ܬܘܒ ܡܐܡܪܐ ܕܐܘܓܪܝܣ ܕܥܠ ܬܡܢܝܐ ܚܘ̈ܫܒܝܢ. ܡܢ ܟܝܢܐ ܡܠܝܠܐ ܕܐܝܬ ܬܚܝܬ ܫܡܝܐ
ܡܢܗ ܟܬܫ ܘܡܢܗ ܡܥܕܪ ܠܗܘ ܡܕܡ ܕܟܬܫ ܘܡܢܗ ܡܬܟܬܫ ܥܡ ܗܘ ܡܕܡ ܕܟܬܫ
ܘܚܠܝܨܐܝܬ ܡܥܝܪ ܘܡܩܝܡ ܥܠܘܗܝ ܩܪܒܐ. ܘܕܟܬܫܝܢ ܐܝܬܝܗܘܢ ܒ̈ܢܝ ܐܢܫܐ ܘܕܡܥܕܪܝܢ ܠܗܘܢ
ܐܝܬܝܙܗܘܢ ܡܠܐܟ̈ܐ ܕܐܠܗܐ. ܘܒ̈ܥܠܕܒܒܝܗܘܢ ܐܝܬܝܗܘܢ ܕܝ̈ܘܐ ܛܿܢܦܐ. ܘܠܐ ܗܘܐ ܡܢ ܩܫܝܘܬ ܚܝܠܗܘܢ
ܕܒܥܠܕܒ̈ܒܐ܆ ܐܦܠܐ ܡܢ ܡܗܡܝܢܘܬܐ ܕܡܥܕܪ̈ܢܐ. ܐܠܐ ܡܢ ܪܦܝܘܬܗܘܢ ܗܘ ܕܟ̈ܬܘܫܐ: ܛܠܩܐ ܘܣܝܦܐ
ܡܢܗܘܢ ܝܕܥܬܐ ܕܐܠܗܐ.
ܡܪܢ ܝܫܘܥ ܡܫܝܚܐ. ܕܐܫܠܡ ܟܠܡܕܡ ܐܝܟ ܕܠܦܘܪܩܢܢ. ܗܘ ܝܗܒ ܠܢ
ܕܢܕܘܫ ܥܠ ܚ̈ܘܘܬܐ ܘܥܩܪ̈ܒܐ܆ ܘܥܠ ܟܠܗ ܚܝܠܗ ܕܒܝܫܐ. ܘܗܕܐ ܥܡ ܫܪܟܐ ܕܟܠܗ ܝܘܠܦܢܗ
ܐܫܠܡ ܠܢ ܗܘ ܕܗܘ ܥܒܕ ܟܕ ܡܬܢܣܐ ܗܘܐ ܡܢ ܣܛܢܐ. ܕܒܙܒܢܐ ܕܬܟܬܘܫܐ ܡܐ ܕܡܩܪܒܝܢ ܥܡܢ
ܕܝ̈ܘܐ: ܘܫܕܝܢ ܥܠܝܢ ܓܐܪ̈ܝܗܘܢ: ܡܢ ܟܬܒܝ ܩܘܕܫܐ ܢܦܢܐ ܠܗܘܢ ܦܬܓܡܐ܆ ܕܠܐ ܢܓܪܘܢ ܒܢ
ܚܘܫ̈ܒܐ ܛ̈ܡܐܐ: ܘܢܫܥܒܕܘܢܗܿ ܠܢܦܫܐ ܒܚܛܝܬܐ ܕܒܥܒ̈ܕܐ ܕܗܘܝܐ: ܘܢܛܡܐܘܢܪܗ̇ ܘܢܛܒܥܘܢܗܿ
ܒܡܘܬܐ ܕܚܛܝܬܐ. ܢܦܫܐ ܓܝܪ ܕܚܛܝܐ ܗܝ ܡܝܬܐ. ܐܡܬܝ ܓܝܪ ܕܠܝܬ ܒܬܪܥܝܬܐ ܚܘܫܒܐ
ܬܩܢܐ: ܕܡܨܐ ܡܦܢܐ ܦܬܓܡܐ ܠܘܩܒܠ ܒܝܫܐ܆ ܦܫܝܩܐܝܬ ܘܩܠܝܠܐܝܬ ܡܣܬܥܪܐ ܚܛܝܬܐ. ܘܗܕܐ
ܚܟܝܡܐܝܬ ܚܘܝ ܠܢ ܩܘܗܠܬ ܟܕ ܐܡܪ. ܕܠܝܬ ܒܥܓܠ ܕܡܦܢܐ ܦܬܓܡܐ ܡܢ ܥܒ̈ܕܝ ܒ̈ܝܫܬܐ.
ܘܬܘܒ ܗܘ ܫܠܝܡܘܢ ܐܡܪ ܒܡ̈ܬܠܘܗܝ. ܕܠܐ ܬܬܠ ܦܬܓܡܐ ܠܣܟܠܐ ܐܝܟ ܣܟܠܘܬܗ܆ ܕܠܐ ܐܦ
ܐܢܬ ܬܬܕܡܐ ܠܗ. ܐܠܐ ܦܢܐ ܠܗ ܦܬܓܡܐ ܥܣܟܠܐ ܐܝܟ ܚܟܝܡܘܬܟ܆ ܕܠܐ ܢܣܒܪ ܒܢܦܫܗ ܕܗܘ
ܚܟܝܡ. ܡܢܘ ܓܝܪ ܕܥܒܕ ܥܒܕܐ ܕܣܟܠܘܬܐ: ܘܡܬܚܡܬ ܥܠ ܐܚܘܗܝ܆ ܗܢܐ ܦܢܝ ܦܬܓܡܐ
ܒܥܒܕܐ ܠܣܟܠܐ ܐܝܟ ܣܟܠܘܬܗ܆ ܘܐܬܕܡܝ ܠܗܘܢ ܠܕܝ̈ܘܐ. ܕܚܡܬܗܘܢ ܠܡ ܓܝܪ ܐܝܟ ܕܚܘܝܐ
ܚܪܡܢܐ. ܡܢܘ ܓܝܪ ܕܢܓܝܪܐ ܪܘܚܗ: ܘܐܡܪ ܕܟܬܝܒ ܗܘ ܕܐܬܬܢܝܚ ܡܢ ܚܡܬܐ ܘܐܬܬܢܝܚ ܡܢ
ܪܘܓܙܐ܆ ܗܢܐ ܦܢܝ ܦܬܓܡܐ ܠܣܟܠܐ ܠܘܩܒܠ ܣܟܠܘܬܗ܆ ܘܐܟܣܗ ܠܕܝܘܐ ܣܟܠܘܬܗ.
ܘܚܘܝ ܠܗ܆ ܕܗܐ ܡܕܡ ܕܣܩܘܒܠܐ ܗܘ ܡܬܚܟܡ ܠܘܩܒܠ ܟܬ̈ܒܐ.
ܡܛܠ ܕܝܢ ܕܡ̈ܠܐ ܕܡܬ̈ܒܥܝܢ
ܠܡܐܡܪ ܠܘܩܒܠ ܒܥܠܕܒ̈ܒܝܢ: ܗܢܘܢ ܕܐܝܬܝܗܘܢ ܕܝ̈ܘܐ ܡܪܝܪ̈ܐ: ܠܐ ܗܘܐ ܒܥܓܠ ܡܫܟܚܝܢܢ
ܠܗܝܢ ܒܫܥܬܐ ܕܬܟܬܘܫܐ: ܡܛܠ ܕܡܟܕܪ̈ܢ ܐ̈ܢܝܢ ܒܟܬ̈ܒܐ: ܘܥܣܩܐ ܗܝ ܕܢܩܘܡ ܥܠܝܗܝܢ..
ܡܛܠ ܗܢܐ ܚܦܝܛܐܝܬ ܓܒܝܢ ܚܢܢ ܡ̈ܠܐ ܡܢ ܟܬ̈ܒܐ ܩ̈ܕܝܫܐ܆ ܐܝܟ ܕܢܙܕܝܢ ܒ̈ܗܝܢ܆ ܘܢܪܕܘܦ ܒܬܪ
ܦܠܫܬܝܐ ܚܠܝܨܐܝܬ. ܟܕ ܩܝܡܝܢܢ ܒܩܪܒܐ܆ ܐܝܟ ܐܢ̈ܫܐ ܓܢܒܪ̈ܝ ܚܝܠܐ: ܘܐܣܛܪ̈ܛܝܘܛܐ ܕܡܠܟܢ
ܢܨܝܚܐ ܝܫܘܥ ܡܫܝܚܐ.
ܘܗܕܐ ܢܕܥ ܚ̈ܒܝܒܝ. ܕܟܡܐ ܕܩܝܡܝܢ ܚܢܢ ܠܘܩܒܠܗܘܢ ܒܬܟܬܘܫܐ:
ܘܡܦܢܝܢܢ ܠܗܘ ܡܠܬܐ ܠܕܝ̈ܘܐ܆ ܗܢܘܢ ܝܬܝܪܐܝܬ ܡܬܡܪܡܪ̈ܝܢ ܥܠܝܢ. ܘܗܕܐ ܡܢ ܐܝܘܒ ܝܠܦܢܢ
ܟܕ ܐܡܪ. ܕܡܐ ܕܡܫܪܐ ܐܢܐ ܕܐܡܠܠ ܕܩܪܝܢ ܒܝ. ܘܬܘܒ ܡܢ ܕܘܝܕ. ܟܕ ܐܡܪ. ܕܐܢܐ ܫܠܡܐ ܡܡܠܠ
ܗܘܝܬ܆ ܘܗܢܘܢ ܡܬܟܬܫܝܢ ܗܘܘ ܥܡܝ ܡܓܢ. ܐܠܐ ܘܠܐ ܕܠܐ ܢܙܘܥ ܡܢܗܘܢ. ܐܠܐ ܕܢܩܘܡ
ܠܘܩܒܠܗܘܢ ܬܟܝܠܐܝܬ ܒܚܝܠܗ ܕܦܪܘܩܢ. ܐܢ ܓܝܪ ܢܗܝܡܢ ܒܡܫܝܚܐ ܘܢܛܪ ܦܘܩ̈ܕܢܘܗܝ.
ܥܒܪܝܢܢ ܠܗ ܠܝܘܪܕܢܢ. ܘܠܡܕܝܢܬܐ ܕܕܩ̈ܠܐ ܫܩܠܝܢܢ. ܒܗܢܐ ܕܝܢ ܩܪܒܐ܆ ܡܬܒܥܐ ܠܢ ܙܝܢܐ
ܕܪܘܚܐ. ܕܐܝܬܘܗܝ ܗܝܡܢܘܬܐ ܫܪܝܪܬܐ ܘܝܘܠܦܢܐ ܕܬܪ̈ܝܢ. ܗܘ ܕܐܝܬܘܗܝ ܨܘܡܐ ܓܡܝܪܐ. ܘܢܨ̈ܚܢܐ
ܚ̈ܠܝܨܐ. ܘܡܟܝܟܘܬܐ ܘܫܠܝܘܬܐ܆ ܕܠܡܚܣܢ ܡܬܬܙܝܥܐ ܐܘ ܕܟܠ ܟܠܗ ܠܐ ܡܬܬܙܝܥܐ. ܘܨܠܘܬܐ
ܒ̈ܟܠܝܠܐ ܕܙܕܝܩܘܬܐ: ܟܕ ܡܣܒܥ ܢܦܫܗ ܡܢ ܠܚܡܐ ܘܡ̈ܝܐ: ܕܡܥܝܪ ܪܘܓܙܗ ܩܠܝܠܐܝܬ: ܘܕܒܣܐ
ܘܡܗܡܐ ܒܨܠܘܬܐ: ܘܡܬܡܠܚ ܥܡ ܗܪ̈ܣܝܘܛܐ. ܗܐ ܓܝܪ ܦܘܠܘܣ ܩܕܝܫܐ ܐܡܪ. ܕܟܠܢܫ
ܕܐܓܘܢܐ ܥܒܕ܆ ܡܢ ܟܠܡܕܡ ܢܛܪ ܢܦܫܗ. ܘܠܘܬ ܟܠܗܘܢ ܒܢܝ̈ܢܫܐ ܡܚܘܐ ܡܟܝܟܘܬܐ
ܐܡܝܢܐܝܬ. ܟܕ ܡܪܝܡ ܐܝ̈ܕܘܗܝ ܒܟܠܕܘܟ܆ ܕܠܐ ܪܘܓܙܐ ܘܕܠܐ ܡܚܫ̈ܒܬܐ ܒܝܫ̈ܬܐ.
ܡܛܠ ܗܕܐ ܗܟܝܠ
ܙܕܩ ܗܘ ܠܢ ܕܟܕ ܗܢܐ ܦܘܠܚܢܐ ܦܠܚܝܢܢ ܒܙܝܢܐ ܕܪܘܚܐ ܢܙܕܝܢ ܘܢܚܘܐ ܠܗܘܢ ܠܦܠܫ̈ܬܝܐ.
ܕܥܕܡܐ ܠܕܡܐ ܠܘܩܒܠ ܚܛܝܬܐ ܡܬܟܬܫܝܢܢ. ܟܕ ܣܬܪܝܢܢ ܡܚܫ̈ܒܬܐ ܒܝܫ̈ܬܐ܆ ܘܟܠ ܪܘܡܐ
ܕܡܬܬܪܝܡ ܠܘܩܒܠ ܝܕܥܬܗ ܕܐܠܗܐ ܘܡܬܚܦܛܝܢܢ ܕܠܐ ܗܘܐ ܠܓܒܪܐ ܝܚܝܕܝܐ ܢܩܝܡ ܩܕܡ
ܒܝܡ ܕܡܫܝܚܐ ܿ ܐܠܐ ܠܪܥܝܢܐ ܝܚܝܕܝܐ. ܓܒܪܐ ܓܝܪ ܐܝܚܝܕܝܐ ܐܝܬܘܗܝ. ܗܘ ܕܣܛܐ ܡܢ ܚܛܝܬܐ
ܕܒܥ̈ܒܕܐ ܗܘܝܐ ܘܡܣܬܥܪܐ. ܪܥܝܢܐ ܕܝܢ ܐܝܚܝܕܝܐ ܐܝܬܘܗܝ܆ ܗܘ ܕܣܛܐ ܡܢ ܚܛܝܬܐ ܕܡܢ ܬܪ̈ܥܝܬܐ
ܕܒܪܥܝܢܢ ܡܬܩܝܡܐ. ܘܒܥܕܢܐ ܕܨܠܘܬܐ܆ ܚܙܐ ܢܘܗܪܐ ܕܬܠܝܬܝܘܬܐ ܩܕܝܫܬܐ.
ܐܠܐ ܙܒܢܐ ܗܘ ܡܟܝܠ
ܥܠ ܚܝܠܗ ܕܡܪܢ ܝܫܘܥ ܡܫܝܚܐ܆ ܕܢܬܟܬܫ ܠܘܩܕܡ ܥܡ ܚܘ̈ܫܒܐ ܕܕܝܘܐ ܕܪܒܘܬ ܟܪܣܐ ̇ ܘܡܢ
ܒܬܪ ܗܠܝܢ܆ ܥܡ ܚܘܫ̈ܒܐ ܕܫܒܥܐ ܕܝ̈ܘܐ ܐܚܪ̈ܢܐ: ܐܝܠܝܢ ܕܒܩܘܠܬܝܐ ܟܬܒܬ ܒܪܝܫܗ ܕܟܬܒܐ
ܗܢܐ ܕܝܚܝܕܝܘܬܐ. ܟܕ ܡܬܟܬܫ ܐܢܐ ܕܐܦܬܚ ܦܘܡܝ ܘܐܡܠܠ܆ ܠܘܬ ܐܠܗܐ ܘܠܘܬ ܡܠܐ̈ܟܘܗܝ
ܩ̈ܕܝܫܐ. ܘܠܘܬ ܢܦܫܝ ܕܡܬܢܣܝܐ. ܘܟܠܗ ܐܓܘܢܐ ܕܕܘܒܪ̈ܐ ܕܝܚܝܕܝܘܬܐ܆ ܐܚܘܐ ܒܓܠܝܐ ܐܝܢܐ
ܕܐܦ ܪܘܚܐ ܕܩܘܕܫܐ ܒܝܕ ܡܙܡܘܪ̈ܐ ܐܠܦܬܗ ܠܕܘܝܕ. ܘܐܦ ܐܒ̈ܗܬܐ ܛ̈ܘܒܢܐ ܐܫܠܡܘ ܠܢ. ܗܢܐ ܕܝܢ
ܕܫܡܗܬ ܒܟܬܒܐ ܒܬܪ ܗܠܝܢ܆ ܟܠܗ ܐܓܘܢܐ ܢܗܘܐ ܠܢ ܒܝܕ ܚܘܫ̈ܒܐ ܕܡܬܩܪܒܝܢ ܠܢ: ܡܢ ܟܠ
ܚܕܚܕ ܡܢ ܗܠܝܢ ܬܡܢܝܐ ܕܝ̈ܘܐ. ܟܬܒܬ ܕܝܢ ܘܣܡܬ ܠܘܩܒܠ ܟܠ ܚܕܐ ܚܕܐ ܡܢ ܡܚܫ̈ܒܬܐ ܦܘܢܝ
ܦܬܓܡܐ ܡܢ ܟܬܒܝ ܩܘܕܫܐ܆ ܕܡܫܟܚ ܡܒܛܠ ܠܗܿ.
ܡܐܡܪܐ ܩܕܡܝܐ܆ ܠܘܩܒܠ ܚܘܫ̈ܒܐ
ܕܪܒܘܬ ܟܪܣܐ:
ܡܢ ܟܬܒܐ ܕܒܪܝܬܐ:
ܐ: ܠܘܩܒܠ ܡܚܫ̈ܒܬܐ ܐܝܠܝܢ ܕܒܥܝܢ ܕܕܠܐ ܥܡܠܐ ܕܨܘܡܐ:
ܢ̈ܦܠܚܢ ܐܪܥܐ ܡܠܝܠܬܐ.
ܐܝܣܟܪ ܓܒܪܐ ܓܢܒܪܐ ܕܪܒܝܥ ܒܝܬ ܫ̈ܒܝܠܐ. ܘܚܙܐ ܡܫܪܝܗ ܘܐܪܥܗ
ܕܛܒܐ܆ ܘܐܪܟܢ ܟܬܦܗ ܠܫܘܥܒܕܐ ܘܗܘܐ ܠܡܐܕܬܐ.
ܡܢ ܡܦܩܢܐ.
ܠܘܩܒܠ ܡܚܫܒܬܐ ܕܐܡܪܐ ܠܝ:
ܕܠܐ ܬܢܘܠ ܢܦܫܟ ܒܨܘܡܐ ܣܓܝܐܐ ܕܡܕܡ ܠܐ ܡܘܬܪ ܠܟ ܐܦܠܐ ܡܕܟܐ ܠܗ ܠܪܥܝܢܟ
ܘܥܒܕ ܠܩܢܐ
ܕܢܚܫܐ ܘܟܢܗ ܕܝܠܗ ܕܢܚܫܐ ܒܝܬ ܫܝܓܬܐ ܕܢ̈ܫܐ ܕܨܝ̈ܡܢ ܘܐܬ̈ܝܢ ܠܡܨܠܝܘ ܒܬܪܥܐ ܕܡܫܟܢܙܒܢܐ
ܓ ܠܘܩܒܠ ܡܚܫ̈ܒܬܐ ܕܡܥܝܪ̈ܢ ܒܢ ܪܓܬܐ ܕܢܐܟܘܠ ܒܣܪܐ ܒܝܘܡܐ ܕܥܐܕܐ: ܘܡ̈ܠܟܢ ܠܢ ܬܘܒ
ܕܢܐܟܘܠ ܡܛܠ ܟܘܪܗܢܐ ܕܦܓܪܐ܀
ܐܡܪ ܠܥܡܐ ܐܬܩܕܫܘ ܠܡܚܪ ܬܐܟܠܘ ܒܣܪܐ ܠܐ ܚܕ ܝܘܡ
ܬܟܠܘܢܗ. ܘܠܐ ܬܪ̈ܝܢ ܝܘ̈ܡܝܢ ܘܠܐ ܚ̈ܡܫܐ ܝܘ̈ܡܝܢ. ܘܠܐ ܥܣ̈ܕܐ ܝܘ̈ܡܝܢ. ܘܠܐ ܥܣܪ̈ܝܢ ܝܘ̈ܡܝܢ. ܥܕܡܐ
ܠܝܪܚ ܝܘ̈ܡܝܢ ܬܟܠܘܢܗ ܥܕܡܐ ܕܢܦܘܩ ܡܢ ܢܚܝܖ̈ܝܟܘܢ. ܘܬܗܘܐ ܠܟܘܢ ܐܦܬܪܐ. ܥܠ ܕܐܣܠܝܬܘܢ
ܠܡܪܝܐ ܕܒܟܘܢ.
ܡܢ ܬܢܝܢ ܢܡܘܣܐ.
ܠܘܩܒܠ ܡܚܫܒܬܐ ܕܒܥܝܐ ܕܬܣܒܥ ܡܢ ܡܐܟܠܐ ܘܡܫܬܝܐ:
ܘܠܐ ܚܝܪܐ ܒܣܘܪܚܢܐ ܕܢܒܥ ܡܢ ܣܒܥܘܬܐ ܕܟܪܣܐ.
ܘܬܐܟܘܠ ܘܬܣܒܥ ܐܠܐ ܐܙܕܗܪ ܕܠܐ ܬܛܥܐ
ܠܡܪܝܐ ܐܠܗܟ. ܕܐܦܩܟ ܡܢ ܐܪܥܐ ܡܨ̈ܪܝܢ: ܡܢ ܒܝܬ ܥܒܕܘܬܐ.
ܗ ܠܘܩܒܠ ܡܚܫܒܬܐ ܕܐܡܪܐ
ܠܝ. ܝܩܝܪ ܦܘܩܕܢܐ ܕܨܘܡܐ.
ܕܗܢܐ ܦܘܩܕܢܐ. ܕܡܦܩܕ ܐܢܐ ܠܟ ܝܘܡܢܐ ܠܐ ܗܘܐ ܩܫܐ ܡܢܟ ܘܠܐ
ܪܚܝܩ ܡܢܟ
ܘ ܠܘܩܒܠ ܡܚܫܒܬܐ ܕܪܓܐ ܕܬܣܒܠ ܡܢ ܡܐܟܠܐ ܘܡܢ ܡܫܬܝܐ ܘܣܒܪܐ ܠܗ ܕܡܕܡ
ܕܒܝܫ ܠܐ ܗܘܐ ܠܗ ܠܢܦܫܐ ܡܢܗܘܢ.܀.
ܘܫܡܢ ܐܝܣܪܝܠ ܘܒܥܛ ܘܛܥܐ ܠܐܠܗܐ ܕܥܒܕܗ
ܘܨܚܝ ܠܬܩܝܦܐ ܕܦܪܩܗ.
ܡܢ ܫܡܘܐܝܠ
ܙ. ܠܘܩܒܠ ܡܚܫܒܬܐ ܕܪܒܘܬ ܟܪܣܐ: ܕܐܠܨܐ ܠܝ
ܕܐܟܘܠ ܒܬܫܥ ܫܥܝܢ.܀
ܗܟܢܐ ܢܥܒܕ ܠܝ ܐܠܗܐ ܘܗܟܢܐ ܢܘܣܦ ܠܝ: ܐܢ ܐܟܘܠ ܐܘ ܐܫܬܐ
ܥܕܡܐ ܕܢܥܪܒ ܫܡܫܐ.
ܡܢ ܣܦܪ ܡܠܟ̈ܐ:
ܚ ܠܘܩܒܠ ܡܚܫܒܬܐ ܕܡܪܢܝܐ ܠܝ ܒܚܘܣܪܢܗ
ܗܟܢܐ ܐܡܪ ܡܪܝܐ. ܩܘܠܬܐ ܕܩܡܚܐ ܠܐ ܬܓܡܪ
ܘܩܪܢܐ ܕܡܫܚܐ ܠܐ ܬܚܣܪ. ܥܕܡܐ ܕܢܬܠ ܡܪܝܐ ܡܛܪܐ ܥܠ ܐܪܥܐ.
ܛ ܠܘܩܒܠ ܢܦܫܐ ܕܒܥܝܐ
ܕܒܣܒܥܐ ܕܠܚܡܐ ܘܕܡ̈ܝܐ: ܬܕܪܘܫ ܐܘܪܚܐ ܕܩ̈ܕܝܫܐ܀
ܘܐܡܪ ܡܠܟܐ ܕܐܝܣܪܐܝܠ. ܣܒܝܗܝ
ܠܡܝܟܐ܆ ܘܐܫܠܡܝܗܝ ܠܐܡܘܢ ܫܠܝܛܐ ܕܩܪܝܬܐ܆ ܘܠܝܘܐܫ ܒܪ ܡܠܟܐ ܘܢܗܘܐ ܒܚܒܘܫܝܐ
ܘܐܘܟܠܘܗܝ ܠܚܡܐ ܕܐܘܠܨܢܐ ܪܒܐ. ܥܕܡܐ ܕܐܗܦܘܟ ܘܐܬܐ ܒܫܠܡܐ.
ܝ ܠܘܩܒܠ ܡܚܫܒܬܐ ܕܐܡܪܐ
ܠܢ: ܕܗܐ ܠܡ ܨ̈ܒܘܬܐ ܕܟܢܫܢܢ: ܠܐ ܣܦ̈ܩܢ ܠܢ ܘܠܐ̈ܚܐ ܕܐܬܝܢ ܨܐܕܝܢ܀
ܗܟܢܐ ܐܡܪ ܡܪܝܐ. ܢܐܟܠܘܢ
ܘܢܘܬܪܘܢ. ܘܐܟܠܘ ܘܐܘܬܪܘ ܐܝܟ ܡܠܬܗ ܕܡܪܝܐ.
ܡܢ ܕܘܝܕ
ܝܐ ܠܘܩܒܠ ܡܚܫܒܬܐ ܗܝ ܕܡܡܪܐ ܠܝ:
ܒܥܘܡܪܐ ܕܡܣܟܢܘܬܐ ܡܪܝܪܬܐ.܀.
ܡܪܝܐ ܢܪܥܝܢܝ ܘܡܕܡ ܠܐ ܢܚܣܪ ܠܝ.
ܝܒ ܠܘܩܒܠ ܡܚܫܒܬܐ
ܕܟܕ ܠܝܬ ܟܦܢܐ: ܒܥܠܬ ܚܘܒܐ ܕܐܟ̈ܣܢܝܐ: ܟܢܫܐ ܠܚܡܐ ܝܬܝܪ ܡܢ ܣܘܢܩܢܗ܀
ܛܠܐ ܗܘܝܬ
ܘܣܐܒܬ ܘܠܐ ܚܙܝܬ ܙܕܝܩܐ ܕܐܫܬܒܩ. ܐܦܠܐ ܙܪܥܗ ܕܒܥܐ ܠܚܡܐ.
ܝܓ ܠܘܩܒܠ ܡܚܫܒܬܐ ܕܝܨܦܐ
ܥܠ ܡܐܟ̈ܠܬܐ ܘܥܠ ܠܒܘܫ̈ܐ. ܘܨܦܬܐ ܕܫܪܪܐ ܡܣܠܝܐ܀
ܡܛܠ ܕܐܚܘܝܟ ܣ̈ܟܠܘܬܝ. ܘܐܬܕܟܐ
ܡܢ ܚ̈ܛܗܝ.
ܠܘܩܒܠ ܡܚܫ̈ܒܬܐ ܕܡ̈ܠܟܢ ܠܢ ܘܐܡܪ̈ܢ. ܠܐ ܗܟܢܐ ܩܫܝܐܝܬ ܬܗܘܐ ܡܬܕܒܪ:
ܘܒܨܘܡܐ ܘܒܥܡܠܐ ܐܡܝܢܐ ܬܗܘܐ ܫܚܩ ܐܢܬ ܦܓܪܟ ܡܚܝܠܐ܀
ܠܐܝ ܠܥܠܡ ܘܬܐܚܐ ܠܥܠܡ ܥܠܡܝܢ.
ܘܠܐ ܬܚܙܐ ܚܒܠܐ: ܟܕ ܬܚܙܐ ܚܟ̈ܝܡܐ ܕܡܝܬܝܢ.
ܝܗ ܠܘܩܒܠ ܡܚܫܒܬܐ ܕܐܡܪܐ ܠܝ. ܕܠܐ ܗܟܢܐ ܕܠܐ
ܚܘܣܢ ܬܫܚܘܩ ܘܬܡܟܟ ܢܦܫܟ ܒܫܗܪܐ܀
ܠܒܐ ܫܚܝܩܐ ܐܠܗܐ ܠܐ ܡܣܠܐ
ܝܘ ܠܘܩܒܠ
ܡܚܫܒܬܐ ܕܝܨܦܐ ܕܡܐ̈ܩܠܬܐ ܘܕܡܫܬܝܐ: ܘܡܬܚܦܛܐ ܕܡܢ ܐܝܟܐ ܬܟܢܫ ܐܢܘܢ܀
ܫܕܝ ܨܦܬܟ ܥܠ
ܡܪܝܐ ܘܗܘ ܢܬܪܣܝܟ.
ܝܙ ܠܘܩܒܠ ܡܚܢܫܒܬܐ ܕܡܪܢܝܐ ܠܝ: ܕܫܗܪܐ ܠܡ ܠܐ ܡܘܬܪ ܠܟ ܡܕܡ:
ܐܠܐ ܠܚܘܫ̈ܒܐ ܣ̈ܓܝܐܐ ܡܟܢܫ ܥܠܝܟ܀
ܫܗܪܬ ܘܗܝܬ ܒܠܚܘܕܝ܆ ܐܝܟ ܨܦܪܐ ܕܡܦܪܚܐ ܥܠ
ܐܓܪܐ.
ܝܚ. ܠܘܩܒܠ ܡܚܫܒܬܐ ܕܟܐܝܐ ܒܢ: ܥܠ ܕܟܠܝܢܢ ܢܦܫܢ ܡܢ ܡܫܚܐ: ܘܠܐ ܡܬܕܟܪܐ
ܠܕܘܝܕ: ܕܗܕ ܗܕܐ ܥܒܕ ܗܘܐ ܟܕ ܐܡܪ܀
ܕܒܘܪ̈ܟܝ ܐܬܟܪܗܘ ܡܢ ܨܘܡܐ: ܘܒܣܪܝ ܢܚܒ ܡܢ ܡܫܚܐ
ܝܛ ܠܘܩܒܠ ܡܚܫ̈ܟܬܐ ܕܡܥܟܪ̈ܢ ܠܢ ܡܢ ܕܘܒܪ̈ܝܢ: ܟܕ ܡܕܚܠܢ ܠܢ ܘܐܡܪ̈ܢ: ܕܡܘܬܐ ܕܕܐܘܘܢܐ ܢܦܩ
ܡܢ ܨܘܡܐ ܩܫܝܐ܀
ܠܐ ܐܡܘܬ. ܐܠܐ ܐܚܐ ܘܐܫܬܥܐ ܥܒ̈ܕܘܗܝ ܕܡܪܝܐ.
ܟ ܠܘܩܒܠ ܡܚܫ̈ܒܬܐ ܕܡ̈ܦܝܣܢ
ܠܝ ܕܐܫܠܐ ܩܠܝܠ ܡܢ ܫܗܪܐ ܣܓܝܐܐ: ܘܐܬܠ ܩܠܝܠ ܢܝܚܐ ܠܦܓܪܐ ܡܚܝܠܐ ܘܕܘܝܐ܀
ܠܐ ܐܥܘܠ
ܠܡܛܠܠܗ ܕܒܝܬܝ܆ ܘܠܐ ܐܣܩ ܠܬܫܘܝܬܗ ܕܥܪܣܝ. ܘܠܐ ܐܬܠ ܫܢܬܐ ܠܥܝ̈ܢܝ ܐܦܠܐ ܢܘܡܬܐ
ܠܓܒ̈ܝܢܝ. ܥܕܡܐ ܕܐܫܟܚ ܐܬܪܐ ܠܡܪܝܐ: ܘܡܫܟܢܐ ܠܐܠܗܗ ܕܝܥܩܘܒ.
ܡܢ ܡ̈ܬܠܗܘܝ ܕܫܠܝܡܘܢ:
ܟܐ ܥܘܩܒܠ ܡܚܫܒܬܐ ܕܩܨܡܐ ܠܢ ܟܦܢܐ: ܐܘ ܐܘܠܨܢܐ ܪܒܐ ܕܒܥܓܠ ܗܘܐ܀
ܠܐ ܢܟܦܢ ܡܪܝܐ
ܢܦܫ̈ܬܐ ܕܥܒ̈ܕܘܗܝ. ܘܚ̈ܚܗܘܢ ܕܪ̈ܫܝܥܐ ܢܘܒܕ.
ܟܒ ܠܘܩܒܠ ܡܚܫܒܬܐ ܕܡܪܢܝܐ ܠܝ ܒܪܓܬ
ܚܡܪܐ: ܐܝܟ ܗܘ ܠܡ ܕܡܬܛܪܝܢ ܡܢ ܡ̈ܝܐ ܟܒܕܐ ܘܛܚܠܐ܀.
ܡܢ ܕܪܐܓ ܒܝܬ ܡܫܬܝܐ܆
ܒܡ̈ܚܣܢܘܗܝ ܢܚܙܐ ܚܒܠܐ.
ܟܓ ܠܘܩܒܠ ܡܚܫܒܬܐ ܕܐܣܝܪܐ ܒܨܦܬܐ ܕܪܓܬ ܡ̈ܟܠܬܐ: ܘܨܦܬܐ
ܕܢܨ̈ܚܢܐ ܡܣܠܝܐ܀
ܒܟܠ ܕܝܨܦ ܐܢܬ܆ ܚܕܐ ܗܝ ܕܡܘܬܪܐ ܠܟ. ܘܐܝܢܐ ܕܒܨܝܪ ܒܥܘܡܪܗ܆ ܢܝܚܐ
ܘܒܣܝܡܐ ܢܗܘܐ.
ܟܕ ܠܘܩܒܠ ܡܚܢܫܒܬܐ ܕܡܒܟܝܐ ܥܠ ܡܐܟ̈ܠܬܐ ܫܚܝ̈ܡܬܐ: ܘܥܠ ܠܚܡܐ
ܝܒܝܫܐ܀
ܛܒ ܗܘ ܓܝܪ ܠܚܡܐ ܝܒܝܫܐ ܒܫܠܝܐ: ܛܒ ܡܢ ܒܝܬܐ ܕܡܠܐ ܕܒ̈ܚܐ ܒܕܝܢܐ.
ܟܗ
ܠܘܩܒܠ ܡܚܫ̈ܒܬܐ ܕܡ̈ܦܝܣܢ ܠܢ ܕܒܝܘܡܐ ܕܥܐܕܐ ܕܢܚܘܣ ܩܠܝܠ ܥܠ ܦܓܪܢ: ܒܝܕ ܕܢܩܪܒ
ܠܐ ܝܐܐ ܦܘ̈ܢܟܐ ܠܣܟܠܐ܆ ܐܦܠܐ ܠܥܒܕܐ ܕܢܬܚܠܛ ܒܪܘܪ̈ܒܢܐ
ܟܘ ܠܘܩܒܠ
ܡܚܫܒܬܐ ܕܒܠܥܕ ܡܢ ܟܘܪܗܢܐ ܩܫܝܐ ܡܓܪܓܐ ܠܢ ܕܢܫܬܐ ܚܡܪܐ: ܘܡܬܢܒܝܐ ܠܢ ܥܠ ܟܐܒܐ
ܕܐܣܛܘܡܟܐ ܘܥܠ ܟܠܗ ܓܘܐ܀
ܥܫܝܢ ܗܘ ܚܡܪܐ. ܘܪܘܝܘܬܐ ܡܨܥܪܢܝܐ. ܘܟܠ ܕܡܫܬܪܚ
ܒܗܘܢ ܠܐ ܗܘܐ ܚܟܝܡ.
ܟܙ ܠܘܩܒܠ ܡܚܫܒܬܐ ܕܚܛܦܐ ܠܗ ܠܪܥܝܢܢ: ܕܢܐܣܘܪ ܡܢ ܨܘܡܢ
ܘܕܘܒܪ̈ܝܢ ܒܡ̈ܘܡܬܢ. ܗܕܐ ܕܝܢ ܡܢ ܥܘܡܪܐ ܕܝܚܕܝܐ ܢܘܟܪܝܬܐ ܐܝܬܝܗܿ.܀.
ܦܚܐ ܗܘ ܠܒܪܢܫܐ
ܕܢܕܪ ܠܩܘܕܫܐ: ܘܡܢ ܒܬܪ ܕܢܕܪ ܬܘܝܐ ܠܗ ܢܦܫܗ
ܟܚ ܠܘܩܒܠ ܡܚܫܒܬܐ ܕܟܠܝܐ ܠܢ ܒܕܡܪܢܝܐ
ܠܢ ܕܡܢ ܠܚܡܐ ܠܐ ܢܬܠ ܠܣ̈ܢܝܩܐ: ܒܝܕ ܕܐܡܪܐ ܠܝ ܕܗܘ ܠܡ ܡܫܟܚ ܒܟܠ ܕܘܟܐ ܚܝܢܢ ܕܝܢ
ܠܐ ܡܨܝܢܢ ܕܢܬܩܪܒ ܠܬܪܥܐ ܢܘܟܪܝܐ܀
ܡܢ ܕܛܒܐ ܥܝܢܗ ܗܘ ܢܬܒܪܟ ܡܛܠ ܕܝܗܒ ܡܢ ܠܚܡܗ
ܠܡܣܟܢܐ
ܟܛ ܠܘܩܒܠ ܡܚ̈ܫܒܬܐ ܕܒܝܘܡܐ ܕܥܐܕܐ ܡܬܩܖ̈ܒܢ ܨܐܕܝܢ ܪܟܝܟܐܝܬ ܘܐܡܪ̈ܢ ܠܢ:
ܕܢܛܥܡ ܚܕܐ ܠܙܒܢܐ ܣܓܝܐܐ ܒܣܪܐ ܘܚܡܪܐ܀
ܠܐ ܬܗܘܐ ܪܘ̈ܐ ܒܚܡܪܐ. ܘܐܣܘܛ ܒܒܣܪܐ.
ܡܛܠ ܕܟܠ ܕܪܘܝ ܒܚܡܪܐ ܘܐܣܘܛ ܒܒܣܪܐ ܢܐܒܕ. ܘܕܕܡܟ ܢܠܒܫ ܒܪܕܥܬܐ.
ܠ. ܠܘܩܒܠ
ܡܚܫܒܬܐ ܕܡܬܕܟܪܐ ܦܘܢ̈ܩܐ ܥܬ̈ܝܩܐ ܘܡܬܥܗܕܐ ܚܡܖܵܢܐ ܒ̈ܣܝܡܐ: ܘܟ̈ܣܐ ܕܛܥܝܢܝܢ ܗܘܝܢ ܥܠ
ܐܝ̈ܕܝܢ. ܟܕ ܣܡܝܟܝܢ ܗܘܝܢ ܘܫܬܝܢ܀
ܠܐ ܬܨܕ ܥܝܢܟ ܒܚܡܪܐ ܕܙܪܓܐ ܥܝܢܗ ܒܟܣܐ. ܐܠܐ ܗܠܟ
ܒܬܪܝܨܘܬܐ. ܡܛܠ ܕܢܢܪܬܗ ܕܚܡܪܐ ܐܝܟ ܡܚܘܬܐ ܗܝ ܕܚܘܝܐ ܘܐܝܟ ܚܪܡܢܐ ܕܦܪܚ.
ܠܐ. ܠܘܩܒܠ
ܡ̈ܚܫܒܬܐ ܕܡܓܖ̈ܓܢ ܠܢ ܕܢܡܠܐ ܟܪܣܢ ܡܢ ܠܚܡܐ ܘܡܢ ܡ̈ܝܐ܀
ܬܫܘܝܬܗ ܕܙܕܩܐ ܠܐ ܬܬܠ
ܠܪܫܝܥܐ ܘܠܐ ܬܛܥܐ ܒܣܒܥܘܬܐ ܕܥܪܣܐ.
ܠܒ ܠܘܩܒܠ ܡܚܫܒܬܐ ܕܗܘܝܢ ܠܢ ܠܘܩܒܠ ܒܗܬܬܐ
ܕܒܗܬܝܢܢ ܡܢ ܐܒܗܬܐ ܟܕ ܡܦܝܣܝܢ ܠܢ ܕܢܫܪܐ ܨܘܡܢ ܘܢܐܟܘܠ ܩܠܝܠ ܝܖ̈ܩܘܢܐ ܒܥܐܕܐ.܀.
ܐܝܬ
ܒܗܬܬܐ ܕܒܪܝܐ ܚ̈ܛܗܐ. ܘܐܝܬ ܒܗܬܬܐ ܕܐܝܩܪܗ ܛܝܒܘܬܐ
ܠܓ ܠܘܩܒܠ ܕܝܘܐ ܕܡܦܝܣ ܠܝ ܒܝܕ
ܫܘܕܠܙܗ ܘܐܡܪ ܠܝ ܒܡܘܡ̈ܬܐ: ܕܐܐ ܡܟܝܠ ܡܕܡ ܚܣܪ ܐܢܬ ܡܢ ܡܐܟܠܐ ܘܡܫܬܝܐ: ܡܛܠ ܕܗܟܢܐ
ܡܚܝܠ ܦܓܪܟ ܘܝܒܝܫ ܡܢ ܨܘܡܐ ܐܡܝܢܐ.܀.
ܣܢܐܐ ܒܣܦܘ̈ܬܗ ܡܡܠܠ ܪ̈ܟܝܟܬܐ. ܒܠܒܗ ܕܝܢ
ܚܫܠ ܒܝܫܬܐ
ܠܕ ܠܘܩܒܠ ܡܚܫܒܬܐ ܕܡܚܘܝܐ ܠܝ ܕܐܝܟ ܗܘ ܕܥܛܠܝܢ ܐܢܘܢ ܦܘܩ̈ܕܢܘܗܝ
ܕܐܠܗܐ: ܘܐܡܪܐ ܠܝ ܕܣܓܝ ܐܘ̈ܠܨܢܐ ܘܕ̈ܘܘܢܐ ܡܝܬܝܢ ܥܠ ܦܓܪܐ ܘܥܠ ܢܦܫܐ܀
ܛ̈ܒܢ ܡ̈ܚܘܬܗ
ܕܪܚܡܐ ܡܢ ܢܘܫ̈ܩܬܗ ܕܒܥܠܕܒܒܐ
ܠܗ ܠܘܩܒܠ ܡܚܢܫܒܬܐ ܕܒܥܝܐ ܩܠܝܠ ܝܡܪܐ ܕܠܐ ܟܘܪܗܢܐ:
ܘܐܡܪܐ ܠܝ ܕܗܐ ܡܛܠ ܒ̈ܢܝܢܫܐ ܐܬܒܪܝ ܚܡܪܐ.܀
ܟܠ ܡܕܡ ܕܥܒܕ ܐܠܗܐ ܫܦܝܪ ܗܘ ܒܙܒܢܗ
ܠܘ ܠܘܩܒܠ ܡܚܫܒܬܐ ܕܡܪܢܝܐ ܠܝ ܒܒܘܣܡܐ ܥܬܝܩܐ ܘܒܡܫܬܝܐ: ܘܒܥܝܐ ܠܗ ܠܗܢܐ
ܥܝܕܐ.܀
ܛܒ ܠܡܐܙܠ ܠܒܝܬ ܒ̈ܟܐ: ܛܒ ܡܢ ܕܠܡܐܙܠ ܠܒܝܬ ܡܫܬܘܬܐ.
ܠܙ ܠܘܩܒܠ
ܡܚܫܒܬܐ ܣܪܝܩܬܐ ܕܡܦܝܣܐ ܠܢ: ܕܝܬܝܪ ܡܢ ܘܠܝܬܐ ܢܡܬܘܚ ܕܘܒܪ̈ܝܢ: ܒܝܕ ܕܢܐܣܘܪ ܣ̈ܩܐ ܒܚ̈ܨܝܢ
ܘܢܦܘܩ ܠܢ ܠܡܕܒܪܐ: ܘܢܗܘܐ ܐܡܝܢܐܝܬ ܬܚܝܬ ܫܡܝܐ: ܟܕ ܪܥܝܢܢ ܥܩܪ̈ܐ ܕܕܒܪܐ: ܘܡܠܟܐ ܠܢ
ܬܘܒ ܕܢܥܪܘܩ ܡܢ ܝܝܙܬܐ ܕܐܢܫܐ: ܐܝܠܝܢ ܕܡܒܝܐܝܢ ܠܢ ܘܡܬܒܝܐܝܢ ܡܢܢ܀.
ܠܐ ܬܗܘܐ ܙܕܝܩ ܣܓܝ܆
ܘܠܐ ܬܬܚܟܡ ܝܬܝܪ ܕܠܐ ܬܬܡܗ
ܠܚ ܡܢ ܐܝܘܒ
ܠܘܩܒܠ ܡܚܫ̈ܒܬܐ ܕܡܥܗܕܢ ܠܢ ܒ̈ܘܣܡܐ ܩܕܡܝ̈ܐ
ܘܡܚܘܝܢ ܠܢ ܐܘܠܨܢܐ ܕܓܕܫ܀
ܛ̈ܒܬܗ ܕܐܠܗܐ ܩܒܠܢܢ: ܘܒܝܫ̈ܬܗ ܠܐ ܢܩܒܠ
ܠܛ ܠܘܩܒܠ
ܡܚܫܒܬܐ ܕܢܦܫܐ ܕܐܙܠܬ ܠܘܬ ܒ̈ܢܝ ܓܢܣܗ ܦܓܪ̈ܢܝܐ ܘܐܫܟܚܬ ܦܬܘܪܐ ܕܡܠܐ ܟܠ ܡܐܟ̈ܠܢ܀
ܩܘܡܝ ܙܠ ܡܢ ܗܪܟܐ ܡܛܠ ܕܠܐ ܗܘܐ ܗܪܟܐ ܢܝܚܟܝ.
ܡܢ ܚܒܩܘܩ.
ܡ. ܠܘܩܒܠ ܡܚܫܒܬܐ
ܕܪܒܘܬ ܟܪܣܐ: ܕܒܝܘ̈ܡܬܐ ܕܥܐܕܐ ܡܚܘܝܐ(?) ܠܢ ܣܓܝ̈ܐܐ ܕܣܡ̈ܝܟܝܢ ܥܠ ܦܬܘܪܐ... ܬܖ̈ܐ.
ܐܢܐ ܕܝܢ ܒܡܪܝܐ.... ܘܐܪܘܙ ܒܐܠܗܐ ܦܪܘܩܝ.
ܡܢ ܐܫܥܝܐ:
ܡܐ: ܠܘܩܒܠ
ܡܚܫ̈ܒܬܐ ܕܡܥܗ̈ܕܢ ܠܢ ܒܘܣܡ̈ܐ: ܕܦܬܘܪܐ ܕܡܠܐ ܗܘܐ... ܛܘܒܝܢ ܘܡܫ̈ܒܚܝܢ ܠܗܝܢ(?) ܛܒ ܡܢ
ܕܘܒܪ̈ܐ ܕܝܚܝܕܝܘܬܐ܀
ܘܝ ܠܕܩܪܝܢ ܠܒܝܫܐ ܛܒܐ ܘܠܛܒܐ ܒܝܫܐ: ܘܣܝܡܝܢ ܠܢܗܝܪܐ ܚܫܘܟܐ
ܘܚܫܘܟܐ ܢܗܝܪܐ: ܘܥܒܕܝܢ ܚܠܝܐ ܡܪܝܪܐ ܘܡܪܝܪܐ ܚܠܝܐ
ܡܒ ܠܘܩܒܠ ܡܚܫܒܬܐ ܕܢܦܫܐ ܕܠܐܝܬ
ܘܡܐܢܬ ܠܗ ܒܟܦܢܐ ܕܠܚܡܐ ܙܥܘܪܐ ܘܡܝܐ ܐܠܝ̈ܨܐ܀
ܢܬܠ ܠܟܘܢ ܡܪܝܐ ܠܚܡܐ ܙܥܘܪܐ܆ܘܡ̈ܝܐ
ܕܐܘܠܨܢܐ. ܘܬܘܒ ܠܐ ܢܬܩܪܒܘܢ ܠܟܝ ܡ̈ܛܥܝܢܝܟܝ. ܡܛܠ ܕܥܝܢܝܟܝ ܢܚܘܪ̈ܢ ܒܡ̈ܛܥܝܢܝܟܝ:
ܘܐܕܢܝ̈ܟܝ ܢܫ̈ܡܥܢ ܩܠܐ ܕܐܝܠܝܢ ܕܡܢ ܒܬܪܝ ܐܛܥܝܘܟܝ.
ܡܢ ܐܪܡܝܐ:
ܡܓ ܠܘܬ ܡܪܝܐ ܥܠ ܟܪܝܗܘܬܗ
ܕܦܓܪܝ: ܕܡܢ ܨܘܡܐ ܣܓܝܐ ܐܬܡܚܠ ܘܒܨܪ ܒܝܕ ܕܘܒܪ̈ܐ ܩ̈ܫܝܐ: ܘܠܢܦܫܝ ܕܡܬܡܠܝܐ ܚܘܫ̈ܒܐ
ܒܝ̈ܫܐ ܕܙܢܝܘܬܐ܀
ܐܬܕܟܪܝܢܝ ܡܪܝܐ ܐܠܗܝ ܘܣܥܘܪܝܢܝ. ܘܙܟܢܝ ܡܢ ܪ̈ܕܘܦܝ. ܘܠܐ ܒܢܓܝܪܘܬ ܪܘܚܟ
ܬܪܡܝܢܝ. ܘܕܥ ܕܡܛܠܬܟ ܩܒܠܬ ܚܣܕܐ: ܡܢ ܐܝܠܝܢ ܕܛܠܡܝܢ ܡܠܬܟ
ܡܕ ܠܘܬ ܡܪܝܐ ܥܠ ܕܝܘܐ
ܕܡܩܪ ܐܣܛܘܡܟܐ ܘܠܟܠܗܘܢ ܫܪ̈ܝܢܐ ܕܦܓܪܐ ܘܡܚܝܠܘܬܐ ܣܓܝܐܬܐ ܪܡܐ ܒܗ ܒܦܓܪܢ: ܐܝܟ ܡܢ
ܕܡܢ ܟܦܢܐ ܘܡܢ ܟܘܪܗܢܐ ܢܓܝܪܐ ܓܕ̈ܫܢ ܗܠܝܢ܀
ܚܘܪ ܡܪܝܐ̈ ܕܐܠܝܨ ܐܢܐ. ܘܟܪܣܝ ܐܬܕܠܚܬ.
ܘܠܒܝ ܐܬܗܦܟ ܒܓܘܝ
ܡܢ...:
ܡܗ: ܠܘܩܒܠ ܢܦܫܐ ܕܠܐ ܣܦܩܐ ܠܗ ܡܐܟܘܠܬܐ ܕܠܚܡܐ
ܘܡܫܬܝܐ ܕܡ̈ܝܐ: ܐܠܐ ܥܡ ܗܠܝܢ ܒܥܝܐ ܝܪܩܐ: ܘܠܐ ܡܬܕܟܪܐ ܠܐܘܠܨܢܐ ܕܙܪ̈ܥܘܢܐ: ܕܐܟܠ ܗܘܐ ܕܢܝܐܝܠ
ܘܚܒܪ̈ܘܗܝ.܀.
ܘܐܡܪ ܕܢܝܐܝܠ ܠܡܢܨܪ ܕܐܩܝܡ ܗܘܐ ܪܒ ܡܗܝܡ̈ܢܐ ܥܠ ܕܢܝܐܝܠ ܘܥܠ ܚܢܢܝܐ:
ܘܥܠ ܥܙܪܝܐ ܘܥܠ ܡܝܫܐܝܠ. ܢܣܐ ܐܢܘܢ ܠܥܒ̈ܕܝܟ ܝܘܡ̈ܝܢ ܥܣܖ̈ܐ܆ ܘܢܬܠܘܢ ܠܢ ܙܪ̈ܥܘܢܐ
ܠܡܐܟܠ܆ ܘܡ̈ܝܐ ܠܡܫܬܐ. ܘܬܚܙܐ ܫܝܘܬܢ ܘܫܝܘܬܐ ܕ̈ܛܠܝܐ ܕܐܟܠܝܢ ܡܢ ܦ̈ܛܒܓܐ ܕܡܵܠܟܐ܆ ܘܐܝܟܢܐ
ܕܚܙܐ ܐܢܬ ܗܟܢܐ ܥܒܕ ܥܡ ܥܒ̈ܕܝܟ. ܘܫܡܥ ܐܢܘܢ ܘܢܣܝ ܐܢܘܢ ܝܘܡ̈ܝܢ ܥܣܪ̈ܐ. ܘܡܢ ܒܬܪ
ܕܫܠܡܘ ܥܣܖ̈ܐ ܝܘܡ̈ܝܢ ܚܙܐ ܐܦ̈ܝܗܘܢ ܕܫܦܝܪ̈ܢ ܘܚܠܝܡ ܘܫܡܝܢ ܒܣܪܗܘܢ ܝܬܝܪ ܡܢ ܕ̈ܛܠܝܐ
ܟܠܗܘܢ ܕܐܟܠܝܢ ܡܢ ܦ̈ܛܒܓܐ ܕܡܠܟܐ. ܘܡܢܨܪ ܢܣܒ ܗܘܐ ܠܗ ܠܫܩܠܗܘܢ. ܘܝܗܒ ܗܘܐ ܠܗܘܢ
ܙܪ̈ܥܘܢܐ.
ܡܢ ܐܘܢܓܠܝܘܢ ܕܡܬܝ:
ܡܘ ܠܘܩܒܠ ܢܦܫܐ ܕܒܙܒܢܐ ܕܩܪܒܐ: ܒܥܝܐ ܕܬܫܟܚ ܙܝܢܐ
ܚܣܝܢܐ܀
ܗܝܕܝܢ ܝܫܘܥ ܐܦܩܬܗ ܪܘܚܐ ܠܡܕܒܪܐ: ܕܢܬܢܣܐ ܡܢ ܐܟܠܩܪܨܐ ܘܨܡ ܐܪ̈ܒܥܝܢ ܐܝܡ̈ܡܝܢ
ܘܐܪ̈ܒܥܝܢ ܠܝ̈ܠܘܢ. ܘܚܪܝܬ ܕܝܢ ܟܦܢ
ܡܙ ܠܘܩܒܠ ܡܚ̈ܫܒܬܐ ܕܝܨ̈ܦܢ ܥܠ ܣܝܒܪܬܐ ܘܥܠ
ܠܒܘܫܐ: ܒܥܠܬܐ ܕܪܚܡܬ ܐܟ̈ܣܢܝܐ: ܘܒܥܠܬ ܟܘܪ̈ܗܢܐ ܘܕܐ̈ܘܘܢܐ ܐܡ̈ܝܢܐ ܕܦܓܪܐ܀
ܠܐ ܬܐܨܦܘܢ
ܠܢܦܫܟܘܢ ܕܡܢܐ ܬܐܟܠܘܢ܆ ܘܡܢܐ ܬܫܬܘܢ. ܐܦ ܠܐ ܠܦܓܪܟܘܢ ܕܡܢܐ ܬܠܒܫܘܢ ܘܬܬܟܣܘܢ.
ܡܛܠ ܕܢܦܫܐ ܝܩܝܪܐ ܗܝ ܡܢ ܣܝܒܪܬܐ
ܡܚ ܠܘܩܒܠ ܢܦܫܐ ܕܐܣܝܪܐ ܒܪܒܘܬ ܟܪܣܐ: ܘܣܒܪܐ
ܠܗ ܕܒܢܝܚܐ ܕܦܓܪܐ ܕܒܦܘ̈ܢܩܐ ܪܕܝܐ ܐܘܪܝܝܐ ܕܚ̈ܝܐ.܀.
ܩܛܝܢܐ ܘܐܠܝܨܐ ܐܘܪܚܐ. ܕܡܘܒܠܐ ܠܚ̈ܝܐ
ܘܕ̈ܠܝܠܐ ܐܢܘܢ ܐܝܠܝܢ ܕܡܫܟܚܝܢ ܠܗ.
ܡܢ ܐܘܢܓܠܝܘܢ ܕܠܘܩܐ:
ܡܛ: ܠܘܩܒܠ ܡܚܫܒܬܐ ܕܟܠܝܐ
ܠܢ. ܕܡܢ ܣܝܒܪ̈ܬܢ ܘܡܢ ܠܒܘܫ̈ܝܢ ܢܬܠ ܠܣܢ̈ܝܩܐ: ܐܝܟ ܕܠܐ ܠܡ ܣܿܦܩܢ ܠܢ ܘܠܗܘܢ ܨ̈ܒܘܬܐ:
ܘܕܐܝܬ ܠܡ ܐܚܪܢܐ ܕܡܚܝܠ ܘܣܢܝܩ ܝܬܝܪ ܡܢ ܗܢܐ: ܘܠܗܘ ܘܠܐ ܠܢ ܕܢܬܠ ܘܠܐ ܠܗܢܐ: ܗܢܐ
ܓܝܪ ܚܒܢܢܐ ܐܝܬܘܗܝ: ܘܕܠܐ ܥܡܠܐ ܒܥܐ ܕܢܐܟܘܠ ܘܕܢܠܒܫ܀
ܡܢ ܕܐܝܬ ܠܗ ܬܪ̈ܬܝܢ ܟܘܬܝܢܝܢ.
ܢܬܠ ܠܡܢ ܕܠܝܬ ܠܗ. ܘܡܢ ܕܐܝܬ ܠܗ ܣܝܒܪܬܐ ܗܟܢܐ ܢܥܒܕ.
