Frankenberg's Syriac edition of the Great Letter by Evagrius Ponticus
tag:kalvesmaki.com,2014:tan-key:evagrius
General keywords associated with the TAN collection for Evagrius of Pontus
tag:kalvesmaki.com,2014:tan-t:cpg2438:letters:deu:1986:bunge
Bunge's 1986 German translation of the Great Letter by Evagrius
Started file
ܬܘܒ ܐܓܪܬܐ ܕܩܕܝܫܐ ܐܘܓܪܝܣ: ܕܠܘܬ ܡܠܢܝܐ:
ܝܕܥܐ ܗܝ ܒܣܝܡܘܬܟ ܡܪܝ: ܕܐܝܠܝܢ ܕܪܚܝܩܝܢ ܡܢ ܚܕܕ̈ܐ ܡܛܠ ܡܬܚܗ ܕܛܘܪܐ ܡܦܪܫܢܐ:
ܕܡܢ ܥܠ̈ܠܬܐ ܣܓܝ̈ܐܬܐ ܘܡܫܚ̈ܠܦܬܐ ܕܡܥܕ̈ܢ ܩܪܝܢ ܡܫܬܟܚ. ܐܡܬܝ ܕܨܒܝܢ ܕܢܕܥܘܢ ܐܘ ܕܢܘܕܥܘܢ ܨܒ̈ܝܢܝܗܘܢ
ܘܪ̈ܐܙܝܗܘܢ ܟܣܝ̈ܐ. ܚܕ ܠܚܕ: ܗܢܘܢ ܕܠܐ ܗܘܐ ܟܠ ܡܢ ܕܗܘ ܘܠܐ ܕܢܪܓܫ ܒܗܘܢ: ܐܠܐ ܪ̈ܥܝܢܐ ܕܡܚܝܢܝܢ
ܠܩ̈ܢܝܗܘܢ. ܟܕ ܒܝܕ ܟܬܝ̈ܒܬܐ ܗܠܝܢ ܣܥܪܝܢ. ܘܟܕ ܪܚܝܩܝܢ ܩܪܝܒܝܢ. ܘܟܕ ܡܒܥܕܝܢ ܚܙܝܢ ܘܡܬܚܙܝܢ. ܘܟܕ ܫܠܝܢ
ܡܡܠܠܝܢ ܘܫܡܥܝܢ. ܘܟܕ ܗܢܘܢ ܟܒܪ ܕܡܟܝܢ ܥܝܪܝܢ. ܒܗܝ ܕܨܒܝܢܗܘܢ ܒܥܒܕܐ ܡܬܓܡܪ. ܘܟܕ ܟܪܝܗܝܢ ܚܠܝܡܝܢ. ܘܟܕ
ܝܬܝܒܝܢ ܪܗܛܝܢ. ܐܡܪ ܐܢܐ ܕܝܢ ܕܐܦ ܟܕ ܡܝܬܝܢ ܚܝܝܢ. ܒܗܝ ܕܠܘ ܐܝܠܝܢ ܕܩܝܡ̈ܢ ܡܨܝܢ ܟܬܝ̈ܒܬܐ ܕܢܘ̈ܕܥܢ
ܒܠܚܘܕ. ܐܠܐ ܐܦ ܕܥܒܪ ܐܦ ܕܥܬܝ̈ܕܢ.
ܘܗܪܟܐ ܡܬܚܙܐ ܚܘܒܗܘܢ ܫܘܝܐ ܕܪ̈ܓܫܐ ܐܝܟܢ ܟܠ ܚܕܚܕ ܡܢܗܘܢ ܡܚܘܐ ܚܝܠܗ: ܘܡܡܠܐ
ܕܘܟܬ ܚܒܪܗ. ܚܠܦ ܓܝܪ ܠܫܢܐ ܐܝܕܐ. ܘܚܠܦ ܐܕܢܐ ܥܝܢܐ. ܗܘܐ ܕܝܢ ܚܠܦ ܐܪܥܗ ܕܠܒܐ ܟܪܛܝܣܐ. ܕܒܝܕ ܚܛܘ̈ܛܐ
ܕܣܘܪ̈ܓܕܘܗܝ ܡܩܒܠ ܨܒ̈ܝܢܐ ܕܐܙܕܪܥܘ ܒܗ. ܥܡ ܫܪܟܐ ܕܥܘܕܪ̈ܢܐ ܣܓܝ̈ܐܐ ܘܕܢܝ̈ܫܐ ܡܫܚ̈ܠܦܐ: ܘܕܦܘܪ̈ܫܢܐ
ܘܕܚܝ̈ܠܐ ܕܫܟܝܚܝܢ ܒܗܝܢ. ܕܠܘ ܙܒܢܐ ܗܘ ܗܫܐ ܕܥܠ ܟܠ ܚܕܚܕ ܡܢܗܘܢ ܢܡܠܠ.
ܘܒܗܠܝܢ ܡܬܒܣܡ܆ ܐܝܢܐ ܕܡܦܣ ܒܗܝܢ ܒܟܬܝ̈ܒܬܐ. ܐܡܪ ܐܢܐ ܕܝܢ ܕܐܦ ܐܝܢܐ ܕܠܐ ܡܦܣ܆
ܡܬܥܕܪ ܐܝܟܐ ܕܐܠܨܐ ܡܢ ܗܘ ܕܡܦܣ. ܗܢܐ ܡܢ ܡܢ ܚܙܬܐ ܐܬܥܕܪ. ܗܘ ܕܝܢ ܡܢ ܫܡܥܐ. ܠܐ ܕܝܢ ܪܒ ܥܘܕܪܢܗ ܕܫܡܥܐ
ܘܫܪܝܪ ܐܝܟ ܕܚܙܝܐ. ܡܦܣ ܐܢܬ ܗܘ ܓܝܪ ܒܕܐܝܟ ܗܠܝܢ ܦܘܪ̈ܫܢܐ.
ܘܥܠ ܐܦ̈ܝ ܗܠܝܢ ܟܠܗܝܢ܆ ܡܢܘ ܣܦܩ ܕܐܝܟ ܡܐ ܕܘܠܐ ܢܘܕܐ ܠܝܗܘܒܗ ܕܗܕܐ ܟܠܗ̇
ܡܘܗܒܬܐ. ܕܐܝܟ ܣܒܪ ܐܢܐ ܝܬܝܪ ܡܢ ܣܘܓܐܐ ܕܡܘ̈ܒܬܗ ܪܒܐ. ܒܗܝ ܕܗܝ ܝܬܝܪܐܝܬ ܡܒܕܩܐ ܥܠ ܚܝܠܐ ܕܚܟܡܬܐ ܘܚܘܒܐ
ܕܝܗܘܒܗ. ܘܐܬܚܙܝܬ ܕܐܝܢܐ ܕܪܚܝܩ ܡܢ ܚܒܪܗ܆ ܒܝܕ ܐܝܕܐ ܘܨܒܥܐ ܘܩܢܝܐ ܘܕܝܘܬܐ ܘܟܪܛܝܣܐ ܥܡ ܫܪܟܐ ܕܥܠܠ̈ܬܐ
ܐܚܪ̈ܢܝܬܐ ܕܡܫ̈ܡܫܢ: ܡܪܓܫ ܒܨܒܝܢܐ ܕܚܒܪܗ. ܐܝܢܐ ܕܝܢ ܕܩܪܝܒ ܠܐ ܣܢܝܩ ܥܠ ܗܠܝܢ ܟܠܗܝܢ. ܐܠܐ ܐܘ ܥܠ ܦܘܡܐ
ܗܘ ܕܒܗ ܡܠܬܐ ܘܪܘܚܐ ܐܟܚܕܐ ܡܫܬܡ̈ܫܢ: ܘܡܫܡ̈ܫܢ ܠܐܕܢܐ ܘܠܠܒܐ܆ ܐܘ ܥܠ ܐܝܕܐ ܘܨܒܥܐ ܒܠܚܘܕ. ܕܡܫܡ̈ܫܢ ܠܥܝܢܐ
ܘܠܠܒܐ. ܚܙܝ ܕܝܢ ܕܢܝܚܐ ܫܪܝܪܐ ܠܐܝܢܐ ܕܪܚܝܩ ܡܢ ܚܒܪܗ܆ ܒܝܕ ܚܙܝܐ ܗܘܐ. ܠܐܝܢܐ ܕܝܢ ܕܩܪܝܒ ܒܝܕ ܫܡܥܐ.
ܘܗܠܝܢ ܟܠܗܝܢ ܕܒܝܕ ܟܬܝ̈ܒܐ ܗܘ̈ܝܢ. ܛܘܦܣܐ ܐܢܝܢ ܥܕܟܝܠ: ܕܐܝܠܝܢ ܕܒܫܪܪܐ
ܡܣܬܥܪ̈ܢ ܨܝܕ ܐܝܠܝܢ ܕܪܚܝܩܝܢ ܡܢ ܐܠܗܐ. ܐܝܠܝܢ ܓܝܪ ܕܪܚܝܩܝܢ ܡܢ ܐܠܗܐ: ܡܛܠ ܥܒܕ̈ܝܗܘܢ ܡܣܠܝ̈ܐ ܕܦܪܫܘ ܒܝܬ
ܠܗܘܢ ܠܒܪܘܝܗܘܢ: ܗܘ ܐܠܗܐ ܡܛܠ ܚܘܒܗ ܨܝܕ ܡܨܥܝܘܬܐ ܕܒܪ̈ܝܬܐ: ܗܠܝܢ ܕܐܬܩܝܡ ܐܝܟ ܟܬܝܒ̈ܬܐ ܒܝܕ ܚܝܠܗ
ܘܚܟܡܬܗ: ܗܢܘ ܕܝܢ ܒܝܕ ܒܪܗ ܘܪܘܚܗ ܐܬܦܪܣܘ ܕܢܪܓܫܘܢ ܘܢܬܩܪܒܘܢ ܨܝܕ ܚܘܒܗ ܕܠܘܬܗܘܢ.
ܘܠܐ ܗܘܐ ܒܚܘܒܗ ܕܠܘܬܗܘܢ ܕܐܠܗܐ ܐܒܐ ܡܪܓܫܝܢ ܒܝܕ ܒܪ̈ܝܬܐ ܒܠܚܘܕ. ܐܠܐ ܐܦ
ܒܚܝܠܗ ܘܒܚܟܡܬܗ. ܐܟܙܢܐ ܓܝܪ ܕܐܝܢܐ ܕܩܪܐ ܒܟܬܝ̈ܒܬܐ: ܡܪܓܫ ܗܘ ܒܝܕ ܫܘܦܪܗܝܢ: ܒܚܝܠܐ ܘܒܣܘܟܠܐ ܕܐܝܕܐ
ܘܕܨܒܥܐ ܕܪܫܡܬ ܐܢܝܢ: ܥܡ ܨܒܝܢܐ ܕܟܬܘܒܗܝܢ. ܗܟܢܐ ܗܘ ܕܚܐܪ ܒܒܪ̈ܝܬܐ ܝܕܘܥܬܢܐܝܬ܆ ܒܐܝܕܗ ܘܒܨܒܥܗ ܕܒܪܘܝܗܝܢ
ܡܪܓܫ ܥܡ ܨܒܝܢܗ. ܗܢܘ ܕܝܢ ܚܘܒܗ.
ܘܐܢ ܬܐܡܪ ܠܝ ܕܐܝܟܢ ܡܫܟܚܐ ܐܝܕܐ ܘܨܒܥܐ: ܒܕܘܟܬ ܚܝܠܐ ܘܚܟܡܬܐ: ܗܢܘ ܕܝܢ ܒܕܘܟܬ
ܒܪܐ ܘܪܘܚܐ ܢܬܬܣܝ̈ܡܢ܆ ܫܡܥܝܗ̇ ܠܪܘܚܐ ܕܐܠܗܐ ܕܐܡܪܐ. ܕܝܡܝܢܗ ܕܡܪܝܐ ܥܒܕܬ ܚܝܠܐ ܘܝܡܝܢܗ ܕܡܪܝܐ ܐܪܝܡܬܢܝ.
ܘܝܡܝܢܟ ܡܪܝܐ ܗܕܝܪܐ ܒܚܝܠܐ. ܥܡ ܫܪܟܐ. ܗܐ ܝܡܝܢܐ ܘܚܝܠܐ ܒܪܐ. ܘܡܛܠ ܪܘܚܐ܆ ܗܘ ܒܪܐ ܐܡܪ ܒܣܒܪܬܗ. ܕܐܢ ܐܢܐ
ܒܪܘܚܐ ܕܐܠܗܐ ܡܦܩ ܐܢܐ ܕܝ̈ܘܐ. ܟܕ ܒܐܘܢܓܠܣܛܐ ܐܚܪܢܐ ܐܡܪ ܒܨܒܥܐ ܕܐܠܗܐ. ܗܐ ܨܒܥܐ ܘܚܟܡܬܐ ܪܘܚܐ ܕܐܠܗܐ.
