Frankenberg's Syriac edition of the letters by Evagrius Ponticus
tag:kalvesmaki.com,2014:tan-key:evagrius
General keywords associated with the TAN collection for Evagrius of Pontus
tag:kalvesmaki.com,2014:tan-t:cpg2437:letters:deu:1986:bunge
Bunge's 1986 German translation of the 62 letters by Evagrius
tag:textalign.net,2015:stylesheet:remodel-via-tan-t
TAN remodeler
Started file
Input from file:/E:/Joel/Dropbox/TAN/library-arithmeticus/evagrius/cpg2437.syr.1912.frankenberg.xml proportionally remodeled after template at file:/E:/Joel/Dropbox/TAN/library-arithmeticus/evagrius/private-cpg2437.deu.1986.bunge.tan-tei.xml
ܐܝܟܢܐ ܕܐܡܪܐ ܡܠܬܐ܆ ܕܗܘ ܕܡܬܢܟܬ ܡܢ ܐܟܕܢܐ܆ ܠܘ ܣܓܝ ܚܫܐ ܡܣܝܒܪ܆ ܐܢ ܢܫܬܥܐ
ܠܐܚܪ̈ܢܐ ܕܢܟܝܬ ܡܢ ܐܟܕܢܐ܆ ܐܦ ܐܢܐ ܗܟܝܠ ܒܡܚܘ̈ܬܝ ܣܓܝ̈ܐܬܐ܆ ܢܦܫܝ ܡܒܝܐܢܐ ܕܠܟܝ ܡܫܬܥܐ ܐܢܐ ܕܒܠܥܬ
ܣܓܝ. ܕܣܓܝ̈ܐܢ ܘܡܫܚ̈ܠܦܢ ܨܢܥ̈ܬܗܘܢ ܕܫܐܕ̈ܐ ܕܠܘܬܢ܆ ܥܠ ܕܚܦܝܛܝܢܢ ܠܡܩܢܐ ܝܕܥܬܗ ܕܡܫܝܚܐ.
ܒܪܡ ܕܥ܆ ܕܠܐ ܚܕ ܡܢ ܢܣܝܘ̈ܢܐ܆ ܕܐܝܟ ܗܕܐ ܦܪܐܣܝܐ ܝܗܒ ܠܢܦܫܐ ܒܥܕܢܐ
ܕܨܠܘܬܐ܆ ܐܝܟ ܕܝܗܒ ܢܣܝܘܢܐ ܕܥܕܐ ܥܠ ܦܓܪܐ. ܐܦܠܐ ܗܘ ܡܪܢ ܠܐܢܫ ܐܚܪܝܢ ܝܗܒ ܕܐܝܟ ܗܕܐ ܠܐ ܚܫܘܫܘܬܐ܆
ܐܝܟ ܕܠܗܘ ܕܒܬܘܕܝܬܐ ܡܣܝܒܪ ܥܪ̈ܨܬܐ ܘܒܣܐ ܒܗܕܐ ܐܘܪܢܩܐ. ܘܢܦܝܣܟܝ ܐܝܘܒ ܛܘܒܢܐ ܗܘ ܕܡܢ ܒܬܪ ܐܓܘܢܐ
ܕܒܡܫܟܐ ܗܢܐ ܚܙܐ ܠܐܠܗܐ܆ ܘܝܠܦ ܡܢܗ ܐܝܕܐ ܗܝ ܥܠܬܐ ܕܗܠܝܢ ܢܣܝܘ̈ܢܐ ܣܝܒܪ.
ܐܦ ܚܢܢ ܐܢ ܗܘ ܕܒܠܚܘܕ ܒܟܐܒ̈ܝܢ ܢܪܢܐ܆ ܟܕ ܡܒܪܟܝܢ ܚܢܢ ܠܡܪܝܐ܆ ܘܡܓܪܝܢ ܚܢܢ
ܪܘܚܢ ܠܘܬ ܐܝܠܝܢ ܕܡܫܡܫܝܢ ܠܢ܆ ܟܕ ܨܝܬܝܢܢ ܬܫܥܝ̈ܬܐ ܡܘܬܪ̈ܢܝܬܐ ܕܬܐܘܪ̈ܝܣ܆ ܗܠܝܢ ܐܢܘܢ ܓܝܪ ܢܡܘ̈ܣܐ
ܕܐܝܠܝܢ ܕܗܟܢܐ ܡܬܢܣܝܢ. ܐܢ ܓܝܪ ܗܢܘܢ ܕܡܢܣܝܢ ܠܢ܆ ܒܕܢܥܦܘܢ ܢܚܬܘܢܢ ܡܢ ܪܢܝܐ ܕܠܥܠ ܡܢܣܝܢ܆ ܚܢܢ ܕܝܢ
ܥܢܝ̈ܢܐ ܕܐܢܫܐ ܦܗ̈ܝܐ ܘܕܢܫ̈ܐ ܡܘܣܦܝܢ ܚܢܢ܆ ܢܟ̈ܝܢܐ ܥܦܝܢ ܚܢܢ ܕܒܥܠܕ̈ܒܒܝܢ. ܥܗܕܝ ܕܐܦ ܠܪ̈ܚܡܘܗܝ
ܕܐܝܘܒ܆ ܟܕ ܨܒܝܢ ܕܒܚܙܝܐ ܕܡܠ̈ܝ ܡܦܪܢܣܢܘܬܗ ܕܐܠܗܐ ܠܡܒܝܐܘ ܠܐܠܝܨܐ܆ ܡܓܪܐ ܠܗܘܢ ܒܝܫܐ ܘܡܛܥܐ.
ܕܢܬܦܘܢܝܗܝ ܠܛܘܒܢܐ ܠܘܬ ܪܘܓܙܐ. ܟܕ ܝܕܥ ܠܝܛܐ ܕܡܟܐܒܐ ܩܠܝܠܐܝܬ ܡܬܚܡܬ.
ܗܘܝܬܝ ܡܕܝܢ ܡܓܪܐ ܪܘܚܟܝ܆ ܟܕ ܬܩܪܝܢܝ ܘܢܫܬܘܚܪܘܢ ܠܡܥܢܐ. ܐܦ ܗܕܐ ܓܝܪ ܡܢܬܐ
ܗܝ ܕܢܣܝܘ̈ܢܐ. ܟܬܝܒ ܓܝܪ. ܕܠܥܒܕܝ ܩܪܝܬ݂ ܘܠܐ ܥܢܢܝ. ܘܐܢ ܐܢܫ ܬܘܒ ܡܢ ܝܕܘܥܝ̈ܟܝ ܢܒܣܐ ܒܟܝ ܠܐ
ܬܬܕܡܪܝܢ. ܐܦ ܪ̈ܚܡܘܗܝ ܓܝܪ ܕܐܝܘܒ܆ ܕܠܐ ܪ̈ܚܡܐ ܗܘܘ ܠܘܬܗ. ܗܠܝܢ ܕܝܢ ܟܠܗܝܢ ܣܥܪ ܒܝܫܐ܆ ܟܕ ܨܒܐ ܠܡܫܓܫ
ܬܪܥܝܬܐ܆ ܕܒܗ ܚܝܪܝܢܢ ܒܐܠܗܐ ܐܝܟ ܕܒܥܒܘܕܐ܆ ܘܒܗ ܡܩܪܒܝܢܢ ܨܠܘܬܐ ܕܟܝܬܐ ܠܐܠܗܐ.
ܘܥܡ ܗܠܝܢ ܟܠܗܝܢ܆ ܐܢ ܗܘ ܕܐܝܠܝܢ ܕܡܬܢܣܝܢ܆ ܝܬܝܪܐܝܬ ܡܬܩܪܒܝܢ ܠܐܠܗܐ
ܒܕܒܥܝܢ ܡܢܗ ܥܘܕܪܢܐ܆ ܠܡܬܩܪܒܘ ܕܝܢ ܠܐܠܗܐ ܛܒܬܐ ܗܝ ܡܕܝܢ ܠܡܬܢܣܝܘ ܛܒܬܐ ܗܝ. ܐܢܗܘ ܕܐܝܟ ܕܐܡܪ ܦܘܠܘܣ
ܛܘܒܢܐ܆ ܕܐܘܠܨܢܐ ܡܣܝܒܪܢܘܬܐ ܓܡܪ ܒܢ܆ ܘܡܣܝܒܪܢܘܬܐ ܒܘܩܝܐ ܘܒܘܩܝܐ ܣܒܪܐ. ܣܒܪܐ ܕܝܢ ܠܐ ܡܒܗܬ. ܕܥܒܕ ܠܗ
ܠܗܘܢܐ ܡܩܒܠܢܐ ܕܡܠܟܘܬܐ ܕܫܡܝܐ.
ܐܢܬܝ ܗܟܝܠ ܢܟܦܬܐ܆ ܐܬܚܦܛܝ ܚܘܪܐ ܫܦܝܪܐ ܠܡܗܘܐ. ܠܐ ܠܢܫ̈ܐ ܒܠܚܘܕ. ܐܠܐ ܐܦ
ܠܓܒܪ̈ܐ. ܠܡܗܘܐ ܠܟܠܢܫ܆ ܐܝܟ ܪܝܫ ܕܡܘܬܐ ܨܘܪܬܐ ܕܡܣܝܒܪܢܘܬܐ. ܝܐܐ ܓܝܪ ܠܬܠܡܝܕܬܗ ܕܡܫܝܚܐ܆ ܕܥܕܡܐ ܠܕܡܐ
ܠܡܬܟܬܫܘ. ܘܠܡܚܘܝܘ ܠܟܠܢܫ ܕܐܦ ܠܢܫ̈ܐ ܙܝܢ ܡܪܢ ܒܓܢܒܪܘܬܐ ܠܘܩܒܠ ܫܐܕ̈ܐ. ܘܚܝܠ ܠܢܦܫ̈ܬܐ ܡܚܝ̈ܠܬܐ
ܒܡܘܗܒܬܐ ܕܦܘ̈ܩܕܢܐ ܘܕܗܝܡܢܘܬܐ
ܐܝܟ ܕܠܐܟܪܐ ܟܬܒܬ ܠܝ ܐܡܝܢܐܝܬ. ܘܐܝܟ ܗܘ ܕܡܨܐ ܐܢܐ ܐܪܥܐ ܪܘܚܢܝܬܐ ܠܡܦܠܚ.
ܐܢܬ ܕܝܢ ܠܐ ܥܕܟܝܠ ܚܙܝܬ ܐܓܘܪܣܐ ܕܝܠܝ ܕܡܠܐ ܟܘ̈ܒܐ ܘܕܪܕܪ̈ܐ. ܐܦܠܐ ܠܟܪܡܝ ܕܝܒܝܫ ܘܕܠܐ ܦܐܪ̈ܝܢ ܗܘ܆
ܘܓܠܝܙ ܡܢ ܣܓܘ̈ܠܐ ܪ̈ܘܚܢܐ.
ܐܠܐ ܥܡ ܗܠܝܢ ܐܦ ܐܡܪܚܢܢ܆ ܕܠܐ ܛܝܒܘ ܢܦܫ̈ܬܐ ܒܣܪ̈ܢܝܬܐ ܠܡܒܫܠܘ܆ ܘܠܡܦܠܛܘ
ܡܢ ܩܫܝܘܬ ܚܝܘܬܐ ܕܒܝܫܘܬܐ. ܘܒܝܕ ܣܢܝܩܘܬ ܡܝ̈ܐ ܕܝܕܥܬܐ܆ ܪܒܘ ܙܒ̈ܢܝܢ ܝܩܕܢܐ ܕܩܕܪܐ ܥܒܕܢܢ. ܒܗܬ ܐܢܐ
ܕܝܢ ܥܠ ܢܪܓܢ ܠܡܐܡܪ. ܕܟܡܐ ܙܒ̈ܢܝܢ ܟܕ ܦܣܩ ܩܝ̈ܣܐ܆ ܢܘܪܐ ܐܪܦܝ ܥܠ ܕܡܚܐ ܠܟܐܦܐ. ܐܘ ܠܠܒܐ ܕܟܐܦܐ. ܐܘ
ܠܐ ܝܕܥ ܐܢܐ ܕܐܝܟܢܐ ܐܫܡܗܝܘܗܝ
ܐܦ ܥܡ ܗܠܝܢ ܟܠܗܝܢ܆ ܐܦ ܐܢܬ ܗܫܐ ܣܐܡܐ ܕܟܝܐ ܫܕܪܬ ܠܢ. ܚܢܢ ܕܝܢ ܐܝܟ
ܕܠܡܥܒܕ ܕܫܦܝܪ ܗܦܟܢ ܫܕܪܢܝܗܝ. ܟܣ̈ܐ ܓܝܪ ܐܘ ܦܝ̈ܠܣܐ ܐܝܟ ܕܦܩܕܬ܆ ܐܝܠܝܢ ܕܬܢܢ ܐܝܬܝܗܘܢ. ܠܡܥܒܕ ܠܐ
ܝܕܥܢܢ. ܛܘܒܐ ܗܘ ܕܝܢ ܐܢ ܠܐ ܢܚܣܪ ܡܢ ܚܘܫܒܢܐ.
ܕܕܡ ܟܝ ܒܡܕܡ ܐܟܫܠܢܝܗܝ ܠܫܡܫܐ ܐܠܘܡܦܘܣ. ܒܪܡ ܡܘܕܝܢ ܚܢܢ ܠܡܪܢ. ܕܐܫܘܝܢ
ܠܡܥܒܕ ܦܨܚܐ ܩܕܝܫܐ܆ ܥܡ ܓܒܪܐ ܕܛܒ ܫܝܢ ܒܥܪܝܪܘܬ ܢܦܫܢ ܒܥܢܝܢܗ
ܡܕܡ ܕܠܡܫܩܠ ܐܘ ܠܡܕܥ ܐܢܫ ܕܠܐ ܣܒܪ (؟) ܟܬܒܬ ܫܠܚܬ ܠܢ. ܐܝܠܝܢ ܕܝܢ
ܕܡܬܝܐܒܝܢ ܗܘܝܢ ܠܡܐܠܦ ܠܐ ܫܠܚܬ ܐܘܕܥܬܢ. ܘܡܢܘ ܗܘ ܕܩܒܠܟ܆ ܘܐܢ ܡܒܪܟܐ ܐܝܬܘܗܝ ܘܐܝܟܐ ܝܬܒ ܐܢܬ. ܘܡܢ
ܐܢܘܢ ܐܝܠܝܢ ܕܗܘܝܬ ܥܡܗܘܢ. ܗܠܝܢ ܓܝܪ ܛܒ ܨܒܐ ܗܘܝܬ ܠܡܕܥ.
ܐܢ ܕܝܢ ܠܐ ܡܕܡ ܐܝܟ ܨܒܝܢܟ ܦܓܥ ܒܟ܆ ܠܐ ܬܬܕܡܪ. ܐܬܕܟܪ ܠܗܘ ܕܠܝܬ ܗܘܐ ܠܗ
ܐܝܟܐ ܕܢܣܡܘܟ ܪܝܫܗ. ܐܢ ܓܝܪ ܠܗܘ ܕܐܝܬܘܗܝ ܪܝܫܐ ܕܟܠ ܠܐ ܡܩܒܠܝܢ܆ ܚܕ ܟܡܐ ܠܒܪܢܫܐ ܕܐܝܟ ܕܐܝܬܘܗܝ
ܒܐܣܟܡܐ ܩܐܡ.
ܝܕܥ ܐܢܬ ܕܝܢ ܐܦ ܐܢܬ܆ ܕܐܪܥܐ ܠܘܩܒܠ ܬܥ̈ܠܐ ܠܐ ܩܝܡܐ܆ ܐܝܠܝܢ ܕܨܒܝܢ ܠܡܥܒܕ
ܠܗܘܢ ܒܗ ܢܩ̈ܥܐ. ܠܐܝܠܝܢ ܕܝܢ ܕܒܥܝܢ ܠܡܚܦܪ ܠܗܘܢ ܒܗ ܒܐܪ̈ܐ܆ ܟܡܐ ܙܒ̈ܢܝܢ ܡܬܪܟܢܐ ܢܦܠܐ ܥܠܝܗܘܢ ܘܚܢܩܐ
ܠܗܘܢ.
ܚܢܢ ܕܝܢ ܡܘܕܝܢܢ ܠܡܪܢ܆ ܕܚܘܒܢܐܝܬ ܡܬܕܟܪ ܐܢܬ ܠܢ. ܘܡܚܘܐ ܐܢܬ ܠܟܠܢܫ
ܚܬܝܬܘܬ ܚܘܒܟ
ܟܬܝ̈ܒܬܐ ܚܙܝܬ ܕܚܣܝܘܬܟ܆ ܕܛܒ ܒܗܝܢ ܚܘܒܟ ܕܠܘܬܢ ܚܘܝܬ. ܘܦܩܕܬ ܕܡܕܡ ܡܕܡ ܡܢ
ܥܡ̈ܠܝܢ ܢܫܠܘܚ ܠܟ. ܗܠܝܢ ܕܒܨܒܝܢܝ ܐܫܠܘܚ ܠܐ ܨܒܐ ܗܘܝܬ: ܡܛܠ ܬܚܡܨܬܝ ܕܠܘܬ ܢܟܦܘܬܟ. ܗܫܐ ܕܝܢ ܟܕ
ܐܬܦܩܕܬ ܕܠܝܠܐܝܬ ܐܫܬܡܥܬ. ܘܫܕܪܬ݂ ܠܟ ܡܐܡܪܐ ܕܦܘܢܝ ܦܬܓܡ̈ܐ ܕܬܩܪܐ ܘܕܬܪܨ. ܕܡܕܡ ܕܚܣܝܪ ܬܡܠܐ. ܐܢܗܘ
ܕܡܕܡ ܡܕܡ ܡܢ ܚܘܫ̈ܒܐ ܛܡ̈ܐܐ ܠܘ ܚܬܝܬܐܝܬ ܣܡܢܢ: ܘܦܘܢܝ ܦܬܓܡܐ ܕܠܘܩܒܠܗܘܢ ܫܦܝܪ ܠܐ ܐܪܥܢܢ. ܡܘܕܢܐ ܕܝܢ
ܠܝܩܝܪܘܬܟ܆ ܕܥܕܟܝܠ ܐܟܡܐ ܕܘܠܐ ܠܐ ܐܕܪܟܬ݂ ܚܘܫ̈ܒܐ ܫܐܕܢܝ̈ܐ. ܕܣܓܝ ܙܒ̈ܢܬܐ ܣܓܝ̈ܐܬܐ ܐܬܥܘܟܬ݂ ܡܢܗܘܢ.
ܘܒܬܪ ܡܐܙܠܬܟ ܡܢ ܠܘܬܝ܆ ܚܫܬ݂ ܡܢܗܘܢ ܚܫ̈ܐ ܕܠܐ ܡܬܡܠܠܝܢ. ܗܫܐ ܕܝܢ ܡܘܕܐ ܐܢܐ ܠܡܪܢ܆ ܥܠ ܐܦ̈ܝ ܐܝܠܝܢ
ܕܫܡܥܬ݂ ܡܛܠܬܟ. ܘܝܠܦܬ݂ ܐܝܟ ܡܐ ܕܡܨܠܐ ܗܘܝܬ݂.
ܗܘܝ ܠܝ ܡܟܝܠ ܟܪܘܙܐ ܕܥܢܘܝܘܬܐ ܘܨܝܘܬܐ ܕܡܟܝܟܘܬܐ: ܘܣܬܘܪܐ ܕܚܘܫ̈ܒܐ ܘܕܟܠ
ܪܘܡܐ ܕܡܬܬܪܝܡ ܠܘܩܒܠ ܝܕܥܬܗ ܕܡܫܝܚܐ. ܕܬܗܘܐ ܦܪܐܣܝܐ ܒܥܕܢܐ ܕܨܠܘܬܐ: ܠܗܘܢܐ ܕܐܝܠܝܢ ܕܝܬܪܝܢ ܡܢ ܗܠܝܢ.
ܘܠܐ ܢܗܘܐ ܡܬܪܟܢ ܘܡܬܟܦܦ: ܐܘ ܟܕ ܡܢ ܪܘܓܙܐ ܡܫܬܩܦ: ܐܘ ܟܕ ܡܢ ܪܓܬܐ ܡܬܢܬܦ. ܓܕ̈ܫܢ ܕܝܢ ܗܠܝܢ܆
ܠܚܡ̈ܬܢܐ ܘܠܪ̈ܚܡܝ ܟܪܣܗܘܢ. ܕܠܐ ܒܐܝܡܡܐ ܡܣܬܦܩܝܢ. ܘܡܢ ܦܢ̈ܛܣܝܣ ܒܝ̈ܫܬܐ ܕܠܠܝܐ ܠܐ ܦܠܛܝܢ.
ܐܦ ܐܢܬ ܗܟܝܠ ܒܝܕ ܡܪܢ ܝܕܥ ܐܢܬ܆ ܕܩܪܝܢܐ ܕܟܬܒ̈ܐ ܐܠܗܝ̈ܐ ܠܕܟܝܘܬܐ ܛܒ ܚܫܚ.
ܕܡܫܢܐ ܠܗ ܠܗܘܢܐ ܡܢ ܡܪ̈ܢܝܬܐ ܕܗܢܐ ܥܠܡܐ ܡܬܚܙܝܢܐ. ܕܡܢܗܝܢ ܗܘܐ ܦܘܬܠܐ ܕܚܘܫ̈ܒܐ ܛܡ̈ܐܐ: ܗܢܘܢ ܕܒܝܕ
ܚܫ̈ܝܗܘܢ ܐܣܪܝܢ ܘܡܩܛܪܝܢ ܠܗ ܠܗܘܢܐ ܒܨܒ̈ܘܬܐ ܓܫܝ̈ܡܬܐ. ܕܠܐ ܚܒܢܢܘܬܐ ܗܟܝܠ ܗܘܝܬ ܡܡܠܠ ܥܡ ܐܚ̈ܐ: ܕܗܘܘ
ܩܪܝܢ ܟܬܒ̈ܐ ܒܥܕܢܐ ܕܝܕܝܥ. ܘܠܐ ܢܗܘܘܢ ܡܚܒܝܢ ܠܥܠܡܐ ܘܠܐ ܠܡܕܡ ܕܒܗ. ܘܠܡܛܪ ܓܘ̈ܢܒܝ ܚܘܫ̈ܒܐ. ܗܕܐ ܓܝܪ
ܢܛܘܪܘܬܐ ܣܡܐ ܗܝ ܕܡܘܒܕ ܕܐܒ̈ܐ. ܘܛܒ ܣܢܝܢ ܠܗ ܫܐܕ̈ܐ.
ܩܪܒܐ ܗܟܝܠ ܕܗܘܐ ܦܪܘܫܐܝ܆ ܢܣܝܘ̈ܢܐ ܣܓܝ̈ܐܐ ܡܠܐ. ܣܓܝ ܕܝܢ ܥܒܕ ܕܟܝܘܬ ܠܒܐ
ܕܠܐ ܡܬܓܚܟܐ ܡܢ ܫܐܕ̈ܐ: ܒܕܠܐ ܡܨܝܢ ܚܝܠܐ ܠܡܥܫܩ ܠܪܥܝܢܐ ܐܘ ܠܢܦܫܐ. ܐܟܙܢܐ ܓܝܪ ܕܚܟܡܬܐ ܕܝܢܐ ܒܘܠܝܬܐ
ܣܘ̈ܟܠܝ ܨܒ̈ܘܬܐ ܓܫܝ̈ܡܬܐ܆ ܗܟܢܐ ܐܦ ܦܪܘܫܘܬܐ܆ ܨܘܪ̈ܬܐ ܕܒܗܘܢܐ ܡܬܛܒ̈ܥܢ ܐܬܗܝܡܬ ܠܡܦܪܫ: ܚܘܫ̈ܒܐ
ܩܕܝ̈ܫܐ ܡܢ ܛܡ̈ܐܐ܆ ܕܟܝ̈ܐ ܡܢ ܡܣܝ̈ܒܐ. ܘܡܘܕܥܐ ܐܘܡܢܘܬܐ ܕܫܐܕ̈ܐ ܡܓܚ̈ܟܢܐ: ܕܠܒܫܝܢ ܕܡ̈ܘܬܐ ܕܪ̈ܓܫܐ
ܘܕܥܘܗܕܢܐ: ܕܢܛܥܘܢ ܠܢܦܫܐ ܕܪܗܛܐ ܠܘܬ ܝܕܥܬܗ ܕܡܫܝܚܐ.
ܐܠܨܐ ܗܝ ܡܟܝܠ ܠܟܠ ܕܒܗܕܐ ܐܣܛܪܛܝܐ ܦܠܚ܆ ܠܡܒܥܐ ܡܢ ܡܪܢ ܡܘܗܒܬܐ ܕܦܪܘܫܘܬܐ.
ܟܕ ܠܐ ܡܚܣܪ ܡܕܡ ܡܢ ܐܝܠܝܢ ܕܘܠܝܢ ܠܩܘܒܠܗ ܕܗܕܐ ܡܘܗܒܬܐ. ܕܐܝܬܝܗܝܢ ܐܝܟ ܕܒܪܘܫܡܐ ܗܠܝܢ. ܥܢܘܝܘܬܐ.
ܡܟܝܟܘܬܐ. ܫܗܪܐ. ܡܬܪܚܩܢܘܬܐ ܕܡܢ ܥܠܡܐ. ܐܡܝܢܘܬܐ ܕܨܠܘܬܐ: ܕܡܬܚܝܠܐ ܡܢ ܩܪܝܢܐ ܕܟܬܒ̈ܐ ܐܠܗܝ̈ܐ. ܡܕܡ
ܓܝܪ ܐܝܟ ܩܪܝܢܗܘܢ ܕܟܬܒ̈ܐ ܐܠܗܝ̈ܐ ܕܟܝܘܬܐ ܕܨܠܘܬܐ ܠܐ ܥܒܕ. ܕܘܒܪ̈ܐ ܓܝܪ ܓܙܪܝܢ ܚܫ̈ܐ. ܕܐܝܬܝܗܘܢ ܪܓܬܐ
ܘܥܩܬܐ ܘܪܘܓܙܐ: ܩܪܝܢܐ ܕܝܢ ܕܒܬܪ ܕܘܒܪ̈ܐ܆ ܐܦ ܗܘ ܪܢܝܐ ܙܥܘܪܐ ܥܠܡܢܝܐ ܥܩܪ ܡܢܢ. ܘܡܥܦܐ ܠܪܥܝܢܢ
ܒܣܘ̈ܟܠܐ ܕܠܐ ܕܡܘ ܕܐܘܣܝܐ ܕܝܕܥܬܐ ܐܠܗܝܬܐ. ܕܠܗ ܩܪܐ ܡܪܢ ܒܣܒܪܬܗ ܬܘܢܐ ܐܝܟ ܕܒܦܠܐܬܐ. ܕܒܗ ܚܙܝܢܢ
ܠܐܒܐ ܩܕܝܫܐ ܘܓܢܝܙܐ
ܛܒ ܡܫܚܠܦܐ ܒܛܒܘܬܗ ܐܓܪܬܐ ܕܫܠܚܬ ܠܢ. ܘܡܠܝܐ ܦܐܪ̈ܝܢ ܛܒ̈ܝܢ. ܗܠܝܢ ܕܐܙܕܟܝܬ
ܩܛܦ ܡܢܗ ܐܦ ܚܨܕ. ܐܦ ܡܢܗܘܢ ܘܒܪܝܚܗܘܢ ܒܣܝܡܐ ܠܣܘܩܝ ܦܝܓܘ ܐܦ ܒܣܡܘ. ܘܗܘܝܬ ܠܝ ܟܠܝ ܒܚܕܘܬܐ
ܘܒܒܘ̈ܣܡܐ.
ܘܡܢ ܢܬܠ ܠܝ ܐܝܟ ܗܠܝܢ ܐܒܗ̈ܐ: ܠܡܒܝܐܘ ܠܢܦܫܝ ܕܝܬܒܐ ܒܚܫܘܟܐ ܘܒܛܠ̈ܠܝ
ܬܝܒܘܬܐ. ܘܙܕܩ ܠܢ ܠܡܬܟܪܘ ܠܡܬܠܐ ܕܟܬܝܒ: ܕܐܝܟ ܡܝ̈ܐ ܩܪܝܪ̈ܐ ܠܢܦܫܐ ܨܗܝܬܐ: ܗܟܢܐ ܗܝ ܣܒܪܬܐ ܡܢ ܐܪܥܐ
ܪܚܝܩܬܐ. ܚܢܢ ܕܝܢ ܡܢܐ ܢܛܝܒ ܥܠ ܐܦ̈ܝ ܗܠܝܢ ܠܝܬ ܠܢ. ܡܣ̈ܟܢܐ ܚܢܢ ܓܝܪ ܘܒܝ̈ܫܐ. ܣܢܝ̈ܩܝ ܥܠ ܛܝܒܘܬܐ
ܕܐܠܗܐ. ܘܣܓܝ ܪܚܝܩܝܢܢ ܠܡܩܒܠܘ ܥܬܝܪܐܝܬ ܠܐܪ̈ܚܝܢ: ܕܒܬܘܪܣܝܐ ܕܡܠ̈ܝ ܪܘܚܐ.
ܕܐܝܬ ܗܘܐ ܠܝ ܕܝܢ ܒܙܒܢ ܐܦ ܠܝ ܐܓܘܪܣܐ ܘܟܪܡܐ܆ ܡܘܕܐ ܐܢܐ ܘܠܐ ܟܦܪ ܐܢܐ.
ܐܟܠ ܕܝܢ ܠܐܓܘܪܣܐ ܩܡܨܐ ܙܚܠܐ. ܘܚܒܠܗ ܠܟܪܡܝ ܚܙܝܪܐ ܕܥܒܐ. ܘܚܝܘܬܐ ܕܒܪܐ ܪܥܬܗ. ܘܗܐ ܝܬܒ ܐܢܐ ܥܠ
ܬܪ̈ܥܝܗ̇ ܕܡܝܬܪܘܬܐ ܘܦܫܝܛܐ ܐܝܕܝ. ܠܘܝ ܕܝܢ ܛܒ ܦܫܝܛܐ ܗܘܐ ܠܡܫܐܠ ܙܕܩܬܐ܆ ܡܢ ܗܢܘܢ ܕܥܐܠܝܢ ܠܗܝܟܠܐ.
ܥܕܪܝܢܝ ܗܟܝܠ ܒܨܠܘܬܐ ܘܒܥܝ ܚܠܦܝ: ܕܢܫܬܕܪ ܠܝ ܦܛܪܘܣ ܘܝܘܚܢܢ. ܕܦܛܪܘܣ ܒܝܕ
ܕܘܒܪ̈ܘܗܝ܆ ܘܝܘܚܢܢ ܒܝܕ ܡܠ̈ܘܗܝ ܐܠܗ̈ܝܬܐ. ܢܫܪܪܘܢ ܒܝ ܪ̈ܓܠܝ ܡܝܬܪܘܬܐ ܘܥܩ̈ܒܝ ܝܕܥܬܐ. ܕܐܦ ܐܢܐ ܟܕ
ܡܫܘܪ ܐܢܐ ܒܝܕ ܝܕܥܬܐ ܦܠܐܬܢܝܬܐ܆ ܐܥܘܠ ܠܗܝܟܠܐ ܕܝܕܥܬܐ ܘܐܬܡܗ ܐܢܘܢ ܠܝܗܘܕ̈ܐ
ܥܒܪܢܗ ܒܠܐ ܝܕܥܬܐ ܠܚܣܝܘܬܟ: ܟܕ ܐܬܝܢ ܡܢ ܠܘܩܕܡ ܠܦܠܣܛܝܢܐ. ܘܠܐ ܐܬܡܨܝܢܢ
ܠܡܣܒ ܙܘ̈ܕܝ ܦܘܪܩܢܐ. ܠܐܘܪܚܐ ܕܣܝܡܐ ܗܘܬ ܠܢ. ܘܟܒܪ ܠܒܪ ܡܢ ܐܪܘܚܐ ܐܝܬܝܢ. ܘܡܬܚܛܦܝܢܢ ܡܢ ܦܪܚܬܐ. ܐܘ
ܫܘܥܐ ܐܝܬܝܢ ܘܡܕܡ ܕܝܥܐ ܡܘܒܫܝܢܢ. ܐܘ ܟܘ̈ܒܐ ܡܠܝܢܢ: ܘܡܬܚܢܩܐ ܒܢ ܡܠܬܐ. ܒܥܢܐ ܡܢܟ ܫܒܘܩ ܠܝ ܗܢܐ
ܚܛܗܐ. ܘܥܠ ܫܪܟܐ ܕܣܟ̈ܠܘܬܝ ܗܘܝ ܡܨܠܐ.
ܒܝܡܐ ܓܝܪ ܪܕܝܢܢ ܕܡܠܐ ܪ̈ܘܚܐ ܘܥܠ̈ܥܠܐ. ܘܕܚܠ ܐܢܐ ܡܢ ܢܘܘܓܐ: ܕܠܘܩܒܠ
ܗܝܡܢܘܬܐ ܘܝܕܥܬܐ ܘܙܕܝܩܘܬܐ ܟܬܫܢܢ*). ܘܒܗܠܝܢ ܕܡܝܟ ܒܢ ܡܪܢ. ܘܠܐ ܥܝܪ ܗܘܢܢ ܗܘ ܕܣܦܩ ܕܒܡܝܬܪ̈ܬܐ
ܢܥܪܝܘܗܝ. ܘܣܓܝ ܙܩܝܦ ܥܠܝܢ ܬܢܝܢܐ ܥܪܘܩܐ. ܐܝܬ ܐܡܬܝ ܕܒܕܘܢܒܗ ܡܚܬܚܬ. ܘܐܝܬ ܬܘܒ ܐܡܬܝ ܕܒܦܘܡܗ ܢܟܬ.
ܘܠܗܢܐ ܠܝܬ ܐܚܪܢܝܐܝܬ ܠܡܕܚܩ܆ ܐܠܐ ܕܓܡܝܪܐܝܬ ܐܢܫ ܢܒܣܪ: ܥܠ ܡܟ̈ܠܬܐ ܘܥܠ ܩܢ̈ܝܢܐ ܘܥܠ ܬܫܒܘܚܬܐ ܕܥܠܡܐ.
ܡܢ ܗܠܝܢ ܓܝܪ ܡܟܪܟ ܒܢ ܒܝܫܐ ܚܘ̈ܫܒܘܗܝ ܛܡ̈ܐܐ: ܘܡܪܟܢ ܠܗ ܠܗܘܢܢ ܒܝܕ ܚܘ̈ܫܒܝ ܚܫ̈ܐ: ܠܡܬܐܣܪܘ ܘܠܡܪܢܐ
ܒܨܒ̈ܘܬܐ ܕܡܬܚܙ̈ܝܢ.
ܒܗܠܝܢ ܚܫ̈ܐ ܐܬܚܫܚ ܗܘ ܒܝܫ ܒܟܠ܆ ܘܗܠܝܢ ܬܠܬܐ ܢܣܝܘ̈ܢܝܢ ܠܝܫܘܥ ܐܠܗܐ ܩܪܒ.
ܐܝܬ ܐܡܬܝ ܕܟܐܦ̈ܐ ܠܚܡܐ ܠܡܥܒܕ ܡܦܝܣ ܗܘܐ. ܘܐܝܬ ܕܐܝܟ ܕܠܡܬܠ ܥܠܡܐ ܟܠܗ ܡܫܬܘܕܐ ܗܘܐ. ܬܘܒ ܕܝܢ ܕܫܘܐ
ܗܘ ܕܢܫܬܡܫ ܡܢ ܡܠܐܟ̈ܐ܆ ܡܢ ܣܗܕ̈ܘܬܐ ܕܡ̈ܠܝ ܪܘܚܐ ܡܬܪܓܡ ܗܘܐ. ܘܒܗܠܝܢ ܡܢܘ ܣܦܩ ܕܢܗܦܟܝܘܗܝ ܠܒܣܬܪܗ.
ܡܢܘ ܢܗܘܐ ܕܢܝܐܝܠ ܘܢܬܥܕܪ ܡܢ ܩܕܝܫܐ ܓܒܪܐܝܠ: ܕܟܕ ܢܥܒܕ ܐܣܦܪܐ ܡܢ ܙܦܬܐ ܘܣܥܪܐ ܘܬܪܒܐ ܢܨܪܝܘܗܝ
ܠܬܢܝܢܐ. ܐܢܐ ܓܝܪ ܠܐ ܣܦܩ ܐܢܐ ܒܕܚܒܬ ܠܝ ܓܝܪ ܡܢ ܢܣܝܘ̈ܢܐ܆ ܣܦܝܢܬܐ ܟܠܗ̇ ܐܓܥܠܬ݂ ܠܩܘܒܪܢܛܐ. ܕܠܐ
ܢܗܘܐ ܬܘܟܠܢܢ ܥܠ ܢܦܫܢ. ܐܠܐ ܥܠ ܐܠܗܐ. ܕܗܘ ܟܐܐ ܒܪܘܚܐ ܘܦܩܕ ܠܝܡܐ. ܘܡܘܒܠ ܠܐܝܠܝܢ ܕܐܝܬܝܗܘܢ
ܒܣܦܝܢܬܐ: ܠܐܪܥܐ ܕܨܒܝܢܗ ܕܠܗ ܚܝܪܝܢ.
