ܐܓܪܬܐ ܕܗܝܡܢܘܬܐ ܕܛܘܒܢܐ ܐܘܓܪܝܣ

ܐܝܟ ܕܒܣܘܓܐܐ ܬܗܪܐ ܐܢܐ ܕܡܢܐ ܓܕܫܟܘܢ. ܘܡܢ ܐܝܟܐ ܗܟܢܐ ܛܒ ܣܓܝ ܐܝܟ ܒܨܝܪ̈ܐ ܒܥܝܢ ܐܢܬܘܢ ........ ܘܬܚܘܒܘܬ ܡܣܟܢܘܬܢ ......... ܡܕܡ ܪܚܝܡܐ ܠܐ ܐܝܬ ܠܗ. ܘܒܡ̈ܠܐ ܡܦܝܣܝܢ ܐܢܬܘܢ ܘܡܚܬܚܬܝܢ ܐܢܬܘܢ ܠܢ. ܟܕ ܡܣܩܝܢ ܐܢܬܘܢ ܥܠ ܒܠܢ ܪܚܡܘܬܐ ܘܡܕܝܢܬܐ. ܟܕ ܒܥܝܢ ܐܢܬܘܢ ܐܝܟ ܠܐܢܫ̈ܝܢ ܥܪ̈ܘܩܐ. ܨܝܕ ܪ̈ܚܡܐ ܐܒܗ̈ܝܐ ܠܘܬܟܘܢ ܬܘܒ ܬܗܦܟܘܢ ܠܢ. ܘܐܢܐ ܕܝܢ ܕܗܘܝܬ ܥܪܘܩܐ܆ ܡܘܕܐ ܐܢܐ ܘܠܐ ܟܦܪ ܐܢܐ. ܥܠܬܐ ܕܝܢ ܝܠܦܘ.

ܒܗܝ ܕܡܢ ܩܕܝܡ ܡܚܒܝܢ ܗܘܝܢ. ܘܗܟܢܐ ܐܝܟ ܕܐܝܬܝܗ̇. ܝܬܝܪܐܝܬ ܐܝܟ ܕܡܢ ܫܠ ܒܠܥܢܢ. ܠܐ ܐܫܟܚܢܢ ܕܢܐܚܘܕ ܒܚܘ̈ܫܒܝܢ . ܐܝܟ ܗܠܝܢ ܕܒܩ̈ܠܐ ܕܦܩ̈ܥܐ ܕܡܢ ܫܠ ܒܚܘܪܦܐ ܡܬܬܙܝܥܝܢ. ܦܪܚܬ ܘܐܪܚܩܬ ܡܢܟܘܢ. ܘܫܟܢܬ ܙܒܢܐ ܕܘܠܐ. ܘܒܬܪܟܢ ܪܚܡܬܐ ܡܬܢܩܦܐ ܗܘܬ ܠܝ܆ ܕܒܥܬܐ ܕܢܝ̈ܫܐ ܘܝܘ̈ܠܦܢܐ ܡܫܒ̈ܚܐ ܘܐܠܗܝ̈ܐ. ܘܪܚܡܬ ܚܒܪܘܬܐ ܕܥܠܝܗܘܢ. ܐܡܪ ܗܘܝܬ ܓܝܪ ܕܐܝܟܢܐ ܡܨܝܐ ܕܐܚܪܢܝܐܝܬ ܕܐܢܐ ܐܦܓܕܝܗ̇ ܠܒܝܫܘܬܐ ܕܒܢ ܥܡܪܐ. ܘܡܢܘ ܕܠܝ ܢܗܘܐ ܠܒܢ ܘܢܫܘܙܒܢܝ ܡܢ ܥܣܘ: ܘܠܘܬ ܪܚܡܬ ܚܟܡܬܐ ܡܠܝܠܬܐ ܘܡܪܡܪܡܬܐ ܢܕܪܫܢܝ.

ܐܠܐ ܡܛܠ ܕܒܚܝܠܐ ܕܐܠܗܐ: ܗܫܐ ܐܝܟ ܚܝܠܢ ܐܫܟܚܢܝܗܝ ܐܝܟ ܒܥܬܢ ܠܨܒܝܢܢ. ܕܠܡܐܢܐ ܓܒܝܐ ܘܒܐܪܐ ܥܡܝܩܬܐ ܦܘܡܐ ܕܡܫܝܚܐ ܓܪܓܪܝܣ ܐܚܕܢܢ ܩܠܝܠ ܡܦܝܣ ܐܢܐ ܕܩܠܝܠ ܬܫܒܩܘܢ ܠܢ ܙܒܢܐ. ܘܫܐܠܝܢ ܚܢܢ ܕܝܢ ܠܡܩܘܝܢܘܬܐ ܘܓܒܝܢܢ ܠܘ ܕܒܡܕܝ̈ܢܬܐ ܠܐ ܓܝܪ ܐܛܥܝ ܠܢ ܒܝܫܐ. ܕܒܗܠܝܢ ܛܥܒܘܬܐ ܠܒܢܝ̈ܢܫܐ ܡܨܛܢܥ. ܐܠܐ ܕܢܢ܆ ܕܥܢܝܢܐ ܕܠܘܬ ܩܕܝ̈ܫܐ ܐܝܬܘܗܝ ܒܠܚܘܕ ܡܘܬܪܢܐ. ܟܕ ܓܝܪ ܢܐܡܪ ܘܢܫܡܥ ܒܝܘ̈ܠܦܢܐ ܐܠܗܝ̈ܐ ܐܡܝܢܐܝܬ܆ ܥܝܕܐ ܩܒܝܥܐ ܘܚܝܠܬܢܐ ܘܠܐ ܡܬܬܙܝܥܐ ܕܚܙ̈ܘܢܐ ܢܣܒܝܢܢ. ܘܕܗܠܝܢ ܕܡܢܢ ܘܥܠܝܢ ܗܢܘ ܚܝܠܐ.

ܐܢܬܘܢ ܕܝܢ ܐܘ ܪ̈ܫܐ ܐܪ̈ܚܝܡܐ ܝܬܝܪ ܡܢ ܟܠ ܘܐܠܗܝ̈ܐ܆ ܛܪܘ ܡܢ ܪ̈ܥܘܬܐ ܕܦܠܫܬ. ܕܠܐ ܚܕ ܡܢܗܘܢ ܢܛܥܐ ܘܢܛܡܡ ܒܪ̈ܬܟܘܢ: ܘܕܟܝܘܬܐ ܕܝܕܥܬܐ ܕܗܝܡܢܘܬܟܘܢ ܢܕܠܚܘܢ. ܗܕܐ ܓܝܪ ܐܝܬ ܠܗܘܢ ܝܨܝܦܘܬܐ. ܕܠܐ ܡܢ ܟܬܒ̈ܐ ܐܠܗܝ̈ܐ ܢܠܦܘܢ ܠܢܦ̈ܫܬܐ ܬܡܝ̈ܡܬܐ. ܐܠܐ ܐܢ ܡܢ ܚܟܡܬܐ ܒܪܝܬܐ ܢܫܩܦܘܢܝܗܝ ܠܫܪܪܐ. ܗܘ ܓܝܪ ܕܠܐ ܝܠܝܕܐ ܘܝܠܝܕܐ ܡܥܠ ܥܠ ܗܝܡܢܘܬܢ: ܘܠܗܘ ܕܡܢ ܡܬܘܡ ܐܝܬܘܗܝ ܕܠܝܬܘܗܝ ܡܠܦ: ܘܠܗܘ ܕܟܝܢܐܝܬ ܐܒܐ ܕܗܘܐ ܐܒܐ: ܘܠܪܘܚܐ ܕܩܘܕܫܐ ܠܐ ܡܬܘܡܝܐ ܐܡܪ: ܠܐ ܗܘܐ ܐܝܟ ܦܠܫ̈ܬܝܐ ܣܥܪ܆ ܗܠܝܢ ܕܚܣܡܝܢ ܒܥܪ̈ܒܘܗܝ ܕܪܫܐ ܕܐܒܗ̈ܬܐ: ܕܠܐ ܢܫܬܘܢ ܡܢ ܡܝ̈ܐ ܕܟܝ̈ܐ ܕܢܒܗܝܢ ܠܚܝ̈ܐ ܕܠܥܠܡ܆ ܐܠܐ ܐܝܟ ܡܠܬܐ ܕܢܒܝܘܬܐ ܦܘܪܥܢܐ ܢܩܒܠܘܢ ܗܝ ܕܐܡܪܬ. ܕܠܝ ܫܒܩܘ ܡܒܘܥܐ ܕܡܝ̈ܐ ܚܝ̈ܐ܆ ܘܚܦܪܘ ܠܗܘܢ ܓܘ̈ܒܐ. ܓܘ̈ܒܐ ܪ̈ܥܝܥܐ ܕܠܐ ܡܫܟܚܝܢ ܠܡܩܒܐ ܡܝ̈ܐ. ܘܠܐ ܕܝܢ ܕܢܘܕܐ ............. ܐܠܗܐ ܘܠܪܘܚܐ ܕܩܘܕܫܐ ܐܠܗܐ. ܐܝܟ ܡܠ̈ܝ ܟܬܒ̈ܐ܆ ܘܕܗܢܘܢ ܕܡܥܠܝܐܝܬ ܐܪܓܫܘ ܒܗܝܢ ܘܐܠܦܘ:

ܠܘܩܒܠ ܕܝܢ ܗܠܝܢ ܕܡܢܬܦܝܢ ܠܗ ܠܩܘܒܠܢ ܠܐܪܙܐ ܬܠܝܬܝܐ ܢܐܡܪ ܕܚܢܢ ܕܚܕ ܗܘ ܐܠܗܐ ܡܘܕܝܢܢ. ܠܘ ܒܡܢܝܢܐ ܐܠܐ ܒܟܝܢܐ. ܟܠܡܕܡ ܓܝܪ ܕܒܡܢܝܢܐ ܡܬܐܡܪ܆ ܗܢܐ ܠܐ ܚܕ ܒܫܪܪܐ ܐܦܠܐ ܦܫܝܛܐ ܒܟܝܢܐ ܐܝܬܘܗܝ. ܐܠܗܐ ܕܝܢ ܦܫܝܛܐ ܗܘ. ܠܐ ܩܒܝܥܐ ܘܠܐ ܡܬܩܢܐ ܠܘܬ ܟܠܢܫ ܡܬܘܕܐ. .. ܠܘ ܗܟܝܠ ܚܕ ܗܘ ܒܡܢܝܢܐ ܐܠܗܐ

ܗܕܐ ܓܝܪ ܕܐܡܪܬ ܕܐܝܟ ܗܕܐ ܗܝ. ܒܡܢܝܢܐ ܐܡܪܝܢܢ ܕܐܝܬܘܗܝ ܥܠܡܐ. ܐܠܐ ܠܘ ܚܕ ܒܟܝܢܐ ܐܦ ܠܐ ܦܫܝܛܐ. ܐܠܐ ܡܣܬܕܩܢܐ ܠܐܣ̈ܛܘܟܣܐ ܕܡܢܗܘܢ ܗܘܐ. ܠܢܘܪܐ ܘܐܐܪ ܘܡܝ̈ܐ ܘܐܪܥܐ. ܬܘܒ ܒܪܢܫܐ ܚܕ ܒܡܢܝܢܐ ܡܫܬܡܗ. ܚܕ ܓܝܪ ܒܪܢܫܐ ܒܥܝܕܐ ܐܡܪܝܢܢ. ܐܠܐ ܠܘ ܦܫܝܛܐ ܐܝܬܘܗܝ ܗܢܐ. ܕܡܢ ܦܓܪܐ ܘܢܦܫܐ ܐܬܩܝܡ. ܗܟܢܐ ܘܒܗ ܒܕܘܡܝܐ܆ ܘܠܡܠܐܟܐ ܚܕ ܒܡܢܝܢܐ ܡܢܝܢܢ. ܐܠܐ ܠܘ ܒܟܝܢܐ ܚܕ ܐܦܠܐ ܦܫܝܛܐ. ܐܘܣܝܐ ܓܝܪ ܐܡܪܝܢܢ ܠܗ ܥܡ ܩܕܝܫܘܬܗ ܠܟܝܢܐ ܕܡܠܐܟ̈ܐ.