ܘܐܬܚܙܝܬ ܕܐܝܕܐ ܘܨܒܥܐ ܕܐܠܗܐ܆ ܚܝܠܐ ܘܚܟܡܬܐ ܕܐܠܗܐ. ܗܢܘ ܕܝܢ ܒܪܐ ܘܪܘܚܐ ܕܐܠܗܐ.
ܘܗܕܐ ܡܢ ܬܫܡܫܬܐ ܟܠܗ̇ ܗܘܝܐ ܒܝܕ ܒܪ̈ܝܬܐ܆ ܨܝܕ ܐܝܠܝܢ ܕܪܚܝܩܝܢ ܡܢ ܐܠܗܐ.
ܕܡܢܗܘܢ ܒܚܙܬܐ ܡܬܒܣܡܝܢ ܡܢܗ܆ ܘܡܢܗܘܢ ܒܝܕ ܫܡܥܐ. ܐܝܠܝܢ ܕܝܢ ܕܡܛܠ ܕܟܝܘܬܗܘܢ ܘܥܒܕ̈ܝܗܘܢ ܡܩܒ̈ܠܐ: ܩܪܝܒܝܢ
ܠܘܬ ܐܠܗܐ. ܠܐ ܣܢܝܩܝܢ ܥܠ ܟܬܝ̈ܒܬܐ ܕܐܝܬܝܗܝܢ ܒܪ̈ܝܬܐ: ܕܒܐܝ̈ܕܝܗܝܢ ܢܪܓܫܘܢ ܒܨܒܝܢܗ ܘܒܚܝܠܗ ܘܒܚܟܡܬܗ
ܕܒܪܘܝܗܘܢ. ܐܠܐ ܡܢܗ̇ ܕܡܠܬܐ ܘܕܪܘܚܐ: ܐܘ ܡܢ ܐܝܕܐ ܘܨܒܥܐ ܡܫܬܡܫܝܢ: ܕܠܐ ܡܨܥܝܘܬܐ ܕܡܕܡ ܡܢ ܒܪ̈ܝܬܐ.
ܐܟܙܢܐ ܓܝܪ ܕܗܘ ܕܡܡܠܠ: ܠܐ ܡܫܬܡܥܐ ܡܠܬܗ ܒܠܥܕ ܡܢ ܪܘܚܗ: ܘܠܐ ܪܘܚܗ ܡܘܕܥܐ ܥܠ
ܨܒܝܢܗ ܒܠܥܕ ܡܢ ܡܠܬܗ. ܕܗܘ ܕܪܡܙ ܠܐ ܪܡܙ ܒܨܒܥܐ ܕܠܐ ܐܝܕܐ: ܐܘ ܒܐܝܕܐ ܕܠܐ ܨܒܥܐ܆ ܗܟܢܐ ܠܐ ܥܒܕ ܒܪܐ
ܕܐܠܗܐ ܡܕܡ: ܕܐܝܬܘܗܝ ܡܠܬܐ ܘܐܝܕܐ ܘܚܝܠܐ: ܒܠܥܕ ܡܢ ܪܘܚܐ ܕܐܝܬܝܗ̇ ܚܟܡܬܐ ܘܨܒܥܐ. ܐܡܝܪ ܓܝܪ. ܕܒܡܠܬܗ
ܕܡܪܝܐ ܐܬܥܒܕܘ ܫܡܝܐ. ܘܒܪܘܚܐ ܕܦܘܡܗ ܟܠܗܘܢ ܚܝ̈ܠܘܬܗ. ܘܫܡܝܐ ܡܫܬܥܝܢ ܫܘܒܚܗ ܕܐܠܗܐ. ܘܥܒܕ ܐܝ̈ܕܘܗܝ ܡܚܘܐ
ܪܩܝܥܐ. ܘܡܛܠ ܕܚܙܘ ܫܡ̈ܝܟ ܥܒܕܐ ܕܨܒ̈ܥܬܟ. ܗܐ ܡܠܬܐ ܘܪܘܚܐ܆ ܘܗܐ ܐܦ ܐܝܕܐ ܘܨܒܥܐ.
ܘܠܐ ܐܬܬܒܥ ܕܥܠ ܡܢܐ ܨܒ̈ܥܬܐ ܣܓܝ̈ܐܬܐ ܐܡܪܬ. ܪܘܚܐ ܕܝܢ ܚܕܐ ܗܐ. ܠܝ ܠܐ ܬܫܡܥ.
ܐܠܐ ܫܡܥ ܠܐܫܥܝܐ ܕܐܡܪ ܕܪܘܚܐ ܕܚܟܡܬܐ ܘܪܘܚܐ ܕܣܘܟܠܐ. ܥܡ ܫܪܟܐ ܕܪ̈ܘܚܐ. ܡܕܝܢ ܣܓܝ̈ܐܬܐ: ܘܠܐ ܠܢ ܕܢܪܢܐ
ܡܢ ܗܕܐ܆ ܫܡܥܬ ܡܢ ܠܗܘ܆ ܫܡܥ ܬܘܒ ܐܦ ܠܦܘܠܘܣ ܕܐܡܪ. ܕܫܘ̈ܚܠܦܐ ܕܡܫܟܚܐ ܠܪ̈ܚܝܩܐ:
ܒܕܡܘܬ ܐܬܘ̈ܬܐ ܨܒܝܢܐ ܘܚܝܠܐ ܘܚܟܡܬܐ ܕܒܪܘܝܗܝܢ. ܗܘ ܚܘܒܐ ܘܚܝܠܐ ܘܚܟܡܬܐ
ܡܫܡܫܝܢ ܠܐܝܠܝܢ ܕܩܪܝܒܝܢ. ܕܐܝܬܝܗܘܢ ܐܦ ܗܢܘܢ ܒܪܝܬܐ ܕܟܝܬܐ ܘܡܠܝܠܬܐ ܘܡܬܝܕܥܢܝܬܐ. ܘܒܕܡܘܬܐ ܐܬܘ̈ܬܐ
ܚܝ̈ܠܬܢܝܬܐ ܘܪ̈ܝܫܝܬܐ܆ ܐܦ ܗܢܘܢ ܢܗܝܪܐܝܬ ܡܒܕܩܝܢ: ܥܠ ܚܝܠܗ ܘܚܟܡܬܗ ܕܒܪܘܝܗܝܢ.
ܐܝܟܢܐ ܕܝܢ ܕܚܝܠܐ ܘܚܟܡܬܐ: ܗܢܘ ܕܝܢ ܒܪܐ ܘܪܘܚܐ: ܐܝܬܝܗܘܢ ܕܒܗܘܢ ܡܬܝܕܥ ܚܝܠܗ
ܘܚܟܡܬܗ ܕܐܒܐ. ܒܪܐ ܕܝܢ ܘܪܘܚܐ ܐܬܘ̈ܬܗ ܐܢܘܢ ܕܐܒܐ ܕܒܗܘܢ ܡܬܝܕܥ. ܒܪܝܬܐ ܕܝܢ ܡܠܝܠܬܐ܆ ܐܬܘ̈ܬܐ ܐܢܝܢ
ܕܒܗܝܢ ܡܬܝܕܥ ܒܪܐ ܘܪܘܚܐ. ܡܛܠ ܗܝ ܕܒܨܠܡܢ. ܘܐܬܘ̈ܬܐ ܕܝܢ ܕܝܠܗ̇ ܕܒܪܝܬܐ ܡܬܝܕܥܢܝܬܐ ܘܠܐ ܡܓܫܡܬܐ܆ ܒܪܝܬܐ
ܡܬܚܙܝܢܝܬܐ ܘܡܓܫܡܬܐ ܐܝܬܝܗ̇. ܐܝܟ ܗܝ ܕܗܠܝܢ ܕܡܬܚܙ̈ܝܢ ܛܘܦܣܐ ܐܢܝܢ ܕܐܝܠܝܢ ܕܠܐ ܡܬܚܙ̈ܝܢ.
ܡܕܝܢ ܐܠܨܐ ܠܢ ܠܐܝܠܝܢ ܕܐܝܬܝܢ ܒܪܝܬܐ ܡܠܝܠܬܐ: ܡܛܠ ܥܠܬܐ ܐܝܕܐ ܕܗܫܐ ܠܐ ܐܠܨܐ
ܕܢܡܪܝܗ̇: ܐܬܟܕܢܢ ܥܡ ܒܪܝܬܐ ܗܕܐ ܡܬܚܙܝܢܝܬܐ܆ ܕܢܐܨܦ ܕܒܝܕ ܗܠܝܢ ܕܡܬܚܙ̈ܝܢ. ܢܥܘܠ ܘܢܪܓܫ ܒܐܝܠܝܢ ܕܠܐ
ܡܬܚܙܝܢ. ܘܗܕܐ ܠܡܣܥܪ ܠܐ ܡܫܟܚܝܢ ܚܢܢ: ܟܕ ܥܕܟܝܠ ܦܝܫܝܢܢ ܐܦ ܡܢ ܕܢܕܥ: ܚܝܠܐ ܟܠܗ ܕܡܬܪ̈ܓܫܢܝܬܐ.
ܐܝܟܢܐ ܓܝܪ ܕܓܢܝܙ ܣܘܥܪܢܐ ܕܟܣܐ ܒܟܬܝ̈ܒܬܐ: ܡܢ ܐܝܠܝܢ ܕܠܐ ܝܕܥܝܢ ܠܡܩܪܐ
ܐܢܝܢ܆ ܗܟܢܐ ܗܘ ܕܚܣܝܪ ܡܢ ܣܘܟܠܗܝܢ ܕܒܪ̈ܝܬܐ ܗܠܝܢ ܡܬܚܙ̈ܝܢܝܬܐ: ܚܣܝܪ ܡܢ ܕܢܪܓܫ ܒܒܪܝܐ ܗܝ ܡܬܝܕܥܢܝܬܐ
ܕܟܣܝܐ ܒܗܝܢ: ܟܡܐ ܐܢ ܚܐܪ ܒܗܝܢ. ܐܝܢܐ ܕܝܢ ܕܡܛܠ ܚܦܝܛܘܬܗ ܘܕܟܝܘܬܗ ܐܬܕܪܫ ܒܗܝܢ܆ ܝܕܥ ܕܟܠܗܝܢ ܥܠܘܗܝ
ܡܒܕ̈ܩܢ. ܘܡܐ ܕܐܪܓܫ ܒܗܕܐ܆ ܗܝܕܝܢ ܐܦ ܗܘ ܥܠ ܚܝܠܐ ܘܚܟܡܬܐ ܕܬܩܢܘܬܗ ܡܫܘܕܥ. ܘܡܟܪܙ ܕܠܐ ܫܠܘܐ ܥܠ ܨܒܝܢܗ
ܕܚܘܒܐ ܗܘ ܕܠܐ ܡܬܕܪܟ: ܕܐܫܬܡܫ ܒܗܘܢ ܒܚܝܠܐ ܘܒܚܟܡܬܐ.
ܘܐܡܪ ܐܢܐ ܦܫܝܩܐܝܬ܆ ܕܐܝܟܢܐ ܕܦܓܪܐ ܡܒܕܩ ܥܠ ܢܦܫܐ ܕܥܡܪܐ ܒܗ ܒܝܕ ܣܘܥܪ̈ܢܘܗܝ:
ܘܗܝ ܢܦܫܐ ܡܟܪܙܐ ܥܠ ܗܘܢܐ ܕܐܝܬܘܗܝ ܪܝܫܗ ܒܝܕ ܙܘ̈ܥܝܗ̇܆ ܗܟܢܐ ܐܦ ܗܘܢܐ ܕܐܝܬܘܗܝ ܦܓܪܐ ܕܪܘܚܐ ܘܕܡܠܬܐ:
ܐܝܟ ܦܓܪܐ ܥܠ ܢܦܫܐ ܕܥܡܪܐ ܒܗ ܡܒܕܩ ܥܠܝܗܘܢ. ܘܗܝ ܗܕܐ ܢܦܫܗ ܕܗܢܐ ܗܘܢܐ܆ ܡܒܕܩܐ ܥܠ ܗܘܢܗ ܕܐܝܬܘܗܝ ܐܒܐ.
ܘܐܝܟܢܐ ܕܗܘܢܐ ܒܝܕ ܡܨܥܝܘܬܗ̇ ܕܢܦܫܐ ܡܥܒܕ ܒܦܓܪܗ ܕܐܝܬܘܗܝ ܗܘܢܐ.
ܦܓܪܗ ܕܝܢ ܕܗܘܢܐ ܠܐ ܝܕܥ ܡܢܐ ܣܥܪ ܗܘܢܐ ܗܘܢܐ ܕܝܢ ܕܐܝܬܘܗܝ ܦܓܪܗ ܕܗܘܢܐ ܝܕܥ
ܡܢܐ ܣܥܪ ܗܘܢܗ ܘܡܢܐ ܣܥܪ ܘܡܢܐ ܥܬܝܕ ܠܡܣܥܪ. ܡܛܠ ܕܗܘܝܘ ܒܠܚܘܕ ܡܢ ܟܠܗܝܢ ܒܪ̈ܝܬܐ ܘܛܟܣܗܝܢ: ܨܠܡܗ ܫܪܝܪܐ
ܘܡܩܒܠܢܐ ܕܝܕܥܬܗ ܕܐܒܐ. ܗܘܢܐ ܠܡ ܕܡܬܚܕܬ ܒܝܕܥܬܐ ܒܕܡܘܬܐ ܕܒܪܝܗ.