ܡܦܝܣ ܐܢܐ ܕܝܢ ܠܒܪܟ ܗܕܣܝܘܣ ܕܐܝܬܘܗܝ ܐܚܝ ܕܗܘܐ ܐܠܨ ܦܓܪܗ ܘܡܫܥܒܕ ܠܗ ܟܡܐ
ܕܡܨܐ. ܒܝܕ ܨܠܘܬܐ ܘܨܘܡܐ ܘܫܗܪܐ. ܕܒܗܘܢ ܡܬܐܣܝܐ ܡܢܬܐ ܪܓܬܢܝܬܐ ܕܢܦܫܐ: ܕܠܐ ܬܗܘܐ ܡܩܒܠܢܝܬܐ ܕܚܘ̈ܫܒܐ
ܢܕܝ̈ܕܐ ܘܕܒܝܫܘܬܐ. ܘܢܗܘܐ ܡܟܒܫ ܪܘܓܙܗ ܕܐܝܬܘܗܝ ܝܗܘܕܐ: ܕܠܫ̈ܐܕܐ ܗܘܢܐ ܡܫܠܡ. ܢܟܒܫܝܘܗܝ ܕܝܢ ܒܝܕ
ܡܟܝܟܘܬܐ ܘܡܓܪܬ ܪܘܚܐ ܘܡܪܚܡܢܘܬܐ. ܕܡܢ ܗܠܝܢ ܡܬܝܠܕ ܚܘܒܐ: ܕܒܗ ܡܬܝܕܥܝܢ ܬܠܡܝ̈ܕܘܗܝ ܕܡܫܝܚܐ. ܢܗܘܐ
ܝܨܦ ܕܩܪܝܢܐ ܕܟܬܒ̈ܐ ܕܗܢܘܢ ܡܣܗܕܝܢ: ܠܘ ܒܠܚܘܕ ܕܦܪܘܩܗ ܗܘ ܕܥܠܡܐ܆ ܐܠܐ ܐܦ ܕܥܒܘܕܐ ܗܘ ܕܥܠܡ̈ܐ:
ܘܕܕܝܢܐ ܘܕܒܛܝܠܘܬܐ ܕܒܗܘܢ. ܗܠܝܢ ܣܦ̈ܩܢ ܠܢ ܠܡܡܠܠܘ ܠܒܪܟ.
ܠܓܒܪܐ ܕܝܢ ܕܐܠܗܐ ܕܡܫܡܫܢܐ ܗܘ ܕܡܫܝܚܐ: ܡܛܠ ܕܣܓܝ ܒܘܝܐܐ ܝܗܒ ܠܢ ܒܡܕܒܪܐ܆
ܡܓܥܠ ܐܢܐ ܠܚܣܝܘܬܟ. ܘܡܦܝܣ ܐܢܐ ܕܬܬܪܟܢ ܘܬܬܠ ܠܗ ܢܦܫܟ: ܐܝܟ ܡܐ ܕܐܢܐ ܐܫܬܘܕܝܬ ܠܗ ܘܗܘ ܣܒܪ ܕܢܫܟܚ.
ܕܫܒܥ
ܠܐ. ܐܝܟ ܕܠܙܕܝܩܐ ܙܕܝܩܐܝܬ ܡܫܘܫܛ ܐܢܐ ܢܦܫܝ ܠܐܠܗܐ. ܡܠܢܐ ܓܝܪ ܚܘ̈ܫܒܝ
ܥܘܠܐ. ܘܠܐ ܬܘܒ ܐܝܟ ܕܠܥܒܘܕܐ ܠܡܪܝܐ ܡܬܩܪܒ ܐܢܐ. ܠܐ ܓܝܪ ܝܕܥ ܐܢܐ ܡ̈ܠܝ ܡܓܫ̈ܡܐ ܘܠܐ ܡܓܫ̈ܡܐ: ܘܕܕܝܢܐ
ܘܕܒܛܝܠܘܬܐ. ܘܠܐ ܬܘܒ ܐܝܟ ܕܩܕܡ ܐܠܗܐ ܩܐܡ ܐܢܐ ܐܢܐ ܫܦܠܐ. ܥܕܟܝܠ ܓܝܪ ܠܐ ܣܦܩܐ ܒܐܝ̈ܕܝ ܕܟܕ ܓܠܐ ܪܝܫܝ
ܐܨܠܐ. ܛܥܝܢܐ ܗܘ ܓܝܪ ܠܨܠܡ̈ܘܗܝ ܕܗܢܐ ܥܠܡܐ. ܘܒܥܕܢ ܨܠܘܬܐ ܠܗܘܢ ܡܡܠܠ ܐܢܐ. ܘܡܪܚܩܢܘܬܐ ܪܘܚܢܝܬܐ ܕܡܢ
ܥܠܡܐ ܡܫܬܘܕܐ ܐܢܐ. ܒܝܕ ܢܦܫܝ ܕܝܢ܆ ܠܐ ܫܠܐ ܐܢܐ ܡܢ ܕܠܡܬܗܦܟܘ ܥܡ ܒܢܝ̈ܢܫܐ. ܠܟܠ ܒܝܬ ܬܪ̈ܥܐ ܗܐ ܢܩܫ
ܐܢܐ. ܘܠܟܠ ܡܕܝܢܐ ܒܨܐ ܐܢܐ. ܕܕܠܡܐ ܐܫܟܚ ܠܡܙܒܢ ܠܝ ܐܦܣܘ̈ܢܝܬܐ ܕܫܘܒܚܐ ܣܪܝܩܐ: ܐܝܟ ܕܐܣܒܥ ܠܢܦܫܝ
ܕܘܝܬܐ ܪܚܡܬ ܣܪ̈ܝܩܬܐ. ܗܠܝܢ ܣܦ̈ܩܢ ܡܛܠ ܠܥܙܪ ܕܝܠܟ: ܗܘ ܕܐܡܪܬ ܕܥܡܪ ܒܝܕܥܬܐ ܕܥܘܒܗ ܕܐܒܪܗܡ.
ܨܒܝܢܗ ܕܫܡܫܬܐ ܢܟܦܬܐ ܣܘܪܐ ܩܠܣܬ. ܣܘܥܪܢܗ ܕܝܢ ܠܐ ܐܬܩܒܠ ܥܠܝ. ܠܐ ܓܝܪ ܝܕܥ
ܐܢܐ ܐܝܕܐ ܡܝܬܪܘܬܐ ܬܩܢܐ ܠܗ: ܒܗܕܐ ܗܠܟܬܐ ܥܡܝܠܬܐ ܕܐܘܪܚܐ ܢܓܝܪܬܐ. ܕܟܡܐ ܕܝܢ ܚܣܪ̈ܢ ܗܝ ܘܕܥܡܗ܆ ܣܦܩܐ
ܒܐܝ̈ܕܝ ܠܡܚܘܝܘ ܒܝܕ ܡܪܢ. ܐܠܐ ܡܦܝܣ ܐܢܐ ܠܚܣܝܘܬܟ܆ ܕܗܘܝܬ ܟܠܐ ܠܐܝܠܝܢ ܕܫܒܩܢ ܥܠܡܐ܆ ܕܒܠܥܕ ܐܢܢܩܐ
ܒܐܘܪܚܐ ܠܐ ܢܪ̈ܕܝܢ. ܡܬܕܡܪ ܐܢܐ ܓܝܪ ܐܢ ܒܗܢܐ ܟܠܗ ܛܘܪܐ ܠܐ ܐܫܬܚܢ ܡܝ̈ܐ ܕܓܝܚܘܢ: ܐܘ ܒܚܘ̈ܫܒܝ
ܬܪ̈ܥܝܬܗܝܢ ܐܘ ܒܣܘܥܪ̈ܢܝ ܥܒܕ̈ܝܗܝܢ. ܢܘܟܪܝܐ ܗܝ ܕܝܢ ܗܕܐ ܠܬܩܢܘܬܐ ܕܢܟ̈ܦܐ
ܠܐ ܒܝܕ ܩܘ̈ܠܣܐ ܡܨܐ ܐܢܐ ܕܐܬܟܠܠ܆ ܘܠܐ ܒܝܕ ܓܘ̈ܢܝܐ ܕܐܬܪܡܐ ܨܒܐ ܐܢܐ.
ܩܘ̈ܠܣܐ ܓܝܪ ܫܘܒܚܐ ܣܪܝܩܐ ܣܥܪܝܢ. ܓܘ̈ܢܝܐ ܕܝܢ ܬܘܒ ܟܪܝܘܬܐ ܣܥܪܝܢ. ܐܬܪ ܕܝܢ ܕܐܝܬ ܫܘܒܚܐ ܣܪܝܩܐ
ܘܟܪܝܘܬܐ܆ ܬܡܢ ܐܦ ܟܠܗܝܢ ܪ̈ܓܝܓܬܐ. ܡܥܩ ܗܘ ܓܝܪ ܗܘ ܕܐܬܓܠܙ ܡܢ ܪ̈ܓܝܓܬܗ. ܕܓܡܪ ܕܝܢ ܨܒܝܢܗ ܩܢܐ ܫܘܒܚܐ
ܣܪܝܩܐ. ܕܦܘܠܘܣ ܐܝܬܝܗ̇ ܗܝ ܕܢܙܟܐ ܒܙܝܢܐ ܕܝܡܝܢܐ ܘܕܣܡܠܐ. ܕܝܠܝ ܕܝܢ ܗܕܐ ܗܝ ܠܡܐܡܪ. ܣܪ̈ܝ ܘܐܬܡܣ̈ܝ
ܚܒܪ̈ܬܝ ܡܢ ܩܕܡ ܣܟ̈ܠܘܬܝ. ܘܬܘܒ ܚܣܢܝ ܡܢ ܥܘܠܝ ܕܪܒ ܗܘ. ܗܠܝܢ ܐܡܝܪ̈ܢ ܠܝ܆ ܠܘܩܒܠ ܟܬܝ̈ܒܬܟ ܩܕܝ̈ܫܬܐ.
ܗܘܝܬ ܕܝܢ ܡܠܦ ܠܐܚ̈ܘܬܟ ܘܠܒ̈ܢܝܟ܆ ܕܐܘܪܚܐ ܕܢܓܝܪܐ ܠܐ ܗ̈ܘܝ ܪ̈ܕܝܢ.
ܘܠܐܬܪ̈ܘܬܐ ܕܚܘܪܒܐ ܕܠܐ ܒܘܚܢܐ܆ ܠܐ ܗ̈ܘܝ ܐܙ̈ܠܢ. ܡܢܟܪܝܐ ܗܝ ܓܝܪ ܗܕܐ ܠܟܠ ܢܦܫܐ ܕܐܬܪܚܩܬ ܡܢ ܥܠܡܐ.
ܚܦܝܛ ܗܘ ܓܝܪ ܟܠ ܡܢ ܕܨܒܐ ܠܡܪܕܐ ܒܐܘܪܚܐ ܕܡܝܬܪܘܬܐ܆ ܠܘ ܒܠܚܘܕ ܡܢ ܚܛܝܬܐ
ܕܒܥܒܕܐ ܠܡܙܕܗܪܘ܆ ܐܠܐ ܕܐܦܠܐ ܒܝܕ ܡܚܫܒܬܐ ܠܡܣܟܠܘ. ܙܘܗܪܐ ܓܝܪ ܕܥܠ ܚܛܝܬܐ ܕܒܥܒܕܐ ܕܡܘܫܐ ܐܝܬܘܗܝ. ܗܘ
ܕܝܢ ܕܒܡܚܫܬܐ܆ ܦܘܩܕܢܐ ܗܘ ܕܦܪܘܩܢ. ܘܡܬܕܡܪ ܐܢܐ ܐܢ ܐܝܬ ܐܢܬܬܐ ܕܡܬܟܪܟܐ ܘܒܪ̈ܒܘ ܦܪ̈ܨܘܦܝܢ ܦܓܥܐ: ܐܢ
ܡܫܟܚܐ ܠܡܓܡܪ ܗܢܐ ܕܘܒܪܐ
ܝܕܥ ܐܢܐ ܠܟ ܕܕܥܪ̈ܒܐ ܣܓܝ̈ܐܐ ܐܝܬܝܟ ܪܥܝܐ. ܘܡܨܝܬ ܗܘ ܥܢܐ ܦܠܘܚܬܐ ܠܡܪܥܐ
ܒܒܝܬ ܠܚܡ. ܩܠܝܠ ܡܢܗܘܢ ܒܚܘܛܪܐ܆ ܘܣܘܓܐܐ ܒܝܕ ܡܫܪܘܩܝܬܐ. ܐܢܐ ܕܝܢ ܕܘܝܐ ܚܕ ܥܪܒܐ ܠܐ ܡܨܐ ܐܢܐ ܠܡܪܥܐ.
ܘܡܢ ܦܘܘܡ ܕܐܒ̈ܐ ܕܐܚܛܦܝܘܗܝ ܠܐ ܨܒܐ ܐܢܐ. ܡܛܠ ܗܢܐ ܗܐ ܡܡܚܝ ܟܠܗ ܡܪܝܪܐܝܬ. ܐܝܬ ܕܡܢ ܚܡܬܐ ܘܐܝܬ ܕܡܢ
ܟܪܝܘܬܐ. ܘܐܝܬ ܡܢ ܫܘܒܗܪܐ ܘܐܝܬ ܕܫܘܒܚܐ ܣܪܝܩܐ ܡܦܪܬ ܠܗ.
ܡܦܝܣ ܐܢܐ ܗܟܝܠ ܠܚܣܝܘܬܟ܆ ܐܬܟܫܦ ܚܠܦܝ ܠܝܫܘܥ ܪܥܝܐ: ܕܢܘܙܒܢ ܡܢ ܚܝ̈ܘܬܐ
ܒܥܪܝܪ̈ܝܬܐ: ܘܢܫܘܝܢ ܠܡܢܝܢܐ ܕܡܪܥܝܬܗ. ܘܢܬܠ ܠܢ ܪܥܝܐ ܕܡܝܬܪܘܬܐ܆ ܘܢܫܩܝܢ ܡܝ̈ܐ ܕܝܕܥܬܗ:
ܛܒ ܚܕܝܢܢ ܒܚܙܝܐ ܕܐܚ̈ܝܢ ܕܒܡܕܒܪܐ: ܐܬܪ ܕܒܥܓܠ ܠܐ ܡܫܬܟܚܝܢ ܥܢܝܢ̈ܐ ܕܐܝܟ
ܗܠܝܢ. ܘܡܢܐ ܢܥܒܕ ܕܟܕ ܚܙܝܢ ܐܢܘܢ ܠܐ ܢܟܣܢ ܠܗܘܢ ܥܓܠܐ. ܒܕܥܕܟܝܠ ܒܢܝܪܐ ܕܒܝܫܘܬܐ ܟܕܝܢܝܢ ܚܢܢ. ܐܦܠܐ
ܦܛܝܪܐ ܕܬܩܢܘܬ ܢܦܫܐ ܘܕܪܚܡܬ ܩܘܫܬܐ ܐܦܝܢ ܠܗܘܢ. ܒܕܠܐ ܥܕܟܝܠ ܩܢܝܢܢ ܬܪܝܨܘܬ ܬܩܢܘܬܐ ܕܕܟ̈ܝܐ.
ܣܡܢܢ ܠܗܘܢ ܕܝܢ ܠܚܡܐ ܝܒܝܫܐ܆ ܐܬܐ ܕܝܒܝܫܘܬ ܬܪܥܝܬܢ. ܕܠܐ ܐܘܥܝܬ ܡܡܬܘܡ. ܠܐ
ܥܣܒܐ ܕܦܫܝܛܘܬܐ ܘܠܐ ܬܬܐ ܕܚܠܝܘܬܐ. ܘܠܐ ܙܝܬܐ ܡܕܗܢܢܐ. ܥܠ ܟܪܡܐ ܓܝܪ ܐܘ ܥܠ ܓܦܬܐ܆ ܐܦܠܐ ܒܪܢܝܐ
ܠܡܡܪܚܘ ܣܦܩܝܢܢ. ܕܐܝܟ ܗܟܢ ܓܝܪ ܪܚܩܝܢ ܚܢܢ ܡܢ ܬܩܢܘܬ ܚܙܝܐ.
ܒܪܡ ܡܗܝܡܢܝܢ ܚܢܢ ܒܡܫܝܚܐ܆ ܐܢ ܬܥܕܪܢ ܐܒܗܘܬܟ ܒܨܠܘܬܐ܆ ܙܪܥܝܢܢ ܡܢ ܗܫܐ
ܙܪܥܐ ܕܙܕܝܩܘܬܐ: ܥܠ ܣܒܪܐ ܕܢܚܨܘܕ ܫܒ̈ܠܐ ܕܝܕܥܬ ܩܘܫܬܐ
ܐܢ ܪܚܝܡ ܠܟ ܩܢܝܢܐ ܕܠܐ ܚܫܘܫܘܬܐ ܛܘܒܬܢܝܬܐ: ܘܨܒܝܬ ܠܡܩܒܠܘ ܐܝܕܥܬܐ ܩܕܝܫܬܐ
ܕܡܫܝܚܐ܆ ܟܠ ܕܠܚܡ ܠܫܟܚܬ ܚܝ̈ܝܟ ܡܢ ܟܠܗ ܢܦܫܟ ܣܥܘܪ. ܘܒܥܕܢ ܨܠܘܬܐ ܫܐܠ ܚܟܡܬܐ ܡܢ ܡܪܢ. ܗܝ ܕܒܛܝܒܘܬܗ
ܥܒܕܐ ܠܟ ܠܐ ܚܫܘܫܐ: ܘܓܠܝܐ ܠܟ ܨܢܝܥܘܬ ܛܘܥܝܝ ܕܫܐܕ̈ܐ. ܒܠܥܕܝܗ̇ ܓܝܪ ܠܐ ܢܦܫܐ ܬܪܨܐ ܒܡܕܡ: ܘܠܐ ܗܘܢܐ
ܗܘܐ ܩܠܝܠ ܕܘܩܗ ܒܚܙܝܐ ܕܥܒܕܗ.
ܒܕܓܘܢ ܘܠܐ ܠܗ ܕܗܘܐ ܡܚܨܦ ܠܘܩܒܠ ܒܥܠܕܪܗ܆ ܐܝܟ ܕܡܚܘܐ ܛܘܒܢܐ ܕܘܝܕ. ܒܕܣܐܡ
ܒܢ̈ܬ ܩ̈ܠܐ ܐܝܟ ܕܡܢ ܦܘܡ ܫܐܕ̈ܐ. ܘܡܦܢܐ ܠܘܩܒܠܗܘܢ ܦܬܓܡܐ. ܡܐ ܓܝܪ ܕܐܡܪܘ ܫܐܕ̈ܐ: ܐܡܬܝ ܕܝܢ ܡܝܬ ܘܐܒܕ
ܫܡܗ܆ ܐܡܪ ܐܦ ܗܘ ܠܐ ܐܡܘܬ. ܐܠܐ ܐܚܐ ܘܐܫܬܥܐ ܥܒܕ̈ܘܗܝ ܕܡܪܝܐ. ܘܡܐ ܬܘܒ ܕܐܡܪܘ ܫܐܕ̈ܐ: ܢܘܕܝ ܘܫܟܢܝ ܥܠ
ܛܘܪ̈ܐ ܐܝܟ ܨܦܪܐ܆ ܢܐܡܪ ܐܦ ܗܘ. ܡܪܝܐ ܗܘ ܐܠܗܝ ܘܦܪܘܩܝ: ܒܝܬ ܓܘܣܝ ܪܒܐ ܕܠܐ ܐܙܘܥ. ܚܙܝ ܡܕܝܢ ܒܢ̈ܬ
ܩ̈ܠܐ ܕܐܡܪ̈ܢ ܠܘܩܒܠ ܚܕܕ̈ܐ. ܘܪܚܡ ܙܟܘܬܐ ܘܐܬܕܡܐ ܒܕܘܝܕ. ܘܚܘܪ ܒܢܦܫܟ.
ܗܘܝ ܬܪܥܐ ܕܠܒܟ܆ ܘܠܐ ܬܫܒܘܩ ܚܘܫܒܐ ܠܡܥܠ ܠܗ ܕܠܐ ܫܘܐܠܐ. ܫܐܠܝܗܝ ܠܚܕ ܚܕ
ܡܢ ܚܘܫ̈ܒܐ ܘܐܡܪ ܠܗ. ܡܢܢ ܐܢܬ ܐܘ ܡܢ ܕܠܩܘܒܠܢ. ܘܐܢ ܒܝܬܝܐ ܗܘ ܫܝܢܐ ܢܡܠܝܟ. ܐܢ ܕܝܢ ܕܠܩܘܒܠܐ ܗܘ܆
ܒܚܡܬܐ ܢܕܚܠܟ ܐܘ ܒܪܓܬܐ ܢܙܝܥܟ. ܕܐܝܟ ܗܟܢ ܐܢܘܢ ܚܘܫ̈ܒܝ ܫܐܕ̈ܐ.
ܒܕܓܘܢ ܘܠܐ ܠܟ ܕܗܘܝܬ ܡܬܒܩܐ܆ ܟܠ ܙܒܢܐ ܒܙܒܢܗ ܒܬܩܢܘܬܐ ܕܢܦܫܟ. ܡܐ ܕܣܟܝܬ
ܠܡܕܡ ܐܝܟ ܕܒܣܒܪܐ ܘܠܐ ܐܨܠܚ ܐܝܟ ܨܒܝܢܟ. ܘܡܐ ܕܚܣܪܬ ܒܡܕܡ ܐܘ ܫܐܠܬ ܘܠܐ ܢܣܒܬ: ܐܘ ܐܫܬܒܚܬ ܐܘ
ܐܬܓܢܝܬ: ܐܘ ܐܬܓܕܦܬ ܐܘ ܐܬܩܠܣܬ: ܐܝܟ ܡܠܬܗ ܕܫܠܝܚܐ ܛܘܒܢܐ܆ ܒܝܕ ܙܝܢܐ ܕܙܕܝܩܐ ܕܒܝܡܝܢܐ ܘܒܣܡܠܐ.
ܒܓܘܢܝܐ ܘܒܫܘܒܚܐ. ܒܓܘܕܦܐ ܘܒܩܘܠܣܐ. ܐܝܟ ܡܛܥܝܢܐ ܕܬܛܥܝܘܗܝ ܡܢܟ ܠܫܘܒܚܐ ܣܪܝܩܐ. ܘܐܝܟ ܫܪܝܪܐ ܬܘܒ
ܕܬܬܛܒܥ ܒܟ ܝܕܥܬܗ ܕܡܫܝܚܐ. ܐܝܟ ܠܐ ܝܕܝܥܐ ܩܢܝ ܡܘܟܟܐ. ܘܐܝܟ ܝܕܝܥܐ ܩܢܝ ܦܪܗܣܝܐ ܕܒܡܫܝܚܐ. ܐܝܟ ܡܣܟܝܢ
ܩܢ̈ܝܢܐ܆ ܘܡܥܬܪ ܣܓܝ̈ܐܐ ܒܝܕܥܬ ܡܪܢ ܐܝܟ ܡܣܪܩ ܡܢ ܟܠ܆ ܘܒܝܕ ܗܝܡܢܘܬܐ ܟܠ ܐܚܝܕ ܐܢܬ. ܗܠܝܢ ܐܢܝܢ ܓܝܪ
ܐܬܘ̈ܬܐ ܕܠܐ ܚܫܘܫܘܬܐ: ܡܠܝܬ ܟܠ ܛܘ̈ܒܝܢ.
ܠܘ ܐܓܪܬܐ ܫܠܚܬ݁ ܠܢ ܐܘ ܓܒܪܐ ܕܬܕܡܘܪܬܐ. ܐܠܐ ܡܟܘܠܬܐ ܒܣܝܡܬܐ ܕܢܛܦܐ ܕܒܫܐ
ܘܚܠܝܬ ܢܦܫܢ. ܐܝܟ ܡܐ ܓܝܪ ܕܡܣܒܪ ܐܢܬ ܥܠܝܢ܆ ܕܐܝܟ ܗܟܢ ܟܬܒܬ݁. ܘܐܝܟ ܕܒܡܚܙܝܬܐ ܨܪܬ݁ ܒܝܕ ܡܠ̈ܝܟ ܚܘܒܟ
ܕܠܘܬܢ.
ܚܢܢ ܕܝܢ ܕܐܝܟ ܗܟܢܢ ܠܐ ܐܝܬܝܢ: ܕܢܣܦܩ ܠܡܨܠܝܘ ܥܠ ܐܦ̈ܝ ܐܚܪ̈ܢܐ. ܠܐ ܓܝܪ
ܕܟܝܘܬ ܠܒܐ ܩܢܝܢܢ܆ ܐܦܠܐ ܓܠܝܘܬ ܐܦ̈ܐ ܕܗܘܝܐ ܠܟܝܢܐ ܡܠܝܠܐ. ܒܝܕ ܠܐ ܚܫܘܫܘܬܐ ܕܢܦܫܐ: ܥܡ ܝܕܥܬ ܩܘܫܬܐ.
ܡܢܘ ܓܝܪ ܢܐܡܪ ܕܕܟܐ ܐܢܬ ܠܒܝ. ܐܘ ܐܬܦܨܝܬ ܡܢ ܚܛܗ̈ܐ ܐܝܟ ܡܠܬ ܫܠܝܡܘܢ.
ܐܠܗܐ ܗܟܝܠ ܥܒܘܕܐ ܕܟܠ: ܘܡܪܢ ܝܫܘܥ ܡܫܝܚܐ܆ ܢܫܕܪ ܡܠܐܟܗ ܩܕܡܝܟ ܘܢܬܩܢ
ܐܘܪܚܟ. ܡܛܠ ܕܬܚܬܝܬ݁ ܢܦܫܟ ܠܡܟܬܒ ܠܢ ܘܠܒܝܐܘܬܢ. ܗܢܐ ܓܝܪ ܒܘܝܐܐ ܒܠܚܘܕ ܒܡܕܒܪܐ: ܩܒܠܢܢ ܡܢ ܟܠ
ܕܡܚܒܝܢ ܠܢ.
ܣܦܩܐܝܬ ܐܘ ܛܘܒܢܐ ܥܠ ܐܝܠܝܢ ܕܥܒܪܘ ܐܦܝܣܬܢܝ. ܘܥܠ ܥܬܝ̈ܕܬܐ ܒܝܐܬܢܝ. ܘܠܐ
ܚܣܪܬ݁ ܡܕܡ ܕܙܕܩ ܠܐܒܐ ܚܬܝܬܐ ܠܡܥܒܕ ܠܒ̈ܢܝܐ. ܘܡܢܐ ܐܣܥܘܪ ܐܘ ܐܚܫ: ܕܨܒܐ ܐܢܐ ܝܚܝܕܐܝܬ ܠܡܐܚܐ: ܘܥܡ
ܒܢܝ̈ܢܫܐ ܠܐ ܐܬܦܗܟ. ܡܛܠ ܕܠܝܬ ܠܡܚܙܐ ܠܐܠܗܐ: ܐܢ ܟܠ ܟܠܗ ܡܢ ܪܥܝܢܢ ܠܐ ܢܛܪܘܕ ܚܫ̈ܐ: ܘܨܠ̈ܡܝ ܥܠܡܐ
ܗܢܐ ܕܡܠܐ ܟܫ̈ܠܐ: ܘܣܘܓܐܐ ܕܦܚ̈ܐ. ܘܡܨܠܐ ܐܢܐ ܕܡܢ ܗܠܝܢ ܐܬܢܟܪܐ܆ ܐܦ ܒܗ ܒܡܣܒܪܢܘܬܟ ܕܥܠܝ.
ܡܬܕܡܪ ܐܢܐ ܕܝܢ ܒܢܟܦܘܬܟ: ܕܐܠܨ ܐܢܬ ܠܝ ܟܘܪܚܐ ܠܡܫܒܩ: ܘܠܡܦܠ ܒܓܠ̈ܠܝ ܝܡܐ.
ܡܢ ܥܢܝܢܟܘܢ ܕܝܢ ܠܐ ܡܫܬܐܠ ܐܢܐ. ܐܠܐ ܡܨܠܢܐ ܠܡܪܢ܆ ܕܢܬܠ ܠܝ ܕܐܚܙܐ ܒܥܝ̈ܢܝ ܠܢܟܦܘܬܟܘܢ. ܨܠܐ ܕܝܢ ܥܠ
ܒܪܟ ܐܘܓܪܝܣ܆ ܕܠܐ ܢܒܗܬܝܘܗܝ ܡܪܢ ܡܢ ܣܒܪܗ.
ܚܕܝܬ݂ ܒܐܚܝܢܘܬܟ ܦܓܪܢܝܬܐ܆ ܘܠܡܪܢ ܒܪܟܬ݂. ܝܬܝܪܐܝܬ ܕܝܢ ܐܚܕܐ܆ ܐܢ ܒܬܪ
ܐܚܝܢܘܬܐ ܕܠܐ ܦܓܪ̈ܢܐ ܬܪܗܛ. ܕܐܝܬܝܗ̇ ܡܝܬܪܘܬܐ ܘܝܕܥܬ ܩܘܫܬܐ. ܕܡܛܠ ܕܒܠܥܕ ܗܠܝܢ ܠܐ ܢܩܦܝܢ ܠܢ ܪ̈ܘܚܢܐ:
ܐܠܐ ܐܢ ܒܚܙܝܐ ܐܘ ܒܕܘܒܪ̈ܐ. ܒܦܘܠܚܢܐ ܕܥܒ̈ܕܐ ܘܒܝܕܥܬܐ ܕܬܐܘܪܝܐ: ܕܥܠܡ̈ܐ ܕܗܘܘ ܘܕܗܘܝܢ. ܕܗܘܘ ܒܝܕ
ܗܝܡܢܘܬܐ. ܘܕܗܘܝܢ ܒܝܕ ܕܟܝܘܬ ܠܒܐ ܕܡܬܩܢܝܐ ܡܢ ܕܘܒܪ̈ܐ ܕܡܬܓܡܪܝܢ ܡܢ ܗܝܡܢܘܬܐ ܕܒܡܫܝܚܐ. ܕܡܢ ܒܠܥܕܝܗ̇
ܠܝܬ ܠܡܦܫܪܐ ܠܐܠܗܐ: ܐܝܟ ܡܠܬܗ ܕܫܠܝܚܐ. ܩܕܡܐܝܬ ܗܟܝܠ ܡܬܒܥܝܐ ܗܝܡܢܘܬܐ ܕܒܡܫܝܚܐ
ܠܡܚܣܢ ܚܘܝܬ݁ܢ ܢܦܫܟ: ܕܗܐ ܡܢ ܙܒܢܐ ܣܓܝܐܐ ܡܬܝܐܒ ܗܘܝܬ݂ ܠܡܚܙܝܟ. ܘܒܡܢܐ ܐܥܕܠܟ
ܠܘ ܣܓܝ ܦܫܝܩ ܗܘܐ ܠܝ. ܒܕܒܣܝܬ ܒܦܘܠܚܢܐ. ܘܡܝܬܐ ܐܢܐ ܥܘܗܕܢܐ ܕܥܘܬܪܐ ܪܘܚܢܐ: ܕܐܝܬܘܗܝ ܡܠܟܘܬܐ ܕܫܡܝܐ:
ܕܐܝܬܝܗ̇ ܠܓܘ ܡܢܢ ܐܝܟ ܡܠܬܗ ܕܦܪܘܩܢ: ܘܡܚܦܝܐ ܒܝܕ ܚܫ̈ܐ. ܘܝܕܝܥܐ ܗܝ ܕܒܠܥܕ ܡܢ ܡܝܬܪܘܬ ܕܘܒܪ̈ܐ܆ ܠܡܬܓܠܝܘ
ܒܡܨܥܬܐ ܠܐ ܡܨܝܐ. ܚܘܪ ܗܟܝܠ ܒܢܦܫܟ܆ ܘܐܠܘܨ ܟܪܣܟ ܘܟܒܫ ܚܡܬܟ܆ ܟܡܐ ܕܡܨܐ ܐܢܬ. ܕܟܡܐ ܓܝܪ ܢܘܗܪܐ ܕܒܝܕ
ܢܛܘܪܘܬܐ ܕܗܠܝܢ ܕܢܚ ܠܟ ܐܘܓܪܝܣ ܕܝܠܟ܆ ܠܡܚܘܝܘܬܟ ܒܪ̈ܒܘ ܦܘܪ̈ܣܝܢ ܠܐ ܡܨܐ.
ܬܘܒ ܟܬܒ ܐܢܐ ܠܘܬܟ ... ܐܚܝ̈ܟ ܠܐ ܓܝܪ ܨܒܐ ܐܢܐ ܕܢܬܚܦ̈ܝܢ ܡܢܟܘܢ ܨܢܥ̈ܬܐ
ܕܫܐܕ̈ܐ ܕܗܐ ܒܐܘܪܚܐ ܒܝܕ ܛܝܒܘܬܐ ܕܐܠܗܐ ܪܕܝܢ ܐܢܬܘܢ. ܕܒܗ ܟܡܝܢ ܚܕ ܚܕ ܡܢ ܫܐܕ̈ܐ. ܟܕ ܚܐܪ ܒܗ
ܒܝܚܝܕܝܐ: ܐܢ ܨܠܐ ܠܚܕ ܡܢ ܓܒ̈ܝܢ: ܠܝܡܝܢܐ ܐܘ ܠܣܡܠܐ: ܐܘ ܐܢ ܗܘ ܕܒܗܝ ܡܨܥܝܘܬܐ ܕܐܘܪܚ ܡܠܟܐ ܡܬܕܒܪ.
ܐܝܟ ܐܢܫ ܢܐܡܪ. ܕܫܐܕܐ ܕܪܒܘܬ ܟܪܣܐ ܚܐܪ ܒܨܝܡܐ܆ ܐܢ ܟܡܝܪܘܬܗ ܣܢܝܩܘܬܗ
ܡܩܛܪܓܐ: ܐܘ ܒܝܕ ܡܠܬܗ ܡܕܡ ܕܐܝܟ ܟܗܢ ܐܘܕܥ. ܐܘ ܕܠܡܐ ܠܬܪܝܢ ܦܠܝܓ ܨܒܝܢ ܨܘܡܗ: ܘܐܚܪܬܐ ܪܢܐ ܡܢ ܠܓܘ:
ܘܐܚܪܬܐ ܡܚܘܐ ܡܢ ܠܒܪ ܠܒܢܝ̈ܢܫܐ. ܘܐܢ ܗܘ ܕܨܐܬ ܠܡܫܡܥ ܡܠ̈ܝܢ ܕܥܠ ܝܪܘܩܘܬܐ ܕܐܦ̈ܘܗܝ: ܐܘ ܕܪܩܝܩ ܡܫܟܗ.
ܐܦ ܫܐܕܐ ܕܙܢܝܘܬܐ ܬܘܒ ܬܚܘ̈ܡܝ ܡܪ̈ܢܝܬܗ ܢܛܪ. ܐܢ ܦܓܥ ܝܚܝܕܝܐ ܒܐܢܬܬܐ: ܐܢ
ܐܝܟ ܕܡܢ ܣܘܩܒܠܐ ܦܓܥ ܒܗ. ܐܘ ܗܘ ܐܬܦܪܣ ܕܢܦܓܥ ܒܗ ܒܒܕܝܐ ܕܥܠ̈ܠܬܗ. ܐܦ ܡ̈ܠܐ ܕܢܩܦ̈ܢ ܠܗ ܬܩܠ ܠܗܝܢ.
ܐܢ ܕܓܘܚܟܐ ܐܢܝܢ. ܐܘ ܠܘܬ ܢܟܦܘܬܐ ܚܝܪ̈ܢ. ܢܛܪ ܐܦ ܠܥܝ̈ܢܘܗܝ ܕܝܚܝܕܝܐ: ܕܠܡܐ ܟܝ ܙܠܝ̈ܠܢ. ܘܗܠܟܬܗ
ܕܠܡܐ ܣܩܝܠܐ. ܐܘ ܒܝܕ ܪܦܝܘܬ ܫܪܝܘܬܗ. ܩܥܝܐ ܥܠ ܚܫܗ. ܐܦ ܒܡܐܢ̈ܘܗܝ ܡܬܒܩܐ ܐܢ ܡܣܡܥܠܝܢ: ܐܘ ܫܦܝܪ̈ܝܢ
ܡܛܠ ܐܢܬܬܐ.
ܐܦ ܫܐܕܐ ܕܪܚܡܬ ܟܣܦܐ ܫܒܝ̈ܠܝܢ ܡܢܐ. ܕܐܝܟܢ ܠܘܬ ܥܬܝܪ̈ܐ ܩܪܒܝܢܢ: ܘܡܢ
ܐܡܪܝܢܢ ܐܘ ܣܥܪܝܢܢ ܠܘܬܗܘܢ ܐܝܟ ܕܢܣܒ ܡܢܗܘܢ ܘܐܢ ܥܠ ܡܣܟܢܘܬܢ ܩܕܡܝܗܘܢ ܡܬܬܢܚܝܢ ܚܢܢ: ܐܝܟ ܗܘ ܠܡ
ܕܡܛܠ ܣܘܓܐܐ ܕܡܣ̈ܟܢܐ ܕܐܠܨܝܢ ܠܢ: ܕܘܟܬ ܡܥܡܪܢ ܨܒܝܢܢ ܠܡܫܒܩ. ܘܐܢ ܗܘ ܕܠܥܬܝܪ̈ܐ ܚܘܝܚܐܝܬ ܡܩܒܠܝܢܢ:
ܡܢ ܡܣ̈ܟܢܐ ܕܝܢ ܐܝܟ ܐܢܫ ܕܥܪܩ ܡܗܦܟܝܢܢ ܐܦ̈ܝܢ.
