ሃዌ ዳዊታ ዛሪያኔ ኣብራሃሜ ዛሬ ጊዴዳ ዬሱሲ ኪሪስቶሳ ዬሌታ ኦዲያ ማፃፋ። ኣብራሃሜ፥ ዪሳቃ ዬሌዳ፤ ዪሳቂ፥ ያዪቆባ ዬሌዳ፤ ያዪቆቢ፥ ዪሁዳኔ ኣ ኢሻቱዋ ዬሌዳ። ዪሁዳይ ቲዒማሪፔ ፓሬሳኔ ዛራሃ ዬሌዳ፤ ፓሬሴ፥ ሄፂሮና ዬሌዳ፤ ሄፂሮኔ፥ ራማ ዬሌዳ። ራሜ ኣሚናዳባ ዬሌዳ፤ ኣሚናዳቤ፥ ናዓሶና ዬሌዳ፤ ናዓሶኔ፥ ሴሊሞና ዬሌዳ። ሴሊሞኔ፥ ራዓቦ ጌቴቲያ ሚሺራቲፔ ቦዔዛ ዬሌዳ፤ ቦዔዚ፥ ኡሩቶ ጌቴቲያ ሚሺራቲፔ ኢዮቤዳ ዬሌዳ፤ ኢዮቤዴ፥ ኢሴይ ዬሌዳ። ኢሴይ ካቲያ ዳዊታ ዬሌዳ። ካቲያ ዳዊቴ፥ ኦሪያ ማቻቲፔ ሶሎሞና ዬሌዳ። ሶሎሞኔ፥ ሮቢዓማ ዬሌዳ፤ ሮቢዓሜ፥ ኣቢያ ዬሌዳ፤ ኣቢያይ፥ ኣሳፋ ዬሌዳ። ኣሳፌ፥ ዮሳፌፃ ዬሌዳ፤ ዮሳፌፄ፥ ኢዮራማ ዬሌዳ፤ ኢዮራሜ፥ ኦዚያና ዬሌዳ። ኦዚያኔ፥ ኢዮዓታማ ዬሌዳ፤ ኢዮዓታሜ፥ ኣካዛ ዬሌዳ፤ ኣካዜ፥ ሂዝቂያሳ ዬሌዳ። ሂዝቂያሴ ሚናሳ ዬሌዳ፤ ሚናሴ፥ ኣሞፃ ዬሌዳ፤ ኣሞፄ፥ ኢዮሲያሳ ዬሌዳ። ኢስራዔሊያ ኣሳይ ኦሞዴቲዴ፥ ባቢሎኔ ጋዲያ ቤዳ ዎዴ፥ ኢዮሲያሴ ኢኮኒያናኔ ኣ ኢሻቱዋ ዬሌዳ። ባቢሎኔ ኦሞዱዋፔ ጉዪያን፥ ኢኮኒያናኔ ሳላቲያላ ዬሌዳ፤ ሳላቲያሌ፥ ዜሩባቤላ ዬሌዳ። ዜሩባቤሊ፥ ኣቢዩዳ ዬሌዳ፤ ኣቢዩዴ፥ ኤሊያቄማ ዬሌዳ፤ ኤሊያቄሚ፥ ኣዞራ ዬሌዳ። ኣዞሬ ሳዶቃ ዬሌዳ፤ ሳዶቄ፥ ኣኪማ ዬሌዳ፤ ኣኪሜ ኤሊዩዳ ዬሌዳ። ኤሊዩዴ፥ ኣሊዓዛራ ዬሌዳ፤ ኣሊዓዛሬ፥ ማታና ዬሌዳ፤ ማታኔ፥ ያዪቆባ ዬሌዳ። ያዪቆቤ፥ ኪሪስቶሳ ጌቴቲያ ዬሱሳ ዬሌዳ ማይራሞ ኦቼዳ ዮሴፋ ዬሌዳ። ሲሚ ዬሌታይ ኡባይ ኣብራሃሞፔ ዳዊታ ጋካናው ታማኔ ኦይዱ ዬሌታ፤ ዳዊቴፔ ዶሚዴ፥ ኣሳይ ባቢሎኔ ጋዲያ ኦሞዴቲዴ ቤዳ ዎዲያ ጋካናው ታማኔ ኦይዱ ዬሌታ፤ ኣሳይ ባቢሎኔ ጋዲያ ኦሞዴቲዴ ቤዳ ዎዲያፔ ኪሪስቶሲ ዬሌቴዳ ዎዲያ ጋካናው ታማኔ ኦይዱ ዬሌታ። ዬሱሲ ኪሪስቶሳ ዬሌታይ ሃዋ ማላ፤ ኣ ዳያ ማይራማ ዮሴፎ ኦሼታ ቃሼታ ኡታዱ። ሄ ዎዴ ዮሴፎና ጋኬቴናን ዴዓዴ፥ ጌሻ ኣያናን ሻሃራዱ። ኢዞ ጊጊሲ ዎꬄዳ ዮሴፎ ፂሎ ኣሳ ጊዴዳ ዲራው፥ ኢዞ ካዉሻናው ኮዪቤና፤ ኢባ ቆንጪሴናን ኢዞ ኣጋናው ቆፔዳ። ሺን ኢ ሄዋ ቆፒሺን፥ ጎዳ ኪታንቻይ ኣኩሙዋን ኣናና ጋኬቲዴ፥ «ዳዊቴ ናዓ ዮሴፎ፥ ማይራማ ጌሻ ኣያናን ሻሃሬዳ ዲራው ኢዞ ኣካናው ያዮፓ። ኢዛ ኣቱማ ናዓ ዬላናዉኑ፤ ኔኒካ፥ ኢ ኣሳ ናጋራፔ ኣሺያ ዲራው ኣ ሱንꬃ ዬሱሳ ጋዴ ፄሳናሳ» ያጌዳ። ቃሲ ጎዳይ ናቢያ ባጋና፥ «ዎዶራታ ሻሃራናዉኑ፤ ናዓካ ዬላናዉኑ፤ ኣ ሱንꬃይካ ኣማኔላ ጌቴታናዋ» ያጌዳዌ ፖሌታና ማላ፥ ሃዌ ኡባይ ሃኔዳ፤ «ኣማኔላ» ያጊያዌ፥ «ፆሳይ ኑናና ዴዔ» ያጊያዋ። *** ዮሴፎ ጌሚዒሹዋፔ ቤጎቲዴ፥ ጎዳ ኪታንቻይ ባሬና ኣዛዞዋዳን፥ ማይራሞ ባሬ ጎሌ ኣፌዳ። ሺን ናዓይ ዬሌታና ጋካናው ዮሴፎ ኢዚኮ ሺቂቤና፤ ቃሲ ናዓካ ዬሱሳ ጊዴ ሱንꬄዳ። ዬሱሲ ዪሁዳ ጋዲያን ቤቴሊሄሜ ጌቴቲያ ካታማን ሄሮዲሴ ካዉቲዴ ዴዒያ ዎዴ ዬሌቴዳ፤ ሄዋፔ ጉዪያን፥ ፆሊንቲያ ፓይዲያ ኣሳይ ኣዋይፊ ዶሊያ ባጋፔ ዬሩሳላሜ ዪዴ፥ «ኣዪሁዳ ካቲያ ጊዳናው ዬሌቴዳ ናዓይ ሃቃን ዴዒ? ኑኒ ኣዋይፊ ዶሊያ ባጋና ኬሴዳ ኣ ፆሊንቲያ ቤዒዴ፥ ኣው ጎዪናናው ዬዶ» ያጊዴ ኦቼዲኖ። ካቲያ ሄሮዲሴ፥ ሄዋ ሲሲዴ ዳጋሜዳ፤ ዬሩሳላሜን ዴዒያ ኣሳይ ኡባይካ ዎዛና ባዬዲኖ። ሄሮዲሴ ቄሳቱዋ ካፓቱዋ ኡባቱዋኔ ሙሴ ሂጊያ ታማሪሲያዋንታ ፄሲዴ፥ «ኪሪስቶሲ ሃቃን ዬሌታንዴሻ?» ያጊዴ ኦቼዳ። ኡንቱንቱ ዛሪዴ፥ «ዪሁዳ ጋዲያን ቤቴሊሄሜ ካታማን ዬሌታናዋ። ናቢ፥ ‹ዪሁዳ ጋዲያን ዴዒያ ቤቴሊሄሜ፥ ኔኒ ዪሁዳ ጋዲያን ዴዒያ ዎሊቃማ ካታማቱዋፔ ላፋካ። ኢስራዔሊያ ሞዲያዌ ኔፔ ኬሳናዋ› ጊዴ ፃፌዳ» ያጌዲኖ። *** ሄዋፔ ካላ፥ ሄሮዲሴ ኣዋይፊ ዶሊያ ባጋፔ ዬዳ ኣሳቱዋ ጌማን ፄሲዴ፥ ፆሊንቲ ኡንቱንቶ ቤቴዳ ዎዲያ ኡንቱንቱፔ ጌሺዴ ኤሬዳ። ያቲዴ ቤቴሊሄሜ ኡንቱንታ ዬዲዴ፥ «ቢዴ ናዓ ሎይꬂ ኮዪቴ፤ ኣ ዴሜዳ ዎዴ ታኒካ ባዴ ኣው ጎዪናናዳን፥ ታናካ ኤሪሲቴ» ያጌዳ። ኡንቱንቱ ካቲ ጌዳዋ ሲሲ ቢዴ ኦጊያን ኣዋይፊ ዶሊያ ባጋና ኡንቱንቱ ካሴ ቤዔዳ ፆሊንቲያ ቤዔዲኖ፤ ናዓይ ዴዒያሳ ጋኪዴ ኤቃና ጋካናው፥ ፆሊንቲ ኡንቱንታ ካሌꬄዳ። ኡንቱንቱ ሄ ፆሊንቲያ ቤዔዳ ዎዴ፥ ዛዋይ ባይና ዳሮ ናሼቻ ናሼቴዲኖ። ጎሌ ጌሊዴ፥ ናዓይ ባሬ ዳዪ ማይራሚና ዴዒያዋ ቤዔዲኖ፤ ጉልባቲዴ ኣው ጎዪኔዲኖ፤ ሄዋፔ ካላ፥ ባሬንቱ ሳፂኒያ ዶዪዴ፥ ዎርቃ፥ ኢፃናኔ ካዋራ ኣው ኢሞታ ሺሼዲኖ። ኡንቱንቱ ሄሮዲሳኮ ሲሜና ማላ፥ ፆሳይ ኣኩሙዋን ኡንቱንታ፥ «ሂንቴና ኤሪቴ» ጊና ሃራ ኦጊያና ባሬንቱ ጋዴ ሲሜዲኖ። ኡንቱንቱ ቤዳዋፔ ጉዪያን፥ ጎዳ ኪታንቻይ ኣኩሙዋን ዮሴፎ ቤቲዴ፥ «ሄሮዲሴ ናዓ ዎꬋናው ኮዪያ ዲራው፥ ዴንዳዴ ናዓኔ ኣ ዳዮ ኣካዴ ጊብፄ ጋዲያ ቤታ፤ ታኒ ኔው ኦዳና ጋካናው፥ ያኒ ዴዓሻ» ያጌዳ። ዮሴፎ ቃማ ዴንዲዴ፥ ናዓኔ ኣ ዳዮ ኣኪዴ፥ ጊብፄ ጋዲያ ቤዳ፤ ጎዳይ ናቢያ ባጋና፥ «ታኒ ታ ናዓ ጊብፄ ጋዲያፔ ፄሳዲ» ያጌዳዌ ፖሌታና ማላ፥ ሄሮዲሴ ሃይቃና ጋካናው ኢ ያኒ ዴዔዳ። *** ሄዋፔ ጉዪያን፥ ሄሮዲሴ ኣዋይፊ ዶሊያ ባጋፔ ዬዳዋንቱ ባሬና ጪሜዳዋ ኤሬዳ ዎዴ፥ ዳሮ ሃንቄቲዴ፥ ፆሊንቲ ካሴ ቤቴዳ ዎዲያ ኡንቱንቱፔ ሲሴዳዋዳን፥ ዎታዳራቱዋ ዬዲዴ፥ ቤቴሊሄሜኒኔ ዩሹዋን ዴዒያ ላዑ ላይꬃ ኣቱማ ናናኔ ላዑ ላይꬃፔ ጋርሳና ዴዒያ ኣቱማ ናና ኡባ ዎꬊሴዳ። ናቢያ ኤርሚያሲ፥ «ዬኩኔ ዚላሳይ ራማ ጌቴቲያ ካታማን ሲሴቴዳ፤ ራሄላ ባሬ ናናው ዬካው። ኡንቱንቱ ሃይቂዲጎ ዲራው፥ ኣጋ ጊና፥ ኣጌናን ኢፃዱ» ጊዴ ኦዴዳዌ ፖሌቴዳ። *** ሄሮዲሴ ሃይቄዳዋፔ ጉዪያን፥ ጎዳ ኪታንቻይ ጊብፄን ዮሴፎ ኣኩሙዋን ቤቲዴ ኣ፥ «ዴንዳ፤ ናዓኔ ኣ ዳዮ ኣካዴ፥ ኢስራዔሊያ ጋዲያ ሲማ። ናዓ ዎꬋናው ኮዪያዋንቱ ሃይቂዲጌዲኖ» ያጌዳ። ዮሴፎ ዴንዲዴ፥ ናዓኔ ኣ ዳዮ ኣኪዴ፥ ኢስራዔሊያ ሲሜዳ። ሺን ዮሴፎ ኣርኬላዎሲ ባሬ ኣዉዋ ሄሮዲሳ ኦይዲያን ዪሁዳ ጋዲያን ካዉቴዳዋ ሲሴዳ ዎዴ፥ ያ ባናው ያዬዳ፤ ፆሳይ ኣው ኣኩሙዋን ሂንቴና ኤሪቴ ጊና፥ ጋሊላ ጋዲያ ቤዳ። ናባቱ፥ «ኣሳይ ኣ፥ ‹ናዚሬቲያ ኣሳ› ጊዴ ፄሳና» ያጌዳዌ ፖሌታና ማላ፥ ናዚሬቴ ጌቴቲያ ካታማ ቢዴ ዴዔዳ። ሄ ዎዴ ፃማቂያ ዮሃኒሲ ኣሳ፥ «ሳሉዋ ካዉቴꬃይ ማታቴዳ ዲራው፥ ሂንቴ ናጋራፔ ሲሚቴ» ያጊዴ፥ ዪሁዳ ሜላ ቢታን ኦዲዴ ዬዳ። *** ኣዪሲ ጎፔ፥ ናቢያ ኢሲያሴ፥ ዮሃኒሳባ ኦዲዴ፥ «ኢቱ ሜላ ቢታን ባሬ ቃላ ꬎቁ ኡዲዴ፥ ‹ጎዳ ኦጊያ ጊጊሲቴ። ኢ ሄሜታና ሎሱዋካ ኣው ሲቲ ኡዲቴ› ጌዳ» ያጌዳ። ዮሃኒሳው ጋሉዋ ኢስኪያን ዳዴቴዳ ማዩ ዴዔ፤ ቃሲ ባሬ ፄሳን ዳፉዋ ዳንጬዳ፤ ኢ ሚያ ቁማይካ ቦሊያኔ ባዙዋ ኤሳ። ኣሳይ ሄ ዎዴ ዬሩሳላሜፔ፥ ዪሁዳ ጋዲያ ኡባ ሳፔኔ ዮርዳኖሳ ሻፋ ሄራን ዴዒያ ጋዲያ ኡባፔ ኣኮ ዪኖ። ባሬንቱ ናጋራ ፓፂና፥ ዮርዳኖሳ ሻፋን ኣሳ ፃማቄዳ። ሺን ዮሃኒሲ ዳሮ ፓሪሳዋቱኔ ሳዱቃዋናቱ ፃማቄታናው ባሬኮ ዪያዋንታ ቤዒዴ፥ «ሃ ሾሻቶ፥ ፆሳ ሃንቁ ያና ሃኒያዋፔ ኣታና ማላ፥ ሂንቴው ኦኔ ኦዴዳዌ? ሲሚ ሂንቴ፥ ሂንቴንቱ ናጋራፔ ሲሜዳዋ ኤሪሲያ ኦሱዋ፥ ኦꬂቴ። ሂንቴ ሂንቴንቱ ዎዛናን፥ ‹ኣብራሃሜ ኑ ኣባ› ጊዴ ቆፒያዋ ሂንቴው ማላቶፖ። ኣዪሲ ጎፔ፥ ታኒ ሂንቴንቱሲ ኦዳይ፤ ፆሳይ ሃ ሹቻቱዋፔ ኣብራሃሞሲ ናና ኡዲ ዴንꬃናው ዳንዳዬ። ቤፂ ሚꬃ ፃጱዋን ቃንፃናው ጊጊ ኡቴዳ፤ ሎዖ ኣይፊያ ኣይፌና ሚꬃ ኡባይ ቃንፄቲዴ፥ ታማን ዬጌታና። «ሂንቴ ሂንቴንቱ ናጋራፔ ሲሚያዋ ቤሳናው፥ ታኒ ሂንቴና ሃꬃን ፃማቃይ፤ ሺን ታፔ ጉዬና ዪያዌ፥ ሂንቴንታ ጌሻ ኣያናኒኔ ታማን ፃማቃና። ኢ ታፔ ዳሮ ሚኔ፤ ኣ ጫማ ቶካናዉካ ታኒ ቤሲያ ኣሳ ጊዲኬ። ኣ ኩሺያን ካꬃ ሴፂያ ላይዳይ ዴዔ። ኡዱማን ዴዒያ ካꬃ ሎይꬂ ጌሼ፤ ባሬ ዛርጋ ዲዪያን ቆላና፤ ሺን ዳላ ቶዔና ታማን ጉዳና» ያጌዳ። ዬሱሲ ሄ ዎዴ ዮሃኒሳን ፃማቄታናው፥ ጋሊላፔ ዮርዳኖሳ ጌቴቲያ ሻፋ ኣኮ ቤዳ። ሺን ዮሃኒሲ፥ «ታኒ ኔናን ፃማቄታናው ቤሲያ ዎዴ፥ ኔኒ ታኮ ያይ?» ያጊዴ፥ ኣ ዲጋናው ኮዬዳ። ሺን ዬሱሲ ዛሪዴ ኣ፥ «ኑኒ ፂሎቴꬃ ኦሱዋ ኡባ ሃዋዳን ፖላናው ቤሲያ ዲራው፥ ሃዒ ታው ኤኖ ጋ» ያጌዳ። ዮሃኒሲካ ኣው ኤኖ ጌዳ። ዬሱሲ ፃማቄቶዋፔ ጉዪያን፥ ኤሌካ ሃꬃፔ ኬሴዳ፤ ሳሉ ዶዬቲና፥ ፆሳ ኣያናይ ሃራጲያዳን ሳሉዋፔ ዎꬊዴ ባሬ ቦላ ዪያ ዎዴ ቤዔዳ፤ ቃሲ ሳሉዋፔ፥ «ታኒ ሲቂያ፥ ታና ናሼቺያ፥ ታ ናዓይ ሃዋ» ያጊያ ቃላይ ዬዳ። ሄዋፔ ጉዪያን፥ ፃላሂያን ፓጬታና ማላ፥ ጌሻ ኣያናይ ኣሳይ ዴዔና ሳዓ ዬሱሳ ኣፌዳ። ዬሱሲ ኦይታሙ ጋላሳኔ ኦይታሙ ቃማ ፆሞዋፔ ጉዪያን ኮሻቴዳ። ፃላሂ ዪዴ ኣ፥ «ኔኒ ፆሳ ናዓ ጊዶፔ፥ ኣኔ ሃ ሹቻቱዋ ኡኪꬃ ጊዳና ማላ ጋ» ያጌዳ። ሺን ዬሱሲ ዛሪዴ፥ «ፆሳ ማፃፋን፥ ‹ኣሳይ ፆሳይ ሃሳዪያ ቃላ ኡባን ዴዓናፔ ኣቲን፥ ኡኪꬃ ፃላላን ዴዔና› ያጌቲ ፃፌቴዳ» ያጌዳ። ሄዋፔ ጉዪያን፥ ፃላሂ ዬሱሳ ጌሻ ካታማ ኣፊ ጌሻ ጎሊያ ፄራን ኤሲዴ፥ «ኔኒ ፆሳ ናዓ ጊዶፔ፥ ኣኔ ዱጌ ኩንዳ። ኣዪሲ ጎፔ፥ ፆሳ ማፃፋን፥ ‹ፆሳይ ባሬ ኪታንቻቱዋ ኔው ኣዛዛናዋ› ቃሲ ‹ኡንቱንቱ ኔ ጌዲ ሹቻን ꬉቤቴና ማላ፥ ባሬንቱ ኩሺያን ኔና ዴንꬃናዋንታ› ያጌቲ ፃፌቴዳ» ያጌዳ። ዬሱሲ ዛሪዴ ኣ፥ «ቃሲካ ፆሳ ማፃፋን፥ ‹ጎዳ ኔ ፆሳ ፓጮፓ› ያጌቲ ፃፌቴዳ» ያጌዳ። ቃሲ ፃላሂ ዬሱሳ ኢቲ ዳሮ ዎልቃማ ዴሪያ ፄራ ኬሲዴ፥ ሃ ኣላሚያን ዴዒያ ካዉቴꬃ ኡባኔ ኡንቱንቱ ቦንቹዋ ቤሲዴ ኣ፥ «ኔኒ ታው ጉልባታዴ ጎዪኖፔ፥ ታኒ ሃዋ ኡባ ኔው ኢማና» ያጌዳ። ሄ ዎዴ ዬሱሲ ዛሪዴ ኣ፥ «ላ ሃ ሴፃናው ሃካ፤ ኣዪሲ ጎፔ፥ ፆሳ ማፃፋን፥ ‹ጎዳው፥ ኔ ፆሳው ጎዪና፤ ኣ ፃላላ ጎሼታ› ጌቴቲ ፃፌቴዳ» ያጌዳ። ሄዋፔ ጉዪያን፥ ፃላሂ ዬሱሳ ኣጊና፥ ኪታንቻቱ ዪዴ፥ ኣው ኦꬄዲኖ። ዮሃኒሲ ቃሼቴዳዋ ዬሱሲ ሲሴዳ ዎዴ፥ ጋሊላ ጌቴቲያ ጋዲያ ቤዳ። ናዚሬቴፔ ኬሲዴ፥ ቂፊሪናሆማ ካታማ ቢዴ፥ ያኒ ዴዔዳ፤ ቂፊሪናሆሚ ዛቢሎናኒኔ ኒፍታሌሜ ጋዲያን ዴዒያ ጋሊላ ኣባ ማታን ዴዔ። ሃዌ ሃኔዳዌ ናቢያ ኢሲያሲ፥ «ዛቢሎኔ ጋዲያኒኔ ኒፍታሌሜ ጋዲያን፥ ኣባ ኦጊያን ዮርዳኖሳ ሻፋፔ ሄፊንꬃ ባጋን፥ ኣዪሁዳ ጊዴና ኣሳይ ዴዒያ ጋሊላን፥ ꬉማኒ ዴዒያ ኣሳይ ዎልቃማ ፖዑዋ ቤዔዳ። ቃሲ ሃይቁዋ ኩዋይ ዴዒያ ጋዲያን ኡቴዳዋንቶ ፖዑ ኬሴዳ» ያጌዳዌ ፖሌታና ማላሳ። ሄ ዎዲያፔ ዶሚዴ ዬሱሲ፥ «ሂንቴ ናጋራ ፓፂቴ፤ ኣዪሲ ጎፔ፥ ሳሉዋ ካዉቴꬃይ ማታቴዳ ዲራሳ» ጊዴ ቃላ ኦዱዋ ዶሜዳ። ዬሱሲ ጋሊላ ኣባ ማታና ኣꬊዴ፥ ላዑ ኢሻቱ ጴፂሮሳ ጌቴቲያ ሲሞኒኔ ኣ ኢሻ ኢንዲራሲ፥ ሞሊያ ኦይቂያዋንታ ጊዶ ዲራው፥ ዳባ ኣባን ዬጊያዋንታ ቤዔዳ። ኡንቱንታ፥ «ታና ካሊቴ፤ ታኒ ሂንቴና ሞሊያ ኦይቂያዋዳን ኣሳ ታኮ ኣሂያ ኦጊያ ታማሪሳና» ያጌዳ። ኡንቱንቱ ኤሌካ ባሬንቱ ዳባ ኣጊዴ፥ ዬሱሳ ካሌዲኖ። ዬሱሲ ሄዋፔ ሲንꬃኮ ቢዴ፥ ሃራ ላዑ ኢሻቱዋ፥ ዛቢዲዮሳ ናና ያዪቆባኔ ኣ ኢሻ ዮሃኒሳ ቤዔዳ፤ ኡንቱንቱ ባሬንቱ ኣዉዋ ዛቢዲዮሳና ሃꬃ ቦላን ቢያ ዎንጊሪያ ጊዶን ባሬንቱ ዳባ ጊጊሲያዋንታ ቤዒዴ፥ ፄሴዳ። ኡንቱንቱ ኤሌካ ሃꬃን ቢያ ዎንጊሪያኔ ባሬንቱ ኣዉዋ ኣጊዴ፥ ዬሱሳ ካሌዲኖ። ዬሱሲ ኣዪሁዳ ዎሳ ጎሌቱዋን ታማሪሲዴ፥ ካዉቴꬃ ሚሺራቹዋ ቃላ ኦዲዲኔ ቃሲ ሃርጊያ ኡባፔኔ ሳኩዋ ኡባፔ ኣሳ ፓꬂዴ፥ ጋሊላ ጋዲያ ኡባን ዩዬዳ። ኣ ዋሪ ሶሪያ ጋዲያ ኡባ ጋኬዳ፤ ዱማ ዱማ ሃርጊያን ኦይቄቲዴ ሃርጌዳ ኣሳ ኡባ፥ ፃላሃቱዋን ኦይቄቴዳዋንታ፥ ዪጩዋ ሳኩ ዴዒያዋንታ፥ ቃሲ ጉንዴድዳዋንታ ኣሳይ ዬሱሳኮ ኣሄዳ፤ ኢ ኡንቱንታ ፓꬄዳ። ጮራ ኣሳይ ጋሊላፔ፥ ታሙ ካታማቱዋፔ፥ ዬሩሳላሜፔ፥ ዪሁዳፔኔ ዮርዳኖሳፔ ሄፊንꬃን ዴዒያ ጋዲያፔ ዬሱሳ ካሌዲኖ። ዬሱሲ ጮራ ኣሳ ቤዒዴ፥ ፑዴ ዴሪያ ኬሲዴ ኡቴዳ። ኣ ካሊያዋንቱ ኣኮ ሺቄዲኖ። ኡንቱንታ ሃዋዳን ያጊ ታማሪሱዋ ዶሜዳ። «ባሬንቱ ኣያና ዴዑዋን ሂዬሳ ጊዴዳዋ ኤሪያዋንቱ ኣንጄቴዳዋንታ፤ ኣዪሲ ጎፔ፥ ሳሉዋ ካዉቴꬃይ ኡንቱንቱሳ። ካዮቲያዋንቱ ኣንጄቴዳዋንታ፤ ኣዪሲ ጎፔ፥ ፆሳይ ኡንቱንታ ሚኒሳና። ኣሺኬ ጊዴዳዋንቱ ኣንጄቴዳዋንታ፤ ኣዪሲ ጎፔ፥ ኡንቱንቱ ሳዓ ላታና። ፂሎቴꬃ ኮሻቲያዋንቱኔ ሳሜቲያዋንቱ ኣንጄቴዳዋንታ፤ ኣዪሲ ጎፔ፥ ፆሳይ ኡንቱንታ ካሊሳና። ማሪያዋንቱ ኣንጄቴዳዋንታ፤ ኣዪሲ ጎፔ፥ ፆሳይ ኡንቱንታ ማራና። ዎዛና ጌሻቱ ኣንጄቴዳዋንታ፤ ኣዪሲ ጎፔ፥ ኡንቱንቱ ፆሳ ቤዓና። ኣሳ ሲጌꬂያዋንቱ ኣንጄቴዳዋንታ፤ ኣዪሲ ጎፔ፥ ፆሳይ ኡንቱንታ፥ ባሬ ናና ጊዴ ፄሳና። ፂሎቴꬃ ዲራው ዬዴርሴቲያዋንቱ ኣንጄቴዳዋንታ፤ ኣዪሲ ጎፔ፥ ሳሉዋ ካዉቴꬃይ ኡንቱንቱሳ። «ሂንቴ ታና ካሊያ ዲራው፥ ኣሳይ ሂንቴና ቦሪያ ዎዴኔ ዋዪሲያ ዎዴ፥ ቃሲ ሂንቴ ቦላ ኢታባ ኡባ ዎርዱዋን ሃሳዪያ ዎዴ፥ ሂንቴ ኣንጄቴዳዋንታ። ሂንቴው ሳሉዋን ዎልቃማ ዎይታይ ዴዒያ ዲራው፥ ናሼቲቴ፤ ሃሹ ጊቴ፤ ኣዪሲ ጎፔ፥ ኣሳይ ሂንቴፔ ካሴ ዴዔዳ ናባቱዋ ሄዋዳን ዬዴርሴዲኖ። «ኣሳ ኡባሲ ሂንቴ ማፂኔ ማላ፤ ሺን ማፂኒ ማልዓና ꬋዮፔ፥ ዛሪዴ ኣ ዎቲ ማልዔꬃኔ? ካሬ ኦሊና፥ ኣሳይ ኣ ዬꬊ ሃሜታናፔ ኣቲን፥ ሲንꬃው ኣይኔ ማዴና። «ሃ ኣላሜው ሂንቴ ፖዖ፤ ዴሪያ ሁጲያን ኬፄቴዳ ካታማይ ጌማና ዳንዳዬና። ፆምፒያ ፆምፒዴ፥ ሶዪን ዴዒያ ኣሳ ኡባው ፖዓና ማላ፥ ꬎቂያ ሳን ዎꬄፔ ኣቲን፥ ካሚያ ሚሻ ጊዶን ቁምዒ ዎꬂያ ኣሳይ ኦኒኔ ባዋ። ሄዋዳንካ፥ ኣሳይ ሂንቴ ኦꬂያ ሎዖ ኦሱዋ ቤዒዴ፥ ሳሉዋን ዴዒያ ሂንቴ ኣዉዋ ቦንቻና ማላ፥ ሂንቴ ፖዑ ኣሳ ሲንꬃን ፖዖ። «ታኒ ሙሴ ሂጊያኔ ናባቱ ታማሪሲያዋ ꬋዪሳናው ዬዳዋ ሂንቴው ማላቶፖ፤ ታኒ ፖላናው ዬዳዋፔ ኣቲን፥ ꬋዪሳናው ያቤይኬ። ኣዪሲ ጎፔ፥ ታኒ ሂንቴው ቱሙዋ ኦዳይ፤ ሳሉኔ ሳዓይ ኣꬋና ጋካናው፥ ቃሲ ኡባባይካ ፖሌታና ጋካናው፥ ሂጊያፔ ኢቲ ጫቻይካ ዎይ ቄሪ ፒዶሊካ ኣꬌና። ሄዋ ዲራው፥ ሃ ኣዛዙዋ ኡባፔ ጉፂያ ኢቲ ኣዛዙዋ ሜንꬂያ ኡራይ ኦኒኔ፥ ቃሲ ሃራቱካ ባሬዋዳን ሃናናዳን ታማሪሲያ ኡራይ ኦኒኔ፥ ሳሉዋ ካዉቴꬃን ኡባፔ ጉꬃ ጊዳና፤ ሺን ኣዛዙዋ ኦꬂያዌኔ ሃራንቱካ ኦꬃናዳን ታማሪሲያዌ ኦኒኔ ሳሉዋ ካዉቴꬃን ꬎቃ ጊዳና። ኣዪሲ ጎፔ፥ ሂንቴ ፂሎቴꬃይ ሙሴ ሂጊያ ታማሪሲያዋንቱ ፂሎቴꬃፔኔ ፓሪሳዋቱዋ ፂሎቴꬃፔ ዳራና ꬋዮፔ፥ ሳሉዋ ካዉቴꬃ ሂንቴ ሙሌ ጌሌናዋ ታኒ ኦዳይ። «ቤኒ ኣሳው፥ ‹ኣሳ ዎꬎፓ፤ ኣሳ ዎꬌዳ ኦኒኔ ፒርዴታና› ጌዳዋ ሲሴዲታ። ሺን ታኒ ሂንቴው ኦዳይ፤ ባሬ ኢሻ ሃንቄቲያ ኡባይ ፒርዴታና፤ ባሬ ኢሻ ቦሪያ ኡባይ ሻንጉዋ ፒርዳው ሺቃና፤ ቃሲ ባሬ ኢሻ፥ ‹ꬉሎዌ› ጊያ ኡባይ ጋናሚያ ታማ ፒርዳው ሺቃና። ሄዋ ዲራው፥ ኔኒ ያርሺያሳን ያርሺሺን፥ ኔ ኢሻ ናቄዳባይ ኔው ሄዋን ሃሳዬቶፔ፥ ኔ ያርሹዋ ሄዋን ኣጋዴ ባ፤ ካሴታዴ ኔ ኢሻና ሲጌታ ዲጋ፤ ሄዋፔ ካላ ያዴ፥ ኔ ያርሹዋ ያርሻ። «ኔና ሞቲያዋና ዎዲ ዴዒሺን ኤሌ ኣናና ሲጌታ ዲጋ፤ ሄዌ ꬋዮፔ፥ ኢ ኔና ዳና ሲንꬃ ኣꬃና፤ ቃሲ ዳናይ ኔና ፖሊሴው ኣꬂ ኢሚና፥ ፖሊሲ ኔና ቃሾ ጎሌን ዬጋና። ታኒ ኔው ቱሙዋ ኦዳይ፤ ኔኒ ኢቲ ሳንቲሚ ኣቴናን፥ ኔ ማጋጩዋ ዉርሳዴ ጪጋና ጋካናው፥ ሙሌካ ቃሾ ጎሌፔ ኬሳካ። « ‹ዎሹሞፓ› ጌዳዋ ሲሴዲታ። ሺን ታኒ ሂንቴው ያጋይ፤ ‹ማጫዉኖ ፄሊዴ ኣሞቲያ ኡባይ፥ ባሬ ዎዛና ጊዶን ሄ ዎዴ ኢናና ዎሹሜዳ።› ኔ ኡሼቻ ኣይፊ ኔና ናጋራ ኦሲሶፔ፥ ኔፔ ዎጫዴ ኦላ ኣጋ፤ ኣዪሲ ጎፔ፥ ኔ ቦላይ ሙሌካ ጋናሚያ ታማን ኦሌቲያዋፔ፥ ኣፔ ኢቱ ፓጪንቶ ኔው ሎዓ። ቃሲ ኔ ኡሼቻ ኩሺ ኔና ናጋራ ኦሲሶፔ፥ ኔፔ ቃንፃዴ ኦላ ኣጋ፤ ኣዪሲ ጎፔ፥ ኔ ቦላይ ሙሌካ ጋናሚያ ታማን ኦሌቲያዋፔ፥ ኣፔ ኢቱ ፓጪንቶ ኔው ሎዓ። « ‹ቃሲ ባሬ ማቻቶ ዬዲያ ኦኒኔ ኢዞ ዬዲያ ፓራማ ኢሞ› ጌቴቴዳ። ሺን ታኒ ሂንቴው ያጋይ፤ ‹ባሬ ማቻታ ዎሹሜናን ዴዒሺን ዬዲያ ኦኒኔ ኢዞ ዎሹማ ኬሴ፤ ቃሲ ኣሲናይ ዬዴዳ ሚሺራቶ ኣኪያዌ ኦኒኔ ዎሹሜ።› «ቃሲ ቤኒ ኣሳው፥ ‹ዎርዱዋን ጫቆፓ፤ ሺን ኔ ጎዳው ጫቄዳዋ ፖላ› ጌዳዋ ሲሴዲታ። ሺን ታኒ ሂንቴው ያጋይ፤ ‹ኡባካ ጫቆፒቴ›፤ ሳሉ ፆሳ ካዉቴꬃ ኦይዲያ ጊዲያ ዲራው፥ ‹ሳሉዋን ጫቆፒቴ› ቃሲ ሳዓይ ኣ ጌዲ ዬꬊያሳ ጊዲያ ዲራው፥ ‹ሳዓን ጫቆፒቴ›፤ ቃሲካ፥ ዬሩሳላሜ ዎልቃማ ካቲያ ካታማ ጊዲያ ዲራው፥ ‹ዬሩሳላሜኒካ ጫቆፒቴ› ኔኒ ኢቲ ቢናናካ ቦꬃ ዎይ ካሬꬃ ኬሳናው ዳንዳዬና ዲራው፥ ‹ኔ ሁጲያንካ ጫቆፓ።› ሺን ሂንቴ፥ ‹ኤ› ዎይ፥ ‹ጊዴና› ጊቴ፤ ሃዋንቱፔ ሃራይ ሴፃናፔ ዬ። « ‹ኣዪፊያ ዲራው ኣዪፊያ፤ ኣቻ ዲራው ኣቻ› ጌዳዋ ሲሴዲታ። ሺን ታኒ ሂንቴው ያጋይ፤ ‹ሂንቴው ኢታባ ኦꬂያ ኡራው ኢታን ዛሮፒቴ፤ ኦኒኔ ኔ ኡሼቻ ባጋ ሻዪያ ባቆፔ፥ ኔ ሃዲርሳ ባጋ ሻዪያካ ኣ ቤሳ፤ ኔ ሻሚጪያ ኣካናው ኢቲ ኡራይ ኔና ሞቶፔ፥ ሄ ኡራው ኔ ኮቲያካ ጉጃ ኢማ። ኦኒኔ ኔና ኢቲ ሳቲያ ኦጊያ ባሬናና ባናዳን ዎልቃንꬆፔ፥ ኣናና ላዑ ሳቲያ ኦጊያ ባ። ኔና ዎሲያ ኡራው ኢማ፤ ቃሲ ኔፔ ታልዓና ኮዪያ ኡራዉካ ዲጎፓ።› « ‹ኔ ላጌꬃቱዋ ሲቃ፤ ኔ ሞርኪያ ሞርካ› ጌዳዋ ሲሴዲታ። ሺን ታኒ ሂንቴው ያጋይ፤ ሳሉዋን ዴዒያ ሂንቴ ኣዉዋሲ ናና ጊዳና ማላ፥ ሂንቴ ሞርኬቱዋ ሲቂቴ፤ ሂንቴና ሼቂያዋንታ ኣንጂቴ፤ ሂንቴና ኢፂያዋንቶ ሎዖባ ኡዲቴ፤ ሂንቴና ዬዴርሲያዋንቶ፥ ፆሳ ዎሲቴ፤ ኣዪሲ ጎፔ፥ ኢታ ኣሳዉካ ሎዖ ኣሳዉካ ፆሳይ ባሬ ኣዋ ኣዋፂሴ፤ ቃሲ ፂላቱዋሲካ ናጋራንቻቱዋሲካ ባሬ ኢራ ቡኪሴ። *** ሂንቴ ሂንቴና ሲቂያዋንቱ ፃላላ ሲቆፔ፥ ሂንቴው ኣይ ዎይታይ ዴዒ? ሃራይ ኣቶ፥ ናጋራንቻቱካ ሄዋዳን ኡዲኖ። ሂንቴ ሂንቴንቱ ኢሻቱዋ ፃላላ ሳሮቶፔ፥ ሃራቱ ኡዲያዋፔ ኣꬊያባ ኣያ ኡዴዲቴ? ሃራይ ኣቶ፥ ኣዪሁዴ ጊዴና ኣሳይካ ሄዋዳን ኡዴ። ሄዋ ዲራው፥ ሳሉዋን ዴዒያ ሂንቴ ኣዉ ፖሎ ጊዶዋዳን፥ ሂንቴካ ፖሎ ጊዲቴ። «ሂንቴ ሎዖ ኦሱዋ ኣሳ ቤሳናው ኣሳ ሲንꬃን ኦꬄና ማላ ናጌቲቴ፤ ሄዌ ꬋዮፔ፥ ሳሉዋን ዴዒያ ሂንቴ ኣዉ ሂንቴው ጋቲያ ኢሜና። «ሄዋ ዲራው፥ ሂንቴ ኣዉዴኔ ሂዬሳው ኢሚያ ዎዴ፥ ሎዓ ማላቲያ ኢታቱ ባሬንታ ቦንቺሳናው፥ ኣዪሁዳ ዎሳ ጎሌኒኔ ኦጊያን ሃራኒ ቤዔታናው ኡዲያዋዳን ኡዶፒቴ፤ ታኒ ሂንቴው ቱሙዋ ኦዳይ፤ ኡንቱንቱ ባሬንቱ ጋቲያ ኣኪዲጌዲኖ። ሺን ኔኒ ሂዬሳው ኢሚያ ዎዴ፥ ጌማን ኢማናዳን፥ ኔ ኡሼቻ ኩሺ ኦꬂያዋ ሃዲርሳ ኩሺ ኤሮፖ። ጌማን ኦꬄዳዋ ቤዒያ ኔ ኣቡ፥ ኔ ሎዖ ኦሱዋ ጋቲያ ዛራናዋ። *** «ፆሳ ዎሲዴ፥ ሎዓ ማላቲያ ኢታቱዋዳን ሃኖፒቴ፤ ኣዪሲ ጎፔ፥ ባሬንታ ኣሳይ ቤዓና ማላ፥ ኣዪሁዳ ዎሳ ጎሌኒኔ ኦጊያ ዶናን ኤቂዴ፥ ፆሳ ዎሲያዋ ዶሲኖ፤ ታኒ ሂንቴው ቱሙዋ ኦዳይ፤ ኡንቱንቱ ባሬንቱ ጋቲያ ኡባካ ኣኬዲኖ። ሺን ኔኒ ፆሳ ዎሲያ ዎዴ፥ ኔ ጎሌ ጌላ፤ ኢፒꬃ ቃቻዴ፥ ቤቴና ኔ ኣዉዋ ዎሳ፤ ጌማን ኦሴቶዋ ቤዒያ ኔ ኣቡ ኔው ኢማናዋ። «ፆሳ ሂንቴ ዎሲያ ዎዴ፥ ፆሳ ኣማኔና ኣሳዳን፥ ጮ ሜላ ዛሬꬁዋ ዳሪሶፒቴ፤ ኡንቱንቱ ሃሳያ ዳሩዋን ሲሴቴ ጊዴ ቆፒኖ። ሄዋ ዲራው፥ ሄ ኣሳዳን ሃኖፒቴ፤ ኣዪሲ ጎፔ፥ ሂንቴ ኣቡ ሂንቴና ኮሺያዋ ሂንቴንቱ ዎሳናፔ ካሴቲዴ ኤሬ። ሲሚ ሂንቴንቱ ሃዋ ማላ ዎሳ ዎሲቴ፤ ‹ሳሉዋን ዴዒያ ኑ ኣቦ፥ ኔ ጌሻ ሱንꬃይ ኣንጄቶ። ኔ ካዉቴꬃይ ዮ፤ ኔ ሼኒ ሳሉዋን ሃኔዳዋዳን፥ ሳዓንካ ሃኖ። ጋላሳን ጋላሳን ኮሺያ ቁማ ኑሲ ሃቼ ኢማ። ኑኒ ኑና ናቆዋንቱሲ ኣቶ ያጊያዋዳን፥ ኔኒካ ኑ ናቁዋ ኣቶ ጋ። ኑና ኢታባፔ ኣሻፔ ኣቲን፥ ፓጪያን ጌሊሶፓ። ካዉቴꬃይ፥ ዎልቃይኔ ቦንቹ ሜꬊናዉካ ኔሳ። ኣሜንዒ› «ሂንቴንቱ ሂንቴና ናቄዳ ሃራ ኣሳ ናቁዋ ኣቶ ጎፔ፥ ሳሉዋን ዴዒያ ሂንቴንቱ ኣዉካ ሂንቴው ኣቶ ጋና። «ሺን ሂንቴንቱ ሂንቴና ናቄዳ ሃራ ኣሳ ናቁዋ ኣቶ ጋና ꬋዮፔ፥ ሂንቴንቱ ኣዉካ ሂንቴ ናቁዋ ኣቶ ጌና። «ቃሲ ሂንቴንቱ ፆሚያ ዎዴ፥ ሎዓ ማላቲያ ኢታቱዋዳን፥ ካዮቲያዋ ማላቶፒቴ፤ ኣዪሲ ጎፔ፥ ኡንቱንቱ ፆሚያዋ ኣሳይ ቤዓና ማላ፥ ባሬንቱ ሶምዒያ ቡላሊሲኖ፤ ታኒ ሂንቴንቶ ቱሙዋ ኦዳይ፤ ኡንቱንቱ ባሬንቱ ጋቲያ ኣኬዲኖ። «ሺን ሂንቴንቱ ፆሚያ ዎዴ፥ ሂንቴንቱ ኣቡ ሂንቴ ፆሚያዋ ኤሮፔ ኣቲን፥ ኣሳይ ኤሬና ማላ፥ ሂንቴ ሶምዒያ ሜጬቲቴ፤ ሂንቴ ሁጲያካ ኦኬቲቴ፤ ያቶፔ፥ ቤቴና ሂንቴ ኣዉ ሂንቴንቱ ኦꬂያዋ ጌማን ቤዒዴ፥ ሂንቴ ጋቲያ ኢማናዋ። *** «ሚሻ ቢልዓይ ሚያሳኒኔ ቢራታይ ሺዒዴ ባዪዚያሳን፥ ካዪሱካ ቦኪዴ ዉዒያሳን፥ ሃ ሳዓን ሂንቴንቱ ሁጲያሲ ዳጋዮፒቴ። ሺን ቢልዓይ ሜናሳኒኔ ሺዔና ሳን፥ ካዪሱካ ቦኪዴ ዉዔና ሳን ሂንቴንቱ ሁጲያሲ ሳሉዋን ሚሻ ዳጋዪቴ። ኣዪሲ ጎፔ፥ ኔ ዎዛናይ ኔ ሚሻይ ዴዒያሳን ዴዓና። «ቦላ ፖዑ ኣይፊያ፤ ሄዋ ዲራው፥ ኔ ኣይፊ ፓፃ ጊዶፔ፥ ኔ ቦላ ኡባይ ፖዖ ጊዳና። ሺን ኔ ኣይፊ ፓፃ ጊዳና ꬋዮፔ፥ ኔ ቦላ ኡባይ ꬉማና፤ ሲሚ ኔናን ዴዒያ ፖዑ ꬉሞፔ፥ ꬉማይ ኣይ ኬና ዳራኔ! «ላዑ ጎዳቱዋሲ ሞዴታናው ዳንዳዪያዌ ኦኒኔ ባዋ፤ ኣዪሲ ጎፔ፥ ኢቱዋ ኢፂዴ፥ ዮኩዋ ሲቄ፤ ዎይ ኢቱዋ ቦንቺዴ፥ ዮኩዋ ካꬌ፤ ኢቲ ኣሳይ ፆሳሲኔ ሻሉዋሲ ሞዴታናው ዳንዳዬና። «ሄዋ ዲራው፥ ታኒ ሂንቴንቶ ኦዳይ፤ ሂንቴ ዴዖ ማናባዉኔ ኡሻናባው፥ ዎይ ሂንቴ ቦላው ማያናባው ሂርጎፒቴ፤ ሼምፑ ቁማፔ ኣꬌኔ? ቃሲ ቦላይ ማዩዋፔ ኣꬌኔ? ፓሊያ ካፋቱዋ ፄሊቴ፤ ኡንቱንቱ ዜሪኪኖ፤ ጫኪኪኖ፤ ዲዪያንካ ቆሊኪኖ፤ ሺን ሳሉዋን ዴዒያ ሂንቴንቱ ኣዉ ኡንቱንታ ሚዜ፤ ሂንቴንቱ ኡንቱንቱፔ ሎይꬂ ዳርኪቴ? ሂንቴንቱ ጊዶን ዳሪሲ ሂርጊዴ፥ ባሬ ጌሳ ቦላ ኢቲ ዋꬋ ጉጃናው ዳንዳዪያዌ ኦኔ? «ኣዪሲ ማዩዋሲ ሂርጊቴ? ዴምባን ዴዒያ ጪሻቱ ዎቲ ዲጪኖንቶ፥ ኣኬኪ ፄሊቴ፤ ኡንቱንቱ ዳቡሪኪኖ ዎይ ፑቱዋ ሱቂኪኖ። ሺን ታኒ ሂንቴንቶ ኦዳይ፤ ሃራይ ኣቶ፥ ሶሎሞኔ ሄዋ ኬና ቦንቼቴዳዋ ጊዲዴ፥ ሄ ጪሻቱዋፔ ኢቱዋ ማላካ ማዪቤና። ሺን ላፋ ኣማኑ ዴዒያዋንቶ፥ ፆሳይ፥ ሃቼ ዴዒዴ፥ ዎንቲ ታማን ኤፂያ ዴምባ ማታ ማዪዚያዌ፥ ሂንቴና ኡንቱዋፔ ኣꬂዴ ዎቲ ማዪዜኔ? ሲሚ፥ ‹ኑኒ ኣያ ማኔ? ዎይ ኣያ ኡሻኔ? ዎይ ኣያ ማያኔ?› ያጊዴ ሂርጎፒቴ። ኣዪሲ ጎፔ፥ ሄ ኡባባ ፆሳ ኣማኔናዋንቱ ዳሪሲዴ ኮዪኖ፤ ሄ ኡባይ ሂንቴና ኮሺያዋ ሳሉዋን ዴዒያ ሂንቴንቱ ኣዉ ኤሬ። ሺን ካሴቲዴ፥ ፆሳ ካዉቴꬃኔ ኣ ፂሎቴꬃ ኮዪቴ፤ ኢ ሂንቴንቶ ሄ ኡባባ ኢማና። ሄዋ ዲራው፥ ዎንቲባሲ ሂርጎፒቴ፤ ኣዪሲ ጎፔ፥ ዎንቲ ጋላሳይ ባሬው ሂርጋና፤ ጋላሳ ኡባዉካ ኣ ሁጴው ጊዲያ ዋዪ ዴዔ። «ፆሳይ ሂንቴንቱ ቦላ ፒርዴና ማላ፥ ሂንቴካ ሃራቱዋ ቦላ ፒርዶፒቴ። ኣዪሲ ጎፔ፥ ሂንቴንቱ ሃራቱዋ ቦላ ፒርዲያዋዳን፥ ፆሳይ ሂንቴንቱ ቦላ ፒርዳና፤ ቃሲ ሂንቴንቱ ሃራቱዋሲ ኢማናው ማኪያባን ኢ ሂንቴው ማካና። ኔ ኣይፊያን ዴዒያ ቱሳ ቤዓካ፤ ሺን ኔ ኢሻ ኣይፊያን ዴዒያ ሱላ ኣዪሲ ፄላይ? ዎይ ኔ ኣይፊያን ቱሳይ ዴዒሺን፥ ኔኒ ኔ ኢሻ፥ ‹ታኒ ኔ ኣይፊያፔ ሱላ ኬሶ› ዋናዴ ጋናው ዳንዳያይ? ላ ሃ ሎዑዋ ማላቲያ ኢታው! ካሴታዴ ኔ ኣይፊያፔ ቱሳ ኬሳዲጋ፤ ሄዋፔ ጉዪያን፥ ኔ ኢሻ ኣይፊያፔ ሱላ ኬሳናው ጌሻዴ ፄላናው ዳንዳያ። «ጌሻባ ካናቱዋሲ ኢሞፒቴ፤ ኡንቱንቱ ጉዬ ሲሚዴ፥ ሂንቴና ሳዓና። ቃሲ ኢንቁዋ ጌቴቲያ ሂንቴንቱ ኣልዖ ሹቻ ጉዱንꬃቱዋ ሲንꬃን ኦሎፒቴ፤ ኡንቱንቱ ባሬንቱ ጌዲያን ዬꬋና። «ዎሲቴ፤ ሂንቴ ኣካና። ኮዪቴ፤ ሂንቴ ዴማና። ካሪያኮ ዪዴ ፄሲቴ፤ ሂንቴው ፔንጊ ዶዬታና። ኣዪሲ ጎፔ፥ ዎሲያ ኡባይ ኣካና፤ ኮዪያ ኡራይ ዴማና፤ ቃሲ ካሪያኮ ዪዴ ፄሲያ ኡራው ፔንጊ ዶዬታና። ዎይ ሂንቴንቱ ጊዶን ባሬ ናዓይ፥ ‹ኡኪꬃ ኢማ› ጎፔ፥ ሹቻ ኢሚያ ኣዉ ዴዒ? ቃሲ፥ ‹ሞሊያ ኢማ› ጎፔ፥ ኣው ሾሻ ኢማናዌ? ሂንቴንቱ ኢታ ጊዲዴ፥ ሂንቴንቱ ናናቱዋሲ ሎዖባ ኢሚያዋ ኤሮፔ፥ ያቲና፥ ሳሉዋን ዴዒያ ሂንቴንቱ ኣዉ ባሬና ዎሲያዋንቱሲ ሎዖባ ዎቲ ዳሪሲ ኢሜኔ! «ሄዋ ዲራው፥ ሃራ ኣሳይ ሂንቴው ኦꬃናው ኮዪያ ኡባባ ሂንቴካ ኣሳው ኦꬂቴ፤ ኣዪሲ ጎፔ፥ ሙሴ ሂጊያ ቢሌꬃይኔ ናባቱ ታማሪሲያዌ ሃዋ። «ኡንዓ ፔንጊያና ጌሊቴ። ኣዪሲ ጎፔ፥ ባዬꬃው ኣፊያ ፔንጊ ኣኩዋ፤ ኦጊካ ዎጋ። ሄዋና ጌሊያ ኣሳይካ ጮራ። «ሺን፥ ዴዖ ኣፊያ ፔንጊ ኡንዓ፤ ኦጊካ ፁንꬃ። ቃሲ ሄዋ ዴሚያዋንቱካ ጉꬃ። «ቦላ ባጋና ዶርሳ ማላቲዴ፥ ሂንቴኮ ዪያ ዎርዶ ናባቱዋፔ ናጌቲቴ፤ ሺን ኡንቱንቱ ጋርሳ ባጋና ዋላቱዋ ማላ። ኡንቱንቱ ኣይፊያ ኣይፊያዋን ሂንቴ ኡንቱንታ ኤራና፤ ኣጉንꬃይ ዎዴንꬃ ኣይፊያ ኣይፌና፤ ጎሚዖሪካ ኮኪያ ኣይፊያ ኣይፌና። ሄዋዳንካ፥ ሎዖ ሚꬃ ኡባይ ሎዖ ኣይፊያ ኣይፌ፤ ሺን ኢታ ሚꬃይ ኢታ ኣይፊያ ኣይፌ። ሎዖ ሚꬃይ ኢታ ኣይፊያ ኣይፋናው ዳንዳዬና፤ ቃሲ ኢታ ሚꬃይካ ሎዖ ኣይፊያ ኣይፋናው ዳንዳዬና። ሎዖ ኣይፊያ ኣይፌና ሚꬃ ኡባይ ቃንፄቲዴ፥ ታማን ዬጌታና። ሄዋ ዲራው፥ ሂንቴ ኡንቱንቱ ኣይፊያ ኣይፊያዋን ኡንቱንታ ኤራኒታ። «ሳሉዋን ዴዒያ ታ ኣቡ ጌዳዋ ኦꬂያ ኡራይ ሳሉዋ ካዉቴꬃ ጌላናፔ ኣቲን፥ ‹ጎዳው፥ ጎዳው› ጊያ ኡባይ ጌሌና። ፒርዳ ጋላሲ ዳሮ ኣሳይ ታና፥ ‹ጎዳው፥ ጎዳው፥ ኑኒ ኔ ሱንꬃን ፆሳይ ኪቶዋ ኦዲቤይኮ? ኔ ሱንꬃን ፃላሃቱዋ ኬሲቤይኮ? ቃሲ ኑኒ ፆሳይ ኦꬂያ ማላሊሲያባ ኔ ሱንꬃን ኦꬂቤይኮ?› ያጋናዋንታ። ታኒ ሄ ዎዴ ኡንቱንታ፥ ‹ታኒ ሂንቴና ኡባካ ኤሪኬ፤ ኢታባ ኦꬂያዋንቱ ሂንቴ ታ ማታፔ ሃኪቴ› ያጋና። «ሄዋ ዲራው፥ ሃዋ ታ ቃላ ሲሲዴ ኦꬂያ ኡባይ ሚኖ ዛላ ቦላ ባሬ ጎሊያ ኬፄዳ ዎዛናማ ኣሳ ማላ። ኢራይ ቡኪዴ፥ ዲዑ ዲዔዳ፤ ጫርኩካ ጫርኪዴ፥ ሄ ጎሊያ ሱጌዳ። ሺን ጎሊ ሚኖ ዛላ ቦላ ኬፄቴዳ ዲራው፥ ኩንዲቤና። «ሃዋ ታ ቃላ ሲሲዴ ኦꬄና ኣሳይ ኡባይ፥ ባሬ ጎሊያ ሻፊያ ቦላ ኬፄዳ ቦዛ ኣሳ ማላ። ኢራይ ቡኪዴ፥ ዲዑ ዲዔዳ፤ ጫርኩካ ጫርኪዴ፥ ሄ ጎሊያ ሱጊና፥ ጎሊ ኤሌካ ኩንዴዳ። ሄ ጎሊ ዎልቃማ ኩንዴꬃ ኩንዴዳ።» ዬሱሲ ባሬ ሃሳዪያዋ ዉርሴዳ ዎዴ፥ ኣሳይ ኢ ታማሪሲያዋን ማላሌቴዲኖ። ኣዪሲ ጎፔ፥ ኢ ኡንቱንታ ታማሪሲዴ፥ ሙሴ ሂጊያ ታማሪሲያዋንቱዳን ጊዴናን፥ ማታይ ዴዒያ ኣሳዳን ታማሪሶ ዲራሳ። ዬሱሲ ዴሪያፔ ዎꬌዳ ዎዴ፥ ጮራ ኣሳይ ኣ ካሌዳ። ሄ ዎዴ ኦሉ ኦይቄዳ ኢቲ ቢታኒ ዬሱሳኮ ዪ ኣ ሲንꬃን ጉልባቲዴ፥ «ጎዳው፥ ኔ ሼኔ ጊዶፔ፥ ታና ፓꬃዴ ጌሻናው ዳንዳያ» ያጌዳ። ዬሱሲ ባሬ ኩሺያ ዬዲ ኣ ቦቺዴ፥ «ታኒ ኮያይ፤ ፓፃዴ ጌያ!» ያጌዳ። ኤሌካ ኦሉ ቢታኒያ ዬዲ ኣጌዳ። ዬሱሲ ኣ፥ «ሲሚ ሃዋ ኦሲኔ ኦዶፓ፤ ሺን ቄሳኮ ባዴ ኔ ፓፃዴ ጌዬዳዋ ኣ ቤሳ፤ ኔ ፓፃዴ ጌዬዳዋ ኣሳ ኤሪሳናው ሙሴ ኣዛዜዳ ያርሹዋ ፆሳው ያርሻ» ያጌዳ። ዬሱሲ ቂፊሪናሆማ ካታማ ጌሌዳ ዎዴ፥ ኢቲ ሮማ ጋዴ ፄቱዋ ካፑ ኣኮ ዪዴ፥ «ታ ጎዳው፥ ታ ቆማ ቦላይ ጉንዲና፥ ዳሮ ሳኬቲዴ፥ ሶዪን ጊሴዳ፤ ሃያጎዶ ታው ፓꬃሪኪ» ያጊ ዎሴዳ። *** ዬሱሲ፥ «ታኒ ባዴ ኣ ፓꬃና» ያጌዳ። ሺን ፄቱዋ ካፑ ዛሪዴ፥ «ታ ጎዳው፥ ኔና ታ ሶይ ጌሊሳናው ታው ቤሴና፤ ሺን ኔኒ ቃላ ፃላላ ሃሳያ፤ ታ ቆማይ ፓፃናዋ። ኣዪሲ ጎፔ፥ ታኒ ታፔ ቦላና ዴዒያዋንቶ ኤኖ ጊያ ኣሳ፤ ቃሲ ታፔ ጋርሳና ዎታዳራቱ ዴዒኖ። ታኒ ኢቱዋ፥ ‹ባ!› ጎፔ ቤ፤ ቃሲ ዮኩዋ፥ ‹ሃያ!› ጎፔ ዬ፤ ታ ቆማ፥ ‹ሃዋ ኦꬃ!› ጎፔ ኦꬄ» ያጌዳ። ዬሱሲ ሄዋ ሲሴዳ ዎዴ ማላሌቲዴ፥ ባሬና ካሊያ ኣሳ፥ «ታኒ ሂንቴው ቱሙዋ ኦዳይ፤ ታኒ ሃዋ ማላ ኣማኑዋ ሃራይ ኣቶ፥ ኢስራዔሊያ ጋዲያንካ ቤዓቤይኬ። ጮራ ኣሳይ ኣዋይፊ ዶሊያ ባጋፔኔ ዉሊያ ባጋፔ ዪዴ፥ ኣብራሃሞና፥ ዪሳቃናኔ ያዪቆባና ሳሉዋ ካዉቴꬃ ጋዪታን ኢቲፔ ኡታናዋንታ ያጋይ። ሺን ካዉቴꬃን ዴዓናው ቤሲያ ኣሳይ ዎልቃማ ꬉማ ጋርሳ ካሬ ኦሌታና፤ ሄዋን ኡንቱንቱ ዬካናኔ ባሬንቱ ኣቻ ꬋቃናዋንታ» ያጌዳ። ሄዋፔ ካላ ዬሱሲ ፄቱዋ ካፑዋ፥ «ኔ ሶይ ባ፤ ኔኒ ኣማኔዳዋዳን ኔው ሃኖ» ያጌዳ፤ ፄቱዋ ካፑዋ ቆማይ ሄ ሳቲያንካ ፓፂ ኣጌዳ። ዬሱሲ ጴፂሮሳ ሶይ ቢዴ፥ ኣ ቦሎታታ ቆፁዋ ሃርጋዴ ጊሴዳዉኖ ቤዔዳ። ኢዚ ኩሺያ ዬሱሲ ቦቺና፥ ቆፁ ኢዞ ባሺ ኣጌዳ፤ ኢዛካ ዴንዳዴ ኣው ሚያባ ጊጊሳዱ። ሳዓይ ኦማርሴዳ ዎዴ፥ ኣሳይ ኢታ ኣያናቱ ኦይቄዳ ጮራ ኣሳ ዬሱሳኮ ኣሄዳ፤ ናቢያ ኢሲያሲ፥ «ኢ ኑ ዳቡራ ባሬው ኣኬዳ፤ ቃሲ ኑ ሃርጊያካ ቶኬዳ» ያጌዳዌ ፖሌታና ማላ፥ ዬሱሲ ኢታ ኣያናቱዋ ባሬ ቃላን ኬሲዴ፥ ሃርጌዳ ኣሳ ኡባካ ፓꬄዳ። *** ዬሱሲ ጮራ ኣሳይ ባሬ ዩሹዋን ዴዒያዋንታ ቤዒዴ፥ ኣባፔ ሄፊንꬃ ፒናና ማላ፥ ባሬና ካሊያዋንታ ኣዛዜዳ። ሄዋፔ ጉዪያን ሙሴ ሂጊያ ታማሪሲያ ኢቱ ኣኮ ዪዴ፥ «ታማሪሲያዎ፥ ኔኒ ቢያሳ ኡባ ታኒ ኔና ካላና» ያጌዳ። ዬሱሲ ኣ፥ «ዎራካናቱዋሲ ኦላይ ዴዔ፤ ካፋቱዋሲካ ኬꬃይ ዴዔ፤ ሺን ታው፥ ኣሳ ናዓው፥ ሼምፓ ኣኪያሳይካ ባዋ» ያጌዳ። ቃሲ ካሊያዋንቱፔ ኢቱ ዬሱሳ፥ «ጎዳው፥ ታኒ ሲንꬃታ ባዴ ታ ኣባ ሞጋናው ባ ያጋሪኪ» ያጌዳ። ሺን ዬሱሲ ኣ፥ «ኔኒ ታና ካላ፤ ሃይቄዳዋንቱ ባሬንቱ ኣኃ ሞጊኖ» ያጌዳ። ዬሱሲ ዎንጊሪያን ጌሎዴ፥ ኣ ካሊያዋንቱ ኣናና ቤዲኖ። ቤታይ ዎንጊሪያ ሚታና ጋካናው፥ ኣባን ዎልቃማ ሆቢ ዴንዴዳ፤ ሺን ዬሱሲ ጌሚዒሼዳ። ኣ ካሊያዋንቱ ኣኮ ቢዴ፥ ጌሚዒሹዋፔ ዴንꬄዲኖ፤ ሄዋፔ ሲሚዴ ኣ፥ «ጎዳው፥ ኑኒ ꬋዬቶ፤ ኑና ኣሻሪኪ» ያጌዲኖ። ዬሱሲ ኡንቱንታ፥ «ሃ ኣማኑ ፓጬዳዋንቶ፥ ኣዪሲ ያዪቴ?» ያጌዳ። ሄዋፔ ጉዪያን ዴንዲዴ፥ ጎቱዋኔ ቤታ ኣጊቴ ጊና፥ ጎቱኔ ቤታይ ጮዑ ጌዳ። ኣሳይ ማላሌቲዴ፥ «ሃዌ ላ ሃራይ ኣቶ፥ ጎቱኔ ቤታይ ኣዛዜቲያዌ ኣይባ ኣሴ?» ያጌዲኖ። ዬሱሲ ጋሊላ ኣባፔ ሄፊንꬃን ዴዒያ ጌርጌሴኖና ጌቴቲያ ጋዲያ ፒኔዳ፤ ኢታ ኣያናቱ ኦይቄዳ ላዑ ኣሳቱ ሄ ጋዲያን ዴዒያዋንቱ ዱፉዋፔ ኬሲዴ፥ ኣናና ጋኬቴዲኖ። ኡንቱንቱ ዳሮ ኢታ ጊዲያ ዲራው፥ ኦኒኔ ሄ ኦጊያና ኣꬋናው ዳንዳዪቤና። ኡንቱንቱ ባሬንቱ ቃላ ꬎቁ ኦꬂዴ፥ «ፆሳ ናዓው፥ ኑናና ኔው ኣዪ ኣላሊ ዴዒ? ዎዲ ጋኬናን ኑና ሙራናው ያዲ?» ያጌዲኖ። ኡንቱንቱፔ ላፋ ሃኪያሳን ጉዱንꬃ ዉዲ ሄሜቴ። ኢታ ኣያናቱ ዬሱሳ፥ «ኔኒ ኑና ኬሲያዋ ጊዶፔ፥ ሂኒ ጉዱንꬃ ዉዲያ ጊዶ ዬዳርኪ» ያጊዴ ዎሴዲኖ። ዬሱሲ ኡንቱንታ፥ «ቢቴ!» ጊና ኡንቱንቱ ቢታናቱዋፔ ኬሲ ቢዴ፥ ጉዱንꬃቱዋን ጌሌዲኖ። ጉዱንꬃ ዉዲ ኡባይ ካካ ላንቂያና ካጆቲዴ፥ ኣባን ጌሊዴ፥ ሚቴቲ ኣጌዲኖ። ጉዱንꬃ ዉዲያ ሄሚያዋንቱ ባቃቲዴ ካታማ ቢ ኣጌዲኖ፤ ቤዳሳን ኢታ ኣያናቱ ኦይቄዳ ኣሳቱ ሃኔዳባ ኡባ ኦዴዲኖ። ሄዋ ሲሴዳ ካታማን ዴዒያ ኣሳይ ኡባይ ዬሱሳና ጋኬታናው ኬሴዲኖ፤ ኣ ቤዔዳ ዎዴ፥ ባሬንቱ ጋዲያፔ ባና ማላ ዎሴዲኖ። ሃዋፔ ካላ ዬሱሲ ዎንጊሪያን ጌሊዴ፥ ኣባ ፒኒዴ፥ ባሬ ካታማ ዬዳ። ኣማሬዳ ኣሳይ ቦላይ ጉንዴድዳ ኢቲ ቢታኒያ ሻንቻማን ቶኪዴ፥ ዬሱሳኮ ኣሄዲኖ፤ ዬሱሲ ኡንቱንቱ ኣማኑዋ ቤዒዴ፥ ቦላይ ጉንዴድዳ ቢታኒያ፥ «ታ ናዓው፥ ያዮፓ፤ ኔ ናጋራይ ኣቶ ጌቴቴዳ» ያጌዳ። ሂጊያ ታማሪሲያዋንቱፔ ኢቱ ኢቱ ባሬንቱ ዎዛናን፥ «ላ ሃ ቢታኒ ፆሳ ቦላ ኢታባ ሃሳዬቴ!» ያጊ ቆፔዲኖ። ዬሱሲ ኡንቱንቱ ቆፋ ኤሪዴ፥ ኡንቱንታ ሃዋዳን ያጌዳ፤ «ሂንቴንቱ ሂንቴ ዎዛናን ሃዋ ማላ ኢታባ ኣዪሲ ቆፒቴ? ‹ኔ ናጋራይ ኣቶ ጌቴቴዳ› ያጊያዌ ማቴዬ? ዎይ፥ ‹ዴንዳ ኤቃዴ ሃሜታ› ያጊያዌ ማቴ? ሺን ሳዓ ቦላን ናጋራ ኣቶ ጋናው ታው፥ ኣሳ ናዓው፥ ማታይ ዴዒያዋ ታኒ ሂንቴና ኤሪሳና» ያጊዴ፥ ሄዋፔ ጉዬ ኢ ሄ ቦላይ ጉንዴዳ ቢታኒያ፥ «ዴንዳ ኤቃ፤ ያታዴ ኔ ሻንቻማ ቶካዴ፥ ኔ ጎሌ ባ» ያጌዳ። ጉንዴዳ ቢታኒካ ዴንዲ ኤቂዴ፥ ባሬ ጎሌ ቤዳ። ሺን ዳሮ ኣሳይ ሄዋ ቤዒዴ ያዬዲኖ፤ ኣሳው ሃዋ ማላ ማታ ኢሜዳ ፆሳ ጋላቴዲኖ። ዬሱሲ ሄዋና ኣꬊዴ፥ ማቶሳ ያጊያዌ ቃራፃ ቃንፂያ ሳን ኡቴዳዋ ዴሚዴ ኣ፥ «ታና ካላ» ያጌዳ። ማቶሲካ ዴንዲ ኤቂዴ፥ ኣ ካሌዳ። ዬሱሲ ማቶሳ ጎሌን ቁማ ማናው ኡቲ ዴዒሺን፥ ቃራፃ ኣኪያ ጮራ ኣሳይኔ ናጋራንቻቱ ዪዴ፥ ኣናናኔ ኣ ካሊያዋንቱና ኢቲፔ ጋዪታን ኡቴዲኖ። ኢቲ ኢቲ ፓሪሳዋቱ ሄዋ ቤዒዴ፥ ዬሱሳ ካሊያዋንታ፥ «ሂንቴና ታማሪሲያዌ ቃራፃ ቃንፂያዋንቱናኔ ናጋራንቻቱዋና ቁማ ኣዪሲ ኢቲፔ ሚ?» ያጌዲኖ። ሺን ዬሱሲ ኡንቱንቱ ያጊያዋ ሲሲዴ፥ «ሃርጋንቻቱዋሳፔ ኣቲን፥ ፓፃቱዋሲ ኣኪሚ ኮሼና። ሺን ሂንቴንቱ ቢዴ፥ ፆሳ ማፃፋይ፥ ‹ታኒ ማሮቴꬃ ኮያይፔ ኣቲን፥ ያርሹዋ ኮዪኬ› ያጊያዌ ዋጊያዌንቶ ኤሪቴ፤ ኣዪሲ ጎፔ፥ ታኒ ናጋራንቻቱዋ ፄሳናው ዬዳዋፔ ኣቲን፥ ፂላቱዋ ፄሳናው ያቤይኬ» ያጌዳ። ሄ ዎዴ ዮሃኒሳ ካሊያዋንቱ ዬሱሳኮ ዪዴ፥ «ኑኒኔ ፓሪሳዋቱ ኡባ ዎዴ ፆሜቶ፤ ሺን ኔና ካሊያዋንቱ ኣዪሲ ፆሚኪኖ?» ያጊዴ ኣ ኦቼዲኖ። ዬሱሲ ኡንቱንታ፥ «ቡላቻ ዬዳ ኣሳይ ማቻቶ ኣኪያዌ ባሬንቱና ዴዒሺን፥ ካዮታናው ዳንዳዪኖ? ዳንዳዪኪኖ፤ ሺን ማቻቶ ኣኪያዋ ኡንቱንቱ ማታፔ ኣፋና ዎዲ ያና፤ ኡንቱንቱ ሄ ዎዴ ፆማናዋንታ» ያጌዳ። «ኤጫ ማዩዋ ቦላ ኦራꬃ ꬌፊያ ዎꬂዴ ሲኪያ ኣሳይ ባዋ፤ ኣዪሲ ጎፔ፥ ኦራꬃ ꬌፊ ኤጫ ማዩዋ ፔꬌሬꬃና፤ ፔꬌꬃይካ ካሴዋፔ ዳራናዋ። ሆዖ ዎዪኒያ ኤሳ ኤጫ ኦጎሩዋን ናዒያ ኣሳይ ባዋ። ሺን ናዖፔ፥ ሄ ዎዪኒያ ኤሳይ ኦጎሩዋ ዳካና፤ ባሬዉካ ዎፌታና፤ ኦጎሩካ ባያናዋ። ሺን፥ ሆዖ ዎዪኒያ ኤሳ ኦራꬃ ኦጎሩዋን ናዓናው ቤሴ፤ ላዑካ ባይኪኖ» ያጌዳ። ዬሱሲ ኡንቱንቶ ሄዋ ኦዲሺን፥ ኣዪሁዴ ዎሳ ጎሌ ካፓቱዋፔ ኢቱ ኣኮ ዪ ኣ ሲንꬃን ጉልባቲዴ፥ «ታ ናታ ሃዒ ሃይቃዱ፤ ሺን ኔኒ ያዴ ኔ ኩሺያ ኢዚ ቦላ ዎꬃሪኪ፤ ኢዛ ዴዑዋን ዴዓናዉኑ» ያጌዳ። ዬሱሲ ዴንዲዴ፥ ባሬና ካሊያዋንቱና ኢቲፔ ቢታኒያ ካሊዴ ቤዳ። ሄ ዎዴ ታማኔ ላዑ ላይꬃ ኩሜንꬃ፥ ኢዚ ቦላፔ ሱꬃይ ጎጊያ ኢቲ ሚሺራታ ጉዬና ሺቃዴ፥ ዬሱሳ ማዩዋ ማጫራ ቦቻዱ። ሃዋ ኢዛ ኡዶዌ፥ ኢዛ ባሬ ዎዛናን፥ «ታኒ ኣ ማዩዋ ፃላላ ቦቻንቶ ፓፃና» ያጋዴ ቆፓዱ። ሺን ዬሱሲ ዩዪ ኢዞ ፄሊዴ፥ «ታ ናቴ፥ ያዮፓ፤ ኔና ኔ ኣማኑ ፓꬄዳ» ያጌዳ። ሄ ማንዒያንካ ሚሺራታ ፓፃ ኣጋዱ። ዬሱሲ ኣዪሁዳ ዎሳ ጎሌ ካፑዋ ሶይ ጋኬዳ ዎዴ፥ ዬኩዋን ዲንካ ፑኒያ ኣሳኔ ዬኪያ ኣሳ ቤዒዴ፥ «ካሬ ኬሲቴ፤ ጉꬃ ናታ ጌሚዒሻዱፔ ኣቲን፥ ሃይቃቤይኩ» ያጌዳ። ሄዋፔ ጉዪያን ኣሳይ ኣ ቦላ ዳሪ ሚጬዳ። ሺን ጮራ ኣሳ ካሬ ኢ ኬሴዳዋፔ ጉዪያን፥ ጎሌ ጌሊዴ፥ ናቲ ኩሺያ ኦይቄዳ፤ ናታካ ዴንዳ ኣጋዱ። ሄ ዋሪ፥ ሄ ማንዒያንካ ሄ ጋዲያን ኡባን ሲሴቴዳ። ዬሱሲ ሄዋና ኣꬊዴ ቢያ ዎዴ፥ ላዑ ቆቃቱ ባሬንቱ ቃላ ꬎቁ ኡዲዴ፥ «ዳዊቴ ናዓው፥ ኑና ማራሪኪ» ያጊዴ ኣ ካሌዲኖ። ዬሱሲ ጎሌ ጌሌዳ ዎዴ፥ ቆቃቱ ኣኮ ዬዲኖ፤ ዬሱሲ ኡንቱንታ፥ «ታኒ ሃዋ ኦꬃናው ዳንዳዪያዋ ኣማኒቴ?» ያጌዳ። ኡንቱንቱ፥ «ኤ ጎዳው» ያጊ ዛሬዲኖ። ሄዋፔ ጉዪያን፥ ዬሱሲ ኡንቱንቱ ኣይፊያ ባሬ ኩሺያን ቦቺዴ ኡንቱንታ፥ «ሂንቴው ሂንቴንቱ ኣማኑዋዳን ሃኖ» ያጌዳ። ኡንቱንቱ ኣይፊ ዶዬቲ ኣጌዳ፤ ዬሱሲ ኡንቱንቶ፥ «ሃዋ ኦሲኔ ኦዶፒቴ» ያጊዴ ሚኒሲዴ ኦዴዳ። ሺን ኡንቱንቱ ቢዴ፥ ሄ ጋዲያ ኡባን ዬሱሳባ ኦዴዲኖ። ኡንቱንቱ ኬሲዴ ቢያ ዎዴ፥ ኣማሬዳ ኣሳይ ኢታ ኣያናይ ኦይቂና ዱዴዳ ቢታኒያ ዬሱሳኮ ኣሄዲኖ። ዬሱሲ ኢታ ኣያና ኬሴዳዋፔ ጉዪያን፥ ዱዴ ቢታኒ ሃሳዬዳ። ኣሳይ፥ «ሃዌ ኦራꬃባ፤ ሃዋ ማላባይ ኢስራዔሊያ ጋዲያን ኡባካ ሃኒቤና» ያጊ ማላሌቴዲኖ። ሺን ፓሪሳዋቱ፥ «ኢ ኢታ ኣያናቱዋ ካፑዋ ዎልቃን ፃላሃቱዋ ኬሴ» ያጌዲኖ። ዬሱሲ ኡንቱንታ ኣዪሁዳ ዎሳ ጎሌቱዋን ታማሪሲዴኔ ካዉቴꬃ ዎንጋላ ሚሺራቹዋ ኦዲዴ፥ ቃሲ ሃርጊያ ኡባፔኔ ሳኩዋ ኡባፔ ኣሳ ፓꬂዴ፥ ዎጋ ካታማቱዋኒኔ ቄሪ ካታማቱዋ ኡባን ዩዬዳ። ጮራ ኣሳ ቤዒዴ፥ ሄሚያ ኣሳይ ባይና ዶርሳዳን ኣሳይ ሂርጌቲያ ዲራዉኔ ኣሳ ማዲያባይ ባይና ዲራው፥ ኣሳው ቃሬቴዳ። ያቲዴ ባሬና ካሊያዋንታ፥ «ቆይቻው ጋካ ካꬃይ ዳራ፤ ሺን ጫኪያ ኣሳይ ጉꬃ። ሲሚ ካꬃ ጎዳይ ካꬃ ጫካናው ኦሳንቻቱዋ ዬዳና ማላ፥ ኣ ዎሲቴ» ያጌዳ። ዬሱሲ ባሬ ታማኔ ላዑ ካሊያዋንታ ፄሲዴ፥ ኡንቱንቱ ኢታ ኣያና ኬሳና ማላ፥ ቃሲ ሃርጊያ ኡባኔ ሳኩዋ ኡባ ፓꬃና ማላ፥ ኡንቱንቶ ማታ ኢሜዳ። ዬሱሲ ኪቴዳ ታማኔ ላዓቱዋ ሱንꬃይ፥ ኮይሮዌ ጴፂሮሳ ጌቴቲያ ሲሞናኔ ኣ ኢሻ ኢንዲራሳ፥ ዛቢዲዮሳ ናና፥ ያዪቆባኔ ዮሃኒሳ፥ ፒሊጶሳ፥ ባርታላሞሳ፥ ቶማሳ፥ ቃራፃ ኣኪያ ማቶሳ፥ ኢልፒዮሳ ናዓ ያዪቆባኔ ታዶሳ፤ ባሬ ጋዴው ቃሬቲያ ሲሞናኔ ዬሱሳ ኣꬂ ኢሜዳ ኣስቆሮቱ ዪሁዳ። ዬሱሲ ሃ ታማኔ ላዓቱዋ ሃዋዳን ያጊዴ ኪቴዳ፤ «ኣዪሁዳ ጊዴና ኣሳ ጋዲያ ቦፒቴ፤ ቃሲ ሳማራቱዋ ካታማካ ጌሎፒቴ፤ ሄዋ ዲራ ባዬዳ ዶርሳኮ፥ ኢስራዔሊያ ኣሳኮ ቢዴ፥ ‹ሳሉዋ ካዉቴꬃይ ማቴዳ› ያጊዴ ኦዲቴ። ሃርጋንቻቱዋ ፓꬂቴ፤ ኣኃ ሃይቁዋፔ ዴንꬂቴ፤ ኦሉ ኦይቄዳዋንታ ፓꬂቴ፤ ኢታ ኣያናቱዋካ ኬሲቴ። ሂንቴንቱ ጮ ኣኬዲታ፤ ጮ ኢሚቴ። ዎርቃ ዎይ ቢራ ዎይ ሳንቲሚያ ሂንቴንቱ ኪሲያን ኦይቆፒቴ፤ ዎይ ኦጌው ቃርጪቲያ፥ ዎይ ላዔꬂያ ማዩዋ፥ ዎይ ጫማ ዎይ ፃምዓ ኦይቆፒቴ። ኣዪሲ ጎፔ፥ ኦሳንቻው ኮሺያባይ ቁማ። «ሂንቴንቱ ጌሊያ ካታማን ዎይ ቄሪ ካታማ ኡባን ሂንቴና ሞካናው ናሼቲያዌ ኦኔንቶ ኣኬካን ፆሞሲቴ፤ ሂንቴንቱ ሄዋፔ ኬሳና ጋካናው፥ ሄዋን ኡቲቴ። ቃሲ ጎሌ ጌሊዴ ሳሮቲቴ። ሄ ጎሌን ዴዒያ ኣሳይ ሂንቴና ሞኮፔ፥ ሂንቴንቱ ሳሮቴዳ ሳሮታይ ኡንቱንታ ጋኮ። ሺን ኡንቱንቱ ሂንቴና ሞኬናን ኢፆፔ፥ ሂንቴንቱ ሳሮቴዳ ሳሮታይ ሂንቴው ጉዬ ሲሞ። ቃሲ ኢቲ ኢቲ ጎሊ ዎይ ካታማይ ሂንቴና ሞኬናን ዎይ ሂንቴንቱ ኦዲያዋ ሲሴናን ኢፆፔ፥ ሄ ጎሌፔ ዎይ ሄ ካታማፔ ኬሲዴ፥ ሂንቴንቱ ጌዲያፔ ባና ሾጪቴ። ታኒ ሂንቴው ቱሙዋ ኦዳይ፤ ፆሳይ ፒርዲያ ጋላሲ ሄ ካታማ ኣሳፔ፥ ሶዶማ ካታማ ኣሳዉኔ ጋሞራ ካታማ ኣሳው ፒርዳ ካዉሺሳና። «ቤዒቴ! ታኒ ሂንቴና ዶርሳ ዋላቱዋ ጊዶ ዬዲያዋዳን ዬዳይ። ሄዋ ዲራው፥ ሾሻዳን ጪንጫ ጊዲቴ፤ ቃሲ ሃራጲያዳን፥ ኣሺኬ ጊዲቴ። ሺን ኣሳፔ ናጌቲቴ። ኣዪሲ ጎፔ፥ ኣሳይ ሂንቴና ፒርዳ ጎሌው ኣꬂዴ ኢማና፤ ቃሲ ባሬ ኣዪሁዳ ዎሳ ጎሌቱዋኒካ ሂንቴና ሊሱዋን ፔዳና። ጋዲያ ኣዪሲያዋንቱ ሲንꬃኒኔ ካታቱዋ ሲንꬃን ታ ዲራው ሂንቴንቱ ኤቂዴ፥ ኡንቱንቱሲኔ ኣዪሁዳ ጊዴና ኣሳ ሲንꬃን ታው ማርካ ጊዳኒታ። ሺን ኡንቱንቱ ሂንቴና ፒርዳው ኣꬂያ ዎዴ፥ ሂንቴንቱ ሃሳያናባ ሄ ሳቲያን ፆሳይ ሂንቴው ኢሚያ ዲራው፥ ሂንቴንቱ ጋናባዉኔ ዎይ ዋጊዴ ሃሳያኔንቶኔ ሂርጎፒቴ። ኣዪሲ ጎፔ፥ ሂንቴንቱን ኣቂዴ ሃሳዪያዌ ሂንቴንቱ ኣዉዋ ጌሻ ኣያናፔ ኣቲን፥ ሃሳዪያዋንቱ ሂንቴንታ ጊዲኪታ። «ኢሻይ ባሬ ኢሻ፥ ኣዉ ባሬ ናዓ ቦላ ዴንዳና፤ ናናይ ባሬንቱ ኣቲኔ ኣዉዋ ቦላ ዴንዲዴ፥ ኡንቱንታ ዎꬊሳና። ቃሲ ኣሳይ ኡባይ ሂንቴንታ ታ ሱንꬃ ዲራው ኢፃና፤ ሺን ዉርሴꬃይ ጋካናው ጌንጪያዌ ኣታናዋ። ኡንቱንቱ ሂንቴና ኢቲ ካታማፔ ዬዴርሶፔ፥ ሃራ ካታማ ቢቴ። ኣዪሲ ጎፔ፥ ታኒ ሂንቴው ቱሙዋ ጋይ፤ ታኒ፥ ኣሳ ናዓይ፥ ያና ጋካናው፥ ሂንቴንቱ ሂንቴ ኦሱዋ ኢስራዔሊያ ካታማ ኡባን ኦꬂዴ ዉርሲኪታ። «ታማሪያዌ ባሬና ታማሪሲያዋፔ ዳሬና፤ ቆማይካ ባሬ ጎዳፔ ዳሬና። ታማሪያዌ ባሬና ታማሪሲያዋ ኬና ጊዲያዌ፥ ቆማይካ ባሬ ጎዳ ኬና ጊዲያዌ ኣው ጊዳና፤ ኡንቱንቱ ጎሌ ጎዳ ቢዔል-ዜቡላ ጊዴ ፄሶፔ፥ ኣ ጎሌ ኣሳ ዋጊ ፄሳኔሻ! «ሲሚ ኣሳሲ ያዮፒቴ፤ ኣዪሲ ጎፔ፥ ጌንꬂ ዎꬄዳባይ ቆንጪያ ኬሴናን ኣቴና፤ ቆሴዳባይካ ኤሬቴናን ኣቴና። ታኒ ሂንቴንቶ ꬉማኒ ኦዲያባ ፖዑዋን ሃሳዪቴ፤ ሂንቴው ሃይꬃን ሳሱኪዴ ኦዴዳዋ፥ ꬎቃ ሳን ኣዋዪቴ። ኣሹዋ ዎꬊያዋንቶ ያዮፒቴ፤ ኡንቱንቱ፥ ሼምፑዋ ዎꬋናው ዳንዳይኪኖ። ሺን ሼምፑዋኔ ኣሹዋ ጋናሚያን ꬋዪሳናው ዳንዳዪያ ፆሳሲ ያዪቴ። ላዑ ሱኒያ ካፋቱ ሳንቲሚያን ዛሊዔቲኪኖ? ሂንቴንቱ ኣዉዋ ሼኒያ ጊዳና ꬋዮፔ፥ ሄ ሱኒያ ካፋቱዋፔ ኢቲናካ ሳዓን ዎꬋዴ ባዩኩ። ሺን ሃራይ ኣቶ፥ ሂንቴንቱ ሁጲያን ዴዒያ ቢናናይ ኡባይካ ፓይዱዋን ዴዔ። ሲሚ ያዮፒቴ፤ ዳሮ ሱኒያ ካፋቱዋፔ ሂንቴንቱ ኣꬊታ። «ሄዋ ዲራው፥ ኣሳ ሲንꬃን ታባ ማርካቲያ ኦሲ ጊዶፔኔ፥ ታኒካ ሳሉዋን ዴዒያ ታ ኣቡ ሲንꬃን ማርካታና፤ ሺን ኣሳ ሲንꬃን ታና ካዲያ ኦናኔ ታኒካ ቃሲ ሳሉዋን ዴዒያ ታ ኣቡ ሲንꬃን ኣ ካዳና። «ታኒ ሳዓሲ ሳሮቴꬃ ኣሃናው ዬዳዋ ሂንቴሲ ማላቶፖ፤ ታኒ ቶራ ኣሃናው ዬዳዋፔ ኣቲን፥ ሳሮቴꬃ ኣሃናው ያቤይኬ። ኣዪሲ ጎፔ፥ ታኒ ናዓ ኣ ኣቡፔ፥ ናቶ ኢዚ ዳዪፔ፥ ናዓ ማቻቶካ ኢዚ ቦሎታቲፔ ሻካናው ያዲ፤ ኣሳሲ ሞርኬቱ ኣ ጎሌ ኣሳቱዋ ጊዳናዋንታ። «ባሬ ኣባ ዎይ ባሬ ዳዮ ታፔ ኣꬂዴ ሲቂያዌ ታዋ ጊዳናው ቤሴና፤ ባሬ ኣቱማ ናዓ ዎይ ባሬ ማጫ ናቶ ታፔ ኣꬂዴ ሲቂያዌ ታዋ ጊዳናው ቤሴና። ባሬ ማስቃሊያ ቶኪዴ፥ ታ ጌዱዋ ካሌናዌ ታዋ ጊዳናው ቤሴና። ባሬ ሼምፑዋ ኣሺያዌ ባዪዛናዋ፤ ሺን ታ ዲራው ባሬ ሼምፑዋ ባዪዚያዌ ኣሻናዋ። «ሂንቴንታ ሞኪያዌ ታና ሞኬ፤ ቃሲ ታና ሞኪያዌ ታና ኪቴዳዋ ሞኬ። ናቢያ፥ ናቢያ ሱንꬃን ሞኪያዌ፥ ናቢያ ጋቲያ ኣናና ጊሼታናዋ፤ ቃሲ ፂሉዋ፥ ፂሉዋ ሱንꬃን ሞኪያዌ፥ ፂሉዋ ጋቲያ ኣናና ጊሼታናዋ። ኦኒኔ ሃ ታና ካሊያዋንቱፔ ጉፂያ ኢቶ፥ ሃራይ ኣቶ ቡሊያ ሃꬃ ፃላላ ኡሻናው ኢሞፔካ፥ ታኒ ሂንቴንቶ ቱሙዋ ጋይ፤ ኢ ባሬ ጋቲያ ኣካና» ያጌዳ። ዬሱሲ ባሬ ታማኔ ላዑ ካሊያዋንታ ኣዛዚያዋ ፖሌዳ ዎዴ፥ ሄዋፔ ዴንዲዴ፥ ካታማቱዋን ታማሪሳናዉኔ ኦዳናው ቤዳ። ፃማቂያ ዮሃኒሲ ቃሾ ጎሌን ዴዒዴ፥ ዬሱሲ ኦꬄዳዋ ሲሲዴ፥ ባሬና ካሊያዋንታ ኣኮ ኪቲዴ፥ «ያናዌ ኔኔዬ? ዎይ ሃራ ናጋኔ?» ያጊ ኦቻናዳን ኡዴዳ። ዬሱሲ ዛሪዴ፥ ኡንቱንቶ ሃዋዳን ያጌዳ፤ «ቢዴ ሂንቴንቱ ቤዒያዋኔ ሲሲያዋ ዮሃኒሳው ኦዲቴ፤ ቆቃቱ ፄሊኖ፤ ዎባቱ ሃሜቲኖ፤ ኦሉ ኦይቄዳዋንቱ ፓፂዴ ጌዪኖ፤ ቱላቱ ሲሲኖ፤ ሃይቄዳዋንቱ ዴንዲኖ፤ ሂዬሳቱ ዎንጋላ ሚሺራቹዋ ሲሲኖ። ታባ ሲꬌና ኡራይ ኣንጄቴዳዋ» ያጌዳ። ዮሃኒሳ ካሊያዋንቱ ሲሚ ቤዳ ዎዴ፥ ዬሱሲ ዮሃኒሳባ ሺቄዳ ኣሳሲ ሃዋዳን ያጊ ሃሳዬዳ፤ «ኣያ ቤዓናው ኣሳይ ዴዔና ሜላ ቢታ ኬሴዲቴ? ጫርኩ ቃꬂያ ማቃ ቤዓናው ኬሴዲቴ? ያቲና፥ ኣያ ቤዓናው ኬሴዲቴ? ሎዒያ ማዩዋ ማዬዳ ቢታኒያ ቤዓናው ኬሴዲቴ? ሎዒያ ማዩዋ ማዬዳዋንቱ ካታቱዋ ጎሌን ዴዒኖ። ያቲና፥ ኣያ ቤዓናው ኬሴዲቴ? ናቢያ ቤዓናው ኬሴዲቴ? ኤ፥ ታኒ ሂንቴው ኦዳይ፤ ናቢያፔካ ኣꬊያዋ ቤዔዲታ። ኣዪሲ ጎፔ፥ ፆሳ ማፃፋን፥ ‹ፆሳይ፥ «ቤዓ፥ ታኒ ኪቲያዋ ኔፔ ሲንꬃው ዬዳና። ኢ ኔው ኦጊያ ጊጊሳናዋ» ያጌዳ› ጌቴቲዴ ዮሃኒሳባይ ፃፌቴዳ። ታኒ ሂንቴንቶ ቱሙዋ ኦዳይ፤ ኣቲ ኡሉዋፔ ዬሌቴዳ ኣሳ ኡባን ፃማቂያ ዮሃኒሳፔ ኣꬊያዌ ኦኒኔ ዴንዲቤና፤ ሺን ሳሉዋ ካዉቴꬃን ኡባፔ ላፊያዌ ኣፔ ኣꬋና። ፃማቂያ ዮሃኒሳ ዎዲያፔ ዶሚዴ፥ ሃቼ ጋካናው፥ ሳሉዋ ካዉቴꬃታ ዳሮ ናቄታው፤ ሚኒ ባፄቲያዋንቱ ኢዞ ዴሚኖ። ኣዪሲ ጎፔ፥ ናባቱ ኡባቱኔ ሙሴ ሂጊ ዮሃኒሳ ዎዲ ጋካናው፥ ቲምቢቲያ ሃሳዬዲኖ፤ ሲሚ ሂንቴንቱ ኡንቱንቱ ሃሳዮዋ ኣማናናዋ ጊዶፔ፥ ያናዋ ጌቴቴዳ ኤላስ ሃ ዮሃኒሳ። ሲሲያ ሃይꬃይ ዴዒያዌ ሲሶ! «ሺን ታኒ ሃ ዎዲያ ኣሳ ኣያና ሌሚሶ? ኡንቱንቱ ቆጫን ኡቲያ ናና ማላቲኖ፤ ኡንቱንቱ ባሬንቱ ላጌꬃቱዋ ፄሲዴ፥ ‹ኑኒ ሂንቴንቶ ሂፂፂያ ፑኔዶ፤ ሺን ዱሪቤይኪታ፤ ዬኩዋ ዬꬃካ ኬሴዶ፤ ሺን ዬኪቤይኪታ› ያጊኖ። ኣዪሲ ጎፔ፥ ዮሃኒሲ ፆሚዲኔ ዎዪኒያ ኤሳ ኡሼናን ዪና ኡንቱንቱ፥ ‹ኣ ቦላ ኢታ ኣያናይ ዴዔ› ያጌዲኖ። ታኒ፥ ኣሳ ናዓይ፥ ማዴኔ ኡሻዴ ዪና፥ ኡንቱንቱ ታና፥ ‹ሃ ናፊሳማኔ ዎዪኒያ ኤሳ ኡሺያዋ ቤዒቴ፤ ቃራፃ ቃንፂያዋንቱናኔ ናጋራንቻቱዋና ሲቄቴ› ያጊኖ፤ ሺን ፆሳ ኣꬌዳ ኤራቴꬃይ ባሬ ኦሱዋን ቱማ ጊዲዴ ቤቴ» ያጌዳ። ሄዋፔ ጉዪያን፥ ዬሱሲ ባሬ ማላታፔ ዳሪያ ባጋ ኦꬄዳ ካታማቱዋን ዴዒያ ኣሳይ ባሬንቱ ናጋራፔ ሲሚቤና ዲራው፥ ኡንቱንታ ሃዋዳን ያጊዴ፥ ቶሺያ ዶሜዳ፤ «ኮራዚኔ ካታማው፥ ኔው ኣዬሮ፤ ቤቴሳይዳ ካታማው፥ ኔዉካ ኣዬሮ፤ ኣዪሲ ጎፔ፥ ሂንቴንቱ ቦላ ፆሳይ ኦꬄዳ ማላታይ ፂሮሳ ካታማኒኔ ሲዶና ካታማን ኦሴቶዋ ጊዲንቶ፥ ኡንቱንቱ ማቂያ ማዪዴ፥ ቢዲንꬃ ኦኬቲዴ፥ ቤኒ ባሬንቱ ናጋራፔ ሲማናዋንታሺን። ታኒ ሂንቴው ኦዳይ፤ ፒርዳ ጋላሲ ፆሳይ ሂንቴፔ ፂሮሳ ካታማዉኔ ሲዶና ካታማው ፒርዳ ካዉሺሳና። ቃሲ ቂፊሪናሆማ ካታማው፥ ኔኒ ሳሉዋ ፑዴ ꬎቁ ጋናው ኮያዲ? ኔኒ ሲዖሊያ ዱጌ ዬጌታና፤ ኣዪሲ ጎፔ፥ ኔ ቦላ ፆሳይ ኦꬄዳ ማላታይ ሶዶማ ካታማን ኦሴቶዋ ጊዲንቶ፥ ሶዶማ ካታማይ ሃቼ ጋካናሲካ ዴዓናዋሺን። ታኒ ሂንቴው ኦዳይ፤ ፒርዳ ጋላሲ ፆሳይ ኔፔ ሶዶማው ፒርዳ ካዉሺሳና» ያጌዳ። ዬሱሲ ሄ ዎዴ ዛሪዴ፥ ሃዋዳን ያጌዳ፤ «ታ ኣቦ፥ ሳሉዋ ሳዓ ጎዳው፥ ኔኒ ሃዋ ኣꬌዳ ኤራንቻቱዋፔኔ ኣኬካንቻቱዋፔ ጌንꬃዴ፥ ኤሬና ናናቱዋሲ ቆንጪሴዳ ዲራው፥ ኔና ጋላታይ፤ ኤ ታ ኣቦ፥ ኣዪሲ ጎፔ፥ ሃዌ ኔ ሼኒያዳን ኦሴቴዳ። «ታ ኣቡ ታው ኡባባ ኢሜዳ፤ ኣዉዋፔ ሃራይ ናዓ ኤሬና፤ ናዓፔኔ ናዓይ ኣዉዋ ቆንጪሳናው ኮዪያ ኣሳፔ ኣቲን፥ ሃራይ ኣዉዋ ኤሬና። «ዳቡራንቻቶ፥ ዴፁዋ ቶኮዋንቶ ኡባቶ፥ ታኮ ሃ ዪቴ፤ ታኒ ሂንቴንታ ሼምፒሳና። ታኒ ጋራኔ ታ ዎዛናን ኣሺኬ ጊዶ ዲራው፥ ታ ሞርጌ ሚꬃን ዋፄቲቴ፤ ታፔ ታማሪቴ፤ ሂንቴንቱ ሼምፑዋሲካ ሂንቴ ሼምፑዋ ዴማና። ኣዪሲ ጎፔ፥ ታ ሞርጌ ሚꬃይ ጊጋ፤ ቃሲ ታኒ ሂንቴንታ ቶሴዳዌካ ካዉሻ» ያጌዳ። ዬሱሲ ሄ ዎዴ ሳምባታ ጋላሲ፥ ቲሻ ባንጋ ጊዶና ኣꬊሺን ኣ ካሊያዋንቱ ኮሻቲዴ፥ ቲሻ ባንጋ ዱꬂዴ፥ ሙሳ ዶሜዲኖ። ሺን ፓሪሳዋቱ ሄዋ ቤዒዴ ዬሱሳ፥ «ቤዓ፥ ኔና ካሊያዋንቱ ሳምባታ ጋላሲ ኦꬃናው ዎጋ ጊዴናባ ኦꬂኖ» ያጌዲኖ። ሺን ዬሱሲ ኡንቱንቱሲ ሃዋዳን ያጌዳ፤ «ዳዊቴኔ ኣናና ዴዒያዋንቱ ኮሻቴዳ ዎዴ፥ ዳዊቴ ኦꬄዳዋ ናባቢቤይኪቴ? ዳዊቴ ፆሳ ጎሌ ጌሊዴ፥ ቄሳቱዋ ፃላላይ ማናፔ ኣቲን፥ ኢኔ ኣናና ዴዒያዋንቱ ማናው ዎጋ ጊዴና ፆሳሲ ያርሼዳ ቁማ ሜዳ። ዎይ ሳምባታ ኡባን ጌሻ ጎሊያን ዴዒያ ቄሳቱ ሳምባታ ዎጋ ሜንꬂያዋ፥ ቃሲ ኡንቱንቱሲ ሄዌ ባዪዞ ጊዴናዋ ሙሴ ሂጊያን ናባቢቤይኪቴ? ሺን ታኒ ሂንቴው ኦዳይ፤ ጌሻ ጎሊያፔ ኣꬊያዌ ሃዋን ዴዔ። ፆሳ ማፃፋይ፥ ‹ታኒ ማሮቴꬃ ኮያይፔ ኣቲን፥ ያርሹዋ ኮዪኬ› ያጊያዌ ዋጊያዌንቶ ሂንቴንቱ ኤሪቴንቶ፥ ባዪዙ ባይና ኣሳ ቦላ ፒርዲኪታ። ኣዪሲ ጎፔ፥ ታኒ፥ ኣሳ ናዓይ፥ ሳምባታ ጎዳ» ያጌዳ። ዬሱሲ ሄዋፔ ዴንዲዴ፥ ኣዪሁዳ ዎሳ ጎሌ ቤዳ። ሄዋን ኩሺ ጉንዴዳ ኢቲ ቢታኒ ዴዔ፤ ዬሱሳ ሞታናው ጋሱዋ ኮዪያ ኣሳቱ፥ «ሳምባታን፥ ሃርጋንቻ ፓꬂያዌ ዎጌ?» ያጊዴ ኣ ኦቼዲኖ። ዬሱሲ ኡንቱንታ፥ «ሂንቴንቱ ጊዶን ኢቲ ዶርሳይ ዴዒያ ኡራይ፥ ሄ ዶርሳይ ሳምባታ ጋላሲ ኦላን ኩንዶፔ፥ ኦይቂዴ ኬሴናዌ ኦኔ? ያቲና፥ ኣሳይ ዶርሳፔ ዎቲ ሎይꬂዴ ዳሬኔ! ሄዋ ዲራው፥ ሳምባታ ጋላሲ ሎዖባ ኦꬂያዌ ዎጋ» ያጌዳ። ሄዋፔ ጉዪያን ቢታኒያ፥ «ኔ ኩሺያ ፒዲ ኦꬃ» ያጊና ቢታኒ ፒዲ ኦꬆዋፔ ጉዪያን፥ ኣ ኩሺ ዮኮ ኩሺያዋዳንካ ፓፂ ኣጌዳ። ሺን ፓሪሳዋቱ ካሬ ኬሲዴ፥ ዬሱሳ ዎቲ ዎꬋኔንቶ ማቄቴዲኖ። ሺን ዬሱሲ ኡንቱንቱ ዞሬታ ኤሪዴ፥ ሄዋፔ ኣጊዴ ቢያ ዎዴ፥ ዳሮ ኣሳይ ኣ ካሌዳ፤ ሃርጌዳ ኡባ ፓꬄዳ። ፆሳይ ናቢያ ኢሲያሳ ባጋና ኦዴዳዌ ፖሌታና ማላ፥ ዬሱሲ ኣሳቱዋሲ፥ «ታባ ሃራ ኣሳሲ ኦዶፒቴ» ያጌዳ። *** ፆሳይ ኢሲያሳ ባጋና ሃዋዳን ያጌዳ፤ «ታኒ ዶሬዳ ታ ኣዪሊ፥ ታኒ ሲቂያ፥ ታና ናሼቺያዌ ሃዌኩ። ታኒ ታ ኣያና ኣ ቦላ ዎꬃና። ኢ ሱሬ ፒርዳ ኣሳው ኡባው ኦዳናዋ። ኢ ፓሉሜቴና፤ ዎይ ዋሴና። ባሬ ቃላካ ኦጊያን ሲሴና። ሱሬ ፒርዳይ ፆኒ ኬሳና ጋካናው፥ ቲንጬቴዳ ማቃ ሜንꬄና ቃሲ ጩዋቲያ ሙቃዳ ቁንጩቲያካ ኢ ቶዪሴና። ኣዪሁዳ ጊዴና ኣሳይ ኡባይ ኣቦላ ባሬንቱ ሂዶታ ዎꬃና» ያጌዳ። ሄዋፔ ጉዪያን፥ ኣማሬዳ ኣሳቱ ኢታ ኣያናይ ኦይቂና ዱዴዳ ኢቲ ቆቃ ቢታኒያ ዬሱሳኮ ኣሄዲኖ፤ ዬሱሲ ሄ ዱዴ ቢታኒያ ፓꬄዳ፤ ቢታኒካ ሃሳያኔ ፄላ ዶሜዳ። ኣሳይ ኡባይ ማላሌቲዴ፥ «ላ ሃዌ ዳዊቴ ናዓ ጊዳንዴሻ?» ያጌዲኖ። ሺን ፓሪሳዋቱ ሄዋ ሲሲዴ፥ «ሃ ቢታኒ ኢታ ኣያናቱዋ ካፑ ‹ቢዔል-ዜቡሊ› ባሬው ዎልቃ ኢሚና፥ ፃላሃቱዋ ኬሴ» ያጌዲኖ። ሺን ዬሱሲ ኡንቱንቱ ቆፋ ኤሪዴ፥ ኡንቱንታ ሃዋዳን ያጌዳ፤ «ባሬ ጊዶን ሻኬቲያ ካዉቴꬃይ ኡባይ ꬋያና፤ ቃሲ ባሬ ጊዶን ሻኬቲያ ካታማይ ዎይ ጎሌን ዴዒያ ኣሳይካ ሚኔና። ቃሲ ሴፃናይ ሴፃና ኬሲያዋ ጊዶፔ፥ ባሬ ጊዶን ሻኬቴ፤ ያቲና፥ ኣ ካዉቴꬃይ ዋኒዴ ሚኒ ኤቃናዌ? ታው ቢዔል-ዜቡሊ ዎልቃ ኢሚና፥ ታኒ ፃላሃቱዋ ኬሲያዋ ጊዶፔ፥ ሂንቴንቱ ኣሳው ዎልቃ ኦኒ ኢሚና ፃላሃቱዋ ኬሳኔ? ሄዋ ዲራው፥ ኡንቱንቱ ሂንቴ ቦላ ፒርዳና። ሺን ፆሳ ጌሻ ኣያናይ ታው ዎልቃ ኢሚና፥ ታኒ ፃላሃቱዋ ኬሲያዋ ጊዶፔ፥ ሲሚ ፆሳ ካዉቴꬃይ ሂንቴ ቦላ ዪዲጌዳ። «ዎይ ኣሳይ ካሴቲዴ፥ ዎልቃማ ኣሳ ቃቼናን ዴዒዴ፥ ኣ ጎሌ ጌሊዴ፥ ኣ ሚሻ ቦንቃናው ዋኒዴ ዳንዳዪ? ቃቼዳዋፔ ጉዪያን፥ ኣ ሚሻ ቦንቃናው ዳንዳዬ። «ታ ባጋ ጊዴና ኡራይ ታዋ ኢፄ፤ ቃሲ ታናና ኢቲፔ ሺሼናዌ ላሌ። ሄዋ ዲራው፥ ታኒ ሂንቴው ኦዳይ፤ ፆሳይ ኣሳው ኣይ ናጋራ ጊዲናካ፥ ቃሲ ኣይ ቦሬ ጊዲናካ ኣቶ ጋና፤ ሺን ጌሻ ኣያና ቦሪያዋ ኣቶ ጌና። ታ ቦላ፥ ኣሳ ናዓ ቦላ፥ ኢታባ ሃሳዪያ ኦ ናጋራኔ ፆሳይ ኣቶ ጋና፤ ሺን ጌሻ ኣያና ቦላ ኢታባ ሃሳዪያ ኦ ናጋራኔ ሳዓን ጊዲና፥ ሳሉዋንካ ፆሳይ ኣቶ ጌና። «ሎዖ ኣይፊያ ዴማናው ሎዖ ሚꬃ ዲቻናው ቤሴ፤ ኢታ ሚꬃ ሂንቴንቱ ዲቾፔ፥ ኢታ ኣይፊያ ዴማኒታ፤ ኣዪሲ ጎፔ፥ ሚꬃይ ኤሬቲያዌ ባሬ ኣይፊያ ኣይፊያዋና። ሾሻቶ፥ ሂንቴንቱ ኢታ ጊዲዴ፥ ዎቲ ሎዖባ ሃሳያናው ዳንዳዪቴ? ኣዪሲ ጎፔ፥ ዶናይ ዎዛና ጊዶን ኩሜዳዋ ሃሳዬ። ሎዖ ኣሳይ ባሬ ሎዖ ሚንጁዋፔ ሎዖባ ኬሴ፤ ቃሲ ኢታ ኣሳይ ባሬ ኢታ ሚንጁዋፔ ኢታባ ኬሴ። ታኒ ሂንቴንቶ ኦዳይ፤ ኣሳይ ባሬ ሃሳዬዳ ማዴና ሃሳያ ኡባው ፒርዳ ጋላሲ ዛሩዋ ኢማናዋ። ኣዪሲ ጎፔ፥ ኔ ሃሳያይ ኔና ፂሊሳና፤ ዎይ ኔ ሃሳያይ ኔ ቦላ ፒርዲሳና» ያጌዳ። ሄዋፔ ጉዪያን፥ ሂጊያ ታማሪሲያ ኢቲ ኢቲ ኣሳይኔ ፓሪሳዋቱ ዛሪዴ ዬሱሳ፥ «ታማሪሲያዎ፥ ኔኒ ማላታ ኦꬂሺን፥ ኑኒ ቤዓናው ኮዬቶ» ያጌዲኖ። ሺን ኢ ዛሪዴ፥ ኡንቱንቶ ሃዋዳን ያጌዳ፤ «ሃ ዎዲያ ኣሳይ ኢታኔ ፆሳ ኣማኔና ዲራው፥ ማላታ ኮዬ፤ ናቢያ ዮናሳ ማላታፔ ኣቲን፥ ሃራ ማላታይ ኢሜቴና። ዮናሲ ዎጋ ሞሊያ ኡሉዋን ሄዙ ጋላሳኔ ሄዙ ቃማ ዴዔዳዋዳን፥ ኣሳ ናዓይካ፥ ቢታ ጊዶን ሄዙ ጋላሳኔ ሄዙ ቃማ ዴዓናዋ። ኔኔዌ ኣሳይ ዮናሲ ኦዴዳዋን ባሬንቱ ናጋራፔ ሲሜዳ ዲራው፥ ፒርዳ ጋላሲ ዴንዲዴ፥ ሂንቴንታ ሞታናዋንታ፤ ቤይቴ፥ ዮናሳፔ ኣꬊያዌ ሃዋን ዴዔ። ዱጌ ባጋ ጋዲያ ካታታ ሶሎሞኔው ዴዒያ ኣꬎ ኤራቴꬃ ሲሳናው ሳዓ ጋፃፔ ዬዳ ዲራው፥ ፒርዳ ጋላሲ ዴንዳዴ፥ ሂንቴንታ ሞታናዉኑ፤ ቤይቴ፥ ሶሎሞኔፔካ ኣꬊያዌ ሃዋን ዴዔ። «ኢታ ኣያናይ ኣሳፔ ኬሴዳ ዎዴ፥ ባሬው ሼምፒያሳ ኮዪዴ፥ ሃꬃይ ባይና ሜላሳና ዩዬ፤ ሺን ዴሜና። ሄ ዎዴ፥ ‹ታኒ ኣጋዴ ዬዳ ታ ጎሌ ሲማና› ያጌ፤ ሲሚዴ ዪያ ዎዴ፥ ጎሊ ሜላ ዴዒያዋኔ ፒቴቲ ጌዪዴ፥ ጊጊ ኡቴዳዋ ዴሜ። ሄዋፔ ጉዪያን፥ ቢዴ ባሬፔ ኢቲያ ላፑ ሃራ ኣያናቱዋ ኣኪዴ ዬ፤ ሄ ኣያናቱ ጌሊዴ፥ ሄዋን ዴዒኖ። ሄ ቢታኒያ ዴዑ ካሴዋፔ ዳሪ ኢቴ። ሃ ዎዲያ ኢታ ኣሳዉካ ቃሲ ሄዋዳን ሃናና» ያጌዳ። ዬሱሲ ዳሮ ኣሳው ሃሳዪሺን፥ ኣ ዳያኔ ኣ ኢሻቱ ኣናና ሃሳያናው ኮዪዴ፥ ካሬን ኤቄዲኖ። ሄዋን ዴዒያ ኣሳፔ ኢቱ ኣ፥ «ኔ ዳያኔ ኔ ኢሻቱ ኔናና ሃሳያናው ኮዪዴ፥ ካሬን ኤቄዲኖ» ያጌዳ። ሺን ዬሱሲ ዛሪዴ፥ «ታ ዳያ ኦኔ? ታ ኢሻቱ ኦኔ?» ያጌዳ። ባሬ ኩሺያን ባሬና ካሊያዋንቱኮ ፆርሲዴ፥ «ቤይቴ፥ ታ ዳያኔ ታ ኢሻቱ ሃዋንቱሺ። ኣዪሲ ጎፔ፥ ሳሉዋን ዴዒያ ታ ኣቡ ሼኒያ ኦꬂያ ኡባይ፥ ታ ኢሻ፥ ታ ሚቻቶኔ ታ ዳዮ» ያጌዳ። ዬሱሲ ሄ ጋላሲ ሶዪፔ ኬሲዴ፥ ኣባ ጋፃን ኡቴዳ። ዳሮ ጮራ ኣሳይ ባሬ ዩሹዋን ዩዪ ኣꬊዴ ሺቂና፥ ዎንጊሪያ ጊዶ ጌሊዴ ኡቴዳ፤ ኣሳይ ኡባይ ኣባ ጋፃን ኤቄዳ። ኣሳሲ ሌሚሱዋን ዳሮባ ሃዋዳን ያጊዴ ኦዴዳ፤ «ኢቲ ቢታኒ ዜሬꬃ ዜራናው ኬሴዳ። ኢ ዜሪሺን፥ ኢቲ ኢቲ ዜሬꬃይ ኦጊያ ዶናን ዎꬌዳ፤ ያቲና ካፉ ዪዴ ሜዳ። ቃሲ ኢቲ ኢቲ ዜሬꬃይ ኣንጮ ጊዴዳ ቢታ ቦላ ዎꬌዳ፤ ዳሮ ቢታይ ባይና ዲራው፥ ሄ ዜሬꬃይ ኤሌካ ዶሌዳ። ሺን ኣዋይ ኬሴዳ ዎዴ ጫርሻይ ሹሌዳ፤ ኣዱሳ ፃጱዋ ዬዲቤና ዲራው ሜሊ ኣጌዳ። ኢቲ ኢቲ ዜሬꬃይ ኣጉንꬃ ጊዶን ዎꬌዳ፤ ሄዋን ዶሌዳዋ ኣጉንꬃይ ዲጪዴ ጩሌዳ። ኢቲ ኢቲ ዜሬꬃይ ቱዔ ቢታን ዎꬊዴ ዶሌዳ፤ ኢቱ ፄቱ ኣይፊያ፥ ኢቱ ኡሱፑን ታሙዋ፥ ኢቱ ሃታሙዋ ኣይፌዳ። ሲሲያ ሃይꬃይ ዴዒያ ኡራይ ሲሶ!» ያጌዳ። ዬሱሳ ካሊያዋንቱ ኣኮ ሺቂዴ፥ «ኔኒ ኣዪሲ ኣሳሲ ሌሚሱዋን ኦዳይ?» ያጌዲኖ። ዬሱሲ ዛሪዴ፥ ኡንቱንቱሲ ሃዋዳን ያጌዳ፤ «ሂንቴንቱሲ ሳሉዋ ካዉቴꬃ ፁራ ኤሩሳይ ኢሜቴዳ፤ ሺን ኡንቱንቱሲ ኢሜቲቤና። ኣዪሲ ጎፔ፥ ዴዒያዎ ጉጄታና፤ ኣው ዳራናዋ፤ ሺን ባይናዋፔ ሃራይ ኣቶ፥ ሄ ዴዒያዌካ ኣኬታናዋ። ታኒ ኡንቱንቱ ፄሊዴ ፄሌናዋዳን፥ ሲሲዴ ሲሴናዋዳን ሃኒያ ዲራው፥ ዎይ ቃሲ ኣኬኬና ዲራው ኡንቱንቶ ሌሚሱዋን ኦዳይ። «ኢሲያሲ ኡንቱንቱባ ሃዋዳን ኦዶዌ ፖሌታናዋ፤ ‹ሂንቴንቱ ሲሳ ሲሳና፤ ሺን ሂንቴንቶ ጌሌና፤ ሂንቴንቱ ፄላ ፄላና፤ ሺን ቤዒኪታ። ኣዪሲ ጎፔ፥ ሃ ኣሳ ዎዛናይ ጉዙሜዳ፤ ባሬንቱ ሃይꬃ ቱሊሴዲኖ፤ ባሬንቱ ኣዪፊያካ ጪሉሜዲኖ። ሃዌ ባዌንቶ፥ ኡንቱንቱ ባሬንቱ ኣይፊያን ቤዓና፤ ባሬንቱ ሃይꬃን ሲሳና፤ ባሬንቱ ዎዛናንካ ኣኬካና፤ ኡንቱንቱ ታኮ፥ ፆሳኮ ሲማና፤ ታኒካ ኡንቱንታ ፓꬃና› ያጌ። «ሺን ሂንቴንቱ ኣይፊ ፄሊያ ዲራዉኔ ሂንቴንቱ ሃይꬃይካ ሲሲያ ዲራው፥ ሂንቴንቱ ኣንጄቴዳዋንታ። ታኒ ሂንቴንቶ ቱሙዋ ኦዳይ፤ ዳሮ ናባቱኔ ፂላቱ ሂንቴንቱ ቤዒያዋ ቤዓናው ኣሞቴዲኖ፤ ሺን ቤዒቤይኪኖ። ሂንቴንቱ ሲሲያዋ ሲሳናው ኣሞቴዲኖ፤ ሺን ሲሲቤይኪኖ። «ሲሚ ካꬃ ዜሪያዋ ሌሚሱዋ ቢሌꬃይ ጊያዋ ሲሲቴ። ካዉቴꬃ ቃላ ሲሲዴ፥ ኣኬኬና ኦኒኔ ኦጊያ ዶናን ዎꬌዳ ዜሬꬃ ማላ፤ ፃላሂያ ካፑ ዪዴ፥ ኡንቱንቱ ዎዛናን ዜሬቴዳዋ ማፂ ዲጌ። ኣንጮ ቢታን ዎꬌዳ ዜሬꬃይ ቃላ ሲሲዴ፥ ኤሌካ ናሼቻን ኣኪያዋንታ ማላቴ። ሺን ሄ ኣሳቱ ሃዒሳፔ ኣቲን፥ ኡንቱንቱን ፃጱ ባዋ፤ ቃላ ጋሱዋን ሜቱ ዎይ ዬዴሳይ ዪያ ዎዴ፥ ኤሌካ ꬉቤቲ ኣጊኖ። ቃሲ ኣጉንꬃ ጊዶን ዎꬌዳዌ ቃላ ሲሲያዋ ቤሴ፤ ሺን ሃ ሳዓ ዴዑዋሲ ሂርጉሳይኔ ዱሬቴꬃ ሲቁሳይ ቃላ ጩሌ፤ ሃ ጋሱዋን ሄ ዜሬꬃይካ ኣይፌናን ኣቲ ኣጌ። ቱዔ ቢታን ዜሬቴዳዌ፥ ቃላ ሲሲዴ፥ ኣኬኪያ ኣሳ ቤሴ፤ ኢካ ኣይፌ፤ ኢቱ ፄቱዋ፥ ኢቱ ኡሱፑን ታሙዋ፥ ኢቱ ሃታሙዋ ኣይፌ» ያጌዳ። ዬሱሲ ኡንቱንቶ ሃራ ሌሚሱዋ ሃዋዳን ያጊዴ ኦዴዳ፤ «ሳሉዋ ካዉቴꬃይ ባሬ ጎሻን ሎዖ ዜሬꬃ ዜሬዳ ቢታኒያ ማላቴ። ሺን ቃማ ኣሳይ ጌሚዒሺዲጊና፥ ኣ ሞርኪ ዪዴ፥ ዛርጋ ዜሬዳዋ ቦላ ዛሪንጊያ ዜሪዴ ቤዳ። ሺን ዛርጋይ ዶሊ ኣይፌዳ ዎዴ፥ ዛሪንጊ ሄ ዎዴ ቤቴዳ። «ኣ ቆማቱ ኣኮ ዪዴ፥ ‹ጎዳው፥ ኔኒ ኔ ጎሻን ሎዖ ዜሬꬃ ዜራቤይኪ? ያቲና፥ ዛሪንጊ ሃቃፔ ዬዴ?› ያጌዲኖ። «ሄዋፔ ጉዪያን ጎዳይ፥ ‹ሄዋ ሞርኪ ኦꬄዳ› ያጌዳ። «ቆማቱ፥ ‹ኑኒ ቢዴ ሾዳናዳን ዶሳይ?› ያጌዲኖ። «ሺን ኢ፥ ‹ኣጊቴ፥ ዛሪንጊያ ሂንቴንቱ ሾዲዴ፥ ዛርጋና ሾዳኒታ። ቦቾፒቴ፤ ቆይጪያ ዎዲ ጋካናው፥ ኢቲፔ ዲጪኖ። ቆይጪያ ዎዲ ጋኮዴ፥ ታኒ ቆይጪያዋንታ፥ ካሴቲዴ ዛሪንጊያ ማፂቴ፤ ታማን ጉዳናው ፖቺያን ፖቺያን ቃቺቴ፤ ሺን ዛርጋ ሺሺዴ ዲዪያን ቆሊቴ› ጋና» ያጌዳ። ዬሱሲ ኡንቱንቶ ሃራ ሌሚሱዋ ያጊዴ ኦዴዳ፤ «ሳሉዋ ካዉቴꬃይ ሳናፊጪያ ጌቴቲያ ጉꬃ ሚꬃቲ ኣይፊያ ማላቴ፤ ሄ ሚꬃቲ ኣይፊያ ኣሳይ ኣኪዴ፥ ባሬ ጎሻን ዜሬዳ። ሄ ዜሬꬃታ ሃራ ዜሬꬃ ኡባፔ ጉፃው፤ ሺን ዲጬዳ ዎዴ፥ ሃራ ኣታኪልቲያ ኡባፔ ዳራው፤ ካፉ ዪዴ፥ ኢዚ ቃንካን ኬፂያዋ ኬና ዎጋ ሚꬃ ጊዳዱ» ያጌዳ። ቃሲካ ዬሱሲ ሃራ ሌሚሱዋ ኡንቱንቶ ያጊዴ ኦዴዳ፤ «ሳሉዋ ካዉቴꬃይ ኢቲ ሚሺራታ ሄዙ ኬሪያ ꬊሊያ ኣካዴ፥ ሙናቄዳ ሙናቃይ ኡባይ ዴንዳና ጋካናው፥ ኣኒ ቲጌዳ ኢርሹዋ ማላቴ» ያጌዳ። ዬሱሲ ኣሳው ሄ ኡባ ሌሚሱዋን ኦዴዳ፤ ሌሚሱ ባይናን ኢ ኢቲባካ ኦዴና፤ ናቢ፥ «ታኒ ኡንቱንቶ ሃሳዪያ ዎዴ፥ ሌሚሱዋን ሃሳያይ። ኣላሚ ሜꬌቶዴፔ ዶሚዴ ጌሜዳ ዬዋቱዋ ኦዳይ» ያጌዳዌ ፖሌታና ማላ፥ ሄዋ ኢ ኦዴዳ። *** ሄዋፔ ጉዪያን፥ ዬሱሲ ኣሳ ኣጊዴ፥ ሶይ ጌሌዳ፤ ኣ ካሊያዋንቱ ኣኮ ቢዴ፥ «ጎሻን ዴዒያ ዛሪንጊያ ሌሚሱዋ ቢሌꬃ ኑሲ ኦዳ» ያጌዲኖ። ዬሱሲ ዛሪዴ፥ ሃዋዳን ያጌዳ፤ «ሎዖ ዜሬꬃ ዜሪያዌ ኣሳ ናዓ፤ ጎሻይ ሃ ኣላሚያ፤ ሎዖ ዜሬꬃይ ፆሳ ካዉቴꬃ ኣሳ፤ ዛሪንጊ ፃላሂያ ካፑዋ ናና። ዛሪንጊያ ዜሬዳዌ ሞርኪያ ፃላሂያ፤ ቆይቻ ዎዲ፥ ዎዲያ ዉርሴꬃ፤ ቃሲ ቆይጪያዋንቱ ኪታንቻቱዋ። «ሄዋ ዲራው፥ ዛሪንጊያ ማፂዴ፥ ታማን ጉዲያዋዳን፥ ዎዲያ ዉርሴꬃን ሄዋ ማላ ጊዳናዋ። ኣሳ ናዓይ፥ ኪታንቻቱዋ ኪታናዋ፤ ኡንቱንቱ ኣ ካዉቴꬃ ጊዶን ናጋራው ጋሶ ጊዲያ ኡባቱዋኔ ኢታባ ኦꬂያዋንታ ማፂዴ ኬሳናዋንታ። ያቲዴ ቶዔና ታማን ኦላናዋንታ፤ ሄዋን ኡንቱንቱ ዬካናዋንታኔ ኣቻ ꬋቃናዋንታ። ሄ ዎዴ ፂላቱ ባሬንቱ ኣቡ ካዉቴꬃን ኣዋዳን ፖዓና። ሲሲያ ሃይꬃይ ዴዒያ ኡራይ ሲሶ! «ሳሉዋ ካዉቴꬃይ ጎሻን ሞጌቴዳ ሚሻ ቤሴ፤ ኢቲ ቢታኒ ሄ ሚሻ ዴሚዴ፥ ዛሪዴ ሞጊ ኣጌዳ፤ ዳሮ ናሼቲዴ ቢዴ፥ ባሬው ዴዒያዋ ኡባ ዛሊዒዴ፥ ሄ ጎሻ ሻሜዳ። «ቃሲ ሳሉዋ ካዉቴꬃይ ኢንቁዋ ጌቴቲያ ዳሮ ኣልዖ ሹቻ ሻማናው ኮዪያ ዛሊዓንቻ ማላቴ። ሄ ዛሊዓንቻይ ዳሮ ኣልዖ ኢንቁዋ ዴሚዴ፥ ቢዴ ባሬው ዴዒያዋ ኡባ ዛሊዒዴ፥ ኣ ሻሜዳ። «ቃሲ ሳሉዋ ካዉቴꬃይ ኡባ ቆሞ ሞሊያ ኦይቂያ፥ ኣባን ዬጌቴዳ ዳባ ማላቴ። ሞሊ ዳባ ኩሜዳ ዎዴ፥ ሞሊያ ኦይቂያ ኣሳቱ ኣባፔ ጋፃ ኬሲዴ ኡቴዲኖ፤ ያቲዴ ሎዖ ሞሊያ ቆሪዴ፥ ዬጊያ ሚሻን ዬጌዲኖ፤ ሺን ኢታ ሞሊያ ዎራ ኦሌዲኖ። ዎዲያ ዉርሴꬃን ሄዋዳን ሃናና፤ ኪታንቻቱ ዪዴ፥ ናጋራንቻቱዋ ፂላቱዋ ጊዶፔ ቆሪዴ፥ ቶዔና ታማን ኦላናዋንታ፤ ሄዋን ኡንቱንቱ ዬካናዋንታኔ ኣቻ ꬋቃናዋንታ። «ሃዌ ኡባይ ሂንቴንቶ ጌሌዴ?» ያጊዴ ኡንቱንታ ኦቼዳ። ኡንቱንቱ፥ «ኤ፥» ያጌዲኖ። ኢ፥ «ሄዋ ዲራው፥ ሳሉዋ ካዉቴꬃ ፁራ ሎይꬂ ኤሪያ፥ ሂጊያ ታማሪሲያ ኡባይ፥ ባሬ ሚሻ ሺሺ ዎꬄዳ ጎሊያፔ ኦራꬃ ሚሻኔ ኤጫ ሚሻ ሻኪ ኬሲያ ኢዛዋ ማላቴ» ያጊ ዛሬዳ። ዬሱሲ ሃ ሌሚሳቱዋ ኦዲ ዉርሶዋፔ ጉዪያን፥ ሄዋፔ ዴንዲዴ፥ ባሬ ካታማ ናዚሬቴ ቤዳ። ኣዪሁዳ ዎሳ ጎሌን ታማሪሲያዋ ሲሴዳ ኣሳይ ማላሌቲዴ፥ ሃዋዳን ያጌዳ፤ «ሃዌ ሃ ኣꬎ ኤራቴꬃኔ ፆሳይ ኦꬂያ ማላታ ኦꬃናው ዎልቃ ሃቃፔ ኣኬዴ? ሃዌ ኣናፂያ ናዓ ጊዴኔ? ኣ ዳያ ማይራሞ ጊዴኬ? ኣ ኢሻቱ ያዪቆባ፥ ዮሴፋ፥ ሲሞናኔ ዪሁዳ ጊዲኪኖ? ኣ ሚቻቱ ኡባይ ኑናና ዴዒኪኖ? ያቲና፥ ኢ ሃ ኤራ ኡባ ሃቃፔ ዴሜዴ?» ያጌዲኖ። ኡንቱንቱ ኢ ጊያባ ኣኬናን ኢፄዲኖ። ሺን ዬሱሲ ሄ ኣሳሲ፥ «ናቢ ባሬ ጋዲያኒኔ ባሬ ሶይ ኣሳን ቦንቼቴና፤ ሺን ሃራሳ ኡባን ቦንቼቴ» ያጌዳ። ኡንቱንቱ ኣማኒቤና ዲራው፥ ዬሱሲ ዳሮ ማላታ ሄ ሳን ኦꬂቤና። ሄ ዎዴ ጋሊላ ጋዲያ ኣዪሲያ ሄሮዲሴ ዬሱሳባ ሲሴዳ፤ ያቲዴ ባሬ ቆማቱዋሲ፥ «ሃዌ ሃይቁዋፔ ዴንዴዳ ፃማቂያ ዮሃኒሳ፤ ፆሳይ ኦꬂያ ዎልቃማ ማላታ ኢ ኦꬂያዌ ሄዋሳ» ያጌዳ። ኣዪሲ ጎፔ፥ ሄሮዲሲ ባሬ ኢሻ ፒሊጶሳ ማቻቲ ሄሮዲያዲ ጋሶታን ዮሃኒሳ ኦይꬂ ቃሺሲዴ፥ ቃሾ ጎሌን ዬጊ ዎꬄዳ። ኣዪሲ ጎፔ፥ ዮሃኒሲ ሄሮዲሳ፥ «ኔኒ ሄሮዲያዶ፥ ኔ ኢሻ ማቻቶ ኣካናው ሂጊ ዲጌ» ያጌዳ። ሄሮዲሲ ዮሃኒሳ ዎꬋናው ኮዬዳ፤ ሺን ዪሁዳ ኣሳይ ናቢያዳን ዮሃኒሳ ፄሌዳ ዲራው፥ ኣሳው ያዬዳ። ሺን ሄሮዲሲ ዬሌቴዳ ጋላሳ ባላይ ጋኪና፥ ሄሮዲያዲ ናታ ኣሳ ሲንꬃን ዱራዴ ሄሮዲሳ ናሼቻው። ሄሮዲሲ ናቶ፥ «ኔና ሎዔዳዋ ኣያኔ ጊዶፔ፥ ታና ኦቻ፤ ታኒ ኔው ኢማና» ያጊዴ ኢዚው ጫቄዳ። ናታ ባሬ ዳይ ዞሪያ ኣካዴ ሄሮዲሳ፥ «ፃማቂያ ዮሃኒሳ ሁጲያ ሃ ዎጪቲያን ዎꬃዴ ታው ኢማ» ያጋዱ። ካቲ ኣው ቃሬቴዳ፤ ሺን ባሬ ጫቁዋ ዲራዉኔ ባሬናና ማዳን ኡቴዳ ኢማꬃ ዲራው፥ ኢዚው ዮሃኒሳ ሁጲ ኢሜታና ማላ ኣዛዜዳ። ካቲ ኪቲዴ፥ ዮሃኒሳ ቆꬊያ ቃሾ ጎሌን ሙጪሴዳ። ሁጲያ ዎጪቲያን ዎꬂ ኣሂዴ፥ ናቲው ኢሜዲኖ፤ ናታ ሄ ሁጲያ ባሬ ኣቲኮ ኣፋዱ። ዮሃኒሳ ካሊያዋንቱ ዪዴ፥ ኣ ኣኃ ኣፊዴ ሞጌዲኖ፤ ሄዋፔ ሲሚዴ ሃ ዬዉዋ ዬሱሳው ቢዴ ኦዴዲኖ። ዬሱሲ ሄዋ ሲሲዴ፥ ዎንጊሪያን ጌሊዴ፥ ሄዋፔ ባሬካ ኣሳይ ባይናሳ ቤዳ፤ ኣሳይ ሄዋ ሲሲዴ፥ ካታማፔ ዴንዲዴ፥ ጌዲያን ኣ ካሌዲኖ። ዬሱሲ ዎንጊሪያፔ ኬሴዳ ዎዴ፥ ዳሮ ኣሳ ቤዒዴ፥ ሄ ኣሳው ቃሬቴዳ፤ ያቲዴ ኡንቱንቱና ዴዒያ ሃርጋንቻቱዋ ፓꬄዳ። ሳዓይ ኦማርሲያ ዎዴ፥ ዬሱሳ ካሊያዋንቱ ኣኮ ዪዴ፥ «ሃዌ ሳዓይ ኣሳይ ባይናሳ፤ ሃዒ ሳዓይ ቃሚዲጌዳ፤ ኣሳይ ኡባይ ቄሪ ካታማቱዋ ቢዴ፥ ባሬንቶ ቁማ ሻማና ማላ፥ ኣሳ ሞዪዛ» ያጌዲኖ። ሺን ዬሱሲ ኡንቱንታ፥ «ኣሳይ ባናው ኮሼና፤ ኣሳው ሜቴቲያባ ሂንቴንቱ ኢሚቴ» ያጌዳ። ኡንቱንቱ ዛሪዴ ኣ፥ «ኑሲ ሃዋን ኢቼሹ ኡኪꬃፔኔ ላዑ ሞሊያፔ ኣቲን፥ ሃራይ ባዋ» ያጌዲኖ። ዬሱሲ ኡንቱንታ፥ «ሄዋንታ፥ ሃ ታኮ ኣሂቴ» ያጌዳ። ኣሳይ ማታኒ ኡታና ማላ፥ ዬሱሲ ኣዛዜዳ፤ ኢቼሹ ኡኪꬃኔ ላዑ ሞሊያ ኦይቂዴ፥ ሳሉዋ ፑዴ ፄሊዴ፥ ፆሳ ጋላቴዳ፤ ሄ ኡኪꬃ ሜንꬂዴ፥ ባሬና ካሊያዋንቱሲ ኢሚና፥ ኡንቱንቱ ጮራ ኣሳው ጊሼዲኖ። ኣሳይ ኡባይ ሚዴ ካሌዳ፤ ኣቴዳ ሱፓ ዶካ ታማኔ ላዑ ዛምቤሊያ ኩሜዳዋ ዴንꬄዲኖ። ሜዳ ኣሳይ ማጫ ኣሳኔ ናና ፓይዴናን፥ ኢቼሹ ሻዓ ጊዲያዋ ኬና። ዬሱሲ ጮራ ኣሳ ሞዪዚዴ፥ ባሬና ካሊያዋንታ ዎንጊሪያን ጌሊዴ፥ ባሬፔ ሲንꬃቲዴ፥ ኣባፔ ሄፊንꬃ ፒናና ማላ ኣዛዜዳ። ኣሳ ሞዪዚዴ፥ ፆሳ ዎሳናው ዴሪያ ሁጲያ ባሬካ ኬሴዳ፤ ሳዓይ ቃሚ ዲጊናካ ሄዋን ባሬካ ዴዔ። ሺን ዎንጊሪ ሄ ዎዴ፥ ኣባ ቦላን ዴዒሺን፥ ሲንꬃ ባጋና ጫርኩ ጫርኪያ ዲራው፥ ቤታይ ዎንጊሪያ ያኔ ሃኔ ሱጌ። ባይራ ኩቱ ዋሲ ሲሚና፥ ዬሱሲ ኣባ ቦላ ሃሜቲዴ፥ ኡንቱንቱኮ ዬዳ። ኣ ካሊያዋንቱ ኣባ ቦላ ኢ ሃሜቲሺን ቤዒ ዳጋሚዴ፥ «ሃዌ ሞይቲሊያ ጊዴኔ!» ጊ ያዪዴ ዋሴዲኖ። ሺን ዬሱሲ ኤሌካ ኡንቱንታ፥ «ኣይኔ ባዋ፤ ታናቴኔ፤ ያዮፒቴ!» ያጌዳ። ጴፂሮሲ ዛሪዴ ኣ፥ «ታ ጎዳው፥ ሃዌ ኔና ጊዶፔ፥ ታኒ ሃꬃ ቦላና ኔኮ ባና ማላ፥ ታና ኣዛዛሪኪ» ያጌዳ። ዬሱሲ ጴፂሮሳ፥ «ሃያ!» ያጌዳ። ጴፂሮሲ ዎንጊሪያፔ ዎꬊዴ፥ ሃꬃ ቦላና ሃሜቲዴ፥ ዬሱሳኮ ቡሳ ዶሜዳ። ሺን ጫርኩዋ ዎልቃ ቤዒዴ፥ ያዬዳ፤ ሃꬃይ ባሬና ሚቱዋ ዶሜዳ ዎዴ፥ ባሬ ኮሻ ꬎቁ ኦꬂዴ፥ «ታ ጎዳው ታና ኣሻሪኪ!» ያጊ ዋሴዳ። ሄ ማንዒያንካ ዬሱሲ ባሬ ኩሺያ ዬዲ ጴፂሮሳ ኦይቂዴ፥ «ላ ሃ ኣማኑ ላፌዳዎ! ኣዪሲ ሲꬋዲ?» ያጌዳ። ኡንቱንቱ ላዑ ዎንጊሪያን ጌሌዳ ዎዴ፥ ጫርኩ ዎፑ ጌዳ። ዎንጊሪያ ጊዶን ዴዒያ ኣ ካሊያዋንቱ ዬሱሳ፥ «ኔኒ ፆሳ ናዓ ጊዴዳዌ ቱማ» ያጊዴ ኣው ጎዪኔዲኖ። ኡንቱንቱ ኣባ ፒኒዴ፥ ጌንሳሬፃ ጌቴቲያ ጋዲያ ጋኬዲኖ። ሄ ጋዲያ ኣሳይ ዬሱሳ ጊዲያዋ ኤሬዲኖ፤ ሄዋ ሄራ ጋዲያ ኡባ ኪቲዴ፥ ሃርጊያ ኣሳ ኡባ ኣኮ ኣሄዲኖ። ሃርጊያ ኣሳይ ኣ ማዩዋ ማጫራ ፃላላ ቦቻና ማላ፥ ኣ ዎሴዲኖ፤ ኣ ማዩዋ ማጫራ ቦቼዳ ኡባይካ ፓፄዳ። ሄዋፔ ጉዪያን፥ ሂጊያ ታማሪሲያ ኢቲ ኢቲ ኣሳይኔ ፓሪሳዋቱ ዬሩሳላሜፔ ዬሱሳኮ ዪዴ፥ «ኔና ካሊያዋንቱ ኣዪሲ ኑ ኣዎቱዋ ዎጋ ባይዚኖ? ኣዪሲ ጎፔ፥ ኡንቱንቱ ቁማ ማናፔ ካሴቲዴ፥ ባሬንቱ ኩሺያ ሜጬቲኪኖ» ያጌዲኖ። ዬሱሲ ዛሪዴ፥ ኡንቱንታ ሃዋዳን ያጌዳ፤ «ሂንቴንቱ ሂንቴ ዎጋ ዲራው፥ ፆሳ ኣዛዙዋ ፖሊያዋ ኣዪሲ ኢፂቴ? ኣዪሲ ጎፔ ፆሳይ፥ ‹ኔ ኣባኔ ኔ ዳዮ ቦንቻ› ቃሲ፥ ባሬ ኣባ ዎይ ባሬ ዳዮ ቦሪያዌ ሃይቆ ያጌዳ። ሺን ሂንቴንቱ፥ ‹ኢቲ ኣሳይ ባሬ ኣባ ዎይ ባሬ ዳዮ ማዲያባይ ባሬው ዴዒና፥ «ሄዌ ፆሳዋ» ጎፔ፥ ባሬ ኣባ ዎይ ባሬ ዳዮ ቦንቻናው ቤሴና› ያጊታ፤ ያቲዴ ሂንቴንቱ ሂንቴንቱ ዎጋ ፖላናው ፆሳ ቃላው ኣዛዜቲኪታ። *** ሃ ሎዓ ማላቲያ ኢታ ኣሳቶ፥ ኢሲያሲ ባሌናን ሂንቴንቱባው ቲምቢቲያ ኦዲዴ፥ ‹ፆሳይ ሃዋዳን ያጌዳ፤ «ሃዌ ኣሳይ ታና ባሬ ቦላ ዶናን ቦንቼ፤ ሺን ኡንቱንቱ ዎዛናይ ታፔ ሃኩዋን ዴዔ። ኣሳይ ታው ሜላ ጎዪኔ፤ ኣዪሲ ጎፔ፥ ኣሳይ ኦꬄዳ ኣዛዙዋ ፆሳ ሂጊያ ማላቲሲዴ ታማሪሴዲኖ» ጌዳ› » ያጌዳ። ዬሱሲ ዳሮ ኣሳ ባሬኮ ፄሲዴ፥ «ሲሲቴኔ ኣኬኪቴ፤ ኣሳ ቱኒሲያዌ ዶና ጊዶ ጌሊያዋ ጊዴና፤ ሺን ኣሳ ቱኒሲያዌ ዶናፔ ኬሲያዋ» ያጌዳ። ሄዋፔ ጉዪያን፥ ኣ ካሊያዋንቱ ኣኮ ዪዴ፥ «ፓሪሳዋቱ ኔኒ ሃሳዬዳዋ ሲሲዴ፥ ሃንቄቴዳዋ ኣኬካይ?» ያጌዲኖ። ሺን ዬሱሲ ዛሪዴ፥ «ሳሉዋን ዴዒያ ታ ኣቡ ቶኪቤና ሚꬃ ኡባይ ሾዴታናዋ። ኡንቱንቶ ሂርጎፒቴ፤ ኡንቱንቱ ቆቃ ካሌꬂያ ቆቃቱዋ፤ ቆቃይ ቆቃ ካሌꬆፔ፥ ላዑካ ኦላን ኩንዴ» ያጌዳ። ጴፂሮሲ ዛሪዴ፥ «ሃ ሌሚሱዋ ቢሌꬃ ኑሲ ኦዳሪኪ» ያጌዳ። ዬሱሲ ኡንቱንታ ሃዋዳን ያጌዳ፤ «ሂንቴንቶ ቃሲ ሃዒ ጋካናዉካ ጌሊቤኔ? ዶናና ጌሊያ ኡባይ ኡሉዋ ጊዶ ቢዴ፥ ቃሲ ኡሉዋፔ ካሬ ኬሲያዋ ኤሪኪቴ? ሺን ዶናፔ ኬሲያዌ ዎዛናፔ ኬሴ፤ ኣሳ ቱኒሲያዌ ሄዋ ማላ። ኣዪሲ ጎፔ፥ ዎዛና ጊዶፔ ኢታ ቆፋይ፥ ዎꬊያዌ፥ ዎሹሚያዌ፥ ቃሲ ዎሹማናው ካጄሊያዌ ኡባይ፥ ዉዒያዌ፥ ዎርዱዋን ማርካቲያዌ፥ ቦሪ ኬሴ። ሄዋ ማላቲያዌ ኣሳ ቱኒሲያዋፔ ኣቲን፥ ሜጪቤና ኩሺያን ሚያዌ ኣሳ ቱኒሴና» ያጌዳ። ሄዋፔ ጉዪያን፥ ዬሱሲ ሄዋፔ ኣጊዴ፥ ፂሮሳኔ ሲዶና ጌቴቲያ ካታማቱ ዴዒያ ጋዲያ ቤዳ። ካናኔ ጌቴቲያ ጋዲያ ማጫዉና ኢቲና ሄዋፔ ዬሱሳኮ ያዴ፥ ባሬ ኮሻ ꬎቁ ኦꬃዴ፥ «ታ ጎዳው፥ ዳዊታ ናዓው፥ ታው ቃሬታሪኪ፤ ታ ናቶ ኢታ ኣያናይ ሎዔና ኦይꬃ ኦይቄዳ» ያጋዱ። ሺን ዬሱሲ ኢዚው ኣይ ቃላኔ ቃቲቤና፤ ኣ ካሊያዋንቱ ኣኮ ዪዴ፥ «ሃ ሚሺራታ ኑ ጌዱዋ ካላ ካላዴ፥ ባሬ ኮሻ ꬎቁ ኦꬃዴ ኦዳው፤ ሄዋ ዲራው፥ ኔኒ ኢዞ ዬዳርኪ» ያጊዴ ዎሴዲኖ። ዬሱሲ ዛሪዴ፥ «ታኒ ባዬዳ ዶርሳው፥ ኢስራዔሊያ ኣሳ ፃላላው ኪቴታዲ» ያጌዳ። ሺን ኢዛ ያዴ፥ «ታ ጎዳው፥ ታና ማዳሪኪ!» ያጋዴ ኣው ጎዪናዱ። ቃሲ ኢ ዛሪዴ፥ «ናና ቁማ ኣኪዴ፥ ካና ማራው ኦሊያዌ ሎዓ ጊዴና» ያጌዳ። ሚሺራታ፥ «ኤ ታ ጎዳው፥ ሄዌ ቱማ፤ ሺን ሃራይ ኣቶ ካና ማራቱ ባሬንቱ ጎዳቱ ሚና፥ ሳምፓፔ ላሌቴዳ ሱፓ ሚኖቴኔ» ያጋዱ። ዬሱሲ ዛሪዴ ኢዞ፥ «ሃ ሚሺራቴ፥ ኔ ኣማኑ ዎልቃማ፤ ኔኒ ኮዬዳዋዳን ኔው ሃኖ» ያጌዳ። ኢዚ ናታ ኤሌካ ፓፃ ኣጋዱ። ዬሱሲ ሄዋፔ ዴንዲዴ፥ ጋሊላ ኣባ ማታ ቤዳ፤ ቃሲ ኢቲ ዴሪያ ቦላ ኬሲዴ፥ ሄዋን ኡቴዳ። ዳሮ ኣሳይ ዎባቱዋ፥ ቆቃቱዋ፥ ቁናቱዋኔ ዱዴቱዋ፥ ቃሲ ሃራ ጮራቱዋ ኣኮ ኣሂዴ፥ ኣ ማታን ዎꬄዳ። ዬሱሲ ኡንቱንታ ፓꬄዳ። ሄዋ ዲራው፥ ኣሳይ ዱዳቱ ሃሳዪሺን፥ ቁናቱ ሱሪሺን ዎባቱ ሃሜቲሺን፥ ቆቃቱ ፄሊሺን ቤዒ ማላሌቲዴ፥ ኢስራዔሊያ ፆሳ ጋላቴዲኖ። ዬሱሲ ባሬና ካሊያዋንታ ባሬኮ ፄሲዴ፥ «ሃ ጮራ ኣሳይ ታናና ሄዙ ጋላሳይ ጋካናው ጋሚዔዳ ዲራው፥ ታኒ ሃ ኣሳው ቃሬታይ፤ ኡንቱንቶ ሃዒ ሚያዌ ባዋ። ቃሲ ኡንቱንቱ ኦጊያን ዳቡሪዴ ኩንዴና ማላ፥ ቁማ ሚዜናን ኡንቱንታ ሜላ ዬዳናዉካ ኮዪኬ» ያጌዳ። ኣ ካሊያዋንቱ ዛሪዴ ዬሱሳ፥ «ኑኒ ሃ ባዙዋን ሃዋ ኬና ኣሳ ካሊሲያ ቁማ ሃቃፔ ዴማኔ?» ያጌዲኖ። ቃሲ ዬሱሲ ኡንቱንታ፥ «ሂንቴንቶ ኣፑን ኡኪꬃይ ዴዒ?» ያጊዴ ኦቼዳ። ኡንቱንቱ፥ «ላፑ ኡኪꬃይኔ ሞሌቱዋፔ ኣማሬዳዋንቱ ዴዒኖ» ያጌዲኖ። ዬሱሲ ኣሳ፥ «ሳዓን ኡቲቴ» ያጌዳ። ሄ ላፑ ኡኪꬃኔ ሞሊያ ኦይቂዴ፥ ፆሳ ጋላቴዳ፤ ሜንꬄሬꬂዴ ባሬና ካሊያዋንቱሲ ኢሜዳ፤ ቃሲ ኡንቱንቱ ጮራ ኣሳሲ ኢሜዲኖ። ኣሳይ ኡባይ ሚዴ ካሌዳ፤ ሚና ኣቴዳ ላፑ ዛምቤሊያ ኩሜዳ ሱፓ ኣ ካሊያዋንቱ ዴንꬄዲኖ። ሜዳ ኣሳይ ማጫ ኣሳኔ ናና ፓይዴናን፥ ኦይዱ ሻዓ ኣቱማ ኣሳ። ዬሱሲ ኣሳ ዬዶዋፔ ጉዪያን፥ ዎንጊሪያን ጌሊዴ፥ ሜጌዶኔ ጌቴቲያ ጋዲያ ቤዳ። ኢቲ ኢቲ ፓሪሳዋቱኔ ሳዱቃዋናቱ ዬሱሳኮ ዪዴ፥ ኣ ፓጫናው ኮዬዲኖ፤ ያቲዴ ባሬንታ ሳሉዋፔ ማላታ ቤሳና ማላ ዎሴዲኖ። ሺን ዬሱሲ ዛሪዴ፥ ኡንቱንታ ሃዋዳን ያጌዳ፤ «ሳዓይ ቃሚያ ዎዴ ሂንቴንቱ፥ ‹ሳሉ ዞዔዳ ዲራው፥ ሳዓይ ሻማናዋ› ያጊታ፤ ዎንቱማꬃን ቃሲ፥ ‹ሳሉ ዞዒዴ ጉባኔዳ ዲራው፥ ሃቼ ኢራይ ቡካናዋ› ያጊታ፤ ሳሉዋ ፄሊዴ፥ ሳዓይ ሃናናዋ ኤራናው ዳንዳዪታ፤ ሺን ታ ዩሳ ዎዲያ ማላታ ሻኪ ኤራናው ዳንዳይኪቴ? ሃ ዎዲያ ኣሳይ ኢታይኔ ዎሹሚያዌ፥ ፆሳው ኣማኔቴናዌ፥ ማላታ ኮዬ፤ ናቢያ ዮናሳ ማላታፔ ኣቲን፥ ሃራ ማላታይ ኣው ኢሜቴና» ያጌዳ። ሄዋፔ ሲሚዴ፥ ኡንቱንታ ኣጊዴ ቤዳ። ኣ ካሊያዋንቱ ኣባ ፒኔዳ ዎዴ፥ ቁማ ኣፋናዋ ዶጌዲኖ። ዬሱሲ ኡንቱንታ፥ «ፓሪሳዋቱዋ ኢርሹዋፔኔ ሳዱቃዋናቱዋ ኢርሹዋፔ ሂንቴንታ ኤሪዴ ናጌቲቴ» ያጌዳ። ኡንቱንቱ ባሬንቱ ጊዶን፥ «ኢ ሃዋ ያጊያዌ ኑኒ ቁማ ኣሂቤና ዲራሳ» ያጊዴ ሃሳያ ዶሜዲኖ። ሺን ኡንቱንቱ ጊያዋ ዬሱሲ ኤሪዴ፥ «ሃ ኣማኑ ፓጬዳዋንቶ፥ ቁማይ ባይና ዲራው፥ ኣዪሲ ሂንቴንቱ ጊዶን ሃሳዪቴ? ሃዒካ ሂንቴንቶ ጌሊቤኔ? ታኒ ኢቼሹ ኡኪꬃ ኢቼሹ ሻዓ ኣሳ ሚዛዴ ካሊሴዳዋ፥ ቃሲ ሂንቴንቱ ኣፑን ዛምቤሊያ ኩንꬂዴ ኣቴዳ ሱፓ ዴንꬄዲቴንቶ ዎዛና ኣꬂኪቴ? ዎይ ታኒ ላፑ ኡኪꬃ ኦይዱ ሻዓ ኣሳ ሚዛ ካሊሴዳዋ፥ ቃሲ ሂንቴንቱ ኣፑን ዛምቤሊያ ኩንꬂዴ ኣቴዳ ሱፓ ዴንꬄዲቴንቶ ዎዛና ኣꬂኪቴ? ታኒ ሂንቴንታ ፓሪሳዋቱዋ ኢርሹዋፔኔ ሳዱቃዋናቱዋ ኢርሹዋፔ ናጌቲቴ ጊያዋፔ ኣቲን፥ ኡኪꬃባ ሂንቴንቶ ሃሳያቤናዋ ሂንቴንቱ ዋኒዴ ኣኬኪኪቴ?» ያጌዳ። ኣ ካሊያዋንቱ ዬሱሲ ባሬንቶ ኦዴዳዋ፥ ፓሪሳዋቱዋ ቲሚርቲያፔኔ ሳዱቃዋናቱዋ ቲሚርቲያፔ ኡንቱንቱ ናጌታና ማላ ኦዴቶዋፔ ኣቲን፥ ሙናቃን ቲጊያ ኢርሹዋፔ ናጌታና ማላ ጊዴናዋ ሄ ዎዴ ኣኬኬዲኖ። ዬሱሲ ቂሳሪያ ፒሊጶሳ ጌቴቲያ ጋዲያ ጋኬዳ ዎዴ፥ ባሬና ካሊያዋንታ፥ «ኣሳይ ታና፥ ኣሳ ናዓ ኦና ጊ?» ያጊዴ ኦቼዳ። ኣ ካሊያዋንቱ ዛሪዴ፥ «ኔና ኢቲ ኢቲ ኣሳይ፥ ፃማቂያ ዮሃኒሳ ያጌ፤ ሃራንቱ ቃሲ ኤላሳ ያጊኖ፤ ቃሲ ሃራንቱ ኤርሚያሳ ዎይ ናባቱዋፔ ኢቱዋ ያጊኖ» ያጌዲኖ። ዬሱሲ ኡንቱንታ፥ «ያቲና ሂንቴንቱ ታና ኦና ጊቴ?» ያጌዳ። ሲሞኒ ጴፂሮሲ ዛሪዴ፥ «ኔኒ ዴዑዋ ፆሳ ናዓ ኪሪስቶሳ» ያጌዳ። ዬሱሲ ዛሪዴ፥ ሃዋዳን ያጌዳ፤ «ዮና ናዓ ሲሞና፥ ሃዋ ኔው ሳሉዋን ዴዒያ ታ ኣቡ ኤሪሴዳዋፔ ኣቲን፥ ኣሳይ ኦኒኔ ኔና ኤሪሲቤና ዲራው፥ ኔኒ ኣንጄቴዳዋ። ጴፂሮሳ፥ ታኒ ኔው ኦዳይ፤ ኔኒ ሹቻ፤ ታኒ ሃ ዛላ ቦላ ታ ዎሳ ጎሊያ ኬፃና፤ ታ ዎሳ ጎሊያ ሃራይ ኣቶ፥ ሲዖሊያ ዎልቃይካ ፆናናው ዳንዳዬና። ታኒ ኔው ሳሉዋ ካዉቴꬃ ቁልፒያ ኢማና፤ ኔኒ ሳዓን ሃኖ ጎዌ ኡባይ ሳሉዋን ፆሳ ሲንꬃን ሃናና፤ ሺን ኔኒ ሳዓን ሃኖፖ ጌዳዌ ሳሉዋንካ ሃኔና» ያጌዳ። ሄዋፔ ጉዪያን፥ ኢ ኪሪስቶሳ ጊዴዳዋ ኣ ካሊያዋንቱ ኦሲኔ ኦዴና ማላ፥ ኡንቱንታ ኣዛዜዳ። ሄ ዎዲያፔ ዶሚዴ ዬሱሲ፥ «ታኒ ዬሩሳላሜ ቢና፥ ታና ጪማቱ፥ ቄሳቱዋ ካፓቱኔ ሂጊያ ታማሪሲያዋንቱ ዳሪ ዋዪሳናው ቤሴ፤ ኡንቱንቱ ታና ዎꬋናዉኔ ታኒ ሄዜንꬆ ጋላሲ ሃይቁዋፔ ዴንዳናው ቤሴ» ያጊዴ፥ ባሬና ካሊያዋንቱሲ ጌሺዴ ኦዱዋ ዶሜዳ። ጴፂሮሲ ኣ ኢቲ ባጋ ዛሪዴ፥ «ታ ጎዳው፥ ፆሳይ ኔና ሄዋፔ ኣሾ፤ ሃዌ ኔ ቦላ ኡባካ ዬና» ያጊዴ ኣ ዞራናው ዶሜዳ። ሺን ዬሱሲ ጉዬ ሲሚዴ ጴፂሮሳ፥ «ሃ ሴፃናው፥ ኔኒ ታ ማታፔ ኪቻ፤ ኔኒ ኣሳይ ዶሲያዋ ቆፒያዋፔ ኣቲን፥ ፆሳይ ዶሲያዋ ቆፔና ዲራው፥ ታው ꬉቦ ጊዳዳ» ያጌዳ። ሄዋፔ ጉዪያን፥ ዬሱሲ ባሬና ካሊያዋንታ ሃዋዳን ያጌዳ፤ «ታና ካላናው ኮዪያ ኡራይ ዴዖፔ፥ ባሬና ካዶ፤ ያቲዴ ባሬ ማስቃሊያ ቶኪዴ፥ ታና ካሎ። ኣዪሲ ጎፔ፥ ባሬ ሼምፑዋ ኣሻናው ኮዪያ ኡራይ ባዪዛናዋ፤ ሺን ባሬ ሼምፑዋ ታ ዲራው ባዪዚያ ኡራይ ኣሻናዋ። ኢቲ ኡራይ ሳዓን ዴዒያ ኡባባ ባሬው ሺሺዴ፥ ባሬ ሼምፑዋ ባዪዞፔ፥ ኣ ኣያ ማዳኔ? ዎይ ኢቲ ኡራይ ባሬ ሼምፑዋ ዎዛናው ኣያ ኢማና ዳንዳዪ? ኣዪሲ ጎፔ፥ ታኒ፥ ኣሳ ናዓይ፥ ታ ኣቡ ቦንቹዋን ታ ኪታንቻቱዋና ያና ሃናይ፤ ኣሳ ኡባው ሄ ዎዴ ኣ ኦሱዋ ጋቲያ ኢማና። ታኒ ሂንቴንቶ ቱሙዋ ጋይ፤ ኣማሬዳ ኣሳቱ፥ ታኒ፥ ኣሳ ናዓይ፥ ካቲያ ጊዳዴ ዪያዋ ቤዓና ጋካናው፥ ሃይቄናዋንቱ ሃዋን ዴዒኖ» ያጌዳ። ዬሱሲ ኡሱፑን ጋላሳፔ ጉዪያን፥ ባሬናና ጴፂሮሳ፥ ያዪቆባኔ፥ ያዪቆባ ኢሻ ዮሃኒሳ ኣኪዴ፥ ኡንቱንቱ ፃላላ ዎጋ ዴሪያ ሁጲያ ኬሴዳ። ቃሲ ኡንቱንቱ ፄሊሺን፥ ኡንቱንቱ ሲንꬃን ላሜቴዳ፤ ኣ ዴሙ ኣዋይፊያዳን ፖዔዳ፤ ኣ ማዩካ ፖዑዋዳን ጶሌዳ። ሙሴኔ ኤላስ ዬሱሳና ሃሳዪሺን፥ ሃ ሄዙ ኣ ካሊያዋንቱ ቤዔዲኖ። ጴፂሮሲ ዬሱሳ፥ «ታ ጎዳው፥ ኑኒ ሃዋን ዴዒያዌ ኑሲ ሎዓ፤ ኔኒ ዶሶፔ፥ ኑኒ ሃዋን ሄዙ ዳሲያ ኢቱዋ ኔው፥ ኢቱዋ ሙሴው፥ ኢቱዋ ኤላሳው ኬፃና» ያጌዳ። ኢ ሃሳዪሺን፥ ፖዒያ ሻሪ ዪኔ ኡንቱንታ ካሚ ኣጌዳ፤ ሻሪያ ጊዶፔ፥ «ሃዌ ታኒ ሲቂያ ታና ናሼቺያ ታ ናዓ፤ ኢ ጊያዋ ሲሲቴ» ጊያ ቃላይ ዬዳ። ኣ ካሊያዋንቱ ሄ ቃላ ሲሴዳ ዎዴ፥ ዳሮ ያዪዴ፥ ጉፋኒ ኣጌዲኖ። ዬሱሲ ኡንቱንቱኮ ዪዴ፥ ኡንቱንታ ቦቺዴ፥ «ዴንዲቴ፤ ያዮፒቴ» ያጌዳ። ኡንቱንቱ ꬎቁ ጊዴ ፄሊያ ዎዴ፥ ዬሱሳ ፃላላፔ ኣቲን፥ ሃራ ኣሳ ኦናኔ ቤዒቤይኪኖ። ኡንቱንቱ ዴሪያፔ ዎꬊሺን፥ ዬሱሲ ኡንቱንታ፥ «ታኒ ኣሳ ናዓይ፥ ሃይቁዋፔ ዴንዳና ጋካናው፥ ሃ ሂንቴንቱ ቤዔዳዋ ኦሲኔ ኦዶፒቴ» ያጊዴ ኣዛዜዳ። ኣ ካሊያዋንቱ ዬሱሳ፥ «ያቲና፥ ሂጊያ ታማሪሲያዋንቱ ኣዪሲ፥ ‹ኤላስ ካሴቲዴ ያናው ቤሴ› ጊኖ?» ያጊዴ ኦቼዲኖ። ኢ ዛሪዴ ያጌዳ፤ «ኤላስ ካሴት ዪዴ፥ ኡባባ ጊጊሳናዋ። ሺን ታኒ ሂንቴንቶ ኦዳይ፤ ኤላስ ሃዋፔ ካሴ ዪዲጌዳ። ሄዎዴ ኣሳይ ኣ፥ ባሬንቶ ኮዬዳዋዳን ኡባ ኦꬄዳዋፔ ኣቲን ኣ ኤሪቤይኪኖ፤ ሄዋዳንካ፥ ቃሲ ታና፥ ኣሳ ናዓ፥ ኣሳይ ዋዪሳናዋ» ያጌዳ። ኣ ካሊያዋንቱ ሄ ዎዴ ባሬንቶ ዬሱሲ ፃማቂያ ዮሃኒሳባ ኦዲያዋ ኣኬኬዲኖ። ኡንቱንቱ ዳሮ ኣሳኮ ዬዳ ዎዴ፥ ኢቲ ቢታኒ ዬሱሳኮ ዪዴ፥ ኣ ሲንꬃን ጉልባቲዴ፥ «ታ ጎዳው፥ ታ ናዓ ዎዛና ባዪዚያ ሃርጊ ኦይቂና፥ ኢ ዳሮ ዎዴ ታማን፥ ቃሲ ዳሮ ዎዴ ሃꬃን ኩንዲያ ዲራው፥ ኢ ዳሪ ሳኬቴ፤ ኣ ፓꬃሪኪ። ኔና ካሊያዋንቱኮካ ኣ ኣሃዲ፤ ሺን ፓꬃናው ዳንዳዪቤይኪኖ» ያጌዳ። ዬሱሲ ዛሪዴ ኡንቱንታ፥ «ኣማኔና ሃ ዎዲያ ጌላ ኣሳው! ታኒ ሂንቴናና ኣዉዴ ጋካናው ዴዓኔ? ቃሲ ሂንቴንቱባ ኣዉዴ ጋካናው ዳንዳያኔ? ናዓ ታኮ ሃ ኣኪዴ ዪቴ» ያጌዳ። ዬሱሲ ኢታ ኣያና፥ «ኣፔ ኬሳ» ጊዴ ኣዛዚና፥ ኢታ ኣያናይ ናዓፔ ኬሲ ኣጌዳ፤ ኤሌካ ናዓይ ፓፂ ኣጌዳ። ሄዋፔ ጉዪያን፥ ኣ ካሊያዋንቱ ባሬንቱ ፃላላ ዬሱሳኮ ዪዴ፥ «ኑኒ ኢታ ኣያና ኬሳናው ኣዪሲ ዳንዳዪቤይኮ?» ያጌዲኖ። ዬሱሲ ኡንቱንታ ያጌዳ፤ «ሄዌ ሂንቴንቱ ኣማኑ ጉፄዳ ዲራሳ፤ ታኒ ሂንቴንቶ ቱሙዋ ኦዳይ፤ ሂንቴንቶ ሳናፊጪያ ጌቴቲያ ጉꬃ ሚꬃቲ ኣይፊያ ኬና ኣማኑ ዴዒንቶ፥ ሂንቴንቱ ሃ ዴሪያ፥ ‹ሃዋፔ ያ ሺቃ› ያጊንቶ ኢ ሺቃና፤ ሂንቴንቱ ኣያኔ ኦꬃናዉካ ዳንዳያኒታ። ሺን ሃዋ ማላ ዎሳፔኔ ፆማፔ ሃራባይ ኬሳናው ዳንዳዬና» ያጌዳ። ኣ ካሊያዋንቱ ጋሊላን፥ ኢቲፔ ሺቂ ኡቲ ዴዒሺን፥ ዬሱሲ ኡንቱንታ፥ «ታና፥ ኣሳ ናዓ፥ ኣሳይ ኣሳው ኣꬂዴ ኢማና። ኣሳይ ታና ዎꬋናዋ፤ ሄዋፔ ጉዪያን ታኒ ሄዜንꬂያ ጋላሲ ሃይቁዋፔ ዴንዳና» ያጌዳ። ኣ ካሊያዋንቱ ዳሮ ቃሬቴዲኖ። ዬሱሲኔ ኣ ካሊያዋንቱ ቂፊሪናሆማ ካታማ ዬዳ ዎዴ፥ ጌሻ ጎሊያሲ ቃራፃ ኣኪያዋንቱ ጴፂሮሳኮ ዪዴ፥ «ሂንቴንታ ታማሪሲያዌ ጌሻ ጎሊያ ጊራ ጊሬኔ?» ያጌዲኖ። ኢ ዛሪዴ፥ «ጊሬ» ያጌዳ። ጴፂሮሲ ሶይ ጌሌዳ ዎዴ፥ ዬሱሲ ካሴቲዴ ኣ፥ «ሲሞና፥ ኔ ቆፋይ ኣዬ? ሃ ሳዓ ካታቱ ቃራፃ ዎይ ጊራ ኦፔ ኣኪኖ? ባሬንቱ ጋዲያ ኣሳፔ ኣኪኖ ዎይ ሃራ ጋዲያ ኣሳፔ ኣኪኖ?» ያጌዳ። ጴፂሮሲ፥ «ሃራ ጋዲያ ኣሳፔ ኣኪኖ» ያጌዳ። ዬሱሲ ጴፂሮሳ፥ «ያቶፔ፥ ጋዲያ ኣሳይ ጊራናው ቤሴና። ሺን ኑኒ ሃ ኣሳቱዋ ሃንቄꬃናው ኮዮኮ፤ ኔኒ ኣባ ባዴ ኣኒ ዳባ ዬጋ፤ ያታዴ ኮይሮ ኬሲያ ሞሊያ ኦይቃዴ፥ ኣ ዶና ፖቂያ ዎዴ፥ ጊራው ጊዲያ ሚሻ ኔኒ ዴማና። ሄዋ ኣካዴ፥ ታ ጊራኔ ኔ ጊራ ኡንቱንቶ ኢማ» ያጌዳ። ኣ ካሊያዋንቱ ዬሱሳኮ ሄ ዎዴ ዪዴ፥ «ሳሉዋ ካዉቴꬃን ኡባፔ ኣꬊያዌ ኦኔ?» ያጌዲኖ። ዬሱሲ ኢቲ ጉꬃ ናዓ ፄሲ ኡንቱንቱ ጊዶን ኤሲዴ፥ ሃዋዳን ያጌዳ፤ «ታኒ ሂንቴንቶ ቱሙዋ ኦዳይ፤ ፆሳኮ ሂንቴንቱ ሲሚዴ፥ ጉꬃ ናናዳን ሃናና ꬋዮፔ፥ ሳሉዋ ካዉቴꬃ ኡባካ ጌላናው ዳንዳዪኪታ። ሲሚ ሃ ጉꬃ ናዓዳን፥ ባሬና ካዉሺያ ኦኒኔ ሳሉዋ ካዉቴꬃን ኡባፔ ኣꬊያዋ። ቃሲ ሃዋ ማላ ናዓ ታ ሱንꬃን ሞኪያ ኦኒኔ ታና ሞኬ። ሺን ታና ኣማኒያ ሃ ጉꬃ ናናፔ ኢቱዋ ባሌꬂያ ኦኒኔ፥ ጋጪያ ዎጋ ዎፃ ባሬ ቆꬊያን ቃቺዴ፥ ኣባ ጪሙዋን ሚቴቲያዌ ኣው ሎዓ። «ኣላሚ ኣሳ ꬉቢያ ዲራው፥ ሳዓው ኣዬሮ፤ ኣዪሲ ጎፔ፥ ꬉቢያባይ ዩሳ ኣጌና፤ ሺን ꬉቡ ኣ ጋሶታን ዪያ ኡራው ኣዬሮ። «ኔና ኩሺ ዎይ ኔ ጌዲ ኔና ባሌꬆፔ፥ ኔፔ ቃንፃ ኦላ፤ ኔኒ ላዑ ኩሺያናኔ ላዑ ጌዲያና ሜꬊና ታማን ኦሌቲያዋፔ ዎባ ዎይ ዱፃ ኩሺያና ሜꬊና ዴዑዋ ጌሊያዌ ኔው ሎዓ። ቃሲ ኔ ኣይፊ ኔና ባሌꬆፔ፥ ኔፔ ዎጫ ኬሳ ኦላ፤ ኔኒ ላዑ ኣዪፊያና ጋናሚያ ታማን ኦሌቲያዋፔ ኢቲ ኣዪፊያና ሜꬊና ዴዑዋ ጌሊያዌ ኔው ሎዓ። «ሂንቴንቱ ሃ ጉꬃቱዋፔ ኢቱዋኔ ካꬌና ማላ፥ ሂንቴንታ ናጊቴ፤ ኣዪሲ ጎፔ፥ ታኒ ሂንቴንቶ ኦዳይ፤ ሳሉዋን ኡንቱንቱ ኪታንቻቱ ኡባ ዎዴ፥ ሳሉዋን ዴዒያ ታ ኣቡ ሲንꬃን ዴዒኖ። ኣዪሲ ጎፔ፥ ታኒ፥ ኣሳ ናዓይ፥ ባዬዳዋ ኣሻናው ያዲ። «ኢቲ ኣሳው ፄቱ ዶርሳቱ ዴዒያዋንቱፔ ኢቱ ባዮፔ፥ ኡዱፑ ታማኔ ኡዱፑኑዋ ዴሪያን ኣጊዴ፥ ሄ ባዬዳዋ ኮያናው ቤኔ? ሂንቴንቱ ዋጊቴ? ታኒ ሂንቴንቶ ቱሙዋ ጋይ፤ ኢ ዴሞፔ፥ ባዪቤና ኡዱፑ ታማኔ ኡዱፑ ዶርሳቱዋፔ ኣꬂዴ፥ ሄ ኢቲ ዶርሳን ናሼቴ። ሄዋዳንካ፥ ሳሉዋን ዴዒያ ሂንቴንቱ ኣቡ ሃ ጉꬃቱዋፔ ኢቱ ባያናዋካ ኮዬና። «ኔ ኢሻይ ኔና ናቆፔ፥ ኔሬካ ኣኮ ባዴ፥ ኣ ናቁዋ ኣው ኦዳ፤ ኢ ኔዋ ሲሶፔ፥ ኔ ኢሻ ባላፔ ዛራዳ። ሺን ኢ ኔዋ ሲሴናን ኢፆፔ፥ ላዑ ዎይ ሄዙ ማርካይ ማርካቶዋን ዬዉ ኡባይ ቱማቲያ ዲራው፥ ሃራ ኢቲ ዎይ ላዑ ኣሳ ኔናና ኢቲፔ ኣፋ። ኢ ኡንቱንቱባ ሲሴናን ኢፆፔ፥ ኡባባ ኣማኒያ ኣሳው ኦዳ፤ ቃሲ ኣማኒያ ኣሳይ ጊያዋካ ኢ ሲሴናን ኢፆፔ፥ ኣማኔና ኣሳዳኒኔ ቃራፃ ሺሺያ ኣሳዳን ኣ ፓይዳ። «ታኒ ሂንቴንቶ ቱሙዋ ጋይ፤ ኔኒ ሳዓን ሃኖ ጎዌ ኡባይ ሳሉዋን ፆሳ ሲንꬃን ሃናና፤ ሺን ኔኒ ሳዓን ሃኖፖ ጌዳዌ ሳሉዋንካ ሃኔና። «ቃሲካ ታኒ ሂንቴንቶ ኦዳይ፤ ሂንቴፔ ላዑ ኡራይ ሳዓን ፆሳ ዎሲያዋን ኣይ ዬዉዋኒኔ ኢቲ ዎዛና ጊዶፔ፥ ሳሉዋን ዴዒያ ታ ኣቡ ሄዋ ሂንቴንቶ ኢማና። ኣዪሲ ጎፔ፥ ላዑ ኡራይ ዎይ ሄዙ ኡራይ ታ ሱንꬃን ሺቂያሳን፥ ታኒ ሄዋን ኡንቱንቱ ጊዱዋን ዴዓይ» ያጌዳ። ጴፂሮሲ ሄ ዎዴ ዬሱሳኮ ዪዴ፥ «ጎዳው፥ ታ ኢሻይ ታና ኣፑ ካላ ናቆፔ ታኒ ኣው ኣቶ ጋናው ቤሲ? ላፑኑዋ ጋካናው ናቂኔዬ?» ያጊዴ ኣ ኦቼዳ። ዬሱሲ ዛሪዴ ኣ፥ «ጊዴና፥ ታኒ ኔና ላፑን ታሙ ካላ ላፑኑዋ ጋዪፔ ኣቲን፥ ላፑኑዋ ፃላላ ጊኬ። «ኣዪሲ ጎፔ፥ ሳሉዋ ካዉቴꬃይ ባሬ ቆማቱዋና ሚሻ ሄቴታናው ቆፔዳ ካቲያ ቤሴ። ሄ ካቲ ሚሻ ሄቴታናው ዶሜዳ ዎዴ፥ ዳሮ ሚሎኔ ቢራ ኣጩ ዴዒያ ኢቲ ቢታኒያ ኣኮ ኣሄዲኖ። ሺን ሄ ቆማው ኣጩዋ ጪጊያዌ ꬋዪና፥ ኣ ጎዳይ ሄ ኣጩዋ ጪጋናው፥ ኣ ማቻታኔ ኢኔ ኣ ናናይ፥ ቃሲ ኣው ዴዒያ ኡባባይ ዛሊዔታና ማላ፥ ኣ ኣዛዜዳ። ሄዋ ዲራው፥ ቆማይ ባሬ ጎዳ ሲንꬃን ጉልባቲዴ፥ ‹ታ ጎዳው፥ ሃያጎዶ ጉꬃ ዎዲያ ናጋሪኪ፤ ታኒ ኔው ኡባባካ ጪጋና ያጊዴ ኣ ዎሴዳ። ኣ ጎዳይ ኣው ቃሬቲዴ፥ ኣ ዬዲ ኣጌዳ፤ ኣ ኣጩዋካ ኣው ማሪ ኣጌዳ። «ሺን ሄ ቆማይ ኬሲዴ፥ ባሬ ላጌꬃ ቆማቱዋፔ ኢቱ ባሬፔ ፄቱ ቢራ ሳንቲሚያ ታልዔዳዋና ጋኬቲዴ፥ ‹ኔ ቦላ ዴዒያ ታ ሚሻ ጪጋ› ያጊ ኦይቂዴ፥ ኣ ጩሌዳ። «ያቲና ሄ ኣ ላጌꬃ ቆማይ ኣ ሲንꬃን ጉልባቲዴ፥ ‹ሃዒ ታዒሻይ ጉꬃ ዎዲያ ናጋሪኪ፤ ታኒ ኔው ኡባባካ ጪጋና› ያጊዴ ኣ ዎሴዳ። «ሺን ኢፂ ኣኪ ቢዴ፥ ኣ ላጌꬃይ ሄ ኣጩዋ ቃንፃና ጋካናው፥ ቃሾ ጎሌ ጌሊሴዳ። ሄዋ ዲራው፥ ኣ ላጌꬃ ቆማቱ ሄዋ ቤዒዴ፥ ዳሮ ዪሎቴዲኖ፤ ባሬንቱ ጎዳኮ ቢዴ፥ ኢ ኦꬄዳ ኡባባ ኣው ኦዴዲኖ። «ሄዋፔ ጉዪያን፥ ጎዳይ ሄ ቆማ ፄሲዴ፥ ‹ሃ ኢታ ቆማው፥ ኔኒ ታና ዎሴዳ ዲራው፥ ታኒ ሄ ኣጩዋ ኡባ ኔው ማራ ኣጋዲ። ታኒ ኔው ሄ ኣጩዋ ማሬዳዋዳን፥ ኔኒካ ኔ ላጌꬃ ቆማው ማራናው ቤሴኔ?› ያጌዳ። ሄዋፔ ሲሚዴ ኣው ዳሮ ሃንቄቲዴ፥ ባሬ ኣጩዋ ኡባ ኢ ጪጊ ዉርሳና ጋካናው፥ ፓፃ ካዔታና ማላ፥ ቃሾ ጎሌ ጌሊሴዳ። «ሂንቴንቱ ሁጲያን ሁጲያን ሂንቴንቱ ኢሻው ዎዛናፔ ኣቶ ጋና ꬋዮፔ፥ ሄ ጎዳይ ባሬ ቆማ ኦꬄዳዋዳን፥ ሳሉዋን ዴዒያ ታ ኣቡካ ሂንቴንታ ሄዋዳን ኦꬃና» ያጌዳ። ዬሱሲ ሄ ሃሳያ ዉርሶዋፔ ጉዪያን፥ ጋሊላፔ ዴንዲዴ፥ ዮርዳኖሳ ሻፋፔ ሄፊንꬃን ዴዒያ ዪሁዳ ጋዲያ ቤዳ። ዳሮ ኣሳይ ኣ ካሊዴ ቤዳዋ ሄዋን ፓꬄዳ። ኢቲ ኢቲ ፓሪሳዋቱ ፓጫናው ዬሱሳኮ ዪዴ፥ «ኢቲ ኣሳይ ኣይ ጋሱዋኒኔ፥ ባሬ ማቻቶ ዬዳናው ኑ ሂጊ ኣዛዚ?» ያጊዴ ኣ ኦቼዲኖ። ዬሱሲ ዛሪዴ፥ ሃዋዳን ያጌዳ፤ «ፆሳይ ኮይሮ ኡንቱንታ ሜꬊዴ፥ ኣቱማዋኔ ማጫዉኖ ኦꬄዳ። ሄዋ ዲራው፥ ‹ኢቲ ኣሳይ ባሬ ኣባኔ ባሬ ዳዮ ኣጊዴ፥ ባሬ ማቻቲና ኢቲፔ ዴዔ፤ ኡንቱንቱ ላዑ ኢቲ ኣሳ ጊዲኖ› ያጊያ ቃላ ናባቢቤይኪቴ? ሄዋ ዲራው፥ ኡንቱንቱ ኢቲ ኣሳ ጊዲያዋፔ ኣቲን፥ ላዑ ኣሳ ጊዲኪኖ፤ ሄዋ ዲራው፥ ፆሳይ ኢቲፔ ዴዓናዳን ጋꬆዋ ኣሳይ ሻኮፖ» ያጌዳ። ፓሪሳዋቱ ዬሱሳ፥ «ያቲና፥ ሙሴ ኣያው ኢቲ ኡራይ ባሬ ማቻቶ ፒሪማ ፔꬊዴ ዬዳና ማላ ኣዛዜዴ?» ያጌዲኖ። ዬሱሲ ዛሪዴ፥ «ሂንቴንቱ ሂንቴንቱ ማቻቱዋ ዬዳና ማላ፥ ሙሴ ሂንቴንታ ኣዛዜዳዌ፥ ሂንቴንቱ ኦዲና ሲሴና ጉዙማ ጊዶ ዲራፔ ኣቲን፥ ኮይሮ ሄዋ ማላ ጊዴና። ታኒ ሂንቴንቶ ኦዳይ፤ ባሬ ማቻቶ ዎሹሜናን ዴዒሺን ዬዲዴ፥ ሃራሮ ኣኪያ ኦኒኔ ዎሹሜ፤ ሃራይ ዬዴዳዉኖ ኣኪያዌካ ዎሹሜ» ያጌዳ። ዬሱሳ ካሊያዋንቱ ኣ፥ «ኣሲና ጊዱዋኒኔ ማቻቲ ጊዱዋን ዴዒያ ዎጋይ ሄዋ ማላ ጊዶፔ፥ ኣኬናኒኔ ጌሌናን ዴዒያዌ ሎዓ» ያጌዲኖ። ሺን ዬሱሲ ኡንቱንታ ያጌዳ፤ «ሄዋ ማላ ቲሚርቲ ፆሳይ ኢሞዋንቱሳፔ ኣቲን፥ ኣሳ ኡባሳ ጊዴና፤ ኣያው ጎፔ፥ ባሬንቱ ዳዪ ኡሉዋፔ ዬሌቲያ ዎዴካ፥ ሹፋ ጊዴዳዋንቱ ዴዒኖ፤ ቃሲ ኣሳይ ቃራቲና ሙሬሳ ጊዴዳዋንቱ ዴዒኖ፤ ቃሲ ሳሉዋ ካዉቴꬃ ዲራው፥ ባሬንታ ሹፋ ኡዴዳዋንቱ ዴዒኖ፤ ሃ ቲሚርቲያ ኣካናው ዳንዳዪያዌ ኦኒኔ ኣኮ» ያጌዳ። ዬሱሲ ሄ ዎዴ ባሬ ኩሺያ ጉꬃ ናና ቦላ ዎꬂዴ፥ ፆሳ ዎሳና ማላ፥ ኢቲ ኢቲ ኣሳይ ናና ኣኮ ኣሄዳ፤ ሺን ዬሱሳ ካሊያዋንቱ ሄ ኣሳ ኣሄና ማላ ሃንቄቴዲኖ። ሺን ዬሱሲ፥ «ቄሪ ናናይ ታኮ ዪያዋ ዲጎፒቴ፤ ኣያው ጎፔ፥ ሳሉዋ ካዉቴꬃይ ሄዋንቱ ማላሳ» ያጌዳ። ሄዋፔ ሲሚዴ ባሬ ኩሺያ ኡንቱንቱ ቦላ ዎꬄዳዋፔ ጉዪያን፥ ሄዋፔ ባሺ ቤዳ። ኢቲ ቢታኒ ዬሱሳኮ ዪዴ፥ «ታማሪሲያዎ፥ ታኒ ሜꬊና ዴዑዋ ዴማናው ሎዖባ ኣያ ኦꬆ?» ያጌዳ። ዬሱሲ ኣ፥ «ሎዖባይ ኣዬንቶ ታና ኣያው ኦቻይ? ኢቱዋ ፃላላይ ሎዓ፤ ሺን ኔኒ ሜꬊናው ዴዓናው ኮዮፔ፥ ኣዛዛቱዋ ናጋ» ያጌዳ። ቢታኒ፥ «ሃቃዋንታ?» ያጊዴ ኦቼዳ። ዬሱሲ ዛሪዴ፥ «ዎꬎፓ፤ ዎሹሞፓ፤ ዉዖፓ፤ ዎርዱዋ ማርካቶፓ፤ ኔ ኣባኔ ኔ ዳዮ ቦንቻ፤ ኔ ሾሩዋካ ኔ ሁጲያዳን ሲቃ» ያጌዳ። ሄ ያላጋ ቢታኒ ዬሱሳ፥ «ታኒ ሄዋ ኡባካ ጉꬃቴꬃፔ ዶማዴ ናጋዲ፤ ያቲና፥ ታው ፓጪያዌ ኣዬ?» ያጌዳ። ዬሱሲ ቢታኒያ፥ «ኔኒ ፖሎ ኣሳ ጊዳናው ኮዮፔ፥ ባዴ ኔው ዴዒያዋ ዛሊዓዴ፥ ሄ ሚሻ ሂዬሳው ኢማ፤ ኔኒ ሳሉዋን ዱሬታና፤ ያታዴ ያዴ ታና ካላ» ያጌዳ። ሺን ሄ ያላጋ ቢታኒ ሄዋ ሲሴዳ ዎዴ፥ ኢ ዳሮ ዱሬ ጊዲያ ዲራው፥ ቃሬቲዴ ባሺ ቤዳ። ዬሱሲ ባሬና ካሊያዋንቱሲ፥ «ታኒ ሂንቴንቶ ቱሙዋ ጋይ፤ ዱሬ ኣሳይ ሳሉዋ ካዉቴꬃ ጌላናዌ ዳሮ ሜቶ ጊዳናዋ። ታኒ ጉጃዴካ ሂንቴንቶ ኦዳይ፤ ዱሬ ኣሳይ ፆሳ ካዉቴꬃ ጌላናፔ፥ ጋሉ ማርፒያ ሉኩዋና ኣꬋናዌ ማታቴ» ያጌዳ። ኣ ካሊያዋንቱ ሄዋ ሲሲ ማላሌቲዴ፥ «ያቲና፥ ኦኒ ኣታናው ዳንዳዪ?» ያጌዲኖ። ዬሱሲ ኡንቱንታ ጫዲ ፄሊዴ፥ «ሃዌ ኣሳው ዳንዳዬቴና፤ ሺን ፆሳው ኡባባይ ዳንዳዬቴ» ያጌዳ። ጴፂሮሲ ሄ ዎዴ ዛሪዴ ዬሱሳ፥ «ቤዓ፥ ኑኒ ኑሲ ዴዒያ ኡባባ ባሺዴ፥ ኔና ካሌዶ፤ ያቲዴ ኑኒ ኣያ ዴማኔሻ?» ያጌዳ። ዬሱሲ ኡንቱንታ ሃዋዳን ያጌዳ፤ «ታኒ ሂንቴንቶ ቱሙዋ ጋይ፤ ታኒ፥ ኣሳ ናዓይ፥ ኦራꬃ ጋዲያን ታ ካዉቴꬃ ኦይዲያን ኡቲያ ዎዴ፥ ታና ካሌዳ ሂንቴንቱካ ታማኔ ላዑ ኢስራዔሊያ ዛራቱዋ ቦላ ፒርዳናው፥ ታማኔ ላዑ ካዉቴꬃ ኦይዲያን ኡታኒታ። ታ ሱንꬃ ዲራው፥ ጎሊያ ዎይ ኢሻቱዋ ዎይ ሚቻቱዋ፥ ዎይ ኣዉዋ ዎይ ኣቶ ዎይ ማቻቶ፥ ዎይ ናና ዎይ ጋዲያ ኣጌዳ ኦኒኔ፥ ፄቱ ዳኩዋፔ ዳሩዋ ኣካና፤ ቃሲ ሜꬊና ዴዑዋካ ላታና። ሺን ጮራቱ ሃዒ ሲንꬃቴዳዋንቱ ጉዬታናዋንታ፤ ቃሲ ጮራቱ ሃዒ ጉዬን ዴዒያዋንቱ ሲንꬃታናዋንታ። «ሳሉዋ ካዉቴꬃይ ዎዪኒያ ጌቴቲያ ቱራ ጊዱዋ ኦꬂያዋንታ ኡኒያ ኦሲሳናው፥ ዎንታ ጉራን ኬሴዳ ዎዪኒያ ቱራ ጎዳ ቤሴ። ኢ ሄ ኦሳንቻቶ ሃቼ ሃቼ ኦꬄዳዋ ዎልቃ ጋቲያ ጪጋናው ኡንቱንቱና ጊጊዴ፥ ባሬ ዎዪኒያ ቱራ ጊዱዋ ኦሲሳናው ኡንቱንታ ዬዴዳ። «ቃሲ ሄዙ ሳቲያ ጊዶዴ ኬሲዴ፥ ኦሱ ባይናን ቆጫን ኤቄዳ ሃራ ኣሳቱዋ ቤዒዴ፥ ኡንቱንታ፥ ‹ሂንቴንቱካ ቃሲ ታ ዎዪኒያ ቱራ ጊዱዋ ኦꬃናው ቢቴ፤ ታኒ ሂንቴንቶ ቤሲያ ጋቲያ ጪጋና› ያጌዳ፤ ሄዋፔ ጉዪያን ኡንቱንቱ ቤዲኖ። ላዔꬁዋካ ኡሱፑን ሳቲያኒኔ ኡዱፑ ሳቲያን ኬሲዴ፥ ሄዋዳን ኦꬄዳ። ታማኔ ኢቲ ሳቲያ ሄራን ኢ ኬሲያ ዎዴ፥ ሃራንቱ ሄዋን ኤቄዳዋንታ ዴሚዴ፥ ‹ኦሱዋ ኦꬄናን ኩሜንꬃ ጋላሳ ሃዋን ኣያው ኤቂ ፔሼዲቴ?› ያጌዳ። «ኡንቱንቱ፥ ‹ኑና ኦሲሲያ ኣሳይ ꬋዬዳ ዲራው ኤቂ ፔሼዶ› ያጌዲኖ። «ኢ፥ ‹ሂንቱንቱካ ቃሲ ታ ዎዪኒያ ቱራ ጊዱዋ ኦꬃናው ቢቴ› ያጌዳ። «ሳዓይ ኦማርሲያ ዎዴ፥ ዎዪኒያ ቱራ ጎዳይ ኦꬂያዋንቱ ካፑዋ፥ ‹ኦሳንቻቱዋ ፄሳዴ፥ ዉርሴꬃን ኦሱዋን ጌሌዳዋንቱፔ ዶማዴ ኮይሮ ጌሌዳዋንታ ጋካናው፥ ኡንቱንቱ ኦሱዋ ዲርጉዋ ጪጋ› ያጌዳ። «ታማኔ ኢቲ ሳቲያ ሄራን ኦሱዋ ዶሜዳዋንቱ ዪዴ፥ ሁጲያን ሁጲያን ኦꬂዴ ፔሼዳ ዎልቃ ጋቲያ ኣኬዲኖ። ኮይሮ ኦሱዋ ዶሜዳ ኣሳይ ዬዳ ዎዴ፥ ዳሩዋ ኣካናው ቆፔዲኖ፤ ሺን ኡንቱንቱካ ሁጲያን ሁጲያን ባሬንቱ ኦሱዋ ዎልቃ ጋቲያ ኣኬዲኖ። ሄዋፔ ጉዪያን፥ ‹ሃ ጉዬፔ ዬዳዋንቱ ኢቲ ሳቲያ ፃላላ ኦꬄዲኖ፤ ኩሜንꬃ ጋላሳ ዳቡሪዴ ጫዎቴዳ ኑዋና ኡንቱንቱ ኦሱዋ ዲርጉዋ ቃራ ኦꬃዳ› ያጊዴ ባሬንታ ኦሱዋን ጌሊሴዳዋ ቦላ ዙዙሜዲኖ። *** «ሺን ኢ ኡንቱንቱፔ ኢቱዋ ሃዋዳን ያጌዳ፤ ‹ታ ላጌው፥ ታኒ ኔና ናቃቤይኪ፤ ኦꬃዴ ፔሼዳ ዎልቃ ጋቲያ ታናና ጊጋቤይኪዬ? ኔዋ ኣካዴ ባ፤ ታኒ ሃዒ ዉርሴꬃን ኦሱዋን ጌሌዳዎካ ኔዋ ኬና ኢማናው ኮያይ። ታኒ ታ ሚሻን ታ ኮዬዳዋዳን ኦꬃናው ታው ማታይ ባዌ? ዎይ ታኒ ሎዓ ጊዴዳ ዲራው፥ ኔኒ ቃናታይ?› ያጌዳ። «ሄዋዳንካ፥ ቃሲ ጉዬቴዳዋንቱ ሲንꬃታናዋንታ፤ ሲንꬃቴዳዋንቱ ቃይ ጉዬታናዋንታ፤ ኣያው ጎፔ፥ ፄሴቴዳዋንቱ ጮራ፤ ሺን ዶሬቴዳዋንቱ ጉꬃ» ያጌዳ። ዬሱሲ ዬሩሳላሜ ቢዴ፥ ኦጊያን ባሬናና ቢያ ታማኔ ላዑ ባሬና ካሊያዋንታ ጋፃ ኬሲዴ፥ ዱማ ኡንቱንቱሲ ያጌዳ። «ቤዒቴ፥ ኑኒ ዬሩሳላሜ ሃዒ ኬሴቶ። ያኒ ታና፥ ኣሳ ናዓ ቄሳቱዋ ካፓቱዋሲኔ ሂጊያ ታማሪሲያዋንቱሲ ኣꬂዴ ኢማናዋንታ፤ ኡንቱንቱ ታ ቦላ ሃይቁዋ ፒርዳ ፒርዳናዋንታ። ቃሲ ኣዪሁዳ ጊዴና ኣሳሲካ ታና ኣꬂዴ ኢማናዋንታ፤ ሄ ኣዪሁዳ ጊዴና ኣሳይ ታ ቦላ ቂሊጫናዋንታኔ ታና ሊሱዋን ሾጫናዋንታ፤ ያቲዴ ማስቃሊያ ቦላ ሚሲማሪያን ꬊሺዴ፥ ታና ካቃናዋንታ፤ ታኒ ሄዜንꬂያ ጋላሲ ሃይቁዋፔ ዴንዳና» ያጌዳ። ሄ ዎዴ ዛቢዲዮሳ ናና ዳያ ባሬ ናናና ዬሱሳኮ ያዱ፤ ኣ ሲንꬃን ጉልባታዴ ኢቲባ ኣ ዎሳዱ። ዬሱሲ ኢዞ፥ «ኣያ ኮያይ?» ያጊዴ ኦቼዳ። ኢዛ ዛራዴ፥ «ሃ ታ ላዑ ናናይ ኔ ካዉቴꬃን ኢቱ ኔፔ ኡሼቻ ባጋና፥ ቃሲ ኢቱ ኔፔ ሃዲርሳ ባጋና ኡቲኖ ያጋሪኪ» ያጋዴ ዎሳዱ። ሺን ዬሱሲ ዛሪዴ ናና፥ «ሂንቴንቱ ኣያ ዎሳናው ቤሲንቶ ኤሪኪታ። ታና ጋኪያ ዎሊቃማ ሜቱዋ ሜቶታኒቴ? ታኒ ፃማቄታና ፂንቃታ ፃማቄታናው ዳንዳዪቴ?» ያጌዳ። ኡንቱንቱ፥ «ኤ ዳንዳያና» ያጌዲኖ። ዬሱሲ፥ «ታና ጋኪያ ዎሊቃማ ሜቱዋ ቱማካ ሂንቴንቱ ሜቶታኒታ፤ ሺን ታፔ ኡሼቻ ባጋናኔ ሃዲርሳ ባጋና ኡታናዋንታ ዶራናው ታው ማታይ ባዋ፤ ሺን ሄ ሳዓይ ታ ኣቡ ኢማናው ጊጊሲ ዎꬄዳዋንቱሳ» ያጌዳ። ዮኮ ታሙ ዬሱሳ ካሊያዋንቱ ሄዋ ሲሴዳ ዎዴ፥ ሄ ላዑ ኢሻቱዋሲ ሃንቄቴዲኖ። ሺን ዬሱሲ ኡንቱንቱ ኡባቱዋካ ባሬኮ ፄሲዴ፥ ሃዋዳን ያጌዳ፤ «ኣሂዛቤ ኣሳቱዋ ካፓቱኔ ሃዋንታ ካሌꬂያ ኣሳቱ ባሬንቱ ኣሳ ኣዪሲያዋ ኤሪታ። ሂንቴንቱ ጊዱዋን ሄዋ ማላ ጊዴና፤ ሺን ሂንቴንቱ ጊዱዋን ꬎቃቴꬃ ኮዪያ ኦኒኔ ሂንቴንቶ ቆማ ጊዳናው ቤሴ። ቃሲ ሂንቴንቱ ጊዱዋን ኡባፔ ቦላ ጊዳናው ኮዪያዌ ኦኒኔ ሂንቴንቶ ኣይሌ ጊዳናው ቤሴ። ሄዋዳን ታኒ፥ ኣሳ ናዓይ፥ ኣሳው ኦꬃናዉኔ ዳሮ ኣሳ ዎዛናው ታ ሼምፑዋ ኢማናው ዬዳዋፔ ኣቲን፥ ኣሳይ ታው ኦꬃና ማላ ያቤይኬ» ያጌዳ። ዬሱሲኔ ኣ ካሊያዋንቱ ኢያርኮፔ ኬሲሺን፥ ዳሮ ኣሳይ ኡንቱንታ ካሌዳ። ላዑ ቆቃ ኣሳቱ ኦጊያ ዶናን ኡቴዳዋንቱ ዬሱሲ ሄዋና ኣꬊያዋ ሲሲዴ፥ ባሬንቱ ኮሻ ꬎቁ ኦꬂዴ፥ «ጎዳው፥ ዳዊታ ናዓው፥ ኑሲ ቃሬታሪኪ» ያጌዲኖ። ዳሮ ኣሳይ ኡንቱንታ፥ «ሃይዚቴ» ጊዴ ሃንቄቴዳ፤ ሺን ኡንቱንቱ ባሬንቱ ኮሻ ዳሪ ꬎቁ ኦꬂዴ፥ «ጎዳው፥ ዳዊታ ናዓው፥ ኑና ማራሪኪ!» ያጌዲኖ። ዬሱሲ ኦጊያን ኤቂዴ፥ ኡንቱንታ ፄሲዴ፥ «ታኒ ሂንቴንቶ ኣያ ኦꬃና ማላ ኮዪቴ?» ያጌዳ። ቆቃቱ፥ «ጎዳው፥ ኑ ኣይፊያ ፓꬃሪኪ» ያጌዲኖ። ዬሱሲ ኡንቱንቶ ቃሬቲዴ፥ ኡንቱንቱ ኣይፊያ ቦቼዳ፤ ኤሌካ ኡንቱንቱ ኣይፊ ፄሊ ኣጊና፥ ኣ ካሊ ኣጌዲኖ። ኡንቱንቱ ዬሩሳላሜ ማቲዴ፥ ዴብሬ ዛይቴ ጌቴቲያ ዴሪያ ላንቂያን ዴዒያ ቤቴፋጌ ጌቴቲያ ቄሪ ካታማ ጋኬዲኖ፤ ዬሱሲ ባሬና ካሊያዋንቱፔ ላዑዋ ሲንꬃው ኪቲዴ፥ ኡንቱንታ ሃዋዳን ያጌዳ፤ «ሂንቴንቱፔ ሲንꬃን ዴዒያ ቄሪ ካታማ ቢቴ፤ ሄዋን ኢቲ ሃራታ ቃሹዋን ዴዔዉኖ ኢዚ ማራና ሂንቴንቱ ቢ ሲሞ ሳንካ ዴማኒታ፤ ኡንቱንታ ቢሊዴ፥ ታው ኣኪ ዪቴ። ኦኒኔ ሂንቴንታ ኦቾፔ፥ ‹ጎዳይ ሃዋንታ ኮዬ› ያጊቴ፤ ኤሌካ ኢ ኡንቱንታ ዬዲ ኣጋናዋ።» ቲምቢቲያ ኦዲያ ናቢ፥ «ፂዮኔ ካታማ ኣሳው፥ ‹ቤዓ፥ ኔ ካቲ ኣሺኬ ጊዲዴ፥ ሃሪያ ቦላ፥ ሃሬ ማራ ቦላ ኡቲዴ፥ ኔኮ ዬ› ያጊቴ» ያጊዴ ሃሳዬዳዌ ፖሌታና ማላ፥ ሃዌ ሃኔዳ። *** ኣ ካሊያዋንቱ ቢዴ፥ ዬሱሲ ባሬንታ ኣዛዞዋዳን ኦꬄዲኖ። ሃራቶኔ ሃሬ ማራ ኣሂዴ፥ ባሬንቱ ማዩዋ ኡንቱንቱ ዞኪያን ዎꬄዲኖ፤ ሄዋፔ ሲሚና ዬሱሲ ቶጌዳ። ሄ ጮራ ኣሳፔ ዳሪያ ባጋይ ባሬ ማዩዋ ኦጊያን ሂፄዳ፤ ቃሲ ሃራንቱ ሚꬃ ሃይꬃ ካር ካሪዴ፥ ኦጊያን ዬጌዲኖ። ዬሱሳፔ ሲንꬃና ሃሜቲያ ጮራ ኣሳይኔ ቃሲ ኣ ጌዱዋ ካሊያ ጮራ ኣሳይ፥ ባሬንቱ ኮሻ ꬎቁ ኦꬂዴ፥ «ዳዊታ ናዓይ ጋላቴቶ! ጎዳ ሱንꬃን ዪያዌ ኣንጄቴዳዋ! ፆሳይ ጋላቴቶ!» ያጌዳ። ዬሱሲ ዬሩሳላሜ ካታማ ጌሌዳ ዎዴ፥ ካታማን ዴዒያ ኣሳይ ኡባይ፥ «ሃዌ ኦኔ?» ያጊዴ ሻቢሬቴዲኖ። ኣሳይ፥ «ሃዌ ጋሊላን ዴዒያ ናዚሬቴ ጌቴቲያ ካታማፔ ዬዳ ናቢያ ዬሱሳ» ያጌዳ። ዬሱሲ ጌሻ ጎሊያ ጌሊዴ፥ ሄዋን ዛሊዒያዋንታኔ ሻሚያዋንታ ኡባ ካሬ ዬዴርሴዳ፤ ቃሲ ሚሻ ላሚያዋንቱ ፃራጴዛኔ ዶጎሙዋ ዛሊዒያዋንቱ ኦይዲያ ጉጲ ዬጊዴ፥ ኡንቱንታ፥ «ፆሳ ማፃፋን፥ ‹ታ ጎሊ ፆሳ ዎሲያ ጎሊያ ጌቴታና› ያጌቲዴ ፃፌቲ ኡቴዳ፤ ሺን ሂንቴንቱ ኣ ቦንቂያዋንቱ ቆሴቲያ ጎንጎሉዋ ኬሴዲታ» ያጌዳ። ቆቃቱኔ ጌዲ ሲሌዳዋንቱ ዬሱሳኮ ጌሻ ጎሊያ ዪና፥ ኢ ኡንቱንታ ፓꬄዳ። ሺን ቄሳቱዋ ካፓቱኔ ሂጊያ ታማሪሲያዋንቱ ዬሱሲ ኦꬂያ ኦራꬃባ ቤዔዳ ዎዴኔ፥ ጉꬃ ናናይ ጌሻ ጎሊያን ባሬንቱ ኮሻ ꬎቁ ኦꬂዴ፥ «ዳዊታ ናዓይ ጋላቴቶ» ያጊያዋ ቤዔዳ ዎዴ ሃንቄቴዲኖ። ያቲዴ ዬሱሳ፥ «ሃዋንቱ ጊያዋ ሲሳይ?» ያጌዲኖ። ዬሱሲ፥ «ኤ ሲሳይ፤ ፆሳ ማፃፋይ፥ ‹ጉꬃ ናናይኔ ꬋሚያ ናናይ ኔና ጋላታና ማላ፥ ኡንቱንታ ኤሪሳዳ› ያጊያዋ ኡባካ ናባቢቤይኪቴ?» ያጌዳ። ዬሱሲ ኡንቱንታ ኣጊዴ፥ ሄ ካታማፔ ቢታኒያ ጌቴቲያ ካታማ ቢዴ፥ ያኒ ኣቄዳ። ዬሱሲ ዎንታ ጉራና ካታማ ቤዳ ዲራው ኮሻቴዳ። ኦጊያ ዶናን ኢቲ ባላሲያ ጌቴቲያ ሚꬃቶ ቤዒዴ፥ ኢኮ ቤዳ፤ ቢ ጋኪያ ዎዴ ሄ ሚꬃቲን ሃይꬃ ፃላላፔ ኣቲን፥ ኣይፊያ ኣይኔ ዴሚቤና፤ ኢዞ፥ «ላዔꬁዋ ሜꬊናዉካ ኣይፎፓ» ያጊና፥ ሄ ባላሳታ ማንዒያን ሜላ ኣጋዱ። ኣ ካሊያዋንቱ ሄዋ ቤዒዴ ማላሌቲዴ፥ «ሃ ባላሳታ ዋናዴ ኢቲ ኩꬃን ሜላ ኣጋዴ?» ያጌዲኖ። ዬሱሲ ዛሪዴ፥ «ታኒ ሂንቴንቶ ቱሙዋ ጋይ፤ ሂንቴንቱ ኣማኑ ዴዒያዋንታኔ ሲꬌናዋንታ ጊዶፔ፥ ሃ ባላሳቶ ታኒ ኦꬄዳዋ ማላ ፃላላ ኦꬂኪታ፤ ሺን ሃራይ ኣቶ ሂንቴንቱ ሃ ዴሪያ፥ ‹ዴንዳዴ ኣባን ኩንዳ› ጊንቶካ ሃናና፤ ሂንቴንቱ ኣማኒዴ ፆሳ ዎሲያዋ ኣያ ጊዲንቶካ ኣካና» ያጌዳ። ዬሱሲ ጌሻ ጎሊያ ዪዴ ታማሪሲሺን፥ ቄሳቱዋ ካፓቱኔ ኣዪሁዳ ጪማቱ ኣኮ ዪዴ፥ «ኔኒ ሃዋ ኦꬃናው ኔው ኣይ ማታይ ዴዒ? ኔው ሃ ማታ ኦኔ ኢሜዳዌ?» ያጌዲኖ። ዬሱሲ ዛሪዴ ኡንቱንታ፥ «ታኒካ ሂንቴንታ ኢቲባ ኦቻና፤ ሂንቴንቱ ታው ሄዋ ኦዶፔ፥ ታኒ ሃዋ ኣይ ማታኒ ኦꬃይታንቶ፥ ሂንቴንቶ ኦዳና፤ ዮሃኒሲ ፃማቂያ ማታይ ሃቃፔ ዬዴ? ፆሳፔ ዬዴዬ ኣሳፔ ዬዴ?» ያጌዳ። ኡንቱንቱ ባሬንቱ ጊዱዋን ፓሉማ ዶሚዴ፥ «ኑኒ፥ ‹ፆሳፔ ዬዳ› ያጎፔ ኢ ኑና፥ ‹ያቶፔ፥ ዮሃኒሲ ኦዴዳዋ ኣያው ኣማኒቤይኪቴ?› ያጋናዋ። ሺን ኑኒ፥ ‹ኣሳፔ ዬዳ› ያጎፔ፥ ኣሳይ ኡባይ ዮሃኒሲ ናቢያ ጊዴዳዋ ኤሪያ ዲራው፥ ኣሳው ያዬቶ» ያጌዲኖ። ኡንቱንቱ ዬሱሳው፥ «ኑኒ ኤሮኮ» ያጊዴ ዛሬዲኖ። ዬሱሲ፥ «ታኒካ ሃዋ ኣይ ማታኒ ኦꬃይታንቶ፥ ሂንቴንቶ ኦዲኬ» ያጌዳ። «ሺን ሂንቴንቱ ኣያ ቆፒቴ? ላዑ ናናይ ዴዒያ ኢቲ ቢታኒ ዴዔ፤ ሄ ቢታኒ ባይራ ናዓኮ ቢዴ፥ ‹ታ ናዓው፥ ሃቼ ባዴ ታ ዎዪኒያ ቱራ ኦꬃ› ያጌዳ። ናዓይ ዛሪዴ፥ ‹ቢኬ› ጌዳ፤ ሺን ጉዬፔ ባሬ ዎዛናን ቆፒ ኣኪዴ፥ ዎዪኒያ ቱራ ኦꬃናው ቤዳ። ኣዉ ዮኮ ናዓኮ ቢዴ፥ ባይራው ጌዳዋዳንካ ኣው ጌዳ፤ ቴፋ ናዓይ ዛሪዴ፥ ‹ሎዓ ታ ጎዳው› ያጌዳ፤ ሺን ቢቤና። ሃ ላዑ ናናፔ ባሬ ኣዉ ኮዬዳዋ ኦꬄዳዌ ሃቃዌ?» ያጌዳ። ኡንቱንቱ፥ «ባይራ» ያጌዲኖ። ዬሱሲ ኡንቱንታ ሃዋዳን ያጌዳ፤ «ታኒ ሂንቴንቶ ቱሙዋ ጋይ፤ ቃራፃ ኣኪያዋንቱኔ ዎሹሚያዋንቱ ሂንቴፔ ሲንꬃቲዴ፥ ፆሳ ካዉቴꬃ ጌላና። ኣዪሲ ጎፔ፥ ፃማቂያ ዮሃኒሲ ፂሎቴꬃ ኦጊያ ታማሪሲዴ፥ ሂንቴኮ ዪና፥ ኢ ጊያዋ ኣማኒቤይኪታ። ሺን ቃራፃ ኣኪያዋንቱኔ ዎሹሚያዋንቱ ኢ ጊያዋ ኣማኔዲኖ፤ ሂንቴንቱ ሃራይ ኣቶ ሄዋ ቤዒዲካ፥ ሂንቴንቱ ናጋራፔ ሲሚዴ፥ ኢ ጊዪያዋ ኣማኒቤይኪታ» ያጌዳ። ቃሲካ ዬሱሲ ሃዋዳን ያጌዳ፤ «ሃራ ሌሚሱዋካ ሲሲቴ፤ ዎዪኒያ ጌቴቲያ ቱራ ቶኬዳ ኢቲ ቢታኒ ዴዔ፤ ዎዪኒያ ቱራ ዩሺ ኣꬂዴ ዲሬዳ፤ ቃሲ ሄ ዎዪኒያ ጉሚዒያ ኦላካ ቦኬዳ፤ ሄዋ ናጊያ ኣሳው ኣዱሳ ሹቻ ጊምቤዳ። ሄዋፔ ጉዪያን፥ ኮꬃ ኦꬂያ ኣሳው ኢሚዴ፥ ሃራ ጋዴ ቤዳ። ዎዪኒያ ኣይፊያ ማፂያ ዎዲ ጋኪና፥ ባሬና ጋኪያዋ ኣኪዴ ያና ማላ፥ ባሬ ቆማቱዋ ባሬ ኮꬃዋቱዋኮ ኪቴዳ። ኮꬃዋቱ ኣ ቆማቱዋ ኦይቂዴ፥ ኢቱዋ ዎꬌዲኖ፤ ቃሲ ዮኩዋ ሹቻን ጳልቄዲኖ። ቃሲካ ሄ ቢታኒ ካሴዋንቱፔ ዳሪያ ሃራ ቆማቱዋ ኪቴዳ፤ ኮꬃዋቱ ሄ ቆማቱዋካ ካሴዋንቱዋዳን ኦꬄዲኖ። «ሺን ዉርሴꬃን ኢ፥ ‹ታ ናዓ ኡንቱንቱ ቦንቻናዋንታ› ያጊዴ ባሬ ናዓ ኡንቱንቱኮ ኪቴዳ። «ሺን ኮꬃዋቱ ናዓ ቤዒዴ፥ ባሬንቱ ጊዱዋን፥ ‹ጋዲያ ላታናዌ ሃዋ፤ ቢዴ ኣ ዎꬊዴ፥ ጋዲያ ኑኒ ላታና› ያጌዲኖ። ናዓ ኦይቂዴ፥ ዎዪኒያ ቱራ ጊዶፔ ጋፃ ኬሲዴ ዎꬌዲኖ። «ሲሚ ዎዪኒያ ቱራ ጎዳይ ዪያ ዎዴ፥ ሄ ኮꬃዋቱዋ ዎታኔ?» ያጊዴ ኦቼዳ። ኡንቱንቱ፥ «ኢ ሄ ኢታ ኣሳቱዋ ዎꬊ ዉርሲዴ፥ ዎዪኒያ ቱራይ ኣይፊያ ዎዴ ባሬና ጋኪያዋ ዎዲያን ሼꬊያ ሃራ ኮꬃዋቱዋሲ ኢማና» ያጌዲኖ። ዬሱሲ ኡንቱንታ ሃዋዳን ያጌዳ፤ « ‹ጊምቢያዋንቱ ካꬊዴ ኢፄዳ ሹቻይ ጎዳ ፃጱዋ ሚኒሲያ፥ ኡባፔ ኣꬊያ ሹቻ ጊዴዳ። ሃዌ ጎዳይ ኦꬄዳዋ፤ ቃሲ ኑ ፄላዉካ ማላሊሲያዋ› ያጊያዋ ፆሳ ማፃፋፔ ኡባካ ናባቢቤይኪቴ? «ሄዋ ዲራው፥ ታኒ ሂንቴንቶ ኦዳይ፤ ፆሳ ካዉቴꬃይ ሂንቴፔ ኣኬቲዴ፥ ሎዖ ኣይፊያ ኢሚያ ኣሳው ኢሜታናዋ። ሄ ሹቻ ቦላ ኩንዲያ ኡባይ ሜዔሬታና፤ ቃሲ ሄ ሹቻይ ኣሳ ቦላ ኩንዶፔ፥ ሄ ኩንዴዳ ኡራ ሊቂሳና» ያጌዳ። ቄሳቱዋ ካፓቱኔ ፓሪሳዋቱ ዬሱሲ ኦዴዳ ሌሚሱዋ ሲሴዳ ዎዴ፥ ባሬንቱዋ ሃሳዪያዋ ኤሬዲኖ። ኡንቱንቱ ዬሱሳ ኦይቃናው ኮዬዲኖ፤ ሺን ዬሱሳ ዳሮ ኣሳይ ናቢያ ጊዴ ቆፒ ኡቴዳ ዲራው፥ ሄ ኣሳው ያዬዲኖ። ዬሱሲ ኣሳው ላዔꬁዋ ሌሚሱዋን ሃዋዳን ያጊዴ ሃሳዬዳ፤ «ሳሉዋ ካዉቴꬃይ ባሬ ናዓው ማቺያ ኢማናው ኡባባ ማኬዳ ካቲያ ማላ። ሄ ካቲ ቡላቻው ኦዲ ዎꬄዳ ኣሳቱዋ ፄሳናው ባሬ ቆማቱዋ ኪቴዳ፤ ሺን ኣሳቱ ያናው ኮዪቤይኪኖ። «ቃሲ ሃራ ቆማቱዋ፥ ‹ፄሴቴዳዋንታ፥ «ታኒ ቁማ ጊጊሳዲ፤ ታ ሳንጋቱኔ ታ ሞꬎ ሚያቱ ሹኬቴዲኖ፤ ኡባባይካ ማኬቴዳ። ቡላቻ ሃ ዪቴ» ያጊቴ› ያጊዴ ኪቴዳ። ሺን ፄሴቴዳዋንቱ ኮዬናን ኢፂዴ፥ ባሬንቱ ኦሶ ቤዲኖ፤ ኢቱ ባሬ ጎሻው ቢና፥ ዮኩ ባሬ ዛሊዔው ቤዳ። ኣቴዳዋንቱ ቃሲ ካቲያ ቆማቱዋ ኦይቂ ዋꬊዴ ዎꬌዲኖ። «ካቲ ዳሮ ሃንቄቴዳ፤ ቃሲ ባሬ ዎታዳራቱዋ ዬዲዴ፥ ሄ ሼምፑዋ ዎꬌዳዋንታ ዎꬊሲዴ፥ ኡንቱንቱ ካታማ ጉዲሴዳ። ሄዋፔ ጉዪያን፥ ባሬ ቆማቱዋ፥ ‹ቡላቻይ ማኬቴዳ፤ ሺን ፄሴቴዳዋንቱ ቡላቻው ቤሲያ ኣሳ ጊዲኪኖ። ሄዋ ዲራው፥ ዎጋ ቃꬋ ቢዴ፥ ሂንቴንቱ ዴሜዳ ኣሳ ኡባ ቡላቻው ፄሲቴ› ያጌዳ። ሄ ቆማቱ ቃꬋ ቢዴ፥ ባሬንቱ ዴሜዳ ኣሳ ኡባ ሎዑዋ ኢታ ሺሺዴ፥ ቡላቻ ዳሲያ ኩንꬄዲኖ። «ሺን ካቲ ቁማ ማናው ኡቴዳ ኣሳ ቤዓናው ጌሌዳ ዎዴ፥ ቡላቻ ማዩዋ ማዪቤና ኢቲ ቢታኒያ ሄዋን ቤዒዴ፥ ‹ታ ላጌው፥ ቡላቻ ማዩዋ ማዬናን ዋናዴ ሃዋ ጌላዲ?› ያጊና ቢታኒ ጮዑ ጌዳ። «ሄዋፔ ጉዪያን፥ ካቲ ባሬ ቆማቱዋ፥ ‹ሃ ቢታኒያ ኩሺያኔ ጌዲያ ቃቺዴ፥ ካሬ ꬉማ ኬሲ ኦሊቴ፤ ኢ ሄዋን ዬካናኔ ኣቻ ꬋቃና› ያጌዳ። «ኣዪሲ ጎፔ፥ ፄሴቴዳዋንቱ ዳራ፤ ሺን ዶሬቴዳዋንቱ ጉꬃ» ያጌዳ። ሄዋፔ ጉዪያን፥ ፓሪሳዋቱ ቢዴ፥ ኣ ሃሳያፔ ባላ ዴሚዴ፥ ኣ ኦይቃና ማላ ማቄቴዲኖ። ቃሲ ባሬንታ ካሊያዋንቱፔኔ ሄሮዲሳ ባጋቱዋፔ ኣማሬዳዋንታ ኣኮ ኪቴዲኖ። ኡንቱንቱ፥ «ታማሪሲያዎ፥ ኔኒ ቱሙዋ ሃሳዪያዋኔ ፆሳ ኦጊያ ቱማቴꬃን ታማሪሲያዋ ኑኒ ኤሬቶ፤ ኣያው ጎፔ፥ ኔኒ ኣሳፔ ኣሳ ሻካካኔ ዱማያካ። ኔ ቆፋይ ኣዬንቶ ኑሲ ኦዳ፤ ኑኒ ሮሜ ጋዲያ ካቲያ ቄሳሬው ጊራ ጊሪያዌ ዎጌዬ ዎጋ ጊዴኔ?» ያጌዲኖ። ሺን ዬሱሲ ኡንቱንቱ ኢታ ቆፋ ኤሪዴ፥ «ሃ ሎዓ ማላቲያ ኢታ ኣሳቶ፥ ኣያው ታና ፓጪቴ? ጊራ ጊሪያ ሚሻ ታና ቤሲቴ» ያጌዳ። ሄዋፔ ጉዬ ኡንቱንቱ ቢራ ሳንቲሚያ ኣው ኣሄዲኖ። ኢ፥ «ሃ ማላይኔ ሱንꬃይ ኦዌ?» ያጌዳ። ሄዋፔ ሲሚዴ ኡንቱንታ ኦቺና፥ ኡንቱንቱ፥ «ሮሜ ጋዲያ ካቲያ ቄሳሬዋ» ያጌዲኖ። ሄዋፔ ጉዪያን፥ ዬሱሲ ኡንቱንታ፥ «ያቶፔ፥ ቄሳሬዋ ቄሳሬሲ፥ ፆሳዋ ፆሳሲ ኢሚቴ» ያጌዳ። ኡንቱንቱ ሄዋ ሲሴዳ ዎዴ፥ ማላሌቲዴ ኣ ኣጊዴ ቤዲኖ። ሃይቄዳ ኣሳይ ዴንዴና ጊያ ሳዱቃዋናቱዋፔ ኢቲ ኢቲ ኣሳቱ ሄ ጋላሲ ዬሱሳኮ ዪዴ፥ ሃዋዳን ያጊዴ፥ ኣ ኦቼዲኖ፤ «ታማሪሲያዎ፥ ሙሴ፥ ‹ኢቲ ኣሳይ ናዓ ዬሌናን ሃይቆፔ፥ ሄ ሃይቄዳዋ ኢሻይ ኣ ማቻቶ ላቲዴ፥ ባሬ ኢሻው ናዓ ዬላናው ቤሴ› ያጌዳ። ኑናና ላፑ ኢሻቱ ዴዒኖ፤ ባይራይ ማቻቶ ኣኪዴ፥ ናዓ ዬሌናን ሃይቄዳ፤ ሄዋፔ ጉዪያን ኣ ማቻቶ ኣ ኢሻይ ኣኬዳ። ቃሲ ላዔꬂያዌካ ሃይቄዳ፤ ሄዜꬂያዌካ፥ ላፑንꬃ ጋካናዉካ ሄዋዳን ሃኔዲኖ። ኡባፔ ጉዪያን፥ ሄ ሚሺራታ ሃይቃዱ። ያቲና፥ ሃይቄዳ ኣሳይ ሃይቁዋፔ ዴንዲያ ጋላሲ ሄ ሚሺራታ ላፑናቱዋፔ ሃቃዎ ማቼ ጊዳኔ? ኣዪሲ ጎፔ፥ ላፑናቱ ኡባይካ ኢዞ ኣኬዲኖ» ያጌዲኖ። ዬሱሲ ዛሪዴ፥ ሃዋዳን ያጌዳ፤ «ፆሳ ማፃፋቱዋ ዎይ ኣ ዎልቃ ሂንቴንቱ ኤሬና ዲራው ባሊታ። ኣዪሲ ጎፔ፥ ሃይቄዳ ኣሳይ ሃይቁዋፔ ዴንዲያ ጋላሲ፥ ሳሉዋን ዴዒያ ኪታንቻቱዋ ማላ ጊዳናፔ ኣቲን፥ ኣቱማ ኣሳይኔ ኣኬና፤ ማጫ ኣሳይኔ ጌሌና። ሺን ሃይቄዳዋንቱ ዴንዱዋባ ጊዶፔ፥ ፆሳይ፥ ‹ታኒ ኣብራሃሜ ፆሳ፥ ዪሳቃ ፆሳ፥ ያዪቆባ ፆሳ› ያጊዴ ሂንቴው ኦዴዳዋ ኡባካ ናባቢቤይኪቴ? ፆሳይ ፓፃ ዴዒያዋንቱ ፆሳ ጊዲያዋፔ ኣቲን፥ ሃይቄዳዋንቱ ፆሳ ጊዴና» ያጌዳ። *** ዳሮ ኣሳይ ሄዋ ሲሲዴ፥ ኣ ቲሚርቲያን ማላሌቴዲኖ። ሺን ዬሱሲ ሳዱቃዋናቱዋ ጮዑ ኦꬄዳዋ ፓሪሳዋቱ ሲሴዳ ዎዴ፥ ኢቲሳ ሺቄዲኖ። ኡንቱንቱ ጊዶፔ ሂጊያ ታማሪሲያ ኢቱ፥ ዬሱሳ ፓጫናው ኢቲባ ኦቼዳ። «ታማሪሲያዎ፥ ሂጊያ ጊዱዋን ኡባፔ ኣꬊያ ኣዛዙ ሃቃዌ?» ያጊዴ ኣ ኦቼዳ። ዬሱሲ ዛሪዴ፥ ሃዋዳን ያጌዳ፤ « ‹ኔኒ ጎዳ ኔ ፆሳ ኔ ኩሜንꬃ ዎዛናፔ፥ ኔ ኩሜንꬃ ሼምፑዋፔ፥ ኔ ኩሜንꬃ ቆፋፔ ሲቃ› ያጌዳ። ሄዌ ኡባፔ ዳሪያ ኣዛዙዋኔ ቃሲ ኡባፔ ኣꬊያ ኣዛዙዋ። ቃሲ ላዔꬂያ ኣዛዙካ ኣ ማላ፤ ሄዌ፥ ‹ኔኒ ኔ ሾሩዋ ኔ ሁጲያዳን ሲቃ› ጊያዋ። ሙሴ ሂጊያ ኡባይኔ ናባቱዋ ቲሚርቲ ሃ ላዑ ኣዛዛቱዋን ቃሼቴ» ያጌዳ። ፓሪሳዋቱ ኢቲሳ ሺቄዳሳን ዬሱሲ ኡንቱንታ፥ «ኪሪስቶሳባ ዋጊዴ ቆፒቴ? ኢ ኦ ናዔ?» ያጊዴ ኦቼዳ። ኡንቱንቱ፥ «ኪሪስቶሲ ዳዊታ ናዓ» ያጌዲኖ። *** ዬሱሲ ኡንቱንታ፥ «ያቲና፥ ዳዊቴ ባሬና ጌሻ ኣያናይ ሃሳዪሲና ኪሪስቶሳ ዋጊዴ፥ ‹ጎዳ› ጊዴ ፄሲ? ቃሲካ ዳዊቴ፥ ‹ጎዳይ ታ ጎዳ፥ «ታኒ ኔ ሞርኬቱዋ ኔኒ ዬꬋ ኤቂያዋ ኦꬃና ጋካናው፥ ሃዋን ታፔ ኡሼቻ ባጋና ኡታዴ ታናና ኢቲፔ ዳናታ» ጌዳ› ያጌዳ። ዳዊቴ ኪሪስቶሳ፥ ‹ጎዳ› ጊዴ ፄሶፔ፥ ያቲና፥ ኪሪስቶሲ ዋኒዴ ዳዊታ ናዓ ጊዲ?» ያጌዳ። ዬሱሳው ኢቲ ቃላ ዛራናው ዳንዳዬዳ ኢቲ ኣሳይኔ ባዋ፤ ቃሲ ሄ ጋላሳፔ ዶሚና፥ ሃራ ኦሻ ኣ ኦቻናው ፃሌዳዌ ኦኒኔ ባዋ። ሄዋፔ ጉዪያን፥ ዬሱሲ ሺቄዳ ኣሳዉኔ ባሬና ካሊያዋንቶ ሃዋዳን ያጊዴ ሃሳዬዳ፤ «ሂጊያ ታማሪሲያዋንቱኔ ፓሪሳዋቱ ሙሴ ሂጊያ ታማሪሲያ ማታና ዴዒኖ። ሄዋ ዲራው፥ ሂንቴንቱ ኦꬃና ማላ፥ ኡንቱንቱ ሂንቴንታ ኣዛዚያ ኡባባ ኦꬂቴኔ ቃሲ ናጊቴ፤ ሺን ኡንቱንቱ ኦꬂያዋዳን ኦꬆፒቴ፤ ኣያው ጎፔ፥ ኡንቱንቱ ባሬንቱ ኦዲያዋ ኦꬂኪኖ። ቶካናው ዴፂያ ቶኩዋ ኡንቱንቱ ቃቺዴ፥ ኣሳ ቶሲኖ፤ ሺን ባሬንቱ ሁጲያን ሃራይ ኣቶ፥ ሄ ቶኩዋ ቢራꬊያን ቦቻናዉካ ኮዪኪኖ። «ሺን ኡንቱንቱ ባሬንቱ ኦሱዋ ኡባ ኣሳይ ቤዓናዳን ኦꬂኖ፤ ኣያው ጎፔ፥ ባሬንቱ ሶምዒያኒኔ ባሬንቱ ኩሺያ ቄሲያን ቃቺያ ፂቂሲያና ዴዒያ ኪታፋ ኣሲኖኔ ባሬንቱ ማዩዋ ማጫራካ ኣዱሲኖ። ኣሳይ ባሬንታ ሾቢዴ ኣፎሳን ቦንቾ ኡቱዋ ዶሲኖ፤ ቃሲ ኣዪሁዳ ዎሳ ጎሌቱዋኒካ ዳሮ ሎዒያ ኦይዲያ ዶሲኖ። ኣሳይ ጌዋን ባሬንታ ቦንቺዴ ሳሮታና ማላኔ ‹ታማሪሲያዎ› ጊዴ ባሬንታ ፄሳናዳን ኮዪኖ። «ሺን ሂንቴንታ ታማሪሲያዌ ኢቱዋ ፃላላ ጊዴዳ ዲራዉኔ ሂንቴንቱ ኡባይ ኢሻቱዋ ጊዴዳ ዲራው፥ ኢቱ ኢቱዋ፥ ‹ታማሪሲያዎ› ጊዴ ፄሶፒቴ። ሃ ሳዓን ኦናኔ ‹ኣዉዋ› ጊዴ ፄሶፒቴ፤ ኣያው ጎፔ፥ ሂንቴንቶ ሳሉዋን ዴዒያ ኢቲ ኣዉ ዴዔ። ኢቱ ኢቱዋ፥ ‹ታማሪሲያዎ› ጊዴካ ፄሶፒቴ፤ ኣያው ጎፔ፥ ሂንቴንቶ ኢቲ ጎዳይ፥ ኪሪስቶሳ ፃላላይ ዴዔ። ሂንቴንቱ ጊዶን ኡባፔ ዳሪያዌ ሂንቴንቶ ቆማ ጊዳናው ቤሴ። ባሬና ዳሪሲያዌ ኦኒኔ ቶሼታና፤ ቃሲ ባሬና ቶቺያዌ ኦኒኔ ꬎቁ ጋና። «ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ፥ ኣሳው ሳሉዋ ካዉቴꬃ ሂንቴንቱ ጎርዲያ ዲራው፥ ሂንቴንቶ ኣዬሮ፤ ኣያው ጎፔ፥ ሂንቴንቱ ሁጴዉኔ ጌሊኪታ፤ ቃሲ ጌላናው ኮዪያዋንታካ ጌሊሲኪታ። «ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ ኣምዔቱዋ ጎሊያ ሂንቴንቱ ቦንቂዴ፥ ሂንቴንቶ ሎዓ ማላታናው ፆሳ ዎሳ ኣዱሲታ፤ ሄዋ ዲራው፥ ሂንቴንቶ ኣዬሮ፤ ኡባፔ ኣꬊያ ፒርዳ ሂንቴንቱ ኣካና። «ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ ሂንቴንቱ ኢቲ ኡራ ኣማንꬃናው ኣባኒኔ ሳዓን ዩዪያ ዲራዉኔ ቃሲ ሂንቴንቱ ኣ ኣማንꬂያ ዎዴ፥ ሄ ኡራ ሂንቴንቱዋፔ ላዑ ኩሺያ ኢቴዳ ጋናሜው ናዓ ኦꬂያ ዲራው፥ ሂንቴንቶ ኣዬሮ። « ‹ኦኒኔ ጌሻ ጎሊያን ጫቆፔ፥ ኣይኔ ባዋ፤ ሺን ጌሻ ጎሊያን ዴዒያ ዎርቃን ጫቆፔ፥ ሄ ጫቁ ኣ ጋኬ› ጊያ ሂንቴንቶ ቆቂ ኡቲዴ ኣሳ ካሌꬂያዋንቶ፥ ሂንቴንቶ ኣዬሮ። ሃ ኤያቱ፥ ሃ ቆቃቱ፥ ዎርቃይ ኣꬊዬ? ዎርቃ ጌሻ ኦꬂያ ጌሻ ጎሊ ኣꬊ? ቃሲ ሂንቴንቱ፥ ‹ኦኒኔ ያርሹዋ ያርሺያባን ጫቆፔ፥ ኣይኔካ ባዋ፤ ሺን ኦኒኔ ኣ ቦላ ዴዒያ ያርሹዋን ጫቆፔ፥ ሄ ጫቁ ኣ ጋኬ› ያጊዴ ታማሪሲታ። ሃ ኤያቱ፥ ሃ ቆቃቱ፥ ያርሹ ኣꬊዬ? ዎይ ያርሹዋ ጌሻ ኦꬂያ ኣ ያርሺያባይ ኣꬊ? ሄዋ ዲራው፥ ያርሹዋ ያርሺያባን ጫቂያ ኡራይ ሄ ያርሺያዋኒካ ጫቄ፤ ቃሲ ኣ ቦላ ዴዒያ ኡባባንካ ጫቄ። ጌሻ ጎሊያን ጫቂያ ኡራይ፥ ሄ ጌሻ ጎሊያኒኔ ኣ ጊዶን ዴዒያ ፆሳን ጫቄ። ሳሉዋን ጫቂያ ኡራይ፥ ፆሳ ካዉቴꬃ ኦይዲያኒኔ ሄ ኦይዲያን ኡቲያዋን ጫቄ። «ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ፥ ሂንቴንቶ ኣዬሮ። ኣዪሲ ጎፔ፥ ካሬꬃ ኣኑጋፔ፥ ሺላሪያፔኔ ኦካሺያፔ ኣሲራታ ሂንቴንቱ ኢሚታ፤ ሺን ሂጊያን ዴዒያ ዳሪ ኮሺያዋንታ ኣጊታ፤ ሄዋንቱ ፒርዳ፥ ማሮቴꬃኔ ፂሎቴꬃ። ሃራንታካ ኣጌናን፥ ሂንቴንቱ ኦꬃናው ቤሲያ ዬዋቱ ሃዋንታ። ሂንቴንቶ ቆቂ ኡቲዴ፥ ኣሳ ካሌꬂያዋንቶ፥ ሂንቴንቱ ኡሻፔ ኡዱንፂያ ጋጪዴ፥ ጋሉዋ ሚቲታ። «ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ፥ ሂንቴንቶ ኣዬሮ። ኣዪሲ ጎፔ፥ ሂንቴንቱ ሻታኔ ኬሪያ ቦላ ባጋ ጌሺታ፤ ሺን ኣ ጊዱዋን ቦንቂያኒኔ ኡዜቴꬃን ኩንꬄዲታ። ሃ ቆቃ ፓሪሳዌው፥ ሻታኔ ኬሪያ ጋርሳ ካሴታዴ ጌሻ ዲጋ፤ ሄዋፔ ጉዪያን፥ ቦላ ባጋይካ ጌሻ ጊዳናዋ። «ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ፥ ሂንቴንቶ ኣዬሮ። ኣዪሲ ጎፔ፥ ካሬ ባጋና ቦሺንቻን ኦኬቲዴ፥ ሎዒ ኡቲዴ፥ ቃሲ ጋርሳ ባጋና ሃይቄዳ ኣሳ ሜቄꬃይኔ ዎቄዳባይ ኡባባይ ኩሜዳ ዱፎቱዋ ማላቲታ። ሄዋዳንካ፥ ቃሲ ቦላ ባጋና ኣሳ ኡባው ፂሉዋ ማላቲታ፤ ሺን ሂንቴንቶ ጋርሳ ባጋና ሎዓ ማላቲያ ኢታቴꬃይኔ ማካላይ ኩሚ ኡቴዳ። «ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ፥ ሂንቴንቶ ኣዬሮ። ኣዪሲ ጎፔ፥ ናባቱዋ ዱፉዋ ቦላ ጎሊያ ኬፂታ፤ ቃሲ ፂላቱዋ ዱፉዋካ ሎይꬂታ። ቃሲ ሂንቴንቱ፥ ‹ኑኒ ቤኒ ኑ ኣዎቱዋ ዎዴ ዴዔዳዋንታ ጊዲንቶ፥ ኡንቱንቱና ኢቲፔ ናባቱዋ ዎꬎኮ ሺን› ያጊታ። ሄዋ ጊዶፔ፥ ናባቱዋ ዎꬌዳዋንቱ ናና ሂንቴንቱ ጊዴዳዋ ሂንቴንቱ ሁጲያን ማርካቲታ። ሲሚ ሂንቴንቱ ኣዎቱ ዶሜዳዋ ፖሊኪቴ! «ሃ ሾሻቶ፥ ሾሻ ናናው፥ ጋናሚያ ፒርዳፔ ዋኒዴ ኣታኒቴ? ሄዋ ዲራው፥ ቤይቴ፥ ታኒ ናባቱዋ ኣꬎ ኤራንቻቱዋኔ ሂጊያ ታማሪሲያዋንታ ሂንቴኮ ኪታና። ኡንቱንቱፔ ኢቱዋ ኢቱዋ ሂንቴንቱ ዎꬋናኔ ማስቃሊያ ቦላ ሚሲማሪያን ꬊሺዴ ካቃኒታ፤ ቃሲ ኢቱዋ ኢቱዋ ሂንቴንቱ ዎሳ ጎሌቱን ሊሱዋን ሾጫኒታኔ ካታማፔ ካታማ ዬዴርሳኒታ። ሄዋ ዲራው፥ ፂሉዋ ኣቤላ ዎꬎዴፔ ዶሚዴ፥ ጌሻ ጎሊያፔኔ ያርሺያሳፔ ጊዱዋን ሂንቴንቱ ዎꬌዳ ባራኪያ ናዓ ዛካራሳ ዎዲያ ጋካናው፥ ሃይቄዳ ፂላቱዋ ኡባቱዋ ሱꬃ ዲራው፥ ሂንቴንቱ ሙሬታኒታ። ታኒ ሂንቴንቶ ቱሙዋ ኦዳይ፤ ሃ ኡባባይ ሃ ዎዲያ ኣሳ ቦላ ጋካናዋ። «ዬሩሳላሜ ካታማ ኣሳው፥ ዬሩሳላሜ ካታማ ኣሳው፥ ናባቱዋ ሂንቴንቱ ዎꬊታ፤ ፆሳይ ሂንቴንቱኮ ኪቴዳዋንታካ ሹቻን ጫዲታ፤ ኩታታ ባሬ ማራቱዋ ባሬ ቄፊያን ሃጲያዋዳን፥ ታኒ ሂንቴንቱ ኣሳ ኢቲሳ ሺሻናው ኣፑ ካላ ኮያዲታ! ሺን ታና ዲጌዲታ። ቤዒቴ፥ ሂንቴንቱ ጎሊ ኡባካ ኦና ጊዳናዋ። ኣዪሲ ጎፔ፥ ታኒ ሂንቴንቶ ኦዳይ፤ ሂንቴንቱ፥ ‹ጎዳ ሱንꬃን ዪያዌ ኣንጄቴዳዋ ጋና ጋካናው፥ ላዔንꬁዋ ታና ቤዒኪታ› ጋይ» ያጌዳ። ዬሱሲ ጌሻ ጎሊያፔ ኬሲዴ ቢያ ዎዴ፥ ጌሻ ጎሊያ ዲርሳ ጊዶን ዴዒያ ጎሊያ ቤሳናው ኣ ካሊያዋንቱ ኣኮ ዬዲኖ። ዬሱሲ ዛሪዴ ኡንቱንታ፥ «ሄዋ ኡባ ቤዒቴ? ታኒ ሂንቴንቶ ቱሙዋ ኦዳይ፤ ሃ ጎሌቱዋን ዴዒያ ኢቲ ሹቻይኔ ኣቴናን ኡባይ ኮሌታና» ያጌዳ። ዬሱሲ ዴብሬ ዛይቴ ጌቴቲያ ዴሪያ ቦላን ኡቲዴዒሺን፥ ኣ ካሊያዋንቱ ባሬንቱ ፃላላ ኣኮ ዪዴ ኣ፥ «ሄዌ ኣዉዴ ሃናኔንቶ፥ ኑሲ ኦዳሪኪ፤ ቃሲ ኔ ዩሳዉኔ ዎዲያ ዉርሴꬃው ማላይ ኣያ ጊዳኔ?» ያጌዲኖ። ዬሱሲ ዛሪዴ፥ ኡንቱንታ ሃዋዳን ያጌዳ፤ «ሂንቴንታ ኦኒኔ ባሌꬄና ማላ ናጌቲቴ። ኣዪሲ ጎፔ፥ ዳሮ ኣሳይ ታ ሱንꬃን፥ ‹ታኒ ኪሪስቶሳ› ያጊዴ ያና፤ ያቲዴ ዳሮ ኣሳ ባሌꬃና። ማታን ዴዒያ ኦላ ዋሱዋኔ ሃኩዋን ዴዒያ ኦላ ኦዱዋ ሲሳናው ሂንቴንቱ ዴዒታ፤ ሄዋ ማላባይ ሃናናው ቤሲያ ዲራው፥ ናጌቲቴ፤ ሂርጎፒቴ፤ ሺን ዉርሴꬃይ ቢራ። ኣዪሲ ጎፔ፥ ኢቲ ጋዲያ ኣሳይ ሃራ ጋዲያ ኣሳና ኦሌታና፤ ቃሲ ኢቲ ካዉቴꬃይ ሃራ ካዉቴꬃና ኦሌታና፤ ኮሻይኔ ቢታ ቃꬃይ ኡባሳን ዴዓናዋ። ሄዌ ኡባይካ ኮይሮ ኦይꬃ ማላ። «ኣሳይ ሄ ዎዴ ሂንቴንታ ዋዪሳናኔ ዎꬋናዋ፤ ታ ሱንꬃ ዲራው፥ ጋዴ ኡባይ ሂንቴንታ ኢፃናዋ። ሄ ዎዴ ጮራ ኣሳይ ኣማኑዋ ኣጋናዋንታ፤ ባሬንቱ ጊዶን ኢቱ ኢቱዋ ኣꬂዴ ኢማናኔ ኢቱ ኢቱዋ ኢፃናዋ። ቃሲ ዎርዶ ናባቱ ጮራቱ ዴንዲዴ፥ ዳሮ ኣሳ ጪማናዋንታ። ማካላይ ዳሪያ ዲራው፥ ጮራ ኣሳ ሲቁ ኢርፃናዋ። ሺን ዉርሴꬃይ ጋካናው ጌንጪያ ኡራይ ኣታናዋ። ኣሳው ኡባው ማርካ ጊዳና ማላ፥ ካዉቴꬃ ዎንጋላ ሚሺራቹ ሳዓ ኡባን ኦዴታናዋ፤ ሄዋፔ ጉዪያን፥ ዉርሴꬃይ ጋካናዋ። «ሄዋ ዲራው፥ ናቢያ ዳኔል ኦዴዳ ባሻ ቱናቴꬃይ ጌሻ ሳን ኤቄዳዋ ሂንቴንቱ ቤዓና፤ ሄዌ ዋጊያዌንቶ፥ ናባቢያዌ ኣኬኮ። «ዪሁዳ ጋዲያን ሄ ዎዴ ዴዒያዋንቱ ዴሪያኮ ኬሲኖ። ጎሊያ ሁጲያን ዴዒያ ኡራይካ ባሬ ሶዪን ዴዒያዋ ኣካናው ዎꬎፖ። ጋዴን ዴዒያዌ ባሬ ማዩዋ ኣካናው ጉዬ ሲሞፖ። ሄ ዎዴ ሻሃራ ማጫዋንቱሲኔ ꬋንꬂያ ማጫዋንቱሲ ኣዬሮ። ባልጉዋን ዎይ ሳምባታን ሂንቴንቱ ቤቴና ማላ፥ ፆሳ ዎሲቴ፤ ኣያው ጎፔ፥ ኣላሚ ሜꬌቶዴፔ ሃቼ ጋካናው ዴዒቤናባይኔ ቃሲ ሃዋፔ ሲንꬃዉካ ኡባ ዴዔና ኢታ ዋዪ ሄ ዎዴ ዴዓናዋ። ፆሳይ ሄ ጋላሳቱዋ ፓይዱዋ ጉꬂያዌ ባዌንቶ፥ ኣሳ ጊዴዳ ኦኒኔ ኣቴና፤ ሺን ኢ ባሬ ዶሬዳ ኣሳቱዋ ዲራው፥ ሄ ጋላሳቱዋ ፓይዱዋ ጉꬃናዋ። «ሄ ዎዴ ኦኒኔ ሂንቴንታ፥ ‹ቤዒቴ። ኪሪስቶሲ ሃዋን ዴዔ› ዎይ፥ ‹ሄዋን ዴዔ› ያጎፔ ኣዋ ኣማኖፒቴ። ኣዪሲ ጎፔ፥ ዎርዶ ኪሪስቶሳቱኔ ዎርዶ ናባቱ ዴንዳና፤ ያቲዴ ባሬንቶ ዳንዳዬቶፔ፥ ሃራይ ኣቶ ፆሳይ ዶሬዳዋንታካ ባሌꬃናው ዎልቃማ ማላታኔ ማላሊሲያባ ቤሳናዋ። ቤዒቴ፥ ታኒ ሂንቴው ሄዋ ካሴታዴ ኦዳዲ። «ሄዋ ዲራው፥ ኣሳይ ሂንቴንታ፥ ‹ቤዒቴ፥ ኪሪስቶሲ ባዙዋን ዴዔ› ጎፔ፥ ያ ቦፒቴ፤ ዎይ ሂንቴንታ፥ ‹ቤዒቴ፥ ቆልዖን ዴዔ› ጊንቶካ፥ ኡንቱንቱባ ኣማኖፒቴ። ኣዪሲ ጎፔ፥ ዋልቃንꬃይ ኣዋይፊ ዶሊያ ባጋፔ ዋልቃሚዴ፥ ኣዋይፊ ዉሊያ ባጋ ጋካናው ጶልቁጊያዋዳን፥ ታ ዩሳይ፥ ኣሳ ናዓ ዩሳይ፥ ሄዋዳን ሃናናዋ። «ባኩታይ ዴዒያሳ ሾርቲ ሺቃና። «ሄ ዎዴ ዋዪያፔ ጉዪያን፥ ማንዒያን ኣዋይ ꬉማና፤ ኣጌናይ ፖዒያዋ ኣጋናዋ፤ ፆሊንታቱ ሳሉዋፔ ኩንዳናዋንታ፤ ቃሲ ሳሉዋን ዴዒያ ዎልቃቱካ ቃፄታናዋንታ። ሄ ዎዴ ታ ማላይ፥ ኣሳ ናዓ ማላይ፥ ሳሉዋን ቤታናዋ፤ ሳዓን ሄ ዎዴ ዴዒያ ኣሳ ዛሪ ኡባይ ዬካናዋንታ። ቃሲ ታኒ፥ ኣሳ ናዓይ፥ ዎልቃናኔ ዎልቃማ ቦንቹዋና ሳሉዋፔ ሻሪያ ጊዶና ዪሺን፥ ኡንቱንቱ ቤዓና። ኢ ባሬ ኪታንቻቱዋ ዎልቃማ ማላካታና ኪታና፤ ኪታንቻቱ ኣላሜው ሃ ጋፃፔ ያ ጋፃ ጋካናው፥ ቃሲ ሳዓን ኦይዱ ባጋፔ ኣው ዶሬቴዳ ኣሳ ሺሻናዋ። «ሌሚሱዋ ባላሳቶ ጌቴቲያ ሚꬃቲፔ ኣኬኪቴ፤ ባላሳታ ኣጪያ ዎዴኔ ኢዚ ሃይꬃይ ቆሌቲያ ዎዴ፥ ቦኒ ማቴዳዋ ሂንቴንቱ ኤራኒታ። ሄዋዳንካ፥ ሂንቴንቱ ሄ ኡባባ ቤዒያ ዎዴ፥ ኢ ማቲዴ ፔንጊያ ሺቄዳዋ ኤሪቴ። ታኒ ሂንቴንቶ ቱሙዋ ኦዳይ፤ ሃ ኡባባይ ሃናና ጋካናው፥ ሃ ዎዲያ ኣሳይ ሃይቂዲጌና። ሳሉኔ ሳዓይ ኣꬋና፤ ሺን ታ ቃላይ ኡባካ ኣꬌና። «ሺን ሄ ጋላሳኔ ሄ ሳቲያ ኣዉዋ ፃላላፔ ኣቲን፥ ሃራይ ኣቶ ሳሉዋን ዴዒያ ኪታንቻቱዋ ጊዲና፥ ዎይ ታና ናዓ ጊዲናካ ኦኒኔ ኤሪያዌ ባዋ። ታ ዩሳይ፥ ኣሳ ናዓ ዩሳይ፥ ኖሄ ዎዴ ሃኖዋ ማላ ጊዳናዋ። ኣዪሲ ጎፔ፥ ባሻ ሃꬃ ዩሳፔ ካሴ ዎዴ፥ ኖሄ ማርካቢያን ጌሌዳ ጋላሳይ ጋካናው፥ ኣሳይ ሜኔ ኡሼኔ፤ ቃሲ ኣቱማ ኣሳይ ኣኬኔ ማጫ ኣሳይ ኣሲና ጌሌ። ባሻ ሃꬃይ ዪዴ፥ ኡንቱንታ ኡባ ኣፋና ጋካናው፥ ኡንቱንቱ ኣኬኪ ቤይኪኖ፤ ታኒ፥ ኣሳ ናዓይ፥ ዪያ ዎዲ፥ ሄዋ ማላ ጊዳናዋ። «ሄ ዎዴ ላዑ ኣሳቱ ጋዴን ኦꬂያዋንቱፔ ኢቱዋ ኣፋና፤ ኢቱ ኣታናዋ። ላዑ ማጫዋንቱ ዎፃን ጋጪያዋንቱፔ ኢቲኖ ኣፋና፤ ኢቲና ኣታና። «ሲሚ ሂንቴ ጎዳይ ኣይ ጋላሲ ያናዌንቶ ሂንቴንቱ ኤሬና ዲራው፥ ናጊ ኡቲቴ። ሺን ካዪሱ ቃማፔ ዎይሳ ዎዲያን ያኔንቶ ጎሊያ ጎዳይ ኤሬዴንቶ፥ ባሬ ጎሊ ቦኬቴና ማላ፥ ቤጎቲዴ ናጊ ኡታናዋ ኤሪቴ። ሄዋ ዲራው፥ ሂንቴንቱካ ጊጊ ኡቲቴ፤ ኣያው ጎፔ፥ ታኒ፥ ኣሳ ናዓይ፥ ሂንቴንቱ ቆፔና ሳቲያን ያና። «ያቲና፥ ባሬ ሶይ ኣሳው ቁማ ኮሺያ ዎዲያን ኢማና ማላ፥ ኣ ጎዳይ ሱንꬄዳ ኣማኔቴዳ ዎዛናማ ቆማይ ኦኔ? ኢ ሄዋዳን ኦꬂሺን፥ ኣ ጎዳይ ዪዴ ዴሚያ ቆማይ ኣንጄቴዳዋ። ታኒ ሂንቴንቶ ቱሙዋ ኦዳይ፤ ጎዳይ ሄ ቆማ ባሬዋ ኡባ ቦላ ሱንꬃና። ሺን ቆማይ ኢታ ጊዶፔ፥ ‹ታ ጎዳይ ጋሚዒዴ ያናዋ› ያጊዴ ባሬ ዎዛናን ቆፒዴ፥ ባሬ ላጌꬃ ቆማቱዋ ዋꬋ ዶሞፔ፥ ማꬆቲያዋንቱና ሞፔኔ ኡሾፔ፥ ሄ ቆማ ጎዳይ ኢ ቆፒቤና ጋላሳኒኔ ኢ ኤሪቤና ሳቲያን ያና። ሄዋፔ ጉዪያን ኣ ቃንፄሬꬂዴ፥ ሎዓ ማላቲያ ኢታ ኣሳቱ ዴዒያሳን ዎꬃና፤ ሄዋን ኢ ዬካናኔ ኣቻ ꬋቃና። «ሄ ዎዴ ሳሉዋ ካዉቴꬃይ ባሬንቱ ኩራዚያ ኦይቂዴ፥ ማቻቶ ኣኪያዋ ሞካናው ካሬ ኬሴዳ ታሙ ዎዶራቱዋ ማላታና። ኡንቱንቱፔ ኢቼሻቱ ቦዛቱዋ፤ ቃሲ ኢቼሻቱ ጪንጫ። ቦዛቱ ባሬንቱ ኩራዚያ ኦይቄዲኖ፤ ሺን ላምባ ኦይቂቤይኪኖ። ሺን ጪንጫቱ ባሬንቱ ኩራዚያኔ ፃሩሙሲያን ላምባ ኦይቄዲኖ። ማቻቶ ኣኪያዌ ዬናን ጋሚዒና፥ ሄ ዎዶራቱ ባሬንታ ጌሚዒሺሲና ጊሲ ኣጌዲኖ። «ቢላሄ ጊዴዳ ዎዴ፥ ‹ቤዒቴ፥ ማቻቶ ኣኪያዌ ጋኬዳ፤ ኣ ሞካናው ካሬ ኬሲቴ› ያጊያ ዎልቃማ ጫቡ ዴንዴዳ። «ሄ ዎዴ ሄ ዎዶራቱ ኡባቱ ቤጎቲዴ፥ ባሬንቱ ኩራዚያ ጊጊሴዲኖ። ቦዛቱ ጪንጫቱዋ፥ ‹ኑ ኩራዚ ቶዓና ሃኒያ ዲራው፥ ሂንቴንቱ ላምባፔ ኑሲ ኢሜሪኪቴ› ያጌዲኖ። «ሺን ጪንጫቱ ዛሪዴ ኡንቱንታ፥ ‹ኣጊቴ፥ ኑሲኔ ሂንቴንቱሲ ጊዴና፤ ሄዋ ዲራ ሂንቴው ዛሊዒያዋንቱኮ ቢዴ ሻሚ ኣኪቴ› ያጌዲኖ። ሄዋፔ ጉዬ ቦዛ ዎዶራቱ ላምባ ሻማናው ቢዲጊና፥ ማቻቶ ኣኪያዌ ፑቱ ጊና፥ ጊጊ ኡቴዳ ኢቼሹ ዎዶራቱ ኣናና ኢቲፔ ቡላቻ ጎሊያ ጌሌዲኖ፤ ኢፒꬃይካ ጎርዴቲ ኣጌዳ። «ጉዬፔ ቃሲ ዮኮ ዎዶራቱ ዪዴ፥ ‹ጎዳው፥ ጎዳው፥ ኑሲ ዶያሪኪ› ያጌዲኖ። «ሺን ማቻቶ ኣኪያዌ ዛሪዴ፥ ‹ታኒ ሂንቴንቶ ቱሙዋ ኦዳይ፤ ታኒ ሂንቴንታ ኤሪኬ› ያጌዳ። «ሲሚ ታኒ፥ ኣሳ ናዓይ፥ ያና ጋላሳ ዎይ ሳቲያ ሂንቴንቱ ኤሬና ዲራው፥ ናጊ ኡቲቴ። «ኣዪሲ ጎፔ፥ ሳሉዋ ካዉቴꬃይ ባሬ ቆማቱዋ ፄሲዴ፥ ባሬው ዴዒያዋ ኡንቱንቶ ሼꬊዴ፥ ኦጊያ ባና ሃኒያ ቢታኒያ ቤሴ። ኡንቱንቱ ሁጲያን ሁጲያን ኡንቱንቱ ዎልቃ ኬና ኢቶ ኢቼሹ ሻዓ ቢራ፥ ኢቶ ላዑ ሻዓ ቢራ፥ ቃሲ ኢቶ ኢቲ ሻዓ ቢራ ኢሚዴ፥ ባሬ ኦጊያ ቤዳ። ኢቼሹ ሻዓ ቢራ ኣኬዳ ቆማይ ኤሌካ ቢዴ ዛሊዒዴ፥ ሃራ ኢቼሹ ሻዓ ቢራ ዎꬊሴዳ። ሄዋዳንካ፥ ቃሲ ላዑ ሻዓ ቢራ ኣኬዳ ቆማይ ሃራ ላዑ ሻዓ ቢራ ዎꬊሴዳ። ሺን ኢቲ ሻዓ ቢራ ኣኬዳዌ ቢዴ፥ ኦላ ቦኪዴ፥ ባሬ ጎዳ ሚሻ ሞጊ ኣጌዳ። «ዳሮ ዎዲያፔ ጉዪያን፥ ሄ ቆማቱዋ ጎዳይ ዪዴ፥ ባሬ ሚሻ ኡንቱንቱና ሄቴቴዳ። ኢቼሹ ሻዓ ቢራ ኣኬዳ ቆማይ ዪዴ፥ ሃራ ኢቼሹ ሻዓ ቢራ ሼꬊዴ፥ ‹ታ ጎዳው፥ ኔኒ ታው ኢቼሹ ሻዓ ቢራ ኢማዳ፤ ቤዓ፥ ሃራ ኢቼሹ ሻዓ ቢራ ዎꬊሳዲ› ያጌዳ። ኣ ጎዳይ ኣ፥ ‹ሃያናሾ! ኔኒ ሎዓኔ ኣማኔቲያ ቆማ፤ ኔኒ ጉꬃባን ኣማኔታዳ። ታኒ ኔና ዳሮባው ካፖ ኦꬃና፤ ሃ ጌላዴ ኔ ጎዳና ናሼታ› ያጌዳ። «ቃሲ ላዑ ሻዓ ቢራ ኣኬዳዌካ ዪዴ፥ ‹ታ ጎዳው፥ ኔኒ ታው ላዑ ሻዓ ቢራ ኢማዳ፤ ቤዓ፥ ታኒ ሃራ ላዑ ሻዓ ቢራ ዎꬊሳዲ› ያጌዳ። ኣ ጎዳይ ኣ፥ ‹ሃያናሾ! ኔኒ ሎዓኔ ኣማኔቲያ ቆማ፤ ኔኒ ጉꬃባን ኣማኔታዳ። ታኒ ኔና ዳሮባው ካፖ ኦꬃና፤ ሃ ጌላዴ ኔ ጎዳና ናሼታ› ያጌዳ። «ኢቲ ሻዓ ቢራ ኣኬዳዌ ቃሲ ዪዴ፥ ‹ታ ጎዳው፥ ኔኒ ዜራቤናሳፔ ቆይጪያ ኣሳ ጊዲያዋኔ ካꬃ ላላቤናሳፔ ማፂያ ሜቄꬂ ባይና ኣሳ ጊዲያዋ ታኒ ኤራይ። ታኒ ያያዲ፤ ያታዴ ባዴ ኔ ቢራ ቢታን ሞጋዲ፤ ቤዓ፥ ኔ ቢራይ ሃዌኩ› ያጌዳ። «ኣ ጎዳይ ዛሪዴ፥ ኣ ሃዋዳን ያጌዳ፤ ‹ሃ ኢታ ኣዛላ ኣሺካሬው፥ ታኒ ዜራቤናሳፔ ቆይጪያ ኣሳ ጊዲያዋኔ ካꬃ ላላቤናሳፔ ማፂያ ኣሳ ጊዲያዋ ኤራዲ? ያቲና፥ ኔኒ ታ ሚሻ ዎꬊሲያዋንቱ ማታን ዎꬄዳዋ ጊዲንቶ፥ ታኒ ሲሚያ ዎዴ ታ ሚሻ ዎꬊያና ኣካናዋሺን ኣቴዳ። ሄዋ ዲራው፥ ሄ ሚሻ ኣፔ ዎꬂ ኣኪዴ፥ ታሙ ሻዓ ቢራይ ዴዒያዎ ኢሚቴ። ኣዪሲ ጎፔ፥ ዴዒያ ኡባው ሃራይ ጉጄታና፤ ኢ ባሬው ጊዲያዋፔ ዳሪሲዴ ኣካና፤ ሺን ባይናዎ ሃራይ ኣቶ፥ ሄ ኣው ዴዒያ ጉꬃይካ ኣፔ ኣኬታናዋ። ጎዔና ቆማ ካሬ ꬉማ ኬሲ ኦሊቴ፤ ሄዋን ኢ ዬካናኔ ባሬ ኣቻ ꬋቃና› ያጌዳ። «ታኒ፥ ኣሳ ናዓይ፥ ኪታንቻቱዋ ኡባቱዋና ቦንቹዋን ዪያ ዎዴ፥ ታ ቦንቾ ካዉቴꬃ ኦይዲያን ኡታና። ሳዓን ዴዒያ ኣሳይ ኡባይ ታ ሲንꬃ ሺቃናዋንታ፤ ሄሚያዌ ዶርሳቱዋ ዴሻቱዋፔ ሻኪያዋዳን፥ ታኒ ሄ ኣሳ ላዑ ኬሳዴ ሻካና። ቃሲ ዶርሳቱዋ ታፔ ኡሼቻ ባጋና ኤሳዴ፥ ዴሻቱዋ ታፔ ሃዲርሳ ባጋና ኤሳና። «ሄዋፔ ጉዪያን፥ ታኒ ካቲ ታፔ ኡሼቻ ባጋና ዴዒያዋንታ ሃዋዳን ያጋና፤ ‹ታ ኣቡ ኣንጄዳዋንቶ፥ ሃ ዪዴ ሳዓይ ሜꬌቶዴፔ ሃቼ ጋካናው፥ ሂንቴንቶ ጊጌዳ ካዉቴꬃ ላቲቴ። ኣዪሲ ጎፔ፥ ታኒ ኮሻቲና ሚዜዲታ፤ ሳሜቲና ኡሼዲታ፤ ኢማꬃ ጊዳዴ ቢናካ ሞኬዲታ። ታኒ ካሎቲና ማዪዜዲታ፤ ሃርጊና ቤዔዲታ፤ ቃሼቲና ታኮ ጋኪዴ ኦቼዲታ› ያጋና። «ሄዋፔ ጉዪያን፥ ፂላቱ ዛሪዴ፥ ኣ ሃዋዳን ያጋና፤ ‹ጎዳው፥ ኔኒ ኮሻቲና፥ ኣዉዴ ቤዒዴ ሚዜዶ? ዎይ ኔኒ ሳሜቲና፥ ኣዉዴ ቤዒዴ ኡሼዶ? ኔኒ ኢማꬃ ጊዳዴ ዪና ኣዉዴ ቤዒዴ ሞኬዶ? ዎይ ኔኒ ካሎቲና ኣዉዴ ማዪዜዶ? ቃሲ ኔኒ ሃርጊና፥ ዎይ ቃሼቲና ኔኮ ቢዴ ኣዉዴ ኔና ቤዔዶ?