ܘܐܢ ܟܬܝ̈ܒܬܐ ܗܠܝܢ ܕܠܪ̈ܚܝܩܐ ܡܫܡ̈ܫܢ: ܡܫܟ̈ܚܢ ܕܢܘ̈ܕܥܢ ܡܢܐ ܐܣܬܥܪ ܘܡܢܐ
ܥܬܝܕ ܕܢܣܬܥܪ܆ ܚܕ ܟܡܐ ܡܠܐ ܘܪܘܚܐ: ܟܠ ܚܟܡܝܢ ܘܟܠ ܡܫܘܕܥܝܢ ܠܗܘܢܐ ܦܓܪܗܘܢ. ܘܐܡܪ ܐܢܐ ܒܫܪܪܐ ܕܬܪ̈ܥܐ
ܣܓܝ̈ܐܐ ܕܡܠܝܢ ܦܘܪ̈ܫܢܐ ܡܫܚ̈ܠܦܐ ܦܓܥܘ ܒܝ ܒܕܘܟܬܐ ܗܕܐ. ܘܠܐ ܨܒܝܬ ܕܐܪܫܘܡ ܐܢܘܢ ܠܟ .. ܛ. ܗܝ ܕܠܐ
........ ـܬ ܕܠܟܪܛܝܣܐ ܘ .... ܐܗܝܡܢ ....... ܗܢܘܢ ܕܕܠܡܐ ........ ܕܝܢ ܕܢܦܓܥܘܢ . ܗ .......
ܟܬܝܒܬܐ ܘܡܛܠ ܕܡܬܚܣܢ ܗܘ ܟܪܛܝܣܐ ܡܢ ܡܪ̈ܚܐ. ܘܡܛܠ ܗܕܐ ܠܐ ܡܫܟܚܐ ܕܥܠ ܟܠܡܕܡ ܢܬܐܫܪ.
ܘܐܝܟܢܐ ܕܐܬܚܙܝܬ ܕܐܝܬ ܡܕܡ ܕܠܐ ܡܫܟܚ ܟܪܛܝܣܐ ܘܕܝܘܬܐ ܕܢܘܕܥܘܢܝܗܝ. ܗܟܢܐ ܟܒܪ
ܐܝܬ ܡܕܡ: ܕܠܐ ܡܫܟ̈ܚܢ ܒܪ̈ܝܬܐ ܕܐܝܬܝܗܝܢ ܟܬܝܒ̈ܬܐ ܕܠܘܬ ܪ̈ܚܝܩܐ: ܕܢܘܕ̈ܥܢ ܟܠܗ ܨܒܝܢܐ ܕܟܬܘܒܗܝܢ. ܐܡܪ
ܐܢܐ ܕܝܢ ܟܝܢܗ. ܡܛܠ ܕܠܘ ܨܠܡܗ ܐܢܝܢ ܟܠܗܝܢ. ܡܠܬܐ ܕܝܢ ܘܪܘܚܐ ܕܐܝܬܝܗܘܢ ܐܬܘ̈ܬܗ ܕܐܒܐ܆ ܟܠ ܚܟܡܝܢ ܘܟܠ
ܡܘܕܥܝܢ. ܡܛܠ ܕܠܐ ܗܘ̈ܝ ܒܪ̈ܝܬܐ. ܐܠܐ ܨܠܡܐ ܚܬܝܬܐ ܘܨܡܚܐ ܫܪܝܪܐ ܕܐܝܬܘܬܗ ܕܐܒܐ.
ܚܟܡ ܕܝܢ ܕܐܦ ܗܘܢܐ ܟܠ܆ ܡܛܠ ܕܡܢ ܡܠܬܐ ܘܪܘܚܐ ܝܕ̈ܥܝ ܟܠ: ܕܐܝܬܘܗܝ ܐܦ ܗܘ
ܨܠܡܗܘܢ ܫܪܝܪܐ ܘܕܡܘܬܗܘܢ ܡܬܒܕܩ ܠܗ. ܐܝܟܢܐ ܕܗܘ ܕܩܪܝܒ ܨܝܕ ܚܒܪܗ: ܡܨܐ ܝܕܥ ܟܠܗ ܨܒܝܢܗ ܒܝܕ ܡܠܬܗ ܘܪܘܚܗ.
ܘܐܝܟܐ ܕܐܝܬ ܡܕܡ ܕܠܐ ܡܬܓܠܐ ܠܗ ܡܢ ܡܠܬܐ ܘܪܘܚܐ܆ ܠܘ ܡܛܠ ܕܠܐ ܐܫܟܚܘ ܗܢܘܢ ܕܢܘܕܥܘܢ. ܐܠܐ ܡܛܠ ܗܢܘܢ
ܕܫܡܥܝܢ ܠܐ ܣܦܩܝܢ ܠܟܠ.
ܗܘܢܐ ܕܝܢ ܡܛܠ ܗܘܢܗ ܠܟܠ ܣܦܩ. ܦܓܪܐ ܕܝܢ ܐܦܠܐ ܟܝܢܗ ܝܕܥ. ܢܦܫܐ ܕܝܢ ܝܕܥܐ
ܟܝܢܐ ܕܦܓܪܗ܆ ܟܕ ܟܝܢܗ ܠܐ ܝܕܥܐ. ܡܐ ܕܝܢ ܕܝܕܥܬ ܟܝܢܗ܆ ܠܐ ܡܟܝܠ ܢܦܫܐ ܗܝ ܐܠܐ ܗܘܢܐ.