ܠܗܠܝܢ ܫܐܕ̈ܐ ܡܬܡܐ܆ ܐܦ ܫܐܕܐ ܕܫܘܒܚܐ ܣܪܝܩܐ. ܘܡܬܒܩܐ ܐܦ ܗܘ܆ ܕܕܠܡܐ
ܡܡܠܠܝܢܢ ܐܘ ܣܥܪܝܢܢ ܡܕܡ: ܕܡܩܪܒ ܠܢ ܠܫܘܒܚܐ ܕܟܗܢܘܬܐ. ܐܘ ܕܠܡܐ ܟܕ ܐܢܫ ܢܝܩܪܢ ܐܝܟ ܕܢܢܝܚܢ ܡܢ
ܦܘܠܚܢܐ ܩܫܝܐ: ܐܬܬܢܚܢܢ ܐܝܟ ܠܐܝ̈ܐ ܐܝܟ ܕܢܬܩܠܣ. ܘܐܢ ܬܘܒ ܡܫܬܥܝܢ ܚܢܢ ܠܐܚܪ̈ܢܐ ܡܛܠ ܫܘ̈ܒܚܐ: ܐܝܠܝܢ
ܕܥܕܝܢ ܥܠܝܢ ܒܓܘ ܟܘܪܚܢ: ܡܢ ܡܠܐܟ̈ܐ ܩܕܝܫ̈ܐ ܐܘ ܡܢ ܫܐܕ̈ܐ.
ܘܟܡܐ ܠܝ ܠܡܡܢܐ ܨܢܥ̈ܬܗܘܢ: ܕܟܕ ܚܐܪ ܒܗܝܢ ܡܪܢ ܐܡܪ. ܗܘܝܬܘܢ ܥܪܝܡܝܢ ܐܝܟ
ܚܘܘ̈ܬܐ ܘܬܡܝܡܝܢ ܐܝܟ ܝܘ̈ܢܐ. ܙܕܩ ܓܝܪ ܐܝܟ ܕܒܩܘܫܬܐ܆ ܕܗܘܐ ܬܡܝܡ ܝܚܝܕܝܐ ܐܦ ܢܝܚ. ܘܒܢܝܚܘܬܗ ܢܗܘܐ
ܬܟܬܘܫܗ. ܐܝܟ ܡܠܬ ܢܒܝܐ. ܢܗܘܐ ܕܝܢ ܩܠܝܠ ܕܘܩܐ ܕܡܕܥܗ ܘܡܥܪܡ ܒܨܢ̈ܥܬܐ ܕܫܐܕ̈ܐ. ܐܝܟ ܡܐ ܕܢܛܪ
ܕܐܢܟܝܡܘܢ ܥܩܒܐ ܕܚܘܘ̈ܬܐ. ܕܢܬܡܨܐ ܠܡܐܡܪ. ܕܠܐ ܟܣܝܢ ܡܢܝ ܣܘܟ̈ܠܘܗܝ ܕܒܝܫܐ: ܘܕܚܙ̈ܝ ܥܝ̈ܢܝ
ܒܒܥܠ̈ܕܒܒܝ: ܘܒܒܝ̈ܫܐ ܕܩܝܡܝܢ ܥܠܝ ܢܫܡ̈ܥܢ ܐܕ̈ܢܝܢ
ܙܕܩ ܠܐܝܠܝܢ ܕܥܬܝܕܝܢ ܠܡܪܕܐ ܒܐܘܪܚܗ ܕܗܘ ܕܐܡܪ: ܕܐܢܐ ܐܢܐ ܐܘܪܚܐ ܘܚܝ̈ܐ܆
ܠܡܐܠܦ ܡܢ ܐܝܠܝܢ ܕܩܕܡܘ ܪܕܘ ܒܗ: ܘܠܡܡܠܠܘ ܥܡܗܘܢ ܡܕܡ ܕܟܫܪ. ܘܠܡܫܡܥ ܡܢܗܘܢ ܡܕܡ ܕܥܕܪ. ܟܕ ܠܐ ܡܥܠܝܢ
ܚܢܢ ܒܡܨܥܬܐ ܡܕܡ ܕܡܢܟܪܝ ܠܡܪܕܝܬܢ. ܘܒܙܘ̈ܥܝܢ ܕܒܟܘܪܚܢ ܢܙܕܗܪ ܕܠܡܐ ܡܣܟܠܝܢܢ.
ܡܢܗܘܢ ܓܝܪ ܕܚܘܫ̈ܒܐ ܛܡ̈ܐܐ܆ ܐܝܬ ܕܒܓܘ ܐܘܪܚܐ ܟܡܝܢܝܢ. ܘܐܝܬ ܕܠܒܪ ܡܢܗ
ܢܬܦܝܢ. ܐܝܠܝܢ ܗܟܝܠܐ ܕܠܒܪ ܡܢ ܐܘܪܚܐ ܐܢܘܢ. ܠܡܛܪ ܦܘܩ̈ܕܢܐ ܟܠܝܢ ܠܢ. ܐܝܠܝܢ ܕܝܢ ܕܠܓܘ ܡܢܗ ܐܢܘܢ܆ ܠܐ
ܟܠܝܢ ܠܢ ܠܡܛܪ ܦܘ̈ܩܕܢܐ. ܐܠܐ ܡܓܪܓܝܢ ܠܢ܆ ܕܐܝܟ ܕܢܫܦܪ ܠܒܢܝ̈ܢܫܐ ܢܥܒܕ ܐܢܘܢ ܘܐܝܬܝܗܘܢ ܡܚ̈ܒܠܢܐ
ܕܢܝܫܐ ܕܦܘܠܚܢܢ. ܐܠܨܐ ܡܟܝܠ ܕܟܠ ܕܥܒܕܝܢ ܚܢܢ ܡܛܠ ܡܪܢ ܢܥܒܕ ܒܚܘܦܛܐ ܚܕܝܐ ܟܬܝܒ ܓܝܪ ܕܡܪܚܡ
ܒܦܨܝܚܘܬܐ.
ܡܢܐ ܓܝܪ ܗܢܝܢܐ ܐܢ ܢܫܠܚܝܗ̇ ܠܝܥܢܘܬܐ ܒܝܕ ܙܕ̈ܩܬܐ ܘܠܚܫ̈ܝ ܟܪܣܐ ܒܥܢܘܝܘܬܐ.
ܘܢܠܒܫ ܚܫ̈ܐ ܐܚܪ̈ܢܐ ܕܫܘܒܚܐ ܣܪܝܩܐ ܐܘ ܕܪܛܢܐ: ܘܢܓܕ̈ܫܢܢ ܒܥܕܢ ܒܨܠܘܬܐ: ܐܝܠܝܢ ܕܓܕ̈ܫܢ ܗܘ̈ܝ ܠܢ ܡܢ
ܚܫ̈ܐ ܕܩܕܡ ܗܠܝܢ. ܦܘܪ̈ܣܘܗܝ ܓܝܪ ܕܒܥܠܕܪܢ: ܕܢܓܠܙܢ ܡܢ ܢܘܗܪܐ ܐܠܗܝܐ: ܕܕܢܚ ܒܠܒܐ ܒܥܕܢܐ ܕܨܠܘܬܐ. ܥܠ
ܗܠܝܢ ܚܘ̈ܫܒܐ ܩܥܐ ܛܘܒܢܐ ܕܘܝܕ: ܕܒܐܘܪܚܐ ܕܗܠ̈ܟܬܝ ܛܡܪܘ ܠܝ ܦܚ̈ܐ. ܘܬܘܒ ܚܒ̈ܠܐ ܕܡܨܝ̈ܕܬܗܘܢ ܦܪܣܘ ܥܠ
ܫܒܝ̈ܠܝ
ܠܚܘܫܒܐ ܫܐܕܢܝܐ܆ ܬܠܬܐ ܚܘܫ̈ܒܝܢ ܣܩܘܒܠܝܝܢ ܠܗ. ܘܦܣܩܝܢ ܠܗ ܟܕ ܢܓܪ ܒܓܘ
ܬܪܥܝܬܢ. ܩܕܡܝܐ ܗܘ ܕܡܢ ܡܠܐܟ̈ܐ ܩܕܝ̈ܫܐ ܟܣܝܐܝܬ ܕܐܠ ܒܢ. ܕܬܪܝܢ ܗܘ ܕܡܢ ܨܒܝܢܢ ܟܕ ܢܬܪܟܢ ܠܘܬ ܘܠܝܬܐ.
ܕܬܠܬܐ ܗܘ ܕܡܢ ܟܝܢܐ ܐܢܫܝܐ: ܕܒܗ ܡܬܬܙܝܥܝܢ ܐܦ ܚܢ̈ܦܐ ܘܪܚܡܝܢ ܒܢ̈ܝܗܘܢ ܘܠܐܒܗ̈ܝܗܘܢ ܡܝܩܪܝܢ.
ܠܚܘܫܒܐ ܕܝܢ ܛܒܐ ܬܪܝܢ ܚܘܫ̈ܒܝܢ ܣܩܘܒܠܝܝܢ ܠܗ. ܚܕ ܡܢ ܫܐܕ̈ܐ܆ ܘܐܚܪܢܐ ܡܢ
ܡܗܡܝܢܘܬ ܨܒܝܢܢ ܟܕ ܢܬܪܟܢ ܠܘܬ ܒܝܫܘܬܐ. ܐܝܟ ܕܡܢ ܟܝܢ ܒܪܝܬܢ ܕܝܢ. ܡܢ ܐܠܗܐ ܒܝܫܬܐ ܠܐ ܝܥܝܐ. ܠܐ ܗܘܝܢ
ܓܝܪ ܡܢ ܒܪܝܫܝܬ ܒܝ̈ܫܐ. ܡܛܠ ܕܙܪܥܐ ܛܒܐ ܙܪܥ ܒܚܩܠܗ ܙܪܘܥܐ ܕܗܘܝܘ ܡܪܢ.
ܒܕܓܘܢ ܚܘܫ̈ܒܐ ܣܕܩܝܢ ܘܡܣܬܕܩܝܢ. ܣܕܩܝܢ ܕܝܢ ܠܒܝ̈ܫܐ ܛܒ̈ܐ. ܘܬܘܒ ܡܣܬܕܩܝܢ
ܡܢܗܘܢ. ܪܘܚ ܩܘܕܫܐ ܗܟܝܠ܆ ܠܣܝܡܗ ܕܚܘܫܒܐ ܩܕܡܝܐ ܚܐܪ. ܘܥܠ ܐܦ̈ܘܗܝ ܕܐܢ ܐܘ ܡܙܕܩ ܠܢ.
ܗܕܐ ܕܐܢ ܕܐܡܪܬ ܕܐܝܟ ܗܟܢ ܐܝܬܝܗ̇: ܣܠܩ ܠܝ ܚܘܫܒܐ ܕܪܚܡܬ ܐܟ̈ܣܢܝܐ ܡܛܠ
ܡܪܢ. ܘܟܕ ܕܠ ܡܢܣܝܢܐ ܣܕܩܗ. ܘܐܕܝܠ ܒܗ ܨܒܝܢܐ ܕܫܘܒܚܐ ܣܪܝܩܐ. ܘܬܘܒ ܗܘܐ ܠܝ ܚܘܫܒܐ ܕܪܚܡܬ ܐܟܣ̈ܢܝܐ:
ܐܝܟ ܕܐܫܦܪ ܠܒܢܝ̈ܢܫܐ. ܡܫܬܪܐ ܕܝܢ ܐܦ ܗܢܐ܆ ܒܝܕ ܚܘܫܒܐ ܛܒܐ ܗܘ ܕܡܛܠ ܡܪܢ ܓܡܪ ܒܢ ܡܝܬܪܘܬܐ.
ܐܢ ܗܟܝܠ ܒܥܒܕ̈ܐ ܛܒ̈ܐ ܠܘܬ ܚܘܫܒܐ ܩܕܡܝܐ ܢܚܡܣܢ: ܘܡܢ ܬܪܝܢܐ ܢܬܢܣܐ܆ ܐܓܪܗ
ܕܚܘܫܒܐ ܩܕܡܝܐ ܢܣܦ. ܒܗܝ ܕܟܕ ܒܢ̈ܝ ܐ̱ܢܫܐ ܚܢܢ ܘܬܟܬܘܫܐ ܐܝܬ ܠܢ ܥܡ ܫܐܕ̈ܐ. ܠܡܩܢܐ ܚܘܫܒܐ ܬܪܨܐ ܕܠܐ
ܡܚܒܠ ܠܐ ܡܨܝܢܢ. ܐܦܠܐ ܠܚܘܫܒܐ ܒܝܫܐ ܡܫܟܚܝܢ ܚܢܢ ܠܡܐܚܕ ܕܠܐ ܢܣܝܘܢ. ܒܗܝ ܕܦܚܫܝܢ ܒܢ ܣܪ̈ܝܕܐ
ܕܡܝܬܪܘܬܐ. ܒܪܡ ܐܢ ܐܢܫ ܡܓܪ ܒܗ ܚܘܫܒܐ ܕܦܣܩ܆ ܒܕܘܟܬ ܗܘ ܕܡܬܦܣܩ ܩܐܡ. ܘܠܘܬܗ ܕܗܘ ܚܘܫܒܐ ܗܘܝܐ
ܡܥܒܕܢܘܬܗ ܕܒܪܢܫܐ܀
ܣܦܩܐܝܬ ܒܝ̈ܐܢ ܟܬܝ̈ܒܬܐ ܕܚܣܝܘܬܟ. ܘܠܣܘܓܐܐ ܕܐܘ̈ܠܨܢܝ ܦܝ̈ܓܝܢ. ܐܠܐ ܢܬܠ ܠܟ
ܡܪܢ ܕܬܫܟܚ ܪ̈ܚܡܐ ܠܘܬ ܡܪܢ ܒܝܘܡܐ ܗܘ. ܒܕܐܥܗܕܬܢ ܠܚܛܝ̈ܐ ܘܡܟܝ̈ܟܐ: ܕܡܕܡ ܕܫܘܐ ܠܚܘܒܟ ܠܝܬ ܠܢ.
ܐܢܐ ܕܝܢ ܛܒ ܨܒܐ ܗ̱ܘܝܬ ܠܡܬܠ ܠܒܬܘܠܗܐ ܢܟܦܬܐ ܡܕܡ ܕܚܫܚ ܠܚܝ̈ܗ̇: ܐܠܐ
ܩܠܝܠܘܬܐ ܕܡܣܪ̈ܒܐ ܠܐ ܫܒܩܬ: ܒܪܡ ܐܝܠܝܢ ܕܩܡܕܢܢ ܒܝܕ ܡܪܢ܆ ܒܟܠܗ ܨܒܝܢܢ ܐܫܠܡܢܢ ܠܗ̇: ܕܗܘܬ ܡܨܠܝܐ
ܒܡܕܥܗ̇ ܐܡܝܢܐܝܬ. ܘܗܘܬ ܐܠܨܐ ܪܓܬܗ̇ ܒܝܕ ܥܢܘܝܘܬܐ. ܘܠܚܡܬܗ̇ ܗܘܬ ܡܦܓܕܐ ܒܝܕ ܢܝܚܘܬܐ. ܡܢ ܚܘܫ̈ܒܐ ܓܝܪ
ܕܡܢ ܩܕܡ ܗܠܝܢ ܡܬܚܢܩܐ ܡܠܬ ܐܠܗܐ: ܗܝ ܕܩܝܡܐ ܒܢ ܘܡܬܓܡܪܐ ܡܣܬ ܚܝܠܢ. ܘܒܝܕ ܥܒ̈ܕܐ ܟܣܝ̈ܐ ܕܡܝܬܪܘܬܢ
ܠܡܬܚܙܝܘ ܒܢ ܨܒܝܐ. ܘܠܡܚܘܝܘ ܒܢ ܠܐܒܐ ܟܣܝܐ ܘܥܒܘܕܐ
ܐܬܩܒܠ ܥܠܝ ܨܒܝܢܟܝ ܪܘܚܢܐ: ܘܐܬܕܡܪܬ ܒܪܚܡܬ ܝܘܠܦܢܟܝ. ܘܚܕܐ ܐ̱ܢܐ
ܒܡܫܬܘܫܛܢܘܬܟܝ. ܕܟܕ ܐܪܡܝܬܝ ܐܝܕܟܝ ܥܠ ܚܪܒܐ ܕܦܕܢܐ ܠܐ ܗܦܟܬܝ ܠܒܣܬܪܟܝ. ܘܠܐ ܒܥܝܐ ܐܢܬܝ ܥܠܡܐ
ܡܬܚܒܠܢܐ ܘܨܒ̈ܘܬܐ ܕܥܒܪ̈ܢ ܐܠܐ ܡܬܟܬܫܐ ܐܢܬܝ ܒܐܓܘܢܐ ܛܒܐ: ܕܕܬܟܠܠܝܢ ܒܟܠܝܠܐ ܕܙܕܝܩܘܬܐ. ܘܬܚܙܝܢ
ܠܚܬܢܐ ܡܫܝܚܐ. ܕܠܗ ܒܝܕ ܥܒܕ̈ܝܟܝ ܛܒ̈ܐ ܒܥܝܐ ܐܢܬܝ. ܗܕܐ ܗ̱ܝ ܓܝܪ ܒܥܬܐ ܕܠܩܘܫܬܝܢ܆ ܕܒܝܕ ܥܒܕ̈ܐ ܢܒܥܐ
ܐ̱ܢܫ ܠܡܪܢ.
ܠܝܬ ܓܝܪ ܐܢܫ ܕܦܠܚ ܥܘܠܐ ܘܒܥܐ ܙܕܝܩܘܬܐ. ܘܠܐ ܕܣܢܐ ܠܟܢܬܗ ܘܒܥܐ ܚܘܒܐ. ܘܠܐ
ܕܡܕܓܠ ܘܒܥܐ ܩܘܫܬܐ. ܗܕܐ ܗܝ ܡܟܝܠ ܒܥܬܗ ܕܡܪܢ ܢܛܘܪܘܬ ܦܘܩ̈ܕܢܐ. ܥܡ ܗܝܡܢܘܬܐ ܕܩܘܫܬܐ ܘܝܕܥܬܐ ܕܫܪܪܐ.
ܛܘܦܣܗܝܢ ܕܝܢ ܕܗܠܝܢ ܡܢܐ ܗܘ܆ ܗܐ ܡܠܦ ܠܟܝ ܟܬܒܐ ܕܫܕܪܢܢ. ܘܡܘܕܥ ܠܟܝ ܐܘܪܚܐ
ܕܩܛܝܢܐ ܘܐܠܝܨܐ. ܒܪܡ ܕܝܢ ܡܘܒܠܐ ܠܡܠܟܘܬܐ ܕܫܡܝܐ. ܠܗܘ ܕܡܬܛܦܝܣ ܒܝܕ ܥܒܕ̈ܐ
ܬܪܝܢ ܣܢܝܩܝܢ ܠܒܘܝܐܐ. ܐܢܐ ܘܐܢܬ ܐܚܝ ܘܚܒܝܒܝ ܐܘܣܛܬܝ: ܕܐܫܬܒܩܢܢ ܡܢ ܐܒܐ
ܕܓܘܐ ܘܣܢܝܩ ܐܢܐ ܠܒܘܝܐܐ ܠܐ ܒܨܝܪ ܡܢܟ. ܐܦܢ ܗܫܐ ܡܬܒܥܐ (؟) ܐܢܐ ܠܡܒܝܐܘܬܟ. ܝܕܥ ܐܢܬ ܗܘ ܓܝܪ ܐܝܟܢ
ܡܚܒ ܗܘܐ ܠܝ ܛܘܒܢܐ: ܟܕ ܡܡܨܥܐ ܒܝܢܬܢ ܚܣܝܘܬܟ. ܘܥܒܕܐ ܦܐܪ̈ܐ ܘܡܪܒܝܐ. ܘܗܫܐ ܡܗܝܡܢ ܐܢܐ ܒܡܪܢ ܗܘ ܕܝܗܒ
ܠܟ ܐܒܐ ܠܦܦܘܣ ܐܢܘܣܝܣ܆ ܕܣܦܩ ܠܟ ܗܢܐ ܠܟܠ ܒܘܝܐܐ. ܘܣܦܩ ܐܦ ܠܢ ܠܡܒܥܐ ܥܠ ܐܦ̈ܝ ܚܛܗ̈ܝܢ.
ܒܪܡ ܐܦ ܗܫܐ ܫܦܝܪ ܥܒܕܬ ܕܒܝܐܬܢ ܒܝܕ ܟܬܝ̈ܒܬܟ ܩܕܝ̈ܫܬܐ. ܘܚܘܝܬ ܚܘܒܟ
ܕܠܘܬܢ: ܕܝܬܝܪ ܡܢ ܝܬܝܪ ܡܝܬܪ ܒܡܪܢ. ܢܬܠ ܠܟ ܡܕܝܢ ܡܪܢ ܐܝܟ ܠܒܟ. ܘܐܝܟ ܟܠܗ̇ ܬܪܥܝܬܟ ܢܫܡܠܐ. ܥܠ
ܕܡܝܩܪ ܐܢܬ ܠܡܟܝ̈ܟܐ ܘܚܛܝ̈ܐ. ܟܕ ܡܕܡ ܕܫܘܐ ܠܚܘܒܟ ܠܝܬ ܠܢ
ܣܓܝ ܙܒ̈ܢܬܐ ܣܓܝ̈ܐܬܐ ܒܝܐܬܢ. ܐܝܬ ܕܒܝܕ ܟܬܝ̈ܒܬܐ܆ ܘܐܝܬ ܕܒܝܕ ܡܐܬܝܐ ܕܐܚ̈ܐ
ܢܟ̈ܦܐ. ܘܡܢܐ ܐܦܪܘܥ ܠܡܪܝܐ: ܕܗܕܐ ܟܠܗ̇ ܛܝܒܘܬܐ ܐܫܟܚܬ ܠܘܬܟ. ܠܡܚܣܢ ܓܝܪ ܡܫܟܚ ܐܢܫ ܐܒܐ ܚܬܝܬܐ. ܒܪܡ
ܡܘܕܐ ܐܢܐ ܠܡܪܢ. ܘܠܝܘܡܐ ܕܩܝܡܬܗ. ܕܒܗ ܝܗܒܬ ܠܝ ܐܣܟܡܐ ܩܕܝܫܐ: ܘܚܠܛܬܢܝ ܒܡܢܝܢܐ ܕܕܝܪ̈ܝܐ. ܘܡܦܝܣ ܐܢܐ
ܕܬܨܠܐ ܥܠܝ܆ ܕܐܫܬܟܚ ܒܐܓܘܢܐ ܛܒܐ ܘܐܫܬܘܐ ܠܨܠܘ̈ܟ. ܘܠܐ ܢܐܩܪ ܥܠܝܟ ܠܡܣܥܪ ܗܕܐ ܒܟܠܙܒܢ ܠܘܬܢ. ܒܝܕ
ܐܢܫ̈ܐ ܢܟ̈ܦܐ ܕܐܬܝܢ ܠܘܬܟ. ܘܒܟܠ ܥܠ̈ܠܢ ܒܐܝ̈ܕܝܗܘܢ ܗܘܝ ܣܥܪ ܠܢ.
ܫܐܠ ܫܠܡܗ̇ ܕܗܝ ܕܣܓܝ ܠܐܝܬ ܒܡܪܢ. ܫܐܠ ܐܢܐ ܒܫܠܡܐ ܕܟܠ ܕܥܡ ܚܣܝܘܬܟ.
ܒܡܠܬܐ ܘܒܥܒܕ̈ܐ ܛܒ ܒܝܐܬܢ ܓܒܪܐ ܕܬܕܡܘܪܬܐ. ܘܣܥܪܬܢܝ ܟܕ ܝܬܒ ܐܢܐ ܒܚܫܘܟܐ
ܘܒܛܠ̈ܠܝ ܬܝܒܘܬܐ. ܡܪܢ ܢܦܪܥܟ ܚܠܦܝ. ܘܗܟܢ ܝܬܝܪܐܝܬ ܐܝܟ ܡܐ ܕܥܬܝܪ ܝܗܘܒܐ. ܘܐܚܙܝܟ ܒܥܠܡܐ ܕܥܬܝܕ. ܥܠ ܚܡܫ
ܘܥܠ ܥܣܪ ܡܕܝ̈ܢܢ. ܕܒܗܝܢ ܐܦ ܬܡܢ ܢܫܬܟܚ܆ ܕܡܢܟ ܡܬܪܕܝܢܢ܆ ܐܦ ܡܬܬܪܣܝܢ ܚܢܢ. ܐܬܪܟܢ ܡܪܝ ܚܒܝܒܐܝܬ ܠܒ̈ܢܝ
ܒܢ̈ܝܟ ܠܡܣܥܪ. ܕܬܕܥ ܕܠܡܐ ܡܕܡ ܕܠܐ ܫܘܐ ܠܚܟܡܬܟ ܡܡܪܚ ܠܢ: ܐܝܟ ܐܟ̈ܣܢܝܝ ܡܢ ܐܝܕܥܬܐ. ܘܡܢ ܡܕܝ̈ܢܬܐ
ܐܠܗ̈ܝܬܐ ܢܘܟܪܝܝܢ
ܛܒ ܒܝܐܢ ܫܡܫܟ ܢܟܦܐ ܐܠܘܡܦܘܣ. ܘܣܓܝ ܐܫܬܥܝ ܠܢ ܥܠ ܡܝܬܪ̈ܬܟ. ܘܐܝܟܢ ܪܥܝܬ
ܡܪܥܝܬܟ: ܩܠܝܠ ܒܝܕ ܚܘܛܪܐ ܘܣܘܓܐܐ ܒܝܕ ܡܫܪܘܩܝܬܐ. ܘܣܓܝ̈ܐܐ ܡܢ ܥܪ̈ܒܐ ܕܡܢ ܠܒܪ ܪܥܝܢ ܗܘܘ܆ ܪܗܛܘ ܡܢ
ܗܫܐ ܠܪܥܝܟ ܘܠܫܩܝܟ. ܘܐܘܕܝܘ ܒܚܕ ܪܥܝܐ ܒܝܕ ܚܕ.
ܚܢܢ ܗܟܝܠ ܒܩܕ̈ܡܝܐ ܐܣܗܕܢܢ ܩܕܡ ܟܠܗܘܢ ܐܚ̈ܐ. ܠܘܬ ܬܪ̈ܝܢܐ ܕܝܢ. ܗܢܘܢ
ܚܙܝ̈ܐ ܗܘܘ ܠܢ ܣܗ̈ܕܐ. ܗܢܘܢ ܕܐܦ ܐܘܕܥܘ ܠܢ ܡܢ ܩܕܝܡ ܥܠ ܐܘܝܘܬܗ̇ ܕܥܕܬܐ. ܕܕܥܟܬ ܒܝܕ ܢܝܚܘܬܟ ܩܫܝܘܬܐ
ܕܒܥܠܕܒܒ̈ܐ. ܗܘܝܬ ܓܝܪ ܢܝܚܐ ܘܡܬܟܬܫܢܐ ܐܝܟ ܡܠܬ ܢܒܝܘܬܐ.
ܢܗܘܐ ܥܒܕܐ ܕܨܠܘܬܟ ܦܘܪܩܢܐ ܕܪ̈ܚܝܩܐ. ܕܐܦ ܚܢܢ ܟܕ ܢܣܬܡܟ ܒܝܕ ܨܠܘ̈ܬܟ܆ ܢܦܩ
ܠܐܘܪܫܠܡ. ܘܢܗܘܐ ܒܢ̈ܝ ܡܕܝܢܬܐ ܕܩܕܝ̈ܫܐ. ܘܒܢ̈ܝ ...... ܕܡܫܝܚܐ. ܘܢܬܠ ܠܗ ܫܘܒܚܐ ܕܝܗܒ ܠܢ ܙܟܘܬܐ
ܐܢܐ ܨܒܐ ܗܘܝܬ ܒܝܕ ܡܪܢ܆ ܕܚܝ̈ܐ ܕܕܝܪܝܘܬܐ ܗܘܝܬ ܚܝܐ. ܟܕ ܣܬܪ ܐܢܬ
ܡܚܫ̈ܒܬܐ: ܘܟܠ ܪܘܡܐ ܕܡܬܬܪܝܡ ܥܠ ܝܕܥܬܗ ܕܡܫܝܚܐ. ܐܢܬ ܕܝܢ ܟܕ ܐܓܗܝܬ ܡܢ ܦܪܛܘܪ̈ܝܐ ܐܢ ܒܩܘܫܬܐ ܐܓܗܝܬ܆
ܐܝܟ ܗܘ ܕܓܡܪܬ ܙܕܝܩܘܬܐ ܕܒܥܒܕܐ ܣܒܪ ܐܢܬ. ܘܬܘܒ ܕܐܦ ܠܗܠ ܡܢ ܗܕܐ ܡܛܝܬ. ܐܝܟ ܕܬܬܡܨܐ ܠܡܐܡܪ: ܒܨܒܝܢ
ܡܠ̈ܘܗܝ ܕܦܘܡܝ ܨܒܝ ܡܪܝܐ. ܐܝܟ ܗܘ ܕܟܠ ܕܒܢܡܘܣܐ ܓܡܪܬ.
ܒܚܘܫ̈ܒܐ ܓܝܪ ܐܚܪ̈ܢܐ ܠܐ ܡܣܬܟܠ ܐܢܬ: ܕܡܢ ܠܒܐ ܢܦܩܝܢ ܘܠܗܘܢܐ ܡܟܬܡܝܢ܆ ܘܐܢ
ܫܠܡ ܠܗܘܢ ܒܬܪܥܝܬܐ܆ ܡܪܟܢܝܢ ܠܗ ܠܘܬ ܚܛܝܬܐ. ܕܥܠܝܗ̇ ܥܠ ܗܕܐ܆ ܦܘܢܝ ܦܬܓܡܐ ܪܘܚܢܐ ܣܝܡ: ܐܝܟ ܕܠܟܠܝܢܐ
ܕܚܛܝܬܐ ܕܨܒܝܢܐ ܘܕܥܒܕܐ. ܠܡܫܠܡ ܕܝܢ ܠܚܛܝܬܐ ܐܦܢ ܒܚܘܫܒܐ. ܚܛܗܐ ܡܬܡܢܐ. ܘܗܐ ܡܘܫܐ ܡܠܦ ܠܟ ܟܕ ܐܡܪ.
ܠܐ ܬܫܠܡ ܠܗܘܢ ܘܡܪܢ ܒܣܒܪܬܗ ܐܝܟ ܕܠܐܓܝܪܐ ܡܚܝܒ: ܠܗܘܢܐ ܕܚܘܫܘܫܐܝܬ ܚܐܪ ܒܐܢܬܬܐ. ܘܠܗܘ ܕܪܓܙ ܥܠ
ܐܚܘܗܝ ܐܦ ܒܡܚܫܒܬܗ.
ܗܠܝܢ ܦܘܩ̈ܕܢܐ ܥܩܪܝܢ ܫܠܡܘܬ ܥܘܠܐ ܡܢ ܠܒܐ: ܘܕܪܫܝܢ ܒܗܘܢܐ ܐܘܪܚܐ ܕܡܪܢ.
ܐܢܫ̈ܐ ܕܝܢ ܕܠܐ ܒܘܝܢ. ܐܝܟ ܕܒܓܘܚܟܐ ܪܢܝܢ ܠܡܪܕܝܗ̇ ܠܐܘܪܚܐ ܗܕܐ. ܘܣܒܪܝܢ ܕܡܢ ܚܕ ܛܘܪܐ ܓܡܪܘܗ̇
ܠܐܘܪܚܐ ܕܫܠܝܚܘܬܐ. ܐܝܟ ܗܘ ܕܢܛܘܪܘܬ ܢܡܘܣܐ: ܒܝܕ ܚܫ̈ܝ ܦܓܪܐ ܒܠܚܘܕ ܡܬܥܘܟܐ. ܚܘܫ̈ܒܐ ܕܝܢ ܕܡܢ ܗܠܝܢ
ܕܙܒܢ ܙܥܘܪ ܐܢܘܢ. ܚܣܡܐ ܕܝܢ ܘܐܟܬܐ ܡܬܡܬܚܝܢ ܐܦ ܥܕܡܐ ܠܣܝܒܘܬܐ.
ܐܟܒܪ ܚܘܫ̈ܒܐ ܕܡܢ ܦܪܛܘܪ̈ܝܐ ܠܐ ܡܛܒܥܝܢ ܠܝ. ܕܠܡܐ ܟܝ ܒܚܘ̈ܫܒܝ ܫܘܒܚܐ
ܣܪܝܩܐ ܡܨܠܐ ܕܠܐ ܐܛܒܥ. ܐܙܕܗܪ ܕܠܡܐ ܟܕ ܓܫܝܡܐܝܬ ܒܐܘܪܫܠܡ ܥܡܪ ܐܢܬ: ܡܕܥܟ ܠܗܠ ܡܢ ܒܝܬ ܥܢܝܐ ܢܗܘܐ.
ܟܕ ܐܣܝܪ ܒܚܘܫ̈ܒܝ ܪܚܡܬ ܟܣܦܐ ܘܫܘ̈ܥܝܬܐ ܘܡܬܬܪܣܐ ܒܡܠ̈ܝ ܙܒܢܐ ܘܙܘܒܢܐ. ܕܡܠܚܐ ܘܚܠܐ ܘܡܫܚܐ ܘܠܚܡܐ. ܟܕ
ܪ̈ܒܘܬܐ ܕܟܦ̈ܢܐ ܐܝܬ ܕܣܢܝܩܝܢ ܠܠܚܡܐ ܕܝܘܡܐ.
ܐܠܐ ܫܒܘܩ ܠܝ ܒܥܐ ܐܢܐ ܡܢܟ. ܠܘܩܒܠ ܐܓܪ̈ܬܟ ܓܝܪ ܦܢܝܬ ܠܟ ܦܬܓܡܐ. ܕܟܬܒܬ
ܕܥܡܪ ܐܢܬ ܒܐܬܪܐ ܡܩܒܠܢܗ ܕܐܠܗܐ. ܗܘ ܕܥܒܕ ܫܡܝܐ ܘܐܪܥܐ. ܘܗܘܝ ܝܕܥ ܕܒܡܨܥܬܟ ܩܐܡ. ܐܝܟ ܣܗܕܘܬܗ ܕܝܘܚܢܢ
ܡܥܡܕܢܐ. ܘܡܣܟܐ ܠܟ ܕܐܡܬܝ ܒܝܕ ܥܒܕ̈ܝܟ ܬܗܘܐ ܒܝܬ ܠܚܡ: ܘܒܝܕ ܚܙܝܐ ܪܘܚܢܐ ܕܕܟܝܘܬ ܟܝܢ ܒܪܝܬܟ ܬܗܘܐ
ܩܝܡܬܐ. ܘܒܝܕ ܣܘ̈ܟܠܝܟ ܕܡ̈ܠܐ ܐܠܗ̈ܝܬܐ: ܬܗܘܐ ܣܘܠܩܗ ܘܬܬܩܪܐ ܛܘܪ̈ܐ ܙܝ̈ܬܐ.
ܘܐܢ ܨܒܐ ܐܢܬ ܠܡܕܥ ܬܩܢܘܬ ܠܒܟ ܡܢܐ ܗܝ: ܐܢ ܚܦܝܛ ܗܘ ܘܐܢ ܡܒܣܐ܆ ܚܘܪ ܒܢܦܫܟ
ܒܥܕܢ ܨܠܘܬܐ. ܒܐܝܠܝܢ ܛܒ̈ܥܝ ܚܘܫ̈ܒܐ ܡܬܬܪܬܪ ܗܘܢܟ. ܘܡܬܢܬܦ ܒܚܘ̈ܫܒܝ ܚܫ̈ܐ ܐܘ ܒܠܐ ܚܫܘܫܘܬܐ. ܘܐܢܗܘ
ܕܚܫ̈ܐ ܡܩܪܒܝܢ ܥܡܗ܆ ܝܕܝܥܐ ܗܝ ܕܦܘܩ̈ܕܢܐ ܐܠܗ̈ܝܐ ܒܣܝܢ ܠܗ. ܘܚܫ̈ܐ ܫܘܚܝܢ ܘܡܙܝܥܝܢ ܒܗ ܚܡܬܐ ܘܪܓܬܐ:
ܥܡ ܣܘܓܐܐ ܕܒܝ̈ܫܬܐ ܘܕܟܐܒ̈ܐ. ܐܢ ܕܝܢ ܒܕܠܝܚܘܬܐ ܗܘ ܕܚܘܫ̈ܒܐ ܬܢܝ̈ܢܐ ܝܕܝܥܐ ܗܝ ܕܠܐ ܝܨܦ ܕܩܪܝܢܐ
ܘܕܨܠܘܬܐ. ܐܠܐ ܒܥܢܝ̈ܢܐ ܕܬܫܥܝ̈ܬܐ ܣܪ̈ܝܩܬܐ ܡܗܓܡ. ܘܗܕܐ ܓܒܝܐ ܠܗ܆ ܕܗܘܐ ܐܡܪ ܘܫܡܥ ܡܕܡ ܚܕܬ. ܐܠܐ
ܐܬܟܬܫ ܒܐܓܘܢܐ ܛܒܐ܆ ܕܬܬܟܠܠ ܒܟܠܝܠܐ ܕܙܕܝܩܘܬܐ. ܘܬܚܙܐ ܠܚܬܢܐ ܡܫܝܚܐ: ܕܠܗ ܗܫܐ ܒܝܕ ܥܒܕ̈ܐ ܛܒ̈ܐ ܒܥܐ
ܐܢܬ. ܕܗܢܘܢ ܐܝܬܝܗܘܢ ܒܥܬܗ ܕܡܪܢ ܕܠܩܘܫܬܝܢ܀
ܐܚܪ̈ܢܐ ܟܒܪ ܡܩܠܝܢ ܥܠܝܢ ܕܩܪܝܢ ܠܢ ܠܘܬ ܡܕܝܢܬܢ. ܠܐ ܓܝܪ ܝܕܥܝܢ ܡܐ ܕܬܢܢ. ܒܟ
ܓܝܪ ܡܬܕܡܪ ܐܢܐ܆ ܕܟܕ ܚܙܝܢ ܠܟ ܐܬܪ̈ܘܬܐ ܕܐܝܬܝܢ ܒܗܘܢ܆ ܗܐ ܫܠܡ ܐܢܬ ܠܐܝܠܝܢ ܕܩܪܝܢ ܐܦ ܡܣܟܝܢ ܠܢ. ܡܛܠ
ܗܟܝܠ ܕܐܝܟ ܡܬܠܐ ܠܣܓܝ̈ܐܐ ܣܘܠܐܢܘܗܝ ܕܥܠܡܐ ܓܒܝܢ ܠܗܘܢ. ܐܚܘܕܝܗ̇ ܠܬܒܝܠ ܚܝܨܐܝܬ ܒܥܐ ܐܢܐ ܡܢܟ. ܐܢܐ ܓܝܪ
ܕܐܪܚܩ ܡܢ ܚܘܪܒܐ ܥܕܡܐ ܠܗܫܐ ܠܐ ܨܒܐ ܐܢܐ.