› ያጋናዋንታ። ታኒ ካቲ ዛራዴ፥ ‹ታኒ ሂንቴንቶ ቱሙዋ ኦዳይ፤ ሂንቴንቱ ሃ ታ ኢሻቱዋ ኡባፔ ሃራይ ኣቶ፥ ላፊያ ኢቶ ኦꬄዳዋ ጊዲንቶካ፥ ሄዋ ታው ኦꬄዲታ› ያጋና። «ሄ ዎዴ፥ ታፔ ሃዲርሳ ባጋና ዴዒያዋንታ ታኒ ያጋና፤ ‹ሃ ሼቄቴዳዋንቶ፥ ታ ማታፔ ኪቺቴ፤ ቢዴ ፃላሂያ ካፖኔ ኣ ኪታንቻቱዋሲ ጊጌዳ ሜꬊና ታማን ጌሊቴ። ኣዪሲ ጎፔ፥ ታኒ ኮሻቲና፥ ታና ሚዚቤይኪታ፤ ሳሜቲና ኡሺቤይኪታ። ታኒ ኢማꬃ ጊዳዴ ቢና፥ ታና ሞኪቤይኪታ፤ ካሎቲና ማዪዚቤይኪታ፤ ቃሲ ሃርጊና፥ ቃሼቲናካ ታና ቤዒቤይኪታ› ያጋና። «ሄ ዎዴ ኡንቱንቱ ቃሲ ሃዋዳን ያጊዴ ዛራናዋንታ፤ ‹ጎዳው፥ ኔኒ ኮሻቲና ዎይ ሳሜቲና፥ ዎይ ኢማꬃ ጊዳዴ ቢና ዎይ ካሎቲና፥ ዎይ ሃርጊና ዎይ ቃሼቲና፥ ኣዉዴ ቤዒዴ፥ ኔና ማዴናን ኢፄዶ?› ያጋናዋንታ። «ሄ ዎዴ ታኒ ካቲ ዛራዴ ኡንቱንታ፥ ‹ታኒ ሂንቴንቶ ቱሙዋ ኦዳይ፤ ሂንቴንቱ ሃ ኡባፔ ላፊያ ኢቱዋ ማዴናን ኢፄዳዌ፥ ታና ማዴናን ኢፄዳዋ› ያጋና። ሄዋንቱ ሜꬊና ሙራው ባና፤ ሺን ፂላቱ ሜꬊና ዴዖ ባና» ያጌዳ። ዬሱሲ ሃ ቲሚርቲያ ኡባ ዉሪሴዳ ዎዴ፥ ባሬና ካሊያዋንታ፥ «ላዑ ጋላሳፔ ጉዪያን፥ ፓሲጋ ባላ ቦንቺያ ጋላሳ ጊዲያዋ ኤሪታ። ሄ ጋላሲ ታና፥ ኣሳ ናዓ፥ ኣሳይ ማስቃሊያ ቦላ ሚሲማሪያን ꬊሺዴ ካቃናው ኣꬂዴ ኢማና» ያጌዳ። ሄ ዎዴ ቄሳቱዋ ካፓቱኔ ጋዲያ ጪማቱ ቃያፋ ጌቴቲያ ቄሳቱዋ ኡባቱዋ ካፑዋ ዎጋ ጎሊያን ሺቂዴ፥ ኣሳይ ኤሬናን ዬሱሳ ኦይቂዴ፥ ዎꬋናው ማቄቴዲኖ። ሺን ኡንቱንቱ፥ «ኣሳይ ዋላሳ ኬሴና ማላ፥ ፓሲጋ ቦንቺያ ጋላሲ ሄዋ ኦꬆኮ» ያጌዲኖ። ዬሱሲ ቢታኒያ ካታማን ኦሉዋ ሃርጊያ ሲሞና ሶዪን ዴዒሺን፥ ኢቲ ሚሺራታ ኣልባስፂሮሳ ጌቴቲያ ሹቻፔ ኦሴቴዳ ቢልቃሲያ ኩሜዳ ዳሪ ኣልዖ ሺቱዋ ኣካዴ ዬዳዉና ቁማ ኢ ሚና፥ ሄ ሺቱዋ ዬሱሳ ሁጲያን ጫጫፋዱ። ሺን ዬሱሳ ካሊያዋንቱ ሄዋ ቤዒዴ፥ «ሃ ሺቱዋ ጮ ባዪዙሳይ ኣያሴ? ኣዪሲ ጎፔ፥ ሃ ሺቱዋ ኣልዖ ጋቲያን ዛሊዒዴ፥ ሚሻ ሂዬሳው ኢማናው ዳንዳዬቴ» ያጌዲኖ። ዬሱሲ ኡንቱንቱ ጊያዋ ኤሪዴ፥ ኡንቱንታ ሃዋዳን ያጌዳ፤ «ሃ ሚሺራቶ ኣያው ዋዪሲቴ? ኢዛ ታው ሎዖባ ኦꬃዱ። ሂዬሳቱ ኡባ ዎዴ ሂንቴናና ዴዒኖ፤ ሺን ታኒ ሂንቴናና ኡባ ዎዴ ዴዒኬ፤ ኢዛ ሃ ሺቱዋ ታ ቦላ ቲጊያዌ ታና ሞጋናው ጊጊሳናሳ። ታኒ ሂንቴንቶ ቱሙዋ ኦዳይ፤ ሳዓ ኡባን ሃ ዎንጋላ ሚሺራቹዋ ኦዲያሳን ሃቃኒኔ፥ ኣሳይ ኢዞ ዎዛና ኣꬃና ማላ፥ ኢዛ ኦꬄዳዌ ኦዴታናዋ» ያጌዳ። ሄ ዎዴ ታማኔ ላዑ ዬሱሳ ካሊያዋንቱፔ ኢቱ ዪሁዳ ኣስቆሮቱ ያጌቲያዌ ቄሳቱዋ ካፓቱዋኮ ቢዴ፥ «ታኒ ሂንቴንቱሲ ዬሱሳ ኦይꬆፔ፥ ታው ኣያ ኢማኒቴ?» ያጊና ኡንቱንቱ ኣው ሃታሙ ቢራ ቆፒዴ ኢሜዲኖ። ሄዋፔ ጉዪያን፥ ዪሁዳይ ዬሱሳ ኣꬂ ኢማናው ኢንጄቲያ ዎዲያ ዎቼ። ባላ ዳቡዋ ሚያ ጋላሳ ቦንቺያ ኮይሮ ጋላሲ፥ ዬሱሳ ካሊያዋንቱ ኣኮ ዪዴ፥ «ፓሲጋ ቦንቺያ ጋላሲ ኔኒ ማና ቁማ ሃቃን ጊጊሳኔ?» ያጌዲኖ። ሄዋፔ ጉዬ ዬሱሲ ኡንቱንታ፥ «ካታማ ቢዴ፥ ኢቲ ቢታኒያ፥ ‹ታማሪሲያዌ ኔና፥ «ታው ዎዲ ጋኬዳ፤ ታኒ ታና ካሊያዋንቱና ፓሲጋ ቦንቺያ ጋላሳ ኔ ሶዪን ኣꬃና» ጌዳ› ጊቴ» ያጌዳ። ኣ ካሊያዋንቱ ዬሱሲ ባሬንታ ኣዛዞዋዳን ኦꬂዴ፥ ፓሲጋ ቦንቺያ ጋላሲ ማና ቁማ ጊጊሴዲኖ። ሳዓይ ኦማርሴዳ ዎዴ፥ ዬሱሲ ታማኔ ላዑ ኣ ካሊያዋንቱና ቁማ ማናው ኡቴዳ። ኡንቱንቱ ሚሺን፥ ዬሱሲ ኡንቱንታ፥ «ታኒ ሂንቴንቶ ቱሙዋ ኦዳይ፤ ሂንቴፔ ኢቲ ኡራይ ታና ኣꬂዴ ኢማናዋ» ያጌዳ። ኡንቱንቱ ዳሪ ዳጋሚዴ፥ ሁጲያን ሁጲያን፥ «ጎዳው፥ ቱሙ ታኔሻ?» ጉሳ ዶሜዲኖ። ዬሱሲ ዛሪዴ፥ «ባሬ ኩሺያ ታናና ኢቲፔ ዎጪቲያፔ ዬዲዴ ቱሺያዌ ታና ኣꬂ ኢማና። ታኒ፥ ኣሳ ናዓይ፥ ፆሳ ማፃፋይ ሃይቃና ጌዳዋዳን ሃይቃና፤ ሺን ታና፥ ኣሳ ናዓ፥ ኣꬂ ኢሚያ ኡራው ኣዬሮ፤ ሄ ኡራይ ዬሌቴናን ኣቴዴንቶ ኣው ሎዓሺን» ያጌዳ። ኣ ኣꬂ ኢሚያ ዪሁዳይ ዛሪዴ፥ «ታማሪሲያዎ፥ ኔኒ ጊያዌ ታኔ?» ያጌዳ። ዬሱሲ ዛሪዴ ኣ፥ «ኔኒ ኔ ሁጲያን ጋዳ» ያጌዳ። ኡንቱንቱ ሚሺን፥ ዬሱሲ ዳቡዋ ኣኪዴ፥ ፆሳ ጋላቴዳ፤ ሄ ዳቡዋ ሜንꬄሬꬂዴ፥ ባሬና ካሊያዋንቱሲ ኢሚዴ፥ «ሄይቴ፤ ሚቴ፤ ሃዌ ታ ኣሹዋ» ያጌዳ። ፁዓ ኣኪዴ፥ ፆሳ ጋላቴዳ። ኡንቱንቶ ኢሚዴ፥ «ኡባይ ሃዋፔ ኡሺቴ፤ ኣያው ጎፔ፥ ሃዌ ዳሮ ኣሳ ናጋራይ ኣቶ ጌቴታና ዲራው ጉኪያ ታ ሱꬃ፤ ታ ሱꬃይ ኦራꬃ ጫቁዋ። ሺን ታኒ ሂንቴንቶ ኦዳይ፤ ታኒ ታ ኣቡ ካዉቴꬃን ኦራꬃ ዎዪኒያ ኤሳ ሂንቴንቱና ኡሻና ጋላሳይ ጋካናው፥ ላዔꬁዋ ሃ ዎዪኒያ ኤሳ ኡባካ ኡሺኬ» ያጌዳ። ማዚሙሪያ ዬፆዋፔ ጉዪያን፥ ዴብሬ ዛይቴ ጌቴቲያ ዴሪያ ቤዲኖ። ዬሱሲ ሄ ዎዴ ኡንቱንታ፥ «ሃቼ ቃማ ሂንቴንቱ ኡባይ ታና ኣጊዴ ኪቻና፤ ኣያው ጎፔ፥ ፆሳ ማፃፋይ፥ ‹ፆሳይ ዶርሳ ሄሚያዋ ዎꬋናዋ፤ ሄዋፔ ጉዪያን ዶርሳ ዉዲ ላሌታናዋ› ያጌ። ሺን ታኒ ሃይቁዋፔ ዴንዶዋፔ ጉዪያን፥ ሂንቴፔ ካሴታዴ ጋሊላ ባና» ያጌዳ። ጴፂሮሲ ዛሪዴ፥ «ኡንቱንቱ ኡባቱ ኔና ኣጊዴ ኪቻናዋንታ፤ ታኒ ኔና ኡባካ ዬጋዴ ኪቺኬ» ያጌዳ። ዬሱሲ ጴፂሮሳ፥ «ታኒ ኔው ቱሙዋ ኦዳይ፤ ሃቼ ቃማ ኩቱ ዋሳናፔ ካሴ፥ ኔኒ ታና ሄዙ ካላ ካዳናሳ» ያጌዳ። ጴፂሮሲ ዛሪዴ፥ «ታኒ ሃራይ ኣቶ፥ ኔናና ኢቲፔ ሃይቂንቶካ፥ ኔና ኡባካ ካዲኬ» ያጌዳ። ቃሲ ዬሱሳ ካሊያዋንቱ ኡባቱካ ሄዋዳን ጌዲኖ። ዬሱሲ ሄ ዎዴ ባሬና ካሊያዋንቱና ጌቴሴማኒያ ጌቴቲያሳ ቢዴ ኡንቱንታ፥ «ታኒ ሂኒ ባዴ ፆሳ ዎሲሺን፥ ሂንቴንቱ ሃዋን ኡቲሺቴ» ያጌዳ። ሄዋፔ ጉዬ ጴፂሮሳኔ ዛቢዲዮሳ ናና ላዑዋ ባሬናና ኣፊዴ፥ ዳሮ ካዩዋኔ ኡጋ ዶሜዳ። ቃሲ ኡንቱንታ፥ «ታኒ ሃይቃና ጋካናሲካ ካዮታይ፤ ሃዋን ቤጎቲዴ፥ ታናና ናጊቴ» ያጌዳ። ላፋ ሲንꬃኮ ሺቂዴ፥ ሳዓን ጉፋኒዴ፥ «ታ ኣቦ፥ ዳንዳዬቲያዋ ጊዶፔ፥ ሃ ፁዓ ታፔ ዲጋ፤ ሺን ኔኒ ኮዪያዋዳን ሃኖፔ ኣቲን፥ ታኒ ኮዪያዋዳን ሃኖፖ» ያጊዴ ፆሳ ዎሴዳ። ዬሱሲ ባሬና ካሊያዋንቱኮ ሲሚዴ ዬዳ፤ ጌሚዒሾዋንታ ዴሚዴ ጴፂሮሳ፥ «ሂንቴንቱ ኢቲ ሳቴንቶኔካ ጌሚዒሼናን ታናና ናጋናው ዳንዳዪቤይኪቴ? ፓጪያን ሂንቴንቱ ጌሌና ማላ፥ ሚኒቴኔ ፆሳ ዎሲቴ፤ ኣያናይ ጊጊ ኡቴዳ፤ ሺን ኣሳቴꬃ ኤሻይ ዳቡራንቻ» ያጌዳ። ዬሱሲ ቃሲ ላዔንꬁዋ ቢዴ፥ «ታ ኣቦ፥ ታኒ ሃ ዎሊቃማ ሜቱዋ ኣኬናን ዴዒሺን ፁዓ ዴንꬃናው ዳንዳዬቴናዋ ጊዶፔ፥ ኔኒ ጊያዌ ሃኖ» ያጊዴ ፆሳ ዎሴዳ። ቃሲካ ሲሚ ዪዴ፥ ኣ ካሊያዋንቱ ኣይፊያ ጌሚዒሹ ጎዚ ዎꬄዳ ዲራው፥ ጌሚዒሾዋንታ ዴሜዳ። ቃሲካ ኡንቱንታ ዬጊ ቢዴ፥ ሄዜንꬁዋ ካሴ ቃላ ዛሪዴ፥ ፆሳ ዎሴዳ። ሄዋፔ ጉዪያን፥ ባሬና ካሊያዋንቶ ዪዴ፥ «ሃዒ ጋካናዉካ ጌሚዒሺቴኔ ሼምፒቴ? ቤዒቴ፥ ታና፥ ኣሳ ናዓ፥ ናጋራንቻ ኣሳቱዋሲ ኣꬂዴ ኢሚያ ዎዲ ጋኬዳ። ዴንዲና ቦይቴ፤ ቤዒቴ፥ ታና ኣꬂ ኢሚያዌ ሃዌኩ ጋኬዳ» ያጌዳ። ዬሱሲ ሄዋ ቢሮ ሃሳዪሺን፥ ታማኔ ላዑ ኣ ካሊያዋንቱፔ ኢቱ፥ ዪሁዳይ፥ ጋኪ ዎꬌዳ፤ ቃሲ ቄሳቱዋ ካፓቱኔ ጋዲያ ጪማቱ ኪቲና፥ ማሻኔ ፃምዓ ኦይቄዳ ጮራ ኣሳይ ኣናና ኢቲፔ ዬዳ። ዬሱሳ ኣꬂ ኢሚያዌ ሄ ጮራ ኣሳ፥ «ታኒ ዬሪያዌ ኣ፤ ኣ ኦይቂቴ» ያጊዴ ማላ ኦዲ ዎꬄዳ። ኤሌካ ዬሱሳኮ ሺቂዴ፥ «ታማሪሲያዎ፥ ሳሮ ዴዓይ» ያጊዴ ኣ ዬሪ ኣኬዳ። ዬሱሲ ዪሁዳ፥ «ታ ላጌው፥ ኔኒ ኦꬃናባ ኦꬃ ኣጋ» ያጌዳ። ሄዋፔ ጉዪያን፥ ሄ ጮራ ኣሳይ ሺቂዴ፥ ዬሱሳ ሎይꬂ ኦይቄዳ። ዬሱሳና ዴዒያዋንቱፔ ኢቱ ባሬ ማሻ ኬሲዴ ቄሳቱዋ ኡባቱዋ ካፑዋ ቆማ ሃይꬃ ቃንፂ ኦሌዳ። ዬሱሲ ሄ ዎዴ ኣ ሃዋዳን ያጌዳ፤ «ኔ ማሻ ኣኬዳሳኒ ዛራዴ ዎꬃ፤ ኣያው ጎፔ፥ ማሻ ዴንꬂያ ኡባይ ማሻን ሃይቃና። ታ ኣቡ ዳሮ ሻዓ ኪታንቻቱዋ ኢቲ ኩꬃን ዬዲዴ፥ ታና ማዳና ማላ፥ ታኒ ኣ ዎሳናው ዳንዳዪያዋ ኤሪኪ? ያቲና፥ ፆሳ ቃላይ ሃዋዳን ሃናናው ቤሴ ያጌዳዌ ዋኒዴ ፖሌታናው ዳንዳዪ?» ያጌዳ። ሄዋፔ ጉዪያን፥ ዬሱሲ ሄዋን ሺቄዳ ጮራ ኣሳ ሃዋዳን ያጌዳ፤ «ታና ካዪሶ ኬሲዴ፥ ካዪሱዋ ኦይቂያዋዳን ኦይቃናው ማሻኔ ፃምዓ ኦይቂዴ ዬዲቴ? ታኒ ጌሻ ጎሊያን ታማሪሳዴ፥ ጋላሳን ጋላሳን ሂንቴንቱና ኦꬂያ ዎዴ ታና ኦይቂቤይኪታ፤ ሺን ሃዌ ኡባይ ሃኔዳዌ ናባቱ ፆሳ ቃላን ፃፌዳዌ ፖሌታናሳ» ያጌዳ። ዬሱሳ ካሊያዋንቱ ሄ ዎዴ ኡባቱ ኣ ዬጊ ቤዲኖ። ዬሱሳ ኦይቄዳዋንቱ ቄሳቱዋ ኡባቱዋ ካፑዋ ቃያፋኮ፥ ሂጊያ ታማሪሲያዋንቱኔ ጪማቱ ሺቄዳሳ ኣኪዴ ቤዲኖ። ሺን ጴፂሮሲ ቄሳቱዋ ኡባቱዋ ካፑዋ ዲርሳ ጊዶ ጋካናው፥ ሃኩዋን ኣ ካሌዳ፤ ዬዉዋ ዉርሴꬃ ቤዓናው ዲርሳ ጊዶ ጌሊዴ፥ ናጊያዋንቱና ኡቲ ኣጌዳ። ቄሳቱዋ ካፓቱኔ ሺቄዳ ኣሳይ ኡባይ ዬሱሳ ዎꬋናው ኣ ቦላ ዎርዱዋ ማርካ ዴማናው ኮዬዲኖ። ሺን ሃራይ ኣቶ ጮራ ኣሳይ ዪዴ፥ ኣ ቦላ ዎርዱዋን ማርካቲናካ ኣፔ ኣይኔ ዴሚቤይኪኖ። ጉዬፔ ላዓቱ ዪዴ፥ «ሃ ቢታኒ፥ ‹ታኒ ፆሳ ጌሻ ጎሊያ ኮላዴ፥ ሄዙ ጋላሳን ዛራዴ ኬፃናው ዳንዳያይ› ጌዳ» ያጌዲኖ። ቄሳቱዋ ኡባቱዋ ካፑ ዴንዲ ኤቂዴ ዬሱሳ፥ «ሃዋንቱ ኔና ሞቲያ ሞቶ ኔው ዛሪያባይ ባዌ?» ያጌዳ። ሺን ዬሱሲ ጮዑ ጌዳ፤ ቃሲካ ቄሳቱዋ ኡባቱዋ ካፑ ኣ፥ «ታኒ ኔና ዴዑዋ ፆሳ ሱንꬃን ጫላይ፤ ኔኒ ፆሳ ናዓ ኪሪስቶሳ ጊዶፔ ኑሲ ኦዳ» ያጌዳ። ዬሱሲ ዛሪዴ፥ «ኔኒ ኔ ሁጴዉካ ጋዳ፤ ሺን ታኒ ሂንቴንቱሲ ኦዳይ፤ ሃዋፔ ሲንꬃን፥ ሂንቴንቱ ታና፥ ኣሳ ናዓ፥ ዎልቃማ ፆሳፔ ኡሼቻ ባጋና ኡቴዳዋኔ ሳሉዋ ሻሪያና ዪሺን ቤዓና» ያጌዳ። ሄዋፔ ጉዪያን፥ ቄሳቱዋ ኡባቱዋ ካፑ ባሬ ማዩዋ ጴꬊ ኦሊዴ፥ «ሃዌ ቦሬዳ፤ ኑና ሃዋፔ ሲንꬃን ኣያው ሃራ ማርካ ኮሺ? ኢ ሃዒ ቦሪያዋ ሂንቴንቱ ሲሴዲታ። ሂንቴንቱ ቆፋይ ኣዬ?» ያጌዳ። ኡንቴንቱ፥ «ኣው ሃይቁ ቤሴ» ያጊዴ ዛሬዲኖ። ሄዋፔ ጉዪያን፥ ኡንቱንቱ ኣ ዴሙዋን ጩቺዴ፥ ኣ ዴቼዲኖ፤ ሃራንቱ ቃሲ ኣ ባቂዴ፥ «ኪሪስቶሳ! ኔን ኔና ናቤ ጋሳሺን፥ ኔና ሾጬዳዌ ኦኔንቶ ኣኔ ኑሲ ኦዳ!» ያጌዲኖ። ጴፂሮሲ ጎሊያፔ ካሬና ዲርሳ ጊዶን ኡቲዴዒሺን፥ ኢቲ ኣሺካራታ ኣኮ ያዴ፥ «ኔኒካ ጋሊላ ዬሱሳና ኢቲፔ ዴዓ» ያጋዱ። ሺን ኢ ኡንቱንቱ ኡባ ሲንꬃን ሄ ኣሺካራቶ፥ «ኔኒ ጊያዌ ኣዬንቶ ታኒ ኤሪኬ» ያጊዴ ካዴዳ። ቃሲ ቢዴ ዲርሳ ፔንጊያኮ ኬሲሺን፥ ሃራ ኣሺካራታ ኣ ቤዓዴ፥ ሄዋን ዴዒያ ኣሳቱዋሲ፥ «ሃ ቢታኒ ናዚሬቲያ ዬሱሳና ዴዔ» ያጋዱ። ጴፂሮሲ ላዔንꬁዋ ጫቂዴ፥ «ታኒ ሄዋ ቢታኒያ ኤሪኬ» ያጌዳ። ላፋ ጋሚዒሺን፥ ሄዋን ኤቄዳ ኣሳይ ጴፂሮሳኮ ዪዴ፥ «ኔኒካ ቱማ ኡንቱንቱና ኢቲፔ ዴዓ፤ ኣያው ጎፔ፥ ኔኒ ሃሳዪያ ሃሳያይካ ኔና ኤሪሴ» ያጌዲኖ። ሄዋፔ ጉዪያን ጴፂሮሲ፥ «ታኒ ሄዋ ቢታኒያ ኤሪኬ!» ያጊዴ፥ ባሬና ሼቃኔ ጫቁዋ ዶሜዳ። ሄ ዎዴ ኤሌካ ኩቱ ዋሲ ኣጌዳ። ጴፂሮሲ ባሬና ዬሱሲ፥ «ኔኒ ኩቱ ዋሳናፔ ካሴ ሄዙ ካላ ታና ካዳናሳ» ጌዳዋ ሃሳዪዴ፥ ካሬ ኬሲዴ፥ ሴሌቲ ዬኬዳ። ዎንታ ጉራን ቄሳቱዋ ካፓቱ ኡባቱኔ ጋዲያ ጪማቱ ዬሱሳ ዎꬋናው ማቄቴዲኖ፤ ኡንቱንቱ ዬሱሳ ቃቺ ኣፊዴ፥ ጋዲያ ኣዪሲያ ጲላፆሳው ኣꬂ ኢሜዲኖ። ዬሱሳ ሄ ዎዴ ኦይꬄዳ ዪሁዳይ ጲላፆሲ ዬሱሳ ቦላ ፒርዴዳዋ ቤዒዴ፥ «ኣዬሮ! ኦይꬄናን ኣጋሪኪታ!» ያጊዴ፥ ሄ ማንዒያንካ ሃታሙ ቢራ ቄሳቱዋ ካፓቶኔ ጋዲያ ጪማቶ ጉዬ ዛሪዴ፥ «ታኒ ጌሻ ኣሳ ኦይꬃዴ ናጋራ ኦꬃዲ» ያጌዳ። ሺን ኡንቱንቱ ኣ፥ «ሄዌ ኑሲ ኣያ ሜቴ? ሄዌ ኔ ሼኔ» ያጌዲኖ። ዪሁዳይ ቢራ ጌሻ ጎሊያን ኦሊ ኣጌዳ፤ ኡንቱንቱ ማታፔ ቢዴ፥ ሱሌቲ ሃይቄዳ። ቄሳቱዋ ካፓቱ ቢራ ኣኪዴ፥ «ሃ ቢራይ ሱꬃ ሚሻ ጊዲሺን፥ ኑኒ ጌሻ ጎሊያ ሚሻና ጋꬂያዌ ዎጋ ጊዴና» ያጌዲኖ። ሄዋፔ ጉዬ ኢቲፔ ዞሬቲዴ፥ ኢማꬃ ኣሳው ሞጎ ጋዲያ ኦꬃናው ኡርቃፔ ሚሻ ሜꬊያዋንቱ ጋዲያ ሻሜዲኖ። ሄዋ ዲራው፥ ሄ ጋዲ ሃቼ ጋካናዉካ፥ ሱꬃ ጋዲያ ጌቴቲዴ ፄሴቴ። ናቢያ ኤርሚያሲ፥ «ኡንቱንቱ ኣው ኢማናው ቆፔዳ ሃታሙ ሹቻ ቢራ ኣኪዴ፥ ጎዳይ ታና ኣዛዞዋዳን፥ ኡርቃፔ ሚሻ ሜꬊያዋንቱ ጋዲያ ሻማናው ኢሜዲኖ» ጌቴቶዌ ሄ ዎዴ ፖሌቴዳ ጌዳ። ዬሱሲ ጋዲያ ኣዪሲያዋ ሲንꬃ ሺቂና፥ ጋዲያ ኣዪሲያዌ ኣ፥ «ኔኒ ኣዪሁዳቱዋ ካቴ?» ያጊዴ ኦቼዳ። ዬሱሲ ኣ፥ «ኔኒካ ጋዴዓ» ያጌዳ። ቄሳቱዋ ካፓቱኔ ጋዲያ ጪማቱ ኣ ሞቲና፥ ኡንቱንቶ ኣይኔ ዛሩዋ ኢሚቤና። ሄ ዎዴ፥ ጲላፆሲ ዬሱሳ፥ «ሃዋንቱ ኔና ሞቲያባ ኡባ ሲሲኪ?» ያጌዳ። ዬሱሲ ሃራይ ኣቶ፥ ኢቲ ቃላካ ዛሬናን ኢፂና፥ ጋዲያ ኣዪሲያዋንቱ ዳሪ ማላሌቴዳ። ጋዲያ ኣዪሲያዌ ፓሲጋ ቦንቺያ ጋላሳን፥ ኣሳይ ኮዪያ ኢቲ ኡራ ቃሹዋፔ ቢሊያ ዎጋይ ዴዔ። ሄ ዎዴ ኢቲ ባርባና ጌቴቲያ ዬሱሲ ዳሮ ኤሬቴዳ ኢታ ቢታኒ ቃሾ ጎሌን ዴዔ። ሄዋ ዲራው፥ ጮራ ኣሳይ ኢቲሳ ሺቄዳሳን ጲላፆሲ፥ «ታኒ ሂንቴንቶ ባርባና ጊያ ዬሱሳ ቢሎ፥ ዎይ ኪሪስቶሳ ጌቴቲያ ዬሱሳ ቢሎ?» ያጊዴ ኣሳ ኦቼዳ። ኣዪሲ ጎፔ፥ ኡንቱንቱ ቃናቲዴ ዬሱሳ ኦꬄዳዋ ኢ ኤሬ። ጲላፆሲ ፒርዳ ጎሌን ኡቲዴዒሺን፥ ኣ ማቻታ ኣው፥ «ሄ ፂሎ ቢታኒያ ኣይኔ ኦꬆፓ፤ ኣያው ጎፔ፥ ታኒ ሃቼ ቃማ ኣኩሙዋን ኣባን ዳሮ ሜቶታዲ» ያጋዴ ኪታዱ። ሺን ቄሳቱዋ ካፓቱኔ ጋዲያ ጪማቱ ጲላፆሲ ባርባና ቢሊዴ፥ ዬሱሳ ዎꬋናዳን፥ ሺቄዳ ኣሳይ ኣ ዎሳና ማላ፥ ኣሳ ጪሜዲኖ። ጲላፆሲ ዛሪዴ ኡንቱንታ፥ «ታኒ ኡንቱንቱ ላዓቱዋፔ ሂንቴው ኦና ቢላናዳን ኮዪቴ?» ያጊና ኡንቱንቱ፥ «ባርባና ቢላናዳን ኮዬቶ» ያጌዲኖ። ጲላፆሲ፥ «ያቲና፥ ኪሪስቶሳ ጌቴቲያ ዬሱሳ ዎቶ?» ያጊዴ ኡንቱንታ ኦቺና ኡባይ፥ «ማስቃሊያ ቦላ ሚሲማሪያን ꬊሼቲዴ ካቄቶ» ያጌዲኖ። ጲላፆሲ ኣሳ፥ «ኣዪሲ? ኣይ ኢታባ ኦꬄዴ?» ያጌዳ። ሺን ኣሳይ ካሴዋፔካ ባሬንቱ ኮሻ ꬎቁ ኦꬂዴ፥ «ማስቃሊያ ቦላ ሚሲማሪያን ꬊሼቲዴ ኢ ካቄቶ» ያጌዲኖ። ዋላሳይ ዴንዳናዋፔ ኣቲን፥ ኣይኔ ሃኔናዋ ጲላፆሲ ቤዒዴ፥ ሃꬃ ኣኪዴ፥ «ሃ ቢታኒ ሃይቂያዋን ታኒ ጌሊኬ፤ ሄዋ ሂንቴንቱ ኤሪቴ» ያጊዴ ሺቄዳ ኣሳ ሲንꬃን ባሬ ኩሺያ ሜጬቴዳ። ሺቄዳ ኣሳይ ኡባይ ዛሪዴ፥ «ኣ ሱꬃ ጎሚ ኑናኔ ኑ ናና ጋኮ» ያጌዳ። ሄዋፔ ጉዪያን፥ ጲላፆሲ ባርባና ኡንቱንቶ ቢሌዳ፤ ሊሱዋን ዬሱሳ ሾጪዴ፥ ማስቃሊያ ቦላ ሚሲማሪያን ꬊሺዴ ካቃናው ኡንቱንቶ ኣꬂዴ ኢሜዳ። ሄዋፔ ጉዪያን፥ ጲላፆሳ ዎታዳራቱ ዬሱሳ ጋዲያ ኣዪሲያዋ ቤሩዋ ኣፊና፥ ዎታዳራቱ ኡባይ ኣ ሚዪያን ዩዪ ኣꬊዴ ኤቄዲኖ። ኣ ማዩዋ ቃሪ ኣኪዴ፥ ዞዖ ማዩዋ ኣ ማዪዜዲኖ። ቃሲ ኣጉንꬃ ኣኪሊሊያ ጊጊሲዴ፥ ኣ ሁጲያን ዎꬄዲኖ፤ ኣ ኡሼቻ ኩሺያን ማቃ ፃምዓ ኦይꬂዴ፥ ኣ ሲንꬃን ጉልባቲዴ፥ «ኣዪሁዳቱዋ ካቴው፥ ሳሮ ዴዓይ!» ያጊዴ፥ ኣ ቦላ ቂሊጬዲኖ። ኣ ቦላ ጩቼዲኖ፤ ሄ ማቃ ፃምዓ ኣኪዴ፥ ኣ ሁጲያ ሾጬዲኖ። ኡንቱንቱ ኣ ቦላ ቂሊጬዳዋፔ ጉዪያን፥ ዞዖ ማዩዋ ኣፔ ቃሪ ኣኪዴ፥ ኣ ማዩዋ ኣ ማዪዜዲኖ፤ ቃሲ ማስቃሊያ ቦላ ሚሲማሪያን ꬊሺዴ ኣ ካቃናው ኣፌዲኖ። ኡንቱንቱ ካሬ ኬሲዴ፥ ኢቲ ሲሞና ጌቴቲያ ቄሬና ጋዴ ኣሳ ዴሚዴ፥ ዬሱሳ ማስቃሊያ ዎልቃን ቶሴዲኖ። ጎልጎታ ጌቴቲያሳ ጋኬዲኖ። «ጎልጎታ» ያጌቲያዌ «ሁጲያሳ» ጊያዋ። ሄዋን ኡንቱንቱ ጫሜዳ ዎዪኒያ ኤሳ ዬሱሳው ኡሻናው ኢሜዲኖ፤ ኢ ሄዋ ጋንፂ ፄሊዴ፥ ኡሼናን ኢፄዳ። ኡንቱንቱ ማስቃሊያ ቦላ ሚሲማሪያን ꬊሺዴ ኣ ካቆዋፔ ጉዪያን፥ ኣ ማዩዋ ሻኪዴ፥ ሳማ ዬጊዴ ኣኬዲኖ። ሄዋፔ ጉዪያን፥ ኣ ናጋናው ሄዋን ኡቲ ኣጌዲኖ። ቃሲ፥ «ሃዌ ኣዪሁዳቱ ካቲያ ዬሱሳ» ያጊዴ ሞቱ ፃፌቶዋ ኣ ሁጴ ባጋና ዎꬄዲኖ። ዬሱሳና ሄ ዎዴ ላዑ ካዪሳቱዋ ኢቱዋ ኣፔ ኡሼቻ ባጋና፥ ቃሲ ኢቱዋ ኣፔ ሃዲርሳ ባጋና፥ ማስቃሊያ ቦላ ሚሲማሪያን ꬊሺዴ ካቄዲኖ። ኦጊያና ኣꬊያ ኣሳይ ዬሱሳ ካꬊዴ፥ ባሬንቱ ሁጲያ ቃꬂዴ ቦሬዲኖ። «ጌሻ ጎሊያ ኮላዴ ሄዙ ጋላሳ ጊዶን ኬፂያዎ፥ ኔ ሁጲያ ኣሻ፤ ኔኒ ፆሳ ናዓ ጊዶፔ፥ ኣኔ ማስቃሊያ ቦላፔ ዎꬋ» ያጌዲኖ። ሄዋዳንካ፥ ቄሳቱዋ ካፓቱ ሂጊያ ታማሪሲያዋንቱናኔ ጪማቱዋና ኢቲፔ ዬሱሳ ቦላ ቂሊጪዴ፥ ሃዋዳን ያጌዲኖ፤ «ሃራንታ ኣሼዳ፤ ሺን ባሬና ኣሻናው ዳንዳዬና። ኢ ኢስራዔሊያ ካቲያ፤ ኣኔ ማስቃሊያ ቦላፔ ሃዒ ዎꬎ፤ ኑኒካ ቃሲ ኣኒ ኣማናና። ፆሳን ኢ ኣማኔቴ፤ ፆሳይ ኣ ኣሻናው ኮዮፔ ኣኔ ኣሾ፤ ኣያው ጎፔ፥ ኢ ባሬና፥ ‹ታኒ ፆሳ ናዓ› ጌ» ያጌዲኖ። ቃሲ ሃራይ ኣቶ፥ ኣናና ማስቃሊያ ቦላ ሚሲማሪያን ꬊሼቲዴ ካቄቴዳ ካዪሳቱካ ሄዋዳን ጊዴ፥ ኣ ቦላ ቂሊጬዲኖ። ኡሱፑን ሳቲያፔ ዶሚዴ፥ ኡዱፑ ሳቲያ ጋካናው፥ ቢታይ ኡባይ ꬉሜዳ። ኡዱፑ ሳቴ ጊዲያ ሄራን ዬሱሲ ባሬ ቃላ ꬎቁ ኦꬂዴ፥ «ኤሎሄ፥ ኤሎሄ፥ ላማ ሳባቂታኒ?» ያጌዳ። ሄዋ ጉሳይ፥ «ታ ፆሳው፥ ታ ፆሳው፥ ታና ኣዪሲ ጮዑ ጋዲ?» ጉሳ። ሄዋን ኤቄዳ ኣሳፔ ኢቱ ሄዋ ሲሲዴ፥ «ሃ ቢታኒ ኤላሳ ፄሴ» ያጌዳ። ሄ ማንዒያንካ ኡንቱንቱፔ ኢቱ ዎፂዴ፥ ኢስፖንጂያ ኣኪዴ፥ ጫላ ዎዪኒያ ኤሳ ጊዶ ዬጊዴ፥ ሄዋ ማቃ ፃምዓ ፄራን ዎꬂዴ፥ ኡሻናው ኣ ዶናኮ ሺሼዳ። ሺን ዮኮንቱ፥ «ኣኔ ዴዓሻ፥ ኤላስ ኣ ኣሻናው ያናዌንቶ ቤዓና» ያጌዲኖ። ዬሱሲ ላዔንꬁዋ ባሬ ቃላ ꬎቁ ኦꬂ ዋሲዴ፥ ሃይቂ ኣጌዳ። ኣኬኪቴ፤ ጌሻ ጎሊያን ካቄቴዳ ጋሪዱ ቆሞፔ ዱጌ ጋካናው፥ ላዑ ኬሲዴ፥ ፖሼቲ ዎꬌዳ፤ ሳዓይ ቃፄዳ። ቃሲ ዛላይካ ጳልቄቴዳ፤ ጮራ ዱፉ ዶዬቴዳ። ፆሳ ኣሳፔ ጮራቱ ሃይቄዳዋንቱ፥ ሃይቁዋፔ ዴንዴዲኖ። ኡንቱንቱ ዱፉዋፔ ኬሲዴ፥ ዬሱሲ ሃይቁዋፔ ዴንዶዋፔ ጉዪያን፥ ጌሻ ካታማ ቤዲኖ፤ ሄዋን ኡንቱንታ ጮራ ኣሳይ ቤዔዳ። ፄቱዋ ካፑኔ ኣናና ዬሱሳ ናጊያ ዎታዳራቱ ሳዓይ ቃፂያዋኔ ሄዋን ሃኔዳዋ ኡባ ቤዔዳ ዎዴ ዳሮ ያዬዲኖ፤ ያሻ ጋሱዋን፥ «ቱሙ ሃዌ ፆሳ ናዓ» ያጌዲኖ። ሄዋን ጮራ ማጫዋንቱ፥ ጋሊላፔ ዶሚዴ፥ ዬሱሳ ማዲዴ ካሊያዋንቱ፥ ሃኩዋን ኤቂዴ ፄሊኖ። ኡንቱንቱ ጊዶን ማግዳላ ጌቴቲያ ካታማፔ ዬዳ ማይራማ፥ ያዪቆባኔ ዮሴፎ ዳያ ማይራማኔ ዛቢዲዮሳ ናና ዳያ ዴዒኖ። ሳዓይ ኦማርሲያ ዎዴ፥ ዮሴፋ ጌቴቲያ ኢቲ ዱሬ ቢታኒ፥ ኣርማቲያሳ ካታማ ቢታኒ ዬዳ፤ ኢ ባሬ ሁጴዉካ ዬሱሳ ካሊያዋ። ዮሴፎ ጲላፆሳኮ ቢዴ፥ ዬሱሳ ኣኃ ኣካናው ዎሴዳ፤ ጲላፆሲ ዮሴፎ ኢሜታና ማላ ኣዛዜዳ። ዬሱሳ ኣኃ ኣኪዴ፥ ጌሻ ሞጉዋ ማዩዋን ፃፂዴ ባሬው ሞጌታናው ሹቻ ዎጬዳ ኦራꬃ ጎንጎሉዋ ጊዶን ኣ ኣኃ ዎꬄዳ፤ ቃሲ ሄ ጎንጎሉዋ ዶናን ዎጋ ሹቻ ጎንዶርሲ ዎꬂዴ፥ ባሺ ቤዳ። ማግዳላ ካታማፔ ዬዳ ማይራማኔ ዮኮ ማይራማ ሄዋን ጎንጎሉዋኮ ሲሚዴ ኡቴዲኖ። ሳምባታሲ ጊጌቲያ ጋላሳፔ ዎንቴꬃ ጋላሲ፥ ቄሳቱዋ ካፓቱኔ ፓሪሳዋቱ ጲላፆሳና ጋኬቲዴ፥ ሃዋዳን ያጌዲኖ፤ «ጎዳው፥ ሄ ዎርዱ ፓፃ ዴዒያ ዎዴ፥ ‹ታኒ ሄዙ ጋላሳፔ ጉዪያን፥ ሃይቁዋፔ ዴንዳና› ያጎዋ ኑኒ ሃሳዬዶ። ሄዋ ዲራው፥ ኣ ሞጌዳ ጎንጎሉዋ ሄዙ ጋላሳ ጋካናው፥ ሎይꬂ ናጋና ማላ ኣዛዛሪኪ፤ ሄዌ ꬋዮፔ ኣ ካሊያዋንቱ ቢዴ፥ ኣ ኣኃ ዉዒዴ ኣሳው፥ ‹ሃይቁዋፔ ዴንዴዳ› ያጋናዋንታ፤ ላዔንꬂያ ባላይ ካሴ ባላፔ ኡባ ያ ኢታና» ያጌዲኖ። ጲላፆሲ ኡንቱንታ፥ «ሂንቴንቶ ናጊያዋንቱ ዴዒኖ፤ ቢዴ ሂንቴንቶ ዳንዳዬቲያ ኬና ናጊሺቴ» ያጌዳ። ሄዋፔ ጉዬ ኡንቱንቱ ቢዴ፥ ሹቻ ቦላ ማታፋ ኣታሚዴ፥ ቃሲ ናጊያዋ ያኒ ዎꬂዴ፥ ዬሱሳ ሞጌዳ ጎንጎሉዋ ናጊሴዲኖ። ሳምባታይ ኣꬊና ዎጋ ጋላሲ ዎንታ ባካሊያን፥ ማግዳላ ጌቴቲያ ካታማፔ ዬዳ ማይራማኔ ዮኮ ማይራማ ዬሱሲ ሞጌቴዳ ጎንጎሉዋ ቤዓናው ቤዲኖ። ጎዳ ኪታንቻይ ሳሉዋፔ ዎꬌዳ ዲራው፥ ሳዓይ ዳሮ ቃፄዳ፤ ሄ ኪታንቻይ ዪዴ፥ ሹቻ ጎንዶርሲ ኦሊዴ፥ ኣ ቦላ ኬሲ ኡቴዳ። ኣ ማላይ ዋልቃንꬃ ማላቴ፤ ኣ ማዩካ ሻቻዳን ቦꬃ። ናጊያዋንቱ ኪታንቻው ያሻ ኮኮሪዴ፥ ሃይቄዳ ኣሳዳን ሃኔዲኖ። ኪታንቻይ ማጫዋንታ ሃዋዳን ያጌዳ፤ «ያዮፒቴ፤ ኣያው ጎፔ፥ ማስቃሊያ ቦላ ሚሲማሪያን ꬊሺዴ ካቄዳ ዬሱሳ ሂንቴንቱ ኮዪያዋ ታኒ ኤራይ። ኢ ሃዋን ባዋ፤ ኣያው ጎፔ፥ ኢ ባሬ ጌዳዋዳንካ ሃይቁዋፔ ዴንዲ ዲጌዳ፤ ሃ ዪዴ፥ ኢ ሞጌቲ ጊሶሳ ቤዒቴ። ሂንቴንቱ ሃዒ ኤሌካ ቢዴ፥ ዬሱሳ ካሊያዋንቶ፥ ‹ዬሱሲ ሃይቁዋፔ ዴንዲ ዲጌዳ። ቃሲ ኢ ሂንቴፔ ካሴቲዴ፥ ጋሊላ ቤ፤ ሂንቴንቱ ኣ ያኒ ቤዓና› ያጊዴ ኦዲቴ። ቤዒቴ፥ ታኒ ሂንቴንቱሲ ኦዳዲ» ያጌዳ። ኡንቱንቱ ያዪዲኔ ቃሲ ዳሮ ናሼቲዴ፥ ዬሱሲ ሞጌቴዳ ጎንጎሉዋ ማታፔ ኤሌካ ኪቺዴ፥ ዬሱሳ ካሊያዋንቶ ኦዳናው ዎፄዲኖ። ሄ ማንዒያንካ ዬሱሲ ኡንቱንቱና ጋኬቲዴ ኡንቱንታ፥ «ሳሮ ዴዒቴ» ያጊ ኣጌዳ፤ ኡንቱንቱ ኣኮ ሺቂ ኣ ጌዲያ ኦይቂዴ፥ ኣው ጎዪኔዲኖ። ዬሱሲ ሄ ዎዴ ኡንቱንታ፥ «ያዮፒቴ፤ ታ ኢሻቱ ጋሊላ ባና ማላ፥ ቢዴ ኡንቱንቶ ኦዲቴ፤ ኡንቱንቱ ታና ያኒ ቤዓናዋንታ» ያጌዳ። ሄ ማጫዋንቱ ቢያ ዎዴ፥ ጎንጎሉዋ ናጊያ ዎታዳራቱዋፔ ኣማሬዳዋንቱ ካታማ ቢዴ፥ ሃኔዳዋ ኡባ ቄሳቱዋ ካፓቶ ኦዴዲኖ። ቄሳቱዋ ካፓቱ ጪማቱዋና ኢቲፔ ሺቂ ዞሬቲዴ፥ ዎታዳራቶ ዳሮ ሚሻ ኢሚዴ፥ « ‹ኑኒ ጌሚዒሹዋን ዴዒሺን ኣ ካሊያዋንቱ ቃማ ዪዴ፥ ኣ ኣኃ ዉዔዲኖ› ያጊቴ። ሃ ዬዉዋ ጋዲያ ኣዪሲያዌ ሲሶፔ፥ ኑኒ ኣው ኦዲ ኣማንꬃና፤ ቃሲ ሂንቴንታ ኣይኔ ሂርጊሴናዳን ኦꬃና» ያጌዲኖ። ዎታዳራቱ ሚሻ ኣኪዴ፥ ባሬንቶ ኦዴዳዋዳን ኦꬄዲኖ። ሃ ዬዉ ኣዪሁዳቱዋ ማታን ሃቼ ጋካናው፥ ኦዴቲዴ ዴዔ። ሺን ታማኔ ኢቲ ኣ ካሊያዋንቱ ዬሱሲ ባሬንታ ቢቴ ጌዳ ጋሊላ ጋዲያ ቢዴ ኣ ቤዔዳ ዎዴ፥ ኣው ጎዪኔዲኖ፤ ሺን ኡንቱንቱፔ ኢቱ ኢቱ ሲꬌዲኖ። *** ዬሱሲ ኡንቱንቱኮ ሺቂዴ፥ ኡንቱንታ ሃዋዳን ያጌዳ፤ «ማታይ ኡባይ ሳሉዋኒኔ ሳዓን ታው ኢሜቴዳ። ሄዋ ዲራው፥ ሂንቴንቱ ቢዴ፥ ኣሳ ኡባ ታና ካሊያዋንታ ኦꬂቴ፤ ኣዉዋ ሱንꬃን፥ ናዓ ሱንꬃኒኔ ጌሻ ኣያና ሱንꬃን ኡንቱንታ ፃማቂቴ። ታኒ ሂንቴንታ ኣዛዜዳባ ኡባ ኡንቱንቱ ናጋና ማላ፥ ኡንቱንታ ታማሪሲቴ፤ ታኒ ዎዲያ ዉርሴꬃይ ጋካናሲካ ኡባ ዎዴ ሂንቴንቱና ዴዒያዋ ኣኬኪቴ» ያጌዳ። ፆሳ ናዓ ዬሱሲ ኪሪስቶሳ ዎንጋላ ሚሺራቹዋ ዶሜꬃ። ናቢያ ኢሲያሲ ፃፌዳ ማፃፋን ፆሳይ፥ «ቤዓ፤ ታ ኪቲያዋ ታኒ ኔፔ ሲንꬃው ዬዳና። ኢ ኔው ኦጊያ ኬሳናዋ። ኢቲ ቢታኒ ቢታ ባዙዋን ባሬ ኮሻ ꬎቁ ኦꬂዴ፥ ‹ጎዳ ኦጊያ ጊጊሲቴ። ኢ ሃሜታና ሎሱዋካ ኣው ሱሪሲቴ› ጌዳዋዳን» ሃኔዳ። ፃማቂያ ዮሃኒሲ ኣሳ ፃማቂዲኔ፥ «ፆሳይ ሂንቴ ናጋራ ኣቶ ጋና ማላ፥ ሂንቴንቱ ናጋራፔ ሲሚዴ ፃማቄቲቴ» ያጊ ቃላ ኦዲዴ ቢታ ባዙዋን ኬሲ ዎꬌዳ። ዪሁዳ ጋዲያን ዴዒያ ኣሳይ ኡባይኔ ዬሩሳላሜ ካታማ ኣሳይ ኡባይ ዮሃኒሳኮ ዬዲኖ። ባሬንቱ ናጋራካ ፓፂና፥ ዮሃኒሲ ሄ ኣሳ ዮርዳኖሳ ሻፋን ፃማቄዳ። ዮሃኒሲ ጋሉዋ ኢስኪያፔ ዳዴቴዳ ማዩዋ ማዪዴ፥ ባሬ ፄሳን ዳፉዋ ዳንጬዳ፤ ቃሲ ቦሊያኔ ዎራ ኤሳ ሜዳ። ዮሃኒሲ ቃላ ኦዲዴ፥ «ታፔ ጉዬና ዳሮ ሚኒያዌ ዬ፤ ሃራይ ኣቶ፥ ኣ ጫማካ ጌዲያፔ ኬሳ ቶካናው ታኒ ቤሲኬ። ታኒ ሂንቴንታ ሃꬃን ፃማቃይ፤ ሺን ኢ ሂንቴንታ ጌሻ ኣያናን ፃማቃናዋ» ያጌዳ። ዬሱሲ ሄ ዎዴ ጋሊላ ጋዲያን ዴዒያ ናዚሬቴ ካታማፔ ዪና፥ ዮሃኒሲ ዮርዳኖሳ ሻፋን ኣ ፃማቄዳ። ዬሱሲ ሃꬃፔ ኬሶሳና ሳሉ ዶዬቲሺናኔ ጌሻ ኣያናይ ባሬ ቦላ ሃራጲያዳን ዎꬊሺን ቤዔዳ። ቃሲ ሳሉዋፔ፥ «ታኒ ሲቂያ ታ ናዓይ ኔና፤ ታና ኔባይ ናሼቼ» ያጊያ ቃላይ ሲሴቴዳ። ኤሌካ ጌሻ ኣያናይ ኣሳይ ባዪና ሜላሳ ኣ ዬዴዳ። ዬሱሲ ኣሳይ ባዪናሳኒ ባሬና ሴፃናይ ፓጪሺን፥ ኦይታሙ ጋላሳ ጋꬄዳ፤ ዱዓናካ ዴዔዳ፤ ኪታንቻቱካ ዪዴ፥ ኣው ኦꬄዲኖ። ዮሃኒሲ ቃሼቶዋፔ ጉዪያን፥ ዬሱሲ ፆሳ ካዉቴꬃ ዎንጋላ ሚሺራቹዋ ኦዲዴ፥ ጋሊላ ጋዲያ ቢዴ፥ «ዎዲ ጋኬዳ፤ ፆሳ ካዉቴꬃይካ ማታቴዳ። ሂንቴንቱ ናጋራፔ ሲሚዴ፥ ዎንጋላ ሚሺራቹዋ ኣማኒቴ» ያጌዳ። ዬሱሲ ጋሊላ ኣባ ላንቂያና ኣꬊዴ፥ ሞሊያ ኦይቂያዋንታ፥ ሲሞናኔ ኣ ኢሻ ኢንዲራሳ፥ ባሬንቱ ዳባ ኣባን ዬጊያዋንታ ቤዔዳ። ያቲዴ ኡንቱንታ፥ «ታና ካሊቴ፤ ታኒ ሂንቴንታ ሞሊያ ኦይቂያዋዳን ኣሳ ታኮ ኣሂያ ኦጊያ ታማሪሳና» ያጌዳ። ሄዋፔ ጉዪያን ኡንቱንቱ ኤሌካ ባሬንቱ ዳባ ኣጊዴ፥ ዬሱሳ ካሌዲኖ። ዬሱሲ ጉꬃ ሲንꬃዉኮ ቢዴ፥ ዛቢዲዮሳ ናና ላዑ ኢሻቱዋ፥ ያዪቆባኔ ዮሃኒሳ ዎንጊሪያ ጊዶን ባሬንቱ ዳባ ጊጊሲያዋንታ ቤዔዳ። ኢ ቤዖሳንካ ኡንቱንታ ፄሲና፥ ባሬንቱ ኣዉዋ፥ ዛቢዲዮሳ፥ ኣ ኦሳንቻቱዋና ዎንጊሪያ ጊዶን ኣጊዴ፥ ዬሱሳ ካሊዴ ቤዲኖ። ኡንቱንቱ ቂፊሪናሆማ ጌቴቲያ ካታማ ዪዴ ጌሌዲኖ፤ ዬሱሲ ሳምባታ ጋላሳይ ጋኮ ዎዴ፥ ኣዪሁዳ ዎሳ ጎሌ ጌሊዴ፥ ታማሪሱዋ ዶሚ ኣጌዳ። ባሬው ማታይ ዴዒያ ኣሳዳን፥ ኣሳ ኢ ታማሪሲያዋፔ ኣቲን፥ ሂጊያ ታማሪሲያዋንቱዳን ታማሪሴና ዲራው፥ ኣሳይ ኣ ቲሚርቲያን ማላሌቴዳ። ሄ ዎዴ ኢታ ኣያናይ ዴዒያ ኢቲ ቢታኒ ኣዪሁዳ ዎሳ ጎሌ ጌሎሳናካ ባሬ ኮሻ ꬎቁ ኦꬂዴ፥ «ናዚሬቲያ ዬሱሳ፥ ኔኒ ኑፔ ኣያ ኮያይ? ኑና ꬋዪሳናው ያዲ? ኔኒ ኦኔንቶ ኤራይ፤ ኔኒ ፆሳፔ ኪቴቴዳ ጌሻ ጊዲኪ!» ያጌዳ። ዬሱሲ ሄ ኢታ ኣያና፥ «ሃይዛ፤ ቢታኒያፔ ኬሳ» ያጊዴ ኣዛዜዳ። ኢታ ኣያናይ ቢታኒያ ቡጬሬꬂ፥ ዳሪ ዋሲሲዴ፥ ኣፔ ኬሲ ኣጌዳ። ኣሳይ ኡባይ ማላሌቲዴ፥ «ሃዌ ኣዬ? ሃ ቢታኒ ባሬ ማታኒ ሃራይ ኣቶ፥ ኢታ ኣያናቱዋካ ኣዛዜዳ፤ ኡንቱንቱካ ቃሲ ኣው ኣዛዜቲኖ፤ ሃዌ ኣይቤ ኦራꬃ ቲሚርቴ?» ያጊዴ፥ ባሬ ጊዶን ኢቱ ኢቱዋ ኦቼዳ። ጋሊላ ጋዲያን ዴዒያ ሄራይ ኡባይ ኤሌካ ዬሱሳ ዋሪያ ሲሴዲኖ። ዬሱሲ ኣዪሁዳ ዎሳ ጎሊያፔ ኬሶሳን፥ ያዪቆባናኔ ዮሃኒሳና ኢቲፔ ሲሞናኔ ኢንዲራሳ ሶይ ቢ ኣጌዳ። ሲሞና ቦሎታታ ቆፁዋ ሃርጋዴ ጊሴዳዉኒባ ኢ ያ ጋኮሳናካ ኣው ኦዲ ኣጌዲኖ። ኢ ኢዚኮ ሺቂዴ፥ ኢዚ ኩሺያ ኦይቂዴ፥ ኢዞ ዴንꬂ ኤሴዳ፤ ቆፁ ኢዞ ኣጊና፥ ኢዛ ኡንቱንቶ ኦꬃዱ። ሃርጌዳ ኣሳ ኡባኔ ኢታ ኣያናቱ ኦይቄዳ ኣሳ ኡባ ኦማርሲ ኣዋይ ዉሌዳዋፔ ጉዪያን፥ ኣሳይ ኣኮ ኣሄዲኖ። ካታማን ዴዒያ ኣሳይ ኡባይ ሄ ካሪያ ሺቄዳ። ዬሱሲ ዱማ ዱማ ሃርጊያን ኦይቄቴዳ ጮራ ኣሳ ፓꬂዴ፥ ጮራ ፃላሃቱዋካ ኬሴዳ። ኢ ኪሪስቶሳ ጊዲያዋ ኢታ ኣያናቱ ኤሬዳ ዲራው፥ ኡንቱንታ ሃሳዪሴናኒ ዲጌዳ። ዬሱሲ ጉራ ዎንቱማꬃኒ ዴንዲዴ፥ ሶዪፔ ኬሲዴ፥ ኣሳይ ባይናሳ ቢዴ ያኒ ፆሳ ዎሴዳ። ሲሞኒኔ ኣናና ዴዒያዋንቱ ኣ ኮዪዴ ቤዲኖ። ኡንቱንቱ ኣ ዴሚዴ፥ «ኣሳይ ኡባይ ኔና ኮዬ» ያጌዲኖ። ሄዋፔ ጉዬ ዬሱሲ ቃሲ ኡንቱንታ፥ «ሄዋ ሄራን ዴዒያ ሃራ ካታማቱዋ ቦይቴ፤ ታኒ ሄዋን ቃላ ኦዳናው ቤሴ፤ ኣዪሲ ጎፔ፥ ታኒ ዬዳዌ ሄዋሳ» ያጌዳ። ኣዪሁዳ ዎሳ ጎሌቱዋን ቃላ ኦዲዲኔ ኢታ ኣያናቱዋ ኬሲዴ፥ ጋሊላ ጋዲያ ኡባ ዩዬዳ። ኦሉ ኦይቄዳ ኢቲ ቢታኒ ዬሱሳኮ ዪዴ፥ ኣ ሲንꬃን ጉልባቲዴ፥ «ኔኒ ኮዮፔ፥ ታና ጌሻ ፓꬃናው ዳንዳያ» ያጊዴ ዎሴዳ። ዬሱሲ ኣው ቃሬቴዳ፤ ባሬ ኩሺያ ዬዲ፥ ኣ ቦቺዴ፥ «ታኒ ኮያይ፤ ጌያ፤ ፓፃ!» ያጌዳ። ኤሌካ ኦሉ ቢታኒያ ዬዲ ኣጊና፥ ቢታኒ ጌዪ ፓፂ ኣጌዳ። ዬሱሲ ዳሪ ሃንቄቲዴ፥ ኤሌካ ኣ ኬሲ ዬዴዳ። ኢ ቢታኒያ፥ «ኔና ኤራ! ሃዋ ኦሲኔ ኦዶፓ፤ ሺን ባዴ ኔ ቦላ ቄሳ ቤሳ፤ ቃሲ ኔኒ ሃዒ ጌሻ ጊዴዳዋ ኣሳ ኤሪሳናው፥ ሙሴ ኣዛዜዳ ያርሹዋ ያርሻ» ያጌዳ። ሺን ቢታኒ ቢዴ፥ ዬዉዋ ኡባሳን ኣሳ ኡባው ኦዱዋኔ ላሌꬃ ዶሜዳ፤ ሄዋ ዲራው፥ ዬሱሲ ቆንጪያ ኬሲዴ፥ ካታማ ጌላናው ዳንዳዪቤና፤ ሺን ኣሳይ ባዪናሳ ጋፃን ዴዔዳ፤ ቃሲ ኣሳይ ኡባሳፔ ኣኮ ዬዲኖ። ኣማሬዳ ጋላሳፔ ጉዪያን፥ «ዬሱሲ ቂፊሪናሆማ ጉዬ ሲሚዴ፥ ሶዪን ዴዔ» ጊያ ሃሳያይ ሲሴቴዳ። ጎሊ ኣኬናን ኢፂና፥ ሃራይ ኣቶ፥ ካሪካ ኡንዓና ጋካናሲ ጮራ ኣሳይ ሺቄዳ፤ ሄዋንቱሲ ዬሱሲ ቃላ ኦዴ። ኦይዱ ኣሳቱ ቦላይ ሲሌዳ ኢቲ ቢታኒያ ቶኪዴ፥ ኣኮ ኣሄዲኖ። ኣሳይ ጮሬዳ ዲራው፥ ቢታኒያ ዬሱሳኮ ኣፋናው ኡንቱንቶ ዳንዳዬቴናን ኢፂና፥ ዬሱሲ ዴዒያ ባጋና ጎሊያ ቃሪዴ፥ ካራ ሉኬዲኖ፤ ሄ ሉኬዳሳና ቢታኒያ ኢ ጊሴዳ ሻንቻማና ዱጌ ዎꬄዲኖ። ዬሱሲ ኡንቱንቱ ኣማኑዋ ቤዒዴ፥ ሄ ቦላይ ሲሌዳ ቢታኒያ፥ «ታ ናዓው፥ ኔ ናጋራይ ኣቶ ጌቴቴዳ» ያጌዳ። ሂጊያ ታማሪሲያዋንቱፔ ሄዋን ኡቴዳ ኢቱ ኢቱ ባሬንቱ ዎዛናኒ፥ «ላ ሃ ቢታኒ ሃዋ ማላ ኢታባ ፆሳ ቦላ ኣዪሲ ሃሳዪ? ፆሳ ፃላላፔ ኣቲን፥ ሃራይ ኦኔ ናጋራ ኣቶ ጋናው ዳንዳዪያዌ?» ያጊዴ ቆፔዲኖ። ኡንቱንቱ ባሬንቱ ዎዛናን ሄዋዳን ቆፖዋ ዬሱሲ ኤሌካ ባሬ ኣያናን ኤሪዴ፥ ኡንቱንታ «ሂንቴንቱ ሂንቴ ዎዛናን ኣዪሲ ሄዋዳን ቆፒቴ? ቦላይ ሲሌዳ ቢታኒያ፥ ‹ኔ ናጋራይ ኣቶ ጌቴቴዳ› ጊያዌ ማቴዬ? ዎይ፥ ‹ዴንዳ ኤቃዴ ኔ ሻንቻማ ቶካዴ ሃሜታ› ጊያዌ ማቴ? ሺን ታኒ፥ ኣሳ ናዓው፥ ሳዓ ቦላን ናጋራ ኣቶ ጋናው ማታይ ዴዒያዋ ታኒ ሂንቴንታ ኤሪሳና» ያጊዴ ሄ ቦላይ ሲሌዳ ቢታኒያ፥ «ኔና ጋይ፤ ዴንዳ ኤቃ፤ ያታዴ ኔ ሻንቻማ ቶካዴ ኔ ሶይ ባ» ያጌዳ። ቢታኒ ኤሌካ ዴንዲ ኤቂዴ፥ ባሬ ሻንቻማ ቶኪዴ፥ ኣሳይ ኡባይ ፄሊሺን ቢና ኣሳይ ኡባይ ማላሌቲዴ፥ «ኑኒ ሃዋ ማላባ ኡባካ ቤዒ ኤሮኮ» ያጊዴ ፆሳ ጋላቴዲኖ። ዬሱሲ ጉጂካ ጋሊላ ኣባ ዶና ቤዳ፤ ኣሳይ ኡባይ ኣኮ ዬዳዋንታ ታማሪሴዳ። ሄዋና ኣꬊዴ፥ ኢልፒዮሳ ናዓ ሌዊያ፥ ጊያዌ ቃራፃ ቃንፂያሳን ኡቴዳዋ ዴሚዴ፥ «ታና ካላ» ያጌዳ። ሄዋፔ ጉዬ ሌዊ ዴንዲ ኤቂዴ፥ ኣ ካሌዳ። ዬሱሲ ቁማ ማናው ሌዊያ ሶዪን ኡቴዳ ዎዴ፥ ቃራፃ ኣኪያ ጮራ ኣሳይኔ ናጋራንቻቱ ኣናናኔ ኣ ካሊያዋንቱና ኢቲፔ ኡቴዲኖ። ኣ ካሊያዋንቱ ጊዶን ሄዋንቱ ማላ ኣሳቱ ዳሬዲኖ። ሂጊያ ታማሪሲያ ኢቲ ኢቲ ፓሪሳዋቱ ዬሱሲ ናጋራንቻቱዋናኔ ቃራፃ ኣኪያዋንቱና ቁማ ሚሺን ቤዒዴ፥ «ኢ ኣዪሲ ናጋራንቻቱዋናኔ ቃራፃ ኣኪያዋንቱና ቁማ ሚ?» ያጊዴ፥ ኣ ካሊያዋንታ ኦቼዲኖ። ዬሱሲ ኡንቱንቱ ጊያዋ ሲሲዴ፥ «ሃርጋንቻቱዋፔ ኣቲን፥ ፓፃ ኣሳው ኣኪሚ ኮሼና፤ ታኒ ናጋራንቻቱዋ ፄሳናው ዬዳዋፔ ኣቲን፥ ፂላቱዋ ፄሳናው ያቤይኬ» ያጊዴ ኡንቱንቶ ዛሬዳ። ፃማቂያ ዮሃኒሳ ካሊያዋንቱኔ ፓሪሳዋቱ ፆሚኖ፤ ኣማሬዳ ኣሳቱ ዬሱሳኮ ዪዴ፥ «ዮሃኒሳ ካሊያዋንቱኔ ፓሪሳዋቱዋ ካሊያዋንቱ ፆሚኖ፤ ሺን ኔና ካሊያዋንቱ ኣዪሲ ፆሚኪኖ?» ያጌዲኖ። ዬሱሲ ኡንቱንታ «ቡላቻ ዬዳ ኣሳቱ ማቻቶ ኣኪያዌ ባሬንቱና ዴዒሺን፥ ፆማናው ዳንዳዪኖ? ማቻቶ ኣኪያዌ ኡንቱንቱና ዴዒሺን፥ ፆማናው ዳንዳይኪኖ። ሺን ማቻቶ ኣኪያዋ ኡንቱንቱ ማታፔ ኣፋና ዎዲ ያናዋ፤ ኡንቱንቱ ሄ ዎዴ ፆማናዋንታ። «ኤጫ ማዩዋ ቦላ ኦራꬃ ꬌፊያ ዎꬂ ሲኪያ ኣሳይ ባዋ፤ ኤጫ ዎꬂ ሲኮፔ፥ ኦራꬃ ꬌፊ ኤጫ ማዩዋ ፔꬌሬꬄ፤ ፔꬌꬃይካ ኮይሮዋፔ ዳራና። ቃሲ ሆዖ ዎዪኒያ ኤሳ ኤጫ ኦጎሩዋን ናዒያ ኣሳይ ባዋ፤ ሺን ናዖፔ፥ ሄ ዎዪኒያ ኤሳይ ኦጎሩዋ ዳኬ፤ ባሬዉካ ዎፌቴ፤ ኦጎሩካ ባዬ፤ ሺን ሆዖ ዎዪኒያ ኤሳ ኦራꬃ ኦጎሩዋን ናዔቴ» ያጌዳ። ዬሱሲ ኢቲ ሳምባታ ጋላሲ ቲሻ ባንጋ ጊዶና ኣꬊሺን፥ ኣ ካሊያዋንቱና ኣናና ቢዴ፥ ባንጋ ቲሻፔ ዱሳ ዶሜዲኖ። ፓሪሳዋቱ ዬሱሳ፥ «ቤዓ፤ ኔና ካሊያዋንቱ ሳምባታ ጋላሲ ሂጌ ጊዴናባ ኣዪሲ ኦꬂኖ?» ያጌዲኖ። ዬሱሲ ኡንቱንታ፥ «ዳዊቴ ኮሻቲዴ፥ ሚያባ ኮዬዳ ዎዴ፥ ባሬናና ዴዒያዋንቱና ኦꬄዳዋ ኡባካ ናባቢቤይኪቴ? ኣቢያታሪ ቄሳቶ ኡባቶ ካፖ ጊዴዳ ዎዴ፥ ዳዊቴ ፆሳ ጎሊያ ጌሊዴ፥ ቄሳቱዋ ፃላላይ ማናፔ ኣቲን፥ ኦኒኔ ማናው ሂጌ ጊዴናዋ ጎዳ ሲንꬃን ዎꬄዳ ቁማ ሚዴ፥ ባሬናና ዴዒያዋንቶካ ኢሜዳ» ያጌዳ። ቃሲካ ዬሱሲ ኡንቱንታ፥ «ሳምባታይ ኣሳው ሜꬌቴዳዋፔ ኣቲን፥ ኣሳይ ሳምባታው ሜꬌቲቤና። ሄዋ ዲራው፥ ታኒ፥ ኣሳ ናዓይ፥ ሃራይ ኣቶ፥ ሳምባታዉካ ጎዳ» ያጌዳ። ዬሱሲ ኣዪሁዳ ዎሳ ጎሊያ ሺሬቲካ ጌሌዳ፤ ሄዋን ኩሺ ሲሌዳ ኢቲ ቢታኒ ዴዔ። ኢቲ ኢቲ ኣሳይ ዬሱሳ ሞታናው ኮዪዴ፥ ኩሺ ሲሌዳ ቢታኒያ ሳምባታን ኢ ፓꬆፔ ቤዓናው ናጌ። ዬሱሲ ሄ ኩሺ ሲሌዳ ቢታኒያ፥ «ዴንዳ ኤቃዴ ሲንꬃው ሃ ያ» ያጌዳ። ሄዋፔ ጉዪያን ኣሳ፥ «ሳምባታን ሎዖባ ኦꬂያዌ ዎጌዬ ኢታባ ኦꬂያዌ ዎጌ? ኣሳ ሼምፑዋ ኣሺያዌ ዎጌዬ ዎꬊያዌ ዎጌ?» ያጊዴ ኦቼዳ። ሺን ኣሳይ ጮዑ ጌዳ። ዬሱሲ ሃንቄቲዴ፥ ኡንቱንታ ዩሺ ኣꬂ ፄሊዴ፥ ኡንቱንቱ ኦዲና ሲሴናዋንታ ጊዲያ ዲራው፥ ኡንቱንቶ ዳሪ ካዮቴዳ፤ ሄ ቢታኒያ፥ «ኔ ኩሺያ ፒዲ ኦꬃ» ያጌዳ፤ ቢታኒ ፒዲ ኦꬂና፥ ኣ ኩሺ ፓፂ ኣጌዳ። ፓሪሳዋቱ ኣዪሁዳ ዎሳ ጎሊያፔ ካሬ ኬሲዴ፥ ዬሱሳ ዎቲ ዎꬋኔንቶ ሄሮዲሳና ዴዒያዋንቱና ማቄቴዲኖ። ዬሱሲ ባሬና ካሊያዋንቱና ጋሊላ ኣባ ቤዳ፤ ጋሊላፔ ጮራ ኣሳይ ኣ ካሌዳ። ቃሲካ ጮራ ኣሳይ ዪሁዳፔ፥ ዬሩሳላሜፔ፥ ኤዶሚያሳፔ፥ ዮርዳኖሳ ሻፋፔ ሄፊንꬃ ባጋፔ፥ ፂሮሳ ካታማፔኔ ሲዶና ካታማፔ ዬሱሲ ኦꬄዳዋ ሲሲዴ፥ ኣኮ ዬዳ። ዬሱሲ ጮራ ኣሳይ ባሬና ሱጊ ኡንዔꬄና ማላ፥ ባሬና ካሊያዋንታ ዎንጊሪያ ባሬው ጋሚዔꬃና ማላ ኣዛዜዳ። ዳሮ ኣሳ ኢ ፓꬄዳ ዲራው፥ ሃርጊያ ኣሳይ ኡባይ ኣ ቦቻናው ሱጌሬቴ። ኢታ ኣያናይ ዴዒያ ኣሳቱካ ኣ ቤዔዳ ዎዴ ኡባን ኣ ሲንꬃን ጉፋኒዴ፥ ባሬንቱ ቃላ ꬎቁ ኦꬂዴ፥ «ኔን ፆሳ ናዓ ጊዲኪ!» ያጌዲኖ። ዬሱሲ ሄ ኢታ ኣያናቱ ባሬባ ኣሳው ኦዲዴ፥ ባሬና ቆንጪያ ኬሴና ማላ፥ ኡንቱንታ ሚኒሲዴ ኣዛዜዳ። ዬሱሲ ዴሪያ ቦላ ኬሲዴ፥ ባሬ ኮዬዳ ኣሳቱዋ ባሬኮ ፄሴዳ፤ ሄዋፔ ጉዬ ኣኮ ቤዲኖ። ኡንቱንቱ ባሬናና ዴዓና ማላኔ ቃላ ኦዳናው ኡንቱንታ ኪታና ማላ፥ ኢታ ኣያናቱዋ ኣሳፔ ኬሳናው ኡንቱንቶ ማታይ ዴዓና ማላ፥ ታማኔ ላዑ ኣሳቱዋ ዶሬዳ። *** ኢ ዶሬዳ ታማኔ ላዓቱ ሃዋንታ፡ ጴፂሮሳ ያጊዴ ሱንꬄዳ ሲሞና፥ ቦዓኔርጌሳ ያጊዴ ሱንꬄዳ ዛቢዲዮሳ ናና ያዪቆባኔ ያዪቆባ ኢሻ ዮሃኒሳ። «ቦዓኔርጌሳ» ጊያዌ «ዎልቃማ ኣሳቱዋ» ጊያዋ። ኢንዲራሳኔ ፒሊጶሳ፥ ባርታላሞሳኔ ማቶሳ፥ ቶማሳኔ ኢልፒዮሳ ናዓ ያዪቆባ፥ ታዶሳኔ ባሬ ቢታው ሴሌቲያ ሲሞና፥ ዬሱሳ ኣꬂ ኢሜዳ ዪሁዳ ኣስቆሮታ። ዬሱሲ ሶይ ቤዳ፤ ላዔንꬁዋካ ቃሲ ጮራ ኣሳይ ሺቂና፥ ኢኔ ኣ ካሊያዋንቱና ሃራይ ኣቶ፥ ቁማ ማናዉካ ዳንዳይቤይኪኖ፤ ኣሳይ ኣ፥ «ጎዬ» ጊያ ዲራው፥ ኣ ዳባቱ ሄዋ ሲሲዴ፥ ኣ ኣካናው ቤዲኖ። ሂጊያ ታማሪሲያ ኢቲ ኢቲ ኣሳቱ ዬሩሳላሜፔ ዪዴ፥ «ዬሱሳ ቦላ ቢዔል-ዜቡል ዴዔ» ያጌዲኖ፤ ቃሲ፥ «ፃላሃቱዋ ካፑ ባሬው ዎልቃ ኢሚና፥ ኢታ ኣያናቱዋ ኬሴ» ያጊዴ ሃሴዬዲኖ። ዬሱሲ ኣሳ ባሬኮ ፄሲዴ፥ ሌሚሱዋ ኦዲዴ፥ «ሴፃናይ ሴፃና ዎቲ ኬሳናው ዳንዳዪ? ኢቲ ካዉቴꬃይ ባሬ ጊዶን ሻኬቶፔ፥ ሄ ካዉቴꬃይ ኤቃናው ዳንዳዬና፤ ቃሲ ኢቲ ጎሌ ኣሳይካ ባሬ ጊዶን ሻኬቶፔ፥ ሄ ጎሌ ኣሳይካ ኤቃናው ዳንዳዬና። ሴፃናይ ባሬናና ዋላቄቲዴ ሻኬቶፔ፥ ባያናፔ ኣቲን፥ ዴዓና ዳንዳዬና። «ሺን ዎልቃማ ኣሳ ጎሌ ጌሊዴ ካሴቲዴ ኣ ቃቼናን ዴዒዴ፥ ኣ ሚሻ ቦንቃናው ዳንዳዪያ ኣሳይ ባዋ፤ ቃቼዳዋፔ ጉዪያን፥ ኣ ጎሊያ ቦንቃናው ዳንዳዬ። «ታኒ ሂንቴንቶ ቱሙዋ ጋይ፤ ፆሳይ ኣሳ ናናው ናጋራ ኡባኔ ኡንቱንቱ ቦሪያ ቦሪያ ኡባ ኣቶ ጋና፤ ሺን ጌሻ ኣያና ቦላ ኢታ ቦሪያ ሃሳዪያ ኦሲኔ ሜꬊናው ናጋራ ጊዳናፔ ኣቲን፥ ፆሳይ ኡባካ ኣቶ ጌና» ያጌዳ። ዬሱሲ ሄዋ ጌዳዌ፥ ኢቲ ኢቲ ኣሳቱ፥ «ዬሱሳ ቦላ ኢታ ኣያናይ ዴዔ» ያጌዳ ዲራሳ። ዬሱሳ ዳያኔ ኣ ኢሻቱ ዪዴ፥ ካሬን ኤቂ ኣኮ ኣሳ ኪቲዴ፥ ኣ ፄሲሴዲኖ። ጮራ ኣሳይ ኣ ማታን ኡቴዲኖ፤ ሄ ኪቴቴዳዌ ኣ፥ «ቤዓ፤ ኔ ዳያኔ ኔ ኢሻቱ ካሬን ኤቂዴ፥ ኔናና ጋኬታናው ኮዪኖ» ያጌዳ። ዬሱሲ ዛሪዴ፥ «ታ ዳያ ኦኔ? ቃሲ ታ ኢሻቱ ኦኔ?» ያጌዳ። ባሬ ማታን ኡቴዳ ኣሳ ዩሺ ኣꬂ ፄሊዴ፥ «ቤዒቴ፤ ታ ዳያኔ ታ ኢሻቱ ሃዋንቱሺ። ፆሳይ ኮዪያዋ ኦꬂያ ኡባይ ታ ኢሻ፥ ታ ሚቻቶኔ ታ ዳዮ» ያጌዳ። ዬሱሲ ሺሬቲካ ጋሊላ ኣባ ማታን ታማሪሱዋ ዶሜዳ፤ ጮራ ኣሳይ ባሬ ሚዪያን ዩዪ ኣꬊዴ ሺቂ ኡቲና፥ ኣባን ዴዒያ ዎንጊሪያ ጊዶ ጌሊዴ፥ ኣኒ ኡቴዲኖ፤ ቃሲ ሄ ኣሳይ ኡባይ ኣባ ሚዪያን ዴዔ። ኢ ኡንቱንታ ዳሮባ ሌሚሱዋን ታማሪሲዴ፥ «ሲሲቴ፤ ኢቲ ቢታኒ ዜሬꬃ ዜራናው ኬሴዳ። ኢ ዜሪሺን፥ ኢቲ ኢቲ ዜሬꬃይ ኦጊያ ዶናን ዎꬌዳ፤ ሄዋ ካፉ ዪዴ ሜዳ። ኢቲ ኢቲ ዜሬꬃይ ኣንጮ ቢታ ቦላ ዎꬌዳ፤ ዳሮ ቢታይ ባይና ዲራው፥ ሄ ዜሬꬃይ ኤሌካ ሞኬዳ። ኣዋይ ኬሴዳ ዎዴ ሹሌዳ፤ ኣዱሳ ፃጱዋ ዬዲቤና ዲራው፥ ሜሊ ኣጌዳ። ኢቲ ኢቲ ዜሬꬃይ ኣጉንꬃ ጊዶን ዎꬌዳ፤ ሄዋን ሞኬዳዋ ኣጉንꬃይ ዲጪዴ ጩሊና፥ ኣይፌናን ኣቴዳ። ኢቲ ኢቲ ዜሬꬃይ ቱዔ ቢታን ዜሬቲዴ ሞኬዳ፤ ዲጪዴ ኢቱ ሃታሙዋ፥ ኢቱ ኡሱፑን ታሙዋ ኣይፊና፥ ኢቱ ፄቱዋ ኣይፌዳ።» ቃይካ ዬሱሲ፥ «ሲሳናው ሃይꬃይ ዴዒያ ኡራይ ሲሶ» ያጌዳ። ታማኔ ላዑ ዬሱሳ ካሊያዋንቱኔ ኢ ኦዴዳዋ ሲሴዳ ሃራ ኣሳቱ ኢ ባሬካ ዴዒሺን ኣኮ ሺቂዴ፥ ሄ ሌሚሱዋ ቢሌꬃ ኣ ኦቼዲኖ። ዬሱሲ ኡንቱንቱሲ፥ «ሂንቴንቶ ፆሳ ካዉቴꬃ ፁራ ዬዉዋ ኤራይ ኢሜቴዳ፤ ሺን ሃራቱ ካዉቴꬃፔ ካሬና ዴዒያዋንቱ፥ ፄላ ፄሊዴ ቤዔና ማላ፥ ቃሲ ሲሳ ሲሲዲካ ኣኬኬና ማላ፥ ኡንቱንቱ ሺሬቲዴ ፆሳኮ ሲሚና፥ ኢ ኡንቱንቱ ናጋራ ኣቶ ጌና ማላ፥ ኡንቱንቶ ኡባባይ ሌሚሱዋን ኦዴቴ» ያጌዳ። *** ዬሱሲ ኡንቱንታ፥ «ሃ ሌሚሱዋ ኤሪኪቴ? ያቲና፥ ሌሚሱዋ ኡባ ዎቲ ኤራኒቴ? ዜሪያዌ ፆሳ ቃላ ዜሬ። ቃላይ ዜሬቲያ ኦጊያ ዶናን ዴዒያዋንቱ ሃዋንታ፤ ኡንቱንቱ ቃላ ሲሲያ ዎዴ፥ ሴፃናይ ኤሌካ ዪዴ፥ ኡንቱንቱ ዎዛናን ዜሬቴዳ ቃላ ኣፊዲጌዳ። ሃዋዳንካ ቃሲ ኣንጮቲያ ቢታን ዜሬቴዳዋንቱ ሃዋንታ፤ ኡንቱንቱ ቃላ ሲሲዴ፥ ኤሌካ ናሼቻን ኣኪኖ። ኡንቱንቱ ሃዒው ዴዒኖፔ ኣቲን፥ ኡንቱንቶ ሚኖ ፃጱ ባዋ፤ ጉዬፔ ቃላ ጋሱዋን ዋዪ ዎይ ዬዴርሱ ዪያ ዎዴ፥ ኡንቱንቱ ኤሌካ ꬉቤቲ ኣጊኖ። ቃሲ ኣጉንꬃ ጊዶን ዜሬቴዳዋንቱ ሃዋንታ፤ ኡንቱንቱ ቃላ ሲሲያዋንታ። ሺን ሃ ሳዓ ዴዖ ሂርጊያዌ ዱሬቴꬃ ዶሲያዌኔ ሃራባ ኣሞቲያዌ ኡንቱንቱ ዎዛናን ጌሊዴ፥ ቃላ ጩሊና ኣይፌናን ኣቲ ኣጌዳ። ሺን ቱዔ ቢታን ዜሬቴዳዋንቱ ቃላ ሲሲዴ ኣኪያዋንታ፤ ኢቱ ሃታሙዋ፥ ኢቱ ኡሱፑን ታሙዋ ኣይፊና፥ ኢቱ ፄቱዋ ኣይፌዳ» ያጌዳ። ዬሱሲ ጉጂዴ፥ «ፆምፒያ ኣሂዴ፥ ጊላፔ ዎይ ኣርሳፔ ጋርሳና ዎꬂያ ኣሳይ ዴዒ? ꬎቃሳን ዎꬄኔ? ኣዪሲ ጎፔ፥ ቆሴዳባይ ኡባይ ቆንጪያ ኬሳናዋ፤ ቃሲ ጌማን ዎꬄዳባይ ኡባይ ቤቴናን ኣቴና። ሲሳናው ሃይꬃይ ዴዒያ ኡራይ ዴዖፔ ሲሶ» ያጌዳ። ቃሲካ ኡንቱንታ፥ «ሂንቴንቱ ሲሲያዋ ኣኬኪዴ ሲሲቴ፤ ፆሳይ ሂንቴ ማኬዳ ቁንዓን ሂንቴንቶ ማካናዋ። ኢ ሂንቴንቶ ዳሪሲዴ ኢማና፤ ዴዒያ ኡራው ጉጂ ኢማና፤ ባይናዋፔ ሃራይ ኣቶ፥ ኣው ዴዒያ ሄ ጉꬃቶካ ኣኪዲጋና» ያጌዳ። ዬሱሲ ቃሲካ፥ «ፆሳ ካዉቴꬃይ ጋዴን ካꬃ ዜሪያ ኣሳ ማላ። ሄ ቢታኒ ቃማ ጌሚዒሼ፤ ጉራ ዴንዴ፤ ኢ ባሬ ሁጴው ዋኒንቶ ኤሬናን፥ ሄ ዜሬꬃይ ሞኬኔ ዲጬ። ቢታይ ካꬃ ባሬካ ሞኬኔ ኣይፌ፤ ኮይሮ ጫርሻይ ጫሬ፤ ጉዬፔ ኣይፋናው ኩኩሜ፤ ቃሲ ዉርሴꬃን ኩሜንꬃ ኣይፊያ ኣይፌ። ሺን ካꬃይ ጋኪያ ዎዴ፥ ካꬃ ሺሺያ ዎዲ ጋኬዳ ዲራው፥ ቢታኒ ኤሌካ ባጫን ጫኩዋ ጌሊ ኣጌዳ» ያጌዳ። ዬሱሲ፥ «ኑኒ ፆሳ ካዉቴꬃ ኣያ ማላቴ ጋኔ? ዎይ ኣያና ሌሚሳኔ? ፆሳ ካዉቴꬃይ ሳናፊጪያ ኣይፋቶ ማላቴ። ሄ ኣይፋታ ዜሪያ ዎዴ፥ ሳዓን ዴዒያ ሚꬃ ኣይፊያ ኡባፔካ ጉፃው፤ ሄኖ ዜሪና ሞካዴ ሃራ ኣታኪልቲያ ኡባፔ ዳራው፤ ዳሮ ዳሻ ዳሻው። ካፉ ኢዚ ቃንካ ኩዋን ጎሊያ ኬፃና ዳንዳዬ» ያጌዳ። ዬሱሲ ሃዋ ማላ ዳሮ ሌሚሱዋን ኣሳይ ሲሳናው ዳንዳዪያዋ ኬና፥ ባሬ ቃላ ኦዴዳ። ኣሳው ሌሚሱ ባይናን ኦዴና፤ ሺን ዬሱሲ ባሬና ካሊያዋንቱ ፃላላና ዴዒያ ዎዴ፥ ኡንቱንቶ ኡባባ ቢሊዴ ኦዴ። ሄ ጋላሲ ሳዓይ ኦማርሲና፥ ዬሱሲ ባሬና ካሊያዋንታ «ኣባፔ ሄፊንꬃ ፒኖይቴ» ያጌዳ። ኣ ካሊያዋንቱ ኣሳ ኣጊዴ፥ ዬሱሲ ካሴ ጌሊ ኡቴዳ ዎንጊሪያን ጌሊዴ፥ ዬሱሳ ባሬንቱና ኣፌዲኖ፤ ሃራ ዎንጊራቱካ ሄዋን ዴዒኖ። ዎልቃማ ጎቱ ዴንዲና፥ ቤታይ ዎንጊሪያ ሾጪና፥ ሃꬃይ ኩማና ጋካናው ዎንጊሪያ ጊዶ ጌሌዳ። ሄ ዎዴ ዬሱሲ ዎንጊሪያን ጉዬ ባጋና ቦርኮꬃ ቦርኮቲዴ ጌሚዒሼዳ። ዬሱሳ ካሊያዋንቱ ኣ ዴንꬂዴ፥ «ታማሪሲያዎ፥ ኑኒ ꬋዪያ ዎዴ ጮዑ ጋዴ ፄላይ?» ያጌዲኖ። ኢ ቤጎቲዴ ጎቱዋ፥ «ጮዑ ጋ» ጊዴ፥ ኣባካ፥ «ዎፑ ጋ» ጌዳ፤ ጎቱካ ጮዑ ጊና፥ ኡባባይካ ዎፑ ጌዳ። ዬሱሲ ባሬና ካሊያዋንታ «ኣዪሲ ሃዋዳን ያዪቴ? ሂንቴንቱ ዋኒ ኣማኒኪቴ?» ያጌዳ። ኡንቱንቱ ዳሮ ያዪዴ ባሬንቱ ጊዶን፥ «ሃዌ ላ ሃራይ ኣቶ፥ ጎቱኔ ኣባይ ኣዛዜቲያዌ ኦኔ?» ያጌዲኖ። ዬሱሲኔ ኣ ካሊያዋንቱ ኣባፔ ሄፊንꬃው ፒኒዴ፥ ጌርጌሴኖና ጌቴቲያ ጋዲያ ጋኬዲኖ። ኣሳ ሞጊያ ዱፉ ዴዒያሳፔ ኢታ ኣያናይ ዴዒያ ኢቲ ቢታኒ ኬሲዴ፥ ዬሱሲ ዎንጊሪያፔ ኬሴዳ ዎዴ፥ ዬሱሳና ጋኬቴዳ። ቢታኒ ሄ ዱፉ ዴዒያሳን ኣቂ ፔሺዴ፥ ያኒ ዴዔ፤ ኣ ኦኒኔ ሃራይ ኣቶ፥ ሳንꬃላታን ቃቻናዉካ ዳንዳይቤና። ኣዪሲ ጎፔ፥ ኢ ዳሮ ዎዴ ኡቂናኒኔ ሳንꬃላታን ቃሼቲዴ ዴዔ፤ ሺን ሳንꬃላታ ዱሴሬꬄዳ፤ ኡቂናካ ሜንꬄሬꬄዳ፤ ኣ ፆናናው ዳንዳዬዳዌ ኦኒኔ ባዋ። ኢ ኡባ ዎዴ ጋላሲኔ ቃማ፥ ሄ ዱፉ ዴዒያሳኒኔ ዴሪያ ቦላ ዋሴ፤ ባሬ ቦላካ ሹቻን ጋሬ። ዬሱሳ ሃኩዋን ቤዔዳ ዎዴ፥ ኣኮ ዎፂ ዪዴ ኣው ጎዪኔዳ። ሄ ቢታኒ ባሬ ኮሻ ꬎቁ ኦꬂዴ፥ «ኡባፔ ቦላ ፆሳ ናዓው፥ ዬሱሳ፥ ኔናኔ ታና ኣዬ ጋꬂ? ታና ሙሬና ማላ፥ ታኒ ኔና ፆሳ ሱንꬃን ዎሳይ» ያጌዳ። ኢ ሄዋ ኣዪሲ ጌዴ ጎፔ፥ ዬሱሲ ኣ፥ «ላ ሃ ኢታ ኣያናው፥ ሃ ቢታኒያፔ ኬሳ» ያጌዳዋሳ። ዬሱሲ ኣ፥ «ኔ ሱንꬃይ ኦኔ?» ያጊዴ ኦቼዳ። ኢ፥ «ኑኒ ጮራ ጊዲያ ዲራው፥ ታ ሱንꬃይ ሌጊዮና» ያጌዳ። ኢታ ኣያናቱዋ ሄ ጋዲያፔ ኬሲ ዬዴና ማላ፥ ዬሱሳ ሚኒሲዴ ዎሴዳ። ሄ ዴሪያ ቦላን ጮራ ጉዱንꬃ ዉዲ ሄሜቴ፤ ኢታ ኣያናቱ ዬሱሳ፥ «ኑና ሂኒ ጉዱንꬃ ዉዲያኮ ዬዳርኪ፤ ኡንቱንቱን ቢዴ ጌላና» ያጊዴ ዎሲና፥ ዬሱሲ፥ «ቢቴ» ያጌዳ። ኢታ ኣያናቱ ቢታኒያፔ ኬሲዴ፥ ጉዱንꬃቱዋን ጌሌዲኖ፤ ላዑ ሻዓ ጊዲያ ጉዱንꬃ ዉዲ ካካ ሁጲያና ካጆቲዴ፥ ኣባን ጌሊዴ፥ ሚቴቲ ኣጌዳ። ጉዱንꬃ ዉዲያ ሄሚያዋንቱ ባቃቲዴ፥ ሃኔዳዋ ካታማኒኔ ካታማፔ ጋፃ ጋዲያን ኦዴዲኖ፤ ሄዋ ቤዓናው ኣሳይ ዬዳ። ኣሳይ ዬሱሳኮ ዪዴ፥ ጮራ ኢታ ኣያናቱ ቤኒ ኦይቄዳ ቢታኒ ባሬ ዎዛናይ ሲሚና፥ ማዩዋ ማዪዴ፥ ሄዋን ኡቴዳዋ ቤዒዴ፥ ኡባይ ያዬዳ። ሄዋ ቤዔዳ ኣሳቱ ኢታ ኣያናቱ ኦይቄዳ ቢታኒ ሃኔዳዋኔ ቃሲ ጉዱንꬃ ዉዲያባ ሄ ኣሳሲ ኦዴዲኖ። ሄዋ ዲራው፥ ኣሳይ ባሬንቱ ጋዲያፔ ዬሱሲ ባና ማላ፥ ዎሳ ዶሜዳ። ዬሱሲ ዎንጊሪያን ጌሊሺን፥ ኢታ ኣያናቱ ኦይቄዳ ቢታኒ ዬሱሳና ዴዓና ማላ፥ ዬሱሳ ዎሴዳ። ሺን ዬሱሲ ኢፂዴ ኣ፥ «ኔ ሶይ ሲማዴ፥ ጎዳይ ኔው ኣይ ማላ ዎልቃማባ ኦꬄዴንቶኔ ቃሲ ኢ ኔው ኣይ ማላ ኬኬንቶ ኔ ሶይ ኣሳው ኦዳ» ያጌዳ። ቢታኒ ቢዴ፥ ታሙ ካታማ ጊያሳን ዩዪዴ፥ ዬሱሲ ባሬው ኣይ ማላ ዎልቃማባ ኦꬄዴንቶ፥ ኦዱዋ ዶሜዳ፤ ኢ ኦዴዳዋ ሲሴዳ ኣሳይ ኡባይ ማላሌቴዳ። ዬሱሲ ሲሚዴ፥ ዎንጊሪያን ጌሊዴ፥ ኣባ ፒኔዳዋፔ ጉዪያን፥ ጮራ ኣሳይ ኣባ ማታን ኣኮ ዩዪ ኣꬊዴ ሺቄዲኖ። ያዒሮሳ ጊያዌ፥ ኣዪሁዳ ዎሳ ጎሊያ ካፓቱዋፔ ኢቱ፥ ዬሱሳ ቤዔዳ ዎዴ ኣኮ ዪ ኣ ጌዲያን ኩንዲዴ፥ «ታ ናታ ሃርጋዴ ሃይቃና ሃናው፤ ኢዛ ፓፃዴ ሎዖ ዴዓና ማላ፥ ያዴ ኔ ኩሺያ ኢዚ ቦላ ዎꬃሪኪ» ያጊዴ ዬሱሳ ሚኒሲዴ ዎሴዳ። ዬሱሲ ያዒሮሳና ቤዳ፤ ኢ ቢሺን ጮራ ኣሳይ ኣ ካሊዴ ሜቶꬄዲኖ። ታማኔ ላዑ ላይꬃ ኡባ ኢዚ ቦላፔ ሱꬃይ ጎጊያ ኢቲ ሚሺራታ ዴዓው። ጮራ ኣኪማቱ ኢዞ ኣኪሚሺንካ፥ ኢዛ ፓፃ ካዔታዱ፤ ባሬ ሚሻ ኡባ ዉርሲናካ ኢዚው ሃ ኢቴዳዋፔ ኣቲን፥ ኣይኔ ኢዞ ማዲቤና። ሄ ሚሺራታ ዬሱሳባ ሲሳዴ፥ ኣሳ ጊዶና ዬሱሳፔ ጉዬና ያዴ፥ ኣ ማዩዋ ቦቻዱ። ኣዪሲ ጎፔ ኢዛ፥ «ታኒ ሃራይ ኣቶ፥ ኣ ማዩዋ ቦቾፔካ ፓፃና» ያጋዴ ቆፓዱ። ኢፔ ጎጊያ ሱꬃይ ኤሌካ ኤቂ ኣጌዳ፤ ኢዛ ባሬ ዋዪያፔ ፓፄዳዋ ባሬ ቦላን ኤራ ኣጋዱ። ዬሱሲ ባሬፔ ዎልቃይ ኬሴዳዋ ባሬ ሁጴው ኤሪዴ፥ ኤሌካ ጮራ ኣሳ ጊዶን ጉዬ ሲሚዴ፥ «ታ ማዩዋ ቦቼዳዌ ኦኔ?» ያጌዳ። ዬሱሳ ካሊያዋንቱ ኣ፥ «ኣሳይ ኔና ሱጊያ ዎዴ ቤዓዴ፥ ‹ታና ኦኔ ቦቼዳዌ?› ያጋይ?» ጌዲኖ። ዬሱሲ ሄዋ ኦኔ ኦꬄዴንቶኔ ቤዓናው ዩሺ ኣꬂዴ ፄሌዳ፤ ሺን ሚሺራታ ባሬው ሃኔዳዋ ኤራዴ፥ ያሻ ኮኮራዴ ያዴ ዬሱሳ ሲንꬃን ጉፋናዱ፤ ቃሲ ቱማቴꬃን ሃኔዳዋ ኡባ ኣው ኦዳዱ። ዬሱሲ ኢዞ፥ «ታ ናቴ፥ ኔና ኔ ኣማኑ ፓꬄዳ፤ ሳሩዋን ባ፤ ኔ ዋዪያፔኔ ፓፃ» ያጌዳ። ዬሱሲ ቢሮ ሄዋ ጊሺን፥ ኣዪሁዳ ዎሳ ጎሊያ ካፑዋ ሶዪፔ ኪቴቴዳ ኣሳቱ ዪዴ፥ «ኔ ናታ ሃይቃዲጋዱ፤ ሲሚ ታማርሲያዋ ኣዪሲ ዳቡርሳይ?» ያጌዲኖ። ሺን ዬሱሲ ኡንቱንቱ ጊያዋ ሲሲዴ፥ ኣዪሁዳ ዎሳ ጎሊያ ካፑዋ፥ «ኣማኖ ፃላላ ኣማናፔ ኣቲን፥ ያዮፓ» ያጌዳ። ዬሱሲ ጴፂሮሳፔ፥ ያዪቆባፔኔ ያዪቆባ ኢሻ ዮሃኒሳፔ ሃራይ ኦኒኔ ባሬና ካሌና ማላ ዲጌዳ። ኡንቱንቱ ኣዪሁዳ ዎሳ ጎሊያ ካፑዋ ሶይ ጋኬዳ ዎዴ፥ ዬሱሲ ኣሳይ ሎይꬂ ዬኪያዋኔ ዚላሊያዋ ቤዔዳ። ጌሊዴ ኣሳ፥ «ኣዪሲ ሎይꬂ ዬኪቴ? ናታ ጌሚዒሻዱፔ ኣቲን፥ ሃይቃቤይኩ» ያጌዳ። ሄዋፔ ጉዬ ኣሳይ ኣ ቦላ ሚጬዳ፤ ሺን ኣሳ ኡባ ካሬ ኬሲዴ፥ ናቲ ኣዉዋኔ ኣቶ ሄዋን ባሬናና ዴዒያ ኣ ካሊያዋንታኔ ኣኪዴ፥ ናታ ዴዒያሳ ጌሌዳ። ዬሱሲ ናቲ ኩሺያ ኦይቂዴ፥ «ፃሊታ፥ ቁሚ» ያጌዳ፤ ሄዋ ቢሌꬃይ፥ «ጉꬃ ናቴ፥ ታኒ ኔና ዴንዳ ጋይ» ጊያዋ። ናታ ኤሌካ ዴንዳ ኤቃዴ ሃሜታዱ፤ ኢዛ ታማኔ ላዑ ላይꬃ ናቶ፤ ሄዌ ሃኒያዋን ኣሳይ ዳሮ ማላሌቴዳ። ዬሱሲ ሄዋ ኡንቱንቱ ኦሲኔ ኦዴና ማላ፥ ኡንቱንታ ሚኒሲ ኣዛዚዴ፥ «ኢዚው ሚያባ ኢሚቴ» ያጌዳ። ዬሱሲ ሄዋፔ ኬሲዴ፥ ባሬ ጋዲያ ናዚሬቴ ካታማ ቤዳ፤ ኣ ካሊያዋንቱካ ኣ ካሊዴ ቤዲኖ። ሳምባታ ጋላሲ ኣዪሁዳ ዎሳ ጎሊያን ታማሪሱዋ ዶሜዳ፤ ኢ ታማርሲያዋ ሲሴዳ ጮራ ኣሳይ ማላሌቲዴ፥ «ሃዌ ሃ ኡባባ ሃቃፔ ዴሜዴ? ሃ ኣው ኢሜቴዳ ኣꬎ ኤራቴꬃይ ኣዬ? ፆሳይ ኦꬂያ ማላታ ኢ ዎቲ ኦꬂ? ሃዌ ኣናፂያ ጊዴኔ? ማይራሚ ናዓ፥ ያዪቆባ ኢሻ፥ ዮሳ ኢሻ፥ ዪሁዳ ኢሻ፥ ሲሞና ኢሻ ጊዴኔ? ኣ ሚቻቱ ኑናና ሃዋን ዴዒያዋንታ ጊዲኪኖ?» ያጊዴ፥ ኢ ጊያዋ ኣኬናን ኢፄዲኖ። ዬሱሲ ሄ ኣሳሲ፥ «ናቢ ባሬ ጋዲያን፥ ባሬ ዳባቱዋኒኔ ባሬንቱ ሶይ ኣሳን ቦንቼቴናዋፔ ኣቲን፥ ኡባሳን ቦንቼቴ» ያጌዳ። ኢ ሄዋን ባሬ ኩሺያ ኣማሬዳ ኣሳቱዋ ቦላ ዎꬂዴ፥ ኡንቱንታ ፓꬄዳዋፔ ኣቲን፥ ጮራ ማላታ ኦꬃናው ኣይኔ ዳንዳይቤና። ኣሳይ ኣማኒቤና ዲራው ማላሌቴዳ። ሄዋፔ ጉዪያን፥ ዬሱሲ ሄዋ ሄራን ዴዒያ ቄሪ ካታማቱዋን ዩዪ ዩዪዴ፥ ኣሳ ታማርሴዳ። ዬሱሲ ታማኔ ላዑ ባሬና ካሊያዋንታ ባሬኮ ፄሲዴ፥ ላዑዋ ላዑዋ ኪቴዳ፤ ቃሲ ኡንቱንቶ ኢታ ኣያናቱዋ ኬሲያ ማታ ኢሜዳ። ኡንቱንታ፥ «ኦጊያ ፃምዓፔ ኣቲን፥ ቁማ፥ ቃርጪቲያ፥ ሂንቴው ሚሻ ኣያኔካ ኦይቆፒቴ። ሂንቴንቱ ጌዲያን ጫማካ ዎꬂቴ፤ ሺን ላዑ ማዩዋ ማዮፒቴ» ያጌዳ። ቃሲካ ኡንቱንታ፥ «ሂንቴንታ ኣሳይ ሃቃን ሞኮፔኔ፥ ሄዋፔ ኬሳና ጋካናው፥ ሄ ጎሊያን ኡቲ ኣጊቴ። ሂንቴንታ ኣሳይ ሞኬናሳ ዎይ ሂንቴ ኦዲያባ ሲሴናሳ ሃቃ ጊዶፔካ፥ ሄ ጋዲያን ዴዒያ ኣሳው ሄዌ ማርካ ጊዳና ማላ፥ ሄዋፔ ኬሲዴ፥ ሂንቴ ጌዲያፔ ባና ሾጪቴ» ያጌዳ። ታማኔ ላዑ ኣ ካሊያዋንቱ ቢዴ፥ ኣሳይ ባሬንቱ ናጋራፔ ሲማናዳን፥ ቃላ ኦዴዲኖ። ኡንቱንቱ ኣሳፔ ዳሮ ኢታ ኣያናቱዋ ኬሲዴ፥ ሃርጊያ ኣሳ ጮራ ዛይቲያ ኦኪዴ ፓꬄዲኖ። ኣሳይ ዬሱሳ ሱንꬃ ዴንꬂያ ዲራው፥ ካቲያ ሄሮዲሴ ሄዋ ኡባ ሲሴዳ፤ ኢቲ ኢቲ ኣሳይ፥ «ፃማቂያ ዮሃኒሲ ሃይቁዋፔ ዴንዴዳ፤ ሄዋሲ ኣው ዎልቃማ ማላታ ኦꬂያ ዎልቃይ ዴዔ» ያጌዳ። ሺን ሃራንቱ ኣ፥ «ሃዌ ኤላሳ» ያጌዲኖ። ሃራንቱ ቃሲ፥ «ሃዌ ቤኒ ዎዴ ናባቱዋ ማላቲያ ናቢያ» ያጌዲኖ። ሺን ሄሮዲሴ ሄዋ ሲሴዳ ዎዴ፥ «ሄዌ ታኒ ቆꬊያ ሙጪሴዳ ፃማቂያ ዮሃኒሳ። ኢ ሃይቁዋፔ ፓፄዳ» ያጌዳ። ኣዪሲ ጎፔ፥ ሄሮዲሴ ባሬ ኢሻ ፒሊጶሳ ማቻቶ ሄሮዲያዶ ኣኪ ዎꬄዳ፤ ሄሮዲሴ ኢዚ ዲራው፥ ባሬ ሁጴው ኣሳ ኪቲዴ፥ ዮሃኒሳ ኦይꬂዴ፥ ቃሺሲ ዎꬄዳ። ኣዪሲ ጎፔ፥ ዮሃኒሲ ሄሮዲሳ፥ «ኔኒ ኔ ኢሻ ማቻቶ ኣካናው ቤሴና» ያጊ ዎꬄዳ። ሄሮዲያዳ ዮሃኒሳው ኡሉዋን ሞርኪያ ኦይቃዴ ኣ ዎꬊሳናው ኮያዱ፤ ሺን ዳንዳያቤይኩ። ዮሃኒሲ ፂሎ ኣሳኔ ጌሻ ኣሳ ጊዴዳዋ ሄሮዲሴ ኤሬዳ ዲራው፥ ኣው ያዪዴ፥ ሎይꬂ ናጊ ዎꬄዳ፤ ዮሃኒሲ ጊያዋ ሲሲዴ፥ ባሬ ዎዛናን ዳሪሲ ሜቶቲዴካ ኣባ ናሼቻን ሲሴዳ። ሄሮዲሴ ባሬ ዬሌቴዳ ጋላሲ፥ ጋዲያ ኣዪሲያዋንቶ፥ ሻላቃቱዋሲኔ ጋሊላን ዴዒያ ዎልቃማ ኣሳው ሾቢያ ጊጊሴዳ ዎዴ፥ ዉርሴꬃን ሄሮዲያዳ ኢንጄ ጋላሳ ዴማዱ። ሄሮዲያዲ ናታ ኢማꬃ ሞኪያሳ ጌላ ዱራዴ፥ ሄሮዲሳኔ ኣ ኢማꬃቱዋ ናሼቻዱ፤ ሄዋፔ ጉዬ ካቲ ናቲው፥ «ኔና ሎዔዳዋ ኣያ ጊዶፔኔ ታና ኦቻ፤ ታኒ ኔው ኢማና» ያጌዳ። ቃሲ ኢዚው ዳሪ ጫቂዴ፥ «ኔኒ ኦቼዳዋ ኣያ ጊዶፔካ፥ ታኒ ኔው ኢማና፤ ሃራይ ኣቶ፥ ታ ካዉቴꬃፔ ባጋ ጊዶፔካ፥ ታኒ ኔው ኢማና» ያጌዳ። ናታ ካሬ ኬሳዴ ባሬ ዳዮ፥ «ኣያ ኢማ ጎ?» ያጋዴ ኦቻዱ። ኢ ዳያ፥ «ፃማቂያ ዮሃኒሳ ሁጲያ ኢማ ጋ» ያጋዱ። ናታ ኤሌካ ካቲያኮ ባዴ ኣ፥ «ፃማቂያ ዮሃኒሳ ሁጲያ ዎጪቲያን ዎꬃዴ፥ ኔኒ ሃዒ ታው ኢማናዳን ኮያይ» ያጋዱ። ሄዋፔ ጉዬ ካቲ ዳሪ ቃሬቴዳ፤ ሺን ባሬ ጫቁዋ ዲራዉኔ ባሬ ኢማꬃቱዋ ዲራው ኢዚው ጫቄዳ ጫቁዋ ኮላናው ኮዪቤና። ሄዋ ዲራው፥ ኤሌካ ናጊያዋ ኪቲዴ፥ ዮሃኒሳ ሁጲያ ኣሃና ማላ ኣዛዜዳ፤ ናጊያዌ ቃሾ ጎሌ ቢዴ፥ ዮሃኒሳ ቆꬊያ ሙጬዳ። ሄ ሙጬዳዋ ዎጪቲያን ዎꬂ ኣሂዴ፥ ናቲው ኢሜዳ፤ ናታ ቃሲ ባሬ ኣቲው ኢማዱ። ዮሃኒሳ ካሊያዋንቱ ሄዋ ሲሴዳ ዎዴ ዪዴ፥ ኣ ኣኃ ኣፊዴ ሞጌዲኖ። ዬሱሲ ኪቴዳዋንቱ ሲሚዴ፥ ዬሱሳና ጋኬቲዴ፥ ባሬንቱ ኦꬄዳባኔ ባሬንቱ ታማርሴዳባ ኡባ ዬሱሳሲ ኦዴዲኖ። ቢያ ኣሳይኔ ዪያ ኣሳይ ዳሪና፥ ሃራይ ኣቶ ቁማ ማናዉካ ኡንቱንታ ጋꬄናን ኢፄዳ ዲራው፥ ዬሱሲ ኡንቱንታ፥ «ኑሬካ ጉꬃ ሼምፒ ኣካናው ኣሳይ ባይናሳ ቦይቴ» ያጌዳ። ዬሱሲኔ ኡንቱንቱ ባሬንቱ ፃላላ ዎንጊሪያን ኡቲዴ፥ ኣሳይ ባይናሳ ቤዲኖ። ኡንቱንቱ ቢሺን፥ ጮራ ኣሳይ ኡንቱንታ ቤዒዴ ኤሬዳ፤ ካታማ ኡባፔ ጌዲያን ዎፂዴ፥ ኡንቱንቱ ቢያሳ ኡንቱንቱፔ ካሴቲዴ ጋኬዲኖ። ዬሱሲ ዎንጊሪያፔ ኬሲዴ፥ ጮራ ኣሳ ቤዔዳ፤ ኣሳይ ሄሚያ ኣሳይ ባይና ዶርሳ ማላ ጊዴዳ ዲራው፥ ቃሬቲዴ ኣሳ ዳሮባ ታማሪሱዋ ዶሜዳ። ሳዓይ ኦማርሲያ ዎዴ፥ ዬሱሳ ካሊያዋንቱ ኣኮ ዪዴ፥ «ሃዌ ሳዓይ ኣሳይ ባይና ሳዓ፤ ሃዒ ሳዓይካ ቃሚዲጌዳ፤ ኣሳይ ሄራኔ ቄሪ ካታማቱዋ ጊዶ ቢዴ፥ ባሬንቶ ሚያባ ሻማና ማላ፥ ኣሳ ሞዪዛ» ያጌዲኖ። ሺን ዬሱሲ ዛሪዴ ኡንቱንታ፥ «ኣሳው ሚያባ ሂንቴ ኢሚቴ» ያጌዳ። ሄዋፔ ጉዬ ኡንቱንቱ፥ «ኑኒ ቢዴ፥ ላዑ ፄቱ ቢራ ሳንቲሚያ ቁማ ሻሚዴ፥ ኣሳይ ማናው ኢማኔ?» ያጊዴ ኣ ኦቼዲኖ። ዬሱሲ ኡንቱንታ፥ «ሂንቴንቶ ኣፑን ዳቡ ዴዒ? ቢዴ ቤዒቴ» ያጌዳ። ኡንቱንቱ ቤዒዴ፥ «ኢቼሹ ዳቡዋኔ ላዑ ሞሊያ» ያጌዲኖ። ዬሱሲ ባሬና ካሊያዋንታ ኣሳ ኡባ ጪታን ጪታን ሻኪ ሻኪዴ፥ ማታን ኡቲሳና ማላ ኣዛዜዳ። ኣሳይ ፄቱ ፄቱኔ ኢሻታሙ ኢሻታሙ ጪታን ጪታን ኡቴዲኖ። ዬሱሲ ኢቼሹ ዳቡዋኔ ላዑ ሞሊያ ኦይቂዴ፥ ፑዴ ሳሉዋ ፄሊዴ፥ ፆሳ ጋላቴዳ፤ ዳቦቱዋ ሜንꬂዴ ኣሳው ጊሻና ማላ፥ ባሬና ካሊያዋንቱሲ ኢሜዳ፤ ቃሲ ላዑ ሞሊያካ ኡንቱንቱ ኡባው ሻኬዳ። ኣሳይ ኡባይ ሚዴ ካሌዲኖ። ሄዋፔ ጉዬ ኣቴዳ ዳቦቱዋ ዶካይኔ ሞሊያ ዶካይ ታማኔ ላዑ ዛምቤሊያ ኩሜዳዋ ዬሱሳ ካሊያዋንቱ ዴንꬄዲኖ። ዳቡዋ ሜዳ ኣቱማ ኣሳይ ኢቼሹ ሻዓ። ኤሌካ ዬሱሲ ሄ ጮራ ኣሳ ሞዪዚዴ፥ ባሬና ካሊያዋንቱ ዎንጊሪያን ጌሊዴ፥ ኣባፔ ሄፊንꬃን ዴዒያ ቤቴሳይዳ ጊያ ካታማ ባሬፔ ሲንꬃቲዴ ባናዳን ኣዛዜዳ። ኡንቱንታ ሞዪዜዳዋፔ ጉዪያን፥ ፆሳ ዎሳናው ዞዚያ ኬሴዳ። ሳዓይ ቃሚያ ዎዴ ዎንጊሪ ዎምባ ጊዱዋን ዴዒሺን፥ ዬሱሲ ዎምባፔ ጋፃን ባሬካ ዴዔ። ጫርኩ ኣ ካሊያዋንቱኮ ጫርኪያ ዲራው፥ ባሬና ካሊያዋንታ ዎምባ ቤታይ ሜቶꬂያዋ ዬሱሲ ቤዒዴ፥ ኩቱ ዋሳና ሃኒያ ዎዴ ዎምባ ቦላን ሃሜቲዴ፥ ኡንቱንቱኮ ዬዳ፤ ኡንቱንታ ዬጊ ኣꬋናው ኮዬዳ። ሺን ዎምባ ቦላን ኢ ሃሜቲሺን፥ ኡንቱንቱ ኣ ቤዒዴ፥ ባሬንቶ ሞይቲሊያ ማላቲና ዋሴዲኖ። ኣዪሲ ጎፔ፥ ኡንቱንቱ ኡባይ ኣ ቤዒዴ፥ ያሻ ኮኮሬዲኖ፤ ሺን ኤሌካ ዬሱሲ ኡንቱንታ፥ «ኣይኔ ባዋ፤ ታናቴኔ ያዮፒቴ» ያጌዳ። ዬሱሲ ኡንቱንቱና ኢቲፔ ዎንጊሪያን ጌሊና፥ ጫርኩ ዎፑ ጌዳ፤ ኡንቱንቱ ዳሮ ማላሌቴዲኖ። ኣዪሲ ጎፔ፥ ኡንቱንቱ ዎዛናይ ጆሌዳ ዲራው፥ ኡንቱንቱ ኡኪꬃባ ኣኬኪቤይኪኖ። ኡንቱንቱ ኣባ ፒኒዴ፥ ጌንሳሬፃ ጊያ ቢታ ጋኬዲኖ፤ ያኒ ዎንጊሪያ ጋፃ ሺሺ ቃቼዲኖ። ኡንቱንቱ ዎንጊሪያፔ ዎꬊያዋን፥ ኣሳይ ኤሌካ ዬሱሳ ኤሪኔ ሄዋ ሄራን ዴዒያ ጋዲያ ኡባን ዎፄሬቲዴ፥ ሃርጋንቻቱዋ ሻንቻማን ቶኪዴ፥ «ዬሱሲ ዴዔ» ጊና ሲሴዳሳ ኣሁዋ ዶሜዳ። ዬሱሲ ቤዳሳ ኡባን ቄሪ ካታማን ጊዲና፥ ዎልቃማ ካታማን ጊዲና፥ ሄራ ጊዶን ጊዲናካ፥ ጌያ ዴንባን ኣሳይ ሃርጋንቻቱዋ ኣኮ ኣፌ። ዬሱሲ ባሬ ማዩዋ ማጫራ ጊዶፔኔ ሃርጋንቻቱዋ ቦሺሳና ማላ፥ ኣሳይ ኣ ዎሴዳ፤ ቦቼዳ ኡባይ ፓፄዳ። ፓሪሳዋቱኔ ዬሩሳላሜፔ ዪዴ፥ ሙሴ ሂጊያ ታማሪሲያ ኣማሬዳ ኣሳቱ ዬሱሳኮ ሺቄዲኖ። ዬሱሳ ካሊያዋንቱፔ ኢቱ ኢቱ ቱና ኩሺያን፥ ሄዋ ጊያዌ ሜጬቴናን ቁማ ሚያዋንታ ቤዔዲኖ። ኣዪሲ ጎፔ፥ ፓሪሳዋቱኔ ኣዪሁዳ ኣሳይ ኡባይ ባሬንቱ ኣዋቱዋ ዎጋ ናጊዴ፥ ባሬንቱ ኩሺያ ሎይꬂ ሜጬቴናን ሚኪኖ። ቃሲ ጌያፔ ዪዴካ ሜጬቴናን ዴዒዴ ሚኪኖ። ቃሲ ኡንቱንቱ ባሬንቱ ኣዋቱዋፔ ኣኬዳ ሃራ ጮራ ዎጋይ ዴዔ፤ ሄዌካ ዋንጫ፥ ኬሪያ፥ ቢራታፔ ሜꬌዳ ሚሻኔ ኣርሳ ሜጪያ ዎጋ። ፓሪሳዋቱኔ ሙሴ ሂጊያ ታማርሲያዋንቱ ዬሱሳ፥ «ኔና ካሊያዋንቱ ኣዪሲ ኑ ኣዋቱዋ ዎጋ ካሌናን ኢፂዴ፥ ባሬንቱ ኩሺያ ሜጬቴናን ቁማ ሚኖ?» ያጊዴ ኦቼዲኖ። ዬሱሲ ኡንቱንታ ሃዋዳን ያጌዳ፤ «ኢሲያሲ ቲምቢቲያ ኦዴዳ ዎዴ፥ ሂንቴንቱባ፥ ሎዓ ማላቲያ ኢታቱባ ፃፌዳዋዳንካ፥ ‹ፆሳይ፥ «ሃዌ ኣሳይ ታና ባሬ ቦላ ዶናን ቦንቼ። ሺን ኡንቱንቱ ዎዛናይ ታፔ ሃኩዋን ዴዔ፤ ኣሳይ ታው ሜላ ጎዪኔ። ኣዪሲ ጎፔ፥ ኣሳይ ኦꬄዳ ኣዛዙዋ ፆሳ ሂጊያ ማላቲሲዴ ታማርሴ» ጌዳ› ያጊዴ ቲምቢቲያ ቱሙዋ ኦዴዳ። *** «ፆሳ ኣዛዙዋ ሂንቴ ኣጊዴ፥ ኣሳ ዎጋ ሚኒሲዴ ናጊታ» ያጌዳ። ቃሲካ ዬሱሲ፥ «ሂንቴንቱ ሂንቴ ዎጋ ናጋናው ፆሳ ኣዛዙዋ ኣጊታ። ኣዪሲ ጎፔ ሙሴ፥ ‹ኔ ኣባኔ ኔ ዳዮ ቦንቻ› ቃሲ፥ ‹ባሬ ኣባኔ ባሬ ኣቶ ቦሪያዌ ሃይቁዋን ሙሬቶ› ያጌዳ። ሺን ኢቲ ኡራው ባሬ ኣዉዋ ዎይ ባሬ ኣቶ ማዲያባይ ዴዒሺን ኢ፥ ‹ሃዌ ቁርባኒያ፤ ሃዋ ጉሳይ ፆሳባ ጊያዋ› ጎፔ፥ ኢ ባሬ ኣዉዋ ዎይ ባሬ ኣቶ ዎዴፔ ማዳናዋ ኣይኔ ኮዪኪታ። ሃ ሃኖታን ሂንቴ ሂንቴንቱ ዎጋ ናጋናው፥ ፆሳ ቃላ ኮሊዴ፥ ሄዋ ማላ ዳሮባ ኦꬂታ» ያጌዳ። ዬሱሲ ጮራ ኣሳ ቃሲካ ባሬኮ ፄሲዴ፥ «ኡባይ ታኒ ጊያዋ ሲሲቴኔ ኣኬኪቴ። ኣሳፔ ኬሲያዌ ኣሳ ቱኒሲያዋፔ ኣቲን፥ ካሬፔ ኣሳ ጊዶ ጌሊዴ፥ ኣሳ ቱኒሲያባይ ኣይኔ ባዋ፤ ሲሳናው ሃይꬃይ ዴዒያ ኡራይ ኦኒኔ ሲሶ» ያጌዳ። ዬሱሲ ጮራ ኣሳ ኣጊዴ ሶይ ጌሌዳ ዎዴ፥ ኣ ካሊያዋንቱ ሄ ሌሚሱዋባ ኣ ኦቼዲኖ። ኢ ኡንቱንታ፥ «ሂንቴንቶካ ቃሲ ጌሊቤኔ? ካሬፔ ኣሳ ዎዛናን ጌሊያባይ ኣይኔ ኣሳ ቱኒሳናው ዳንዳዬናዋ ኣኬኪቴ? ኣዪሲ ጎፔ፥ ቁማይ ኣሳ ኡሉዋ ጊዶ ጌሊዴ፥ ካሬው ኬሲያዋፔ ኣቲን፥ ኣሳ ዎዛና ጊዶ ጌሌና» ያጌዳ። ሃዋዳንካ ዬሱሲ ቁማ ኡባይ ቱና ጊዴናዋ ኤሪሴዳ። ቃሲካ ዬሱሲ ሃዋዳን ያጌዳ፤ «ኣሳ ቱኒሲያባይ ኣሳ ዎዛና ጊዶፔ ኬሲያባ። ኣዪሲ ጎፔ፥ ኣሳ ዎዛና ጊዶፔ ኬሲያዌ ኢታ ቆፋ፤ ዎሹሚያዋ፤ ዉዒያዋ፤ ዎꬊያዋ፤ ጫራቴꬃ፤ ዮራቴꬃ፤ ኡዚያ ዎይ ባሬና ዶሲያዋ፤ ኢታቴꬃ ዎይ ጪሚያዋ፤ ጌኒያ፤ ማጫዋ ኣሞቲያዋ፤ ቃናቲያዋ፤ ቦሪያዋ ዎይ ዚጊሪያዋ፤ ኣዩዋ፤ ኤያቴꬃ። ሃ ኢታባይ ኡባይ ኣሳ ዎዛና ጊዶፔ ኬሲዴ፥ ኣሳ ቱኒሴ» ያጌዳ። ዬሱሲ ሄዋፔ ኣጊዴ፥ ፂሮሳኔ ሲዶና ጊያ ካታማቱዋ ማታን ዴዒያ ጋዲያ ቢዴ፥ ኢቲ ጎሊያ ጌሌዳ፤ ቃሲ ኢ ያኒ ዴዒያዋ ኦኒኔ ኤራናዋ ኮዪቤና፤ ሺን ቆሴቲዴ ጋሚዓናው ዳንዳዪቤና። ሺን ባሬ ጉꬃ ናቲ ቦላ ኢታ ኣያናይ ዴዒያ ኢቲ ሚሺራታ ዬሱሳባ ሲሳዴ፥ ኤሌካ ኣኮ ያኔ ኣ ጌዲያን ጉፋና ኣጋዱ። ሄ ሚሺራታ ኣዪሁዳ ኣሳ ጊዱኩ፤ ኣ ዬሌቴዳዌካ ሶሪያ ጊያ ጋዲያና፤ ኣ ባሬ ናቲፔ ፃላሂያ ኬሳና ማላ፥ ዬሱሳ ዎሳዱ። ሺን ዬሱሲ ዛሪዴ፥ «ናናይ ካሴቲዴ ቁማ ካሊኖ፤ ኣዪሲ ጎፔ፥ ናና ቁማ ኣኪዴ፥ ካናቱዋሲ ኦሊያዌ ሎዓ ጊዴና» ያጌዳ። ሚሺራታ ዛራዴ፥ «ቱማካ ታ ጎዳው፥ ሃራይ ኣቶ ሳምፓ ሚዪያን ዴዒያ ካናቱካ ናናቱዋፔ ኣቴዳ ሱፓ ሚኖ» ያጋዱ። ዬሱሲ ቃሲ ኢዞ፥ «ሃ ኔኒ ሃሳዬዳ ቃላ ዲራው፥ ፃላሂ ኔ ናቲፔ ኬሴዳ፤ ሲሚ ኔ ሶይ ባ» ያጌዳ። ሚሺራታ ባሬ ሶይ ቢያ ዎዴ፥ ኢዚ ናቲፔ ፃላሂ ኬሲና፥ ሂፃን ጊሴዳዉኖ ዴማዱ። ዬሱሲ ፂሮሳ ጋዲያፔ ኬሲዴ፥ ሲዶናናኔ ታሙ ካታማ ጊያ ጋዲያና ካንꬂዴ፥ ጋሊላ ኣባኮ ቤዳ። ኣሳይ ቱሌኔ ዱዴ ጊዴዳ ቢታኒያ ዬሱሳኮ ኣሂዴ፥ ባሬ ኩሺያ ኣ ቦላን ዎꬃና ማላ፥ ዬሱሳ ዎሴዲኖ። ዬሱሲ ባሬካ ሄ ቢታኒያ ጮራ ኣሳፔ ጋፃ ኬሲዴ፥ ባሬ ቢራꬊያ ኣ ሃይꬃን ዬዴዳ፤ ቃሲ ጩቻ ጩቺዴ፥ ኣ ኢንፃርሳ ቦቼዳ። ሳሉዋ ፑዴ ፄሊዴ፥ ቶኪ ሼምፒዴ፥ «ኤፍታሂ» ያጌዳ፤ ሄዋ ጊያዌ ዶዬታ ጊያዋ። ቢታኒያ ሃይꬃይ ኤሌካ ዶዬቲ ኣጌዳ፤ ቃሲ ኣ ሃሳዬና ኢንፃርሳይካ ቢሌቲ ኣጌዳ፤ ቢታኒ ኣይኔ ዋዬቴናን ሃሳዪ ኣጌዳ። ዬሱሲ ኣሳው፥ «ሃዋ ኦሲኔ ኦዶፒቴ» ያጊዴ ኦዴዳ፤ ሺን ኢ ዳሪሲ ሚኒሲ ኦዲና፥ ኣሳይ ቃሲ ኦዱዋ ያ ዳሪሴዳ። ሄዋ ሲሴዳ ኣሳይ ኡባይ ዳሮ ማላሌቲዴ፥ «ኡባባካ ኢ ሎይꬂ ኦꬄ። ሃራይ ኣቶ ቱሊያካ ሲሴ፤ ቃሲ ዱዲያካ ሃሳዪሴ» ያጌዲኖ። ሄዎዴ፥ ጮራ ኣሳይ ቃሲ ዬሱሳኮ ሺቄዳ፤ ኣሳው ሚያባይ ꬋዪና፥ ዬሱሲ ባሬና ካሊያዋንታ ባሬኮ ፄሲዴ፥ «ሃ ጮራ ኣሳይ ታናና ሄዙ ጋላሳይ ጋካናው ጋሚዒዴ፥ ሚያባ ኣይኔ ዴሚቤና ዲራው፥ ታኒ ኡንቱንቶ ቃሬታይ። ታኒ ኡንቱንታ ኮሻና ሶይ ዬዶፔ፥ ቢዴ ኦጊያን ዳቡሪዴ ኩንዳና፤ ኣዪሲ ጎፔ፥ ኢቱ ኢቱ ሃኮሳፔ ዬዳ» ያጌዳ። ኣ ካሊያዋንቱ ዛሪዴ፥ «ሃ ኣሳይ ባዪና ሳን ሃ ኣሳ ኡባ ሚዛናው ጊዲያ ቁማ ዴማናው ዳንዳዪያዌ ኦኔ?» ያጌዲኖ። ዬሱሲ ኡንቱንታ፥ «ሂንቴንቶ ኣፑን ዳቡ ዴዒ?» ያጊዴ ኦቼዳ። ኡንቱንቱ፥ «ላፑ ዳቡ ዴዔ» ያጌዲኖ። ዬሱሲ ኣሳ፥ «ሳዓን ኡቲቴ» ያጊዴ ኣዛዜዳ፤ ቃሲ ላፑ ዳቡዋ ኣኪዴ፥ ፆሳ ጋላቴዳ፤ ሄ ዳቡዋ ሜንꬂዴ፥ ኣሳው ጊሻና ማላ፥ ባሬና ካሊያዋንቶ ኢሜዳ። ዬሱሳ ካሊያዋንቱ ሄ ጮራ ኣሳሲ ጊሼዲኖ። ኡንቱንቶ ቃሲካ ኣማሬዳ ሱፓ ሞሌቱ ዴዒኖ፤ ዬሱሲ ሄዋንቶካ ፆሳ ጋላቲዴ፥ ኣሳው ጊሻና ማላ፥ ባሬና ካሊያዋንታ ኣዛዜዳ። ኣሳይ ኡባይ ሚዴ ካሊና ኣቴዳ ዶካይ ላፑ ዛምቤሊያ ኩሜዳዋ ኣ ካሊያዋንቱ ዴንꬄዲኖ። ቁማ ሜዳ ኣሳይ ኦይዱ ሻዓ ጊዳና፤ ሄዋፔ ጉዪያን፥ ዬሱሲ ኣሳ ዬዴዳ። ኢ ቃሲ ባሬና ካሊያዋንቱና ኤሌካ ዎንጊሪያን ጌሊዴ፥ ዳልማኑታ ጊያ ጋዲያ ቤዳ። ፓሪሳዋቱ ዪዴ፥ ዬሱሳና ፓሉማ ዶሜዲኖ። ዬሱሳ ፓጫናው ኮዪዴ፥ ሳሉዋፔ ማላታ ባሬንታ ቤሳና ማላ ኦቼዲኖ። ዬሱሲ ዳሪሲ ቶኪ ሼምፒዴ፥ «ሃ ዎዲያ ኣሳይ ኣዪሲ ማላታ ኮዪ? ታኒ ሂንቴንቶ ቱሙዋ ኦዳይ፤ ሃ ዎዲያ ኣሳው ማላታይ ኡባካ ኢሜቴና» ያጌዳ። ቃሲ ኡንቱንታ ሄዋን ኣጊዴ፥ ዛሪ ዎንጊሪያን ጌሊዴ፥ ኣባፔ ሄፊንꬃ ፒኔዳ። ዬሱሳ ካሊያዋንቱ ቁማ ኣፋናዋ ዶጌዲኖ፤ ኡንቱንቶ ዎንጊሪያ ጊዶን ኢቲ ኡኪꬃፔ ሃራይ ባዋ። ዬሱሲ ኡንቱንታ፥ «ሂንቴንታ ኤሪቴ፤ ፓርሳዋቱዋ ኢርሹዋፔኔ ሄሮዲሳ ኢርሹዋፔ ናጌቲቴ» ያጊዴ ኣዛዜዳ። ኡንቱንቱ ባሬንቱ ጊዶን፥ «ኢ ሃዋ ጊያዌ ኑሲ ቁማይ ባይና ዲራሳ» ያጊዴ ሃሳያ ዶሜዲኖ። ዬሱሲ ኡንቱንቱ ጊያዋ ኤሪዴ፥ «ሂንቴንቶ ዳቡ ባዪናዋ ኣዪሲ ሃሳዪቴ? ሃዒ ጋካናው ሂንቴው ጌሌኔ? ዎይ ኣኬኪኪቴ? ሂንቴ ዎዛናይ ጆሌዴ? ሂንቴንቶ ኣይፊ ዴዔ፤ ቤዒኪቴ? ቃሲ ሃይꬃይ ዴዔ፤ ሲስኪቴ? ሂንቴንቶ ሃሳዬቴኔ? ታኒ ኢቼሹ ዳቡዋ ኢቼሹ ሻዓ ኣሳው ሜንꬃ ኢሜዳ ዎዴ፥ ኣፑን ዛምቤሊያ ኩሜዳ ዶካ ዴንꬄዲቴ?» ያጌዳ። ኡንቱንቱ፥ «ታማኔ ላዑ ዛምቤሊያ ኩሜዳ ዶካ ዴንꬄዶ» ያጌዲኖ። «ታኒ ቃሲካ ላፑ ዳቡዋ ኦይዱ ሻዓ ኣሳው ሜንꬃዴ ኢሜዳ ዎዴ፥ ኣፑን ዛምቤሊያ ኩሜዳ ዶካ ዴንꬄዲቴ?» ያጌዳ። ኡንቱንቱ፥ «ላፑ ዛምቤሊያ ኩሜዳ ዶካ ዴንꬄዶ» ያጌዲኖ። ኢ ቃሲ፥ «ሃዒካ ኣኬኪቤይኪቴ?» ያጌዳ። ዬሱሲኔ ኣ ካሊያዋንቱ ቤቴሳይዳ ጊያ ካታማ ቤዲኖ፤ ኣሳቱ ቆቃ ቢታኒያ ዬሱሳኮ ኣሂዴ፥ ሄ ቢታኒያ ቦቻና ማላ፥ ኣ ዎሴዲኖ። ዬሱሲ ቆቃ ቢታኒያ ኩሺያ ኦይቂዴ፥ ሄራፔ ጋፃ ኬሴዳ፤ ኣ ኣይፊያን ጩቺዴ፥ ባሬ ኩሺያ ኣ ቦላ ዎꬂዴ፥ «ኔው ኣዬንቶ ቤቲ?» ያጊዴ ኦቼዳ። ቢታኒ ꬎቂዴ፥ «ታኒ ኣሳ ቤዓይ፤ ሺን ኣሳይ ሃሜቲዴ፥ ሚꬃ ማላቴ» ያጌዳ። ሄዋፔ ጉዪያን፥ ዬሱሲ ሺሬቲዴ ቢታኒያ ኣይፊያን ባሬ ኩሺያ ዎꬄዳ። ኣ ኣይፊ ፓፄዳ፤ ቢታኒካ ሎይꬂ ፄሌዳ፤ ቃሲ ኡባባካ ጌሺዴ ቤዔዳ። ዬሱሲ ቢታኒያ፥ «ሄራ ጌሎፓ» ያጊ ኣ ሶይ ዬዴዳ። ዬሱሲ ባሬና ካሊያዋንቱና ቂሳሪያ ፒሊጶሳ ዴዒያ ቄሪ ሄራቱዋ ቤዳ፤ ኢ ቢሺን ኦጊያን ዬሱሲ፥ «ታና ኣሳይ ኦና ጊ?» ያጊዴ ባሬና ካሊያዋንታ ኦቼዳ። ኣ ካሊያዋንቱ፥ «ኢቲ ኢቲ ኣሳይ ኔና፥ ‹ፃማቂያ ዮሃኒሳ› ጌ፤ ሃራንቱ፥ ‹ኤላሳ› ጊኖ፤ ቃሲ ሃራንቱ፥ ‹ናባቱዋፔ ኢቱዋ› ጊኖ» ያጌዲኖ። ዬሱሲ ኡንቱንታ፥ «ሂንቴሺ ታና ኦና ጊቴ?» ያጊዴ ኦቼዳ። ጴፂሮሲ፥ «ኔኒ ዶሬቴዳ ኪሪስቶሳ» ያጊዴ ዛሬዳ። ዬሱሲ፥ «ታባ ኦሲኔ ኦዶፒቴ» ያጊዴ ኡንቱንታ ኣዛዜዳ። ዬሱሲ ባሬና ካሊያዋንታ፥ «ታኒ፥ ኣሳ ናዓይ፥ ዳሪ ዋዬታናው ቤሴ፤ ጪማቱ፥ ቄሳቱዋ ካፓቱኔ ሂጊያ ታማርሲያዋንቱ ታና ኢፃናው ቤሴ፤ ኡንቱንቱ ታና ዎꬋናዉኔ ታኒ ሄዜንꬂያ ጋላሳፔ ጉዪያን፥ ሃይቁዋፔ ዴንዳናው ቤሴ» ያጊዴ ታማሪሱዋ ዶሜዳ። ሄዋ ኢ ኡንቱንቶ ጌሺዴ ኦዴዳ፤ ጴፂሮሲ ኣ ኢቲ ባጋ ዛሪዴ፥ ዞሬታ ዶሜዳ። ሺን ዬሱሲ ጉዬ ሲሚዴ፥ ባሬና ካሊያዋንታ ፄሊዴ ጴፂሮሳ፥ «ሃ ሴፃናው፥ ኪቻ ታ ማታፔ! ኔን ኣሳይ ቆፒያዋ ቆፓሳፔ ኣቲን፥ ፆሳይ ቆፒያዋ ጊዴና» ያጌዳ። ዬሱሲ ጮራ ኣሳኔ ባሬና ካሊያዋንታ ባሬኮ ፄሲዴ፥ «ታና ካላና ኮዪያ ኡራይ ዴዖፔ፥ ባሬና ካዶ፤ ያቲዴ ባሬ ማስቃሊያ ቶኪዴ፥ ታና ካሎ። ኣዪሲ ጎፔ፥ ባሬ ሼምፑዋ ኣሻና ኮዪያ ኡራይ ባዪዛናዋ፤ ሺን ታ ዲራዉኔ ዎንጋላ ሚሺራቹዋ ዲራው ባሬ ሼምፑዋ ባዪዚያ ኡራይ ኣሻናዋ። ኢቲ ኡራይ ሳዓን ዴዒያ ኡባባ ባሬው ሺሺዴ፥ ባሬ ሼምፑዋ ባዪዞፔ፥ ኣ ኣያ ማዳኔ? ኢቲ ኡራይ ባሬ ሼምፑዋ ዎዛናው ኣያ ኢማና ዳንዳዪ? ፆሳ ኣማኔና ሃ ናጋራንቻ ዬሌታ ዎዲያን፥ ኢቲ ኡራይ ታናኒኔ ታ ቃላን ዬላቶፔ፥ ታኒካ፥ ኣሳ ናዓይ፥ ቃሲ ታ ኣዉዋ ቦንቹዋን ጌሻ ኪታንቻቱዋና ዪያ ዎዴካ፥ ኣኒ ዬላታና» ያጌዳ። ዬሱሲ ኡንቱንታ፥ «ታኒ ሂንቴንቶ ቱሙዋ ጋይ፤ ኣማሬዳ ኣሳቱ ፆሳ ካዉቴꬃይ ዎልቃና ዪያዋ ቤዔናን ሃይቄናዋንቱ ሃዋን ዴዒኖ» ያጌዳ። ዬሱሲ ኡሱፑን ጋላሳፔ ጉዪያን፥ ባሬናና ጴፂሮሳ፥ ያዪቆባኔ ዮሃኒሳ ኣኪዴ፥ ኡንቱንቱ ፃላላ ዎልቃማ ዴሪያ ቦላ ኬሴዳ፤ ኡንቱንቱ ሲንꬃን ላሜቴዳ፤ ኣ ማዩካ ጶሌዳ፤ ሳዓን ማዩዋ ሜጪያ ኦኒኔ ጌሻናው ዳንዳዬናዋ ኬና ዳሪ ቦፄዳ። ሄ ሄዙ ዬሱሳ ካሊያዋንቱ፥ ኤላሲኔ ሙሴ ዬሱሳና ሃሲያዋንታ ቤዔዲኖ። ጴፂሮሲ ዬሱሳ፥ «ታማሪሲያዎ፥ ኑኒ ሃዋን ዴዒያዌ ኑሲ ሎዓ፤ ኑኒ ሄዙ ዳሳቱዋ ኢቱዋ ኔው፥ ኢቱዋ ሙሴው፥ ቃሲ ኢቱዋ ኤላሳሲ ኬፃና» ያጌዳ። ኢ ዋጋኔንቶኔ ኤሪቤና፤ ኣዪሲ ጎፔ፥ ኢካ ዮኮንቱካ ዳሪ ያዬዲኖ። ሄዋፔ ጉዪያን፥ ሻሪ ዪዴ ኡንቱንታ ካሚና ሻሪያፔ፥ «ሃዌ ታኒ ሲቂያ ታ ናዓ፤ ኢ ጊያዋ ሲሲቴ» ጊያ ቃላይ ዬዳ። ኤሌካ ኡንቱንቱ ዩሺ ኣꬂ ፄሊያ ዎዴ፥ ዬሱሳፔ ኣቲን፥ ሃራ ኦናኔ ባሬንቱ ማታን ቤዒቤይኪኖ። ኡንቱንቱ ዴሪያፔ ዎꬊሺን፥ ዬሱሲ ኡንቱንታ፥ «ታኒ፥ ኣሳ ናዓይ፥ ሃይቁዋፔ ዴንዳና ጋካናው፥ ሂንቴ ቤዔዳባ ኦሲኔ ኦዶፒቴ» ያጊዴ ኣዛዜዳ። ኢ ኣዛዜዳዋ ኡንቱንቱ፥ « ‹ኤኖ› ጊዴ፥ ሃ ሃይቁዋፔ ዴንዲያዋ ጊያዌ ዋጊያዌ» ያጊዴ፥ ባሬንቱ ጊዶን ሃሳዬቴዲኖ። ኡንቱንቱ ዬሱሳ፥ «ሂጊያ ታማርሲያዋንቱ ኣዪሲ፥ ‹ኤላስ ካሴቲዴ ያናው ቤሴ› ጊኖ?» ያጊዴ ኦቼዲኖ። ኢ ዛሪዴ ያጌዳ፤ «ቱማካ፥ ኤላስ ካሴት ዪዴ፥ ኡባባ ጊጊሴ፤ ያቲና፥ ኣዪሲ ፆሳ ማፃፋይ፥ ‹ኣሳ ናዓይ ዳሪ ዋዬታናኔ ኢፄታና› ያጊ? ሺን ታኒ ሂንቴንቶ ኦዳይ፤ ኤላስ ዬዳ፤ ቃሲ ኣባይ ፆሳ ማፃፋን ፃፌቴዳዋዳንካ፥ ኣሳይ ኣ ባሬ ኮዬዳባ ኦꬄዳ» ያጌዳ። ዬሱሲ፥ ጴፂሮሲ፥ ያዪቆቢኔ ዮሃኒሲ ዮኮ ዬሱሳ ካሊያዋንቱኮ ሲሚዴ ዪያ ዎዴ፥ ጮራ ኣሳይ ሄ ካሊያዋንቱ ዩሹዋን ኤቄዳዋኔ ሂጊያ ታማሪሲያ ኣማሬዳ ኣሳቱ ኡንቱንቱና ፓሉሜቲያዋንታ ቤዔዲኖ። ሄ ጮራ ኣሳይ ዬሱሳ ቤዔዳ ዎዴ ማላሌቲ ዳጋሚዴ፥ ኤሌካ ኣኮ ዎፂ ዪዴ፥ ኣ ሳሮቴዳ። ዬሱሲ ባሬና ካሊያዋንታ «ኡንቱንቱና ኣያ ፓሉሜቲቴ?» ያጊዴ ኦቼዳ። ሄ ጮራ ኣሳ ጊዶፔ ኢቲ ቢታኒ ዛሪዴ፥ «ታማሪሲያዎ፥ ታ ናዓ ቦላን ሃሳያ ዲጊያ ኢታ ኣያናይ ዴዒያ ዲራው፥ ኣ ኔኮ ኣካዴ ያዲ። ሃ ኢታ ኣያናይ ኣ ኦይቂያ ዎዴ ኡባን፥ ኣ ኦሌ፤ ኣ ዶናናካ ሆሙ ፓሮቴ፤ ቃሲ ኣቻ ጋርጪሴ፤ ቦላካ ዞሊሴ። ኣፔ ሃ ኢታ ኣያና ኬሳና ማላ፥ ኔና ካሊያዋንቶ ኦዳዲ፥ ሺን ኬሳናው ዳንዳይቤይኪኖ» ያጌዳ። ዬሱሲ ዛሪዴ ኡንቱንታ፥ «ኣማኔና ሃ ዎዲያ ኣሳው! ታኒ ሂንቴንቱና ኣዉዴ ጋካናው ዴዓኔ? ቃሲ ሂንቴንቱባ ኣዉዴ ጋካናው ዳንዳያኔ? ናዓ ታኮ ሃ ኣኪ ዪቴ» ያጌዳ። ኡንቱንቱ ናዓ ኣኮ ኣሄዲኖ፤ ሄ ኢታ ኣያናይ ዬሱሳ ቤዔዳ ማንዒያንካ ናዓ ኮኮርሲ ኣጌዳ፤ ናዓይ ሳዓን ኩንዲዴ፥ ዶናና ሆሙ ጎፑ ጊሺን ጎንዶሬቴዳ። ዬሱሲ ሄ ናዓ ኣዉዋ፥ «ሃዌ ኔ ናዓ ኦይቆዴፔ ዎይሳ ዎዴ ጊዳኔ?» ያጊዴ ኦቼዳ። ናዓ ኣቡ፥ «ኢ ናዓቴꬃን ዴዒያ ዎዲያፔ ዶሜዳ። ኣ ዎꬋናው ዳሮ ዎዴ ታማኒኔ ሃꬃን ኦሌዳ፤ ሺን ኔኒ ዳንዳዮፔ፥ ኑሲ ቃሬታዴ ኑና ማዳሪኪ» ያጌዳ። ዬሱሲ ኣ፥ «ኔኒ ዳንዳዮፔ ጋይ? ኣማኒያ ኣሳው ኡባባይ ዳንዳዬቴ» ያጌዳ። ኤሌካ ናዓ ኣቡ ባሬ ኮሻ ꬎቁ ኦꬂዴ፥ «ታኒ ኣማናይ፤ ሺን ጉጃ ኣማናናዳን፥ ታና ማዳሪኪ» ያጌዳ። ዬሱሲ ኣሳይ ዳሪ ዳሪ ቢያዋ ቤዒዴ፥ ኢታ ኣያና፥ «ናዓ ቱሌኔ ዱዴ ኡዴዳ ኣያናው፥ ሃ ናዓፔ ኬሳ ጋዴ ኔና ታ ኣዛዛይ፤ ቃሲ ዛሬꬃዴ ኣኒ ጌሎፓ» ያጌዳ። ሄ ኢታ ኣያናይ ዋሲዴ፥ ናዓ ዳሪሲ ኮኮርሲዴ፥ ኣፔ ኬሴዳ። ናዓይ ሃይቄዳዋ ማላቲና፥ ዳሮ ኣሳይ፥ «ናዓይ ሃይቄዳ» ያጌዳ። ሺን ዬሱሲ ናዓ ኩሺያ ኦይቂዴ ዴንꬂና፥ ናዓይ ዴንዲ ኤቄዳ። ዬሱሲ ሶይ ጌሌዳዋፔ ጉዪያን፥ ኣ ካሊያዋንቱ ዬሱሳ ዱማ፥ «ኑኒ ሄ ኢታ ኣያና ኬሳናው ኣዪሲ ዳንዳይቤይኮ?» ያጊዴ ኦቼዲኖ። ዬሱሲ ዛሪዴ፥ «ሄዋ ማላይ ዎሳፔኔ ፆማፔ ኣቲን፥ ሃራባን ኬሳናው ዳንዳዬና» ያጌዳ። ኡንቱንቱ ሄዋፔ ዴንዲዴ፥ ጋሊላና ኣꬊዴ ቤዲኖ፤ ዬሱሲ ባሬ ዴዒያሳ ኦኒኔ ኤራና ማላ ኮዪቤና። ኣዪሲ ጎፔ፥ ኢ ባሬና ካሊያዋንታ «ታና፥ ኣሳ ናዓ፥ ኣሳይ ኣሳው ኣꬂዴ ኢማናኔ ዎꬋና፤ ታኒ ቃሲ ሄዙ ጋላሳፔ ጉዪያን፥ ሃይቁዋፔ ዴንዳና» ያጊዴ ታማሪሴ። ሺን ኡንቱንቶ ኢ ጊያዌ ጌሊቤና፤ ቃሲ ኣ ኦቻናዉካ ያዬዲኖ። ኡንቱንቱ ቂፊሪናሆማ ጊያ ካታማ ቤዲኖ፤ ሶይ ጌሌዳዋፔ ጉዪያን፥ ዬሱሲ ኡንቱንታ፥ «ኦጊያን ኣያ ፓሉሜቲቴ?» ያጊዴ ኦቼዳ። ሺን ኡንቱንቱ ቢዴ ኦጊያን፥ «ኑ ጊዶን ኑ ኡባፔ ኣꬊያዌ ኦኔ?» ያጊዴ ፓሉሜቴዳ ዲራው፥ ጮዑ ጌዲኖ። ዬሱሲ ኡቲዴ፥ ታማኔ ላዑ ባሬና ካሊያዋንታ ፄሲዴ ኡንቱንታ፥ «ኦኒኔ ሲንꬃው ኣꬋና ኮዮፔ፥ ኡባፔ ጉዬ ኣꬊዴ፥ ሄ ኡባው ቆማ ጊዳናው ቤሴ» ያጌዳ። ኢቲ ጉꬃ ናዓ ኦይቂዴ፥ ኡንቱንቱ ጊዶን ኤሴዳ፤ ሄ ጉꬃ ናዓ ኢዲሚዴ ኡንቱንታ፥ «ሃዋንቱ ማላ ጉꬃ ናናፔ ኢቱዋ ታ ሱንꬃን ሞኪያ ኦኒኔ ታና ሞኬ፤ ቃሲ ታና ሞኪያ ኦኒኔ ታና ኪቴዳዋ ሞኪያዋፔ ኣቲን፥ ታ ፃላላ ሞኬና» ያጌዳ። ዮሃኒሲ ኣ፥ «ታማሪሲያዎ፥ ኢቲ ኣሳይ ኔ ሱንꬃን ኢታ ኣያናቱዋ ኬሲያዋ ኑኒ ቤዒዴ፥ ኑ ባጋ ጊዴና ዲራው፥ ኣ ዲጌዶ» ያጌዳ። ሺን ዬሱሲ ያጌዳ፤ «ኦኒኔ ታ ሱንꬃን ማላታ ኦꬂዴ፥ ኤሌካ ታ ቦላ ኢታባ ሃሳያናው ዳንዳዪያዌ ባዪና ዲራው ዲጎፒቴ፤ ኣዪሲ ጎፔ፥ ኑባ ኤቄቴና ኡራይ ኑ ባጋ። ታኒ ሂንቴንቶ ቱሙዋ ኦዳይ፤ ሂንቴ ታዋንታ ኪሪስቶሳዋንታ ጊዲያ ዲራው፥ ኦኒኔ ሂንቴንቶ ታ ሱንꬃን ቡሊያ ሃꬃ ኡሻናው ኢሞፔካ፥ ባሬ ጋቲያ ኣካናዋ። «ታና ኣማኒያ ሃ ጉꬃቱዋፔ ኢቱዋ ባሌꬂያ ኦናኔ፥ ጋጪያ ዎጋ ዎፃ ኣ ቆꬊያን ቃቺዴ፥ ኣባን ኣ ኦሊያዌ ኣው ሎዓ። ኔ ኩሺ ኔና ባሌꬆፔ፥ ቃንፃ ኦላ፤ ኔኒ ላዑ ኩሺያና ቃሲ ኡባካ ቶዔና ጋናሚያ ታማን ጌሊያዋፔ፥ ዱፃ ኩሺያና ዴዑዋ ጌሊያዌ ኔው ሎዓ። *** ኔ ጌዲ ኔና ባሌꬆፔ፥ ቃንፃ ኦላ፤ ኔን ላዑ ጌዲያና ኡባካ ቶዔና ጋናሚያ ታማን ዬጌቲያዋፔ፥ ዶማ ጊዳዴ ዴዑዋ ጌሊያዌ ኔው ሎዓ። *** ኔ ኣይፊ ኔና ባሌꬆፔ፥ ዎጫ ኦላ፤ ኔኒ ላዑ ኣይፊያና ኡባካ ቶዔና ጋናሚያ ታማን ዬጌቲያዋፔ፥ ኢቲ ኣይፊያና ፆሳ ካዉቴꬃ ጌሊያዌ ኔው ሎዓ። *** «ቁማን ማፂኒያ ዬጊያዋዳን፥ ታማይ ኣሳ ኡባ ቦላ ዬጌታና። ማፂኒ ሎዓ፤ ሺን ኢ ማልዓና ꬋዮፔ፥ ዛሪዴ ኣ ዎቲ ማልዔꬃኒቴ? ሂንቴንቱን ማፂኒ ዴዖ፤ ያቲዴ ኢቱ ኢቱዋና ሳሮቴꬃን ዴዒቴ» ያጌዳ። ዬሱሲ ሄዋፔ ዴንዲዴ፥ ዮርዳኖሳ ሻፋፔ ሄፊንꬃ ባጋና ዪሁዳ ጋዲያ ቤዳ። ጮራ ኣሳይ ሺሬቲዴ ኣኮ ሺቂና፥ ካሴ ኢ ኦꬂያዋዳንካ ሄ ኣሳ ታማሪሱዋ ዶሜዳ። ኢቲ ኢቲ ፓሪሳዋቱ ፓጫናው ዬሱሳኮ ዪዴ፥ «ኢቲ ኣሳይ ባሬ ማቻቶ ዬዳናው ኑሲ ሂጊ ኣዛዚ?» ያጊዴ ኣ ኦቼዲኖ። ኢ ዛሪዴ፥ «ሙሴ ሂንቴንታ ዋጊ ኣዛዜዴ?» ያጌዳ። ኡንቱንቱ፥ «ሙሴ፥ ‹ኢቲ ኣሳይ ባሬ ማቻቶ ፓራማ ኢሚዴ ዬዶ› ጌዳ» ያጌዲኖ። ዬሱሲ ዛሪዴ ኡንቱንታ፥ «ሂንቴንቱ ኦዲና ሲሴናዋንታ ጊዲያ ዲራው፥ ሙሴ ሃ ኣዛዙዋ ሂንቴንቶ ፃፌዳ። ሺን ፆሳይ ኮይሮ ሜꬊያ ዎዴ፥ ኣቱማ ኣሳኔ ማጫ ኣሳ ኦꬂዴ፥ ኡንቱንታ ሜꬌዳ። ሄዋ ዲራው፥ ኢቲ ኣሳይ ባሬ ኣባኔ ባሬ ዳዮ ኣጊዴ፥ ባሬ ማቻቲና ኢቱዋ ጊዴ፤ ኡንቱንቱ ላዓቱ ኢቲ ኣሾ ጊዲኖ፤ ሄዋ ዲራው፥ ኡንቱንቱ ኢቲ ኣሳ ጊዲያዋፔ ኣቲን፥ ላዑ ኣሳ ጊዲኪኖ። ሄዋ ዲራው፥ ፆሳይ ኢቲፔ ጋꬄዳዋ ኣሳይ ሻኮፖ» ያጌዳ። ኡንቱንቱ ሶይ ሲሜዳ ዎዴ፥ ዬሱሳ ካሊያዋንቱ ሃ ዬዉዋባ ዬሱሳ ዛሪ ኦቼዲኖ። ዬሱሲ ኡንቱንታ፥ «ባሬ ማቻቶ ዬዲዴ፥ ሃራሮ ኣኪያ ኡራይ ኦኒኔ ኢዚና ዎሹሜ። ቃሲ ማጫዉናካ ባሬ ኣሲናፔ ኬሳዴ ሃራ ኣሲና ጌሎፔ ዎሹማው» ያጌዳ። ዬሱሲ ጉꬃ ናና ቦቻና ማላ፥ ኢቲ ኢቲ ኣሳይ ናና ኣኮ ኣሄዳ፤ ሺን ዬሱሳ ካሊያዋንቱ ሄ ኣሳ ሴሬዲኖ። ዬሱሲ ሄዋ ቤዒዴ፥ ባሬና ካሊያዋንታ ሃንቄቴዳ፤ ኡንቱንታ፥ «ጉꬃ ናናይ ታኮ ዪያዋንታ ዲጎፒቴ፤ ኣዪሲ ጎፔ፥ ፆሳ ካዉቴꬃይ ሃዋንቱ ማላሳ። ታኒ ሂንቴንቶ ቱሙዋ ጋይ፤ ፆሳ ካዉቴꬃ ጉꬃ ናዓዳን ኣኬና ኡራይ ኦኒኔ ሄ ካዉቴꬃ ኡባካ ጌሌና» ያጌዳ። ጉꬃ ናና ኢዲሚዴ፥ ባሬ ኩሺያ ኡንቱንቱ ቦላ ሁጲያን ሁጲያን ዎꬂዴ፥ ኡንቱንታ ኣንጄዳ። ዬሱሲ ባናው ኬሴዳ ዎዴ፥ ኢቲ ቢታኒ ዎፂዴ ዪ ኣ ሲንꬃን ጉልባቲዴ፥ «ሎዖ ታማርሲያዎ፥ ሜꬊና ዴዑዋ ላታናው ታኒ ኣያ ኦꬆ?» ያጊዴ ኣ ኦቼዳ። ዬሱሲ፥ «ኣዪሲ ታና ሎዖ ጋይ? ፆሳ ፃላላፔ ኣቲን፥ ሃራ ሎዑ ኦኒኔ ባዋ። ፆሳ ኣዛዙዋ፥ ‹ዎꬎፓ፤ ዎሹሞፓ፤ ዉዖፓ፤ ዎርዱዋ ማርካቶፓ፤ ጪሞፓ፤ ኔ ኣባኔ ኔ ዳዮ ቦንቻ› ያጊያዋ ኤራሳ» ያጌዳ። ቢታኒ ዬሱሳ፥ «ታማሪሲያዎ፥ ታኒ ሄዋ ኡባ ናዓቴꬃፔ ዶማዴ ሃዒ ጋካናዉካ ናጋይ» ያጌዳ። ዬሱሲ ቢታኒያ ዶሴዳ፤ ኣ ጫዲ ፄሊዴ፥ «ኔው ኢቲባይ ፓጬዳ፤ ባዴ ኔው ዴዒያባ ኡባ ዛልዓዴ፥ ሄ ሚሻ ሂዬሳው ኢማ፤ ኔን ሳሉዋን ዱሬታና። ያቶዋፔ ጉዪያን ያዴ ታና ካላ» ያጌዳ። ሺን ቢታኒ ሄዋ ሲሲዴ፥ ኢ ዳሮ ዱሬ ጊዲያ ዲራው፥ ባሬ ሶምዒያ ꬉሚሲዴ፥ ናሼቴናን ኣጊዴ ቤዳ። ዬሱሲ ባሬና ካሊያዋንታ ዩሺ ኣꬂ ፄሊዴ፥ «ዳሮ ዱሬ ኣሳይ ፆሳ ካዉቴꬃ ጌላናው ዋኒ ሜታንዴሻ!» ያጌዳ። ኣ ካሊያዋንቱ ኣ ሃሳያ ሲሲዴ ማላሌቴዲኖ፤ ሺን ዬሱሲ ቃሲካ ኡንቱንታ፥ «ናቶ፥ ፆሳ ካዉቴꬃ ጌላናው ዎቲ ሜታንዴሻ! ዱሬ ኣሳይ ፆሳ ካዉቴꬃ ጌላናዋፔ፥ ጋሉ ማርፒያ ፆዒያና ኣꬋናዌ ማታቴ» ያጌዳ። ዬሱሳ ካሊያዋንቱ ማላሌቲዴ፥ «ያቲና፥ ኦኔ ኣታናው ዳንዳዪያዌ?» ያጊዴ ኢቱ ኢቱዋ ኦቼዲኖ። ዬሱሲ ኡንቱንታ ጫዲ ፄሊዴ፥ «ሃዌ ፆሳው ዳንዳዬቲያዋፔ ኣቲን፥ ኣሳው ዳንዳዬቴና፤ ኣዪሲ ጎፔ፥ ፆሳው ኡባባይካ ዳንዳዬቴ» ያጌዳ። ጴፂሮሲ ዬሱሳ፥ «ቤዓ፤ ኑኒ ኑባ ኡባ ኣጊዴ፥ ኔና ካሌዶ» ያጌዳ። ዬሱሲ፥ «ታኒ ሂንቴንቶ ቱሙዋ ጋይ፤ ታ ዲራዉኔ ዎንጋላ ሚሺራቹዋ ዲራው፥ ጎሊያ ዎይ ኢሻቱዋ ዎይ ሚቻቱዋ፥ ዎይ ኣዉዋ ዎይ ኣቶ ዎይ ማቻቶ፥ ዎይ ናና ዎይ ጋዲያ ኣጌዳ ኣሳይ ኦኒኔ፥ ሃዒ ሃ ዎዲያን ፄቱ ዳኩዋፔ ዳሪያ ጎሌቱዋ፥ ኢሻቱዋ፥ ሚቻቱዋ፥ ኣቶ፥ ናና፥ ጋዲያ፥ ቃሲ ሜቱዋካ ኣካናዋ። ሲንꬃፔ ያና ዎዲያንካ ሜꬊና ዴዑዋ ኣካናዋ። ሺን ጮራቱ ሃዒ ሲንꬃን ዴዒያዋንቱ ጉዬ ኣꬋና፤ ቃሲ ጮራቱ ሃዒ ጉዬን ዴዒያዋንቱ ሲንꬃው ኣꬋና» ያጌዳ። ኡንቱንቱ ዬሩሳላሜ ቢዴ፥ ኦጊያን ዴዒኖ፤ ዬሱሲ ባሬና ካሊያዋንቱፔ ሲንꬃና ሃሜቴ። ኡንቱንቱ ማላሌቴዲኖ፤ ኣ ካሊያዋንቱ ያዬዲኖ። ዛሪዴ ታማኔ ላዑ ባሬና ካሊያዋንታ ጋፃ ኬሲዴ፥ ባሬና ጋካናባ ዱማዪዴ ኡንቱንቱሲ ሃዋዳን ያጊዴ ኦዴዳ፤ «ቤዒቴ፤ ኑኒ ዬሩሳላሜ ሃዒ ኬሶይቴ፤ ያኒ ታና፥ ኣሳ ናዓ፥ ቄሳቱዋ ካፓቱዋሲኔ ሙሴ ሂጊያ ታማርሲያዋንቱሲ ኣꬂዴ ኢማና። ኡንቱንቱ ታ ቦላን ሃይቁዋ ፒርዳ ፒርዳና፤ ቃሲ ኣዪሁዳ ጊዴና ኣሳሲካ ታና ኣꬂዴ ኢማና። ሄ ኣዪሁዳ ጊዴና ኣሳይ ታ ቦላ ቂሊጫናኔ ጩቻና፤ ታና ሊሱዋን ሾጫናኔ ዎꬋና፤ ታኒ ቃሲ ሄዙ ጋላሳፔ ጉዪያን፥ ሃይቁዋፔ ዴንዳና።» ዛቢዲዮሳ ናናይ ያዪቆቢኔ ዮሃኒሲ ዬሱሳኮ ዪዴ፥ «ታማሪሲያዎ፥ ኑኒ ኔና ዎሲያባ ኡባባ ኑሲ ኦꬃሪኪ» ያጌዲኖ። ዬሱሲ ኡንቱንታ፥ «ታኒ ሂንቴንቶ ኣያ ኦꬆ?» ያጌዳ። ኡንቱንቱ ኣ፥ «ኔ ቦንቾ ካዉቴꬃን ኔኒ ኡቲያ ዎዴ፥ ኑፔ ኢቱዋ ኔፔ ኡሼቻ ባጋና ቃሲ ኢቱዋ ሃዲርሳ ባጋና ኡቲሳሪኪ» ያጌዲኖ። ሺን ዬሱሲ ኡንቱንታ፥ «ሂንቴንቱ ኣያ ዎሳናው ቤሲንቶካ ኤሪኪታ፤ ታኒ ኡሻናው ቤሲያ ሜቱዋ ፁዓ ኡሻናው ዳንዳዪቴ? ቃሲ ታኒ ፃማቄታናው ቤሲያ ፂንቃታ ፃማቄታናው ዳንዳዪቴ?» ያጌዳ። ሄዋፔ ጉዬ ኡንቱንቱ ዛሪዴ፥ «ኤ ዳንዳዬቶ» ያጌዲኖ። ዬሱሲ ቃሲ፥ «ታኒ ኡሻናው ቤሲያ ሜቱዋ ፁዓ ሂንቴ ኡሻና፤ ታኒ ፃማቄታናው ቤሲያ ፂንቃታካ ሂንቴ ፃማቄታና። ሺን ታፔ ኡሼቻ ባጋናኔ ሃዲርሳ ባጋና ኡታናዋንታ ዶሪያዌ ታና ጊዲኬ፤ ሺን ሄ ሳዓይ ፆሳይ ኢማናው ጊጊሲ ዎꬄዳዋንቱሳ» ያጌዳ። ዮኮ ታሙ ዬሱሳ ካሊያዋንቱ ሄዋ ሲሴዳ ዎዴ፥ ያዪቆባኔ ዮሃኒሳ ሃንቄቴዲኖ። ዬሱሲ ኡንቱንታ ኡባ ባሬኮ ፄሲዴ፥ ሃዋዳን ያጌዳ፤ « ‹ኣዪሁዳ ጊዴናዋንታ ሞዲያዋንታ› ጊዴ ቆፒያዋንቱኔ ሄዋንታ ካሌꬂያ ኣሳቱ ባሬንቱ ኣሳ ሞዲያዋ ኤሪታ። ሺን ሂንቴ ጊዶን ሄዋ ማላ ጊዴና፤ ሂንቴ ጊዶን ዎጋታና ኮዪያ ኦኒኔ ሂንቴንቶ ቆማ ጊዳናው ቤሴ። ቃሲ ሂንቴ ጊዶን ኡባፔ ቦላ ጊዳና ኮዪያ ኦኒኔ ሂንቴ ኡባው ኣዪሌ ጊዳናው ቤሴ። ኣዪሲ ጎፔ፥ ሃራይ ኣቶ ታኒ፥ ኣሳ ናዓይካ፥ ኣሳው ኦꬃናዉኔ ጮራቱዋ ዎዛናው ዬዳዋፔ ኣቲን፥ ኣሳይ ታው ኦꬃና ማላ ያቤይኬ» ያጌዳ። ኡንቱንቱ ኢያርኮ ጊያ ካታማ ቤዲኖ፤ ዬሱሲ ባሬና ካሊያዋንቱናኔ ጮራ ኣሳና ኢያርኮፔ ኬሲሺን፥ ፂሞሳ ናዓይ ቆቃይ፥ ባርፃሞሳ ጊያዌ፥ ኦጊያ ዶናን ዎሲዴ ኡቴዳ። ባርፃሞስ ናዚሬቲያ ዬሱሳ ጊዴዳዋ ሲሲዴ፥ ባሬ ኮሻ ꬎቁ ኦꬂዴ፥ «ዳዊቴ ናዓ ዬሱሳ፥ ታና ማራሪኪ!» ያጉሳ ዶሜዳ። ጮራ ኣሳይ ኣ፥ «ሃይዛ!» ጊዴ ሃንቄቴዳ። ሺን፥ ኢ ባሬ ኮሻ ካሴዋፔካ ዳሪሲ ꬎቁ ኦꬂዴ፥ «ዳዊቴ ናዓው፥ ታና ማራሪኪ!» ያጌዳ። ዬሱሲ ኦጊያን ኤቂዴ፥ «ኣ ሃ ፄሲቴ» ያጌዳ። ኡንቱንቱ ቆቃ፥ «ኣይኔ ባዋ፤ ዴንዳ ኤቃ፤ ኔና ፄሴ» ያጊዴ ፄሴዲኖ። ቆቃይ ባሬ ማዩዋ ኦሊ ኣጊዴ፥ ጉፒ ዴንዲ ኤቂዴ፥ ዬሱሳኮ ቤዳ። ዬሱሲ ኣ፥ «ታኒ ኔው ኣያ ኦꬃናው ኮያይ?» ያጌዳ። ቆቃይ፥ «ታማሪሲያዎ፥ ታኒ ፄላናዋ ኮያይ» ያጌዳ። ዬሱሲ ኣ፥ «ባ፤ ኔ ኣማኑ ኔና ፓꬄዳ» ያጌዳ። ኤሌካ ኣ ኣይፊ ፄሊ ኣጊና፥ ኦጊያን ዬሱሳ ካሊ ኣጌዳ። ኡንቱንቱ ዬሩሳላሜ ማቲዴ፥ ዴብሬ ዛይቴ ዴሪያ ማታን ዴዒያ ቤቴፋጌኔ ቢታኒያ ጋኬዲኖ፤ ዬሱሲ ባሬና ካሊያዋንቱፔ ላዑዋ ሲንꬃው ኪቲዴ፥ «ሂንቴንቱፔ ሲንꬃን ዴዒያ ሄራ ቢቴ፤ ያ ጌሎሳና ኦኒኔ ኡባ ቶጊቤና ቃሹዋን ዴዒያ ሃሬ ማራ ሂንቴ ዴማና፤ ኣ ቢሊ ሃ ኣኪዴ ዪቴ። ኦኒኔ ሂንቴንታ፥ ‹ሄዋ ኣዪሲ ኦꬂቴ?› ያጊዴ ኦቾፔ፥ ‹ጎዳው ሃዌ ኮሼ፤ ኤሌካ ዛሪ ሃ ዬዳናዋ› ያጊቴ» ያጌዳ። ኡንቱንቱ ቢዴ፥ ሃሬ ማራ ፔንጊያ ማታን ኦጊያን ቃቺ ዎꬄዳዋ ዴሚዴ ቢሌዲኖ። ሄዋን ኤቄዳ ኢቲ ኢቲ ኣሳቱ ኡንቱንታ፥ «ሃሬ ማራ ዎታናው ቢሊቴ?» ያጌዲኖ። ዬሱሳ ካሊያዋንቱ ዬሱሲ ባሬንታ ኣዛዜዳዋ ኦዲና፥ ኣሳቱ ዬዲ ኣጌዲኖ። ኡንቱንቱ ሃሬ ማራ ዬሱሳኮ ኣሂዴ፥ ባሬንቱ ማዩዋ ኣ ዞኪያን ዎꬄዲኖ፤ ዬሱሲ ሄ ሃሬ ማራ ቶጌዳ። ጮራ ኣሳይ ባሬንቱ ማዩዋ ኦጊያን ሂፄዳ፤ ቃሲ ሃራንቱ ሚꬃ ሃይꬃ ካር ካሪዴ፥ ኦጊያን ሂፄዲኖ። ዬሱሳፔ ሲንꬃና ሃሜቲያ ኣሳይኔ ኣ ጌዱዋ ካሊያ ኣሳይ ባሬንቱ ኮሻ ꬎቁ ኦꬂዴ፥ «ፆሳይ ጋላቴቶ! ጎዳ ሱንꬃን ዪያዌ ኣንጄቴዳዋ። ጎዳ ሱንꬃን ዪያ ኑ ኣዉዋ ዳዊቴ ካዉቴꬃይ ኣንጄቴዳዋ። ሳሉዋ ኡባፔ ቦላ ሳሉዋን ዴዒያ ፆሳይ ጋላቴቶ» ያጌዲኖ። ዬሱሲ ዬሩሳላሜ ቢዴ፥ ጌሻ ጎሊያ ጌሌዳ፤ ቃሲ ኡባባ ዩዪ ዩዪ ፄሌዳዋፔ ጉዪያን፥ ሳዓይ ቃሚያ ዲራው፥ ታማኔ ላዑ ዬሱሳ ካሊያዋንቱና ቢታኒያ ቤዳ። ዎንቴꬃ ጋላሲ ኡንቱንቱ ቢታኒያፔ ኬሲዴ ቢሺን፥ ዬሱሲ ኮሻቴዳ። ሃኩዋን ኢቲ ባላሲያ ጊያ ሚꬃቶ ሃይꬃ ማያ ኡቴዳዉኖ ቤዒዴ፥ ኦኒ ኤሪ ኢ ቦላ ኣይፊ ቤቶፔኔ ጊዴ፥ ቤዓናው ኢዚኮ ቤዳ፤ ሺን ኢዚኮ ኢ ቢያ ዎዴ፥ ሃይꬃ ፃላላፔ ኣቲን፥ ኣይኔ ኣይፊያ ዴሚቤና፤ ኣዪሲ ጎፔ፥ ባላሲ ኣይፊያ ዎዲ ጋኪቤና። ዬሱሲ ሄ ባላሳቶ፥ «ኔፔ ሺሬቲዴ ሜꬊናው ኦኒኔ ኣይፊያ ሞፖ» ያጌዳ። ዬሱሳ ካሊያዋንቱ ኢ ጊያዋ ሲሴዲኖ። ኡንቱንቱ ዬሩሳላሜ ቤዲኖ፤ ዬሱሲ ጌሻ ጎሊያ ጌሊዴ፥ ሄዋን ዛሊዒያዋንታኔ ሻሚያዋንታ ካሬ ዬዴርሱዋ ዶሜዳ፤ ቃሲ ሚሻ ላሚያዋንቱ ፃራጴዛኔ ዶጎሙዋ ዛሊዒያዋንቱ ኦይዲያ ኣꬂ ዬጊዴ፥ ኦኒኔ ኣዬንቶ ቶኪዴ፥ ጌሻ ጎሊያ ጊቢያ ጊዶና ኣꬋናዋ ዲጌዳ። ዬሱሲ ኣሳ ሃዋዳን ያጊዴ ታማሪሴዳ፡ «ፆሳ ማፃፋን፥ ‹ታ ጎሊ ኣዪሁዳ ጊዴና ኣሳይ ኡባይ ፆሳ ዎሲያ ጎሌ ጌቴታና› ያጌቲዴ ፃፌቲ ኡቴዳ፤ ሺን ሂንቴ ኣ ቦንቃንቻቱ ቆሴቲያ ጎንጎሉዋ ኬሴዲታ።» ቄሳቱዋ ካፓቱኔ ሙሴ ሂጊያ ታማርሲያዋንቱ ሄዋ ሲሲዴ፥ ኣ ዎꬋና ኦጊያ ኮሻ ዶሜዲኖ፤ ሺን ጮራ ኣሳይ ኢ ታማሪሲያዋን ማላሌቲያ ዲራው፥ ኣው ያዬዲኖ። ሳዓይ ኦማርሴዳ ዎዴ፥ ዬሱሲኔ ኣ ካሊያዋንቱ ካታማፔ ጋፃ ኬሴዲኖ። ኡንቱንቱ ዎንቴꬃ ጋላሲ ጉራ ኦጊያና ኣꬊዴ፥ ሄ ባላሳታ ፃጱዋና ሜላዲጌዳዉኖ ቤዔዲኖ። ጴፂሮሲ ሃሳዪዴ፥ «ታማሪሲያዎ፥ ቤዓ፤ ኔን ሼቄዳ ባላሳታ ሜላዲጋዱ» ያጌዳ። ዬሱሲ ዛሪዴ፥ ኡንቱንታ ሃዋዳን ያጌዳ፤ «ፆሳ ኣማኒቴ። ታኒ ሂንቴንቶ ቱሙዋ ጋይ፤ ኦኒኔ ባሬ ዎዛናን ሲꬌናን ባሬ ጌዳባይ ሃናናዋ ኣማኒዴ፥ ሃ ዴሪያ፥ ‹ዴንዳዴ ኣባን ኩንዳ› ጎፔ ሃናና። ሄዋ ዲራው፥ ፆሳ ሂንቴ ዎሲያባኔ ኦቺያባ ኡባ ኣኪዲጎዋዳን ኣማኒቴ፤ ሂንቴ ኣካና። ፆሳ ዎሳናው ሂንቴ ኤቂያ ዎዴ፥ ሳሉዋን ዴዒያ ሂንቴ ኣዉ ሂንቴ ናጋራ ኣቶ ጋና ማላ፥ ኦኒኔ ሂንቴንታ ናቄዳባይ ዴዖፔ፥ ኣው ኣቶ ጊቴ። ሺን ኣሳ ናጋራ ሂንቴ ኣቶ ጋና ꬋዮፔ፥ ሳሉዋን ዴዒያ ሂንቴ ኣዉካ ሂንቴ ናጋራ ሂንቴንቶ ኣቶ ጌና።» ኡንቱንቱ ቃሲካ ዬሩሳላሜ ቤዲኖ፤ ዬሱሲ ጌሻ ጎሊያን ሃሜቲሺን፥ ቄሳቱዋ ካፓቱ፥ ሙሴ ሂጊያ ታማሪሲያዋንቱኔ ጪማቱ ዬሱሳኮ ዬዲኖ። ኣ፥ «ኔኒ ሃዋ ኦꬃናው ኔው ኣይ ማታይ ዴዒ? ዎይ ኔው ሃ ማታ ኢሜዳዌ ኦኔ?» ያጌዲኖ። ዬሱሲ ዛሪዴ ኡንቱንታ፥ «ታኒካ ሂንቴንታ ኢቲባ ኦቻና፤ ታው ኦዲቴ፤ ታኒ ቃሲ ሃዋ ኣይ ማታን ኦꬃይታንቶ፥ ሂንቴንቶ ኦዳና። ዮሃኒሲ ፃማቂያ ማታ ኣኬዳዌ ፆሳፔዬ ዎይ ኣሳፔ? ታው ኦዲቴ» ያጌዳ። ኡንቱንቱ ባሬንቱ ጊዶን ፓሉማ ዶሚዴ፥ «ኑኒ፥ ‹ፆሳፔ ዬዳ› ያጎፔ፥ ኢ ኑና፥ ‹ያቲና፥ ዮሃኒሲ ኦዴዳዋ ኣዪሲ ኣማኒቤይኪቴ?› ያጋና። ሺን፥ ‹ኣሳፔ ዬዳ ጋኔ?› » ያጌዲኖ፤ ቃሲ ኣሳይ ኡባይ ዮሃኒሲ ናቢያ ጊዴዳዋ ኤሪያ ዲራው፥ ኣሳው ያዬዲኖ። ሄዋ ዲራው፥ ኡንቱንቱ ዬሱሳው፥ «ኑኒ ኤሮኮ» ያጊዴ ዛሬዲኖ፤ ዬሱሲ፥ «ታኒካ ሃዋ ኣይ ማታን ኦꬃይታንቶ፥ ሂንቴንቶ ኦዲኬ» ያጌዳ። ዬሱሲ ኡንቱንቶ ኦዱዋ ሌሚሱዋን ያጊዴ ዶሜዳ፤ «ኢቲ ቢታኒ ዎዪኒያ ጊያ ቱራ ቶኪዴ፥ ዲርሳ ዩሺ ኣꬂዴ ዲሬዳ፤ ቃሲ ሄ ዎዪኒያ ጉሚዒያ ኦላካ ቦኬዳ፤ ሄዋ ናጊያ ኣሳው ናጊያሳ ኬፄዳ፤ ሄዋፔ ጉዪያን፥ ኮꬃ ኦꬂያ ኣሳው ኢሚዴ፥ ሃራ ጋዴ ቤዳ። ዎዪኒያ ኣይፊያ ማፂያ ዎዲ ጋኪና፥ ባሬና ጋኪያዋ ኣኪዴ ያና ማላ፥ ኢቲ ቆማ ባሬ ኮꬃዋቱዋኮ ኪቴዳ። ኮꬃ ኦꬂያዋንቱ ኣ ቆማ ኦይቂ ዋꬊዴ፥ ኩሼ ሜላ ዬዴዲኖ። ላዔꬁዋ ሃራ ቆማ ኡንቱንቱኮ ኪቴዳ፤ ኡንቱንቱ ሄ ቆማ ሁጲያ ጳልቂዴ ፖኪሲ ዬዴዲኖ። ዎዪኒያ ቱራ ጎዳይ ቃሲካ ሃራ ቆማ ኪቴዳ፤ ሄ ቆማ ዎꬌዲኖ፤ ቃሲ ሃራ ጮራቱዋካ ሄዋዳን ኦꬄዲኖ፤ ኢቱዋ ኢቱዋ ዋꬊዴ፥ ሃራቱዋ ዎꬌዲኖ። «ዎዪኒያ ቱራ ጎዳው ኪታናው ኡባፔ ዉርሴꬃን ኢ ዳሪ ሲቂያ ኣ ናዓ ፃላላይ ኣቴዳ፤ ኢ፥ ‹ኡንቱንቱ ታ ናዓ ቦንቼናን ኣጊኪኖ› ጊዴ፥ ባሬ ናዓ ኡንቱንቱኮ ኪቴዳ። «ሺን ኮꬃ ኦꬂያዋንቱ ባሬንቱ ጊዶን፥ ‹ላታናዌ ሃዋ፤ ቢዴ ኣ ዎꬎይቴ፤ ኣው ዴዒያዌ ኑዋ ጊዳና!› ያጌዲኖ። ናዓ ኦይቂ ዎꬊዴ፥ ኣ ኣኃ ዎዪኒያ ቱራ ጊዶፔ ጋፃ ኬሲ ኦሌዲኖ። «ሲሚ ዎዪኒያ ቱራ ጎዳይ ዎታኔ? ዪዴ ሄ ኮꬃዋቱዋ ዎꬊ ዉርሲዴ፥ ዎዪኒያ ቱራ ኮꬃ ኦꬂያ ሃራ ኣሳው ኢማናዋ። ‹ጊምቢያዋንቱ ካꬊ ኢፄዳ ሹቻይ ጎዳ ፃጱዋ ሚኒሲያ፥ ኡባፔ ኣꬊያ ሹቻ ጊዴዳ። ሃዌ ጎዳይ ኦꬄዳዋ፤ ቃሲ ኑናካ ማላሊሲያዋ› ያጊያዋ ፆሳ ማፃፋፔ ናባቢቤይኪቴ?» ያጌዳ። *** ቄሳቱዋ ካፓቱ፥ ሂጊያ ታማሪሲያዋንቱኔ ጪማቱ ዬሱሲ ሄ ሌሚሱዋ ባሬንቱን ሌሚሴዳዋ ኤሬዳ ዲራው፥ ኣ ኦይቃናው ኮዬዲኖ፤ ሺን ኣሳው ያዪዴ፥ ባሺ ቤዲኖ። ቃሲ ኣ ሃሳያፔ ባላ ዴማና ማላ፥ ፓሪሳዋቱዋፔኔ ሄሮዲሳ ባጋቱዋፔ ኣማሬዳዋንቱ ኣኮ ኪቲና ዪዴ፥ «ታማሪሲያዎ፥ ኔኒ ቱሙዋ ሃሳዪያዋኔ ኣሳፔ ኣሳ ሻኬናዋ ኑኒ ኤሬቶ፤ ኣዪሲ ጎፔ፥ ኔኒ ኣሳ ዱማያካ፤ ቃሲ ፆሳ ኦጊያ ቱማቴꬃን ታማሪሳ። ኑኒ ሮማ ካቲያ ቄሳሬው ጊራ ጊሪያዌ ዎጌዬ ዎጋ ጊዴኔ? ጊራ ጊራኔዬ ዲጋኔ?» ያጌዲኖ። ሺን ኡንቱንቱ ሎዓ ማላቲያ ኢታ ኣሳ ጊዴዳዋ ዬሱሲ ኤሪዴ፥ «ታና ኣዪሲ ፓጪቴ? ኢቲ ሳንቲሚያ ሃ ታኮ ኣሂቴ፤ ታኒ ኣኔ ቤዓና» ያጌዳ። ኡንቱንቱ ኣው ኣሄዲኖ፤ «ሃ ማላይኔ ሱንꬃይ ኦዌ?» ያጊዴ ኡንቱንታ ኦቼዳ። ኡንቱንቱ፥ «ቄሳሬዋ» ያጌዲኖ። ዬሱሲ ዛሪዴ ኡንቱንታ፥ «ያቶፔ፥ ቄሳሬዋ ቄሳሬሲ፥ ፆሳዋ ፆሳሲ ኢሚቴ» ያጊና ኡንቱንቱ ኣባ ማላሌቴዲኖ። ሃይቄዳ ኣሳይ ዴንዴና ጊያ ሳዱቃዋናቱዋፔ ኢቲ ኢቲ ኣሳቱ ዬሱሳኮ ዪዴ፥ ሃዋዳን ያጊዴ፥ ኣ ኦቼዲኖ፤ «ታማሪሲያዎ፥ ሙሴ ኑሲ ሂጊያ ፃፊዴ፥ ‹ማቻቶ ኣኬዳ ኣሳይ ናዓ ዬሌናን ሃይቆፔ፥ ሄ ሃይቄዳዋ ኢሻይ ኣ ማቻቶ ላቲዴ፥ ባሬ ኢሻው ናዓ ዬላናው ቤሴ› ያጊያዋ ፃፌዳ። ኢቲ ዎዴ ላፑ ኢሻቱ ዴዒያዋንቱፔ ባይራይ ማቻቶ ኣኪዴ፥ ናዓ ዬሌናን ሃይቄዳ። ላዔꬂያ ኢሻይ ኢዞ ኣኬዳ፤ ኢካ ናዓ ዬሌናን ሃይቄዳ፤ ሄዜንꬂያዌካ ሄዋዳን ሃኔዳ። ላፑናቱካ ኢዞ ኣኪዴ፥ ናዓ ዬሌናን ሃይቄዲኖ፤ ኡባፔ ጉዪያን፥ ቃሲ ሄ ሚሺራታ ሃይቃዱ። ያቲና፥ ሃይቄዳ ኣሳይ ሃይቁዋፔ ዴንዲያ ዎዴ፥ ኢዛ ኡንቱንቱፔ ሃቃዎ ማቼ ጊዳኔ? ኣዪሲ ጎፔ፥ ላፑናቱካ ኢዞ ኣኬዲኖ»። ዬሱሲ ዛሪዴ ኡንቱንታ፥ «ሂንቴንቱ ባሌቲያዌ፥ ፆሳ ማፃፋቱዋኔ ኣ ዎልቃ ኤሬና ዲራሳ! ኣዪሲ ጎፔ፥ ሃይቄዳ ኣሳይ ሃይቁዋፔ ዴንዲያ ዎዴ፥ ሳሉዋን ዴዒያ ኪታንቻቱዋ ማላ ጊዳናፔ ኣቲን፥ ኣቱማ ኣሳይኔ ኣኬና፤ ማጫ ኣሳይኔ ጌሌና። ሺን ሃይቄዳዋንቱ ዴንዱዋባ ጊዶፔ፥ ሙሴ ማፃፋን ፃፌቴዳ ፃራጋይ ሚያ ቡራባ ኦዲያ ሳዓን፥ ፆሳይ ሙሳ፥ ‹ታኒ ኣብራሃሜ ፆሳ፥ ዪሳቃ ፆሳ፥ ያዪቆባ ፆሳ› ጊዲያዋ ኡባካ ናባቢቤይኪቴ? ኢ ፓፃ ዴዒያዋንቱ ፆሳ ጊዲያዋፔ ኣቲን፥ ሃይቄዳዋንቱ ፆሳ ጊዴና፤ ሂንቴ ዳሪሲ ባሌዲታ» ያጌዳ። ሂጊያ ታማሪሲያዋንቱፔ ኢቱ ኡንቱንቱ ፓሉሜቲያዋ ሺቂዴ ሲሴዳ፤ ቃሲ ዬሱሲ ኡንቱንቶ ሎዖ ዛሬዳዋ ሲሲዴ፥ «ኣዛዙዋ ኡባፔ ኣꬊያ ኣዛዙ ሃቃዌ?» ያጊዴ ዬሱሳ ኦቼዳ። ዬሱሲ ዛሪዴ፥ ኣ «ኣዛዙዋ ኡባፔ ኣꬊያ ኣዛዙዋ፥ ‹ኢስራዔሊያ ኣሳይ ሲሲቴ፥ ጎዳይ ኑ ፆሳይ ኢቲ ጎዳ። ሂንቴንቱ ጎዳ ሂንቴ ፆሳ ሂንቴ ኩሜንꬃ ዎዛናፔ፥ ሂንቴ ኩሜንꬃ ሼምፑዋፔ፥ ሂንቴ ኩሜንꬃ ቆፋፔ፥ ሂንቴ ኩሜንꬃ ዎልቃፔ ሲቂቴ› ያጌ። ቃሲ ኣዛዙዋ ኡባፔ ኣꬊያ ላዔንꬆ ኣዛዙ ሃዋ፤ ‹ኔኒ ኔ ሾሩዋ ኔ ሁጲያዳን ሲቃ› ጊያዋ፤ ሃዋንቱፔ ኣꬊያ ሃራ ኣዛዙ ባዋ» ያጌዳ። ሂጊያ ታማሪሲያዌ ዬሱሳ ያጌዳ፤ «ታማሪሲያዎ፥ ቱሙዋ ጋዳ፤ ኔኒ ‹ፆሳይ ኢቲ ፆሳ ፃላላ። ኣፔ ኣቲን፥ ሃራይ ባዋ› ጌዳዌ ቱማ። ፆሳ ኩሜንꬃ ዎዛናፔ፥ ኩሜንꬃ ቆፋፔኔ ኩሜንꬃ ዎልቃፔ ዶሲያዌኔ ቃሲ ባሬ ሾሩዋካ ባሬ ሁጲያዳን ሲቂያዌ፥ ጉዲያ ያርሹዋፔኔ ሃራ ያርሹዋ ኡባፔ ኣꬌ» ያጌዳ። ዬሱሲ ሂጊያ ታማርሲያዋ ዛሩ ኣꬎ ኤራንቻ ኣሳ ዛሩዋ ጊዴዳዋ ቤዒዴ፥ «ኔኒ ፆሳ ካዉቴꬃፔ ሃካቤይካ» ያጌዳ፤ ሄዋፔ ጉዪያን፥ ዬሱሳ ሃራባ ኦቻናው ኦኒኔ ፃሊቤና። ዬሱሲ ጌሻ ጎሊያን ታማሪሲዴ፥ «ሂጊያ ታማርሲያዋንቱ ኪሪስቶሳ ዎቲ ዳዊቴ ናዓ ጊኖ? ዳዊቴ ባሬና ጌሻ ኣያናይ ሃሳዪሲና፥ ‹ጎዳይ ታ ጎዳ፥ «ታኒ ኔ ሞርኬቱዋ ኔኒ ዬꬋ ኤቂያባ ኦꬃና ጋካናው፥ ሃዋን ታፔ ቦንቼታዴ ኡሼቻ ባጋና ኡታ» ጌዳ› ያጌዳ። ዳዊቴ ባሬ ሁጴው ኪሪስቶሳ፥ ‹ጎዳ› ጊዴ ፄሶፔ፥ ያቲና፥ ኪሪስቶሲ ዋኒዴ፥ ዳዊቴ ናዓ ጊዲ?» ያጌዳ። ጮራ ኣሳይ ዬሱሲ ጊያዋ ናሼቻን ሲሴዳ። ዬሱሲ ታማሪሲዴ፥ «ሂጊያ ታማሪሲያዋንቱፔ ናጌቲቴ፤ ኡንቱንቱ ኣዱሳ ማዩዋ ማዪዴ ዩዪያዋኔ ጌያ ሄራንካ ኣሳይ ኡንቱንታ ቦንቺዴ ሳሮቲያዋ ዶሲኖ። ኡንቱንቱ ኣዪሁዳ ዎሳ ጎሌቱዋን ዳሪ ሎዒያ ኦይዲያ ዶሲኖ፤ ቃሲ ኣሳይ ባሬንታ ኢማꬃቴꬃን ሞኪያሳንካ ቦንቾ ሳዓ ዶሲኖ። ኡንቱንቱ ኣምዔቱ ጎሊያ ቦንቂዴ፥ ባሬንቶ ሎዓ ማላታናው ፆሳ ዎሳ ኣዱሲኖ፤ ኡንቱንቱ ኡባፔ ኣꬊያ ሙራ ኣካናዋንታ» ያጌዳ። ዬሱሲ ጌሻ ጎሊያን ኢሞታ ዬጊያ ሳፅኒያ ማታን ኡቲዴ፥ ኣሳይ ባሬ ሚሻ ሄ ሳፅኒያን ዬጊያዋ ቤዔዳ፤ ጮራ ዱሬ ኣሳይ ዳሮ ሚሻ ሄ ሳፅኒያን ዬጌዲኖ። ኢቲ ሂዬሳ ኣምዓታ ያዴ፥ ኢቲ ሳንቲሚያን ላሜቲያ ላዑ ሴምቤራቱዋ ሄ ሳፅኒያን ዬጋዱ። ዬሱሲ ባሬና ካሊያዋንታ ፄሲዴ፥ «ታኒ ሂንቴንቶ ቱሙዋ ጋይ፤ ኢሞታ ሳፅኒያን ዬጌዳ ኣሳ ኡባፔ ሃ ሂዬሳ ኣምዓታ ዳሪሳዴ ዬጋዱ። ኣዪሲ ጎፔ፥ ሃራቱ ኡባይ ባሬንቶ ፓላሄዳ ሚሻፔ ዬጌዲኖ፤ ሺን ኢዛ ባሬ ፓጫፔ፥ ባሬው ዴዒያ ዴዑዋ ሙሌካ ኢማ ኣጋዱ» ያጌዳ። ዬሱሲ ጌሻ ጎሊያፔ ኬሲሺን፥ ኣ ካሊያዋንቱፔ ኢቱ ኣ፥ «ታማሪሲያዎ፥ ሃዌ ኣይቤ ሎዖ ሹቻቴንቶኔ ቃሲ ኣይቤ ሎዖ ሹቻ ጎላቱዋ ቤዓይ!» ያጌዳ። ዬሱሲ ዛሪዴ፥ «ሃ ዎልቃማ ሹቻ ጎላቱዋ ቤዓይ? ሃ ጎላቱዋን ዴዒያ ኢቲ ሹቻይኔ ኣቴናን ኡባይ ኮሌታና» ያጌዳ። ዬሱሲ ጌሻ ጎሊያፔ ሂኒ ባጋና ዴብሬ ዛይቴ ዴሪያ ቦላን ኡቴዳ ዎዴ፥ ጴፂሮሲ፥ ያዪቆቢ፥ ዮሃኒሲኔ ኢንዲራሲ ባሬንቱ ፃላላ ኣኮ ዪዴ ኣ፥ «ሄዌ ኣዉዴ ሃናኔንቶ፥ ኑሲ ኦዳሪኪ፤ ቃሲ ሄዌ ኡባይ ፖሌታና ዎዲያ ኤሪሲያ ማላቱ ኣያ ጊዳኔ?» ያጊዴ ኦቼዲኖ። ዬሱሲ ቃሲ ኡንቱንቶ ሃዋዳን ያጊዴ፥ ኦዱዋ ዶሜዳ፤ «ሂንቴንታ ኦኒኔ ባሌꬄና ማላ ናጌቲቴ። ጮራ ኣሳቱ ታ ሱንꬃን፥ ‹ታኒ ኪሪስቶሳ› ያጊዴ ያናዋ፤ ጮራ ኣሳ ባሌꬃና። ማታን ዴዒያ ኦላ ኮሻኔ ሃኩዋን ዴዒያ ኦላ ኦዱዋ ሂንቴ ሲሲያ ዎዴ፥ ሂርጎፒቴ፤ ሄዋ ማላባይ ሃናናው ቤሴ፤ ሺን ዉርሴꬃይ ቢራ። ኣዪሲ ጎፔ፥ ኢቲ ጋዴ ኣሳይ ሃራ ጋዴ ኣሳና ኦሌታና፤ ቃሲ ኢቲ ካዉቴꬃይ ሃራ ካዉቴꬃና ኦሌታና፤ ቢታ ቃꬃይ ኡባሳን ዴዓና፤ ኮሻይካ ዴዓና፤ ሺን ሄዌ ኮይሮ ዬሉዋ ኦይꬃ ማላ። «ሺን ሂንቴ ሂንቴንቱ ሁጴው ናጌቲቴ፤ ኣዪሲ ጎፔ፥ ኣሳይ ሂንቴንታ ኦይቂዴ፥ ፒርዳ ጎሌው ኣꬂዴ ኢማና፤ ቃሲ ባሬ ኣዪሁዳ ዎሳ ጎሌቱዋኒካ ሂንቴንታ ሊሱዋን ሾጫና፤ ጋዲያ ሞዲያዋንቱ ሲንꬃኒኔ ካታቱዋ ሲንꬃን ታ ዲራው ሂንቴ ማርካታናው ኤቃና። ሚሺራቹዋ ቃላይ ኮይሮና ኣሳው ኡባው ኦዴቲዲጋናው ቤሴ። ኡንቱንቱ ሂንቴንታ ፒርዳ ጎሌ ኣሂያ ዎዴኔ ኣꬂዴ ኢሚያ ዎዴ፥ ዎቲ ሃሳያኒቴንቶ ኮይሮና ሂርጎፒቴ፤ ሄ ሳቲያን ፆሳይ ሂንቴንቶ ኢሚያባ ሃሳዪቴ። ኣዪሲ ጎፔ፥ ጌሻ ኣያናይ ሃሳያናፔ ኣቲን፥ ሃሳዪያዋንቱ ሂንቴንታ ጊዲኪታ። «ኢሻይ ባሬ ኢሻ፥ ኣዉ ባሬ ናዓ ዎꬊሳና፤ ቃሲ ናናይ ባሬንቱ ኣዋቱዋ ቦላኒኔ ባሬንቱ ኣዬቱዋ ቦላ ዴንዲዴ፥ ኡንቱንታ ዎꬊሳና። ኣሳይ ኡባይ ሂንቴንታ ታ ሱንꬃ ዲራው ኢፃና፤ ሺን ዉርሴꬃይ ጋካናው ጌንጪያዌ ኣታና። «ሺን ናቢያ ዳኔል ኦዴዳ ባሻ ቱናቴꬃይ ኤቃናው ቤሴናሳን ኤቂሺን ሂንቴ ቤዒያ ዎዴ፥ ሄዌ ዋጊያዌንቶ፥ ናባቢያዌ ኣኬኮ፤ ዪሁዳ ጋዲያን ሄ ዎዴ ዴዒያዋንቱ ዴሪያኮ ቤቲኖ። ጎሊያ ሁጲያን ዴዒያ ኡራይካ ኢቲባ ኣካናው ዱጌ ዎꬊዴ፥ ባሬ ሶይ ጌሎፖ። ጋዴን ዴዒያዌካ ባሬ ማዩዋ ኣካናው ጉዬ ሲሞፖ። ሄ ዎዴ ሻሃራ ማጫዋንቶኔ ꬋንꬂያ ማጫዋንቶ ኣዬሮ። ሺን ሃዌ ኡባይ ሃኒያ ዎዲ ባልጉዋ ጊዴና ማላ፥ ፆሳ ዎሲቴ፤ ኣዪሲ ጎፔ፥ ፆሳይ ሳዓ ኮይሮ ሜꬌዳዋፔ ዶሚዴ፥ ሃዒ ጋካናው፥ ኡባካ ዴዒቤና ሜቱ፥ ቃሲ ሃዋፔ ሲንꬃዉካ ኡባ ዴዔና ሜቱ ኣሳ ቦላ ሄ ዎዴ ዴዓና። ጎዳይ ሄ ጋላሳቱዋ ፓይዱዋ ጉꬂያዌ ባዌንቶ፥ ኣሳ ጊዴዳ ኦኒኔ ኣቴና፤ ሺን ኢ ባሬ ዶሬዳ ኣሳቱዋ ዲራው፥ ሄ ጋላሳቱዋ ፓይዱዋ ጉꬄዳ። «ሄ ዎዴ ኦኒኔ ሂንቴንታ፥ ‹ቤዒቴ፤ ኪሪስቶሲ ሃዋን ዴዔ› ዎይ፥ ‹ቤዒቴ፤ ኪሪስቶሲ ሄዋን ዴዔ› ያጎፔ፥ ሄዋ ኣማኖፒቴ። ኣዪሲ ጎፔ፥ ዎርዳንቻ ኪሪስቶሳቱኔ ዎርዶ ናባቱ ዴንዲዴ ባሬንቶ ዳንዳዬቶፔ፥ ሃራይ ኣቶ ፆሳይ ዶሬዳዋንታካ ባሌꬃናው ማላታኔ ማላሊሲያባ ቤሳና። ሺን ሂንቴ ናጌቲቴ፤ ታኒ ሂንቴንቶ ኡባባ ካሴታዴ ኦዳዲ። «ሺን ሄ ዎዴ ሄ ዋዪያፔ ጉዪያን፥ ኣዋይ ꬉማና፤ ኣጌናይ ፖዒያዋ ኣጋና፤ ፆሊንታቱ ሳሉዋፔ ኩንዳና፤ ቃሲ ሳሉዋን ዴዒያ ዎልቃቱካ ቃፄታና። ሄ ዎዴ ታኒ፥ ኣሳ ናዓይ፥ ዎልቃማ ዎልቃናኔ ቦንቹዋና ሻሪያ ጊዶና ዪሺን፥ ኡንቱንቱ ቤዓና። ሄ ዎዴ ታኒ ኪታንቻቱዋ ሳዓ ኦይዱ ባጋ ኪታና፤ ሳዓ ጋፃፔ ሳሉዋ ጋፃ ጋካናው፥ ፆሳይ ዶሬዳ ኣሳ ሺሻና። «ሌሚሱዋ ባላሳቶ ጊያ ሚꬃቲፔ ታማሪቴ፤ ባላሳታ ኣጪያ ዎዴኔ ኢዚ ሃይꬃይ ሃይቲያ ዎዴ፥ ቦኒ ማቴዳዋ ሂንቴ ኤሪታ። ሃዋዳንካ ሂንቴ ሄ ኡባባይ ሃኒያዋ ቤዒያ ዎዴ፥ ኢ ማታቲዴ ፔንጊያ ሺቄዳዋ ኤሪቴ። ታኒ ሂንቴንቶ ቱሙዋ ኦዳይ፤ ሃ ኡባባይ ሃናና ጋካናው፥ ሃ ዎዲያ ዬሌታይ ሃይቂዲጌና። ሳሉኔ ሳዓይ ኣꬋና፤ ሺን ታ ቃላይ ኡባካ ኣꬌና። «ሺን ሄ ጋላሳኔ ሄ ሳቲያ ኣዉዋ ፃላላፔ ኣቲን፥ ሃራይ ኣቶ ሳሉዋን ዴዒያ ኪታንቻቱዋ ጊዲና፥ ዎይ ታና ናዓ ጊዲናካ ኦኒኔ ኤሪያባይ ባዋ። ሄ ዎዲ ኣዉዴ ጊዳኔንቶ፥ ሂንቴ ኤሬና ዲራው፥ ናጌቲቴ፤ ሚኒቴ፤ ፆሳ ዎሲቴ። ታ ዩሳይ ባሬ ጎሊያ ኣጊዴ፥ ኦጊያ ቢያ ቢታኒያ ማላ፤ ቢታኒ ባሬ ቆማቱዋሲ ሁጲያን ሁጲያን ኦሱዋ ኢሚዴ፥ ኡንቱንታ ባሬ ኦሱዋሲ ካፖ ኦꬄዳ፤ ቃሲ ካሪያ ናጊያዌካ ሚኒሲዴ ናጋና ማላ ኣዛዜዳ። «ሄዋ ዲራው፥ ሚኒቴ፤ ኣዪሲ ጎፔ፥ ጎሊያዉ ኦማርሳ ጊዲና፥ ዎይ ቃማ ቢላሄ ጊዲና፥ ዎይ ኩቱ ዋሲያ ዎዴ ጊዲና፥ ዎይ ጉራ ዎንቱማꬃና ጊዲና ኣዉዴ ያኔንቶ፥ ሂንቴ ኤሪኪታ። ሂንቴንቱ ኣኬኬናን ኢ ዮፔ፥ ሂንቴንታ ጌሚዒሼዳዋንታ ዴሜና ማላ ሚኒቴ። ታኒ ሂንቴንቶ ኦዲያዋ ኣሳ ኡባው ኦዳይ፤ ሚኒቴ።» ፓሲጋ ባላ ጊያዋ ቦንቺያ ጋላሳይኔ ጫሊቤና ኡኪꬃ ሙሳ ቦንቺያ ባላ ጋላሳይ ጋካናው ላዑ ጋላሳይ ኣቴዳ፤ ቄሳቱዋ ካፓቱኔ ሂጊያ ታማርሲያዋንቱ ኣሳይ ኤሬናን ዬሱሳ ኦይቂዴ ዎꬋና ኦጊያ ኮዪኖ። «ኣሳይ ዋላሳ ኬሴና ማላ፥ ፓሲጋ ቦንቺያ ጋላሲ ሄዋ ኦꬆኮ» ያጌዲኖ። ዬሱሲ ቢታኒያ ጋዲያን ኦሉዋ ሃርጊያ ሲሞና ሶዪን ቁማ ማናው ኡቴዳ ዎዴ፥ ኢቲ ሚሺራታ ቢልቃሲያ ኩሜዳ ናርዶሳ ጊያ ዳሪ ኣልዖ ሺቱዋ ኣካዴ ያዱ፤ ሄ ቢልቃሲያ ሜንꬃዴ ሺቱዋ ዬሱሳ ሁጲያን ቲጋዱ። ሄዋን ዴዒያ ኣሳፔ ኢቱ ኢቱ ሃንቄቲዴ፥ «ሃ ሺቱዋ ጮ ኣያው ባዪዛይ? ሃ ሺቱዋ ሄዙ ፄቱ ቢራ ሳንቲሚያን ዛሊዒዴ፥ ሚሻ ሂዬሳው ኢማናው ዳንዳዬቴ» ያጊዴ ባሬንቱ ጊዶን ሃሳዪኖ፤ ያቲዴ ሄ ሚሺራቶ ዳሪሲ ሃንቄቴዲኖ። *** ሺን ዬሱሲ ሃዋዳን ያጌዳ፤ «ሃ ሚሺራቶ ኣይኔ ጎፒቴ፤ ኢዞ ኣዪሲ ሜቶꬂቴ? ኢዛ ታው ሎዖባ ኦꬃዱ። ሂዬሳቱ ኡባ ዎዴ ሂንቴንቱና ዴዒኖ፤ ሂንቴ ኮዬዳ ዎዴ ኣዉዴኔ ኡንቱንታ ማዳናው ዳንዳዪታ፤ ሺን ታኒ ኡባ ዎዴ ሂንቴንቱና ዴዒኬ። ኢዛ ባሬው ዳንዳዬቴዳዋ ኦꬃዱ፤ ቃሲ ታ ኣሳቴꬃይ ሞጌታናፔ ካሴታዴ ሞጎ ጊጊሳናው ሺቱዋ ኦካዱ። ታኒ ሂንቴንቶ ቱሙዋ ኦዳይ፤ ሳዓ ኡባን ዎንጋላ ሚሺራቹዋ ኦዲያሳን ሃቃኒኔካ፥ ኣሳይ ኢዞ ቆፓና ማላ፥ ሃ ኢዛ ኦꬄዳዌ ኦዴታና» ያጌዳ። ታማኔ ላዑ ዬሱሳ ካሊያዋንቱፔ ኢቱ ዪሁዳ ኣስቆሮቱ ጊያዌ፥ ዬሱሳ ቄሳቱዋ ካፓቱዋሲ ኣꬂዴ ኢማናው ኡንቱንቱኮ ቤዳ። ኡንቱንቱ ሄዋ ሲሴዳ ዎዴ ናሼቲዴ፥ «ኑኒ ኔው ሚሻ ኢማና» ያጌዲኖ፤ ዪሁዳ ኣስቆሮቱ ዬሱሳ ኣꬂዴ ኢማናው ኢንጄቲያ ዎዲያ ዎቼ። ጫሊቤና ኡኪꬃ ሚያ ባላ ጋላሳ ቦንቺያ ኮይሮ ጋላሲ፥ ፓሲጋ ቁማ ማናው ዶርሳ ሹኪያ ዎዴ፥ ዬሱሳ ካሊያዋንቱ ኣ፥ «ፓሲጋ ቦንቺያ ጋላሲ ኔኒ ማና ቁማ ኑኒ ሃቃ ቢዴ ጊጊሳኔ?» ያጊዴ ኦቼዲኖ። ዬሱሲ ባሬና ካሊያዋንቱፔ ላዓቱዋ ሃዋዳን ያጊዴ ኪቴዳ፤ «ካታማ ቢቴ፤ ሂንቴ ቢሺን፥ ኦቱዋን ሃꬃ ቶኬዳ ኢቲ ቢታኒ ሂንቴንቱና ጋኬታናዋ፤ ኣ ካሊቴ። ኢ ቢዴ ጌሊያ ጎሊያዉዋ፥ ‹ታማሪሲያዌ ኔና፥ «ታኒ ታና ካሊያዋንቱና ፓሲጋ ቁማ ማናው ታ ኢማꬃ ኪፊሊ ሃቃኔ?» ያጌ› ያጊቴ። ጎሊያዉ ሂንቴንታ ፖቂያ ቦላን ዴዒያ ጊጊ ኡቴዳ ኣኮ ኪፊሊያ ቤሳና፤ ሄዋን ኑሲ ጊጊሲቴ» ያጌዳ። ሄ ላዑ ዬሱሳ ካሊያዋንቱ ኬሲዴ፥ ካታማ ቤዲኖ፤ ዬሱሲ ባሬንቶ ኦዴዳዋዳንካ ኡባባ ዴሚዴ፥ ፓሲጋ ቁማ ጊግሴዲኖ። ሳዓይ ኦማርሲያ ዎዴ ዬሱሲ ታማኔ ላዑ ባሬና ካሊያዋንቱና ያ ቤዳ። ኡንቱንቱ ኡቲዴ ሳምፓፔ ቁማ ሚሺን፥ ዬሱሲ ኡንቱንታ፥ «ታኒ ሂንቴንቶ ቱሙዋ ኦዳይ፤ ሂንቴንቱፔ ኢቱ ታናና ሚያዌ፥ ታና ኣꬂዴ ኢማናዋ» ያጌዳ። ኣ ካሊያዋንቱ ሎይꬂ ሲሴቲና፥ ሁጲያን ሁጲያን ኣ፥ «ቱሙ ታኔሻ?» ጊያዋ ዶሜዲኖ። ዬሱሲ ዛሪዴ፥ «ኢ ሃ ሂንቴንቱ ታማኔ ላዓቱዋፔ ኢቱዋ፤ ኢ ታናና ኢቲፔ ቱሻናው ባሬ ዳቡዋ ሻታን ዬዲያዋ። ታኒ፥ ኣሳ ናዓይ፥ ፆሳ ማፃፋይ ሃይቃና ጌዳዋዳን ሃይቃና፤ ሺን ታና፥ ኣሳ ናዓ፥ ኣꬂዴ ኢሚያ ኡራው ኣዬሮ፤ ሄ ኡራይ ዬሌቴናን ኣቴዴንቶ፥ ኣው ሎዓ ሺን» ያጌዳ። ኡንቱንቱ ሚሺን፥ ዬሱሲ ዳቡዋ ኣኪዴ፥ ፆሳ ጋላቴዳ፤ ሄ ዳቡዋ ሜንꬂዴ፥ ባሬና ካሊያዋንቶ ኢሚዴ፥ «ሄይቴ፤ ሃዌ ታ ኣሹዋ» ያጌዳ። ፁዓ ኣኪዴ፥ ፆሳ ጋላቲዴ፥ ኡንቱንቶ ኢሜዳ፤ ኡባይ ሄ ፁዓፔ ኡሼዲኖ። ዬሱሲ፥ «ሃዌ ኦራꬃ ጫቁዋን ጮራ ኣሳ ዲራው ጉኪያ ታ ሱꬃ። ታኒ ሂንቴንቶ ቱሙዋ ኦዳይ፤ ታኒ ፆሳ ካዉቴꬃን ኦራꬃ ዎዪኒያ ኤሳ ኡሻና ጋላሳይ ጋካናው፥ ላዔንꬁዋ ሃ ዎዪኒያ ኤሳ ኡባካ ኡሺኬ» ያጌዳ። ማዚሙሪያ ዬፄዳዋፔ ጉዪያን፥ ዴብሬ ዛይቴ ዴሪያ ቤዲኖ። ዬሱሲ ባሬና ካሊያዋንቶ፥ «ሂንቴንቱ ኡባይ ታና ዬጊዴ ዎፃኒታ፤ ኣዪሲ ጎፔ፥ ፆሳ ማፃፋይ፥ ‹ፆሳይ ዶርሳ ሄሚያዋ ዎꬋና፤ ሄዋፔ ጉዪያን ዶርሳይ ኡባይ ላሌታና ጌ› ያጌዳ። ሺን ታኒ ሃይቁዋፔ ዴንዴዳዋፔ ጉዪያን፥ ሂንቴንቱፔ ካሴታዴ ጋሊላ ባና» ያጌዳ። ጴፂሮሲ ዛሪዴ፥ «ኡንቱንቱ ኡባቱ ኔና ዬጊዴ ቦፔካ፥ ታኒ ኔና ሙሌካ ዬጊኬ» ያጌዳ። ዬሱሲ ጴፂሮሳ፥ «ታኒ ኔው ቱሙዋ ኦዳይ፤ ሃቼ ቃማ ኩቱ ላዔꬁዋ ዋሳናፔ ካሴ፥ ኔን ታና ሄዙ ጌዴ ካዳናሳ» ያጌዳ። ሺን ጴፂሮሲ ካሴዋፔካ ሚኒሲዴ፥ «ታኒ ሃራይ ኣቶ፥ ኔናና ኢቲፔ ሃይቂንቶካ፥ ኔና ሙሌካ ካዲኬ» ያጌዳ። ቃሲ ሃራቱ ኡባቱካ ሄዋዳን ጌዲኖ። ጌቴሴማኔ ጊያ ሳዓ ቤዲኖ፤ ዬሱሲ ባሬና ካሊያዋንታ «ታኒ ፆሳ ዎሳናሲ፥ ሂንቴንቱ ሃዋን ኡቲሺቴ» ያጌዳ። ዬሱሲ ጴፂሮሳ፥ ያዪቆባኔ ዮሃኒሳ ባሬናና ኣፌዳ፤ ዳሪ ካዮቴዳኔ ሜቶቴዳ። ቃሲ ኡንቱንታ፥ «ታኒ ሃይቃና ጋካናዉካ ካዮታይ፤ ሃዋን ታኪሺቴ፤ ጌሚዒሾፒቴ» ያጌዳ። ጉꬃ ሲንꬃኮ ሺቂዴ፥ ሳዓን ጉፋኒዴ፥ ዳንዳዬቲያዋ ጊዶፔ፥ ሄ ዎዲ ባሬፔ ኣꬋና ማላ፥ ፆሳ ዎሴዳ። ቃሲካ፥ «ኣባቦ፥ ታ ኣቦ፥ ኡባባይ ኔው ዳንዳዬቴ፤ ሃ ፁዓ ታፔ ዲጋ፤ ሺን ኔ ሼኒያዳን ሃኖፔ ኣቲን፥ ታ ሼኒያዳን ሃኖፖ» ያጌዳ። ዬሱሲ ባሬና ካሊያዋንቱኮ ሲሚ ዪዴ፥ ጌሚዒሼዳዋንታ ዴሚዴ ጴፂሮሳ፥ «ሲሞና፥ ጌሚዒሻዲ? ኔን ኢቲ ሳቴንቶኔ ናጋናው ዳንዳያቤይኪ? ፓጪያን ሂንቴ ጌሌና ማላ፥ ናጌቲቴኔ ፆሳ ዎሲቴ፤ ኣያናይ ጊጊ ኡቴዳ፤ ሺን ኣሹ ዳቡራንቻ» ያጌዳ። ቃሲካ ቢዴ ካሴዋዳንካ ፆሳ ዎሴዳ። ኣ ካሊያዋንቱኮ ጉዬ ሲሚዴ ኢ ዪያ ዎዴ፥ ጌሚዒሼዳዋንታ ዴሜዳ፤ ኡንቱንቱ ኣይፊያ ጌሚዒሹ ጎዚ ዎꬄዳ ዲራው፥ ኣው ኣያ ሃሳዪኖንቶካ ኤሪቤይኪኖ። ሄዜንꬁዋ ኡንቱንቱኮ ዪዴ፥ «ሃዒ ጋካናዉካ ጌሚዒሺቴኔ ሼምፒቴ? ጊዳና፤ ዎዲ ጋኬዳ፤ ቤዒቴ፥ ታና፥ ኣሳ ናዓ፥ ናጋራንቻ ኣሳቱዋ ኩሺያን ኣꬂዴ ኢሚያ ዎዲ ጋኬዳ። ዴንዲና ቦይቴ፤ ቤዒቴ፥ ታና ኣꬂዴ ኢሚያዌ ሃዌኩ ጋኬዳ» ያጌዳ። ዬሱሲ ሄዋ ቢሮ ሃሳዪሺን፥ ታማኔ ላዑ ኣ ካሊያዋንቱፔ ኢቱ፥ ዪሁዳ ኣስቆሮቱ፥ ኤሌካ ጋኪ ዎꬌዳ፤ ቃሲ ቄሳቱዋ ካፓቱ ሂጊያ ታማሪሲያዋንቱኔ ጪማቱ ኪቲና፥ ማሻኔ ፃምዓ ኦይቄዳ ጮራ ኣሳይ ኣናና ኢቲፔ ዬዳ። ዬሱሳ ኣꬂ ኢሚያዌ ሄ ጮራ ኣሳው፥ «ታኒ ዬሪያዌ ኣ፤ ኣ ኦይቂዴ ሎይꬂ ናጊዴ፥ ኣፊቴ» ያጊዴ ማላ ኦዲ ዎꬄዳ። ዪሁዳ ኣስቆሮቱ ጋኮሳናካ ዬሱሳኮ ሺቂዴ፥ «ታማሪሲያዎ» ያጊዴ ዬሱሳ ዬሪ ኣኬዳ። ሄ ጮራ ኣሳይ ዬሱሳ ሚኒሲ ኦይቄዳ። ሺን ማታን ኤቄዳዋንቱፔ ኢቱ ባሬ ጩቢያ ሾዲኔ ቄሳቱዋ ኡባቱዋ ካፑዋ ቆማ ሾጪዴ፥ ኣ ሃይꬃ ቃንፂ ኦሌዳ። ዬሱሲ ዛሪዴ፥ ሄ ሺቄዳ ጮራ ኣሳ፥ «ታና ቦንቃንቻ ኬሲዴ፥ ቦንቃንቻ ኦይቂያዋዳን ኦይቃናው ጩቢያኔ ፃምዓ ኦይቂዴ ዬዲቴ? ታኒ ጌሻ ጎሊያን ታማሪሳዴ፥ ጋላሳን ጋላሳን ሂንቴንቱና ዴዒያ ዎዴ ታና ኦይቂቤይኪታ፤ ሺን ፆሳ ማፃፋቱ ጌዳዌ ፖሌታናው ቤሴ» ያጌዳ። ዬሱሳ ካሊያዋንቱ ኡባቱ ኣ ዬጊዴ ቢ ኣጌዲኖ። ናፃላ ፃላላ ማዬዳ ኢቲ ያላጋ ቢታኒ ዬሱሳ ካሊያዋ ኣሳይ ኦይቄዳ። ሺን ሄ ቢታኒ ናፃላ ኦሊዴ፥ ካሎ ፂራ ዎፄዳ። ኣሳይ ዬሱሳ ቄሳቱዋ ኡባቱዋ ካፑዋ ሶይ፥ ቄሳቱዋ ካፓቱዋ ኡባቱ፥ ጪማቱኔ ሂጊያ ታማርሲያዋንቱ ሺቄዳሳ ኣፌዲኖ። ጴፂሮሲ ቄሳቱዋ ኡባቱዋ ካፑዋ ዲርሳ ጊዱዋ ጋካናሲ ሃኩዋን ኣ ካሌዳ፤ ያኒ ናጊያዋና ታማ ካሺዴ፥ ኡቲ ኣጌዳ። ቄሳቱዋ ካፓቱኔ ሄዋን ሺቄዳ ኣሳይ ኡባይ ዬሱሳ ዎꬋናው ኣ ቦላ ማርካ ኮዬዲኖ፤ ሺን ኣይኔ ዴሚቤይኪኖ። ኣዪሲ ጎፔ፥ ጮራ ኣሳቱ ኣ ቦላን ዎርዱዋ ማርካቴዲኖ፤ ሺን ኡንቱንቱ ማርካቴꬃይ ኢቲ ማላ ጊዴና። ኢቲ ኢቲ ኣሳቱ ዴንዲ ኤቂዴ ዬሱሳ ቦላ፥ «ኢ፥ ‹ታኒ ኣሳይ ኬፄዳ ሃ ጌሻ ጎሊያ ኮላዴ፥ ኣሳይ ኬፂቤና ሃራ ጌሻ ጎሊያ ሄዙ ጋላሳ ጊዶን ኬፃና› ጊሺን፥ ኑኒ ሲሴዶ» ያጊዴ ዎርዱዋ ማርካቴዲኖ። *** ሺን ሃራይ ኣቶ ኡንቱንቱ ማርካቴꬃይ ሄዋን ኢቲ ማላ ጊዲቤና። ቄሳቱዋ ኡባቱዋ ካፑ ኣሳ ኡባ ሲንꬃን ዴንዲ ኤቂዴ ዬሱሳ፥ «ሃዋንቱ ኔና ሞቲያ ሞቶ ኔው ዛሪያባይ ባዌ?» ያጊዴ ኦቼዳ። ሺን ዬሱሲ ጮዑ ጊዴ፥ ኣይኔ ዛሪቤና፤ ቄሳቱዋ ኡባቱዋ ካፑ ኣ፥ «ኣንጄቴዳ ፆሳ ናዓይ ኪሪስቶሲ ኔኔ?» ያጊዴ ላዔንꬁዋ ኦቼዳ። ዬሱሲ ዛሪዴ፥ «ኤ፥ ታና፤ ሂንቴ ታና፥ ኣሳ ናዓ፥ ዎልቃማ ፆሳፔ ኡሼቻ ባጋና ኡቲዴዒሺናኔ ሳሉዋ ሻሪያና ዪሺን ቤዓና» ያጌዳ። ቄሳቱዋ ኡባቱዋ ካፑ ባሬ ማዩዋ ፔꬊ ኦሊዴ፥ «ኑና ሃዋፔ ሲንꬃን ኣዪሲ ሃራ ማርካ ኮሺ? ሂንቴንቱ ኣ ቦሪያ ሲሴዲታ፤ ሂንቴ ቆፋይ ኣዬ?» ያጌዳ፤ ኡንቱንቱ ኡባይ፥ «ኢ ሃይቃና ቤሴ» ያጊዴ ኣ ቦላ ፒርዴዲኖ። ኡንቱንቱፔ ኢቱ ኢቱ ኣ ቦላ ጩሼꬃ ዶሜዲኖ፤ ኣ ኣይፊያ ካሚ ዴቺዴ፥ «ኔና ዴቼዳዌ ኦኔ? ኣኔ ቲምቢቲያ ኦዳ!» ያጌዲኖ፤ ቃሲ ናጊያዋንቱካ ኣ ቂንፃሊያ ባቂዴ ኣፌዲኖ። ጴፂሮሲ ዲርሳ ጊዶን ሂርኪና ዴዒሺን፥ ቄሳቱዋ ኡባቱዋ ካፑዋ ማጫ ኣሺካራቱዋፔ ኢቲና ያዱ። ጴፂሮሲ ታማ ካሺያዋ ቤዓዴ፥ ጫዳ ፄላዴ፥ «ኔኒካ ናዚሬቲያ ዬሱሳና ኢቲፔ ዴዓ» ያጋዱ። ሺን ጴፂሮሲ፥ «ኔኒ ጊያዌ ኣዬንቶ ታኒ ኤሪኬ፤ ታው ኣኬኬቴና» ያጊዴ ካዴዳ፤ ያቲዴ ዲርሳ ፔንጊያኮ ኬሴዳ፤ ኩቱካ ዋሴዳ። ሄ ኣሺካራታ ጴፂሮሳ ቤዓዴ፥ ኣ ማታን ኤቄዳ ኣሳቱዋ፥ «ሃ ቢታኒካ ኡንቱንቱና ዴዔ» ጋዴ ጉጃዴ ኦዱዋ ዶማዱ። ሺን ጴፂሮሲ ቃሲካ ካዴዳ። ጉꬃ ጋሚዒሺን፥ ማታን ኤቄዳ ኣሳቱ ላዔንꬁዋ ጴፂሮሳ፥ «ኔኒ ቱማ ኡንቱንቱና ኢቲፔ ዴዓ፤ ኣዪሲ ጎፔ፥ ኔኒ ጋሊላ ጋዲያ ኣሳ» ያጌዲኖ። ሺን ጴፂሮሲ፥ «ታኒ ሄዋ ሂንቴ ጊያ ቢታኒያ ኤሪኬ!» ያጊዴ ባሬና ሼቃኔ ጫቁዋ ዶሜዳ። ኤሌካ ኩቱ ላዔꬁዋ ዋሲ ኣጌዳ፤ ጴፂሮስ ባሬና ዬሱሲ፥ «ኔኒ ኩቱ ላዔꬁዋ ዋሳናፔ ካሴ ሄዙ ጌዴ ታና ካዳናሳ» ጌዳዋ ሃሳዪዴ፥ ዳሪ ዬኬዳ። ዎንታ ጉራን ኤሌካ ቄሳቱዋ ካፓቱ ጪማቱዋናኔ ሙሴ ሂጊያ ታማሪሲያዋንቱና ሄዋን ሺቄዳ ኣዪሁዳ ሻንጋቱዋ ኡባና ማቄቲዴ፥ ዬሱሳ ቃቺ ኣፊዴ፥ ጲላፆሳው ኣꬂዴ ኢሜዲኖ። ጲላፆሲ ኣ፥ «ኔኒ ኣዪሁዳቱዋ ካቴ?» ያጊዴ ኦቼዳ። ዬሱሲ ዛሪዴ ኣ፥ «ኔ ጊያዋዳና» ያጌዳ። ቄሳቱዋ ካፓቱ ዬሱሳ ዳሮባን ሞቴዲኖ። ጲላፆሲ ሺሬቲዴ ዬሱሳ፥ «ኔው ዛሪያባይ ባዌ? ኡንቱንቱ ኔ ቦላ ዎዪሳ ሞቱዋ ኣሂንቶ ቤዒኪ?» ያጊዴ ኦቼዳ። ሺን ዬሱሲ ሃራባ ዛሬናን ኢፂና፥ ጲላፆሲ ማላሌቴዳ። ጲላፆሳው ፓሲጋ ባላ ቦንቺያ ጋላሳን ኣሳይ ኮዪያ ኢቲ ኡራ ቃሹዋፔ ቢሊያ ዎጋይ ዴዔ። ሄ ዎዴ ኢቲ ባርባና ጊያ ቢታኒ ዋላሳ ኬሲዴ ሼምፑዋ ዎꬌዳ ኣሳቱዋና ኢቲፔ ቃሾ ጎሊያን ዴዔ። ሺቄዳ ጮራ ኣሳይ ጲላፆሲ ካሴ ኤሬቶዋዳንካ ባሬንቶ ማሮታ ኦꬃና ማላ፥ ኣ ኦቼዲኖ። ጲላፆሲ ኣሳ ዛሪዴ፥ «ታኒ ሂንቴንቶ ኣዪሁዳቱዋ ካቲያ ቢሊያዋ ኮዪቴ?» ያጊዴ ኦቼዳ። ኣዪሲ ጎፔ፥ ቄሳቱዋ ካፓቱ ዬሱሳ ቃናቲዴ ኣꬂ ኢሜዳዋ ጲላፆሲ ኤሬዳ። ሺን ቄሳቱዋ ካፓቱ ዬሱሳ ኮታ ባርባና ቢላናዳን፥ ሄ ሺቄዳ ኣሳይ ጲላፆሳ ዎሳና ማላ፥ ኣሳ ማቄዲኖ። ጲላፆሲ ላዔንꬁዋ ዛሪዴ፥ «ያቲና፥ ሃ ኣዪሁዳ ካቲያ ሂንቴንቱ ጊያዋ ዎቶ?» ያጌዳ። ኣሳይ ጲላፆሳው ዛሪ ዛሪ ባሬንቱ ኮሻ ꬎቁ ኦꬂዴ፥ «ኣ ካቃ» ያጌዲኖ። ጲላፆሲ ኣሳ፥ «ኣዪሲ? ኢ ኣይ ኢታባ ኦꬄዴ?» ያጌዳ። ሺን ኣሳይ ካሴዋፔካ ባሬ ኮሻ ꬎቁ ኦꬂዴ፥ «ኣ ካቃ» ያጌዲኖ። ጲላፆሲ ኣሳ ናሼቻናው ኮዪዴ፥ ባርባና ኣሳው ቢሌዳ፤ ያቲዴ ሊሱዋን ዬሱሳ ዎታዳራቱዋን ሾጪሲዴ፥ ካቃና ማላ ኡንቱንቶ ኣꬂ ኢሜዳ። ሄዋፔ ጉዪያን፥ ዎታዳራቱ ዬሱሳ ጋዲያ ሞዲያዋ ጊቢያ ኣፊዴ፥ ሃራ ዎታዳራቱዋ ኡባ ኢቲፔ ፄሴዲኖ። ቃሲ ዞዖ ማዩዋ ኣ ማዪዜዲኖ፤ ኣጉንꬃ ኣኪሊሊያ ጊጊሲዴ፥ ኣ ሁጲያን ዎꬄዲኖ። ሄዋፔ ጉዪያን ኣ፥ «ኣዪሁዳቱዋ ካቴው፥ ሳሮታይ ኔው ጊዶ» ያጊ ሳሮቲዴ፥ ኣ ቂሊጩዋ ዶሜዲኖ። ዬሱሳ ሁጲያ ማቃ ፃምዓን ሾጬዲኖ፤ ቃሲ ኣ ቦላን ጩቼዲኖ፤ ጉልባቲዴ ኣው ጎዪኔዲኖ። ኣ ቦላ ቂሊጬዳዋፔ ጉዪያን፥ ዞዖ ማዩዋ ኣፔ ቃሪ ኣኪዴ፥ ኣ ማዩዋ ኣ ማዪዜዲኖ፤ ያቲዴ ማስቃሊያ ቦላን ሚሲማሪያን ꬊሺዴ፥ ኣ ካቃናው ኣፌዲኖ። ኡንቱንቱ ቢዴ፥ ኢስኪንዲራኔ ሩፎሳ ዬሌዳ ኣዉዋ፥ ኢቲ ሲሞና ጊያ ቄሬና ጋዲያ ኣሳይ፥ ጋፃፔ ካታማ ዪያዋና ጋኬቲዴ፥ ዬሱሳ ማስቃሊያ ዎልቃን ቶሴዲኖ። ያቲዴ ጎልጎታ ጌቴቲያሳ ዬሱሳ ኣፌዲኖ። «ጎልጎታ» ጊያዌ «ሁጲያ ጎሲያሳ» ጊያዋ። ካዋራ ጊያ ꬋሊ ዋላኬቴዳ ዎዪኒያ ኤሳ ዬሱሳው ኡሻናው ኢሜዲኖ፤ ሺን ኢ ኡሼናን ኢፄዳ። ኡንቱንቱ ኣ ካቄዲኖ፤ ቃሲ ኦና ኦና ጋካኔንቶ ኤራናው ኣ ማዩዋ ሻኪዴ፥ ሳማ ዬጌዲኖ። ኡንቱንቱ ኣ ካቂያ ዎዴ፥ ዎንታፔ ሄዙ ሳቴ። «ኣዪሁዳቱዋ ካቲያ» ያጊ ኣ ሞቲያ ፃፉ ፃፌቲ ኡቴዳ። ዬሱሳና ላዑ ካዪሳቱዋ ኢቱዋ ኣፔ ኡሼቻ ባጋና፥ ቃሲ ኢቱዋ ኣፔ ሃዲርሳ ባጋና ማስቃሊያ ቦላ ሚሲማሪያን ꬊሺዴ ካቄዲኖ። ፆሳ ማፃፋይ፥ «ኢታባ ኦꬄዳ ኣሳቱዋና ኢ ፓይዴቴዳ» ያጊያዌ ፖሌቴዳ። ኦጊያና ኣꬊያ ኣሳይ ዬሱሳ ካꬊዴ፥ ባሬንቱ ሁጲያ ቃꬂዴ ቦሬዲኖ፤ «ሲሚ፥ ጌሻ ጎሊያ ኮላዴ ሄዙ ጋላሳ ጊዶን ኬፂያዎ፥ ኣኔ ማስቃሊያ ቦላፔ ዎꬋዴ፥ ኔ ሁጲያ ኣሻ» ያጌዲኖ። ሃዋዳንካ ቄሳቱዋ ካፓቱ ሙሴ ሂጊያ ታማሪሲያዋንቱና ኢቲፔ ዬሱሳ ቦላ፥ «ሃራ ኣሳቱዋ ኣሼዳ፤ ሺን ባሬና ኣሻናው ዳንዳዬና፤ ኑኒ ቤዒዴ ኣማናና ማላ፥ ኪሪስቶሲ ኢስራዔሊያ ካቲ፥ ኣኔ ማስቃሊያ ቦላፔ ሃዒ ዎꬎ» ጊዴ ቂሊጬዲኖ። ቃሲ ሃራይ ኣቶ፥ ኣናና ማስቃሊያ ቦላ ሚሲማሪያን ꬊሼቲዴ ካቄቴዳዋንቱካ ኣ ቦላ ቂሊጬዲኖ። ኡሱፑን ሳቲያፔ ዶሚዴ፥ ኡዱፑ ሳቲያ ጋካናው፥ ጋዲያ ኡባይ ꬉሜዳ። ኡዱፑ ሳቲያን ዬሱሲ ባሬ ቃላ ꬎቁ ኦꬂዴ፥ «ኤሎሄ፥ ኤሎሄ፥ ላማ ሳባቂታኒ?» ያጌዳ። ሄዋ ጊያዌ፥ «ታ ፆሳው፥ ታ ፆሳው፥ ታና ኣዪሲ ኣጋዲ?» ጊያዋ። ሄዋን ኤቄዳ ኣሳፔ ኢቱ ኢቱ ሄዋ ሲሲዴ፥ «ቤዒቴ፤ ኤላሳ ፄሴ» ያጌዳ። ሄ ኣሳፔ ኢቱ ዎፂ ዪዴ፥ ዛንዛ ማላቲያዋን ጫላ ዎዪኒያ ኤሳ ኩንꬄዳ፤ ሄዋ ማቃ ጋቲማ ፄራን ዎꬂዴ፥ «ዴዒሺቴ ኣኔ፤ ኤላስ ማስቃሊያፔ ኣ ዎꬃናው ያኔንቶኔ ኣኔ ቤዖይቴ» ያጊዴ ዬሱሳ ዶናኮ ኡሻናው ሺሼዳ። ዬሱሲ ቃላ ꬎቁ ኦꬂ ዋሲዴ፥ ሃይቂ ኣጌዳ። ጌሻ ጎሊያን ቃሼቴዳ ጋሪዱ ቆሞፔ ዱጌ ጋካናው፥ ላዑ ኬሲዴ ፖሼቲ ዎꬌዳ። ማስቃሊያፔ ሲንꬃ ባጋና ሄዋን ኤቄዳ ኢቲ ፄቱዋ ካፑ፥ ሄዋ ኬና ዬሱሲ ዋሲዴ ሃይቄዳዋ ቤዔዳ ዎዴ፥ «ሃ ቢታኒ ቱሙ ፆሳ ናዓ» ያጌዳ። ሄዋን ሃኩዋን ኤቂዴ ፄሊያ ኣማሬዳ ማጫዋንቱ ዴዒኖ፤ ኡንቱንቱ ጊዶን ማግዳላ ጊያ ካታማፔ ዬዳ ማይራማ፥ ቴፋ ያዪቆባኔ ዮሳ ዳያ ማይራማኔ ሳሎማ ዴዒኖ። ሄ ማጫ ኣሳቱ ዬሱሲ ጋሊላን ዴዒያ ዎዴ፥ ኣ ካሌዳዋንታኔ ኣ ማዴዳዋንታ፤ ቃሲ ዬሱሳና ኢቲፔ ዬሩሳላሜ ቤዳ ሃራ ጮራ ማጫ ኣሳቱ ሄዋን ዴዒኖ። ሳዓይ ኦማርሴዳ ዎዴ፥ ሄዋን ሺቄዳ ኣሳን ቦንቼቴዳ ኢቲ ዮሴፋ ጊያ ቢታኒ፥ ፆሳ ካዉቴꬃይ ያናዋ ናጊ ኡቴዳዌ፥ ኣርማቲያሳ ጊያ ካታማ ኣሳይ ዬዳ፤ ሄ ጋላሳይ ዎንቴꬃ ሳምባታው ጊጌቲያ ጋላሳ ጊዴዳ ዲራው፥ ዮሴፎ ፃሊዴ ጲላፆሳኮ ቢዴ፥ ዬሱሳ ኣኃ ኣካናው ዎሴዳ። *** ጲላፆሲ፥ ዬሱሲ ማንዒያንካ ሃይቂዲጌዳዋ ሲሴዳ ዎዴ ማላሌቴዳ፤ ፄቱዋ ካፑዋ ፄሲዴ፥ «ኢ ሃይቆዴፔ ጋሚዔዴ?» ያጊዴ ኦቼዳ። ጲላፆሲ ዬሱሲ ሃይቄዳዋ ፄቱዋ ካፑዋፔ ሲሲዴ፥ ኣ ኣኃ ዮሴፎ ኣካናዳን ኡዴዳ። ዮሴፎ ሞጉዋ ማዩዋ ሻሜዳ፤ ዬሱሳ ኣኃ ማስቃሊያፔ ዎꬂ ማዩዋን ፃፂዴ፥ ሹቻ ዎጬዳ ኣሳ ሞጊያ ጎንጎሉዋ ጊዶን ኣ ኣኃ ዎꬄዳ፤ ቃሲ ሄ ጎንጎሉዋ ዶናን ዎልቃማ ሹቻ ጎንዶርሲዴ ዎꬄዳ። ማግዳላ ካታማፔ ዬዳ ማይራማኔ ዮሳ ዳያ ማይራማ ዬሱሳ ኣኃ ኡንቱንቱ ሃቃን ዎꬂንቶ ቤዒኖ። ሳምባታይ ኣꬌዳዋፔ ጉዪያን፥ ማግዳላ ካታማፔ ዬዳ ማይራማ፥ ያዪቆባ ዳያ ማይራማኔ ሳሎማ ቢዴ፥ ዬሱሳ ኣኃ ኦካናው ሺቱዋ ሻሜዲኖ። ዎጋ ጋላሲ ዎንቱማꬃ ዳሮ ጉራን ፃልቂ ኬሲሺን፥ ሄ ጎንጎሉዋ ቤዲኖ። ኡንቱንቱ ባሬንቱ ጊዶን ኢቱ ኢቱዋና፥ «ጎንጎሉዋ ዶናፔ ኑሲ ሹቻ ኦኔ ጎንዶርሲዴ ዲጋናዌሻ?» ያጊዴ ሃሳዪኖ። ኡንቱንቱ ፄሊያ ዎዴ፥ ሄ ዳሮ ዎልቃማ ሹቻ ጎንዶርሲዲጌዳዋ ቤዔዲኖ። ዬሱሲ ሞጌቴዳ ጎንጎሉዋ ጊዶ ጌሊያ ዎዴ፥ ኢቲ ዎዳላ ቢታኒ ቦꬃ ማዩዋ ማዪዴ፥ ኡሼቻ ባጋና ኡቴዳዋ ቤዒዴ ዳጋሜዲኖ። ሺን ኢ ኡንቱንታ፥ «ዳጋሞፒቴ። ማስቃሊያ ቦላ ካቄቴዳ ናዚሬቲያ ዬሱሳ ሂንቴንቱ ኮዪያዋ ኤራይ። ኢ ሃዋን ባዋ፤ ዴንዲዲጌዳ። ኡንቱንቱ ኣ ዎꬄዳሳ ሃዋ ቤዒቴ። ሺን ቢዴ ዬሱሲ ባሬና ካሊያዋንቶኔ ጴፂሮሳው፥ ‹ዬሱሲ ሂንቴንቱፔ ካሴቲዴ ጋሊላ ቤ፤ ኢ ሂንቴንቶ ኦዴዳዋዳንካ ሂንቴንቱ ኣ ያኒ ቤዓና› ያጊዴ ሃዋ ኦዲቴ» ያጌዳ። ማጫ ኣሳቱ ያሻን ኮኮሪዴ፥ ዬሱሲ ሞጌቴዳ ጎንጎሉዋፔ ኬሲዴ ባቃቲ ኣጌዲኖ፤ ቃሲ ኡንቱንቱ ያዬዳ ዲራው፥ ኣሳው ሄዋ ኦሲኔ ኣይኔ ኦዲቤይኪኖ። ማጫ ኣሳቱ ቢዴ፥ ባሬንቶ ኦዴቴዳባ ኡባ ጴፂሮሳዉኔ ኣናና ዴዒያዋንቶ ቃንꬃን ኦዴዲኖ፤ ሄዋፔ ጉዪያን፥ ዬሱሲ ባሬ ሁጴው ባሬና ካሊያዋንቱ ቦላ፥ ሜꬊናው ኣሺያ ላሜቴና ጌሻ ሚሺራቹዋ ቃላ፥ ኣዋይ ሞኪያሳፔ ዉሊያሳ ጋካናው ኪቴዳ። ዬሱሲ ሃይቁዋፔ ዴንዴዳዋፔ ጉዪያን፥ ዎጋ ጋላሲ ጉራ፥ ላፑ ኢታ ኣያናቱዋ ኬሴዳ ማግዳላ ካታማፔ ዬዳ ማይራሚው ካሴቲዴ ቤቴዳ። ኢዛ ባዴ ካሴ ኣናና ዴዒያዋንቶ፥ ቃሬቲዲኔ ዬኪዴ ኡቴዳዋንቶ ኦዳዱ፤ ሺን ዬሱሲ ፓፃ ዴዒያዋኔ ኢዚው ቤቴዳዋ ኡንቱንቱ ሲሴዳ ዎዴ፥ ኢዚ ኦዱዋ ቱማ ጊቤይኪኖ። ሄዋፔ ጉዪያን፥ ኡንቱንቱፔ ላዓቱ ካታማፔ ኬሲዴ ቢሺን፥ ኦጊያን ዬሱሲ ኮይሮዋፔ ዱማቲዴ፥ ኡንቱንቶ ቤቴዳ። ኡንቱንቱ ጉዬ ሲሚዴ፥ ሃራቱዋሲ ኦዴዲኖ፤ ሺን ሄዋንቱ ኡንቱንቱ ኦዱዋ ቱማ ጊቤይኪኖ። ጉዬፔ ታማኔ ኢቲ ዬሱሳ ካሊያዋንቱ ቁማ ሚሺን፥ ዬሱሲ ኡንቱንቶ ቤቴዳ። ኡንቱንቶ ኣማኑ ባይና ዲራው፥ ኢ ኡንቱንታ ሴሬዳ፤ ቃሲ ሃይቁዋፔ ኢ ዴንዴዳዋ ቤዔዳዋንቱ ኡንቱንቶ ኦዲና፥ ኡንቱንቱ ኣማኔናን ኢፄዳ ዲራዉኔ ኦዲና ሲሴናዋንታ ጊዲያ ዲራው፥ ኢ ኡንቱንታ ሴሬዳ። ኢ ኡንቱንታ ሃዋዳን ያጌዳ፤ «ኣላሚያ ኡባ ቢዴ፥ ኣሳ ኡባው ዎንጋላ ሚሺራቹዋ ቃላ ኦዲቴ። ኣማኖዌኔ ፃማቄቶዌ ኣታና፤ ሺን ኣማኔናዋ ቦላ ፆሳይ ፒርዳና። ታናን ኣማኒያዋንቱ ሃ ማላታቱዋ ኦꬃናዋንታ፡ ኡንቱንቱ ታ ሱንꬃን ኢታ ኣያናቱዋ ኬሳናዋንታ፤ ቃሲ ኡንቱንቱ ዱማ ዱማ ኦራꬃ ቃላን ሃሳያናዋንታ። ኡንቱንቱ ሾሻ ኦይቆፔካ፥ ዎይ ኣያኔ ዎꬊያ ማርዚያ ኡሺንቶካ ኡንቱንታ ቆሄና። ቃሲ ኡንቱንቱ ባሬንቱ ኩሺያ ሃርጋንቻቱዋ ቦላ ዎꬃና፤ ሄ ሃርጋንቻቱ ፓፃና» ያጌዳ። ጎዳ ዬሱሲ ባሬና ካሊያዋንቱና ሃሳዬዳዋፔ ጉዪያን፥ ፆሳይ ኣ ፑዴ ሳሉዋ ኣፊና፥ ፆሳፔ ኡሼቻ ባጋና ኡቴዳ። ኣ ካሊያዋንቱ ቢዴ፥ ኡባሳን ዎንጋላ ሚሺራቹዋ ኦዴዲኖ። ጎዳይካ ኡንቱንቱና ኢቲፔ ኦꬄ፤ ኡንቱንቱ ኦዲያ ቃላይካ ቱማ ጊዴዳዋ ኡንቱንቱ ኦꬂያ ማላታቱዋን ኤሪሴዳ። ቦንቼቴዳ ቶፊሎሳ፥ ኮይሮ ባሬንቱ ኣይፊያን ቤዔዳዋንቱኔ ባሬንቱ ቃላን ማርካቴዳዋንቱ ኑሲ ኦዴዲኖ። ፃፌቴዳ ዬዉዋ ታ ባጋን ኡባ ፃጱዋፔ ቢዳ ፄሎዋፔ ጉዬ፥ ታሪኪያ ማራ ናጌዳ ኦጊያን ኔው ፃፋናው ሎዓ ጊዴዳዌ ታው ቤቴዳ። *** *** *** ዪሁዳ ጋዲያ ካቲያ ሄሮዲሳ ዎዲያን፥ ኣቢያ ቄሳቴꬃ ኦሱዋ ባጋፔ ጊዴዳ ዛካራሳ ጌቴቲያ ኢቲ ቄሳይ ዴዔ። ማቻታካ ኤልሳቤፆ ጌቴቲያ ኣሮኔ ያራፔ ዬሌቴዳዉኖ። ላዓቱካ ጎዳ ኣዛዙዋኔ ሴራ ዳሪሲዴ ናጊያዋንታኔ ካꬌ ባንታን ፆሳ ሲንꬃን ዴዒያ ፂላቱዋ። ጊዶፔ ኣቲን ኤልሳቤፃ ማንꬃ ጊዶ ዲራው፥ ዬሉ ኡንቱንቶ ባዋ። ላዓቱካ ላይꬃ ሱጌዳዋንታ። ኢቲ ጋላሲ ዛካራሲ ባሬ ባጋ ካላን ፆሳ ሲንꬃን ቄሳቴꬃን ኦꬂያ ዎዴ፥ ባሬ ቄሳቴꬃ ዎጋ ዶያዳን ጌሻ ጎሊያ ጌሊዴ ኢፃና ጩዊሱዋ ሳማይ ኣ ጋኬዳ። ኢፃናይ ጩዊያ ዎዴ ኣሳይ ኡባይ ካሬን ኤቂዴ ዎሲ ዴዔ። ጎዳ ኪታንቻይ ኢፃና ያርሹዋሳፔ ኡሼቻና ኤቂዴ ኣው ቤቴዳ። ዛካራሲካ ቤዔዳ ዎዴ ዳጋሚዴ ያሻን ሚቴቴዳ። ኪታንቻይካ ቃሲ ያጌዳ፥ «ዛካራሳ፥ ያዮፓ፤ ኔ ዎሳይ ሲሴቴዳ፥ ኔ ማቻታ ኤልሳቤፃ ኣቱማ ናዓ ዬላናዉኑ። ኣ ዬሌታን ናሼታይኔ ኢሻሉ ኔው ሃናናዋ፤ ጮራቱካ ኢ ዬሌቶ ዲራው ሃሹ ጋናዋንታ፤ ኢካ ጎዳ ሲንꬃን ዳራ ጊዳናዋ። ማꬆዪያ ዎዪኒያ ኡሻ ጊዶ ሃራ ማꬆዪያ ኡሻ ኣይኔ ኡሼና፤ ባሬ ዳይ ኡሉዋን ዴዒሺን ኣያና ጌሻይ ኣኒ ኩማናዋ። «ኢስራዔሊያ ኣሳቱዋፔካ ጮራቱዋ ኡንቱንቱ ጎዳ ፆሳኮ፥ ኢ ዛራናዋ። ኢካ ጊጌና ኣሳ ጎዳው ጊጊሳናው፥ ኣዋቱዋ ዎዛና ናናቱዋኮ፥ ኣዛዜቴናዋንታካ ፂሎቴꬃ ኤራኮ ዛራናው፥ ኤላሳ ኣያናኒኔ ዎልቃን ጎዳፔ ሲንꬃና ቤ።» ዛካራሲካ ኪታንቻ፥ «ታኒ ጪማዲ፥ ታማቻታካ ባሬ ላይꬃን ሱጌዳዉኖ፥ ሃዋ ታኒ ኣያን ኤራኒታ?» ጌዳ። ኪታንቻይካ ዛሪዴ፥ «ታኒ ፆሳ ሲንꬃን ኤቂያ ጋብሬላ፤ ሃዋ ሚሺራቹዋ ኔው ኦዳናው ኔኮ ኪቴታዲ፤ ሄኮ ሄ ዎዲያን ሃናና ታ ቃላ ኔ ኣማና ቤና ዲራው፥ ሃ ዬዉ ሃናና ጋላሳይ ጋካናው ኔኒ ዱዴ ጊዳናሳ፤ ሃሳያናዉካ ዳንዳያካ» ጌዳ። ሄ ዎዴ ኣሳይ፥ ዛካራሲ ጌሻ ጎሊያፔ ኬሴናን ኣያው ጋሚዔዴንቶ ማላሌቲዴ ናጊኖ። ኬሴዳ ዎዲያንካ ሃሳያናው ዳንዳይቤና፤ ጌሻ ጎሊያን ሳፃ ኢ ቤዔዳዋ ኣኬኬዲኖ፤ ኢካ ሃሳያናው ዳንዳዪቤናዋ ፆርሲ ቤሲዴ፥ ዱዴ ጊዲዴ ዴዔዳ። ዛካራሲካ ባሬ ኦሱዋ ዎዲያ ዉርሶ ዎዴ፥ ባሬ ጎሌ ሲሜዳ። ሄዋፔ ጉዪያን ኣ ማቻታ ኤልሳቤፃ ሻሃራዴ ኢቼሹ ኣጌና ባሬና ጌንꬃዱ። ኤልሳቤፃካ፥ «ታ ቶሺያ ኣሳ ጊዶፔ ዲጋናው ጎዳይ ባሬ ማሮቴꬃን ታና ፄሎ ዎዴ፥ ሃዋዳን ታው ኦꬄዳ» ጋዱ። ኡሱፑንꬃ ኣጌናን ፆሳ ኪታንቻ ጋብሬል ጋሊላ ጋዲያን ናዚሬቴ ካታማ ዳዊታ ያራፔ ጊዴዳ ዮሴፋ ጌቴቲያ ቢታኔው ኦሼታ ቃሼቴዳ ዎዶራቲኮ ፆሳ ማታፔ ኪቴቴዳ፤ ዎዶራቲ ሱንꬃይካ ማይራሞ ጌቴቴ። ኪታንቻይካ ማይራሚኮ ዪዴ፥ «ዳሪሳዴ ዶሴታዉኔ፥ ሳሮቴꬃይ ኔው ጊዶ፤ ጎዳይካ ኔናና ጋꬆ ዴዔ፤ ኔኒካ ማጫዋንቱ ጊዶን ኣንጄቴዳዉኖ» ያጌዳ። ማይራማካ ኣ ሃሳያፔ ዴንዶዋን ዳሪሳ ዳጋማዴ፥ «ሃዌ ኣያ ማላ ሳሮታ ጊዳኔ» ጋዴ ዬዉዋ ቆፓዱ። ኪታንቻይ ኢዞ፥ «ሃኔ ማይራሜ፥ ፆሳ ማታን ሳባ ዴማዳ ያዮፓ። ኔኒ ሻሃራዴ፥ ኣቱማ ናዓ ዬላናሳ፤ ኣ ሱንꬃካ ዬሱሳ ጋናሳ። ኢካ ዳራ ጊዳናዋ፤ ኡባፔ ꬎቃ ፆሳ ናዓ ጌቴታና፤ ጎዳ ፆሳይ ኣ ኣቡ ዳዊታ ካዉቴꬃ ኦይዲያ ኣው ኢማናዋ። ኢካ ያዪቆባ ጎሌን ሜꬊናው ካዉታናዋ፤ ኣ ካዉቴꬃዉካ ዉርሴꬃይ ባዋ» ያጌዳ። ማይራማካ ኪታንቻ፥ «ታኒ ዎዶራቶ ጊዶ ዲራው፥ ሃዌ ዎቲ ሃናናዌ?» ያጋዱ። ኪታንቻይካ ዛሪዴ ኢዚው፥ «ኣያና ጌሻይ ኔ ቦላ ያናዋ፤ ꬎቃ ፆሳ ዎልቃይ ኔናን ሼምፓናዋ። ሄዋ ዲራው፥ ኔፔ ዬሌቲያዌ ጌሻ ፆሳ ናዓ ጌቴታና። ኔ ዳባታ ኤልሳቤፃ ባሬ ጪማቴꬃ ዎዲያን ኣቱማ ናዓ ሻሃራዱ። ማንꬃ ጌቴቴዳዉና ኤልሳቤፃ ሻሃሮዴፔ ኡሱፑንꬃ ኣጌና ኦይቃዱ። ፆሳ ፆኒያ ዬዉ ባዋ» ያጌዳ። ማይራማካ፥ «ታኒ ጎዳ ኣይላቶ፤ ኔኒ ጎዋዳን ሃኖ» ጋዱ። ሄዋፔ ጉዪያን ኪታንቻይ ኢዚ ማታፔ ቤዳ። ማይራማካ ሄ ኣጌና ጊዶን ዴንዳዴ ኪሊ ዞዜቲያ ዪሁዳ ጋዴን ዴዒያ ኢቲ ካታማ ኤሌላ ኬሳዱ። ዛካራሳ ጎሌ ጌላዴ ኤልሳቤፆ ሳሮታዱ። ኤልሳቤፃካ ማይራሚ ሳሮታ ሲሴዳ ዎዴ፥ ኢዚ ኡሉዋን ዴዒያ ሻሃራይ ጉፔዳ፤ ኤልሳቤፃካ ኣያና ጌሻን ኩማዱ። ባሬ ኮሻካ ꬎቁ ኦꬃዴ፥ «ኔኒ ማጫዋንቱ ጊዶፔ ኣንጄቴዳዉኖ። ኔፔ ዬሌቲያዌካ ኣንጄቶዋ። ኔኒ ታ ጎዳ ዳያ ታኮ ያናው ታኒ ኦኔ? ሄኮ ኔ ሳሮታ ኮሻይ ታ ሃይꬃን ሲሴቴዳ ዎዴ፥ ታ ኡሉዋን ዴዒያ ሻሃራይ ናሼቻን ጉፔዳ። ጎዳይ ፖሌቴ ጊዴ ኢዚው ኦዴዳዋ ኣማኔዳዉና ኢዛ ኣንጄቴዳዉኖ» ያጋዱ። ማይራማካ፥ «ታ ሼምፓታ ታ ጎዳ ቦንቻው፥ ታ ኣያናይካ ታ ፆሳ፥ ታ ꬋሊያን ሎይꬃ ናሼታው። ኢካ ባሬ ኣይላቲ ቶሺያ ፄሌዳ። ሃቼፔ ዶሚዴ ዬሌታይ ኡባይ ኣንጄቴዳዉኔ ጊኖ። ዎልቃማ ጊዴዳ ኢ ዳሮ ዬዉዋ ታው ኦꬄዳ፤ ኣ ሱንꬃይካ ጌሻ። ኣ ማሮታይ ያዪያዋንቱሲ ዬሌታፔ ዬሌታይ ጋካናው ዴዔ። ባሬ ዎልቃን ሚኖ ኪታ ኪቴቴዳ፤ ባሬንቱ ዎዛና ቆፋን ኦቶሬቲያዋንታ ላሌዳ። ሞዲያዋንታ ካዉቴꬃ ማታ ኦይዲያፔ ዎꬄዳ፤ ኣሺካቱዋካ ቃሲ ꬎቁ ꬎቁ ኦꬄዳ። ኮሻቴዳዋንታ ሎዖ ዬዉዋን ካሊሴዳ፤ ዱራቱዋ ቃሲ ሜላ ዬዴርሴዳ ባሬ ማሮቴꬃ ቆፒዴ ባሬ ኣይሊያ ኢስራዔሊያ ማዴዳ። ኑ ኣዋቶ ኢ ኦዴዳዋዳን ኣብራሃሜዉኔ ኣ ያራው ጌዳዋ ሜꬊናው ናጋና ዲራሳ» ያጋዱ። ማይራማካ ሄዙ ኣጌና ኬና ኤልሳቤፂ ማታን ጋሚዖዋፔ ጉዪያን ባሬ ጎሌ ሲማዱ። ኤልሳቤፂዉካ ዬሊያ ዎዲ ጋኪና፥ ኣቱማ ናዓ ዬላዱ። ኢዚ ሾራቱኔ ኢዚ ዳቦ ጊዴዳዋንቱ፥ ጎዳይ ማሮቴꬃ ኢዚው ኦꬄዳዋ ሲሲዴ ኢዚና ኢቲፔ ናሼቴዲኖ። ሆስፑንꬃ ጋላሳን ናዓ ቃፃራናው ዬዲኖ፤ ኣ፥ ኣዉዋ ሱንꬃን ዛካራሳ ጊዴ ሱንꬃናው ኮዬዲኖ። ኣ ዳያ ቃሲ፥ «ሃኔና፥ ዮሃኒሳ ጌቴታናው ኮሼ» ያጋዱ። ኡንቱንቱካ ኢዞ፥ «ኔ ዳባቱዋፔ ሃቼ ጋካናው ኢቱካ ሃ ሱንꬃን ፄሴቲቤና» ያጌዲኖ። ኣ ኣባ፥ ኦና ጊያ ሱንꬃን ፄጌታናው ኮዪንቶ ፆርሲ ኦቼዲኖ። ኣ ኣቡካ ፃፊያባ ኦቺ ኣኪዴ፥ «ናዓ ሱንꬃይ ዮሃኒሳ» ጊዴ ፃፊና፥ ኡባቱካ ዬዉዋን ማላሌቴዲኖ። ሄዋንካ ዛካራሳ ዶናይ ዶዬቴዳ፥ ኣ ኢንፃርሳይካ ቢሌቲና ሃሳያ ዶሜዳ፥ ፆሳካ ጋላቴዳ። ኣ ሾራቱካ ዴዒያሳ ኡባን ያሻን ኩሜዲኖ። ሃ ዬዉካ ዞዜቲያ ዪሁዳ ጋዲያ ኡባን ዳሪ ሃሳዬቴዳ። ሃዋካ ሲሴዳዋንቱ ኡባቱ፥ «ሃ ናዓይ ኣያ ጊዳኔሻ?» ያጊዴ ዬዉዋ ባሬንቱ ዎዛናን ኦይቄዲኖ፤ ፆሳይካ ኣናና ዴዒያዋ ኤሬዲኖ። ዮሃኒሳ ኣቡ ዛካራሲ ኣያና ጌሻን ኩሚዴ ቲምቢቲያ ያጊ ኦዴዳ፡ «ኢስራዔሊያ ጎዳይ ፆሳይ ኣንጄቶ፤ ዪዴ ባሬ ኣሳ ፆሞሴዳኔ ዎዜዳ። ባሬ ኣይሊያ ዳዊቴ ጎሊያን፤ ዎልቃማ ኣሺያዋ ኑሲ ጊጊሴዳ። ሃዌካ ቤኒ ጎዳ ጌሻ ናባቱዋ ዶናን ኦዴቶዋዳን፥ ኢ ኑና፥ ኑ ሞርኬቱዋፔኔ ኑናና ኤቄቲያዋንቱ ኩሺያፔ ኣሻናሳ። ሃዋካ ኢ ኦꬄዳዌ፥ ኑ ኣዋቶ ማሮቴꬃ ቤሳናሳኔ፥ ባሬ ጌሻ ጫቁዋ ዎዛና ኣꬃናሳ። ኑ ኣዉዋ ኣብራሃሞሲ ጫቄዳ ጫቁዋ ቆፓናው፥ ኑ ሞርኬቱዋ ኩሺያፔ ኬሲዴ ያሻይ ባንታን ኣው ኦꬃናዳን ማታ ኑሲ ኢሜዳ። ሃዌኔካ፥ ኑና ኑ ዎዲያ ኡባን ጌሻቴꬃኒኔ ፂሎቴꬃን ባሬ ሲንꬃን ኤሳና ዲራሳ። ዛሪዴካ፥ ኔኖ፥ ታ ናዓው፥ ꬎቃ ፆሳ ናቢያ ጌቴታናሳ፤ ኦጊያ ጊጊሳናው ጎዳፔ ሲንꬃና ባናሳ። ኣሳ ናጋራ ማሪያ ኣቶቴꬃ ኤራ ኡንቱንቶ ኢማናሳ። ሄዌካ ኪሊፔ ዬዳ ፖዑ፥ ኑና ፆሞሴዳዌ ኑ ፆሳ ማሮቴꬃኔ ቃሬታ ጋሱዋና። ኣ ፖዑካ ꬉማኒኔ ሃይቁዋ ኩዋን ኡቴዳዋንቶ ፖዒሴ፤ ኑ ጌዲያካ ሳሮቴꬃ ኦጊያን ሱሪሴ።» ናዓይካ ዲጪዴ፥ ኣያናን ሚኔዳ፤ ኢስራዔሊያ ኣሳው ቤቴዳ ጋላሳይ ጋካናው ሜላ ቢታን ዴዔዳ። ሄ ዎዴ ሮማ ካዉቴꬃ ጋርሳን ዴዒያ ኣሳይ ኡባይ ሱንꬃ ፃፌታናዳኒኔ ፓይዴታናዳን ኣዉጊስፆሴ ቄሳሬፔ ኣዛዙ ኬሴዳ። ሄዌኔካ፥ ቄሬኔዮሴ ሶሪያ ጋዲያ ሞዲያ ዎዴ ሃኔዳ ኮይሮ ኣሳ ፓይዱዋ። ሃዋ ዲራው ኢቲ ኢቲ ኣሳይ ፃፌታናው ባሬ ካታማ ባሬ ካታማ ቤዳ። ዮሴፎካ ዳዊታ ጎሊያፔኔ ያራፔ ጊዲያ ዲራው ጋሊላ ኣዉራጃን ዴዒያ ናዚሬቴ ካታማፔ ዴንዲዴ ዳዊታ ካታማ ጊዴዳዉኒኮ ዪሁዳን ዴዒያ ቤቴሊሄሜ ጌቴቲያ ካታማ ኬሴዳ። ሄ ዎዴ ዬሊያ ዎዲ ማቴዳ ኣው ኦሼታ ኡቴዳ ማይራማካ ኣናና ኢቲፔ ባዱ። ኡንቱንቱ ሄዋን ዴዒሺን ኢዚው ዬሊያ ዎዲ ጋኪ ኣጌዳ። ኢዛካ ባይራ ናዓ ጊዴዳ ኣቱማ ናዓ ዬላዱ፤ ኢማꬃይ ሼምፒያሳ ዴማ ቤና ዲራው፥ ናዓ ማዩዋን ፃፃዴ ጋጳቲያን ቄራዱ። ሄ ጋዲያን ቃማ ባሬንቱ ዉዲያ ሄሚዴ ዴምባን ኣቂያዋንቱ ዴዒኖ። ፆሳ ኪታንቻይ ቆፔናን ዪዴ ኡንቱንቱ ሚዪያን ኤቄዳ፤ ጎዳ ቦንቹ ኡንቱንቱ ዩሹዋን ፖዔዳ ዎዴ፥ ዎልቃማ ያሻይ ኡንቱንታ ኦይቄዳ። ኪታንቻይ ኡንቱንታ፥ «ያዮፒቴ፥ ኣሳው ኡባው ሃኒያ ዳሮ ናሼቺያ ሚሺራቹዋ ታኒ ሂንቴንቶ ኣሃዲ። ሃቼ ዳዊታ ካታማን ኣሺያዌ ዬሌቴዳ። ኢካ ጎዳ ኪሪስቶሳ። ሃዌ ሂንቴንቶ ማላ ጊዶ፡ ጋጪኖ ናዓይ ማዩዋን ፃፄቲዴ ጋጳቲያ ጊዶን ጊሴዳዋ ዴማኒታ» ያጌዳ። ቆፔናን ጮራ ፆሳ ኪታንቻቱ ኮይሮ ኪታንቻና ኢቲፔ ቆንጬዲኖ። ፆሳካ ጋላቲዴ፥ ሃዋዳን ጌዲኖ፡ «ቦንቹ ፆሳው ቦላ ሳሉዋን ጊዶ። ሳዓን ኢ ዶሲያ ኣሳው ሳሮቴꬃይ ጊዶ» ያጌዲኖ። ኪታንቻቱ ኡንቱንቱፔ ሻኬቲዴ ሳሉዋ ኬሶዋፔ ጉዬ፥ ዉዲያ ሄሚያዋንቱ፥ «ጎዳይ ኑሲ ቆንጪሴዳዋ፥ ሃዋ ሃኔዳ ዬዉዋ ቤዓናው ቤቴሊሄሜ ቦይቴ» ጌቴቴዲኖ። ኡንቱንቱካ ኤሌሊዴ ቤዲኖ። ማይራሞኔ ዮሴፋ ዴሚዴ፥ ጋጪኖ ናዓይካ ጋጳቲያን ጊሴዳዋ ቤዔዲኖ። ሄዋፔ ጉዪያን ጉꬃ ናዓ ዲራው ኦዴቴዳዋ ቆንጪሲዴ ኦዴዲኖ። ሃዋ ሲሴዳ ኡባይ ኡንቱንቱ ኦዴዳ ዬዉዋን ማላሌቴዲኖ። ማይራማ ቃይ ሃዋ ኡባ ባሬ ዎዛናን ኦይቃዴ ቆፓዴ ጋሚዓዱ። ዉዲያ ሄሚያዋንቱካ ኡባ ዬዉ ኡንቱንቶ ኦዴቴዳዋዳን ሃኒና ዴሞ ዲራው፥ ሲሴዳዎኔ ቤዔዳዎ ኡባው ፆሳ ቦንቺዲኔ ጋላቲዴ ሲሜዲኖ። ናዓው ሆስፑን ጋላሳ ጊዲና ቃፃሬቲያ ዎዲ ጋኮ ዎዴ፥ ኢ ኣቲ ኡሉዋን ኣታናፔ ካሴ፥ ኪታንቻይ ኬሶ ሱንꬃን፥ ዬሱሳ ጌቴቴዳ። ሙሴ ዎጋ ማራዳን ጌዪያ ዎዲ ፖሌቴዳ ዎዴ ዮሴፎኔ ማይራማ ጋጪኖ ናዓ ፆሳው ሼꬋናው ዬሩሳላሜ ኣኪ ቤዲኖ። ሄዌኔካ ጎዳ ዎጋን፥ «ኣቱማ ናዓ ጊዴዳ ባይራ ናዓይ ኡባይ ፆሳው ዱማቴዳዋ ጊዳናዋ» ጌቴቲ ፃፌቴዳዋዳኒኔ፥ ቃሲካ ጎዳ ዎጋን፥ «ላዑ ዶጎማቱዋ ዎይ ላዑ ሃራጴ ማራቱዋ» ጌቴቶዋዳን፥ ጎዳው ያርሹዋ ያርሻናው ኣፌዲኖ። ሄ ዎዴ ፂሎኔ ጌንጫ ጊዴዳ ሲሞና ጌቴቲያ ኢቲ ቢታኒ ዬሩሳላሜን ዴዔ። ኢካ፥ ኢስራዔሊያ ኣሳው ኣቶቴꬃ ሂዶታ ናጊያዋኔ ኣያና ጌሻይ ኣ ቦላን ሼምፔዳ ኣሳ። ጎዳን ኦኬቴዳ ኪሪስቶሳ ቤዔናን ሃይቄናዋ ኣያና ጌሻን ኣው ቆንጪሴዳ። ኢካ ሄ ዎዴ ኣያና ጌሻይ ካሌꬂና፥ ጌሻ ጎሊያ ጌሌዳ። ናዓ ዬላዋንቱ ኤሪያ ዎጋ ማራዳን፥ ኮሺያዋ ኣው ፖላናው ጉꬃ ናዓ ዬሱሳ ኦይቂዴ ጌሎ ዎዴ፥ ሲሞኔ ሞኪ ኣኪ ናዓ ኢዲሚዴ ፆሳ ጋላቲዴ ሃዋ ያጌዳ፡ «ጎዳው፥ ኔኒ ቃላ ጌሎ ማራዳን ሃዒ ታና ኔ ኣይሊያ ሳሩዋን ኔኮ ኣፋ። ጋሱካ፥ ታ ኣይፋቱ ኣሳ ኡባ ሲንꬃን ኔኒ ጊጊሴዳ፥ ኣሺያ ሂዶታ ቤዔዲኖ። *** ሄዌካ ኢስራዔሊያ ጊዴና ኣሳው ቆንጬꬃ ኢሚያ ፖዑዋ። ቃሲ ኔ ኣሳው ኢስራዔሌው ቦንቹዋ።» ዮሴፎኔ ኣ ዳያ ኣ ዲራው ሃሳዬቴዳ ዬዉዋሲ ማላሌቴዲኖ። ሲሞኒካ ኣንጂዴ ማይራሞ፥ «ሃዌ ናዓይ ኢስራዔሊያን ጮራቱዋሲ ዴንዱዋሲኔ ኩንዴꬃው ጋሶ ጊዳናው፥ ቃሲካ ኢታ ሃሳዪያዋንቱሲ ማላ ጊዳናው ዶሬቴዳ። ጮራቶካ ዎዛና ቆፋይ ቆንጮዋ ጊዳናው፥ ኔ ሼምፑካ ማሻን ቃንፆዋዳን ሴሌታናዋ » ያጌዳ። ቃሲካ ኣሴራ ያራፔ ጊዴዳ ፓኑዔላ ናታ ሃኖ ጌቴቲያ ናባታ ዴዓው፤ ኢዛካ ሎይꬃ ጪማዱ። ባሬ ዎዶሮቴꬃን ጌሌዳ ኣሲናና ላፑ ላይꬃ ዴዔዳዉኖ። ኢዚ ላይꬃይካ ሆስፑን ታማኔ ኦይዱዋ ጊዳና ጋካናው ጋላሳኔ ቃማ ጌሻ ጎሊያፔ ሻኬቴናን ፆማኒኔ ዎሳን ኪቴታዴ ኣምዔ ጊዳዴ ጋሚዓዱ። ሄ ዎዴካ ሺቃዴ ፆሳ ጋላታዱ፤ ቃሲካ ዬሩሳላሜ ኣሳይ ዎዜታናው ናጊያዋንቶ ኡባቶ ጋጪኖ ናዓ ዬሱሳባ ኦዳዱ። ዮሴፎኔ ማይራማ ጎዳ ሂጊያን ኣዛዜቴዳዋ ኡባ ፖሎዋፔ ጉዬ ጋሊላ ኣዉራጃን ዴዒያ ባሬንቱ ካታማ ናዚሬቴ ሲሜዲኖ። ጉꬃ ናዓይካ ዲጪዴኔ ሚኒዴ ቤዳ፤ ኣꬎ ኤራኒካ ኩሜዳ፤ ፆሳ ኣꬎ ኬካቴꬃይ ኣቦላን ሼምፔዳ። ዮሴፎኔ ማይራማ ላይꬃን ላይꬃን ፓሲጋ ባላ ቦንቻናው ዬሩሳላሜ ካታማ ቢኖ። ናዓዉካ ታማኔ ላዑ ላይꬃ ጊዶ ዎዴ ዶያዳን ባላው ሂኒ ዬሩሳላሜ ኬሴዲኖ። ባላ ፖሎዋፔ ካላ ባሬንቱ ጎሌ ኡንቱንቱ ሲሞዴ ጉꬃ ናዓ ዬሱሲ ዮሴፎኔ ማይራማ ኤሬናን ዬሩሳላሜን ኣቲ ኣጌዳ። ኡንቱንቱና ኢቲፔ ዴዒያዋ ማላቲና ኢቲ ጋላሳ ኦጊያ ሃሜቴዲኖ። ጉዬፔ ቃሲካ ባሬንቱ ዳባቱዋናኔ ባሬንቱ ሲቄቲያዋንቱ ማታን ኮሻ ዶሜዲኖ። ꬋዮ ዎዴ ኮዪዴ ሂኒ ዬሩሳላሜ ሲሜዲኖ። ሄዙ ጋላሳፔ ጉዬ፥ ታማሪሲያዋንቱ ጊዶን ዬሱሲ ኡቲዴ ኡንቱንቱ ጊያዋ ሲሲዴኔ ኡንቱንታ ኦቺዴ ጌሻ ጎሊያ ጋርሳን ዴዒያዋ ቤዔዲኖ። ሲሲያዋንቱ ኡባቱካ፥ ኣ ኣኬካኒኔ ኣ ዛሩዋን ማላሌቴዲኖ። ዮሴፎኔ ኣ ዳያ ኣ ቤዖ ዎዴ ማላሌቴዲኖ። ኣ ዳያካ፥ «ታ ናዓው፥ ኣያው ኑና ሃዋዳን ኦꬃይ? ኔ ኣቡኔ ታኔ ኔና ኮዪዴ፥ ዳሮ ሜቶቴዶ» ያጋዱ። ዬሱሲካ ኡንቱንቶ፥ «ኣያው ታና ኮዪቴ? ታ ኣቡ ጎሌን ዴዓናው ታው ኮሺያዋ ኤሪቤይኪቴ?» ያጊ ዛሬዳ። ሄዋ ያጊ ኦዶፔ ኣቲን፥ ኡንቱንቶ ኢ ኦዴዳ ዬዉ ኣያ ጊንቶ ጌሊቤና። ሄዋፔ ሲሚዴ፥ ኡንቱንቱና ኢቲፔ ሂኒ ናዚሬቴ ቤዳ፤ ሄዋንካ ኡንቱንቶ ኣዛዜቴ። ኣ ዳያካ ሄዋ ኡባ ባሬ ዎዛናን ዎꬃዱ። ዬሱሲካ ኤራኒኔ ጌሳን፥ ሳባኒካ ፆሳኔ ኣሳ ሲንꬃን ዲጬዳ። ፂባሪዮሳ ጌቴቲያ ካቲ ካዉቴዳ ታማኔ ኢቼሼꬂያ ላይꬃን ጴንፄናዊያ ጲላፆሲ ዪሁዳ ሞዲያ ዎዴ፥ ሄሮዲሴ ጋሊላን ኦይዴንꬂያ ሻኩዋ ሞዲያ ዎዴ፥ ኣ ኢሻይ ፒሊጶሲካ ኢፁሪያኒኔ ፂርኮንዶሳን ኦይዴንꬂያ ሻኩዋ ሞዲያ ዎዴ፥ ሊሳኒዮሲካ ኣቢሌኔን ኦይዴንꬂያ ሻኩዋ ሞዲያዋ ጊዲዴ ሞዲ ዴዒሺን፥ ሃኒኔ ቄያፋይ ቄሳቱዋ ካፓቱዋ ጊዲዴ ዴዒሺን፥ ፆሳ ቃላይ ዛካራሳ ናዓ ዮሃኒሳኮ ሜላ ቢታን ዬዳ። ዮሃኒሲ ዮርዳኖሳ ሻፋ ሄራ ኡባ ቢዴ፥ «ሂንቴ ናጋራይ ኣቶ ጌቴታና ማላ ናጋራ ፓፂዴ ፃማቄቲቴ» ያጊ ታማሪሴዳ። ናቢያ ኢሲያሳ ማፃፋን ፃፌቴዳ ቃላዳን፥ «ሜላ ቢታን ዋሲያ ቢታኒያ ኮሻይ፥ ‹ጎዳው ኦጊያ ጊጊሲቴ፤ ኣ ኦጊያካ ሱሪሲቴ። « ‹ኦላይ ኡባይ ኩሞ፤ ዴሪኔ ዞዚ ዴንባ ጊዶ፥ ጊጌና ኦጊ ኡባይ ጊጎ፥ ሃንቺሮ ኦጊ ኡባይ ሊቆ። « ‹ሄዋ ጊዶፔ ኣሳይ ኡባይ ፆሳይ ኣሺያዋ ቤዓና› » ያጌዳ። ሃዋ ዲራው ዮሃኒሲ ኣ ኩሺያን ፃማቄታናው ኬሴዳ ኣሳው ሃዋዳን ኦዱዋ ዶሜዳ፥ «ሄንቴኖ፥ ሾሻ ናቶ፤ ዪያ ሃንቁዋፔ ኣታና ማላ ሂንቴንታ ኦኒ ማቄዴ? ሲሚ ሂንቴንቱ ናጋራፔ ሲሜዳዋንቶ ቤሲያ ኣይፊያ ኣይፊቴ። ሂንቴንቱ ዎዛናን ኣብራሃሞ ኑ ኣቡ ዴዔ ጎፒቴ። ፆሳይ ኣብራሃሞሲ ናና ሃ ሹቻቱዋፔ ዴንꬃናው ዳንዳዬ ያጋዴ ታኒ ሂንቴንቶ ኦዳይ። ሃዒ ኡባ ቤፂ ሚꬃ ፃጱዋን ቃንፃናው ጊጊ ኡቴዳ፤ ሲሚ ሎዖ ኣይፊያ ኣይፌና ሚꬃይ ኡባይ ቃንፄቲዴ ታማን ኦሌታናዋ።» «ያቲና ሃዒ ኑ ኣያ ኡዳኔ?» ያጊዴ ኣ ጮራ ኣሳይ ኦቼዳ። ዮሃኒሲካ፥ «ላዑ ማዩ ዴዒያዌ ባይናዎ ኢሞ፤ ቁማይ ዴዒያዌካ ባይናዎ ጊሾ» ያጊ ዛሬዳ። ቃራፃ ሺሺያዋንቱካ ፃማቄታናው ዪዴ፥ «ታማርሲያዎ፥ ኑ ኣያ ኡዳኔ?» ያጊ ኦቼዲኖ። ኢ ኡንቱንቶ፥ «ጌቴቶዋፔ ኣꬎ ቃራፃ ኣꬂ ሺሾፒቴ» ያጊ ኦዴዳ። ሄዋፔ ካላ ዎታዳራቱ፥ «ኑኒሺ፥ ኣያ ኡዳኔ?» ያጊ ኣ ኦቼዲኖ። ዮሃኒሲካ፥ «ኣሳ ሻሉዋ ናቁዋን ቦንቂ ኣኮፒቴ፥ ኦናኔ ዎርዱዋን ሞቶፒቴ፥ ሂንቴንቱ ዲርጉ ሂንቴንቶ ጊዳና» ያጊ ዛሬዳ። ሄ ዎዴ ኣሳይ ኡባይ ኪሪስቶሳ ዩሳ ናጊዴ ዴዒያ ዲራው ዮሃኒሳ፥ «ሃዌካ ኪሪስቶሳ ጊዴናን ኣቴና» ያጊዴ ባሬንቱ ዎዛናን ማሌዲኖ። ዮሃኒሲ ኡባቱዋካ፥ «ታኒ ሃꬃን ፃማቃይ፤ ጊዶፔ ኣቲን ታፔ ዎልቃማይኔ ታኒካ ኣ ጫማ ቃሹዋ ቢላና ዳንዳዬናዌ ቢሮ ያናዋ፤ ኢካ ኣያና ጌሻኒኔ ታማን ፃማቃናዋ፤ ኣ ኩሺያን ካꬃ ዳላፔ ሻኪ ጌሺያ ላይዳይ ዴዔ። ካꬃ ኡዱማን ቡኮዋ ጌሺ ፑኒዴ ኣይፊያ ዲዪያን ቆሌ፤ ሺን ዳላ ቶዔና ታማን ጉዴ።» ዮሃኒሲካ ሃራ ጮራ ቃላን ጮራ ኣሳ ማቂዴ ሚሺራቹዋ ቃላ ኦዴዳ። ጋሊላ ሞዲያ ሄሮዲሳ ቃሲ ባሬ ኢሻ ፒሊጶሳ ማቻቶ ሄሮዲያዶ ኢ ኣኬዳ ዲራዉኔ ሃራካ ጮራ ኢታ ኪታ ኪቴቶ ዲራው፥ ዮሃኒሲ ሴሬዳ። ሃዋ ዲራው ሃ ኡባ ጉጂዴ ሄሮዲሴ ዮሃኒሳ ቃሾ ጎሌ ጌልሴዳ። ኣሳይ ኡባይ ፃማቄቲ ሲሞዋፔ ጉዪያን ዬሱሲ ፃማቄቴዳ። ኢ ዎሲ ዴዒሺንካ ሳሉ ዶዬቲ ኣጌዳ። ጌሻ ኣያናይካ ሃራጲያ ማላቲዴ ኣ ቦላን ዎꬌዳ። ሳሉዋፔካ፥ «ታ ዶሲያ ናዓይ ኔና፤ ኔናን ታኒ ናሼታይ» ያጊያ ቃላይ ዬዳ። ዬሱሲ ታማርሱዋ ዶሞዴ ኣው ሃታሙ ላይꬃ ጊዴዳ፤ ጮራ ኣሳይካ ባሬንቶ ማላቶዋዳን ኣ ዮሴፎ ናዓ ያጊኖ፤ ዮሴፎ ኤሌ ናዓ፤ ኤሌ ማቴ ናዓ፤ ማቴ ሌዊያ ናዓ፤ ሌዊ ሚልኬ ናዓ፤ ሚልኬ ዮና ናዓ፤ ዮኒ ዮሴፎ ናዓ፤ ዮሴፎ ማታቲያ ናዓ፤ ማታቲ ኣሞፄ ናዓ፤ ኣሞፄ ናሆሜ ናዓ፤ ናሆሜ ኤሲሊሜ ናዓ፤ ኤሲሊሜ ናጌ ናዓ፤ ናጌ ማዓቴ ናዓ፤ ማዓቴ ማታቲዩ ናዓ፤ ማታቲዩ ሴሜዬ ናዓ፤ ሴሜዪ ዮሴቆ ናዓ፤ ዮሴቆ ዮዳ ናዓ፤ ዮዲ ዮናና ናዓ፤ ዮናኒ ሬሴ ናዓ፤ ሬሴ ዜሩባቤላ ናዓ፤ ዜሩባቤሊ ሳላቲያላ ናዓ፤ ሳላቲያሌ ኔሌ ናዓ፤ ኔሊ ሚልኬ ናዓ፤ ሚልኬ ሃዴ ናዓ፤ ሃዴ ዮሳሴ ናዓ፤ ዮሳሴ ቆሳማ ናዓ፤ ቆሳሚ ኤልማዶሜ ናዓ፤ ኤልማዶሜ ኤሬ ናዓ፤ ኤሬ ዮሴዔ ናዓ፤ ዮሴዔ፥ ኤሊዔዜራ ናዓ፤ ኤሊዔዜሬ፥ ዮራሜ ናዓ፤ ዮራሚ ማፃቴ ናዓ፤ ማፃቴ ሌዊያ ናዓ፤ ሌዊ ሲሞና ናዓ፤ ሲሞኔ ዪሁዳ ናዓ፤ ዪሁዳይ ዮሴፎ ናዓ፤ ዮሴፎ ዮናና ናዓ፤ ዮናኒ ኤሊያቄማ ናዓ፤ ኤሊያቄሚ ሜሊያ ናዓ፤ ሜሊዬ ማዪናና ናዓ፤ ማዪናኒ ማፃቴ ናዓ፤ ማፃቴ ናታኔ ናዓ፤ ናታኔ ዳዊቴ ናዓ፤ ዳዊቴ ኢሴይ ናዓ፤ ኢሴይ ኢዮቤዳ ናዓ፤ ኢዮቤዲ ቦዔዛ ናዓ፤ ቦዔዚ ሳልሞና ናዓ፤ ሳልሞኒ ናሂሾና ናዓ፤ ናሂሾኒ ኣሚናዳባ ናዓ፤ ኣሚናዳቢ ራማ ናዓ፤ ራሚ ኣሪና ናዓ፤ ኣሪናይ ሄዝሮና ናዓ፤ ሄዝሮኒ ፔሬዛ ናዓ፤ ፔሬዚ ዪሁዳ ናዓ፤ ዪሁዳይ ያዪቆባ ናዓ፤ ያዪቆቢ ዪሳቃ ናዓ፤ ዪሳቂ ኣብራሃሞ ናዓ፤ ኣብራሃሞ ታራ ናዓ፤ ታሪ ናኮራ ናዓ፤ ናኮሪ ሴሮሄ ናዓ፤ ሴሮሂ ራጋዋ ናዓ፤ ራጋዊ ፔሌጋ ናዓ፤ ፔሌጊ ኣቤራ ናዓ፤ ኣቤሪ ሳላ ናዓ፤ ሳሊ ቃይናና ናዓ፤ ቃይናኒ ኣርፋኪሲዴ ናዓ፤ ኣርፋኪሲዴ ሴሜ ናዓ፤ ሴሚ ኖሄ ናዓ፤ ኖሄ ላሜሄ ናዓ፤ ላሜሂ ማቱሳላ ናዓ፤ ማቱሳሊ ሄኖኬ ናዓ፤ ሄኖኪ ያሬዳ ናዓ፤ ያሬዲ ማላሊዔላ ናዓ፤ ማላሊዔሊ ቃይናና ናዓ፤ ቃይናኒ ሄኖሳ ናዓ፤ ሄኖሲ ሴቴ ናዓ፤ ሴቲ ኣዳማ ናዓ፤ ኣዳሚ ፆሳ ናዓ። ዬሱሲ ጌሻ ኣያናን ኩሚዴ ዮርዳኖሳ ሻፋፔ ሲሜዳ፤ ኣያናን ሜላ ሳዓ ካሌሴቲዴ ቤዳ። ሄዋን ኦይታሙ ጋላሳ ዳቢሎሳን ፓጬቴዳ። ሄ ጋላሳቱዋን ኣያኔ ሚቤና ዲራው ዉርሴꬃ ፖሉዋ ሄራን ኢ ኮሻቴዳ። ዳቢሎሲካ፥ «ኔኒ ፆሳ ናዓ ጊዶፔ ሃ ሹቻ፥ ‹ኡኪꬃ ጊዳ› ጋዴ ኣዛዛ» ያጌዳ። ዬሱሲካ፥ « ‹ኣሳይ ፆሳ ቃላ ኡባፔ ኣቲን ኡኪꬃ ፃላላን ዴዔና› ጌቴቲ ፆሳ ቃላን ፃፌቴዳ» ያጊ ዛሬዳ። ዳቢሎሲካ ꬎቃ ጊዴዳ ዴሪያ ዬሱሳ ኬሲዴ ኣላሚያ ካዉቴꬃ ኡባ ሊጶ ኣይፊ ሲማናው ቤሴዳ። ዳቢሎሲካ፥ «ሃ ካዉቴꬃ ማታይኔ ቦንቹ ኡባይ ታው ኢሜቴዳ። ታኒ ታ ዶሲያ ኦሲኔ ኢማና፤ ኔዉካ ኢማና። ሄዋ ጊዲያ ዲራው፥ ኔ ታ ሲንꬃን ታው ጎዪኖፔ ሃ ኡባይ ኔሳ ጊዳናዋ» ያጌዳ። ዬሱሲካ ዛሪዴ፥ « ‹ጎዳ ፆሳው ጎዪና፥ ኣ ፃላላ ጎዳያ› ጌቴቲ ፆሳ ቃላን ፃፌቴዳ» ያጌዳ። ዳቢሎሲካ ዬሱሳ ዬሩሳላሜ ኣፊዴ ጌሻ ጎሊያ ሁጲያ ኬሲዴ፥ « ‹ፆሳይ ኔና ናጋና ማላ ኪታንቻቱዋ ኪታናዋ፥ ኡንቱንቱካ ኔ ጌዲ ሹቻን ꬉቤቴና ማላ ባሬንቱ ኩሺያን ኔና ዴንꬃናዋንታ› ያጌቲዴ ጌሻ ማፃፋን ፃፌቴዳ፤ ኣኔ ኔኒ ፆሳ ናዓ ጊዶፔ ሃዋፔ ዱጌ ኔና ኦላ» ያጌዳ። *** *** ዬሱሲካ ዛሪዴ፥ « ‹ኔ ጎዳ ፆሳ ፓጮፓ› ጌቴቴዳ» ያጌዳ። ዳቢሎሲካ ፓጪያ ኡባ ዉርሶዋፔ ጉዬ ጉꬃ ዎዴው ዬሱሳፔ ሻኬቴዳ። ዬሱሲካ ኣያና ዎልቃን ጋሊላ ጋዲያ ሲሜዳ። ኣ ዋሪካ ዩሹዋን ዴዒያ ኡባ ጋኬዳ። ዬሱሲካ ኣዪሁዳቱዋ ዎሳ ጎሊያን ታማሪሲዴ ኣሳን ኡባን ጋላቴቴዳ። ኢ ባሬ ዲጮ ካታማ ናዚሬቴ ዬዳ፤ ካሴ ኦꬂያዋዳንካ ሳምባታ ጋላሲ ኣዪሁዳቱዋ ዎሳ ጎሌ ጌሊዴ ናባባናው ዴንዲዴ ኤቄዳ። ናቢያ ኢሲያሳን ፃፌቲዴ ፃፄቴዳ ማፃፋ ኣው ኢሜዲኖ። ሄ ማፃፋ ቢሊዴ፡ «ታኒ ሂዬሳቱዋሲ ሚሺራቹዋ ኦዳናው ኦኬቴዳ ዲራው ጎዳ ኣያናይ ታ ቦላን ዴዔ። ቃሼቴዳዋንቱሲ ቢሌꬃ፥ ቆቃቱዋሲ ፄላና ማላ ኦዳናው፥ ቃይካ ናቄቴዳዋንታ ናቁዋፔ ኬሳና ማላ ዶሴቴዳ ጎዳ ላይꬃ ኦዳና ማላ፥ ታና ኪቴዳ» ጌቴቲ ፃፌቴዳሳ ዴሜዳ። *** *** ማፃፋካ ፃፂዴ ኣዪሁዳቱዋ ዎሳ ጎሊያን ኦꬂያዎ ኢሚዴ ኡቴዳ። ኣዪሁዳቱዋ ዎሳ ጎሊያን ዴዒያ ኣሳይ ኡባይ ኣ ጫዲ ፄሌዳ። ዬሱሲካ፥ «ሃቼ ሂንቴው ናባቤቲና ሂንቴንቱ ሲሴዳ ቃላይ ፖሌቴዳ» ያጌዳ። ኡባይ ኣው ማርካቴዲኖ። ኣ ዶናፔ ኬሲያ ኣꬎ ኬካቴꬃ ቃላፔ ዴንዴዳዋን ማላሌቲዴ፥ «ሃዌ ዮሴፎ ናዓ ጊዴኔ?» ጌዲኖ። ዬሱሲካ ሲꬌ ባንታን ሃ ሌሚሱዋን፥ «ሂንቴንቱ ታው ‹ꬋሊያ ጎዳው፥ ኔ ሁጲያ ፓꬃ፥ ኔኒ ቂፊሪናሆማን ኦꬂና ኑ ሲሶዋ ኡባ ሃ ኔ ካታማኒካ ቃሲ ኦꬃ› ያጊዴ ኦዲታ» ያጌዳ። ቃሲካ፥ «ቱሙዋ ያጋይ፥ ናቢ ባሬ ዬሌቶ ጋዲያን ጋማካ ቦንቼቴና። «ዬዉዋን ቃሲ ቱሙዋ ኦዳይ፡ ኤላሳ ዎዲያን ሄዙ ላይꬃኔ ኡሱፑን ኣጌና ኢራይ ቡኬናን ኢፂና ሳዓ ኡባን ዎልቃማ ኮሻይ ጌሌዳ ዎዴ፥ ኢስራዔሌን ጮራ ኣምዓቱ ዴዒኖ። ኤላሲካ ሲዶና ጋዲያን ዴዒያ ሴራፍታ ሄራ ኢቲ ኣምዓቲኮ ኪቴቴዳፔ ኣቲን ኦኮኔ ኪቴቲ ቤና። ናቢያ ኤልሳዓ ዎዲያንካ ኢስራዔሊያን ጮራ ኦሉዋ ሃርጊያን ኦይቄቴዳዋንቱ ዴዒኖ፤ ሶሪያ ቢታን ዴዒያ ኒዒማኔፔ ኣቲን ኡንቱንቱፔ ኦኒኔ ፓፂ ቤና» ያጌዳ። ኣዪሁዳቱዋ ዎሳ ጎሊያን ዴዒያዋንቱ ኡባቱ ሃዋ ሲሲዴ ዳሪሲዴ ሃንቄቴዲኖ። ኡንቱንቱ ዴንዲዴ ዬሱሳ ካታማፔ ጋፃ ኬሲዴ ዱጌ ኦላናው ካታማይ ኬፄቴዳ ዴሪያ ሁጲያ ኣፌዲኖ። ሺን ዬሱሲ ኡንቱንቱ ጊዱዋና ኣꬊዴ ቤዳ። ሄዋፔ ጉዪያን ዬሱሲ ጋሊላ ጋዲያን ዴዒያ ቂፊሪናሆማ ካታማ ቤዳ። ሳምባታ ጋላሳንካ ኣሳ ታማሪሴዳ። ኢ ታማሪሲያ ቲሚርቲ ማታን ጊዲያ ዲራው ሲሴዳ ኣሳይ ኡባይ ማላሌቴዲኖ። ኣዪሁዳቱዋ ዎሳ ጎሊያን ኢታ ኣያናይ ኦይቄዳ ቢታኒ ዴዔ፤ ባሬ ኮሻ ꬎቁ ኡዲ ዋሲዴ፥ «ሃያ ጎዶ ኣጋሪኪ ናዚሬቲያ ዬሱሳ፤ ኑሲ ኔናና ኣይ ኢቲፔቴꬃይ ዴዒ? ኑና ባዪዛናው ያዲ? ኔኒ ኦኔንቶ ኤራዲ፤ ኔኒ ፆሳ ኣዉ ኪቴዳ ጌሻ ጊዲኪ!» ያጌዳ። ዬሱሲካ፥ «ጮዑ ጋ፥ ኣፔካ ኬሳ» ያጊ ሴሬዳ። ኢታ ኣያናይ ቢታኒያ ኡንቱንቱ ጊዱዋን ኩንዲሲዴ ኣይኔ ቆሄናን ኣፔ ኬሴዳ። ኣሳይ ኡባይ ማላሌቲዴ ኢቱ ኢቶ፥ «ሃዌ ኣያ ቃሌ? ባሬው ዴዒያ ማታኒኔ ዎልቃን ኢታ ኣያናቱዋ ሴሬ፤ ቃሲ ኢታ ኣያናይካ ኬሴ» ያጊዴ ሃሳዬዲኖ። ኣ ዋሪካ ሄ ዩሹዋን ዴዒያ ጋዲያ ኡባ ጋኬዳ። ዬሱሲ ኣዪሁዳቱዋ ዎሳ ጎሊያፔ ዴንዲዴ ሲሞና ጎሊያ ጌሌዳ፥ ሲሞና ቦሎታታ ዎልቃማ ቆፁዋ ሃርጊያን ሃርጌታዴ ጊሴዳዉኒው ዬሱሲ ኢዞ ፓꬃናዳን ኣሳይ ኣ ዎሴዳ። ኢ ማታን ኤቂዴ ቆፁዋ ሃርጊያ ሴሪና፥ ሃርጊ ዬዲሼዳ፤ ሄዎዲያንካ ዴንዳዴ ኡንቱንቶ ኪቴታዱ። ኣዋይ ዉሎ ዎዲያን ዱማ ዱማ ሃርጊያን ኦይቄቴዳ ሃርጋንቻቱዋ ኡባ ኣኮ ኣሄዲኖ፤ ኢካ ኢቱዋ ኢቱዋ ቦላ ባሬ ኩሺያ ዎꬂዴ ፓꬄዳ። ኢታ ኣያናቱካ፥ «ኔኒ ኪሪስቶሳ ፆሳ ናዓ» ያጊ ዋሲዴ ጮራ ኣሳፔ ኬሴዲኖ። ኢ ኪሪስቶሳ ጊዶዋ ኡንቱንቱ ኤሬዳ ዲራው ሃሳዬና ማላ ዲጌዳ። ሳዓይ ዎንቶ ዎዴ ኣሳይ ባይናሳ ቤዳ፤ ኣሳይ ኡባይ ኣ ኮዪዴ ኢ ዴዒያሳ ዬዲኖ። ባሬንቱፔ ሻኬቲ ቤናዳን ዲጋናው ኮዬዲኖ። ኢ ቃይ፥ «ሂኒ ሃራ ካታማቱዋሲ ባዴ ፆሳ ካዉቴꬃ ሚሺራቹዋ ቃላ ኦዳናው ኮሼ፤ ታኒ ኪቴቴዳዌ ሃዋ ዲራሳ» ያጌዳ። ጋሊላን ዴዒያ ኣዪሁዳቱዋ ዎሳ ጎሌን ቃላ ታማሪሲዴ ጋሚዔዳ። ኢቲ ጋላሲ ዬሱሲ ጌንሳሬፄ ኣባ ጋፃን ኤቂዴ ዴዒሺን ጮራ ኣሳይ ኣኮ ሺቂዴ ፆሳ ቃላ ሲሳናው ሱጌቲ ዴዒኖ። ሄ ዎዴ ላዑ ዎንጊራቱ ኣባ ጋፃን ኤቆዋ ኢ ቤዔዳ፤ ሞሊያ ጲሪያዋንቱ ቃሲ ዎንጊራቱዋፔ ዎꬊዴ ባሬንቱ ዳባ ሜጪ ዴዒኖ። ዬሱሲ ዎንጊራቱዋ ጊዶፔ ሲሞናዉኖ ጊዴዳዉኒኒ ጌሊዴ ሳዓፔ ያ ኣባኮ ጉꬃ ሺሻናዳን ኦቼዳ። ሄዋፔ ጉዬ ዎንጊሪያ ቦላን ኡቲዴ ኣሳ ታማሪሱዋ ዶሜዳ። ታማሪሱዋ ቤꬆዋፔ ጉዪያን ሲሞና፥ «ዎንጊሪያ ያ ኣባ ጪሙዋኮ ሺሺቴ፤ ሂንቴንቱ ዳባካ ሞሊያ ጲራናው ኦሊቴ» ያጌዳ። ሲሞኒካ፥ «ጎዳው፥ ቃማ ኩሜንꬃ ዳቡሪ ኣቂዴ ኣዪኔካ ኦዪቂቤይኮ፤ ሺን ሃዒ ኔኒ ጎዋዳን ዳባ ኦሌቶ» ያጊ ዛሬዳ። ሄዋዳንካ ኦꬄዳ ዎዴ፥ ዳሮ ጮራ ሞሊያ ኦይቄዲኖ። ኡንቱንቱ ዳባቱካ ዱፄሬታናው ሃኔዲኖ። ሃራ ዎንጊሪያን ዴዒያ ላጌꬃቱ ዪዴ ማዳናዳን ዉቴዲኖ፤ ኡንቱንቱ ላዑ ዎንጊራቱዋንካ ሞሊያ ኩንꬂና ዎንጊራቱ ሚቴቱሳ ዶሜዲኖ። ሲሞኒ ጴፂሮሲካ ሃዋ ቤዔዳ ዎዴ ዬሱሳ ጉልባታን ኩንዲዴ፥ «ጎዳው፥ ታኒ ናጋራንቻ ኣሳ ጊዶ ዲራው ታፔ ሻኬታ» ያጌዳ። ሃዋ ጌዳዌ ኢኔ ኣናና ኢቲፔ ዴዒያዋንቱ ኡባይ ባሬንቱ ኦይቄዳ ሞሊያ ጮራቴꬃን ማላሌቴዲኖ። ሄዋዳንካ ቃይ ሲሞና ላጌꬃ ጊዴዳዋንቱ ዛቢዲዮሳ ናናቱ ያዪቆቢኔ ዮሃኒሲ ማላሌቴዲኖ። ዬሱሲካ ሲሞና፥ «ያዮፓ ሃዋፔ ጉዪያን ኣሳ ጲሪያዋ ጊዳናሳ» ጌዳ። ኡንቱንቱካ ዎንጊራቱዋ ሃꬃፔ ጋፃ ኬሲዴ፥ ኡባባ ኣጊዴ ዬሱሳ ካሌዲኖ። ዬሱሲ ካታማቱዋፔ ኢቱዋን ዴዒሺን ኦሉ ቦላ ኡባ ሜዳ ቢታኒ ዴዒያዌ ዬሱሳ ቤዒዴ ኣ ሲንꬃንካ ኩንዲዴ፥ «ጎዳው፥ ኔኒ ኮዮፔ ታና ፓꬃናው ዳንዳያ» ያጊዴ ዎሴዳ። ዬሱሲካ ባሬ ኩሺያ ዬዲ ቦቺዴ፥ «ዶሳይ ጌያ!» ጌዳ። ሄማንዒያንካ ኦሉ ኣ ዬዴዳ። ዬሱሲ ኣ፥ «ሃዋ ኦሲኔ ኦዶፓ። ሺን ቄሳኮ ባዴ ኔና ቤሳ። ሄዋፔ ጉዬ ኦሉዋ ሃርጊያፔ ፓፄዳዋሲ ማርካ ጊዳናዳን ሙሴ ሂጊያን ኣዛዜቴዳ ያርሹዋ ሺሻ» ጌዳ። ጊዶሺን ኣ ዋሪ ሎይꬂ ኣኪዴ ቤዳ፤ ዳሮ ጮራ ኣሳይካ ዬሱሲ ኦዲያዋ ሲሳናዉኔ ባሬንቱ ሃርጊያፔ ፓፃናው ሺቄዲኖ። ዬሱሲ ጮራ ዎዴ ጌማሳ ቢዴ ዎሴ። ኢቲ ጋላሲ ዬሱሲ ታማሪሲዴ ዴዒሺን ጋሊላፔኔ ዪሁዳ ሄራ ኡባፔ፥ ዬሩሳላሜ ዬዳ ፓሪሳዋቱኔ ሂጊያ ታማሪሲያዋንቱ ኡቲ ዴዒሺን ሃርጋንቻቱዋ ፓꬃና ማላ ፆሳ ኣዉዋ ዎልቃይ ኣው ኢሜቴዳ። ሄ ዎዴ ቦላይ ሲሌዳ ኢቲ ቢታኒያ ኣማሬዳ ኣሳይ ሻንቻማን ቶኪ ኣሂ ጎሌ ጌልሲዴ ዬሱሳ ሲንꬃን ዎꬃናው ኮዬዲኖ። ኣሳ ጮራቴꬃፔ ዴንዴዳዋን ዬሱሳኮ ሺቃናው ዳንዳዪ ቤይኪኖ። ሄዋ ዲራው ቦላው ጊዒ ጎሊያ ካራ ቃሪዴ ኣ፥ ሻንቻማና ኣሳ ጊዶን ዬሱሳ ሲንꬃን ዎꬄዲኖ። ዬሱሲካ ኡንቱንቱ ኣማኑዋ ቤዒዴ፥ «ሃ ቢታኔው፥ ኔ ናጋራይ ኣቶ ጌቴቴዳ» ያጌዳ። ሙሴ ሂጊያ ታማሪሲያዋንቱኔ ፓሪሳዋቱ፥ «ሃዌ ፆሳ ቦሪያዌ ኦኔ? ኢቲ ፆሳፔ ኣቲን ናጋራ ኣቶ ጋናው ኦኒ ዳንዳዪ?» ያጊ ቆፋ ዶሜዲኖ። ዬሱሲካ ኡንቱንቱ ቆፋ ኤሮ ዲራው ሃዋዳን ጌዳ፥ «ኣዪሲ ሂንቴንቱ ዎዛናን ሃዋዳን ቆፒቴ? ‹ኔ ናጋራይ ኣቶ ጌቴቴዳ› ጋናዋፔኔ ‹ዴንዳዴ ባ› ጋናዋፔ ሃቃዌ ማቴ? ዬዉዋን ቃሲ ሃዋ ታኒ ጌዳዌ፥ ኣሳ ናዓይ ቢታ ቦላን ናጋራ ማራናው ማታይ ዴዒያዋ ሂንቴንቱ ኤራናዳና።» ሄዋፔካ ጉንዴዳ ቢታኒያ፥ «ዴንዳ ኔ ሻንቻማ ቶካዴ ኔ ጎሌ ባ ጋይ» ያጌዳ። ጉንዳይካ ኣሳ ሲንꬃን ዴንዶዋሺን ባሬ ሻንቻማ ቶኪዴ ፆሳ ጋላቲዴ ባሬ ሶይ ቤዳ። ሃ ዎዴ ኡባቱካ ዳሪ ማላሌቴዲኖ፤ ፆሳካ ጋላቲዴ፥ «ሃቼ ማላባ ቤዔዶ» ያጊዴ ያሻን ኩሜዲኖ። ሄዋፔ ጉዪያን ዬሱሲ ኬሲዴ ቤዳ፤ ሌዊያ ጌቴቲያ ቃራፃ ሺሺያዌ፥ ቃራፃ ሺሺያሳን ኡቶዋ ቤዒዴ፥ «ታና ካላ» ጌዳ። ኢካ ዴንዲዴ ኡባባ ኣጊዴ ኣ ካሌዳ። ሄዋፔ ሲሚዴ ሌዊ ባሬ ጎሌን ዳሮ ሾቢያ ጊጊሴዳ፤ ጮራ ቃራፃ ሺሺያዋንቱኔ ሃራ ጮራ ኣሳይካ ኡንቱንቱና ኡቲዴ ሚዴዒኖ። ፓሪሳዋቱኔ ሂጊያ ታማሪሲያ፥ ኡንቱንቱና ኦꬂያዋንቱ፥ ዬሱሳ ካሊያዋንቱ ቦላን፥ «ኣዪሲ ቃራፃ ቃንፂያዋንቱናኔ ናጋራንቻቱዋና ሚቴኔ ኡሺቴ?» ያጊዴ ዙዙሜዲኖ። ዬሱሲካ፥ «ሃርጋንቻ ኣሳፔ ኣቲን ፓፃ ኣሳሲ ኣኪሚያ ኮሼና። ታኒ ዬዳዌ፥ ናጋራንቻቱ ባሬንቱ ናጋራ ፓፂዴ ሲማናዳናፔ ኣቲን፥ ፂላቱዋ ፄሳናው ያቤይኬ» ያጊ ዛሬዳ። ሃዋፔ ጉዪያን ዬሱሳ፥ «ዮሃኒሳ ካሊያዋንቱኔ ፓሪሳዋቱዋ ካሊያዋንቱ ኡባ ዎዴ ፆሚኖኔ ዎሲኖ፤ ሺን ኔና ካሊያዋንቱ ቃሲ ኡባ ጋላሲ ሚኖኔ ኡሺኖ» ያጊዴ ኦቼዲኖ። ዬሱሲካ፥ «ሚሺራይ ኡንቱንቱና ዴዒሺን ሚያታቱ ፆማናው ዳንዳዪኖ? ዬዉዋን ቃሲ ሚሺራይ ኡንቱንቱፔ ሻኬቲዴ ባና ዎዲ ያናዋ፤ ሄ ዎዴ ፆማናዋንታ» ያጊ ዛሬዳ። ዬሱሲካ ካሊያ ሌሚሱዋ ኦዴዳ፡ «ኦራꬃ ማዩዋፔ ፔꬊ ኣኪዴ ኤጫ ማዩዋ ቦላን ꬌፒያዌ ባዋ፤ ጋሱካ ሃዋዳ ኡዶፔ ኦራꬃ ማዩዋ ፔꬌ፤ ኦራꬃ ꬌፊካ ኤጫ ማዩዋን ጊጌና። ሃዋዳንካ ኤጬዳ ጪልጊያን ኦራꬃ ዎዪኒያ ኤሳ ዎꬂያዌ ባዋ፤ ዎꬆፔ ቃይ ኦራꬃ ዎዪኒያ ኤሳይ ጪልጊያ ꬉሴ፤ ኤሳይካ ጉኬ፤ ጪልጋዪካ ባዬ። ኦራꬃ ዎዪኒያ ኤሳ፥ ኦራꬃ ጪልጊያን ዎꬃናው ቤሴ። ኤጫ ዎዪኒያ ኤሳ ኡሺዴ ኦራꬃ ኮዪያዌ ኦኒኔ ባዋ፤ ጋሱካ ኤጫይ ማልዔ ጊያ ዲራው።» ሳምባታ ጋላሲ ዬሱሲ ባሬና ካሊያዋንቱና ኢቲፔ ኢቲ ጎሻ ጊዱዋና ኣꬊያ ዎዴ ኣ ካሊያዋንቱ ዛርጋፔ ቲሻ ዱꬂዴ ባሬንቱ ኩሺያን ሺጌቺዴ ሙሳ ዶሜዲኖ። ፓሪሳዋቱዋ ጊዶፔ፥ «ሳምባታ ጋላሳን ኦꬃናው ዎጋ ጊዴናዋ ኣያው ኦꬂቴ?» ያጌዲኖ። ዬሱሲ፥ «ካቲያ ዳዊቴኔ ኢቲፔ ዴዒያዋንቱ ኮሻቴዳ ዎዴ ኦꬄዳዋ ናባቢ ቤይኪቴ? ዳዊቴ ፆሳ ጎሊያ ጌሊዴ ቄሳቱዋፔ ኣቲን ሃራ ኣሳይ ሜናዳን ዲጌቴዳ፥ ፆሳው ያርሼቴዳ ቁማ ሜዳ። ኢቲፔ ዴዒያዋንቱካ ኢ ኢሚናዴ ሜዲኖ» ያጊ ዛሬዳ። ሃዋፔ ካሊዴ ዬሱሲ፥ «ኣሳ ናዓይ ሳምባታው ጎዳ!» ጌዳ። ሃራ ሳምባታ ጋላሳን ዬሱሲ ኣዪሁዳቱዋ ዎሲያ ጎሊያ ጌሊዴ ታማሪሲ ዴዔ። ሄዋንካ ኡሼቻ ኩሺ ሲሌዳ ቢታኒ ዴዔ። ሂጊያ ታማርሲያዋንቱኔ ፓሪሳዋቱ ዬሱሳ ሞቲያ ጋሱዋ ዴማናው ኢ ሳምባታን ኣሳ ፓꬆፔ ቤዓና ጊዴ ናጊ ዴዒኖ። ኢካ ኡንቱንቱ ቆፋ ኤሪዴ ኩሺ ሲሌዳ ቢታኒያ፥ «ዴንዳ ኣሳ ጊዱዋን ኤቃ» ያጌዳ። ቢታኒካ ዴንዲ ኤቄዳ። ሄዋፔ ሲሚዴ ዬሱሲ፥ «ሃኒንቶኔ ሳምባታ ጋላሳን ሎዖባ ኦꬃናው ቤሲዬ ኢታባ ኦꬃናው ቤሲ? ሼምፑዋ ኣሻናው ቤሲዬ ዎꬋናው ቤሲ?» ያጌዳ። ዬሱሲ ባሬ ዩሹዋን ዴዒያ ኣሳ ኡባ ፄሎዋፔ ጉዪያን ቢታኒያ፥ «ኔ ኩሺያ ሚጫ!» ያጌዳ። ኢካ ሚጪዴ ፓፄዳ። ኡንቱንቱ ሎይꬂ ሃንቄቲዴ ዬሱሳ ቦላ ኦꬃናዋ ባሬንቱ ጊዶን ማቄቴዲኖ። ሄ ዎዲያን ዬሱሲ ዴሪያ ቦላ ዎሳናው ኬሴዳ፤ ሄዋንካ ቃማ ኩሜንꬃ ፆሳኮ ዎሲዴ ኣቄዳ። ሳዓይ ዎንቶዋን ባሬና ካሊያዋንታ ፄሴዳ። ሄዋንቱፔካ ታማኔ ላዓቱዋ ዶሪዴ፥ «ኪቴቴዳዋንታ» ያጊዴ ሱንꬄዳ። ኡንቱንቱ ሱንꬃይካ፡ ጴፂሮሳ ጊዴ ኢ ሱንꬄዳ ሲሞና፥ ኣ ኢሻ ኢንዲራሳ፥ ያዪቆባ፥ ዮሃኒሳ፥ ፒሊጶሳኔ ባርታላሞሳ፥ ማቶሳ፥ ቶማሳ፥ ኢልፒዮሳ ናዓ ያዪቆባ፥ ባሬ ጋዴው ሴሌቲያ ሲሞና፥ ያዪቆባ ናዓ ዪሁዳኔ ዬሱሳ ኣꬂ ኢሜዳ ኣስቆርቱ ዪሁዳ። ዬሱሲካ ኡንቱንቱና ኢቲፔ ዴሪያፔ ዎꬊዴ ዴምባሳን ኤቄዳ። ኣ ካሊያዋንቱፔካ ጮራ ኣሳይ ሄዋን ዴዔ። ቃይካ ኣፔ ሲሳናዉኔ ባሬንቱ ሃርጊያፔ ፓፃናው ዪሁዳ ጋዲያፔ፥ ዬሩሳላሜ ካታማፔ፥ ኣባ ማታን ዴዒያ ፂሮሳፔኔ ሲዶናፔ ዬዳ ጮራ ኣሳይ ሄዋን ዴዒኖ። ሃ ኣሳይካ ኣ ሲሳናዉኔ ባሬንቱ ሃርጊያፔ ፓፃናው ዬዲኖ። ቱና ኣያናን ኦይቄቲዴ ሜቶቲያዋንቱካ ፓፄዲኖ። ዎልቃይ ኣፔ ኬሲዴ ኡባ ፓꬂያ ዲራው ኣሳይ ኡባይ ኣ ቦቻናው ኮዬ። ባሬና ካሊያዋንታ ፄሊዴ ያጌዳ፡ «ሂንቴንቱ ማንቃቱ ኣንጄቴዳዋንታ፤ ኣዪሲ ጎፔ፥ ፆሳ ካዉቴꬃይ ሂንቴንቱዋ። ሂንቴንቱ ሃዒ ኮሻቲያዋንቱ ኣንጄቴዳዋንታ፤ ጊዲኒ ካላኒታ፤ ሂንቴንቱ ሃዒ ዬኪያዋንቱ ኣንጄቴዳዋንታ፤ ጊዲኒ ሚጫኒታ። «ኣሳ ናዓ ዲራው ሂንቴንታ ኣሳይ ኢፂያ ዎዴኔ ቶቺያ ዎዴ፥ ሂንቴንቱ ሱንꬃካ ኢታን ዴንꬂያ ዎዴ፥ ኣንጄቴዲታ። ሳሉዋን ሂንቴንቱ ኣካና ዎይታይ ዳራ ጊዲያ ዲራው ሄ ጋላሲ ናሼቻን ጉፒቴ፤ ጋሱካ ካሴ ሂንቴንቱ ኣዎቱ ናባቱዋ ቦላን ሃዋዳን ኦꬂዴ ዴዔዲኖ። ዬዉዋን ቃሲ ዱሬ ኣሳቶ ሂንቴንቶ ኣዬ፤ ሂንቴንቱ ኢሻሎ ዴዑዋን ዴዔዲታ። ሂንቴንቶ ሃዒ ካሌዳዋንቶ ኣዬ፤ ጊዲኒ ኮሻታኒታ፤ ሂንቴንቶ ሃዒ ሚጪያዋንቶ ኣዬ፤ ጊዲኒ ካዮታኒታኔ ዬካኒታ። ኣሳይ ኡባይ ሂንቴንቱ ሎዖቴꬃባ ሃሳዪያ ዎዴ፥ ሂንቴንቶ ኣዬ፤ ካሴ ሂንቴንቱ ኣዎቱ ዎርዶ ናባቶ ሃዋዳን ኦꬄዲኖ። «ሺን ታኒ ኦዲያዋ ሲሲያዋንቶ ያጋይ፡ ሂንቴንቱ ሞርኬቱዋ ዶሲቴ፤ ሂንቴና ኢፂያዋንቶ፥ ሎዑዋ ኦꬂቴ፤ ሂንቴና ሼቂያዋንታ ኣንጂቴ፥ ሂንቴና ናቂያዋንቶ፥ ዎሲቴ። ኢቲ ባጋ ሻዪያ ባቂያዎ፥ ላዔꬁዋካ ቤሳ፤ ኦኒኔ ኔ ኮቲያ ኣኪያዎ፥ ኔ ሻሚጪያካ ዲጎፓ። «ኔው ዴዒያዋ ኔና ዎሲያዎ፥ ኢማ፤ ኔዋ ኣኬዳዋ፥ ዛራ ጋዴ ኦቾፓ። ኣሳይ ሂንቴንቶ ኦꬃና ማላ ሂንቴንቱ ዶሲያዋዳን፥ ሂንቴንቱካ ሃራው ሃዋዳን ኦꬂቴ። «ሂንቴንታ ዶሲያዋንታ ፃላላ ዶሶፔ ኣይ ጋላታይ ዴዒ? ሃዋ ጊዶፔ ናጋራንቻቱካ ባሬና ዶሲያዋንታ ዶሲኖ። ሂንቴንቶ ሎዖባ ኦꬂያዋንቱ ፃላላው ሂንቴንቱ ሎዖባ ኦꬆፔ ሄዎ ኣይ ጋላታይ ዴዒ? ናጋራንቻቱካ ሃዋዳን ኦꬂኖ። ታልዒዴ ሂንቴው ዛራናው ዳንዳዪያዋንቱ ፃላላው ታልዖፔ ኣይ ጋላታይ ዴዒ? ባሬ ታልዔዳዋ ዛሪዴ ኣካናው ናጋራንቻቱካ ባሬንቱ ጋርሳን ታልዔቲኖ። ሺን ሂንቴንቱ፥ ሂንቴንቱ ሞርኪያ ዶሲቴ፤ ኡንቱንቶካ ሎዖባ ኦꬂቴ፤ ሂንቴንቱፔ ታልዖዋ ዛሪዲ ኣካናው ቆፖፒቴ። ሃዋ ሂንቴንቱ ፖሎፔ ሂንቴንቶ ጋቲ ዳራናዋ። ቃሲ ሂንቴንቱ ኡባፔ ቦላ ፆሳ ናና ጊዳኒታ። ኢ ኢታቶኔ ጋላቴናዋንቶካ ኬካ። ሂንቴንቱ ኣቡ ማሪያዋ ጊዶዋዳን ሂንቴንቱካ ማሪያዋንታ ጊዲቴ። «ኦ ቦላንካ ፒርዶፒቴ፥ ሂንቴንቱ ቦላንካ ፒርዴቴና፤ ሃራ ቦላ ኩናኒያ ኦꬆፒቴ፤ ሂንቴንቱ ቦላንካ ኩናኒ ኦሴቴና። ኣቶ ጊቴ፤ ፆሳይ ሂንቴንቶ ኣቶ ጋና። ኢሚቴ፤ ሂንቴንቶ ኢሜታና። ሂንቴንቱ ማኬዳ ማካን ሂንቴንቶ ማኬታና። ባቂ ናቂና ሲሊ ኩሚ ፓላህ ላሌቲያ ማካ ሂንቴንቱ ኪዉዋን ኢዲንꬃና» ጌዳ። ቃሲካ ዬሱሲ ሃዋፔ ካሊያ ሌሚሱዋ ኦዴዳ፤ «ቆቃይ ቆቃ ካሌꬃናው ዳንዳዪ? ቆቃይ ቆቃ ካሌꬆፔ ላዓቱካ ኦይቄቲዴ ኦላን ኩንዲኪኖ? ታማሪያዌ ባሬና ታማሪሲያዋፔ ኣꬌና፤ ታማሪያዌ ሚኒ ታማሮፔ ባሬና ታማሪሶዋ ማላ ጊዳናው ዳንዳዬ። «ኔ ኣይፊያ ጊዶን ዴዒያ ቱሳ ኬሴናን ዴዓዴ ሃራ ኔ ላጊያ ኣይፊያ ጊዶን ዴዒያ ሱላ ኣያው ፄላይ? ኔ ኣይፊያ ጋርሳን ዴዒያ ቱሳ ቤዔናን ሃራ ኣሳኮ ሺቃዴ፥ ‹ታ ኢሻው፥ ኔ ኣይፊያ ጋርሳፔ ሱላ ታ ኬሶ?› ያጋናው ዎታ ዳንዳያይ? ሃ ሎዑዋ ማላቲያ ኢታው፥ ኮይሮታዴ ኔ ኣይፊያ ጊዶን ዴዒያ ቱሳ ኬሳ። ሄዋፔ ጉዪያን ኔ ኢሻ ኣይፊያ ጊዶን ዴዒያ ሱላ ኬሳናው ጌሻዴ ፄላናው ዳንዳያ። «ሎዖ ሚꬃይ ኢታ ኣይፊያ ኣይፌና፤ ሄዋዳንካ ኢታ ሚꬃይ ሎዖ ኣይፊያ ኣይፋናው ዳንዳዬና። ሚꬃይ ኡባይ ባሬ ኣይፊያ ኣይፊያዋን ኤሬቴ። ኣጉንꬃፔ ዎዴንꬃ ኣይፊ ማፄቴና፤ ሃዋዳንካ፥ ፁንዱቂያፔ ላዲያ ኣይፊያ ማፃናው ዳንዳዬቴና። ሎዖ ኣሳይ ባሬ ሎዖ ዎዛናፔ ሎዖ ዬዉዋ ሃሳዬ። ቃይ ኢታ ኣሳይ ባሬ ኢታ ዎዛናፔ ኢታ ዬዉዋ ሃሳዬ። ኣዪሲ ጎፔ፥ ኣሳይ ባሬ ዶናን ሃሳዪያዌ ባሬ ዎዛናን ኩሜዳዋ ዶናይ ሃሳዪያ ዲራሳ። «ታኒ ኦዶዋ ኦꬂኪታ፥ ሺን ኣያው ጎዳው፥ ጎዳው፥ ያጊዴ ታና ፄጊቴ? ታኮ ዪያ ኡባይ ታ ቃላካ ሲሲዴ ኦሱዋን ፔሺያዌ ኦና ማላቲንቶ ታ ሂንቴንታ ቤሳና፤ ኢካ ጎሊያ ኬፂዴ ዳሮ ኦላ ቦኪዴ ዛላ ቦላ ጊንቢዴ ኬፄዳ ኣሳ ማላቴ፤ ዲዑ ዲዒዴ ሄ ጎሊያ ሱጊናካ፥ ሚኖ ዛላ ቦላ ኬፄቶ ዲራው ቃꬃናው ዳንዳይቤና። ቃይ ታ ቃላ ሲሲዴ ኦሱዋን ፔሼና ኡራይ ባሱ ባንታሳ ሻፊያ ቦላን ጎሊያ ኬፄዳዋ ማላቴ። ዲዑ ዲዒዴ ሄ ጎሊያ ሱጎ ዎዴ ማንዒያንካ ኩንዴዳ፤ ሄ ጎሊካ ኢታ ዎዳ ዎዲዴ ባዬዳ» ያጌዳ። ዬሱሲካ ሃዋ ኡባ ኣሳ ሲንꬃን ሃሳይ ዉርሶዋፔ ጉዪያን ሂኒ ቂፊሪናሆማ ቤዳ። ሄዋንካ ኢቲ ፄቱዋ ካፑ ዴዔ። ኢ ዳሮፔ ዶሲያ ኣ ቆማይ ሃርጊዴ ሃያናው ማቴዳ። ኢካ ዬሱሳባ ሲሴዳ ዎዴ፥ ባሬ ቆማ ዎሲዴ ፓꬃና ማላ ዪሁዳ ጪማቱዋ ሂኒ ኣኮ ኪቴዳ። ኡንቱንቱካ ዬሱሳኮ ዪዴ፥ «ሃ ቢታኒ፥ ኔኒ ኣ ማዳናዳን ዳሮፔ ኮዬዳ፤ ጋሱካ ኑ ኣሳ ኢ ዳሮፔ ዶሲዴ ኣዪሁዳቱዋ ዎሲያ ጎሊያ ኬፂሶዌካ ኣ» ያጊዴ ዳሮፔ ዎሴዲኖ። ዬሱሲካ ኡንቱንቱና ኢቲፔ ቤዳ። ኢካ ሂኒ ጎሊያ ሄራ ጋኬዳ ዎዴ ፄቱዋ ካፑ ባሬ ላጌꬃቱዋ ባሬኮ ፄሲዴ፥ «ታ ጎዳው፥ ዳቡሮፓ፤ ኣዪሲ ጎፔ፥ ኔና ታ ጎሊያ ካራፔ ጋርሳ ባጋና ጌልሳናው ታው ቤሴና። ሃዋ ዲራው ኔ ሲንꬃን ኤቃናዉካ ሃራይ ኣቶ ቤሲያዋ ጊዲኬ። ሺን ኔኒ ቃላ ፃላላ ኦዳ፤ ታ ቆማይካ ፓፃናዋ። ታኒ ታፔ ቦላና ማታይ ዴዒያዋንቱሲ ኤኖ ጋዴ ዴዒያ ኣሳ። ታፔ ጋርሳናካ ታኒ ኪቲሲያ ዎታዳራቱ ዴዒኖ። ኢቱዋ፥ ‹ባ› ያጊያ ዎዴ፥ ቤ፤ ሃራካ ቃይ፥ ‹ሃያ› ጎፔ ዬ። ታ ቆማይካ፥ ሃዋ ‹ኦꬃ› ጊያ ዎዴ ኣዛዜቴ፤ ኦꬄ» ያጌዳ። ዬሱሲካ ሃዋ ሲሲዴ ኣ ዬዉዋን ማላሌቴዳ፤ ጉዬ ሲሚዴ ኣ ካሊያ ዳሮ ኣሳ፥ «ታኒ ሂንቴንቶ ቱሙዋ ጋይ፤ ታኒ ሃዋ ማላ ኣማኑዋ ሃራይ ኣቶ፥ ኢስራዔሊያ ጋርሳንካ ቤዓቤይኬ» ያጌዳ። ካሴ ኪቴቴዳ ኣሳቱካ ፄቱዋ ካፑዋ ጎሌ ጉዬ ሲሚያ ዎዴ፥ ኣ ቆማይ ፓፆዋ ቤዔዲኖ። ዎንቲሳ ጋላሲ ዬሱሲ ባሬና ካሊያዋንቱናኔ ጮራ ኣሳና ኢቲፔ ናይኖ ጌቴቲያ ካታማቶ ቤዲኖ። ዬሱሲ ካታማ ጋካና ማቶ ዎዴ፥ ኣሳይ ሃይቄዳ ኣኃ ቶኪዴ ኬሴዲኖ። ሃይቆዌካ ባሬ ዳዪው ሜፂ ኢቲ ናዓ፤ ኣታካ ኣሲናይ ባይና ኣምዓቶ። ዳሮ ካታማ ኣሳይካ ኢዞ ካሌዲኖ። ዬሱሲካ ኢዞ ቤዔዳ ዎዴ ቃሬቲዴ፥ «ዬኮፓ!» ያጌዳ። ሺቂዴ ሻንቻማ ቦቼዳ፤ ቶኮዋንቱካ ኤቄዲኖ። ዬሱሲ፥ «ኔኖ ያላጋው፥ ዴንዳ ጋይ!» ያጊና፥ ቢታኒ ሱሪ ኡቴዳ። ሃሳያካ ዶሜዳ። ዬሱሲካ ኣ፥ ኣ ዳዪው ኢሜዳ። ኡባይካ ያሻን ኩሚዴ፥ «ዎልቃማ ናቢ ኑ ጋርሳን ዴንዴዳ፤ ፆሳይካ ባሬ ኣሳ ኣሻናው ዬዳ!» ያጊዴ ፆሳ ጋላቴዲኖ። ሄዌኔካ ዬሱሳ ዋሪ ዪሁዳ ዩሹዋን ዴዒያ ጋዲያ ኡባን ሲሴቴዳ። ዮሃኒሳ ካሊያዋንቱ ሃኖዋ ኡባ ኣው ኦዴዲኖ። ዮሃኒሲካ ባሬና ካሊያዋንቱፔ ላዓቱዋ ፄሲዴ፥ «ያናዌ ኔኔዬ? ዎይ ኑኒ ሃራ ናጋኔ?» ያጊ፥ ኡንቱንቱ ኦቻና ማላ ሂኒ ዬሱሳኮ ኪቴዳ። ኣሳቱካ ዬሱሳኮ ዪዴ፥ «ፃማቂያ ዮሃኒሲ፥ ያና ጌቴቴዳዌ ኔኔዬ? ዎይ ሃራ ናጋኔ? ያጊዴ ኦቻና ማላ ኔኮ ኪቴዳ» ያጌዲኖ። ሄ ዎዲያን ዬሱሲ ጮራ ኣሳ ዱማ ዱማ ሃርጊያፔ ፓꬄዳ፤ ቱና ኣያናቱዋካ ኣሳፔ ኬሴዳ፤ ጮራ ቆቃቱዋ ኣይፊያ ዶዬዳ። ዬሱሲካ ዮሃኒሲ ኪቶዋንቶ፥ «ቢዴ ሂንቴንቱ ቤዔዳዋኔ ሲሴዳዋ ዮሃኒሳው ኦዲቴ፤ ቆቃቱ ፄላናዋንታ፤ ጉንዳቱ ሃሜታናዋንታ፤ ኦሉ ኦይቆዋንቱ ጌያናዋንታ፤ ቱሌዳዋንቱ ሲሳናዋንታ፤ ሃይቄዳዋንቱ ዴንዳናዋንታ፤ ሂዬሳቱዋሲካ ሚሺራቹዋ ቃላይ ኦዴታናዋ። ታናን ꬉቤቴና ኣሳይ ኡባይ ኣንጄቴዳዋንታ» ያጌዳ። ዮሃኒሲ ኪቴዳዋንቱ ቢዲጎዋፔ ጉዪያን ዬሱሲ ኣሳው ዮሃኒሳባ ኦዱዋ ዶሜዳ፡ «ኣያ ቤዓናው ቢታ ባዙዋ ኬሴዲቴ? ጫርኩ ቃꬂያ ኡሱንꬃ? ዎይ ኣያ ቤዓናው ኬሴዲቴ? ሎዖ ማዩዋ ማዬዳ ኣሳ ዴዑዋ? ሎዖ ማዩዋ ማዬዳዋንቱኔ ባሬና ጊጊሲያዋንቱ ካቲያ ጎሌን ዴዒኖ። ዎይ ኣያ ቤዓናው ኬሴዲቴ? ናቢያ ቤዓናው ኬሴዲቴ? ኤ፤ ታኒ ሂንቴንቶ ያጋይ፤ ሂንቴንቱ ቤዓናው ኬሶዌ ናቢያፔካ ኣꬉዋ። ፆሳ ማፃፋን፥ ‹ኔ ኦጊያ ኔፔ ሲንꬃና ጊጊሲያ ኪታንቻ ኔፔ ሲንꬃያዴ ኪታና› ጌቴቲ ዮሃኒሳባይ ፃፌቴዳዌ ሃዋ። ማጫዋንቱፔ ዬሌቴዳዋንቱ ጋርሳን ፃማቂያ ዮሃኒሳፔ ኣꬊያ ኦኒኔ ባዋ። ፆሳ ካዉቴꬃን ቃሲ ኡባፔ ላፋ ጌቴቲያዌካ ኣፔ ኣꬋናዋ» ያጌዳ። ሃራይ ኣቶሺን ቃራፃ ኬሲያዋንቱ ኣቴናን ሃዋ ዬሱሲ ሃሳዮዋ ሲሴዳ ኡባይ ዮሃኒሳ ኩሺያን ፃማቄቶዋንቱ ፆሳው ቤሲያ ቦንቹዋ ኢሜዲኖ። ሺን ሂጊያ ታማሪሲያዋንቱኔ ፓሪሳዋቱ ዮሃኒሳን ፃማቄቲቤና ዲራው፥ ፆሳይ ኡንቱንቶ ቆፔዳዋ ኢፄዲኖ። ዬሱሲ፥ «ሲሚ ታኒ ሃ ዎዲያ ኣሳ ኣያና ሌሚሶ? ኡንቱንቱ ኣያ ማላቲኖ? ኡንቱንቱ ጌያሳን ኡቲዴ ኢቱ ኢቱዋ ፄሲዴ፥ ‹ሱሱሊያ ሂንቴንቶ ፑኒናካ ካዒቤይኪታ፤ ዬኩዋ ዬꬃ ኬሴዶሺንካ ዬኪቤይኪታ ያጌቲያ ናና ማላቲኖ› ጌዳ። ፃማቂያ ዮሃኒሲ ቁማ ሜናን ዎዪኒያ ኤሳካ ኡሼናን ዪና፥ ‹ኣ ቦላን ጋሌናይ ዴዔ› ያጌዲታ። ታኒ ኣሳ ናዓይ ማዴኔ ኡሻዴ ዪና፥ ‹ሃዌ ናፊሳማ፤ ዎዪኒያ ኤሳካ ኡሺያዋ፤ ቃራፂያዋንቶኔ ናጋራንቻቶ ዳቡዋ› ያጊታ። ጊዶፔ ኣቲን ፆሳ ኣꬎ ኤራቴꬃይ ባሬ ኦሱዋን ቱማ ጊዲዴ ቤቴዳ» ያጌዳ። ፓሪሳዋቱዋፔ ኢቱ ባሬናና ቁማ ማና ማላ ሾቢና፥ ዬሱሲ ኣ ሶይ ቢዴ ማናው ኡቴዳ። ሄ ካታማን ናጋራንቻ ጌቴቴዳ ኢቲ ሚሺራታ ዴዔዉና፥ ዬሱሲ ኣ ሶዪን ኡቴዳዋ ሲሳዴ፥ ኣልባስፂሮሳ ጌቴቲያ ሹቻፔ ኦሴቴዳ ቢልቃሲያ ኩሜዳ ሺቱዋ ኣካ ያዱ። ጉዬና ኣ ጌዲያ ማታን ኤቃዴ፥ ዬካዴ ኣ ጌዲያካ ባሬ ኣፎꬃን ኦካ ዶማዱ፤ ኢዚ ኣፎꬃይ ባዪዜዳ ኣ ጌዲያካ ባሬ ሁጲያ ቢናናን ቁጫዴኔ ኣ ጌዲያ ዬራዴ ጌዲያን ሺቱዋካ ጫጫፋዱ። ዬሱሳ ባሬ ሶይ ፄሴዳ ፓሪሳዊካ ሃዋ ቤዒዴ፥ «ሃዌ ናቢያ ጊዴዴንቶ፥ ሃና ኣ ቦቺያ ሚሺራታ ኦኔንቶኔ ቃይካ ኢዛ ናጋራንቻ ጊዲያዋ ኢ ኤራናሺን» ያጌዳ። ዬሱሲካ ዛሪዴ፥ «ሲሞና፥ ታኒ ኔው ኦዲያ ዬዉ ዴዔ» ያጊና፥ ሲሞኒካ፥ «ታማሪሲያዎ፥ ኦዳ» ያጌዳ። ዬሱሲ፥ «ኢቲ ቢታኒያፔ ሚሻ ታልዔዳ ላዑ ኣሳቱ ዴዒኖ። ኢቱዋ ማታን ኢቼሹ ፄቱ ዲናሪ፥ ቃይ ዮኩዋ ማታን ኢሻታሙ ዴዔ። ላዓቶካ ጪጊያዌ ꬋዪና፥ ላዓቱዋ ኣጩዋካ ማሪ ኣጌዳ። ሃዋንቱፔ ሃቃዌ ሎይꬂ ዶሲያዋ ማላቲ?» ያጌዳ። ሲሞኒካ ዛሪዴ፥ «ዳሩዋ ኣጎዋ ማላቴ» ያጌዳ። ዬሱሲካ፥ «ቱሙዋ ዛራዳ» ያጌዳ። ዬሱሲ ሚሺራቲኮ ፄሊዴ፥ ሲሞና ሃዋዳን ያጌዳ፤ «ሃኖ ሚሺራቶ ቤዓዲ? ታኒ ኔ ጎሌ ዪና ሃራይ ኣቶሺን ሃꬃካ ታ ጌዴው ኢማቤይካ፤ ሺን ኢዛ ባሬ ኣፎꬃን ታጌዲያ ኢርፂሳዱ፤ ባሬ ሁጲያ ቢናናኒካ ቁጫዱ። ኔኒ ታና ዬራ ቤይካ፤ ሺን ኢዛ ታኒ ጌሎዴፔ ዶማዴ ታጌዲያ ዬሪያዋ ኣጋ ቤይኩ። ኔኒ ታ ሁጲያን ዛይቲያ ኦካ ቤይካ፤ ሺን ኢዛ ታ ጌዲያን ሺቱዋ ጫጫፋዱ። ሃዋ ዲራው ታ ሂንቴንቶ ኦዳይ፡ ዳሮፔ ኢዛ ዶሴዳዋ ዲራው፥ ዳሮ ናጋራይ ኢዚው ዴዒያዌ ማሬቴዳ፤ ጉꬃይ ማሬቲያዌ ጉꬃ ዶሴ» ያጌዳ። ዬሱሲ ሚሺራቶ፥ «ኔ ናጋራይ ቁጬቴዳ» ያጌዳ። ዬሱሳና ኢቲፔ ቁማ ማናው ኡቴዳዋንቱ ባሬንቱ ዎዛናን፥ «ናጋራ ማራናው ዳንዳዪያዌ ሃዌ ኦኔ?» ያጌዲኖ። ዬሱሲ ሚሺራቶ፥ «ኔ ኣማኑ ኔና ኣሼዳ፥ ሳሮቴꬃን ኔ ጎሌ ባ» ያጌዳ። ዬሱሲ ሃዋፔ ሲሚዴ፥ ሳባኪዲኔ ፆሳ ካዉቴꬃ ሚሺራቹዋ ቃላ ካታማኒኔ ሄራን ኦዲዴ ኣꬌዳ። ታማኔ ላዑ ዬሱሳ ካሊያዋንቱካ ኣናና ኢቲፔ ዴዒኖ። ኢታ ኣያናፔኔ ዎልቃማ ሃርጊያፔ ፓፄዳዋንቱ ኢቲ ኢቲ ማጫዋንቱካ ዴዒኖ። ሄዋንቱካ፡ ላፑ ፃላሂ ኬሴዳ ማግዳላ ጌቴቲያ ካታማፔ ዬዳ ማይራሞኔ፥ ሄሮዲሳ ጎሊያን ሱንꬃ ጊዴዳ ኩዛ ማቻቲ ዮሃኖ፥ ሶሲና ጌቴቴዉናኔ ሃራ ጮራቱዋና ኢቲፔ ጊዲዴ፥ ዬሱሳኔ ኣ ካሊያዋንታ ሚሻን ማዴዲኖ። ጮራ ኣሳይ ዳሮ ካታማቱዋፔ ሺቂዴ፥ ዬሱሳኮ ዬዳ ዎዲያን ሌሚሱዋን፥ «ዜሪያዌ ዜሬꬃ ዜራናው ኬሴዳ። ዜሪያ ዎዴ ኢቲ ኢቲ ዜሬꬃይ፥ ኦጊያ ዶናን ዎꬊዴ ዬꬌቴዳ። ያቲና ሳሉዋ ካፉ ሄዋ ሜዳ። ሃራይ ቃይ ዛላ ቦላ ዎꬊዴ ዶሌዳ ዎዴ ኮሺያ ሃꬃ ዴሜና ዲራው ሜሌዳ። ሃራ ዜሬꬃይ ኣጉንꬃ ጋርሳን ዎꬌዳ። ኣጉንꬃይ ኢቲፔ ዲጪዴ ሚቴዳ። ሃራይ ሎዒያ ቱዔ ቢታን ዎꬌዳ። ዶሎዋፔ ጉዪያን፥ ዜሬቶዋፔ ፄቱ ኩሺያ ዳኩዋ ሞኬዳ» ያጌዳ። ዬሱሲ ሃዋ ሃሳዪዴ፥ «ሃይꬃይ ዴዒያ ኡባይ ሲሶ» ያጊ ቃላ ꬎቁ ኡዲዴ ዋሴዳ። ኣ ካሊያዋንቱ፥ «ሃ ሌሚሱ ኣያ ጉሴ?» ያጊ ኣ ኦቼዲኖ። ኢካ ዛሪዴ፥ «ሂንቴንቶ ፆሳ ካዉቴꬃ ፁራ ኤራይ ኢሜቴዳ፤ ሺን ሃራቶ፥ ፄሊዲካ ኤሬና ማላ፥ ሲሲዲካ ኣኬኬና ማላ ሌሚሱዋን ኦዳይ» ያጌዳ። ዬሱሲ፥ «ዜሬꬃ ሌሚሱ ሃዋ፡ ዜሬꬃይ ፆሳ ቃላ። ኦጊያ ጋፃን ዎꬌዳ ዜሬꬃይ፥ ጉꬃ ዎዴው ቃላ ሲሲያ ኣሳ፤ ኤሌካ ፃላሂ ዪኔ፥ ኡንቱንቱ ሲሶዋን ኣማን ኣቴና ማላኔ ቃላይ ዎዛናፔ ዶጌታና ማላ ኦꬄ። ዛላ ቦላን ዎꬌዳ ዜሬꬃይ፥ ኮይሮ ቃላ ናሼቻን ሲሲያዋንታ። ሄዋንቱካ ጉꬃ ዎዲያ ኣማኒኔ ፓጪ ጋኪያ ዎዲያን ፃጱ ባንታ ዲራው ኤሌካ ኣማኑዋ ካዲኖ። ኣጉንꬃ ጋርሳን ዎꬌዳ ዜሬꬃይ፥ ቃላ ሲሲያዋንታ፤ ሺን ዴዑዋ ሂርጋይኔ ዱሬቴꬃ ኢሻሉ ጩሌዳዋንታ። ሄዋንቱ ሎዖ ኣይፊያ ኢማናው ዳንዳዪኪኖ። ሎዖ ቱዔ ቢታን ዎꬌዳ ዜሬꬃይ ቤሲያዌ፥ ሎዓኔ ፂሎ ዎዛናን ቃላ ሲሲዴ ናጊያ ኣሳኔ ሄ ቃላን ሚኒ ኤቂዴ ሎዖ ኣይፊያ ኣይፊያዋንታ። «ፆምፒያ ሳꬂዴ ኢቲባን ቁምዒ ኣጊያዌ ዎይ ኣርሳፔ ጋርሳና ዎꬂያዌ ኦኒኔ ባዋ። ቆንጬናን ቆሱዋን ኣቲያባይ ኢቲ ዬዉኔ ባዋ። ኤሬቴናኒኔ ቤቲያሳ ኬሴናን ኣታናባይ ኣይኔ ባዋ። ሄዋ ጊዲያ ዲራው ሎይꬂ ኣኬካን ሲሲቴ። ዎዛናፔ ሲሲያዎ ኡባው ጉጂ ኣኬካይ ኢሜታና፤ ኣኬኬናዋፔ ሄ ኣው ዴዒያዋ ማላቲያ ኣኬካይካ ኣኬታናዋ» ያጌዳ። ሄ ዎዲያን ኣታኔ ኢሻቱ ዬሱሳና ጋኬታናው ኣኮ ዬዲኖ፤ ሺን ኣሳ ጮራቴꬃፔ ዴንዶ ጋሱዋን ኣ ዴማናው ዳንዳይቤይኪኖ። ኢቲ ቢታኒ፥ «ኔ ዳያኔ ኔ ኢሻቱ ኔናና ጋኬታናው ኮዮ ዲራው ካሬን ዪዴ ኤቄዲኖ» ያጊ ኦዴዳ። ኢካ፥ « ታ ዳያኔ ታ ኢሻቱ፥ ፆሳ ቃላ ሲሲዴ ኦሱዋ ቦላን ፔሺያዋንታ» ያጊ ዛሬዳ። ኢቲ ጋላሲ ዬሱሲ ባሬና ካሊያዋንቱና ኢቲፔ ዎንጊሪያ ጌሊዴ፥ «ኣባፔ ሄፊንꬃ ቦይቴ» ጌዳ። ኡንቱንቱካ ዴንዲዴ ሃሜታ ዶሜዲኖ። ፒኒ ዴዒያ ዎዴ፥ ዬሱሲ ጌሚዒሼዳ። ኣባን ጎቱዋ ጫርኩ ዴንዶ ዲራው፥ ዎንጊሪያ ጋርሳን ሃꬃይ ኩሚና ዳሮ ሜቶቴዲኖ። ኡንቱንቱ ዬሱሳኮ ሺቂዴ፥ «ጎዳው፥ ጎዳው! ኑኒ ባዮይቴቴ!» ያጊዴ ኣ ቤጎꬄዲኖ። ኢካ ቤጎቲዴ ጎቱዋኔ ሃꬃ ቤታ ሴሪና፥ ጎቱኔ ሃꬃ ቤታይ ኤቄዳ፤ ኡባባይካ ጮዑ ጌዳ። ኢካ፥ «ሂንቴንቶ ኣማኑ ሃቃን ዴዒ?» ያጌዳ። ኡንቱንቱካ ያዪ ማላሌቲዴ ኢቱ ኢቱዋ፥ «ሃዋዳን ጫርኩኔ ሃꬃይ ጮዑ ጊቴ ጊና ኣዛዜቲያዌ ሃዌ ኦኔ?» ያጌቴዲኖ። ጋሊላ ኣባፔ ሄፊንꬃና ዴዒያ ጌርጌሴኖና ጌቴቲያ ጋዲያ፥ ዬሱሲኔ ኣ ካሊያዋንቱ፥ ዎንጊሪያን ፒኒዴ ጋኬዲኖ። ሄ ሃꬃፔ ፒኒ ሳዓ ዎꬎ ዎዴ፥ ኢታ ኣያናን ኦይቄቴዳ ኢቲ ቢታኒ፥ ካታማፔ ኬሲዴ ኣናና ጋኬቴዳ። ዳሮ ዎዲያፔ ዶሚዴ ማዩዋ ማዬናን ካሎ ጎሊያ ኣጊዴ ዱፉዋን ዴዔ። ዬሱሳ ዴሞዋፔ ጉዪያን፥ ዋሲ ኣ ሲንꬃን ጉፋኒዴ ዎልቃማ ኮሻን፥ «ዎልቃማ ፆሳ ናዓ ዬሱሳ፥ ታዉኔ ኔው ኣይቤ ኢቲፔቴꬃይ ዴዒ? ታና ዋዪሶፓሪኪ፤ ታ ኔና ዎሳይ» ያጌዳ። ኢ ሄዋ ኣዪሲ ጌዴ ጎፔ፥ ቢታኒያ ዬጊ ኬሳና ማላ ዬሱሲ ኣ ኣዛዞ ዲራሳ። ኢታ ኣያናይ ቢታኒያ ኦይቆዴፔ ዳሮ ዎዴ ጊዶ ዲራው፥ ቢራታ ሳንꬃላታን ጌዲያኔ ኩሺያ ቃሼቲዴ ናጌቴ። ሳንꬃላታ ዱꬂ ኣኪዴ ኢታ ኣያናይ ካሌꬂና ባዙዋ ቤ። ዬሱሲካ፥ «ኔ ሱንꬃይ ኦኔ?» ያጊ ኦቼዳ። ኢካ ጮራ ኢታ ኣያናይ ጌሊ ኡቶ ዲራው፥ «ሌጊዮና» ያጌዳ። ባሬንታ ዬሱሲ፥ «ሂኒ ጪሞ ኦላ ቢቴ» ያጌና ማላ ዎሴዲኖ። ሄዋን ዴዒያ ዞዚያ ጋፃን ሄሜቲያ ጮራ ጉዱንꬃቱ ዴዒኖ። ጮራ ቱና ኣያናቱ፥ ሄ ጉዱንꬃቱዋ ጋርሳ፥ «ጌሊቴ» ጋና ማላ ዬሱሳ ዎሴዲኖ። ኢካ፥ «ቢዴ ጌሊቴ» ጌዳ። ኢታ ኣያናቱካ ቢታኒያፔ ኬሲዴ ጉዱንꬃቱዋ ጋርሳ ጌሌዲኖ። ጉዱንꬃ ዉዲካ ላንቂያፔ ካጆቲዴ ኤሌካ ኣባን ሚቴቴዲኖ። ጉዱንꬃ ሄሚያዋንቱ ሃኖዋ ኡባ ቤዖ ዎዴ ሃራሳ ቢዴ፥ ሄ ካታማኒኔ ዩሹዋን ሃኖዋ ኦዴዲኖ። ኣዬ ሃኔዴንቶ ቤዓናው ኬሲዴ፥ ኣሳይ ዬሱሳኮ ዬዲኖ። ኢታ ኣያናይ ኬሴዳ ቢታኒ፥ ኣ ዎዛናይ ሲሚና ማዩዋ ማዪዴ ዬሱሳ ጌዲያ ማታን ኡቶዋ ቤዒዴ ያዬዲኖ። ኢታ ኣያናን ኦይቄቴዳ ቢታኒ ዎቲ ፓፄዴንቶ ቤዔዳ ኣሳይ፥ ሃራ ኣሳው ኦዴዲኖ። ጌርጌሴኖና ጋዲያኒኔ ሄ ሄራን ዴዒያ ኣሳይ ኡባይ ዳሪ ያዬዳ ዲራው፥ ዬሱሲ ባሬንቱ ማታፔ ባና ማላ ዎሴዲኖ። ኢካ ዎንጊሪያን ጌሊዴ ቤዳ። ኢታ ኣያናይ ኬሴዳ ቢታኒካ ዬሱሳና ባና ጊዴ፥ ኣ ዎሴዳ፤ ሺን ዬሱሲ፥ «ኔ ጎሌ ሲማዴ ፆሳይ ኔው ኦꬆ ዎልቃማባይ ኣዬንቶ ማርካታ» ያጊ ዬዴዳ። ዬሱሲ ሲሜዳ ዎዴ ኣሳይ ኡባይ ናጊ ዴዒያ ዲራው፥ ኣ ሞኪ ኣኬዲኖ። ሄ ዎዴ፥ ኣዪሁዴ ኣሳ ዎሳ ጎሌው ሱንꬃ ጊዴዳ ያዒሮሳ ያጌቲያ ቢታኒ ኣኮ ዬዳ። ኢካ ዬሱሳ ጌዲያ ሲንꬃን ኩንዲዴ፥ ባሬ ጎሌ ጌላና ማላ ዎሴዳ። ጋሶቴꬃይካ ታማኔ ላዑ ላይꬃይ ኩሜዳ ኣው ዴዒያ ኢቲ ናታ ሃይቃናው ማታ ኡቶ ዲራሳ። ዬሱሲ ቢያ ዎዴ ጮራ ኣሳይ ኣ ዩሹዋን ሱጌቲዴ ሜቶꬄዲኖ። ሄ ኣሳ ጊዶን ሄ ዎዲያን ታማኔ ላዑ ላይꬃ ኡባ ሱꬃይ ጎጊያ ሚሺራታ ዴዓው። ባሬ ዴዒያ ሻሉዋ ኡባ ꬋሊያ ኤሪያዋንቶ ዉርሲናካ ፓꬃናው ዳንዳዮዌ ኦኒኔ ባዋ። ጉዬና ያዴ ኣ ማዩዋ ማጫራ ቦቻዱ፤ ሄ ማንዒያንካ ኢፔ ጎጊያ ሱꬃይ ኤቂ ኣጌዳ። ዬሱሲ፥ «ኦኔ ታና ቦቾዌ?» ያጌዳ። ኡባይ ካዲና ጴፂሮሲ፥ «ጎዳው፥ ኣሳይ ሱጌቲዴ ሜቶꬂያ ዎዴ፥ ‹ኦኔ ታና ቦቾዌ› ያጋይ?» ጌዳ። ሺን ዬሱሲ፥ «ኢቲ ኣሳይ ታና ቦቼዳ፤ ዎልቃይካ ታፔ ኬሶዋ ታኒ ኤራይ» ያጌዳ። ሚሺራታካ፥ ዬሱሳ ኢዛ ቦቾዌ ኤሬቴናን ኣቲቤናዋ ኤራዴ፥ ኮኮራዴ ዮና ዬሱሳ ሲንꬃን ኩንዳ ኣጋዱ። ኣያ ጋሱዋን ዬሱሳ ቦቻዴንቶ ኢዛ ፓፆዋ ኡባ ኣሳ ሲንꬃን ኦዳዱ። ኢካ ኢዚው፥ «ሃ ሚሺራቴ! ኔ ኣማኑ ኔና ፓꬄዳ፤ ሳሮ ባ» ያጌዳ። ዬሱሲ ሃሳይ ዴዒሺን፥ ኣዪሁዳ ኣሳ ኣማኒያዋንቱ ሱንꬃ ሶዪፔ ኢቲ ቢታኒ ዬዳዌ፥ «ኔ ናታ ሃያዱ፤ ሲሚ ታማሪሲያዋ ሜቶꬆፓ» ያጌዳ። ዬሱሲ ሃዋ ሲሲዴ፥ «ያዒሮሳ፥ ኣማናፔ ኣቲን፥ ያዮፓ! ኢዛ ፓፃናዉኑ» ያጊ ዛሬዳ። ሶይ ጌሊዴ፡ ጴፂሮሳፔ፥ ያዪቆባፔ፥ ዮሃኒሳፔ፥ ናቲ ኣቡፔኔ ናቲ ዳዪፔ ኣቲን፥ ኦኒኔ ጌላናዳን ኤኖ ጊቤና። ኡባይ ሄ ናቲው ዬኪዴኔ ካዮቲዲ ዴዒኖ። ሺን ዬሱሲ፥ «ዬኮፒቴ፥ ጊሳዱፔ ኣቲን ሃያቤይኩ» ያጌዳ። ኢዛ ሃይቄዳዋ ኤሪዴ ኣ ቦላ ሚጬዲኖ። ጊዶፔ ኣቲን ዬሱሲ ኢዚ ኩሺያ ኦይቂዴ፥ «ሃ ናቴ፥ ቤጎታ!» ያጌዳ። ኢዚ ሼምፑካ ሲሚና ኤሌካ ዴንዳ ኤቂና ማናባ ኢማና ማላ፥ ዬሱሲ ኣዛዜዳ። ኢዚ ኣቡኔ ኢዚ ዳያ ማላሌቴዲኖ፤ ሺን ዬሱሲ ኡንቱንታ፥ ሃኖ ዬዉዋ ኦሲኔ ኦዴና ማላ ኣዛዜዳ። ዬሱሲ ታማኔ ላዑ ኣ ካሊያዋንታ ኢቲፔ ባሬኮ ፄሲዴ፥ ፃላሂያ ኡባ ኣሳፔ ኬሳናዉኔ ሃርጊያዋንታ ፓꬃና ማላ ዎልቃኔ ማታ ኢሜዳ። ፆሳ ካዉቴꬃባ ኦዳናዉኔ ሃርጋንቻቱዋ ፓꬃና ማላ ኡንቱንታ ኪቴዳ። ኢ ኡንቱንታ ኪቲዴ፥ «ኦጊያ ቢዴ፥ ፃምዓ ጊዲናካ፥ ዎይ ቃርጪቲያ፥ ዎይ ቁማ፥ ዎይ ሚሻ ጊዲናካ ኣያኔ ኦይቆፒቴ፤ ላዔꬂያ ማዩዋካ ኦይቆፒቴ። ሂንቴና ኣሳይ ሃቃን ሞኮፔኔ፥ ሄዋፔ ኬሳና ጋካናው፥ ሂንቴንቱ ጌሌዳ ጎሊያን ጋሚዒቴ። ሄ ካታማ ኣሳይ ሂንቴና ሞኬናን ኢፆፔ፥ ሄዋፔ ኬሲዴ፥ ኡንቱንቱ ሂንቴና ሞኬናን ኢፆዎ ማርካ ጊዳና ማላ፥ ሂንቴንቱ ጌዲያፔ ባና ሾጪ ዲጊዴ ቢቴ» ያጌዳ። ኣ ካሊያዋንቱ ቢዴ፥ ቄሪ ካታማ ኡባን ሚሺራቹዋ ቃላ ኦዲዴኔ ሃርጋንቻ ፓꬂዴ ዩዬዲኖ። ሃዒ ጋሊላ ቢታ ካቲያ ሄሮዲሴካ ሃኔዳ ዬዉዋ ሲሲዴ ያቲ ጌዳ። ጋሶቴꬃይኔካ ኢቲ ኢቲ ኣሳይ፥ «ዮሃኒሲ ሃይቁዋፔ ዴንዴዳ» ያጌ። ሃራ ኣሳይ፥ «ኤላሲ ኬሲዴ ቤቴዳ» ያጊያ ዎዴ፥ ሃራንቱ ቃሲ፥ «ቤኒ ናባቱዋፔ ኢቱ ሃይቁዋፔ ዴንዴዳ» ያጊኖ። ሄሮዲሴካ፥ «ታኒ ዮሃኒሳ ቆꬊያ ቃንፂሳ ዲጋዲሺን፥ ሃዋዳን ኣሳይ ሃሳዪያ ቢታኒ ኦኔ?» ያጊዴ፥ ዬሱሳ ቤዓናው ኮዬዳ። ዬሱሲ ኪቶዋንቱ ሲሚዴ፥ ኡንቱንቱ ኦꬄዳዋ ኡባባ ዬሱሳው ኦዴዲኖ። ኢካ ኡንቱንታ ኣኪዴ፥ ቤቴሳይዳ ያጌቲያ ካታማ ማታን ዴዒያ ታካሳ ቤዳ። ኣሳይ ኢ ዴዒያሳ ኤሪዴ ካሊና፥ ኡንቱንታ ሞኪ ኣኪዴ ፆሳ ካዉቴꬃባ ኦዴዳ፤ ሃርጊያፔ ፓፃናው ቤሲያዋንታካ ፓꬄዳ። ሳዓይ ኦማርሲያ ዎዴ፥ ዬሱሳ ካሊያ ታማኔ ላዓቱ ኣኮ ዪዴ፥ «ሃ ኣሳይ ኡባይ ኑ ዩሹዋን ዴዒያ ሄራ ጊዶኔ ቄሪ ካታማቱዋ ጊዶ ቢዴ፥ ኣቂያሳኔ ቁማ ዴማና ማላ ሞዪዛ፤ ኣያው ጎፔ ኑኒ ሃዋን ኣሳይ ባይናሳን ዴዔቶ» ያጌዲኖ። ሺን ዬሱሲ ኡንቱንታ፥ «ኣሳው ሜቴቲያባ ሂንቴንቱ ኢሚቴ» ያጌዳ። ኡንቱንቱ ዛሪዴ፥ «ኣኔ ቢዴ፥ ሃ ኡባ ኣሳው ቁማ ሻሜናን ꬋዮፔ ኑሲ ኢቼሹ ሶሉዋፔኔ ላዑ ሞሊያፔ ሃራይ ባዋ፤ ሄዋሲ ኑኒ ሃ ጮራ ኣሳው ቁማ ሻማና ማላ ኮያይ?» ያጌዲኖ። [ጋሱካ፥ ሄዋን ዴዒያ ኣሳይ ኢቼሹ ሻዓ ኬና] ዬሱሲ ባሬና ካሊያዋንታ፥ «ኢሻታሙ ኢሻታሙ ኣሳ ጪታን ጪታን ሻኪ ሻኪ ኡቲሲቴ» ያጌዳ። ኡንቱንቱካ ኢ ጎዋዳን ኡባ ኣሳካ ኡቲሴዲኖ። ዬሱሲካ ኢቼሹ ሶሉዋኔ ላዑ ሞሊያ ኦይቂዴ፥ ፑዴ ሳሉዋ ቦንጎቲ ፄሊዴ ፆሳ ጋላቴዳ፤ ዱꬂዴ፥ ኣሳው ጊሻና ማላ ኣ ካሊያዋንቶ ኢሜዳ። ኣሳይ ኡባይካ ሚዴ ካሌዲኖ። ኡንቱንቱፔ ኣቴዳ ዶካ፥ ታማኔ ላዑ ሳምፓ ኩሜዳዋ ዴንꬄዲኖ። ኢቲ ጋላሲ ዬሱሲ ባሬካ ዎሲያ ዎዴ፥ ኣ ካሊያዋንቱካ ኣናና ኢቲፔ ዴዒሺን፥ «ኣሳይ ታና ኦና ጊኖ?» ጊዴ ኡንቱንታ ኦቼዳ። ኡንቱንቱ ዛሪዴ፥ «ኣሳይ ኔና ፃማቂያ ዮሃኒሳ ያጌ፤ ሃራ ኣሳይ ቃሲ ኤላሳ ያጌ፤ ሃራይ ቃሲ ቤኒ ናባቱዋፔ ኢቱ ዴንዴዳ ያጌ» ያጌዲኖ። ዬሱሲ ኡንቱንታ፥ «ሂንቴሺ፥ ታና ኦና ጊቴ?» ያጌዳ። ጴፂሮሲካ ዛሪዴ፥ «ኔኒ ፆሳይ ኦኬዳ ኪሪስቶሳ» ያጌዳ። ዬሱሲካ ኡንቱንታ፥ «ሃዋ ኦሲኔ ኦዶፒቴ» ያጊ ሚኒሲ ኣዛዚዴ፥ «ታኒ፥ ኣሳ ናዓይ፥ ዳሮ ሜቱዋ ኣካናው ቤሴ፤ ጪማቱዋን፥ ቄሳቱዋ ካፓቱዋኒኔ ሙሴ ሂጊያ ታማሪሲያዋንቱን ኢፄታናው ኮሼ፤ ኡንቱንቱ ታና ዎꬋናዋንታ፤ ታኒካ ሄዜንꬆ ጋላሲ ሃይቁዋፔ ዴንዳናው ቤሴ» ያጌዳ። ዬሱሲካ ኣሳ ኡባ፥ «ታና ካላናው ዶሲያዌ ዴዖፔ፥ ባሬ ሁጲያ ካዶ፤ ባሬ ማስቃሊያ ጋላሳን ጋላሳን ቶኪዴ ታና ካሎ። ባሬ ሼምፑዋ ኣሻናው ዶሲያዌ ኡባይ ባዪዜ፤ ሺን ታ ዲራው ባሬ ሼምፑዋ ባዪዚያዌ ኡባይ ኣሼ። ኢቲ ኡራይ ሃ ኣላሚያባ ኡባ ኣሺዴ ባሬ ሼምፑዋ ባዪዞፔ ዎይ ባሬው ፓጪሶፔ፥ ኣያ ማዲ? ኣሳይ ታናኒኔ ታቃላን ዬላቶፔ፥ ታኒ ኣሳ ናዓይ፥ ታ ቦንቹዋናኔ ጌሻ ኪታንቻቱዋ ቦንቹዋና ዪያ ዎዴ ኣኒ ዬላታናዋ። ታኒ ሂንቴንቶ ቱሙዋ ያጋይ፤ ሃዋን ዴዒያ ኣሳፔ፥ ፆሳ ካዉቴꬃ ቤዓና ጋካናው ሃይቁዋ ሃይቄናዋንቱ ኢቱ ኢቱ ዴዒኖ» ያጌዳ። ዬሱሲ ሃዋ ጎዋፔ ጉዪያን፥ ኢቲ ሳሚንታ ኬና ጋሚዒዴ፥ ጴፂሮሳኔ ዮሃኒሳ፥ ያዪቆባካ ኣኪዴ፥ ዎሳናው ዴሪያ ሁጲያ ኬሴዳ። ኢ ዎሲሺን፥ ኣ ዴሙዋ ማላይ ላሜቴዳ፤ ኣ ማዩካ ቦፂዴ ጶልቄዳ። ቆፔናን ላዑ ኣሳቱ፥ ሙሴኔ ኤላስ ኬሲ ቤቲዴ፥ ዬሱሳና ሃሳይ ዴዒኖ። ኡንቱንቱ ቦንቹዋን ቆንጪ ቤቲዴ፥ ዬሱሲ ፆሳ ቆፋ ፖላናው ዬሩሳላሜን ሃይቃናዋ ኣናና ሃሳዬዲኖ። ጴፂሮሳኔ ኣናና ኢቲፔ ዴዒያዋንታ ጌሚዒሹ ጌሮዬዳሺን፥ ኤሌካ ቤጎቲዴ ኣ ቦንቹዋኔ ኣናና ጋꬆ ኤቄዳ ላዑ ኣሳቱዋ ቤዔዲኖ። ሄ ላዑ ኣሳቱ፥ ዬሱሳ ሚዪያፔ ሻኬቲያ ዎዴ፥ ጴፂሮሲ ዬሱሳ፥ «ጎዳው፥ ሃዋን ዴዒያዌ ኑሲ ሎዓ ጊዲያ ዲራው፥ ሄዙ ዳሲያ ኢቱዋ ኔው፥ ኢቱዋ ሙሴው፥ ኢቱዋ ኤላሳው ኬፃና» ያጌዳ። ጴፂሮሲ ሄዋ ሃሳይ ዴዒሺን፥ ሻሪ ዪዴ ኡንቱንታ ካሚ ኣጊና ዬሱሳ ካሊያዋንቱ ያዬዲኖ። ሻሪያፔካ፥ «ታኒ ዶሬዳ ታ ናዓይ ሃዋ፤ ኢ ጊያዋ ሲሲቴ» ያጊያ ቃላይ ዬዳ። ቃላይ ሲሴቶዋፔ ጉዪያን፥ ዬሱሲ ባሬ ፃላላ ጊዲዴ ቤቴዳ፤ ኡንቱንቱካ ዬዉዋ ባሬንቱ ዎዛናን ኦይቂዴ ሄ ዎዲያን ኦኒኔካ ኣያኔ ኦዲቤና። ዎንቴꬃ ጋላሲ፥ ዬሱሲኔ ሄዙ ኣ ካሊያዋንቱ ዴሪያፔ ዱጌ ዎꬊያ ዎዴ፥ ጮራ ኣሳይ ዬሱሳና ጋኬቴዳ። ሄ ዎዴ ኣሳፔ ኢቲ ቢታኒ ባሬ ኮሻ ꬎቁ ኦꬂዴ፥ «ታማሪሲያዎ፥ ታው ዴዒያዌ ኢቲ ናዓ ጊዶ ዲራው፥ ኔኒ ኣ ቤዓና ማላ ኔና ዎሳይ፤ ቃሲ ኢታ ኣያናይ ዎዛና ኣꬄናን ዴንዲዴ ኣ ዋሲሴ፤ ዶናና ፓሮያና ጋካናው ኣ ኮኮርሲዴ፥ ኡባ ጋላሲ ሜቶꬂያዋፔ ኣቲን፥ ኣ ኤሌ ዬዴና። ኔና ካሊያዋንቱ ሄ ኢታ ኣያና ኬሳና ማላ፥ ታኒ ኡንቱንታ ዎሳዲ፤ ሺን ዳንዳይቤይኪኖ» ያጌዳ። ዬሱሲ ዛሪዴ ኡንቱንታ፥ «ኣማኔና ሃ ዎዲያ ዴሻ ኣሳው፥ ታኒ ሂንቴናና ኣዉዴ ጋካናው ዴዓኔ? ቃሲ ሂንቴንቱባ ኣዉዴ ጋካናው ዳንዳያኔ? ኔ ናዓ ሃ ኣካያ» ያጌዳ። ናዓይ ዪዴ ዴዒሺን፥ ኢታ ኣያናይ ኣ ሳዓን ኦሊዴ ኮኮርሴዳ፤ ዬሱሲ ኢታ ኣያና ኣጋ ጊ ናዓ ፓꬂዴ ኣ ኣቦ ዛሪዴ ኢሜዳ። ኣሳይ ኡባይካ ፆሳ ዎልቃማ ዎልቃፔ ዴንዶዋን ማላሌቴዲኖ። «ታና ኣሳ ናዓ፥ ኣሳይ ኣሳ ኩሺያን ኣꬂዴ ኢማናዋ፤ ሂንቴንቱ ሃ ዬዉዋ ዶጎፒቴ» ያጌዳ። ሺን ኢ ጊያዋ ኡንቱንቱ ኣኬኪቤይኪኖ። ኡንቱንቶ ጌሌና ማላ ኡንቱንቱፔ ጌሜዳ ዲራው፥ ሃ ዬዉዋ ዬሱሳ ኦቻናው ያዬዲኖ። ኣ ካሊያዋንቱ፥ «ኑ ጊዶፔ ዳሪያዌ ኦኔ?» ያጊዴ ፓሉሜቴዲኖ። ዬሱሲ ኡንቱንቱ ዎዛና ቆፋ ኤሪዴ፥ ጉꬃ ናዓ ኣሂዴ፥ ባሬ ማታን ኤሲዴ፥ «ሃ ጉꬃ ናዓ ታ ሱንꬃን ሞኪያዌ ኦኒኔ ታና ሞኬዳ፤ ቃሲ ታና ሞኪያ ኡባይ፥ ታና ኪቴዳ ታ ኣባ ሞኬ። ሂንቴንቱ ኡባፔ ጉፂያዌ ኡባፔ ዳራ» ያጌዳ። ዮሃኒሲካ ዛሪዴ፥ «ጎዳው፥ ኢቲ ኣሳይ ኔ ሱንꬃን ኢታ ኣያናቱዋ ኬሲያዋ ኑኒ ቤዒዴ፥ ኑ ባጋ ጊዴና ዲራው፥ ኣ ዲጌዶ» ያጌዳ። ሺን ዬሱሲ ኣ፥ «ሂንቴንቱ ጊያዋ ጳልቄናዌ ሂንቴንቱ ባጋ ጊዲያ ዲራው፥ ኣ ዲጎፒቴ» ያጌዳ። ዬሱሲ ሳሉዋ ቢያ ዎዲ ማቲና፥ ባሬ ዎዛና ቆፋ ዬሩሳላሜኮ ዛሬዳ። ባሬፔ ሲንꬃው ኡባ ዬዉዋ ጊጊሳና ማላ፥ ኪቴቲያ ኣሳ ሳማሪያ ካታማ ኪቴዳ። ሺን ኢ ዬሩሳላሜ ባናው ዴንዴዳ ዲራው፥ ኣሳይ ኣ ሞኪቤይኪኖ። ኣ ካሊያዋንቱ ያዪቆቢኔ ዮሃኒሲ ሄዋ ቤዒዴ፥ «ጎዳው፥ ኑኒ ኤላሲ ኡዶዋዳን፥ ታማይ ሳሉዋፔ ዪዴ ኡንቱንታ ማናዳን ፄሳና ማላ ኮያይ?» ያጌዲኖ። ሺን ዬሱሲ ጉዬ ሲሚዴ፥ ኡንቱንታ ሴሬዳ። «ታኒ፥ ኣሳ ናዓይ፥ ኣሳ ሼምፑዋ ኣሻናው ዮዋፔ ኣቲን፥ ባዪዛናው ያቤይኬ» ያጌዳ። ኡንቱንቱ ሃራሳን ዴዒያ ቄሪ ካታማ ቤዲኖ። ኡንቱንቱ ኦጊያና ቢሺን፥ ኢቲ ቢታኒ ዬሱሳ፥ «ጎዳው፥ ኔኒ ቢያሳ ኡባ ታኒ ኔና ካላና» ያጌዳ። ዬሱሲ ኣ፥ «ዎራካናቶ ኦላይ፥ ሳሉዋ ካፋቶካ ጎሊ ዴዔ፤ ሺን ታኒ፥ ኣሳ ናዓይ፥ ጌላ ሼምፓ ኣኪያሳይ ታው ባዋ» ያጌዳ። ዬሱሲ ሃራ ኡራ፥ «ታና ካላ» ያጌዳ። ሺን፥ ቢታኒ፥ «ጎዳው፥ ታኒ ካሲያን ባዴ ታ ኣባ ሞጋና» ያጌዳ። ዬሱሲ፥ «ሃይቆዋንታ ባሬንቱ ሃይቆዋንቱ ሞጊኖ፤ ኔኒ ባዴ፥ ፆሳ ካዉቴꬃባ ኦዳ» ያጌዳ። ቃሲ ሃራ ቢታኒ፥ «ጎዳው፥ ታኒ ኔና ካላና፤ ሺን ኮይሩዋን ታ ሶይ ኣሳ ባዴ ሳሮታና» ያጌዳ። ሺን ዬሱሲ ኣ፥ «ቦራ ጎሻናው ዶሞዌ ኦኒኔ ጉዬ ፄሎፔ ፆሳ ካዉቴꬃው ቤሴና» ያጌዳ። ሃዋፔ ካላ ጎዳይ ሃራ ላፑን ታሙ ኣሳ ሱንꬂዴ ላዑዋ ላዑዋ ኡዲዴ ኢ ባናው ዴዒያ ካታማ ኡባ ኪቴዳ። ዬሱሲ ኡንቱንታ፥ «ቆይቻው ጋኬዳ ካꬃይ ዳራ፤ ኪቴቲያ ኣሳይ ጉꬃ። ሲሚ ቆይጬቲያ ካꬃ ጎዳይ፥ ቆይቻው ኪቴቲያዋንታ ዬዳና ማላ ዎሲቴ። ታኒ ዶርሳቱዋዳን ዋላቱዋ ጊዶ ሂንቴና ኪታይ፥ ቢቴ። ሂንቴንቱ ኦጌው ኣያኔ ኦይቆፒቴ፡ ቦርሳ፥ ቃርጪቲያ፥ ጫማ፥ ጊዲናካ ኦይቆፒቴ፤ ኣሳና ሳሮቴቲዴ ኦጊያን ዎዲያ ዉርሶፒቴ። «ሂንቴንቱ ጌሊያ ጎሌ ኡባ ካሲያን፥ ‹ሳሮቴꬃይ ሃ ጎሌው ጊዶ› ያጊቴ። ሄ ጎሊያን ሳሮቴꬃ ዶሲያ ኣሳይ ዴዖፔ፥ ሂንቴንቱ ሳሮታይ ሄ ጎሊያን ኣቃናዋ፤ ኮዬናዋ ጊዶፔ፥ ሂንቴንቱ ሳሮታይ ሂንቴንቶ ሲማናዋ። ሄ ጎሊያን ኡንቱንቶ ዴዒያዋፔ ሚዲኔ ኡሺዴ ዴዒሺቴ፤ ኦሳንቻው ኣ ዲርጉዋ ጪጋይ ኮሼ፤ ኢቲ ጎሊያፔ ሃራ ጎሊያ ዩዮፒቴ። «ኣይ ካታማኔ ሂንቴንቱ ጌሊያ ዎዴ፥ ኣሳይ ሂንቴና ሞኪ ኣኪዴ ሚዛናው ሺሾዋ ኣያኔ ሚቴ። ሄ ካታማቲን ዴዒያ ሃርጋንቻቱዋ ፓꬂዴ ኣሳው፥ ‹ፆሳ ካዉቴꬃይ ሂንቴኮ ማቴዳ› ያጊዴ ኦዲቴ። ዬዉዋን ቃሲ ኣይ ካታማኔ ጌሎዴ፥ ኣሳይ ሂንቴንታ ሞኪ ኣኬናዋንታ ጊዶፔ ሄ ካታማ ቃꬋኮ ኬሲኔ፥ ‹ኑኒ ሂንቴና ዬላያናው፥ ሃራይ ኣቶ ኑ ጌዲያ ቦላን ዴዒያ ሂንቴንቱ ካታማ ባናካ ሂንቴንቶ ቆቆፌቶ ፤ ዬዉዋን ቃሲ፥ ፆሳ ካዉቴꬃይ ሂንቴንቱኮ ማቴዳዋ ኤሪቴ› ያጊቴ። ፒርዳ ጋላሲ ሃ ካታማቲፔ ሶዶማ ካታማ ጋኬዳ ሙራይ ካዉሻናዋ ያጋዴ ታኒ ሂንቴው ኦዳይ። «ኣዬ ኔው ኮራዚኔ፤ ኣዬ ኔው ቤቴሳይዴ፤ ሂንቴንቱን ሃኔዳ ማላታቱ ፂሮሳ ካታማኒኔ ሲዶና ካታማን ሃኔዴንቶ፥ ሄዋን ዴዒያ ኣሳቱ ካዩዋ ማዩዋ ማዪዴ፥ ቢዲንꬃ ቦላን ኡቲዴ፥ ቤኒፔ ባሬንቱ ናጋራፔ ሲማናዋንታሺን። ሃዋ ዲራው፥ ሙሬቲያ ጋላሲ ሂንቴንቱፔ ኣꬂዴ ፂሮሳ ካታማዉኔ ሲዶና ካታማው ሙራይ ካዉሻናዋ። ሃኔ ቂፊሪናሆሜ፥ ኔኒ ሳሉዋ ፑዴ ꬎቁ ጋናው ኮያዲ? ዱጌ ሲዖሊያ ዎꬋናሳ። «ሂንቴንቱ ጊያዋ ሲሲያ ኣሳይ፥ ታኒ ጊያዋ ሲሴ፤ ሂንቴንታ ኢፂያ ኡራይ ታና ኢፄ፤ ታና ኢፂያ ኡራይ ታና ኪቴዳዋካ ኢፄ» ያጌዳ። ላፑን ታሙ ኣሳቱካ፥ «ጎዳው፥ ኢታ ኣያናቱካ ኔ ሱንꬃን ኑሲ ኣዛዜቴዲኖ» ያጊዴ ናሼቻን ሲሜዲኖ። ዬሱሲካ ኡንቱንቶ፥ «ሴፃናይ ዋልቃንꬃዳን ሳሉዋፔ ዎꬊሺን ቤዓዲ። ሲሚ ሾሻኔ ሶጉዋ ዬꬋናዳን ሂንቴንቱ ሞርኪያ ፃላሂያ ዎልቃ ፆናና ማላ ማታ ኢማዲ። ሂንቴንታ ቆሃናዌ ኣይኔካ ዴዔና። ጊዶፔ ኣቲን ሂንቴንቱ ሱንꬃይ ሳሉዋ ማዚጎቢያን ፃፌቶ ዲራው፥ ናሼቲቴፔ ኣቲን ኢታ ኣያናቱ ኣዛዜቶ ዲራው ናሼቶፒቴ» ያጌዳ። ሄ ዎዲያን ዬሱሲ ኣያና ጌሻን ዳሮ ናሼቲዴ፥ «ሳሉዋኔ ሳዓ ጎዳው፥ ኔኒ ሃ ዬዉዋ ታማሮዋንቱፔኔ ኣꬎ ኤራንቻቱዋፔ ጌንꬃዴ፥ ቄሪ ናናው ቆንጪሶ ዲራው፥ ኔና ጋላታይ፤ ኤ፥ ታ ኣቦ፥ ኣዪሲ ጎፔ፥ ሃዋ ኦꬃናው ኔ ሎዖ ሼኔ ጊዴዳ። «ኡባ ዬዉ ታው ታ ኣቡፔ ኢሜቴዳ። ናዓይ ኦኔንቶ ኣዉዋፔ ኣቲሺን ኦኒኔ ኤሪያዌ ባዋ፤ ሄዋዳንካ ኣዉ ኦኔንቶ ናዓፔኔ ኢ ቆንጪሳናው ኮዮ ኡራፔ ኣቲን፥ ሃራይ ኦኒኔ ኤሪያዌ ባዋ» ያጌዳ። ካሊዴካ ዬሱሲ ባሬና ካሊያዋንቱኮ ሲሚ ዎꬊዴ፥ ኡንቱንቱ ፃላላ፥ «ሂንቴንቱ ቤዒያዋ ፄሊያ ኣይፋቱ ኣንጄቴዳዋንታ። ታ ሂንቴው ኦዲያዌ ኣዬ ጎፔ፥ ጮራ ናባቱኔ ካታቱ ሂንቴንቱ ቤዒያዋ ቤዓናው ኣሞቴዲኖሺን ቤዒቤይኪኖ፤ ሂንቴንቱ ሲሲያዋካ ሲሳናው ኣሞቴዲኖ፤ ሺን ሲሲቤይኪኖ» ያጌዳ። ኢቲ ጋላሲ ሂጊያ ኤሪያዌ ኢቱ ዬሱሳ ፓጫናው ኣኮ ዪዴ፥ «ታማሪሲያዎ፥ ሜꬊና ዴዑዋ ላታናው፥ ታኒ ኣያ ኡዶ?» ያጊ ኦቼዳ። ዬሱሲ ዛሪዴ፥ «ሙሴ ሂጊያ ማፃፋን ፃፌቶዌ ኣዬ? ኔኒ ኣያ ጋዴ ቢላይ?» ያጌዳ። ቢታኒካ፥ «ሙሴ ሂጊያ ማፃፋይ፥ ‹ፆሳ ኔ ጎዳ ፖሎ ኔ ዎዛናፔ፥ ፖሎ ኔ ሼምፑዋፔ፥ ፖሎ ኔ ዎልቃፔኔ ፖሎ ኔ ቆፋፔ ሲቃ፤ ሄዋዳንካ ኔ ላጌꬃካ ኔ ሁጲያዳን ዶሳ› ጌ» ያጌዳ። ዬሱሲ ኣ፥ «ሊኬ፥ ቱሙዋ ጋዳ፤ ሲሚ ኔኒካ ሃዋ ኦꬃ፤ ዴዑዋን ዴዓናሳ» ያጌዳ። ሙሴ ሂጊያ ታማሪሲያ ቢታኒ ቃይ ባሬና ፂሎ ኦꬃናው ኮዪዴ ዬሱሳ፥ «ሃኖሺን፥ ታ ላጌꬃይ ኦኔ?» ያጊዴ ኦቼዳ። ዬሱሲ ዛሪዴ፥ «ኢቲ ቢታኒ ዬሩሳላሜፔ ኢያርኮ ቢዴ ዴዒሺን፥ ኦጊያ ቦላን ፓናቱ ኣ ዴሚዴ፥ ኣ ማዩዋ ቃሮዋፔ ጉዬ ሾጪዴ፥ ሃይቃናው ፖሉ ጎዴ ኦሊዴ ቤዲኖ። ቆፔናን ኢቲ ቄሳይ ሄ ኦጊያና ቢዴዒያዌ፥ ሾጬቲዴ ኩንዴዳ ቢታኒያ ቤዔዳ ዎዴ፥ ኣያኔ ኡዴናን ሚዪያና ኣꬊዴ ቤዳ። ሄዋዳንካ ኢቲ ሌዊ ሄ ኦጊያና ቢዴዔ። ኢካ ቢታኒያ ቤዒዴ፥ ሚዬቲ ኣꬌዳ። ሺን ሳማሪያ ኣሳ ጊዴዳ ኢቲ ቢታኒ፥ ሄ ባጋና ኣꬊዴ፥ ሃ ቢታኒያኮ ዬዳ። ኣ ቤዔዳ ዎዴ ኣው ቃሬቴዳ። ኣኮካ ሺቂዴ፥ ዛይቲያኔ ዎዪኒያ ኤሳ ኣ ማይꬃን ቲጊዴ፥ ቃቼዳ። ሄዋፔ ጉዬ ባሬ ሃሪያ ቶጊሲዴ፥ ኢማꬃይ ኣቂያ ጎሊያ ኣኪ ቤዳ፤ ሄዋን ቢꬋዪዴ ናጌዳ። ዎንቴꬃ ጋላሲ ጉꬃ ቢራ ባሬ ኪሲያፔ ኬሲዴ፥ ኢማꬃይ ኣቂያ ጎሊያ ጎዳው ኢሚዴ፥ ‹ሃ ቢታኒያ ታው ሎይꬃ ቢꬋያ፤ ሃዋፔ ዳሩዋ ኔኒ ኬሶፔካ፥ ታኒ ሲሚያ ዎዴ ኔው ጪጋና› ያጌዳ። «ሲሚ ሃ ሄዙ ኣሳቱዋፔ፥ ፓናቱዋ ኩሺያን ሾጬቲዴ ኩንዴዳ ቢታኔው፥ ላጌ ጊዴዳዌ ሃቃዋ ማላቲ?» ያጌዳ። ሂጊያ ታማሪሲያዌካ፥ «ሄ ኣው ቃሬቶዋ» ያጌዳ። ዬሱሲካ ኣ፥ «ሲሚ ባዴ ኔኒካ ሄዋዳን ኦꬃ» ያጌዳ። ዬሱሲ ባሬና ካሊያዋንቱና ኦጊያ ቢዴ፥ ኢቲ ሄራ ጋርሳ ጋኬዳ። ሄዋን ማርቶ ጌቴቲያ ኢቲ ሚሺራታ ባሬ ጎሌን ሞካዱ። ኢዚዉካ ማይራሞ ጌቴቲያ ሚቻታ ዴዓው፤ ሄናካ ዬሱሳ ጌዲያ ማታን ኡታዴ፥ ኢ ኦዲያዋ ሃይዛዴ ዴዓው። ማርታ ቃይ ሶይባ ጊጊሳዴ ዳቡራ ዴዓው፤ ሄዋ ዲራው ዬሱሳኮ ሺቃዴ፥ «ሃና ታ ሚቻታ፥ ኪታ ኡባ ታ ቦላ ኦሊና፥ ታኒ ታሬካ ላባኖዴ ፄላዴ ጮዑ ጋይ? ሃያና ታና ማዳናዳን ኢዚው ኦዳ» ያጋዱ። ዬሱሲካ ዛሪዴ ኢዞ፥ «ማርቴ፥ ማርቴ፥ ኔኒ ጮራ ዬዉዋ ቆፓዴ ሂርጋ፤ ቃሲካ ሜቶታ። ሺን ኮሺያዌ ኢቲባ፤ ማይራማ ባሬፔ ኦኒኔ ኣኬና ሎዖባ ዶራዱ» ያጌዳ። ኢቲ ጋላሲ ዬሱሲ ኢቲሳን ዎሳ ዎሲ ዴዔ። ዎሳ ዉርሶዋፔ ጉዬ ኣ ካሊያዋንቱፔ ኢቱ፥ «ጎዳው! ዮሃኒሲ ባሬና ካሊያዋንታ ዎሳ ታማሪሶዋዳን፥ ኑናካ ኔኒ ዋጊ ዎሳኔንቶ ታማሪሳ» ያጌዳ። ኢካ ኡንቱንታ፥ «ፆሳ ዎሲዴ ያጊ ዎሲቴ፡ ‹ሳሉዋን ዴዒያ ኑ ኣቦ፥ ኔ ሱንꬃይ ኣንጄቶ፤ ኔ ካዉቴꬃይ ዮ፤ ኔ ሼኒ ሳሉዋን ሃኖዋዳን ሳዓንካ ሃኖ፤ « ‹ጋላሳን ጋላሳን ኮሺያ ቁማ ኑሲ ሃቼ ኢማ፤ « ‹ኑኒ ኑና ናቄዳዋንቱዋ ኡባ ኣቶ ጎዋዳን፥ ኔኒካ ኑናቁዋ ኣቶ ያጋ፤ ኑና ኢታፔ ናጋፔ ኣቲን፥ ፓጪያን ጌልሶፓ› ያጊቴ» ያጌዳ። ቃይካ ዬሱሲ ባሬና ካሊያዋንታ፥ «ሂንቴንቱፔ ኢቶ ሲቆ ላጊ ዴዒንቶ ጊዶ ቢላሂያን ኣኮ ዪዴ፥ ‹ታ ሲቆ ላጌው፥ ታው ሄዙ ሶሉዋ ታልዓ፤ ኣዪሲ ጎፔ፥ ኢቲ ታ ላጌꬃይ ዪና ኣ ሚዚያዋ ꬋያዲ› ያጊ ዎሴዳ ጎይቴ። ባሬ ጎሌን ዴዒያ ኣ ሲቆ ላጊ ሶዪፔ ሃሳዪዴ፥ ‹ታና ሜቶꬆፓ፤ ፔንጊ ቃሼቴዳ፤ ታናናይካ ታናና ጊሴዲኖ፤ ሄዋ ዲራው ታኒ ዴንዳዴ ኔው ኣይኔ ኢማናው ዳንዳይኬ› ጋናዌ? ታኒ ሂንቴንቶ ኦዲያዌ ኣዬ ጎፔ፥ ኢ ኣው ሲቆ ላጊያ ጊዶ ዲራው፥ ኢሜኔንቶኔካ ኡንዔꬆ ዲራው ኢ ኮዪያዋ ኡባ ኢሜ። ሃዋ ዲራው፥ ‹ዎሲቴ፥ ሂንቴንቶካ ኢሜታናዋ፤ ኮዪቴ፥ ዴማኒታ፤ ካሪያ ዪዴ ፄሲቴ፥ ሂንቴንቶ ዶዬታናዋ› ያጋይ። ጋሱካ፥ ዎሲያ ኡባይ ኣካናዋ፤ ኮዪያ ኡራይካ ዴማናዋ፤ ካሪያ ዪዴ ፄሲያ ኡራው፥ ካሪ ዶዬታናዋ። «ሂንቴንቱ ጊዶፔ ባሬ ናዓው፥ ሞሊያ ዎሲና ሾሻ፥ ቁማ ኢማ ጊና ሹቻ ኢሚያ ኣዉ ዴዒ? ዎይ ቁቁሊያ ዎሲና ሶጉዋ ኢሚዬ? ሂንቴንቱ ኢታ ጊዲ ዴዒዴ ሂንቴንቱ ናናው ሎዖባ ኢሚያዋ ኤሮፔ፥ ያቲና ሳሉዋን ዴዒያ ሂንቴንቱ ኣዉ ባሬና ዎሲያዋንቶ ኣያና ጌሻ ዎቲ ዳሪሲዴ ኢማንዴሻ?» ያጌዳ። ኢቲ ጋላሲ ዬሱሲ ኢቲ ቢታኒያፔ ዱዲሲያ ኣያና ኬሶዋፔ ጉዬ ዱዴ ቢታኒ ሃሳያ ዶሚና፥ ኣሳይ ማላሌቴዳ። ሺን ኡንቱንቱፔ ኢቱ ኢቱ፥ «ጋሌናቱዋ ካፑዋ ቢዔል-ዜቡሊ ኣው ዎልቃ ኢሚና ጋሌናቱዋ ኬሴ» ያጌዲኖ። ኢቱ ኢቱ ቃሲ ዬሱሳ ፓጫናው ሳሉዋፔ ማላታ ቤሳናዳን ኣፔ ኮዬዲኖ። ሺን ዬሱሲካ ኡንቱንቱ ቆፋ ኤሪዴ ኡንቱንታ ሃዋ ያጌዳ፡ «ባሬ ጊዶን ሻኬቲያ ካዉቴꬃይ ኡባይ ꬋያናዋ፤ ሻኬቲያ ጎሊካ ኩንዴ። ያቲና ሴፃና ካዉቴꬃይ ባሬ ጊዶን ሻኬቶፔ ኣ ካዉቴꬃይ ዎቲ ኤቃናዌ? ሂንቴንቱ ታና፥ ‹ፃላሂያ ካፑዋ ቢዔል-ዜቡሊ ኔው ዎልቃ ኢሚና ኬሳ› ያጊ ሃሳዪታ። ሲሚ ታኒ ቢዔል-ዜቡላ ዎልቃን ጋሌናቱዋ ኬሲያዋ ጊዶፔ ሂንቴንቱ ናናይ ኦ ዎልቃን ኬሳናዋንቴ? ሃዋ ጊዲያ ዲራው፥ ኡንቱንቱ ሂንቴንቱ ቦላን ፒርዲያዋንታ ጊዳናዋንታ። ሺን ታኒ ጋሌናቱዋ ኬሲያዌ ፆሳ ዎልቃና ጊዶፔ፥ ሲሚ ፆሳ ካዉቴꬃይ ሂንቴንቱኮ ዬዳዋ ኤሪቴ። «ዎልቃማ ኣሳይ ቤሲያዋዳን ሚኒዴ ባሬ ጎሊያ ናጎፔ፥ ኣ ሻሉ ሎይꬂ ናጌታናዋ። ዬዉዋን ቃሲ ኣፔ ሚኑዋ ዳሪያዌ ዪዴ ኣ ቆሆፔኔ ፆኖፔ ኢ ኣማኔቴዳ ቶራኔ ጎንዳሊያ ኣፔ ዎꬂ ኣኪዴ፥ ኣው ዴዒያ ሚሻ ጊሼቲ ኣኬ። «ታ ባጋ ጊዴናዌ ታናና ኤቄቴ፤ ታናና ሺሺ ቤናዌካ ላሌ። «ቱና ኣያናይ ኣሳፔ ኬሴዳ ዎዴ፥ ባሬው ሼምፒያሳ ኮዪዴ፥ ሃꬃይ ባንታሳና ኣꬊ ቤ። ሼምፒያሳ ዴሜናን ኣቶፔ፥ ‹ታኒ ካሴ ዬጋ ኬሴዳ ታ ጎሊያ ሲማና› ያጌ፤ ሲሚያ ዎዴካ ጎሊ ፒቴቲዴ ጊጎዋ ዴሜ። ሄዋፔ ካላ፥ ቢዴ ሃራ ኣፔ ኢታ ላፑ ቱና ኣያናቱዋ ኣኪ ያ ጌሊዴ፥ ሄዋን ዴዒኖ፤ ሄ ቢታኒያ ዴዑ ኮይሮዋፔ ካላዌ ኢቶዋ ጊዴ» ያጌዳ። ዬሱሲ ሃዋ ሃሳይ ዴዒሺን፥ ኢቲ ሚሺራታ ጮራ ኣሳ ጊዶፔ ባሬ ኮሻ ꬎቁ ኦꬃዴ፥ «ኔና ዬሌዳዉናኔ ꬋንꬄዳ ኔ ዳያ ኣንጄቴዳዉኖ» ያጋዱ። ዬሱሲ ቃሲ፥ «ኣንጄቴዳዋንቱ ፆሳ ቃላ ሲሲዴ ኣዛዜቲያዋንታ» ያጊ ዛሬዳ። ጮራ ኣሳይ ሺቆ ዎዴ ዬሱሲ፥ «ሃ ዬሌታይ ኢታ፤ ኦራꬃ ማላታ ኮዬ፤ ሺን ናቢያ ዮናሳ ማላታፔ ሃራይ ኢሜቴና። ጋሱካ ዮናሲ ኔኔዌ ካታማ ኣሳው ማላታ ጊዶዋዳን፥ ታኒ፥ ኣሳ ናዓይካ፥ ሃ ዬሌታው ማላታ ጊዳና። ኣዋይ ሞኪያሳ ፄሊያ ዎዴ፥ ኡሼቻ ዱጌባጋና ዴዒያ ጋዲያ ካታታ ሶሎሞኔው ዴዒያ ኣꬎ ኤራቴꬃ ሲሳናው ቢታ ጋፃፔ ዬዳ ዲራው፥ ፒርዳ ዎዴ ሃ ዬሌታን ዴንዳዴ ፒርዳናዉኑ፤ ቤዒቴ፥ ሶሎሞኔፔካ ኣꬊያዌ ሃዋን ዴዔ። ኔኔዌ ኣሳይ ፒርዳ ዎዴ ሂንቴንቱ ቦላ ዴንዲዴ ፒርዳናዋንታ፤ ኣያው ጎፔ፥ ኡንቱንቱ ዮናሲ ኦዶዋ ሲሲዴ ባሬንቱ ናጋራ ፓፂ ሲሜዳ ዲራሳ፤ ቤዒቴ፥ ዮናሳፔ ኣꬊያዌ ሃዋን ዴዔ። «ሶይ ጌሊያ ኣሳው ፖዓናዳን፥ ፆምፒያ ፆምፒዴ ꬎቃሳን ዎꬃናፔ ኣቲን፥ ጌማሳን ዎይ ፖዑዋ ካሚያ ዬዉዋፔ ጋርሳና ዎꬂያዌ ኦኒኔ ባዋ። ኔ ኣሳቴꬃው ኔ ኣይፊ ፆምፒያ ማላ፤ ኔ ኣይፊ ፓፃ ጊዶፔ ኔ ኩሜንꬃ ኣሳቴꬃይካ ፖዑዋ ዴሜ፤ ሺን ኔ ኣይፊ ሃርጎፔ ኔ ኩሜንꬃ ኣሳቴꬃይካ ꬉማ። ኣኬካ፤ ሄዋ ጊዲያ ዲራው፥ ኔ ጋርሳን ዴዒያ ፖዑ ꬉሜናዳን ናጌታ። ሲሚ ኔ ኣሳቴꬃይ ኡባይ ፖዑዋን ኩሜዳዋ ጊዶፔኔ፥ ꬉሜዳ ኣሳቴꬃይ ኔናን ባይናዋ ጊዶፔ፥ ኔ ኣሳቴꬃይ ኡባይ፥ ፆምፒ ባሬ ፖዑዋ ኔ ቦላን ፖዒሲያዋዳን፥ ኔ ቦላን ዋጋጋ ፖዑዋ ጊዳናዋ» ያጌዳ። ዬሱሲ ሃሳያ ዉርሶዋፔ ካላ፥ ኢቲ ፓሪሳዌ ቢታኒ ባሬ ጎሌን ቁማ ማናዳን ኣታሌዳ፤ ዬሱሲካ ኢቲፔ ጌሊዴ ጋዪታን ኡቴዳ። ፓሪሳዊካ ዬሱሳ ቁማ ማናፔ ካሲያን ኩሺያ ሜጬቲ ቤናዋ ቤዒዴ ማላሌቲና፥ ጎዳይካ፥ «ሂንቴንቶ ፓሪሳዋቶ፥ ፁዓኔ ሻታ ቦላ ባጋ ጌሺታ፤ ሺን ሂንቴንቱ ጋርሳይ ኡዚያኒኔ ኢታቴꬃን ኩሜዳ። ሂንቴንቶ ኤያቶ! ቦላ ባጋ ሜꬌዳዌ ጋርሳ ሜꬊቤኔ? ሺን ሂንቴንቱ ፁዓኒኔ ሻታ ጋርሳን ዴዒያዋ ሂዬሳቶ ኢሚቴ፤ ሄዎዴ ኡባባይካ ሂንቴው ጌሻ ጊዳናዋ። «ሺን ሂንቴንቶ ፓሪሳዋቶ፥ ሂንቴው ኣዬ! ኣያው ጎፔ፥ ኣኑጋፔኔ ፃሎቲያፔ፥ ኣጉፒያ ዶዑዋፔ፥ ታሙ ኩሺያፔ ኢቲ ኩሺያ ፆሳው ኢሚታ፤ ሺን ቱሙ ፒርዳኔ ፆሳ ሲቂያዋ ሂንቴንቱ ኣጊታ። ዬዉዋን ቃሲ ሄዋ ኣጌናን ሃዋ ኦꬃናው ቤሴ። «ሂንቴንቶ ፓሪሳዋቶ፥ ሂንቴው ኣዬ! ኣያው ጎፔ፥ ኣዪሁዳ ኣሳ ዎሳ ጎሌን ቦንቾ ኡቱዋ፥ ጌያ ጊዶኒካ ቦንቾ ሳሮታ ኮዪታ። «ኣሳይ ኤሬናን ቦላና ሃሜቲያ ቤቴና ዱፉዋ ማላቲያ ዲራው ሂንቴው ኣዬ!» ያጌዳ። ሙሴ ሂጊያ ታማሪሲያዋንቱፔ ኢቱ፥ «ታማሪሲያዎ፥ ኔኒ ሃዋ ያጋ ሃሳዮ ዲራው ኑና ቦራዳ» ያጊ ዛሬዳ። ዬሱሲ፥ «ሂንቴኖ ሂጊያ ኤሪያዋንቶ፥ ሄንቴው ኣዬ! ኣያው ጎፔ፥ ኣሳይ ቶኪዴ ዳንዳዬና ዴፆ ቶኩዋ ሃራ ቶሲታ፤ ሺን ሂንቴንቱ ሂንቴ ሁጴው ቢራꬊያንካ ቦቺኪታ። «ሂንቴንቱ ኣዎቱ ዎꬌዳ ናባቱዋ ዱፉዋ ሎይꬂያ ዲራው ሂንቴው ኣዬ! ሲሚ ሂንቴንቱ ኣዎቱ ናባቱዋ ዎꬊና፥ ሂንቴንቱ ኡንቱንቱ ዱፉዋ ቦላን ጎሊያ ኬፂያ ዲራው፥ ‹ናባቱዋ ኦሱ ሎዓ› ያጊዴ፥ ኡንቱንቱዋ ማርካቲታ። ሃዋ ዲራው፥ ፆሳ ኣꬎ ኤራቴꬃይ፥ ‹ታኒ ናባቱዋኔ ዬሱሲ ኪቶዋንታ ኡንቱንቱኮ ኪታና፤ ኡንቱንቱካ ሄዋንቱፔ ኢቱዋ ኢቱዋ ዎꬋናዋንታ፤ ኢቱዋ ኢቱዋ ሜቶꬃናዋንታ› ያጌዳ። ሃዋ ጊዲያ ዲራው፥ ሃ ኣላሚ ሜꬌቶዴፔ ዶሚዴ ጉኬዳ ናባቱዋ ሱꬃው ሃ ዬሌታይ ኦሼቴ። ኣቤላፔ ዶሚዴ ያርሹዋሳፔኔ ጌሻ ጎሊያፔ ጊዱዋን ጉኬዳ ዛካራሳ ሱꬃ ጋካናው ኮዬቴ። ኤ! ታኒ ጋይ፤ ሃ ዬሌታይ ሃዎ ኦሼቲያዋ። «ሂንቴንቶ ሙሴ ሂጊያ ኤሪያዋንቶ፥ ሂንቴው ኣዬ! ኣያው ጎፔ ኤራ ፔንጊያ ዶዪያ ቁልፒያ ኣኬዲታ። ሂንቴንቱ ሂንቴ ሁጴዉካ ጌሊቤይኪታ፤ ቃሲ ጌላናው ኮዪያዋንታካ ዲጌዲታ» ያጌዳ። ዬሱሲ ሄዋፔ ኬሶዋፔ ጉዪያን፥ ሂጊያ ታማሪሲያዋንቱኔ ፓሪሳዋቱ ኣ ኦሻን ኡርጉንꬁሳኔ ኤቄቱሳ ዶሜዲኖ። ኣ ዶናፔ ሎዔናባይ ኬሶፔ ኦይቃናው ጌዲኖ፤ ሺን ዴሚቤይኪኖ። ሄ ዎዲያን ጮራ ሻዓን ፓይዴቲያ ኣሳይ ኢቱ ኢቱዋ ዬꬋና ጋካናው ሺቂ ዴዒሺን፥ ዬሱሲ ባሬና ካሊያዋንቶ ኮይሮ ኦዳናው ዶሚዴ፥ «ፓሪሳዋቱዋ ኢርሹዋፔ ናጌቲቴ፤ ሃዌካ ሎዓ ማላቲያ ኡንቱንቱ ኢሚያ ኢታ ቲሚርቲያ። ሺን ኣያኒኔ ካሜቴዳ ዬዉ ቆንጪያ ኬሴናን ኣቴና፤ ቃሲካ ጌሜዳ ዬዉ ኤሬቴናን ኣቴና። ሄዋ ዲራው ሂንቴ ꬉማኒ ሃሳዮዌ ኡባይ፥ ጋላሲ ፖዑዋን ሲሴታናዋ፤ ሂንቴንቱ ኣሳይ ባይናሳን ሂኒ ጊሶ ጎሊያን ሃይꬃን ሳሱኮዌ ኡባይ ꬎቁ ጌዳ ሲሴቲያ ቆንጬሳን ኣዋጄታናዋ። «ታናዳን ኣማኒያዋንቶ፥ ታኒ ሂንቴው ያጋይ፤ ሃዒ ኣሹዋ ዎꬊያዋንታ፥ ሄዋፔ ካላ ቃይ ኣያኔ ኦꬃናው ዳንዳዬናዋንታ ያዮፒቴ። ዬዉዋን ቃሲ ሂንቴንቱ ኦሲ ያያናው ቤሲንቶ ታኒ ሂንቴንታ ኤሪሳና፤ ሄዌካ ዎꬎዋፔ ጉዪያን ጋናሚያን ኦላናው ማታይ ዴዒያ ፆሳ ፃላላው ያዪቴ፤ ኤ፥ ኣው ያዪቴ ያጋይ። «ኢቼሹ ሱኒያ ካፋቱ ሳንቲሚያን ሻሜቲኪኖዬ? ሄዋንቱፔ ኢቲኖኔ ኡሳ ፆሳይ ዶጌና። ሺን ሃራይ ኣቶ ሂንቴንቱ ሁጲያን ዴዒያ ቢናናይ ኡባይካ ፓይዴቴዳዋ፤ ሃዋ ዲራው ያዮፒቴ፤ ሂንቴንቱ ጮራ ሱኒያ ካፋቱዋፔ ዳሪታ። «ታኒ ሂንቴው ኦዳይ፤ ታባ ኣሳ ሲንꬃን ማርካቲያዎ ኦሲኔ ታኒካ ኣሳ ናዓይ፥ ቃሲ ፆሳ ኪታንቻቱዋ ሲንꬃን ማርካታና፤ ሺን ኣሳ ሲንꬃን ታና ካዲያዋንታ ታኒካ ኣሳ ናዓይ፥ ቃሲ ፆሳ ኪታንቻቱዋ ሲንꬃን ካዳና። «ታ ቦላ፥ ኣሳ ናዓ ቦላ፥ ቦሪያ ቃላ ሃሳዪያዌ ዴዖፔ ኣ ናቁ ኣቶ ጌቴታና፤ ሺን ጌሻ ኣያና ቦላ ቦሪያ ቃላ ሃሳዪያዌ ዴዖፔ ቃይ ኣ ናቁ ኣቶ ጌቴቴና። «ኣሳይ ሂንቴንታ ኣዪሁዴ ዎሲያ ጎሊያኮ፥ ጋዲያ ኣዪሲያዋንቱኮኔ ማታይ ዴዒያዋንቱ ሲንꬃ ፒርዳሲ ሺሺያ ዎዴ፥ ‹ዋጊ ዛራኔሻ? ዎይ ኣያ ጊዴ ሃሳያኔሻ?› ያጊዴ ሂርጎፒቴ፤ ኣያው ጎፔ፥ ሂንቴና ኣያና ጌሻይ ሂንቴንቱ ሄ ሳቲያን ሃሳያናው ቤሲያባ ታማሪሳናዋ» ያጌዳ። ኣሳ ጋርሳፔ ኢቲ ቢታኒ ዬሱሳ፥ «ታማሪሲያዎ፥ ኑ ኣቡ ሃይቂና ኑኒ ላታና ማላ ኣቴዳባ፥ ታው ጊሻና ማላ ሃያጎዶ ታ ኢሻው ኦዳ» ያጌዳ። ዬሱሲ ቃይ፥ «ሃ ቢታኔው፥ ሂንቴንቱ ቦላን ፒርዲያዋ ጊዳናዳኔ ሄዋ ሂንቴው ጊሻናዳን ታና ኦኔ ሱንꬄዳዌ?» ያጌዳ። ጉጂዴካ ኡባቱዋ፥ «ኣሳ ሼምፑዋሲ ሻሉዋ ዱሬቴꬃይ ዴዑዋ ኢሜና ዲራው፥ ያሬቲያዋፔኔ ዮራቲያዋፔ ናጌቲቴ፤ ዱሬቴꬃ ኣሙዋ ኡባፔካ ሂንቴና ናጊቴ» ያጌዳ። ካሊዴካ ሃዋዳን ያጊ ሌሚሱዋ ኡንቱንቶ ኦዴዳ፡ «ኣው ዴዒያ ቢታይ ዳሪሲዴ ካꬃ ሞኬዳ ኢቲ ዱሬ ቢታኒ ዴዔ። ሃ ቢታኒ፥ ‹ታው ታ ካꬃ ዎꬃናው ጊዲያ ሳዓይ ባንታዋ ዲራው ኣያ ኡዶሻ?› ያጊዴ፥ ባሬ ዎዛናን ቆፔዳ፤ ሃዋዳን ያጊ ማሌዳ፤ ‹ታኒ ዎታኔ ጎፔ፥ ታው ዴዒያ ዬሲያ ኮላዴ፥ ሃራ ኣኪያ ዬሲያ ሜꬋና ያጊዴ ማሌዳ፤ ሄዋን ታ ካꬃኔ ታው ዴዒያ ሚሻ ኡባ ዎꬃና። ያታዴ ታና፥ «ኔ ካጫይ ዳሮ ሎዓ፤ ኔው ዳሮ ዎዲያሲ ጊዲያ ማፁዋ ሺሻዳ፤ ሲሚ ሼምፓዴ ማ፥ ኡሻ፥ ናሼታ» ጋና› ያጌዱ። «ሺን ፆሳይ ኣ፥ ‹ሃ ቦዛው፥ ሃቼ ቃማ ኔኒ ሃይቃ። ያቲና ሃ ኔኒ ሺሼዳ ማፁ ኡባይ ኦሲ ጊዳናዌ?› ያጌዳ። «ባሬው ቢታ ቦላን ሻሉዋ ሺሺያዌ፥ ፆሳ ሲንꬃን ቃይ ማንቆ ጊዴዳ ኣሳይ ሃቢታኒያ ማላ» ያጌዳ። ሃዋፔ ካላ ዬሱሲ ባሬና ካሊያዋንታ፥ «ሃዋ ዲራው፥ ታ ሂንቴው ኦዳይ፡ ሂንቴንቱ ፓፃ ዴዓናው ኣያ ማኔ? ሂንቴንቱ ቦላሲ ኣያ ማያኔ? ያጊዴ ሂርጎፒቴ። «ጋሱካ፥ ሼምፑ ቁማፔ፥ ቃሲ ኣሳቴꬃይ ማዩዋፔ ኣꬌኔ? ኣኔ ቁራቱዋ ፄሊቴ፤ ኡንቱንቱ ዜሪኪኖ፤ ጫኪኪኖ፤ ኡንቱንቶ ካꬃ ሺሺያ ሳዓይ ዎይ ዬሲ ባዋ፤ ሃኖፔ ኣቲን፥ ኡንቱንታ ፆሳይ ሚዜ፤ ሂንቴንቱ ካፋቱዋፔ ዳሮፔ ዳሪኪቴ? ሂንቴንቱፔ ዳሪ ቆፒዴ ዳሮ ዎዲያ ዴዓናው ዳንዳዪያዌ ኦኔ? «ሲሚ ሂንቴንቱ ሃ ላፋባ ኦꬃናው ዳንዳዬናዋንታ ጊዶፔ ኣያው ሃራባው ሂርጌቲቴ? ጪሻቱ ዎቲ ዲጪኖንቶ ኣኔ ፄሊቴ፤ ኡንቱንቱ ኪታን ዳቡሪኪኖ፤ ፑቱዋ ሱቂኪኖ፤ ጊዶሺን ታኒ ሂንቴው ኦዲያዌ፥ ሶሎሞኔ ሄዋ ኬና ቦንቼቴዳዋ ጊዲዴ፥ ሄ ጪሻቱዋፔ ኢቱዋ ማላኔ ማዪቤና። ሂንቴንቶ ላፋ ኣማኑ ዴዒያዋንቶ፥ ያቶፔ ፆሳይ ሃቼ ቤቲዴ፥ ዎንቲ ታማን ኤፃናው ኦሌቲያ፥ ዴንባን ዶሊያ ማታ ሃዋዳን ማዪዚያዋ ጊዶፔ፥ ሂንቴንታ ዎቲዴ ኡንቱንቱፔ ኣꬂዴ ማዪዜኔ? «ሃዋ ዲራው፥ ‹ኣያ ማኔ? ኣያ ኡሻኔ?› ያጊዴ ኡባ ዎዴ ኮዮፒቴኔ ሂርጎፒቴ። ኣያው ጎፔ፥ ሃዋ ዴማናው ሃ ኣላሚያን ዴዒያ ፆሳን ኣማኔቴና ኣሳይ ሂርጌቲኖ። ሂንቴንቶ ሃዌ ኡባይ ኮሺያዋ ሳሉዋን ዴዒያ ሂንቴንቱ ኣዉ ኤሬ። ሄዋ ሃኒያዋ ኣጊዴ፥ ፆሳ ካዉቴꬃ ኮዪቴ፤ ኢ ሂንቴንታ ኮሺያዋ ኡባ ኢማናዋ። «ሂንቴንቱ ጉꬃ ጊዲንቶኔ፥ ሳሉዋ ሂንቴንቱ ኣዉ ባሬ ካዉቴꬃ ሂንቴንቶ ኢማናው ናሼቴዳ ዲራው ያዮፒቴ። «ሂንቴው ዴዒያዋ ዛሊዒዴ ማንቆ ኢሚቴ፤ ካዪሱ ሺቄናሳን፥ ቢልዓይካ ሜናሳን፥ ሳሉዋን ዉሬና ሚሻ ዳጋዪዴ፥ ኤጬና ቃርጪታቱዋ ሂንቴንቱ ሁጴው ዎꬂቴ። ኣያው ጎፔ፥ ሂንቴንቱ ዎዛናይ ሂንቴ ሚሻይ ዴዒያሳን ዴዓናዋ። «ሂንቴ ፄሳይ ዳንጬቶዋ፥ ሂንቴ ፆምፒካ ፖዔዳዋ ጊዶ። ሂንቴንቱካ፥ ባሬንቱ ጎዳይ ዪዴ ፔንጊያ ቆፂያ ዎዴ፥ ኤሌካ ዶያናው ቡላቻፔ ሲማና ጋካናው ናጊያ ኦሳንቻቱዋ ማላቲቴ። ባሬንቱ ጎዳይ ሶይ ዬዳ ዎዴ ቤጎቲ ዴዒሺን ዴሚያ ሄ ኦሳንቻቱ ኣንጄቴዳዋንታ። ታኒ ቱሙዋ ጋይ፤ ኢ ኡንቱንታ፥ ‹ኡቲቴ› ጊዴ፥ ባሬ ዳንጩዋ ሚኒሲዴ ኡንቱንቶ ቁማ ኣꬂዴ ሾባናዋ። ጎዳይ ሄካ ቢላሂያን ዎይ ሄካ ቢላሂያፔ ካላ ዬዳ ዎዴ፥ ቤጎቲዴ ጌንጪ ናጊዴ ቤቲያ ቆማቱ ኣንጄቴዳዋንታ። ሃዋ ቃይ ኤሪቴ፤ ካዪሱ ኣይ ሳቲያን ዪንቶ ጎሊያዉ ኤሪንቶ፥ ጎሊ ቦኬቲያ ዎዴ ጮዑ ጊዴ ፄሌናሺን። ኣሳ ናዓይ ቆፔና ሳቲያን ያናዋ፤ ሂንቴንቱ ጊጌቲ ናጊቴ» ያጌዳ። ጴፂሮሲካ «ጎዳው፥ ሃ ሌሚሱዋ ኔኒ ኦዲያዌ ኑፃላላሴ ሃራ ኡባሲካ ኢቲፔ ኦዳይ?» ያጌዳ። ጎዳይካ፥ «ሲሚ ኡንቱንቱ ባሬ ሶይ ኣሳው ቁማ ኢማናው ቤሲያ ሳቲያን ኢማና ማላ፥ ኣ ጎዳይ ሱንꬂያ ኣማኔቴዳኔ ኤራንቻ ሚዚያ ቆማይ ኦኔ?» ያጌዳ። ጎዳይ ሲሚያ ዎዴ ሃዋዳን ኪቴቲና ዴሚያ ቆማይ ኢ ኣንጄቴዳዋ። ታኒ ሂንቴው ቱሙዋ ኦዳይ፤ ዴዒያ ማፁዋ ኡባ ቦላን ኣ ሱንꬃናዋ። ዬዉዋን ቃሲ ሄ ቆማይ፥ «ታ ጎዳይ ኤሌ ዬና፤ ጋሚዓናዋ» ያጊ ባሬ ዎዛናን ቆፖፔኔ ኣቱማኔ ማጫ ቆማቱዋ ሾቻ ዶሞፔ፥ ቃይካ ኮዮዋዳን ሙሳኔ ኡሻ፥ ማꬆቱሳካ ዶሞፔ፥ ሄ ቆማ ጎዳይ፥ ኢ ቆፔና ጋላሲኔ ሲꬊቤና ሳቲያን ያናዋ፤ ሄ ዎዲያን ኣ ቃንፄሬꬂዴ፥ ኣ ጊሹዋ ማዳራካ ኣማኔናዋንቱና ኢቲሳ ኡዳናዋ። ባሬ ጎዳ ሼኒያ ኤሪዴ ጊጌናዌኔ ኣሼኒያዳን ኪቴቴና ቆማይ፥ ኢ ኢታ ꬎባ ꬎቤታናዋ። ኤሪቤናዌ ቃይ ꬎቤታናው ቤሲያዋ ኡዴዳዌ፥ ጉꬃ ꬎቤቴ። ዳሮባይ ኢሜቴዳ ኣሳ ኡባፔ፥ ኣፔ ዳሮባይ ኮዬቴ፤ ዎልቃማ ሃዳራይ ኢሜቶዋፔ፥ ኣፔ ዳሪሲዴ ኮዬቴ። ዬሱሲ፥ «ታኒ ዬዳዌ፥ ሃ ሳዓ ቦላ ታማ ሳꬃናሳ፤ ሃዒካ ኤፄዴንቶ፥ ታና ኣይ ኬና ናሼቻናዌሻ። ታኒ ፃማቄታና ሜቱዋ ፂንቃታይ ፖሌታና ጋካናው ዋናዴ ኡንዔታይታ! ሃ ሳዓ ታኒ ዬዳዌ፥ ሳሮቴꬃ ኣሃናሳ ማላቲዬ? ሂንቴው ማላቶፖ። ታኒ ዮዌ፥ ሳሮታሲ ጊዴናን ሻካናሳፔ ኣቲን። ኣያው ጎፔ፥ ሃዒፔ ዶሚና ኢቲ ጎሊያን ዴዒያ ኢቼሹ ኣሳቱ ሻኬታናዋንታ፤ ሄዛቱ ላዓቱዋ ቦላ፥ ላዓቱካ ሄዛቱዋ ቦላ ዴንዲዴ ዋላቄታናዋንታ። ኣዉ ናዓ ቦላ፥ ናዓይካ ኣዉዋ ቦላ፥ ኣታ ናቲ ቦላ፥ ናታካ ኣቲ ቦላ፥ ቦሎታታ ናዓ ማቺ ቦላ፥ ናዓ ማቻካ ቦሎታቲ ቦላ፥ ዋላሳን ዴንዲዴ ሻኬታናዋንታ» ያጌዳ። ቃይካ ዬሱሲ ኣሳሲ፥ «ኣዋይ ዉሊያ ባጋና ሂንቴ ሻሪያ ቤዖፔ፥ ‹ሃዒ ሃ ሳቲያን ሄኮ ዎልቃማ ኢራይ ቡካና ሃኔ› ያጊታ፤ ቱሙካ ቃይ ቡኬ። ዱጌ ባጋና ጫርኩ ጫርኮዴ፥ ‹ሃቼ ሻማናዋ› ያጊታ፤ ጌቴቶዋዳንካ ቃይ ሃኔ። ሂንቴኖ ሎዓ ማላቲያ ኢታቶ፥ ሳዓኔ ሳሉዋ ፄሊዴ፥ ሃናናዋ ኤሪታ፤ ሺን ሃ ዎዲያባ ዎቲ ኤራናው ዳንዳይኪቴ? «ዎዴ ሂንቴንቱ ፂሎ ጊዴዳ ዬዉዋ ሂንቴንቶ ኣያው ፒርዲኪቴ? ኔ ሞርኪያና ኢቲፔ ፒርዲያ ዳና ሲንꬃን ሺቃናው ቦዴ፥ ቢሮ ኦጊያ ቦላ ዴዒሺን ሲጌታ ዲጋ። ሄዌ ꬋዮፔ ኔና ጎቺዴ ፒርዲያ ዳናኮ ኣፋና፤ ዳናይካ ፖሊሴው ኣꬂ ኢማናዋ፤ ፖሊሲ ቃሾ ጎሌን ዬጋናዋ። ታኒ ኔው ኦዲያዌ፥ ዉርሴꬃ ኣጩዋ ጪጋና ጋካናው ሄዋፔ ኬሳካ» ያጌዳ። ሄ ዎዲያን ኢቲ ኢቲ ኣሳቱ ዬሱሳኮ ዪዴ ጲላፆሲ ጋሊላ ኣሳ ዎꬊዴ ኡንቱንቱ ሱꬃ ያርሹዋና ኢቲፔ ዋላኬዳዋ ኣው ኦዴዲኖ። ዬሱሲካ ዛሪዴ፥ «ሃዋንቱ ጋሊላ ኣሳቱ ሃይቄዳ ዲራው፥ ያቲና ኡንቱንቶ ሃራ ጋሊላ ኣሳ ኡባፔካ ኣꬊዴ ናጋራንቻቱዋ ጊዶዋንታ ማላቲኖ? ታኒ ያጋይ፥ ሃዋዳን ጊዴና፤ ዬዉዋን ቃሲ ሂንቴ ናጋራ ፓፂዴ ናጋራፔ ሲሜናን ኢፆፔ፥ ሂንቴንቱ ኡባቱካ ሄዋዳን ሃይቂታ። ዎይ ሳሊሆማ ጊምቢ ኡንቱንቱ ቦላ ኩንዲዴ፥ ዎꬌዳ ታማኔ ሆስፑን ኣሳቱዋ ዬሩሳላሜን ዴዒያዋንቱ ኡባፔ ኣꬊዴ ናቆዋንታ ማላቲኖ? ሃዋዳን ጊዴና ያጋይ፤ ዬዉዋን ቃሲ ናጋራ ፓፃና ꬋዮፔ ኡባቱካ ሃዋዳን ባያኒታ» ያጌዳ። ዬሱሲካ ሃዋዳን ያጊ ሌሚሱዋ ኦዴዳ፥ «ኢቲ ቢታኔው ዎዪኒያ ቱራ ጎሻ ጋዴን ቶኬቴዳ ባላሲያ ጌቴቲያ ኣይፊ ሜቴቲያ ሚꬃታ ዴዓው፤ ሄ ቢታኒካ ሚꬃታ ኣይፋዴንቶኔ ጊዴ ዬዳዌ፥ ኣይኔካ ኣይፊያ ዴሚቤና። ዎዪኒያ ቱራ ናጊያዋ ኢ፥ ‹ታኒ ሃ ባላሲያ ጌቴቲያ ሚꬃቲፔ ኣይፊያ ዴማናው ሄዙ ላይꬃ ሲሜሬታዴ ኣያኔ ዴማቤይኬ። ሄዋ ዲራው ዴካ ዴንꬃ ዲጋ፤ ኣያው ቢታ ጮ ሜሊሳይ?› ያጌዳ። ናጊያዌካ ዛሪዴ፥ ‹ጎዳው፥ ታኒ ኢ ዩሹዋ ሃሩማናሲኔ ፒቱዋ ኦላናሲ፥ ሃ ላይꬃ ፃላላው ባሻ። ሲንꬃው ኣይፎፔ ሎዓ፤ ሺን ኣይፌናን ኢፆፔ ዴኬቱ› ጌዳ» ያጌዳ። ዬሱሲካ ኢቲ ሳምባታ ጋላሲ ኣዪሁዳ ዎሳ ጎላቱዋፔ ኢቱዋን ታማሪሲ ዴዔ። ሄዋኒካ ታማኔ ሆስፑን ላይꬃ ኩሜንꬃ ቱና ኣያናይ ቁኒሴዳ ሚሺራታ ዴዓው። ኢዛካ ሱራዴ ኤቃናው ኣይኔ ዳንዳያቤይኩ። ዬሱሲካ ኢዞ ቤዔዳ ዎዴ ፄሲዴ፥ «ሃ ሚሺራቴ፥ ኔ ሃርጊያፔ ፓፃዳ» ያጌዳ። ዬሱሲ ባሬ ኩሺያ ኢዚ ቦላ ዎꬂና፥ ሄዎዴ ሱራ ሲቲ ጋ ኤቃዴ ባሬ ፆሳ ጋላታዱ። ሺን ኣዪሁዳ ዎሳ ጎሌ ካፑ ቃሲ ዬሱሲ ሳምባታን ፓꬄዳዋ ዲራው ሃንቄቲ ዛሮዋሺን ኣሳቱዋ፥ «ኪቴታናው ቤሲያ ኡሱፑን ጋላሳቱ ዴዒኖ፤ ሄ ጋላሳቱን ዪዴ ፓፂቴፔ ኣቲን ሳምባታን ጊዴና» ያጌዳ። ጎዳይካ ዛሪዴ፥ «ሃ ሎዓ ማላቲያ ኢታ ኣሳቶ፥ ሂንቴንቱፔ ኢቱኔካ ሳምባታ ጋላሲ ቦራ ማጋዱዋፔ ዎይ ሃሪያ ጋፃታፔ ቢሊዴ ሃꬃ ኡሻናው ኣፌኔ? ሃና ኣብራሃሞ ያራ ጊዴዳዉና፥ ታማኔ ሆስፑን ላይꬃ ኩሜንꬃ ፃላሂ ቃቼዳዉና ሳምባታ ጋላሲ ሄ ቃሹዋፔ ቢሌታናው ቤሴኬ?» ያጌዳ። ሃዋ ኦዴዳ ዎዴ ኤቄቲያዋንቱ ኡባይ ዬላቴዲኖ፤ ኣሳይ ኡባይ ቃይ ኢ ኦꬄዳ ማላሊሲያ ኦሱዋን ኡባን ናሼቴዲኖ። ዬሱሲካ፥ «ፆሳ ካዉቴꬃይ ኣያ ማላቲ? ኢ ኣያ ማላቲንቶ፥ ታኒ ሂንቴንታ ዎታ ቤሶ? ፆሳ ካዉቴꬃይ ሳናፊጪያ ጌቴቲያ ቄሪ ሚꬃቲ ኣይፊያ ማላቴ። ሄ ሚꬃቲ ኣይፊያ ኣሳይ ኣኪዴ ጎሻ ጋርሳን ዜሬዳ፤ ዜሬቶና ዲጫዴ ዎጋ ሚꬃ ጊዳዱ፤ ያቲና ሳሉዋ ካፋቱካ ኢዚ ኣጫ ቦላ ባሬንቶ ጎሊያ ኬፄዲኖ» ያጌዳ። ዬሱሲካ ዛሪዴ፥ «ፆሳ ካዉቴꬃይ ኣያ ማላቲንቶ፥ ታኒ ሂንቴንታ ዎታ ቤሶ? ኢቲ ሚሺራታ ሄዙ ኬሪያ ꬊሊያ ኣካዴ፥ ሙናቄዳ ሙናቃይ ኡባይ ዴንዳና ጋካናው፥ ኣኒ ቲጌዳ ኢርሹዋ ማላቴ» ያጌዳ። ሄዋፔ ካላ ዬሱሲ ዬሩሳላሜ ቢዴ፥ ዎጋ ካታማኒኔ ቄሪ ካታማን ዴዒያ ኣሳ ታማሪሲዴ ኣꬌዳ። ሄ ዎዴ ኢቲ ቢታኒ ሺቂዴ ኣ፥ «ጎዳው፥ ፆሳ ፒርዳፔ ኣቲያዋንቱ ጉꬃ ኣሳ ፃላሌ?» ያጌዳ። ሄዋፔ ጉዬ ዬሱሲ ኡንቱንታ፥ «ታኒ ሂንቴንቶ ኦዳይ፤ ኡንዓ ፔንጊያና ጌላናው ባፄቲቴ። ጮራ ኣሳይ ጌላናው ኮዪኖ፤ ሺን ዳንዳይቤይኪኖ። ጎሊያዉ ዴንዲዴ፥ ኢፒꬃ ቃቾዋፔ ጉዬ ሂንቴንቱ ካሬን ኤቂዴ፥ ‹ጎዳው፥ ጎዳው፥ ኑሲ ዶያሪኪ› ያጊዴ ፄሳ ዶሚያ ዎዴ፥ ኢካ ዛሪዴ፥ ‹ሃቃፔ ዬዲቴንቶ፥ ታኒ ሂንቴንታ ኤሪኬ› ያጋናዋ። «ሄ ዎዴ ሂንቴንቱ፥ ‹ኑኒ ኔናና ኢቲፔ ሜዶ፤ ኡሼዶ፤ ኔኒ ኑ ሄራንካ ታማሪሳዳ› ያጋናዋንታ። «ዬሱሲ ቃሲ፥ ‹ታኒ ሂንቴንቶ ኦዳይ፤ ሂንቴንቱ ሃቃፔ ዬዲቴንቶ፥ ታኒ ሂንቴንታ ኤሪኬ፤ ኡባቱካ ማካላንቻቱ ታማታፔ ሃኪቴ› ያጋናዋ። «ኣብራሃሞ፥ ዪሳቂ፥ ያዪቆቢኔ ናባቱ ኡባይ ሂንቴንቱ ካሬን ኤቂሺን፥ ፆሳ ካዉቴꬃን ዴዒያዋንታ ሂንቴንቱ ቤዒያ ዎዴ፥ ሂንቴንቶ ዬኮኔ ኣቻ ꬋቁዋ ጊዳናዋ። «ኣሳይ ኣዋይ ዶሊያሳፔኔ ዉሊያሳፔ፥ ቃሲ ኪሊባጋፔኔ ሂርኪባጋፔ ዪዴ፥ ፆሳ ካዉቴꬃ ጋዪታን ኡቲኖ። ቤዒቴ፤ ጉዬቴዳዋንቱ፥ ሲንꬃታናዋንታ፤ ሲንꬃቴዳዋንቱ ቃይ ጉዬታናዋንታ» ያጌዳ። ሄ ዎዴ ፓሪሳዋቱዋፔ ኢቱ ኢቱ ዬሱሳኮ ዪዴ፥ «ሄሮዲሴ ኔና ዎꬋናው ኮዪያ ዲራው፥ ሃዋፔ ባዲጋ» ያጌዲኖ። ዬሱሲ ዛሪዴ፥ «ቢዴ ሄ ዎራካናሲ፥ ‹ሃቼኔ ዎንቲ ኢታ ኣያናቱዋ ኬሳና፤ ሃርጋንቻቱዋካ ፓꬃና፤ ሄዜንꬆ ጋላሲ ታ ኦሱዋ ዉርሳና› ያጊቴ። ሃኖፔ ኣቲን ናቢ ዬሩሳላሜፔ ሃራሳን ሃይቃናው ቤሴና ዲራው፥ ታኒ ሃቼ፥ ዎንቲኔ ዎንቲፔሺ ኦጊያ ቦላ ዴዓናው ቤሴ። «ዬሩሳላሜ ካታማ ኣሳው፥ ዬሩሳላሜ ካታማ ኣሳው፥ ናባቱዋ ዎꬊያዋንቶ፥ ሂንቴንቱኮ ኪቴቶዋንታ ሹቻን ጫዲያዋንቶ፥ ኩታታ ባሬ ማራቱዋ ባሬ ቄፊያፔ ጋርሳና ሺሻ ሃጲያዋዳን፥ ታኒ ሂንቴንቱ ናና ኢቲ ጋዲያ ሺሻናው ኣፑ ጌዴ ኮያዲታ! ሺን ታና ዲጌዲታ። ቤዒቴ፤ ፆሳይ ሂንቴንቱ ጎሊያ ኣይኔ ኦሊቤና፤ ታኒ ሂንቴንቶ ያጋይ፤ ሂንቴንቱ፥ ‹ጎዳ ሱንꬃን ዪያዌ ኣንጄቴዳዋ› ጋና ጋካናው፥ ታና ቤዒኪታ» ያጌዳ። ሳምባታ ጋላሲ ፓሪሳዋቱዋ ሱንꬃቱዋፔ ኢቱዋ ጎሌ ዬሱሲ ቁማ ማናው ጌሌዳ ዎዴ፥ ኣያ ኪቴቲንቶ ቤዓናው ኣሳቱ ናጊዴዒኖ። ቦላይ ጋፊና ሜቶቲያ ኢቲ ቢታኒ ዬሱሳፔ ሲንꬃና ዴዔ። ዬሱሲ ሂጊያ ታማሪሲያዋንታኔ ፓሪሳዋቱዋ፥ «ሳምባታን ፓꬃናው ዳንዳዬቲ ዳንዳዬቴኔ?» ጊዴ ኦቼዳ። ኡንቱንቱካ ጮዑ ጌዲኖ። ኢ ሄ ቢታኒያ ቦላ ቦቺ ፓꬂዴ ኣ ሞዪዜዳ። ዬሱሲ ኡንቱንታ፥ «ሂንቴንቱፔ ሃሪ ዎይ ቦራይ ኦላን ኩንዲንቶ፥ ሳምባታ ጊዴ ኤሌሊ ኬሴናዌ ኦኔ?» ጌዳ። ኡንቱንቱካ ሃ ዬዉዋሲ ኢቲ ዛሩዋኔ ኢማናው ዳንዳዪቤይኪኖ። ዬሱሲ ሾቤቶዋንቱ ቦንቾሳ ዶሪያ ዎዴ ፄሊዴ፥ «ኦኒኔ ቡላቻ ፄሶፔ፥ ቦንቼቴዳሳን ኡቶፓ፤ ኦኒ ኤሪ ኔፔ ኣꬂዴ ቦንቼቶዌ ፄሴቴዳዋ ጊዳናዋ። ኔናኔ ኣኔ ፄሳዌ ዪዴ፥ ‹ሃዎ፥ ኡቱዋ ኣው ዬዳ› ያጊና፤ ሄዎዲያን ዬላታዴ ፃዴና ዴዒያሳን ኡቱዋ ዶማሳ፤ ዬዉዋን ቃሲ ኔኒ ፄሴቶ ዎዴ ኔና ፄሶዌ ዪዴ፥ ‹ታ ላጌው፥ ኪሊ ꬎቃሳን ኡታ› ጋና ማላ፥ ባዴ ኡባፔ ሆካሳን ኡታ፤ ሄ ዎዴ ኔናና ኢቲፔ ኡቴዳዋንቱ ኡባቱዋ ሲንꬃን ኔው ቦንቹ ኢሜታናዋ፤ ባሬ ሁጲያ ꬎቁ ኡዲያ ኡባይ ቶሼታናዋ፤ ባሬ ሁጲያ ቶቺያዋንቱ ꬎቁ ጊኖ» ያጊ ሌሚሱዋ ኡንቱንቶ ኦዴዳ። ዬሱሲ ባሬና ፄሴዳዋ ዛሪዴ፥ «ኔኒ ላፃ ዎይ ካዉዋ ጊጊሴዳ ዎዴ፥ ኔ ላጌꬃቱዋ ዎይ ኔ ኢሻቱዋ ዎይ ዱሬ ኔ ሾራቱዋ ፄሶፓ፤ ኣያው ጎፔ፥ ኡንቱንቱ ኔና ባሬንቱ ታራን ፄሲዴ ኩሺያ ጪጋና ዳንዳዪኖ። ሺን ኣታሊያባ ጊጊሴዳ ዎዴ፥ ሂዬሳቱዋ፥ ጉንዳቱዋ፥ ዶማቱዋኔ ቆቃቱዋ ፄሳ። ኡንቱንቱ ኔው ኩሺያ ዛራናው ዳንዳዬናዋንታ ጊዲያ ዲራው፥ ኔኒ ኣንጄታናሳ። ፂላቱ ሃይቁዋፔ ዴንዲያ ዎዴ ፆሳይ ኔው ኩሺያ ዛራናዋ» ያጌዳ። ዬሱሲ ሃሳያ ዉርሲያ ዎዴ፥ ቁማ ማናው ኡቶ ኣሳፔ ኢቱ ሃዋ ሲሲዴ፥ «ፆሳ ካዉቴꬃ ጋዪታን ኡቲያዌ ኣንጄቴዳዋ» ጌዳ። ዬሱሲካ ሃዋዳን ጌዳ፤ «ኢቲ ቢታኒ ዳሮ ሎዖ ካዉዋ ጊጊሲዴ፥ ጮራ ኣሳቱዋ ፄሴዳ። ካዉዋ ዎዲ ጋኪና፥ ካሴ ፄሴቶዋንታ፥ ‹ሃዒ ካዉ ጊጌዳ፥ ሃዪቴ› ጊዴ ፄሳና ማላ ባሬ ጎሌን ኪቴቲያ ቆማ ኡንቱንቱኮ ኪቴዳ። ሺን ኡባቱካ ኢቲፔ፥ ቤናዳን ኣጋና ማላ ዎሴዲኖ፤ ኮይሮ ቢታኒ ቆማው ኦዲዴ፥ ‹ታኒ ቢታ ሻሜዳ ዲራው ባዴ ቤዓናው ኮሼ፤ ሄዋ ዲራው ሃያ ጎዶ ታው ሃንቄቶፓሪኪ› ጌዳ። «ላዔꬂያዌ ቃሲ፥ ‹ታኒ ኢቼሹ ዋꬃ ቦራቱዋ ሻሜዳዋንታ ዋፃ ቤዓናው ቢያ ዲራው፥ ሃያ ጎዶ ታው ሃንቄቶፓሪኪ› ጌዳ። «ሃራይ ቃሲ፥ ‹ታኒ ማቻቶ ኣኬዳ ዲራው፥ ያናው ዳንዳያቤይኬ› ጌዳ። «ቆማይካ ዪዴ ባሬ ጎዳው፥ ሃኖዋ ኡባ ኦዴዳ። ሄ ዎዴ ጎዳይ ዳሮ ሃንቄቲዴ፥ ባሬ ጎሊያን ኪቴቲያ ቆማ፥ ‹ሂኒ ካታማ ኦጊያኔ ሎሶ ኦጊያ ኤሌላዴ ኬሳ፤ ማንቃቱዋኔ ጉንዳቱዋ፥ ዶማቱዋኔ ቆቃቱዋ ሃ ኣካዴ ያ› ጌዳ። «ኣ ቆማይካ፥ ‹ጎዳው፥ ኔኒ ታና ኣዛዞዋዳን ኦꬃዲ፤ ሺን ሃዒካ ሃራ ኣሳ ኣኪያሳይ ዴዔ› ጌዳ። ጎዳይካ ባሬ ቆማ፥ ‹ታ ጎሊ ኩማናዳን ሂኒ ኦጊያፔ ካሬ ባጋኔ ዲርሳ ጋፃ ኡባ ኬሳዴ፥ ኣሳ ታ ጎሌ ኣካዴ ያ። ኣያው ጎፔ፥ ኮይሮ ታ ጎሌ ሾቤቴዳዋንቱፔ ኢቲ ኣሳይኔ ታ ቁማ ሜና› ጌዳ» ያጌዳ። ጮራ ኣሳይ ዬሱሳና ኢቲፔ ቢዴዒያ ዎዴ፥ ኢካ ኣሳኮ ጉዬ ሲሚዴ፥ «ኦኒኔ ታኮ ዪያዌ ዴዖፔ ባሬ ኣባኔ ኣቶ፥ ባሬ ማቻቶኔ ባሬ ናና፥ ባሬ ኢሻቱዋኔ ሚቻቱዋ፥ ባሬ ዴዑዋ ኣሼናን ታፔ ኣꬂ ዶሶፔ፥ ታና ካሊያዋ ጌቴታናው ዳንዳዬና። ኦኒኔ ባሬ ማስቃሊያ ቶኪዴ፥ ታ ጌዱዋ ካሌናን ꬋዮፔ፥ ታና ካሊያዋ ጊዳናው ዳንዳዬና። «ሂንቴንቱፔ ኢቱ ሹቻ ጎሊያ ኬፃናው ኮዮፔ፥ ኪታ ዉርሳናው ጊዲያ ሻሉዋ ካሴቲዴ ኡቲ ሄቴናዌ ኦኔ? ሄዌ ꬋዮፔ፥ ጎሊያ ዶሚዴ፥ ኪታ ዉርሳናው ዎልቃይ ኢፆፔ፥ ቤዔዳዋንቱ ኡባይ፥ ‹ሃ ቢታኒ ኬፃናው ዶሜዳ፤ ሺን ኪታ ዉርሳናው ኢፄቴዳ› ጊዴ ቂሊጪኖ። «ዎይ ታሙ ሻዓ ኦላንቻቱዋ ኦይቄዳ ኢቲ ካቲ፥ ሃራ ላታሙ ሻዓ ኦላንቻቱዋ ኦይቄዳዋንቱና ኦሌታናው ዳንዳዮፔኔ ኮይሮና፥ ታኒ ፆናኔ ፆኒኪታሻ ጊዴ ኡቲ ቆፔኔ? ባሬው ዳንዳዬቴናን ꬋዮፔ፥ ኦላው ዪያ ዮኮ ካቲ ሃኩዋን ዴዒሺን ኪቲዴ ሲጌታናው ዎሴ። ሲሚ ሃዋዳንካ ሂንቴንቱፔ ኦኒኔ ባሬው ዴዒያዋ ኡባ ኣጌናዌ፥ ታና ካሊያዋ ጊዳናው ዳንዳዬና። «ማፂኒ ሎዓ፤ ሺን ሎቂሎቄናን ꬋዮፔ፥ ላዔꬆ ኣ ዎቲ ሎቂሎቂሳናው ዳንዳዬቲ? ቢታዉካ ሎዔና፤ ቱዔያናዉካ ማዴናዋ ጊዶ ዲራው፥ ኣሳይ ኣ ኦሊ ኣጌ። ሲሲያ ሃይꬃይ ዴዒያዌ ሃዋ ሲሶ» ያጌዳ። ኢቲ ጋላሲ፥ ቃራፃ ሺሺያዋንቱኔ ናጋራንቻቱ ኡባይ ዬሱሳ ሲሳናው ኣኮ ሺቄዲኖ። ፓሪሳዋቱኔ ሙሴ ሂጊያ ታማሪሲያዋንቱ፥ «ሃ ቢታኒ፥ ናጋራንቻቱዋ ሺሺያዋኔ ኡንቱንቱና ቁማ ሚያዋ» ያጊዴ ዙዙሜዲኖ። ዬሱሲካ ሌሚሱዋን ዛሩዋ ሃዋዳን ያጊ ኦዴዳ፡ «ፄቱ ዶርሳይ ዴዒያ ኡራይ ሂንቴንቱ ጊዶፔ ዴዒንቶ ሄዋፔ ኢቱ ባዪንቶ ኡዱፑ ታማኔ ኡዱፑኑዋ ዴንባን ኣጊዴ ባዬዳዋ ቤታና ጋካናው ኮዬናዌ ኦኔ? ዴሜዳ ዎዴ ናሼቻን ባሬ ሃሺያ ቦላን ዶርሳ ቶኪ፥ ባሬ ጎሌ ሲሚዴ፥ ባሬ ዶሲያዋንታኔ ሾራቱዋ ኢቲፔ ፄሲዴ፥ ‹ባዬዳ ታ ዶርሳ ዴሞ ዲራው፥ ታናና ኢቲፔ ናሼቲቴ› ያጊዴ ኦዴ። ሄዋዳንካ ናጋራ ፓፄꬃ ኮሼና ኡዱፑ ታማኔ ኡዱፑ ፂላቱዋፔ ኣꬂዴ ናጋራ ፓፂያ ኢቲ ናጋራንቻን ሳሉዋን ዳሮ ናሼቻይ ጊዳናዋ። «ቃይካ ታሙ ናሃሲያ ሳንቲሚ ዴዒያ ሚሺራታ ታሙዋፔ ኢቱ ባዪንቶ ዴማና ጋካናው ፆምፒያ ፆምፓዴ፥ ጎሊያ ፒታዴ ሎይꬃ ኮዬናዉና ኢዛ ኦኔ? ኢዛካ ዴሜዳ ዎዲያን ባሬ ዶሲያዋንታኔ ባሬ ሾራቱዋ ኢቲፔ ፄሳዴ፥ ‹ታፔ ባዬዳ ሳንቲሚያ ዴሜዳ ዲራው፥ ታናና ኢቲፔ ናሼቲቴ› ያጋዴ ኦዳው። ሄዋዳንካ ናጋራ ፓፂያ ኢቲ ናጋራንቻ ጋሶቴꬃን ፆሳ ኪታንቻቱዋ ሲንꬃን ናሼቻይ ሃናናዋ» ያጌዳ። ጉጂዴ ዬሱሲ፥ «ላዑ ናናይ ዴዒያ ኢቲ ቢታኒ ዴዔ፤ ኡንቱንቱፔካ ቴፋ ናዓይ፥ ‹ኔ ማፁዋፔ ታና ጋኪያዋ ኢማ› ጌዳ። ኣዉካ ባሬ ማፁዋፔ ናናቶ ጊሼዳ። ጉꬃ ዎዲያፔ ጉዪያን ቴፋ ናዓይ ባሬና ጋኬዳዋ ኡባ ሺሺ ኣኪዴ ሂኒ ሃኮ ጋዴ ቤዳ፤ ሄዋን ባሬ ኣኬዳ ሚሻ ኡባ ላሊ ዉርሲ ኣጌዳ። ኢካ ዴዒያዋ ኡባ ዉርሴዳዋፔ ጉዪያን ሄ ጋዴን ዎልቃማ ኮሻይ ጌሌዳ፤ ኢካ ሜቱዋን ኡንዔቱሳ ዶሜዳ። ሃዋ ዲራው ሄ ጋዴን ዴዒያዋንቱፔ ኢቱዋኮ ሺቂዴ፥ ‹ታና ኔው ቆማ ኦꬃሪኪ?› ያጊና፥ ቢታኒካ ባሬ ጉዱንꬃ ዉዲያ ሄማና ማላ ኣ ዴምባ ዬዴዳ። ጉዱንꬃ ዉዲ ሚያ ሃልዑዋ ማናው ኣሞቴዳ፤ ሺን ሄዌንቶካ ኣው ኢሚያዌ ቤቲቤና። ባሬ ባዪዙዋ ኤሮ ዎዴ፥ ‹ቁማይ ፆኒዴ ሳዓን ኣቲያ ታ ኣቦ ኦꬂያዋንቱ ኣፑኔ፤ ሺን ታኒ ሃዋን ኮሻን ሃይቃና ማታይታ? ዴንዳዴ ታ ኣቡኮ ባኔ› ሃዋዳን ያጋና፤ ‹ታ ኣቦ፥ ፆሳካ ኔናካ ናቃዲ፤ ሃኒፔ ጉዬ ኔ ናዓ ያጌታዴ ፄሴታናው ቤሲኬ፤ ኔው ኪቴቲያዋንቱፔ ኢቱዋዳን ታና ዎꬃሪኪ ጋና› ጌዳ። ሄ ማንዒያንካ ዴንዲዴ ባሬ ኣቡኮ ዬዳ። «ኢ ቢሮ ሃኩዋን ዴዒሺን፥ ኣዉ ቤዒዴ፥ ኣው ቃሬቴዳ፤ ኣኮ ዎፂ ቢዴ፥ ኣ ኢዲሚ ዬሬዳ። «ናዓይካ፥ ‹ታ ኣቦ፥ ታኒ ፆሳካ ኔናካ ናቃዲ፤ ሃኒፔ ጉዬ ኔ ናዓ ጌቴታዴ ፄሴታናው ቤሲኬ› ያጌዳ። ሺን ኣዉ ባሬ ኦሳንቻቱዋ፥ ‹ኤሌሊ ቢዴ፥ ኡባፔ ዶሬቴዳ ሎዖ ማዩዋ ኣሂዴ፥ ኣ ማዪዚቴ፤ ኣ ቢራꬊያን ሚጊዱዋ፥ ኣ ጌዲያንካ ጫማ ዎꬂቴ። ሞꬌዳ ኮሩማ ኣሂዴ ሹኪቴ፤ ሞይቴ፥ ናሼቶይቴ። ኣያው ጎፔ፥ ሃዌ ታ ናዓይ ሃይቄዳ፤ ሺን ሃዒ ፓፄዳ፤ ባዬዳ፤ ሺን ሃዒ ቤቴዳ› ያጊና፥ ናሼቻ ዶሜዲኖ። «ሄ ዎዲያን፥ ባይራ ናዓይ ጋዴን ዴዒያዌ ዪዴ ጎሌኮ ማቲያ ዎዴ፥ ዬꬃኔ ዱሩዋ ኮሹንቻ ሲሴዳ። ኢካ ዬዉ ኣዬንቶ ኤራናው ኮዪዴ፥ ቆማቱዋፔ ኢቱዋ ፄሲዴ፥ ‹ሃዌ ኣዬ?› ጊዴ ኦቼዳ። ቆማቱካ፥ ‹ኔ ኢሻይ ሳሮ ዬዳ ዲራው፥ ኔ ኣቡ ሞꬎ ኮሩማ ኣው ሹኬዳ› ያጊ ኦዴዲኖ። «ባይራ ናዓይ ሃንቄቲዴ ጎሌ ጌሊኬ ያጊ ኢፂና፥ ኣዉ ካሬው ኬሲዴ፥ ጌላናዳ ዎሴዳ። ሺን ኢ ዛሪዴ ባሬ ኣባ፥ ‹ሄኮ ሃዋ ኬና ዎዲያ ቆማዳን ኔው ኪቴታዲ፤ ኔ ኣዛዞዋፔ ኢቱዋኔካ ፓጪሳ ቤይኬ፤ ታ ላጌꬃቱዋና ኢቲፔ ናሼታና ማላ ሃራይ ኣቶ ኢቲ ዴሻ ቡልዑዋኔ ታው ኢማ ቤይካ፤ ሺን ሃዌ ኔ ናዓይ ኔ ሚሻ ጫራቱዋና ኢቲፔ ዲፊሲዴ ዪና፥ ꬊኮ ቦራ ሹካዳ› ያጌዳ። «ኣዉካ ኣ፥ ‹ታ ናዓው፥ ኔኒ ኡባ ጋላሳ ታናና ኢቲፔ ዴዓ፤ ታሳ ጊዴዳባይ ኡባይካ ኔዋ። ሺን ሃዌ ኔ ኢሻይ፥ ሃይቄዳዌ ፓፆ ዲራዉኔ ባዬዳዌ ቤቶ ዲራው፥ ኑኒ ሚዲኔ ኡሺዴ ናሼታናው ቤሴ› ያጌዳ» ጊዴ ኦዴዳ። ዬሱሲ ባሬና ካሊያዋንቶ ኦዲዴ፥ «ኢቲ ዱሬ ቢታኒ፥ ባሬ ጎሊያ ኡባ ቦላ ሱንꬄዳ ኢቲ ቢታኒ ዴዔ፤ ሺን ሃ ቢታኒ ኣ ሚሻ ባዪዜ ያጊያ ዚጊርሳይ ኣ ጋኬዳ፤ ሄዋ ዲራው ባሬ ሱንꬄዳ ቢታኒያ ፄሲዴ፥ ‹ሃዌ ታኒ ሲሲያ ዬዉ ኣዬ? ሃኒፔ ጉዬ ኔኒ ታ ጎሊያኒኔ ታ ሚሻ ቦላ ታፔ ጋርሳና ሱንꬄታዴ ኪቴታናው ዳንዳያቤና ዲራው፥ ሃቼ ጋካናው ኪቴቴዳዋ ሄታዴ ሼꬋ› ያጌዳ። «ሱንꬄቴዳዌ ባሬ ዎዛናን፥ ‹ታ ጎዳይ ታና ሱንꬃቴꬃፔ ኮላና ሃኔ፤ ሺን ታ ዋኖሻ? ጎሻናው ዎልቃይ ታው ባዋ፤ ዎሳናው ቃሲ ታው ፖኬ። ታ ኦꬃናባ ታ ኤራይ፤ ኢ ታና ሱንꬃቴꬃፔ ኬሶፔ፥ ባሬንቱ ጎሌ ቢና፥ ታና ሞኪያ ላጌꬃቱዋ ታኒ ዴማና› ያጌዳ። «ባሬ ጎዳፔ ሻሉዋ ታልዔዳ ኣሳቱዋ ሁጲያን ሁጲያን ፄሲዴ፥ ኮይሮ ቢታኒያ፥ ‹ኔኒ ታ ጎዳፔ ዎይሳ ኬና ሻሉዋ ታልዓዲ?› ያጌዳ። «ኢካ፥ ‹ታኒ ፄቱ ባሬታ ኩሜዳ ዛይቲያ ታልዓዲ› ያጌዳ። «ሱንꬄቴዳ ቢታኒካ፥ ኔኒ ፓራማና ዋራቃታ ሄይ፤ ኡታዴ ኤሌካ ‹ኢሻታማ› ጋዴ ፃፋ ያጌዳ። «ሄዋፔ ሃራ ቢታኒያ፥ ‹ኔኒ ኣፑኑዋ ታልዓዲ?› ያጌዳ። « ‹ፄቱ ቁንዓ ዛርጋ› ያጌዳ። «ሱንꬃይካ፥ ‹ዋራቃታ ሄይ፤ ሆስፑን ታማ ጋዴ ፃፋ› ያጌዳ። «ሄ ሱንꬃይ ጪንጫቴꬃን ኦꬄዳ ዲራው፥ ኣ ጎዳይ ኣ ጋላቴዳ፤ ኣያው ጎፔ፥ ሃ ኣላሚያ ኣሳይ ባሬንቱዎ ፖዑዋ ኣሳፔ ኣꬌዳ ጪንጫቱዋ። «ታኒ ሂንቴንቶ ያጋይ፥ ‹ሃ ኣላሚያ ሻሉ ዉሪያ ዎዴ፥ ሜꬊናው ዉሬና ጎሊያን ሂንቴንታ ሞካና ማላ፥ ሃ ሚሻን ሂንቴንቶ ላጊያ ዴሚቴ። ላፋ ዬዉዋን ኣማኔቴዳዌ፥ ዎጋባኒካ ኣማኔቴ። ሺን ላፋ ዬዉዋን ኣማኔቲቤናዌ፥ ዎጋባኒካ ኣማኔቴና። ሲሚ ሂንቴንቱ ሃ ኣላሚያ ሻሉዋን ኣማኔቴናዋ ጊዶፔ፥ ቱማቴꬃ ሻሉዋ ሂንቴንቶ ኦኔ ሃዳራ ጊዴ ኢማናዌ? ሂንቴንቱ ሃራ ኣሳ ሻሉዋን ኣማኔቴናዋ ጊዶፔ፥ ሂንቴንቱ ሚሻ ኦኔ ሂንቴንቶ ኢማናዌ?› ጌዳ። «ኢቲ ካላ ላዑ ጎዳቶ ቆማታናው ዳንዳዪያዌ ኣይ ቆማይካ ባዋ፤ ኣያው ጎፔ፥ ኢቱዋ ኢፂዴ፥ ሃራ ዶሴ፤ ዎይ ኢቱዋ ቦንቺዴ፥ ሃራ ካꬌ፤ ፆሳዉኔ ሻሎ ሞዴታናው ዳንዳይኪታ» ያጌዳ። ሻሉዋ ዶሲያ ፓሪሳዋቱ ሃዋ ኡባ ሲሲዴ፥ ዬሱሳ ቦላ ቂሊጬዲኖ። ሺን ዬሱሲ ኡንቱንታ፥ «ሂንቴንቱ ኣሳ ሲንꬃን ሂንቴንታ ፂሎ ኣሳ ኦꬂያዋንታ፤ ሺን ፆሳይ ሂንቴንቱ ዎዛና ኤሬ፤ ኣያው ጎፔ፥ ኣሳ ሲንꬃን ቦንቼቴዳዌ ፆሳ ሲንꬃን ቱና ጊዴ። «ሙሴ ሂጊያኔ ናባቱ ፃፌዳ ማፃፋ ዮሃኒሳ ዎዲያ ጋካናው ኣሳይ ኣዛዜቲዴ ዴዔዲኖ፤ ሄዋፔ ካላ ቃይ ፆሳ ካዉቴꬃይ ኦዴቴዳ፤ ኣሳይ ኡባይ ያ ጌላናው ኬሴቴ። ሺን ሂጊያፔ ኢቲባይ ኣቲያዋፔ ሳሉኔ ሳዓይ ኣꬊያዌ ማታቴ። «ባሬ ማቻቶ ቢሊዴ ሃራሮ ኣኪያዌ ኡባይ ዎሹሜ፤ ቃሲ ኣሲናፔ ቢሌቴዳ ማጫዉኖ ኣኪያዌ ኦኒኔካ ዎሹሜ። «ጋቲ ሎይꬂዴ ኣልዖ ጊዴዳ ማዩዋ ማዪዲኔ ጋላሳን ጋላሳን ኦቶሩዋን ናሼቲዴ ዴዒያ ኢቲ ዱሬ ቢታኒ ዴዔ። ቃሲካ ኩሜንꬃ ኣሳቴꬃን ማይꬃይ ዴዒያ ኢቲ ኣሊዓዛራ ጌቴቲያ ሂዬሳይ፥ ሃ ዱሬ ቢታኒያ ካሪያን ጊሴዳ። ሃ ዱሬ ቢታኒያ ሳምፓፔ ላሌቴዳ ሱፓ ማናው ኣሞቴ፤ ሃራይ ኣቶ ካናቱካ ዪዴ ኣ ማይꬃ ላጪኖ። «ሃ ሂዬሳ ቢታኒ ሃይቂና፥ ኪታንቻቱ ኣ ኣብራሃሞ ባጋ ቦንቾሳ ኣፌዲኖ፤ ዱሬ ቢታኒካ ቃሲ ሃይቂዴ ሞጌቴዳ። ሲዖሊያን ዳሮ ሴሌቲዴ ዴዒሺን፥ ꬎቁ ጊዴ ሃኩዋን ኣሊዓዛራ፥ ኣብራሃሞ ባጋን ዴዒያዋ ቤዔዳ። «ኢካ ባሬ ኮሻ ꬎቁ ኡዲዴ፥ ‹ኣብራሃሞ፥ ታ ኣቦ፥ ታው ቃሬታ። ሃ ታማ ሴላን ሜቶታ ዴዒያ ዲራው፥ ኣሊዓዛር ባሬ ቢራꬊያ ፄራ ሃꬃን ቦቺዴ፥ ታ ኢንፃርሳ ኢርፂሳናዳን ሃያና ታኮ ኪታሪኪ› ያጌዳ። «ኣብራሃሞ ቃሲ፥ ‹ታ ናዓው፥ ኔኒ ፓፃ ዴዓዴ፥ ሎዖ ዴዑዋ ዴዒና፥ ኣሊዓዛር ሎዔና ሜቶ ዴዑዋ ዴዔዳዋ ቆፓ። ሃዒ ቃይ ኢ ሃዋኒ ናሼቲያ ዎዴ፥ ኔኒ ሜቱዋ ቦላ ዴዓ። « ‹ሃዋፔ ሃራይ ቃይ፥ ሃዋፔ ያ ሂንቴንቱኮ ኣꬋናው ኮዪያዋንቱ ኣꬌናዳን፥ ያኒ ዴዒያዋንቱካ ቃሲ ሃ ኑኮ ፒኔናዳን፥ ኑ ጊዶኒኔ ሂንቴንቱ ጊዶን ዎጋ ኣፉ ሜꬌቴዳ› ያጌዳ። «ዱሬ ቢታኒካ፥ ‹ኣብራሃሞ፥ ሲሚ ሄዋ ጊዶፔ፥ ኔኒ ኣሊዓዛራ ታ ኣቡ ጎሌ ዬዳና ማላ፥ ኔና ዎሳይ። ኣያው ጎፔ፥ ታው ኢቼሹ ኢሻቱ ዴዒያ ዲራው፥ ኡንቱንቱ ቃይ ሃ ሜቱዋሳ ዬና ማላ፥ ኡንቱንቶ ኣሊዓዛር ቢዴ ማርካቶ› ያጌዳ። «ኣብራሃሞ ቃሲ፥ ‹ሙሴኔ ናባቱ ፃፌዳ ማፃፋይ ኡንቱንቶ ዴዔ፤ ሄ ማፃፋይ ጊያዋ ኡንቱንቱ ሲሲኖ› ያጌዳ። «ዱሬ ቢታኒ፥ ‹ሂዒ፤ ኣብራሃሞ፥ ታ ኣቦ፥ ሄዋ ጊዴና፤ ሺን ኢቲ ቢታኒ ሃይቁዋፔ ዴንዲዴ፥ ኡንቱንቱኮ ቢንቶ፥ ኡንቱንቱ ባሬንቱ ናጋራ ፓፂዴ፥ ሲማናዋንታ› ያጌዳ። «ኣብራሃሞካ፥ ‹ኡንቱንቱ ሙሴኔ ናባቱ ፃፌዳ ማፃፋ ሲሴናዋ ጊዶፔ፥ ሃራይ ኣቶ ኢቲ ኡራይ ሃይቁዋፔ ዴንዲ ዪንቶካ ኣማኒኪኖ› ጌዳ» ያጌዳ። ዬሱሲ ባሬና ካሊያዋንታ፥ «ኣሳ ባሌꬂያዌ ዬናን ኣቴና፤ ሺን ባሌꬂያዋ ኣሂያ ኡራው ኣው ኣዬ፤ ሄ ቢታኒ ሃ ጉꬃቱዋፔ ኢቱዋ ባሌꬂያዋፔ፥ ጋጪያ ዎፃ ባሬ ቆꬊያን ቃሼቲዴ ኣባን ሚቴቲያዌ ኣው ሎዓ። ሂንቴ ሁጴው ናጌቲቴ። «ኔ ኢሻይ ኔና ናቆፔ፥ ኣ ዞራ። ቃሲ ናጋራፔ ኢ ሲሞፔ፥ ኣው ኣቶ ያጋ። ኢቲ ጋላሲ ኢ ኔና ላፑ ጌዴ ናቂዴ፥ ላፑ ጌዴካ፥ ‹ኔና ታ ናቃዲ፥ ታና ማራ› ጊዴ ኔኮ ዮፔ፥ ኣው ኣቶ ጋ» ያጌዳ። ኪቴቴዳዋንቱካ ጎዳ፥ «ኑሲ ኣማኑዋ ጉጃ» ያጊዴ ኦቼዲኖ። ጎዳይካ፥ «ሂንቴው ሳናፊጪያ ኣይፊያ ኬና ኣማኑ ዴዒንቶ፥ ሂንቴንቱ ሃ ቦዒያ፥ ‹ሃዋፔ ሾዴታዴ፥ ኣባን ቶኬታ› ጊንቶ ሂንቴው ኤኖ ጋና» ያጌዳ። ቃሲካ ዬሱሲ፥ «ሂንቴፔ ጎሺያዌ ዎይ ሚያ ሄሚያ ቆማይ ዴዒያ ኣሳይ ሃቄት ዴዖፔ፥ ጎሻ ጋዴፔ ዎይ ሚያ ጋዴፔ ሲሞ ዎዴ ኤሌካ፥ ‹ሃያ ሼምፓ ኣካ፥ ቁማ ማናው ኡታ› ያጊያዌ ኦኔ? ዬዉዋን ቃሲ፥ ‹ታ ማና ካዉዋ ጊጊሳ፤ ታ ማናኔ ኡሻና ጋካናው ሚናዴ ታና ኤቃዴ ሚዛ። ሄዋፔ ጉዬ ኔው ማ፥ ኡሻ› ያጊያዋ ጊዴኔ? ሄ ቆማይ ኪቴቴዳባ ኦꬄዳ ዲራው፥ ሄ ቢታኒ ጋላታናው ቤሴኔ? ሄዋዳንካ ሂንቴ ቃሲ ኣሳይ ሂንቴና ኪቶ ኦሱዋ ኦꬄዳ ዎዴ፥ ‹ኑኒ ማዴና ቆማቱዋ፤ ኑ ኦሶ ፃላላ ኦꬄዶ› ያጊቴ» ያጌዳ። ዬሱሲ ዬሩሳላሜ ቢዴ፥ ጋሊላፔኔ ሳማሪያ ጊያ ጋዳቱዋፔ ጊዱዋና ኣꬌዳ። ኢ ኢቲ ጉꬃ ካታማቶ ጌሊያ ዎዲያን፥ ሃኩዋን ኤቄዳ ታሙ ኦሉዋን ኦይቄቴዳዋንቱ ኣ ቤዔዲኖ። ኡንቱንቱካ ሃኩዋን ኤቂዴ፥ ባሬንቱ ኮሻ ꬎቁ ኡዲዴ፥ «ዬሱሳ፥ ጎዳው፥ ሃያ ጎዶ ኑና ፓꬃሪኪ!» ያጌዲኖ። ዬሱሲ ኡንቱንታ ቤዒዴ፥ «ቢዴ፥ ሂንቴንቱ ቦላ ቄሳቱዋ ቤሲቴ» ያጌዳ። ኡንቱንቱካ ቄሳቱዋኮ ቢዴዒዴ ኦሉዋፔ ፓፄዲኖ። ኡንቱንቱፔ ኢቱ ባሬ ሃርጊያፔ ፓፄዳዋ ቤዒዴ፥ ባሬ ኮሻ ꬎቁ ኡዲዴ፥ ፆሳ ቦንቺዴ ሲሜዳ። ጋላቲዴካ ዬሱሳ ጌዲያ ማታን ጉልባቴዳ። ሄ ቢታኒ ሳማሪያ ኣሳ። ዬሱሲ ዛሪዴ፥ «ታሙ ፓፂቤይኪኖ? ያቲና ኡዱፑናቱ ሃቃን ዴዒኖ? ኣዪሁዳ ኣሳ ጊዴና ሳማሪያ ቢታኒያፔ ኣቲን፥ ፆሳ ቦንቻናው ሲሜዳዋንቱ ባዋ ጉሴ?» ያጌዳ። ዬሱሲ ኣ፥ «ዴንዳ ባ፤ ኔ ኣማኑ ኔና ፓꬄዳ» ያጌዳ። ፓሪሳዋቱ ኢቲ ጋላሲ፥ «ፆሳ ካዉቴꬃይ ኣዉዴ ያኔ?» ጊዴ ኦቺና ዬሱሲ፥ «ፆሳ ካዉቴꬃይ ሂንቴንቱ ናጊያ ኦጊያን ዬና» ያጊ ዛሬዳ። ቃሲካ፥ «ኦኒኔ፥ ‹ፆሳ ካዉቴꬃይ ሃዋን ዴዔ›፥ ዎይ ‹ሄዋን ዴዔ› ጋናው ዳንዳዬና፤ ፆሳ ካዉቴꬃይ ሂንቴንቱ ዎዛና ጊዶን ዴዔ» ያጌዳ። ዬሱሲ ባሬና ካሊያዋንቶ ኦዲዴ፥ «ኣሳ ናዓይ ቆንጪያ ጋላሳቱዋፔ ኢቱዋ ቤዓናው ሂንቴንቱ ኣሞቲያ ዎዲ ያና፤ ሺን ቤዒኪታ። ቃሲ ኡንቱንቱ ሂንቴና፥ ‹ሃዌኩ ሃዋና› ዎይ ‹ሄዋና› ያጋናዋንታ። ሺን ኡንቱንታ ካሊዴ፥ ኡንቱንቱና ቦፒቴ። ዋልቃንꬃይ ሳሉዋን ዎልቃሚያ ዎዴ፥ ሃ ጋፃፔ ሂኒ ጋፃ ፖዑ ፖዒያዋዳን፥ ኣሳ ናዓ ዩሳይካ ሄዋዳን ሃናናዋ። ሺን ኮይሮቲዴ ኣሳ ናዓይ ዳሮ ሜቱዋ ሜቶታናዉኔ ሄ ዎዲያን ዴዒያ ዬሌታን ኢፄታናው ቤሴ። «ኖሄ ዎዲያን ሃኖዋዳንካ፥ ኣሳ ናዓይ ቆንጪያ ጋላሳንካ ሄዋዳን ሃናናዋ። ኖሄ ማርካቢያ ጌሎ ጋላሳይ ጋካናው ኡንቱንቱ፥ ሚዲኔ ኡሺዴ፥ ኣኪዲኔ ኣኬቲዴ ዴዒሺን፥ ባሻ ሃꬃይ ዪዴ ኡባ ኣሳካ ባዪዜዳ። «ሄዋዳንካ፥ ሎፄ ዎዲያን፥ ኣሳይ ሚዲኔ ኡሺዴ፥ ዛሊዒዴ፥ ቶኪዲኔ ጎሊያ ኬፂዴ ዴዔዲኖ። ሺን ሎፄ፥ ሶዶማፔ ኬሶ ጋላሳን ቃሲ ሳሉዋፔ ታማይኔ ኤፂያ ቦንቆ ሹቻይ ቡኬዳ፤ ኡባባካ ሚዴ ዉርሴዳ። «ኣሳ ናዓይ ቆንጪያ ጋላሳንካ ሃዋዳን ሃናናዋ። ሄ ጋላሳን፥ ጎሊያ ሁጲያን ዴዒያዌ፥ ጎሌ ጋርሳን ዴዒያ ሚሻ ኣካናው ዎꬎፖ፤ ሃዋዳንካ ጎሻ ጋዴን ዴዒያዌ፥ ጉዬ ሲሞፖ። ኣኔ ሎፄ ማቻቲባ ቆፒቴ! ባሬ ሼምፑዋ ኣሻናው ኮዪያ ኡባይ፥ ባዪዜ፤ ባሬ ሼምፑዋ ባዪዚያ ኡባይ፥ ዴዑዋን ናጌ። ታ ሂንቴው ኦዲያዌ ኣዬ ጎፔ፥ ሄ ቃማን ላዑ ኣሳቱ ኢቲ ጊሱዋን ጊሳናዋንታ፤ ኡንቱንቱፔ ኢቱ ኣኬቲና ላዔꬂያዌ ኣታናዋ። ላዑ ማጫ ኣሳቱ ኢቲ ዎፃን ጋጫናዋንታ፤ ኢቲና ኣኬቲና፥ ኢቲና ኣታናዉኑ። ላዑ ኣሳቱ ጎሻ ጋርሳን ዴዒኖ፤ ኢቱ ኣኬታናዋ፥ ላዔꬂያዌ ኣታናዋ» ያጌዳ። ኣ ካሊያዋንቱ ዬሱሳ፥ «ጎዳው፥ ሄዌ ሃቃን ሃናናዌ?» ያጌዲኖ። ኢካ ዛሪዴ፥ «ባኩታይ ዴዒያሳ ሾርቲ ሺቃናዋ» ያጌዳ። ዬሱሲ ባሬና ካሊያውንቶ፥ ሳሌቴናን ኡባ ጋላሲ ዎሳናዳን ሌሚሱዋን ኦዴዳ። ኢካ፥ «ኢቲ ካታማን ፆሳው ያዬናዌ፥ ኣሳካ ቦንቼና ኢቲ ዳናይ ዴዔ። ሄ ካታማን ኣምዔ ሚሺራታ ዴዓው። ኢዛካ ሄ ዳናኮ ያዴ፥ ‹ታ ሞርኬዉኔ ታው ዴዒያ ዬዉዋ ፒርዳ› ያጋዱ። «ዳሮ ዎዲያን ኢዚው ፒርዴናን ኢፄዳ። ሺን ባሬ ዎዛናን ቆፒዴ፥ ‹ታኒ፥ ኡባ ፆሳው ያያና ꬋዮፔካ፥ ኣሳካ ቃይ ቦንቻና ꬋዮፔ፥ ሃ ኣምዔ ሚሺራታ ታና ላባንꬂያ ዲራዉኔ ኡባ ዎዴ ታኮ ያዴ ታና ዳቡርሴና ማላ፥ ታኒ ኢዚው ፒርዳና› ጌዳ። «ሄ ማካላንቻ ዳናይ ጎዋ ኣኬኪቴ። ፆሳይ ጋላሲኔ ቃማ ባሬንታ ማዳና ማላ፥ ዳንዳያን ኣኮ ዋሲያ ዶሬታዋንቱሲ ፒርዴኔዬ? ኢ ኡንቱንቶ ኤሌካ ዛሬኔ? ታኒ ሂንቴንቶ ያጋይ፤ ኡንቱንቶ ኤሌሊ ፒርዳና፤ ሺን ኣሳ ናዓይ ዪያ ዎዴ ሃ ቢታን ኣማኑዋ ዴማኔሻ?» ያጌዳ። ባሬንታ ጌሻ ጊዴ ኣማኔቲያዋንቶኔ ሃራ ኡባ ዳሪ ካꬊያዋንቶ፥ ዬሱሲ ሃ ሌሚሱዋ ኦዴዳ፡ «ላዑ ኣሳቱ ዎሳናው ጌሻ ጎሊያ ጌሌዲኖ። ሄዋንቱፔ ኢቱ ፓሪሳዊያ፤ ኢቱ ቃይ ቃራፃ ቃንፂያዋ። ፓሪሳዊ ዴንዲ ኤቂዴ ባሬ ዎዛናን ዎሲዴ፥ ‹ፆሳው፥ ታኒ ሃራ ኣሳዳን፡ ቦንቂያዋንቱዳን፥ ማካሊያዋንቱዳን፥ ዎሹሚያዋንቱዳን፥ ዎይ ሃዋዳን ቃራፃ ሺሼና ዲራው ኔና ጋላታይ። ሳሚንታን ላዑ ካላ ፆማይ፤ ታኒ ዴሚያ ኡባፔ ታሙ ኩሺያፔ ኢቱዋ ኢማይ› ያጌዳ። «ሺን ቃራፂያ ቢታኒ ሃኩዋን ኤቂዴ፥ ባሬ ኣይፊያን ፑዴ ሳሉዋ ꬎቁ ጊዴ ፄላናዉካ ኮዪቤና። ሺን ባሬ ቲራ ባቂዴ፥ ‹ፆሳው፥ ታኒ ናጋራንቻ፤ ታና ማራ› ያጌዳ። ታኒ ሂንቴንቶ ኦዲያዌ ኣዬ ጎፔ፥ ካሴ ቢታኒያፔ ኣꬊዴ ሃ ቢታኒ ፂሎ ጊዲዴ ባሬ ጎሌ ሲሜዳ፤ ባሬና ꬎቁ ኦꬂያ ኡባይ ካዉሻና፤ ባሬና ቃይ ካዉሺሲያ ኡራይ ꬎቁ ጋና» ያጌዳ። ዬሱሲ ባሬ ኩሺያ ዎꬂዴ ኣንጃና ማላ ኣሳይ ጉꬃ ናና ኣኪዴ ኣኮ ዬዲኖ። ኣ ካሊያዋንቱካ ቤዒዴ፥ ኣሳ ኣሄና ማላ ጌዲኖ። ዬሱሲ ቃሲ ጉꬃ ናና ባሬኮ ፄሲዴ፥ «ጉꬃ ናናይ ታኮ ያና ማላ ኣጊቴ፥ ዲጎፒቴ፤ ፆሳ ካዉቴꬃይ ሃዋንቱ ማላሳ። ታኒ ሂንቴንቶ ቱሙዋ ኦዳይ፤ ፆሳ ካዉቴꬃ ጉꬃ ናዓዳን ኣኬናዋንቱ ኡባይ ሄ ካዉቴꬃ ሙሌካ ጌሌና» ያጌዳ። ዪሁዳ ቢታ ሞዲያዋንቱፔ ኢቱ፥ «ሎዖ ታማሪሲያዎ፥ ታኒ ሜꬊና ዴዑዋ ላታናው ኣያ ኦꬃናው ቤሲ?» ያጊዴ ዬሱሳ ኦቼዳ። ዬሱሲካ ኣው፥ «ኣያው ታና ሎዖ፥ ያጋይ? ኢቲ ፆሳፔ ኣቲን፥ ሎዑ ኦኒኔ ባዋ፤ ፆሳ ኣዛዛቱዋ፥ ‹ዎሹሞፓ፥ ዎꬎፓ፥ ዉዖፓ፥ ዎርዱዋ ማርካቶፓ፥ ኔ ኣባኔ ኔ ዳዮ ቦንቻ ያጊያዋ ኤራ› » ያጊዴ ዛሬዳ። ቢታኒ ዛሪዴ፥ «ሃዋ ኡባ፥ ናዓቴꬃፔ ዶማዴ ናጋዲ» ያጌዳ። ዬሱሲካ ሃዋ ሲሲዴ፥ «ኢቲባይ ኔኒ ቢሮን ኦꬄናኒ ኣቶዌ ዴዔ፤ ሄዌኔካ፥ ኔው ዴዒያዋ ኡባ ዛሊዓዴ ማንቃቶ ኢማ፤ ሃዋ ኦꬆፔ ሳሉዋንካ ኔኒ ዱሬታና፤ ሄዋፔ ጉዬ ታ ጌዱዋ ካላ» ያጌዳ። ሄ ቢታኒ ቃሲ ሄዋ ሲሲዴ ዳሮ ዱሬ ጊዶ ዲራው ዳሮ ካዮቴዳ። ዬሱሲካ ሃ ቢታኒ ዳሮ ካዮቶዋ ቤዒዴ፥ «ዱሬ ኣሳይ ፆሳ ካዉቴꬃ ጌላናው ዎቲ ሜታንዴሻ! ዱሬ ኣሳይ ፆሳ ካዉቴꬃ ጌላናዋፔ ጋሉ ማርፒያ ፆዒያና ኣꬋናዌ ማታቴ» ያጌዳ። ሄዋ ሲሴዳ ኣሳይ፥ «ሲሚ ኦኒ ኣታናው ዳንዳዪ?» ያጌዲኖ። ኢካ ቃይ ዛሪዴ፥ «ኣሳው ዳንዳዬቴናዌ ፆሳው ዳንዳዬቴ» ያጌዳ። ጴፂሮሲ ዛሪዴ፥ «ሲሚ ኑኒ ኑሲ ዴዒያ ኡባ ኣጊዴ ኔና ካሌዶ» ያጌዳ። ኢካ፥ «ቱሙዋ ጋይ፥ ፆሳ ካዉቴꬃ ዲራው ባሬ ጎሊያ፥ ዎይ ባሬና ዬላዋንታ፥ ዎይ ባሬ ማቺያ፥ ዎይ ባሬ ናና፥ ዎይ ኢሻቱዋ ኣጌዳዌ፥ ሃዎዲያን ዳሮ ዳኩዋ፥ ሲንꬃ ዪያ ካዉቴꬃኒካ ሜꬊና ዴዑዋ ኣኬናዌ ኦኒኔ ባዋ» ያጌዳ። ዬሱሲካ ታማኔ ላዑ ባሬና ካሊያዋንታ ባሬኮ ፄሲዴ፥ «ሲሚ ዬሩሳላሜ ባና፤ ኣሳ ናዓባይካ ናባቱ ማፃፋን ፃፌቴዳባይ ኡባይ ያኒ ፖሌታና። ኣዪሁዴ ጊዴናዋንቶ ኣ ኣꬂ ኢማና፥ ቂሊጫና፥ ዳሮ ሜቶꬃና፥ ኣ ቦላን ጩቻና፤ ሾጮዋፔ ጉዪያን ዎꬋና፥ ሄዜንꬂያ ጋላሲ ኢ ዴንዳና» ያጌዳ። ኡንቱንቱካ ሃ ዬዉዋፔ ኣያኔ ኣኬኪቤይኪኖ፤ ሃዪቁካ ኡንቱንቶ ኣኬኬቲቤና ዲራው ኢ ሃሳዮባካ ኤሪቤይኪኖ። ዬሱሲ ኢያርኮኮ ማቴዳ ዎዲያን፥ ኢቲ ቆቃ ቢታኒ ዎሲዴ ኦጊያ ጋፃን ኡቴዳ። ጮራ ኣሳይ ኣꬊያዋ ሲሲዴ፥ «ሃዌ ኣዬሻ?» ያጊ ኦቼዳ። ኣሳይካ ኣው፥ «ናዚሬቲያ ዬሱሲ ሃዋና ኣꬊዴ ዴዔ» ያጊ ዛሬዲኖ። ኢካ፥ «ዳዊቴ ናዓ ዬሱሳ፥ ታና ማራሪኪ» ጊዴ ዋሴዳ። ኣፔ ሲንꬃና ቢዴ ዴዒያዋንቱካ፥ ጮዑ ጋናዳን ሃንቄቴዲኖ። ኢ ቃይ፥ «ዳዊቴ ናዓው፥ ታና ማራሪኪ» ጊዴ ዳሪ ዋሴዳ። ዬሱሲካ ኤቂዴ፥ ባሬኮ ኣሃናዳን ኣሳው ኦዴዳ። ዬሱሳኮ ኢ ማቶ ዎዲያን፥ ዬሱሲ፥ «ታኒ ኔው ኣያ ኦꬃናዳን ኮያይ?» ያጊዴ ኣ ኦቼዳ። ኢካ ዛሪዴ፥ «ጎዳው፥ ፄላናው ኮያይ» ጌዳ። ዬሱሲካ፥ «ፄላ፥ ኔ ኣማኑ ኔና ፓꬄዳ» ያጌዳ። ሄ ዎዲያንካ ፄሊ ኣጌዳ፤ ፆሳካ ቦንቺዴ ኣ ጌዱዋ ካሌዳ። ኣሳይ ኡባይ ቢታኒያ ፄሊዴ፥ ፆሳ ጋላቴዲኖ። ዬሱሲ ሂኒ ኢያርኮ ካታማ ጌሊዴ፥ ሄዋና ኣꬊ ዴዔ። ሱንꬃይ ዛኪዮሳ ጌቴቲያ ኢቲ ዱሬ ቢታኒ ሄዋን ዴዔ። ኢካ ቃራፂያዋንቱሲ ካፑዋ። ዛኪዮሲ ዬሱሳ ጌቴቲያዌ ሃቃዌንቶ ቤዓናው ኮዪሺን ቃንꬃ ጊዴዳዋ ዲራው፥ ኣሳ ጮራቴꬃፔ ዴንዶዋን ቤዓናው ዳንዳዪቤና። ዬሱሲ ሄ ኦጊያና ኣꬊያ ዲራው፥ ሲንꬃው ኣꬊዴ ኢቲ ቦዒያ ቦላ ኬሴዳ። ዬሱሲ ሄ ሳዓ ጋኪዴ፥ ꬎቁ ጊ ፑዴ ፄሊዴ፥ «ዛኪዮሳ፥ ሃቼ ኔ ጎሌን ፔሻናው ቤሲያ ዲራው ኤሌ ዎꬋ» ያጌዳ። ኢካ ኤሌሊ ቦዒያፔ ዎꬊዴ፥ ናሼቻን ዬሱሳ ሞኬዳ። ሄዋን ዴዒያ ኣሳ ኡባይ ሃዋ ቤዒዴ፥ «ሃዌ ናጋራንቻ ጎሌን ጌሊዴ ኢማꬃ ጊዲዴ ሾቤታና ሃኔ» ጊዴ ኡባቱካ ዙዙንꬃ ዶሜዲኖ። ዛኪዮሲካ ቃሲ ኤቂዴ ጎዳ፥ «ጎዳው፥ ሲሚ ታው ዴዒያዋ ኡባፔ ባጋ ሂዬሳቶ ኢማና፤ ኦፔኔካ ዎርዱዋን ኣኬዳዋ ጊዶፔ፥ ኦይዱ ዳኩዋ ኡዳዴ ዛራና» ያጌዳ። ዬሱሲካ ዛኪዮሳው ኦዲዴ፥ «ኔኒካ ኣብራሃሞ ሼሻ ጊዲያ ዲራው፥ ሃቼ ኣቶቴꬃይ ሃ ጎሌ ኣሳው ዬዳ። ኣያው ጎፔ፥ ኣሳ ናዓይ ባዬዳዋ ኮያናዉኔ ኣሻናው ዬዳ» ያጌዳ። ኣሳይ ሃዋ ሲሲዴ ዴዒሺን ዬሱሲ፥ ሂኒ ዬሩሳላሜ ማቶ ዲራዉኔ ኡንቱንቶ ፆሳ ካዉቴꬃይ ሃዒካ ቆንጪያዋ ማላቶ ዲራው ሌሚሱዋ ኦዴዳ። ሃዋዳን ያጊ ዶሜዳ፤ «ኢቲ ዎልቃማ ቢታኒ ባሬው ካዉቴꬃ ቦንቹዋ ኣኪዴ ሲማናው፥ ሂኒ ሃኮ ጋዲያ ቤዳ። ባሬ ቆማቱዋ ጊዶፔ ታሙዋ ፄሲዴ፥ ኡንቱንቶ ታሙ ሚና ጌቴቲያ ሚሻ ኢሞዋሺን፥ ‹ታኒ ሲማዴ ያና ጋካናው፥ ሃሚሻን ዛሊዒሺቴ› ያጌዳ። «ሺን ኣ ጋዲያ ኣሳይ ኣ ኢፆ ዲራው፥ ‹ሃ ቢታኒ ኑ ቦላ ካዉታናዳን ኑኒ ኮዮኮ› ያጊዴ፥ ጉዬና ኢ ዴዒያሳ ኣሳ ኪቴዲኖ። ጊዶፔ ኣቲን፥ ሃ ቢታኒ ካቴ ጊዲዴ ሂኒ ባሬ ጋዴ ሲሜዳ። ሄ ቆማቱ ሁጲያን ሁጲያን ኢ ኢሞ ሚሻን ዛሊዒዴ ኣይ ኬና ዎꬊሴዲኖንቶ ኤራናው ፄሲሴዳ። «ኮይሮ ቆማይ ሺቂዴ፥ ‹ጎዳው፥ ኔኒ ታው ኢሜዳ ታሙ ሚና ዎꬊያ ታሙዋ ዴማዲ› ያጌዳ። ኣ ጎዳይ ኣ፥ ‹ሃያናሾ! ኔኒ ሎዖ ቆማ፤ ኔኒ ጉꬃ ዬዉዋን ኣማኔቴዳዋ ጊዳዴ ቤቶ ዲራው፥ ታሙ ካታማቱዋ ቦላን ማታይ ኔው ኢሜቴዳ› ያጌዳ። «ላዔꬂያዌካ ሺቂዴ፥ ‹ጎዳው፥ ኔኒ ታው ኢሜዳ ኢቼሹ ሚና ጌቴቲያ ሚሻይ ኢቼሹዋ ዎꬌዳ› ያጌዳ። ኣ ጎዳይካ ኣ፥ ‹ኔው ኢቼሹ ካታማቱዋ ቦላን ማታይ ኢሜቴዳ› ያጌዳ። ሃራ ሄዜንꬂያ ቆማይ ሺቂዴ፥ ‹ጎዳው፥ ጩርቃን ፃፃ ዎꬄዳ ኔ ሚሻ ሃዋ ቤዓ። ኣያው ጎፔ፥ ኔኒ ዎꬃቤናሳፔ ኣኪያዋ፤ ዜራቤናዋ ቆይጪያ ሜቄꬂ ባይና ኣሳ ጊዲያ ዲራው፥ ኔው ያያዲ› ያጌዳ። «ጎዳይካ፥ ‹ሃ ኢታ ቆማይ፤ ኔኒ ሃሳዮ ቃላን ኔ ቦላ ታኒ ፒርዳና። ዎꬃቤናዋ ኣኪያዋ፥ ዜራቤናዋ ቆይጪያ ሜቄꬂ ባይና ኣሳ ጊዲያዋ ኤሮፔ፥ ታኒ ያዴ ታ ሚሻ ዎꬊያና ኣካና ማላ፥ ኣዪሲ ዎꬊሲያዋንቶ ኢማቤይኪ?› ያጌዳ። «ጎዳይካ፥ ሄዋን ኤቆዋንታ፥ ‹ሃ ሚሻ ኣፔ ዎꬂ ኣኪዴ ታሙ ሚናይ ዴዒያዎ ኢሚቴ› ያጌዳ። ኡንቱንቱካ፥ ‹ጎዳው፥ ኣው ታሙ ሚናይ ዴዔ› ያጌዲኖ። «ኢካ፥ ‹ታኒ ሂንቴንቶ ኦዲያዌ፥ ዴዒያዎ ኡባው ጉጄታናዋ፤ ባይናዋፔ ቃሲ ሄ ዴዒያዌካ ኣኬታናዋ። ዬዉዋን ቃሲ ታኒ ኡንቱንቱ ቦላን ካዉቴናዳን ኮዬዳ ታ ሞርካቱዋ ታኮ ኣሂዴ ታ ሲንꬃን ሹኪቴ› ጌዳ» ያጌዳ። ዬሱሲ ሃዋ ጎዋፔ ካላ ሂኒ ዬሩሳላሜ ኬሳናው ባሬና ካሊያዋንቱፔ ሲንꬃቲዴ ቤዳ። ዴብሬ ዛይቴ ጌቴቲያ ዴሪያ ማታን ዴዒያ ሂኒ ቤቴፋጌን ቢታኒያ ጌቴቲያ ሄራ ካታማቱዋኮ ሺቄዳ ዎዴ ባሬና ካሊያዋንቱፔ ላዓቱዋ፥ «ሂንቴንቱፔ ሲንꬃን ዴዒያ ቄሪ ካታማቱዋ ቢቴ፤ ያ ሂንቴንቱ ጌሊያ ዎዴ፥ ኦኒኔ ቢሮ ኡቲቤና ሃሬ ማራይ ቃሼቲ ኡቴዳዋ ዴማኒታ፤ ኣ ቢሊዴ ሃ ኣኪ ዪቴ። ኦኒኔ ሂንቴንታ፥ ‹ሃዋ ኣያው ቢሊቴ?