ܘܗܘܢܐ ܠܐ ܡܪܓܫ ܒܟܝܢܗ: ܐܠܐ ܒܝܕ ܡܠܬܐ ܘܪܘܚܐ ܕܐܝܬܝܗܘܢ ܢܦܫܗ. ܘܐܝܟܢܐ ܕܠܐ
ܡܬܝܕܥ ܟܝܢܗ ܕܦܓܪܐ: ܐܠܐ ܒܝܕ ܢܦܫܐ ܕܥܡܪܐ ܒܗ: ܘܠܐ ܗܝ ܢܦܫܐ ܡܬܝܕܥܐ ܒܠܥܕ ܡܢ ܦܓܪܗ܆ ܗܟܢܐ ܐܦܠܐ ܒܪܐ
ܘܪܘܚܐ ܡܬܝܕܥܝܢ: ܐܠܐ ܒܝܕ ܗܘܢܐ ܕܐܝܬܘܗܝ ܦܓܪܗܘܢ. ܢܦܫܗ ܕܝܢ ܕܗܘܢܐ܆ ܝܕܥܐ ܗܝ ܗܘܢܗ ܒܟܠܙܒܢ ܐܦ ܕܠܐ
ܦܓܪܗ: ܡܛܠ ܕܒܪܬ ܟܝܢܗ ܗܝ ܕܗܘܢܗ. ܗܢܘ ܕܝܢ ܕܐܒܐ.
ܘܐܝܟܢܐ ܕܐܝܬ ܐܡܬܝ ܕܢܫܩܠܘܢ ܗܠܝܢ ܫܡܗ̈ܐ ܘܡܢܝ̈ܢܐ: ܘܡܢ ܒܝܬ ܦܓܪܐ ܠܢܦܫܐ
ܘܠܗܘܢܐ: ܒܗܝ ܕܡܬܥܠܝܢ ܠܗܘܢ ܠܛܟܣܐ ܕܗܘܢܐ: ܡܛܠ ܗܝ ܕܗܒ ܠܗܘܢ ܕܢܗܘܘܢ ܒܢ ܚܕ: ܐܝܟܢܐ ܕܐܢܐ ܘܐܢܬ ܚܕ ܚܢܢ܆
ܗܟܢܐ ܐܝܬ ܐܡܬܝ ܕܢܫܬܩܠܘܢ ܫܡܗ̈ܐ ܘܡܢܝ̈ܢܐ: ܡܢ ܒܝܬ ܐܒܐ ܠܒܪܗ ܘܠܪܘܚܗ ܘܠܒܪܝܬܗ ܡܠܝܠܬܐ ܕܐܝܬܝܗ̇ ܦܓܪܗ:
ܡܛܠ ܗܝ ܕܢܗܘܐ ܐܠܗܐ ܟܠ ܒܟܠ.
ܠܐ ܕܝܢ ܬܣܒܪ ܡܛܠ ܕܐܡܪܬ ܕܡܫܬܩܠܝܢ ܫܡܗ̈ܐ ܘܡܢܝ̈ܢܐ: ܡܢ ܒܝܬ ܒܪܝܬܐ ܡܠܝܠܬܐ
ܠܒܪܘܝܗ: ܕܐܦ ܗܢܘܢ ܩܢܘ̈ܡܐ ܘܫܡ̈ܗܐ ܕܐܒܐ ܘܕܒܪܐ ܘܕܪܘܚܐ ܡܬܥܛܝܢ. ܐܠܐ ܐܝܟܢܐ ܕܟܝܢܗ ܕܗܘܢܐ ܡܬܚܝܕ ܒܟܝܢܗ
ܕܐܒܐ ܒܕܐܝܬܘܗܝ ܦܓܪܗ܆ ܗܟܢܐ ܫܡܗ̈ܝ ܢܦܫܐ ܘܦܓܪܐ: ܡܬܒܠܥܝܢ ܒܩܢܘ̈ܡܐ ܕܒܪܐ ܘܕܪܘܚܐ. ܘܕܠܐ ܫܘܠܡ ܡܩܘܐ ܚܕ
ܟܝܢܐ. ܬܠܬܐ ܩܢܘ̈ܡܝܢ ܕܐܠܗܐ ܘܕܨܠܡܗ. ܐܝܟ ... ܡܬܓܫܡـ ....... ܡܢ ܒܬܪ ܡܬ ...... ܡܛܠ (؟) ܫܠܡܘ ....
ܡܛܠ ܗܕܐ ܓܝܪ ܐܝܬ ܡܢܝ̈ܢܐ ܒܝܬ ܦܓܪܐ ܘܢܦܫܐ ܘܗܘܢܐ܆ ܡܛܠ ܫܘܚ̈ܠܦܐ ܕܨܒ̈ܝܢܐ.
ܡܫܬܩܠܝܢ ܕܝܢ ܫܡܗ̈ܐ ܘܡܢܝ̈ܢܐ: ܗܢܘܢ ܕܡܛܠ ܡܬܬܙܥܢܘܬܐ ܥܠܘ ܥܠ ܗܘܢܐ. ܡܫܬܩܠܝܢ ܕܝܢ ܐܦ ܫܡܗ̈ܐ ܣܓܝ̈ܐܐ:
ܗܢܘܢ ܕܐܫܬܡܝ ܒܗܘܢ ܐܠܗܐ: ܘܐܬܟܢܝ ܐܠܨܐܝܬ ܡܛܠ ܫܘ̈ܚܠܦܝܗܘܢ ܕܡܠܝ̈ܠܐ ܡܥܒܕܢܐܝܬ ܘܡܕܒܪܢܐܝܬ ܘܫܐܝܠܐܝܬ ܐܝܟ
ܕܡܛܠ ܡܣ̈ܟܠܢܐ ܕܝܢܐ. ܘܡܛܠ ܚܛܗ̈ܐ ܬܒܘܥܐ. ܘܡܛܠ ܚܛܗ̈ܐ ܬܒܘܥܐ. ܘܡܛܠ ܟܪ̈ܝܗܐ ܐܣܝܐ. ܘܠܘܬ ܡܝ̈ܬܐ ܡܢܚܡܢܐ.
ܡܛܠ ܒܥܠܕܒܒܘܬܐ ܘܚܛܝܬܐ܆ ܩܛܘܠܐ ܘܡܬܬܘܝܢܐ. ܥܡ ܫܪܟܐ.
ܠܘ ܐܝܟ ܡܢ ܕܗܘ ܗܠܝܢ ܟܠܗܘܢ ܦܘܪ̈ܫܢܐ ܠܝܬܘܗܝ ܐܠܐ ܡܛܠ ܕܗܢܘܢ ܕܥܠܝܗܘܢ
ܣܢܝܩܝܢ ܠܝܬ ܐܢܘܢ . ܫܡܗ̈ܐ ܕܝܢ ܘܩܢܘ̈ܡܐ ܕܒܪܐ ܘܕܪܘܚܐ. ܠܐ ܥܒܪܝܢ. ܡܛܠ ܕܠܘ ... ܐܝܬ ܠܗܘܢ ...... ܠܗܐ
... ܘܐ .............. ܥܒܘܪܬܐ ܐܫܬܡܝܘ. ܠܐ ܥܒܪܝܢ. ܐܠܐ ܡܢ ܐܡܬܝ ܕܐܝܬܝܗ̇ ܥܠܬܗܘܢ ܐܝܬܝܗܘܢ ܘܟܡܐ
ܕܐܝܬܝܗ̇. ܠܘ ܕܝܢ ܐܝܟ ܒܪܝܬܐ ܡܠܝܠܬܐ: ܕܐܦ ܥܠܬܗ ܕܝܠܗ ܐܒܐ ܗܘ. ܕܗܕܐ ܕܝܢ ܒܛܝܒܘܬܐ ܕܗܢܘܢ ܕܝܢ ܒܟܝܢ
ܐܝܬܘܬܐ.