ܡܢ ܦܪܟܣܝܣ:
ܠܘܩܒܠ
ܢܦܫܐ ܕܪܚܡܐ ܕ̈ܓܝܓܬܐ: ܘܠܗ ܗܘ ܒܠܚܘܕ ܟܢܫܐ ܣܝܒܪܬܐ ܘܠܒܘܫܐ܀
ܟܠܗܘܢ ܕܝܢ ܐܝܠܝܢ
ܕܡܗܝܡܢܝܢ ܗܘܘ ܐܟܚܕܐ ܗܘܘ. ܘܟܠܡܕܡ ܕܐܝܬ ܗܘܐ ܠܗܘܢ ܕܓܘܐ ܗܘܐ܆ ܘܩܢܝܢܗܘܢ ܡܙܒܢܝܢ
ܗܘܘ: ܘܡܦܠܓܝܢ ܗܘܘ ܠܐܢܫ ܐܢܫ ܡܢ ܕܚܣܝܪ ܠܗ
ܢܐ ܠܘܩܒܠ ܢܦܫܐ ܕܡܡܐܢܐ ܒܐܘܠܨܢܐ ܕܓܕܫ
ܒܐܘܠܨܢܐ ܣܓܝܐܐ ܘܠܐ ܠܢ ܠܡܥܠ ܠܡܠܟܘܬܐ ܕܐܠܗܐ.
ܫܠܝܚܐ:
ܡܢ ܐܓܪܬܐ ܕܪ̈ܗܘܡܝܐ.
ܢܒ: ܠܘܩܒܠ ܡܚܫ̈ܒܬܐ ܕܡ̈ܦܝܣܢ ܠܢ ܕܢܐܨܦ ܩܠܝܠ ܕܦܓܪܢ:
ܒܝܕ ܡܐܟܠܐ ܘܡܫܬܝܐ.܀.
ܠܐ ܬܐܨܦܘܢ ܕܒܣܪܟܘܢ ܠܪ̈ܓܝܓܬܐ
ܢܓ ܠܘܩܒܠ ܡܚܫ̈ܒܬܐ ܕܡܓܖ̈ܝܢ
ܠܢ: ܕܢܬܒܝܐܐ ܒܩܠܝܠ ܦܘܪܓܝܐ ܕܝܪܩܐ܀
ܗܘ ܕܟܪܝܗ ܝܪܩܐ ܗܘ ܐܟܠ.
ܡܢ ܐܓܪܬܐ ܩܕܡܝܐ
ܕܩܘܪ̈ܢܬܝܐ.
ܢܕ. ܠܘܩܒܠ ܡܚܫܒܬܐ ܕܒܙܒܢܐ ܕܦܐܪ̈ܐ: ܪܡܝܐ ܒܢ ܪܓܬ ܡܐܟ̈ܠܬܐ ܕܐܒ̈ܢܐ܀
ܟܠܢܫ
ܓܝܪ ܕܐܓܘܢܐ ܥܒܕ ܡܢ ܟܠ ܡܕܡ ܢܛܪ ܢܦܫܗ. ܕܢܣܒ ܟܠܝܠܐ ܕܡܬܚܒܠ. ܚܢܢ ܕܝܢ ܪ̈ܗܛܝܢܢ
ܕܢܣܒ ܟܠܝܠܐ ܕܠܐ ܡܬܚܒܠ.
ܡܢ ܐܓܪܬܐ ܕܬܪ̈ܬܝܢ ܕܩܘܪ̈ܢܬܝܐ:
ܢܗ: ܠܘܩܒܠ ܡܚܫ̈ܒܬܐ ܕܗܘܝܐ
ܒܢ ܒܥܠܬ ܣܘܢܩܢܐ ܣܓܝܐܐ: ܘܒܩܠܝܠ ܩܠܝܠ ܫܪܝܢ ܠܗܿ ܠܚܝܠܬܢܘܬܗ ܕܢܦܫܐ܀
ܒܟܠܡܕܡ
ܕܝܢ ܡܬܐܠܨܝܢ ܚܢܢ ܐܠܐ ܠܐ ܡܬܥܝܩܝܢ ܚܢܢ. ܡܬܩܠܩܠܝܢܢ. ܐܠܐ ܠܐ ܡܬܦܪܣܝܢ ܚܢܢ. ܡܬܪܕܦܝܢܢ.
ܐܠܐ ܠܐ ܡܫܬܒܩܝܢܢ. ܡܣܚܦܝܢ ܠܢ. ܐܠܐ ܠܐ ܐܒܕܝܢܢ. ܒܟܠܙܒܢ ܡܝܬܘܬܗ ܕܝܫܘܥ ܫܩܝܠܝܢܢ
ܒܦܓܪ̈ܝܢ. ܕܚ̈ܝܘܗܝ ܕܝܫܘܥ ܒܦܓܪ̈ܝܢ ܢܬܓܠܘܢ
ܢܘ ܠܘܩܒܠ ܡܚܫܒܬܐ ܕܨܝܪܐ ܩܕܡ ܥ̈ܝܢܝܢ
ܟܐܒܐ ܕܐܣܛܘܡܟܐ ܘܕܟܒܕܐ ܘܕܛܚܠܐ: ܘܢܦܚܐ ܕܥܒܪ ܠܗ ܠܟܢܘܫܪܐ܀
ܡܛܠܗܢܐ ܠܐ ܡܐܢܐ ܠܢ.
ܐܦܢ ܒܪܢܫܢ ܓܝܪ ܒܪܝܐ ܡܬܚܒܠ܆ ܐܠܐ ܕܡ ܠܓܘ ܡܬܚܕܬ ܝܘܡ ܡܢ ܝܘܡ
ܢܙ ܠܘܩܒܠ
ܡܚܫ̈ܒܬܐ ܕܗ̈ܘܝܢ ܒܢ ܐܡܬ ܕܒܩܠܝܠ ܩܠܝܠ ܡܬܚܒܠ ܟܠܗ ܦܓܪܢ܀
ܝܕܥܝܢܢ ܓܝܪ ܕܐܢ ܒܝܬܢ
ܗܢܐ ܕܒܐܪܥܐ ܡܫܬܪܐ ܐܠܐ ܐܝܬ ܠܢ ܒܢܝܢܐ ܕܡܢ ܐܠܗܐ܆ ܒܝܬܐ ܕܠܐ ܒܥܒܕ ܐܝ̈ܕܝܐ ܒܫܡܝܐ ܠܥܠܡ
ܢܚ ܠܘܩܒܠ ܡܚܫܒܬܐ ܕܡܥܝܪܐ ܒܢ ܡܪܚܡܢܘܬܐ: ܘܡܦܝܣܐ ܠܢ ܕܢܬܠ ܠܡ̈ܣܟܢܐ: ܘܡܢ ܒܬܪ
ܗܕܐ ܡܟܪܝܐ ܠܢ ܘܡܥܝܩܐ ܠܢ ܥܠ ܡܕܡ ܕܝܗܒܝܢܢ܀
ܠܐ ܐܝܟ ܕܡܢ ܟܪܝܘܬܐ܆ ܘܠܐ ܐܝܟ ܕܡܢ ܩܛܝܪܐ
ܠܝܗܘܒܐ ܗܘ ܓܝܪ ܚܕܝܐ ܪܚܡ ܐܠܗܐ ܘܕܛܒܐ ܥܝܢܗ ܗܘ ܢܬܒܪܟ
ܢܛ ܠܘܩܒܠ ܡܚܫܒܬܐ ܕܨܝܪܐ
ܒܢ ܡܚܝܠܘܬܐ ܬܩܝܦܬܐ ܕܡܢ ܟܘܪ̈ܗܢܐ ܕܥܬܝܕܝܢ ܕܢܗܘܘܢ ܒܢ ܡܢ ܨܘܡܐ ܘܡܦܝܣܐ ܠܢ ܕܢܐܟܘܠ
ܩܠܝܠ ܒܘܫܠܐ܀
ܐܡܬ ܕܟܪܝܗ ܐܢܐ ܗܝ ܕܝܢ ܗܘ ܚܝܠܬܢ ܐܢܐ܇
ܐܓܪܬܐ ܕܐܦ̈ܣܝܐ:
ܠܘܩܒܠ
ܡܚܫܒܬܐ ܕܒܥܝܐ ܣܒܥܐ ܕܚܡܪܐ ܒܝܘܡܐ ܕܥܐܕܐ܀
ܠܐ ܙܗܘܝܬܘܢ ܪܘܝܢ ܒܚܡܪܐ ܣܓܝܐܐ ܕܒܗ ܐܝܬ
ܐܘܣܘܛܘܬܐ. ܐܠܐ ܐܬܡܠܘ ܒܪܘܚܐ܆ ܘܡܠܠܘ ܥܡ ܢܦܫܟܘܢ ܒܡܙܡܘܖ̈ܐ ܘܒܬܫ̈ܒܚܬܐ. ܘܒܙܡܝܪ̈ܬܐ
ܕܪܘܚܐ ܗܘܝܬܘܢ ܙܡܪܝܢ ܠܡܪܝܐ ܒ̈ܠܒܘܬܟܘܢ
ܡܢ ܐܓܪܬܐ ܕܦܠܦܝ̈ܣܝܐ:
ܣܐ ܠܘܩܒܠ ܡܚܫ̈ܒܬܐ
ܕܥܒ̈ܕܢ ܠܢܦܫܢ: ܕܡܢ ܦܘܠܚܢܐ ܕܐܝ̈ܕܝܐ ܠܐ ܬܒܥܐ ܕܬܟܢܫ ܠܗ ܣܝܒܪܬܐ: ܐܦܠܐ ܡܢ ܐܢܫܘܬܗ
ܬܬܛܦܝܣ ܕܬܩܒܠ ܡܕܡ: ܡܛܠ ܠܡ ܕܡ̈ܣܟܢܐ ܐܝܬܝܗܘܢ ܘܛܘܪܐ ܪܒܐ ܪܚܝܩܝܢ ܡܢܗ: ܡܢ ܐܚܪ̈ܢܐ
ܕܝܢ ܡ̈ܠܟܢ ܠܗ ܕܬܡܠܐ ܣܢܝܩܘܬܗ܀
ܡܪܢ ܩܪܪܝܒ ܗܘ. ܕܡܕܡ ܠܐ ܬܐܨܦܘܢ ܐܠܐ ܒܟܠܙܒܢ ܒܨܠܘܬܐ
ܘܒܒܥܘܬܐ ܘܒܬܟܫܦܬܐ ܘܒܬܘܕܝܬܐ܆ ܫܠܐ̈ܬܟܘܢ ܢܬ̈ܝܕܥܢ ܩܕܡ ܐܠܗܐ
ܣܒ ܠܘܩܒܓ ܡܚܫܒܬܐ
ܕܩܨܡܐ ܠܝ ܟܦܢܐ ܘܚܘܣܪܢܐ ܕܠܚܡܐ ܘܡܪܢܝܐ ܠܝ ܕܝܢ ܒܒܗܬܬܐ ܕܛܝܒܘܬܐ ܕܡܢ ܐܚܪ̈ܢܐ ܡܩܒܠ
ܐܢܐ܀
ܒܟܠ ܘܒܟܠܡܬ ܡܕܪܫ ܐܢܐ ܐܦ ܒܣܒܥܐ ܐܦ ܒܟܦܢܐ ܕܟܠܕܡ ܡܨܐ ܐܢܐ ܚܝܠܐ ܒܡܫܝܚܐ
ܕܡܚܝܠ ܠܝ.
ܡܢ ܐܓܪܬܐ ܩܕܡܝܬܐ ܕܬܣܠܘܢܝ̈ܩܝܐ.
ܣܓ: ܠܘܩܒܠ ܡܚܫܒܬܐ ܕܟܼܠܝܐ ܠܢ ܕܠܐ
ܢܦܠܘܚ ܒܐܝ̈ܕܝܢ: ܘܡܦܝܣܐ ܠܢ ܕܢܣܟܐ ܕܢܩܒܠ ܣܘܢܩܢܐ ܡܢ ܚܖ̈ܢܐ܀
ܒܥܢܢ ܕܝܢ ܡܢܟܘܢ
ܐ̈ܚܝ܆ ܬܬܝܬܪܘܢ ܘܬܬܚܦܛܘ܆ ܘܬܗܘܘܢ ܪܚܡܝܢ ܠܡܝܩܪܘ ܚܕܠܚܕ. ܘܗܘܝܬܘܢ ܫܠܝܢ ܘܥܢܝܢ
ܒܣܘܥܪ̈ܢܝܟܘܢ ܘܗܘܝܬܘܢ ܦܠܚܝܢ ܒܐܝ̈ܕܝܟܘܢ ܐܝܟܢܐ ܕܦܩܕܢܟܘܢ. ܘܗܘܝܬܘܢ ܡܗܠܟܝܢ ܒܐܣܟܡܐ
ܠܘܬ ܒܪ̈ܝܐ܆ ܘܥܠ ܐܢܫ ܠܐ ܗܘܝܬܘܢ ܣܢܝܩܝܢ.
ܡܢ ܐܓܪܬܐ ܕܬܪ̈ܬܝܢ ܕܬ̈ܣܠܘܢܩܝܐ:
ܣܕ ܠܘܩܒܠ
ܪܥܝܢܐ ܕܟܠܐ ܠܢ ܕܢܦܠܚ ܒܐܝ̈ܕܝܢ. ܘܐܠܨ ܠܢ ܕܢܐܟܘܠ ܠܚܡܐ ܘܢܣܒܥ܀
ܐܢ ܐܢܫ ܠܐ ܦܠܚ܆ ܐܦܠܐ
ܢܠܥܣ.
ܡܢ ܐܓܪܬܐ ܕܥܒܪ̈ܝܐ:
ܣ: ܗ: ܠܘܩܒܠ ܡܚܫܒܬܐ ܕܐܡܪܐ ܕܩܫܝܢ ܐܢܘܢ ܕܘܒܪ̈ܐ ܕܝܚܝܕܝܘܬܐ
ܘܣܓܝ ܝܩܝܪ̈ܝܢ: ܘܒܝܕ ܐܘܠܨܢܐ ܒܝܫ ܒܝܫ ܡܘܒܕܝܢ ܠܗ ܠܦܓܪܢ ܘܠܢܦܫܐ ܡܕܡ ܠܐ ܡܘܬܪܝܢ ̇
ܟܠ ܡܪܕܘܬܐ ܕܡܬܪܕܝܢܢ ܗܫܐ܆ ܠܐ ܡܬܚܝܙܝܐ ܠܢ ܕܕܚܕܘܬܐ ܗܝ܆ ܐܠܐ ܐܝܟ ܕܕܟܪܝܘܬܐ. ܡܢ ܒܬܪ ܙܒܢܐ
ܕܝܢ. ܝܗܒܐ ܦܐܖ̈ܐ ܕܫܠܡܐ: ܠܐܝܠܝܢ ܕܡܬܪܕܝܢ ܒܗ: ܘܦܪܥܢܗܘܢ ܟܐܢܘܬܐ
ܣܘ ܠܘܩܒܠ ܪܥܝܢܐ
ܕܚܦܝܛ ܒܡܐܟܘܠܬܐ: ܘܡܗܡܐ ܡܢ ܡܪܚܡܢܘܬܐ ܕܥܠ ܡ̈ܣܟܢܐ.܀
ܠܐ ܬܛܥܘܢ ܕܬܫܬܘܬܦܘܢ
ܒܥܒ̈ܕܐ ܛ̈ܒܐ. ܒܗܠܝܢ ܓܝܪ ܕܒ̈ܚܐ ܫܦܪ ܐܢܫ ܠܐܠܗܐ.
ܡܢ ܐܓܪܬܐ ܩܕܡܝܬܐ ܕܛܡܬܐܝܘܣ
ܣܙ
ܠܘܩܒܠ ܡܚܫܒܬܐ ܕܕܠܐ ܟܐܒܐ ܕܐܣܛܘܡܟܐ. ܘܕܠܐ ܟܘܪ̈ܗܢܐ ܬܩ̈ܝܦܐ: ܡܠܟܐ ܠܢ ܕܢܫܬܐ ܚܡܪܐ
ܟܕ ܡܪܢܝܐ ܠܢ ܒܦܘܩܕܢܗ ܕܫܠܝܚܐ ܛܘܒܢܐ: ܕܒܝܕ ܐܓܪܬܗ ܐܦܣ ܠܗ ܠܛܡܬܐܝܘܣ ܥܠ
ܗܕܐ܀
ܛܪ ܢܦܫܟ ܕܟܝܐܝܬ ܘܡ̈ܝܐ ܡܟܝܠ ܬܘܒ ܠܐ ܬܫܬܐ. ܐܠܐ ܚܡܪܐ ܩܠܝܠ ܗܘܝܬ ܫܬܐ ܡܛܠ
ܐܣܛܘܡܟܟ܆ ܘܡܛܠ ܟܘܪ̈ܗܢܝܟ ܐܡ̈ܝܢܐ.
ܡܢ ܐܓܪܬܐ ܕܝܥܩܘܒ.
ܣ: ܚ ܠܘܩܒܠ ܡܚܫ̈ܒܬܐ
ܕܡܪ̈ܟܢܢ ܠܢ ܬܘܒ ܠܥܠܡܐ ܘܠܦܘܩ̈ܕܢܘܗܝ܀
ܠܐ ܝܕܥܝܢ ܐܢܬܘܢ ܕܪܚܡܬܗ ܕܥܠܡܐ ܗܢܐ
ܒܥܠܕܒܒܘܬܐ ܗܝ ܠܘܬ ܐܠܗܐ܆ ܐܝܢܐ ܗܟܝܠ ܕܨܒܐ ܕܢܗܘܐ ܪܚܡܐ ܠܥܠܡܐ ܗܢܐ܆ ܒܥܠܕܒܒܐ ܠܐܠܗܐ
ܗܘܐ
ܡܢ ܐܓܪܬܐ ܕܝܘܚܢܢ:
ܣܛ: ܠܘܩܒܠ ܡܚܫܒܬܐ ܕܣܒܪܐ ܕܝܩܝܪ ܗܘ ܦܘܩܕܢܐ ܕܥܠ ܨܘܡܐ܀
ܘܦܘܩ̈ܕܢܘܗܝ ܠܐ ܝܩܝܪ̈ܝܢ. ܟܠܿ ܕܝܠܝܕ ܡܢ ܐܠܗܐ ܙܟܐ ܠܗ ܠܥܠܡܐ. ܘܗܕܐ ܗܝ ܙܟܘܬܐ ܕܙܟܬܗ
ܠܥܠܡܐ ܗܝܡܢܘܬܢ܀
ܒܪܝܟ ܗܘ ܡܪܢ ܝܫܘܥ ܡܫܝܚܐ ܐܠܗܢ: ܕܝܗܒ ܠܢ ܙܟܘܬܐ ܥܠ ܚܘܫ̈ܒܐ
ܕܕܝܘܐ ܕܪܒܘܬ ܟܪܣܐ.
ܡܐܡܪܐ ܕܬܪ̈ܝܢ:
ܠܘܩܒܠ ܚ̈ܘܫܒܐ ܕܙܢܝܘܬܐ:
ܡܢ ܡܦܩܢܐ
ܐ ܠܘܩܒܠ
ܡܚܫܒܬܐ ܕܙܢܝܘܬܐ ܕܨܝܪܐ ܒܬܪܥܝܬܝ ܐܢܬܬ ܓܒܪܐ܀
ܠܐ ܬܐܪܓ ܐܢܬܬܗ ܕܚܒܪܟ
ܒ ܠܘܩܒܠ
ܡܚܫܒܬܐ ܕܟܪܝܘܬܐ ܕܗܘܝܐ ܒܢ ܡܢ ܢܣ̈ܝܘܢܐ ܣ̈ܓܝܐܐ ܕܙܢܝܘܬܐ ܕܓܕܫܝܢ ܒܢ: ܘܦܣܩܝܢ ܠܣܒܪܢ
ܒܕܐܡܪܝܢ ܠܢ: ܕܡܢܐ ܠܡ ܡܕܡ ܕܫܦܝܪ ܡܣܟܝܢ ܐܢܬܘܢ ܒܬܪ ܗܢܐ ܟܠܗ ܥܡܠܐ܀
ܐܢ ܡܫܡܥ
ܬܫܡܥ ܒܩܠܝ: ܘܬܥܒܕ ܟܠ ܡܕܡ ܕܐܡܪ ܐܢܐ ܠܟ܆ ܐܣܢܐ ܠܣܢܐܝ̈ܟ ܘܐܥܝܩ ܠܒܥܠܕܒ̈ܒܝܟ.
ܡܛܠ ܕܢܐܙܠ ܡܠܐܟܝ ܩܕܡܝܟ܆ ܘܢܥܠܟ ܥܠ ܐܡܘܪ̈ܝܐ ܘܥܠ ܚܬ̈ܝܐ. ܘܥܠ ܦܪ̈ܙܝܐ ܘܟ̈ܢܥܢܝܐ
ܘܚ̈ܘܝܐ ܥܡ ܚܒ̈ܘܣܝܐ. ܘܬܚܪܘܒ ܐܢܘܢ:
ܓ ܠܘܩܒܠ ܡܚܫܒܬܐ ܕܣܒܪܐ ܠܗ: ܕܒܚܕܐ ܫܥܐ
ܥܪ̈ܩܝܢ ܡܢܗ ܚܘܫ̈ܒܐ ܒܝܫ̈ܐ ܕܙܢܝܘܬܐ܀
ܠܐ ܐܚܪܘܒ ܐܢܘܢ ܡܢ ܩܕܡܝܟ ܒܫܢܬܐ ܚܕܐ. ܕܠܐ ܬܗܘܐ
ܐܪܥܐ ܚܪܒܐ: ܘܬܣܓܐ ܥܠܝܟ ܚܝܘܬ ܒܪܐ. ܐܠܐ ܒܩܠܝܠ ܩܠܝܠ ܐܚܪܘܒ ܐܢܘܢ ܡܢ ܩܕܡܝܟ܆ ܥܕܡܐ
ܕܬܬܩܦ ܘܬܐܪܬ ܐܪܥܗܘܢ:
ܕ ܠܘܩܒܠ ܡܚܫܒܬܐ ܡܢ ܕܙܢܝܘܬܐ ܕܐܡܪܐ: ܕܠܐ ܠܡ ܡܫܟܚܢܐ ܛܠܝܘܬܐ
ܡܡܬܘܡ ܦܝܫܐ ܡܢ ܪ̈ܓܝܓܬܐ ܕܙܢܝܘܬܐ: ܘܡܚܫ̈ܒܬܐ ܕܕ̈ܟܝܢ ܡܢܗ ܬܩܪܒ ܠܐܠܗܐ܀
ܟܠ ܕܥܒܪ
ܒܡܢܝܢܐ ܡܢ ܒܪ ܥܣܪ̈ܝܢ ܫ̈ܢܝܢ ܘܠܥܠ܆ ܢܬܠ ܦܘܪܫܢܐ ܠܡܪܝܐ
ܗ ܠܘܩܒܠ ܡܚܫܒܬܐ ܕܙܢܝܘܬܐ
ܕܐܡܪܐ: ܕܠܐ ܠܡ ܚܝܒܐ ܛܠܝܘܬܐ ܐܘ ܡܬܥܕܠܐ: ܐܢܗܘ ܕܙܢܝܬ ܐܘ ܐܢ ܬܘܒ ܒܚܝܕܘܬܐ ܩܒܠܬ ܐܢܘܢ
ܠܚܘܫ̈ܒܐ ܛܡ̈ܐܐ܀
ܘܐܡܪ ܡܪܝܐ ܠܡܘܫܐ. ܡܢ ܕܚܛܐ ܠܝ ܐܥܛܝܘܗܝ
ܡܢ ܣܦܖ̈ܐ ܕܚ̈ܝܐ ܡܢ
ܬܢܝܢ ܢܡܘܣܐ:
ܘ: ܠܘܩܒܠ ܪܥܝܢܐ ܕܠܐ ܡܬܚܦܛ ܒܙܗܝܪܘܬܐ ܕܢܛܪ ܢܦܫܗ ܡܢ ܙܢܝܘܬܐ ܕܡܬܩܝܡܐ
ܒܗ: ܐܠܐ ܐܡܪ ܘܣܥܪ ܥܘܠܐ ܥܡ ܐܢܬܬܐ ܕܡܬܬܨܝܪܐ ܩܕܡ ܥ̈ܝܢܘܗܝ܀.
ܫܡܥ ܐܝܣܪܝܠ.. ܘܛܪ
ܘܥܒܕ ܕܢܛܐܒ ܠܟ ܘܬܣܓܐ ܛܒ. ܐܝܟ ܕܐܡܪ ܠܟ ܐܠܗܐ ܕܐܒ̈ܗܝܟ: ܕܢܬܠ ܠܟ ܐܪܥܐ ܕܡܪܕܝܐ
ܚܠܒܐ ܘܕܒܫܐ
ܠܘܩܒܠ ܡܚܫܒܬܐ ܕܒܥܝܐ ܒܝܕ ܪܓܬܐ ܛܢܦܬܐ: ܕܬܬܩܪܒ ܠܕܝܘܐ ܕܙܢܝܘܬܐ܀
ܡܢ
ܡܪܝܐ ܐܠܗܟ ܕܚܠ܆ ܘܠܗ ܒܠܚܘܕܘܗܝ ܦܠܘܚ܆ ܘܒܫܡܗ ܝܡܝ
ܚ ܠܘܩܒܠ ܢܦܫܐ ܕܒܐܝܡܡܐ
ܘܒܠܠܝܐ ܡܫܬܚܩܐ ܡܢ ܚܘܫ̈ܒܐ ܕܙܢܝܘܬܐ: ܟܕ ܦܣܩܐ ܣܒܪܐ ܕܥܠ ܙܟܘܬܗܘܢ܀
ܠܐ ܬܐܡܪ ܒܠܒܟ
ܕܩܫܐ ܗܘ ܥܡܐ ܗܢܐ. ܘܐܝܟܢܐ ܡܨܐ ܐܢܐ ܒܚܝܠܗ. ܠܐ ܬܕܚܠ. ܐܬܕܟܪ ܡܕܡ ܕܥܒܕ ܡܪܝܐ ܐܠܗܟ
ܠܦܪܥܘܢ ܘܠܟܠܗܘܢ ܡܨܪ̈ܝܐ
ܛ ܠܘܩܒܠ ܡܚܫܒܬܐ ܕܢܦܫܐ ܕܡܬܐܠܨܐ ܒܚܘܫ̈ܒܐ ܕܙܢܝܘܬܐ:
ܘܡܦܠܓܝܢ ܠܗ ܠܚܫܐ ܒܝܫܐ ܕܙܢܝܘܬܐ ܒܨ̈ܠܡܐ ܡܫ̈ܚܠܦܐ: ܘܟܢܫܝܢ ܪ̈ܥܝܢܐ ܛܡ̈ܐܐ: ܘܗܦܟܝܢ
ܘܕܒܩܝܢ ܠܘܬ ܚܕ ܡܢ ܗܠܝܢ ܪ̈ܥܝܢܐ ܡܫ̈ܥܒܕܐ: ܘܠܗ ܗܘ ܡܓܪܝܢ ܥܠܝܗܿ ܥܠ ܢܦܫܐ ܚܠܫܬܐ܀
ܘܬܕܥ ܝܘܡܢܐ ܕܡܪܝܐ ܐܠܙܘܟ ܗܘ ܥܒܪ ܩܕܡܝܟ. ܢܘܪܐ ܗܘ ܓܝܪ ܐܟܠܬܐ܆ ܘܗܘ ܢܘܒܕ ܐܢܘܢ.
ܘܗܘ ܢܬܒܘܪ ܐܢܘܢ ܩܕܡܝܟ. ܘܬܚܪܘܒ ܐܢܘܢ ܘܬܘܒܕ ܐܢܘܢ ܒܥܓܠ ܐܝܟ ܕܐܡܪ ܠܟ ܡܪܝܐ
ܝ ܠܘܩܒܠ ܚܘܫ̈ܒܐ ܕܡܬܪܟܢܝܢ ܩܠܝܠ ܠܡܐܟ̈ܠܬܐ: ܐܡܬܝ ܕܪܘܚܐ ܕܙܢܝܘܬܐ ܟܕ ܡܓܚܟ ܒܗܘܢ
ܝܗܒ ܐܬܪܐ ܩܠܝܠ: ܘܡܛܠ ܗܕܐ ܣܒܪܝܢ ܠܗܘܢ ܕܡܛܝܘ ܠܬܚܘܡܐ ܕܢܟܦܘܬܐ.܀.
ܠܐ ܬܥܒܕܘܢ
ܐܝܟ ܕܥܒܕܝܢ ܗܘܝܬܘܢ ܗܪܟܐ: ܐܢܫ ܐܢܫ ܐܝܟ ܕܫܦܝܪ ܒ̈ܥܝܢܘܗܝ. ܡܛܠ ܕܠܐ ܥܕܟܝܠ ܡܛܝܬܘܢ
ܠܒܝܬ ܡܫܪܝܐ: ܘܠܝܪܬܘܬܐ ܕܝܗܒ ܠܟ ܡܪܝܐ ܐܠܗܟ
ܝܐ ܠܘܩܒܠ ܢܦܫܐ ܕܙܚܥܐ ܘܪܥܠܐ ܡܢ
ܕܝܘܐ ܕܡܐܫ ܗܕܡ̈ܝܗ: ܡܣܬܟܠܝܢ ܕܝܢ ܡܕܡ ܕܡܬܐܡܪ ܐܝܠܝܢ ܕܐܬܢܣܝܘ ܡܢ ܕܝܘܐ ܗܢܐ܀
ܡܣܝܥܢܟ
ܘܥܕܘܪܟ ܐܠܗܐ ܗܘ. ܘܠܐ ܗܘܐ ܒܣܦܣܪܐ ܫܘܒܗܪܟ. ܢܬܟܬܒܘܢ ܠܟ ܒܥܠܕܒ̈ܒܝܟ. ܘܐܢܬ ܥܠ
ܩܕܠܗܘܢ ܬܕܪܘܟ
ܡܢ ܫ̈ܒܛܐ:
ܝܒ: ܠܘܩܒܠ ܢܦܫܐ ܕܡܢ ܟܪܝܘܬܐ ܢܦܠܐ ܒܩܘܛܥ ܪܥܝܢܐ: ܘܠܐ
ܡܫܟܝܚܐ ܡܣܝܒܪܐ ܡܟܝܠ ܚܘܫ̈ܒܐ ܛܡ̈ܐܐ: ܕܡܛܡ̈ܐܝܢ ܠܗ ܠܨܠܘܬܗ܀
ܩܘܡ. ܡܛܠ ܕܗܢܘ
ܝܘܡܐ ܕܐܫܠܡ ܡܪܝܐ ܠܣܝܣܪܐ ܒܐܝܕܟ. ܗܐ ܡܪܝܐ ܢܦܩ ܩܕܡܝܟ
ܝܓ ܠܘܩܒܠ ܪܥܝܢܐ ܕܡܬܚܪܐ
ܡܢ ܚܘܫ̈ܒܐ ܕܙܢܝܘܬܐ: ܘܠܐ ܨܒܐ ܕܟܠ ܟܠܗ ܢܢܦܨ ܐܢܘܢ ܡܢܗ ܘܠܐ ܡܬܪܥܐ ܒܦܟܪܐ ܕܚܛܝܬܐ ܘܪܢܝܐ
ܕܒܝܫ̈ܬܐ.܀.
ܘܐܡܪܬ ܕܠܝܠܐ. ܦܠܫܬ̈ܝܐ ܐܬܘ ܥܠܝܟ ܫܡܫܘܢ. ܘܐܬܬܥܝܪ ܡܢ ܫܢܬܗ ܘܐܡܪ. ܐܦܘܩ
ܐܝܟ ܕܒܟܠܙܒܢ ܘܐܫܬܢܕ ܒܗܘܢ. ܘܠܐ ܝܕܥ ܕܦܪܩ ܠܗ ܡܪܝܐ ܡܢܗ ܘܐܚܕܘܗܝ ܦܠܫ̈ܬܝܐ ܘܥܘܪܘ
ܥܝܢܘܗܝ. ܘܐܣܪܘܗܝ ܒܫ̈ܫܠܬܐ. ܘܐܚܬܘܗܝ ܠܥܙܐ ܘܗܘܐ ܛܚܢ ܒܝܬ ܐܣܝܪ̈ܐ
ܡܢ ܫܡܘܐܝܠ
ܝܕ ܠܘܬ ܡܠܐܟܗ ܕܡܪܝܐ ܕܡܢ ܫܠܝ ܐܬܚܙܝ ܒܬܪܥܝܬܝ: ܘܐܩܪܗ ܠܡܚܫܒܬܐ ܕܙܢܝܘܬܐ: ܘܪܕܦ
ܡܢܗ ܟܠܗܘܢ ܚܘܫ̈ܒܐ ܕܚܕܝܪ̈ܝܢ ܠܗ܀
ܥܫܢ ܠܒܝ ܒܡܪܝܐ ܘܐܬܬܪܝܡܬ ܩܪܢܝ. ܘܐܬܦܬܚ ܦܘܡܝ
ܥܠ ܒܥܠܕܒ̈ܒܝ. ܡܛܠ ܕܚܕܝܬܢܝ ܒܦܘܪܩܢܟ
ܝܗ ܠܘܩܒܠ ܕܝܘܐ ܛܢܦܐ ܕܙܢܝܘܬܐ: ܕܡܬܚܙܐ
ܠܝ ܒܠܠܝܐ ܒܚܙܘܐ ܡܫܟܪܐܝܬ ܒܕܡܘܬ ܐܢܬܬܐ: ܘܠܐ ܐܫܟܚ ܥܨܗ ܠܢܦܫܝ ܒܨ̈ܒܝܢܘܗܝ ܛܡܵܐܐ܀
ܩܫ̈ܬܬܐ ܕܓܢܒܖ̈ܐ ܢܬܬܒܪ̈ܢ. ܘܟܪ̈ܝܗܐ ܐܬܥܫܢܘ ܒܚܝܠܐ. ܘܣ̈ܒܥܐ ܒܠܚܡܐ ܐܬܐܓܪܘ ܘܟ̈ܦܢܐ ܐܘܬܪܘ
ܝܘ ܠܘܩܒܠ ܢܦܫܐ ܕܠܐ ܨܒܝܐ ܕܬܥܪܘܩ ܡܢ ܪܓܬܐ ܛܢܦܬܐ: ܘܡܓܪܐ ܒܚܘܫܒܐ ܕܢܚܫ ܥܡܘܢܝܐ:
ܗܘ ܕܡܬܬܓܡ ܚܘܝܐ܀
ܘܐܡܪܘܢ ܟܠܗܘܢ ܐܢܫܐ ܕܠܟܝܫ ܠܢܚܫ. ܐܩܝܡ ܠܢ ܩܝܡܐ ܘܢܦܠܚܟ.
ܘܐܡܪ ܠܗܘܢ ܢܚܫ ܥܡܘܢܝܐ. ܒܗܕܐ ܐܩܝܡ ܠܟܘܢ ܩܝܡܐ܆ ܡܐ ܕܥܘܪܬܘܢ ܟܠ ܥܝܢܟܘܢ ܕܝܡܝܢܐ:
ܘܥܒܕܬܟܘܢ ܚܣܕܐ ܥܠ ܟܠܗ ܐܝܣܪܝܠ
ܡܢ ܣܦܪ ܡ̈ܠܟܐ:
ܝܙ: ܥܘܩܒܠ ܕܝܘܐ ܕܙܢܝܘܬܐ ܕܨܒܐ
ܕܒܝܕ ܚܘܫ̈ܒܐ ܢܚܒܠ ܘܢܣܝܒ ܢܟܦܘܬܝ܀
ܚܣ ܠܝ ܡܢ ܡܪܝܐ ܕܐܬܠ ܠܟ ܝܪܬܘܬܐ ܕܐܒ̈ܗܝ
ܡܢ ܣܦܪ ܕܒܪܝܡܝܢ:
ܝܚ: ܠܘܩܒܠ ܢܦܫܐ ܕܣܒܪܐ ܠܗ. ܕܝܬܝܪ ܡܢ ܚܝܠܗ ܡܬܢܣܝܐ: ܡܢ ܕܝܘܐ
ܕܙܢܝܘܬܐ܀
ܗܝܕܝܢ ܫܪܝܬ ܐܪܥܐ ܝܗܒܐ ܦܘܪܫܢܐ ܕܡܐܕܬܐ ܠܦܘܡ ܦܪܥܘܢ. ܟܠܢܫ ܐܝܟ ܚܝܠܗ ܡܢ
ܥܡܐ ܕܐܪܥܐ܆ ܡܣܩ ܗܘܐ ܟܣܦܐ ܘܕܗܒܐ ܠܿܡܬܠ ܠܦܪܥܘܢ
ܝܛ ܠܘܬ ܡܪܝܐ ܥܠ ܚܘܫ̈ܒܐ
ܕܙܢܝܘܬܐ: ܕܡܚܘܝܢ ܠܢ ܚ̈ܙܘܢܐ ܢܕ̈ܝܕܐ ܒ̈ܠܝܠܘܬܐ܀
ܡܪܝܐ ܐܡܪܬ. ܡܪܝܐ ܒܗܬܬ܆ ܘܐܚܦܪܬ ܩܕܡ
ܐܦ̈ܝܟ. ܥܘܠܐ ܣܓܝ ܥܠ ܪܝܫܢ. ܘܛܥܝܘܬܢ ܡܛܬ ܥܕܡܐ ܠܫܡܝܐ. ܡܢ ܙܒܢܐ ܕܐܒ̈ܗܝܢ ܐܦ ܒܚܛܗܐ
ܪܒܐ ܐܝܬܝܢ ܥܕܡܐ ܠܝܘܡܢܐ
ܡܢ ܥܙܪܐ:
ܟܟ: ܠܘܩܒܠ ܢܦܫܐ ܕܒܬܪ ܬܟܬ̈ܘܫܐ ܚ̈ܠܝܨܐ ܕܥܡ
ܚܘܫ̈ܒܐ ܕܙܢܝܘܬܐ: ܩܢܬ ܢܟܦܘܬܐ ܘܕܟܝܘܬܐ܀
ܐܪܥܐ ܕܥܐܠܝܢ ܐܢܬܘܢ ܠܗ ܠܡܐܪܬܗ܆ ܡܬܬܙܥܘ
ܡܬܬܙܝܥܐ ܒܙܘܥܬܐ ܕܥܡܡ̈ܐ ܘܕܐܡ̈ܘܬܐ: ܕܡܠܐܘܗ ܡܢ ܦܘܡ ܠܦܘܡ ܛܢܦܘܬܐ
ܡܢ ܕܘܝܕ ܢܒܝܐ:
ܟܐ:
ܠܘܬ ܡܪܝܐ ܥܠ ܣܘܓܐܐ ܕܚܘܫ̈ܒܐ ܛܡ̈ܐܐ ܕܫܚܩܝܢ ܘܐܠܨܝܢ ܠܢ: ܘܠܘܬ ܦܪ̈ܨܘܦܐ ܡܫ̈ܚܠܦܐ
ܢܓܕܝܢ ܠܗ ܠܪܥܝܢܢ܀
ܡܪܝܐ ܡܐ ܣܓܝܘ ܐܠ̈ܘܨܝ. ܣ̈ܓܝܐܐ ܕܩܡܘ ܥܠܝ. ܘܣ̈ܓܝܐܐ ܕܐܡܪܝܢ
ܠܗ ܠܢܦܫܝ܆ ܠܝܬ ܠܟܝ ܦܘܪܩܢܐ ܒܐܠܗܟܝ. ܘܐܢܬ ܡܪܝܐ ܡܣܝܥܢܝ ܘܐܝܩܪܝ. ܘܡܪܡܪܡܢܗ
ܕ݁ܪܝܫܝ
ܟܒ ܠܘܩܒܠ ܢܦܫܐ ܕܠܐ ܚܟܡܐ: ܕܥܘܙܐ ܕܚܡܬܐ ܣܩܘܒܠܐ ܐܝܬܘܗܝ ܕܚܘܫܒܐ ܕܙܢܝܘܬܐ.
ܪܓܙܘ
ܘܠܐ ܬܚܛܘܢ. ܐܡܪܘ ܒ̈ܠܒܝܟܘܢ ܘܥܠ ܡ̈ܫܟܒܝܟܘܢ ܪܢܘ
ܟܓ ܠܘܩܒܠ ܚܘܫ̈ܒܐ ܛܡ̈ܐܐ ܕܡܓܪܝܢ
ܒܢ: ܘܨ̈ܠܡܐ ܡܫܟܪ̈ܐ ܙܒ̈ܢܬܐ ܣܓܝܐ̈ܬܐ ܨܝܪܝܢ ܒܢ: ܘܐܣܪܝܢ ܠܗ ܠܪܥܝܢܢ ܒܝܕ ܚ̈ܫܐ ܕܪܓܬܐ
ܕܗܕܡ̈ܐ ܡܨܥܪ̈ܐ.܀
ܦܪܘܩܘ ܡܢܝ ܟܠ ܥܒ̈ܕ݂ܝ ܫܘܩܪܐ.. ܡܛܠ ܕܫܡܥ ܡܪܝܐ ܩܠܐ ܕܒܟܬܝ.
ܫܡܥ ܡܪܝܐ̈ ܒܥܘܬܝ ܡܪܝܐ ܨܠܘܬܝ ܩܒܠ
ܟܕ ܠܘܬ ܡܪܝܐ ܥܠ ܕܝܘܐ ܕܙܢܝܘܬܐ: ܕܟܕ ܠܐ ܡܨܐ ܡܟܐ
ܠܢ ܒܝܕ ܪܓܬܐ ܕܦܓܪܢ ܗܝܕܝܢ ܠܝܚܝܕܝܐ ܕܣܥܪ ܠܗ ܠܚܛܝܬܐ ܗܝ ܡܫܟܪܬܐ ܕܙܢܝܘܬܐ: ܡܚܘܐ
ܠܢ ܒܬܪܥܝܬܢ܀
ܒܥܠܕܒܒܐ ܓܡܪ ܒܣܝܦܐ ܠܥܠܡ ܩܘܪ̈ܝܐ ܥܩܪܬ ܘܐܘܒܕܬ ܕܘܟܪ̈ܢܝܗܝ.
ܘܡܪܝܐ ܠܥܠܡ ܩܝܡ
ܟܗ ܠܘܬ ܡܪܝܐ ܥܠ ܕܝܘܐ ܛܢܦܐ ܕܙܢܝܘܬܐ: ܐܝܢܐ ܕܓܠܝܐܝܬ ܕܝܢ ܡܬܩܪܒ
ܠܥܛܡ̈ܬܐ ܕܐܝܠܝܢ ܕܡܬܚܦܛܝܢ ܕܢܪܚܩܘܢ ܡܢܗ. ܟܕ ܚܛܦ ܠܗ ܡܢ ܫܠܝ ܠܗܘܢܐ: ܒܝܕ
ܫܢܝܘܬܐ ܕܡܫܢܐ ܠܗ ܠܢܦܫܐ: ܒܣܘܓܐܐ ܕܚܘܫ̈ܒܐ ܬܩ̈ܝܦܐ ܕܙܢܝܘܬܐ. ܦܩܚ ܗܘ ܕܝܢ ܣܓܝ
ܐܡܬܝ ܕܡܬܢܣܝܢ ܚܢܢ ܡܢܗ ܕܗܢܐ ܕܝܘܐ܆ ܕܢܫܘܪ ܡܚܕܐ ܘܒܝܕ ܗ̈ܠܟܬܐ ܣܓܝܐ̈ܬܐ ܘܚܪ̈ܝܦܬܐ
ܢܬܚܫܚ ܒܩܠܝܬܢ. ܡܢ ܕܡܨܐ ܕܢܣܬܟܠ ܢܣܬܟܠ܀
ܐܢܗܪ ܥ̈ܝܢܝ ܕܠܐ ܐܕܡܟ ܠܡܘܬܐ. ܘܠܐ ܢܐܡܪ
ܒܥܠܕܒܒܝ ܕܙܟܝܬܗ.
ܟܘ ܠܘܩܒܠ ܢܦܫܐ ܕܣܒܪܐ ܠܗ: ܕܬܩ̈ܝܦܝܢ ܐܢܘܢ ܚܘܫ̈ܒܐ ܕܙܢܝܘܬ.: ܡܢ
ܦܘܩ̈ܕܢܘܗܝ ܕܐܠܗܐ ܕܐܬܝܗܒܘ ܠܢ ܠܡܛܠܩܘܬܗ ܠܗܢܐ ܚܫܐ܀
ܐܫܚܘܩ ܐܢܘܢ ܐܝܟ ܥܦܪܐ
ܥܠ ܐܦ̈ܝ ܪܘܚܐ. ܘܐܝܟ ܣܝܢܐ ܕܫ̈ܘܩܐ ܐܕܘܫ ܐܢܘܢ
ܟܙ ܠܘܬ ܡܪܝܐ ܥܠ ܕܝܘܐ ܕܡܢ ܫܠܝ ܢܦܠ ܥܠ
ܦܓܪܐ: ܘܠܪܥܝܢܐ ܠܐ ܡܫܟܚ ܙܟܐ ܒܝܕ ܚܘܫ̈ܒܐ ܛ̈ܢܦܐ ܕܡܩܪܒ ܠܗ܀
ܐܗܦܟܬ ܡܖ̈ܩܕܬܝ
ܠܚܕܘܬܐ. ܫܪܝܬ ܣܩܝ ܘܐܟܒܢܬܢܝ ܚܝܕܘܬܐ. ܡܛܠ ܗܢܐ ܐܙܡܪ ܠܟ ܫܘܒܚܐ ܘܠܐ ܐܫܬܘܩ
ܟܚ
ܠܘܩܒܠ ܡܚܫܒܬܐ ܕܐܡܪܐ ܠܝ: ܕܡܒܗܬ ܠܟ ܕܝܘܐ ܕܙܢܝܘܬܐ: ܐܢ ܗܘ ܕܩܐܡ ܐܢܬ ܠܩܘܒܠܗ܀
ܢܒܗܬܘܢ ܘܢܚܦܪܘܢ ܐܝܠܝܢ ܕܒܥܝܢ ܠܢܦܫܝ. ܢܗܦܟܘܢ ܠܒܣܬܪܗܘܢ ܘܢܚܦܪܘܢ. ܐܝܠܝܢ
ܕܐܬܚܫܒܘ ܥܠܝ ܒܝܫܬܐ.
ܟܛ ܠܘܩܒܠ ܡܚܫܒܬܐ ܕܡܬܠܚܡܐ ܠܝ: ܕܫܐܕܐ ܐܚܪܢܐ ܕܙܢܝܘܬܐ
ܕܝܩܝܪ ܘܚܨܝܦ ܘܬܩܝܦ ܡܢ ܩܕܡܝܐ ܡܫܕܪ ܥܠܝܟ. ܐܝܢܐ ܕܦܝܫܩܐܝܬ ܐܢܣ ܘܡܬܚܬܐ ܠܗ ܠܢܦܫܟ
ܠܘܬ ܚܛܝܬܐ ܕܒܥܒ̈ܕܐ ܗܘܝܐ.܀
ܢܗܘܘܢ ܐܝܟ ܕܚܝܚܐ ܩܕܡ ܪ̈ܘܚܐ. ܘܡܠܐܟܗ ܕܡܪܝܐ ܢܪܕܘܦ
ܐܢܘܢ. ܬܚܫܟ ܐܘܪܚܗܘܢ ܘܢܗ̈ܘܝܢ ܒܗ ܡܫܪ̈ܘܥܝܬܐ. ܘܡܠܐܟܗ ܕܐܠܗܐ ܢܪܕܘܦ ܐܢܘܢ
ܠ ܠܘܩܒܠ
ܢܦܫܐ ܕܒܙܒܢܐ ܕܡܫܬܚܩܐ ܡܢ ܚܘܫ̈ܒܐ ܕܙܢܝܘܬܐ ܘܡܣܠܝܐ ܣܩ̈ܐ: ܘܠܐ ܡܬܕܟܪܐ ܠܕܘܝܕ ܕܗܝ ܗܕܐ
ܥܒܕ ܗܘܐ ܠܡܪܕܘܬܢ. ܟܕ ܐܡܪ܀
ܕܐܢܐ ܕܝܢ ܒܟܪܝܗܘܬܗܘܢ ܠܒܫܬ ܣܩܐ. ܘܡܟܟܬ ܢܦܫܝ
ܒܨܘܡܐ
ܠܐ ܠܘܩܒܠ ܢܦܫܐ ܕܟܪܝܐ ܠܗ ܥܠ ܕܐܓܪܘ ܒܗ ܚܘܫ̈ܒܐ ܛܡ̈ܐܐ ܕܙܢܝܘܬܐ: ܘܠܐ ܡܣܟܝܐ
ܠܙܟܘܬܐ ܕܥܠܝܗܘܢ: ܡܛܠ ܕܚܙܝܐ ܕܒܪܥܝܢܗ ܩܒܝܥ ܚܕ ܡܢ ܨ̈ܠܡܐ ܛܡ̈ܐܐ: ܕܐܡܝܢܐܝܬ ܫܚܩ
ܠܗ܀
ܒܙܒܢܐ ܙܥܘܪܐ ܒܥܐ ܐܢܬ ܠܗ ܠܪܫܝܥܐ ܘܠܝܬܘܗܝ. ܘܚܐܪ ܐܢܬ ܒܕܘܟܬܗ ܘܠܐ ܡܫܬܟܚܝ
ܠܒ ܠܘܩܒܠ ܕܝܘܐ ܕܙܢܝܘܬܐ ܕܡܬܕܡܐ ܒܐܣܟܡܐ ܕܫܘܦܪܐ ܕܐܢܬܬܐ ܥܪܛܠܝܬܐ: ܕܡܪܦܝܐ
ܒܗ̈ܠܟܬܗ ܘܡܦܠܗܕܐ ܟܠܗ ܓܘܫܡܗ ܛܢܦܐܝܬ: ܘܚܛܦܐ ܠܪܥܝܢܐ ܕܣ̈ܓܝܐܐ: ܘܥܒܕܐ ܠܗܘܢ
ܕܢܛܥܘܢ ܨ̈ܒܘܬܐ ܡܝܬܪ̈ܬܐ܀
ܡܛܠܗܢܐ ܐܠܗܐ ܢܥܩܪܟ. ܘܢܣܚܦܟ ܠܥܠܡ ܡܢ ܡܫܟܢܗ. ܘܥܩܪܟ
ܡܢ ܐܪܥܐ ܕܚ̈ܝܐ
ܠܓ ܠܘܩܒܠ ܡܚܫܒܬܐ ܕܡܬܢܒܝܐ ܠܝ ܡܦܘܠܬܐ ܕܡܢ ܢܟܦܘܬܐ: ܘܒܗܬܬܐ
ܕܗܘܝܐ ܠܝ ܩܕܡ ܒ̈ܢܝ ܐܢܫܐ܀
ܢܗܦܟܘܢ ܠܒܣܬܪܗܘܢ ܟܠܗܘܢ ܣܢܐ̈ܝܗܿ ܕܨܗܝܘܢ ܘܢܗܘܘܢ ܐܝܟ
ܠܡܝܪܐ ܕܐܓܪܐ: ܕܡܐ ܕܢܫܒܬ ܒܗ ܪܘܚܐ ܠܝܬܘܗܝ. ܘܐܦ ܠܐ ܡܬܝܕܥܐ ܕܘܟܬܗ
ܡܢ ܡܬ̈ܠܘܗܝ
ܕܫܠܝܡܘܢ
ܠܕ ܠܘܩܒܠ ܕܝܘܐ ܕܙܢܝܘܬܐ ܕܒܠܠܝܐ ܒܝܕ ܚܠܡܐ ܠܘܬ ܣܘܥܪܢܐ ܛܡܐܐ ܢܓܕܢܝ:
ܘܒܐܝܡܡܐ ܬܘܒ ܒܝܕ ܚܘܫ̈ܒܐ ܡܚܣܕ ܠܢ ܘܓܚܟ ܥܠܝܢ܀
ܐܦ ܐܢܐ ܐܓܚܟ ܥܠ ܬܒܪܗܘܢ.
ܘܐܚܕܐ ܡܐ ܕܐܬܐ ܥܠܝܗܘܢ ܕܠܘܚܝܐ ܘܐܒܕܢܐ ܡܢ ܫܠܝܐ ܘܬܒܪܗܘܢ ܐܝܟ ܥܠܥܠܐ ܢܐܬܐ
ܠܗ ܠܘܩܒܠ
ܐܘ ܡܛܠ ܕܡܫܟܚܝܐ ܓܝܪ ܡܬܝܬܪܐ ܡܢܢ ܪܘܚܢܐܝܬ܀
ܠܐ ܬܓܪ ܨܝܕ ܢܘܟܪܝܬܐ.
ܠܘ ܠܘܩܒܠ
ܪܥܝܢܐ ܕܡܬܨܝܪܐ ܒܙܘ ܕܡܘܬܐ ܕܫܘܦܪܐ ܕܐܢܬܬܐ: ܘܨܒܐ ܕܚܦܝܛܐܝܬ ܢܡܠܠ ܥܡܗܿ: ܐܘ ܕܢܣܥܘܪ
ܒܝܫܬܐ ܡܕܡ ܕܐܝܬ ܗܘܐ ܦܘܪܣܐ ܕܠܐ ܢܗܘܐ: ܐܝܟ ܕܬܢܝ ܠܢ ܝܘܚܢܢ ܩܕܝܫܐ ܢܒܝܐ ܕܬܒܐܝܣ܀
ܠܐ
ܬܐܪܓ ܫܘܦܪܐ ܕܐܢܬܬܐ ܒܠܒܟ. ܘܠܐ ܬܬܨܝܕ ܒ̈ܥܝܢܝܗ: ܘܠܐ ܬܫܒܝܟ ܒܬܡܪ̈ܝܗ. ܕܘܡܝܗ ܓܝܪ
ܕܐܢܬܬܐ ܙܢܝܬܐ܆ ܐܝܟ ܓܪܝܨܬܐ ܗܝ ܕܠܚܡܐ.
ܠܙ ܠܘܩܒܠ ܚܘܫܒܐ ܕܡܦܝܣ ܠܝ: ܕܡܕܡ ܠܐ
ܚܣܪܝܢܢ ܡܢ ܚܙܬܗ ܕܐܢܬܬܐ ܙܢܝܬܐ܀
ܕܠܡܐ ܣܐܡ ܒܪܢܫܐ ܢܘܪܐ ܒܥܘܒܗ ܘܢܚ̈ܬܘܗܝ ܠܐ ܡܘܩܕ.
ܐܘ ܕܠܡܐ ܡܗܠܟ ܓܒܪܐ ܥܠ ܓܘܡܖ̈ܐ ܕܢܘܪܐ ܘܪ̈ܓܠܘܗܝ ܠܐ ܡܬ̈ܟܘܝܢ. ܗܟܢܐ ܡܢ ܕܥܐܠ
ܥܠ ܐܢܬܬ ܚܒܪܗ ܘܩܪܒ ܠܗ ܠܐ ܙܟܐ.
ܠܚ ܠܘܩܒܠ ܢܦܫܐ ܕܠܐ ܝܕܥܐ ܥܠܬܐ ܕܢܣ̈ܝܘܢܐ: ܘܠܐ
ܬܘܒ ܡܬܪܥܝܐ ܕܕܝܘܐ ܕܙܢܝܘܬܐ ܐܡܬܝ ܕܡܙܕܟܐ ܘܡܫܢܐ ܡܢܢ: ܢܟܦܘܬܐ ܓܡܝܪܬܐ ܫܒܩ ܒܢ܀
ܨܪܦܐ ܒܩܐ ܠܣܐܡܐ܆ ܘܟܘܪܐ ܠܕܗܒܐ. ܘܡܪܝܐ ܒܚܪ ܠܒܐ.
ܠܛ ܠܘܩܒܠ ܚܘܫܒܐ ܛܡܐܐ:
ܕܡܫܕܠ ܘܡܦܢܐ ܠܢ ܬܘܒ ܠܘܬ ܚܛܝܬܐ: ܗܝ ܕܡܛܠܬܗ ܙܒ̈ܢܝܢ ܣܓ̈ܝܐܢ ܬܒܢܢ ܩܕܡ ܡܪܝܐ.
܀
ܐܝܟ ܟܠܒܐ ܕܗܦܟ ܥܠ ܬܝܘܒܗ܆ ܗܟܢܐ ܗܘ ܣܟܠܐ ܕܫܛܐ ܒܫܛܝܘܬܗ.
ܡܢ ܩܘܗܠܬ
ܡ
ܠܘܩܒܠ ܚܘܫܒܐ ܕܡܝܬܐ ܠܢ ܥܘܗܕܢܐ ܕܒܝܬܐ: ܗܘ ܕܒܗ ܦܐܪ̈ܐ ܣ̈ܓܝܐܐ ܝܗܒܢ ܚܢܢ ܠܣܛܢܐ.
܀
ܠܒܐ ܕܚܟ̈ܝܡܐ ܒܝܬ ܐܒܠܐ. ܘܠܒܐ ܕܣ̈ܟܠܐ ܒܝܬ ܚܕܘܬܐ.
ܡܐ ܠܘܩܒܠ ܢܦܫܐ ܕܦܓܥܐ
ܒ̈ܢܣܝܘܢܐ ܕܚܘܫ̈ܒܐ ܛܡ̈ܐܐ: ܘܠܐ ܒܥܝܐ ܕܬܪܕܘܦ ܐܢܘܢ ܒܝܕ ܟܦܢܐ ܘܨܗܝܐ: ܘܫܗܪܐ ܘܨܠܘܬܐ܀
ܐܢ
ܪܘܚܐ ܕܫܠܝܛܐ ܬܣܩ ܥܠܝܟ܆ ܐܬܪܟ ܠܐ ܬܫܒܘܩ. ܡܛܠ ܕܐܣܝܘܬܐ ܫܒܩܐ ܚ̈ܛܗܐ ܣ̈ܓܝܐܐ.
ܡܢ
ܙܡܝܪܬ ܙܡܝܪ̈ܬܐ:
ܡܒ: ܠܘܬ ܡܠܐ̈ܟܐ ܩ̈ܕܝܫܐ܆ ܡܛܠ ܚܘܫ̈ܒܐ ܛܡ̈ܐܐ ܕܐܓܪܘ ܒܢܦܫܐ܀
ܠܐ
ܬܚܙܘܢܢܝ ܕܐܘܟܡܢܐ ܕܐܘܟܡܢܝ ܫܡܫܐ.