ܐܢ ܗܟܝܠ ܟܠܡܕܡ ܕܒܡܢܝܢܐ ܚܕ: ܚܕ ܒܟܝܢܐ ܠܝܬܘܗܝ ܘܚܕ ܒܟܝܢܐ ܘܦܫܝܛܐ ܒܡܢܝܢܐ ܠܝܬܘܗܝ: ܚܢܢ ܕܝܢ ܐܡܪܝܢܢ ܠܐܠܗܐ ܚܕ ܐܝܟܢܐ ܡܥܠܝܢ ܥܠܝܢ ܠܡܢܝܢܐ ܕܟܠ ܟܠܗ ܦܪܫܝܢܢ ܠܗ ܘܡܟܪܙܝܢ ....... ܗܘ ܟܝܢܐ ܡܬܝܕܥܢܐ ܘܛܘܒܬܢܐ. ܡܢܝܢܐ ܕܝܢ ܐܝܬܘܗܝ ܕܟܡܐ. ܟܡܐ ܕܝܢ ܠܟܝܢܐ ܡܓܫܡܐ ܡܙܘܓ. ܡܢܝܢܐ ܗܟܝܠ ܕܟܝܢܐ ܡܓܫܡܐ ܐܝܬܘܗܝ. ܥܒܘܕܐ ܕܝܢ ܕܓܘܫ̈ܡܐ ܗܝܡܢܢ ܕܐܝܬܘܗܝ ܡܪܝܐ. ܟܠ ܡܢܝܢܐ ܡܚܘܝܢܐ ܐܝܬܘܗܝ ܕܟܝܢܐ ܗܘܠܢܝܐ ܘܡܣܬܝܟܢܐ. ܚܕܝܘܬܐ ܕܝܢ ܘܝܚܝܕܝܘܬܐ. ܕܐܝܬܝܐ ܦܫܝܛܐ ܘܠܐ ܡܬܬܚܕܢܐ ܐܝܬܝܗ̇ ܡܚܘܝܢܝܬܐ.

ܟܠ ܗܟܝܠ ܕܡܢܝܢܐ ܐܘ ܒܪܝܬܐ ܡܘܕܝܢ ܠܒܪܗ ܕܐܠܗܐ ܐܘ ܠܪܘܚܐ ܕܩܘܕܫܐ ܛܥܐ ܕܟܝܢܐ ܥܒܝܐ ܘܡܣܬܝܟܢܐ ܡܥܠ. ܡܣܬܝܟܢܐ ܕܝܢ ܐܡܪ ܐܢܐ ܕܐܝܬܘܗܝ ܠܘ ܒܠܚܘܕ ܡܕܡ ܕܒܕܘܟܬܐ ܡܬܬܚܕ. ܐܠܐ ܘܗܘ ܡܕܡ ܕܒܡܩܕܡܘܬ ܝܕܥܬܐ ܣܝܟܗ: ܗܘ ܕܥܬܝܕ ܕܡܢ ܡܕܡ ܕܠܝܬܘܗܝ ܠܡܕܡ ܕܐܬܝܘܗܝ ܢܝܬܝܘܗܝ. ܗܘ ܕܐܦ ܕܒܐܘܡܢܘܬܐ ܡܫܟܚܐ ܕܢܣܝܟ. ܟܠ ܡܕܡ ܓܝܪ ܕܡܬܐܡܪ ܩܕܝܫܐ: ܘܟܝܢܐ ܡܣܬܝܟܢܐ ܐܝܬ ܠܗ܆ ܩܕܝܫܘܬܗ ܗܘ ܢܣܝܒܬܐ ܐܝܬ ܠܗ. ܘܡܕܡ ܕܩܕܝܫܘܬܗ ܢܣܝܒܬܐ ܐܝܬ ܠܗ. ܠܘ ܠܐ ܡܩܒܠܢܐ ܐܝܬܘܗܝ ܕܒܝܫܘܬܐ. ܒܪܐ ܕܝܢ ܘܪܘܚܐ ܕܩܘܕܫܐ܆ ܡܒܘܥܐ ܗܘ ܕܩܕܝܫܘܬܐ ܕܡܢܗ ܟܠܗ ܟܝܢܐ ܕܡܠܝ̈ܠܐ ܐܝܟ ܡܫܘܚܬܐ ܕܬܩܢܘܬܗܘܢ ܡܬܩܕܫ.

ܗܢܘ ܕܝܢ ܐܝܟ ܕܒܡܠܬܐ ܕܫܪܪܐ. ܠܘ ܕܠܐ ܕܡܠܐ ܘܕܡܠܐ ܠܐܒܐ ܒܪܐ ܐܡܪܝܢܢ ܬܪܬܝܗܝܢ ܓܝܪ ܐܟܚܕܐ ܒܫܘܝܘܬܐ ܠܐ ܡܫܟܚܐ ܕܢܬܐܡܪ̈ܢ. ܕܕܡܐ ܓܝܪ ܘܕܠܐ ܕܡܐ ܒܡܘ̈ܙܓܐ ܠܚܘܕܝܗܘܢ ܡܬܐܡܪ. ܐܠܗܘܬܐ ܕܝܢ ܒܪܬ ܚܐܪ̈ܐ ܐܝܬܝܗ̇ ܡܢ ܡܘ̈ܙܓܐ. ܘܟܕ ܒܚܕܝܘܬ ܟܝܢܐ ܡܘܕܝܢܢ ܡܩܒܠܝܢ ܚܢܢ ܐܡܝܐܘܣܝܢ. ܘܡܢ ܗܘܝܐ ܘܒܪܝܬܐ ܥܪܩܝܢܢ. ܕܥܠ ܐܠܗܐ ܐܒܐ ܐܝܬܝܐ ܝܠܘܕܐ ܕܒܪܐ ܐܝܬܝܝܐ܆ ܡܢ ܗܕܐ ܓܝܪ ܡܬܝܕܥܐ ܫܘܝܘܬ ܐܝܬܘܬܐ. ܐܠܗܐ ܓܝܪ ܒܐܝܬܘܬܐ܆ ܠܐܠܗܐ ܕܒܐܝܬܘܬܗ ܒܪ ܟܝܢ ܐܝܬܘܬܗ ܐܝܬܘܗܝ. ܘܡܛܠ ܕܡܬܐܡܪ ܐܠܗܐ ܐܦ ܒܪܢܫܐ܆ ܐܝܟ ܗܕܐ ܕܐܢܐ ܐܡܪܬ ܕܐܠܗ̈ܝܢ ܐܢܬܘܢ܆ ܐܦ ܫܐܕܐ ܐܠܗܐ: ܐܝܟ ܗܕܐ ܕܐܠܗ̈ܐ ܕܥܡ̈ܡܐ ܫܐܕ̈ܐ ܐܢܘܢ. ܐܠܐ ܒܪܢܫܐ ܒܛܝܒܘܬܐ ܡܬܐܡܪ. ܫܐܕ̈ܐ ܕܝܢ ܒܕܓܠܘܬܐ. ܐܠܗܐ ܕܝܢ ܠܚܘܕܘܗܝ ܒܐܝܬܘܬܗ ܐܝܬܘܗܝ ܐܠܗܐ.

ܠܚܘܕܘܗܝ ܕܝܢ ܡܐ ܕܐܡܪ ܐܢܐ. ܠܐܝܬܘܬ ܐܠܗܘܬܐ ܩܕܝܫܬܐ ܘܠܐ ܒܪܝܬܐ ܡܘܕܥ ܐܢܐ. ܗܝܕܝܢ ܕܝܢ ܕܠܚܘܕܘܗܝ܆ ܡܬܐܡܪ ܘܥܠ ܐܢܫ ܒܪ ܐܢܫܐ. ܘܥܠ ܟܝܢܐ ܕܟܘܠ ܦܫܝܛܐܝܬ. ܥܠ ܐܢܫ ܕܝܢ ܒܪܢܫܐ ܕܐܝܟ ܗܟܢܐ ܐܝܟ ܕܥܠ ܦܘܠܘܣ ܕܠܚܘܕܘܗܝ ܐܬܚܛܦ ܥܕܡܐ ܠܫܡܝܐ ܬܠܝ̈ܬܝܐ. ܘܫܡܥ ܡ̈ܠܐ ܕܠܐ ܡܬܡܠ̈ܠܢ: ܐܝܠܝܢ ܕܠܐ ܫܠܝܛ ܠܒܪ ܐܢܫܐ ܕܢܡܠܠ ܐܢܝܢ. ܕܥܠ ܟܝܢܐ ܕܝܢ ܕܟܠ. ܐܝܟ ܗܝ ܕܐܡܪ ܕܘܝܕ. ܕܒܪ ܐܢܫܐ ܐܝܟ ܥܡܝܪ ܝܘ̈ܡܘܗܝ. ܬܢܢ ܓܝܪ ܠܘ ܠܦܠܢ ܒܪܢܫܐ. ܐܠܐ ܐܢ ܠܟܝܢܐ ܕܟܠ ܡܘܕܥ ܟܠ ܓܝܪ ܒܪܢܫ ܕܡܠܐ ܙܒܢܐ ܘܡܝܘܬܐ. ܗܟܢܐ ܐܦ ܗܝ ܡܣܬܟܠܝܢܢ ܕܥܠ ܟܝܢܐ ܐܡܝܪܐ. ܗܘ ܕܗܘ ܒܠܚܘܕܘܗܝ ܠܐ ܡܬܚܒܠ ܘܕܗܘܝܘ ܚܟܝܡܐ ܒܠܚܘܕܘܗܝ܆ ܘܠܝܬ ܛܒܐ ܐܠܐ ܐܢ ܚܕ ܐܠܗܐ. ܗܕܐ ܓܝܪ ܕܚܕ ܘܗܝ ܕܠܚܘܕܘܗܝ܆ ܕܚܕ ܡܕܡ ܐܝܬܝܗܘܢ ܡܚܘܝܐ. ܘܐܦ ܗܕܐ ܗܘ ܕܡܬܚ ܫܡܝܐ ܒܠܚܘܕܘܗܝ. ܘܬܘܒ ܕܠܡܪܝܐ ܐܠܗܐ ܬܣܓܘܕ ܘܠܗ ܒܠܚܘܕܘܗܝ ܬܦܠܘܚ. ܘܠܝܬ ܐܠܗ ܐܚܪܝܢ ܠܒܪ ܡܢܝ.

ܗܠܝܢ ܓܝܪ ܕܚܕ ܘܒܠܚܘܕܘܗܝ ܕܥܠ ܐܠܗܐ܆ ܠܘ ܠܣܩܘܒܠܝܘܬܐ ܕܒܪܐ ܐܘ ܕܪܘܚܐ ܕܩܘܕܫܐ ܐܝܬܝܗܘܢ. ܐܠܐ ܠܘܩܒܠ ܗܢܘܢ ܕܡܫܬܡܗܝܢ ܐܠܗ̈ܐ ܒܕܓܠܘܬܐ. ܐܝܟ ܗܝ ܕܡܪܝܐ ܒܠܚܘܕܘܗܝ ܕܒܪܗ. ܘܠܝܬ ܗܘܐ ܥܡܗ ܐܠܗܐ ܢܘܟܪܝ. ܘܐܪܝܡܘ ܒܢ̈ܝ ܐܝܣܪܝܠ ܠܒܥܠܐ ܘܠܣܓ̈ܕܬܐ ܕܥܣܬܪܘܬ. ܘܦܠܚܘ ܠܡܪܝܐ ܒܠܚܘܕܘܗܝ. ܘܬܘܒ ܦܘܠܘܣ ܐܡܪ. ܐܝܟܢܐ ܕܐܝܬ ܐܠܗ̈ܐ ܣܓܝ̈ܐܐ ܘܡܪ̈ܘܬܐ ܣܓܝ̈ܐܐ: ܐܠܐ ܠܢ ܕܝܠܢ ܚܕ ܗܘ ܐܠܗܐ ܐܒܐ. ܕܟܠ ܡܕܡ ܡܢܗ. ܘܚܕ ܡܪܝܐ ܝܫܘܥ ܡܫܝܚܐ. ܕܟܠ ܡܕܡ ܒܐܝ̈ܕܘܗܝ.