ܠܡܒܪܟܘ ܡܣܟܝܢ ܐܢܬܘܢ ܠܝ ܘܠܡܒܝܐܘܬܟܘܢ ܐܚ̈ܝ ܚܒܝ̈ܒܐ. ܗܕܐ ܓܝܪ ܟܬܒܬܘܢ.
ܐܢܐ ܕܝܢ ܡܢܟܪܝ ܐܢܐ ܗܘ ܡܢ ܒܘܝܐܐ ܘܡܢ ܒܘܪܟܬܐ ܕܐܝܟ ܗܕܐ. ܠܐ ܓܝܪ ܡܥܣܪ̈ܐ ܩܪܒܬ ܠܡܠܟܝܙܕܩ܆ ܐܦܠܐ ܡܢ
ܚܪܒܐ ܕܡܠ̈ܟܐ ܗܦܟܬ ܟܕ ܫܩܝܠ ܐܢܐ ܙܟܘܬܐ. ܐܡܝܪ ܓܝܪ ܕܗܢܐ ܢܩܒܠ ܒܘܪܟܬܐ ܡܢ ܡܪܝܐ܆ ܐܝܢܐ ܕܕܟ̈ܝܢ
ܐܝ̈ܕܘܗܝ ܘܓܒܐ ܒܠܒܗ: ܘܠܐ ܢܣܒ ܢܦܫܗ ܒܣܪܝܩܘܬܐ ܘܠܐ ܝܡܐ ܒܢܟܠܐ. ܠܝܬ ܕܝܢ ܠܡܩܢܐ ܠܒܐ ܕܟܝܐ: ܕܠܐ
ܫܘܠܛܢܐ ܓܡܝܪܐ ܕܥܠ ܫܐܕ̈ܐ.
ܐܢܐ ܕܝܢ ܣܪܝ ܘܐܬܡܣܝ ܚܒܪ̈ܬܝ ܡܢ ܩܕܡ ܣܟ̈ܠܘܬܝ. ܘܠܨܝܕܐ ܠܐ ܚܫܚ ܐܢܐ.
ܒܕܒܗܝܬ ܐܢܐ. ܘܠܐ ܫܘܐ ܐܢܐ ܕܐܬܗܝܡܢ ܡܨܝܕܬܐ ܕܪܘܚ: ܘܐܝܟ ܕܒܝܕ ܟܪܘܟܝܐ ܕܡܠܬܐ ܐܨܘܕ ܠܐܝܠܝܢ ܕܡܢ
ܡܝܬܪܘܬܐ ܒܥܘܡ̈ܩܝ ܒܝܫܘܬܐ ܢܦܠܝܢ .. ܠܚܘ ...... ܐܢܐ ............ ܘܠܐ ܐܗܘܐ ܬ ... ܗܘ ܬܢܝ ..
ܠܝܛܐ ܕܡܬܓܚܟ ܡܢ ܡܠܐܟ̈ܐ ܩܕܝ̈ܫܐ ܘܡܨܛܕܐ ܒܒ̈ܢܝ ܐܢܫܐ. ܡܢ ܕܨܒܐ ܗܟܝܠ ܐܦ ܗܫܐ: ܠܡܪܡܐ ܠܗ ܦܓܘܕܬܐ
ܘܠܡܩܒ ܢܚܝܪܗ ܒܫܐܪܐ܆ ܢܩܢܐ ܢܝܚܘܬܐ ܕܗܝ ܗܝ ܐܡܐ ܕܝܕܥܬܐ. ܕܒܗ̇ ܡܬܩܠܣ ܗܘܐ ܐܦ ܡܘܫܐ ܒܣܗܕܘܬܐ. ܕܢܝܚ
ܗܘܐ ܡܢ ܟܠܗܘܢ ܒܢܝ̈ܢܫܐ. ܘܐܦܝ̈ܢ ܒܐܦܝ̈ܢ ܡܠܠ ܥܡ ܐܠܗܐ: ܘܐܝܠܦ ܡ̈ܠܝ ܗܘ̈ܝܐ ܒܚܙܘܐ ܘܠܐ ܒܦܠܐܬܐ.
ܠܐ ܐܢܫ ܥܠ ܥܢܘܝܘܬܐ ܒܠܚܘܕ ܢܗܘܐ ܬܟܝܠ ܒܥܐ ܐܢܐ ܡܢܟܘܢ. ܠܝܬ ܓܝܪ ܠܡܒܢܐ
ܒܝܬܐ ܡܢ ܚܕܐ ܟܐܦܐ. ܐܦܠܐ ܡܢ ܚܕܐ ܠܒܬܐ ܠܡܓܡܪ ܒܢܝܢܐ. ܥܢܘܝܐ ܕܪܓܘܙܬܢ ܩܝܣܐ ܗܘ ܝܒܝܫܐ: ܕܙܒܢܐ
ܬܫܪܝܝܐ ܕܠܐ ܦܐܪ̈ܝܢ. ܕܬܪܬܝܢ ܙܒ̈ܢܝܢ ܡܝܬ ܘܐܬܥܩܪ. ܪܓܘܙܬܢܐ ܠܐ ܢܚܙܐ ܟܘܟܒ ܢܘܓܗܐ ܕܕܢܚ. ܐܠܐ ܢܐܙܠ
ܠܐܬܪ ܕܠܐ ܗܦܟ. ܠܐܪܥܐ ܚܫܘܟܬܐ ܘܥܡܘܛܬܐ. ܠܐܪܥܐ ܕܚܫܘܟܐ ܕܠܥܠܡ. ܐܬܪ ܕܠܐ ܨܡܚ ܢܘܗܪܐ ܘܠܝܬ ܠܡܚܙܐ
ܚܝ̈ܐ ܕܒܢܝ̈ܢܫܐ.
ܥܢܘܝܘܬܐ ܠܚܘܕܝܗ̇ ܥܨܪܐ ܦܓܪܐ. ܢܝܚܘܬܐ ܕܝܢ ܚܙܝܐ ܥܒܕܐ ܠܗ ܠܗܘܢܐ. ܐܦ ܠܐ
ܓܝܪ ܡܕܡ ܐܚܪܝܢ ܡܕܥܟ ܓܐܪ̈ܘܗܝ ܝܩ̈ܕܐ ܕܒܝܫܐ: ܐܝܟ ܝܕܥܬܐ ܕܐܠܗܐ. ܡܛܠ ܕܓܐܪܐ ܡܫܠܗܒܐ ܐܝܬܘܗܝ ܚܘܫܒܐ
ܫܐܕܢܝܐ. ܕܡܙܝܥ ܪܓܬܐ ܒܠܐ ܘܠܝܬܐ. ܘܠܗ ܠܗܢܐ ܓܐܪܐ܆ ܐܘ ܠܐ ܩܒܠܗ ܗܘܢܐ ܕܢܗܝܪ ܒܚܙܝܗ ܘܥܦܐ ܒܪܢܝܐ
ܕܐܠܗܐ܆ ܐܘ ܐܢ ܩܒܠܗ ܒܥܓܠ ܫܕܐ ܠܗ. ܒܕܚܦܛܐ ܠܗ ܐܝܕܥܬܐ ܐܝܟ ܕܒܦܪܚܐ: ܘܦܪܫܐ ܠܗ ܡܢ ܥܠܡܐ ܓܫܝܡܐ. ܒܠܥܕ
ܓܝܪ ܓܫܝܡܘܬ ܥܠܡܐ ܗܢܐ܆ ܚܘܫܒ ܫܐܕܐ ܢܬܩܝܡ ܠܝܬ ܦܘܪܣܐ. ܡܛܠ ܕܚܘܫ̈ܒܐ ܕܐܝܟ ܗܠܝܢ ܨܒ̈ܘܬܐ ܓܫܝ̈ܡܬܐ
ܛܥܝܢܝܢ.
ܢܥܪܘܩ ܗܟܝܠ ܐܢ̈ܚ ܚܒܝ̈ܒܐ܆ ܘܠܐ ܢܬܬܚܕ ܒܗܢܐ ܥܠܡܐ. ܢܒܣܪ ܥܠ ܡܐܟܘܠܬܐ ܘܥܠ
ܡܫܬܝܐ. ܡܐܟܘܠܬܐ ܕܝܢ ܕܟܪܣܐ ܘܟܪܣܐ ܕܡܐܟܘܠܬܐ. ܐܠܗܐ ܕܝܢ ܠܬܪܬܝܗܝܢ ܡܒܛܠ. ܢܦܩܝܗ̇ ܡܢܢ ܠܝܥܢܘܬܐ:
ܕܐܝܬܝܗ̇ ܐܡܐ ܕܦܬܟܪܘܬܐ܆ ܢܥܪܘܩ ܡܢ ܫܘܒܚܐ ܣܪܝܩܐ. ܕܟܠܗ ܫܘܒܚܐ ܕܒܪܢܫܐ ܐܝܟ ܥܣܒܐ ܗܘ ܕܚܡܐ. ܘܒܬܪ
ܩܠܝܠ ܐܫܕ ܥܘܦܝܗ. ܢܩܢܐ ܕܝܢ ܡܠܬ ܐܠܗܐ ܕܠܥܠܡ ܩܝܡܐ. ܘܠܥܠܡ ܡܩܝܡܐ ܠܢ ܒܝܫܘܥ ܡܫܝܚܐ ܡܪܢ.
ܥܠ ܚܘܫܒܐ ܕܝܢ ܕܩܘܛܥ ܪܥܝܢܐ ܟܬܒܬܘܢ. ܕܐܝܢܐ ܠܡ ܒܝܬܐ ܐܠܨܐ ܠܡܫܒܩ. ܪܘܚܢܐ
ܐܘ ܦܓܪܢܐ. ܕܠܗ ܠܗܢܐ ܒܝܬܐ ܦܓܪܢܐ܆ ܛܒ ܣܢܐ ܐܝܢܐ ܕܡܬܢܣܐ ܡܢ ܩܘܛܥܐ. ܡܢ ܬܪܬܝܢ ܓܝܪ ܡܫܦܠ ܡܩܛܥ
ܪܥܝܢܐ. ܡܢ ܣܢܐܬܐ ܘܡܢ ܪܓܬܐ. ܗܘ ܓܝܪ ܕܡܬܩܛܥܐ ܠܗ܆ ܣܢܐ ܕܫܟܝ̈ܚܢ ܘܪܐܓ ܠܕܠܐ ܫܟܝ̈ܚܢ. ܘܟܡܐ ܕܢܓܕܐ
ܪܓܬܐ ܠܬܚܬ ܠܕܝܪܝܐ܆ ܗܟܢܐ ܐܦ ܣܢܐܬܐ ܪܕܦܐ ܠܗ ܡܢ ܟܘܪܚܗ. ܘܐܝܬ ܠܡܬܠܗ (؟) ܐܝܟ ܒـ ... ܕܠܐ. ܡܠܬܐ ܕ
......... ܠܗ ..... ܡܢ ܩـ ... ܘܗܝ ܘܡـ ... ܘܪܕܦܐ ܠܗ ܣܢܐܬܐ ܡܢ ܒܣܬܪܗ:
ܠܡܫܒܩܗ ܕܝܢ ܠܗܢܐ ܒܝܬܐ ܚܣܕܐ ܗܘ. ܘܐܬܐ ܗܝ ܕܡܙܕܟܝܢܘܬܐ. ܗܠܝܢ ܕܝܢ ܓܕ̈ܫܢ
ܠܐܝܠܝܢ ܕܝܬܒܝܢ ܠܚܘܕܝܗܘܢ. ܒܡܨܪܝܢ ܓܝܪ ܐܦ ܕܝܪ̈ܬܐ. ܒܝܕ ܟܘܪ̈ܚܐ ܣܓܝ̈ܐܐ ܡܬܩ̈ܢܢ. ܘܚܕ ܚܕ ܡܢ ܐܚ̈ܐ
ܐܙܠ ܠܟܘܪܚܗ ܒܠܚܘܕܘܗܝ. ܟܕ ܦܠܚ ܒܐܝܕ̈ܘܗܝ ܘܡܨܠܐ. ܡܬܟܢܫܝܢ ܕܝܢ ܐܟܚܕܐ. ܒܥܕܢ ܡܙܘܢܐ ܘܒܥܕܢ ܨܠܘ̈ܬܐ
ܕܣܝ̈ܡܢ: ܒܥܕ̈ܢܝ ܫܦܪܐ ܘܪܡܫܐ
ܐܢܐ ܚܕ ܡܢ ܡܩܠܣܝܢܝܗ̇ ܐܢܐ ܕܥܢܘܝܘܬܐ. ܘܡܨܠܢܐ ܕܥܡܗ̇ ܐܚܐ. ܥܡ ܡܓܪܬ ܪܘܚܐ
ܘܚܘܒܐ. ܕܠܐ ܗܠܝܢ ܓܝܪ ܡܢ ܕܡܫܡܗ ܥܢܘܝܘܬܐ ܩܛܡܐ ܗܘ ܕܫܪܟ ܡܢ ܢܘܪܐ. ܕܐܘܩܕܗ ܪܬܚܗ ܕܚܘܒܐ. ܡܛܠ
ܕܥܢܘܝܘܬܐ ܒܠܚܘܕܝܗ̇܆ ܠܗܝ ܒܬܘܠܬܐ ܣܟܠܬܐ ܕܡܝܐ ܕܐܬܓܠܙܬ ܡܢ ܓܢܘܢܐ܆ ܒܕܚܣܪ ܡܫܚܗ̇ ܘܕܥܟ ܠܡܦܐܕܗ̇.
ܠܡܦܐܕܐ ܩܪܐ ܐܢܐ ܠܗܘܢܐ ܕܥܒܝܕ ܠܡܩܒܠܘ ܢܘܗܪܐ ܛܘܒܬܢܐ. ܘܡܛܠ ܩܫܝܘܬܗ ܢܦܠ ܡܢ ܝܕܥܬܐ ܕܐܠܗܐ. ܐܬܪ ܓܝܪ
ܕܚܣܝܪ ܡܫܚܐ ܚܡܬܐ ܡܫܠܛܐ. ܗܠܝܢ ܐܡܝܪ̈ܢ ܠܝ ܠܘܬܟܘܢ ܐܚ̈ܝ ܚܒܝ̈ܒܐ.
ܥܠ ܗܘ ܕܝܢ ܬܢܝܢܐ ܥܪܘܩܐ ܕܐܠܨ ܠܟܘܢ. ܠܐ ܬܪܢܘܢ ܘܠܐ ܬܚܫܒܘܢܝܗܝ. ܘܠܐ
ܬܕܚܠܘܢ ܡܢܗ. ܥܒܕܐ ܗܘ ܓܝܪ ܥܪܘܩܐ ܕܚܝ ܒܝܫܐܝܬ ܕܥܪܩ ܡܢ ܡܪܗ. ܠܐ ܬܬܠܘܢ ܠܗ ܐܬܪܐ ܥܕܡܐ ܠܡܘܬܐ. ܡܪܢ
ܝܗܒ ܠܟܘܢ ܠܡܕܫ ܠܚܘܘ̈ܬܐ ܘܥܩܪ̈ܒܐ: ܘܡܢ ܒܢ̈ܬ ܩ̈ܠܐ ܕܫܐܕ̈ܐ ܕܚܠܝܢ ܐܢܬܘܢ ܥܠ ܕܡܫܪܩܝܢ܆ ܗܐ ܡܙܡܪܝܢ
ܐܢܬܘܢ ܒܠܠܝܐ ܘܒܐܝܡܡܐ܆ ܐܢ ܬܫܪܐ ܥܠܝ ܡܫܪܝܬܐ ܠܐ ܕܚܠ ܠܒܝ. ܘܐܢ ܢܩܘܡ ܥܠܝ ܩܪܒܐ ܒܗܕܐ ܬܟܝܠ ܐܢܐ.
ܠܘ ܗܢܘ ܗܘ ܕܫܐܠ ܡܢ ܡܪܢ ܫܚܪܐ ܕܚܙܝܪ̈ܐ: ܘܗܘ ܕܫܐܠ ܩܕܡܝ ܡܢ ܐܝܘܒ
ܠܩܢܝ̈ܢܘܗܝ܆ ܐܢ ܠܚܙܝܪ̈ܐ ܘܠܚܡܪ̈ܐ ܠܐ ܫܠܝܛ ܠܡܩܪܒ: ܒܠܥܕ ܡܢ ܡܦܣܢܘܬܗ ܕܝܗܘܒܐ. ܥܠ ܨܠܡܗ ܕܐܠܗܐ ܐܝܟܢ
ܫܠܝܛ. ܚܢܢ ܫܥܒܕܢܢ ܢܦܫܢ ܠܫܐܕ̈ܐ ܒܠܐ ܗܝܡܢܘܬܢ. ܠܐ ܢܬܕܠܚ ܠܒܟܘܢ ܘܠܐ ܢܕܚܠ. ܗܝܡܢܘ ܒܐܠܗܐ ܘܒܡܫܝܚܐ
ܗܝܡܢܘ.
ܠܡܬܠܚܡܘ ܒܠܚܘܕ ܝܕܥ ܬܢܝܢܐ. ܐܠܘ ܓܝܪ ܡܨܐ ܗܘܐ܆ ܟܒܪ ܕܝܢ ܐܣ̈ܐ ܗܦܟ ܥܠܝܢ.
ܕܠܝܚ ܕܝܢ ܘܥܝܝܩܐ ܠܗ܆ ܥܠ ܕܢܦܠ ܡܢ ܢܦܫܐ ܗܝ ܕܡܢ ܩܕܝܡ ܡܬܛܦܝܣܐ ܗܘܬ ܠܗ. ܘܠܚܝܡ ܥܠ ܐܝܠܝܢ ܕܒܥܝܢ ܥܠ
ܐܦ̈ܝܗ̇ ܡܢ ܡܪܢ. ܨܒܐ ܗܘܐ ܓܝܪ ܕܐܦ ܒܬܪ ܡܘܬܗ̇ ܢܗܘܐ ܫܠܝܛ ܥܠܝܗ̇. ܠܐ ܗܟܝܠ ܬܫܒܩܘܢ ܠܗ̇ ܕܝܪܟܘܢ. ܠܐ
ܓܝܪ ܫܘܝܢ ܐܢܬܘܢ ܠܗܕܐ ܡܙܕܟܝܢܘܬܐ. ܡܗܝܡܢܝܢܢ ܒܡܪܢ. ܕܡܫܕܪ ܡܠܐܟܗ ܘܪܕܦ ܠܗ ܡܢܟܘܢ ܐܝܟ ܥܢܢܐ ܝܒܝܫܬܐ.
ܐܢܬܘܢ ܗܟܝܠ ܩܘܡܘ ܒܡܪܢ ܘܠܐ ܬܕܚܠܘܢ. ܐܠܐ ܨܠܘ ܥܠ ܚܕܕ̈ܐ ܘܥܠܝܢ. ܕܢܫܠܡ
ܡܪܢ ܐܓܘܢܢ ܘܢܬܠ ܠܢ ܟܠܝܠܐ ܕܙܕܝܩܘܬܐ. ܘܫܡܗ̈ܐ ܕܟܠܟܘܢ ܢܟܬܘܒ ܡܪܢ ܒܣܦܪܐ ܕܚܝ̈ܐ܀
ܝܕܥܬܟ ܕܙܒ̈ܢܝܢ ܣܓܝ̈ܐܢ. ܗܪܓ ܗܘܝܬ ܒܫܪ̈ܒܝ ܟܣܐ ܪܘܚܢܐ. ܡܠܠܬ ܥܡܝ ܓܝܪ ܥܠ
ܠܐ ܡܝܬܘܬܗ̇ ܕܢܦܫܐ. ܘܬܒܥ ܗܘܝܬ ܠܝ ܥܠ ܬܘܩܢܗ ܕܗܢܐ ܦܓܪܐ: ܕܡܚܘܐ ܠܢܦܫܐ ܥܠܡܐ ܓܫܝܡܐ: ܘܒܝܕ ܙܘ̈ܥܝ
ܪ̈ܘܟܝܒܘܗܝ ܡܚܘܐ ܣܘ̈ܟܠܐ ܕܥܠܘܗܝ
ܐܢ ܗܟܝܠ ܡܚܒ ܐܢܬ ܠܡܚܙܐ ܚܟܡܬ ܥܒܘܕܐ܆ ܥܗܕ ܦܘܩ̈ܕܢܘܗܝ ܕܐܠܗܐ. ܕܗܢܘܢ
ܡܕܟܝܢ ܠܗ ܠܗܘܢܐ: ܐܝܟ ܕܢܗܘܐ ܫܘܐ ܠܗܘ ܟܣܐ ܪܘܚܢܐ. ܒܢܦܫܐ ܓܝܪ ܡܦܬܠܬܐ ܠܐ ܥܐܠܐ ܚܟܡܬܐ. ܘܠܐ ܥܡܪܐ
ܒܦܓܪܐ ܕܡܚܝܒ ܠܚܛܝܬܐ.
ܥܗܕ ܠܗܝܡܢܘܬܐ ܬܪܝܨܬܐ. ܘܕܥ ܕܬܠܝܬܝܘܬܐ ܩܕܝܫܬܐ܆ ܠܐ ܒܚܙܝܐ ܕܓܫܝ̈ܡܐ܆ ܐܦܠܐ
ܒܬܐܘܪܝܐ ܕܠܐ ܓܫܝ̈ܡܐ ܡܬܪܫܐ. ܘܥܡܗܘܢ ܕܣܘܥܪ̈ܢܐ ܠܐ ܡܬܡܢܝܐ. ܡܛܠ ܕܐܝܟ ܕܒܛܝܒܘ ܡܬܪܟܢܐ ܠܘܬ ܝܕܥܬܐ
ܕܢܦܫܐ (؟)0 ܒܪ̈ܝܬܐ ܓܝܪ ܡـ .. ܡܕܡ ܗܘ̈ܝ. ܬܠܝܬܝܘܬܐ ܕܝܢ ܩܕܝܫܬܐ܆ ܝܕܥܬܐ ܗܝ ܐܝܬܝܝܬܐ. ܕܠܐ ܡܬܥܩܒܐ
ܘܠܐ ܡܬܕܪܟܐ.
ܠܐ ܓܝܪ ܘܠܐ ܠܡܚܪ ܒܚܟܝ̈ܡܝ ܚܢܦܘܬܐ: ܕܡܣܝܟܐܝܬ ܩܪܝܢ ܠܐܠܗܐ ܪܘܚ ܝܕܥܬܐ
ܘܢܘܪܐ. ܕܠܐ ܠܡ ܐܝܬ ܠܗ ܚܙܘܐ. ܐܠܐ ܡܫܬܚܠܦ ܘܡܬܕܦܐ ܒܗܝ ܕܨܒܐ. ܗܕܐ ܕܝܢ ܕܐܠܗܐ ܠܐ ܐܝܬܝܗ̇: ܐܠܐ
ܕܫܐܕ̈ܐ. ܕܝܬܝܪܐܝܬ ܡܢ ܗܠܝܢ ܡܣܬܓܕܝܢ: ܘܒܟܠܗܝܢ ܓܫܝ̈ܡܬܐ ܡܬܕܡܝܢ ܕܠܝܠܐܝܬ
ܠܐ ܐܢܫ ܡܬܗܝܡܢ ܣܝܡܬܐ ܘܕܡܟ. ܘܠܐ ܐܢܫ ܩܒܠ ܡܥܡܘܕܝܬܐ ܕܦܘܢܝܐ ܘܠܐ ܫܗܪ.
ܐܝܟ ܕܐܡܪ ܫܠܝܡܘܢ. ܕܠܐ ܬܬܠ ܫܢܬܐ ܠܥܝ̈ܢܝܟ ܐܦܠܐ ܢܘܬܐ ܠܬܡܪ̈ܝܟ. ܕܬܬܦܨܐ ܐܝܟ ܛܒܝܐ ܡܢ ܢܫܒܐ ܘܐܝܟ
ܦܪܚܬܐ ܡܢ ܦܚܐ. ܫܢܬܐ ܕܟܝܢܐ ܡܠܝܠܐ ܩܪܐ ܠܚܛܝܬܐ ܕܒܥܒܕܐ. ܕܗܝ ܓܠܙܐ ܢܦܫܐ ܡܢ ܢܘܗܪܐ ܩܕܝܫܐ. ܢܘܡܬܐ
ܕܝܢ ܩܪܐ܆ ܠܚܘܫܒܐ ܕܩܕܡܐܝܬ ܥܕܐ ܥܠ ܢܦܫܐ. ܘܒܬܪܟܢ ܡܬܩܪܐ ܫܢܬܐ ܒܠܐ ܥܝܪܘܬܐ. ܘܠܐ ܢܣܒܪ ܐܢܫ ܕܠܐ ܡܨܝܐ
ܗܕܐ ܠܡܗܘܐ ܐܝܟ ܕܢܬܬܥܝܪ. ܪܘܚܐ ܓܝܪ ܕܩܘܕܫܐ ܠܘ ܥܪ̈ܨܬܢ ܟܠܐ ܠܡܗܘܐ. ܕܝܠܢ ܓܝܪ ܐܝܬܝܗ̇: ܕܢܬܟܬܫ
ܒܐܝܠܝܢ ܕܡܨܝܐ ܠܡܗܘܐ ܘܠܐ ܠܡܗܘܐ. ܢܡܘܣܐ ܓܝܪ ܠܘ ܥܪ̈ܨܬܗ ܕܟܝܢܐ ܦܣܩ. ܐܠܐ ܦܘܩܕܢܐ ܝܗܒ ܒܐܝܠܝܢ ܕܡܨܝܐ
ܠܡܬܢܛܪܘ.
ܐܢܐ ܓܝܪ ܠܐ ܚܐܪ ܐܢܐ ܒܐܝܠܝܢ ܕܡܥܠܝܢ ܒܝܫܘܬܐ ܒܟܝܢ ܒܪܝܬܢ. ܘܣܝܡܝܢ ܢܡܘܣܐ
ܕܠܐ ܘܠܝܬܐ. ܐܢ ܓܝܪ ܟܠ ܒܝܫܘ: ܡܢ ܡܢܬܐ ܚܫܘܒܬܢܝܬܐ ܐܘ ܕܚܡܬܐ ܐܘ ܕܪܓܬܐ ܡܟܢܐ ܕܬܗܘܐ: ܒܗܘܢ ܕܝܢ
ܒܗܠܝܢ ܚܝ̈ܠܐ: ܡܫܟܚܐ ܗܝ ܠܡܬܚܫܚܘ ܛܒܐܝܬ ܘܒܝܫܐܝܬ܆ ܝܕܝܥܐ ܕܡܢ ܚܫܚܬܐ ܕܠܐ ܒܘܠܝܬܐ ܡܬܝܠܕܐ ܒܝܫܘܬܐ.
ܘܐܢ ܗܕܐ ܗܟܢܐ ܗܝ܆ ܡܕܝܢ ܘܠܐ ܚܕܐ ܒܝܫܬܐ ܕܢܦܫܐ ܐܬܒܪܝܬ ܡܢ ܐܠܗܐ.
ܐܦܠܐ ܚܕ ܡܢ ܦܓܪ̈ܐ ܐܡܪ ܐܢܐ ܕܐܬܒܪܝ ܒܝܫܐܝܬ. ܟܠ ܓܝܪ ܕܗܘܐ ܡܒܠܢܐ ܕܝܕܥܬܐ
ܕܐܠܗܐ: ܘܓܒܐ ܠܗ ܛܒ ܡܢ ܝܕܥܬܐ ܠܐ ܝܕܥܬܐ܆ ܗܢܐ ܡܬܐܡܪ ܒܝܫܐ. ܠܝܬܘܗܝ ܓܝܪ ܟܝܢܐ ܦܓܪܢܐ ܡܩܒܠܢܐ
ܕܝܕܥܬܐ. ܡܕܝܢ ܘܠܐ ܚܕ ܡܢ ܦܓܪ̈ܐ ܙܕܩ ܕܢܬܩܪܐ ܒܝܫܐ. ܐܠܐ ܐܝܠܝܢ ܕܩܪܝܢ ܠܗ ܢܒܗܬܘܢ. ܚܢܢ ܕܝܢ ܒܝܕ
ܡܝܬܪ̈ܬܐ ܢܬܚܦܛ ܕܢܩܝܡܝܘܗܝ ܩܕܡ ܐܠܗܐ. ܟܕ ܡܚܘܝܢܢ ܒܝܕ ܥܒܕ̈ܐ܆ ܕܟܠ ܢܡܘܣܐ ܕܣܡ ܐܠܗܐ ܫܦܝܪ ܣܡ
ܛܒ ܐܬܒܣܡܬ ܒܚܘܒܟ. ܘܓܡܝܪܐ ܒܝ ܪܚܡܬ ܐܟܣܢܝܘܬܟ. ܘܥܠ ܐܦ̈ܝ ܢܝܚܐ ܕܐܫܟܚܬ ܠܘܬܟ
ܡܢܐ ܐܦܪܘܥ. ܢܗܘܐ ܡܪܝܐ ܒܠܒܟ ܪܒ ܟܘܡܪ̈ܐ ܪ̈ܒܐ. ܗܘ ܕܥܒܕ ܠܫܡܝܐ ܘܫܡܠܝ ܟܠ. ܢܪܝܡ ܪܫܟ ܥܠ ܒܥܠܕ̈ܒܒܝܟ.
ܢܠܦܟ ܝܕܥܬܐ ܕܙܕܝܩܘܬܐ. ܘܢܓܠܐ ܠܟ ܚܟܡܬ ܪ̈ܐܙܘܗܝ. ܢܗܘܐ ܦܐܪܟ ܣܓܝ ܘܥܩܪܟ ܥܠ ܡܝ̈ܐ ܢܫܘܚ. ܫܒܠܟ ܠܐ ܢܘܒܫ
ܪܘܚܐ. ܘܛܠܐ ܕܫܡܝܐ ܢܐܬܐ ܥܠ ܚܨܕܟ. ܬܦܪܥ ܣܬܟ ܘܐܕܫܟ ܢܗܘܐ ܫܒܝܚ. ܢܐܟܘܠ ܡܢܗ ܡܪܝܐ ܘܢܫܪܐ ܒܦܪܕܝܣܟ. ܥܠ
ܕܥܒܕܬ ܕܫܦܝܪ ܠܢ ܡܟ̈ܐ ܘܚܛܝ̈ܐ. ܟܕ ܠܝܬ ܠܢ ܡܕܡ ܕܫܘܐ ܠܚܘܒܟ
ܝܘܚܢܢ ܡܥܡܕܢܐ ܠܦܠܚ̈ܝ ܐܣܛܪܛܝܐ ܟܕ ܐܬܩܪܒܘ ܠܘܬܗ: ܘܥܠ ܐܦ̈ܝ ܚܝ̈ܝܗܘܢ
ܫܐܠܘܗܝ ܐܡܪ ܠܗܘܢ. ܕܠܐܢܫ ܠܐ ܬܛܠܡܘܢ. ܘܢܣܦ̈ܩܢ ܠܟܘܢ ܐܦܣܘ̈ܢܝܬܟܘܢ. ܐܢܐ ܕܝܢ ܠܘܬ ܢܟܦܘܬܟ ܡܕܡ ܕܐܝܟ
ܗܟܢ ܠܐ ܐܡܪ ܐܢܐ. ܡܫܦܥܐ ܗܝ ܒܟ ܓܝܪ ܛܝܒܘܬܗ ܕܡܫܝܚܐ. ܘܝܕܥ ܐܢܐ ܕܥܕܘܪܐ ܐܢܬ ܕܛܠܝ̈ܡܐ ܒܚܦܝܛܘܬܟ.
ܘܠܡܣ̈ܟܢܐ ܡܢ ܐܦܣ̈ܘܢܝܬܟ ܙܐܢ ܐܢܬ. ܒܗܝ ܕܐܦ ܠܢ. ܒܛܒܘܬ ܥܝܢܐ ܚܘܝܬ ܪܚܡܬ ܐܟܣܢܝܘܬܟ. ܥܡ ܫܘܬܦܬܟ
ܟܢܝܟܬܐ ܐܡܬܗ ܕܡܫܝܚܐ: ܗܝ ܕܟܠ ܣܥܪܐ ܠܐܝܩܪܢ ܘܠܢܝܚܢ. ܢܬܠ ܠܟܘܢ ܡܪܢ ܕܬܫܟܚܘܢ ܪ̈ܚܡܐ ܒܗܘ ܝܘܡܐ.
ܘܬܐܬܐ ܥܠܝܟܘܢ ܒܘܪܟܬܐ ܗܝ ܕܐܒܗ̈ܝܟܘܢ ܒܪܟܟܘܢ. ܢܩܕܫ ܡܪܢ ܥܒܕ̈ܝܟܘܢ ܘܢܢܛܪ ܒܬܝ̈ܟܘܢ. ܘܢܪܕܘܦ ܡܢܟܘܢ
ܟܠ ܡܚ̈ܘܢ.
ܗܘܘ ܐܦ ܐܢܬܘܢ ܕܠܐ ܚܡܬܐ ܘܪܚܡܬܢܝܢ. ܟܠ ܥܒܕܘ ܒܡܓܪܬ ܪܘܚܐ. ܡܕܡ ܥܡ ܐܠܗܐ
ܘܥܡ ܝܕܥܬܗ ܠܐ ܬܝܩܪܘܢ. ܐܬܕܡܘ ܒܩܘܪܢܠܝܣ ܕܨ̈ܠܘܬܗ ܘܙܕ̈ܩܬܗ܆ ܠܘ ܠܡܠܐܟ̈ܐ ܩܕܝ̈ܫܐ ܒܠܚܘܕ. ܐܠܐ ܐܦ ܠܗ
ܠܐܠܗܐ ܐܦܝܣ: ܠܡܫܕܪܘ ܠܘܬܗ ܠܫܡܥܘܢ ܟܐܦܐ: ܕܒܝܕ ܥܡܕܐ ܡܕܡ ܕܚܣܝܪ ܗܘܐ ܢܡܠܐ. ܡܕܡ ܓܝܪ ܠܐ ܡܩܝܡ ܠܢ
ܠܘܬ ܐܠܗܐ: ܐܝܟ ܡܓܪܬ ܪܘܚܐ ܘܡܪܚܡܢܘܬܐ. ܐܠܗܐ ܓܝܪ ܡܪܚܡܢܐ ܥܠ ܡܪ̈ܚܡܢܐ ܡܪܚܡ. ܘܡܪܝܐ ܢܓܝܪ ܪܘܚܐ܆ ܥܡ
ܢܓܝܪ̈ܝ ܪܘܚܐ ܡܓܪ ܪܘܚܗ. ܘܡܛܠ ܕܐܓܪܘ ܪܘܚܐ ܡܛܠܬܗ܆ ܝܗܒ ܠܗܘܢ ܐܓܪܐ ܕܡܠܝܟ ܒܡܠܟܘܬܐ ܕܫܡܝܐ
ܠܝܬ ܠܟܘܢ ܠܡܟܬܒ ܐܓܪ̈ܬܐ ܠܐܝܠܝܢ ܕܐܡܪܝܢ ܕܝܩܣ. ܓܒܝܬܘܢ ܠܟܘܢ ܓܝܪ ܐܘܡܢܘ܆
ܕܣܓܝ ܦܪܫܐ ܠܟܘܢ ܡܢ ܡܠܟܘܬܐ ܕܫܡܝܐ. ܠܝܠܝ ܐܝܡܡ ܢܨܝܢ ܐܢܬܘܢ܆ ܘܡܩܝܡܝܢ ܐܢܬܘܢ ܠܘܬ ܚܕܕ̈ܐ ܩܪ̈ܒܐ ܕܠܐ
ܫܝܢܐ: ܥܠ ܐܦ̈ܝ ܝܘܬܪ̈ܢܐ ܛܢ̈ܦܐ. ܘܥܠ ܐܦ̈ܝ ܨܒ̈ܘܬܐ ܕܐܚܪ̈ܢܐ. ܘܗܢܐ ܡܬܠ ܫܘܥܝܬܐ ܐܡܪܝܢ ܐܢܬܘܢ. ܕܕܠܐ
ܢܚܫܐ ܘܕܚܠܬܐ ܦܘܒܘܣ ܠܐ ܩܨܡ. ܡܛܠ ܗܢܐ ܠܘܬ ܐܝܠܝܢ ܕܝܗܒܝܢ ܪ̈ܚܡܢܐ ܐܢܬܘܢ. ܘܠܘܬ ܐܝܠܝܢ ܕܠܐ ܝܗܒܝܢ ܐܘ
ܫܐܠܝܢ܆ ܕܠܐ ܪ̈ܚܡܐ ܡܬܚܙܝܢ ܐܢܬܘܢ. ܘܫܪܟܬܘܢ ܠܗܕܐ ܕܐܢܬܘܢ ܬܗܘܘܢ ܚܝܪܢ ܒܐܝܕ̈ܝܐ ܕܟܠܢܫ: ܡܢ ܐܬܐ ܟܕ
ܛܥܝܢ ܬܚܝܬ ܫܚܬܗ. ܒܕܝܠܟܘܢ ܕܝܢ ܐܢܫ ܠܐ ܢܚܘܪ. ܬܐܒܕ ܝܥܢܘܬܐ ܡܢ ܒܢܝ̈ܢܫܐ. ܘܥܠ ܐܢܫ ܡܢ ܟܪ̈ܣܛܝܢܐ ܗܕܐ
ܐܡܢܘܬܐ ܠܓܡܪ ܠܐ ܬܡܠܟ.