ܡܢ ܐܝܘܒ:
ܡܓ: ܠܘܩܒܠ ܢܦܫܐ ܕܣܒܪܐ ܠܗ ܕܠܒܪ
ܡܢ ܟܝܢܗ ܗܝ ܗܕܐ: ܕܬܛܪ ܠܪܥܝܢܐ ܚܪܝܦܐ ܕܠܐ ܢܙܢܐ ܒܬܪܥܝܬܗ܀
ܐܡܪ ܗܘܐ ܓܝܪ ܐܝܘܒ܆
ܕܕܠܡܐ ܚܛܘ ܒ̈ܢܝ ܘܨܚܝܘ ܠܐܠܗܐ ܒܠܒܗܘܢ
ܡܕ ܠܘܩܒܠ ܢܦܫܐ ܕܡܢ ܕܝܘܐ ܕܙܢܝܘܬܐ ܐܬܢܣܝܬ
ܢܣܝܘܢܐ ܪܒܐ ܕܐܐ ܡܬܡܠܠ: ܘܬܡܝܗܐ ܒܗ ܒܢܣܝܘܢܐ ܗܢܐ ܘܡܬܕܡܪܐ: ܕܐܝܟܢܐ ܗܘ ܗܢܐ ܕܝܘܐ ܠܐ ܒܗܬ
ܘܠܐ ܕܚܠ܀
ܗܐ ܢܣܝܘܢܐ ܗܘ ܠܐܢܫܐ ܥܠ ܐܪܥܐ܆ ܘܐܝܟ ܝܘܡ̈ܝ ܐܓܝܪܐ ܐܝܬ ܚ̈ܝܘܗܝ
ܡܗ
ܠܘܩܒܠ ܚܘܫܒܐ ܕܡܬܢܒܐ ܠܝ ܥܠ ܕܝ̈ܘܐ ܕܙܢܝܘܬܐ: ܕܐܬܝܢ ܘܡܝܫܝܢ ܠܗܕܡ̈ܝܢ ܘܡܘܩܕܝܢ ܠܗܘܢ
܀
ܢܡܘܫܘܢ ܒܛܗܪܐ ܐܝܟ ܕܒܚܫܘܟܐ. ܢܓܫܓܫܘܢ ܚܫܘܟܐ ܘܠܐ ܢܗܝܪܐ. ܘܡܛܥܐ ܠܗܘܢ ܐܝܟ
ܪ̈ܘܝܐ
ܡܘ ܠܘܩܒܠ ܕܝܘܐ ܕܙܢܝܘܬܐ ܕܐܠܨ ܠܗ ܠܐܝܣܪܐܝܠ: ܕܚܠܦ ܚ̈ܛܐ ܢܟܢܫ ܬܒܢܐ ܘܩܢܝ̈ܐ܀
ܚܣ ܠܝ ܕܐܪܫܥ ܩܕܡ ܡܪܝܐ. ܘܚܣ ܠܝ ܕܐܥܒܕ ܚܛܝܬܐ. ܡܛܠ ܕܠܒܪܢܫܐ ܐܝܟ ܥܒ̈ܕܘܗܝ
ܦܪܥ ܠܗ
ܡܙ ܠܘܩܒܠ ܢܦܫܐ ܕܠܐ ܚܟܡܐ: ܕܡܢ ܐܝܟܐ ܡܫܬܕܪܝܢ ܥܠܝܢ ܗܠܝܢ ܚܘܫ̈ܒܐ ܝܩ̈ܕܐ܀
ܢܦܩܝܢ ܡܢ ܦܘܡܗ ܠܡܦܐ̈ܕܐ ܐܝܟ ܓܘܡܪ̈ܐ ܕܢܘܪܐ
ܡܚ ܠܘܩܒܠ ܡܚܫܒܬܐ ܕܙܢܝܘܬܐ ܕܐܡܪܐ
ܠܝ: ܕܡܕܡ ܠܐ ܚܣܪ ܐܢܐ: ܘܠܐ ܡܬܚܒܠ ܐܢܐ ܡܢ ܟܦܢܐ ܘܨܗܝܐ ܘܡܢ ܨܘܡܐ ܣܓܝܐܐ܀
ܘܐܡܝܬ
ܥܩܪܟܝ ܒܟܦܢܐ. ܘܕܡܫܬܚܪ ܡܢܟܝ ܢܬܩܛܠ
ܡܛ ܠܘܩܒܠ ܕܝܘܐ ܕܒܪܥܝܢܝ ܡܠܟ ܠܝ:
ܕܐܫܬܘܬܦ ܥܡ ܐܢܬܬܐ ܘܐܒܐ ܕܒ̈ܢܝܐ ܐܗܘܐ. ܘܠܐ ܗܟܢܐ ܐܗܘܐ ܡܬܟܬܫ ܒܟܦܢܐ ܥܡ ܚܘܫ̈ܒܐ
ܕܙܢܝܘܬܐ܀
ܫܛܝܐ ܓܝܪ ܫܛܝܘܬܐ ܡܡܠܠ. ܘܠܒܗ ܚܫܠ ܥܘܠܐ. ܕܢܥܒܕ ܚܠܦܘܬܐ ܘܢܡܠܠ
ܛܥܝܘܬܐ. ܘܢܣܪܩ ܢܦܫܐ ܕܟܦܢܐ. ܘܡܫܬܝܐ ܕܨܗܝܐ ܢܓܝܙ.
ܡܢ ܐܪܡܝܐ
ܢܢ ܠܘܬ ܡܪܝܐ܆ ܥܠ ܕܝ̈ܘܐ
ܕܙܢܝܘܬܐ ܕܫܩܠܝܢ ܠܗܘܢ ܥ̈ܠܬܐ ܡܢ ܟܬ̈ܒܐ ܘܡܢ ܢܝܫ̈ܐ ܕܟܬܝܒܝܢ ܒܗܘܢ܀
ܡܪܝܐ ܚܝܠܬܢܐ ܒܚܪ
ܙܕܩܐ: ܘܚܙܐ ܟܘ̈ܠܝܬܐ ܕܠܒܐ. ܐܚܙܐ ܦܘܪܥܢܟ ܡܢܗܘܢ: ܡܛܠ ܕܠܟ ܓܠܝܬ ܕܝ̈ܢܝ
ܡܢ ܐܘܠܝ̈ܬܗ
ܕܐܪܡܝܐ:
ܢܐ: ܠܘܬ ܡܪܝܐ ܥܠ ܚܘܫ̈ܒܐ ܕܙܢܝܘܬܐ: ܕܐܓܪܘ ܒܝ.
ܚܙܝ ܡܪܝܐ̈ ܫܘܥܒܕܝ ܕܐܬܬܪܝܡ
ܢܒ ܠܘܬ ܡܪܝܐ ܥܠ ܕܝܘܐ ܕܐܥܝܪܗ ܒܠܠܝܐ ܠܚܘܫܒܐ ܠܝܛܐ ܥܠ ܢܦܫܝ: ܘܕܠܚ
ܟܠܗܝܢ ܨܘܪ̈ܬܗ ܕܦܪܨܘܦܐ܀
ܚܘܪ ܡܪܝܐ ܘܚܙܝ ܕܗܘܝܬ ܙܠܝܠܬܐ
ܢܓ ܠܘܬ ܢܦܫܐ ܕܢܦܠܬ
ܒܚ̈ܙܘܢܐ ܡܫܟܪ̈ܐ ܕܠܠܝܐ܀
ܩܘܡܝ ܫܒܚܝ ܒܠܠܝܐ ܒܪܝܫ ܐܘܪ̈ܚܬܟܝ. ܐܫܘܕ ܐܝܟ ܡ̈ܝܐ ܠܒܟܝ
ܠܘܩܒܠ ܐ̈ܦܝ ܥܠܝܐ.
ܢܕ ܠܘܬ ܡܪܝܐ ܥܠ ܕܝܘܐ ܕܙܢܝܘܬܐ: ܕܚܙܬܐ ܕܕܡܘܬܐ ܡܫܟܪܬܐ ܒܝܕ ܚܫܐ
ܕܪܓܬܐ ܒܪܥܝܢܝ ܩܒܥ܀
ܩܪܝܬ ܫܡܟ ܡܪܝܐ܆ ܘܡܢ ܓܘܒܐ ܬܚܬܝܐ ܩܠܝ ܫܡܥܬ. ܠܐ ܬܪܟܢ
ܐܕܢܟ. ܐܠܐ ܐܪܘܚ ܠܝ ܘܦܪܘܩܝܢܝ. ܩܪܒܬ ܒܝܘܡܐ ܕܩܪܝܬܟ܆ ܘܐܡܪܬ ܠܝ ܠܐ ܬܕܚܠ
ܡܢ ܕܢܝܐܝܠ
ܢܗ: ܠܘܩܒܠ ܕܝܘܐ ܕܙܢܝܘܬܐ: ܕܡܐ ܕܐܘܦܝܘ ܚܘܫ̈ܒܘܗܝ ܫܪܝ ܒܨܐ ܘܡܐܫ ܠܗܘܢ ܠܗܕܡ̈ܘܗܝ
ܕܦܓܪܐ ܝܕܥܝܢ ܕܝܢ ܡܢܐ ܐܡܪ ܐܢܐ܆ ܐܝܠܝܢ ܕܐܬܢܣܝܘ ܡܢ ܕܝܘܐ ܗܢܐ. ܘܠܐ ܠܗܘܢ ܕܝܢ ܠܐܝܠܝܢ ܕܡܬܟܬܫܝܢ
ܥܡܗ ܕܒܙܒܢܐ ܕܩܪܒܐ ܣܘܓܐܗ ܕܐܠܝܐ ܘܕܝܡܡܐ. ܢܗܘܘܢ ܡܗܠܟܝܢ ܒܩܠܝܬܐ. ܘܡܨܠܝܢ. ܘܟܕ
ܝܬܒܝܢ ܢܗܘܘܢ ܚܛܦܝܢ ܩܠܝܠ ܡܢ ܫܢܬܐ. ܘܢܗܘܘܢ ܠܒܝܫܝܢ ܣܩ̈ܐ ܩܫ̈ܝܐ ܘܢܗܘܘܢ ܥܪܩܝܢ ܡܢ
ܣܒܥܘܬܐ ܕܠܚܡܐ ܘܕܡ̈ܝܐ. ܢܣܬܟܠܘܢ ܕܝܢ ܐܝܠܝܢ ܕܟܬܫܝܢ ܒܗܢܐ ܐܓܘܢܐ܆ ܕܟܕ ܒܚܝܠܐ ܕܐܠܗܐ
ܠܗܢܐ ܕܝܘܐ ܢܙܟܘܢ. ܩܢܝܢ ܢܟܦܘܬܐ ܘܠܐ ܡܬܚܛܦܝܢ܀
ܡܠܟܘܬܟ ܥܒܪܬ ܡܢܟ ܘܡܢ ܐܢܫܐ ܪ̈ܕܦܝܢ
ܠܟ ܘܥܡ ܚܝܘܬ ܒܪܐ ܢܗܘܐ ܡܥܡܪܟ. ܘܥܣܒܐ ܐܝܟ ܬܘܪܐ ܢܘܟܠܘܢܟ. ܘܡܢ ܛܠܐ ܕܫܡܝܐ ܬܨܛܒܥ
ܘܫܒܥܐ ܥ̈ܕܢܝܢ ܢܬܚܠܦܘܢ ܥܠܝܟ. ܥܕܡܐ ܕܬܕܥ ܕܫܠܝܛ ܗܘ ܐܠܗܐ ܡܪܝܡܐ ܒܡܠܟܘܬܐ ܕܐܢܫܐ.
ܕܠܡܢ ܕܨܒܐ ܢܬܠܝܗ.
ܡܢ ܐܘܢܓܠܝܘܢ ܕܡܬܝ:
ܢܘ: ܠܘܩܒܠ ܪܥܝܢܐ ܕܒܝܕ ܨ̈ܠܡܐ ܕܡܬܩܝܡܝܢ
ܒܬܪܥܝܬܗ ܕܕܟܪ̈ܐ ܘܕܢܩ̈ܒܬܐ: ܡܬܚܦܛ ܕܢܣܥܘܪ ܚܛܝܬܐ܀
ܟܠ ܡܢ ܕܚܙܐ ܐܢܬܬܐ ܐܝܟ
ܕܢܪܓܝܗ܆ ܡܚܕܐ ܓܪܗ ܒܠܒܗ
ܢܙ ܠܘܩܒܠ ܢܦܫܐ ܕܡܬܢܣܝܐ ܡܢ ܚܘܫ̈ܒܐ ܛܢܦ̈ܐ ܕܙܢܝܘܬܐ:
ܘܠܐ ܨܒܝܐ ܕܬܫܗܪ ܘܬܨܠܐ.܀.
ܐܬܬܥܝܪܘ ܘܨܠܘ ܕܠܐ ܬܥܠܘܢ ܠܢܣܝܘܢܐ. ܫܠܝܚܐ
ܡܢ ܐܓܪܬܐ
ܕܩܘܪ̈ܢܬܝܐ:
ܢܚ: ܠܘܩܒܠ ܡܚܫ̈ܒܬܐ ܕܒܙܒܢ ܕܒܪ̈ܢ ܠܢ ܠܫ̈ܘܩܐ: ܒܙܒܢ ܕܝܢ ܠܒܪ ܡܢ ܫ̈ܘܩܐ
ܐ̈ܠܨܢ ܠܢ ܕܢܦܗܐ܀
ܠܐ ܬܛܥܘܢ. ܠܐ ܙܢ̈ܝܐ. ܠܐ ܓܝܪ̈ܐ. ܘܠܐ ܡ̈ܚܒܠܐ. ܘܠܐ ܫ̈ܟܒܝ ܥܡ ܕܟܖ̈ܐ. ܘܠܐ
ܓܢܒܐ. ܘܠܐ ܝ̈ܥܢܐ. ܘܠܐ ܪ̈ܘܝܐ. ܘܠܐ ܚ̈ܛܘܦܐ. ܗܠܝܢ ܡܠܟܘܬܐ ܕܐܠܗܐ ܠܐ ܝܪ̈ܬܝܢ
ܢܛ ܠܘܩܒܠ
ܡܚܫ̈ܒܬܐ ܕܡ̈ܩܝܡܢ ܒܠܒܢ ܙܢܝܘܬܐ ܗܝ ܕܡܪܝܐ ܚܙܐ ܟܕ ܡܣܬܪ̈ܢ܀
ܘܠܐ ܢܙܢܐ ܐܝܟܢܐ ܕܡܢܗܘܢ
ܙܢܝܘ: ܘܢܦܠܘ ܒܚܕ ܝܘܡܐ ܥܣܪܝܢ ܘܐܪܒܥܐ ܐ̈ܠܦܝܢ.
ܡܢ ܐܓܪܬ ܕܐ̈ܦܣܝܐ:
ܣ: ܠܘܩܒܠ ܚܘܫ̈ܒܐ
ܛ̈ܢܦܐ ܕܒܙܒܢ ܒ̈ܚܙܘܢܐ ܕܠܠܝܐ ܡܫܠܡܝܢ ܠܢ: ܘܒܙܒܢ ܒܐܝܡܡܐ ܡܫܪܝܢ ܚܙܬܐ ܕܨܠ̈ܡܐ ܕܨܝܪܝܢ
ܒܪܥܝܢܝܢ܀
ܗܕܐ ܕܝܢ ܗܘܝܬܘܢ ܝܕܥܝܢ. ܕܟܠ ܐܢܫ ܕܙܢܝ ܘܛܢܦ ܘܥܠܘܒ ܘܐܝܬܘܗܝ ܦܠܚ
ܦܬܟܪ̈ܐ ܠܝܬ ܠܗ ܝܪܬܘܬܐ ܒܡܠܟܘܬܐ ܕܡܫܝܚܐ ܘܕܐܠܗܐ
ܡܢ ܐܓܪܬܐ ܕܝܥܩܘܒ:
ܣܐ: ܠܘܩܒܠ
ܡܚܫܒܬܐ ܕܣܒܪܐ ܕܡܢ ܐܠܗܐ ܐܬܝܢ ܢܣ̈ܝܘܢܐ ܥܠ ܒܢܝܢܫ̈ܐ܀
ܠܐ ܢܐܡܪ ܐܢܫ ܟܕ ܡܬܢܣܐ: ܕܡܢ
ܐܠܗܐ ܐܬܢܣܝܬ. ܐܠܗܐ ܕܝܢ ܠܐ ܡܢܣܐ ܠܒܪܢܫܐ ܒܒܝܫ̈ܬܐ. ܐܢܫ ܐܢܫ ܕܝܢ ܡܢ ܪܓܬܗ ܗܘ ܡܬܢܣܐ
ܣܒ ܠܘܩܒܠ ܢܦܫܐ ܕܠܐ ܝܕܥܐ: ܕܡܢ ܪ̈ܓܝܓܬܐ ܓܕܫܝܢ ܠܗ ܡܢ ܕܝ̈ܘܐ ܢܣܝ̈ܘܢܐ ܕܟܠܓܢܣ܀
ܡܢ
ܐܝܟܐ ܐܝܬ ܒܟܘܢ ܩܪ̈ܒܐ ܘܡ̈ܨܘܬܐ. ܠܐ ܗܘܐ ܡܢ ܪ̈ܓܝܓܬܐ ܕܡܩܪܒܢ ܒܗ̈ܕܡܝܟܘܢ
ܡܢ ܐܓܪܬܐ
ܕܦܛܪܘܣ
ܠܘܩܒܠ ܡܚܢܫܒܬܐ ܕܢܦܫܐ ܕܠܐ ܡܣܝܒܪܐ ܠܓܫܬܐ ܕܕܝܘܐ ܕܡܢ ܫܠܝ ܢܦܠ ܒܝܢܬ
ܥܛܡ̈ܬܐ: ܘܡܢ ܠܬܚܬ ܡܬܟܪܟ ܒܗܝܢ ܘܡܘܩܕ܀
ܚ̈ܒܝܒܝ܆ ܐܢ ܥܪܨܐ ܥܠܝܟܘܢ ܪܓܬܐ ܐܠܘܨܬܐ
ܠܐ ܬܣܒܪܘܢ ܕܡܕܡ ܢܘܟܪܝ ܓܕܫ ܠܟܘܢ. ܡܛܠ ܕܡܬܢܣܝܘ ܡܬܢܣܝܢ ܐܢܬܘܢ ܐܠܐ ܐܝܟ ܫܘ̈ܬܦܐ
ܕܚܫ̈ܘܗܝ ܕܡܫܝܚܐ ܚܕܘ ܕܐܦ ܒܓܠܝܢܐ ܕܬܫܒܘܚܬܗ ܬܚܕܘܢ
ܣܕ ܠܘܩܒܠ ܡܚܫܒܬܐ ܕܢܦܫܐ
ܕܡܢ ܥܩܬܐ ܘܟܖ̈ܝܘܬܐ ܢܦܠܐ ܘܣܒܪܐ ܠܗ ܕܗܝ ܒܠܚܘܕܝܗܿ ܗܟܢܐ ܛܒ ܩܫܝܐܝܬ(?) ܡܬܢܣܝܐ܀
ܐܬܬܥܝܪܘ ܘܫܗܪܘ. ܘܥܗܕܘ ܕܒܥܠܕܒܒܟܘܢ ܤܛܢܐ ܐܝܟ ܐܪܝܐ ܢܗܡ ܘܡܗܠܟ. ܘܒܥܐ ܕܠܡܢܘ
ܢܒܠܥ ܘܗܘܝܬܘܢ ܡܫܪܪܝܢ ܒܗܝܡܢܘܬܟܘܢ. ܘܗܘܝܬܘܢ ܝܕܥܝܢ ܕܐܦ ܥܠ ܐܚܝ̈ܟܘܢ ܕܒܥܠܡܐ܆
ܣܗ. ܠܘܩܒܠ ܚܘܫܒܐ ܕܡܬܠܚܡ(?) ܠܝ ܘܐܡܪ: ܕܐܝܬ ܠܟ
ܕܬܣܒܘܠ ܡܢ ܕܝ̈ܘܐ ܒܝܫ̈ܬܐ ܕܠܐ ܡܬܡ̈ܠܠܢ ܐܝܠܝܢ ܕܠܐ ܨܒܝܬ ܕܐܪܫܘܡ ܐ̈ܢܝܢ ܒܟܬܒܐ: ܕܠܐ ܐܦ
ܚܦܝܛܘܬܐ ܕܐܝܠܝܢ ܕܟܬܫܝܢ ܐܥܘܟ: ܘܐܦ ܒܐܝܠܝܢ ܕܗܫܐ ܐܬܪܚܩ ܡܢ ܥܠܡܐ ܙܘܥܬܐ ܐܪܡܐ: ܐܦ
ܠܐܢ̈ܫܐ ܒܪܝܪ̈ܐ ܕܐܝܬܝܗܘܢ ܒ̈ܢܝ ܒܥܠܡܐ ܐܟܫܠ. ܫܪܝܪܐܝܬ ܓܝܪ ܣܓܝ ܨ̈ܒܘܬܐ ܕܠܐ ܡܬܡ̈ܠܠܢ.
ܚܙܝܬ ܐܢܘܢ ܠܕܝܘܐ ܕܣܥܪܝܢ. ܐܝܠܝܢ ܕܠܐ ܟܒܪ ܫܠܝܛ ܠܗܘܢ ܠܣܓ̈ܝܐܐ ܡܢ ܒ̈ܢܝܢܫܐ ܕܢܡܠܠܘܢ
ܐ̈ܢܝܢ. ܣܓܝ ܓܝܪ ܐܚܕܢܝ ܬܗܪܐ ܥܠ ܢܓܝܪܘܬ ܪܘܚܐ ܕܡܠܐ̈ܟܐ ܩ̈ܕܝܫܐ: ܕܐܝܟܢܐ ܠܐ ܐܘܩܕܘ ܘܐܣܝܦܘ
ܐܢܘܢ: ܒܫܠܗܒܝܬܐ ܕܢܘܪܐ ܕܠܐ ܕܥܟܐ.܀
ܝܕܝܥ ܗܘ ܡܪܝܐ ܕܢܦܪܘܩ ܠܙܕܝܩܐ ܡܢ ܢܣܝܘܢܐ. ܘܢܛܪ
ܠܥܘ̈ܠܐ ܠܝܘܡܐ ܕܕܝܢܐ ܟܕ ܡܫܬܢܩܝܢ܀
ܒܪܝܟ ܗܘ ܡܪܢ ܝܫܘܥ ܡܫܝܚܐ ܐܠܗܢ: ܕܝܗܒ ܠܢ
ܙܟܘܬܐ ܥܠ ܕܝܘܐ ܕܙܢܝܘܬܐ
ܬܘܒ ܡܐܡܪܐ ܕܬܠܬܐ ܕܥܠ ܪܚܡܬ ܟܣܦܐ:
ܐ: ܡܢ ܒܪܝܬܐ
ܠܘܩܒܠ
ܕܝܘܐ ܕܡܠܟ ܠܝ ܒܬܪܥܝܬܝ. ܕܗܐ ܠܡ ܒܚܠܡܐ ܡܓܪܓ ܐܢܐ ܠܚܕ ܡܢ ܒ̈ܢܝ ܓܢܣܟ: ܐܘ ܠܚܕ
ܡܢ ܥܬܝܪ̈ܐ ܕܢܫܕܪ ܠܟ ܕܗܒܐ܀
ܐܪܝܡܬ ܐܝ̈ܕܝ ܠܘܬ ܐܠܗܐ ܡܪܝܡܐ ܕܩܢܐܝܢܗ ܫܡܝܐ ܘܐܪܥܐܐ: ܐܢ
ܡܢ ܚܘܛܐ ܘܥܕܡܐ ܠܥܪܩܬܐ ܕܡܣܢܐ܆ ܐܢ ܐܣܒ ܡܢ ܟܠ ܡܕܡ ܕܐܝܬ ܠܟ
ܒ ܠܘܩܒܠ ܚܘܫܒܐ
ܕܡܚܘܐ ܠܝ ܡܣܟܢܘܬܐ ܡܪܝܪܬܐ ܘܒܝܫ̈ܬܐ ܕܢܒ̈ܥܢ ܡܢܗ: ܘܡܪܢܝܐ ܠܝ ܕܒܝܘܡܐ ܕܡܣܬܢܩ
ܐܢܐ ܠܐ ܡܫܬܟܚ ܠܝ ܡܥܕܪܢܐ܀
ܐܢ ܢܗܘܐ ܡܪܝܐ ܐܠܗܐ ܥܡܝ: ܘܢܛܪܢܝ ܒܐܘܪܚܐ ܗܕܐ ܕܐܙܠ ܐܢܐ
ܒܗ: ܘܢܬܠ ܠܝ ܠܚܡܐ ܠܡܐܟܠ ܘܡ̈ܝܐ ܠܡܫܬܐ ܘܠܒܘܫܐ ܠܡܠܒܫ: ܘܐܗܦܘܟ ܒܫܠܡܐ
ܠܒܝܬ ܐܒܝ ܢܗܘܐ ܠܝ ܡܪܝܐ ܐܠܗܐ. ܘܟܐܦܐ ܗܕܐ ܕܥܒܕܬ ܩܝܡܬܐ ܬܗܘܐ ܒܝܬܐ ܕܐܠܗܐ
ܡܢ
ܡܦܩܢܐ
ܓ ܠܘܩܒܠ ܚܘܫܒܐ ܕܪܚܡܬ ܟܣܦܐ ܕܥܒܕ ܥܢ ܕܢܨܚܐ ܠܐܒ̈ܗܝܢ: ܥܠ ܕܠܐ ܝܗܒܘ
ܠܝ ܡܢ ܩܢܝܢܗܘܢ܀.
ܕܡܨܚܐ ܠܐܒܘܗܝ ܘܠܐܡܗ ܡܬܩܛܠܘ ܢܬܩܛܠ
ܠܘܩܒܠ ܚܘܫܒܐ ܐܝܢܐ
ܕܡܛܠ ܪܚܡܬ ܟܣܦܐ: ܡܓܪܐ ܠܢ ܕܢܥܝܩܝܘܗܝ ܒܝܕ ܝܘܩܪܐ ܕܥܡ̈ܠܐ ܣ̈ܓܝܐܐ: ܠܐܝܢܐ ܕܗܫܐ
ܐܬܬܠܡܕ܀
ܠܥܡܘܪܐ ܠܐ ܬܥܝܩܘܢ. ܡܛܠ ܕܐܢܬܘܢ ܝܕܥܝܢ ܐܢܬܘܢ ܡܢ ܢܦܫܟܘܢ ܢܦܫܐ ܕܥܡܘܪܐ
ܡܛܠ ܕܥܡܘܪ̈ܐ ܗܘܝܬܘܢ ܒܐܪܥܐ ܕܡܨܪܝܢ.
ܡܢ ܣܦܪܐ ܕܟ̈ܗܢܐ:
ܗ: ܠܘܩܒܠ ܚܘܫܒܐ ܕܪܚܡܬ
ܟܣܦܐ ܕܐܚܕ ܪ̈ܚܡܐ ܡܢ ܐܝܢܐ ܕܫܐܠ ܡܢܗ ܣܘܢܩܢܐ. ܘܠܢ ܗܘ ܒܠܚܘܕܝܢ ܡܠܟ ܠܢ ܕܢܣܝܡ.܀
ܐܚܒ ܠܩܪܝܒܟ ܐܝܟ ܢܦܫܟ ܐܢܐ ܐܢܐ ܡܪܝܐ ܐܠܗܟ.
ܘ ܠܘܩܒܠ ܚܘܫܒܐ ܕܪܚܡܬ ܟܣܦܐ: ܐܝܢܐ
ܕܥܒܕ ܠܢ ܕܢܟܠܐ ܠܐܚܐ ܕܢܩܪܐ ܒܟܬܒܐ: ܐܘ ܕܢܐܠܦ ܝܘܠܦܢܐ. ܘܡܓܪܐ ܠܢ ܕܡܛܠ ܝܘܬܪܢܐ ܥܒܘܪܐ
ܒܥܡܠܐ ܘܒܬܥܫܐ ܢܪܡܝܘܗܝ:܀
ܠܐ ܬܥܠܒܘܢ ܐܢܫ ܠܐܚܘܗܝ ܘܕܚܠܘ ܡܢ ܐܠܗܐ. ܡܛܠ ܕܐܢܐ ܐܢܐ
ܡܪܝܐ ܐܠܗܟ
ܠܘܩܒܠ ܚܘܫܒܐ ܕܪܚܡܬ ܟܣܦܐ ܕܡܗܡܐ ܒܐܝܢܐ ܕܐܬܟܪܗ ܟܘܪܗܢܐ ܢܓܝܪܐ: ܘܡܢ
ܡܣܟܢܘܬܐ ܬܘܒ ܣܓܝ ܡܬܐܠܨ܀.
ܐܢ ܐܬܡܣܟܢ ܐܚܘܟ ܘܐܪܟܢ ܐܝܕܗ ܥܡܟ܆ ܠܐ ܬܐܚܕܘܗܝ ܐܝܟ
ܬܘܬܒܐ ܘܐܝܟ ܥܡܘܪܐ ܘܢܐܚܐ ܥܡܟ
ܚ ܠܘܩܒܠ ܚܘܫܒܐ ܕܝܬܝܪ ܡܢ ܚܝܠܐ ܬܒܥ ܡܢ ܐܚܘܗܝ
ܦܘܠܚܢ ܐܝ̈ܕܝܐ܀
ܓܒܪ ܒܐܝܝܘܗܝ ܦܘܠܚܢܐ ܩܫܝܐ ܠܐ ܬܦܠܚܘܢ.
ܡܢ ܬܢܝܢ ܢܡܘܣܐ:
ܛ: ܠܘܩܒܠ
ܚܘܫܒܐ ܕܠܐ ܫܒܩ ܕܢܬܠ ܠܐܚܐ ܕܣܢܝܩ: ܘܒܥܐ ܡܕܡ ܕܢܐܙܦ ܡܢܢ܀
ܠܐ ܬܐܚܘܕ ܐܝܕܟ ܡܢ ܡܣܟܢܐ.
ܐܠܐ ܦܬܚ ܠܗ ܐܝܕܟ ܘܐܘܙܦܝܗܝ ܡܕܡ ܕܚܣܝܪ ܠܗ
ܝ ܠܘܩܒܠ ܚܘܫܒܐ ܕܒܥܐ ܕܢܛܪ ܠܗ
ܐܘܨܪ̈ܐ: ܘܠܐܢܫ ܡܢ ܐܢ̈ܝܐ ܠܐ ܨܒܐ ܕܢܢܝܚ ܡܢܗܘܢ܀.
ܠܝܛ ܣܠܟ ܘܐܨܘܬܟ. ܠܝܛܝܢ ܦܐܪ̈ܐ ܕܐܪܥܟ
ܡܢ
ܫܒܛܐ
ܝܐ ܠܘܩܒܠ ܚܘܫܒܐ ܕܡܝܬܪ ܠܥܘܬܪܐ ܛܒ ܡܢ ܡܣܟܢܘܬܐ܀
ܠܐ ܗܘܐ ܛܒ ܒܘܥܪܗ
ܕܐܦܪܝܡ. ܡܢ ܩܛܦܗ ܕܐܝܙܪܥܠ
ܡܢ ܣܦܪ ܡ̈ܠܦܐ
ܝܒ: ܠܘܩܒܠ ܡܚܫܒܬܐ ܕܢܦܫܐ ܕܡܪܚܡܐ
ܥܠ ܡ̈ܣܟܢܐ: ܘܥܠ ܢܟ̈ܣܐ ܕܡܦܩܐ ܥܠܝܗܘܢ ܗܦܟܐ ܡܚܕܐ ܘܡܬܬܘܝܐ܀
ܢܗܘܘܢ ܠܒ̈ܘܬܟܘܢ
ܫܠܡܝܢ ܠܘܬ ܡܪܝܐ ܐܠܗܐ܆ ܘܙܕܝܩܐܝܬ ܗܠܟܘ ܒܢܡ̈ܘܣܘܗܝ. ܘܛܪܘ ܦܘܩ̈ܕܢܘܗܝ ܐܝܟ ܕܝܘܡܢܐ
ܝܓ ܠܘܩܒܠ ܢܦܫܐ ܕܡܝܬܘܬܗ ܕܝܫܘܥ ܒܥܝܐ ܕܬܫܟܚ: ܘܥܕܟܝܠ ܡܕܡ ܡܢ ܢܟ̈ܣܐ ܩܢܝܐ:
ܘܐܙܠ ܡܢ ܬܡܢ ܐܠܝܐ܆ ܘܐܫܟܚ ܠܐܠܝܫܥ ܒܪ ܫܦܛ ܕܕܒܪ ܦܕܢܐ. ܘܬܪܬܥܣܖ̈ܐ ܦܕ̈ܢܝܢ ܩܕܡܘܗܝ.
ܘܗܘ ܚܕ ܡܢ ܬܪܥܣܪ̈ ܗܘܿܐ. ܘܥܒܪ ܥܠܘܗܝ ܐܠܝܐ܆ ܘܫܕܐ ܡܥܦܪܗ ܥܠܘܗܝ. ܘܫܒܩܗ ܠܦܕܢܐ
ܕܬܘܪ̈ܐ܆ ܘܪܗܛ ܒܬܪ ܐܠܝܐ܆ ܐܡܪ ܠܗ. ܐܙܠ ܐܫܘܩ..ܒܝ ܘܠܐܡܝ. ܘܐܡܪ ܗܦܘܟ ܙܠ ܠܟ.
ܡܢܐ ܓܝܪ ܥܒܕܬ ܠܟ. ܘܗܦܟ ܡܢ ܒܬܪܗ܆ ܘܢܣܒܗ ܠܦܕܢܐ ܕܬܘܪ̈ܐ ܘܩܛܠ ܐܢܘܢ. ܘܒܡܐܢ̈ܐ
ܕܬܘܪܐ ܒܫܠ ܒܣܪܐ. ܘܝܗܒ ܠܥܡܐ ܘܐܟܠ. ܘܩܡ ܐܙܠ ܒܬܪ ܐܠܝܐ ܢܒܝܐ ܘܫܡܫܗ
ܝܕ ܠܘܩܒܠ
ܢܦܫܐ ܕܚܝܣܐ ܥܠ ܟܣܦܐ: ܘܥܠ ܫܪܟܐ ܕܨ̈ܒܘܬܐ ܕܣܝܡ̈ܢ ܠܗ: ܘܠܐ ܨܒܝܐ ܕܬܦܩ ܡܢܗܝܢ ܠܐܚܵܐ
ܕܐܬܝܢ܀
ܘܐܡܪ ܐܠܝܫܥ ܠܬܠܡܝܕܗ. ܬܦܝ ܩܕܣܐ ܪܒܐ܆ ܘܒܫܠ ܒܘܫܠܐ ܠܒܢܝ ܢܒ̈ܝܐ
ܝܗ ܥܘܩܒܠ
ܢܦܫܐ ܕܩܒܠܬ ܕܗܒܐ ܕܐܫܬܕܪ ܐܝܟ ܕܠܣܘܥܪܢܐ ܕܐܚ̈ܐ: ܘܡܬܪܓܪܓܐ ܕܬܦܩܝܘܗܝ ܐܝܟ ܨܒܝܢܐ
ܕܪ̈ܓܝܓܬܗ: ܘܛܥܝܐ ܓܪܒܗ ܕܓܚܙܝ. ܐܝܠܝܢ ܕܝܢ ܕܩܪܝܢ ܢܣܬܟܠܘܢ. ܕܐܝܟܢܐ ܐܠܝܫܠ ܢܒܝܐ:
ܓܠܝܗܝ ܠܚܘܫܒܐ ܕܪܚܡܬ ܟܣܦܐ: ܟܕ ܠܘܩܕܡ ܠܚܫ̈ܐ ܒܝ̈ܫܐ ܣܡ: ܘܒܬܪ ܗܠܝܢ ܫܪܟܐ
ܕܬܪ̈ܥܝܬܐ ܕܚܕܪ̈ܝܗܝܢ ܟ̈ܢܫܢ: ܕܡܢܗܝܢ ܡܬܝܠܕ ܙܒܢܐ ܢܓܝܪܐ ܕܚܘܫ̈ܒܐ: ܐܝܠܝܢ ܕܡܥܟܪܝܢ ܠܗ
ܠܪܥܝܢܐ ܒܥ̈ܢܝܢܐ ܒܝ̈ܫܐ ܘܡܓܪܒܝܢ ܠܗ܀
ܘܐܡܪ ܠܗ ܐܠܝܫܥ. ܐܝܡܟܐ ܓܚܙܝ. ܘܐܡܪ. ܠܐ ܐܙܠ
ܥܒܕܟ ܠܐ ܠܟܐ ܘܠܐ ܠܟܐ. ܐܡܪ ܠܗ. ܠܒܝ ܚܘܝܢܝ ܟܕ ܢܚܬ ܓܒܪܐ ܡܢ ܡܪܟܒܬܗ ܠܐܘܪܠܟ.
ܗܢܘ ܙܒܢܐ ܕܬܩܢܐ ܠܟ ܟܣܦܐ: ܘܬܩܢܐ ܠܟ ܠܒܘܫ̈ܐ ܘܙܝ̈ܬܐ ܘܟܪ̈ܡܐ: ܘܥ̈ܢܐ ܘܬܘܪ̈ܐ ܘܥܒ̈ܕܐ
ܘܐܡ̈ܪܗܬܐ܆ ܓܪܒܗ ܕܢܥܡܢ ܢܕܒܩ ܒܟ ܘܒܙܪܥܟ ܠܥܠܡ. ܘܢܦܩ ܡܢ ܩܕܡܘܗܝ ܟܕ ܓܪܒ ܐܝܟ
ܬܠܓܐ.
ܡܢ ܕܘܝܕ ܢܒܝܐ:
ܝܘ ܠܘܬ ܡܪܝܐ ܥܠ ܚܘܫܒܐ ܕܪܚܡܬ ܟܣܦܐ ܕܡܥܗܕ ܟܕ ܡܪܢܐ ܠܝ:
ܕܗܐ ܠܡ ܢܦܩܬ ܠܟ ܡܢ ܝܪܬܘܬܐ ܕܐܒ̈ܗܝܟ.܀.
ܡܪܝܐ ܡܢܬܐ ܕܝܪܬܘܬܝ ܘܕܟܣܝ. ܐܢܬ ܗܘ ܡܦܢܐ
ܠܝ ܝܪܬܘܬܝ
ܝܙ ܠܘܩܒܠ ܚ̈ܘܫܒܐ ܕܡܚܣܕܝܢ ܠܢ ܐܝܟ ܡܛܠ ܕܫܒܩܘܢ ܐܒ̈ܗܝܢ: ܘܠܐ ܡܫܕܪܝܢ
ܠܢ ܕܗܒܐ ܐܝܟ ܕܢܡܠܐ ܣܘܢܩܢܢ܀
ܡܛܠ ܕܐܒܝ ܘܐܡܝ ܫܒܩܘܢܝ. ܘܡܪܐ ܚܡܠܢܝ
ܝܚ ܠܘܩܒܠ
ܚܘܫ̈ܒܐ ܕܡܪܢܝܢ ܠܢ: ܕܗܐ ܠܡ ܐܚ̈ܝܢ ܕܐܝܬܝܗܘܢ ܒܥܠܡܐ ܥܬܝܪ̈ܝܢ: ܘܡܫܬܒܚܝܢ ܡܢ ܟܠܢܫ
ܡܛܠ ܥܘܬܪܗܘܢ܀
ܒܡܪܝܐ ܬܫܬܒܗܪ ܢܦܫܝ. ܢܫܡܥܘܢ ܡ̈ܣܟܢܐ ܘܢܚܕܘܢ.
ܠܘܩܒܠ ܢܦܫܐ
ܕܠܐ ܚܟܡܐ ܕܕܝܢܐ ܐܝܬ ܠܢ ܥܡ ܣܛܢܐ: ܐܢ ܒܘܠܝܬܐ ܠܐ ܢܦܪܢܣ ܢܟ̈ܣܐ ܕܐܬܝܗܒ ܠܢ ܡܢ ܐܠܗܐ܀
ܡܣܟܐ ܪܫܝܥܐ ܠܙܕܝܩܐ ܘܒܥܐ ܠܡܩܛܠܗ ܘܡܪܝܐ ܠܐ ܢܫܒܩܝܘܗܝ ܒܐܝ̈ܕܘܗܝ. ܐܠܐ ܢܚܝܒܘܗܝ
ܒܕܝܢܐ.
ܟܐ ܠܘܩܒܠ ܢܦܫܐ ܕܐܚܝܕܐ ܒܥܠܡܐ ܘܡܚܒܐ ܠܥܒܘܪ̈ܝܬܐ: ܘܒܥܝܐ ܒܝܬܐ ܘܢ̈ܟܣܐ
ܕܐܒ̈ܗܝܗ܀
ܫܡܥܝ ܒܪܬܝ ܘܚܙܝ ܘܨܠܝ ܐܕܢܟܝ ܘܛܥܝ ܥܡܟܝ ܘܒܝܬ ܐܒܘܟܝ. ܕܢܬܪܓܪܓ
ܡܠܟܐ ܠܫܘܦܪܟܝ
ܟܒ ܠܘܩܒܠ ܚܘܫ̈ܒܐ ܕܪܢܝܢ ܒ̈ܢܟܣܐ: ܘܠܐ ܚܝܪܝܢ ܒܟܐܒܐ ܡܕܝܒܐ ܕܥܘܬܪܐ܀
ܩܢܝܢܐ ܡܐ ܕܣܥܐ ܠܐ ܢܚܕܐ ܒܗ ܠܒܥܘܢ
ܟܓ ܠܘܩܒܠ ܚܘܫܒܐ ܕܒܝܬܐ ܫܒܝܚܐ ܕܐܒ̈ܗܝܢ
ܡܚܘܐ ܠܢ: ܘܠܩܠܝܬܐ ܙܥܘܪܬܐ ܡܣܢܐ ܠܗ ܒ̈ܥܝܢܝܢ܀
ܨܒܝܬ ܠܡܥܡܪ ܒܒܝܬܗ ܕܐܠܗܐ܆ ܛܒ
ܡܢ ܕܠܡܥܡܪ ܒܡܫܟܢܐ ܕܪ̈ܫܝܥܐ
ܟܕ ܠܘܩܒܠ ܚܘܫܒܐ ܕܣܢܝܩ ܥܠ ܟܣܦܐ: ܐܟ ܡܛܠ
ܨ̈ܒܘܬܐ ܕܡܬ̈ܒܥܝܢ: ܘܦܣܩܗ ܣܒܪܗ ܡܢ ܛܝܒܘܬܐ ܕܐܠܗܐ܀
ܘܡܪܝܐ ܠܐ ܢܟܠܐ ܛܒ̈ܬܗ. ܡܢ ܐܝܠܝܢ
ܕܡܗܠܟܝܢ ܒܬܡܝܡܘܬܐ
ܟܗ ܠܘܬ ܡܪܝܐ ܥܠ ܚܘܫܒܐ ܕܪܚܡܬ ܟܣܦܐ ܕܐܓܪ ܒܢ: ܘܡܪܢܐ ܠܗ
ܠܪܥܝܢܢ: ܐܘ ܒܥܘܗܕܢܐ ܕܢܟ̈ܣܐ ܕܐܦܩܢܢ: ܐܘ ܒܚܦܝܛܘܬܐ ܕܡܬܚܦܛܝܢܢ: ܕܢܩܢܐ ܨ̈ܒܘܬܐ ܐܝܠܝܢ
ܕܥܕܟܝܠ ܠܐ ܡܬ̈ܚܙܝܢ: ܐܘ ܒܢܘܛܪܐ ܘܙܘܗܪܐ ܕܐܝܠܝܢ ܕܗܫܐ ܐܝܬܝܗܝܢ.܀
ܐܦܢܐ ܠܒܝ ܠܤܗܕܘܬܟ
ܘܠܐ ܠܡܬ̈ܠܐ ܐܘܟܝܬ ܠܥܠܘܒܘܬܐ.
ܟܘ ܠܘܩܒܠ ܚܘܫܒܐ ܕܪܚܡܝܢ ܟܣܦܐ: ܘܨܝܪ̈ܝܢ ܒܝ ܪܚܡܬ
ܐܟ̈ܣܢܝܐ: ܘܠܢܦܫܝ ܐܠܨܝܢ ܠܗ ܕܬܥܠܘܒ ܠܐܚܪ̈ܢܐ: ܘܡܚܦܛܝܢ ܠܗ ܬܘܒ ܕܚܠܦ ܝܘܬܪ̈ܢܐ ܥܒܘܖ̈ܐ
ܬܬܕܝܢ܀
ܒܐܘܪܚܐ ܕܗ̈ܠܟܬܝ ܛܡܪܘ ܠܝ ܫܒܗܪ̈ܢܐ ܦܚ̈ܐ. ܘܚ̈ܒܠܐ ܕܡܨ̈ܝܕܬܗܘܢ ܦܪܣܘ ܥܠ
ܟܙ ܠܘܩܒܠ ܚܘܫܒܐ ܕܪܚܡܬ ܟܣܦܐ ܕܡܬܢܒܐ ܠܢ:
ܕܒܡܣܟܢܘܬܐ ܡܪܝܪܬܐ ܙܒܥܐ ܣܓܝܐܐ ܐܝܬ ܠܢ ܕܢܚܐ܀
ܒܪܢܫܐ ܐܠܗܓܐ ܕܡܐ. ܘܝܘܡ̈ܬܗ ܥܒܪܝܢ
ܐܝܟ ܛܠܠܐ.
ܡܢ ܡ̈ܬܠܘܗܝ ܢܫܠܡܘܢ:
ܟܙ: ܠܘܩܒܠ ܢܦܫܐ ܕܡܛܠ ܚܫܐ ܕܪܚܡܬ ܟܣܦܐ:
ܠܘܬ ܡܪܚܡܢܘܬܐ ܠܡܚܣܢ ܡܫܬܘܫܛܐ܀
ܛܝܒܘܬܐ ܘܩܘܫܬܐ ܠܐ ܢܫܒܩܘܢܟ. ܐܠܐ ܩܛܘܪ ܐܢܘܢ
ܒܨܘܪܟ܆ ܘܟܬܘܒ ܐܢܘܢ ܥܠ ܠܘܚ̈ܐ ܕܠܒܟ. ܕܬܫܟܚ ܪ̈ܚܡܐ ܘܛܝܒܘܬܐ ܩܕܡ ܐܠܗܐ ܘܩܕܡ
ܒ̈ܢܝܢܫܐ
ܟܚ ܠܘܩܒܠ ܚܘܫܒܐ ܕܪܚܡܬ ܟܣܦܐ ܕܟܠܐ ܠܢ ܡܢ ܕܢܣܥܘܪ ܫܦܝܪ̈ܬܐ: ܘܡܪܢܐ ܠܢ
ܒܡܣܟܢܘܬܐ ܘܒܡܚܝܠܘܬ ܦܓܪܐ܀
ܠܐ ܬܬܟܠܐ ܠܡܥܒܕ ܕܫܦܝܪ ܟܡܐ ܕܣܦܩܐ ܒܐܝ̈ܕܝܟ ܠܡܥܒܕ.
ܘܟܕ ܐܝܬ ܠܟ. ܠܐ ܬܐܡܪ ܠܗ ܠܚܒܪܟ ܕܙܠ: ܘܠܡܚܪ ܬܐ ܘܐܬܠ ܠܟ
ܟܛ ܠܘܩܒܠ ܚܘܫܒܐ
ܕܪܚܡܬ ܟܣܦܐ: ܐܝܢܐ ܕܡܛܠ ܪܓܬܐ ܕܢ̈ܟܣܐ ܒܐܠܝܐ ܘܒܐܝܡܡܐ ܠܘܬ ܦܘܠܚܢܐ ܕܐܝ̈ܕܝܐ ܪܕܦ
ܠܢ: ܘܡܢ ܩܪܝܢܐ ܕܟܬ̈ܒܐ ܩ̈ܕܝܫܐ ܓܠܙ ܠܢ ܘܡܢ ܣܘܥܪ̈ܢܐ ܘܡܢ ܬܫܡܫܬܐ ܕܟܪ̈ܝܗܐ ܟܠܐ ܠܢ.܀
ܠܐ
ܡܗܢܐ ܥܘܬܪܐ ܒܝܘܡܐ ܕܪܘܓܙܐ. ܙܕܝܩܘܬܐ ܕܝܢ ܡܦܨܝܐ ܡܢ ܡܘܬܐ
ܠ ܠܘܩܒܠ ܚܘܫܒܐ ܕܫܚܩ
ܠܢ: ܥܠ ܕܕܠܐ ܚܘܣܢ ܡܒܕܪܝܢܢ ܢܟܣܝܢ܀
ܦܘܪܩܢܗ ܕܢܦܫܗ ܕܓܒܪܐ ܥܘܬܪܗ. ܘܡܣܟܢܐ ܠܐ
ܡܩܒܠ ܟܐܬܐ
ܠܐ ܠܘܩܒܠ ܚܘܫܒܐ ܕܒܝܕ ܐܚܕ ܪ̈ܚܡܐ: ܡܝܩܪ ܠܟܣܦܐ ܛܒ ܡܢ ܚܟܡܬܗ
ܕܐܠܗܐ܀
ܕܩܢܐ ܚܟܡܬܐ ܛܒܐ ܗܝ ܠܗ ܡܢ ܕܗܒܐ. ܘܕܩܢܐ ܣܘܟܠܐ ܡܝܬܪ ܗܘ ܠܗ ܡܢ ܣܐܡܐ
ܠܒ ܠܘܩܒܠ ܚܘܫܒܐ ܕܪܝܚܡܬ ܟܣܦܐ: ܕܒܥܐ ܢܝܚܐ ܘܫܘܒܚܐ ܡܢ ܥܘܬܪܐ܀
ܡܝܬܪ ܗܘ ܫܡܐ
ܡܢ ܥܘܬܪܐ ܣܓܝܐܐ. ܘܛܒܐ ܡܪܚܡܢܘܬܐ ܡܢ ܕܗܒܐ ܘܡܢ ܣܐܡܐ.
ܠܓ ܠܘܩܒܠ ܪܥܝܢܐ ܕܒܝܕ
ܡܪܚܡܢܘܬܐ ܡܫܬܪܐ ܡܢ ܚܘܫ̈ܒܐ ܕܪܚܡܬ ܟܣܦܐ: ܘܒܝܕ ܟܡܝܪܘܬܐ ܬܘܒ ܘܪܛܢܐ: ܬܘܒ ܡܬܐܣܪ
ܒܗܘܢ. ܗܠܝܢ ܕܝܢ ܓܕ̈ܫܐ ܡܘܕܥܝܢ ܥܠ ܢܦܫܐ܆ ܕܠܐ ܚܟܡܐ ܚ̈ܫܐ ܕܚܘܫ̈ܒܐ. ܘܠܐ ܝܕܥܐ ܦܟܖ̈ܐ
ܕܟܝܢܐ ܡܠܝܠܐ: ܕܡܬܚܦܛ ܠܘܬ ܝܕܥܬܗ ܕܐܠܗܐ.܀.
ܠܝܗܘܒܐ ܓܝܪ ܚܕܝܐ ܪܚܡ ܐܠܗܐ. ܦܐܖ̈ܐ
ܕܝܢ ܕܥܒ̈ܕܘܗܝ ܢܫܠܡ
ܡܢ ܩܘܗܠܬ
ܠܕ ܠܘܩܒܠ ܚܘܫ̈ܒܐ ܕܡܝܬܝܢ ܠܢ ܥܘܗܕܢܐ ܕܒܝܬܐ܂
ܘܕܩܢܝܢܐ ܘܕܗܘܦܟܐ ܕܒܗܘܢ܀
ܗܒܠ ܗ̈ܒܠܝܢ ܐܡܪ ܩܘܗܠܬ ܗܒܠ ܗ̈ܒܠܝܢ ܘܟܠܡܕܡ ܗܒܠܐ
ܠܗ
ܠܘܩܒܠ ܚܘܫܒܐ ܕܪܚܡܬ ܟܣܦܐ: ܐܝܢܐ ܕܐܦ ܨ̈ܒܘܬܐ ܕܣ̈ܝܡܢ ܠܓܘ ܒܥܐ ܕܢܛܪ. ܘܐܦ
ܐܚܪ̈ܢܝܬܐ ܡܢ ܠܒܪ ܒܥܐ ܕܢܟܢܫ: ܐܝܟ ܕܡܛܠ ܢܝܚܐ ܕܐܚ̈ܐ: ܘܐܝܟ ܕܡܛܠ ܩ̈ܢܝܢܐ ܕܟܬ̈ܒܝ ܩܘܕܫܐ܀
ܕܪܚܡ ܟܣܦܐ ܠܐ ܢܣܒܥ ܟܣܦܐ. ܘܕܪܚܡ ܡܡܘܢܐ ܠܐ ܢܩܕܝܘܗܝ ܐܦ ܗܢܐ ܗܒܠܐ
ܡܢ ܐܝܘܒ:
ܠܘ:
ܠܘܩܒܠ ܚܘܫܒܐ ܕܨܐܪ ܩܕܡ ܥ̈ܝܢܝܢ ܚܘܣܪܢܐ ܕܢܟ̈ܣܐ ܘܕܩ̈ܢܝܢܐ: ܕܐܝܬ ܗܘܐ ܢܝܚܐ ܪܒܐ ܦܓܪܢܝܐ
ܠܐܝܘܒ܀
ܡܪܝܐ ܝܗܒ ܘܡܪܝܐ ܢܣܒ. ܢܗܘܐ ܫܡܗ ܕܡܪܝܐ ܡܒܪܟ
ܡܢ ܐܫܥܝܐ:
ܠܙ: ܠܘܩܒܠ
ܚܘܫܒܐ ܕܪܚܡܬ ܟܣܦܐ: ܐܝܢܐ ܕܡܠܟ ܠܢ ܕܢܚܡܘܠ ܡܐܟ̈ܠܬܐ ܘܢܚ̈ܬܐ: ܘܠܐܚ̈ܐ ܐܝܠܝܢ ܕܣܢܝܩܝܢ
ܠܐ ܢܬܠ ܡܢܗܘܢ܀
ܩܨܝ ܠܚܡܟ ܠܟܦܢܐ. ܘܠܐܟܣܢܝܐ ܐܥܠ ܠܒܝܬܟ. ܟܕ ܬܚܙܐ ܥܪܛܠܝܐ
ܘܬܟܣܝܘܗܝ. ܘܠܐ ܬܗܡܐ ܡܢ ܒܪ ܒܣܪܟ
ܡܢ ܐܘܢܓܠܝܘܢ ܕܡܬܝ.
ܠܚ: ܠܘܩܒܠ ܢܦܫܐ ܕܠܐ
ܡܬܪܟܢܐ ܠܘܬ ܡܪܚܡܢܘܬܐ: ܟܕ ܚܙܝܐ ܡܣܟܢܘܬܐ ܕܐܚ̈ܐ܀
ܛܘܒܝܗܘܢ ܠܡܖ̈ܚܡܢܐ܆ ܕܥܠܝܗܘܢ
ܢܗܘܘܢ ܪ̈ܚܡܐ
ܠܛ ܠܘܩܒܠ ܢܦܫܐ ܕܨܒܝܐ ܕܚܠܦ ܢܟ̈ܣܐ ܘܩ̈ܢܝܢܐ ܕܐܬܚܛܦܘ ܡܢܗ ܬܥܘܠ
ܒܕܝܢܐ: ܘܠܐ ܝܕܥܐ ܕܠܐ ܡܫܬܪܝܐ ܡܢ ܦܟܖ̈ܐ ܕܚܘܫ̈ܒܐ: ܐܝܠܝܢ ܕܗܘܝܢ ܡܛܠ ܡܕܡ ܕܐܬܚܛܦܘ ܡܢܗ:
ܐܠܐ ܐܢ ܒܚܘܒܐ ܬܘܣܦ ܐܦ ܟܘܬܝܢܗ܀
ܡܢ ܕܨܒܐ ܕܢܕܘܢ ܥܡܟ ܘܢܫܩܘܠ ܟܘܬܝܢܟ܆ ܫܒܘܩ ܠܗ
ܢܣܒ ܐܦ ܡܪܛܘܛܟ
ܡ ܠܘܩܒܠ ܚܘܫܒܐ ܕܟܠܐ ܠܢ ܕܢܘܙܦ ܠܐܚܐ: ܐܝܟ ܕܡܛܠ ܕܠܐ ܠܡ ܡܫܟܚ
ܕܢܦܪܘܥ܀
ܡܢ ܕܫܐܠ ܠܟ ܗܒ ܠܗ. ܘܡܢ ܕܨܒܐ ܕܢܐܙܦ ܡܢܟ ܠܐ ܬܟܠܝܘܗܝ
ܡܐ ܠܘܩܒܠ
ܚܘܫ̈ܒܐ ܕܠܓܘ ܕܨܒܝܢ ܕܢܐܚܕܘܢ ܢܟ̈ܣܐ: ܘܒܝܕ ܨܦܬܐ ܕܥܠܝܗܘܢ ܢܬܛܠܩܘܢ ܪܥܝܢܐ܀
ܠܐ ܬܣܝܡܘܢ
ܠܟܘܢ ܣܝܡ̈ܬܐ ܒܐܪܥܐ: ܐܬܪ ܕܣܣܐ ܘܐܟܠܐ ܡܚܒܠܝܢ: ܘܐܝܟܐ ܕܓܢ̈ܒܐ ܦܠܫܝܢ ܘܓܢܒܝܢ
ܡܒ ܠܘܩܒܠ ܕܝܘܐ ܕܐܡܪ ܠܢ: ܕܡܫܟܚܐ ܗܝ ܨܒܘܬܐ ܕܟܕ ܩܢܐ ܐܢܫ ܢܟ̈ܣܐ ܢܦܠܘܚ ܠܡܪܝܐ܀
ܠܐ ܐܢܫ ܡܫܟܚ ܠܬܪ̈ܝܢ ܡܪ̈ܘܢ ܠܡܦܠܚ. ܐܘ ܓܝܪ ܠܚܕ ܢܤܢܐ ܘܠܐܚܪܢܐ ܢܪܚܡ. ܐܘ ܠܚܕ ܢܝܩܪ
ܘܠܐܚܪܢܐ ܢܫܘܛ. ܠܐ ܡܫܟܚܝܢ ܐܢܬܘܢ ܠܡܦܠܚ ܠܐܠܗܐ ܘܠܡܡܘܢܐ
ܡܓ ܠܘܩܒܠ ܢܦܫܐ ܕܒܙܒܢܐ
ܕܨܪܝܟܘܬܐ: ܨܒܝܐ ܕܡܢ ܐܚܪ̈ܢܐ ܬܡܠܐ ܣܘܢܩܢܗ. ܗܝ ܕܝܢ ܠܐ ܨܒܝܐ ܕܠܐܚܪ̈ܢܐ ܗܢܘܢ ܕܐܠܝܨܝܢ ܘܚܤܝܪ
ܠܗܘܢ ܬܢܝܚ܀
ܟܠ ܡܐ ܕܨܒܝܢ ܐܢܬܘܢ ܕܢܥܒܕܘܢ ܠܟܘܢ ܒܢܝܢܫ̈ܐ܆ ܗܟܢܐ ܐܦ ܐܢܬܘܢ ܥܒܕܘ
ܠܗܘܢ. ܗܢܘ ܓܝܪ ܢܡܘܤܐ ܘܢܒ̈ܝܐ
ܡܢ ܐܘܢܓܠܝܘܢ ܕܡܪܩܘܣ:
ܡܕ: ܠܘܩܒܠ ܚܘܫܒܐ ܕܠܐ
ܫܒܩ ܠܢ ܕܢܦܠܓ ܢܟ̈ܣܝܢ. ܟܕ ܥ̈ܠܠܬܐ ܫܦܝܪ̈ܬܐ ܨܐܪ ܩܕܡ ܥ̈ܝܢܝܢ܀.