ܐܠܐ ܒܥܝܢ ܚܢܢ ܬܢܢ܆ ܐܝܟܢܐ ܡܢ ܒܬܪ ܕܐܡܪ ܚܕ ܐܠܗܐ ܠܐ ܣܦܩ ܠܗܕܐ. ܐܡܪܢܢ ܓܪܝ ܕܚܕ ܘܠܚܘܕܘܗܝ ܕܥܠ ܐܠܗܐ ܠܟܝܢܐ ܗܘ ܡܚܘ̈ܝܢ. ܐܠܐ ܘܕܐܒܐ ܐܘܣܦ ܘܕܡܫܝܚܐ ܥܗܕ. ܣܒܪ ܐܢܐ ܓܝܪ ܕܠܐ ܣܦܩ ܠܗ ܒܠܚܘܕ ܠܦܘܠܘܣ ܡܐܢܐ ܓܒܝܐ. ܕܢܟܪܙ ܐܠܗܐ ܠܚܘܕܘܗܝ ܠܐܒܐ ܘܐܠܗܐ ܠܒܪܐ: ܘܐܠܗܐ ܠܪܘܚܐ ܕܩܘܕܫܐ. ܗܕܐ ܕܒܝܕ ܡܠܬܐ ܚܕ ܐܠܗܐ ܐܘܕܥ. ܐܠܐ ܬܘܒ ܘܒܝܕ ܬܘܣܦܬܐ ܕܐܒܐ ܕܟܠ ܡܕܡ ܡܢܗ ܢܚܘܐ. ܘܒܝܕ ܥܘܗܕܢܐ ܬܘܒ ܕܡܪܝܐ܆ ܕܟܠ ܡܕܡ ܒܐܝ̈ܕܘܗܝ ܘܬܘܒ ܒܝܕ ܐܘܚܕܢܐ ܕܝܫܘܥ ܡܫܝܚܐ ܠܡܬܒܪܢܫܢܘܬܗ ܢܐܡܪ ܘܠܚܫܐ ܢܓܠܐ ܘܠܩܝܡܬܐ ܢܚܘܐ. ܗܕܐ ܓܝܪ ܕܝܫܘܥ ܡܫܝܚܐ܆ ܠܡܚܫ̈ܒܬܐ ܕܕܐܝܟ ܗܠܝܢ ܡܘܕܥܐ ܠܢ.

ܡܛܠ ܗܕܐ ܡܢ ܩܕܡ ܚܫܗ ܡܫܬܐܠ ܒܪܐ. ܕܡܪܝܐ ܝܫܘܥ ܡܫܝܚܐ ܢܬܐܡܪ. ܘܡܦܩܕ ܠܬܠܡܝ̈ܕܐ܆ ܕܠܐ ܢܐܡܪܘܢ ܠܐܢܫ ܕܗܘܝܘ ܝܫܘܥ ܡܫܝܚܐ. ܥܬܝܕ ܗܘܐ ܠܗ ܓܝܪ ܕܡܢ ܒܬܪ ܫܘܡܠܝܐ ܕܡܕܒܪܢܘܬܐ ܘܡܢ ܒܬܪ ܣܘܠܩܐ. ܢܦܣ ܠܗܘܢ ܕܢܟܪܙܘܢܝܗܝ ܝܫܘܥ ܡܫܝܚܐ. ܘܕܐܝܟ ܗܕܐ ܐܝܬܝܗ̇ ܐܦ ܗܕܐ ܕܢܕܥܘܢܟ ܕܐܢܬ ܗܘ ܒܠܚܘܕܝܟ ܐܠܗܐ ܫܪܝܪܐ. ܘܠܡܢ ܕܫܕܪܬ ܝܫܘܥ ܡܫܝܚܐ ܘܗܝ ܕܗܝܡܢܘ ܒܐܠܗܐ ܐܦ ܒܝ ܗܝܡܢܘ. ܕܒܟܠ ܕܘܟܐ ܢܛܪ ܡܚܫ̈ܒܬܢ ܪܘܚܐ ܕܩܘܕܫܐ܆ ܕܠܐ ܟܕ ܡܬܩܪܒܝܢܢ ܨܝܕ ܚܕܐ ܡܢ ܐܚܪܬܐ ܢܦܠ: ܘܟܕ ܚܝܪܝܢܢ ܒܡ̈ܠܐ ܕܥܠ ܐܠܗܘܬܐ ܢܒܣܐ ܒܡܕܒܪܢܘܬܐ: ܘܢܗܘܐ ܠܢ ܗܘ ܡܕܡ ܕܡܢܢ ܡܬܒܨܪ ܠܓܘܕܦܐ.

ܡ̈ܠܐ ܕܝܢ ܕܡܢ ܟܬܒ̈ܝ ܩܘܕܫܐ ܗܠܝܢ ܕܫܩܠܝܢ ܠܗܝܢ ܒܥ̈ܠܝ ܕܪܐ܆ ܘܡܒܠܒܠܝܢ ܠܗܝܢ ܠܘܩܒܠ ܡܚܫ̈ܒܬܗܘܢ. ܠܣܘܪܩܐ ܕܬܫܒܘܚܬܗ ܕܝܚܝܕܝܢ. ܗܟܢܐ ܢܕܘܢ ܐܢܝܢ ܐܝܟܢܐ ܕܡܫܟܚܝܢܢ. ܟܕ ܓܠܝܢ ܚܢܢ ܠܗ ܠܡܚܫܒܬܗܘܢ. ܠܘܩܕܡ ܢܬܬܣܝܡ ܒܡܨܥܬܐ܆ ܗܕܐ ܕܐܢܐ ܚܝ ܐܢܐ ܡܛܠ ܐܒܐ. ܗܕܐ ܓܝܪ ܐܝܬܝܗ̇܆ ܚܕ ܡܢ ܓܐܪ̈ܐ ܕܡܫܬܕܝܢ ܠܫܡܝܐ: ܡܢ ܐܝܕܐ ܕܒܝ̈ܫܐ ܕܗܦܟܐܝܬ ܡܬܚܫܚܝܢ ܒܗ: ܗܪܟܐ ܓܝܪ ܠܘ ܠܚܝ̈ܐ ܡܬܘ̈ܡܝܐ ܡܫܡܗ ܡܢܐ ܓܝܪ. ܗܘ ܡܕܡ ܕܡܛܠ ܡܕܡ ܚܝ. ܗܘ ܕܢܗܘܐ ܚܝ̈ܐ ܠܐ ܡܫܟܚ. ܐܝܟ ܕܠܐ ܗܘ ܕܡܢ ܐܚܪܢܐ ܡܫܬܚܢ. ܕܐܦ ܗܘ ܫܚܝܢܘܬܐ ܕܢܦܫܗ ܢܗܘܐ. ܡܫܝܚܐ ܕܝܢ ܕܝܠܢ ܐܡܪ ܕܐܢܐ ܐܢܐ ܚܝ̈ܐ. ܐܠܐ ܚܝܐ ܐܡܪ ܗܠܝܢ ܕܒܦܓܪ ܕܒܙܒܢܐ ܗܢܐ ܗܘܘ. ܘܚܝܐ ܡܛܠ ܐܒܐ ܒܨܒܝܢܗ ܗܘ ܓܝܪ ܐܬܐ ܠܥܠܡܐ ܕܒܢܝ̈ܢܫܐ. ܕܠܐ ܐܡܪ ܕܐܢܐ ܚܝܝܬ ܡܛܠ ܐܒܐ. ܐܠܐ ܕܚܝ ܐܢܐ ܡܛܠ ܐܒܐ ܘܓܠܝܐܝܬ ܠܙܒܢܐ ܗܢܐ ܡܚܘܐ.

ܘܕܗܢܐ ܐܝܬܘܗܝ ܡܕܟ ܕܐܬܪܫܡ. ܡܢ ܗܕܐ ܕܐܬܝܐ ܡܣܬܟܠܝܢܢ. ܘܗܘ ܕܐܟܠ ܠܝ ܐܡܪ ܢܚܐ ܡܛܠܬܝ. ܐܟܠܝܢܢ ܕܝܢ ܦܓܪܗ ܘܫܬܝܢܢ ܕܡܗ܆ ܘܗܘܝܢܢ ܫܘ̈ܬܦܐ ܕܡܠܬܐ ܘܕܚܟܡܬܐ ܒܝܕ ܡܬܒܪܢܫܢܘܬܗ ܕܡܬܓܫܡܢܘܬܗ ܘܕܡܐܟܘܠܬܐ ܡܬܪܓܫܢܝܬܐ ܘܪܘܚܢܝܬܐ. ܦܓܪܐ ܕܝܢ ܘܕܡܐ ܫܡܗ܆ ܠܟܠܗ̇ ܡܐܬܝܬܗ ܐܪܢܝܬܐ. ܘܠܝܘܠܦܢܐ ܕܡܬܩܝܡ ܘܡܬܝܕܥ ܡܢ ܦܠܘܚܘܬܐ ܘܝܕܥܬܐ ܕܟܝܢܐ ܘܝܕܥܬܐ ܕܐܠܗܐ. ܕܒܗ ܡܬܬܪܣܝܐ ܢܦܫܐ: ܘܡܬܩܪܒܐ ܒܛܘܝܒܐ ܩܕܡܝܬ ܠܝܕܥܬܐ ܕܗܠܝܢ ܕܐܝܬܝܗܝܢ ܘܗܕܐ ܗܝ ܐܝܟ ܕܡܢ ܡܠܬܐ ܗܕܐ ܕܡܬܚܙܝܐ ܕܐܬܐܡܪܬ ܒܫܪܪܐ..

ܘܬܘܒ ܐܒܝ ܪܒ ܗܘ ܡܢܝ. ܘܒܗܕܐ ܡܠܬܐ ܬܘܒ ܡܬܚܫܚܝܢ ܒܗ ܝܠ̈ܕܘܗܝ ܕܒܝܫܐ ܛܠܘ̈ܡܐ. ܐܢܐ ܕܝܢ ܐܦ ܡܢ ܩܠܐ ܗܢܐ܆ ܕܒܪ ܟܝܢܐ ܕܐܒܐ ܐܝܬܘܗܝ ܒܪܐ ܡܗܝܡܢ ܐܢܐ ܘܡܬܝܕܥ. ܠܦܘ̈ܚܡܐ ܓܝܪ ܝܕܥ ܐܢܐ ܚܝܠܬܢܐܝܬ܆ ܕܥܠ ܗܢܘܢ ܕܡܢܗ ܟܕ ܡܢܗ ܕܟܝܢܐ ܡܬܦܫܛܝܢ. ܠܡܠܐܟܐ ܓܝܪ ܡܢ ܡܠܐܟܐ ܐܡܪܝܢܢ ܕܪܒ. ܘܠܒܪ ܐܢܫܐ ܙܕܝܩܐ ܡܢ ܒܪܢܫܐ. ܘܠܦܪܚܬܐ ܩܠܝܠܬܐ ܡܢ ܦܪܚܬܐ. ܐܢ ܗܟܝܠ ܦܘ̈ܚܡܐ ܥܠ ܒܢ̈ܝ ܛܘܗܡܐ ܗܘܝܢ܆ ܡܬܐܡܪ ܕܝܢ ܕܪܒ ܗܘ ܐܒܐ ܒܦܘܚܡܐ ܡܢ ܒܪܐ. ܒܪ ܟܝܢܐ ܗܘ ܕܐܒܐ ܒܪܐ.