ܗܘ ܕܝܢ ܗܘܢܐ ܐܝܟ ܕܐܡܪܢܢ܆ ܚܕ ܗܘ ܟܝܢܗ ܘܩܢܘܡܗ ܘܛܟܣܗ. ܘܒܙܒܢ ܕܡܛܠ ܚܐܪܘܬܗ
ܡܫܠܛܬܐ ܢܦܠ ܡܢ ܛܟܣܗ ܩܕܡܝܐ ܐܫܬܡܝ ܢܦܫܐ. ܘܟܕ ܬܘܒ ܐܬܢܚܬ ܐܬܟܢܝ ܦܓܪܐ. ܘܒܙܒܢ ܗܘ ܟܕ ܗܘ ܦܓܪܐ ܘܢܦܫܐ
ܘܗܘܢܐ. ܡܛܠ ܫܘܚ̈ܠܦܐ ܕܨܒ̈ܝܢܘܗܝ. ܡܛܠ ܕܐܝܬ ܐܡܬܝ ܕܢܥܒܪܘܢ ܨܒ̈ܝܢܘܗܝ ܘܙܘ̈ܥܘܗܝ ܡܫܚ̈ܠܦܐ: ܘܢܩܘܡ ܒܒܪܝܬܗ
ܩܕܡܝܬܐ. ܚܕ ܗܘ ܟܝܢܗ ܘܩܢܘܡܗ ܘܫܡܗ ܗܘ ܕܐܠܗܐ ܝܕܥ ܠܗ. ܘܗܘ ܡܐ ܕܩܡ ܒܟܝܢܗ܆ ܚܕ ܗܘ ܠܡ ܡܢ ܟܠܗܘܢ ܗܘ̈ܝܐ.
ܕܠܐ ܐܬܪܗ ܘܠܐ ܫܡܗ ܝܕܝܥ. ܘܕܗܘܢܐ ܗܝ ܠܡ ܬܘܒ ܥܪܛܠܝ ܕܢܐܡܪ ܡܢܐ ܗܘ ܟܝܢܗ.
ܘܠܐ ܬܬܕܡܪ ܕܐܡܪܬ ܕܒܚܕܝܘܬܗܘܢ ܕܡܠܝ̈ܠܐ ܕܥܡ ܐܠܗܐ ܐܒܐ: ܚܕ ܐܢܘܢ ܟܝܢܐ ܒܬܠܬܐ
ܩܢܘ̈ܡܝܢ: ܕܠܐ ܬܘܣܦܬܐ ܡܕܡ ܘܠܐ ܫܘܚܠܦܐ. ܐܢ ܓܝܪ ܝܡܐ ܗܢܐ ܡܬܪܓܫܢܐ: ܕܚܕ ܗܘ ܒܟܝܢܗ ܘܒܓܘܢܗ ܘܒܛܥܡܗ:
ܘܐܡܬܝ ܕܢܚܠܛܘܢ ܒܗ ܢܗܪ̈ܘܬܐ ܣܓܝ̈ܐܐ ܩܢ̈ܝܝ ܛܥ̈ܡܬܐ ܡܫܚ̈ܠܦܬܐ: ܠܘ ܒܠܚܘܕ ܗܘ ܠܘܬ ܦܘܪ̈ܫܢܝܗܘܢ ܠܐ
ܡܫܬܚܠܦ. ܐܠܐ ܠܗܘܢ ܓܡܝܪܐܝܬ ܠܘܬ ܟܝܢܗ ܘܓܘܢܗ ܘܛܥܡܗ ܕܠܐ ܥܡܠ ܡܫܚܠܦ܆ ܚܕܟܡܐ ܝܡܐ ܡܬܝܕܥܢܐ ܘܠܐ ܡܣܬܝܟܢܐ
ܘܠܐ ܡܫܬܚܠܦܢܐ ܕܐܝܬܘܗܝ ܐܠܗܐ ܐܒܐ: ܐܡܬܝ ܕܢܬܘܒܘܢ ܠܗ ܗܘ̈ܢܐ ܒܕܡܘܬ ܢܚ̈ܠܐ ܠܝܡܐ. ܠܟܝܢܗ ܘܠܓܘܢܗ ܘܠܛܥܡܗ
ܠܟܠܗܘܢ ܓܡܝܪܐܝܬ ܡܫܚܠܦ. ܘܡܟܝܠ ܠܐ ܗܘܘ ܣܓܝ̈ܐܐ. ܐܠܐ ܚܕ ܐܝܬܝܗܘܢ ܒܝܚܝܕܝܘܬܗ ܕܠܐ ܫܘܠܡ ܘܕܠܐ ܦܘܪܫ ܡܛܠ
ܚܕܝܘܬܗܘܢ ܘܡܘܙܓܗܘܢ ܕܥܡܗ.
ܘܐܝܟܢܐ ܕܒܚܘܠܛܢܗܘܢ ܕܢܗܪ̈ܘܬܐ ܕܥܡ ܝܡܐ: ܕܗܘ̈ܢܐ ܕܥܡ ܐܒܐ: ܗܘܝܐ ܬܪܝܢܘܬ
ܟܝ̈ܢܐ ܐܘ ܪܒܥܝܘܬ ܩܢܘ̈ܡܐ. ܐܠܐ ܐܝܟ ܕܚܕ ܗܘ ܝܡܐ ܒܟܝܢܗ ܘܒܓܘܢܗ ܘܒܛܥܡܗ: ܩܕܡ ܕܢܬܚܠܛܘܢ ܒܗ ܢܗܪ̈ܘܬܐ ܐܦ
ܡܐ ܕܐܬܚܠܛܘ ܒܗ܆ ܗܟܢܐ ܟܝܢܐ ܐܠܗܝܐ ܚܕ ܗܘ ܒܩܢܘ̈ܡܐ ܬܠܬܐ ܕܐܒܐ ܘܕܒܪܐ ܘܕܪܘܚܐ: ܐܦ ܡܐ ܕܐܬܚܠܛܘ ܒܗ ܗܘ̈ܢܐ
ܐܝܟ ܕܩܕܡ ܕܢܬܚܠܛܘܢ ܒܗ.