ܚܙܝ ܟܡܐ ܥܛܠܐ ܠܐܝܠܝܢ
ܕܐܝܬ ܠܗܘܢ ܢܟ̈ܣܐ: ܕܢܥܠܘܢ ܠܡܠܟܘܬܗ ܕܐܠܗܐ ܫܠܝܚܐ
ܐܓܪܬܐ ܕܪ̈ܗܘܡܝܐ.
ܡܗ. ܠܘܩܒܠ
ܪ̈ܥܝܢܐ ܕܗܐ ܠܡ ܙܕܩ̈ܬܐ ܥܒܕ܆ ܘܨܐܪ ܩܕܡܘܗܝ ܕܡܘܬܐ ܕܬܘܟܐ ܘܕܪܛܢܐ ܘܕܐܦ̈ܐ ܟܡܝܪ̈ܬܐ: ܐܝܠܝܢ
ܕܢܘܟܪ̈ܝܢ ܐܢ̈ܝܢ ܡܢ ܚܘܒܐ ܕܦܘܠܚܢ ܦܘܩ̈ܕܢܐ: ܐܝܢܐ ܕܠܐ ܨܒܐ ܕܢܫܬܚܩ ܡܢ ܚܫ̈ܐ ܕܐܝܟ ܗܠܝܢ:
ܡܛܠ ܝܕܥܬܐ ܩܕܝܫܬܐ ܐܝܕܐ ܕܓܕܫܐ ܠܗ ܠܪܥܝܢܐ: ܐܡܬܝ ܕܗܘܐ ܥܪܛ̈ܠܝ ܡܢ ܚܫ̈ܐ ܤ̈ܢܝܐ܀
ܘܕܡܪܚܡ ܒܦܨܝܚܘܬܐ. ܘܠܐ ܗܘܝܬܘܢ ܫܓܝܫܝܢ ܒܚܘܒܟܘܢ
ܐܓܪܬܐ ܕܬܪ̈ܬܝܢ ܕܠܘܬ ܩܘܪ̈ܢܬܝܐ:
ܡܘ ܠܘܩܒܠ ܚܘܫܒܐ ܕܪܚܡܬ ܟܣܦܐ: ܕܝܗܒ ܛܘܒܐ ܠܐܚ̈ܝܢ ܦܓܪ̈ܢܝܐ: ܘܠܒ̈ܢܝ ܓܢܣܢ
ܕܐܝܬܝܗܘܢ ܒܥܠܡܐ: ܐܝܟ ܡܛܠ ܕܩܢܝܢ ܟܤܦܐ ܕܡܬܚܙܐ܀
ܟܠܡܕܡ ܓܝܪ ܕܡܬܚܙܐ ܕܫܥܬܐ
ܗܘ. ܘܗܘ ܡܕܡ ܕܠܐ ܡܬܚܙܐ ܕܠܥܠܡ ܗܘ.
ܡܙ ܠܘܩܒܠ ܚܘܫܒܐ ܕܚܐܣ ܥܠ ܡܕܡ ܕܝܗܒ
ܠܣܢܝ̈ܩܐ. ܒܝܕ ܓܝܪ ܕܝܗܒ ܙܕܩ̈ܬܐ܆ ܫܪܐ ܠܗ ܠܪܥܝܢܐ ܡܢ ܚܘܫ̈ܒܐ. ܒܝܕ ܕܝܢ ܬܘܒ ܕܗܦܟ
ܡܬܬܘܐ ܥܠ ܡܕܡ ܕܝܗܒ܆ ܐܣܪ ܠܗ ܠܪܥܝܢܐ ܒܗܘܢ ܒܚܘܫ̈ܒܐ ܐܝܠܝܢ ܕܡܥܟܪܝܢ ܠܗ܆
ܘܒܚܘܤܪܢܐ ܥܒܕܝܢ ܠܗ ܕܢܩܒܠ ܝܕܥܬܐ ܕܐܠܗܐ܀
ܗܢܐ ܕܝܢ ܙܪܥܐ ܡܢ ܕܙܪܥ ܒܚܘܤܢܐ ܐܦ
ܒܚܘܣܢܐ ܚܨܕ. ܘܡܢ ܕܙܪܥ ܒܒܘܪܟܬܐ ܐܦ ܒܒܘܪܟܬܐ ܢܚܨܘܕ
ܡܢ ܐܓܪܬܐ ܕܐܦ̈ܤܝܐ
ܡܚ ܠܘܩܒܠ
ܚܘܫ̈ܒܐ ܕܪܚܡܬ ܟܣܦܐ: ܕܡܚܒܠܝܢ ܠܗ ܠܒܤܝܡܘܬܐ ܕܠܘܬ ܐܚ̈ܐ܀.
ܗܘܝܬܘܢ ܒܣܝܡܝܢ
ܚܕ ܠܘܬ ܚܕ. ܘܡܪܚܡܢܝܢ. ܗܘܝܬܘܢ ܫܒܩܝܢ ܚܕ ܠܚܕ. ܐܝܟܢܐ ܕܐܠܗܐ ܒܡܫܝܚܐ ܫܒܩ ܠܢ
ܡܢ
ܐܓܪܬܐ ܕܦܠܝܦܣܐ:
ܡܛ ܠܘܩܒܠ ܚܘܫܒܐ ܕܠܗ ܒܠܚܘܕܘܗܝ ܒܥܐ ܕܢܤܝܡ ܨܒܘܬܐ܀
ܠܐ ܐܢܫ
ܕܢܦܫܗ ܒܠܚܘܕ ܢܐܨܦ܆ ܐܠܐ ܐܦ ܕܚܒܪ̈ܘܗܝ
ܢܢ ܠܘܩܒܠ ܚܘܫܒܐ ܕܝܘܬܪ̈ܢܐ ܕܢܟ̈ܤܐ ܡܝܬܐ ܠܢ
ܐܦ ܥܘܬܪܐ ܥܬܝܩܐ ܡܚܘܐ ܠܢ: ܕܡܫܟܚ ܗܘܐ ܢܤܦܩ ܠܐܚ̈ܐ ܣ̈ܓܝܐܐ܀
ܐܠܐ ܗܠܝܢ ܕܝܘܬܪܢܐ
ܗܘܝ ܠܝ܆ ܡܛܠ ܡܫܝܚܐ ܚܘܤܪܢܐ ܚܫܒܬ ܐܢ̈ܝܢ. ܘܬܘܒ ܚܫܒ ܐܢܐ ܠܗܝܢ ܚܘܤܪܢܐ ܡܛܠ
ܝܬܝܪܘܬܐ ܕܝܕܥܬܗ ܕܝܫܘܥ ܡܫܝܚܐ ܡܪܝ. ܗܘ ܕܡܛܠܬܗ ܟܠܡܕܡ ܚܣܪܬ. ܘܟܠ ܡܕܡ ܐܝܟ
ܙܒܠܐ ܚܫܒܬ܆ ܕܠܡܫܝܚܐ ܒܠܚܘܕ ܐܬܪ
ܐܓܪܬܐ ܕܠܘܬ ܩ̈ܘܠܣܝܐ
ܠܘܩܒܠ ܚܘܫ̈ܒܐ ܐܝܠܝܢ
ܕܒܠܥܒܘܬܐ ܡܪܠܝܢ ܠܢ: ܘܕܚܠܬ ܦܬܟܪ̈ܐ ܕܡܬܝܠܕܐ ܡܢܗ ܠܐ ܚܙܝܢ܀
ܐܡܝܬܘ ܗܟܝܠ ܗܕܡ̈ܝܟܘܢ
ܕܒܐܪܥܐ. ܙܢܝܘܬܐ ܘܛܢܦܘܬܐ. ܘܥܠܘܒܘܬܐ ܕܗܝ ܗܝ ܕܚܠܬ ܦܬܟܪ̈ܐ. ܡܛܠ ܗܠܝܢ ܗܘ ܓܝܪ
ܐܬܐ ܪܘܓܙܗ ܕܐܠܗܐ ܥܠ ܒ̈ܢܝܐ ܕܠܐ ܡܬܛܦܝܤܢܘܬܐ
ܡܢ ܐܓܪܬܐ ܕܥܒܪ̈ܝܐ:
ܢܒ ܠܘܩܒܠ ܚܘܫ̈ܒܐ
ܕܡܕܡ ܕܝܬܝܪ ܡܢ ܤܘܢܩܢܢ ܒܥܝܢ ܕܢܟܢܫܘܢ ܥܠ ܣܘܢܩܢܢ (?) ܘܪܚܡܝܢ ܕܢܩܢܘܢ ܟܤܦܐ܀
ܠܐ ܗܘܐ
ܪܚܡ ܟܤܦܐ ܪܥܝܢܟܘܢ ܤܦܩ ܠܟܘܢ ܓܝܪ ܡܕܡ ܕܐܝܬ ܠܟܘܢ ܐܡܝܪ ܓܝܪ ܗܟܢܐ ܐܡܪ ܡܪܝܐ
ܕܠܐ ܐܫܒܩܟ ܘܠܐ ܐܪܦܐ ܒܟ ܐܝ̈ܕܝܐ.
ܡܢ ܐܓܪܬܐ ܩܕܡܝܬܐ ܕܠܘܬ ܛܝܡܬܐܝܘܣ:
ܢܓ. ܠܘܩܒܠ ܢܦܫܐ
ܕܡܕܡ ܝܬܝܪ ܡܢ ܡܐܟ̈ܠܬܐ ܘܡܢ ܬܟܣܝܬܐ ܒܥܝܐ: ܘܠܐ ܡܬܕܟܪܐ ܠܡܥܠܢܗ ܫܠܝܚܐ ܕܠܥܠܡܐ
ܘܠܡܦܩܢܗ ܬܘܒ ܥܪܛܠܝܐ܀
ܡܕܡ ܠܐ ܐܥܠܢ ܠܥܠܡܐ. ܘܫܪܝܪܐܝܬ ܐܦ ܠܐ ܕܢܦܩ ܡܢܗ
ܡܫܟܚܝܢܢ. ܐܢ ܐܝܬ ܠܢ ܕܝܢ ܡܐܟܘܠܬܐ ܘܬܟܣܝܬܐ܆ ܗܢܐ ܣܦܩ ܠܢ. ܐܝܠܝܢ ܓܝܪ ܕܨܒܝܢ
ܠܡܥܬܪ ܒܢܣ̈ܝܘܢܐ ܢܦܠܝܢ ܘܒ̈ܦܚܐ ܘܒܪ̈ܓܝܓܬܐ ܣܓܝܐܬ̈ܐ ܕܚܣܝܪ̈ܝܢ ܪܥܝܢܐ: ܕܡܗܪ̈ܢ ܘܡ̈ܛܒܥܢ
ܢܕ ܠܘܩܒܠ ܚܘܫܒܐ ܕܪܚܡܬ ܟܣܦܐ ܕܐܡܪ. ܕܡܕܡ ܕܒܝܫ ܠܪܚܡܬ
ܟܤܦܐ ܠܐ ܢܩܝܦ: ܐܠܐ ܢܝܚܐ ܪܒܐ ܕܗܘܐ ܠܐܚ̈ܐ ܘܠܐܟ̈ܣܢܝܐ܀
ܥܩܪܐ ܕܟܠܗܝܢ ܒܝܫ̈ܬܐ ܪܚܡܬ ܟܤܦܐ
ܐܝܬܝܗ: ܐܦ ܐܝܬ ܐܢܫܐ ܕܐܬܪܓܪܓܘ ܠܗ܆ ܘܡܢ ܗܝܡܢܘܬܐ ܛܥܘ. ܘܢܦܫܗܘܢ ܐܣܪܘ ܒܕܐܘ̈ܘܢܐ
ܣ̈ܓܝܐܐ
ܡܢ ܐܓܪܬܐ ܕܬܪ̈ܬܝܢ ܕܠܘܬ ܛܡܬܐܝܘܣ:
ܢܗ: ܠܘܩܒܠ ܚܘܫܒܐ ܕܒܥܐ ܕܡܛܠ ܝܘܬܪܢܐ
ܕܡܡܠܐ ܣܘܢܩܢܗ. ܢܬܕܘܕ ܒܨ̈ܒܘܬܗ ܕܥܠܡܐ܀
ܠܐ ܓܝܪ ܐܝܬ ܐܢܫ ܕܦܠܚ ܘܡܬܕܘܕ ܒܨ̈ܒܘܬܗ
ܕܥܠܡܐ: ܘܡܫܟܚ ܕܠܗܘ ܡܢ ܕܓܒܝܗܝ ܢܫܦܪ. ܘܐܢ ܐܝܬ ܐܢܫ ܕܡܬܪܒܐ ܒܐܬܠܝܛܘܬܐ܆ ܠܐ
ܢܣܒ ܟܠܝܠܐ: ܐܠܐ ܐܢ ܒܐܣܟܡܗ ܢܬܟܬܫ
ܡܢ ܐܓܪܬܐ ܕܦܛܪܘܣ
ܠܘܩܒܠ ܚܘܫܒܐ ܕܒܥܩܬܐ
ܡܫܡܫ ܣܘܥܪ̈ܢܐ: ܐܝܟ ܗܘ ܠܡ ܕܗܐ ܐܘܦܝܘ ܢܟ̈ܣܐ: ܘܠܐ ܗܫܐ ܐܝܬ ܡܢܗܘܢ: ܘܠܐ ܬܘܒ ܡܫܟܚܐ
ܕܢܗܘܘܢ܀
ܘܟܠ ܕܡܫܡܫ܆ ܐܝܟ ܕܡܢ ܐܠܗܐ ܝܗܝܒ ܠܗ ܢܫܡܫ ܘܢܫܦܪ ܠܐܠܗܐ
ܡܢ ܐܓܪܬܐ
ܕܝܘܚܢܢ:
ܢܙ: ܠܘܩܒܠ ܚܘܫܒܐ ܕܪܚܡܬ ܟܣܦܐ: ܕܠܐ ܨܒܐ ܕܢܙܕܕܩ ܒܐܚ̈ܐ. ܡܛܠ ܕܠܐ ܠܡ
ܣܢܝܩܝܢ: ܘܒܥܒܕܐ ܟܦܪ ܒܚܘܒܐ ܕܐܠܗܐ܀
ܘܐܝܢܐ ܕܐܝܬ ܠܗ ܥܘܬܪܐ ܒܥܠܡܐ: ܘܚܙܐ ܠܐܚܘܗܝ
ܕܣܢܝܩ ܘܐܚܕ ܪ̈ܚܡܘܗܝ ܡܢܗ܆ ܐܝܟܢܐ ܫܪܐ ܒܗ ܚܘܒܗ ܕܐܠܗܐ
ܢܚ ܠܘܩܒܠ ܚܘܫ̈ܒܐ ܐܝܠܝܢ
ܕܒܡܠܬܐ ܥܒܕܝܢ ܠܢ ܕܢܘܕܐ ܕܡܚܒܝܢܢ ܠܐܚ̈ܐ: ܒܥܒܕܐ ܕܝܢ ܡܛܠ ܪܚܡܬ ܟܤܦܐ ܢܟܦܘܪ
ܒܗܘܢ܀
ܒܢܝ ܠܐ ܢܚܒ ܚܕ ܠܚܕ ܒܡܠܬܐ ܘܒܠܫܢܐ. ܐܠܐ ܒܟܐܢܘܬܐ ܘܒܩܘܫܬܐ܀
ܒܪܝܟ ܗܘ ܡܪܢ
ܘܐܠܗܢ ܘܦܪܘܩܢ ܝܫܘܥ ܡܫܝܚܐ: ܕܝܗܒ ܠܢ ܙܟܘܬܐ ܥܠ ܕܝܘܐ ܕܪܚܡܬ ܟܤܦܐ ܕܢܙܟܝܘܗܝ
ܫܠܡ:
ܡܐܡܪܐ ܕܐܪܒܥܐ ܕܥܠ ܚܘ̈ܫܒܐ ܕܕܝܘܐ ܕܟܪܝܘܬܐ܀
ܡܢ ܡܦܩܢܐ.
ܐ. ܠܘܩܒܠ ܢܦܫܐ
ܕܤܒܪܐ ܠܗ ܡܢ ܟܪܝܘܬܐ ܕܓܕܫܐ ܠܗ ܕܠܐ ܫܡܥ ܡܪܝܐ ܐܢܩܬܗ܀
ܘܐܬܬܢܚܘ ܒ̈ܢܝ ܐܝܤܪܐܝܠ ܡܢ
ܫܘܥܒܕܐ ܩܫܝܐ. ܘܨܠܝܘ ܘܣܠܩܬ ܓܥܬܗܘܢ ܠܘܬ ܡܪܝܐ ܡܢ ܫܘܥܒܕܐ ܩܫܝܐ. ܘܫܡܥ ܐܠܗܐ
ܐܢܩܬܗܘܢ
ܒ ܠܘܩܒܠ ܚܘܫ̈ܒܐ ܕܣܒܪܝܢ ܠܗܘܢ ܕܠܐ ܚܙܐ ܡܪܝܐ ܫܚܩܢ ܕܡܢ ܕܝ̈ܘܐ܀
ܘܐܡܪ
ܡܪܝܐ. ܡܚܙܐ ܚܙܝܬ ܫܘܥܒܕܗ ܕܥܡܝ ܕܒܡܨܪܝܢ. ܘܓܥܬܗܘܢ ܫܡܥܬ ܡܢ ܩܕܡ ܡܫ̈ܥܒܕܢܝܗܘܢ.
ܡܛܠ ܕܝܕܥ ܐܢܐ ܠܗ ܠܟܐܒܗܘܢ. ܘܢܚܬܬ ܠܡܦܨܝܘܬܗ ܡܢ ܐܝܕܐ ܕܡܨܪ̈ܝܐ
ܓ ܠܘܩܒܠ ܢܦܫܐ
ܕܠܐ ܚܟܡܐ ܕܗܝܕܝܢ ܝܬܝܪ ܩܠܝܠ ܣܓܝܢ ܢܣܝ̈ܘܢܐ: ܐܡܬܝ ܕܫܪܝܬ ܠܡܥܩܒܘ ܪܘܚܢܐܝܬ ܡ̈ܠܘܗܝ
ܚܝ̈ܬܐ ܕܐܠܗܐ: ܘܐܬܚܦܛܬ ܒܦܘܩ̈ܕܢܘܗܝ ܕܐܠܗܐ.܀.
ܘܗܦܟ ܡܘܫܐ ܠܘܬ ܡܪܝܐ ܘܐܡܪ. ܡܪܝ
ܠܡܢܐ ܐܒܐܫܬ ܠܥܡܐ ܗܢܐ. ܘܠܡܢܐ ܫܕܪܬܢܝ. ܕܡܢ ܫܥܬܐ ܕܐܬܝܬ ܠܘܬ ܦܪܥܘܢ ܠܡܡܠܠܘ
ܒܫܡܟ. ܒܐܫ ܠܥܡܐ ܗܢܐ. ܘܡܦܪܩ ܠܐ ܦܪܩܬ ܠܥܡܟ
ܕ ܠܘܩܒܠ ܚܘ̈ܫܒܐ ܕܠܐ ܡܣܟܝܢ
ܕܢܩܒܠܘܢ ܥܘܕܪܢܐ ܡܢ ܐܠܗܐ: ܘܒܝܕ ܟܪܝܘܬܐ ܤܚܦܝܢ ܠܗ ܠܢܦܫܐ܀
ܡܛܠ ܗܢܐ ܐܡܪ ܠܒ̈ܢܝ
ܐܝܣܪܐܝܠ܆ ܐܢܐ ܐܢܐ ܡܪܝܐ ܐܠܗܐ. ܘܡܦܩ ܐܢܐ ܠܟܘܢ ܡܢ ܫܘܥܒܕܐ ܕܡܨܪ̈ܝܐ. ܘܡܦܨܐ ܐܢܐ ܠܟܘܢ ܡܢ
ܥܒܕܘܬܗܘܢ. ܘܐܦܪܩܟܘܢ ܒܕܪܥܐ ܪܡܐ ܘܒ̈ܕܝܢܐ ܪܘܪ̈ܒܐ. ܘܐܣܒܟܘܢ ܠܝ ܥܡܐ܆ ܘܐܗܘܐ ܠܟܘܢ
ܐܠܗܐ
ܗ ܠܘܩܒܠ ܢܦܫܐ ܕܠܐ ܡܦܣܐ: ܕܐܝܠܝܢ ܕܗܫܐ ܟܦܪܘ ܒܗ ܒܥܠܡܐ ܒܐܝ̈ܕܝܗܘܢ ܕܕܝ̈ܘܐ
ܡܪ̈ܝܪܐ ܠܐ ܢܦܠܝܢ. ܘܩܪ̈ܒܐ ܓ̈ܠܝܐ ܕܒܝܕ ܚ̈ܙܘܢܐ ܘܓܫܬܐ ܠܐ ܟܬܫܝܢ: ܐܝܟ ܕܠܐ ܢܬܪܗܒܘܢ ܡܢ
ܙܘܥܬܗܘܢ ܢܦܢܘܢ(sic) ܠܗܘܢ ܠܥܠܡܐ܀
ܘܗܘܐ ܕܟܕ ܫܕܪ ܦܪܥܘܢ ܠܥܡܐ܆ ܠܐ ܐܘܒܠ ܐܢܘܢ ܐܠܗܐ
ܒܐܘܪ̈ܚܐ ܕܐܪܥܐ ܕܦܠܫ̈ܬܝܐ. ܡܛܠ ܕܩܪܝܒܐ ܗܘܬ. ܡܛܠ ܕܐܡܪ ܐܠܗܐ܆ ܕܕܠܡܐ ܢܕܚܠܘ ܥܡܐ
ܡܐ ܕܚܙܘ ܩܪܒܐ ܘܢܗܦܟܘܢ ܠܡܨܪܝܢ.
ܘ. ܠܘܩܒܠ ܚܘ̈ܫܒܐ ܕܐܡܪܝܢ ܠܢ. ܕܠܐ ܠܡ ܝܕܥܝܢ ܕܝ̈ܘܐ
ܕܡܪܝܐ ܥܒܕ ܚܠܦܝܢ ܩܪܒܐ܀
ܘܐܡܪܝܢ ܡܨܪ̈ܝܐ ܢܥܪܘܩ ܡܢ ܩܕܡ ܒܝܬ ܐܝܤܪܐܝܠ ܡܛܠ ܕܡܪܝܐ
ܥܒܕ ܠܗܘܢ ܩܪܒܐ ܒܡܨܪܝܢ.
ܙ. ܠܘܩܒܠ ܢܦܫܐ ܕܠܐ ܚܟܡܐ ܕܡܢܐ ܡܬܚܫܒܝܢ ܥܠܝܢ ܕܝܘ̈ܐ܀
ܘܐܡܪ ܒܥܠܕܒܒܐ ܐܪܕܘܦ ܘܐܕܪܟ ܘܐܦܠܓ ܒܙܬܐ. ܬܒܠܥ ܐܢܘܢ ܢܦܫܝ ܐܫܡܘܛ ܣܝܦܝ
ܘܬܚܪܘܒ ܐܢܘܢ ܐܝܕܝ
ܚ ܠܘܬ ܡܪܝܐ ܥܠ ܚܘܫ̈ܒܐ ܕܡܙܝܥܝܢ ܠܢ ܒܕܐܡܪܝܢ. ܕܒܠܠܝܐ ܕܝ̈ܘܐ ܐܬܝܢ
ܬܦܠ ܥܠܝܗܘܢ ܕܚܠܬܐ ܘܙܘܥܬܐ. ܒܪܒܘܬܐ ܕܕܪܥܟ ܢܛܒܥܘܢ ܐܝܟ ܟܐܦܐ.
ܥܕܡܐ ܕܢܥܒܪ ܥܡ̈ܟ ܡܪܝܐ.. ܥܕܡܐ ܕܢܥܒܪ ܥܡܐ ܗܢܐ ܕܦܪܩܬ
ܛ ܠܘܩܒܠ ܚܘܫ̈ܒܐ ܕܙܘܥܬܐ
ܕܓܕܫܝܢ ܠܢ: ܥܠ ܕܠܐ ܡܬܚܙܐ ܡܠܐܟܐ ܕܡܥܕܪ ܠܢ ܒܐܝܕܐ.....ܩܪܒܐ ܠܡܪܝܐ ܒܥܡܠܝܩ ܡܢ
ܕܪܕܪܝܢ.
ܝ. ܠܘܩܒܠ ܢܦܫܐ ܕܡܬܪܗܒܐ: ܐܝܟ ܗܘ ܕܠܐ ܢܛܪܝܢ ܠܗ ܡ̈ܠܐܟܐ ܕܐܠܗܐ܀
ܗܐ ܡܫܕܪ ܐܢܐ
ܡܠܐܟܝ ܩܕܡܝܢ ܕܢܢܛܪܟ ܒܐܘܪܚܐ ܘܕܢܥܠܟ ܠܐܪܥܐ ܕܬܩܢܬ.
ܝ ܠܘܩܒܠ ܢܦܫܐ ܕܟܪܝܐ ܠܗ ܥܠ
ܕܠܘܚܝܐ ܕܠܠܝܐ: ܘܡܢ ܙܘܥܬܗ ܤܒܪܐ ܠܗ ܕܐܡܝܢܐܝܬ ܒܫܓܝܫܘܬܗ ܦܝܫܐ܀
ܐܬܠ ܫܠܡܐ
ܒܐܪܥܟܘܢ. ܘܬܪܕܦܘܢ ܠܒ̈ܥܠܕܒܒܝܟܘܢ. ܘܢܦܠܘܢ ܩܕܡܝܟܘܢ ܒܚܪܒܐ
ܬܢܝܢ ܢܡܘܣܐ
ܝܒ
ܠܘܩܒܠ ܚܘܫ̈ܒܐ ܐܢ̈ܫܝܐ ܕܗܕܣܝܢ ܒܢ ܘܐܡܪܝܢ. ܕܠܐ ܠܡ ܟܒܪ ܦܩܚ ܠܟܘܢ ܕܬܗܘܘܢ ܡܬܚܪܝܢ
ܥܡ ܕܝ̈ܘܐ܀
ܘܐܡܪܬ ܠܟܘܢ܆ ܕܠܐ ܬܕܚܠܘܢ ܘܠܐ ܬܙܘܥܘܢ ܡܢܗܘܢ. ܡܪܝܐ ܐܠܗܟܘܢ ܐܙܠ ܩܕܡܝܟܘܢ܆
ܘܗܘ ܡܬܟܬܫ ܚܠܦܝܟܘܢ
ܝܓ ܠܘܩܒܠ ܢܦܫܐ ܕܐܬܪܗܒܬ ܡܢ ܩܠܗ ܕܕܝܘܐ ܕܐܫܪܩ ܥܠܝܗ ܡܢ
ܫܠܝ ܒܐܐܪ܀܀
ܫܪܐ ܠܡܘܒܕܘܬܗ ܘܐܬܓܪܐ ܥܡܗ ܠܩܪܒܐ. ܝܘܡܢܐ ܐܫܪܐ ܠܡܬܠ ܕܚܠܬܟ
ܘܙܘܥܬܟ: ܥܠ ܐܦ̈ܝ ܟܠܗܘܢ ܥܡܡ̈ܐ ܕܬܚܝܬ ܫܡܝܐ. ܕܢܫܡܥܘܢ ܫܡܥܟ܆ ܘܢܙܘ̈ܥܘܢ ܢܕܚ̈ܠܘܢ
ܡܢ ܩܕܡܝܟ
ܝܕ ܠܘܩܒܠ ܚܘܫ̈ܒܐ ܐܢ̈ܫܝܐ ܕܡܬܕܠܚܝܢ ܡܢ ܚܙܬܐ ܕܕܝܘܐ: ܐܝܢܐ ܕܡܒܪ̈ܩܢ ܥܝ̈ܢܘܗܝ
ܐܝܟ ܢܘܪܐ܀
ܠܐ ܬܕܚܠ ܡܢܗܘܢ ܡܛܠ ܕܡܪܝܐ ܐܠܗܟܘܢ ܗܘ ܡܬܟܬܫ ܚܠܦܝܟܘܢ
ܝܗ ܠܘܬ ܡܪܝܐ
ܥܠ ܕܦܫܬ ܢܦܫܐ ܕܠܐ ܙܘܥܐ: ܟܕ ܢܦܠܘ ܡܢ ܫܠܝ ܒܩܠܐ ܘܒܫܓܘܫܝܐ ܕܝ̈ܘܐ ܥܠ ܦܓܪܐ܀
ܘܐܡܪܬ. ܡܪܝܐ ܐܠܗܐ ܐܢܬ ܫܪܝܬ ܠܡܚܘܝܘ ܠܥܒܕܟ ܪܒܘܬܟ: ܘܐܝܕܟ ܬܩܝܦܬܐ ܘܕܪܥܟ ܪܡܐ.
ܐܝܢܘ ܓܝܪ ܐܠܗܐ ܐܝܬ ܒܫܡܝܐ ܐܘ ܒܐܪܥܐ: ܕܢܥܒܕ ܐܝܟ ܥܒ̈ܕܝܟ ܘܐܝܟ ܓܒܪ̈ܘܬܟ
ܝܘ ܠܘܩܒܠ
ܢܦܫܐ ܕܡܬܪܗܒܐ ܘܙܝܥܐ ܡܢ ܕܝ̈ܘܐ ܕܡܬܚܙܝܢ ܠܗ: ܘܣܒܪܐ ܠܗ ܕܫܒܩܗ ܡܪܝܐ܀.
ܡܪܝܐ
ܐܠܗܟܘܢ܆ ܠܐ ܢܚܒܠܟܘܢ ܘܠܐ ܢܫܒܩܟܘܢ. ܘܠܐ ܢܛܥܐ ܩܝܡܐ ܕܝܡܐ ܠܐܒ̈ܗܝܟܘܢ
ܝܙ ܠܘܩܒܠ
ܢܦܫܐ ܕܨܒܝܐ ܕܬܕܥ ܥܠܬܐ ܕܗܠܝܢ ܢ̈ܣܝܘܢܐ܀
ܘܢܡܟܟܟ ܘܢܢܤܝܟ ܡܪܝܐ ܐܠܗܟ. ܘܢܥܒܕ ܥܡܟ
ܛܝܒܘܬܐ ܒܚܪܬܐ ܕܝܘܡ̈ܬܐ
ܝܚ ܠܘܩܒܠ ܚܘܫ̈ܒܐ ܐܢ̈ܫܝܐ ܕܡܬܕܠܚܝܢ ܡܢ ܚܙܬܐ ܕܕܝ̈ܘܐ ܕܐܬܝܢ
ܥܠܝܢ ܒ̈ܠܝܠܘܬܐ. ܘܒܕܡܘܬ ܚܘ̈ܘܬܐ ܡܬܥܩܠܩܠܝܢ ܥܠ ܚܨܐ ܘܥܠ ܓܒܐ܀
ܠܐ ܢܬܬܒܪ
ܠܒܟܘܢ ܘܠܐ ܬܕܠܚܘܢ. ܘܠܐ ܬܙܘܥܘܢ ܘܠܐ ܬܬܪܗܒܘܢ ܡܢ ܩܕܡܝܗܘܢ. ܡܛܠ ܕܡܪܝܐ ܐܠܗܟ ܐܙܠ
ܩܕܡܝܟ: ܕܐܣܩܟ ܡܢ ܐܪܥܐ ܕܡܨܪܝܢ. ܗܘ ܢܬܟܬܫ ܥܠ ܐܦ̈ܝܟܘܢ ܥܡ ܒ̈ܥܠܕܒܒܝܟܘܢ ܒܝ̈ܫܐ.
ܘܢܦܪܩܟܘܢ
ܝܛ ܠܘܩܒܠ ܢܦܫܐ ܕܟܪܝܐ ܠܗ: ܘܙܝܥܐ ܡܢ ܕܝ̈ܘܐ ܕܒܠܩܝܢ ܥܠܝܗ ܒ̈ܠܝܠܘܬܐ.܀
ܐܬܚܝܠܘ ܘܐܬܥܫܢܘ. ܠܐ ܬܕܚܠܘܢ ܘܠܐ ܬܙܘܥܘܢ ܡܢ ܩܕܡܝܗܘܢ. ܡܛܠ ܕܡܪܝܐ ܐܠܗܟ ܗܘ ܐܙܠ
ܥܡܟ. ܠܐ ܢܪ̈ܦܝܟ ܘܠܐ ܢܫܒܩܟ ܡܢ ܝܫܘܥ ܒܪܢܘܢ:
ܠܘܩܒܠ ܢܦܫܐ ܕܨܒܝܐ ܒܝܕ ܡܪܚܩܢܘܬܗ ܕܡܢ
ܥܠܡܐ: ܕܬܬܚܝܠ ܒܕܚܠܬܐ ܕܐܠܗܐ: ܘܡܬܥܟܪܐ ܒܝܕ ܙܘܥܬܐ ܕܡܢ ܕܝ̈ܘܐ܀
ܐܬܚܝܠܘ ܘܐܬܥܫܢܘ܆
ܘܠܐ ܬܙܘܥ. ܡܛܠ ܕܥܡܟ ܗܘ ܡܪܝܐ ܐܠܗܟ ܐܬܪ ܕܐܙܠ ܐܢܬ
ܟ ܠܘܩܒܠ ܚܘܫ̈ܒܐ ܕܡܬܚܒܢܢܝܢ
ܕܢܬܩܪܒܘܢ ܠܕܘܒܪ̈ܐ ܕܕܚܠܬ ܐܠܗܐ: ܡܢ ܙܘܥܬܐ ܕܚ̈ܙܘܢܐ ܕܚ̈ܝܠܐ: ܘܡܢ ܠܡ̈ܦܐܕܐ ܕܢܘܪܐ ܕܦܪ̈ܚܝܢ
ܒܐܐܪ܀
ܠܐ ܬܕܚܠܘܢ ܘܠܐ ܬܙܘܥܘܢ ܡܢܗܘܢ. ܡܛܠ ܕܗܟܢܐ ܢܥܒܕ ܡܪܝܐ ܐܠܗܟܘܢ ܠܒܥܠܕܒ̈ܒܝܟܘܢ:
ܐܝܠܝܢ ܕܐܢܬܘܢ ܤܢܝܢ ܐܢܬܘܢ ܠܗܘܢ
ܫ̈ܒܛܐ
ܟܐ: ܠܘܩܒܠ ܢܦܫܐ ܕܡܢ ܟܪܝܘܬܐ ܢܦܠܐ: ܘܡܛܠܗܕܐ
ܡܬܪܗܒܐ ܡܢ ܚ̈ܙܘܢܐ ܕܐܠܝܐ܀
ܐܬܬܥܝܪܝ ܐܬܬܥܝܪܝ ܕܒܘܪܐ.. ܐܬܬܥܝܪܝ ܘܐܬܝܕܝ ܘܡܠܠܝ ܬܫܒܘܚܬ
ܟܒ ܡܢ ܫܡܘܐܝܠ
ܠܘܩܒܠ ܡܚܫܒܬ ܕܠܐ ܡܣܬܟܠܐ: ܕܩܝܢܬܐ ܕܢܩܝܦܐ ܠܡܙܡܘܪ̈ܐ: ܡܫܚܠܦܐ
ܠܡܡܙܓܘܬܗ ܕܦܓܪܐ: ܘܪܕܦܐ ܠܗ ܠܕܝܘܐ ܕܡܐܫ ܠܗ ܠܚܨܐ: ܘܡܩܪ ܠܓܝ̈ܕܐ ܘܫܓܫ
ܠܟܠܗܘܢ ܗ̈ܕܡܐ܀
ܘܟܕ ܗܘܝܐ ܗܘܬ ܪܘܚܐ ܒܝܫܬܐ ܥܠ ܫܐܘܠ܆ ܢܩܫ ܗܘܐ ܕܘܝܕ ܒܟܢܪܐ܆
ܘܡܪܘܚ ܗܘܐ ܠܗ. ܘܡܫܢܝܐ ܗܘܬ ܡܢܗ ܪܘܚܐ ܒܝܫܬܐ
ܟܓ ܠܘܩܒܠ ܕܝܘܐ ܕܡܬܚܙܐ ܕܫܩܝܠ
ܠܗ: ܟܕ ܢܚܙܝܗܝ ܕܫܩܝܠ ܣܝܦܐ ܘܐܬܐ ܠܐܘܪܥܗ: ܒܙܒܢܐ ܕܐܙܠ ܗܘܐ ܕܢܚܙܐ ܦܪܕܝܣܐ ܕܥܒܕ
ܝܢܣ ܘܝܡܒܪܝܣ܀
ܐܢܬ ܐܬܐ ܐܙܬ ܥܠܝ ܒܣܝܦܐ ܘܒܢܝܙܟܐ ܘܒܣܢܘܪܬܐ ܘܒܣܟܪܐ܆ ܘܐܢܐ ܐܬܐ ܐܢܐ
ܥܠܟ ܒܫܡܗ ܕܡܪܝܐ ܚܝܠܬܢܐ ܨܒܐܘܬ
ܟܕ ܠܘܩܒܠ ܕܝ̈ܘܐ ܕܒܐܐܪ ܥܒܕܝܢ ܫܓܘܫܝܐ: ܘܒܬܪ
ܗܠܝܢ ܡܫܡܥܝܢ ܠܢ ܒ̈ܢܬ ܩ̈ܠܐ ܕܝܠܗܘܢ.܀
ܡܛܠ ܕܠܐ ܗܘܐ ܒܣܝܦܐ ܘܒܢܝܢܟܐ ܦܖ̈ܩ ܡܪܝܐ.
ܡܛܠ ܕܕܡܪܝܐ ܗܘ ܩܪܒܐ. ܘܢܘܠܡܟܘܢ ܡܪܝܐ ܒܐܝ̈ܕܝ
ܟܗ ܠܘܩܒܠ ܕܝܘܐ ܕܡܬܠܚܡ ܠܝ
ܒܡܘܡ̈ܬܐ ܘܐܡܪ: ܕܓܚܟܐ ܥܒܕ ܐܢܐ ܠܟ ܘܒܙܚܐ ܒܢܬ ܟܠܗܘܢ ܝ̈ܚܝܕܝܐ: ܡܛܠ ܕܒܨܝܬ
ܘܓܠܝܬ ܟܠܗܘܢ ܟܝ̈ܢܐ ܕܟܠܗܘܢ ܚܘܫ̈ܒܐ ܛܡ̈ܐܐ܀
ܣܦܩ ܠܟܘܢ. ܠܐ ܢܫܬܒܗܪ ܟܦܝܦܐ ܐܝܟ
ܦܫܝܛܐ
ܡܢ ܣܦܪ ܡ̈ܠܟܐ:
ܟܘ: ܠܘܘܥܠ ܢܦܫܐ ܕܡܬܪܗܒܐ ܡܢ ܕܝ̈ܘܐ ܕܡܢ ܗܠܝ ܡܬܝܝܙܝܢ ܒܐܐܪ܀
ܠܐ ܬܕܚܠ ܡܛܠ ܕܣ̈ܓܝܐܝܢ ܐܢܘܢ ܕܥܡܢ ܡܢ ܕܥܡܗܘܢ
ܟܙ ܠܘܘܒܠ ܙܦܫܐ ܕܠܐ ܡܗܝܡܢܐ: ܕܡܠܐ
ܐܐܪ ܡܢ ܡ̈ܠܐܟܐ ܩ̈ܕܝܘܐ ܕܡܥܕܪܝܢ ܠܢ: ܘܠܐ ܡܬܚܙܝܢ ܠܕܝ̈ܘܐ܀
ܘܨܠܝ ܐܠܝܫܥ ܘܕܡ ܡܪܝܐ ܘܐܡܪ
ܡܪܝܐ ܦܬܚ ܥ̈ܝܢܘܗܝ ܕܛܠܝܐ ܘܢܚܙܐ. ܘܦܬܚ ܡܪܝܐ ܥܝ̈ܢܘܗܝ ܕܛܠܝܐ ܘܚܙܐ. ܘܗܐ ܛܘܪܐ ܡܠܐ
ܪ̈ܟܫܐ ܘܪ̈ܟܒܐ ܕܢܘܪܐ ܚܕܪܘܗܝ ܕܐܠܝܫܥ
ܡܢ ܗܘ:
ܟܚ ܠܘܩܒܠ ܚܘܫܒܐ ܕܒܪܥܠܐ ܘܒܐܪܬܝܬܐ ܪܡܐ
ܠܝ. ܐܝܟ ܗܘ ܠܡ ܕܐܬܝܢ ܕܝ̈ܘܐ ܘܡܬܟܬܫܝܢ ܥܡܝ܀
ܕܝܬܒ ܒܫܡܝܐ ܢܓܚܟ. ܘܡܪܝܐ ܢܡܝܩ
ܒܗܘܢ ܗܝܕܝܢ ܢܡܠܠ ܥܠܝܗܘܢ ܒܪܘܓܙܗ܆ ܘܒܚܡܬܗ ܢܕܠܚ ܐܢܘܢ
ܟܛ ܠܘܬ ܡܪܝܐ ܡܛܠ
ܚ̈ܙܘܢܐ ܫ̈ܓܝܫܐ ܘܡܫܟܪ̈ܐ: ܕܡܬܚܙܝܢ ܠܢ ܒ̈ܠ ܠܘܬܐ܀
ܪܚܡ ܥܠܝ ܡܪܝܐ ܡܛܠ ܕܟܪܝܗ ܐܢܐ. ܘܐܣܢܝ
ܡܪܝܐ ܡܛܠ ܕܙܥܘܓܪ̈ܡܝ. ܘܢܦܫܝ ܐܬܬܙܝܥܬ ܛܒ. ܘܐܢܬ ܡܪܝܐ ܥܕܡܐ ܠܐܡܬܝ ܐܬܦܢ ܡܪܝܐ
ܘܦܨܗ ܠܢܦܫܝ. ܘܦ ܪܘܩܝܢܝ ܡܛܠ ܛܝܒܘܬܟ
ܠ ܠܘܩܒܠ ܚܘܫ̈ܒܐ ܕܡܠܟܝܢ ܠܢ ܕܢܥܪܘܩ
ܡܢ ܩܕܡ ܒܝܫܬܗܘܢ ܕܕܝܘܐ. ܘܠܐ ܢܩܘܡ ܥܡܗܘܢ ܚܠܝܨܐܝܬ ܒܐܓܘܢܐ܀
ܒܡܪܝܐ ܣ ܒܪܬ ܐܝܟܢ
ܐܡܪܝܢ ܐܢܬܘܢ ܠܢܦܫܝ: ܢܘܕܝ ܘܫܘܢܝ ܥܠ ܛܘܪ̈ܐ ܐܝܟ ܨܦܪܐ
ܠܐ ܠܘܬ ܡܪܝܐ ܥܠ ܣܒܪܐ ܕܥܬܝܕܝܢ
ܕܝ̈ܘܐ ܕܢܐܬܘܢ ܥܠܝܢ ܒܐܠܝܐ܀
ܩܘܡ ܡܪܝܐ̈ ܩܕܡ ܐܦ̈ܝܗܘܢ ܘܐܒܪܟ ܐܢܘܢ ܘܦܨܗ ܠܢܦܫܝ ܡܢ ܪ̈ܫܝܥܐ
ܘܡܢ ܚܪܒܐ
ܠܒ ܠܘܩܒܠ ܦܫܐ ܕܡܫܬܓܫܐ ܡܢ ܩ̈ܠܐ ܫ̈ܓܝܫܐ ܘܡܢ ܕܠܘܝܢܝܐ ܕܕܝ̈ܘܐ܀
ܗܠܝܢ
ܒܡܪ̈ܘܒܬܐ ܘܗܠܝܢ ܒܙ̈ܟܫܐ. ܘܚܢܢ ܒܫܡܗ ܕܡܪܝܐ ܐܠܗܢ ܢܥܫܢ. ܗܢܘܢ ܒܪܟܘ ܘܢܦܠܘ܆ ܘܚܢܢ
ܩܡܢ ܘܐܬܛܝܒܢ.
ܠܓ ܠܘܩܒܠ ܕܝ̈ܘܐ ܕܒܠܠܝܐ ܕܒܩܝܢ ܠܦܓܪ̈ܝܢ: ܘܒܕܡܘܬ ܥܩܪ̈ܒܐ ܡܚܝܢ
ܠܗܕܡ̈ܝܢ܀
ܡܪܝܐ ܢܘܗܪܝ ܘܦܘܪܩܢܝ ܡܢ ܡܢ ܐܕܚܠ. ܡܪܝܐ ܥܘܫܢܐ ܕܚ̈ܝܝ ܡܢ ܡܢܘ ܙܐܥ ܐܢܐ. ܟܕ
ܩܪܒܘ ܠܝ ܒܝ̈ܫܐ ܠܡܐܟܠ ܒܣܪܝ܆ ܒ̈ܥܠܕܒܒܝ ܘܣ̈ܢܐܝ ܐܝܟ ܚܕܐ ܐܣܬܚܦܘ ܘܢܦܠܘ
ܠܕ
ܠܘܩܒܠ ܕܝ̈ܘܐ ܕܡܢ ܫܠܝ ܡܕܝܩܝܢ ܥܠܝܢ ܡܢ ܐܐܪ ܒܕܡܘܬ ܗ̈ܢܕܘܝܐ܀
ܐܢ ܬܫܪܐ ܥܠܝ ܡܫܪܝܬܐ
ܠܐ ܕܚܠ ܠܒܝ. ܘܐܢ ܢܩܘܡ ܥܠܝ ܩܪܒܐ ܒܗܕܐ ܬܟܝܠ ܐܢܐ
ܠܗ ܠܘܬ ܡܪܝܐ ܡܛܠ ܕܝܘܐ ܕܟܪܝܘܬܐ
ܕܩܪܒ݂ ܠܝ: ܐܝܢܐ ܕܒܠܚܘܕܘܗܝ ܠܪܓܬܐ ܠܐ ܥܒܕ: ܐܠܐ ܟܠܗ ܦܘܠܚܢܗ ܒܪܫܐ ܘܒܚܨܐ
ܐܝܬܘܗܝ. ܟܕ ܒܙܒܢ ܥܡ ܚܘܫ̈ܒܐ ܡܝܬܝܢ ܠܗܘ ܟܪܝܘܬܐ: ܒܙܒܢ ܕܠܐ ܒܥܐ ܚܘܫ̈ܒܐ: ܒܥܩܬܐ
ܣܓܝܐܬܐ ܕܠܐ ܡܬܒܥܝܐ ܪܡܐ ܠܗ ܠܢܦܫܐ܀
ܐܢܬ ܣܬܪܝܢܝ ܘܡܢ ܒ̈ܥܠܕܒܒܝ ܢܛܪܝܢܝ. ܫܘܒܚܢܐ
ܘܦܘܪܩܢܐ ܐܟܪܟܝܢܝ ܕܐܣܬܟܠܟ
ܠܘ ܠܘܬ ܡܪܝܐ ܥܠ ܕܝ̈ܘܐ ܕܢܦܠܝܢ ܥܠ ܡܫܟܐ ܕܦܓܪܐ: ܘܟ̈ܘܝܐ ܐܝܟ
ܗܘ ܕܡܢ ܢܘܪܐ ܣܝܡܝܢ ܒܗ. ܘ̈ܛܒܥܐ ܓ̈ܠܝܠܐ ܒܕܡܘܬ ܗܢܘܢ ܕܡܢ ܣܘܩܝܐ ܗܘܝܢ ܡܣܩܩܝܢ ܒܗ.
ܐܝܠܝܢ ܕܐܢܐ ܙܒ̈ܢܝܢ ܣ̈ܓܝܐܢ ܚܙܝܬ ܐܢܘܢ ܒ̈ܥܝܢܝ ܘܐܬܕܡܪܬ܀
ܕܘܢ ܡܪܝܐ ܕܝܢܝ ܘܐܬܟܬܫ ܥܡ ܐܝܠܝܢ
ܕܡܬܟܬܫܝܢ ܥܡܝ ܐܚܘܕ ܙܝܢܐ ܘܣܟܪܐ ܘܩܘܡ ܒܥܘܕܪܢܝ. ܫܡܘܛ ܣܦܣܪܐ ܘܐܒܪܩ ܠܘܩܒܠ
ܪ̈ܕܘܦܝ. ܘܐܡܪ ܠܢܦܫܝ ܕܐܢܐ ܗܘ ܦܪܘܩܟܝ
ܠܙ ܠܘܬ ܡܪܝܐ ܡܛܠ ܕܝܘܐ ܕܟܪܝܘܬܐ ܕܡܫܚܠܦ
ܠܪܥܝܢܐ: ܘܒܚܕܐ ܬܪܥܝܬܐ ܕܡܠܝܐ ܥܩܬܐ ܬܩܝܦܬܐ ܘܒܥ ܠܗ. ܗܕܐ ܕܝܢ ܐܝܬܝܗ ܐܬܐ ܕܫܢܝܘܬܐ
ܐܗܦܟ ܢܦܫܝ ܡܢ ܫܓܘܫܝܗܘܢ. ܘܡܢ ܐܪ̈ܝܘܬܐ ܝܚܝܕܘܬܝ.
ܠܚ ܠܘܩܒܠ ܚܘܫܒܐ
ܕܡܬܠܚܡ ܠܝ ܘܐܡܪ. ܕܗܐ ܠܡ ܒܠܠܝܐ ܐܬܝܢ ܕܝ̈ܘܐ ܟܕ ܫܩܝܠܝܢ ܣ̈ܝܦܐ܀
ܤܝܦܗܘܢ ܢܥܘܠ
ܒܠܒܗܘܢ. ܘܩܫܬ̈ܬܗܘܢ ܢܬܬܒܪ̈ܢ
ܠܛ ܠܘܩܒܠ ܚܘܫܒܐ ܕܡܬܢܒܐ ܠܝ ܥܠ ܡܚܘܬܐ ܕܡܢ
ܕܝ̈ܘܐ܀
ܡܛܠ ܕܐܢܐ ܠܚܫܐ ܡܛܝܒ ܐܢܐ. ܘܟܐܒܝ ܠܘܩܒܠܝ ܒܟܠܙܒܢ
ܡ ܠܘܩܒܠ ܢܦܫܐ ܕܒܙܒܢܐ
ܕܟܪܝܘܬܐ: ܒܥܝܐ ܕܬܫܟܚ ܒܨܠܘܬܐ ܡ̈ܠܐ ܪ̈ܘܚܢܝܬܐ܀
ܠܐ ܬܫܒܩܢܝ ܡܪܝܐ̈ ܐܠܗܝ ܘܠܐ ܬܪܚܩ ܡܢܝ.
ܐܠܐ ܟܬܪ ܠܥܘܕܪܢܝ ܘܦܪܘܩܝܢܝ
ܡܐ ܠܘܬ ܡܪܝܐ ܥܠ ܕܝ̈ܘܐ ܕܟܘܝܘ ܫܪ̈ܝܢܘܗܝ ܕܦܓܪܐ܀
ܐܥܒܪ
ܡܢܝ ܢܓܕܟ ܘܡܢ ܡܚܘܬܐ ܕܐܝ̈ܕܝܟ
ܡܒ ܠܘܩܒܠ ܢܦܫܐ ܕܡܛܠ ܚܘܫܒܐ ܕܟܪܝܘܬܐ. ܕܨܐܪ ܩܕܡ
ܥ̈ܝܢܝܢ ܤܝܒܘܬܐ ܕܐܒܐ ܘܒܨܝܪܘܬ ܚܝܠܐ ܕܐܡܐ: ܘܐܒܠܐ ܕܒ̈ܢܝ ܓܢܣܐ ܕܠܐ ܡܬܒܝܐܝܢ܀
ܪ̈ܟܝܟܢ
ܡ̈ܠܘܗܝ ܡܢ ܡܫܚܐ ܘܗ̈ܢܝܢ ܠܘ̈ܠܝܬܐ
ܡܓ ܠܘܬ ܡܪܝܐ܆ ܡܛܠ ܕܝܘܐ ܕܒܪܥܝܢܝ ܡܬܠܚܡ ܠܝ
ܫܢܝܘܬܐ ܘܚܣܝܪܘܬ ܡܕܥܐ: ܒܒܗܬܬܐ ܕܝܠܝ ܘܕܐܝܠܝܢ ܕܒܥܝܢ ܠܡܪܝܐ ܒܝܕ ܕܘܒܪ̈ܐ ܕܝܚܝܕܝܘܬܐ܀
ܠܐ ܢܒܗܬܘܢ ܒܝ ܐܝܠܝܢ ܕܡܤܒܪܝܢ ܒܟ ܡܪܝܐ̈ ܐܠܗܐ ܚܝܠܬܢܐ. ܘܠܐ ܢܚܦܪܘܢ ܒܝ ܐܝܠܝܢ ܕܒܥܝܢ ܠܟ
ܐܠܗܗ ܕܐܝܤܪܝܠ
ܡܕ ܠܘܩܒܠ ܢܦܫܐ ܕܠܐ ܚܟܡܐ ܡܢܐ ܐܡܪ̈ܝܢ ܪ̈ܝܫܐ ܕܕܝ̈ܘܐ. ܥܠ ܐܝܠܝܢ ܕܐܫܬܒܩܘ
ܡܢ ܡܪܝܐ܀
ܡܛܠ ܕܐܡܪܘ ܥܠܝ ܒ̈ܥܠܕܒܒܝ: ܘܐܝܠܝܢ ܕܢܛܪܝܢ ܠܢܦܫܝ܆ ܐܬܡܠܟܘ ܐܝܟ ܚܕܐ
ܘܐܡܪܘ. ܐܠܗܐ ܫܒܩܗ ܪܕܦܘܗܝ ܘܐܚܕܘܗܝ. ܡܛܠ ܕܠܝܬ ܠܗ ܡܦܨܝܢܐ
ܡܗ ܠܘܬ ܡܪܝܐ
ܡܛܠ ܚܘܘܬܐ ܕܡܬܚܙܝܢ ܕܦܪ̈ܚܝܢ ܒܐܐܪ̈. ܘܥܒܕܝܢ ܬܘܒ ܢܦܫܗܘܢ ܕܢܦܩܝܢ ܡܢ ܐܤ̈ܐ ܘܠܐ ܠܢ ܕܢܐܡܪ
ܡܕܡ ܕܐܦ ܤܒܐ ܡܨܪܝܐ ܛܘܒܢܐ ܡܩܪܝܣ ܦܬܚ ܦܘܡܗ ܘܐܡܪ܀
ܠܐ ܬܬܠ ܠܬܒܪܐ ܢܦܫܐ ܕܡܘܕܝܐ
ܠܟ
ܡܘ ܠܘܩܒܠ ܢܦܫܐ ܕܠܐ ܡܦܣܐ: ܕܡܢܐ ܐܡܪܝܢ ܥܠܝܢ ܠܚ̈ܕܕܐ ܕܝ̈ܘܐ ܛܢ̈ܦܐ.܀
ܘܐܡܪܘ.
ܬܘ ܢܘܒܕ ܐܢܘܢ ܡܢ ܥܡܐ܆ ܘܠܐ ܢܬܕܟܪ ܬܘܒ ܫܡܗ ܕܐܝܣܪܝܠ.
ܡܙ ܠܘܩܒܠ ܕܝ̈ܘܐ ܐܝܠܝܢ ܕܒܩܠܝܠ
ܩܠܝܠ ܡܫܪܝܢ ܡܬܕܡܝܢ ܒܨ̈ܠܡܐ ܡܫܟܪ̈ܐ: ܘܡܕܝܩܝܢ ܡܢ ܐܐܪ. ܘܠܐ ܠܢ ܕܢܦܢܐ ܦܬܓܡܐ. ܐܝܢܐ ܕܐܦ
ܙܕܝܩܐ ܛܘܒܢܐ ܐܢܛܘܢܝܢܘ ܦܢܝ ܘܐܡܪ܀
ܡܪܝܐ ܡܥܕܪܢܝ ܘܐܢܐ ܐܚܙܐ ܒܣ̈ܢܐܝ.
ܡܚ ܠܘܩܒܠ ܕܝܘܐ
ܕܐܬܓܘܙܠ ܐܝܟ ܢܘܪܐ: ܘܗܦܟ ܐܫܬܪܝ ܬܘܒ ܒܬܢܢܐ.܀.