ܐܝܬ ܕܝܢ ܐܦ ܐܚܪܬܐ ܬܪܥܝܬܐ ܕܦܪܝܫܐ ܒܗ̇ ܒܡܠܬܐ. ܡܢܐ ܗܘ ܓܝܪ ܬܗܪܐ: ܐܢ ܕܪܒ ܗܘ ܡܢܗ ܐܒܐ ܐܡܪ. ܕܟܕ ܡܠܬܐ ܐܝܬܘܗܝ ܦܓܪܐ ܗܘܐ. ܡܢ ܗܝ ܕܐܦ ܙܥܘܪܐ ܡܢ ܬܫܒܘܚܬܐ ܕܡܠܐܟ̈ܐ ܐܬܚܙܝ ܘܕܒ̈ܢܝ ܐܢܫܐ ܒܚܙܬܐ. ܡܟܟܬܝܗܝ ܓܝܪ ܩܠܝܠ ܡܢ ܡܠܐܟ̈ܐ. ܘܬܘܒ ܠܗܘ ܕܙܥܪ ܡܢ ܡܠܐܟ̈ܐ. ܘܚܙܝܢܝܗܝ ܕܠܝܬ ܗܘܐ ܠܗ ܚܙܘܐ ܘܠܐ ܙܝܘܐ: ܐܠܐ ܙܝܘܗ ܙܥܘܪܐ ܘܚܣܝܪܐ ܡܢ ܒܢܝ̈ܢܫܐ.

ܗܠܝܢ ܕܝܢ ܟܠܗܝܢ ܩܒܠ ܥܠܘܗܝ ܡܛܠ ܣܘܓܐܐ ܕܪ̈ܚܡܘܗܝ ܒܥܠ ܓܒܝܠܬܗ. ܕܠܥܪܒܐ ܐܒܝܕܐ ܢܦܪܘܩ. ܘܢܚܠܘܛ ܥܠ ܬܫܥܝܢ ܘܬܫܥܐ ܘܠܗܘ ܕܢܚܬ ܗܘܐ ܡܢ ܐܘܪܫܠܡ ܠܐܝܪܝܚܘ ܕܡܛܠ ܗܕܐ ܢܦܠ ܒܠܣ̈ܛܝܐ. ܚܠܝܡܐ ܬܘܒ ܠܡܕܝܢܬܗ ܢܗܦܟ. ܐܘ ܐܦ ܠܐܘܪܝܐ ܢܚܣܕ ܗܪܛܝܩܐ ܕܒܗ ܟܕ ܚܝܘܬܐ ܐܝܬܘܗܝ ܗܘܐ ܐܬܬܪܣܝ ܡܢ ܡܠܬܐ. ܘܠܡܣܟܢܘܬܗ ܬܘܒ ܡܦܪܣܐ ܕܐܦܠܐ ܒܥܪܣܐ ܐܫܬܪܬܚ ܒܪܗ ܕܢܓܪܐ. ܡܛܠ ܗܕܐ ܙܥܘܪ ܡܢ ܐܒܐ ܒܪܐ ܕܡܛܠܬܟ ܗܘܐ ܡܝܬܐ ܕܠܟ ܡܢ ܡܝܬܘܬܐ ܢܫܘܙܒ. ܘܒܪ ܚܝ̈ܐ ܫܡܝ̈ܢܐ ܢܥܒܕܟ. ܗܟܢܐ ܛܠܡ ܐܢܬ. ܐܝܟܢܐ ܕܐܚܪܢܐ ܠܐܣܝܐ ܢܥܕܘܠ. ܕܡܬܓܗܢ ܥܠ ܫܘ̈ܚܢܐ ܘܫܩܠ ܪܝܚܐ ܕܣܪܝܘܬܗܘܢ. ܕܠܐܝܠܝܢ ܕܚܫܝܢ ܢܐܣܐ.

ܡܛܠܬܟ ܗܘ ܫܥܬܐ ܘܝܘܡܐ ܕܕܝܢܐ ܠܐ ܝܕܥ. ܠܐ ܓܝܪ ܛܥܐ ܡܕܡ ܠܗܝ ܕܒܫܪܪܐ ܐܝܬܝܗ̇ ܚܟܡܬܐ. ܟܠܡܕܡ ܓܝܪ ܒܐܝܕܗ ܗܘܐ. ܠܐ ܐܢܫ ܐܦܠܐ ܡܢ ܒܢܝ̈ܢܫܐ: ܡܢ ܡܬܘܡ ܡܕܡ ܕܥܒܕ ܠܐ ܝܕܥ. ܐܠܐ ܐܦ ܗܕܐ ܡܕܒܪ ܡܛܠ ܡܚܝܠܘܬܟ. ܕܠܐ ܡܛܠ ܦܪܬܣܡܝܐ ܙܥܘܪܬܐ ܗܢܘܢ ܕܚܛܘ ܢܦܠܘܢ ܒܙܥܘܪܘܬ ܢܦܫܐ: ܕܠܝܬ ܬܘܬܪܐ ܕܙܒܢܐ ܠܬܝܒܘܬܐ. ܘܐܦܠܐ ܬܘܒ ܗܢܘܢ ܕܡܬܟܬܫܝܢ ܒܢܘܓܪܐ ܠܚܝܠܐ ܒܥܠܕܪܐ ܡܛܠ ܙܒܢܐ ܐܪܝܟܐ ܢܒܣܪܘܢ. ܕܬܪܬܝܗܝܢ ܓܝܪ ܒܝܕ ܠܐ ܝܕܥܬܐ ܕܐܣܟܡܐ ܡܕܒܪ. ܕܠܚܕ ܡܛܠ ܐܓܘܢܐ ܫܦܝܪܐ ܢܦܣܘܩ ܠܗ ܙܒܢܐ܆ ܘܠܐܚܪܝܢ ܡܛܠ ܚܛܗ̈ܐ ܠܙܒܢܐ ܕܬܝܒܘܬܐ ܢܛܫܝܘܗܝ.

ܘܗܐ ܟܕ ܥܡ ܗܠܝܢ ܕܒܐܘܢܓܠܝܘܢ ܢܦܫܗ ܡܢܐ ܕܠܐ ܝܕܥܝܢ ܡܛܠ ܡܚܝܠܘܬܐ ܕܣܓܝ̈ܐܐ. ܠܚܪܬܐ ܕܝܢ ܒܦܪܟܣܣ ܕܫܠܝ̈ܚܐ ܡܟܝܠ ܐܝܟ ܓܡܝܪ̈ܐ ܟܕ ܡܡܠ ܠܬܠܡܝ̈ܕܐ ܒܝܬ ܠܗ ܘܠܗܘܢ. ܟܕ ܦܪܫ ܢܦܫܗ ܐܡܪ ܠܘ ܕܝܠܟܘܢ ܗܝ ܠܡܕܥ ܙܒܢܐ ܐܘ ܙܒ̈ܢܐ. ܗܢܘܢ ܕܐܒܐ ܣܡ ܐܢܘܢ ܒܫܘܠܛܢܐ ܕܢܦܫܗ. ܘܗܠܝܢ ܐܝܟ ܕܒܒܥܬܐ ܩܕܡܝܬܐ ܐܬܐܡܪܝܢ ܥܒܝܐܝܬ. ܗܫܐ ܕܝܢ ܢܒܨܐ ܡܥܠܝܐܝܬ ܠܬܪܥܝܬܗ̇ ܕܡܠܬܐ ܘܢܩܘܫ ܠܬܪܥܗ̇ ܕܡܠܬܐ ܕܝܕܥܬܐ ܕܠܡܐ ܢܫܟܚ ܢܩܝܡܝܘܗܝ ܠܡܪܐ ܒܝܬܐ ܠܝܗܘܒܐ ܕܠܚܡܐ ܪܘܚܝܐ: ܕܗܠܝܢ ܕܫܐܠܝܢ ܠܗ. ܡܛܠ ܕܪ̈ܚܡܐ ܘܐܚ̈ܐ ܐܝܬܝܗܘܢ ܗܠܝܢ ܕܝܨܝܦܝܢܢ ܕܢܬܪܣܐ.

ܐܢܘܢ ܬܠܡܝ̈ܕܘܗܝ ܩܕܝ̈ܫܐ ܕܦܪܘܩܢ ܟܕ ܪܚܝܩܝܢ ܗܘܘ ܡܢ ܬܐܘܪܝܐ ܐܝܟ ܕܒܝܬ ܒܢ̈ܝ ܐܢܫܐ. ܡܢ ܡܠܬܐ ܚܪܬܐ ܫܐܠܝܢ ܗܘܘ. ܘܠܛܘܒܬܢܘܬܐ ܕܫܘܡܠܝܐ ܕܢܕܥܘܢ ܡܬܝܐܒܝܢ ܗܘܘ. ܗܝ ܕܠܐ ܝܕܥܝܢ ܡܠܐܟ̈ܘܗܝ܆ ܐܦ ܥܠ ܢܦܫܗ ܡܪܢ ܐܡܪ ܘܠܝܘܡܐ ܐܡܪ ܗܘܐ ܠܟܘܠܗ̇ ܡܬܕܪܟܢܘܬܐ ܚܬܝܬܬܐ ܕܡܚܫ̈ܒܬܗ ܕܐܠܗܐ. ܠܫܥܬܐ ܕܝܢ ܠܟܠܗ̇ ܬܐܘܪܝܐ ܕܚܕܝܘܬܐ ܘܕܝܚܝܕܝܘܬܐ. ܕܠܗ ܗܘ ܠܐܒܐ ܒܠܚܘܕ ܝܗܒܗ ܝܕܥܬܗܝܢ.. ܣܒܪ ܐܢܐ ܕܝܢ ܕܗܘ ܡܬܐܡܪ ܥܠ ܐܠܗܐ ܕܝܕܥ ܗܘ ܡܕܡ ܕܐܝܬܘܗܝ ܘܗܘ ܗܘ ܕܠܐ ܝܕܥ ܗܘ ܕܠܝܬܘܗܝ: ܚܟܡܬܐ ܕܝܢ ܘܙܕܝܩܘܬܐ ܡܬܐܡܪ ܕܝܕܥ ܐܠܗܐ. ܕܙܕܝܩܘܬܐ ܗܘ ܘܚܟܡܬܐ ܕܢܦܫܗ ܐܝܬܘܗܝ. ܥܘܠܘܬܐ ܕܝܢ ܘܒܝܫܘܬܐ ܠܐ ܝܕܥ. ܠܐ ܓܝܪ ܐܝܬܘܗܝ ܥܘܠܘܬܐ ܘܒܝܫܘܬܐ ܐܠܗܐ ܕܒܪܐ ܠܢ.