› ጊዴ ኦቾፔ፥ ‹ኢ ባሬ ጎዳው ኮሺያ ዲራሳ› ያጊቴ» ያጌዳ። ኪቴቴዳዋንቱካ ቢዴ፥ ዬሱሲ ኡንቱንቶ ኦዶዋዳን ሃኒና ዴሜዲኖ። ኡንቱንቱ ሃሬ ማራ ቢሊያ ዎዴ ቤዒዴ ሃሪያ ጎዳይ፥ «ሃሬ ማራ ኣያው ቢሊቴ?» ያጌዳ። ኡንቱንቱካ፥ «ጎዳው ሃዌ ኮሼ» ያጊዴ፥ ሃሬ ማራ ዬሱሳኮ ኣሄዲኖ፤ ባሬንቱ ማዩዋ ኣ ቦላን ዎꬂዴ ዬሱሳ ሃሪያ ቶጊሴዲኖ። ኣሳይካ ዬሱሲ ቢያ ኦጊያ ቦላ ባሬንቱ ማዩዋ ሂፄዲኖ። ኢ ዴብሬ ዛይቴ ጌቴቲያ ዴሪያ ዱጌꬃ ኣፊያ ኦጊያ ማቴዳ ዎዴ፥ ዳሮ ጮራ ጊዴዳ ኣ ካሊያዋንቱ ቤዔዳ ፆሳይ ኦꬄዳ ማላታው ኡባው ናሼቲዴ፥ ባሬንቱ ኮሻ ꬎቁ ኦꬂዴ፥ «ጎዳ ሱንꬃን ዪያ ካቲ ኣንጄቴዳዋ፤ ሳሉዋን ሳሮታይ ጊዶ። ቃሲ ኪሊ ꬎቃ ሳሉዋን ዴዒያ ፆሳይ ቦንቼቶ» ያጌዲኖ። ኣሳ ጋርሳን ዴዒያ ኢቲ ኢቲ ፓሪሳዋቱ ዬሱሳ፥ «ታማርሲያዎ፥ ኔና ካሊያዋንታ ጮዑ ኦꬃሪኪ» ያጌዲኖ። ኢካ ዛሪዴ፥ «ታኒ ሂንቴንቶ ኦዳይ፥ ኡንቱንቱ ጮዑ ጎፔ፥ ሹቻይካ ዋሳናዋ» ያጌዳ። ዬሱሲ ዬሩሳላሜ ማቴዳ ዎዴ፥ ካታማቶ ቤዒዴ፥ ዬኪዴ፥ «ኔ ሳሮታው ጊዲያዋ ኔኒ ሃቼ ኤራዲንቶ ሎዓ፤ ሺን ሃዒ ሄዌ ኔ ኣይፊያፔ ጌሜዳ። ኣያው ጎፔ፥ ኔ ቦላ ያና ዎዲ ዴዔ፤ ሄ ዎዴ ኔና ኢፂያዋንቱ ኔ ዩሹዋን ዲርሳ ዲሪዴ፥ ያፔኔ ሃፔኔ ዶዲዴ፥ ኔና ኡንዔꬂያ ዎዲ ያናዋ። ኔናኔ ኔ ዲርሳ ጋርሳን ዴዒያ ኔ ኣሳ ሜንꬄሬꬃና። ፆሳይ ኔና ቤዓናው ዬዳ ዎዲያ ኔኒ ኤራቤና ዲራው፥ ኔና ኢፂያዋንቱ ሹቻ ኡባ ኢቱዋ ኢቱዋ ቦላፔ ዴንꬂዴ ላላናዋ» ያጌዳ። ሃዋፔ ካላ ዬሱሲ ጌሻ ጎሊያ ጌሊዴ፥ ዛሊዒያዋንታ ሄዋፔ ኬሴዳ። ዬሱሲ ዛሪዴ፥ « ‹ታ ጎሊ ፆሳ ዎሲያ ጎሊያ ጊዳናዋ› ጌቴቲዴ ፆሳ ቃላን ፃፌቴዳ። ሺን ሂንቴንቱ ኣ ፓኑዋ ጎንጎሉዋ ኦꬄዲታ» ያጌዳ። ዬሱሲ ኡባ ዎዴ ጌሻ ጎሊያን ታማሪሲ ዴዒሺን፥ ቄሳቱዋ ካፓቱ፥ ሙሴ ሂጊያ ታማሪሲያዋንቱኔ ኣሳ ኣዪሲያዋንቱ ኣ ዎꬋናው ኮዪኖ። ሺን ኣሳይ ኡባይ ኣ ሃሳያፔ ኢቱኔ ኣቴናን ሲሲ ኡቶ ዲራው፥ ኣ ዎꬊያ ኦጊያ ኡንቱንቱ ꬋዬዲኖ። ኢቲ ጋላሲ ዬሱሲ ኣሳ ጌሻ ጎሊያን ታማሪሲዴኔ ሚሺራቹዋ ቃላ ኦዲዴ ዴዒያ ዎዴ፥ ቄሳቱዋ ካፓቱኔ ሙሴ ሂጊያ ታማሪሲያዋንቱ ጋዲያ ጪማቱዋና ኢቲፔ ዬሱሳኮ ዬዲኖ። ኡንቱንቱካ፥ «ሃ ዬዉዋ ኔኒ ኡዲያዌ ኣይ ማታኔንቶ ኦዳ፤ ሃ ማታካ ኔው ኢሜዳዌ ኢ ኦኔ?» ያጊዴ ኦቼዲኖ። ኢካ፥ «ታ ሂንቴና ኢቲ ኦሻ ኦቺያዌ ዴዒያዋ ኣኔ ዛሪቴ። ዮሃኒሳ ፂንቃታይ ፆሳፔ ዎይ ኣሳፔ?» ያጊ ኦቼዳ። ኡንቱንቱ ባሬ ጊዶን ማቄቲዴ፥ «ፆሳፔ ጎፔ፥ ሄዋ ጊዶፔ ‹ኣያው ኣማኒቤይኪቴ› ኑና ያጋናዋ፤ ‹ኣሳፔ› ጎፔ፥ ኣሳይ ኡባይ ዮሃኒሲ ናቢያ ጊዲያዋ ኣማኒያ ዲራው ሹቻን ኑና ዴቻናዋንታ» ያጌዲኖ። ሃዋሲ፥ «ሃቃፔ ዬዴንቶ ኤሮኮ» ጊዴ ኣው ዛሬዲኖ። ዬሱሲካ፥ «ሃዋ ጊዶፔ ታካ፥ ታኒ ኦ ማታን ሃ ዬዉዋ ኦꬃይታንቶ ሂንቴንቶ ኦዲኬ» ያጌዳ። ሃዋፔ ሲሚዴ ዬሱሲ ኣሳው ሃ ሌሚሱዋ ያጊ ኦዱዋ ዶሜዳ፡ «ኢቲ ቢታኒ ዳሮ ዎዪኒያ ቱራቱዋ ቶኬዳ። ጎሻንቻቱዋሲ ኮꬃው ኢሚዴ፥ ኢ ሂኒ ሃራ ጋዲያ ቢዴ ጮራ ዎዲያ ጋሚዔዳ። ዎዪኒ ኣይፊያ ኣይፎ ዎዴ፥ ዎዪኒያ ጎሻ ጎዳይ ባሬና ጋኪያዋ ኣሃናዳን ኢቲ ቆማ ኮꬃዋቱዋኮ ኪቴዳ። ኪቴቲ ቤዳዋካ ꬎቢዴ፥ ሜላ ኩሺያ ዬዴዲኖ። ሄዋፔ ሃራ ቆማ ኪቴዳ። ኡንቱንቱ ሄዋካ ቃሲ ꬎቢዴ፥ ቶቺዴ፥ ሜላ ኩሺያ ዬዴዲኖ። ሃዒካ ሃራ ሄዜንꬂያ ቆማ ኪቴዳ። ኡንቱንቱካ ቃሲ ኣ ማሱንꬂዴ፥ ሂኒ ካሬ ኦሌዲኖ። «ሄ ዎዪኒያ ቱራ ጎዳይካ፥ ‹ሲሚ ኣያ ኡዶ? ኣኔ ሃዒ ታ ዶሲያ ናዓ ኪታና፤ ኦኒ ኤሪ ኣ ቦንቾፔኔ› ጌዳ። ጎሻንቻቱ ቃሲ ናዓ ቤዔዳ ዎዴ፥ ‹ሃዌ ኣ ላቲያዋ ጊዶ ዲራው፥ ሃዪቴ ዎꬎይቴ፤ ሄዋፔ ጉዬ፥ ቢታይ ኑሳ ጊዳናዋ› ጊዴ ዞሬቴዲኖ። ዎዪኒያ ቱራ ሳዓፔ፥ ሂኒ ካሬው ኬሲዴ ኣ ዎꬌዲኖ። «ዎዪኒያ ቱራ ጎዳይካ ኡንቱንታ ኣያ ኦꬃንዴሻ? ዮፔ ሄ ጎሻንቻቱዋ፥ ዎꬋናዋ፤ ዎዪኒያ ቱራ ሳዓካ ሃራንቶ ኢማናዋ» ያጌዲኖ። ኣሳቱካ ሃዋ ሲሶ ዎዴ፥ «ሃዋ ማላባ ኣሆፖ» ያጌዲኖ። ዬሱሲካ ሂኒ ኡንቱንቱኮ ፄሊዴ፥ « ‹ሲሚ ሹቻ ጎሊያ ኬፂያዋንቱ ካꬌዳ ሹቻይ፥ ኢ ዋና ጎሊያ ሚኒሲያ ሁጴ ሹቻ ጊዴዳ› ጌቴቲዴ ፃፌቴዳዋ ቢሌꬃይ ኣዬ? ሃ ሹቻ ቦላን ኩንዲያ ኡባይ ሜዔሬቴ፤ ሹቻይካ ኣ ቦላን ኩንዲያ ኡባይ ቡንቼታናዋ» ያጌዳ። ሙሴ ሂጊያ ፃፊያዋንቱኔ ቄሳቱዋ ካፓቱ ዬሱሲ ሃሳዬዳ ሌሚሱ፥ ኡንቱንቱ ቦላን ጌቴቶዋ ኤሮ ዲራው፥ ሄ ሳቲያንካ ኣ ኦይቃናው ኮዬዲኖ። ሺን ኣሳው ያዬዲኖ። ዬሱሳ፥ ሄ ጋዲያ ሞዲያዋሲኔ ኣ ማታሲ ኣꬂዴ ኢማናው ኣ ዶናፔ ኬሲያ ቃላን ኦይቃናው ኢንጄቲያ ዎዲያ ናጊኖ። ሄዋ ዲራው ጌሻ ማላቲዴ ኦይꬃናው ዎቺያዋንታ ኪቴዲኖ። ሄ ኪቴቶዋንቱካ ዬሱሳ፥ «ታማሪሲያዎ፥ ኔኒ ቱማ ዬዉዋ ሃሳዪያዋኔ ታማሪሲያዋ፥ ሄዋዳንካ ቃይ ፆሳ ኦጊያ ቱማቴꬃን ታማሪሲያዋኔ ኦሲኔ ዱማዬናዋ ኑኒ ኤሬቶ። ቃሲካ ኡንቱንቱ፥ ሮማ ካቲያ ቄሳሬው ጊራ ጪጋናው ኮሺ ዎይ ኮሼኔ?» ያጊ ኦቼዲኖ። ኢ ቃሲ ኡንቱንቱ ዴሻቴꬃ ኤሪዴ፥ «ኣኔ ታና ኢቲ ዲናሪያ ቤሲቴ፤ ሄዋ ቦላን ዴዒያ ሚሲሊኔ ፃፌቶዌ ኦና ቤሲ?» ጌዳ። ኡንቱንቱካ፥ «ቄሳሬዋ» ጊዴ ዛሬዲኖ። ኢኔካ፥ «ሄዋ ጊዶፔ፡ ቄሳሬዋ፥ ቄሳሬው ኢሚቴ፤ ፆሳዋ፥ ፆሳው ኢሚቴ» ያጌዳ። ኡንቱንቱካ፥ ኢ ሃሳዬዳ ቃላን ኣሳ ሲንꬃን ኦይቃናው ዳንዳዪ ቤይኪኖ። ኣ ዛሩዋን ማላሌቲዴ ጮዑ ጌዲኖ። ሳዱቃዋናቱፔ ኢቱ ኢቱ ዬሱሳኮ ዪዴ፥ ኦሻ ኣው ሺሼዲኖ። ኡንቱንቱካ ዬሱሳ፥ «ታማሪሲያዎ፥ ኢቲ ቢታኒ ማቻቶ ኣኪዴ ናዓ ዬሌናን ሃዪያዋ ጊዶፔ፥ ሚሺራቶ ሄዋ ኢሻይ ላታ ኣኪ ናዓ ዬሊዴ ባሬ ኢሻው ዜሬꬃ ዎꬃና ማላ ሙሴ ኑሲ ፃፌዳ። ኢቲ ዎዲያን ላፑ ኢሻቱ ዴዒያዋንቱፔ፥ ባይራይ ማቻቶ ኣኪዴ ዬሌናን ሃይቂ ኣጌዳ። ላዔꬂያዌካ ኢዞ ላቴዳ። ሄዜንꬂያዌካ ቃሲ ኢዞ ኣኬዳ፤ ላፑናቱካ ኢዞ ኣኪዴ ናዓ ዬሌናን ሃይቄዲኖ። ዉርሴꬃን ሚሺራታካ ሃይቃ ኣጋዱ። ሲሚ ላፑናቱካ ሄ ሚሺራቶ ኣኬዳ ዲራው፥ ሃይቁዋፔ ዴንዴዳ ዎዴ፥ ኢዛ ኦሲ ማቼ ጊዳኔ?» ያጊ ኦቼዲኖ። ዬሱሲካ፥ «ሃ ኣላሚያ ናናይ ኣኪኖኔ ኣኬቲኖ። ሺን ሃይቁዋፔ ዴንዲዴ፥ ሲንꬃፔ ዪያ ዎዲያን ዴዓናው ቤሲያዋንቱ ኣኪኪኖኔ ኣኬቲኪኖ። ኡንቱንቱ ፆሳ ኪታንቻ ማላቲዴ ዴዒያ ዲራው፥ ሄዋፔ ሲሚዴ ሃይቂኪኖ። ሃይቁዋፔ ዴንዲያዋንታ ጊዲያ ዲራው ኡንቱንቱ ፆሳ ናና። ሙሴ፥ ፆሳይ ኣው ቆንጬዳ ዎራባ ፃፌዳ ታሪኪያ ጋርሳን፥ ጎዳ ፆሳ፥ «ኣብራሃሞ ፆሳ፥ ዪሳቃ ፆሳ፥ ያዪቆባ ፆሳ» ያጊዴ ፄሱሳይ፥ ሃይቃዋንቱ ዴንዲያዋ ቤሴ። ኡባይካ ኣው ሃይቂ ቤናዋንታ ጊዲያ ዲራው፥ ኢ ሃይቂቤናዋንቱ ፆሳፔ ኣቲን፥ ሃይቆዋንቱዋ ጊዴና» ያጌዳ። ኢቲ ኢቲ ሙሴ ሂጊያ ፃፌዳዋንቱካ፥ «ታማሪሲያዎ፥ ሎዑዋ ሃሳያዳ» ያጌዲኖ። ሃዋፔ ሲሚዴ፥ ኢቱካ ኣ ኦቻናው ፃሎዌ ባዋ። ሃዋፔ ካላ ዬሱሲ ኡንቱንታ፥ «ኣሳይ ኪሪስቶሳ ዎቲ ‹ዳዊቴ ናዓ› ያጊኖ? ጋሶቴꬃይኔካ፥ ዳዊቴ ባሬ ሁጴው ማዚሙሬ ማፃፋ ጋርሳን፥ ‹ጎዳይ ታ ጎዳ፥ «ታኒ ኔ ሞርኬቱዋ ኔ ጌዲያፔ ጋርሳና ዴዓናዳን ኦꬃና ጋካናው፥ ታ ኡሼቻን ኡታ» ጌዳ› ያጌዳ። *** «ሲሚ ዳዊቴ ኪሪስቶሳ፥ ‹ጎዳ›፥ ጊዴ ፄሲያዋ ጊዶፔ፥ ዎቲ ኣው ናዓ ጊዳና ዳንዳዪ?» ያጌዳ። ኣሳይ ኡባይ ሲሲሺን ባሬና ካሊያዋንቶ፥ «ሙሴ ሂጊያ ታማሪሲያዋንቱፔ ናጌቲቴ፤ ኡንቱንቱካ፥ ኣዱሳ ቃሚሺያ ማዪዴ ዩያናው፥ ጌያይ ዴዒያሳን ቦንቾ ሳሮታ ኣካናው፥ ዎሲያ ጎሌን ቦንቾ ኦይዲያን ኡታናው፥ ሾቤቴዳሳን ቦንቾሳ ኮዪያዋንታ። ሄዋንቱካ ኣምዓቱዋ ጎሊያ ካሎዪያዋንታ፤ ባሬንታ ቤሳናው ዎሳ ኣዱሲያዋንታ፤ ኡንቱንታ ኢታ ፒርዳይ ናጌ» ያጌዳ። ዬሱሲ ꬎቁ ጊዴ ፄሊያ ዎዴ፥ ዱሬ ኣሳይ ጌሻ ጎሊያን ኢሞታ ሺሺያ ሚሻ ጊዶን ባሬንቶ ዴዒያዋፔ ኡንቱንቱ ዬጊያ ዎዴ ቤዔዳ። ቃሲካ ኢቲ ሂዬሳ ኣምዔ ሚሺራታ ላዑ ሴምቤሪያ ሄዋን ዬጊያ ዎዴ ቤዒዴ፥ «ታ ሂንቴው ቱሙዋ ጋይ፥ ሃ ሂዬሳ ኣምዔ ሚሺራታ፥ ኦፔኔ ዳሩዋ ኢማዱ። ሃ ኣሳይ ኡባይ ባሬንቶ ፓላሆዋፔ ኢሜዲኖ፤ ሺን ኢዛ ባሬ ሂዬሳቴꬃ ዎልቃን ባሬው ዴዒያዋ ኡባ ኢማዱ» ያጌዳ። ኣ ካሊያዋንቱፔ ኢቱ ኢቱ፥ «ጌሻ ጎሊ ሎዖ ሹቻኒኔ ባላ ሺቁዋ ኢሞታን ሎዔዳዋ» ያጊ ሃሳዪያ ዎዴ ዬሱሲ፥ «ሃዌ ሂንቴንቱ ቤዒያዌ ኡባይ ኮሌቴናን፥ ሹቻይ ሹቻ ቦላን ኬሌቲዴ ኣቴና ዎዲ ያናዋ» ያጌዳ። ኡንቱንቱካ፥ «ታማሪሲያዎ፥ ሲሚ ሃዌ ሃናናዌ ኣዉዴ? ቃሲካ ሃዌ ሃናናው ማላይ ኣዬ?» ያጊዲ ኦቼዲኖ። ኢካ፥ «ኦኒኔ ባሌꬄናዳን ናጌቲቴ፤ ጮራ ኣሳይ፥ ‹ታኒ ኪሪስቶሳ› ያጊዴ ቃሲካ፥ ‹ዎዲ ማቴዳ› ያጊዴ ታ ሱንꬃን ያናዋንታ፤ ሂንቴንቱ ቃሲ ኡንቱንታ ካሎፒቴ። ኦላ ዬዉዋኔ ኣሳ ማካላባ ሲሲያ ዎዴ ዳጋሞፒቴ፤ ሃዌ ኮይሮ ሃናናው ቤሲያዋ ጊዶ ዲራፔ ኣቲን ዉርሴꬃይ ቢራ» ያጌዳ። ሄዋፔ ካሊዴ ኣሳው፥ «ኣሳይ ኣሳ ቦላ፥ ካዉቴꬃይካ ካዉቴꬃ ቦላ፥ ዴንዳናዋ፤ ዎልቃማ ቢታ ቃꬃይ ሃናናዋ፤ ኮሻይኔ ሃርጊ፥ ዱማ ዱማሳን ሜꬌታናዋ፤ ያሺያ ዬዉኔ ኡባካ ዎልቃማ ማላታይ ሳሉዋፔ ሃናናዋ። «ሃዌ ኡባይ ሃናናፔ ካሲያን ቃሲ ኣሳይ ሂንቴንታ ኦይቃናዋንታ፥ ሜቶꬃናዋንታ፤ ሂኒ ኣዪሁዳቱዋ ዎሳ ጎሌ ኣሳው ኣꬂ ኢማናዋንታ፤ ቃሾ ጎሌካ ጌሊሳናዋንታ፤ ካታቱዋ ሲንꬃኒኔ ሞዲያዋንቱ ሲንꬃን ሺሻናዋንታ፤ ሃዌ ኡባይ ታ ሱንꬃ ጋሱዋን ሂንቴንታ ጋካናዋ። ሃዌካ ማርካታናው ሂንቴው ሎዖ ቃዳ ጊዳናዋ። ሃዋ ጊዲያ ዲራው፥ ኣይ ዛሩዋ ኢማኔ ጊዴ ኮይሮቲዴ ሂንቴንቱ ኡንዔቴና ማላ ሃዋ ዎዛና ኣꬂቴ። ኤቄቲያዋንቱ ኡባይ፥ ኤቄታናዉኔ ላካናው ዳንዳዬና ቃላኔ ኣꬎ ጪንጫቴꬃ ታኒ ሂንቴንቶ ኢማና። ሂንቴንታ ዬሌዳዋንቱኔ ሂንቴንቱ ኢሻቱ፥ ሂንቴንቱ ዳባቱኔ ሂንቴንቱ ላጌꬃቱካ ኣቴናን ሂንቴንታ ኣꬂ ኢማናዋንታ፤ ሂንቴንቱፔካ ኢቱዋ ኢቱዋ ዎꬋናዋንታ። ታ ሱንꬃ ዲራው ኣሳ ኡባ ማታን ኢፄቴዳዋንታ ጊዳኒታ። ዬዉዋን ቃሲ ሂንቴንቱ ሁጲያ ቢናናፔካ ኢቲናኔ ባዩኩ። ሚኒ ኤቂዴ ሂንቴንቱ ሼምፑዋ ኣሺታ። «ዬሩሳላሜ ኦላ ኣሳን ዶዴቴዳ ዎዴ፥ ኢዚ ባዬꬃይ ማቴዳዋ ኤሪቴ። ሄ ዎዴ ዪሁዳን ዴዒያዋንቱ ዴሪያኮ ባቃቲኖ፤ ካታማን ዴዒያዋንቱ ቃይ ሄዋፔ ኬሲኖ፤ ባላጋሪያን ዴዒያዋንቱካ ያ ካታማኮ ጌሎፒኖ፤ ፆሳ ቃላን ፃፌቴዳዌ ኡባይ ፖሌታናዳን ሃዌ ሃሉዋ ኬሲያ ዎዲያ። ቢታ ቦላን ዎልቃማ ሜቱ ሃናናዋ፤ ሃዒ ዴዒያ ኣሳ ቦላን ሃንቁ ያናዋ፤ ሄዋ ዲራው ሄዎዲያን ሻሃሮዋንቶኔ ꬋንꬂያዋንቶ ኣዬ! ኣሳይ ኡባይ ማሻን ሃይቃናዋንታ፤ ፆሳ ኤሬና ጋዲያ ኡባቱካ ኦሞዱዋን ባናዋንታ፤ ዬሩሳላሜካ ኣዪሁዳ ጊዴናዋንቱ ዎዲ ፖሌታና ጋካናው፥ ኡንቱንቱን ዬꬌቴዳዉኖ ጊዳናዉኑ። «ኣዋ፥ ኣጌናኒኔ ፆሊንቲያ ቦላ ማላታይ ሃናናዋ፤ ኣባፔኔ ቤታ ኮሻፔ ዴንዶ ጋሱዋን ቢታ ቦላን ዴዒያ ኣሳይ ኡባይ ኡንዔታናዋንታ፤ ሂርጋናዋንታ። ሳሉዋ ዎልቃይ ኡባይ ቃፂያ ዲራው ኣሳይ ያሻኒኔ ኣላሚያ ቦላ ኣዬ ያናዌሻ ያጊዴ ናጉዋን ዳቡራናዋንታ። ሄ ዎዴ ኣሳ ናዓይ ዎልቃኒኔ ዎልቃማ ቦንቹዋን ሻሪያን ዪያ ዎዴ ቤዓናዋንታ። ሂንቴንቱካ፥ ሃ ዬዉ ፖሌቱሳ ዶሚያ ዎዴ፥ ዎዙ ማቶ ዲራው ሲቲ ጊዴ ኤቂቴ፤ ፑዴ ꬎቁ ጊዴ ፄሊቴ» ጌዳ። ካሊዴካ፥ ሃዋ ያጊ ሌሚሱዋ ኦዴዳ፥ «ዎዴንꬃፔኔ ሃራ ሚꬃ ኡባፔ ፄሊቴ፤ ሃይꬃይ ኣጪና ቤዒያ ዎዴ፥ ሄ ዎዴ ቦኒ ማቴዳዋ ሂንቴንቱ ኤሪታ። ሄዋዳንካ ቃሲ ዬዋቱ ፖሌቲያዋ ቤዒያ ዎዴ፥ ፆሳ ካዉቴꬃታ ማቴዳዉኖ ኤሪቴ። «ታኒ ሂንቴው ቱሙዋ ጋይ፤ ሃዌ ኡባይ ፖሌታና ጋካናው ሃ ዬሌታይ ኣꬌና። ሳሉኔ ሳዓይ ኣꬋና፤ ሺን ታ ቃላይ ኣꬌና። ሲሚ ዛዋይ ባይና ዴዑዋን፥ ኡሻ ዳሩዋኔ ዴዑዋባን ኡንዔቲሺን ሂንቴንቱ ዎዛናይ ሌፔናዳኒኔ ሄ ጋላሳይ ጲሪያዳን ቆፔናን ሂንቴና ጋኬናዳን ናጌቲቴ፤ ሃዌ ቢታ ኡባን ዴዒያዋንቱ ኡባቱዋ ቦላን ጋካናዋ። ሲሚ ዪያ ኢታባ ኡባፔ ሂንቴንቱ ኣታናዳኒኔ ኣሳ ናዓ ሲንꬃንካ ኤቃናው ዳንዳያና ማላ፥ ኡባ ዎዴ ሚኒ ዎሲቴ» ያጌዳ። ዬሱሲ ጋላሲ ጋላሲ ጌሻ ጎሊያን ታማሪሲዴ፥ ቃማ ቃማ ዴብሬ ዛይቴ ያጌቲያ ዴሪያኮ ኬሲዴ ኣቄ። ኣሳይ ኡባይ ኣ ሲሳናው ጉራን ያ ጌሻ ጎሊያ ኣኮ ዪኖ። ፓሲጋ ጌቴቲያ ማጋጌ ኡኪꬃ ሚያ ባላይ ማቴዳ። ቄሳቱዋ ካፓቱኔ ሙሴ ሂጊያ ፃፊያዋንቱ ዬሱሳ ዎቲ ዎꬋኔንቶ፥ ዎꬊያ ኦጊያ ጌማን ኮዪኖ፤ ሺን ኣሳው ያዪኖ። ፃላሂካ ታማኔ ላዑ ካሊያዋንቱፔ ኢቱዋ ጊዴዳ ኣስቆሮቱ ዪሁዳን ጌሌዳ። ኢካ ቢዴ፥ ዬሱሳ ዎቲ ኣꬂ ኢማኔንቶ ቄሳቱዋ ካፓቱዋናኔ ጌሻ ጎሊያ ናጊያዋንቱ ካፓቱዋና ኢቲፔ ሃሳዬዳ። ኡንቱንቱካ ናሼቲዴ፥ ሚሻካ ዪሁዳው ኢማናው ዉሌቴዲኖ። ኢካ ኤኖ ጌዳ፤ ኣሳይ ባይና ሳን ዬሱሳ ኣꬂ ኢማናው ኢንጄቲያ ዎዲያ ኮዬ። ማጋጌ ኡኪꬃ ሚያ ባላ ቦንቺያ ዎዲ ጋኬዳ፤ ሄ ዎዲካ ፓሲጋው ዶርሳ ሹካናው ቤሲያ ዎዲያ። ዬሱሲ ጴፂሮሳኔ ዮሃኒሳ፥ «ፓሲጋ ቁማ ኑኒ ማናዳን ቢዴ ጊጊሲቴ» ጊዴ ኪቴዳ። ኡንቱንቱካ ዛሪዴ፥ «ሃቃን ጊጊሳናዳን ኮያይ?» ያጊ ኦቼዲኖ። ኢካ፥ «ሂንቴንቱ፥ ካታማ ጌሊያ ዎዴ ኦቱዋና ሃꬃ ቶኬዳ ቢታኒ ሂንቴንቱና ጋኬታናዋ፤ ኢ ጌሊያ ጎሊያ ኣ ካሊዴ ጌሊቴ፤ ሄ ጎሊያዋካ፥ ‹ታማሪሲያዌ ኔና፥ «ታኒ፥ ታና ካሊያዋንቱና ኢቲፔ ፓሲጋ ቁማ ሚያ ኢማꬃ ኪፊሊ ሃቃ ባጋና ዴዒ?» ያጌ› ጊቴ። ሄ ቢታኒካ ፖቂያ ቦላን ዴዒያ ሂፄቲ ኡቴዳ ኣኮ ኪፊሊያ ሂንቴንታ ቤሳናዋ፤ ሄዋኒካ ሳዓ ጊጊሲቴ» ያጌዳ። ኡንቱንቱ ቢዴ፥ ዬሱሲ ጎዋዳንካ ቢታኒያ ዴሚዴ ፓሲጋ ቁማ ጊጊሴዲኖ። ፓሲጋ ቁማይ ሜቴቲያ ሳቲ ጋኮ ዎዴ፥ ታማኔ ላዑ ኪቴቶዋንቱና ኢቲፔ ቁማ ማናው ኡቴዳ። ኢካ፥ «ታና ሜቱ ጋካናፔ ካሲያን ሂንቴንቱና ሃ ፓሲጋ ቁማ ማናው ዳሮ ኣሞታዴ ዴዓይ። ኣዪሲ ጎፔ፥ ታ ሂንቴው ኦዲያዌ፥ ሃዌ ፆሳ ካዉቴꬃን ፖሌታና ጋካናው፥ ታኒ ላዔꬁዋ ሃዋፔ ሚኬ» ያጌዳ። ፁዓ ኣኪዴ፥ ፆሳ ጋላቲዴ፥ «ሃዋ ሄይቴ፥ ሂንቴንቱ ጊዱዋን ጊሼቲ ኡሺቴ። ኣዪሲ ጎፔ፥ ታ ሂንቴንቶ ያጋይ፥ ፆሳ ካዉቴꬃይ ያና ጋካናው፥ ሃቼፔ ዶማዴ ዎዪኒያ ኤሳ ኡሺኬ» ያጌዳ። ቃሲ ማጋጌ ኡኪꬃ ኣኪዴ፥ ፆሳ ጋላቴዳ፤ ሄ ኡኪꬃ ሜንꬂ ኡንቱንቶ ኢሚዴ፥ «ሃዌ ሂንቴንቶ ኢሜቲያዌ ታ ኣሹዋ፤ ሃዋን ታና ቆፓና ማላ ሃዋ ሚቴ» ያጌዳ። ካዉዋ ሞዋፔ ጉዪያን፥ ካሴዋዳን ፁዓ ዴንꬂ ኡንቱንቶ ኢሚዴ፥ ሃዋዳን ያጌዳ፡ «ሃ ፁዓይ፥ ታ ሂንቴንቱ ዲራው ጉሲያ ታ ሱꬃ ቆፔꬂያ ኦራꬃ ጫቁዋ። ሺን ቤዒቴ፥ ታና ኣꬂ ኢማናው ዴዒያ ቢታኒ ጋዪታን ታናና ኢቲፔ ሜ። ኣያው ጎፔ፥ ታኒ ኣሳ ናዓይ ፆሳይ ጎዋዳን ባይ፤ ሺን ታና ኣꬂዴ ኢሚያ ኡራው ኣው ኣዬ» ያጌዳ። ኡንቱንቱ ጊዶፔ ሄዋ ኦꬃናው ዴዒያዌ ኦና ጊዳኔንቶ፥ ባሬንቱ ጊዶን ኦሻ ዶሜዲኖ። ቃሲ ባሬንቱ ጊዶፔ ኦኒ ኣꬌንቶ ያጌቲያ ፓሉማይ ኡንቱንቱ ጊዶን ኬሴዳ። ዬሱሲ ኡንቱንታ ያጌዳ፡ «ሃ ኣላሚያ ሞዲያዋንቱ ባሬንቱ ኣሳ ቦላ ጎዳቲኖ፤ ኡንቱንታ ሞዲያዋንቱ ኬካቱዋ ጌቴቲኖ። ሺን ሂንቴንቱ ሃዋዳን ሃኖፒቴ፤ ዬዉዋን ቃሲ ሂንቴንቱፔ ꬎቃ ጊዴዳዌ ሂንቴ ኡባፔ ጉፂያዋ፤ ሂንቴንታ ሞዲያዌካ፥ ሂንቴንቶ ቆማዳን ሃኖ። «ቁማ ማናው ኡቴዳዋፔኔ ቁማ ኣሳው ኣꬂያዋፔኔ ኦኒ ቦንቼቲ? ቁማ ማናው ኡቴዳዋ ጊዴኔ? ታኒ ቃሲ ሂንቴንቱ ጊዶን ቁማ ኣꬂያ ቆማ ማላ። ቃሲ ታኒ ፓጬቲያ ዎዲያን ሂንቴንቱ ታናና ኢቲፔ ሚኒ ኤቄዳዋንታ። ኣ ካዉቴꬃ ኦይዲያን ኡታና ማላ ታ ኣቡ ታና ሱንꬆዋዳን፥ ታኒ ቃሲ ታ ካዉቴꬃን ታ ጋይታፔ ማናዳኒኔ ኡሻናዳን፥ ታማኔ ላዑ ኢስራዔሊያ ያራቱዋ ቦላ ፒርዲዴ፥ ካዉቴꬃ ኦይዲያን ኡታና ማላ ሂንቴንታ ሱንꬃዲ» ያጌዳ። *** ጎዳይ፥ «ሲሞና፥ ሲሞና፥ ታኒ ኦዲያዋ ሲሳ፤ ፃላሂ ሂንቴንታ ኣሳይ ዛርጋ ሃልዒያዋዳን፥ ሃልዓናው ፆሳ ዎሴዳ። ሺን ታኒ ኔ ኣማኑ ባዬናዳን ኔ ዲራው ጋናታዲ። ኔኒ ታኮ ሲሚያ ዎዴ ኔ ኢሻቱዋ ሚኒሳ» ያጌዳ። ሲሞኒ ዛሪዴ፥ «ጎዳው፥ ታኒ ኔናና ቃሼታናዉኔ ኔናና ኢቲፔ ሃይቃናው ጊጋ ኡታዲ» ያጌዳ። ዬሱሲ ቃሲ፥ «ጴፂሮሳ፥ ታኒ ኔው ያጋይ፤ ሃቼ ቢላሂያን፥ ኩቱ ዋሳናሲ ሄዙ ጌዴ ታና ኔኒ፥ ‹ኣ ታኒ ኤሪኬ› ጋዴ ካዳናሳ» ያጌዳ። ዬሱሲ ባሬና ካሊያዋንቶ፥ «ኮሮጁ፥ ቃርጪቲኔ ጫማይ ባንታን ታኒ ሂንቴንታ ኪቶ ዎዴ፥ ሂንቴንቶ ኢቲባይ ፓጮዌ ዴዒ?» ያጌዳ። ኡንቱንቱካ፥ «ኢቲ ባይኔ ኑሲ ፓጪ ቤና» ያጌዲኖ። ኢካ ዛሪዴ፥ «ሃዒ ቃሲ ኮሮጁ ዴዒያዌ ኣኪ ቦ፤ ቃርጪቲ ዴዒያዌካ ሄዋዳን ኡዶ፤ ባይናዌ ቃይ ባሬ ማዩዋ ዛሊዒዴ ማሻ ሻሞ። ኣያው ጎፔ ታ ሂንቴው ያጋይ፥ ‹ሃዌ ማካላንቻቱና ኢቲፔ ፓይዴቴዳ› ያጌቲ ፆሳ ማፃፋን ፃፌቴዳዌ፥ ታናን ፖሌቴናን ኣቴና። ኤ፥ ታው ጌቴቴዳዌ ሃዒ ፖሌታናዋ» ያጌዳ። ኣ ካሊያዋንቱ፥ «ጎዳው፥ ሃዋን ላዑ ማሻይ ዴዔ» ያጊና ኢካ፥ «ሄዌ ጊዳናዋ» ያጌዳ። ዬሱሲ ካታማፔ ኬሲዴ፥ ሃራ ጋላሲ ቢያዋዳንካ ዴብሬ ዛይቴ ቤዳ። ቃሲ ኣ ካሊያዋንቱካ ኣ ጌዱዋ ቤዲኖ። ሄ ሳዓ ጋኪዴ፥ «ፓጪያን ሂንቴንቱ ጌሌናን ኣታና ማላ፥ ዎሲቴ» ያጌዳ። ሹቻ ኦሊና ጋኪያሳ ኬና ኡንቱንቱፔ ሃኪ ቤዳ። ጉልባቲዴ፥ «ታ ኣቦ፥ ኔኒ ኮዪያዋ ጊዶፔ፥ ሃ ሜቱዋ ፁዓ ታፔ ዲጋ፤ ሺን ታ ሼኔ ጊዶፖ፤ ኔ ሼኔ ጊዶፔ ኣቲን» ያጊዴ ዎሴዳ። ሳሉዋፔ ዪዴ ሚኒሲያ ኪታንቻይ ኣው ቤቴዳ። ባሬ ዎዛና ጊዶን ሴሌቲዴ፥ ዳሪ ዎሴዳ። ኢ ጫዎቲያ ጫዉካ ሳዓ ቦላን ፆኪያ ሱꬃ ማላቴዳ። ዎሳፔ ዴንዲዴ፥ ባሬና ካሊያዋንቱኮ ጉዬ ቢዴ፥ ኡንቱንቱ ዳሮፔ ቃሬቴዳ ዲራው፥ ዳቡሪዴ ጌሚዒሾዋንታ ፄሊዴ፥ «ኣያው ጌሚዒሺቴ? ፓጪያን ጌሌናዳን ዴንዲ ዎሲቴ» ያጌዳ። ዬሱሲ ሄዋ ሃሳይ ዴዒሺን፥ ጮራ ኣሳይ ዬዲኖ። ታማኔ ላዑ ኣ ካሊያዋንቱፔ ኢቱዋ ጊዴዳ ዪሁዳ ጌቴቲያዌ ሄ ኣሳ ካሌꬂዴ ዬራናው ዬሱሳኮ ሺቄዳ። ዬሱሲ ቃይ፥ «ዪሁዳው፥ ኔኒ ታና ኣሳ ናዓ ዬራዴ ኣꬃ ኢማይ?» ያጌዳ። ኣ ዩሹዋን ዴዒያ ኣ ካሊያዋንቱ ሃኔቲያ ዬዉዋ ቤዖ ዎዴ ኣ፥ «ጎዳው፥ ሃ ኣሳ ኑኒ ማሻን ቃንፃኔ?» ያጌዲኖ። ኡንቱንቱፔ ኢቱ፥ ቄሳቱዋ ኡባቱዋ ካፑዋ ቆማ ሾጪዴ፥ ኣ ኡሼቻ ሃይꬃ ቃንፂ ኦሌዳ። ዬሱሲ ቃይ ዛሪዴ፥ «ኣጊቴ፥ ባሺቴ» ያጌዳ። ቢታኒያ ሃይꬃካ ቦቺዴ ፓꬄዳ። ዬሱሲካ ባሬኮ ዬዳ ቄሳቱዋ ካፓቶ፥ ጌሻ ጎሊያ ናጊያዋንቶ፥ ሱንꬃቱዋሲኔ ጋዲያ ጪማቶ፥ «ፓኑዋ ኦይቂያዋዳን ማሻኔ ፃምዓ ኦይቂዴ ዪቴ? ጌሻ ጎሊያን ታኒ ጋላሳን፥ ጋላሳን ሂንቴንቱና ዴዒያ ዎዴ፥ ታና ኦይቂቤይኪታ፤ ሺን ሃዒ ሃዌ ሂንቴንቱ ዎዴኔ ꬉማ ዎልቃ ዎዴ» ያጌዳ። ዬሱሳ ኦይቂ ቃቺዴ፥ ቄሳቱዋ ኡባ ካፑዋ ጎሌ ኣፊዴ ጌሊሴዲኖ። ጴፂሮሲካ ኡንቱንቱፔ ጉዬ ሃኩዋን ኡንቱንቱ ጌዱዋ ካሌ። ዲርሳ ጊዶን ታማ ኤꬂዴ፥ ኢቲፔ ኡቲ ዴዒሺን፥ ጴፂሮሲ ኡንቱንቱ ጊዶን ዪዴ ኡቲ ኣጌዳ። ታማይ ፖዒያ ባጋና ጴፂሮሲ ኡቲዴ ዴዒሺን፥ ኢቲ ኣሺካራታ ሎይꬃ ፄላዴ፥ «ሃዌካ ኣናና ኢቲፔ ዴዔ» ያጋዱ። ጴፂሮሲ ቃይ፥ «ሃኔ ሚሺራቴ፥ ታኒ ኣ ኤሪኬ» ያጊ ካዴዳ። ጉꬃ ዎዲያፔ ጉዪያን፥ ሃራ ቢታኒ ጴፂሮሳ ቤዒዴ፥ «ኔኒ ኡንቱንቱና ጋꬆ ዴዓ» ያጊና፤ ጴፂሮሲ ቃሲ፥ «ሃዎ ቢታኔው፥ ታኒ ኣናና ጋꬆ ዴዒኬ» ያጌዳ። ኢቲ ሳቴ ጊዲያዋ ጋሚዒዴ ሃራ ቢታኒ ቆንጪሲዴ፥ «ኢ ጋሊላ ጋዴ ኣሳ ጊዲያ ዲራው፥ ሃ ቢታኒ ኣናና ኢቲፔ ዴዒያዌ ቱማ» ያጌዳ። ጴፂሮሲ ቃሲ፥ «ሃ ቢታኔው፥ ኔኒ ጊያዌ ኣዬንቶ ታኒ ኤሪኬ» ያጌዳ። ሄ ዎዲያን ኢ ቢሮካ ሃሳይ ዴዒሺን፥ ኤሌካ ኩቱ ዋሲ ኣጌዳ። ጎዳይ ጉዬ ሲሚዴ፥ ጴፂሮሳ ፄሌዳ። ጴፂሮሲ ጎዳይ ባሬና፥ «ሃቼ ኩቱ ዋሳና ጋካናው፥ ሄዙ ጌዴ ታና ካዳናሳ» ጌዳ ጎዳ ቃላይ ኣው ቆፌቲ ኣጌዳ። ጴፂሮሲ ዲርሳፔ ካሬ ኬሲዴ፥ ሴሌቲዴ ዬኬዳ። ዬሱሳ ኦይቄዳ ኣሳይ ቂሊጪኖኔ ሾጪኖ። ኣ ኣይፊያ ጎዚ ባቂዴ፥ «ኔና ባቄዳዌ ኦኔ? ናቢያ ጊዶፔ ኔና ዴቻዋ ኣኔ ኦዳ» ያጊዴ ኣ ኦቼዲኖ። ቃሲ ኣ ሃራ ጮራ ቦሪያ ቦሬዲኖ። ሳዓይ ዎንቲና ጋዲያ ጪማ ኣሳቱ፥ ቄሳቱዋ ካፓቱኔ ሙሴ ሂጊያ ታማሪሲያዋንቱ፥ ዬሱሳ ባሬንቱ ሺቄዳሳ ኣፊዴ፥ «ኪሪስቶሲ ኔኔ? ኣኔ ኑ ኦዳ» ያጌዲኖ። ሺን ኢ፥ «ታኒ ሂንቴንቶ ኦዶፔ ታና ኣማኒኪታ፤ ቃሲ ሂንቴንታ ታኒ ኦቾፔ ኦዲኪታ፤ ዎይ ቃሹዋፔ ታና ቢሊኪታ። ሺን ሃ ሳቲያፔ ዶሚን ታኒ ኣሳ ናዓይ፥ ሃዒፔ ዶማዴ፥ ዎልቃማ ፆሳ ኡሼቻ ባጋና ኡታና» ያጌዳ። ኡንቱንቱ ኡባይ ዬሱሳ፥ «ያቲና ኔኒ ፆሳ ናዔ?» ያጌዲኖ። ኢካ ዛሪዴ፥ «ታኒ ፆሳ ናዓ ጊዶዋ ሂንቴንቱ ሃሳዬዲታ» ያጌዳ። ኡንቱንቱካ፥ «ኑኒ ኑ ሁጴው ኣ ዶናፔ ሲሴዶ፤ ሃዋፔ ሲንꬃው ኣይ ማርካ ኮሺ?» ያጌዲኖ። ሄዋን ሺቄዳ ኡባቱካ ኢቲፔ ዴንዲዴ፥ ዬሱሳ ጲላፆሳኮ ኣፌዲኖ። ኡንቱንቱካ፥ «ሃቢታኒ ኑ ኣሳ ባሌꬂዴ፥ ኣሳይ ሮሜ ቢታ ካዉዋ ቄሳራው ጊራ ኢሜና ማላ ዲጊዴ፥ ቃሲ፥ ‹ታኒ ካቲያ› ያጊሺን ዴሜዶ» ያጊዴ ሞቱዋ ዶሜዲኖ። ጲላፆሲካ ዬሱሳ፥ «ሃዎ፥ ኣዪሁዳቱዋ ካቲ ኔኔ?» ያጊዴ ኦቼዳ። ዬሱሲ ዛሪዴ ኣ፥ «ኔኒ ጋ ዴዓሳ» ያጌዳ። ጲላፆሲ ቄሳቱዋ ካፓቱዋሲኔ ኣሳሲ ኦዲዴ፥ «ታኒ ሃ ቢታኒያ ቦላን ኣይኔ ኢታ ኦሱዋ ዴማ ቤይኬ» ያጌዳ። ጊዶፔ ኣቲን ኡንቱንቱ፥ «ሃ ቢታኒ ጋሊላፔ ዶሚዴ፥ ሃራይ ኣቶ ሃዋ ጋካናዉካ፥ ዪሁዳ ጋዲያ ኡባ ባሬ ቲሚርቲያን ቃꬂዴ ዴዔ» ያጊዴ ሚኒሲ ኦዴዲኖ። ጲላፆሲካ ሃዋ ሲሲዴ፥ «ኢ ጋሊላ ኣሴ?» ያጊዴ ኤራናው ኦቼዳ። ጲላፆሲ ሄሮዲሴ ሞዲያ ጋዲያፔ ዬሱሲ ዬዳዋ ኤሬዳ ዎዴ፥ ሄሮዲሴካ ቃይ ሄዎዲያን ዬሩሳላሜን ዴዒያ ዲራው፥ ኣኮ ዬሱሳ ዬዴዳ። ሄሮዲሴ ዳሮ ዎዲያፔ ዶሚዴ ዬሱሳ ቤዓናው ኣሞቲ ዴዒያ ዲራው፥ ኣ ቤዔዳ ዎዴ ዳሮፔ ናሼቴዳ። ዬሱሳ ዋሪያ ሲሴዳዋ ዲራው፥ ኢ ኦራꬃባ ኦꬂሺን ቤዓናው ሂዶታን ጋሚዔዳ። ሄሮዲሴ ዬሱሳ ዳሮባ ኦቼዳ፤ ሺን ዬሱሲ ኣው ኣያኔ ዛሪቤና። ቄሳቱዋ ካፓቱኔ ሙሴ ሂጊያ ታማሪሲያዋንቱ ሄዋን ኤቂዴ፥ ዬሱሳ ሎይꬂ ሞቲዴ ዴዒኖ። ሄሮዲሴኔ ኣ ዎታዳራቱ ዬሱሳ ካꬊዴ፥ ኣ ቦላ ቂሊጬዲኖ። ቦንቼቴዳ ማዩዋ ኣ ማዪዚዴ፥ ጲላፆሳኮ ዛሪዴ ዬዴዲኖ። ሄሮዲሴኔ ጲላፆሲ ሃዋፔ ካሴና ሞርኪያን ዴዒኖ፤ ሺን ሄ ጋላሲ ሲጌቴዲኖ። ጲላፆሲ ቄሳቱዋ ካፓቱዋ፥ ኣዪሲያዋንታኔ ሃራ ጮራ ኣሳ ኢቲፔ ፄሲዴ፥ ሃዋዳን ያጌዳ፥ « ‹ሃ ቢታኒ ኣሳ ማካላቴꬃው ዴንꬄꬄ›፥ ያጊዴ ታኮ ኣሄዲታ፤ ታካ ሂንቴንቱ ሲንꬃን ቢዳ ፄላዴ፥ ሂንቴንቱ ሺሼዳ ሞቱዋን ኢቲ ባላኔ ኣ ቦላን ዴማ ቤይኬ። ቃሲ ሄሮዲሴካ ኣ ቦላን ኣይኔ ዴሚቤና ዲራው፥ ሃ ኑኮ ዛሪ ዬዴዳ፤ ሂንቴንቱ ቤዒያዋዳንካ፥ ሃቢታኒ ኣ ሃይቆ ጋꬂያባ ኣይኔ ኡዲቤና። ሃዋ ዲራው ታኒ ኣ ሙራዴ ቢላና» ያጌዳ። *** ኣሳይ ኡባይ ኢቲፔ ጊዲዴ፥ «ሃ ቢታኒያ ያ ዲጋ! ባርባና ጊያ ዬሱሳ ኑሲ ቢላ!» ያጊዴ ጫቦቴዲኖ። ባርባን ካታማን ዋላሳ ዴንꬂዴ፥ ኣሳ ዎꬌዳ ዲራው፥ ቃሼቴዳዋ። ጲላፆሲ ዬሱሳ ቢላናው ኮዪዴ፥ ኣሳው ላዔꬁዋ ጉጂዴ ሃሳዬዳ። ሺን ኡንቱንቱ፥ «ማስቃሊያ ቦላ ሚሲማሪያን ꬊሻዴ ካቃ! ካቃ!» ያጊ ዋሴዲኖ። ጲላፆሲካ ሄዜንꬁዋ ኡንቱንታ፥ «ኣያው? ሃቢታኒ ኦꬄዳ ኢታ ኦሱ ኣዬ? ታኒ ኣ ሃይቆ ጋꬂያ ናቁዋ ኣይኔ ኣፔ ዴማቤይኬ፤ ሃዋ ዲራው፥ ኣ ሙራዴ ቢላ ዬዳና» ያጌዳ። ሺን ኡንቱንቱ ባሬንቱ ኮሻ ꬎቁ ኦꬂዴ፥ ካቄታናዳን ዳሪ ዋሴዲኖ። ኡንቱንቱ ዋሱካ ጲላፆሳ ቆፋ ላሜዳ። ሃዋ ዲራው፥ ጲላፆሲካ ኡንቱንቱ ኦሻይ ሲማናዳን ዬሱሳ ቦላን ፒርዴዳ። ኣሳ ማካላው ዴንꬄꬂዴኔ ሼምፑዋ ዎꬊዴ፥ ቃሼቴዳ ቢታኒያ ቢሌታናዳን ኡንቱንቱ ዎሶ ዲራው፥ ሄ ቢታኒያ ቢሌዳ። ሺን ዬሱሳ ባሬንቱ ሼኒያዳን ኮዮዋ ኦꬃና ማላ፥ ኣꬂ ኢሜዳ። ዬሱሳ ኦይቂ ኣፊዴ ዴዒሺን፥ ሲሞና ጌቴቲያ ቄሬና ቢታኒ ሄራፔ ዪዴ ዴዒሺን ዴሚዴ፥ ማስቃሊያ ቶሲዴ ዬሱሳና ባና ማላ ኡዴዲኖ። ዳሮ ጮራ ኣሳይኔ ዬኪያ ማጫዋንቱ ጉዬና ካሊኖ። ዬሱሲ ጉዬ ሲሚዴ ኡንቱንቶ፥ «ሂንቴኖ፥ ዬሩሳላሜ ማጫዋንቶ፥ ሂንቴንቱ ሁጴዉኔ ሂንቴንቱ ናናው ዬኪቴፔ ኣቲን፥ ታው ዬኮፒቴ፤ ‹ማንꬃ ጊዴዳዋንቱኔ ዬሊቤና ኡሉ፥ ꬋንꬂቤና ꬋንꬃይ፥ ኣንጄቴዳዋንታ› ጌቴቲያ ዎዲ ያናዋ። ሄ ዎዲያን፥ ‹ዞዛቶ፥ ኑ ቦላ ዎዲቴ፤ ዙኩላቱዋካ፥ ኑና ቆሲቴ› ያጋኒታ። ሲሚ ቃዬ ሚꬃን ሃዋዳን ሃኖፔ፥ ሜላ ሚꬃን ዋናናዌ?» ያጌዳ። ዬሱሳና ኢቲፔ ካቄታና ማላ፥ ኢታ ኦሱዋ ኦꬄዳ ሃራ ላዑ ኣሳቱዋካ ኣፌዲኖ። ቄራኔው ጌቴቲያሳ ጋኬዳ ዎዲያን፥ ዬሱሳ ካቄዲኖ። ኢታ ኦꬆዋንታካ፥ ኢቱዋ ኡሼቻና፥ ዮኩዋ ሃዲርሳና ካቄዲኖ። ዬሱሲ፥ «ታ ኣቦ፥ ኡንቱንቱ ባሬንቱ ኦꬂያዋ ኤሬና ዲራው፥ ኡንቱንቱ ናጋራ ኣቶ ጋ» ያጌዳ። ኡንቱንቱካ ኣ ማዩዋ ሳማ ዬጌቲዴ ጊሼቲ ኣኬዲኖ። ኣሳይ ኤቂ ፄሊሺን፥ ጋዲያ ሞዲያዋንቱ፥ «ሃራንታ ኣሼ፤ ፆሳን ዶሬቴዳ ኪሪስቶሲ ኣ ጊዶፔ፥ ኣኔ ባሬ ሁጲያ ኣሼኔ?» ያጊዴ ቂሊጬዲኖ። ቃሲ ዎታዳራቱካ ሺቂዴ ቂሊጬዲኖ፤ ጫሜዳ ዎዪኒያ ኤሳ ኣው ኣሂ ኢሚዴ፥ «ሃዎ፥ ኔኒ ኣዪሁዳ ካቲያ ጊዶፔ፥ ኔ ሁጲያ ኣሻ!» ያጌዲኖ። ሁጲሳናካ፥ «ሃዌ ኣዪሁዳ ካቲያ» ያጊያ ፃፉዋ ፃፌዲኖ። ኢታ ኦꬂዴ ካቄቴዳዋንቱፔ ኢቱ፥ ቦሪዲኔ ቶቺዴ፥ «ሃዎ ኔኒ ኪሪስቶሳ ጊዲኪ? ኣኔ ኣ ጊዶፔ፥ ኔ ሁጲያኔ ኑና ኣሻ» ያጌዳ። ዮኩ ቃይ ኣ፥ «ኔኒ ሃዋ ማላቲያ ፒርዳ ቦላ ዴዓዴካ ፆሳው ያዪኪ? ኑኒ ኪቴቴዳ ባላን ሙራ ኣኪዴ ዴዔቶ፤ ኑሲ ቤሲያ ሙራ ቦላን ዴዔቶ፤ ሺን ሃ ቢታኒ ኢቲ ኢታባኔ ኦꬂቤና» ያጊ ዛሬዳ። ኢ ዬሱሳ፥ «ኔኒ ኔ ካዉቴꬃ ዎልቃን ዪያ ዎዴ፥ ታና ቆፓ» ያጌዳ። ዬሱሲካ፥ «ታኒ ኔው ቱሙዋ ኦዳይ፥ ሃቼ ታናና ኢቲፔ ጋናቲያን ዴዓናሳ» ያጌዳ። ሄ ዎዴ ኡሱፑን ሳቴ ጊዲያ ኬና፤ ሄዋፔ ኡዱፑ ሳቲያ ጋካናው፥ ቢታ ኡባ ቦላን ꬉማ ጊዴዳ። ኣዋይካ ባሬ ፖዑዋ ዲጌዳ፤ ጌሻ ጎሊያ ጋሪዱካ ፔꬌቲዴ ላዑዋ ኬሴዳ። ዬሱሲካ ዳሮ ꬎቁ ጌዳ ቃላን ዋሲዴ፥ «ታ ኣቦ፥ ታኒ ታ ሼምፑዋ ኔ ኩሺያን ኣꬃ ኢማይ!» ያጊ ሲሞዋፔ ጉዪያን ኢ ሃይቄዳ። ፄቱዋ ካፑ ሃኔዳ ዬዉዋ ቤዔዳ ዎዴ፥ «ሃ ቢታኒ ቱማካ ፂሎ ኣሳ» ያጊዴ ፆሳ ጋላቴዳ። ሃዋ ቤዓናው ኢቲሳ ሺቄዳ ኣሳይ ኡባይ ሃኔዳ ዬዉዋ ቤዒዴ፥ ባሬንቱ ቲራ ባቂዴ ሲሜዲኖ። ዬሱሳ ኤሪያ ኣሳይ ኡባይኔ ጋሊላፔ ዶሚዴ ኣ ካሌዳ ማጫዋንቱ ሃዋ ፄሊዴ፥ ሃኩዋን ኤቄዲኖ። ኣዪሁዳ ሻንጋቱዋ ጊዴዳዋንቱፔ ኢቱ፥ ዮሴፋ ጌቴቲያ ሎዓኔ ፂሎ ቢታኒ ዴዔ። ሃ ቢታኒ ሻንጋቱዋ ማቁዋኔ ኡንቱንቱ ኦሱዋን ኢቲፔቴꬃ ኦꬂቤና። ፆሳ ካዉቴꬃ ዩሳ ሂዶታን ናጊዴ ዴዔ። ዮሴፎካ ጲላፆሳኮ ቢዴ፥ ዬሱሳ ኣኃ ኣካናው ዎሴዳ። ኣካናዳን ጌቴቶዋፔ ጉዬ፥ ኣኃ ቦላፔ ዎꬂዴ፥ ሎዖ ሞጉዋ ማዩዋን ፃፂዴ፥ ሹቻፔ ዎጬቲዴ ሜꬌቴዳ፥ ኦኒኔ ካሴ ሞጌቲ ቤና ኦላ ጊዶን ዎꬄዳ። ጋላሳይካ ሳምባታ ሞካናው ጊጊያ ጋላሳ፤ ሳምባታይካ ጌላና ሃኔ። ጋሊላፔ ዶሚዴ ዬሱሳና ኢቲፔ ዬዳ ማጫዋንቱ ካሊዴ፥ ዱፉዋን ኣ ኣኃ ዎቲዴ ዎꬄዲኖንቶ ቤዔዲኖ። ኡንቱንቱ ሃዋፔ ሶይ ሲሚዴ፥ ሺቱዋኔ ኦኪያዋ ኣኃው ጊጊሴዲኖ። ሂጊያ ማራዳን ሳምባታ ጋላሲ ሼምፔዲኖ። ሳሚንታፔ ኮይሮ ጋላሳ፥ ማጫዋንቱ ጊጊሴዳ ሺቱዋ ኦይቂዴ ዳሪ ጉሪዴ ዱፉዋኮ ቤዲኖ። ሹቻይካ ዱፉዋ ዶናፔ ጎንዶሬቲና ቤዔዲኖ። ኡንቱንቱ ዱፉዋ ጋርሳ ኦላ ጌሎ ዎዴ፥ ጎዳ ዬሱሳ ኣኃ ዴሚቤይኪኖ። ማጫዋንቱ ሲꬊዴ ዴዒሺን፥ ዋጪዋጪያ ማዩዋ ማዬዳ ላዑ ኣሳቱ፥ ቆፔናን ኡንቱንቱ ሚዪያን ኤቄዲኖ። ማጫዋንቱካ ያሻፔ ዴንዶዋን ሳዓ ፄሊዴ ዴዒሺን፥ ላዑ ኣሳቱ፥ «ዴዑዋን ዴዒያዋ፥ ኣ ኣያው ሃይቆዋንቱ ጊዶፔ ኮዪቴ? ኢ ዴንዴዳ፤ ሃዋን ባዋ። ቃይካ ጋሊላን ዴዒያ ዎዲያን፥ ‹ኣሳ ናዓይ ናጋራንቻቱዋ ኩሺያን ኣꬊ ኢሜታናዋ፤ ማስቃሊያ ቦላን ካቄታናዋ፥ ሄዜንꬆ ጋላሲ ሃይቁዋፔ ዴንዳናዋ› ያጌቶዋ ቆፒቴ» ያጌዲኖ። *** ማጫዋንቱካ ሄ ዎዴ ቃላ ኣኬኬዲኖ። ኡንቱንቱካ ዱፉዋፔ ሲሚዴ ሃ ኡባ ዬዉዋ ታማኔ ኢቲ ኪቴቶዋንቶኔ ኡንቱንታ ካሊያዋንቶ ኡባቶ ኦዴዲኖ። ሃዋ ዬሱሲ ኪቶዋንቶ ኦዴዳዋንቱ፡ ማግዳላፔ ዬዳ ማይራሞ፥ ዮሃኖ፥ ያዪቆባ ዳዮ ማይራሞኔ ኡንቱንቱና ኢቲፔ ዴዒያ ሃራ ማጫዋንታ። ኡንቱንቶ ማጫዋንቱ ኦዲያ ቃላይ ቃጂያዋ ማላቲና ኣማኒቤይኪኖ። ሺን ሄ ዎዴ ጴፂሮሲ ዴንዲዴ ዱፉዋኮ ዎፄዳ። ያ ጋኪዴ ሆኪ ፄሊያ ዎዴ፥ ጋርሳን ሞጉዋ ማዮ ፃላላይ ዴዒያዋ ቤዔዳ። ሃኖ ዬዉዋንካ ማላሌቲዴ፥ ጎሌ ሲሜዳ። ሄ ጋላሲ ዬሱሳ ካሊያዋንቱፔ ላዑ ኣሳቱ ዬሩሳላሜፔ ላዑ ሳቲያ ሃኪያ ኤማሁሳ ጌቴቲያ ሄራ ቢዴ፤ ኢቱ ኢቱዋና ሃኔዳ ዬዉዋ ኡባ ሃሳይ ዴዒኖ። ኡንቱንቱ ሃሳዪዲኔ ዞሬቲዴ ዴዒሺን፥ ዬሱሲ ባሬ ሁጴው ዪዴ ኡንቱንቱ ሚዪያ ሺቂዴ ኡንቱንቱና ቢዴ ዴዔ። ሺን ኡንቱንቱ ባሬ ኣይፊያን ፄሊዴ ኣ ጊዲያዋ ሻኪ ኤራናው ዳንዳይቤይኪኖ። ዬሱሲ፥ « ሂንቴንቱ ኦጊያ ቦላን ኢቱ ኢቱዋና ሃሳዪያዌ ኣዬ?» ያጊ ኦቼዳ። ኡንቱንቱካ ዳጋማን ሌቹሚዴ ኤቄዲኖ። ኡንቱንቱፔ ኢቱ ቄሊዮጳ ጌቴቲያዌ፥ «ሃ ጊዱዋን ዬሩሳላሜን ሃኖ ዬዉዋ ኤሬናዌ ኔ ፃላላይ ሃጋዴው ኢማꬄ?» ያጊ ዛሬዳ። ዬሱሲ፥ «ኢ ኣዬ?» ያጊና፥ ኡንቱንቱካ፥ «ፆሳ ሲንꬃኒኔ ኣሳ ኡባ ሲንꬃን ቃላኒኔ ኪታን ሚኖ ናቢያ ጊዴዳ ናዚሬቲያ ዬሱሳባ ሃሳዬቶ። ኣካ ቄሳቱዋ ካፓቱኔ ኑና ሞዲያዋንቱ ሃይቁዋ ፒርዳው ኣꬂ ኢሜዲኖ፤ ማስቃሊያ ቦላን ዎꬌዲኖ። ኑኒ ካሴና፥ ‹ኢስራዔሊያ ኣሳ ዎዛናዋ› ያጊ ሂዶቶዌ ኣ፤ ሺን ሃ ዬዉ ሃኔቲዴ ኣꬎዴፔ ሄዙ ቃማ ጊዴዳ። ኑ ጊዶፔ ኢቲ ኢቲ ማጫዋንቱ ኑና ማላሊሴዲኖ። ኡንቱንቱ ጉራን ሂኒ ዱፉዋ ቤዲኖ፥ ሺን ዬሱሳ ኣኃ ኡንቱንቱ ꬋዮ ዎዴ ሺሬቲ ሲሚዴ፥ «ኢ ዴንዴዳ፤ ያጊያዋ ኪታንቻቱ ኦዲሺን ቤዔዶ» ያጊ ኦዴዲኖ። ኑ ጊዶፔካ ኢቲ ኢቲ ኣሳይ ዱፉዋ ቢዴ ኡንቱንቱ ጎዋዳን ሃኒና ቤዔዲኖ፤ ሺን ዬሱሳ ኣኃ ዴሚቤይኪኖ» ያጌዲኖ። ዬሱሲ ኡንቱንቶ፥ «ሂንቴኖ፥ ኣኬኬና ኣሳቶ፥ ሂንቴንቱ ዎዛናን ናባቱ ኦዶዋ ኡባ ኤሌ ኣማኔናዋንቶ፤ ኪሪስቶሲ ሃ ሜቱዋ ኣካናዉኔ ባሬ ቦንቹዋኮ ጌላናው ቤሴኔ?» ያጌዳ። ሄዋፔ ሲሚዴ ዬሱሲ ሙሴ ማፃፋቱዋፔኔ ናባቱ ፃፌዳ ማፃፋቱዋፔ ዶሚዴ፥ ፆሳ ማፃፋቱዋ ኡባን ፃፌቴዳ ባሬባ ኡንቱንቶ ቢሊዴ ኦዴዳ። ኡንቱንቱ ቢዴዒያ ሄራ ማቴዳ ዎዴ፥ ዬሱሲ ሃራሳ ቢያዋ ማላቴዳ። ሄ ዎዴ ኡንቱንቱ ኣ፥ «ጋላሳይ ቃሚዴ ዴዒያ ዲራው፥ ኦማርሳይ ማቴዳ፤ ኑናና ኢቲፔ ኣቃ!» ያጊ ሚኒሲ ዎሴዲኖ። ሃዋ ዲራው፥ ኢካ ኡንቱንቱና ኢቲፔ ኣቃናው ጌሌዳ። ኡንቱንቱ ኢቲፔ ጋዪታን ኡቴዳ ዎዴ፥ ዳቡዋ ዴንꬂዴ ኣንጄዳ፤ ሜንꬂዴ ኡንቱንቶ ኢሜዳ። ኡንቱንቱ ኣይፊካ ኣ ኣኬካና ማላ ዶዬቲና፥ ዬሱሳ ጊዲያዋ ኤሬዲኖ። ኢካ ኡንቱንቱ ሲንꬃፔ ጌሜዳ። ኡንቱንቱካ ኢቱ ኢቱዋ፥ «ቃꬋን ኢቲፔ ኑ ዴዒሺን፥ ኑና ኢ ሃሳዪሲያ ዎዲያኒኔ ፆሳ ማፃፋቱዋካ ኑሲ ቆንጪሲዴ ኢ ኦዲያ ዎዲያን፥ ኑ ዎዛና ጊዶን ታማዳን ሴሌ ጊዴኔ?» ጌቴቴዲኖ። ሄ ዎዲያንካ ዴንዲዴ ዬሩሳላሜ ሲሜዲኖ። ዬሱሲ ኪቶ ታማኔ ኢታቶኔ ኡንቱንቱና ኢቲፔ ዴዒያዋንቶ፥ «ጎዳይ ቱሙዋካ ዴንዴዳ፥ ሲሞናዉካ ቤቴዳ» ያጊዴ ሄዋን ኢቲፔ ሺቂ ኡቴዳዋንታ ዴሜዲኖ። *** ሄ ላዓቱ፥ ቃꬋን ሃኔዳዋኔ ዬሱሲ ዳቡዋ ሜንꬂያ ዎዴ ዎቲ ኣ ኤሬዲኖንቶ ኡንቱንቶ ኦዴዲኖ። ሃዋ ኡንቱንቱ ሃሳይ ዴዒሺን፥ ዬሱሲ ኡንቱንቱ ጊዶን ኤቂዴ፥ «ሳሮቴꬃይ ሂንቴው ጊዶ» ያጌዳ። ኡንቱንቶ ሞይቲሊያ ቤዖዋ ማላቲና ዳጋሚዴ፥ ያሻን ኩሜዲኖ። ኢካ ኡንቱንታ፥ «ኣያው ዳጋሚቴ? ኣያ ዲራው ሂንቴንቱ ዎዛናይ ሲꬊ? ታኒ ዬሱሳ ጊዲያዋ ኤራናው፥ ኣኔ ታ ኩሺያኔ ታ ጌዲያ ቤዒቴ፤ ታናን ሂንቴንቱ ቤዒያዋዳን፥ ሞይቲሌው ኣሹኔ ሜቄꬃይ ባዋ። ኣኔ ታና ሂንቴንቱ ኩሺያን ኦይቂ ቤዒቴ» ያጌዳ። ሃዋ ያጊ ሲሚዴ፥ ባሬ ኩሺያኔ ባሬ ጌዲያ ቤሴዳ። ኡንቱንቱካ ናሼቻፔ ዴንዶዋን፥ ኣማኔናን ማላሌቲ ዴዒሺን ኢ፥ «ሃዋን ሜቴቲያዌ ሂንቴንቶ ዴዒ?» ያጊ ኡንቱንታ ኦቼዳ። ኡንቱንቱካ፥ ፂፄቴዳ ሞሊያፔ ላፋ ፑሩዋ ኣው ኢሜዲኖ። ኢካ ኣኪዴ ኡንቱንቱ ሲንꬃን ሜዳ። ኢካ፥ «ታኒ ሂንቴንቱና ኢቲፔ ዴዓዴ፥ ‹ሙሴ ማፃፋን፥ ናባቱዋ ማፃፋኒኔ ቃላን ፃፌቶ ማዚሙራቱን ታ ዲራው ፃፌቴዳ ኡባይ ፖሌታናው ቤሴ› ያጋዴ ሂንቴንቶ ኦዴዳ ዬዉ ሃዋ» ያጌዳ። ሄ ዎዲያንካ ፆሳ ማፃፋቱዋን ጌቴቶዋ ኣኬካና ማላ፥ ኡንቱንቱ ዎዛና ዶዬዳ። ኡንቱንቶ፥ « ‹ኪሪስቶሳ ሜቱ ጋካናዋ፤ ሄዜንꬂያ ጋላሲ ሃይቁዋፔ ዴንዳናዋ። ኣ ኣሱንꬃን ናጋራ ፓፄꬃይኔ ማሮታ ዴሙሳይ ዬሩሳላሜፔ ዶሚዴ ኣሳው ኡባው ኦዴታናዋ› ያጌቲዴ ፃፌቴዳ። «ሂንቴንቱካ ሃዎ ማርካቱዋ። ታ ሂንቴንቶ፥ ታ ኣቡ ቃላ ጌሌዳ ሂዶታ ዬዳና፤ ሄዌ ጋካናዉኔ ሂንቴንቶ ዎልቃይ ሳሉዋፔ ኢሜታና ጋካናው፥ ዬሩሳላሜ ካታማን ናጊሺቴ» ያጌዳ። ሃዋፔ ጉዪያን፥ ቢታኒያ ጌቴቲያ ካታማ ጋካናው፥ ኡንቱንታ ኣፌዳ፤ ባሬ ኩሺያ ሚጪዴ ኡንቱንታ ኣንጄዳ። ኡንቱንቱፔ ሻኬቲዴ፥ ሳሉዋ ቤዳ። ኡንቱንቱ ኣው ጎዪኒዴ፥ ዳሮ ናሼቻን ዬሩሳላሜ ሲሜዲኖ። ቃሲ ፓጬናን ፆሳ ጋላቲዴ፥ ጌሻ ጎሊያን ዴዔዲኖ። ቃላይ ኮይሮ ዴዔ፤ ቃላይካ ፆሳና ኢቲፔ ዴዔ፤ ቃላይካ ፆሳ። ኢ ኮይሮፔካ ፆሳና ዴዔ። ኡባባይ ቃላ ባጋና ሜꬌቴዳ። ሜꬌቴዳባኒ ኡባባኒ ኢ ባይናን ኢቲባይኔ ሜꬌቲቤና። ኣኒ ዴዑ ዴዔ፤ ዴዑ ኣሳው ፖዑዋ። ፖዑ ꬉማኒ ፖዔ፤ ꬉማይ ፖዑዋ ፆኒቤና። ፆሳፔ ኪቴቲ ዬዳ ኣ ሱንꬃይ ዮሃኒሳ ጌቴቲያ ኢቲ ቢታኒ ዴዔ። ኣሳይ ኡባይ ኣ ባጋና ኣማናና ማላ፥ ፖዑዋባ ማርካታናው ዬዳ። ፖዑዋባ ማርካታናው ዬዳፔ ኣቲን፥ ኢ ባሬ ሁጴው ፖዑዋ ጊዴና። ኢካ ቱሙ ፖዑዋ ጊዴዳዌ ኣሳው ፖዒሳናው ሃ ሳዓ ዪያዋ። ቃላይ ኣላሚያን ዴዔ፤ ፆሳይ ቃላን ኣላሚያ ሜꬌዳ፤ ሺን ኣላሚ ኣ ኤሪቤና። ኢ ባሬ ባጋቱዋኮ ዬዳ፤ ሺን ኡንቱንቱ ኣ ሺሺ ኣኪቤይኪኖ። ጊዶፔ ኣቲን ኢ ባሬና ሺሺ ኣኬዳ ኡባቶ፥ ባሬ ሱንꬃኒ ኣማኔዳዋንቶ፥ ፆሳ ናና ጊዳና ማላ፥ ማታ ኢሜዳ። ኡንቱንቱ ፆሳፔ ዬሌቴዲኖፔ ኣቲን፥ ኣሳይ ዬሊያ ማራኒ ዎይ ኣሹዋ ሼኒያን ዎይ ኣቱማ ኣሳ ሼኒያ ፃላላን ዬሌቲቤይኪኖ። ቃላይ ኣሳ ጊዲዴ፥ ኣꬎ ኬካቴꬃኒኔ ቱማቴꬃን ኩሚዴ ኑ ጊዱዋን ዴዔዳ። ኑኒ፥ ኢ ባሬ ኣቦ ኢቲ ናዓ ጊዲዴ ኣኬዳ ኣው ዴዒያ ባሬ ኣዉዋ ቦንቹዋ ቤዔዶ። ዮሃኒሲ ኣባ ባሬ ኮሻ ꬎቁ ኦꬂዴ፥ «ታኒ፥ ‹ታፔ ካላ ዪያዌ ታፔ ቦላ፤ ኣዪሲ ጎፔ፥ ታ ዬሌታናፔ ካሴና ኢ ዴዒያዋ› ጋዴ ሂንቴንቶ ኦዶዌ ሃዋ» ያጊ ማርካቴዳ። ኑኒ ኡባይ ኣ ኩሜንꬃ ኣꬎ ኬካቴꬃን ፓላሄዳ ኣንጁዋ ኣኬዶ። ፆሳይ ሂጊያ ሙሴ ባጋና ኢሜዳ፤ ሺን ኣꬎ ኬካቴꬃይኔ ቱማቴꬃይ ዬሱሲ ኪሪስቶሳ ባጋና ዬዳ። ፆሳ ቤዔዳ ኣሳይ ኦኒኔ ባዋ፤ ባሬ ኣዉዋ ማታን ዴዒያ ባሬ ሁጴው ፆሳ ጊዴዳዌ ኢቲ ናዓ ፃላላይ ኣባ ማርካቴዳ። ዬሩሳላሜን ዴዒያ ኣዪሁዳቱዋ ኣዪሲያዋንቱ ቄሳቱዋኔ ሌዋቱዋ ዮሃኒሳኮ፥ «ኔኒ ኦኔ?» ጊዴ ኣ ኦቻና ማላ ኪቲና፥ ዮሃኒሲ ኡንቱንቱሲ ማርካቴዳ ማርካቴꬃይ ሃዋ። ዮሃኒሲ፥ «ታኒ ኪሪስቶሳ ጊዲኬ» ያጊዴ ጌሺ ማርካቴዳዋፔ ኣቲን፥ ማርካቱሳ ኢፂቤና። ኡንቱንቱ፥ «ያቲና፥ ኔኒ ኦኔ? ኔኒ ኤላሴ?» ያጊዴ ኦቼዲኖ። ዮሃኒሲ፥ «ኣ ጊዲኬ» ያጌዳ። ቃሲካ ኡንቱንቱ፥ «ኔኒ ናቤ?» ያጊዴ ኦቼዲኖ። ዮሃኒሲ፥ «ጊዲኬ» ያጊ ዛሬዳ። ኡንቱንቱ፥ «ያቲና ኔኒ ኦኔ? ኑኒ ኑና ኪቴዳዋንቶ ኦዳና ማላ፥ ኔኒ ኔና ኦና ጋይ?» ያጌዲኖ። ዮሃኒሲ ዛሪዴ፥ «ናቢያ ኢሳያሴ ጌዳዋዳን፥ ዎራን ባሬ ቃላ ꬎቁ ኡዲዴ፥ ‹ጎዳ ኦጊያ ሲቲ ኦꬂቴ!› ጊያ ኮሻይ ታዋ» ያጌዳ። ቃሲ ፓሪሳዋቱ ኪቴዳ ኣሳቱ ዮሃኒሳ፥ «ኔኒ ኪሪስቶሳ ዎይ፥ ኤላሳ ዎይ ናቢያ ጊዳና ꬋዮፔ፥ ያቲና ኣዪሲ ፃማቃይ?» ያጊዴ ኦቼዲኖ። ዮሃኒሲ፥ «ታኒ ሃꬃን ፃማቃይ፤ ሺን ሂንቴንቱ ኤሬናዌ ኢቱ ሃዋኒ ሂንቴንቱ ጊዱዋን ዴዔ። ኢ ታፔ ካላ ዬ። ታኒ ኣ ጫማ ቃሹዋ ቢላናዉካ ቤሲኬ» ያጊ ዛሬዳ። ሃዌ ኡባይ ዮርዳኖሳ ሻፋፔ ሄፊንꬃ ባጋ ዮሃኒሲ ፃማቂያሳ ቢታኒያን ሃኔዳ። ዮሃኒሲ ዎንቴꬃ ጋላሲ ዬሱሲ ባሬኮ ዪያዋ ቤዒዴ፥ «ፆሳ ኦርጌ ዶርሳ፥ ኣላሚያ ኣሳ ናጋራ ꬋዪሲያዌ፥ ሃዌሺ! ታኒ፥ ‹ታፔ ካላ ኢቱ ያናዋ፤ ኢ ታፔ ቦላ፤ ኣዪሲ ጎፔ፥ ታ ዬሌታናፔ ካሴና ኢ ዴዒያዋ› ጋዴ ኦዴዳዌ ሃዋ። ኢ ኦኔንቶ ታኒ ኤሪኬ፤ ሺን ኢስራዔሊያ ኣሳው ኣ ቆንጪሳናው ሃꬃን ፃማቃዴ ያዲ» ያጌዳ። ዮሃኒሲ ማርካቲዴ፥ «ጌሻ ኣያናይ ሳሉዋፔ ሃራጲያዳን ዎꬊሺናኔ ኣ ቦላን ኡቲሺን፥ ታኒ ቤዓዲ። ታኒ ኣ ኤሪኬ፤ ሺን ሃꬃኒ ፃማቃና ማላ ታና ኪቴዳ ፆሳይ፥ ‹ጌሻ ኣያናይ ዎꬊዴ፥ ኢቲ ኣሳ ቦላ ሼምፒሺን፥ ኔኒ ቤዓና፤ ኢካ ጌሻ ኣያናን ፃማቄ› ያጊዴ ታው ኦዴዳ። ታኒ ሄዋ ቤዓዲ፤ ኢ ፆሳ ናዓ ጊዲያዋካ ማርካታይ» ያጌዳ። ዎንቴꬃ ጋላሲ ዮሃኒሲ ሺሬቲዴካ ባሬና ካሊያዋንቱፔ ላዓቱዋና ኢቲፔ ኤቄዳ፤ ኢ ዬሱሲ ኣꬊሺን ቤዒዴ፥ «ፆሳ ዶርሳይ ሃዌሺ!» ያጌዳ። ዮሃኒሳ ካሊያ ላዓቱ ዮሃኒሲ ጊያዋ ሲሲዴ፥ ዬሱሳ ካሌዲኖ። ዬሱሲ ባሬና ካሊያዋንታ ጉዬ ሲሚ ቤዒዴ፥ «ኣያ ኮዪቴ?» ያጊ ኦቼዳ። ኡንቱንቱ ዛሪዴ፥ «ሬቢ፥ ኔኒ ሃቃን ዴዓይ?» ያጌዲኖ። «ሬቢ» ጉሳይ «ታማሪሲያዎ» ጊያዋ። ዬሱሲ ኡንቱንታ፥ «ሃ ዪዴ ቤዒቴ» ያጌዳ። ኡንቱንቱ ቢዴ፥ ኢ ዴዒያሳ ቤዔዲኖ፤ ሄ ጋላሲ ሳዓይ ታሙ ሳቴ ሄራ ጊዲያ ዲራው፥ ኡንቱንቱ ኣናና ፔሼዲኖ። ዮሃኒሲ ጌዳዋ ሲሲዴ፥ ዬሱሳ ካሌዳ ላዑ ኣሳቱዋፔ ኢቱ፥ ሲሞና ጴፂሮሳ ኢሻ ኢንዲራሳ። ኢንዲራሴ ኮይሮ ባሬ ኢሻ ሲሞና ዴሚዴ፥ «ኑኒ ፆሳይ ኪቴዳዋና ጋኬቴዶ» ያጌዳ። ሄዋ ጉሳይ «ኪሪስቶሳ» ጊያዋ። ኢንዲራሴ ሲሞና ዬሱሳኮ ኣሄዳ። ዬሱሲ ሲሞና ቤዒዴ፥ «ኔኒ ዮሃኒሳ ናዓ ሲሞና፤ ኔ ሱንꬃይ ኬፋ ጌቴታናዋ» ያጌዳ። «ኬፋ» ጊያዋ ቢሌꬃይ «ጴፂሮሳ» ዎይ «ዛላ» ጊያዋ። ዎንቴꬃ ጋላሲ ዬሱሲ ጋሊላ ባናው ቆፋ ቃቼዳ፤ ኢ ፒሊጶሳና ጋኬቲዴ፥ «ታና ካላ!» ያጌዳ። ፒሊጶሲ፥ ኢንዲራሲኔ ጴፂሮሴ ዴዔዳ ቤቴሳይዳ ጌቴቲያ ካታማፔ ዬዳ ኣሳ። ፒሊጶሲ ናቲናዔላና ጋኬቲዴ፥ «ሙሴ ማፃፋቱዋኒኔ ናባቱዋ ማፃፋቱዋን ኣባይ ፃፌቴዳዋዳን፥ ዮሴፎ ናዓ ዬሱሲ ናዚሬቴ ካታማን ዴዒያዋና ኑኒ ጋኬቴዶ» ያጊ ኦዴዳ። ናቲናዔሊ ዛሪዴ፥ «ናዚሬቴ ካታማፔ ሎዖባይ ኬሳናው ዳንዳዪ?» ያጌዳ። ፒሊጶሲ፥ «ያዴ ቤዓ» ያጌዳ። ናቲናዔሊ ባሬኮ ዪያዋ ዬሱሲ ቤዒዴ፥ «ማካላይ ባይና ቱሙ ኢስራዔሊያ ኣሳይ ሃዋ!» ያጌዳ። ናቲናዔሊ ዬሱሳ፥ «ኔኒ ታና ሃቃን ኤራይ?» ያጊ ኦቼዳ። ዬሱሲ ዛሪዴ፥ «ፒሊጶሲ ኔና ፄሳናፔ ካሴ፥ ኔኒ ባላሲያ ጌቴቲያ ሚꬃፔ ሂርኪና ዴዒሺን፥ ታኒ ኔና ቤዓዲ» ያጌዳ። ናቲናዔሊ ዛሪዴ፥ «ታማሪሲያዎ፥ ኔኒ ፆሳ ናዓ! ኔኒ ኢስራዔሊያ ካቲያ!» ያጌዳ። ዬሱሲ፥ «ታኒ ኔና ባላሲያ ጌቴቲያ ሚꬃፔ ሂርኪና ቤዓዲ ጌዳ ዲራው ኣማናይ? ኔኒ ሃዋፔ ኣꬊያዋ ቤዓና!» ያጌዳ። ቃሲካ ዬሱሲ፥ «ታኒ ሂንቴንቱሲ ቱሙዋ ኦዳይ፤ ሳሉ ዶዬቲና፥ ፆሳ ኪታንቻቱ ታ ቦላ፥ ኣሳ ናዓ ቦላ፥ ፑዴ ኬሲሺናኔ ዱጌ ዎꬊሺና፥ ሂንቴንቱ ቤዓና» ያጌዳ። ሄዜንꬆ ጋላሲ ጋሊላ ጋዲያን ቃና ጌቴቲያ ካታማን ቡላቻይ ቡላቼቴዳ፤ ዬሱሳ ዳያ ሄ ቡላቻን ዴዓው። ዬሱሲካ ባሬና ካሊያዋንቱና ኢቲፔ ሄ ቡላቻ ፄሴቴዳ። ዎዪኒያ ኡሻይ ዉሪዲጊና፥ ዬሱሳ ዳያ ኣ፥ «ኡንቱንቱሲ ዎዪኒያ ኡሻይ ዉሪዲጌዳ» ያጋ ኦቻዱ። ዬሱሲ ዛሪዴ፥ «ታ ዳዬ፥ ሃዌ ታ ኦሱዋ ጊዲያ ዲራው፥ ኔ ያያና ኮሼና። ታ ዎዲ ቢሮ ጋኪቤና» ያጌዳ። ዬሱሳ ዳያ ኪቴቲያዋንቱሲ፥ «ኢ ሂንቴንቱሲ ኦዲያዋ ኣያ ጊዶፔኔ ኦꬂቴ» ያጋ ኦዳዱ። ኣዪሁዳቱ ካሴ ኦꬂያ ዶያዳን፥ ሜቻ ዎጋው ኢቱ ኢቱ ፄቱ ፃሪሙሲያ ኦይቂያ ኡሱፑን ሹቻ ባꬃቱ ሄዋን ዴዒኖ። ዬሱሲ ኪቴቲያዋንታ፥ «ባꬃቱዋኒ ሃꬃ ኩንꬂቴ» ያጌዳ፤ ጌቴቶዋዳንካ ኡንቱንቱ ባꬃቱዋኒ ዶና ጋካናው ሃꬃ ኩንꬄዲኖ። ዬሱሲ ኡንቱንታ፥ «ሃዒ ዱቂዴ፥ ቡላቻ ካፖ ኢሚቴ» ያጌዳ፤ ኡንቱንቱ ኣው ኣፊዴ ኢሜዲኖ። ቡላቻ ካፑ ዎዪኒያ ኡሻ ጊዴዳ ሃꬃ ጋንፂ ፄሊዴ፥ ሃቃፔ ዬዴንቶ ኤሪቤና፤ ሺን ሃꬃ ኩንꬄዳ ኦሳንቻቱ ኤሪኖ። ቡላቻ ካፑ ማቻቶ ኣኪያዋ ፄሲዴ፥ «ኦኒኔ ኣዪፌ ጊዴዳ ዎዪኒያ ኡሻ ኢማꬃ ኣሳ ካሴቲዴ ኡሼ፤ ያቲዴ ኣሳይ ዳሪሲ ኡሼዳዋፔ ጉዪያን፥ ቂራሪያ ኡሼ። ሺን ኔኒ ኣዪፌ ጊዴዳ ዎዪኒያ ኡሻ ሃኖ ጋካናው ናጋዳ!» ያጌዳ። ዬሱሲ ባሬ ኦꬄዳ ዎልቃማ ማላታቱዋፔ ሃዋ ኮይሩዋ ጋሊላ ጋዲያን ቃና ጌቴቲያ ሄራን ኦꬄዳ፤ ሄዋን ባሬ ቦንቹዋ ኢ ቆንጪሲና፥ ኣ ካሊያዋንቱ ኣኒ ኣማኔዲኖ። ሄዋፔ ጉዪያን፥ ዬሱሲ ባሬ ዳዪና፥ ባሬ ኢሻቱዋናኔ ባሬና ካሊያዋንቱና ኢቲፔ ቂፊሪናሆማ ጌቴቲያ ካታማ ቢዴ ኣማሬዳ ጋላሳ ታኬዲኖ። ኣዪሁዳቱ ቦንቺያ ፓሲጋ ባላ ጋላሳይ ማታቲና፥ ዬሱሲ ዬሩሳላሜ ቤዳ። ጌሻ ጎሊያ ጊቢያን ሚዛ፥ ዶርሳኔ ዶጎማቱዋ ዛሊዒያ ኣሳ ዴሜዳ፤ ቃሲ ሃራቱ ባሬንቱ ኦይዲያን ኡቲዴ፥ ሚሻ ላሚያዋንታ ዴሜዳ። ኢ ጎላ ጂራፊያ ዶቂዴ፥ ኣሳ ኡባ ዶርሳናኔ ሚያና ጌሻ ጎሊያ ጊቢያፔ ካሬው ኬሲዴ ዬዴሪሴዳ። ሚሻ ላሚያዋንቱ ኦይዲያካ ኣꬂ ዬጊዴ፥ ኡንቱንቱ ሚሻ ላሌዳ። ዶጎሙዋ ዛሊዒያዋንታ ኢ፥ «ሃ ዶጎማቱዋ ሃዋፔ ኬሲቴ፤ ታ ኣቡ ጎሊያ ጌያ ኦꬆፒቴ!» ያጌዳ። ዬሱሳ ካሊያዋንቱ ፆሳ ማፃፋን፥ «ታኒ ኔ ጎሌው ሴሌቲያ ሴላይ ታና ታማዳን ጉዴ» ጌቴቲዴ ፃፌቴዳዋ ሃሳዬዲኖ። ሄዋፔ ጉዬ፥ ኣዪሁዴ ኣሳ ኣዪሲያዋንቱ ዛሪዴ፥ «ኔው ሃዋ ኦꬃናው ዳንዳዪያ ማታይ ዴዒያዋ ኑና ኣያ ማላታ ቤሳኒ?» ያጌዲኖ። ዬሱሲ፥ «ሃ ጌሻ ጎሊያ ኮሊቴ፤ ታኒ ሄዙ ጋላሳኒ ዛራዴ ኬፃና» ያጌዳ። ቃሲካ ኣዪሁዴ ኣሳ ኣዪሲያዋንቱ፥ «ሃ ጌሻ ጎሊያ ኬፃናው ኦይታማኔ ኡሱፑን ላይꬃ ኣኬዳ፤ ሺን ኔኒ ሄዙ ጋላሳኒ ኬፃኒ?» ያጌዲኖ። ሺን ኢ ሃሳዬዳ ጌሻ ጎሊ ባሬ ኣሳቴꬃባ። ሄዋ ዲራው፥ ዬሱሲ ሃይቁዋፔ ዴንዴዳዋፔ ጉዪያን፥ ዬሱሳ ካሊያዋንቱ ኢ ሄዋ ጌዳዋ ሃሳዬዲኖ። ቃሲ ኡንቱንቱ ፆሳ ማፃፋይ ጌዳዋኔ ዬሱሲ ሃሳዬዳዋ ኣማኔዲኖ። ፓሲጋ ባላ ቦንቺያ ዎዴ፥ ዬሱሲ ዬሩሳላሜን ዴዒሺን፥ ኢ ኦꬄዳ ማላታ ቤዒዴ፥ ጮራ ኣሳይ ኣ ኣማኔዲኖ። ሺን ዬሱሲ ኣሳ ኡባ ኤሪያ ዲራው፥ ሄዋንታ ኣማኒቤና። ኣሳባ ኦኒኔ ኣው ማርካታና ማላ ኮዪቤና፤ ኣዪሲ ጎፔ፥ ኣሳ ዎዛናኒ ኣዬ ዴዒንቶ፥ ኢ ባሬ ሁጴው ኤሪያ ዲራሳ። ፓሪሳዋቱዋፔ ጊዴዳ ካፑዋ ኒቆዲሞሳ ጌቴቲያ ኢቲ ቢታኒ ዴዔ። ኒቆዲሞሲ ቃማ ዬሱሳኮ ዪዴ፥ «ታማሪሲያዎ፥ ኔኒ ኑና ታማሪሳና ማላ ፆሳይ ኪቴዳ ጊዲያዋ ኑኒ ኤሬቶ፤ ኣዪሲ ጎፔ፥ ፆሳይ ኣናና ዴዒያ ኣሳፔ ኣቲን፥ ሃ ኔኒ ኦꬂያ ዎልቃማ ማላታቱዋ ኦꬃናው ዳንዳዪያ ኣሳይ ባዋ» ያጌዳ። ዬሱሲ ዛሪዴ፥ «ታኒ ኔው ቱሙዋ ኦዳይ፤ ኣሳይ ላዔንꬁዋ ዬሌታና ꬋዮፔ፥ ፆሳ ካዉቴꬃ ቤዓናው ዳንዳዬና» ያጌዳ። ኒቆዲሞሲ፥ «ጪማ ኣሳይ ዋኒዴ ላዔንꬁዋ ዬሌታናው ዳንዳዪ? ባሬ ዳይ ኡሉዋ ሲሚ ጌሊዴ፥ ላዔንꬁዋ ዬሌታናው ኣሳይ ዳንዳዪ?» ያጌዳ። ዬሱሲ ዛሪዴ፥ «ታኒ ኔው ቱሙዋ ኦዳይ፤ ኣሳይ ሃꬃፔኔ ጌሻ ኣያናፔ ዬሌታና ꬋዮፔ፥ ፆሳ ካዉቴꬃ ጌላናው ዳንዳዬና። ኣሳይ ኣሹዋን ኣሳፔ ዬሌቴ፤ ሺን ኣሳይ ኣያናኒ ጌሻ ኣያናፔ ዬሌቴ፤ ‹ሂንቴንቱ ላዔንꬁዋ ዬሌታናው ቤሴ› ጋዴ ታኒ ኦዴዳ ዲራው፥ ማላሌቶፓ። ጫርኩ ባሬ ኮዬዳሳ ጫርኬ። ኔኒ ኣ ኮሹንቻ ሲሳሳ፤ ሺን ኢ ሃቃፔ ዪንቶ ዎይ ሃቃ ቢንቶ ኤራካ። ጌሻ ኣያናፔ ዬሌቴዳ ኡባይ ሄዋ ማላ» ያጌዳ። ኒቆዲሞሲ፥ «ሃዌ ዋኒዴ ሃናናው ዳንዳዪ?» ያጊዴ ኦቼዳ። ዬሱሲ ዛሪዴ፥ «ኔኒ ኢስራዔላቱዋ ታማሪሲያዋ ጊዳዴ ሃዋ ኤሪኪ? ታኒ ኔው ቱሙዋ ኦዳይ፤ ኑኒ ኤሪያዋ ሃሳዬቶኔ ቤዔዳዋ ማርካቴቶ፤ ሺን ኑኒ ማርካቲያዋ ሂንቴንቱ ኣኪኪታ። ታኒ ሂንቴንቱሲ ሳዓባ ኦዲና፥ ኣማኔናዋንታ ጊዶፔ፥ ሳሉዋባ ኦዲና ዋኒ ኣማናኒቴ? ሳሉዋፔ ዎꬌዳ ታፔ ኣቲን፥ ሳሉዋ ኬሴዳዌ ኦኒኔ ባዋ፤ ሳሉዋን ዴዒያ ኣሳ ናዓይ ታና። «ሙሴ ዎራን ፃንቂማሉዋ ሾሻ ሱሌዳዋዳን፥ ታና ኣማኔዳ ኡባይ ሜꬊና ዴዑዋ ኣካና ማላ፥ ታኒ ኣሳ ናዓይ ማስቃሊያ ቦላ ፑዴ ዴንዳና ቤሴ። *** «ፆሳ ናዓ ኣማኒያ ኡባይ ሜꬊና ዴዑዋ ኣካናፔ ኣቲን፥ ꬋዬና ማላ፥ ፆሳይ ሃ ኣላሚያ ኣሳ ሎይꬂ ሲቄዳ ዲራው፥ ባሬ ሜፂ ኢቲ ናዓ ኢሜዳ። ኣዪሲ ጎፔ፥ ፆሳይ ባሬ ናዓ ሃ ኣላሚያ ኣሳ ፒርዳናው ኪቲቤና፤ ሺን ኡንቱንታ ኣ ባጋና ኣሻናው ኪቴዳ። «ኣ ናዓ ኣማኒያ ኦኒኔ ፒርዴቴና፤ ሺን ናዓን ኣማኔና ኦኒኔ፥ ፆሳ ናዓ ኢቱዋ ኣማኒቤና ዲራው፥ ሃዒካ ፒርዴቲ ኡቴዳ። ኣሳ ቦላ ዪያ ፒርዳይ ሃዋ፡ ፖዑ ሃ ኣላሚያ ዬዳ፤ ሺን ኣሳ ኪታይ ኢታ ጊዲያ ዲራው፥ ፖዑዋፔ ኣꬂዴ፥ ꬉማ ሲቄዳ። ኢታባ ኦꬂያ ኦኒኔ ፖዑዋ ኢፄ፤ ኣዪሲ ጎፔ፥ ባሬ ኪታይ ቆንጬና ማላ፥ ፖዑዋኮ ሺቄና። ሺን ቱሙዋ ኦꬂያ ኦኒኔ ፆሳይ ኣዛዜዳዋዳን፥ ኢ ኦꬄዳዋ ፖዑ ቆንጪሳና ማላ፥ ፖዑዋኮ ሺቄ» ያጌዳ። ሄዋፔ ጉዪያን፥ ዬሱሲኔ ኣ ካሊያዋንቱ ዪሁዳ ጋዲያ ቤዲኖ፤ ዬሱሲ ሄ ጋዲያን ኡንቱንቱና ኣማሬዳ ዎዲያ ኡቲዴ፥ ኣሳ ፃማቂዴ ዴዔ። ቃሲ ዮሃኒሲ ሳሌሜ ማታን ዴዒያ ሄኖና ጊያ ሳን ዎጋ ሃꬃይ ዴዒያ ዲራው፥ ኣሳይ ኣኮ ዪና ፃማቄ። ሄዌ ሃኔዳዌ ዮሃኒሲ ቃሼታናፔ ካሴና። ሄዋፔ ጉዪያን፥ ዮሃኒሳ ካሊያዋንቱና ኣማሬዳ ኣዪሁዳቱዋ ሜቻ ዎጋባ ፓሉሜቴዲኖ። ኡንቱንቱ ዮሃኒሳኮ ቢዴ፥ «ታማሪሲያዎ፥ ዮርዳኖሳ ሻፋፔ ሄፊንꬃን ኔናና ዴዒያዌ፥ ኔኒ ኣባ ማርካቶዌ፥ ቤዓ ሃዒ ፃማቄ፤ ኣሳይ ኡባይካ ኣኮ ቤ» ያጌዲኖ። ዮሃኒሲ ዛሪዴ፥ «ፆሳይ ኢማና ꬋዮፔ፥ ኣሳይ ኣይኔ ኣካናው ዳንዳዬና። ‹ታኒ ኪሪስቶሳ ጊዲኬ፤ ሺን ታኒ ኣፔ ሲንꬃው ኪቴታዲ› ጌዳዋሲ ሂንቴ ሂንቴንቱ ሁጴው ማርካ። ሚሺራ ማጫዉና ዴዒያ ኡራይ ኢካ ሚሺራ፤ ሄ ሚሺራ ሚያታይ ኤቂዴ፥ ኢ ጊያዋ ሲሲያዌ ኣ ሃሳያን ዳሮ ናሼቴ። ሄዋ ዲራው፥ ሃዌ ታ ናሼቻይ ፖሌቴዳ። ኢ ዳሪና ታ ጉፃና ቤሴ» ያጌዳ። ቦላፔ ዪያዌ ኡባፔ ቦላ። ሳዓፔ ቤቴዳዌ ሳዓሳ። ኢካ ሳዓባ ሃሳዬ። ሳሉዋፔ ዪያዌ ኡባፔ ቦላ። ኢ ባሬ ቤዔዳባኔ ሲሴዳባ ማርካቴ፤ ሺን ኣ ማርካቴꬃ ኣኪያዌ ባዋ። ኣ ማርካቴꬃ ኣኪያ ኦኒኔ ፆሳይ ቱማንቻ ጊዲያዋ ሄዋን ማርካቴ። ፆሳይ ኪቴዳዌ ፆሳ ቃላ ኦዴ፤ ኣዪሲ ጎፔ፥ ፆሳይ ባሬ ጌሻ ኣያና ፓላሂሲዴ ኢሜ። ፆሳይ ባሬ ናዓ ሲቂዴ ኡባባ ኣ ኩሺያን ዎꬄዳ። ናዓ ኣማኒያ ኡራው ሜꬊና ዴዑ ዴዔ፤ ሺን ናዓ ኣማኔናዋ ቦላ ፆሳ ሃንቁ ዴዓናዋፔ ኣቲን፥ ኢ ዴዑዋ ቤዔና። ዬሱሲ ዮሃኒሳዋፔ ዳሪያ ባሬና ካሊያዋንታ ባሬኮ ሺሼኔ ፃማቄ ጊያዋ ፓሪሳዋቱ ሲሴዳዋ ዬሱሲ ኤሬዳ ዎዴ፥ ዪሁዳ ኣጊዴ፥ ጋሊላ ቤዳ፤ ጊዶፔኔ፥ ዬሱሳ ካሊያዋንቱ ፃማቄዳዋፔ ኣቲን፥ ዬሱሲ ባሬ ሁጴው ኦናኔ ፃማቂቤና። *** *** ጋሊላ ቢዴ፥ ሳማሪያና ኣꬋናዌ ኣ ኣሼናባ ጊዴዳ። ሄዋ ዲራው፥ ያዪቆቢ ባሬ ናዓ ዮሴፎ ኢሜዳ ጋዲያ ማታን ዴዒያ ሲካሮ ጌቴቲያ ሳማሪያ ካታማ ቤዳ። ሄ ሳዓን ያዪቆባ ሃꬃ ኦላይ ዴዔ፤ ዬሱሲ ሃሜታን ዳቡሪዴ፥ ሄ ሃꬃ ኦላ ማታን ኡቴዳ። ሄ ዎዴ ሳዓይ ኡሱፑን ሳቲያ ሄራ። ሳማሪያ ሚሺራታ ሃꬃ ዱቃናው ዬዳዉኖ ዬሱሲ፥ «ታና ሃꬃ ኡሻሪኪ!» ያጌዳ። ዬሱሳ ካሊያዋንቱ ቁማ ሻማናው ካታማ ቤዲኖ። ሄ ሚሺራታ ዛራዴ ኣ፥ «ኔኒ ኣዪሁዳ ኣሳ ጊዳዴ፥ ሳማሪያ ማጫ ኣሳ ጊዴዳ ታና፥ ዎታ ዴዑዋ ኢሚያ ሃꬃ ኡሻ ጋይ?» ያጋዱ፤ ኣዪሲ ጎፔ፥ ኣዪሁዳቶኔ ሳማሪያ ኣሳው ኢቲፔቴꬃይ ባይና ዲራሳ። ዬሱሲ ዛሪዴ ኢዞ፥ «ኔኒ ፆሳ ኢሞታኔ ቃሲ ኔና ‹ታና ሃꬃ ኡሻ› ጊያዌ ኦኔንቶ ኤሪያዋ ጊዲንቶ፥ ኣ ዎሳናሳ፤ ኢካ ኔው ዴዑዋ ኢሚያ ሃꬃ ኢማና» ያጌዳ። ሚሺራታ ዛራዴ፥ «ጎዳው፥ ኔው ዱቂያባይ ባዋ፤ ኦላይካ ጪሙዋ። ያቲና፥ ዴዑዋ ኢሚያ ሃꬃ ሃቃፔ ኣካኒ? ኑሲ ሃ ሃꬃ ኦላ ኢሜዳ ኑ ኣዉዋ ያዪቆባፔ ኔኒ ዳራይ? ኢ፥ ኣ ናናይኔ ኣ ሜሂ ሃዋፔ ኡሼዲኖ» ያጋዱ። ዬሱሲ ዛሪዴ፥ «ሃ ሃꬃፔ ኡሺያ ኦኒኔ ላዔንꬁዋ ሳሜታናዋ። ሺን ታኒ ኢሚያ ሃꬃ ኡሺያ ኦኒኔ ላዔንꬁዋ ሳሜቴና። ታኒ ኢሚያ ሃꬃይ ሄ ኣ ጊዶን ሜꬊና ዴዑዋሲ ፑልቲያ ፑልቱዋ ጊዳናዋ» ያጌዳ። ሚሺራታ፥ «ጎዳው፥ ታኒ ሳሜቴና ማላኔ ሃꬃ ቲካናዉካ ሃ ዬና ማላ፥ ታው ሄ ሃꬃ ኢማ!» ያጋዱ። ዬሱሲ ኢዞ፥ «ባዴ ኔ ኣሲና ፄሳዴ ሃ ሲማ» ያጌዳ። ሚሺራታ ዛራዴ፥ «ታው ኣሲናይ ባዋ» ያጋዱ። ዬሱሲ፥ «ታው ኣሲናይ ባዋ ጊያዋን ቱሙዋ ጋዳ። ኔኒ ኢቼሹ ኣሲና ጌላዳ፤ ሃዒ ኔናና ዴዒያ ቢታኒ ኔ ኣሲና ጊዴና። ኔኒ ሃዒ ታው ኦዴዳዌ ቱማ» ያጌዳ። ሚሺራታ ቃይ፥ «ጎዳው፥ ኔኒ ናቢያ ጊዲያዋ ታ ሃዒ ኤራዲ፤ ኑ ሳማሪያ ኣሳ ኣዋቱ ሃ ዴሪያን ጎዪኔዲኖ፤ ሺን ኣዪሁዳቱ ሂንቴንቱ ኣሳይ ፆሳው ጎዪናናው ቤሲያ ሳዓይ ዬሩሳላሜና ያጊታ» ያጋዱ። ዬሱሲ፥ «ሃ ሚሺራቴ፥ ታና ኣማና፤ ሃ ዴሪያን ዎይ ዬሩሳላሜን ኣዉዋ ፆሳው ሂንቴንቱ ጎዪኔና ዎዲ ያናዋ። ሂንቴንቱ ሳማሪያ ኣሳይ ሂንቴ ኤሬናባው ጎዪኒታ፤ ፆሳይ ኑና ኣዪሁዳቱዋ ጎዔቲዴ ኣቶቴꬃ ኣሂያ ዲራው፥ ኑኒ ኑ ኤሪያዎ ጎዪኔቶ። ሺን ኣዉዋ ፆሳው ቱሙዋፔ ጎዪኒያዋንቱ ኣ፥ ጌሻ ኣያና ዎልቃኒኔ ፆሳ ፆሳቴꬃዳን ጎዪኒያ ዎዲ ማታቴዳ፤ ኡባ ሃዒካ ጋኬዳ። ኣዪሲ ጎፔ፥ ኣሳ ባሬው ጎዪናና ማላ፥ ኣዉ ፆሳይካ ሃ ኦጊያን ጎዪኒያዋንታ ኮዬ። ፆሳይ ኣያና፤ ኣው ጎዪኒያዋንቱካ ጌሻ ኣያና ዎልቃኒ ፆሳ ፆሳቴꬃዳን ጎዪናናው ቤሴ» ያጌዳ። ሚሺራታ፥ «ማሲሂያ ጌቴቲያ ኦኬቶዌ ያናዋ ታኒ ኤራይ። ኢ ዪያ ዎዴ ኑሲ ኡባባ ኦዳናዋ» ያጋዱ። ዬሱሲ፥ «ሃ ኔናና ሃሳዪያዌ ታኒ ኣ» ያጌዳ። ሃዋ ኡንቱንቱ ሃሳዪሺን፥ ዬሱሳ ካሊያዋንቱ ቤዳሳፔ ሲሜዲኖ። ዬሱሲ ሚሺራቲና ሃሳዪሺን ኡንቱንቱ ቤዒዴ ዳሪሲ ማላሌቴዲኖ፤ ሺን ሚሺራቶ፥ «ኣያ ኮያይ?» ዎይ ዬሱሳ፥ «ኢናና ኣዪሲ ሃሳያይ?» ጊዴ ኦቾዌ ኦኒኔ ባዋ። ሄዋፔ ጉዪያን፥ ሚሺራታ ባሬ ሃꬃ ኦቱዋ ኣጋ ባሻ ጉዬ ካታማ ባዴ ኣሳው፥ «ታኒ ኦꬄዳዋ ኡባ ታው ኦዴዳ ቢታኒያ ቤዓናው ዴንዲቴ፤ ሄዌ ኪሪስቶሳ ጊዳንዴሻ?» ያጋዱ። ኣሳይ ካታማፔ ኬሲዴ፥ ዬሱሳኮ ቤዳ። ሄዌ ሃኒሺን፥ ኣ ካሊያዋንቱ ዬሱሳ፥ «ጉꬃባ ማሪኪ!» ያጊዴ ዎሴዲኖ። ሺን ኢ፥ «ታው ሂንቴንቱ ኤሬና ቁማይ ታኒ ሚያዌ ዴዔ» ያጌዳ። ሄዋ ዲራው፥ ኣ ካሊያዋንቱ ባሬንቱ ጊዶን፥ «ኣው ሚያባ ኣሄዳ ኣሳይ ዴዓንዴሻ?» ያጌዲኖ። ዬሱሲ ኡንቱንቱሲ፥ «ታ ቁማይ ታና ኪቴዳዋ ሼኒያ ኡዱሳኔ ኣ ኦሱዋ ፖሉሳ። ሂንቴንቱ፥ ‹ኦይዱ ኣጌናፔ ጉዪያን፥ ካꬃይ ጫኬታናዋ› ጊኪቴዬ? ታኒ ሂንቴንቱሲ ኦዳይ፤ ጎሻ ሎይꬂ ፄሊቴ፤ ካꬃይ ጫካ ቤሴዳ። ዜሪያዌኔ ጫኪያዌ ኢቲፔ ናሼታና ማላ፥ ጫኪያዌ ዲርጉዋ ኣኬኔ ካꬃ ሜꬊና ዴዖ ሺሼ። ሃ ጋሱዋን፥ ‹ኢቱ ዜሬ፤ ቃሲ ኢቱ ጫኬ› ጊያ ሃሳያይ ቱማ። ሂንቴንቱ ዳቡሪቤናዋ ጫካና ማላ፥ ታኒ ሂንቴንታ ኪታዲ፤ ሃራቱ ኦꬂ ዳቡሬዲኖ፤ ሂንቴንቱ ሃራቱዋ ዳቡራን ጌሌዲታ» ያጌዳ። ሚሺራታ፥ «ኢ ታኒ ኦꬄዳ ኡባባ ኦዴዳ» ጋዴ ማርካቴዳ ዲራው፥ ሄ ካታማን ዴዒያ ሳማሪያ ኣሳፔ ጮራይ ዬሱሳ ኣማኔዳ። ሳማሪያ ኣሳይ ዬሱሳኮ ዬዳ ዎዴ፥ ባሬንቱ ማታን ጋሚዓና ማላ፥ ዬሱሳ ዎሲና ኢ ያኒ ላዑ ጋላሳ ኡቴዳ። ኢ ኦዲያ ቃላ ዲራው፥ ካሴዋፔ ጮራ ኣሳይ ኣማኔዳ፤ ቃሲ ኡንቱንቱ ሚሺራቶ፥ «ኑኒ ኑ ሁጴው ኢ ጊያዋ ሲሲዴ ኣማኔዳዋፔ ኣቲን፥ ኔኒ ማርካቴዳ ዲራሳ ጊዴና፤ ኢ ቱሙ ኣላሚያ ኣሳ ኣሺያዋ ጊዲያዋካ ኑኒ ኤሬዶ» ያጌዲኖ። ላዑ ጋላሳፔ ጉዪያን፥ ዬሱሲ ሳማሪያፔ ኬሲዴ፥ ጋሊላ ጋዲያ ቤዳ። ኣዪሲ ጎፔ፥ ኢ ባሬ ሁጴው፥ «ናቢ ባሬ ጋዲያን ቦንቼቴና» ያጊ ኦዴዳ። ዬሱሲ ጋሊላ ጋኬዳ ዎዴ፥ ጋሊላ ኣሳይ ኣ ሞኬዳ፤ ፓሲጋ ቦንቺያ ጋላሲ ኡንቱንቱ ዬሩሳላሜን ዴዒያ ዲራው፥ ኢ ኦꬄዳ ኡባባ ቤዔዲኖ። ዬሱሲ ሃꬃ ዎዪኒያ ኡሻ ኬሴዳ፥ ጋሊላን ዴዒያ ቃና ካታማ ቤዳ። ቂፊሪናሆማን ኣ ናዓይ ሳኬቲያ፥ ካቲያ ጎሌን ኦꬂያ ኢቲ ካፑ ዴዔ። ዬሱሲ ዪሁዳፔ ጋሊላ ዬዳዋ ሄ ካፑ ሲሲዴ፥ ኣኮ ዪዴ ሃይቃናው ማቴዳ ባሬ ናዓ ቢዴ ፓꬃና ማላ፥ ዬሱሳ ዎሴዳ። ዬሱሲ ሄ ካፑዋ፥ «ፆሳይ ኦꬂያ ማላታኔ ሄቾ ጊሲያባ ቤዔናኒ ዴዒዴ፥ ሂንቴንቱ ኣዪኔ ኣማኒኪታ» ያጌዳ። ሄ ካፑ ዛሪዴ፥ «ጎዳው፥ ታ ናዓይ ሃይቄናን ዴዒሺን፥ ታናና ባሪኪ» ያጌዳ። ዬሱሲ፥ «ባ፤ ኔ ናዓይ ፓፃ ዴዓናዋ!» ያጌዳ። ሄ ካፑ ዬሱሲ ጌዳዋ ኣማኒዴ ቤዳ። ኢ ባሬ ጎሌ ቢሺን፥ ኣ ቆማቱ ኣናና ኦጊያን ጋኬቲዴ ኣ፥ «ኔ ናዓይ ፓፃ ዴዔ» ጌዲኖ። ኢ ባሬ ቆማቱዋ ባሬ ናዓው ኣይ ሳቲያን ኬኬዴንቶ ኦቺና ኡንቱንቱ፥ «ዚኖ ላፑ ሳቲያን ቆፁ ኣ ኣጌዳ» ያጌዲኖ። ናዓ ኣዉ ዬሱሲ ባሬው፥ «ኔ ናዓይ ፓፃ ዴዓናዋ» ጌዳዌ ሄ ሳቲያና ጊዴዳዋ ሃሳዬዳ። ሄዋ ዲራው፥ ኢኔ ኣ ሶይ ኣሳይ ኡባይ ኣማኔዲኖ። ሃዌ ዬሱሲ ዪሁዳፔ ጋሊላ ዪዴ ኦꬄዳ ላዔንꬆ ማላታ። ሄዋፔ ጉዪያን፥ ዬሱሲ ኣዪሁዳቱ ቦንቺያ ባላው ዬሩሳላሜ ቤዳ። ዬሩሳላሜን ዶርሳ ፔንጊያ ማታን ኢብራዪስፄ ቃላን ቤቴሳይዳ ጌቴቲያ ዳጋቲ ኡቴዳ ሃꬃይ ዴዔ፤ ሄ ዳጋቲ ኡቴዳ ሃꬃ ዩዪ ኣꬌዳ ኢቼሹ ካሻይ ዴዔ። ሄዋን ጮራ ሃርጋንቻቱ፥ ቆቃቱ፥ ዎባቱኔ ሲሌዳዋንቱ ጊሴዲኖ። [ሃꬃይ ቃፂያዋ ናጊኖ። ኣዪሲ ጎፔ፥ ኢቲ ኢቲ ጌዴ ጎዳ ኪታንቻይ ሄ ዳጋቴዳ ሃꬃኮ ጌሊዴ፥ ሃꬃ ቃꬄ፤ ሃꬃይ ቃፄዳዋፔ ጉዪያን፥ ኮይሮ ጌሌዳ ኡራይ ባሬና ኦይቄዳ ኣይ ሃርጊያፔካ ፓፄ።] ሄዋን ሃታማኔ ሆስፑን ላይꬃ ሳኬቴዳ ኢቲ ቢታኒ ዴዔ። ሄ ቢታኒ ሄዋን ጊሴዳዋ ዬሱሲ ቤዒዴ፥ ዳሮ ዎዲያ ሳኬቴዳዋካ ኤሪዴ ቢታኒያ፥ «ፓፃናው ኮያይ?» ያጌዳ። ሳኬቲያ ቢታኒ ዛሪዴ፥ «ጎዳው፥ ሃꬃይ ቃፂያ ዎዴ፥ ታና ሃꬃን ዬጊያ ኣሳይ ꬋዬዳ፤ ታኒ ጌላና ሃኒያ ዎዴ፥ ሃራ ኡራይ ታፔ ካሴቲዴ ጌሊ ኣጌ» ያጌዳ። ዬሱሲ ኣ፥ «ዴንዳ ኤቃ፤ ኔኒ ጊሶዋ ቶካዴ ባ» ያጌዳ። ቢታኒ ኤሌካ ፓፂ ኣጌዳ፤ ባሬ ጊሱዋ ቶኪዴ ቤዳ። ሄዌ ሃኔዳዌ ሳምባታ ጋላሳና። ሄዋ ዲራው፥ ኣዪሁዳቱ ፓፄዳ ቢታኒያ፥ «ሃቼ ሳዓይ ሳምባታ፤ ኔኒ ኔ ጊሱዋ ቶካ ቢያዌ ዎጋ ጊዴና» ያጌዲኖ። ሺን ቢታኒ፥ «ታና ፓꬄዳዌ፥ ‹ኔ ጊሱዋ ቶካዴ ባ› ያጌዳ» ጊዴ ኡንቱንቱሲ ዛሬዳ። ኡንቱንቱ ኣ፥ «ኔና፥ ‹ኔ ጊሱዋ ቶካዴ ባ› ጌዳዌ ኢ ኦኔ?» ጊዴ ኦቼዲኖ። ሺን ሄዋን ጮራ ኣሳይ ዴዒያ ዲራዉኔ፥ ዬሱሲካ ጌሜቴዳ ዲራው፥ ቢታኒ ባሬና ፓꬄዳዌ ኦኔንቶ ኤሬና። ዬሱሲ ጉዬፔ ሄ ቢታኒያ ጌሻ ጎሊያን ዴሚዴ፥ «ቤዓ፥ ኔኒ ሃዒ ፓፃዳ፤ ሃዋፔካ ኢታባይ ኔና ጋኬና ማላ፥ ላዔንꬆ ናጋራ ኦꬆፓ» ያጌዳ። ሄዋፔ ጉዪያን፥ ቢታኒ ቢዴ፥ ባሬና ፓꬄዳዌ ዬሱሳ ጊዲያዋ ኣዪሁዳ ኣሳ ካፓቶ ኦዴዳ። ዬሱሲ ሃዋ ሳምባታን ኦꬄዳ ዲራው፥ ኡንቱንቱ ዬሱሳ ዬዴሳን ዋዪሱዋ ዶሜዲኖ። ዬሱሲ ዛሪዴ ኡንቱንቱሲ፥ «ታ ኣቡ ኡባ ዎዴ ኦꬄ፤ ታኒካ ኦꬃናው ቤሴ» ያጌዳ። ሄዋ ዲራው፥ ዬሱሲ ሳምባታ ጋላሳ ቦንቼና ዲራ ፃላላሳ ጊዴናን፥ ባሬና ፆሳና ቃራዪዴ፥ «ፆሳይ ታ ኣባ» ጌዳ ዲራው፥ ኣዪሁዳ ኣሳ ካፓቱ ኣ ዎꬋናው ካሴዋፔ ሚኒሲዴ ኮዪኖ። ዬሱሲ ዛሪዴ ኡንቱንቱሲ፥ «ታኒ ሂንቴንቱሲ ቱሙዋ ኦዳይ፤ ናዓይ ባሬካ ኣይኔ ኦꬄና። ኢ ባሬ ኣቡ ኦꬂሺን ቤዒያዋ ፃላላ ኦꬄ፤ ኣዉ ኦꬂያዋ ናዓይካ ኦꬄ። ኣዪሲ ጎፔ፥ ኣዉ ባሬ ናዓ ሲቄ፤ ቃሲ ኢ ኦꬂያ ኦሱዋ ኡባባ ባሬ ናዓ ቤሴ። ኡባ ሂንቴንቱ ማላሌታና ጋካናው፥ ኢ ሃዋፔ ኣꬊያ ኦሱዋካ ባሬ ናዓ ቤሳናዋ። ጋሱኔ፥ ኣዉ ሃይቄዳዋንታ ሃይቁዋፔ ዴንꬂዴ ሼምፑዋና ዎꬂያዋዳን፥ ናዓይካ ቃሲ ባሬ ኮዮዋንታ ሼምፑዋና ዎꬄ። ኣሳይ ኡባይ ኣዉዋ ቦንቺያዋዳን፥ ናዓካ ቦንቻና ማላ፥ ኣዉ ፒርዳ ኡባ ናዓው ኢሜዳዋፔ ኣቲን፥ ኢ ኦናኔ ፒርዴና፤ ናዓ ቦንቼና ኡራይ፥ ኣ ኪቴዳ ኣዉዋካ ቦንቼና። *** «ታኒ ሂንቴንቱሲ ቱሙዋ ኦዳይ፤ ታ ቃላ ሲሲያዎኔ ታና ኪቴዳዋን ኣማኒያዎ ሜꬊና ዴዑ ዴዔ። ሃይቁዋፔ ዴዖ ኢ ፒኔዳዋፔ ኣቲን፥ ፒርዴቴና። ታኒ ሂንቴንቱሲ ቱሙዋ ኦዳይ፤ ሃይቄዳ ኣሳይ ፆሳ ናዓ ኮሻ ሲሲያ ዎዲ ያናዋ፤ ሄዌኔካ ሃዓ። ሄ ኮሻ ሲሲያዋንቱ ሼምፑዋና ዴዓና። ኣዪሲ ጎፔ፥ ኣዎ ዴዑዋ ኢሚያ ዎልቃይ ዴዒያዋዳን፥ ዴዑዋ ኢሚያ ሄ ዎልቃ ባሬ ናዓዉካ ኢሜዳ። ፆሳ ኣዉ ባሬ ናዓው ፒርዲያ ማታ ኢሜዳ፤ ኣዪሲ ጎፔ፥ ናዓይ ኣሳ ናዓ። «ሃዋን ማላሌቶፒቴ፤ ኣዪሲ ጎፔ፥ ዱፉዋን ዴዒያዋንቱ ኣ ኮሻ ሲሲያ ዎዲ ዬ። ሲሲዴ ኡንቱንቱ ዱፉዋፔ ጋፃ ኬሳና፤ ሎዖባ ኦꬄዳዋንቱ ዴዑዋን ዴዓናው ዴንዳና፤ ቃሲ ኢታባ ኦꬄዳዋንቱ ፒርዴታናው ዴንዳናዋንታ። «ታኒ ታፔ ኣይኔ ኦꬃናው ዳንዳዪኬ፤ ፆሳይ ታው ኦዴዳዋዳን ፒርዳይ። ታ ፒርዳይ ቱማ፤ ኣዪሲ ጎፔ፥ ታኒ ታና ኪቴዳዋ ሼኒያ ፖሊያዋፔ ኣቲን፥ ታኒ ዶሲያዋ ኦꬂኬ። «ታኒ ታ ሁጴው ታባ ማርካቶፔ፥ ታ ማርካቴꬃይ ቱማ ጊዴና። ታባ ማርካቲያዌ ሃራይ ዴዔ፤ ኢ ታባ ማርካቲያዌ ቱማ ጊዲያዋ ታኒ ኤራይ። «ሂንቴንቱ ዮሃኒሳኮ ኣሳ ኪቲና፥ ኢ ኡንቱንቶ ቱሙዋ ማርካቴዳ። ታኒ ሄዋ ሂንቴንታ ኣቲኖ ጋዴ ጊያዋፔ ኣቲን፥ ኣሳ ማርካቴꬃይ ታው ኮሺና ጊዴና። ዮሃኒሲ ሙቃዳዳን፥ ኤፄዳኔ ፖዒሴዳ፤ ሂንቴንቱካ ኣማሬዳ ዎዲያ ኣ ፖዑዋን ናሼታናው ኮዬዲታ። «ሺን ታው ዮሃኒሳዋፔ ኣꬊያ ማርካቴꬃይ ዴዔ፤ ኣዪሲ ጎፔ፥ ታኒ ዉርሳናው ታ ኣቡ ታው ኢሜዳ ኪታይ፥ ሃ ታኒ ኦꬂያዌ፥ ኢ ታና ኪቴዳዋ ጊዲያዋ ማርካቴ። «ቃሲ ታና ኪቴዳ ታ ኣቡ ባሬ ሁጴው ታባ ማርካቴ። ሂንቴንቱ ኣ ኮሻ ኣይኔ ሲሲቤይኪታ፤ ኣ ማላካ ቤዒቤይኪታ። ኢ ኪቴዳዋ ኣማኔና ዲራው፥ ኣ ቃላይ ሂንቴንቱ ዎዛናን ባዋ። «ፆሳ ማፃፋቱዋፔ ሜꬊና ዴዑዋ ዴሚያዋ ሂንቴው ማላቲና፥ ኡንቱንታ ቢዲታ፤ ኡንቱንቱካ ታባ ማርካቲያዋንታ። ሺን ዴዑዋ ዴማናው ታኮ ዪያዋ ሂንቴንቱ ኮዪኪታ። «ታኒ ኣሳፔ ቦንቹዋ ኮዪኬ። ሺን ታኒ ሂንቴንቱ ዎዛናን ፆሳ ሲቁ ባይናዋ ኤራይ። ታኒ ታ ኣቡ ሱንꬃን ያዲ፤ ሺን ታና ኣኪቤይኪታ። ሺን ሃራ ኣሳይ ባሬ ሱንꬃን ዪያ ዎዴ፥ ኣ ኣኪታ። ሂንቴንቱ ኢቱ ኢቱዋ ቦንቺታ፤ ሺን ኢቲ ፆሳፔ ዪያ ቦንቹዋ ኮዪኪታ። ያቲና፥ ዋኒዴ ኣማናናው ዳንዳዪቴ? «ታኒ ታ ኣቡ ሲንꬃን ሂንቴንታ ሞቲያዋ ሂንቴው ማላቶፖ፤ ሂንቴንታ ሞቲያዌ፥ ሂንቴ ሂዶታ ዎꬂያ ሙሳ። ሂንቴንቱ ሙሳ ኣማኔዳባ ጊዲንቶ፥ ታናካ ኣማናኒታ፤ ኣዪሲ ጎፔ፥ ታባ ፃፌዳዌ ኣ። ሺን ሂንቴንቱ ኢ ፃፌዳዋ ኣማኔናን ኢፆፔ፥ ታኒ ጊያዋ ዎቲ ኣማናኒቴ?» ያጌዳ። ሄዋፔ ጉዪያን፥ ዬሱሲ ጋሊላ ኣባፔ ዎይ ፂቢሪያዶሳ ኣባፔ ሄፊንꬃ ፒኔዳ። ኢ ሃርጋንቻቱዋ ቦላ ኦꬄዳ ዎልቃማ ማላታ ቤዔዳ ዲራው፥ ጮራ ኣሳይ ኣ ካሌዳ። ዬሱሲ ዴሪያ ኬሲዴ፥ ያኒ ባሬና ካሊያዋንቱና ኢቲፔ ኡቴዳ። ኣዪሁዳቱ ቦንቺያ ፓሲጋ ጋላሳይ ጋኬዳ። ዬሱሲ ሲንꬃኮ ፄሊዴ፥ ጮራ ኣሳይ ባሬኮ ዪያዋ ቤዒዴ ፒሊጶሳ፥ «ሃ ኣሳ ኡባ ሚዛናው ጊዲያ ቁማ ሃቃፔ ሻማኔ?» ያጌዳ። ኢ ሄዋ ፒሊጶሳ ፓጫናው ጌዳ፤ ኣዪሲ ጎፔ፥ ኢ ባሬ ሁጴው ኣያ ኦꬃና ቤሲንቶ ኦꬃናባ ኤሬ። ፒሊጶሲ ዛሪዴ ዬሱሳ፥ «ሁጲያን ሁጲያን፥ ሃራይ ኣቶ ኢቲ ኢቲ ባርሱዋ ጋꬃናው፥ ላዑ ፄቱ ዲናሪያን ሻሜዳ ኡኪꬃይካ ጊዴና» ያጌዳ። ቃሲ ዬሱሳ ካሊያዋንቱፔ ኢቱ፥ ሲሞኒ ጴፂሮሳ ኢሻይ ኢንዲራሲ፥ «ባንጋ ኡኪꬃ ኢቼሹኔ ላዑ ሞሊ ዴዒያ ኢቲ ናዓይ ሃዋን ዴዔ፤ ሺን ሃ ኣሳ ኡባው ሄዌ ዎቲ ጊዳኔ?» ያጌዳ። ዬሱሲ ባሬና ካሊያዋንታ፥ «ኣሳይ ኡታናዳን ኡዲቴ» ያጌዳ። ሄ ሳዓን ዳሮ ማታይ ዴዔ። ኣሳይ ኡባይ ኡቴዳ፤ ኣቱማ ኣሳይ ኢቼሹ ሻዓ ጊዲያዋ። ዬሱሲ ኡኪꬃ ኣኬዳ፤ ፆሳ ጋላቲዴ፥ ሄዋን ኡቴዳ ኣሳው ጊሼዳ። ሞሊያካ ሄዋዳን ኦꬂና ኣሳይ ባሬ ኮዬዳዋ ኬና ሜዳ። ኡንቱንቱ ኡባይ ካሌዳዋፔ ጉዪያን፥ ዬሱሲ ባሬና ካሊያዋንታ «ኢቲባይካ ጮ ባዬና ማላ፥ ኣቴዳ ዶካ ሺሺቴ» ያጌዳ። ሄዋ ዲራው፥ ኡንቱንቱ ኡባካ ሺሼዲኖ፤ ኣሳይ ካሊና ኣቴዳ ባንጋ ኡኪꬃ ዶካ ሺሺዴ፥ ታማኔ ላዑ ዛምቤሊያ ኩንꬄዲኖ። ኣሳይ ዬሱሲ ኦꬄዳ ዎልቃማ ማላታ ቤዔዳ ዎዴ፥ «ሃዌ ቱሙዋፔ ሃ ሳዓ ያና ጌዳ ናቢያ» ያጌዲኖ። ኡንቱንቱ ዪዴ ባሬና ዎልቃን ኦይቂ ካቲያ ኦꬃናው ሃኒያዋ ዬሱሲ ኤሪዴ፥ ባሬካ ዴሪያ ቦላ ሺሬቲዴ ኬሴዳ። ሳዓይ ኦማሪሴዳ ዎዴ፥ ዬሱሳ ካሊያዋንቱ ኣባኮ ቤዲኖ፤ ሳዓይ ቃሜዳ፤ ሺን ዬሱሲ ኡንቱንቱኮ ሄ ሳቲ ጋካናው ዪቤና፤ ሄዋሲ ኡንቱንቱ ዎንጊሪያን ጌሊዴ፥ ኣባ ፒኒ ሄፊንꬃ ቂፊሪናሆማ ቤዲኖ። ዎልቃማ ጫርኩ ጫርኬዳ ዲራው፥ ኣባይ ቃፄዳ፤ ኢቲ ሳቲያ ኬና ኡንቱንቱ ኣባ ሻጎዋፔ ጉዪያን፥ ዬሱሲ ኣባ ቦላና ሃሜቲዴ ዪያዋ ቤዒዴ ያዬዲኖ። ሺን ኢ፥ «ያዮፒቴ፤ ታናቴ!» ያጌዳ። ኡንቱንቱ ዎንጊሪያን ኣ ጌሊሳናው ኮዬዲኖ፤ ዎንጊሪ ኡንቱንቱ ቢያሳ ኣባ ጋፃ ኤሌካ ጋኪ ኣጌዳ። ዎንቴꬃ ጋላሲ፥ ኣባፔ ሄፊንꬃና ኣቴዳ ጮራ ኣሳይ ኣባ ቦላ ኢቲ ዎንጊሪያ ፃላላይ ዴዒያዋ ቤዔዲኖ፤ ዬሱሲ ባሬና ካሊያዋንቱና ዎንጊሪያን ጌሊዴ፥ ኡንቱንቱና ቤናን፥ ኡንቱንቱ ባሬካ ቤዳዋ ኣኬኬዲኖ። ሺን ፂቢሪያዶሳፔ ሃራ ዎንጊራቱ ዬሱሲ ፆሳ ጋላቲና፥ ኣሳይ ኡኪꬃ ሜዳሳ ማታ ዬዲኖ። ኣሳይ ዬሱሲ ዎይ ኣ ካሊያዋንቱ ሄዋን ባይናዋ ቤዒዴ፥ ዬሱሳ ኮያናው ዎንጊሪያን ጌሊዴ፥ ቂፊሪናሆማ ቤዲኖ። ኣሳይ ዬሱሳ ኣባፔ ሄፊንꬃን ዴሜዳ ዎዴ፥ «ታማሪሲያዎ፥ ሃዋ ኣዉዴ ያዲ?» ያጌዲኖ። ዬሱሲ ዛሪዴ፥ «ታኒ ሂንቴንቱሲ ቱሙዋ ኦዳይ፤ ሂንቴንቱ ታና ኮዪያዌ ኡኪꬃ ሜዳ ዲራሳኔ ካሌዳ ዲራሳ ጊዲያዋፔ ኣቲን፥ ዎልቃማ ማላታ ቤዔዳ ዲራሳ ጊዴና። ሜꬊና ዴዑዋ ቁማው፥ ታኒ ኣሳ ናዓይ ሂንቴንቱሲ ኢማናዎ፥ ኦꬂቴፔ ኣቲን፥ ሳሚያ ቁማው ኦꬆፒቴ፤ ኣዪሲ ጎፔ፥ ኣዉ ፆሳይ ሄዋ ꬊሺሳናው ማታፋ ኣታሚ ዎꬄዳ» ያጌዳ። ሄዋፔ ጉዪያን ኡንቱንቱ፥ «ኑኒ ፆሳ ኦሱዋ ኦꬃናው ኣያ ኦꬃናው ቤሲ?» ያጊዴ ዬሱሳ ኦቼዲኖ። ዬሱሲ ዛሪዴ፥ «ሂንቴንቱ ኦꬃና ማላ፥ ፆሳይ ኮዪያ ኪታይ ሃዋ፤ ኢ ኪቴዳዋን ኣማኒቴ» ያጌዳ። ኡንቱንቱ ዛሪዴ፥ «ኑኒ ቤዒዴ፥ ኔናን ኣማናና ማላ፥ ኣይ ዎልቃማ ማላታ ኦꬃኒ? ኣያ ኪቴታኒ? ፆሳ ማፃፋን፥ ‹ኡንቱንቱ ማና ማላ ሳሉዋፔ ኡኪꬃ ኢሜዳ› ያጌቲ ፃፌቶዋዳን፥ ኑ ኣዋቱ ሜላ ቢታን ማና ሜዲኖ» ያጌዲኖ። ዬሱሲ፥ «ታኒ ሂንቴንቱሲ ቱሙዋ ኦዳይ፤ ሂንቴንቱሲ ሳሉዋፔ ቱሙ ኡኪꬃ ኢሚያዌ ታ ኣባፔ ኣቲን፥ ሂንቴንቱሲ ሳሉዋፔ ኡኪꬃ ኢሜዳዌ ሙሳ ጊዴና። ኣዪሲ ጎፔ፥ ቱማ ጊዴዳ ፆሳ ኡኪꬃይ፥ ሳሉዋፔ ዎꬊያዌ ሃ ኣላሚያ ኣሳው ዴዑዋ ኢሜ» ያጌዳ። ኡንቱንቱ ዛሪዴ፥ «ጎዳው፥ ኑካ ሄ ኡኪꬃ ኡባ ዎዴ ኢማ» ያጌዲኖ። ዬሱሲ፥ «ታኒ ዴዑዋ ኡኪꬃ፤ ታኮ ዪያ ኡራይ ኡባካ ኮሻቴና። ቃሲ ታና ኣማኒያ ኡራይ ኣይኔ ሳሜቴና። ሺን ታኒ ሂንቴንቱሲ ኦዴዳዋዳን፥ ሂንቴንቱ ታና ቤዔዲታ፤ ሺን ኣማኒኪታ። ታ ኣቡ ታው ኢሚያ ኡባይ ታኮ ያናዋ፤ ቃሲ ታኮ ዪያ ኦናኔ ኡባካ ታኒ ካሬ ዬዲኬ። ኣዪሲ ጎፔ፥ ታኒ ታና ኪቴዳዋ ሼኒያ ፖላናው ሳሉዋፔ ያዲፔ ኣቲን፥ ታ ሼኒያ ፖላናው ያቤይኬ። ታና ኪቴዳዌ ኮዪያዌ ሃዋ፤ ታኒ ኢ ታው ኢሜዳ ኡባቱዋካ ዉርሴꬃ ጋላሲ ዴንꬃናፔ ኣቲን፥ ኢቱዋካ ባዪዛና ማላ ኮዬና። ኣዪሲ ጎፔ፥ ታ ኣቡ ኮዪያዌ ሃዋ፤ ታና ናዓ ቤዒዴ፥ ኣማኒያ ኡባቱ ሜꬊና ዴዑዋ ኣካናዋንታ፤ ታኒካ ሄ ኡባቱዋ ዉርሴꬃ ጋላሲ ዴንꬃና» ያጌዳ። ዬሱሲ፥ «ታኒ ሳሉዋፔ ዎꬌዳ ኡኪꬃ» ጌዳ ዲራው፥ ኣዪሁዳቱ ኣ ቦላ ዙዙሜዲኖ። ኡንቱንቱ፥ «ሃዌ ኑኒ ኣ ኣዉዋኔ ኣ ኣቶ ኤሪያ ዮሴፎ ናዓ ዬሱሳ ጊዴኔ? ያቲና፥ ኢ ዋጊዴ፥ ‹ታኒ ሳሉዋፔ ዎꬋዲ› ጋናው ዳንዳዪ?» ያጌዲኖ። ዬሱሲ ዛሪዴ፥ «ኢቱ ኢቱዋና ዙዙሚያዋ ኣጊቴ። ታና ኪቴዳ ታ ኣቡ ታኮ ኣሄዳ ኣሳፔ ኣቲን፥ ታኮ ያናው ዳንዳዪያ ኣሳይ ባዋ፤ ታኒካ ዉርሴꬃ ጋላሲ ኣ ዴንꬃና። ናባቱ ‹ፆሳይ ኣሳ ኡባ ታማሪሳና› ያጊዴ ፃፌዲኖ፤ ኣዉ ጊያዋ ሲሲያዌኔ ኣዉዋፔ ታማሪያዌ ኦኒኔ ታኮ ዬ። ፆሳ ማታፔ ዬዳዋፔ ኣቲን፥ ፆሳ ቤዔዳ ኣሳይ ባዋ፤ ኣ ፃላላይ ፆሳ ቤዔዳ። «ታኒ ሂንቴንቱሲ ቱሙዋ ኦዳይ፤ ታና ኣማኒያ ኡራው ሜꬊና ዴዑ ዴዔ። ታኒ ዴዑዋ ኡኪꬃ። ሂንቴንቱ ኣዋቱ ሜላ ቢታን ማና ሜዲኖ፤ ሺን ሃይቄዲኖ። ኣሳይ ኣፔ ሚዴ ሃይቄና ኡኪꬃይ ሳሉዋፔ ዪያዌ ሃዋ። ሳሉዋፔ ዎꬌዳ ዴዑዋ ኡኪꬃይ ታና፤ ኦኒኔ ሃ ኡኪꬃፔ ሞፔ፥ ሜꬊናው ዴዓናዋ፤ ቃሲ ሃ ኣላሚያ ኣሳው ዴዖ ጊዳና ማላ፥ ታኒ ኢማና ኡኪꬃይ ታ ኣሹዋ» ያጌዳ። ኣዪሁዳቱ፥ «ሃ ቢታኒ ባሬ ኣሹዋ ኑኒ ማና ማላ፥ ኑሲ ዎቲዴ ኢማናው ዳንዳዪ?» ያጊዴ ባሬንቱ ጊዱዋን ፓሉሜቴዲኖ። ሄዋ ዲራው፥ ዬሱሲ ኡንቱንታ፥ «ታኒ ሂንቴንቱሲ ቱሙዋ ኦዳይ፤ ታ ኣሹዋ፥ ኣሳ ናዓ ኣሹዋ፥ ሂንቴንቱ ማና ꬋዮፔ፥ ቃሲ ታ ሱꬃካ ኡሻና ꬋዮፔ፥ ሂንቴው ዴዑ ባዋ። ታ ኣሹዋ ሚያ ኡራዉኔ፥ ታ ሱꬃ ኡሺያ ኡራው ሜꬊና ዴዑ ዴዔ። ታኒ ዉርሴꬃ ጋላሲ ኡንቱንታ ዴንꬃና። ኣዪሲ ጎፔ፥ ታ ኣሹ ቱሙ ቁማ፤ ታ ሱꬃይካ ቱሙ ኡሻ። ታ ኣሹዋ ሚያ ኡራይኔ ታ ሱꬃ ኡሺያ ኡራይ ታናን ዴዔ፤ ታኒካ ኣናኒ ዴዓይ። ዴዑዋ ኣዉ ታና ኪቲና፥ ታኒ ኣ ጋሱዋን ዴዒያዋዳን፥ ታና ሚያ ኡራይካ ታ ጋሱዋን ዴዓና። ሳሉዋፔ ዎꬌዳ ኡኪꬃይ ሃዋ፤ ሂንቴንቱ ኣዋቱ ሚዴ ሃይቄዳ ማና ማላ ጊዴና፤ ሃ ኡኪꬃ ሚያ ኡራይ ሜꬊናው ዴዓና» ያጌዳ። ዬሱሲ ቂፊሪናሆማ ካታማን ኣዪሁዳ ዎሳ ጎሌን ታማሪሲዴ፥ ሃዋ ኦዴዳ። ዬሱሳ ካሊያዋንቱፔ ዳሪያ ባጋይ ሄዋ ሲሴዳ ዎዴ፥ «ሃዌ ጌሌና ቲሚርቲያ፤ ሃዋ ኦኒ ኣካናዌ?» ያጌዲኖ። ሺን ዬሱሲ ባሬና ካሊያዋንቱ ሄዎ ዙዙሜዳዋ ኤሪዴ፥ «ሃዌ ሂንቴንታ ꬉቢ? ሲሚ ታኒ፥ ኣሳ ናዓይ፥ ካሴ ዴዒያሳ ፑዴ ኬሲሺን ቤዒንቶ ኣያ ጋኒቴ? ጌሻ ኣያናይ ዴዑዋ ኢሜ፤ ኣሳ ሚኖታይ ኣይኔ ጎዔና። ታኒ ሂንቴንቱሲ ኦዴዳ ቃላይ ኣያናኔ ዴዑዋ። ሺን ሂንቴንቱ ጊዱዋን ኣማኔናዋንቱ ዴዒኖ» ያጌዳ፤ ኣዪሲ ጎፔ፥ ኣማኔናዋንቱ ሃቃዋንቴንቶኔ ባሬና ኣꬂ ኢማናዌ ኦኔንቶ ዬሱሲ ኮይሮፔ ዶሚዴ ኤሬዳ። ቃሲካ ዬሱሲ፥ «ታ ኣቡፔ ጊዳና ꬋዮፔ ኦኒኔ ታኮ ያናው ዳንዳዬና ያጋዴ ታ ኦዴዳዌ ሄዋ ዲራሳ» ያጌዳ። ሄዋ ጋሱዋን፥ ዬሱሳ ካሊያዋንቱፔ ጮራቱ ኣ ኣጊዴ፥ ጉዬ ሲሜዲኖ፤ ላዔንꬆ ኣ ካሊቤይኪኖ። ዬሱሲ ቃሲ ታማኔ ላዑ ባሬና ካሊያዋንታ፥ «ሂንቴካ ኣጊዴ ባናው ኮዪቴ?» ያጌዳ። ሲሞኒ ጴፂሮሴ ዛሪዴ፥ «ጎዳው፥ ኑኒ ኦኮ ባኔ? ኔው ሜꬊና ዴዑዋ ቃላይ ዴዔ። ኔኒ ፆሳ ጌሻ ጊዲያዋ ኑኒ ኣማኔቶኔ ኤሬቶ» ያጌዳ። ዬሱሲ ኡንቱንታ፥ «ታኒ ሂንቴንታ ታማኔ ላዓቱዋ ዶራቤይኪታ? ቃሲ ሂንቴፔ ኢቱ ፃላሂያ» ያጌዳ። ዬሱሲ ሄዋ ሲሞና ናዓ ዪሁዳ ኣስቆሮታ ጌ፤ ኣዪሲ ጎፔ፥ ዪሁዳይ ዬሱሳ ካሊያ ታማኔ ላዓቱዋፔ ኢቱዋ፤ ኢ ዬሱሳ ኣꬂ ኢማናዋ። ሄዋፔ ጉዬ፥ ዬሱሲ ጋሊላን ያ ሃ ዩዬዳ፤ ኣዪሁዳቱ ኣ ዎꬋናው ኮዪያ ዲራው፥ ዪሁዳን ዩያና ኮዪቤና። ኣዪሁዳቱ ቦንቺያ ዳሲያ ባላይ ጋኪ ኡቴዳ። ሄዋ ዲራው፥ ዬሱሳ ኢሻቱ ኣ፥ «ኔና ካሊያዋንቱ ኔኒ ኦꬂያዋ ቤዓና ማላ፥ ሃዋፔ ዴንዳዴ ዪሁዳ ጋዲያ ባ። ኣዪሲ ጎፔ፥ ባሬው ኤሬታናው ኮዪያ ኣሳይ ኦኒኔ ባሬ ኦሱዋ ጌንꬄና። ኔኒ ሃዋንታ ኦꬂና፥ ኔባ ኣላሚያ ኡባይ ኤሮ!» ያጌዲኖ። ኣዪሲ ጎፔ፥ ሃራይ ኣቶ ኣ ኢሻቱካ ኣ ኣማኒቤይኪኖ። ዬሱሲ ኡንቱንታ፥ «ታው ኢንጄቲያ ዎዲ ጋኪቤና፤ ሺን ሂንቴንቱሲ ኣይ ዎዴካ ኢንጄቴ። ሳዓይ ሂንቴንታ ኢፃናው ዳንዳዬና፤ ሺን ታኒ ሳዓ ኪታይ ኢታ ጊዲያዋ ማርካቲያ ዲራው፥ ታና ኢፄዳ። ባላ ቦንቺያሳ ሂንቴንቱ ቢቴ፤ ታው ኢንጄቲያ ዎዲ ጋኪቤና ዲራው፥ ታኒ ባላ ቦንቺያሳ ባናዌ ቢራ» ያጌዳ። ኢ ሃዋ ጊዴ፥ ጋሊላን ኣቴዳ። ሺን ኣ ኢሻቱ ባላ ጋላሳ ቦንቺያሳ ቤዳዋፔ ጉዪያን፥ ኢካ ኣሳይ ቤዔናን ጌማን ያ ቤዳ። ኣዪሁዳቱ ባላ ጋላሳ ቦንቺያሳን ኣ ኮዪኖኔ፥ «ኢ ሃቃን ዴዒ?» ያጊዴ፥ ኣ ላቢኖ። ኣሳ ጊዱዋን ዳሮ ዙዙንꬃይ ዴንዴዳ። ኣማሬዳ ኣሳይ፥ «ኢ ሎዖ ኣሳ» ያጌ፤ ሃራቱ ቃሲ፥ «ኣ፥ ኢ ኣሳ ባሌꬄ» ያጊኖ። ሺን ኣዪሁዳቱ ያዬዳ ዲራው፥ ኦኒኔ ኣባ ቆንጪያን ሃሳዬና። ባላ ቦንቺያ ጋላሳ ባጋን፥ ዬሱሲ ጌሻ ጎሊያ ቢዴ፥ ታማሪሱዋ ዶሜዳ። ኣዪሁዳቱ ማላሌሌቲዴ፥ «ሃ ቢታኒ ኣይኔ ታማሬናን ሃዋ ኬና ዋኒ ኤሬዴ?» ያጌዲኖ። ሄዋ ዲራው፥ ዬሱሲ ዛሪዴ፥ «ታና ታማሪሲያዌ ታና ኪቴዳ ፆሳ ማታፔ ዪያዋፔ ኣቲን፥ ታዋ ጊዴና። ፆሳ ሼኒያ ኦꬃናው ዶሲያ ኦኒኔ ሃ ታኒ ታማሪሲያዌ ፆሳ ማታፔ ዪንቶ ዎይ ቃሲ ታኒ ታፔ ሃሳያዪታንቶ ኤራና። ባሬዋ ሃሳዪያ ኡራይ ባሬ ሁጲያሲ ቦንቹዋ ኮዬ፤ ሺን ባሬና ኪቴዳዌ ቦንቼታና ማላ ኮዪያ ኡራይ ቱማንቻ፤ ኣኒ ዎርዶባይ ባዋ። ሙሴ ሂንቴንቱሲ ሂጊያ ኢሚቤኔ? ሺን ሂንቴፔ ኢቱኔ ሂጊያ ናጌና። ታና ኣዪሲ ዎꬋናው ኮዪቴ?» ያጌዳ። ኣሳይ ዛሪዴ፥ «ኔናን ፃላሂ ዴዔ፤ ኔና ዎꬋናው ኦኔ ኮዬዳዌ?» ያጌዳ። ዬሱሲ፥ «ታኒ ኢቲ ዎልቃማባ ኦꬂና፥ ሂንቴንቱ ኡባይ ማላሌቴዲታ። ሂንቴንቱ ናና ሂንቴንቱ ዶካላና ማላ፥ ሙሴ ሂንቴንታ ኣዛዜዳ። ሺን ዶካሉሳይ ሂንቴንቱ ኣዋቱዋና ዬዳዋፔ ኣቲን፥ ሙሴና ዪቤና፤ ሄዋሲ ሂንቴንቱ ሳምባታን ኣቱማ ናና ዶካሊታ። ሙሴ ሂጊ ኣዛዜዳ ዲራው፥ ሂንቴንቱ ሳምባታን ዶካሊያዋ ጊዶፔ፥ ያቲና ታኒ ኢቲ ኣሳው ኩሜንꬃ ቦላ ፓꬄዳ ዲራው፥ ታና ኣዪሲ ሃንቄቲቴ? ቱሙ ፒርዳ ፒርዲቴፔ ኣቲን፥ ኣሳ ዴሙዋ ፄሊዴ ፒርዶፒቴ» ያጌዳ። ሄዋ ዲራው፥ ዬሩሳላሜ ኣሳፔ ኢቱ ኢቱ፥ «ኡንቱንቱ ዎꬋናው ኮዪያ ቢታኒ ሃዋ ጊዴኔ? ቤዒቴ፥ ቆንጪያን ኢ ሃሳዬ፤ ኡንቱንቱ ኣ ኣይኔ ጊኪኖ። ሃዌ ኪሪስቶሳ ጊዲያዋ ኑ ካፓቱ ቱሙ ኤሪኖሻ? ሺን ኑኒ ኣ ሃቃፔ ዬዴንቶ ኤሮይቴ፤ ኪሪስቶሲ ዪያ ዎዴ፥ ኢ ሃቃፔ ዪንቶኔ ኦኒኔ ኤሬና» ያጌዲኖ። ሄዋፔ ጉዪያን፥ ዬሱሲ ጌሻ ጎሊያን ታማሪሲዴ፥ ባሬ ቃላ ꬎቁ ኡዲዴ፥ «ሂንቴንቱ ታና ኤሪታ፤ ቃሲ ታኒ ሃቃፔ ዬዴንቶካ ኤሪታ። ታኒ ታ ሼኒያን ያቤይኬ፤ ሺን ታና ኪቴዳዌ ቱማንቻ፤ ሂንቴንቱ ኣ ኤሪኪታ። ሺን ታኒ ኣ ኤራይ፤ ኣዪሲ ጎፔ፥ ኢ ታና ኪቲና፥ ታኒ ኣ ማታፔ ያዲ» ያጌዳ። ሄዋ ዲራው፥ ኡንቱንቱ ኣ ኦይቃናው ኮዬዲኖ፤ ሺን ኣ ዎዲ ቢሮ ጋኪቤና ዲራው፥ ኦኒኔ ኣ ቦላ ኩሺያ ዎꬂቤና። ሺን ዳሮ ኣሳይ ዬሱሳ ኣማኒዴ፥ «ኪሪስቶሲ ዪያ ዎዴ፥ ሃ ቢታኒ ኦꬄዳ ማላታፔ ዳሪያዋ ኦꬃኔዬ?» ያጌዲኖ። ፓሪሳዋቱ ዳሮ ኣሳይ ዬሱሳባ ዙዙሚያዋ ሲሴዲኖ፤ ቄሳቱዋ ካፓቱኔ ፓሪሳዋቱ ኣ ኦይቂ ቃሺሳናው ኣማሬዳ ዎታዳራቱዋ ኪቴዲኖ። ዬሱሲ፥ «ታኒ ሂንቴናና ላፋ ጋሚዓና፤ ሄዋፔ ጉዪያን፥ ታና ኪቴዳዋኮ ባና። ሂንቴንቱ ታና ኮያና፤ ሺን ዴሚኪታ፤ ኣዪሲ ጎፔ፥ ታኒ ዴዒያ ሳዓ ሂንቴንቱ ባናው ዳንዳዪኪታ» ያጌዳ። ኣዪሁዳቱ ኢቱ ኢቱዋና፥ «ሃዌ ኑኒ ኣ ዴሜናሳ ሃቃ ባና ሃኒ? ኣዪሁዳቱ ዴዒያ ጊሪኬ ካታማ ቢዴ፥ ጊሪኬ ኣሳቱዋ ታማሪሳና ሃኒ? ኢ፥ ‹ሂንቴ ታና ኮያና፤ ሺን ዴሚኪታ› ቃሲ፥ ‹ታኒ ዴዒያሳ ሂንቴንቱ ባናው ዳንዳዪኪታ› ያጌ፤ ሄዋ ጊያዌ ዋጊያዌ?» ያጌዲኖ። ሄ ባላ ጋላሳ ቦንቺያ ጋላሳፔ ዋናቲያ ዉርሴꬃ ጋላሳኒ ዬሱሲ ዴንዲ ኤቂዴ፥ ባሬ ቃላ ꬎቁ ኡዲዴ፥ «ሳሜቴዳ ኡራይ ኦኒኔ ታኮ ዪዴ ኡሾ። ታናን ኣማኒያዎ፥ ፆሳ ማፃፋይ ጊያዋዳን፥ ኣ ኡሉዋፔ ዴዑዋ ኢሚያ ሃꬃ ፑልቱ ጎጋናዋ» ያጌዳ። ኢ ሄዋ ኣ ኣማኔዳዋንቱ ኣካና ጌሻ ኣያናባ ሃሳዬዳ። ዬሱሲ ቢሮ ባሬ ቦንቹዋኮ ኬሲቤና ዲራው፥ ሄ ዎዴ ጌሻ ኣያናይ ኡንቱንቶ ኢሜቲቤና። ሄ ኣሳፔ ዳሪያ ባጋይ ኢ ጊያዋ ሲሲዴ፥ «ቱሙ ሃዌ ናጌቲያ ናቢያ» ያጌዲኖ። ሃራንቱ፥ «ሃዌ ኪሪስቶሳ» ያጌዲኖ። ሺን ሃራንቱ ቃሲ፥ «ኪሪስቶሲ ጋሊላፔ ዬና። ፆሳ ማፃፋይ፥ ‹ኪሪስቶሲ ዳዊቴ ዛሪያፔ፥ ዳዊቴ ዴዔዳ ቤቴሊሄሜ ካታማፔ ያና› ጌኔዬ?» ያጌዲኖ። ዬሱሳ ጋሱዋን ኣሳይ ባሬ ጊዱዋን ሻኬቴዳ። ሄ ኣሳፔ ኢቱ ኢቱ ኣ ኦይቃናው ኮዬዲኖ፤ ሺን ኩሺያኒኔ ኣ ቦቺቤይኪኖ። ጌሻ ጎሊያ ናጊያዋንቱ ቄሳቱዋ ካፓቱዋኮኔ ፓሪሳዋቱዋኮ ሲሚ ዬዳ ዎዴ ኡንቱንቱ ናጊያዋንታ፥ «ኣዪሲ ኣ ኣሂቤይኪቴ?» ያጊዴ ኦቼዲኖ። ጌሻ ጎሊያ ናጊያዋንቱ ኡንቱንቱሲ፥ «ሃ ቢታኒ ሃሳዬዳዋዳን፥ ኡባካ ኦኒኔ ሃሳዪቤና!» ያጊዴ ዛሬዲኖ። ፓሪሳዋቱ ዛሪዴ፥ «ኢ ሂንቴናካ ባሌꬁዋ? ካፓቱዋፔ ዎይ ፓሪሳዋቱዋፔ ኣ ኣማኔዳ ኣሳይ ዴዒ? ሺን ሂጊያ ኤሬና ሃ ኣሳይ ሼቄቴዳዋ» ያጌዲኖ። ኡንቱንቱፔ ኢቱ ካሴና ዬሱሳኮ ቤዳ ኒቆዲሞሲ ኡንቱንታ፥ «ኢቲ ኡራይ ጊያባ ሲሴናን ዎይ ኢ ኣያ ኦꬄዴንቶ ኤሬናን ዴዒዴ፥ ካሴቲዴ ኣ ቦላ ፒርዲያዌ ኑ ሂጊያን ዴዒ?» ያጌዳ። ኡንቱንቱ ዛሪዴ ኣ፥ «ኔኒካ ቃሲ ጋሊላ ጋዲያ ኣሴ? ጋሊላ ጋዲያፔ ናቢ ቤቴናዋ ፆሳ ማፃፋቱዋ ቢዳዴ ኤራ» ያጌዲኖ። ኣሳይ ኡባይ ኣጊዴ፥ ባሬ ሶይ ባሬ ሶይ ቤዳ። ሺን ዬሱሲ ዎጋራ ሚꬃን ኤሬቴዳ ዴሪያኮ ቤዳ። ዎንቴꬃ ጋላሲ ጉራን ጌሻ ጎሊያ ሲሜዳ፤ ኡባ ኣሳይ ኣኮ ዪና፥ ኡቲዴ ኡንቱንታ ታማሪሱዋ ዶሜዳ። ሙሴ ሂጊያ ታማሪሲያዋንቱኔ ፓሪሳዋቱ ዎሹሚሺን ኦይቄቴዳ ኢቲ ሚሺራቶ ኣኮ ኣሄዲኖ። ኡንቱንቱ ኣሳ ኡባ ሲንꬃን ኢዞ ኤሲዴ ዬሱሳ፥ «ታማሪሲያዎ፥ ሃ ሚሺራታ ዎሹማዴ ኦይቄታዱ። ሂጊያ ቦላን ሙሴ ሃኒ ማላ ማጫ ኣሳ ሹቻን ጫዳና ማላ፥ ኑና ኣዛዜዳ። ያቲና ኔኒ ዋጋይ?» ያጌዲኖ። ኡንቱንቱ ሄዋ ጌዳዌ ዬሱሳ ሞቲያዋ ዴሚዴ ኣ ፓጫናሳ፤ ሺን ዬሱሲ ሆኪዴ፥ ባሬ ቢራꬊያን ቢታ ቦላ ፃፌዳ። ኡንቱንቱ ኣ ኦቺዴ ኣጌናን ኢፂና፥ ፑዴ ꬎቁ ጊዴ፥ «ሂንቴንቱ ጊዱዋን ናጋራ ኦꬂቤና ኣሳይ ካሴቲዴ፥ ኢዞ ሹቻን ጫዶ» ያጌዳ። ቃሲካ ሆኪዴ፥ ቢታ ቦላ ፃፌዳ። ኡንቱንቱ ሄዋ ሲሴዳ ዎዴ፥ ካሴቲዴ ጪማቱ ኬሲና፥ ኢቱ ኢቱ ኬሲዴ ዉሬዲኖ፤ ኣ ሲንꬃን ሚሺራታ ኤቃ ዴዒሺን፥ ዬሱሲ ባሬ ፃላላ ኣቴዳ። ኢ ፑዴ ꬎቁ ጊዴ ሚሺራቶ፥ «ሚሺራቴ፥ ኣሳቱ ሃቃን ዴዒኖ? ኦኒኔ ኔ ቦላ ፒርዲቤኔ?» ያጌዳ። ሚሺራታ፥ «ጎዳው፥ ኦኒኔ ታ ቦላ ፒርዲቤና» ያጋዱ። ዬሱሲ ኢዞ፥ «ታኒካ ኔ ቦላ ፒርዲኬ፤ ባ፤ ላዔንꬃዴ ናጋራ ኦꬆፓ» ያጌዳ። ቃሲካ ዬሱሲ ኣሳው፥ «ታኒ ኣላሜው ፖዑዋ፤ ታና ካሊያ ኦኒኔ ዴዑዋ ኢሚያ ፖዑዋ ዴማናፔ ኣቲን፥ ꬉማኒ ኡባካ ሃሜቴና» ያጊዴ ሃሳዬዳ። ሄዋፔ ጉዬ ፓሪሳዋቱ፥ «ኔኒ ኔባ ማርካታሳ፤ ኔ ማርካቴꬃይ ቱማ ጊዴና» ያጌዲኖ። ዬሱሲ ዛሪዴ፥ «ታኒ ታባ ማርካቶፔካ፥ ታ ማርካቴꬃይ ቱማ፤ ኣዪሲ ጎፔ፥ ታኒ ሃቃፔ ያዲታንቶኔ ቃሲ ሃቃ ባይታንቶ ኤራይ፤ ሺን ሂንቴንቱ ኤሪኪታ። ኣሳይ ፒርዲያ ኦጊያን ሂንቴንቱ ፒርዲታ፤ ታኒ ኢቲ ኡራ ቦላካ ፒርዲኬ። ሺን ታኒ ፒርዲያዋ ጊዶፔኔ፥ ታ ፒርዳይ ቱማ፤ ኣዪሲ ጎፔ፥ ታና ኪቴዳ ታ ኣቡ ታናና ዴዔፔ ኣቲን፥ ታኒ ታሬካ ዴዒኬ። ላዑ ኣሳ ማርካቴꬃይ ቱማ ጊዲያዌ ሂንቴንቱ ሂጊያን ፃፌቲ ኡቴዳ። ታኒ ታባ ታ ሁጴው ማርካታዲ፤ ቃሲ ታና ኪቴዳ ታ ኣቡካ ታባ ማርካቴ» ያጌዳ። ኡንቱንቱ፥ «ኔ ኣቡ ሃቃን ዴዒ?» ያጊዴ ዬሱሳ ኦቼዲኖ። ዬሱሲ ዛሪዴ፥ «ሂንቴንቱ ታናካ ዎይ ታ ኣባካ ኤሪኪታ፤ ታና ኤሬዳዋ ጊዲንቶ፥ ታ ኣባካ ኤራኒታ» ያጌዳ። ዬሱሲ ጌሻ ጎሊያ ታማሪሲዴ፥ ኢሞታ ሚሻይ ኡቲያ ሳፂኒያ ማታን ሄዋ ሃሳዬዳ። ኣ ኦኒኔ ኦይቂቤና፤ ኣዪሲ ጎፔ፥ ኣ ዎዲ ቢሮ ጋኪዲጊቤና። ቃሲካ ዬሱሲ ኡንቱንታ፥ «ታኒ ባና ሂንቴንቱ ታና ኮያና፤ ሺን ሂንቴንቱ፥ ሂንቴንቱ ናጋራን ሃይቃኒታ። ታኒ ቢያ ሳዓካ ባናው ሂንቴንቱ ዳንዳዪኪታ» ያጌዳ። ኣዪሁዳቱ፥ «ኢ፥ ‹ታኒ ቢያሳ ሂንቴንቱ ባናው ዳንዳይኪታ› ያጌ፤ ኢ ባሬና ባሬካ ዎꬋኔዬ?» ያጌዲኖ። ዬሱሲ ዛሪዴ፥ «ሂንቴንቱ ጋርሳ ኣሳ፤ ታኒ ቦላ ኣሳ። ሂንቴንቱ ሃ ኣላሚያ ኣሳ፤ ታኒ ሃ ኣላሚያ ኣሳ ጊዲኬ። ሂንቴንቱ፥ ሂንቴንቱ ናጋራን ሃዪቃናዋ ታኒ ሂንቴንቱሲ ኦዴዳዌ ሃዋሳ፤ ታኒ ታና ጊዲያዋ ሂንቴንቱ ኣማናና ꬋዮፔ፥ ሂንቴንቱ፥ ሂንቴንቱ ናጋራን ሃያኒታ» ያጌዳ። ኡንቱንቱ፥ «ኔኒ ኦኔ?» ያጊዴ ኦቼዲኖ። ዬሱሲ ዛሪዴ፥ «ታኒ ታና። ታኒ ሂንቴባ ሃሳዪያባይኔ ፒርዲያባይ ዳሮባይ ዴዔ። ሺን ታና ኪቴዳዌ ቱማንቻ፤ ቃሲ ታኒ ኣፔ ሲሴዳዋ ኣላሚያ ኣሳው ኦዳይ» ያጌዳ። ኢ ባሬ ኣዉዋባ ሃሳዪያዋ ኡንቱንቱ ኣኬኪቤይኪኖ። ሄዋ ዲራው፥ ዬሱሲ ኡንቱንታ፥ «ታና ኣሳ ናዓ ሂንቴንቱ ማስቃሊያ ቦላ ፑዴ ዴንꬂያ ዎዴ፥ ታኒ ታና ጊዲያዋኔ ቃሲ ታኒ ታ ኣቡ ታና ታማሪሴዳዋዳን ሃሳዪያዋፔ ኣቲን፥ ታ ሼኒያን ኣይኔ ኦꬄናዋ ሂንቴንቱ ኤራኒታ። ቃሲ ታና ኪቴዳዌ ታናና ዴዔ፤ ታኒ ኡባ ዎዴ ኣ ናሼቺያዋ ኦꬂያ ዲራው፥ ኢ ታ ፃላላ ኣጊቤና» ያጌዳ። ዬሱሲ ሄዋ ሃሳዪሺን ሲሴዳ ዳሮ ኣሳይ ኣ ኣማኔዲኖ። ዬሱሲ ባሬና ኣማኔዳ ኣዪሁዳቱዋ፥ «ሂንቴንቱ ታኒ ታማሪሲያዎ ኣዛዜቶፔ፥ ቱሙ ታና ካሊያዋንታ። ሂንቴንቱ ቱማቴꬃካ ኤራኒታ፤ ቃሲ ቱማቴꬃይ ሂንቴንታ ኣይሌቴꬃፔ ኬሳናዋ» ያጌዳ። ኡንቱንቱ ዛሪዴ፥ «ኑኒ ኣብራሃሞ ዛሬ፤ ኑኒ ኦሲኔካ ኣይሌቲቤይኮ። ያቲና ኔኒ ዋጋዴ፥ ‹ኣይሌቴꬃፔ ሂንቴንቱ ኬሳኒታ› ጋይ?» ያጌዲኖ። ዬሱሲ፥ «ታኒ ሂንቴንቱሲ ቱሙዋ ኦዳይ፤ ናጋራ ኦꬂያ ኦኒኔ ናጋራ ኣይሊያ። ኣይሊ ኡባ ዎዴ ሶዪን ዴዔና፤ ሺን ናዓይ ሜꬊናው ጎሌን ዴዔ። ናዓይ ሂንቴንታ ኣይሌቴꬃፔ ኬሶፔ፥ ሂንቴንቱ ኣይሌቴꬃፔ ቱሙ ኬሳኒታ። ሂንቴንቱ ኣብራሃሞ ዛሬ ጊዲያዋ ታኒ ኤራይ፤ ሺን ታ ታማሪሲያዋ ሂንቴንቱ ኣኬና ዲራው፥ ታና ዎꬋናው ኮዪታ። ታኒ ታ ኣቡ ታና ቤሴዳዋ ሃሳያይ፤ ቃሲ ሂንቴንቱካ ሂንቴንቱ ኣዉዋፔ ሲሴዳዋ ኦꬂታ» ያጌዳ። ኡንቱንቱ ዛሪዴ፥ «ኑ ኣቡ ኣብራሃማ» ያጌዲኖ። ዬሱሲ ኡንቱንታ፥ «ሂንቴንቱ ኣብራሃሞ ናና ጊዴዴንቶ፥ ኢ ኦꬄዳ ኦሱዋ ማላ ኦꬃኒታ። ሺን ፆሳፔ ሲሴዳ ቱሙዋ ኦዴዳ ታና ሂንቴንቱ ዎꬋናው ኮዪታ፤ ኣብራሃሜ ሄዋዳን ኦꬂቤና። ሂንቴንቱ፥ ሂንቴንቱ ኣዉ ኦꬄዳዋ ኦꬂታ» ያጌዳ። ኡንቱንቱ ዛሪዴ፥ «ኑኒ ዎሹማን ዲቃላቴꬃ ዬሌቲቤይኮ፤ ኑሲ ኢቲ ኣዉ፥ ፆሳ ፃላላይ ዴዔ» ያጌዲኖ። ዬሱሲ ኡንቱንታ፥ «ሂንቴንቱ ፆሳ ናና ቱሙ ጊዴዴንቶ፥ ታና ሲቃና፤ ኣዪሲ ጎፔ፥ ታኒ ፆሳ ማታፔ ያዴ ሃዋን ዴዓይ። ታና ኢ ኪቴዳዋፔ ኣቲን፥ ታኒ ታ ሼኒያን ያቤይኬ። ታኒ ታማሪሲያዋ ሂንቴንቱ ኣኬኬናዌ ኣያሴ? ታኒ ታማሪሲያዋ ሂንቴንቱ ኣኬና ዲራሳ። ሂንቴንቱ፥ ሂንቴንቱ ኣዉዋ ኢታ ኣያና ናና፤ ቃሲ ሂንቴንቱ፥ ሂንቴንቱ ኣዉ ኣሞቲያዋ ኦꬃናው ኮዪታ። ኢ ካሴፔ ዶሚዴ፥ ሼምፑዋ ዎꬌዳዋ፤ ቱማቴꬃይ ኣኒ ባይና ዲራው፥ ቱማቴꬃኮ ሺቂ ኤሬና። ኢ ዎርዱዋ ሃሳዪያ ዎዴ፥ ባሬፔ ሃሳዬ፤ ኣዪሲ ጎፔ፥ ኢ ዎርዳንቻኔ ቃሲ ዎርዶካ ኣዉዋ። ሺን ታኒ ቱሙዋ ሃሳዪያ ዲራው፥ ሂንቴንቱ ታና ኣማኒኪታ። ሂንቴፔ ታና ናጋራ ኦꬂሺን ቤዓዲ ጋናው ዳንዳዪያዌ ኦኔ? ታኒ ቱሙዋ ሃሳዪያዋ ጊዶፔ፥ ታና ኣዪሲ ኣማኒኪቴ? ፆሳ ኣሳ ጊዴዳ ኡራይ ፆሳይ ጊያዋ ሲሴ፤ ሂንቴንቱ ፆሳ ኣሳ ጊዴና ዲራው፥ ፆሳይ ጊያዋ ሲሲኪታ» ያጌዳ። ኣዪሁዳቱ ዛሪዴ፥ «ኑኒ ኔና፥ ‹ኔኒ ሳማሪያ ኣሳ፤ ኔናን ኢታ ኣያናይ ዴዔ› ጊዴ ባዪዜዶ?» ያጌዲኖ። ዬሱሲ ኡንቱንታ፥ «ታ ቦላ ኢታ ኣያናይ ባዋ። ታኒ ታ ኣባ ቦንቻይ፤ ሺን ሂንቴንቱ ታና ካዉሺታ። ታኒ ታ ሁጲያሲ ቦንቹዋ ኮዪኬ፤ ሄዋ ታው ኮዪያዌኔ ፒርዲያዌ ዴዔ። ታኒ ሂንቴንቱሲ ቱሙዋ ኦዳይ፤ ታኒ ታማሪሲያዋ ናጊያ ኦኒኔ ኡባካ ሃይቄና» ያጌዳ። ኣዪሁዳቱ ዛሪዴ፥ «ኔ ቦላ ኢታ ኣያናይ ዴዒያዋ ኑኒ ሃዒ ኤሬዶ። ኣብራሃሜ ሃይቄዳ፤ ናባቱ ሃይቄዲኖ፤ ሺን ኔኒ፥ ‹ታ ቃላ ናጊያ ኦኒኔ ኡባካ ሃይቄና› ያጋ። ኔኒ ሃይቄዳ ኑ ኣዉዋ ኣብራሃሞፔ ዳራይ? ናባቱ ቃሲ ሃይቄዲኖ። ኔኒ ኔና ኦና ጋዴ ቆፓይ?» ያጌዲኖ። ዬሱሲ፥ «ታኒ ታና ቦንቾፔ፥ ታ ቦንቹ ሜላ፤ ሂንቴንቱ ኑ ፆሳ ጊያ ታ ኣቡ ታና ቦንቼ። ሂንቴንቱ ኣ ኤራና ꬋዮፔካ፥ ታኒ ኣ ኤራይ። ታኒ ኣ ኤሪኬ ጎፔ፥ ሂንቴንቱዋዳን ዎርዶ ጊዳይ፤ ሺን ታኒ ኣ ኤራይ፤ ቃሲ ኣ ቃላካ ናጋይ። ሂንቴንቱ ኣዉ ኣብራሃሜ፥ ታ ዩሳ ዎዲያ ቤዓናው ላሞቴዳ፤ ቤዒዴካ ናሼቴዳ» ያጌዳ። ኣዪሁዳቱ ዛሪዴ ኣ፥ «ኔው ሃራይ ኣቶ ኢሻታሙ ላይꬃ ኩሚቤናዌ ኣብራሃማ ቤዓዲ?» ያጌዲኖ። ዬሱሲ ኡንቱንታ፥ «ታኒ ሂንቴንቱሲ ቱሙዋ ኦዳይ፤ ኣብራሃሞ ዬሌታናፔካ ካሴ ታኒ ታና» ያጌዳ። ሄዋ ዲራው፥ ኡንቱንቱ ዬሱሳ ጫዳናው ሹቻ ኣኬዲኖ፤ ሺን ዬሱሲ ኡንቱንቱፔ ጌሜቲዴ፥ ጌሻ ጎሊያፔ ቤዳ። ዬሱሲ ቢዴ፥ ዬሌቶዴፔ ቆቃ ጊዲዴ ዴዒያ ኢቲ ቢታኒያ ቤዔዳ። ዬሱሳ ካሊያዋንቱ ዬሱሳ፥ «ታማሪሲያዎ፥ ሃ ቢታኒ ቆቃ ጊዲዴ ዬሌታናዳን፥ ናጋራ ኦꬄዳዌ ኦኔ? ኢ ኦꬄዴዬ? ዎይ ኣ ዬሌዳዋንቱ ኦꬄዲኖ?» ያጊዴ ኦቼዲኖ። ዬሱሲ፥ «ፆሳ ኪታይ ኣ ቦላን ቆንጫና ማላ ቆቄዳፔ ኣቲን፥ ኢ ዎይ ኣ ዳያኔ ኣ ኣቡ ናጋራ ኦꬂቤይኪኖ። ኑኒ ሳዓይ ቃሜናን ዴዒሺን፥ ታና ኪቴዳዋ ኦሱዋ ኦꬃናው ቤሴ። ኦኒኔ ኦꬃናው ዳንዳዬና ቃማይ ዬ። ታኒ ኣላሚያን ዴዓዴ ኣላሜው ፖዖ» ያጌዳ። ዬሱሲ ሄዋ ጊዴ፥ ሳዓን ጩቼዳ፤ ባሬ ጩቻኒ ጉꬃ ኡርቃ ሹጊሲዴ፥ ሄ ኡርቃኒ ቆቃ ቢታኒያ ኣይፊያ ኦኪዴ፥ «ባዴ ሳሊሆማ ጊያ ዳጋቴዳ ሃꬃን ኔ ኣይፊያ ሜጫ» ያጌዳ። «ሳሊሆማ» ጊያዌ «ኪቴቴዳዋ» ጉሳ። ሄዋ ዲራው፥ ቢታኒ ቢዴ፥ ባሬ ኣይፊያ ሜጬቲዴ፥ ፄሊዴ ሲሜዳ። ቢታኒያ ሾራቱኔ ቢታኒ ካሴ ዎሲሺን ቤዔዳ ኣሳይ፥ «ሃዌ ኡቲዴ ዎሲያ ቢታኒያ ጊዴኔዬ?» ያጌዲኖ። ቃሲ ኣማሬዳዋንቱ፥ «ሃዌ ኣቴኔ» ያጌዲኖ። ሃራንቱ ቃሲ፥ «ቱይቲ፥ ሃዌ ኣ ማላቲያዋፔ ኣቲን፥ ኣ ጊዴና» ያጌዲኖ። ሺን ቢታኒ፥ «ታኒ ኣቴ» ያጌዳ። ኡንቱንቱ ቢታኒያ፥ «ያቲና፥ ኔ ኣይፊ ዋኒ ፄሌዴ?» ያጊዴ ኦቼዲኖ። ኢ ዛሪዴ፥ «ዬሱሳ ጌቴቲያ ቢታኒ ጉꬃ ኡርቃ ሹጊሲዴ፥ ታ ኣይፊያ ኦኪዴ፥ ‹ሳሊሆማ ጌቴቲያ ዳጋቴዳ ሃꬃኒ ባዴ ኔ ኣይፊያ ሜጬታ› ያጌዳ። ታኒ ባዴ ሜጬታዴ ፄላዲ» ያጌዳ። ኡንቱንቱ ኣ፥ «ኢ ሃቃን ዴዒ?» ያጊዴ ኦቼዲኖ። ቢታኒ፥ «ታኒ ኤሪኬ» ያጌዳ። ኡንቱንቱ ካሴ ቆቂዴ ፄሌዳ ቢታኒያ ፓሪሳዋቱዋኮ ኣፌዲኖ። ዬሱሲ ኡርቃ ሹጊሲዴ፥ ቢታኒያ ኣይፊያ ፓꬄዳ ጋላሳይ ሳምባታ ጋላሳ። ሄዋ ዲራው፥ ቢታኒ ዋኒ ፄሌዴንቶኔ ፓሪሳዋቱ ኣ ጉጂዴ ኦቼዲኖ። ቢታኒ ኡንቱንቱሲ፥ «ኢ ታ ኣይፊያን ጉꬃ ኡርቃ ዎꬄዳ። ታ ኣይፊያ ሜጬታዴ ሃዒ ፄላዲ» ያጌዳ። ፓሪሳዋቱዋፔ ኢቱ ኢቱ፥ «ሃዋ ኦꬄዳ ቢታኒ ሳምባታ ሂጊያ ናጌና ዲራው፥ ፆሳ ማታፔ ዪቤና» ያጌዲኖ። ሺን ሃራንቱ፥ «ናጋራንቻ ኣሳይ ሃዋ ማላ ዎልቃማ ማላታ ዋኒ ኦꬃናው ዳንዳዪ?» ያጊዴ ኡንቱንቱ ባሬንቱ ጊዱዋን ሻኬቴዲኖ። ሄዋ ዲራው፥ ፓሪሳዋቱ ቢታኒያ ኢቲ ካላ ጉጂዴ፥ «ኢ ኔ ኣይፊያ ዶዬዳ ዲራው፥ ኣባ ዋጋይ?» ያጌዲኖ። ቢታኒ፥ «ኢ ናቢያ» ያጌዳ። ኣዪሁዳቱ ሄ ፄሌዳ ቢታኒያ ኣቶኔ ኣዉዋ ፄሲዴ ኦቻና ጋካናው፥ ቢታኒ ቆቃ ጊዴዳዋኔ ሃዒ ኢ ፄሊያዋ ኣማኒቤይኪኖ። ኣዪሁዳቱ ኣ ኣቶኔ ኣዉዋ፥ «ሂንቴንቱ፥ ‹ቆቃ ጊዲዴ ዬሌቴዳ› ጊያ ሂንቴንቱ ናዓይ ሃዌ? ያቲና፥ ሃዒ ዋኒዴ ፄሌዴ?» ያጊዴ ኦቼዲኖ። ቢታኒያ ዳያኔ ኣዉ፥ «ሃዌ ኑ ናዓ ጊዴዳዋኔ ቆቃ ጊዲዴ ዬሌቴዳዋ ኑኒ ኤሬቶ። ሺን ሃዒ ኢ ዋኒ ፄሌዴንቶ፥ ኑኒ ኤሮኮ፤ ዎይ ኣ ኣይፊያ ኦኒ ፓꬄዴንቶ፥ ኑኒ ኤሮኮ። ኣ ኦቺቴ፤ ኢ ዶንዛ ኣሳ፤ ባሬባ ሃሳያናው ዳንዳዬ!» ያጌዲኖ። ቢታኒያ ዳያኔ ኣዉ ኣዪሁዳቶ ያዬዳ ዲራው፥ ሄዋ ጌዲኖ፤ ኣዪሲ ጎፔ፥ ኣዪሁዳቱ ዬሱሲ ኪሪስቶሳ ያጊዴ ማርካቲያ ኡራይ ዴዖፔ፥ ሄ ኡራ ኣዪሁዳ ዎሳ ጎሊያፔ ኬሳናው ካሴት ቆፋ ቃቺ ዎꬄዲኖ። ኣ ዳያኔ ኣዉ፥ «ኢ ዶንዛ ኣሳ፤ ኣ ኦቺቴ!» ጌዳዌ ሃዋሳ። ሄዋ ዲራው፥ ቆቃ ጊዲዴ ዬሌቴዳ ቢታኒያ ኡንቱንቱ ላዔንꬁዋ ፄሲዴ፥ «ፆሳ ጋላታ፤ ሃ ቢታኒ ናጋራንቻ ጊዲያዋ ኑኒ ኤሬቶ» ያጌዲኖ። ቢታኒ፥ «ኢ ናጋራንቻ ጊዲያዋኔ፥ ጊዴናዋ ኤሪኬ፤ ታኒ ቆቃ ጊዲያዋኔ ሃዒ ፄሊያዋ ሄ ኢቲባ ኤራይ» ያጌዳ። ኡንቱንቱ ዛሪዴ ቢታኒያ፥ «ኢ ኔው ኣያ ኦꬄዴ? ኢ ኔ ኣይፊያ ዎቲ ፓꬄዴ?» ያጌዲኖ። ኢ ኡንቱንታ፥ «ታኒ ሂንቴንቱሲ ኦዳዲ፤ ሲሲቤይኪታ። ኣዪሲ ላዔንꬁዋ ሲሳናው ኮዪቴ? ሂንቴካ ዬሱሳ ካሊያዋንታ ጊዳናው ኮዪቴ?» ያጌዳ። ኡንቱንቱ ኣ ቦሪዴ፥ «ኔኒ ሄ ቢታኒያ ካሊያዋ፤ ኑኒ ሙሳ ካሊያዋንታ። ፆሳይ ሙሴሲ ሃሳዬዳዋ ኑኒ ኤሬቶ፤ ሺን ሃ ቢታኒያ ጊዶፔ፥ ኢ ሃቃፔ ዬዴንቶኔ ኑኒ ኤሮኮ» ያጌዲኖ። ቢታኒ፥ «ኢ ሃቃፔ ዬዴንቶኔ ሂንቴንቱ ኤሬናዌ ማላሊሲያዋ፤ ሺን ኢ ታ ኣይፊያ ፓꬄዳ! ፆሳው ያዪያ ኡራይኔ ፆሳይ ኮዪያዋ ኦꬂያ ኡራይ ዴዖፔ፥ ሄ ኡራባ ፆሳይ ሲሲያዋፔ ኣቲን፥ ናጋራንቻቱዋባ ሲሴና። ቆቃ ጊዲዴ ዬሌቴዳ ኣሳ ኣይፊያ ኦኒኔ ፓꬂና፥ ሳዓይ ሜꬌቶዴፔ ዶሚና፥ ሲሴቲ ኤሬና። ሃ ቢታኒ ፆሳፔ ዪቤናዋ ጊዲንቶ፥ ኢቲባኔ ኦꬃናዉካ ዳንዳዬና» ያጌዳ። ኡንቱንቱ ዛሪዴ ኣው፥ «ኔኒ ናጋራን ዬሌታዴ ዲጬዳዌ ኑና ታማሪሳናው ኮያይ?» ያጌዲኖ፤ ኣዪሁዳ ዎሳ ጎሊያፔ ካሬ ኣ ኬሴዲኖ። ኡንቱንቱ ቢታኒያ ካሬ ኬሴዳዋ ዬሱሲ ሲሴዳ፤ ዬሱሲ ቢታኒያ ዴሚዴ፥ «ኣሳ ናዓ ኣማናይ?» ያጌዳ። ቢታኒ ዬሱሳ፥ «ጎዳው፥ ታኒ ኣ ኣማናናዳን ኢ ኦኔ? ታው ኦዳሪኪ!» ያጌዳ። ዬሱሲ ቢታኒያ፥ «ኔኒ ኣ ቤዓዳ፤ ሃ ኔናና ሃሳዪያዌካ ኣ» ያጌዳ። ቢታኒ ዛሪዴ፥ «ጎዳው፥ ኣማናይ» ያጊዴ ዬሱሳው ጎዪኔዳ። ዬሱሲ፥ «ቆቃቱ ፄላና ማላኔ ፄሊያዋንቱ ቆቃና ማላ፥ ታኒ ፒርዳናው ሃ ሳዓ ያዲ» ያጌዳ። ኣናና ዴዒያ ኣማሬዳ ፓሪሳዋቱ ሄዋ ሲሲዴ፥ «ኑኒካ ቆቄዬ?» ያጊዴ ኦቼዲኖ። ዬሱሲ፥ «ሂንቴንቱ ቆቃ ጊዴዴንቶ፥ ሂንቴንቱሲ ናጋራ ጊዴና፤ ሺን ሃዒ ሂንቴንቱ፥ ‹ኑኒ ፄሌቶ› ያጊታ፤ ሂንቴንቱ ናጋራና ዴዒታ» ያጌዳ። ዬሱሲ፥ «ታኒ ሂንቴንቱሲ ቱሙዋ ኦዳይ፤ ዶርሳ ሲኩዋ ፔንጊያና ጌሌናን ሃራሳና ጌሊያ ኦኒኔ ካይሱዋኔ ፓኑዋ። ሺን ፔንጊያና ጌሊያዌ ዶርሳ ሄሚያ ኣሳ። ፔንጊያ ናጊያዌ ኣው ፔንጊያ ዶዬ፤ ዶርሳቱካ ኣ ኮሻ ሲሳና፤ ኢ ባሬ ዶርሳቱዋ ኡንቱንቱ ሱንꬃን ሱንꬃን ፄሲዴ፥ ካሬ ካሌꬃና። ኢ ባሬዋንታ ካሬ ኬሴዳዋፔ ጉዪያን፥ ኡንቱንቱፔ ሲንꬃና ሃሜቴ፤ ኡንቱንቱካ ኣ ኮሻ ኤሪያ ዲራው፥ ኣ ካሊኖ። ሃራ ኡራ ኮሻ ኡንቱንቱ ኤሬና ዲራው፥ ኣፔ ባቃታናፔ ኣቲን፥ ኣ ጌዱዋ ካሊኪኖ» ያጌዳ። ዬሱሲ ኡንቱንቱሲ ሃ ሌሚሱዋ ኦዴዳ፤ ሺን ኢ ኡንቱንቱሲ ኣይ ኦዲንቶኔካ ኡንቱንቱ ኣኬኪቤይኪኖ። ዬሱሲ ቃሲካ ኡንቱንቱሲ፥ «ታኒ ሂንቴንቱሲ ቱሙዋ ኦዳይ፤ ታኒ ዶርሳቶ ጌሊያ ፔንጊያ። ታፔ ካሴ ዬዳ ኡባይ ካዪሱዋኔ ፓኑዋ፤ ሺን ዶርሳቱ ኡንቱንቱ ጊያዋ ሲሲቤዪኪኖ። ፔንጊ ታና፤ ታናን ጌሊያ ኦኒኔ ኣታናዋ። ኢ ጌላናኔ ኬሳና፤ ቃሲ ሎዖ ማታይ ዴዒያ ሳዓካ ዴማናዋ። ካዪሱ ዉዓናው፥ ዎꬋናዉኔ ꬋዪሳናው ዪያዋፔ ኣቲን፥ ሃራባው ዬና፤ ታኒ ኡንቱንቱሲ ዴዑ ዴዓና ማላኔ ኩሚዴ ፓላሃና ማላ ያዲ። «ታኒ ዶርሳ ሎይꬃ ሄሚያዋ፤ ዶርሳ ሎይꬂ ሄሚያዌ ሄ ዶርሳቱዋ ዲራው ሃይቄ። ሚሻ ኣኪዴ ሄሚያ ኡራይ ዋሊያ ዪያዎዴ ቤዒዴ፥ ዶርሳቱዋ ዬጊ ባሺዴ ባቃቴ። ኣዪሲ ጎፔ፥ ዶርሳቱ ኣዋንታ ጊዲኪኖ፤ ቃሲ ኢካ ዶርሳቱዋ ሄሚያዋ ጊዴና። ሄዋ ዲራው፥ ዶርሳቱዋ ኦይቄኔ ላሌ። ሻሉዋ ኣኪዴ ሄሚያዌ ባሬ ሻሎ ሄሚያ ዲራዉኔ ዶርሳባይ ኣ ቆፌꬄና ዲራው፥ ዶርሳቱዋ ኣጊዴ ባቃቴ። «ታኒ ዶርሳ ሎይꬃ ሄሚያዋ፤ ታ ኣቡ ታና ኤሪያዋዳን፥ ታኒካ ቃሲ ታ ኣባ ኤራይ። ሄዋዳንካ፥ ታኒ ታ ዶርሳቱዋ ኤራይ፤ ታ ዶርሳቱካ ታና ኤሪኖ። ቃሲ ታኒ ታ ዶርሳቱዋ ዲራው፥ ሃይቃናው ኮያዲ። *** ሃ ሲኩዋን ባይና ሃራ ዶርሳቱካ ታው ዴዒኖ። ታኒ ኡንቱንታካ ኣሃናው ቤሴ። ቃሲ ኡንቱንቱ ታ ኮሻ ሲሳና፤ ኢቲ ዉዲ ዴዓና፤ ሄሚያዌካ ኢቱዋ ጊዳናዋ። «ታኒ ታ ሼምፑዋ ዛራዴ ኣካና ማላ፥ ኣꬃዴ ኢማናው ኮዪያ ዲራው፥ ታ ኣቡ ታና ሲቄ። ታኒ ዶሳዴ ታ ሼምፑዋ ኣꬃ ኢሚያዋፔ ኣቲን፥ ታፔ ኦኒኔ ኣኬና። ታው ታ ሼምፑዋ ኣꬃ ኢሚያ ማታይ ዴዔ፤ ቃሲ ዛራዴ ኣካናዉካ ማታይ ዴዔ። ታኒ ሃ ኣዛዙዋ ታ ኣዉዋፔ ኣካዲ» ያጌዳ። ሄ ሃሳያ ዲራው፥ ኣዪሁዳቱዋ ጊዱዋን ቃሲካ ሻኩ ሜꬌቴዳ። ኡንቱንቱፔ ዳሪያ ባጋይ፥ «ኣኒ ፃላሂ ዴዔ! ኢ ጎዬ! ኣ ሃሳያ ኣዪሲ ሲሲቴ?» ያጌዲኖ። ሃራቱ ቃሲ፥ «ፃላሂ ኦይቄዳ ኣሳይ ሃዋዳን ሃሳዬና፤ ፃላሂ ቆቃ ኣሳ ኣይፊያ ፄሊሳናው ዳንዳዪዬ?» ያጌዲኖ። ዬሩሳላሜን ጌሻ ጎሊያ ኣንጂሴዳ ጋላሳ ሃሳዪሲያ ባላይ ጋኬዳ፤ ሳዓይ ሄ ዎዴ ባልጉዋ። ዬሱሲ ጌሻ ጎሊያን ሶሎሞና ባራንዳን፥ ያኔ ሃኔ ሃሜቴ። ኣዪሁዳቱ ዬሱሳ ማታን ዩዪ ኣꬊዴ፥ «ኔኒ ኑና ኣዉዴ ጋካናው ሲꬊሳዴ ዎꬃኒ? ኔኒ ኪሪስቶሳ ጊዶፔ፥ ኑሲ ጌሻዴ ኦዳ» ያጌዲኖ። ዬሱሲ ኡንቱንቱሲ ዛሪዴ፥ «ታኒ ሂንቴንቱሲ ኦዳዲ፤ ሺን ታና ኣማኒኪታ፤ ታኒ ታ ኣቡ ሱንꬃን ኦꬂያ ኪታይ ታባ ማርካቴ። ሺን ሂንቴንቱ ታ ዶርሳ ጊዴና ዲራው ኣማኒኪታ። ታ ዶርሳቱ ታ ኮሻ ሲሲኖ፤ ታኒ ኡንቱንታ ኤራይ፤ ኡንቱንቱካ ታና ካሊኖ። ታኒ ኡንቱንቱሲ ሜꬊና ዴዑዋ ኢማይ፤ ቃሲ ኡንቱንቱ ኡባካ ሃይቂኪኖ። ኦኒኔ ታ ኩሺያፔ ኡንቱንታ ዎꬂ ኣካናው ዳንዳዬና። ኡንቱንታ ታው ኢሜዳ ታ ኣቡ ኦፔኔ ኣꬌ፤ ኦኒኔ ታ ኣቡ ኩሺያፔ ኡንቱንታ ዎꬂ ኣካናው ዳንዳዬና። ታኔ ታ ኣቡ ኢቱዋ» ያጌዳ። ኣዪሁዳቱ ዬሱሳ ጫዳናው ቃሲካ ሹቻ ዴንꬄዲኖ። ዬሱሲ ኡንቱንታ፥ «ታኒ ኦꬃናው ታ ኣቡ ታው ኢሜዳ ዳሮ ሎዖ ኦሱዋ ሂንቴንታ ቤሳዲ፤ ሄዋንቱፔ ሃቃዋንቱ ዲራው፥ ታና ሹቻን ጫዳናው ኮዪቴ?» ያጌዳ። ኣዪሁዳቱ ዛሪዴ፥ «ኑኒ ኔና ሎዖ ኦሱዋ ዲራው፥ ሹቻን ጫዳናው ኮዮኮ፤ ሺን ኔኒ ፆሳ ቦላ ቦሪያ ቃላ ሃሳዪያ ዲራዉኔ ቃሲ ኣሳ ጊዳዴ ኔ ሁጲያ ፆሳ ኦꬄዳ ዲራው፥ ጫዳናው ኮዬቶ!» ያጌዲኖ። ዬሱሲ ዛሪዴ፥ «ሂንቴንቱ ሂጊያን ፆሳይ፥ ‹ሂንቴ ፆሳቱዋ› ጌዳዌ ፃፌቲቤኔ? ፆሳ ማፃፋቱዋ ላማናው ዳንዳዬቴና፤ ፆሳይ ባሬ ቃላይ ዬዳ ኣሳቱ፥ ‹ፆሳቱዋ› ጊዴ ፄሴዳዋ ጊዶፔ፥ ታኒ፥ ‹ታኒ ፆሳ ናዓ› ጌዳ ዲራው፥ ታ ኣቡ ኣንጂዴ፥ ሳዓ ኪቴዳ ታና፥ ‹ፆሳ ቦላ ቦሪያ ቃላ ሃሳያ› ያጊቴ? ታኒ ታ ኣቡ ኦꬂያዋ ኦꬃና ꬋዮፔ፥ ታና ኣማኖፒቴ። ሺን ታኒ ኦꬂያዋ ጊዶፔ፥ ሃራይ ኣቶ ሂንቴንቱ ታና ኣማናና ꬋዮፔካ፥ ታ ኣቡ ታናን ዴዒያዋኔ ታኒካ ታ ኣቡን ዴዒያዋ ኤራናዳኒኔ ኣኬካናዳን፥ ታ ኦሱዋ ኣማኒቴ» ያጌዳ። ቃሲካ ኡንቱንቱ ኣ ኦይቃናው ኮዬዲኖ፤ ሺን ኢ ኡንቱንቱፔ ኬሲ ኣኪዴ ቤዳ። ዮሃኒሲ ካሴ ፃማቂያሳ ዮርዳኖሳ ሻፋፔ ሄፊንꬃ ዬሱሲ ፒኒዴ፥ ያኒ ዴዔዳ። ዳሮ ኣሳይ ዬሱሳኮ ዪዴ፥ «ዮሃኒሲ ዎልቃማ ማላታ ኦꬂቤና፤ ሺን ኢ ሃ ቢታኒያባ ሃሳዬዳባይ ኡባይ ቱማ» ያጌዲኖ። ያኒ ዳሮ ኣሳይ ዬሱሳ ኣማኔዳ። ቢታኒያ ጊያ ቄሪ ካታማን ኣሊዓዛራ ጊያ ኢቲ ቢታኒ ሃርጌዳ፤ ሄ ካታማይ ማይራማኔ ኢዚ ሚቻታ ማርታ ዴዔዳ ካታማ። ጎዳ ጌዲያ ሺቱዋ ኦካዴ፥ ባሬ ቢናናን ኣ ጌዲያ ቁጬዳዉና ሄ ማይራሞ፤ ሃርጌዳዌ ቃሲ ኢዚ ኢሻ ኣሊዓዛራ። ሄዋ ዲራው፥ ሚቻቱ፥ «ጎዳው፥ ኔኒ ሲቂያዌ ሃርጌዳ» ጊዴ ዬሱሳው ኪቴዲኖ። ዬሱሲ ሄዋ ሲሴዳ ዎዴ፥ «ታኒ ፆሳ ናዓይ ሃርጊያ ጋሱዋን ቦንቼታና ማላ፥ ፆሳ ቦንቹዋሲ ሃ ሃርጊ ኣሊዓዛራ ኦይቄዳፔ ኣቲን፥ ዎꬊያ ሃርጊያ ጊዴና» ያጌዳ። ዬሱሲ ማርቶ፥ ኢዚ ሚቻቶኔ ኣሊዓዛራ ሲቄ፤ ኣሊዓዛር ሃርጌዳዋ ዬሱሲ ሲሴዳ ዎዴ፥ ባሬ ዴዒያ ሳዓን ላዑ ጋላሳ ፔሼዳ። ሄዋፔ ጉዪያን፥ ዬሱሲ ባሬና ካሊያዋንታ «ላዔንꬁዋ ዪሁዳ ጋዲያ ቦይቴ» ያጌዳ። ዬሱሳ ካሊያዋንቱ ዛሪዴ፥ «ታማሪሲያዎ፥ ጉꬃ ዎዲያፔ ካሴ ኣዪሁዳቱ ኔና ሹቻን ጫዳናው ኮዬዲኖ፤ ቃሲካ ያ ባኒ?» ያጌዲኖ። ዬሱሲ፥ «ኢቲ ጋላሳን ታማኔ ላዑ ሳቲ ዴዔኔዬ? ጋላሲ ሃሜቲያ ኣሳይ ꬉቤቴና፤ ኣዪሲ ጎፔ፥ ኢ ሃ ሳዓ ፖዑዋ ቤዔ። ሺን ቃማ ሃሜቲያ ኡራይ ዴዖፔ፥ ፖዑ ኣኒ ባይና ዲራው፥ ꬉቤቴ» ያጌዳ። ዬሱሲ ሄዋ ጌዳዋፔ ጉዪያን፥ ቃሲካ ኡንቱንቱሲ፥ «ኑ ዳቡ ኣሊዓዛር ጌሚዒሼዳ፤ ሺን ጌሚዒሹዋፔ ኣ ዴንꬃናው ታኒ ባይ» ያጌዳ። ዬሱሳ ካሊያዋንቱ ዛሪዴ፥ «ጎዳው፥ ኢ ጌሚዒሼዳዋ ጊዶፔ፥ ኣው ሎዓናዋ» ያጌዲኖ። ኣሊዓዛር ሃይቄዳዋ ዬሱሲ ኦዴዳ፤ ሺን ኣሊዓዛር ጌሚዒሺዴ ጊሴዳዋ ኦዴዳ ጊዴ፥ ኡንቱንቱ ቆፔዲኖ። ሄዋ ዲራው፥ ዬሱሲ ጌሺዴ ኡንቱንታ፥ «ኣሊዓዛር ሃይቄዳ። ሂንቴንቱ ኣማናና ማላ፥ ታኒ ሄ ሳዓን ዴዔናዎ፥ ሂንቴንቱ ዲራው ናሼታይ። ሺን ዴንዲቴ፤ ኣኮ ቦይቴ» ያጌዳ። ሄዋፔ ጉዪያን፥ ማንቲያ ጌቴቲያ ቶማሲ ባሬ ላጌꬃቱዋ ዬሱሳ ካሊያዋንታ፥ «ዬሱሳና ሃይቃናው ኑኒካ ቃሲ ቦይቴ!» ያጌዳ። ዬሱሲ ጋኪያ ዎዴ፥ ኣሊዓዛራው ሞጌቶዴፔ ኦይዱ ጋላሳ ጊዴዳዋ ዴሜዳ። ቢታኒያ ካታማይ ዬሩሳላሜፔ ሄዙ ኪሎ ሚቲሪያ ኬና ሃኬ። ዳሮ ኣዪሁዳቱ ማርቶኔ ማይራሞ ኡንቱንቱ ኢሻይ ሃይቄዳዎ ሜንꬄꬃናው ዬዲኖ። ማርታ ዬሱሲ ዬዳዋ ሲሳዴ፥ ኣ ሞካናው ኬሳዱ፤ ሺን ማይራማ ጎሌን ኣታዱ። ማርታ ዬሱሳ፥ «ጎዳው፥ ኔኒ ሃዋን ዴዔዳዋ ጊዲንቶ፥ ታ ኢሻይ ሃይቄና። ሺን ኔኒ ዎሲያዋ ኣይ ጊዶፔኔ፥ ፆሳይ ኔው ሃራይ ኣቶ ሃዒካ ኢማናዋ ታኒ ኤራይ» ያጋዱ። ዬሱሲ፥ «ኔ ኢሻይ ሃይቁዋፔ ዴንዳና» ያጌዳ። ማርታ፥ «ዎዲያ ዉርሴꬃን ዴንዱዋ ጋላሲ፥ ኢ ሃይቁዋፔ ዴንዳናዋ ታኒ ኤራይ» ያጋዱ። ዬሱሲ ኢዚው፥ «ታኒ ዴንዱዋኔ ዴዑዋ፤ ታና ኣማኒያ ኡራይ ሃራይ ኣቶ፥ ሃይቆፔካ ዴዑዋን ዴዓናዋ። ቃሲ ዴዑዋን ዴዒያ ኡራይኔ ታና ኣማኒያ ኡራይ ኡባይ ኡባካ ሃይቄና፤ ሄዋ ኔኒ ኣማናይ?» ያጌዳ። ማርታ ዛራዴ፥ «ጎዳው፥ ኤ ታኒ ኣማናይ፤ ኔኒ ፆሳ ናዓ፥ ሳዓ ያናው ዴዒያ ኪሪስቶሳ ጊዲያዋ ታኒ ኣማናይ» ያጋዱ። ማርታ ሄዋ ጌዳዋፔ ጉዪያን፥ ባዴ ባሬ ሚቻቲው ጌማን ፄሳዴ፥ «ታማሪሲያዌ ዪዴ፥ ኔና ኮዬ» ያጋዱ። ማይራማ ሄዋ ሲሴዳ ዎዴ፥ ኤሌላ ዴንዳ ኤቃዴ ዬሱሳኮ ባዱ። ዬሱሲ ማርታ ኣ ሞኬዳ ሳዓን ዴዔፔ ኣቲን፥ ቢሮ ቄሪ ካታማ ጋኪቤና። ማይራሞ ሜንꬄꬂዴ፥ ጎሌን ኢዚና ዴዒያ ኣዪሁዳቱ፥ ኢዛ ኤሌካ ዴንዳ ኤቃዴ ካሬ ኬሲያዋ ቤዒዴ፥ ኣሊዓዛር ሞጌቴዳ ዱፉዋ ባዴ ያኒ ዬካናው ሃናው ያጊዴ፥ ኢዞ ካሊዴ ኬሴዲኖ። ማይራማ ዬሱሲ ዴዒያሳ ባዴ ዬሱሳ ቤዔዳ ዎዴ፥ ኣ ጌዲያ ቦላን ኩንዳዱ፤ «ጎዳው፥ ኔኒ ሃዋን ዴዔዳዋ ጊዲንቶ፥ ታ ኢሻይ ሃይቄና ሺን!» ያጋዱ። ዬሱሲ ኢዛ ዬኪያዋኔ ቃሲ ኢዚና ዬዳ ኣዪሁዳቱካ ዬኪያዋ ቤዒዴ፥ ባሬ ዎዛናን ዳሮ ሴሌቴዳ፤ ቃሲ ቶኪ ሼምፔዳ። ኡንቱንታ፥ «ሃቃን ሞጌዲቴ?» ያጊዴ ኦቺና፥ «ጎዳው፥ ያዴ ቤዓ» ያጊዴ ዛሬዲኖ። ዬሱሲ ኣፎፄዳ። ሄዋ ዲራው፥ ኣዪሁዳቱ፥ «ኣሊዓዛራ ኢ ኣይ ኬና ሲቂንቶ ቤዒቴ!» ያጌዲኖ። ሺን ኡንቱንቱፔ ኢቱ ኢቱ፥ «ሃዌ ቆቃ ቢታኒያ ፄሊሴዳዌ ሃ ቢታኒ ሃይቄናዳን ኡዳናው ዳንዳዬኔ?» ያጌዲኖ። ዬሱሲ ቃሲካ ዎዛናፔ ቃሬቲዴ፥ ኣሊዓዛር ሞጌቴዳ ዱፉዋኮ ቤዳ፤ ሄ ዱፉ ጎንጎሉዋ ጊዲዴ ሹቻን ቁምዔቲ ኡቴዳ። ዬሱሲ፥ «ሹቻ ዲጊቴ!» ያጊዴ ኣዛዜዳ። ሃይቄዳ ቢታኒያ ሚቻታ ማርታ፥ «ጎዳው፥ ኢ ሃይቆዴፔ ኦይዱ ጋላሳ ጊዴዳ ዲራው፥ ሃዒ ፂንቃናዋ!» ያጋዱ። ዬሱሲ ማርቶ፥ «ኣማኒያዋ ጊዶፔ፥ ኔኒ ፆሳ ቦንቹዋ ቤዓናዋ ታኒ ኔው ኦዳቤይኪታ?» ያጌዳ። ኡንቱንቱ ሹቻ ዴንꬄዲኖ፤ ዬሱሲ ሳሉዋ ፑዴ ፄሊዴ፥ «ኣዎ፥ ታኒ ጊያዋ ኔኒ ሲሴዳ ዲራው፥ ኔና ጋላታይ። ኔኒ ኡባ ዎዴ ሲሲያዋ ታኒ ኤራይ፤ ሺን ሃዋን ዩዪ ኣꬊዴ ኤቄዳ ኣሳይ ኔኒ ታና ኪቴዳዋ ኣማናና ማላ፥ ሃዋ ታኒ ኡንቱንቱ ዲራው ጋይ» ያጌዳ። ዬሱሲ ሄዋ ጌዳዋፔ ጉዪያን፥ ባሬ ቃላ ꬎቁ ኡዲዴ፥ «ኣሊዓዛራ፥ ሃ ኬሳ!» ያጌዳ። ሃይቄዳ ኣሊዓዛራ ኩሺኔ ጌዲ ሻሉዋን ቃሼቲ ኡቲዴ ኣ ዴሙካ ኣፊላን ካሜቲ ኡቴዳዌ ኬሲና ዬሱሲ ኡንቱንታ፥ «ቢሊ ኣጊቴ! ቦ!» ያጌዳ። ሄዋ ዲራው፥ ማይራሚኮ ዬዳ ኣዪሁዳቱዋፔ ጮራቱ ዬሱሲ ኦꬄዳዋ ቤዒዴ፥ ኣ ኣማኔዲኖ። ሺን ኡንቱንቱፔ ኢቱ ኢቱ ፓሪሳዋቱዋኮ ቢዴ፥ ዬሱሲ ኦꬄዳዋ ኡንቱንቱሲ ኦዴዲኖ። ሄዋፔ ጉዪያን፥ ቄሳቱዋ ካፓቱኔ ፓሪሳዋቱ ያዓ ሺሺዴ፥ «ሃ ቢታኒ ዳሮ ዎልቃማ ማላታ ኦꬂያ ዲራው፥ ኣያ ኦꬃኔ? ኑኒ ኣ ጮዑ ጊዴ፥ ኣጎፔ፥ ኣሳይ ኡባይ ኣ ኣማናናዋ፤ ቃሲ ሮሜ ጋዲያ ኣሳቱ ዪዴ፥ ኑ ጌሻ ጎሊያኔ ኑ ኣሳ ꬋዪሳና» ያጌዲኖ። ኡንቱንቱፔ ኢቱ ቃያፋ ጊያ፥ ሄ ላይꬂ ቄሳቱዋ ኡባቱዋ ካፖ ጊዴዳዌ፥ «ሂንቴንቱ ኣይኔ ኤሪኪታ! ኣሳይ ኡባይ ꬋዪያዋፔ ኣሳ ኡባ ዲራው፥ ኢቲ ኣሳይ ሃይቂያዌ ሎዓ ጊዲያዋ ሂንቴንቱ ኣኬኪቴ?» ያጌዳ። ኢ ሄዋ ባሬፔ ጊቤና፤ ሺን ሄ ላይꬂ ቄሳቱዋ ኡባቱዋ ካፖ ጊዲያ ዲራው፥ ዬሱሲ ኣዪሁዳ ኣሳ ዲራው ሃይቃናው ቤሲያዋ ናቢ ኦዴዳ። ቃሲ ዬሱሲ ኣዪሁዳ ኣሳ ፃላላው ሃይቄና፤ ሺን ላሌቲ ዴዒያ ፆሳ ናና ኢቱዋ ኡዲ ሺሻናው ሃይቃናዋ። ሄ ጋላሳፔ ዶሚዴ፥ ኡንቱንቱ ኣ ዎꬋናው ማቄቴዲኖ። ሄዋ ዲራው፥ ዬሱሲ ኣዪሁዳቱ ጊዱዋን ቆንጪያን ያ ሃ ሃሜቲቤና፤ ሺን ሜላ ቢታ ጋፃን ዴዒያ ጋዲያ፥ ኤፊሬማ ጌቴቲያ ካታማ ቤዳ። ባሬና ካሊያዋንቱና ሄዋን ታኬዳ። ኣዪሁዳቱ ፓሲጋ ቦንቺያ ጋላሳይ ማቴዳ፤ ቃሲ ዳሮ ኣሳይ ባሬና ጌሻናው፥ ፓሲጋ ቦንቺያ ጋላሳይ ጋካናፔ ካሴ ዱማ ዱማ ሳፔ ዬሩሳላሜ ቤዳ። ኡንቱንቱ ዬሱሳ ኮዪኖ፤ ጌሻ ጎሊያን ኤቂዴ፥ «ኣያ ቆፒቴ? ፓሲጋ ቦንቺያሳ ዬሱሲ ዬኔ?» ያጊዴ ኢቱ ኢቱዋ ኦቼዲኖ። ቃሲ ቄሳቱዋ ካፓቱኔ ፓሪሳዋቱ ዬሱሳ ቃቻናው፥ ኢ ዴዒያሳ ኤሪያዌ ኦኒኔ ባሬንቶ ኦዳና ማላ ኣዛዜዲኖ። ፓሲጋ ቦንቺያ ጋላሳፔ ኡሱፑን ጋላሳ ካሴቲዴ፥ ዬሱሲ ኢ ሃይቁዋፔ ዴንꬄዳ ኣሊዓዛር ዴዒያ ቢታኒያ ጊያ ካታማ ቤዳ። ሄ ሳዓን ኡንቱንቱ ኣው ካዉዋ ካꬄዲኖ፤ ኣሊዓዛር ኣናና ኡቲዴ ኢቲፔ ሚያዋንቱ ጊዶን ኡቲ ዴዒሺን፥ ማርታ ካዉዋ ጊሻ ሚዛዱ። ማይራማ ዳሮ ሻሉዋን ዛሊዔቲያ ኢቲ ፃሪሙሲያ ጊዲያ ናርዶሳ ጌቴቲያ ጌሻ ሺቱዋ ኣሃዴ፥ ዬሱሳ ጌዲያ ኦካዴ ባሬ ቢናናን ኣ ጌዲያ ቁጫዱ፤ ጎሊያ ኡባይ ሺቱዋ ሳዉዋን ቶሺኩ ጌ። ሺን ዬሱሳ ካሊያዋንቱፔ ኢቱ፥ ዬሱሳ ኣꬂ ኢማናዌ፥ ዪሁዳ ኣስቆሮቱ፥ «ሃ ሺቱ ሄዙ ፄቱ ዲናሪያኒ ዛሊዔቲና፥ ኣያሲ ሄዌ ሂዬሳው ኢሜቴኔ?» ያጌዳ። ኢ ካዪሱዋ ጊዴዳ ዲራው፥ ሄዋ ጌዳፔ ኣቲን፥ ሂዬሳው ቃሬቲዴ ጊቤና፤ ኢ ሚሻ ቃርጪቲያ ኦይቂያዋ ጊዲያ ዲራው፥ ኡባ ዎዴ ኣፔ ባሬው ኣኬዳ። ዬሱሲ፥ «ሃ ሺቱዋ ታኒ ሞጌቲያ ጋላሳይ ጋካናው ኢዛ ኣያው ሚንጃኔ? ኢዞ ኣጊቴ። ሂዬሳቱ ኡባ ዎዴ ሂንቴናና ዴዓና፤ ሺን ታኒ ኡባ ዎዴ ሂንቴናና ዴዒኬ» ያጌዳ። ኣዪሁዳቱዋፔ ዳሮ ኣሳይ ዬሱሲ ቢታኒያን ዴዒያዋ ሲሲዴ፥ ያ ቤዳ፤ ኡንቱንቱ ዬሱሳ ቤዓና ጊሻ ፃላላው ጊዴናን፥ ኢ ሃይቁዋፔ ዴንꬄዳ ኣሊዓዛራካ ቤዓናው ቤዲኖ። ሄዋ ዲራው፥ ቄሳቱዋ ካፓቱ ኣሊዓዛራካ ቃሲ ዎꬋናው ማቄቴዲኖ። ኣዪሲ ጎፔ፥ ኣሊዓዛራ ጋሱዋን ዳሮ ኣዪሁዳቱ ባሬና ካሌꬂያዋንታ ኣጊዴ፥ ዬሱሳ ኣማኒኖ። ዎንቴꬃ ጋላሲ ፓሲጋ ቦንቺያሳ ዬዳ ዳሮ ኣሳይ ዬሱሲ ዬሩሳላሜ ቢያዋ ሲሴዳ። ያቲዴ ዛምባ ሃይꬃ ኦይቂዴ፥ ኣ ሞካናው ኬሴዲኖ። ባሬንቱ ኮሻ ꬎቁ ኡዲዴ፥ «ፆሳይ ጋላቴቶ! ፆሳ ሱንꬃን ዪያ ኢስራዔሊያ ካቲ ኣንጄቴዳዋ!» ያጌዲኖ። ፆሳ ማፃፋይ፥ «ፂዮኔ ካታማው፥ ያዮፓ! ቤዓ፥ ኔ ካቲ ሃሬ ማራ ቦላ ኡቲዴ ዬ» ጊያዋዳን፥ ዬሱሲ ሃሬ ማራ ዴሚዴ፥ ኣ ቶጌዳ። *** ዬሱሳ ካሊያዋንቱ ሄዋ ካሴ ኣኬኪቤይኪኖ፤ ሺን ዬሱሲ ቦንቼቴዳዋፔ ጉዪያን፥ ፆሳ ማፃፋይ ሄዋ ኡባ ጌዳዋኔ ቃሲ ኡንቱንቱካ ሄዋ ኡባ ዬሱሳው ኦꬄዳዋ ሃሳዬዲኖ። ኣሊዓዛር ሞጌቴዳ ጎንጎሉዋፔ ዬሱሲ ኣ ፄሲዴ፥ ሃይቁዋፔ ዴንꬄዳ ዎዴ፥ ዬሱሳና ዴዒያ ዳሮ ኣሳይ ዬሱሳው ማርካቴዳ። ዳሮ ኣሳይ ኣ ሞካናው ኬሴዳዌ፥ ኢ ሄ ዎልቃማ ማላሊያዋ ኦꬄዳ ዲራሳ። ሄዋ ዲራው፥ ፓሪሳዋቱ ኢቱ ኢቱዋ፥ «ሂንቴንቱ ኣይኔ ኦꬃናው ዳንዳዬናዋ ቤዒቴ! ቤዒቴ፥ ጋዴ ኡባይ ኣ ጌዱዋ ካሌዳ» ያጌዲኖ። ፓሲጋ ቦንቺያ ጋላሲ ጎዪናናው ዬሩሳላሜ ቤዳዋንቱ ጊዶን ኢቲ ኢቲ ጊሪኬ ኣሳቱ ዴዒኖ። ኡንቱንቱ ጋሊላ ጋዲያን ቤቴሳይዳ ጌቴቲያ ካታማፔ ዬዳ ፒሊጶሳኮ ቢዴ፥ «ጎዳው፥ ኑኒ ዬሱሳ ቤዓናው ኮዬቶ» ያጊዴ ዎሴዲኖ። ፒሊጶሲ ቢዴ፥ ኢንዲራሳው ኦዲና ላዓቱካ ቢዴ፥ ዬሱሳው ኦዴዲኖ። ዬሱሲ ኡንቱንቱሲ ሃዋዳን ያጌዳ፤ «ታኒ፥ ኣሳ ናዓይ፥ ቦንቼቲያ ሳቲ ጋኬዳ። ታኒ ሂንቴንቱሲ ቱሙዋ ኦዳይ፤ ኢቲ ዛርጋ ኣይፋታ ቢታን ዎꬋዴ ዎቃና ꬋዮፔ፥ ባሬካ ኣታው። ሺን ሄ ዛርጋ ኣይፋታ ዎቆፔ፥ ዳሮ ኣይፊያ ኣይፋው። ባሬ ሼምፑዋ ሲቂያ ኦኒኔ ባዪዜ፤ ቃሲ ባሬ ሼምፑዋ ሃ ሳዓን ኢፂያ ኦኒኔ ሜꬊና ዴዖ ኣሼ። ኦኒኔ ታው ኦꬆፔ፥ ታና ካላናው ቤሴ፤ ቃሲ ታኒ ዴዒያ ሳዓን ታው ኦꬂያዌካ ዴዓናዋ። ታው ኦꬂያ ኦናኔ፥ ታ ኣቡካ ኣ ቦንቻናዋ። «ሃዒ ታ ሼምፑ ዳሮ ኡንዔቴዳ፤ ያቲና ዋጎ? ታኒ፥ ‹ታ ኣቦ፥ ታና ሃ ሳታቲፔ ኣሻርኪ› ያጎ? ቱይቲ፥ ታኒ ሃ ሳቲያን ዬዳዌ ሃዋ ዲራሳ። ታ ኣቦ፥ ኔ ሱንꬃ ቦንቻ» ያጌዳ። ሄ ዎዴ ሳሉዋፔ፥ «ታኒ ታ ሱንꬃ ቦንቻዲ፤ ቃሲካ ጉጃዴ ቦንቻና» ያጊያ ቃላይ ዬዳ። ሄ ሳዓን ኤቄዳ ጮራ ኣሳይ ሄ ቃላ ሲሲዴ፥ «ሄዌ ጉጉንꬃ» ያጌዳ። ሃራንቱ ቃሲ፥ «ኪታንቻይ ኣው ሃሳዬዳ» ያጌዲኖ። ዬሱሲ ዛሪዴ ኡንቱንታ፥ «ሃ ቃላይ ሂንቴንቱ ዲራው ዬዳዋፔ ኣቲን፥ ታ ዲራሳ ጊዴና። ሃ ሳዓይ ፒርዴቲያ ዎዲ ሃዓ፤ ሃ ሳዓ ሞዲያዌ ሃዒ ካሬ ኦሌታናዋ። ቃሲ ታኒ ማስቃሊያ ቦላ ካቄቲያ ዎዴ፥ ኣሳ ኡባ ታኮ ጎቻና» ያጌዳ። ኢ ሄዋ ጌዳዌ ኣይ ማላ ሃይቁዋ ኢ ሃይቃኔንቶኔ ኡንቱንታ ኤሪሳናሳ። ዳሮ ኣሳይ ዛሪዴ ዬሱሳ፥ «ኑ ሂጊ ኪሪስቶሲ ሜꬊናው ዴዒያዋ ኦዴ። ያቲና፥ ኔኒ ዋጋዴ፥ ‹ኣሳ ናዓይ ማስቃሊያ ቦላ ካቄታና› ጋይ? ሄ ኣሳ ናዓይ ኦኔ?» ያጌዲኖ። ዬሱሲ፥ «ፖዑ ሂንቴናና ጉꬃ ዎዲያ ጋሚዓናዋ። ሂንቴንቱሲ ꬉሜና ማላ፥ ፖዑ ዴዒሺን፥ ፖዑዋን ሃሜቲቴ። ꬉማኒ ሃሜቲያ ኡራይ ሃቃ ቢንቶኔ ኤሬና። ፖዑዋ ኣሳ ጊዳና ማላ፥ ሂንቴንቱሲ ፖዑ ዴዒሺን፥ ፖዑዋ ኣማኒቴ» ያጌዳ። ዬሱሲ ሄዋ ሃሳዬዳዋፔ ጉዪያን፥ ቢዴ ኡንቱንቱፔ ጌሜቴዳ። ኢ ሄዋ ኬና ዎልቃማ ማላታ ኡንቱንቱ ሲንꬃን ኦꬆፔካ፥ ናቢያ ኢሳያሴ፥ «ጎዳው፥ ኑ ማርካቴꬃ ኦኒ ኣማኔዴ? ጎዳይ ባሬ ዎልቃ ኦና ቤሴዴ?» ጌዳዌ ቱማ ጊዳና ማላ፥ ኡንቱንቱ ኣ ኣማኒቤይኪኖ። *** ኢሳያሴ ቃሲካ፥ «ኡንቱንቱ ኣይፊ ፄሌና ማላ፥ ኡንቱንቱ ዎዛናይካ ኣኬኬና ማላ፥ ኡንቱንቱ ፆሳኮ ሲሚና፥ ኢ ኡንቱንታ ፓꬄና ማላ፥ ፆሳይ ኡንቱንቱ ኣይፊያ ቆቂሴዳ። ኡንቱንቱ ዎዛና ዳሚሴዳ» ጌዳ ዲራው፥ ኡንቱንቱ ኣማናናው ዳንዳዪቤዪኪኖ። *** ኢሳያሴ ዬሱሳ ቦንቹዋ ቤዔዳ ዲራዉኔ ቃሲ ኣባ ሃሳዬዳ ዲራው፥ ሄዋ ጌዳ። ሄዋ ጊዲናካ፥ ሃራይ ኣቶ ኣዪሁዳቱ ካፓቱዋፔካ ጮራቱ ዬሱሳ ኣማኔዲኖ። ሺን ፓሪሳዋቱ ባሬና ኣዪሁዳቱ ዎሳ ጎሊያፔ ኬሲኖ ጊዴ ያዬዳ ዲራው፥ ኣማኔዳ ጊዴ ማርካቲቤይኪኖ። ኣዪሲ ጎፔ፥ ኡንቱንቱ ፆሳ ሳባፔ ኣꬂዴ፥ ኣሳ ሳባ ሲቄዲኖ። ዬሱሲ ባሬ ቃላ ꬎቁ ኡዲዴ ያጌዳ፤ «ታና ኣማኒያ ኦኒኔ ታና ኪቴዳዋካ ኣማኒያዋፔ ኣቲን፥ ታ ፃላላ ኣማኔና። ታና ቤዒያ ኦኒኔ ታና ኪቴዳዋካ ቤዔ። ታና ኣማኒያ ኡባይ ꬉማኒ ዴዔና ማላ፥ ታኒ ፖዑዋ ጊዳዴ ሳዓ ያዲ። ታ ቃላ ሲሲዴ ኣዛዜቴና ኡራ ኦናኔ ታኒ ፒርዲኬ፤ ኣዪሲ ጎፔ፥ ታኒ ኣላሚያ ኣሻናው ዬዳዋፔ ኣቲን፥ ፒርዳናው ያቤይኬ። ታና ኢፂያ ኦናኔ ቃሲ ታ ቃላ ኣኬና ኦናኔ ፒርዲያዌ ዴዔ። ታኒ ኦዴዳ ቃላይ ዉርሴꬃ ጋላሲ ሄ ኡራ ፒርዳና። ኣዪሲ ጎፔ፥ ታኒ ሃዋ ታፔ ሃሳያቤይኬ፤ ሺን ታና ኪቴዳ ታ ኣቡ ታኒ ጋናዋኔ ሃሳያናዋ ታና ኣዛዜዳ። ቃሲ ኣ ኣዛዙ ሜꬊና ዴዑዋ ኣሂያዋ ታኒ ኤራይ፤ ሄዋ ዲራው፥ ታኒ ኦዲያዌ ታ ኣቡ ታና ኦዳ ጊዴ ኦዴዳዋ» ያጌዳ። ፓሲጋ ቦንቺያ ጋላሳይ ጋካናፔ ካሴቲዴ፥ ሃ ሳዓፔ ሻኬቲዴ፥ ኣዉዋኮ ቢያ ዎዲ ጋኬዳዋ ዬሱሲ ኤሬዳ፤ ሃ ሳዓን ዴዒያ ባሬዋንታ ኡባ ዎዴ ሲቄዳ፤ ዉርሴꬃይ ጋካናው ኡንቱንታ ሲቄዳ። ዬሱሲኔ ካሊያዋንቱ ካዉዋ ሚሺን፥ ሲሞና ናዓ ዪሁዳ ኣስቆሮቱ ዬሱሳ ኣꬂ ኢማናዳን፥ ፃላሂ ኣ ቆፊሲ ዎꬄዳ። ዬሱሲ ባሬ ኣዉ ኡባባ ኣ ኩሺያን ዎꬄዳዋ፥ ቃሲ ፆሳ ማታፔ ኢ ዬዳዋኔ፥ ሲሚዴ ኣኮ ባናዋ ኤሬዳ። ዬሱሲ ሚያሳፔ ዴንዲ ኤቂዴ፥ ቦላ ባጋ ማዩዋ ቃሪ ዎꬂዴ፥ ፖፃ ባሬ ፄሳን ዳንጬዳ። ሄዋፔ ጉዪያን፥ ሃꬃ ሜቻ ሚሻን ቲጊዴ፥ ባሬና ካሊያዋንቱ ጌዲያ ሜቻኔ ባሬ ፄሳን ዳንጬዳ ፖፃን ቁጩሳ ዶሜዳ። ዬሱሲ ሲሞኒ ጴፂሮሳኮ ዪና ጴፂሮሴ፥ «ጎዳው፥ ኔኒ ታ ጌዲያ ሜጫናው ሃናዪዬ?» ያጌዳ። ዬሱሲ ዛሪዴ ኣ፥ «ታኒ ኦꬂያዋ ኔኒ ሃዒ ኤራካ፤ ሺን ጉዬፔ ኤራናሳ» ያጌዳ። ጴፂሮሴ፥ «ኔኒ ታ ጌዲያ ኡባካ ሜጫካ!» ያጌዳ። ዬሱሲ ኣ፥ «ታኒ ኔ ጌዲያ ሜጫና ꬋዮፔ፥ ኔዉኔ ታዉኔ ኢቲፔቴꬃይ ባዋ» ያጊዴ ዛሬዳ። ሲሞና ጴፂሮሴ ዬሱሳ፥ «ጎዳው፥ ያቶፔ፥ ታ ጌዲያ ፃላላ ሜጮፓ፤ ታ ኩሺያካ ታ ሁጲያካ ሜጫ!» ያጌዳ። ዬሱሲ ዛሪዴ፥ «ቦላ ሜጬቲዲጌዳ ኡራይ ኦኒኔ ጌዲያፔ ሃራባ ሜጬታናው ኮሼና፤ ኣው ኡባሳይካ ጌሻ። ቃሲ ሂንቴንቱካ ጌሻ፤ ሺን ኡባይ ጌሻ ጊዲኪታ» ያጌዳ። ኣዪሲ ጎፔ፥ ዬሱሲ ባሬና ኣꬂ ኢማና ኡራይ ኦኔንቶኔ ኤሬዳ፤ ኢ፥ «ሂንቴንቱ ኡባይ ጌሻ ጊዲኪታ» ጌዳዌ ሃዋሳ። ኡንቱንቱ ጌዲያ ሜጬዳዋፔ ጉዪያን፥ ዬሱሲ ባሬ ማዩዋ ማዪዴ፥ ባሬሳ ጉዬ ሲሚ ቢ ኡቲዴ ኡንቱንታ ያጌዳ፤ «ታኒ ሂንቴንቱሲ ኦꬄዳዋ ኣኬኪቴ? ሂንቴንቱ ታና፥ ታማሪሲያዎኔ ጎዳው ጊታ፤ ታኒ ሄ ሂንቴንቱ ጊያዋ ጊዲያ ዲራው፥ ሎይꬄዲታ። ታኒ ሂንቴንቱሲ ጎዳኔ ሂንቴንታ ታማሪሲያዋ ጊዳዴ፥ ሂንቴንቱ ጌዲያ ሜጪያዋ ጊዶፔ፥ ሂንቴንቱካ ኢቱ ኢቱዋ ጌዲያ ሜጫናው ቤሴ። ኣዪሲ ጎፔ፥ ታኒ ሂንቴንቱሲ ኦꬄዳዋዳን፥ ሂንቴንቱካ ኦꬃና ማላ፥ ሂንቴንቱሲ ሌሚሱዋ ጊዳዲ። ታኒ ሂንቴንቱሲ ቱሙዋ ኦዳይ፤ ቆማይ ባሬ ጎዳፔ ኣꬌና። ቃሲ ኪቴቴዳ ኡራይካ ባሬና ኪቴዳዋፔ ኣꬌና። ሂንቴንቱ ሄዋ ኤሪዴ ኦꬂያዋ ጊዶፔ ኣንጄቴዳዋንታ። «ታኒ ሂንቴንቶ ኡባባ ሃሳዪኬ። ታኒ ዶሬዳዋንታ ኤራይ፤ ሺን ፆሳ ማፃፋይ፥ ‹ታኒ ባርሴዳዌ ታ ኩሺያ ሳዔዳ› ጌዳዌ ቱማ ጊዳናው ቤሴ። ሄዌ ሃኒያ ዎዴ ታኒ ታና ጊዲያዋ ሂንቴንቱ ኣማናና ማላ፥ ሄዌ ሃናናፔ ካሴታዴ ሂንቴንቱሲ ሃናናዋ ኦዳይ። ታኒ ሂንቴንቱሲ ቱሙዋ ኦዳይ፤ ታኒ ኪቲያ ኦናኔ ሞኪያ ኡራይ ታናካ ሞኬ፤ ቃሲ ታና ሞኪያ ኦኒኔ ታና ኪቴዳዋ ሞኬ» ያጌዳ። ዬሱሲ ሄዋ ሃሳዬዳዋፔ ጉዪያን፥ ባሬ ዎዛናን ዳሮ ሜቶቲዴ፥ «ታኒ ሂንቴንቱሲ ቱሙዋ ኦዳይ፤ ታና ሂንቴፔ ኢቱ ኣꬂ ኢማናዋ» ጊዴ ቆንጪያን ኦዴዳ። ኢ ኦና ሃሳዪንቶኔ፥ ካሊያዋንቱሲ ኡባካ ኤሬቴናን ኢፂና፥ ኢቱ ኢቱዋ ፄሌዲኖ። ዬሱሳ ካሊያዋንቱፔ ኢቱ፥ ዬሱሲ ሲቂያዌ፥ ዬሱሳ ማታን ኡቴዳ። ሄዋ ዲራው፥ ሲሞና ጴፂሮሴ ሄ ካሊያዋ ሲሚዒዴ፥ «ኢ ኦና ጊንቶ፥ ኣኔ ኣ ኦቻ» ያጌዳ። ሄዋ ዲራው፥ ሄ ካሊያዌ ዬሱሳ ሃይꬃኮ ሺቂዴ፥ «ጎዳው፥ ኢ ኦኔ?» ያጌዳ። ዬሱሲ ዛሪዴ፥ «ታኒ ኡኪꬃን ጫባ ቱሻዴ ኢሚያዌ ኣ» ያጌዳ። ቃሲ ኡኪꬃ ሜንꬂ ኣኪዴ፥ ጫባ ቱሺዴ፥ ሲሞና ናዓ፥ ዪሁዳ ኣስቆሮቱሲ ኢሜዳ። ዪሁዳይ ኡኪꬃ ሜንꬆዋ ኣኮዋፔ ጉዪያን፥ ሴፃናይ ኤሌካ ዪሁዳን ጌሌዳ። ዬሱሲ ኣ፥ «ኔኒ ኦꬃናዋ ኤሌላ ኦꬃ!» ያጌዳ። ሺን ሄ ሳዓን ኡቴዳዋንቱፔ ኦኒኔ ዬሱሲ ሄዋ ኣ ኣዪሲ ጌዴንቶኔ ኤሪቤና። ዪሁዳይ ሚሻ ቃርጪቲያ ኦይቂያ ዲራው፥ ካሊያዋንቱፔ ኢቱ ኢቱ ዬሱሲ ዪሁዳ፥ «ፓሲጋ ቦንቺያ ጋላሳው ባሬና ኮሺያዋ ባዴ ሻማ ዎይ ሂዬሳው ሚፁዋታ ኢማ ጌዳ» ያጊዴ ቆፔዲኖ። ዪሁዳይ ኡኪꬃ ሜንꬆዋ ኣኪዴ፥ ኤሌካ ካሬ ኬሴዳ፤ ሄ ዎዴ ሳዓይ ቃማ። ዪሁዳይ ካሬ ኬሴዳዋፔ ጉዪያን፥ ዬሱሲ ያጌዳ፤ «ሃዒ ታኒ ኣሳ ናዓይ ቦንቼታዲ፡ ፆሳይካ ታ ባጋና ቦንቼቴዳ። ፆሳይ ታ ባጋና፥ ኣሳ ናዓ ባጋና ቦንቼቶፔ፥ ኢ ባሬ ሁጴው ታና ኣሳ ናዓ ቦንቻናዋ፤ ቃሲ ኢ ታና ኤሌካ ቦንቻናዋ። ታ ናቶ፥ ታኒ ሂንቴናና ዳሮ ዎዲያ ጋሚዒኬ። ሂንቴንቱ ታና ኮያና፤ ሺን ታኒ ኣዪሁዳቱዋ፥ ‹ታኒ ቢያሳ ሂንቴንቱ ባናው ዳንዳዪኪታ› ጌዳዋዳን፥ ሂንቴዉካ ሃዒ ኦዳይ። ታኒ ሂንቴንታ ኦራꬃ ኣዛዙዋ ኣዛዛይ፤ ኢቱ ኢቱዋ ሲቂቴ። ታኒ ሂንቴንታ ሲቄዳዋዳንካ፥ ሂንቴንቱ ኢቱ ኢቱዋ ሲቃና ቤሴ። ሂንቴንቱ ኢቱ ኢቱዋና ሲቄቶፔ፥ ታና ካሊያዋንታ ጊዲያዋ ኣሳይ ኡባይ ኤራና» ያጌዳ። ሲሞኒ ጴፂሮሴ ዬሱሳ፥ «ጎዳው፥ ኔኒ ሃቃ ባይ?» ያጌዳ። ዬሱሲ ዛሪዴ፥ «ታኒ ቢያሳ ኔኒ ሃዒ ታና ካላናው ዳንዳያካ፤ ሺን ጉዬፔ ካላና» ያጌዳ። ጴፂሮሴ፥ «ጎዳው፥ ታኒ ኔና ሃዒ ካላናው ኣዪሲ ዳንዳዪኪታ? ታኒ ኔ ዲራው፥ ሃይቃናዉካ ጊጋ ኡታዲ!» ያጌዳ። ዬሱሲ ዛሪዴ፥ «ታ ዲራው ሃይቃናው ሃዒ ቱሙ ጊጋ ኡታዲ? ታኒ ኔው ቱሙዋ ኦዳይ፤ ኩቱ ዋሳናፔ ካሴ፥ ኔኒ ታና ሄዙ ጌዴ ካዳናሳ» ያጌዳ። ዬሱሲ ካሊያዋንታ «ሂንቴንቱ ዎዛናይ ሂርጎፖ፤ ፆሳን ኣማኒቴ፤ ታናንካ ኣማኒቴ። ታ ኣቡ ጎሌን ዳሮ ሳዓይ ዴዔ። ሄዋ ጊዴኔንቶ፥ ታኒ ሂንቴንቱሲ ሄዋ ኦዲኬ፤ ታኒ ሂንቴንቱሲ ሳዓ ጊጊሳናው ባይ። ታኒ ባዴ ሳዓ ጊጊሴዳዋፔ ጉዪያን፥ ታኒ ዴዒያ ሳዓን ሂንቴንቱካ ዴዓና ማላ፥ ሲማ ያዴ ሂንቴንታ ታኮ ኣካ ኣፋና። ቃሲ ሂንቴንቱ ታኒ ቢያ ኦጊያ ኤሪታ» ያጌዳ። ቶማሲ፥ «ጎዳው፥ ኔኒ ቢያሳ ኑኒ ኤሮኮ፤ ኦጊያ ዋኒዴ ኤራናው ዳንዳዬቶ?» ያጌዳ። ዬሱሲ ዛሪዴ፥ «ኦጊ፥ ቱሙኔ ዴዑ ታና፤ ታ ባጋናፔ ኣቲን፥ ኦኒኔ ታ ኣቡኮ ባናው ዳንዳዬና። ሂንቴንቱ ታና ኤሪያዋ ጊዲንቶ፥ ታ ኣባካ ኤራና፤ ሃዒፔ ዶሚዴ፥ ሂንቴንቱ ኣ ኤሪታኔ ቃሲ ኣ ቤዔዲታ» ያጌዳ። ፒሊጶሲ ዬሱሳ፥ «ጎዳው፥ ኣዉዋ ኑና ቤሳ፤ ሄዌ ኑሲ ጊዳናዋ» ያጌዳ። ዬሱሲ ዛሪዴ ያጌዳ፤ «ፒሊጶሳ፥ ታኒ ሃዋ ኬና ዎዲያ ሂንቴናና ዴዒናካ ታና ኤሪኪ? ታና ቤዔዳ ኡራይ ኣዉዋካ ቤዔዳ፤ ያቲና፥ ኔኒ ዋጋዴ፥ ‹ኣዉዋ ኑና ቤሳ› ጋይ?» ታኒ ኣዉዋ ጊዶን ዴዒያዋ ቃሲ ኣዉካ ታ ጊዶን ዴዒያዋ ኔኒ ኣማኒኪ? ታኒ ሂንቴንቱሲ ኦዲያ ቃላ ታኒ ታፔ ኦዲኬ፤ ሺን ታ ጊዶን ዴዒያ ኣዉ ባሬ ኦሱዋ ኦꬄ። ታኒ ኣዉዋ ጊዶን ዴዒያዋኔ ቃሲ ኣዉካ ታ ጊዶን ዴዒያዋ ታና ኣማኒቴ፤ ሄዌ ꬋዮፔ፥ ታ ኦሱዋባው ታና ኣማኒቴ። «ታኒ ሂንቴንቱሲ ቱሙዋ ኦዳይ፤ ታና ኣማኒያ ኡራይ ታኒ ኦꬂያ ኦሱዋ ኦꬃና። ታኒ ኣዉዋኮ ቢያ ዲራው፥ ሄ ኡራይ ሃዋፔ ኣꬊያ ኦሱዋ ኦꬃና። ኣዉ ናዓ ጋሱዋን፥ ታ ባጋና ቦንቼታና ማላ፥ ታ ሱንꬃን ሂንቴንቱ ዎሲያ ኡባባ ታኒ ሂንቴንቱሲ ፖላና። ሂንቴንቱ ታ ሱንꬃን ታና ኣያኔ ኦቾፔካ፥ ታኒ ፖላና። «ሂንቴንቱ ታና ሲቂያዋ ጊዶፔ፥ ታ ኣዛዙዋ ናጋና። ታኒ ኣዉዋ ዎሳና፤ ሂንቴናና ሜꬊናው ዴዓና ማላ፥ ቱማቴꬃ ኣያና፥ ሃራ ሜንꬄꬂያዋ ሂንቴንቱሲ ኢ ኢማና። ሃ ሳዓይ ሄ ቱማቴꬃ ኣያና ቤዔናዋኔ ኤሬናዋ ጊዲያ ዲራው፥ ኣ ኣካናው ዳንዳዬና፤ ሺን ኢ ሂንቴናና ዴዒያ ዲራዉኔ ሂንቴንቱ ጊዶን ዴዓና ዲራው፥ ሂንቴንቱ ኣ ኤሪታ። *** «ታኒ ሂንቴንታ ኣዉኔ ኣታ ባይና ዪዖ ናናዳን ሂንቴሬካ ኣጋባሺኬ፤ ታኒ ሲማዴ ሂንቴንቱኮ ያና። ጉꬃ ዎዲያፔ ጉዪያን፥ ኣላሚ ታና ላዔንꬁዋ ቤዔና፤ ሺን ሂንቴንቱ ታና ቤዓና፤ ታኒ ዴዑዋን ዴዒያ ዲራው፥ ሂንቴንቱካ ቃሲ ዴዑዋን ዴዓና። ታኒ ታ ኣዉዋ ጊዶን ዴዒያዋኔ ሂንቴንቱ ታ ጊዶን ዴዒያዋ፥ ቃሲ ታኒ ሂንቴንቱ ጊዶን ዴዒያዋኔ ሂንቴንቱ ሄ ጋላሲ ኤራና። «ታ ኣዛዙ ኣ ማታን ዴዒያ ኣሳይ፥ ቃሲ ሄ ኣዛዙዋካ ናጊያዌ፥ ኢ ታና ሲቂያ ኣሳ። ታና ሲቂያ ኣሳ ታ ኣቡካ ሲቄ፤ ታኒካ ኣ ሲቃይ። ታኒ ኣው ቆንጫና» ያጌዳ። ዪሁዳ ኣስቆሮታ ጊዴና ዪሁዳይ ዬሱሳ፥ «ጎዳው፥ ኔኒ ኔ ሁጲያ ኣላሚያ ቤሴናን፥ ኑና ቤሳና ጊያዋ ዋጋዴ ጋይ?» ያጌዳ። ዬሱሲ፥ «ታና ሲቂያ ኦኒኔ ታ ቃላ ናጌ፤ ታ ኣቡ ኣ ሲቃናዋ፤ ቃሲ ታ ኣቡኔ ታኒኔ ኣኮ ዪዴ፥ ኣናና ዴዓና። ታና ሲቄና ኡራይ ኦኒኔ ታ ቃላው ኣዛዜቴና፤ ሂንቴንቱ ሲሲያ ቃላይ ታና ኪቴዳ ኣዉዋፔ ኣቲን፥ ታዋ ጊዴና። «ታኒ ሂንቴናና ኢቲፔ ዴዓዴ ሃዋ ሂንቴንቱሲ ኦዳዲ፤ ሺን ጌሻ ኣያናይ፥ ሜንꬄꬂያዌ፥ ኣዉ ታ ሱንꬃን ኪታናዌ፥ ሂንቴንታ ኡባባ ታማሪሳናዋ። ታኒ ሂንቴንቱሲ ኦዴዳ ኡባባካ ሂንቴንታ ሃሳዪሳናዋ። «ታኒ ሳሮቴꬃ ሂንቴናና ዎꬃይ፤ ታ ሳሮቴꬃ ሂንቴንቱሲ ኢማይ። ታኒ ኣላሚ ኢሚያ ሳሮቴꬃ ማላ ኢሚኬ። ሂንቴንቱ ሂርጎፒቴኔ ያዮፒቴ። ታኒ ሂንቴንቱሲ፥ ‹ታኒ ባይ፤ ሺን ሲማዴ ሂንቴንቱኮ ያና› ጌዳዋ ሲሴዲታ፤ ሂንቴንቱ ታና ሲቄዳዋ ጊዲንቶ፥ ታፔ ኣዉ ዳሪያ ዲራው፥ ታኒ ኣዉዋኮ ቢያዋን ሂንቴንቱ ናሼታኒታ። ሄዌ ሃኒያ ዎዴ ሂንቴንቱ ኣማናና ማላ፥ ሄዌ ሃኔናን ዴዒሺን፥ ሃናና ካሴታዴ ታኒ ሂንቴንቱሲ ኦዳዲ። «ሃ ኣላሚያ ሞዲያዌ ዪያ ዲራው፥ ታኒ ሃዋፔ ሲንꬃን ሂንቴናና ሎይꬃ ሃሳዪኬ። ታና ኢ ኣይኔ ኦꬃናው ዳንዳዬና። ሺን ታኒ ኣዉዋ ሲቂያዋ ኣላሚ ኤራናው ቤሴ፤ ቃሲ ታኒካ ኣዉ ታና ኣዛዜዳዋዳን ኦꬃይ። ዴንዲ ኤቂቴ፤ ሃዋፔ ቦይቴ። «ታኒ ዎዪኒያ ጌቴቲያ ቱራው ቱሙ ኣኖ፤ ጎሻንቻይ ታ ኣባ። ታ ጊዶን ዴዒያ ኣይፊያ ኣይፌና ቱራ ማራ ኡባ ኢ ካሬ፤ ኣይፊያ ቱራ ማራ ኡባይ ካሴዋፔ ሎይꬂ ኣይፋናዳን፥ ሄ ማራ ፄራ ኢ ጪጊዴ ጌሻና። ታኒ ሂንቴንቱሲ ሃዒ ኦዴዳ ቃላ ጋሱዋን፥ ሂንቴንቱ ጌሻ። ታ ጊዶን ዴዒቴ፤ ታኒካ ሂንቴንቱ ጊዶን ዴዓና። ዎዪኒያ ቱራ ማራይ ኣኑዋና ኢቲፔ ዴዔናን ꬋዮፔ፥ ሄ ማራይ ባሬካ ኣይፊያ ኣይፋናው ዳንዳዬናዋዳን፥ ሂንቴንቱካ ታ ጊዶን ዴዔናን ꬋዮፔ፥ ኣይፊያ ኣይፋናው ዳንዳዪኪታ። «ታኒ ዎዪኒያ ቱራው ኣኖ፤ ሂንቴንቱ ሄ ቱራ ማራቱዋ። ታ ጊዶን ዴዒያ ኡራይ፥ ታኒካ ኣ ጊዶን ዴዒያ ኡራይ፥ ዳሮ ኣይፊያ ኣይፋና፤ ኣዪሲ ጎፔ፥ ታኒ ባይናን ሂንቴሬካ ኣይኔ ኦꬃናው ዳንዳዪኪታ። ታ ጊዶን ዴዔና ኡራይ ቱራ ማራዳን፥ ካሬን ዬጊና ሜሌዳዋ ሺሺዴ ታማን ዎꬂና፥ ኢ ኤፃናዋ። ሂንቴንቱ ታ ጊዶን ዴዖፔ፥ ቃሲ ታ ቃላይካ ሂንቴንቱ ጊዶን ዴዖፔ፥ ሂንቴንቱ ኮዬዳዋ ኣያ ጊዲናካ ዎሲቴ፤ ሂንቴንቱ ኣካኒታ። ሂንቴንቱ ዳሮ ኣይፊያ ኣይፎፔኔ ቃሲ ታና ካሊያዋንታ ጊዶፔ፥ ሄዋን ታ ኣቡ ቦንቼታናዋ። ኣዉ ታና ሲቄዳዋዳን፥ ታኒካ ሂንቴንታ ሲቃዲ፤ ታ ሲቁዋን ዴዒቴ። ታኒ ታ ኣቡ ኣዛዙዋ ናጋዴ ኣ ሲቁዋን ዴዔዳዋዳን፥ ሂንቴንቱካ ታ ኣዛዙዋ ናጎፔ፥ ታ ሲቁዋን ዴዓኒታ። «ታ ናሼቻይ ሂንቴናና ዴዓና ማላኔ፥ ሂንቴንቱ ናሼቻይ ኩሜንꬃ ጊዳና ማላ፥ ታኒ ሃዋ ሂንቴንቱሲ ኦዳዲ። ታ ኣዛዙ ሃዋ፤ ታኒ ሂንቴንታ ሲቂያዋዳን፥ ሂንቴንቱካ ኢቱ ኢቱዋና ሲቄቲቴ። ባሬ ሼምፑዋ ባሬ ላጌው ኣꬂዴ ኢሚያዋፔ ኣꬊያ ሲቁ ኦሲኔካ ባዋ። ታኒ ሂንቴንታ ኣዛዜዳዋ ኡባ ኦꬆፔ፥ ሂንቴንቱ ታ ላጌቱዋ። «ኣይሊ ባሬ ጎዳይ ኦꬂያዋ ኤሬና ዲራው፥ ታኒ ሂንቴንታ ሃዋፔ ሲንꬃው ኣይላቱዋ ጊኬ፤ ሺን ታኒ ሂንቴንታ ታ ላጌቱዋ ጋዲ። ኣዪሲ ጎፔ፥ ታ ኣዉዋፔ ሲሴዳ ኡባባ ታኒ ሂንቴንቱሲ ኦዳዲ። ታኒ ሂንቴንታ ዶሬዳዋፔ ኣቲን፥ ሂንቴንቱ ታና ዶሪቤይኪታ። ሂንቴንቱ ቢዴ ኣይፊያ ኣይፋና ማላኔ ዴዓና ማላ፥ ታኒ ሂንቴንታ ሱንꬃዲ። ቃሲ ኣዉካ ሂንቴንቱ ታ ሱንꬃን ዎሴዳዋ ኡባ ኢማና። ታኒ ሂንቴንታ ኣዛዚያዌ ሃዋ፤ ኢቱ ኢቱዋና ሲቄቲቴ። «ኣላሚ ሂንቴንታ ኢፆፔ፥ ካሴቲዴ ታና ኢፄዳዋ ኣኬኪቴ። ሂንቴንቱ ኣላሚያሳ ጊዴዴንቶ፥ ኣላሚ ባሬዋዳን ሂንቴንታ ሲቃና፤ ሺን ታኒ ሂንቴንታ ኣላሚያፔ ዶሬዳዋፔ ኣቲን፥ ሂንቴንቱ ኣላሚያሳ ጊዲኪታ፤ ኣላሚ ሂንቴንታ ኢፂያዌ ሃዋሳ። ‹ኣይሊ ባሬ ጎዳፔ ዳሬና› ጋዴ ታኒ ሂንቴንቱሲ ኦዴዳዋ ሃሳዪቴ። ኡንቱንቱ ታና ዬዴርሴዳዋ ጊዶፔ፥ ሂንቴናካ ዬዴርሳና። ኡንቱንቱ ታ ቃላ ናጌዳዋ ጊዶፔ፥ ሂንቴንቱ ቃላካ ናጋናዋንታ። ሺን ኡንቱንቱ ታና ኪቴዳዋ ኤሬና ዲራው፥ ሃ ኡባ ታ ጋሱዋን ኡንቱንቱ ሂንቴንቱ ቦላ ኦꬃናዋንታ። ታኒ ያዴ ኡንቱንቱሲ ኦዴናዋ ጊዲንቶ፥ ኡንቱንቱሲ ናጋራ ጊዴና፤ ሺን ሃዒ ኡንቱንቱ ኦꬂያ ናጋራ ጋሶዪያዌ ባዋ። ታና ኢፂያዌ ታ ኣዉዋካ ኢፄዳ። ኦኒኔ ኦꬂቤና ኦሱዋ ኡንቱንቱ ጊዶን ታኒ ኦꬃቤናባ ጊዲንቶ፥ ኡንቱንቱሲ ናጋራ ጊዴናን ኣታናዋ፤ ሺን ሃዒ ኡንቱንቱ ታኒ ኦꬄዳ ኦሱዋ ቤዒዴ፥ ታናካ ታ ኣዉዋካ ኢፄዲኖ። *** ሺን ኡንቱንቱ ሂጊያን፥ ‹ታና ጮ ኢፄዲኖ› ጌቴቲዴ ፃፌቴዳዌ ፖሌታና ማላ፥ ሃዌ ሃኔዳ። «ሺን ኣዉዋፔ ዪያ ቱማቴꬃ ኣያናይ ሜንꬄꬂያዌ ያናዋ። ታኒ ኣዉዋፔ ሂንቴንቱሲ ኣ ዬዳና፤ ቃሲ ኢ ታባ ማርካታናዋ። ሂንቴካ ቃሲ ካሴፔ ዶሚዴ፥ ታናና ዴዒያ ዲራው፥ ታባ ማርካታና። «ታኒ ሃዋ ሂንቴንቱ ꬉቤቴና ማላ፥ ሂንቴንቱሲ ኦዳዲ። ኡንቱንቱ ሂንቴንታ ባሬንቱ ኣዪሁዳ ዎሳ ጎሊያፔ ኬሲ ዬዳናዋንታ። ሄዋ ቦላ ቃሲ ሂንቴንታ ዎꬊያ ኡራይ ፆሳው ኦꬂያዋ ኣው ማላቲያ ዎዲ ያናዋ። ኡንቱንቱ ሄዋ ሂንቴንቱ ቦላ ኦꬂያዌ ታናኔ ኣዉዋ ኤሬና ዲራሳ። ሺን ኡንቱንቱ ሄዋ ሂንቴንቱ ቦላ ኦꬂያ ዎዲ ጋኪያ ዎዴ፥ ታኒ ሂንቴንቱሲ ኦዴዳዋ ሂንቴንቱ ሃሳያና ማላ፥ ታኒ ሂንቴንቱሲ ሃዋ ኦዳዲ። «ታኒ ሂንቴናና ዴዒያ ዲራው፥ ኮይሮ ሄዋ ሂንቴንቱሲ ኦዳቤይኬ። ሺን ሃዒ ታኒ ታና ኪቴዳዋኮ ባይ፤ ሺን ሂንቴፔ ኦኒኔ፥ ‹ሃቃ ባይ?