Principium charitatis, est alteri alterius gloriae mutua responsio.

Bonum est ditescere in mansuetudine et charitate.

Ventilator virtutis est superba cogitatio.

Plana via fit ab eleemosyna.

Injustus judex est conscientia inquinata.

Durum est servire passionibus carnis.

Si volueris esse absque dolore, stude placere Deo.

Qui honeste sui curam gerit, ipsius a Deo cura geritur.

Temperans cor portus est contemplationum.

Quando voles te ipsum nosse quisnam sis, ne compares cum eo, quis eras, sed cum eo qui ab initio fuisti.

Cisterna sine aqua est anima gloriae cupida.

Anima superba taberna est latronum, oditque sonitum scientiae.

Veri viri malus est error nescire Scripturas.

An Deum timeas, agnoscito e lacrymis.

Armatura infracta est humilitas animae.

Arbor paradisi est vir cupidus virtutis.

Jesus Christus est lignum vitae, utere ipso ut oportet, et non morieris in aeternum.

Benefac his qui sunt vere pauperes, et comedes CHristum.

Robur verum est Christi corpus comedere.

Si amas Christum, ejus mandata servare ne obliviscaris.

Inde namque demonstratur qui post Deum est benefactor.

Qui secundum Deum amicus est, lac, et mel, veris fluit sermonibus.

Anima vero pigra talem non habebit amicum.

Crudelis herus, cogitatio cupida voluptatis.

Tacere veritatem est aurum sepelire.

Qui timet Deum, facit omnia secundum Deum.