ܐܢ ܗܟܝܠ ܗܘ ܡܬܐܡܪ ܥܠ ܐܠܗܐ ܕܝܕܥ ܗܘ ܡܕܡ ܕܐܝܬܘܗܝ: ܘܗܘ ܡܕܡ ܕܠܝܬܘܗܝ ܕܠܐ ܝܕܥ. ܠܝܬܘܗܝ ܕܝܢ ܡܪܢ ܐܝܟ ܬܪܥܝܬܐ ܕܡܬܓܫܡܢܘܬܗ ܘܝܘܠܦܢܐ ܥܒܝܐ ܪܓܬܐ ܕܫܘܡܠܝܐ. ܠܐ ܗܟܝܠ ܝܕܥ ܦܪܘܩܢ ܫܘܡܠܝܐ ܘܛܘܒܬܢܘܬܐ ܕܒܚܪܬܐ ܐܠܐ ܐܦܠܐ ܡܠܐܟ̈ܐ ܐܡܪ ܕܝܕܥܝܢ ܗܢܘ ܕܝܢ ܐܦܠܐ ܬܐܘܪܝܐ ܕܒܗܘܢ: ܘܡ̈ܠܐ ܕܬܫܡܫܬܗܘܢ ܝܕܥܝܢ ܪܓܬܐ ܐܚܪܝܬܐ. ܥܒܝܐ ܓܝܪ ܐܦ ܝܕܥܬܐ ܕܗܠܝܢ ܒܦܚܡܐ ܕܐܦ̈ܝܢ ܠܘܩܒܠ ܐܦ̈ܝܢ ܐܒܐ ܕܝܢ ܐܡܪ ܠܚܘܕܘܗܝ ܝܕܥ ܡܛܠ ܕܐܦ ܗܘ ܐܝܬܘܗܝ ܫܘܡܠܝܐ ܘܛܘܒܬܢܘܬܐ ܕܒܚܪܬܐ. ܡܐ ܓܝܪ ܕܠܐ ܡܟܝܠ ܒܡܚܙܝܬܐ ܘܢܘܟܪܝܬܐ ܠܐܠܗܐ ܝܕܥܝܢܢ: ܐܠܐ ܠܗ ܠܚܘܕܘܗܝ ܐܝܟ ܕܠܚܕ ܢܬܩܪܒ. ܗܝܕܝܢ ܘܠܪܓܬܐ ܐܚܪܝܬܐ ܢܕܥ ܠܡܠܟܘܬܐ ܓܝܪ ܕܡܫܝܚܐ ܐܡܪܝܢ ܕܐܝܬܝܗ̇: ܠܟܘܠܗ̇ ܝܕܥܬܐ ܗܘܠܢܝܬܐ. ܕܐܠܗܐ ܕܝܢ ܘܕܐܒܐ ܠܕܠܐ ܗܘܠܐ. ܘܐܝܟ ܐܢܫ ܢܐܡܪ ܠܟܠܗ̇ ܬܐܘܪܝܐ ܥܪܛܠܝܬܐ ܕܐܠܗܘܬܐ.

ܐܝܬܘܗܝ ܕܝܢ ܡܪܢ ܐܦ ܗܘ ܛܘܒܬܢܘܬܐ ܕܒܚܪܬܐ ܘܫܘܡܠܝܐ ܐܝܟ ܕܡܢ ܬܪܥܝܬܐ ܕܠܘܬ ܡܠܬܐ. ܡܢܐ ܓܝܪ ܐܡܪ ܒܐܘܢܓܠܝܘܢ܆ ܘܐܢܐ ܐܩܝܡܝܘܗܝ ܒܝܘܡܐ ܐܚܪܝܐ. ܠܩܝܡܬܐ ܐܡܪ ܠܦܘܪܫܢܐ ܕܡܢ ܝܕܥܬܐ ܗܘܠܢܝܬܐ ܕܠܘܬ ܬܐܘܪܝܐ ܕܠܐ ܗܘܠܐ. ܝܘܡܐ ܕܝܢ ܐܚܪܝܐ ܐܡܪ܆ ܠܝܕܥܬܐ ܕܡܢ ܒܬܪܗ ܠܝܬ ܐܚܪܬܐ. ܗܝܕܝܢ ܓܝܪ ܩܐܡ ܡܕܥܢ ܘܠܘܬ ܪܘܡܐ ܛܘܒܬܢܐ ܡܫܬܩܠ ܡܐ ܕܚܙܐ ܠܚܕܝܘܬܐ ܘܝܚܝܕܝܘܬܐ ܕܡܠܬܐ. ܐܠܐ ܡܛܠ ܕܗܫܐ ܐܬܥܒܝ ܠܗ ܡܕܥܢ. ܘܠܥܦܪܐ ܐܬܢܩܦ ܘܥܡ ܛܝܢܐ ܐܬܚܠܛ: ܘܠܐ ܡܨܐ ܕܩܠܝܠܐܝܬ ܢܬܒܩܐ ܒܝܕ ܐܚܝ̈ܢܐ ܕܓܘܫܡܗ ܥܠ̈ܡܐ ܡܬܕܪܫ. ܘܡܥܒܕܢܘܬܐ ܕܒܪܘܝܐ ܡܣܬܟܠ ܘܠܗܠܝܢ ܡܢ ܗܫܐ ܡܢ ܗܘ̈ܝܐ ܡܪܓܫ. ܕܗܟܢܐ ܒܩܠܝܠ ܩܠܝܠ ܢܬܪܒܐ ܘܢܫܟܚ ܐܚܪܝܬ ܕܐܦ ܠܗ̇ ܠܐܠܗܘܬܐ ܥܪܛܠܐܝܬ ܢܬܩܪܒ.

ܘܒܗܕܐ ܬܪܥܝܬܐ ܣܒܪ ܐܢܐ ܕܐܡܪ: ܕܐܒܐ ܪܒ ܗܘ ܡܢܝ. ܘܠܝܬ ܗܝ ܕܝܠܝ ܕܐܬܠ ܐܠܐ ܠܗܠܝܢ ܕܐܬܛܝܒܬ ܡܢ ܐܒܐ. ܘܗܕܐ ܓܝܪ ܐܝܬܝܗ̇ ܘܗܝ ܡܐ ܕܡܫܠܡ ܡܠܟܘܬܐ ܠܐܠܗܐ ܐܒܐ ܡܫܝܚܐ ܕܪܫܝܬܐ ܐܝܬܘܗܝ ܘܠܐ ܫܘܡܠܝܐ. ܐܝܟ ܕܒܝܘܠܦܢܐ ܥܒܝܐ ܐܡܪ ܐܢܐ: ܗܘ ܕܡܢܢ ܘܥܠܝܢ ܘܠܘ ܐܝܟ ܕܡܢܗ ܘܥܠܘܗܝ ܡܬܝܕܥ. ܡܛܠ ܕܝܢ ܕܗܕܐ ܗܟܢܐ ܐܝܬܝܗ̇܆ ܬܘܒ ܟܕ ܡܫܐܠܝܢ ܬܠܡܝ̈ܕܐ ܒܦܪܟܣܣ ܕܫܠܝ̈ܚܐ ܕܐܢ ܒܗܢܐ ܙܒܢܐ ܡܦܢܐ ܐܢܬ ܡܠܟܘܬܐ ܠܐܝܣܪܐܝܬ. ܐܡܪ ܕܠܘ ܕܝܠܟܘܢ ܗܝ ܕܬܕܥܘܢ ܙܒܢܐ ܐܘ ܙܒ̈ܢܐ: ܗܠܝܢ ܕܐܒܐ ܣܡ ܐܢܘܢ ܒܫܘܠܛܢܐ ܕܢܦܫܗ. ܗܢܘ ܕܝܢ. ܠܘ ܕܐܝܠܝܢ ܕܐܣܝܪܝܢ ܒܕܡܐ ܘܒܣܪܐ ܐܝܬܝܗ̇ ܝܕܥܬܐ ܕܡܠܟܘܬܐ ܕܕܐܝܟ ܗܕܐ. ܠܗܕܐ ܓܝܪ ܬܐܘܪܝܐ܆ ܐܒܐ ܣܡ ܒܫܘܠܛܢܐ ܕܝܠܗ. ܫܘܠܛܢܐ ܓܝܪ ܩܪܐ ܠܒ̈ܢܝ ܚܐܪ̈ܐ. ܕܢܦܫܗ ܕܝܢ. ܠܗܢܘܢ ܕܠܐ ܩܪܒܐ ܠܗܘܢ ܠܐ ܝܕܥܬܐ ܕܣܘܥܪ̈ܢܐ ܬܚ̈ܬܝܐ.

ܙܒܢܐ ܕܝܢ ܘܙܒ̈ܢܐ ܠܐ ܬܣܬܟܠ ܠܝ ܡܬܪܓܫܢܐܝܬ. ܐܠܐ ܦܘܪ̈ܫܢܐ ܕܝܕܥܬܐ ܕܗܘܝܢ ܡܢ ܫܡܫܐ ܡܬܝܕܥܢܐ. ܙܕܩ ܓܝܪ ܕܬܐܬܐ ܠܓܡܘܪܝܐ ܨܠܘܬܐ ܗܝ ܕܡܪܢ ܝܫܘܥ ܓܝܪ ܐܝܬܘܗܝ ܗܘ ܕܨܠܝ ܕܗܒ ܠܗܘܢ ܕܐܦ ܗܢܘܢ ܒܢ ܚܕ ܢܗܘܘܢ ܐܝܟܢܐ ܕܐܢܐ ܘܐܢܬ ܚܕ ܚܢܢ ܐܒܐ ܚܕ .... ܓܝܪ ܐܠܗܐ ܕܗܘܐ ܒܟܠ ܘܡܚܝܕ ܠܟܠܢ ܘܐܒܕ ܡܢܝܢܐ ܒܡܐܝܬܐ ܕܝܚܝܕܝܘܬܐ

ܘܐܢܐ ܕܝܢ ܕܐܝܟ ܗܠܝܢ ܣܡܬ ܥܠ ܡܠܬܐ ܗܕܐ ܒܒܥܬܐ ܬܪܝܨܬܐ. ܐܢ ܕܝܢ ܐܢܫ ܡܝܬܪܐܝܬ ܢܐܡܪ ܘܢܬܪܨ ܒܕܚܠ ܐܠܗܐ ܕܝܠܢ. ܘܢܐܡܪ ܘܢܬܩܢ ܘܡܪܢ ܢܦܪܘܥ ܚܠܦܝܢ ܠܐ ܓܝܪ ܡܕܝܪ ܠܘܬܢ ܚܣܡܐ. ܡܛܠ ܕܐܦ ܠܐ ܡܛܠ ܚܪܝܝܘܬܐ ܘܬܫܒܘܚܐ ܣܪܝܩܬܐ: ܠܒܥܬܐ ܕܡ̈ܠܐ ܗܠܝܢ ܐܬܩܪܒܢܢ ܐܠܐ ܡܛܠ ܝܘܬܪܢܐ ܕܐܚ̈ܐ ܕܠܐ ܢܬܢܩܫܘܢ ܡܐܢ̈ܐ ܕܦܚܪܐ. ܗܢܘܢ ܕܓܙܐ ܐܝܬ ܒܗܘܢ ܕܐܠܗܐ ܡܢ ܗܢܘܢ ܕܠܒܐ ܕܟܐܦܐ ܐܝܬ ܠܗܘܢ ܘܠܐ ܓܙܝܪܝܢ. ܗܢܘܢ ܕܒܙܝܢܐ ܡܙܕܝܢܝܢ. ܕܚܟܡܬܐ ܕܫܛܝܘܬܐ

ܬܘܒ ܒܝܕ ܫܠܝܡܘܢ ܒܡ̈ܬܠܘܗܝ ܡܬܒܪܐ ܡܪܝܐ ܓܝܪ ܐܡܪ ܒܪܢܝ ܒܪܫܐ ܕܐܘܪ̈ܚܬܗ ܪܫܐ ܓܝܪ ܕܐܘܪ̈ܚܬܗ ܕܐܘܢܓܠܝܘܢ ܡܫܬܡܗ. ܕܡܫܘܫܛܢ (s) ܠܢ ܨܝܕ ܡܠܟܘܬܐ ܕܫܡܝܐ. ܠܘ ܕܒܐܝܬܘܬܗ ܐܬܒܪܝ ܐܠܐ ܐܢ ܒܡܕܒܪܢܘܬܗ ܗܘܐ ܐܘܪܚܐ ܗܝ ܓܝܪ ܕܗܘܐ ܘܗܕܐ ܕܐܬܒܪܝ ܚܕܐ ܗܝ. ܐܝܟܢܐ ܓܝܪ ܕܐܘܪܚܐ ܗܘܐ܆ ܗܟܢܐ ܐܦ ܬܪܥܐ ܘܪܥܝܐ ܘܡܠܐܟܐ ܘܢܩܝܐ ܘܬܘܒ ܪܒ ܟܘܡܪ̈ܐ ܘܫܠܝܚܐ ܫܡ̈ܗܐ ܕܣܝܡܝܢ ܕܐܝܬܝܗܘܢ ܒܐܝܕܥܬܐ ܘܪܥܝܐ ܘܡܠܐܟܐ ܘܢܩܝܐ ܘܬܘܒ ܪܒ ܟܘܡܪ̈ܐ ܘܫܠܝܚܐ ܫܡܗ̈ܐ ܕܣܝܡܝܢ ܕܐܝܬܝܗܘܢ ܒܐܝܕܥܬܐ ܕܫܘ̈ܚܠܦܐ ..