ܦܚܐ ܐܬܬܒܪ. ܘܚܢܢ ܐܬܦܨܝܢ. ܥܘܕܪܢܢ
ܒܫܡܗ ܕܡܪܐ ܗܘ ܕܥܒܕ ܫܡܝܐ ܘܐܪܥܐ
ܡܛ ܠܘܬ ܡܪܝܐ ܥܠ ܕܝܘܐ ܕܡܬܠܚܡ ܠܝ. ܕܒܢܘܪܐ
ܡܓܘܙܠܬܐ ܡܘܩܕ ܠܝ܀.
ܢܚ̈ܬܢ ܥܠܝܗܘܢ ܓܘܡܪ̈ܐ. ܢܦܠܘܢ ܒܢܘܪܐ ܘܠܐ ܢܫܟܚܘܢ ܠܡܩܡ.
ܢܢ:
ܡܢ ܡܬ̈ܠܘܗܝ ܕܫܠܝܡܘܢ:
ܠܘܩܒܠ ܚܘܫܒܐ ܕܐܡܪ ܠܝ: ܕܩܝܘܢܕܝܢܘܣ ܪܒܐ ܘܐܘܠܨܢܐ ܣܓܝܐܐ
ܡܠܝܐ ܐܘܪܚܐ ܕܡܝܬܝܐ ܠܝܕܥܬܗ ܕܝܫܘܥ ܡܫܝܚܐ܀
ܐܡܪ ܚܒܢܢܐ ܡܐ ܕܡܫܬܕܪ. ܐܪܝܐ ܒܐܘܪܚܐ܆
ܘܩܛܠܐ ܒܝܬ ܫ̈ܘܩܐ
ܡܢ ܐܝܘܒ:
ܢܐ ܠܘܩܒܠ ܢܦܫܐ ܕܠܐ ܝܕܥܐ ܕܐܦܠܐ ܠܒܥܝܪܐ ܡܫܟܚ ܤܛܢܐ
ܕܢܬܩܪܒ: ܒܠܥܕ ܡܢ ܦܘܩܕܢܐ ܕܐܠܗܐ܀
ܥܒܕ ܐܝܕܘܗܝ ܒܪܟܬ. ܘܩܢܝܢܗ ܣܓܝ ܒܐܪܥܐ. ܒܪܡ
ܐܘܫܛ ܐܝܕܟ ܘܩܪܘܒ ܠܟܠܡܕܡ ܕܐܝܬ ܠܗ܆ ܐܠܐ ܒܐ̈ܦܝܟ ܢܨܚܝܟ
ܢܒ ܠܘܩܒܠ ܢܦܫܐ ܕܠܐ ܚܟܡܐ
ܕܡܢ ܒܬܪ ܢܣ̈ܝܘܢܐ ܕܗܘܝܢ ܠܗ ܒܝܕ ܚܘܫ̈ܒܐ: ܣܛܢܐ ܡܬܚܦܛ ܘܒܥܐ ܡܢ ܐܠܗܐ ܕܢܬܠ ܠܗ
ܫܘܠܛܢܐ ܥܠ ܦܓܪܐ܀
ܘܥܢܐ ܣܛܢܐ ܘܐܡܪ ܠܡܪܝܐ. ܡܫܟܐ ܚܠܦ ܡܫܟܐ. ܘܟܠܡܕܡ ܕܐܝܬ
ܠܓܒܪܐ ܝܗܒ ܚܠܦ ܢܦܫܗ ܘܡܬܦܠܛ. ܘܐܢ ܠܐ ܐܘܫܛ ܐܝܕܟ ܘܩܪܘܒ ܠܒܣܪܗ ܐܘ ܠܓܪܡܗ܆
ܐܠܐ ܒܐ̈ܦܝܟ ܢܨܚܝܟ
ܢܓ ܠܘܩܒܠ ܚܘ̈ܫܒܐ ܕܡܙܝܥܝܢ ܠܢ ܟܕ ܡܬܢܒܝܢ ܠܢ ܘܐܡܪܝܢ: ܕܗܐ ܠܡ
ܒܠܠܝܐ ܐܬܝܢ ܕܝ̈ܘܐ ܒܕܡܘܬ ܟܘ̈ܟܒܐ ܘܡܬܚܙܝܢ ܒܓܘ ܩܠܝܬܐ: ܘܡܘܩܕܝܢ ܥܝ̈ܢܝܟܘܢ ܘܐܦ̈ܝܟܘܢ.
ܦܩܚ ܗܘ ܠܢ ܕܒܙܒܢܐ ܗܢܐ ܕܢܣܝܘܢܐ܆ ܢܣܝܡ ܒܘܪܟܐ ܘܢܓܪ ܒܨܠܘܬܐ. ܘܢܗܦܟ ܐܦ̈ܝܢ ܘܠܐ ܢܚܘܪ
ܟܕ ܡܬܚܦܛܝܢ ܠܙܘܥܬܢ܀
ܐܠܝܐ ܗܘ ܢܟܤܝܘܗܝ ܥܡܛܢܐ. ܢܚܫܟܘܢ ܟܘ̈ܟܒܝ ܫܦܪܗ.
ܢܤܟܘܢ ܠܢܘܗܪܐ ܘܠܐ ܢܗܘܐ. ܘܠܐ ܢܚܙܐ ܒܙܠܝ̈ܩܝ ܫܦܪܐ
ܢܕ ܠܘܩܒܠ ܚܘܫܒܐ ܕܡܬܢܒܐ ܠܝ
ܘܐܡܪ: ܕܡܘܬܐ ܓܕܫ ܠܟ ܡܢ ܕܝ̈ܘܐ܀
ܐܢ ܡܐܬ ܓܒܪܐ ܚܝܐ. ܟܕ ܟܠܗܘܢ ܝܘܡ̈ܝ ܚ̈ܝܘܗܝ ܢܫܠܡ
ܡܢ ܡܝܟܐ:
ܢܗ ܠܘܩܒܠ ܪܘܚܐ ܒܝܫܬܐ ܕܩܝܡܐ ܠܘܩܒܠ ܢܦܫܝ: ܘܡܝܬܝܐ ܘܡܚܘܝܐ ܠܝ
ܚ̈ܛܗܝܗ ܩܕܡ̈ܝܐ. ܘܟܪܝܘܬܐ ܡܬܚܦܛܐ ܕܬܪܡܐ ܒܗ܀
ܠܐ ܬܚܕܝܢܝ ܠܝ ܒܥܠܕܒܒܬܝ.. ܕܢܦܠܬ
ܬܘܒ ܩܝܡܐ ܐܢܐ. ܘܕܝܬܒܬ ܒܚܫܘܟܐ ܡܪܝܐ ܡܢܗܪ ܠܝ
ܡܢ ܢܚܘܡ:
ܢܘ: ܠܘܩܒܠ ܢܦܫܐ ܕܠܐ
ܡܤܝܒܪܐ ܚܠܝܨܐܝܬ ܠܕܝܘܐ: ܐܝܢܐ ܕܒܙܒܢܐ ܕܨܠܘܬܐ ܡܢ ܫܠܝ ܐܬܐ ܘܫܟܢ ܥܠ ܐܒܪ̈ܐ ܘܥܠ ܩܕܠܐ:
ܘܚܐܟ ܠܐܪ̈ܢܐ ܘܛܪܦ ܠܢܚܝܪ̈ܐ.܀
ܛܒ ܗܘ ܡܪܝܐ ܠܡܣܝܥܘ ܒܝܘܡܐ ܕܐܘܠܨܢܐ. ܘܝܕܥ ܠܐܝܠܝܢ
ܕܬܟܝܠܝܢ ܥܠܘܗܝ
ܢܙ ܠܘܩܒܠ ܢܦܫܐ ܕܪܓܐ ܕܬܐܠܦ: ܕܡܢܐ ܟܝ ܗܘܐ ܠܗܘܢ ܠܕܝ̈ܘܐ ܒܝܘܡܐ
ܕܕܝܢܐ. ܘܐܝܢܘ ܓܢܣܐ ܕܬܫܢܝܩܐ ܕܡܫܬܠܡܝܢ ܠܗ. ܥܠ ܗܢܐ ܕܝܢ ܬܫܢܝܩܐ ܪܙܢܐܝܬ ܟܕ ܡܬܢܒܐ
ܢܒܝܐ ܬܢܐ ܘܐܡܪ܀
ܗܕܐ ܗܝ ܡܚܘܬܐ ܕܢܡܚܐ ܡܪܝܐ: ܠܟܠܗܘܢ ܥܡܡ̈ܐ ܕܡܬܚܝܠܝܢ ܥܠ ܐܪܫܠܡ
ܢܬܡܤܐ ܒܤܪܗܘܢ ܟܕ ܩܪܡܝܢ ܥܠ ܪ̈ܓܠܝܗܘܢ.ܘܥ̈ܝܢܗܘܢ ܢܬܡ̈ܣܝܢ ܒܕܘܟ̈ܝܬܗܝܢ. ܘܠܫܢܗܘܢ
ܢܬܡܤܐ ܒܦܘܡܗܘܢ
ܡܢ ܐܫܥܝܐ
ܢܚ ܠܘܩܒܠ ܕܝ̈ܘܐ ܕܡܢ ܫܠܝ ܐܘܚܕܘ ܢܘܪܐ: ܘܫܓܫܘ ܒܩ̈ܠܐ
ܪ̈ܗܝܒܐ: ܘܡܛܠ ܕܒܬܡܗܐ ܐܪܡܝܘܗ ܠܢܦܫܐ܆ ܠܐ ܫܒܩܘܗ ܕܬܦܠ ܒܙܘܥܬܗܘܢ. ܘܠܐ ܕܝܢ ܕܢܐܡܪ܆
ܡܕܡ ܕܐܦ ܐܒܘܢ ܩܕܝܫܐ ܡܘܪܝܣ ܦܢܝ ܦܬܓܡܐ ܠܘܩܒܠܗܘܢ ܘܐܡܪ.܀
ܙܘܥܘ ܥܡܡ̈ܐ
ܘܐܬܬܒܪܘ. ܘܨܘܬܘ ܟܠܗܘܢ ܪ̈ܚܝܩܐ ܕܐܪܥܐ. ܐܬܥܫܢܘ ܘܐܬܬܒܪܘ. ܘܐܬܪܥܘ ܬܪܥܝܬܐ ܘܬܬܒܛܠ.
ܡܠܠܘ ܡܠܬܐ ܘܠܐ ܬܬܩܝܡ ܡܛܠ ܥܡܢܘܐܝܠ
ܡܢ ܐܪܡܝܐ
ܢܛ ܠܘܩܒܠ ܚܘܫ̈ܒܐ ܕܓܕܫܝܢ ܠܢ
ܡܛܠ ܡܚܝܠܘܬܐ ܕܡܩܪܒܝܢ ܠܢ ܕܝ̈ܘܐ܀
ܘܐܢܐ܆ ܠܐ ܗܦܟܬ ܠܒܣܬܪܝ. ܐܦܠܐ ܩܡܬ ܒܚܪܝܢܐ.
ܓܘܫܡܝ ܝܗܒܬ ܠܡ̈ܚܘܬܐ܆ ܘܦܟ̈ܝ ܠܫܘܩܦܐ. ܘܐܦ̈ܝ ܠܐ ܐܦܢܝܬ ܡܢ ܒܗܬܬܐ ܘܡܢ ܪܘܩܐ. ܘܡܪܝܐ
ܐܠܗܐ ܥܕܪܢܝ. ܡܛܠ ܗܢܐ ܥܒܕܬ ܐܦ̈ܝ ܐܝܟ ܟܐܦܐ. ܘܝܕܥܬ ܕܠܐ ܒܗܬ ܐܢܐ. ܡܛܠ ܕܩܪܝܒ ܗܘ
ܡܙܕܩܢܝ
ܣ ܠܘܩܒܠ ܚܘܫܒܐ ܕܢܦܫܐ ܕܟܪܝܐ ܠܗ: ܥܠ ܚܤܕܐ ܕܡܚܤܕܝܢ ܠܗ ܪ̈ܚܡܝܗ
ܘܒ̈ܢܝ ܓܢܣܗ: ܡܛܠ ܕܠܐ ܦܠܓܬ ܠܗܘܢ ܡܢ ܡܢ ܢܟ̈ܣܝܗ: ܐܦܠܐ ܚܕ ܒܘܝܐܐ ܗܘܐ ܠܗ
ܡܢܗܘܢ܀
ܠܐ ܬܕܚܠܘܢ ܡܢ ܚܤܕܐ ܕܐܢܫܐ: ܘܡܢ ܓܘܕܦܗܘܢ ܠܐ ܬܙܘܥܘܢ.
ܣܐ ܠܘܩܒܠ ܢܦܫܐ ܕܠܐ
ܚܟܡܐ: ܕܚܘ̈ܫܒܐ ܣܪ̈ܝܩܐ ܕܚܠܬܐ ܘܐܪܬܝܬܐ ܡܘܠܕܝܢ ܒܗ: ܘܡܥܡܛܝܢ ܠܗ ܠܢܘܗܪܐ ܩܕܝܫܐ:
ܕܬܘܟܠܢܐ ܝܗܒ ܠܪܥܝܢܐ܀
ܐܬܪܚܩܝ ܡܢ ܥܫܘܩܝܐ܆ ܘܠܐ ܬܬܕܚܠܝܢ ܡܢ ܬܒܪܐ. ܡܛܠ ܕܠܐ ܩܪܒ ܠܟܝ
ܤܒ ܠܘܩܒܠ ܢܦܫܐ ܕܙܝܥܐ ܡܢ ܒܪ̈ܩܐ ܕܗܘܝܢ ܒܐ̈ܣܐ܀
ܠܐ ܬܕܚܠ ܡܢܗܘܢ. ܕܠܡܐ ܐܬܒܪܟ
ܩܕܡܝܗܘܢ. ܡܛܠ ܕܥܡܟ ܐܢܐ ܠܡܦܨܝܘܬܟ ܐܡܪ ܡܪܝܐ
ܣܓ ܠܘܬ ܡܪܝܐ ܡܛܠ ܚܘܫ̈ܒܐ ܕܟܪܝܘܬܐ
ܕܡܝܬܝܢ ܠܪܥܝܢܐ ܠܘܬ ܗܘܬܐ ܕܡܠܝܐ ܡ̈ܝܬܐ. ܘܛܒܥܝܢ ܒܠܒܐ ܚܙܘ̈ܢܐ ܡܫܟܪ̈ܐ ܗܠܝܢ ܕܝܢ ܐܬܐ ܐܢܘܢ
ܕܢܦܫܐ ܕܒܩܘܢܕܝܢܘܣ ܪܡܝܐ܀
ܠܡܢܐ ܗܘܐ ܟܐܒܝ ܥܫܝܢ: ܘܡܚܘܬܝ ܚܣܝܢܐ ܘܠܐ ܨܒܝܐ ܠܡܬܐܤܝܘܢ
ܘܗܘܐ ܠܒܝ ܐܝܟ ܡ̈ܝܐ ܟ̈ܕܒܐ ܕܠܐ ܡܬܗܝܡܢܝܢ
ܣܕ ܠܘܬ ܡܪܝܐ ܡܛܠ ܕܝ̈ܘܐ ܕܐܡܪܝܢ ܠܢ ܒܪܥܝܢܢ.
ܕܒܥܓܠ ܐܝܬ ܠܟܘܢ ܕܬܒܗܬܘܢ ܒܕܘܒܪ̈ܝܟܘܢ܀
ܢܒܗܬܘܢ ܪ̈ܕܘܦܝ ܘܠܐ ܐܒܗܬ ܐܢܐ. ܢܬܬܒܪܘܢ ܗܢܘܢ
ܘܠܐ ܐܬܒܪ ܐܢܐ. ܐܝܬܐ ܥܠܝܗܘܢ ܝܘܡܐ ܕܒܝܫܬܐ. ܘܚܕ ܬܪ̈ܝܢ ܬܒܪܐ ܬܒܘܪ ܐܢܘܢ
ܣܗ ܡܢ ܚܙܩܝܐܝܠ:
ܠܘܩܒܠ ܢܦܫܐ ܕܡܬܬܙܝܥܐ ܡܢ ܩܪ̈ܒܐ ܕܕܝ̈ܘܐ ܕܒܝܕ ܓܫܬܐ ܗܘܝܢ܀
ܠܐ ܬܕܚܠ ܡܢܗܘܢ ܘܡܢ
ܡ̈ܠܝܗܘܢ ܠܐ ܬܙܘܥ. ܡܛܠ ܕܒܝܬܐ ܐܢܘܢ ܡܡܪܡܪܢܐ
ܡܢ ܐܘܢܓܠܝܘܢ ܕܡܬܝ:
ܣܘ: ܠܘܩܒܠ
ܢܦܫܐ ܕܠܐ ܡܦܣܐ: ܕܐܦ ܠܐ ܥܠ ܚܙܝܪ̈ܐ ܫܠܝܛܝܢ ܕܝ̈ܘܐ ܐܝܠܝܢ ܕܡܫܬܒܗܪܝܢ ܒܗܕܐ. ܕܗܐ ܠܡ
ܫܠܝܛܝܢ ܚܢܢ ܥܠ ܒܢܝܢܫ̈ܐ. ܘܐܝܟ ܨܒܝܢܢ ܫܥܒܕܢ ܐܢܘܢ܀
ܐܝܬ ܗܘܐ ܕܝܢ ܠܗܠ ܡܢܗܘܢ. ܒܩܪܐ
ܕܚܙܝܪ̈ܐ ܣ̈ܓܝܐܐ ܕܪܥܝܐ ܗܢܘܢ ܕܝܢ ܫܐ̈ܕܐ. ܒܥܝܢ ܗܘܘ ܡܢܗ ܘܐܡܪܝܢ. ܐܢ ܡܦܩ ܐܢܬ ܠܢ. ܐܦܣ
ܠܢ ܕܢܐܙܠ ܠܒܩܪ̈ܐ ܕܚܙܝܪ̈ܐ. ܐܡܪ ܠܗܘܢ ܝܫܘܥ ܙܠܘ
ܡܢ ܐܘܢܓܠܘܢ ܕܝܘܚܢܢ:
ܣܙ ܠܘܩܒܠ
ܢܦܫܐ ܕܠܐ ܡܤܬܟܠܐ: ܕܡܚܝܠܘܬܐ ܕܗܝܡܢܘܬܐ ܪܗܝܒܘܬܐ ܘܙܘܥܬܐ ܡܝܬܝܐ ܐܠܒܐ܀.
ܠܐ ܢܕܚܠܘܢ
ܠܒ̈ܘܬܟܘܢ. ܐܠܐ ܗܝܡܢܘ ܒܐܠܗܐ ܘܒܝ ܗܝܡܢܘ
ܡܢ ܦܪܟܣܣ:
ܣܚ: ܠܘܩܒܠ ܢܦܫܐ ܕܟܪܝܐ
ܘܫ̈ܠܝܚܐ ܢܦܩܘ ܡܢ ܬܡܢ ܟܕ ܚܕܝܢ. ܡܢ ܩܕܡ
ܦܪܨܘܦܗ ܕܟܢܫܐ ܗܘ: ܕܐܫܬܘܝܘ ܗܘܘ ܕܡܛܠ ܫܡܐ ܕܐܠܗܐ ܢܨܛܥܪܘܢ ܫ:
ܡܢ ܐܓܪܬܐ ܕܠܘܬ
ܪ̈ܗܘܡܝܐ:
ܣܛ: ܥܠ ܐܘܠܨܢܐ ܕܡܢ ܢܣ̈ܝܘܢܐ܀
ܘܠܐ ܗܟܢܐ ܒܠܚܘܕ ܐܠܐ ܘܐܦ ܒܐܘ̈ܠܨܢܝܢ ܡܫܬܒܗܪܝܢ
ܚܢܢ. ܕܝܕܥܝܢܢ ܕܐܘܠܨܢܐ܆ ܡܣܝܒܪܢܘܬܐ ܓܡܪ ܒܢ. ܘܡܢ ܡܣܝܒܪܢܘܬܐ ܒܘܩܝܐ. ܘܡܢ ܒܘܩܝܐ
ܤܒܪܐ. ܣܒܪܐ ܕܝܢ ܠܐ ܡܒܗܬ ܡܛܠ ܕܚܘܒܗ ܕܐܠܗܐ ܡܫܦܥ ܥܠ ܠܒ̈ܘܬܢ: ܒܪܘܚܐ ܕܩܘܕܫܐ
ܕܐܬܝܗܒܬ ܠܢ
ܥ ܠܘܩܒܠ ܚܘܫܒܐ ܕܡܬܢܒܐ ܠܝ ܐܘ̈ܠܨܢܐ ܚ̈ܣܝܢܐ. ܕܡܢ ܢܣ̈ܝܘܢܐ ܗܘܝܢ.܀
ܡܬܪܥܐ ܐܢܐ ܓܝܪ܆ ܕܠܐ ܫܘܝܢ ܚܫ̈ܘܗܝ ܕܙܒܢܐ ܗܢܐ: ܠܬܫܒܘܚܬܐ ܐܝܕܐ ܕܥܬܝܕܐ ܕܬܬܓܠܐ ܒܢ.
ܡܢ
ܐܓܪܬܐ ܕܩܘܪ̈ܢܬܝܐ ܩܕܡܝܬܐ:
ܥܐ: ܠܘܩܒܠ ܚܘܫܒܐ ܕܢܦܫܐ ܕܣܒܪܐ ܠܗ: ܕܝܬܝܪ ܡܢ ܚܝܠܗ
ܡܬܢܤܝܐ܀
ܡܗܝܡܢ ܗܘ ܕܝܢ ܐܠܗܐ ܕܠܐ ܢܢܤܟܘܢ ܒܡܕܡ ܕܠܐ ܡܨܝܢ ܐܢܬܘܢ ܚܝܠܐ. ܐܠܐ ܢܥܒܕ
ܠܢܤܝܢܟܘܢ ܡܦܩܢܐ. ܐܝܟܢܐ ܕܬܫܟܚܘܢ ܠܡܤܝܒܪܘ
ܡܢ ܐܓܪܬܐ ܕܬܪ̈ܬܝܢ ܕܩܘܪ̈ܢܬܝܐ:
ܥܒ:
ܠܘܩܒܠ ܢܦܫܐ ܕܡܛܠ ܢܤܝܘܢܐ ܬܡܝܗܐ ܕܠܐ ܡܬܡܠܠ: ܐܝܢܐ ܕܐܢܐ ܠܐ ܨܒܝܬ ܕܐܓܠܝܘܗܝ ܒܝܕ
ܡ̈ܠܐ: ܡܛܠ ܐܢܫܐ ܐܝܠܝܢ ܕܐܘܝܐܝܬ ܡܢ ܒܝܫܘܬܐ ܘܡܢ ܗܕܝܘܛܘܬܐ: ܒܡ̈ܠܐ ܕܚ̈ܦܝܛܢ ܘܕܠܐ ܚ̈ܦܝܛܢ
ܡܓܚܟܝܢ: ܘܕܤܒܪܝܢ ܠܗܘܢ ܬܘܒ ܕܠܐ ܫܚܩܝܢ ܕܝ̈ܘܐ ܠܝܚ̈ܝܕܝܐ ܓܠܝܐܝܬ. ܗܠܝܢ ܕܝܢ ܐܢ̈ܫܐ.
ܐܝܟ ܗܘ ܕܟܠ ܟܠܗ ܠܐ ܚܟܡܝܢ ܒܩܪܒܐ ܕܕܝ̈ܘܐ: ܐܝܠܝܢ ܕܒܝܕ ܒܥܬܐ ܗܘ ܕܒܥܝܢ ܡܢ ܐܠܗܐ: ܫܩܠܝܢ
ܫܘܠܛܢܐ ܠܡܢܤܝܘܬܢ܀
ܘܥܠ ܢܦܫܢ ܦܣܩܢ ܡܘܬܐ. ܕܠܐ ܢܗܘܐ ܠܢ ܬܘܟܠܢܐ ܥܠ ܢܦܫܢ. ܐܠܐ
ܥܠ ܐܠܗܐ ܗܘ ܕܡܩܝܡ ܡܝܬܐ. ܗܘ ܕܡܢ ܡ̈ܘܬܐ ܗܠܝܢ ܚ̈ܣܝܢܐ ܦܪܩܢ. ܘܬܘܒ ܢܦܪܩܢ
ܥܓ
ܠܘܩܒܠ ܕܝܘܐ ܕܡܝܬܐ ܠܝ ܚ̈ܛܗܐ ܕܛܠܝܘܬܝ܀
ܩܕܡ̈ܝܬܐ ܓܝܪ ܥܒܪ ܠܗ̈ܝܢ. ܘܟܠܡܕܡ ܡܢ
ܕܪܫ ܐܬܚܕܬ ܒܡܫܝܚܐ
ܥܕ ܠܘܩܒܠ ܚܘܫ̈ܒܐ ܕܟܪܝܘܬܐ ܕܓܕܫܝܢ ܠܢ ܥܠ ܨ̈ܒܘܬܐ ܥܒܘܪ̈ܝܬܐ:
ܘܒܥܩܬܐ ܤܓܝܐܬܐ ܡܛܒܥܝܢ ܘܡܡܝܬܝܢ ܠܗ ܠܪܥܝܢܐ.܀
ܟܪܝܘܬܐ ܕܡܛܠ ܐܠܗܐ. ܬܘܬ ܢܦܫܐ
ܗܝ ܕܡܦܢܝܐ ܠܚ̈ܝܐ ܕܠܥܠܡ ܘܟܪܝܘܬܐ ܕܥܠܡܐ ܡܘܬܐ ܗܘ ܓܒܠܐ
ܥܗ ܡܢ ܐܓܪܬܐ ܕܝܥܩܘܒ.
ܠܘܩܒܠ ܚܘܫ̈ܒܐ ܕܢܦܫܐ ܕܡܢܐܬ ܠܗ ܒܩܪܒܐ ܓܠܝܐ ܕܠܘܩܒܠ ܕܝ̈ܘܐ܀
ܐܫܬܥܒܕܘ ܗܟܝܠ
ܠܐܠܗܐ. ܘܩܘܡܘ ܠܘܩܒܠ ܤܛܢܐ ܘܥܪܩ ܠܗ ܡܢܟܘܢ
ܡܢ ܐܓܪܬܐ ܕܦܛܪܘܣ:
ܥܘ ܠܘܩܒܠ
ܚܘܫ̈ܒܐ ܕܡܣܟܝܢ ܕܡܬܛܪܝܐ ܢܦܫܐ ܡܢ ܕܝ̈ܘܐ: ܘܦܓܪܐ ܢܦܠ ܒܟܘܪܗܢܐ ܕܠܝܬ ܠܗ ܐܤܝܘܬܐ܀
ܡܢܘ ܢܒܐܫ ܠܟܘܢ ܐܢ ܗܘ ܕܬܗܘܘܢ ܡܡܪ̈ܝܢܐ ܕܛܒ̈ܬܐ ܐܦܢ ܚܫܬܘܢ ܥܠ ܐܦ̈ܝ ܙܕܝܩܘܬܐ ܛܘܒܝܟܘܢ.
ܡܢ ܕܚܠܬܗܘܢ ܕܝܢ ܠܐ ܬܕܚܠܘܢ ܘܠܐ ܬܙܘܥܘܢ. ܠܡܪܝܐ ܕܝܢ ܡܫܝܚܐ ܩܕܫܘ ܠܒܘ̈ܬܟܘܢ(?)܀
ܒܪܝܟ
ܗܘ ܡܪܢ ܘܐܠܗܢ ܘܦܪܘܩܢ ܝܫܘܥ ܡܫܝܚܐ ܕܝܗܒ ܠܢ ܙܟܘܬܐ ܥܠ ܕܝܘܐ ܕܟܪܝܘܬܐ.
ܬܘܒ ܡܐܡܪܐ
ܕܚܡܫܐ: ܠܘܩܒܠ ܕܝܘܐ ܕܪܘܓܙܐ.
ܡܢ ܟܬܒܐ ܕܒܪܝܬܐ
.ܐ. ܠܘܩܒܠ ܢܦܫܐ ܕܠܐ ܝܕܥܐ. ܕܠܐܟܬܐ
ܕܐܚܐ ܕܐܓܪܬ. ܦܫܝܩܐܝܬ ܡܕܥܟܐ ܡܘܗܒܬܐ܀
ܐܡܪ ܕܝܢ ܝܥܩܘܒ ܠܥܣܘ. ܐܢ ܐܫܟܚܬ ܪ̈ܚܡܐ
ܒ̈ܥܝܢܝܟ܆ ܣܒ ܩܘܪܒܢܝ ܡܢ ܐܝ̈ܕܝ ܡܛܠ ܕܗܫܐ ܚܙܝܬ ܐܦ̈ܝܟ ܐܝܟ ܚܙܘܐ ܕܐܦ̈ܝ ܡܠܐܟܐ. ܘܐܨܛܒܝܬ
ܒܝ. ܣܒ ܒܘܪ̈ܟܬܝ ܕܐܝܬܝܬ ܠܟ ܡܛܠ ܕܪܚܡ ܥܠܝ ܐܠܗܐ. ܡܛܠ ܕܐܝܬ ܠܝ ܟܠ.
ܒ
ܠܘܩܒܠ ܚܘܫ̈ܒܐ ܕܪܘܓܙܐ ܕܓܕܫܝܢ ܠܐܘܪܚܐ ܕܕܘܒܪܐ ܬܩ̈ܢܐ܀
ܠܐ ܬܨܘܢ ܒܐܘܪܚܐ
ܓ ܠܘܩܒܠ
ܚܘܫܒܐ ܕܡܣܗܕ ܕܓܠܘܬܐ. ܗܝ ܕܝܠܝܕܐ ܡܢ ܪܘܓܙܐ܀.
ܠܐ ܬܣܗܕ ܒܚܒܪܟ ܣܗܕܘܬܐ ܕܓܠܬܐ.
ܕ ܠܘܩܒܠ ܚܘܫܒܐ ܕܗܘܐ ܡܢ ܡܐܟܠܩܪܨܐ. ܕܡܥܝܪ ܘܡܕܠܚ ܠܗ ܠܚܡܬܐ ܥܠ ܐܚ̈ܐ܀
ܠܐ ܬܫܪ
ܠܫܡܥܐ ܟܕܒܐ
ܗ ܠܘܩܒܠ ܚܘܫܒܐ ܕܡܢ ܪܘܓܙܐ ܡܬܬܥܝܪ: ܘܨܒܐ ܕܢܚܣܕ ܠܐܚ̈ܐ܀
ܡܢ ܟܠ
ܡܠܬܐ ܟܕܒܬܐ ܗܘܝܬ ܡܪܚܩ
ܘ ܠܘܩܒܠ ܚܘܫܒܐ ܕܨܐܪ ܒܪܥܝܢܐ ܠܐܚܐ: ܕܒܣܢܐܬܐ ܐܡܪ ܡܕܡ
ܕܒܝܫ: ܘܫܡܥ ܡܕܡ ܕܣܢܐ. ܗܕܐ ܕܝܢ ܐܝܟ ܕܡܬܢܐ ܗܘܐ ܝܘܚܢܢ ܢܒܝܐ ܚܙܝܐ ܕܬܒܐܝܣ܆ ܡܫܟܚܐ
ܗܝ ܕܠܐ ܬܗܘܐ. ܐܢ ܗܘ ܠܡ ܕܗܕܐ ܣܢܐܬܐ: ܥܠ ܐܦ̈ܝ ܢܟ̈ܣܐ ܘܣܝܒܪ̈ܬܐ ܗܘܝܐ ܤܢܐܬܐ ܕܝܢ ܕܚܠܦ
ܠܐ ܬܤܢܐ ܠܐܚܘܟ ܒܠܒܟ. ܐܠܐ ܡܟܤܘ ܐܟܤܝܗܝ
ܠܚܒܪܟ܆ ܕܠܐ ܡܛܠܬܗ ܬܩܒܠ ܚܛܗܐ
ܡܢ ܡܢܝܢܐ
ܙ: ܠܘܩܒܠ ܢܦܫܐ ܕܣܒܪܐ ܠܗ ܕܠܒܪ ܡܢ
ܟܝܢܐ ܐܝܬܝܗ ܡܟܝܟܘܬܐ ܡܫܡܠܝܬܐ܀.
ܘܓܒܪܐ ܡܘܫܐ ܡܟܝܟ ܗܘܐ ܡܢ ܟܠܗܘܢ ܒܢܝܢܫ̈ܐ ܕܥܠ
ܐܪܥܐ
ܡܢ ܫܡܘܐܝܠ
ܚ ܠܘܩܒܠ ܢܦܫܐ ܕܠܐ ܚܟܡܐ: ܕܗܝܕܝܢ ܗܘ ܓܕܫ̈ܢ ܨ̈ܘܚܝܬܐ ܕܡܢ ܒ̈ܢܝܢܫܐ
ܐܡܬܝ ܕܐܠܗܐ ܫܒܩ ܠܗܿ ܕܬܬܢܣܐ܀
ܐܡܪ ܠܗ ܕܘܝܕ ܠܐܝܫܝ ܘܠܟܠܗܘܢ ܥܒ̈ܕܘܗܝ. ܗܐ ܒܪܝ
ܕܢܦܩ ܡܢ ܚ̈ܨܝ܆ ܒܥܐ ܕܢܣܒ ܢܦܫܝ ܡܢܝ. ܐܦ ܗܫܐ ܒ̈ܢܝ ܝܡܝܢܝ ܫܒܩܘܗܝ ܡܨܚܐ. ܐܠܗܐ
ܗܘ ܐܡܪ ܠܗ. ܛܟ ܢܚܙܐ ܡܪܝܐ ܘܢܦܪܥܢܝ ܛܒ̈ܬܐ ܚܠܦ ܨ̈ܘܚܝܬܝ ܕܝܘܡܢܐ
ܡܢ ܕܘܝܕ.
ܛ ܠܘܩܒܠ
ܢܦܫܐ ܕܡܗܡܝܐ ܡܢ ܡܟܝܟܘܬܐ: ܘܪ̈ܓܐ ܠܗ ܕܬܐܠܦ ܐܘܪ̈ܚܬܗ ܕܡܪܝܐ.܀.
ܘܡܕܒܪ ܠܡ̈ܟܝܟܐ
ܒܕܝܢܐ܆ ܘܡܠܦ ܠܡ̈ܣܟܢܐ ܐܘܪ̈ܚܬܗ
ܝ ܠܘܩܒܠ ܢܦܫܐ ܕܡܩܒܠܐ ܚܘܫ̈ܒܐ ܕܪܘܓܙܐ: ܘܡܟܢܫܐ
ܥܠ ܐܚ̈ܐ ܥ̈ܠܠܬܐ ܒܝܫ̈ܬܐ: ܘܩ̈ܢܛܐ ܕܓ̈ܠܐ܀
ܐܬܬܢܝܚ ܡܢ ܚܡܬܐ ܘܐܬܬܢܝܚ ܡܢ ܪܘܓܙܐ. ܘܠܐ ܬܚܣܡ
ܠܡܥܒܕ ܒܝܫܬܐ. ܡܛܠ ܕܒ̈ܝܫܐ ܣܝܦܝܢ. ܘܐܝܠܝܢ ܕܡܤܒܪܝܢ ܒܡܪܝܐ ܝܪܬܝܢ ܐܪܥܐ
ܝܐ ܠܘܩܒܠ
ܚܘܫܒܐ ܕܡܬܬܙܝܥ ܒܡܐܟܠ ܩܪܨܐ ܕܐܚ̈ܐ: ܘܒܥܢܢܐ ܕܡܢ ܚܡܬܐ ܡܚܦܐ ܢܦܫܗ܀
ܝܬܒ ܗܘܝܬ
ܘܪ̈ܢܐ ܒܐܚܘܟ. ܘܒܒܪ ܐܡܟ ܡܡܝܩ ܗܘܝܬ
ܠܘܬ ܡܪܝܐ ܥܠ ܕܝܕܥ ܠܗ ܪܥܝܢܐ ܕܡܢ ܕܠܝܚܘܬܗ
ܕܚܡܬܐ: ܗܘܝܢ ܒܠܠܝܐ ܚ̈ܙܘܢܐ ܕܚ̈ܝܠܐ. ܘܥܠ ܕܐܕܪܟ ܬܘܒ ܕܒܝܕ ܡܪܚܡܢܘܬܐ ܘܢܓܝܪܘܬ ܪܘܚܐ. ܗܘܝܢ
ܡܬܕܥܟܝܢ܀
ܚܟܡܝܢܝ ܡܢ ܒ̈ܥܠܕܒܒܝ ܡܛܠ ܕܦܘܩ̈ܕܢܝܟ ܢܛܪܬ. ܡܢ ܟܠܗܘܢ ܡ̈ܠܦܢܝ
ܣܟܠܝܢܝ: ܡܛܠ ܕܣܗܕܘܬܟ ܗܘܬ ܠܝ ܪܢܝܐ
ܝܓ ܠܘܩܒܠ ܕܝܘܐ ܕܡܓܪܓ ܚܡܬܐ ܥܠ ܐܚ̈ܐ:
ܘܬܘܒ ܗܕܐ ܬܫܒܘܚܬܐ ܡܦܝܣ ܠܢ ܕܢܫܒܚ: ܐܝܕܐ ܕܟܬܝܒ ܒܗ ܦܘܩܕܢܐ ܕܢܓܝܪܘܬ ܪܘܚܐ: ܗܘ
ܕܚܢܢ ܠܐ ܢܛܪܢܝܗܝ. ܗܕܐ ܕܝܢ ܥܒܕ ܕܢܓܚܟ ܥܠܝܢ. ܟܕ ܡܙܡܪܝܢܢ ܦܘܩܕܢܐ ܗܘ ܕܒܥܒܕܐ ܠܐ
ܢܛܪܢܝܗܝ܀
ܐܝܟܢ ܢܫܒܚ ܠܟܘܢ ܬܫ̈ܒܚܬܗ ܕܡܪܝܐ ܒܐܪܥܐ ܢܘܟܪܝܬܐ
ܡܢ ܡ̈ܬܠܘܗܝ ܕܫܠܝܡܘܢ:
ܝܕ. ܠܘܩܒܠ ܚܘܫܒܐ ܕܬܪ̈ܥܝܬܐ ܒܝ̈ܫܬܐ ܡܟܢܫ ܥܠ ܐܚܐ. ܐܝܟ ܕܥܠ ܡܗܡܝܢܐ ܘܐܝܟ
ܡܚܤܕܢܐ ܘܕܡܕܡ ܕܘܠܐ ܠܐ ܥܒܕ܀
ܠܐ ܬܬܚܫܒ ܒܝܫܬܐ ܥܠ ܚܒܪܟ. ܕܝܬܒ ܥܡܟ ܒܫܠܝܐ
ܝܗ
ܠܘܩܒܠ ܚܘܫܒܐ ܕܡܢ ܤܢܐܬܐ ܗܘܐ. ܘܨܒܐ ܕܢܬܚܪܐ ܥܡ ܐܚܐ: ܥܠ ܨ̈ܒܘܬܐ ܥܒܘܪ̈ܝܬܐ܀
ܣܢܐܬܐ
ܬܓܪܓ ܕܝܢܐ ܘܠܟܠܗܘܢ ܥܘ̈ܠܐ ܬܟܣܐ ܣܢܐܬܐ
ܝܘ ܠܘܩܒܠ ܚܘܫܒܐ ܕܥܨܐ ܠܢ ܕܢܦܩ ܠܘܛܬܐ
ܥܠ ܐܚܐ܀
ܡܟܡܢܢ ܒܒܥܠܕܒܒܘܬܐ ܣ̈ܦܘܬܐ ܕܥܘܠܐ ܘܕܡܦܩ ܠܘܛܬܐ ܚܤܝܪ ܪܥܝܢܐ ܗܘ
..ܙ. ܠܘܩܒܠ ܚܡܬܐ ܕܡܬܕܠܚܐ ܥܠ ܐܚܐ: ܘܒܥܕܢܐ ܕܨܠܘܬܐ ܕܠܐ ܐܣܟܝܡ ܥܒܕܐ ܠܗ ܠܪܥܝܢܐ
ܢܦܫܐ ܒܪܝܟܬܐ ܬܕܗܢ. ܘܓܒܪܐ ܚܡܬܢܐ ܕܠܐ ܐܣܟܝܡ ܐܝܬܘܗܝ
ܝܚ ܠܘܩܒܠ ܚܘܫܒܐ ܕܡܥܝܪ
ܚܡܬܢ ܥܠ ܒܥܝܪܐ ܕܠܐ ܬܪܨܐ ܒܐܘܪܚܗ܀
ܙܕܝܩܐ ܝܕܥ ܡܢ ܢܦܫܐ ܕܒܥܝܪܗ. ܘܥܘ̈ܠܐ ܐܚܕܝܢ ܪ̈ܚܡܝܗܘܢ
ܝܛ ܠܘܩܒܠ ܚܘܫܒܐ ܕܩܠܝܠܐܝܬ ܡܬܬܥܝܪ ܡܢ ܪܘܓܙܐ: ܘܡܛܠ ܥܠܬܐ ܫܝܛܬܐ ܡܕܠܚ ܠܗ
ܠܪܥܝܢܐ܀
ܣܟܠܐ ܒܪ ܝܘܡܗ ܡܘܕܥ ܪܘܓܙܗ. ܘܥܪܝܡܐ ܡܛܫܐ ܨܥܪܗ
ܟܟ ܠܘܩܒܠ ܚܘܫܒܐ
ܕܡܬܪܥܐ ܢܟܠܐ ܥܠ ܐܚܐ.܀.
ܠܐ ܢܣܬܩܒܠ ܨܝܕܐ ܠܓܒܪܐ ܢܟܝܠܐ ܘܩܢܝܢܐ ܝܩܝܪܐ ܒܪܢܫܐ ܓܒܝܐ
ܟܐ ܠܘܩܒܠ ܢܦܫܐ ܕܒܐܘܪܚܐ ܕܐܟܬܐ ܪܕܝܐ: ܘܒܝܕ ܚܘܫ̈ܒܐ ܡܓܪܓܐ ܠܗ ܠܪܥܝܢܐ ܕܢܬܓܘܙܠ
ܒܚܡܬܐ ܒܬܪ ܕܝܢ ܚܘܫܒܗ ܕܗܢܐ ܚܫܐ ܡܬܚܒܢܐ. ܗܘܐ ܙܒܢܐ ܘܬܪܥܝܬܐ ܕܡܠܬܐ: ܐܘ ܕܨܒܘܬܐ
ܥܒܘܪܝܬܐ. ܗܝ ܕܡܚܦܐ ܘܡܛܒܥܐ ܠܗ ܠܪܥܝܢܐ.܀.
ܒܐܘܪܚܐ ܕܙܕܝܩܘܬܐ ܚ̈ܝܐ ܛ̈ܒܐ. ܘܐܘܪܚܐ
ܕܐܟܬ̈ܢܐ ܠܡܘܬܐ
ܟܒ ܠܘܩܒܠ ܚܘܫܒܐ ܕܪܘܓܙܐ ܕܡܙܥ ܘܥܩܪ ܠܗ ܠܢܓܝܪܘܬ ܪܘܚܐ: ܘܥܒܕܠܢ
ܕܢܬܪܥܐ ܥܒ̈ܕܐ ܕܣܟܠܘܬܐ. ܗܘ ܕܐܝܬܘܗܝ ܚܝܠܗ ܡܢ ܪܓܬܐ ܕܨܒ̈ܘܬܐ: ܗܝ ܕܚܠܦܝܗ ܡܟܝܟܘܬܐ
ܡܬܬܚܝܒܐ ܕܬܬܥܝܪ܀
ܕܢܓܝܪܐ ܪܘܚܗ ܣܓܝ ܚܟܝܡ. ܘܕܟܪܝܐ ܪܘܚܗ ܛܒ ܤܟܠ
ܟܓ ܥܘܩܒܠ
ܚܘܫܒܐ ܕܪܘܓܙܐ: ܕܟܠܐ ܠܢ ܕܢܦܢܐ ܦܬܓܡܐ ܒܡܟܝܟܘܬܐ ܠܐܝܠܝܢ ܕܟܐܝܢ ܒܢ ܒܘܠܝܬܐ.܀.
ܪܘܓܙܐ
ܟܕ ܠܘܩܒܠ ܚܘܫܒܐ ܕܡܓܪܐ ܠܢ ܒܡܨܘܬܐ ܥܠ ܐܚ̈ܐ: ܘܟܠܐ ܠܢ ܕܢܦܣܘܩ ܥ̈ܠܠܬܐ.܀.
ܓܒܪܐ
ܚܡܬܢܐ ܡܓܪܓ ܚܡܬܐ. ܘܓܒܪܐ ܢܓܝܪ ܪܘܚܐ ܥܕܠܐ ܗܘܝܐ ܡܕܥܟ ܠܗ
ܟܗ ܠܘܩܒܠ ܢܦܫܐ
ܕܤܒܪܐ ܠܗ ܕܠܐ ܗܘܐ ܚܘܫܒܐ ܕܪܘܓܙܐ ܡܤܠܝ ܩܕܡ ܐܠܗܐ: ܐܠܐ ܚܛܝܬܐ ܕܗܘܝܐ ܡܢܗ܀
ܡܣܠܝܢ
ܐܢ̈ܝܢ ܩܕܡ ܡܪܝܐ ܡܚ̈ܫܒܬܐ ܒ̈ܝܫܬܐ. ܘܕܟ̈ܝܢ ܡ̈ܠܐ ܒܣܝܡ̈ܬܐ
ܟܘ ܠܘܩܒܠ ܚܘܫܒܐ ܕܡܠܟ ܠܢ:
ܕܢܪܚܡ ܠܐܢ̈ܫܐ ܚܡ̈ܬܢܐ ܘܡ̈ܠܠܝ ܪܘܓܙܐ.܀
ܠܐ ܬܗܘܐ ܪܚܡܐ ܠܓܒܪܐ ܚܡܬܢܐ. ܘܥܡ ܓܒܪܐ ܕܡܠܐ
ܪܘܓܙܐ ܠܐ ܬܥܘܠ. ܕܠܐ ܬܐܠܦ ܢܡ̈ܘܣܘܗܝ: ܘܬܫܟܚ ܬܘܩܠܬܐ ܠܢܦܫܟ
ܟܙ ܠܘܩܒܠ ܢܦܫܐ
ܕܐܬܥܠܒܬ: ܘܨܒܝܐ ܕܐܦ ܗܝ ܬܥܠܘܒ. ܗܕܐ ܕܝܢ ܐܝܬܝܗ ܐܬܐ ܕܚܫܐ ܒܝܫܐ ܕܢܦܫܐ ܕܪܚܡܐ
ܣܪ̈ܝܩܬܐ܀
ܠܐ ܬܐܡܪ ܕܐܥܒܕ ܠܗ ܐܝܟ ܕܥܒܕ ܠܝ: ܘܐܦܪܥܝܘܗܝ ܐܝܟ ܥܒ̈ܕܘܗܝ
ܟܚ ܠܘܩܒܠ
ܪܥܝܢܐ ܕܠܐ ܡܬܪܚܡ ܘܠܐ ܡܪܚܦ ܥܠ ܒܥܠܕܒܒܗ: ܟܕ ܒܡܣܟܢܘܬܐ ܡܪܝܪܬܐ ܚܙܐ ܠܗ: ܘܠܐ ܨܒܐ
ܕܒܝܕ ܦܬܘܪܐ ܢܫܪܐ ܒܥܠܕܒܒܘܬܗ܀
ܐܢ ܟܦܢ ܒܥܠܕܒܒܟ ܐܘܟܠܝܗܝ. ܘܐܢ ܨܗܐ ܐܫܩܝܗܝ. ܘܟܕ
ܗܠܝܢ ܬܥܒܕ ܠܗ܆ ܓܘܡܪܐ ܕܢܘܪܐ ܬܩܒܪ ܥܠ ܩܪܩܒܬܗ. ܘܡܪܝܐ ܦܪ̈ܥ ܠܟ ܛܒ̈ܬܐ
ܟܛ
ܡܢ ܩܘܗܠܬ
ܠܘܩܒܠ ܚܘܫܒܐ ܕܢܦܫܐ ܕܒܥܓܠ ܡܬܓܘܙܠܐ ܒܚܡܬܐ: ܘܥܠ ܐܚ̈ܐ ܚܪܝܦܐܝܬ
ܡܬܡܪܡܪܐ.܀.
ܠܐ ܬܣܬܪܗܒ ܒܪܘܚܟ ܠܡܪܓܙ. ܡܛܠ ܕܪܘܓܙܗܘܢ ܕܣ̈ܟܠܐ ܒܥܘܒܗܘܢ ܢܬܬܢܝܚ
ܠ ܠܘܩܒܠ ܢܦܫܐ ܕܠܐ ܨܒܝܐ ܕܬܫܪܐ ܥ̈ܠܠܬܐ ܕܚܡܬܐ: ܐܠܐ ܪܓܐ ܡܐܟ̈ܠܬܐ ܘܢܚ̈ܬܐ ܘܢ̈ܟܣܐ
ܘܫܘܒܚܐ ܕܥܒܪ. ܐܝܠܝܢ ܕܡܛܠܬܗܝܢ ܚܡܬܐ ܕܡܬܕܠܚܐ܆ ܠܐ ܦܪ̈ܩܐ ܡܢ ܠܒܐ: ܐܠܐ ܡܛܒܥܐ ܠܗ
ܠܪܥܝܢܐ ܠܐܒܕܢ ܐܒ̈ܕܢܝܢ܀
ܐܥܒܪ ܪܘܓܙܐ ܡܢ ܠܒܟ܆ ܘܐܦܪܩ ܒܝܫܬܐ ܡܢ ܒܣܪܟ. ܡܛܠ ܕܛܠܝܘܬܐ
ܘܠܐ ܝܕܥܬܐ ܗܒܠܐ
ܡܢ ܫܪܬ ܫܪܝܢ.
ܠܐ: ܠܘܩܒܠ ܕܝܘܐ ܕܒܝܕ ܢ̈ܣܝܘܢܐ ܣܓ̈ܝܐܐ: ܒܥܐ ܕܢܕܥܟ
ܚܘܒܢ ܕܠܘܬ ܐܚ̈ܐ܀
ܡ̈ܝܐ ܣ̈ܓܝܐܐ ܠܐ ܢܫܟܚܘܢ ܠܡܕܥܟܘ ܠܚܘܒܐ. ܘܢܗܪ̈ܘܬܐ ܠܐ ܢܚܦܘܢܝܗܝ
ܠܒ ܡܢ ܐܫܥܝܐ
ܠܘܩܒܠ ܚܘܫܒܐ ܕܡܓܪܐ ܠܝ: ܕܐܟܬܘܒ ܠܗܘ ܡܢ ܕܐܥܝܩܢ: ܡ̈ܠܐ ܕܥܩܬܐ
ܕܡ̈ܚܝܢ ܠܠܒܗ: ܘܝ ܠܕܒܕܩܝܢ ܒܕܩ̈ܐ ܕܥܬܐ ܘܟܬܒܝܢ ܥܘܠܐ
ܡܢ ܐܘ̈ܠܝܬܗ ܕܐܪܡܝܐ:
ܠܓ: ܠܘܬ
ܡܪܝܐ ܡܛܠ ܚܘܫ̈ܒܐ ܕܪܘܓܙܐ: ܕܠܐ ܡܓܪܝܢ ܡܟܝܠ ܨܐܕܝܢ܀
ܕܢܬ ܡܪܝܐ ܕܝܢܐ ܕܢܦܫܝ ܘܦܪܩܬ
ܚ̈ܝܝ. ܚܙܝܬ ܡܪܝܐ ܡܘܟܟܝ ܘܕܢܬ ܕܝܢܝ. ܚܙܝܬ ܟܠܗ ܢܩܡܬܗܘܢ ܘܟܠ ܕܐܬܚܫܒܘ ܥܠܝ
ܠܕ
ܡܢ ܐܘܢܓܠܝܘܢ ܕܡܬܝ:
ܠܘܩܒܠ ܚܘܫ̈ܒܐ ܕܪܘܓܙܐ ܕܡܩܢܝܢ ܠܢ ܐܒ̈ܗܝܢ ܘܐܚ̈ܝܢ: ܒܙܒܢܐ ܕܪܕܦܝܢ
ܠܢ ܡܛܠ ܫܡܗ ܕܡܪܝܐ܀
ܛܘܒܝܗܘܢ ܠܐܝܠܝܢ ܕܐܬܪܕܦܘ ܡܛܠ ܟܐܢܘܬܐ ܕܕܝܠܗܘܢ ܗܝ ܡܠܟܘܬܐ
ܕܫܡܝܐ
ܠܗ ܠܘܩܒܠ ܚܘܫܒܐ ܕܡܢ ܩܘܛܥ ܪܥܝܢܐ ܡܬܕܠܚ ܥܠ ܐܚܐ܀
ܟܠ ܡܢ ܕܪܓܙ ܥܠ
ܐܚܘܗܝ ܐܝܩܐ܆ ܡܚܝܒ ܗܘ ܠܕܝܢܐ
ܠܘ ܠܘܩܒܠ ܪܥܝܢܐ ܕܡܬܚܡܬ ܥܠ ܡܢ ܕܡܚܗܝ. ܘܠܐ ܨܒܐ
ܒܝܕ ܡܚܘܬܐ ܕܬܪ̈ܬܝܢ: ܕܢܫܪܐ ܚܘܫܒܐ ܕܗܘܐ ܠܗ ܡܛܠ ܡܚܘܬܐ ܩܕܡܝܬܐ.܀
ܡܢ ܕܡܚܐ ܠܟ ܥܠ
ܦܟܟ ܕܝܡܝܢܐ܆ ܐܦܢܐ ܠܗ ܐܦ ܐܚܪܢܐ.
ܠܙ ܠܘܩܒܠ ܚܘܫ̈ܒܐ ܕܡܓܪܓܝܢ ܠܢ: ܕܢܣܢܐ ܘܢܠܘܛ
ܠܒܥܠܕܒ̈ܒܝܢ܀
ܐܚܒܘ ܥܒܥܠܕܒ̈ܒܝܟܘܢ. ܘܒܪܟܘ ܠܡܢ ܕܠܝܛ ܠܟܘܢ. ܘܥܒܕܘ ܕܫܦܝܪ
ܠܡܢ ܕܤܢܐ ܠܟܘܢ. ܘܨܠܘ ܥܠ ܐܝܠܝܢ ܕܪܕܦܝܢ ܠܟܘܢ ܒܩܛܝܪܐ. ܐܝܟܢܐ ܕܬܗܘܘܢ ܒ̈ܢܘܗܝ
ܕܐܒܘܟܘܢ ܕܒܫܡܝܐ
ܡܢ ܐܘܢܓܠܝܘܢ ܕܠܘܩܐ:
ܠܚ: ܠܘܩܒܠ ܚܘܫܒܐ ܕܪܘܓܙܐ ܕܠܐ ܣܦܩܐ ܠܗ
ܬܝܒܘܬܐ ܕܐܚܐ: ܐܠܐ ܬܘܒ ܗܦܟ ܡܬܡܪܡܪ ܥܠܘܗܝ.܀.
ܐܢ ܢܚܛܐ ܐܚܘܟ ܟܐܝ ܒܗ. ܘܐܢ ܬܐܒ
ܫܒܘܩ ܠܗ. ܘܐܢ ܫܒܥ ܙܒ̈ܢܝܢ ܒܝܘܡܐ ܢܣܟܠ ܒܟ: ܘܫܒܥ ܙܒ̈ܢܝܢ ܢܬܦܢܐ ܠܘܬܟ ܘܢܐܡܪ:
ܕܬܐܒ ܐܢܐ ܫܒܘܩ ܠܗ
ܡܢ ܐܘܢܓܠܝܘܢ ܕܝܘܚܢܢ:
ܠܛ ܠܘܩܒܠ ܪܥܝܢܐ ܕܡܩܒܠ ܚܘܫ̈ܒܐ ܕܪܘܓܙܐ
ܥܠ ܐܚ̈ܐ: ܘܡܚܒܠ ܦܘܩܕܢܐ ܕܚܘܒܐ ܗܘ ܕܐܬܩܪܝ ܚܕܬܐ܀
ܦܘܩܕܢܐ ܚܕܬܐ ܝܗܒ ܐܢܐ ܠܟܘܢ܆
ܕܗܘܝܬܘܢ ܡܚܒܝܢ ܚܕ ܠܚܕ ܐܝܟܢܐ ܕܐܢܐ ܐܚܒܬܟܘܢ: ܐܦ ܐܢܬܘܢ ܬܚܒܘܢ ܚܕ ܠܚܕ ܫܠܝܚܐ:
ܡܢ
ܡ: ܠܘܩܒܠ ܚܘܫ̈ܒܐ ܕܪܘܓܙܐ: ܕܥܠ ܚܘܒܐ ܡܬܡܪܡܪܝܢ܀
ܡܢܘ ܢܦܪܫܢܝ
ܡܢ ܚܘܒܗ ܕܡܫܝܚܐ. ܐܘܠܨܢܐ ܐܘ ܒܝܫܬܐ. ܐܘ ܡܣܟܢܘܬܐ. ܐܘ ܪܕܘܦܝܐ. ܐܘ ܟܦܢܐ. ܐܘ ܥܪܛܠܝܘܬܐ.
ܐܘ ܣܝܦܐ
ܡܐ ܠܘܩܒܠ ܚܘܫ̈ܒܐ ܕܚܣܡܐ: ܕܚܕܝܢ ܒܡܦܘܠܬܐ ܕܒ̈ܥܠܕܒܒܝܢ܀.