ܐܢ ܐܢܫ ܕܝܢ ܪܐܓ ܝܕܥܬܗ ܕܦܪܘܩܢ. ܚܟܡܬܐ ܛܒܬܐ ܪܚܡ܆ ܘܝܐܐ ܠܗ ܠܡܚܒܢܗ̇܆
ܕܗܘܐ ܢܝܚ ܘܢܟܦ ܘܐܝܬܘܗܝ ܕܠܐ ܒܝܫܘ ܘܕܠܐ ܪܘܓܙܐ. ܘܡܪܚܡܢ ܘܐܡܝܢ ܒܨܠܘܬܐ܆ ܘܢܪܕܘܦ ܡܢܗ ܐܟܬܐ. ܥܠ ܐܦ̈ܝ
ܕܝܢ ܡܠܬܐ ܕܗܝܡܢܘܬܐ ܬܪܝܨܬܐ: ܘܥܠܝ ܐܦ̈ܝ ܣܘ̈ܟܠܐ ܕܥܠܝܗ̇܆ ܢܩܘܡ ܒܩܘܝܢܕܢܘܣ ܡܢ ܟܠܗ̇ ܢܦܫܗ.
ܗܠܝܢ ܐܡܪܝ̈ܢ ܠܝ ܠܘܬܟ ܐܝܟ ܡܠܬ ܡܬܠ̈ܘܗܝ ܕܫܠܝܡܘܢ. ܕܗܒ ܐܦܬܐ ܠܚܟܝܡܐ ܕܬܘܒ
ܢܬܚܟܡ. ܘܐܘܕܥ ܠܙܕܝܩܐ ܘܢܘܣܦ ܠܡܩܒܠܘ. ܝܕܥܝܢܢ ܕܛܒ ܪܚܡ ܠܡܫܝܚܐ ܐܝܬܝܟ. ܘܠܐ ܝܩܝܪ ܒܥܝ̈ܢܝܟ ܡܕܡ ܝܬܝܪ
ܡܢ ܝܕܥܬܗ ܕܡܫܝܚܐ. ܐܬܕܡܐ ܡܕܝܢ ܒܒܪ ܡܕܝܢܬܟ ܘܡܪܐ ܫܡܟ. ܘܬܒ ܠܒܪ ܡܢ ܡܫܟܢܟ܆ ܟܕ ܣܝܡ ܠܟ ܗܢܐ ܥܠܡܐ
ܐܝܟ ܛܠܠܐ. ܬܪܣܐ ܒܝܕ ܡܝܬܪ̈ܬܟ ܠܥܓܠܐ܆ ܕܢܗܘܐ ܡܛܝܒ ܠܪܚܡܬ ܐܟܣ̈ܢܝܐ. ܐܝܬ ܠܟ ܣܪܐ ܡܥܕܪܢܝܬܐ ܕܚܦܝܛܐ.
ܝܕܥ ܐܢܐ ܠܗ̇܆ ܕܦܛܝܪ̈ܝ ܦܫܝܛܘܬܐ ܘܩܘܫܬܐ ܦܠܚܐ ܠܐܠܗܐ. ܢܬܠ ܕܝܢ ܡܪܢ ܕܗܘܐ ܨܚܝܚ ܛܗܪܐ ܕܡܝܬܪܘܬܟܘܢ.
ܘܢܗܘܐ ܡܫܟܢܟܘܢ ܒܝܬ ܡܫܪܝܐ ܠܡܠܐܟ̈ܐ ܩܕܝ̈ܫܐ ܘܠܡܫܝܚܐ ܦܪܘܩܢ
ܠܥܢܝܢܐ ܕܒܦܓܪ ܣܓܝܐܝܢ ܟܠܝܢ̈ܘܗܝ ܒܝܕ ܕܘܟܬܐ ܘܙܒܢܐ ܘܠܐ ܣܦܝܩܘܬܐ
ܘܟܪܝܗܘܬܐ. ܠܥܢܝܢܐ ܕܝܢ ܕܢܦܫܐ܆ ܠܝܬ ܥܘܘܟܐ ܥܡܗ̇ ܓܝܪ ܕܡܬܬܙܝܥܐ ܡܡܠܠܐ ܥܡ ܡܢ ܕܨܒܝܐ. ܘܒܝܕ ܩܠܝܠܘܬ
ܪܥܝܢܐ܆ ܨܠ̈ܡܐ ܕܡܬܚܙܝܢ ܠܗ̇ ܒܗ ܡܣܩܐ. ܒܪܡ ܕܥ܆ ܕܙܒ̈ܢܬܐ ܣܓܝ̈ܐܬܐ ܡܠܠܬ ܥܡܟ ܥܠ ܐܦ̈ܝ ܚܝ̈ܐ. ܘܐܝܟܢܐ
ܬܩܢܐܝܬ ܒܗܢܐ ܥܠܡܐ ܬܬܕܒܪ.
ܕܐܚܒܬܢ ܓܝܪ ܡܘܕܐ ܐܢܐ ܘܠܐ ܟܦܪ ܐܢܐ. ܐܢ ܕܝܢ ܐܦ ܥܕܡܐ ܠܗܫܐ ܚܘܐ ܒܝܕ
ܬܩܢܘܬܟ: ܕܥܗܝܕ ܐܢܬ ܗܘ ܠܡܝܬܪܘܬܐ ܘܠܣܘ̈ܟܠܐ ܐܠܗ̈ܝܐ: ܗܠܝܢ ܕܓܠܐ ܠܟ ܡܪܢ ܒܝܕ ܡܚܝܠܘܬܢ. ܝܬܝܪܐܝܬ ܕܝܢ
ܢܝܚܘܬܐ ܘܢܟܦܘܬܐ ܠܐ ܬܛܥܐ. ܕܗܢܝܢ ܡܕܟ̈ܝܢ ܠܢܦܫܐ: ܘܡܩܪ̈ܒܢ ܠܗ̇ ܠܘܬ ܝܕܥܬܗ ܕܡܫܝܚܐ. ܠܐ ܓܝܪ ܫܒܩܢܢ
ܠܟ ܥܠܬܐ ܕܡܦܩ ܒܪܘܚܐ ܠܗܘ ܝܘܡܐ: ܐܠܐ ܟܠܡܕܡ ܕܚܫܚ ܠܟ ܠܡܠܟܘܬܐ ܕܫܡܝܐ ܐܘܕܥܢܟ
ܡܢ ܟܘܪܚܢ ܡܣܟܢܐ ܟܬܒܢܢ ܠܬܩܢܘܬܟܝ. ܘܗܕܐ ܚܠܝܡܘܬܢ ܕܒܡܫܝܚܐ ܡܘܕܥܝܢܢ. ܕܝܨܝܦܬܝ
ܓܝܪ ܕܝܠܢ. ܒܗ̇ ܒܗܕܐ ܡܦܣܝܢ ܚܢܢ. ܒܝܕ ܚܘܒܐ ܕܡܚܒܐ ܐܢܬܝ ܠܢ. ܒܗܝ ܕܟܠ ܣܥܪܬܝ ܕܚܫܚ ܠܐܝܩܪܢ ܘܠܢܝܚܢ. ܐܠܐ
ܡܪܢ ܢܦܪܥܟܝ ܚܠܦܝܢ. ܘܝܬܝܪܐܝܬ ܐܝܟ ܡܐ ܕܥܬܝܪܐ ܡܘܗܒܬܗ. ܘܬܚܙܝܢ ܒܛܒ̈ܬܗ̇ ܕܐܪܫܠܡ ܟܠ ܝܘ̈ܡܝ ܚܝ̈ܝܟܝ.
ܕܬܚܙܝܢ ܓܝܪ ܒܢ̈ܝܐ ܠܒ̈ܢܝܟܝ܆ ܗܐ ܝܗܝܒܐ ܗܝ ܠܟܝ. ܘܒܢ̈ܝܐ ܕܐܝܟ ܗܠܝܢ. ܡܢܘ ܢܣܒ ܟܕ ܛܒ ܛܒ ܢܨܠܐ
ܠܗ. ܕܥܗܝܕ ܠܚܣܝܘܬܟ ܥܗܝܕ ܠܡܝܬܪܘܬܐ. ܘܕܥܗܝܕ ܠܡܝܬܪܘܬܐ ܥܗܝܕ ܠܐܠܗܐ: ܕܝܗܒ
ܠܟ ܡܥܝܢܐ ܕܚܘܒܐ: ܕܕܠܐ ܚܣܡ ܠܟܠ ܡܪܕܝܐ ܫܘܝܐܝܬ. ܕܐܦ ܚܢܢ ܡܢ ܩܕܝܡ ܛܒ ܐܫܬܝܢ ܡܢܗ ܘܐܬܒܣܡ ܫܦܝܥܐܝܬ
ܡܢ ܟܠ ܕܐܝܬ ܠܟ. ܘܠܡܐܢܐ ܕܚܝ̈ܐ ܐܫܟܚܢ ܡܢ ܟܝܡܘܢܐ ܕܐܕܪܟܢ.
ܘܡܢܐ ܢܦܪܘܥ ܠܡܪܝܐ: ܕܟܠܗܘܢ ܦܘܪ̈ܥܢܘܗܝ ܝܗܒ ܥܠܝܢ ܒܝܕ ܒܣܝܡܘܬܟ. ܐܣܒܪ ܫܡܟ
ܠܐܚ̈ܝ܆ ܘܒܓܘ ܥܕܬܐ ܐܫܒܚܟ. ܘܠܐ ܐܫܠܐ ܡܢ ܕܠܡܒܪܟܘܬܟ. ܥܡ ܙܡܝܪ̈ܬܐ ܕܪܘܚܐ ܟܠ ܝܘ̈ܡܝ ܚܝ̈ܝ. ܘܐܚܙܝܟ
ܒܥܠܡܐ ܕܥܬܝܕ. ܟܕ ܫܠܝܛ ܐܢܬ ܥܠ ܚܡܫ ܘܥܠ ܥܣܪ ܡܕܝ̈ܢܢ. ܘܢܫܬܟܚ ܒܗܝܢ ܬܘܒ ܐܦ ܚܢܢ. ܕܡܢܟ ܡܬܪܕܝܢ ܚܢܢ
ܐܦ ܡܬܪܣܝܢܢ.
ܡܦܣ ܐܢܐ ܓܝܪ ܕܢܝܚܘܬܟ ܥܠܬܐ ܕܝܕܥܬܐ ܪܒܬܐ ܗܘܬ ܠܟ. ܡܛܠ ܕܐܦܠܐ ܚܕܐ ܡܢ
ܡܝܬܪ̈ܬܐ ܡܘܠܕܐ ܚܟܡܬܐ ܐܝܟ ܢܝܚܘܬܐ: ܕܒܗ̇ ܡܬܩܠܣ ܐܦ ܡܘܫܐ: ܕܢܝܚ ܗܘܐ ܡܢ ܟܠܗܘܢ ܒܢ̈ܝ ܐܢܫܐ. ܘܡܨܠܐ
ܐܢܐ. ܕܬܠܡܝܕܐ ܕܢܝܚܐ ܐܗܘܐ ܘܐܫܡܫܗ:
ܐܝܟ ܡܝ̈ܐ ܩܪܝܪ̈ܐ ܠܢܦܫܐ ܨܗܝܬܐ܆ ܗܟܢܐ ܗܝ ܣܒܪܬܐ ܛܒܬܐ ܡܢ ܐܪܥܐ ܪܚܝܩܬܐ.
ܘܟܬܝ̈ܒܬܗ ܕܡܕܥܟ ܛܒ ܕܥܟ ܝܩܝܕܘܬܐ ܕܡܢ ܥܡ̈ܠܐ ܓܕܫܬܢ. ܐܝܟ ܐܝܠܝܢ ܕܟܬܒܬ ܫܠܚܬ ܠܢ ܡܢ ܩܕܝܡ ܡܝܬܪܘܬܟ.
ܟܠ ܓܝܪ ܕܚܫܚ ܠܐܝܩܪܢ ܘܠܢܝܚܢ ܣܥܪ ܐܢܬ ܡܢ ܟܠܗ̇ ܢܦܫܟ.
ܘܡܢܐ ܐܨܠܐ ܘܐܫܠ ܠܟ ܡܢ ܡܪܢ ܢܬܠ ܠܟ ܡܪܢ ܟܠܝܠܐ ܕܙܕܝܩܘܬܐ. ܘܬܗܘܐ ܒܪ
ܝܪܬܘܬܐ ܕܩܕܝ̈ܫܐ. ܥܠ ܕܥܒܕܬ ܥܠܝܢ ܪ̈ܚܡܐ: ܘܚܘܝܬ ܠܘܬܢ ܪ̈ܚܡܝ ܚܘܒܐ. ܕܠܝܬ ܐܦܠܐ ܚܕܐ ܡܝܬܪܘܬܐ ܕܪܒܐ
ܡܢ ܗܕܐ. ܕܐܦ ܡܪܢ ܝܫܘܥ ܡܫܝܚܐ܆ ܠܚܘܒܐ ܣܡ ܕܢܗܘܐ ܬܚܘܝܬܐ ܕܬܠܡܝ̈ܕܘܗܝ. ܟܕ ܐܡܪ. ܒܗܕܐ ܢܕܥܘܢ ܒܢܝ̈ܢܫܐ
ܕܬܠܡܝ̈ܕܝ ܐܢܬܘܢ ܟܕ ܚܘܒܐ ܢܗܘܐ ܒܟܘܢ ܠܘܬ ܚܕܕ̈ܐ. ܥܡܗ ܕܚܘܒܐ ܬܩܘܡ ܩܕܡ ܒܝܡ ܕܡܫܝܚܐ. ܘܬܣܒ ܡܢܗ ܓܪܐ
ܕܫܐܠ̈ܬܢ.
ܐܢ ܓܝܪ ܥܠ ܐܦ̈ܝ ܟܣܐ ܕܩܪܝܪ̈ܐ ܐܓܪܐ ܡܠܝܟ܆ ܟܡܐ ܟܝ ܝܕܥܬ ܐܠܗܐ ܬܩܒܠ: ܥܠ
ܐܦ̈ܝ ܟܠ ܕܣܥܪܬ ܠܘܬܢ ܡܢ ܒܪܫܝܬ ܡܝܬܪܘܬܟ. ܕܚܠܦ ܟܠܗܝܢ ܢܦܪܥܟ ܡܪܝܐ ܕܝܢܐ ܕܟܐܢܘܬܐ. ܘܢܓܠܐ ܠܟ ܪ̈ܐܙܝ
ܚܟܡܬܐ. ܘܢܫܠܛܟ ܥܠ ܥܣܪ ܡܕܝ̈ܢܢ. ܕܬܓܕ ܡܢ ܒܝܫܘܬܐ ܠܡܝܬܪܘܬܐ ܢܦ̈ܫܬܐ ܡܠܝ̈ܠܬܐ: ܘܡܢ ܠܐ ܝܕܥܬܐ ܠܘܬ
ܝܕܥܬܗ ܕܡܫܝܚܐ
ܒܩܘܫܬܐ ܝܕܥ ܐܢܐ ܕܗܟܢܐ ܗܝ. ܐܝܟܢܐ ܓܝܪ ܡܨܝܐ ܕܬܬܝܬܪ ܒܪܬ ܩܠܐ ܕܟܬܝ̈ܒܬܐ:
ܡܢ ܩܠ ܢܦܫܐ ܕܒܦܓܪܐ. ܒܪܡ ܕܝܢ ܐܦ ܒܝܕ ܪ̈ܚܡܐ ܟܬܒܝܢ ܚܢܢ ܠܡܚ̈ܒܢܝܢ. ܟܕ ܡܬܕܡܝܢܢ ܠܫܐܠ̈ܝ ܫܠܡܐ
ܚܬܝܬܐ. ܕܗܢܘܢ ܗܠܝܢ ܠܐ ܣܦܩ ܠܗܘܢ ܢܩܦܐ ܕܦܘܡܗܘܢ ܒܠܚܘܕ. ܐܠܐ ܒܐܝ̈ܕܝܗܘܢ ܡܥܦܩܝܢ ܠܦܓܪ̈ܐ ܕܚܕܕ̈ܐ.
ܘܗܟܢܐ ܣܘܚ ܟܠ ܚܕ ܡܢܗܘܢ܆ ܕܠܟܢܬܗ ܒܓܘܗ ܢܣܝܡ. ܐܢܐ ܕܝܢ ܡܘܕܐ ܐܢܐ ܕܗܟܢܐ ܥܗܝܕ ܐܢܬ ܠܝ. ܘܟܬܒ ܐܢܬ ܠܝ
ܕܠܐ ܒܟܝܢܐ܆ ܟܕ ܐܝܬܝܗܝܢ ܟܝܢܝ̈ܬܐ. ܘܡܬܚܙ̈ܝܢ ܕܠܐ ܒܟܝܢܐ܆ ܡܛܠ ܗܠܝܢ ܕܒܒܝܫܘܬܐ ܡܗܠܟܝܢ.
ܕܫܥܬܐ ܡܕܝܢ ܫܒܘܩܝܢܝ ܒܡܕܒܪܐ ܒܥܐ ܐܢܐ ܡܢܟ. ܨܘܠ̈ܦܬܝ ܓܝܪ ܠܐ ܗܘ̈ܝ
ܕܣܡ̈ܡܢܐ ܪ̈ܟܝܟܐ ܐܠܐ ܕܟܘ̈ܝܐ. ܨܠܐ ܕܝܢ ܥܠܝܢ ܕܢܛܥܢ ܚܘܡܐ ܡܣܝܒܪܢܐܝܬ. ܘܢܒܗܬ ܠܒܥܠܕ̈ܒܒܝܢ ܘܢܚܙܐ
ܠܡܪܢ
ܡܚܝ ܠܣܘܣܝܐ ܒܫܒܛܐ ܘܠܚܡܪܐ ܒܙܩܬܐ ܒܥܐ ܐܢܐ ܡܢܟ. ܐܢܐ ܓܝܪ ܕܫܥܬܐ ܓܠܝܙ ܐܢܐ
ܗܘ ܡܢ ܕܠܡܪܗܛ. ܠܐ ܓܝܪ ܡܪܟܒܬܗ ܕܐܠܗܐ ܥܡ ܐܚܪ̈ܢܐ ܨܒܐ ܐܢܐ ܠܡܓܕ܆ ܐܦܠܐ ܠܚܘܕܝ ܠܡܪܝ ܡܫܟܚ ܐܢܐ
ܠܡܫܩܠ. ܥܕܟܝܠ ܓܝܪ ܦܬܓܡܐ ܡܦܢܝܢ ܠܬܠܡܝ̈ܕܐ ܡܪ̈ܘܗܝ ܕܚܡܪܐ. ܘܠܐ ܫܒܩܝܢ ܠܝ ܚܘܫ̈ܒܝ ܚܫ̈ܐ: ܠܡܛܥܢ ܠܡܪܗ
ܕܠܐ ܚܫܘܫܘܬܐ. ܒܕܐܣܪܝܢ ܠܪ̈ܓܠܝ ܘܟܠܝܢ ܠܝ ܡܢ ܪܗܛܐ. ܠܐ ܓܝܪ ܡܡܬܘܡ ܚܙܐ ܗܘܢܐ ܡܕܝܢܬܗ ܕܐܠܗܐ: ܟܡܐ
ܕܐܣܝܪ ܒܝܕ ܪ̈ܓܝܓܬܐ ܒܨܒ̈ܘܬܐ ܡܓܫ̈ܡܬܐ.
ܝܕܝܥܐ ܗܝ ܓܝܪ ܕܠܗܘ ܚܘܫܒܐ ܛܥܝܢ܆ ܐܝܢܐ ܕܚܫܗ ܫܩܝܠ ܒܓܘܗ. ܘܠܘ ܗܝ ܨܒܘܬܐ
ܪܗܛ܆ ܐܝܕܐ ܕܚܫܗ ܠܘܬܗ̇ ܢܓܕ ܠܗ. ܠܐ ܕܝܢ ܡܨܝܐ ܕܢܚܘܬ ܗܢܐ ܡܒܐ: ܐܢ ܚܫܗ ܠܐ ܡܬܦܣܩ. ܐܟܙܢܐ ܓܝܪ ܕܡܓܪ
ܚܘܫܒܐ ܕܠܚܡܐ ܒܟܦܢܐ ܡܛܠ ܟܦܢܗ: ܘܚܘܫܒܐ ܕܫܝܘ̈ܛܝܢ ܡܛܠ ܫܘܒܚܐ ܣܪܝܩܐ. ܗܠܝܢ ܕܝܢ ܚܘܫ̈ܒܐ܆ ܕܨܒܘܬܐ
ܡܓܫ̈ܡܬܐ ܐܝܬܝܗܘܢ ܚܘܫ̈ܒܐ. ܘܥܡ ܗܠܝܢ ܡܪ̈ܢܝܬܐ܆ ܠܝܬ ܠܡܩܒܠܘ ܝܕܥܬܐ ܕܐܠܗܐ. ܡܛܠ ܕܝܕܥܬܐ ܕܐܠܗܐ܆ ܠܘ
ܡܕܡ ܕܛܒܥ ܠܗܘܢܐ ܡܘܕܥܐ. ܠܘ ܓܝܪ ܦܓܪܐ ܗܘ ܐܠܗܐ: ܕܐܝܬ ܠܗ ܓܘܢܐ ܐܘ ܡܘܫܚܬ ܐܣܟܡܐ. ܗܠܝܢ ܓܝܪ ܛܒܥܝܢ
ܠܗ ܠܗܘܢܐ ܒܝܕ ܚܘܫ̈ܒܐ ܐܝܟ ܕܐܡܪܢܢ.
ܡܬܒܥܐ ܠܗ ܗܟܝܠ ܠܗܘܢܐ ܕܥܬܝܕ ܠܡܩܒܠܘ ܝܕܥܬܐ ܕܐܠܗܐ܆ ܕܢܬܓܠܙ ܡܢ ܣܘ̈ܟܠܝ
ܨܒ̈ܘܬܐ. ܠܐ ܕܝܢ ܡܨܝܐ ܠܡܥܪܩ ܡܢ ܚܘ̈ܫܒܐ: ܐܢ ܚܫ̈ܐ ܠܐ ܫܠܚ. ܐܡܪܬ ܓܝܪ. ܕܡܛܠ ܗܠܝܢ ܡܓܪܝܢ ܒܢ ܚܘܫ̈ܒܝ
ܨܒ̈ܘܬܐ ܡܓܫ̈ܡܬܐ. ܘܠܐ ܡܨܝܐ ܕܢܫܕܐ ܡܢܢ ܚܫ̈ܐ: ܐܠܐ ܢܪܚܩ ܡܢ ܗܘܢܢ ܠܥܒܘܬܐ. ܘܪܚܡܬ ܟܣܦܐ ܘܫܘܒܚܐ
ܣܪܝܩܐ. ܠܗܠܝܢ ܓܝܪ ܚܫ̈ܐ ܢܩܝܦܝܢ ܫܐܕ̈ܐ ܕܩܝܡܝܢ ܠܘܩܒܠ ܕܘܒܪ̈ܝܢ. ܡܢ ܗܠܝܢ ܓܝܪ ܓܒܠ ܣܛܢܐ. ܗܠܝܢ ܬܠܬܐ
ܢܣܝܘ̈ܢܝܢ ܕܟܬܝܒܝܢ ܒܣܒܪܬܐ ܘܩܪܒ ܠܡܪܢ ܘܟܕ ܐܬܚܙܝ ܕܡܥܠܝ ܡܢܗܘܢ. ܦܩܕ ܠܗ ܠܣܛܢܐ ܕܙܠ ܠܟ ܠܒܣܬܪܝ.
ܥܪܩ ܓܝܪ ܕܝܘܐ ܕܙܢܝܘܬܐ ܡܢ ܥܨܪܗ ܕܦܓܪܐ. ܘܥܪܩ ܕܝܘܐ ܕܚܡܬܐ: ܡܐ ܕܠܐ ܡܨܐ
ܕܠܚ ܒܝܕ ܪܘܓܙܐ ܥܠ ܐܦ̈ܝ ܡܢ ܓܝܪ ܢܪܓܙ ܒܪܢܫܐ: ܐܢ ܢܒܣܐ ܒܡܐܟܘܠܬܐ ܘܒܡܪ̈ܗܛܐ ܘܒܫܘܒܚܐ ܣܪܝܩܐ. ܥܪܩ
ܕܝܢ ܐܦ ܕܝܘܐ ܕܟܪܝܘܬܐ: ܡܐ ܕܠܐ ܡܨܐ ܡܕܡ ܠܡܚܛܦ. ܩܕܡ ܓܝܪ ܗܘ ܒܪܢܫܐ ܫܕܐ ܡܢܗ ܟܠ ܘܐܬܛܝܒ ܘܠܐ ܐܬܪܗܒ.
ܕܠܘܚܝܐ ܗܘ ܓܝܪ ܠܢܦܫܐ ܚܫܘܫܬܐ ܚܘܫܒܐ ܫܐܕܢܝܐ: ܕܡܥܝܪ ܒܗ ܪܓܬܐ ܘܚܡܬܐ ܕܠܐ ܒܟܝܢܐ.
ܐܢ ܗܟܝܠ ܒܛܝܒܘܬܐ ܕܐܠܗܐ ܢܓܗܐ ܗܘܢܐ ܡܢ ܗܠܝܢ: ܘܢܫܠܚ ܠܒܪܢܫܗ ܥܬܝܩܐ. ܒܥܕܢ
ܨܠܘܬܐ ܬܩܢܘܬܗ ܡܬܚܙܝܐ ܠܗ܆ ܐܝܟ ܣܦܝܠܐ ܐܘ ܒܕܡܘܬܐ ܕܓܘܢܐ ܕܫܡܝܐ. ܕܠܗ̇ ܠܗܕܐ ܐܬܪܐ ܕܐܠܗܐ ܩܪܐ ܟܬܒܐ:
ܕܚܙܘ ܣܒ̈ܐ ܒܛܘܪܐ ܕܣܝܢܝ. ܠܗ ܠܗܢܐ ܐܬܪܐ܆ ܐܦ ܚܙܘܐ ܕܫܠܡܐ ܩܪܐ. ܕܒܗ ܚܙܐ ܐܢܫ ܗܘ ܒܗ: ܠܗܘ ܫܠܡܐ ܕܥܠܝ
ܡܢ ܟܠ ܡܕܥ ܘܡܢܛܪ ܠܒܘ̈ܬܢ. ܒܠܒܐ ܓܝܪ ܕܟܝܐ ܫܡܝܐ ܐܚܪܢܐ ܡܬܛܒܥ. ܕܚܙܘܗ ܢܘܗܪܐ ܗܘ ܘܐܬܪܗ ܪܘܚܢܐ ܗܘ.
ܕܒܗ ܡܬܚܙܝܢ ܟܡܐ ܗܘ ܣܘ̈ܟܠܝܗܘܢ ܡܚܘܝܐ. ܪܬܚܗ̇ ܕܝܢ ܕܚܡܬܐ ܒܝܕ ܪܘܓܙܐ ܓܡܝܪܐܝܬ ܥܛܝܐ
ܛܒ ܪܒ ܟܘܘܢܗ ܕܚܘܒܐ. ܚܠܝܢ ܥܘ̈ܕܠܘܗܝ. ܒܣܝܡܝܢ ܘܚܠܝܢ ܪ̈ܫܝܢܘܗܝ. ܙܕܩܐܝܬ
ܡܕܝܢ ܠܥܠ ܡܢ ܟܠ ܡܝܬܪܘ ܣܡܗ ܡܪܢ. ܘܬܚܘܝܬܐ ܕܬܠܡܝ̈ܕܘܗܝ ܚܘܝܗ ܕܐܝܬܘܗܝ ܟܕ ܐܡܪ ܒܗܕܐ ܢܕܥܘܢ ܟܠܗܘܢ
ܒܢܝ̈ܢܫܐ ܕܬܠܡܝ̈ܕܝ ܐܢܬܘܢ. ܟܕ ܬܚܒܒܘܢ ܠܚܕܕ̈ܐ.
ܗܐ ܓܝܪ ܒܟܘܠ ܒܘܣܡ ܡܩܒܠ ܐܢܐ ܐܓܪ̈ܬܟ. ܘܫܪܐ ܐܢܐ ܟܡܝܪܘܬܐ ܒܝܕ ܦܨܝܚܘܬܐ.
ܘܐܝܟ ܕܒܠܡܐܢܐ ܕܚܝ̈ܐ ܡܥܠܐ ܐܢܐ ܠܗܘܢܝ ܡܢ ܕܠܘܚܝܐ ܕܡܝܬܝܢ ܥܠܘܗܝ ܚܘܫ̈ܒܐ. ܕܐܝܟ ܗܠܝܢ ܓܝܪ ܟܬܒ ܐܢܬ
ܠܢ ܐܝܟ ܡܐ ܕܚܘܒܗ ܕܡܫܝܚܐ ܐܨܚ ܠܟ. ܡܛܠ ܗܕܐ ܗܘܐ ܐܢܐ ܛܠܝܐ ܡܫܬܡܥܢܐ܆ ܕܡܩܒܠ ܟܐܬܐ ܡܢ ܐܒܐ ܚܬܝܬܐ.
ܘܚܕܐ ܐܢܐ ܕܥܬܪ ܐܢܐ ܡܢ ܚܘܒܟ ܕܥܘܗܕܢܗ ܡܒܝܐܐ ܠܝ.
ܘܟܬܝ̈ܒܬܟ ܛܒ ܡܒܣ̈ܡܢ ܠܝ. ܟܕ ܛܒ ܠܗܘܢܝ ܟܠܐ ܐܢܐ ܠܡܬܩܪܒܘ ܠܨܒ̈ܘܬܐ
ܡܓܫ̈ܡܬܐ. ܠܘܬܟܘܢ ܕܝܢ ܕܠܐ ܚܣܡ ܡܫܡܪ ܐܢܐ ܠܗ ܠܡܪܗܛ. ܕܢܗܘܐ ܡܬܕܡܐ ܒܚܘܒܟܘܢ. ܠܡܟܠܝܗ ܓܝܪ ܡܢܟܘܢ
ܒܚܘܒܐ ܗܘ ܠܡܣܟܠܘ. ܕܡܣܟܠ ܕܝܢ ܒܚܘܒܐ ܒܡܫܝܚܐ ܚܛܐ. ܕܗܘܝܘ ܚܘܒܢ. ܘܣܪ ܗܘܢܐ ܒܚܒܪܗ ܒܠܐ ܚܫܘܫܘܬܐ. ܒܝܕ
ܝܕܥܬܐ ܕܫܪܪܐ ܕܬܠܝܬܝܘܬܐ ܩܕܝܫܬܐ
ܛܒ ܡܚܘ̈ܝܢ ܟܬܝ̈ܒܬܟ ܪܚܡܬܟ ܚܬܝܬܐ ܕܠܘܬܢ. ܘܚܘܒܟ ܕܠܐ ܢܟܠܐ. ܘܡܬܕܡܪ ܐܢܐ
ܕܐܝܟܢ ܡܬܕܡ̈ܝܢ ܡܠ̈ܝܟ ܠܢܟܦܘܬܐ ܕܢܦܫܟ. ܘܒܘܝܐܐ ܕܡܢܗܝܢ. ܐܝܟ ܗܘ ܕܢܦܫܐ ܚܝܐ ܒܗ.
ܠܝܬ ܕܝܢ ܠܡܬܩܪܒܘ ܠܕܘܒܪ̈ܐ ܕܕܝܪܝܘܬܐ ܘܠܡܬܐܡܢܘ ܠܘܥܕܐ ܕܡܕܝ̈ܢܬܐ. ܕܠܐ
ܬܬܡܠܐ ܢܦܫܐ ܕܡ̈ܘܬܐ ܣܓܝ̈ܐܬܐ ܘܡܫܚ̈ܠܦܬܐ ܕܡܢ ܠܒܪ ܡܩܒܠܐ. ܕܥܠܝܗܝܢ ܥܠ ܗܠܝܢ܆ ܙܒ̈ܢܝܢ ܣܓܝ̈ܐܢ ܨܠܝܬ
ܠܐܠܗܐ. ܕܐܘ ܠܐ ܢܗ̈ܘܝܢ. ܐܘ ܡܐ ܕܗܘ̈ܝ ܠܐ ܢܓܪ̈ܢ. ܕܠܝܠܐܝܬ ܓܝܪ ܛܒܥ ܗܘܢܐ ܕܡܘ̈ܬܐ ܒܓܘܗ. ܘܒܚܘܫ̈ܒܝ
ܫܐܕ̈ܐ ܡܣܪܗܒ ܠܡܬܬܙܥܘ.
ܡܛܠ ܗܕܐ ܠܘ ܗܝ ܟܕ ܗܝ ܬܩܢܘܬܐ ܐܝܬܝܗ̇ ܕܥܒܕܐ ܘܕܚܙܝܐ. ܠܡܝܬܪܘܬܐ ܓܝܪ ܟܠܐ
ܚܘܫܒܐ ܕܡܢ ܚܫ̈ܐ. ܠܚܙܝܐ ܕܝܢ ܡܥܘܟ܆ ܐܦ ܚܘܫܒܐ ܒܠܚܘܕ ܫܚܝܡܐ. ܬܟܣ ܠܗ ܓܝܪ ܠܣܘܟܠܐ ܪܘܚܢܐ ܪܢܝܐ
ܡܓܫܡܐ. ܐܢ ܗܟܝܠ ܡܨܝܐ ܕܟܕ ܡܓܪ ܐܢܫ ܒܡܕܝܢܬܐ ܘܡܬܗܦܟ ܒܗ: ܕܟܠ ܟܠܗ ܕܠܐ ܨܠܡ ܢܛܪ ܗܘܢܗ ܕܘܢ ܐܢܬ.
ܕܚܠ ܐܢܐ ܓܝܪ ܕܠܡܐ ܟܕ ܒܥܝܢܢ ܕܩܝ̈ܡܢ. ܢܦܠ ܡܢ ܕܥܬܝ̈ܕܢ. ܘܢܬܚܙܐ ܒܥܠܡܐ
ܕܥܬܝܕ: ܕܝܙܦܝܢܢ ܕܠܐ ܟܘܚܕ ܚ̈ܛܐ ܒܚܨܕܐ. ܕܡܢܗܘܢ ܐܢ ܢܙܪܘܥ ܗܫܐ܆ ܢܬܪܣܐ ܒܫܢܬܐ ܫܒܝܥܝܬܐ ܝܬܡ̈ܐ
ܘܐܪ̈ܡܠܬܐ ܒܝܕ ܡܪܢ. ܠܝܬ ܕܝܢ ܠܡܚܨܕ ܕܠܐ ܙܪܥܐ. ܐܦܠܐ ܠܡܙܪܥ ܡܨܝܐ ܐܢ ܩܕܡܐܝܬ ܟܘ̈ܒܐ ܠܐ ܢܥܩܘܪ.
ܘܙܪܥܐ ܢܛܡܘܪ ܡܢ ܥܘܦܐ ܕܚܛܦ. ܐܢ ܕܝܢ ܐܝܠܝܢ ܕܚܛܦܝܢ ܙܪܥܐ: ܒܗܝ ܕܟܠܝܢ ܠܢ ܠܡܦܠܚ ܙܕܝܩܘܬܐ ܚܛܘܦ̈ܐ
ܡܬܩܪܝܢ. ܐܝܠܝܢ ܕܡܟܣܝܢ ܙܪܥܐ ܒܝܕ ܕܦܠܚܝܢ ܡܝܬܪܘܬܐ܆ ܙܕܩܐ ܕܡܛܫ̈ܝܢܐ ܢܬܩܪܘܢ.
ܡܬܠܛܫܐ ܕܝܢ ܗܕܐ ܡܓܠܬܐ ܒܝܕ ܢܝܚܘܬܐ. ܕܒܗ̇ ܡܣܬܗܕ ܡܘܫܐ ܕܢܝܚ ܗܘܐ ܡܢ
ܟܠܗܘܢ ܒܢܝ̈ܢܫܐ. ܘܣܘ̈ܟܠܝ ܥܠܡܐ ܗܢܐ ܒܠܚܘܕܘܗܝ ܥܦܐ. ܡܓܠܬܐ ܕܝܢ ܐܝܟ ܕܒܦܠܐܬܐ ܡܬܩܪܝܐ܆ ܗܝ ܕܠܒܟܐ ܠܗ
ܐܝܕܐ: ܘܡܚܘܝܐ ܟܝܢܗܝܢ ܕܡܝܬܪ̈ܬܐ. ܐܝܟ ܡܠܬ ܐܝܘܒ ܕܐܡܪ. ܕܠܝܬ ܗܘܐ ܡܕܡ ܥܘܠܐ ܒܐܝ̈ܕܝ. ܐܦ ܫܠܝܡܘܢ ܬܘܒ
ܐܡܪ. ܕܟܘ̈ܒܐ ܝܥܝܢ ܒܐܝܕܗ ܕܪܘܝܐ. ܟܘ̈ܒܐ ܕܝܢ ܡܬܐܡܪܝܢ ܚܘܫ̈ܒܝ ܚܫ̈ܐ. ܐܢ ܕܝܢ ܗܕܐ ܗܟܢܐ ܗܝ܆ ܝܕܝܥܐ
ܗܝ ܕܗܢܘ ܚܨܘܕܐ ܚܝܠܬܢܐ܆ ܗܘ ܕܡܛܝ ܠܓܒܪܐ ܓܡܝܪܐ: ܠܡܫܘܚܬܐ ܕܩܘܡܬܐ ܕܫܘܡܠܝܗ ܕܡܫܝܚܐ. ܝܠܘ̈ܕܐ ܓܝܪ
ܘܢܫ̈ܐ ܡܢܟܪܝܢ ܐܢܘܢ ܠܗܢܐ ܚܨܕܐ. ܝܠܘ̈ܕܐ ܓܝܪ ܥܠ ܚܠܒܐ ܣܢܝܩܝܢ. ܘܢܫ̈ܐ ܙܪܥܐ ܡܩܒ̈ܠܢ. ܕܒܝܕ ܝܠܕܐ
ܕܒ̈ܢܝܐ ܢܚܝ̈ܝܢ. ܐܢ ܢܩܘܡ ܒܗܡܢܘܬܐ ܘܒܩܕܝܫܘܬܐ ܘܒܢܟܦܘܬܐ
ܡܢܐ ܣܥܪ ܠܘܬܟܘܢ ܡܪܢ ܐܘ ܐܝܟܢ ܐܬܩܢ ܨܒܘܬܟܘܢ ܠܐ ܝܕܥ ܐܐ. ܒܪܡ ܗܕܐ ܝܕܥ
ܐܢܐ܆ ܕܙܕܩܐ ܗܝ ܕܒܟܠ ܙܒܢ ܢܘܕܐ ܠܐܠܗܐ. ܐܝܟ ܕܟܬܝܒ. ܐܒܪܟ ܠܡܪܝܐ ܒܟܠܙܒܢ. ܘܒܟܠܙܒܢ ܬܒܒ̈ܚܬܗ ܒܦܘܡܝ.
ܐܣܝܐ ܗܘ ܓܝܪ ܕܢܦܫ̈ܬܐ. ܘܨܒܐ ܕܟܠܗܘܢ ܒܢܝ̈ܢܫܐ ܢܓܘܢ ܘܢܐܬܘܢ ܠܝܕܥܬܐ ܕܫܪܪܐ.
ܒܥܐ ܐܢܐ ܡܢܟܘܢ܆ ܠܐ ܐܢܫ ܢܬܪܨ ܠܡܪܢ ܘܢܐܡܪ: ܕܗܕܐ ܙܕܩܐ ܗܘܬ ܠܡܗܘܐ ܠܢ:
ܘܠܐ ܗܝ ܠܡܓܕܫ ܠܢ. ܡܢܘ ܓܝܪ ܝܕܥ ܪܥܝܢܗ ܕܡܪܝܐ: ܐܘ ܡܢܘ ܗܘܐ ܠܗ ܒܥܠ ܡܠܟܐ. ܒܥܡܛܢܐ ܕܐܢ ܐܝܟ ܡܠܬ
ܐܝܘܒ. ܘܥܢܢܐ ܟܣܝܬܗ ܘܠܐ ܡܬܚܙܐ. ܝܕܥ ܗܘ ܓܝܪ ܐܝܠܝܢ ܣܡ̈ܡܢܐ ܢܓܕܝܢ ܡܢ ܒܝܫܘܬܐ ܠܡܝܬܪܘܬܐ. ܘܡܢ ܠܐ
ܝܕܥܬܐ ܠܘܬ ܝܕܥܬܐ ܡܩܪܒܝܢ. ܠܟܠ ܒܥܐ ܠܡܚܐ. ܘܠܡܐܬܐ ܠܝܕܥܬܐ ܕܫܪܪܐ.
ܫܡܥ ܕܝܢ ܐܦ ܠܫܠܝܡܘܢ ܚܟܝܡܐ ܕܒܡ̈ܬܠܘܗܝ ܐܡܪ: ܒܪܝ ܠܐ ܬܡܐܢ ܠܟ ܒܡܪܕܘܬܗ
ܕܡܪܝܐ: ܘܠܐ ܬܬܪܦܐ ܐܡܬܝ ܕܡܢܗ ܡܬܟܘܢ ܐܢܬ. ܠܡܢ ܕܪܚܡ ܓܝܪ ܡܪܝܐ ܪܕܐ ܠܗ. ܘܡܢܓܕ ܠܟܠ ܒܪܐ ܕܡܩܒܠ
ܥܠܘܗܝ. ܐܢ ܝܬܝܪ ܢܬܪܕܐ ܝܬܝܪ ܢܬܪܚܡ. ܢܓܕ̈ܐ ܐܘܠ̈ܨܢܐ ܓܡܪܝܢ ܒܢ. ܘܐܝܟ ܡܠܬ ܛܘܒܢܐ ܦܘܠܘܣ܆ ܐܘܠܨܢܐ
ܡܣܝܒܪܢܘܬܐ ܓܡܪ ܒܢ. ܘܡܣܝܒܪܢܘܬܐ ܒܘܩܝܐ܆ ܘܒܘܩܝܐ ܣܒܪܐ. ܣܒܪܐ ܕܝܢ ܠܐ ܡܒܗܬ. ܡܛܠ ܕܥܒܕܗ ܕܣܒܪܐ ܝܕܥܬܐ
ܗܝ ܕܐܠܗܐ. ܕܠܗ ܡܫܬܘܝܢ ܐܝܠܝܢ ܕܚܠܝܨܐܝܬ ܡܬܟܬܫܝܢ ܒܐܓܘܢܐ ܕܥܠ ܐܦ̈ܝ ܡܝܬܪܘܬܐ. ܘܝܩܘܕܘܬܗ ܕܗܢܐ ܥܠܡܐ
ܚܠܝܡܐܝܬ ܡܣܝܒܪܝܢ
ܝܕܥܬܟ ܕܛܒ ܪܓܝܓܐ ܠܟ ܝܕܥܬܐ ܕܐܠܗܐ. ܘܝܨܦ ܐܢܬ ܕܙܕܝܩܘܬܐ. ܘܨܒܝܬ ܕܒܝܕ
ܦܘܩܕܢܐ ܠܐ ܚܫܘܫܐ ܠܡܗܘܐ. ܠܝܬ ܓܝܪ ܐܝܟ ܕܒܩܘܫܬܐ: ܠܡܩܡ ܕܠܐ ܕܟܝܘ ܩܕܡ ܐܠܗܐ. ܡܛܠ ܕܡܬܟܪܟ ܗܘܢܐ ܟܕ
ܚܫܘܫܐ ܗܘ܆ ܘܠܡܚܣܢ ܬܩܢ. ܒܕܣܥܪ ܡܥܒܕܢܘܬܐ ܕܪ̈ܓܝܓܬܐ. ܡܬܟܠܐ ܕܝܢ ܡܢ ܛܘܥܝܝ܆ ܡܐ ܕܗܘܐ ܠܐ ܚܫܘܫܐ ܘܦܓܥ
ܒܠܐ ܦܓܪ̈ܢܐ: ܕܗܢܘܢ ܡܡܠܝܢ ܐܪ̈ܓܝܓܬܗ ܪ̈ܘܚܢܝܐ.
ܡܨܝܐ ܗܝ ܓܝܪ ܕܟܠ ܟܠܗ ܢܬܦܨܐ ܡܢ ܒܝܫܘܬܐ. ܡܛܠ ܕܡܢ ܪܫܝܬܐ܆ ܙܪ̈ܥܐ
ܕܡܝܬܪܘܬܐ ܣܝܡܝܢ ܗܘܘ ܒܢ. ܕܒܝܫܘܬܐ ܕܝܢ ܠܐ. ܠܘ ܓܝܪ ܕܗܘ ܡܕܡ ܕܡܩܒ̈ܠܢܐ ܚܢܢ: ܐܦ ܚܝܠܗ ܩܢܝܢܢ. ܕܗܐ
ܟܕ ܡܨܝܢܢ ܕܠܐ ܢܗܘܐ ܐܝܬܝܢ. ܡܕܡ ܕܠܐ ܐܝܬܘܗܝ ܠܐ ܩܢܝܢܢ ܚܝܠܗ. ܐܢ ܗܘ ܕܚܝ̈ܠܐ ܡܘ̈ܙܓܐ ܐܢܘܢ. ܡܕܡ ܕܠܐ
ܐܝܬܘܗܝ ܐܦ ܠܐ ܡܘܙܓܐ ܗܘ.
ܐܝܬ ܗܘܐ ܙܒܢܐ ܕܠܝܬ ܗܘܬ ܒܝܫܘܬܐ. ܘܗܘܐ ܙܒܢܐ ܕܠܐ ܐܝܬܝܗ̇: ܠܝܬ ܕܝܢ ܙܒܢܐ
ܕܠܝܬ ܗܘܬ ܡܝܬܪܘܬܐ. ܘܠܐ ܗܘܐ ܙܒܢܐ ܕܠܐ ܐܝܬܝܗ̇. ܠܐ ܓܝܪ ܡܬܥܛܝܢ ܙܪ̈ܥܐ ܕܡܝܬܪܘܬܐ. ܘܡܦܝܣ ܠܝ ܗܘ
ܥܬܝܪܐ ܕܟܬܝܒ ܒܣܒܪܬܐ. ܕܟܕ ܡܫܬܢܩ ܒܫܝܘܠ ܠܐܚ̈ܘܗܝ ܚܐܢ ܗܘܐ. ܚܢܢܐ ܕܝܢ ܙܪܥܐ ܗܘ ܛܒܐ ܕܡܝܬܪܘܬܐ. ܘܐܢ
ܗܘ ܕܥܘܬܪܗ̇ ܕܢܦܫܐ ܐܝܕܥܬܐ ܗܝ: ܘܡܣܟܢܘܬܗ̇ ܠܐ ܝܕܥܬܐ܆ ܩܕܝܡ ܗܘ ܡܕܝܢ ܥܘܬܪܐ ܠܡܣܟܢܘܬܐ. ܘܫܘܡܠܝܐ
ܕܬܪܝܢܐ ܓܘܠܙܢܐ ܗܘ܀
ܟܪܐ ܗܘܐ ܙܒܢܐ ܕܥܢܝܢܢ. ܘܒܗܘܪܐܝܬ ܐܬܬܣܝܡܘ ܒܢ ܡܕܡ ܡܕܡ ܡܢ ܙܪ̈ܥܐ
ܕܡܝܬܪܘܬܟ. ܕܠܡܦܠܚ ܐܢܘܢ ܥܣܩܐ ܗܝ. ܐܠܐ ܡܩܕܡ ܠܢ ܒܘܝܐܐ ܕܟܬܝܒ̈ܬܟ. ܐܝܟ ܡܐ ܓܝܪ ܕܓܕܫ ܠܐܝܠܝܢ
ܕܒܚܙ̈ܘܝ ܚܠ̈ܡܐ: ܚܩ̈ܠܬܐ ܡܫܪܝܢ ܠܡܚܨܕ. ܗܕܐ ܓܕܫܬ ܠܢ ܒܪܚܡܬ ܚܘܒܟ. ܕܒܩܠܝܠ ܙܒܢܐ ܣܓܝ̈ܐܬܐ ܥܦܝܢ ܚܢܢ.
ܗܘܬ ܠܢ ܕܝܢ ܥܠܬܐ ܕܗܢܐ ܚܘܦܛܐ܆ ܗܝ ܣܦܝܢܬܐ ܕܐܘܒܠܬܢ ܠܡܨܪܝܢ. ܘܡܪܢ ܝܫܘܥ
ܡܫܝܚܐ. ܗܘ ܕܢܓܕܢ ܠܘܬ ܚܘܪܒܐ. ܙܒܢܐ ܗܘ ܗܫܐ ܠܡܣܥܪ ܚܩ̈ܠܝ ܚܕܕ̈ܐ: ܘܠܡܬܠ ܘܠܡܣܒ ܗܒܒ̈ܝ ܟܬܝܒ̈ܬܐ.
ܘܠܡܬܟܠܠܘ ܒܐܕ̈ܫܐ ܕܚܕܕ̈ܐ. ܘܠܡܚܕܬܘ ܚܘܒܗ ܕܡܫܝܚܐ: ܕܗܘ ܡܩܝܡ ܠܢ ܩܕܡ ܚܘܒܐ ܪܝܫܝܐ ܕܗܘܝܘ ܡܪܢ.
ܓܠܝܐ ܗܝ ܗܟܝܠ ܕܒܩܘ̈ܠܣܘܗܝ ܕܡܫܝܚܐ ܓܘܕܐ ܫܒܝܚܬܐ ܕܩܕܝ̈ܫܐ ܡܨܛܒܬܐ.
ܘܡܫܬܒܗܪܐ ܒܚܘܒܗ ܚܬܝܬܐ. ܕܐܦ ܛܘܒܢܐ ܐܫܥܝܐ ܢܒܝܐ܆ ܠܘܬܗ ܚܐܪ ܗܘܐ ܟܕ ܐܡܪ. ܡܪܝܐ ܐܠܗܝ ܐܢܬ: ܐܫܒܚܟ
ܘܐܘܕܐ ܠܫܡܟ: ܕܥܒܕܬ ܥܒܕ̈ܐ ܕܬܕܡܘܪܬܐ. ܐܦ ܛܘܒܢܐ ܕܘܝܕ ܢܒܝܐ ܗܟܢܐ ܐܡܪ. ܠܫܢܝ ܢܘܕܐ ܒܙܕܝܩܘܬܟ ܘܟܠܗ
ܝܘܡܐ ܬܫܒ̈ܚܬܟ. ܢܗܘܐ ܡܒܪܟ ܡܢ ܟܠ ܐܡܝܢ
ܝܕܥ ܐܢܐ ܠܟ ܕܛܒ ܚܫܚ ܐܢܬ ܠܡܫܢܝܘ ܡܢ ܥܠܡܐ. ܘܡܨܐ ܐܢܬ ܗܘ ܕܬܫܬܠܛ ܥܠ
ܫܐܕ̈ܐ. ܘܠܡܢܐ ܡܫܬܘܚܪ ܐܢܬ ܠܐ ܝܕܥ ܐܢܐ. ܡܢܐ ܕܝܢ ܢܐܬܪ ܒܪܢܫܐ ܐܢ ܟܠܗ ܥܠܡܐ ܢܩܢܐ: ܘܢܦܫܗ ܢܘܒܕ ܐܘ
ܢܚܣܪ. ܐܒܕܢܐ ܕܝܢ ܕܢܦܫܐ ܐܝܬܘܗܝ ܡܦܘܠܬܐ ܕܡܢ ܚܝ̈ܐ ܕܠܥܠܡ ܘܚܘܣܪܢܐ ܕܢܦܫܐ ܗܢܘ: ܓܘܠܙܢܐ ܕܡܢ ܙܪ̈ܥܐ
ܟܝ̈ܢܝܐ. ܕܡܙܝܥܝܢ ܒܢ ܐܝܕܥܬܗ ܕܐܠܗܐ.
ܠܐ ܬܬܡܬܢ ܒܥܐ ܐܢܐ ܡܢܟ. ܐܠܐ ܥܪܘܩ ܡܢ ܗܢܐ ܥܠܡܐ ܕܠܐ ܬܬܘܐ ܒܚܪܬܟ. ܡܐ
ܕܚܙܝܬ ܡܟ̈ܣܐ ܘܙܢܝ̈ܬܐ ܕܩܕܡܝܢ ܠܟ ܠܡܠܟܘܬܐ ܕܫܡܝܐ܀
ܙܒܢܐ ܢܓܝܪܐ ܫܬܩܬ ܡܢܢ ܓܒܪܐ ܕܬܕܡܘܪܬܐ. ܕܐܢܬ ܩܕܡܝ ܢܨܒܬ ܒܝ ܫܒܫܬܐ ܘܒܝܬ
ܟܬܝܒ̈ܬܟ ܒܪܟܝܟܘܬ ܠܒܐ ܐܫܩܝܬܗ: ܟܒܪ ܕܝܢ ܐܦ ܚܢܢ ܠܐ ܬܙܥܘܪ ܐܥܝܩܢܟ. ܕܠܐ ܫܕܪܢܢ ܠܟ ܩܪܛܠܐ ܕܡܠܐ ܣܓܘ̈ܠܐ
ܕܟܬܝ̈ܒܬܢ. ܥܠܬܐ ܕܝܢ ܕܗܕܐ ܐܢܐ ܠܐ ܐܝܬܝ. ܐܠܐ ܗܘ ܕܒܬܪܟܢ ܢܨܒ ܒܝ ܫܒܫܬܐ ܕܒܝܫܘܬܐ: ܘܨܥܪ ܠܟܠܗܘܢ ܦܠܚ̈ܝ.
ܗܫܐ ܕܝܢ ܕܗܘܝܬ ܟܪܘܙܐ ܕܬܝܒܘܬܐ ܒܝܕ ܡܪܢ: ܫܒܘܩ ܠܝ ܥܠ ܕܐܗܡܝܬ. ܘܡܫܬܘܕܐ ܐܢܐ ܕܬܘܒ ܗܕܐ ܠܐ ܐܥܒܕ
ܐܝܬ ܠܟ ܣܝܡܬܐ ܘܠܐ ܡܬܪܣܐ ܐܢܬ ܠܢ. ܐܠܐ ܛܫܝܬܗ ܡܢܢ ܠܐܓܢܟ. ܘܡܢܐ ܢܬܪܥܐ
ܐܡܪ ܠܢ: ܥܠ ܗܝ ܕܟܬܝܒܐ ܕܪܘܚܐ ܕܚܟܡܬܐ ܪܚܡ ܐܢܫܐ ܗܘ. ܐܘ ܐܝܟܢ ܫܠܡܐ ܗܝ ܕܐܡܝܪܐ ܒܡܙܡܘܪܐ: ܕܙܕܝܩܐ
ܟܠܗ ܝܘܡܐ ܡܪܚܡ ܘܡܘܙܦ.
ܐܢܐ ܝܕܥ ܐܢܐ ܕܝܕܥܬܐ ܕܐܠܗܐ. ܟܕ ܡܬܪܣܝܐ ܡܬܬܪܣܝܐ. ܘܡܐ ܕܝܗܒܐ ܢܣܒܐ. ܩܨܝ
ܗܟܝܠ ܠܚܡܟ ܠܟܦܢܐ܆ ܘܠܕܠܐ ܬܛܠܝܠ ܐܥܠ ܠܒܝܬܟ. ܗܘ ܓܝܪ ܕܝܗܒ ܠܟ ܡܘܗܒܬܐ ܕܟܗܢܘܬܐ ܗܕܐ ܠܡܥܒܕ ܡܢ ܟܠܗ̇
ܢܦܫܟ ܦܩܕ ܠܟ
ܟܬܘܒ ܠܢ ܐܦ ܗܫܐ ܬܐܘܦܪܐ ܢܟܦܐ ܟܕ ܚܕܐ ܐܢܬ. ܕܢܚܙܐ ܓܝܪ ܒܡܪܢ ܦܩܝܕܝܢܢ. ܘܨܠܐ
ܥܠܝ ܕܠܐ ܐܗܘܐ ܡܐܟܘܠܬܐ ܠܬܥ̈ܠܐ. ܐܠܐ ܡܢܬܗ ܕܡܪܝܐ: ܗܘ ܕܦܪܩܢ ܡܢ ܡܪ̈ܘܬܐ ܣܓܝ̈ܐܐ: ܘܩܪܒܢ ܠܡܪܘܬܐ
ܕܐܒܘܗܝ. ܒܣܝ ܕܝܢ ܒܟܝܢܐ ܦܓܪܢܐ܆ ܕܡܢ ܒܪܫܝܬ ܡܬܚܒܠܢܐ ܗܘ. ܘܬܘܒ ܠܚܒܠܐ ܫܪܟ ܝܨܦ ܕܝܢ ܕܨܠܡ ܐܠܗܐ܆ ܕܕܠܐ
ܛܡܐܘ ܡܢ ܦܓܪܐ ܢܦܘܩ
ܒܪܝܟ ܗܘ ܐܠܗܐ ܕܗܝܡܢܟ ܩܝܫܘܬܐ ܩܕܝܫܬܐ: ܠܡܥܡܕܘ ܢܦ̈ܫܬܐ ܒܡܝܬܪܘܬܐ ܘܒܝܕܥܬܐ
ܕܐܠܗܐ. ܗܕܐ ܗܝ ܓܝܪ ܒܩܘܫܬܐ ܩܫܝܫܘܬܐ ܕܒܪܘܚ. ܠܡܩܒܠܘ ܝܕܥܬܐ ܪܘܚܢܝܬܐ: ܘܠܡܩܪܐ ܢܦ̈ܫܬܐ ܡܢ ܒܝܫܘܬܐ
ܠܡܝܬܪܘܬܐ. ܘܡܢ ܠܐ ܝܕܥܬܐ ܠܐܝܕܥܬܗ ܕܡܫܝܚܐ. ܠܘ ܓܝܪ ܐܝܟ ܕܒܙܒܢܐ ܗܘܢܐ ܡܢ ܗܘܢܐ ܩܫܝܫ. ܡܕܡ ܓܝܪ ܕܕܠܐ
ܦܓܪ ܗܘ. ܐܦ ܕܠܐ ܙܒܢܐ ܗܘ. ܡܬܩܫܫ ܕܝܢ ܐܢܗܘ ܕܥܠܒ ܒܡܝܬܪܘܬܐ ܘܒܝܕܥܬܐ.
ܐܢܐ ܕܝܢ ܕܠܐ ܫܘܐ ܐܢܐ ܠܗܕܐ. ܒܡܕܒܪܐ ܐܝܟ ܕܒܐܟܣܘܪܝܐ ܐܫܬܕܝܬ. ܠܡܣܝܒܪܘ
ܕܝ̈ܢܐ ܥܠ ܐܦ̈ܝ ܪ̈ܘܫܥܝ ܣܓܝ̈ܐܐ. ܐܢܬ ܕܝܢ ܨܠܐ ܥܠܝ ܒܥܐ ܐܢܐ ܡܢܟ. ܕܐܬܡܨܐ ܕܐܦܪܘܥ ܡܕܐܬܐ܆ ܘܐܥܪܘܩ ܡܢ
ܒܥܠܕܪܐ ܘܡܢ ܫܘ̈ܢܩܐ ܕܥܬܝܕܝܢ ܠܝ ܒܐܝ̈ܕܘܗܝ
ܣܥܪܬ ܠܡܢ ܕܝܬܒ ܒܚܫܘܟܐ ܘܒ̈ܛܠܠܝ ܬܝܒܘܬܐ ܘܐܢܗܪܬ ܢܘܗܪܐ ܠܥܝ̈ܢܐ ܕܐܡܝܢܐܝܬ
ܚܝܪ̈ܢ ܠܒܘܝܐܐ. ܘܡܢܐ ܐܦܪܘܥ ܠܡܪܝܐ ܥܠ ܐܦ̈ܝ ܒܘܝܐܐ ܕܟܬܝ̈ܒܬܟ: ܕܒܗܝܢ ܬܪܨܬ ܠܢܦܫܝ ܕܫܚܝܩܐ ܗܘܬ
ܒܩܘܛܥܐ. ܘܥܗܝܕ ܐܢܬ ܠܟܠܒܐ ܡܝܬܐ: ܕܡܛܠ ܣܘܓܐܐ ܕܒܝ̈ܫܬܝ ܫܕܐ ܐܢܐ ܒܡܕܒܪܐ ܥܕܡܐ ܠܝܘܡܢܐ. ܕܐܦܠܐ ܥܘܦܐ
ܩܪܒ ܠܝ ܐܝܟ ܕܢܓܡܪ ܒܣܪܐ ܕܒܝ̈ܫܬܝ: ܘܢܥܨܐ ܥܝ̈ܢܐ ܕܙܒ̈ܢܝܢ ܣܓܝ̈ܐܢ ܐܝܟ ܕܒܣܘܓܐܐ ܥܠ ܐܒܐ ܪܘܚܢܐ
ܓܚ̈ܟܢ.
ܐܠܐ ܡܘܕܐ ܐܢܐ ܠܡܪܢ ܘܠܚܣܝܘܬܟ܆ ܕܡܢܐ ܐܢܬ ܠܝ ܥܡ ܥܪ̈ܒܝܟ. ܒܪܡ ܕܝܢ ܥܕܪ ܠܝ
ܒܕܡܠܐ ܐܢܐ ܫܘ̈ܚܢܐ ܣܓܝ̈ܐܐ. ܠܡܟܬܪܘ ܠܒܪ ܡܢ ܥܢܟ ܩܕܝܫܬܐ ܒܡܕܒܪܐ
ܐܚܐ ܦܠܕܝܣ ܐܘܫܛ ܠܝ ܟܬܝ̈ܒܬܐ ܕܚܣܝܘܬܟ܆ ܕܒܗܝܢ ܡܢܝܬ ܒܝ̈ܫܬܗ ܕܗܢܐ ܥܠܡܐ.
ܕܥܕ̈ܝܢ ܥܠ ܠܒܢ ܘܡܥܦ̈ܝܢ ܠܗܘܢܢ. ܐܢܐ ܕܝܢ ܟܕ ܩܪܝܬ ܘܠܡܚܣܢ ܐܪܓܫܬ ܐܘܕܝܬ ܠܡܪܢ ܕܚܝܒܢܝ ܒܠܐ ܝܕܥܬܐ:
ܘܐܝܟ ܕܠܒܥܝܪܐ ܕܠܐ ܡܠܬܐ. ܟܕܝܢ ܒܪܚܝܐ ܠܡܬܟܪܟܘ ܕܠܐ ܚܙܝܐ.
ܒܪܡ ܟܬܝ̈ܒܬܐ ܕܐܝܟ ܗܠܝܢ ܛܒ ܚܫ̈ܚܢ ܠܝܚܝ̈ܕܝܐ ܫܐܕ̈ܐ ܓܝܪ ܒܝܕ ܫܘܒܚܐ
ܣܪܝܩܐ܆ ܢܘܚܐ ܪܒܐ ܕܝܡܐ ܡܫܬܘܕܝܢ ܘܛܘܒܢܐ ܕܡܝܬܪܘܬܐ ܐܘ ܕܝܕܥܬܐ ܠܐ ܡܚܘܝܢ. ܗܘܝ ܗܟܝܠ ܟܬܒ ܠܝ ܕܐܝܟ
ܗܠܝܢ ܘܡܥܝܪ ܕܡܟܘܬܝ ܒܥܐ ܐܢܐ ܡܢܟ. ܚܙܐ ܐܢܐ ܓܝܪ܆ ܕܣܓܝܘ ܠܗܘܢ ܒܝ ܚܠ̈ܡܝ ܫܘܒܚܐ ܣܪܝܩܐ. ܟܕ ܛܒ
ܣܡ̈ܡܢܝ ܨܥܪܐ ܡܢ ܐܣܝܐ ܕܢܦ̈ܫܬܐ ܬܟܒܝܢ ܥܠܝ. ܘܕܚܠ ܐܢܐ ܕܠܡܐ ܐܦ ܥܠ ܢܦܫܝ ܢܐܡܪ: ܕܐܣܝܢܗ̇ ܠܒܒܠ ܘܠܐ
ܐܬܣܝܬ. ܐܘ ܕܠܡܐ ܢܐܡܪ ܕܠܝܬ ܠܡܥܨܒ ܐܦܠܐ ܠܡܪܟܟܘ ܒܡܫܚܐ.
ܡܬܕܡܪ ܐܢܐ ܕܝܢ ܒܐܘܡܢܘܬܗܘܢ ܕܫܐܕ̈ܐ: ܐܝܟܢ ܡܢ ܟܠ ܨܒܘ ܢܣܒܝܢ ܥܠ̈ܠܬܐ. ܣܩܐ
ܚܫܚ ܠܗܘܢ ܠܫܘܒܚܐ ܣܪܝܩܐ. ܘܡܐܢܐ ܪܝܫܝܐ. ܘܡܠܬܐ ܘܫܬܩܐ. ܘܣܒܥܐ ܘܟܦܢܐ. ܘܡܬܪܚܩܢܘܬܐ ܘܚܘܠܛܢܐ ܕܥܡ
ܐܢܫܐ. ܫܦܝܪ ܡܕܝܢ ܐܢܫ ܡܢ ܐܚ̈ܐ ܩܪܝܗܝ ܠܫܘܒܚܐ ܣܪܝܩܐ: ܩܘܪܛܒܐ ܕܡܢ ܟܠ ܓܒ̈ܝܢ ܕܒܨ. ܒܪܡ ܗܕܐ ܢܬܕܟܪ.
ܕܡܫܝܚܐ ܡܪܢ ܒܟܘ̈ܒܐ ܐܬܟܠܠ. ܒܩܘܪ̈ܛܒܐ ܕܝܢ ܠܐ. ܕܥܣܩܘܬ ܡܣܠܝܘܬܗܘܢ ܐܝܟ ܕܒܦܠܐܬܐ ܢܚܘܐ. ܐܢܐ ܕܝܢ
ܡܗܝܡܢ ܐܢܐ ܒܡܪܢ܆ ܕܩܐܡ ܐܢܐ ܠܘܩܒܠ ܗܠܝܢ. ܟܕ ܡܬܚܝܠ ܐܢܐ ܒܨܠܘ̈ܬܟ܆ ܘܚܙܐ ܐܢܐ ܦܘܪܩܢܗ ܕܐܠܗܐ
ܚܢܢ ܟܬܒܢܢ ܠܟ ܠܘ ܥܢܝܢ ܐܓܪܬܐ. ܐܠܐ ܥܘܕܠܐ ܕܛܒ ܪܒ. ܥܠ ܕܫܠܚܬ ܠܢ ܐܓܪܬܐ:
ܘܐܥܝܪܬ ܒܢ ܣܘܓܐܐ ܕܚܝܠܐ ܕܫܘܒܚܐ ܣܪܝܩܐ. ܡܐܢܬ ܠܝ ܒܩܪܝܢܐ ܕܩܘ̈ܠܣܝܟ. ܗܢܘ ܕܝܢ. ܒܐܦ̈ܣܘܢܝܬܐ ܕܫܘܒܚܐ
ܣܪܝܩܐ. ܠܐ ܕܝܢ ܘܠܐ ܠܡܟܬܒ ܗܟܢܐ: ܠܐܝܠܝܢ ܕܡܪܚܩܝܢ ܡܢ ܥܠܡܐ: ܘܠܡܪܦܝܘ ܢܦ̈ܫܬܗܘܢ ܕܢܣܝ̈ܣܢ ܒܚܫ̈ܐ
ܘܪ̈ܚܡܢ ܣܪ̈ܝܩܬܐ.
ܐܠܐ ܕܠܩܘܒܠܐ ܕܗܠܝܢ ܡ̈ܠܐ ܘܠܐ ܠܡܟܬܒ. ܬܒܝ ܒܡܕܒܪܐ ܢܦܫܐ ܕܘܝܬܐ. ܦܠܘܚ
ܠܐܠܗܐ ܒܨܘܡܐ ܘܒܨܠܘܬܐ. ܠܐ ܗܘܝܬܝ ܡܕܝܩܐ ܒܥܠܡܐ ܕܣܓܝ ܒܣܓܝ̈ܐܬܐ ܐܕܘܝܟܝ ܗܘܝܬܝ ܥܗܝܕܐ ܛܘ̈ܒܥܝܟܝ ܗܠܝܢ
ܥܬܝ̈ܩܐ. ܗܘܝܬܝ ܥܗܝܕܐ ܠܓܝ̈ܣܐ ܕܟܡܐ ܙܒ̈ܢܝܢ ܐܕܘܝܘܟܝ. ܠܐ ܬܛܥܝܢ ܠܝܡܐ ܘܠܗܠܝܢ ܓܠ̈ܠܐ ܒܥܪܝܪ̈ܝܐ. ܠܐ
ܥܗܝܕܬܝ ܟܕ ܡܬܒܪܐ ܗܘܝܬܝ ܒܠܡܐܢܐ ܕܢܟܦܘܬܐ: ܐܝܟܢ ܛܒܥܬܝ ܣܦܝܢܬܟܝ܆ ܥܡ ܟܠܗܘܢ ܚܘܫ̈ܒܝ ܢܟܦܘܬܟܝ. ܠܐ
ܝܕܥܐ ܐܢܬܝ ܡܢܐ ܓܕܫܟܝ: ܟܕ ܢܩܫܬ ܣܦܝܢܬܟܝ ܠܟܐܦܐ ܕܩܫܝܘܬܟܝ. ܕܐܬܢܩܒܝ ܥܘܡܩܐ ܕܣܦܝܢܬܟܝ: ܘܥܠܘ ܡܠܐܘܗ̇
ܡܝ̈ܐ ܕܐܟܬܐ. ܘܟܠܗ ܐܘܣܝܐ ܕܨܠܘܬܟܝ ܐܘܒܕܘ.
ܥܗܕܝ ܠܪܝܚ ܝܥܢܘܬܐ ܕܢܫܒ ܡܢ ܫܡܝ ܚܟܐ. ܘܠܗܝܩ ܠܣܘܓܐܐ ܕܪ̈ܓܝܓܬܐ. ܥܗܕܝ
ܕܟܡܐ ܛܘܒ̈ܥܝܢ ܣܥܪܐ ܪܚܡܬ ܟܣܦܐ: ܘܟܡܐ ܦܪܒܝܢ ܡܥܝܪܐ ܒܒܢܝ̈ܢܫܐ. ܚܒܘܫ̈ܝܐ ܘܒܝܬ ܐܣܝܪ̈ܐ. ܘܣܘܓܐܐ
ܕܡܐܢ̈ܝ ܫܢ̈ܕܐ ܡܫܚ̈ܠܦܐ. ܕܟܕ ܒܗܠܝܢ ܚܪ ܛܘܒܢܐ ܫܠܝܚܐ܆ ܫܦܝܪ ܩܪܗ̇ ܠܪܚܡܬ ܟܣܦܐ ܥܩܪܐ ܕܟܠܗܝܢ ܒܝ̈ܫܬܐ.
ܥܠ ܓܠܠܐ ܕܝܢ ܕܫܘܒܚܐ ܣܪܝܩܐ ܐܘ ܕܫܘܒܗܪܐ ܐܘ ܕܓܘܕܦܐ: ܕܥܒܪܘܗ̇ ܠܣܦܝܢܬܐ: ܘܟܣܝܘܗܝ ܠܗܘܢܐ ܩܘܒܪܢܛܐ
ܡܢܐ ܐܝܬ ܠܡܐܡܪ. ܗܠܝܢ ܘܕܐܝܟ ܗܠܝܢ ܘܠܐ ܠܡܟܪܙܘ ܒܐܕ̈ܢܝܗܘܢ ܕܐܝܠܝܢ ܕܢܦܩܝܢ ܡܢ ܥܠܡܐ. ܐܝܟ ܕܠܡܥܒܕ
ܫܝܢܐ ܒܢܦ̈ܫܬܗܘܢ ܕܘ̈ܝܬܐ: ܕܡܢ ܫܐܕ̈ܐ ܣܓܝ̈ܐܐ ܘܡܫܚ̈ܠܦܐ ܡܬܕܠ̈ܚܢ. ܗܘ ܓܝܪ ܕܟܬܒ ܩܘܠܣܐ ܠܗܘ ܕܡܪܚܩ ܡܢ
ܝܬܒܐ܆ ܕܡܐ ܠܓܒܪܐ ܕܪܡܐ ܒܐܬܘܢܐ ܕܫܓܝܪ: ܐܘ ܣܪܩܬܐ ܐܘ ܚܒܬܐ ܐܘ ܩܢܝ̈ܐ: ܕܝܬܝܪܐܝܬ ܢܬܢܒܪܫ.