ܡܢܐ ܬܘܒ ܢܐܡܪ ܗܪܛܝܩܐ ܡܛܠ ܐܠܗܐ ܕܠܐ ܡܫܥܒܕ ܘܕܡܛܠܬܟ ܚܛܝܬܐ ܗܘܐ. ܟܬܝܒ ܓܝܪ ܕܡܐ ܕܐܫܬܥܒܕ ܠܗ ܟܠ ܗܝܕܝܢ ܗܘ ܒܪܐ ܢܫܬܥܒܕ ܠܗܘ ܕܫܥܒܕ ܠܗ ܟܠ ܡܕܡ. ܠܐ ܕܚܠ ܐܢܬ ܒܪ ܐܢܫܐ ܡܢ ܐܠܗܐ. ܕܡܛܠܬܟ ܐܫܬܡܗ ܠܐ ܡܫܥܒܕܐ. ܠܫܘܥܒܕܐ ܓܝܪ ܕܝܠܟ ܫܘܥܒܕܐ ܕܝܠܗ ܥܒܕܗ. ܘܒܗܝ ܕܒܗ̇ ܬܟܬܘܫܐ ܠܘܩܒܠ ܬܩܢܘܬܐ ܥܒܕ ܐܢܬ. ܒܗ ܠܐ ܡܫܥܒܕܐ ܢܦܫܗ ܫܡܗ. ܗܟܢܐ ܡܢ ܩܕܝܡ ܥܠ ܢܦܫܗ ܗܘ ܐܡܪ ܗܘܐ ܕܡܬܪܕܦ. ܫܐܘܠ ܓܝܪ ܐܡܪ ܫܐܘܠ܆ ܠܡܢܐ ܪܕܦ ܐܢܬ ܠܝ. ܟܕ ܪܗܛ ܗܘܐ ܠܘܬ ܕܪܡܣܘܩ ܘܨܒܐ ܗܘܐ ܕܠܬܠܡܝ̈ܕܘܗܝ ܕܡܫܝܚܐ ܢܐܣܘܪ ܗܘܐ ܘܬܘܒ ܢܦܫܗ ܥܪܛܠܝܐ ܡܫܡܗ. ܟܕ ܚܙܐ ܚܕ ܡܢ ܐܚ̈ܐ ܕܐܝܬܘܗܝ ܥܪܛܠܝܐ. ܥܪܛܠܝܐ ܓܝܪ ܐܡܪ ܕܐܝܬܝ ܗܘܝܬ ܘܐܠܒܫܬܘܢܢܝ. ܘܐܘܒ ܟܕ ܐܚܪܢܐ ܐܝܬܘܗܝ ܗܘܐ ܒܝܬ ܐܣܝܪ̈ܐ܆ ܥܠ ܢܦܫܗ ܗܘ ܐܡܪ ܕܐܝܬܘܗܝ ܒܚܒܘܫܝܐ ܗܘ ܓܝܪ ܫܩܠ ܟܘܪ̈ܗܢܝܢ. ܘܚܫ̈ܝܢ ܣܝܒܪ. ܐܢ ܗܟܝܠ ܚܫ̈ܝܢ ܘܟܘܪ̈ܗܢܝܢ ܫܩܠ. ܚܕ ܕܝܢ ܡܢ ܚܫ̈ܐ ܐܝܬܘܗܝ ܠܐ ܫܘܥܒܕܐ. ܐܦ ܠܗܢܐ ܫܩܠ. ܡܛܠ ܗܕܐ ܗܠܝܢ ܕܓܕܫܢ ܠܢ ܕܐܝܬܝܗܝܢ ܕܚܫܘܫܘܬܐ܆ ܕܕܝܠܗ ܐܢܝܢ ܚܫܒ ܠܗܝܢ ܡܪܢ. ܕܡܢ ܫܘܬܦܘܬܐ ܕܠܘܬܢ ܟܠܗܘܢ ܚܫ̈ܝܢ ܡܩܒܠ.

ܐܠܐ ܐܦ ܗܝ ܕܠܐ ܡܫܟܚ ܒܪܐ ܢܥܒܕ ܡܕܡ ܡܢ ܨܒܘܬ ܢܦܫܗ. ܫܩܠܝܢ ܠܗ ܡܓܕ̈ܦܢܐ ܕܠܘܩܒܠ ܐܠܗܐ ܠܥܩܘܪܝܐ ܕܫܡܘ̈ܥܐ. ܠܝ ܕܝܢ ܐܦ ܗܕܐ ܡܠܬܐ܆ ܝܬܝܪܐܝܬ ܙܥܩܐ ܠܝ. ܕܡܢܗ ܗܘ ܕܟܝܢܐ ܕܐܒܐ ܒܪܐ. ܐܢ ܓܝܪ ܡܕܡ ܕܡܢ ܒܪ̈ܝܬܐ ܡܠܝ̈ܠܬܐ: ܡܫܟܚ ܡܕܡ ܡܢ ܢܦܫܗ ܢܥܒܕ ܒܚܐܪܘܬܐ ܕܨܒܝܢܗ ܘܩܢܐ ܒܫܘܝܘܬܐ ܪܦܦܐ ܕܠܘܬ ܒܝܫܘܬܐ ܘܛܒܘܬܐ ܒܪܐ ܕܝܢ ܠܐ ܡܫܟܚ ܡܕܡ ܡܢ ܨܒܘܬ ܢܦܫܗ ܢܥܒܕ ܠܘ ܒܪܝܬܐ ܐܝܬܘܗܝ ܒܪܐ. ܐܢ ܕܝܢ ܠܘ ܒܪܝܬܐ ܗܘ. ܒܪ ܟܝܢ ܐܝܬܘܬܐ ܕܐܒܘܗܝ ܐܝܬܘܗܝ ܒܪܐ. ܘܬܘܒ ܠܝܬ ܡܕܡ ܡܢ ܒܪ̈ܝܐ ܕܐܝܟ ܐܠܗܐ ܡܥܒܕ. ܒܪܐ ܕܝܢ ܗܘ ܡܕܡ ܕܚܙܐ ܠܗ ܠܐܒܐ ܕܥܒܕ ܗܟܢܐ ܠܗ ܗܘ ܥܒܕ ܐܦ ܒܪܐ. ܠܐ ܗܟܝܠ ܒܪܝܬܐ ܐܝܬܘܗܝ ܒܪܐ. ܘܐܚܪܢܝܐܝܬ ܠܝܬ ܡܕܡ ܡܢ ܒܪ̈ܝܐ: ܕܟܠܡܕܡ ܕܨܒܐ ܡܫܟܚ ܕܢܥܒܕ ܒܪܐ ܕܝܢ ܒܫܡܝܐ ܘܒܐܪܥܐ܆ ܟܠܡܕܡ ܕܨܒܐ ܥܒܕ. ܠܐ ܗܟܝܠ ܒܪܝܬܐ ܐܝܬܘܗܝ ܒܪܐ. ܘܬܘܒ ܟܠܗܝܢ ܒܪ̈ܝܬܐ܆ ܐܘ ܡܢ ܣܩܘܒܠܝܘܬܐ ܐܬܩܝܡ ܐܘ ܡܩ̈ܒܠܢܝܬܐ ܐܝܬܝܗܝܢ ܕܣܩܘܒܠܝܘܬܐ. ܒܪܐ ܕܝܢ ܕܙܕܝܩܘܬܐ ܗܘ ܕܡܢܗ܆ ܘܟܝܢܐ ܕܠܐ ܓܫܘܡ ܐܝܬܘܗܝ. ܠܐ ܗܟܝܠ ܒܪܝܬܐ ܐܝܬܘܗܝ ܒܪܐ. ܐܠܘ ܕܝܢ ܗܟܢ܆ ܒܪ ܟܝܢ ܐܝܬܘܬܐ ܕܐܒܐ ܐܝܬܘܗܝ.

ܘܣܦܩܐ ܒܥܬܐ ܕܐܝܟ ܗܕܐ ܕܐܝܟ ܚܝܠܢ ܐܬܪܫܡܬ ܡܢ ܦܬܓܡ̈ܐ ܗܠܝܢ .. ܗܫܐ ܕܝܢ ܠܚܪܬܐ ܘܠܘܩܒܠ ܗܠܝܢ ܕܡܩܪܒܝܢ ܠܘܩܒܠ ܪܘܚܐ ܕܩܘܕܫܐ ܒܦܬܓܡܐ ܡܬܬܙܝܥܝܢ ܕܢܣܚܘܦ ܟܠܗ̇ ܪܡܘܬܐ ܕܝܕܥܬܗܘܢ ܕܡܬܬܪܝܡܐ ܥܠ ܝܕܥܬܐ ܕܐܠܗܐ. ܒܪܝܬܐ ܓܝܪ ܐܡܪܝܢ ܠܪܘܚܐ ܕܩܘܕܫܐ. ܟܠܡܕܡ ܕܝܢ ܒܪܝܐ܆ ܥܒܕܐ ܐܝܬܘܗܝ ܕܒܪܘܝܐ ܟܬܝܒ ܓܝܪ ܕܟܠܡܕܡ ܥܒܕܟ ܐܝܬܘܗܝ. ܐܢ ܕܝܢ ܥܒܕܐ ܗܘ ܪܘܚܐ ܕܩܘܕܫܐ܆ ܐܦ ܩܕܝܫܘܬܐ ܢܣܝܒܬܐ ܐܝܬ ܠܗ. ܟܠ ܡܕܡ ܕܝܢ ܕܩܕܝܫܘܬܐ ܢܣܝܒܬܐ ܐܝܬ ܠܗ܆ ܠܘ ܠܐ ܡܩܒܠܢܐ ܗܘ ܕܒܝܫܘܬܐ ܪܘܚܐ ܕܝܢ ܕܩܘܕܫܐ܆ ܒܐܝܬܘܬܐ ܐܝܬܘܗܝ ܩܕܝܫܐ. ܘܡܒܘܥܐ ܕܩܕܝܫܘܬܐ ܡܫܡܗ. ܠܘ ܗܟܝܠ ܒܪܝܬܐ ܗܘ ܪܘܚܐ ܕܩܘܕܫܐ. ܐܢ ܗܟܝܠ ܠܘ ܒܪܝܬܐ ܗܘ܆ ܒܪܟܝܢ ܐܝܬܘܬܐ ܗܘ ܕܐܠܗܐ. ܐܝܟܢܐ ܥܒܕܐ ܩܪܐ ܐܢܬ ܠܗ ܐܡܪ ܠܝ. ܠܗܘ ܕܒܡܥܡܘܕܝܬܐ ܡܚܪܪ ܠܟ ܡܢ ܥܒܕܘܬܐ. ܢܡܘܣܐ ܓܝܪ ܕܪܘܚܐ ܕܚܝ̈ܐ܆ ܚܪܪܟ ܡܢ ܢܡܘܣܐ ܕܚܛܝܬܐ.