ܗܘܝܬܘܢ ܚܕܝܢ
ܥܡ ܕܚܕܝܢ. ܘܗܘܝܬܘܢ ܒܟܝܢ ܥܡ ܕܒܟܝܢ. ܘܡܕܡ ܕܡܬܪܥܝܢ ܐܢܬܘܢ ܥܠ ܢܦܫܟܘܢ: ܗܟܢܐ ܐܦ
ܥܠ ܐܚ̈ܝܟܘܢ
ܡܒ ܠܘܩܒܠ ܚܘܫܒܐ ܕܐܚܕ ܐܟܬܐ: ܘܡܬܚܦܛ ܕܢܦܪܘܥ ܒܝܫܬܐ ܠܡܢ
ܕܐܥܝܩܗ܀
ܠܐ ܬܦܪܥܘܢ ܒܝܫܬܐ ܚܠܦ ܒܝܫܬܐ܆ ܐܠܐ ܢܬܒܛܠ ܠܟܘܢ ܕܬܥܒܕܘܢ ܛܒ̈ܬܐ ܠܘܬ
ܒܢܝ̈ܢܫܐ ܟܠܗܘܢ
ܡܢ ܐܓܪܬܐ ܩܕܡܝܬܐ ܕܩܘܪ̈ܢܬܝܐ:
ܡܓ ܠܘܩܒܠ ܚܘܫ̈ܒܐ ܕܪܘܓܙܐ. ܕܡܠܟܝܢ
ܠܢ ܕܢܥܠܘܒ ܘܢܛܠܘܡ܀
ܡܛܠ ܡܢܐ ܓܝܪ ܠܐ ܡܬܓܠܙܝܢ ܐܢܬܘܢ. ܘܡܛܠ ܡܢܐ ܒܟܘܢ ܠܐ
ܡܣܟܠܝܢ. ܐܠܐ ܐܢܬܘܢ ܡܣܟܠܝܢ ܐܢܬܘܢ܆ ܘܓܠܙܝܢ ܐܢܬܘܢ ܐܦ ܠܐܚ̈ܝܟܘܢ
ܡܕ ܠܘܩܒܠ ܚܘܫܒܐ
ܕܪܘܓܙܐ: ܕܡܬܚܡܬ ܥܠ ܗܘ ܕܚܣܕܢܝ ܒܥܒܕܘܬܐ܀
ܥܒܕܐ ܐܬܩܪܝܬ܆ ܠܐ ܢܬܒܛܠ ܠܟ. ܐܢ
ܓܝܪ ܡܫܟܚ ܐܢܬ ܠܡܬܚܪܪܘ܆ ܐܬܚܪܪ. ܥܒܕܐ ܓܝܪ ܐܝܢܐ ܕܐܬܩܪܝ ܒܡܪܢ. ܒܪܚܐܪ̈ܐ ܗܘ ܒܡܪܢ
ܡܗ ܠܘܩܒܠ ܢܦܫܐ ܕܠܐ ܡܦܤܐ ܒܦܪܪܝܣܝܐ ܕܚܘܒܐ: ܘܒܝܕ ܡܚܫܒܬܐ ܕܪܘܓܙܐ: ܡܬܓܠܙܐ
ܡܢܗ܀
ܐܢ ܒܟܠ ܠܫܢ ܕܒܢܝܢ̈ܫܐ ܐܡܠܠ ܘܒܕܡܠܐܟ̈ܐ: ܘܚܘܒܐ ܠܐ ܢܗܘܐ ܒܝ܆ ܗܘܝܬ ܠܝ ܐܝܟ
ܢܚܫܐ ܕܙܐܡ܆ ܐܘ ܨܨܠܐ ܕܝܗܒ ܩܠܐ. ܘܐܢ ܬܗܘܐ ܒܝ ܢܒܝܘܬܐ: ܘܐܕܥ ܪ̈ܐܙܐ ܟܠܗܘܢ ܘܟܠܗ ܝܕܠܬܐ:
ܘܟܠܗ ܗܝܡܢܘܬܐ ܐܝܟܢܐ ܕܛܘܪܐ ܐܫܢܐ: ܘܚܘܒܐ ܠܐ ܢܗܘܐ ܒܝ܆ ܠܐ ܗܘܝܬ ܡܕܡ. ܘܐܢ ܐܘܟܠ ܟܠ
ܕܐܝܬ ܠܝ ܠܡ̈ܣܟܢܐ: ܐܦ ܐܫܠܡ ܦܓܪܝ ܕܢܩܕ: ܘܚܘܒܐ ܠܐ ܢܗܘܐ ܒܝ܆ ܡܕܡ ܠܐ ܝܬܪ ܐܢܐ. ܚܘܒܐ
ܢܓܝܪܐ ܪܘܚܗ ܘܒܤܝܡ. ܚܘܒܐ ܠܐ ܚܣܡ. ܘܠܐ ܡܙܕܥܦ. ܘܠܐ ܡܬܚܬܪ. ܘܠܐ ܡܫܬܒܗܪ. ܘܠܐ ܒܥܐ
ܡܕܡ ܕܠܢܦܫܗ ܒܠܚܘܕ ܢܢܝܚ. ܐܠܐ ܐܦ ܕܚܒܪܘܗܝ. ܚܘܒܐ ܠܐ ܡܬܬܦܝܪ. ܘܠܐ ܡܬܪܥܐ ܕܒܝܫ.
ܘܠܐ ܚܕܐ ܒܒܝܫܬܐ ܕܐܚܪܝܢ. ܐܠܐ ܚܕܐ ܒܩܘܫܬܐ. ܚܘܒܐ ܟܠ ܡܕܡ ܡܣܝܒܪ܆ ܘܟܠܡܕܡ ܡܗܝܡܢ.
ܟܠ ܡܤܒܪ ܟܠ ܣܒܠ. ܚܘܒܐ ܡܢ ܡܬܘܡ ܠܐ ܢܦܠ
ܡܢ ܐܓܪܬܐ ܕܠܘܬ ܓ̈ܠܛܝܐ:
ܡܘ:
ܠܘܩܒܠ ܢܦܫܐ ܕܪܓܙܐ ܚܪܝܦܐܝܬ: ܘܒܥܝܐ ܕܬܫܟܚ ܒܩܢܘܡܗ ܬܚܘܡܐ ܕܝܕܥܬܐ ܕܫܪܪܐ܀
ܦܐܪ̈ܐ ܕܝܢ ܕܪܘܚܐ ܐܝܬܝܗܘܢ ܚܘܒܐ. ܚܕܘܬܐ ܘܫܠܡܐ. ܘܡܓܪܬ ܪܘܚܐ܆ ܘܡܣܝܒܪܢܘܬܐ. ܘܛܒܘܬܐ
ܘܗܝܡܢܘܬܐ. ܘܡܟܝܟܘܬܐ ܘܒܣܝܡܘܬܐ
ܡܙ ܠܘܩܒܠ ܚܘܫ̈ܒܐ ܕܪܡܝܢ ܠܢ ܒܥܩܬܐ: ܡܛܠ
ܒܘܨܪ̈ܝܗܘܢ ܕܐܚ̈ܐ܀
ܗܘܝܬܘܢ ܫܩܠܝܢ ܛܥܢܐ ܚܕܕܚܕ. ܘܗܟܢܐ ܡܡܠܝܢ ܐܢܬܘܢ ܢܡܘܤܗ ܕܡܫܝܚܐ
ܡܚ ܠܘܩܒܠ ܚܘܫ̈ܒܐ ܕܢܦܫܐ ܕܡܬܪܥܝܐ ܒܪܘܓܙܐ: ܥܠ ܐܢ̈ܫܐ ܕܛܒ̈ܬܐ ܣܓܝܐ̈ܬܐ ܩܒܠ
ܡܢܗܘܢ: ܘܗܦܟ ܪܛܢܘ ܥܠܝܗܘܢ܀
ܘܟܕ ܥܒܕܝܢܢ ܕܛܒ܆ ܠܐ ܗܘܬ ܡܐܢܐ ܠܢ. ܢܗܘܐ ܓܝܪ ܙܒܢܐ
ܕܢܚܨܘܕ ܘܠܐ ܬܐܡܢ ܠܢ
ܡܢ ܐܓܪܬܐ ܕܐ̈ܦܤܝܐ
ܡܛ ܠܘܩܒܠ ܚܘܫ̈ܒܐ ܕܪܘܓܙܐ ܕܠܐ ܫܒܩܝܢ ܠܢ
ܕܢܬܪܥܐ ܠܐܚ̈ܐ. ܟܕ ܨܝܪ̈ܝܢ ܩܕܡ ܥ̈ܝܢܝܢ ܥܠܠܬܐ ܕܒܘܠܝܬܐ ܐܝܬܝܗܝܢ. ܗܠܝܢ ܕܝܢ ܐܝܬܝܗܝܢ. ܒܗܬܬܐ
ܘܕܚܠܬܐ ܘܫܘܒܗܪܐ. ܕܠܐ ܠܡ ܬܘܒ ܒܗ̈ܝܢ ܟܕ ܒ̈ܗܝܢ ܒܗܠܝܢ ܣ̈ܟܠܘܬܐ ܩ̈ܕܡܝܬܐ ܢܦܠ: ܗܘ ܡܢ
ܕܐܬܥܒܪ ܒܗܕܐ. ܗܕܐ ܕܝܢ ܐܬܐ ܐܝܬܝܗ ܕܨܢܝܥܘܬܐ ܕܕܝܘܐ. ܕܠܐ ܨܒܐ ܕܢܫܒܘܩ ܠܪܥܝܢܐ: ܕܢܗܘܐ ܡܚܪܪ
ܡܢ ܐܟܬܐ܀
ܘܫܡܫܐ ܥܠ ܪܘܓܙܟܘܢ ܠܐ ܢܥܪܒ. ܘܠܐ ܬܬܠܘܢ ܐܬܪܐ ܠܐܟܠܩܪܨܐ
ܢܢ ܠܘܩܒܠ
ܚܘܫ̈ܒܐ ܕܟܠܓܢܣ ܕܡܢ ܚܡܬܐ ܡ̈ܬܝܠܕܝܢ: ܥܠ ܨ̈ܒܘܬܐ ܕܡܕܡ ܡܕܡ܀
ܟܠܗ ܡܪܝܪܘܬܐ ܘܪܘܓܙܐ:
ܘܚܡܬܐ ܘܪܘܒܐ ܘܨ̈ܘܚܝܬܐ܆ ܢܫ̈ܬܩܠܢ ܡܢܟܘܢ. ܥܡ ܟܠܗ ܒܝܫܘܬܐ
ܐܓܪܬܐ ܢܐ: ܕܠܘܬ
ܦܝ̈ܠܝܦܣܝܐ:
ܠܘܩܒܠ ܚܘܫ̈ܒܐ ܕܪܘܓܙܐ. ܕܡܡܪܚܝܢ ܕܢܪܛܢܘܢ ܥܠ ܬܫܡܫܬܐ ܕܐܚ̈ܐ܀
ܟܠ
ܡܕܡ ܕܥܒܕܝܢ ܐܢܬܘܢ܆ ܕܠܐ ܪܛܢܐ ܘܕܠܐ ܦܠܓܘܬܐ. ܐܠܐ ܒܒܪܝܪܘܬܐ ܬܗܘܘܢ. ܕܠܐ ܡܘܡ ܘܕܠܐ ܪܫܝܢ. ܐܝܟ
ܒ̈ܢܝܐ ܕܐܠܗܐ ܕܥܡܪܝܢ ܒܕܪܐ ܥܣܩܐ ܘܡܦܬܠܐ
ܡܢ ܐܓܪܬܐ ܕܩ̈ܘܠܣܝܐ:
ܢܒ: ܠܘܩܒܠ ܚܘܫ̈ܒܐ
ܕܡܢ ܚܡܬܐ ܕܡܬܓܘܙܠܐ ܗܘܝܢ: ܘܡܢ ܚܡܝܡܘܬܗܘܢ ܓܘܕܦܐ ܘܕܓܠܘܬܐ ܡܘܠܕܝܢ.܀
ܗܫܐ ܕܝܢ
ܡܢ ܦܘܡܟܘܢ ܠܐ ܢ̈ܦܩܢ. ܘܠܐ ܬܗܘܘܢ ܪܢܝܢ ܚܕ ܒܚܕ
ܐܓܪܬܐ ܕܬ̈ܣܠܘܢܩܝܐ ܩܕܡܝܬܐ:
ܢܓ ܠܘܩܒܠ
ܚܘܫ̈ܒܐ ܕܨܒܝܢ ܕܢܦܪܥܘܢ ܒܝܫܬܐ ܚܠܦ ܒܝܫܬܐ܀
ܐܙܕܗܪܘ ܕܠܡܐ ܐܢܫ ܡܢܟܘܢ ܒܝܫܬܐ ܢܦܪܘܥ
ܐܠܐ ܒܟܠܙܒܢ ܗܪܛܘ ܒܬܪ ܛܒ̈ܬܐ. ܕܠܘܬ ܚ̈ܕܕܐ ܘܕܠܘܬ ܟܠܢܫ
ܡܢ ܐܓܪܬܐ ܕܛܡܬܐܝܘ ܩܕܡܝܬܐ
ܢܕ ܠܘܩܒܠ ܢܦܫܐ ܕܠܐ ܝܕܥܐ ܤܟܗ ܕܦܘܩܕܢܐ ܕܐܠܗܐ: ܘܒܝܕ ܚܘܫ̈ܒܐ ܕܪܘܓܙܐ ܡܚܒܠܐ ܠܗ܀
ܤܟܗ ܕܝܢ ܕܦܘܩܕܢܐ ܐܝܬܘܗܝ ܚܘܒܐ. ܕܡܢ ܠܒܐ ܕܟܝܐ ܘܡܢ ܬܐܪܬܐ ܛܒܬܐ܆ ܘܡܢ ܗܝܡܢܘܬܐ ܕܠܐ
ܫܓܝܫܘܬܐ
ܢܗ: ܡܢ ܐܓܪܬܐ ܕܬܪ̈ܬܝܢ ܕܝܠܗ ܕܛܝܡܬܐܣ:
ܠܘܩܒܠ ܪܥܝܢܐ ܕܒܝܕ ܚܘܫ̈ܒܐ ܬܟܬܘܫܐ
ܡܩܝܡ ܒܬܪܥܝܬܐ܀
ܥܒܕܗ ܕܝܢ ܕܡܪܢ. ܠܐ ܚܝܒ ܗܘ ܠܡܬܟܬܫܘ. ܐܠܐ ܕܢܗܘܐ ܡܟܝܟ ܥܘܬ
ܟܠܢܫ
ܢܘ ܠܘܩܒܠ ܚܘܫܒܐ ܕܪܘܓܙܐ ܕܓܕܫ ܠܝ: ܡܛܠ ܪܕܘܦܝܐ: ܕܡܬܪܕܦ ܐܢܐ ܡܢ ܐܒ̈ܗܝ
ܘܡܢ ܒ̈ܢܝ ܓܢܣܝ ܡܛܠ ܫܡܗ ܕܡܪܝܐ܀
ܐܝܠܝܢ ܕܝܢ ܕܨܒܝܢ ܠܡܚܐ ܒܝܫܘܥ ܡܫܝܚܐ ܐܠܗܢ
ܒܟܐܢܘܬܐ܆ ܐܦ ܗܢܘܢ ܡܬܪܕܦܝܢ
ܢܙ: ܡܢ ܐܓܪܬܐ ܕܦܝܠܡܘܢ:
ܠܘܩܒܠ ܚܘܫܒܐ ܕܡܥܝܪ ܒܢ
ܪܘܓܙܐ: ܥܠ ܐܚܐ ܕܫܩܠ ܟܤܦܐ ܐܘ ܡܕܡ ܐܚܪܝܢ ܠܤܘܢܩܢܗ: ܘܠܐ ܡܬܚܦܛ ܕܢܦܪܥܝܘܗܝ܀
ܐܢ ܐܣܟܠ ܒܟ ܐܘ ܡܕܡ ܫܩܠ ܡܢܟ ܐܢܐ ܦܪܥ ܐܢܐ
ܢܚ: ܡܢ ܐܓܪܬܐ ܕܝܥܩܘܒ
ܠܘܩܒܠ ܢܦܫܐ
ܕܩܠܝܠܐܝܬ ܪܓܙܐ: ܘܒܥܝܐ ܙܕܝܩܘܬܐ ܕܐܠܗܐ܀
ܢܗܘܐ ܕܝܢ ܟܠ ܐܢܫ ܚ̈ܒܝܒܝ ܡܣܪܗܒ ܠܡܫܡܥ܆
ܘܡܘܚܪ ܠܡܡܠܠܘ܆ ܘܡܘܚܪ ܠܡܪܓܙ. ܪܘܓܙܗ ܓܝܪ ܕܓܒܪܐ ܙܕܝܩܘܬܐ ܕܐܠܗܐ ܠܐ ܥܒܕ
ܢܛ ܠܘܩܒܠ ܚܘܫܒܐ ܕܡܠܐ ܠܗ ܠܪܥܝܢܐ ܪܘܓܙܐ: ܘܒܥܐ ܕܢܚܙܐ ܢܦܫܗ ܒܚܟܡܬܐ ܕܐܠܗܐ܀
ܚܟܡܬܐ ܕܡܢ ܠܥܠ ܩܕܝܫܐ ܗܝ ܘܡܟܝܟܐ ܘܡܫܬܡܥܢܝܐ ܘܡܠܝܐ ܪ̈ܚܡܐ ܘܦܐܪ̈ܐ ܛ̈ܒܐ. ܘܕܠܐ
ܦܠܓܘܬܐ ܗܝ. ܘܒܐ̈ܦܐ ܠܐ ܢܣܒܐ. ܦܐܪ̈ܐ ܕܝܢ ܕܡܢ ܙܕܝܩܘܬܐ ܒܫܝܢܐ ܡܙܕܪܥܝܢ ܠܐܝܠܝܢ ܕܥܒܕܝܢ ܫܠܡܐ
ܣ ܠܘܩܒܠ ܚܘܫܒܐ ܕܡܬܬܙܝܥ ܒܡܐܟܠ ܩܪܨܐ ܕܐܚ̈ܐ: ܘܒܣܐ ܒܗ ܒܣܐܡ ܢܡܘܣܐ: ܕܠܐ ܗܘܐ
ܠܡ ܟܐܢܐܝܬ ܤܡܗ ܠܗܢܐ ܢܡܘܤܐ ܕܦܩܕ ܘܐܡܪ̈. ܕܠܐ ܬܐܟܘܠ ܩܪ̈ܨܐ ܕܐܚܘܟ܀
ܡܢ ܕܡܡܠܠ ܥܠ
ܐܚܘܗܝ ܐܘ ܕܐܢ ܠܐܚܐ܆ ܡܡܠܠ ܥܠ ܢܡܘܤܐ ܘܕܐܢ ܠܢܡܘܣܐ. ܘܐܢ ܠܢܡܘܣܐ ܕܐܢ ܐܢܬ܆ ܠܐ ܗܘܝܬ
ܥܒܘܕܗ ܕܢܡܘܣܐ ܐܠܐ ܕܝܢܗ. ܚܕ ܗܘ ܓܝܪ ܣܐܡ ܢܡܘܤܐ ܘܕܝܢܐ. ܕܡܫܟܚ ܠܡܚܝܘ ܘܠܡܘܒܕܘ
ܡܢ ܐܓܪܬܐ ܕܦܛܪܘܣ:
ܣܐ ܠܘܩܒܠ ܪܥܝܢܐ ܕܨܒܐ ܕܢܦܪܘܥ ܒܝܫܬܐ ܚܠܦ ܒܝܫܬܐ: ܐܘ ܨܘܚܝܬܐ
ܚܠܦ ܨܘܚܝܬܐ: ܘܠܐ ܒܥܐ ܕܒܝܕ ܒܘܪ̈ܟܬܐ ܢܛܥܐ ܐܢܘܢ: ܠܚܘܫ̈ܒܐ ܡܨ̈ܚܝܢܐ ܘܐܟ̈ܠܝ ܩܪ̈ܨܐ.܀.
ܠܐ
ܬܦܪܥܘܢ ܒܝܫܬܐ ܚܠܦ ܒܝܫܬܐ: ܐܘ ܨܘܚܝܬܐ ܚܠܦ ܨܘܚܝܬܐ. ܐܠܐ ܚܠܦ ܗܠܝܢ܆ ܡܒܪܟܘ
ܒܪܟܘ. ܡܛܠ ܕܠܗܕܐ ܗܘ ܐܬܩܪܝܬܘܢ. ܕܒܘܪܟܬܐ ܬܐܪܬܘܢ
ܣܒ: ܡܢ ܐܓܪܬܐ ܕܝܘܚܢܢ:
ܠܘܩܒܠ
ܪܥܝܢܐ ܕܐܡܪ ܕܐܝܬ ܒܗ ܕܚܠܬ ܐܠܗܐ: ܘܣܢܐ ܠܐܚܘܗܝ܀
ܡܢ ܕܐܡܪ ܓܝܪ ܕܒܢܘܗܪܐ ܐܝܬܘܗܝ ܘܤܢܐ
ܠܐܚܘܗܝ ܒܚܫܘܟܐ ܐܝܬܘܗܝ ܥܕܡܐ ܠܗܫܐ
ܤܓ ܠܘܩܒܠ ܚܘܫ̈ܒܐ ܕܡܢ ܣܢܐܬܐ ܡܬܝܠܕܝܢ:
ܘܥܒܕܝܢ ܠܪܥܝܢܐ ܩܛܠ ܠܐܝܐ܀
ܟܠ ܕܤܢܐ ܠܐܚܘܗܝ܆ ܩܛܠ ܐܢܫܐ ܗܘ. ܘܝܕܥܝܢ ܐܢܬܘܢ ܕܟܠ ܡܢ
ܕܩܛܠ ܐܢܫܐ ܗܘ܆ ܠܝܬ ܠܗ ܚ̈ܝܐ ܕܠܥܠܡ
ܣܕ ܠܘܩܒܠ ܪܥܝܢܐ ܕܡܘܕܐ ܕܡܚܒ ܠܐܠܗܐ: ܒܝܕ
ܕܝܢ ܣܢܐܬܐ ܕܠܘܬ ܐܚܐ: ܒܚܘܒܐ ܩܕܡܝܐ ܟܦܪ܀
ܐܢ ܐܢܫ ܐܡܪ ܕܡܚܒ ܠܐܠܗܐ ܘܠܐܚܘܗܝ ܣܢܐ܆
ܕܓܠܐ ܐܝܬܘܗܝ. ܘܫܪܪܐ ܠܝܬ ܒܗ. ܗܘ ܓܝܪ ܕܠܐܚܘܗܝ ܕܡܬܚܙܐ ܠܐ ܡܚܒ܆ ܐܝܟܢܐ ܠܐܠܗܐ ܕܠܐ
ܚܙܝܗܝ ܡܫܟܚ ܕܢܚܒ܀
ܒܪܝܟ ܗܘ ܡܪܢ ܝܫܘܥ ܡܫܝܚܐ ܐܠܗܢ. ܕܝܗܒ ܠܢ ܙܟܘܬܐ ܥܠ
ܚܘ̈ܫܒܐ ܕܕܝܘܐ ܕܪܘܓܙܐ ܕܢܙܟܝܘܗܝ.
ܬܘܒ ܡܐܡܪܐ ܕܫܬܐ܆ ܠܘܩܒܠ ܚܘܫ̈ܒܐ ܕܕܝܘܐ ܕܩܘܛܥ
ܪܥܝܢܐ:
ܡܢ ܒܪܝܬܐ:
ܐ: ܠܘܩܒܠ ܚܘܫܒܐ ܕܕܝܘܐ ܕܩܘܛܥ ܪܥܝܢܐ: ܕܣܢܐ ܥܒܕܐ ܕܐܝ̈ܕܝܐ ܕܐܘܡܢܘܬܐ
ܕܝܕܥ: ܘܨܒܐ ܕܢܐܠܦ ܐܘܡܢܘܬܐ ܐܚܪܬܐ ܕܝܬܝܪܐܝܬ ܡܬܪܣܝܐ ܠܗ: ܘܠܝܬ ܒܗ ܥܡܠܐ ܤܓܝܐܐ܀
ܒܕܘܥܬܐ ܕܐܦ̈ܝܟ ܬܐܟܘܠ ܠܚܡܐ܆ ܥܕܡܐ ܕܬܗܦܘܟ ܠܐܪܥܐ ܐܝܕܐ ܕܡܢܗ ܐܬܢܣܒܬ. ܡܛܠ ܕܥܦܪܐ
ܒ ܡܢ ܡܦܩܢܐ
ܠܘܩܒܠ ܚܘܫܒܐ ܕܡܢ ܩܘܛܥ ܪܥܝܢܐ ܡܬܬܙܝܥ ܒܡܐܟܠ
ܩܪܨܐ ܕܥܠ ܪܝܫ ܕܝܪܐ: ܒܥܠܬܐ ܕܗܐ ܠܡ ܠܐ ܡܒܝܐ ܠܐܚ̈ܐ: ܘܩܫܐ ܠܗܘܢ ܘܠܐ ܡܪܚܡ ܥܠܝܗܘܢ
ܒܐܘܠܨܢܗܘܢ܀
ܠܟܗܢܐ ܕܐܠܗܐ ܠܐ ܬܨܚܐ. ܘܠܪܝܫܐ ܕܥܡܟ ܠܐ ܬܠܘܛ
ܡܢ ܡܢܝܢܐ:
ܓ: ܠܘܩܒܠ:
ܢܦܫܐ ܕܡܬܪܦܝܐ ܠܚܘܫܒܐ ܕܩܘܛܥ ܪܥܝܢܐ: ܘܕܠܐ ܡܣܝܒܪܢܘܬܐ ܡܣܟܝܐ ܕܬܣܒܥ ܡܢ ܦܐܪ̈ܐ
ܕܝܕܥܬܐ ܕܫܪܪܐ.܀.
ܐܬܚܝܠܘ ܘܣܒܘ ܡܢ ܦܐܪ̈ܐ ܕܐܪܥܐ
ܕ: ܡܢ ܬܢܝܢ ܢܡܘܣܐ:
ܠܘܩܒܠ ܪܥܝܢܐ ܕܡܢ
ܚܘܫ̈ܒܐ ܕܩܘܛܥ ܪܥܝܢܐ: ܐܬܪܟܢ ܬܘܒ ܠܘܬ ܥܠܡܐ ܘܐܚܒܗ: ܘܠܨ̈ܒܘܬܐ ܐܝܠܝܢ ܕܡܢܗ ܐܝܬܝܗܝܢ܀
ܫܡܥ ܐܝܣܪܝܠ.. ܡܪܝܐ ܐܠܗܢ ܡܪܝܐ ܚܕ ܗܘ. ܪܚܡ ܠܡܪܝܐ ܐܠܗܟ ܡܢ ܟܠܗ ܠܒܟ ܘܡܢ
ܟܠܗ ܚܝܠܟ. ܘܡܢ ܟܠܗ ܢܦܫܟ ܘܡܢ ܟܠܗ ܩܢܝܢܟ:
ܗ ܠܘܩܒܠ ܚܘܫܒܐ ܕܩܘܛܥ ܪܥܝܢܐ: ܕܡܢ
ܩܪܝܢܐ ܘܡܢ ܝܘܠܦܢܐ ܓܠܙ ܠܢ ܕܡ̈ܠܐ ܪ̈ܘܚܢܝܬܐ: ܡܣܛܐ ܠܢ ܟܕ ܐܡܪ: ܕܗܐ ܠܡ ܦܠܢ ܣܒܐ
ܩܕܝܫܐ ܬܪܥܣܪ̈ ܡܙܡܘܪ̈ܝܢ ܒܠܚܘܕ ܝܕܥ ܗܘܐ: ܘܫܦܪ ܠܐܠܗܐ܀
ܢܗܘܘܢ ܗܠܝܢ ܦܬ̈ܓܡܐ ܕܡܦܩܕ
ܐܢܐ ܠܟ ܝܘܡܢܐ ܥܠ ܠܒܟ. ܘܬܢܐ ܐܢܘܢ ܠܒ̈ܢܝܟ. ܘܡܠܠ ܒܗܘܢ ܡܐ ܕܝܬܒ ܐܢܬ ܒܒܝܬܟ܆ ܘܡܐ
ܕܐܙܠ ܐܢܬ ܒܐܘܪܚܐ. ܘܡܐ ܕܕܡܟ ܐܢܬ ܘܡܐ ܕܩܐܡ ܐܢܬ
ܘ ܠܘܩܒܠ ܢܦܫܐ ܕܡܩܒܠܐ ܚܘܫ̈ܒܐ
ܕܩܘܛܥ ܪܥܝܢܐ: ܐܡܬܝ ܕܟܘܪܗܢܐ ܙܥܘܪܐ ܢܓܕܫ ܠܗ ܠܦܓܪܐ܀
ܘܢܥܒܪ ܡܪܝܐ ܡܢܟ ܟܠ ܟܐܒ.
ܘܟܠ ܡ̈ܚܘܬܐ ܒܝܫ̈ܬܐ ܕܡܨܪ̈ܝܐ ܕܝܕܥ ܐܢܬ܆ ܠܐ ܢܝܬܐ ܐܢ̈ܝܢ ܥܠܝܟ. ܐܠܐ ܢܝܬܐ ܐܢ̈ܝܢ ܥܠ ܟܠܗܘܢ
ܣܢܐܝ̈ܟ
ܙ ܠܘܩܒܠ ܚܘܫܒܐ ܕܡܢ ܩܘܛܥ ܪܥܝܢܐ ܒܥܐ ܠܐܢܫܘܬܗ ܘܠܒ̈ܢܝ ܒܝܬܗ. ܘܡܬܪܥܐ ܕܕܝܘܐ
ܕܩܘܛܥ ܪܥܝܢܐ ܣܓܝ ܚܝܠܬܢ: ܘܠܐ ܠܡ ܡܫܟܚ ܐܢܐ ܕܐܙܟܐ ܠܚܘܫ̈ܒܐ ܕܢܦܩܝܢ ܡܢܗ ܘܩܝܡܝܢ
ܠܘܩܒܠܝ܀
ܘܢܫܠܡ ܐܢܘܢ ܡܪܝܐ ܒܐܝ̈ܕܝܟ ܠܒ̈ܥܠܕܒܒܝܟ ܕܩܝܡܝܢ ܠܘܩܒܠܟ܆ ܟܕ ܬܒܝܪܝܢ.
ܒܐܘܪܚܐ ܚܕܐ ܢܦܩܘܢ ܥܠܝܟ܆ ܘܒܫܒܥ ܐܘܪ̈ܚܢ ܢܥܪܩܘܢ ܡܢ ܩܕܡܝܟ
ܡܢ ܝܫܘܥ ܒܪܢܘܢ:
ܚ:
ܠܘܩܒܠ ܚܘܫܒܐ ܕܩܘܛܥ ܪܥܝܢܐ ܕܥܪܩ ܡܢ ܩܪܝܢܐ ܘܡܢ ܪܢܝܐ ܕܡ̈ܠܐ ܪ̈ܘܚܢܝܬܐ: ܘܡܠܟ ܠܢ ܕܢܦܝܣ
ܠܡܪܝܐ ܕܒܝܕ ܪܘܚܗ ܢܠܦܢ ܟܬ̈ܒܐ܀
ܠܐ ܢܥܢܕ ܣܦܪܐ ܗܢܐ ܕܢܡܘܣܐ ܡܢ ܦܘܡܟ. ܐܠܐ ܗܘܝܬ ܪ̈ܢܐ ܒܗ
ܒܐܝܡܡܐ ܘܒܠܠܝܐ. ܘܬܛܪ ܘܬܥܒܕ ܟܠܡܕܡ ܕܟܬܝܒ ܒܗ. ܕܬܨܠܚ. ܘܬܟܫܪ. ܗܐ ܦܩܕܬܟ
ܡܢ
ܫ̈ܒܛܐ:
ܛ: ܠܘܩܒܠ ܢܦܫܐ ܕܒܙܒܢܐ ܕܩܘܛܥ ܪܥܝܢܐ ܡܬܪܥܝܐ ܘܐܡܪܐ: ܕܠܡܢܐ ܟܝ ܗܟܢܐ ܫܒܩܢܝ
ܡܪܝܐ ܕܐܬܢܣܐ ܡܢ ܪ̈ܝܘܐ: ܐܝܠܝܢ ܕܒܙܒܢ ܚܡܬܢ ܡܥܝܪܝܢ ܥܠ ܐܚ̈ܐ ܕܩܪ̈ܝܒܝܢ ܠܢ: ܒܙܒܢ ܕܝܢ
ܒܟܪܝܘܬܐ ܪܡܝܢ ܠܢ. ܒܝܕ ܕܐܠܨܝܢ ܠܢ ܕܢܬܬܥܝܩ ܐܦ ܠܘܬ ܐܚ̈ܐ ܕܪ̈ܚܝܩܝܢ ܡܢܢ. ܗܠܝܢ ܕܝܢ ܦܘܪ̈ܣܐ
ܐܝܬܝܗܘܢ. ܕܚܘܫ̈ܒܐ ܕܩܘܛܥ ܪܥܝܢܐ܀
ܘܐܬܚܡܬ ܡܪܝܐ ܥܠ ܐܝܣܪܐܝܠ ܘܐܡܪ. ܥܠ ܕܥܒܪ ܥܡܐ
ܗܢܐ ܥܠ ܩܝܡܝ ܕܦܩܕܬ ܠܐܒ̈ܗܝܗܘܢ: ܘܠܐ ܫܡܥܘ ܒܩܠܝ܆ ܐܦ ܐܢܐ ܠܐ ܐܘܣܦ ܠܡܘܒܕܘ ܠܐܢܫ ܡܢ
ܩܕܡܝܗܘܢ. ܡܢ ܥܡܡ̈ܐ ܕܫܒܩ ܝܫܘܥ ܒܪܢܘܢ ܘܡܝܬ. ܡܛܠ ܕܢܢܣܐ ܒܗܘܢ ܡܪܝܐ ܠܐܝܣܪܐܝܠ:
ܐܢ ܢܛܪܝܢ ܐܘܪ̈ܚܬܗ ܕܡܪܝܐ ܘܡܗܠܟܝܢ ܒ̈ܗܝܢ: ܐܝܟ ܕܢܛܪܘ ܐܒ̈ܗܝܗܘܢ ܐܘ ܠܐ ܘܫܒܩ ܐܢܘܢ ܡܪܝܐ
ܠܥܡܡ̈ܐ ܗܠܝܢ܆ ܘܠܐ ܐܘܒܕ ܐܢܘܢ ܒܥܓܠ. ܘܠܐ ܐܫܠܡ ܐܢܘܢ ܡܪܝܐ ܒܐܝܕܐ ܕܝܫܘܥ ܒܪܢܘܢ. ܘܗܠܝܢ
ܥܡܡ̈ܐ ܕܫܒܩ ܡܪܝܐ ܠܡܢܤܝܘ ܒܗܘܢ ܠܐܝܣܪܝܠ. ܟܠ ܕܠܐ ܝܕܥܘ ܠܟܠܗܘܢ ܩܪ̈ܒܐ ܕܟ̈ܢܥܢܝܐ.
ܒܠܚܘܕ ܡܛܠ ܕܢܕܥܘܢ ܕܪ̈ܐ ܕܒ̈ܢܝ ܐܝܣܪܝܠ. ܕܢܠܦܘܢ ܩܪܒܐ. ܒܠܚܘܕ ܩܕܡ̈ܝܐ ܠܐ ܝܕܥܘ
ܡܢ
ܕܘܝܕ:
ܝ: ܠܘܩܒܠ ܢܦܫܐ ܩܫܝܬܐ ܕܠܐ ܨܒܝܐ ܕܬܫܦܥ ܕܡ̈ܥܐ ܒܠܠܝܐ: ܡܛܠ ܚܘܫ̈ܒܐ ܕܩܘܛܥ
ܪܥܝܢܐ. ܫܘܦܥ ܕܡ̈ܥܐ ܓܝܪ ܐܝܬܘܗܝ܆ ܣܡܐ ܪܒܐ ܕܚ̈ܙܘܢܐ ܕܠܠܝܐ: ܐܝܠܝܢ ܕܡܢ ܩܘܛܥ ܪܥܝܢܐ
ܡܬܝܠܕܝܢ. ܗܢܐ ܕܝܢ ܤܡܐ ܐܦ ܕܘܝܕ ܢܒܝܐ܆ ܚܟܝܡܐܝܬ ܩܪܒ ܗܘܐ ܠܚܫ̈ܘܗܝ ܟܕ ܐܡܪ܀
ܠܐܝܬܝ
ܒܬ̈ܢܚܬܝ ܘܨܒܥܬ ܒܟܠ ܠܝܠܐ ܥܪܣܝ. ܘܒܕܡܥܬܝ ܬܫܘܝܬܝ ܐܡܣܝܬ
ܝܐ ܠܘܬ ܡܪܝܐ ܡܛܠ
ܚܘܫ̈ܒܐ ܕܩܘܛܥ ܪܥܝܢܐ ܕܐܓܪܘ ܒܝ.܀
ܚܙܝ ܡܘܟܟܝ. ܘܥܡܠܝ ܘܫܒܘܩ ܠܝ ܟܠܗ ܚܛܝܬܝ
ܝܒ ܠܘܩܒܠ ܚܘ̈ܫܒܐ ܕܩܘܛܥ ܪܥܝܢܐ: ܕܦܣܩܝܢ ܠܗ ܠܣܒܪܝ܀
ܐܢܐ ܕܝܢ ܗܝܡܢܬ ܕܐܚܙܐ
ܝܓ ܠܘܩܒܠ ܚܘܫܒܐ ܕܪܛܘܢܝܐ ܕܡܢ ܩܘܛܥ ܪܥܝܢܐ ܗܘܐ: ܐܝܢܐ
ܕܐܦ ܥܠܝܗ ܕܬܫܒܘܚܬܐ ܡܡܪܚ ܕܢܫܬܩ܀
ܐܒܪܟ ܠܡܪܝܐ ܒܟܠܙܒܢ. ܘܒܟܠܙܒܢ ܬܫ̈ܒܚܬܗ
ܒܦܘܡܝ
ܝܕ ܠܘܩܒܠ ܢܦܫܐ ܕܒܩܘܛܥ ܪܥܝܢܐ ܫܩܠܐ ܚܘ̈ܫܒܐ ܕܦܣܩܝܢ ܠܗ ܠܤܒܪܗ
ܟܕ ܡܚܘܝܢ ܠܗ ܕܤܓܝ ܥܤܩ ܥܘܡܪܐ ܕܝܚܝܕܝܘܬܐ: ܘܠܡܚܣܢ ܡܣܝܒܪ ܐܢܫ ܕܘܒܪܗ܀
ܤܒܪ ܒܐܠܗܐ ܘܥܒܕ ܛܒܬܐ ܥܒܪ ܒܐܪܥܐ ܘܒܥܝ ܗܝܡܢܘܬܐ
ܝܗ ܠܘܩܒܠ ܢܦܫܐ ܕܘܝܬܐ
ܕܡܬܩܛܥܐ ܬܪܥܝܬܗ: ܘܕ̈ܘܟܝܬܐ ܐܚܪ̈ܢܝܬܐ ܓܒܝܐ ܠܗ ܕܬܥܡܪ ܒܗܝܢ܀
ܤܒܪ ܒܡܪܝܐ ܘܛܪ
ܐܘܪܚܗ. ܘܢܪܝܡܟ ܠܡܐܪܬ ܐܪܥܐ
ܝܘ ܠܘܩܒܠ ܪܥܝܢܐ ܕܠܐ ܚܟܡ: ܕܟܕ ܢܓܪܘܢ ܒܗ ܚܘܫ̈ܒܐ
ܕܩܘܛܥ ܪܥܝܢܐ: ܡܕܠܚܝܢ ܬܩܢܘܬܗ: ܘܒܙܒܢܐ ܕܨܠܘܬܐ ܡܥܡܛܝܢ ܠܗ ܠܢܘܗܪܐ ܩܕܝܫܐ ܒ̈ܥܝܢܘܗܝ.
ܡܛܠܬܗ ܕܝܢ ܕܝܠܗ ܕܗܢܐ ܢܘܗܪܐ. ܨܒܝܢܢ ܕܢܐܠܦ ܕܡܢ ܐܝܟܐ ܐܝܬܘܗܝ. ܐܢܐ ܘܥܒܕܗ ܕܐܠܗܐ
ܐܡܘܢܝܣ. ܘܫܐܠܢܝܗܝ ܠܝܘܚܢܢ ܩܕܝܫܐ ܚܙܝܐ ܕܬܒܐܝܣ. ܕܗܘ ܟܝ ܟܝܢܐ ܕܪܥܝܢܐ ܢܗܝܪ ܗܘ:
ܘܢܘܗܪܐ ܡܢ ܢܦܫܗ ܡܒܥ: ܐܘ ܡܢ ܠܒܪ ܡܕܡ ܐܚܪܝܢ ܡܬܚܙܐ ܘܡܢܗܪ ܠܗ. ܗܘ ܕܝܢ ܦܢܝ ܠܢ
ܦܬܓܡܐ ܘܐܡܪ. ܕܠܝܬ ܒܪܢܫܐ ܕܡܫܟܚ ܡܦܫܩ ܠܗܕܐ. ܘܠܐ ܬܘܒ ܒܠܥܕ ܡܢ ܛܝܒܘܬܐ ܕܐܠܗܐ
ܡܫܟܚ ܪܥܝܢܐ ܕܢܬܢܗܪ ܒܨܠܘܬܐ: ܟܕ ܡܢ ܒܥܠܕܒ̈ܒܐ ܣ̈ܓܝܐܐ ܘܡܪ̈ܝܪܐ ܡܢ ܡܬܚܪܪ: ܐܝܠܝܢ
ܕܡܬܚܦܛܝܢ ܠܐܒܕܢܗ܀
ܠܒܝ ܐܬܗܦܟ ܘܚܝܠܝ ܫܒܩܢܝ. ܘܢܘܗܪܐ ܕܥ̈ܝܢܝ ܠܐ ܗܘܐ ܠܘܬܝ
ܝܙ ܠܘܩܒܠ ܢܦܫܐ ܕܨܒܝܐ ܕܬܐܠܦ: ܕܐܢ ܫܪܝܪܐܝܬ ܗܝܕܝܢ ܗܘ ܡܫܬܠܡܐ ܢܦܫܐ ܠܢܣ̈ܝܘܢܐ ܕܡܢ
ܫܐ̈ܕܐ: ܐܡܬܝ ܕܩܠܝܠ ܡܫܬܒܩܐ ܡܢ ܡ̈ܠܐܟܐ ܩ̈ܕܝܫܐ܀
ܪ̈ܚܡܝ ܘܚܒܪ̈ܝ ܠܘܩܒܠ ܟܐܒܝ ܩܡܘ.
ܘܩܪ̈ܝܒܝ ܒܪܘܚܩܐ ܩܝܡܝܢ ܗܘܘ. ܘܐܚܕܘܢܝ ܐܝܠܝܢ ܕܒܥܝܢ ܠܢܦܫܝ ܘܨܒܝܢ ܠܒܝܫܬܝ. ܘܡܠܠܘ
ܫܘܩܪܐ ܘܢܟܠܐ ܘܝܘܡܐ ܟܠܗ ܪܢܝܢ ܗܘܘ
ܝܚ ܠܘܩܒܠ ܚܘܫܒܐ ܕܩܘܛܥ ܪܥܝܢܐ ܕܦܣܩ ܤܒܪܐ
ܕܡܣܝܒܪܢܘܬܢ: ܐܝܟ ܗܘ ܕܠܐ ܡܫܟܚܐ ܒܝܕ ܪܗܛܗ ܡܦܝܤܐ ܠܗ ܠܡܪܝܐ ܕܢܥܒܕ ܥܠܝܢ ܪ̈ܚܡܐ܀
ܡܤܒܪܘ ܤܒܪܬ ܒܡܪܝܐ܆ ܕܐܬܦܢܝ ܠܘܬܝ ܘܫܡܥ ܒܥܘܬܝ
ܝܛ ܠܘܩܒܠ ܢܦܫܐ ܕܤܒܪܐ ܠܗ
ܕܠܐ ܗܘܐ ܡܕܡ ܐܢ̈ܝܢ ܕܡ̈ܥܐ: ܒܙܒܢܐ ܕܩܪܒܐ ܕܥܡ ܩܘܛܥ ܪܥܝܢܐ: ܘܠܐ ܡܬܕܟܪܐ ܠܗ ܠܕܘܝܕ ܕܗܝ
ܗܕܐ ܥܒܕ ܗܘܐ ܟܕ ܐܡܪ܀
ܐܠܗܐ ܗܘܬ ܠܝ ܕܡܥܬܝ ܡܐܟܘܠܬܐ ܒܐܝܡܡܐ ܘܒܠܠܝܐ
ܟ ܠܘܩܒܠ
ܢܦܫܐ ܕܡܢ ܩܘܛܥ ܪܥܝܢܐ ܢܦܠܐ: ܘܡܬܡܠܝܐ ܚܘܫ̈ܒܐ ܕܟܪܝܘܬܐ܀
ܥܠ ܡܢܐ ܡܬܛܪܦܬܝ ܢܦܫܝ̈
ܘܥܠ ܡܢܐ ܟܪܝܐ ܠܟܝ. ܣܟܝ ܠܐܠܗܐ ܡܛܠ ܕܬܘܒ ܐܘܕܐ ܠܗ. ܠܦܪܘܩܐ ܕܐܦ̈ܝ ܘܐܠܗܝ
ܟܐ ܠܘܬ
ܡܪܝܐ ܥܠ ܕܝܘܐ ܕܩܘܛܥ ܪܥܝܢܐ ܕܐܬܚܪܝ ܥܡܝ ܟܠܗ ܝܘܡܐ܀
ܪܚܡ ܥܠܝ ܐܠܗܐ̈ ܡܛܠ ܕܕܫܢܝ
ܒܪܢܫܐ. ܝܘܡܐ ܟܠܗ ܩܪܒܬܢܐ ܐܠܨܢܝ
ܟܒ ܠܘܬ ܡܪܝܐ ܥܠ ܕܫܢܝܘ ܡܢܝ ܚܘܫ̈ܒܐ ܕܚܡܬܐ
ܘܕܪܓܬܐ܀
ܐܥܠܬܢܝ ܒܢܘܪܐ ܘܒܡ̈ܝܐ ܘܐܦܩܬܢܝ ܠܐܪܘܚܬܐ
ܟܓ ܠܘܬ ܡܪܝܐ ܡܛܠ ܚܘܫ̈ܒܐ ܕܩܘܛܥ
ܪܥܝܢܐ ܕܗܘܝܢ ܒܢ: ܕܗܐ ܠܡ ܦܠܢ ܚܕ ܡܢ ܐܚ̈ܝܢ ܐܘ ܚܕ ܡܢ ܒ̈ܢܝ ܓܢܣܢ. ܐܬܩܪܒ ܘܢܩܦ ܠܕܪܓܐ
ܕܐܝܩܪܐ ܘܕܫܘܠܛܢܐ܀
ܛܐܒ ܠܝ ܫܡܟ ܡܪܝܐ̈ ܬܘܟܠܢܝ
ܟܕ ܠܘܩܒܠ ܚܘܫܒܐ ܕܡܓܪܓ ܠܢ:
ܕܒܙܒܢܐ ܕܩܘܛܥ ܪܥܝܢܐ ܢܐܙܠ ܠܘܬ ܐܚ̈ܐ: ܐܝܟ ܕܢܬܒܝܐ ܡܢܗܘܢ܀
ܠܝܬ ܡܒܝܐܢܐ ܠܢܦܫܝ. ܐܬܕܟܪܬ
ܐܠܗܐ ܘܐܬܕܠܚܬ. ܘܐܪܢܝܬ ܘܐܬܛܪܦܬ ܪܘܚܝ
ܟܗ ܠܘܩܒܠ ܚܘܫܒܐ ܕܩܘܛܥ ܪܥܝܢܐ: ܕܡܢܐ ܠܢ
ܙܒܢܐ ܢܓܝܪܐ: ܘܫ̈ܢܝܐ ܕܚ̈ܝܐ ܡܪ̈ܝܪܐ܀
ܒܪܢܫܐ ܐܝܟ ܥܡܝܪܐ ܝܘܡ̈ܘܗܝ. ܘܐܝܟ ܥܘܦܝܐ ܕܚܩܠܐ ܗܟܢ
ܝܥܐ
ܟܘ ܠܘܩܒܠ ܚܘܫܒܐ ܕܩܘܛܥ ܪܥܝܢܐ: ܕܡܬܚܦܛ ܕܢܫܟܚ ܩܠܝܬܐ ܐܚܪܬܐ ܐܝܟ ܕܠܡܥܡܪܗ
ܐܝܟ ܗܘ ܠܡ ܕܗܝ ܩܕܡܝܬܐ ܕܐܚܝܕ ܗܘܐ ܤܓܝ ܣܢܝܐ: ܘܡܠܝܐ ܠܡ ܢܛܘܠܘܬܐ: ܘܗܘܘ ܠܗ
ܡܢܗ ܟܘܪ̈ܗܢܐ ܕܟܠ ܓܢܣ܀
ܗܪܟܐ ܐܬܒ ܡܛܠ ܕܪܓܬܗ
ܟܙ ܠܘܬ ܡܪܝܐ ܥܠ ܚܘܫ̈ܒܐ
ܕܪ̈ܕܦܘܗܝ ܠܪܥܝܢܝ ܘܤܪܕܘܗܝ܀
ܡܛܠ ܕܪܕܦ ܒܥܠܕܒܒܐ ܠܢܦܫܝ܆ ܘܡܟܟ ܚ̈ܝܝ ܒܐܪܥܐ.
ܘܐܘܬܒܢܝ ܐܝܟ ܡܝܬܐ ܒܚܫܘܟܐ ܠܥܠܡ. ܘܐܬܛܪܦܬܝ ܥܠܝ ܪܘܚܝ ܘܙܥ ܠܒܝ ܒܓܘܝ
ܡܢ
ܟܚ: ܠܘܩܒܠ ܚܘܫܒܐ ܕܩܘܛܥ ܪܥܝܢܐ: ܕܫܕܐ ܦܘܠܚܢܐ ܕܐܝ̈ܕܝܐ:
ܘܒܢܘܡܬܐ ܐܪܟܢܗ ܠܦܓܪܐ ܥܠ ܐܣܬܐ܀܀.
ܥܕܡܐ ܠܐܡܬܝ ܕܡܟ ܐܢܬ ܚܒܢܢܐ. ܐܡܬܝ ܬܩܘܡ
ܡܢ ܫܢܬܟ. ܩܠܝܠ ܬܢܘܡ ܘܩܠܝܠ ܬܕܡܟ ܘܩܠܝܠ ܬܤܝܡ ܐܝܕܟ ܥܠ ܚܕܝܟ. ܬܐܬܐ ܥܠܝܟ
ܡܤܟܢܘܬܐ ܘܬܕܪܟܟ ܨܪܝܟܘܬܐ ܐܝܟ ܓܒܪܐ ܟܫܝܪܐ.
ܟܛ ܠܘܩܒܠ ܚܘܫܒܐ ܗܘ ܕܡܗܡܐ ܡܢ
ܥܡ̈ܠܐ ܕܦܘܠܚܢ ܦܘܩ̈ܕܢܐ.܀..
ܛܒ ܗܘ ܒܪܢܫܐ ܕܡܫܪܐ ܠܡܥܕܪܘ: ܡܢ ܗܘ ܕܬܠܐ ܒܤܒܪܐ
ܠ ܠܘܩܒܠ ܚܘܫܒܐ ܕܩܘܛܥ ܪܥܝܢܐ ܕܥܕܠ ܠܗܘܢ ܠܐܚ̈ܐ: ܐܝܟ ܗܘ ܕܠܝܬ ܒܗܘܢ ܚܘܒܐ: ܘܠܐ
ܨܒܝܢ ܠܡܒܝܐܘ ܠܐܝܠܝܢ ܕܟܪܝܗܝܢ ܘܠܐܝܢ.܀..
ܥܠܬܐ ܒܥܐ ܕܢܫܟܚ ܓܒܪܐ ܕܨܒܐ ܕܢܦܪܘܫ ܡܢ
ܚܒܪ̈ܘܗܝ. ܒܟܠܙܒܢ ܕܝܢ ܒܚܤܕܐ ܢܗܘܐ
ܠܐ ܡܢ ܐܝܘܒ
ܠܘܩܒܠ ܢܦܫܐ ܕܟܪܝܐ ܠܗ ܡܛܠ ܚܘܫܒܐ
ܕܩܘܛܥ ܪܥܝܢܐ.܀..
ܡܪܕܘܬܗ ܕܚܣܝܢܐ ܠܐ ܬܣܠܐ. ܡܛܠ ܕܗܘ ܬܒܪ ܘܥܨܒ. ܘܡܚܐ ܘܐܝ̈ܕܘܗܝ
ܡܐܣ̈ܝܢ ܒܫܬ ܥ̈ܩܢ ܢܦܪܩܟ܆ ܘܒܕܫܒܥ ܠܐ ܬܩܪܘܒ ܠܟ ܒܝܫܬܐ
ܠܒ ܠܘܩܒܠ ܚܘܫܒܐ
ܕܩܘܛܥ ܪܥܝܢܐ ܕܨܐܪ ܠܢ ܤܝܒܘܬܐ ܢܓܝܪܬܐ. ܘܡܣܟܢܘܬܐ ܡܪܝܪܬܐ ܕܠܐ ܡܬܒܝܐܐ: ܘܟܘܪ̈ܗܢܐ
ܕܡܫܟܚܝܢ ܩܛܠܝܢ ܠܗ ܠܦܓܪܐ܀
ܫܐܠ ܥܠ ܕܪ̈ܐ ܩܕܡ̈ܝܐ. ܘܐܬܒܝܢ ܬܘܒ ܒܒܘܕܩܐ ܕܐܒ̈ܗܝܗܘܢ.
ܕܐܬܡܠܝ ܓܝܪ ܚܢܢ ܠܐ ܝܕܥܝܢ ܚܢܢ. ܘܐܝܟ ܛܠܠܐ ܐܢܘܢ ܝܘܡ̈ܝܢ ܥܠ ܐܪܥܐ
ܠܓ ܠܘܩܒܠ
ܚܘܫܒܐ ܕܩܘܛܥ ܪܥܝܢܐ ܕܡܚܘܐ ܠܢ ܕܘܟ̈ܝܬܐ ܐܚܪ̈ܢܝܬܐ: ܘܡܠܟ ܠܢ ܕܪ̈ܗܝܢ ܢܩܢܐ ܠܢ ܩܠܝܬܐ:
ܘܐܝܟ ܗܘ ܕܐܦ ܣ̈ܘܢܩܢܝܢ ܕܠܐ ܥܡܠܐ ܡܫܟܚܝܢܢ ܒ̈ܗܝܢ: ܘܢܝܚܐ ܘܒܘܝܐܐ ܠܐܚ̈ܐ ܕܐܬܝܢ ܨܐܕܝܢ܀
ܙܥܘܪ̈ܝܢ
ܐܢܘܢ ܝܘܡ̈ܬܐ ܕܚ̈ܝܝ. ܦܪܘܩܘ ܡܢܝ ܕܐܫܠܐ ܘܐܬܬܢܝܚ ܩܠܝܠ. ܥܕܠܐ ܐܙܠ ܐܢܐ ܘܬܘܒ ܠܐ ܐܗܦܘܟ:
ܠܐܪܥܐ ܚܫܘܟܬܐ ܕ̈ܛܠܠܝ ܡܘܬܐ ܕܫܗܝܐ ܐܝܟ ܚܒܪܐ ܘ̈ܛܠܠܝ ܡܘܬܐ. ܘܠܝܬ ܒܗ ܣܕܪ̈ܝܢ ܕܕܪ̈ܝܢ:
ܘܡܫܠܗܝܐ ܐܝܟ ܚܒܪܐ
ܠܕ ܠܘܩܒܠ ܢܦܫܐ ܕܒܩܘܛܥ ܪܥܝܢܐ ܡܬܪܥܝܐ: ܕܠܝܬ ܕܚܙܐ ܥܩ̈ܬܗ܀
ܠܐ ܬܐܡܪ ܕܠܐ ܙܟܐ ܓܒܪܐ ܡܐ ܕܕܚܠ ܡܢ ܐܠܗܐ. ܡܛܠ ܕܗܐ ܙܟܘܬܗ ܡܢ ܡܪܝܐ ܕܚܙܐ
ܠܗ ܡܢ ܡܝܟܐ:
ܠ
ܗ ܠܘܩܒܠ ܚܘܫ̈ܒܐ ܕܩܘܛܥ ܪܥܝܢܐ: ܕܝܗܒܝܢ ܛܘܒܐ ܠܐܝܠܝܢ ܕܒܥܠܡܐ ܡܬܚܫܚܝܢ܀
ܡܛܠ
ܕܟܠܗܘܢ ܥܡܡ̈ܐ ܢܗܠܟܘܢ ܐܢܫ ܒܫܡ ܐܠܗܗ܆ ܘܚܢܢ ܢܗܠܟ ܒܫܡܗ ܕܡܪܝܐ ܐܠܗܢ. ܠܥܠܡ
ܘܠܥܠܡ ܥܠܡܝܢ
ܠܘ ܠܘܩܒܠ ܢܦܫܐ ܕܡܛܠ ܟܘܪܗܢܗ ܕܦܓܪܐ: ܡܩܒܠܐ ܚܘܫ̈ܒܐ ܕܩܘܛܥ
ܪܥܝܢܐ܀
ܡܚܘܬܗ ܕܡܪܝܐ ܐܣܝܒܪ. ܡܛܠ ܕܚܛܝܬ ܠܗ. ܥܕܡܐ ܕܢܕܘܢ ܕܝܢܝ ܘܢܬܒܥ ܬܒܥܬܝ:
ܘܢܦܩܢܝ ܠܢܘܗܪܐ ܘܐܚܙܐ ܒܙܕܝܩܘܬܗ
ܡܢ ܐܫܥܝܐ
ܠܙ ܠܘܩܒܠ ܢܦܫܐ ܕܢܦܠ ܥܠܝܗ ܝܘܩܪܐ
ܕܩܘܛܥ ܪܥܝܢܐ: ܘܡܢ ܡܐܝܢܘܬܐ ܕܚܘܫ̈ܒܐ ܕܩܘܛܥ ܪܥܝܢܐ ܩܥܝܐ܀
ܢܒܗܬܘܢ ܘܢܚܦܪܘܢ ܐܝܠܝܢ
ܕܤܩܪܝܢ ܠܟ. ܘܢܗܘܘܢ ܐܝܟ ܠܐ ܡܕܡ. ܘܢܐܒܕܘܢ ܓܒܪ̈ܐ ܕܢܨܝܢ ܥܡܟ. ܘܢܗܘܘܢ ܐܝܟ ܠܐ ܐܝܬܝܗܘܢ.