ܟܬܒܬ ܠܝ ܕܝܢ ܬܘܒ܆ ܐܝܟ ܗܘ ܕܒܥܠ̈ܕܒܒܐ ܡܩܪܒܝܢ ܥܡܢ. ܐܢܐ ܕܝܢ ܡܢ ܒܢܝ̈ܢܫܐ
ܠܐ ܕܚܠ ܐܢܐ. ܐܠܐ ܕܚܠ ܐܢܐ ܡܢ ܥܣܘ. ܕܠܡܐ ܢܐܬܐ ܢܡܚܝܢܝ: ܘܐܡܐ ܥܡ ܒܢ̈ܝ ܢܫܩܦ: ܘܢܥܒܕܝܘܗܝ ܠܗܘܢܝ
ܡܝܬܐ ܡܢ ܝܕܥܬܐ: ܘܕܠܐ ܒܢ̈ܝܢ ܢܥܒܕܝܗ̇ ܠܬܪܥܝܬܝ ܕܓܠܝܙܐ ܡܢ ܦܐܪ̈ܝ ܡܝܬܪܘܬܐ ܠܒܥܠ̈ܕܒܒܐ ܕܝܢ ܡܬܚܙܝ̈ܢܐ
ܡܛܐܒ̈ܢܐ ܩܪܐ ܐܢܐ. ܪ̈ܕܘܝܐ ܐܢܘܢ ܓܝܪ ܕܢܦܫܝ ܣܪܝܩܬ ܫܘܒܚܐ ܒܝܕ ܩܠ̈ܠܝܗܘܢ. ܐܢܐ ܓܝܪ ܠܐܝܠܝܢ ܕܡܨܚܝܢ
ܠܝ ܠܐ ܥܕܠܐ ܐܢܐ ܘܠܐ ܕܚܩ ܐܢܐ ܡܢܝ ܠܐܣܝܐ ܕܢܦܫ̈ܬܐ. ܕܚܘ̈ܠܡܢܐ ܒܝܕ ܥܨܒܐ ܕܫܝܛܘܬܐ ܡܩܪܒ ܠܝ. ܝܕܥ ܐܢܐ
ܓܝܪ ܡܢܐ ܓܕܫ ܠܐܝܠܝܢ ܕܡܬܚܪܝܢ ܠܘܩܒܠ ܐܣܘ̈ܬܐ: ܐܝܟܢ ܡܬܐܣܪܝܢ ܒܥܪ̈ܩܐ ܘܕܠܐ ܒܨܒܝܢܗܘܢ ܡܬܓܙܪܝܢ.
ܒܪܡ ܗܕܐ ܝܕܥ ܐܢܐ ܬܟܠܝܐܝܬ. ܕܐܝܠܝܢ ܕܣܕܩܝܢ ܥܕܬܗ ܕܡܪܝܐ܆ ܪܚܝܩܝܢ ܐܢܘܢ ܡܢ
ܨܠܘܬܐ ܕܟܝܬܐ. ܐܢ ܓܝܪ ܥܫܘ̈ܩܐ ܡܬܩܪܝܢ ܐܝܠܝܢ ܕܣܩܘܒܠܝܝܢ ܠܗܘܢܐ ܒܥܕܢܐ ܕܨܠܘܬܐ: ܘܡܚܫܟܝܢ ܠܗ ܐܝܟ
ܕܒܥܘ̈ܕܠܐ ܠܕܠܐ ܥܕܠܝ܆ ܡܢܐ ܟܝ ܢܥܒܕܘܢ ܐܢ ܢܫܟܚܘܢ ܥܠܬܐ ܕܐܝܟ ܗܕܐ. ܠܟ ܕܝܢ ܡܦܝܣ ܐܢܐ܆ ܕܗܘܝܬ ܪܚܝܩ
ܡܢ ܣܘܥܪ̈ܢܐ ܕܐܝܟ ܗܠܝܢ. ܘܠܐ ܗܘܝܬ ܡܬܕܒܪ ܐܢܬ ܠܡ̈ܠܐ ܡܫܚ̈ܠܦܬܐ. ܥܠܡܐ ܓܝܪ ܗܢܐ ܒܝܫ ܗܘ. ܐܢ ܕܝܢ
ܕܠܝܚ ܝܬܝܪ ܢܥܪܘܩ ܡܢܗ. ܐܢܐ ܓܝܪ ܫܘܝܐܝܬ ܡܢ ܐܝܩܪܐ ܘܡܢ ܨܥܪܐ ܕܚܠ ܐܢܐ. ܠܐܝܩܪܐ ܓܝܪ ܫܘܒܚܐ ܣܪܝܩܐ
ܢܩܝܦ. ܘܠܨܥܪܐ ܐܟܬܐ: ܗܠܝܢ ܕܝܢ ܬܪ̈ܝܗܘܢ ܚܫ̈ܐ܆ ܛܒ ܡܢܟܪܝܢ ܡܢ ܬܩܢܘܬܐ ܡܫܝܢܬܐ.
ܐܣܠܐ ܠܐܝܠܝܢ ܕܪܚܡܝܢ ܨܘܡܐ ܒܠܚܘܕ. ܕܟܕ ܡܢ ܚܘܫ̈ܒܝ ܟܪܣܐ ܠܐ ܡܬܥܡܛܝܢ. ܐܠܐ
ܒܪܚܡܬ ܟܣܦܐ ܘܒܐܟܬܐ ܘܒܪܘܓܙܐ: ܘܒܫܘܒܚܐ ܣܪܝܩܐ ܘܒܫܘܒܗܪܐ ܚܘܫ̈ܒܝܗܘܢ ܡܛܒܥܝܢ. ܠܐ ܗܟܝܠ ܬܗܘܐ ܕܠܐ
ܒܘܝܢ ܒܥܐ ܐܢܐ ܡܢܟ. ܘܠܐ ܬܣܒܪ ܕܨܝ̈ܡܐ ܒܠܚܘܕ ܡܩܒܠܝܢ ܐܝܕܥܬܐ ܕܐܠܗܐ. ܡܢ ܚܕ ܓܝܪ ܕܦܐ ܠܐ ܡܬܓܡܪܐ
ܣܦܝܢܬܐ. ܐܦܠܐ ܡܢ ܚܕܐ ܠܒܬܐ ܡܬܒܢܐ ܒܝܬܐ. ܢܝܫܗ ܓܝܪ ܕܕܝܪܝܐ ܗܢܘ. ܕܠܐ ܡܢ ܚܕ ܚܘܫܒ ܢܫܪܝܘܗܝ ܠܗܘܢܗ:
ܘܢܗܦܘܟ ܢܐܣܪܝܘܗܝ ܒܐܚܪܢܐ. ܐܠܐ ܟܠ ܟܠܗ ܢܚܪܪ ܗܘܢܗ ܡܢ ܚܘܫ̈ܒܐ ܛܡ̈ܐܐ: ܘܢܩܝܡܝܘܗܝ ܩܕܡ ܡܫܝܚܐ.
ܐܒܗ̈ܬܐ ܓܝܪ ܪ̈ܘܚܢܐ. ܠܘ ܒܗܝ ܕܥܠ ܣܓܝ̈ܐܐ ܥܒܝܕܝܢ ܡܬܩܪܝܢ ܐܒܗ̈ܬܐ. ܘܐܠܐ
ܐܦ ܠܛܪܝ̈ܒܘܢܐ ܕܐܝܬ ܗܘܐ ܠܗܘܢ ܠܡܫܬܡܗܘ ܐܒܗ̈ܬܐ. ܐܒܗ̈ܬܐ ܓܝܪ ܗܠܝܢ ܐܢܘܢ. ܐܝܠܝܢ ܕܐܝܬ ܠܗܘܢ ܡܘܗܒܬܐ
ܕܪܘܚܐ: ܘܝܠܕܝܢ ܠܣܓܝ̈ܐܐ ܠܡܝܬܪܘܬܐ ܘܠܝܕܥܬܐ ܕܐܠܗܐ. ܐܢܐ ܕܝܢ ܟܕ ܚܙܝܬ ܕܒܥܠܬ ܡܠܬܐ ܡܬܟܢܫܝܢ ܣܓܝ̈ܐܐ:
ܕܠܐ ܡܢ ܪܒܘܬ ܟܪܣܐ ܘܠܐ ܡܢ ܪܘܓܙܐ ܡܚܡܣܢܝܢ: ܘܠܐ ܐܡܝܢܝܢ ܒܨܠܘܬܐ܆ ܫܠܝܬ ܡܢ ܕܠܡܐܡܪ. ܕܠܐ ܢܗܘܘܢ ܐܚ̈ܝ
ܓܢܬܐ ܕܬܠܝܐ
ܚܠܝܢ ܣܘܟ̈ܠܐ ܕܥܠ ܗܢܐ ܥܠܡܐ. ܡܪܝܪ ܕܝܢ ܗܘ ܥܠܡܐ. ܘܝܬܝܪܐܝܬ ܡܪܝܪ ܐܝܟ ܡܐ
ܕܐܢܫ ܒܝܕ ܚܫ̈ܐ ܢܬܚܫܚ ܒܗ. ܝܕܥ ܐܢܬ ܗܘ ܕܝܢ ܐܒܐ ܡܝܩܪܐ. ܕܐܚܪܬܐ ܗܝ ܪܓܬ ܦܓܪܐ ܐܝܟ ܦܓܪܐ܆ ܘܐܚܪܬܐ ܗܝ
ܪܓܬ ܢܦܫܐ ܐܝܟ ܟܝܢܐ ܕܠܐ ܦܓܪ. ܘܬܪ̈ܬܝܗܝܢ ܐܟܚܕܐ ܠܡܗܘܐ ܠܐܢܫ ܠܐ ܡܨܝܐ. ܠܐ ܓܝܪ ܐܢܫ ܡܫܟܚ ܦܠܚ ܠܬܪܝܢ
ܡܪ̈ܘܢ. ܐܘ ܓܝܪ ܠܚܕ ܢܣܢܐ ܘܠܐܚܪܢܐ ܢܪܚܡ. ܐܘ ܠܚܕ ܢܩܦ ܘܒܐܚܪܢܐ ܢܒܣܐ.
ܒܪܡ ܟܡܐ ܕܡܨܝܬ ܩܨܝ ܠܚܡܟ ܠܟܦܢܐ. ܠܐܝܠܝܢ ܕܡܛܠ ܒܝܫܘܬܐ ܐܝܬܝܗܘܢ ܕܠܐ
ܬܛܠܝܠ܆ ܐܥܠ ܐܢܘܢ ܠܒܝܬܐ ܕܡܝܬܪܘܬܟ. ܐܢ ܚܙܝܬ ܕܥܪܛܠܝ ܐܠܒܫܝܗܝ. ܘܡܢ ܒܢ̈ܝ ܒܝܬܐ ܕܙܪܥܟ܆ ܠܐ ܬܗܦܟ
ܐܦ̈ܝܟ. ܙܪܥܐ ܕܝܢ ܐܡܪ ܐܢܐ܆ ܠܘ ܗܢܘܢ ܕܡܢ ܟܝܢܐ. ܐܠܐ ܠܗܢܘܢ ܕܡܢ ܬܩܢܘܬܐ ܡܣܬܩܒܠܝܢ ܠܢ. ܐܢ ܐܢܫ̈ܝܢ
ܕܝܢ ܡܢ ܐܚ̈ܐ ܐܡܪܝܢ ܠܢ ܒܝܫܐܝܬ܆ ܠܐ ܬܬܕܡܪ. ܥܗܕ ܠܐܣܘ̈ܬܐ. ܕܩܘܒܠ ܛܝܒܘܬܐ ܠܘ ܡܢ ܡܝ̈ܬܐ ܒܥܝܢ܆ ܐܠܐ
ܡܢ ܚܝ̈ܐ
ܝܕܥ ܐܢܐ ܕܚܫܚܬܐ ܕܠܘܬ ܚܝ̈ܐ ܒܝܕ ܐܠܗܐ ܛܒ ܩܢܐ ܐܢܬ. ܩܠܝܠ ܕܝܢ ܡܗܡܝܬ
ܒܐܘܪܚܟ ܒܗܝ ܕܛܒ ܡܢ ܡܝܬܪܘܬܐ ܝܩܝܪ ܒܥܝ̈ܢܝܟ ܥܠܡܐ ܡܬܚܒܠܢܐ ܕܥܒܪ. ܗܢܐ ܕܐܢ ܐܢܫ ܒܝܕ ܚܫ̈ܐ ܢܬܚܫܚ ܒܗ܆
ܛܒ ܡܫܢܐ ܠܗ ܠܗܘܢܐ ܡܢ ܝܕܥܬܐ ܕܐܠܗܐ. ܟܕ ܣܝܡܝܢ ܥܡܗ ܒܥܠܕ̈ܒܒܐ ܗܠܝܢ ܕܝܐܝܒܝܢ ܠܐܒܕܢܢ.
ܙܒܢܐ ܗܘ ܗܫܐ ܠܡܦܠܚ ܠܡܪܝܐ ܘܠܡܥܒܕ ܦܐܪ̈ܐ ܕܙܕܝܩܘܬܐ. ܡܛܠ ܕܡܢ ܦܐܪ̈ܐ
ܕܙܕܝܩܘܬܐ. ܫܘܚ ܐܝܠܢ ܚܝ̈ܐ ܕܐܝܬܘܗܝ ܡܫܝܚܐ: ܒܠܒܘ̈ܬܐ ܕܟܝ̈ܐ ܕܒܢ̈ܝ ܐܢܫܐ. ܕܗܘ ܡܛܠ ܥܠ ܟܠܗܘܢ ܐܝܠܝܢ
ܕܡܢ ܫܘܠܗܒ ܒܝܫܘܬܐ ܝܩܕܝܢ
ܠܘ ܐܝܟ ܚܟܝܒܡܐ ܐܝܟ ܡܬܠ̈ܝ ܪܘܚܐ: ܩܒܠܬ ܟܘܘܢܐ ܐܝܟ ܕܐܪܚܡ ܠܡܟܣܢܝ. ܐܠܐ
ܐܝܟ ܒܪܢܫܐ ܡܠܐ ܚܫ̈ܐ ܕܡܬܚܛܦ ܠܡܬܦܨܝܘ ܡܢ ܚܫ̈ܐ. ܡܘܕܐ ܐܢܐ ܓܝܪ ܕܕܚܘܠܬܢ ܐܢܐ: ܡܢ ܗܘ ܕܕܚܠ ܡܢ ܛܠܝܬܐ
ܒܝܘ̈ܡܝ ܦܝܠܛܘܣ. ܬܘܒ ܕܝܢ ܥܡ ܗܝ ܕܕܚܠܬ܆ ܫܘܒܩܢܐ ܫܐܠ ܗܘܝܬ ܕܐܣܒ. ܕܠܐ ܐܛܪܐ ܢܦܫܐ ܕܫܩܝܠܐ ܒܟܪܣܐ
ܘܨܝܪ ܒܗ̇ ܛܒܥܗ ܕܡܫܝܚܐ: ܘܐܩܒܠ ܡܣܡ ܒܪܫܐ ܕܬܘܪܐ ܕܩܘܪܐ. ܝܐܐ ܠܗ ܓܝܪ ܠܟܘܘܢܐ ܕܗܘܐ ܡܡܙܓ. ܕܟܕ ܐܡܪ
ܣܘܥܪܢܐ܆ ܢܠܒܫ ܦܪܨܘܦܐ ܕܚܠܬܐ.
ܥܠ ܚܫ̈ܐ ܕܝܢ ܕܗܫܐ ܐܚܝܕܝܢ ܠܟ܆ ܣܒܪ ܐܢܐ ܕܝܕܥܬܐ ܗܕܐ ܗܝ. ܚܘܫ̈ܒܐ ܕܝܢ
ܕܡܗܪܝܢ ܠܢ܆ ܡܢܗܘܢ ܐܝܬܝܗܘܢ ܡܢ ܟܝܢܐ ܡܢܗܘܢ ܕܝܢ ܡܢ ܡܚܝܠܘܬܐ ܕܨܒܝܢܢ. ܡܢ ܟܝܢܐ ܗܟܝܠ ܐܝܬܝܗܘܢ ܗܠܝܢ
ܕܡܢ ܕܡܐ ܘܡܢ ܐܒܗ̈ܝܢ. ܡܢ ܨܒܝܢܐ ܕܝܢ ܗܠܝܢ ܕܡܢ ܚܡܬܐ ܘܡܢ ܪܓܬܐ ܓܕܫܝܢ ܠܢ. ܘܗܠܝܢ ܕܝܢ ܕܡܢ ܟܝܢܐ ܒܝܕ
ܢܘܓܪܐ ܡܗܪܝܢ ܠܢ. ܒܗܝ ܕܗܘܢܐ ܒܝܕ ܪܢܝܐ܆ ܒܓܘܗ ܛܒܥ ܠܗܘܢ ܘܡܬܥܦܐ ܒܗܘܢ ܕܠܗ ܐܡܝܪ ܒܟܬܒܐ: ܕܥܒܪ
ܩܠܝܠܐܝܬ ܘܠܐ ܬܫܬܘܚܪ ܒܗܝ ܕܘܟܬܐ. ܗܠܝܢ ܕܝܢ ܕܡܢ ܨܒܝܢܐ ܡܗܪܝܢ ܠܗܘܢܐ ܐܢ ܢܫܠܡ ܠܗܘܢ. ܟܬܝܒ ܓܝܪ ܕܠܐ
ܬܨܒܐ ܠܡܗܘܐ ܥܡܗܘܢ. ܡܗܪܝܢ ܕܝܢ ܒܝܕ ܢܘܓܪܐ ܘܒܝܕ ܥܒܕܐ ܕܚܛܝܬܐ.
ܡܨܝܢ ܐܢܘܢ ܓܝܪ ܚܘܫ̈ܒܐ ܟܝܢܝ̈ܐ ܕܢܥܝܪܘܢ ܚܡܬܐ ܘܪܘܓܙܐ. ܒܕܡܛܥܝܢ ܠܗܘܢܐ
ܒܥܝܢܣܘܢ ܣܓܝܐܐ. ܐܠܐ ܝܨܦ ܠܡܣܒ ܣܡ̈ܡܢܐ ܕܥܗܝܢ: ܕܐܝܬܝܗܘܢ ܟܦܢܐ ܘܨܗܝܐ ܘܫܗܪܐ. ܘܡܬܪܚܩܢܘܬܐ ܕܡܢ ܝܬܒܐ
ܘܨܠܘܬܐ. ܝܕܥ ܗܘ ܓܝܪ ܟܦܢܐ ܚܣܝܢܐ ܐܦ ܒܗ ܒܟܝܢܐ ܠܡܟܦܪ. ܘܬܦܝܣܟ ܐܢܬܬܐ ܕܒܫܡܪܝܢ ܕܡܢ ܟܦܢܗ̇ ܐܟܠܬ
ܒܪܗ̇: ܣܒ̈ܥܐ ܓܝܪ ܟܠ ܕܥܗܢ ܠܣܒܥܘܬܗܘܢ ܬܒܥܝܢ. ܘܒܕܟܝܘܬ ܨܠܘܬܐ ܒܣܝܢ. ܘܟܒܪ ܬܐܡܪ ܕܟܕ ܝܨܦ ܐܢܐ
ܕܚܝ̈ܝܗܘܢ ܕܗܢܘܢ ܕܐܝܬܝܗܘܢ ܕܝܠܝ܆ ܠܐ ܛܠܡ ܐܢܐ ܦܘܩܕܢܐ. ܐܣܬܟܠ ܒܨܢܝܥܘܬ ܒܝܫܐ܆ ܕܒܝܕ ܛܒܬܐ ܓܡܪ ܒܟ
ܡܘܬܐ: ܘܡܢ ܚܘܫ̈ܒܐ ܟܝܢܝ̈ܐ ܡܚܫܟ ܗܘܢܟ. ܚܘܪ ܕܝܢ ܒܐܣܝܐ ܕܢܦܫ̈ܬܐ܆ ܕܒܝܕ ܛܒܬܐ ܓܡܪ ܒܟ ܡܘܬܐ: ܘܡܢ
ܚܘܫ̈ܒܐ ܟܝܢܝ̈ܐ ܡܚܫܟ ܗܘܢܟ. ܚܘܪ ܕܝܢ ܒܐܣܝܐ ܕܢܦܫ̈ܬܐ܆ ܕܒܝܕ ܩܪܒܐ ܡܘܬܪܢܐ ܡܓܡܪ ܠܗܘܢ ܠܚܘܫ̈ܒܐ ܗܠܝܢ
ܟܕ ܐܡܪ. ܕܡܢ ܕܐܬܐ ܠܘܬܝ ܘܠܐ ܣܢܐ ܠܐܒܘܗܝ ܘܠܐܡܗ: ܘܠܐܚ̈ܗܘܝ ܘܠܐܢܬܬܗ ܘܠܒ̈ܢܘܗܝ ܐܦ ܠܢܦܫܗ܆ ܠܐ ܡܫܟܚ
ܕܢܗܘܐ ܠܝ ܬܠܡܝܕܐ. ܒܗܝ ܕܚܫܟ ܠܒܗ ܒܡܪ̈ܢܝܬܐ ܗܠܝܢ.
ܘܠܐ ܬܣܒܪ ܕܡܕܡ ܗܘ ܪܒ: ܕܡܛܠ ܝܕܥܬܐ ܕܐܠܗܐ ܢܫܒܘܩ ܐܢܫ ܒܢ̈ܝ ܛܘܗܡܗ.
ܣܓܝ̈ܐܐ ܓܝܪ ܕܐܛܦܝܣܘ ܠܦܬܟܪ̈ܐ. ܕܒܚܘ ܒܢ̈ܝܗܘܢ ܘܒܢ̈ܬܗܘܢ ܠܫܐܕ̈ܐ. ܝܕܥ ܐܢܐ ܣܓܝ̈ܐܐ ܡܢ ܐܚ̈ܐ ܒܝܕ
ܗܠܝܢ ܚܘܫ̈ܒܐ ܒܩܢܕܝܢܘܣ ܢܦܠܘ. ܒܗܝ ܕܐܓܪܘ ܒܗܘܢ. ܘܟܕ ܐܬܘ ܠܘܬܗܘܢ ܐܒܗ̈ܝܗܘܢ ܐܘ ܐܚ̈ܝܗܘܢ ܚܕܝܐܝܬ ܒܓܘ
ܟܘܪܚܐ ܠܐ ܩܒܠܘ ܐܢܘܢ. ܗܦܟܗ̇ ܓܝܪ ܒܝܫܐ ܒܪܘܓܙܐ ܠܬܪܥܝܬܐ ܒܦܪܨܘܦ ܡܬܪܚܩܢܘܬܐ.
ܟܬܪ ܗܟܝܠ ܒܡܕܒܪܐ ܒܫܠܝܐ ܒܥܐ ܐܢܐ ܡܢܟ. ܘܐܬܐܡܢ ܒܨܠܘܬܐ ܕܠܐ ܪܘܓܙܐ ܘܕܠܐ
ܡܚܫ̈ܒܬܐ܆ ܘܠܐ ܬܬܠ ܐܬܪܐ ܠܒܝܫܐ. ܡܛܝܐ ܗܝ ܓܝܪ ܒܐܝ̈ܕܝ ܡܪܝܐ ܕܩܪܟ܆ ܕܐܦ ܠܗܠܝܢ ܢܩܪܒ ܠܘܬ ܚܝ̈ܐ. ܘܢܬܠ
ܝܪܬܘܬܐ ܥܡ ܗܠܝܢ ܕܒܢܘܗܪܐ ܡܩܕܫܝܢ
ܣܦܩܐܝܬ ܒܝܐܬܢ ܐܘ ܢܟܦܐ: ܘܒܝܕ ܒܘܝܐܐ ܕܥܟܬܝܗܝ ܠܐܒܠܐ. ܘܠܐ ܝܗܒܬ ܐܬܪܐ
ܠܕܡ̈ܥܐ. ܠܐ ܓܝܪ ܙܕܩ ܠܡܬܐܒܠܘ ܥܠ ܕܡ̈ܟܐ. ܕܠܐ ܗܘܬ ܟܪܝܐ ܠܢ: ܐܝܟ ܫܪܟܐ ܕܐܢܫܐ ܕܣܒܪܐ ܠܝܬ ܠܗܘܢ.
ܘܐܠܐ ܐܝܟܢ ܢܐܡܪ ܠܐܠܗܐ: ܐܦܩ ܢܦܫܝ ܡܢ ܒܝܬ ܚܒܘܫܝܐ ܕܐܘܕܐ ܠܫܡܟ: ܐܝܟ ܗܘ ܕܟܠܝܢܐ ܗܘ ܡܢ ܦܓܪܐ: ܠܡܣܩܘ
ܬܘܕܝܬܐ ܕܟܝܬܐ ܠܐܠܗܐ. ܪ̈ܓܫܐ ܓܝܪ ܠܘܬ ܡܓܫ̈ܡܬܐ ܪܟܝܢܝܢ. ܗܘܢܐ ܕܝܢ ܠܘܬ ܪ̈ܘܚܢܝܬܐ ܚܐܪ. ܕܒܗܝܢ
ܡܬܬܢܝܚ ܐܠܗܢ. ܒܕܓܘܢ ܒܫܪܘܝܘܬܗ ܕܗܘܢܐ ܡܡܐܢ ܒܡܓܫ̈ܡܬܐ. ܟܕ ܡܬܝܐܒ ܕܠܚܘܕܗܘܝ ܢܡܠܠ ܥܡ ܐܠܗܐ.
ܐܝܟ ܙܢܐ ܓܝܪ ܕܠܝܬ ܦܘܪܣܐ ܕܕܠܐ ܦܓܪܐ ܢܬܩܪܒ ܠܡܓܫ̈ܡܬܐ܆ ܗܟܢܐ ܠܐ ܡܨܝܐ
ܕܒܠܥܕ ܡܢ ܗܘܢܐ ܠܐ ܦܓܪܢܐ ܠܡܚܙܝܗ ܠܠܐ ܦܓܪܢܐ. ܠܘ ܕܝܢ ܗܘܢܐ ܚܙܐ ܠܐܠܗܐ܆ ܐܠܐ ܗܘܢܐ ܕܟܝܐ. ܛܘܒܝܗܘܢ
ܠܡ ܠܐܝܠܝܢ ܕܕܟܝܢ ܒܠܒܗܘܢ ܕܗܢܘܢ ܢܚܙܘܢ ܠܐܠܗܐ. ܚܘܪ ܕܝܢ ܕܛܘܒܐ ܠܘ ܠܕܟܝܘܬܐ ܝܗܒ. ܐܠܐ ܠܚܙܝܐ.
ܕܟܝܘܬܐ ܓܝܪ ܠܐ ܚܫܘܫܘܬܐ ܗܝ ܕܢܦܫܐ ܡܠܝܠܬܐ. ܚܙܝܐ ܕܝܢ ܕܐܠܗܐ܆ ܝܕܥܬܐ ܗܝ ܕܩܘܫܬܐ ܕܚܕܐ ܐܝܬܘܬܐ
ܕܬܠܝܬܝܘܬܐ ܣܓܝܕܬܐ. ܕܠܗ ܚܙܝܢ ܐܝܠܝܢ ܕܗܪܟܐ ܓܡܪܘ ܕܘܒܪ̈ܐ: ܘܒܝܕ ܦܘܩ̈ܕܢܐ ܕܟܝܘ ܢܦܫܗܘܢ.
ܚܕ ܕܝܢ ܡܢ ܦܘܩ̈ܕܢܐ ܘܪܫܝܐ ܗܢܘ ܚܘܒܐ. ܕܥܡܗ ܚܙܐ ܗܘܢܐ ܠܚܘܒܐ ܩܕܡܝܐ ܕܗܘܝܘ
ܐܠܗܐ. ܒܝܕ ܚܘܒܢ ܓܝܪ. ܠܚܘܒܗ ܕܐܠܗܐ ܕܠܘܬܢ ܚܙܝܢܢ. ܐܝܟ ܕܐܡܝܪ ܒܡܙܡܘܪܐ: ܡܠܦ ܠܡܣ̈ܟܢܐ ܐܘܪܚܗ. ܢܝܚ
ܗܘܐ ܕܝܢ ܡܘܫܐ ܡܢ ܟܠܗܘܢ ܒܢܝ̈ܢܫܐ. ܘܫܦܝܪ ܐܡܪܬ ܪܘܚܐ ܕܩܘܕܫܐ ܕܚܘܝ ܐܘܪ̈ܚܬܗ ܠܡܘܫܐ.
ܗܕܐ ܢܝܚܘܬܐ ܐܠܒܟ ܠܐܚ̈ܝܟ܆ ܕܥܣܩܐܝܬ ܗܘܘ ܦܥܝܢ ܠܘܬ ܚܡܬܐ. ܘܠܐ ܚܕܐ ܓܝܪ ܡܢ
ܒܝ̈ܫܬܐ ܐܝܟ ܚܡܬܐ: ܥܒܕܐ ܠܗ ܠܗܘܢܐ ܕܢܗܘܐ ܫܐܕܐ ܒܝܕ ܕܠܝܚܘܬܗ ܕܪܘܓܙܐ. ܐܡܝܪ ܓܝܪ ܒܡܙܡܘܪܐ. ܕܚܡܬܗܘܢ
ܐܝܟ ܕܚܘܝܐ ܚܪܡܢܐ. ܘܠܐ ܬܣܒܪ ܕܡܕܡ ܐܚܪܝܢ ܐܝܬܘܗܝ ܫܐܕܐ: ܐܠܐ ܒܪܢܫܐ ܕܕܠܝܚ ܒܪܘܓܙܐ: ܘܢܦܝܩ ܡܢ
ܡܪܓܫܢܘܬܐ. ܡܛܠ ܕܦܓܪ̈ܝܗܘܢ ܕܫܐܕ̈ܐ܆ ܓܘܢܐ ܐܝܬ ܠܗܘܢ ܘܐܣܟܡܐ. ܐܠܐ ܡܢ ܡܪܓܫܢܘܬܢ. ܒܕܓܘܢ ܡܐ ܕܨܒܝܢ
ܠܡܬܚܙܝܘ ܠܐܢܫ܆ ܝܬܝܪܐܝܬ ܒܟܠ ܐܣܟ̈ܡܝ ܦܓܪܢ ܡܬܕܡܝܢ. ܘܦܓܪ̈ܐ ܕܝܠܗܘܢ ܠܐ ܡܚܘܝܢ.
ܠܐ ܗܟܝܠ ܐܢܫ ܡܢ ܐܚ̈ܐ ܢܬܕܡܐ ܠܚܘܝܐ. ܘܠܐ ܬܬܩܒܠ ܥܠܝܟ ܥܢܘܝܘܬܐ ܕܪܚܝܩܐ
ܡܢܗ̇ ܢܝܚܘܬܐ. ܗܘ ܓܝܪ ܕܡܪܚܩ ܡܢ ܡܐܟܘܠܬܐ ܘܡܢ ܡܫܬܝܐ: ܘܥܝܪܐ ܒܓܘܗ ܚܡܬܐ ܕܠܐ ܒܘܠܝܬܐ܆ ܕܡܐ ܠܣܦܝܢܬܐ
ܕܐܝܬܝܗ̇ ܒܡܨܥܬܗ ܕܝܡܐ: ܘܡܕܒܪ ܠܗ̇ ܫܐܕܐ ܕܪܘܓܙܐ.
ܐܡܪ ܠܝ ܓܝܪ. ܠܡܢܐ ܟܕ ܨܒܐ ܟܬܒܐ ܠܡܩܠܣܘܬܗ ܠܡܘܫܐ: ܫܒܩ ܟܠܗܝܢ ܐܬܘ̈ܬܐ
ܕܥܒܕ ܘܠܢܝܚܘܬܐ ܒܠܚܘܕ ܐܬܕܟܪ. ܠܐ ܓܝܪ ܐܡܪ ܕܡܘܫܐ ܒܬܪܬܥܣܪܐ ܡܚ̈ܘܢ ܪܕܗ̇ ܠܡܨܪܝܢ. ܘܐܦܩ ܡܢܗ̇ ܥܡܐ
ܝܩܝܪܐ ܘܠܐ ܐܡܪ ܕܡܘܫܐ ܩܕܡܐܝܬ ܩܒܠ ܢܡܘܣܐ ܡܢ ܐܠܗܐ. ܘܕܝܕܥܬܐ ܕܥܠܡ̈ܐ ܕܗܘܘ ܩܒܠ. ܘܠܐ ܐܡܪ ܕܒܚܘܛܪܐ
ܦܠܓ ܝܡܐ ܕܣܘܦ: ܘܡܢ ܟܐܦܐ ܕܛܪܢܐ ܐܦܩ ܡܝ̈ܐ ܠܥܡܐ ܕܨܗܝ. ܐܠܐ ܐܡܪ ܕܠܚܘܕܘܗܝ ܩܡ ܩܕܡ ܐܠܗܐ ܒܡܕܒܪܐ. ܟܕ
ܨܒܐ ܕܢܥܛܝܘܗܝ ܠܐܝܣܪܝܠ. ܘܫܐܠ ܕܢܬܥܛܐ ܥܡ ܒܢ̈ܝ ܥܡܗ. ܪܚܡܬ ܐܢܫܘܬܐ ܘܥܘܠܐ ܣܡ ܩܕܡ ܐܠܗܐ: ܒܗܝ ܕܐܡܪ
ܫܒܘܩ ܠܗܘܢ ܐܘ ܥܛܝܢܝ ܡܢ ܣܦܪܟ ܕܟܬܒܬ. ܗܠܝܢ ܐܡܪ ܢܝܚܐ. ܐܠܗܐ ܕܝܢ ܓܒܐ ܠܗ ܕܢܫܒܘܩ ܠܐܝܠܝܢ ܕܚܛܘ܆ ܐܘ
ܢܥܘܠ ܒܡܘܫܐ.
ܫܒܩ ܟܬܒܐ ܡܙܘܢܐ ܫܒܝܚܐ ܕܡܢܢܐ: ܘܦܪܚܬܐ ܕܡܢ ܫܠܝܐ ܕܣܠܘܝ: ܘܨܘܡܗ ܕܡܘܫܐ
ܕܡܥܠܝ ܡܢ ܟܝܢܐ ܕܒܢܝ̈ܢܫܐ: ܘܠܗܘ ܡܫܟܢ ܙܒܢܐ ܦܠܐܬܢܝܐ: ܕܒܗ ܨܝܪܝܢ ܥܠܡ̈ܐ ܕܗܘܘ ܘܕܗܘܝܢ. ܘܗܕܐ ܒܠܚܘܕ
ܩܠܣ. ܕܡܘܫܐ ܠܡ ܢܝܚ ܗܘܐ ܡܢ ܟܠܗܘܢ ܒܢܝ̈ܢܫܐ. ܐܘ ܡܐ ܪܒܐ ܬܕܡܘܪܬܐ ܕܟܠܗ̇ ܚܟܡܬܗ ܕܡܘܫܐ ܒܬܪܬܝܢ ܐܬܘ̈ܢ
ܣܝܟ ܐܦ ܗܘ ܓܝܪ ܩܘܠܣܗ ܐܦ ܫܡܗ ܕܡܘܫܐ ܕܬܪܬܝܢ ܗܘ ܐܬܘ̈ܢ.
ܐܦ ܕܘܝܕ ܟܕ ܥܗܕ ܗܘܐ ܠܡܝܬܪܘܬ ܢܝܚܘܬܐ ܐܡܪ. ܐܬܕܟܪ ܡܪܝܐ ܠܕܘܝܕ ܘܠܟܠܗ
ܡܘܟܟܗ. ܫܒܩ ܗܝ ܕܒܘܪ̈ܟܘܗܝ ܐܬܟܪܗ ܡܢ ܨܘܡܐ ܘܒܣܪܗ ܢܚܒ ܡܢ ܡܫܚܐ: ܘܗܝ ܕܫܗܪ ܘܗܘܐ ܐܝܟ ܨܦܪܐ ܕܡܦܪܚܐ
ܥܠ ܐܓܪ̈ܐ ܘܐܡܪ. ܐܬܕܟܪ ܡܪܝܐ ܠܕܘܝܕ ܘܠܟܠܗ̇ ܢܝܚܘܬܗ.
ܢܩܢܝܗ̇ ܐܦ ܚܢܢ ܠܗܕܐ ܢܝܚܘܬܐ ܕܗܘ ܕܐܡܪ. ܕܝܠܦܘ ܡܢܝ ܕܢܝܚ ܐܢܐ ܘܡܟܝܟ ܐܢܐ
ܒܠܒܝ. ܕܢܠܦܢ ܡܢ ܐܘܪ̈ܚܬܗ ܘܢܢܝܚܢ ܒܡܠܟܘܬܗ ܕܫܡܝܐ
ܟܕ ܡܝܘܬܐ ܐܢܬ. ܠܐ ܣܓܝ ܬܥܘܩ ܠܟ ܥܠ ܕܫܟܒ ܐܒܘܢ ܛܘܒܢܐ. ܚܢܢ ܓܝܪ ܠܘܬܗ
ܐܙܠܝܢܢ. ܗܘ ܕܝܢ ܠܘܬܢ ܠܐ ܗܦܟ. ܨܒܝܢܝ ܕܝܢ ܥܠ ܟܠ ܕܐܝܬ ܠܝ ܗܢܘ. ܢܕܪܐ ܢܕܪܬ ܠܐܠܗܐ ܟܕ ܥܠܬ ܠܡܢܝܢܐ
ܕܕܝܪ̈ܝܐ. ܕܡܕܡ ܒܬܪ ܡܘܬܗ ܕܐܒܝ ܠܐ ܐܫܒܘܩ ܠܝ ܒܐܪܥܐ ܐܠܐ ܟܠ ܐܦܩ ܒܙܕ̈ܩܬܗ ܕܡܪܝܐ.