ܐܠܐ ܐܦܠܐ ܕܡܫܬܚܠܦܢܐ ܗܘ ܬܘܒ ܟܝܢܗ ܬܡܪܚ ܬܐܡܪ. ܟܕ ܚܐܪ ܐܢܬ ܒܟܝܢܐ ܕܚܝܠܐ ܕܕܠܩܘܒܠܐ. ܗܘ ܕܐܝܟ ܒܪܩܐ ܢܦܠ ܡܢ ܫܡܝܐ܆ ܘܢܦܠ ܡܢ ܗܠܝܢ ܕܒܫܪܪܐ ܐܝܬܝܗܘܢ ܚܝ̈ܐ. ܡܛܠ ܕܩܕܝܫܘܬܐ ܢܣܝܬܐ ܐܝܬ ܗܘܐ ܠܗ. ܘܪܗܛ ܒܬܪ ܨܒܝܢܐ ܒܝܫܐ ܕܡܫܬܚܠܦܢܘܬܗ. ܘܡܢ ܗܝ ܕܢܦܠ ܡܢ ܚܕܝܘܬܐ: ܘܫܕܝܗܝ ܠܐܣܟܡܐ ܡܠܐܟܝܐ ܡܢ ܓܕܫܐ ܕܨܒܝܢܗ ܐܫܬܡܗ ܣܛܢܐ. ܕܕܥܟܬ ܬܫܒܘܚܬܗ ܛܘܒܬܢܝܬܐ ܩܕܡܝܬܐ ܘܐܚܕ ܡܢ ܨܒܝܢܗ ܚܝܠܐ ܗܢܐ ܕܕܠܩܘܒܠܐ.

ܘܬܘܒ ܐܢ ܢܐܡܪ ܕܪܘܚܐ ܕܩܘܕܫܐ ܒܪܝܬܐ ܗܘ ܕܡܣܬܝܟܢܐ ܗܘ ܟܝܢܗ ܡܥܠ ܥܠܝܢ. ܐܝܟܢܐ ܗܟܝܠ ܬܩܘܡ ܗܝ ܕܐܡܝܪܐ: ܕܪܘܚܗ ܕܡܪܝܐ ܡܠܬ ܬܒܝܠ. ܘܠܐܝܟܐ ܐܙܠ ܡܢ ܪܘܚܟ. ܐܠܐ ܐܦܠܐ ܐܝܟܢܐ ܕܡܬܚܙܝܐ ܕܟܝܢܐ ܗܘ ܦܫܝܛܐ ܡܘܕܐ. ܚܕ ܓܝܪ ܒܡܢܝܢܐ ܡܫܡܗ ܠܗ. ܟܠܡܕܡ ܕܒܡܢܝܢܐ ܐܝܬܘܗܝ ܗܢܐ ܠܘ ܦܫܝܛܐ ܐܝܟ ܕܐܡܪܬ ܐܝܬܘܗܝ. ܐܢ ܕܝܢ ܠܘ ܦܫܝܛܐ ܐܝܬܘܗܝ ܪܘܚܐ ܕܩܘܕܫܐ܆ ܡܢ ܟܝܢܐ ܘܡܢ ܩܕܝܫܘܬܐ ܐܬܬܩܝܡ. ܘܡܕܡ ܕܐܝܟ ܗܢܐ ܡܪܟܒܐ ܗܘ. ܘܡܢܘ ܕܐܝܟ ܗܢܐ ܐܝܬܘܗܝ ܚܣܝܪ ܪܥܝܢܐ ܕܡܪܟܒܐ ܢܐܡܪ ܠܟܝܢܗ ܘܕܠܘ ܦܫܝܛܐ ܗܘ ܪܘܚܐ ܕܩܘܕܫܐ ܘܒܡܠܬܐ ܕܦܫܝܛܘܬܐ ܒܪܟܝܢ ܐܝܬܘܬܐ ܕܐܒܐ ܘܕܒܪܐ.

ܐܢ ܕܝܢ ܙܕܩ ܕܢܬܓܘܐ ܒܡܠܬܐ ܕܢܚܙܐ ܪܘܪ̈ܒܬܐ ܡܢ ܗܕܐ ܝܬܝܪܐܝܬ ܢܚܙܐ ܚܝܠܐ ܕܐܠܗܘܬܐ ܕܪܘܚܐ ܕܩܘܕܫܐ .. ܬܠܬ ܒܪ̈ܝܢ ܐܫܟܚܢܢ ܕܡܫܬܡܗ̈ܢ ܒܟܬܒ̈ܐ ܩܕܝ̈ܫܐ. ܚܕܐ ܘܩܕܡܝܬܐ ܗܕܐ ܕܡܢ ܠܐ ܡܕܡ ܠܡܕܡ ܐܬܬ. ܕܬܪܬܝܢ ܗܕܐ ܕܡܢ ܒܝܫܘܬܐ ܕܠܫܘܚܠܦܐ ܡܝܬܪܐ. ܕܬܠܬ ܕܝܢ ܠܩܝܡܬܐ ܕܡܢ ܒܝܬ ܡܝ̈ܬܐ. ܒܗܠܝܢ ܡܫܟܚ ܐܢܬ ܠܪܘܚܐ ܕܩܘܕܫܐ ܥܒܘܕܐ ܥܡ ܐܒܐ ܘܒܪܐ. ܘܡܢܐ ܐܡܪ ܕܘܝܕ: ܒܡܠܬܗ ܕܡܪܝܐ ܐܬܥܒܕܘ ܫܡܝܐ ܘܒܪܘܚܐ ܕܦܘܡܗ ܟܠܗܘܢ ܚܝ̈ܠܘܬܗ. ܬܘܒ ܒܪܢܫܐ ܒܝܕ ܡܥܡܘܕܝܬܐ ܡܬܒܪܐ. ܟܠ ܓܝܪ ܕܒܡܫܝܚܐ ܗܘ ܒܪܝܬܐ ܗܘ ܚܕܬܐ. ܘܡܢܐ ܬܘܒ ܐܡܪ ܠܬܠܡܝ̈ܕܘܗܝ ܦܪܘܩܢ ܙܠܘ ܘܬܠܡܕܘ ܠܟܠܗܘܢ ܥܡ̈ܡܐ. ܟܕ ܡܥܡܕܝܢ ܐܢܬܘܢ ܠܗܘܢ܆ ܒܫܡ ܐܒܐ ܘܒܪܐ ܘܪܘܚܐ ܕܩܘܕܫܐ. ܚܙܐ ܐܢܬ ܐܦ ܬܢܢ: ܕܥܡ ܐܒܐ ܘܒܪܐ ܐܝܬܘܗܝ ܪܘܚܐ ܕܩܘܕܫܐ. ܡܢܐ ܕܝܢ ܢܐܡܪ ܐܦ ܡܛܠ ܩܝܡܬܐ ܕܡܢ ܒܝܬ ܡܝ̈ܬܐ: ܡܐ ܕܡܝܬܝܢܢ ܘܗܦܟܝܢܢ ܠܥܦܪܢ. ܐܪܥܐ ܓܝܪ ܐܝܬܝܢ ܘܠܐܪܥܐ ܗܦܟܝܢܢ. ܘܢܫܕܪ ܪܘܚܗ ܕܩܘܕܫܐ ܘܢܒܪܐ ܠܢ. ܘܢܚܕܬ ܠܐܦ̈ܝܗ̇ ܕܐܪܥܐ. ܗܕܐ ܓܝܪ ܕܐܡܪ ܦܘܠܘܣ ܩܝܡܬܐ܆ ܕܘܝܕ ܚܘܕܬܐ ܫܡܗ.

ܢܫܡܥ ܕܝܢ ܡܢ ܗܢܐ ܕܐܬܚܛܦ ܥܕܡܐ ܠܫܡܝܐ ܬܠܝ̈ܝܐ ܡܢܐ ܐܡܪ. ܠܐ ܝܕܥܝܢ ܐܢܬܘܢ ܕܗܝܟܠܐ ܐܝܬܝܟܘܢ ܕܪܘܚܐ ܕܩܘܕܫܐ ܕܥܡܪ ܒܟܘܢ܆ ܟܠ ܓܝܪ ܗܝܟܠܐ ܗܝܟܠܐ ܗܘ ܕܐܠܗܐ. ܐܢ ܕܝܢ ܗܝܟܠܐ ܕܪܘܚܐ ܕܩܘܕܫܐ ܐܝܬܝܢ: ܐܠܗܐ ܗܘ ܪܘܚ ܩܘܕܫܐ. ܡܬܐܡܪ ܕܝܢ ܗܝܟܠܐ ܘܕܫܠܝܡܘܢ. ܐܠܐ ܐܝܟ ܕܥܒܘܕܗ. ܐܢ ܕܝܢ ܗܟܢܐ: ܗܝܟܠܐ ܐܝܬܝܢ ܕܪܘܚܐ ܕܩܘܕܫܐ܆ ܐܠܗܐ ܗܘ ܪܘܚ ܩܘܕܫܐ. ܗܘ ܕܝܢ ܕܒܢܐ ܟܠ ܐܠܗܐ ܗܘ. ܘܐܢ ܗܟܝܠ ܐܝܟ ܣܓܝܕܐ ܗܘ ܘܥܡܘܪܐ ܗܘ ܒܢ ܐܘܕܐ ܕܐܝܬܘܗܝ ܐܠܗܐ. ܠܡܪܝܐ ܓܝܪ ܐܠܗܟ ܬܣܓܘܕ ܘܠܗ ܒܠܚܘܕܘܗܝ ܬܦܠܘܚ.

ܐܢ ܕܝܢ ܡܢ ܫܘܡܗܐ ܕܐܠܗܐ ܢܥܪܩܘܢ. ܢܐܠܦܘܢ ܕܡܢܐ ܐܝܬܘܗܝ ܡܚܘܝܢܐ ܗܢܐ ܫܡܐ. ܡܢ ܗܝ ܕܟܠ ܡܕܡ ܣܡ. ܘܕܚܙܐ ܐܫܬܡܗ ܐܠܗܐ. ܐܢ ܕܝܢ ܐܠܗܐ ܐܬܐܡܪ: ܡܢ ܗܝ ܕܚܙܐ ܘܕܣܡ ܟܠ ܡܕܡ: ܘܪܘܚ ܩܘܕܫܐ ܟܠܡܕܡ ܝܕܥ ܕܐܠܗܐ. ܐܢ ܕܝܢ ܐܠܗܐ ܐܬܐܡܪ: ܡܢ ܗܝ ܕܚܙܐ ܘܕܣܡ ܟܠ ܡܕܡ: ܘܪܘܚ ܩܘܕܫܐ ܟܠܡܕܡ ܝܕܥ ܕܐܠܗܐ: ܐܝܟ ܪܘܚܐ ܕܒܢ ܕܝܠܢ܆ ܐܠܗܐ ܗܘ ܪܘܚ ܩܘܕܫܐ. ܘܬܘܒ ܐܢ ܣܝܦܐ ܕܪܘܚܐ ܡܠܬܐ ܐܝܬܘܗܝ ܕܐܠܗܐ܆ ܐܠܗܐ ܗܘ ܪܘܚ ܩܘܕܫܐ. ܕܗܘ ܓܝܪ ܐܝܬܘܗܝ ܣܝܦܐ. ܕܗܘ ܕܐܦ ܡܠܬܐ ܡܫܬܡܗ. ܘܐܢ ܝܡܝܢܐ ܕܐܒܐ ܒܪܐ ܡܫܬܡܗ ܝܡܝܢܗ ܓܝܪ ܕܡܪܝܐ ܥܒܕܬ ܚܝܠܐ. ܘܝܡܝܢܗ ܕܡܪܝܐ ܬܒܪܬ ܠܒܥܠܕ̈ܒܒܝܢ. ܨܒܥܐ ܗܘ ܕܝܢ ܕܐܠܗܐ ܪܘܚܐ ܕܩܘܕܫܐ ܐܝܟ ܦܬܓܡܐ ܗܢܐ ܕܐܢ ܐܢܐ ܒܨܒܥܐ ܕܐܠܗܐ ܡܦܩ ܐܢܐ ܕܝ̈ܘܐ. ܗܕܐ ܕܒܐܘܢܓܠܣܛܐ ܐܚܪܢܐ ܟܬܝܒܐ. ܕܐܢ ܐܢܐ ܒܪܘܚܐ ܕܐܠܗܐ ܡܦܩ ܐܢܐ ܕܝ̈ܘܐ. ܡܢܗ ܗܘ ܕܟܝܢܐ ܕܐܒܐ ܘܕܒܪܐ ܘܪܘܚ ܩܘܕܫܐ