ܚܙܝܢܢ ܓܝܪ ܕܐܦ ܩܕܡ ܕܢܓܠܘܢ ܡܝ̈ܐ ܕܝܡܐ ܠܐܬܪܐ ܚܕ ܕܬܬܚܙܐ ܝܒܝܫܬܐ܆ ܐܦ
ܢܗܪ̈ܘܬܐ ܒܗ ܚܕ ܗܘܘ. ܡܢ ܒܬܪ ܕܝܢ ܕܐܬܦܪܫܘ ܡܢܗ ܣܓܝ̈ܐܐ ܡܫܚ̈ܠܦܐ ܒܕܟܠ ܚܕܚܕ ܡܢܗܘܢ ܐܫܬܚܠܦ ܠܛܥܡܗ ܕܐܪܥܐ
... ܐܫܬܟܚ ܒܗ. ܗܟܢܐ ܒܗ̇ ܒܕܡܘܬܐ ܩܕܡ ܕܬܦܪܫ ܚܛܝܬܐ ܒܝܬ ܗܘ̈ܢܐ ܠܐܠܗܐ: ܒܕܡܘܬ ܐܪܥܐ ܒܝܬ ܝܡܐ ܠܢܗܪ̈ܘܬܐ܆
ܚܕ ܗܘܘ ܒܗ ܕܠܐ ܫܘܚܠܦܐ. ܟܕ ܕܝܢ ܐܬܝܕܥܬ ܚܛܝܬܗܘܢ ܐܬܦܪܫܘ ܡܢܗ ܘܐܬܢܟܪܝܘ ܠܗ ܘܠܛܥܡܗ ܘܠܓܘܢܗ. ܒܕܩܢܘ ܟܠ
ܚܕ ܚܕ ܡܢܗܘܢ ܛܥܡܗ ܕܦܓܪܐ ܗܘ ܕܐܬܟܕܢܘ ܥܡܗ. ܟܕ ܕܝܢ ܬܫܬܩܠ ܐܪܥܐ ܡܢ ܡܨܥܬܐ܆ ܚܕ ܗܘ ܝܡܐ ܘܢܗܪ̈ܘܬܐ ܕܠܐ
ܫܘܚܠܦ. ܗܟܢܐ ܟܕ ܬܬܥܛܐ ܚܛܝܬܐ ܡܢ ܒܝܬ ܗܘ̈ܢܐ ܠܐܠܗܐ܆ ܚܕ ܐܢܘܢ ܘܠܐ ܣܓܝ̈ܐܐ.
ܠܐ ܕܝܢ ܡܛܠ ܕܐܡܪܬ: ܕܐܝܟ ܢܗܪ̈ܘܬܐ ܡܢ ܩܕܝܡ ܒܝܡܐ ܐܝܬܝܗܘܢ ܗܘܘ ܡܠܝ̈ܠܐ
ܒܐܠܗܐ ܬܣܒܪ ܡܢ ܗܕܐ: ܕܐܦ ܕܠܐ ܫܘܪܝ ܐܢܘܢ ܥܡܗ ܒܟܝܢܗܘܢ. ܐܠܐ ܐܦܢ ܒܚܟܡܬܗ ܘܒܚܝܠܐ ܕܥܒܘܕܘܬܗ: ܠܗ ܥܡܗ
ܐܝܬܝܗܘܢ ܕܠܐ ܫܘܪܝܐ (؟) ܠܒܪܝܬܗܘܢ ܫܘܪܝܐ ܐܝܬ. ܠܐ ܕܝܢ ... ܠܗܘܢ ܫܘܠܡܐ ܡܛܠ ܚܕܝܘܬܗܘܢ ܕܥܡ ܗܘ ܕܫܘܪܝܐ
ܠܝܬ ܠܗ ܐܦܠܐ ܫܘܠܡܐ ܡܫܬܟܚ ܠܗ.
ܠܗܠܝܢ ܟܠܗܝܢ ܐܬܢܬܦ ܪܥܝܢܝ: ܟܕ ܒܡܘܗܒܬܐ ܪܒܬܐ ܕܟܬܝ̈ܒܬܐ ܨܒܝܬ ܠܡܬܒܩܝܘ.
ܘܡܛܠ ܕܡܢ ܗܕܐ ܕܘܡܪܐ ܪܒܐ ܐܚܕܢܝ: ܘܐܥܝܪܢܝ ܠܘܬ ܬܫܒܘܚܬܐ ܘܩܘܒܠ ܛܝܒܘܬܐ ܕܝܗܘܒܗ܆ ܨܒܝܬ ܕܐܦ ܠܚܘܒܟ ܐܪܫܘܡ
ܐܢܝܢ. ܕܐܦ ܐܢܬ ܬܓܕܘܠ ܟܠܝܠ ܬܫܒܘܚܬܐ ܕܠܐ ܫܠܘܐ ܠܗܘ ܕܕܝܠܗ ܗܘ ܥܒܕ ܬܫܒܘܚܬܐ. ܘܢܦܝܣܝܘܗܝ ܕܐܝܟܢܐ
ܕܒܪ̈ܚܡܘܗܝ ܐܫܘܝ ܠܢ ܕܥܠ ܐܦ̈ܝ ܗܠܝܢ ܙܥܘܪ̈ܝܬܐ ܢܩܠܣܝܘܝ܆ ܬܘܒ ܢܫܘܐ ܠܢ ܒܛܝܒܘܬܗ܆ ܕܕܠܐ ܡܨܥܝܘܬܐ ܕܡܕܡ ܡܢ
ܒܪ̈ܝܬܐ: ܐܠܐ ܒܡܨܥܝܘܬܐ ܕܒܪܗ ܘܕܪܘܚܗ: ܢܬܒܣܡ ܡܢ ܚܘܒܗ ܕܠܐ ܫܘܠܡ܆ ܘܢܫܒܚܝܘܗܝ ܥܠ ܟܠ ܕܒܪܐ ܐܡܝܢ.
ܫܡܥ ܕܝܢ ܡܟܝܠ ܗܘ ܡܕܡ ܕܡܛܠܬܗ ܗܘܬ ܥܠܬܐ ܠܟܬܝ̈ܒܬܢ ܠܘܬ ܒܣܝܡܘܬܟ ܘܫܒܘܩ