ܓܒܪ̈ܐ ܕܡܬܟܬܫܝܢ ܥܡܟ
ܡܢ ܐܪܡܝܐ:
ܠܚ ܠܘܩܒܠ ܢܦܫܐ ܕܡܢ ܚܘܫ̈ܒܐ ܕܡܐܝܢܘܬܐ ܘܕܩܘܛܥ
ܪܥܝܢܐ ܕܐܓܪܘ ܒܗ: ܐܬܡܚܠܬ ܘܬܚܒܬ ܘܐܘܦܝܬ ܒܡܪ̈ܪܐ ܕܢܦܫܗ: ܘܐܬܐܟܠ ܠܗ ܚܝܠܗ ܡܢ
ܫܦܠܗ ܪܒܐ: ܘܩܪܝܒܐ ܕܬܦܣܘܩ ܤܒܪܗ ܡܢ ܩܛܝܪܗ ܕܕܝܘܐ ܗܢܐ: ܟܕ ܡܫܬܢܝܐ ܘܡܫܬܒܪܪܐ
ܒܕܡ̈ܥܐ ܚܫܝܫ̈ܬܐ ܘܚ̈ܢܝܓܬܐ: ܘܠܝܬ ܠܗ ܦܘܝܓܐ ܡܢ ܕܘܟ܀
ܗܟܢܐ ܐܡܪ ܡܪܝܐ. ܟܠܝ ܩܠܟܝ
ܡܢ ܒܟܝܐ܆ ܘܥ̈ܝܢܝܟܝ ܡܢ ܕܡܥܬܐ. ܡܛܠ ܕܐܝܬ ܐܓܪܐ ܠܕܡ̈ܥܝܟܝ ܐܡܪ ܡܪܝܐ: ܘܢܗܦܟܘܢ ܡܢ
ܐܪܥܐ ܕܒܥܠܕܒ̈ܒܐ. ܘܐܝܬ ܣܒܪܐ ܠܚܪܬܟܝ ܐܡܪ ܡܪܝܐ. ܘܢܗܦܟܘܢ ܒ̈ܢܝܐ ܠܬܚ̈ܘܡܝܗܘܢ
ܠܛ
ܠܘܬ ܡܪܝܐ ܥܠ ܚܘܫ̈ܒܐ ܕܩܘܛܥ ܪܥܝܢܐ: ܕܡܙܝܥܝܢ ܠܗ ܠܡܣܝܒܪܢܘܬܢ ܘܡܓܪ̈ܓܝܢ ܠܢ
ܕܢܬܦܪܓܐ ܩܠܝܠ: ܘܕܢܚܙܐ ܥܘܡܪܢ ܘܿܐܢܫܘܬܢ ܠܢܘܓܪܐ ܣܓܝܐܐ܀
ܡܪܝܐ ܚܘܣ ܡܛܠ ܫܡܟ.
ܡܛܠ ܕܤܓܝܐܐ ܗܝ ܛܝܒܘܬܟ. ܘܠܟ ܚܛܝܢ ܣܒܪܗ̈ ܕܐܝܤܪܝܠ ܘܦܪܘܩܗ ܒܙܒܢܐ ܕܐܘܠܨܢܐ.
ܡܢ
ܐܘ̈ܠܝܬܗ ܕܐܪܡܝܐ
ܡ ܠܘܩܒܠ ܚܘܫ̈ܒܐ ܕܡܚܘܝܢ ܠܢ ܝܚܝܕܝܘܬܐ: ܕܣܓܝ ܐܘ̈ܠܨܢܐ ܘܥܡ̈ܠܐ ܪܘܪ̈ܒܐ
ܐܝܬ ܒܕܘܒܪܗ܀
ܛܒ ܗܘ ܡܪܝܐ ܠܡܢ ܕܡܤܟܐ ܠܗ ܘܠܢܦܫܐ ܕܒܥܝܐ ܠܗ. ܛܒ ܠܡܢ
ܡܐ ܠܘܩܒܠ ܚܘܫܒܐ ܕܐܡܪ ܕܡܫܟܚ ܗܘ ܐܢܫ ܐܦ ܕܠܐ
ܝܚܝܕܝܘܬܐ: ܕܢܩܢܐ ܕܟܝܘܬܐ ܘܬܩܢܘܬܐ܀
ܛܒ ܠܓܒܪܐ ܟܕ ܢܫܩܘܠ ܢܝܪܟ ܒܛܠܝܘܬܗ܆ ܘܢܬܒ
ܒܠܚܘܕܘܗܝ ܘܢܫܬܘܩ܆ ܡܛܠ ܕܩܒܠ ܥܠܘܗܝ ܢܝܪܟ. ܘܢܬܠ ܒܥܦܪܐ ܦܘܡܗ܆ ܡܛܠ
ܕܐܝܬ ܣܒܪܐ. ܘܢܬܠ ܦܟܗ ܠܡܢ ܕܡܚܐ ܠܗ ܘܢܤܒܥ ܚܣܕܐ. ܡܛܠ ܕܠܐ ܛܥܐ ܡܪܝܐ ܠܥܠܡ
ܡܒ ܡܢ ܕܢܝܐܝܠ
ܠܘܬ ܡܪܝܐ ܡܛܠ ܚܘܫܒܐ ܕܩܘܛܥ ܪܥܝܢܐ: ܕܐܬܚܝܠ ܥܠܝ܀
ܠܐ ܬܬܠ ܠܢ
ܠܚܣܕܐ ܡܛܠ ܫܡܟ. ܡܛܠ ܐܒܪܗܡ ܪܚܡܟ. ܘܐܝܣܚܩ ܥܒܕܟ܆ ܘܐܝܤܪܐܝܠ ܩܕܝܫܟ
ܡܢ
ܐܘܢܓܠܝܘܢ ܕܡܬܝ:
ܡܓ ܠܘܩܒܠ ܚܘܫܒܐ ܕܩܘܛܥ ܪܥܝܢܐ: ܕܡܠܟ ܠܢ ܕܢܣܥܘܪ ܠܐܒܘܢ ܦܓܪܢܐ
܀
ܫܒܘܩ ܡ̈ܝܬܐ ܩܒܪܝܢ ܡ̈ܝܬܝܗܘܢ. ܘܐܢܬ ܙܠ ܣܒܪ ܡܠܟܘܬܐ ܕܫܡܝܐ
ܡܕ ܠܘܩܒܠ ܢܦܫܐ ܕܡܢ
ܩܘܛܥ ܪܥܝܢܐ ܢܦܠܐ: ܘܬܘܒ ܠܒ̈ܢܝ ܓܢܣܗ ܦܓܪ̈ܢܐ ܒܥܝܐ܀
ܐܢ ܐܢܫ ܢܫܒܘܩ ܐܒ̈ܗܐ ܐܘ ܐܚ̈ܐ ܐܘ
ܐܚ̈ܘܬܐ ܐܘ ܐܢܬܬܐ ܐܘ ܒ̈ܢܝܐ: ܐܘ ܩܘܪ̈ܝܐ ܡܛܠ ܫܡܝ܆ ܚܕ ܒܡܐܐ ܢܩܒܠ: ܘܚ̈ܝܐ ܕܠܥܠܡ ܢܐܪܬ
ܡܢ
ܐܘܢܓܠܝܘܢ ܕܠܘܩܐ:
ܡܗ: ܠܘܩܒܠ ܢܦܫܐ ܕܠܐ ܡܦܣܐ: ܕܪܚܡܬܐ ܕܠܘܬ ܐܢܫܘܬܗ ܤܢܐܬܐ ܩܪܗ
ܡܫܝܚܐ: ܟܕ ܐܡܪ ܗܘܐ ܗܟܢܐ ܠܘܬ ܢܦܫ̈ܬܐ ܕܒ̈ܚܫܐ ܕܪ̈ܓܝܓܬܐ ܐܝܬܝܗܝܢ: ܘܪ̈ܚܡܢ ܠܗ
ܠܥܠܡܐ܀
ܡܢ ܕܐܬܐ ܠܘܬܝ ܘܠܐ ܤܢܐ ܠܐܒܘܗܝ ܘܠܐܡܗ: ܘܠܐܚ̈ܘܗܝ ܘܠܐܚ̈ܘܬܗ܆ ܠܐ ܡܫܟܚ ܕܢܗܘܐ
ܠܝ ܬܠܡܝܕܐ
ܡܢ ܦܪܟܣܣ:
ܡܘ: ܠܘܩܒܠ ܚܘܫ̈ܒܐ ܕܩܘܛܥ ܪܥܝܢܐ ܕܗܘܝܢ ܒܢ: ܐܝܟ ܗܘ ܠܡ
ܕܗܐ ܒ̈ܢܝ ܓܢܣܢ ܐܡܪܝܢ ܡܛܠܬܢ: ܕܠܐ ܗܘܐ ܠܡ ܡܛܠ ܐܠܗܐ ܫܒܩܢܝܗܝ ܠܥܠܡܐ ܘܐܚܒܢܗ
ܠܝܚܝܕܝܘܬܐ: ܐܠܐ ܐܘ ܡܛܠ ܚ̈ܛܗܝܢ ܐܘ ܡܛܠ ܡܚܝܠܘܬܢ. ܕܠܐ ܡܫܟܚܝܢ ܗܘܝܢ ܕܢܬܓܒܪ
ܒܨ̈ܒܘܬܗ ܕܥܠܡܐ܀
ܡܢ ܡܢ ܘܠܐ ܠܡܬܛܦܤܘ ܫܪܝܪܐܝܬ. ܡܢ ܐܠܗܐ ܐܘ ܡܢ ܒ̈ܢܝ ܐܢܫܐ
ܡܢ ܐܓܪܬܐ
ܕܪ̈ܗܘܡܝܐ
ܡܙ ܠܘܩܒܠ ܚܘܫ̈ܒܐ ܕܩܘܛܥ ܪܥܝܢܐ: ܕܓܕܫܝܢ ܠܢ ܡܢ ܐܘ̈ܠܨܢܐ܀
ܗܘܝܬܘܢ ܡܣܝܒܪܝܢ
ܐܘ̈ܠܨܢܝܟܘܢ. ܗܘܝܬܘܢ ܚܦܝܛܝܢ ܒܨܠܘܬܐ ܘܠܐ ܬܐܡܢ ܠܟܘܢ
ܡܢ ܐܓܪܬܐ ܩܕ: ܕܩܘܪ̈ܢܬܝܐ:
ܡܚ
ܠܘܩܒܠ ܚܘܫ̈ܒܐ ܕܡܢ ܩܘܛܥ ܪܥܝܢܐ: ܡܡܪܚܝܢ ܕܢܪܛܢܘܢ܀
ܠܐ ܬܪܛܢܘܢ ܐܝܟܢܐ ܕܡܢܗܘܢ ܪܛܢܘ:
ܘܐܒܕܘ ܡܢ ܐܝ̈ܕܝ ܡܚܒܠܢܐ
ܡܢ ܐܓܪܬܐ ܕܬܪ̈ܬܝܢ ܕܩܘܪ̈ܢܬܝܐ:
ܡܛ: ܠܘܩܒܠ ܚܘܫܒܐ ܕܟܪܝܐ ܠܗ
ܡܛܠ ܚܘܫ̈ܒܐ ܕܩܘܛܥ ܪܥܝܢܐ: ܘܠܐ ܡܬܕܟܪ ܠܢܤ̈ܝܘܢܘܗܝ ܕܫܠܝܚܐ: ܐܝܠܝܢ ܕܬܢܐ ܘܐܡܪ܀
ܒܠܐܘܬܐ ܝܬܝܪ ܡܢܗܘܢ. ܒܐܣܘܪ̈ܐ ܝܬܝܪ ܡܢܗܘܢ. ܒܐܘ̈ܠܨܢܐ ܝܬܝܪ ܡܢܗܘܢ ܒܡ̈ܚܘܬܐ ܝܬܝܪ
ܡܢܗܘܢ. ܐܢ ܒܡ̈ܘܬܐ ܙܒ̈ܢܝܢ ܣ̈ܓܝܐܢ. ܡܢ ܝܗ̈ܘܕܝܐ ܚܡܫ ܙܒ̈ܢܝܢ. ܐܪܒܥܝܢ ܐܪܒܥܝܢ ܚܤܝܪ ܚܕܐ
ܒܠܥܬ. ܬܠܬ ܙܒ̈ܢܝܢ ܒ̈ܙܩܬܐ ܐܬܢܓܕܬ. ܚܕܐ ܙܒܢ ܐܬܪܓܡܬ. ܬܠܬ ܙܒ̈ܢܝܢ ܗܘܝܬ ܢܘܓܐ. ܐܝܡܡܐ
ܘܠܠܝܐ. ܕܠܐ ܣܦܝܢܬܐ ܒܝܡܐ ܗܘܝܬ. ܚܙܝܬ ܩܢܘܢܕܝܢܘܣ ܒܐܘܪ̈ܚܬܐ ܣܓܝܐ̈ܬܐ. ܩܢܘܢܕܝܢܘܣ
ܕܒܢܗܪ̈ܘܬܐ. ܩܢܘܢܕܝܢܘܣ ܕܡܢ ܓ̈ܝܣܐ. ܩܢܘܢܕܝܢܘܣ ܕܡܢ ܛܘܗܡܝ. ܩܢܘܢܕܝܢܘܣ ܕܡܢ ܥܡܡ̈ܐ.
ܩܢܘܢܕܝܢܘܣ ܕܒܡ̈ܕܝܢܬܐ. ܩܢܘܢܕܝܢܘܣ ܕܒܚܘܫ̈ܒܐ. ܩܢܘܢܕܝܢܘܣ ܕܒܝܡܐ. ܩܢܘܢܕܝܢܘܣ ܕܡܢ
ܐܚ̈ܐ ܕܓ̈ܠܐ. ܒܥܡܠܐ ܘܒܠܐܘܬܐ. ܒܫܗܪܐ ܣܓܝܐܐ. ܒܥܪܝܐ ܘܒܥܪܛܠܝܘܬܐ. ܒܟܦܢܐ ܘܒܨܗܝܐ. ܒܨܘܡܐ
ܣܓܝܐܐ. ܣܛܪ ܡܢ ܐܚܪ̈ܢܝܬܐ ܣܓܝܐ̈ܬܐ
ܡܢ ܕܐܦܣܝ̈ܐ:
ܢܢ: ܠܘܩܒܠ ܚܘܫ̈ܒܐ ܕܩܘܛܥ ܪܥܝܢܐ: ܕܠܐ
ܡܘܕܝܢ ܠܐܒ̈ܗܬܐ ܘܠܐܚ̈ܐ܀
ܗܘܝܬܘܢ ܡܘܕܝܢ ܒܟܠܙܒܢ ܥܠ ܐ̈ܦܝ ܟܠܢܫ܆ ܒܫܡܗ ܕܡܪܢ ܝܫܘܥ
ܡܫܝܚܐ. ܗܘܝܬܘܢ ܡܫܬܥܒܕܝܢ ܚܕ ܠܚܕ. ܒܕܚܠܬܗ ܕܡܫܝܚܐ
ܡܢ ܕܦܝܠܝ̈ܦܣܝܐ:
ܢܐ: ܠܘܩܒܠ
ܢܦܫܐ ܕܠܐ ܝܕܥܐ: ܕܐܦ ܗܕܐ ܕܢܚܫ ܐܢܫ ܥܠ ܐ̈ܦܝ ܡܫܝܚܐ: ܚܕܐ ܐܝܬܝܗ ܡܢ ܡܘܗ̈ܒܬܐ ܕܪܘܚܐ܀
ܐܦ ܗܕܐ ܡܘܗܒܬܐ ܡܢ ܐܠܗܐ ܐܬܝܗܒܬ ܠܟܘܢ. ܕܠܘ ܒܠܚܘܕ ܡܗܝܡܢܘ ܬܗܝܡܢܘܢ ܒܗ
ܒܡܫܝܚܐ܆ ܐܠܐ ܐܦ ܥܠ ܐ̈ܦܘܗܝ ܬܚܫܘܢ ܘܬܣܝܒܪܘܢ ܐܓܘܢܐ
ܡܢ ܕܥܒܪ̈ܝܐ:
ܢܒ: ܠܘܩܒܠ
ܚܘܫ̈ܒܐ ܕܢܦܫܐ ܕܡܢ ܩܘܛܥ ܪܥܝܢܐ ܡܬܬܙܝܥܝܢ: ܘܨܒܝܢ ܕܢܫܒܩܘܢ ܐܘܪܚܐ ܩܕܝܫܬܐ ܕܢܨ̈ܝܚܐ
ܘܕܘܟܬܐ ܕܥܘܡܪܐ܀
ܡܣܝܒܪܢܘܬܐ ܗܘ ܓܝܪ ܤܓܝܐܬܐ ܡܬܒܥܝܐ ܠܟܘܢ: ܕܬܥܒܕܘܢ ܨܒܝܢܗ
ܡܢ ܗܝܡܢܘܬܐ ܢܚܐ. ܘܐܢ ܡܬܩܛܥܐ ܠܗ ܠܐ ܨܒܝܐ ܒܗ ܢܦܫܝ
ܢܓ ܠܘܩܒܠ ܚܘܫܒܐ ܕܡܓܪܓ
ܠܢ ܠܚܙܬܐ ܕܡܕܝܢܬܐ ܘܕܐܢܫܘܬܝ ܘܕܪ̈ܚܡܝ ܕܬܡܢ܀
ܠܐ ܓܝܪ ܐܝܬ ܠܢ ܗܪܟܐ ܡܕܝܢܬܐ ܕܡܩܘܝܐ.
ܐܠܐ ܠܐܝܕܐ ܕܥܬܝܕܐ ܡܤܟܝܢܢ
ܢܕ ܠܘܩܒܠ ܢܦܫܐ ܕܡܢ ܩܘܛܥ ܪܥܝܢܐ ܘܟܪܝܘܬܐ ܢܦܠܬ: ܘܡܬܚܫܒܐ
ܒܠܒܗ ܕܠܡܪܕܘܬܐ ܕܕܝ̈ܘܐ ܐܫܬܠܡܬ܀
ܐܚܪ̈ܢܐ ܗܘܘ ܓܘܚܟܐ ܘܒܙܚܐ. ܘܩܒܠܘ ܢܣ̈ܝܘܢܐ ܘܢ̈ܓܕܐ.
ܘܐܬܪܓܡܘ ܘܐܬܐܣܪܘ ܒܝܬ ܐܣܝܪ̈ܐ. ܟܕ ܠܒܝܫܝܢ ܗܘܘ ܠܒ̈ܘܫܐ: ܡ̈ܫܟܐ ܕܐܡܪ̈ܐ ܘܕܥ̈ܙܐ܆ ܡܛܠ
ܕܠܝܬ ܗܘܐ ܠܗܘܢ ܡܕܡ. ܘܒܐܘܠܨܢܐ ܗܘܘ ܐܢܫܐ ܕܠܐ ܫܘܐ ܠܗܘܢ ܥܠܡܐ. ܘܐܝܟ ܛ̈ܥܝܐ ܐܬܟܪܟܘ܆
ܒܛܘܪ̈ܐ ܘܒܡܥܪ̈ܐ ܘܒܦܥܪ̈ܝܗ ܕܐܪܥܐ
ܢܗ ܠܘܩܒܠ ܚܘܫ̈ܒܐ ܕܩܘܛܥ ܪܥܝܢܐ: ܕܡܬܚܡܬܝܢ ܥܠ
ܐܒ̈ܗܬܐ ܩ̈ܕܝܫܐ: ܐܝܟ ܕܥܠ ܐܢܫܐ ܕܐܚܝܕܝܢ ܪ̈ܚܡܝܗܘܢ. ܘܠܐ ܨܒܝܢ ܕܢܒܐܘܢ ܠܐܚ̈ܐ. ܡܛܠ ܗܕܐ ܐܦ
ܗܢܘܢ ܚܘܫ̈ܒܐ ܡܥܩܝܢ ܨܐܕܝܗܘܢ: ܘܠܐ ܨܒܝܢ ܕܢܫܬܥܒܕܘܢ ܠܗܘܢ܀
ܐܬܛܦܝܣܘ ܠܡܕܒܪ̈ܢܝܟܘܢ
ܘܐܫܬܡܥܘ ܠܗܘܢ. ܗܢܘܢ ܓܝܪ ܫܗܪܝܢ ܚܠܦ ܢܦܫ̈ܬܟܘܢ. ܐܝܟܢܐ ܕܚܘܫܒܢܐ ܝܗܒܝܢ ܠܐܠܗܐ.
ܒܚܕܘܬܐ ܘܠܐ ܒܬܢܚ̈ܬܐ
ܡܢ ܐܓܪܬ ܕܝܥܩܘܒ
ܢܘ: ܠܘܩܒܠ ܚܘܫܒܐ ܕܢܦܫܐ ܕܟܪܝܐ ܠܗ: ܥܠ
ܪܘܚܐ ܕܩܘܛܥ ܪܥܝܢܐ ܕܐܓܪ ܒܗ ܘܡܫܚܠܦ ܬܩܢܘܬܗ܀.
ܚܕܘܬܐ ܪܒܬܐ ܬܗܘܘܢ ܚܕܝܢ ܐ̈ܚܝ..
ܐܡܬܝ ܕܒܟܠ ܢܣ̈ܝܘܢܐ ܡܬܢܣܝܢ ܐܢܬܘܢ. ܝܕܥܝܢ ܐܢܬܘܢ ܓܝܪ ܕܒܘܩܝܐ ܕܗܝܡܢܘܬܟܘܢ܆ ܗܝܕܝܢ
ܡܬܝܕܥ ܠܟܠܢܫ ܒܡܣܝܒܪܢܘܬܟܘܢ. ܠܗ ܕܝܢ ܠܡܣܝܒܪܢܘܬܐ܆ ܢܗܘܐ ܠܗ ܥܒܕܐ ܡܫܡܠܝܐ.
ܕܬܗܘܘܢ ܓܡܝܪܝܢ ܘܡܫܠܡܢܝܢ. ܘܒܡܕܡ ܠܐ ܗܘܝܬܘܢ ܚܤܝܪܝܢ
ܢܙ ܠܘܩܒܠ ܪܥܝܢܐ ܕܡܢ ܚܘܫܒܐ
ܕܩܘܛܥ ܪܥܝܢܐ ܡܢ ܟܠ ܕܘܟ ܡܫܬܩܦ: ܘܒܙܒܢ ܡܢ ܚܡܬܐ ܡܬܪܕܦ ܡܢ ܕܘܟ̈ܝܬܐ: ܘܒܙܒܢ ܕܝܢ ܨܝܕ
ܕܘܟ̈ܝܬܐ ܐܚܪ̈ܢܝܬܐ ܕܠܘܬ ܐܚ̈ܐ ܡܢ ܓܓܪܬܐ ܡܬܢܓܕ: ܐܘ ܠܘܬ ܒ̈ܢܝ ܓܢܣܗ ܕܥܠܡܐ: ܗܘ
ܕܙܒ̈ܢܝܢ ܣ̈ܓܝܐܢ ܡܟܟ ܘܫܦܠܗ܀
ܛܘܒܘܗܝ ܠܒܪ ܐܢܫܐ ܕܡܤܝܒܪ ܢܣܝ̈ܘܢܐ. ܕܡܐ ܕܐܬܒܚܪ
ܢܤܒ ܟܠܝܠܐ ܕܚ̈ܝܐ: ܗܘ ܕܡܠܟ ܐܠܗܐ ܠܐܝܠܝܢ ܕܪܚܡܝܢ ܠܗ܀
ܒܪܝܟ ܗܘ ܡܪܢ ܝܫܘܥ ܡܫܝܚܐ:
ܕܝܗܒ ܠܢ ܙܟܘܬܐ ܥܠ ܚܘܫ̈ܒܐ ܕܕܝܘܐ ܕܩܘܛܥ ܪܥܝܢܐ.
ܡܐܡܪܐ ܕܫܒܥܐ: ܠܘܩܒܠ ܚܘܫ̈ܒܐ ܕܡܢ
ܕܝܘܐ ܕܫܘܒܚܐ ܣܪܝܩܐ:܀
ܡܢ ܒܪܝܬܐ:
ܠܘܩܒܠ ܚܘܫܒܐ ܕܡܢ ܕܝܘܐ ܕܫܘܒܚܐ ܣܪܝܩܐ: ܕܡܠܟ
ܠܢ ܕܢܦܘܩ ܒܥܠܡܐ ܒܙܒܢܐ ܕܠܐ ܘܠܐ: ܐܝܟ ܕܢܬܠܡܕ ܠܐܚ̈ܐ ܘܠܐܚ̈ܘܬܐ ܘܢܓܪܓ ܐܢܘܢ ܒܥܘܡܪܐ
ܕܝܚܝܕܝܘܬܐ܀.
ܦܠܛ ܢܦܫܟ ܘܠܐ ܬܬܦܢܐ ܠܒܣܬܪܟ. ܘܠܐ ܬܩܘܡ ܒܟܠܗ ܦܩܥܬܐ. ܠܛܘܪܐ
ܐܬܦܠܛ ܕܠܐ ܬܐܒܕ
ܒ ܡܢ ܡܢܝܢܐ
ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ: ܕܡܥܝܪ ܒܝ ܚܤܡܐ ܕܥܠ
ܐ̈ܚܐ: ܕܩܒܠܘ ܡܢ ܡܪܝܐ ܡܘܗܒܬܐ ܕܝܕܥܬܐ܀
ܠܐ ܬܛܢܢܝ. ܡܢ ܕܝܢ ܥܒܕ ܟܠܗ ܥܡܗ ܕܡܪܝܐ
ܢܒ̈ܝܐ. ܡܛܠ ܕܝܗܒ ܡܪܝܐ ܪܘܚܗ ܥܠܝܗܘܢ
ܓ ܠܘܩܒܠ ܢܦܫܐ ܕܩܒܠܬ ܚܘܫ̈ܒܐ ܛܢ̈ܦܐ:
ܘܟܗܢܘܬܐ ܪ̈ܓܐ ܡܢ ܫܘܒܚܐ ܣܪܝܩܐ ܕܐܚܝܕ ܠܗܿ. ܘܠܐ ܡܬܪܥܝܐ ܩܝܘܢܕܝܢܘܣ ܕܐܬܐ ܒܬܪܗ܀
ܘܢܣܒ ܐܠܝܥܙܪ ܟܗܢܐ ܦܝܪ̈ܡܐ ܕܢܚܫܐ ܕܩܪܒܘ ܡ̈ܘܩܕܐ. ܘܐܪܩ ܐܢܘܢ ܛܣ̈ܐ ܪ̈ܩܝܩܐ ܠܡܕܒܚܐ:
ܕܘܟܪܢܐ ܠܒ̈ܢܝ ܐܝܣܪܐܝܠ. ܕܠܐ ܢܗܘܐ ܩܪܒ ܓܒܪܐ ܢܘܟܪܝܐ: ܐܝܢܐ ܕܠܐ ܗܘܐ ܡܢ ܙܪܥܗ ܕܐܗܪܘܢ:
ܠܡܤܡ ܥܛܪܐ ܕܒܤܡ̈ܐ ܩܕܡ ܡܪܝܐ. ܕܠܐ ܢܗܘܐ ܐܝܟ ܩܘܪܚ ܘܐܝܟ ܟܢܘܫܬܗ: ܕܦܬܚܬ ܐܪܥܐ
ܦܘܡܗ ܘܒܠܥܬ ܐܢܘܢ: ܐܝܟ ܕܐܡܪ ܡܪܝܐ ܒܐܝܕܐ ܕܡܘܫܐ
ܡܢ ܬܢܝܢ ܢܡܘܣܐ:
ܠܘܩܒܠ ܚܘܫܒܐ
ܕܫܘܒܚܐ ܣܪܝܩܐ. ܕܡܛܠ ܒܢܝܢ̈ܫܐ ܗܘ ܥܒܕ ܙܕܝܩܘܬܐ.܀
ܟܐܢܐܝܬ ܒܬܪ ܙܕܝܩܘܬܐ ܪܕܦ܆ ܕܬܥܘܠ
ܬܐܪܬ ܐܪܥܐ ܕܡܪܝܐ ܐܠܗܟ ܝܗܒ ܠܟ
ܗ ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ: ܕܟܕܝܢ ܥܡ ܡܠܬܐ
ܕܥܠ ܢܨ̈ܚܢܐ: ܘܕܒܪ ܟܪܒܐ ܕܫܘܒܚܐ ܣܪܝܩܐ܀
ܠܐ ܬܕܒܪ ܦܕܢܐ ܒܬܘܪܐ ܘܒܚܡܪܐ ܐܝܟ ܚܕܐ
ܡܢ
ܫܡܘܐܝܠ:
ܘ: ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ: ܕܗܐ ܠܡ ܗܘܝܬ ܠܟ ܡܫܒܚܐ ܒܝܢܬ
ܟܠܗܘܢ ܐ̈ܚܐ܀
ܘܐܢܐ ܡܟܝܟܐ ܐܢܐ ܘܠܘ ܡܫܒܚܐ
ܡܢ ܣܦܪ ܡ̈ܠܟܐ:
ܙ ܠܘܩܒܠ ܢܦܫܐ ܕܠܐ ܨܒܝܐ
ܘܐܡܪܘ ܒ̈ܢܝ ܢܒ̈ܝܐ
ܠܐܠܝܫܥ. ܗܐ ܗܢܐ ܐܬܪܐ ܕܝܬܒܝܢܢ ܒܗ ܩܕܡܝܟ ܗܪܟܐ܆ ܐܠܝܨ ܗܘ ܠܢ. ܢܐܙܠ ܠܝܘܪܕܢܢ. ܘܢܦܣܘܩ
ܡܢ ܬܡܢ ܚܕܐ ܚܕܐ ܩܪܝ܂ ܘܢܥܒܕ ܠܢ ܐܬܪܐ ܠܡܬܒ ܬܡܢ. ܘܐܡܪ ܙܠܘ
ܡܢ ܕܘܝܕ:
ܚ: ܠܘܩܒܠ
ܢܦܫܐ ܕܡܢ ܫܘܒܚܐ ܤܪܝܩܐ ܕܐܚܝܕ ܠܗ: ܣܒܪܐ ܠܗ ܕܡܫܪܝܢ ܕܝ̈ܘܐ ܒܡܘܠܟܢܐ ܕܟܗܢܘܬܐ
ܕܡܫܬܘܕܝܢ ܠܗ.܀.
ܡܛܠ ܕܠܝܬ ܒܦܘܡܗܘܢ ܟܐܢܘܬܐ. ܐܠܐ ܥܘܠܐ ܒܓܘܗܘܢ ܐܝܟ ܩܒܪ̈ܐ ܦܬܝܚܐ
ܓܓܪ̈ܬܗܘܢ. ܘܠܫ̈ܢܝܗܘܢ ܡܗܦܟܝܢ
ܛ ܥܘܩܒܠ ܚܘܫܒܐ ܕܫܘܒܚܐ ܣܪܝܩܐ ܕܡܓܪܓ ܠܢ ܕܢܠܦ
ܠܐܚ̈ܐ ܐܘ ܠܥܠܡ̈ܝܐ: ܟܕ ܚܢܢ ܥܕܟܝܠ ܚܠܝܡܘܬܐ ܕܢܦܫܐ ܠܐ ܩܢܝܢܢ܀
ܐܦ ܨܦܪܐ ܐܫܟܚܬ ܠܗ ܒܝܬܐ
ܘܫܘܦܢܝܢܐ ܩܢܐ. ܘܐܬܪܒܝܘ ܦܪ̈ܘܓܐ ܥܠ ܓܢܒ ܡܕܒܚܟ ܡܪܝܐ̈ ܚܝܠܬܢܐ
ܝ ܠܘܩܒܠ ܚܘܫ̈ܒܐ
ܕܫܘܒܚܐ ܤܪܝܩܐ ܕܡܒܛܠܝܢ ܠܗ ܠܪܥܝܢܐ ܒܬܪ̈ܥܝܬܐ ܕܟܠ ܓܢܣ: ܟܕ ܒܙܒܢ ܡܦܪܢܣܐ
ܕܢܟ̈ܤܐ ܕܐܠܗܐ ܥܒܕܝܢ ܠܗ: ܘܒܙܒܢ ܫܪܝܪܐ ܥܠ ܐ̈ܚܐ ܡܩܝܡܝܢ ܠܗ܀
ܥܒܪܘ ܡܢܝ ܥܘ̈ܠܐ ܕܐܛܪ
ܦܘܩ̈ܕܢܘܗܝ ܕܐܠܗܝ
ܝܐ ܠܘܩܒܠ ܚܘܫܒܐ ܕܫܘܒܚܐ ܤܪܝܩܐ ܕܡܠܟ ܠܝ ܡܘܠܟܢܐ ܩܫܝܐ:
ܕܐܪܚܩ ܡܢ ܐܚܘܬܐ: ܘܐܚܒܘܫ ܢܦܫܝ ܡܛܠ ܐ̈ܚܐ: ܘܣܒܪ ܠܗ ܕܡܛܥܐ ܠܝ܀
ܒܐܘܪܚܐ ܕܗ̈ܠܟܬܝ
ܛܡܪܘ ܠܝ ܫܒܗܪ̈ܢܐ ܦܚ̈ܐ
ܡܢ ܡ̈ܬܠܘܗܝ ܕܫܠܝܡܘܢ
ܝܒ: ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ:
ܕܐܠܨ ܠܢ ܕܢܡܠܠ ܣܓܝ ܘܕܝܬܝܪ̈ܢ. ܕܗܕܐ ܕܝܢ ܝܬܝܪ ܩܠܝܠ ܫܟܝܚܐ܆ ܠܘܬ ܝܚ̈ܝܕܝܐ ܐܝܠܝܢ
ܕܒܚܒܘܫܝܐ ܐܢܘܢ: ܘܡܛܠ ܫܘܒܚܐ ܣܪܝܩܐ ܪܡܝܢ ܢܦܫܗܘܢ ܒܨ̈ܒܘܬܐ ܕܥܠܡܐ: ܘܡܩܒܠܝܢ
ܚܕܝܐܝܬ ܠܐܢ̈ܫܐ ܕܡܬܬܕܝܢܝܢ ܥܡ ܚ̈ܕܕܐ ܩܕܡܝܗܘܢ܀
ܒܣܘܓܐܐ ܕܡ̈ܠܐ ܠܐ ܡܬܦܨܐ ܐܢܬ ܡܢ ܥܘܠܐ.
ܘܕܚܤܟ ܣ̈ܦܘܬܗ ܣܟܘܠܬܢ
ܝܓ ܠܘܩܒܠ ܚܘܫܒܐ ܕܡܠܟ ܠܢ ܕܩܕܡ ܬܩܢܘܬܢ ܢܩܘܡ ܥܠ
ܐ̈ܚܐ: ܘܢܕܒܪ ܢܦܫ̈ܬܐ ܒܐܝܕܥܬܗ ܕܡܫܝܚܐ܀܀
ܐܝܬ ܐܘܪܚܐ ܕܣܒܪܝܢ ܥܠܝܗ ܒܢܝܢܫ̈ܐ ܕܬܪܝܨܐ ܗܝ܆
ܘܐܘܪ̈ܚܬܗ ܐܘܪ̈ܚܬܐ ܐ̈ܢܝܢ ܕܡܘܬܐ
ܝܕ ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ: ܕܡܓܪܓ ܠܢ ܕܢܫܒܘܩ
ܡܟܝܠ ܟܬ̈ܒܐ: ܡܛܠ ܕܠܐ ܐܕܪܟܢܢ ܚܝܠܗܘܢ܀
ܕܝܗܒ ܦܬܓܡܐ ܥܕܠܐ ܢܫܡܥ܆ ܣܟܠܐ ܗܘ
ܘܡܚܤܕܐ
ܝܗ ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ: ܕܡܓܪܓ ܠܐܝܠܝܢ ܕܣܓܝ ܛܠܝܢ ܕܢܬܒܘܢ
ܒܠܚܘܕܝܗܘܢ܀.
ܐܦ ܒܥܒ̈ܕܘܗܝ ܡܬܝܕܥ ܛܠܝܐ. ܐܢ ܕܟܐ ܘܐܢ ܬܪ̈ܝܨܝܢ ܥܒ̈ܕܘܗܝ
ܝܘ ܠܘܩܒܠ
ܚܘܫܒܐ ܕܫܘܒܚܐ ܣܪܝܩܐ: ܕܡܠܟ ܠܢ ܕܠܥܠܡ̈ܝܐ ܐܝܠܝܢ ܕܡܚܒܝܢ ܠܢ ܢܥܪܘܒ: ܡܐ ܕܐܠܨ
ܠܗܘܢ ܡܪܐ ܚܘܒܐ܀
ܠܐ ܬܬܠ ܢܦܫܟ ܠܥܪܘܒܘܬܐ: ܒܕܒܗܬ ܐܢܬ ܡܢ ܦܪ̈ܨܘܦܐ. ܐܢ ܠܝܬ ܠܟ ܓܝܪ
ܡܢ ܐܝܟܐ ܕܬܦܪܘܥ. ܢܣܒܝܢ ܬܫܘܝܬܐ ܡܢ ܬܚܘܬܝܟ
ܝܙ ܠܘܩܒܠ ܢܦܫܐ ܕܡܛܠ ܫܘܒܚܐ ܣܪܝܩܐ
ܡܕܡ ܡܢ ܪ̈ܐܙܐ ܕܝܚܝܕܝܘܬܐ ܠܐܢ̈ܫܐ ܥܠܡ̈ܝܐ ܡܬܢܝܐ܀
ܩܕܡ ܣܟܠܐ ܠܐ ܬܡܠܠ. ܡܛܠ ܕܫܐܛ ܠܗ̈ܝܢ
ܠܡ̈ܠܝܟ
ܝܚ ܠܘܩܒܠ ܚܘܫ̈ܒܐ ܕܡܓܪܓܝܢ ܠܢ ܕܢܦܘܩ ܒܥܠܡܐ: ܡܛܠ ܝܘܬܪܢܐ ܕܐܝܠܝܢ ܕܚܙܝܢ
ܠܢ܀
ܡ̈ܠܘܗܝ ܕܛܪܟܢܐ ܫܓܫܢ. ܘܡ̈ܚܬܢ ܠܬܘ̈ܢܐ ܕܠܒܐ
ܝܛ ܠܘܩܒܠ ܕܝܘܐ ܐܝܢܐ ܕܡܛܠ
ܢܣܝ̈ܘܢܐ ܪܘܪ̈ܒܐ: ܐܝܠܝܢ ܕܩܪܒ ܠܢ ܓܠܝܐܝܬ: ܗܦܟ ܬܘܒ ܡܦܝܣ ܠܢ ܕܢܫܒܘܩ ܠܗ. ܗܕܐ ܕܝܢ
ܐܝܟ ܕܬܢܝ ܠܢ ܢܒܝܐ ܩܕܝܫܐ ܝܘܚܢܢ. ܡܛܠ ܫܘܒܚܐ ܣܪܝܩܐ ܥܒܕ ܠܗ܀
ܘܠܐ ܠܢ ܕܝܢ ܕܢܦܢܐ
ܠܗ ܦܬܓܡܐ܆ ܐܝܢܐ ܕܗܘ ܛܘܒܢܐ ܦܢܝ ܘܐܡܪ. ܡܢ ܣ̈ܦܘܬܗ ܡܬܝܕܥ ܣܢܐܐ. ܘܒܓܘܗ ܟܡܝܢ
ܟܡܝܢܐ. ܘܐܢ ܡܡܟܟ ܩܠܗ ܠܐ ܬܗܝܡܢܝܗܝ. ܡܛܠ ܕܫܒܥ ܒ̈ܝܫܢ ܥܡܪ̈ܢ ܒܓܘܗ
ܟ ܠܘܩܒܠ
ܚܘܫ̈ܒܐ ܕܐܠܨܝܢ ܠܢ ܡܛܠ ܫܘܒܚܐ ܕܥܒܪ: ܕܢܓܠܐ ܕܘܒܪ̈ܝܢ ܢܨܝ̈ܚܐ܀܀
ܢܫܒܚܘܢܟ ܢܘܟܪ̈ܝܐ ܘܠܐ
ܦܘܡܟ. ܘܐܚܪ̈ܢܐ ܘܠܐ ܣ̈ܦܘܬܟ
ܡܢ ܩܘܗܠܬ:
ܟܐ: ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ: ܕܒܙܒܢܐ
ܕܠܐ ܘܠܐ ܐܠܨ ܠܢ ܕܢܡܠܠ: ܘܒܙܒܢܐ ܕܘܠܐ ܡܠܟ ܠܢ ܕܢܫܬܘܩ܀
ܙܒܢܐ ܠܡܫܬܩ ܘܙܒܢܐ ܠܡܡܠܠܘ
ܟܒ ܡܢ ܐܝܘܒ
ܠܘܩܒܠ ܢܦܫܐ ܕܠܐ ܡܦܤܐ ܕܐܦ ܤܛܢܐ ܝܕܥ ܗܘ ܠܗܘܢ ܠܐܝܠܝܢ ܕܦܠܚܝܢ ܠܡܪܝܐ܀
ܥܢܐ ܣܛܢܐ ܘܐܡܪ ܠܡܪܝܐ. ܣܪܝܩܐܝܬ ܓܝܪ ܕܚܠ ܐܝܘܒ ܠܐܠܗܐ. ܐܢܬ ܓܝܪ ܐܓܢܬ ܐܝܕܟ
ܒܪܟܬ. ܘܩܢܝܢܗ ܤܓܝ ܒܐܪܥܐ
ܟܓ ܡܢ ܐܫܥܝܐ:
ܠܘܩܒܠ ܕܝܘܐ ܕܡܠܟ ܠܢ ܘܐܡܪ: ܕܡܫܒ̈ܚܐ
ܥܒܕ ܐܢܐ ܠܟܘܢ ܒܟܠܕܘܟ: ܩܕܡ ܟܠܗܘܢ ܒܢܝ̈ܢܫܐ. ܘܥܒܕ ܢܦܫܗ܆ ܕܗܐ ܠܡ ܐܙܠ ܡܥܕܪ ܠܢ܀
ܘܢܫܕܪ ܡܪܝܐ ܚܝܠܬܢܐ ܨܥܪܐ ܒܐܝܩܪܟ܆ ܘܒܫܘܒܚܟ ܢܘܪܐ ܬܘܩܕ
ܟܕ ܠܘܩܒܠ ܢܦܫܐ ܕܫܘܒܚܐ
ܕܡܢ ܒܢܝܢܫ̈ܐ ܪܚܡܐ: ܝܬܝܪ ܡܢ ܐܝܕܥܬܗ ܕܡܫܝܚܐ܀
ܟܠ ܒܪܢܫܐ ܐܝܟ ܥܡܝܪܐ. ܘܟܠܗ ܝܐܝܘܬܗ
ܐܝܟ ܥܘܦܝܐ ܝܒܫ ܥܡܝܪܐ ܘܚܡܐ ܥܘܦܝܐ܆ ܘܡܠܬܗ ܕܐܠܗܢ ܠܥܠܡ̈ܝܢ ܩܝܡܐ
ܡܢ ܐܪܡܝܐ:
ܟܗ:
ܠܘܬ ܡܪܝܐ ܡܛܠ ܚܘܫ̈ܒܐ ܕܫܘܒܚܐ ܕܐܓܪܘ ܒܢ: ܐܝܠܝܢ ܕܠܪܥܝܢܐ ܕܘܝܐ ܕܩܕܡ ܕܝ̈ܘܐ ܕܪܘܓܙܐ
ܘܕܟܪܝܘܬܐ ܘܕܫܘܒܗܪܐ ܒܠܥܝܢ ܠܗ܀
ܐܤܢܝ ܡܪܝܐ ܘܐܬܐܣܐ. ܦܪܘܩܝܢܝ ܘܐܬܦܪܩ. ܡܛܠ
ܕܫܘܒܗܪܝ ܐܢܬ ܗܘ
ܡܢ ܐܘ̈ܥܝܬܗ ܕܐܪܡܝܐ:
ܟܘ: ܠܘܩܒܠ ܕܝܘܐ ܕܥܒܕܢܝ ܒܫܢܬܐ ܕܠܠܝܐ ܪܥܝܐ
ܕܥ̈ܢܐ: ܘܒܐܝܡܡܐ ܦܫܩܗ ܠܗ ܠܝ ܠܚܠܡܐ ܘܐܡܪ: ܕܟܗܢܐ ܗܘܐ ܐܢܬ: ܘܗܐ ܐܝܠܝܢ ܕܒܥܝܢ ܠܟ
ܒܥܓܠ ܐܬܝܢ ܒܬܪܟ܀
ܫܬܩܘ ܒܓܘܒܐ ܚ̈ܝܝ. ܫܕܘ ܒܝ ܟܐܦ̈ܐ
ܡܢ ܕܢܝܐܝܠ:
ܟܙ ܠܘܩܒܠ ܕܝܘܐ
ܕܗܡܣ ܒܡܕܥܢ ܘܐܡܪ: ܕܗܐ ܠܡ ܒܥܓܠ ܡܬܚܛܦܝܢ ܐܢܬܘܢ ܠܫܡܝܐ. ܗܕܐ ܕܝܢ ܐܢ̈ܫܝܢ ܡܢ
ܐ̈ܚܐ ܐܬܚܫܒܘ܆ ܘܒܟܝܡܘܢܐ ܩܫܝܐ ܢܦܠܘ ܘܐܬܢܘܓܘ܀
ܬܪܝܨܐܝܬ ܕܓܠܬ ܒܪܝܫܟ. ܗܐ ܓܝܪ
ܡܠܐܟܗ ܕܡܪܝܐ ܫܩܠ ܦܘܩܕܢܐ ܡܢ ܡܪܝܐ܆ ܕܢܦܣܩܟ ܡܢ ܡܨܥܬܟ
ܟܚ ܠܘܩܒܠ ܕܝܘܐ ܕܐܫܬܘܕܝ
ܠܢ ܒܠܒܢ: ܕܥܒܕ ܠܢ ܝܵܕܝܥܐ ܒܝܕ ܚܟܡܐ ܩܕܡ ܡ̈ܠܟܐ ܘܪ̈ܝܫܢܐ.܀.
ܬܪܝܨܐܝܬ ܐܦ ܐܢܬ ܕܓܠܬ
ܒܪܝܫܟ. ܗܐ ܓܝܪ ܡܠܐܟܗ ܕܡܪܝܐ ܫܩܝܠ ܣܝܦܐ܆ ܕܢܨܪܝܟ ܡܢ ܡܨܥܬܟ. ܘܩܐܡ ܐܝܟܢܐ ܕܢܘܒܕܟ
ܡܢ ܐܘܢܓܠܝܘܢ ܕܡܬܝ:
ܟܛ ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ: ܐܝܢܐ ܕܩܕܡ ܕܢܥܒܕ ܦܘܩ̈ܕܢܐ
ܕܐܠܗܐ: ܨܒܐ ܕܢܐܠܦ ܐܢܘܢ ܠܐܚ̈ܐ܀
ܟܠ ܕܝܢ ܕܢܥܒܕ ܘܢܐܠܦ܆ ܪܒܐ ܢܬܩܪܐ ܒܡܠܟܘܬܐ ܕܫܡܝܐ.
ܠ ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ ܕܡܬܢܩܦ ܟܠ ܠܙܕܩ̈ܬܐ ܘܠܪܥܝܢܐ ܡܦܬܠܐ ܥܒܕ
ܠܗ܀
ܚܘܪܘ ܕܝܢ ܒܙܕܩ̈ܬܟܘܢ ܕܠܐ ܬܥܒܕܘܢܗ ܩܕܡ ܒܢܝܢܫ̈ܐ ܐܝܟ ܕܬܬܚܙܘܢ ܠܗܘܢ ܘܐܠܐ ܐܓܪܐ ܠܝܬ
ܠܟܘܢ ܠܘܬ ܐܒܘܟܘܢ ܕܒܫܡܝܐ
ܠܐ ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ: ܕܒܬܩܢܘܬܐ ܕܨܠܘܬܐ
ܕܟܝܬܐ ܡܬܚܙܐ ܠܢ. ܘܡܕܡܐ ܠܗ ܠܪܥܝܢܐ ܒܕܡܘܬܐ ܕܗܘ ܨܒܐ: ܟܕ ܗܘ ܪܥܝܬܐ ܕܠܐ ܚܙܬܐ ܘܕܠܐ
ܕܡܘܬܐ ܐܝܬܘܗܝ: ܘܨܐܪ ܠܗ ܐܝܟ ܗܘ ܕܡܨܠܐ ܓܝܪ ܠܐܠܗܘܬܐ. ܗܟܢܐ ܕܝܢ ܗܘܐ ܠܗ ܠܪܥܝܢܐ: ܐܝܢܐ
ܕܡܢ ܚܫܐ ܕܫܘܒܚܐ ܣܪܝܩܐ ܡܫܬܚܩ: ܘܡܢ ܕܝܘܐ ܗܘ ܐܝܢܐ ܕܒܥܕܢܐ ܕܨܠܘܬܐ ܠܗ ܠܕܘܟܬܐ
ܡܬܩܪܒ: ܐܝܟܐ ܕܡܚܘܐ ܕܡܢ ܛ̈ܠܝܐ ܘܡܢ ܐܢ̈ܫܐ ܣ̈ܓܝܐܐ ܡܬܚܙܐ. ܡܢܘ ܕܡܫܟܚ ܕܢܤܬܟܠ
ܢܤܬܟܠ܀
ܡܐ ܕܡܨܠܐ ܐܢܬ܆ ܠܐ ܬܗܘܐ ܐܝܟ ܢ̈ܣܒܝ ܒܐ̈ܦܐ: ܕܪܚܡܝܢ ܠܡܩܡ ܒܟܢܘܫ̈ܬܐ ܘܒܙܘ̈ܝܬܐ
ܕܫ̈ܘܩܐ ܠܡܨܠܝܘ: ܐܝܟ ܕܢܬܚܙܘܢ ܠܒ̈ܢܝܢܫܐ. ܘܐܡܝܢ ܐܡܪ ܐܢܐ ܠܟܘܢ ܕܩܒܠܘ ܐܓܪܗܘܢ
ܠܒ
ܠܘܩܒܠ ܚܘܫ̈ܒܐ ܕܫܘܒܚܐ ܣܪܝܩܐ: ܕܡܬܚܦܛܝܢ ܕܒܝܕ ܟܡܝܪܘܬܐ ܢܓܠܘܢ ܨܘܡܢ: ܐܝܟܢܐ ܡܢ(?)
ܚܘܫ̈ܒܐ ܕܪܒܘܬ ܟܪܤܐ ܡܫܬܪܐ ܘܡܬܚܪܪ ܪܥܝܢܐ: ܕܢܬܐܣܪ ܘܢܬܬܚܕ ܒܚܘܫܒܐ ܕܫܘܒܚܐ
ܣܪܝܩܐ. ܗܕܐ ܕܝܢ ܡܬܦܪ̈ܣܝܢ ܕܢܥܒܕܘܢ ܕܝ̈ܘܐ ܛܡ̈ܐܐ܆ ܐܝܟܢܐ ܕܠܐ ܢܫܟܚ ܪܥܝܢܐ ܕܢܩܘܡ ܘܢܬܠܐ
ܚܝܪܗ ܠܘܬ ܐܠܗܐ: ܟܕ ܡܥܠܝ ܡܢ ܚܘܫ̈ܒܐ܀
ܐܡܬܝ ܕܨܝܡܝܢ ܐܢܬܘܢ. ܠܐ ܬܗܘܘܢ ܟܡܝܪ̈ܐ ܐܝܟ
ܢܣ̈ܒܝ ܒܐܦ̈ܐ. ܡܚܒܠܝܢ ܓܝܪ ܦܪ̈ܨܘܦܝܗܘܢ܆ ܐܝܟ ܕܢܬܚܙܘܢ ܠܒ̈ܢܝܢܫܐ ܕܨܝܡܝܢ. ܘܐܡܝܢ ܐܡܪ ܐܢܐ
ܠܟܘܢ ܕܩܒܠܘ ܐܓܪܗܘܢ
ܠܓ ܠܘܩܒܠ ܚܘܫ̈ܒܐ ܕܫܘܒܚܐ ܣܪܝܩܐ: ܕܐܠܨܝܢ ܠܗ ܠܢܦܫܐ
ܕܬܪܢܐ ܒܡ̈ܠܐ ܒ̈ܛܠܬܐ: ܘܒܨ̈ܒܘܬܐ ܥܒܘܪ̈ܝܬܐ ܡܬܚܦܛܝܢ ܕܢܐܣܪܘܢܝܗܝ ܠܪܥܝܢܐ: ܒܐܝܠܝܢ ܕܡ̈ܙܝܥܢ
ܒܢ ܐܘ ܪܓܬܐ ܐܘ ܚܡܬܐ: ܐܘ ܕܨܝܪ̈ܝܢ ܒܗ ܒܪܥܝܢܐ ܚ̈ܙܘܢܐ ܡܫܟܪ̈ܐ: ܐܝܠܝܢ ܕܐܝܬܝܗܘܢ ܡ̈ܚܒܠܢܐ
ܕܬܩܢܘܬܐ ܕܟܝܬܐ: ܗܝ ܕܡܨܒܬܐ ܘܡܟܠܠܐ ܠܗ ܠܨܠܘܬܢ܀
ܐܡܝܢ ܐܡܪ ܐܢܐ ܠܟܘܢ. ܕܟܠ ܡܠܐ ܒܛܠܐ
ܕܢܐܡܪܘܢ ܒܢܝܢܫ̈ܐ܆ ܢܬܠܘܢ ܦܬܓܡܗ ܒܝܘܡܐ ܕܕܝܢܐ. ܡܢ ܡ̈ܠܝܟ ܬܙܕܕܩ. ܘܡܢ ܡ̈ܠܝܟ ܬܬܚܝܒ
ܠܕ
ܠܘܩܒܠ ܚܘ̈ܫܒܐ ܕܗܘܝܢ ܒܚܕܘܬܐ: ܡܛܠ ܕܪ̈ܘܚܐ ܛܢ̈ܦܬܐ ܥܪ̈ܩܢ ܡܢ
ܢܦܫ̈ܬܢ܀
ܒܗܕܐ ܠܐ ܬܚܕܘܢ ܕܫܐ̈ܕܐ ܡܫܬܥܒܕܝܢ ܠܟܘܢ. ܐܠܐ ܚܕܘ ܕܫܡ̈ܗܝܟܘܢ ܐܬܟܬܒܘ ܒܫܡܝܐ
ܡܢ ܐܘܢܓܠܝܘܢ ܕܝܘܚܢܢ:
ܠܗ ܠܘܩܒܠ ܕܝܘܐ ܕܐܡܪ ܠܝ ܒܠܒܝ: ܕܗܐ ܠܡ ܡܦܣ ܐܢܬ
ܒܡܘܗܒܬܐ ܕܐܣܝܘܬܐ ܕܩܒܠܬ܀
ܐܡܬܝ ܕܡܡܠܠ ܟܕܒܘܬܐ܆ ܡܢ ܕܝܠܗ ܗܘ ܡܡܠܠ. ܡܛܠ
ܕܕܓܠܐ ܗܘ ܐܦ ܐܒܘܗܝ
ܡܢ ܦܪܟܣܣ:
ܠܘ ܠܘܩܒܠ ܫܐܕܐ ܕܡܠܟ ܠܢ ܕܢܩܢܐ ܟܗܢܘܬܐ ܒܝܕ
ܟܣܦܐ܀
ܟܣܦܟ ܥܡܟ ܢܐܙܠ ܠܐܒܕܢܐ. ܡܛܠ ܕܣܒܪܬ ܕܡܘܗܒܬܗ ܕܐܠܗܐ ܒܩܢܝܢ ܥܠܡܐ
ܡܬܩܢܝܐ
ܡܢ ܕܩܘܪ̈ܢܬܝܐ ܩܕܡܝܬܐ
ܠܙ ܠܘܩܒܠ ܢܦܫܐ ܕܡܢ ܫܘܒܚܐ ܣܪܝܩܐ ܡܫܬܚܩܐ: ܘܪܓܐ
ܕܬܐܠܦ ܚܟܡܬܐ ܕܝ̈ܘܢܝܐ܀
ܚܟܡܬܗ ܕܥܠܡܐ ܗܢܐ܆ ܫܛܝܘܬܐ ܗܝ ܠܘܬ ܐܠܗܐ ܡܢ ܕܩܘܪ̈ܢܬܝܐ
ܕܬܪ̈ܬܝܢ܆
ܠܚ ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ: ܕܨܒܐ ܕܢܫܬܒܗܪ ܒܥܡܠܐ ܕܕܘܒܪ̈ܐ ܬܩ̈ܢܐ.܀
ܡܢ ܕܡܫܬܒܗܪ ܒܡܪܝܐ ܢܫܬܒܗܪ. ܠܐ ܗܘܐ ܓܝܪ ܡܢ ܕܢܦܫܗ ܡܫܒܚ: ܗܘ ܗܘ ܒܩܐ. ܐܠܐ ܡܢ
ܕܡܪܝܐ ܢܫܒܚܝܘܗܝ
ܠܛ ܡܢ ܕܓ̈ܠܛܝܐ ܠܘܩܒܠ ܚܘܫܒܐ ܕܫܘܒܚܐ ܣܪܝܩܐ ܕܡܓܪܓ ܠܢ
ܕܢܦܝܣ ܐܢܘܢ ܠܒ̈ܢܝ ܓܢܣܢ: ܕܐܢ ܚܐܝܢܢ ܟܐܢܐܝܬ ܒܥܘܡܪܐ ܕܝܚܝܕܝܘܬܐ: ܡܫܬܘܝܢܢ ܠܚܠܝܡܘܬ
ܢܦܫܐ ܘܠܝܕܥܬܐ ܕܫܪܪܐ܀
ܗܫܐ ܓܝܪ ܠܒܢ̈ܝܢܫܐ ܗܘ ܡܦܝܣ ܐܢܐ ܐܘ ܠܐܠܗܐ. ܐܠܘ ܓܝܪ ܥܕܡܐ
ܠܗܫܐ ܠܒ̈ܢܝܢܫܐ ܫܦܪ ܗܘܝܬ܆ ܥܒܕܐ ܠܡܫܝܚܐ ܠܐ ܗܘܐ ܗܘܝܬ
ܡܢ ܕܥܒܪ̈ܝܐ:
ܡ ܠܘܩܒܠ
ܚܘܫܒܐ ܕܫܘܒܚܐ ܣܪܝܩܐ ܕܡܠܟ ܠܝ ܕܐܣܥܘܪ ܡܕܡ: ܐܝܟ ܡܢ ܕܐܬܝܩܪ ܒܟܗܢܘܬܐ܀
ܠܐ ܓܝܪ ܐܢܫ
ܠܢܦܫܗ ܓܒܐ ܐܝܩܪܐ܆ ܐܠܐ ܡܢ ܕܡܢ ܐܠܗܐ ܡܬܩܪܐ
ܡܢ ܐܓܪܬܐ ܕܝܥܩܘܒ:
ܠܘܩܒܠ ܚܘܫܒܐ
ܕܫܘܒܚܐ ܣܪܝܩܐ: ܕܡܓܪܓ ܠܢ ܕܢܐܠܦ: ܟܕ ܐܢܚܢܢ ܚܠܝܡܘܬ ܢܦܫܐ ܠܐ ܩܢܝܢܢ: ܐܘ ܝܕܥܬܐ
ܕܫܪܪܐ܀
ܠܐ ܣܓ̈ܝܐܐ ܡ̈ܠܦܢܐ ܢܗܘܘܢ ܒܟܘܢ ܐ̈ܚܝ.. ܡܛܠ ܕܝܕܥܝܢ ܐܢܬܘܢ ܕܕܝܢܐ ܝܬܝܪܐ ܡܩܒܠܝܢܢ
ܣܓܝܐ̈ܬܐ ܓܝܪ ܡܬܥܒܪܝܢܢ. ܟܠ ܕܒܡܠܬܐ ܠܐ ܫܪܥ܆ ܗܢܐ ܐܝܬܘܗܝ ܓܒܪܐ ܓܡܝܪܐ. ܕܡܫܟܚ
ܡܫܥܒܕ ܐܦ ܠܟܠܗ ܦܓܪܗ:
ܡܒ ܠܘܩܒܠ ܚܘܫ̈ܒܐ ܕܫܘܒܚܐ ܣܪܝܩܐ ܕܒܥܝܢ ܡܘܗ̈ܒܬܐ
ܕܐܣܝܘܬܐ: ܐܘ ܕܝܕܥܬܐ ܕܐܠܗܐ܀
ܫܐܠܝܢ ܐܢܬܘܢ ܘܠܐ ܢܣܒܝܢ ܐܢܬܘܢ. ܡܛܠ ܕܒܝܫܐܝܬ ܫܐܠܝܢ
ܐܢܬܘܢ. ܐܝܟ ܕܬܬܪܣܘܢ ܪ̈ܓܝܓܬܟܘܢ
ܡܢ ܐܓܪܬܐ ܕܝܘܚܢܢ:
ܡܓ: ܠܘܩܒܠ ܚܘܫ̈ܒܐ ܕܫܘܒܚܐ
ܤܪܝܩܐ ܕܒܥܝܢ ܠܗ ܠܥܠܡܐ: ܘܫܘܒܚܗ ܨܐܝܪܝܢ ܩܕܡ ܥ̈ܝܢܝܗܘܢ܀
ܠܐ ܬܚܒܘܢ ܠܥܠܡܐ܆ ܘܠܐ
ܠܡܕܡ ܕܐܝܬ ܒܗ. ܐܢ ܐܢܫ ܓܝܪ ܡܚܒ ܠܥܠܡܐ܆ ܠܝܬ ܒܗ ܚܘܒܗ ܕܐܠܗܐ܀
ܒܪܝܟ ܗܘ ܡܪܢ
ܝܫܘܥ ܡܫܝܚܐ: ܕܝܗܒ ܠܢ ܙܟܘܬܐ ܥܠ ܚܘܫ̈ܒܐ ܕܕܝܘܐ ܕܫܘܒܚܐ ܣܪܝܩܐ.