ܘܐܝܟ ܕܥܠ ܬܠܝܬܝܘܬܐ ܣܓܝܕܬܐ ܘܩܕܝܫܬܐ ܕܐܝܟ ܗܠܝܢ ܬܢܢ ܐܡܪܢܢ. ܠܐ ܓܝܪ ܡܫܟܚܐ ܕܝܬܝܪܐܝܬ ܠܡܠܬܐ ܕܥܠܝܗ̇ ܢܒܥܪ. ܐܢܬܘܢ ܕܝܢ ܡܢ ܒܬܪ ܕܢܣܒܬܘܢ ܙܪ̈ܥܐ ܡܢ ܚܠܫܘܬܝ܆ ܦܠܘܚܘ ܒܢܦܫܟܘܢ ܠܫܢܢܐ ܓܡܝܪܬܐ. ܡܛܠ ܕܪ̈ܒܝܬܐ ܐܝܟܢܐ ܕܝܕܥܝܢ ܐܢܬܘܢ ܕܗܠܝܢ ܐܝܟ ܗܠܝܢ ܬܘܒ ܡܬܬܥܒܝܢ ܐܢܚܢܢ. ܡܗܝܡܢ ܐܢܐ ܕܝܢ ܠܐܠܗܐ. ܕܡܝܬܝܢ ܐܢܬܘܢ ܦܐܪ̈ܐ ܚܕ ܒܬܠܬܝܢ ܘܒܫܬܝܢ ܘܒܡܐܐ ܡܛܠ ܕܟܝܘܬܐ ܕܕܘܒܪ̈ܝܟܘܢ ܛܘܒܝܗܘܢ ܠܡ ܠܐܝܠܝܢ ܕܕܟܝܢ ܒܠܒܗܘܢ ܕܗܢܘܢ ܢܚܙܘܢ ܠܐܠܗܐ.

ܘܠܐ ܬܣܒܪܘܢ ܠܟܘܢ ܐܚ̈ܝ ܕܡܕܡ ܐܚܪܝܢ ܗܝ ܡܠܟܘܬܐ ܕܫܡܝܐ. ܐܠܐ ܐܢ ܚܚܙܬܐ ܫܪܝܪܬܐ ܕܗܠܝܢ ܕܐܝܬܝܗܝܢ. ܗܕܐ ܕܐܦ ܛܘܒܬܢܘܬܐ ܡܫܡܗܝܢ ܠܗ ܟܬܒ̈ܐ ܩܕܝ̈ܫܐ. ܐܢ ܓܝܪ ܡܠܟܘܬܐ ܕܫܡܝܐ ܠܓܘ ܡܢܢ ܐܝܬܝܗ̇: ܒܐܬܪ ܕܒܪܐܢܫܢ ܓܘܝܐ: ܠܘ ܡܕܡ ܐܚܪܝܢ ܐܠܐ ܐܢ ܚܙܬܐ ܡܬܬܩܝܡܐ܆ ܚܙܬܐ ܐܝܬܝܗ̇ ܡܠܟܘܬܐ ܕܫܡܝܐ. ܗܠܝܢ ܕܝܢ ܕܗܫܐ ܛܠܢܝܬܗܝܢ ܚܙܝܢܢ ܐܝܟ ܕܒܡܚܙܝܬܐ. ܠܚܪܬܐ ܡܢ ܒܬܪ ܕܢܓܗܐ ܡܢ ܓܘܫܡܐ ܐܪܥܢܐ ܗܢܐ: ܘܠܐ ܡܬܚܒܠܢܐ ܢܠܒܫ ܘܠܐ ܡܝܘܬܐ܆ ܫܪܪܗܝܢ ܪܝܫ ܕܡܘܬܐ ܩܕܡܝܬܐ ܢܚܙܐ. ܚܙܝܢܢ ܕܝܢ ܕܐܢ ܕܘܒܪܢ ܠܘܬ ܬܪܝܨܘܬܐ ܢܚܝܪܝܘܗܝ ܘܝܨܝܦܘܬܐ ܕܗܝܡܢܘܬܐ ܬܪܝܨܬܐ ܬܗܘܐ ܠܢ ܗܠܝܢ ܕܠܒܪ ܡܢܗܝܢ ܠܡܪܢ ܐܢܫ ܠܐ ܡܫܟܚ ܕܢܚܙܐ. ܒܢܦܫܐ ܓܝܪ ܡܥܩܡܬܐ ܐܡܪ܆ ܠܐ ܬܥܘܠ ܚܟܡܬܐ. ܘܠܐ ܬܥܡܪ ܒܓܘܫܡܐ ܕܡܚܝܒ ܠܚܛܝܬܐ ..

ܘܠܐ ܐܢܫ ܢܙܥܙܥܢܝ ܘܢܢܩܫܢܝ ܘܢܐܡܪ ܕܟܕ ܠܐ ܝܕܥ ܐܢܬ ܕܩܕܡ ܪ̈ܓܠܝܟ ܥܠ ܟܝܢܐ ܕܟܠ ܟܠܗ ܕܠܐ ܓܫܘܡ ܘܕܠܐ ܥܒܝܘܬܐ ܐܝܬܘܗܝ ܡܚܟܡ ܐܢܬ ܠܢ. ܘܐܦ ܓܝܪ ܕܠܐ ܟܐܢܘܬܐ ܕܐܢ ܐܢܐ: ܕܪ̈ܓܫܐ ܐܢ ܕܠܐ ܥܘܘܟܐ ܕܡܢ ܓܘܫܡܐ ܐܚܝܢܗܘܢ ܢܣܒܥܘܢ. ܗܘܢܐ ܕܝܢ ܠܚܘܕܘܗܝ ܢܒܛܠ ܡܢ ܦܘܠܚܢܐ ܕܚܫܚ ܠܗ ܐܝܟܢܐ ܓܝܪ ܕܪ̈ܓܫܐ ܕܡܬܪ̈ܓܫܢܝܬܐ ܗܟܢܐ ܘܐܦ ܡܕܥܐ ܕܡܬܝܕ̈ܥܢܝܬܐ ܐܝܬܘܗܝ ܣܥܘܪܐ. ܥܡ ܗܕܐ ܕܝܢ ܐܦ ܗܕܐ ܬܬܐܡܪ. ܕܠܦܪܘܫܘܬܐ ܕܟܝܢܐ ܕܠܐ ܝܘܠܦܢܐ ܥܒܕ ܗܘ ܕܡܢ ܒܪܫܝܬ ܒܪܐ ܠܢ ܐܠܗܐ. ܠܐ ܓܝܪ ܡܠܦ ܐܢܫ ܠܚܙܝܐ ܕܢܕܥ ܠܓܘܢ̈ܐ ܘܠܐܣܟ̈ܡܐ. ܘܐܦܠܐ ܠܡܫܡܥܬܐ ܠܩܠܐ ܘܠܙܡܡ̈ܐ ܐܦ ܠܐ ܠܣܘܩܐ ܪ̈ܝܚܢܐ ܒܣܝ̈ܡܐ ܘܦܪ̈ܝܫܐ. ܐܦܠܐ ܠܚܟܐ ܛܥܡ̈ܬܐ ܘܡܘ̈ܙܓܐ. ܐܦܠܐ ܠܓܫܬܐ ܪ̈ܟܝܟܐ ܘܩܫ̈ܝܐ. ܐܘ ܚܡܝ̈ܡܐ ܐܘ ܩܪܝܪ̈ܐ. ܐܦ ܠܐ ܠܡܕܥܐ ܕܢܬܩܪܒ ܠܡܬܝܕܥܢܝ̈ܬܐ ܢܠܦܝܘܗܝ ܐܢܫ. ܘܐܝܟܢܐ ܕܐܢ ܢܬܟܘܢ ܗܠܝܢ ܥܠ ܝܨܝܦܘܬܐ ܒܠܚܘܕ ܣܢܝܩܝܢ. ܘܠܦܘܠܚܢܗܘܢ ܦܫܝܩܐܝܬ ܢܓܡܪܘܢ. ܗܟܢܐ ܐܦ ܡܕܥܐ ܕܡܬܐܣܪ ܒܦܓܪܐ ܗܢܐ ܘܡܬܡܠܐ ܡܢ ܫܪܓܪ̈ܓܝܬܐ: ܥܠ ܗܝܡܢܘܬܐ ܣܢܝܩ ܘܕܘܒܪ̈ܐ ܬܪ̈ܝܨܐ. ܗܢܘܢ ܕܡܫܪܪܝܢ ܠܪ̈ܓܠܘܗܝ ܐܝܟ ܕܐܝܠܐ. ܘܥܠ ܪ̈ܡܬܐ ܡܩܝܡܝܢ

ܘܗܝ ܗܕܐ ܐܦ ܚܟܝܡܐ ܫܠܝܡܘܢ ܡܦܩܕ ܠܟ ܘܐܝܬ ܐܡܬܝ ܕܡܝܐ ܠܢ ܠܦܥܠܐ ܚܨܝܦܐ ܫܘܫܡܢܐ ܘܒܗ ܠܫܒܝܠܐ ܕܦܠܘܚܘܬܐ ܣܪܛ ܠܢ ܘܐܝܬ ܐܡܬܝ ܕܠܡܐܢܐ ܕܟܟܪܝܬܐ ܕܕܒܘܪܝܬܐ ܚܟܝܡܬܐ ܘܒܗ ܠܝܕܥܬܐ ܕܟܝܢܐ ܡܬܠ ܕܒܗ ܡܙܝܓܐ ܡܠܬܐ ܕܥܠ ܬܠܝܬܝܘܬܐ ܩܕܝܫܬܐ. ܐܢ ܗܘ ܕܡܢ ܫܘܦܪܐ ܕܒܪ̈ܝܬܗ ܒܡܫܘܚܬܐ ܥܒܘܕܐ ܕܟܠ ܡܬܝܕܥ.

ܐܠܐ ܟܕ ܬܘܕܝܬܐ ܡܢ ܒܬܪ ܕܢܘܕܐ ܠܐܒܐ ܘܠܒܪܐ ܘܠܪܘܚܐ ܕܩܘܕܫܐ ܡܣܩܝܢ ܚܢܢ. ܫܘܠܡܐ ܢܬܠ ܠܟܬܒܐ. ܡܛܘܠ ܕܒܟܠܡܕܡ ܟܝܠܐ ܫܦܝܪ ܐܝܟ ܕܐܡܪܘ ܡ̈ܬܠܐ܀

ܫܠܡܬ ܐܓܪܬܐ ܕܛܘܒܢܐ ܐܘܓܪܝܣ ܕܥܠ ܗܝܡܢܘܬܐ܀