ܐܝܟ ܡܠܬܟ ܕܝܢ ܟܕ ܙܒܢܐ ܚܡܬ ܒܟ ܟܪܝܘܬܐ ܟܬܒܬ ܠܢ. ܐܢܐ ܕܝܢ ܟܕ ܐܝܬܝ ܒܗ
ܒܐܒܠܐ. ܐܬܬܒܥܬ ܗܕܐ ܐܓܪܬܐ. ܘܡܬܐܠܨ ܗܘܝܬ ܗܠܝܢ ܠܡܟܬܒ ܐܝܠܝܢ ܕܡܢܟܘܢ ܩܒܠܬ. ܐܠܗܐ ܕܝܢ ܕܡܒܝܐܐ
ܠܡܟܝ̈ܟܐ ܒܝܐܢ. ܒܕܝܗܒ ܠܢ ܒܪܫܥܬܗ ܐܝܕܥܬܐ ܕܡܘܬܐ ܘܕܚܝ̈ܐ: ܕܦܓܪܐ ܕܗܘܝܘ ܡܢܢ ܘܕܢܦܫܐ ܡܠܝܠܬܐ. ܕܠܡܢܐ
ܟܝ ܡܬܐܣܪ̈ܢ ܢܦܫ̈ܬܐ ܒܦܓܪ̈ܐ ܘܬܘܒ ܡܫܬܪܝܢ. ܘܥܠ ܡܢܐ ܡܠܐܟ̈ܐ ܘܕܝ̈ܘܐ ܠܥܠܡܢ ܐܬܝܢ: ܚܢܢ ܕܝܢ
ܠܥܠ̈ܡܝܗܘܢ ܠܐ ܐܙܠܝܢܢ. ܠܐ ܓܝܪ ܠܡܠܐܟ̈ܐ ܢܩܦ ܝܬܝܪ ܠܐܠܗܐ ܡܫܟܚܝܢܢ܆ ܐܦ ܠܐ ܠܫܐܕ̈ܐ ܠܡܛܡܐܘ ܝܬܝܪ
ܡܬܪܥܝܢܢ. ܠܐ ܓܝܪ ܠܗܝ ܪܒܘܬ ܝܕܥܬܐ ܡܛܝܢ܆ ܐܦܠܐ ܠܗܕܐ ܠܐ ܝܕܥܬܐ ܫܪܟܢܢ.
ܘܐܝܟܢܢ ܐܒܗ̈ܝܢ ܐܒܗ̈ܐ ܐܢܘܢ ܕܦܓܪܐ ܒܠܚܘܕ. ܐܠܗܐ ܕܝܢ ܐܒܐ ܗܘ ܕܢܦܫܐ.
ܘܐܟܙܢܐ ܕܟܘܪܗܢܗ ܕܒܪܐ ܡܥܝܩ ܠܐܒܐ܆ ܗܟܢܐ ܠܐ ܡܛܟܣܘܬܗ̇ ܕܢܦܫܐ ܡܥܝܩܐ ܠܐܠܗܐ. ܐܒܐ ܒܟܘܪܗܢܗ ܕܒܪܐ
ܠܐܣܝܐ ܩܪܐ. ܐܠܗܐ ܕܝܢ ܠܐܣܝܐ ܕܢܦܫ̈ܬܢ ܡܢ ܫܡܝܐ ܫܕܪ. ܕܢܫܕܠ ܢܓܕ ܠܒܢܝ̈ܢܫܐ ܡܢ ܒܝܫܘܬܐ ܠܡܝܬܪܘܬܐ:
ܘܡܢ ܠܐ ܝܕܥܬܐ ܠܐܝܕܥܬܐ ܕܐܠܗܐ.
ܐܝܟܢܐ ܕܝܢ ܕܠܡܠܐܟ̈ܐ ܝܗܒ ܡܥܡܪܐ ܐܪܫܠܡ ܕܠܥܠ܆ ܐܝܟ ܕܟܬܝܒ. ܕܐܬܩܪܒܬܘܢ
ܠܛܘܪܐ ܕܨܗܝܘܢ: ܘܠܡܕܝܢܬܐ ܕܐܠܗܐ ܚܝܐ ܐܪܫܠܡ ܕܒܫܡܝܐ: ܘܠܪ̈ܒܘܬܐ ܕܡܠܐܟ̈ܐ. ܐܣܪ ܕܝܢ ܠܕܝ̈ܘܐ ܒܥܪ̈ܩܝ
ܚܫܘܟܐ܆ ܘܐܫܠܡ ܠܬܚܬܝ̈ܬܗ̇ ܕܐܪܥܐ ܕܢܬܢܛܪܘܢ ܠܕܝܢܐ. ܠܢ ܕܝܢ ܣܡ ܒܗܢܐ ܥܠܡܐ܆ ܘܟܕܢܢ ܥܡ ܦܓܪ̈ܐ ܦܠܘ̈ܚܐ.
ܐܝܟ ܕܟܬܝܒ. ܕܫ̈ܡܝ ܫܡܝܐ ܕܡܪܝܐ. ܘܐܪܥܐ ܝܗܒܗ ܠܒܢܝ̈ܢܫܐ. ܕܟܕ ܢܥܒܕ ܪ̈ܚܡܐ ܢܗܘܘܢ ܥܠܝܢ ܪ̈ܚܡܐ. ܘܢܗܘܐ
ܒܢ̈ܝ ܝܪܬܘܬܐ ܕܡܠܐܟ̈ܐ. ܕܥܡܗܘܢ ܡܗܝܡܢ ܐܢܐ ܕܐܝܬܘܗܝ ܐܒܘܢ ܛܘܒܢܐ. ܡܪܚܡܢܐ ܗܘܐ ܓܝܪ. ܘܣܗܕܝܢ ܐܝܠܝܢ
ܕܢܣܒܘ ܡܢܗ ܙܕ̈ܩܬܐ ܘܙܒܢܘ ܠܗ ܡܫܚܐ.
ܗܠܝܢ ܡ̈ܠܐ ܕܫܪܘܝܘܬ ܝܕܥܬܐ ܐܣܬܩܒܠ ܒܥܕܢ ܐܒܠܐ܆ ܘܫܢܝ̈ܢܢܝ ܡܢ ܟܪܝܘܬܐ. ܐܢܬ
ܕܝܢ ܩܕܝܫܐ܆ ܫܦܝܪ ܥܒܕܬ ܕܒܚܝ̈ܘܗܝ ܐܢܝܚܬܝܗܝ ܠܛܘܒܢܐ. ܘܟܕ ܫܟܒ ܝܩܪܬܝܗܝ ܒܓܘ ܩܒܪܐ ܩܕܝܫܐ: ܐܬܪ ܕܐܒܘܢ
ܐܒܪܗܡ ܘܒ̈ܢܘܗܝ ܫܟܒܘ. ܘܡܘܕܐ ܐܢܐ ܩܕܡ ܡܪܢ. ܘܩܕܡ ܡܠܐܟ̈ܐ ܩܕܝ̈ܫܐ. ܗܢܘܢ ܕܡܕܒܪܝܢ ܠܟ ܘܡܩܝܡܝܢ ܠܟ
ܩܕܡ ܒܝܡ ܕܡܫܝܚܐ ܦܪܘܩܢ.
ܝܕܥ ܐܢܐ ܕܡܫܬܘܚܪ ܐܢܐ: ܘܡܥܝܩ ܐܢܐ ܠܢܟܦܘܬܟ ܗܘܡܛܝܐ: ܟܕ ܡܬܠܗܩ ܐܢܐ
ܠܪܚܡܬܟ ܒܝܕ ܫܘܘ̈ܕܝܝ. ܐܓܪ ܠܝ ܪܘܚܐ ܒܥܢܐ ܡܢܟ. ܕܥܕܟܝܠ ܠܐ ܡܨܐ ܐܢܐ ܒܚܝܠܐ ܠܡܡܪܚܘ ܠܘܬ ܥܠܡܐ. ܝܕܥ
ܐܢܬ ܗܘ ܓܝܪ ܡܢ ܫܘܪܝܐ ܐܝܢܐ ܕܘܒܪܐ ܒܣܝܐ ܐܬܕܒܪܬ. ܐܠܐ ܡܪܝܐ ܫܕܪ ܡܠܐܟܗ. ܘܦܨܝܢܝ ܡܢ ܐܝ̈ܕܘܗܝ ܕܗܪܘܕܣ
ܡܠܟܐ: ܘܡܢ ܡܕܡ ܕܡܬܚܫܒܝܢ ܗܘܘ ܥܠܝ ܟܠܗ ܣܒܪܐ ܕܥܡܐ ܕܝܗ̈ܘܕܝܐ.
ܗܫܐ ܕܝܢ ܣܝܡ ܠܝ ܢܝܫܐ ܕܠܐ ܐܫܒܘܩ ܟܘܪܚܝ. ܥܠ ܐܦ̈ܝ ܓܝܪ ܬܐܘܪܝܐ ܕܗܘ̈ܝܐ
ܕܬܠܝܬܝܘܬܐ ܩܕܝܫܬܐ ܐܝܬܘܗܝ ܐܓܘܢܢ. ܘܩܪܒܐ ܪܒܐ ܡܩܝܡܝܢ ܠܘܩܒܠܢ ܫܐܕ̈ܐ: ܕܢܥܘܟܘܢܢܝ ܕܠܐ ܢܕܥ. ܚܢܢ ܕܝܢ
ܟܕ ܝܨܦܝܢܢ ܢܐܠܦ. ܒܕܓܘܢ ܕܚܠ ܐܢܐ ܕܠܡܐ ܟܕ ܐܬܥܦܐ ܠܝ ܒܥܠܡܐ: ܢܣܐܒ ܒܝ ܝܫܘܥ: ܘܢܦܘܫ ܡܢ ܕܠܡܗܘܐ ܠܝ
ܪܒ ܚܝܠܐ: ܘܐܗܘܐ ܬܘܒ ܥܒܕܐ ܕܦܠܫ̈ܬܝܐ.
ܛܒ ܢܬܦܗ ܠܪܥܝܢܝ ܐܒܠܗ ܕܐܒܘܢ ܛܘܒܢܐ. ܡܛܠ ܕܬܩܢܘܬܗ̇ ܕܬܐܘܪܝܐ܆ ܕܕܠܐ ܛܒܥܐ
ܕܕܡܘܬܐ ܨܒܐ ܪܘܚ ܩܘܕܫܐ ܠܡܗܘܐ. ܕܢܗܘܐ ܡܚܪܪ ܡܕܥܐ ܡܢ ܟܠ ܚܫ̈ܝ ܚܘܫ̈ܒܐ. ܐܟܙܢܐ ܓܝܪ ܕܥܝܢܐ ܓܗܪܬܐ ܠܐ
ܢܗܝܪܐ ܒܚܙܝܐ ܕܐܝܠܝܢ .. ــܬ ... ܗܟܢܐ ܐܦ ܡܕܥܐ (؟). ܐܝܬ ܒܗ ܚܘܫ̈ܒܝ (؟) ܚܫܐ ܒܝ̈ܫܐ ܠܐ ܡܫܬܘܕܥ
ܪܘܚܢܝܬܐ ܘܝܐܐ ܠܗ ܕܒܩܠܝܠ ܩܠܝܠ ܠܘܬ ܟܠܗܝܢ ܠܡܫܬܘܫܛܘ. ܕܢܡܛܐ ܠܡܬܩܪܒܘ ܠܘܬ ܚܕܐ ܥܠܬܐ ܘܐܒܐ ܕܪ̈ܘܚܢܐ:
ܗܘ ܕܒܝܕ ܫܘܢܝܐ ܕܣܘ̈ܟܠܐ ܕܡܢ ܟܠ ܕܡܬܚܙܐ ܡܬܓܠܐ ܠܠܒܐ.
ܠܬܐܘܪܝܐ ܕܗܘ̈ܝܐ. ܣܓܝ̈ܐܢ ܠܗ ܬܫܥܝ̈ܬܐ ܕܚܙ̈ܝܐ. ܬܐܘܪܝܐ ܕܝܢ ܬܠܝܬܝܘܬܐ
ܩܕܝܫܬܐ܆ ܚܕ ܗܘ ܣܘܟܠ ܝܕܥܬܐ ܕܥܠܝܗ̇: ܡܛܠ ܕܝܕܥܬܐ ܐܝܬܝܝܬܐ ܐܝܬܝܗ̇: ܘܠܗܘܢܐ ܕܥܪܛܠܝ ܡܢ ܚܫ̈ܐ
ܡܬܓܠܝܐ. ܠܐ ܕܝܢ ܡܫܟܚ ܡܕܥܐ ܕܢܚܙܐ: ܐܢ ܠܪܘܡܗ ܕܗܢܐ ܛܘܪܐ ܠܐ ܪܗܛ. ܛܘܪܐ ܗܘ ܓܝܪ ܪܘܚܢܐ ܝܕܥܬܐ
ܕܬܠܝܬܝܘܬܐ ܩܕܝܫܬܐ: ܕܠܪܘܡܐ ܡܥܠܝܐ ܕܥܣܩ ܠܡܬܩܪܒܘ ܠܗ. ܕܐܢ ܠܗܕܐ ܢܫܬܘܐ ܡܕܥܐ܆ ܡܫܢܐ ܡܢ ܪܢܝܐ
ܕܨܒ̈ܘܬܐ. ܠܗܢܐ ܛܘܪܐ ܡܕܒܪܝܢ ܗܘܘ ܡܠܐܟ̈ܐ: ܠܛܘܒܢܐ ܠܘܛ ܟܕ ܐܡܪܝܢ. ܠܛܘܪܐ ܐܫܬܘܙܒ܆ ܕܠܐ ܬܪܟܟ ܒܝܫܬܐ.
ܐܫܬܘܦ ܕܝܢ ܗܘܝܬ (*ܢܘܗܪܗ ܕܡܪܝܐ ܘܚܕܝܐܝܬ ܢܦܠ ܗܘܝܬ ܒܝܡܗ ܕܥܠܡܐ: ܕܐܚܠܐ
ܡܠܚܘܬ ܒܝܫܘܬܐ ܕܢܦܫ̈ܬܐ ܕܒܢ̈ܝ ܐܢܫܐ ܡܠܝ̈ܠܬܐ. ܗܫܐ ܕܝܢ ܥܢܢܐ ܐܢܐ ܝܒܝܫܬܐ܆ ܕܡܢ ܪܘܚܐ ܠܡܕܒܪܐ
ܐܬܪܕܦܬ. ܩܝܘܢܕܝܢܘܣ ܗܘ ܠܝܚܝܕܝܐ: ܕܟܕ ܠܐ ܓܡܝܪ ܢܦܘܩ ܡܢ ܟܘܪܗܚܗ: ܥܕܠܐ ܢܩܒܠ ܫܘܡܠܝܐ ܕܕܘܒܪ̈ܐ
ܘܕܬܐܘܪܝܐ. ܘܛܒ ܗܘܐ ܠܗ ܐܠܘ ܠܐ ܥܠ ܡܢ ܫܘܪܝܐ ܠܐܓܘܢܐ܆ ܐܘ ܠܐ ܐܟܬܒ ܢܦܫܗ ܠܡܬܟܬܫܘ ܥܡ ܚܝ̈ܘܬܐ. ܗܘܝܬ
ܥܗܝܕ ܐܢܬ ܠܬܫܥܝܬܗ ܕܟܬܒܐ: ܐܝܟܢ ܥܡܠܝܩ ܘܒܢ̈ܝ ܡܕܢܚܐ ܥܒܪܘܗܝ ܠܝܘܪܕܢܢ ܢܗܪܐ ܘܐܬܟܬܫܘ ܥܡ ܐܝܣܪܝܠ: ܟܕ
ܐܝܬܘܗܝ ܒܐܪܥܐ ܕܡܘܠܟܢܐ: ܒܕܗܡܝ ܒܕܚܠܬ ܐܠܗܐ.
ܠܝ ܕܝܢ ܐܓܘܢܐ ܒܛܝܒܘܬܗ ܕܡܪܢ ܐܝܬ ܠܝ܆ ܠܘ ܒܠܚܘܕ ܕܠܐ ܐܣܥܘܪ ܡܕܡ ܕܠܐ ܘܠܐ܆
ܐܠܐ ܕܐܦ ܠܐ ܐܬܚܫܒ ܡܕܡ ܕܒܝܫ. ܘܡܘܕܐ ܐܢܐ ܕܥܕܟܝܠ܆ ܠܐ ܡܛܝܬ ܠܓܡܝܪܘܬ ܗܕܐ ܬܩܢܘܬܐ. ܡܚܡܣܢ ܐܢܐ ܕܝܢ
ܟܕ ܡܚܨܦ ܐܢܐ܆ ܘܡܗܝܡܢܐ ܠܝ ܕܢܣܒ ܐܢܐ. ܕܗܝ ܗܕܐ ܡܠܟ ܠܝ: ܗܘ ܡܢ ܕܩܪܢܝ ܡܢ ܚܫܘܟܐ ܠܢܘܗܪܐ ܩܕܝܫܐ
ܘܛܘܒܬܢܐ
ܠܐ ܬܟܪܐ ܠܟ ܒܡܕܡ ܐܚܐ ܩܪܩܘܦܝܐ: ܒܗܝ ܕܪܚܝܩ ܝܬܒܢ ܡܢ ܕܝܠܟ. ܡܨܐ ܐܢܬ ܗܘ
ܓܝܪ ܕܟܕ ܒܙܕܝܩܘܐ ܘܒܕܚܠܬ ܐܠܗܐ ܬܚܐ: ܠܡܗܘܐ ܥܡ ܐܒܗ̈ܝܢ ܩܕܝ̈ܫܐ. ܠܝܕܥܬܐ ܓܝܪ ܕܡܪܢ ܠܐ ܦܣܩܢ
ܕܘܟ̈ܝܬܐ. ܐܠܐ ܚܘ̈ܫܒܝ ܚܫ̈ܐ. ܕܗܐ ܐܝܟ ܡܠܬ ܦܘܠܘܣ ܛܘܒܢܐ܆ ܣܓܝ̈ܐܐ ܚܕ ܚܢܢ ܒܝܫܘܥ ܡܫܝܚܐ. ܐܦ ܠܣܘܓܐܐ
ܕܝܢ ܕܗܝܡܢܘ ܠܡܪܢ܆ ܚܕ ܗܘܐ ܠܒܐ ܐܦ ܢܦܫܐ: ܒܠܐ ܚܫܘܫܘܬܐ ܘܒܗܝܡܢܘܬܐ. ܡܕܡ ܓܝܪ ܕܐܝܬܘܗܝ ܐܬܪܐ ܠܦܓܪ̈ܐ܆
ܗܕܐ ܐܝܬܝܗ̇ ܐܦ ܡܝܬܪܘܬܐ ܠܠܐ ܦܓܪ̈ܢܐ. ܗܠܝܢ ܓܝܪ ܡܬܐܡܪܝܢ ܡܢ ܩܕܝܫܐ ܕܐܝܬܝܗܘܢ ܐܟܚܕܐ܆ ܐܝܠܝܢ ܕܚܕܐ
ܗܝ ܡܝܬܪܘܬܗܘܢ.
ܛܘܒܐ ܕܝܢ ܝܗܒܬ ܠܐܝܠܝܢ ܕܥܡܪܝܢ ܥܡܢ. ܛܘܒܝܗܘܢ ܠܢܝ̈ܚܐ ܐܝܠܝܢ ܓܝܪ ܕܥܡܪܝܢ
ܥܡܝ܆ ܟܠ̈ܒܐ ܐܢܘܢ ܝܨܝ̈ܦܐ: ܕܠܥܝܢ ܕܡܝ ܟܠܝܘܡ ܒܝܘܡ. ܐܣܬܟܠ ܡܕܡ ܕܐܡܪܬ.
ܘܥܠ ܠܠܥܙܪ ܘܠܥܬܝܪܐ. ܕܠܥܙܪ ܡܬܒܣܡ ܗܘܐ ܒܝܕܥܬܐ܆ ܘܥܬܝܪܐ ܡܫܬܢܩ ܗܘܐ
ܒܫܠܗܒܝܬܐ ܕܠܐ ܝܕܥܬܐ. ܡܢ ܗܕܐ ܝܕܥܝܢܢ܆ ܕܐܝܬ ܗܘܐ ܙܒܢܐ ܕܠܝܬ ܗܘܐ ܒܝܫܘܬܐ. ܘܗܘܐ ܙܒܢܐ ܕܠܐ ܐܝܬܝܗ̇.
ܠܝܬ ܕܝܢ ܙܒܢܐ ܕܠܝܬ ܗܘܬ ܡܝܬܪܘܬܐ. ܘܠܐ ܗܘܐ ܙܒܢܐ ܕܠܐ ܐܝܬܝܗ̇: ܠܐ. ܙܪ̈ܥܐ ܓܝܪ ܕܡܝܬܪܘܬܐ ܠܐ
ܡܬܥܛܝܢ. ܘܢܦܝܣܟ ܥܬܝܪܐ ܕܥܠ ܐܦ̈ܝ ܒܝ̈ܫܬܗ ܒܫܝܘܠ ܡܫܬܢܩ ܗܘܐ ܘܚܐܢ ܠܐܚ̈ܘܗܝ. ܚܢܢܐ ܕܝܢ ܙܪܥܐ ܗܘ ܛܒܐ
ܕܡܝܬܪܘܬܐ. ܨܒܥܐ ܕܝܢ ܘܦܚܬܐ ܕܝܕܥܬܐ ܘܕܒܝܫܘܬܐ ܐܝܬܝܗܝܢ ܦܠܐܬܐ. ܐܝܟ ܡܐ ܕܐܫܠܡ ܠܢ ܐܢܫ ܕܡܕܩ ܗܘܐ
ܒܪ̈ܘܚܢܝܬܐ ܚܬܝܬܐܝܬ
ܡܒܪܟ ܗܘ ܐܠܗܐ ܐܒܗܘܝ ܕܡܪܢ ܝܫܘܥ ܡܫܝܚܐ: ܗܘ ܕܒܪܟܢ ܒܝܫܘܥ ܡܫܝܚܐ ܡܪܢ.
ܘܣܡܟܢ ܒܗܝܡܢܘܬܐ ܕܒܪܗ: ܕܡܙܝܥܝܢ ܗܘܝܢ. ܘܬܪܨܢ ܒܝܕ ܡܘܬܗ ܕܢܦܝܠܝܢ ܗܘܝܢ. ܘܦܨܝܢܝ ܡܢ ܡܣܟܢܘܬܐ.
ܘܦܪܩܢܝ ܡܢ ܐܝ̈ܕܝ ܡܫܥܒ̈ܢܕܢܐ. ܒܕܫܕܪ ܡܢ ܫܡܝܐ ܕܩܘܕܫܗ܆ ܠܡܫܝܚܐ ܦܪܘܩܢ ܘܡܚܝܢܐ ܕܢܦ̈ܫܬܢ. ܘܝܗܒ ܠܢ ܒܗ
ܦܪܗܣܝܐ: ܒܕܙܟܐ ܠܟܠ ܚܝ̈ܠܘܬܐ ܕܠܩܘܒܠܢ. ܟܕ ܐܡܪ. ܐܬܠܒܒܘ ܐܢܐ ܙܟܝܬܗ ܠܥܠܡܐ. ܘܐܦܩ ܡܢܢ ܠܣܛܢܐ ܒܝܕ
ܦܘܩ̈ܕܢܘܗܝ ܩܕܝ̈ܫܐ: ܘܦܬܚ ܠܢ ܬܪܥܐ ܕܚܝ̈ܐ. ܘܕܪܫ ܠܢ ܐܘܪܚܐ ܕܦܘܪܩܢܐ ܗܢܘ ܕܝܢ܆ ܕܗܘ ܕܗܘܐ ܠܢ ܐܘܪܚܐ
ܐܝܟ ܕܐܡܪ. ܕܐܢܐ ܐܢܐ ܐܘܪܚܐ. ܕܟܕ ܒܗ ܘܒܐܝܕܗ ܢܪܕܐ܆ ܢܣܒ ܝܕܥܬܐ ܕܬܠܝܬܝܘܬܐ ܣܓܝܕܬܐ ܘܩܕܝܫܬܐ.
ܡܛܠ ܗܟܝܠ ܕܐܠܗܢ ܚܘܒܐ ܗܘ ܐܚܝ ܐܝܟ ܡܠܬܗ ܕܝܘܚܢܢ. ܗܘ ܕܡܗܠܟ ܒܚܘܒܐ ܠܐ ܪܓܙ
ܥܠ ܐܚ̈ܘܗܝ. ܠܐ ܠܡ ܠܐ ܚܣܡ. ܠܐ ܪܚܡ ܙܟܘܬܐ ܘܠܐ ܩܢܐܬܐ. ܚܕܐ ܓܝܪ ܡܢ ܗܠܝܢ ܠܐ ܫܒܩ ܚܘܒܐ ܠܡܥܒܕ ܠܡܢ
ܕܩܢܐ ܠܗ. ܐܠܐ ܐܝܟ ܡܠܬ ܦܘܠܘܣ ܛܘܒܢܐ܆ ܚܕܐ ܥܡ ܕܚܕܝܢ. ܕܐܝܬܝܗ̇ ܐܬܐ ܕܠܐ ܚܣܘܡܘܬܐ. ܘܒܟܐ ܥܡ ܕܒܟܝܢ .
ܕܐܝܬܝܗ̇ ܐܬܐ ܕܡܪܚܡܢܘܬܐ. ܬܪ̈ܬܝܗܝܢ ܕܝܢ ܗܠܝܢ. ܕܚܘܒܐ ܐܢܝܢ ܩܕܝܫܐ.
ܐܢ ܕܝܢ ܘܠܐ ܕܦܫܝܩܐܝܬ ܢܓܠܝܘܗܝ ܠܟܝܢܗ ܕܚܘܒܐ܆ ܕܐܝܟ ܗܟܢ ܣܒܪ ܐܢܐ
ܕܐܝܬܘܗܝ. ܚܘܒܐ ܡܝܬܪܘܬܐ ܗܘ ܕܢܦܫܐ ܡܠܝܠܬܐ. ܕܡܬܓܡܪ ܒܝܕ ܓܘܠܙܢܐ ܕܡܢ ܟܠ ܪ̈ܓܝܓܬܐ ܕܫܐܛ ܡܐܟܘܠܬܐ
ܘܡܡܘܢܐ ܘܫܘܒܚܗ ܕܠܥܠܡܐ: ܘܥܡ ܗܠܝܢ ܟܦܪ ܒܦܓܪܗ ܒܪܚܡܬ ܝܕܥܬܐ ܕܐܠܗܐ. ܐܝܟ ܓܝܪ ܐܢܫ ܢܓܪ ܪܘܚܗ ܠܘܬ ܡܢ
ܕܡܚܐ ܠܗ ܥܠ ܦܟܗ: ܐܢ ܪܘܚܡ ܬܫܒܘܚܬܐ ܗܘ. ܐܘ ܪܚܡ ܦܓܪܗ ܗܘ ܗܘ ܕܒܠܥ. ܐܘ ܐܝܟܢ ܠܐ ܒܝܕ ܡܨܘܬܐ ܢܬܬܒܥ:
ܠܡܢ ܕܢܣܒ ܡܢܗ ܡܪ̈ܗܛܐ. ܐܢ ܗܘ ܕܐܚܝܕ ܒܚܫܐ ܕܡܐܟܘܠܬܐ ܘܕܡܡܘܢܐ.
ܒܕܓܘܢ ܟܬܝܒ. ܕܠܐ ܬܪܚܡܘܢ ܠܥܠܡܐ ܘܠܐ ܠܟܠ ܕܒܗ. ܕܠܐ ܟܕ ܢܨܝܢ ܐܢܬܘܢ ܥܠ
ܐܦ̈ܝ ܗܠܝܢ: ܘܥܡ ܚܕܕ̈ܐ ܕܝܢܝܢ ܐܢܬܘܢ ܬܬܛܡܐܘܢ. ܪܚܡܬܗ ܓܝܪ ܕܗܢܐ ܥܠܡܐ ܒܥܠܕܒܒܘܬܐ ܗܝ ܠܘܬ ܐܠܗܐ.
ܘܐܢܗܘ ܕܐܠܗܢ ܚܘܒܐ ܗܘ ܐܝܟ ܕܟܬܝܒ܆ ܡܕܝܢ ܪܚܡܬܗ ܕܗܢܐ ܥܠܡܐ ܒܝܫܐ܆ ܒܥܠܕܒܒܘܬܐ ܗܝ ܠܚܘܒܐ ܩܕܝܫܐ. ܠܝܬ
ܗܟܝܠ ܠܡܩܢܐ ܚܘܒܐ: ܐܢ ܠܥܠܡܐ ܠܐ ܢܣܢܐ. ܘܠܐ ܠܡܣܢܐ ܠܥܠܡܐ ܐܢ ܡܢ ܚܫ̈ܐ ܠܐ ܢܫܠܚ: ܕܒܗܘܢ ܩܐܡ ܒܪܢܫܢ
ܥܬܝܩܐ: ܘܡܬܚܒܠ ܒܪ̈ܓܝܓܬܐ ܕܛܘܥܝܝ܀
ܐܕܫ̈ܝ ܚܘܒܐ ܝܬܝܪܐܝܬ ܠܢ ܗܘ ܘܠܐ ܠܡܒܥܐ ܡܢܟܘܢ. ܕܒܝܕ ܠܐ ܚܫܘܫܘܬܐ ܩܢܝܬܘܢ
ܚܘܒܐ ܐܠܗܝܐ. ܘܥܬܪܬܘܢ ܥܘܬܪܐ ܫܡܝܢܐ. ܐܦܠܐ ܓܝܪ ܒܢܝ̈ܐ ܣܝܡܝܢ ܣ̈ܡܬ ܠܐܒ̈ܗܐ ܐܠܐ ܐܒ̈ܗܐ ܠܒܢܝ̈ܐ ܟܕ
ܐܝܬܝܟܘܢ ܗܟܝܠ ܐܒܗ̈ܐ܆ ܡܪܘ ܒܐܒܐ ܡܫܝܚܐ. ܘܬܪܣܐܘܢ ܕܫܥܬܐ ܠܚܡܐ ܕܣܥܪܐ. ܒܝܕ ܝܘܠܦܢܐ ܕܬܘܪܨ ܥܝ̈ܕܐ.
ܠܘܬ ܒܘܪܘܬܢ ܐܬܬܚܬܘ܆ ܥܕܡܐ ܕܢܫܕܐ ܡܢܢ ܥܝܕ̈ܐ ܚܝܘ̈ܬܢܐ. ܘܢܫܬܘܐ ܠܠܚܡܐ ܪܘܚܢܐ ܕܢܚܬ ܡܢ ܫܡܝܐ: ܘܙܐܢ
ܠܟܠ ܟܝ̈ܢܐ ܡܠܝ̈ܠܐ ܡܘܫܚܬ ܬܩܢܘܬܗܘܢ.
ܗܘ ܓܝܪ ܕܢܚܬ܆ ܗܘܝܘ ܗܘ ܕܐܦ ܣܠܩ ܕܢܡܠܐ ܟܠ. ܘܐܢ ܗܘ ܕܟܠ ܡܡܠܐ܆ ܟܠܢ ܢܣܒ
ܡܢ ܡܠܝܘܬܗ ܕܡܫܝܚܐ ܦܪܘܩܢ. ܡܘܠܝܗ ܓܝܪ ܕܡܫܝܚܐ ܝܕܥܬܐ ܗܝ ܪܘܚܢܝܬܐ: ܕܥܠ̈ܡܐ ܕܗܘܘ ܘܕܗܘܝܢ. ܥܡ
ܗܝܡܢܘܬܐ ܕܫܪܪܐ ܕܬܠܝܬܝܘܬܐ ܩܕܝܫܬܐ.
ܗܝܡܢܘܬܐ ܓܝܪ ܓܡܝܪܬܐ ܡܬܩܢܝܐ. ܒܝܕ ܓܘܠܙܢܐ ܕܟܠܗܘܢ ܣܘ̈ܟܠܐ ܕܨܒ̈ܘܬܐ
ܡܓܫ̈ܡܬܐ. ܘܡܬܓܠܝܐ ܠܡܕܪܥܐ ܬܠܝܬܝܘܬܐ ܩܕܝܫܬܐ ܕܠܗ ܡܨܐ ܡܕܥܐ ܚܙܐ ܐܢ ܡܢ ܚܝ̈ܐ ܡܫܬܠܚ. ܘܡܢ ܒܪܢܫܗ
ܥܬܝܩܐ: ܗܘ ܕܡܬܚܒܠ ܐܝܟ ܪ̈ܓܝܓܬܐ ܕܛܘܥܝܝ ܗܢܐ ܕܝܢ ܐܢ ܡܫܬܚܩ܆ ܗܘܐ ܝܩܕܐ ܫܠܡܐ ܠܐܠܗܐ܆ ܒܝܕ ܕܘܒܪ̈ܐ
ܬܪ̈ܝܨܐ ܘܗܝܡܢܘܬܐ ܕܩܘܫܬܐ
ܡܠܟܘܬܐ ܕܫܡܝܐ ܠܐ ܣܢܝܩܐ ܠܡܠܝܠܘܬܐ ܕܢܦܫܐ. ܐܠܐ ܕܗܘܬ ܚܙܝܐ. ܡܠܝܠܘܬܐ ܓܝܪ
ܐܦ ܠܢܦ̈ܫܬܐ ܡܣܝ̈ܒܬܐ ܫܟܝܚܐ ܗܝ ܚܙܝܐ ܕܝܢ ܫܟܝܚ ܒܠܚܘܕ ܠܢܦ̈ܫܬܐ ܕܟܝ̈ܬܐ.
ܒܟܠ ܥܠܠ̈ܢ ܗܟܝܠ ܕܡܣ̈ܬܩܒܠܢ ܗܘܝ ܟܬܒ ܠܢ ܘܡܨܠܐ ܐܢܬ ܥܠܝܢ. ܕܠܐ ܢܗܘܐ
ܗܕܝܘܛܝܢ ܒܝܕܥܬܢ. ܒܡܠܝܠܘܐ ܕܝܢ ܒܣܝ܆ ܒܕܠܐ ܚܫܚܐ ܠܢ ܠܐܘܪܚܢ. ܐܡܪ ܓܝܪ ܡܪܢ. ܬܘ ܒܪ̈ܝܟܘܗܝ ܕܐܒܝ܆
ܘܝܪܬܘ ܡܠܟܘܬܐ ܕܡܛܝܒܐ ܠܟܘܢ ܡܢ ܩܕܡ ܬܪ̈ܡܝܬܗ ܕܥܠܡܐ. ܟܦܢ ܗܘܝܬ ܓܝܪ ܘܐܘܟܠܬܘܢܢܝ. ܘܨܗܐ ܗܘܝܬ
ܘܐܫܩܬܘܢܢܝ. ܐܟܣܢܝܐ ܗܘܝܬ ܘܟܢܫܬܘܢܢܝ. ܟܪܝܗܐ ܗܘܝܬ ܘܣܥܪܬܘܢܢܝ. ܒܝܬ ܐܣܝܪ̈ܐ ܗܘܝܬ ܘܐܬܝܬܘܢ ܠܘܬܝ.
ܚܢܐ ܐܢܬ ܕܒܚܕܐ ܡܢ ܗܠܝܢ ܠܡܝܠܘܬܐ ܠܐ ܥܗܕ. ܡܠܬܐ ܓܝܪ ܐܝܬܝܗ̇ ܡܠܐܟܐ
ܕܣܘ̈ܟܠܐ. ܡܠܟܘܬܐ ܕܝܢ ܕܫܡܝܐ ܠܐ ܗܘܬ ܒܡܠܬܐ ܐܠܐ ܒܚܝܠܐ. ܚܝܠܐ ܕܝܢ ܡܬܐܡܪ ܕܟܝܘܬ ܢܦܫܐ ܕܗܘܝܐ ܡܢ
ܚܘܒܐ. ܗܘ ܕܐܢܬ ܒܝܕ ܡܪܢ ܩܢܐ ܐܢܬ ܡܢ ܫܘܪܝܐ.
ܘܒܝܕ ܟܬܝ̈ܒܬܟ܆ ܐܕ̈ܫܐ ܪ̈ܘܚܢܐ ܠܢ ܝܗܒܬ. ܕܐܝܟ ܗܠܝܢ ܕܝܢ ܟܬܒܬ ܠܢ. ܐܝܠܝܢ
ܕܚܘܒܗ ܕܡܪܢ ܐܨܚ ܠܟ. ܒܪܡ ܡܬܕܡܪ ܐܢܐ: ܐܢ ܗܟܢܐ ܗܘ ܡܐ ܕܠܘܬܢ. ܐܙܕܗܪ ܕܠܡܐ ܬܫܬܟܚ ܒܥܐ ܡܢ ܟܘ̈ܒܐ
ܥܢ̈ܒܐ: ܐܘ ܡܢ ܩܘܪ̈ܛܒܐ ܬܐܢ̈ܐ. ܘܩܪܐ ܠܡܦܐܕܐ ܠܗܘ ܕܓܠܝܙ ܡܢ ܢܘܗܪܐ. ܨܠܐ ܕܝܢ ܥܠܝܢ. ܕܡܪܢ ܢܥܒܕܢ ܐܝܟ
ܡܐ ܕܣܒܪ ܐܢܬ ܥܠܝܢ. ܥܕܡܐ ܓܝܪ ܠܝܘܡܢܐ. ܥܕܟܝܠ ܕܐܝܟ ܗܟܢ ܠܐ ܐܝܬܝܢ