ܬܘܒ ܡܐܡܪܐ ܕܬܡܢܝܐ:
ܕܠܘܩܒܠ ܚܘܫ̈ܒܐ ܠܝ̈ܛܐ ܕܫܒܗܪܢܘܬܐ:.܀܀
ܡܢ ܟܬܒܐ ܕܒܪܝܬܐ
ܐ: ܠܘܟܒܠ ܚܘܫܒܐ
ܕܫܒܗܪܢܘܬܐ ܕܐܡܪ ܠܝ: ܕܐܢܐ ܐܢܐ ܩܕܝܫܗ ܕܡܪܝܐ܀
ܠܝܛ ܐܢܬ ܡܢ ܟܠܗ ܒܥܝܪܐ. ܘܡܢ ܟܠܗ ܚܝܘܬܐ
ܕܕܒܪܐ. ܘܥܠ ܟܪܣܟ ܬܗܠܟ. ܘܥܦܪܐ ܬܐܟܘܠ ܟܠ ܝܘܡ̈ܝ ܚ̈ܝܝܟ
ܒ ܠܘܩܒܠ ܚܘܫܒܐ
ܕܫܒܗܪܢܘܬܐ: ܕܡܫܒܚ ܠܝ ܘܡܪܝܡ ܠܝ ܠܪܘܡܐ ܐܝܟ ܕܠܕܟܝܐ: ܕܠܐ ܬܘܒ ܡܩܒܠ ܚܘܫ̈ܒܐ
ܛܡ̈ܐܐ܀
ܗܐ ܫܪܝܬ ܠܡܡܠܠܘ ܩܕܡ ܡܪܝܐ. ܘܐܢܐ ܥܦܪܐ ܐܢܐ ܘܩܛܡܐ
ܓ ܠܘܩܒܠ ܚܘܫܒܐ
ܡܓܕܦܢܐ ܕܟܦܪ ܒܐܠܗܐ ܕܡܬܪܣܐ ܠܝ: ܘܛܠܡ ܠܡܠܐܟܐ ܕܡܥܕܪ ܠܝ.܀.
ܐܠܗܐ ܕܬܪܣܝܢܝ ܡܢ
ܛܠܝܘܬܝ ܘܥܕܡܐ ܠܝܘܡܢܐ܆ ܡܠܐܟܐ ܕܦܪܩܢܝ ܡܢ ܟܠ ܒ̈ܝܫܢ
ܡܢ ܡܦܩܢܐ.
ܕ ܠܘܩܒܠ ܢܦܫܐ
ܕܨܒܝܐ ܕܬܐܠܦ ܕܡܢܐ ܐܡܪܝܢ ܕܝ̈ܘܐ ܫܒܗܪ̈ܢܐ: ܐܡܬܝ ܕܚܙܝܢ ܠܢ ܕܒܨܝܢ ܚܢܢ ܫܪ̈ܒܐ ܪ̈ܘܚܢܐ܀
ܬܥܫܢ
ܥܒܝܕܬܐ ܥܠ ܓܒܪ̈ܐ ܘܢܪܢܘܢ ܒܗ. ܘܠܐ ܢܪܢܘܢ ܒܡ̈ܠܐ ܣܪ̈ܝܩܬܐ
ܗ ܠܘܩܒܠ ܚܘܫܒܐ
ܫܒܗܪܢܐ ܕܟܦܪ ܒܦܘܪܩܢܗ ܕܐܠܗܐ: ܗܘ ܕܒܥܘܕܪܢܗ ܙܟܝܢ ܠܫܒܥܐ ܕܝ̈ܘܐ ܐܚܪ̈ܢܐ ܚܒܪ̈ܘܗܝ ܕܕܝܘܐ
ܕܫܒܗܪܢܘܬܐ܀
ܫܒܚܘ ܠܡܪܝܐ ܓܐܝܐ: ܕܐܬܓܐܝ ܥܠ ܪ̈ܟܫܐ ܘܪ̈ܟܒܝܗܘܢ ܐܪܡܝ ܒܝܡܐ. ܬܩܝܦܐ
ܘܡܫܒܚܐ. ܕܢܚ ܡܪܝܐ ܘܗܘܐ ܠܢ ܦܪܘܩܐ
ܘ ܠܘܬ ܡܪܝܐ ܡܛܠ ܚܘܫܒܐ ܕܫܒܗܪܢܘܬܐ ܕܡܫܒܚ
ܝܡܝܢܟ ܡܪܝܐ ܗܕܝܪܐ ܒܚܝܠܐ ܝܡܝܢܟ
ܡܪܝܐ ܬܒܪܬ ܠܒܥܠܕܒ̈ܒܝܟ. ܒܣܘܓܐܐ ܕܬܘܩܦܟ ܣܚܦܬ ܠܣܢܐܝܵܟ
ܙ ܠܘܩܒܠ ܚܘ̈ܫܒܐ
ܕܫܒܗܪܢܘܬܐ ܕܐܠܨܝܢ ܠܗ ܠܢܦܫܐ ܕܬܒܣܐ ܒܡ̈ܠܐܟܐ ܩ̈ܕܝܫܐ: ܐܝܟ ܗܘ ܕܠܐ ܡܫܟܚܝܢ ܪ̈ܕܝܢ ܠܗ
ܒܣ̈ܟܠܘܬܐ ܕܡܣܟܠܐ. ܐܝܟܢܐ ܕܡܢܗܘܢ ܬܫܬܒܩ ܥܠ ܕܐܬܪܥܝܬ ܗܠܝܢ܆ ܘܬܦܠ ܬܘܒ ܒܪ̈ܝܘܐ
ܛܡ̈ܐܐ: ܗܢܘ ܕܝܢ ܚܘܫ̈ܒܐ ܕܫܒܗܪܢܘܬܐ܀.
ܗܐ ܡܫܕܪ ܐܢܐ ܡܠܐܟܝ ܩܕܡܝܟ܆ ܕܢܢܛܪܟ ܒܐܘܪܚܐ
ܘܢܥܠܟ ܠܐܪܥܐ ܕܬܩܢܬ. ܐܙܕܗܪ ܡܢܗ ܘܫܡܥ ܒܩܠܗ. ܠܐ ܬܬܚܪܐ ܠܩܘܒܠܗ܆ ܕܠܡܐ ܠܐ ܢܫܒܘܩ
ܠܚ̈ܘܒܝܟ. ܡܛܠ ܕܫܡܝ ܥܠܘܗܝ
ܡܢ ܣܦܪܐ ܕܟ̈ܗܢܐ
ܚ: ܠܘܩܒܠ ܚܘܫܒܐ ܕܫܒܗܪܢܘܬܐ
ܕܡܠܟ ܠܢ ܕܢܒܣܐ ܒܐܒ̈ܗܝܢ ܩܪ̈ܝܫܐ: ܐܝܟ ܗܘ ܠܡ ܕܡܕܡ ܝܬܝܪ ܡܢܢ ܠܐ ܥܡܠܘ ܒܕܘܒܪ̈ܝܗܘܢ܀
ܡܢ ܩܕܡ ܣܒܐ ܗܘܝܬ ܩܐܡ. ܘܗܘܝܬ ܡܝܩܪ ܠܡܢ ܕܩܫܝܫ ܡܢܟ. ܘܕܚܠ ܡܢ ܐܠܗܟ
ܛ ܠܘܩܒܠ
ܚܘܫܒܐ ܡܓܕܦܢܐ ܕܡܙܝܥ ܠܗ ܠܪܥܝܢܐ ܠܐܒܕܢ ܐܒ̈ܕܢܝܢ܀
ܓܒܪ ܓܒܪ ܟܕ ܢܨܚܐ ܠܐܠܗܗ܆
ܢܩܒܠ ܚܛܗܗ. ܘܡܢ ܕܢܦܪܘܫ ܫܡܗ ܕܡܪܝܐ ܡܬܩܛܠܘ ܢܬܩܛܠ ܘܡܪܓܡ ܢܪܓܡܘܢܗܝ ܟܠܗ
ܟܢܘܫܬܐ܀
ܠܘܬ ܡܪܝܐ ܡܛܠ ܕܐܓܪܘ ܒܢ ܚܘܫ̈ܒܐ ܡ̈ܓܕܦܢܐ: ܘܦܣܩܝܢ ܠܗ ܠܦܪܗܣܝܐ
ܕܨܠܘܬܢ܀
ܩܘܡ ܡܪܝܐ ܘܢܬܬܒܪܘܢ ܣܢܐ̈ܝܟ. ܘܢܥܪܩܘܢ ܒܥܠܕܒ̈ܒܝܟ ܡܢ ܩܕܡܝܟ
ܝܐ ܠܘܩܒܠ
ܢܦܫܐ ܕܠܐ ܝܕܥܐ ܫܘܦܪܐ ܕܝܕܥܬܐ ܘܡܬܛܦܝܤܐ ܠܕܝܘܐ ܕܡܠܟ ܠܗ ܕܬܥܪܘܩ ܡܢ ܝܕܥܬܗ
ܕܡܫܝܚܐ: ܘܡܢ ܦܘܩ̈ܕܢܘܗܝ ܩ̈ܕܝܫܐ ܐܝܠܝܢ ܕܡܒܨܪ ܠܗܘܢ ܩܕܡ ܥ̈ܝܢܝܗ܀
ܘܝܫܘܥ ܒܪܢܘܢ ܘܟܠܒ
ܒܪ ܝܘܦܢܐ ܡܢ ܓܫܘ̈ܫܐ ܕܐܪܥܐ܆ ܨܪܝܘ ܢܚ̈ܬܝܗܘܢ ܘܐܡܪܘ ܠܟܠܗ ܟܢܘܫܬܐ ܕܒ̈ܢܝ ܐܝܤܪܝܠ܂
ܐܪܥܐ ܕܥܒܪܢ ܒܗ ܠܡܓܫܗ܆ ܛܒܐ ܗܝ ܐܪܥܐ ܛܒ. ܐܢ ܨܒܐ ܒܢ ܡܪܝܐ ܘܡܥܠ ܠܢ ܠܐܪܥܐ ܗܕܐ
ܘܝܗܒ ܠܗ ܠܢ܆ ܐܪܥܐ ܗܝ ܕܡܪܕܝܐ ܚܠܒܐ ܘܕܒܫܐ. ܒܠܚܘܕ ܥܠ ܡܪܝܐ ܠܐ ܬܡܪܕܘܢ
ܡܢ ܬܢܝܢ
ܢܡܘܣܐ:
ܝܒ: ܠܘܩܒܠ ܚܘܫܒܐ ܡܓܕܦܢܐ: ܕܥܒܕ ܠܢ ܕܢܬܚܫܒ: ܐܢ ܐܝܬ ܒܢ ܐܠܗܐ ܐܘ ܠܐ܀
ܠܐ ܬܢܤܐ ܠܡܪܝܐ ܐܠܗܟ:
ܝܓ ܠܘܩܒܠ ܢܦܫܐ ܕܒܫܒܗܪܢܘܬܐ ܡܬܚܫܒܐ: ܕܒܚܝܠܗ ܙܟܬ ܐܢܘܢ
ܠܕܝ̈ܘܐ ܕܩܝܡܝܢ ܠܘܩܒܠ ܦܘܠܚܢ ܦܘܩ̈ܕܢܐ܀
ܠܐ ܬܐܡܪ ܒܠܒܟ ܕܒܚܝܠܝ ܘܒܥܘܫܢܐ ܕܐܝ̈ܕܝ ܩܢܝܬ
ܠܝ ܗܠܝܢ ܢܟ̈ܣܐ. ܐܬܕܟܪ ܠܡܪܝܐ ܐܠܗܟ ܕܗܘ ܝܗܒ ܠܟ ܚܝܠܐ
ܝܕ ܠܘܩܒܠ ܪܥܝܢܐ ܕܣܒܪ
ܠܗ: ܕܡܛܠ ܙܕܝܩܘܬܗ ܘܟܐܢܘܬܗ ܙܟܐ ܠܒܥܠܕܒ̈ܒܘܗܝ: ܘܥܠ ܘܝܪܬ ܝܕܥܬܗ ܕܡܫܝܚܐ܀
ܠܐ
ܬܐܡܪ ܒܠܒܟ ܡܐ ܕܬܒܪ ܐܢܘܢ ܡܪܝܐ ܡܢ ܩܕܡܝܟ: ܕܒܙܕܝܩܘܬܝ ܐܥܠܢܝ ܡܪܝܐ ܠܡܐܪܬ ܐܪܥܐ ܗܕܐ.
ܒܝܕ ܚ̈ܛܗܝܗܘܢ ܗܘ ܓܝܪ ܕܥܡܡ̈ܐ ܗܠܝܢ ܡܘܒܕ ܠܗܘܢ ܡܪܝܐ ܡܢ ܩܕܡܝܟ. ܠܐ ܗܘܐ ܒܙܕܝܩܘܬܟ
ܘܒܬܪܝܨܘܬܗ ܕܠܒܟ: ܥܐܠ ܐܢܬ ܠܡܐܪܬ ܐܪܥܗܘܢ. ܐܠܐ ܡܛܠ ܚ̈ܛܗܝܗܘܢ ܕܥܡܡ̈ܐ ܗܠܝܢ
ܡܘܒܕ ܠܗܘܢ ܡܪܝܐ ܐܠܗܟ ܡܢ ܩܕܡܝܟ
ܝܘ ܠܘܩܒܠ ܕܝܘܐ ܕܐܡܪ ܠܝ ܕܟܠܗܘܢ ܒ̈ܢܝ ܐܢܫܐ ܠܝ
ܡܒܪܟܝܢ: ܘܐܢܐ ܐܢܐ ܡܘܠܕܢܐ ܕܚܟ̈ܝܡܐ܀
ܠܝܛ ܐܢܬ ܒܩܪܝܬܐ. ܠܝܛ ܐܢܬ ܒܚܩܠܐ. ܠܝܛ ܣܠܟ
ܘܐܨܘܬܟ. ܠܝܛܝܢ ܦܐܪ̈ܐ ܕܟܪܣܟ ܘܦܐܪ̈ܐ ܕܐܪܥܟ
ܝܘ ܠܘܩܒܠ ܚܘܫܒܐ ܡܓܕܦܢܐ ܕܛܠܡ ܠܗ
ܠܚܐܪܘܬܐ ܕܒܢ ܘܐܡܪ: ܕܠܘ ܒܨܒܝܢܢ ܚܛܝܢܢ ܘܡܙܕܕܩܝܢܢ. ܘܡܛܠ ܗܢܐ ܠܘ ܠܡ ܟܐܢܐܝܬ ܗܘܐ
ܓܙܪ ܕܝܢܐ܀
ܚܙܝ ܕܝܗܒܬ ܩܕܡܝܟ ܝܘܡܢܐ ܚ̈ܝܐ ܘܡܘܬܐ. ܛܒ̈ܬܐ ܘܒܝܫ̈ܬܐ
ܡܢ ܝܫܘܥ ܒܪܢܘܢ:
ܝܙ ܠܘܩܒܠ ܚܘܫ̈ܒܐ ܕܢܦܫܐ ܕܠܐ ܝܕܥܐ: ܕܠܐ ܘܠܐ ܕܠܟܠ ܡܠܐܟܐ ܕܡܢ ܫܠܝ ܡܬܚܙܐ ܠܗ ܬܤܒܪ
ܕܕܡܪܝܐ ܗܘ: ܐܠܐ ܐܢ ܥܠ ܗܘ ܐܝܢܐ ܕܡܠܬܗ ܚܕܘܬܐ ܘܫܝܢܐ ܡܫܡܠܝܐ ܝܗܒܐ ܠܢܦܫܐ: ܗܘ ܕܒܚܙܬܗ
ܙܥܬ ܘܕܚܠܬ ܗܢܐ ܕܝܢ ܫܝܢܐ܆ ܕܝ̈ܘܐ ܒܚܙܬܗܘܢ ܠܐ ܡܩܢܝܢ ܠܗ: ܐܠܐ ܕܚܠܬܐ ܪܒܬܐ ܘܐܪܬܝܬܐ ܪܡܝܢ
ܒܢܦܫܐ ܘܒܦܓܪܐ. ܘܒܝܕ ܩܠܗܘܢ ܦܚܝܚܐ܆ ܒܘܠܒܠܐ ܘܪܗܝܒܘܬܐ ܡܝܬܝܢ ܥܠ ܠܒܐ܀
ܘܟܕ
ܗܘܐ ܝܫܘܥ ܒܦܩܥܬܐ ܕܐܝܪܚܘ܆ ܐܪܝܡ ܥ̈ܝܢܘܗܝ ܘܚܙܐ ܓܒܪܐ ܚܕ ܩܐܡ ܠܘܩܒܠܗ܆ ܘܣܝܦܗ
ܫܡܝܛ ܘܐܚܝܕ ܒܐܝܕܗ. ܘܐܙܠ ܝܫܘܥ ܠܘܬܗ ܘܐܡܪ ܠܗ. ܡܢܢ ܐܢܬ ܐܘ ܡܢ ܒ̈ܥܠܕܒܒܝܢ. ܘܐܡܪ
ܠܗ. ܘܐܡܪ ܠܗ ܡܢܐ ܐܡܪ ܡܪܝ ܠܥܒܕܗ
ܡܢ ܫܡܘܐܝܠ
ܝܚ ܠܘܩܒܠ ܚܘܫܒܐ ܫܒܗܪܢܐ:
ܕܟܦܪ ܒܛܝܒܘܬܐ ܕܐܠܗܐ܀
ܐܢ ܢܚܛܐ ܓܒܪܐ ܒܓܒܪܐ܆ ܢܒܥܐ ܡܢ ܡܪܝܐ ܘܢܫܬܒܩ ܠܗ. ܘܐܢ
ܒܡܪܝܐ ܢܚܛܐ ܓܒܪܐ ܡܢ ܡܢ ܢܒܥܐ
ܡܢ ܣܦܪ ܡ̈ܠܟܐ:
ܝܛ ܠܘܩܒܠ ܢܦܫܐ ܕܨܒܝܐ ܘܡܢܚܐ
ܕܬܫܟܚ ܕܬܣܝܡ ܒܘܪܟܐ: ܘܠܐܝܐ ܕܬܡܟܟܝܘܗܝ ܠܕܝܘܐ ܡܓܕܦܢܐ: ܐܝܢܐ ܕܣܩܪ ܨ̈ܠܘܬܢ ܐܡ̈ܝܢܬܐ܀
ܘܐܠܝܐ ܤܠܩ ܠܪܝܫ ܛܘܪܐ ܟܪܡܠܐ. ܘܐܬܓܗܢ ܥܠ ܐܪܥܐ܆ ܘܣܡ ܐܦ̈ܘܗܝ ܒܝܢܬ ܒܘܪ̈ܟܘܗܝ
ܟ ܠܘܩܒܠ ܢܦܫܐ ܕܙܝܥܐ ܡܢ ܚܘܫ̈ܒܐ ܕܚ̈ܝܠܐ ܕܓܘܕܦܐ: ܘܢܦܠܐ ܡܢ ܚܝܠܐ ܕܨܠܘܬܐ܀
ܠܐ ܬܕܚܠ ܡܢ
ܡ̈ܠܐ ܕܫܡܥܬ: ܕܓܕܦܘ ܩܕܡܝ ܐܝ̈ܙܓܕܘܗܝ ܕܡܠܟܐ ܕܐܬܘܪ. ܗܐ ܐܢܐ ܝܗܒ ܐܢܐ ܥܠܘܗܝ ܪܘܚܐ܂
ܘܢܫܡܥ ܛܒܐ ܘܢܗܦܘܟ ܠܐܬܪܗ. ܘܐܪܡܝܘܗܝ ܒܚܪܒܐ ܒܐܪܥܗ
ܟܐ ܠܘܬ ܡܪܝܐ ܡܛܠ ܡ̈ܠܐ ܕܕܝܘܐ
ܕܓܕܦ ܒܢ ܥܠ ܡܪܝܐ ܓܘܕ̈ܦܐ ܕܠܐ ܡܬܡܠܠܝܢ: ܐܝܠܝܢ ܕܐܢܐ ܠܐ ܐܫܟܚܬ ܠܡܟܬܒ: ܕܠܐ ܐܙܝܥ
ܠܫܡܝܐ ܘܠܐܪܥܐ. ܒܚܡܬܐ ܗܘ ܓܝܪ ܩܐܡ ܗܢܐ ܕܝܘܐ ܟܕ ܠܐ ܙܐܥ. ܘܡܡܠܠ ܓܘܕܦܐ ܪܒܐ: ܥܠ
ܐܠܗܐ ܘܥܠ ܡܠܐܟ̈ܘܗܝ ܩ̈ܕܝܫܐ. ܝܕܥܝܢ ܕܝܢ ܡܢܐ ܐܡܪ ܐܢܐ܆ ܐܝܠܝܢ ܕܐܬܢܣܝܘ ܡܢܗ. ܒܙܒܢܐ ܕܝܢ ܕܗܢܐ
ܢܣܝܘܢܐ܂ ܫܦܝܪ ܗܘ ܨܘܡܐ ܘܩܪܝܢܐ ܕܟܬ̈ܒܐ. ܘܨ̈ܠܘܬܐ ܕܠܐ ܩ̈ܛܥܢ ܕܒ̈ܕܡܥܐ ܡܬܩܪ̈ܒܢ.܀
ܡܪܝܐ
ܐܠܗܐ ܕܐܝܤܪܝܠ ܝܬܒ ܥܠ ܟܪ̈ܘܒܐ܆ ܐܢܬ ܗܘ ܐܠܗܐ ܒܠܚܘܕܝܟ ܥܠ ܟܠܗܝܢ ܡ̈ܠܟܘܬܐ ܕܐܪܥܐ.
ܐܢܬ ܥܒܕܬ ܫܡܝܐ ܘܐܪܥܐ. ܨܠܝ ܡܪܝܐ ܐܕܢܟ ܘܥܢܝܢܝ. ܦܬܚ ܡܪܝܐ ܥ̈ܝܢܝܟ ܘܚܙܝ. ܘܫܡܥ
ܡ̈ܠܘܗܝ ܕܣܢܚܪܝܒ: ܕܫܠܚ ܠܡܚܤܕܘ ܠܐܠܗܐ ܚܝܐ
ܡܢ ܥܙܪܐ:
ܠܘܬ ܡܪܝܐ ܡܛܠ ܚܘܫܒܐ
ܕܫܒܗܪܢܘܬܐ ܕܟܦܪ ܒܙܟܘܬܐ ܕܡܢ ܐܠܗܐ܀
ܡܢܟ ܙܟܘܬܐ ܘܡܢܟ ܚܟܡܬܐ. ܘܕܝܠܟ ܬܫܒܘܚܬܐ ܘܐܢܐ
ܥܒܕܟ. ܒܪܝܟ ܐܢܬ ܕܝܗܒܬ ܚܟܡܬܐ܆ ܘܠܟ ܡܘܕܐ ܐܢܐ ܡܪܝܐ ܛܘܒܢܐ ܕܐܒ̈ܗܝ
ܡܢ ܕܘܝܕ
ܟܓ ܠܘܬ
ܡܪܝܐ ܡܛܠ ܚܘܫ̈ܒܐ ܡ̈ܓܕܦܢܐ ܕܐܓܪܘ ܒܝ܀
ܡܪܝܐ ܐܠܗܝ ܒܟ ܣܒܪܬ ܦܪܘܩܝܢܝ. ܘܡܢ ܟܠ
ܪ̈ܕܘܦܝ ܦܨܢܝܢ ܕܠܡܐ ܐܝܟ ܐܪܝܐ ܠܡܬܒܪ ܠܢܦܫܝ: ܘܠܝܬ ܕܦܪܩ ܘܡܦܨܐ
ܟܕ ܠܘܬ ܡܪܝܐ ܡܛܠ
ܕܝܘܐ ܕܫܒܗܪܢܘܬܐ ܕܐܬܩܪܒ ܠܘܬܢ: ܐܝܢܐ ܕܙܒ̈ܢܝܢ ܣ̈ܓܝܐܢ ܡܬܚܙܐ ܒܕܡܘܬ ܡܠܐܟܐ ܕܢܘܗܪܐ: ܟܕ
ܚܝܠܐ ܪܒܐ ܕܕܝ̈ܘܐ ܕܒܝܪ ܥܡܗ܀
ܠܐ ܬܝܬܐ ܥܠܝܢ ܪܓܠܐ ܥܫܝܢܬܐ. ܘܐܝܕܗܘܢ ܕܪ̈ܫܝܥܐ ܠܐ ܬܙܝܥܢܝ
ܟܗ
ܠܘܬ ܡܪܝܐ ܡܛܠ ܚܘܫܒܐ ܕܫܒܗܪܢܘܬܐ ܕܛܠܡ ܠܥܘܕܪܢܐ ܕܐܠܗܐ. ܘܠܚܝܠܐ ܕܝܠܗ ܚܫܒ ܠܗ
ܠܙܩܘܬܐ܀
ܡܛܠ ܕܠܐ ܗܘܐ ܥܠ ܩܫ̈ܬܬܢ ܬܟܝܠܝܢܢ. ܐܦܠܐ ܥܠ ܙܝܢܢ ܕܢܦܪܩܢ. ܐܢܬ ܗܘ ܦܪܩܬܢ
ܡܢ ܣܢܐ̈ܝܢ܆ ܘܐܒܗܬܬ ܠܒܥܠܕܒ̈ܒܝܢ.
ܟܘ ܠܘܩܒܠ ܕܝܘܐ ܕܡܫܬܘܕܐ ܠܢ ܕܢܦܫܩ ܠܢ ܟܬ̈ܒܐ.
ܘܠܐ ܠܢ ܕܢܐܡܪ. ܐܝܟܢܐ ܕܐܦ ܐܒܘܢ ܛܘܒܢܐ ܡܩܪܝܣ ܐܡܪ܀
ܠܚܛܝܐ ܐܡܪ ܠܗ ܐܠܗܐ܆ ܡܐ ܠܟ
ܘܠܟܬ̈ܒܐ ܕܦܘ̈ܩܕܢܝ: ܕܫܩܠܬ ܩܝܡܝ ܒܦܘܡܟ. ܐܢܬ ܕܝܢ ܤܢܝܬ ܡܪܕܘܬܝ܆ ܘܫܕܝܬ ܡ̈ܠܝ
ܠܒܤܬܪܟ
ܟܙ ܠܘܩܒܠ ܚܘܫ̈ܒܐ ܫܒܗܪ̈ܢܐ ܕܚܕܝܪ̈ܝܢ ܠܗ ܠܪܥܝܢܢ. ܘܡܪܡܝܢ ܠܗ ܒܪܒܘܬܐ
ܕܐܒܕܢܐ܀܀
ܥܕܡܐ ܠܐܡܬܝ ܡܬܓܪܓܝܢ ܐܢܬܘܢ ܥܠ ܓܒܪܐ ܕܬܩܛܠܘܢ. ܐܝܟ ܐܣܬܐ ܕܡܛܬ ܘܐܝܟ
ܤܝܓܐ ܕܕܚܝܩ
ܟܚ ܠܘܬ ܡܪܝܐ ܡܛܠ ܚܘܫ̈ܒܐ ܫܒܗܪ̈ܢܐ ܕܐܓܪܘ ܒܢ: ܘܕܠܐ ܦܪܗܣܝܐ ܥܒܕܘܗܝ
ܠܪܥܝܢܐ ܒܥܕܢܐ ܕܨܠܘܬܐ܀
ܡ̈ܠܐ ܕܥܘ̈ܠܐ ܥܫ̈ܢܝܢ ܡܢܝ. ܘܚ̈ܛܗܝ ܐܢܬ ܬܚܣܐ ܐܢܘܢ
ܟܛ ܠܘܩܒܠ
ܚܘܫ̈ܒܐ ܕܓܘܕܦܐ: ܕܐܡܪܝܢ ܥܠ ܐܠܗܐ ܡܕܡ ܕܠܐ ܡܬܡܠܠ܀
ܠܐ ܬܪܝܡܘܢ ܠܡܪܘܡܐ ܩܪܢܟܘܢ:
ܘܬܡܠܠܘܢ ܒܨܘܪܐ ܪܡܐ
ܠ ܠܘܩܒܠ ܚܘܫܒܐ ܕܫܒܗܪܢܘܬܐ ܕܡܫܒܚ ܠܝ: ܐܝܟ ܗܘ ܕܛܒܐܝܬ
ܒܢܐ ܐܢܐ ܢܦܫ̈ܬܐ ܒܕܘܒܪ̈ܐ ܬܩ̈ܢܐ: ܘܒܝܕܥܬܗ ܕܐܠܗܐ܀
ܐܢ ܡܪܝܐ ܠܐ ܒܢܐ ܒܝܬܐ ܤܪܝܩܐܝܬ ܠܐܝܢ
ܒܢ̈ܝܘܗܝ. ܘܐܢ ܡܪܝܐ ܠܐ ܢܛܪ ܩܪܝܬܐ ܣܪܝܩܐܝܬ ܫܗܪ̈ܝܢ ܢܛܘܪ̈ܝܗ
ܠܐ ܡܢ ܡܬ̈ܠܘܗܝ ܕܫܠܝܡܘܢ:
ܠܘܩܒܠ ܚܘܫܒܐ ܫܒܗܪܢܐ ܕܡܡܝܩ ܒܐ̈ܝܐ: ܐܝܟ ܗܘ ܕܗܐ ܠܡ ܡܗܡܝܢ ܡܢ ܦܘܠܚܢ ܦܘܩ̈ܕܢܐ܀
ܤܚܦ ܡܪܝܐ ܠܫܒܗܪ̈ܢܐ. ܘܥܠ ܡ̈ܟܝܟܐ ܡܪܚܡ
ܠܒ ܠܘܩܒܠ ܢܦܫܐ ܕܨܒܝܐ ܕܬܐܠܦ: ܕܡܢܐ
ܡܐܟܘܠܬܗܘܢ ܡܐܟܘܠܬܐ ܗܝ ܕܥܘܠܐ. ܘܚܡܪܐ ܕܥܬܐ ܫܬܝܢ
ܠܓ
ܠܘܩܒܠ ܚܘܫܒܐ ܫܒܗܪܢܐ ܕܟܠܐ ܠܝ ܕܐܚܙܐ ܠܐܚ̈ܐ: ܐܝܟ ܗܘ ܡܢ ܕܠܐ ܡܝܬܪܝܢ ܡܢܝ ܒܝܕܥܬܐ܀
ܕܡܗܠܟ ܥܡ ܚܟܝܡܐ ܢܗܘܐ ܚܟܝܡ. ܘܕܡܗܠܟ ܥܡ ܤܟܠܐ ܢܒܐܫ ܠܗ
ܠܕ ܠܘܩܒܠ ܚܘܫܒܐ
ܫܒܗܪܢܐ: ܕܟܠܐ ܠܝ ܒܙܒܢܐ ܕܢܣܝܘܢܐ ܩܫܝܐ ܘܢܓܝܪܐ: ܕܒܝܕ ܐܚ̈ܐ ܐܦܝܣ ܠܡܪܝܐ܀
ܐܚܐ ܕܡܬܥܕܪ
ܡܢ ܐܚܘܗܝ܆ ܐܝܟ ܡܕܝܢܬܐ ܡܢ ܚܣܢܗ
ܠܗ ܠܘܩܒܠ ܚܘܫܒܐ ܫܒܗܪܢܐ: ܕܕܟܝܐ ܘܙܟܝܐ ܚܫܒ
ܠܝ.܀
ܡܢܘ ܢܐܡܪ ܕܙܟܝ ܐܢܬ ܠܒܝ: ܘܐܬܕܟܝܬ ܡܢ ܚ̈ܛܗܐ
ܠܘ ܠܘܩܒܠ ܚܘܫܒܐ ܫܒܗܪܢܐ:
ܕܠܢܨܚܢܐ ܕܝܠܬܐ ܩܪܐ ܠܗ܀
ܛܘܒܘܗܝ ܠܒܪܢܫܐ ܕܕܚܠ ܒܟܠܙܒܢ܆ ܘܐܝܢܐ ܕܡܩܫܐ ܠܒܗ ܢܦܠ
ܒܒܝܫܬܐ
ܡܢ ܩܘܗܠܬ:
ܠܙ: ܠܘܩܒܠ ܚܘܫ̈ܒܐ ܫܒܗܪ̈ܢܐ ܕܡܬܚܬܪ̈ܝܢ ܥܠ ܐܚ̈ܐ ܡܛܠ
ܓܢܣܢ ܦܓܪܢܐ: ܕܣܒܪܝܢܢ ܕܫܒܝܚܐ ܐܝܬܘܗܝ܀
ܟܠܡܕܡ ܡܢ ܥܦܪܐ ܗܘܐ. ܘܠܥܦܪܐ ܗܦܟ
ܠܚ ܠܘܩܒܠ ܚܘܫܒܐ ܫܒܗܪܢܐ ܕܡܚܘܐ ܠܝ ܚ̈ܛܗܝܗܘܢ ܕܐܚ̈ܐ܀
ܡܛܠ ܕܠܝܬ ܒܪ ܐܢܫܐ
ܕܙܕܝܩ ܥܠ ܐܪܥܐ: ܕܥܒܕ ܛܒܬܐ ܘܠܐ ܚܛܐ
ܠܛ ܠܘܩܒܠ ܕܝܘܐ ܕܐܡܪ ܠܝ: ܕܗܐ ܠܡ ܗܘܝܬ
ܠܟ ܐܝܚܝܕܝܐ ܡܫܡܠܝܐ܀
ܐܝܬ ܗܘ ܣܒܪܐ. ܡܛܠ ܕܛܒ ܗܘ ܟܠܒܐ ܕܚܝ: ܡܢ ܐܪܝܐ ܕܡܝܝܬ
ܡܢ
ܐܝܘܒ:
ܡ: ܠܘܩܒܠ ܕܝ̈ܘܐ ܕܡܐܣܝܢ ܓܡܝܪܐ ܡܢ ܡܟܝܟܘܬܐ ܠܫܒܗܪܢܘܬܐ ܕܟܪ̈ܝܗܐ܀
ܒܪܡ ܕܝܢ
ܡ̈ܡܠܠܝ ܫܘܩܪܐ ܐܢܬܘܢ܀ ܘܡܐܣ̈ܝܝ ܒܠܐ ܡܕܡ ܐܢܬܘܢ
ܡܐ ܠܘܩܒܠ ܕܝ̈ܘܐ ܕܚܛܦܝܢ ܠܗ ܠܪܥܝܢܐ:
ܠܓܘܕܦܐ ܕܥܠ ܐܠܗܐ܀
ܥܠ ܐܠܗܐ ܡܡܠܠܝܢ ܐܢܬܘܢ ܥܘܠܐ܆ ܘܥܠܘܗܝ ܡܡܠܠܝܢ ܐܢܬܘܢ ܢܟܠܐ
ܡܒ ܠܘܩܒܠ ܚܘܫܒܐ ܫܒܗܪܢܐ: ܕܡܢܐ ܠܝ ܚ̈ܛܗܝܗܘܢ ܕܐ̈ܚܐ܀
ܡܢܘ ܕܕܩܐ ܡܢ ܛܡܐܘܬܐ ܐܦܠܐ
ܚܕ. ܐܢ ܦܣܝܩܝܢ ܐܢܘܢ ܝܘܡ̈ܘܗܝ: ܘܡܢܝܢܐ ܕܝܪ̈ܚܘܗܝ ܓܙܝܪ̈ܝܢ
ܡܓ ܠܘܩܒܠ ܢܦܫܐ ܕܡܢ
ܫܒܗܪܢܘܬܐ ܕܐܚܝܕܐ ܠܗ. ܣܒܪܐ ܕܕܘܒܪܗ ܐܝܟ ܩܘܪܒܢܐ ܡܩܒܠ ܩܕܡ ܐܠܗܐ܀
ܡܢܐ ܝܘܬܪܢ ܠܡܪܝܐ
ܕܡܬܡܡ ܐܢܬ ܐܘܪ̈ܚܬܟ
ܡܕ. ܡܢ ܙܟܪܝܐ:
ܠܘܩܒܠ ܚܘܫܒܐ ܕܕܝܘܐ ܕܐܠܨ ܠܗ ܠܪܥܝܢܐ ܕܢܪܫܥ
ܒܫܡܝܐ܀
ܣܛܢܐ ܢܓܥܘܪ ܒܟ ܡܪܝܐ. ܢܓܥܘܪ ܒܟ ܡܪܝܐ ܕܓܒܗ ܠܐܘܪܫܠܡ
ܡܢ ܐܫܥܝܐ
ܡܗ
ܠܘܩܒܠ ܚܘܫܒܐ ܫܒܗܪܢܐ ܕܡܪܡܪܡ ܠܝ: ܐܝܟ ܕܠܓܒܪܐ ܚܟܝܡܐ܀
ܘܝ ܠܕܚܟ̈ܝܡܝܢ ܒ̈ܥܝܢܝ
ܢܦܫܗܘܢ: ܘܠܘܩܒܠ ܐ̈ܦܝܗܘܢ ܣ̈ܟܘܠܬܢܝܢ.
ܡܘ ܠܘܩܒܠ ܢܦܫܐ ܕܠܐ ܡܦܣܐ: ܕܡܕܡ ܐܚܪܝܢ
ܠܐ ܡܪܗܒ ܠܗܘܢ ܠܕܝ̈ܘܐ ܘܒܕܚܠܬܐ ܪܡܐ ܠܗܘܢ: ܐܠܐ ܐܢ ܝܕܥܬܗ ܕܡܫܝܚܐ: ܗܝ ܕܡܦܪܣܝܐ
ܠܟܠܗܝܢ ܨ̈ܢܥܬܗܘܢ: ܘܡܪܝܪܘܬܐ ܕܚܘܫ̈ܒܝܗܘܢ ܟ̈ܣܝܐ ܓܠܝܐ܀
ܘܬܗܘܐ ܐܪܥܐ ܕܝܗܘܕܐ܆ ܕܚܠܬܐ
ܘܙܘܥܬܐ ܘܣܘܪܕܐ ܠܡܨܪ̈ܝܐ. ܘܡܢ ܫܡܥܐ ܕܫܡܗ ܢܙܘܥܘܢ. ܡܛܠ ܬܪܥܝܬܐ ܕܐܬܪܥܝ ܡܪܝܐ
ܥܠܝܗܘܢ
ܡܢ ܐܪܡܝܐ:
ܡܙ ܠܘܩܒܠ ܚܘܫ̈ܒܐ ܫܒܗܪ̈ܢܐ ܘܡ̈ܓܕܦܢܐ: ܕܐ̈ܠܗܐ ܥܒܕܝܢ ܠܗܘܢ
ܠܕܝ̈ܘܐ܀
ܗܟܢܐ ܐܡܪ ܠܗܘܢ. ܐ̈ܠܗܐ ܕܫܡܝܐ ܘܐܪܥܐ ܠܐ ܥܒܕܘ܆ ܢܐܒܕܘܢ ܡܢ ܐܪܥܐ ܘܡܢ ܬܚܝܬ ܫܡܝܐ
ܗܠܝܢ
ܡܚ ܠܘܬ ܡܪܝܐ ܡܛܠ ܚܘܫܒܐ ܕܫܒܗܪܢܘܬܐ ܕܡܫܒܚ ܠܝ ܘܐܡܪ: ܕܗܐ ܠܡ ܙܟܝܬ
ܐܢܘܢ ܠܒܥܠܕܒ̈ܒܝܟ܀
ܝܕܥ ܐܢܐ ܕܐܘܪ̈ܚܬܗ ܕܡܪܝܐ ܠܐ ܗ̈ܘܝ ܐܝܟ ܕܒܪܢܫܐ. ܘܠܐ ܐܝܟ ܓܒܪܐ ܕܐܙܠ
ܘܡܬܩܢ ܨܒܘܬܗ
ܡܢ ܐܘ̈ܠܝܬܗ ܕܐܪܡܝܐ
ܡܛ: ܠܘܩܒܠ ܢܦܫܐ ܕܟܪܝܐ ܠܗ: ܡܛܠ ܚܘܫܒܐ
ܡܓܕܦܢܐ.܀
ܡܛܠ ܕܠܐ ܛܥܐ ܡܪܝܐ ܠܥܠܡ. ܐܠܐ ܡܡܟܟ ܘܡܪܝܡ ܐܝܟ ܣܘܓܐܬ ܪ̈ܚܡܘܗܝ. ܡܛܠ
ܕܠܐ ܛܥܐ ܡܢ ܠܒܗ. ܘܡܡܟܟ ܒ̈ܢܝ ܓܢܒܪ̈ܐ
ܠܘܬ ܡܪܝܐ ܡܛܠ ܚܘܫ̈ܒܐ ܡ̈ܓܕܦܢܐ. ܕܛܡܪܝܢ
ܠܗ ܠܪܥܝܢܐ ܒܥܕܢܐ ܕܨܠܘܬܐ܀
ܛܢܬ ܒܪܘܓܙܟ ܘܪܕܦܬܢ. ܘܩܛܠܬܢ ܘܠܐ ܚܣܬ. ܛܢܬ ܒܛܢܢܟ
ܘܐܥܒܪܬ ܨܠܘܬܢ. ܥܩܝܪ̈ܐ ܘܡ̈ܣܠܝܐ ܥܒܕܬܢ ܒܝܬ ܥܡܡ̈ܐ
ܡܢ ܚܙܩܝܐܝܠ
ܠܘܩܒܠ ܕܝܘܐ
ܫܒܗܪܢܐ: ܗܘ ܕܡܫܡܗ ܢܦܫܗ ܐܠܗܐ܀
ܐܢܬ ܕܝܢ ܒܪܢܫܐ ܐܢܬ ܒܐܝܕܐ ܕܘ̈ܛܘܠܝܟ ܘܠܐ ܗܘܝܬ ܐܠܗܐ.
ܒܐܝܕܐ ܕܥܘܪ̈ܠܐ ܢܘܟܪ̈ܝܐ ܬܡܘܬ. ܡܛܠ ܕܐܢܐ ܡܠܠܬ ܐܡܪ ܡܪܐ ܡܪ̈ܘܬܐ
ܐܘܢܓܠܝܘܢ ܕܡܬܝ
ܠܘܩܒܠ
ܢܦܫܐ ܕܡܣܠܝܐ ܠܗ ܠܐܚܐ: ܐܝܟ ܗܘ ܕܡܗܡܝܢܐ ܗܘ ܘܠܐ ܚܦܝܛܐ: ܘܡܛܠ ܕܐܣܝܪܐ ܒܦܟܪ̈ܐ
ܡܢܐ ܕܝܢ ܚܙܐ ܐܢܬ ܓܠܐ ܕܒܥܝܢܗ ܕܐܚܘܟ:
ܘܩܪܝܬܐ ܕܒܥܝܢܟ ܕܝܠܟ ܠܐ ܡܬܒܚܪܐ ܠܟ܀( sic )
ܠܘܩܒܠ ܕܝܘܐ ܡܓܕܦܢܐ ܕܐܡܪܕܓ̈ܠܬܐ: ܕܚܘܫ̈ܒܐ
ܛ̈ܡܐܐ ܡܠ̈ܟܠܬܐ ܐ̈ܢܝܢ܀
ܠܐ ܗܘܐ ܡܕܡ ܕܥܐܠ ܠܦܘܡܐ ܡܣܝܒ ܠܗ ܠܒܪܢܫܐ. ܐܠܐ ܡܕܡ ܕܢܦܩ
ܡܢ ܦܘܡܐ܆ ܗܘ ܗܘ ܡܣܝܒ ܠܗ ܠܒܪܢܫܐ
ܡܢ ܐܘܢܓܠܝܘܢ ܕܡܪܩܘܣ:
ܠܘܩܒܠ ܢܦܫܐ ܕܐܠܝܨܐ
ܒܚܘܫ̈ܒܐ ܕܫܒܗܪܢܘܬܐ: ܘܠܐ ܚܟܡܐ ܕܐܝܟܢܐ ܬܦܩ ܐܢܘܢ ܡܢܗ܀
ܗܢܐ ܓܢܣܐ ܠܐ ܢܦܩ܆ ܐܠܐ
ܒܨܘܡܐ ܘܒܨܠܘܬܐ
ܢܢ ܠܘܩܒܠ ܪܥܝܢܐ ܫܒܗܪܢܐ: ܕܩܕܡܝܐ ܕܐ̈ܚܐ ܪܐܓ ܕܢܗܘܐ܀
ܡ̈ܢ ܕܨܒܐ ܕܢܗܘܐ
ܩܕܡܝܐ܆ ܢܗܘܐ ܐܚܪܝܐ ܕܟܠܢܫ ܘܡܫܡܫܢܐ ܕܟܠܢܫ
ܡܢ ܐܘܢܓܠܘܢ ܕܠܘܩܐ.
ܢܐ: ܠܘܩܒܠ ܚܘܫܒܐ
ܫܒܗܪܢܐ: ܕܣܒܪ ܠܗ ܕܠܡܐ ܝܬܝܪ ܡܢ ܦܘܩ̈ܕܢܘܗܝ ܕܐܠܗܐ ܡܕܡ ܣܥܪ܀
ܚܢܢ ܥܒ̈ܕܐ ܚܢܢ ܒ̈ܛܝܠܐ
ܕܡܫܝܚܐ܆ ܕܡܕܡ ܕܚܝܒܝܢ ܗܘܝܢ ܠܡܥܒܕ ܥܒܕܢ
ܢܒ ܠܘܩܒܠ ܚܘܫܒܐ ܫܒܗܪܢܐ ܕܡܙܕܩ
ܢܦܫܗ: ܘܠܐ ܫܦܝܪ ܠܗ ܡܕܡ ܕܡܣܬܥܪ. ܡܢ ܐ̈ܚܐ ܒܝܕ ܡܚܝܠܘܬܐ܀
ܟܠ ܕܢܬܬܪܝܡ ܢܬܡܟܟ.
ܘܟܠ ܕܢܬܡܟܟ ܢܬܬܪܝܡ ܫܠܝܚܐ.
ܡܢ ܐܓܪܬܐ ܕܪ̈ܗܘܡܝܐ:
ܢܓ: ܠܘܩܒܠ ܚܘܫܒܐ ܫܒܗܪܢܐ
ܕܡܤܠܐ ܠܐܚܐ ܕܠܐ ܐܟܠ: ܘܚܫܒ ܠܗ ܡܚܝܠܐ: ܕܠܐ ܠܡ ܡܫܟܚ ܕܟܕ ܐܟܠ ܢܩܘܡ ܒܩܪܒܐ:
ܘܡܛܠ ܗܕܐ ܗܘ ܝܗܒ ܢܦܫܗ ܠܨܘܡܐ܀
ܗܘ ܕܐܟܠ ܠܗܘ ܕܠܐ ܐܟܠ ܠܐ ܢܤܠܐ
ܢܕ ܠܘܩܒܠ
ܚܘܫܒܐ ܫܒܗܪܢܐ ܕܕܐܢ ܠܗܘ ܕܐܟܠ: ܐܝܟ ܗܘ ܕܡܛܠ ܕܠܐ ܠܡ ܡܫܟܚ ܐܚܕ ܢܦܫܗ܀
ܗܘ ܕܠܐ
ܐܟܠ ܠܗܘ ܕܐܟܠ ܠܐ ܢܕܘܢ
ܡܢ ܕܩܘܪ̈ܢܬܝܐ ܩܕܡܝܬܐ:
ܢܗ: ܠܘܩܒܠ ܚܘܫܒܐ ܫܒܗܪܢܐ ܕܡܫܒܚ
ܠܝ: ܐܝܟ ܕܡܛܠ ܕܡܨܠܐ ܐܢܐ ܕܠܐ ܐܫܬܥܒܕ ܠܟܪܤܐ ܒܠܚܘܕ: ܐܠܐ ܐܦ ܕܠܚܡܬܐ ܐܙܟܐ܀
ܠܐ ܐܢܐ ܐܠܐ
ܛܝܒܘܬܗ ܕܐܠܗܐ ܕܥܡܝ
ܢܘ ܡܢ ܕܩܘܪ̈ܢܬܝܐ: ܕܬܪ̈ܬܝܢ
ܠܘܩܒܠ ܢܦܫܐ ܕܠܐ ܡܦܣܐ: ܕܐܦ ܗܘ ܣܛܢܐ
ܡܬܕܡܐ ܒܡܠܐܟܐ ܕܫܪܪܐ: ܘܗܘܐ ܡܠܦܢܐ ܕܝܕܥܬܐ ܕܓܠܬܐ܀
ܐܢ ܓܝܪ ܗܘ ܣܛܢܐ ܡܬܕܡܐ ܒܡܠܐܟܐ
ܕܢܘܗܪܐ܆ ܠܐ ܗܘܬ ܪܒܐ ܨܒܘܬܐ܇ ܐܢ ܐܦ ܡܫ̈ܡܫܢܘܗܝ ܡܬܕܡܝܢ ܒܡܫ̈ܡܫܢܐ ܕܙܕܝܩܘܬܐ. ܗܢܘܢ
ܕܚܪܬܗܘܢ ܬܗܘܐ ܐܝܟ ܥܒ̈ܕܝܗܘܢ
ܡܢ ܕܓ̈ܠܛܝܐ:
ܢܙ: ܠܘܩܒܠ ܚܘܫ̈ܒܐ ܫܒܗܪ̈ܢܐ: ܕܡܣܠܝܢ
ܠܗܘܢ ܠܐܚ̈ܐ: ܠܐܝܠܝܢ ܕܫܪܥܝܢ ܡܛܠ ܫܪ̈ܥܬܗܘܢ܀
ܐ̈ܚܝ܆ ܐܢ ܐܢܫ ܡܢܟܘܢ ܢܬܥܡܠ ܒ̈ܣܟܠܘܬܐ.
ܐܢܬܘܢ ܐܝܠܝܢ ܕܒܪܘܚ ܐܢܬܘܢ ܐܬܩܢܘܗܝ ܒܪܘܚܐ ܡܟܝܟܬܐ. ܘܗܘܝܬܢ ܙܗܝܪ̈ܝܢ. ܕܕܠܡܐ ܐܦ ܐܢܬܘܢ
ܬܬܢܣܘܢ
ܢܚ: ܡܢ ܕܦܝ̈ܠܝܦܣܝܐ:
ܠܘܩܒܠ ܚܘܫܒܐ ܫܒܗܪܢܐ ܕܡܪܡܪܡ ܠܝ: ܐܝܟ ܗܘ ܕܐܕܪܟܬ
ܫܘܠܡܐ ܕܦܘܠܚܢ ܦܘܩ̈ܕܢܐ܀
ܠܐ ܗܘܐ ܓܝܪ ܡܢ ܟܕܘ ܫܩܠܬ ܐܘ ܡܢ ܟܕܘ ܐܬܓܡܪܬ. ܐܠܐ ܪܗܛ ܐܢܐ܆
ܕܠܡܐ ܕܐܕܪܟ ܠܡܕܡ ܕܡܛܠܬܗ ܐܕܪܟܢܝ ܝܫܘܥ ܡܫܝܚܐ
ܡܢ ܐܓܪܬܐ ܕܝܘܚܢܢ:
ܢܛ: ܠܘܩܒܠ
ܚܘܫܒܐ ܫܒܗܪܢܐ ܕܡܪܡܪܡ ܠܝ: ܐܝܟ ܗܘ ܕܠܝܬ ܒܬܪܥܝܬܝ ܨܠܡܐ ܕܚܛܝܬܐ܀
ܐܢ ܐܡܪܝܢܢ
ܕܚ̈ܛܗܐ ܠܝܬ ܠܢ܆ ܡܚܛܝܢܢ ܢܦܫܢ. ܘܫܪܪܐ ܠܝܬ ܒܢ. ܐܢ ܕܝܢ ܡܘܕܝܢܢ ܒ̈ܚܛܗܝܢ܆ ܡܗܝܡܢ
ܗܘ ܘܟܐܝܢ ܐܠܗܐ܆ ܕܢܫܒܘܩ ܠܢ ܚ̈ܛܗܝܢ. ܘܢܕܟܝܢ ܡܢ ܟܠܗ ܥܘܠܢ
ܡܢ ܐܓܪܬ ܕܝ̈ܗܘܕܝܐ ( s ):
ܣ:
ܠܘܩܒܠ ܚܘܫ̈ܒܐ ܕܢܦܫܐ: ܕܒܥܝܢ ܡܢ ܡܪܝܐ ܚܠܝܡܘܬ ܢܦܫܐ ܥܕܡܐ ܠܚܪܬܐ܀
ܠܗܘ ܕܡܨܐ
ܕܢܢܛܪܟܘܢ ܕܠܐ ܪܫܝܢ: ܘܢܩܝܡܟܘܢ ܩܕܡ ܫܘܒܚܗ ܕܠܐ ܡܘܡ ܒܚܕܘܬܐ: ܠܐܠܗܐ ܦܪܘܩܢ ܒܠܚܘܕܘܗܝ
ܫܘܒܚܐ ܘܪܒܘܬܐ ܘܐܘܚܕܢܐ ܘܫܘܠܛܢܐ܆ ܡܢ ܩܕܡ ܟܠܗܘܢ ܥܠܡ̈ܐ ܘܗܫܐ ܘܒܟܠܙܒܢ ܘܠܥܠܡ
ܥܠܡܝܢ ܐܡܝܢ.܀.
ܒܪܝܟ ܗܘ ܡܪܢ ܝܫܘܥ ܡܫܝܚܐ ܐܠܗܢ ܕܝܗܒ ܠܢ ܙܟܘܬܐ ܥܠ ܚܘ̈ܫܒܐ
ܕܕܝܘܐ ܕܫܒܗܪܢܘܬܐ.
ܫܠܡ ܟܬܒܐ ܗܢܐ ܕܛܘܒܢܐ ܐܘܓܪܝܣ: ܕܥܠ ܗܠܝܢ ܬܡܢܝܐ ܚܘܫ̈ܒܝܢ܆
ܘܦܘܢܝ ܦܬܓܡܐ ܕܡܢ ܟܬ̈ܒܝ ܩܘܕܫܐ. ܕܡܢܣܝܢ ܠܢ ܕܝ̈ܘܐ܀ ܕܗܘܝܢ ܟܠܗܘܢ ܐܪ̈ܒܥܡܐܐ ܘܬܫܥܝܢ
ܘܫܒܥܐ ܪ̈ܝܫܝܢ:܀