› ጊዴ ታና ኦቺያዌ ባዋ። ሺን ታኒ ሃዋ ኦዴዳ ዲራው፥ ሂንቴንቱ ዎዛናን ዳሮ ካዩ ዴዔ። ሺን ታኒ ሂንቴንቱሲ ቱሙዋ ኦዳይ፤ ታኒ ቢያዌ ሂንቴንቱሲ ሎዓ። ኣዪሲ ጎፔ፥ ታኒ ባና ꬋዮፔ፥ ሜንꬄꬂያዌ ሂንቴንቱኮ ዬና፤ ሺን ታኒ ቦፔ፥ ኣ ሂንቴንቱኮ ዬዳና። ቃሲ ሜንꬄꬂያዌ ዪዴ፥ ኡንቱንቱ ናጋራባ፥ ፆሳ ፂሎቴꬃባኔ ፒርዳባ ሃ ሳዓ ኣሳይ ባዪዜዳዋ ቤሳናዋ። ናጋራባይ ኣሳይ ታና ኣማኔና ዲራሳ። ፂሎቴꬃባይ ቃሲ ታኒ ኣዉዋኮ ቢያ ዲራው፥ ሂንቴንቱ ታና ላዔንꬁዋ ቤዒኪታ። ፆሳ ፒርዳባይ ቃሲ ኣላሚያ ሞዲያዌ ፒርዴቴዳ ዲራሳ። «ታኒ ሂንቴንቱሲ ኦዲያባይ ዳሮባይ ዴዔ፤ ሺን ሃዒ ሂንቴንቱሲ ጌሌና። ቱማቴꬃ ኣያናይ ዪያ ዎዴ፥ ሂንቴንታ ቱማቴꬃ ኡባኮ ካሌꬃናዋ። ኣዪሲ ጎፔ፥ ኢ ባሬ ሲሴዳዋ ኦዳናፔ ኣቲን፥ ባሬፔ ኣይኔ ኦዴና። ቃሲ ሲንꬃፔ ያናባ ሂንቴንቱሲ ኢ ኦዳናዋ። ኢ ታና ቦንቻናዋ፤ ኣዪሲ ጎፔ፥ ኢ ታው ዴዒያዋፔ ኣኪዴ፥ ሂንቴንቱሲ ኦዳናዋ። ኣዎ ዴዒያባይ ኡባይ ታዋ፤ ሜንꬄꬂያዌ ታው ዴዒያባፔ ኣኪዴ፥ ሂንቴንቱሲ ኦዳናዋ ታኒ ጌዳዌ ሃዋሳ። «ጉꬃ ዎዲያፔ ጉዪያን፥ ሂንቴንቱ ታና ቤዒኪታ፤ ቃሲ ጉꬃ ዎዲያፔ ጉዪያን፥ ሂንቴንቱ ታና ቤዓና» ያጌዳ። ዬሱሳ ካሊያዋንቱፔ ኢቱ ኢቱ ባሬንቱ ጊዶን፥ « ‹ጉꬃ ዎዲያፔ ጉዪያን፥ ሂንቴንቱ ታና ቤዒኪታ፤ ቃሲ ጉꬃ ዎዲያፔ ጉዪያን፥ ሂንቴንቱ ታና ቤዓኒታ፤ ኣዪሲ ጎፔ፥ ታኒ ኣዉዋኮ ባይ› ጊያዌ ሄዌ ዋጊያዌ?» ያጌዲኖ። « ‹ጉꬃ ዎዲያፔ ጉዪያን› ጊያዌ ዋጊያዌ? ኢ ኣዪሲ ሃሳዪንቶኔ ኑሲ ኤሬቴና» ያጌዲኖ። ኡንቱንቱ ባሬና ኦቻናው ኮዪያዋ ዬሱሲ ኤሪዴ፥ ኡንቱንታ ያጌዳ፤ «ታኒ፥ ‹ጉꬃ ዎዲያፔ ጉዪያን፥ ሂንቴንቱ ታና ቤዒኪታ፤ ቃሲ ጉꬃ ዎዲያፔ ጉዪያን፥ ሂንቴንቱ ታና ቤዓና› ጌዳዎ ሂንቴንቱ ኢቱ ኢቱዋ ኦቺቴ? ታኒ ሂንቴንቱሲ ቱሙዋ ኦዳይ። ሂንቴንቱ ዬካናኔ ካዮታና፤ ሺን ሃ ኣላሚ ናሼታና። ቃሲ ሂንቴንቱ ካዮታና፤ ሺን ሂንቴንቱ ካዮቶዌ ናሼቻ ጊዳናዋ። ኢቲ ሚሺራታ ናዓ ዬላና ሃኒያ ዎዴ፥ ባሬ ዬሊያ ዎዲ ጋኬዳ ዲራው፥ ኦይቄታው፤ ሺን ናዓይ ዬሌቴዳዋፔ ጉዪያን፥ ናዓይ ሃ ሳዓን ዬሌቴዳ ናሼቻ ዲራው፥ ባሬ ኦይꬃ ሃሳዩኩ። ሄዋ ዲራው፥ ሂንቴንቱካ ሂንቴንቱ ዎዛናን ካዮቲታ፤ ሺን ታኒ ላዔንꬁዋ ሂንቴንታ ቤዓና፤ ቃሲ ሂንቴንቱ ዎዛናይ ሎይꬂ ናሼታና፤ ሂንቴንቱ ናሼቻ ኦኒኔ ሂንቴፔ ኣኬና። «ሄ ጋላሲ ሂንቴንቱ ታና ኣይኔ ዎሲኪታ። ታኒ ሂንቴንቱሲ ቱሙዋ ኦዳይ፤ ሂንቴንቱ ታ ሱንꬃን ዎሲያዋ ኡባ ኣዉ ሂንቴንቱሲ ኢማናዋ። ሃዒ ጋካናሲ ታ ሱንꬃን ኣይኔ ዎሲቤይኪታ፤ ሂንቴንቱ ናሼቻይ ፖሌታና ማላ፥ ፆሳ ዎሲቴ፤ ሂንቴንቱ ኣካና። «ሃዋ ታኒ ሂንቴንቱሲ ሌሚሱዋን ኦዳዲ፤ ሺን ታኒ ሌሚሱዋን ኦዴና ዎዲ ያናዋ፤ ሺን ኣዉዋባ ታኒ ሂንቴንቱሲ ቆንጪያን ኦዳና። ታኒ ሄ ጋላሲ፥ ሂንቴንቱ ታ ሱንꬃን ኣዉዋ ዎሳና፤ ቃሲ ሂንቴንቱ ዲራው፥ ታኒ ኣዉዋ ዎሳና ጊኬ። ኣዪሲ ጎፔ፥ ኣዉ ባሬ ሁጴው ሂንቴንታ ሲቄ፤ ሂንቴንቱ ታና ሲቂያ ዲራዉኔ ታኒ ኣዉዋ ማታፔ ዬዳዋ ኣማኖ ዲራው፥ ኢ ሂንቴንታ ሲቄ። ታኒ ኣዉዋ ማታፔ ሃ ኣላሚያ ያዲ፤ ቃሲ ሃ ኣላሚያ ኣጋዴ ኣዉዋኮ ባና» ያጌዳ። ዬሱሳ ካሊያዋንቱ ዛሪዴ ዬሱሳ፥ «ቤዓ፥ ሃዒ ኔኒ ቆንጪያን ሃሳያሳ፤ ሌሚሱዋን ኣይኔ ሃሳያካ። ኔኒ ኡባባ ኤሪያዋ ኑኒ ሃዒ ኤሬቶ፤ ቃሲ ኔና ኦኒኔ ኦቻና ማላ፥ ኔኒ ኮዬናዋ ኤሬቶ። ሄዌ ኑና ኔኒ ፆሳፔ ዬዳዋ ኣማንꬄ» ያጌዲኖ። ዬሱሲ ዛሪዴ ኡንቱንታ፥ «ሃዒ ኣማኒቴ? ቤዒቴ፥ ሂንቴንቱ ሂንቴንቱ ጎሌ ጎሌ ላሌቲያ ዎዲኔ ታ ፃላላ ዬጊ ባሺያ ዎዲ ያናዋ፤ ሃዒካ ዪዲጌዳ። ሺን ኣዉ ታናና ዴዒያ ዲራው፥ ታ ፃላላ ጊዲኬ። ሂንቴንቱ ታ ጊዶን ዴዒዴ፥ ሳሮ ዴዓና ማላ፥ ታኒ ሃዋ ሂንቴንቱሲ ኦዳዲ። ኣላሚያን ሂንቴንቱ ዋዬታና። ሺን ሚኒቴ፤ ታኒ ኣላሚያ ፆናዲ» ያጌዳ። ዬሱሲ ሄዋ ሃሳዬዳዋፔ ጉዪያን፥ ፑዴ ሳሉዋ ፄሊዴ፥ ሃዋዳን ያጌዳ፤ «ታ ኣቦ፥ ዎዲ ጋኬዳ፤ ኔ ናዓይ ኔና ቦንቻና ማላ፥ ኔኒካ ኔ ናዓ ቦንቻ። ኣዪሲ ጎፔ፥ ኔኒ ኣው ኢሜዳ ኡባው ሜꬊና ዴዑዋ ኢ ኢማና ማላ፥ ኣሳ ኡባ ቦላን ኣው ማታ ኢማዳ። ኣሳይ ኔና ኢቲ ቱሙ ፆሳ ጊዴዳዋ ኤራና ማላኔ፥ ቃሲ ኔኒ ኪቴዳ ዬሱሲ ኪሪስቶሳ ኤራና ማላ፥ ሃዌ ሜꬊና ዴዑዋ። ኔኒ ታው ኦꬃናው ኢሜዳ ኦሱዋ ፖላዴ፥ ኔና ሳዓን ቦንቻዲ። ሃዒካ ቃሲ ኣዎ፥ ኣላሚ ሜꬌታናፔ ካሴ ኔ ማታን ታው ዴዒያ ቦንቹዋን ኔ ሲንꬃን ታና ቦንቻ። «ኣላሚያ ኣሳፔ ኔኒ ታው ኢሜዳዋንቶ ኔ ሱንꬃ ኤሪሳዲ፤ ኡንቱንቱ ኔዋንታ፤ ቃሲ ኔኒ ኡንቱንታ ታው ኢማዳ። ኡንቱንቱ ኔ ቃላዉካ ኣዛዜቴዲኖ። ሃዒ ኔኒ ታው ኢሜዳ ኡባባይ ኔፔ ዬዳዋ ኡንቱንቱ ኤሪኖ። ኣዪሲ ጎፔ፥ ኔኒ ታው ኢሜዳ ቃላ ታኒ ኡንቱንቱሲ ኢማዲ፤ ኡንቱንቱካ ሄ ቃላ ኣኬዲኖ። ታኒ ኔ ማታፔ ዬዳዌ ቱማ ጊዲያዋ ኤሪዴ ኔኒ ታና ኪቴዳዋካ ኣማኔዲኖ። «ታኒ ኡንቱንቱሲ ዎሳይ፤ ኣላሜው ኔና ዎሲኬ። ሺን ኔኒ ታው ኢሜዳ ኣሳው ዎሳይ፤ ኣዪሲ ጎፔ፥ ኡንቱንቱ ኔዋንታ። ታው ዴዒያ ኡባባይ ኔባ፤ ቃሲ ኔው ዴዒያ ኡባባይካ ታባ። ታኒ ኡንቱንቱ ባጋና ቦንቼታዲ። ታኒ ሃዋፔ ጉዪያን፥ ኣላሚያን ዴዒኬ፤ ኡንቱንቱ ኣላሚያን ዴዒኖ፤ ታኒ ሃዒ ኔኮ ባይ። ጌሻ ኣዎ፥ ሃ ኔኒ ታው ኢሜዳዋንቱ ኔኒኔ ታኒ ኢቱዋ ጊዲያዋዳን፥ ኡንቱንቱ ኢቱዋ ጊዳና ማላ፥ ኡንቱንታ ኔ ሱንꬃን ናጋ። ታኒ ኡንቱንቱና ኣላሚያን ዴዓዴ፥ ኔኒ ታው ኢሜዳ ኔ ሱንꬃ ዎልቃን ኡንቱንታ ናጋዲ። ታኒ ኡንቱንታ ናጋዲ፤ ፆሳ ማፃፋይ ጌዳዌ ፖሌታና ማላ፥ ባሻይ ቤሲያ ኡራፔ ኣቲን፥ ኡንቱንቱፔ ሃራይ ኦኒኔ ባይቤና። «ሃዒ ታኒ ኔኮ ባይ፤ ኡንቱንቱ ዎዛናን ታ ናሼቻይ ፖሌታና ማላ፥ ሃዋ ታኒ ኣላሚያን ሃሳያይ። ታኒ ኡንቱንቱሲ ኔ ቃላ ኢማዲ፤ ታኒ ኣላሚያሳ ጊዴናዋዳን፥ ኡንቱንቱካ ኣላሚያሳ ጊዴና ዲራው፥ ኣላሚ ኡንቱንታ ኢፄዳ። ኔኒ ፃላሂያፔ ኡንቱንታ ናጋና ማላ ዎሲያዋፔ ኣቲን፥ ኣላሚያፔ ኬሳና ማላ ዎሲኬ። ታኒ ኣላሚያሳ ጊዴናዋዳን፥ ኡንቱንቱካ ኣላሚያሳ ጊዲኪኖ። ኔኒ ቱማቴꬃን ኡንቱንታ ኔዋንታ ኦꬃ፤ ኔ ቃላይካ ቱማቴꬃ። ኔኒ ታና ኣላሚያ ኪቴዳዋዳን፥ ታኒካ ኡንቱንታ ኣላሚያ ኪታዲ፤ ቃሲ ኡንቱንቱ ቱማቴꬃን ኔው ዱማታና ማላ፥ ኡንቱንቱ ዲራው፥ ታኒ ታ ሁጲያ ኔው ዱማያዲ። «ታኒ ኡንቱንቱ ፃላላው ዎሲኬ፤ ሺን ኡንቱንቱ ቃላ ኦዲና፥ ታና ኣማኔዳዋንቶካ ዎሳይ። ኡንቱንቱ ኡባይ ኢቱዋ ጊዳና ማላ፥ ታኒ ዎሳይ። ኣዎ፥ ኔኒ ታ ጊዶን ዴዒያዋዳን፥ ቃሲ ታኒካ ኔ ጊዶን ዴዒያዋዳን፥ ኡንቱንቱ ኑ ጊዶን ዴዒኖ። ቃሲ ኔኒ ታና ኪቴዳዋ ኣላሚ ኣማናና ማላ፥ ኡንቱንቱ ኢቱዋ ጊዲኖ። ኔኒኔ ታኒ ኢቱዋ ጊዲያዋዳን፥ ኡንቱንቱ ኢቱዋ ጊዳና ማላ፥ ኔኒ ታና ቦንቼዳዋዳን፥ ታኒካ ኡንቱንታ ቦንቻዲ። ታኒ ኡንቱንቱ ጊዶን ዴዒና፥ ኔኒ ታ ጊዶን ዴዒና፥ ቃሲ ኔኒ ታና ሲቂያዋዳን፥ ኡንቱንታካ ሲቆዋኔ ኔኒ ታና ሃ ኣላሚያ ኪቴዳዋ ኣላሚ ኤራናዳን፥ ኡንቱንቱ ኡባ ኢቱዋ ጊዲኖ። «ኣዎ፥ ሳዓይ ሜꬌታናፔ ካሴ ኔኒ ታና ሲቄዳ ዲራው፥ ታው ኢሜዳ ታ ቦንቹዋ ኡንቱንቱ ቤዓና ማላ፥ ኔኒ ታው ኢሜዳዋንቱ ታኒ ዴዒያ ሳዓን ታናና ዴዓና ማላ ኮያዲ። «ፂሎ ኣዎ፥ ኣላሚያ ኣሳይ ኔና ኤሬና፤ ሺን ታኒ ኔና ኤራይ። ቃሲ ኔኒ ታና ኪቴዳዋ ሃዋንቱ ኤሪኖ። ኔኒ ታና ሲቄዳ ሲቁ ኡንቱንቱ ጊዶን ዴዓና ማላ፥ ቃሲ ታኒካ ኡንቱንቱ ጊዶን ዴዓና ማላ፥ ታኒ ኔ ሱንꬃ ኡንቱንታ ኤሪሳዲ፤ ሲንꬃዉካ ኤሪሳና» ያጌዳ። ዬሱሲ ሄዋ ጊዴ፥ ፆሳ ዎሴዳዋፔ ጉዪያን፥ ባሬና ካሊያዋንቱና ቄዲሮና ጊያ ዛንጋራ ፒኔዳ። ሄ ሳዓን ኣቲኪልቲያ ሳዓይ ዴዔ፤ ዬሱሲኔ ዬሱሳ ካሊያዋንቱ ጌሌዲኖ። ዬሱሳ ኣꬂ ኢሜዳ ዪሁዳይ ሄ ሳዓ ኤሬዳ፤ ኣዪሲ ጎፔ፥ ዬሱሲ ኡባ ዎዴ ባሬና ካሊያዋንቱና ሄዋን ሺቄ። ሄዋ ዲራው፥ ካሌꬂያ ቄሳቱዋ ካፓቱኔ ፓሪሳዋቱ ዪሁዳና ባናዳን ኢሜዳ ሮማ ዎታዳራቱኔ ጌሻ ጎሊያ ናጊያዋንቱ ኩራዚያ፥ ያቢያኔ ቶራ ኦይቂዴ ሄ ሳዓ ቤዲኖ። ዬሱሲ ባሬና ጋካናው ሃኒያ ኡባባ ኤሪዴ፥ ጋፃ ኬሲዴ፥ «ኦና ኮዪቴ?» ያጌዳ ኡንቱንቱ ዛሪዴ፥ «ናዚሬቲያ ዬሱሳ ኮዬቶ» ያጌዲኖ። ዬሱሲ ዛሪዴ፥ «ታኒ ኣ» ያጌዳ። ዬሱሳ ኣꬂ ኢሜዳ ዪሁዳይካ ሄዋን ኡንቱንቱና ኤቄዳ፤ ዬሱሲ፥ «ታኒ ኣ» ጌዳ ዎዴ፥ ኡንቱንቱ ጉዬኮ ሺቂዴ፥ ሳዓን ኩንዴዲኖ። ዬሱሲ ቃሲካ፥ «ኦና ኮዪቴ?» ያጊ ኦቺና ኡንቱንቱ፥ «ናዚሬቲያ ዬሱሳ» ያጌዲኖ። ዬሱሲ ዛሪዴ፥ «ታኒ ኣ ጊዲያዋ ሂንቴንቱሲ ኦዳዲ፤ ሲሚ ሂንቴንቱ ታና ኮዪያዋ ጊዶፔ፥ ሃዋንታ ዬዲቴ» ያጌዳ። ኢ፥ «ታ ኣቦ፥ ኔኒ ታው ኢሜዳዋንቱፔ ሃራይ ኣቶ፥ ኢቱዋካ ባዪዛቤይኬ» ጌዳዌ ፖሌታና ማላ፥ ሄዋ ጌዳ። ሲሞኒ ጴፂሮሳው ማሻይ ዴዔ፤ ኢ ሄ ማሻ ሾዲኔ ቄሳቱዋ ኡባቱዋ ካፑዋ ቆማ ኡሼቻ ሃይꬃ ሾጪዴ፥ ቃንፂ ዬጌዳ። ሄ ቆማ ሱንꬃይ ማልኮሳ። ዬሱሲ ጴፂሮሳ፥ «ኔ ማሻ ሾኩዋን ዛራዴ ዎꬃ! ታ ኣቡ ታው ኢሜዳ ሜቱዋ ፁዓ ታኒ ኡሺኪታ?» ያጌዳ። ሻላቃይ፥ ዳሮ ዎታዳራቱኔ ቃሲ ጌሻ ጎሊያ ናጊያዋንቱ ዬሱሳ ኦይቂዴ ቃቼዲኖ። ኮይሮ ዬሱሳ ሃናኮ ኣፌዲኖ፤ ሃኒ ሄ ላይꬂ ቄሳቱዋ ካፓቱዋ ጊዴዳ ቃያፋ ቦሉዋ። «ኣሳ ኡባ ዲራው፥ ኢቲ ኣሳይ ሃይቂንቶ ሎዓ» ጊዴ ኣዪሁዳቱዋ ዞሬዳዌ ቃያፋ። ሲሞኒ ጴፂሮሲኔ ሃራ ኢቲ ካሊያዌ ዬሱሳ ካሊዴ ቤዲኖ። ሄ ሃራ ካሊያዋ ቄሳቱዋ ካፑ ኤሬዳ፤ ሄዌ ዬሱሳና ቄሳቱዋ ካፑዋ ዲርሳ ጋርሳ ጌሌዳ። ሺን ጴፂሮሴ ካሬና ዲርሳ ፔንጊያን ኤቄዳ። ቄሳቱዋ ኡባቱዋ ካፑ ኤሪያ ሃራ ካሊያዌ ካሬ ኬሲዴ፥ ፔንጊያ ናጊያ ናቲው ኦዲዴ፥ ጴፂሮሳ ዲርሳ ጋርሳ ጌሊሴዳ። ፔንጊያ ናጊያ ናታ ጴፂሮሳ፥ «ኔኒ ሃ ቢታኒያ ካሊያዋንቱፔ ኢቱዋ ጊዲኪዬ?» ያጋዱ። ኢ፥ «ቱይቲ፥ ታኒ ጊዲኬ» ያጌዳ። ሳዓይ ሜጊያ ዲራው፥ ኣይላቱኔ ጌሻ ጎሊያ ናጊያዋንቱ ታማ ኤፂዴ፥ ቦንቄዳዋ ዩዪ ኣꬊ ኤቂዴ ካሺኖ፤ ጴፂሮሲካ ኡንቱንቱና ኤቂዴ፥ ሄ ታማ ካሼ። ቄሳቱዋ ኡባቱዋ ካፑ፥ ዬሱሳ ካሊያዋንቱባኔ ኣ ቲሚርቲያባ ኦቼዳ። ዬሱሲ ኣው ዛሪዴ፥ «ታኒ ኣሳ ኡባው ቆንጪያን ኦዳዲ። ታኒ ኣዪሁዳ ኡባይ ሺቂያ ኣዪሁዳ ዎሳ ጎሌኒኔ ጌሻ ጎሊያን ኡባ ዎዴ ታማሪሳዲ፤ ጌማን ኣዪኔ ሃሳያቤይኬ። ያቲና፥ ኔኒ ታና ኣዪሲ ኦቻይ? ታኒ ኦዴዳዋ ሲሴዳ ኣሳ ኦቻ፤ ሄ ኣሳይ ታኒ ኦዴዳዋ ኤሬዳ» ያጌዳ። ዬሱሲ ሄዋ ጌዳ ዎዴ፥ ሄዋን ኤቄዳ ዎታዳራቱዋፔ ኢቱ ዬሱሳ ባቂዴ፥ «ቄሳቱዋ ኡባቱዋ ካፑዋ ቦላ ሃዋዳን ዛራይ?» ያጌዳ። ዬሱሲ ዛሪዴ፥ «ታኒ ባላባ ሃሳዬዳዋ ጊዶፔ፥ ሃዋን ዴዒያ ኣሳ ኡባው ኦዳ፤ ሺን ታኒ ቱሙዋ ሃሳዬዳዋ ጊዶፔ፥ ታና ኣዪሲ ባቃይ?» ያጌዳ። ሄዋ ዲራው፥ ሃኒ፥ ቃሼቲ ኡቴዳ ዬሱሳ፥ ቄሳቱዋ ኡባቱዋ ካፑዋ፥ ቃያፋኮ ዬዴዳ። ጴፂሮሲ ሄዋን ኤቂዴ፥ ታማ ካሼ፤ ሃራንቱ ኣ፥ «ኔኒ ሃ ቢታኒያ ካሊያዋንቱፔ ኢቱዋ ጊዲኪዬ?» ያጌዳ። ጴፂሮሴ፥ «ቱይቲ፤ ታኒ ጊዲኬ» ያጊዴ ካዴዳ። ቄሳቱዋ ኡባቱዋ ካፑዋ ቆማቱዋፔ ኢቱዋ፥ ጴፂሮሴ ሃይꬃ ቃንፄዳ ቢታኒያ ዳቡ ጴፂሮሳ፥ «ታኒ ኔና ኣናና ዳሮ ኣታኪልቲያ ጊዶን ቤዓቤይኪታዬ?» ያጊዴ ኦቼዳ። ጴፂሮሴ ቃሲካ ካዴዳ፤ ኤሌካ ኩቱ ዋሲ ኣጌዳ። ኡንቱንቱ ዬሱሳ ቃያፋ ጎሌፔ ሮሜ ኣሳ ኣዪሲያዋ ኦሶ ጎሊያ ኣፌዲኖ። ሳዓይ ዎንታ ጉራ፤ ኣዪሁዳቱ ፓሲጋ ቦንቺያ ጋላሳ ቁማ ማናው፥ ባሬንቱ ሁጲያሲ ቱኔና ማላ፥ ሮሜ ኣሳ ኣዪሲያዋ ኦሶ ጎሊያ ጌሊቤይኪኖ። ሄዋ ዲራው፥ ጲላፆሲ ኡንቱንቱኮ ካሬ ኬሲዴ፥ «ሃ ቢታኒያ ሂንቴንቱ ኣያኒ ሞቲቴ?» ያጌዳ። ኡንቱንቱ፥ «ኢ ኢታባ ኦꬂቤናዋ ጊዲንቶ፥ ኑኒ ኣ ኔኮ ኣሆኮ» ያጌዲኖ። ጲላፆሲ ዛሪዴ ኡንቱንቱሲ፥ «ሂንቴንቱ ኣ ኣፊዴ፥ ሂንቴንቱ ሂጊ ጊያዋዳን፥ ኣ ቦላ ፒርዲቴ» ያጌዳ። ኣዪሁዳቱ፥ «ኦናኔ ዎꬊያ ማታይ ኑሲ ባዋ» ያጌዲኖ። ሃዌ ሃኔዳዌ ዬሱሲ ኣይ ማላ ሃይቁዋ ሃይቃኔንቶ ኤሪሳናው ሃሳዬዳዌ ፖሌታናሳ። ጲላፆሲ ባሬ ኦሱዋ ጎሌ ላዔꬁዋ ጌሊዴ፥ ዬሱሳ ፄሲዴ፥ «ኔኒ ኣዪሁዳ ካቴ?» ያጊዴ ኣ ኦቼዳ። ዬሱሲ ጲላፆሳ፥ «ሃ ኦሻ ኔኒ ኔፔ ኦቻዪዬ ዎይ ሃራ ኣሳይ ኔው ታባ ኦዴዴ?» ያጌዳ። ጲላፆሲ ዛሪዴ፥ «ታና ኣዪሁዳ ኣሳ ጋይ? ኔ ዛሬቱኔ ቄሳቱዋ ካፓቱ ኔና ታው ኣꬂ ኢሜዲኖ፤ ኔኒ ኣያ ኦꬃዲ?» ያጌዳ። ዬሱሲ፥ «ታ ካዉቴꬃይ ሃ ኣላሚያና ጊዴና። ታ ካዉቴꬃይ ሃ ኣላሚያና ጊዴዴንቶ፥ ታና ኣዪሁዳቶ ኣꬂ ኢሜናዳን፥ ታው ኦꬂያዋንቱ ታው ኦሌታና፤ ሺን ታ ካዉቴꬃይ ሃ ኣልሚያና ጊዴና» ያጌዳ። ሄዋ ዲራው፥ ጲላፆሲ ዬሱሳ፥ «ያቲና፥ ኔኒ ካቴዬ?» ያጊዴ ኦቼዳ። ዬሱሲ ዛሪዴ፥ «ኔኒ ታና ካቲያ ጋዳ። ታኒ ቱማ ማርካታና ዲራው ዬሌታዲ፤ ቃሲ ሄዋ ዲራው፥ ሃ ኣላሚያ ያዲ። ቱሙዋ ባጋ ጊዴዳ ኦኒኔ ታኒ ጊያዋ ሲሴዳ» ያጌዳ። ጲላፆሲ፥ «ቱሙ ኣዬ?» ያጌዳ። ጲላፆሲ ሄዋ ጌዳዋፔ ጉዪያን፥ ኣዪሁዳቱዋኮ ካሬ ኬሲዴ፥ «ታኒ ኣኒ ኣይ ባላኔ ዴማቤይኬ። ሺን ፓሲጋ ቦንቺያ ጋላሲ፥ ኢቲ ኣሳ ታኒ ሂንቴንቱሲ ቃሹዋፔ ቢሊያ ዶያይ ዴዔ፤ ታኒ ሂንቴንቱሲ ኣዪሁዳቱ ካቲያ ቢሊያዋ ኮዪቴ?» ያጌዳ። ኡንቱንቱ ዛሪዴ፥ ባሬንቱ ኮሻ ꬎቁ ኡዲዴ፥ «ባርባና ቢላፔ ኣቲን፥ ኣ ጊዴና!» ያጌዲኖ። ሺን ባርባኒ ፓኑዋ። ሄዋፔ ጉዪያን፥ ጲላፆሲ ዬሱሳ ኦይቂዴ፥ ሊሱዋን ሾጬዳ። ዎታዳራቱ ኣጉንꬃፔ ኣኪሊሊያ ጊጊሲዴ፥ ኣ ሁጲያን ዎꬄዲኖ፤ ቃሲ ዞዖ ማዩዋካ ኣ ማዪዜዲኖ። ኣኮ ሺቂዴ፥ «ኣዪሁዳ ካቴው፥ ሼምፑዋ ጋሚዓ!» ያጊዴ ኣ ሻዪያ ባቄዲኖ። ጲላፆሲ ቃሲካ ካሬ ኬሲዴ ኣዪሁዳቱዋ፥ «ቤዒቴ፥ ታኒ ኣኒ ኣይ ባላኔ ዴማቤናዋ ሂንቴንቱ ኤራና ማላ፥ ኣ ሂንቴንቱኮ ካሬ ኬሳና» ያጌዳ። ሄዋፔ ጉዪያን፥ ዬሱሲ ኣጉንꬃ ኣኪሊሊያ ባሬ ሁጲያን ዎꬂዴ፥ ዞዖ ማዩዋ ማዪዴ፥ ካሬ ኬሴዳ፤ ጲላፆሲ ኣዪሁዳቱዋ፥ «ቢታኒያ ሃዋ ቤዒቴ» ያጌዳ። ቄሳቱዋ ካፓቱኔ ዎታዳራቱ ኣ ቤዔዳ ዎዴ፥ ባሬንቱ ኮሻ ꬎቁ ኡዲዴ፥ «ማስቃሊያ ቦላ ሚሲማሪያን ꬊሻዴ ኣ ሱላ! ሱላ!» ያጌዲኖ። ጲላፆሲ ኡንቱንታ፥ «ሂንቴንቱ ኣ ኣፊዴ፥ ማስቃሊያ ቦላ ሚሲማሪያን ꬊሺዴ ሱሊቴ፤ ኣዪሲ ጎፔ፥ ታኒ ኣይ ባላኔ ዴማቤይኬ» ያጌዳ። ኣዪሁዳቱ ዛሪዴ፥ «ኑሲ ሂጊ ዴዔ፤ ኑ ሂጊ ጊያዋዳን፥ ኢ ሃይቃናው ቤሴ፤ ኣዪሲ ጎፔ፥ ኢ ባሬና ፆሳ ናዓ ኦꬄዳ» ያጌዲኖ። ጲላፆሲ ሄዋ ሲሴዳ ዎዴ፥ ካሴዋፔ ሎይꬂ ያዬዳ። ቃሲካ ጲላፆሲ ባሬ ኦሱዋ ጎሌ ሲሚ ጌሊዴ ዬሱሳ፥ «ኔኒ ሃቃፔ ያዲ?» ያጊዴ ኦቼዳ፤ ሺን ዬሱሲ ኣው ኣይኔ ዛሪቤና። ሄዋ ዲራው፥ ጲላፆሲ ኣ፥ «ታው ኦዲኪ? ኔና ቢላናው ዎይ ማስቃሊያ ቦላ ሚሲማሪያን ꬊሻዴ ካቃናው ታው ማታይ ዴዒያዋ ኤሪኪዬ?» ያጌዳ። ዬሱሲ፥ «ፆሳይ ኔው ቦላፔ ማታ ኢሚቤናባ ጊዲንቶ፥ ኔው ታ ቦላ ማታይ ዴዔና ሺን። ሄዋ ዲራው፥ ታና ኔው ኣꬂ ኢሜዳዌ ኣꬊያ ናጋራ ኦꬄዳ» ያጌዳ። ጲላፆሲ ሄዋ ሲሴዳ ዎዴ፥ ዬሱሳ ቢላናው ኦጊያ ኮዬዳ፤ ሺን ኣዪሁዳቱ ባሬንቱ ኮሻ ꬎቁ ኡዲዴ፥ «ኔኒ ኣ ቢሊያዋ ጊዶፔ፥ ካቲያ ቄሳሬ ዳቦ ጊዳካ! ባሬና ካቲያ ጊያ ኦኒኔ ቄሳሬ ሞርኬ!» ያጌዲኖ። ጲላፆሲ ሄዋ ሲሲዴ፥ ዬሱሳ ካሬ ኬሴዳ። ያቲዴ ሹቻ ባሱዋ ጊያ ሳዓን ፒርዳ ኦይዲያን ኡቴዳ፤ ኢብራዪስፄ ቃላን ሄ ሳዓይ ጋይታ ጊያዋ። ሄ ጋላሳይ ፓሲጋ ቦንቺያ ጋላሳው ጊጊሲያ ጋላሳ፤ ሳዓይ ኡሱፑን ሳቲያ ሄራ ጊዳናዋ። ጲላፆሲ ኣዪሁዳቱዋ፥ «ሂንቴንቱ ካቲያ ሃዋ ቤዒቴ!» ያጌዳ። ኣዪሁዳቱ ባሬንቱ ኮሻ ꬎቁ ኡዲዴ፥ «ዲጋ! ዲጋ! ማስቃሊያ ቦላ ሚሲማሪያን ꬊሻዴ ሱላ!» ያጌዲኖ። ጲላፆሲ ዛሪዴ፥ «ሂንቴንቱ ካቲያ ታኒ ማስቃሊያ ቦላ ሚሲማሪያን ꬊሻዴ ሱሊያዋ ኮዪቴ?» ያጊዴ ኦቼዳ። ቄሳቱዋ ካፓቱ፥ «ቄሳሬፔ ሃራ ካቲ ኑሲ ባዋ!» ያጌዲኖ። ሄዋፔ ጉዪያን፥ ኡንቱንቱ ማስቃሊያ ቦላ ሚሲማሪያን ꬊሺዴ፥ ዬሱሳ ካቃና ማላ፥ ጲላፆሲ ኡንቱንቱሲ ኣꬂ ኢሜዳ። ኡንቱንቱ ዬሱሳ ኦይቂዴ፥ ኣፌዲኖ። ዬሱሲ ባሬ ማስቃሊያ ቶኪዴ፥ ጉጊያሳ ጌቴቲያሳ ቤዳ። «ጉጊያሳ» ጊያዌ ኢብራዪስፄ ቃላን «ጎልጎꬃ» ጊያዋ። ኡንቱንቱ ሄ ሳዓን ማስቃሊያ ቦላ ሚሲማሪያን ꬊሺዴ፥ ዬሱሳ ካቄዲኖ፤ ቃሲ ኣናና ሃራ ላዑ ኣሳቱ፥ ኢቱዋ ያ ባጋና ቃሲ ኢቱዋ ሃ ባጋና ዬሱሳ ጊዱዋን ዎꬂዴ፥ ማስቃሊያ ቦላ ሚሲማሪያን ꬊሺዴ ካቄዲኖ። ጲላፆሲ ፂፋቲያ ፃፊዴ፥ ማስቃሊያ ቦላ ዎꬄዳ። ኢ ፃፌዳዌ፥ «ኣዪሁዳቱ ካቲያ፥ ናዚሬቲያ ዬሱሳ» ያጌ። ዬሱሲ ማስቃሊያ ቦላ ሚሲማሪያን ꬊሼቲዴ ሱሌቴዳ ሳዓይ ካታማ ማታን ዴዒያ ዲራው፥ ዳሮ ኣዪሁዳቱ ሄ ፂፋቲያ ናባቤዲኖ። ፂፋቲ ኢብራዪስፄ ቃላን፥ ሮማይስፄ ቃላኒኔ ጊሪኬ ቃላን ፃፌቴዳ። ሄዋ ዲራው፥ ኣዪሁዳ ቄሳቱዋ ካፓቱ ጲላፆሳ፥ « ‹ሃ ቢታኒ ባሬና ኣዪሁዳ ካቲያ ያጌዳ› ጋዴ ፃፋፔ ኣቲን፥ ‹ኣዪሁዳ ካቲያ› ጋዴ ፃፎፓ» ያጌዲኖ። ጲላፆሲ፥ «ታኒ ፃፌዳዋ ፃፋ ዲጋዲ» ያጊዴ ዛሬዳ። ዎታዳራቱ ማስቃሊያ ቦላ ሚሲማሪያን ꬊሺዴ፥ ዬሱሳ ካቄዳዋፔ ጉዪያን፥ ኣ ማዩዋ ኣኪዴ፥ ኦይዱ ኬሲ ሻኬዲኖ፤ ኢቲ ኢቲ ዎታዳራ ኢቲ ሻኩ ጋኬዳ። ኣ ኣዱሳ ማዩዋካ ኣኬዲኖ፤ ኣዱሳ ማዩ ሃሺያፔ ዶሚዴ፥ ዱጌ ጋካናው ዬዲ ማዬቲያዋፔ ኣቲን፥ ቃንፄቲዴ ሲኬቲቤና። ዎታዳራቱ ኢቱ ኢቱዋ፥ «ኦና ጋካኔንቶ፥ ሳማ ዎይ ኤፃ ዬጋናፔ ኣቲን፥ ማዩዋ ፔꬎኮ» ያጌዲኖ። ሄዌ ሃኔዳዌ ፆሳ ማፃፋይ፥ «ታ ማዩዋ ሻኪ ኣኬዲኖ፤ ታ ኣዱሳ ማዩዋን ሳማ ዬጌዲኖ» ጊያዌ ፖሌታናሳ። ሄዋ ዲራው፥ ዎታዳራቱ ሄዋ ኦꬄዲኖ። ሺን ዬሱሳ ማስቃሊያ ማታን ኣ ዳያ፥ ኣ ኣቲ ሚቻታ፥ ቃሊዮጳ ማቻታ ማይራማኔ ማግዳላ ጌቴቲያ ካታማፔ ዬዳ ማይራማ ኤቄዲኖ። ዬሱሲ ባሬ ዳያኔ ኢ ሲቂያ ካሊያዌ ሄዋን ኤቄዳዋንታ ቤዒዴ፥ ባሬ ዳዮ፥ «ሃ ሚሺራቴ፥ ኔ ናዓ ሃዋ ቤዓ!» ያጌዳ። ሄዋፔ ጉዪያን፥ ሄ ካሊያዋ «ኔ ዳዮ ሃኖ ቤዓ!» ያጌዳ። ሄ ካሊያዌ ኢዞ ሄ ሳቲያፔ ዶሚዴ፥ ባሬ ሶይ ኣፌዳ። ሄዋፔ ጉዪያን፥ ዬሱሲ ኡባባይ ሃዒ ፖሌቴዳዋ ኤሪዴ፥ ፆሳ ማፃፋይ ጌዳዌ ፖሌታና ማላ፥ «ታና ሳሜ» ያጌዳ። ሄ ሳዓን ኢቲ ፁጋ ኩሜዳ ጫላ ዎዪኒያ ኤሳይ ዴዔ። ኡንቱንቱ ኢስፖንጂያ ሄ ዎዪኒያ ኤሳን ዬጊዴ፥ ሂሶጲያ ጌቴቲያ ሚꬃ ፄራን ዎꬂዴ፥ ዬሱሳ ዶናኮ ሺሼዲኖ። ዬሱሲ ዎዪኒያ ኤሳ ጋንፂ ቤዔዳዋፔ ጉዪያን፥ «ፖሌቴዳ» ያጌዳ። ቃሲ ሄዋፔ ጉዪያን፥ ባሬ ሁጲያ ቶቺዴ፥ ባሬ ሼምፑዋ ኢሜዳ። ሄ ጋላሳይ ኣዪሁዳቱዋሲ ጊጌቲያ ጋላሳ ጊዲያ ዲራዉኔ ቃሲ ሄ ሳምባታይ ዳሮ ቦንቾ ጊዲያ ዲራው፥ ሳምባታን ኣሳቱዋ ኣኃይ ማስቃሊያ ቦላ ፔሼና ማላ፥ ሱሌቴዳ ኣሳቱዋ ሱዪሊያ ሜንꬂዴ፥ ማስቃሊያፔ ዎꬃና ማላ፥ ኣዪሁዳቱ ጲላፆሳ ዎሴዲኖ። ሄዋ ዲራው፥ ዎታዳራቱ ዪዴ፥ ዬሱሳና ሱሌቴዳ ኮይሮ ቢታኒያ ሱዪሊያ ሜንꬄዲኖ፤ ቃሲ ኣናና ሱሌቴዳ ላዔꬆ ቢታኒያ ሱዪሊያካ ሜንꬄዲኖ። ሺን ዬሱሳኮ ዬዳ ዎዴ ኢ ሃይቂዲጌዳዋ ቤዒዴ፥ ኣ ሱዪሊያ ሜንꬂቤይኪኖ። ጊዶፔኔ፥ ዎታዳራቱዋፔ ኢቱ ኣ ሚዪያ ቶራን ጫዴዳ። ኤሌካ ሱꬃይኔ ሃꬃይ ጎጊ ኣጌዳ። ሂንቴንቱ ኣማናና ማላ፥ ሃዋ ቤዔዳዌ ማርካቴዳ፤ ኢ ማርካቲያዌካ ቱሙዋ፤ ቃሲ ባሬ ሃሳያይ ቱማ ጊዲያዋ ኢ ኤሬዳ። ሄዌ ሃኔዳዌ ፆሳ ማፃፋይ፥ «ኣ ሜቄꬃቱዋፔ ኢቱኔ ሜዔና» ጌዳዌ ፖሌታናሳ። ቃሲካ ፆሳ ማፃፋይ ሃራይ፥ «ኣሳይ ባሬ ጫዴዳዋ ቤዓና» ያጌ። ሄዋፔ ጉዪያን፥ ኣርማቲያሳ ጌቴቲያ ካታማፔ ዬዳ ዮሴፎ ዬሱሳ ኣኃ ኣኪዴ ኣፋናው ጲላፆሳ ዎሴዳ፤ ዮሴፎ ኣዪሁዳቶ ያዬዳ ዲራው፥ ኣሳይ ኤሬናን ዬሱሳ ካሊያዋ። ዮሴፎ ዎሲና ጲላፆሲ፥ «ኣፋ» ያጌዳ። ሄዋ ዲራው፥ ዮሴፎ ቢዴ፥ ዬሱሳ ኣኃ ኣፌዳ። ቃሲ ኒቆዲሞሲ ሄዋፔ ካሴ ዬሱሳኮ ቃማ ዬዳዌ፥ ካዋራናኔ ጎዳሬ ኡꬃና ዋላኬቴዳ ኦይታማኔ ኢቼሹ ኪሎ ጊራሜ ጊዲያዋ ኬና ሺቱዋ ኦይቂ ኣኪዴ፥ ዮሴፎና ዬዳ። ሄ ላዑ ኣሳቱ ዬሱሳ ኣኃ ኣኪዴ፥ ኣዪሁዳቱ ኣኃ ፃፂያ ዎጋዳን፥ ሺቱዋና ጋꬂዴ፥ ሞጉዋ ኣፊላን ፃፄዲኖ። ዬሱሲ ማስቃሊያ ቦላ ሚሲማሪያን ꬊሼቲዴ ሱሌቴዳ ሳዓን ዳሮ ኣቲኪልቲያ ሳዓይ ዴዔ፤ ሄ ኣቲኪልቲያ ሳዓ ጊዶን ሹቻ ዎጪ ኬሴዳ ቢሮ ኦኒኔ ሞጌቲቤና ኦራꬃ ዱፉ ዴዔ። ሄ ዱፉ ማታን ዴዒያ ዲራዉኔ ቃሲ ኣዪሁዳቱ ሳምባታው ጊጌቲያ ጋላሳ ጊዲያ ዲራው፥ ዬሱሳ ያኒ ዎꬄዲኖ። ዎጋ ጋላሲ ጉራን፥ ቢሮ ዳቢዳቢያዋን፥ ማግዳላ ጌቴቲያ ካታማፔ ዬዳ ማይራማ ዬሱሲ ሞጌቴዳ ዱፉዋኮ ባዴ ሹቻይ ሄ ጎንጎሉዋ ዶናፔ ዴንዲኪቼዳዋ ቤዓዱ። ሲሞኒ ጴፂሮሳኮኔ ዬሱሲ ሲቂያ ዮኮ ካሊያዋኮ፥ ኢዛ ዎፃዴ ባዴ፥ «ዱፉዋፔ ጎዳ ኣፊዲጌዲኖ፤ ሃቃን ኣ ዎꬄዲኖንቶኔ ኑኒ ኤሮኮ» ያጋዱ። ሄዋ ዲራው፥ ጴፂሮሲኔ ዮኮ ካሊያዌ ኣጊዴ፥ ዱፉዋኮ ቤዲኖ። ላዑካ ኢቲፔ ዎፄዲኖ፤ ሺን ዮኮ ካሊያዌ ጴፂሮሳፔ ኣꬊ ካሴቲዴ፥ ሄ ዱፉዋኮ ጋኬዳ። ሄ ካሊያዌ ሆኪዴ፥ ሞጉዋ ኣፊላ ቤዔዳ፤ ሺን ጊዶ ጌሊቤና። ሲሞኒ ጴፂሮሴ ኣ ካሊ ዪዴ፥ ዱፉዋ ጊዶ ጌሌዳ። ያቲዴ ሞጉዋ ኣፊላይ ሄዋን ዴዒያዋ ቤዔዳ፤ ቃሲ ዬሱሳ ሁጲያን ፃፄቲ ኡቴዳ ኣፊላይ ሄ ፃፄቴዳዋዳንካ ዱማ ኢቲ ሳዓን ዴዒያዋ ቤዔዳ፤ ሄ ኣፊላይ ዱማ ዴዔፔ ኣቲን፥ ሞጉዋ ኣፊላና ኢቲፔ ዴዔና። ሄ ዎዴ፥ ካሴቲዴ ጎንጎሉዋኮ ጋኬዳ ዮኮ ካሊያዌ ጌሊ ቤዒዴ ኣማኔዳ። ዬሱሲ ሃይቁዋፔ ዴንዳናው ቤሲያዋ ኦዲያ ፆሳ ማፃፋ ኡንቱንቱ ቢሮ ኣኬኪቤይኪኖ። ሄዋፔ ጉዪያን፥ ካሊያዋንቱ ባሬንቱ ጎሌ ሲሚዴ ቤዲኖ። ሺን ማይራማ ሄ ዱፉዋ ዶናን ኤቃዴ ዬካዴ ሆካዴ ዱፉዋ ጊዶ ፄላዱ። ቦꬃ ማዩዋ ማዬዳ ላዑ ኪታንቻቱ ዬሱሳ ኣኃይ ጊሴዳ ሳዓን ኢቱ ሁጲሳና ኢቱ ጌዲሳና ኡቴዳዋንታ ቤዓዱ። ኡንቱንቱ ኢዞ፥ «ሚሺራቴ፥ ኣዪሲ ዬካይ?» ያጊዴ ኦቼዲኖ። ኢዛ፥ «ኣሳቱ ታ ጎዳ ኣፊዲጌዲኖ፤ ኡንቱንቱ ሃቃን ዎꬄዲኖንቶኔ ታኒ ኤሪኬ» ያጋዱ። ሄዋ ጌዳዋፔ ጉዪያን፥ ጉዬ ሲማ ፄላዴ፥ ዬሱሲ ኤቄዳዋ ቤዓዱ። ሺን ኢ ዬሱሳ ጊዴዳዋ ኣኬካቤይኩ። ዬሱሲ ኢዞ፥ «ሚሺራቴ፥ ኣዪሲ ዬካይ? ኦና ኮያይ?» ያጊዴ ኦቼዳ። ማይራማ ኣቲኪልቲያ ናጊያዋ ጋዴ፥ «ጎዳው፥ ኔኒ ኣኬዳዋ ጊዶፔ፥ ኣ ሃቃን ዎꬃዲንቶ፥ ታው ኦዳሪኪ፤ ታኒ ኣ ኣካና» ያጋዱ። ዬሱሲ ኢዞ፥ «ማይራሜ» ያጌዳ። ኣ ኣኮ ሲማዴ፥ ኢብራዪስፄ ቃላን «ራቡኒ» ያጋዱ፤ ሄዋ ቢሌꬃይ «ታማሪሲያዎ» ጊያዋ። ዬሱሲ ኢዞ፥ «ታኒ ቢሮ ታ ኣዉዋኮ ባቤና ዲራው፥ ታና ቦቾፓ፤ ሺን ታ ኢሻቱዋኮ ባዴ፥ ‹ታኒ ታ ኣዉዋኮኔ ሂንቴንቱ ኣዉዋኮ፥ ታ ፆሳኮኔ ሂንቴንቱ ፆሳኮ፥ ፑዴ ባይ ጌዳ› ጋዴ ኡንቱንቱሲ ኦዳ» ያጌዳ። ማግዳላ ጌቴቲያ ካታማፔ ዬዳ ማይራማ ጎዳ ቤዔዳዋኔ ኢዚው ኢ ሄዋ ኦዴዳዋ ባዴ ካሊያዋንቱሲ ኦዳዱ። ሄ ዎጋ ጋላሲ ኦማርሲ፥ ካሊያዋንቱ ኣዪሁዳቱው ያዬዳ ዲራው፥ ፔንጊያ ጎርዲዴ፥ ሺቂ ኡቲ ዴዒሺን፥ ዬሱሲ ዪዴ፥ ኡንቱንቱ ጊዱዋን ኤቂዴ፥ «ሳሮቴꬃይ ሂንቴንቱሲ ጊዶ» ያጌዳ። ሄዋ ጌዳዋፔ ጉዪያን፥ ባሬ ኩሺያኔ ባሬ ሚዪያ ኡንቱንታ ቤሴዳ፤ ካሊያዋንቱ ጎዳ ቤዔዳ ዎዴ ሎይꬂ ናሼቴዲኖ። ዬሱሲ ላዔንꬁዋ ኡንቱንቱሲ፥ «ሳሮቴꬃይ ሂንቴንቱሲ ጊዶ፤ ታ ኣቡ ታና ኪቴዳዋዳን፥ ታኒካ ሂንቴንታ ኪታይ» ያጌዳ። ሄዋ ጌዳዋፔ ጉዪያን፥ ኡንቱንቱ ቦላ ኡፉ ጊዴ ሼምፔዳ፤ ቃሲ፥ «ጌሻ ኣያና ኣኪቴ። ሂንቴንቱ ኣቶ ጌዳ ኣሳ ናጋራይ ኣቶ ጌቴታናዋ፤ ሂንቴንቱ ኣቶ ጌናዋንቱ ናጋራይ ኣቶ ጌቴቴና» ያጌዳ። ሺን ታማኔ ላዑ ካሊያዋንቱፔ ኢቱ፥ ማንቲያ ጊያ ቶማሲ፥ ዬሱሲ ዬዳ ዎዴ ኡንቱንቱና ባዋ። ሄዋ ዲራው፥ ዮኮ ካሊያዋንቱ ቶማሳው፥ «ኑኒ ጎዳ ቤዔዶ!» ያጌዲኖ። ሺን ቶማሲ ኡንቱንቱሲ፥ «ሚሲማሪያን ኢ ጫዴቴዳ ኣ ኩሺያን ዴዒያ ማላ ቤዔናኒኔ ሄ ማላ ታ ቢራꬊያን ቦቼናን፥ ቃሲ ታ ኩሺያ ኣ ሚዪያን ዬዳ ቤዔናን ታኒ ኣማኒኬ» ያጌዳ። ሳሚንታፔ ጉዪያን፥ ዬሱሳ ካሊያዋንቱ ቃሲካ ጎሌን ሺቂ ኡቴዲኖ፤ ቶማሲካ ኡንቱንቱና ዴዔ። ፔንጊ ቃሼቲ ኡቲ ዴዒሺን፥ ዬሱሲ ዪዴ፥ ኡንቱንቱ ጊዱዋን ኤቂዴ፥ «ሳሮቴꬃይ ሂንቴንቱሲ ጊዶ» ያጌዳ። ሄዋፔ ጉዪያን፥ ዬሱሲ ቶማሳ፥ «ኔ ኩሺያ ሃ ኣሃዴ፥ ታ ኩሺያ ቤዓ፥ ቃሲ ኔ ኩሺያ ሃ ኣሃዴ፥ ታ ሚዪያን ዬዳ ቤዓ፥ ኔኒ ኣማኒያዋ ጊዳፔ ኣቲን፥ ኣማኔናዋ ጊዶፓ!» ያጌዳ። ቶማሲ ዛሪዴ፥ «ታ ጎዳው፥ ታ ፆሳው!» ያጌዳ። ዬሱሲ፥ «ኔኒ ታና ቤዔዳ ዲራው ኣማናዳ፤ ቤዔናን ኣማኔዳዋንቱ ኣንጄቴዳዋንታ» ያጌዳ። ዬሱሲ ሃ ማፃፋን ፃፌቲቤና ሃራ ዳሮ ማላታቱዋ ባሬና ካሊያዋንቱ ሲንꬃን ኦꬄዳ። ሺን ዬሱሲ፥ ኢ ኪሪስቶሳ፥ ፆሳ ናዓ ጊዲያዋ ሂንቴንቱ ኣማናና ማላኔ፥ ቃሲ ኣ ኣማኒዴ ኣ ሱንꬃን ዴዑዋ ሂንቴንቱ ዴማና ማላ፥ ሃዌ ፃፌቴዳ። ሄዋፔ ጉዪያን፥ ዬሱሲ ፂቢሪያዶሳ ጌቴቲያ ኣባ ጋፃን ባሬ ካሊያዋንቱሲ ላዔንꬁዋ ቤቴዳ። ኢ ኡንቱንቱሲ ሃዋዳን ቤቴዳ። ሲሞኒ ጴፂሮሲኔ ማንቲያ ጌቴቲያ ቶማሲ፥ ቃና ጋሊላፔ ዬዳ ናቲናዔሊ፥ ዛቢዲዮሳ ናናይኔ ዬሱሳ ካሊያዋንቱፔ ሃራ ላዓቱ ኢቲፔ ዴዒኖ። ሲሞኒ ጴፂሮሴ ኡንቱንቱሲ፥ «ታኒ ሞሊያ ኦይቃናው ባይ» ያጌዳ። ኡንቱንቱ፥ «ኑኒካ ኔናና ባና» ያጊዴ፥ ኬሲዴ ዎንጊሪያ ጊዶ ጌሌዲኖ፤ ሺን ኡንቱንቱ ሄ ጋላሲ ቃማ ሞሊያ ኣይኔ ኦይቂቤይኪኖ። ዎንቲያ ዎዴ ኣዋይ ኬሳናፔ ካሴ፥ ዬሱሲ ኣባ ጋፃን ኤቄዳ፤ ሺን ኣ ካሊያዋንቱ ዬሱሳ ጊዴዳዋ ኤሪቤይኪኖ። ዬሱሲ ኡንቱንታ፥ «ናቶ፥ ሞሊያ ኦይቂቤይኪቴዬ?» ያጌዳ። ኡንቱንቱ ዛሪዴ፥ «ኣይኔ ኦይቂቤይኮ» ያጌዲኖ። ኢ ዛሪዴ፥ «ሂንቴንቱ ዳባ ዎንጊሪያፔ ኡሼቻ ባጋኮ ዬጊቴ፤ ኣማሬዳዋ ሂንቴንቱ ኦይቃና» ያጌዳ። ሄዋ ዲራው፥ ዳባ ኡሼቻ ባጋኮ ዬጊና፥ ሞሊ ዳሬዳ ዲራው፥ ጎቺ ኬሳናዌ ኡንቱንታ ፆኔዳ። ዬሱሲ ሲቂያ ኣ ካሊያዌ ጴፂሮሳ፥ «ሃዌ ጎዳቴኔ!» ያጌዳ። ሲሞኒ ጴፂሮሴ ጎዳ ኢ ጊዴዳዋ ሲሴዳ ዎዴ፥ ካሎ ዴዒያ ዲራው፥ ባሬ ማዩዋ ማዪዴ፥ ኣባ ጊዶ ጉፒ ጌሌዳ። ሺን ዮኮ ካሊያዋንቱ ሞሊ ኩሚ ኡቴዳ ዳባ ጎቺዴ፥ ዎንጊሪያን ኣባፔ ጋፃ ኬሴዲኖ፤ ኡንቱንቱ ኣባፔ ላዑ ፄቱ ዋꬋ ኬና ሃኪዴ ዴዒኖፔ ኣቲን፥ ሎይꬂ ሃኪዴ ዴዒኪኖ። ኡንቱንቱ ኣባፔ ጋፃ ኬሴዳ ዎዴ፥ ፂፁንꬃ ቦንቁዋን ሞሊ ዴዒያዋኔ ኡኪꬃ ቤዔዲኖ። ዬሱሲ ኡንቱንታ፥ «ሃዒ ሂንቴንቱ ኦይቄዳ ሞሊያፔ ኣማሬዳዋ ሃሚቴ» ያጌዳ። ሲሞኒ ጴፂሮሴ ዎንጊሪያን ጌሊዴ፥ ፄታኔ ኢሻታማኔ ሄዙ ዎጋ ሞሌቱ ኩሚ ኡቴዳ ዳባ ጎቺዴ፥ ኣባፔ ጋፃ ኬሴዳ፤ ሞሊ ሄዋ ኬና ዳሮ ጊዲናካ ዳባይ ዳኬቲቤና። ዬሱሲ ኡንቱንታ፥ «ሃ ዪዴ፥ ቃንዒያ ቃንዒቴ» ያጌዳ። ዬሱሳ ካሊያዋንቱፔ ኢቱኔ፥ «ኔኒ ኦኔ?» ጊዴ ኣ ኦቻናው ፃሊቤና፤ ኣዪሲ ጎፔ፥ ጎዳ ኢ ጊዴዳዋ ኡንቱንቱ ኤሬዲኖ። ዬሱሲ ዪዴ፥ ኡኪꬃ ኣኪዴ፥ ኡንቱንቱሲ ኢሜዳ፤ ሞሊያካ ሄዋዳን ኢሜዳ። ዬሱሲ ሃይቁዋፔ ዴንዴዳዋፔ ጉዪያን፥ ባሬ ካሊያዋንቱሲ ቤቲሺን ሃዌ ሄዜንꬁዋ። ኡንቱንቱ ቁማ ሜዳዋፔ ጉዪያን፥ ዬሱሲ ሲሞኒ ጴፂሮሳ፥ «ዮሃኒሳ ናዓ ሲሞና፥ ታና ሃዋንቱፔ ኣꬃዴ ሲቃይ?» ያጌዳ። ሲሞኒ ጴፂሮሴ፥ «ኤ ጎዳው፥ ታኒ ኔና ዶሲያዋ ኔኒ ኤራሳ» ያጌዳ። ዬሱሲ ኣ፥ «ታ ዶርሳ ማራቱዋ ሄማ» ያጌዳ። ዬሱሲ ቃሲካ፥ «ዮሃኒሳ ናዓ ሲሞና፥ ታና ሲቃይ?» ያጌዳ። ሲሞኒ ጴፂሮሴ፥ «ኤ ጎዳው፥ ታኒ ኔና ዶሲያዋ ኔኒ ኤራሳ» ያጌዳ። ዬሱሲ፥ «ታ ዶርሳቱዋ ሄማ» ያጌዳ። ዬሱሲ ሄዜንꬁዋ፥ «ዮሃኒሳ ናዓ ሲሞና፥ ታና ዶሳይ?» ያጌዳ። ዬሱሲ ሄዜንꬁዋ ሲሞኒ ጴፂሮሳ፥ «ታና ዶሳይ?» ያጊዴ ኦቼዳ ዲራው፥ ጴፂሮሴ ኣዛኒዴ፥ «ጎዳው፥ ኔኒ ኡባባ ኤራሳ፤ ታኒ ኔና ዶሲያዋ ኔኒ ኤራሳ» ያጌዳ። ዬሱሲ፥ «ታ ዶርሳቱዋ ሄማ። ታኒ ኔው ቱሙዋ ኦዳይ፤ ኔኒ ዎዳላቴꬃን ዴዒያ ዎዴ፥ ኔ ፄሳን ሳቂያ ኔሬካ ዳንጫዴ፥ ኔኒ ኮዬዳሳ ባሳ። ሺን ጪሜዳዋፔ ጉዪያን፥ ኔ ኩሺያ ሚጫ ቤሳሳ። ኔና ሃራ ኡራይ ዳንጪሳናዋ፤ ኔኒ ዶሴናሳካ ኣፌ» ያጌዳ። ዬሱሲ ሄዋ ጴፂሮሴ ኣይ ማላ ሃይቁዋ ሃይቂዴ፥ ፆሳ ቦንቺሳኔንቶኔ ኤሪሳናው ጌዳ፤ ቃሲ ሄዋ ጌዳዋፔ ጉዪያን፥ ዬሱሲ ጴፂሮሳ፥ «ታና ካላ» ያጌዳ። ጴፂሮሴ ጉዬ ሲሚዴ፥ ዬሱሲ ሲቂያ ካሊያዌ ባሬፔ ጉዬና ዪያዋ ቤዔዳ፤ ሄ ካሊያዌ ካዉዋ ሚያ ሳዓን ዬሱሳኮ ሺቂዴ ኣ፥ «ጎዳው፥ ኔና ኣꬂ ኢማናዌ ኦኔ?» ያጌዳዋ። ጴፂሮሴ ሄ ካሊያዋ ቤዒዴ ዬሱሳ፥ «ጎዳው፥ ሃ ቢታኒ ቃሲ ዋናኔ?» ያጌዳ። ዬሱሲ ኣ፥ «ታኒ ያና ጋካናው ኢ ዴዓና ማላ ታኒ ኮዮፔ፥ ሄዌ ኔና ኣያ ሜቲ? ኔኒ ታና ካላ» ያጌዳ። ሄዋ ዲራው፥ ሄ ካሊያዌ ሃይቄና ጊያ ሃሳያይ ኢሻቱዋ ኡባኮ ጋኬዳ፤ ሺን ዬሱሲ፥ «ታኒ ያና ጋካናው፥ ኢ ዴዓና ማላ፥ ታኒ ኮዮፔ፥ ኔና ኣያ ሜቲ?» ጌዳዋፔ ኣቲን፥ «ሃይቄና» ጊቤና። ሄ ዬዉዋባ ማርካቴዳዌኔ ቃሲ ሄዋ ፃፌዳዌ ሄ ካሊያዋ ኣ ማርካቴꬃይ ቱማ ጊዲያዋ ኑኒ ኤሬቶ። ዬሱሲ ኦꬄዳ ሃራ ዳሮባይካ ዴዔ፤ ኡባባይ ሁጲያን ሁጲያን ፃፌቲንቶ፥ ፃፌቲያ ማፃፋቶ ሃ ሙሌ ኣላሚ ጊዳናዋ ታው ማላቴና። ቶፊሎሳ፥ ዬሱሲ ሳሉዋ ቤዳ ጋላሳይ ጋካናው፥ ኦꬃናዉኔ ታማሪሳናው ዶሜዳዋ ኡባባ ታኒ ታ ኮይሮ ማፃፋን ፃፋዲ። ሳሉዋ ባናፔ ካሴ ኢ ባሬ ዶሪዴ ኪቴዳዋንታ ጌሻ ኣያናን ኣዛዜዳ። *** ኢ ባሬ ኪቴዳዋንቶ ኦይታሙ ጋላሳ ቤቲዲኔ ቃሲ ፆሳ ካዉቴꬃባ ኡንቱንቶ ኦዲዴ፥ ባሬ ዋዪያፔ ጉዪያን፥ ሃይቁዋፔ ዴንዴዳዋ ሲꬌ ባይናን ሎይꬂ ኣማንꬂዴ፥ ባሬና ኡንቱንታ ቤሴዳ። ኡንቱንቱና ኢቲፔ ዴዒዴ፥ ኡንቱንታ ሃዋዳን ያጊዴ ኣዛዜዳ፤ «ዬሩሳላሜፔ ኬሶፒቴ፤ ሺን ሂንቴንቱ ታፔ ሲሴዳ ታ ኣቡ ሂንቴንቶ ኢማና ጊዴ ሂዶቴዳዋ ናጊቴ። ኣዪሲ ጎፔ፥ ዮሃኒሲ ሃꬃን ፃማቄዳ፤ ሺን ጉꬃ ዎዲያፔ ጉዪያን፥ ጌሻ ኣያናን ሂንቴንቱ ፃማቄታኒታ» ያጌዳ። ዬሱሲ ኪቴዳዋንቱ ዬሱሳና ጋኬቴዳ ዎዴ ኣ፥ «ጎዳው፥ ሃ ዎዲያን ኢስራዔላቱዋሲ ካዉቴꬃ ዛራኒ?» ያጊዴ ኦቼዲኖ። ዬሱሲ ኡንቱንታ፥ «ታ ኣቡ ባሬ ጎዳቴꬃን ኬሬዳ ኣጌናኔ ዎዲያ ሂንቴንቱ ኤራናሳ ጊዴና። ሺን ጌሻ ኣያናይ ሂንቴንቱ ቦላ ዎꬊያ ዎዴ፥ ዎልቃ ሂንቴንቱ ኣካኒታ፤ ያቲዴ ዬሩሳላሜኒኔ ዪሁዳ ጋዲያ ኡባን፥ ሳማሪያኒኔ ጋዲያ ጋፃ ኡባ ጋካናው ታው ማርካቲያዋንታ ጊዳኒታ» ያጌዳ። ሄዋ ጌዳዋፔ ጉዪያን፥ ኡንቱንቱ ፄሊሺን፥ ꬎቁ ꬎቁ ጊዴ፥ ሳሉዋ ቢና፥ ኡንቱንቱ ኣይፊያፔ ሻሪ ኣ ጌንꬄዳ። ዬሱሲ ቦላው ዴንዲያ ዎዴ፥ ኡንቱንቱ ሳሉዋ ጫዲ ፄሊሺን፥ ቦꬃ ማዩዋ ማዬዳ ላዑ ኣሳቱ ኤሌካ ኡንቱንቱ ማታን ኤቂዴ፥ «ጋሊላ ኣሳቶ፥ ሳሉዋ ፄሊዴ፥ ሂንቴንቱ ኣዪሲ ኤቄዲቴ? ሃ ሂንቴንቱፔ ሳሉዋ ቤዳ ዬሱሲ ሳሉዋ ቢያዋ ሂንቴንቱ ቤዔዳዋዳንካ፥ ሲሚዴ ያናዋ» ያጌዲኖ። ሄዋፔ ጉዪያን፥ ዬሱሲ ኪቴዳዋንቱ ዴብሬ ዛይቴ ጌቴቲያ ዎጋራ ሚꬃ ዴሪያፔ ዬሩሳላሜ ሲሜዲኖ። ዎጋራ ሚꬃ ዴሪ ዬሩሳላሜፔ ኢቲ ኪሎ ሚቲሪያ ኬና። ዬሱሲ ኪቴዳዋንቱ ዬሩሳላሜ ጌሊዴ፥ ባሬንቱ ዴዒያ ሳዓ ꬎቃ ፑዴ ኬሴዲኖ፤ ያ ኬሴዳዋንቱ ሱንꬃይ ጴፂሮሳ፥ ዮሃኒሳ፥ ያዪቆባ፥ ኢንዲራሳ፥ ፒሊጶሳ፥ ቶማሳ፥ ባርታላሞሳ፥ ማቶሳ፥ ኢልፒዮሳ ናዓ ያዪቆባ፥ ባሬ ጋዲያሲ ሴሌቲያ ሲሞናኔ ያዪቆባ ናዓ ዪሁዳ። ሃዋንቱ ኡባቱ ማጫዋንቱና፥ ዬሱሳ ዳዪ ማይራሚናኔ ዬሱሳ ኢሻቱዋና ኡባይ ኢቲ ዎዛና ጊዲዴ፥ ኡባ ዎዴ ኢቲፔቴꬃን ዎሳው ሺቂኖ። ሄ ዎዴ፥ ጴፂሮሲ ፄታኔ ላታማ ጊዲያ ኣማኒያ ኣሳ ሺቁዋን ኢቲፔ ዴዒያ ባሬ ኢሻቱዋ ጊዶን ዴንዲ ኤቂዴ፥ ሃዋዳን ያጌዳ፤ «ታናዳን ኣማኒያዋንቶ፥ ዬሱሳ ኦይቄዳዋንታ ካሌꬄዳ ዪሁዳባ ጌሻ ኣያናይ ካሴ ዳዊቴ ዶናን ኦዴዳ ፆሳ ማፃፋ ቃላይ ፖሌታናው ቤሴ። ኣዪሲ ጎፔ፥ ዪሁዳ ኣስቆሮቱ ኑናና ዴዔ፤ ቃሲ ኑናና ኢቱዋ ጊዲ ፓይዴቲዴ ኦሱዋ ባጋይ ዴዓና ማላ ዶሬቴዳ» ያጌዳ። ዪሁዳ ኣስቆሮቱ ባሬ ኢታ ኦሱዋን ዴሜዳ ሚሻን ጋዲያ ሻሜዳ፤ ሲንꬃው ጉፋኒዴ ኩንዲና፥ ኣ ኡሉ ጊዱዋፔ ዳኬቴዳ፤ ኣ ማራጪ ኡባይካ ካሬው ጱልፄቲ ኬሲ ኣጌዳ። ዪሁዳ ቦላ ሃኔዳዋ ዬሩሳላሜን ዴዒያ ኣሳይ ኡባይ ሲሴዳ፤ ሄዋ ዲራው፥ ሄ ጋዲያ ባሬንቱ ቃላን ኣኬልዳማ ጊዴ ሱንꬄዲኖ፤ ሄዋ ቢሌꬃይ ሱꬃ ጋዲያ ጊያዋ። ጴፂሮሲ ኦዲዴ፥ «ኣዪሲ ጎፔ፥ ማዚሙሪያ ማፃፋን፥ ‹ኣ ጎሊ ሜላ ኣቶ፤ ኦኒኔ ሄዋን ዴዖፖ› ቃሲ ‹ኣ ሱንꬃቴꬃካ ሃራይ ኣኮ› ጌቴቲዴ ፃፌቴዳ። ሄዋ ዲራው፥ ኢቲ ኣሳይ ጎዳ ዬሱሳ ዴንዱዋ ማርካታናው፥ ኑናና ጋኬታናው ቤሴ፤ ዮሃኒሲ ፃማቄዳ ዎዲያፔ ዶሚዴ፥ ዬሱሲ ኑፔ ሳሉዋ ቤዳ ዎዲ ጋካናሲ፥ ጎዳ ዬሱሲ ኑናና ሃሜቴዳ ዎዲያ ኡባን ኢ ኑናና ዴዒያዋንቱፔ ኢቱዋ ጊዲ ሱንꬄታናው ቤሴ።» *** ሄዋፔ ጉዬ ኣማኒያ ኣሳይ ዶሩዋሲ ዮስፆሳ ጊያ ባርሳባ ጌቴቲያ ዮሴፋኔ ማቲያሳ ላዑዋ ኤሴዲኖ። ሄዋፔ ጉዪያን፥ ፆሳ ዎሲዴ፥ «ኡባ ዎዛና ኤሪያ ጎዳው፥ ዪሁዳ ኣስቆሮቱ ባሬሳ ባናው ዬጊዴ ቤዳ ኦሱዋኔ ዬሱሲ ኪቴዳ ኦሱዋ ሃዳራ ኣካናዳን፥ ሃ ላዑ ኣሳቱዋፔ ኢቱዋ ኔኒ ዶሬዳዋ ኑና ቤሳ» ያጌዲኖ። *** ኡንቱንቱን ሳማ ዬጌዲኖ፤ ሳማይ ማቲያሳ ቦላን ዎꬊና፥ ማቲያሲ ዬሱሲ ኪቴዳ ታማኔ ኢቲ ኪቴታዋንቱና ፓይዴቴዳ። ጴንፄቆስቴ ጊያ ጋላሳይ ጋኬዳ ዎዴ፥ ኣማኒያዋንቱ ኡባቱ ኢቲፔ ጊዲዴ፥ ኢቲሳ ሺቂ ዴዒሺን፥ ዎልቃማ ጎቱዋዳን ጉሚያ ጉንꬃይ ዎዛና ኣꬄናን ሳሉዋፔ ዪዴ፥ ኡንቱንቱ ኡቴዳ ጎሊያ ኡባ ኩሜዳ። ቃሲ ታማ ላጩዋዳን ፖዱጊያዌ ኡንቱንቶ ቤቲዴ፥ ሻኬቲ ሻኬቲ፥ ኡንቱንቱ ኡባ ቦላ ዎꬌዳ። ኡንቱንቱ ኡባን ጌሻ ኣያናይ ኩሚዴ፥ ዱማ ዱማ ቃላን ሃሳያና ማላ፥ ኡንቱንታ ዳንዳዪሲና፥ ሃሳያ ዶሜዲኖ። ሳዓን ዴዒያ ኣሳ ዜሬꬃ ኡባፔ ዪዴ፥ ፆሳው ያዪያ ኢቲፔ ዴዒያ ኣዪሁዳቱ ዬሩሳላሜን ዴዒኖ። ሃ ጉንꬃ ሲሴዳ ዎዴ፥ ኣሳይ ኡባይ ሺቄዳ፤ ኡንቱንቱ ባሬንቱ ቃላን ቃላን ሃሳዪሺን ሲሴዳ ዲራው፥ ጊያዋ ꬋዬዲኖ። ኣሳይ ኡባይ ማላሌቲዴኔ ሃዌ ኦራꬃባ ጊዴ፥ «ቤዒቴ፤ ሃ ሃሳዪያዋንቱ ኡባቱ ጋሊላ ኣሳቱዋ ጊዲኪኖ? ያቲና፥ ኑኒ ኑ ዬሌቴዳ ጋዴ ቃላን ኡንቱንቱ ሃሳዪሺን ዋኒዴ ሲሴቶ? ኑኒ ጳርቴ ኣሳቱ፥ ሜዶኔ ኣሳቱ፥ ኤላሜፄ ኣሳቱ፥ ላዑ ሻፋቱዋፔ ጊዱዋን ዴዒያዋንቱ፥ ዪሁዳን፥ ቃጳዶቂያን፥ ጳንፆሳን፥ ኢሲያን፥ ፒርጊያን፥ ጲኒፊሊያን፥ ጊብፄን፥ ቄሬና ባጋን ዴዒያ ሊቢያ ዎራዳቱዋን ዴዒያዋንቱ፥ ሮሜፔ ዬዳ ኢማꬃቱ፥ ኣዪሁዳቱ፥ ኣዪሁዳቴꬃው ላሜቴዳ ኑፔ ኣማሬዳዋንቱ፥ ቃሪፄሴ ኣሳቱኔ፥ ኣራቢያ ኣሳቱ፥ ፆሳይ ኦꬄዳ ዎልቃማ ኦሱዋ ኑ ቃላን ኡንቱንቱ ሃሳዪሺን ሲሴዶ» ያጌዲኖ። *** ኡባይካ ማላሌቲዴ፥ ዬዉ ባሬንቶ ጌሌናን ኢፂና ባሬንቱ ጊዶን፥ «ላ ሃዌ ዋጊያዌ?» ያጌዲኖ። ሺን ሃራ ኣሳቱ ኣማኒያዋንቱ ቦላን ቂሊጪዴ፥ «ሃዋንቱ ኡሺዴ ማꬆቴዲኖ» ያጌዲኖ። ሺን ጴፂሮሲ፥ ዬሱሲ ኪቴዳ ሃራ ታማኔ ኢቲ ኪቴቶዋንቱና ዴንዲ ኤቂዴ፥ ባሬ ኮሻ ꬎቁ ኦꬂዴ፥ ኡንቱንቶ ሃዋዳን ያጊ ኦዴዳ፤ «ኣዪሁዳቶ፥ ቃሲ ዬሩሳላሜን ዴዒያ ኡባቶ፥ ታኒ ኦዲያዋ ሲሲቴ። ሃዌ ሂንቴንቶ ኤሬቶ፤ ሂንቴንቱ ቆፒያዋዳን፥ ሃዋንቱ ማꬆቲቤይኪኖ። ኣዪሲ ጎፔ፥ ዎንታፔ ቢሮ ሄዙ ሳቴ ጊዴ። ሺን ሃዌ ናቢያ ኢዩዔል ሃሳዬዳዋ። «ኢ ሃሳዪዴ፥ ‹ፆሳይ ሃዋዳን ያጌዳ፤ ዎዲያ ዉርሴꬃን ሃዋዳን ሃናናዋ። ታኒ ኣሳ ኡባ ቦላን ታ ኣያና ጉሳና። ሂንቴንቱ ኣቱማ ናናይኔ ሂንቴንቱ ማጫ ናናይ ቲምቢቲያ ኦዳናዋንታ። ሂንቴንቱ ዎዳላ ናናይካ ሳፃ ቤዓናዋንታ፤ ሂንቴንቱ ጪማቱካ ኣኩሙዋ ኣኩሜታናዋንታ። ሄ ጋላሳቱን ታ ኣቱማ ቆማቱዋ ቦላኒኔ ታ ማጫ ኣሺካራቱዋ ቦላን ታኒ ታ ኣያና ጉሳና። ሄዋፔ ጉዬ ኡንቱንቱ ቲምቢቲያ ኦዳናዋንታ። ቃሲ ታኒ ቦላ ሳሉዋን ኦራꬃባ፥ ጋርሳ ሳዓንካ ማላታ ቤሳና። ሱꬃይ፥ ታማይኔ ሻሪያዳን ካሜዳ ጩዋይ ዴዓና። ዎልቃማኔ ቦንቾ ጊዴዳ ጎዳ ጋላሳይ ጋካናፔ ካሴ ኣዋይ ꬉማና፤ ኣጌናይካ ሱꬃ ማላታና። ሄ ዎዴ ሃዋዳን ሃናናዋ፤ ጎዳ ሱንꬃ ፄሲያ ኦኒኔ ኣታና› ያጌዳ። «ኢስራዔሊያ ኣሳቶ፥ ሃ ቃላ ሲሲቴ፤ ናዚሬቲያ ዬሱሲ ሂንቴንቱ ጊዶን ፆሳይ ባሬናን ኦꬄዳ ዎልቃማ ኦሱዋን፥ ኦራꬃባኒኔ ማላታን ሂንቴንቶ ꬊሺሴዳ ኣሳ፤ ሄዋ ሂንቴንቱካ ኤሪታ። ዬሱሲ ሂንቴንቶ ኢሜታና ማላ፥ ፆሳይ ካሴ ባሬ ሼኒያኒኔ ባሬ ኤራን ባሬ ቆፋ ቃቺ ዎꬄዳ፤ ያቲና፥ ኣ ሂንቴንቱ ናጋራንቻቱዋ ኩሺያን ማስቃሊያ ቦላ ሚሲማሪያን ꬊሺሲዴ፥ ካቂሲ ዎꬊሴዲታ። ሺን ሃይቁ ዬሱሳ ኦይቃናው ዳንዳዪቤና ዲራው፥ ፆሳይ ሃይቁዋ ሴላ ኣፔ ꬋዪሲዴ፥ ኣ ዴንꬄዳ። ኣዪሲ ጎፔ፥ ዳዊቴ ዬሱሳባ ሃዋዳን ያጌዳ፤ ‹ታኒ ሜቶቴናዳን፥ ጎዳይ ታ ኡሼቻን ዴዒያ ዲራው፥ ታኒ ኡባ ዎዴ ጎዳ ታ ማታን ቤዓይ። ሄዋ ዲራው፥ ታ ዎዛናይ ናሼቴዳ፤ ታ ኢንፃርሳንካ ናሼቻይ ኩሜዳ። ቃሲ ታ ቦላይካ ሎዖ ዴዓና ጊዴ፥ ናሼቻን ናጌ። ኣዪሲ ጎፔ፥ ታ ሼምፑዋ ሲዖሊያን ኣጋካ። ቃሲ ኔ ጌሻ ናዓ ኣኃካ ዎቄꬃካ። ኔኒ ታና ዴዑዋ ኦጊያ ኤርሳዳ። ኔኒ ታናና ዴዒያዋን ታኒ ዳሪ ናሼታይ› ያጌዳ። «ኢሻቶ፥ ኑ ኣዋቱዋ ካፑዋ ዳዊቴባ ታኒ ሂንቴንቶ ጌሻዴ ኦዳናው ቤሴ፤ ዳዊቴ ሃይቂዴ ሞጌቴዳ፤ ኣ ዱፉ ሃቼ ጋካናዉካ ኑ ማታን ዴዔ። ዳዊቴ ናቢያ ጊዴዳ ዲራዉኔ ፆሳይ ኣ ናና ዜሬꬃፔ ኢቱዋ ኣ ካዉቴꬃ ኦይዲያን ኡቲሳናው ኣው ጫቄዳዋ ኤሬዳ ዲራው፥ ኪሪስቶሳ ዴንዱዋ ሲንꬃው ፄሊዴ፥ ‹ኣ ሼምፑ ሲዖሊያን ኣቲቤና፤ ኣ ቦላይካ ዎቂቤና› ጊዴ ኦዴዳ። «ፆሳይ ዬሱሳ ሃይቁዋፔ ዴንꬄዳዋሲ ኑኒ ኡባይ ማርካ። ሄዋ ዲራው፥ ፆሳይ ባሬፔ ኡሼቻ ባጋን ኣ ꬎቁ ꬎቁ ኡዲዴ፥ ኣው ጌሻ ኣያና ኢማና ጌዳዋዳን፥ ጌሻ ኣያና ኣኪዴ፥ ሃዋ ሂንቴንቱ ሃዒ ቤዒያዋኔ ሲሲያዋ ኑ ቦላ ጉሴዳ። ኣዪሲ ጎፔ፥ ዳዊቴ ባሬ ሁጴው ሳሉዋ ኬሲቤና፤ ሺን ያጌዳ፤ ‹ጎዳይ ታ ጎዳ፤ «ታኒ ኔ ሞርኬቱዋ ኔኒ ጌዲያን ዬꬋ ኤቂያዋ ኦꬃና ጋካናው ሃዋን ታፔ ኡሼቻ ባጋና ኡታ» ጌዳ› ያጌዳ። *** «ሄዋ ዲራው፥ ፆሳይ ማስቃሊያ ቦላ ሚሲማሪያን ሃ ሂንቴንቱ ꬊሺዴ ካቄዳ ዬሱሳ ጎዳኔ ኪሪስቶሳ ኦꬄዳዋ ኢስራዔሊያ ኣሳ ዜሬꬃይ ኡባይ ቱሙፔ ኤሮ» ያጌዳ። ኣሳይ ጴፂሮሲ ጌዳዋ ሲሴዳ ዎዴ፥ ኣሳው ዎዛናይ ዳሮፔ ቦሼቲና፥ ጴፂሮሳኔ ዬሱሲ ኪቴዳ ሃራቱዋ፥ «ኑ ኢሻቶ፥ ያቲና ኑኒ ኣያ ኡዳኔ?» ያጌዲኖ። ጴፂሮሲ ኡንቱንታ፥ «ሂንቴንቱ ናጋራይ ኣቶ ጌቴታና ማላ፥ ናጋራፔ ሲሚዴ፥ ሂንቴንቱ ሁጲያን ሁጲያን ዬሱሲ ኪሪስቶሳ ሱንꬃን ፃማቄቲቴ። ፆሳይ ኢሚያ ጌሻ ኣያና ሂንቴንቱ ኣካና። ኣዪሲ ጎፔ፥ ፆሳይ ኢማና ጌዳ ቃላይ ሂንቴንቱሳ፥ ሂንቴንቱ ናናቱዋሳኔ ጎዳይ ኑ ፆሳይ ባሬኮ ፄሲያ ሃኩዋን ዴዒያዋንቱ ኡባሳ» ያጌዳ። ጴፂሮሲ ኡንቱንቶ ቃላ ሃራካ ጉጂ ማርካቲዴ፥ «ሃ ዎዲያ ጌላ ኣሳፔ ሂንቴንቱ ሁጲያ ኣሺቴ» ያጊዴ ዞሬዳ። ጴፂሮሲ ኦዴዳዋ ኣኬዳዋንቱ ፃማቄቴዲኖ፤ ሄ ጋላሲ ሄዙ ሻዓ ጊዲያ ኣሳይ ኣማኔዲኖ። ኡንቱንቱ ዬሱሲ ኪቴዳዋንቱ ቲሚርቲያን፥ ኢቲፔቴꬃን ኡኪꬃ ሜንꬂ ሚያዋኒኔ ፆሳ ዎሳን ጌንጪኖ። ዬሱሲ ኪቴዳዋንቱ ኩሺያን ዳሮ ኦራꬃባይኔ ማላታቱ ኦሴቲና፥ ኣሳ ኡባ ያሻይ ኦይቄዳ። ኣማኔዳ ኡባቱ ኢቲፔ ዴዒኖ፤ ቃሲ ባሬንቶ ዴዒያባ ኡባካ ኢቲፔ ሻኪ ኣኬዲኖ። ኡንቱንቱ ባሬንቱ ጋዲያኔ ባሬንቶ ዴዒያባ ዛሊዒ ዛሊዒዴ፥ ኦናኔ ኮሼዳ ኬና ሚሻ ኡባው ሻኬዲኖ። ቃሲ ኡባ ጋላሲ፥ ኢቲ ዎዛና ጊዲዴ፥ ጌሻ ጎሊያን ፓጬናን ጋኬቲዴ፥ ባሬንቱ ጎሌ ጎሌ ፄሴቲዴ ናሼቻኒኔ ፓሺካ ዎዛናን ቁማ ሚኖ። ፆሳ ጋላቲዴ፥ ኣሳ ኡባን ሳቤቴዲኖ። ቃሲ ጎዳይ ኣማኒ ኣቲያዋንታ ጋላሲ ጋላሲካ ኡንቱንቱ ቦላ ጉጄ። ኢቲ ጋላሲ፥ ጴፂሮሲኔ ዮሃኒሲ ፆሳ ዎሳናው ኡዱፑ ሳቲያን ጌሻ ጎሊያ ቤዲኖ። ዬሌቶዴፔ ዶሚዴ፥ ጉንዳ ጊዲዴ ዴዒያ ኢቲ ቢታኒ ጌሻ ጎሊያ ጌሊያ ኣሳፔ ሚሻ ዎሳናው፥ ኡባ ጋላሲ ዳሪ ሎዓ ጊያ ጌሻ ጎሊያ ፔንጊያን ኣሳይ ኣፊዴ ዎꬂያዌ ዴዔ። ሄ ዎባ ቢታኒ፥ ጴፂሮሲኔ ዮሃኒሲ ጌሻ ጎሊያ ጌላና ሃኒሺን ቤዒዴ፥ ሚሻ ኡንቱንታ ዎሴዳ። ጴፂሮሲ ዮሃኒሳና ኣ ጫዲ ፄሊዴ፥ «ኑኮ ሃ ፄላ» ያጌዳ። ዎባ ቢታኒ ኡንቱንቱፔ ኢቲባ ኣካናው ኮዪዴ፥ ኡንቱንቱኮ ፄሌዳ። ሺን ጴፂሮሲ ኣ፥ «ታው ሚሻይ ባዋ፤ ሺን ታው ዴዒያባ ታኒ ኔው ኢማና፤ ናዚሬቲያ ዬሱሲ ኪሪስቶሳ ሱንꬃን ዴንዳዴ ሃሜታ» ያጌዳ። ያቲዴ፥ ዎባ ቢታኒያ ባሬ ኡሼቻ ኩሺያን ኦይቂዴ፥ ፑዴ ዴንꬄዳ፤ ኤሌካ ኣ ጌዲኔ ሜሺ ሜቄꬃይ ሚኒ ኣጌዳ። ቢታኒ ፑዴ ጉፒዴ፥ ዴንዲ ኤቄዳ፤ ያኔ ሃኔ ሃሜታ ዶሜዳ። ሄዋፔ ጉዪያን ሃሜቲዴ፥ ጉፒዲኔ ፆሳ ጋላቲዴ፥ ኡንቱንቱና ኢቲፔ ጌሻ ጎሊያ ጌሌዳ። ኢ ሃሜቲሺናኔ ፆሳ ጋላቲሺን፥ ኣሳይ ኡባይ ኣ ቤዔዳ። ያቲዴ፥ ሚሻ ዎሳናው ዳሪ ሎዓ ጊያ ጌሻ ጎሊያ ፔንጊያን ኡቴዳዌ ኣ ጊዴዳዋ ኣኬኬዲኖ፤ ኢ ሃኔዳዋ ቤዒዴ ማላሌቴዲኖ። ቢታኒ ጴፂሮሳኔ ዮሃኒሳ ኦይቂ ኡቴዳ ዎዴ፥ ኣሳይ ኡባይ ማላሌቲዴ፥ ሶሎሞኔ ባራንዳ ጊያሳን ኢቲፔ ኡንቱንቱኮ ዎፄዲኖ። ጴፂሮሲ ኣሳ ቤዔዳ ዎዴ ኡንቱንቶ ያጌዳ፤ «ኢስራዔሊያ ኣሳቶ፥ ኣዪሲ ሃዎ ማላሌቲቴ? ዎይ ኣዪሲ ኑና ጫዲ ፄሊቴ? ኑኒ ኑ ዎልቃን ዎይ ፆሳ ማላቲያዋን ሃ ቢታኒያ ሃሜꬄዳዋ ሂንቴንቶ ማላቲ? ኣብራሃሞ ፆሳይ፥ ዪሳቃ ፆሳይ፥ ያዪቆባ ፆሳይ፥ ኑ ኣዋቱዋ ፆሳይ፥ ሂንቴንቱ ኣꬂ ኢሜዳዋ ጲላፆሲ ቢላናው ቆፒ ኡቴዳ ዎዴ፥ ሂንቴንቱ ኣ ሲንꬃን፥ ‹ኑኒ ኣ ኤሮኮ› ጌዳ ባሬ ናዓ ዬሱሳ ቦንቼዳ። ሺን ሂንቴንቱ ጌሻኔ ፂሉዋ፥ ‹ኑኒ ኣ ኤሮኮ› ጊዴ፥ ሼምፑዋ ዎꬌዳዋ ኣ ዲራ ሂንቴንቶ ቢላናው ጲላፆሳ ዎሴዲታ። ዴዑዋ ኢሚያዋ ሂንቴንቱ ዎꬌዲታ፤ ሺን ፆሳይ ሃይቁዋፔ ኣ ዴንꬄዳዋሲ ኑኒ ማርካ። ሃ ዎባ ቢታኒያ ዬሱሳ ሱንꬃ ዎልቃይ ሚኒሴዳ፤ ሂንቴንቱ ቤዒያዌኔ ኤሪያዌካ ኢ ኣ ሱንꬃን ኣማኒያዋን ኦሴቴዳ፤ ሃ ሂንቴንቱ ኡባ ሲንꬃን ኣ ሃዋዳን ሎይꬄዳዌ፥ ዬሱሳ ኢ ኣማኒያዋ። «ሃዒካ ታናዳን ኣማኒያዋንቶ፥ ሂንቴንቱካ ሂንቴንታ ካሊያዋንቱዳን፥ ኤሬናን ኦꬄዳዋ ታኒ ኤራይ። ሺን ፆሳይ ቤኒ፥ ናባቱዋ ኡባቱዋ ዶናን፥ ‹ኪሪስቶሲ ዋዬታና ቤሴ› ያጊዴ ኦዴዳ፤ ባሬ ኦዴዳዋካ ሄዋዳን ፖሌዳ። ሲሚ ፆሳይ ሂንቴንቱ ናጋራ ማራናዳን፥ ጎዳ ማታፔ ኣያና ሚኖቴꬃ ዎዲ ሂንቴንቶ ያናዳኒኔ ፆሳይ ዬሱሲ ኪሪስቶሳ ካሴ ሂንቴንቶ ኦዴቶዋዳን ዬዳናዳን፥ ሂንቴንቱ ናጋራ ፓፂዴ ፆሳኮ ሲሚቴ። *** ፆሳይ ጌሻ ጊዴዳ ባሬ ናባቱዋ ዶናን ቤኒፔ ዶሚዴ ሃሳዬዳዋዳን፥ ኡባባይ ኦራፂያ ዎዲ ጋካናው፥ ዬሱሲ ሳሉዋን ጋሚዓናው ቤሴ። ሙሴ፥ ‹ጎዳይ ፆሳይ፥ ሂንቴንቱ ዛሪያ ጊዶፔ ሂንቴንቶ ታናዳን ናቢያ ዴንꬃና፤ ሂንቴንቱ ኢ ጊያዋ ኡባ ሲሲቴ። ሄ ናቢ ኦዲያዋ ሲሴና ኣሳይ ኦኒኔ ኣሳ ጊዶፔ ሻኬቲ ꬋዮ› ያጌዳ። «ቃሲ ሳሜላፔ ዶሚዴ፥ ኣፔ ካላ ዴንዴዳ ናባቱ ኡባቱ፥ ሃ ዎዲያባ ኦዴዲኖ። ሂንቴንቱ ናባቱዋ ናና፤ ቃሲ ፆሳይ ኣብራሃሞሲ፥ ‹ሳዓን ዴዒያ ኣሳ ኡባ ታኒ ኔ ዜሬꬃ ባጋና ኣንጃና› ያጊዴ ኑ ኣዋቱዋና ጫቄዳ ጫቁዋ ላቲያ ናና። ፆሳይ ሂንቴንታ ኡባቱዋ ሂንቴንቱ ኢታ ኦሱዋፔ ዛሪዴ ኣንጃና ማላ፥ ባሬ ቆማ ዴንꬂዴ፥ ሂንቴንቶ ኮይሮ ዬዴዳ» ያጌዳ። ጴፂሮሲኔ ዮሃኒሲ ኣሳሲ ኦዲሺን፥ ቄሳቱዋ ካፓቱ፥ ጌሻ ጎሊያ ዎታዳራቱዋ ኣዛዚያዌኔ ሳዱቃዋናቱ፥ ኡንቱንቱ ኣሳ ታማሪሲያ ዲራዉኔ ሃራ ኣሳቱ ሃይቁዋፔ ዴንዳናዎ ማርካ ጊዳና ማላ፥ ዬሱሲ ሃይቁዋፔ ዴንዴዳዋ ኦዴዳ ዲራው፥ ዳሪ ዪሎቲዴ፥ ኡንቱንቱኮ ዬዲኖ። ኡንቱንታ ኦይቂዴ፥ ሳዓይ ኦማርሲዲጎ ዲራው ዎንታናሲ ቃሾ ጎሌ ጌሊሴዲኖ። ሺን ቃላ ሲሴዳዋንቱፔ ጮራቱ ኣማኔዲኖ፤ ኣቱማ ኣሳ ፓይዱ ኢቼሹ ሻዓ ኬና ጊዴዳ። ዎንቴꬃ ጋላሲ፥ ኡንቱንታ ሞዲያዋንቱ፥ ኣዪሁዳ ኣሳ ጪማቱ፥ ሙሴ ሂጊያ ታማርሲያዋንቱ፥ ቄሳቱዋ ኡባቱዋ ካፓቱ ሃኒ፥ ቃያፊ፥ ዮሃኒሲ ኢስኪንዲሪኔ ቄሳቱዋ ኡባቱዋ ካፓቱዋ ዳባቱ ኡባይ ዬሩሳላሜን ሺቄዲኖ። *** ዬሱሲ ኪቴዳዋንታ ባሬንቱ ጊዱዋን ኤሲዴ፥ «ኣያ ዎልቃን ዎይ ኦ ሱንꬃን ሃዋ ሂንቴንቱ ኦꬄዲቴ?» ያጊዴ ኦቼዲኖ። ሄ ዎዴ ጴፂሮሲ ባሬናን ጌሻ ኣያናይ ኩሚና፥ ኡንቱንታ ሃዋዳን ያጌዳ፤ «ኣሳ ካሌꬂያዋንቶ፥ ኣዪሁዳ ኣሳ ጪማቶ፥ ሃቼ ሃ ሃርጋንቻ ቢታኒያሲ ኦሴቴዳ ሎዖ ኦሱዋባኔ ኢ ዋኒ ፓፄዴንቶ፥ ሂንቴንቱ ኑና ኦቾፔ፥ ማስቃሊያ ቦላ ሚሲማሪያን ሂንቴንቱ ꬊሺዴ ካቂና፥ ፆሳይ ሃይቁዋፔ ዴንꬄዳ ናዚሬቲያ ዬሱሲ ኪሪስቶሳ ሱንꬃን ሃ ቢታኒ ፓፂዴ፥ ሂንቴንቱ ሲንꬃን ኤቄዳዌ ሂንቴንቱ ኡባሲኔ ኢስራዔሊያ ኣሳ ኡባው ኤሬቶ። ጎሊያ ኬፂያዋንቱ ሂንቴንቱ ካꬊዴ ኢፄዳ ቱሳይ ጎሊያ ኡባ ቶኪያ ኮሺያ ቱሳ ጊዴዳ። ኣሳይ ኣቶቴꬃ ዬሱሳ ባጋና ዴማናፔ ኣቲን፥ ሃራ ኦ ባጋናኔ ዴሜና፤ ኑኒ ኣ ሱንꬃን ኦꬃናው ቤሴ፤ ኣዪሲ ጎፔ፥ ፆሳይ ሳሉዋፔ ጋርሳን ኣሳሲ ኢሜዳ ሃራ ሱንꬃይ ባዋ» ያጌዳ። ሺቁዋ ኣሳይ ጴፂሮሲኔ ዮሃኒሲ ፃሌዳ ፃላ ቤዔዳ ዎዴ፥ ኡንቱንቱ ታማሪቤና ጮ ኣሳ ጊዴዳዋ ኣኬኪዴ ማላሌቴዲኖ፤ ኡንቱንቱ ዬሱሳና ዴዒያዋካ ኤሬዲኖ። ቃሲ ፓፄዳ ቢታኒ ጴፂሮሳናኔ ዮሃኒሳና ኤቄዳዋ ኣሳይ ቤዒዴ፥ ጊያዋ ꬋዬዲኖ። ሺን ጴፂሮሲኔ ዮሃኒሲ ሺቁዋፔ ካሬ ኬሳና ማላ ኣሳይ ኣዛዚዴ፥ ባሬ ጊዶን ዞሬቲዴ፥ «ሃ ኣሳቱዋ ኣያ ኡዳኔ? ኣዪሲ ጎፔ፥ ኡንቱንቱ ኩሺያን ኦሴቴዳ ዎልቃማ ማላታቱ ዬሩሳላሜን ዴዒያ ኡባው ቤቴዳ። ኑኒ ሄዋ ኤሮኮ ጋናው ዳንዳዮኮ። ሺን ዬዉ ኣሳው ላሌቴና ማላ፥ ሃዋፔ ሲንꬃው ሃ ኣሳቱ ዬሱሳ ሱንꬃ ኦሲኔ ኦዴናዳን፥ ሚኒሲዴ ኡንቱንታ፥ ‹ሂንቴና ኤሪቴ› ጎይቴ» ያጌዲኖ። ኡንቱንቱ ፄሲዴ፥ ዬሱሳ ሱንꬃ ሙሌካ ዴንꬄናዳኒኔ ኣባ ታማሪሴናዳን ኣዛዜዲኖ። ሺን ጴፂሮሲኔ ዮሃኒሲ ዛሪዴ፥ «ፆሳው ኤኖ ጊያዋ ኣጊዴ፥ ሂንቴንቶ ኤኖ ጊያዌ ፆሳ ሲንꬃን ሎዔንቶኔ ኣኔ ሂንቴ ፒርዲቴ። ኣዪሲ ጎፔ፥ ኑኒ ቤዔዳባኔ ሲሴዳባ ኦዴናን ኣጋናው ዳንዳዮኮ» ያጊዴ ሺቄዳ ኣሳው ኦዴዲኖ። ሺቄዳ ኣሳይ ኡንቱንታ ሙራናው ጋሶቲያባይ ꬋዪና፥ ላዔꬁዋ ዳሪሲ ፓሉሜቲዴ፥ ሃኔዳባው ኣሳይ ኡባይ ፆሳ ጋላቲያ ዲራው፥ ኡንቱንታ ቢሊዴ ዬዴዲኖ። ሄ ሃርጊያፔ ፓꬂያ ማላታቱ ኣው ኦሴቴዳ ቢታኒ ዬሌቶዴፔ ላይꬃይ ኣው ኦይታሙዋፔ ኣꬌዳ። ጴፂሮሲኔ ዮሃኒሲ ቢሌቲዴ፥ ባሬንቱ ዳባቱዋኮ ቢዴ፥ ቄሳቱዋ ካፓቱኔ ኣዪሁዳ ጪማቱ ባሬንታ ጌዳባ ኡባ ኡንቱንቶ ኦዴዲኖ። ኡንቱንቱ ሄዋ ሲሴዳ ዎዴ፥ ኢቲ ዎዛና ጊዲዴ፥ ፆሳ ሃዋዳን ያጊዴ ዎሴዲኖ፤ «ኡባ ሞዲያ ጎዳው፥ ሳሉዋ፥ ሳዓ፥ ኣባኔ ኡንቱንቱ ጊዶን ዴዒያ ኡባባ ሜꬌዳዎ፥ ኔኒ ኔው ኦꬂያ ኑ ኣዉዋ ዳዊቴ ዶናን ጌሻ ኣያናን ሃሳያዴ፥ ‹ኣዪሁዳ ጊዴና ኣሳይ ኣዪሲ ዪሎቴዴ? ቃሲ ኣሳይ ኣዪሲ ዳንቤናባው ማቄቴዴ? ሳዓ ካታቱ ጊጌቴዲኖ፤ ጋዲያ ሞዲያዋንቱ ጎዳ ቦላኒኔ ኢ ኦኬዳ ኪሪስቶሳ ቦላ ኢቲፔ ዴንዴዲኖ› ያጋዴ ሃሳያዳ። «ኣዪሲ ጎፔ፥ ሄሮዲሲኔ ጴንፄናዊያ ጲላፆሲ ኣዪሁዳ ጊዴና ኣሳናኔ ኢስራዔሊያ ኣሳና፥ ኔኒ ኦኬዳ ኪሪስቶሳ ኔ ጌሻ ናዓ ዬሱሳ ቦላ ዴንዳናው፥ ሃ ካታማን ሺቄዳዌ ቱማ። ቃሲ ኔኒ ኔ ዎልቃኒኔ ኔ ሼኒያን ሃናና ጋዴ ቆፓ ኡቴዳባ ኡባ ኦꬃናው ሺቄዲኖ። ሃዒካ ጎዳው፥ ኡንቱንቱ ናሲያ ፄላ፤ ኑኒ ኔና ካሊያዋንቱ፥ ኔ ቃላ ኩሜንꬃ ቆንጬቴꬃን ኦዳናዳን፥ ኑና ዳንዳዪሳ። ፓꬃናው ኔ ዎልቃ ቤሳ፤ ቃሲ ኔ ጌሻ ናዓ ዬሱሳ ሱንꬃን ኦራꬃባኔ ማላታ ኦሲሳ» ጊዴ ዎሴዲኖ። ኡንቱንቱ ፆሳ ዎሴዳዋፔ ጉዪያን፥ ሄ ኡንቱንቱ ሺቄዳሳይ ቃፄዳ። ኡንቱንቱ ኡባን ጌሻ ኣያናይ ኩሚና፥ ፆሳ ቃላ ቆንጬቴꬃን ኦዴዲኖ። ኣማኒያዋንቱ ኡባቱ ቆፋኒኔ ዎዛናን ኢቱዋ ጊዴዲኖ። ኡንቱንቱ ሜሂ ኡባይ ኢቲፔ ዴዒያዋፔ ኣቲን፥ ባሬው ዴዔዳባ ኦኒኔ ባሬንቱባ ጊቤና። ዬሱሲ ኪቴዳዋንቱ ጎዳ ዬሱሲ ሃይቁዋፔ ዴንዴዳዋ ዎልቃማ ዎልቃን ማርካቲኖ፤ ቃሲ ፆሳይ ኡንቱንቶ ኡባው ኣꬎ ኬካቴꬃ ዳሪሲዴ ኢሜዳ። ኣማኒያዋንቱ ጊዶን ሜቶታንቻይ ኢቱኔ ባዋ፤ ኣዪሲ ጎፔ፥ ቢታይ ዎይ ጎሊ ዴዒያዋንቱ ኡባቱ ዛሊዒዴ፥ ኣኬዳ ሚሻ ኣሂዴ፥ ዬሱሲ ኪቴዳዋንቱሲ ኢሚኖ፤ ሄ ሚሻይ ኣሳው ኮሺያዋዳን ሻኬቲ፥ ሁጲያን ሁጲያን ኢሜቴ። ቆጲሮሳ ጌቴቲያ ሳን ዬሌቴዳ ዮሴፋ ጊያ ሌዊያ ዛሪ ኢቱ ዴዔ፤ ኣ ሱንꬃ ዬሱሲ ኪቴዳዋንቱ ባርናባሳ ጌዲኖ። ሄዋ ቢሌꬃይ «ሜንꬄꬂያ ናዓ» ጊያዋ። ባርናባሲ ባሬው ዴዒያ ጋዲያ ዛሊዔዳ ሚሻ ኣሂዴ፥ ዬሱሲ ኪቴዳዋንቱሲ ኢሜዳ። ኢቲ ሃናኒያ ጌቴቲያ ቢታኒ ባሬ ማቻቲ ሳጲሪና ጋዲያ ዛሊዔዳ። ሄ ዛሊዔዳ ሚሻፔ ባሬ ማቻታ ኤሪሺን ኣሺዴ፥ ኣቶዋ ዬሱሲ ኪቴዳዋንቱሲ ኢሜዳ። ሺን ጴፂሮሲ ሃናኒያ፥ «ኔኒ ጌሻ ኣያና ጪማዴ ኔ ጋዲያ ዛሊዔዳ ሚሻፔ ሻካ ኣሻና ማላ፥ ፃላሂ ኔ ዎዛናን ኣዪሲ ጌሌዴ? ኔኒ ዛሊዓናፔ ካሴ ጋዲ ኔዋ ጊዴኔ? ቃሲ ኔኒ ዛሊዓ ሲሚናካ ሚሻይ ኔሳ ጊዴኔ? ያቲና፥ ሃዋ ማላባ ኦꬃናው ኣዪሲ ኔ ዎዛናን ቆፓዲ? ኔኒ ፆሳው ዎርዶቶዋፔ ኣቲን፥ ኣሳው ዎርዶታቤይካ» ያጌዳ። ሃናኒ ሄ ቃላ ሲሴዳ ማንዒያንካ ኩንዲዴ ሃይቂ ኣጌዳ፤ ሄዋ ሲሴዳ ኡባይ ዳሮ ያዬዳ። ዎዳላ ኣሳቱ ሶይ ጌሊዴ፥ ኣ ኣኃ ፃፂዴ፥ ካሬው ኬሲ ኣ ሞጌዲኖ። ሄዙ ሳቴ ጊዶዋፔ ጉዪያን፥ ሃናኒያ ማቻታ ሄዋ ኤሬናን ዴዓዴ ጌላዱ። ጴፂሮሲ ኢዞ፥ «ሂንቴንቱ ጋዲያ ሃኒ ኬና ሚሻን ዛሊዔዲቴ? ኣኔ ታው ኦዳ» ያጌዳ። ኢዛ፥ «ኤ ሃኒ ኬና ሚሻን ዛሊዔዶ» ያጋዱ። ጴፂሮሲ ሚሺራቶ፥ «ኔኒኔ ኔ ኣሲናይ ጎዳ ኣያና ፓጫናው ኣዪሲ ዞሬቴዲቴ? ቤዓ፤ ኔ ኣሲና ሞጌዳ ኣሳቱ ካሬን ዴዒኖ፤ ኔ ኣኃካ ኡንቱንቱ ካሬ ኬሳና» ያጌዳ። ሚሺራታ ሄ ማንዒያንካ ጴፂሮሳ ጌዲያ ማታን ኩንዳዴ ሃይቃ ኣጋዱ፤ ዎዳላ ኣሳቱ ጌሊያ ዎዴ ሃይቄዳዉኖ ዴሚዴ፥ ካሬ ኬሴዳዋፔ ጉዬ፥ ኢዚ ኣሲና ዱፉዋ ማታን ሞጌዲኖ። ኣማኒያ ኣሳ ኡባይኔ ሄዋ ሲሴዳ ሃራ ኣሳይ ኡባይ ዳሪ ያዬዳ። ዬሱሲ ኪቴዳዋንቱ ዳሮ ማላታኔ ኦራꬃባ ኣሳ ጊዶን ኦꬂኖ፤ ኣማኒያ ኡባቱ ሶሎሞኔ ባራንዳን ኢቲፔ ሺቂኖ። ሃራ ኣሳፔ ኡንቱንቱና ጋኬታናው ሃራይ ኣቶ ኢቱኔ ፃሊቤና፤ ሺን ኣሳይ ኡንቱንታ ቦንቼ። ኣማኒያ ኣቱማ ኣሳይኔ ማጫ ኣሳይ ካሴዋፔ ጮራይ ጎዳሲ ጉጄቴ። ሄዋ ዲራው፥ ኣሳይ ሃርጋንቻቱዋ ሻንቻማኒኔ ሳሌናን ቄሪ ቶኪዴ፥ ጴፂሮሲ ሄዋና ኣꬊያ ዎዴ ሃራይ ኣቶ፥ ኣው ኩዌንቶኔ ኡንቱንቱፔ ኢቱዋ ኢቱዋ ቦላና ኣꬋና ማላ፥ ካታማ ኦጊያ ዶና ኬሲዴ ዎꬄ። ቃሲ ጮራ ኣሳይ ዬሩሳላሜ ማታን ዴዒያ ካታማቱዋፔ ሃርጋንቻቱዋኔ ኢታ ኣያናን ኦይቄቴዳ ኣሳቱዋ ኣኪ ዬዲኖ፤ ኡባቱካ ፓፄዲኖ። ሄዋፔ ሲሚና ቄሳቱዋ ካፑኔ ኣናና ዴዒያ ሳዱቃዋናቱ ኡባቱ ዬሱሲ ኪቴዳዋንታ ዳሮ ቃናቲዴ፥ ኡንቱንቱ ቦላ ዴንዴዲኖ። ቃሲ ዬሱሲ ኪቴዳዋንታ ኦይቂዴ፥ ኡባ ኣሳ ቃቺያ ጎሊያን ዬጌዲኖ። ሺን ጎዳ ኪታንቻይ ቃማ ቃሾ ጎሌ ፔንጊያ ዶዪዴ፥ ዬሱሲ ኪቴዳዋንታ ካሬ ኬሲዴ፥ «ሂንቴንቱ ቢዴ፥ ጌሻ ጎሊያን ኤቂዴ፥ ሃ ኦራꬃ ዴዑዋ ቃላ ኡባ ኣሳው ኦዲቴ» ያጌዳ። ዬሱሲ ኪቴዳዋንቱ ሄዋ ሲሴዳ ዎዴ፥ ዎንቱማꬃን ጌሻ ጎሊያ ጌሊዴ፥ ታማርሳናው ዶሜዲኖ። ቃሲ ቄሳቱዋ ካፑኔ ኣናና ዴዒያዋንቱ ዪዴ፥ ሺቄዳ ኣሳና ኢስራዔሊያ ጪማቱዋ ኡባቱዋ ኢቲፔ ፄሲዴ፥ ዬሱሲ ኪቴዳዋንታ ባሬንቱ ሲንꬃ ኣሃና ማላ፥ ዎታዳራቱዋ ቃሾ ጎሌ ኪቴዲኖ። ሺን ዎታዳራቱ ቃሾ ጎሌ ቢዴ፥ ዬሱሲ ኪቴዳዋንታ ዴሚቤይኪኖ፤ ጉዬ ሲሚዴ ሺቄዳ ኣሳው፥ «ኑኒ ቢያ ዎዴ ቃሾ ጎሌ ካሪያ ዳሮ ሚኒሲ ቃቺና፥ ናጊያዋንቱካ ፔንጊያን ኤቄዳዋንታ ዴሜዶ፤ ሺን ኑኒ ቃሾ ጎሊያ ዶዪያ ዎዴ፥ ጎሌ ጋርሳን ሃራይ ኣቶ ኢቲ ኣሳይኔ ባዋ» ያጌዲኖ። *** ጌሻ ጎሊያ ዎታዳራቱዋ ኪቲያዌኔ ቄሳቱዋ ካፓቱ ሄዋ ሲሴዳ ዎዴ፥ «ሃዌ ዋኑዋሻ? ቃሲ ጊዲኒ ኣዬ ሃናንዴሻ?» ያጊዴ ሂርጌዲኖ። ሄዋፔ ጉዪያን፥ ኢቲ ቢታኒ ኡንቱንቱኮ ዪዴ፥ «ቤዒቴ፤ ቃሾ ጎሊያን ሂንቴ ቃቼዳ ኣሳቱ ጌሻ ጎሊያን ኤቂዴ፥ ኣሳ ታማሪሲኖ» ያጊዴ ኡንቱንቶ ኦዴዳ። ጌሻ ጎሊያ ዎታዳራቱዋ ኣዛዚያዌ ዎታዳራቱዋና ቢዴ፥ ዬሱሲ ኪቴዳዋንታ ኣሄዳ፤ ሺን ኡንቱንቱ ባሬንታ ኣሳይ ሹቻን ጫዳናዋንታ ጊዴ ያዬዳ ዲራው፥ ኡንቱንታ ሎዳን ኣሄዲኖ። ኡንቱንቱ ዬሱሲ ኪቴዳዋንታ ኣሂዴ፥ ሄዋ ሺቄዳ ሻንጉዋ ሲንꬃን ኤሲና፥ ቄሳቱዋ ካፑ ኡንቱንታ፥ «ሂንቴንታ ኑኒ ሄ ቢታኒያ ሱንꬃን ታማሪሴና ማላ ሚኒሲዴ ኣዛዚቤይኮ? ቤዒቴ፤ ሂንቴ ቲሚርቲያ ዬሩሳላሜ ካታማ ኡባ ጋꬄዲታ፤ ቃሲ ሄ ቢታኒያ ሼምፑዋን ኑና ኦይꬃናው ቆፒታ!» ያጊዴ ኦቼዳ። ጴፂሮሲኔ ዬሱሲ ኪቴዳ ሃራንቱ ዛሪዴ ያጌዲኖ፤ «ኑኒ ኣሳው ኣዛዜታናፔ ፆሳው ኣዛዜታናው ቤሴ። ማስቃሊያ ቦላ ሚሲማሪያን ꬊሺ ካቂዴ፥ ሂንቴ ዎꬌዳ ዬሱሳ ኑ ኣዋቱዋ ፆሳይ ሃይቁዋፔ ዴንꬄዳ፤ ኢስራዔላቱዋሲ ናጋራፔ ሲማኔ ናጋራ ኣቶ ጉሳ ዬሱሲ ኢማና ማላ፥ ፆሳይ ሞዲያዋኔ ኣሺያዋ ኣ ኦꬂዴ፥ ባሬፔ ኡሼቻ ባጋን ꬎቁ ꬎቁ ኦꬄዳ። ሄዋሲ ኑኒ ማርካ፤ ቃሲ ፆሳይ ባሬው ኣዛዜቲያዋንቱሲ ኢሜዳ ጌሻ ኣያናይካ ማርካ» ያጌዲኖ። ሺቄዳ ኣሳይ ሄዋ ሲሴዳ ዎዴ፥ ዳሮ ዪሎቲዴ፥ ዬሱሲ ኪቴዳዋንታ ዎꬋናው ቆፔዲኖ። ሺን ኣሳ ኡባን ዳሮ ቦንቼቴዳ ጋማሊያላ ጌቴቲያ፥ ሂጊያ ታማሪሲያ ኢቲ ፓሪሳዊ፥ ሺቁዋን ዴንዲ ኤቂዴ፥ ዬሱሲ ኪቴዳዋንቱ ጉꬃ ዎዲያ ካሬ ኬሳና ማላ ኣዛዚዴ ሄዋን ሺቄዳ ኣሳ ሃዋዳን ያጌዳ፤ «ኢስራዔሊያ ኣሳቶ፥ ሂንቴ ሃ ኣሳቱዋ ኦꬃና ቆፒያዋን ሂንቴንታ ናጊቴ። ኣዪሲ ጎፔ፥ ሃዋፔ ካሴ ዎዲያን ቴዎዳሳ ጌቴቲያዌ ባሬና ዎልቃማ ጊዴ ዴንዴዳ፤ ዴንዲና ኦይዱ ፄቱ ጊዲያ ኣሳቱ ኣናና ጋኬቴዲኖ፤ ሺን ኣ ዎꬊና፥ ኣ ካሌዳ ኡባቱካ ላሌቲዴ፥ ማዴና ኣሳ ጊዲዴ ኣቴዲኖ። ሄዋፔ ጉዪያን፥ ኣሳይ ፓይዴቲያ ዎዴ፥ ጋሊላ ዪሁዳይ ዴንዲዴ፥ ዳሮ ኣሳ ፓኑዋ ኡዲዴ ካሌꬄዳ፤ ሺን ኣካ ዎꬊና፥ ኣ ካሌዳ ኣሳይ ኡባይ ላሌቴዳ። «ሃዒካ ታኒ ሂንቴንቶ ኦዳይ፤ ሃ ኣሳቱዋፔ ሻኬቲቴ፤ ኡንቱንታ ቦቾፒቴ። ኣዪሲ ጎፔ፥ ሃ ቆፋይኔ ሃ ኦሱ ኣሳይ ኦꬄዳዋ ጊዶፔ ꬋያና። ሺን ሃ ቆፋይኔ ሃ ኦሱ ፆሳፔ ዬዳዋ ጊዶፔ፥ ሂንቴ ኡንቱንታ ꬋዪሳናው ዳንዳይኪታ፤ ኦኒ ኤሪ ሃዋ ሃኒዴ ፆሳና ሂንቴ ኢቴቴናዳን» ያጌዳ። ሄዋፔ ጉዬ ሺቄዳ ኣሳይ ጋማሊያላ ዞሪያ ኣኪዴ፥ ዬሱሲ ኪቴዳዋንታ ፄሲዴ፥ ሊሱዋን ሾጪሴዲኖ፤ ሄዋፔ ጉዪያን ኡንቱንታ፥ «ዬሱሳ ሱንꬃ ላዔꬁዋ ኡባካ ዴንꬆፒቴ» ጊ ቢሊዴ ዬዴዲኖ። ዬሱሳ ሱንꬃ ዲራው፥ ኡንቱንቱ ኡጋቲዴ ዬላታናው ቤሲያባ ቆፔዳ ዲራው፥ ሻንጉዋ ሲንꬃፔ ናሼቲዴ ኬሴዲኖ። ኡንቱንቱ ኡባ ጋላሲ ጌሻ ጎሊያኒኔ ኣሳ ሶዪን ዬሱሲ፥ ኪሪስቶሳ ጊዴዳዋ ታማሪሲያዋኔ ኦዲያዋ ያ ጉጄዲኖ። ሄ ዎዴ፥ ካሊያዋንቱ ፓይዱ ዳሪ ዳሪ ቢሺን፥ ጊሪኬ ቃላ ሃሳዪያ ኣዪሁዳቱኔ ዪሁዳን ዴዒያ ኣዪሁዳቱ ዋላቄቴዲኖ፤ ኣዪሲ ጎፔ፥ ጊሪኬ ቃላ ሃሳዪያ ኣዪሁዳቱ፥ «ኡባ ጋላሲ ጊሼቲያ ቁማን ኑ ኣሲናይ ሃይቆ ማጫዋንቱ ናቄቲኖ» ያጌዲኖ። ዬሱሲ ኪቴዳ ታማኔ ላዓቱ ዎሳ ጎሌ ኣሳ ኡባ ፄሲዴ፥ ሃዋዳን ያጌዲኖ፤ «ኑኒ ፆሳ ቃላ ኦዲያዋ ኣጊዴ፥ ቁማ ጊሻናው ኑሲ ቤሴና። ኢሻቶ፥ ሎዓ ጌቴቲያዋንታ ጌሻ ኣያናይኔ ኣꬎ ኤራቴꬃይ ኩሜዳ ላፑ ኣሳቱዋ ሂንቴ ጊዶፔ ዶሪቴ፤ ኑኒ ቃሲ ኡንቱንታ ሃ ኦሱዋሲ ሱንꬃና። ሺን ኑኒ ፆሳ ዎሳኒኔ ቃላ ኦዱዋን ሚናና» ያጌዲኖ። ዬሱሲ ኪቴዳዋንቱ ሃሳዬዳ ሃሳያይ ኣሳ ኡባ ናሼቼዳ፤ ሄዋፔ ጉዬ፥ ኣማኑኔ ጌሻ ኣያናይ ኩሜዳ ኢስፂፋኖሳ፥ ፒሊጶሳ፥ ጲሮኮሮሳ፥ ኒቃሮና፥ ፂሞና፥ ጳሪሜናኔ ኣዪሁዳቱዋ ኣማኑዋን ጌሌዳ ኣንፆኪያ ኒቆላዎሳ ዶሬዲኖ። ያቲዴ ዬሱሲ ኪቴዳዋንቱ ሲንꬃን ኡንቱንታ ኤሲና፥ ዬሱሲ ኪቴዳዋንቱ ፆሳ ዎሴዳዋፔ ጉዪያን፥ ባሬንቱ ኩሺያ ኡንቱንቱ ቦላ ዎꬄዲኖ። ፆሳ ቃላይ ኣኪ ኣኪ ቤዳ፤ ካሊያዋንቱ ፓይዱዋን ዬሩሳላሜን ዳሪሲ ዳሪ ዳሪ ቤዳ፤ ቃሲ ጮራ ቄሳቱካ ኣማኔዲኖ። ኣꬎ ኬካቴꬃይኔ ዎልቃይ ኩሜዳ ኢስፂፋኖሲ፥ ኣሳ ጊዶን ኦራꬃባኔ ዎልቃማ ማላታ ኦꬄ። ኣይሌቴꬃፔ ኬሴዳ ኣሳ ጊያ ኣዪሁዳ ኣማኒያዋንቱፔ፥ ቄሬናፔ፥ ኢስኪንዲሪያ ኣሳቱዋፔ፥ ኪልቂያፔኔ ኢሲያፔ ዬዳ ኢቲ ኢቲ ኣሳቱ ዴንዲዴ፥ ኢስፂፋኖሳና ፓሉሜቴዲኖ። ሺን ኢስፂፋኖሲ ኣꬎ ኤራቴꬃኒኔ ኣያናን ሃሳዪያዋ ዲጋናው ዳንዳይቤይኪኖ። ሄ ዎዴ ኡንቱንቱ፥ «ሙሴ ቦላኔ ፆሳ ቦላ ኢ ቦሪያ ቃላ ሃሳዪሺን ሲሴዶ» ጊያ ዎርዶ ኣሳቱዋ ሻሜዲኖ። ኣሳ ኡባ፥ ጪማቱዋኔ ሙሴ ሂጊያ ታማሪሲያዋንታ ሃንቄꬄዲኖ፤ ኢስፂፋኖሳኮ ዪዴ ኣ ኦይቂዴ፥ ሺቄዳ ኣሳኮ ኣሂና፥ ኣ ቦላ ፄሴዳ ዎርዶ ማርካቱ፥ «ሃ ቢታኒ ሃ ጌሻ ጎሊያኔ ሙሴ ሂጊያ ቦሪያዋ ኣዉዴኔ ኣጌና። ኣዪሲ ጎፔ ኢ፥ ‹ሃዌ ናዚሬቲያ ዬሱሲ ሃ ጌሻ ጎሊያ ኮላና፤ ሙሴ ኑሲ ኢሜዳ ሂጊያካ ላማና› ያጊሺን፥ ኑኒ ሲሴዶ» ያጌዲኖ። ሺቁዋን ኡቴዳ ኣሳይ ኡባይ ኢስፂፋኖሳ ኣኬኪዴ ፄሊያ ዎዴ፥ ኣ ሶምዒ ኪታንቻ ሶምዒያ ማላቴ። ቄሳቱዋ ኡባቱዋ ካፑ ኢስፂፋኖሳ፥ «ሃዌ ቱሜ?» ያጊዴ ኦቼዳ። ኢስፂፋኖሲ «ታናዳን ኣማኒያዋንቶ፥ ታ ኣዋቶ፥ ሲሲቴ! ኑ ኣዉዋ ኣብራሃሞ ቢሮ ካራኔ ባናፔ ካሴ ማሲጴፆሚያን ዴዒሺን፥ ቦንቾ ፆሳይ ኣው ቤቲዴ፥ ‹ኔ ቢታፔኔ ኔ ዳባቱዋፔ ሻኬታዴ፥ ታኒ ኔና ቤሲያ ጋዲያ ባ› ያጌዳ። ሄ ዎዴ ኣብራሃሞ ካላዳዋቱ ጋዲያፔ ኬሲዴ፥ ካራኔን ዴዓናው ቤዳ። ኣ ኣቡ ሃይቄዳዋፔ ጉዪያን፥ ፆሳይ ኣ ሃ ጋዴ ሂንቴ ሃዒ ዴዒያሳ ኣሄዳ። ኢ ሃ ጋዲያፔ ሃራይ ኣቶ፥ ጌዲያን ዬꬊያ ሳዓካ ኣብራሃሞሲ ኢሚቤና፤ ሺን ኣው ናዓይ ꬋዮፔካ፥ ፆሳይ ኣ፥ ‹ታኒ ኔዉኔ ኔፔ ጉዪያን፥ ኔ ዜሬꬃው ሃ ጋዲያ ላታ ኦꬃዴ ኢማና› ያጌዳ። ፆሳይ ኣብራሃሞሲ፥ ‹ኔ ዛራቱ ሃራ ጋዲያን ዴዓና፤ ያኒ ኦይዱ ፄቱ ላይꬃው ኡንቱንቱ ኣይሌታናኔ ናቄታና። ሺን ታኒ ኔ ዜሬꬃ ሞዲያ ኣሳ ቦላ ፒርዳና፤ ሄዋፔ ጉዪያን፥ ኡንቱንቱ ሄ ጋዲያፔ ኬሲዴ፥ ሃዋን ታው ጎዪናና› ያጌዳ። ፆሳይ ኣብራሃሜ ዜሬꬃይ ቃፃሬታና ማላ ኣናና ጫቂና፥ ዪሳቃ ኢ ዬሊዴ፥ ሆስፑንꬃ ጋላሲ ቃፃሬዳ፤ ዪሳቂ ያዪቆባ ቃፃሪና፥ ቃሲ ያዪቆቢ ታማኔ ላዑ ኣዋቱዋ ካፓቱዋ ቃፃሬዳ። «ኣዋቱዋ ካፓቱ ዮሴፋ ቃናቲዴ፥ ጊብፄ ጋዲያሲ ኣይሌታናዳን፥ ኣ ዛሊዔዲኖ፤ ሺን ፆሳይ ኣናና ኢቲፔ ዴዔ። ፆሳይ ዋዪያ ኡባፔካ ኣ ኬሴዳ፤ ቃሲ ጊብፄ ካቲያ ሲንꬃንካ ናሹዋኔ ኣꬎ ኤራቴꬃ ኣው ኢሜዳ፤ ጊብፄ ካቲ ዮሴፎሲ ጊብፄ ጋዲያኔ ባሬ ጎሊያ ኡባ ሞዳናዳን፥ ሱንꬃቴꬃ ኢሜዳ። «ጊብፄ ጋዲያኒኔ ካናኔ ጋዲያን ኡባን ኮሻይ ጌሊዴ፥ ጮራ ኣሳ ሜቶꬄዳ፤ ሄ ጋሱዋን ኑ ኣዋቱ ቁማ ዴሚቤይኪኖ። ያዪቆቢ ጊብፄ ጋዲያን ካꬃይ ዴዒያዋ ሲሲዴ፥ ኑ ኣዋቱዋ ኮይሮ ያ ዬዴዳ። ላዔꬁዋ ቡሳን ዮሴፎ ባሬ ኢሻቱዋሲ ኤሬቴዳ፤ ቃሲ ጊብፄ ካቲካ ዮሴፎ ዛሪያ ኤሬዳ። ዮሴፎ ባሬ ኣዉዋ ያዪቆቢኔ ባሬ ዳቡ ኡባይ ሙሌካ ላፑን ታማኔ ኢቼሹ ኣሳይ ባሬኮ ያና ማላ፥ ኪቲዴ ፄጊሴዳ። ያዪቆቢ ጊብፄ ጋዲያ ዎꬊዴ ሃይቄዳ፤ ኑ ኣዋቱካ ያኒ ሃይቄዲኖ። ኡንቱንቱ ኣኃይ ሄዋፔ ሴኬማ ጌቴቲያ ጋዲያ ቶኬቲዴ፥ ያኒ ኣብራሃሞ ሃሞራ ናናፔ ዳሮ ቢራን ሻሜዳ ዱፉዋን ሞጌቴዳ። «ሺን ፆሳይ ኣብራሃሞሲ ኢማና ጌዳዌ ፖሌቲያ ዎዲ ጋካና ማቲና፥ ዮሴፋ ኤሬና ሃራ ካቲ ጊብፄ ጋዲያን ዴንዳና ጋካናሲ፥ ኣሳይ ዳሪ ዳሪ ቤዳ። *** ሄ ካቲ ኑ ዛሪያ ጪሚዴ፥ ጉꬃ ናናይ ሃይቃና ማላ፥ ካሬ ኡንቱንታ ኬሲ ኦላናዳን፥ ኑ ኣዋቱዋ ኡንዔꬄዳ። «ሙሴ ዬሌቴዳዌ ሄ ዎዴ፤ ፆሳ ሲንꬃን ኢ ዳሮ ሎዖ ናዓ ጊዴዳ፤ ባሬ ኣዉዋ ጎሊያን ሄዙ ኣጌና ጋካናሲ ዲጬዳ። ሙሴ ዎራ ኦሌቴዳ ዎዴ፥ ጊብፄ ካቲያ ናታ ዴማዴ ባሬ ናዓዳን ኣ ዲቻዱ። ሙሴ ጊብፃቱዋ ኣꬎ ኤራቴꬃ ኡባ ታማሪዴ፥ ቃላኒኔ ኦሱዋን ዎልቃማ ኣሳ ጊዴዳ። «ሺን ሙሴው ዬሌቶዴፔ ላይꬃይ ኦይታሙዋ ኩሜዳ ዎዴ፥ ባሬ ኢሻቱዋ፥ ኢስራዔሊያ ኣሳቱዋ ቤዓናው ባሬ ዎዛናን ቆፔዳ። ኢስራዔላቱዋፔ ኢቱዋ ጊብፄፔ ኢቱ ናቂሺን ቤዒዴ፥ ሄ ኢስራዔሊያ ማዴዳ፤ ሄ ናቄዳ ጊብፄ ቢታኒያ ዎꬊዴ፥ ኣ ሃሉዋ ኬሴዳ። ሙሴ ባሬ ኢሻቱዋ ባሬ ባጋና ፆሳይ ኣሻና ሃኒያዋ ኡንቱንቱ ኣኬኬዲኖ ጊዴ ቆፔዳ፤ ሺን ኡንቱንቱ ኣኬኪቤይኪኖ። «ዎንቴꬃ ጋላሲ ላዑ ኢስራዔሊያ ኣሳቱ ኢቱ ኢቱዋና ዋꬌቲያዋንታ ዴሚዴ፥ ኡንቱንታ ሲጌꬃናው ኮዪዴ፥ ‹ኣሳቶ፥ ኢሻቱ ሂንቴንቱ ኣዪሲ ኢቱ ኢቱዋ ናቂቴ?› ያጌዳ። «ሺን ሄ ባሬ ሾሩዋ ናቂያዌ ሙሳ፥ ‹ኔና ኑ ቦላ ሞዲያዋኔ ዳና ኡዲዴ፥ ሱንꬄዳዌ ኦኔ? ኔኒ ዚኖ ጊብፄ ቢታኒያ ዎꬌዳዋዳን፥ ታናካ ዎꬋናው ኮያይ?› ያጊዴ፥ ሙሳ ካሬው ሱጊ ዬጌዳ። ሙሴ ሄዋ ሲሴዳ ዎዴ ጊብፄፔ ኬሲዴ፥ ሚዲያማ ጋዲያን ቤቴ ጊዲ ዴዒዴ፥ ላዑ ኣቱማ ናና ያኒ ዬሌዳ። «ጎዳ ኪታንቻይ ኦይታሙ ላይꬃፔ ጉዪያን፥ ሲና ዴሪያ ማታን ዴዒያ ባዙዋ ቡራን ኤፂያ ታማ ላጩዋ ጊዶን ሙሴው ቤቴዳ። ሙሴ ባሬ ቤዔዳዎ ማላሌቲዴ፥ ኣኬኪ ፄላናው ቡራ ማታን ኢ ሺቂዴዒሺን፥ ጎዳ ቃላይ፥ ‹ታኒ ኔ ኣዋቱዋ ፆሳ፥ ኣብራሃሜ ፆሳ፥ ዪሳቃ ፆሳ፥ ያዪቆባ ፆሳ› ያጊዴ ሙሴኮ ዬዳ። ሙሴ ያሻ ኮኮሪዴ፥ ፄላናው ፃሊቤና። *** «ጎዳይ ሙሳ፥ ‹ኔኒ ኤቄዳ ቢታይ ጌሻ ጊዲያ ዲራው፥ ኔ ጌዲያን ዴዒያ ጫማካ ኬሳ። ታኒ ጊብፄን ዴዒያ ታ ኣሳ ዋዪያ ጌሻ ቤዓዴ፥ ቃሲ ኡንቱንቱ ኦሊያካ ሲሳዴ፥ ኡንቱንታ ኣሻናው ዎꬋዲ። ሃዒ ሃ ያ። ታኒ ኔና ጊብፄ ኪታና› ያጌዳ። «ሄ ሙሳ ኢስራዔላቱ፤ ‹ኔና ኑና ሞዲያዋኔ ዳና ኡዲዴ ሱንꬄዳዌ ኦኔ?› ያጊዴ ኢፄዲኖ፤ ቡራ ጊዶን ኣው ቤቴዳ ኪታንቻን ሞዲያዋኔ ኣሺያዋ ጊዳና ማላ፥ ፆሳይ ኣ ኪቴዳ። ሄ ሙሴ ኢስራዔላቱዋ ጊብፄ ጋዲያን ዞዖ ኣባኒኔ ሜላ ቢታን፥ ኦይታሙ ላይꬃው ኦራꬃባኔ ማላታ ኦꬂዴ፥ ጊብፄፔ ካሌꬄዳ። «ኢስራዔሊያ ኣሳሲ፥ ‹ፆሳይ ታና ዴንꬄዳዋዳን፥ ሂንቴ ዛሪያ ጊዶፔ ታ ማላ ናቢያ ሂንቴንቶ ዴንꬃናዋ› ያጌዳዌ ሄ ሙሳ። ኢ ኢስራዔሊያ ኣሳ ማባራና ኢቲፔ ሜላ ቢታን ዴዔዳዋ፤ ኢ ኑ ኣዋቱዋናኔ ሲና ዴሪያ ቦላን ባሬው ሃሳዬዳ ኪታንቻና ኢቲፔ ዴዔዳ። ያቲዴ ፆሳፔ ዴዑዋ ቃላ ኑሲ ኢማናው ኣኬዳ። «ሙሴው ኑ ኣዋቱ ኣዛዜታናው ዶሲቤይኪኖ፤ ሺን ጌዴ ኣ ሱጊ ኦሊዴ፥ ጉዬ ጊብፄ ሲማናው ኣሞቴዲኖ። ቃሲ ኣሮና፥ ‹ኑና ካሌꬂያ ፆሳቱዋ ኑሲ ሜꬋ፤ ኣዪሲ ጎፔ፥ ሃ ኑና ጊብፄፔ ኣሄዳ ሙሴ ዋኔዴንቶ ኑኒ ኤሮኮ› ያጌዲኖ። ሚዛ ማራ ማላቲሲዴ፥ ሄ ዎዴ ኤቃ ኦꬄዲኖ፤ ሄ ኤቃሲ ያርሹዋ ያርሺዴ፥ ባሬንቱ ኩሺ ኦꬄዳ ኦሱዋን ናሼቴዲኖ። ሺን ፆሳይ ኡንቱንቶ ዞኪያ ዛሬዳ፤ ኡንቱንቱ ሳሉዋ ፆሊንቲያሲ ጎዪናናዳን፥ ኡንቱንታ ኣጌዳ፤ ናባቱዋ ማፃፋን፥ ‹ኢስራዔሊያ ኣሳቶ፥ ኦይታሙ ላይꬃ ኣሳይ ባይና ሳን ሹኬዳ ሜሂያኔ ያርሹዋ ታው ያርሼዲቴ? ሂንቴንቱ ሂንቴንቶ ጎዪናናው ኦꬄዳ ኤቃቱዋ፥ ሞሎካ ዱንካኒያኔ ሬፋና ጊያ ሂንቴ ፆሳ ፆሊንቲያ ቶኬዲታ። ታኒ ሂንቴንታ ባቢሎኔፔ ሂኒ ባጋ ዬዳና› ጌቴቲዴ ፃፌቴዳ። «ሙሴ ባሬ ቤዔዳዋ ማላቲሲዴ፥ ጎዳይ ኣው ኦዴዳዋዳን ሜꬌዳ ማርካ ዱንካኒ ኑ ኣዋቱዋሲ ሜላ ቢታን ዴዔ። ቃሲ ኑ ኣዋቱ ዱንካኒያ ባሬንቱ ኣዋቱዋፔ ካላን ኣኪዴ፥ ፆሳይ ካሴ ዬዴርሴዳ ኣዪሁዳ ጊዴና ኣሳ ቢታ ኦይቄዳ ዎዴ፥ ኢያሱና ጌሊሴዲኖ፤ ሄ ዱንካኒ ዳዊቴ ዴዒያ ዎዲ ጋካናዉካ ሄዋን ዴዔዳ። ዳዊቴ ፆሳን ሳቤቴዳ፤ ቃሲ ያዪቆባ፥ ጎዳይ ዴዓና ጎሊያ ኬፃናው ፆሳ ዎሴዳ። ሺን ኣው ጎሊያ ኬፄዳዌ ሶሎሞና። «ሺን ናቢ፥ ‹ጎዳይ፥ «ሳሉ ታ ካዉቴꬃ ኦይዲያ፤ ሳዓይካ ታ ጌዲ ዬꬊያሳ። ያቲና፥ ታው ኣያ ማላ ጎሊያ ኬፃኒቴ? ዎይ ታኒ ሼምፓናሳይ ሃቃኔ? ሃ ኡባባ ታ ኩሺያን ሜꬋቤይኪታ?» ያጌ› ጌዳዋዳን፥ ኡባፔ ቦላ ፆሳይ ኣሳይ ኬፄዳ ጎሊያን ዴዔና። *** *** «ሂንቴንቱ ኣይቤ ሞርጊ ሚኖ ኣሴ? ሂንቴንቱ ዎዛናይ ፆሳ ቃላ ኣካናው ኣይቤ ዳሜዳዌ? ሂንቴንቱ ሃይꬃይካ ዋኒ ቱሌዴ? ኡባ ዎዴ ጌሻ ኣያናሲ ኣዛዜቴናን ኢፂታ። ናባቱዋን ሂንቴንቱ ኣዋቱ ዬዴርሲቤናዌ ኦኔ? ፆሳ ናዓይ ፂሉ ያናዋ ካሴቲዴ ኦዴዳዋንታካ ዎꬌዲኖ። ሃዒ ሂንቴንቱካ ኪታንቻቱዋ ኩሺያፔ ፆሳ ሂጊያ ኣኪዴ ኣዛዜቲቤናዋንቱ፥ ፂሉዋ ኣꬂ ኢሚዴ ዎꬌዲታ» ያጌዳ። *** ኡንቱንቱ ሄዋ ሲሴዳ ዎዴ፥ ባሬንቱ ዎዛናን ኢስፂፋኖሳሲ ዳሮ ዪሎቲዴ፥ ባሬንቱ ሜንቴርሻ ሳዒዴ ናሴዲኖ። ሺን ኢስፂፋኖሲ ባሬናን ጌሻ ኣያናይ ኩሚና፥ ሳሉዋ ፑዴ ጫዲ ፄሊዴ፥ ፆሳ ቦንቹዋኔ ዬሱሲ ፆሳፔ ኡሼቻ ባጋን ኤቄዳዋ ቤዔዳ። ያቲዴ፥ «ፄሊቴ፥ ታኒ ሳሉ ዶዬቲና፥ ኣሳ ናዓይ ፆሳፔ ኡሼቻ ባጋን ኤቄዳዋ ቤዓይ» ያጌዳ። ኮሻ ꬎቁ ኦꬂ ዋሲዴ፥ ባሬንቱ ሃይꬃ ቱጪዴ፥ ኢቲፔ ጊዲ ኣኮ ዎፄዲኖ። ካታማፔ ጋፃ ኣ ኬሲዴ፥ ሹቻን ጫዴዲኖ። ማርካቱካ ባሬንቱ ማዩዋ ኬሲዴ፥ ኢቲ ሳዖላ ጌቴቲያ ዎዳላ ማታን ዎꬄዲኖ። ኢስፂፋኖሲ፥ «ታ ጎዳ ዬሱሳ፥ ታ ሼምፑዋ ኣካ» ያጊዴ ፄጊሺን፥ ኡንቱንቱ ሹቻን ኣ ዴቺኖ። ሄ ዎዴ ኢ ጉልባቲዴ፥ ባሬ ኮሻ ꬎቁ ኦꬂዴ፥ «ታ ጎዳው፥ ሃ ናጋራ ኡንቱንቶ ኣቶ ጋ» ያጌዳ። ሄዋ ጊኔ ሃይቂ ኣጌዳ። ሳዖሊ ኢስፂፋኖሴ ሃይቁ ሎዓ ጊ ኣኬዳ። ሄ ጋላሲ ዬሩሳላሜን ዴዒያ ኣማኒያዋንቱ ቦላ ዎልቃማ ዬዴርሱ ዴንዴዳ፤ ዬሱሲ ኪቴዳዋንቱፔ ኣቲን፥ ኣማኒያዋንቱ ኡባቱ ዪሁዳ ጋዲያኒኔ ሳማሪያ ጋዲያን ላሌቴዲኖ። ፆሳ ኣሳቱ ኢስፂፋኖሳ ሞጌዲኖ፤ ቃሲ ኣው ዳሮ ዬኬዲኖ። ሺን ሳዖሊ ኣማኒያ ኣሳ ꬋዪሳናው ባፄቴ፤ ኡባ ጎሊያ ጌሊ ጌሊዴ፥ ኣቱማ ኣሳኔ ማጫ ኣሳ ጎቺ ጎቺዴ፥ ቃሾ ጎሌ ዬዴ። ላሌቴዳ ኣማኒያዋንቱ ቃላ ኦዲዴ፥ ኡባሳ ቤዲኖ። ፒሊጶሲ ሳማሪያ ካታማ ዎꬊዴ፥ ኪሪስቶሳባ ኣሳሲ ኦዴዳ። ጮራ ኣሳይ ፒሊጶሲ ጌዳዋ ዳሪሲ ኣኬኪዴ ሲሴዳ፤ ኢ ኦꬂያ ማላታካ ቤዔዳ። ኣዪሲ ጎፔ፥ ኢታ ኣያናቱ ኮሻ ꬎቁ ኦꬂ ሃሳዪዴ፥ ጮራ ኣሳፔ ኬሴዲኖ፤ ቃሲ ጮራ ሲሌዳዋንቱኔ ዎባቱ ፓፄዲኖ። ሄ ካታማን ኣሳይ ዳሮ ናሼቴዳ። ሺን ሲሞና ጌቴቲያ ኢቲ ቢታኒ ካሴ፥ ባሬና ዎልቃማ ጊ ካዪዲ፥ ሳማሪያ ኣሳ፥ «ላ ሃዌ ኣይቤ ኦራꬃቤ» ጊሲዴ ሄ ካታማን ዴዔዳ። ጉꬃቴꬃፔ ዶሚዴ፥ ዎጋቴꬃ ጋካናው፥ ኣሳይ ኡባይ፥ «ፆሳ ዎልቃይ ዳሮ ዎልቃማይ ሃዋ» ጊዴ ኣባ ሲሴ። ዳሮ ዎዲያፔ ዶሚዴ፥ ካዩዋን ሳማሪያ ኣሳ «ላ ሃዌ ኣይባ ኦራꬃቤ» ጊሴዳ ዲራው፥ ኣሳይ ኣባ ሲሴ። ሺን ፒሊጶሲ ፆሳ ካዉቴꬃባኔ ዬሱሲ ኪሪስቶሳ ሱንꬃባ ኣቱማዋንቱሲኔ ማጫዋንቱሲ ሚሺራቹዋ ኦዲዴ፥ ኡንቱንቱ ኣባ ኣማኒዴ ፃማቄቴዲኖ። ቃሲ ሲሞኒካ ባሬ ሁጴው ኣማኒዴ ፃማቄቴዳዋፔ ጉዪያን፥ ፒሊጶሳና ኢቲፔ ዴዒዴ፥ ኦሴቲያ ማላታኔ ፆሳይ ኦꬄዳ ዎልቃማ ማላታ ቤዒዴ ማላሌቴዳ። ዬሱሲ ኪቴዳ ዬሩሳላሜን ዴዒያዋንቱ፥ ሳማሪያ ኣሳይ ፆሳ ቃላ ኣኬዳዋ ሲሴዳ ዎዴ፥ ጴፂሮሳኔ ዮሃኒሳ ኡንቱንቱኮ ዬዴዲኖ። ጴፂሮሲኔ ዮሃኒሲ ዎꬊዴ፥ ኣማኒያዋንቱ ጌሻ ኣያና ኣካና ማላ፥ ኡንቱንቶ ፆሳ ዎሴዲኖ፤ ኣዪሲ ጎፔ፥ ሳማሪያ ኣሳቱ ጎዳ ዬሱሳ ሱንꬃን ፂንቃታ ፃላላ ፃማቄቴዳዋፔ ኣቲን፥ ኡንቱንቱፔ ኢቱዋ ቦላኒኔ ጌሻ ኣያናይ ዎꬊቤና። ሄ ዎዴ ጴፂሮሲኔ ዮሃኒሲ ባሬንቱ ኩሺያ ኡንቱንቱ ቦላ ዎꬆዋፔ ጉዪያን ኡንቱንቱ ጌሻ ኣያና ኣኬዲኖ። ዬሱሲ ኪቴዳዋንቱ ባሬንቱ ኩሺያ ኡንቱንቱ ቦላ ዎꬂና፥ ኡንቱንቶ ጌሻ ኣያናይ ኢሜቴዳዋ ሲሞኒ ቤዔዳ ዎዴ፥ ጴፂሮሳሲኔ ዮሃኒሳሲ ሚሻ ኣሂዴ፥ «ታኒካ ታ ኩሺያ ዎꬂያ ኡባይ ጌሻ ኣያና ኣካና ማላ፥ ሃ ማታ ታዉካ ኢሜሪኪቴ» ያጌዳ። ሺን ጴፂሮሲ ኣው ሃዋዳን ያጌዳ፤ «ኔኒ ፆሳ ኢሞታ ሚሻን ሻማናው ቆፔዳ ዲራው፥ ኔ ሚሻይ ኔናና ጮ ꬋዮ። ኔ ዎዛናይ ፆሳ ሲንꬃን ሱሬ ጊዴና ዲራው፥ ኔው ሃዋን ጊሹ ባዋ። ያቶዋፔ ጉዪያን ሃ ኔ ዎዛና ኢታ ቆፋ ዲራው፥ ናጋራፔ ሲማ፤ ኦኒ ኤሪ ኔ ዎዛናን ዴዒያ ኢታ ቆፋ ፆሳይ ኣቶ ጋኔንቶኔ ፆሳ ዎሳ። ኣዪሲ ጎፔ፥ ኔኒ ዳሮ ቃናቲያ ኦይቃዴ ናጋራ ቃሹዋን ዴዒያዋ ታኒ ቤዓይ» ያጌዳ። ሄዋፔ ጉዬ ሲሞኒ ጴፂሮሳሲኔ ዮሃኒሳሲ ዛሪዴ፥ «ሂንቴንቱ ጌዳዋፔ ኢቲባይኔ ታና ጋኬና ማላ፥ ሂንቴ ታው ፆሳ ዎሲቴ» ያጌዳ። ጴፂሮሲኔ ዮሃኒሲ ማርካቴዳዋፔኔ ጎዳ ቃላ ኦዴዳዋፔ ጉዪያን፥ ጉዬ ዬሩሳላሜ ሲሜዲኖ፤ ያቲዴ ሳማሪያን ዴዒያ ዳሮ ቄሪ ካታማቱዋን ሚሺራቹዋ ቃላ ኦዴዲኖ። ጎዳ ኪታንቻይ ፒሊጶሳ፥ «ዴንዳዴ ዬሩሳላሜፔ ጋዛ ኣፊያ ኣሲ ባይና ሜላ ሳዓ ኦጊያኮ ባ፤ ሄ ኦጊ ኣዋይ ኬሲያሳ ፄሊያ ዎዴ ኡሼቻ ዱጌሃ ባጋና ዴዔ» ያጌዳ። ፒሊጶሲ ዴንዲዴ ቤዳ። ሂንዴኮ ጌቴቲያ ቶጲያ ካታቲሲ ቢታ ሞዲያ ኢ ሚሻ ኡባካ ናጊያ ቶጲያ ኣሳ ጊዴዳ ኢቲ ሹፋይ ዴዒያዌ ጎዪናናው ዬሩሳላሜ ቤዳ። ፓራይ ጎቺያ ጋሪያን ኡቲዴ፥ ዬሩሳላሜፔ ጉዬ ሲሚዴ፥ ናቢያ ኢሲያሳ ማፃፋ ናባቤ። ጌሻ ኣያናይ ፒሊጶሳ፥ «ሄ ጋሪያኮ ሺቃዴ ኢቲፔ ጊዳ» ያጌዳ። ፒሊጶሲ ዎፂ ዪዴ፥ ናቢያ ኢሲያሳ ማፃፋ ሹፋይ ናባቢሺን ሲሲዴ ኣ፥ «ኔኒ ናባቢያዋ ኣኬካይ?» ያጌዳ። ሹፋይ፥ «ታው ኦዲዴ ኣኬኪሲያ ኣሳይ ባይናን ዋኒዴ ኣኬኬቲ?» ያጌዳ፤ ቃሲ ባሬናና ጋሪያን ኬሲዴ ኡታና ማላ፥ ፒሊጶሳ ዎሴዳ። ሹፋይ ናባቢያ ማፃፋይ «ዶርሳዳን ኢ ሹኬታናው ላጌቴ። ዶርሳ ማራይ ባሬ ኢሲኪያ ቃንፂያዋ ሲንꬃን ጮዑ ጊያዋዳን፥ ኢካ ባሬ ዶና ፖኪቤና። ኢ ካዉሼዳዋዳን ኣው ፂሎ ፒርዳይ ꬋዬዳ። ዬሱሳ ዴዑ ሃ ሳዓፔ ፑዴ ኣኬቲዲጌዳ ዲራው፥ ኣ ዛሪያባ ኦኔ ኦዳናዌ?» ያጌዳ። ሹፋይ ዛሪዴ ፒሊጶሳው፥ «ናቢ ሃዋ ኦዋ ኦዲ? ባሬባ ኦዲዬ ዎይ ሃራ ኣሳባ ኦዲ? ታው ኦዳሪኪ» ያጌዳ። ፒሊጶሲ ዛሪዴ፥ ፆሳ ማፃፋ ኢ ናባቢያሳፔ ዶሚዴ፥ ዬሱሳባ ሚሺራቹዋ ቃላ ኣው ኦዴዳ። ኡንቱንቱ ኦጊያ ኦይቂ ቢዴ፥ ሃꬃይ ዴዒያሳ ጋኬዲኖ፤ ሹፋይ፥ «ሃꬃ ሃዋ ቤዓ፤ ፃማቄቲያዋ ታና ዲጊያዌ ኣዬ?» ያጌዳ። ፒሊጶሲ ኣ፥ «ኔኒ ኔ ኩሜንꬃ ዎዛናፔ ኣማኖፔ፥ ዳንዳያ» ያጌዳ። ኢ ዛሪዴ፥ «ዬሱሲ ኪሪስቶሲ ፆሳ ናዓ ጊዲያዋ ታኒ ኣማናይ» ያጌዳ። ጋሪ ኤቃና ማላ ሹፋይ ኣዛዚና፥ ኢኔ ፒሊጶሲ ላዓቱ ዱጌ ዎꬊዴ፥ ሃꬃን ጌሊና ፒሊጶሲ ኣ ፃማቄዳ። ኡንቱንቱ ሃꬃፔ ጋፃ ኬሴዳ ዎዴ፥ ጎዳ ኣያናይ ፒሊጶሳ ሊጲ ኡዲዴ፥ ኣፊ ኣጌዳ፤ ላዔꬁዋ ሹፋይ ፒሊጶሳ ቤዒቤና፤ ሺን ባሬ ኦጊያ ናሼቲዴ ቤዳ። ፒሊጶሲ ባሬ ሁጴው ኣዞፆሳን ዴዒያዋ ኤሬዳ፤ ቃሲ ቂሳሪያ ያና ጋካናዉካ፥ ካታማ ኡባን ዩዪዴ ሚሺራቹዋ ቃላ ኦዴ። ሺን ሳዖሊ ጎዳ ካሊያዋንታ ዎꬋናው ማንዲዴ፥ ቄሳቱዋ ኡባቱዋ ካፑዋኮ ቤዳ። ያቲዴ ጎዳ ኦጊያ ካሊያ ኣሳቱዋ ማጫዋንታኔ ኣቱማዋንታ ዴሞፔ፥ ቃቺዴ ዬሩሳላሜ ኣሃናው፥ ዳማስቆን ዴዒያ ኣዪሁዳ ዎሳ ጎሌቶ ዳቢዳቢያ ፃፋናው ኣ ዎሴዳ። ኢ ቢዴ፥ ዳማስቆ ካታማ ጋካና ማቶዴ፥ ቆፔናን ሳሉዋፔ ዎልቃማ ፖዑ ኣ ዩሹዋ ኡባኒ ፖዔዳ። ሳዖሊ ሳዓን ኩንዲ ኡቲና፥ «ሳዖላ ሳዖላ፥ ኣዪሲ ታና ዋዪሳይ?» ጊያ ቃላ ሲሴዳ። ሳዖሊ፥ «ታ ጎዳው፥ ኔኒ ኦኔ?» ያጊዴ ኦቼዳ። ዬሱሲካ፥ «ታኒ ኔኒ ዬዴርሳዴ ዴዒያ ዬሱሳ።» ያጌዳ። ሺን ሳዖሊ ኮኮሪዲኔ ማላሌቲዴ፥ «ታ ጎዳው፥ ታኒ ኣያ ኦꬃናዳን ኮያይ?» ያጌዳ። ጎዳይ ኣ፥ «ዴንዳዴ ካታማ ጌላ፤ ኔኒ ኦꬃናው ቤሲያባይ ኔው ያኒ ኦዴታናዋ» ያጌዳ። ሳዖላና ኦጊያን ቢያ ኣሳቱ ኣይኔ ሃሳዬናን ኤቂ ኣጊዴ፥ ኮሻ ሲሲኖ፤ ሺን ኦናኔ ቤዒቤይኪኖ። ሳዖሊ ሳዓፔ ዴንዲና፥ ኣ ኣይፊ ዶዬቴዳ ዎዴ፥ ኣይኔ ፄላናው ዳንዳዪቤና፤ ሄዋ ዲራው፥ ኡንቱንቱ ኣ ኩሺያ ኦይቂ ጎቺዴ፥ ዳማስቆ ጌሊሴዲኖ። ሄዙ ጋላሳ ጋካናዉካ ኢ ፄሊቤና፤ ኣይኔ ሚቤና፤ ኣያኔካ ኡሺቤና። ዳማስቆን ኢቲ ሃናኒያ ጊያ ካሊያዌ ዴዔ፤ ጎዳይ ሳፃን ኣ፥ «ሃናኔው» ያጌዳ። ሃናኒ፥ «ታ ጎዳው፥ ሃዋን ዴዓይ» ያጌዳ። ጎዳይ ኣ፥ «ዴንዳዴ ሱሬ ጌቴቲያ ኦጊያ ባዴ፥ ዪሁዳ ሶዪን ኢቲ ሳዖላ ጊያ ፄርሴሴፔ ዬዳ ቢታኒያ ኮያ፤ ኣዪሲ ጎፔ፥ ኢ ዎሴ። ቃሲ ሃናኒያ ጊያ ቢታኒ ጌሊዴ፥ ሳዖሊ ላዔንꬁዋ ፄላናዳን፥ ባሬ ኩሺያ ኣ ቦላ ዎꬂያዋ ሳፃን ቤዔዳ» ያጌዳ። ሃናኒ ዛሪዴ፥ «ታ ጎዳው፥ ዬሩሳላሜን ኔ ጌሻ ኣሳ ቦላ ሄ ቢታኒ ኣይ ኬና ኢታባ ኦꬄዴንቶ፥ ታኒ ዳሮ ኣሳፔ ሲሳዲ። ቃሲ ዳማስቆን ኔ ሱንꬃ ፄሲያዋንታ ኡባ ቃቻናው፥ ቄሳቱዋ ካፓቱ ኣው ማታ ኢሜዲኖ» ያጌዳ። ሺን ጎዳይ ኣ፥ «ሳዖሊ ኣዪሁዳ ጊዴና ኣሳ ሲንꬃን፥ ካታቱዋ ሲንꬃኒኔ ኢስራዔሊያ ኣሳ ሲንꬃን፥ ታ ሱንꬃ ኤሪሳናዉኔ ታው ኦꬃናዳን ዶሬቴዳ ሚሻ ጊዲያ ዲራው፥ ኔኒ ባ። ኣዪሲ ጎፔ፥ ታ ሱንꬃ ዲራው፥ ኢ ኣዪኬና ዋዬታናው ቤሲንቶ፥ ታኒ ኣ ቤሳና» ያጌዳ። ሃናኒ ቢዴ፥ ሶይ ጌሊዴ፥ ባሬ ኩሺያ ሳዖላ ቦላ ዎꬂዴ፥ «ታ ኢሻው ሳዖላ፥ ኔኒ ዪያ ኦጊያን ኔው ቤቴዳ ዬሱሲ፥ ኔኒ ፄላና ማላኔ ጌሻ ኣያናይ ኔናን ኩማና ማላ፥ ታና ኪቴዳ» ያጌዳ። ኤሌካ፥ ኣዬንቶ ፖቁዋ ማላይ ሳዖላ ኣይፊያፔ ዎꬊና፥ ሳዖሊ ላዔንꬁዋ ፄሌዳ፤ ቃሲ ዴንዲዴ ፃማቄቴዳ። ቁማ ሚዴ ሚኔቲ፥ ዳማስቆን ዴዒያ ካሊያዋንቱና ኣማሬዳ ጋላሳ ጋሚዔዳ። ኤሌካ፥ «ዬሱሲ ኪሪስቶሲ ፆሳ ናዓ» ያጊዴ፥ ኣዪሁዳ ዎሳ ጎሌቱዋን ቃላ ኦዴዳ። ሄዋ ሲሴዳ ኡባይ ማላሌቲዴ፥ «ሃዌ ዬሩሳላሜን ዬሱሳ ሱንꬃ ፄሲያዋንታ ꬋዪሲያዋ ጊዴኔ? ቃሲ ኡንቱንታ ቃቺዴ፥ ቄሳቱዋ ካፓቱዋ ሲንꬃ ኣፋናው ዪቤኔዬ?» ያጌዲኖ። ሺን ሳዖሊ ቃላ ኦዲያ ኦዱ ሚኒ ሚኒ ቤዳ፤ ዬሱሲ ቃሲ ኪሪስቶሳ ጊዲያዋካ ኢ ኣኬኪሲዴ ኦዴዳ ዲራው፥ ዳማስቆን ዴዒያ ኣዪሁዳቱ ኣው ዛሪያዋ ꬋዬዲኖ። ጮራ ጋላሳፔ ጉዪያን፥ ኣዪሁዳቱ ሺቂዴ፥ ሳዖላ ዎꬋናው ዞሬቴዲኖ። ሺን ኣዪሁዳቱ ባሬና ዎꬋናው ቆፖዋ ሳዖሊ ሲሴዳ፤ ኡንቱንቱ ኣ ዎꬋናው ቃማኔ ጋላሲ ካታማ ፔንጊያ ናጊኖ። ሺን ካሊያዋንታ ኣ ቃማ ኣፊዴ፥ ዲርሳ ሁጲያና ታዪያን ዱጌ ዎꬄዲኖ። ሳዖሊ ዬሩሳላሜ ጋኬዳ ዎዴ፥ ካሊያዋንቱና ኢቲፔ ጋኬታናው ሺቂ ቤዔዳ፤ ሺን ካሊያዋ ኢ ጊዴዳዋ ኡባይ ኣማኔናን ኢፂዴ፥ ኣው ያዬዲኖ። ሺን ባርናባሲ ሳዖላ ዬሱሲ ኪቴዳዋንቱኮ ኣፌዳ፤ ኦጊያን ጎዳ ኢ ዋኒዴ ቤዔዴንቶ፥ ኣው ጎዳይ ዎቲ ሃሳዬዴንቶኔ ቃሲ ሳዖሊ ዳማስቆን ዬሱሳ ሱንꬃን ያዬናን ዎቲ ቃላ ኦዴዴንቶ፥ ኡንቱንቶ ጌሺዴ ኦዴዳ። ሳዖሊ ዬሩሳላሜን ዩዪዴኔ ጎዳ ዬሱሳ ሱንꬃን ያዬናን ቃላ ኦዲዴ፥ ዬሱሲ ኪቴዳዋንቱና ኢቲፔ ዴዔዳ። ቃሲ ሳዖሊ ጊሪኬ ቃላ ሃሳዪያ ኣዪሁዳቱዋና ሃሳዬኔ ፓሉሜቴ፤ ሺን ኡንቱንቱ ኣ ዎꬋናው ኮዬዲኖ። ኢሻቱ ሄዋ ሲሲዴ፥ ሳዖላ ዱጌ ቂሳሪያ ኣፊዴ፥ ፄርሴሴ ዬዴዲኖ። ዪሁዳን፥ ጋሊላኒኔ ሳማሪያን ኡባን ዴዒያ ኣማኒያ ኣሳቱ ሳሮቴꬃን ዴዔዲኖ፤ ቃሲ ሚኔዲኖ፤ ጎዳሲ ያዪያዋኒኔ ጌሻ ኣያና ማዱዋን ጌሜቲዴ፥ ፓይዱዋንካ ዳሪ ዳሪ ቤዲኖ። ጴፂሮሲ ኡባሳን ዩዪዴ፥ ሊዳን ዴዒያ ጌሻ ኣሳቱዋኮ ቃሲ ዎꬌዳ። ያቲዴ ሄዋን ሆስፑን ላይꬃ ሲሊዴ፥ ኣርሳን ጊሲዴ ዴዒያ ኢቲ ኤኒያ ጊያ ቢታኒያ ዴሜዳ። ጴፂሮሲ ኤኒያ፥ «ኤናው፥ ዬሱሲ ኪሪስቶሲ ኔና ፓꬄ፤ ዴንዳዴ ኔ ሂፃ ዬጋ» ያጌዳ። ሄዋፔ ጉዬ ኤሌካ ዴንዲ ኤቄዳ። ሊዳኒኔ ሳሮናን ዴዒያ ኣሳይ ኡባይ ኤኒያ ቤዒዴ፥ ጎዳኮ ሲሜዲኖ። ዮጴ ካታማን ኢቲ ፃቢቶ ጌቴቲያ ኣማኔዉና ዴዓው፤ ፃቢቶ ጉሳይ ጊሪኬ ቃላን ዶርቆ ጊያዋ። ኢዛ ባሬ ዴዔዳ ዎዲያ ኡባን ሎዖባ ኦꬃዴኔ ሂዬሳ ማዳዴ ዴዓው። ሄ ዎዴ ኢዛ ሃርጋዴ ሃይቂና፥ ኣሳይ ኢዚ ኣኃ ሜጪዴ፥ ፖቂያ ፑዴ ኬሲዴ ጊሲሴዳ። ሊዳይ ዮጴሲ ማታ፤ ካሊያዋንቱ ጴፂሮሲ ሊዲያን ዴዒያዋ ዮጴን ሲሲዴ፥ «ሃያና ኑኮ ኤሌካ ያሪኪ» ያጊያ ኪታ ላዑ ኣሳቱዋ ቦላ ኣኮ ኪቴዲኖ። ሄዋፔ ጉዬ ጴፂሮሲ ዴንዲዴ፥ ኡንቱንቱና ቢ ጋኪና፥ ፖቂያ ፑዴ ኣ ኬሲዴ፥ ኪፊሊያ ጌሊሴዲኖ። ኣሲኒ ባይና ኣምዔ ማጫዋንቱ ኡባይ ዬኪዴኔ ዶርቃ ኡንቱንቱና ዴዒያ ዎዴ ኦꬄዳ ቃሚሻቱዋኔ ማያቱዋ ኡባ ጴፂሮሳ ቤሲዴ፥ ኣ ዩሹዋን ዩዪ ኣꬊዴ ኤቄዲኖ። ጴፂሮሲ ኡንቱንታ ኡባ ካሬ ኬሲዴ፥ ጉልባቲ ፆሳ ዎሴዳ፤ ቃሲ ኣኃኮ ሲሚዴ፥ «ፃቢቴ፥ ዴንዳ» ያጌዳ፤ ፃቢታካ ባሬ ኣይፊያ ዶያ ጴፂሮሳ ቤዓዴ፥ ꬎቃ ኡታዱ። ጴፂሮሲ ኢዞ ባሬ ኩሺያን ማዲዴ፥ ዴንꬂ ኤሴዳ፤ ሄዋፔ ጉዪያን፥ ኣማኒያዋንታኔ ኣሲኒ ባይና ኣምዔ ማጫዋንታ ፄሲዴ፥ ፓፄዳዉኖ ኡንቱንቶ ኢሜዳ። ሃ ዬዉ ዮጴ ካታማ ኡባን ላሌቲና ጮራ ኣሳይ ጎዳ ኣማኔዲኖ። ጴፂሮሲ ዮጴን ኢቲ ሲሞና ጊያ ጋልባ ቃጪያዋና ዳሮ ዎዲያ ጋሚዔዳ። ቂሳሪያን «ፃላቱዋ ኦላ ኣሳቱዋ» ጌቴቲያ ኦላንቻቶ ኢቲ ፄታቱዋ ካፑ ቆርኔሊዮሳ ጊያዌ ዴዔ። ቆርኔሊዮሲ ፆሳ ሎይꬂዴ ኣማኒያ ኣሳኔ፥ ባሬ ሶይ ኣሳ ኡባና ኢቲፔ ፆሳሲ ጎዪኒያ ኣሳ፤ ኣዪሁዳ ሂዬሳካ ኢ ዳሮ ማዴ፤ ቃሲ ፆሳ ኡባ ዎዴ ዎሴ። ኢቲ ጋላሲ ኡዱፑ ሳቲያ ሄራን፥ «ቆርኔሊዮሳ» ጊዴ ፄሲያ ፆሳ ኪታንቻይ ባሬኮ ጌሊሺን፥ ቆርኔሊዮሲ ሳፃን ጌሺዴ ቤዔዳ። ቆርኔሊዮሲ ያዪዴ፥ ኪታንቻ ጫዲ ፄሊዴ፥ «ታ ጎዳው፥ ኢ ኣዬ?» ያጌዳ። ኪታንቻይ ዛሪዴ፥ ሃዋዳን ያጌዳ፤ «ኔ ዎሳይኔ ኔኒ ሂዬሳ ማዲያዌ ፆሳ ሲንꬃን ሃሳዬታናው ሳሉዋ ቤዳ። ሃዒ ዮጴ ኣሳ ኪታዴ፥ ጴፂሮሳ ጌቴቲያ ሲሞና ኣሂሳ። ጴፂሮሲ ኣባ ዶናን ዴዒያ ጋልባ ቃጪያ ሲሞና ጎሌን ኢማꬃቴꬃኒ ኡቴዳ፤ ኔኒ ኦꬃናው ቤሲያዋ ኢ ኔው ኦዳናዋ» ያጌዳ። ቆርኔሊዮሲ ባሬው ኦዴዳ ኪታንቻይ ቢና፥ ባሬ ቆማቱዋፔ ላዓቱዋኔ ፆሳሲ ጎዪኒያ ባሬፔ ሻኬቴና ዎታዳራቱዋፔ ኢቱዋ ፄሲዴ፥ ኡንቱንቶ ኡባባ ኦዲዴ፥ ኡንቱንታ ዮጴ ኪቴዳ። ዎንቴꬃ ጋላሲ ኡንቱንቱ ቢዴ፥ ዮጴ ካታማኮ ማቲሺን፥ ጴፂሮሲ ኡሱፑን ሳቲያ ሄራን ጎሊያ ቦላን ዴምባዪዴ ኦꬄዳሳ ፆሳ ዎሳናው ኬሴዳ። ቃሲ ኮሻቲዴ፥ ቁማ ማናው ኮዬዳ፤ ሺን ቁማይ ካዒሺን፥ ሳፃ ቤዔዳ። ሳሉ ዶዬቲና፥ ዎልቃማ ማዩዋ ማላቲያባይ ኦይዱ ባጋና ኦይቄቲዴ፥ ሳዓን ዎꬊሺን፥ ጴፂሮሲ ቤዔዳ። ሄዋን ኦይዱ ጌዲያና ዴዒያ ሜሂ፥ ዶዓይ፥ ሾሻይ፥ ዛሪኔ ካፉ ኡባይ ዴዔ። «ጴፂሮሳ፥ ዴንዳ ኤቃዴ ሹካ ማ» ጊያ ቃላይ ኣኮ ዬዳ። ሺን ጴፂሮሲ፥ «ታ ጎዳው፥ ሃኔና! ታኒ ቱናባኔ ሼኔዪያባ ኡባካ ማ ኤሪኬ» ያጌዳ። ቃሲ ላዔንꬁዋ፥ «ፆሳይ ጌሼዳዋ ኔኒ ቱኒሶፓ» ጊያ ቃላይ ኣኮ ዬዳ። ሄዙ ጌዴ ሄዋዳን ጌዳ፤ ሄዋፔ ጉዪያን፥ ኤሌካ ሄ ዎልቃማ ማዩዋ ማላቲያዌ ፑዴ ሳሉዋ ኣኬቲ ኣጌዳ። ጴፂሮሲ ባሬ ቤዔዳ ሳፃ ቢሌꬃይ ኣያ ጊዳንዴሻ? ያጊዴ፥ ባሬ ዎዛና ጊዶን፥ «ላ ሃዌ ኣዬ?» ጊሺን፥ ቆርኔሊዮሲ ኪቴዳ ኣሳቱ ሲሞና ጎሊ ዴዒያሳ ኮዪዴ፥ ኣ ፔንጊያን ኤቄዲኖ። ባሬንቱ ኮሻ ꬎቁ ኦꬂዴ፥ «ጴፂሮሳ ጌቴቲያ ሲሞና ጊያ ኢማꬃይ ሄዋን ዴዒ?» ያጊዴ ኦቼዲኖ። ጴፂሮሲ ሳፃን ቤዔዳባ ኣኬካናው ቆፋን ሼኪዴዒሺን፥ ጌሻ ኣያናይ ኣ፥ «ቤዓ፥ ሄዙ ኣሳቱ ኔና ኮዪኖ፤ ዴንዳዴ ዎꬋ፤ ታኒ ኡንቱንታ ኪቴዳ ዲራው፥ ሲꬌናን ኡንቱንቱና ባ» ያጌዳ። ጴፂሮሲ ኣሳቱዋኮ ዎꬊዴ፥ «ሂንቴንቱ ኮዪያዌ ታና። ኣያ ኣካና ዬዲቴ?» ያጌዳ። ኡንቱንቱ፥ «ፆሳሲ ያዪያ ፂሉ ኣዪሁዳ ኣሳ ኡባን ዳሮ ቦንቼቴዳ ፄታቱዋ ካፑዋ ቆርኔሊዮሲ፥ ኔና ባሬ ሶይ ኣፊሲዴ፥ ቃላ ኔፔ ሲሳና ማላ፥ ፆሳ ጌሻ ኪታንቻይ ኣው ኦዴዳ» ያጌዲኖ። ጴፂሮሲ ኣሳቱዋ ኢማꬃ ኡዲ ሾባናው ሶይ ሞኬዳ። ዎንቴꬃ ጋላሲ፥ ዴንዲዴ ኡንቱንቱና ቤዳ፤ ዮጴ ካታማን ዴዒያ ኢሻቱዋፔ ኢቱ ኢቱ ኣናና ኢቲፔ ቤዲኖ። ዎንቴꬃ ጋላሲ፥ ቂሳሪያ ጋኬዲኖ፤ ቆርኔሊዮሲ ባሬ ዳባቱዋኔ ባሬ ላጌꬃቱዋ ኢቲፔ ፄሲ ሺሺዴ፥ ጴፂሮሳ ናጌ። ጴፂሮሲ ጌላና ሃኒሺን፥ ቆርኔሊዮሲ ኣናና ጋኬቲዴ፥ ኣ ሲንꬃን ኩንዲዴ፥ ኣው ጎዪኔዳ። ሺን ጴፂሮሲ፥ «ዴንዳ! ታኒካ ታ ሁጴው ኣሳ» ያጊዴ ኣ ዴንꬄዳ። ጴፂሮሲ ቆርኔሊዮሳና ሃሳዪዴ፥ ሶይ ጌሌዳ፤ ኢ ጌሊያ ዎዴ ጮራ ኣሳይ ሺቄዳዋ ዴሚዴ፥ ኣሳ፥ «ኣዪሁዳ ኣሳይ ሃራ ዛሪያና ኢቲፔቴꬃን ዴዓናው፥ ዎይ ጋኬታናው ዎጋ ጊዴናዋ ሂንቴ ሁጴው ኤሪታ፤ ሺን ታኒ ኦናኔ ቱና ዎይ ሼኔዪያባ ጌና ማላ፥ ፆሳይ ታና ቤሴዳ። ሄዋ ዲራው፥ ሂንቴ ታው ኪቲና፥ ፓሉማይ ባይናን ያዲ። ሃዒ፥ ‹ታና ኣዪሲ ኣሂሴዲቴ?› ያጋዴ ሂንቴንታ ኦቻይ» ያጌዳ። ቆርኔሊዮሲ ሃዋዳን ያጌዳ፤ «ታኒ ሃቼ ኦይዱ ጋላሳፔ ካሴ ሃ ሳቲያን ኡዱፑ ሳቲያ ዎሳ ታ ሶዪን ፆሳ ዎሲሺን፥ ጶልቂያ ማዩዋ ማዬዳ ኣሳይ ታ ሲንꬃን ኤቂዴ፥ ታና፥ ‹ቆርኔሊዮሳ፥ ፆሳይ ኔ ዎሳ ሲሴዳ፤ ኔኒ ሂዬሳ ማዲያዋካ ሃሳዬዳ። ሲሚ ኣሳ ዮጴ ኪታዴ፥ ሲሞኒ ጴፂሮሳ ጊያዋ ፄሲሳ፤ ሲሞኒ ጴፂሮሲ ሲሞና ጊያ ጋልባ ቃጪያዋ ጎሌን ኣባ ዶናን ኢማꬃቴꬃ ኡቴዳ› ያጌዳ። ሄዋ ዲራው፥ ታኒ ኔኮ ኤሌካ ኪታዲ፤ ኔኒኔ ያዴ ሎይꬃዳ፤ ሲሚ ኔኒ ኑሲ ኦዳናው ፆሳይ ኔና ኣዛዜዳዋ ኡባ ሲሳናው ሃዒ ኑኒ ኡባይ ሃዋን ፆሳ ሲንꬃን ዴዔቶ» ያጌዳ። ጴፂሮሲ ሃሳያ ሃዋዳን ያጊ ዶሜዳ፤ «ፆሳይ ኣሳ ሶምዒያ ፄሌና፤ ሺን ጋዴ ኡባን ባሬው ያዪያዋኔ ፂሎ ኦሱዋ ኦꬂያዋ ጋላቲያዋ ታኒ ቱሙ ኣኬካዲ። *** ፆሳይ ኣሳ ኡባ ጎዳ፥ ዬሱሲ ኪሪስቶሳ ባጋና፥ ሳሮቴꬃ ኦዲዴ፥ ሃ ዎንጋላ ሚሺራቹዋ ኢስራዔሊያ ኣሳሲ ኪቴዳዋ ሂንቴንቱ ኤሪታ። ዮሃኒሲ ቃላ ኦዴዳ ፂንቃታፔ ጉዪያን፥ ጋሊላፔ ዶሚዴ፥ ዪሁዳ ጋዲያ ኡባን ሃኔዳዋ ሂንቴ ኤሪታ። ፆሳይ ናዚሬቲያ ዬሱሳ ጌሻ ኣያናኒኔ ዎልቃን ኩንꬄዳ፤ ፆሳይ ኣናና ዴዒያ ዲራው፥ ሎዖባ ኢ ኦꬂዲኔ ፃላሂያ ካፑዋሲ ሞዴቴዳ ኡባ ፓꬂዴ ዩዬዳ። «ኣዪሁዳ ጋዲያኒኔ ዬሩሳላሜን ኢ ኦꬄዳ ኡባባሲ ኑኒ ማርካ። ኡንቱንቱ ማስቃሊያ ቦላ ሚሲማሪያን ꬊሺ ካቂዴ፥ ኣ ዎꬌዲኖ። ሺን ፆሳይ ሄዜንꬂያ ጋላሳን ሃይቁዋፔ ኣ ዴንꬂዴ ቤሴዳ። ፆሳይ ኮይሮ ዶሬዳ ማርካቱዋ ኑና፥ ኣ ቤሴዳፔ ኣቲን፥ ኣሳ ኡባ ጊዴና፤ ሃይቁዋፔ ኢ ዴንዴዳዋፔ ጉዪያን፥ ኑኒ ኣናና ሜዶኔ ኡሼዶ። ፆሳይ ዎንጋላ ሚሺራቹዋ ኣሳሲ ኑኒ ኦዳናዉኔ፥ ፓፃ ዴዒያዋንቱ ቦላኒኔ ሃይቄዳዋንቱ ቦላን ፒርዳናው ኢ ሱንꬄዳዌ ዬሱሳ ጊዴዳዋ ኑኒ ማርካታናው ኑና ኣዛዜዳ። ፆሳይ ኣኒ ኣማኒያ ኡባ ናጋራ ኣ ሱንꬃን ኣቶ ጋናዋ ናባቱ ኡባቱ ማርካቲኖ» ያጌዳ። ጴፂሮሲ ቢሮ ሄ ዬዉዋ ኦዲሺን፥ ቃላ ሲሲያ ኡባ ቦላ ጌሻ ኣያናይ ዎꬊ ኣጌዳ። ጴፂሮሳና ዮጴፔ ዬዳ፥ ኣማኒያ ቃፃሬቴዳ ኣዪሁዳ ኡባቱ ኣዪሁዳ ጊዴናዋንቱ ቦላንካ ጌሻ ኣያና ኢሞታይ ጉኬዳ ዲራው ማላሌቴዲኖ። ኣዪሲ ጎፔ፥ ኡንቱንቱ ዱማ ዱማ ቃላን ሃሳዪሺኒኔ ፆሳ ዳሮቴꬃ ሳቢሺን ሲሴዲኖ። ሄ ዎዴ ጴፂሮሲ ዛሪዴ፥ «ሃዋንቱ ቃሲ ኑናዳን ጌሻ ኣያና ኣኬዳዋንቱ ፃማቄቴናዳን፥ ሃꬃ ኡንቱንታ ዲጋናው ዳንዳዪያዌ ኦኔ?» ያጌዳ። ኡንቱንቱ ዬሱሲ ኪሪስቶሳ ሱንꬃን ፃማቄታና ማላ፥ ኡንቱንታ ኣዛዜዳ፤ ሄዋፔ ጉዪያን፥ ኡንቱንቱ ባሬንቱና ኣማሬዳ ጋላሳ ኡታና ማላ፥ ኣ ዎሴዲኖ። ዬሱሲ ኪቴዳዋንቱኔ ዪሁዳ ኡባን ዴዒያ ኢሻቱ፥ ኣዪሁዳ ጊዴናዋንቱካ ፆሳ ቃላ ኣኬዳዋ ሲሴዲኖ። ጴፂሮሲ ዬሩሳላሜ ቤዳ ዎዴ፥ ቃፃሬቴዳ ኣሳቱ ኣናና ፓሉሜቲዴ፥ ኣ፥ «ኔኒ ቃፃሬቲቤናዋንቱኮ ጌላዴ፥ ኡንቱንቱና ቁማ ማዳ» ያጌዲኖ። ሺን ጴፂሮሲ ሃኔዳዋ ኮይሩዋፔ ዶሚዴ፥ ማራን ማራን ሃዋዳን ያጊዴ ኦዴዳ፤ «ታኒ ዮጴ ካታማን ፆሳ ዎሲሺን፥ ታኒ ኣያናኒ ጊዳዴ ሳፃ ቤዓዲ፤ ዎልቃማ ማዩዋ ማላቲያዌ ኦይዱ ባጋና ኦይቄቲዴ፥ ሳሉዋፔ ዎꬊዴ፥ ታኮ ዬዳ። ሄዋ ጊዱዋ ታኒ ጫዳ ፄሊያ ዎዴ፥ ኦይዱ ጌዲ ዴዒያ ሜሂያ፥ ዱዓ፥ ሾሻ፥ ዛሪያኔ ካፉዋ ቤዓዲ። ቃሲ፥ ‹ጴፂሮሳ፥ ዴንዳ፤ ሹካ ማ› ጊያ ቃላ ታኒ ሲሳዲ። «ሺን ታኒ፥ ‹ታ ጎዳው፥ ሃኔና! ቱናባይ ዎይ ሼኔዪያባይ ኡባካ ታ ዶናኮ ሺቂ ኤሬና› ጋዲ። «ቃላይ ሳሉዋፔ ላዔꬁዋካ፥ ‹ፆሳይ ጌሼዳዋ ኔኒ ቱና ጎፓ› ያጊዴ ታው ዛሬዳ። «ሄዌ ሄዙ ጌዴ ሃኒና፥ ዉርሴꬃን ኡባባይ ሳሉዋ ፑዴ ጎሼቴዳ። ሄ ማንዒያንካ ሄዙ ኣሳቱ ቂሳሪያፔ ታኮ ኪቴቲዴ፥ ታኒ ዴዒያ ጎሊያ ጋኪ ኣጌዲኖ። ታኒካ ሲꬌናኒ ኡንቱንቱና ባና ማላ፥ ጌሻ ኣያናይ ታው ኦዴዳ። ቃሲ ሃ ኡሱፑን ኢሻቱ ዮጴፔ ታናና ቂሳሪያ ቢና፥ ኑኒ ቆርኔሊዮሳ ሶይ ጌሌዶ። ኪታንቻይ ባሬ ሶዪን ኤቂዴ ባሬና፥ ‹ጴፂሮሳ ጌቴቲያ ሲሞና ፄሳናው ኣሳ ዮጴ ኪታ፤ ኔኒኔ ኔ ጎሌ ኣሳይ ኡባይ ኣቲያ ቃላ ኢ ኔው ኦዳናዋ› ጌዳዋ ቆርኔሊዮሲ ዎቲ ሲሴዴንቶ፥ ኑሲ ኦዴዳ። *** «ታኒ ሃሳያናው ዶሚያዋን ጌሻ ኣያናይ ኮይሮ ኑ ቦላ ዎꬌዳዋዳን፥ ኡንቱንቱ ቦላካ ዎꬊ ኣጌዳ። ጎዳይ፥ ‹ዮሃኒሲ ሃꬃን ፃማቄዳ፤ ሺን ሂንቴንቱ ጌሻ ኣያናን ፃማቄታኒታ› ያጌዳ ቃላ ታኒ ሃሳያዲ። ፆሳይ ኑሲ ጎዳ ዬሱሲ ኪሪስቶሳ ኣማኔዳዋንቱሲ ኢሜዳ ኢሞታ ማላ ኣዪሁዳ ጊዴናዋንቶካ ቃሲ ኢሞፔ፥ ሲሚ ፆሳ ዲጋናው ታኒ ኦኔ?» ያጌዳ። ኡንቱንቱ ሃዋ ሲሴዳ ዎዴ ባሬንቱ ፓሉማ ኣጊዴ፥ «ያቲና፥ ፆሳይ ኣዪሁዳ ጊዴናዋንቱካ ቃሲ ናጋራፔ ሲሚዴ ዴዓናዳን፥ ኡንቱንታ ቃዴዳ» ያጊዴ ፆሳ ጋላቴዲኖ። ኢስፂፋኖሳ ቦላ ጋኬዳ ዋዪያ ጌዱዋን ላሌቴዳ ኣማኒያዋንቱ ቃላ ኣዪሁዳቱዋ ፃላላፔ ኣቲን፥ ሃራሲ ኢቱዋሲኔ ኦዴናን፥ ፒንቄ፥ ቆጲሮሳኔ ኣንፆኪያ ጋካናው ዩዬዲኖ። ሺን ቆጲሮሳፔኔ ቄሬናፔ ዬዳ ኢቲ ኢቲ ኣማኒያ ኣሳቱ ኣንፆኪያ ቢዴ፥ ጎዳ ዬሱሳ ዎንጋላ ሚሺራቹዋ ኦዲዴ፥ ጊሪኬ ኣሳሲካ ኦዴዲኖ። ጎዳ ዎልቃይ ኡንቱንቱና ዴዔ፤ ቃሲ ጮራ ኣሳይ ኣማኒዴ፥ ጎዳኮ ሲሜዲኖ። ሃ ዬዉ ዬሩሳላሜን ዴዒያ ኣማኒያ ኣሳሲ ሲሴቲና፥ ኣማኒያ ኣሳይ ባርናባሳ ኣንፆኪያ ኪቴዳ። ባርናባሲ ኣንፆኪያ ቤዳ ዎዴ፥ ፆሳ ኣꬎ ኬካቴꬃ ኦሱዋ ቤዒዴ ናሼቴዳ፤ ኡንቱንቱ ኡባይ ጎዳን ባሬንቱ ኩሜንꬃ ዎዛናፔ ሚኒ ዴዓናዳን፥ ኡንቱንታ ዞሬዳ። ኣዪሲ ጎፔ፥ ባርናባሲ ጌሻ ኣያናይኔ ኣማኑ ኩሜዳ ሎዖ ኣሳ፤ ሄ ጋሱዋን ጮራ ኣሳይ ጎዳኮ ዬዲኖ። ሄዋፔ ጉዪያን፥ ባርናባሲ ሳዖላ ኮያናው ፄርሴሴ ቤዳ። ያቲዴ ሳዖላ ዴሜዳ ዎዴ፥ ኣንፆኪያ ኣሄዳ። ባርናባሲኔ ሳዖሊ ኣማኒያ ኣሳና ኢቲ ላይꬃ ኩሜንꬃ ኡቲዴ፥ ጮራ ኣሳ ታማሪሴዲኖ፤ ካሊያዋንቱ ኣንፆኪያን ኣማኒያ ኣሳ ጌቴቲዴ፥ ኮይሮ ፄሴቴዲኖ። ናባቱ ዬሩሳላሜፔ ኣንፆኪያ ሄ ዎዴ ዎꬌዲኖ። ኡንቱንቱ ጊዶፔ ኣጋቦሳ ጊያዌ ዴንዲዴ፥ ሳዓ ኡባን ዎልቃማ ኮሻይ ዴንዳናዋ ኣያና ዎልቃን ቲምቢቲያ ኦዴዳ፤ ሄዌ ሃኔዳዌ ቃላዉዴዮሳ ካዉቴꬃ ዎዲያና። ካሊያዋንቱ ሁጲያን ሁጲያን ባሬንቱ ዎልቃ ኬና ሚሻ ኬሲዴ፥ ዪሁዳን ዴዒያ ባሬንቱ ኢሻቱዋሲ ማዱዋ ዬዳናው ቆፋ ቃቼዲኖ። ኡንቱንቱ ሄዋዳን ኦꬂዴ፥ ሚሻ ባርናባሳ ቦላኒኔ ሳዖላ ቦላ ዎሳ ጎሌ ጪማቶ ዬዴዲኖ። ካቲያ ሄሮዲሴ ሄ ዎዴ ዎሳ ጎሌ ኣሳፔ ኣማሬዳዋንታ ዋዪሱዋ ዶሜዳ። ዮሃኒሳ ኢሻ ያዪቆባ ማሻን ዎꬊሴዳ። ሄዌ ኣዪሁዳቱዋ ናሼቼዳዋ ቤዒዴ፥ ጉጂ ጴፂሮሳካ ኦይቄዳ፤ ሄዌ ማጋጌ ኡኪꬃ ባላ ቦንቺያ ጋላሳቱዋና። ጴፂሮሳ ኦይቂዴ ቃቼዳ። ፓሲጋ ባላ ቦንቺያ ጋላሳቱዋፔ ጉዪያን፥ ጋዴ ኣሳ ሲንꬃ ኣꬃናው ቆፒዴ፥ ኦይዱ ኦይዱ ዎታዳራቱ ኣ ናጋናዳን፥ ታማኔ ኡሱፑን ዎታዳራቱዋሲ ኣꬂዴ ኢሜዳ። ሄዋ ዲራው፥ ጴፂሮሲ ቃሾ ጎሊያን ናጌቴ፤ ሺን ዎሳ ጎሌ ኣሳይ ኣው ሚኒሲዴ ፆሳ ዎሴ። ሄሮዲሴ ጴፂሮሳ ኣሳ ሲንꬃ ኣꬃናው ቆፓናፔ ካሴ ቃማ፥ ጴፂሮሲ ላዑ ሳንꬃላታን ቃሼቲዴ፥ ላዑ ዎታዳራቱዋፔ ጊዱዋን ጌሚዒሼዳ፤ ናጊያዋንቱካ ቃሾ ጎሌ ፔንጊያን ኤቂዴ ናጊኖ። ኣኬኬናን ዴዒሺን፥ ጎዳ ኪታንቻይ ሄዋን ኤቂ ኣጌዳ፤ ቃሾ ጎሌንካ ፖዑ ፖዒ ኣጌዳ። ኪታንቻይ ጴፂሮሳ ሚዪያ ዴቺ ቤጎꬂዴ ኣ፥ «ኤሌ ዴንዳ» ያጌዳ፤ ሄ ማንዒያንካ ሳንꬃላታይ ኣ ኩሺያፔ ዎꬊ ኣጌዳ። ኪታንቻይ ኣ፥ «ኔ ሱሪያ ዳንጫ፤ ኔ ጫማካ ዎꬃ» ያጊና፥ ጴፂሮሲ ሄዋዳን ኦꬄዳ፤ ኪታንቻይ፥ «ኔ ማዩዋ ማያዴ ታና ካላ» ያጌዳ። ጴፂሮሲ ቃሾ ጎሊያፔ ኬሲዴ፥ ኪታንቻ ካሌዳ፤ ኣው ሳፃ ቤዒያዋ ማላቴዳፔ ኣቲን፥ ኪታንቻይ ኦꬂያባይ ቱማ ጊዴዳዋ ኤሪቤና። ኪታንቻይኔ ጴፂሮሲ ኮይሮ ዎታዳራፔኔ ላዔንꬆ ዎታዳራፔ ኣꬊዴ፥ ካታማ ኣፊያ ቢራታ ፔንጊያኮ ጋኬዲኖ፤ ፔንጊካ ኡንቱንቶ ባሬካ ዶዬቲ ኣጌዳ፤ ኡንቱንቱ ኬሲዴ ኢቲ ኦጊያና ቢሺን፥ ኪታንቻይ ኤሌካ ጴፂሮሳፔ ሻኬቲ ኣጌዳ። ጴፂሮሲ ባሬና ጋኬዳባ ኣኬኪዴ፥ «ታና ጎዳይ ባሬ ኪታንቻ ኪቲዴ፥ ሄሮዲሳ ኩሺያፔኔ ኣዪሁዳ ኣሳይ ናጊ ኡቴዳ ኡባባፔ ኣሼዳዋ ሃዒ ቱሙ ኤራዲ» ያጌዳ። ኢ ሄዋ ኣኬኬዳ ዎዴ፥ ጮራ ኣሳይ ኢቲፔ ሺቂዴ ፆሳ ዎሲያሳ፥ ማርቆሳ ጊያ ዮሃኒሳ ዳዪ ማይራሚ ሶይ ቢዴ ፔንጊያን ፄሲና፥ ኢቲ ሮዶ ጊያ ኣሺካራታ ዶያናው ያዱ። ሮዳ ጴፂሮሳ ቃላ ጊዴዳዋ ኤሬዳ ዎዴ፥ ባሬና ናሼቺና፥ ፔንጊያ ዶዬናን ጉዬ ዎፃዴ፥ ጴፂሮሲ ካሬን ኤቄዳዋ ኣሳሲ ኦዳዱ። ኣሳይ ኢዞ፥ «ሃኔ፥ ኔኒ ጎያ» ያጌዳ። ሮዳ ጴፂሮሳ ጊዴዳዋ ጌሻዴ ኦዳዱ። ኡንቱንቱ፥ «ሄዌ ኣ ኪታንቻ» ያጌዲኖ። ሺን ጴፂሮሲ ካሬን ፄሲዴ ኣጌናን ኢፂና፥ ኣሳይ ካሪያ ዶዪ፥ ኣ ቤዒዴ ማላሌቴዲኖ። ሺን ኡንቱንቱ ጮዑ ጋና ማላ፥ ጴፂሮሲ ባሬ ኩሺያን ፆርሲዴ፥ ጎዳይ ቃሾ ጎሊያፔ ኣ ዎቲ ኬሴዴንቶ፥ ኡንቱንቶ ቆንጪሲ ኦዲዴ፥ «ሃዋ ያዪቆባሲኔ ኢሻቱዋሲ ኦዲቴ» ጊዴ፥ ኬሲ ሃራሳ ቤዳ። ሳዓይ ዎንቴዳ ዎዴ፥ ጴፂሮሲ ሃቃ ቢዲጌዴንቶ ጊና ዎታዳራቱዋ ጊዶን ዳሮ ዋላሳይ ኬሴዳ። ሄሮዲሴ ጴፂሮሳ ኮዪሺን፥ ኢ ꬋዬዳ ዎዴ፥ ናጊያዋንታ ቆሪዴ፥ ኡንቱንታ ዎꬋና ማላ ኣዛዜዳ፤ ሄዋፔ ጉዪያን፥ ዪሁዳፔ ቂሳሪያ ዎꬊዴ፥ ሄዋን ኣማሬዳ ዎዲያ ኡቴዳ። ሄሮዲሴ ፂሮሳ ኣሳሲኔ ሲዶና ኣሳሲ ሎይꬂ ሃንቄቴዳ፤ ኡንቱንቱ ጋዴ ኣሳይ ካꬃ ሄሮዲሳ ጋዴ ኣሳፔ ዴሚያ ዲራው፥ ኡንቱንቱ ኢቲፔ ጊዲዴ፥ ኣ ጎሊያ ካፑዋ ቢላስፆሳ ባሬንቱ ባጋ ኦꬂዴ፥ ሲጌታና ማላ ዎሳናው ሄሮዲሳኮ ቤዲኖ። ሄሮዲሴ ሱንꬄቴዳ ጋላሲ፥ ባሬ ካዉቴꬃ ማዩዋ ማዪዴ፥ ካዉቴꬃ ኦይዲያን ኡቲዴ፥ ኣሳሲ ሃሳዬዳ። ኣሳይ፥ «ሃዌ ፆሳ ቃላ፤ ኣሳ ቃላ ጊዴና» ያጊዴ ኮሻ ꬎቂሲዴ ሃሳዬዳ። ሄሮዲሴ ፆሳ ቦንቺቤና ዲራው፥ ሄ ማንዒያንካ ጎዳ ኪታንቻይ ኣ ዴቺና፥ ጉፁኒያን ሜቴቲዴ፥ ሃይቂ ኣጌዳ። ሺን ፆሳ ቃላይ ዲጬኔ ዳር ዳር ቤ። ባርናባሲኔ ሳዖሊ ባሬንቱ ኦሱዋ ፖሊዴ፥ ማርቆሳ ጊያ ዮሃኒሳ ባሬንቱና ኣኪዴ፥ ዬሩሳላሜፔ ሲሜዲኖ። ኣንፆኪያን ዴዒያ ኣማኒያ ኣሳ ጊዶን ናባቱኔ ታማርሲያዋንቱ ዴዒኖ፤ ኡንቱንቱካ ባርናባሳ፥ ካሬꬃ ጊያ ሲሞና፥ ቄሬናፔ ዬዳ ሉቂዮሳ፥ ጋዲያ ሞዲያ ሄሮዲሳና ዲጬዳ ሚናሃኔ ሳዖላ። ኡንቱንቱ ጎዳሲ ጎዪኒሺናኔ ፆሚሺን፥ ጌሻ ኣያናይ፥ «ታኒ ፄሴዳ ኦሱዋሲ ባርናባሳኔ ሳዖላ ታው ዱማዪቴ» ያጌዳ። ኡንቱንቱ ፆሜዳዋፔኔ ዎሴዳዋፔ ጉዪያን፥ ባሬንቱ ኩሺያ ባርናባሳ ቦላኒኔ ሳዖላ ቦላን ዎꬂዴ፥ ኡንቱንታ ዬዴዲኖ። ሄዋ ዲራው፥ ጌሻ ኣያናይ ኡንቱንታ ኪቲና፥ ሴሉቂያ ዎꬌዲኖ፤ ሄዋፔ ዎንጊሪያን ጌሊዴ፥ ቆጲሮሳ ሃꬃኒ ዶዴቴዳሳ ቤዲኖ። ኡንቱንቱ ሲልማና ጋኪዴ፥ ኣዪሁዳ ዎሳ ጎሌቱዋን ፆሳ ቃላ ኦዴዲኖ፤ ኡንቱንታ ማዳናው ዮሃኒሲ ኡንቱንቱና ዴዔ። ኡንቱንቱ ቆጲሮሳ ሃꬃን ዶዴቴዳ ሳዓ ኡባ ጳፉ ጋካናው ዩዪዴ፥ ናቢያ ኢቲ ዎርዳንቻ፥ ኣዪሁዳ ኣሳ ባር-ዬሱሳ ጊያ ሻሬቹዋ ዴሜዲኖ። ሄ ሻሬቹ ጋዲያ ሞዲያ ሳርጊዮሳ ጳዉሎሳ ጊያ ኣኬካንቻ ቢታኒያና ዴዔ። ሳርጊዮሳ ጳዉሎሳ ባርናባሳኔ ሳዖላ ባሬኮ ፄሲዴ፥ ፆሳ ቃላ ሲሳናው ኮዬዳ። ሺን ሻሬቹዋ ኤሊማሲ (ጊሪኬ ቃላን ሄዌ ኣ ሱንꬃ) ጋዲያ ሞዲያዋ ኣማኑዋ ዲጋናው ኮዪዴ፥ ኡንቱንቱ ሃሳያ ጳልቄዳ። ሺን ጳዉሎሳ ጊያ ሳዖሊ ባሬናን ጌሻ ኣያናይ ኩሚና፥ ሻሬቹዋ ጫዲ ፄሊዴ፥ ኣ፥ «ላ ሃ ፃላሂያ ካፑዋ ናዓው፥ ጌኔቴꬃይ ኡባይኔ ኢታቴꬃይ ኡባይ ኩሜዳዎ፥ ፂሎቴꬃ ኡባ ሞርኬው፥ ጎዳ ኦጊያ ሱሪያ ጌላዪያዋ ኣጊኪ? ቤዓ፤ ሃዒ ጎዳ ኩሺ ኔ ቦላ ዴዔ፤ ኔኒ ቆቃ ጊዳና፤ ኣማሬዳ ዎዲ ጋካናው፥ ኣዋ ፖዑዋ ቤዓካ» ያጌዳ። ሄ ማንዒያንካ ሻኖቻይኔ ꬉማይ ኣ ኣይፊያ ጎዚና፥ ባሬ ኩሺያ ኦይቂዴ፥ ካሌꬂያ ኡራ ኮዪዴ ዩዬዳ። ሄ ዎዴ ጋዲያ ሞዲያዌ ሄዋ ቤዔዳ ዎዴ፥ ጎዳይ ታማሪሲያዋን ማላሌቲዴ ኣማኔዳ። ጳዉሎሲኔ ኣናና ዴዒያዋንቱ ጳፉፔ ዴንዲዴ፥ ጲኒፊሊያን ዴዒያ ጴርጌ ዎንጊሪያን ቤዲኖ፤ ዮሃኒሲ ኡንቱንቱፔ ሻኬቲ፥ ዬሩሳላሜ ሲሜዳ። ሺን ኡንቱንቱ ጴርጌፔ ኣꬊዴ፥ ጲሲዲያን ዴዒያ ኣንፆኪያ ጋኬዲኖ፤ ሳምባታ ጋላሳን ኣዪሁዳ ዎሳ ጎሌ ጌሊዴ ኡቴዲኖ። ሙሴ ሂጊኔ ናባቱዋ ማፃፋይ ናባቤቴዳዋፔ ጉዪያን፥ ኣዪሁዳ ዎሳ ጎሌ ካፓቱ፥ «ኑ ኢሻቶ ኣሳ ሚኒሲያ ቃላይ ሂንቴንቶ ዴዖፔ፥ ኣሳው ሃሳዬሪኪቴ» ያጊዴ ኡንቱንቶ ኪቴዲኖ። ጳዉሎሲ ዴንዲ ኤቂዴ፥ ባሬ ኩሺያን ፆርሲዴ፥ ሃዋዳን ያጌዳ፤ «ኢስራዔሊያ ኣሳቶ፥ ፆሳሲ ያዪያዋንቶ ሲሲቴ። ሃ ኢስራዔሊያ ኣሳ ፆሳይ ኑ ኣዋቱዋ ዶሪዴ፥ ጊብፄ ጋዲያን ኢማꬃቴꬃን ኡንቱንቱ ዴዒሺን፥ ኡንቱንታ ጮሪሴዳ፤ ባሬ ዎልቃማ ዎልቃኒካ ጊብፄ ጋዲያፔ ኡንቱንታ ኬሴዳ። ባዙዋን ኦይታሙ ላይꬃ ኬና ኑ ኣዋቱዋ ኢ ዳንዳዬዳ። ካናኔ ጊያ ጋዲያን ኣዪሁዳ ጊዴና ላፑ ካዉቴꬃ ꬋዪሲዴ፥ ኡንቱንቱ ጋዲያ ባሬ ኣሳ ላቲሴዳ። ሄዋፔ ጉዪያን፥ ናቢያ ሳሜላ ዎዲያ ጋካናሲ፥ ኦይዱ ፄታኔ ኢሻታሙ ላይꬃ ኬና ዳናቱዋ ኡንቱንቶ ኢሜዳ። ሄዋፔ ጉዪያን፥ ኡንቱንቱ ባሬንቶ ካቲያ ኢማና ማላ ዎሲና፥ ፆሳይ ቢኒያማ ዛሪያፔ ቂሳ ናዓ ሳዖላ ኦይታሙ ላይꬃው ካዉታና ማላ፥ ኡንቱንቶ ኢሜዳ። ፆሳይ ሳዖላ ሻሬዳዋፔ ጉዪያን፥ ኡንቱንቱ ቦላ ዳዊቴ ካዉታና ማላ፥ ኣ ዴንꬄዳ፤ ዳዊቴባ ማርካቲዴ፥ ‹ታኒ ኮዪያ ኡባባ ታ ዎዛናዳን ኦꬂያ ኢሴይ ናዓ ዳዊታ ዴማዲ› ያጌዳ። «ፆሳይ፥ ‹ታኒ ዳዊታ ዛሪያፔ ኢስራዔሊያ ኣሳ ኣሺያዋ ኣሃና› ቃላ ጌሌዳዋዳንካ፥ ዬሱሳ ኣሄዳ። ዬሱሲ ያናፔ ካሴ ኢስራዔሊያ ኣሳይ ኡባይ ባሬንቱ ናጋራፔ ሲሚዴ ፃማቄታና ማላ፥ ዮሃኒሲ ቃላ ኦዴዳ። ቃሲ ዮሃኒሲ ባሬ ኦሱዋ ዉርሳና ሃኒዴ ኣሳ፥ ‹ታና ኦና ጊዴ ቆፒቴ? ታኒ ሂንቴ ናጊያዋ ጊዲኬ፤ ሺን ቤዒቴ፥ ኣ ጌዲያ ጫማ ቃሹዋካ ጌዲያፔ ቢላናው ታው ቤሴናዌ ታፔ ጉዬና ዬ› ያጌዳ። «ታናዳን ኣማኒያዋንቶ፥ ኣብራሃሜ ዜሬꬃቶ፥ ቃሲ ሃዋን ኣዪሁዳ ጊዴናዋንቶ ፆሳሲ ያዪያዋንቶ፥ ሃ ኣቶቴꬃ ቃላይ ኑሲ ኪቴቴዳ። ኣዪሲ ጎፔ፥ ዬሩሳላሜን ዴዒያ ኣሳይኔ ኡንቱንቱ ካፓቱ ዬሱሳኔ ሳምባታ ጋላሳ ኡባን ናባቤቲያ ናባቱዋ ቃላ ኣኬኪቤና ዲራው፥ ኣ ቦላ ፒርዲዴ፥ ናባቱዋ ቃላ ፖሌዲኖ። ዬሱሳ ዎꬊሳናው ኢቲ ጋሱካ ኡንቱንቶ ቤቴናን ኢፂና፥ ጲላፆሲ ኣ ዎꬋና ማላ ዎሴዲኖ። «ኡንቱንቱ ዬሱሳባይ ፆሳ ማፃፋን ፃፌቴዳዋ ኡባ ፖሌዳ ዎዴ፥ ማስቃሊያፔ ኣ ዎꬂዴ ሞጌዲኖ። ሺን ፆሳይ ሃይቁዋፔ ዬሱሳ ዴንꬄዳ። ሄዋፔ ጉዪያን ኢ ባሬናና ጋሊላፔ ዬሩሳላሜ ዬዳ ኣሳቶ ጮራ ጋላሳ ቤቴዳ ኡንቱንቱ ሃዒ ኣባ ኣሳሲ ማርካቲኖ። «ፆሳይ ኑ ኣዋቱዋሲ ኢማና ጌዳ ዎንጋላ ሚሺራቹዋ ኑኒ ሂንቴንቶ ኦዴቶ። ዳዊቴ ማዚሙሪያ ማፃፋን ላዔꬆ ሼምፑዋን፥ ‹ኔኒ ታ ናዓ። ሃቼ ታኒ ኔ ኣዉዋ ጊዳዲ› ጌቴቲዴ ፃፌቴዳዋዳን፥ ፆሳይ ዬሱሳ ዴንꬂዴ፥ ኑ ኣዋቱዋሲ ኢማና ጌዳዋ ኑሲ ኡንቱንቱ ናናሲ ፖሌዳ። ላዔንꬁዋ ኢ ሃይቄና ማላ፥ ሃይቁዋፔ ኣ ዴንꬄዳዋሲ ፆሳይ፥ ‹ታኒ ዳዊቴው ኢማና ጌዳ ኣማኔቴዳ ጌሻ ኣንጁዋ ሂንቴንቶ ኢማና› ያጊዴ ሃሳዬዳ። ሄዋ ዲራው፥ ማዚሙሪያ ማፃፋን ሃራሳን ቃሲ፥ ‹ኔ ጌሻ ናዓ ኣኃካ ሙሲሳካ› ያጌዳ። ኣዪሲ ጎፔ፥ ዳዊቴ ባሬ ዎዲያን ፆሳ ቆፋ ኦꬄዳዋፔ ጉዪያን ሃይቂዴ፥ ባሬ ኣዋቱዋና ሃይቂ ሙሴዳ። ሺን ፆሳይ ሃይቁዋፔ ዴንꬄዳዌ ሙሲቤና። «ሄዋ ዲራው፥ ታናዳን ኣማኒያዋንቶ፥ ናጋራ ኣቶ ጌቴቴዳዌ ሂንቴንቶ ዬሱሳ ባጋና ኦዴቴዳዌኔ፥ ሙሴ ሂጊያን ፂላናው ሂንቴንቶ ዳንዳዬቴና ኡባባፔ ኣኒ ኣማኒያ ኡባይ ፂላናዌ ሂንቴንቶ ኤሬቶ። *** ሄዋ ዲራው፥ ናባቱ ጌዳዌ ሂንቴ ቦላ ጋኬና ማላ ናጌቲቴ፤ ‹ፆሳይ ጌዳባ ቂሊጪያዋንቶ፥ ቤዒቴ፤ ሃራይ ኣቶ ኢቲ ኡራይ ሂንቴንቶ ኦዲንቶካ፥ ሂንቴ ኣማኔና ኦሱዋ ታኒ ሂንቴንቱ ዎዲያን ኦꬂያ ዲራው፥ ፖራ ጊቴ፤ ሃይቂቴ› ጌዲኖ» ያጌዳ። ጳዉሎሲኔ ባርናባሲ ኣዪሁዳ ዎሳ ጎሊያፔ ኬሲሺን፥ ኣሳይ ኡንቱንታ ላዔንꬁዋ ሳምባታንካ ሄዋ ጉጂዴ ኦዳና ማላ ዎሴዲኖ። ሺቁ ላሌቴዳዋፔ ጉዪያን፥ ጮራ ኣዪሁዳቱኔ ኣዪሁዳቱዋ ኣማኑዋን ጌሊዴ ፆሳው ያዪያ ጮራቱ፥ ጳዉሎሳኔ ባርናባሳ ካሌዲኖ፤ ዬሱሲ ኪቴዳዋንቱ ፆሳ ኣꬎ ኬካቴꬃን ሚኒ ዴዓና ማላ፥ ኡንቱንቶ ኦዲዴ ሚኒሴዲኖ። ላዔንꬁዋ ሳምባታን ኣማሬዳ ኣሳቱዋፔ ኣቲን፥ ካታማ ኣሳይ ኡባይ ፆሳ ቃላ ሲሳናው ሺቄዳ። ሺን ኣዪሁዳቱ ጮራ ኣሳ ቤዔዳ ዎዴ፥ ጳዉሎሳ ቃናቴዲኖ፤ ኣ ሃሳያ ጳልቂዴ፥ ኣ ቦሬዲኖ። ጳዉሎሲኔ ባርናባሲ ፃሊዴ፥ «ፆሳ ቃላይ ካሴቲዴ ሂንቴንቶ ኦዴታናው ኮሼ፤ ሺን ቃላ ሂንቴ ኢፄዳ ዲራዉኔ ሜꬊና ዴዑዋ ኣካናው ሂንቴንቶ ቤሴና ጊዴ፥ ሂንቴ ሂንቴንቱ ሁጲያን ፒርዴዳ ዲራው፥ ቤዒቴ፥ ኑኒ ኣዪሁዳ ጊዴናዋንቱኮ ሲሜቶ። ኣዪሲ ጎፔ፥ ጎዳይ ኑና፥ « ‹ኣሳይ ኡባይ ሂንቴ ባጋና ኣታና ማላ፥ ሂንቴንታ ታኒ ኣዪሁዳ ጊዴናዋንቶ ፖዑዋ ኦꬃዲ› ያጊ ኣዛዜዳ» ያጌዲኖ። ኣዪሁዳ ጊዴናዋንቱ ሄዋ ሲሴዳ ዎዴ፥ ናሼቲዴ ፆሳ ቃላ ቦንቼዲኖ፤ ቃሲ ሜꬊና ዴዑዋሲ ዶሬቴዳ ኡባይ ኣማኔዲኖ። ጎዳ ቃላይ ሄ ጋዲያ ኡባ ጋኬዳ። ሺን ኣዪሁዳቱ ፆሳው ጎዪኒያ ቦንቼቴዳ ማጫዋንታኔ ካታማን ዴዒያ ዎልቃማ ኣሳቱዋ ጳዉሎሳ ቦላኒኔ ባርናባሳ ቦላ ዴንꬄꬂና፥ ኣሳቱ ኡንቱንታ ዬዴርሱዋ ዶሚዴ፥ ባሬንቱ ጋዲያፔ ኬሴዲኖ። ሺን ዬሱሲ ኪቴዳዋንቱ ኡንቱንታ ኢፂያዋንቱሲ ማላታ ጊዳና ማላ፥ ባሬንቱ ጌዲያፔ ባና ሾጪዴ፥ ኢቆኒዮኔ ካታማ ቤዲኖ። ቃሲ ኣንፆኪያን ዴዒያ ካሊያዋንቱኒካ ጌሻ ኣያናይኔ ናሼቻይ ኩሜዳ። ካሴዋዳንካ ጳዉሎሲኔ ባርናባሲ ኢቆኒዮኔን ኣዪሁዳቱዋ ዎሳ ጎሌ ጌሊዴ፥ ቃላ ኦዴዲኖ፤ ሄዋፔ ጉዪያን ጮራ ኣዪሁዳቱኔ ኣዪሁዳ ጊዴናዋንቱ ኣማኔዲኖ። ሺን ኣማኒቤና ኣዪሁዳቱ ኣዪሁዳ ጊዴናዋንቱ ዎዛና ላሚዴ፥ ኢሻቱዋ ቦላ ሃንቄꬄዲኖ። ዬሱሲ ኪቴዳዋንቱ ሄዋን ዳሮ ዎዲያ ጋሚዔዲኖ፤ ኡንቱንቱ ጎዳባ ያዬናን ኦዴዲኖ፤ ጎዳይ ማላታኔ ኦራꬃባ ኡንቱንቱ ኦꬃና ማላ፥ ኡንቱንቶ ዎልቃ ኢሜዳዋን ባሬ ኣꬎ ኬካቴꬃ ቃላባይ ቱማ ጊዴዳዋ ማርካቴዳ። ሺን ካታማ ኣሳይ ሻኬቲ፥ ባጋይ ኣዪሁዳቱዋኮ፥ ባጋይ ዬሱሲ ኪቴዳዋንቱኮ ሲሜዲኖ። ኣዪሁዳ ጊዴናዋንቱኔ ኣዪሁዳቱ ባሬንቱ ካፓቱዋና ኢቲፔ ዬሱሲ ኪቴዳዋንታ ቆሃናዉኔ ሹቻን ጫዳናው ቆፔዳ ዎዴ፥ ዬሱሲ ኪቴዳዋንቱ ሄዋ ኤሪዴ፥ ሊስፂራኔ ዴርቤ ጌቴቲያ ሊቃዖኒያ ካታማቱዋኔ ኡንቱንቱ ሄራን ዴዒያ ጋዲያ ቢ ኣጌዲኖ፤ ሄዋን ዎንጋላ ሚሺራቹዋ ኦዲኖ። ባሬ ዳዪ ኡሉዋፔ ዬሌቶዴፔ ዶሚዴ፥ ላዑ ጌዲ ሲሊና፥ ኡባካ ሃሜቴና ኢቲ ቢታኒ ሊስፂራን ዴዔ። ሄ ቢታኒ ጳዉሎሲ ኦዲሺን ሲሴ፤ ጳዉሎሲ ኣ ጫዲ ፄሊያ ዎዴ፥ ፓፃናው ኣው ኣማኑ ዴዒያዋ ቤዒዴ፥ ኮሻ ꬎቂሲዴ ኣ፥ «ሲቲ ጋዴ ኔ ጌዲያን ኤቃ» ያጌዳ፤ ጉፒ ዴንዲዴ፥ ሃሜታ ዶሜዳ። ጳዉሎሲ ኦꬄዳዋ ኣሳይ ቤዒዴ፥ ባሬ ኮሻ ሊቃዖኒያ ቃላን ꬎቁ ኦꬂዴ፥ «ፆሳቱ ኣሳ ማላቲዴ ኑኮ ዎꬌዲኖ» ያጌዳ። ኣሳይ ባርናባሳ፥ «ዲያ» ጊዴ፥ ጳዉሎሲ ሃሳያሲ ዋናቲያ ዲራው፥ ኣ፥ «ሄርሜሳ» ጊዴ ሱንꬄዳ። ጌሻ ጎሊ ካታማ ማታን ዴዒያ ዲያ ቄሳይኔ ኣሳይ ኮሩማቱዋኔ ዳሪ ሎዒያ ጪሻቱዋ ዬሱሲ ኪቴዳዋንቱሲ ያርሹዋ ያርሻናው ኮዪዴ፥ ፔንጊያ ኣሄዲኖ። ሺን ዬሱሲ ኪቴዳ ባርናባሲኔ ጳዉሎሲ ሄዋ ሲሴዳ ዎዴ ባሬንቱ ማዩዋ ፔꬊዴ፥ ኣሳ ጊዶ ዎፂዴ፥ ባሬንቱ ኮሻ ꬎቁ ኦꬂዴ፥ ሃዋዳን ያጌዲኖ፤ «ኣሳው፥ ሃዋ ኣዪሲ ኦꬂቴ? ኑኒካ ሂንቴንቱዋዳን ሜꬌቴዳ ኣሳ፤ ሃ ፓꬄና ዬዉዋፔ ሳሉዋኔ ሳዓ፥ ኣባኔ ኡንቱንቱ ጊዶን ዴዒያ ኡባባ ሜꬌዳ ዴዑዋ ፆሳኮ ሂንቴ ሲማና ማላ፥ ሂንቴንቶ ኑኒ ዎንጋላ ሚሺራቹዋ ኦዴቶ። ኢ ቤኒ ኣሳ ዜሬꬃይ ኡባይ ባሬንቱ ኦጊያ ባና ማላ ዬዲ ኣጌዳ። ሂንቴንቶ ኢራ ሳሉዋፔ ቡኪሴዳ፤ ካꬃካ ኢ ዎዲያን ኢሜዳ፤ ቃሲ ቁማ ኢሚዴ፥ ሂንቴንታ ሎይꬂ ናሼቼ፤ ያቲዴ ሂንቴንቶ ሎዖባ ኦꬂዴ፥ ኡባ ዎዴካ ባሬው ማርካ ꬋዪቤና» ያጌዲኖ። ዬሱሲ ኪቴዳዋንቱ ሄዋ ጊዴ፥ ባሬንቶ ኣሳይ ያርሼና ማላ፥ ሜቶቲዴ ዲጌዲኖ። ኣንፆኪያፔኔ ኢቆኒዮኔፔ ዬዳ ኣዪሁዳቱ ኣሳ ባሬንቱ ባጋ ዛሪዴ፥ ሹቻን ጳዉሎሳ ጫዴዲኖ፤ ኡንቱንቶ ሃይቄዳዋ ማላቲና፥ ካታማፔ ካሬው ኣ ጎቺ ኬሴዲኖ። ሺን ካሊያዋንቱ ኣ ማታን ዩዪ ኣꬊዴ ኤቂሺን፥ ኢ ዴንዲዴ፥ ካታማ ጌሌዳ። ዎንቴꬃ ጋላሲ ባሪናባሳና ኢቲፔ ዴርቤ ቤዳ። ኡንቱንቱ ዴሪቤ ካታማን ዎንጋላ ሚሺራቹዋ ኦዲዴ፥ ጮራ ኣሳይ ዬሱሳ ኣማናና ማላ ኦꬄዳዋፔ ጉዪያን፥ ሊስፂራ፥ ኢቆኒዮኔኔ ጲሲዲያን ዴዒያ ኣንፆኪያ ሲሜዲኖ፤ ያቲዴ ሄዋን ካሊያዋንታ ሚኒሲዴኔ ኡንቱንቱ ኣማኑዋን ሚኒ ዴዓና ማላ ዞሪዴ፥ «ኑኒ ፆሳ ካዉቴꬃ ጌላናው ሎይꬂ ዋዬታና ቤሴ» ያጌዲኖ። *** ቃሲ ኣማኒያዋንቶ ዴዒያሳን ዴዒያሳን ጪማቱዋ ዶሪዴ፥ ፆሜዳዋፔኔ ዎሴዳዋፔ ጉዪያን፥ ኡንቱንቱ ኣማኔዳ ጎዳሲ ኡንቱንታ ሃዳራ ኢሜዲኖ። ጲሲዲያ ጋዲያፔ ኣꬊዴ፥ ጲኒፊሊያ ዬዲኖ፤ ጴርጌን ቃላ ኦዴዳዋፔ ጉዪያን፥ ኣፃሊያ ቤዲኖ። ሄዋፔ ኡንቱንቱ ባሬንቱ ፖሌዳ ኦሱዋ ዲራው፥ ኣሳይ ኡንቱንቱ ሃዳራ ፆሳ ኣꬎ ኬካቴꬃው ኢሜዳ ኣንፆኪያ ማርካቢያን ሲሜዲኖ። ኣንፆኪያ ጋኬዳ ዎዴ ኣማኒያ ኣሳ ሺሺዴ፥ ፆሳይ ባሬንቱና ኢቲፔ ኦꬄዳ ኡባባኔ፥ ኣዪሁዳ ጊዴና ኣሳይ ኣማናና ማላ፥ ኡንቱንቶ ፔንጊያ ዶዬዳዋ፥ ኣሳው ኦዴዲኖ። ያቲዴ ሄዋን ካሊያዋንቱና ዳሮ ዎዲያ ጋሚዔዲኖ። ኢቲ ኢቲ ኣሳቱ ዪሁዳፔ ኣንፆኪያ ዎꬊዴ፥ «ሙሴ ዎጋዳን፥ ሂንቴ ቃፃሬቴናዋ ጊዶፔ፥ ኣታናው ዳንዳይኪታ» ያጊዴ ኢሻቱዋ ታማሪሱዋ ዶሜዲኖ። ጳዉሎሲኔ ባርናባሲ ኡንቱንቱና ዳሪሲ ዋላቄቲዴ ፓሉሜቲና፥ ኣንፆኪያን ዴዒያ ኢቲ ኢቲ ሃራ ኣሳቱ ሄ ፓሉማ ዲራው፥ ጳዉሎሳናኔ ባሪናባሳና ዬሩሳላሜ ቢዴ፥ ዬሱሲ ኪቴዳዋንቱናኔ ጪማቱዋና ጋኬታናው ቆፋይ ቃሼቴዳ። ኣማኒያ ኣሳቱ ኡንቱንታ ኪቲዴ ኦጊያን ማዲሺን፥ ኣዪሁዳ ጊዴናዋንቱ ፆሳኮ ሲሜዳዋ ኦዲዴ፥ ፒንቂያናኔ ሳማሪያና ኣꬌዲኖ፤ ሄዌ ኢሻቱዋ ኡባ ሎይꬂ ናሼቼዳ። ኡንቱንቱ ዬሩሳላሜ ጋኬዳ ዎዴ፥ ኣማኒያዋንቱ፥ ዬሱሲ ኪቴዳዋንቱኔ ጪማቱ ኡንቱንታ ሞኬዲኖ፤ ፆሳይ ባሬንቱን ኦꬄዳዋ ኡባ ኦዴዲኖ። ሺን ፓሪሳዋቱዋ ባጋፔ ኣማኔዳ ኢቲ ኢቲ ኣሳቱ ዴንዲ ኤቂዴ፥ «ሂንቴንቱ ኡንቱንታ ቃፃራናዉኔ ሙሴ ሂጊያ ናጋና ማላ ኣዛዛናው ቤሴ» ያጌዲኖ። ዬሱሲ ኪቴዳዋንቱኔ ጪማቱ ሄዋ ዞሬታናው ሺቄዲኖ። ሎይꬂ ሃሳዬዳዋፔ ጉዪያን፥ ጴፂሮሲ ዴንዲ ኤቂዴ፥ ኡንቱንታ ሃዋዳን ያጌዳ፤ «ታናዳን ኣማኒያዋንቶ፥ ኣዪሁዳ ጊዴናዋንቱ ዎንጋላ ሚሺራቹዋ ቃላ ታ ዶናፔ ሲሲዴ ኣማናና ማላ፥ ታና ፆሳይ ሂንቴ ጊዶፔ ቤኒ ዶሬዳዋ ሂንቴንቱ ኤሪታ። ኣሳ ዎዛና ኤሪያ ፆሳይ ጌሻ ኣያና ኑሲ ኢሜዳዋዳን፥ ኡንቱንቶካ ኢሚዴ ቱማዬዳ። ኡንቱንቱ ኣማኔዳ ዲራው፥ ኢ ኡንቱንቱ ዎዛና ጌሺዴ፥ ኑ ጊዱዋኒኔ ኡንቱንቱ ጊዱዋን ዱማቴꬃ ዎꬂቤና። ሄዋ ዲራው፥ ኑ ኣዋቱኔ ኑኒ ቶካናው ዳንዳዪቤና ዎልቃማ ቶኩዋ ካሊያዋንቱ ሞርጊያን ዎꬂዴ፥ ሃዒ ሂንቴ ኣዪሲ ፆሳ ፓጪቴ? ሺን ጎዳ ዬሱሲ ኪሪስቶሳ ኣꬎ ኬካቴꬃን ኡንቱንቱ ኣቴዳዋዳን፥ ኑኒካ ኣቴዳዋ ኣማኔቶ» ያጌዳ። ኣሳይ ኡባይ ጮዑ ጊዴ፥ ባርናባሲኔ ጳዉሎሲ ኣዪሁዳ ጊዴና ኣሳ ጊዶን ባሬንቱ ባጋና ፆሳይ ኦꬄዳ ማላታኔ ኦራꬃባ ኡባ ኦዲሺን ሲሴ። ኡንቱንቱ ሃሳያ ዉርሴዳዋፔ ጉዪያን፥ ያዪቆቢ ሃዋዳን ያጊዴ ዛሬዳ፤ «ኢሻቶ፥ ታኒ ጊያዋ ሲሲቴ። ፆሳይ ኣዪሁዳ ጊዴናዋንቱ ጊዶፔ ባሬው ሃኒያ ኣሳ ኣካናው ኣዪሁዳ ጊዴናዋንቶ ኮይሮ ዎቲ ቆፔዴንቶ ሲሞኒ ኦዴዳ። ናቢያ ቃላይ ሃዋና ጊጌ፤ ጎዳይ ዳሮ ዎዲያፔ ዶሚዴ፥ ኣሳ ሃዋ ኤሪሲዴ፥ ፆሳ ማፃፋን ሃዋዳን ያጌዳ፤ ‹ሃዋፔ ጉዪያን፥ ሳዓን ዴዒያ ሃራ ኣሳይ ኡባይኔ ታዋ ጊዳናው ታኒ ፄሴዳ ኣዪሁዳ ጊዴና ኣሳይ ኡባይ ጎዳ ኮያና ማላ፥ ታኒ ሲማና። ታኒ ኮሌቲዴ ኩንዴዳ ጎሊያዳን ሃኔዳ ዳዊቴ ካዉቴꬃ ዴንꬃና። ኮሌቴዳዋካ ዛራዴ ኬፃና፤ ታኒ ላዔꬁዋ ኣ ኤሳና› ያጌዳ። *** *** *** «ሄዋ ዲራው፥ ታ ቆፋ ጊዶፔ፥ ኣዪሁዳ ጊዴናዋንቱፔ ፆሳኮ ሲሚያዋንታ ኑኒ ሜቶꬃናው ኮሼና። ሺን ኡንቱንቱ ኤቃኒ ቱኔዳዋ ሜና ማላ፥ ዎሹሜና ማላ፥ ባኩቴዳ ሜሂያ ኣሹዋ ሜና ማላኔ ሱꬃ ኡሼና ማላ፥ ኡንቱንቶ ኑኒ ዳቢዳቢያ ፃፋናው ኮሼ። ኣዪሲ ጎፔ፥ ሙሴ ሂጊያ ካሴ ዬሌታፔ ዶሚዴ ሳምባታን ሳምባታን ኣዪሁዳ ዎሳ ጎሌቱዋን ናባቢዴ፥ ኣ ቃላ ካታማ ኡባን ኦዲያዋንቱ ዴዒኖ» ያጌዳ። ሄዋፔ ጉዪያን፥ ዬሱሲ ኪቴዳዋንቱኔ ጪማቱ ዎሳ ጎሌ ኣሳ ኡባና ኢቲፔ ባሬንቱ ጊዶፔ ኣማሬዳ ኣሳቱዋ ዶሪዴ፥ ጳዉሎሳናኔ ባሪናባሳና ኣንፆኪያ ዬዳናው ቆፋ ቃቼዲኖ፤ ኡንቱንቱ ዳሮ ቦንቼቴዳ ላዑ ኣሳቱዋ ባርሳባ ጌቴቲያ ዪሁዳኔ ሲላሳ ዶሬዲኖ። ያቲዴ ሃዋዳን ጊያ ዳቢዳቢያ ፃፊዴ፥ ኡንቱንቱ ቦላ ኪቴዲኖ፤ «ኑኒ ዬሱሲ ኪቴዳዋንቱኔ ጪማቱ ሂንቴ ኢሻቱ፥ ኣንፆኪያን፥ ሶሪያኒኔ ኪልቂያን ዴዒያ ኣዪሁዳ ባጋ ጊዴና ኢሻቱዋሲ ኑ ሳሮታ ኪቴቶ። «ኑኒ ኣዛዚቤና ኣሳቱ ኑ ጊዶፔ ቢዴ፥ ‹ሂንቴንቱ ቃፃሬታናዉኔ ሙሴ ሂጊያ ናጋናው ቤሴ› ጊዴ፥ ሂንቴንታ ሜቶꬄዳዋኔ ዪሎዬዳዋ ሲሲዴ፥ ኑ ጎዳ ዬሱሲ ኪሪስቶሳ ሱንꬃ ዲራው፥ ባሬንቱ ሼምፑዋ ኦሌዳ ኑኒ ሲቂያ ባርናባሳናኔ ጳዉሎሳና ዶሬቴዳ ኣሳቱዋ ሂንቴንቱኮ ኪታናው ኢቲ ዎዛናን ኑ ቆፋ ቃቼዶ። *** ሄዋ ዲራው፥ ኑኒ ፃፌዳዋ ኡንቱንቱ ባሬንቱ ሁጴው ባሬንቱ ዶናን ሂንቴንቶ ኦዳና ማላ፥ ዪሁዳኔ ሲላሳ ኪቴዶ። «ኣዪሲ ጎፔ፥ ኤቃው ያርሼዳዋ ሞፒቴ፤ ሱꬃ ኡሾፒቴ፤ ባኩቴዳ ሜሂያ ኣሹዋ ሞፒቴ፤ ዎሹሞፒቴ። ሃ ኮሺያዋንቱፔ ኣቲን፥ ሃራ ዴፂያ ዬዉዋ ሂንቴንታ ቶሴና ማላ፥ ኑኒኔ ጌሻ ኣያናይ ዬዉዋ ኤኖ ጊዴ ኣኬዶ፤ ሃ ኡባባፔ ሂንቴ ሁጲያ ናጎፔ፥ ሂንቴንቱ ሎዖባ ኦꬂታ። ሲሚ ሳሮ ዴዒቴ» ያጌዲኖ። *** ሄዋ ዲራው፥ ኪቴቴዳዋንቱ ሞዪዜቲ፥ ኣንፆኪያ ዎꬊዴ፥ ኣማኒያ ኣሳ ሺሺዴ፥ ዳቢዳቢያ ኣሳሲ ኢሜዲኖ። ኡንቱንቱ ሄ ሚኒሲያ ዳቢዳቢያ ናባቤዳ ዎዴ፥ ናሼቴዲኖ። ቃሲ ዪሁዳይኔ ሲላሴ ባሬንቱ ሁጴው ናባቱዋ ጊዲያ ዲራው፥ ኢሻቱዋ ሎይꬂ ማቂዴ ሚኒሴዲኖ። ኡንቱንቱ ኣንፆኪያን ኣማሬዳ ጋላሳ ኡቴዳዋፔ ጉዪያን፥ ኢሻቱ ሳሮቴꬃን ሞዪዚና፥ ባሬንታ ኪቴዳዋንቱኮ ሲሜዲኖ። ሺን ሲላሴ ያኒ ኣታናው ባሬ ቆፋ ቃቼዳ። ቃሲ ጳዉሎሲኔ ባርናባሲ ሃራ ጮራ ኣሳቱዋና ኢቲፔ ጎዳ ቃላ ታማሪሲዴኔ ዎንጋላ ሚሺራቹዋ ኦዲዴ፥ ኣንፆኪያን ኡቴዲኖ። ኣማሬዳ ጋላሳፔ ጉዪያን፥ ጳዉሎሲ ባርናባሳ፥ «ኑኒ ጎዳ ቃላ ኦዴዳ ካታማ ኡባን ኑ ኢሻቱ ዎቲ ዴዒኖንቶ፥ ጉዬ ሲሚዴ፥ ፆሞሲ ቤዖይቴ» ያጌዳ። ሄዋፔ ጉዬ ባርናባሲ ማርቆሳ ጌቴቲያ ዮሃኒሳ ባሬንቱና ኣፋናው ኮዬዳ። ሺን ጳዉሎሲ ማርቆሳ ባሬንቱና ኣፋናው ኮዪቤና፤ ኣዪሲ ጎፔ፥ ኢ ኡንቱንቱፔ ጲኒፊሊያን ሻኬቴዳ፤ ቃሲ ኡንቱንቱና ኦሱዋሲ ቢቤና። ኡንቱንቱ ጊዱዋን ሎዔና ዋላሳይ ኬሲና፥ ኢቱ ኢቱዋፔ ሻኬቴዳ፤ ባርናባሲ ማርቆሳ ኣኪዴ፥ ማርካቢያን ቆጲሮሳ ቤዳ። ሺን ጳዉሎሲ ሲላሳ ኣኪና፥ ኢሻቱ ኣ ሃዳራ ፆሳ ኣꬎ ኬካቴꬃው ኢሜዳዋፔ ጉዪያን ቤዳ። ያቲዴ ኣማኒያ ኣሳቱዋ ሚኒሲዴ፥ ሶሪያናኔ ኪልቂያና ኣꬌዳ። ጳዉሎሲ ቃሲ ዴርቤኔ ሊስፂራ ቤዳ፤ ሄዋን ፂሞቶሳ ጌቴቲያ ካሊያዌ፥ ኢቲ ኣማኒያ ኣዪሁዳ ሚሺራቲ ናዓይ ዴዔ፤ ኣ ኣቡ ጊሪኬ ኣሳ። ሊስፂራኒኔ ኢቆኒዮኔን ዴዒያ ኢሻቱ ፂሞቶሳባ ሎይꬂ ማርካቴዲኖ። ጳዉሎሲ ፂሞቶሳ ባሬናና ኣፋናው ኮዪዴ፥ ኣ ኣቡ ጊሪኬ ኣሳ ጊዴዳዋ ሄዋን ዴዒያ ኣዪሁዳ ኡባይ ኤሪያ ዲራው፥ ኣ ኦይቂዴ ቃፃሬዳ። ኡንቱንቱ ካታማቱዋና ቢዴ፥ ዬሱሲ ኪቴዳ ዬሩሳላሜን ዴዒያዋንቱኔ ጪማቱ ዎꬄዳ ሂጊያ ኣማኒያዋንቱ ናጋና ማላ፥ ኡንቱንቶ ኦዲዴ ኣꬌዲኖ። ሄዋ ዲራው፥ ኣማኒያዋንቱ ኣማኑዋን ሚኒ፥ ፓይዱዋንካ ጋላሳፔ ጋላሳን ዳሪ ዳሪ ቤዲኖ። ኢሲያን ቃላ ኦዴና ማላ፥ ጌሻ ኣያናይ ኡንቱንታ ዲጌዳ ዲራው፥ ፒርጊያ ጋዲያናኔ ጋላቲያ ጋዲያና ኣꬌዲኖ። ኡንቱንቱ ሚሲያ ዛዋ ጋኬዳ ዎዴ፥ ቢቲኒያ ባናው ኮዬዲኖ፤ ሺን ዬሱሳ ኣያናይ ኡንቱንታ ዲጌዳ። ሄዋ ዲራው፥ ኡንቱንቱ ሚሲያ ማታና ኣꬊዴ፥ ፂሮዓዳ ዎꬌዲኖ። ጳዉሎሲ ቃማ ሳፃን ኢቲ ማቂዶኒያ ቢታኒ ባሬና፥ «ማቂዶኒያ ፒናዴ ኑና ማዳሪኪ» ያጊዴ ኤቂ ዎሲሺን ቤዔዳ። ሳፃ ኢ ቤዔዳዋፔ ጉዪያን፥ ኑኒ ኤሌካ ማቂዶኒያ ባናው ኮዬዶ፤ ኣዪሲ ጎፔ፥ ዎንጋላ ሚሺራቹዋ ያኒ ዴዒያ ኣሳሲ ኦዳናው፥ ፆሳይ ኑና ፄሴዳዋ ኑሲ ማላቴዳ። ሄዋ ዲራው፥ ፂሮዓዳፔ ዴንዲዴ፥ ሲቲ ጊዴ ማርካቢያን ሳሞቲራቄ ቤዶ፤ ዎንቴꬃ ጋላሲ ናጱሌ ቤዶ። ሄዋፔ ፒሊጲሲዮሳ ቤዶ፤ ፒሊጲሲዮሲ ማቂዶኒያ ቢታው ሁጴ ካታማ፤ ቃሲ ሮሜ ኣሳይ ዴዒያ ካታማ፤ ኑኒ ሄ ካታማን ኣማሬዳ ጋላሳ ኡቴዶ። ሳምባታ ጋላሲ፥ ካታማፔ ጋፃን ሻፋ ዶናን ኣዪሁዳቱ ፆሳ ዎሲያ ሳዓይ ዴዒያዋ ኣኬኪዴ ቤዶ፤ ሄዋን ኡቲዴ ሺቄዳ ማጫ ኣሳሲ ቃላ ኦዴዶ። ኢቲ ሊዲያ ጌቴቴዉና፥ ቲያፂሮና ካታማፔ ያዴ ፆሳ ኣማኔዉና፥ ዞዖ ማዩዋ ዛሊዒያ ሚሺራታ፥ ኑኒ ኦዲያዋ ሲሳዱ፤ ጳዉሎሲ ኦዲያዋካ ኢዛ ሲሳና ማላ ፆሳይ ኢ ዎዛና ዶዬዳ። ሊዲያ ባሬ ሶይ ኣሳና ኢቲፔ ፃማቄቴዳዋፔ ጉዪያን ኑና፥ «ሂንቴንቱ ታና ጎዳ ቱማቴꬃን ኣማናው ጊዴ ቆፖፔ፥ ታ ሶዪን ዴዒሺቴ» ጋዴ ዎሳዱ፤ ሚኒሳዴ ሾባዱ። ኑኒ ፆሳ ዎሲያሳ ቢሺን፥ ኢታ ኣያናይ ኢዚ ቦላ ኣቂና ካዪያ ኢቲ ኣሺካሬ ናታ ኑናና ጋኬታዱ፤ ሄ ናታ ካያዴ ዳሮ ሚሻ ባሬ ጎዳቱዋሲ ዴማዱ። ጋኬታዴ ጳዉሎሳኔ ኑና ካላዴ፥ «ሃዋንቱ ሂንቴንቶ ኣታና ኦጊያ ኦዲያዋንቱ፥ ኡባፔ ቦላ ፆሳ ኣይሌቱዋ» ጋዴ ኮሻ ꬎቁ ኦꬃዴ ሃሳያው። ኡባ ጋላሲ ሄዋዳን ጋው፤ ሺን ጳዉሎሲ ዪሎቲዴ ጉዬ ሲሚ፥ ሄ ኢታ ኣያና፥ «ኔኒ ኢፔ ኬሳና ማላ ዬሱሲ ኪሪስቶሳ ሱንꬃን ኔና ኣዛዛይ» ያጌዳ፤ ሄ ማንዒያንካ ኢታ ኣያናይ ኢፔ ኬሲ ኣጌዳ። ሺን ኢዚ ጎዳቱ ባሬንቱ ሚሻ ዴማና ኦጊ ꬋዬዳዋ ቤዒዴ፥ ጳዉሎሳኔ ሲላሳ ኦይቂዴ፥ ጌያ ሳዓን ዴዒያ ዳናቱዋ ሲንꬃ ጎቺ ኬሴዲኖ። ዳናቱዋ ሲንꬃ ኡንቱንታ ኣፊዴ፥ «ሃዋንቱ ኣዪሁዳ ኣሳ ጊዲዴ፥ ኑ ካታማ ኣሳ ሎይꬂ ሜቶꬂኖ። ኑኒ ሮሜ ጋዲያ ኣሳ ጊዲዴ፥ ኣካናዉኔ ኦꬃናው ዎጋ ጊዴናባ ታማሪሲኖ» ያጌዲኖ። ኣሳይ ኢቲ ባጋ ጊዲዴ፥ ጳዉሎሳ ቦላኒኔ ሲላሳ ቦላ ዴንዴዳ፤ ዳናቱካ ኡንቱንቱ ማዩዋ ቃሪ ኣኪዴ፥ ፃምዓን ኡንቱንታ ሾጫና ማላ ኣዛዜዲኖ። ኡንቱንቱ ዳሪሲ ዋꬌዳዋፔ ጉዪያን፥ ቃሾ ጎሊያን ዬጌዲኖ። ቃሾ ጎሊያ ናጊያዌካ ኡንቱንታ ሚኒሲ ናጋናዳን ኣዛዜዲኖ። ቃሾ ጎሊያ ናጊያዌ ሄ ኣዛዙዋ ኣኪዴ፥ ጳዉሎሳኔ ሲላሳ ቃሾ ጎሊያ ቆልዖ ጌሊሴዳ፤ ኡንቱንቱ ጌዲያካ ሚꬃና ጋꬂ ዳራፂዴ ቃቼዳ። ሺን ቃማ ቢላሄ ጊዲያ ሄራን ጳዉሎሲኔ ሲላሴ ፆሳ ዎሲዴ፥ ማዚሙሪያ ዬፂዴ ፆሳ ጋላቲኖ፤ ቃሼቶ ኣሳይ ኡንቱንቱ ጊያዋ ሲሴ። ቃሾ ጎሊያ ፃጱ ቃፃና ጋካናው ዎዛና ኣꬄናን ቢታይ ዳሪሲ ቃፄዳ፤ ሄ ማንዒያንካ ፔንጊካ ኡባይ ዶዬቲ ኣጊና፥ ቃሼቴዳ ኣሳ ኡባ ሳንꬃላታይ ቢሌቲ ዎꬌዳ። ቃሾ ጎሊያ ናጊያዌ ጌሚዒሹዋፔ ቤጎቲያ ዎዴ፥ ቃሾ ጎሊያ ፔንጊካ ኡባይ ዶዬቴዳዋ ቤዒዴ፥ ቃሼቶ ኣሳይ ኬሲ ኣኪዴ ቢዲጌዳዋ ኣው ማላቲና፥ ባሬና ዎꬋናው ቆፒዴ፥ ጩቢያ ኣኬዳ። ሺን ጳዉሎሲ ኮሻ ꬎቁ ኦꬂዴ፥ «ኔኒ ኔና ኣያኔ ኡዶፓ፤ ኣዪሲ ጎፔ፥ ኑኒ ኡባይ ሃዋን ዴዔቶ» ያጌዳ። ቃሾ ጎሊያ ናጊያዌ ፆምፒያ ዎሲ ኣኪዴ፥ ኤሌካ ቆልዖ ዎፄዳ፤ ኮኮሪዴ ጳዉሎሳ ሲንꬃኒኔ ሲላሴ ሲንꬃን ጉፋኔዳ፤ ኡንቱንታ ካሬ ኬሲዴ፥ «ታ ጎዳቶ፥ ታኒ ኣታናው ኣያ ኦꬃና ቤሲ?» ያጌዳ። ጳዉሎሲኔ ሲላሴ ኣ፥ «ጎዳ ዬሱሲ ኪሪስቶሳ ኣማና፤ ኔኒ ኣታና፤ ኔ ሶይ ኣሳይካ» ያጌዲኖ። ኡንቱንቱ ኣዉኔ ኣ ሶዪን ዴዒያ ኡባው ጎዳ ቃላ ኦዴዲኖ። ቃማ ሄ ሳቲያንካ ቃሾ ጎሊያ ናጊያዌ ኡንቱንታ ኣፊዴ ኡንቱንቱ ማይꬃ ሜጬዳ፤ ሄ ማንዒያንካ ባሬ ሶይ ኣሳ ኡባና ፃማቄቲ ኣጌዳ። ጳዉሎሳኔ ሲላሳ ፑዴ ባሬ ሶይ ኣፊዴ፥ ኡንቱንቶ ቁማ ኣꬄዳ፤ ኢ ባሬ ሶይ ኣሳ ኡባና ፆሳ ኣማኔዳ ዲራው፥ ናሼቴዳ። ዎንቲና ዳናቱ፥ «ሄ ኣሳቱዋ ቢላ» ያጊዴ፥ ፖሊሲያ ካፓቱዋ ኣኮ ኪቴዲኖ። ሄዋፔ ጉዬ ቃሾ ጎሊያ ናጊያዌ፥ «ሂንቴንቱ ቢሌታና ማላ፥ ዳናቱ ታው ኪቴዲኖ፤ ሲሚ ሃዒ ኬሲዴ ሳሮቴꬃን ቢቴ» ያጊዴ ሄ ኪታ ጳዉሎሳው ኦዴዳ። ሺን ጳዉሎሲ ሄ ፖሊሲያ ካፓቱዋ፥ «ኑኒ ሮሜ ጋዴ ኣሳ ጊዲሺን፥ ኡንቱንቱ ኑና ፒርዳይ ባይናን ኣሳ ሲንꬃን ዋꬊዴ፥ ቃሾ ጎሊያን ዬጌዲኖ። ሃዒ ኑና ጌማን ኬሲ ዬዲኖ? ሃኔና፤ ኡንቱንቱ ባሬንቱ ሁጴው ዪዴ፥ ኑና ኬሲኖ» ያጌዳ። ፖሊሲያ ካፓቱ ዳናቱዋሲ ሄዋ ኦዲና፥ ጳዉሎሲኔ ሲላሴ ሮሜ ጋዴ ኣሳ ጊዴዳዋ ሲሴዳ ዎዴ፥ ያዬዲኖ። ሄዋ ዲራው፥ ዳናቱ ዪዴ ኡንቱንታ፥ «ኑኒ ሂንቴንታ ናቄዶ» ጌዲኖ። ቃሾ ጎሊያፔ ካሬ ኡንቱንታ ኬሲዴ፥ ካታማፔ ኬሲዴ ባና ማላ ዎሴዲኖ። ጳዉሎሲኔ ሲላሴ ቃሾ ጎሊያፔ ኬሲዴ፥ ሊዲያ ሶይ ቤዲኖ፤ ያኒ ኢሻቱዋና ጋኬቲዴ፥ ኡንቱንታ ሚኒሲዴ ሄዋፔ ቤዲኖ። ጳዉሎሲኔ ሲላሴ፥ ኣምፒጶሊሳናኔ ኣጶሎኒያና ኣꬊዴ፥ ቴሴሎንቄ ዬዲኖ፤ ቴሴሎንቄን ኣዪሁዳ ዎሳ ጎሊ ዴዔ። ጳዉሎሲ ባሬ ዶያዳንካ ያ ጌሌዳ፤ ሄዋን ሄዙ ሳምባታ ጋላሳቱዋን ፆሳ ማፃፋቱዋፔ ኣሳና ሃሳዬዳ፤ ኪሪስቶሲ ዋዪያ ኣካናዉኔ ሃይቁዋፔ ዴንዳናው ቤሲያዋ ኡንቱንቶ ቢሊዴ ኦዲዲኔ ቱማ ጊዴዳዋካ ኡንቱንታ ኤሪሲዴ፥ «ዬሱሲ ሃ ታኒ ሂንቴንቶ ኦዲያዌ ኪሪስቶሳ» ያጌ። ኡንቱንቱፔ ኢቱ ኢቱ ዬዉ ቱማ ጊዴዳዋ ኣኬኪዴ፥ ጳዉሎሳናኔ ሲላሴና ጋኬቴዲኖ፤ ሃዋዳንካ፥ ፆሳሲ ጎዪኒያ ጮራ ጊሪኬ ኣሳይኔ ጮራ ቦንቼቴዳ ማጫዋንቱ፥ ጳዉሎሳናኔ ሲላሴና ጋኬቴዲኖ። ሺን ኣዪሁዳቱ ቃናቲዴ፥ ኢቲ ኢቲ ኦሱ ባዪና ኢታ ኣሳቱዋ ቆጫፔ ሺሺዴ ካታማ ኣሳ ዋላሴዲኖ፤ ጳዉሎሳኔ ሲላሳ ኣሳኮ ኬሳና ማላ ኮዪዴ፥ ያሶና ጎሊያ ዶዴዲኖ። ጳዉሎሲኔ ሲላሴ ኡንቱንቶ ቤቴናን ኢፂና፥ ያሶናኔ ኢቲ ኢቲ ኢሻቱዋ ካታማ ካፓቱዋኮ ኣፊዴ፥ «ሃዋንቱ ጋዲያ ኡባ ሜቶꬄዳዋንቱ፥ ሃዋካ ዬዲኖ። ያቲና ያሶኒ ኡንቱንታ ባሬ ሶዪን ዎꬄዳ፤ ሃዋንቱ ኡባይ፥ ‹ዬሱሳ ጊያ ሃራ ካቲ ዴዔ› ጊዴ ቄሳሬ ኣዛዙዋ ሚኒሲኖ» ያጊዴ፥ ኮሻ ꬎቂሲዴ ሃሴዬዲኖ። ሺቄዳ ኣሳይኔ ካታማ ካፓቱ ሄዋ ሲሲዴ ሜቶቴዲኖ። ካፓቱ ያሶናኔ ሃራቱዋ ዋሲያን ቢሌዲኖ። ኣማኒያዋንቱ ጳዉሎሳኔ ሲላሳ ሳዓይ ቃሚያዋኒ ኤሌካ ቤሪያ ዬዴዲኖ። ያ ጋኪዴ፥ ኣዪሁዳ ዎሳ ጎሌ ጌሌዲኖ። ቤሪያ ኣሳቱ ቴሴሎንቄን ዴዒያ ኣሳቱዋፔካ ኣꬊ ዶዬቶ ዎዛናይ ዴዒያ ዲራው፥ «ጳዉሎሲ ጌዳዌ ቱሜንቶኔ» ያጊዴ፥ ኡባ ጋላሲ ፆሳ ማፃፋቱዋ ታማሪዴ፥ ቃላ ኩሜንꬃ ላሞታን ኣኬዲኖ። ሄዋ ዲራው፥ ኡንቱንቱፔ ጮራቱ፥ ጊሪካቱዋፔ ቦንቼቴዳ ጮራ ማጫዋንቱኔ ጮራ ኣቱማ ኣሳቱ ኣማኔዲኖ። ሺን ቴሴሎንቄን ዴዒያ ኣዪሁዳቱ ጳዉሎሲ ፆሳ ቃላ ቤሪያንካ ኦዴዳዋ ሲሴዳ ዎዴ፥ ቤሪያ ዪዴ፥ ኣሳ ኣናና ዋላሴዲኖ። ሄዋፔ ጉዪያን፥ ኢሻቱ ኤሌካ ጳዉሎሳ ኣባ ማታን ዬዲ ኣጌዲኖ፤ ሺን ሲላሴኔ ፂሞቶሴ ቤሪያን ኣቴዲኖ። ጳዉሎሳ ሞዪዜዳ ኣሳቱ ኣቴና ጋꬄዲኖ፤ ሄ ኣሳቱ ሲላሴኔ ፂሞቶሴ ባሬንቶ ዳንዳዬቴዳዋዳን፥ ኤሌካ ባሬኮ ያና ማላ፥ ጳዉሎሲ ኪቴዳ ኪታ ኣኪዴ፥ ቤሪያ ሲሜዲኖ። ጳዉሎሲ ኣቴናን ሲላሳኔ ፂሞቶሳ ናጊዴ፥ ካታማን ኤቃይ ኩሜዳዋ ቤዒዴ ዪሎቴዳ። ሄዋ ዲራው፥ ኣዪሁዳ ዎሳ ጎሊያን ኣዪሁዳቱዋናኔ ፆሳሲ ጎዪኒያ ኣዪሁዳ ጊዴና ኣሳቱዋና ፓሉሜቴ፤ ቃሲ ኡባ ጋላሲ ጌያን ባሬናና ጋኬቲያ ኣሳናካ ፓሉሜቴ። ቃሲ ኤፒቆሮሳፔኔ ኢስፆዒኪያፔ ዬዳ ኢቲ ኢቲ ኤራንቻቱ ጳዉሎሳና ፓሉሜቴዲኖ፤ ኡንቱንቱፔ ኢቱ ኢቱ፥ «ሃ ቶፊናይ ኣያ ሃሳያናው ኮዪ?» ያጌዲኖ። ሃራቱ ጳዉሎሳ ዬሱሳባኔ ሃይቁዋፔ ኢ ዴንዴዳዋ ባሬንቶ ኦዲያ ዲራው፥ «ኦራꬃ ፆሳቱባ ኦዲያዋ ማላቴ» ያጌዲኖ። ጳዉሎሳ ኦይቂዴ፥ «ሃ ኔኒ ታማሪሲያ ኦራꬃ ዬዉ ኣዬንቶ ኑና ኤሪሳሪኪ? ኣዪሲ ጎፔ፥ ኔኒ ኑሲ ኦራꬃባ ኦዳሳ፤ ሲሚ ሃዌ ኣዬንቶ ኑኒ ኤራናው ኮዬቶ» ያጊዴ ጳዉሎሳ ኣሪዮስፓጎሳ ጌቴቲያሳ ኣፌዲኖ። *** ኣቴና ኣሳይ ኡባይኔ ሄዋን ዴዒያ ኢማꬃቱ ኦራꬃባ ሃሳዪዲኔ ሲሲዴ ፔሺያዋፔ ኣቲን፥ ሃራባን ፔሺኪኖ። ጳዉሎሲ ኣሪዮስፓጎሳን ዴዒያ ሺቁዋ ሲንꬃን ኤቂዴ፥ ሃዋዳን ያጌዳ፤ «ኣቴና ኣሳቶ፥ ፆሳቱዋሲ ኡባባኒ ሂንቴንቱ ዳሪ ያዪያዋ ታኒ ቤዓይ። ኣዪሲ ጎፔ፥ ታኒ ሂንቴንቱ ጎዪኒያዋ ፄላዴ ኣꬊሺን፥ ‹ኤሬቴና ፆሳሲ› ጌቴቲዴ ፃፌቴዳ ያርሹዋ ሳዓ ቃሲ ዴማዲ፤ ሄዋ ዲራው፥ ሃ ሂንቴ ኤሬናን ጎዪኒያዋ ታኒ ሂንቴንቶ ኦዳይ። «ኣላሚያኔ ኣላሚያን ዴዒያ ኡባባ ሜꬌዳ ፆሳይ ሳሉዋኔ ሳዓ ጎዳይ፥ ኣሳይ ኬፄዳ ጌሻ ጎሊያን ዴዔና። ኣዬንቶ ፓጬዳ ኣሳዳን፥ ኣሳ ኩሺያ ኢ ፄሌና፤ ኣዪሲ ጎፔ፥ ኢ ባሬ ሁጴው ዴዑዋ ሼምፑዋኔ ኡባባ ኣሳ ኡባው ኢሜዳ። ፆሳይ ኣሳ ዛሪያ ኡባ ኢቲ ኡራፔ ሜꬊዴ፥ ጋዲያ ኡባን ዎꬄዳ፤ ኢ ባሬ ሁጴው ኡንቱንቱ ዴዓና ዎዲያኔ ሳዓ ካሴ ዛዋዬዳ። «ኢ ሄዋ ኦꬄዳዌ ኡንቱንቱ ኦይቂ ኦይቂ ፄሊዴ፥ ባሬና ኮዪዴ፥ ኦኒ ኤሪ ዴማናዋንቴሻ ጊያዋና፤ ጊዶፔኔ፥ ፆሳይ ኑፔ ኦሲኔ ሃኮ ጊዴና። ኣዪሲ ጎፔ፥ ሂንቴንቱፔ ኢቲ ኢቲ ኤራንቻቱ፥ ‹ኑኒ ኣ ናና› ጌዳዋዳን፥ ኑኒ ኣኒ ፓፃ ዴዔቶኔ ቃፄቴቶ። ሲሚ ኑኒ ፆሳ ናና ጊዴዳ ዲራው፥ ፆሳይ ኣሳ ጪንጫቴꬃኒኔ ቆፋን ዎርቃፔ ዎይ ቢራፔ ዎይ ሹቻፔ ኦሴቴዳዋ ማላቴ ያጊዴ፥ ቆፓናው ቤሴና። ሄዋ ዲራው፥ ፆሳይ ኣሳይ ኤሪቤና ዎዲያ ኣꬄዳ፤ ሺን ሃዒ ኡባሳን ኣሳይ ኡባይ ናጋራፔ ሲማና ማላ ኣዛዜዳ። ኣዪሲ ጎፔ፥ ፆሳይ ዎዲያ ኬሪ ዎꬄዳ፤ ሄ ዎዲያን ባሬ ዶሬዳ ኡራን ሳዓን ዴዒያ ኣሳ ኡባ ቦላ ፂሎ ፒርዳ ኢ ፒርዳና፤ ኣሳ ኡባው ሃይቁዋፔ ዬሱሳ ዴንꬄዳዋን ሄዋ ቱማዬዳ» ያጌዳ። ኡንቱንቱፔ ኢቲ ኢቲ ኣሳቱ ሃይቁዋፔ ዴንዱዋባ ጳዉሎሳፔ ሲሲዴ፥ ኣ ቦላ ቂሊጬዲኖ፤ ሺን ሃራ ኣሳቱ ኣ፥ «ኑኒ ሃዋ ኔፔ ጉጂዴ ሲሳና ኮዬቶ» ጌዲኖ። ሄዋ ዲራው፥ ጳዉሎሲ ኡንቱንቱ ጊዶፔ ኬሴዳ። ሺን ኢቲ ኢቲ ኣቱማ ኣሳቱ ጳዉሎሳና ጋኬቲዴ ኣማኔዲኖ፤ ኡንቱንቱ ጊዱዋን ኣሪዮስፓጎሳን ዴዒያ ፒርዳ ጎሌ ዳናይ ዲዮናሲዮሲ፥ ዳማሪሶ ጌቴቲያ ኢቲ ሚሺራቲና ሃራ ኣሳቱ ዴዒኖ። ሄዋፔ ጉዪያን፥ ጳዉሎሲ ኣቴናፔ ኬሲዴ፥ ቆሮንቶሳ ቤዳ። ሄዋን ኣቂላ ጊያ ኢቲ ኣዪሁዳ ቢታኒያ ዴሜዳ፤ ኣቂላይ ጳንፆሳን ዬሌቴዳ፤ ኣዪሁዳ ኣሳይ ኡባይ ሮሜፔ ኬሳና ማላ፥ ቃላዉዴዮሲ ኣዛዜዳ ዲራው፥ ኣማሬዳ ዎዲያፔ ካሴ፥ ኢ ባሬ ማቻቲ ጲሪስቂላና ፃሊያፔ ዬዳ፤ ጳዉሎሲ ኡንቱንቱና ጋኬታናው ቤዳ። ኣ ኦሱኔ ኡንቱንቱ ኦሱ ኢቲ ማላ ዱንካኒያ ሲካ ጊዲያ ዲራው፥ ኡንቱንቱና ኡቲዴ፥ ኢቲፔ ኦꬄዳ። ጳዉሎሲ ሳምባታ ኡባን ኣዪሁዳቱዋና ጊሪካቱዋ ኣማንꬃናው ኣዪሁዳ ዎሳ ጎሊያን ፓሉሜቴ። ሲላሴኔ ፂሞቶሴ ማቂዶኒያፔ ዬዳ ዎዴ፥ ጳዉሎሲ ኣዪሁዳቱዋሲ ዬሱሲ ባሬ ሁጴው ኪሪስቶሳ ጊዴዳዎ ቃላ ኦዱዋ ቶሌዳ። ሺን ኡንቱንቱ ጳዉሎሳ ሃሳያ ጳልቂናኔ ኣ ቦሪና፥ ጳዉሎሲ ባሬ ማዩዋፔ ባና ቆቆፊዴ፥ «ሂንቴንቱ ኢታቴꬃይ ሂንቴንታ ኦይቆ፤ ታኒ ሄዋን ጌሊኬ፤ ሃዋፔ ሂኒ ባጋን ታኒ ኣዪሁዳ ጊዴና ኣሳኮ ባይ» ያጌዳ። ሄዋፔ ኬሲዴ፥ ፆሳሲ ጎዪኒያ ዮስፆሳ ጊያ ቢታኒያ ሶይ ቤዳ፤ ዮስፆሳ ጎሊ ኣዪሁዳ ዎሳ ጎሊያ ማታን ዴዔ። ኣዪሁዳ ዎሳ ጎሌ ካፑ ቃሪሲጶሲ ባሬ ሶይ ኣሳ ኡባና ጎዳ ኣማኔዳ፤ ቆሮንቶሳ ኣሳቱዋፔካ ጮራቱ ፆሳ ቃላ ሲሴዳ ዎዴ፥ ኣማኒዴ ፃማቄቴዲኖ። ጎዳይ ኢቲ ቃማ ሳፃን ጳዉሎሳ፥ «ያዮፓ፤ ኦዳ፤ ጮዑ ጎፓ። ታኒ ኔናና ዴዒያ ዲራው፥ ኔና ቆሃናው ኢታባን ዬጋና ኣሳይ ኦኒኔ ባዋ፤ ኣዪሲ ጎፔ፥ ታው ሃ ካታማን ጮራ ኣሳይ ዴዔ» ያጌዳ። *** ጳዉሎሲ ፆሳ ቃላ ኣሳ ታማሪሲዴ፥ ኢቲ ላይꬃኔ ኡሱፑን ኣጌና ኡንቱንቱና ኡቴዳ። ጋሊዮሴ ኣካዪያ ጋዲያ ሞዲያ ዎዴ፥ ኣዪሁዳቱ ኢቲፔ ጳዉሎሳ ቦላ ዴንዲዴ፥ ፒርዳ ጎሌ ኣ ኣፊዴ፥ «ሃ ቢታኒ ሙሴ ሂጊያ ኢፂዴ፥ ኣሳይ ፆሳሲ ጎዪናና ማላ ጪሜ» ያጌዲኖ። ጳዉሎሲ ሃሳያና ሃኒሺን፥ ጋሊዮሴ ኣዪሁዳቱዋ፥ «ኣዪሁዳቶ፥ ሄዌ ባላ ኦሱዋ ዎይ ኢታ ናቆ ጊዶፔ፥ ታኒ ሂንቴንቱባ ዳንዳያዴ ሲሳናው ቤሴ። ሺን ቃላሲ ሱንꬃሲኔ ሂንቴ ሁጴ ሂጊያሲ ሂንቴንቱ ፓሉሜቶፔ፥ ሂንቴ ሁጴው ኤሪቴ፤ ሃዋ ታኒ ፒርዲኬ» ያጌዳ። ፒርዳ ጎሊያፔ ካሬው ኡንቱንታ ኬሴዳ። ሄዋፔ ጉዪያን፥ ጊሪኬ ኣሳይ ኡባይ ኣዪሁዳ ዎሳ ጎሌ ካፑዋ ሶስቴኒሳ ኦይቂዴ፥ ፒርዳ ጎሊያ ሲንꬃን ሾጬዲኖ፤ ሺን ጋሊዮሳ ሄዌ ኣይኔ ሜቲቤና። ጳዉሎሲ ዳሮ ዎዲያ ቆሮንቶሳን ኡቴዳዋፔ ጉዪያን፥ ኢሻቱዋ ሳሮቲዴ፥ ጲሪስቂሊናኔ ኣቂላና ማርካቢያን ሶሪያ ቤዳ፤ ባሬው ሺቄዳ ጋሱ ዴዒያ ዲራው፥ ኪንኪሪያ ካታማን ባሬ ሁጲያ ሜዴቴዳ። ኡንቱንቱ ኤፌሶኔ ጋኬዳ ዎዴ፥ ጳዉሎሲ ጲሪስቂሎኔ ኣቂላ ያኒ ዬጊ ዬዳ፤ ሺን ባሬው ኣዪሁዳ ዎሳ ጎሌ ጌሊዴ፥ ኣዪሁዳቱዋና ፓሉሜቴዳ። ኡንቱንቱ ባሬንቱና ዳሮ ዎዲያ ኡታና ማላ ጳዉሎሳ ዎሲና ኢ ኢፄዳ። ሺን ኡንቱንቱፔ ሻኬቲዴ፥ «ፆሳይ ጎፔ፥ ላዔꬁዋ ሂንቴንቱኮ ሲማና» ያጊዴ ኤፌሶናፔ ማርካቢያን ቤዳ። ቂሳሪያ ጋኬዳ ዎዴ ዬሩሳላሜ ቢዴ፥ ኣማኒያ ኣሳ ሳሮቴዳዋፔ ጉዪያን፥ ኣንፆኪያ ዎꬌዳ። ያኒ ኣማሬዳ ዎዲያ ጋሚዒዴ ቤዳ፤ ካሊያዋንታ ኡባ ሚኒሲዴ፥ ጋላቲያናኔ ፒርጊያና ኣꬌዳ። ኢስኪንዲሪያን ዬሌቴዳ ኣዪሁዳ ኣሳ ኢቲ ኣጲሎሳ ጊያ ሎዖ ሃሳዪያዌ ኤፌሶኔ ቤዳ፤ ፆሳ ማፃፋቱዋ ኢ ዳሪሲ ኤሪያ ኣሳ። ጎዳ ኦጊያካ ታማሬዳ ኣሳ፤ ዮሃኒሳ ፂንቃታ ፃላላ ኤሪዴ፥ ኣያናን ባሬ ጋርሳን ኤፄቲዴ፥ ዬሱሳባ ሱሪሲዴ ሃሳዬዳኔ ታማርሴዳ። ያቲዴ ኣዪሁዳ ዎሳ ጎሊያን ያዬናን ሃሳያ ዶሜዳ። ጲሪስቂላይኔ ኣቂላይ ኢ ኦዲያዋ ሲሴዳ ዎዴ፥ ባሬንቱና ሶይ ኣ ኣፊዴ፥ ፆሳ ኦጊያ ካሴፔ ሱሪሲዴ፥ ኣው ጌሺ ኦዴዲኖ። ኣጲሎሲ ኣካዪያ ፒናና ኮዪና፥ ኢሻቱ ኣ ሚኒሲዴ፥ ኣካዪያን ዴዒያ ካሊያዋንቱ ኣ ሞካና ማላ፥ ኡንቱንቶ ዳቢዳቢያ ፃፌዲኖ፤ ኢ ያ ጋኪዴ፥ ፆሳ ኣꬎ ኬካቴꬃን ኣማኒያዋንታ ዳሮ ማዴዳ። ኣዪሲ ጎፔ፥ ዬሱሲ ባሬ ሁጴው ኪሪስቶሳ ጊዴዳዋ ኣዪሁዳቱዋሲ ፆሳ ማፃፋቱዋፔ ቆንጪሲዴ፥ ኣሳ ሲንꬃን ሚኒሲዴ ኦዴዳ። ኣጲሎሲ ቆሮንቶሳን ዴዒሺን፥ ጳዉሎሲ ቆሞ ባጋና ኣꬊዴ፥ ኤፌሶኔ ቤዳ፤ ኢቲ ኢቲ ካሊያዋንታ ዴሜዳ። ጳዉሎሲ ኡንቱንታ፥ «ሂንቴንቱ ኣማኔዳ ዎዴ ጌሻ ኣያና ኣኬዲቴ?» ያጊዴ ኦቼዳ። ኡንቱንቱ፥ «ቱይቲ፥ ኣኪቤይኮ፤ ሃራይ ኣቶ፥ ጌሻ ኣያናይ ዴዒያዋካ ሲሲቤይኮ» ያጌዲኖ። ጳዉሎሲ ኡንቱንታ፥ «ያቲና፥ ኣያን ፃማቄቴዲቴ?» ያጌዳ። ኡንቱንቱ፥ «ኑኒ ዮሃኒሳ ፂንቃታኒ ፃማቄቴዶ» ያጊዴ ዛሬዲኖ። ጳዉሎሲ፥ «ዮሃኒሲ ባሬፔ ጉዪያን ዪያ ዬሱሲ ኪሪስቶሳን ኣሳይ ኣማናና ማላ፥ ኣሳሲ ኦዲዴ፥ ናጋራፔ ሲሚያ ፂንቃታኒ ፃማቄዳ» ያጌዳ። ኡንቱንቱ ሄዋ ሲሴዳ ዎዴ፥ ጎዳ ዬሱሲ ኪሪስቶሳሲ ጊዳናው ፃማቄቴዲኖ። ጳዉሎሲ ባሬ ኩሺያ ኡንቱንቱ ቦላ ዎꬄዳ ዎዴ ጌሻ ኣያናይ ኡንቱንቱ ቦላን ዎꬊና፥ ዱማ ዱማ ቃላን ሃሴዬዲኖ፤ ቃሲ ቲምቢቲያካ ኦዴዲኖ። ሄዋን ታማኔ ላዑ ኣሳቱዋ ጊዲያዋንቱ ዴዒኖ። ጳዉሎሲ ኣዪሁዳ ዎሳ ጎሌ ጌሊዴ፥ ፆሳ ካዉቴꬃባ ፓሉሜቲዲኔ ኣኬኪሲዴ፥ ኣሳና ሄዙ ኣጌና ጊዲያዋ ኬና ያዬናን ሃሳዬ። ሺን ኡንቱንቱፔ ኢቱ ኢቱ ማካሊዴ፥ ጮራ ኣሳ ሲንꬃን ጎዳ ኦጊያ ቦሪዴ ኣማኔናን ኢፂና፥ ጳዉሎሲ ኡንቱንቱፔ ሻኬቲ፥ ባሬና ካሊያዋንታ ባሬናና ኣፌዳ፤ ፂራኖሳ ጊያ ቲሚርቴ ጎሊያን ኡባ ጋላሲ ፓሉሜቴ። ጳዉሎሲ ላዑ ላይꬃ ጋካናው ቃላ ኦዴዳ፤ ሄዋ ዲራው፥ ኢሲያን ዴዒያ ኣሳይ ኡባይ፥ ኣዪሁዳቱካ ኣዪሁዳ ጊዴናዋንቱካ ጎዳ ቃላ ሲሴዲኖ። ፆሳይ ጳዉሎሳ ባጋና ዱማ ማላታ ኦꬄዳ። ሄዋ ዲራው፥ ኣሳይ ኣ ቦላይ ቦቼዳ ማራቢያ ዎይ ማዩዋ ሃርጋንቻቱዋሲ ኣፌ፤ ሃርጋንቻቱካ ፓፂኖ፤ ኢታ ኣያናቱካ ኡንቱንቱፔ ኬሲኖ። ኢታ ኣያናቱዋ ኬሲዴ ዩዪያ ኣዪሁዳቱዋፔ ኢቱ ኢቱ፥ «ጳዉሎሲ ቃላ ኦዲያ ዬሱሳ ሱንꬃን ኑኒ ሂንቴንታ ኬሲቴ ጊዴ ኣዛዜቶ» ያጊዴ፥ ኢታ ኣያናቱ ዴዒያ ኣሳቱዋ ቦላን ጎዳ ዬሱሳ ሱንꬃ ፄሲ ቤዔዲኖ። ቄሳቱዋ ካፑዋ ኣስቄዋ ጊያ ኢቲ ኣዪሁዳ ቢታኒያሲ ሄዋ ኦꬄዳ ላፑ ናናይ ዴዒኖ። ኢታ ኣያናይ ኡንቱንቶ ዛሪዴ፥ «ታኒ ዬሱሳ ኤራይ፤ ጳዉሎሳካ ኤራይ። ሺን ሂንቴንቱ ኦኔ?» ያጌዳ። ኢታ ኣያናይ ዴዒያ ቢታኒ ኡንቱንቱ ቦላ ጉፒ ዎꬊና፥ ኡንቱንቱ ማሱንፂዴ፥ ሄ ጎሊያፔ ካሎ ዎፃና ጋካናሲ፥ ዎልቃሚዴ ፆኔዳ። ኤፌሶኔን ዴዒያ ኣዪሁዳቱኔ ኣዪሁዳ ጊዴናዋንቱ ኡባይ ሄዋ ሲሲዴ ኡባይ ዳሮ ያዬዲኖ፤ ጎዳ ዬሱሳ ሱንꬃይካ ዳሮ ቦንቼቴዳ። ኣማኒያዋንቱፔ ጮራ ኣሳቱ ባሬንቱ ኦꬄዳዋ ፓፂዲኔ ቆንጪያን ኦዲዴ ዪኖ። ቢቲያዋንቱፔ ጮራቱ ባሬንቱ ማፃፋቱዋ ሺሺዴ፥ ኣሳ ኡባ ሲንꬃን ጉዴዲኖ፤ ሄ ማፃፋቱዋ ጋቲያ ሄቲያ ዎዴ፥ ኢሻታሙ ሻዓ ቢራ ሳንቲሚያ ጊዴዳ። ሄዋ ማላ ዎልቃማ ኦጊያን ፆሳ ቃላይ ዲጬኔ ኣኬ። ሄዌ ፖሌቴዳዋፔ ጉዪያን ጳዉሎሲ፥ «ታኒ ዬሩሳላሜ ባዴ ሮሜካ ቃሲ ቤዓናው ቤሴ» ያጊዴ፥ ማቂዶኒያናኔ ኣካዪያና ኣꬊዴ፥ ዬሩሳላሜ ባናው ቆፋ ቃቼዳ። ቃሲ ባሬና ማዲያዋንቱፔ ላዓቱዋ ፂሞቶሳኔ ኤራስፆሳ ማቂዶኒያ ኪቲዴ፥ ባሬው ኢሲያን ኣማሬዳ ዎዲያ ጋሚዔዳ። ጎዳ ኦጊያ ዲራው፥ ሄ ዎዴ ዳሮ ዋላሳይ ኬሴዳ። ኣዪሲ ጎፔ፥ ፃጋራ ቢራ ሙሺሲዴ ቲጊ ሜꬊያ ዲሜፂሮሳ ጊያ ኢቲ ቢታኒ ኣርፄሚሲ ጌሻ ጎሊያ ሚሲሊያ ቢራፔ ቲጊ ቲጊዴ፥ ኦሳንቻቱዋሲ ዳሮ ዎꬊያ ዴሜ። ሄዋንታኔ ኡንቱንቱዋ ማላ ኦሱዋ ኦꬂያዋንታ ኢቲፔ ሺሺዴ፥ ሃዋዳን ያጌዳ፤ «ኣሳው፥ ኑ ዱሬቴꬃይ ሃ ኦሱዋና ጊዲያዋ ሂንቴ ኤሪታ። ሄዌ ጳዉሎሲ፥ ‹ኣሳ ኩሺ ሜꬌዳዋንቱ ፆሳቱዋ ጊዲኪኖ› ያጊዴ፥ ኤፌሶኔ ፃላላን ጊዴናን ኣማሬዳ ጋዳቱዋፔ ኣቲን፥ ኢሲያን ኡባን ጮራ ኣሳሲ ኦዲ ኣማንꬄዳዋ ሂንቴንቱ ቤዔዲታኔ ሲሴዲታ። ሎዔናባይ፥ ኑ ኦሱ ካꬌታናዋ ፃላላ ጊዴና፤ ሺን ኢሲያን ዴዒያ ኡባቱኔ ሳዓ ኡባን ዴዒያዋንቱ ጎዪኒያ ዎልቃማ ፆሳቶ ጌቴቲያ ኣርፄሚሲ ጌሻ ጎሊ ቦንቼቴናን ኣታናዋኔ፥ ኢዚ ዳሮቴꬃይ ኩንዳናዋ» ያጌዳ። ኣሳይ ሄዋ ሲሴዳ ዎዴ ሎይꬂ ሃንቄቲዴ «ኤፌሶኔ ኣርፄሚሳ ዎልቃማ» ያጊዴ ጫቦቴዲኖ። ካታማ ኡባን ዋላሳይ ዴንዴዳ፤ ጳዉሎሳና ሃሜቲያ ማቂዶኒያ ኣሳቱዋ ጋዮሳኔ ኣሪስፂሮኮሳ ባሬንቱና ኦይቂ ኣኪዴ፥ ኢቲፔ ካሳ ሳዓ ዎፄዲኖ። ጳዉሎሲካ ኣሳይ ሺቄዳሳ ጌላናው ኮዬዳ። ሺን ካሊያዋንቱ ኣ ዲጌዲኖ። ኢሲያ ጋዲያ ካፓቱዋፔ ጳዉሎሳ ላጌꬃቱዋፔ ኢቱ ኢቱ ጳዉሎሳው ኪቲዴ፥ ካሳ ሳዓን ቆንጪያ ኬሲዴ ኢ ቤቴና ማላ፥ ኣ ዎሴዲኖ። ሺቁዋን ዋላሳይ ዴንዲና፥ ዳሪያ ባጋ ኣሳይ ሃራይ ኣቶ ኣዪሲ ሺቄዴንቶ ኤሬና ዲራው፥ ኢቱ ኢቲባው ዋላቄቲያ ዎዴ፥ ዮኩ ቃይ ሃራባው ዋላቄቴ። ኣዪሁዳቱ ኢስኪንዲራ ኣꬂ ቤሲና፥ ኢቲ ኢቲ ኣሳይ ኢ ሃሳያና ማላ፥ ኣሳ ጊዶፔ ሲንꬃው ኣ ኣꬄዳ፤ ኣሳይ ጮዑ ጋና ማላ፥ ኢ ባሬ ኩሺያን ፆርሲ ቤሲዴ፥ ኣሳሲ ሞቴታናው ኮዬዳ። ሺን ኢስኪንዲሬ ኣዪሁዳ ኣሳ ጊዴዳዋ ኣሳይ ኤሬዳ ዎዴ፥ ላዑ ሳቴ ጊዲያዋ ኬና ኡባይ ኢቲ ቃላን፥ «ኤፌሶኔ ኣርፄሚሳ ዎልቃማ» ያጊዴ ጫቦቴዲኖ። ካታማው ፃፌ ጊዴዳዌ ኣሳ ጮዑ ኦꬂዴ፥ ሃዋዳን ያጌዳ፤ «ኤፌሶኔ ኣሳው፥ ኤፌሶኔ ካታማይ ዎልቃማ ኣርፄሚሲሲኔ ሳሉዋፔ ዎꬌዳ ኤቃ ሹቻሲ ኤቃ ጎሊያ ናጊያዋ ጊዴዳዋ ኤሬና ኣሳይ ኦኔ? ሃዋ ካዲያ ኣሳይ ባይና ዲራው፥ ሂንቴንቱ ዎፑ ጋናዉኔ ዲርቤናን ኣጋናው ቤሴ። ኣዪሲ ጎፔ፥ ሃዋንቱ ጌሻ ጎሊያ ሚሻ ዉዒቤናዋንታ ኑ ፆሳቱዋካ ቦሪቤናዋንታ ኣሄዲታ። ሄዋ ዲራው፥ ዲሜፂሮሲኔ ኣናና ዴዒያ ኦሳንቻቱ ኣሳ ሞታናው ኮዮፔ፥ ፒርዳ ጎሊ ዶያ ዴዔ፤ ቃሲ ጋዲያ ሞዲያዋንቱካ ዴዒኖ፤ ኡንቱንቱ ባሬንቱ ጊዶን ሞቴቲኖ። ሺን ሂንቴ ሃራ ዬዉዋ ኮዮፔ፥ ሂጊያ ሺቁዋን ዬዉዋ ቃቻና። ኣዪሲ ጎፔ፥ ሃቼ ሃኔዳዋ ሻቢሬꬃ ጊዴ፥ ሮሜ ጋዲያ ኣሳቱ ኑና ሞታና፤ ሃ ሺቆካ ጋሱ ባዪና ዲራው፥ ኑኒ ጋሱዋ ኦዳናው ዳንዳዮኮ» ያጊዴ ሺቁዋ ላሌዳ። ዋላሳይ ኢርፄዳዋፔ ጉዪያን፥ ጳዉሎሲ ካሊያዋንታ ኣሂሲዴ ዞሬዳ፤ ኡንቱንታ፥ «ሳሩዋን ዴዒቴ» ጊዴ፥ ማቂዶኒያ ባናው ኬሴዳ። ሄ ጋዲያና ኣꬊዴ፥ ቃላ ኦዲዴ፥ ኣሳ ሎይꬂ ሚኒሴዳዋፔ ጉዪያን፥ ጊሪኬ ጋዴ ዬዳ። ኢ ሄዋን ሄዙ ኣጌና ኡቲዴ፥ ማርካቢያን ሶሪያ ባናው ቆፒሺን፥ ኣዪሁዳቱ ባሬና ዎꬋናው ኮዪያዋ ቤዒዴ፥ ማቂዶኒያና ጉዬ ሲማናው ባሬ ቆፋ ቃቼዳ። ጳዉሎሳ ሞዪዜዳዋንቱ፥ ቤሪያፔ ጳሪሃሳ ናዓ ሶሲጳፂሮሳ፥ ቴሴሎንቄፔ ኣሪስፂሮኮሳኔ ሲኮንዲሳ፥ ዴርቤፔ ጋዮሳኔ ኢሲያፔ ቲኪቆሳኔ ፂሮፊሞሳ፥ ቃሲ ፂሞቶሳ። ሄዋንቱ ሲንꬃው ቢዴ፥ ኑና ፂሮዓዳን ናጊኖ። ኑኒ ኡኪꬃ ባላ ጋላሳ ቦንቾዋፔ ጉዪያን፥ ፒሊጲሲዮሳ ጊያ ጋዲያፔ ማርካቢያን ዴንዲዴ፥ ኢቼሹ ጋላሳን ፂሮዓዳን ኡንቱንታ ጋኪዴ፥ ያኒ ላፑ ጋላሳ ኡቴዶ። ኑኒ ዎጋ ጋላሲ ኡኪꬃ ሜንꬃናው ሺቂዴዒሺን፥ ጳዉሎሲ ዎንቲና ባናው ቆፔዳ ዲራው፥ ኡንቱንቶ ቃላ ኦዲዴ፥ ቃማ ቢላሂ ጋካናው ዬዉዋ ኣዱሴዳ። ኑኒ ሺቂ ኡቴዳ ፖቂያን ጮራ ፆምፒ ዴዔ። ኤዉፂኮሳ ጊያ ኢቲ ዎዳላይ ማስኮቲያ ቦላ ኡቲዴ፥ ዳሪሲ ጌሚዒሼዳ። ጳዉሎሲ ሃሳያ ኣዱሴዳ ዎዴ፥ ኤዉፂኮሲ ጌሚዒሹዋን ሃይሬዳዌ ሄዜንꬂያ ፖቂያፔ ሳዓን ኩንዲዴ ሃይቄዳዋ ኣሳይ ዴንꬄዳ። ሺን ጳዉሎሲ ዎꬊዴ፥ ኣ ቦላ ጉፋኔዳ። ኣ ኢዲሚዴ፥ «ኣ ሼምፑ ኬሲቤና ዲራው ሂርጎፒቴ» ያጌዳ። ያቲዴ ፑዴ ፖቂያ ኬሲዴ፥ ኡኪꬃ ሜንꬂዴ ሜዳ፤ ሳዓይ ዎንታና ጋካናሲ፥ ዳሮ ዎዲያ ሃሳዬዳዋፔ ጉዪያን ቤዳ። ዎዳላይ ፓፂና፥ ሶይ ኣፊዴ፥ ዳሪሲ ናሼቴዲኖ። ሺን ጳዉሎሲ ባሬና ያፔ ኑኒ ሞካና ማላ፥ ኑሲ ኦዴዳ ዲራው፥ ካሴቲዴ ማርካቢያኮ ቢዴ፥ ኣሶሳ ባናው ዴንዴዶ፤ ኣዪሲ ጎፔ፥ ጌዲያን ባናው ኢ ቆፔዳ ዲራው ኑና ሄዋዳን ኣዛዜዳ። ኢ ኑናና ኣሶሳን ጋኬቲና፥ ማርካቢያን ኣ ኣኪዴ ሚፂሊኔ ዬዶ። ዎንቴꬃ ጋላሲ ያፔ ማርካቢያን ዴንዲዴ፥ ኪዮሳ ሄራ ጋኬዶ፤ ቃሲ ዎንቴꬃ ጋላሲ ሳሞሳ ፒኔዶ፤ ቲሮጊሊዮሜን ኣቂዴ፥ ዎንቲና ሚሊፄ ዬዶ። ኣዪሲ ጎፔ፥ ጳዉሎሲ ኢሲያን ዳሪ ጋሚዔናን ኤፌሶኔ ላንቂያና ኣꬋናው ባሬ ቆፋ ቃቼዳ፤ ባሬው ዳንዳዬቶፔ፥ ጴንፄቆስቴ ጌቴቲያ ጋላሲ ዬሩሳላሜ ጋካናው ኤሌሌ። ጳዉሎሲ ሚሊፄፔ ኤፌሶኔ ኪቲዴ፥ ኣማኒያ ኣሳ ካሌꬂያዋንታ ፄጊሴዳ። ዎሳ ጎሌ ጪማቱ ጳዉሎሳኮ ዪና፥ ኡንቱንታ ኢ ሃዋዳን ያጌዳ፤ «ታኒ ኢሲያ ጌሌዳ ኮይሮ ጋላሳፔ ዶሚን፥ ካዉሻቴꬃኒኔ ዳሮ ኣፎꬃኒ ጎዳሲ ኦꬃዴ፥ ኣዪሁዳቱዋ ሺቁዋፔ ታና ጋኬዳ ፓጬ ጊዴዳ ዎዲያ ኡባን ሂንቴንቱና ዋናዴ ዴዓዲታንቶ ሂንቴንቱ ኤሪታ። *** ናጋራፔ ፆሳኮ ሲሚያዋኔ ኑ ጎዳ ዬሱሲ ኪሪስቶሳ ኣማኒያዋ ኣዪሁዳቱዋሲኔ ኣዪሁዳ ጊዴናዋንቶ ማርካታዴ፥ ሺቁዋንካ ሂንቴንቱ ጎሌን ጎሌንካ ሂንቴንቶ ኦዳዴ ታማሪሴዳዋፔ ኣቲን፥ ሂንቴንታ ጎዒያባፔ ኢቲባኔ ፓጪሳ ቤይኬ። *** «ቤዒቴ፤ ሃዒካ ታኒ ጌሻ ኣያናሲ ኣዛዜታዴ፥ ዬሩሳላሜ ባይ፤ ያኒ ታው ኣዬ ኬሳኔንቶኔ ኤሪኬ። ጌሻ ኣያናይ ቃሹኔ ዋዪ ታና ናጊያዋ ካታማ ኡባን ታው ኦዴ። ሺን ታ ዎꬃ ፖላናዉኔ ጎዳ ዬሱሲ ኪሪስቶሳፔ ታኒ ኣኬዳ ኦሱዋ ፆሳ ኣꬎ ኬካቴꬃ ዎንጋላ ሚሺራቹዋ ማርካቲያዋ ፖላናው፥ ታ ሼምፑዋ ማዴናዋዳን ፓይዳይ። «ቤዒቴ፤ ታኒ ሃዒካ ፆሳ ካዉቴꬃባ ኦዳዴ፥ ሂንቴንቱ ኡባ ጊዶን ዩያዲ፤ ሲሚ ሃዋፔ ሲንꬃው ሂንቴንቱፔ ኦኒኔ ታና ቤዔናዋ ኤራይ። ሄዋ ዲራው፥ ሂንቴንቱፔ ኢቲ ኡራይ ባዮፔካ ታኒ ሄዋን ጌሌናዋ ሃቼ ሂንቴንቶ ጌሻዴ ኦዳይ። ኣዪሲ ጎፔ፥ ፆሳይ ኦꬃናው ቆፔዳዋ ኡባ ሂንቴንቶ ኣይኔ ኣሼናን ኦዳዲ። «ዬሱሲ ባሬ ሱꬃን ዎዜዳ ፆሳ ኣማኒያዋንታ ናጊቴ፤ ቃሲ ጌሻ ኣያናይ ሂንቴንታ ካፓቱዋ ኦꬂዴ ሱንꬄዳ ዉዲያ ኡባኔ ሂንቴንቱ ሁጲያ ናጊቴ። ታኒ ቤዳዋፔ ጉዪያን፥ ዉዲያሲ ቃሬቴና ኢታ ዎራካናቱ ሂንቴንቱ ጊዶ ጌላናዋንታኔ፥ ካሊያዋንታ ባሬንቱ ጌዱዋ ካሌꬃናው ዎርዱዋ ሃሳዪያ ኣሳቱ ሂንቴንቱ ጊዶፔ ዴንዳናዋ ኤራይ። *** ሄዋ ዲራው፥ ታኒ ሄዙ ላይꬃ ቃማኔ ጋላሳ ኣፎꬃኒ ሂንቴንታ ሁጲያን ሁጲያን ሚኒሲያዋ ኣጋቤናዋ ቆፒዴ ጌንጪቴ። «ሃዒካ ሂንቴንታ ሚኒሳናዉኔ ጌሻ ኣሳ ኡባ ጊዶን ላቲሳናው ዳንዳዪያ ፆሳሲኔ ኣ ኣꬎ ኬካቴꬃ ቃላሲ ሂንቴንታ ሃዳራ ኢማይ። «ታኒ ኦፔኔ ቢራ ዎይ ዎርቃ ዎይ ማዩዋ ኣሞታቤይኪ፤ ታኒ ሃ ታ ኩሺያን ታናኔ ታናና ኢቲፔ ዴዒያዋንታ ኮሼዳዋ ኦꬄዳዋ ሂንቴንቱ ሂንቴንቱ ሁጴው ኤሪታ። ሂንቴንቱ ሃዋዳን ዳቡሪ ኦꬂዴ፥ ዳቡራንቻቱዋ ማዳናሲኔ ጎዳ ዬሱሲ ባሬ ሁጴው፥ ‹ኣኪያዋፔ ኢሚያዌ ኣንጄቴዳዋ› ጌዳዋዳን፥ ኣ ቃላ ሂንቴንቱ ዎዛና ኣꬃናው ቤሲያዋ ታኒ ጮራ ኦጊያን ሂንቴንታ ቤሳዲ» ያጌዳ። ጳዉሎሲ ሄዋ ሃሳይ ዉርሲዴ፥ ኡንቱንቱ ኡባና ኢቲፔ ጉልባቲዴ፥ ፆሳ ዎሴዳ። ኡንቱንቱ ኡባይ ጳዉሎሳ ኢዲሚዴ፥ ዬኪዴ ዬሬዲኖ። ኡባፔ ኢ፥ «ታና ላዔꬁዋ ኡባካ ቤዒኪታ» ያጌዳ ቃላይ ኡንቱንታ ዳሮ ቃሬꬂና ማርካቢያ ጋካናው ኣ ሞዪዜዲኖ። ኑኒ ኤፌሶኔ ጪማቱዋፔ ሻኬቲዴ፥ ቆሳ ጌቴቲያ ሃꬃን ዶዴቶ ሳዓ ዪ ኣጌዶ፤ ዎንቲሳ ጋላሲ ሮዳ ጋኬዶ፤ ሄዋፔ ጳፂራ ቤዶ። ፒንቄ ፒኒያ ማርካቢያ ዴሚዴ፥ ኣኒ ጌሊዴ ባናው ዴንዴዶ። ኑኒ ቆጲሮሳፔ ቤዓናው ዳንዳዪያሳ ዪዴ፥ ኣዋይ ኬሲያሳ ፄሊያ ዎዴ ቆጲሮሳ ሃዲርሳ ባጋ ዬጊዴ፥ ሶሪያ ቤዶ፤ ሄዋፔ ጉዪያን ፂሮሳ ጋኬዶ፤ ኣዪሲ ጎፔ፥ ማርካቢ ባሬ ጫና ፂሮሳን ዎꬄ። ያኒ ካሊያዋንታ ዴሚዴ፥ ኡንቱንቱና ላፑ ጋላሳ ኡቴዶ፤ ጳዉሎሲ ዬሩሳላሜ ቤና ማላ፥ ኡንቱንቱ ኣው ኣያናን ኦዴዲኖ። ኑኒ ኡንቱንቱና ኡቲያ ዎዲ ዉሪና፥ ኬሲዴ ቤዶ፤ ኡንቱንቱ ኡባቱ ባሬንቱ ማጫዋንቱናኔ ባሬንቱ ናናና ኢቲፔ ካታማፔ ካሬው ኬሳና ጋካናሲ፥ ኑና ሞዪዜዲኖ፤ ኑኒ ኣባ ዶናን ጉልባቲዴ፥ ፆሳ ዎሴዶ። ሄዋፔ ጉዪያን፥ ኢቱ ኢቱዋ ሳሮቲዴ፥ ማርካቢያን ጌሌዶ፤ ኡንቱንቱ ባሬንቱ ሶይ ሲሜዲኖ። ኑኒ ኣባ ኦጊያ ዉርሲዴ፥ ፂሮሳፔ ጴፄሌማይሴ ጋኬዶ፤ ኢሻቱዋ ሳሮቲዴ፥ ኡንቱንቱ ማታን ኢቲ ጋላሳ ፔሼዶ። ዎንቲሳ ጋላሲ ኬሲዴ፥ ቂሳሪያ ቤዶ፤ ዎንጋላ ሚሺራቹዋ ኦዲያ ፒሊጶሳ ሶይ ጋኪዴ፥ ኣ ማታን ኡቴዶ፤ ዬሩሳላሜን ዶሬቴዳ ላፑናቱዋፔ ኢ ኢቱዋ። ፒሊጶሳሲ ናባቱዋ ጊዴዳ ኦይዱ ዎዶሮ ማጫ ናናቱ ዴዒኖ። ኑኒ ኡንዴኔዳ ጋላሳ ኡቴዳ ዎዴ፥ ናቢያ ኣጋቦሳ ጊያ ቢታኒ ዪሁዳፔ ቂሳሪያ ዬዳ። ኑኮ ዪዴ፥ ጳዉሎሳ ሳቂያ ኣኪዴ ባሬ ኩሺያኔ ባሬ ጌዲያ ቃቺዴ፥ «ጌሻ ኣያናይ ጊያዌ ሃዋ፤ ሃ ሳቂያ ጎዳ ዬሩሳላሜን ኣዪሁዳቱ ሃዋዳን ቃቺዴ፥ ኣዪሁዳ ጊዴና ኣሳቱዋሲ ኣꬂዴ ኢማና» ያጌዳ። ኑኒ ሄዋ ሲሴዳ ዎዴ፥ ኑኒኔ ያኒ ዴዒያ ኣሳቱ ጳዉሎሲ ዬሩሳላሜ ቤና ማላ ዎሴዶ። ሺን ጳዉሎሲ ዛሪዴ፥ «ሂንቴንቱ ዬኪዴኔ ታ ዎዛና ቃሬቲሲዴ ዋኒቴ? ታኒ ጎዳ ዬሱሳ ሱንꬃ ዲራው ቃሼታናዋ ፃላላ ጊዴናን፥ ሃራይ ኣቶ ዬሩሳላሜን ሃይቃናዉካ ጊጋ ኡታዲ» ያጌዳ። ዞሪያ ኢ ኣኬናን ኢፂና፥ «ጎዳይ ጌዳዌ ሃኖ» ያጊዴ ጮዑ ጌዶ። ያኒ ኣማሬዳ ዎዲያ ጋሚዔዳዋፔ ጉዪያን፥ ጊጌቲዴ ዬሩሳላሜ ባናው ኬሴዳ። ቂሳሪያን ዴዒያ ካሊያዋንቱፔ ኣማሬዳዋንቱ ቃሲ ኑናና ቤዲኖ፤ ኡንቱንቱ ኑኒ ኣቃናሳ ሚናሶና ጊያ ቆጲሮሳ ቢታኒያ ሶይ ኑና ኣፌዲኖ፤ ሚናሶኒ ዳሮ ዎዲያፔ ዶሚዴ ካሊያዋ። ኑኒ ዬሩሳላሜ ጋኬዳ ዎዴ፥ ኢሻቱ ኑና ናሼቻን ሞኬዲኖ። ዎንቲሳ ጋላሲ፥ ጳዉሎሲኔ ኑኒ ያዪቆባና ጋኬታናው ቤዶ። ዎሳ ጎሌ ጪማቱ ኡባቱካ ዴዒኖ። ጳዉሎሲ ኡንቱንታ ሳሮቴዳዋፔ ጉዪያን፥ ኣዪሁዳ ጊዴና ኣሳ ጊዶን ባሬ ባጋና ፆሳይ ኦꬄዳዋ ኡንቱንቶ ዉርሲዴ ኦዴዳ። ኡንቱንቱ ሄዋ ሲሴዳ ዎዴ ፆሳ ጋላቲዴ፥ ጳዉሎሳ ሃዋዳን ያጌዲኖ፤ «ኑ ኢሻው፥ ኣዪሁዳቱዋ ጊዶን ፆሳ ኣማኔዳዋንቱፔ ኣፑን ሻዓይ ዴዒኖንቶ ቤዓሳ፤ ኡንቱንቱ ኡባይ ሂጊያ ሚኒሲ ናጊኖ። ዬሩሳላሜ ኣዪሁዳቱ፥ ኣዪሁዳ ጊዴናዋንቱ ጋዲያን ዴዒያ ኣዪሁዳ ኡባቱ ባሬንቱ ናና ቃፃሬና ማላ፥ ዎይ ኣዪሁዳቱ ኦꬂያዋ ካሌና ማላ፥ ሙሴ ሂጊያካ ባዪዛና ማላ ኔኒ ታማርሲያዋ ሲሴዲኖ። ያቲና፥ ኣዬ ሎዑ? ኔኒ ዬዳዋ ጮራቱ ሲሲያ ዲራው፥ ሺቄናን ኣጊኪኖ። «ሄዋ ዲራው፥ ሃዋ ኑኒ ኔው ኦዲያዋ ኦꬃ፤ ኢቲፔ ሺቁ ዴዒያ ኦይዱ ኣሳቱ ኑ ማታን ዴዒኖ። ኡንቱንታ ኣካዴ ኡንቱንቱና ጌያ፤ ቃሲ ኡንቱንቱ ባሬንቱ ሁጲያ ሜዴታና ማላ፥ ኡንቱንቶ ሚሻ ኢማ፤ ኡንቱንቱ ኡባይ ኔዋ ሲሴዳዌ ቱማ ጊዴናዋኔ ኔኒ ኔ ሁጴዉካ ቃሲ ሙሴ ሂጊያ ናጋዴ ማራን ዴዒያዋ ኤራና። «ሺን ኣማኔዳ ኣዪሁዳ ጊዴና ኣሳቱዋ ጊዶፔ፥ ኡንቱንቱ ኤቃው ያርሼዳዋ ሜና ማላኔ ሱꬃ ኡሼና ማላ፥ ባኩቴዳ ሜሂያ ኣሹዋ ሜና ማላኔ ዎሹሜና ማላ፥ ኑኒ ዬዉዋ ቃቺዴ፥ ኡንቱንቶ ዳቢዳቢያ ፃፌዶ» ያጌዲኖ። ሄዋፔ ጉዪያን፥ ጳዉሎሲ ዎንቲሳ ጋላሲ ኣሳቱዋ ኣኪዴ፥ ኡንቱንቱና ጌዬዳ፤ ኢ ባሬንታ ጌሹሳ ኣዉዴ ፖሊንቶ ኤሪሳናዉኔ ቃሲ ያርሹዋ ሁጲያን ሁጲያን ኣዉዴ ኢማኔንቶ ኤሪሳናው ጌሻ ጎሊያ ጌሌዳ። ላፑ ጋላሳይ ዉራና ሃኖዴ፥ ኢሲያፔ ዬዳ ኣዪሁዳቱ ጌሻ ጎሊያን ጳዉሎሳ ቤዒዴ፥ ኣሳ ኡባ ሃንቄꬂዴ፥ «ኢስራዔሊያ ኣሳው፥ ኑና ማዲቴ፤ ኢስራዔሊያ ኣሳ፥ ሙሴ ሂጊያኔ ሃ ጌሻ ጎሊያ ኢፂዴ፥ ኡባሳን ኣሳ ኡባ ታማሪሲያዌ ሃ ቢታኒያ፤ ጉጂዴ ቃሲ ጊሪኬ ኣሳካ ጌሻ ጎሊያ ጌሊሲዴ፥ ሃ ጌሻ ሳዓ ቱኒሴዳ» ያጊ ዋሲዴ፥ ጳዉሎሳ ኦይቄዲኖ። *** ኡንቱንቱ ካሴ ኤፌሶኔን ዴዒያ ፂሮፊሞሳ ጳዉሎሳና ካታማን ቤዔዳ ዲራው፥ ጌሻ ጎሊያ ጳዉሎሲ ኣ ጌሊሴዳዋ ኡንቱንቶ ማላቴዳ። ካታማ ኡባይ ሻቢሬቴዳ፤ ኣሳይ ኡባይ ሺቂዴ ጳዉሎሳ ኦይቂዴ፥ ጌሻ ጎሊያፔ ካሬው ጎቺ ኬሴዳ፤ ሄ ማንዒያንካ ጌሻ ጎሊያ ፔንጌቱ ቃሼቲ ኣጌዲኖ። ኣሳይ ጳዉሎሳ ዎꬋና ሃኒሺን፥ «ዬሩሳላሜ ካታማይ ሙሌካ ሻቢሬቲዲጌዳ» ጊያ ሃሳያይ ሮሜ ጋዲያ ኦላ ካፑዋሲ ጋኬዳ። ሄ ኦላ ካፑ ዎታዳራቱዋኔ ፄታቱዋ ካፓቱዋ ኢቲፔ ኣኪዴ፥ ዎፂዴ ኣሳ ቦላ ኬሲ ዎꬌዳ፤ ኣሳይ ኦላ ካፑዋኔ ዎታዳራቱዋ ቤዔዳ ዎዴ፥ ጳዉሎሳ ሾጪያዋ ባሺ ኣጌዳ። ሄ ዎዴ፥ ሄ ኦላ ካፑ ሺቂ፥ ጳዉሎሳ ኦይቂዴ፥ ላዑ ሳንꬃላታን ቃሼታና ማላ ኣዛዚዴ፥ ኢ ኦኔንቶኔ ቃሲ ኣያ ኦꬄዴንቶኔ ኣሳ ኦቼዳ። ኣሳፔ ባጋይ ኢቲባው ዋሲያ ዎዴ፥ ባጋይ ሃራባው ዋሴ፤ ዋሱ ጮሬዳ ዲራው፥ ኦላ ካፑዋሲ ቱሙዋ ኤራናው ዳንዳዬቴናን ኢፂና፥ ዎታዳራቱ ጳዉሎሳ ባሬንቱ ዴዒያሳ ኣፋና ማላ፥ ኡንቱንታ ኣዛዜዳ። ዬꬊዴ ኬሲያ ዴꬃ ጳዉሎሲ ጋኬዳ ዎዴ፥ ኣሳ ሱጌꬃ ዲራው፥ ዎታዳራቱ ኣ ቶኬዲኖ። ኣዪሲ ጎፔ፥ ጮራ ኣሳይ፥ «ኣ ዎꬋ!» ያጊዲኔ ዋሲዴ ካሌ። ዎታዳራቱ ጳዉሎሳ ባሬንቱ ዴዒያሳ ኣፋና ሃኒሺን ጳዉሎሲ ኦላ ካፑዋ፥ «ታኒ ኔው ኢቲባ ኦዶ?» ያጌዳ። ሄ ኦላ ካፑ ጳዉሎሳ፥ «ኔኒ ጊሪኬ ቃላ ኤራይ? ኔኒ ሃዋፔ ካሴ ዎዴ፥ ዋላሳ ኬሳዴ ሼምፑዋ ዎꬌዳዋንቱፔ ኦይዱ ሻዓ ኣሳቱዋ ኣሳይ ባይና ሜላ ሳዓ ካሌꬄዳ ጊብፄ ቢታኒያ ጊዲኪ?» ያጌዳ። ሺን ጳዉሎሲ፥ «ታኒ ኣዪሁዳ ኣሳ፤ ቃሲ ኪልቂያን ዴዒያ ፄርሴሴን ዬሌቴዳ ሁጴ ካታማን ዴዒያ ኣሳ። ሃያና ታና ኣሳሲ ሃሳዪሳሪኪ!» ያጌዳ። ኦላ ካፑ ኣ፥ «ሃሳያ» ያጊና፥ ጳዉሎሲ ዬꬊዴ ኬሲያ ዴꬃን ኤቂዴ፥ ኣሳይ ጮዑ ጋና ማላ፥ ባሬ ኩሺያን ኣሳኮ ፆርሴዳ። ኣሳይ ጮዑ ጊና፥ ኢብራዪስፄ ቃላን ሃሳዪዴ፥ ሃዋዳን ያጌዳ። «ታናዳን ኣማኒያዋንቶ፥ ታ ኣዋቶ፥ ታኒ ሃዒ ሂንቴንቶ ኦዲያ ዬዉዋ ሲሲቴ!» ጳዉሎሲ ኡንቱንቶ ኢብራዪስፄ ቃላን ሃሳዪያዋ ሲሲዴ፥ ካሴፔ ሎይꬂ ጮዑ ጊና ኢ ሃዋዳን ያጌዳ። «ታኒ ኪልቂያን ዴዒያ ፄርሴሴን ዬሌታዴ፥ ሃ ካታማን ጋማሊያሊ ታና ታማሪሲና ዲጫዴ፥ ኑ ኣዋቱዋ ሂጊያካ ሚኒሳ ታማራዴ፥ ሃቼ ሂንቴ ኡባይ ሃኒያዋዳንካ፥ ታኒ ፆሳ ዬዉዋሲ ሴሌቲያ ኣዪሁዳ ኣሳ። ታኒ ማጫ ኣሳኔ ኣቱማ ኣሳ ኦይቃ ኦይቃዴ ቃሾ ጎሌን ዬጌዳ ኣሳኔ፥ ሃ ኦጊያ ካሊያ ኣሳ ዎꬊሳና ጋካናሲ ሜቶꬄዳ ኣሳ። ሃዋዳንካ፥ ቃሲ፥ ቄሳቱዋ ኡባቱዋ ካፑኔ ጪማ ኡባ ሺቁ ታዋ ማርካታናው ዳንዳዬ፤ ታኒ ዳማስቆን ዴዒያ ኡንቱንቱ ኢሻቱዋ ኣዪሁዳቱዋሲ፥ ኡንቱንቱፔ ዳቢዳቢያ ኣካዴ፥ ሄዋን ዴዒያ ኣሳቱ ቃሼቲዴ ሙሬታናዳን፥ ዬሩሳላሜ ኡንቱንታ ኣሃናው ያ ባዲ። «ታኒ ባዴ ዳማስቆ ማቴዳ ዎዴ፥ ሴታ ጋላሳ ጊዲሺን፥ ቆፔናን ሳሉዋፔ ዎልቃማ ፖዑ ታ ማታን ዩዪ ኣꬊዴ ፖዔዳ። ታኒ ሳዓን ኩንዳ ኡታዴ፥ ‹ሳዖላ፥ ሳዖላ፥ ታና ኣያው ዬዴርሳይ?› ጊያ ቃላ ሲሳዲ። «ታኒ ዛራዴ፥ ‹ታ ጎዳው፥ ኔኒ ኦኔ?› ያጋዲ። «ሄዋፔ ጉዬ፥ ‹ታኒ ኔኒ ዬዴርሲያ ናዚሬቲያ ዬሱሳ› ያጌዳ። ታናና ኢቲፔ ዴዒያዋንቱ ፖዑዋ ቤዒዴ ያዬዲኖ፤ ሺን ታው ሃሳዪያዋ ቃላ ሲሲቤይኪኖ። « ‹ታ ጎዳው፥ ታኒ ኣያ ኡዶ?› ያጋዲ። «ጎዳይ ታና፥ ‹ዴንዳዴ ዳማስቆ ባ። ኔኒ ኦꬃናው ፆሳይ ቆፔዳ ኡባባይ ኔው ያኒ ኦዴታናዋ› ያጌዳ። ሄ ዎልቃማ ፖዑዋ ዲራው፥ ታ ኣይፊ ቆቂና፥ ታናና ዴዒያ ኣሳቱ ታ ኩሺያ ኦይቂዴ፥ ታና ጎቺና፥ ዳማስቆ ጋካዲ። «ዳማስቆን ዴዒያ ኣዪሁዳ ኡባይ ሎይꬂ ቦንቺያ ኢቲ ሃናኒያ ጊያ ቢታኒ፥ ኑ ሂጊያሲ ኣዛዜቲዴ፥ ፆሳው ኢሜቴዳ ኣሳ። ሃናኒ ታኮ ዪዴ፥ ታ ማታን ኤቂዴ ታና፥ ‹ታ ኢሻው ሳዖላ፥ ፄላ› ያጌዳ። ታኒ ሄ ዎዴ ሄ ማንዒያንካ ኣኮ ፄላ ኣጋዲ። «ኢ ታና ሃዋዳን ያጌዳ፤ ‹ኑ ኣዋቱዋ ፆሳይ ኔኒ ኣ ቆፋ ኤራናው፥ ኣ ፂሎ ናዓ ቤዓናዉኔ ኣ ዶናፔካ ሃሳያ ሲሳናው ኔና ካሴና ዶሬዳ። ኣዪሲ ጎፔ፥ ኔኒ ቤዔዳባኔ ሲሴዳባ ኣሳ ኡባ ሲንꬃን ኣው ማርካታናሳ። ሃዒካ ኣያው ጋሚዓይ? ዴንዳዴ ፃማቄታ፤ ኣ ሱንꬃ ፄሳዴ፥ ኔ ናጋራፔካ ሜጬታ› ያጌዳ። «ታኒ ጉዬ ዬሩሳላሜ ሲማዴ ጌሻ ጎሊያን ዎሲሺን፥ ታ ኣያናን ጊዳዲ። ጎዳይ ታና፥ ‹ኤሌላዴ፥ ዬሩሳላሜ ኬሳ ኣያው ጎፔ፥ ኔኒ ታው ሃዋን ማርካቲያዋ ኣሳይ ኣኬና› ያጊሺን ታኒ ኣ ቤዓዲ። «ታኒ፥ ‹ታ ጎዳው፥ ኣዪሁዳ ዎሳ ጎሊያ ኡባን ኔና ኣማኒያዋንታ ኦይቃዴ ዋꬌዳዋኔ ቃሾ ጎሊያን ዬጌዳዋ ኡንቱንቱ ኤሪኖ። ኡንቱንቱ ኔ ማርካ ኢስፂፋኖሳ ዎꬊያ ዎዴ፥ ታኒ ሄ ዬዉዋ ኤኖ ጋዲ። ቃሲ ኡንቱንቱ ሚዪያን ኤቃዴ፥ ኣ ዎꬊያዋንቱ ማዩዋ ናጋይ› ያጌዳ። «ጎዳይ ታና፥ ‹ታኒ ኔና ኣዪሁዳ ጊዴና ኣሳኮ ሃኮሳ ኪቲያ ዲራው ባ› ጌዳ» ያጌዳ። ጳዉሎሲ ሄ ቃላ ሃሳያና ጋካናው ኣሳይ ኢ ጊያዋ ሲሴ፤ ሄዋፔ ጉዪያን፥ ባሬንቱ ኮሻ ꬎቁ ኦꬂዴ፥ «ሃዋ ጋዲያፔ ꬋዪሳ፤ ኢ ዴዓናው ቤሴና» ያጌዲኖ። ኡንቱንቱ ዋሲሺን፥ ባሬንቱ ማዩዋ ቦላው ኦሊሺኒኔ ባና ጫርኩዋን ላሊሺን፥ ኦላ ካፑ ዎታዳራቱ ጳዉሎሳ ባሬንቱ ዴዒያሳ ኣፋና ማላ ኣዛዜዳ። ቃሲ ኣሳይ ኣዪሲ ሄዋዳን ኣቦላ ዋሴዲኖንቶ ኤራናው፥ ጳዉሎሳ ሊሱዋን ሾጫና ማላ፥ ኡንቱንታ ኣዛዜዳ። *** ሺን ዎታዳራቱ ጳዉሎሳ ዳፉዋን ሚኒሲ ቃቼዳ ዎዴ፥ ጳዉሎሲ ባሬ ማታን ኤቄዳ ፄታቱዋ ካፑዋ፥ «ሮሜ ጋዲያ ኣሳ ፒርዳይ ባይናን ሾጪያዌ ሂንቴንቶ ዎጌ?» ያጌዳ። ሄዋ ፄታቱዋ ካፑ ሲሴዳ ዎዴ፥ ኦላ ካፑዋኮ ቢዴ፥ «ሃ ቢታኒ ሮሜ ኣሳ። ኔኒ ኣያ ኦꬃና ቆፓይ?» ያጊዴ ኦቼዳ። ኦላ ካፑ ጳዉሎሳኮ ሺቂዴ፥ «ኔኒ ሮሜ ኣሴ? ታው ኦዳ» ያጌዳ። ጳዉሎሲ፥ «ኤ» ያጌዳ። ኦላ ካፑ ጳዉሎሳው ዛሪዴ፥ «ታኒ ሃ ዛሬቴꬃ ዳሮ ሚሻን ሻማዲ» ያጌዳ። ሺን ጳዉሎሲ፥ «ታኒ ሄ ዜሬꬃፔ ዬሌታዲ» ያጌዳ። ሄዋ ዲራው፥ ጳዉሎሳ ቢዳናው ቆፔዳዋንቱ ማንዒያን ኣፔ ሻኬቲ ኣጌዲኖ። ኦላ ካፑካ ጳዉሎሲ ሮሜ ኣሳ ጊዴዳዋ ኤሬዳ ዎዴ ያዬዳ፤ ኣዪሲ ጎፔ፥ ሳንꬃላታን ኣ ቃሺሲ ዎꬄዳ። ዎንቴꬃ ጋላሲ ኦላ ካፑ፥ ኣዪሁዳቱ ጳዉሎሳ ኣዪሲ ሞቴዲኖንቶኔ ጌሺዴ ኤራናው ኮዪዴ፥ ጳዉሎሳ ቢሌዳ። ያቲዴ ቄሳቱዋ ካፓቱኔ ኣሳይ ኡባይ ሺቃና ማላ ኣዛዜዳ፤ ቃሲ ጳዉሎሳ ዱጌ ዎꬂዴ፥ ኡንቱንቱ ሲንꬃን ኤሴዳ። ጳዉሎሲ ሄዋን ሺቄዳ ኣሳ ጫዲ ፄሊዴ፥ «ታናዳን ኣማኒያዋንቶ፥ ታኒ ሃቼ ጋካናዉካ ፆሳ ሲንꬃን ታ ዴዑዋ ኡባን ቲላ ዎዛናን ዴዓዲ» ያጌዳ። ቄሳቱዋ ኡባቱዋ ካፑ ሃናኒ፥ ጳዉሎሳ ዶና ባቃና ማላ፥ ኣ ማታን ኤቄዳዋንታ ኣዛዜዳ። ጳዉሎሲ ሄ ዎዴ ኣ፥ «ላ ሃ ቦሺንቻን ኦኬዳ ጎዳው፥ ፆሳይ ኔና ባቃና። ኔኒ ታ ቦላ ሂጊያን ፒርዳናው ኡታዴ፥ ዎጋይ ባይናን ታና ባቃና ማላ ኣዛዛይ?» ያጌዳ። ጳዉሎሳ ማታን ኤቄዳዋንቱ ኣ፥ «ኔኒ ፆሳ ቄሳቱዋ ኡባቱዋ ካፑዋ ቦራይ?» ያጌዲኖ። ሄዋፔ ጉዬ ጳዉሎሲ፥ «ታናዳን ኣማኒያዋንቶ፥ ኢ ቄሳቱዋ ኡባቱዋ ካፑዋ ጊዴዳዋ ታኒ ኤራቤይኬ፤ ኣዪሲ ጎፔ፥ ‹ኔ ጋዲያ ሞዲያዋ ቦላ ኢታ ቃላ ሃሳዮፓ› ጌቴቲዴ ፆሳ ማፃፋን ፃፌቴዳ» ያጌዳ። ሺን ጳዉሎሲ ባጋቱ ሳዱቃዋናቱዋ፤ ባጋቱ ፓሪሳዋቱዋ ጊዴዳዋ ቤዒዴ፥ «ታናዳን ኣማኒያዋንቶ፥ ታኒ ፓሪሳዊያኔ ፓሪሳዊያ ናዓ፤ ‹ሃይቄዳዋንቱ ሃይቁዋፔ ዴንዳናዋንታ› ጋዴ ታኒ ናሼቻን ናጊያ ዲራው፥ ኡንቱንቱ ታ ቦላ ፒርዲኖ» ያጊዴ፥ ꬎቁ ኦꬂዴ ሃሳዬዳ። ጳዉሎሲ ሄዋ ያጊና፥ ፓሪሳዋቱዋ ጊዶኒኔ ሳዱቃዋናቱዋ ጊዶን ዋላሳይ ኬሲና፥ ሺቄዳ ኣሳይ ላሌቴዳ። ኣዪሲ ጎፔ፥ ሳዱቃዋናቱ፥ «ሃይቄዳ ኣሳይ ዴንዴና፤ ኪታንቻይካ ኣያናይካ ባዋ» ያጌዲኖ፤ ፓሪሳዋቱ ቃሲ ላዑካ ዴዒያዋ ኣማኒኖ። ዎልቃማ ዋላሳይ ዴንዴዳ፤ ፓሪሳዋቱዋ ባጋፔ ሙሴ ሂጊያ ታማርሲያዋንቱ ዴንዲ ኤቂዴ፥ «ሃ ቢታኒያ ቦላ ኣይኔ ባላ ዴሚቤይኮ፤ ኣው ኣያናይ ዎይ ኪታንቻይ ሃሳዬናን ኣጌና» ያጊዴ ፓሉሜቴዲኖ። ዋላሳይ ዳሪና፥ ኦላ ካፑ ጳዉሎሳ ኡንቱንቱ ሜንꬄሬꬃኔንቶኔ ጊ ያዪዴ፥ ባሬ ዎታዳራቱ ዎꬊዴ፥ ኡንቱንቱ ጊዶፔ ኣ ኤሌካ ኬሲዴ፥ ባሬንቱ ዴዒያሳ ኣፋና ማላ ኣዛዜዳ። ሄ ቃማ ጎዳይ ጳዉሎሳ ማታን ኤቂዴ፥ «ጳዉሎሳ፥ ኔኒ ታው ዬሩሳላሜን ማርካቴዳዋዳን፥ ሮሜንካ ማርካታናው ቤሴ፤ ሚና፤ ኣይኔ ባዋ» ያጌዳ። ዎንቲሳ ጋላሲ፥ ኣዪሁዳቱ ጳዉሎሳ ዎꬋና ጋካናሲ፥ ሜናዳኒኔ ኡሼናዳን፥ ጫቄቲዴ ጊጌቴዲኖ። ጳዉሎሳ ቦላ ሄዋ ማቄቴዳ ኣሳቱ ኦይታሙዋፔ ዳሪኖ። ኡንቱንቱ ቄሳቱዋ ካፓቱዋኮኔ ጪማቱዋኮ ዪዴ፥ «ኑኒ ጳዉሎሳ ዎꬋና ጋካናሲ፥ ኣይኔ ባሬናዳን፥ ጊጌቲ ኡቴዶ። ሄዋ ዲራው፥ ሂንቴንቱኔ ሺቄዳ ኣሳይ ጳዉሎሳባ ጌሺዴ ቢዲያዋ ማላቲዴ፥ ኦላ ካፑ ኣ ሂንቴንቱኮ ዱጌ ዎꬃና ማላ ኦቺቴ፤ ኑኒ ኢ ሃ ሺቃናፔ ካሴና ኣ ዎꬋናው ጊጊ ኡቴዶ» ያጌዲኖ። ሺን ጳዉሎሳ ሚቻቲ ናዓይ ሄ ማቁዋ ሲሴዳ ዎዴ፥ ቢዴ ዎታዳራቱ ዴዒያሳ ጌሊዴ፥ ጳዉሎሳው ኦዴዳ። ጳዉሎሲ ፄታቱዋ ካፓቱዋፔ ኢቱዋ ፄሲዴ፥ «ሃ ናዓ ኦላ ካፑዋኮ ኣፋ፤ ኣዪሲ ጎፔ፥ ኦላ ካፑዋሲ ኢ ኦዲያዌ ዴዔ» ያጌዳ። ሄዋ ዲራው፥ ፄታቱዋ ካፑ ናዓ ኦላ ካፑዋኮ ኣፊዴ፥ «ቃሾ ጎሌን ዴዒያ ጳዉሎሲ፥ ሃ ናዓይ ኔው ኣዬንቶ ኦዲያባይ ዴዒያ ዲራው፥ ታና ባሬኮ ፄሲዴ፥ ኣ ኔኮ ኣሃናዳን፥ ታና ዎሴዳ» ያጌዳ። ኦላ ካፑ ናዓ ኩሺያ ኦይቂዴ፥ ዱማ ጋፃ ኬሲዴ፥ «ኔኒ ታው ኦዳናባይ ኣዬ?» ያጊዴ ኦቼዳ። ናዓይ ኦላ ካፑዋሲ፥ «ኣዪሁዳቱ ጳዉሎሳባ ካሴፔ ሚኒሲ ኦቺያዋ ማላቲዴ፥ ኔኒ ሺቁዋ ኣ ኡቲሳናዳን፥ ኔና ዎንቲ ዎሳናው ዞሬታ ቃቼዲኖ። ሺን ኔኒ ኡንቱንቱ ጊያዋ ሲሶፓ፤ ኣዪሲ ጎፔ፥ ኦይታሙዋፔ ዳሪያ ኣሳቱ ጳዉሎሳ ዎꬋና ጋካናሲ፥ ቁማ ሜናዳኒኔ ሃꬃ ኡሼናዳን፥ ጫቄቲዴ ጌሜቲ ኡቲዴ ኣ ናጊኖ፤ ኔኒ ጊያዋ ሲሳናው ሃዒካ ጊጌቲ ኡቲዴ ናጊኖ» ያጌዳ። ሄዋ ዲራው፥ ኦላ ካፑ ናዓ፥ «ሃ ዬዉዋ ኔኒ ታና ኤሪሴዳዋ ኦሲኔ ኦዶፓ» ያጊዴ ኣዛዜዳዋፔ ጉዪያን፥ ኣ ዬዴዳ። ኦላ ካፑ ፄታቱዋ ካፓቱዋፔ ላዑዋ ፄሲዴ፥ «ቂሳሪያ ባናው፥ ላዑ ፄቱ ዎታዳራቱዋ፥ ላፑን ታሙ ፓራ ኦይቄዳ ኣሳቱዋኔ ላዑ ፄቱ ቶራንቻቱዋ ቃማፔ ሄዙ ሳቲያን ጊጊሲቴ፤ ጋዲያ ሞዲያ ፊሊኪሳኮ ጳዉሎሳ ሳሮቴꬃን ጋꬃናው ቶጊሲያ ሜሂያኔ ጊጊሲቴ» ያጊዴ፥ ኡንቱንታ ኣዛዜዳ። ኦላ ካፑ ሃዋዳን ጊያ ዳቢዳቢያ ፃፌዳ። «ቃላዉዴዮሳ ሉሲዮሳፔ፤ ጋዲያ ሞዲያ ቦንቼቴዳ ፊሊኪሳ! ሳሮቴꬃይ ኔው ጊዶ። ኣዪሁዳቱ ሃ ቢታኒያ ኦይቂዴ ዎꬋና ሃኒሺን፥ ሮሜ ካታማ ኣሳ ኢ ጊዴዳዋ ኤራዴ፥ ዎታዳራቱዋና ጋካዴ ኣ ኣሻዲ። ኡንቱንቱ ኣ ኣዪሲ ሞቴዲኖንቶ ኤራናው ኮያዴ፥ ዱጌ ኡንቱንቱ ሺቁዋሲ ኣ ኣፋዲ። ኡንቱንቱ ባሬንቱ ሂጊያባ ኢ ኦቼዳዋሲ ኣ ሞቴዳዋፔ ኣቲን፥ ኣ ዎꬊሲያ ዎይ ቃሺሲያ ሞቶ ጊዴና። ኡንቱንቱ ሃ ቢታኒያ ቦላ ማቄቲ ኡቴዳ ዚጊሪሳይ ታና ጋኪና፥ ታኒ ሄ ማንዒያንካ ኣ ኔኮ ዬዳ ኣጋዲ፤ ኣ ሞቲያዋንቱካ ቢዴ፥ ኔ ሲንꬃን ሞታና ማላ ኦዳዲ፤ ሳሮ ዴዓ» ያጌዳ። ሄዋ ዲራው፥ ዎታዳራቱ ኣዛዜቴዳዋዳንካ ጳዉሎሳ ኣኪዴ፥ ቃማ ኣንቲጳፂሪሳ ጋꬄዲኖ። ዎንቲሳ ጋላሲ ኣናና ባና ማላ ፓራ ቶጎ ኣሳቱዋ ዎꬂዴ፥ ጌዲያን ቢያዋንቱ ጉዬ ዎታዳራቱ ዴዒያሳ ሲሜዲኖ። ፓራዋንቱ ቂሳሪያ ጌሊዴ፥ ዳቢዳቢያ ጋዲያ ሞዲያዎ ኢሚዴ፥ ጳዉሎሳ ኣ ሲንꬃ ኣꬄዲኖ። ጋዲያ ሞዲያዌ ዳቢዳቢያ ናባቤዳዋፔ ጉዪያን፥ ጳዉሎሲ ሃቃ ኣዉራጃ ኣሴንቶ ኣ ኦቼዳ፤ ኪልቂያ ኣሳ ኢ ጊዴዳዋ ኤሬዳ ዎዴ፥ «ታኒ ኔባ ኔና ሞቲያዋንቱ ዪያ ዎዴ ሲሳና» ያጊዴ፥ ዎታዳራቱ ሄሮዲሳ ካዉቴꬃ ጎሌን ኣ ናጋና ማላ ኣዛዜዳ። ኢቼሹ ጋላሳፔ ጉዪያን፥ ቄሳቱዋ ኡባቱዋ ካፑ፥ ሃናኒያ፥ ጪማቱዋናኔ ፃርፃሉሳ ጊያ ኢቲ ፃባቃና ዱጌ ቂሳሪያ ዎꬌዳ፤ ኡንቱንቱ ጋዲያ ሞዲያዋ ቦላ ጳዉሎሳ ሞቴዲኖ። ጳዉሎሲ ፄሴቴዳ ዎዴ፥ ፃርፃሉሴ ኣ ሃዋዳን ያጊዴ፥ ሞቱዋ ዶሜዳ። «ቦንቼቴዳ ፊሊኪሳ፥ ኑኒ ኔ ባጋና ዳሮ ሳሮቴꬃ ዴሜዶሺን፥ ኔ ቆፋን ሃ ጋዲያሲ ኡባባኒ ኡባሳንካ ሎዖ ላሚ ቤቲያዎ ኔና ሎይꬂ ጋላቲዴ፥ ሃዋ ኣኬቶ። *** ሺን ታኒ ኔና ጋሚዔꬄናን፥ ዶያ ጊዴዳ ኔ ኬካቴꬃን ኑባ ኔኒ ቃንꬃን ሲሳና ማላ፥ ኔና ዎሳይ። ኣዪሲ ጎፔ፥ ሃ ቢታኒ ꬉቦ ጊዲዴ፥ ሳዓ ኡባን ዴዒያ ኣዪሁዳቱዋ ጊዶን ዋላሳ ዴንꬄዳ፥ ናዚራዋቱ ባጋ ኣሳ ካሌꬂያዋ ጊዴዳዋ ኤሬዶ። ሃራይ ኣቶ ጌሻ ጎሊያካ ቱኒሳናው ኮዪሺን ኣ ኦይቂዴ፥ ኑ ሂጊያዳን፥ ኣ ቦላ ፒርዳናው ቆፔዶ፤ ሺን ኦላ ካፑዋ ሉሲዮሲ ዪዴ፥ ዎልቃን ኑ ኩሺያፔ ኣ ዎꬂ ኣኬዳ። ኣ ሞቲያዋንቱካ ኔኮ ያና ማላ ኣዛዜዳ፤ ኔኒ ኔ ሁጴው ሃ ቢታኒያ ቢዳዴ፥ ኑኒ ኣ ሞቲያ ዬዉዋ ኡባ ኤራናው ዳንዳያ» ያጌዳ። ኣዪሁዳቱካ ቃሲ፥ «ሃ ዬዉ ቱማ» ጊዴ፥ ኣ ቆፋ ኣኬዲኖ። ጋዲያ ሞዲያዌ ጳዉሎሳ ያናዳን ዉቲና፥ ኢ ሃዋዳን ያጊዴ ዛሬዳ፤ «ኔኒ ዳሮ ዎዲያፔ ዶማዴ፥ ሃ ኣሳሲ ፒርዳዴ ዴዒያዋ ታኒ ኤራዴ፥ ታ ዬዉዋ ናሼቻን ዛራይ። ታኒ ዬሩሳላሜ ጎዪናናው ኬሶዴፔ ታማኔ ላዑ ጋላሳፔ ዳሬናዋ ኔኒ ኔ ሁጴው ኤራና ዳንዳያ። ኣዪሁዳቱ ታና ጌሻ ጎሊያን ጊዲና፥ ኣዪሁዳ ዎሳ ጎሌን ጊዲና፥ ካታማን ጊዲና፥ ኦናናኔ ፓሉሜቲሺን ዎይ ኣሳ ሺሻዴ ማቂሺን፥ ኢቲ ኡራናኔ ቤዒቤይኪኖ። ኡንቱንቱ ሃዒካ ታና ሞቲያዋ ሻቲማናው ዳንዳይኪኖ። «ሺን ታኒ ሃዋ ኔው ኦዳይ፤ ታኒ ሙሴ ሂጊያን ዴዒያዋኔ ናባቱ ፃፌዳ ኡባባ ኣማናናዳን፥ ኑ ኣዋቱዋ ፆሳሲ ኡንቱንቱ ዎርዶ ጊያ ኦጊያን ጎሼታይ። ሃዋንቱ ባሬንቱ ሁጴው፥ ‹ኣሳይ ኡባይ፥ ዎርዱካ ፂሉካ ሃይቁዋፔ ዴንዳናዋንታ› ጊያዋዳን፥ ታኒካ ኡንቱንቱ ዴንዲያዋ ፆሳኒ ሂዶታ ዎꬃዴ ኣሙዋኒ ናጋይ። ሄዋ ዲራው፥ ታኒ ቃሲ፥ ፆሳ ሲንꬃኒኔ ኣሳ ሲንꬃን ኡባ ዎዴ፥ ፖኩ ባይና ቲላ ዎዛናይ ታው ዴዓና ማላ ሚናይ። «ታኒ ዬሩሳላሜፔ ኬሶዴፔ ጮራ ላይꬃፔ ጉዪያን፥ ታ ጋዴ ሂዬሳሲ ሚሻ ኢማናዉኔ ያርሹዋ ያርሻናው ዬሩሳላሜ ባዲ። ሄዋ ኦꬂሺን፥ ኣሳይ ሺቄናን፥ ዋላሳይ ዴንዴናን፥ ታኒ ጌሻ ጎሊያን ጌዪሺን፥ ኡንቱንቱ ታና ዴሜዲኖ። ሺን ኢሲያፔ ዬዳ ኢቲ ኢቲ ኣዪሁዳቱ ሄዋን ዴዒኖ፤ ኡንቱንቱ ታ ቦላ ዬዉዋ ኮዮፔ፥ ዪዴ ታና ኔ ቦላን ሞታናው ቤሴ። ዎይ ታኒ ኡንቱንቱ ጊዶን ኤቃዴ፥ ‹ሃይቄዳዋንቱ ዴንዳናዋ ኣማኒያ ዲራው፥ ሃቼ ሂንቴ ሲንꬃን ታ ቦላ ፒርዲኖ› ጋዴ ሃ ꬎቂሳዴ ሃሳዬዳ ኢቲ ቃላፔ ኣቲን፥ ሺቁዋ ሲንꬃን ኤቂሺን፥ ታ ቦላ ኢቲ ባዪዙዋ ዴሜዳዋ ጊዶፔ፥ ሃዋንቱ ባሬንቱ ሁጴው ሃዋን ኦዳናዋንታ» ያጌዳ። *** ሺን ፊሊኪሴ ፆሳ ኦጊያባ ጌሺ ኤሬዳ ዲራው፥ «ታኒ ሂንቴ ዬዉዋ ኦላ ካፑዋ ሉሲዮሲ ዪያ ዎዴ ኦጊያ ኦይꬃና» ያጊዴ፥ ፒርዲያ ዎዲያ ሲንꬃው ኬሬዳ። ፊሊኪሴ ቃሲ ጳዉሎሳ ቃቼናን ናጋና ማላኔ ኣ ዳባቱዋፔ ኦኒኔ ኣው ኦꬂሺን፥ ዎይ ኣኮ ዪሺን ዲጌና ማላ፥ ፄታቱዋ ካፑዋ ኣዛዜዳ። ኣማሬዳ ጋላሳፔ ጉዪያን፥ ፊሊኪሴ ኣዪሁዳ ኣሳ ዛሬ ጊዴዳ ባሬ ማቻቲ ዲሩሲሊና ዪዴ፥ ጳዉሎሳ ኪቲ ኣሂሲዴ፥ ዬሱሲ ኪሪስቶሳን ኣማኒያ ኦጊያ ኢ ሃሳዪሺን ሲሴዳ። ጳዉሎሲ ፂሎቴꬃባ፥ ባሬ ሁጲያ ናጉዋባኔ ያና ፒርዳባ ሃሳዪሺን፥ ፊሊኪሴ ያዪዴ፥ «ኔኒ ሃዒው ባ፤ ታው ሚኬዳ ዎዴ፥ ኔና ኪታዴ ፄጊሳና» ያጌዳ። ሄ ዎዴ ቃሲ ጳዉሎሲ ቢሌታናው፥ ባሬው ማጋንፃ ኢማንዴሻ ጊዴ ቆፔዳ፤ ሄዋ ዲራው፥ ዳሮ ዎዴ ኣ ኣሂሲ ኣሂሲዴ፥ ኣናና ሃሳዬ። ላዑ ላይꬃ ኩሜዳዋፔ ጉዪያን፥ ፊሊኪሳ ኮታ ጶርቂዮሳ ፒስፆሲ ኣኬዳ። ፊሊኪሴ ኣዪሁዳቱዋ ናሼቻናው ኮዪዴ፥ ቃሾ ጎሌን ጳዉሎሳ ባሺ ኣጌዳ። ፒስፆሲ ኣዉራጃ ጌሌዳ ሄዜንꬂያ ጋላሳፔ ጉዪያን፥ ቂሳሪያፔ ዬሩሳላሜ ቤዳ። ያኒ ቄሳቱዋ ካፓቱኔ ኣዪሁዳቱዋ ካሌꬂያዋንቱ ጳዉሎሳ ሞቴዲኖ። ኡንቱንቱ ጳዉሎሳ ዎꬋናው ኦጊያን ቆሴቲ ኡታናው፥ ባሬንቶ ሎዖባ ኡዲዴ ኣ ዬሩሳላሜ ኣሃና ማላ፥ ፒስፆሳ ዎሴዲኖ። ፒስፆሲ ኡንቱንቶ፥ «ጳዉሎሲ ቂሳሪያን ቃሼቲ ኡቴዳ፤ ታኒ ታ ሁጴዉካ ኤሌካ ያ ጉዬ ሲማናው ቆፓ ኡታዲ። ሄዋ ዲራው፥ ኢ ኣዬንቶ ባዪዜዳዌ ዴዖፔ፥ ሂንቴንቱ ጊዶን ኣዎቲያዋንቱ ታናና ቂሳሪያ ቢዴ፥ ኣ ሞቲኖ» ያጊዴ ዛሬዳ። ፒስፆሲ ዬሩሳላሜን ሆስፑን ዎይ ታሙ ጋላሳፔ ኣꬄናን ኡቲዴ፥ ቂሳሪያ ቤዳ፤ ዎንቲሳ ጋላሲ ፒርዲያሳን ኡቲዴ፥ ጳዉሎሳ ኣሃና ማላ ኣዛዜዳ። ኢ ጋኬዳ ዎዴ፥ ዬሩሳላሜፔ ዬዳ ኣዪሁዳቱ ኣ ማታን ዩዪ ኣꬊ ኤቂዴ፥ ባሬንቶ ሻቲማናው ዳንዳዬቴና ዳሮ ዴፆ ሞቱዋ ኣ ቦላ ዎꬄዲኖ። ጳዉሎሲ ሞቴቲዴ፥ «ታኒ ኣዪሁዳቱዋ ሂጊያካ ጌሻ ጎሊያካ ሮሜ ካቲያ ቄሳራካ ኣይኔ ናቃቤይኪ» ያጌዳ። ፒስፆሲ ኣዪሁዳቱዋ ናሼቻናው ኮዪዴ ጳዉሎሳ፥ «ፑዴ ዬሩሳላሜ ኬሳዴ፥ ሃ ዬዉዋባ ያኒ ታ ሲንꬃን ኦሼታናው ኮያይ?» ያጊዴ ኦቼዳ። ሺን ጳዉሎሲ፥ «ታኒ ኦሼታናው ቤሲያ ቄሳራ ፒርዳ ጎሌን ኤቃዲ። ኔኒካ ሎይꬃ ኤሪያዋዳን፥ ታኒ ኣዪሁዳቱዋ ኣይኔ ናቃቤይኪ። ሲሚ ታኒ ናቄዳዋ ዎይ ሃይቃናው ቤሲያዋ ኦꬄዳዋ ጊዶፔ፥ ሃይቁዋፔ ኣታና ጊኬ፤ ሺን ኡንቱንቱ ታና ሞቲያ ሞቱ ሜላ ጊዴዳዋፔ ሂኒ ባጋን፥ ኦኒኔ ታና ኡንቱንቶ ኣꬂዴ ኢማናው ዳንዳዬና፤ ቄሳሬ ታባ ፒርዶ ጋዴ ኦቻይ» ያጌዳ። ሄዋፔ ጉዪያን፥ ፒስፆሲ ባሬናና ዞሬቲያዋንቱና ዞሬቲ ሲሚዴ ኣ፥ «ኔኒ ቄሳሬ ታባ ፒርዶ ጋዴ ኦቻዳ፤ ቄሳራኮ ባናሳ» ያጊዴ ዛሬዳ። ኣማሬዳ ጋላሳፔ ጉዪያን፥ ካቲያ ኣግሪጳይኔ ባሪኒቄ ፒስፆሳ ሳሮታናው ቂሳሪያ ቤዲኖ። ያኒ ኡንቱንቱ ጮራ ጋላሳ ኡቲ ዴዒሺን፥ ፒስፆሲ ካቲያሲ ጳዉሎሳባ ሃዋዳን ያጊዴ ኦዴዳ፤ «ሃዋን ፊሊኪሴ ቃቺዴ ባሺ ቤዳ ኢቲ ቢታኒ ዴዔ። ታኒ ዬሩሳላሜን ዴዒሺን፥ ቄሳቱዋ ካፓቱኔ ኣዪሁዳ ጪማቱ ኣ ቦላ ፒርዳና ማላ፥ ታና ዎሲዴ፥ ኣባ ታው ኦዴዲኖ። ታኒ፥ ‹ሞቴቴዳ ኡራይ ባሬና ሞቲያዋንቱና ኢቲፔ ኤቄናኒኔ ባሬና ሞቴዳ ዬዉዋሲ ዛሩዋ ኢሜናን፥ ኦና ጊዶፔኔ ኣꬂዴ ኢሚያዌ ሮሜ ኣሳሲ ዎጋ ጊዴና› ያጋዴ ኡንቱንቶ ዛራዲ። «ሄዋ ዲራው፥ ኡንቱንቱ ሃዋን ሺቄዳ ዎዴ፥ ታኒ ጋሚዔናን ዎንቲሳ ጋላሲ፥ ፒርዳ ጎሌ ጌላዴ ጳዉሎሳ ኣሃና ማላ ኣዛዛዲ። ኣ ሞቲያዋንቱ ኤቂዴ፥ ኢታባን ኣ ሞቴናን ኣጊኪኖ ጋዴ ታኒ ቆፔዳዋዳን፥ ኣይኔ ኣ ሞቲቤይኪኖ። ሺን ኡንቱንቱ ባሬንቱ ኣማኔዳባንቱባኔ ጳዉሎሲ፥ ‹ፓፃ ዴዔ› ጊያ ሃይቄዳ ኢቲ ዬሱሳ ጌቴቲያ ቢታኒያባ ኣናና ፓሉሜቴዲኖ። ታኒ ሃ ዬዉዋ ዎታዴ ቢዳ ዴማኒታንቶ፥ ቆፋ ቃቼናን ዴዓዴ፥ ጳዉሎሲ ዬሩሳላሜ ቢዴ፥ ሃ ዬዉዋ ያኒ ኦሼታናው ኮዪንቶኔ ጋዴ ኣ ኦቻዲ፤ ሺን ጳዉሎሲ ባሬ ዬዉዋ ኣዉጊስፆሴ ቄሳሬ ኦጊያ ኦይꬃና ጋካናው ናጌታናዳን ኦቺና፥ ታኒ ኣ ቄሳራኮ ዬዳና ጋካናሲ፥ ኢ ቃሼታና ማላ ኣዛዛዲ» ያጌዳ። ሄዋፔ ጉዬ ኣግሪጳይ ፒስፆሳ፥ «ታኒ ታ ሁጴዉካ ቃሲ ሄ ቢታኒ ጊያዋ ሲሳና ኮያይ» ያጌዳ። ፒስፆሲ ኣ፥ «ኔኒ ዎንቲ ኢ ጊያዋ ሲሳናሳ» ያጌዳ። ዎንቲሳ ጋላሲ፥ ኣግሪጳይኔ ባሪኒቄ ዳሮ ቦንቹዋን ኦላ ካፓቱዋናኔ ካታማን ዴዒያ ዎልቃማ ኣሳና ዪዴ፥ ፒርዳ ጎሌ ጌሌዲኖ፤ ፒስፆሲ ጳዉሎሳ ኣሃና ማላ ኣዛዚና ኣሄዲኖ። ፒስፆሲ ሃዋዳን ያጌዳ፤ «ካቲያ ኣግሪጳ፥ ሃዋን ኑናና ዴዒያ ኣሳ ኡባው፥ ኣዪሁዳ ኣሳይ ኡባይ ዬሩሳላሜኒካ ሃዋንካ ዋሲዴ፥ ‹ኢ ሃዋፔ ሲንꬃው ፓፃ ዴዓናው ቤሴና› ያጊዴ፥ ታና ዎሴዳ ቢታኒያ ሃዋ ቤዒታ። ሺን ኢ ኣይኔ ሃይቃናው ቤሲያዋ ኦꬄዳዋ ታኒ ዴማቤይኬ፤ ኢ ባሬ ሁጴው፥ ‹ኣዉጊስፆሴ ቄሳሬ ታባ ፒርዶ ያጋዴ ኦቻዲ› ጌዳ ዲራው፥ ቄሳራኮ ኣ ዬዳናው ታኒ ቆፓዲ። ታኒ ኣባ ታ ጎዳ ኣዉጊስፆሴ ቄሳሬሲ ፃፋናው ቱሙ ዬዉ ታው ኣይኔ ባዋ፤ ሄዋ ዲራው፥ ኢ ሎይꬂ ኦሼቶዋፔ ጉዪያን፥ ታኒ ፃፊያባ ዴማና ማላ፥ ሂንቴንቱ ሲንꬃ፥ ካቲያ ኣግሪጳ፥ ኡባ ኔ ሲንꬃ ኣ ኣሃዲ። ኣዪሲ ጎፔ፥ ቃሼቴዳ ኡራ ኪቲያ ዎዴ፥ ኣ ኣያው ሞቴዴንቶ፥ ኤሪሴናን ጮዑ ጊ ባሺያዌ ታው ኤያቴꬃ ማላቴ» ያጌዳ። ኣግሪጳይ ጳዉሎሳ፥ «ኔኒ ኔባ ሃሳያናው ዳንዳያ» ያጌዳ። ሄ ዎዴ ጳዉሎሲ ባሬ ኩሺያ ሚጪዴ ሃዋዳን ያጊ ዛሬዳ። «ካቲያ ኣግሪጳ፥ ኣዪሁዳቱዋ ዎጋኔ ፓሉማ ኡባ ኔኒ ሎይꬃዴ ኤሪያ ዲራው፥ ታና ኣዪሁዳቱ ሞቲያ ዬዉዋ ኡባ ሃቼ ታኒ ኔ ሲንꬃን ዛሪያዎ ታ ቃዳይ ዳሪሲ ሎዓ ያጋዴ ቆፓይ፤ ሄዋ ዲራው፥ ኔኒ ታ ሃሳያ ሳሌቴናን ሲሳና ማላ፥ ኔና ዎሳይ። *** «ታኒ ናዓቴꬃፔ ዶማዴ ታ ኣሳ ጊዶኒኔ ዬሩሳላሜን ዴዔዳ ታ ዴዑዋ ኣዪሁዳ ኡባቱ ካሴፔ ዶሚዴ ኤሪኖ። ታኒ ኮይሮፔ ዶማዴ፥ ኑ ኣማኑዋ ሂጊያ ኦፔኔ ሚኒሲዴ ናጊያ ፓሪሳዋቱዋ ባጋ ፓሪሳዌ ጊዳዴ ዴዒያዋ፥ ኡንቱንቱ ማርካታናው ኮዮፔ ኤሪኖ። ታኒ ሃዒካ ፆሳይ ኑ ኣዋቱዋሲ ኢማና ጌዳዋ ናሼቻን ናጊያ ዲራው፥ ፒርዴታናሲ ሃዋን ኤቃይ። ቃሲ ታማኔ ላዑ ኑ ኣዋቱዋ ዛራቱ ፆሳው ቃማኔ ጋላሲ ኡባዴ ሚኒሲ ጎዪኒዴ፥ ፆሳይ ኢማና ጌዳዋ ኣካናው ናሼቻን ናጊኖ፤ ካቲያ ኣግሪጳ፥ ኣዪሁዳቱ ታና ሞቲያዌ ታኒ ሄዋ ናሼቻን ናጊያ ዲራሳ። ኣዪሁዳቶ፥ ፆሳይ ሃይቄዳዋንታ ዴንꬂያዋ ኣዪሲ ኣማኒኪቴ? «ታኒ ታ ሁጴዉካ ናዚሬቲያ ዬሱሳ ኤቄታናው ቤሴ ጋዴ ካሴ ቆፓዲ። ታኒ ዬሩሳላሜን ኦꬄዳዌ ሃዋ፤ ቄሳቱዋ ካፓቱዋፔ ማታ ኣካዴ፥ ፆሳ ኣሳቱዋፔ ጮራቱዋ ቃሺሳዲ፤ ኡንቱንታ ዎꬊያ ዎዴካ ኡንቱንቱ ሃይቂያዋ ዶሳዲ። ኣዪሁዳ ዎሳ ጎሌ ኡባን ዳሮ ዎዴ ኡንቱንታ ሙራዴ፥ ባሬንቱ ኣማኑዋ ኡንቱንቱ ኣጋና ማላ ጎዴታዲ፤ ታኒ ዎጋይ ባይናዋ ኡንቱንቶ ሃንቄታዴ፥ ሃራይ ኣቶ፥ ሃራ ጋዲያ ካታማ ጋካናዉካ ኡንቱንታ ሜቶꬃይ። «ታኒ ሃ ዬዉዋሲ ቄሳቱዋ ካፓቱዋፔ ማታኔ ኣዛዙዋ ኣካዴ ዳማስቆ ባዲ። ካቴው፥ ታኒ ሴታ ጋላሲ ኦጊያን ዴዒሺን፥ ኣዋ ፖዑዋፔ ሎይꬂ ኣꬊያ ፖዑ ታናኔ ታናና ቤዳዋንታ ዩዪ ኣꬊዴ፥ ሳሉዋፔ ፖዒሺን ቤዓዲ። ኑኒ ኡባይ ሳዓን ኩንዴዳ ዎዴ፥ ኢብራዪስፄ ቃላን፥ ‹ሳዖላ፥ ሳዖላ፥ ታና ኣያው ዬዴሳን ሜቶꬃይ? ኔኒ ታና ኢፁሳን ኔና ቆሃሳ› ያጊዴ ታው ኦዲሺን ሲሳዲ። «ያታዴ፥ ‹ታ ጎዳው፥ ኔኒ ኦኔ?› ያጋዲ። «ጎዳይ፥ ‹ታኒ ኔኒ ዬዴሳን ሜቶꬂያ ዬሱሳ። ሺን ዴንዳ ኤቃ፤ ኣዪሲ ጎፔ፥ ሃቼ ኔኒ ታና ቤዔዳዋኔ ታኒ ኔና ሲንꬃፔ ቤሳናዋ ሃራንቶ ማርካታና ማላ፥ ታው ኦꬂያዋ ኡዳዴ ኔና ሱንꬃናው ኔው ቆንጫዲ። ኡንቱንቱ ታና ኣማኒና፥ ኡንቱንቱ ናጋራይ ኣቶ ጌቴታናዳን፥ ፆሳይ ዶሬዳ ኣሳ ጊዶን ኡንቱንቱ ባሬንቱ ዴዒያሳ ዴማናዳን፥ ቃሲ ꬉማፔ ፖዑዋ ሲማናዳኒኔ ፃላሂያ ጎዳቴꬃፔካ ፆሳኮ ሲማናዳን፥ ኡንቱንቱ ኣይፊያ ኔኒ ዶያና ማላ፥ ኢስራዔሊያ ኣሳፔኔ ታኒ ኔና ኡንቱንቱኮ ኪቲያ ኣዪሁዳ ጊዴናዋንቱፔ ኔና ኣሻና› ያጌዳ። *** «ካቲያ ኣግሪጳ፥ ሄዋ ዲራው፥ ታው ሳሉዋፔ ቤቴዳ ሳፃሲ ታኒ ኣዛዜታናዋ ኢፃቤይኬ። ሺን ታኒ ካሴታዴ፥ ዳማስቆኒኔ ዬሩሳላሜን ሄዋፔ ጉዪያን፥ ዪሁዳ ጋዲያ ኡባን ዴዒያዋንቱሲኔ ኣዪሁዳ ጊዴናዋንቶ ባሬንቱ ናጋራፔ ሲማና ማላ፥ ቃሲ ናጋራፔ ሲማናው ቤሲያዋ ኦꬂዴ፥ ፆሳኮ ሲማና ማላ ቃላ ኦዳዲ። ሄዋ ዲራው፥ ኣዪሁዳቱ ታና ጌሻ ጎሊያን ኦይቂዴ ዎꬋናው ኮዬዲኖ። ሄዋ ዲራው፥ ታኒ ፆሳ ማዱዋ ኣካዴ፥ ዳሮኔ ጉꬃው ሃቼ ጋካናዉካ ኤቃዴ ማርካታይ። ናባቱኔ ሙሴ፥ ‹ኪሪስቶሲ ሜቶታናው ቤሴ፤ ቃሲ ሃይቁዋፔ ኮይሮ ዴንዲዴ፥ ኣዪሁዳቱዋሲኔ ኣዪሁዳ ጊዴናዋንቶ ኣቶቴꬃ ፖዑዋ ኦዳናው ቤሴ› ጌዳዋዳን፥ ታኒካ ኡንቱንቱ ሃሳዬዳዋፔ ሃራ ኢቲባኔ ሃሳዬዳባይ ባዋ» ያጌዳ። *** ጳዉሎሲ ባሬንቱባ ሃዋዳን ያጊዴ ዛሪሺን፥ ፒስፆሲ ኮሻ ꬎቁ ኡዲዴ ኣ ሃሳያ ꬉባናው፥ «ጳዉሎሳ፥ ኔኒ ጎያ፤ ኔኒ ዳሪ ታማሬዳዌ ኔና ጎሻና ሃኔ» ያጌዳ። ሺን ጳዉሎሲ ሃዋዳን ያጌዳ፤ «ቦንቼቴዳ ፒስፆሳ፥ ታኒ ቱማቴꬃን ሎዖ ዬዉዋኔ ዎዛና ቆፋ ሃሳዪያዋፔ ኣቲን ጎዪኬ። ታኒ ካቲያ ኣግሪጳሲ ሃ ዬዉዋ ቆንጪያን ኦዲያዋ ኢ ኤሬ፤ ኣዪሲ ጎፔ፥ ሃ ዬዉ ጌማን ኦሴቲቤና ዲራው፥ ሃዋፔ ኢቱኔ ኣፔ ጌሜናዋ ታኒ ጌሻዴ ኤራይ። «ካቲያ ኣግሪጳ፥ ኔኒ ናባቱ ጌዳዋ ኣማናይ? ኔኒ ኡንቱንቱ ጌዳዋ ኣማኒያዋ ታኒ ኤራይ» ያጌዳ። ካቲያ ኣግሪጳይ ጳዉሎሳ፥ «ሃዒ ሃ ቃንꬃ ዎዳቲንካ ታና ኣማንꬃናው ኮያይ?» ያጌዳ። ሄዋፔ ጉዬ ጳዉሎሲ፥ «ዳሮ ዎዴ ጊዲና፥ ጉꬃ ዎዴ ጊዲና፥ ኔ ፃላላ ጊዳካ፤ ሺን ሃቼ ታኒ ኦዲያዋ ሲሲያ ኡባይ ቃሲ ታዋዳን ቃሼቶፒኖ ኣቲን፥ ታ ማላ ጊዳናዳን ፆሳ ዎሳይ» ያጌዳ። ሄዋፔ ጉዪያን ካቲ፥ ሞዲያ ፒስፆሴ፥ ባሪኒቄኔ፥ ኡንቱንቱና ዴዒያ ኡባይ ዴንዲ፥ ኢቲ ባጋ ሲሚዴ፥ ኢቱ ኢቱዋና፥ «ሃ ቢታኒ ሃይቁሳይ ኣቶ ሺን፥ ቃሹዋሲካ ቤሲያባ ኦꬂቤና» ያጊ ሃሴዬዲኖ። ኣግሪጳይ ፒስፆሳ፥ «ሃ ቢታኒ፥ ‹ቄሳሪ ታባ ፒርዶ› ጊቤኔንቶ፥ ቢሌታናው ዳንዳዬ ሺን» ያጌዳ። ኑኒ ማርካቢያን ፃሊያ ባናው ቆፒ ኡቴዳ ዎዴ፥ ጳዉሎሳኔ ሃራ ኣማሬዳ ቃሼቴዳ ኣሳቱዋ ኣዉጊስፆሳ ዎታዳራቱዋ ጊያዋንቱፔ ኢቲ ዩሊዮሳ ጊያ ፄታቱዋ ካፑዋሲ ኣꬂዴ ኢሜዲኖ። ኢሲያ ጋፃን ዴዒያ ጋዳቱዋ ቢያ ኣዲራሚፂዮና ማርካቢያን ጌሊዴ ቤዶ፤ ማቂዶኒያ ኣሳ ጊዲያ ቴሴሎንቄ ኣሪስፂሮኮሲ ኑናና ዴዔ። ዎንቲሳ ጋላሲ ኑኒ ሲዶና ጋኪሺን፥ ዩሊዮሲ ጳዉሎሳው ዳሮፔ ኣ፥ «ኔ ዳባቱ ኔና ኮሺያባ ማዳና ማላ፥ ኔኒ ኡንቱንቱኮ ባናው ዳንዳያ» ያጌዳ። ሄዋፔ ዴንዲዴ፥ ሲንꬃና ኑ ቦላ ጫርኪያ ዲራው፥ ቆጲሮሳ ሃꬃን ዶዴቴዳ ሳዓን ጫርኬና ባጋ ቤዶ። ኪልቂያ ማታኒኔ ጲኒፊሊያ ማታን ዴዒያ ኣባ ፒኒዴ፥ ሊቂያን ዴዒያ ሙራ ጋኬዶ። ሄዋን ፄታቱዋ ካፑ ፃሊያ ቢያ ኢስኪንዲሪያ ማርካቢያ ዴሚዴ፥ ኣኒ ኑና ጌሊሴዳ። ኑኒ ጮራ ዎዲያ ሎዳን ቢዴ፥ ዳሮ ሜቱዋን ቄኒዶሳ ካታማ ጋኬዶ፤ ሄዋና ባናው ኑና ጫርኩ ዲጊና ሳልሞናና ኣꬊዴ፥ ሃꬃን ዶዴቴዳ ቃርፄሳን ጫርኩዋፔ ቴዔቲዴ ቤዶ። ቃሲካ ዳሮ ሜቱዋን ጋፃና ጋፃና ኣꬊዴ፥ ላሲያ ካታማ ማታን ዴዒያ ኣባ ዶናን ማርካቢ ዎፑ ጊዴ ሼምፒያሳ ጌቴቲያሳ ዬዶ። ኑኒ ሄዋን ጮራ ዎዲያ ጋሚዔዳዋፔ ጉዪያን፥ ፆማይ ቢሌቲዲጌዳ ዲራው፥ ማርካቢያን ቢያዌካ ሂርጊሺን ጳዉሎሲ ኡንቱንታ ዞሪዴ፥ «ኣሳው፥ ኑ ቡሳን ዎልቃማ ቦሻይኔ ዳሮ ባሻይ ዴዓናዌ ታው ቤቴ፤ ባሻይ ዪያዌ ጫና ቦላኔ ማርካቢያ ቦላ ፃላላን ጊዴና፤ ኑ ሼምፑዋ ቦላካ ያናዋ» ያጌዳ። ሺን ፄታቱዋ ካፑ ጳዉሎሲ ጌዳዋፔ ኣꬂዴ፥ ማርካቢያን ዴዒያዋንታ ኣዛዚያዌኔ ማርካቢያ ጎዳይ ጊያዋ ኣማኔ። ሄ ኣባ ማታ ካታማይ ባልጉዋ ሻጫናው ኡንቱንቶ ሚኬና ካታማ፤ ሄዋ ዲራው፥ ጮራ ኣሳቱ ባሬንቶ ዳንዳዬቶፔ፥ ፒንቄ ጊያ ካታማ ጋኪዴ፥ ባልጉዋ ያኒ ሻጫና ማላ፥ ያፔ ዴንዳናው ዞሬቴዲኖ፤ ፒንቄን ዴዒያ ማርካቢ ሼምፒያ ሚኮ ሳዓይ ዶዬቴዳዌ፥ ኣዋይ ዉሊያሳፔኔ ኡሼቻ ባጋፔ ጊዱዋን፥ ቃሲ ዉሊያሳፔኔ ሃዲርሳፔ ጊዱዋና። ኣዋይ ኬሲያሳ ፄሊያ ዎዴ ኡሼቻ ዱጌሃ ባጋ ጫርኩ ሎዳን ጫርኬዳ ዎዴ፥ ባሬንቱ ቆፔዳዋዳን ሃኔዳዋ ኡንቱንቶ ማላቲና ዴንዴዲኖ፤ ማርካቢ ቤና ማላ ኦይቂያ ቢራታ ፑዴ ዳፊዴ፥ ቃርፄሳ ማታቲዴ፥ ላንቂያና ኣꬌዲኖ። ሺን ዳሪ ጋሚዔናን፥ «ኣዉራቂስ» ጊያ ዳሮ ዎልቃማ ጎቱ ሃꬃ ጊዶን ዴዒያ ሳዓፔ ዱጌ ኡንቱንቱ ቦላ ዴንዴዳ። ሄ ጎቱ ማርካቢያ ዴቺዴ ኣꬄናን ዲጊና፥ ባናው ኑሲ ዳንዳዬቴናን ኢፄዳ ዲራው፥ ማርካቢያ ኢ ኣፊያሳ ኣጊዴ ቤዶ። ኑኒ ቄዳ ጊያ ሃꬃን ዶዴቴዳ ጫርኩዋፔ ጌሜዳ ሳና ኣꬊያ ዎዴ፥ ዳሪሲ ሜቶቲዴ ማርካቢያ ዎንጊሪያን ናጊ ኣሻናው ዳንዳዬዶ። ኡንቱንቱ ዎንጊሪያ ፑዴ ኬሴዳዋፔ ጉዪያን፥ ጋዲያን ማርካቢያ ፃፂዴ፥ ሚኒሲ ቃቼዲኖ፤ ሲርፂሳ ጊያ ሻፊ ኩሜዳ ሳን ባሬንታ ኩንዲሳኔንቶኔ ጊዴ ሂርጊዴ፥ ማርካቢያ ኣፊያ ሻራ ዎꬂዴ፥ ጫርኩዋን ማርካቢያ ጮ ዬዲ ኣጌዲኖ። ጎቱ ዎልቃሚዴ ኑ ቦላን ዎልቃሜዳ ዲራው፥ ዎንቲሳ ጋላሲ ጫናፔ ኣባን ኦሉዋ ዶሜዲኖ። ሄዜንꬂያ ጋላሲካ ማርካቢያን ዴዒያ ሚሻ ኡንቱንቱ ባሬንቱ ኩሺያን ኦሌዲኖ። ኑኒ ዳሮ ዎዲያ ኣዋኔ ፆሊንቲያ ቤዔናን፥ ዎልቃማ ኡሹ ኑ ቦላ ቡኪሺን፥ ሲንꬃፔ ꬋያናን ኣቶኮ ጊዴ ቆፔዶ። ኡንቱንቱ ዳሮ ዎዲያ ቁማ ሜናን ጋሚዔዳዋፔ ጉዪያን፥ ጳዉሎሲ ሄ ዎዴ ኡንቱንቱ ጊዶን ዴንዲ ኤቂዴ፥ ሃዋዳን ያጌዳ፤ «ኣሳው፥ ሂንቴንቱ ታ ዞሪያ ኣኬዴንቶኔ ቃርፄሳፔ ዴንዴናን ኣቴዴንቶ፥ ሃዋ ማላ ባዬꬃይኔ ቆሁ ኑና ጋኬና። ሺን ሃዒካ ታኒ ሂንቴንታ ያዮፒቴ ጋዴ ዞራይ፤ ኣዪሲ ጎፔ፥ ሃ ማርካቢ ባያናፔ ኣቲን፥ ሂንቴንቱፔ ኢቲ ኡራ ሼምፑካ ባዬና። ኣዪሲ ጎፔ፥ ፆሳ ኪታንቻይ፥ ታና ሞዴዳ ታኒ ጎዪኒያ ፆሳዌ፥ ዚኖ ቃማ ታ ማታን ኤቂዴ፥ ‹ጳዉሎሳ፥ ያዮፓ፤ ኔኒ ሮሜ ጋዲያ ካቲያ ቄሳራ ሲንꬃን ኤቃናው ቤሴ፤ ቤዓ፥ ፆሳይ ባሬ ኬካቴꬃን ኔናና ቢያ ኣሳ ኡባ ሼምፑዋ ኣሻና› ያጌዳ። ሄዋ ዲራው ኣሳው፥ ያዮፒቴ። ኣዪሲ ጎፔ፥ ሄ ኪታንቻይ ታው ኦዴዳዋዳን ሃናናዋ ታኒ ፆሳ ኣማናይ፤ ሺን ጫርኩ ኑና ኢቲ ሃꬃን ዶዴቴዳ ሳዓን ኣባ ዶናን ዶምዒሳና» ያጌዳ። ታማኔ ኦይዴንꬆ ጋላሲ ሜዲቴራኒያ ኣባን ኑና ጫርኩ ያኔ ሃኔ ሱጊሺን፥ ማርካቢያን ኦꬂያዋንቱሲ ቃማ ቢላሂ ቢታኮ ማቴዳዋ ማላቴዳ። ኡንቱንቱ ሊኪያ ጋዲያ ፄራን ዴፂያባ ቃቺዴ፥ ሃꬃን ዬጊና፥ ሃꬃይ ኦይታሙ ሚቲሪያ ጪማቴዳዋ ኤሬዲኖ። ጉꬃ ጋሚዒዴ፥ ላዔꬁዋ ዬጊዴ፥ ሃታሙ ሚቲሪያ ጪማቴዳዋ ኤሬዲኖ። ኡንቱንቱ ሹቻቲያሳን ኩንዴና ማላ ያዪዴ፥ ማርካቢ ቤና ማላ ኦይቂያ ኦይዱ ቢራታ ማርካቢያፔ ጉዬና ኣባን ዬጊዴ፥ ሳዓይ ዎንታና ማላ፥ ባሬንቱ ፆሳቱዋ ዎሲኖ። ማርካቢያን ኦꬂያዋንቱ ማርካቢያፔ ኪቻናው ኮዪዴ፥ ማርካቢ ቤና ማላ ኦይቂያ ኣማሬዳ ቢራታቱዋ ማርካቢያፔ ሲንꬃ ባጋና ኣባን ዬጊያዋ ማላቲዴ፥ ዎንጊሪያ ኣባን ዎꬄዳ ዎዴ፥ ጳዉሎሲ ፄታቱዋ ካፑዋኔ ዎታዳራቱዋ፥ «ሃዋንቱ ማርካቢያ ጊዶን ዴዓና ꬋዮፔ፥ ሂንቴንቱ ኣታናው ዳንዳይኪታ» ያጌዳ። ሄዋፔ ጉዪያን፥ ዎታዳራቱ ዎንጊሪ ቃሼቴዳ ጋዲያ ቃንፂዴ፥ ዬዲ ኣጌዲኖ። ሳዓይ ዎንታና ሃኒሺን፥ ጳዉሎሲ ኡባይ ቁማ ማና ማላ፥ ሃዋዳን ያጊዴ ዎሴዳ፤ «ሂንቴንቱ ሃቼና ታማኔ ኦይዱ ጋላሳ ናጌዲታ፤ ቃሲ ሄ ኡባንካ ቁማ ሚቤይኪታ። ሄዋ ዲራው፥ ጉꬃ ቁማ ሂንቴንቱ ማና ማላ፥ ታኒ ሂንቴንታ ዎሳይ፤ ኣዪሲ ጎፔ፥ ሂንቴንቱ ፓፃ ዴዓናው ጉꬃ ቁማ ማና ኮሼ፤ ሃራይ ኣቶ ሂንቴንቱ ሁጲያ ቢናናፔ ኢቱካ ባዬና» ያጌዳ። ጳዉሎሲ ሃዋ ጊዴ፥ ኡኪꬃ ኣኪዴ፥ ኡባ ሲንꬃን ፆሳ ጋላቴዳ፤ ሜንꬂ ሙሳ ዶሜዳ። ሄዋፔ ጉዪያን ኡባይ ሎይꬂ፥ ባሬንቶ ቃሲ ቁማ ሜዲኖ። ኑኒ ማርካቢያን ዴዒያዋንቱ ላዑ ፄታኔ ላፑን ታማኔ ኡሱፑና። ኡንቱንቱ ሚዴ ካሌዳ ዎዴ፥ ጫና ዛርጋ ኣባን ኦሊዴ ማርካቢያ ዴፁዋ ካዉሺሴዲኖ። ሳዓይ ዎንቴዳ ዎዴ፥ ማርካቢያን ኦꬂያዋንቱ ጋዲያ ኤሪቤይኪኖ፤ ሺን ሃꬃይ ጎጊዴ ኣባን ጌሌዳሳ ሚዪያን ዴዒያ ሻፊያ ኣኬካን ፄሌዲኖ። ባሬንቱሲ ዳንዳዬቲንቶ፥ ማርካቢያ ሄ ሻፊያኮ ላጋናው ባሬንቱ ቆፋ ቃቼዲኖ። ያቲዴ ማርካቢ ቤና ማላ ኦይቂያ ቢራታቱዋ ቢሊዴ፥ ኣባ ጊዶ ዬጌዲኖ፤ ሄ ዎዴ፥ ማርካቢያ ኮዬዳሳ ዛሪዴ ላጊያ ሚꬃ ቃቼዳ ጋዲያ ቢሌዲኖ፤ ሄዋፔ ጉዪያን፥ ጫርኩ ማርካቢያ ሲንꬃው ሱጋና ማላ፥ ማርካቢያ ኣፊያ ሻራ ሲንꬃ ባጋና ꬎቁ ኡዲዴ፥ ቡሳ ዶሜዲኖ። ሺን ማርካቢ ጪሙ ዴዒያሳፔ ኣꬊዴ ሃꬃን ዶዴቴዳ ሳዓ ማታን ዴዒያ ዴꬃሳን ዶምዔቲ ኤቄዳ፤ ማርካቢያሲ ጉዬ ባጋይ ቤታ ሱጌꬃን ሜዔሬቲሺን፥ ሲንꬃ ባጋይ ዱጌ ꬊሼቲዴ፥ ቃፄናን ኢፂ ኣጌዳ። ዎታዳራቱ ቃሼቴዳ ኣሳፔ ኢቱኔ ሃꬃ ዋꬊዴ ኬሲ ኣኪ ቤና ማላ፥ ኡንቱንታ ዎꬋናው ዞሬቴዲኖ። ሺን ፄታቱዋ ካፑ ጳዉሎሳ ኣሻናው ኮዪዴ፥ ዎታዳራቱዋ ማቁዋ ኢፄዳ፤ ሃꬃ ዋꬋ ኤሪያ ኡባይ ማርካቢያፔ ሃꬃን ጉፒ ጉፒዴ ካሴቲዴ ጋፃ ኬሳና ማላ ኣዛዜዳ። ኣቴዳዋንቱፔ ኣማሬዳዋንቱ ሳንቃን፥ ኣማሬዳዋንቱ ቃይ ማርካቢያ ሜዑዋን ኬሳና ማላ ኣዛዜዳ፤ ሄዋዳን ኡባቱካ ጋፃ ሳሮቴꬃን ኬሴዲኖ። ኑኒ ጋፃ ሳሮቴꬃን ኬሴዳ ዎዴ፥ ሄ ሃꬃን ዶዴቴዳ ሳዓይ ማልታ ጌቴቲያዋ ኤሬዶ። ሃꬃን ዶዴቴዳ ሳዓን ዴዒያ ኣሳቱ ኑሲ ዳሮ ኬካቴꬃ ኬኬዲኖ፤ ኢራይ ቡካናው ዶሜዳ ዲራዉኔ ሜጉዋ ዲራው፥ ታማ ኤꬂዴ፥ ኑና ኡባ ሞኬዲኖ። ጳዉሎሲ ዳሮ ቃይፄሪያ ሚꬃ ሚፂዴ ታማን ዬጊሺን፥ ማርዛማ ሾሻይ ሴላ ዲራው ኬሲዴ፥ ኣ ኩሺያን ፃፄቲዴ፥ ኣ ዱኬዳ። ሃꬃን ዶዴቴዳ ሳዓን ዴዒያ ኣሳቱ ቂርጫንቲያ ሾሻይ ጳዉሎሳ ኩሺያን ፃፄቴዳዋ ቤዔዳ ዎዴ ኢቱ ኢቱዋሲ፥ «ቱሙ ሃ ቢታኒ ሼምፑዋ ዎꬊያ ኣሳ፤ ሃራይ ኣቶ ኣባፔ ኢ ኣቲናካ ኑ ፆሳ ፒርዳይ ኣ ፓፃ ዴዖ ጊቤና» ያጌዲኖ። ሺን ጳዉሎሲ ባሬ ኩሺያፔ ቂርጫንቲያ ሾሻ ዉፃኪዴ፥ ታማን ኦሌዳ፤ ኣ ኣይኔ ኦꬂቤና። ኡንቱንቱ፥ «ኣ ቦላይ ጋፌ፤ ዎይ ኣኬኬናን ኩንዲዴ ሃይቄ» ያጊዴ ኣ ናጊኖ፤ ሺን ጮራ ዎዲያ ናጊዴ፥ ኣ ቦላን ኣይኔ ዱማቴዳባይ ꬋዪና፥ «ሃዌ ፆሳ» ያጊዴ ባሬንቱ ቆፋ ባሺ ኣጌዲኖ። ሄዋ ሄራን ሃꬃን ዶዴቲ ኡቴዳ ሳዓ ካፑዋ ፑፒሊዮሳ ጊያዋሲ ጋዲ ዴዔ፤ ኢ ኑና ኢማꬃቴꬃ፥ ሄዙ ጋላሳ ሲቁዋን ሞኪ ሞዪዜዳ። ፑፒሊዮሳ ኣቡ ቆፁዋ፥ ሴላኔ ኡሉዋ ካꬋ ሳኬቲ ጊሲዴ ዴዔ፤ ጳዉሎሲ ኣ ሶይ ጌሊዴ፥ ኣው ፆሳ ዎሴዳ፤ ባሬ ኩሺያ ኣ ቦላ ዎꬂዴ፥ ኣ ፓꬄዳ። ሄዋፔ ጉዪያን፥ ሄ ሃꬃን ዶዴቴዳ ሳዓን ሃርጊያ ሃራ ኡባ ኣሳይካ ቃሲ ዪዴ ፓፄዳ። ሄዋፔ ሲሚና ኑና ዳሮ ቦንቹዋ ቦንቼዲኖ፤ ኑኒ ማርካቢያን ባናው ዴንዴዳ ዎዴ፥ ኦጌው ኑና ኮሺያባ ኑሲ ኢሜዲኖ። ሄዙ ኣጌናፔ ጉዪያን፥ ሃꬃን ዶዴቴዳ ሳዓን ባልጉዋ ኣꬂዴ፥ «ማንቴ ፆሳ» ጊያ ኢስኪንዲሪያ ማርካቢያን ባናው ዴንዴዶ። ኑኒ ሲራኩሴ ጊያ ካታማ ጌሊዴ፥ ያኒ ሄዙ ጋላሳ ኡቴዶ። ሄዋፔ ዩዪዴ፥ ሬጊዩሜ ጊያ ካታማ ጋኬዶ። ኢቲ ጋላሳፔ ጉዪያን፥ ኣዋይ ኬሲያሳ ፄሊያ ዎዴ ኡሼቻ ዱጌሃ ባጋ ጫርኩ ጫርኪና፥ ዎንቲሳ ጋላሲ ፑቲያሉሳ ጊያ ካታማ ዬዶ። ሄዋን ኑኒ ኢቲ ኢቲ ኣማኒያዋንታ ዴሚና፥ ባሬንቱና ላፑ ጋላሳ ኡታና ማላ፥ ኑና ዎሴዲኖ፤ ሄዋፔ ቃሲ ሮሜ ዬዶ። ሮሜን ዴዒያ ኣማኒያዋንቱ ኑባ ሲሲዴ፥ ኣፊያሳ ጌያኔ «ሄዙ ኣቂያሳ ጌቴቲያሳ» ጋካናሲ ኑና ሞካናው ዬዲኖ፤ ጳዉሎሲ ኡንቱንታ ቤዔዳ ዎዴ ፆሳ ጋላቲዴ፥ ዎዛናን ሚኒሴዳ። ኑኒ ሮሜ ጌሌዳ ዎዴ፥ ጳዉሎሲ ባሬና ናጊያ ዎታዳራና ባሬካ ዴዓናዳን ኡዴቴዳ። ሄዙ ጋላሳፔ ጉዪያን፥ ጳዉሎሲ ኣዪሁዳቱዋ ካፓቱዋ ባሬኮ ፄሴዳ፤ ኡንቱንቱ ሺቄዳ ዎዴ፥ ኡንቱንታ ሃዋዳን ያጌዳ፤ «ታናዳን ኣማኒያዋንቶ፥ ታኒ ኑ ኣሳ ዎይ ኑ ኣዋቱዋ ዎጋ ኢታባ ኣይኔ ኦꬄናን፥ ታና ዬሩሳላሜን ቃቺዴ፥ ሮሜ ኣሳሲ ኣꬂዴ ኢሜዲኖ። ኡንቱንቱ ታና ቢዴዳዋፔ ጉዬ፥ ሃይቃናው ቤሲያባይ ታ ቦላ ኣይኔ ባዪና ዲራው፥ ታና ቢላናው ኮዬዲኖ። ሺን ሄዋ ኣዪሁዳቱ ኤኖ ጌናን ኢፄዳ ዎዴ፥ ‹ታባ ቄሳሬ ፒርዶ› ጋናዌ ታና ኮሼዳፔ ኣቲን፥ ታኒ ታ ዛሪያ ሞቲያባይ ታው ዴዒና ጊዴና። ታኒ ሂንቴንቱና ጋኬታናዉኔ ሃሳያናው ሂንቴንታ ፄሴዳዌ ሄዋሳ፤ ኣዪሲ ጎፔ፥ ኢስራዔሊያ ኣሳይ ናሼቻን ናጊያዋ ዲራው ታኒ ሃ ሳንꬃላታን ቃሼታዲ» ያጌዳ። ኣዪሁዳ ጪማቱ ጳዉሎሳ፥ «ኑኒ ዪሁዳፔ ኔባው ዳቢዳቢያ ኣኪቤይኮ። ኑ ኢሻቱዋፔካ ሃራይ ኣቶ፥ ኢቱካ ዪዴ፥ ኔባ ኦዲቤና፤ ዎይ ኔ ሱንꬃ ባዪዚዴ፥ ኑሲ ኦዲቤና። ሺን ሄ ኣሳ ሱንꬃ ኡባሳን ኣሳይ ባዪዚዴ ሃሳዪያዋ ኑኒ ኤሪያ ዲራው፥ ኔ ቆፋ ሲሳናው ኮዬቶ» ያጌዲኖ። ኡንቱንቱ ባሬንቱ ያና ጋላሳ ጳዉሎሳው ኬሪዴ፥ ሄ ጋላሲ ጮሪዴ ኢ ዴዒያሳ ዬዲኖ፤ ኢካ ኡንቱንቶ ፆሳ ካዉቴꬃባ ማርካቴዳ። ቃሲ ኡንቱንቱ ዬሱሳባ ኣማናና ማላ፥ ሙሴ ሂጊያፔኔ ናባቱ ፃፌዳዋፔ ኣኪዴ ኡንቱንታ ታማሪሲዴ፥ ዎንታፔ ኦማርሲ ጋካናው ሎይꬂ ኦዴዳ። ባጋቱ ጳዉሎሲ ጌዳዋ ኣማኔዲኖ፤ ሺን ባጋቱ ኣማኒቤይኪኖ። ኡንቱንቱ ባሬንቱ ጊዶን ዬዉዋ ኤኖ ጌናን ኢፄዳ ዎዴ፥ ጳዉሎሲ ኢቲባ ጌዳዋፔ ጉዪያን ቤዲኖ፤ ኢ ሃዋዳን ያጌዳ፤ «ጌሻ ኣያናይ ኑ ኣዋቱዋሲ ናቢያ ኢሲያሳ ማፃፋን፥ ‹ኔኒ ሄ ኣሳኮ ባዴ ሃዋዳን ጋ፤ «ሂንቴንቱ ሲሳ ሲሳና፥ ሺን ሂንቴንቶ ጌሌና፤ ሂንቴንቱ ፄላ ፄላና፥ ሺን ቤዒኪታ። ኣዪሲ ጎፔ፥ ሃ ኣሳ ዎዛናይ ጉዙሜዳ፤ ባሬንቱ ሃይꬃ ቱሊሴዲኖ፤ ባሬንቱ ኣዪፊያካ ጪሉሜዲኖ። ሄዌ ባዌንቶ፥ ባሬንቱ ኣይፊያን ቤዓና፤ ኡንቱንቱ ሃይꬃይካ ሲሳና፤ ኡንቱንቱ ዎዛናይካ ኣኬካና፤ ኡንቱንቱ ታኮ ፆሳኮ ሲማና። ቃሲ ታኒካ ኡንቱንታ ፓꬃና» ያጋ› ያጌዳ። «ሲሚ ሃዌ ፆሳ ኣቶቴꬃይ፥ ኣዪሁዳ ጊዴናዋንቶ ኪቴቴዳዌ ሂንቴንቶ ኤሬቶ። ቃሲ ኡንቱንቱካ ሲሳና» ያጌዳ። [ጳዉሎሲ ሄዋ ጌዳዋፔ ጉዪያን፥ ኣዪሁዳቱ ባሬንቱ ጊዶን ዳሮ ፓሉሜቲዴ ቤዲኖ።] ጳዉሎሲ ኪራ ጎሊያን ላዑ ላይꬃ ኩሜንꬃ ዴዒዴ፥ ባሬኮ ዪያ ኡባ ሞኬ። ባሬና ኦኒኔ ዲጌናን ፆሳ ካዉቴꬃባኔ ጎዳ ዬሱሲ ኪሪስቶሳባ ኦዲዴ፥ ያዬናን ዳሪ ቆንጪሲዴ ታማርሴዳ። ባሬ ሚሺራቹዋ ቃላ ኦዳናው ፆሳይ ዶሪዴ ፄሴዳ ኪሪስቶሳ ዬሱሳ ቆማይ፥ ዬሱሲ ኪሪስቶሲ ኪቴዳ ጳዉሎሲ፥ ታኒ ሃ ዳቢዳቢያ ፃፋይ። ፆሳይ ዳሮ ዎዴፔ ካሴ ባሬ ናባቱዋ ባጋና ሚሺራቹዋ ቃላ ኢማና ያጌዳዌ ፆሳ ጌሻ ማፃፋቱዋን ፃፌቴዳ፤ ሄ ሚሺራቹዋ ቃላይ ኣሳ ጊዲዴ ዳዊቴ ዛሪያፔ ዬሌቴዳ ፆሳ ናዓ፥ ኑ ጎዳ ዬሱሲ ኪሪስቶሳባ። ቃሲ ኢ ባሬ ጌሻ ኣያናን ሃይቁዋፔ ዴንዴዳዋን፥ ፆሳ ናዓ ጊዲያዋ ዎልቃማ ዎልቃን ቤሴዳ። ኣዪሁዳ ጊዴና ኣሳይ ኡባይ ኣማናናዳኒኔ ኣዛዜታናዳን፥ ኑኒ ኡንቱንታ ካሌꬃና ማላ፥ ፆሳይ ኪሪስቶሳ ሱንꬃ ዲራው፥ ኪሪስቶሳ ባጋና ኣꬎ ኬካቴꬃኔ ዬሱሲ ኪቴዳዋንታ ጊዲያ ማታ ኑሲ ኢሜዳ። ዬሱሲ ኪሪስቶሳዋ ጊዳናዳን፥ ፆሳይ ፄሴዳ ሂንቴንቱካ ሄዋንቱ ጊዶን ዴዒታ። ፆሳይ ሲቂያዋንቶኔ ጌሻባ ኦꬃናው ፄሴዳ ሮሜ ጋዲያን ዴዒያ ኡባቶ ፆሳ ኑ ኣዉዋፔኔ ጎዳ ዬሱሲ ኪሪስቶሳፔ ኣꬎ ኬካቴꬃይኔ ሳሮቴꬃይ ሂንቴንቶ ጊዶ። ካሴታዴ ታኒ ሂንቴንቱ ኣማኑ ሳዓ ኡባን ሲሴቴዳ ዲራው፥ ዬሱሲ ኪሪስቶሳ ባጋና ሂንቴንቶ ታኒ ፆሳ ጋላታይ። ኣዪሲ ጎፔ፥ ታኒ ኡባ ዎዴ ታ ዎሳን ሂንቴንታ ሃሳዪሲያዎ፥ ፆሳይ፥ ታኒ ኣ ናዓ ሚሺራቹዋ ቃላ ኦዲያዋን ታ ኣያናን ኣው ኦꬂያዌ ማርካ። ፆሳይ፥ ባሬ ሼኒያን፥ ታኒ ሃዒ ሂንቴንቱኮ ባናው ታ ኦጊያ ሚኮያናዳን፥ ኡባ ዎዴ ዎሳይ። *** ኣዪሲ ጎፔ፥ ታኒ ሂንቴንታ ሚኒሳናው፥ ሂንቴንቱና ኢቲፔ ኣያና ኢሞታ ሻካና ማላ፥ ሂንቴንታ ቤዓናው ላሞታይ። ታኒ ጊያዌ፥ ሂንቴንቱካ ታካ ኢቲ ዎዴ ሚኔታና። ሂንቴንቱ ታ ኣማኑዋን፥ ቃሲ ታኒካ ሂንቴ ኣማኑዋን ሚኔታና። ታናዳን ኣማኒያዋንቶ፥ ታኒ ኡባ ዎዴ ሂንቴንቱኮ ባናው ቆፓዲ። ሺን ታና ዲጊያባይ ዴዒያዋ ሂንቴ ኤራናው ቤሴ፤ ታኒ ሃራይ ኣቶ ኣዪሁዳ ጊዴና ሃራ ኣሳፔካ ኣይፊያ ዴሜዳዋዳን፥ ሂንቴንቱፔካ ኣይፊያ ዴማናው ኮያይ። ታኒ ኣሳ ኡባው፥ ጊሪኬ ኣሳዉኔ ታማሪቤና ኣሳው ቃሲ ኣꬎ ኤራንቻቶኔ ኤያቶ ቃንፃና ኣጩ ዴዔ። ሄዋ ዲራው፥ ታው ዳንዳዬቴዳ ኬናን ሮሜን ዴዒያ ሂንቴንቱሲካ ሚሺራቹዋ ቃላ ኦዳናው ኣሞታይ። ሚሺራቹዋ ቃላይ ታና ዬላዬና፤ ኢ ኣማኒያ ኡባ፥ ካሴቲዴ ኣዪሁዳ ኣሳ ቃሲ ኣዪሁዳ ጊዴና ኣሳ ኣሻናው ፆሳፔ ዪያ ዎልቃ። ኣዪሲ ጎፔ፥ ፆሳ ማፃፋይ፥ «ፂሉ ፆሳን ኣማኔቲዴ ዴዓና» ያጊያዋዳን፥ ፆሳይ ኣሳ ኮይሮፔ ዉርሴꬃ ጋካናው፥ ኣማኑዋን ፂሊሲያዋ ሚሺራቹዋ ቃላይ ቆንጪሴ። ቱማቴꬃይ ኤሬታናዋ ባሬንቱ ኢታ ሃኖታን ዲጊያ ናጋራ ኦሱዋ ኡባ ቦላኒኔ ኣሳ ኢታ ኦሱዋ ኡባ ቦላን፥ ፆሳ ሃንቁ ሳሉዋፔ ዎꬊዴ ቆንጫና። ኡንቱንቱ ፆሳባ ኤራና ዳንዳዪያዌ ኡንቱንቶ ቆንጬ፤ ኣዪሲ ጎፔ፥ ፆሳይ ኡንቱንቶ ቆንጪሴዳ። ቤቴና ኣ ሃኖታይ፥ ሄዌካ ኣ ሜꬊና ዎልቃይኔ ኣ ፆሳቴꬃይ ኢቲፔ ፆሳይ ሃ ኣላሚያ ሜꬌዳዋፔ ዶሚዴ፥ ኡንቱንቶ ቆንጪዴ ቤቴዳ፤ ኡንቱንቱ ሄዋ ፆሳይ ሜꬌዳባፔ ቤዓናው ዳንዳዪያ ዲራው፥ ኡንቱንቶ ጋሶዪያባይ ባዋ። ኣዪሲ ጎፔ፥ ኡንቱንቱ ፆሳ ኤሮፔካ፥ ኣው ቤሲያ ቦንቹዋ ኢሚቤይኪኖ፤ ቃሲ ኣ ጋላቲኪኖ። ሺን ኡንቱንቱ ኣላሌ ኬሴናባ ቆፒኖ፤ ቃሲ ኡንቱንቱ ኣኬኬና ዎዛናይ ꬉሜዳ። ኡንቱንቱ ባሬንታ ኣꬌዳ ኤራንቻ ጊኖ፤ ሺን ኡንቱንቱ ኤያ። ኡንቱንቱ ሃይቄና ፆሳሲ ጎዪኒያዋ ኢፂዴ፥ ሃይቂያ ኣሳ ሜꬌታ፥ ካፋቱዋ ሜꬌታ፥ ዶዓቱዋ ሜꬌታኔ ቲራን ጎሼቲያዋንቱ ሜꬌታ ሜꬌቴዳዋንቱሲ ጎዪኔዲኖ። ሄዋ ዲራው፥ ኡንቱንቱ ኢቱ ኢቱዋና ፖኮባ ኦꬃና ማላ፥ ፆሳይ ኡንቱንቱ ዎዛናይ ኣሞቲያ ቱናባ ኦꬃናዳን ኡንቱንታ ኣጌዳ። ኣዪሲ ጎፔ፥ ኡንቱንቱ ፆሳ ቱማቴꬃ ዎርዱዋን ላሜዲኖ፤ ቃሲ ሜꬌዳ ፆሳ ኣጊዴ፥ ኢ ሜꬌዳባው ጎዪኔዲኖኔ ኦꬄዲኖ። ፆሳይ ሜꬊናው ጋላቴቴዳዋ። ኣሜንዒ። ሄዋ ዲራው፥ ፆሳይ ኡንቱንቱ ፖኮባ ኣሞታና ማላ፥ ኡንቱንታ ኣጌዳ፤ ሃራይ ኣቶ ኡንቱንቱ ማጫዋንቱ ባሬንቶ ቤሲያዋ ኣጊዴ፥ ቤሴናዋ ሃኔዲኖ። ሃዋዳንካ፥ ኣቱማ ኣሳይ ቃሲ ባሬንቶ ቤሲያዋዳን ማጫዋንቱና ጋኬቲያዋ ኣጊዴ፥ ኢቱ ኢቱዋና ጋኬታናው ኮዬዲኖ፤ ኣቱማ ኣሳይ ኢቱ ኢቱዋና ፖኮባ ኦꬂዴ፥ ባሬንቱ ኦꬄዳ ባላን ባሬንቶ ቤሲያ ፒርዳ ኣኬዲኖ። ኡንቱንቱ ፆሳ ኤራናው ዶሴናን ኢፄዳዋ ኬና ፆሳይ ኡንቱንቱ ቤሴናዋ ኦꬃና ማላ፥ ኡንቱንቶ ፓꬄና ቆፋ ኢሜዳ። ኡንቱንቱን ቱናቴꬃይ፥ ኢታቴꬃይ፥ ዮራቴꬃይኔ ኢታ ሃኖታይ ኩሜዳ፤ ቃሲ ኡንቱንቱን ቃናቲ፥ ሼምፑዋ ዎꬊያ ቆፋይ፥ ፓሉማይ፥ ጪሙሳይኔ ኢታ ቆፋይ ኩሜዳ፤ ቃሲ ኡንቱንቱ ሶቂያዋንታ፥ ዚጊሪያዋንታ፥ ፆሳ ኢፂያዋንታ፥ ቦሪያዋንታ፥ ኦቶሬቲያዋንታ፥ ጬቄቲያዋንታ፥ ኢታባ ኦꬃናው ኮዪያዋንታኔ ባሬንቱ ኣዎኔ ኣቲው ኣዛዜቴናዋንታ፥ ቆፋይ ባይናዋንታ፥ ኣማኑ ባይናዋንታ፥ ሃራንቶ ቃሬቴናዋንታኔ ማሬናዋንታ። ኡንቱንቱ ሃዋንቱ ማላ ኦꬂያዋንቱሲ ሃይቁ ቤሴ ጊያ ፆሳ ሂጊያ ኤሪዴ፥ ሃዋንታ ኦꬂኖ፤ ሄዋ ፃላላ ጊዴናን፥ ሃዋንታ ኦꬂያዋንታካ ኦꬂቴ ጊዴ ሚኒሲኖ። ሄዋ ዲራው፥ ኔኖ ሃራንቱ ቦላ ፒርዲያዎ፥ ኔው ጋሶዪያባይ ባዋ፤ ኣዪሲ ጎፔ፥ ኔኒ ሃራንቱ ቦላ ፒርዳዴ፥ ሄ ኔኒ ኡንቱንቱ ቦላ ፒርዲያዋ ማላ ኡዶፔ፥ ኔ ቦላ ፒርዳሳ። ኑኒ ሃዋ ማላ ኦሱዋ ኦꬂያዋንቱ ቦላ ፆሳይ ፂሎ ፒርዳ ፒርዲያዋ ኤሬቶ። ኔኖ፥ ሃዋ ማላ ኦሱዋ ኦꬂያዋንቱ ቦላ ፒርዲያዎ፥ ቃሲ ሄ ኔኒ ፒርዲያዋ ማላ ኦꬂያዎ፥ ኔኒ ፆሳ ፒርዳፔ ኣቲያዋ ማላቲ? ዎይ ፆሳ ዎልቃማ ኬካቴꬃ፥ ጌንጩዋኔ ዳንዳያ ካꬋዪሻ? ፆሳይ ኔና ናጋራፔ ዛራናው ኮዪያ ዲራው፥ ኢ ኬካ ጊዲያዋ ኔኒ ኤራሳ። ሺን ሂንቴንቶ ጉዙማ ዎዛናይኔ ናጋራፔ ሲሜና ዎዛናይ ዴዔ፤ ሄዋ ዲራው፥ ፆሳ ሃንቁኔ ፂሎ ፒርዳይ ቆንጪያ ጋላሲ፥ ኔኒ ኔ ቦላ ሃንቁዋ ካሴዋፔ ዳሪሳሳ። ፆሳይ ኣሳ ኡባው ኣ ኦሱዋ ማላ ኢማናዋ። ኢቲ ኢቲ ኣሳቱ ሎዖባ ዳንዳያን ኦꬂኖ፤ ቃሲ ጋላታ፥ ቦንቹዋኔ ባዬና ዴዑዋ ኮዪኖ፤ ኡንቱንቶ ፆሳይ ሜꬊና ዴዑዋ ኢማና። ሺን ሃራንቱ ኢታባ ኦꬃናው ያሬቲኖኔ ቱማቴꬃ ኢፂኖ፤ ፆሳይ ኡንቱንቱ ቦላ ባሻኔ ሃንቁዋ ዬዳና። ኢታባ ኦꬂያ ኣሳይ ኡባይ ሜቶታናኔ ዋዬታና፤ ሄዌ ካሴቲዴ፥ ኣዪሁዳ ኣሳ ጋካና፤ ሄዋፔ ቃሲ ኣዪሁዳ ጊዴና ኣሳ ጋካና። ሺን ፆሳይ ሎዖ ኦሱዋ ኦꬂያ ኡባቶ ጋላታ፥ ቦንቹዋኔ ሳሮቴꬃ ኢማና። ካሴቲዴ ኣዪሁዳቶ ኢማና፤ ሄዋፔ ቃሲ ኣዪሁዳ ጊዴናዋንቶ ኢማና። ኣዪሲ ጎፔ፥ ፆሳ ኣዪፊያን ኣሳይ ኡባይ ኢቲ ማላ። ሙሴ ሂጊ ባይናን ናጋራ ኦꬄዳ ኡባይ ሂጊ ባይናን ꬋያና። ሙሴ ሂጊ ዴዒሺን፥ ናጋራ ኦꬄዳ ኡባይ ሂጊያን ፒርዴታና። ኣዪሲ ጎፔ፥ ፆሳ ሲንꬃን ሂጊያ ናጊያዋንቱ ፂሊኖፔ ኣቲን፥ ሂጊያ ሲሲያዋንቱ ፂሊኪኖ። ኣዪሁዳ ጊዴና ኣሳው ሂጊ ባዋ፤ ሺን ባሬንቱ ቲላ ቆፋን ሂጊ ኣዛዚያዋ ኦꬂኖ፤ ኡንቱንቶ ሂጊ ꬋዮፔካ፥ ኡንቱንቱ ባሬንቱ ሁጴው ሂጌ። ሂጊ ኣዛዚያዌ ኡንቱንቱ ዎዛና ጊዶን ፃፌቴዳዋ ኡንቱንቱ ሃኖታይ ቤሴ፤ ኢቲ ኢቲ ካላ ኡንቱንቱ ቲላ ቆፋይ ኡንቱንቶ ማርካቲያ ዲራዉኔ ቃሲ ኢቲ ኢቲ ካላ ኡንቱንቱ ቆፋይ ኡንቱንታ ሞቲያ ዲራው፥ ዎይ ቃሲ ኡንቱንቱና ጋዳቲያ ዲራው፥ ሄዌ ቱማ ጊዲያዋ ኤሪሴ። ታኒ ታማሪሴዳ ሚሺራቹዋ ቃላዳን፥ ኣሳ ዎዛናን ጌሜዳ ቆፋ ፆሳይ ዬሱሲ ኪሪስቶሳ ባጋና ሃዋዳን ፒርዳና። ሺን ኔኒ ኔና ኣዪሁዳ ጋሳ፤ ሂጊያን ዜምፓዴ ፆሳን ጬቄታሳ። ኔኒ ኦꬃና ማላ፥ ፆሳይ ኮዪያዌ ኣዬንቶ ኤራ፤ ቃሲ ቱማ ጊዲያዋ ዶራናው ሂጊያፔ ታማራዳ። ኔኒ ቆቃቱዋ ካሌꬂያዋ፥ ቃሲ ꬉማኒ ዴዒያዋንቶካ ፖዒሲያዋ፥ ኤሬናዋንታ ኤሪሲያዋኔ ናናቱዋ ታማሪሲያዋ ጊዲያዋ ኤራዲ፤ ሂጊያፔ ኔኒ ኩሜንꬃ ኤራቴꬃኔ ቱማቴꬃ ዴሚያዋ ኤራሳ። *** ያቲና፥ ኔኒ ሃራቱዋ ታማሪሲያዌ ኔና ኔ ሁጴው ኣዪሲ ታማሪሲኪ? ኔኒ፥ «ዉዖፓ» ያጋዴ ቃላ ኦዳሳ። ሺን ኔኒ ኔ ሁጴው ዉዓዬ? ኔኒ፥ «ዎሹሞፓ» ያጋ። ሺን ኔኒ ኔ ሁጴው ዎሹማይ? ኔኒ ኤቃ ሼኔታ። ሺን ኤቃይ ዴዒያ ጎሊያ ቦንቃይ? ፆሳ ሂጊ ኔው ዴዒያ ዲራው፥ ኔኒ ጬቄታሳ፤ ሺን ሄ ሂጊያ ሜንꬃዴ ፆሳ ዬላያይ? ኣዪሲ ጎፔ፥ ፆሳ ማፃፋይ፥ «ኣዪሁዳ ኣሳቶ፥ ሂንቴ ጋሱዋን ኣዪሁዳ ጊዴና ኣሳቱዋ ጊዶን ፆሳ ሱንꬃይ ባዬ» ያጌ። ኔኒ ሂጌው ኣዛዜቶፔ፥ ኔ ቃፃራይ ማዱዋና ዴዔ፤ ሺን ኔኒ ሂጊያ ሜንꬆፔ፥ ኔኒ ቃፃሬቴዳዌ ቃፃሬቲቤናዋዳን ፓይዴቴ። ኣዪሁዳ ጊዴና ኣሳይ ቃፃሬቴናን ሂጊ ኣዛዚያዋ ናጎፔ፥ ፆሳይ ኣ ቃፃሬቴዳዋዳን ፓይዴኔ? ሂንቴንቱ፥ ኣዪሁዳ ኣሳቱ፥ ሂንቴንቶ ፃፌቴዳ ሂጊ ዴዖፔካ ቃሲ ሂንቴ ቃፃሬቶፔካ፥ ሂጊያ ሂንቴ ሜንꬂያ ዲራው፥ ኣዪሁዳ ጊዴና ኣሳይ ቦላ ቃፃሬታና ꬋዮፔካ፥ ሂጌው ኣዛዜቲዴ፥ ሂንቴ ቦላ ፒርዳና። ኣዪሲ ጎፔ፥ ኣዪሁዳ ኣሳ ማላቲያ ኡባይ ቱሙ ኣዪሁዳ ኣሳ ጊዴና፤ ቃሲ ኣሳይ ባሬ ኣሹዋ ኣሳቴꬃ ቃፃሬቴዳ ዲራው፥ ቱሙ ኣዪሁዳ ኣሳ ጊዴና። ሺን ቱሙ ኣዪሁዳ ኣሳ ጊያ ኡራይ ጋርሳ ባጋና ኣዪሁዳ ኣሳ ጊዴዳዋ፤ ቃፃሬቲያዋ ፆሳ ኣያናን ኦሴቲያ ዎዛና ቃፃራፔ ኣቲን፥ ፃፌቴዳ ሂጊያና ጊዴና፤ ሄ ኡራይ ባሬ ጋላታ ፆሳፔ ኣኪያዋፔ ኣቲን፥ ኣሳፔ ኣኪቤና። ያቲና፥ ኣዪሁዳ ኣሳቱ ኣያኒ ኣዪሁዳ ጊዴና ኣሳፔ ኣꬊኖ? ዎይ ቃፃሬቲያዋን ኣይ ማዱ ዴዒ? ሃዌ ኣዪሁዳቱዋ ኡባባኒ ሎይꬂ ማዴ፤ ኡባባፔ ካሴ ፆሳይ ባሬ ኪታ ሃዳራ ኣዪሁዳቶ ኢሜዳ። ያቲና ኡንቱንቱፔ ኢቱ ኢቱ ኣማኔቴናዋ ጊዶፔ፥ ዋኒ? ሄዋ ዲራው፥ ፆሳይ ኣማኔቴና ያጊያዌ? ሄዋ ጊዴና፤ ኣሳይ ኡባይ ዎርዳንቻ ጊዶፔካ፥ ፆሳይ ጊያዌ ቱማ ጊዳናው ቤሴ። ፆሳ ማፃፋይ፥ «ኔኒ ሃሳዪያ ዎዴ፥ ኔኒ ፂሎ ጊዲያዋ ኤሪሳናው ኮሼ፤ ኔኒ ሞቴቲያ ዎዴ፥ ሻቲማናው ቤሴ» ያጌ። ሺን ኑ ባዪዙ ፆሳ ፂሎ ኦሱዋ ኤሪሲንቶ፥ ኑኒ ዋጋኔ? ኑ ቦላ ሃንቁዋ ኣሂያ ፆሳይ ባዪዛንቼ? ታኒ ኣሳይ ጊያዋዳን ጋይ። ሄዌ ዋዪ ሃናና። ኣዪሲ ጎፔ፥ ሄዋዳን ጊዶፔ፥ ፆሳይ ሃ ኣላሚያ ቦላ ዎቲ ፒርዳኔ? ሺን ታ ዎርዱዋን ፆሳ ቱማቴꬃይ ኣ ቦንቾ ዳሮፔ፥ ያቲና፥ ሃዋ ጋካናው ኣዪሲ ታ ቦላ ናጋራንቻዳን ፒርዲ? ያቲና ኑኒ፥ «ሎዑ ያናዳን፥ ኣኔ ኢታባ ኦꬆይቴ» ኣዪሲ ጎኮ? ኢቲ ኢቲ ኣሳይ ሃዋ ታና ሞቲዴ ቦሬዲኖ፤ ኡንቱንቱ ፆሳፔ ቤሲያ ፒርዳ ኣካና። ሄዋ ዲራው፥ ኑኒ ዋጋኔ? ኑኒ ኣዪሁዳቱ፥ ኣዪሁዳ ጊዴና ኣሳፔ ዳሬቶ? ሄዋ ጊዴና፤ ኣዪሲ ጎፔ፥ ኣዪሁዳቱካ ኣዪሁዳ ጊዴና ኣሳቱካ ኡባይ ኢቲፔ ናጋራፔ ጋርሳን ዴዒያዋ ታኒ ካሴ ሂንቴንቶ ኦዳዲ። ፆሳ ማፃፋይ ሃዋዳን ያጌ፤ «ፂሎ ኣሳይ ኢቱኔ ባዋ። ኣኬኪያ ኣሳይካ ባዋ፤ ዎይ ፆሳ ኮዪያዌካ ባዋ። ኣሳይ ኡባይ ኦጊያፔ ካሬ ኬሴዲኖ፤ ኡባይ ሙሌካ ማዴናዋ ጊዴዳ። ሎዖባ ኦꬂያ ኦኒኔ ባዋ፤ ሃራይ ኣቶ ኢቱኔ ባዋ። ኡንቱንቱ ዶናይ ዶያ ዴዒያ ዱፉዋ ማላ። ባሬንቱ ኢንፃርሳን ዎርዶቴዲኖ። ኡንቱንቱ ዶናፔ ኣሳ ዎꬊያ ሾሻ ዪሻ ማላ ሃሳያይ ኬሴ። ኡንቱንቱ ዶናን ሼቃይኔ ጫሞባይ ኩሜዳ። ኡንቱንቱ ሱꬃ ጉሳናው ዳሪ ኤሌሊኖ። ባይዙኔ ኮሌꬃይ ኡንቱንቱ ቤዳሳን ሃቃኒኔ ꬋዬና። ኡንቱንቱ ሳሮቴꬃ ኦጊያካ ኤሪኪኖ። ቃሲ ፆሳው ያዪያባይ ኡንቱንቱ ቆፋን ባዋ» ያጌ። ኣሳ ኡባ ሃሳያ ዲጋና ማላኔ ኩሜንꬃ ሳዓ ፆሳ ፒርዳፔ ጋርሳው ኣꬃና ማላ፥ ሂጊያ ጊዶን ኦዴቴዳ ኡባባይ ሂጊያፔ ጋርሳን ዴዒያ ኣሳው ሃሳዪያዋ ኑኒ ኤሬቶ። ፆሳ ሲንꬃን ኦኒኔ ሂጊ ኣዛዚያዋ ኦꬂያዋን ፂሌና፤ ሂጊ ኢቲ ኣሳይ ናጋራ ኦꬄዳዋ ኤራናዳን ኡዴ። ሺን ፆሳይ ኣሳ ፂሊሲያ ኦጊ ሂጊ ባይናን ሃዒ ቆንጬዳ፤ ሂጊኔ ናባቱ ሄ ፂሎቴꬃባ ማርካቴዲኖ። ፆሳይ ኣሳ ዬሱሲ ኪሪስቶሳ ኣማኒያዋን ፂሊሴ፤ ፆሳይ ሄዋ ኣ ኣማኒያ ኡባው ኦꬄ፤ ኣይ ሻኮቴꬃይኔ ባዋ። ኣዪሲ ጎፔ፥ ኣሳይ ኡባይ ናጋራ ኦꬄዳ፤ ፆሳ ቦንቹካ ኡንቱንቶ ጉፄዳ። ሺን ኡንቱንቱ ፆሳይ ኢሚያ ኣ ኣꬎ ኬካቴꬃን፥ ባሬንታ ዎዚያ ኪሪስቶሲ ዬሱሳ ባጋና ጮ ፂሌዲኖ። ዬሱሳ ሱꬃን ኣሳይ ኣ ኣማኒዴ፥ ባሬ ናጋራው ማሮቴꬃ ዴማናው፥ ፆሳይ ኣ ኢሜዳ፤ ፆሳይ ሄዋ ባሬ ፂሎቴꬃ ቤሳናው ኦꬄዳ፤ ኢ ቤኒ ዎዲያን ኣሳ ናጋራ ዳንዳዪዴ፥ ካꬊ ባሺ ኣጌዳ፤ ሺን ሃ ዎዲያን ባሬ ፂሎቴꬃ ቤሳናው ኣሳ ናጋራ ኣጌና፤ ፆሳይ ሄዋ ኦꬂያዋን ኢ ባሬ ሁጴው ፂሎ ጊዲያዋኔ ዬሱሳ ኣማኒያ ኡባ ፂሊሲያዋ ቤሴ። ያቲና፥ ኑኒ ኣያው ጬቄታኔ? ኣይኔ ባዋ። ኣያ ጋሱዋኔ? ኑኒ ሂጌው ኤኖ ጊያዋኔ? ጊዴና፤ ኣማኑዋ ሂጊያናፔ ኣቲን። ኣዪሲ ጎፔ፥ ኣሳይ ኣማኑዋን ፂላናፔ ኣቲን፥ ሂጊ ኣዛዚያዋ ኦꬂያዋና ጊዴና ያጊዴ ቆፔቶ። ዎይ ፆሳይ ኣዪሁዳቱዋ ፃላላው ፆሴ? ኣዪሁዳ ጊዴና ኣሳው ፆሳ ጊዴኔ? ቱማ፥ ኣዪሁዳ ጊዴናዋንቶካ ኢ ቃሲ ፆሳ። ኢቲ ፆሳ ፃላላይ ዴዔ፤ ኣዪሁዳቱዋ ኡንቱንቱ ኣማኑዋን ኢ ፂሊሳና፤ ቃሲ ኣዪሁዳ ጊዴናዋንታካ ኡንቱንቱ ኣማኑዋን ፂሊሳና። ያቲና፥ ኑኒ ሂጊያ ኣማኑዋን ጋፃ ሱጋኔ? ጊዴና፤ ሂጊያ ሚኒሶይቴፔ ኣቲን። ያቲና፥ ኑኒ ኑሲ ኣሹዋን ዛሬ ጊዲያ ኣብራሃሞ ኣያ ዴሜዳ ጋኔ? ኣዪሲ ጎፔ፥ ኣብራሃሞ ኦሱዋን ፂሌዳዋ ጊዶፔ፥ ኣው ጬቄቲያባይ ዴዔ፤ ሺን ፆሳ ሲንꬃን ጬቄታና ዳንዳዬና። ኣዪሲ ጎፔ፥ ፆሳ ማፃፋይ ዋጊ? «ኣብራሃሞ ፆሳ ኣማኔዳ፤ ፆሳይ ሄዋ ኣው ፂሎቴꬃን ፓይዴዳ» ያጌ። ኦꬂያ ኡራይ ኣኪያ ሚሻ ባሬው ቤሲና ኣኬፔ ኣቲን፥ ኣው ጮ ኢሜቲያዋዳን ፓይዴቴና። ሺን ኦሱዋ ኦꬄናን፥ ናጋራንቻ ፂሊሲያ ፆሳ ኣማኒያ ኡራ፥ ፆሳይ ኣ ኣማኑዋን ኣ ፂሊሴ። ሃዋዳንካ፥ ኣይ ኦሱኔ ባይናን፥ ፆሳይ ፂሉዋዳን ፓይዴዳ ኣሳ ናሼቺያባ ዳዊቴ ሃሳዬዳ ዎዴ ጌዳዌ ሃዋ። «ፆሳይ ኡንቱንቱ ባዪዙዋ ኣቶ ጌዳዋንቱኔ ኡንቱንቱ ናጋራ ካሜዳዋንቱ ኣንጄቴዳዋንታ። ጎዳይ ኣ ናጋራ ፓይዴና ኣሳይ ኣንጄቴዳዋ» ያጌ። ያቲና፥ ሃ ዳዊቴ ሃሳዬዳ ኣንጁ ቃፃሬቴዳ ኣሳ ፃላላሴዬ? ዎይ ቃሲ ቃፃሬቲቤና ኣሳቱዋሴ? ኣዪሲ ጎፔ ኑኒ፥ «ፆሳ ማፃፋይ፥ ‹ኣብራሃሞ ፆሳ ኣማኔዳ፤ ፆሳይ ሄዋ ኣው ፂሎቴꬃን ፓይዴዳ› ያጌ» ጎይቴ። ያቲና፥ ሃዌ ኣዉዴ ሃኔዴ? ኣብራሃሞ ቃፃሬቲ ሲሚኔዬ? ዎይ ቃፃሬታናፔ ካሴኔ? ቃፃሬታናፔ ካሴናፔ ኣቲን፥ ቃፃሬቲና ጊዴና። ጉዬፔ ኢ ቃፃሬቴዳ፤ ፆሳይ ኣ ኣማኑዋ ዲራው፥ ኢ ቃፃሬታናፔ ካሴ ኣ ፂሎ ኡዴዳዋ ኤሪሳናው፥ ኣ ቃፃራይ ማላ ጊዴዳ። ሄዌካ ቃሲ ቃፃሬቴናን ፆሳ ኣማኒያ ኡባቱዋ ፆሳይ ፂሎ ኦꬂዴ ፓይዳናዳን፥ ኡንቱንቶ ኣብራሃሞ ኣዉዋ ጊዳናሳ። ኢ ቃፃሬቴዳዋንቶካ ኣዉዋ፤ ጊዶፔካ፥ ኡንቱንቱ ቃፃሬቴዳ ዲራሳ ጊዴና፤ ሺን ኑ ኣዉዋ ኣብራሃሞ ቃፃሬታናፔ ካሴ ኣማኒያ ኣማኑዋ ማላ ካሊያዋንቶካ ኣዉዋ። ኣብራሃሞሲኔ ኣ ዜሬꬃው ፆሳይ፥ «ሃ ሳዓ ታኒ ሂንቴንቶ ኢማና» ያጌዳዌ፥ ኣብራሃሞ ፆሳ ኣማኒዴ ፂሌዳ ዲራሳፔ ኣቲን፥ ሂጌው ኢ ኣዛዜቴዳ ዲራሳ ጊዴና። ኣዪሲ ጎፔ፥ ሂጌው ኣዛዜቲያዋንቱ ፆሳይ ኢማና ጌዳዋ ላቲያዋንታ ጊዶፔ፥ ኣሳ ኣማኑ ማዴናባ ጊዴዳ፤ ፆሳይ ጌዳዌካ ሜላ ጊዴዳ፤ ሂጊ ፆሳ ቦሻ ኣሄ፤ ሺን ሂጊ ባይናሳን ሂጊያ ሜንꬂያባይ ባዋ። ሄዋ ዲራው፥ ሂጊያ ናጊያዋንቱ ፃላላው ጊዴናን፥ ቃሲ ኣብራሃሞ ኣማኔዳዋዳን፥ ኣማኒያ ኣብራሃሜ ዜሬꬃ ኡባው ፆሳይ ኢማና ጌዳዌ፥ ዎይታዳን ቱማታናዌ ኣማኑዋና። ኣብራሃሞ ኑሲ ኡባው ኣዉዋ። ፆሳ ማፃፋይ፥ «ታኒ ኔና ጮራ ካዉቴꬃቶ ኣዎ ኦꬃዲ» ጊያዋዳን፥ ሃይቄዳዋንቶ ዴዑዋ ኢሚያ፥ ባሬ ኣዛዙዋን ባይናባ ዴዒያባዳን ኦꬂዴ ፄሲያ፥ ኢ ኣማኔዳ ፆሳ ሲንꬃን ኣብራሃሞ ኑሲ ኡባው ኣዉዋ። *** ፆሳ ማፃፋይ ኣብራሃሞሲ፥ «ኔ ዜሬꬃይ ሃዋ ኬና ጊዳና» ያጌዳዋዳን፥ ሃዋ ኬና ጊዳና ጊዴ፥ ናሼቻን ናጋናው ዳንዳዬና ዎዴ፥ ኣብራሃሞ ኣማኒዴኔ ሲንꬃፔ ዴማና ጊዴ፥ ናሼቻን ናጊዴ፥ ጮራ ዜሬꬃው ኣዉዋ ጊዴዳ። ሄ ዎዴ፥ ኣብራሃሞ ዬሌቶዴፔ ፄቱ ላይꬃ ኩማና ሃኒያ ጪማ፤ ሺን ባሬ ዳቡራንቻ ኣሳቴꬃኔ ሳራ ናዓ ዬላናው ዳንዳዬናዋ ቆፔዳ ዎዴ፥ ኢ ባሬ ኣማኑዋን ዳቡሪቤና። ፆሳ ኢ ቦንቺዴ፥ ኣው ኢማና ጌዳ ፆሳይ ቃሲ ፖላናው ዳንዳዪያዋ ሎይꬂ ኤሪዴ ባሬ ኣማኑዋን ሚኔዳዋፔ ኣቲን፥ ኣማኔናን ኢፂዴ፥ ፆሳይ ኢማና ጌዳዋ ሲꬊቤና። *** ሄዋ ዲራው፥ ፆሳይ ቃሲ ኣ ኣማኑዋ ፂሎቴꬃን ፓይዴዳ። «ኣው ፂሎቴꬃን ፓይዴዳ» ጊያ ቃላይ ኣ ፃላላው ፃፌቲቤና። ሄ ቃላይ ኑ ጎዳ ዬሱሳ ሃይቁዋፔ ዴንꬄዳ ፆሳ ኣማኒያ ኑሲካ ፂሎቴꬃን ፓይዴታና ማላ ፃፌቴዳ። ፆሳይ ኣ ኑ ናጋራ ዲራው፥ ሃይቆ ኣꬂዴ ኢሚና፥ ኢ ኑና ፂሊሳናው ሃይቁዋፔ ዴንዴዳ። ሄዋ ዲራው፥ ኑኒ ኣማኑዋን ፂሌዳዋን፥ ኑ ጎዳ ዬሱሲ ኪሪስቶሳ ባጋና ኑሲ ፆሳና ሳሮቴꬃይ ዴዔ፤ ቃሲ ኢ ኑና ሃዒ ኑኒ ዴዒያ ፆሳ ኣꬎ ኬካቴꬃ ጊዶ ኣማኑዋን ኣሄዳ፤ ያቲና፥ ኑኒ ፆሳ ቦንቹዋ ሻካናው ኑሲ ዴዒያ ሂዶታን ጬቄቴቶ። ሄዋ ፃላላ ጊዴና፤ ኑኒ ኑ ዋዪያንካ ናሼቴቶ፤ ኣዪሲ ጎፔ፥ ዋዪያፔ ዳንዳያይ፥ ቃሲ ዳንዳያፔ ፓጪያን ሚኒያዌ፥ ፓጪያን ሚኖታፔ ሂዶታይ ዪያዋ ኑኒ ኤሬቶ። *** ፆሳይ ኑሲ ኢሜዳ ጌሻ ኣያና ባጋና ባሬ ሲቁዋ ኑ ዎዛናን ጉሴዳ ዲራው፥ ሄ ኑኒ ዴማናው ናሼቻን ናጊ ኡቴዳዌ ኑና ዬላዬና። ኣዪሲ ጎፔ፥ ኑኒ ቢሮ ዎልቃይ ባይናዋንታ ጊዲዴ ዴዒሺን፥ ፆሳይ ዶሬዳ ዎዲ ጋኪና፥ ኪሪስቶሲ ናጋራንቻቱዋ ዲራው ሃይቄዳ። ፂሎ ኡራ ዲራው፥ ኢቲ ኡራይ ሃይቃናዌ ዳሮ ሜቶባ፤ ሺን ሎዖ ኣሳ ዲራው ሃይቃናው፥ «ኤኖ» ጊያ ኡራይ ኦኒ ኤሪ ቤቴናን ኣጌና። ሺን ኑኒ ቢሮ ናጋራንቻ ጊዲዴ ዴዒሺን፥ ኪሪስቶሲ ኑ ዲራው ሃይቄዳ፤ ሄዌ ፆሳይ ኑና ኣይ ኬና ሲቂንቶኔ ኣ ሲቁዋ ኤሪሴ። ሲሚ ኑኒ ሃዒ ኣ ሱꬃን ፂሌዳዋ ጊዶፔ፥ ኣ ባጋና ፆሳ ሃንቁዋፔ ኣታና። ኣዪሲ ጎፔ፥ ኑኒ ፆሳና ካሴ ሞርኬ፤ ሺን ኣ ናዓ ሃይቁዋን ኣናና ሲጌቴዶ። ሄዋፔ ኣꬂዴ፥ ሃዒ ኑኒ ፆሳና ሲጌቴዳዋፔ ጉዪያን፥ ኢ ፓፃ ጊዲያ ዲራው ኑና ኣሻና። ሺን ሄዋ ፃላላ ጊዴና፤ ሃዒ ኑና ፆሳና ሲጌꬄዳ ኑ ጎዳ ዬሱሲ ኪሪስቶሳ ባጋና ኑና ፆሳባይ ናሼቼ። ሄዋ ዲራው፥ ናጋራይ ሃ ሳዓ ኢቲ ኣሳ ባጋና ጌሌዳ፤ ሄ ናጋራይ ባሬናና ሃይቁዋ ኣሄዳ፤ ሄዋ ጋሱዋን፥ ኣሳይ ኡባይ ኣዳማ ባጋና ናጋራ ኦꬄዳ ዲራው፥ ሃይቁ ኣሳ ዛሪያ ኡባ ጋኬዳ። ሂጊ ኢሜታናፔ ካሴ፥ ሃ ኣላሚያን ናጋራይ ዴዔ፤ ሺን ሂጊ ባይና ዎዴ ናጋራይ ፓይዴቴና። ሺን ኣዳማ ዎዲያፔ፥ ሙሴ ዎዲያ ጋካናሲ፥ ሃይቁ ኣሳ ኡባ ሞዴዳ፤ ሃራይ ኣቶ ኣዳሚ ፆሳ ሂጌው ኣዛዜቴናን ኢፄዳዋዳን፥ ናጋራ ኦꬂቤናዋንታካ ሃይቁ ሞዴዳ። ኣዪሲ ጎፔ፥ ኣዳሚ ያናዎ ሌሚሱዋ። ሺን ፆሳ ኢሞታይ ኣዳማ ናጋራ ኬና ጊዴና ዲራው፥ ኡንቱንቱ ኢቲ ማላ ጊዲኪኖ፤ ኢቲ ቢታኒያ ናጋራ ዲራው፥ ጮራ ኣሳይ ሃይቄዳዌ ቱማ፤ ሺን ፆሳ ኣꬎ ኬካቴꬃይኔ ኣ ኢሞታይ ኢቲ ኣሳ ኣꬎ ኬካቴꬃ ባጋና፥ ዬሱሲ ኪሪስቶሳ ኣꬎ ኬካቴꬃ ባጋና ጮራ ኣሳው ዳሬዳ። ፆሳ ኢሞታይ ናጋራ ኦꬄዳ ቢታኒያ ባጋና ዬዳዋ ማላ ጊዴና፤ ኣዪሲ ጎፔ፥ ኣዳሚ ኢቲ ናጋራ ኦꬄዳዋፔ ጉዪያን፥ ፆሳይ ኣ ባዪዜዳዋዳን ፒርዴዳ፤ ሺን ኣሳይ ዳሮ ናጋራ ኦꬄዳዋፔ ጉዪያን ፆሳይ፥ «ሂንቴንቱ ባዪዚቤይኪታ» ጊዴ፥ ባሬ ኣꬎ ኬካቴꬃ ኡንቱንታ ቤሴ። ኣዪሲ ጎፔ፥ ኢቲ ቢታኒያ ናጋራ ጋሱዋን፥ ኣ ናጋራ ባጋና፥ ሃይቁ ካዉቴዳዌ ቱማ፤ ሺን ኢቲ ኡራይ፥ ዬሱሲ ኪሪስቶሲ ኦꬄዳባይ ኣይ ኬና ዳሬ፤ ፆሳ ዳሮ ኣꬎ ኬካቴꬃኔ ፂሎቴꬃ ኢሞታ ኣኪያ ኡባይ ኪሪስቶሳ ባጋና ፆኒዴ ዴዓና። ሲሚ ኢቲ ኡራይ ናጋራ ኦꬄዳ ጋሱዋን ኣሳ ኡባ ቦላ ባዪዜዳዋዳን ፒርዳይ ዬዳ። ሄዋዳንካ ኢቲ ኡራይ ፂሎባ ኦꬄዳ ጋሱዋን፥ ፆሳይ ኣሳ ኡባ፥ «ባይዚቤይኪታ» ጊዴ ኡንቱንቶ ዴዑዋ ኢሜዳ። ኣዪሲ ጎፔ፥ ኢቲ ኡራይ ኣዛዜቴናን ኢፄዳ ጋሱዋን፥ ዳሮ ኣሳይ ናጋራንቻ ጊዴዳ፥ ሃዋዳንካ ቃሲ ኢቱ ኤኖ ጌዳዋን ጮራ ኣሳይ ፂላና። ናጋራ ዳሪሳናው፥ ሂጊ ዬዳ፤ ሺን ናጋራይ ዳሪያ ዎዴ ፆሳ ኣꬎ ኬካቴꬃይ ሎይꬂ ዳሬዳ። ናጋራይ ሃይቁዋ ዎልቃን ካዉቴዳዋዳን፥ ሃዋዳንካ ቃሲ ፆሳ ኣꬎ ኬካቴꬃይ ፂሎቴꬃ ዎልቃን ካዉቲዴ፥ ኑ ጎዳ ዬሱሲ ኪሪስቶሳ ባጋና፥ ኑና ሜꬊና ዴዖ ካሌꬄ። ያቲና፥ ኑኒ ዋጋኔ? ፆሳ ኣꬎ ኬካቴꬃይ ዳራናዳን፥ ናጋራን ሚኒዴ ዴዓኔ? ጊዴና፤ ኑኒ ናጋራ ኦꬄና ማላ ሃይቂዲጌዶ። ያቲና፥ ኑኒ ሃዋፔ ሲንꬃው ዎቲ ኣ ጊዶን ዴዓኔ? ዎይ ኑኒ ኡባቱ ኪሪስቶሳ ዬሱሳና ኢቲፔ ጊዳናው፥ ፃማቄቴዳ ዎዴ፥ ኣ ሃይቁዋንካ ኣናና ኢቲፔ ጊዳናው ፃማቄቴዳዋ ኤሪኪቴ? ሄዋ ዲራው፥ ኪሪስቶሲ ባሬ ኣዉዋ ቦንቾ ዎልቃን ሃይቁዋፔ ዴንዶዋዳን፥ ኑኒካ ኦራꬃ ዴዑዋ ዴዓናው፥ ኣ ሃይቁዋ ኣናና ሻካናው ፂንቃታኒ ኣናና ኢቲፔ ሞጌቴዶ። ኣዪሲ ጎፔ፥ ኑኒ ኢ ሃይቄዳዋዳን ሃይቂዴ፥ ኣናና ኢቱዋ ጊዶፔ፥ ሃዋዳንካ፥ ሃይቁዋፔ ኢ ዴንዶዋዳን ኑኒካ ዴንዲዴ፥ ኣናና ኢቱዋ ጊዳና። ኑኒ ሃዋፔ ሲንꬃው ናጋራው ኣይሌ ጊዴና ማላ፥ ቃሲ ኑ ናጋራንቻ ኣሳቴꬃ ዎልቃይ ꬋያና ማላ፥ ኑ ኤጫ ኣሳቴꬃ ኪሪስቶሳና ማስቃሊያ ቦላ ሚሲማሪያን ꬊሼቲ ካቄቴዳዋ ኤሬቶ። ኣዪሲ ጎፔ፥ ኢቲ ኡራይ ሃይቂያ ዎዴ ናጋራ ዎልቃይ ኣ ሞዴና፤ ሺን ኑኒ ኪሪስቶሳና ሃይቄዳዋ ጊዶፔ፥ ኣናና ቃሲ ዴዓናዋ ኣማኔቶ። ኣዪሲ ጎፔ፥ ኪሪስቶሲ ሃይቁዋፔ ዴንዴዳዋ፥ ቃሲ ላዔንꬁዋ ኢ ሃይቄናዋኔ ሃይቁ ሲንꬃፔ ኣ ሞዴናዋ ኑኒ ኤሬቶ። ኢ ኢቲ ካላካ ሃይቄዳ፤ ናጋራው ኣ ቦላ ዎልቃይ ባዋ፤ ሺን ኢ ሃ ዴዒያ ዴዑዋ ፆሳው ዴዔ። ሃዋዳን ቃሲ ሂንቴ ናጋራ ኦꬄናዳን፥ ሂንቴንታ ሃይቄዳዋዳን ቆፒቴ፤ ሺን ጎዳ ኪሪስቶሳ ዬሱሳ ባጋና ፆሳው ሂንቴ ፓፃ ዴዒያዋዳን፥ ሂንቴንታ ቆፒቴ። ሄዋ ዲራው፥ ሂንቴ ሂንቴንቱ ኣሳቴꬃ ኣሙዋሲ ኣዛዜታና ማላ፥ ናጋራይ ሃይቂያ ሂንቴ ኣሳቴꬃ ሞዶፖ። ቃሲ ሂንቴ ኣሳቴꬃፔ ኢቲ ሳኔ ኢታ ኦሱዋ ኦꬃናው ናጋራው ኢሞፒቴ፤ ሺን ሃይቁዋፔ ዴንዴዳ ኣሳዳን ሂንቴንታ ፆሳው ኢሚቴ፤ ቃሲ ሂንቴ ኩሜንꬃ ኣሳቴꬃካ ፂሎ ኦሱዋ ኦꬃናው ፆሳው ኢሚቴ፤ ኣዪሲ ጎፔ፥ ናጋራይ ሂንቴንታ ሞዳናው ዳንዳዬና፤ ሂንቴ ፆሳ ኣꬎ ኬካቴꬃ ጋርሳና ዴዒታፔ ኣቲን፥ ሂጊያፔ ጋርሳና ዴዒኪታ። ያቲና፥ ዋናኔ? ፆሳ ኣꬎ ኬካቴꬃ ጋርሳና ዴዒኖፔ ኣቲን፥ ሂጊያፔ ጋርሳና ዴዔና ዲራው፥ ናጋራ ኦꬃኔ? ጊዴና፤ ሂንቴ ሂንቴንታ ኢቲ ኡራው ኣዛዜታናው፥ ኣይሊያዳን ኦꬂዴ ኢሚያ ዎዴ፥ ሄ ሂንቴንታ ኣዛዚያዎ ኣይሌቱዋ ጊዲያዋ ኤሪታ፤ ዎይ ሂንቴ ሂንቴንቶ ሃይቁዋ ኣሂያ ናጋራው ኤኖ ጊታ፤ ዎይ ሂንቴ ሂንቴንታ ፂሎ ኦꬂያ ኣዛዞ ኤኖ ጊታ። ሺን ፆሳው ጋላታይ ጊዶ፤ ኣዪሲ ጎፔ፥ ናጋራው ካሴ ሂንቴ ኣይሌ፤ ሺን ጉዬፔ ሂንቴ ኣኬዳ ቲሚርቲያ ጊዶን ዴዒያ ቱማቴꬃው ሂንቴ ኩሜንꬃ ዎዛናፔ ኣዛዜቴዲታ። ሂንቴንቱ ናጋራ ኣይሌቴꬃፔ ኬሲዴ፥ ፂሎቴꬃው ኣይሌ ጊዴዲታ። ሂንቴንቱ ሜꬌታን ዳቡራንቻ ጊዲያ ዲራው፥ ታኒ ኦሲካ ጌሊያ ሃሳያ ሃሳያይ፤ ሂንቴ ካሴ ሂንቴ ኩሜንꬃ ኣሳቴꬃ ናቁዋ ኦꬃናው፥ ቱናቴꬃዉኔ ናቆ ኣይሌ ኡዲዴ ኢሜዲታ፤ ሃዒ ሄዋዳንካ ሂንቴ ኩሜንꬃ ኣሳቴꬃ ጌሻባ ኦꬃናው፥ ፂሎቴꬃው ኣይሌ ኡዲዴ ኢሚቴ። ሂንቴንቱ ናጋራው ኣይሌቲዴ ዴዒያ ዎዴ፥ ፂሎቴꬃይ ሂንቴንቶ ጎዳ ጊዴና። ሂንቴንታ ሃዒ ዬላዪያ ዬዋቱዋ ሄ ዎዴ ኦꬄዳዋፔ ኣይ ማዱዋ ዴሜዲቴ? ኣዪሲ ጎፔ፥ ሄ ዬዋቱዋ ዉርሴꬃይ ሃይቁዋ። ሺን ናጋራ ኣይሌቴꬃፔ ሂንቴ ኬሲዴ፥ ፆሳው ኤኖጌዲታ፤ ቃሲ ሂንቴ ኦꬂያ ኡባባኒ ሂንቴንታ ኡባካ ኣው ኣꬂዴ ኢሜዲታ። ሄዌ ሂንቴንቶ ዎሬ፤ ሄዋ ዉርሴꬃይ ሜꬊና ዴዑዋ። ኣዪሲ ጎፔ፥ ናጋራ ጋቲ ሃይቁዋ። ሺን ፆሳይ ኑ ጎዳ ኪሪስቶሳ ዬሱሳ ባጋና ኢሚያ ኢሞታይ ሜꬊና ዴዑዋ። ታናዳን ኣማኒያዋንቶ፥ ሂንቴንቱ ኡባይ ሂጊያ ኤሪያ ዲራው፥ ታኒ ጊያዋ ሎይꬂ ኤሪታ፤ ሂጊ ኢቲ ኣሳይ ፓፃ ዴዔዳ ዎዴ ፃላላን ኣ ሞዴ። ኣዪሲ ጎፔ፥ ኣሲና ጌሌዳ ሚሺራታ ኢዚ ኣሲናይ ፓፃ ዴዔዳ ኬናን፥ ሂጊያን ኣናና ቃሼታ ኡታዱ፤ ሺን ኢዚ ኣሲናይ ሃይቆፔ፥ ኣናና ጫቄዳ ሂጊ ኢዞ ሞዴና። ሄዋ ዲራው፥ ኢዛ ባሬ ኣሲናይ ፓፃ ዴዒሺን፥ ሃራ ኣቱማዋ ጌሎፔ፥ ኣሳይ ኢዞ፥ «ዎሹሜዉኖ» ጋና። ሺን ኢዚ ኣሲናይ ሃይቆፔ፥ ሂጊ ኢዞ ሞዴና፤ ኢዛ ሃራ ኣሲና ጌሎፔኔ ኢዞ ኦኒኔ፥ «ዎሹሜዉኖ» ጌና። ታናዳን ኣማኒያዋንቶ፥ ሄዋዳን ሂንቴንቱ ቃሲ ኪሪስቶሳ ኣሳቴꬃፔ ኢቲ ባጋ ጊዲያ ዲራው፥ ሂንቴንቱ ኣባጋና ሃይቄዲታ። ቃሲ ኑኒ ፆሳ ማዲያ ኦሱዋ ኦꬃና ማላ፥ ሂንቴንቱ ፆሳይ ሃይቁዋፔ ዴንꬄዳ ኪሪስቶሳዋንታ። ኣዪሲ ጎፔ፥ ኑኒ ኑ ኣሳቴꬃይ ኮዬዳዋዳን ዴዒያ ዎዴ፥ ሂጊ ኑኒ ናጋራ ኦꬃናዳን፥ ኑና ዴንꬄꬄ፤ ኑ ኣሳቴꬃ ጊዶን ኢታ ኣሙ ዴዒያ ዲራው፥ ኑኒ ሃይቆ ኣይፊያ ኣይፌዶ። ሺን ሃዒ ኑኒ ኑና ቃቼዳዎ ሃይቄዳ ዲራው፥ ፆሳይ ኑና ሂጊያ ቃሹዋፔ ቢሌዳ። ሄዋ ዲራው፥ ኑኒ ጌሻ ኣያናይ ጊጊሴዳ ኦራꬃ ኦጊያን ፆሳው ኤኖ ጋናዋፔ ኣቲን፥ ፃፌቴዳ ሂጊ ኑሲ ጊጊሴዳ ኤጫ ኦጊያን ኤኖ ጎኮ። ያቲና፥ ኑኒ ዋጋኔ? ሂጊ ባሬ ሁጴው ናጋሬ? ሄዋ ጊዴና፤ ሺን ሂጊ ናጋራይ ኣዬንቶ ታና ኤሪሴዳ። ኣዪሲ ጎፔ፥ ታኒ ሂጊ፥ «ኣሳባ ኣሞቶፓ» ጊቤኔንቶ፥ ኣሳባ ኣሞቲያዌ ኣዬንቶ ኤሪኬ። ሺን ናጋራይ ታኒ ኡባባ ኣሞታና ማላ፥ ኣዛዙዋ ባጋና ታ ቦላ ኦጊያ ዴሜዳ፤ ኣዪሲ ጎፔ፥ ሂጊ ባዌንቶ፥ ናጋራው ዎልቃይ ባዋ። ካሴ ሂጊ ባይና ዎዴ ታኒ ፓፃ፤ ሺን ኣዛዙ ዬዳ ዎዴ ናጋራይ ዴዖ ሲሚና፥ ታኒ ቃሲ ሃይቃዲ፤ ታና ፓፃ ዎꬃናው ፆሳይ ቆፔዳ ኣዛዙ፥ ታው ሃይቁዋ ኣሄዳ። ኣዪሲ ጎፔ፥ ናጋራይ ኣዛዙዋ ባጋና ታና ጪሚያ ኦጊያ ዴሚዴ፥ ሄ ኣዛዙዋን ታና ዎꬌዳ። ሄዋ ዲራው፥ ሂጊ ጌሻ፤ ኣዛዙካ ጌሻ፥ ፂላኔ ሎዓ። ያቲና፥ ሎዖባይ ታው ሃይቁዋ ኣሄዴ? ሄዋ ጊዴና፤ ሺን ታው ሄዋ ናጋራይ ኣሄዳ፤ ኣሳይ ናጋራይ ኣዬንቶ ሻኪዴ ኤራና ማላ፥ ናጋራይ ሎዖባ ባጋና፥ ታው ሃይቁዋ ኣሄዳ። ቃሲ ኣዛዙ፥ «ኦኒኔ ናጋራ ኦꬃናው ቤሴና» ያጊያ ዲራው፥ ናጋራይ ካሴዋፔ ኣꬊ ኢቴዳ። ኑኒ ሂጊ ፆሳዋ ጊዲያዋ ኤሬቶ፤ ሺን ታኒ ታና ናጋራው ዛሊዔዳ ሃይቂያ ኣሳ፤ ታኒ ኦꬂያዋ ዎዛና ኣꬂኬ፤ ኣዪሲ ጎፔ፥ ታኒ ኢፂያዋ ኦꬃይፔ ኣቲን፥ ታኒ ኦꬃናው ዶሲያዋ ኦꬂኬ። ታኒ ኢፂያዋ ኦꬂያዋ ጊዶፔ፥ ሂጊ ሎዓ ጊዲያዋ ማርካታይ። ሄዋ ጊዶፔ፥ ሄ ዬዉዋ ታ ቦላ ዴዒያ ናጋራይ ኦꬂያዋፔ ኣቲን፥ ሃዒ ታኒ ኦꬂኬ። ታናን፥ ሄዌኔ ታ ኣሳቴꬃን ሎዖባይ ዴዔናዋ ታኒ ኤራይ፤ ኣዪሲ ጎፔ፥ ሎዖባ ኦꬂያ ኣሙ ታ ቦላ ዴዖፔካ፥ ታኒ ሄ ሎዖባ ኦꬃናናው ዳንዳዪኬ። ታኒ ኢፂያ ኢታባ ኦꬃይፔ ኣቲን፥ ታኒ ዶሲያ ሎዖባ ኦꬂኬ። ሺን ታኒ ኢፂያዋ ኦꬂያዋ ጊዶፔ፥ ሄዋ ታ ቦላ ዴዒያ ናጋራይ ኦꬂያዋፔ ኣቲን፥ ሃዒ ሄዋ ኦꬂያዌ ታና ጊዲኬ። ሲሚ ታኒ ሎዖባ ኦꬃናው ዶሲሺን፥ ኢታባ ኦꬂያዌ ታው ሂጌ ጊዲያዋ ዴማዲ። ኣዪሲ ጎፔ፥ ታኒ ታ ዎዛና ጊዶን ፆሳ ሂጊያን ናሼታይ፤ ሺን ታ ቦላ ጊዶን ዴዒያ ታ ዎዛና ቆፋ ሂጊያና ዋꬌቲያ ዱማ ሂጊያ ቤዓይ። ሄ ሂጊ ታ ቦላ ጊዶን ዴዒያ ናጋራ ኦሲሲያ ሂጊያን ታና ቃሺሴ። ታኒ ኣይባ ናሼቺ ባይና ኣሴ! ታና ሃይቆ ኣፊያ ሃ ኣሳቴꬃፔ ኣሻናዌ ኦኔ? ኑ ጎዳ ዬሱሲ ኪሪስቶሳ ባጋና ፆሳው ጋላታይ ጊዶ። ሲሚ ታኒ ታ ዎዛና ቆፋን ፆሳ ሂጌው ኤኖ ጋይ። ሺን ታ ኣሳቴꬃን ታና ናጋራ ኦሲሲያ ሂጌው ኤኖ ጋይ። ሄዋ ዲራው፥ ኪሪስቶሳ ዬሱሳና ዴዒያዋንቱ ቦላን ፒርዳይ ሃዒ ባዋ፤ ኣዪሲ ጎፔ፥ ኪሪስቶሳ ዬሱሳ ባጋና ኑሲ ዴዑዋ ኢሚያ ጌሻ ኣያና ሂጊ ታና ናጋራ ሂጊያ ኣይሌቴꬃፔኔ ሃይቁዋ ሂጊያ ኣይሌቴꬃፔ ኬሴዳ። ኣሳ ኣሳቴꬃይ ዳቡራንቻ ጊዲያ ዲራው፥ ሂጊ ኦꬃናው ዳንዳዪቤናዋ ፆሳይ ኦꬄዳ፤ ናጋራንቻቱዋ ኣሳቴꬃ ማላ ኣሳቴꬃና ዴዒያ ባሬ ናዓ፥ ኣሳይ ኦꬄዳ ናጋራው ያርሹዋ ጊዳናው ፆሳይ ኪቲዴ፥ ኣሳ ኣሳቴꬃ ጊዶን ዴዒያ ናጋራ ፒርዴዳ። ጌሻ ኣያናይ ኮዪያዋዳን ዴዒያዋንቱፔ ኣቲን፥ ኑ ኣሳቴꬃይ ኮዪያዋዳን ዴዓናዋንቱ ቦላ፥ ኑ ቦላ፥ ሂጊያ ፂሎ ኣዛዙ ፖሌታና ማላ፥ ፆሳይ ሃዋ ኦꬄዳ። ባሬንቱ ኣሳቴꬃይ ኮዪያዋዳን ዴዒያዋንቱ ባሬንቱ ኣሳቴꬃባ ቆፒኖ፤ ሺን ጌሻ ኣያናይ ኮዪያዋዳን ዴዒያዋንቱ ጌሻ ኣያናባ ቆፒኖ። ኣሳቴꬃባ ቆፑሳይ ሃይቁዋ ኣሄ፤ ሺን ጌሻ ኣያናባ ቆፑሳይ ዴዑዋኔ ሳሮቴꬃ ኣሄ። ኣሳቴꬃባ ቆፑሳይ ፆሳው ኢፆ፤ ኣያው ጎፔ፥ ኣሳቴꬃይ ፆሳ ሂጌው ኤኖ ጌና፤ ቃሲ ኤኖ ጋናዉካ ኣው ዳንዳዬቴና። ባሬንቱ ኣሳቴꬃው ኤኖ ጊያዋንቱ ፆሳ ናሼቻናው ዳንዳይኪኖ። ሺን ፆሳ ኣያናይ ሂንቴንቱን ዴዖፔ፥ ጌሻ ኣያናይ ጊያዋዳን ዴዒታፔ ኣቲን፥ ሂንቴ ኣሳቴꬃይ ኮዪያዋዳን ዴዒኪታ። ሺን ኦኒኔ ኪሪስቶሳ ኣያናይ ባይናዋ ጊዶፔ፥ ሄ ኡራይ ኪሪስቶሳዋ ጊዴና። ሺን ኪሪስቶሲ ሂንቴንቱን ዴዖፔ፥ ሂንቴ ኣሳቴꬃይ ናጋራ ጋሱዋን ሃይቄዳዋ፤ ሺን ሂንቴ ኣያናይ ፂሎቴꬃ ጋሱዋን ሂንቴንቱን ፓፃ ዴዔ። ሺን ዬሱሳ ሃይቁዋፔ ዴንꬄዳ ፆሳ ኣያናይ ሂንቴ ጊዶን ዴዖፔ፥ ሃይቁዋፔ ኪሪስቶሳ ዴንꬄዳ ፆሳይ ቃሲ ሂንቴንቱን ዴዒያ ባሬ ጌሻ ኣያናን፥ ሃይቂያ ሂንቴ ኣሳቴꬃዉካ ዴዑዋ ኢማና። ሲሚ ታናዳን ኣማኒያዋንቶ፥ ኑኒ ኣጩዋና ዴዔቶ፤ ኑ ኣሳቴꬃይ ኮዪያዋዳን ዴዓናው ኑሲ ቤሴና። ኣዪሲ ጎፔ፥ ሂንቴ ሂንቴ ኣሳቴꬃይ ጊያዋዳን ዴዖፔ፥ ሂንቴ ሃይቃና፤ ሺን ሂንቴ ሂንቴ ናጋራ ኦሱዋ ጌሻ ኣያናን ዎꬎፔ፥ ፓፃ ዴዓና። ፆሳ ኣያናይ ካሌꬂያ ኡባቱ ፆሳ ናና። ኣዪሲ ጎፔ፥ ኑኒ ኑ ኮሻ ꬎቁ ኦꬂዴ፥ «ኣባ! ታ ኣቦ» ያጊዴ ፄሲያ፥ ኑና ፆሳ ናና ኬሲያ ጌሻ ኣያና ፆሳፔ ኣኬዶፔ ኣቲን፥ ላዔꬁዋ ያያናው ኣይሌ ኬሲያ ኣያና ኣኪቤይኮ። ፆሳ ኣያናይ ባሬ ሁጴው ኑ ኣያናና ጊዲዴ፥ ኑኒ ፆሳ ናና ጊዲያዋ ማርካቴ። ኑኒ ኣ ናና ጊዶፔ፥ ኢ ባሬ ኣሳው ሚንጄዳ ኣንጁዋ ላታና፤ ቃሲ ኑኒ ፆሳይ ኪሪስቶሳው ሚንጄዳዋካ ኣናና ላታና፤ ኑኒ ኪሪስቶሳ ዋዪያ ኣናና ሻኮፔ፥ ኣ ቦንቹዋካ ኣናና ሻካና። ኣዪሲ ጎፔ፥ ኑኒ ሃዒ ዋዬቲያ ዋዪያ ኑሲ ሲንꬃፔ ቆንጫና ቦንቹዋና ጋꬃናው፥ ኡባካ ዳንዳዬቴና ጋዴ ታኒ ቆፓይ። ፆሳይ ሜꬌዳ ሜꬌታ ኡባይ ፆሳ ናናይ ቆንጫናዋ ሎይꬂ ላሞቲ ኡቴዳ። ኣዪሲ ጎፔ፥ ሜꬌታ ኡባይ ማዱ ባይናባ ጊዳናዳን፥ ፆሳይ ኣ ቦላ ፒርዴዳ፤ ሲንꬃፔ ዴማና ጊዴ ናሼቻን ናጊ ኡታናዳን ኡዴዳ ፆሳይ ኮዬዳ ዲራው ሃኔዳፔ ኣቲን፥ ሜꬌታ ኡባይ ባሬ ሁጴው ኮዬዳዋን ጊዴና። ሜꬌታ ኡባይ ባሬ ሁጴው ባሻ ኣይሌቴꬃፔ ኢቲ ጋላሲ ኬሳናዋ፤ ቃሲ ሄ ሜꬌታቱ ፆሳ ናናይ ኣይሌቴꬃፔ ኬሴዳ ቦንቾ ኬሳ ሻካና። ኣዪሲ ጎፔ፥ ሜꬌታ ኡባይ ኢቲፔ ሃዋ ጋካናው፥ ማጫ ኣሳ ዬሉ ኦይቂና ኦሊያዋዳን፥ ሳኩዋን ኦሊያዋ ኑኒ ኤሬቶ። ቃሲ ሄዋ ፃላላ ጊዴና፤ ኑኒ፥ ጌሻ ኣያና ፆሳ ባይራ ኢሞታዳን ኡዲዴ ኣኬዳዋንቱ፥ ኑ ሁጴው ቃሲ ፆሳይ ኑና ባሬ ናና ኦꬃናዳኒኔ ኑ ኩሜንꬃ ኣሳቴꬃ ዎዛናዳን ናጊዴ፥ ኑ ጊዶን ኦሌቶ። ኣዪሲ ጎፔ፥ ኑኒ ፆሳይ ኢማና ጌዳዋን ኣቴዶ። ሺን ኑኒ ፆሳይ ኢማና ጌዳዋ ቤዖፔ፥ ያቲና፥ ሄዌ ናሼቻን ናጊያዋ ጊዴና፤ ኣዪሲ ጎፔ፥ ባሬ ቤዒያዋ ዴማና ጊዴ፥ ናሼቻን ናጊያዌ ኦኔ? ሺን ኑኒ ቤዔናዋ ዴማና ጊዴ፥ ናሼቻን ናጎፔ፥ ሄዋ ዳንዳዪዴ ናጌቶ። ሃዋዳን ቃሲ ጌሻ ኣያናይ ኑ ዳቡራ ማዳናው ዬ፤ ኣዪሲ ጎፔ፥ ኑኒ ፆሳ ዎቲ ዎሳናው ቤሲንቶ ኤሮኮ፤ ሺን ጌሻ ኣያናይ ባሬ ሁጴው ቃላን ቆንጪሳናው ዳንዳዬቴና ኦሊያን ኑሲ ጋናቴ። ቃሲ ኣሳ ዎዛና ቢዲያ ፆሳይ፥ ጌሻ ኣያናይ ኢ ኮዪያዋዳን፥ ፆሳ ናቶ ጋናቲያ ዲራው፥ ጌሻ ኣያና ቆፋይ ኣዬንቶ ኤሬ። ፆሳይ ባሬና ሲቂያዋንቶ፥ ባሬ ቆፋዳን ፄሴዳዋንቶ፥ ኡባ ዬዉዋ ሎዖቴꬃው ኦꬂያዋ ኑኒ ኤሬቶ። ፆሳይ ባሬ ናዓይ ጮራ ኢሻቱዋ ጊዶን ባይራ ጊዳናዳን፥ ኢ ካሴ ኤሬዳዋንታ ቃሲ ባሬ ናዓ ማላታናዳን፥ ካሴቲዴ ቆፋ ቃቼዳ። ፆሳይ ካሴቲዴ ቆፔዳዋንታ፥ ኡንቱንታ ቃሲ ፄሴዳ፤ ሄ ፄሴዳዋንታካ ጌሼዳ፤ ሄ ጌሼዳዋንታካ ቃሲ ቦንቼዳ። ያቲና፥ ኑኒ ሃዋ ኡባ ዋጋኔ? ፆሳይ ኑ ባጋ ጊዶፔ፥ ኑና ኦኒ ኤቄታናዌ? ኢ ሃራይ ኣቶ ባሬ ናዓካ ዋዪያፔ ጉዬ ኣሺቤና፤ ሺን ኣ ኑሲ ኡባው ኣꬂዴ ኢሚ ኣጌዳ። ኢ ባሬ ናዓ ኢሜዳዌ ቃሲ ኑሲ ኡባባ ጮ ኢሜኔ? ፆሳይ ዶሬዳዋንታ ኦኔ ሞታናዌ? ፆሳይ ባሬ ሁጴው ኡንቱንታ ፂሊሴዳ። ያቲና፥ ኡንቱንቱ ቦላ ፒርዳናው ዳንዳዪያዌ ኦኔ? ሄዋ ጎፔ፥ ሃይቁዋፔ ዴንዲዴ፥ ፆሳፔ ኡሼቻ ባጋና ኡቴዳ፥ ኪሪስቶሲ ዬሱሳ፤ ኢ ቃሲ ኑሲ ጋናቴ። ሲሚ ኑና ኪሪስቶሳ ሲቁዋፔ ሻካናዌ ኦኔ? ዋዪ ዎይ ሜቱ ዎይ ዬዴርሱ ዎይ ኮሻይ ዎይ ካሉ ዎይ ያሻይ ዎይ ኦላይ ኑና ሻካኔ? ፆሳ ማፃፋይ፥ «ኑኒ ኔ ዲራው፥ ኡባ ጋላሲ ሃይቄቶ፤ ሹካው ኣፊያ ዶርሳዳን ፓይዴቴቶ» ያጌ። ሺን ኑኒ ኑና ሲቄዳ ኣኒ ሃ ዬዉዋ ኡባን ኑና ፆኒያዋንቱፔ ኣꬌቶ። ኣዪሲ ጎፔ፥ ሃይቁዋ ጊዲና፥ ዴዑዋ፥ ኪታንቻቱዋ ጊዲና፥ ሞዲያዋንታ፥ ሃዒ ዴዒያዋንታ ጊዲና፥ ሲንꬃፔ ያናዋ፥ ዎልቃማቱዋ ጊዲና፥ ቦላ ሳሉዋ ጊዲና፥ ጋርሳ ሳዓ፥ ኣይ ሜꬌታ ጊዲናካ፥ ኑ ጎዳ ኪሪስቶሳ ዬሱሳን ዴዒያ ፆሳ ሲቁዋፔ ኑና ሻካናው ዳንዳዬናዋ ታኒ ኤራዲ። *** ታኒ ቱሙዋ ሃሳያይ፤ ታኒ ኪሪስቶሳሳ፤ ቃሲ ዎርዶቲኬ። ጌሻ ኣያናይ ሞዲያ ታ ቲላ ዎዛናይ ታኒ ዎርዶቴናዋ ታው ማርካቴ። ታው ኣሹዋን ዛሬ ጊዲያ ታናዳን ኣማኒያዋንቶ፥ ታ ዎዛናን ዳሮ ቃሬታይኔ ኣጌና ቆፋይ ዴዔ። ኣዪሲ ጎፔ፥ ታኒ ታ ሁጴው ኡንቱንቱ ዲራው፥ ፆሳ ሼቃፔ ጋርሳና ዴዓሪኪታሻ! ቃሲ ኪሪስቶሳፔካ ሻኬታሪኪታሻ! *** ኡንቱንቱ ኢስራዔሊያ ኣሳቱዋ፤ ፆሳይ ኡንቱንታ ባሬ ናና ኡዲዴ፥ ባሬ ቦንቹዋ ኡንቱንቱና ሻኬዳ። ኡንቱንቱና ቃላ ጌሊዴ፥ ሂጊያ ኡንቱንቶ ኢሜዳ። ኡንቱንቱ ፆሳው ቤሲያ ኦጊያን ጎዪኒኖ፤ ቃሲ ፆሳይ ኢማና ጌዳዋካ ኣኬዲኖ። ኡንቱንቱ ዜሬꬃኒ ካሴ ኣዋቱዋ ዛሬ፤ ቃሲ ኪሪስቶሲካ ኣሹዋን ኡንቱንቱ ዛሬ። ኢ፥ ኡባፔ ቦላ ጊዲዴ ሞዲያ፥ ሜꬊናው ጋላቴቴዳዌ ፆሳ። ኣሜንዒ። ሺን ታኒ፥ «ፆሳይ ኢማና ጌዳዌ ኣታና» ያጊኬ። ኣዪሲ ጎፔ፥ ኢስራዔሊያ ኣሳ ኡባቱ ፆሳይ ዶሬዳዋንታ ጊዲኪኖ። ቃሲ ኣብራሃሜ ዜሬꬃቱ ኡባቱ ፆሳ ናና ጊዲኪኖ። ፆሳይ ኣብራሃሞሲ፥ «ኔ ዜሬꬃይ ዪሳቃ ባጋና ፄሴታናዋ» ያጌዳ። ሄዋ ጉሳይ ኡንቱንቱ ፆሳይ ኢማና ጌዳ ኦጊያን ዬሌቴዳ ናናይ ዛሪያዳን ፓይዴታና፤ ሺን ኣሳ ቆፋዳን ዬሌቴዳዋንቱ ፆሳ ናና ጊዲኪኖ ጉሳ። ኣዪሲ ጎፔ፥ ፆሳይ ኢማና ጊዴ ሃሳዬዳዌ ሃዋ፤ «ታኒ ሃ ጌቴቴዳዋዳን ሄዎዴ ያና፤ ሳራካ ኣቱማ ናዓ ዬላና» ያጌዳ። ሄዋ ፃላላካ ጊዴና፤ ኢርቢቃ ዬሌዳ ማንቴ ናና ኣዉ ኢቱዋ፤ ኢካ ኑ ኣዉዋ ዪሳቃ። ሺን ኢቲ ናዓ ዶሬዳ ፆሳይ ባሬ ሁጴው ቆፔዳዋ ጊዳናዳን፥ ፆሳይ ኢርቢቂው፥ «ባይራይ ቴፋው ኣዛዜታና» ያጌዳ፤ ኢ ሄዋ ኡንቱንቱ ዬሌታናፔኔ ኢታባ ዎይ ሎዖባ ኣይኔ ኦꬃናፔ ካሴና ጌዳ። ሄዋ ዲራው፥ ፆሳ ዶሩ ኣ ፄሴዳዋዳኒፔ ኣቲን፥ ኡንቱንቱ ኦꬄዳዋና ጊዴና። *** ፆሳ ማፃፋይ፥ «ያዪቆባ ሲቃዲ፤ ሺን ኤሳ ኢፃዲ» ያጌ። ያቲና፥ ኑኒ ዋጋኔ? ፆሳይ ዴሺሲዴ ፒርዲ? ሄዋ ጊዴና። ኣዪሲ ጎፔ፥ ሙሴው ኢ፥ «ታኒ ማራናው ኮዪያዋንታ ማራና፤ ቃሲ ቃሬታናው ኮዪያዋንቱሲካ ቃሬታና» ያጌዳ። ሲሚ ፆሳይ ኣሳ ማሪያዌ ኢ ማራናው ኮዪያ ዲራሳፔ ኣቲን፥ ኣሳይ ኮዪያ ዎይ ኦꬂያ ዲራሳ ጊዴና። ኣዪሲ ጎፔ፥ ፆሳ ማፃፋይ ጊብፄ ካቲያሲ፥ «ታኒ ታ ዎልቃ ኔናን ቤሳናዉኔ ታ ሱንꬃይ ኣላሚያ ኡባን ኦዴታናው፥ ሄዋሲ ታኒ ኔና ካዉꬃዲ» ያጌ። ሲሚ ፆሳይ ማራና ኮዪያዋ ማሬ፤ ቃሲ ዎዛና ጎርዳና ኮዪያዋ ዎዛና ጎርዴ። ሲሚ ሂንቴ ታና፥ «ሄዌ ቱማ ጊዶፔ፥ ፆሳይ ኣሳ ባዪዙዋሲ ኣያው ቶሺ? ፆሳይ ጌዳዋ ኢፃዲ ጋናዌ ኦኔ?» ያጋናው ዳንዳዪታ። ሺን ታ ላጌው፥ ፆሳሲ ዛራናው ኔኒ ኦኔ? ኡርቃፔ ሜꬌቴዳ ሚሻይ ጉዬ ዛሪዴ ባሬና ሜꬌዳዋ፥ «ታና ሃዋዳን ኣዪሲ ሜꬋዲ?» ጊዴ ኦቻናው ዳንዳይ? ዎይ ኡርቃ ሜꬊያዌ ባሬ ሜꬊያ ኡርቃ ባሬ ኮዪያዋዳን ኦꬃናዉኔ ኢቲ ማላ ኡርቃፔ ኢቱዋ ቦንቾ ሚሻ ኡዲዴ፥ ቃሲ ኢቱዋ ቶሼቴዳ ኦሱዋ ኦꬂያ ሚሻ ኡዲዴ ሜꬋናው ኣው ማቲ ባዌ? ፆሳይ ኦꬄዳዌ ሃዋና ኢቱዋ። ኢ ባሬ ሃንቁዋ ቤሳናዉኔ ባሬ ዎልቃ ኤሪሳናው ኮዬዳ፤ ኢ ባሬ ሃንቁዋን ፒርዳናዋንታ፥ ባዪዛናው ጊጊ ኡቴዳዋንታ፥ ዳሮ ጌንጩዋን ዳንዳዬዳ። ቃሲ ኢ ማሬዳዋንቶ፥ ባሬ ቦንቹዋ ኣካናው ጊጊሲ ዎꬄዳዋንቱሲ ኢ ኣይ ኬና ቦንቼቲንቶኔ ቤሳናው ኮዬዳ። ኑኒ ኢ ፄሴዳዋንታ፤ ሺን ኣዪሁዳ ኣሳ ፃላላፔ ጊዴናን፥ ኣዪሁዳ ጊዴና ኣሳ ጊዶፔካ ፄሴዳ። ሆሴዓ ማፃፋን ኢ ጊያዌ ሃዋ፤ «ታ ኣሳ ጊዴናዋንታ፥ ‹ታ ኣሳ› ጋዴ ፄሳና። ታኒ ሲቃቤና ዛሪያካ፥ ‹ታ ሲቃቶ› ጋዴ ፄሳና። ‹ሂንቴንቱ ታ ኣሳ ጊዲኪታ› ጊያዋ ኡንቱንቱ ሲሴዳ ሄ ሳዓን፥ ኡንቱንቱ፥ ‹ዴዑዋ ፆሳ ናና› ጌቴቲዴ ፄሴታናዋንታ» ያጌ። ኢሲያሲ ኢስራዔሊያ ኣሳባ ያጊዴ ሃሳዬዳ፤ «ኢስራዔሊያ ኣሳይ ኣባ ማታን ዴዒያ ሻፊያ ኬና ጊዶፔካ፥ ኡንቱንቱፔ ኣማሬዳዋንቱ ፃላላይ ኣታና። ኣዪሲ ጎፔ፥ ጎዳይ ሳዓ ቦላን ዴዒያ ኣሳ ኡባ ቦላ ኤሌካ ፒርዳና» ያጌዳ። ኢሲያሲ ካሴቲዴ፥ «ኡባፔ ዎልቃማ ጎዳይ ኑሲ ኣማሬዳ ዜሬꬃ ኣሼኔንቶ፥ ኑኒ ሶዶማ ካታማዳኒኔ ጋሞራ ካታማዳን ሃኔዶሺን» ያጊ ሃሳዬዳ። ያቲና፥ ኑኒ ዋጋኔ? ፂሎቴꬃ ኮዪቤና ኣዪሁዳ ጊዴና ኣሳይ ኣማኑዋን ፂሌዳ፤ ሺን ኢስራዔሊያ ኣሳይ ባሬንታ ፂሊሲያ ሂጊያ ኮዬዳዋንቱ ሄ ሂጊያ ዴሚቤይኪኖ። ኣዪሲ ዴሚቤይኪኖ? ኡንቱንቱ ኦሱዋናፔ ኣቲን፥ ኣማኑዋን ፂሎቴꬃ ኮዪቤና ዲራሳ። ኡንቱንቱ ፆሳ ማፃፋይ፥ «ኣኬኪቴ፤ ታኒ ፂዮኔን ኣሳ ꬉቢያ ሹቻ፥ ኡንቱንቱ ኦጊያን ዛላ ዎꬃና። ሺን ኣኒ ኣማኒያ ኦኒኔ ዬላቴና» ያጊዴ ፃፌቶዋዳን ꬉቢያ ሹቻን ꬉቤቴዲኖ። *** ታናዳን ኣማኒያዋንቶ፥ ታኒ ኢስራዔሊያ ኣሳው ታ ኩሜንꬃ ዎዛናፔ ኣሞቲያዌኔ ፆሳ ዎሲያዌ ኡንቱንቱ ኣታናሳ፤ ኣዪሲ ጎፔ፥ ኡንቱንቱ ፆሳው ኦꬃናው ሎይꬂ ኮዪያዋ ታኒ ማርካታይ፤ ሺን ኡንቱንቱ ፆሳው ኦꬃናው ሎይꬂ ኮዪያ ኮሻይ ቱሙ ኤራቴꬃፔ ጊዴና። ኣዪሲ ጎፔ፥ ፆሳይ ኣሳ ፂሊሲያ ኦጊያ ኡንቱንቱ ኤሬናን፥ ባሬንቱ ሁጴ ፂሎቴꬃ ኤሳናው ኮዬዲኖ፤ ቃሲ ባሬንቱ ሁጴው ፆሳይ ኣሳ ፂሊሲያ ኦጌው ኤኖ ጊቤይኪኖ። ኣዪሲ ጎፔ፥ ኣማኔዳ ኡባይ ፂላናዳን፥ ኪሪስቶሲ ሂጊያ ቆፋ ፖሌዳ። ኣሳይ ሂጌው ኣዛዜቲዴ ፂሊያባው ሙሴ፥ «ሂጊ ኣዛዚያዋ ኦꬂያ ኦኒኔ ሄ ሂጊያን ፓፃ ዴዓና» ያጊ ፃፌዳ፤ ሺን ኣማኑዋን ፂሊያባው ጌቴቴዳዌ ሃዋ፤ «ኔ ዎዛናን፥ ‹ኦኒ ሳሉዋ ፑዴ ባኔ?› ጎፓ። ሄዌ ኪሪስቶሳ ዱጌ ዎꬃናሳ፤ ዎይ ‹ዱጌ ሳዓ ጋርሳ ዎꬋናዌ ኦኔ?› ጎፓ። ሄዌ ኪሪስቶሳ ሃይቁዋፔ ዴንꬃናሳ። ሺን ኢ ጊያዌ ሃዋ፤ ‹ፆሳ ቃላይ ኔ ማታና፤ ኔ ዶናኒኔ ኔ ዎዛናን ዴዔ› ጌቴቴዳ» ያጌ። ሄዌካ ኑኒ ሂንቴንቶ ኦዲያ ኣማኑዋ ቃላ። ኔኒ፥ «ዬሱሲ ጎዳ» ጋዴ ኔ ዶናን ማርካቶፔ፥ ቃሲ ፆሳይ ሃይቁዋፔ ኣ ዴንꬄዳዋ ኔ ዎዛናን ኣማኖፔ፥ ኔኒ ኣታና። ኣዪሲ ጎፔ፥ ኣሳይ ባሬ ዎዛናን ኣማኒዴ ፂሌ፤ ባሬ ዶናንካ ማርካቲዴ ኣቴ። ፆሳ ማፃፋይ፥ «ኣኒ ኣማኒያ ኦኒኔ ዬላቴና» ያጌ። ኣዪሁዳ ኣሳኔ ኣዪሁዳ ጊዴና ኣሳ ጊዶን ዱማቴꬃይ ባዋ። ኢቲ ፆሳይ ኡባ ጎዳ፤ ኢ ባሬና ፄሲያ ኡባቶ ዳሮ ኬካ። ኣዪሲ ጎፔ፥ ፆሳ ማፃፋይ፥ «ጎዳ ሱንꬃ ፄሲያ ኦኒኔ ኣታና» ያጌ። ያቲና፥ ኡንቱንቱ ኣ ኣማኒቤናዋንታ ጊዶፔ፥ ዎቲ ኣ ፄሳናው ዳንዳዪኖ? ቃሲ ቃላ ሲሲቤናዋንቱ ዋኒ ኣማናናው ዳንዳዪኖ? ቃላ ኦዲያዌ ꬋዮፔ፥ ኡንቱንቱ ዋኒ ሲሳናው ዳንዳዪኖ? ቃሲ ቃላ ኦዲያዋንቱ ኪቴቴናን ኣጎፔ፥ ኦሱ ዎቲ ኦዴታናው ዳንዳዪ? ኣዪሲ ጎፔ፥ ፆሳ ማፃፋይ፥ «ናሼቺያ ሚሺራቹዋ ኦዲያዋንቱ ዩሳይ ዎቲ ሎዒ!» ያጌ። ሺን ኡንቱንቱ ኡባይ ዎንጋላው ኣዛዜቲቤይኪኖ፤ ኣዪሲ ጎፔ ኢሲያሲ፥ «ታ ጎዳው፥ ኑኒ ማርካቴዳዋ ኦኒ ኣማኔዴ?» ያጌዳ። ሲሚ ኣሳይ ቃላ ሲሲዴ ኣማኔ፤ ቃሲ ኢቲ ኡራይ ኪሪስቶሳ ቃላ፥ ኦዲና ሲሴ። ሺን ኡንቱንቱ ቃላ ሲሲቤናዌ ቱሜ ጋዴ ታኒ ኦቻይ። ቱማ ኡንቱንቱ ሲሴዲኖ፤ ፆሳ ማፃፋይ፥ «ኡንቱንቱ ሃሳያ ኮሻይ ሳዓ ኡባን ላሌቴዳ፤ ኡንቱንቱ ቃላይካ ሳዓ ጋፃ ጋኬዳ» ያጌዳ። ሺን ኢስራዔሊያ ኣሳቱ ኤሪቤይኪኖዬ ጋዴ ታኒ ኦቻይ። ሙሴ ካሴ፥ «ታኒ ሂንቴንታ ኣሳ ጊዴና ኣሳቱዋን ሴሊሳና፤ ቃሲ ኤያ ኣሳቱዋን ታኒ ሂንቴንታ ሃንቄꬂሳና» ያጌዳ። ቃሲ ኢሲያሲ ዳሮ ፃሊዴ፥ «ታና ኮዪቤናዋንቶ ቤታዲ፤ ታና ኦቺቤናዋንቶካ ቆንጫዲ» ያጌ። ሺን ኢስራዔላቱዋባ ኢ ሃሳዪዴ፥ «ጋላሳ ኡባ ኣዛዜቴናዋንቶኔ ታዋ ኢፂያዋንቶ ታ ኩሺያ ሚጫዲ» ያጌ። ያቲና፥ ፆሳይ ባሬ ኣሳ ኢፄዴ ጋዴ ኦቾ? ሄዋ ጊዴና፤ ኣዪሲ ጎፔ፥ ታኒ ታ ሁጴው ኢስራዔሊያ ኣሳ፤ ኣብራሃሜ ዛሬ፤ ቢኒያማ ያራ። ፆሳይ ኮይሮ ዶሬዳ ባሬ ኣሳቱዋ ኢፄና፤ ፆሳ ማፃፋይ፥ ኤላሳ ታሪኪያ ጊዶን፥ ኤላሲ ኢስራዔላቱዋ ፆሳ ሲንꬃን ዎቲ ሞቲንቶ፥ ሂንቴ ኤሪታ። «ጎዳው፥ ኡንቱንቱ ሄ ሱንꬃን ናባቱዋ ዎꬌዲኖ፤ ኔ ያርሺያሳካ ኮሌዲኖ። ያቲና፥ ታኒ ታ ፃላላይ ኣታዲ። ቃሲ ኡንቱንቱ ታናካ ዎꬋናው ኮዪኖ» ያጌዳ። ፆሳይ ኣው ዋጊ ዛሬዴ? «ታኒ ኤቃ ባዓላው ጉልባቲቤና ላፑ ሻዓ ኣሳ ታው ኣሻዲ» ያጌዳ። ሃዋዳንካ ቃሲ ሃ ዎዲያን፥ ፆሳይ ባሬ ኣꬎ ኬካቴꬃን ዶሬዳ ኣማሬዳ ኣሳቱ ዴዒኖ። ሺን ኢ ባሬ ኣꬎ ኬካቴꬃን ዶሬዳፔ ኣቲን፥ ኡንቱንቱ ኦሱዋን ኡንቱንታ ዶሪቤና፤ ሄዌ ꬋዮፔ፥ ኣ ኣꬎ ኬካቴꬃይ ቱሙ ኣꬎ ኬካቴꬃ ጊዴና። ያቲና፥ ኣዬ? ኢስራዔሊያ ኣሳቱ ባሬንቱ ኮዪያዋ ዴሚቤይኪኖ፤ ሺን ፆሳይ ዶሬዳ ኣማሬዳዋንቱ ዴሜዲኖ። ዮኮንቱ ዎዛናይ ሚኔዳ። ሃዋዳንካ፥ ፆሳ ማፃፋይ፥ «ፆሳይ ኡንቱንቱ ባሬንቱ ኣይፊያን ቤዔናዳኒኔ ባሬንቱ ሃይꬃን ሲሴናዳን፥ ሃዋ ጋካናው ኡንቱንቶ ኣዛላ ኣያና ኢሜዳ» ያጌዳ። ቃሲ ዳዊቴ ያጌዳ፤ «ኡንቱንቱ ሚያ ጋይታይ ኡንቱንታ ጲሪያዳን ኦይቆ፤ ኡንቱንታ ጉፋንꬆ፤ ኡንቱንቶ ኩሺያ ሺሪ ጪጎ። ኡንቱንቱ ፄሌናዳን፥ ኡንቱንቱ ኣይፊ ጎዜቶ፤ ኡባ ዎዴ ባሬንቱ ሜቱዋን ቁኒዴ ዴዒኖ» ያጌዳ። ያቲና፥ ኣዪሁዳቱ ꬉቤቴዳ ዎዴ፥ ዴንዴናዳን ኩንዴዲኖ? ሄዋ ጊዴና፤ ኡንቱንቱ ናጋራ ኦꬄዳ ዲራው፥ ኣቶቴꬃይ ኡንቱንቱ ኣዪሁዳ ጊዴና ኣሳቱዋ ቃናታናዳን፥ ኣዪሁዳ ጊዴና ኣሳው ዬዳ። ሺን ኣዪሁዳቱ ናጋራ ኦꬄዳ ዲራው፥ ኣላሜው ዳሮ ኣንጁ ዬዳ፤ ቃሲ ኡንቱንቱ ኩንዴꬃይካ ኣዪሁዳ ጊዴና ኣሳው ዳሮ ኣንጁዋ ኣሄዳ። ያቲና፥ ኣዪሁዳቱ ኡባይ ጉጄቲያ ዎዴ፥ ኣንጁ ዎይሳ ኬና ዳራንዴሻ! ሺን ታኒ ሃዒ ሂንቴንቶ፥ ኣዪሁዳ ጊዴና ኣሳው ሃሳያይ፤ ታኒ ኣዪሁዳ ጊዴና ኣሳው ዬሱሲ ኪቴዳዋ ጊዲያ ዲራው፥ ታ ኦሱዋ ቦንቻና። ታኒ ታ ዛሬ ጊዲያ ኣሳቱዋ ቃናታንቻቱዋ ኡዶፔ፥ ኦኒ ኤሪ ኡንቱንቱፔ ኣማሬዳዋንታ ኣሼናን ኣጊኬ። ኣዪሲ ጎፔ፥ ፆሳይ ኡንቱንታ ኢፄዳ ዎዴ፥ ሃ ኣላሚ ፆሳና ሲጌቴዳ። ያቲና ፆሳይ ኡንቱንታ ሺሺ ኣኪያ ዎዴ፥ ሃይቄዳዌ ዴዑዋ ዴማናፔ ኣቲን፥ ኣዬ ሃናኔ? ኮይሮ ኣይፌ ባጋ ሙናቃይ ኣንጄቴዳዋ ጊዶፔ፥ ሙሜ ሙናቃይካ ቃሲ ኣንጄቴዳዋ ጊዳና፤ ኢቲ ሚꬃ ፃጱ ኣንጄቴዳዋ ጊዶፔ፥ ሃይꬃይ ኡባይካ ቃሲ ኣንጄቴዳዋ ጊዳና። ሺን ዎራን ዶሌዳ ዎጋራ ሚꬃ ቃንካፔ ኢቱዋ ኢቱዋ ካሬዳሳን፥ ኔና ዎራን ዶሌዳ ዎጋራ ሚꬃ ማላ ሄ ዎጋራና ጋꬂ ቃቼዶ፤ ኔኒ ቃሲ ዛይቲ ኬሲያ ዎጋራ ሚꬃ ፃጱዋና ኢቲፔ ዴዓ። ሲሚ ኔኒ ሄ ካሬቲ ዎꬌዳ ቃንካቱዋ ቦላን ኦቶሬታናው ቤሴና፤ ሺን ኔኒ ኦቶሬቲያዋ ጊዶፔካ፥ ፃጱ ኔና ቶኬፔ ኣቲን፥ ኔኒ ፃጱዋ ቶኬናዋ ኣኬካ። ሄዋ ዲራው ኔኒ፥ «ኤ፤ ሺን ቃንካቱ ታኒ ኡንቱንቱ ሳዓን ጌላናዳን ካሬቴዲኖ» ያጋና። ሄዌ ቱማ፤ ኡንቱንቱ ኣማኒቤና ዲራው፥ ካሬቴዲኖ፤ ኔኒ ኣማኔዳ ዲራው፥ ሄ ሳዓን ኤቃዳ። ሺን ያያፔ ኣቲን፥ ኦቶሮ ቆፋ ቆፖፓ። ኣዪሲ ጎፔ፥ ፆሳይ ሜꬌታ ቃንካ ማላቲያዋንቶ፥ ኣዪሁዳቶ ቃሬቲቤናዋ ጊዶፔ፥ ኔው ቃሬቲያዋ ማላቲ? ሲሚ ፆሳ ኬካቴꬃኔ ፃላቴꬃ ቤዓ። ኩንዴዳዋንቶ ኢ ፃላ፤ ሺን ኔኒ ኣ ኬካቴꬃኒ ሚናዴ ዴዖፔ፥ ኢ ኔው ኬካ፤ ሄዌ ꬋዮፔ፥ ኔኒካ ቃሲ ካሬታና። ኣዪሁዳቱካ ቃሲ ኣማኔናን ኢፂያዋ ኣጎፔ፥ ፆሳይ ካሴ ኡንቱንቱ ዴዒያሳን ዛሪዴ ዎꬃና፤ ኣዪሲ ጎፔ፥ ኢ ኡንቱንታ ዛሪዴ ዎꬃናው ዳንዳዬ። ኣዪሲ ጎፔ፥ ፆሳይ ሂንቴንታ ዎራን ዴዒያ ኮይሮ ሜꬌታ ዎጋራ ሚꬃፔ ቃንፂዴ፥ ሂንቴንቱ ሜꬌታን ዎራን ዶሎዋንቱዳን ጊዴናን ጋዴን ቶኬዳ ዎጋራ ሚꬃና ጋꬂ ኦይꬄዳዋ ጊዶፔ፥ ያቲና፥ ሄ ካሬቲ ዎꬌዳ ኮይሮ ሜꬌታ ቃንካቱዋ ዛሬꬂዴ፥ ኡንቱንታ ኮይሮ ሜꬌታን ዶሌዳ ባሬንቱ ዎጋራ ሚꬃና ጋꬂ ቃቻናው፥ ኣ ኣዬ ፆናናዌ? ታናዳን ኣማኒያዋንቶ፥ ታኒ ሂንቴ ኤራናዳን ኮዪያ ቱሙ ፁራ ዬዉ ዴዔ፤ ሄዌ ሂንቴ ሂንቴንታ ሂንቴሬካ፥ ኑኒ ኣꬌዳ ኤራንቻ ያጊዴ ቆፒያዋ ዲጌ፤ ኢስራዔሊያ ኣሳፔ ባጋይ ሲሴናን ኢፄዳ፤ ሺን ሄ ሲሴናን ኢፂያዌ ኣዪሁዳ ጊዴና ኣሳ ኩሜንꬃ ፓይዱ ፆሳኮ ጋካናሲ ጋሚዓና። ሃዋዳንካ፥ ኢስራዔሊያ ኣሳይ ኡባይ ኣታና፤ ፆሳ ማፃፋይ ሃዋዳን ያጌ፤ «ኣሺያዌ ፂዮኔ ጌቴቲያ ካታማፔ ዪዴ፥ ናጋራ ኦሱዋ ኡባ ያዪቆባ ዛሪያፔ ዲጋና። ታኒ ኡንቱንቱ ናጋራ ኣቶ ያጊያ ዎዴ፥ ኡንቱንቱና ጌላና ቃላ ጫቁ ሃዋ» ያጌ። ኣዪሁዳ ጊዴና ኣሳቶ፥ ኣዪሁዳቱ ዎንጋላ ሚሺራቹዋ ባጋና ሂንቴ ዲራው፥ ፆሳና ሞርኬ፤ ሺን ፆሳ ዶሩዋ ባጋና ኣዋቱዋ ዲራው፥ ኡንቱንቱ ኢ ሲቂያዋንታ። ኣዪሲ ጎፔ፥ ፆሳይ ባሬ ኢሜዳዋ ጉዬ ኣኬና፤ ቃሲ ባሬ ፄሴዳዋ ኢፃዲ ጌና። ኣዪሁዳ ጊዴናዋንቶ፥ ፆሳው ሂንቴ ካሴና ኣዛዜቲቤይኪታ፤ ሺን ኣዪሁዳቱ ኣዛዜቴናን ኢፄዳ ዲራው፥ ፆሳ ማሮቴꬃ ሃዒ ሂንቴ ኣኬዲታ። ሃዋዳን፥ ሂንቴ ኣኬዳ ማሮቴꬃ ዲራው፥ ኣዪሁዳቱ ቃሲ ፆሳ ማሮቴꬃ ሃዒ ኣካናዳን፥ ፆሳው ኣዛዜቴናን ኢፄዲኖ። ኣዪሲ ጎፔ፥ ፆሳይ ኣሳ ኡባ ማራና ማላ፥ ኣሳይ ኡባይ ኣው ኣዛዜቴናን ኢፂያ ሃኖታን ቃቼዳ። ፆሳ ዱሬቴꬃይ ዎይሳ ኬና ዳሬ? ኣ ኣꬎ ኤራቴꬃይኔ ኣ ኤራቴꬃይ ዎይሳ ኬና ጪሜ? ኣ ፒርዳ ኦዳናዌ ኦኔ? ኢ ባሬ ኦꬂያዋ ኣዪሲ ኦꬂንቶ፥ ኦኔ ኣኬኪያዌ? ሄዋ ፆሳ ማፃፋይ፥ «ጎዳ ዎዛና ኤሪያዌ ኦኔ? ኣ ዞራናው ዳንዳዪያዌ ኦኔ? ዎይ ባሬ ኩሺያ ዛራና ማላ፥ ኣው ኢቲባ ኢሜዳዌ ዴዒ?» ያጌ። ኣዪሲ ጎፔ፥ ኡባባ ኢ ሜꬌዳ፤ ቃሲ ኡባባይካ ኣ ማታኒኔ ኣዉኔ ዴዔ፤ ፆሳው ሜꬊናው ቦንቹ ጊዶ። ኣሜንዒ። ሲሚ ታናዳን ኣማኒያዋንቶ፥ ሂንቴ ሂንቴ ኦናቴꬃ ፆሳ ናሼቺያ ዴዖኔ ጌሻ ያርሹዋ ኡዲዴ፥ ፆሳው ሺሻናዳን፥ ታኒ ሂንቴንታ ፆሳ ማሮቴꬃን ዎሳይ፤ ፆሳው ሂንቴ ጎዪናናው ቤሲያ ቱሙ ኦጊ ሄዋ። ፆሳይ ሂንቴ ቆፋ ኡባና ዱማዪዴ፥ ሂንቴንታ ላሞፔ ኣቲን፥ ሃ ኣላሚያ ኣሳ ማላቶፒቴ። ሄ ዎዴ ሂንቴ፥ ፆሳ ሼኒ፥ ሎዖባይ፥ ኣ ናሼቺያባይኔ ቃሲ ፖሎ ጊዴዳባይ ኣዬንቶ ኤራኒታ። ፆሳይ ታው ኢሜዳ ኣꬎ ኬካቴꬃን ታኒ ሂንቴንቶ ኦዳይ። ሂንቴንቱ ቆፓናው ቤሲያዋፔ ኣꬂዴ፥ ኦቶሩዋን ቆፖፒቴ፤ ሄዋ ኣጊዴ፥ ዎዛናማ ኣሳዳን ቆፒቴ፤ ፆሳይ ሂንቴንቶ ሁጲያን ሁጲያን ኢሜዳ ኣማኑዋ ኬናን ሂንቴ ቦላ ፒርዲቴ። ኑ ኢቲ ቦላ ጊዶን፥ ጮራ ቦላ ቆሞቱ ዴዒኖ፤ ሄ ቆሞቱዋ ኡባዉካ ዱማ ዱማ ኦሱ ዴዔ። ሃዋዳን፥ ኑኒ ጮራ ኣሳ ጊዶፔካ፥ ኪሪስቶሳ ባጋና ኢቲ ኣሳ። ቃሲ ኑኒ ኢቲ ኣሳቴꬃ ቆሞቱዋዳን፥ ኢቱ ኢቱዋና ኦይቄቲ ኡቴዶ። ፆሳይ ኑሲ ኢሜዳ ኣꬎ ኬካቴꬃን ዱማ ዱማ ኢሞታይ ዴዔ። ኑ ኢሞታይ ናቤቴꬃ ጊዶፔ፥ ኑሲ ዴዒያ ኣማኑዋ ኬና ኦዳናው ቤሴ። ሃራቱዋ ማዱሳ ጊዶፔ፥ ሄ ኦሱዋን ሚናናው ቤሴ፤ ታማሪሱሳ ጊዶፔ፥ ሄ ታማሪሱዋን ሚናናው ቤሴ። ሃራ ኣሳቱዋ ሚኒሱሳ ጊዶፔ፥ ሄ ኦሱዋን ሚናናው ቤሴ። ባሬ ሁጴው ዴዒያባፔ ሃራቱዋሲ ኢሚያ ኦኒኔ ዎዛናፔ ኢሞ። ማታይ ዴዒያ ኡራይ ሚኒሲ ኦꬃናው ቤሴ፤ ሃራቱዋሲ ኬኪያ ኡራይ ናሼቻን ኬካናው ቤሴ። ሂንቴንቱ ሲቁ ኣሳ ቤሳናው ሲቄቲያዋ ጊዳናው ቤሴና። ኢታባ ኢፂቴ፤ ሎዖባ ሚኒሲዴ ኦይቂቴ። ኢቱ ኢቱዋና ኢሻቱዋዳን ሲቄቲቴ፤ ኢቱ ኢቱዋ ቦንቺያዋን ናሼቲቴ። ሚኒዴ ኦꬂቴ፤ ኣዛሎፒቴ፤ ሂንቴ ኩሜንꬃ ዎዛናፔ ጎዳው ኦꬂቴ። ፆሳይ ሂንቴንቶ ኢማና ጌዳዋን ናሼቲቴ፤ ዋዪያን ጌንጪቴ። ኡባ ዎዴ ፆሳ ዎሲቴ፤ ፆሳ ኣሳቱዋ ኮሺያባን ማዲቴ፤ ኢማꬃ ሞኪቴ። ሂንቴንታ ዬዴርሲያዋንታ ኣንጂቴ፤ ኡንቱንታ ኣንጂቴፔ ኣቲን፥ ሼቆፒቴ። ናሼቲያዋንቱና ናሼቲቴ፤ ዬኪያዋንቱናካ ዬኪቴ። ኣሳ ኡባው ኢቲ ማላ ቆፋ ቆፒቴ፤ ኦꬂያባን ኡባን ሂንቴንታ ቶቺዴ ዴዒቴፔ ኣቲን፥ ኦቶሬቶፒቴ፤ ሂንቴንታ ሂንቴሬካ ኣꬎ ኤራንቻ ጊዴ ቆፖፒቴ። ኦኒኔ ሂንቴንቶ ኢታባ ኦꬆፔ፥ ሄ ኡራው ኢታባ ኦꬂ ዛሮፒቴ፤ ኣሳ ኡባው ሎዖባ ኦꬃናው ቆፒቴ። ኣሳ ኡባና ሳሮቴꬃን ዴዓናው፥ ሂንቴ ባጋና፥ ሂንቴንቶ ዳንዳዬቴዳባ ኡባ ኦꬂቴ። ታናዳን ኣማኒያዋንቶ፥ ሂንቴ ሂንቴ ሁጴው ኣሳው ሃሉዋ ኬሶፒቴ። ፆሳይ ሃሉዋ ኬሳናዳን፥ ኣ ቦላ ኦሊቴ። ኣዪሲ ጎፔ፥ ፆሳ ማፃፋይ፥ «ጎዳይ፥ ‹ታኒ ሃሉዋ ኬሳና፤ ታኒ ኩሺያ ጪጋና› ጌ» ያጌ። ሺን ፆሳ ማፃፋይ፥ «ኔ ሞርኪ ኮሻቶፔ፥ ሚዛ። ሳሜቶፔ፥ ኡሻ። ኣዪሲ ጎፔ፥ ኔኒ ሄዋ ኦꬂያዋን ኣ ዳሪሳ ዬላያሳ» ያጌ። ኢታባ ሎዖባን ፆናፔ ኣቲን፥ ኢታባይ ኔና ፆኖፖ። ኣሳይ ኡባይ ጋዲያ ኣዪሲያዋንቱሲ ኤኖ ጋናው ቤሴ፤ ኣዪሲ ጎፔ፥ ፆሳይ ጌናን ዴዒሺን፥ ጋዲያ ኣዪሲያዌ ዴዓናው ዳንዳዬና። ሃዒ ዴዒያ ኣዪሲያዋንቱካ ፆሳይ ዎꬄዳዋንታ። ሄዋ ዲራው፥ ሃዒ ዴዒያ ኣዪሲያዋንታ ኢፂያ ኦኒኔ ፆሳ ኣዛዙዋ ኢፄ፤ ባሬ ቦላ ፒርዳ ኣሄ። ኣዪሲ ጎፔ፥ ኣዪሲያዋንቱ ኢታባ ኦꬂያዋንታ ያሻናዋፔ ኣቲን፥ ሎዖባ ኦꬂያዋንታ ያሺኪኖ። ኣዪሲያዎ ያዬናን ኣጋናው ኮያይ? ያቶፔ ሎዖባ ኦꬃ፤ ኢ ኔና ጋላታና። ኣዪሲ ጎፔ፥ ኢ ኔው ሎዖባ ኦꬃናው፥ ፆሳው ቆማ። ሺን ኔኒ ኢታባ ኦꬆፔ፥ ኢታባ ኦꬄዳዋ ኢ ሴሪያ ዲራው፥ ኣው ያያ፤ ኢ ፆሳ ቆማ። ቃሲ ኢታባ ኦꬂያዋንቱ ቦላ ፆሳ ሃንቁዋ ኢ ኣሄ። ሄዋ ዲራው፥ ጋዲያ ኣዪሲያዋንቱሲ ኤኖ ጊያዌ ፆሳ ሙራ ፃላላሳ ጊዴናን፥ ሂንቴንቱ ዎዛና ቆፋ ዲራዉካ ኤኖ ጋናው ቤሴ። ኣዪሲ ጎፔ፥ ጋዲያ ኣዪሲያዋንቱ ባሬንቱ ኦሱዋ ኦꬂያ ዎዴ፥ ፆሳው ኦꬂያ ዲራው፥ ሂንቴ ቃራፃ ቃንፂያዌ ሄዋሳ። ኡባ ኣሳዉካ ቤሲያዋ ኢሚቴ። ጊራ ጊራናው ቤሲያዎ ጊሪቴ፤ ቃራፃ ቃንፃናው ቤሲያዎ ቃንፂቴ፤ ያያናው ቤሲያዎ ያዪቴ፤ ቦንቹ ቤሲያዋ ቦንቺቴ። ሂንቴንቱ ኢቱ ኢቱዋና ሲቄታናፔ ኣቲን፥ ሃራ ኣጩ ኦ ቦላኒኔ ዴዖፖ። ኣዪሲ ጎፔ፥ ሃራ ሲቂያ ኦኒኔ ሂጊ ጊያዋ ፖሌዳ። «ዎሹሞፓ፤ ዎꬎፓ፤ ዉዖፓ፤ ኣሳባ ኣሞቶፓ» ጊያ ኣዛዛቱኔ ሃራ ኣዛዛቱ ኡባቱ፥ «ኔ ሾሩዋ ኔ ሁጲያዳን ሲቃ» ጊያ ኣዛዙዋን ኩሚኖ። ባሬ ሾሩዋ ሲቂያ ኦኒኔ ኣው ኢታባ ኦꬄና፤ ሄዋ ዲራው፥ ሾሩዋ ሲቂያዌ ሂጊያ ኡባው ኤኖ ጊያዋ። ጌሚዑሹዋፔ ሂንቴ ቤጎቲያ ሳቲ ሃዒ ጋኬዳ ዲራው፥ ሃ ዎዲያ ኣኬኪቴ። ኣዪሲ ጎፔ፥ ኑኒ ኮይሮ ኣማኔዳ ዎዲያፔ፥ ኑኒ ኣቲያ ዎዲ ሃዒ ኑኮ ማታቴዳ። ቃማይ ኣꬋናው ሃኔ፤ ጋላሳይ ማታቴዳ። ሲሚ ኑኒ ꬉማ ኦሱዋ ኣጊዴ፥ ፖዑዋን ኦሌታናው፥ ኦላ ሚሻ ማዮይቴ፤ ጋላሲ ፖዑዋን ዴዒያ ኣሳዳን፥ ኣኔ ማራ ዴዖይቴ። ዬꬃኒኔ ማꬁዋን ጊዶፖ፤ ዎሹሙሳኒኔ ዎሹማናው ካጄሉሳና ጊዶፖ፤ ፓሉማኒኔ ቃናቲያን ጊዶፖ። ሺን ጎዳ ዬሱሲ ኪሪስቶሳ፥ ኦላ ሚሻ ኣ ማዪቴ፤ ሂንቴ ናጋራንቻ ኣሳቴꬃይ ባሬ ዎዛና ኣሙዋ ፖላናዳን፥ ኣው ቆፖፒቴ። ኣማኑዋን ኣዛሊያ ኡራ ሺሺ ኣኪቴ። ሺን ኢ ባሬ ሁጴው ቆፒያባን ኣናና ፓሉሜቶፒቴ። ኢቲ ኡራ ኣማኑ ኢ ኣያ ሚናኔ ዲጌና። ሺን ኣማኑዋን ኣዛሊያ ኡራይ ጋዴን ሞኬዳባ ፃላላ ሜ። ኡባባ ሚያ ኡራይ ኡባባ ሜና ኡራ ካꬎፖ፤ ኡባባ ሜና ኡራይካ ኡባባ ሚያ ኡራ ቦላ ፒርዶፖ። ኣዪሲ ጎፔ፥ ፆሳይ ኣ ሺሺ ኣኬዳ። ሃራ ኣሳ ቆማ ቦላ ፒርዲያዌ ኔኒ ኦኔ? ኢ ኩንዲና ዎይ ዴንዲና ባሬ ጎዳሳ፤ ሺን ጎዳይ ኣ ዴንꬃናው ዳንዳዪያ ዲራው፥ ኢ ኤቃና። ኢቲ ኡራይ፥ «ሂቃ ጋላሳይ ሃራ ጋላሳቱዋፔ ኣꬌ» ያጊዴ ቆፒያ ዎዴ፥ ሃራይ፥ «ኡባ ጋላሳቱካ ኢቲ ማላ» ጊዴ ቆፔ። ኣሳይ ኡባይ ሁጲያን ሁጲያን ሄዋዳን ኣዪሲ ቆፒንቶ ኣኬኮ። ኢቲ ጋላሳ ሃራ ጋላሳቱዋፔ ኣꬂዴ ቦንቺያ ኡራይ ጎዳ ቦንቾ ቦንቼ፤ ቁማ ሚያ ኡራይካ ጎዳ ቦንቾ ሜ። ኣዪሲ ጎፔ፥ ኢ ሄ ቁማ ዲራው፥ ፆሳ ጋላቴ። ቁማ ሜናዌካ ጎዳ ቦንቾ ሜናን ኣጌዳ፤ ቃሲ ፆሳ ጋላቴ። ኣዪሲ ጎፔ፥ ኑፔ ኦኒኔ ባሬ ሁጴ ፃላላው ዴዔና፤ ቃሲ ኦኒኔ ባሬ ሁጴ ፃላላው ሃይቄና። ኑኒ ፓፃ ዴዖፔ፥ ጎዳው ዴዔቶ፤ ቃሲ ሃይቆፔካ፥ ጎዳው ሃይቄቶ። ሲሚ ኑኒ ፓፃ ዴዖፔ ዎይ ሃይቆፔካ ጎዳሳ። ሄዋ ዲራው፥ ኪሪስቶሲ ፓፃ ዴዒያዋንቶኔ ሃይቄዳዋንቶ ጎዳ ጊዳናው ሃይቂዴ፥ ሃይቁዋፔ ዴንዴዳ። ያቲና፥ ኔኒ ኔ ኢሻ ቦላ ኣዪሲ ፒርዳይ? ዎይ ኔኒ ኔ ኢሻ ኣዪሲ ካꬋይ? ኑኒ ኡባይካ ፆሳ ፒርዳ ኦይዲያ ሲንꬃን ኤቃና። ኣዪሲ ጎፔ፥ ፆሳ ማፃፋይ፥ « ‹ታኒ ጎዳይ ታ ዴዑዋን ጫቃይ፤ ኣሳይ ኡባይ ታ ሲንꬃን ጉልባታና። ቃሲ ታኒ ፆሳ ጊዲያዋ ኣሳይ ኡባይ ማርካታና› ያጋይ» ያጌ። ሲሚ ኑኒ ሁጲያን ሁጲያን ኑባ ፆሳው ኦዳና። ሄዋ ዲራው፥ ኑኒ ኢቱ ኢቱዋ ቦላ ፒርዲያዋ ሃዋፔ ሲንꬃው ኣኔ ኣጎይቴ። ሺን ኡባፔ ኣꬂዴ፥ ሂንቴ ኢሻ ꬉቢያባ ዎይ ናጋራን ኦሊያባ ኦꬄናዳን ቆፋ ቃቺቴ። ታኒ ጎዳ ዬሱሲ ኪሪስቶሳና ዴዒያዋን፥ ባሬ ሁጴው ቱና ጊዲያባይ ባይናዋ ኤራይኔ ኣኬካይ። ሺን ኢቲ ኡራይ ኢቲባ ቱና ጊዴ ቆፖፔ፥ ሄዌ ኣው ቱና ጊዴ። ኔኒ ሚያባ ዲራው፥ ኔ ኢሻ ቆሆፔ፥ ሲሚ ኔኒ ሲቁዋን ዴዓካ። ኪሪስቶሲ ኣ ዲራው ሃይቄዳ ኣሳ ኔ ሚያ ቁማን ባዪዞፓ። ሲሚ ኔኒ ሎዖባ ጊያዋ ኣሳይ ካꬎፖ። ኣዪሲ ጎፔ፥ ፆሳ ካዉቴꬃይ ጌሻ ኣያናይ ኢሚያ ፂሎቴꬃ፥ ሳሮቴꬃኔ ናሼቻ ጊዲያዋፔ ኣቲን፥ ሙሳኔ ኡሻ ጊዴና። ኣዪሲ ጎፔ፥ ኪሪስቶሳው ሃዋዳን ኦꬂያ ኡራይ ኦኒኔ ፆሳ ናሼቼ፤ ኣሳይካ ኣ ጋላቴ። ያቶፔ፥ ኣኔ ኑኒ ሳሮቴꬃ ኣሂያባኔ ኑና ኢቱዋ ኢቱዋና ሚኒሲያባ ኡባ ኮዬቶ። ፆሳ ኦሱዋ ቁማ ዲራው ባዪዞፓ። ቁማይ ኡባይ ጌሻ፤ ሺን ሃራ ኡራ ናጋራን ዬጊያዋ ሙሳይ ኢታ። ሄዋሲ ኣሹዋ ሜናን ዎይ ኡሻ ኡሼናን ኣጊያዌ ዎይ ኔ ኢሻ ꬉቢያባ ኣያኔ ኦꬄናን ኣጊያዌ ሎዓ። ሃ ዬዉዋን ኔ ኣማኑዋ ኔፔኔ ፆሳፔ ጊዱዋን ናጋ። ኢቲ ኡራይ ሎዓ ጊዴ ኢ ኣማኔቴዳዋ ኦꬂያ ዎዴ፥ «ታኒ ሎዑዋ ኦꬃዲ» ጊዴ ባሬ ዎዛናኒ ኣማኔቶፔ፥ ሄ ኡራይ ቱሙ ኣንጄቴዳዋ። ሺን ኢ ሄ ሚያባን ሲꬎፔ፥ ኣ ሙሳይ ኣማኑዋና ጊዴና ዲራው፥ ፆሳይ ኣ ቦላ ፒርዴ፤ ቃሲ ኣማኑ ባይናን ኦꬄዳዌ ኣያዪኔካ ናጋራ። ኑኒ ኣማኑዋን ሚኔዳዋንቱ ዳቡራንቻቱዋ ቶኩዋ ቶካናው ቤሴ፤ ኑኒ ኑ ፃላላ ናሼቻናው ቤሴና። ኑኒ ሁጲያን ሁጲያን ኑ ኢሻ ማዳናው፥ ኣማኑዋን ኣ ሚኒሳናዉኔ ናሼቻናው ቤሴ። ኣዪሲ ጎፔ፥ ሃራይ ኣቶ ኪሪስቶሲካ ባሬና ናሼቺቤና። ሺን ፆሳ ማፃፋይ፥ «ኔና ቦሬዳዋንቱ ቦሬዳ ቦሪ ታ ቦላ ዎꬌዳ» ጌዳዋዳን ሃኔዳ። ፆሳ ማፃፋይ ኑሲ ኢሚያ ጌንጫኒኔ ሚኖታን ኑኒ ዴማና ጊዴ ናሼቻን ናጊ ኡቴዳዌ ዴዓና ማላ፥ ፆሳ ማፃፋን ፃፌቴዳ ኡባባይ ኑና ታማርሳናው ፃፌቴዳ። ሂንቴንቱ ኡባይ ኢቲ ዎዛና ጊዲዴ፥ ኢቲ ቃላን ፆሳ፥ ኑ ጎዳ ዬሱሲ ኪሪስቶሳ ኣዉዋ፥ ቦንቻና ማላ፥ ጌንጩዋኔ ሚኖቴꬃ ኢሚያ ፆሳይ፥ ሂንቴንቶ ኪሪስቶሲ ዬሱሲ ኦꬄዳዋዳን፥ ኢቱ ኢቱዋና ኢቲፔ ዴዒያ ኢቲ ቆፋ ኢሞ። *** ሄዋ ዲራው፥ ኪሪስቶሲ ሂንቴንታ ሞኬዳዋዳን፥ ፆሳ ቦንቾ ኢቱ ኢቱዋ ሞኪቴ። ኣዪሲ ጎፔ፥ ፆሳይ ኣማኔቴዳዋ ጊዲያዋ ኤሪሳናው፥ ፆሳይ ኣዋቶ ኢማና ጌዳዋ ቱማያናዉኔ ኣዪሁዳ ጊዴና ኣሳይ ፆሳ ኣ ማሮቴꬃ ዲራው ቦንቻናው ኪሪስቶሲ ኣዪሁዳቶ ቆማ ጊዴዳዋ ሂንቴንቶ ኦዳይ። ሄዋ ፆሳ ማፃፋይ፥ «ሄዋ ዲራው፥ ታኒ ኔና ኣዪሁዳ ጊዴና ኣሳ ጊዶን ጋላታና፤ ኔ ሱንꬃካ ሳባና» ያጌ። *** ቃሲካ፥ «ኣዪሁዳ ጊዴና ኣሳቶ፥ ፆሳ ኣሳቱዋና ናሼቲቴ» ያጌ። ቃሲካ ጉጂዴ፥ «ሂንቴንቶ፥ ኣዪሁዳ ጊዴና ኣሳቶ ኡባቶ፥ ጎዳ ጋላቲቴ፤ ኣሳው ኡባው፥ ኣ ጋላቲቴ» ያጌ። ቃሲካ ኢሲያሲ፥ «ኢሴይ ዜሬꬃይ ዪዴ ኣዪሁዳ ጊዴና ኣሳ ሞዳናው ዴንዳና። ቃሲ ኡንቱንቱ ኣ ባጋና ዴማና ጊዴ ናሼቻን ናጋና» ያጌ። ሂንቴንቱ ኣካና ጊዴ ናሼቻን ናጊያዌ ጌሻ ኣያና ዎልቃን ዲጫናዳን፥ ሂንቴንቶ ኢማና ጌዳ ፆሳይ፥ ሂንቴ ኣ ኣማኒያ ዲራው፥ ሂንቴንቶ ናሼቻኔ ሳሮቴꬃ ኩንꬂዴ ኢሞ። ታናዳን ኣማኒያዋንቶ፥ ሂንቴንቱን ሎዖቴꬃይኔ ኤራቴꬃይ ኡባይ ኩሜዳዋኔ ቃሲ ኢቱ ኢቱዋ ዞራናው ዳንዳዪያዋ ታኒ ታ ሁጴው ኤራዲ። ሺን ታኒ ሂንቴንታ ኢቲባ ኢቲባ ጉጃ ቆፊሳናው፥ ሃ ዳቢዳቢያ ጊዶን ኣይኔ ያዬናን ሂንቴንቶ ፃፋዲ። ታኒ ኪሪስቶሳ ዬሱሳ ቆማ ጊዳዴ፥ ኣዪሁዳ ጊዴና ኣሳው ኦꬃናዳን፥ ፆሳይ ታው ኣꬎ ኬካቴꬃ ኢሜዳ ዲራው፥ ታኒ ኣይኔ ያያቤይኬ፤ ኣዪሁዳ ጊዴና ኣሳይ ጌሻ ኣያና ባጋና ፆሳው ጌሻ ጊዲዴ፥ ኣ ናሼቺያ ያርሹዋ ጊዳናዳን፥ ፆሳ ዎንጋላ ሚሺራቹዋ ኦዲያዋን ጌሻቴꬃን ኦꬃይ። *** ሄዋ ዲራው፥ ታኒ ኪሪስቶሳ ዬሱሳን ጊዳዴ ፆሳው ኦꬂያባን ጬቄታናው ዳንዳያይ። ኣዪሁዳ ጊዴና ኣሳይ ፆሳው ኣዛዜታናዳን፥ ኪሪስቶሲ ታ ባጋና ቃላን፥ ኦሱዋን፥ ማላን፥ ማላታ ዎልቃኒኔ ጌሻ ኣያና ዎልቃን ኦꬄዳዋ ፃላላ ታኒ ኦዳናፔ ኣቲን፥ ሃራባ ኦዳናው ፃሊኬ። ሄዋ ዲራው፥ ዬሩሳላሜፔ ዶማዴ፥ ኢሊዋሪቆና ጌቴቲያ ጋዲያ ጋካናው ዩያዴ፥ ኪሪስቶሳ ዎንጋላ ሚሺራቹዋ ዉርሳ ኦዳዲ። *** ሃዋዳንካ፥ ታኒ ሃራ ኣሳይ ዶሜዳዋ ቦላን ዶሜናዳን፥ ኪሪስቶሳ ሱንꬃይ ፄሴቲቤናሳን ዎንጋላ ሚሺራቹዋ ኦዳናው ኣሞታዲ። ሺን ፆሳ ማፃፋይ፥ «ኣባይ ሃዋ ጋካናው ኦዴቲቤናዋንቱ ኣ ቤዓናዋንታ፤ ቃሲ ኣባ ሲሲቤናዋንቱ ኣኬካናዋንታ» ያጌ። ሄዋ ዲራው፥ ታኒ ጮራ ዎዴ ሂንቴንቱኮ ያናው ኮያይ፤ ሺን ያናው ዳንዳያቤይኬ። ሺን ታኒ ሃዒ ሃ ሄራን ታ ኦሱዋ ዉርሴዳ ዲራዉኔ ጮራ ላይꬃፔ ዶማዴ ሂንቴንታ ባዴ ቤዓናው ላሞቴዳ ዲራው ሃዒካ ሂንቴንቱኮ ባና ጋዴ ቆፓይ፤ ታኒ ኢሲፔኔ ጌቴቲያ ጋዲያ ባዴ ሂንቴንታ ቤዓናው ኮያይ፤ ቃሲ ኣማሬዳ ዎዲያ ሂንቴንታ ቤዓዴ ናሼቶዋፔ ጉዪያን፥ ኢሲፔኔ ቢሺን፥ ሂንቴ ታና ማዳና ማላ ኮያይ። ሺን ሃዒ ታኒ ፆሳ ኣሳቱዋ ማዳናው፥ ዬሩሳላሜ ባይ። ኣዪሲ ጎፔ፥ ማቂዶኒያኔ ኣካዪያ ጌቴቲያ ጋዲያን ዴዒያ ዎሳ ጎሌ ኣሳቱ ዬሩሳላሜን ዴዒያ ሂዬሳቱዋሲ ሚሻ ኢማናው ኮዬዲኖ። ኡንቱንቱ ባሬንቱ ሁጴው ሃዋ ኦꬃናው ቆፋ ቃቼዲኖ። ኡንቱንቱ ሄ ሂዬሳቱዋ ማዳናዌ ኡንቱንቶ ኣጩ ዴዔ፤ ኣዪሲ ጎፔ፥ ኣዪሁዳቱ ባሬንቱ ኣያና ኣንጁዋ ኣዪሁዳ ጊዴና ኣሳቱዋና ሻኬዳዋ ጊዶፔ፥ ኣዪሁዳ ጊዴና ኣሳቱካ ቃሲ ባሬንቶ ዴዔዳባን ኣዪሁዳቱዋ ማዳናው ቤሴ። ሄዋ ዲራው፥ ታኒ ሃ ኦሱዋ ዉርሴዳዋፔ ጉዪያኒኔ ኡንቱንቶ ሺቄዳ ሚሻ ኡባ ኢሜዳዋፔ ጉዪያን፥ ኢሲፔኔ ባዴ ሂንቴ ማታና ኣꬋና። ታኒ ሂንቴንቱኮ ቢያ ዎዴ፥ ኪሪስቶሳ ኣንጁ ታናን ኩሚና ባናዋ ኤራይ። ታናዳን ኣማኒያዋንቶ፥ ታው ፆሳ ሂንቴ ዎሲዴ፥ ዎሳን ሂንቴ ታናና ሚናናዳን፥ ጎዳ ዬሱሲ ኪሪስቶሳ ባጋናኔ ጌሻ ኣያናይ ኢሚያ ሲቆቴꬃን ታኒ ሂንቴንታ ዎሳይ። ታኒ ዪሁዳን ዴዒያ ኣማኔናዋንቱፔ ኣታናዳኒኔ ቃሲ ታኒ ዬሩሳላሜን ኦꬂያ ኦሱ ያኒ ዴዒያ ፆሳ ኣሳቱዋ ናሼቺያዋ ጊዳናዳን፥ ፆሳ ዎሲቴ። ቃሲ ፆሳይ ጎፔ፥ ታኒ ሂንቴንቱኮ ናሼቻን ባዴ፥ ሂንቴ ማታን ሼምፓና። ሳሮቴꬃ ፆሳይ ሂንቴንቱና ኡባና ጊዶ። ኣሜንዒ። ኪንኪሪያ ጌቴቲያ ካታማን ዴዒያ ኣማኒያ ኣሳና ኦꬂያ ኑ ሚቻታ ፔባ ሎዖ ማጫ ኣሳ ጊዲያዋ ታኒ ሂንቴንታ ኤሪሳይ። ሂንቴንቱ ኢዞ ጌሻቱ ጎዳ ሱንꬃን ሞኪያዋዳን ሞኪቴ፤ ቃሲ ኢዛ ሂንቴንቱፔ ኮዪያዌ ኣያ ጊዶፔካ፥ ኢዞ ማዲቴ፤ ኣዪሲ ጎፔ፥ ኢዛ ባሬ ሁጴው ጮራ ኣሳ ማዳው፤ ቃሲ ታና ታ ሁጴዉካ ዳሪሳ ማዳው። ኪሪስቶሳ ዬሱሳ ኦሱዋ ታናና ኢቲፔ ኦꬂያ ጲሪስቂሊሲኔ ኢዚ ኣሲና ኣቂላሲ ታ ሳሮቶዋ ኦዲቴ። ኡንቱንቱ ታ ሼምፑዋ ዲራው፥ ባሬንቱ ሼምፑዋ ኣꬂ ኢሜዲኖ። ኡንቱንታ ታ ፃላላ ጊዴናን፥ ኣዪሁዳ ጊዴና ኣሳ ኣማኒያ ኣሳይ ኡባይካ ጋላቴ። ቃሲ ኡንቱንቱ ጎሊያ ኣማኒያ ኣሳይ ሺቂያሳ ኡዲዴ ጋኬቲያ ኣሳ ኡባ ሳሮ ጊቴ። ኢሲያ ጋዲያን ኪሪስቶሳ ኮይሮ ኣማኔዳ ታ ሲቂያ ኤፓኔቶሳው፥ ታ ሳሮቶዋ ኦዲቴ። ሂንቴንቶ ሎይꬃ ዳቡሬዳ ማይራሞ ሳሮቲቴ። ታናና ቃሾ ጎሌን ዴዔዳ ታ ዳቦ ጊዴዳ ኣዪሁዳቱዋ፥ ኣንዲሮኒቆሳኔ ዩኒያሳ ሳሮቲቴ። ዬሱሲ ኪቴዳዋንቱ ጊዶን ኡንቱንቱ ሎይꬂ ኤሬቴዳዋንታ። ቃሲ ኡንቱንቱ ኪሪስቶሳ ታፔ ካሴና ኣማኔዲኖ። ጎዳና ኢቲፔቴꬃን ዴዒያ ታ ሲቆ ላጊያ ኣምፒሊያቶሳው ታ ሳሮቶዋ ኦዲቴ። ኪሪስቶሳ ኦሱዋ ኑናና ኢቲፔ ኦꬂያ ኡርባኖሳኔ ታኒ ሲቂያ ኢስፃኩሳ ሳሮቲቴ። ኪሪስቶሳና ኢ ዴዒያዌ ኤሬቲና ፓጪያ ፆኔዳ ኣጴሊሳው ታ ሳሮቶዋ ኦዲቴ፤ ኣሪስፆቢሎሳ ሶይ ኣሳዉካ ታ ሳሮቶዋ ኦዲቴ። ታ ዳቦ ጊዴዳ ኣዪሁዳዊያ ሄሮዲዮናኔ ኪሪስቶሳ ኣማኒያ ናርሲሴሳ ሶይ ኣሳ ሳሮቲቴ። ጎዳ ኦሱዋን ዳቡሪያ ቲሩፋይናኔ ቲሩፎሶ ጌቴቲያ ማጫዋንታ ሳሮቲቴ፤ ቃሲ ጎዳው ዳሮ ዳቡራዴ ኦꬂያ ሲቂያ ፔርሲሶ ሳሮቲቴ። ጎዳ ኦሱዋን ሎይꬂ ኤሬቴዳ ሩፎሳዬዉኔ ታና ባሬ ናዓዳን ማዴዳ ኣ ዳዪው ታ ሳሮቶዋ ኦዲቴ። ታ ሳሮቶዋ ኣሲንኪሪቶሳው፥ ፒሌጎናው፥ ሄርሜሳው፥ ፓቲሮባሳዉኔ ኡንቱንቱና ዴዒያ ኣማኒያ ኢሻቱዋ ኡባው ኦዲቴ። ፒሌጎና፥ ዩሎ፥ ኔሪያ፥ ኣ ሚቻቶ፥ ኦሉምፖሳኔ ኡንቱንቱና ዴዒያ ፆሳ ኣሳቱዋ ኡባ ሳሮቲቴ። ጌሻ ኣሳው ቤሲያ ዬሬታ ዬሬቲዴ፥ ኢቱ ኢቱዋ ሳሮቲቴ፤ ኪሪስቶሳን ኣማኒያዋንቱ ኡባቱ ሂንቴንታ ሳሮ ያጌዲኖ። ታናዳን ኣማኒያዋንቶ፥ ኣሳ ጊዶን ሻኮቴꬃ ሜꬊያዋንታ፥ ኣሳ ኣማኖ ꬉቦ ጊዲያዋንታኔ ሂንቴ ታማሬዳ ቲሚርቲያና ጋኬቴናዋ ታማሪሲያዋንታ ኣኬካናዳን፥ ታኒ ሂንቴንታ ዎሳይ። ኡንቱንቱኮ ሺቆፒቴ። ኣዪሲ ጎፔ፥ ሄዋ ማላባ ኦꬂያዋንቱ ባሬንቱ ኡሉዋሲ ኦꬂኖፔ ኣቲን፥ ኑ ጎዳ ዬሱሲ ኪሪስቶሳው ኦꬂኪኖ፤ ባሬንቱ ላቢያ ሃሳያኒኔ ቂꬊያን ኢታባ ቆፔና ኣሳ ዎዛና ባሌꬂኖ። ዎንጋላው ሂንቴ ኣዛዜቴዳዋ ኣሳይ ኡባይ ሲሴዳ። ሄዋ ዲራው፥ ታኒ ሂንቴባን ናሼታይ፤ ሺን ሎዖቴꬃው ሂንቴ ኣꬌዳ ኤራንቻ ጊዳናዳኒኔ ቃሲ ኢታባው ኣሺኬ ጊዳናዳን ኮያይ። ሳሮቴꬃ ፆሳይ ሴፃና ሂንቴ ጌዲያፔ ጋርሳና ሃኬና ማታ ዎዴ ጋጫና። ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴንቱና ጊዶ። ታናና ኦꬂያ ፂሞቶሴ ሂንቴንታ ሳሮ ያጌ፤ ቃሲ ሃዋዳንካ፥ ታ ዳባቱ ሉቂዮሲ፥ ያሶኒኔ ሶሲጳፂሮሲ ሂንቴንታ ሳሮ ያጊኖ። ታኒ፥ ፃርፂዮሲ፥ ሃ ዳቢዳቢያ ፃፌዳዌ፥ ሂንቴንቶ ጎዳ ሱንꬃን ሳሮታ ኪታይ። ኣማኒያ ኣሳይ ኡባይ ኣ ሶዪን ሺቂያ ታ ሲራ ጋዮሲ ሂንቴንታ ሳሮ ያጌ፤ ካታማ ሚሻ ኦይቂያ ኤራስፆሲኔ ኑ ኢሻይ ቁዋርፆሲ ሂንቴንታ ሳሮ ያጊኖ። ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴንቱና ኡባና ጊዶ። ኣሜንዒ። ኑኒ ፆሳ ጋላቴቶ። ታኒ ዎንጋላ ባጋና ዬሱሲ ኪሪስቶሳባ ኦዴዳዋዳኒኔ ዳሮ ዎዲያፔ ጌሚዴ፥ ሃዒ ቆንጬዳ ቱማቴꬃዳን፥ ሂንቴ ኣማኑዋን ሂንቴንታ ፆሳይ ሚኒሳናው ዳንዳዬ። ሺን ሃዒ ናባቱ ፃፌዳዋ ባጋና ቱማቴꬃይ ቆንጪያን ኤሬታናዳን ኦꬄዳ፤ ቃሲ ኣሳ ኡባይ ፆሳ ኣማኒዴ ኣዛዜታናዳን፥ ሜꬊና ፆሳ ኣዛዙዋን፥ ሃ ኣላሚያን ዴዒያ ኣሳ ዜሬꬃ ኡባው ቆንጬዳ። ኣꬌዳ ኤራቴꬃይ ኣ ፃላላው ዴዒያ ኢቲ ፆሳው ዬሱሲ ኪሪስቶሳ ባጋና ሜꬊናው ቦንቹ ጊዶ። ኣሜንዒ። ታኒ፥ ፆሳ ሼኒያን ዬሱሲ ኪሪስቶሲ ኪቴዳዋ ጊዳናው ፄሴቴዳ ጳዉሎሲኔ፥ ኑ ኢሻ ሶስቴኒሲ፥ ቆሮንቶሳን ዴዒያ ፆሳ ኣማኒያ ኣሳቱዋሲ፥ ዬሱሲ ኪሪስቶሳን ጌዬዳዋንቱሲኔ፥ ኑሲ ጎዳ ጊዲያ ኑ ጎዳ ዬሱሲ ኪሪስቶሳ ሱንꬃ ኡባ ሳዓን ፄሲያ ኡባቱዋና ጌሻ ጊዳናው ፄሴቴዳዋንቱሲ ሃ ዳቢዳቢያ ፃፌቶ። ፆሳይ፥ ኑ ኣዉኔ ኑ ጎዳይ ዬሱሲ ኪሪስቶሲ ሂንቴንቱሲ ኣꬎ ኬካቴꬃኔ ሳሮቴꬃ ኢሞ። ፆሳይ ኪሪስቶሳ ዬሱሳ ባጋና ሂንቴንቱሲ ኢሜዳ ኣꬎ ኬካቴꬃ ዲራው፥ ታኒ ኡባ ዎዴ ሂንቴንቱሲ ፆሳ ጋላታይ። ታኒ ኪሪስቶሳሲ ማርካቲያዌ ሂንቴንቱን ሚኔዳ ዲራው፥ ሂንቴ ኡባባኒ፥ ሃሳያ ኡባን ኤራቴꬃ ኡባን፥ ኣኒ ዱሬቴዲታ። *** ሃዋዳን ሂንቴ ኑ ጎዳ ዬሱሲ ኪሪስቶሳ ዩሳ ናጊሺን፥ ኣያና ኢሞታፔ ሃራይ ኣቶ ኢቱኔ ሂንቴንቱሲ ፓጬና። ቃሲ ኑ ጎዳ ዬሱሲ ኪሪስቶሳ ጋላሳን ሂንቴ ካꬌ ባይናዋንታ ጊዳናዳን፥ ዉርሴꬃይ ጋካናው ኢ ሂንቴንታ ሚኒሳናዋ። ባሬ ናዓ ኑ ጎዳ ዬሱሲ ኪሪስቶሳ ኢቲፔቴꬃው ሂንቴንታ ፄሴዳ ፆሳይ ኣማኔቴዳዋ። ሺን ታናዳን ኣማኒያዋንቶ፥ ኢቲ ዎዛናኒኔ ኢቲ ቆፋን ኢቲፔ ጊዳናፔ ኣቲን፥ ሻኮቴꬃይ ሂንቴ ጊዶን ዴዔና ማላ፥ ሂንቴ ኡባይ ኢቲ ሃሳያ ሃሳያናዳን፥ ኑ ጎዳ ዬሱሲ ኪሪስቶሳ ሱንꬃን ታኒ ሂንቴንታ ዎሳይ። ኣዪሲ ጎፔ፥ ታናዳን ኣማኒያዋንቶ፥ ቃሎዓ ሶይ ኣሳይ ሂንቴንቱባ፥ ሂንቴ ጊዶን ዋላሳይ ዴዒያዋ፥ ታው ኦዴዲኖ። ታኒ ጊያዌ ሃዋ፤ ሂንቴንቱ ሁጲያን ሁጲያን፥ «ታኒ ጳዉሎሳዋ። ታኒ ኣጲሎሳዋ። ታኒ ኬፋዋ። ታኒ ኪሪስቶሳዋ» ያጊታ። ኪሪስቶሲ ሻኬቴዴ? ሂንቴንቱ ዲራው፥ ማስቃሊያ ቦላ ሚሲማሪያን ꬊሼቲዴ ካቄቴዳዌ ጳዉሎሴ? ዎይ ሂንቴ ጳዉሎሳሲ ጊዳናው ፃማቄቴዲቴ? ታኒ ቃሪሲጶሳፔኔ ጋዮሳፔ ኣቲን፥ ሂንቴንቱፔ ኦናኔ ፃማቃቤና ዲራው፥ ፆሳ ጋላታይ። ሄዋ ዲራው፥ ኦኒኔ ሂንቴንታ ታው ጊዳናዳን ፃማቄቴዲታ ጋናው ዳንዳዬና። ቃሲ፥ ኤ፥ ኢስፂፋኖሳ ሶይ ኣሳካ ታኒ ፃማቃዲ። ሺን ሃራ ጉጃዴ ፃማቃዲታንቶኔ ዎዛና ኣꬂኬ። ኣዪሲ ጎፔ፥ ኪሪስቶሲ ታና ሚሺራቹዋ ቃላ ኦዳና ማላ ኪቴዳፔ ኣቲን፥ ፃማቃና ማላ ኪቲቤና፤ ቃሲ ኪሪስቶሲ ማስቃሊያ ቦላ ሃይቄዳዌ ሜላ ጊዴና ማላ፥ ታኒ ኣሳ ኣꬌዳ ኤራቴꬃ ቃላን ታማሪሲኬ። ኣዪሲ ጎፔ፥ ኪሪስቶሲ ማስቃሊያ ቦላ ሃይቄዳዋ ኦዲያ ቃላይ ꬋዪያዋንቱሲ ኤያቴꬃ። ሺን ኑሲ ኣቲያዋንቱሲ ፆሳ ዎልቃ። ፆሳ ማፃፋይ፥ «ታኒ ኤራንቻቱዋ ኣꬌዳ ኤራቴꬃ ባዪዛና፤ ቃሲ ኣኬካንቻቱዋ ኣኬካካ ꬋዪሳና» ያጌ። ኣꬌዳ ኤራንቻይ ሃቃን ዴዒ? ሂጊያ ታማሪሲያዌ ሃቃን ዴዒ? ዎይ ሃ ኣላሚያ ፆናናው ፓሉሜቲያዋንቱ ዋናንዲኖሻ? ፆሳይ ሃ ሳዓ ኣꬎ ኤራቴꬃይ ኤያቴꬃ ጊዲያዋ ቤሴዳ! ኣዪሲ ጎፔ፥ ኣሳይ ባሬ ሁጴ ኣꬎ ኤራቴꬃን ባሬና ፆሳ ኤሬና ማላ፥ ፆሳይ ባሬ ኣꬎ ኤራቴꬃን ዲጊዴ፥ ኑኒ ኦዲያ ኤያ ቃላን ኣማኒያዋንታ ኣሻናው ቆፔዳ። ኣዪሁዳቱ ማላታ ኦቺኖ። ቃሲ ጊሪኬ ኣሳቱ ኣꬎ ኤራቴꬃ ዎልቃማ ኮሻ ኮዪኖ። ሺን ኑኒ ማስቃሊያ ቦላ ሚሲማሪያን ꬊሼቲዴ ካቄቴዳ ኪሪስቶሳባ ኦዴቶ። ሄዌ ኣዪሁዳቱዋሲ ꬉቦ፤ ቃሲ ኣዪሁዳ ጊዴናዋንቱሲ ኤያቴꬃ። ሺን ፆሳይ ፄሴዳዋንቱሲ ኣዪሁዳቱሲካ ጊሪካቱሲካ ኑኒ ኦዲያ ፆሳ ዎልቃይኔ ኣ ኣꬎ ኤራቴꬃይ ኪሪስቶሳ። ኣዪሲ ጎፔ፥ ፆሳ ኤያቴꬃይ ኣሳ ኣꬌዳ ኤራቴꬃፔ ኣꬌ፤ ቃሲ ኣ ላፋቴꬃ ጌቴቲያዌካ ኣሳ ሚኖቴꬃፔ ሚኔ። ሲሚ ታናዳን ኣማኒያዋንቶ፥ ፆሳይ ሂንቴንታ ፄሲያ ዎዴ ሂንቴ ዎይሳ ማላ ኣሴንቶ ቆፒቴ። ኣሳ ቆፋን ሂንቴ ጊዶን ኣꬎ ኤራንቻቱ፥ ዎልቃማቱኔ ꬎቃ ሼሻቱ ዳራ ጊዲኪኖ። ሺን ፆሳይ ኣꬌዳ ኤራንቻቱዋ ዬላያናው፥ ኣላሚያን ዴዒያ ኤያቱዋ ዶሬዳ፤ ቃሲ ሚናቱዋ ዬላያናው፥ ኣላሚያን ዴዒያ ላፋቱዋ ዶሬዳ። ፆሳይ ሃ ኣላሚያን ዎልቃማባ ጊዴ ቆፒያዋ ꬋዪሳናው፥ ሃ ኣላሚያ ማዴናባ ካꬌቶባኔ ሃኒቤናባ ዶሬዳ። ሄዋ ዲራው፥ ኦኒኔ ፆሳ ሲንꬃን ጬቄታናው ቤሴና። ሺን ፆሳይ ሂንቴንቱሲ ኪሪስቶሲ ዬሱሳ ዴዑዋ ኡዲ ኢሜዳ። ኪሪስቶሲ ኑሲ ኣꬎ ኤራቴꬃ፥ ፂሎቴꬃ፥ ጌሻቴꬃኔ ኣቶቴꬃ ጊዴዳ። ሄዋ ዲራው፥ ፆሳ ማፃፋይ፥ «ጬቄቲያ ኡራይ ኦኒኔ ጎዳይ ኦꬄዳዋን ጬቄቶ» ያጌ። ታናዳን ኣማኒያዋንቶ፥ ታኒ ፆሳ ቱማቴꬃ ፁራ ሂንቴንቱሲ ኦዳናው ሂንቴንቱኮ ዬዳ ዎዴ፥ ꬎቃ ቃላኒኔ ኣꬌዳ ኤራቴꬃን ኦዳናው ያቤይኬ። ኣዪሲ ጎፔ፥ ታኒ ሂንቴንቱና ዴዓዴ፥ ዬሱሲ ኪሪስቶሳፔኔ ቃሲ ማስቃሊያ ቦላ ሚሲማሪያን ꬊሼቲዴ ኢ ካቄቴዳዋፔ ኣቲን፥ ሃራባ ኤሬናዳን፥ ታ ቆፋ ቃቻዲ። ታኒ ዳቡራኒኔ ያሻን ዳሮ ኮኮርሳን ሂንቴንቱና ዴዓዲ። ታኒ ታማሪሲያዋኔ ኦዲያዋ ፆሳ ኣያናኒኔ ዎልቃን ቆንጪሳይፔ ኣቲን፥ ጪማ ጊዲዴ ኣꬌዳ ኤራቴꬃ ቃላና ጊዴና። ሄዋ ዲራው፥ ሂንቴ ኣማኑ ፆሳ ዎልቃናፔ ኣቲን፥ ኣሳ ኣꬎ ኤራቴꬃን ዜምፒቤና። ኑኒ ኣያናን ዎዛናማቱዋ ጊዶን ኣꬎ ኤራቴꬃ ሃሳዬቶ። ሺን ሄዌካ ሃ ኣላሚያ ኣꬎ ኤራቴꬃ ጊዴና፤ ዎይ ሃ ኣላሚያ ሞዲያ ꬋዪያዋንቱ ኣꬎ ኤራቴꬃ ጊዴና። ሺን ኑኒ ኦዲያ ኣꬎ ኤራቴꬃይ፥ ፆሳይ ካሴቲዴ፥ ጮራ ዎዲያፔ ካሴ ኑ ቦንቹዋሲ ዶሬዳ ኣሳፔ ጌሜዳ ኣ ፁራ ኣꬎ ኤራቴꬃ። ሃ ኣላሚያ ሞዲያዋንቱፔ ኦኒኔ ሃ ኣꬎ ኤራቴꬃ ኤሪቤና። ኡንቱንቱ ኤሬዳዋ ጊዲንቶ፥ ቦንቾ ጎዳ ማስቃሊያ ቦላ ሚሲማሪያን ꬊሺዴ ካቂኪኖ። ሺን ፆሳ ማፃፋይ፥ «ኦኒኔ ኣይፊያን ቤዒቤናዌ፥ ሃይꬃንካ ሲሲቤናዌ፥ ቃሲ ኦኒኔ ባሬ ዎዛናን ቆፒቤናዌ ፆሳይ ባሬና ሲቂያዋንቱሲ ጊጊሴዳዋ» ጊያዋዳን ኑኒ ሃሳዬቶ። ፆሳይ ባሬ ፁራ ዬዉዋ ባሬ ኣያናን ኑና ኤሪሴዳ፤ ኣዪሲ ጎፔ፥ ጌሻ ኣያናይ ፆሳባ ሃራይ ኣቶ ጌሜዳ ዬዉዋ ኡባ ቢዴ። ኣዪሲ ጎፔ፥ ኣሳን ዴዒያ ኣሳ ኣያናፔ ኣቲን፥ ኣሳባ ኤሪያዌ ኦኔ? ሃዋዳንካ፥ ቃሲ ፆሳባ ፆሳ ኣያናፔ ኣቲን፥ ኦኒኔ ኤሬና። ኑኒ ፆሳይ ኑሲ ኢሜዳባ ኡባ ኤራናው ኢ ኑሲ ዬዴዳ ኣያና ኣኬዶፔ ኣቲን፥ ኣላሚያ ኣያና ኣኪቤይኮ። ኑኒ ኣያና ዬዉዋ ኣያና ዬዉዋና ጋꬂዴ፥ ጌሻ ኣያናይ ኑና ታማሪሴዳ ቃላን ሃዋ ሃሳዬቶፔ ኣቲን፥ ኣሳ ኣꬎ ኤራቴꬃይ ኑና ታማሪሴዳ ቃላን ሃሳዮኮ። ሺን ጌሻ ኣያናይ ባይና ኣሳይ ፆሳ ኣያና ዬዉዋ ኣኬና፤ ኣዪሲ ጎፔ፥ ሄዌ ኣው ኤያቴꬃ። ዬዉ ጌሻ ኣያናን ፓጬቲያ ዲራው፥ ኢ ኤራናው ዳንዳዬና። ሺን ጌሻ ኣያናይ ዴዒያ ኣሳይ ኡባባ ሻኬ፤ ሺን ኢ ባሬ ሁጴው ኦናኒኔ ሻኬቴና። ኣዪሲ ጎፔ፥ ፆሳ ማፃፋይ፥ «ጎዳ ዎዛና ኤሪያዌ ኦኔ? ኣ ዞራናው ዳንዳዪያዌ ኦኔ?» ያጌ። ሺን ኑሲ ኪሪስቶሳ ዎዛናይ ዴዔ። ታናዳን ኣማኒያዋንቶ፥ ታኒ ጌሻ ኣያናይ ዴዒያ ኣሳሲ ሃሳዪያዋዳን፥ ሂንቴንቱሲ ሃሳያናው ዳንዳያቤይኬ። ሺን ሃ ኣላሚያ ኣሳሲ ሃሳዪያዋዳኒኔ ኣማኑዋን ሚኒቤና ኪሪስቶሳን ዴዒያ ጉꬃ ናና ማላ ኣሳሲ ሃሳዪያዋዳን ሃሳያዲ። ሂንቴንቱ ቢሮ ሚኖ ቁማ ማናው ዳንዳይቤና ዲራው፥ ታኒ ሂንቴንታ ማꬃ ፓካዲ፤ ሃራይ ኣቶ፥ ሃዒካ ዳንዳይቤይኪታ። ኣዪሲ ጎፔ፥ ሂንቴ ሃዒካ ሃ ኣላሚያ ኣሳዳን ዴዒታ። ሂንቴንቱ ሃ ኣላሚያ ኣሳ ጊዲያዋ ሂንቴ ጊዶን ዴዒያ ቃናቲኔ ፓሉማይ ኤሪሴኔ? ቃሲ ሃ ኣላሚያ ኣሳዳን ሲሜሬቲታ። ኣዪሲ ጎፔ፥ ሂንቴንቱፔ ኢቱ፥ «ታኒ ጳዉሎሳዋ» ጎፔ፥ ሃራይ ቃሲ፥ «ታኒ ኣጲሎሳዋ» ጎፔ፥ ሃ ኣላሚያ ኣሳ ማላ ጊዲኪቴ? ያቲና፥ ኣጲሎሲ ኦኔ? ጳዉሎሲ ኦኔ? ኑኒ ሂንቴንታ ኣማንꬄዳ ፆሳ ካሊያዋንታ። ፆሳይ ኑሲ ሁጲያን ሁጲያን ኢሜዳ ኦሱዋ ኦꬄቶ። ታኒ ፑቲያ ቶካዲ፤ ኣጲሎሲ ሃꬃ ኡሼዳ፤ ሺን ፆሳይ ፑቲያ ዲቼዳ። ሄዋ ዲራው፥ ዲቺያ ፆሳፔ ኣቲን፥ ቶኪያዌካ ሃꬃ ኡሺያዌካ ኣያኔ ጊዴና። ቶኪያዌኔ ሃꬃ ኡሺያዌ ኢቲ ማላ፤ ሺን ፆሳይ ሁጲያን ሁጲያን ኣ ዳቡራ ኬና ኣው ዎይታና። ኑኒ ፆሳሲ ኢቲፔ ኦꬂያ ኣ ኦሳንቻቱዋ ጊዲያ ዲራው፥ ሂንቴ ኣ ኦሱዋ ሳዓ። ቃሲካ ሂንቴ ፆሳ ጎሊያ። ፆሳይ ታው ኢሜዳ ኣꬎ ኬካቴꬃን ኤራንቻ ኣናፂያዳን፥ ጎሊያ ባሱዋ ባሳዲ። ሃራ ኡራይ ኣ ቦላ ኬፄ። ሺን ኣ ቦላ ኬፂያ ኦኒኔ ዎቲ ኬፂንቶ፥ ባሬ ሁጴው ናጌቶ። ኣዪሲ ጎፔ፥ ፆሳይ ዬሱሲ ኪሪስቶሳ ፃላላ ባሶ ኦꬂዴ ዎꬄዳ። ኣፔ ሃራ ባሱዋ ባሳናው ኦኒኔ ዳንዳዬና። ሺን ሃ ባሱዋ ቦላ ኦኒኔ ዎርቃን ጊዲና፥ ቢራን ጊዲና፥ ኣልዖ ሹቻን ጊዲና፥ ሚꬃን ጊዲና፥ ጋታን ዎይ ማቃን ኬፆፔ፥ ኣሳ ኡባ ኦሱ ቆንጪያ ኬሳናዋ። ኣዪሲ ጎፔ፥ ታማን ቆንጫና ዲራው፥ ሄ ጋላሳይ ኣሳ ኡባ ኦሱዋ ቤሳና። ኣሳይ ኡባይ ባሬ ኦሱዋ ዎቲ ኦꬄዴንቶኔ ታማይ ፓጫና። ኦኒኔ ባሱዋ ቦላ ኬፄዳ ኦሱ ሚኒዴ ኣቶፔ፥ ኢ ዎይታ ኣካናዋ። ኦ ኦሱኔ ጉዴቶፔ፥ ሄ ኡራይ ቆሄታና። ኢ ባሬ ሁጴው ኣታና፤ ሺን ታማ ጊዶፔ ኬሲ ኣኮዋዳን ኣታና። ሂንቴንቱ ፆሳይ ኣቂያ ጌሻ ጎሊያ ጊዲያዋኔ ፆሳ ኣያናይ ሂንቴንቱን ዴዒያዋ ኤሪኪቴ? ኦኒኔ ፆሳ ጌሻ ጎሊያ ኮሎፔ፥ ፆሳይ ኣ ኮላና። ኣዪሲ ጎፔ፥ ፆሳይ ኣቂያ ጌሻ ጎሊ ጌሻ፤ ሄ ጌሻ ጎሊካ ሂንቴንታ። ኦኒኔ ባሬ ሁጲያ ጪሞፖ። ሂንቴንቱፔ ኦኒኔ ባሬና ሃ ኣላሚያን ኣꬎ ኤራንቻ ያጊዴ ቆፖፔ፥ ኣꬎ ኤራንቻ ጊዳናው፥ ኤያ ጊዶ። ኣዪሲ ጎፔ፥ ሃ ኣላሚያ ኣꬎ ኤራቴꬃይ ፆሳ ሲንꬃን ኤያቴꬃ። ፆሳ ማፃፋይ፥ «ፆሳይ ኣꬎ ኤራንቻቱዋ ኡንቱንታ ኡንቱንቱ ጌኒያን ኦይቄ» ያጌ። ቃሲ፥ «ኣꬌዳ ኤራንቻቱዋ ቆፋይካ ማዱ ባይናዋ ጊዲያዋ ጎዳይ ኤሬ» ያጌ። ሄዋ ዲራው፥ ኦኒኔ ኣሳን ጬቄቶፖ። ኣዪሲ ጎፔ፥ ኡባባይካ ሂንቴዋ። ጳዉሎሲካ፥ ኣጲሎሲካ፥ ኬፋይካ፥ ሃ ኣላሚካ፥ ዴዑካ፥ ሃይቁካ፥ ሃዒ ዴዒያዌካ፥ ሲንꬃፔ ያናዌክ፥ ኡባይካ ሂንቴዋ። ሂንቴንቱ ኪሪስቶሳዋንታ፤ ኪሪስቶሲካ ፆሳዋ። ኣሳይ ኑና ኪሪስቶሳው ኦꬂያዋንቱዳኒኔ ፆሳ ጎሌን ዴዒያ ፁራ ናጊያ ኣሳዳን ቆፖ። ያቲዴ ሄ ኣሳቱ ባሬንቱ ጎዳሲ ኣማኔቴዳዋንታ ጊዲዴ፥ ቤታናው ኮሼ። ሺን ሂንቴ ዎይ ሃራይ ታ ቦላ ፒርዶፔ፥ ኣይኔ ጊዴና። ሃራይ ኣቶ፥ ታኒካ ታ ሁጲያን ፒርዲኬ። ኣዪሲ ጎፔ፥ ታኒ ታ ሁጲያን ኣያኔካ ኤሪያባይ ባዋ፤ ሺን ታና ሄዌ ፂሊሴና። ታና ፒርዲያዌ ጎዳ። ሄዋ ዲራው፥ ጎዳይ ꬉማኒ ጌሜዳባ ፖዑዋ ኬሲያዌ፥ ዎዛና ቆፋ ቆንጪሲያዌ ያና ዎዲ ጋካናሲ ኦ ቦላኒኔ ኦናኔ ፒርዶፒቴ። ሄ ዎዴ፥ ኣሳይ ኡባይ ሁጲያን ሁጲያን ፆሳፔ ሳባ ዴማናዋ። ታናዳን ኣማኒያዋንቶ፥ ሂንቴንቱፔ ኦኒኔ ኢቱ ታማሪሲያዋ ሳቢዴ፥ ሃራይ ታማሪሲያዋ ቦሬና ማላ፥ «ፆሳ ማፃፋን ፃፌቴዳዋ ቦንቻ» ያጊያዋ ሂንቴ ኑናና ታማራና ማላ፥ ሂንቴ ዲራው፥ ታባኔ ኣጲሎሳባ ሌሚሱዋዳን ኦዳዲ። ኣዪሲ ጎፔ፥ ሃራቱዋፔ ኔና ኦኔ ꬎቂሴዳዌ? ኔኒ ፆሳፔ ኣካቤናባይ ኔው ኣዬ ዴዒያዌ? ያቲና፥ ኔኒ ኣኬዳዋ ጊዶፔ፥ ኣዪሲ ኣካቤናዋዳን ጬቄታይ? ሃዒ ሂንቴ ካሌዲታ። ሃዒ ዱሬቴዲታ። ኑኒ ባይናን ሂንቴሬካ ካዉቴዲታ። ኑኒካ ሂንቴንቱና ካዉታናዳን፥ ሂንቴ ካዉቴዲቴንቶ ሎዓ ሺን። ኣዪሲ ጎፔ፥ ታው ማላቲያዋዳን፥ ኑኒ ሃ ሳዓሲ፥ ኪታንቻቱዋሲኔ ኣሳሲ ካሳ ጊዴዳ ዲራው፥ ፆሳይ ኑና ዬሱሲ ኪቴዳዋንታ ሃይቁዋሲ ፒርዴቴዳ ኣሳዳን፥ ኡባፔ ዉርሴꬃ ኦꬄዳ። ኑኒ ኪሪስቶሳ ዲራው ኤያ፥ ሺን ሂንቴ ኪሪስቶሳን ኣꬌዳ ኤራንቻ። ኑኒ ዳቡራንቻ፥ ሺን ሂንቴ ሚና። ሂንቴንቱ ቦንቼቴዳዋንታ፥ ሺን ኑኒ ቶሼቴዳዋንታ። ሃ ዎዲ ጋካናሲ፥ ኑኒ ኮሻቴቶ፤ ሳሜቴቶ፤ ካሎቴቶ፤ ዴሼቴቶ። ቃሲ ዴዒያ ሳዓ ꬋዪዴ ዩዬቶ። ኑኒ ኑ ኩሺያን ኦꬂዴ ዳቡሬቶ። ኑና ኣሳይ ሼቂያ ዎዴ፥ ኣንጄቶ። ኑና ዬዴርሲ ዩዪያ ዎዴካ ዳንዳዬቶ። ኑ ቦላ ኢታባ ሃሳዪያ ዎዴ፥ ኑኒ ሎዖ ቃላ ዛሬቶ። ኑኒ ሃዋ ጋካናሲካ፥ ሃ ሳዓ ፒቱዋኔ ኡባባ ቡራ ጊዴዶ። ታኒ ታ ሲቂያ ናናዳን፥ ሂንቴንታ ሴራናው ሃዋ ፃፋዲፔ ኣቲን፥ ዬላያናው ፃፋቤይኬ። ኣዪሲ ጎፔ፥ ኪሪስቶሳን ሂንቴንታ ዲቺያ ታሙ ሻዓ ኣሳይ ሂንቴንቱሲ ዴዖፔካ፥ ሂንቴንቱሲ ኢቲ ኣዉዋፔ ሃራይ ባዋ። ኣዪሲ ጎፔ፥ ታኒ ሚሺራቹዋ ቃላ ሂንቴንቱሲ ኣሄዳዋዳን፥ ኪሪስቶሳ ዬሱሳን ሂንቴንቱሲ ኣዉዋ ጊዳዲ። ሲሚ ታናዳን ሃኒቴ ያጋዴ ሂንቴንታ ዎሳይ። ሄዋ ዲራው፥ ጎዳን ኣማኔቴዳ ታ ሲቂያ ታ ናዓ ፂሞቶሳ ሂንቴንቱኮ ኪታዲ። ኢ ኡባ ሳዓን ዴዒያ ኣማኒያ ኣሳ ኡባው ታኒ ታማሪሲያ ኪሪስቶሳ ዬሱሳን ዴዒያ ታ ኦጊያ ሂንቴንታ ሃሳዪሳናዋ። ታኒ ሂንቴንታ ቤዓናው ሂንቴንቱኮ ዬናባ ማላቲና፥ ኦቶሬቲያ ኢቲ ኢቲ ኣሳቱ ዴዒኖ። ሺን ጎዳይ ጎፔ፥ ታኒ ሂንቴንቱኮ ኤሌካ ባዴ ሄ ኦቶሬቲያ ኣሳቱዋሲ ሃሳያ ጊዴናን፥ ኡንቱንቱ ዎልቃ ኤራና። ኣዪሲ ጎፔ፥ ፆሳ ካዉቴꬃይ ፆሳ ዎልቃናፔ ኣቲን፥ ሃሳያና ጊዴና። ታኒ ሂንቴንቱኮ ሙሪያ ፃምዓና ዮዬ ዎይ ሲቁዋናኔ ኣሺኬ ኣያናና ዮ? ሃቃዋ ዶሪቴ? ሂንቴንቱ ጊዶን ፖኮ ዎሹማ ኦሱ ዴዒያዌ ዚጊሬቴ፤ ሄዋ ማላ ፖኮ ዎሹማ ኦሱ ሃራይ ኣቶ፥ ፆሳ ኣማኔና ኣሳ ጊዶኒኔ ባዋ። ኣዪሲ ጎፔ፥ ባሬ ኣዉዋ ማቻቶ ኣኬዳ ኣሳይ ዴዔ። ሂንቴንቱካ ኦቶሬቴዲታ። ሄዋፔ ሂንቴ ካዮታናው ቤሴኔ? ሄዋ ማላ ፖኮ ኦሱዋ ኦꬄዳ ቢታኒ ሂንቴ ጊዶፔ ኪቻናው ቤሴ። ኣያ ጊዲናካ ታኒ ታ ኣሳቴꬃን ሂንቴንቱና ዴዔናኒ ꬋዮፔካ፥ ኣያናን ሂንቴንቱና ዴዓይ። ሃዒ ሂንቴንቱና ዴዒያዋዳን ሃናዴ፥ ሄዋ ማላ ኦሱዋ ኦꬄዳ ቢታኒያ ቦላ ኑ ጎዳ ዬሱሲ ኪሪስቶሳ ሱንꬃን ፒርዳዲጋዲ። ሂንቴንቱኔ ታ ኣያናይ ኑ ጎዳ ዬሱሲ ኪሪስቶሳ ዎልቃና ኢቲፔ ሺቂዴ፥ *** ሄ ቢታኒያ ኣያናይ ጎዳ ዬሱሲ ፒርዳው ዪያ ጋላሳን ኣታና ማላ፥ ናጋራን ኩሜዳ ኣ ቦላ ኮላናዳን ሴፃናሲ ሂንቴ ኢማናዳን፥ ታኒ ፒርዳዲ። ሂንቴንቱ ጬቁ ሎዓ ጊዴና። ጉꬃ ኢርሹ ሙናቃ ኡባ ዴንꬂያዋ ኤሪኪቴ? ሂንቴንቱ ኦራꬃ ጊዳና ማላ፥ ናጋራ ኢርሹ ጫሌዳዋ ኬሲቴ። ሂንቴንቱ ኢርሹ ባይና ሙናቃ ማላ። ኣዪሲ ጎፔ፥ ኑ ፓሲጋ ዶርሳይ፥ ኪሪስቶሲ ያርሼቴዳ። ሄዋ ዲራው፥ ኑኒ ኡኪꬃ ባላ ሱሬቴꬃኒኔ ቱማቴꬃን ቦንቻናፔ ኣቲን፥ ጫላ ኢርሹዋን፥ ኢታቴꬃ ኢርሹዋኒኔ ጌላቴꬃ ኢርሹዋን ቦንቾኮ። ዎሹማናው ቆፒያዋንቱና ሂንቴ ኢቲፔ ጋኬቴና ማላ፥ ሂንቴንቱሲ ዳቢዳቢያ ፃፋዲ። ታኒ ጊያዌ ሃ ኣላሚያን ዴዒያ ዎሹማናው ቆፒያዋንቱፔ ዎይ ዮራቲያዋንቱፔ፥ ካዪሶቲያዋንቱፔኔ ዎይ ኤቃው ጎዪኒያዋንቱፔ ኡባካ ሻኬታና ማላ ጊዴና። ሄዋ ጊዶፔ፥ ሃ ኣላሚያፔ ሂንቴ ሻኬቲ ባናው ቤሴ ጉሳ። ሺን ኢሻቱዋ ሃዒ ጌቴቲያዋንቱፔ ኢቱኔ ዎሹማናው ቆፒያዋንቱ ዎይ ሚሻው ዮራቲያዋንቱ ዎይ ኤቃው ጎዪኒያዋንቱ ዎይ ኣሳ ሱንꬃ ባይዚያዋንቱ ዎይ ማꬆቲያዋንቱ ዎይ ዉዒያዋንቱና ሂንቴንቱ ኢቲፔቴꬃ ኦꬄና ማላ፥ ታኒ ሂንቴንቱሲ ፃፋዲ። ሄዋንቱ ማላና ሃራይ ኣቶ፥ ቁማካ ኢቲፔ ሞፒቴ። ኣዪሲ ጎፔ፥ ዎሳ ጎሌፔ ካሬና ዴዒያዋንቱ ቦላ ፒርዳናው ታና ኣዬ ጋꬂ? ሂንቴንቱ ጊዶን ዎሳ ጎሌን ዴዒያዋንቱ ቦላን ሂንቴ ፒርዲኪቴዬ? ሺን ካሬና ዴዒያዋንቱ ቦላን ፆሳይ ፒርዳና። ሄ ኢታባ ኦꬂያ ኡራ ሂንቴ ጊዶፔ ኬሲዲጊቴ። ሂንቴንቱፔ ኢቲ ኡራሲ ባሬ ኢሻና ሞቱ ዴዒያባ ጊዶፔ፥ ኣማኒያዋንቱ ቦላ ፒርዴታናዋ ባሺዴ፥ ኣማኔናዋንቱ ቦላ ፒርዴታናው ዋኒ ፃሊዴ ቢ? ኣማኒያዋንቱ ኣላሚያ ቦላ ፒርዳናዋ ኤሪኪቴ? ያቲና፥ ኣላሚያ ቦላ ሂንቴ ፒርዳናዋንታ ጊዶፔ፥ ኡባባፔ ጉፂያዋ ፒርዳናው ዳንዳይኪቴ? ሃ ዴዑዋባይ ኣቶ ሺን፥ ኣማኒያዋንቱ ኪታንቻቱዋ ቦላ ፒርዳናዋ ኤሪኪቴ? ያቲና፥ ሂንቴንታ ሃ ኣላሚያ ዴዑዋባው ፒርዳ ጎሌ ቡሳይ ኮሾፔ፥ ኣማኒያ ኣሳይ ካꬌዳ ኣሳን ፒርዲሳናው ኣፊቴ? ታኒ ሂንቴንታ ዬላያናው ሃዋ ጋይ፤ ሃዋ ጊዳናው ቤሲ? ሂንቴንቱ ጊዶን ኢሻቱዋ ሲጌꬃናው ዳንዳዪያ ሎዖ ኤራንቻ ኣሳይ ኢቱኔ ባዌ? ሺን ኢቲ ኢሻይ ዮኮ ኢሻ ፒርዳ ጎሌን ሞቲዴ፥ ሄ ዬዉዋ ኣማኔና ኣሳን ፒርዲሲ? ሲሚ ኢቱ ኢቱዋ ሞቲያዌ ሂንቴ ጊዶን ዴዖፔ፥ ሄዌ ሂንቴ ኩንዴዳዋ ቤሴ። ሄዋፔ ሂንቴ ናቄቲያዌኔ ጪሜቲያዌ ሎዔኔ? ሺን ሂንቴ ሂንቴ ሁጴው ኢቱ ኢቱዋ ሃራይ ኣቶ፥ ሂንቴ ኢሻቱዋካ ናቂታኔ ጪሚታ። ዎይ ማካላንቻቱ ፆሳ ካዉቴꬃ ላቴናዋ ኤሪኪቴ? ባሎፒቴ። ዎሹማናው ቆፒያዋንቱ ዎይ ኤቃው ጎዪኒያዋንቱ ዎይ ዎሹሚያዋንቱ ዎይ ኣቱማዋ ጊዲዴ፥ ኣቱማዋና ጊሲያዋንቱ፥ ዎይ ካዪሳቱ ዎይ ሚሻው ዮራቲያዋንቱ ዎይ ማꬆቲያዋንቱ ዎይ ኣሳ ሱንꬃ ባይዚያዋንቱ ዎይ ቦንቂያዋንቱ ፆሳ ካዉቴꬃ ላቲኪኖ። ሂንቴንቱፔካ ኢቲ ኢቲ ኣሳይ ሄዋንቱ ማላ። ሺን ጎዳ ዬሱሲ ኪሪስቶሳ ሱንꬃኒኔ ኑ ፆሳ ኣያናን ሂንቴ ሜጬቲዴ ጌዬዲታ፤ ቃሲ ፂሌዲታ። ኢቲ ኡራይ፥ «ታኒ ኮዬዳባ ኡባ ኦꬃናው ዳንዳያይ» ጋና ዳንዳዬ። ሺን ኡባይካ ታና ማዴና። ታኒ ኮዬዳባ ኡባ ኦꬃናው ዳንዳያይ። ሺን ኣዬኔካ ታና ሞዴና። ቃይ ሃራይካ፥ «ቁማይ ኡሉዋሳ፤ ኡሉካ ቁማሳ» ጌ። ሺን ፆሳይ ኡሉዋካ ቁማካ ꬋዪሳና። ኣሳ ኣሳቴꬃይ ጎዳ ዬሱሳሳፔ ኣቲን፥ ዎሹማሳ ጊዴና። ጎዳ ዬሱሲካ ኣሳ ኣሳቴꬃሳ። ፆሳይ ጎዳ ዬሱሳ ሃይቁዋፔ ዴንꬄዳ፤ ቃሲ ኑናካ ሃይቁዋፔ ባሬ ዎልቃን ዴንꬃና። ሂንቴንቱ ኣሳቴꬃይ ኪሪስቶሳ ኣሳቴꬃና ኢቱዋ ጊዲያዋ ሂንቴ ኤሪኪቴ? ያቲና፥ ታኒ ኪሪስቶሳ ኣሳቴꬃና ኢቱዋ ጊዴዳዋ ኣፋዴ፥ ጫራቲ ኣሳቴꬃና ኢቱዋ ኦꬃናው ቤሲ? ቤሴና! ዎይ ጫራቲና ኢቲፔቴꬃ ሜꬊያ ኡራይ ኢዚና ኢቲ ኣሳቴꬃ ጊዲያዋ ኤሪኪቴ? ኣዪሲ ጎፔ፥ ፆሳ ማፃፋይ፥ «ኡንቱንቱ ላዓቱ ኢቲ ኣሾ ጊዳና» ያጌ። ሺን ጎዳና ኢቲፔቴꬃ ሜꬊያ ኡራይ ኣያናን ኣናና ኢቱዋ ጊዴ። ዎሹማፔ ሃኪቴ። ኢቲ ኡራይ ኦꬂያ ሃራ ናጋራ ኡባይ ኣ ኣሳቴꬃፔ ካሬና ዴዔ፤ ሺን ዎሹሚያዌ ባሬ ቦላን ናጋራ ኦꬄ። ዎይ ሂንቴ ቦላይ ፆሳይ ሂንቴንቱሲ ኢሜዳ ሂንቴንቱን ዴዒያ ጌሻ ኣያናይ ኣቂያ ጌሻ ጎሊያ ጊዲያዋ ኤሪኪቴ? ቃሲ ሂንቴ ሂንቴ ሁጲያሳ ጊዲኪታ። ኣዪሲ ጎፔ፥ ፆሳይ ሂንቴንታ ጋቲያን ሻሜዳ። ሄዋ ዲራው፥ ሂንቴ ኣሳቴꬃን ኣ ቦንቺቴ። ሂንቴንቱ ታው ፃፌዳ ዬዉዋሲ ኣቱማ ኣሳይ ማጫዉኖ ቦቼኔንቶ ሎዓ። ሺን ዎሹማ ጋሱዋ ዲራው፥ ኣቱማ ኣሳሲ ሁጲያን ሁጲያን ማቻታ ዴዑ። ቃሲ ማጫ ኣሳሲካ ሁጲያን ሁጲያን ኣሲናይ ዴዖ። ኣሲናይ ባሬ ማቻቲው ኣሲናቴꬃን ቤሲያባ ኡዶ፤ ቃሲ ሄዋዳን፥ ማቻታካ ባሬ ኣሲናሲ ማቼቴꬃን ቤሲያባ ኦꬁ። ማቻታ ባሬ ኣሳቴꬃሲ ጎዳ ጊዱኩ፤ ሺን ኢዚ ኣሲናይ ጎዳ። ሃዋዳንካ፥ ቃሲ ኣሲናይ ባሬ ኣሳቴꬃሲ ጎዳ ጊዴና፤ ሺን ኣ ማቻታ ጎዳ። ሂንቴንቱ ሂንቴ ጊዶን ፆሳ ዎሳን ጌንጫናው ሄ ዎዲያሲ ዞሬታን ዲጌታናፔ ኣቲን፥ ኢቱ ኢቱዋ ዲጎፒቴ። ሂንቴንቱ ሂንቴንታ ናጌና ዲራው፥ ሴፃናይ ሂንቴንታ ፓጬናዳን፥ ኢቲፔ ዴዒቴ። ሺን ታኒ ሂንቴንታ ሄዋ ሂንቴ ዶሶዋዳን ሃኒቴ ጋዪፔ ኣቲን፥ ኣዛዚኬ። ታኒ ኣሳይ ኡባይ ታናዳን ሃኒንቶ ዶሳይ። ሺን ፆሳይ ኣሳው ሁጲያን ሁጲያን ዱማ ዱማ ኢሞታ ኢሚ ዎꬄዳ፤ ኢቱዋሲ ሃዋዳን፥ ቃሲ ዮኮዋሲ ሄዋዳን ኢሚ ዎꬄዳ። ሄዋ ዲራው፥ ታኒ ማቻቶ ኣኪቤናዋንቱኔ ኣሲናይ ሃይቆ ማጫዋንቱ ታናዳን ጮ ዴዒኖንቶ፥ ኡንቱንቶ ሎዓ ጋይ። ሺን ኣሙዋን ጉዴቲያዋፔ ኣኪያዌኔ ጌሊያዌ ሎዓ ጊዲያ ዲራው፥ ኡንቱንቱ ባሬንታ ናጋናው ዳንዳያና ꬋዮፔ፥ ኣኪኖኔ ጌሊኖ። ማቻታ ባሬ ኣሲናፔ ሻኬቱፑ። ሺን ሻኬቶፔኔ ጌሌናን ዴዑ፤ ዎይ ባሬ ኣሲናና ሲጌቱ። ኣሲናይካ ባሬ ማቻቶ ዬዶፖ ያጋዴ፥ ኣኬዳዋንታኔ ጌሌዳዋንታ ኣዛዛይ። ሺን ሃዋ ኣዛዚያዌ ጎዳፔ ኣቲን፥ ታና ጊዲኬ። *** ታኒ ሃራቱዋ ሃዋዳን ጋይ፤ ጎዳ ጊዴና። ኣማኔና ማቻታ ዴዒያ ኣማኒያ ኣሳይ ኦኒኔ ዴዖፔ፥ ኣ ማቻታ ኣናና ኢቲፔ ዴዒያዋ ኢ ዶሶፔ፥ ኢዞ ዬዶፖ። ቃሲ ኣማኔና ኣሲናይ ዴዒያ ኣማኒያ ማቻታ ዴዖፔ፥ ኢዚ ኣሲናይ ኢዚና ኢቲፔ ዴዒያዋ ኢዛ ዶሶፔ፥ ኣፔ ሻኬቱፑ። ኣዪሲ ጎፔ፥ ኣማኔና ኣሲናይ ባሬ ኣማኒያ ማቻቲና ዴዒዴ ጌዬዳ። ቃሲ ኣማኔና ማቻታ ባሬ ኣማኒያ ኣሲናና ዴዓዴ ጌያዱ። ሄዌ ባዌንቶ፥ ሂንቴንቱ ናናይ ቱና፤ ሺን ሃዒ ኡንቱንቱ ጌሻ። ሺን ኣማኔናዌ ሻኬታና ኮዮፔ ሻኬቶ። ኣማኒያ ማቻቶ ጊዲና፥ ዎይ ኣሲና ጊዲና፥ ሃዋ ማላ ዬዉዋን ቃሼቲኪኖ። ኣዪሲ ጎፔ፥ ፆሳይ ኑና ሳሮቴꬃን ዴዓናው ፄሴዳ። ኣማኒያ ማቻቴ፥ ኔኒ ኔ ኣሲና ኣሻኒንቶኔ ኦ ኤሪ? ዎይ ኣማኒያ ኣሲናው ኔኒ ኔ ማቻቶ ኣሻኒንቶኔ ኦ ኤሪ? ጊዶፔኔ፥ ኣሳይ ሁጲያን ሁጲያን ጎዳይ ኣው ኢሜዳዋዳኒኔ ቃሲ ፆሳይ ባሬና ፄሴዳዋዳን ዴዖ። ሄዌ ኣማኒያ ኣሳ ኡባ ታኒ ታማሪሴዳ ሂጊያ። ኦኒኔ ቃፃሬቲ ኡቲዴ፥ ፆሳ ኣማኔዳዋ ጊዶፔ፥ ባሬ ቃፃራ ማላ ዲጎፖ። ቃሲ ኦኒኔ ቃፃሬቴናን ዴዒዴ፥ ፆሳ ኣማኔዳዋ ጊዶፔ ቃፃሬቶፖ። ኣዪሲ ጎፔ፥ ፆሳ ኣዛዙዋ ናጋናፔ ኣቲን፥ ቃፃሬቲና ቃፃሬታና ꬋዪና ኣላሊ ባዋ። ኣሳይ ሁጲያን ሁጲያን ፆሳይ ባሬና ፄሲያ ዎዴ ዴዒያዋዳን ዴዖ። ፆሳይ ኔና ፄሲያ ዎዴ ኔኒ ኣይሌ? ኣይኔ ባዋ፤ ሺን ኔኒ ኣይሌቴꬃፔ ኬሳናው ዳንዳዮፔ ኬሳ። ኣዪሲ ጎፔ፥ ኣይሌ ጊዲ ኡቴዳ ኣሳ ጎዳይ ፄሶፔ፥ ኢ ጎዳይ ኣይሌቴꬃፔ ኬሴዳ ኣሳ። ሃዋዳንካ፥ ኣይሌ ጊዴና ኣሳ ኪሪስቶሲ ፄሶፔ፥ ኢ ኪሪስቶሳ ኣይሌ። ፆሳይ ሂንቴንታ ጋቲያን ሻሜዳ። ኣሳ ኣይሌ ጊዶፒቴ። ታናዳን ኣማኒያዋንቶ፥ ኣሳይ ሁጲያን ሁጲያን ፆሳይ ኣ ፄሲያ ዎዴ ዴዒያ ዴዑዋዳን፥ ፆሳና ዴዖ። ዎዶራቱዋሲ ጎዳይ ታና ኣዛዜዳባይ ባዋ። ሺን ታኒ ጎዳሲ ኣማኔቴዳዋ ጊዴዳ ዲራው፥ ኣፔ ማሮቴꬃ ኣኬዳዋዳን፥ ሂንቴንታ ዞራይ። ሲሚ ሃዒ ሜቱዋሲ ታው ሃዌ ሎዓ ማላቴ፤ ኣሳይ ሃዋዳን ሃኒዴ ዴዖፔ ሎዓ። ኔኒ ማቻቶ ኣካዲጌዳዋ ጊዶፔ፥ ኢዞ ዬዳናው ኮዮፓ። ማቻቶ ኣካቤናዋ ጊዶፔ፥ ኣካናው ኮዮፓ። ሺን ኔኒ ማቻቶ ኣኮፔ፥ ናጋራ ኦꬃቤይካ። ዎዶራታካ ኣሲና ጌሎፔ፥ ናጋራ ኦꬃቤይኩ። ሺን ኣኬቲያዋንቶኔ ጌሌቲያዋንቶ ኡንቱንቱ ዴዑዋን ዎልቃማ ሜቱ ዴዔ። ታኒ ሂንቴንታ ሄ ሜቱዋፔ ኣሻናው ኮያይ። ሺን ታናዳን ኣማኒያዋንቶ፥ ታኒ ጊያዌ ሃዋ፤ ዎዲ ዉሬዳ። ሃዋፔ ሲንꬃው ኣኬዳ ኣሳቱ፥ ኣኪቤና ኣሳዳን ሃኒኖ። ዬኪያዋንቱ ዬኬናዋዳን፥ ናሼቲያዋንቱ ናሼቴናዋዳን፥ ሻሚያዋንቱካ ሻሚዴ ኣይኔ ባይናዋዳን፥ ሃ ኣላሚያ ዴዑዋን ማዴቲያዋንቱ ኡባካ ማዴቴናዋዳን ሃኒኖ። ኣዪሲ ጎፔ፥ ሃ ኣላሚያ ዴዑ ኣቲያዋ። ሂንቴንቱ ሂርጌናን ዴዓናዋ ታኒ ዶሳይ። ኣኪቤናዌ ጎዳ ናሼቻናው ኮዪያ ዲራው፥ ኣ ኦሱዋባ ቆፔ። ሺን ኣኬዳዌ ባሬ ማቻቶ ናሼቻናው ኮዪያ ዲራው፥ ሳዓባ ቆፔ። ኣ ቆፋይ ሻኬቴዳ። ኣሲና ጌላቤና ዎዶራታ ባሬ ኣሹዋኒኔ ባሬ ሼምፑዋን ጌያናው ኮዪያ ዲራው፥ ጎዳ ኦሱዋባ ቆፓው። ሺን ኣሲና ጌሌዳዉና ባሬ ኣሲና ናሼቻናው ኮዪያ ዲራው፥ ሳዓባ ቆፓው። ታኒ ሃዋ ሂንቴንታ ማዳና ማላ ጋዪፔ ኣቲን፥ ሂንቴንታ ꬉባናው ጊኬ። ሺን ሂንቴ ቤሲያዋዳን ዴዒዴ፥ ጎዳ ኦሱዋ ሂንቴና ኢሚዴ ኦꬃና ማላ ኮያይ። ኦኒኔ ባሬ ጊጊሴዳ ዎዶራቶ ኣኪያ ዎዲ ጋኪና፥ ባሬና ናጋናው ኣው ዳንዳዬቴናን ኢፆፔ፥ ኢዞ ኣኮ። ኢ ኢዞ ኣኮፔ፥ ሄዋን ናጋራይ ባዋ። ሺን ኢ ባሬ ዎዛናን ሚኖፔ፥ ኣኬናን ጋሚዓና ዳንዳዬ። ቃሲ ባሬና ናጊዴ፥ ባሬ ጊጊሴዳ ዎዶራቶ ኣኬናን ጋሚዓና ጎፔ፥ ኦኒኔ ዎልቃንꬄናን ባሬ ዎዛናን ቆፋ ቃቼዳዋ ጊዶፔ ሎይꬄዳ። ሄዋ ዲራው፥ ዎዶራቶ ኣኪያ ኡራይ ሎይꬄዳ፤ ቃሲ ኣኬናዌ ኡባ ኣꬂ ሎይꬄዳ። ኣሲና ጌሌዳ ሚሺራታ ባሬ ኣሲናይ ዴዔዳ ኬናን ኣናና ኢቴፔ ዴዓናዳን ቃሼታ ኡታዱ። ሺን ኢ ሃይቆፔ፥ ጎዳ ኣማኒያ ኣሳ ኦናኔ ጊዶፔ፥ ባሬ ዶሴዳ ኣሲና ጌላናው ዳንዳያው። ታ ቆፋ ጊዶፔ፥ ጌሌናን ዴዓንቶ፥ ኢዛ ናሼቻን ዴዓና። ቃሲ ታናን ፆሳ ኣያናይ ዴዒያዋ ታኒ ኤራይ። ኤቃሲ ያርሼዳ ቁማባ ጊዶፔ፥ ኑኒ ኡባይካ ኤሬቶ። ኤራይ ኦቶርሴ፤ ሺን ሲቁ ኣማኑዋን ዲቼ። ኦኒኔ ባሬው ኢቲባ ኤሪያዋ ማላቶፔ፥ ኢ ቢሮ ኤራናው ቤሲያዋ ኤሪቤና። ሺን ኦኒኔ ፆሳ ሲቆፔ፥ ፆሳይ ኣ ኤሬ። ሄዋ ዲራው፥ ኤቃው ያርሼዳ ቁማ ሙሳባ ጊዶፔ፥ ኤቃ ኡባይ ኣላሚያን ኣያኔ ጊዴናዋኔ፥ ኢቲ ፆሳፔ ኣቲን፥ ሃራይ ባይናዋ ኑኒ ኤሬቶ። ኣዪሲ ጎፔ፥ ጮራ ፆሳቱኔ ጮራ ጎዳቱ ዴዒኖ። ሺን ሃራይ ኣቶ፥ ሳሉዋን ጊዲና ሳዓን ጊዲና፥ ፆሳቱዋ ጌቴቲያዋንቱ ዴዖፔካ፥ ኡባባ ሜꬌዳዌ ኑኒ ኣው ዴዒያዌ፥ ኢቲ ፆሳይ፥ ኣዉ፥ ኑሲ ዴዔ። ቃሲ ኡባባይ ኣኒ ሜꬌቴዳዌኔ ኑኒ ኣኒ ዴዒያዌ ኢቲ ጎዳይ፥ ዬሱሲ ኪሪስቶሲካ ኑሲ ዴዔ። ሺን ሃ ኤራይ ኣሳ ኡባው ዴዔና። ኢቲ ኢቲ ኣሳቱ ኤቃ ዶዬዳ ዲራው፥ ሃዒ ጋካናዉካ፥ «ኤቃው ያርሼዳ ቁማ» ያጊዴ ሚኖ። ቃሲ ኡንቱንቱ ዎዛናይ ሹጋ ጊዴዳዋን፥ ኡንቱንቶ ሃ ቁማን ቱኔዳዋ ማላቴ። ሺን ቁማይ ኑና ፆሳኮ ሺቃናዳን ማዴና። ኑኒ ማና ꬋዪንቶካ ኑሲ ኣይኔ ፓጬና፤ ሞፔኔ ኑሲ ኣይኔ ጉጄቴና። ሺን ሃዌ ሂንቴ ሂንቴ ዶሶዋዳን ሃኒያዌ ሹጎ ኣማኑዋና ዴዒያዋንታ ናጋራን ዬጌና ማላ ናጌቲቴ። ኣዪሲ ጎፔ፥ ኔኒ ኤራንቻይ ኤቃው ያርሼዳ ቁማ ማናው ኤቃ ጎሊያን ኡቴዳ ዎዴ፥ ሹጎ ኣማኑዋና ዴዒያ ኢቲ ኣሳይ ኔና ቤዖፔ፥ ኤቃው ያርሼዳ ቁማ ኢ ማናው ኣ ዎዛናይ ቆፔኔዬ? ሄዋ ጊዶፔ ሃ ሹጎ ኣማኑዋና ዴዒያ ኔ ኢሻይ፥ ኪሪስቶሲ ኣ ዲራው ሃይቄዳዌ፥ ኔ ኤራን ባዬ። ሃዋዳንካ፥ ሂንቴ ሂንቴ ኢሻቱዋ ናቂያዋኒኔ ኡንቱንቱ ሹጎ ዎዛና ማይꬂያዋን ኪሪስቶሳ ናቂታ። ሄዋ ዲራው፥ ቁማይ ኣማኒያ ታ ኢሻ ꬉቢያዋ ጊዶፔ፥ ኣ ꬉቤና ማላ፥ ታ ዴዒያ ላይꬃን ሙሌካ ኣሹዋ ሚኬ። ታኒ ኣይሌቴꬃይ ባይና ኣሳ ጊዲኪታ? ዬሱሲ ኪቴዳዋ ጊዲኪታ? ኑ ጎዳ ዬሱሲ ኪሪስቶሳ ቤዓቤይኪታ? ሂንቴንቱ ታኒ ጎዳሲ ኦꬄዳ ታ ኦሱዋፔ ቤቴዳዋንታ ጊዲኪቴዬ? ታኒ ሃራንቱሲ ዬሱሲ ኪቴዳዋ ጊዳና ꬋዮፔካ፥ ሂንቴንቶ ዬሱሲ ኪቴዳዋ ጊዲያዌ ኤሬቴዳዋ፤ ኣዪሲ ጎፔ፥ ታኒ ጎዳን ዬሱሲ ኪቴዳዋ ጊዲያዎ ሂንቴ ማርካ። ታና ቦሪያዋንቱሲ ታኒ ኢሚያ ዛሩ ሃዋ። ማናዉኔ ኡሻናው ኑሲ ማቲ ባዌ? ዬሱሲ ኪቴዳ ሃራቱዋዳኒኔ ጎዳ ኢሻቱዋዳን፥ ቃሲ ጴፂሮሳዋዳን፥ ኤኖ ጊያ ማቻቶ ኢቲፔ ኣኪዴ ባናው ኑሲ ማታይ ባዌ? ዎይ ኑ ዴዑዋሲ ኦꬂዴ ባፄታናው ቤሲያዌ ታናኔ ባርናባሳ ፃላሌ? ኣይ ዎዴኔ ባሬ ሚሻ ሚዴ፥ ዎታዳራቴꬃ ኦꬂያዌ ኦኔ? ዎይ ዎዪኒያ ቱራ ቶኪዴ፥ ኣ ኣይፊያ ሜናዌ ኦኔ? ዎይ ሚዛ ዉዲያ ሄሚዴ፥ ሄ ሚዛ ዉዲያፔ ማꬃ ኡሼናዌ ኦኔ? ታኒ ሃዋ ኣሳ ቆፋ ፃላላን ጋይታ? ዎይ ሂጊ ቃሲ ሃዋ ጌኔ? ኣዪሲ ጎፔ፥ ሙሴ ሂጊያን፥ «ካꬃ ዬꬊያ ሜሂያ ዶና ቃቾፓ» ጌቴቲዴ ፃፌቴዳ። ፆሳይ ሜሂያባ ቆፒዴ ሃዋ ጊ? ዎይ ኢ ሄዋ ጊያዌ ሙሌካ ኑ ዲራሳ ጊዴኔ? ቱማካ ኑ ዲራው ፃፌቴዳ፤ ጎሺያ ቢታኒካ ካꬃ ቡኪያ ቢታኒካ፥ «ታና ጋኪያዋ ኣካና» ያጊዴ ኦꬃናው ቤሴ። ኑኒ ሂንቴ ጊዶን ኣያና ዬዉዋ ዜሬዳዋንታ ጊዲዴ፥ ኑ ኣሹዋሲ ማዶ ጊዲያዋ ሂንቴንቱፔ ጫኮፔ ዳሮቤ? ሃራቱ ሄዋ ሂንቴንቱፔ ኣካናው ኡንቱንቶ ማታይ ዴዖፔ፥ ኑሲ ኡንቱንቱዋፔ ኣꬊያ ማታይ ባዌ? ሺን ኑኒ ኪሪስቶሳ ሚሺራቹዋ ቃላሲ ꬉቦ ጊዴናዳን፥ ኡባባ ጌንጪያዋፔ ኣቲን፥ ሄ ማታን ጎዔቲቤይኮ። ጌሻ ጎሊያን ኦꬂያ ኣሳቱ ባሬንቱ ቁማ ጌሻ ጎሊያፔ ኣኪያዋ ኤሪኪቴ? ቃሲ ያርሺያሳን ኦꬂያዋንቱ ያርሹዋፔ ኣኪያዋ ኤሪኪቴ? ሃዋዳንካ፥ ቃሲ ሚሺራቹዋ ቃላ ኦዲያዋንቱ ባሬንቱ ዴዑዋሲ ኮሺያባ ኣፔ ዴማናዳን፥ ጎዳይ ኣዛዜዳ። ሺን ታኒ ሃ ማታ ኡባን ኣይኔ ጎዔታቤይኬ። ታኒ ሃዋ ፃፌዳዌ ሄዋ ማላ ማታይ ታው ዴዓናው ቤሴ ያጊያዋና ጊዴና። ኣዪሲ ጎፔ፥ ታ ጬቁዋ ኦኒኔ ሜላ ኬሲያዋፔ ሃይቂያዌ ታው ሎዓ። ሚሺራቹዋ ቃላ ኦዳናው ታኒ ኣዛዜታ ኡቴዳ ዲራው፥ ኣ ኦዶፔካ ታው ጬቄቲያባይ ባዋ። ሚሺራቹዋ ቃላ ኦዴናን ኣጎፔ፥ ታው ኣዬሮ። ኣዪሲ ጎፔ፥ ታኒ ሃዋ ዶሳዴ ኦꬆፔ፥ ታው ዎይታይ ዴዔ። ሺን ታኒ ዶሴናን ኢፆፔካ፥ ሚሺራቹዋ ቃላ ዲራው ሃዳራ ፆሳይ ታው ኢሜዳ። ያቲና፥ ታ ዎይታይ ኣዬ? ሚሺራቹዋ ቃላ ኦዳዴ፥ ታው ዎንጋላን ዴዒያ ኩሜንꬃ ማታን ጎዔቴናን፥ ሚሺራቹዋ ቃላ ጮ ኦዲያዋ። ታኒ ኦሲኔ ኣይሌ ጊዲኬ ሺን፥ ጮራቱዋ ዛራናው ታና ኡባው ኣይሌ ኬሳዲ። ታኒ ኣዪሁዳቱዋ ዛራናው ኡንቱንቱና ኡንቱንታ ጊዳዴ ዴዓዲ። ታ ሁጴው ሂጊያፔ ጋርሳና ዴዒኬ። ሺን ሂጊያፔ ጋርሳና ዴዒያዋንታ ዛራናው ሂጊያፔ ጋርሳና ዴዒያ ኣሳ ማላ ጊዳዲ። ታኒ ሂጊ ባይና ኣሳቱዋና ዴዓዴ፥ ሂጊ ባይና ኣሳዳን ሃናዲ። ፆሳ ሂጊ ꬋዪና ጊዴና። ሺን ሂጊ ባይናዋንታ ዛራናው፥ ኪሪስቶሳ ሂጊያፔ ጋርሳና ዴዓዲ። ታኒ ኣማኑዋን ዳቡሪያዋንታ ዛራናው፥ ኡንቱንቱ ማላ ጊዳዲ። ታኒ ኣይ ኦጊያኒኔ ኣማሬዳ ኣሳቱዋ ኣሻናው፥ ኡባ ኣሳቱዋና ኡባባኒ ኡንቱንቱ ማላ ጊዳዲ። ታኒ ሚሺራቹዋ ቃላ ኣንጁዋ ሻካናው፥ ሚሺራቹዋ ቃላ ዲራው፥ ኡባባ ኦꬃይ። ዎꬃን ፆናና ጊዴ ዎፂያ ኡባይ ኢቲፔ ዎፄ። ሺን ኢቱዋ ፃላላይ ዎይታ ኣኪያዋ ኤሪኪቴ? ሃዋዳን ሂንቴንቱካ ዎይታ ኣካናው ዎፂቴ። ካሳው ባሬና ጊጊሲያ ኦኒኔ ኡባባኒ ባሬና ናጌ። ኣሳይ ሄዋ ዳቡሪያዌ ፆኔዳዎ ኢሜቲያ ባዪያ ኣክሊሊያ ዴማናሳ። ሺን ኑኒ ዳቡሪያዌ ሜꬊናው ዴዒያዋኔ ባዬና ኣክሊሊያ ዴማናሳ። ሄዋ ዲራው፥ ታኒ ቆፊ ባይናን ዎፂያዋዳን ዎፂኬ። ጫርኩዋ ዪምፒያ ኣሳዳንካ ጮ ኦሌቲኬ። ሺን ታኒ ሃራንቶ ኦዴዳዋፔ ጉዪያን፥ ታ ሁጴው ዎይታፔ ኣቴና ማላ፥ ታ ኣሳቴꬃ ናጌታናዳን ኦꬃይ። ሄዋ ቦላን ታናዳን ኣማኒያዋንቶ፥ ታኒ ሂንቴ ሃዋ ኤራና ማላ ኮያይ። ኑ ኣዎቱ ኡባይ ሻሪያፔ ጋርሳና ዴዔዲኖ፤ ኡባይካ ኣባ ጊዶና ፒኔዲኖ። ኡንቱንቱ ኡባይ ሙሴና ኢቴፔ ጊዳናው፥ ሻሪያኒኔ ኣባን ፃማቄቴዲኖ። ኡንቱንቱ ኡባይ ሄ ኢቲ ኣያና ቁማ ሜዲኖ። ቃሲ ኡባይካ ሄ ኢቲ ኣያና ኡሻ ኡሼዲኖ። ኣዪሲ ጎፔ፥ ኡንቱንቱ ባሬንታ ካሌꬂያ ኣያና ዛላፔ ፑልቶዋ ኡሼዲኖ፤ ሄ ዛላይካ ኪሪስቶሳ። ሺን ፆሳይ ኡንቱንቱፔ ዳሪያ ባጋቱዋን ናሼቲቤና ዲራው፥ ኡንቱንቱ ኣኃይ ኣሳይ ባይና ሳን ላሌቴዳ። ኡንቱንቱ ኢታባ ኣሞቴዳዋዳን፥ ኑ ዎዛናይ ቃሲ ኢታባ ኣሙዋፔ ናጌታናዳን፥ ሄዌ ኡባይ ኑሲ ቲሚርቴ ጊዴዳ። ፆሳ ማፃፋይ፥ «ኣሳይ ማናዉኔ ኡሻናው ኡቴዲኖ፤ ቃሲ ዱሮ ዴንዲ ኤቄዲኖ» ያጊያዋዳን፥ ኡንቱንቱፔ ኢቱ ኢቱ ኤቃው ጎዪኔዳዋዳን፥ ሂንቴ ጎዪኖፒቴ። ኡንቱንቱፔ ኢቱ ኢቱ ዎሹሜዳዋዳን፥ ኑኒ ዎሹማናው ቤሴና። ሄዋ ጋሱዋን ኡንቱንቱፔ ኢቲ ጋላሲ ላታማኔ ሄዙ ሻዓይ ሃይቄዳ። ኡንቱንቱፔ ኢቱ ኢቱ ጎዳ ፓጪዴ፥ ሾሻን ዱኬቲ ሃይቄዳዋዳን፥ ኑኒ ጎዳ ፓጫናው ቤሴና። ኡንቱንቱፔ ኢቱ ኢቱ ዙዙሚና፥ ዎꬊያ ኪታንቻን ኡንቱንታ ꬋዪሴዳዋዳን ዙዙሞፒቴ። ሃዌ ኡባይ ሃራቱሲ ቲሚርቴ ጊዳናዳን ኡንቱንቱ ቦላ ጋኬዳ። ቃሲ ኑና ዎዲያ ዉርሴꬃይ ጋካና ማቴዳዋንታ ሴራናው ፃፌቴዳ። ሄዋ ዲራው፥ ሚና ኤቃዲ ጊዴ ቆፒያ ኡራይ ኦኒኔ ኩንዴናዳን፥ ባሬና ናጎ። ሂንቴንታ ጋኪያ ፓጪ፥ ኣሳ ኡባ ጋኪያ ፓጪያ ማላፔ ኣቲን፥ ኣይኔ ዱማቴና። ሂንቴንቱ ዎልቃይ ዳንዳዪያዋፔ ኣꬊያ ፓጪያን ሂንቴ ፓጬታናው ኮዬና ፆሳይ ኣማኔቴዳዋ። ሺን ሂንቴንታ ፓጪ ጋኪያ ዎዴ፥ ሄ ፓጪያ ኢ ሂንቴንታ ዳንዳዪሳና። ቃሲ ሄ ፓጪያፔ ሂንቴንቱ ኬሲያ ኦጊያካ ኢ ኢማና። ሄዋ ዲራው፥ ታ ዶሲያዋንቶ፥ ኤቃው ጎዪኖፒቴ። ሂንቴንቱ ዎዛናማ ኣሳ ጊዴዳ ዲራው፥ ታኒ ሂንቴንቶ ኦዳይ። ታኒ ጊያዋ ሂንቴ ፒርዲቴ። ኑኒ ፆሳ ጋላቲዴ ሻኪያ ኣንጁዋ ፁዓይ ኪሪስቶሳ ሱꬃና ኢቲፔቴꬃይ ዴዒያዋ ጊዴኔ? ቃሲ ኑኒ ሜንꬂያ ኡኪꬃይ ኪሪስቶሳ ኣሹዋና ኢቲፔቴꬃይ ዴዒያዋ ጊዴኔ? ኢቲ ኡኪꬃይ ዴዒያ ዲራው፥ ኑኒ ጮራ ጊዶፔካ፥ ኢቲ ኣሳቴꬃ። ኣዪሲ ጎፔ፥ ኑኒ ኡባይካ ሄ ኢቲ ኡኪꬃ ሻኬቴቶ። ኢስራዔሊያ ኣሳ ፄሊቴ። ያርሹዋ ሚያዋንቱ ያርሺያሳና ኢቲፔቴꬃይ ዴዒያዋንታ ጊዲኪኖ? ሲሚ ታኒ ዋጋይታ? ኤቃሲ ያርሼቴዳ ቁማይ ማዲ ዎይ ኤቃይ ማዲ? ማዴና፤ ሺን ታኒ ጊያዌ ፆሳ ኣማኔና ኣሳቱ ኢታ ኣያናቱዋሲ ያርሺያዋፔ ኣቲን፥ ፆሳው ያርሺኪኖ። ኢታ ኣያናቱዋና ሂንቴ ኢቲፔ ዙፔታና ማላ፥ ታኒ ኮዪኬ። ጎዳ ፁዓፔ ኡሺዴ ቃሲ ኢታ ኣያናቱዋ ፁዓፔ ኡሻናው ሂንቴ ዳንዳዪኪታ። ጎዳ ጋይታፔ ሂንቴ ጊሼቲዴ ቃሲ ኢታ ኣያናቱዋ ጋይታፔ ማናው ዳንዳዪኪታ። ሄዋ ኡዲዴ ኑኒ ጎዳና ፂኖታናው ኮሺ? ኑኒ ኣፔ ሚኔቶ? ሂንቴፔ ኢቱ ኢቱ፥ «ኡባባ ኦꬃናው ታና ዲጊያባይ ባዋ»፤ ሺን ኡባባይ ማዴና። «ኡባባ ኦꬃናው ዲጊያባይ ባዋ፤ ሺን ኡባባይ ጌሼና» ያጊኖ። ኦኒኔ ሃራ ኣሳ ማዲያባ ቆፖፔ ኣቲን፥ ሃራይ ኣቶ ኢቱኔ ባሬና ማዲያባ ቆፖፖ። ጌያን ኣፃሬ ታራን ዛሊዔቲያ ኣሹዋ ሂንቴ ዎዛና ቆፋን፥ ኣይኔ ሲꬌናን ሚቴ። ኣዪሲ ጎፔ፥ ኣላሚኔ ኣኒ ዴዒያባይ ኡባይ ጎዳባ። ኢቲ ኣማኔና ኣሳይ ሂንቴንታ ኢማꬃ ኡዲ ሾባናው ፄሲና ባናው ኮዮፔ፥ ሂንቴ ዎዛና ቆፋን፥ ኣይኔ ሲꬌናን ሂንቴ ሲንꬃ ኢ ኣꬂያባ ኡባ ሚቴ። ሺን ኢቲ ኡራይ ሂንቴንቶ፥ «ሃዌ ኤቃው ያርሼዳዋ» ጎፔ፥ ሄ ሂንቴንቶ ኦዴዳ ቢታኒያ ዲራዉኔ ቃሲ ሂንቴ ዎዛና ቆፋ ዲራው፥ ሄ ቁማ ሞፒቴ። ታኒ ጊያዌ ኔ ዎዛና ቆፋ ዲራሳ ጊዴና፤ ሺን ዮኮ ቢታኒያ ዎዛና ቆፋ ዲራሳ። ታኒ ታ ሃናናው ዳንዳዪያ ታ ሃኖታ ሃራ ኣሳ ዎዛናይ ኣያው ፒርዲ? ታኒ ፆሳ ጋላታዴ ቁማ ሞፔ፥ ፆሳ ጋላታዴ ሜዳ ቁማው ኣያው ቦሬታይታ? ሲሚ ሂንቴ ኣያኔ ሞፔ፥ ዎይ ኣያኔ ኡሾፔ፥ ዎይ ሂንቴ ኣያኔ ኡዶፔ፥ ኡባባ ፆሳ ቦንቹዋሲ ኦꬂቴ። ሂንቴንቱ ኣዪሁዳ ኣሳቱዋሲ ዎይ ጊሪኬ ኣሳቱዋሲ ዎይ ፆሳ ኣማኒያዋንቱሲ ꬉቦ ጊዶፒቴ። ታኒ ቃሲ ጮራቱ ኣታና ማላ፥ ኡንቱንቱ ኡባ ማዳናዳኒፔ ኣቲን፥ ታ ሁጴው ማዱዋ ኮዬናን፥ ኣሳ ኡባ ኡባባኒ ናሼቺያዋዳን፥ ሂንቴንቱካ ሄዋዳ ኡዲቴ። ታኒ ኪሪስቶሳ ሌሚሱዋ ካሊያዋዳን፥ ሂንቴንቱካ ታዋ ካሊቴ። ታናዳን ኣማኒያዋንቶ፥ ሂንቴ ኡባባኒ ታና ሃሳዪያ ዲራዉኔ፥ ዎጋ ታኒ ሂንቴንቶ ኢሜዳዋዳን፥ ሂንቴ ሚኒሲዴ ናጊያ ዲራው፥ ሂንቴንታ ጋላታይ። ሺን ኪሪስቶሲ ኣቱማዋ ኡባው ሁጴ ጊዲያዋ፥ ኣቱማ ኣሳይ ማጫ ኣሳሲ ሁጴ ጊዲያዋኔ ቃሲ ፆሳይ ኪሪስቶሳሲ ሁጴ ጊዲያዋ ሂንቴ ኤራና ማላ ኮያይ። ፆሳ ዎሲዴ፥ ዎይ ቲምቢቲያ ኦዲዴ፥ ባሬ ሁጲያ ጎዚያ ኣቱማ ኣሳይ ኡባይ ኪሪስቶሳ ቶቼ። ቃሲ ፆሳ ዎሳዴ ዎይ ቲምቢቲያ ኦዳዴ፥ ባሬ ሁጲያ ጎዜና ማጫዉና ባሬ ኣሲና ቶቻው፤ ኣያው ጎፔ፥ ኢዛ ባሬ ሁጲያ ሜዴታዲጎኒና ኢቲ ማላ። ማጫዉና ባሬ ሁጲያ ጎዛና ꬋዮፔ፥ ቃንፂሱ። ሺን ኢዛ ባሬ ሁጲያ ቃንፂሳናዌ ዎይ ሜዲሳናዌ ፖኮፔ፥ ባሬ ሁጲያ ጎዙ። ኣቱማዌ ፆሳ ሌሚሱዋኔ ቦንቹዋ ጊዲያ ዲራው፥ ባሬ ሁጲያ ጎዛናው ቤሴና፤ ሺን ማጫዉና ኣቱማዋሲ ቦንቾ። ኣዪሲ ጎፔ፥ ማጫዉና ኣቱማዋፔ ቤታዱፔ ኣቲን፥ ኣቱማዌ ማጫዉኒፔ ቤቲቤና። ኣዪሲ ጎፔ፥ ማጫዉና ኣቱማዋ ዲራው ሜꬌታዱፔ ኣቲን፥ ኣቱማዌ ማጫዉኒ ዲራው ሜꬌቲቤና። ሄዋ ዲራው፥ ማጫዉና ባሬ ኣሲና ኣዪሱዋፔ ጋርሳና ዴዒያዋ ኤሪሳናዉኔ ኪታንቻቱዋ ዲራው፥ ኢዚ ሁጲያን ጎዚያባይ ዴዓናው ቤሴ። ሺን ጎዳን ማጫዉና ኣቱማዌ ባይናን ዴዑኩ፤ ኣቱማዌካ ማጫዉና ባይናን ዴዔና። ኣዪሲ ጎፔ፥ ማጫዉና ኣቱማዋፔ ሜꬌቴዳዋዳን፥ ቃሲ ኣቱማዌካ ማጫዉኒፔ ዬሌቴዳ። ቃሲ ኡባባይካ ፆሳፔ ዬ። ሂንቴንቱ ሂንቴ ሁጴው ፒርዲቴ። ማጫዉና ባሬ ሁጲያ ጎዜናን ፆሳ ዎሳናው ቤሲ? ኣቱማዌ ባሬ ሁጲያ ዲቾፔ፥ ኣው ፖኮ። ሺን ማጫዉና ባሬ ሁጲያ ዲቾፔ፥ ኢዚው ቦንቾ ጊዲያዋ ሃራይ ኣቶ፥ ሜꬌቴንቶኔ ሂንቴንታ ታማሪሴኔ? ኣዪሲ ጎፔ፥ ማጫዉኒ ሁጲ ኢዞ ካማናው ኢዚው ኢሜቴዳ። *** ሺን ኦኒኔ ሃ ዬዉዋን ፓሉሜታናው ኮዮፔ፥ ኑሲ ጊዲና ዎይ ፆሳ ኣማኒያዋንቶ ጊዲናካ፥ ሃዋፔ ሃራ ዎጋይ ባዋ። ሂንቴ ሺቂያዌ ኢታባሳፔ ኣቲን፥ ሎዖባሳ ጊዴና ዲራው፥ ታኒ ሃ ኣዛዙዋ ኢማዴ ሂንቴንታ ጋላቲኬ። ሺን ሂንቴ ዎሳ ጎሌን ሺቂያ ዎዴ፥ ሂንቴ ጊዶን ጳልቄꬃይ ዴዒያዋ ታኒ ሲሳይ። ቃሲ ሄዌ ኢቲ ባጋና ቱማ ጊዲያዋ ኣማናይ። ኣዪሲ ጎፔ፥ ሂንቴ ማታን ኣማኔቴዳዋንቱ ቆንጪ ኤሬታና ማላ፥ ሂንቴ ጊዶኒካ ቃሲ ሻኩ ዴዓናው ቤሴ። ሄዋ ዲራው፥ ሂንቴ ኢቲፔ ሺቂያ ዎዴ፥ ሂንቴ ሺቁ ጎዳ ካዉዋ ማናሳ ጊዴና። ኣዪሲ ጎፔ፥ ሂንቴ ቁማ ሚያ ዎዴ፥ ኡባይ ሁጲያን ሁጲያን ባሬዋ ባሬዋ ሚያ ዲራው፥ ኢቱ ኮሻቴ፤ ኢቱ ቃሲ ማꬆቴ። ማናዉኔ ኡሻናው ሂንቴንቶ ጎሊ ባዌ? ዎይ ፆሳ ዎሳ ጎሊያ ካꬊቴ? ቃሲ ኣይኔ ባይናዋንታ ዬላዪቴ? ታኒ ሂንቴንታ ዋጎ? ሃ ዬዉዋን ታኒ ሂንቴንታ ጋላቶ? ጋላቲኬ። ኣዪሲ ጎፔ፥ ታኒ ቃሲ ሂንቴንቶ ኢሜዳ ቲሚርቲያ ጎዳፔ ኣካዲ። ጎዳ ዬሱሲ ኡንቱንቱ ኣ ኣꬂዴ ኢሜዳ ቃማ ዳቡዋ ኣኪዴ፥ ፆሳ ጋላቴዳ፤ ዳቡዋ ሜንꬂዴ፥ «ሄይቴ፤ ሚቴ። ሃዌ ሂንቴ ጊሻታው ባሬና ኢሜዳ ታ ኣሹዋ። ሃዋን ታና ቆፒቴ» ያጌዳ። ሃዋዳንካ፥ ካዉዋ ሚዴ ሲሚና፥ ፁዓ ቃሲ ኣኪዴ፥ «ሃዌ ፁዓይ ታ ሱꬃን ታኒ ጫቄዳ ኦራꬃ ጫቁዋ። ሂንቴንቱ ኣፔ ኡሼዳ ዎዴ ኡባን ሄዋን ታና ቆፒቴ» ያጌዳ። ኣዪሲ ጎፔ፥ ሂንቴ ሃ ዳቡዋ ሜዳ ዎዴ ኡባኒኔ ሃ ፁዓፔ ኡሼዳ ዎዴ ኡባን ጎዳይ ያና ጋካናዉካ፥ ኣ ሃይቁዋ ኦዲታ። ሄዋ ዲራው፥ ቤሴናን ዴዒዴ ጎዳ ዳቡዋ ሚያዌ፥ ዎይ ጎዳ ፁዓፔ ኡሺያዌ ኦኒኔ ኣ ኣሹዋኔ ኣ ሱꬃ ኣጮቴ። ሺን ኣሳይ ባሬ ሁጲያ ፓጮ። ያቲዴ ዳቡዋ ሞ። ፁዓፔካ ኡሾ። ኣዪሲ ጎፔ፥ ጎዳ ኣሹዋ ሻኪዴ ኤሬናን ዳቡዋ ሚያዌኔ ፁዓፔካ ኡሺያዌ ባሬ ሁጴዋ ፒርዳ ሜኔ ኡሼ። ሄዋ ዲራው፥ ሂንቴ ጊዶን ጮራቱ ዳቡራንቻኔ ሃርጋንቻ ጊዴዲኖ፤ ቃሲ ኡንዴኔዳዋንቱ ሃይቄዲኖ። ሺን ኑኒ ኑ ሁጲያ ቱሙ ፓጬዴንቶ፥ ፆሳይ ኑና ፒርዴና። ኑኒ ፒርዴቲያ ዎዴ፥ ሃ ኣላሚያና ኢቲፔ ፒርዴቴና ማላ፥ ጎዳይ ኑና ሴሬ። ሄዋ ዲራው፥ ታናዳን ኣማኒያዋንቶ፥ ጎዳ ካዉዋ ማናው ሂንቴ ሺቂያ ዎዴ፥ ኢቱ ኢቱዋ ናጊቴ። ኦኒኔ ኮሻቴዳዋ ጊዶፔ፥ ኢቲፔ ሺቂያ ዎዴ ፆሳ ፒርዳን ሂንቴ ጌሌና ማላ፥ ባሬ ሶዪን ሞ። ኣቴዳዋ ታኒ ያ ባዴ ጊጊሳና። ታናዳን ኣማኒያዋንቶ፥ ጌሻ ኣያና ኢሞታባ ሂንቴ ኤራናው ኮያይ። ሂንቴንቱ ፆሳ ኣማኔና ዎዴ፥ ኡባ ዎዴ ካሊያዋዳንካ፥ ሃሳዬና ኤቃቱዋኮ ሂንቴ ቤዳዋ ኤሪታ። ሄዋ ዲራው፥ ፆሳ ኣያናይ ካሌꬂያ ኣሳይ ኦኒኔ፥ «ዬሱሲ ሼቄቶ» ያጊዴ ሃሳዬናዋኔ ቃሲ ጌሻ ኣያናይ ካሌꬆፔፔ ኣቲን፥ ሃራይ ኣቶ ኢቲ ኣሳይኔ፥ «ዬሱሲ ጎዳ» ጋናው ዳንዳዬናዋ ታኒ ሂንቴንታ ኤሪሳይ። ኣያና ኢሞታይ ዱማ ዱማ፤ ሺን ኢሚያ ኣያናይ ኢቱዋ። ቃሲ ኦꬂያ ኦሱ ዱማ ዱማ፤ ሺን ጎዳይ ኢቱዋ። ኦሱዋ ኦꬃናው ዱማ ዱማ ኦጊ ዴዒሺን፥ ሄ ኦꬂያ ኦጊያ ኡባ ኣሳ ኡባው ቆንጪሲያ ፆሳይ ኢቱዋ። ሺን ኣሳ ኡባ ማዳናው፥ ጌሻ ኣያና ቆንጪሲያ ዎልቃይ ኡባው ሁጲያን ሁጲያን ኢሜቴዳ። ኣዪሲ ጎፔ፥ ጌሻ ኣያናይ ኢቱዋሲ ኣꬎ ኤራቴꬃ ሃሳያ ኢሜዳ፤ ቃሲ ኢቱዋሲ ኤራቴꬃ ሃሳያ ኢሜዳ። ሄ ጌሻ ኣያናይ ኢቱዋሲ ኣማኑዋ ኢሚዴ፥ ዮኮዋሲ ሃርጋንቻ ፓꬂያ ዎልቃ ኢሜዳ። ጌሻ ኣያናይ ኢቱዋሲ ማላታ ኦꬂያ ዎልቃ ኢሚዴ፥ ኢቱዋሲ ቲምቢቲያ ኦዲያ ዎልቃ ኢሜዳ። ኢቱዋሲ ኣያናቱዋ ጊዱዋን ዴዒያ ዱማቴꬃ ኤሪያ ዎልቃ ኢሚዴ፥ ኢቱዋሲ ዱማ ዱማ ቃላን ሃሳዪያ ዎልቃ ኢሜዳ። ቃሲ ኢቱዋሲ ዱማ ዱማ ቃላን ሃሳዬዳዋ ቢሊያ ዎልቃ ኢሜዳ ሺን ሃ ኡባባ ኦꬂያዌ ሄ ኢቲ ጌሻ ኣያና። ኣሳ ኡባው ኢ ባሬ ኮዪያዋዳን፥ ዱማ ዱማ ኢሞታ ሻኪ ሻኪዴ ኢሜዳ። ኪሪስቶሲ ጮራ ኣሳቴꬃቱ ዴዒያ ኢቲ ቦላ ማላ። ቦላይ ጮራ ኣሳቴꬃቱዋፔ ሜꬌቴዳዋ ጊዶፔካ፥ ኢቲ ቦላ። ኣዪሲ ጎፔ፥ ኑኒ ኣዪሁዳ ኣሳ ጊዶፔኔ ዎይ ጊሪኬ ኣሳ ጊዶፔ፥ ዎይ ኣይሌ ጊዶፔኔ ዎይ ዎማኖ ጊዶፔ፥ ኡባይ ኢቲ ጌሻ ኣያናን ኢቲ ቦላ ጊዳናው ፃማቄቴዶ። ቃሲ ኑኒ ኡባይ ኢቲ ጌሻ ኣያና ኡሼዶ። ኣዪሲ ጎፔ፥ ቦላሲ ኣሳቴꬃይ ጮራ ጊዲያዋፔ ኣቲን፥ ኢቱዋ ጊዴና። ጌዲ፥ «ታኒ ኩሺያ ጊዴና ዲራው፥ ቦላ ቆሞ ጊዲኬ» ጎፔ፥ ኢ ሄዋ ጊያዌ ቦላ ቆሞ ጊዲያዋ ዲጋኔ? ሃይꬃይካ፥ «ታኒ ኣይፊያ ጊዴና ዲራው፥ ቦላ ቆሞ ጊዲኬ» ጎፔ፥ ኢ ሄዋ ጊያዌ ቦላ ቆሞ ጊዲያዋ ዲጋኔ? ቦላይ ኡባይ ኣይፊያ ፃላላ ጊዲንቶ፥ ዎቲዴ ሲሳናው ዳንዳዪ? ቃሲ ቦላይ ኡባይ ሃይꬃ ፃላላ ጊዲንቶ፥ ዎቲዴ ሲንጋናው ዳንዳዪ? ሺን ፆሳይ ባሬ ኮዬዳዋዳን፥ ቦላ ኣሳቴꬃቱዋ ኢቱዋ ኢቱዋ ቦላን ዎꬄዳ። ኡባይ ኢቲ ቆሞ ጊዲንቶ፥ ቦላይ ሃቃን ዴዓኔ? ሺን ኣሳቴꬃቱ ጮራ ጊዶፔካ፥ ቦላይ ኢቱዋ። ኣዪፊ ኩሺያ፥ «ኔኒ ታና ኮሻካ» ጋናው ዳንዳዬና። ዎይ ቃሲ ሁጲ ጌዳቱዋ፥ «ሂንቴንቱ ታና ኮሺኪታ» ጋናው ዳንዳዬና። ሺን ላፋ ማላቲያ ቦላ ኣሳቴꬃቱ ሎይꬂ ኮሺያዋንታ። ቦላ ኣሳቴꬃቱዋፔ ቦንቼቴናዋንታ ኑሲ ማላቲያዋንታ ኑኒ ሎይꬂ ቦንቼቶ። ቃሲ ኑና ዬላዪያ ቦላ ኣሳቴꬃቱዋካ ሎይꬂ ቦንቼቶ። ኑ ቦላፔ ቤቲያ ባጋው ማዩ ኮሼና፤ ሺን ፖኪያ ባጋ ኣሳቴꬃቱዋ ሎይꬂ ማዪዛናዳን፥ ፆሳይ ኣሳቴꬃ ኢቲፔ ጋꬄዳ። ቦላ ኣሳቴꬃቱ ኢቱ ኢቱዋሲ ኢቲ ማላ ቆፋ ቆፓናፔ ኣቲን፥ ቦላን ዱማቴꬃይ ዴዓናው ቤሴና። ቦላ ኣሳቴꬃቱዋፔ ኢቱ ሴሌቶፔ፥ ቦላ ኣሳቴꬃቱ ኡባይካ ኣናና ሴሌቲኖ፤ ቦላ ኣሳቴꬃቱዋፔ ኢቱ ቦንቼቶፔ፥ ቦላ ኣሳቴꬃቱ ኡባይ ኣናና ናሼቲኖ። ሂንቴንቱ ኡባይ ኪሪስቶሳ ቦላ፤ ቃሲ ሁጲያን ሁጲያን ሂንቴ ኡባይካ ኣ ቦላ ኣሳቴꬃቱዋ። ፆሳይ ዎሳ ጎሌን ኢቲ ኢቲ ኣሳቱዋ፥ ኮይሩዋን ዬሱሲ ኪቴዳዋንታ፥ ላዔንꬁዋን ናባቱዋ፥ ሄዜንꬁዋን ታማሪሲያዋንታ፥ ሄዋፔ ጉዪያን፥ ማላታ ኦꬂያዋንታ፥ ሄዋፔ ጉዪያን፥ ፓꬂያ ዎልቃይ ዴዒያዋንታ፥ ማዲያዋንታ፥ ዎሳ ጎሊያ ኣዪሲያዋንታ ዱማ ዱማ ቃላን ሃሲያዋንታ ኦꬄዳ። ኡባቱ ዬሱሲ ኪቴዳዋንቴ? ኡባቱ ናባቴ? ኡባቱ ታማሪሲያዋንቴ? ኡባቱ ማላታ ኦꬂኖ? ኡባሲ ፓꬂያ ዎልቃይ ዴዒ? ኡባቱ ዱማ ዱማ ቃላን ሃሳዪኖ? ቃሲ ዱማ ዱማ ቃላን ሃሳዬዳዋ ኡባቱ ቢሊኖ? ሺን ኡባፔ ኣꬊያ ኢሞታ ሎይꬂ ኮዪቴ። ቃሲ ኡባፔ ሎይꬂ ኣꬊያ ኦጊያ ታኒ ሂንቴንታ ቤሳና። ታኒ ኣሳ ቃላኒኔ ኪታንቻ ቃላን ሃሳዮፔካ ታው ሲቁ ꬋዮፔ፥ ታ ሃሳያይ ጮ ዋሲያ ዳዋላ ማላ፤ ዎይ ቆልጫካቲያ ፂናፂሊያ ማላ። ናቤቴꬃ ኢሞታይ ታው ዴዖፔካ፥ ታኒ ጌሜዳ ዬዉዋ ኡባኔ ኤራቴꬃ ኡባ ኤሪንቶካ፥ ቃሲ ዴሪያ ዴንꬂ ዲጊያ ኣማኑ ታው ዴዖፔካ፥ ሲቁ ꬋዮፔ፥ ታኒ ኣያኔ ጊዲኬ። ታው ዴዒያዋ ኡባ ሂዬሳቱዋ ሚዛናው ኢሚንቶካ ሃራይ ኣቶ፥ ታ ቦላ ታማን ጉዳናው ኣꬃ ኢሚንቶካ ሲቁ ꬋዮፔ፥ ታና ኣይኔ ማዴና። ሲቁ ዳንዳያንቻ። ሲቁ ኬኬ። ሲቁ ቃናቴና። ጬቄቴና፤ ቃሲ ኦቶሬቴና። ሲቁ ባሬው ቤሴናዋ ኦꬄና፤ ኡዜቴና፤ ዪሎቴና፤ ሲቁ ናቄቴዳዋካ ፓይዴና። ሲቁ ቱማቴꬃን ናሼቲያዋፔ ኣቲን፥ ዎርዱዋን ናሼቴና። ሲቁ ኡባባ ዳንዳዬ። ኡባባይካ ሃናናዋ ጊዴ፥ ናሼቻን ናጌ። ኡባባኒ ጌንጬ። ሲቁ ሙሌካ ꬋዬና። ሺን ናቤቴꬃይካ ኣታና። ዱማ ዱማ ቃላን ሃሳዪያዌካ ኣታና። ኤራቴꬃይካ ꬋያና። ኣዪሲ ጎፔ፥ ኑኒ ኤራቴꬃፔ ፓጫ ኤሬቶ፤ ቲምቢቲያፔካ ፓጫ ኦዴቶ። ሺን ኩሜንꬃ ጊዴዳዌ ዪያ ዎዴ፥ ፓጫይ ꬋያና። ታኒ ናዓቴꬃን ዴዒያ ዎዴ፥ ናዓዳን ሃሳያይ። ናዓዳን ቆፓይ። ቃሲ ናዓዳንካ ኣኬካይ። ዎዳላ ጊዴዳ ዎዴ፥ ናዓቴꬃ ሃኑዋ ኣጋዲ። ኑኒ ሃዒ ቤዒያዌ ማስቶቲያን ቤዒያ ሌምዒ ሌምዒያ ማላ ማላ፤ ሺን ሄ ዎዴ ኑኒ ኑ ኣይፊያን ቆንጪያን ቤዓና። ሃዒ ታኒ ኤራቴꬃፔ ፓጫ ኤራይ፤ ሺን ፆሳይ ታና ዉርሲዴ ኤሪያዋዳን፥ ሄ ዎዴ ታኒካ ዉርሳ ኤራና። ሺን ሄዋ ጊዶፔ፥ ኣማኑ፥ ሃናናዋ ጊዴ ናሼቻን ናጊያዌኔ ሲቁ፥ ሃዋንቱ ሄዛቱ ሚኒዴ ዴዒኖ። ሃዋንቱፔ ኣꬊያዌ ሲቁዋ። ሲቁዋ ካሊቴ። ኣያና ኢሞታካ ሎይꬂ ኮዪቴ። ሺን ኡባፔ ኣꬂዴ፥ ናቤቴꬃ ኮዪቴ። ኣዪሲ ጎፔ፥ ዱማ ዱማ ቃላን ሃሳዪያ ኡራይ ፆሳው ሃሳዬፔ ኣቲን፥ ኣሳሲ ሃሳዬና። ኣዪሲ ጎፔ፥ ኢ ሃሳዪያዋ ኦኒኔ ኣኬኬና። ሺን ኣሳሲ ቆንጪቤና ዬዉዋ ኣያና ዎልቃን ሃሳዬ። ሺን ናቢ ኣሳ ማዳናው፥ ዞራናዉኔ ሚኒሳናው ኣሳሲ ሃሳዬ። ዱማ ዱማ ቃላን ሃሳዪያ ኡራይ ባሬና ማዴ። ሺን ናቢ ዎሳ ጎሊያ ማዴ። ሂንቴንቱ ኡባይ ዱማ ዱማ ቃላን ሃሳያናዋ ታኒ ዶሳይ። ሺን ናቤቴꬃ ሄዋፔ ኣꬃዴ ዶሳይ። ኣዪሲ ጎፔ፥ ዱማ ዱማ ቃላን ሃሳዪያዌ ሄ ሃሳዬዳዋ ዎሳ ጎሊያ ማዳናው ቢሊያ ኣሳይ ꬋዮፔ፥ ዱማ ዱማ ቃላን ሃሳዪያዋፔ ናቤቴꬃይ ኣꬌ። ሺን ታናዳን ኣማኒያዋንቶ፥ ሃዒ ታኒ ሂንቴንቱኮ ባዴ፥ ዱማ ዱማ ቃላን ሃሳያዴ፥ ሳፃን ዎይ ኤራቴꬃን ዎይ ናቤቴꬃን ዎይ ታማሪሲያዋን ሂንቴንቱሲ ኦዳና ꬋዮፔ፥ ታኒ ሂንቴንታ ኣያ ማዳይታ? ሃራይ ኣቶ፥ ሼምፑ ባይናባይ ሱሱሊያ ጊዲና ዎይ ዲꬃ ጊዲና ካዒዴ፥ ባሬ ካሳ ዱማቴꬃ ኤሪሳና ꬋዮፔ፥ ሱሱሊያ ፑኖፔኔ፥ ዎይ ዲꬃ ዲፆፔ፥ ኣሳይ ዎቲዴ ኤራኔ? ቃሲ ፁሩምባ ዋሱ ሎይꬂ ኤሬታና ꬋዮፔ፥ ኦላው ኦኔ ጊጌታናዌ? ሃዋዳንካ፥ ቃሲ ዱማ ዱማ ቃላን ሂንቴ ሃሳዪያዌ ቆንጬ ጊዴናን ꬋዮፔ፥ ሂንቴ ሃሳዪያዋ ኣሳይ ዎቲ ኣኬካኔ? ኣዪሲ ጎፔ፥ ጫርኩዋሲ ሂንቴ ሃሳዪታ። ሃ ኣላሚያን ጮራ ቃላይ ዴዔ፤ ሺን ቢሌꬃይ ባይና ቃላይ ኢቱኔ ባዋ። ሺን ኢቲ ኣሳይ ሃሳዪያ ቃላ ታኒ ኤራና ꬋዮፔ፥ ሄ ሃሳዪያዌ ታው ኢማꬃ ጊዴ፤ ታኒካ ኣው ኢማꬃ ጊዳይ። ሃዋዳንካ፥ ቃሲ ጌሻ ኣያና ኢሞታ ሂንቴ ኣካናው ሎይꬂ ኮዪያዋንታ ጊዲያ ዲራው፥ ዎሳ ጎሊያ ዲቻናው ማዳዋ ኡባባፔ ኣꬂዴ ኮዪቴ። ሄዋ ዲራው፥ ዱማ ዱማ ቃላን ሃሳዪያዌ ባሬ ሃሳዬዳዋ ቢላናው ዳንዳያና ማላ፥ ፆሳ ዎሶ። ኣዪሲ ጎፔ፥ ታኒ ዱማ ዱማ ቃላን ፆሳ ዎሶፔ፥ ታ ኣያናይካ ዎሴ፤ ሺን ታ ጋርሳ ቆፋይ ኣይኔ ጎዔቴና። ያቲና፥ ታኒ ዎቶ? ታኒ ታ ኣያናን ፆሳ ዎሳና፤ ቃሲ ታ ቆፋንካ ፆሳ ዎሳና። ታ ኣያናን ዬፃና፤ ቃሲ ታ ቆፋንካ ዬፃና። ሄዋ ጊዳና ꬋዮፔ፥ ኔኒ ኔ ኣያና ፃላላን ፆሳ ጋላቲያዋ ጊዶፔ፥ ሄ ሳዓን ኔኒ ጊያዋ ኤሬና ኣሳይ ኔኒ ፆሳ ጋላቲያዋ ኤሬናን፥ ኔኒ ጋላቴዳዋን ዎቲዴ፥ «ኣሜንዒ» ጋኔ? ኔኒ ፆሳ ጋላቲያዌ ሎዓ፤ ሺን ሄዌ ዮኮ ቢታኒያ ማዴና። ታኒ ዱማ ዱማ ቃላን ሂንቴ ኡባፔ ኣꬃዴ ሃሳዪያ ዲራው፥ ፆሳ ጋላታይ። ሺን ታኒ ዎሳ ጎሌን ሃራቱዋ ታማርሳናው ዱማ ዱማ ቃላን ታሙ ሻዓ ቃላቱዋ ሃሳዪያዋፔ ኢቼሹ ቃላቱዋ ታ ዎዛና ቆፋን ሃሳያናው ዶሳይ። ታናዳን ኣማኒያዋንቶ፥ ሂንቴ ኢታ ዬዉዋን ጉꬃ ናና ማላ ጊዳናፔ ኣቲን፥ ቆፋን ጉꬃ ናና ማላ ጊዶፒቴ፤ ሂንቴ ጋርሳ ቆፋን ዎዛናማቱዋ ጊዲቴ። ፆሳ ማፃፋን፥ «ጎዳይ፥ ‹ታኒ ሃ ኣሳው፥ ዱማ ዱማ ቃላን ሃሳዪያ ኣሳኒኔ ኢማꬃቱዋ ዶናን ሃሳያና። ሺን ሄዋንካ፥ ታኒ ጊያዋ ኡንቱንቱ ሲሲኪኖ› ያጌ» ጌቴቲዴ ፃፌቴዳ። ሲሚ ዱማ ዱማ ቃላን ሃሳዪያዌ ኣማኔናዋንቱሲ ማላታ ጊዲያዋፔ ኣቲን፥ ኣማኒያዋንቱሲ ማላታ ጊዴና። ቃሲ ናባቱዋፔ ሃሳዬቲያዌ ኣማኒያዋንቱሲ ማላታ ጊዲያዋፔ ኣቲን፥ ኣማኔናዋንቱሲ ማላታ ጊዴና። ሄዋ ዲራው፥ ኣማኒያ ኣሳይ ኡባይ ኢቲፔ ሺቂዴ፥ ቃሲ ኡባይካ ዱማ ዱማ ቃላን ሃሳዮፔ፥ ታማሪቤና ኣሳይ ዎይ ኣማኔና ኣሳይ ጌሊዴ፥ ሂንቴንታ ኡባ፥ «ጎዪታ» ጌኔ? ሺን ታማሪቤና ኣሳይ ዎይ ኣማኔና ኣሳይ ዎሳ ጎሌ ጌሊያ ዎዴ፥ ኣሳይ ኡባይ ቲምቢቲያ ኦዶፔ፥ ኢ ባሬ ሲሲያዋን ባሬ ናጋራ ኣኬኬ። ቃሲ ሄ ሲሴዳባ ኡባንካ ኢ ፒርዴታና። ኣ ዎዛናን ጌሜዳ ቆፋይካ ቆንጫና። ሃዋዳንካ ቃሲ፥ «ፆሳይ ቱሙ ሂንቴ ጊዶን ዴዔ» ያጊዴ ማርካቲዴ፥ ጉፋኒዴ ፆሳው ጎዪናና። ሲሚ ታናዳን ኣማኒያዋንቶ፥ ኣዬ? ሂንቴንቱ ኢቲፔ ሺቂያ ዎዴ፥ ሁጲያን ሁጲያን፥ ኢቱዋሲ ማዚሙሪ ዴዔ፤ ኢቱዋሲ ታማሪሲያዌ ዴዔ፤ ኢቱዋሲ ሳፃይ ዴዔ፤ ቃሲ ኢቱዋሲ ዱማ ዱማ ቃላን ሃሳዪያዌ ዴዔ፤ ኢቱዋሲ ቢሊያዌ ዴዔ። ኡባይካ ዎሳ ጎሊያ ማዲያዋ ጊዳናው ቤሴ። ኦኒኔ ዱማ ዱማ ቃላን ሃሳዮፔ፥ ላዑ ጊዲዴ፥ ዎይ ዳሮፔ ሄዙ ጊዲዴ፥ ካላን ካላን ሃሳያናው ቤሴ። ቃሲ ሃራ ኢቱ ኡንቱንቱ ሃሳዬዳዋ ቢሎ። ሺን ቢሊያ ኣሳይ ꬋዮፔ፥ ዱማ ዱማ ቃላን ሃሳዪያዌ ዎሳ ጎሊያን ጮዑ ጎ። ባሬ ሁጴዉኔ ፆሳው ሃሳዮ። ናባቱካ ላዑ ጊዲዴ ዎይ ሄዙ ጊዲዴ ሃሳዪኖ። ቃሲ ሃራንቱ ኡንቱንቱ ጊያዋ ሻኪኖ። ሺን ፆሳይ ሄ ሳዓን ኡቴዳ ሃራሲ ኢቲባ ቆንጪሶፔ፥ ካሴና ሃሳዪያዌ ጮዑ ጎ። ኣዪሲ ጎፔ፥ ኡባይ ታማራና ማላኔ ኡባይ ሚናና ማላ፥ ካላን ካላን ቲምቢቲያ ኦዳናው ዳንዳዪታ። ቲምቢቲያ ኦዲያዋንቱ ኢሞታይ ኡንቱንቶ ኣዛዜቴ። ኣዪሲ ጎፔ፥ ፆሳይ ሳሮቴꬃ ፆሳፔ ኣቲን፥ ጫቡዋ ፆሳ ጊዴና። ጌሻቱ ዎሳ ጎሌቱዋ ኡባን፥ ማጫዋንቱ ሺቁዋ ጋርሳን ጮዑ ጊኖ። ኣዪሲ ጎፔ፥ ኣዪሁዳቱዋ ሂጊ ጊያዋዳንካ ኡንቱንቱ ሞዴታናፔ ኣቲን፥ ሺቁዋ ጋርሳን ሃሳያናው ኡንቱንቶ ማቲ ባዋ። ማጫዋንቱ ሺቁዋ ጋርሳን ሃሳዪያዌ ፖኮ ጊዲያ ዲራው፥ ኣዬንቶ ኤራናው ኮዮፔኔ ሶዪን ባሬንቱ ኣሲና ኦቺኖ። ፆሳ ቃላይ ኮይሮ ሂንቴፔ ዬዴ? ዎይ ሂንቴ ፃላላኮ ዬዴ? ኦኒኔ ባሬና ናቢያ ዎይ ፆሳ ኣያናይ ዴዒያ ኣሳ ያጊዴ ቆፖፔ፥ ታኒ ሂንቴንቶ ፃፊያዌ ጎዳ ኣዛዙዋ ጊዲያዋ ኣኬኮ። ሺን ኦኒኔ ኣኬካና ꬋዮፔ፥ ኣኬኮፖ ባሺ ኣጎ። ሄዋ ዲራው፥ ታናዳን ኣማኒያዋንቶ፥ ቲምቢቲያ ኦዳናው ሎይꬂ ኣሞቲቴ። ቃሲ ዱማ ዱማ ቃላን ሃሲያዋካ ዲጎፒቴ። ሺን ኡባባይካ ዎጋኒኔ ማራን ሃኖ። ታናዳን ኣማኒያዋንቶ፥ ታኒ ሂንቴንቶ ኦዴዳ ሚሺራቹዋ ቃላ ሂንቴ ኣኬዳዋኔ ቃሲ ሂንቴ ኣማኑ ኣኒ ኤቄዳዋ ሂንቴንታ ቆፔꬃይ። ሂንቴንቱ ኣማኑ ሜላ ጊዳና ꬋዮፔ፥ ቃሲ ታኒ ሂንቴንቶ ኦዴዳ ቃላ ሎይꬂ ኦይቆፔ፥ ሂንቴ ሄ ሚሺራቹዋ ቃላን ኣቴዲታ። ኣዪሲ ጎፔ፥ ታኒ ቃሲ ኣኬዳዋ ኡባባፔ ኣꬊዴ ኮሺያዋ ካሴታዴ ሂንቴንቱሲ ኢማዲ። ሄዌ ኣዬ ጎፔ፥ ፆሳ ማፃፋይ ጊያዋዳን፥ ኪሪስቶሲ ኑ ናጋራ ዲራው ሃይቂዴ ሞጌቴዳ። ፆሳ ማፃፋይ ጊያዋዳንካ፥ ሄዜንꬂያ ጋላሲ ሃይቁዋፔ ዴንዲዴ፥ ጴፂሮሳው ቆንጬዳ። ሄዋፔ ጉዪያን፥ ባሬ ኪቴዳ ታማኔ ላዓቶ ቆንጬዳ። ሄዋፔ ጉዪያን፥ ኢቼሹ ፄቱዋፔ ዳሪያ ባሬና ካሊያ ኣሳው ኢቲ ካላ ቆንጬዳ። ኡንቱንቱፔ ዳሪያ ባጋይ ሃኖ ጋካናሲካ ፓፃ ዴዒኖ፤ ሺን ኣማሬዳዋንቱ ሃይቄዲኖ። ሄዋፔ ጉዪያን፥ ያዪቆባው ቆንጬዳ፤ ጉዬፔ ባሬ ኪቴዳ ኡባቶ ቆንጬዳ። ቃሲ ኡባፔ ዉርሴꬃን፥ ዎዲ ጋኬናን ዬሌቴዳ ታዉካ ቆንጬዳ። ኣዪሲ ጎፔ፥ ዬሱሲ ኪቴዳ ኡባፔ ታኒ ላፋ፤ ታኒ ፆሳ ዎሳ ጎሊያ ዋዪሴዳ ዲራው፥ ዬሱሲ ኪቴዳዋ ጌቴታዴ ፄሴታናዉካ ቤሲኬ። ሺን ፆሳ ኣꬎ ኬካቴꬃን ታኒ ታናካ። ቃሲ ታው ኢ ኢሜዳ ኣꬎ ኬካቴꬃይ ሜላ ጊዲቤና፤ ሺን ታኒ ኡንቱንታ ኡባፔ ኣꬃዴ ኦꬃዲ። ሺን ታናና ዴዒያ ፆሳ ኣꬎ ኬካቴꬃይ ኦꬄዳፔ ኣቲን፥ ታና ጊዲኬ። ሲሚ ታና ጊዶፔካ፥ ዎይ ኡንቱንታ ጊዶፔካ፥ ኑኒ ኡባይ ኦዲያዌ ሃዋ፤ ሂንቴንቱካ ሃዋ ኣማኔዲታ። ኪሪስቶሲ ሃይቁዋፔ ዴንዴዳዋ ኦዲያዋ ጊዶፔ፥ ሂንቴንቱፔ ኢቲ ኢቲ ኣሳቱ ያቲና ዎቲዴ፥ «ሃይቄዳ ኣሳይ ሃይቁዋፔ ዴንዴና» ያጊኖ? ሃይቄዳ ኡራይ ሃይቁዋፔ ዴንዲቤናዋ ጊዶፔ፥ ያቲና ሄኮ ኪሪስቶሲካ ሃይቁዋፔ ዴንዲቤና ጊያዋ። ኪሪስቶሲ ሃይቁዋፔ ዴንዲቤናዋ ጊዶፔ፥ ያቲና ኑኒ ኦዲያዌካ ሜላ፤ ቃሲ ሂንቴ ኣማኑካ ሜላ። ቃሲ ኑኒ፥ «ኪሪስቶሳ ሃይቁዋፔ ዴንꬄዳ» ያጊዴ ፆሳባ ማርካቴዳ ዲራው፥ ኣ ዎርዶ ማርካቱዋ ጊዲዴ ቤቴዶ። ሺን ሃይቄዳዋንታ ሃይቁዋፔ ኢ ዴንꬂቤናዋ ጊዶፔ፥ ኪሪስቶሳካ ዴንꬂቤና። ኣዪሲ ጎፔ፥ ሃይቄዳዋንቱ ሃይቁዋፔ ዴንዴናዋ ጊዶፔ፥ ሲሚ ኪሪስቶሲካ ዴንዲቤና። ኪሪስቶሲ ሃይቁዋፔ ዴንዲቤናዋ ጊዶፔ፥ ሂንቴ ኣማኑካ ሜላ፤ ቃሲ ሂንቴ ሃዋ ጋካናዉካ ናጋራና ዴዒታ። ሲሚ ኪሪስቶሳ ኣማኒዴ ሃይቄዳዋንቱካ ቃሲ ꬋዬዲኖ ጊያዋ። ኑኒ ሃ ዴዑዋ ፃላላው ኪሪስቶሳን ሂዶቴዳ ጊዶፔ፥ ሃ ኣላሚያን ዴዒያ ኣሳ ኡባፔካ ኑባይ ሎዔና። ሺን ኪሪስቶሲ ሃይቄዳዋንቱ ዴንዱዋሲ ባይራ ጊዲዴ፥ ሃይቁዋፔ ዴንዴዳዌ ቱማ። ኣዪሲ ጎፔ፥ ሃይቁ ኢቲ ኣሳ ባጋና ሃ ኣላሚያ ዬዳ፥ ሃይቄዳዋንቱ ዴንዱካ ቃሲ ኢቲ ኣሳ ባጋና ዬዳ። ኣዪሲ ጎፔ፥ ኣሳይ ኡባይ ኣዳማና ኢቲፔቴꬃ ሜꬌዳ ዲራው ሃይቄዳዋዳን፥ ኪሪስቶሳና ኢቲፔቴꬃ ሜꬌዳ ዲራው፥ ኡባይ ዴዑዋሲ ዴንዳና። ሺን ኡባይካ ባሬ ካላን ካላን ዴንዳና። ኪሪስቶሲ ኡባፔ ካሴቲዴ ዴንዴዳ፤ ሄዋፔ ጉዪያን፥ ኪሪስቶሳዋንቱ ኪሪስቶሲ ዪያ ዎዴ ዴንዳና። ሄዋፔ ጉዪያን፥ ኪሪስቶሲ ማታ ኡባ፥ ጎዳቴꬃ ኡባኔ ዎሊቃ ኡባ ꬋዪሲዴ፥ ፆሳው ባሬ ኣቦ ካዉቴꬃ ኢሚያ ዎዴ፥ ዎዲያ ዉርሴꬃይ ያናዋ። ኣዪሲ ጎፔ፥ ፆሳይ ኣ ሞርኬቱዋ ኡባ ኣ ጌዲያፔ ጋርሳና ዎꬃና ጋካናው፥ ኪሪስቶሲ ሞዳናው ቤሴ። ኡባፔ ዉርሴꬃን ꬋዪዴ ዴዒያ ሞርኪ ሃይቁዋ። ኣዪሲ ጎፔ፥ ፆሳ ማፃፋይ፥ «ፆሳይ ኡባባ ኣ ጌዲያፔ ጋርሳና ዎꬂዴ ሞዲሴዳ» ያጌ። ሺን ኡባባ ኣ ጌዲያፔ ጋርሳና ዎꬂዴ ሞዲሴዳ ጊያ ዎዴ፥ ኡባባ ኦꬄዳ ፆሳፔ ኣቲን፥ ዮኮ ኡባይ ሞዴቴዳ ጊያዌ ቆንጬ። ሺን ኡባባይ ኪሪስቶሳው ሞዴቴዳዋፔ ጉዪያን፥ ኪሪስቶሲ ቃሲ ባሬ ሁጴው ኡባባ ባሬና ሞዲሴዳ ፆሳው ሞዴታና። ፆሳይ ቃሲ ኡባባ ዉርሲዴ ሞዳና። ሄዋ ጊዳና ꬋዮፔ፥ ሃይቄዳዋንቱ ኮታ ፃማቄቲያዋንቱ ኣያ ኦꬂኖ? ሃይቄዳዋንቱ ኡባካ ዴንዴናዋ ጊዶፔ፥ ኣሳይ ሃይቄዳዋንቱ ኮታ ኣዪሲ ፃማቄቲ? ያቲና፥ ኑኒ ኡባ ዎዴ ኣዪሲ ሃሳዬና ሜቱዋን ጌሌቶ? ታናዳን ኣማኒያዋንቶ፥ ታኒ ኑ ጎዳ ኪሪስቶሳ ዬሱሳን ታው ዴዒያ ሂንቴናን ጬቄታዴ፥ ጋላሳን ጋላሳን ሃይቃይ። ታኒ ኤፌሶኔን ኣሳ ቆፋዳን ዱዓና ባፄቴዳዌ ታና ኣያ ማዲ? ሺን ሃይቄዳዋንቱ ሃይቁዋፔ ዴንዴናዋ ጊዶፔ፥ «ሲሚ ሞይቴኔ ኡሾይቴ፤ ኣዪሲ ጎፔ፥ ኑኒ ዎንቲ ሃይቃና» ጊያዋ ማላ። ጪሜቶፒቴ፤ ኢታ ላጌቴꬃይ ሎዖ ሃኖታ ባዪዜ። ፂሎቴꬃኮ ሲሚቴ። ናጋራ ኦꬆፒቴ። ሂንቴንቱፔ ኢቲ ኢቲ ኣሳይ ፆሳ ኤሬና፤ ታኒ ሃዋ ሂንቴንታ ዬላያናው ጋይ። ሺን ኢቲ ኣሳይ፥ «ሃይቄዳ ኣሳይ ዋኒዴ ዴንዳኔ? ኡንቱንቱ ኣያ ማላ ቦላና ያኔ?» ያጌናን ኣጌና። ኔኖ ኤያው፥ ኔኒ ጋዲያን ዜሪያ ዜሬꬃይ ሃይቄናን ሞኬና። ኔኒ ዜሪያዌ ዛርጋ ጊዲና ዎይ ሃራ ቆሞ ካꬃ ጊዲና፥ ኣይፊያ ፃላላፔ ኣቲን፥ ላሚ ዶሊዴ ኬሲያዋ ጊዴና። ሺን ፆሳይ ዜሬꬃው ባሬ ዶሴዳ ቦላ ኢሜ፤ ቃሲ ዜሬꬃ ኡባሲካ ሁጲያን ሁጲያን ኡንቱንቱ ቦላ ኢሜ። ሜꬌታ ኡባ ኣሹ ኢቱዋ ጊዴና። ሺን ኣሳ ኣሹ ኢቱዋ፤ ሜሂያ ኣሹ ዱማ፤ ካፋቱዋ ኣሹካ ዱማ፤ ቃሲ ሞሊያ ኣሹካ ዱማ። ቃሲ ሳሉዋ ኣሳቴꬃቱኔ ሳዓ ኣሳቴꬃቱ ዴዒኖ። ሺን ሳሉዋ ቦላ ቦንቹ ዱማ፤ ቃሲ ሳዓ ቦላ ቦንቹ ዱማ። ኣዋይፊያሲ ኣ ሁጴ ቦንቹ ዴዔ። ኣጌናሲካ ኣ ሁጴ ቦንቹ ዴዔ። ቃሲ ፆሊንታቱዋሲካ ዱማ ቦንቹ ዴዔ፤ ኣያው ጎፔ፥ ኢቲ ፆሊንቲ ዮኮ ፆሊንቲያፔ ቦንቹዋን ዱማቴ። ቃሲ ሃይቄዳዋንቱ ሃይቁዋፔ ዴንዲያ ዎዴ ሄዋዳን ሃናና፤ ሃይቂያ ቦላይ ሞጌቲዴ፥ ሃይቄና ቦላ ጊዲዴ ዴንዳና። ቦላይ ቶሺያን ሞጌቲዴ፥ ቦንቹዋን ዴንዳና። ቃሲ ዳቡራን ሞጌቲዴ፥ ዎልቃን ዴንዳና። ሜꬌታ ቦላይ ሞጌቲዴ፥ ጌሻ ኣያናን ካሌሴቲያ ቦላ ጊዲዴ ዴንዳና። ሜꬌታ ቦላይ ዴዖፔ፥ ቃሲ ጌሻ ኣያናን ካሌሴቲያ ቦላይካ ዴዔ። ሃዋዳንካ፥ ቃሲ ፆሳ ማፃፋን፥ «ኮይሮ ቢታኒ፥ ኣዳሚ፥ ፓፃ ዴዒያ ኣሳ ጊዲዴ ሜꬌቴዳ» ያጌ። ሺን ዉርሴꬃ ኣዳሚ ዴዑዋ ኢሚያ ኣሳ ጊዴዳ። ሺን ሜꬌታ ኣሳይ ኮይሮ ዪና፥ ጌዶፔ ኣያና ኣሳይ ዬዳፔ ኣቲን፥ ኣያናዌ ኮይሮ ዪቤና። ኮይሮ ኣዳሚ ቢታፔ ሜꬌቴዳ፤ ኢ ቢታፔ ሜꬌቴዳዋ። ላዔንꬁዋ ኣዳሚ ሳሉዋፔ ዬዳ። ሃ ሳዓ ኣሳቱ ቢታፔ ሜꬌቴዳዋ ማላቲኖ። ቃሲ ሳሉዋ ኣሳቱ ሳሉዋፔ ዬዳዋ ማላቲኖ። ኑኒ ቢታፔ ሜꬌቴዳዋ ማላ ማዬዳዋዳን፥ ሳሉዋፔ ዬዳዋ ማላካ ቃሲ ማያና። ታናዳን ኣማኒያዋንቶ፥ ታኒ ጊያዌ ሃዋ፤ ኣሹኔ ሱꬃይ ፆሳ ካዉቴꬃ ላታና ዳንዳዬና። ቃሲ ዎቂያዌ ዎቄናዋ ላቴና። ሲሲቴ! ታኒ ሂንቴንቶ ኢቲባ ፁራይ። ኑኒ ኡባይ ሃይቆኮ። ሺን ዉርሴꬃ ፁሩምባይ ፑኔቲያ ዎዴ፥ ሊጴዳ ኣይፊ ፄላናሲ ዎዛና ኣꬄናን ላሜታና። ኣዪሲ ጎፔ፥ ፁሩምባይ ፑኔቲያ ዎዴ፥ ሃይቄዳ ኣሳይ ዎቄና ኣሳ ጊዲዴ ዴንዳና፤ ኑኒካ ላሜታና። *** ኣዪሲ ጎፔ፥ ሃዌ ዎቂያዌ ዎቄናዋ ማያናው ቤሴ፤ ቃሲ ሃዌ ሃይቂያዌ ሃይቄናዋ ማያናው ቤሴ። ሺን ሃዌ ዎቂያዌ ዎቄናዋ ማዪያ ዎዴ፥ ቃሲ ሃዌ ሃይቂያዌ ሃይቄናዋ ማዪያ ዎዴ፥ ሄ ዎዴ፥ ፆሳ ማፃፋይ፥ «ሃይቁ ፆኔቲዴ ሚቴቴዳ። ሃይቆ፥ ኔ ዪሻይ ሃቃኔ? ሃይቆ፥ ኔ ፆኑ ሃቃኔ?» ጌዳ ቃላይ ፖሌታና። ሃይቁ ዱኪያ ዎልቃ ናጋራፔ ዴሜ፤ ቃሲ ናጋራይ ዎልቃ ሂጊያፔ ዴሜ። ሺን ኑ ጎዳ ዬሱሲ ኪሪስቶሳ ባጋና ኑና ፆኒሲያ ፆሳ ጋላታይ ጋኮ። ታኒ ሲቂያ ታናዳን ኣማኒያዋንቶ፥ ሄዋ ዲራው፥ ቃፄናን ሚኒ ኤቂቴ። ሂንቴንቱ ዳቡራይ ጎዳ ባጋና ሜላ ጊዴናዋ ኤሪዴ፥ ኡባ ዎዴ ጎዳ ኦሱዋ ኣዛሌናን ኦꬂቴ። ፆሳ ኣሳቶ ሚሻ ሺሻናው ጋላቲያን ዴዒያ ኣማኒያ ኣሳቶ ታኒ ቃላ ጌሌዳዋዳን፥ ሂንቴንቱካ ቃሲ ሄዋዳን ኦꬂቴ። ሂንቴንቱ ታኒ ያ ቢያ ዎዴ፥ ሚሻ ሺሼና ማላ፥ ሂንቴ ኡባይ ዎጋ ጋላሲ ጋላሲ፥ ሂንቴ ዴሚያ ኬናፔ ሂንቴ ጎሌን ዳጋዪቴ። ታኒ ያ ጋኪያ ዎዴ፥ ሂንቴ ኣማኒያ ኣሳ ኦና ጊዶፔኔ፥ ሂንቴ ኢሜዳዋ ጋꬃና ማላ፥ ዳቢዳቢያና ኡንቱንታ ዬሩሳላሜ ኪታና። ቃሲ ታኒ ኡንቱንቱና ባናው ኮሾፔ፥ ኡንቱንቱ ታናና ኢቲፔ ባናዋንታ። ታኒ ማቂዶኒያና ኣꬋዴ፥ ሂንቴንቱኮ ባና፤ ኣዪሲ ጎፔ፥ ታኒ ማቂዶኒያና ኣꬋይ። ታኒ ቢያሳ ሃቃ ጊዶፔኔ፥ ታ ቡሳን ሂንቴ ታና ማዳና ማላ፥ ሂንቴ ማታን ኣማሬዳ ዎዲያ ጋሚዔናን ኣጊኬ። ዎይ ባልጉዋካ ሂንቴ ማታን ሻጬናን ዋያ ኣጋና። ኣዪሲ ጎፔ፥ ታኒ ሃዒ ያና ኣꬋዴ ሄ ኦጊያና ሂንቴንታ ቤዓናው ኮዪኬ። ጎዳይ ጎፔ፥ ሂንቴ ማታን ኣማሬዳ ዎዲያ ታካናው ቆፓይ። ሺን ታኒ ጴንፄቆስቴ ጊያ ጋላሳይ ጋካናው ኤፌሶኔን ጋሚዓና። ታው ኦሱ ኩሜዳ ኣኮ ፔንጊካ ያኒ ዶዬቴዳ። ቃሲ ታው ጮራ ሞርኬቱ ዴዒኖ። ፂሞቶሴ ሂንቴንቱኮ ዮፔ፥ ሂንቴ ማታን ኢ ያዬናን ዴዓናዳን፥ ኣ ሎይꬂ ኦይቂቴ። ኣዪሲ ጎፔ፥ ኢካ ቃሲ ጎዳ ኦሱዋ ኦꬄ። ሄዋ ዲራው፥ ኦኒኔ ኣ ካꬎፖ። ሺን ኢ ታኮ ሳሮ ሲማና ማላ፥ ኣ ማዲዴ ሳሮቴꬃን ሞዪዚቴ። ኣዪሲ ጎፔ፥ ታኒ ኢ ኢሻቱዋና ሲማናዋ ናጋ ኡታዲ። ሺን ኑ ኢሻ ኣጲሎሲ ዮኮ ኢሻቱዋና ሂንቴንቱኮ ባና ማላ፥ ታኒ ኣ ሚኒሳ ዎሳዲ። ሺን ሃዒ ሂንቴንቱኮ ባናው ኮዪቤና፤ ኢ ባሬው ሚኪያ ዎዴ ሂንቴንቱኮ ባናዋ። ቤጎቲቴ። ኣማኑዋን ሚኒ ኤቂቴ። ፃሊቴ። ጎቢቴ። ኦሱዋ ኡባ ሲቁዋን ኦꬂቴ። ታናዳን ኣማኒያዋንቶ፥ ኢስፂፋኖሲኔ ኣ ሶይ ኣሳይ ጊሪኬን ኮይሮ ኣማኔዳዋንታ ጊዲያዋኔ ፆሳ ኣሳቱዋሲ ኦꬃናው ባሬንታ ኢሜዳዋ ሂንቴ ኤሪታ። ሂንቴንቱካ ኡንቱንቱ ማላ ኣሳሲኔ፥ ኡንቱንቱና ኦꬂያ ኡባው ዳቡሪያ ኡባው ኤኖ ጋናዳን፥ ታኒ ሂንቴንታ ዎሳይ። *** ኢስፂፋኖሲ፥ ፓርዶናፂሲኔ ኣካይቆሲ ሂንቴ ባይናሳን ታና ቦራሲሲቤና ዲራው፥ ኡንቱንቱ ዩሳን ታኒ ናሼታይ። ኡንቱንቱ ሂንቴንታ ኣያናን ሚኒሴዳዋዳን፥ ታናካ ኣያናን ሚኒሴዳ ዲራው፥ ሄዋንቱ ማላ ኣሳቱዋ ዶጎፒቴ። ኢሲያን ዴዒያ ኣማኒያ ኣሳይ ሂንቴንታ፥ «ሳሬ፥ ሎዔ» ጊኖ። ኣቂላይኔ ጲሪስቂላ ባሬንቱ ሶዪን ሺቂያ ዎሳ ጎሌ ኣሳናካ ሂንቴንቶ ጎዳ ሳሮታ ዎዛናፔ ኪቲኖ። ኢሻቱ ኡባይ ሂንቴንቱሲ ሳሮታ ኪቲኖ። ኢቱ ኢቱዋና ጌሻ ዬሬታ ዬሬቲዴ ሳሮቴቲቴ። ታኒ ጳዉሎሲ ሃ ሳሮታ ታ ኩሺያን ፃፋዲ። ጎዳ ዬሱሲ ኪሪስቶሳ ሲቄና ኣሳይ ዴዖፔ፥ ኢ ሼቄቴዳዋ ጊዶ። ኑ ጎዳው፥ ሃያ። ጎዳ ዬሱሲ ኪሪስቶሳ ኣꬎ ኬካቴꬃይ ሂንቴንቱና ጊዶ። ኪሪስቶሳ ዬሱሳን ዴዒያ ሂንቴንቱ ኡባና ታ ሲቁ ጊዶ። ኣሜንዒ። ታኒ ጳዉሎሲ፥ ፆሳ ሼኒያን፥ ኪሪስቶሲ ዬሱሲ ኪቴዳዌኔ ኑ ኢሻይ ፂሞቶሲ ፆሳው ጎዪኒያ ቆሮንቶሳ ካታማን ዴዒያ ኣማኒያዋንቶኔ ኣካዪያን ዴዒያ ፆሳ ናናቶ ሃ ዳቢዳቢያ ፃፌቶ። ፆሳ ኑ ኣዉዋፔኔ ጎዳ ዬሱሲ ኪሪስቶሳፔ፥ ኣꬎ ኬካቴꬃዪኔ ሳሮቴꬃይ ሂንቴንቶ ጊዶ። ፆሳ ኑ ጎዳ ዬሱሲ ኪሪስቶሳ ኣዉዋ፥ ማሮቴꬃ ኣዉዋኔ ሜንꬄꬁዋ ኡባ ፆሳ ጋላታይ ጋኮ፤ ፆሳይ ኑና ኑ ሁጴው ሜንꬄꬄዳ ሜንꬄꬁዋዳን፥ ዳሮ ዋዪያ ዋዬቲያዋንታ ኑኒካ ሜንꬄꬃናዳን፥ ኑ ዋዪያ ኡባን ኢ ኑና ሜንꬄꬄ። ኣዪሲ ጎፔ፥ ኑኒ ኪሪስቶሳ ባጋና ዳሮ ዋዪያ ዋዬቲያዋዳን፥ ሄዋዳንካ፥ ቃሲ ኑና ኣ ባጋና ዳሮ ሜንꬄꬁዋን ሜንꬄꬄ። ኑኒ ዋዬቶፔ፥ ሄዌ ሂንቴና ሜንꬄꬃናሳኔ ሂንቴና ኣሻናሳ፤ ቃሲ ኑኒ ሚኔቶፔ፥ ኑኒ ዳንዳዬዳ ዋዪያ ማላ ሂንቴካ ጌንጪዴ ዳንዳያና ማላ፥ ፆሳይ ሂንቴዉካ ቃሲ ሜንꬄꬁዋኔ ዳንዳያ ኢማናሳ። ሂንቴ ዴማና ጊዴ፥ ሂዶታን ናጊ ኡቴዳዌ ዳሮ ሚና፤ ኣዪሲ ጎፔ፥ ሂንቴ ኑናና ዋዬቴዳዋዳን፥ ሄዋዳን ሜንꬄꬁዋካ ኑናና ኣካናዋ ኑኒ ኤሬቶ። ኑ ኑናዳን ፆሳ ካሊያዋንቶ፥ ኑኒ ኢሲያ ጋዲያን ዋዬቴዳ ዋዪያ ሂንቴና ሃሳዪሳናው ኮዬቶ፤ ኑ ዋዪ ኑ ዎልቃፔ ዳሪና፥ ኑና ዎꬌ ጊዴ፥ ሂርጋና ጋካናው፥ ኑና ዎጋይ ባዪናዋ ዴፄዳ። ኑኒ ኑ ቦላ ሃዪቁዋ ፒርዳይ ፒርዴቴዳ ያጊዴ ቆፔዶ፤ ሺን ሄዌ ሃኔዳዌ ሃይቄዳ ኣሳ ሃይቁዋፔ ዴንꬂያ ፆሳን ኑኒ ኣማኔታናፔ ኣቲን፥ ኑ ሁጲያን ኣማኔቴናዳና። ፆሳይ ሃዋ ማላ ኢታ ሃዪቁዋፔ ኑና ኣሼዳ፤ ኢ ኑና ኣሻና፤ ሲንꬃፔካ ኢ ኑና ኣሻናዋ ጊዴ፥ ሂዶታን ናጊ ኡቴዶ። ሂንቴ ዎሴዳ ዳሮ ዎሳን ኑሲ ኣንጁ ሲሜዳ ዲራው፥ ዳሮ ኣሳይ ኑ ዲራው ፆሳ ጋላታና ማላ፥ ሂንቴካ ቃሲ ኑና ዎሳን ማዳና ኮሼ። ኑኒ ጬቄቲያዌ ሃዋ፤ ሃ ሳዓን ኑኒ ዴዒያ ዴዑ፥ ኡባ ቃሲ ሂንቴናና ኑሲ ዴዒያ ኢቲፔቴꬃይ ፆሳ ኣꬎ ኬካቴꬃናፔ ኣቲን፥ ኣሳ ኣꬌዳ ኤራቴꬃና ጊዴናዋ፥ ቃሲ ፆሳይ ኢሜዳ ጌሻቴꬃኒኔ ሱሬቴꬃን ኑኒ ዴዒያዋ ዎዛና ቆፋይ ኑሲ ማርካቴ። ኣዪሲ ጎፔ፥ ሂንቴ ናባባናዉኔ ኣኬካናው ዳንዳዪያዋ ፃላላ ሂንቴንቶ ፃፊያዋፔ ኣቲን፥ ኑኒ ሃራባ ሂንቴንቶ ፃፎኮ። ኑ ጎዳ ዬሱሳ ጋላሲ ኑኒ ሂንቴናን ጬቄታናዋዳን፥ ሂንቴካ ኑናን ጬቄታና ማላ፥ ሂንቴ ሃዒ ዉርሲ ኣኬኬና ዬዉዋ ጊዲኒ ዉርሲ ኣኬካና ጋዴ ቆፓይ። *** ሄዋ ታኒ ሎይꬃ ኤሬዳ ዲራው፥ ሂንቴ ላዑ ጌዴ ጎዔታና ማላ፥ ኡባፔ ካሴታዴ ሂንቴኮ ባናው ቆፋ ቃቻዲ። ታኒ ማቂዶኒያ ባዴ ሂንቴናና ጋኬታናዋኔ ቃሲ ያፔ ሲማዴ ሂንቴ ማታና ዪሁዳ ኣꬊሺን፥ ሂንቴ ታና ማዳናዋ ቆፓ ኡታዲ። ሄዋ ዲራው፥ ታኒ ሄዋ ቆፓዴ ታናን ኣማኔታቤይኪታ? ታኒ ታ ቆፋ ቃቺያ ዎዴ፥ ሳዓ ኣሳዳን ኢቲ ኩꬃን፥ «ኤ፥ ኤ» ዎይ፥ «ጊዴና፥ ጊዴና» ጋናው ጊጋ ኡታዲታ? ሺን ፆሳይ ኣማኔቴዳዋ ጊዲያዌ ቱማ ጊዲያዋዳን፥ ኑኒ ሂንቴንቶ ኦዲያ ቃላይ «ኤ» ጊያዋኔ «ጊዴና» ጊያዋ ጊዴና። ኣዪሲ ጎፔ፥ ታኒ፥ ሲላሴኔ ፂሞቶሲ ሂንቴ ጊዶን ኦዴዳ ፆሳ ናዓይ፥ ዬሱሲ ኪሪስቶሲ «ኤ» ጊያዋፔ ኣቲን፥ «ጊዴና» ጊያዋ ጊዴና። ሺን ፆሳ ባጋና ኢ ኡባ ዎዴካ «ኤ»። ኣዪሲ ጎፔ፥ ፆሳይ ኢማና ጌዳባው ኡባው ኤኖ ጌዳዌ ኪሪስቶሳ ባጋና ፖሌታና፤ ሄዋ ዲራው፥ ኑኒ ኪሪስቶሳ ባጋና ፆሳ ቦንቾ፥ ኣሜንዒ ጌቶ። ፆሳይ ኪሪስቶሳ ባጋና ኑናኔ ሂንቴና ሜንꬄꬄኔ ኦኬ። ኑኒ ኣዋ ጊዲያዋ ኤሪሲያ ማታፋ ኢ ኑ ቦላ ዎꬂዴ፥ ባሬ ጌሻ ኣያና ዋሲያዳን፥ ኑ ዎዛና ጊዶን ዎꬄዳ። ቃሲ ታኒ ቆሮንቶሳ ቤናን ኣጌዳዌ ሂንቴና ቆሄናዳና። ሄዌ ዎርዶ ጊዶፔ ታና ሙራናው ታ ሼምፑዋን ፆሳይ ማርካ። ኑኒ ሂንቴና ናሼቻናው ሂንቴናና ኢቲፔ ኦꬂያዋንታፔ ኣቲን፥ ሂንቴ ኣማኒያዋን ሂንቴና ጎዴታናው ኮዪያዋንታ ጊዶኮ፤ ኣዪሲ ጎፔ፥ ሂንቴንቱ ሂንቴ ኣማኑሳን ሚኒዴ ዴዒታ። ታኒ ላዔንꬁዋ ሂንቴና ካዮዬና ማላ፥ ሂንቴኮ ቤናዳን፥ ታ ቆፋ ቃቻዲ። ኣዪሲ ጎፔ፥ ታኒ ሂንቴና ካዮዪያዋ ጊዶፔ፥ ሃ ታኒ ካዮዬዳ ሂንቴ ታና ናሼቻናፔ ኣቲን፥ ኦኔ ታና ናሼቻናዌ? ታኒ ሂንቴንቶ ሄ ዳቢዳቢያ ፃፌዳዌ፥ ታና ናሼቻናው ቤሲያ ኣሳቱዋን ታኒ ካዮታናው ሂንቴኮ ባናው ኮያቤናዋሳ፤ ታኒ ናሼቲያ ዎዴ፥ ሂንቴ ኡባይካ ቃሲ ናሼታናዋ ሂንቴ ኡባን ኣማኔታይ። ኣዪሲ ጎፔ፥ ታኒ ሂንቴንቶ ዳሮ ዋዪያኒኔ ቱጋን ቃሲ ዳሮ ኣፎꬃና ፃፌዳዌ፥ ሂንቴና ካዮያናሳ ጊዴና፤ ሺን ታኒ ሂንቴና ኡባቱዋ ኣይ ኬና ሲቃይታንቶ ሂንቴ ኤራናዳና። ሺን ኢቲ ኡራይ ሃራ ካዮዬዳዋ ጊዶፔ፥ ታኒ ኣ ዬዉዋ ዳሪሳናው ኮዪኬ፤ ኢ ሂንቴና ኡባቱዋ ካዮዬዳፔ ኣቲን፥ ታ ፃላላ ካዮዪቤና። ሂንቴፔ ዳሪያ ባጋ ኣሳይ ሄ ቢታኒያ ማላ ኣሳ ሄዋዳን ሙሮፔ፥ ሄ ሙራይ ኣው ጊዳናዋ። ሄዋ ዲራው፥ ሄ ቢታኒ ሎይꬂ ካዮቴና ማላ፥ ሂንቴ ኣው ኣቶ ጋናዉኔ ኣ ሜንꬄꬃናው ቤሴ። ሄዋ ዲራው፥ ሂንቴ ኣ ሚኒሲዴ ሲቂያዋ ኢ ኤራና ማላ፥ ታኒ ሂንቴና ዎሳይ። ኣዪሲ ጎፔ፥ ሂንቴ ታው ኣዛዜታናው ኡባ ዎዴ ጊጊ ኡቴዲቴንቶኔ ቃሲ ፓጪያ ሂንቴ ዳንዳዪንቶ ኤራናው፥ ሄ ዳቢዳቢያ ሂንቴንቶ ፃፋዲ። ኢቲ ኡራይ ናቄዳዋ ሂንቴ ኣቶ ጊያ ዎዴ፥ ታኒካ ቃሲ ኣቶ ጋይ፤ ታኒ ኣቶ ጌዳዋ ጊዶፔ፥ ኣቶ ጌዳዋ ኣያኔ ኪሪስቶሳ ሲንꬃን ሂንቴ ዲራው፥ ኣቶ ጋዲ። ሴፃናይ ኑኮ ዪዴ፥ ኑና ጪሜና ማላ፥ ታኒ ኣቶ ጋዲ፤ ኣዪሲ ጎፔ፥ ኑኒ ኣ ቆፋ ኤሬቶ። ታኒ ኪሪስቶሳ ሚሺራቹዋ ቃላ ኦዳናው ፂሮዓዳ ቤዳ ዎዴ፥ ጎዳይ ያኒ ታው ፔንጊያ ዶዪ ዎꬄዳ። ታኒ ታ ኢሻ ቲታ ያኒ ዴማቤና ዲራው፥ ታው ኣያናይ ሼምፒቤና። ሄዋ ዲራው፥ ያኒ ዴዒያ ኣሳ፥ «ሳሮ ዴዒቴ» ጋዴ ማቂዶኒያ ባዲ። ሺን ኪሪስቶሳ ባጋና ኡባ ዎዴ ኑና ፆኖ ካሌꬂያ ፆሳ፥ ቃሲ ኪሪስቶሳ ቲሚርቲያ ኑ ባጋና ሺቱዋዳን፥ ኡባሳ ጋꬂያዋ ጋላታይ ጋኮ። ኣዪሲ ጎፔ፥ ኑኒ ኣቲያ ኣሳ ጊዱዋኒኔ ꬋዪያ ኣሳ ጊዶን ኪሪስቶሲ ፆሳው ያርሺያ ሳዉዋ ቶሺኩ ጊያ ሺቱዋ ማላ። ኑኒ ꬋዪያዋንቶ ዜዒያ ሃይቁዋ፤ ቃሲ ኣቲያዋንቶ ዴዑዋ ኢሚያ ሳዊያ ሺቱዋ፤ ያቲና፥ ሄዋ ኦꬃናው ዳንዳዪያዌ ኦኔ? ኑኒ ፆሳ ቃላ ጌሎባዳን፥ ዋላኪዴ ዛሊዒያ ሃራ ጮራ ኣሳቱዋ ማላ ጊዶኮ፤ ሺን ፆሳይ ኑና ኪቲና፥ ኣማኔቲዴ ፆሳ ሲንꬃን ኪሪስቶሳ ባጋና ቃላ ኦዴቶ። ኑኒ ሺሬቲዴ፥ ኑ ሁጲያ ሳባናው ዶሜዶዬ? ዎይ ሃራ ኣሳቱዋዋዳን፥ ሳባ ዳቢዳቢያ ሂንቴንቶ ዬዳናው ዎይ ሂንቴፔ ኣካናው ኮዬቶ? ሂንቴንቱ ሂንቴ ሁጲያን ኣሳይ ኡባይ ኤራናዳኒኔ ናባባናዳን፥ ኑ ዎዛናን ፃፌቲ ኡቴዳ ኑ ዳቢዳቢያ። ሃ ዳቢዳቢያ ኪሪስቶሲ ባሬ ሁጲያን ፃፊዴ፥ ኑ ቦላ ኪቴዳዌ ቱማ፤ ሃ ዳቢዳቢ ዴዑዋ ፆሳ ጌሻ ኣያናን ኣሳ ዎዛናን ፃፌቴዳዋፔ ኣቲን፥ ሹቻ ቦላ ቃላሚያን ፃፌቲቤና። ኑሲ ኪሪስቶሳ ባጋና ፆሳን ሃዋ ማላ ኣማኑ ዴዔ። ኑ ዳንዳያይ ፆሳፔ ዪያዋፔ ኣቲን፥ ሃ ኦሱዋ ኑኒ ኑ ሁጲያን ኦꬃናው ዳንዳዬቶ ጊያዌ ኑሲ ኣያዪኔ ባዋ። ኑኒ ኦራꬃ ጫቆ ኦꬃና ማላ፥ ፆሳይ ኑና ዳንዳዪሴዳ፤ ሄ ኦራꬃ ጫቁ ጌሻ ኣያናዋፔ ኣቲን፥ ፃፌቴዳ ሂጊያዋ ጊዴና። ፃፌቴዳ ሂጊ ሃዪቁዋ ኣሄ፤ ሺን ጌሻ ኣያናይ ዴዑዋ ኣሄ። ሹቻ ዎጪዴ ፃፌዳ ሂጊ ኢሜቲያ ዎዴ፥ ፆሳ ቦንቹ ቤቴዳ፤ ሙሴ ሶምዒያን ዴዒያ ጶሌꬃይ ꬋዪያዋ ጊዶፔካ፥ ሄ ጶሌꬃይ ዳሮ ዎልቃማ ጊዲያ ዲራው፥ ኢስራዔሊያ ኣሳይ ኣ ሶምዒያ ቲሽሺ ኦꬂ ፄላናው ዳንዳዪቤና። ሃዪቁዋ ኣሂያ ሂጊ ኦꬂያ ኦሱ ሃዋ ማላ ቦንቹዋና ዪያዋ ጊዶፔ፥ ጌሻ ኣያናይ ኦꬂያ ኦሱዋ ቦንቹ ኣይ ኬና ዳራኔ? ኣዪሲ ጎፔ፥ ኣሳይ ፒርዳ ኣኪያ ኦሱ ቦንቾ ጊዶፔ፥ ኣሳይ ፂሊያ ኦሱዋ ቦንቹ ዋኒዴ ዳራንዴሻ? ኣዪሲ ጎፔ፥ ካሴ ቦንቹ ሃዒ ባሬፔ ሎይꬂ ኣꬊያ ቦንቹዋ ጋሱዋን ቦንቹዋ ꬋዬዳዌ ቱማ። ኣዪሲ ጎፔ፥ ሄ ꬋዬዳዋን ቦንቹ ዴዒያዋ ጊዶፔ፥ ሜꬊናው ዴዒያዋን ኣይ ኬና ዎልቃማ ቦንቹ ዴዓንዴሻ? ኑኒ ሂዶታን ናጊያ ሃዋ ማላባይ ኑሲ ዴዒያ ዲራው፥ ቆንጪያን ፃሊዴ ሃሳዬቶ። ኢስራዔሊያ ኣሳይ ꬋዪያ ቦንቹዋ ዉርሴꬃ ቤዔና ማላ፥ ባሬ ሶምዒያ ናፃላን ካሜዳ ሙሴ ማላ ጊዶኮ። ሺን ኡንቱንቱ ዎዛናይ ዶንጪሌዳ፤ ኣዪሲ ጎፔ፥ ኡንቱንቱ ኤጫ ጫቁዋ ናባቢያ ዎዴ፥ ሃቼ ጋካናሲካ፥ ሄ ናፃላይ ኡንቱንቱ ዎዛና ካሚ ዎꬄዳ፤ ኦኒኔ ኪሪስቶሳና ጋኬቲያ ዎዴ ፃላላን ሄ ናፃላይ ኪቼ። ሺን ኡንቱንቱ ሙሴ ማፃፋ ናባቢያ ዎዴ ኡባን ሃቼ ጋካናሲካ፥ ሄ ናፃላይ ኡንቱንቱ ዎዛና ካሚ ዎꬄዳ። ሺን ፆሳ ማፃፋይ፥ «ኦኒኔ ጎዳኮ ሲሚያ ዎዴ፥ ኣዉዴኔ ሄ ናፃላይ ቃሬቴ» ያጌ። ጎዳይ ጌሻ ኣያና። ጎዳ ኣያናይ ዴዒያሳን ኣዪሌቴꬃይ ባዋ። ኑኒ ኡባይካ ናፃላን ካሜቲቤና ሶምዒያን ጎዳ ቦንቹዋ ቤዓና ቃሲ ጌሻ ኣያና ጊዲያ ጎዳፔ ዪያ ሄ ቦንቹ ኑና ባሬና ማላቲሲዴ፥ ቦንቹዋፔ ቦንቾ ላማና። ሲሚ ፆሳይ ኑሲ ሃ ኦሱዋ ባሬ ማሮቴꬃን ኦꬃናዳን ኢሜዳ ዲራው፥ ኑኒ ሳሌቶኮ። ኑኒ ጌማን ኦꬂያ ዬላዪያ ኦሱዋ ኡባ ኣጎይቴ፤ ቃሲ ጌኒያ ኦሱዋካ ኦꬆኮ፤ ዎይ ፆሳ ቃላ ዎርዱዋና ዋላኮኮ። ሄዋዳንካ፥ ቱሙዋ ቆንጪያን ሃሳዪዴ፥ ፆሳ ሲንꬃን ሱሬ ዎዛናው ኑና ሺሾይቴ። ኑኒ ኦዲያ ዎንጋላ ሚሺራቹ ጌሜዳዋ ጊዶፔካ፥ ꬋዪያ ኣሳቱዋ ፃላላው ጌሜዳ። ሃ ሳዓ ፆሳይ ኣማኔና ኣሳቱዋ ቆፋ ጆሊሴዳ፤ ኪሪስቶሳ ቦንቹዋ፥ ዎንጋላ ሚሺራቹዋ ፖዑዋ ባሬንቶ ፖዒያዋ፥ ፆሳ ማላቲያዋ ኡንቱንቱ ቤዔና ማላ፥ ኡንቱንታ ዲጌዳ። ኣዪሲ ጎፔ፥ ዬሱሲ ኪሪስቶሲ ጎዳ ጊዲያዋኔ ኣ ዲራው ኑኒ ኑ ሁጲያን ሂንቴንቶ ቆማ ጊዲያዋ ኦዴቶፔ ኣቲን፥ ኑባ ኦዶኮ። ኣዪሲ ጎፔ፥ «ꬉማፔ ፖዑ ፖዓና» ጌዳ ፆሳይ ኑ ዎዛናን ባሬ ፖዑዋ ፖዒሴዳ፤ ቃሲ ኢ ባሬ ቦንቾ ኤራቴꬃ ፖዑዋ ኪሪስቶሳ ሲንꬃን ፖዒያዋ ኑሲ ኢማናው ፖዒሴዳ። ሺን ኡባፔ ኣꬊያ ዎልቃይ ፆሳዋፔ ኣቲን፥ ኑሳ ጊዴናዋ ቤሳናው ኑሲ ሃ ሚንጃይ ኡርቃፔ ሜꬌቴዳ ሚሻ ጊዴዳ ኑ ጊዶን ዴዔ። ኑኒ ኡባ ባጋናካ ኡንዔቴዶ፤ ሺን ሜዔሬቲቤይኮ፤ ቃሲ ኢቲ ኢቲ ዎዴ ሲꬌቶ፤ ሺን ኑ ኡባናካ ኣጊቤይኮ። ኑኒ ዬዴርሴቴዶ፤ ሺን ፆሳይ ኑና ኦሊቤና፤ ቃሲ ኑ ሞርኬቱ ኑና ኦሊ ኣጌዲኖ፤ ሺን ኑኒ ꬋዪቤይኮ። ቃሲ ዬሱሳ ዴዑ ኑ ኣሳቴꬃን ቤታና ማላ፥ ኑኒ ኡባ ዎዴ ኣ ሃዪቁዋ ኑ ኣሳቴꬃን ቶኪ ዩዬቶ። ኣዪሲ ጎፔ፥ ሃዪቂያ ኑ ኣሳቴꬃ ቦላ ዬሱሳ ዴዑ ቤታና ማላ፥ ፓፃ ዴዒያ ኑኒ ኣ ዲራው፥ ኡባ ዎዴ ሃይቄቶ። ሄዋ ዲራው፥ ሃይቁ ኑ ጊዶን ኦꬄ፤ ሺን ዴዑ ቃሲ ሂንቴ ጊዶን ኦꬄ። ፆሳ ማፃፋይ፥ «ታኒ ኣማኔዳ ዲራው ሃሳያዲ» ያጌ፤ ሄ ኣማኑዋ ኣያናይ ኑሲካ ዴዒያ ዲራው፥ ኑኒካ ኣማኔቶ፤ ሄዋ ዲራው፥ ሃሳዬቶ። ፆሳይ፥ ጎዳ ዬሱሳ ሃዪቁዋፔ ዴንꬄዳዌ፥ ኑናካ ቃሲ ዬሱሳና ሃዪቁዋፔ ዴንꬂዴ፥ ሂንቴናና ኢቲፔ ባሬ ሲንꬃ ሺሻናዋ ኤሬቶ። ሃዌ ኡባይ ሂንቴ ዲራሳ፤ ፆሳ ኣꬎ ኬካቴꬃይ ዳሮ ኣሳ ጋኪያ ዎዴ፥ ኣሳይ ፆሳ ቦንቾ ዳሮ ጋላታ ኢማና። ሄዋ ዲራው፥ ኑኒ ሳሌቶኮ፤ ኑሲ ሃራይ ኣቶ፥ ቦላ ባጋ ኣሳቴꬃይ ዎቂንቶካ፥ ጋርሳ ባጋ ኣሳቴꬃይ ጋላሳን ጋላሳን ኦራፄ። ኣዪሲ ጎፔ፥ ሃዒው ዋዬቲያ ሃ ጉꬃ ዋዪ፥ ኡባፔ ሎይꬂ ዳሪያ ሜꬊና ቦንቹዋ ኑሲ ቤቲሳና። ኑኒ ቤቴናዋ ፄሌቶፔ ኣቲን፥ ቤቲያዋ ፄሎኮ፤ ኣዪሲ ጎፔ፥ ቤቲያባይ ሃዒሳ፤ ሺን ቤቴናዌ ሜꬊናው ዴዒያዋ። ኣዪሲ ጎፔ፥ ኑኒ ዴዒያ ሃ ሳዓ ዱንካኒ ኮሌቶፔ፥ ኑሲ ኣሳይ ኬፂቤና ጎሊ፥ ፆሳይ ኬፄዳዌ፥ ሳሉዋን ሜꬊናው ዴዒያዋ ኑኒ ኤሬቶ። ኑኒ ሃ ኣላሚያን ዴዒዴ ዳሮ ኦሌቶኔ ሳሉዋን ዴዓና ኑ ጎሊያ ማያናው ሎይꬂ ኣሞቴቶ። ኑኒ ሄዋ ማዪዴ፥ ካሎቶኮ፤ ኑኒ ሃ ሳዓ ዱንካኒያን ዴዒዴ፥ ዴፄቲዴ ኦሌቶ፤ ኣዪሲ ጎፔ፥ ሃዪቂያ ኣሳቴꬃይ ዴዑዋን ሚቴታና ማላ፥ ኑኒ ማያናው ኮዬቶፔ ኣቲን፥ ካሎታናው ኮዮኮ። ኑና ሃዎ ጊጊሴዳዌ ፆሳ፤ ቃሲ ኢ ባሬ ጌሻ ኣያና ዋሴ ኡዲዴ፥ ኢሜዳዌ ኣ። ሄዋ ዲራው፥ ኑኒ ኡባ ዎዴ ኣማኔቴቶ፤ ቃሲ ኑኒ ኑ ጎሌን ሃ ኣሳቴꬃን ዴዔዳ ኬናን፥ ጎዳፔ ሻኬቲዴ ዴዒያዋካ ኤሬቶ። ኣዪሲ ጎፔ፥ ኑኒ ኣማኑዋን ዴዔቶፔ ኣቲን፥ ቤዒያዋን ዴዖኮ። ኑና ኣማንꬄ፤ ቃሲ ሃ ኣሳቴꬃን ኑ ጎሊያ ኣጊ ጎሌ ቢዴ ጎዳና ኢቲፔ ዴዒያዌ ኑና ናሼቼ። ሄዋ ዲራው፥ ኑኒ ቃሲ ኣሹዋን ዴዒና ዴዓና ꬋዪና፥ ኑ ቆፋይ ኣ ናሼቻናሳ። ኣዪሲ ጎፔ፥ ኑኒ ሁጲያን ሁጲያን ኦꬄዳ ኦሱ ሎዓ ጊዲና፥ ዎይ ኢታ ጊዲና፥ ኑሲ ቤሲያዋ ኣካናው፥ ኪሪስቶሳ ፒርዳ ኦይዲያ ሲንꬃን ኡባይካ ሺቃናው ቤሴ። ሄዋ ዲራው፥ ኑኒ ፆሳው ያዩሳይ ኣዬንቶ ኤሪዴ፥ ሄዋዳን ቃሲ ኣሳካ ኣማንꬄቶ፤ ፆሳይ ኑና ኡባና ኤሬ፤ ቃሲ ሂንቴካ ሂንቴ ዎዛና ቆፋን ኑና ኤሪታ ያጋዴ ቆፓይ። ቤቲያባን ጬቄቲያዋንቱፔ ኣቲን፥ ዎዛናን ዴዒያዋን ጬቄቴና ኣሳቶ ሂንቴ ኦዲ ዛሪያባይ ዴዓና ማላ፥ ሂንቴ ኑናን ጬቄታናዳን፥ ኑኒ ሂንቴንቶ ጋሱዋ ጊዳናው ኮዪያዋፔ ኣቲን፥ ኑና ጋላታናው ኮዮኮ። ኑኒ ጎዪያዋ ጊዶፔ፥ ፆሳ ቦንቹዋሳ፤ ዎይ ቃሲ ዎዛናና ዴዒያዋ ጊዶፔካ፥ ሂንቴና ጎዓናሳ። ኪሪስቶሳ ሲቁ ኑና ጊዴ፤ ኣዪሲ ጎፔ፥ ኢቲ ኣሳይ ኣሳ ኡባው ሃዪቄዳዋ ኑኒ ኣኬኬዶ፤ ሄዋ ጊዶፔ ኣሳይ ኡባይ ኣናና ሃዪቄዳ። ፓፃ ዴዒያዋንቱ ባሬንቱ ዲራው ሃዪቄዳዎኔ ቃሲ ሃዪቁዋፔ ዴንዴዳዎ ዴዓናፔ ኣቲን፥ ሲንꬃፔ ባሬንቱ ሁጴው ዴዔና ማላ፥ ኢ ኣሳ ኡባ ዲራው ሃዪቄዳ። ሄዋ ዲራው፥ ኑኒ ሃዋፔ ሲንꬃው ኦናኔ ኣሳ ቆፋን ፒርዶኮ፤ ሃራይ ኣቶ፥ ኑኒ ኪሪስቶሳ ካሴ ኣሳ ቆፋን ፒርዴዳዋ ጊዶፔካ፥ ሲሚ ሲንꬃፔ ሄዋዳን ፒርዶኮ። ሄዋ ዲራው፥ ኦኒኔ ኪሪስቶሳና ዴዖፔ፥ ኦራꬃ ሜꬌታ፤ ጪማይ ኣꬌዳ፤ ቤዒቴ፥ ኡባባይካ ኦራፄዳ። ኪሪስቶሳ ባጋና ኑና ባሬናና ሲጌꬄዳ ፆሳይ ኡባባካ ኦꬄዳ፤ ቃሲ ኢ ኑሲ ሃራቱዋ ባሬናና ሲጌꬂያ ኦሱዋ ኢሜዳ። ፆሳይ ኪሪስቶሳ ባጋና ኣሳ ኡባ ባሬናና ሲጌꬄ፤ ኣሳ ናጋራካ ኣሳ ቦላ ፓይዴና፤ ቃሲ ኣሳ ባሬናና ሲጌꬂያ ኪታካ ኑሲ ኢሜዳ። ሲሚ ፆሳይ ኑ ባጋና ሂንቴንቶ ሃሳዪያዋዳን፥ ኑኒካ ኪሪስቶሳ ዲራው ሃሳዪያ ኢ ኪቴዳዋንታ፤ ቃሲ ኑኒ ሂንቴና፥ «ፆሳና ሲጌቲቴ» ጊዴ፥ ኪሪስቶሳ ዲራው ዎሴቶ። ኑኒ ፆሳ ፂሎቴꬃ ኪሪስቶሳ ባጋና ኣካና ማላ፥ ናጋራ ኤሬና ኪሪስቶሳ ኑ ዲራው፥ ፆሳይ ናጋራንቻ ኦꬄዳ። ሂንቴ ኑናና ፆሳ ኦሱዋ ኦꬂዴ፥ ኣ ኣꬎ ኬካቴꬃ ኣኪዴ ሃኔና ኦጊያን ጎዔቴና ማላ፥ ኑኒ ሂንቴና ዎሴቶ። ኣዪሲ ጎፔ ፆሳይ፥ «ታኒ ኢንጄ ዎዲያን ኔኒ ጊያዋ ሲሳዲ፤ ቃሲ ኣቶቴꬃ ጋላሲ ኔና ማዳዲ» ያጌ። ቤዒቴ፥ ኢንጄ ዎዲ ሃዓ። ቤዒቴ፥ ኣቶቴꬃ ጋላሳይ ሃቻ። ኑኒ ኑ ኦሱዋ ኦኒኔ ቦራናዋ ኮዮኮ፤ ቃሲ ኦናኔ ꬉባናዋ ኮዮኮ። ሺን ኡባባኒ ኑኒ ፆሳ ኦሳንቻቱዋ ጊዲያዋ ኑ ሁጲያን ቤሴዶ፤ ዳሮ ጌንጫን፥ ዋዪያን፥ ሜቱዋን፥ ዎልቃማ ቱጋን፥ ሊሱዋን ሾጬቲያዋን፥ ቃሹዋን፥ ሻቢሬቱሳን፥ ዳቡራን፥ ጌሚዒሹዋ ꬋዪያዋን፥ ፆማን፥ ጌሻቴꬃን፥ ኤራቴꬃን፥ ዳንዳያን፥ ኬካቴꬃን፥ ጌሻ ኣያናን፥ ቱሙ ሲቁዋን፥ ቱሙዋ ሃሳዪያዋን፥ ፆሳ ዎልቃን ኑኒ ፆሳ ኦሳንቻቱዋ ጊዲያዋ ኑ ሁጲያን ቤሴዶ፤ ቃሲ ፂሎቴꬃ ቶራ ኡሼቻ ኩሺያን፥ ጎንዳሊያ ሃዲርሳ ኩሺያን ኦይቃና። ኑኒ ቦንቼቴዶኔ ቶሼቴዶ፤ ቦሬቴዶኔ ጋላቴቴዶ። ቃሲ ቱሙዋ ሃሳዬቶ፤ ሺን ኣሳይ ኑና ዎርዱዋ ጊዴ ቆፔ። ኑኒ ኣሳይ ኤሬና ኣሳ ማላ፤ ሺን ኣሳይ ኡባይ ኑና ኤሬ፤ ኑኒ ሃይቄዳ ኣሳ ማላ፤ ሺን ሂንቴ ቤዒያዋዳንካ ዴዔቶ፤ ሙሬቴዳ ኣሳ ማላ፤ ሺን ሃዪቂቤይኮ። ኑኒ ካዮቲያዋንታ ጊዶፔካ፥ ኡባ ዎዴ ናሼቴቶ። ሂዬሳ ማላቴቶ፤ ሺን ዳሮ ኣሳ ዱሬዬቶ፤ ቃሲ ኣያይኔ ባይና ኣሳ ማላቴቶ፤ ሺን ኡባባይካ ኑዋ። ቆሮንቶሳን ዴዒያ ኣሳው፥ ኑኒ ሂንቴንቶ ቆንጪያን ኦዴዶ፤ ኑ ኡሉዋካ ሂንቴና ቤሴዶ፤ ኑኒ ሂንቴንቶ ꬊቢቤይኮ፤ ꬊቤዳዋንቱ ሂንቴና። ኑኒ ኑ ኡሉዋ ሂንቴንቶ ጌንꬂቤይኮ፤ ሺን ሂንቴ ኡሉዋ ኑሲ ጌንꬄዳዋንቱ ሂንቴና። ሃዒ ታኒ ታ ናናው ሃሳዪያዋዳን፥ ሂንቴንቶ ሃሳያይ፤ ኑኒ ሂንቴና ኑ ኡሉዋ ቤሴዳዋዳን፥ ሂንቴካ ኑና ሂንቴ ኡሉዋ ኣሲ ዶዪዴ ቤሲቴ። ኣማኔና ኣሳቱዋና ዙፔቲዴ፥ ጊጌና ኦሱዋ ኦꬆፒቴ። ኣዪሲ ጎፔ፥ ፂሎቴꬃዉኔ ናጋራው ኣያን ጋኬꬃይ ዴዒ? ፖዖኔ ꬉማው ኣያን ኢቲፔቴꬃይ ዴዒ? ኪሪስቶሳኔ ዳቢሎሳ ኢቲፔ ጋꬂያባይ ኣዬ? ቃሲ ኣማኒያዌኔ ኣማኔናዌ ኮፂያዌ ኣዬ ዴዒ? ፆሳ ጌሻ ጎሌዉኔ ኤቃው ኣይቤ ዙፔቴꬃይ ዴዒ? ኣዪሲ ጎፔ ፆሳይ፥ «ታኒ ኡንቱንቱ ጊዶን ዴዓናኔ ኡንቱንቱ ጊዶን ሃሜታና። ታኒ ኡንቱንቱ ፆሳ ጊዳና፤ ቃሲ ኡንቱንቱካ ታ ኣሳቱዋ ጊዳና» ጌዳዋዳን፥ ኑኒ ዴዑዋ ፆሳ ጌሻ ጎሊያ። ሄዋዳንካ፥ ቃሲ ጎዳይ፥ «ኡንቱንቱ ጊዶፔ ኬሲቴ፤ ኡንቱንቱፔ ሻኬቲቴ። ቱናባካ ቦቾፒቴ። ታኒ ሂንቴና ሞካ ኣካና። ቃሲ ታኒ ሂንቴንቶ ኣዉዋ ጊዳና፤ ሂንቴካ ታው ኣቱማ ናናቱዋኔ ማጫ ናናቱዋ ጊዳኒታ። ታኒ ኡባፔ ዎልቃማ ጎዳይ ሃዋ ኦዳይ» ያጌዳ። ሄዋ ዲራው፥ ታ ሲቃቶ፥ ፆሳይ ሃ ኡባባ ኑሲ ኢማና ጌዳዋፔ ሂኒ ባጋን፥ ኑ ኣሹዋኔ ኑ ሼምፑዋ ቱኒሲያ ኡባባፔ ኑ ሁጲያ ኣኔ ጌሾይቴ፤ ቃሲ ፆሳው ያዪያዋን ኡባና ጌዪዴ ዴዔቶ። ሂንቴ ኡሉዋ ኑና ቤሲቴ፤ ኑኒ ኦናኔ ናቂቤይኮ፤ ኦናኔ ቆሂቤዪኮ፤ ቃሲ ኦናኔ ጪሚቤዪኮ። ታኒ ሄዋ ሂንቴ ቦላ ፒርዳናው ጊኬ፤ ኣዪሲ ጎፔ፥ ታኒ ካሴ ሂንቴንቶ ጌዳዋዳንካ፥ ሂንቴንቱ ኑ ዎዛናን ዴዒታ፤ ኑኒ ዴዒናካ ሃይቂናካ፥ ኢቲፔ ዴዔቶ። ታኒ ሃሳዪያዋ ሂንቴፔ ቆሲኬ፤ ታኒ ሂንቴናን ጬቄታይ፤ ኑ ዋዪያ ኡባን ታኒ ሎይꬃ ሚናይኔ ናሼታይ። ኣዪሲ ጎፔ፥ ሃራይ ኣቶ ኑኒ ማቂዶኒያ ቤዳ ዎዴ፥ ኡባ ባጋንካ ዋዬቴዶፔ ኣቲን፥ ሼምፒቤይኮ፤ ሃራ ኣሳና ዋላሳይ ዴዔ፤ ኑ ዎዛናንካ ያሻይ ዴዔ። ሺን ካዉሼዳዋንታ ሜንꬄꬂያ ፆሳይ፥ ቲቶ ዩሳን ኑና ሜንꬄꬄዳ። ኑና ካሴዋፔ ኣꬂ ናሼቺያዌ፥ ቲቶ ዩሳ ፃላላ ጊዴና፤ ሺን ሂንቴ ኣ ሜንꬄꬄዳዌ፥ ሂንቴ ታና ቤዓናው ኣሞቴዳዋኔ ታው ቃሬቴዳዋ ቃሲ ሂንቴ ታና ማዳናው ጊጌቴዳዋ ኢ ኑሲ ኦዴዳ። ኣዪሲ ጎፔ፥ ታ ዳቢዳቢ ሂንቴና ካዮዬዳዋ ጊዶፔካ፥ ኣዪሲ ፃፋዲታሻ ጊኬ፤ ኣዪሲ ፃፋዲታሻ ጎፔካ፥ ታ ዳቢዳቢ ሂንቴና ጉꬃ ዎዲያ ካዮዬዳዋ ቤዓይ። ሃዒ ታና ናሼቺያዌ ታኒ ሂንቴና ካዮዬዳ ዲራሳ ጊዴና፤ ሺን ሂንቴ ካዩ ሂንቴና ናጋራፔ ዛሬዳዋ ዲራሳ፤ ኣዪሲ ጎፔ፥ ኑኒ ሂንቴና ኣያኒኔ ቆሄናዳን፥ ፆሳይ ባሬ ኮዬዳዋዳን፥ ሂንቴና ካዮዬዳ። ኣዪሲ ጎፔ፥ ፆሳይ ኮዪያ ካዩ ናጋራፔ ዛሪዴ ኣቶቴꬃኮ ኣሄ፤ ሄዌካ ታኒ ባዪዛዲ ጌና ዎዛና፤ ሺን ኣላሚያ ካዩ ሃዪቁዋ ኣሄ። ፆሳይ ሄ ሂንቴ ካዩዋን ኣይ ኣዪፊያ ኢሜዴንቶ ቤዒቴ። ሂንቴና ኣይ ኬና ዴንꬄꬄዴንቶኔ ሂንቴ ጌሻቴꬃ ቱማያናው ሂንቴና ኣይ ኬና ዛሩዋ ኢሚሴዴንቶ፥ ኣይ ኬና ሃንቄꬄዴንቶኔ ኣይ ኬና ታው ያሺሴዴንቶ፥ ኣይ ኬና ሴሊሴዴንቶ፥ ኣያ ኬና ታና ላሞቲሴዴንቶኔ ናቆ ኦሱዋ ኦꬃዋንታ ሙራናው ኣይ ኬና ጊጊሴዴንቶ ፓጪ ቤዒቴ፤ ሂንቴ ሂንቴ ሁጲያን ጌሻ ጊዴዳዋ ኡባባንካ ኤሪሴዲታ። ሄዋ ዲራው፥ ታኒ ሄ ዳቢዳቢያ ሂንቴንቶ ፃፌዳዋ ጊዶፔካ፥ ናቄዳ ኡራ ዎይ ናቄቴዳ ኡራ ዲራሳ ጊዴና፤ ሺን ሂንቴ ኑሲ ዎዪሳ ቆፒንቶኔ ፆሳ ሲንꬃን ሂንቴንቶ ቆንጪሳናው ታኒ ፃፋዲ። ኑኒ ሚኔዳዌ ሄዋ ዲራሳ፤ ሄ ኑ ሚኖታ ቦላ፥ ቲቶ ናሼቴዳዋሲ ኑኒ ኡባፔ ዳሪያ ናሼቻ ናሼቴዶ። ኣዪሲ ጎፔ፥ ሂንቴ ኡባይ ኣ ሂርጋፔ ሼምፒሴዲታ። ታኒ ሂንቴዋ ሳባዴ ኣው ኦዲና፥ ሂንቴ ታና ዬላዪቤዪኪታ፤ ሺን ኑኒ ሂንቴንቶ ኡባ ዎዴ ቱሙዋ ሃሳዬዶ፤ ሄዋዳንካ፥ ኑኒ ቲቶ ሲንꬃን ሂንቴዋ ሳቤዳዌ ቱማ ጊዴዳ። ሄዋ ዲራው፥ ሂንቴ ኡባይ ኣው ያዪዴ ኮኮሪዴ፥ ኣ ዎቲ ሞኬዲቴንቶኔ ቃሲ ኣው ኣይ ኬና ኣዛዜቴዲቴንቶ ኢ ሃሳዪያ ዎዴ፥ ሂንቴና ሎይꬂ ሲቄ። ታኒ ኡባባኒ ሂንቴና ኣማኒያ ዲራው ናሼታይ። ኑዋዳን ፆሳ ኣሳቶ፥ ፆሳ ኣꬎ ኬካቴꬃይ ማቂዶኒያ ኣማኒያዋንቱ ጊዶን ኦꬄዳዋ ሂንቴና ኤሪሳናው ኮዬቶ። ኡንቱንቱ ኣꬌዳ ዋዪያን ዎልቃማ ፓጪያ ፓጬቴዲኖ፤ ሺን ኡንቱንቱ ሂዬሳ ጊዶፔካ፥ ባሬንቱ ኢሚያዋን ዳሮ ኬኪኖኔ ቃሲ ዎልቃማ ናሼቻ ናሼቲኖ። ኣዪሲ ጎፔ፥ ኡንቱንቱ ባሬንቱ ዎልቃ ኬና ቃሲ ሃራይ ኣቶ ባሬንቱ ዎልቃፔካ ዳሪያዋ ዶሲዴ ኢሜዳዎ ታኒ ማርካ። ኡንቱንቱ ፆሳ ኣሳቱዋ ማዲያ ሎዖ ኦሱዋ ኑናና ኦꬃናው ኑና ዳሮ ዎሴዲኖ። ኡንቱንቱ ኑኒ ቆፔዳዋፔ ኣꬂዴ ኦꬄዲኖ፤ ካሴቲዴ ኡንቱንቱ ባሬንቱ ሁጲያ ጎዳው ኢሜዳዋፔ ጉዪያን፥ ፆሳ ሼኒያዳን፥ ኑሲካ ባሬንቱ ሁጲያ ኢሜዲኖ። ሄዋ ዲራው፥ ኑኒ ሃ ሎዖ ኦሱዋ ዶሜዳ ቲቶ ጉጂ ኦꬃናዳኒኔ ሂንቴና ማዲዴ፥ ሄ ኦሱዋ ፖሊሳናዳን ኣ ዎሴዶ። ሺን ሂንቴ ኡባባኒ፥ ኣማኑዋን፥ ሃሳያን፥ ኤራቴꬃን፥ ዎልቃማ ሎዖ ኣሙዋን፥ ኑና ሲቂያዋንካ ዱሬቴዳዋዳን፥ ሃ ሎዖ ኦሱዋንካ ሂንቴንቱ ኬካ ጊዳናዋ ኑኒ ኮዬቶ። ታኒ ሄዋ ኣዛዛናው ጊኬ፤ ሺን ሃራቱዋ ዎልቃማ ሎዖ ኣሙዋ ባጋና ሂንቴ ሲቁ ኣይ ኬና ቱሜንቶ ኤራናው ጋይ። ኣዪሲ ጎፔ፥ ሂንቴ ኑ ጎዳ ዬሱሲ ኪሪስቶሳ ኣꬎ ኬካቴꬃ ኤሪታ፤ ኪሪስቶሲ ዱሬ ጊዲ ዴዒዴ፥ ሂንቴ ኣ ሂዬሳቴꬃን ዱሬታናዳን፥ ሂንቴ ዲራው ሂዬሴዳ። ታኒ ሃ ዬዉዋ ሂንቴና ዞሪያዌ ሃዋ፤ ዚላይꬂ ሂንቴ ዶሜዳዋ ሃዒ ዉርሲያዌ ሂንቴንቶ ሎዓ፤ ሂንቴ ኦሶ ፃላላው ጊዴናን፥ ኦꬃና ቆፋዉካ ካሴቴዳዋንታ። ሂንቴ ኦꬃናው ሎይꬂ ኣሞቴዳዌ ኦꬂዴ ፖሌዳዋና ጊጋ ጊዳና ማላ፥ ሂንቴንቶ ዳንዳዬቴዳዋዳንካ ኦሱዋ ፖሊቴ። ኣዪሲ ጎፔ፥ ኢቲ ኡራይ ኢማናው ሎይꬂ ኮዮፔ፥ ኢ ባሬው ዴዔዳ ኬና ኢማናፔ ኣቲን፥ ኣው ባይናዋ ኣፔ ኣኬና። ኣዪሲ ጎፔ፥ ታኒ ሃራንቱ ዋዪያፔ ሼምፒና፥ ሂንቴ ዋዬቲቴ ጊኬ፤ ሂንቴ ኡባይካ ቃራ ዴዓናዳናፔ ኣቲን። ኡንቱንቱ ፓላሃይ ሂንቴ ፓጫ ኩንꬃና ማላ፥ ሂንቴንቶ ሃ ዎዲያን ዴዒያ ፓላሃይ ኡንቱንቱ ፓጫ ኩንꬃና ኮሼ፤ ላዑካ ሄዋን ቃራን ጎዔቲኖ። ፆሳ ማፃፋን፥ «ዳሪሲዴ ሺሼዳዎ ፓላሂቤና፤ ቃሲ ጉꬃ ሺሼዳዎካ ፓጪቤና» ጌቴቲዴ ፃፌቴዳ። ሺን ኑኒ ሂንቴንቶ ቆፒያዋ ማላ፥ ዎልቃማ ቆፋ ቲታ ቆፊሴዳ ፆሳ ጋላታይ ጋኮ። ቲቶ ሂንቴኮ ባናው ባሬ ቆፋ ቃቼዳዌ፥ ባሬ ሁጲያን ሂንቴና ማዳናው ዳሮ ኣሞቴዳ ጊሻፔ ኣቲን፥ ኑ ዞሪያ ፃላላ ኣኬዳዋና ጊዴና። ሚሺራቹዋ ቃላ ኦዲያ ባሬ ኦሱዋን ኣማኔቲያ ኣማኒያዋንቱ ሲንꬃ ኡባን ዳሮ ቦንቼቴዳ ኢሻ ኑኒ ኣናና ኢቲፔ ኪቴቶ። ሄዋ ቦላን ቃሲ፥ ሃ ኑኒ ኦꬂያ ሎዖ ኦሱዋ ኢ ኑናና ኢቲፔ ኦꬃናዉኔ ጎዳ ቦንቾ ኑኒ ሃራቱዋ ማዳናሲ ሎይꬂ ኣሞቲያዋ ቤሳናው ኣማኒያ ኣሳቱ ኣ ዶሪዴ ሱንꬄዲኖ። ኑኒ ኦꬂያ ሃ ኬካ ኢሞታ ዲራው፥ ኦኒኔ ኑና ዚጊሬና ማላ ናጌቴቶ። ኣዪሲ ጎፔ፥ ኑኒ ጎዳ ሲንꬃን ሎዖባ ኦꬃናዋ ፃላላ ጊዴና፤ ሺን ኣሳ ሲንꬃንካ ሎዖባ ኦꬃናው ቆፔቶ። ኑኒ ዳሮ ጌዴ ፓጪ ቤዔዳ ኑ ኢሻ፥ ኡባ ዎዴ ሂንቴና ማዳናው ዳሮ ኣሞቲያዋ፥ ሃ ኣሳቱዋና ሂንቴኮ ኪቴቶ፤ ቃሲ ሃዒ ኢ ሂንቴና ዳሮ ኣማኒያ ዲራው፥ ሂንቴና ማዳናው ካሴዋፔ ኣꬂዴ ሎይꬂ ኣሞቴ። ቲቶዋ ጊዶፔ፥ ኢ ሂንቴና ማዳናው ታናና ኢቲፔ ኦꬂያ ታ ላጊያ፤ ዮኮ ኢሻቱዋባ ጊዶፔ፥ ኡንቱንቱ ኣማኒያ ኣሳቱ ኪቴዳዋንታኔ ኡንቱንቱ ዴዑ ኪሪስቶሳ ቦንቺሲያዋ። ሲሚ ኣማኒያዋንቱ ኡባቱ ሂንቴ ሲቁ ቱማ ጊዲያዋ ኤራና ማላ፥ ቃሲ ኑኒ ሂንቴዋ ሳቢያዌ ሊኬ ጊዲያዋ ኤራና ማላ፥ ሂንቴ ሲቁዋ ኡንቱንታ ቤሲቴ። ዪሁዳን ዴዒያ ጌሻ ኣሳቱዋ ማዳናው ዬዲያባው ታኒ ሂንቴንቶ ፃፋናው ኮሼና። ሂንቴ ማዳናው ሎይꬂ ኣሞቲያዋ ታኒ ኤሪያ ዲራው፥ ማቂዶኒያን ዴዒያ ኣሳው ሂንቴዋ ሳባዲ። ታኒ ኡንቱንቶ፥ «ኣካዪያን ዴዒያ ኢሻቱ ዚላይꬂፔ ዶሚዴ፥ ማዳናው ጊጌቴዲኖ» ያጋዴ ኦዳዲ፤ ቃሲ ሂንቴ ዎልቃማ ኣሙካ ኡንቱንቱፔ ዳሪያ ባጋ ዴንꬄꬄዳ። ሺን ታኒ ኡንቱንቶ ጌዳዋዳንካ ኑኒ ሃ ዬዉዋ ሂንቴናን ጬቄቲያዌ ሜላ ጊዴና ማላ፥ ሂንቴ ጊጌቴዳዋንታ ጊዳናዳን፥ ሃ ኢሻቱዋ ሂንቴኮ ኪታይ። ማቂዶኒያ ኣሳቱ ታናና ዪዴ፥ ሂንቴ ጊጌቴናን ዴዒሺን፥ ሂንቴና ዴሞፔ፥ ኑ ፃላላ ጊዴናዳን፥ ሂንቴ ኑፔ ኣꬉዋ ዬላታኒታ፤ ሺን ኑኒ ሂንቴና ሎይꬂ ኣማኒዴ ጬቄቴዳዋሳ። ሄዋ ዲራው፥ ታኒ ሃ ኢሻቱ ታፔ ሲንꬃቲ ሂንቴኮ ቢዴ፥ ሂንቴ ኢማና ጌዳ ኢሞታ ካሴቲዴ ጊጊሳና ማላ፥ ኡንቱንታ ዎሳናው ኮሺያዋ ኣኬካዲ። ሄዋፔ ጉዪያን፥ ሄ ኢሞታይ ታኒ ጋኪያ ዎዴ ጊጊ ኡታናዋ፤ ሄዌ ቃሲ ዎልቃን ሂንቴ ኢሚያዋ ጊዴናን፥ ዶሲዴ ኢሚያዋ ኤሪሴ። ሃዋ ኣኬኪቴ፤ ጉꬃ ዜሬꬃ ዜሪያ ኡራይ ጉꬃ ካꬃ ጫካና፤ ዳሮ ዜሬꬃ ዜሪያ ኡራይ ቃሲ ዳሮ ካꬃ ጫካና። ፆሳይ ናሼቻን ኢሚያ ኡራ ሲቂያ ዲራው፥ ቃሬቲዴ ዎይ ዶሴናን ኢሚያዋ ጊዴናን፥ ኢሚያ ኡራይ ሁጲያን ሁጲያን ባሬ ዎዛናን ቆፔዳዋ ኢሞ። ፆሳይ ሂንቴንቶ ጊዲያዌ ኡባ ዎዴ ዴዓናዳኒኔ ቃሲ ሃራቶካ ሂንቴ ኢማናው ጊዲያዌ ዴዓናዳን ሂንቴና ኮሺያ ኡባባ ሂንቴንቶ ኢማናው ዳንዳዬ። ፆሳ ማፃፋይ፥ «ኢ ሂዬሳ ኣሳው ዳሪሲዴ ኢሜ፤ ቃሲ ኣ ፂሎቴꬃይ ሜꬊናው ዴዓናዋ» ያጌ። ፆሳይ፥ ዜሪያዎ ዜሬꬃኔ ማናው ቁማ ኢሚያዌ፥ ሂንቴና ኮሺያ ዜሬꬃ ኡባ ሂንቴንቶ ኢማና፤ ቃሲ ሂንቴ ፂሎቴꬃፔ ዳሮ ኣይፊያ ኣዪፊሳናው ሄ ዜሬꬃ ዲቻናዋ። ዳሮ ኣሳይ ሂንቴ ኢሚያ ኢሞታ ኑፔ ኣኪዴ፥ ፆሳ ጋላታናዳን፥ ሂንቴ ኡባ ዎዴ ዳሪሲዴ ኢሚያዋንታ ጊዳና ማላ፥ ፆሳይ ሂንቴና ኡባ ባጋና ዱሬያና። ኣዪሲ ጎፔ፥ ሃ ሂንቴ ኦꬂያ ኦሱ ፆሳ ናናው ኮሺያዋ ኩንꬂ ኢሚያዋ ፃላላ ጊዴና፤ ሺን ፆሳው ዳሮ ጋላታ ኢሚያዋን ኩሚዴ ጎጌ። ሃ ሂንቴ ኦሱ ሂንቴ ኣማኑዋ ኤሪሲያ ዲራው፥ ዳሮ ኣሳይ ኪሪስቶሳ ዎንጋላ ሂንቴ ኣማኒዴ ማርካቲያዎኔ ሂንቴ ማዱዋ ኡንቱንቱናኔ ሃራ ኡባቱዋና ሻኪዴ፥ ዳሪሲ ኢሚያዎ ፆሳ ቦንቻና። ኡንቱንቱ ሂንቴንቶ ፆሳ ዎሲዴ፥ ሂንቴናን ዴዒያ ፆሳ ኣꬎ ኬካቴꬃይ ዛዋይ ባዪናዋ ዲራው፥ ሂንቴና ላሞቴቶ። ዛዋይ ባዪና ፆሳ ኣꬎ ኬካቴꬃ ዲራው፥ ፆሳ ጋላታይ ጋኮ። ታኒ ጳዉሎሲ፥ ሂንቴ፥ «ኢ ኑናና ዴዒያ ዎዴ ኣሺኬ» ጊያዌ፥ ቃሲ፥ «ኑፔ ሃኪ ዴዒያ ዎዴ ኑ ቦላ ፃሌ» ጊያዌ፥ ሎዓኔ ኣሺኬ ጊዴዳ ኪሪስቶሳ ባጋና ሂንቴና ዎሳይ። ኑና ሃ ሳዓ ዶያዳን ዴዒኖ ጊዴ ቆፒያ ኢቲ ኢቲ ኣሳቱዋ ቦላ ታኒ ፃላናዋ ኤራይ፤ ሺን ታኒ ሂንቴኮ ቢያ ዎዴ ሂንቴ ታና ፃሊሴና ማላ፥ ሂንቴና ዎሳይ። ኣዪሲ ጎፔ፥ ኑኒ ሃ ሳዓን ዴዖፔካ፥ ሃ ሳዓ ኣሳዳን ኦሌቶኮ። ኣዪሲ ጎፔ፥ ኑኒ ኦሌቲያ ቶራይ ሃ ሳዓዋ ጊዴና። ሺን ጌሱዋ ላላናው ዎልቃና ዴዒያ ፆሳ ቶራ። ኑኒ ኣሳ ቆፋ ꬋዪሴቶ፤ ቃሲ ፆሳ ኤራቴꬃ ቦላ ዴንዲዴ ꬉቢያ ኦቶሮ ቆፋ ኡባ ላሌቶ። ሄ ቆፋ ኡባይ ኪሪስቶሳው ኣዛዜታና ማላ ኦሞዴቶ። *** ሂንቴ ኣዛዜቲያዋ ፖሌዳዋፔ ጉዪያን፥ ኣዛዜቴናን ኢፂያዋ ኡባ ኑኒ ሙራናው ጊጌታና። ሂንቴ ሲንꬃን ዴዒያዋ ፄሊቴ፤ ኦኒኔ ባሬና ኪሪስቶሳዋ ጊዴ ቆፖፔ፥ ሄዋ ጉጂ ቆፖ፤ ኪሪስቶሳዋ ኢ ጊዴዳዋዳን፥ ኑኒካ ቃሲ ኣዋ። ኣዪሲ ጎፔ፥ ጎዳይ ኑሲ ኢሜዳ ኑ ኣዎቴꬃኒ ታኒ ሎይꬃ ኦቶሬቲያዋ ጊዶፔካ፥ ሄዋን ዬላቲኬ፤ ሄ ኑሲ ኢሜዳ ኣዎቴꬃይ ሂንቴና ኬፃናሳፔ ኣቲን፥ ኮላናሳ ጊዴና። ታኒ ታ ዳቢዳቢያን ሂንቴና ያሺሳናው ፃፎ ኣሳ ማላታዴ ቤታናው ኮዪኬ። ኣዪሲ ጎፔ፥ ኢቲ ኢቲ ኣሳይ፥ «ጳዉሎሳ ዳቢዳቢ ዴፆኔ ዎልቃማ፤ ሺን ፄሊያ ዎዴ ኢ ዳቡራንቻ፤ ኣ ሃሳያይካ ፓꬄና» ያጌ። ሄዋ ማላ ኣሳይ ኑኒ ሃኩዋን ዴዒዴ ፃፊያ ዳቢዳቢያኒኔ ያኒ ሂንቴናና ዴዒዴ ኦꬂያ ኦሱዋን ዱማቴꬂ ባዪናዋ ኣኬካና ኮሼ። ኑኒ ባሬና ናሺያ ኢቲ ኢቲ ኣሳቱዋና ኑና ፓይዳናው ዎይ ሊኪሳናው ኮዮኮ፤ ሺን ኡንቱንቱ ባሬና ኢቱ ኢቱዋና ሊኪሲዲኔ ቃሲ ባሬና ኢቱ ኢቱዋና ቃራዪዴ፥ ኡባና ኤዬዲኖ። ሺን ኑኒ ፆሳይ ኑሲ ኤሴዳ ዛዋ ጊዶን ጬቄቲያዋፔ ኣቲን፥ ሄ ዛዋፔ ፒኒዴ ጬቄቶኮ፤ ሄ ዛዋይ ሂንቴኮካ ጋኬ። ኑኒ ሂንቴኮ ጋኪቤናዋ ማላቲዴ፥ ዛዋ ፒኖኮ፤ ኣዪሲ ጎፔ፥ ኑኒ ኪሪስቶሳ ሚሺራቹዋ ቃላ ኦዲዴ፥ ሂንቴኮ ካሴ ጋኬዶ። ኑኒ ፆሳይ ኤሴዳ ዛዋ ፒኒዴ፥ ሃራ ኣሳይ ኦꬄዳ ኦሱዋን ጬቄቶኮ፤ ሺን ሂንቴ ኣማኑ ዲጪ ዲጪ ቢያ ዎዴ፥ ኑኒ ሂንቴ ጊዶን ኦꬂያ ኦሱዋ ዛዋይ ካሴዋፔ ሎይꬂ ኣኪ ኣኪ ባናዋ ጊዴ ቆፔቶ። ኑኒ ሚሺራቹዋ ቃላ ሂንቴ ዴዒያሳፔ ሂኒ ባጋን ኦዳና፤ ቃሲ ሃራ ዛዋን ኦሴቲዲጌዳ ኦሱዋንካ ጬቄቶኮ። ሺን ፆሳ ማፃፋይ፥ «ጬቄቲያ ኡራይ ኦኒኔ ጎዳ ሎዖቴꬃባን ጬቄቶ» ያጌ። ኣዪሲ ጎፔ፥ ጎዳይ ናሺያ ኡራፔ ኣቲን፥ ባሬና ናሺያ ኡራይ ጋላቴቴና። ሂንቴ ታ ኤያቴꬃ ጉꬃ ዳንዳዪንቶ ሎዓ። ሃያና ዳንዳዪቴ። ፆሳይ ቃናቲያዋዳን፥ ታኒካ ሂንቴው ቃናታይ፤ ኣዪሲ ጎፔ፥ ታኒ ሂንቴና ኢቲ ኣቱማዎ፥ ኪሪስቶሳው ኢማና ጋዴ፥ ኣቱማዋ ኤሬና ጌሻ ዎዶራቲዳን ጊጊሳ ዎꬃዲ። ሺን ሾሻይ ባሬ ማካላን ሄዋኖ ባሌꬄዳዋዳን፥ ኪሪስቶሳው ሂንቴ ኢሜዳ ሂንቴ ሱሬ ቆፋይ ባዪቤናዌ ዎራ ባንዴሻ ጋዴ ሂርጋይ። ኣዪሲ ጎፔ፥ ኢቲ ኡራይ ዪዴ፥ ኑኒ ሂንቴንቶ ኦዴዳ ዬሱሳፔ ሃራ ዬሱሳ ሂንቴንቶ ኦዶፔ፥ ዎይ ሂንቴ ኣኬዳ ኣያናፔኔ ዎንጋላፔ ዱማ ኣያናኔ ዎንጋላ ሂንቴ ኣኮፔ፥ ሂንቴ ኤኖ ጊዴ ኣኬዲታ ጉሳ። ዬሱሲ ኪቴዳ ሃ ዋናቱዋፔ ታኒ ኣያንካ ላፊያዋ ታው ማላቴና። ታኒ ሃሳዪያ ሃሳያን ታማራቤና ኣሳ ጊዶፔካ፥ ኤራቴꬃን ጊዲኬ፤ ሺን ኑኒ ሂንቴንቶ ሃ ዬዉዋ ኣሳ ኡባ ጊዶን ኡባ ባጋና ቆንጪሴዶ። ዎይ ታኒ ሂንቴና ሚሻ ኦቼናን፥ ፆሳ ሚሺራቹዋ ቃላ ሂንቴንቶ ጮ ኦዴዳዌኔ ሂንቴና ꬎቁ ኦꬃናው ታ ሁጲያ ቶቼዳዌ ታው ናጋራ ጊዳንዴሻ? ታኒ ሂንቴንቶ ኦꬃናው ሃራ ኣማኒያ ኣሳፔ ሚሻ ኣኬዳዎ፥ ሄዋንታ ቦንቃዲ። ቃሲ ታኒ ሂንቴናና ዴዒሺን፥ ታና ሜቲና፥ ሂንቴፔ ኢቲ ኡራካ ዋዪሳቤይኬ። ኣዪሲ ጎፔ፥ ማቂዶኒያፔ ዬዳ ኢሻቱ ታና ኮሼዳ ኡባባ ታው ኢሜዲኖ፤ ታኒ ሂንቴና ዋዪሴና ማላ፥ ካሴ ቶኮ ጊዳቤናዋዳንካ ሲንꬃዉካ ቶኮ ጊዲኬ። ኪሪስቶሳ ቱማቴꬃይ ታናን ዴዒሺን፥ ሃ ታ ጬቁ ኣካዪያ ጋዲያን ሃቃኒኔ ኣቴና። ታኒ ሃዋ ኣዪሲ ጋይታ? ሂንቴና ሲቄና ዲራሴ? ታኒ ሂንቴና ሲቂያዋ ፆሳይ ኤሬ። ሺን ሄ ባሬንቱ ጬቄቲያዋን ኑኒ ኦꬂያዋዳን ኦꬃናው ጋሶቲያዋንቱ ጋሱዋ ዲጋናው፥ ሃዒ ታኒ ኦꬂያ ኦሱዋ ጉጃዴ ኦꬃና። ኣዪሲ ጎፔ፥ ኡንቱንቱ ዬሱሲ ኪቲቤና ዎርዶ ኣሳቱዋ፤ ሄዋንቱ ማላ ኣሳቱ ኪሪስቶሲ ኪቴዳዋንታ ማላታናው ባሬንቱ ማላ ላሜሬꬂያ ኪቴቲቤና ዎርዳንቻቱዋኔ ላባንቻ ኦሳንቻቱዋ። ሄዌ ማላሊሲያዋ ጊዴና፤ ኣዪሲ ጎፔ፥ ሴፃናይ ባሬ ሁጴው ፖዑዋ ኪታንቻ ማላታናው ባሬ ማላ ላሜ። ሄዋ ዲራው፥ ሴፃና ኦሳንቻቱ ፂሎቴꬃ ኦሳንቻቱዋ ማላታናው ባሬንቱ ማላ ላሞፔ፥ ሄዌ ዎልቃማባ ጊዴና፤ ኡንቱንቱ ዉርሴꬃን ባሬንቱ ኦሱዋ ማላ ኣካና። ታኒ ላዔꬁዋካ ጋይ፤ ታና ኦኒኔ ኤያ ጊዴ ቆፖፖ፤ ሺን ሂንቴ ታና፥ ኢ ኤያ ጎፔካ፥ ታኒ ጉꬃ ጬቄታናዳን፥ ታና ኤያ ጊቴ። ታኒ ሃዋዳን ፃላዴ ጬቄታዴ ሃሳዪያዌ፥ ኤያቴꬃ ሃሳያፔ ኣቲን፥ ታና ጎዳይ ኣዛዚና ጊዴና። ዳሮ ኣሳይ ሃ ሳዓባን ጬቄቲያ ዲራው፥ ታኒካ ጬቄታና። ሂንቴ ኣꬌዳ ኤራንቻ ጊዲያ ዲራው፥ ኤያ ኣሳዋ ናሼቻን ዳንዳዪታ። ኣዪሲ ጎፔ፥ ኦኒኔ ሂንቴና ኣዪሌዮፔ፥ ዎይ ሂንቴዋ ሞፔ፥ ዎይ ሂንቴዋ ቦንቆፔ፥ ሂንቴ ቦላ ኦቶሬቶፔ፥ ዎይ ሂንቴ ሻዪያ ባቆፔ፥ ዳንዳዪታ። ኑኒ ሄዋ ኦꬃናው ዳሮ ዳቡራንቻ ጊዴዳዋ ታኒ ዬላታዴ ኦዳይ። ሺን ኦኒኔ ኢቲባን ፃሊዴ ጬቄቶፔ፥ ታኒካ ጬቄታናው ፃላይ፤ ታኒ ኤያ ኣሳዳን ሃሳያይ። ኡንቱንቱ ኢብራዌ? ታኒካ ኢብራዌ። ኡንቱንቱ ኢስራዔሊያ ኣሴ? ታኒካ ኢስራዔሊያ ኣሳ። ኡንቱንቱ ኣብራሃሜ ዛሬ? ታኒካ ቃሲ ኣብራሃማ ዛሬ። ኡንቱንቱ ኪሪስቶሳ ቆማቴ? ታኒካ ኡንቱንቱፔ ኣꬊያ ቆማ፤ ታኒ ጎዪያ ኣሳዳን ሃሳያይ፤ ታኒ ዳሮ ኦꬃ ዳቡራዲ፤ ዳሮ ዎዲያ ቃሼታዲኔ ሊሱዋን ሾጬታዲ፤ ቃሲ ዳሮ ዎዲያ ሃዪቃዴ ኣታዲ። ኣዪሁዳቱ ታና ኢቼሹ ጌዴ፥ ሃታማኔ ኡዱፑኑዋ ሊሱዋን ሾጬዲኖ። ሮሜ ኣሳይ ታና ሄዙ ጌዴ ፃምዓን ሾጬዳ፤ ኢቲ ጋላሲ ሹቻን ጫዲ ጫዲዴ ኣጌዳ፤ ማርካቢ ሄዙ ጌዴ ሜዒና፥ ኣባ ጊዶን ኢቲ ቃማኔ ኢቲ ጋላሳ ኣቃዴ ፔሻዲ። ታኒ ዳሮ ኦጊያ ሃሜታዲ፤ ታና ኩንꬆ ሃꬃዪኔ ቦንቃንቻቱ ቦንቂ ዲጊዴ ኣሼዳ፤ ቃሲ ታ ቢታ ኣሳይኔ ኣዪሁዳ ጊዴና ኣሳይ ቦንቂ ዲጊዴ ኣሼዲኖ። ቃሲካ ካታማይ፥ ባዙ፥ ኣባይ፥ ታና ያሺሴዳ፤ ዎርዱዋ ዳባቱካ ታና ቦንቂ ዲጊዴ ኣሼዲኖ። ታኒ ዳቡራዲኔ ሜቶታዲ። ዳሮ ጌዴ ጌሚዒሹዋ ꬋያዲ፤ ኮሻታዲ፤ ሳሜታዲ። ዳሮ ጌዴ ፆማዲ፤ ቃሲ ሜጌታዲኔ ካሎታዲ። ሃራባ ኡባፔካ ኡባ ጋላሲ ታው ቶኩዋ ጊዴዳባይ፥ ዎሳ ጎሊያ ኡባው ሂርጊያዋ። ዳቡሪያዌ ኦኔ? ታኒ ዳቡሪኪታዬ? ናጋራን ጌሊያዌ ኦኔ? ታኒ ኡንዔታዴ ኣው ቃሬቲኪታዬ? ታኒ ጬቄታናው ኮሺያዋ ጊዶፔ፥ ታኒ ዳቡራንቻ ጊዲያዋ ኤሪሲያዋን ጬቄታና። ሜꬊናው ኣንጄቴዳ ፆሳይ፥ ኑ ጎዳ ዬሱሲ ኪሪስቶሳ ኣዉ፥ ታኒ ዎርዶቴናዋ ኤሬ። ዳማስቆ ካታማን ኣሬታሳ ጊያ ካቲያፔ ጋርሳና ጋዲያ ሞዲያዌ፥ ታና ኦይꬃናው ዳማስቆ ካታማ ናጊሴ። ሺን ካታማ ጊምቢያ ዲርሳ ማስኮቲያና ታና ታዪያን ዱጌ ዎꬂና፥ ኣፔ ኬሳ ኣካዲ። ጬቄቲያዌ ታው ኣዪኔ ጎዔናዋ ጊዶፔካ፥ ታኒ ጬቄታናው ቤሴ። ሺን ታኒ ሳፃባኔ ጎዳፔ ቆንጬዳዋ ሃሳያና። ታማኔ ኦይዱ ላይꬃፔ ካሴ፥ ሄዜንꬆ ሳሉዋ ፑዴ ቤዳ ኢቲ ቢታኒያ፥ ኪሪስቶሳ ኣማኒያዋ፥ ታኒ ኤራይ፤ ሄ ቢታኒ ባሬ ኣሳቴꬃን ቤዴ ዎይ ሳፃን ቤዴንቶ፥ ታኒ ኤሪኬ፤ ፆሳይ ኤሬ። ሄ ቢታኒያ፥ ሄዜንꬆ ሳሉዋ ፑዴ ቤዳዋ፥ ኤራይ፤ ኢ ባሬ ኣሳቴꬃን ቤዴንቶኔ ዎይ ሳፃን ቤዴንቶ፥ ታኒ ኤሪኬ፤ ፆሳይ ኤሬ። ሄዋን ሄ ቢታኒ ኣሳይ ሃሳያናው ዳንዳዬናዋ፥ ኣሳ ኢንፃርሳዪካ ሃሳያናው ዳንዳዬናዋ ሲሴዳ። ታኒ ሄ ቢታኒያባን ጬቄታና፤ ሺን ታኒ ዳቡራንቻ ጊዲያዋ ኤሪሲያ ዲራው፥ ታ ሁጲያን ጬቄቲኬ። ታኒ ጬቄታናው ኮዪያዋ ጊዶፔካ ኤያ ጊዲኬ፤ ኣዪሲ ጎፔ፥ ታኒ ቱሙዋ ሃሳያይ። ሺን ኣሳይ ታዋ ታናን ቤዒያዋፔኔ ታፔ ሲሲያዋፔ ኣꬂዴ ቆፔና ማላ ናጌታይ። ቃሲ ፆሳይ ታው ዳሮ ቆንጬዳ ዎልቃማ ዬዉዋፔ ዴንዴዳዋን ኦቶሬቴናዳን ዲጋናው ታና ጫዲ ኦይቂያ፥ ሴፃና ኪታንቻይ፥ ታና ሜቶꬃናዉኔ ታኒ ኦቶሬቴና ማላ፥ ታና ናጋናው ታው ኢሜቴዳ። ሄዋ ታፔ ሻካና ማላ፥ ታኒ ጎዳ ሄዙ ጌዴ ዎሳዲ። ጎዳይ ታና፥ «ታ ኣꬎ ኬካቴꬃይ ኔው ጊዳናዋ፤ ኣዪሲ ጎፔ፥ ታ ዎልቃይ ኔ ዳቡራን ፖሌቴ» ያጌዳ፤ ሄዋ ዲራው፥ ኪሪስቶሳ ዎልቃይ ታናን ዴዓና ማላ፥ ታ ዳቡራን ጬቄታናው ታኒ ዳሮ ናሼታይ። ታኒ ኪሪስቶሳ ዲራው ዳቡሪያዋን፥ ኣሳን ቦሬቲያዋን፥ ዋዬቲያዋን፥ ዬዴርሴቲያዋን፥ ሜቶቲያዋን ናሼታይ፤ ኣዪሲ ጎፔ፥ ታኒ ዳቡሪያ ዎዴ፥ ሄ ዎዴ ሚናይ። ታኒ ጬቄቴዳዋን ኤያዲ፤ ሺን ሄዋ ሂንቴ ታና ዎልቃን ኦሲሴዲታ፤ ኣዪሲ ጎፔ፥ ሂንቴ ታና ጋላታናው ቤሴ፤ ታኒ ኣያኒኔ ኤሬቴናን ꬋዮፔካ፥ ዬሱሲ ኪቴዳ ꬎቃ ጌቴቴዳ ኡባቱዋፔ ላፊኬ። ታና ዬሱሲ ኪቴዳዌ ቱማ ጊዲያዋ ኤሪሲያ ማላይ፥ ኦራꬃባይኔ ዎልቃማ ኦሱ ሂንቴ ጊዶን ዳሮ ጌንጫን ኦሴቴዳ። ታኒ ታ ሁጲያን ሂንቴና ዋዪሳቤናዋፔ ኣቲን፥ ሃራ ኣማኒያ ኣሳቱዋፔ ሂንቴ ኣያኒ ላፊቴ? ሃያና ታኒ ሂንቴና ናቄዳዋ ታው ኣቶ ጊቴ። ታኒ ሂንቴኮ ባናው ጊጎዴፔ፥ ሃዌ ታው ሄዜንꬆ ዎዴ፤ ታኒ ሂንቴና ዋዪሲኬ። ታኒ ሂንቴና ኮዪያዋፔ ኣቲን፥ ሂንቴ ሚሻ ኮዪኬ፤ ኣዪሲ ጎፔ፥ ኣዉኔ ኣታ ባሬንቱ ናናው ሚሻ ሚንጂያዋፔ ኣቲን፥ ናናይ ባሬንቱ ኣዎኔ ኣቲው ሚንጂኪኖ። ታኒ ሂንቴ ሼምፖ ታው ዴዒያዋ ታናና ጋꬃዴ ናሼቻን ኢማና፤ ያቲና፥ ታኒ ሂንቴና ሎይꬃ ሲቂያ ዲራው፥ ሂንቴ ታና ላፋ ሲቂቴ? ጊዶፔካ፥ ታኒ ሂንቴና ዋዪሳቤይኬ፤ ሺን ሂንቴ ታና፥ «ኔኒ ኑና ጪማዴ ማካላን ኦይቃዳ» ያጋኒታ። ታኒ ሃራይ ኣቶ፥ ሂንቴኮ ኪቴዳ ኢቲ ኣሳ ባጋናካ ሂንቴፔ ጎዔታዲታ? ቲቶ ሂንቴኮ ባና ማላ፥ ታኒ ዎሳዲ፤ ቃሲ ኣማኒያ ኢሻካ ኣናና ዬዳዲ። ቲቶ ሂንቴፔ ጎዔቴዴ? ኑኒ ኑ ኦሱዋ ኢቲ ቆፋን ኦꬂቤይኮ? ቃሲ ኑ ሃኑካ ኢቱዋ ጊዴኔዬ? ኑኒ ኡባ ዎዴካ ሂንቴ ሲንꬃን ኑ ሁጴው ሞቴቲያዋ ሂንቴንቶ ማላቲ? ኑኒ ኪሪስቶሳን ዴዒያዋንቱዳን፥ ፆሳ ሲንꬃን ሃዒ ጋካናሲካ ሃሳዬቶ። ኑ ሲቃቶ፥ ኑኒ ኦꬂያ ኡባባይካ ሂንቴና ማዳናሳ። ኣዪሲ ጎፔ፥ ታኒ ሂንቴኮ ቢያ ዎዴ፥ ኦኒ ኤሪ ታኒ ኮዪያዋ ማላ ሂንቴ ጊዴናን ኣጋኔንቶኔ፤ ቃሲ ታኒካ ሂንቴ ኮዪያዋ ማላ ጊዴናን ኣጋኔንቶኔ። ቃሲ ኦኒ ኤሪ ሄዋን ፓሉሚ፥ ቃናቲ፥ ሃንቁ፥ ዮራይ፥ ዚጊርሳይ፥ ሳሮቴꬃ ዲጉሳይ፥ ኦቶሩ፥ ሜቱ ዴዔናን ዋዪ ኣጋና፤ ታና ያሼ። ታኒ ሂንቴኮ ላዔꬁዋ ቢያ ዎዴ፥ ታ ፆሳይ ሂንቴ ሲንꬃን ታና ካዉሻኔንቶኔ ያያይ፤ ታኒ ናጋራ ካሴ ኦꬂዴ፥ ባሬንቱ ኦꬄዳ ቱናቴꬃፔ፥ ዎሹሚያዋፔኔ ኣሙዋፔ ሲሚቤና ዳሮ ኣሳቶ ዬኬናን ኣጊኬ ጋዴ ያያይ። ሃዌ ታው ሂንቴኮ ዩሳይ ሄዜንꬆ ዎዴ። ኣይ ሞቱካ ላዑ ዎይ ሄዙ ማርካይ ማርካቲና ፒርዴታናው ኮሼ። ታኒ ላዔንꬁዋ ሂንቴናና ጋኬቴዳ ዎዴ፥ ሂንቴና ናጌቲቴ ጋዲ፤ ሃዒካ ሃኩዋን ዴዖፔካ፥ ሂንቴና ናጌቲቴ ጋይ። ታኒ ቃሲካ ሂንቴኮ ቢያ ዎዴ፥ ናጋራ ካሴ ኦꬄዳዋንታካ ቃሲ ሃራቱዋ ኡባቱዋካ ሙሬናን ኣጊኬ። ኣዪሲ ጎፔ፥ ኪሪስቶሲ ታ ባጋና ሃሳዪያዋ ኤሪሲያዋ ሂንቴ ኮዪታ። ኢ ሂንቴናና ሃሳዪያ ዎዴ ኣ ዎልቃፔ ኣቲን ቤቲያዌ ኣ ዳቡራ ጊዴና። ኣዪሲ ጎፔ፥ ኪሪስቶሲ ማስቃሊያ ቦላ ሚሲማሪያን ꬊሼቲዴ፥ ዳቡራን ካቄቴዳ፤ ሺን ፆሳ ዎልቃን ፓፃ ዴዔ። ኣዪሲ ጎፔ፥ ኢ ዳቡራንቻ ጊዴዳዋዳን፥ ኑኒካ ዳቡራንቻ፤ ሺን ሂንቴናና ሃሳዪያዋን ኑኒ ፆሳ ዎልቃን ኣናና ዴዓና። ኣማኑዋን ሂንቴ ሚኒ ዴዒንቶ ኣኔ ሂንቴና ፓጪቴ፤ ሂንቴና ቢዲቴ። ኪሪስቶሲ ሂንቴናን ዴዒያዋ ሂንቴ ኤሪኪቴ? ሄዌ ꬋዮፔ ፓጪያን ኩንዴዲታ ጉሳ። ኑኒ ፓጪያን ኩንዲቤናዋ ሂንቴ ኤሪያዋ ኣማናይ። ሂንቴ ኢታባ ሙሌካ ኦꬄና ማላ፥ ኑኒ ፆሳ ዎሴቶ። ኑኒ ፓጪያ ዳንዳዪያዋንታ ጊዲዴ ቤታናሳ ጊዴና፤ ሺን ኑኒ ፓጪያ ዳንዳዬናዋንታ ማላቲዴ ቤቶፔካ፥ ሎዖባ ሂንቴ ኦꬃናሳ። ኣዪሲ ጎፔ፥ ኑኒ ቱሙዋ ፃላላው ኦꬃናፔ ኣቲን፥ ቱሙዋፔ ሃራ ኣዪኔ ኦꬃናው ዳንዳዮኮ፤ ኑኒ ዳቡራንቻ ሺን ሂንቴ ዎልቃማ ጊዶዴ ናሼቴቶ። ሂንቴ ፖሎ ጊዳና ማላ ኑኒ ፆሳ ዎሴቶ። ታኒ ሂንቴፔ ሃኩዋን ዴዓዴ ፃፌዳዌ ሄዋ ዲራሳ፤ ታኒ ሂንቴኮ ቢያ ዎዴ፥ ጎዳይ ታው ኢሜዳ ማታኒ ዜምፓዴ፥ ሂንቴና ሜቶꬃናው ታና ዋዪ ኮሻና። ሄ ማታይ ታኒ ሂንቴና ኬፃናው ታው ኢሜቴዳዋፔ ኣቲን፥ ሂንቴና ኮላናው ኢሜቲቤና። ዉርሴꬃን ታናዳን ፆሳ ካሊያዋንቶ፥ ሳሮ ዴዒቴ፤ ባሊ ባይናን ዴዒቴ፤ ታ ዞሪያ ሲሲቴ፤ ኢቲ ዎዛና ጊዲዴ ዴዒቴ፤ ሳሮቴꬃን ዴዒቴ። ሲቁዋኔ ሳሮቴꬃ ፆሳይ፥ ሂንቴናና ኢቲፔ ዴዓና። ኢቱ ኢቱዋና ጌሻ ዬሬታ ዬሬቲዴ ሳሮቴቲቴ። ፆሳ ኣሳ ኡባቱ ሂንቴና ሳሮ ሳሮ ጊኖ። ጎዳ ዬሱሲ ኪሪስቶሳ ኣꬎ ኬካቴꬃይ፥ ፆሳ ሲቁ፥ ጌሻ ኣያና ኢቲፔቴꬃይ ሂንቴናና ኡባና ጊዶ። ኣሜንዒ። ታኒ ጳዉሎሲ፥ ዬሱሲ ኪሪስቶሲኔ ቃሲ ሃይቁዋፔ ኣ ዴንꬄዳ ፆሳይ ኣዉ ኪቴዳዋፔ ኣቲን፥ ኣሳፔ ዎይ ኣሳ ባጋና ኪቴቴዳዋ ጊዲኬ። ሃ ታኒኔ ታናና ዴዒያ ኣማኒያ ኢሻቱ ኡባይ፥ ጋላቲያ ጋዲያን ዴዒያ ኣማኒያ ኣሳ ኡባው ሳሮታ ኪቴቶ። ፆሳይ ኑ ኣዉኔ ኑ ጎዳይ ዬሱሲ ኪሪስቶሲ ሂንቴንቶ ኣꬎ ኬካቴꬃኔ ሳሮቴꬃ ኢሞ። ኑ ፆሳ፥ ኑ ኣዉዋ ሼኒያን ኪሪስቶሲ ሃ ኢታ ኦሱ ኦሴቲያ ዎዲያፔ ኑና ኣሻና ማላ፥ ኑ ናጋራ ዲራው፥ ባሬ ሁጲያ ኢሜዳ። ፆሳው ሜꬊፔ ሜꬊና ጋካናው ቦንቹ ጊዶ። ኣሜንዒ። ኪሪስቶሳ ኣꬎ ኬካቴꬃን ሂንቴንታ ፄሴዳ ፆሳ ኣጊዴ፥ ሃራ ዎንጋላኮ፥ ሂንቴ ኤሌሊዴ፥ ዎቲ ሲሜዲቴንቶ ታው ኦራꬃባ ጊዴዳ። ሂንቴንታ ቡልዓኪያዋንቱኔ ኪሪስቶሳ ሚሺራቹዋ ቃላ ጌላያናው ኮዪያ ኣማሬዳ ኣሳቱ ዴዒኖፔ ኣቲን፥ ቱሙፔ ሃራ ሚሺራቹዋ ቃላይ ባዋ። ሺን ሃራይ ኣቶ ኑና ጊዲና፥ ዎይ ሳሉዋፔ ኪታንቻ ጊዲና፥ ኑኒ ሂንቴንቶ ካሴ ኦዴዳ ሚሺራቹዋ ቃላፔ ዱማቲያዋ ሂንቴንቶ ኦዲያዋ ጊዶፔ፥ ኢ ሜꬊናው ሼቄቴዳዋ ጊዶ። ካሴ ኑኒ ጌዳዋዳን፥ ሃዒካ ላዔንꬁዋ ታኒ ኦዳይ፤ ሂንቴ ኣኬዳ ሚሺራቹዋ ቃላፔ ዱማቲያዋ ኦኒኔ ሂንቴንቶ ኦዶፔ፥ ሄ ኡራይ ሜꬊናው ሼቄቴዳዋ ጊዶ። ሃዌ ታና ኣሳፔ ሳባ ኮዪያዋ ማላቲሲ? ማላቲሴና! ታኒ ፆሳይ ሎዓ ጊያዋ ኮያይ። ዎይ ታኒ ኣሳ ናሼቻናው ኮያይታ? ታኒ ሃዒካ ኣሳ ናሼቻናው ኮዪያዋ ጊዶፔ፥ ኪሪስቶሳ ኣይሌ ጊዲኬ። ታ ኢሻቶ፥ ታኒ ሂንቴንቶ ኦዴዳ ሚሺራቹዋ ቃላይ ኣሳፔ ጊዴናዋ ሂንቴንቶ ኦዳይ። ኣዪሲ ጎፔ፥ ታው ዬሱሲ ኪሪስቶሲ ቆንጪሴዳፔ ኣቲን፥ ታኒ ሚሺራቹዋ ቃላ ኣሳፔ ኣካቤይኬ፤ ኣሳይ ታና ታማሪሲቤና። ካሴ ታኒ ኣዪሁዳ ኣማኑዋን ዴዒያ ዎዴ፥ ዋናዴ ዴዓዲታንቶ፥ ሂንቴ ሲሴዲታ፤ ታኒ ኪሪስቶሳ ኣማኒያዋንታ ቃሬታይ ባይናን ዬዴርሳዲኔ ꬋዪሳናው ባፄታዲ። ታ ዎዴ ዴዔዳ ኣሳቱዋፔ ጮራቱዋ ኣዪሁዳ ኣማኑዋ ሂጊያ ናጉዋን ኣꬋይ፤ ኑ ኣዎቱዋ ዎጋ ኦፔኔ ኣꬋዴ ሲቃዲ። ሺን ፆሳይ ባሬ ኣꬎ ኬካቴꬃን፥ ታኒ ቢሮ ታ ዳዪ ኡሉዋን ዴዒሺን፥ ባሬው ኦꬃናው ታና ፄሴዳ፤ ኣባ ኦዲያ ሚሺራቹዋ ቃላ ኣዪሁዳ ጊዴና ኣሳው ታኒ ኦዳና ማላ፥ ፆሳይ ባሬ ናዓ ታው ቆንጪሳናው ኮዬዳ ዎዴ፥ ዞሬታናው ኦኮኔ ባቤይኪ። *** ዎይ ታፔ ካሴ ዬሱሲ ኪቴዳዋንቱና ጋኬታናው ዬሩሳላሜ ባቤይኪ፤ ሺን ታኒ ኤሌካ ኣራቢያ ጌቴቲያ ጋዲያ ባዲ። ሄዋፔ ዳማስቆ ጊያ ካታማ ሲማዲ። ሄዙ ላይꬃፔ ጉዪያን፥ ጴፂሮሳና ጋኬታናው ዬሩሳላሜ ባዴ፥ ኣናና ታማኔ ኢቼሹ ጋላሳ ኡታዲ። ሺን ዬሱሲ ኪቴዳዋንቱፔ ጎዳ ኢሻ ያዪቆባፔ ኣቲን፥ ሃራቱዋና ጋኬታቤይኪ። ታኒ ሂንቴንቶ ፃፊያዋን ዎሪ ባዋ፤ ታኒ ሂንቴንቶ ዎርዱዋ ኦዴናዋ ፆሳይ ማርካ! ሄዋፔ ጉዪያን፥ ሶሪያ ጌቴቲያ ጋዲያኔ ኪልቂያ ጌቴቲያ ጋዲያ ባዲ። ዪሁዳን ዴዒያ ኪሪስቶሳን ኣማኒያዋንቱ ታናና ኤሬታ ጊዲኪኖ። ሺን ሃራ ኣሳይ፥ «ኑና ዬዴርሲ ዩዪያ ቢታኒ ሃዋፔ ካሴ ኢ ꬋዪሳናው ኮዪያ ኣማኑዋባ ሃዒ ኦዴ» ጊያዋ ኡንቱንቱ ሲሲዴ ታባን ፆሳ ጋላቴዲኖ። ሄዋፔ ሲማዴ ታኒ ታማኔ ኦይዱ ላይꬃፔ ጉዪያን፥ ባሪናባሳና ላዔንꬁዋ ዬሩሳላሜ ባዴ፥ ቲታካ ታናና ኣካዴ ባዲ። ፆሳይ ታው ሳፃን ቆንጪሴዳ ዲራው ባዴ ታኒ ሃዒ ኦꬂያ ኦሱ ዎይ ካሴ ኦꬄዳዌ ሜላ ኣቴና ማላ፥ ኪሪስቶሳን ኣማኒያዋንታ ካሌꬂያዋንታ ዱማ ሺሻዴ፥ ኣዪሁዳ ጊዴና ኣሳው ታኒ ኦዲያ ሚሺራቹዋ ቃላይ ኣይ ማሌንቶ ኡንቱንቶ ኦዳዲ። ሺን ሃራይ ኣቶ ታናና ዴዒያ ቲታ ኢ ጊሪኬ ጋዲያ ኣሳ ጊዲሺን፥ ቃፃሬቶ ጊዴ ጎዴቲቤይኪኖ። ጊዶፔኔካ፥ ዎርዱዋን ኑሲ ኢሻቱዋ ማላቲ ዪዴ፥ ኑናና ዋላኬቴዳ ጮራ ኣሳቱ ኣ ቃፃራናው ኮዬዲኖ። ሄ ኣሳቱ ኪሪስቶሳ ዬሱሳን ኑሲ ዴዒያ ኑኒ ኮዬዳዋዳን ሃናና ዳንዳዪያ ላዓቴꬃ ዎቺዴ ꬊሻናው፥ ዉዔቲዴ ኑ ጊዶ ጌሊዴ ኑና ኣይሌ ኦꬃናው ኮዬዲኖ። ሺን ሚሺራቹዋ ቃላ ቱማቴꬃይ ሂንቴንቱና ሚኒ ዴዓና ማላ፥ ኑኒ ሃራይ ኣቶ ጉꬃ ዎዲያካ ኡንቱንቶ ሞዴቲቤይኮ። ሺን ካፓቱዋ ማላቲያዋንቱ ታው ኣይኔ ኦራꬃ ቆፋ ኢሚቤይኪኖ፤ ሃዋ ኣዪሲ ጋይታ ጎፔ፥ ሃዋፔ ካሴ ኡንቱንቱ ኦና ጊዲናካ ታና ሜቲያባ ጊዴና፤ ፆሳይ ኣሳ ሶምዒያ ፄሊዴ ፒርዴና። ሺን ጉዬፔ ፆሳይ ጴፂሮሳው፥ ኣዪሁዳቶ ሚሺራቹዋ ቃላ ኦዲያ ሃዳራ ኢሜዳዋዳን፥ ታዉካ ኣዪሁዳ ጊዴና ኣሳው ሚሺራቹዋ ቃላ ኦዲያ ሃዳራ ኢሜዳዋ ኡንቱንቱ ቤዔዲኖ። ኣዪሲ ጎፔ፥ ጴፂሮሲ ኣዪሁዳቶ ዬሱሲ ኪቴዳዋ ጊዴዳዋዳን፥ ታኒካ ፆሳ ዎልቃን ኣዪሁዳ ጊዴና ኣሳው ዬሱሲ ኪቴዳዋ ጊዳዲ። ቃሲ ካሌꬂያዋንታ ማላቲዴ ቤቲያዋንቱ፥ ያዪቆቢ፥ ጴፂሮሲኔ ዮሃኒሲ፥ ታው ኢሜቴዳ ኣꬎ ኬካቴꬃ ኤሪዴ፥ ታናኔ ባርናባሳ ኑ ኩሺያ ኦይቂዴ ሳሮቴዲኖ። ታኒኔ ባርናባሲ ኣዪሁዳ ጊዴና ኣሳ ጊዶን ኦꬃናዳን፥ ቃሲ ኡንቱንቱ ኣዪሁዳቱዋ ጊዶን ኦꬃናዳን ቃቺዴ ዴንዴዶ። ኡንቱንቱ ኑና ካሴፔካ ታኒ ኦꬃናው ቆፓዴ ዴዒያ ሂዬሳቱዋ ማዳናዋ ፃላላ ቆፊሴዲኖ። ሺን ጴፂሮሲ ኣንፆኪያ ጊያ ካታማ ዬዳ ዎዴ፥ ኢ ባዪዜዳ ዲራው፥ ቆንጪያን ታኒ ኣ፥ «ኔኒ ባዪዛንቻ» ያጋዲ። ኣዪሲ ጎፔ፥ ያዪቆባ ማታፔ ኪቴቴዳ ኣማሬዳ ኣሳይ ያናፔ ካሴ ኣዪሁዳ ጊዴና ኣሳቱዋና ቁማ ሜ፤ ሺን ኡንቱንቱ ዬዳዋፔ ጉዪያን፥ ኣዪሁዳ ጊዴናዋንቱ ኣማኒያዋንታ ጊዳናው ቃፃሬታናው ኮሼ ጊያዋንቶ ያዬዳ ዲራው፥ ሚያዋ ኤሲዴ፥ ኣዪሁዳ ጊዴናዋንቱፔ ሻኬቴዳ። ቃሲ ዮኮ ኣማኔዳ ኣዪሁዳቱ ጴፂሮሳና ያሻ ዶሜዲኖ፤ ሃራይ ኣቶ ባርናባሲካ ኡንቱንቱና ያሻንቻ ጊዴዳ። ሺን ኡንቱንቱ ሚሺራቹዋ ቃላ ቱማቴꬃዳን፥ ሱሬ ሃሜቴናዋ ቤዓዴ፥ ጴፂሮሳ ሄ ኡባ ኣሳ ሲንꬃን፥ «ኔኒ ፆሳ ኣሳ ኣዪሁዳ ጊዳዴ፥ ኡንቱንቱዳን ጊዴናን ፆሳ ኣሳ ጊዴና ኣዪሁዳ ጊዴናዋንቱዳን ዴዓ፤ ሺን ያቲና፥ ዎታዴ ኣዪሁዳ ጊዴናዋንታ፥ ‹ኣዪሁዳቱዋዳን ዴዒቴ› ጋዴ ጊዳይ?» ያጋዲ። ኑኒ ዬሌታን ኣዪሁዳ፤ «ናጋራንቻ ጊዴዳ ኣዪሁዳ ጊዴና ኣሳቱዋ» ጊዶኮ። ሄዋ ጊዶፔካ፥ ኣሳይ ዬሱሲ ኪሪስቶሳ ኣማኒዴ ፆሳ ሲንꬃን ፂላናፔ ኣቲን፥ ሙሴ ሂጊያ ናጉዋን ፂሌናዋ ኤሬዶ፤ ኣሹዋ ማዬዳ ኣሳይ ኡባይ ሙሴ ሂጊያ ናጉዋን ፂሌና ዲራው፥ ኑኒ ኑ ሁጴዉካ ሙሴ ሂጊያ ናጉዋን ጊዴናን፥ ኪሪስቶሳን ኣማኒዴ ፂላና ማላ፥ ኪሪስቶሲ ዬሱሳን ኣማኔዶ። ሺን ኑሲ ኪሪስቶሳን ዴዒያ ኢቲፔቴꬃን ፂላናው ኮዪያዋንታ ጊዲዴ፥ ኑ ሁጴው ናጋራንቻ ጊዲዴ ቤቶፔ፥ ያቲና ኪሪስቶሲ ናጋራ ታማሪሲያዌ? ሄዌ ሙሌካ ዎርዶ! ኣዪሲ ጎፔ፥ ኢቲ ካላካ ኣጋ ዲጌዳዋ ታኒ ላዔꬁዋ ኦꬂያዋ ጊዶፔ፥ ታኒ ታ ሁጴው ሂጊያ ሜንꬂያዋ ጊዲያዋ ኤሪሳይ። ታኒ ፆሳው ፓፃ ዴዓና ማላ፥ ሂጊያ ባጋና ሂጌው ሃይቃዲ። ታኒ ኪሪስቶሳና ኣ ማስቃሊያ ቦላ ሚሲማሪያን ꬊሼታዴ ካቄታዲ፤ ሲሚ፥ ሃዒ ፓፃ ዴዒያዌ ታና ጊዲኬ። ሺን ኪሪስቶሲ ታ ጊዶን ዴዔ፤ ታኒ ሃዒ ዴዒያ ዴዑ፥ ታና ሲቂዴ፥ ታ ዲራው፥ ባሬ ሁጲያ ኢሜዳ ፆሳ ናዓን ዴዒያ ኣማኑዋና። ታኒ ፆሳ ኣꬎ ኬካቴꬃ ኢፂኬ፤ ኣሳይ ሂጊያ ባጋና ፂሎቴꬃ ዴሚያዋ ጊዶፔ፥ ኪሪስቶሲ ጮ ሜላ ሃይቄዳ ጉሳ። ኣኬካይ ባይና ጋላቲያ ኣሳቶ፥ ታኒ ሂንቴና ኪሪስቶሲ ማስቃሊያ ቦላን ሚሲማሪያን ꬊሼቲዴ ካቄቴዳዋ ቆንጪሳዴ ታማሪሳዲ። ያቲና፥ ቱሞ ሂንቴ ኤኖ ጌና ማላ፥ ሂንቴንታ ቢቴዳዌ ኦኔ? ኣኔ ታው ሃ ኢቲ ዬዉዋ ፃላላ ኦዲቴ፡ ፆሳ ኣያና፥ ሂጊ ጊያዋ ናጊዴ ኣኬዲቴ ዎይ ኣማኑዋን ሲሲዴ ኣኬዲቴ? ሂንቴንቱ ሄዋ ኬና ኤዬ? ፆሳ ኣያናን ዴዑዋ ዶሚዴ፥ ሃዒ ሂንቴ ዎልቃን ፖሊቴ? ሂንቴንቱ ዳቡራ ኡባው ኣይኔ ማዱ ባዌ? ቱማ ማዱ ዴዔ። ያቲና፥ ፆሳይ ሂንቴንቶ ጌሻ ኣያና ኢሚያዌኔ ሂንቴ ጊዶን ማላታ ኦꬂያዌ፥ ሙሴ ሂጊያ ሂንቴ ኦꬄዳ ዲራሴ? ዎይ ሚሺራቹዋ ቃላ ሲሲዴ፥ ሂንቴ ኣማኔዳ ዲራሴ? ሃዋዳንካ፥ ኣብራሃሞ ፆሳ ኣማኔዳ ዲራው፥ ፆሳይ ኣ ፂሉዋዳን ፄሌዳ። ሄዋ ዲራው፥ ኣማኒያዋንቱ ኣብራሃሜ ዛሬ ጊዲያዋ ኤሪቴ። ፆሳይ ኣዪሁዳ ጊዴና ኣሳ ኣማኑዋን ፂሊሳናዋ ፆሳ ማፃፋይ ካሴት ቤዒዴ፥ «ሃ ኣላሚያን ዴዒያ ኣሳይ ኡባይ ኔናን ኣንጄታና» ያጊዴ፥ ሚሺራቹዋ ቃላ ኣብራሃሞሲ ካሴቲዴ ኦዴዳ። ሄዋ ዲራው፥ ኣብራሃሞ ኣማኒዴ ኣንጄቴዳዋዳን፥ ኣማኒያዋንቱ ኣዋዳካ ኣንጄታና። ሂጊያ ኦሱዋን ኣማኔቲዴ ዴዒያዋንቱ ኡባይ ሼቃ ጊዶን ዴዒኖ፤ ኣዪሲ ጎፔ፥ ፆሳ ማፃፋይ፥ «ሂጊያ ማፃፋን ፃፌቴዳ ኡባባኒ ዴዔናዌኔ ፖሌናዌ ኦኒኔ ሼቄቴዳዋ» ያጌ። ፆሳ ማፃፋይ፥ «ፆሳ ሲንꬃን ፂላቱ ኣኒ ኣማኔቲዴ ዴዑዋን ዴዓና» ጊያ ዲራው፥ ኦኒኔ ፆሳ ሲንꬃን ሂጊያ ናጊያዋን ፂሌናዌ ኤሬቴዳዋ። ሂጊ ኣማኑዋን ባሴቲ ኤቂ ቤና፤ ሺን ፆሳ ማፃፋይ፥ «ሂጊ ጊያዋ ፖሊያዌ ኣኒ ዴዑዋን ዴዓና» ያጌ። ፆሳ ማፃፋን፥ «ሚꬃ ቦላ ካቄቲ ሃይቂያ ኦኒኔ ሼቄቴዳዋ» ጌቴቲ ፃፌቴዳ ዲራው፥ ኪሪስቶሲ ኑ ዲራው ሼቄቴዳዋ ጊዲዴ፥ ኑና ሂጊያ ሼቃፔ ዎዚ ኣኬዳ። ኪሪስቶሲ ሄዋ ኣዪሲ ኦꬄዴ ጎፔ፥ ፆሳይ ኢማና ጌዳ፥ ጌሻ ኣያና ኑኒ ኣማኑዋን ኣካናዳኒኔ ኣብራሃሜ ኣንጁ ባሬ ባጋና ኣዪሁዳ ጊዴና ኣሳ ጋካና ማላ ጊዴ ኦꬄዳ። ታናዳን ኣማኒያዋንቶ፥ ታኒ ኣሳይ ጊያዋዳን ሂንቴንቶ ጋይ፤ ሃራይ ኣቶ ላዑ ኣሳቱ ኢቲ ዬዉዋ ሃሳዪዴ፥ ጫቁዋ ዎꬄዳዋፔ ሂኒ ባጋን፥ ኦኒኔ ሄ ጫቁዋ ቢላናው ዎይ ሃራባ ሄ ጫቁዋ ቦላ ጉጃናው ዳንዳዬና። ኣብራሃሞኔ ኣ ዛሪ ፆሳይ ሲንꬃፔ ኢማና ጊዴ ሃሳዬዳዋ ሲሴዲኖ። ፆሳ ማፃፋይ ጮራ ኣሳው ሃሳዪያዋዳን፥ «ኔ ዜሬꬃቱዋሲ» ጌና፤ ዋጊ ጎፔ፥ «ኔ ዛሬው» ያጌ። ሄዌኔ፥ ኢቲ ኣሳ ፃላላ ጌ፤ ኢካ ኪሪስቶሳ። ታኒ ጊያዌ ሃዋ፤ ፆሳይ ኣብራሃሞሲ ጫቂዴ፥ ሃ ጫቁዋ ታኒ ናጋና ያጌዳ። ኦይዱ ፄታኔ ሃታሙ ላይꬃፔ ጉዪያን ዬዳ ሙሴ ሂጊ ፆሳይ ዎꬄዳ ሃ ጫቁዋ ꬋዪሳናዉኔ ሲንꬃፔ ኢማና ጊዴ ሃሳዬዳዋ ዲጋናው ዳንዳዬና። ኣዪሲ ጎፔ፥ ፆሳይ ኢሚያ ላታይ ሂጊያን ቤቲያዋ ጊዶፔ፥ ያቲና ፆሳይ ሲንꬃፔ ኢማና ጊዴ፥ ቃላ ጌሌዳዋና ጊዴና ጊያዋ፤ ሺን ፆሳይ ኢማና ጊዴ ቃላ ጌሌዳዋን ላታ ኣብራሃሞሲ ኢሜዳ። ያቲና፥ ሂጊ ኣዪሲ ዴዒ? ሂጊ ባዪዞ ኦሱዋ ጊዲያባይ ኣዬንቶ ቤሳናው ፆሳይ ኢማና ጊዴ ሃሳዬዳ ኣብራሃሜ ዛሪ ያና ጋካናው ጉጄቴዳ፤ ኪታንቻ ባጋና ሙሴ ጋናቲያዋን ኢሜቴዳ። ጋናይ ኢቲ ኡራ ፃላላሳ ጊዴና፤ ሺን ፆሳይ ኢቱዋ። ያቲና፥ ፆሳይ ሲንꬃፔ ኢማና ጊዴ ሃሳዬዳዋ፥ ኢቲ ሂጊ፥ «ሃኔና» ያጊ? ኣዓ! ሄዋ ጌና። ኣዪሲ ጎፔ፥ ሂጊ ኣሳው ዴዑዋ ኢማናው ዳንዳዪያባ ጊዶፔ፥ ፂሎቴꬃይካ ቱሙ ሂጊያ ኣዛዜቲያዋፔ ቤቴ ጊያዋ። ሺን ዬሱሲ ኪሪስቶሳ ኣማኒና፥ ፆሳይ ሲንꬃፔ ኢማና ጊዴ ቃላ ጌሌዳ ላዓቴꬃይ፥ ኣማኒያዋንቶ ኢሜታና ማላ፥ ኣሳይ ኡባይ ናጋራሲ ሞዴቲዴ ዴዒያዋ፥ ፆሳ ማፃፋይ ኦዴ። ሺን ካሴ ሃ ኣማኑ ያናሲ፥ ሲንꬃፔ ቆንጫና ኣማኖ ሂጊ ኑና ቃሼቴዳ ኣሳዳን ጎርዲ ዎꬄዳ። ሄዋ ዲራው፥ ኑኒ ኣማኑዋን ፂላና ማላ፥ ኪሪስቶሲ ያና ጋካናው ሂጊ ኑና ናጊያዋ ጊዴዳ። ሺን ሃዒ ሲሚ ኣማኑ ዬዳ ዲራው፥ ሂጊ ሃዋፔ ሲንꬃው ኑና ናጊያዋ ጊዴና። ሂንቴንቱ ኡባይ ኣማኑዋ ባጋና ኪሪስቶሳ ዬሱሳን ኢቱዋ ጊዴዳ ፆሳ ናና። ኣዪሲ ጎፔ፥ ሂንቴ ኪሪስቶሳና ኢቱዋ ጊዳና ማላ ፃማቄቴዳ ኡባቱ ኪሪስቶሳ ማዬዲታ። ሄዋ ዲራው፥ ኣዪሁዳ ኣሳ ጊዶኒኔ ጊሪኬ ኣሳ ጊዶን ዱማቴꬃይ ባዋ፤ ኣይሊያ ዎይ ዎማኑዋ ጊዶን ዱማቴꬃይ ባዋ፤ ኣቱማዋ ዎይ ማጫ ኣሳ ጊዶን ዱማቴꬃይ ባዋ። ኣዪሲ ጎፔ፥ ሂንቴንቱ ኡባይካ ኪሪስቶሳ ዬሱሳን ኢቲ ኣሳ። ሂንቴንቱ ኪሪስቶሳዋ ጊዶፔ፥ ሲሚ ሂንቴንቱ ኣብራሃሜ ዛሬ፤ ቃሲ ፆሳይ ሲንꬃፔ ኢማና ጊዴ ቃላ ጌሌዳዋ ላቲያዋንታ። ሺን ኣኬኪቴ፤ ባሬ ኣቡዋ ላቲያ ናዓይ ናዓቴꬃን ዴዒዴ፥ ዴዒያዋ ኡባው ጎዳ ጊዶፔካ፥ ኣይላቱዋፔ ኣው ዱማቲያሳይ ባዋ። ሺን ባሬ ኣቡ ጌዳ ዎዲ ዉራና ጋካናው፥ ኣ ሃዳራ ኣኬዳዋንቱ ኩሺያኒኔ ኣ ሚሻ ናጊያዋንቱ ኩሺያን ዴዔ። ሃዋዳን ኑኒካ ቃሲ ናዓቴꬃን ዴዒያ ዎዴ፥ ሃ ኣላሚያ ሞዲያ ኣያናቱዋሲ ኣይሌቴዶ። ሺን ያናው ቤሲያ ዎዲ ጋኬዳ ዎዴ፥ ፆሳይ ማጫዉኒፔ ዬሌቶዋ፥ ሙሴ ሂጌው ሞዴቲያ ኣሳ ጋርሳን ዬሌቴዳዋ፥ ባሬ ናዓ ኪቴዳ። ኣዪሲ ኪቴዴ ጎፔ፥ ሂጊያን ሞዴቲዴ ዴዒያዋንታ ዎዛናዉኔ ኑና ባሬ ናና ኦꬃናው ኪቴዳ። ፆሳይ ሂንቴ ኣ ናና ጊዲያ ዲራው፥ «ኣባቦ፥ ታ ኣቦ» ጊዴ ዋሲያ ባሬ ናዓ ኣያና፥ ኑ ዎዛና ጊዶ ኪቴዳ። ሄዋ ዲራው፥ ሃዋፔ ሲንꬃው ኔኒ ፆሳ ናዓ ጊዲያዋፔ ኣቲን፥ ኣይሌ ጊዳካ፤ ቃሲ ኔኒ ኣ ናዓ ጊዶፔ፥ ኪሪስቶሳ ባጋና ፆሳይ ቃላ ጌሌዳባ ላቲያዋ። ሺን ሂንቴ ሃዋፔ ካሴ ፆሳ ኤሬናን ዴዒዴ፥ ቱማ ጊዴና ፆሳቱዋሲ ኣይሌ ጊዲዴ ኤኖ ጌዲታ። ሺን ሃዒ ፆሳ ኤሪዴ፥ ኡባካ ፆሳን ኤሬቲዴ፥ ላፋኔ ቃሲ ካꬌቴዳ ሃ ኣያናቱዋኮ ዋኒዴ ሲሚቴ? ሺሬቲ ሲሚ፥ ኣይሌ ጊዲዴ፥ ላዔꬁዋ ኡንቱንቶ ኤኖ ጋናው ኮዪቴ? ዱማቴዳ ጋላሳቱዋ፥ ኣጌናቱዋ፥ ዎዴቱዋኔ ላይꬃቱዋ ሂንቴ ሎይꬂ ናጉዋን ኣይሌቴዲታ። ታና ሂንቴባይ ያሼ፤ ታኒ ሂንቴንቶ ጮ ጋዴ ሜላ ዳቡራዲታሻ? ታናዳን ኣማኒያዋንቶ፥ ታኒ ሂንቴንቱዳን ሃኔዳ ዲራው፥ «ሂንቴንቱካ ታናዳን ሃኒቴ» ጋዴ፥ ሂንቴንታ ዎሳይ፤ ሂንቴ ታና ኣይኔ ናቂቤይኪታ። ታኒ ኮይሮ ሂንቴንቶ ሚሺራቹዋ ቃላ ኦዴዳዌ ታና ሃርጊሲሺና ጊዲያዋ ሂንቴ ኤሪታ። ታው ፓፃቴꬃይ ꬋዪዴ፥ ሂንቴንቶ ፓጬ ጊዲናካ፥ ታና ካꬊቤይኪታ፤ ሼኔቲካቤይኪታ። ሄዋ ዲራ ኡባ ታና ፆሳ ኪታንቻ ሞኪያዋዳን፥ ዎይ ኪሪስቶሳ ዬሱሳ ሞኪያዋዳን ሞኬዲታ። ያቲና፥ ሄኮ ሂንቴ ናሼቲያዌ ቤቴና! ታና ጊዶፔ፥ ሂንቴንቶ ዳንዳዬቲያባ ጊዲና፥ ታው ሂንቴ ሂንቴንቱ ኣይፊያ ዎጪ ኢሚንቶኔ ኢፄናዋ ማርካታይ። ያቲና ታኒ ሂንቴንቶ ቱሙዋ ኦዲያ ዲራው፥ ሂንቴ ሞርኬ ጊዳይታ? ሃራ ኣሳቱ ሂንቴንቶ ቃሬቲያዋ ማላቲኖ፤ ሺን ኡንቱንቱ ቆፋይ ሎዔና፤ ኣዪሲ ጎፔ፥ ሂንቴ ኡንቱንቶ ቃሬታና ማላ፥ ታፔ ሂንቴንታ ሻካናው ኮዪኖ። ሺን ታኒ ሂንቴ ማታን ዴዒያ ዎዴ ፃላላን ጊዴናን፥ ኡባ ዎዴካ ሎዖባን ሂንቴ ኮዬቲያዋንታ ጊዶፔ ሎዓ። ታ ሲቆ ናቶ፥ ኪሪስቶሳ ሜꬌታይ ሂንቴንቱን ቤታና ጋካናው፥ ማጫዉኖ ኦይꬃይ ሳኪያ ኬና፥ ታኒ ሂንቴ ዲራው ሳኬታይ። ሺን ታኒ ሂንቴንቶ ሂርጊያ ዲራው፥ ሃዒ ሂንቴ ማታ ባዴ ሂንቴንቱና ዶናን ሃሳያንቶ፥ ዳሪ ዶሳይ። ሙሴ ሂጊያን ሞዴቲዴ ዴዓናው ኮዪያዋንቶ፥ ሂጊ ጊያዋ ሲስኪቴ? ኣኔ ታው ኦዲቴ። ኣዪሲ ጎፔ፥ ፆሳ ማፃፋይ፥ «ኣብራሃሞሲ ዳንጋፂራቲፔኔ ጎዳቲፔ ዬሌቴዳ ላዑ ናናይ ዴዒኖ» ያጌ። ሺን ዳንጋፂራቲ ናዓይ ኣሳይ ናዓ ዬሊያ ማራዳንካ ዬሌቴዳ፤ ቃሲ ጎዳቲ ናዓይ፥ ፆሳይ ሲንꬃፔ ኢማና ጊዴ ቃላ ጌሌዳዋን ዬሌቴዳ። ሃ ላዑ ማጫዋንቱ ላዑ ጫቁዋሲ ጊዲያ ሌሚሶ። ኡንቱንቱፔ ኢቲና፥ ሙሴሲ ሂጊ ኢሜቴዳ ሲና ዴሪያፔ ጫቁ ዬዳዉና፥ ባሬ ናና ኣይሌቴꬃው ዬላዱ፤ ኢዛካ ኣጋሮ። ሃ ኣጋራ ኣራቢያ ጌቴቲያ ጋዲያን ዴዒያ ሲና ዴሪያን ሌሚሴታው፤ ቃሲካ ሃዒ ዴዒያ ዬሩሳላሜን ሌሚሴታው፤ ኣዪሲ ጎፔ፥ ዬሩሳላሜ ካታማይ ባሬ ጊዶን ዴዒያ ኣሳ ኡባና ሙሴ ሂጊያ ኣይሌቴꬃን ዴዔ። ሺን ሳሉዋን ዴዒያ ዬሩሳላሜ ኣይሌቴꬃን ዴዑኩ፤ ኢዛ ኑሲ ኣቶ ጊዴዳ ሳሮ። ኣዪሲ ጎፔ፥ ፆሳ ማፃፋይ፥ «ሃኔ፥ ዬላቤና ማንꬃቴ፥ ናሼታ፤ ዬሉዋ ኦይꬃይ ኦይቂ ኤሬናዉኔ፥ ኔ ኮሻ ꬎቁ ኦꬃዴ ኢሊላ! ኣዪሲ ጎፔ፥ ባሬ ኣሲናና ዴዒያ ማጫዉኒፔ፥ ባሬካ ዴዒያ ማጫዉኒው ጮራ ናናይ ዴዓና» ያጌ። ታናዳን ኣማኒያዋንቶ፥ ኑኒካ ሳሪ ናዓ ዪሳቃዳን፥ ፆሳይ ሲንꬃፔ ኢማና ጊዴ ቃላ ጌሌዳ ናና። ሺን ሄ ዎዴ ኣሳ ማራዳን ዬሌቴዳዌ፥ ፆሳ ኣያናይ ጌዳዋዳን ዬሌቴዳዋ ዬዴርሲ ዲጎዋዳን፥ ሃዒካ ሄዋ ማላ። ሺን ፆሳ ማፃፋይ ዋጊ? «ዳንጋፂርቲ ናዓይ ጎዳቲ ናዓና ኢቲፔ ላቴና ዲራው፥ ዳንጋፂራቶ ኢዚ ናዓና ኢቲፔ ኬሳ ዬዳ» ያጌ። ሄዋ ዲራው፥ ታናዳን ኣማኒያዋንቶ፥ ኑኒ ጎዳቲ ናና ጊዲያዋፔ ኣቲን፥ ዳንጋፂራቲ ናና ጊዶኮ። ኑኒ ኣይሌቴꬃይ ባይናን፥ ዴዓና ማላ፥ ኪሪስቶሲ ኑና ኣይሌቴꬃፔ ኬሴዳ፤ ሲሚ ሚኒዴ ኤቂቴ፤ ላዔንꬁዋ ኣይሌቴꬃ ሞርጌ ሚꬃን ዋፄቶፒቴ። ሲሲቴ፥ ታኒ ጳዉሎሲ፥ ሂንቴንታ ያጋይ፤ ሂንቴ ቃፃሬቲያዋ ጊዶፔ፥ ኪሪስቶሲ ሂንቴንታ ኣይኔ ማዴና። ቃፃሬቲያ ኡባቱ ሂጊ ጊያዋ ኡባ ፖሊዴ ናጋናው ቤሲያዋ ጉጃዴ ቆፔꬃይ። ሂጊያ ናጊዴ ፂላናው ኮዪያዋንቶ፥ ኪሪስቶሳፔ ሻኬቴዲታ፤ ፆሳ ኣꬎ ኬካቴꬃፔካ ኩንዴዲታ። ኑና ጊዶፔ፥ ኑኒ ፆሳ ኣያና ባጋና ኣማኑዋን ፂላናው ናሼቻን ናጌቶ። ኣዪሲ ጎፔ፥ ኑኒ ኪሪስቶሲ ዬሱሳና ኢቲፔ ዴዖፔ፥ ሲቁዋን ኦꬂያ ኣማኑዋፔ ኣቲን፥ ቃፃሬቲናካ፥ ቃፃሬቴናኒ ኣጊናካ ኑና ኣይኔ ማዴና። ካሴ ሎዖ ዎፂታ፤ ሺን ቱማቴꬃው ሂንቴ ኤኖ ጌና ማላ፥ ኦኔ ሂንቴንታ ዲጌዳዌ? ሃ ጪሙ ሂንቴንታ ፄሴዳ ፆሳፔ ዪቤና። ኣሳይ ጊያዋዳን፥ ጉꬃ ኢርሹ ሙናቃ ኡባ ዴንꬄ። ሂንቴንቱ ሃራባ ቆፔናዋ ታኒ ፆሳን ኣማኔታይ፤ ሺን ሂንቴንታ ሜቲያ ኡራይ ኦና ጊዶፔኔ፥ ፆሳፔ ባሬ ፒርዳ ኣካናዋ። ሺን ታናዳን ኣማኒያዋንቶ፥ ታኒ ሃዋ ጋካናው ቃፃራይ ኮሺያዋ ኦዲያዋ ጊዶፔ፥ ታና ኣዪሲ ዬዴርሲኖ? ሄዌ ቱማ ጊዶፔ፥ ታኒ ኪሪስቶሳ ማስቃሊያባ ታማሪሲና ኣይኔ ሜቲያባይ ባዋ። ሂንቴንታ ሜቶꬂያዋንቱ ባሬንታ ባሬንቶካ ጎይሬሪኪኖሻ! ሂንቴንታ ጊዶፔ፥ ታናዳን ኣማኒያዋንቶ፥ ኣይሌቴꬃፔ ኬሳናው ፄሴቴዲታ። ጊዶፔኔካ ኣይሌቴꬃፔ ሂንቴ ኬሴዳዋን፥ ሂንቴ ኣሳቴꬃ ኣሙ ሂንቴንታ ሞዶፖ። ሄዋ ዲራ ሲቁዋን ኢቱ ኢቶ ሞዴቲቴ። ኣዪሲ ጎፔ፥ ሂጊ ኡባይ ኢቲ ሃሳያን ቃሼቴዳ፤ ኢካ፥ «ኔ ሾሩዋ ኔ ሁጲያዳን ሲቃ» ያጊያዋ። ሺን ሂንቴ ኢቱ ኢቱዋና ሳዔቲያዋኔ ሜቴቲያዋ ጊዶፔ፥ ሂንቴ ሂንቴ ጊዶን ዉሬና ማላ ናጌቲቴ። ሺን ሲሲቴ፤ ፆሳ ኣያናይ ሂንቴንታ ካሌꬂያዋ ጊዶፔ፥ ሂንቴ ኣሹዋ ኣሙዋ ሙሌካ ፖሊኪታ። ኣዪሲ ጎፔ፥ ኑ ኣሹ ኣሞቲያዋ ጌሻ ኣያናይ ኢፄ፤ ቃሲ ጌሻ ኣያናይ ኣሞቲያዋ ኑ ኣሹ ኢፄ፤ ሃዋንቱ ኢቱ ኢቱዋና ኢፄቲኖ። ሄዋ ዲራው፥ ሂንቴ ዶሲያዋ ኦꬃናው ዳንዳይኪታ። ሺን ፆሳ ኣያናይ ሂንቴንታ ካሌꬂያዋ ጊዶፔ፥ ሙሴ ሂጊ ሂንቴንታ ሞዴና። ኣሹዋ ኦሱ ኤሬቴዳዋ፤ ኢካ ኣዬ ጎፔ፥ ዎሹሚያዋ፥ ቱናቴꬃ፥ ኣꬌዳ ቱናቴꬃ ኦሱዋ፥ ኤቃው ጎዪኒያዋ፥ ቢቲያዋ፥ ሞርኬቴꬃ፥ ፓሉማ፥ ቃናቲያዋ፥ ሃንቁዋ፥ ባሬና ዶሲያዋ፥ ዋላቄቲያዋ፥ ኢቱ ኢቱዋፔ ሻኬቲያዋ፥ ኣሳዋ ኣሞቲያዋ፥ ማꬆቲያዋ፥ ዬꬃንቻ ጊዲያዋኔ ሃዋንታ ማላቲያዋንታ። ካሴካ ታኒ ሂንቴንቶ ኦዴዳዋዳን፥ ሃዋንታ ማላቲያዋንታ ኦꬂያዋንቶ ፆሳ ካዉቴꬃን ጌሊያሳይ ባዋ። ሺን ጌሻ ኣያና ኣይፊ፥ ሲቁዋ፥ ናሼቻ፥ ሳሮቴꬃ፥ ዳንዳያ፥ ኬካቴꬃ፥ ሎዖቴꬃ፥ ኣማኔቲያዋ፥ ኣሺኬቴꬃ፥ ባሬ ሁጲያ ናጊያዋ። ሄዋንታ ማላቲያዋንታ ዲጊያ ሂጊ ባዋ። ኪሪስቶሳ ዬሱሳባ ጊዲያዋንቱ ባሬንቱ ኣሳቴꬃ ኣ ኢታ ቆፋናኔ ኣ ኣሙዋና ኢቲፔ ማስቃሊያ ቦላን ሚሲማሪያን ꬊሺዴ ካቄዲኖ። ኑሲ ጌሻ ኣያናይ ዴዑዋ ኢሞዋፔ ጉዪያን፥ ኑና ቃሲ ኢ ካሌꬆ። ኣኔ ኦቶሬቲያዋ፥ ዎይ ኢቱ ኢቱዋ ሃንቄꬂያዋ፥ ዎይ ኢቱ ኢቱዋ ቃናቲያዋ ኣጎይቴ። ታናዳን ኣማኒያዋንቶ፥ ሂንቴናን ጌሻ ኣያናን ዴዒያዋንቱ ኢቲ ኡራይ ኣይ ባዪዙዋ ኦꬂዴ፥ ቤቶፔካ፥ ኣሺኬቴꬃ ኣያናን ኣ ሱሪሲቴ፤ ቃሲ ሂንቴ ፓጬቴና ማላ፥ ሂንቴ ሁጲያ ናጊቴ። ኢቱ ኢቱዋ ቶኩዋ ቶኪቴ፤ ሄዋ ኦꬂያዋን ኪሪስቶሳ ሂጌው ኣዛዜቲታ። ኣዪሲ ጎፔ፥ ኢቲ ኡራይ ኣይኔ ሃኔናን ዴዒዴ፥ ኢቲባ ኢ ሃኔዳዋ ኣው ማላቶፔ፥ ባሬ ሁጲያ ጪሜ። ሺን ኣሳይ ኡባይ ሁጲያን ሁጲያን ባሬ ኦሱዋ ፓጮ፤ ሄዋፔ ጉዪያን፥ ሃራ ኣሳዋና ሊኬናን፥ ባሬ ሁጴ ኦሱዋ ፃላላን ኣማኔቲያዋ ዴማና። ኣዪሲ ጎፔ፥ ኣሳይ ኡባይ ሁጲያን ሁጲያን ባሬፔ ናጌቲያዋ ኦꬃና ቤሴ። ሺን ፆሳ ቃላ ታማሪያዌ ባሬው ዴዒያ ሎዖባ ኡባ ባሬና ታማሪሲያዋና ሻኮ። ሂንቴንታ ሂንቴሬካ ጪሞፒቴ። ኦኒኔ ፆሳ ቦላ ቂሊጫናው ዳንዳዬና፤ ኣዪሲ ጎፔ፥ ኣሳይ ባሬ ዜሪያዋ ዛሬꬂዴ ቆይጫና። ባሬ ኣሹዋ ኣሙዋን ዜሪያዋ ጊዶፔ፥ ኣሹዋ ኣሙዋፔ ሃይቁዋ ቆይጫና። ሺን ፆሳ ኣያናን ዜሪያዋ ጊዶፔ፥ ፆሳ ኣያናፔ ሜꬊና ዴዑዋ ቆይጫና። ኣኔ ሎዖ ኦሱዋ ኦꬃናው ሚኖይቴ። ኣዪሲ ጎፔ፥ ኑኒ ሚኒ ኦꬆፔ፥ ቆይጪያ ዎዲ ሲንꬃፔ ያናዋ። ሄዋ ጊዶፔ ሃ ኦꬃናው ኑኒ ዳንዳዪያዋን፥ ኣሳ ኡባው ሎዖባ ኦꬆይቴ፤ ሺን ኡባፔ ኣꬂዴ፥ ኑናና ኣማኑዋን ዴዒያዋንቶ ሎዖባ ኦꬆይቴ። ታኒ ታ ኩሺያን፥ ኣይ ማላ ዎልቃማ ፒዶላቱዋን፥ ሃዋ ሂንቴንቶ ፃፋዲታንቶ ቤዒቴ። ኣሳ ሲንꬃን ሎዒዴ ቤታናው ኮዪያ ኡባቱ፥ ሂንቴ ቃፃሬታና ማላ ኮዪኖ፤ ሺን ሄዋ ኡንቱንቱ ኦꬂያዌ ባሬንቶ ኪሪስቶሳ ማስቃሊያ ዲራው ዬዴርሴቴናን ኣታና ፃላላሳ። ኣዪሲ ጎፔ፥ ኡንቱንቱ ሂንቴ ቃፃሬቴዳዋን ጬቄታናው ሂንቴንታ ቃፃሬቲኖ ጊኖፔ ኣቲን፥ ሃራይ ኣቶ ቃፃሬቴዳዋንቱካ ባሬንቱ ሁጴው ሙሴ ሂጊያ ናጊኪኖ። ሺን ኣላሚ ታው ካቄቲና፥ ታኒካ ኣላሜው ካቄቴዳ ዬሱሲ ኪሪስቶሳ ማስቃሊያፔ ኣቲን፥ ታኒ ጬቄቲያባይ ሃራባይ ታፔ ሃኮ። ኣዪሲ ጎፔ፥ ኪሪስቶሲ ዬሱሳን ኦራꬃ ሜꬌታ ጊዲያዌ ማዴፔ ኣቲን፥ ቃፃሬቲናካ ቃፃሬቴናን ኣጊናካ ኣይኔ ማዴና። ሃ ዎጋን ሃሜቲያ ኡባቱዋ ቦላኒኔ ፆሳ ኣሳ ኡባ ቦላ፥ ሳሮቴꬃይኔ ማሮቴꬃይ ጊዶ። ታኒ ዬሱሳው ማይቴድ ማላ ታ ቦላን ቶኬዳ ዲራው፥ ሃዋፔ ሲንꬃው ኢቲ ኣሳይካ ታና ሜቶꬆፖ። ታናዳን ኣማኒያዋንቶ፥ ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴንቱና ጊዶ። ኣሜንዒ። ታኒ ፆሳ ሼኒያን ኪሪስቶሲ ዬሱሲ ኪቴዳ ጳዉሎሲ፥ ኤፌሶናን ዴዒያ ፆሳ ናናው ቃሲ ኪሪስቶሳ ዬሱሳው ኣማኔቲዴ ዴዒያዋንቶ ሃ ዳቢዳቢያ ፃፋይ። ፆሳ ኑ ኣዉዋፔኔ ጎዳ ዬሱሲ ኪሪስቶሳፔ ኣꬎ ኬካቴꬃዪኔ ሳሮቴꬃይ ሂንቴንቶ ጊዶ። ኣያና ኣንጁዋ ኡባን ኪሪስቶሳ ባጋና ቦላ ሳሉዋን ኑና ኣንጄዳ ፆሳ፥ ኑ ጎዳ ዬሱሲ ኪሪስቶሳ ኣዉዋ፥ ኑኒ ጋላቴቶ። ኑኒ ኣ ሲንꬃን ጌሻቱዋኔ ፖኩ ባዪናዋንታ ጊዳና ማላ፥ ፆሳይ ኑና ሳዓይ ሜꬌታናፔ ካሴ፥ ኪሪስቶሳ ባጋና ባሬ ሲቁዋን ዶሬዳ። ፆሳይ ባሬ ሼኒያን ባሬ ዶሴዳዋዳን፥ ዬሱሲ ኪሪስቶሳ ባጋና ኑና ባሬ ናናቱዋ ኦꬃናው ካሴቲዴ ቆፒ ዎꬄዳ። ፆሳይ ባሬ ሲቂያ ናዓ ባጋና ኑሲ ጮ ኢሜዳ ኣꬎ ኬካቴꬃ ቦንቹዋ ዲራው፥ ኑፔ ጋላታ ኣካናው ሄዋ ኦꬄዳ። ኑኒ ፆሳ ኣꬎ ኬካቴꬃ ዳሩዋዳን፥ ኪሪስቶሳ ሱꬃን ዎዜቴዶ፤ ሄዋን ፆሳይ ኑ ናጋራ ኣቶ ጌዳ። ፆሳይ ባሬ ኣꬌዳ ኤራቴꬃ ኡባኒኔ ባሬ ዎዛና ቆፋ ኡባን ባሬ ኣꬎ ኬካቴꬃ ኑሲ ዳሪሲዴ ኢሜዳ። ኣዪሲ ጎፔ፥ ፆሳይ ባሬ ቆፔዳዋ ኦꬄዳ፤ ቃሲ ኪሪስቶሳ ባጋና ፖላናው ቆፒ ዎꬄዳ ፁራ ዬዉዋ ኑና ኤሪሴዳ። ፆሳይ ዎዲያ ዉርሴꬃይ ጋኪያ ዎዴ ፖላናው ቆፔዳ ቆፋይ ኪሪስቶሳ ዋና ኡዲዴ፥ ሳሉዋኒኔ ሳዓን ዴዒያ ሜꬌታ ኡባ ኢቲፔ ኣኒ ሺሻናዋ። ኡባባይ ፆሳ ቆፋዳኒኔ ኢ ጌዳዋዳን ሃኔዳ፤ ፆሳይ ካሴቲዴ ቆፒ ዎꬄዳዋዳን፥ ኪሪስቶሳ ባጋና ኑኒ ኣዋንታ ጊዳናዳን፥ ኑና ዶሬዳ። ኑኒ ካሴቲዴ፥ ኪሪስቶሳ ባጋና ኣካና ጊዴ ናሼቻን ናጊያዋንቱ፥ ፆሳ ቦንቹዋ ጋላቴቶ። ሂንቴዉካ ቃሲ ሄዋዳን ሃኔዳ፤ ቱሙ ኪታ፥ ሂንቴንቶ ኣቶቴꬃ ኣሄዳ ሚሺራቹዋ ቃላ፥ ሂንቴ ሲሴዳ ዎዴ ኪሪስቶሳ ኣማኔዲታ፤ ፆሳይ ሂንቴንቶ ኢማና ጌዳ ጌሻ ኣያና ባጋና፥ ሂንቴ ኣዋ ጊዲያዋ ኤሪሲያ ማታፋ ሂንቴ ቦላ ዎꬄዳ። ፆሳይ ባሬ ኣሳው ኢማና ጌዳዋ ኑኒ ላታና ጋካናው፥ ጌሻ ኣያና ዋሴቴꬃ ኦይቄዶ። ሄዌ ቃሲ ኣ ቦንቹዋሲ፥ ጋላታ ጊዳናዋ። ሄዋ ዲራው፥ ጎዳ ዬሱሳ ሂንቴ ኣማኒያዋኔ ጌሻቱዋ ኡባ ሂንቴ ሲቂያዋ ታኒ ሲሶዴፔ ዶማዴ፥ ሂንቴንቶ ፆሳ ጋላቲያዋ ኣጋቤዪኬ፤ ፆሳ ዎሳዴ ሂንቴዉካ ዎሳይ። ቃሲ ጎዳ ዬሱሲ ኪሪስቶሳ ፆሳይ፥ ቦንቹዋ ኣዉ፥ ፆሳ ሂንቴ ኤራናዳን፥ ሂንቴና ኣꬌዳ ኤራንቻ ኦꬂያ ቃሲ ፆሳ ሂንቴንቶ ቆንጪሲያ ጌሻ ኣያና ሂንቴንቶ ኢማናዳን፥ ታኒ ዎሳይ። ፆሳይ ሂንቴ ኣካና ጊዴ፥ ናሼቻን ናጊ ኡቴዳዎ ሂንቴና ፄሴዳዋኔ ኢ ባሬ ኣሳው ኢማና ጊያ ኣንጁ ኣይ ኬና ዱሬንቶ ሂንቴ ኤራናዳን፥ ፆሳይ ሂንቴ ዎዛና ዶዪና፥ ኣ ፖዑዋ ሂንቴ ቤዓናዳን፥ ታኒ ፆሳ ዎሳይ። ቃሲ ኣ ኣማኒያ ኑናን ኣ ዎልቃይ ሎይꬂ ኦꬄ። ሃ ኑናን ዴዒያ ዎልቃይኔ ሃዪቁዋፔ ኪሪስቶሳ ዴንꬂዴ፥ ሳሉዋ ሳዓን ፆሳፔ ኡሼቻ ባጋና ኡቲሴዳ ዎልቃማ ዎልቃይ ኢቱዋ። *** ኪሪስቶሲ ሳሉዋ ሱንꬃቱዋፔ፥ ጎዳቴꬃይ ዴዒያዋንቱፔ፥ ዎልቃማቱዋፔኔ ጎዳቱዋ ኡባፔ ቦላ ጊዲዴ ሞዴ፤ ኢ ሃዒ ዴዒያ ዬሌታ ፃላላን ጊዴናን፥ ሲንꬃፔ ያና ዬሌታኒካ ሃራ ሱንꬃቴꬃ ኡባፔ ꬎቄ። ፆሳይ ኡባባ ኪሪስቶሳ ጌዲያፔ ጋርሳን ሞዲሲዴ፥ ቃሲ ፆሳይ ኢ ኡባባኒ ኡባፔ ቦላና ጎዳ ጊዳናዳን፥ ዎሳ ጎሌው ኣ ኢሜዳ። ዎሳ ጎሊ ኪሪስቶሳ ኣሳቴꬃ፤ ዎሳ ጎሊ ኪሪስቶሲ ኡባሳን ኡባባ ኩንꬂያ ኣ ፖሉዋ። ሂንቴ ኣዛዜቴናን ኢፄዳ ዲራዉኔ ሂንቴ ናጋራ ዲራው፥ ካሴ ዎዲያን ኣያና ሃዪቁዋ ሃዪቄዲታ። ሄ ዎዴ ሂንቴ ሃ ኣላሚያ ዬሌታ ኢታ ኦጊያ ሃሜቴዲታ፤ ጫርኩዋ ጊዶን ዴዒያ ዎልቃማ ኣያናቱዋ ካፖ ቃሲ ፆሳው ኣዛዜቴና ኣሳ ሃዒ ሞዲያ ኣያናው ኣዛዜቴዲታ። ኑኒካ ቃሲ ኡባይ ሄ ኣሳ ማላ፤ ቃሲ ኑኒ ኑ ኣሹዋ ኣሙዋዳን ዴዔዶ፤ ኑ ኣሹኔ ኑ ዎዛናይ ኮዬዳዋ ኦꬄዶ። ኑኒካ ሃራቱዋዋዳን፥ ኑ ሜꬌታን ፆሳ ሃንቁዋ ኣካናው ዴዔቶ። ሺን ፆሳ ማሮቴꬃይ ዳራ ጊዲያ ዲራው፥ ባሬ ሲቁዋ ዳሩዋዳን፥ ኑኒ ኣው ኣዛዜቴናን ኢፂዴ፥ ሃራይ ኣቶ ኣያናን ሃዪቄዳዋንታ ጊዲናካ፥ ኢ ኪሪስቶሳና ኑሲ ዴዑዋ ኢሜዳ። ፆሳ ኣꬎ ኬካቴꬃን ሂንቴ ኣቴዲታ። ኑኒ ኪሪስቶሲ ዬሱሳና ሳሉዋኔ ሳዓኔ ሞዳናዳን፥ ፆሳይ ኑና ኣናና ኢቲፔ ሃዪቁዋፔ ዴንꬄዳ። ኢ ሲንꬃፔ ያና ዎዲያን፥ ኑሲ ኪሪስቶሲ ዬሱሳን ዴዒያ ኬካቴꬃን፥ ኡባፔ ኣꬊያ ባሬ ኣꬎ ኬካቴꬃ ꬎቃቴꬃ ቤሳናው ሄዋ ኦꬄዳ። ኣዪሲ ጎፔ፥ ሂንቴ ፆሳ ኣꬎ ኬካቴꬃን፥ ኣማኑዋን ኣቴዲታ፤ ሃዌ ፆሳ ኢሙዋፔ ኣቲን፥ ሂንቴ ኦሱዋና ጊዴና። ሂንቴ ዳቡራን ቤቲቤና ዲራው፥ ሂንቴ ጬቄቲያባይ ኣያዪኔ ባዋ። ኣዪሲ ጎፔ፥ ኑኒ ፆሳ ሜꬌታ፤ ኢ ኑሲ ካሴቲዴ ጊጊሲ ዎꬄዳ ሎዖ ኦሱዋ ኑኒ ኦꬃናዳን፥ ኪሪስቶሲ ዬሱሳ ባጋና ኑና ሜꬌዳ። ሄዋ ዲራው፥ ሂንቴኖ ዛሪያን ኣዪሁዳ ጊዴና ኣሳቶ፥ ባሬንቱ ኣሳቴꬃ ቦላ ኩሺያን ኦሴቴዳዋን፥ ባሬና ቃፃሬቴዳዋንታ ጊያ ኣዪሁዳቱ፥ ቃፃሬቲቤናዋንታ ጊዴ ፄሲያዋንቶ፥ ሂንቴ ካሴ ኦኔንቶ ኣኬኪቴ። ሄ ዎዴ ሂንቴ ኪሪስቶሳፔ ሻኬቴዲታ፤ ኢማꬃ ጊዲዴ፥ ኢስራዔሊያ ኣሳፔ ሃኪዴ ዴዔዲታ፤ ፆሳይ ባሬ ኣሳው ኢማና ጊዴ ጫቄዳ ጫቁዋፔ ኣዪኔ ዴሚቤይኪታ፤ ሃ ሳዓ ቦላ ሂንቴ ዴማና ጊዴ፥ ናሼቻን ናጊ ኡቴዳዋ ዴሜናኒኔ ቃሲ ፆሳይ ባዪናን ዴዔዲታ። ሺን ሂንቴ ካሴ ሃኪዴ ዴዒያዋንቱ ሃዒ ኪሪስቶሳ ዬሱሳና ዴዒዴ፥ ኪሪስቶሳ ሃዪቁዋን ማታ ሺቄዲታ። ኣዪሲ ጎፔ፥ ኪሪስቶሲ ኣዪሁዳ ኣሳኔ ኣዪሁዳ ጊዴና ኣሳ ኢቱዋ ኡዲዴ፥ ኑሲ ሳሮቴꬃ ኣሄዳ። ኡንቱንቱ ላዑዋ ሻኪዴ፥ ሞርኬ ኦꬂ ዎꬄዳ ሞርኬቴꬃ ጎዳ ባሬ ኣሳቴꬃን ኮሊ ዬጌዳ። ኢ ባሬ ሁጴው ሃ ላዑ ዛሬቱዋፔ ኢቲ ኦራꬃ ኣሳ ሜꬊዴ ሳሮቴꬃ ዎꬃናው፥ ኣዪሁዳ ኣሳቱዋ ሂጊያ ኣ ኣዛዛቱዋኔ ዎጋቱዋና ኢቲፔ ꬋዪሴዳ። ኪሪስቶሲ ማስቃሊያ ቦላ ሚሲማሪያን ꬊሼቲዴ ሃይቄዳ ባሬ ሃዪቁዋን ሞርኬቴꬃ ꬋዪሴዳ፤ ቃሲ ማስቃሊያ ባጋና ላዑ ዛሬቱዋካ ኢቲ ኣሳ ኦꬂ ሲጌꬂዴ፥ ፆሳኮ ኣሄዳ። ኪሪስቶሲ ዪዴ፥ ፆሳፔ ሃኪዴ ዴዒያ ሂንቴንቶ ኣዪሁዳ ጊዴናዋንቶኔ፥ ኣ ማታን ዴዒያ ኣዪሁዳቶ ኡባው፥ ሚሺራቹዋ ቃላ ሳሮቴꬃ ኦዴዳ። ኣዪሲ ጎፔ፥ ኑኒ ኡባይ፥ ኣዪሁዳቱካ ኣዪሁዳ ጊዴናዋንቱካ፥ ኢቲ ጌሻ ኣያናን ኪሪስቶሳ ባጋና ኣዉዋ ሲንꬃ ሺቃናው ዳንዳዬቶ። ሲሚ ሂንቴ ኣዪሁዳ ጊዴና ኣሳቱ ሃዋፔ ሲንꬃው ኣላጋ ዎይ ኢማꬃ ጊዲኪታ፤ ሃዒ ሂንቴኔ ጌሻቱ ኢቲ ቢታ ኣሳ፤ ቃሲ ፆሳው ሂንቴ ሶይ ኣሳ። ዬሱሲ ኪቴዳዋንቱኔ ቲምቢቲያ ኦዲያዋንቱ ባሴዳ ባሱዋ ቦላ ሂንቴካ ኬፄቴዲታ፤ ጎዳ ፃጱዋ ሚኒሲያ ዋና ሹቻይ ኪሪስቶሲ ዬሱሳ። ኢ ጎሊያ ኡባ ኢቲፔ ሺሺ ኦይቂዴ፥ ፆሳ ባጋና ጌሻ፥ ፆሳ ጌሻ ጎሌ ጊዳና ማላ ዲቼ። ሂንቴ ቃሲ ፆሳይ ባሬ ኣያናን ዴዒያ ጎሊያ ጊዳናው፥ ሃራቱዋ ኡባና ኢቲፔ ኪሪስቶሳን ኬፄቲታ። ሄዋ ዲራው፥ ሂንቴኖ ኣዪሁዳ ጊዴና ኣሳቶ፥ ታኒ ጳዉሎሲ ሂንቴ ዲራው ኪሪስቶሲ ዬሱሳ ቃሾ ኣሳ ጊዴዳዌ፥ ፆሳ ዎሳይ። ፆሳይ ባሬ ኣꬎ ኬካቴꬃን፥ ታኒ ሂንቴና ማዳናዳን፥ ሃ ኦሱዋ ታው ኢሜዳዋ ሂንቴ ሎይꬂ ሲሴዲታ። ፆሳይ ባሬ ፁራ ቆፋ ታው ቆንጪሲዴ፥ ታና ኤሪሴዳ፤ ታኒ ሄዋ ቃንꬃን ፃፋዲ። ቃሲ ታኒ ፃፌዳዋ ሂንቴ ናባቢያ ዎዴ፥ ኪሪስቶሳ ፁራ ታኒ ዎታ ኣኬካዲታንቶኔ ኤራናው ዳንዳዪታ። ቤኒ ዎዴ ኣሳይ ሄ ፁራ ዬዉዋ ሲሲቤና፤ ሺን ፆሳይ ሄዋ ዬሱሲ ኪቴዳ ፆሳ ናናቶኔ ቲምቢቲያ ኦዲያዋንቶ፥ ጌሻ ኣያናን ሃዒ ቆንጪሴዳ። ፁራ ዬዉ ሃዋ፤ ኣዪሁዳ ጊዴና ኣሳይ ዎንጋላ ባጋና፥ ፆሳ ኣንጁዋ ኣዪሁዳቱዋና ኢቲፔ ላቲኖ፤ ኡንቱንቱ ኢቲ ኣሳቴꬃን ሻኬቴናን ዴዒኖ፤ ቃሲ ኪሪስቶሲ ዬሱሳ ባጋና ፆሳይ ኢማና ጌዳዋ ኣዪሁዳቱዋና ሻኪኖ። ፆሳይ ባሬ ኦሱዋ ዎልቃ ባጋና ታው ኢሜዳ ኣꬎ ኬካቴꬃን ታኒ ሃ ዎንጋላው ቆማ ጊዳዲ። ታኒ ጌሻቱዋ ኡባ ጊዶን ላፊያዋ ጊዶፔካ፥ ኣዪሁዳ ጊዴና ኣሳው ዛዋይ ባዪና ኪሪስቶሳ ዱሬቴꬃ ሚሺራቹዋ ቃላ ኦዲያ ሃ ቃዳ ፆሳይ ታው ኢሜዳ። ቃሲ ታኒ ሄዋን ፆሳ ፁራ ቆፋ ኣሳ ኡባው ቆንጪሳ ኦዳና፤ ኡባባ ሜꬌዳ ፆሳይ ባሬ ፁራ ዬዉዋ ቤኒ ዎዴ ጌንꬂ ዎꬄዳ። ፆሳይ ሃዒ ሄዋ ዎሳ ጎሊያ ባጋና ሳሉዋ ሳዓን ዴዒያ ካፓቶኔ ጎዳቴꬃይ ዴዒያዋንቶ ዛዋይ ባዪና ባሬ ኣꬌዳ ኤራቴꬃ ቆንጪሳናው ኦꬄዳ። *** ፆሳይ ሄዋ ኑ ጎዳ ኪሪስቶሲ ዬሱሳ ባጋና ኢ ፖሌዳ ባሬ ሜꬊና ቆፋዳን ኦꬄዳ። ኑኒ ኪሪስቶሲ ዬሱሳና ኢቲፔ ጊዲዴ፥ ኣ ኣማኒያ ኣማኑዋን ኣማኔቲዴ፥ ኣዪኔ ያዬናን ፆሳ ሲንꬃ ሺቃናው ዳንዳዬቶ። ሄዋ ዲራው፥ ታኒ ሂንቴዋን ሜቶቲያዋን ሂንቴ ሂርጌና ማላ፥ ሂንቴና ዎሳይ፤ ኣዪሲ ጎፔ፥ ታኒ ሂንቴ ቦንቾ ሜቶታይ። ሄዋ ዲራው፥ ታኒ ሳሉዋኒኔ ሳዓን ዴዒያ ኣማኒያ ጎሊያ ኣሳይ ኡባይ ኣፔ ዬዳ ፆሳ ሲንꬃን ጉልባታይ። *** ፆሳይ ባሬ ቦንቹዋ ዳሩዋዳን፥ ባሬ ጌሻ ኣያናን፥ ሂንቴንቶ ሂንቴ ጋርሳ ኣሳቴꬃን ሂንቴ ሚኒያ ዎልቃ ኢማናዳኒኔ፥ ቃሲ ኣማኑዋ ባጋና ኪሪስቶሲ ሂንቴ ዎዛና ባሬ ጎሊያ ሜꬋናዳን፥ ታኒ ፆሳ ዎሳይ፤ ቃሲካ ሂንቴ ፃጱዋ ዬዲዴ፥ ቶኬቲዴ ሲቁዋን ሚናናዳን፥ ፆሳ ዎሳይ። *** ቃሲ ጌሻቱዋ ኡባና ኪሪስቶሳ ሲቁ ኣይ ኬና ኣኬንቶ፥ ኣዱሴንቶ፥ ꬎቄንቶኔ ጪሜንቶ ኤሪያ ዎልቃ ሂንቴንቱ ዴማናዳን፥ ታኒ ፆሳ ዎሳይ። ኤራቴꬃፔ ኣꬊያ ኪሪስቶሳ ሲቁዋ ሂንቴ ኤራናዳኒኔ ቃሲ ፆሳዋ ጊዲያ ኡባባኒ ሂንቴ ፖሊ ኩማናዳን፥ ታኒ ፆሳ ዎሳይ። ሲሚ ኑ ጊዶን ኦꬂያ ባሬ ዎልቃ ባጋና ኑኒ ዎሲያዋ ዎይ ቆፒያዋ ኡባፔ ሎይꬂ ዳሪሲ ኦꬃናው ዳንዳዪያ ፆሳው፥ ዎሳ ጎሊያኒኔ ኪሪስቶሲ ዬሱሳን ኡባ ዎዴ ሜꬊናፔ ሜꬊና ጋካናው ቦንቹ ጊዶ። ኣሜንዒ። *** ሄዋ ዲራው፥ ታኒ ጎዳው ኦꬂያ ዲራው ቃሼቴዳዌ ፆሳይ ሂንቴና ፄሴዳ ፄሳው ቤሲያ ዴዑዋ ሂንቴ ዴዓናዳን፥ ታኒ ሂንቴና ዎሳይ። ኡባ ዎዴ ሂንቴ ሂንቴ ሁጲያ ካዉሺያዋንታ፥ ኣሺኬቱዋኔ ዳንዳያንቻቱዋ ጊዲቴ፤ ኢቱ ኢቱዋ ማዲያዋን ሂንቴ ሲቁዋ ቤሲቴ። ሂንቴና ኢቲፔ ጋꬂ ቃቺያ ሳሮቴꬃን፥ ጌሻ ኣያናይ ሂንቴንቶ ኢሚያ ኢቲፔቴꬃ ናጋናው ሚኒቴ። ፆሳይ ሂንቴና ፄሴዳ ሂዶታይ፥ ሂንቴ ዴማና ጊዴ ናጊ ኡቴዳዌ ሜፂ ኢቱዋ ጊዶዋዳን፥ ኢቲ ኣሳቴꬃይኔ ኢቲ ጌሻ ኣያናይ ዴዔ። ኢቲ ጎዳይ፥ ኢቲ ኣማኑኔ ኢቲ ፂንቃታይ ዴዔ። ኡባ ጎዳይ፥ ኡባ ባጋና ኦꬂያዌ፥ ኡባ ጊዶን ዴዒያዌ፥ ኢቲ ፆሳይ፥ ኡባ ኣዉ ዴዔ። ሺን ኪሪስቶሲ ኢሜዳ ኢሙዋዳን፥ ኑኒ ሁጲያን ሁጲያን ዱማ ኢሙዋ ኣኬዶ። ሄዋ ዲራው፥ ፆሳ ማፃፋይ፥ «ኢ ፑዴ ꬎቃሳ ኬሴዳ ዎዴ፥ ኦሞዴቴዳዋንታ ኣፌዳ፤ ኣሳዉካ ኢሞታ ኢሜዳ» ያጌ። ያቲና፥ «ፑዴ ኬሴዳ» ጊያዌ ዋጊያዌ? ኢ ኮዪሮ ዱጌ ዎꬌዳ፤ ሄዌ ሳዓው ሂርኪ ዉርሴꬃሳ ዎꬌዳ ጊያዋ። ሃ ዱጌ ዎꬌዳዌ ባሬ ሁጴው ኣ፤ ሄ ኢ ኡባባ ኩማናዳን፥ ሳሉዋ ኡባፔ ꬎቂያሳ ፑዴ ኬሴዳ። ኣሳው ኢሞታ ኢሜዳዌ ኣ፤ ኢ ኢቱዋ ኢቱዋ ዬሱሲ ኪቴዳዋንታ፥ ሃራቱዋ ቲምቢቲያ ኦዲያዋንታ፥ ቃሲ ሃራቱዋ ሚሺራቹዋ ቃላ ኦዲያዋንታ፥ ቃሲካ ሃራቱዋ ዎሳ ጎሊያ ካሌꬂያዋንታኔ ታማሪሲያዋንታ ኦꬂ ሱንꬄዳ። ኢ ሄዋ ጌሻቱ ኡባይ ኣማኒያ ኣሳ ኦሱዋ ኦꬃናዳኒኔ ኪሪስቶሳ ቦላን ኬፄታናዳን ጊጊሳናው ኦꬄዳ። ቃሲ ኑኒ ኡባይ ፆሳ ናዓ ኣማኒናኔ ኤሪና ቤቲያ ኢቲፔቴꬃኮ ጋካና፤ ኑኒ ኪሪስቶሳ ፖሎ ዲቻ ኬና ዲጪዴ፥ ዶንዛ ኣሳ ጊዳናዳና። ኑኒ ቤታን ያኔ ሃኔ ሾጬቲዴ፥ ባሬንቱ ጪሚያ ሃኖታን ኣሳ ባላ ኦጊያ ካሌꬂያ ጌኒያ ኣሳ ቲሚርቲያ ጫርኩዋ ኡባን ሱጌቲዴ፥ ሃዋፔ ሲንꬃው ናዓ ጊዳናው ቤሴና። ሺን ኑኒ ሲቆቴꬃን ቱሙዋ ሃሳዪዴ፥ ሁጴ ጊዲያ ኪሪስቶሳኮ ኡባባኒ ዲጫናው ቤሴ። ቦላ ጊዶን ዴዒያ ዱማ ዱማ ሻኮታይ ኣኒ ኢቲፔ ኦይቄቴዲኖ፤ ቃሲ ኩሜንꬃ ቦላይ ባሬው ኢሜቴዳሳ ኡባን ኢቱ ኢቱዋና ጋኬቲዴ፥ ኢቲፔ ኦይቄቲ ኡቴዳ፤ ሄ ዱማ ዱማ ሻኮታይ ኦꬃናው ቤሲያዋ ኦꬂያ ዎዴ፥ ኩሜንꬃ ቦላይ ሲቁዋን ዲጬኔ ባሬና ኬፄ። ሄዋ ዲራው፥ ታኒ ሃዋ ሂንቴንቶ ጎዳ ሱንꬃን ኦዳይኔ ማርካታይ። ሂንቴ ጎዒ ባዪና ቆፋ ቆፒያ ኣዪሁዳ ጊዴና ኣሳቱዋዳን ዴዖፒቴ። ኡንቱንቱ ዎዛናይ ꬉማኒ ዴዔ፤ ኡንቱንቱ ኣዪኔ ኤሬናዋንታኔ ኣዛዜቴና ዲራው፥ ፆሳይ ኢሚያ ዴዑዋፔ ሃኬዲኖ። ኡንቱንቱ ማታን ዬላ ጊያዌ ባዋ፤ ኡንቱንቱ ዎሹማው ካጄላናው ባሬንቱ ሁጲያ ኣꬂ ኢሚኖ፤ ቃሲ ቱናባ ኡባ ፓጪ ባዪናን ኦꬃናው ሎይꬂ ዮራቲያዋንታ። ሺን ሂንቴ ኪሪስቶሳዋ ሄዋዳን ታማሪቤዪኪታ። ኣባ ቱሙ ሲሴዲታ፤ ቃሲ ቱማቴꬃይካ ዬሱሳን ዴዒያዋ፥ ኣፔ ታማሬዲታ። ሂንቴ ካሴ ዴዒያ ዴዑዋ ኣጊቴ፤ ቃሲ ባሬ ጪሚያ ኣሙዋን ꬋዪያ ሂንቴ ኤጫ ኣሳቴꬃ ꬋዪሲቴ። ሂንቴ ዎዛናይኔ ቆፋይ ኡባና ኦራፃናው ቤሴ። ቱሙ ፂሎቴꬃኒኔ ጌሻቴꬃን ፆሳ ሌሚሱዋን ሜꬌቴዳ ኦራꬃ ኣሳቴꬃ ማዪቴ። ሲሚ ዎርዶቶፒቴ። ኑኒ ኡባይ ኪሪስቶሳ ኣሳቴꬃን ኢቲ ኣሳ ጊዲያ ዲራው፥ ኣሳይ ኡባይ ባሬ ኢሻው ቱሙዋ ሃሳያናው ቤሴ። ሃንቄቲቴ፤ ሺን ሂንቴ ሃንቁዋን ናጋራ ኦꬆፒቴ። ሂንቴ ሃንቁዋን ዴዒሺን፥ ኣዋይ ዉሎፖ። ፃላሄው ፆዒያ ኢሞፒቴ። ዉዒያ ኡራይ ሃዋፔ ሲንꬃው ዉዖፖ፤ ሺን ሄዋ ኣጊዴ፥ ሂዬሳቱዋ ማዳናው፥ ባሬ ኩሺያን ሎዖባ ኦꬂዴ ዳቡሮ። ሂንቴ ሃሳያይ ሲሲያዋንታ ጎዓና ማላ፥ ኮሺያዋዳን ሜንꬄꬂያ ሎዖ ቃላይ ሂንቴ ዶናፔ ኬሶፔ ኣቲን፥ ኢታ ቃላይ ሙሌካ ኬሶፖ። ፆሳይ ሂንቴና ዎዚያ ጋላሳው ሂንቴ ኣታሜቲ ኡቴዳ ፆሳ ጌሻ ኣያና ካዮዮፒቴ። ኢፂያ ሃኖታ፥ ዪሉዋ፥ ሃንቁዋ፥ ዋሱዋኔ ጫሻ ኡባ ኢታቴꬃ ኡባና ሂንቴፔ ꬋዪሲቴ። ኢቱ ኢቶ ኬኪቴኔ ቃሬቲቴ፤ ቃሲ ፆሳይ ኪሪስቶሳ ባጋና ሂንቴንቶ ኣቶ ጌዳዋዳን፥ ሂንቴካ ኢቱ ኢቱዋ ኣቶ ጊቴ። ሲሚ ፆሳይ ሲቂያ ናናቱዋዳን፥ ኣ ማላቲቴ። ቃሲ ኪሪስቶሲ ኑና ሲቂዴ፥ ባሬ ሁጲያ ፆሳው ናሼቺያ ያርሹዋዳኒኔ ኢሞታ ኡዲዴ ኢሜዳዋዳን፥ ሂንቴካ ሲቁዋን ዴዓናው ቤሴ። ሺን ፆሳ ናናው ቤሲያዋዳን፥ ሂንቴ ጊዶን ዎሹሚያዌኔ ቱናቴꬃ ኡባይ፥ ዎይ ሚሻ ኣሞቲያዌ ሙሌካ ሲሴቶፖ። ዬላዪያዌኔ ኤያ ሃሳያይ ዎይ ፓꬄና ቂꬊ ሂንቴንቶ ቤሴናዋ ጊዲያ ዲራው፥ ሂንቴ ማታን ኡባካ ዴዖፖ፤ ሂንቴ ሄዋ ኡባ ኣጊዴ፥ ፆሳ ጋላታናው ቤሴ። ሃዋ ኤሪቴ፤ ኦኒኔ ዎሹሚያዋ ዎይ ቱናባ ኦꬂያዋ፥ ዎይ ሚሻ ኣሞቲያዋ ጊዶፔ፥ ኪሪስቶሳ ካዉቴꬃኔ ፆሳ ካዉቴꬃ ላታናው ዳንዳዬና፤ ሚሻ ኣሞቲያዌ ኤቃው ጎዪኒያዋፔ ዱማቴና። ሂንቴና ኦኒኔ ፓꬄና ሃሳያን ጪሞፖ፤ ኣዪሲ ጎፔ፥ ሃዋ ጋሱዋን ፆሳ ሃንቁ ኣዛዜቴና ኣሳ ቦላ ያና። ሲሚ ሄዋ ማላ ኣሳና ዙፔቶፒቴ። ኣዪሲ ጎፔ፥ ካሴ ሂንቴ ꬉማኒ ዴዔዲታ፤ ሺን ጎዳ ባጋና ሃዒ ፖዑዋን ዴዒታ፤ ፖዑዋን ዴዒያ ኣሳዳን ፖዑዋን ሃሜቲቴ። ኣዪሲ ጎፔ፥ ፖዑ ሎዖቴꬃ፥ ፂሎቴꬃኔ ቱማቴꬃ ኡባ ኣዪፌ። ጎዳ ናሼቺያባይ ኣዬንቶ ታማሪቴ። ጎዒ ባዪና ꬉማ ኦሱዋ ቆንጪሲ ቤሲቴፔ ኣቲን ኣናና ዋላኬቶፒቴ። ኡንቱንቱ ጌማን ኦꬂያዌ ሃራይ ኣቶ ሃሳዪያዌካ ፖኬ። ሺን ኡባባይ ፖዑዋ ኬሲያ ዎዴ፥ ቆንጪያን ቤታና፤ ኣዪሲ ጎፔ፥ ቆንጪያን ቤቲያ ኡባባይ ፖዑዋ። ሄዋ ዲራው፥ «ጌሚዒሺያዎ፥ ቤጎታ፤ ሃዪቁዋፔካ ዴንዳ፤ ኪሪስቶሲ ኔው ፖዒሳናዋ» ያጌ። ሲሚ ሂንቴ ዋኒ ዴዒንቶ ኣኬኪቴ፤ ኣꬌዳ ኤራቴꬃና ዴዒያ ኣሳዳን ዴዒቴፔ ኣቲን፥ ኣꬌዳ ኤራቴꬃይ ባዪና ኣሳዳን ዴዖፒቴ። ዎዲ ኢታ ጊዲያ ዲራው፥ ሂንቴ ዎዲያ ሂንቴው ዳንዳዬቶዋዳን ሎዖቴꬃው ጎዔቲቴ። ሄዋ ዲራው፥ ጎዳይ ኮዪያዌ ኣዬንቶ ኣኬኪቴፔ ኣቲን፥ ኤያ ጊዶፒቴ። ቃሲ ሂንቴናን ጌሻ ኣያናይ ቃንፄናን ኩሞፔ ኣቲን፥ ሂንቴና ባዪዚያ ዎዪኒያ ጊያ ኤሳ ኡሺዴ ማꬆቶፒቴ። ማዚሙሪያ ዬꬃን፥ ጋላቲዴ ዬፂያዋኒኔ ኣያና ዬꬃን ኢቱ ኢቱዋና ሃሳዪቴ፤ ቃሲ ጋላቲያ ዬꬃኒኔ ማዚሙሪያ ዬፂያዋን ሂንቴ ዎዛናን ጎዳ ጋላቲዴ ዬፂቴ። ኑ ጎዳ ዬሱሲ ኪሪስቶሳ ሱንꬃን፥ ኣዉዋ ፆሳ ኡባባው ኡባ ዎዴ ጋላቲቴ። ኪሪስቶሳው ያዪዴ፥ ኢቱ ኢቶ ሞዴቲቴ። ማቼቶ፥ ጎዳው ሞዴቲያዋዳን፥ ሂንቴ ኣሲናው ሞዴቲቴ። ኣዪሲ ጎፔ፥ ኪሪስቶሲ ቃሲ ዎሳ ጎሌው ሁጴ ጊዲያዋዳን፥ ኣሲናይካ ባሬ ማቻቲው ሁጴ፤ ቃሲ ኪሪስቶሲ ባሬ ሁጲያን፥ ባሬ ቦላ ጊዲያ ዎሳ ጎሊያ ኣሺያዋ። ሺን ዎሳ ጎሊ ኪሪስቶሳው ሞዴቲያዋዳን፥ ማቼቱ ቃሲ ባሬንቱ ኣሲናው ኡባባኒ ሞዴታናው ቤሴ። ኣሲናቶ፥ ኪሪስቶሲ ዎሳ ጎሊያ ሲቂዴ፥ ባሬ ሁጲያ ኢዚው ኢሜዳዋዳን፥ ሂንቴካ ሂንቴ ማቻቱዋ ሲቂቴ። ኢ ዎሳ ጎሊያ ባሬ ቃላኒኔ ሃꬃን ሜጪ ጌሺዴ፥ ፆሳው ዱማያናው ሃዋ ኦꬄዳ። ኪሪስቶሲ ዎሳ ጎሊያ ቂታይ ዎይ ዴሙዋ ጪꬊሲያዌ ዎይ ሄዋ ማላቲያዌ ባዪናን፥ ኣ ኩሜንꬃ ቦንቹዋና ጌሻኔ ቦሬቴናዋ ኡዲዴ፥ ባሬ ሁጴው ሺሻናው ኮዬዳ። ሲሚ ቃሲ ኣሲናይ ባሬ ማቻቶ ባሬ ቦላዳን ሲቃናው ቤሴ፤ ባሬ ማቻቶ ሲቂያዌ ባሬና ሲቄ። ኣዪሲ ጎፔ፥ ባሬ ቦላ ኢፂያ ኣሳይ ሙሌካ ባዋ፤ ሺን ኪሪስቶሲ ዎሳ ጎሊያ ሙዚያዋዳኒኔ ናጊያዋዳን ኦኒኔ ባሬ ቦላ ሙዜኔ ናጌ። ኣዪሲ ጎፔ፥ ኑኒ ኣ ቦላ ዱማ ዱማ ኣሳቴꬃ። ፆሳ ማፃፋይ፤ «ሄዋ ዲራው፥ ኣቱማዌ ባሬ ኣዉዋኔ ባሬ ዳዮ ኣጊዴ፥ ባሬ ማቻቲና ኢቲፔ ዴዓና፤ ኡንቱንቱ ላዑካ ኢቲ ኣሹዋ ጊዳና» ያጌ። ሃ ፁራይ ዎልቃማ ቱማቴꬃ፤ ሺን ታኒ ሃዌ ኪሪስቶሳባኔ ዎሳ ጎሊያባ ኦዴ ያጋይ። ጊዶፔካ፥ ቃሲ ኣሲናይ ሁጲያን ሁጲያን ማቺያ ባሬ ሁጲያዳን ሲቃናው ቤሴ፤ ማቻታካ ባሬ ኣሲና ቦንቻናው ቤሴ። ናቶ፥ ሂንቴና ዬሌዳዋንቶ ጎዳ ቦንቺያዋዳን ኣዛዜቲቴ፤ ኣዪሲ ጎፔ፥ ሃዌ ኦꬃናው ቤሲያዋ። «ኔው ኡባባይ ሎዓናዳኒኔ ሳዓን ኔ ላይꬃይ ኣዱቃናዳን፥ ኔ ኣዉዋኔ ኔ ዳዮ ቦንቻ» ጊያ ኣዛዙ ፆሳይ ኢማና ጌዳ ሂዶታና ዴዒያ ኮዪሮ ኣዛዙዋ። *** ኣዋቶ፥ ሂንቴ ሂንቴ ናናቱዋ ጎዳ ሴራኒኔ ዞሪያን ዲቺቴፔ ኣቲን፥ ኡንቱንታ ሃንቄꬆፒቴ። ኣዪላቶ፥ ኪሪስቶሳው ኦꬂያዋዳን፥ ሂንቴ ጎዳቶ ያሻቴꬃኒኔ ኮኮርሳን ሱሬ ዎዛናፔ ኣዛዜቲቴ። ፆሳይ ጌዳዋ ኦꬂያዋንቱዳን፥ ኪሪስቶሳ ኣዪላቱዋዳን፥ ዎዛናፔ ኦꬂቴፔ ኣቲን፥ ኣሳ ናሼቻናው ኦꬂያዋዳን፥ ኣሳይ ቤዖ ጊዴ ኦꬆፒቴ። ኣሳው ጊዴናን ጎዳው ኦꬂያዋዳን፥ ꬊቤናን ዎዛናፔ ኦꬂቴ። ኣዪሌ ጊዲና ዎይ ዎማኑዋ ጊዲና፥ ኢ ኦꬂያ ሎዖ ኦሶ ኡባው ጎዳይ ሁጲያን ሁጲያን ዎዪታናዋ ኤሪታ። ጎዳቶ፥ ሂንቴ ኣዪሌቱዋ ናሲያዋ ኣጊዴ፥ ኡንቱንቶ ሄዋዳን ኦꬂቴ፤ ሂንቴናኔ ኡንቱንታ ጋꬂ ሞዲያ ጎዳይ፥ ኦናኔ ማዲ ፒርዴናዌ፥ ሳሉዋን ዴዒያዋ ኤሪታ። ዉርሴꬃን፥ ጎዳኒኔ ኣ ዎልቃማ ዎልቃን ኡባ ዎዴ ሚኒቴ። ፃላሂያ ኢታ ጪሙዋ ቴዓናው ሂንቴ ዳንዳያና ማላ፥ ፆሳይ ሂንቴንቶ ኢሚያ ኦላ ማዩዋ ኡባ ማዪቴ። ኣዪሲ ጎፔ፥ ኑኒ ቦላ ሳሉዋ ዴዒያ ኢታ ኣያና ዎልቃቱዋና፥ ሞዲያዋንቱና፥ ጎዳቴꬃይ ዴዒያዋንቱናኔ ሃ ꬉማ ቢታ ሞዲያዋንቱና ኦሌቲያዋፔ ኣቲን፥ ኣሳና ኦሌቶኮ። ሄዋ ዲራው፥ ኢታ ጋላሳን ቴዓናዉኔ ቃሲ ዉርሴꬃይ ጋካናው ዋꬌቶዋፔ ጉዪያን፥ ሚኒ ኤቃናው ሂንቴ ዳንዳያና ማላ፥ ፆሳ ኦላ ሚሻ ኡባ ኦይቂቴ። ሄዋ ዲራው፥ ፄሳን ሳቂያ ዳንጪያዋዳን ቱማቴꬃ ዳንጪዴ፥ ቲራን ዎꬂያ ኦላ ሚሻዳን ፂሎቴꬃ ማዪዴ፥ ሂንቴ ጌዲያን ጫማ ዎꬂያዋዳን ሳሮቴꬃ ሚሺራቹዋ ቃላ ኦዳናው ጊጊዴ፥ ሚኒ ኤቂቴ። *** ሄ ኡባፔ ኣꬂዴ፥ ፃላሂ ዬዲያ ዎንዳፊያ ታማ ኡባ ቶዪሳናው፥ ኣማኑዋ ኡባ ዎዴ ጎንዳሊያዳን ኦይቂቴ። ኣቶቴꬃ ሁጲያን ዎꬂያ ቢራታ ቆቢያዳን ዎꬂቴ፤ ቃሲ ጌሻ ኣያና ማሻ ጊዴዳ ፆሳ ቃላ ኦይቂቴ። ፆሳ ዎሲዲኔ ኣ ማዱዋ ኦቺዴ፥ ኡባ ዎዴ ጌሻ ኣያናን ፆሳ ዎሲቴ። ሄዋ ዲራው፥ ሚኒቴ፤ ሳሌቶፒቴ፤ ጌሻቱዋ ኡባው ፆሳ ኡባ ዎዴ ዎሲቴ። ቃሲ ታኒ ያዬናን ዎንጋላ ፁራ ኦዳናው፥ ፆሳይ ታ ዶና ዶዪዴ፥ ሃሳዪያዋ ኢማናዳን፥ ታዉካ ፆሳ ዎሲቴ። ታኒ ሃዒ ቃሹዋን ዴዖፔካ፥ ሃ ዎንጋላ ዲራው ታኒ ኪቴቴዳዋ፤ ታኒ ኣባ ታው ቤሲያዋዳን ያዬናን ኦዳና ማላ፥ ታው ፆሳ ዎሲቴ። ሺን ታኒ ዋና ዴዒንቶኔ ኣያ ኦꬃይታንቶ ሂንቴካ ኤራናዳን፥ ኑ ሲቆ ኢሻይ፥ ጎዳ ኦሱዋን ኣማኔቴዳ ቆማይ ቲኪቆሲ፥ ታዋ ኡባ ሂንቴንቶ ኦዳናዋ። ኑኒ ኡባይ ዋኒ ዴዒንቶ ሂንቴንቶ ኦዲዴ፥ ሂንቴና ሚኒሳና ማላ፥ ታኒ ኣ ሂንቴኮ ኪታዲ። ፆሳ ኣዉዋፔኔ ጎዳ ዬሱሲ ኪሪስቶሳፔ ሳሮቴꬃይኔ ሲቆቴꬃይ ኣማኑዋና ኢቲፔ ኢሻቱዋ ኡባው ጊዶ፤ ዶቼና ሲቁዋን ኑ ጎዳ ዬሱሲ ኪሪስቶሳ ሲቂያ ኡባቱዋና ፆሳ ኣꬎ ኬካቴꬃይ ጊዶ። ኣሜንዒ። ኑኒ ዬሱሲ ኪሪስቶሳ ኦሳንቻቱ ጳዉሎሲኔ ፂሞቶሲ፥ ኪሪስቶሳ ዬሱሳን ዴዒያዋንቶ፥ ፒሊጲሲዮሳ ጊያ ካታማን ዴዒያ ጌሻቶ ኡባቶ፥ ኣማኒያዋንታ ካሌꬂያዋንቶኔ ማዲያዋንቶ ሃ ዳቢዳቢያ ፃፌቶ። ኑ ኣዉዋ ፆሳፔኔ ጎዳ ዬሱሲ ኪሪስቶሳፔ ኣꬎ ኬካቴꬃዪኔ ሳሮቴꬃይ ሂንቴንቶ ጊዶ። ታኒ ሂንቴና ሃሳዪያ ዎዴ ኡባን ታ ፆሳ ጋላታይ። ሂንቴ ኮዪሮ ጋላሳፔ ሃኖ ጋካናው፥ ሚሺራቹዋ ቃላ ኦዲያዋን ታና ማዴዳ ዲራው፥ ታኒ ኡባ ዎዴ ሂንቴንቶ ኡባው ናሼቻን ፆሳ ዎሳይ። *** ቃሲ ሂንቴንቱ ጊዶን ሎዖ ኦሱዋ ዶሜዳ ፆሳይ፥ ኪሪስቶሲ ዬሱሲ ሲሚያ ጋላሳይ ጋካናው ፖላናዋ ኤራይ። ታኒ ሂንቴንቶ ኡባው ሄዋዳን ቆፓናው ቤሴ፤ ኣዪሲ ጎፔ፥ ታኒ ሂንቴና ኡባ ዎዴ ሃሳያይ። ሃዒ ታኒ ቃሹዋን ዴዒያዋኒኔ ዎንጋላው ሞቴቲያዋን፥ ቃሲ ዎንጋላ ሚኒሳ ኤሲያዋኒኔ፥ ፆሳይ ታው ቃዴዳ ቃዳ ሂንቴካ ታናና ጊሺ ኣኬዲታ። ኣዪሲ ጎፔ፥ ታኒ ሂንቴና ኡባቱዋ ኪሪስቶሲ ዬሱሳፔ ዪያ ሲቁዋን ኣይ ኬና ሲቂንቶ፥ ፆሳይ ታው ማርካ። ቃሲ ታኒ ሂንቴንቶ ፆሳ ዎሲያዌ ሃዋ፤ ሎዖባ ኣያኔካ ዶራናው ሂንቴንቱ ዳንዳያናዳኒኔ፥ ቃሲ ሂንቴንቱ ሲቁ ቱሙ ኤራቴꬃናኔ ኣኬካ ኡባና ኢቲፔ ጉጂ ጉጂ ዲጫናዳን፥ ፆሳ ዎሳይ፤ ያቲዴ ኪሪስቶሲ ሲሚያ ጋላሳን ሂንቴንቱ ሱሬኔ ፖኩ ባይናዋንታ ጊዳና። *** ቃሲ ሂንቴንቱ ሼምፑካ ፆሳ ቦንቾኔ ጋላታው ዬሱሲ ኪሪስቶሳ ባጋና ቤቲያ ፂሎቴꬃ ኣይፊያ ኣዪፋና። ታናዳን ፆሳ ካሊያዋንቶ፥ ሃ ታና ጋኬዳዌ ሚሺራቹዋ ቃላይ ኣካናዳን ቱሙ ማዴዳዋ ሂንቴንቱ ኤራና ማላ ኮያይ። ታኒ ኪሪስቶሳ ዲራው ቃሼቴዳዋ፥ ካቲያ ጎሊያ ናጊያ ኡባቱኔ ሃዋን ዴዒያ ሃራቱ ኡባቱ ኤሪኖ። ቃሲ ታኒ ቃሼቴዳዌ ኑ ኢሻቱዋፔ ዳሪያዋንቱ ጎዳን ሎይꬂ ኣማኔቲዴ፥ ፆሳ ቃላ ያሺ ባይናን ካሴዋፔ ፃሊዴ ኦዳናዳን ማዴዳ። ቱሙፔ ኢቱ ኢቱ ቃናቲያ ዲራዉኔ ፓሉሚያ ዲራው፥ ኪሪስቶሳዋ ኦዲኖ፤ ሺን ሃራንቱ ሎዖ ኣሙዋን ኦዲኖ። ሃዋንቱ ፆሳይ ታው ዎንጋላ ናጊያ ኦሱዋ ኢሜዳ ዲራው፥ ሲቂዴ ቃላ ኦዲኖ። ሺን ዮኮንቱ ታኒ ቃሹዋን ዴዒሺን፥ ታ ቦላ ዋዪያ ኣሃናዋ ኡንቱንቶ ማላቲና፥ ባሬና ሲቂያ ዎልቃማ ኣሙዋን ኪሪስቶሳዋ ኦዲኖፔ ኣቲን፥ ዎዛናፔ ኦዲኪኖ። ኣይኔ ባዋ፤ ማላቲሲያ ኦዶኔ ጊዶ ዎይ ቱሙ ኦዶኔ ጊዶ፥ ኣይ ኦጊያኒኔ ኪሪስቶሳዋ ኦዶፔ፥ ታኒ ሄዋን ናሼታይ። ሲንꬃናዉካ ቃሲ ታኒ ናሼታና። ኣዪሲ ጎፔ፥ ታኒ ሂንቴንቱ ዎሳኒኔ ዬሱሲ ኪሪስቶሳ ኣያናፔ ዪያ ማዱዋን ኣታናዋ ኤራይ። ታ ዎልቃማ ኣሙኔ ፆሳፔ ኣካና ጋዴ ታኒ ናሼቻን ናጊያ ናጉ ኣዬ ጎፔ፥ ታኒ ፓፃ ዴዒናካ ዎይ ሃዪቂናካ ያዬናን፥ ካሴዋዳን ሃዒካ ታ ኩሜንꬃ ኣሳቴꬃን ኪሪስቶሲ ቦንቼታናዋፔ ኣቲን፥ ታኒ ሃራይ ኣቶ ኢቲባንካ ዬላቴናን ኣታናሳ። ኣዪሲ ጎፔ፥ ታው ዴዑ ኪሪስቶሳ፤ ቃሲ ሃዪቁካ ታው ጎዓ። ሺን ታኒ ፓፃ ዴዒያዋን ዳሮ ጎዒያዋ ኦꬃናዋ ጊዶፔ፥ ሃቃዋ ዶራኔንቶ ታው ኤሬቴና። ታኒ ሃ ላዑ ዬዋቱዋን ሜቶታይ፤ ሃ ዴዑዋፔ ሻኬታናዉኔ ቃሲ ኪሪስቶሳና ኢቲፔ ዴዓናው ኣሞታይ፤ ኪሪስቶሳና ኢቲፔ ዴዒያዌ ኡባፔ ኣꬌዳ ዳሮ ሎዖባ። ሺን ታኒ ሃዪቂያዋፔ ሂንቴንቱ ዲራው ፓፃ ዴዒያዌ ሂንቴና ዳሮ ኮሺያዋ። ሃዌ ቱማ ጊዲያዋ ታኒ ጌሻዴ ኤራይ፤ ቃሲ ኣማኑዋን ሂንቴንቱ ዲጫናዳኒኔ ናሼታናዳን፥ ታኒ ሂንቴናና ኡባና ፓፃ ዴዓና። ሄዋ ዲራው፥ ታኒ ሂንቴናና ላዔꬁዋ ዪያ ዎዴ፥ ኪሪስቶሳ ዬሱሳና ሂንቴ ዴዒያ ዴዑዋን፥ ታባን ጬቄቲያባይ ሂንቴንቶ ዳራና። ጊዶፔካ፥ ሂንቴንቱ ሂንቴንቱ ሁጴው ኪሪስቶሳ ዎንጋላው ቤሲያ ዴዑዋ ዴዒቴ፤ ታኒ ሂንቴና ባዴ ዎይ ቤዓና ꬋዪና፥ ሂንቴንቱ ኢቲ ቆፋን ሚኒዴ ኤቄዳዋኔ፥ ቃሲ ዎንጋላ ኣማኖ ኢቲ ዎዛና ጊዲዴ ኢቲፔ ባፄቲያዋ ሲሳና። ሂንቴ ሞርኬቱዋሲ ኣያንካ ያዮፒቴ፤ ሄዌ ኡንቱንቶ ኡንቱንቱ ባሻ ꬊሺሴ፤ ሺን ፆሳይ ሂንቴና ፆኒሲያ ዲራው፥ ሂንቴንቶ ኣቶቴꬃ ꬊሺሴ። ኣዪሲ ጎፔ፥ ኪሪስቶሳው ኦꬂያ ቃዳይ ሂንቴና ጋኬዳዌ ሂንቴንቱ ኣኒ ኣማናና ፃላላሳ ጊዴናን ኣ ዲራው ዋዪያካ ኣካናሳ። ታኒ ካሴ ባፄቲሺን ሂንቴንቱ ቤዔዳዋ ማላ ባፂኔ ቃሲ ሃዒካ ታኒ ባፄቲያዋ ሂንቴንቱ ሲሲያዋ ማላይ ሂንቴና ጋኬዳ። ኪሪስቶሳን ሂንቴንቱ ዴዒያ ዴዑ ሂንቴና ዎዛንꬂ? ኣ ሲቁ ሂንቴና ሜንꬄꬂ? ጌሻ ኣያናና ሂንቴንቶ ኢቲፔቴꬃይ ዴዒ? ሂንቴ ኢቱ ኢቱዋሲ ኬኪቴኔ ቃሬቲቴ? ያቶፔ፥ ሂንቴንቱ ቆፋን፥ ሲቁዋን፥ ዎዛናኒኔ ቆፋ ፖሉዋን ኢቱዋ ጊዲዴ፥ ታና ፖሎ ናሼቺቴ። ሂንቴና ሲቂያዋን ዎይ ጬቄታናው ኮዪያ ሜላ ኣሙዋን ኢቲባኔ ኦꬆፒቴ፤ ሺን ኢቱ ኢቱዋፔ ꬎቃይ ያጊዴ ቆፔናን፥ ኢቱ ኢቱዋሲ ሂንቴንቱ ሁጲያ ካዉሺቴ። ቃሲ ኢቱ ኢቱዋ ጎዒያዋ ኮያናፔ ኣቲን፥ ሂንቴንቱ ሁጴ ፃላላ ጎዒያዋ ኮዮፒቴ። ኪሪስቶሳ ዬሱሳን ዴዒያ ሃ ኣሺኬቴꬃ ቆፋይ ቃሲ ሂንቴናንካ ዴዓናው ቤሴ። ኢ ኡባ ዎዴ ፆሳ ጊዲዴ ዴዔዳ፤ ሺን ኢ ዎልቃን ፆሳ ኬና ጊዲያ ማታይ ዴዒያዋ ቤሲያዋዳን ፓይዲቤና። ሺን ኢ ባሬ ሼኒያን ኡባባ ኣጊዴ፥ ኣይሊያ ሜꬌታ ኣኬዳ፤ ቃሲ ኣሳ ማላቲዴ ቆንጬዳ። ኢ ባሬና ካዉሼዳ፤ ሃይቆ፥ ኡባ ሃራይ ኣቶ፥ ማስቃሊያ ቦላ ሃይቃናዉካ ኣዛዜቴዳ። ሄዋ ዲራው፥ ፆሳይ ኣ ሎይꬂ ꬎቁ ꬎቁ ኦꬄዳ፤ ቃሲ ሱንꬃ ኡባፔካ ኣꬊያ ꬎቃ ሱንꬃ ኣው ኢሜዳ። ሄዋ ዲራው፥ ሳሉዋኒኔ ሳዓን ሳዓፔ ጋርሳን ዴዒያ ኡባይ ዬሱሳ ሱንꬃ ቦንቻናው ጉልባታና። ቃሲ ኣሳይ ኡባይ ዬሱሲ ኪሪስቶሲ ጎዳ ያጊዴ፥ ፆሳ ኣዉዋ ቦንቾ ማርካታና። ሄዋ ዲራው፥ ታ ዳባቶ፥ ታኒ ሂንቴናና ዴዒያ ዎዴ ኡባን ሂንቴንቱ ታው ኣዛዜቴዳዋዳን፥ ሃዒ ታኒ ሂንቴንቱ ማታን ዴዔና ዎዴካ፥ ሂንቴንቱ ካሴዋፔ ኣꬂዴ ታው ኣዛዜታናው ቤሴ፤ ያሻቴꬃኒኔ ኮኮርሳን ሂንቴንቱ ኣቶቴꬃ ፖላናው ኦꬂቴ። ኣዪሲ ጎፔ፥ ፆሳይ ሂንቴና ባሬው ኤኖ ጊሳናዳኒኔ ቃሲ ኢ ቆፔዳዋ ሂንቴንቱ ኦꬃናዳን ሂንቴንቱ ጊዶን ኡባ ዎዴ ኦꬄ። ጌላኔ ናጋራንቻ ኣሳ ጊዶን ፖኩ ባይናዋንታ፥ ጌሻቱዋ፥ ፆሳ ናናቱዋዳንካ ፖኩ ባዪናዋንታ ጊዲቴ፤ ቃሲ ዙዙሜናን ዎይ ኢታባ ቆፔናን ኡባባ ኦꬂቴ። ሄ ኣሳ ጊዶኒካ ሳሉዋን ፖዒያ ፆሊንቲያዳን ፖዒዴ፥ *** ዴዑዋ ሚሺራቹዋ ቃላ ኡንቱንቶ ኦዲቴ፤ ሄ ዎዴ ታ ዳቡራዪኔ ታ ኦሱ ሜላ ꬋዪቤናዌ ኤሬቲያ ዲራው፥ ኪሪስቶሲ ሲሚያ ጋላሲ ታኒ ሂንቴናን ጬቄታና። ሃራይ ኣቶ ሂንቴንቱ ኣማኑ ፆሳው ያርሺያ ያርሹዋ ቦላ ታ ሱꬃይ ኡሻ ያርሹዋዳን ጉኮፔካ፥ ታኒ ናሼታይ፤ ሂንቴናና ኡባና ኢቲፔ ናሼታይ። ሄዋዳን ሂንቴካ ቃሲ ናሼታናው ቤሴ፤ ታናና ኢቲፔ ናሼቲቴ። ሺን ታኒ ሂንቴንቱ ዴዑዋባ ሲሳዴ ናሼታናዳን፥ ፂሞቶሳ ሂንቴኮ ኤሌካ ዬዳናዋ ጎዳ ዬሱሳን ኣማኔታይ። ኣዪሲ ጎፔ፥ ሂንቴንቱ ዴዑዋባው ዎዛናፔ ሂርጊያ ኣ ማላ ኣሳይ ሃራይ ኦኒኔ ታው ባዋ። ኣዪሲ ጎፔ፥ ሃራቱ ኡባቱ ባሬንቱ ሁጴ ጎዓ ኮዪኖ፤ ዬሱሲ ኪሪስቶሳዋ ኮዪኪኖ። ሺን ናዓይ ባሬ ኣቡ ኦꬂያዋዳን፥ ፂሞቶሲ ታናና ኢቲፔ ጊዲዴ፥ ዎንጋላ ኦሱዋ ኦꬄዳዋን፥ ኣማኔቲያ ኣሳ ጊዲያዋ ኤሪሴዳዋ ሂንቴንቱ ኤሪታ። ሄዋ ዲራው፥ ታኒ ዬዉ ሃኒያዋ ቤዓዴ፥ ኤሌካ ኣ ሂንቴኮ ዬዳና ጋዴ ቆፓይ። ታኒ ታ ሁጴው ማታ ዎዲያን ሂንቴኮ ባናዋ ጎዳን ኣማኔታይ። ሺን ታኒ ታ ኢሻ ኤፓፊሮዲቶሳ፥ ታናና ኢቲፔ ታ ባጋ ጊዲዴ ኦꬄዳዋ፥ ኦሌቴዳዋኔ፥ ቃሲ ታና ማዲያዋን ሂንቴንቶ ኪቴቲዴ ኦꬄዳዋ ሂንቴኮ ኪታናው ኮሺያዋ ቆፓዲ። ኣዪሲ ጎፔ፥ ኢ ሂንቴና ኡባ ቤዓናው ላሞቴ፤ ቃሲ ኢ ሳኬቴዳዋ ሂንቴንቱ ሲሴዳ ዲራው፥ ባሬ ዎዛናን ዳሮ ሜቶቴ። ኢ ቱሙ ሳኬቲዴ፥ ሃዪቂ ኣቴዳ፤ ሺን ፆሳይ ኣው ቃሬቴዳ፤ ኣ ፃላላው ጊዴናን ካዩ ካዩዋ ቦላ ጉጄቴናዳን፥ ታዉካ ቃሬቴዳ። ሲሚ ሂንቴንቱ ላዔንꬁዋ ኣ ቤዒዴ ናሼታናዳን፥ ታዉካ ታ ዎዛና ካዩ ኢርፃናዳን፥ ታኒ ኤሌካ ኣ ሂንቴኮ ዬዳና። ሄዋ ዲራው፥ ጎዳን ዴዒያ ኢሻዳን፥ ኩሜንꬃ ናሼቻን ኣ ሞኪቴ፤ ቃሲ ኣ ማላቲያ ኣሳ ኡባካ ቦንቺቴ። ኣዪሲ ጎፔ፥ ሂንቴንቱ ሂንቴንቱ ሁጴው ታና ማዳና ዳንዳዬና ማዱዋ ማዳናው፥ ኪሪስቶሳ ኦሱዋ ዲራው፥ ባሬ ሼምፑዋ ሼኔኮ ጊዴ፥ ሃዪቂ ኣቴዳ። ዉርሴꬃን፥ ታናዳን ፆሳ ካሊያዋንቶ፥ ጎዳይ ሂንቴንቶ ናሼቻ ኢሞ። ታኒ ካሴ ፃፌዳዋ ዛሬꬃዴ ፃፊያዌ ታና ዋዪሴና፤ ቃሲ ሄ ፃፊያዌ ሂንቴና ናጋና። ኢታባ ኦꬂያዋንቱፔ፥ ሄ ካናቱዋ ኤሻይ ዴዒያዋንቱፔ፥ ቃፃራይ ኮሼ ጊያ ኣሳቱዋፔ ናጌቲቴ። ኣዪሲ ጎፔ፥ ኑኒ ፆሳ ጌሻ ኣያናን ፆሳው ጎዪኒያ ዲራዉኔ ኑ ዴዑዋን ጎዳ ኪሪስቶሳ ዬሱሳን ናሼቲያ ዲራው፥ ቱሙ ቃፃራ ቃፃሬቴዳዋንታ፤ ኣሳቴꬃ ቦላ ኦሴቲያዋን ኣማኖኮ። ቃሲ ታው ታ ሁጲያንካ ታ ኣሳቴꬃን ኣማኔቲያዌ ዴዔ። ኣይ ኣሳይኔ ባሬ ኣሳቴꬃን ኣማኔቲያዌ ባሬው ዴዔ ጊዴ ቆፖፔ፥ ታኒ ኣፔ ሎይꬃ ኣꬋይ። ታኒ ዬሌቶዴፔ ሆስፑንꬃ ጋላሳን ቃፃሬታዲ። ታኒ ዬሌታን ኢስራዔሊያ፤ ቢኒያማ ዛሬ፤ ዋላካይ ባዪና ኣዪሁዳ ኣሳ። ኣዪሁዳ ሂጊያ ናጊያዋን ጊዶፔ፥ ታኒ ፓሪሳዌ፤ ኣዪሁዳ ኣማኖ ሴላ ጊዶፔ፥ ታኒ ኣማኒያዋንታ ዋዪሳዲ፤ ኢቲ ኡራይ ሙሴ ሂጌው ኣዛዜቲዴ ፂሊያዋ ባጋ ጊዶፔ፥ ታናን ፖኮባይ ቤቲቤና። ሺን ታና ጎዒያ ሄ ኡባባ ኪሪስቶሳ ዲራው ባዬዳዋዳን ፓይዳይ። ቱማካ፥ ሄዋንቱ ፃላላ ጊዴና፤ ታኒ ታ ጎዳ ኪሪስቶሲ ዬሱሳ ኤሪያዌ ኡባባፔ ሎይꬂ ኣꬊያ ዲራው፥ ኡባባ ታና ሙሌካ ጎዔናዋዳን ፓይዳይ፤ ታኒ ኣ ዲራው ኡባባ ዬጋ ባሻዲ። ኪሪስቶሳ ዴማናዉኔ ኣናና ዴዓናው ኡባባ ዎራ ኦሌዳዋዳን ፓይዳይ፤ ታኒ ሙሴ ሂጌው ኣዛዜታዴ ዴሚያ ታ ሁጴ ፂሎቴꬃይ ታው ባዋ። ኪሪስቶሳ ኣማኒና፥ ፆሳይ ኢሚያ ፂሎቴꬃይ፥ ኣማኑዋን ፆሳ ማታፔ ዪያ ፂሎቴꬃይ ታው ሃዒ ዴዔ። *** ታኒ ኪሪስቶሳኔ ኣ ዴንዱዋ ዎልቃ ኤራናው ኮያይ፤ ያታዴ ታኒ ታ ሁጴው ሃዪቁዋፔ ዴንዳና ያጊያዋን፥ ኣ ዋዪያ ኣናና ዋዬታናዉኔ ኣ ሃይቁዋን ኣ ማላታናው ኣሞታይ። *** ታኒ ሃዒ ዴማ ዲጋዲ ዎይ ታናን ባሊ ባዋ ጊኬ። ሺን ኪሪስቶሲ ዬሱሲ ታና ባሬው ኦꬄዳ ዎይታ ዴማና ጋዴ ኤሌላይ። ታናዳን ፆሳ ካሊያዋንቶ፥ ታኒ ሄዋ ዴማ ዲጋዲ ጋዴ ቆፒኬ፤ ሺን ታኒ ኢቲባ ኦꬃይ፤ ታፔ ጉዬና ዴዒያዋ ዶጋዴ ሲንꬃን ዴዒያዋ ኦይቃናው ዋꬌታይ። ፆሳይ ኪሪስቶሲ ዬሱሳ ባጋና ቦላ ዴዑዋሲ ፄሲያ ዎይታ ኣካናው፥ ታ ጋካናው ዎፃይ። ሲሚ ኑኒ ኣያናን ሚኔዳዋንቱ ኡባቱ ሃዋ ቆፓናው ቤሴ፤ ቃሲ ሂንቴፔ ኣማሬዳዋንቶ ኣያኒኔ ዱማ ቆፋይ ዴዖፔ፥ ሄዋካ ፆሳይ ሂንቴንቶ ቆንጪሳና። ጊዶፔካ፥ ኑኒ ሃኖ ጋካናው ዴዔዳ ማራዳን፥ ኣኔ ሲንꬃው ሄ ማራ ካሎይቴ። ታናዳን ፆሳ ካሊያዋንቶ፥ ታኒ ሃኒያዋዳን ሃኒቴ። ኑኒ ሂንቴንቶ ሌሚሱዋ ጊዴዶ፤ ሄዋዳን ሂንቴካ ኑኒ ሂንቴንቶ ሌሚሱዋ ጊዴዳ ማራ ካሊያዋንታ ኣኬኪቴ። ኣዪሲ ጎፔ፥ ታኒ ሄዋ ሂንቴንቶ ካሴ ጮራቶ ኦዳዲ፤ ቃሲ ሃዒ ላዔꬁዋካ ኣፎፃዴ ሂንቴንቶ ኦዳይ፤ ኪሪስቶሲ ማስቃሊያ ቦላ ሚሲማሪያን ꬊሼቲዴ ሃዪቄዳዎ ባሬንቱ ሼምፑ ባሬና ሞርኬ ኦꬄዳ ዳሮ ኣሳቱ ዴዒኖ። ኡንቱንቱ ዉርሴꬃይ ባሻ፤ ኡንቱንቱ ኡሉ ኡንቱንቶ ፆሳ፤ ዬላታናው ቤሲያዋን ኡንቱንቱ ኦቶሬቲኖ፤ ቃሲ ሃ ሳዓባ ፃላላ ቆፒኖ። ኣዪሲ ጎፔ፥ ኑ ቢታይ ሳሉዋና፤ ኑኒ ቃሲ ሳሉዋፔ ያና ኑና ኣሺያ ጎዳ ዬሱሲ ኪሪስቶሳ ናጌቶ። ኪሪስቶሲ ኡባባ ባሬፔ ጋርሳን ዎꬃናው ዳንዳዪያ ባሬ ዎልቃን፥ ኑ ዳቡራንቻ ኣሳቴꬃ ላሚዴ፥ ባሬ ቦንቾ ኣሳቴꬃ ማላቲሲዴ ኦꬃና። ታናዳን ፆሳ ካሊያዋንቶ፥ ታኒ ሲቂያዋንቶ፥ ላሞቲያዋንቶ፥ ታና ናሼቺያዋንቶ፥ ታና ꬎቁ ኦꬂያዋንቶ፥ ታ ዳባቶ፥ ሲሚ ጎዳን ሂንቴንቱ ሚኒ ኤቃናው ቤሴ። ኤዎዴኔ ሲንፂኬ፥ ሂንቴንቱ ላዑካ ቆፋን ኢቱዋ ጊዲዴ፥ ጎዳን ዴዓናዳን፥ ታኒ ሂንቴና ዞራይ። ቃሲ ታናና ኦꬂያ ኣማኔቴዳዎ፥ ኔኒ ሃ ማጫ ኣሳቱዋ ማዳናዳን፥ ታኒ ኔና ዎሳይ፤ ኣዪሲ ጎፔ፥ ኡንቱንቱ ታናናኔ ኡንቱንቱ ሱንꬃይ ፆሳ ዴዑዋ ማፃፋን ፃፌቴዳ ቃሌሚንፆሳና ቃሲ ታናና ኢቲፔ ኦꬂያ ሃራቱዋ ኡባና ዎንጋላ ኡባሳ ጋꬃናው ዳቡሬዲኖ። ጎዳና ሂንቴንቱ ዴዒያ ዴዑዋን ኡባ ዎዴ ናሼቲቴ፤ ታኒ ሃዋ ጉጃዴካ ጋይ፤ ናሼቲቴ። ኣሳይ ኡባይ ሂንቴንቱ ኣሺኬቴꬃ ኤሮ፤ ጎዳይ ማታን ያና። ፆሳ ሂንቴንቱ ዎሲያ ዎሳ ኡባን ኣ ሎይꬂ ጋላቲዴ፥ ሂንቴና ኮሺያዋ ኡባው ዎሲቴፔ ኣቲን፥ ኢቲባዉካ ሂርጎፒቴ። ቃሲ ኣሳ ኤራቴꬃ ኡባፔ ኣꬊያ ፆሳ ሳሮቴꬃይ ሂንቴንቱ ዎዛናኔ ሂንቴንቱ ቆፋ ጎዳ ዬሱሲ ኪሪስቶሳ ባጋና ናጋና። ዉርሴꬃን፥ ታናዳን ፆሳ ካሊያዋንቶ፥ ሂንቴንቱ ዎዛናን ሎዖባኔ ጋላቲሲያዋ ቆፒቴ፤ ቱማ ጊዲያባ ኡባ፥ ቦንቺሲያዋ ኡባ፥ ባዪዙዋ ጊዴናባ ኡባ፥ ጌሻባ ኡባ፥ ሲቁዋ ኡባ፥ ሱሬ ጊዲያባ ኡባ ቆፒቴ። ሂንቴንቱ ታፔ ታማሬዳዋ፥ ኣኬዳዋ፥ ሲሴዳዋኔ ቤዔዳዋ ኡባ ኦꬂቴ፤ ቃሲ ኑሲ ሳሮቴꬃ ኢሚያ ፆሳይ ሂንቴናና ኢቲፔ ጊዳናዋ። ሺን ዳሮ ዎዲያፔ ጉዪያን፥ ሃዒ ሂንቴንቱ ታዋ ላዔንꬁዋ ቆፓናው ዶሜዳ ዲራው፥ ታኒ ጎዳን ሎይꬃ ናሼታይ፤ ታው ቆፓናው ሂንቴንቶ ኢንጄቴናን ኢፄዳዋፔ ኣቲን፥ ታው ቆፋ ቆፒታ። ታኒ ሃዋ ታና ሜቴዳ ዲራው ጊኬ፤ ኣዪሲ ጎፔ፥ ታው ዴዒያባይ ታው ጊዳና ጊያዋ ታኒ ታማራዲ። ታኒ ሜቶቲዴ ዎቲ ዴዓኔንቶ ኤራይ፤ ቃሲ ዱሬቲዴ ዴዒያዌካ ኣዬንቶ ኤራይ፤ ሃቃን ጊዲናካ ኣዉዴ ጊዲናካ፥ ታኒ ካሉዋኔ ኮሻ ቃሲ ፓጫኔ ፓላሃ ታማራዲ። ኪሪስቶሲ ታው ኢሜዳ ዎልቃን፥ ኡባባ ኦꬃናው ታኒ ዳንዳያይ። ጊዶፔካ፥ ሂንቴንቱ ታ ሜቱዋ ታናና ሜቶቲዴ ዳሮ ሎይꬄዲታ፤ ፒሊጲሲዮሳ ኣሳው፥ ዎንጋላ ሚሺራቹ ኮይሮ ሂንቴ ጊዶን ኦዴቴዳ፤ ሺን ታኒ ማቂዶኒያፔ ኬሴዳ ዎዴ፥ ታና ኣማኒያ ሂንቴንቱፔ ኣቲን፥ ሃራይ ማዲቤናዋ ሂንቴንቱ ሂንቴንቱ ሁጴው ኤሪታ፤ ቃሲ ኢሚያባንካ ኣኪያባንካ ሂንቴፔ ኣቲን፥ ሃራይ ታና ማዲቤና። ኣዪሲ ጎፔ፥ ታና ሜቱ ኦይቄዳ ዎዴ፥ ሃራይ ኣቶ ታኒ ቴሴሎንቂያን ዴዒሺንካ ታና ዛሪ ዛሪዴ ማዴዲታ። ታኒ ሂንቴዋ ቦላ ሃራባይ ጉጄታናዋ ኮዪያዋፔ ኣቲን፥ ዎዪታ ፃላላ ኣካናው ኮዪኬ። ሺን ታኒ ሂንቴንቱ ኢሜዳዋ ኡባ ኣካዲ፤ ቃሲ ታው ፓላሂዴ ጊዲያዌ ዴዔ። ሂንቴ ኪቴዳ ኡባባ ኤፓፊሮዲቶሳፔ ኣካዲ፤ ኮሺያ ኡባይ ታው ዴዔ። ሂንቴ ታው ኪቴዳ ኢሙ ፆሳው ሳዉዋ ቶሺኩ ጊያኔ ኢ ዶሲያ፥ ኣ ናሼቺያ ያርሹዋ ማላ። ቃሲ ታ ፆሳይ ባሬ ቦንቾ ዱሬቴꬃ ዳሩዋን ኪሪስቶሲ ዬሱሳ ባጋና ሂንቴና ኮሺያዋ ኡባ ሂንቴንቶ ኢማና። ኑ ፆሳው፥ ኑ ኣዎ ሜꬊናፔ ሜꬊና ጋካናው ቦንቹ ጊዶ። ኣሜንዒ። ኪሪስቶሲ ዬሱሳዋ ጊዲያ ፆሳ ኣሳቱዋ ኡባቱዋ ሳሮ ጊቴ። ታናና ሃዋን ዴዒያ ኢሻቱ ሂንቴና ሳሮ ጊኖ። ሃዋን ዴዒያ ፆሳ ኣሳቱዋ ኡባቱ፥ ኡባፔካ ኣꬂዴ ካቲያ ቄሳሬ ጎሊያን ዴዒያዋንቱ ሂንቴና ሳሮ ጊኖ። ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴናና ጊዶ። ታኒ ጳዉሎሲ፥ ፆሳ ሼኒያን ኪሪስቶሲ ዬሱሲ ኪቴዳዋ ጊዴዳዌኔ ኑ ኢሻይ ፂሞቶሲ፥ ቆላሲያሳ ጊያ ካታማን ዴዒያ ፆሳ ናናቶ፥ ኪሪስቶሳን ኣማኔቴዳ ኢሻቶ ሃ ዳቢዳቢያ ፃፌቶ። ፆሳ ኑ ኣዉዋፔኔ ጎዳ ዬሱሲ ኪሪስቶሳፔ፥ ኣꬎ ኬካቴꬃዪኔ ሳሮቴꬃይ ሂንቴንቶ ጊዶ። ኑኒ ሂንቴንቶ ዎሲዴ፥ ኑ ጎዳ ዬሱሲ ኪሪስቶሳ ኣዉዋ፥ ፆሳ ኡባ ዎዴ ጋላቴቶ። ኣዪሲ ጎፔ፥ ኑኒ ኪሪስቶሲ ዬሱሳ ሂንቴንቱ ኣማኒያዋኔ ፆሳ ኣሳቱዋ ኡባ ሲቂያዋ ሲሴዶ። ቱሙ ኪታይ ዎንጋላይ ኮዪሮ ሂንቴኮ ዬዳ ዎዴ፥ ፆሳይ ሲንꬃፔ ኢማና ጌዳዋ ሲሴዲታ። ሲሚ ሂንቴንቱ ኣማኑኔ ሲቁ ሳሉዋን ጊጊዴ ናጊያ፥ ፆሳይ ሲንꬃፔ ኢማና ጌዳዋን ዶሜቴዳ። ሄ ዎንጌሊ ሂንቴኮ ጋኬዳ፤ ሂንቴንቱ ኣ ሲሶዴፔኔ ፆሳ ኣꬎ ኬካቴꬃ ቱማቴꬃን ኤሮዴፔ ዶሚዴ፥ ሂንቴንቱ ጊዶን ዴዒያዋዳንካ፥ ቢታ ኡባን ኣንጁዋ ኣሄኔ ኡባሳ ኣኬ። ሂንቴንቱ ሄዋ ኑናና ኢቲፔ ቆማ ጊዴዳ ሲቆ ኤፓፊራፔ ታማሬዲታ፤ ኢ ኑ ዲራው ኪሪስቶሳው ኣማኔቲዴ ኦꬂያዌ፥ ፆሳ ኣያናን ሃራቱዋ ሂንቴንቱ ሲቂያዋ ኑሲ ኦዴዳ። ሄዋ ዲራው፥ ኑኒ ቃሲ ሄዋ ሲሴዳ ጋላሳፔ ዶሚዴ፥ ፆሳይ ሂንቴንቶ ባሬ ሼኒያ ኤሪያ ኤራቴꬃ፥ ፆሳ ኣያናይ ኢሚያ ኣꬌዳ ኤራቴꬃናኔ ኣኬካና ኢቲፔ ኩንꬂዴ ኢማናዳን፥ ኡባ ዎዴ ባሌናን ፆሳ ዎሴቶ። ሄዋፔ ጉዪያን፥ ጎዳይ ኮዪያዋዳን ሂንቴንቱ ዴዓናዉኔ፥ ኡባ ዎዴ ኣ ናሼቺያባ ኦꬃናው ዳንዳያና፤ ሂንቴንቱ ኦꬂያ ሎዖ ኦሱዋ ኡባን ሂንቴንቱ ዴዑ ጎዓና ዴዒያዋ ጊዳናዋ፤ ቃሲ ፆሳ ኤሪያዋን ዲጪ ዲጪ ባኒታ። ሂንቴንቱ ኡባባኒ ናሼቻን ጌንጫናዳኒኔ ዳንዳያናዳን፥ ፆሳይ ባሬ ቦንቹዋ ጊታቴꬃዳን ኢሚያ ዎልቃ ኡባን ሚኒቴ። ቃሲ ፆሳ ናናቶ ጊጌዳ ፖዖ ካዉቴꬃ ላታናው፥ ኑና ዳንዳዪሴዳ ፆሳ ኣዉዋ ጋላቲቴ። ኢ ኑና ꬉማ ዎልቃፔ ኣሺዴ፥ ባሬ ሲቂያ ናዓ ካዉቴꬃኮ ፒንꬄዳ። ቃሲ ኢ ባሬ ናዓን ኑና ዎዚዴ፥ ኑ ናጋራ ኣቶ ጌዳ። ኪሪስቶሲ ቤቴና ፆሳ ቆንጪሲያዋ፤ ኢ ሜꬌቴዳዋ ኡባፔ ኣꬊያ ባይራ ናዓ። ኣዪሲ ጎፔ፥ ኡባባይካ ኣኒ ሜꬌቴዳ፤ ቤቲያዋንቱ፥ ቤቴናዋንቱ፥ ኣያናቱዋፔ ቤቲያ ዎልቃይኔ ጎዳቴꬃይ፥ ꬎቃቴꬃይኔ ማታይ፥ ሳሉዋኒኔ ሳዓን ዴዒያ ኡባባይካ ኣኒኔ ኣው ሜꬌቴዳ። ኢ ኡባባፔ ካሴ ዴዔዳ፤ ኡባባይካ ኣኒ ባሬ ሳዓ ሳዓ ኦይቂዴ ዴዔ። ኢ ባሬ ሁጴው፥ ዎሳ ጎሌው ሁጴኔ ዴዖ፤ ኢ ኡባፔ ቦላ ጊዳና ማላ፥ ካሴቲዴ ሃዪቁዋፔ ዴንዴዳ ባዪራ ናዓ ጊዴዳ። ኣዪሲ ጎፔ፥ ፆሳይ ኮዬዳዋዳን፥ ኣኒ ፆሳቴꬃ ኩሜንꬃይ ዴዔ። ያቲና ፆሳይ ኪሪስቶሳ ባጋና ኡባባ ባሬናና ሲጌꬃናው ዬዉዋ ቃቼዳ፤ ባሬ ናዓይ ማስቃሊያ ቦላን ጉሴዳ ሱꬃን ሳሉዋኒኔ ሳዓን ዴዒያ ኡባባ ባሬናና ሲጌꬄዳ። ሃዋፔ ካሴ፥ ሂንቴንቱ ኢታባ ቆፔዳ ዲራዉኔ ኦꬄዳ ዲራው፥ ፆሳፔ ሻኬቲዴ፥ ኣናና ሞርኬቴዲታ። ሺን ፆሳይ ሃዒ ሂንቴንታ ፖኮባይ ባዪናዋንታኔ ቃሲ ጌሻቱዋ ኦꬂዴ፥ ባሬ ሲንꬃ ሺሻናው፥ ባሬ ናዓ ሃዪቄዳዋ ኣሳቴꬃን ባሬናና ሂንቴንታ ሲጌꬄዳ። ሄዌ ሂንቴንቱ ቱሙ ኣማኑዋን ሚኒ ኤቂዴ፥ ሚሺራቹዋ ቃላ ሲሲዴ፥ ሲንꬃፔ ኣካና ጌዳዋፔ ቃፄናን ሚኒዴ ዴዖፔ ሃናና፤ ሄ ዎንጋላ ሚሺራቹ ሳዓን ዴዒያ ሜꬌታ ኡባ ማታን ኦዴቴዳ። ታኒ ጳዉሎሲካ ሚሺራቹዋ ቃላ ኦዲያዋ ጊዳዲ። ታኒ ሂንቴንቶ ዋዬቴዳ ዲራው፥ ሃዒ ናሼታይ፤ ኪሪስቶሲ ባሬ ሁጴው፥ ሄዋ ጊያዌ ዎሳ ጎሌው፥ ዋዬቲሺን ፓጬዳዋ ታኒ ታ ቦላ ሳኩዋን ኩንꬃይ። ፆሳይ ታና ሂንቴንታ ማዲያዋኔ ኣ ቃላ ፖላዴ ኦዲያ ኣሺካሬቴꬃ ኪታ ታው ኢሜዳ። ሃ ቃላይ ሃዋፔ ካሴ ባጋ ኡባን፥ ኣሳ ኡባው ኤሬቴናን ጌሚዴ ዴዔ፤ ሺን ባሬና ኣማኒያዋንቶ ፆሳይ ሃዒ ቆንጪሴዳ። ፆሳይ ኣዪሁዳ ጊዴና ኣሳው ዎꬄዳ ሃ ኣሳው ቆንጪቤና ቦንቹዋኔ ዱሬ ዬዉ ኣዬንቶ ጌሻቱዋ ኤሪሳናው ኮዬዳ፤ ሃ ኣሳው ሃዒ ቆንጬዳዌ ኣዬ ጎፔ፥ ኪሪስቶሲ ሂንቴንቱን ዴዒያዋ፤ ሄዋ ጊያዌ ፆሳ ቦንቹዋ ኣናና ሂንቴንቱ ኣካናዋ። ሄዋ ዲራው፥ ኑኒ ኣሳ ኡባው ኪሪስቶሳዋ ኦዴቶ፤ ኣሳ ኡባ ኪሪስቶሳን ኩሜንꬃ ኣሳ ኦꬂዴ፥ ፆሳኮ ሺሻና ማላ፥ ኑሲ ኣꬌዳ ኤራቴꬃ ኡባን ሂንቴንታ ሴሬቶኔ ታማሪሴቶ። ታኒ ሃዋ ፖላናው፥ ታናን ኦꬂያ ኪሪስቶሲ ታው ኢሚያ ዎልቃን ባፄታይኔ ዳቡራይ። ታኒ ሂንቴንቶኔ ሎዶቂያ ጊያ ካታማን ዴዒያ ኣሳቶኔ ቃሲ ታና ቤዒቤና ኣማኒያዋንቶ ኡባቶ ኣይ ኬና ባፄታዲታንቶ ሂንቴንቱ ኤራና ማላ ኮያይ። ኡንቱንቱ ዎዛናይ ሚናና ማላ፥ ሲቁዋን ኢቲፔ ጊዲዴ፥ ቱሙ ኣኬካን ቤቲያ ዱሬቴꬃ ኡባ ኡንቱንቱ ኣካና ማላኔ ቃሲ ኡንቱንቱ ፆሳይ ኣሳው ቆንጪሲቤናዋ፥ ኪሪስቶሳ ኣ ሁጴው ኤራና ማላ፥ ታኒ ዳቡራይ። ጌማን ፆሳይ ሚንጄዳ ኤራይኔ ኣꬌዳ ኤራቴꬃይ ኡባይ ኣኒ ዴዔ። ኦኒኔ ሂንቴንታ ጪሚያ ቃላን ባሌꬄና ማላ፥ ታኒ ሂንቴንታ ሃሳዪሳይ። ኣዪሲ ጎፔ፥ ታኒ ሂንቴንቱ ማታፔ ሃካዴ ዴዖፔካ፥ ኣያናን ሂንቴንቱና ዴዓይ፤ ሂንቴንቱ ዴዒያ ማራኔ ኪሪስቶሳ ሂንቴንቱ ሚኒዴ ኣማኒያዋ ቤዓዴ ናሼታይ። ሲሚ ሂንቴንቱ ጎዳ ኪሪስቶሲ ዬሱሳ ኣኬዳዋዳን፥ ኣኒ ዴዒቴ። ኣኒ ፃጱዋ ዬዲዴ ዲጪቴ፤ ሂንቴንቱ ታማሬዳዋዳን ኣማኑዋን ሚኒቴ፤ ፆሳ ኡባ ዎዴ ጋላቲቴ። ኪሪስቶሳፔ ጊዴና ቲሚርቲያን፥ ሃ ሳዓ ሞዲያ ኣያናቱዋ ቲሚርቲያኒኔ፥ ኣሳፔ ዬዳ ኤራቴꬃን፥ ቃሲ ሜላ ጪሙዋን ሂንቴንታ ኦኒኔ ኦሞዴና ማላ ናጌቲቴ። ኣዪሲ ጎፔ፥ ኪሪስቶሳ ኣሳቴꬃ ቦላን ፆሳቴꬃ ሜꬌታ ኩሜንꬃይ ዴዔ። ቃሲ ኡባ ኣያናቱዋ ካፖቴꬃዉኔ ጎዳቴꬃው ኡባው ሁጴ ጊዲያ ኪሪስቶሳፔ ኩሜንꬃ ዴዑዋ ዴሜዲታ። ሂንቴንቱ ኪሪስቶሳና ኢቲ ኣሳ ማላ ጊዲዴ፥ ኣሳ ቃፃራ ማላ ጊዴናን፥ ሂንቴንቱ ናጋራንቻ ሜꬌታ ዲጊያ ቃፃራ፥ ሃዌካ ኣሹዋ ቃፃራ ጊዴናን ኪሪስቶሲ ኦꬄዳዋ። ሂንቴንቱ ፃማቄቴዳ ዎዴ፥ ኪሪስቶሳና ሞጌቲዴ፥ ኪሪስቶሳ ሃዪቁዋፔ ዴንꬄዳ ፆሳ ዎልቃ ኣማኔዳ ዲራው፥ ኦራꬃ ዴዑዋሲ ፂንቃታን ኪሪስቶሳና ኢቲፔ ዴንዴዲታ። ሂንቴንቱ ሂንቴንቱ ናቁዋኒኔ ሂንቴንቱ ኤጫ ኣሳቴꬃ ቃፃሬቴናን ኣጌዳዋን ሃዪቂዴ ዴዒያ ዎዴ፥ ፆሳይ ሂንቴንቱ ናቁዋ ኣቶ ጊዴ፥ ኪሪስቶሳና ሂንቴንታ ፓፃ ዎꬄዳ። ኑና ኢፂያ፥ ኣጩዋ ፓራማ ኣ ጫቁዋና ኢቲፔ ፆሳይ ዳኬዳ፤ ማስቃሊያ ቦላን ꬊሺዴ፥ ኦጊያፔ ዲጌዳ። ኪሪስቶሲ ሄ ማስቃሊያን ካፓቱዋፔኔ ጎዳቱዋፔ ዎልቃ ዎꬂ ኣኪዴ፥ ባሬ ፆኑዋኔ ኦሞዴቴዳዋንታ ቆንጪያን ቤሴዳ። ሄዋ ዲራው፥ ሙሳን ዎይ ኡሻን፥ ባላ ጋላሳ ዎይ ኣጌናይ ፄሪያ ዎዲያ ቦንቺያዋን፥ ዎይ ሳምባታ ቦንቺያዋን፥ ኦኒኔ ሂንቴንቱ ቦላ ፒርዶፖ። ሃዋንቱ ሲንꬃፔ ያና ዬዋቱዋሲ ኤሹዋ፤ ሺን ቱማቴꬃይ ኪሪስቶሳዋ። ዎርዱዋ ኣሺኬ ማላታናዉኔ ኪታንቻው ጎዪናናው ኮዪያዌ፥ ቤዒቤናዋ ሳፃን ቤዓዲ ጊዴ ኦቶሬቲያዌ፥ ኣሳቴꬃ ቆፋን ጮ ኣዪያዌ፥ ኦኒኔ ሂንቴንቱ ቦላ ፒርዶፖ። ሄዋ ማላ ኣሳይ ሁጴ ጊዲያ ኪሪስቶሳ ሚኒሲ ኦይቄዳዋ ሌፒሴ። ቦላ ኡባይ ሄ ሁጲያፔ ዎልቃ ዴሚዴ፥ ቦላን ዴዒያ ኩሪያናኔ ፃጱዋና ኢቲፔ ኦይቄቲዴ፥ ፆሳይ ዲቺያ ዲሹዋዳን ዲጬ። ሂንቴንቱ ሃ ሳዓ ሞዲያ ኣያናቱዋፔ ሃኪዴ፥ ኪሪስቶሳና ሃዪቄዲታ፤ ያቲና፥ ኣዪሲ ሃ ሳዓ ዎጋን ዴዒያ ኣሳዳን ዴዒቴ? «ኦይቆፓ፤ ባራ ቤዖፓ፤ ቦቾፓ» ያጊያ ሂጌቶ ኣዪሲ ኣዛዜቲቴ? *** ሃ ኡባባይካ ኣሳይ ሜꬌዳ ሂጌኔ ቲሚርቴ ጊዲያ ዲራው፥ ዎዲያፔ ጉዪያን ꬋያና። ኡንቱንቱ ኪታንቻው ጎዪኒያዋኒኔ ዎርዱዋ ኣሺኬ ማላቲያዋን ቃሲ ባሬንቱ ኣሳቴꬃ ጊልቂሲያዋን ኣꬌዳ ኤራንቻ ማላቲኖ፤ ሺን ኣሹዋ ኣሙዋ ዲጋናው ጎዔና። ሲሚ ሂንቴንቱ ኪሪስቶሳና ሃዪቁዋፔ ዴንዴዳዋ ጊዶፔ፥ ፆሳፔ ኡሼቻ ባጋና ኡቴዳ ኪሪስቶሲ ዴዒያሳን ሳሉዋን ዴዒያዋ ሚኒሲ ኮዪቴ። ሳሉዋን ዴዒያዋ ሂንቴንቱ ቆፓናፔ ኣቲን፥ ሳዓን ዴዒያዋ ቆፖፒቴ። ኣዪሲ ጎፔ፥ ሂንቴንቱ ሃዪቄዲታ፤ ቃሲ ሂንቴንቱ ሼምፑ ፆሳን ኪሪስቶሳና ጌሜዳ። ሂንቴው ዴዖ ጊዴዳ ኪሪስቶሲ ቆንጪያ ዎዴ፥ ሄ ዎዴ ሂንቴካ ኣናና ቦንቹዋን ቆንጫና። ሄዋ ዲራው፥ ሂንቴንቱን ዴዒያ ሃ ሳዓ ኣሞቱዋ ዎꬊቴ፤ ሄዋንቱካ ዎሹሚያዋ፥ ቱናቴꬃ፥ ዎሹማናው ኮዪያዋ፥ ኢታ ኣሙዋ፥ ሚሻ ኣሞቲያዋ። ዮራንቻ ጊዱሳይ ኤቃው ጎዪኒያዋፔ ዱማቴና። ሃዋንቱ ጋሱዋን፥ ፆሳይ ኣዛዜቴና ኣሳቱዋ ሃንቄታናዋ። ካሴ ሂንቴንቱ ሃ ኢታ ቆፋቱዋን ዴዒያ ዎዴ ኡንቱንቱን ሞዴቴዲታ። ሺን ሃዒ ሂንቴንቱ ቃሲ ሃንቁዋ፥ ዪሉዋ፥ ኢፁዋ፥ ሂንቴንቱ ዶናፔ ኬሲያ ጫሻኔ ዬላዪያ ሃሳያ ሃዋንታ ኡባ ሂንቴፔ ꬋዪሲቴ። ኢቱ ኢቶ ዎርዶቶፒቴ፤ ኣዪሲ ጎፔ፥ ናጋራንቻ ሜꬌታ ኣ ኦሱዋና ሂንቴፔ ꬋዪሲ ዲጊዴ፥ ፆሳይ፥ ኣ ሜꬌዳዌ፥ ባሬና ማላቲሳናዉኔ ባሬው ዴዒያ ኤራቴꬃ ኡባ ኢማናው፥ ኡባ ዎዴ ኦራꬂያ ኦራꬃ ሜꬌታ ማዬዲታ። ሃ ኦራꬃ ሜꬌታን፥ ጊሪኬ ኣሳ ዎይ ኣዪሁዳ ኣሳ፥ ቃፃሬቴዳዋ ዎይ ቃፃሬቲቤናዋ፥ ኢማꬃቱዋኔ ኣይኔ ታማሪቤናዋ፥ ኣዪሊያ ዎይ ዎማኑዋ ጊዴ ሻኪያባይ ባዋ፤ ሁጴ ኣላሊ ኪሪስቶሳ፤ ኢ ኡባንካ ዴዔ። ሄዋ ዲራው፥ ፆሳይ ዶሬዳዋንቱዳን፥ ጌሻኔ ሲቂያዋንታ ጊዲዴ፥ ማሮቴꬃ፥ ቃሬታ፥ ኬካቴꬃ፥ ሂንቴንቱ ሁጲያ ካዉሺያዋ፥ ኣሺኬቴꬃኔ ዳንዳያ ማዪቴ። ኢቱ ኢቱዋዋ ዳንዳዪቴ፤ ኦኒኔ ባሬ ላጊያ ቦላ ሃንቄቴዳዌ ዴዖፔ፥ ኢቱ ኢቶ ኣቶ ያጎ። ኪሪስቶሲ ሂንቴንቶ ኣቶ ጌዳዋዳን፥ ሂንቴካ ኣቶ ጊቴ። ሄዋ ኡባ ቦላ፥ ኡባባ ኢቲፔ ሺሺ ቃቺያ ሲቁዋ ማዪቴ። ኪሪስቶሲ ኢሚያ ሳሮቴꬃይ ሂንቴንታ ሞዶ፤ ኣዪሲ ጎፔ፥ ፆሳይ ሂንቴንታ ኢቲ ኣሳ ኡዲዴ፥ ሄ ሳሮቴꬃው ፄሴዳ ፆሳ ጋላቲቴ። ኪሪስቶሳ ቃላይ ሂንቴንቱ ዎዛናን ኩሚዴ ዴዖ፤ ሂንቴንቶ ዴዒያ ኣꬌዳ ኤራቴꬃ ኡባን ኢቱ ኢቱዋ ታማሪሲቴኔ ዞሪቴ፤ ሂንቴንቱ ዎዛናን ፆሳ ጋላቲዴ፥ ዎሳኔ ማዚሙሪያ፥ ፆሳ ሱንꬃ ꬎቁ ኦꬂያ ዬꬃ ዬፂቴ። ሂንቴ ኣይ ሃሳዪያዋ ዎይ ኣይ ኦꬂያዋ ጊዶፔካ፥ ኣዉዋ ፆሳ ዬሱሳ ባጋና ጋላቲዴ፥ ኦꬂያዋ ኡባ ጎዳ ዬሱሳ ሱንꬃን ኦꬂቴ። ማቼቶ፥ ኣማኒያ ኣሳው ቤሲያዋዳን፥ ሂንቴንቱ ኣሲናው ሞዴቲቴ። ኣቱማ ኣሳቶ፥ ሂንቴንቱ ማጫ ኣሳ ሲቂቴ፤ ኡንቱንቱና ዎፑ ጊዴ ዴዒቴ። ናቶ፥ ሂንቴንታ ዬሌዳዋንቶ ኡባባኒ ኣዛዜቲቴ። ኣዪሲ ጎፔ፥ ሂንቴንቱ ኡንቱንቶ ኣዛዜቲያዌ ፆሳ ዳሮ ናሼቼ። ኣዋቶ፥ ሂንቴንቱ ናናይ ዎዛና ባዬና ማላ፥ ኡንቱንታ ዪሎዮፒቴ። ኣዪሌቶ፥ ሳዓን ሂንቴንቶ ጎዳ ጊዲያዋንቶ ኡባባኒ ኣዛዜቲቴ፤ ጎዳው ያዪዴ፥ ሱሬ ዎዛናን ኦꬂቴፔ ኣቲን፥ ኣሳ ናሼቻናዉኔ ኣሳይ ቤዖ ጊያዋን ኣዛዜቲያዋንታ ጊዶፒቴ። ሂንቴ ኦꬂያ ኦሱ ኡባ ኣሳው ጊዴናን ጎዳው ኦꬂያዋዳን፥ ዎዛናፔ ኦꬂቴ። ጎዳ ኪሪስቶሳው ሂንቴንቱ ኦꬂያ ዲራው፥ ኢ ባሬዋንቶ ኢማናው ጊጊሲ ዎꬄዳዋ ሂንቴንቱ ላታናዋ ኣኬኪቴ። ባላባ ኦꬄዳ ኡራይ ኦኒኔ፥ ባሬ ኦꬄዳ ባላዳን ዎይታ ኣካና፤ ኣዪሲ ጎፔ፥ ፆሳይ ፒርዲዴ፥ ኦናኔ ማዴና። ጎዳቶ፥ ሂንቴዉካ ሳሉዋን ጎዳይ ዴዒያዋ ኤሪዴ፥ ሂንቴንቱ ኣዪሌቶ ፂሎቴꬃኒኔ ሱሬቴꬃን ኮሺያዋ ኦꬂቴ። ፆሳ ኣጌናን ዎሲቴ፤ ቃሲ ዎሲዴ ኣዛሌናን፥ ኣ ጋላቲዴ ዎሲቴ። ቃሲ ሂንቴንቱ ዎሲያ ዎዴ ኡባን፥ ካሴዴፔ ኣሳው ቆንጪቤናዋ፥ ኪሪስቶሳዋ ኑኒ ኦዳና ማላ፥ ፆሳይ ኑሲ ኢንጄያናዳን፥ ኑሲካ ፆሳ ዎሲቴ፤ ኣዪሲ ጎፔ፥ ሃዒ ታኒ ቃሾ ጎሊያን ዴዒያዌ ሄዋሳ። ቃሲካ ታኒ ቤሲያዋ ኬና ቆንጪሳዴ ሃ ዬዉዋ ኦዳና ማላ፥ ታው ፆሳ ዎሲቴ። ሂንቴው ዴዒያ ዎዲያ ጎዒ ባዪናሳን ꬋዪሴናን፥ ኣማኔናዋንቱ ማታን ጪንጫቴꬃን ዴዒቴ። ሂንቴንቱ ኣሳ ኡባው ዎቲ ዛራናው ቤሲንቶ ኤራና ማላ፥ ሂንቴንቱ ሃሳያይ ኡባ ዎዴ፥ ሲሳናው ሎዒያዋኔ ናሼቺያዋ ጊዳናው ቤሴ። ኑ ሲቆ ኢሻይ ቲኪቆሲ፥ ታናና ኢቲፔ ጎዳ ኦሱዋን ቆማ ጊዴዳ ኣማኔቲያ ኦሳንቻይ፥ ታ ዴዑዋባ ሂንቴንታ ኤሪሳና። ታኒ ኣ ሂንቴኮ ኪቲያዌ፥ ኑኒ ዋኒ ዴዒንቶ ሂንቴንቶ ኢ ኦዲዴ፥ ሂንቴንታ ሜንꬄꬃና ዲራሳ። ኣናሲሞሲ፥ ኣማኔቲያ ሲቆ ኢሻይ፥ ሂንቴንቱ ጋዴዌ፥ ኣናና ኢቲፔ ሂንቴኮ ቤ፤ ኡንቱንቱ ሃዋን ሃኒያ ኡባባ ሂንቴንታ ኤሪሳና። ታናና ቃሹዋን ዴዒያ ኣሪስፂሮኮሲኔ ባርናባሳው ኣዉዋ ጊዴዳ ማርቆሲ ሂንቴንታ ሳሮቲኖ፤ ታኒ ሂንቴንታ ካሴ ኣዛዜዳዋዳን፥ ማርቆሲ ሂንቴኮ ቦፔ፥ ዎዛናፔ ኣ ሞኪቴ። ዮስፆሳ ጊያ ዬሱሲካ ሂንቴንታ ሳሮ ሳሮ ጌ፤ ኣዪሁዳ ኣሳቱዋፔ ታናና ፆሳ ካዉቴꬃው ኦꬂያዌ፥ ሃ ሄዙ ኣሳቱዋፔ ሃራይ ባዋ፤ ሃዋንቱ ታና ዳሮ ማዴዲኖ። ኤፓፊሪ፥ ሂንቴንቱ ጋዴዌ፥ ኪሪስቶሲ ዬሱሳ ቆማይ፥ ሂንቴንታ ሳሮ ሳሮ ጌ። ኢ ሂንቴንቱ ፆሳን ሚኒዴ ኤቃናዳኒኔ ፆሳይ ኮዪያዌ ኡባይ ኣዬንቶ ኤሪዴ፥ ፖሊ ኣማናናዳን፥ ኡባ ዎዴ ፆሳ ሚኒሲ ዎሴ። ኣዪሲ ጎፔ፥ ኢ ሂንቴንቶ፥ ሎዶቂያ ኣሳዉኔ ሂራፖሊሳ ጊያ ካታማ ኣሳው ዳሮ ዳቡሪያዋ ታኒ ማርካታይ። ኑ ሲቆ ዶቶሪ ሉቃሲኔ ዴማሲ ሂንቴንታ ሳሮ ዴዒቴ ያጊኖ። ሎዶቂያን ዴዒያ ኑ ኢሻቶኔ ኒምፒው ቃሲ ኢዚ ጎሊያን ሺቂያ ኣማኒያ ኣሳቶ ኑ ሳሮታ ኦዲቴ። ሃ ዳቢዳቢያ ሂንቴንቱ ናባቤዳዋፔ ጉዪያን፥ ሎዶቂያ ኣማኒያዋንቶካ ናባቢሲቴ፤ ሂንቴካ ሎዶቂያ ኣማኒያዋንቱካ ሂንቴንቶ ዬዲያ ዳቢዳቢያ ናባቢቴ። ቃሲ ኣርኪፖሳው፥ «ጎዳይ ኔው ኢሜዳ ኦሱዋ ፖላናዋ ዶጎፓ» ያጊዴ ኦዲቴ። ታኒ ጳዉሎሲ፥ ታ ኩሺያን ሳሮታ ፃፌዳዋ ሃዋ ቤዒቴ፤ ታኒ ቃሹዋን ዴዒያዋ ዶጎፒቴ። ፆሳ ኣꬎ ኬካቴꬃይ ሂንቴንቱና ጊዶ። ኑኒ ጳዉሎሲ፥ ሲላሴኔ ፂሞቶሲ ቴሴሎንቄን ዴዒያ ኣማኒያ ኣሳቶ ሃ ዳቢዳቢያ ፃፌቶ፤ ሄዋንቱ ፆሳ ኑ ኣቡዋንቶኔ ጎዳ ዬሱሲ ኪሪስቶሳዋንቶ፥ ኣꬎ ኬካቴꬃይኔ ሳሮቴꬃይ ጊዶ። ኑኒ ዎሳን ፆሳ ጋላቲዴ፥ ኡባ ዎዴ ሂንቴና ኡባቱዋ ሃሳዬቶ። ኑኒ ኑ ፆሳ፥ ኑ ኣዉዋ ሲንꬃን ኣማኑዋን ሂንቴንቱ ኦꬄዳ ኦሱዋኔ፥ ሲቁዋን ሂንቴንቱ ዳቡሬዳ ዳቡራ፥ ቃሲ ኑ ጎዳ ዬሱሲ ኪሪስቶሳን ሂንቴው ዴዒያ ሂዶታን ጌንጪያ ጌንጩዋ ኡባ ዎዴ ሃሳዬቶ። ኑናዳን ፆሳ ካሊያዋንቶ፥ ፆሳይ ሂንቴና ሲቂያዋኔ ሂንቴና ባሬው ናና ኦꬃናው ዶሬዳዋ ኑኒ ኤሬቶ። ኣዪሲ ጎፔ፥ ኑኒ ዎንጋላ፥ ዎልቃን፥ ጌሻ ኣያናኒኔ ሄ ዎንጌሊ ቱማ ጊዴዳዋ ዉርሲ ኣማኒያዋን ሂንቴንቶ ኣሄዳዋፔ ኣቲን፥ ኣሳ ቃላ ፃላላን ኣሂቤይኮ። ኑኒ ሂንቴናና ዴዒያ ዎዴ፥ ሂንቴንቱ ዲራው ዋኒ ዴዔዴንቶ፥ ሂንቴንቱ ኤሪታ። ቃሲ ሂንቴንቱ ዳሮ ዋዬቶፔካ፥ ጌሻ ኣያናይ ኢሜዳ ናሼቻን ኪታ ኣኬዲታ፤ ሄዋን ኑ ሌሚሱዋኔ ጎዳዋ ካሌዲታ። ሄዋ ዲራው፥ ማቂዶኒያኒኔ ኣካዪያ ጊያ ጋዲያን ዴዒያ ኣማኒያ ኡባቶ ሌሚሱዋ ጊዴዲታ። ኣዪሲ ጎፔ፥ ጎዳ ቃላይ ሂንቴፔ ኬሲዴ፥ ማቂዶኒያኒኔ ኣካዪያ ፃላላን ሲሴቲቤና፤ ሺን ፆሳ ሂንቴንቱ ኣማኒያዌ ኡባሳን ሲሴቴዳ። ሲሚ ኑኒ ሃሳያናው ኮሺሺን ኣቶዌ ኣይኔ ባዋ። ኣዪሲ ጎፔ፥ ኑኒ ሂንቴኮ ቤዳ ዎዴ፥ ሂንቴንቱ ኑና ዎቲ ሞኬዴንቶኔ ቃሲ ሂንቴንቱ ሂንቴንቱ ኤቃው ኦꬂያዋ ኣጊዴ፥ ዎርዶቴና ዴዑዋ ፆሳው ኦꬃናው ዋኒ ፆሳኮ ሲሜዲቴንቶ፥ ኡንቱንቱ ባሬንቱ ሁጲያን ሃሳዪኖ። ቃሲ ፆሳ ናዓይ ዬሱሲ፥ ፆሳይ ሃዪቁዋፔ ዴንꬄዳዌ፥ ኑና ሲንꬃፔ ያና ፆሳ ሃንቁዋፔ ኣሺያዌ ሳሉዋፔ ያናዋ ሂንቴንቱ ናጊያዋ ኡንቱንቱ ሃሳዪኖ። ኑናዳን ፆሳ ካሊያዋንቶ፥ ኑኒ ሂንቴኮ ቤዳዌ ሜላ ጊዴናዋ ሂንቴንቱ ሂንቴንቱ ሁጴው ኤሪታ። ሺን ኑኒ ሂንቴኮ ያናፔ ካሴ ፒሊጲሲዮሳ ጊያ ካታማን ዋዬቴዳዋኔ ቦሬቴዳዋ ሂንቴንቱ ኤሪታ፤ ዳሮ ጳልቄꬃይ ዴዖፔካ፥ ሂንቴንቶ ኣ ሚሺራቹዋ ቃላ ኦዳና ማላ፥ ፆሳይ ኑሲ ሚኖቴꬃ ኢሜዳ። ኑኒ ሂንቴና ዎሲያዌ ባሊዴ ዎይ ቱናቴꬃን ዎይ ጌኒያን ጊዴና። ሺን ፆሳይ ዎንጋላ ሃዳራ ኣካናው ኑኒ ኣማኔቲያዋንታ ጊዲና፥ ኑሲ ሄ ሃዳራ ኢሜዳ፤ ሄ ኢሜዳዋዳንካ ኑኒ ሃሳዬቶ። ቃሲ ኑኒ ኑ ዎዛና ፆሞሲያ ፆሳ ናሼቺያዋዳን ሃሳዬቶፔ ኣቲን፥ ኣሳ ናሼቺያዋዳን ሃሳዮኮ። ኑኒ ሂንቴኮ ጪሚያ ሃሳያና፥ ዎይ ኑኒ ዮራ ጌንꬂያ ሃኖታን ዪቤናዋ ሂንቴንቱ ሎይꬂ ኤሪታ፤ ፆሳይካ ኑሲ ማርካ። ኑኒ ኣሳፔ፥ ዎይ ሂንቴፔ፥ ዎይ ሃራንቱ ኦፔኔካ ቦንቹዋ ኣካናው ኮዪቤይኮ። ኑኒ ኪሪስቶሲ ኪቴዳዋንታ ጊዲዴ፥ ቦንቹዋ ሂንቴንቱፔ ኦቻናው ዳንዳዬቶ። ሺን ኣታ ባሬ ናናቱዋ ሲቁዋን ዲቺያዋዳን፥ ሂንቴንቱ ጊዶን ኣሺኬ ጊዴዶ። ሂንቴንቱ ኑሲ ዳሮ ኣልዖ ጊዴዳ ዲራው፥ ፆሳ ዎንጋላ ሂንቴንቶ ኢማናዋ ፃላላ ጊዴናን፥ ኑ ዴዑዋካ ሂንቴንቶ ኢማናው ጊጊ ኡቴዶ፤ ኣዪሲ ጎፔ፥ ሂንቴና ኑኒ ሎይꬂ ሲቄዶ። ኑናዳን ፆሳ ካሊያዋንቶ፥ ኑ ኦሱዋኔ ኑ ዳቡራ ሂንቴንቱ ኣኬኪታ፤ ሂንቴንቶ ፆሳ ሚሺራቹዋ ቃላ ኦዲዴ፥ ሂንቴና ኣዪኔ ዋዪሴና ማላ፥ ቃማኔ ጋላሲ ኑኒ ኦꬄዶ። ኑ ዴዑ ሂንቴንቱ ማታን፥ ኣማኒያዋንቱ ማታን፥ ጌሻ፥ ፂሎኔ ቦሬቴናዋ ጊዲያዎ ሂንቴኔ ፆሳይ ማርካ። ኑኒ ሂንቴንቶ ሁጲያን ሁጲያን ኣዉ ባሬ ናናው ሃኒያዋዳን ሃኔዳዋ ኤሪታ። ኑኒ ሂንቴና ዞሬዶ፤ ሜንꬄꬄዶኔ ሂንቴንቶ ማርካቴዶ። ሄዌኔካ ሂንቴና ፄሴዳ ፆሳ ናሼቺያ ዴዑዋ ሂንቴንቱ ዴዓናዳናኔ ኣ ካዉቴꬃኔ ኣ ቦንቹዋ ጌላናዳና። ሂንቴ ኑፔ ፆሳ ቃላ ቱማ ጊዴዳዋዳን ኣኬዳ ዎዴ፥ ፆሳ ኪታዳን ኣኬዳዋፔ ኣቲን፥ ኣሳ ኪታዳን ኣኪቤና ዲራው፥ ፆሳ ቃላይ ኣማኒያ ሂንቴናን ኦꬄ፤ ሄ ጋሱዋን ኑኒ ፆሳ ኡባ ዎዴ ጋላቴቶ። ኣዪሲ ጎፔ፥ ኑናዳን ፆሳ ካሊያዋንቶ፥ ኪሪስቶሲ ዬሱሳን ኢቱዋ ጊዴዳ ዪሁዳ ጊያ ጋዲያን ዴዒያ ኣማኒያዋንታ፥ ሂንቴንቱ ሌሚሴቲታ፤ ሄዋንቱ ፆሳ ኣማኒያዋንታ። ኣዪሁዳቱ ኡንቱንታ ዋዪሴዳዋዳን፥ ሂንቴንቱ ቢታ ኣሳይካ ሂንቴና ዋዪሴዳ። ሄ ኣዪሁዳቱ ጎዳ ዬሱሳኔ ናባቱዋ ዎꬌዲኖ፤ ቃሲ ኑና ዬዴርሴዲኖ። ኡንቱንቱ ፆሳ ናሼቺኪኖ፤ ኣሳ ኡባካ ኢፂኖ። ኣዪሁዳ ጊዴና ኣሳይ ኣታና ማላ፥ ኑኒ ኡንቱንቶ ቃላ ኦዲያዋ ዲጊኖ። ቃሲ ኡንቱንቱ ናጋራይካ ኡባ ዎዴ ዳሪ ዳሪ ቤ። ሺን ዉርሴꬃን ፆሳ ሃንቁ ኡንቱንቱ ቦላ ዎꬌዳ። ሺን ኑናዳን ፆሳ ካሊያዋንቶ፥ ኑኒ ኑ ቆፋን ጊዴናዳን፥ ኣሳቴꬃ ፃላላን ሂንቴፔ ጉꬃ ዎዴው ሻኬቴዳ ዎዴ፥ ሂንቴና ዳሮ ላሞቲዴ፥ ኣይፊያን ቤዓናው ሎይꬂ ኮዬዶ። ኣዪሲ ጎፔ፥ ኑኒ ሂንቴኮ ሲሚዴ ባናው ኮዬዶ። ኡባ ታኒ ጳዉሎሲ ዛራ ዛራዴ ሂንቴኮ ባናው ማላ ቤዓዲ፤ ሺን ሴፃናይ ኑና ዲጌዳ። ኣዪሲ ጎፔ፥ ኑ ጎዳ ዬሱሲ ኪሪስቶሲ ዪያ ዎዴ፥ ኑኒ ቤዓና ጊዴ ናሼቻን ናጊያዌ፥ ዎይ ኑ ናሼቻይ፥ ዎይ ኑኒ ጬቄቲያ ኣኪሊሊ ኦኔ? ሂንቴና ጊዲኪቴዬ? ኣዪሲ ጎፔ፥ ሂንቴንቱ ኑ ቦንቹዋኔ ኑ ናሼቻ። ሄዋ ዲራው፥ ኑሲ ጌንጫናው ዳንዳዬቴናን ኢፄዳ ዎዴ፥ ኣቴና ጊያ ካታማን ኑሬካ ኣታናው ቆፋ ቃቼዶ። ሂንቴና ዞራናዳኒኔ ሂንቴንቱ ኣማኑዋን ሂንቴና ሚኒሳናዳን፥ ፆሳው ኦꬂያ ኑ ኢሻ፥ ኑናና ኢቲፔ ኪሪስቶሳ ሚሺራቹዋ ቃላ ኦዲያ ፂሞቶሳ ሂንቴኮ ኪቴዶ። ሃ ዋዪያ ጋሱዋን ሂንቴፔ ኦኒኔ ጉዬ ሲሜና ማላ፥ ኣ ኪቴዶ። ኑኒ ሄዎ ዶሬቴዳዋ ሂንቴንቱ ሂንቴንቱ ሁጴው ኤሪታ። ኣዪሲ ጎፔ፥ ኑኒ ሂንቴናና ዴዒዴ፥ ኑኒ ዋዬታናዋ ካሴቲዴ ሂንቴንቶ ኦዴዶ፤ ቃሲ ሂንቴንቱ ኤሪያዋዳንካ ካሴ ሄዋዳን ሃኔዳ። ሄዋ ዲራው፥ ቃሲ ጌንጫናው ታው ዳንዳዬቴናን ኢፄዳ ዎዴ፥ «ኦኒ ኤሪ ፃላሂያ ካፑ ሂንቴና ፓጬናን ኣጌና። ኑ ዳቡራዪካ ሜላ ጊዴናን ኣጌና» ያጋዴ ሂንቴንቱ ኣማኑዋ ኤራናው ፂሞቶሳ ሂንቴኮ ኪታዲ። ሺን ሃዒ ፂሞቶሲ ሂንቴንቱ ማታፔ ኑኮ ዪዴ፥ ሂንቴንቱ ኣማኑዋባኔ ሂንቴንቱ ሲቁዋባ ሂንቴንቶ ሚሺራቹ ጊዴ ኑሲ ኦዴዳ። ቃሲ ኑኒ ሂንቴና ቤዓናው ላሞቲያዋዳን ሂንቴካ ኑና ቤዓናው ላሞቲዴ፥ ኡባ ዎዴ ኑሲ ሎዖባ ቆፒያዋ ኢ ኦዴዳ። ሄዋ ዲራው፥ ኑናዳን ፆሳ ካሊያዋንቶ፥ ኑ ዋዪያኒኔ ኑ ቱጋን ኡባን ሂንቴንቱ ኣማኑዋ ባጋና ሂንቴዋን ኑ ሚኔቴዶ። ጎዳን ሚኒዴ ሂንቴንቱ ዴዖፔ፥ ኑኒካ ሃዒ ዴዔቶ። ኣዪሲ ጎፔ፥ ኑኒ ሂንቴባው ፆሳ ጋላቴቶ። ኑኒ ኑ ፆሳ ሲንꬃን ሂንቴንቱ ዲራው ዴዒያ ናሼቻ ኡባው ኣ ዳሮ ጋላቴቶ። ኑኒ ሂንቴና ቤዓናዉኔ ሂንቴንቱ ኣማኖ ፓጬዳዋ ኩንꬃናው፥ ቃማኔ ጋላሲ ኑ ኩሜንꬃ ዎዛናፔ ፆሳ ዎሴቶ። ኑ ኣዉ፥ ኑ ፆሳይ ባሬ ሁጴው፥ ቃሲ ኑ ጎዳይ ዬሱሲ ኪሪስቶሲ ኑኒ ሂንቴኮ ቢያ ኦጊያ ኑሲ ጊጊሶ። ኑኒ ሂንቴና ሎይꬂ ሲቂያዋዳን፥ ጎዳይ ሂንቴንቱ ኢቱ ኢቱዋ ሲቂያ ሲቁዋኔ ቃሲ ኣሳ ኡባ ሲቂያ ሲቁዋ ሂንቴንቶ ዳሪሶኔ ጉጆ። ኑ ጎዳይ ዬሱሲ ባሬ ጌሻቱዋ ኡባና ዪያ ዎዴ፥ ኑ ፆሳ፥ ኑ ኣዉዋ ሲንꬃን ሂንቴ ዎዛናይ ጌሻኔ ፖኩ ባይናዋ ኡዲዴ፥ ሂንቴና ኢ ሜንꬄꬆ። ሲሚ ዉርሴꬃን፥ ኑናዳን ፆሳ ካሊያዋንቶ፥ ፆሳ ናሼቻናው ሂንቴንቱ ዋኒ ዴዓናው ቤሲንቶ፥ ኑፔ ታማሬዲታ። ሄዌ ሂንቴንቱ ካሴዴፔ ዴዒያ ማራ፤ ሺን ሃዒ ሂንቴንቱ ካሴዋፔ ሎይꬂዴ ኦꬃናዳን፥ ጎዳ ዬሱሳ ሱንꬃን ሂንቴና ዎሴቶኔ ዞሬቶ። ኣዪሲ ጎፔ፥ ኑኒ ጎዳ ዬሱሳ ማታ ባጋና ሂንቴንቶ ኢሜዳ ኣዛዙ ሃቃዌንቶ፥ ሂንቴንቱ ኤሪታ። ኣዪሲ ጎፔ፥ ፆሳይ ሂንቴፔ ኮዪያዌ ኣዬ ጎፔ፥ ሂንቴንቱ ጌሻ ጊዳናዋኔ ዎሹሚያዋ ኡባና ኣጋናዋ ኮዬ። ሂንቴንቱ ሁጲያን ሁጲያን ጌሻቴꬃኒኔ ቦንቹዋን ሂንቴንቱ ማቺያና ዎቲ ዴዓኔንቶ ኤራናው ቤሴፔ ኣቲን፥ ፆሳ ኤሬና ኣማኔና ኣሳቱዋዳን፥ ሎይꬂ ኣሞቲያዋን ኣካናው ቤሴና። ኑኒ ቃሲ ካሴ ሂንቴንቶ ኦዴዳዋዳኒኔ ሂንቴና ሚኒሲ ዞሬዳዋዳን፥ ጎዳይ ሃዋ ማላባን ኡባን ሃሉዋ ኬሲያዋ ጊዲያ ዲራው፥ ኦኒኔ ሃ ዬዉዋን ባሬ ኢሻ ናቃናዉኔ ጪማናው ቤሴና። ኣዪሲ ጎፔ፥ ፆሳይ ኑና ጌሻቴꬃን ዴዓናው ፄሴዳዋፔ ኣቲን፥ ቱናቴꬃን ዴዓናው ፄሲቤና። ሄዋ ዲራው፥ ሃ ቲሚርቲያ ኢፂያ ኦኒኔ ሂንቴንቶ ባሬ ጌሻ ኣያና ኢሚያ ፆሳ ኢፄፔ ኣቲን፥ ኣሳ ኢፄና። ሂንቴ ሂንቴንቱ ሁጲያን ኢቱ ኢቱዋ ሲቃናዳን፥ ፆሳይ ሂንቴና ታማሪሴዳ ዲራው፥ ሂንቴንቱ ሂንቴንቱ ኢሻቱዋ ዎቲ ሲቃናው ቤሲንቶ፥ ኑኒ ፃፋናው ኮሼና። ቃሲ ማቂዶኒያ ቢታ ኡባን ዴዒያ ኢሻቱዋ ኡባቱዋ ቱሙ ሂንቴንቱ ሲቂታ። ሺን ኑናዳን ፆሳ ካሊያዋንቶ፥ ሂንቴንቱ ሄዋፔ ጉጂ ጉጂዴ ኡንቱንታ ሲቃና ማላ፥ ሂንቴና ዎሴቶ። ኑኒ ካሴ ሂንቴንቶ ኦዴዳዋዳን፥ ዎፑ ጌዳ ዴዑዋ ዴዒቴ። ቃሲ ሂንቴና ኮሺያዋ ዴማናው፥ ሂንቴ ኩሺያን ኦꬂቴ። ሄዋ ጊዶፔ፥ ኣማኔናዋንቱ ማታን ሂንቴንቱ ቦንቼታናኔ ቃሲ ሂንቴና ኮሺያባው ኦናኔ ኣዉዳሺኪታ። ሺን ኑናዳን ፆሳ ካሊያዋንቶ፥ ሂንቴንቱ ሂዶታይ ባይና ኣሳቱዋዳን ካዮቴና ማላ፥ ሃይቄዳ ኣሳቱዋባ ሂንቴንቱ ኤራና ማላ ኮዬቶ። ኑኒ ዬሱሲ ሃዪቄዳዋኔ ቃሲ ሃዪቁዋፔ ኢ ዴንዴዳዋ ኣማኔቶ፤ ሄዋዳንካ፥ ፆሳይ ዬሱሳ ኣማኒዴ ሃዪቄዳዋንታ ዬሱሳና ኣሃናዋ ኣማኔቶ። ኣዪሲ ጎፔ፥ ኑኒ ሂንቴንቶ ኦዲያ ጎዳ ቃላይ ሃዋ፤ ኑኒ፥ ጎዳ ላዔንꬁዋ ዩሳ ጋላሳይ ጋካናው ሃዋን ፓፃ ዴዒያዋንቱ፥ ሃይቄዳዋንቱፔ ካሴቶኮ። ኣዪሲ ጎፔ፥ ጎዳይ ባሬ ሁጲያን ኣዛዙዋና፥ ኪታንቻቱዋ ካፑዋ ኮሻና፥ ፆሳ ማላካታ ጊሬꬃና ሳሉዋፔ ዎꬋና። ኪሪስቶሳ ኣማኒዴ ሃዪቄዳዋንቱ ካሴቲዴ ሃዪቁዋፔ ዴንዳና። ሄዋፔ ጉዪያን፥ ኑኒ ሄ ዎዴ ፓፃ ዴዒያዋንቱ፥ ጎዳና ጫርኩዋ ጊዶን ጋኬታናው ኡንቱንቱና ኢቲፔ ሻሪያን ዴንዳና። ሄዋ ዲራው ኑኒ ጎዳና ኢቲፔ ኡባ ዎዴ ዴዓና። ሄዋሲ፥ ሃ ቃላን ኢቱ ኢቱዋ ሜንꬄꬂቴ። ሺን ኑናዳን ፆሳ ካሊያዋንቶ፥ ሃ ዬዋቱ ኣዉዴ ሃናኔንቶ፥ ዎዲያኔ ኣጌና ሂንቴንቶ ፃፋናው ኮሼና። ኣዪሲ ጎፔ፥ ጎዳ ጋላሳይ ካዪሱ ቃማ ዪያዋዳን ያናዋ ሂንቴንቱ ሎይꬂ ኤሪታ። ኣሳይ፥ «ኡባባይ ሳራ፤ ኣያይካ ሃኔና» ጊሺን፥ ማጫ ኣሳ ዬሉ ኦይቂያዋዳን፥ ባሻይ ኡንቱንቱ ቆፔናን ኡንቱንቱ ቦላ ያና። ኡንቱንቱ ሙሌካ ኬሲ ኣኪኪኖ። ሺን ኑናዳን ፆሳ ካሊያዋንቶ፥ ሄ ጋላሳይ ሂንቴንቶ ካዪሱ ዪያዋዳን ያናው ሂንቴንቱ ꬉማኒ ዴዒኪታ። ሂንቴ ኡባይ ፖዑዋ ኣሳኔ ጋላሳ ኣሳ፤ ኑኒ ቃማ ኣሳ ዎይ ꬉማ ኣሳ ጊዶኮ። ሄዋ ዲራው፥ ኑኒ ሃራቱ ጌሚዒሺያዋዳን ጌሚዒሻናው ቤሴና። ኑኒ ቤጎታናዉኔ ዎጋን ዴዓናው ቤሴ። ኣዪሲ ጎፔ፥ ጌሚዒሺያዋንቱ ቃማ ጌሚዒሺኖ፤ ማꬆቲያዋንቱካ ቃማ ማꬆቲኖ። ሺን ኑኒ ጋላሳ ኣሳ ጊዲያዋንቱ ዎጋን ዴዓናው ቤሴ። ኑኒ ኣማኑዋኔ ሲቁዋ ቲራን ዎꬂያ ኦላ ሚሻዳን ኦይቂዴ፥ ኑኒ ሂዶታን ናጊያ ኣቶቴꬃ፥ ቢራታ ቆቢያዳን፥ ሁጲያን ዎꬃናው ቤሴ። ኣዪሲ ጎፔ፥ ፆሳይ ኑና ኑ ጎዳ ዬሱሲ ኪሪስቶሳ ባጋና ኣቶቴꬃ ዴማናው ዶሬዳዋፔ ኣቲን፥ ኣ ሃንቁዋ ኣካናው ዶሪቤና። ኑኒ ፓፃ ጊዲና ዎይ ሃዪቄዳዋንታ ጊዲና፥ ኪሪስቶሳና ኢቲፔ ዴዓና ማላ፥ ኪሪስቶሲ ኑ ዲራው ሃዪቄዳ። ሄዋ ዲራው፥ ሂንቴንቱ ቃሲ ሃዒ ኦꬂያዋዳን፥ ሃራቱዋ ሜንꬄꬂቴኔ ኢቱ ኢቱዋ ዲቺቴ። ኑናዳን ፆሳ ካሊያዋንቶ፥ ሂንቴንቱ ጊዶን ኦꬂያዋንታ፥ ሂንቴና ኣማኑዋ ኦጊያን ካሌꬂያዋንታኔ ዞሪያዋንታ፥ ሂንቴንቱ ቦንቻና ማላ፥ ሂንቴና ዎሴቶ። ኡንቱንቱ ኦꬂያ ኦሱዋ ዲራው፥ ኡንቱንታ ሎይꬂ ቦንቺቴኔ ሲቂቴ። ኢቱ ኢቱዋና ሳሮቴꬃን ዴዒቴ። ኑናዳን ፆሳ ካሊያዋንቶ፥ ኑኒ ሂንቴና ዞሬቶ፤ ማራይ ባዪና ዴዑዋ ዴዒያዋንታ ሴሪቴ። ያዪያዋንታ ሜንꬄꬂቴ። ዎልቂ ባይናዋንታ ማዲቴ። ኣሳ ኡባ ዳንዳዪቴ። ኦኒኔ ኢታ ዲራው ኢታ ዛሬና ማላ ናጌቲቴ፤ ሺን ኡባ ዎዴ፥ ኢቱ ኢቶኔ ቃሲ ኣሳ ኡባው ሎዖባ ኦꬃናው ሚኒቴ። ኡባ ዎዴ ናሼቲቴ። ኡባ ዎዴ ቃንፄናን ፆሳ ዎሲቴ። ኡባባኒ ጋላቲቴ። ኣዪሲ ጎፔ፥ ኪሪስቶሳ ዬሱሳ ባጋና ፆሳይ ሂንቴፔ ኮዪያዌ ሄዋ። ጌሻ ኣያና ታማ ቶዪሶፒቴ። ቲምቢቲያ ቃላ ካꬎፒቴ። ኡባባካ ፓጪቴ። ሎዖባ ኦይቂቴ። ኢታ ኦሱዋ ኡባፔ ሃኪቴ። ሳሮቴꬃ ፆሳይ ባሬ ሁጴው ሂንቴና ኡባባኒ ፖሎ ጌሾ፤ ቃሲ ኑ ጎዳይ ዬሱሲ ኪሪስቶሲ ዪያ ዎዴ፥ ፆሳይ ሂንቴንቱ ኣያና፥ ሼምፑዋኔ ኣሳቴꬃ ኢቲፔ ቦሬቴናዋኔ ፖሎ ኡዲዴ ናጎ። ሂንቴና ፄሲያዌ ኣማኔቴዳዋ፤ ቃሲ ሄዋ ኢ ፖላና። ኑናዳን ፆሳ ካሊያዋንቶ፥ ኑሲ ፆሳ ዎሲቴ። ኢሻቱዋ ኡባ ጌሻ ዬሩዋ ዬሪዴ ሳሮቲቴ። ሂንቴ ሃ ዳቢዳቢያ ጌሻ ኢሻቱዋ ኡባው ናባባናዳን፥ ጎዳ ሱንꬃን ሂንቴና ዎሳይ። ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴናና ኢቲፔ ጊዶ። ኑኒ ጳዉሎሲ፥ ሲላሴኔ ፂሞቶሲ፥ ቴሴሎንቄን ዴዒያ ኣማኒያ ኣሳቶ ሃ ዳቢዳቢያ ፃፌቶ። ሄዋንቱ ፆሳ ኑ ኣቡዋንታኔ ጎዳ ዬሱሲ ኪሪስቶሳዋንታ። ፆሳ ኑ ኣዉዋፔኔ ጎዳ ዬሱሲ ኪሪስቶሳፔ፥ ኣꬎ ኬካቴꬃይኔ ሳሮቴꬃይ ሂንቴንቶ ጊዶ። ኑናዳን ፆሳ ካሊያዋንቶ፥ ሂንቴንቱ ኣማኑ ሎይꬂ ዲጪያ ዲራዉኔ፥ ሂንቴንቱ ኢቱ ኢቱዋ ሲቂያ ሲቁ ዳሪያ ዲራው፥ ኑኒ ሂንቴንቶ ቤሲያዋዳን፥ ፆሳ ኡባ ዎዴ ጋላታናው ቤሴ። ሄዋ ዲራው፥ ሂንቴንታ ዬዴሳይኔ ዋዪያ ኡባይ ጋኪናካ ሂንቴንቱ ጌንጪያዋኔ ኣማኒያዋ ኑኒ ኑ ሁጴው ፆሳ ኣማኒያዋንቶ ኦዲዴ፥ ሂንቴዋን ጬቄቴቶ። ሂንቴንቱ ዋዬቲያ ፆሳ ካዉቴꬃው ቤሲያዋንታ ጊዲዴ ፓይዴታና ማላ፥ ፆሳይ ፒርዲያ ፂሎ ፒርዳ ቤሲያ ማላ። ፆሳይ ቱሙ ፒርዳ ፒርዳና። ጎዳይ ዬሱሲ ባሬ ዎልቃማ ኪታንቻቱዋና ታማ ላጩዋ ጊዶን ሳሉዋፔ ዪያ ዎዴ፥ ፆሳይ ሂንቴንታ ዋዪሲያዋንቱ ቦላ ዋዪያ ኣሃና። ቃሲ ዋዬቲያ ሂንቴናኔ ኑና ሼምፒሳና። *** ቃሲ ፆሳይ ባሬና ኤሬናዋንታኔ ኑ ጎዳ ዬሱሲ ኪሪስቶሳ ዎንጋላ ሚሺራቾ ኣዛዜቴናዋንታ ሙራና። ሄ ጋላሲ ኢ ባሬ ጌሻቱዋን ቦንቼታናዉኔ ቃሲ ባሬና ኣማኒያ ኡባቱዋን ሳቤታናው ዪያ ዎዴ፥ ኡንቱንቱ ጎዳ ሲንꬃፔኔ ኣ ዎልቃ ቦንቹዋፔ ሻኬቲዴ፥ ሜꬊና ባሻን ሙሬታና። ጋሱኔካ፥ ኑኒ ሂንቴንቶ ኦዴዳ ኪታይ ኣማኔቴዳ። *** ኑኒ ሂንቴንቶ ኡባ ዎዴ ፆሳ ዎሲያዌ ሄዋሳ። ኑ ፆሳይ ፄሴዳ ዴዖ ሂንቴንታ ቤሲያዋንታ ጊዴ ፓይዳናዳን፥ ኑኒ ኣ ዎሴቶ፤ ሂንቴንቱ ሎዖባ ኡባ ኣሞቲያዋኔ ሂንቴንቱ ኣማኑዋ ኦሱዋ ኢ ባሬ ዎልቃን ፖሎ። ሄዋን ኑ ፆሳ ኣꬎ ኬካቴꬃኒኔ ቃሲ ኑ ጎዳ ዬሱሲ ኪሪስቶሳ ኣꬎ ኬካቴꬃን፥ ጎዳ ዬሱሳ ሱንꬃ ሂንቴንቱ ቦንቻና፤ ሂንቴናካ ኢ ቦንቻና። ሃዒ ኑናዳን ፆሳ ካሊያዋንቶ፥ ኑ ጎዳ ዬሱሲ ኪሪስቶሳ ዩሳባዉኔ ኑኒ ኣናና ዴዓናው ኣኮ ሺቃናባው፥ ቲምቢቲያ ኣሳይ ሂንቴንቶ ኦዲያዋን ዎይ ሃራ ኣሳፔ ሲሴዳ ቃላን፥ ዎይ ኦኒኔ ኑፔ ዬዳ ኪታዳን ሃሳዪያዋን፥ «ጎዳ ጋላሳይ ጋኬዳ» ጊዴ ሂንቴንቱ ኤሌካ ዳጋሜናዳኒኔ ዎዛና ባዬናዳን፥ ኑኒ ሂንቴንታ ዎሴቶ። ሂንቴንታ ኦኒኔ ኣይ ኦጊያኒኔ ባሌꬆፖ። ኣዪሲ ጎፔ፥ ካሴቲዴ ማካሊያዌኔ ቃሲ ናጋራንቻይ፥ ባሻ ናዓይ ቆንጬናን ዴዒሺን፥ ሄ ጋላሳይ ጋኬና። ኣሳይ ጎዪኒያ ኡባባኔ ኣሳይ ፆሳ ጊያ ኡባባ ኢ ኢፃና። ኢ ባሬና ኡንቱንቱ ኡባፔ ꬎቁ ኦꬃና። ቃሲ ሃራይ ኣቶ ፆሳ ጌሻ ጎሊያ ጌሊ ኡቲዴካ፥ «ታኒ ፆሳ» ጋና። ሂንቴንቱ ሃሳዪኪቴ? ታኒ ሄዋ ሂንቴንቶ ሂንቴናና ዴዓዴ ኦዳዲ። ኢ ባሬ ዎዲያን ያናፔ ኣቲን፥ ሃዒ ያናዋ ኣያይ ኣ ቴቂንቶ፥ ሂንቴንቱ ኤሪታ። ኣዪሲ ጎፔ፥ ፁራ ጊዴዳ ማካላይ ሃዒ ኦꬄ፤ ሺን ሄ ቴዒያዌ ኦጊያፔ ኪቻና ጋካናው፥ ኢ ቆንጬና። ሄዋፔ ጉዪያን፥ ሄ ማካላንቻይ ቆንጪና፥ ጎዳይ ዬሱሲ ባሬ ዶና ፔኑዋን ኣ ዎꬋና። ቃሲ ዬሱሲ ባሬ ላዔንꬆ ቦንቾ ዩሳን ኣ ሙሌካ ꬋዪሳና። ሄ ማካላንቻይ ሴፃና ኦሱዋን ዪዴ፥ ዳሮ ዎልቃን ዎርዶ ማላታኔ ማላሊሲያዋ ኦꬃና። ሄዋዳንካ፥ ቃሲ ꬋዪያ ኣሳቱዋ ዱማ ዱማ ኢታ ጪሙዋን ባሌꬃና። ꬋዪያዋንቱ ኣታናው ቱማቴꬃ ሲቂዴ ኣኪቤና ዲራው ꬋያና። ሄዋ ዲራው፥ ቱማቴꬃ ኣማኒቤና ኡባ ኣሳቱ፥ ናጋራ ኦꬂያዋን ናሼቲያዋንቱ ኡባይ ፒርዴታናዳኒኔ ዎርዶ ጊዲያባ ኣማናናዳን፥ ፆሳይ ዎልቃማ ባላ ኡንቱንቱ ጊዶ ዬዳና። *** ሺን ጎዳይ ሲቂያ ኑናዳን ፆሳ ካሊያዋንቶ፥ ኑኒ ፆሳ ሂንቴንቱ ዲራው፥ ኡባ ዎዴ ጋላታናው ቤሴ። ኣዪሲ ጎፔ፥ ጌሻ ኣያና ዎልቃኒኔ ቱማቴꬃ ሂንቴንቱ ኣማኒያዋን ሂንቴንታ ኣሻናው፥ ፆሳይ ሂንቴና ባይራዳን ዶሬዳ። ፆሳይ ሂንቴንታ ኑኒ ሂንቴንቶ ኦዴዳ ኑ ሚሺራቹዋ ቃላ ባጋና ፄሴዳዌ፥ ሂንቴንቱ ኑ ጎዳ ዬሱሲ ኪሪስቶሳና ኢቲፔ ቦንቼታናሳ። ሲሚ ኑናዳን ፆሳ ካሊያዋንቶ፥ ሚኒዴ ኤቂቴ፤ ኑኒ ሂንቴና ኑ ዶናን ጊዲና፥ ዎይ ኑ ዳቢዳቢያን ጊዲና፥ ታማሪሴዳ ዎጋ ኦይቂቴ። ኑ ጎዳ ዬሱሲ ኪሪስቶሲ ባሬ ሁጲያን ቃሲ ፆሳይ፥ ኑ ኣዉ ኑና ሲቂዴ፥ ባሬ ኣꬎ ኬካቴꬃን ኑሲ ሜꬊና ዳንዳያኔ ሎዖ ሂዶታ ኢሜዳዌ፥ ቃሲ ሂንቴንቱ ሎዖባ ኡባ ኦꬃናዳኒኔ ሃሳያናዳን፥ ሂንቴንቱ ዎዛና ሚኒሶኔ ሜንꬄꬆ። *** ዉርሴꬃን ኑናዳን ፆሳ ካሊያዋንቶ፥ ጎዳ ቃላይ ሂንቴንቱ ጊዶን፥ ኤሌካ ኣካናዳኒኔ ቦንቼታናዳን፥ ኑሲ ፆሳ ዎሲቴ። ቃሲ ኣሳይ ኡባይ ኣማኔና ዲራው፥ ፆሳይ ኑና ናጋራንቻ ኣሳቱዋፔኔ ኢታ ኣሳቱዋፔ ኣሻና ማላ፥ ኑሲ ዎሲቴ። ሺን ጎዳይ ኣማንꬂያዋ፤ ኢ ሂንቴና ሜንꬄꬃናኔ ቃሲ ኢታፔካ ናጋና። ኑኒ ሂንቴና ኣዛዚያዋ ሂንቴንቱ ሃዒ ኦꬂያዋኔ ቃሲ ሲንꬃፔካ ኦꬃናዋ ጎዳይ ኑና ሂንቴዋን ኣማንꬄ። ጎዳይ ሂንቴንቱ ዎዛና ፆሳ ሲቁዋኮኔ ኪሪስቶሲ ኢሚያ ዳንዳያኮ ካሌꬆ። ኑናዳን ፆሳ ካሊያዋንቶ፥ ሂንቴንቱ ኑፔ ኣኬዳ ዎጋ ካሌናን ኣዛላ ዴዑዋ ዴዒያ ኢሻ ኡባፔ ሂንቴንቱ ሻኬታናዳን፥ ኑ ጎዳ ዬሱሲ ኪሪስቶሳ ሱንꬃን ሂንቴና ኣዛዜቶ። ኣዪሲ ጎፔ፥ ኑኒ ሂንቴናና ዴዒያ ዎዴ ኣዛሊቤና ዲራው፥ ሂንቴንቱ ኑዋዳን ሃኒዴ ዴዓናው ቤሲያዋ ሂንቴንቱ ሂንቴንቱ ሁጲያን ኤሪታ። ኑኒ ሂንቴፔ ኦሲኔ ቶኩዋ ጊዴና ማላ፥ ቃማኔ ጋላሲ ዳቡሪዴኔ ጃሚዴ ኦꬂዴ ዴዔዳዋፔ ኣቲን፥ ኦፔኔ ቁማ ጮ ሚቦኮ። ኑኒ ሄዋ ኦꬄዳዌ ሂንቴንቱ ኑዋዳን ሃኒዴ ዴዓናዳን፥ ኑኒ ሂንቴንቶ ሌሚሱዋ ጊዳናዳፔ ኣቲን፥ ሄዋ ሂንቴና ኦቻናው ኑሲ ማታይ ꬋዪና ጊዴና። ኣዪሲ ጎፔ፥ ኑኒ ሃራይ ኣቶ ሂንቴናና ዴዒዴካ፥ «ኦꬃናው ኮዬና ኡራይ ኦኒኔ ሞፖ» ያጊዴ ሂንቴና ኣዛዜዶ። ኣዪሲ ጎፔ፥ ኣሳ ዬዉዋን ጌሊያዋፔ ኣቲን፥ ኣዪኔ ኦꬄናዋንቱ፥ ኣዛላ ዴዑዋ ዴዒያ ኣማሬዳ ኣሳቱ ሂንቴንቱ ጊዶን ዴዒያዋ ኑኒ ሲሴዶ። ኑኒ ሄዋንቱ ማላ ኣሳቱ ማራ ዴዑዋ ዴዓናዳኒኔ ኦꬂዴ ቁማ ማናዳን፥ ጎዳ ዬሱሲ ኪሪስቶሳ ሱንꬃን ኣዛዜቶኔ ዞሬቶ። ሺን ሂንቴንቱ ኑናዳን ፆሳ ካሊያዋንቶ፥ ሎዖ ኦሱዋ ኦꬃናው ኣዛሎፒቴ። ቃሲ ኑኒ ሃ ዳቢዳቢያን ኪቴዳ ኪታው ኣዛዜቴና ኡራይ ኦኒኔ ዴዖፔ፥ ሄ ኡራ ኣኬኪቴ። ኢ ዬላታና ማላ፥ ኣፔ ሻኬቲቴ። ሺን ኢሻዳን ኣ ሴሪቴፔ ኣቲን፥ ሞርኪያዳን ፄሎፒቴ። ሳሮቴꬃ ጎዳይ ባሬ ሁጲያን ሂንቴንቶ ኡባ ዎዴኔ ኡባ ባጋና ሳሮቴꬃ ኢሞ። ጎዳይ ሂንቴናና ኡባና ጊዶ። ታኒ ጳዉሎሲ፥ ሃ ሳሮታ ታ ኩሺያን ፃፋዲ፤ ታ ዳቢዳቢያ ኡባው ሃዌ ታ ፊርማ። ሃዌ ታኒ ፃፊያ ኦጊያ። ኑ ጎዳ ዬሱሲ ኪሪስቶሳ ኣꬎ ኬካቴꬃይ ሂንቴናና ኡባና ጊዶ። ኑና ኣሺያ ፆሳይኔ ኑኒ ቤዓና ጊዴ ናሼቻን ናጊያ ዬሱሲ ኪሪስቶሲ ኣዛዜዳ ኣዛዙዋዳን፥ ዬሱሲ ኪሪስቶሲ ኪቴዳዋ ጊዴዳ ታኒ ጳዉሎሲ፥ ኣማኑዋ ባጋና ታ ቱሙ ናዓው፥ ፂሞቶሳው ሃ ዳቢዳቢያ ፃፋይ። ፆሳ ኑ ኣዉዋፔኔ ኑ ጎዳ ኪሪስቶሳ ዬሱሳፔ ኣꬎ ኬካቴꬃይ፥ ማሮቴꬃይኔ ሳሮቴꬃይ ኔው ጊዶ። ታኒ ማቂዶኒያ ባዴ ኔው ጌዳዋዳን፥ ኔኒ ኤፌሶኔን ጋሚዓና ማላ ኮያዲ። ኢቲ ኢቲ ኣሳቱ ዎርዱዋ ቲሚርቲያ ታማሪሲኖ፤ ሄዋንቱ ታማሪሴና ማላ፥ ኣጊቴ ጋዴ ኦዳ። ኡንቱንቱ ቶሳ ኦዲያዋኔ ባሬንቱ ዛሪያ ጋይሪያዋ ኣጋናዳን ኦዳ። ኣዪሲ ጎፔ፥ ሄዋ ማላባይ ፓሉማ ካሌꬄ፤ ቃሲ ፆሳ ቆፋ ኣማኑዋን ኤሬቲያዋ ኦꬂኪኖ። ሃ ኣዛዞ ዋና ቆፋይ ጌሻ ዎዛናፔ፥ ሎዖ ሱሬ ዎዛናፔ፥ ኣሳይ ቤዖ ጊያባይ ባይና ኣማኑዋፔ ቤቲያ ሲቁዋ ዴንꬄꬃናሳ። ኢቲ ኢቲ ኣሳቱ ሃዋ ኣጊዴ፥ ማዴና ሃሳያኮ ሲሜዲኖ። ኡንቱንቱ ኣያ ሃሳዪንቶኔ ዎይ ባሬንቱን ኣማኔቲዴ ኦዲያባይ ኣዬንቶ ኤሪኪኖ፤ ሺን ፆሳ ሂጊያ ታማሪሲያዋንታ ጊዳናው ኮዪኖ። ኣሳይ ቤሲያዋዳን ሂጊያን ጎዔቶፔ፥ ሂጊ ሎዓ ጊዲያዋ ኑኒ ኤሬቶ። ኢቲባ ኣኬካናው ኮሼ። ሂጊ ሎዖ ኣሳው ሜꬌቲቤና። ሺን ሂጊያ ሜንꬂያዋንቶ፥ ኣዛዜቴናዋንቶ፥ ማካላንቻቶ፥ ናጋራንቻቶ፥ ጌሻቴꬃይ ባይናዋንቶ፥ ቱናቶ፥ ባሬንቱ ዳዮ ዎይ ኣባ ዎꬊያዋንቱሲ፥ ሼምፑዋ ዎꬊያዋንቱሲ፥ ዎሹማናው ካጄሊያዋንቶ፥ ኣቱማ ኣሳይ ኣቱማ ኣሳና ዎሹሚያዋንቶ፥ ኣሳ ዛሊዒያዋንቶ፥ ዎርዳንቻቶኔ ዎርዱዋን ጫቂያዋንቶ፥ ዎይ ቱሙ ቲሚርቲያና ጋኬቴና ኣይ ኦሱዋ ጊዲናካ ኦꬂያዋንቶ ኬሴዳ። ሄ ቱሞ ቲሚርቲ ኣንጄቴዳ ፆሳይ ታኒ ኣዋጃና ማላ፥ ታው ሃዳራ ኢሜዳ ቦንቾ ዎንጋላ ጊዱዋን ዴዔ። ታኒ ኦꬂያ ኪታን ታው ዎልቃ ኢሜዳ ኑ ጎዳ ኪሪስቶሳ ዬሱሳ ጋላታይ። ታና ባሬ ኦሳንቻ ሱንꬂዴ፥ ታና ሄ ኦሶ ቤሲያ ኣማኔቶዋ ጊዴ ፓይዴዳ ዲራዉካ ኣ ጋላታይ። ታኒ ሃዋፔ ካሴ ኣ ቦሪያዋ፥ ኣ ዬዴርሲያዋኔ ቱጋዪያዋ ጊዶፔኔ፥ ታው ሃዋ ኢ ኦꬄዳ። ሺን ታኒ ኤሬናን ኦꬄዳ ዲራዉኔ ኣማናቤና ዲራው፥ ፆሳይ ታና ማሬዳ። ቃሲ ኑ ጎዳይ ዛዋይ ባይና ባሬ ኣꬎ ኬካቴꬃ ታ ቦላን ጉሲዴ፥ ኪሪስቶሳ ዬሱሳ ባጋና ኑባ ጊዴዳ ኣማኑዋኔ ሲቁዋ ታው ኢሜዳ። ኪሪስቶሳ ዬሱሲ ናጋራንቻቱዋ ኣሻናው ሃ ሳዓ ዬዳ ጊያ ሃሳያይ ኣማኔቴዳዋኔ ኣሳይ ኡባይ ቱማ ጊዴ ኣካናው ቤሲያዋ። ኡባፔ ኣꬊያ ናጋራንቻይ ታና። ሺን ሜꬊና ዴዑዋ ኣካናው ኣኒ ኣማናናው ቤሲያ ኣሳው ታኒ ሌሚሱዋ ጊዳናዳን፥ ኡባፔ ኣꬊያ ናጋራንቻው ታው ዬሱሲ ኪሪስቶሳ ዳሮ ዳንዳያዳን፥ ፆሳይ ታና ማሬዳ። ኣይፊያን ቤቴና ሜꬊና ፆሳው ኢቱዋሲ፥ ሜꬊና ካቴው፥ ሜꬊናፔ ሜꬊና ጋካናው ጋላታይኔ ቦንቹ ጊዶ። ኣሜንዒ! ታ ናዓ ፂሞቶሳ፥ ካሴ ኔባ ቲምቢቲያ ኦዴዳዋዳን፥ ሄ ኦዴዳዋዳን ሎዖ ኦላ ኔኒ ኦሌታና ማላ፥ ሃ ኣዛዙዋ ኔው ሃዳራ ኢማይ። ኣማኑኔ ሎዖ ሱሬ ዎዛናይ ኔው ዴዖ። ኢቱ ኢቱ ባሬንቱ ሱሬ ዎዛና ዬጊ ኣጊዴ፥ ላጊያዌ ባይና ማርካቢ ባዪያዋዳን፥ ባሬንቱ ኣማኑዋ ባዪዜዲኖ። ፆሳ ቦሪያዋ ኣጋና ማላ፥ ሄዋ ታማራናው ታኒ ሴፃናው ኣꬃ ኢሜዳ ሄሜኔዮሲኔ ኢስኪንዲሪ ኡንቱንቱ ጊዶን ዴዒኖ። ኑኒ ፆሳ ማላቲያዋን፥ ጌሻቴꬃ ኡባን፥ ሳሮቴꬃኒኔ ኣሺኬቴꬃን ዴዓና ማላ፥ ኣሳ ኡባው፥ ካቴቶኔ ሱንꬃቴꬃይ ዴዒያ ኡባቶ፥ ፆሳ ኦቻናው፥ ዎሳናው፥ ጋናታናዉኔ ጋላታናው ቤሲያዋ ኡባባፔ ካሴታዴ ታኒ ኔና ኤሪሳይ። *** *** ኣሳይ ኡባይ ኣታናዳኒኔ ቱማቴꬃ ኤራናዳን ኮዪያ ኑና ኣሺያ ፆሳ ሲንꬃን ሃዌ ሎዒያባኔ ናሼቺያዋ። ኣዪሲ ጎፔ፥ ኢቲ ፆሳይ ዴዔ፤ ፆሳፔኔ ኣሳፔ ጊዱዋን ጊዲዴ ጋናቲያ ኢቱ ዴዔ። ሄዌካ ኪሪስቶሲ ዬሱሳ ጊያ ኣሳ። ኢ ኣሳ ኡባ ዎዛናው ባሬና ኡባው ኢሜዳ። ፆሳይ ባሬ ዎዲያን ኣሳ ኡባ ዎዛናው ኮዪያዋ ቤሲያ ማርካይ ሃዋ። ታኒ ፆሳ ቃላ ኦዲያዋ፥ ዬሱሲ ኪቴዳዋኔ ቃሲ ኣማኑዋኒኔ ቱማቴꬃን ኣዪሁዳ ጊዴና ኣሳ ታማሪሲያዋ ጊዳዴ ሱንꬄቴዳዌ ሃዋሳ። ታኒ ዎርዶቲኬ፤ ቱሙዋ ሃሳያይ። ሄዋ ዲራው፥ ኡባሳን ዴዒያ ኣቱማ ኣሳይ ሃንቁኔ ፓሉሚ ባይናን፥ ባሬ ጌሻ ኩሺያ ፑዴ ዴንꬂዴ፥ ፆሳ ዎሳናዳን፥ ታኒ ኮያይ። ሄዋዳን ቃሲ ማጫዋንቱካ ቤሲያ ማዩዋ ያሻቴꬃኒኔ ባሬንታ ሞዲያዋን ማዪኖ። ፆሳው ያያይ ጊያ ማጫ ኣሳ ቤሲያዋዳን፥ ሎዖባ ኦꬂያዋናፔ ኣቲን፥ ሁጲያ ሹሩባ ዳዲያዋን፥ ዎርቃን ዎይ ኢንቁዋን፥ ዎይ ዳሮ ኣልዖ ኣፊላን ባሬና ኣሌቂሶፒኖ። *** ማጫዉና ኡባባኒ ሞዴታዴ፥ ጮዑ ጋዴ ታማሩ። ታኒ ማጫዉና ጮዑ ጋዴ ዴዑ ጋዪፔ ኣቲን፥ ኣቱማ ኣሳ ታማሪሱኔ ዎይ ኡንቱንቱ ቦላ ኣዎቱ ጊኬ። ኣዪሲ ጎፔ፥ ኣዳሚ ኮይሮ ሜꬌቴዳ፤ ሄዋና ጉዬፔ ሜꬌታዱ። ሄዋና ጪሜታዴ ፆሳ ሂጊያ ሜንꬃዱፔ ኣቲን፥ ኣዳሚ ጪሜቲቤና። ሺን ማጫዉና ኣማኑዋን፥ ሲቁዋን፥ ጌሻቴꬃኒኔ ባሬና ሞዳዴ ዴዖፔ፥ ናና ዬሊያዋን ኣታና። ኦኒኔ ዎሳ ጎሊያ ካሌꬂያዋ ጊዳናው ኮዮፔ፥ ሎዖባ ኣሞቴዳ ጊያ ሃሳያይ ቱማ። ዎሳ ጎሊያ ካሌꬂያ ኡራይ ቦሪሴናዋ፥ ኢቲ ማቻቲ ፃላላይ ዴዒያዋ፥ ባሬና ሞዲያዋ፥ ባሬና ናጊያዋ፥ ባሬው ቤሲያዋ ኦꬂያዋ፥ ኢማꬃ ሞኪያዋ፥ ታማሪሳናው ዳንዳዪያዋ፥ ማꬆቴናዋ፥ ኣሺኬቴꬃፔ ኣቲን ዋላቄቴናዋ፥ ፓሉሜቴናዋ፥ ሻሉዋ ሲቄናዋ፥ ናናይ ኣው ኣዛዜቲያዋኔ ቦንቺያዋ፥ ቃሲ ባሬ ጎሊያ ኣዪሳናው ዳንዳዪያዋ ጊዳናው ቤሴ። ኣዪሲ ጎፔ፥ ኢቲ ኡራይ ባሬ ጎሊያ ኣዪሳናው ዳንዳዬናዋ ጊዶፔ፥ ፆሳ ኣማኒያዋንታ ዎቲ ኣዪሳናው ዳንዳዪ? ኦቶሩዋን ሱጌቲዲ፥ ፃላሂያ ካፑ ፆሳ ፒርዳን ኩንዴዳዋዳን ኩንዴና ማላ፥ ኦራꬃ ኣማኔዳ ኣሳ ጊዳናው ቤሴና። ፃላሂያ ካፑዋ ቦሪያኒኔ ጲሪያን ጌሌና ማላ፥ ሄ ኡራይ ዎሳ ጎሊያፔ ካሬና ዴዒያ ኣሳን ናሼቲያዋ ጊዳናው ቤሴ። ሄዋዳን ቃሲ ዎሳ ጎሊያ ማዲያዋንቱ ኣሳይ ቦንቺያዋንታ፥ ላዑ ዶና ሃሳዬናዋንታ፥ ዳሮ ዎዪኒያ ኤሳ ኡሼናዋንታ፥ ሚሻው ያሬቴናዋንታ፥ ኣማኑዋ ፁራ ጌሻ ዎዛና ቆፋን ናጊያዋንታ ጊዳናው ቤሴ። ሄዋንቱ ካሴቲዴ ፓጬታናው ኮሼ። ፓጪያ ኣꬎዋፔ ጉዪያን፥ ዎሳ ጎሌን ኦꬂያዋንታ ጊዲዴ ኦꬂኖ። ሄዋዳንካ ቃሲ ኡንቱንቱ ማቻቱ ኣሳይ ቦንቺያዋንታ፥ ዚጊሬናዋንታ፥ ባሬና ሞዲያዋንታ፥ ኡባባኒ ኣማኔቲያዋንታ ጊዳናው ቤሴ። ዎሳ ጎሊያ ማዲያዌ ኢቲ ማቻቲ ፃላላይ ዴዒያዋኔ ቃሲ ባሬ ናናኔ ባሬ ጎሊያ ሎይꬂ ኣዪሲያዋ ጊዳናው ቤሴ። ኣዪሲ ጎፔ፥ ዎሳ ጎሊያ ማዲያዋንታ ጊዲዴ፥ ሎዖ ኦሱዋ ኦꬂያዋንቱ ባሬንቱ ሁጴው ዎልቃማ ቦንቹዋ ዴሚኖ፤ ቃሲ ኪሪስቶሳ ዬሱሳን ባሬንቶ ዴዒያ ኣማኑዋ ሎይꬂ ፃሊዴ ሃሳያናው ዳንዳዪኖ። ታኒ ኔኮ ኤሌካ ባና ጋዴ ሃዋ ኔው ፃፋይ። ሺን ታኒ ቤናን ጋሚዖፔ፥ ፆሳ ጎሌን ኔኒ ዎታ ዴዓናው ቤሲንቶ ኤራና ማላ ፃፋይ። ሄ ጎሊ ቱማቴꬃው ቱሳኔ ባሶ ጊዲያ ዴዑዋ ፆሳ ዎሳ ጎሊያ። ኑ ኣማኑዋ ፁራይ ዎልቃማ ጊዲያዋ ኦኒኔ ሲꬋናው ዳንዳዬና። ኪሪስቶሲ ኣሹዋን ቆንጬዳ፤ ኢ ፂሉዋ ጊዲያዋ ጌሻ ኣያናይ ማርካቴዳ። ኪታንቻቱካ ኣ ቤዔዲኖ፤ ኣዪሁዳ ጊዴና ኣሳይ ኣባ ኦዲና ሲሴዳ። ሳዓን ዴዒያ ኣሳይ ኣ ኣማኔዳ፤ ቦንቹዋን ኢ ሳሉዋ ቤዳ። ኢቲ ኢቲ ኣሳይ ዉርሴꬃ ዎዲያን ኣማኑዋ ኣጋናዋ ጌሻ ኣያናይ ቆንጪያን ኦዴዳ። ኡንቱንቱ ዎርዶ ኣያናቱዋሲ ኣዛዜታና፤ ቃሲ ፃላሃቱዋ ቲሚርቲያ ካላና። ሃዋ ማላ ቲሚርቲ፥ ቲላ ዎዛና ታማን ቦንቄዳ ቢራታን ጉዴዳዋዳን ዶንጪሌዳ ዎርዶ ኣሳቱዋ ባጋና ዬዳ። ሃዋንቱ ማላ ኣሳቱ ኣኪያዋኔ ጌሊያዋ ቃሲ ኢቲ ኢቲ ቆሞ ካꬃ ሚያዋ ዲጊኖ። ሺን ኣማኒያዋንቱኔ ቱማቴꬃ ኤሪያዋንቱ ፆሳ ጋላቴዳዋፔ ጉዪያን ማና ማላ፥ ፆሳይ ካꬃ ሜꬌዳ። ኣዪሲ ጎፔ፥ ፆሳይ ሜꬌዳባይ ኡባባይካ ሎዓ። ፆሳ ጋላቲዴ ኣኮፔ፥ ኦሌቲያዌ ኣያይኔ ባዋ። ኣዪሲ ጎፔ፥ ሄ ኡባባይ ፆሳ ቃላኒኔ ዎሳን ኣንጄቴዳዋ። ሄዋ ዲራው፥ ኔኒ ኢሻቱዋ ሄዋ ሃሳዪሲያዋ ጊዶፔ፥ ኣማኑዋኔ ኔኒ ካሌዳ ሎዖ ቲሚርቲያ ቃላን ኤቆፔ ኔኒ ኪሪስቶሲ ዬሱሳው ሎዖ ኦሳንቻ ጊዳናሳ። ሺን ኣማኒያ ኣሳው ሎዔና ሃሳያፔኔ ቃሲ ጪማ ማጫ ኣሳ ቶሳፔ ባቃታ። ቃሲ ፆሳ ማላቲያዋን ኔና ሎሂሳ። ኣዪሲ ጎፔ፥ ኣሳይ ባሬ ቦላ ሚኒሲያዌ ላፋ ጎዔ። ሺን ፆሳ ማላቲያዋን ሎሂሲያዌ ሃዒካ ሲንꬃፔካ ዴዑዋ ኢማና ጊያ ዲራው፥ ኡባባዉካ ጎዔ። ሃ ሃሳያይ ኣሳይ ኡባይ ኣካናው ቤሲያ ቱሙ ሃሳያ። ኑኒ ሄዋ ዴማናው ዳቡሬቶኔ ሎይꬂ ኦꬄቶ፤ ሄዋሲ ኑኒ ሂዶታ ዎꬄዳዌ ኣሳ ኡባ፥ ኡባፔ ኣꬂዴ፥ ኣማኒያዋንታ ኣሺያ ዴዑዋ ፆሳ። ሃዋ ኣዛዛኔ ታማሪሳ። ኔኒ ያላጋ ጊዲያ ዲራው፥ ኔና ኦኒኔ ካꬎፖ። ሺን ኣማኒያዋንቶ ኔ ሃሳያን፥ ሃኖቴꬃን፥ ሲቁዋን፥ ኣማኑዋኒኔ ጌሻቴꬃን ሌሚሱዋ ጊዳ። ታኒ ያና ጋካናው ኣሳሲ ፆሳ ማፃፋ ናባቢያዋኒ፥ ፆሳ ቃላ ኦዲያዋኒኔ ታማሪሲያዋኒ ሚና። ቲምቢቲያ ኦዲያዋንቱ ሃሳዪናኔ ጪማቱ ባሬንቱ ኩሺያ ኔ ቦላ ዎꬂና፥ ኔኒ ኣኬዳ፥ ኔናን ዴዒያ ጌሻ ኣያና ኢሙዋ ቶቾፓ። ኔ ዲቻይ ኣሳ ኡባው ቆንጫና ማላ፥ ሄዋ ሚኒሳ ቆፓ። ሃዋ ኡባ ዎዴ ኦꬃ። ኔ ሁጲያኔ ኔ ቲሚርቲያ ናጋ። ኔኒ ሄዋ ኦꬆፔ፥ ኔናኔ ኔኒ ጊያዋ ሲሲያዋንታ ኣሺያ ዲራው፥ ኣጌናን ኦꬃ። ጪማ ኣሳ ኔ ኣባ ቦንቺያዋዳን ቦንቻፔ ኣቲን፥ ቶቾፓ። ያላጋቱዋ ኔ ኢሻዳን፥ ቃሲ ጪማ ማጫ ኣሳ ኔ ኣቲዳን፥ ያላጋ ማጫ ኣሳ ኔ ሚቻቲዳን፥ ኩሜንꬃ ጌሻቴꬃን ቦንቻ። ባሬ ፃላላ ጊዴዳ ቱሙ ኣምዔቱዋ ቦንቻ። ሺን ኣምዓቲው ናናይ ዎይ ናና ናናይ ዴዖፔ፥ ሄ ናናይ ፆሳ ማላቲያዋ ባሬንቱ ሶይ ኣሳ ቤሲያዋኒኔ ቃሲ ሄዋ ኦꬂያዋን ባሬንታ ዬሌዳዋንቱ ኩሺያ ዛሪያዋ ታማሪኖ። ኣዪሲ ጎፔ፥ ሄዌ ፆሳ ናሼቺያዋ። ኣያ ማዱካ ባይና ባሬ ዴዒያ ቱሙ ኣምዓታ ፆሳይ ኢማና ጋዴ ናሼቻን ናጋ ኡታዱ። ቃሲ ጋላሲኔ ቃማ ፆሳይ ኢዞ ማዳና ማላ፥ ዎሳዉኔ ኦቻው። ሺን ባሬና ኢሻሊሲያ ኣምዓታ ፓፃ ዴዖፔካ፥ ኢዛ ሃይቃዲጋዱ። ቃሲ ኦኒኔ ኡንቱንታ ቦሬና ማላ፥ ሃ ኣዛዙዋ ኢማ። ሺን ባሬንቱዎ ቃሲ ኡባፔ ኣꬂዴ፥ ባሬ ሶይ ኣሳው ቆፔና ኡራይ ኦናኔ ጊዶፔ፥ ሄዌ ባሬ ኣማኑዋ ካዴዳዋ። ኣማኔና ኣሳፔካ ኣꬊዴ ኣው ኢታ። ኡሱፑን ታሙ ላይꬃይ ኩሚቤና ኣምዓቲ ሱንꬃ ማዚጎቢያን ፃፎፓ። ሄዋ ቦላን ቃሲ ኢዛ ኢቲ ኣሲናፔ ሃራ ጌላቤናዉኖ ጊዳናው ኮሼ። ናና ዲቺያዋን፥ ኢማꬃ ሞኪያዋን፥ ጌሻቱዋ ጌዲያ ሜጪያዋን፥ ዋዬቴዳ ኣሳ ማዲያዋን፥ ሎዖ ኦሱዋ ኡባ ካሊያዋን፥ ሃ ሎዖ ኪታ ኪቴቲያዋን ኤሬቴዳዉኖ ጊዳናው ቤሴ። ሺን ያላጋ ኣምዔቱዋ ዮኮንቱ ሱንꬃና ጋꬃ ፃፎፓ። ኣዪሲ ጎፔ፥ ኡንቱንቱ ባሬንታ፥ ኣሲና ጌላ ጌላ ጊያ ዎዴ፥ ኪሪስቶሳ ኣጋናዋንታ። ኮይሮ ኣማኑዋ ካꬌዳ ዲራው፥ ኡንቱንቱ ፒርዴታና። ሄዌ ባይናን ኦሱዋ ꬋዪዴ ኢቲ ጎሊያፔ ሃራ ጎሊያ ዩዪዴ፥ ሃሜቲያዋ ፃላላ ጊዴናን፥ ባሬንቶ ቤሴናባ ሃሳዪዴ፥ ዚጊርሳኔ ዬዉዋን ጮ ጌሊያዋ ታማሪኖ። ሄዋ ዲራው፥ ኑ ሞርኬቱ ኑ ቦላ ሃሳዪያ ኢታባ ዴሜና ማላ፥ ያላጋ ኣምዓቱ ኣሲና ጌሊዴ፥ ናዓ ዬሊዴ፥ ባሬንቱ ጎሊያ ኣዪሳና ማላ ዞራይ። ኣዪሲ ጎፔ፥ ሃዋፔ ካሴ ኣማሬዳ ኣምዓቱ ሴፃና ካላናው ኣጊዴ ጉዬ ሲሜዲኖ። ኣማኒያ ሚሺራቲው ሃቃንካ ዳቦ ኣምዓቱ ዴዖፔ፥ ኢዛ ኡንቱንታ ማዳናው ቤሴ። ኣማኒያ ኣሳቱ ማዱ ቤሲያ ቱሙ ኣምዔቱዋ ማዳና ማላ፥ ኡንቱንቱ ኣማኒያዋንቶ ቶኮ ጊዶፒኖ። ሎይꬂ ሄሚያ ጪማቱ፥ ቃሲ ኡባፔ ኣꬂዴ፥ ቃላ ኦዲያዋኒኔ ታማሪሲያዋን ዳቡሪያዋንቱ፥ ዳኮ ቦንቹዋ ኣካናው ቤሲኖ። ኣዪሲ ጎፔ፥ ፆሳ ማፃፋይ፥ «ኡዱማን ካꬃ ዬꬊያ ቦራ ዶና ቃቾፓ» ቃሲ፥ «ኦሳንቻይ ባሬ ዲርጉዋ ኣካናው ቤሴ» ያጌ። ላዑ ዎይ ሄዙ ማርካይ ባይናን፥ ዎሳ ጎሊያ ጪማ ሞቲያዋ ሲሶፓ። ሃራቱ ያያና ማላ፥ ናጋራ ኦꬂያ ኡባቱዋ ኣሳ ኡባ ሲንꬃን ሴራ። ኔኒ ኣይኔ ኣሳ ዴሙዋ ፄሌናን፥ ኢቱዋ ኢቱዋፔ ዱማዬናን ሃ ኣዛዙዋ ናጋና ማላ፥ ፆሳኒኔ ዬሱሲ ኪሪስቶሳን ዶሬቴዳ ኪታንቻቱዋ ሲንꬃን ኔና ታኒ ዞራይ። ኦ ቦላኒኔ ኤሌላዴ ኔ ኩሺያ ዎꬆፓ። ሃራቱዋ ናጋራን ጌሎፓ። ኔና ጌሻቴꬃን ናጋ። ኔኒ ኡባ ዎዴ ሳኬቲያ ዲራዉኔ ኔ ኡሉዋ ዲራው፥ ጉꬃ ዎዪኒያ ኤሳ ኡሻፔ ኣቲን፥ ሃꬃ ፃላላ ኡሾፓ። ኢቲ ኢቲ ኣሳቱዋ ናጋራይ ቤዓናው ቆንጬ፤ ኡንቱንቱ ናጋራይ ኡንቱንታ ፒርዳናው ኡንቱንቱፔ ሲንꬃው ኣꬌ። ሺን ሃራቱ ናጋራይ ጉዬፔ ቆንጬ። ሄዋዳንካ፥ ሎዖ ኦሱካ ቆንጬ። ቆንጪቤናባ ጊዶፔኔ፥ ጌማናው ዳንዳዬና። ፆሳ ሱንꬃይኔ ኑ ቲሚርቲ ቦሬቴና ማላ፥ ኣይሌቴꬃ ሞርጌ ሚꬃ ጊዶን ዴዒያዋንቱ ባሬና ሞዲያ ጎዳቶ ቦንቹ ቤሲያዋ ኤሪኖ። ኣማኒያ ኣሳ ኣይሊያ ጊዴዳዋንቶ ኡንቱንቱ ጎዳቱ ኡንቱንቶ ኢሻ ጊዲያ ዲራው፥ ኡንቱንታ ካꬎፒኖ። ሺን ባሬንቱ ኪታን ጎዔቲያዋንቱ ኡንቱንቱ ሲቂያ ኣማኒያዋንታ ጊዲያ ዲራው፥ ኡንቱንቱ ካሴዋፔ ኣꬂዴ ኦꬃናው ቤሴ። ኔኒ ሃ ዬዋቱዋ ታማሪሳናዉኔ ኦዳናው ቤሴ። ኦኒኔ ዱማ ቲሚርቲያ ታማሪሲያዋ ጊዶፔ፥ ቃሲ ኑ ጎዳ ዬሱሲ ኪሪስቶሳ ቱሙ ቃላናኔ ኑ ኣማኑዋ ቲሚርቲያና ጋኬቴና ኡራይ ዳሮ ኦቶሬቴ፤ ኣይኔ ኤሬና። ቃሲ ቃላ ቦላን ፓሉሜታናዉኔ ዋላቄታናው ኡንቱንቶ ጊጌና ቆፋይ ዴዔ። ሄዌ ቃናቲያ፥ ፓሉማ፥ ቦሪያ፥ ኢታ ሲꬊያ ካሌꬄ። *** ቃሲ ኡንቱንቱ ሁጲ ኦꬄና። ቱማቴꬃይ ባይና ኣሳቱዋናካ ፓሉማ ካሌꬄ። ኡንቱንቱ ፆሳ ማላቲያዋን ዱሬታና ጊዴ ቆፒኖ። ኔኒ ሄ ኣሳቱዋፔ ሻኬታ። ሺን ታው ዴዒያባይ ታው ጊዳና ጊያ ኡራ ፆሳ ማላቲያዌ ዱሬዬ። ኣዪሲ ጎፔ፥ ኑኒ ሃ ኣላሚያ ኣይኔ ኣሂቤይኮ፤ ቃሲ ኣፔ ኣይኔ ኣፎኮ። ሺን ሚያባይኔ ማዪያባይ ዴዖፔ፥ ሄዌ ኑሲ ጊዳናዋ። ሺን ዱሬታናው ኮዪያዋንቱ ፓጪያኒኔ ጲሪያን ጌሊኖ፤ ቃሲ ዳሮ ኣሳ ባሻዉኔ ꬋዮ ጎቺ ኣፊያ ዳሮ ኤያኔ ቆሂያ ኣሙዋን ኩንዲኖ። ኣዪሲ ጎፔ፥ ሻሉዋ ሲቂያዌ ኢታቴꬃ ኡባው ፑልቱዋ። ኢቱ ኢቱ ሄዋ ኣሞቲዲ፥ ኣማኑዋፔ ባሌቲዴ፥ ዳሮ ሜቱዋን ባሬንታ ቆሄዲኖ። ሺን ኔኖ፥ ፆሳ ኣሳው፥ ሄዋፔ ባቃታ። ፂሎቴꬃ፥ ፆሳ ማላቲያዋ፥ ኣማኑዋ፥ ሲቁዋ፥ ዳንዳያኔ ኣሺኬቴꬃ ካላ። ኣማኑዋ ባፂያ ሎይꬃ ባፄታ። ዳሮ ኣሳ ሲንꬃን ሎዖ ማርካ ማርካታዴ፥ ኔና ፆሳይ ፄሴዳ ሜꬊና ዴዑዋ ኦይቃ። ኡባባው ዴዑዋ ኢሚያ ፆሳ ሲንꬃኒኔ፥ ቃሲ ጴንፄናዊያ ጲላፆሳ ጌቴቲያ ጋዲያ ሞዲያዋ ሲንꬃን ሎዖ ማርካ ማርካቴዳ ኪሪስቶሲ ዬሱሳ ሲንꬃን ታኒ ኔና ሃዋ ኣዛዛይ። ኑ ጎዳ ዬሱሲ ኪሪስቶሲ ቆንጫና ጋካናው፥ ቂታይ ባዪናኒኔ ቦሪ ባይናን ሄ ኣዛዙዋ ናጋ። ኣ ቆንጬꬃ፥ ኢቲ ሱንꬃይ ዴዒያ ኣንጄቴዳ ፆሳይ፥ ካታቱዋ ካቲ፥ ጎዳቱዋ ጎዳይ፥ ባሬ ቤሲያ ዎዲያን ቤሳና። ሃይቄናዌ ኢቲ ኣ ፃላላ። ኦኒኔ ኣኮ ሺቃናው ዳንዳዬና ፖዑዋን ዴዔ። ኦኒኔ ኣ ቤዒቤና፤ ቃሲ ቤዓናዉካ ዳንዳዬና። ቦንቹኔ ሜꬊና ዎልቃይ ኣው ጊዶ። ኣሜንዒ። ሃዒ ሃ ዎዲያን ዱሬ ጊዲያዋንቱ ኦቶሬቴናዳኒኔ ቃሲ ኑኒ ናሼታናዳን፥ ኡባባ ፓላሂሲዴ ኑሲ ኢሚያ ዴዑዋ ፆሳን ኣማኔታናዋፔ ኣቲን፥ ኣꬊያ ዱሬቴꬃን ኡንቱንቱ ኣማኔቴናዳን፥ ኡንቱንታ ኣዛዛ። ኡንቱንቱ ሎዖባ ኦꬃናዳን፥ ሎዖ ኪታን ዱሬታናዳን፥ ኬኪያዋንታኔ ሃራቱዋና ሻኪ ኣኪያዋንታ ጊዳናዳን ኣዛዛ። ሄዋ ያቲያዋን ኡንቱንቱ ሲንꬃው ሚኖ ባሶ ጊዲያ ሻሉዋ ባሬንቶ ሺሺኖ። ሄዋፔ ጉዪያን፥ ኡንቱንቱ ቱሙ ዴዑዋ ኣካና። ፂሞቶሳ፥ ኢቲ ኢቲ ኣሳይ ባላን ኤራቴꬃ ጊያ ኤያ ፓሉሚያፔኔ ሜላ ሃሳያፔ ባቃታዴ፥ ኔው ኢሜቴዳ ሃዳራ ናጋ። ኣዪሲ ጎፔ፥ ኢቱ ኢቱ ኑሲ ኤራቴꬃይ ዴዔ ያጊዴ፥ ኣማኑዋ ባሌዲኖ። ፆሳ ኣꬎ ኬካቴꬃይ ሂንቴናና ኡባና ጊዶ። ታኒ ጳዉሎሲ፥ ፆሳይ ኢማና ጌዳ ኪሪስቶሲ ዬሱሳና ኑሲ ዴዒያ ዴዑዋባ ኦዳናው፥ ፆሳይ ጌዳዋዳን፥ ኪሪስቶሲ ዬሱሲ ኪቴዳዌ፥ ታ ሲቆ ናዓ ፂሞቶሳው ሃ ዳቢዳቢያ ፃፋይ። ፆሳ ኣዉዋፔኔ ኑ ጎዳ ኪሪስቶሲ ዬሱሳፔ፥ ኣꬎ ኬካቴꬃይ፥ ማሮቴꬃይኔ ሳሮቴꬃይ ኔው ጊዶ። ታ ዛራቱ ኦꬄዳዋዳን፥ ታኒካ ታና ዞሪያ ጌሻ ዎዛናፔ ኦꬂያ ፆሳ ቃማኔ ጋላሲ ዎሲያ ዎሳን ኡባ ዎዴ ኔና ሃሳዪያ ዲራው፥ ኣ ጋላታይ። ታኒ ኔ ኣፎꬃ ሃሳያ ሃሳያዴ ናሼታና ማላ፥ ኔና ቤዓናው ዳሮ ላሞታይ። ኔናን ዴዒያ ዎርዶ ባይና ኣማኑዋ ሃሳያይ። ሄ ኣማኑ ቤኒ ኔ ዳይ ዳይ ሎይዲኒኔ ኔ ዳይ ኤዉኒቂን ዴዒያ ኣማኑዋ ማላ፤ ቃሲ ኔናኒካ ሄዌ ዴዒያዋ ኤራዲ። ሄዋ ዲራው፥ ታኒ ታ ኩሺያ ላዑዋ ኔ ቦላ ዎꬄዳ ዎዴ፥ ፆሳይ ኔው ኢሜዳ ኢሙዋ ኔኒ ዶሺሴና ማላ፥ ኔና ሃሳዪሳይ። ኣዪሲ ጎፔ፥ ፆሳይ ኑሲ ዎልቃ፥ ሲቁዋኔ ኑ ሁጲያ ናጊያዋ ኢሚያ ጌሻ ኣያና ኢሜዳፔ ኣቲን፥ ያሻ ኣያና ኢሚቤና። ሲሚ፥ ኑ ጎዳው ማርካቲያዋን ዎይ ኣ ዲራው ቃሹዋን ዴዒያ ታዋንካ ዬላቶፓ። ሺን ፆሳይ ኔው ኢሚያ ዎልቃ ኬናን ታናና ሚሺራቹዋ ቃላው ዋዬታ። ፆሳይ ባሬ ቆፋኒኔ ባሬ ኣꬎ ኬካቴꬃን ኑና ኣሺዴ፥ ባሬ ኣሳ ኦꬃናው ፄሶዋፔ ኣቲን፥ ኑኒ ኦꬄዳ ኦሱዋ ዲራው ጊዴና። ኢ ሃ ኣꬎ ኬካቴꬃ ኪሪስቶሲ ዬሱሳ ባጋና ዎዲ ዶሜታናፔ ካሴ ኑሲ ኢሜዳ። ሺን ሃዒ ሃ ኣꬎ ኬካቴꬃይ ኑና ኣሺያ ኪሪስቶሲ ዬሱሳ ዩሳን ኑሲ ቆንጬዳ። ቃሲ ሃይቁዋ ዎልቃካ ኢ ꬋዪሴዳ። ዎንጋላ ሚሺራቹዋ ባጋና ባዬና ዴዑዋ ኑሲ ቆንጪሴዳ። ታኒ ዬሱሲ ኪቴዳዋኔ ኣዪሁዳ ጊዴና ኣሳ ታማሪሲያዋ ጊዳዴ፥ ዎንጋላ ሚሺራቹዋ ኦዳና ማላ፥ ፆሳይ ታና ዶሬዳ። ቃሲ ታኒ ሃ ሜቱዋ ኣኪያዌ ሄዋ ዲራሳ። ሺን ታኒ ኣማኔዳዋ ኤሪያ ዲራው፥ ዬላቲኬ። ቃሲ ኢ ታው ኢሜዳ ሃዳራ ሄ ጋላሳይ ጋካናው፥ ኢ ናጋናው ዳንዳዪያዋ ኤራይ። ታኒ ኔና ታማሪሴዳ ቱሙ ቃላ ሌሚሱዋ ኡዳ ኦዪቃዴ፥ ኪሪስቶሲ ዬሱሳን ኑሲ ዴዒያ ኣማኑዋኒኔ ሲቁዋን ዴዓ። ኑ ጊዶን ዴዒያ ጌሻ ኣያና ባጋና ኔው ሃዳራ ኢሜዳ ሎዖባ ናጋ። ኢሲያ ጊያ ቢታን ዴዒያ ኡባቱ ታፔ ባቃቴዳዋ ኤራሳ፤ ኡንቱንቱ ጊዶን ፒጌሉሲኔ ሄርሞጌኔሲ ዴዒኖ። ሄኔሲፎሩ ታና ዳሮ ዎዴ ሜንꬄꬄዳ ዲራው፥ ጎዳይ ኣ ሶይ ኣሳው ማሮቴꬃ ኢሞ። ቃሲ ታኒ ቃሾ ጎሌን ዴዒያዋ ኢ ዬላቲቤና። ሺን ሮሜ ጊያ ካታማ ጋኬዳሳና ታና ሎይꬂ ኮዪዴ ዴሜዳ። ሄ ጋላሲ ጎዳፔ ማሮቴꬃ ዴማናዳን፥ ጎዳይ ኣው ኢሞ። ቃሲ ኤፌሶና ጊያ ካታማን ኢ ታና ኣይ ኬና ማዴዴንቶኔ ኔኒ ሎይꬃ ኤራሳ። ሲሚ ታ ናዓው፥ ኪሪስቶሲ ዬሱሳን ዴዒያ ኣꬎ ኬካቴꬃን ሚና። ቃሲ ዳሮ ማርካቱ ዴዒያሳን ታፔ ኔኒ ሲሴዳ ዬዋቱዋ ሃራቱዋ ታማሪሳናው ዳንዳዪያ ኣማኔቴዳ ኣሳቱዋሲ ሃዳራ ኢማ። ኪሪስቶሳ ዬሱሳው ኣማኔቴዳ ዎታዳራዳን፥ ታናና ዋዬታ። ኦላ ቢያ ዎታዳራይ ባሬ ካፑዋ ናሼቻናው፥ ዎታዳራ ጊዴና ኣሳይ ኦꬂያ ኪታን ዋላኬቴና። ቃሲ ዎꬃን ኬሴቲያ ኡራይካ ዎጋዳን ዎፃና ꬋዮፔ፥ ዎይታ ኣኬና። ዳሮ ዳቡሪዴ ኦꬄዳ ቢታ ጎሺያ ቢታኒ ሺቄዳ ካꬃፔ ባሬና ጋኪያዋ ኮይሮ ኣካናው ቤሴ። ኔኒ ኡባባ ኣኬካናዳን፥ ጎዳይ ኔና ዳንዳዪሳና ዲራው፥ ታኒ ጊያዋ ቆፓ። ታኒ ዎንጋላ ሚሺራቹዋ ኦዲያዋዳን፥ ሃይቁዋፔ ዴንዴዳ ዳዊቴ ዛሪያ ዬሱሲ ኪሪስቶሳ ቆፓ። ታኒ ዎንጋላ ሚሺራቹዋ ኦዲያ ዲራው፥ ኢታባ ኦꬄዳዋዳን፥ ሃራይ ኣቶ ቃሼታና ጋካናው ዋዬታይ። ሺን ፆሳ ቃላይ ቃሼቴና። ሄዋ ዲራው፥ ታኒ ፆሳይ ዶሬዳ ኣሳቱካ ኪሪስቶሲ ዬሱሳን ዴዒያ ኣቶቴꬃ ሜꬊና ቦንቹዋና ዴማናዳን፥ ኡንቱንቱ ዲራው፥ ታኒ ኡባባን ዋዬታይ። ሃዌ፥ «ኑኒ ኣናና ኢቲፔ ሃይቄዳዋ ጊዶፔ፥ ኣናና ኢቲፔ ዴዓና። ኑኒ ጌንጮፔ፥ ኣናና ኢቲፔ ካዉታና። ኑኒ ኣ ካዶፔ፥ ኢካ ኑና ካዳና። ኑኒ ኣማኔቴናን ኣጎፔካ፥ ኢ ኣማኔቲያዋ ጊዲዴ ዴዓናዋ። ኣዪሲ ጎፔ፥ ኢ ባሬና ባሬ ሁጴው ኤሪኬ ጋናው ዳንዳዬና» ጊያዌ ቱሙ ሃሳያ። ኔኒ ኔ ኣሳ ሃዋ ሃሳዪሳ፤ ኡንቱንቱ ቃላን ፓሉሜቴና ማላ፥ ፆሳ ሲንꬃን ዞራ። ሄዌ ሲሲያ ኣሳ ባዪዚያዋፔ ኣቲን፥ ኣይኔ ጎዔና። ኔኒ ፆሳ ቱማቴꬃ ቃላ ሱሬቴꬃን ኦዲያዋኔ ቃሲ ኣ ኦሶ ዬላቴና ኦሳንቻ ጊዳዴ፥ ፆሳይ ሳቢያ ኣሳዳን፥ ኔ ሁጲያ ፆሳው ኢማናው ሚና። ሺን ሃ ሳዓው ኢንጄቲያ ማዴና ሃሳያፔ ኔና ናጋ። ኣዪሲ ጎፔ፥ ሄዌ ፆሳፔ ኣሳ ሃሴ። ቃሲ ኡንቱንቱ ታማሪሲያዌ ቦላ ጪቱዋዳን ኡባሳ ጋካናሳ። ሄ ታማሪሲያዋንቱፔ ላዓቱ ሄሜኔዮሳኔ ፒሊፆሳ። ኡንቱንቱ ቱሙዋ ኦጊያ ኣጊዴ፥ «ሃይቁዋፔ ዴንዲያዌ ካሴ ኣꬊዲጌዳ» ያጊዴ ኣማሬዳ ኣማኒያ ኣሳቱዋ ኣማኑዋ ባዪዚኖ። ጊዶፔካ፥ ፆሳይ ኤሴዳ ሚኖ ቱሳይ ቃፃና ዳንዳዬና። ቃሲ ኣ ቦላን፥ «ጎዳይ ባሬዋንታ ኤሬ»፤ ቃሲ «ጎዳዋ ጊዲያ ኦኒኔ ኢታ ኦሱዋ ኣጎ» ያጊያ ቃላቱ ፃፌቴዲኖ። ኢቲ ዎልቃማ ጎሌን ዎርቃፔኔ ቢራፔ ሜꬌቴዳ ሚሻ ፃላላ ጊዴናን፥ ሚꬃፔኔ ኡርቃፔ ሜꬌቴዳ ሚሻቱካ ዴዒኖ። ሄዋንቱፔ ባጋቱ ቦንቾ ኦሱዋ ኡንቱንቱን ኦꬃናው፥ ቃሲ ባጋቱ ቶሼቲያባ ኡንቱንቱን ኦꬃናው ሜꬌቴዲኖ። ሄዋ ዲራው፥ ኦኒኔ ሃ ኢታባ ኡባፔ ባሬና ጌሾፔ፥ ኢ ባሬ ጎዳ ጎዒያ ኦሱዋ ኦꬃናው ባሬና ኢሜዳ ዲራው፥ ቦንቾ ኦሱዋ ኦꬂያ ሚሻ ጊዳናዋ። ቃሲ ሎዖ ኦሱዋ ኡባ ኦꬃናው ጊጌቴዳዋ ጊዳናዋ። ሺን ኔኒ ኢታ ዎዳላቴꬃ ኣሙዋፔ ባቃታ። ባሬንታ ማዳናው ጌሻ ዎዛናፔ ጎዳ ፄሲሲያዋንቱና ኢቲፔ፥ ፂሎቴꬃ፥ ኣማኑዋ፥ ሲቆቴꬃኔ ሳሮቴꬃ ሚኒሳዴ ካላ። ሺን ኤያቱዋ ፓሉሚኔ ኣይኔ ኤሬናዋንቱ ፓሉሚ ዋላሳ ካሌꬂያዋ ኤራዴ ኣፔ ባቃታ። ጎዳ ቆማይ ኡባው ኬኪያዋ፥ ሎይꬂ ታማሪሲያዋኔ ዳንዳያንቻ ጊዳናው ቤሴፔ ኣቲን፥ ዋላቄታናው ቤሴና። ቃሲ ኢ ባሬና ኢፂያዋንታ ኣሺኬቴꬃን ሴሪያዋ ጊዳናው ቤሴ። ኡንቱንቱ ባሬንቱ ናጋራፔ ሲሚዴ፥ ቱማቴꬃ ኤራናዳን ፆሳይ ኦꬃኔንቶ፥ ኦኒ ኤሪ። ቃሲ ኡንቱንቱ ባሬንቱ ዎዛና ቆፋው ሲሚዴ፥ ኡንቱንታ ባሬ ኮዬዳባው ኣዛዜታና ማላ ኦይቄዳ ፃላሂያ ካፑዋ ዳባፔ ኬሲ ኣካና። ሺን ዉርሴꬃ ጋላሲ ዋዪሲያ ዎዲ ያናዋ ኣኬካ። ኣዪሲ ጎፔ፥ ኣሳይ ባሬና ሲቂያዋንታ፥ ሻሉዋ ሲቂያዋንታ፥ ጬቄቲያዋንታ፥ ኣዪያዋንታ፥ ቦሪያዋንታ፥ ባሬና ዬሌዳዋንቶ ኣዛዜቴናዋንታ፥ ጋላቴናዋንታ፥ ጌሻቴꬃይ ባይናዋንታ፥ ሲቁ ባይናዋንታ፥ ሲጌቴናዋንታ፥ ዚጊርሳንቻቱዋ፥ ባሬና ናጌናዋንታ፥ ኬኬናዋንታ፥ ሎዖባ ዶሴናዋንታ፥ ኡባ ኤሪኬ ጊያዋንታ፥ ዲርቢያዋንታ፥ ኦቶሩዋን ሱጌቲያዋንታ፥ ቃሲ ፆሳፔ ኣꬂዴ፥ ኢሻሉዋ ዶሲያዋንታ ጊዳና። ኡንቱንቱ ፆሳው ጎዪኒያዋ ማላቲኖ፤ ሺን ኣ ዎልቃ ካዴዲኖ። ሄዋንቱ ማላ ኣሳቱዋኮ ሺቆፓ። ኣዪሲ ጎፔ፥ ኡንቱንቱፔ ኢቱ ኢቱ ኣሳ ጎሊያ ጌሊዴ፥ ናጋራይ ዴፄዳዋንታ፥ ዱማ ዱማ ኣሙዋን ሱጌቲያዋንታ፥ ኡባ ዎዴ ታማሪዴ፥ ቱማቴꬃ ኤራ ኣካናው ሙሌ ዳንዳዪቤና ዳቡራንቻ ማጫዋንታ ባሌꬂኖ። *** ያኔሲኔ ያምባሬሲ ሙሴ ዬዉዋ ጳልቆዋዳን፥ ሄዋዳን ቃሲ ሃዋንቱ፥ ሱሬ ቆፋይ ባይናዋንታ ኣማኑዋን ኩንዴዳዋንቱ፥ ቱማቴꬃባ ጳልቂኖ። ሺን ያኔሳ ኤያቴꬃይኔ ያምባሬሳ ኤያቴꬃይ ቃሲ ቆንጬዳዋዳን፥ ኡንቱንቱ ኤያቴꬃይካ ኣሳ ኡባው ቆንጫና ዲራው፥ ኡንቱንቱ ካሴዋፔ ኣꬊዴ ዲጪኪኖ። ሺን ኔኒ ታ ቲሚርቲያ፥ ታ ሃኖታኔ ታ ቆፋ፥ ታ ኣማኑዋኔ ታ ዳንዳያ፥ ታ ሲቁዋኔ ታ ጌንጩዋ፥ ታ ዬዴሳኔ ታ ዋዪያ ቤዓዳ። ኣንፆኪያኔ፥ ኢቆኒዮኔኔ ሊስፂራ ጊያ ካታማቱዋን ታና ጋኬዳባኔ ታኒ ዳንዳዬዳ ዬዴሳ ኤራሳ። ጎዳይ ታና ሄ ኡባፔ ኣሼዳ። ቱማቴꬃን ኪሪስቶሲ ዬሱሳን ፆሳ ማላቲዴ ዴዓናው ዶሲያ ኡባይ ዬዴርሴታና። ሺን ኢታ ኣሳቱኔ ባሌꬂያዋንቱ ሃራቱዋ ባሌꬂዴኔ ባሬንቱ ሁጴው ባሊዴ፥ ካሴፔ ኢቲ ኢቲ ቢኖ። ሺን ኔኒ ሄ ቱማቴꬃ ኦፔ ታማሬዴንቶኔ ኤራዴ፥ ኔኒ ታማሬዳዋኒኔ ኤሬዳዋን ሚናዴ ዴዓ። ኔኒ ጉꬃ ናዓቴꬃፔ ዶማዴ ኪሪስቶሲ ዬሱሳ ኣማናዴ፥ ኣቶቴꬃይ ቤቲያ ኣꬌዳ ኤራ ኢማናው ዳንዳዪያ ጌሻ ማፃፋቱዋ ኤራዳ። ፆሳ ማፃፋ ኡባን ፆሳ ኣያናይ ዴዔ። ቃሲ ሄ ማፃፋቱ ፆሳው ኦꬂያ ኣሳይ ኩሜንꬃኔ ሎዖ ኦሱዋ ኡባው ጊጌዳዋ ጊዳና ማላ፥ ቱማቴꬃ ታማሪሳናው፥ ባላ ሴራናው፥ ባዪዙዋ ሱሪሳናዉኔ ፂሎቴꬃ ዴዖ ዞሪያ ኢማናው ማዲኖ። *** ታኒ ኔና ፆሳ ሲንꬃኒኔ፥ ዴዑዋን ዴዒያ ኣሳኔ ሃይቄዳ ኣሳ ፒርዳናው ዴዒያ ኪሪስቶሲ ዬሱሳ ሲንꬃን፥ ቃሲ ኣ ዩሳኒኔ ኣ ካዉቴꬃን ኔና ዞራይ። ቃላ ኦዳ። ዎዲ ኢንጄቲና ኢንጄታና ꬋዪና፥ ሚናዴ ኦዳ። ዳሮ ዳንዳያን ኣሳ ታማሪሳዴ ሱሪሳ፥ ሴራኔ ዞራ። ኣዪሲ ጎፔ፥ ኣሳይ ቱሙ ቲሚርቲያ ሲሴናን ኢፂያ ዎዲ ያናዋ። ሺን ኣሳይ ባሬንቱ ኣሙዋ ካሊዴ፥ ሲሳናው ናሼቺያዋ ኦዲያ ታማሪሲያዋንታ ጉጂ ጉጂ ሺሻና። ኡንቱንቱ ቱሙ ዬዉዋ ሲሲያዋ ኣጊዴ፥ ቶሳ ሲሳናው ባሬንቱ ሃይꬃ ዎራ ዛራና። ሺን ኔኒ ኡባባኒ ኔ ሁጲያ ናጋናው ቤሴ። ዋዪያ ዳንዳያ። ዎንጋላ ሚሺራቹዋ ኦዲያዌ ኦꬂያ ኦሱዋ ኦꬃ። ፆሳ ቆማዳን፥ ኔ ኦꬂያ ኦሱዋ ኡባ ፖላ። ታና ጊዶፔ፥ ታ ሱꬃይ ጉኪዴ ያርሼቲያ ዎዲኔ ቃሲ ሃ ዴዑዋ ኣጋዴ ቢያ ዎዲ ጋኬዳ። ታኒ ሎዖ ባፂያ ባፄታዲ፤ ዎꬃ ዎፃዴ ዉርሳዲ፤ ኣማኑዋካ ናጋዲ። ሲንꬃፔ ታው ፂሎቴꬃ ኣኪሊሊ ጊጊ ኡቴዳ። ሄዋ ፂሎ ፒርዳ ፒርዲያ ጎዳይ ሄ ጋላሲ ታው ኢማና። ቃሲ ኪሪስቶሲ ቆንጫናዋ ዶሲያ ኡባሳፔ ኣቲን፥ ታ ፃላላሳ ጊዴና። ታኮ ኤሌካ ያናው ሚና። ኣዪሲ ጎፔ፥ ዴማሲ ሃ ኣላሚያ ዶሲዴ፥ ታና ኣጊዴ፥ ቴሴሎንቂያ ጊያ ካታማ ቤዳ። ቄርቂሲ ጋላቲያ ጊያ ጋዲያ ቢና፥ ቃሲ ቲቶ ዲልማፂያ ጊያ ጋዲያ ቤዳ። ሉቃሳ ፃላላይ ታናና ዴዔ። ማርቆሲ ታና ኪታን ሎይꬂ ማዳናው ዳንዳዪያ ዲራው፥ ኣ ዴማዴ ኔናና ኣካዴ ያ። ሺን ታኒ ቲኪቆሳ ኤፌሶና ጊያ ካታማ ኪታዲ። ኔኒ ያዴ፥ ፂሮዓዳ ጊያ ካታማን ካርፖሳዋን ታኒ ዬጋዴ ዬዳ ታ ጋቢያኔ ቃሲ ማፃፋቱዋ ታው ኣካዴ ያ። ሺን ዱማያዴ ጋልባን ፃፌቴዳ ማፃፋቱዋ ኣያ ጊዶፔኔ፥ ኣኬናን ዮፓ። ቢራታ ቆፂያ ኢስኪንዲሪ ታና ዳሮ ቆሄዳ፤ ጎዳይ ኣው ኣ ኦሱዋዳን ዛራና። ኢ ኑኒ ኦዲያዋ ሎይꬂ ጳልቂያ ዲራው፥ ኔኒ ኣፔ ኔና ናጋ። ኮይሮ ታና ሞቲያ ዎዴ፥ ኡባይካ ኣጌዳዋፔ ኣቲን፥ ታና ኦኒኔ ማዲቤና። ፆሳይ ሄዋ ኡንቱንቶ ፓይዶፖ። ሺን ታኒ ኩሜንꬃ ኪታ ኣዪሁዳ ጊዴና ኣሳይ ኡባይ ሲሳናው ኦዳና ማላ፥ ጎዳይ ታ ማታን ኤቂዴ፥ ታው ዎልቃ ኢሜዳ። ቃሲ ጋሙዋ ዶናፔካ ታና ኣሼዳ። ጎዳይ ታና ኢታባ ኡባፔ ኣሺዴ፥ ባሬ ሳሉዋ ካዉቴꬃ ሳሮቴꬃን ኣፋና፤ ኣው ሜꬊ ሜꬊናው ቦንቹ ጊዶ። ኣሜንዒ። ጲሪስቂሊሲ፥ ኣቂላሲኔ ሄኔሲፎሩ ሶይ ኣሳው ታ ሳሮታ ኦዳ። ኤራስፆሲ ቆሮንቶሳ ጊያ ካታማን ኣቴዳ። ሺን ፂሮፊሞሲ ሳኬቴዳ ዲራው፥ ሚሊፄ ጊያ ካታማን ኣ ዎꬃዲ። ባልጉ ዎꬋናፔ ካሴ ያናው ሚና። ኤዉቡሉሲ፥ ጱዴሲ፥ ሊኖሲኔ ቂላዉዴ ቃሲ ሃራ ኢሻቱ ኡባይካ ኔና ሳሮ ሳሮ ጊኖ። ጎዳይ ኔ ኣያናና ጊዶ። ኣꬎ ኬካቴꬃይ ሂንቴናና ኡባና ጊዶ። ኣሜንዒ። ዬሱሲ ኪሪስቶሲ ኪቴዳ ታኒ ጳዉሎሲ፥ ፆሳ ኣይሊ፥ ሃ ዳቢዳቢያ ፃፋይ። ፆሳይ ዶሬዳ ኣሳው ኣማኑ ዴዓናዳኒኔ ፆሳ ቱማቴꬃ ኤራኮ ኡንቱንታ ካሌꬃናዳን ታኒ ዶሬታዴ ኪቴታዲ። ዎርዶቴና ፆሳይ ኑሲ ሃ ሜꬊና ዴዑዋ ዳሮ ዎዲያፔ ካሴ ኢማና ጌዳ። ፆሳይ ኑና ኣሺያዌ ሊኬ ዎዲያን ባሬ ቃላን ሃዋ ቆንጪሴዳ፤ ኢ ሃዳሪዴ ታና ኣዛዜዳዋዳን፥ ታኒ ኣ ቃላ ኦዳይ። ኣማኑዋ ኢቲፔቴꬃን ታ ቱሙ ናዓ ኔው ቲቶ፥ ፆሳ ኣዉዋፔኔ ኑና ኣሺያ ዬሱሲ ኪሪስቶሳፔ፥ ኣꬎ ኬካቴꬃይ፥ ማሮቴꬃይኔ ሳሮቴꬃይ ጊዶ። ታኒ ኔና ቃርፄሳን ኣጋዴ ዬዳዌ፥ ኔኒ ኣቶዋ ጊጊሳናሳኔ፥ ታኒ ኣዛዜዳዋዳን፥ ካታማ ኡባን ዎሳ ጎሊያ ጪማቱዋ ዶራናሳ። ጪማይ ቦሬቴናዋኔ ኢቲ ማቻቲ ፃላላይ ዴዒያዋኔ ኣማኒያ ናናይ ዴዒያዋ ጊዳናው ቤሴ፤ ኣ ናናይ ሻሉዋ ባዪዚያባኒኔ ዎይ ኣዛዜቴናን ኢፂያባን ኣሳይ ኣማሳሌናዋንታ ጊዳናው ቤሴ። ኣዪሲ ጎፔ፥ ሄ ጪማይ ፆሳ ኦሱዋ ኣዛዚያ ካፑዋ ጊዲዴ፥ ፖኪሴናዋ፥ ኦቶሬቴናዋኔ ኤሌ ሃንቄቴናዋ ጊዳናው ቤሴ፤ ቃሲ ማꬆቴናዋ፥ ሱጌናዋኔ ዮራቴናዋ ጊዳናው ቤሴ። ሺን ኢማꬃ ሞኪያዋኔ ሎዖባ ዶሲያዋ ጊዳናው ቤሴ፤ ቃሲ ኣኬካንቻ፥ ፂሉዋ፥ ጌሻኔ ባሬና ናጊያዋ ጊዳናው ቤሴ። ኣማኔቲያ ዴዑ ቤቲያ ቲሚርቲያና ጊጊያ ቃላ ኢ ሎይꬂ ኦይቆ። ያቶፔ ሃራቱዋ ቱሙ ኣማኑዋ ታማሪሲያዋኒ ሜንꬄꬃናዉኔ ቃሲ ሄዋ ኢፂያዋንታካ ዞራናው ዳንዳያናዋ። ኣዪሲ ጎፔ፥ ኣዛዜቴናዋንቱ፥ ማዴናዋ ሃሳዪያዋንቱ፥ ሃራቱዋ ጪሚያዋንቱኔ ቃፃሬቴዳ ኣዪሁዳ ኣማኒያዋንቱ ባጋ ጊዴዳ ዳሮ ኣሳቱ ዴዒኖ። ኡንቱንቱ ታማሪሳናው ቤሴና ፖኪያ ኦጊያን ሚሻ ዴማናው ታማሪሲያዋን ጎሊያ ኡባ ባይዚያ ዲራው፥ ኡንቱንቱ ሃሳያ ቴዓና ቤሴ። ኡንቱንቱ ጊዶፔ ኢቱ፥ ቲምቢቲያ ኦዲያዌ ኡንቱንቶ፥ «ቃሪፄሴ ኣሳይ ኡባ ዎዴ፥ ዎርዳቱዋ፥ ኢታ ዱዓቱዋኔ ዮራንቻ፤ ቃሲ ኣዛላ ኣሳ» ያጌዳ። ኢ ማርካቶዌ ቱማ፤ ሄዋ ዲራው፥ ኔኒ ኡንቱንቱሲ ሚኖ ኣማኑ ዴዓናዳኒኔ ቃሲ ኣዪሁዳቱዋ ቶሳኔ ቱሙዋ ኢፄዳ ኣሳቱዋ ኣዛዙዋ ኡንቱንቱ ሲሴናዳን፥ ኡንቱንታ ሚኒሳዴ ሴራናው ቤሴ። *** ባሬንቱ ሁጴው ጌሻ ጊዴዳዋንቱሲ ኡባባይካ ጌሻ፤ ሺን ቱናቱዋሲኔ ኣማኔናዋንቱሲ ኡንቱንቱ ዎዛና ቆፋይኔ ኡንቱንታ ሱሬ ዎዛናይ ቱኔዳ ዲራው፥ ኡንቱንቶ ኣያይኔ ጌሻ ጊዴና። ኡንቱንቱ ባሬንቱ ፆሳ ኤሪያዋ ቆንጪያን ኦዲኖ፤ ሺን ኡንቱንቱ ሼኔዪያዋንታ፥ ኣዛዜቴናዋንታኔ ኦሱዋ ኡባዉካ ጊጌናዋንታ ጊዲያ ዲራው፥ ባሬንቱ ኪታን ኣ ኤሮኮ ጊኖ። ሺን ኔኒ ዴዑዋ ዴማናው ጊጊያ ቲሚርቲያ ታማሪሳናው ቤሴ። ጪማ ኣቱማ ኣሳይ ኣማኑዋን፥ ሲቁዋኒኔ ዳንዳያን ሚኖ ጊዳናዳን፥ ቃሲ ማꬆቴናዋ፥ ቦንቼቲያዋኔ ባሬናካ ናጊያዋ ጊዳናዳን ዞራ። ሄዋዳንካ ጪማ ማጫ ኣሳይ ጌሻ ዴዑዋ ዴዒያዋንታ፥ ዚጊሬናዋንታ፥ ዎዪኒያ ኤሳሲ ሞዴቴናዋንታኔ ሎዖባ ታማሪሲያዋንታ ጊዳናው ቤሴ። ኡንቱንቱ ፆሳ ቃላይ ቦሬቴና ማላ፥ ባሬንቱ ኣሲናቱዋኔ ባሬንቱ ናና ሲቂያዋንታ፥ ባሬንታካ ናጊያዋንታ፥ ጌሻቱዋ፥ ባሬንቱ ጎሌን ኦꬂያዋንታ፥ ኬካቱዋኔ ባሬንቱ ኣሲናቱዋሲካ ኣዛዜቲያዋንታ ጊዳና ማላ፥ ያላጋ ማጫዋንታ ታማሪሳ። *** ሄዋዳንካ ያላጋ ኣቱማ ኣሳቱ ባሬንታ ናጋና ማላ ዞራ። ኔኒ ኔ ሁጴዉካ ሎዖ ኦሱዋ ኡባን ኡንቱንቶ ሌሚሶ ጊዳ፤ ኔኒ ታማሪሲያዋንካ ኣማኔቲያዋኔ ቦንቼቲያዋ ጊዳ። ኔ ሞርኬቱ ኑና ዚጊሪያባይ ኡንቱንቱሲ ꬋዪያ ዎዴ ኡንቱንቱ ዬላታና ማላ፥ ኔኒ ቦሬቴና ሎዖ ሃሳያ ሃሳያ። ኣዪሌቱ ባሬንቱ ጎዳቱዋሲ ኣዛዜታና ማላኔ፥ ኡንቱንቱና ፓሉሜቴናን ኡባባኒ ኡንቱንታ ናሼቻና ማላ ዞራ። ኡንቱንቱ ባሬንቱ ጎዳቱዋፔ ዉዔና ማላ፥ ቃሲ ኑና ኣሺያ ፆሳዋ ታማሪሲያዋ ኡባባኒ ጋላቲሳናው፥ ባሬንቱ ኦꬂያ ኪታን ኡባ ዎዴ ሎዓኔ ኣማኔቲያዋንታ ጊዲያዋ ቤሳና ማላ፥ ኡንቱንታ ዞራ። ኣዪሲ ጎፔ፥ ፆሳይ ኣሳ ኡባ ኣሺያ ባሬ ኣꬎ ኬካቴꬃ ቆንጪሴዳ። ሄ ኣꬎ ኬካቴꬃይ ናጋራ ኦሱዋኔ ሃ ኣላሚያ ኣሙዋ ኑኒ ኣጋናዳኒኔ ኑ ሁጲያ ናጊዴ፥ ፆሳ ማላቲዴ፥ ፂሎቴꬃን ዴዓናዳን፥ ኑና ታማሪሴ። ኑኒ ኑ ዎልቃማ ፆሳይ፥ ኑና ኣሺያ ዬሱሲ ኪሪስቶሲ ቤታና ጌዳ ኣንጄቴዳ ቦንቾ ጋላሳ ናጌቶ። ኢታ ኦሱዋ ኡባፔ ኢ ኑና ዎዛናዉኔ ሎዖባ ኦꬃናው ኣሞቲያ ባሬ ጌሻ ኣሳ ኬሳናው፥ ኑ ዲራው፥ ባሬ ሁጲያ ኢሜዳ። ኔኒ ሃዋ ታማሪሳ፥ ኔ ኩሜንꬃ ማታኒ ዞራኔ ሴራ፤ ኦኒኔ ኔና ካꬎፖ። ኡንቱንቱ ሞዲያዋንቱሲኔ ማታይ ዴዒያዋንቱሲ ሞዴታናው፥ ኣዛዜታናዉኔ ሎዖ ኦሱዋ ኡባ ኦꬃናው ጊጌታናዳን ኡንቱንታ ሃሳዪሳ፤ ቃሲ ኡንቱንቱ ኦ ቦላኒኔ ኢታ ቃላ ሃሳዬና ማላ፥ ኦናናኔ ዋላቄቴና ማላ፥ ኣሳ ኡባ ኣሺኬቴꬃኔ ሲጋቴꬃ ቤሲያዋንታ ጊዳናዳን ዞራ። *** ኣዪሲ ጎፔ፥ ኑኒ ካሴ ኑ ሁጴዉካ ኤያቱዋ፥ ኣዛዜቴናዋንታ፥ ባሊያዋንታኔ ኣሙዋሲኔ ዱማ ዱማ ናሼቻሲ ኣዪሊያዳን ሞዴቲያዋንታ፤ ቃሲ ኢታቴꬃኒኔ ቃናቲያን ዴዒያዋንታ፤ ኣሳን ኢፄቲያዋንታኔ ኢቱ ኢቱዋካ ኢፂያዋንታ። ሺን ኑና ኣሺያ ፆሳ ኬካቴꬃይኔ ኣሳ ኢ ሲቂያ ሲቁ ቆንጬዳ ዎዴ፥ ኢ ባሬ ማሮቴꬃዳንካ፥ ኦራꬃ ዬሌቱሳን ሃኔዳ ጌዩሳኒኔ ጌሻ ኣያናን ኦራፄዳዋን ኑና ኣሼዳዋፔ ኣቲን፥ ኑኒ ፂሎ ኦሱዋ ኦꬄዳዋና ጊዴና። ፆሳይ ባሬ ኣꬎ ኬካቴꬃን ኑኒ ፂላናዳኒኔ፥ ኢ ኢማና ጌዳ ሜꬊና ዴዑዋ ላታናዳን፥ ኑና ኣሺያ ዬሱሲ ኪሪስቶሳ ባጋና ጌሻ ኣያና ኑ ቦላ ዳሪሲዴ ቲጌዳ። *** ሃ ሃሳያይ ኣማኔቴዳዋ፤ ፆሳ ኣሳቱ ሎዖ ኦሱዋ ኦꬃናው ጊጋናዳን፥ ሃ ዬዉዋ ኡንቱንቱሲ ኔኒ ሚኒሳዴ ኦዳናው ኮያይ፤ ሃዋንቱ ኣሳው ሎዓኔ ጎዒያዋንታ። ሺን ኤያቴꬃ ፓሉማፔ፥ ዛሪያ ፓይዲያዋፔ፥ ዋላሳፔኔ ሂጊያባን ዋላቄቲያዋፔ ናጌታ። ኣዪሲ ጎፔ፥ ሄዋንቱ ጎዔናዋንታኔ ማዴናዋንታ። ሻኮቴꬃ ሜꬊያ ኡራይ ጌላ ኣሳ ጊዲያዋኔ ባሬ ሁጲያን ፒርዲዴ ናጋራ ኦꬂያዋ ኤራዴ፥ ኢቲ ጌዴ ዎይ ላዑ ጌዴ ኣ ሴሬዳዋፔ ጉዪያን፥ ሄዋ ማላቲያ ኣሳፔ ሻኬታ። *** ታኒ ኣርፄማሳ ዎይ ቲኪቆሳ ኔኮ ኪቲያ ዎዴ፥ ኔኒ ታኮ ኒቆጲሊዮና ያናው ሚና። ኣዪሲ ጎፔ፥ ታኒ ባልጉዋ ያኒ ሻጫናው ቆፋ ቃቻዲ። ሂጊያ ኤሪያ ዜናሲኔ ኣጲሎሲ ኦጊያ ቢያ ዎዴ፥ ኡንቱንቱሲ ኣያይኔ ፓጬና ማላ፥ ኡንቱንታ ሎይꬃ ማዳ። ኑ ኣሳይካ ማዴና ኣሳ ጊዲዴ ኣቴና ማላ፥ ባሬንታ ሎይꬂ ኮሺያዋ ዴማናው፥ ሎዖ ኦሱዋ ሚኒዴ ኦꬂያዋ ታማሪኖ። ታናና ዴዒያ ኡባቱ ኔና ሳሮ ሳሮ ጌዲኖ። ኑና ኣማኑዋን ሲቂያዋንታ ሳሮ ሳሮ ጋ። ፆሳ ኣꬎ ኬካቴꬃይ ሂንቴናና ኡባና ኢቲፔ ጊዶ። ኣሜንዒ። ታኒ ጳዉሎሲ፥ ዬሱሲ ኪሪስቶሳ ዲራው ቃሹዋን ዴዒያዌኔ ኑ ኢሻ ፂሞቶሲ፥ ኑናና ኦꬂያ ኑኒ ሲቂያ ፒሊሞናው፥ ኔ ጎሌን ሺቂያ ኣማኒያዋንቶ፥ ኑ ሚቻቲ ኣፊቢሲኔ ኑናና ኢቲፔ ዴዒያ ኪሪስቶሳ ዎታዳራ ኣርኪፖሳው ሃ ዳቢዳቢያ ፃፌቶ። ፆሳ ኑ ኣዉዋፔኔ ኑ ጎዳ ዬሱሲ ኪሪስቶሳፔ ኣꬎ ኬካቴꬃይኔ ሳሮቴꬃይ ሂንቴንቱሲ ጊዶ። ኔኒ ፆሳ ኣሳቱዋ ሲቂያዋኔ ጎዳ ዬሱሳ ኣማኒያዋ ታኒ ሲሲያ ዲራው፥ ፆሳ ዎሳዴ ኔና ሃሳዪያ ዎዴ ኡባን፥ ታ ፆሳ ጋላታይ። *** ኔኒ ኔ ኣማኑዋ ሃራቱዋና ሻኪያዌ ኑሲ ኪሪስቶሲ ዬሱሳ ባጋና ዪያ ሎዖባ ኡባ ኤሪሳና ማላ፥ ታኒ ፆሳ ዎሳይ። ኣዪሲ ጎፔ፥ ፆሳ ኣሳቱዋ ዎዛናይ ኔ ኪታን ሚኔዳ ዲራው፥ ታ ኢሻው፥ ታኒ ኔ ሲቁዋን ዳሮ ናሼቻኔ ሜንꬄꬁዋ ዴማዲ። ሄዋ ዲራው፥ ኔኒ ኦꬃናው ቤሲያዋ ኦꬃና ማላ፥ ታኒ ኔና ኣዛዛናው ኪሪስቶሳ ባጋና ፃሎፔካ፥ ታኒ ጳዉሎሲ ጪሜዳዌ፥ ኪሪስቶሲ ዬሱሳው ሃዒካ ቃሹዋን ዴዒያዌ፥ ሲቁዋ ዲራው፥ ኔና ዎሳይ። ታኒ ቃሹዋን ዴዓዴ ኣው ኣዉዋ ጊዴዳ ታ ናዓ ኣናሲሞሳ ዲራው፥ ኔና ዎሳይ። ኢ ካሴ ኔና ጎዔና፤ ሺን ሃዒ ኔናካ ታናካ ቱሙ ጎዔ። ታኒ ዎዛናፔ ዶሲያ ኣናሲሞሳ ኔኮ ዬዶዌ ታ ዎዛና ዬዶዋ። ታኒ ዎንጋላ ዲራው ቃሼታ ኡታ ዴዒሺን፥ ኔና ኮቺዴ፥ ታና ማዳና ማላ፥ ታ ማታን ኣ ኣሻናው ኮያይ። *** ሺን ኔኒ ኔ ሼኒያዳን ኦꬃናዋ ኮያይፔ ኣቲን፥ ኔናና ዞሬቴናን ዎልቃን ኣይኔ ኦꬃናው ኮዪኬ። ኣናሲሞሲ ጉꬃ ዎዲያ ኔፔ ሻኬቴዳዌ፥ ኦኒ ኤሪ ሲሚዴ፥ ኡባ ዎዴካ ኔናና ዴዓናሴንቶኔ። ሲሚ ሃዋፔ ሲንꬃው ኣናሲሞሲ ኣይሊያ ጊዴና፤ ሺን ኣይሊያፔ ኢ ሎይꬂ ኣꬌ፤ ኢ ታው ኣይ ኬና ሲቆ ኢሼ! ቃሲ ኢ ኔው ኣሳ ባጋናካ ጎዳ ባጋናካ ኣይ ኬና ኣꬌዳ ኢሻ ጊዳንዴሻ! ሲሚ ኔኒ ታና ኔ ላጌꬃ ጊያዋ ጊዶፔ፥ ታና ሞኪያዋዳን፥ ኣ ሞካ። ኢ ኔው ባዪዜዳባይ ዎይ ኣ ቦላ ኔው ኣጩ ዴዖፔ፥ ታፔ ጪጋ ኣካ። ሄ ኣጩዋ ታኒ ጪጋና ጋዴ፥ ታኒ ጳዉሎሲ ታ ኩሺያን ፃፋይ። ኔኒ ታው ኔ ሼምፑዋ ኣጮታ ኡቴዳዋ ታኒ ኔና ሃሳዪሳናው ኮሼና። ኤ፥ ታ ኢሻው፥ ጎዳ ባጋና ኔፔ ማዱዋ ዴማናው ኮያይ። ኪሪስቶሳ ባጋና ታና ሜንꬄꬃ። ታኒ ጌዳዋፔ ዳሩዋ ኔኒ ኦꬃናዋ ኤራዴ፥ ቃሲ ኔ ታው ኣዛዜታናዋካ ኣማናዴ፥ ሃዋ ኔው ፃፋይ። ቃሲ ሂንቴንቱ ኤሌካ ታው ኢማꬃይ ሼምፒያ ጎሊያ ጊጊሲቴ። ኣዪሲ ጎፔ፥ ፆሳይ ሂንቴንቱ ዎሳን ታና ሂንቴንቱሲ ጉዬ ዛሪዴ ኢማና ጋዴ ቆፓይ። ኪሪስቶሲ ዬሱሳ ዲራው፥ ታናና ቃሹዋን ዴዒያ ኤፓፊሪ ኔና ሳሮ ሳሮ ጌ። ቃሲ ታናና ኢቲፔ ኦꬂያ ማርቆሲ፥ ኣሪስፂሮኮሲ፥ ዴማሲኔ ሉቃሲ ኔና ሳሮ ሳሮ ጊኖ። ጎዳ ዬሱሲ ኪሪስቶሳ ኣꬎ ኬካቴꬃይ ሂንቴንቱ ኣያናና ጊዶ። ፆሳይ ቤኒ ዎዴ፥ ኑ ኣዎቱ ናባቱዋ ባጋና ዱማ ዱማ ኦጊያኒኔ ዳሮ ዎዲያን ሃሳዬዳ። ሺን ሃ ዉርሴꬃ ዎዲያን፥ ኡባባ ኣ ላቲሲዴ፥ ዬሌታ ኣ ባጋና ሜꬌዳ ባሬ ናዓ ባጋና ኑሲ ሃሳዬዳ። ናዓይ ፆሳ ቦንቾ ፖዑዋ ጶሌ፤ ቃሲ ኩሜንꬃ ፆሳ ኤሻ ኣኪዴ፥ ባሬ ዎልቃማ ቃላን ሃ ሳዓ ናጌ፤ ያቲዴ ኣሳ ናጋራፔ ጌሺዴ፥ ኡባፔ ቦላ ፆሳፔ ኡሼቻ ባጋና ሳሉዋን ኡቴዳ። ፆሳይ ኣው ኢሜዳ ሱንꬃቴꬃይ ኪታንቻቱዋፔ ꬎቃ ጊዲያዋዳንካ፥ ኡንቱንቱፔ ኣ ሎይꬂ ꬎቁ ኦꬄዳ። ኣዪሲ ጎፔ፥ ፆሳይ ባሬ ኪታንቻቱዋፔ ኦና፥ «ኔኒ ታ ናዓ፤ ታኒ ሃቼ ኔው ኣዉዋ ጊዳዲ» ጌዴ? ዎይ ቃሲ ኦና፥ «ታኒ ኣው ኣዉዋ ጊዳና፤ ኢካ ታው ናዓ ጊዳና» ጌዴ? ቃሲ ፆሳይ ባሬ ባይራ ናዓ ሃ ሳዓ ዬዳና ሃኒዴ፥ «ታ ኪታንቻቱዋ ኡባቱካ ኣው ጎዪኒኖ» ያጌዳ። ፆሳይ ኪታንቻቱዋባ ሃሳዪዴ፥ «ታኒ ታ ኪታንቻቱዋ ጫርኩዋ ኬሳይ፤ ቃሲ ታ ኦሳንቻቱዋካ ታማ ላጩዋ ኬሳይ» ያጌ። ሺን ባሬ ናዓዋ ሃሳዪዴ፥ «ፆሳው፥ ኔ ካዉቴꬃ ኦይዲ ሜꬊ ሜꬊናው ዴዔ። ኔ ካዉቴꬃ ፂሎቴꬃን ኣሃሳ። ኔኒ ፂሎቴꬃ ሲቃዴ፤ ናቁዋ ኢፃዳ። ፆሳይ፥ ኔ ፆሳይ ኔና ኔ ላጌቱዋፔ ኣꬂዴ፥ ናሼቻን ኢሊሊሲያ ዛይቲያ ኦኬዳዌ ሃዋሳ» ያጌ። ፆሳይ ሃዋዳን ያጌ፤ «ጎዳው፥ ኮይሮ ኔኒ ሳዓ ሜꬋዳ፤ ሳሉዋካ ኔ ኩሺያን ሜꬋዳ። ሄዋንቱ ኡባይ ꬋያና፤ ሺን ኔኒ ዴዓና። ኡንቱንቱ ኡባይካ ኣፊላዳን ዉራና። ኔኒ ኡንቱንታ ጋቢያዳን ዳኮያና፤ ቃሲ ኡንቱንቱ ኣፊላዳን ላሜታናዋንታ። ሺን ኔኒ ኔናካ፤ ኔ ላይꬃይ ኡባካ ዉሬና» ያጌ። ሺን ፆሳይ ባሬ ኪታንቻቱዋፔ ኢቱዋኔ፥ «ታኒ ኔ ሞርኬቱዋ ኔኒ ጌዲያን ዬꬊያዋ ኦꬃና ጋካናው፥ ሃዋን ታፔ ኡሼቻ ባጋን ኡታ» ጊቤና። ኪታንቻቱ ኡባይ ፆሳው ኦꬃናዉኔ ኣቶቴꬃ ዴማና ኣሳቱዋ ማዳናው ፆሳይ ኪቴዳ ኣያናቱዋ ጊዲኪኖዬ? ሄዋ ዲራው፥ ኑኒ ሲሴዳ ቱሙ ዬዉዋፔ ሱጌቲ ዎራ ቤና ማላ፥ ሄ ዬዉዋ ሎይꬂ ኦይቃናው ቤሴ። ኣዪሲ ጎፔ፥ ኪታንቻቱ ኦዴዳ ቃላይ ቱማ ጊዲያ ዲራው፥ ናቂያ ዎይ ኣዛዜቴና ኣሳይ ኡባይ ሙሬቴዳዋ ጊዶፔ፥ ያቲና፥ ኑኒ ሃ ዎልቃማ ኣቶቴꬃ ሼኔኮ ጎፔ፥ ዋኒዴ ኣታኔ? ጎዳይ ኮይሮ ባሬ ሁጴው ሃ ኣቶቴꬃ ኦዴዳ፤ ቃሲ ኢ ኦዴዳዋ ሲሴዳዋንቱ ኑሲ ጌሺዴ ኦዴዲኖ። ሄ ሲሴዳዋንቱ ማርካቴዳዌ ቦላ ፆሳይካ ማላ፥ ኦራꬃባኔ ዱማ ዱማ ማላታ ኪቴቲያዋን ጉጂ ማርካቴዳ፤ ቃሲ ጌሻ ኣያና ኢሙዋካ ባሬ ኮዬዳዋዳን፥ ጊሺ ጋꬄዳ። ኣዪሲ ጎፔ፥ ፆሳይ ኑኒ ሃሳዪያ ሲንꬃፔ ያና ኣላሚያ፥ ኪታንቻቱዋ ሞዲሲቤና። ሺን ፆሳ ማፃፋይ ኢቲ ሳን ሃዋዳን ያጌ፤ «ፆሳው፥ ኔኒ ኣሳዋ ቆፓናው ኣሳይ ኣዬ? ዎይ ኔኒ ኣው ሂርጋናው ኢ ኣዬ? ኔኒ ኪታንቻቱዋፔ ኣማሬዳ ዎዲያ ኣ ጉꬃዳ። ኣ ሁጲያንካ ቦንቹዋኔ ሳባ ኣኪሊሊያ ዎꬃዳ። ቃሲ ኡባባ ኣ ጌዲያፔ ጋርሳና ዎꬃዴ ሞዲሳዳ» ያጌ። ኣዪሲ ጎፔ፥ ፆሳይ ኡባባካ ኣ ሞዲሴዳዋዳን ኣኒ ሞዴቲቤናዌ ኣያይኔ ባዋ፤ ሺን ሃዒ ኡባባይ ኣው ሞዴቲያዌ ኑሲ ቤቴና። ሺን ኑኒ ዬሱሳ ቤዔቶ፤ ዬሱሲ ፆሳ ኣꬎ ኬካቴꬃ ባጋና ኣሳ ኡባው ሃይቃና ማላ፥ ኣማሬዳ ዎዲያ ኪታንቻቱዋፔ ጋርሳ ጊዴዳ። ቃሲ ሃይቁዋ ዋዪያ ኢ ዋዬቴዳ ዲራው፥ ፖዒያ ቦንቹዋኔ ሳባ ኣኪሊሊያ ዎꬄዳዋ ሃዒ ኑኒ ቤዔቶ። ፆሳይ ኡባባ ሜꬌዳዌ፥ ኡባባካ ናጊያዌ፥ ዬሱሲ ዳሮ ናና ኣሂዴ፥ ባሬናና ቦንቺሳና ማላ፥ ዋዪያ ባጋና ዬሱሳ ባላይ ባይናዋ ኦꬄዳዋ ቤሴ፤ ኣዪሲ ጎፔ፥ ሄ ናና ኣቶቴꬃው ካሌꬂያዌ ዬሱሳ። ኣዪሲ ጎፔ፥ ኣሳ ጌሺያ ዬሱሳዉካ ቃሲ ሄ ጌዬዳ ኣሳ ኡባዉካ ኣዉ ኢቱዋ። ዬሱሲ ኡንቱንታ፥ «ታ ኢሻቱዋ» ጊዴ ዬላቴናን ፄሲያዌ ሃዋሳ። ዬሱሲ፥ «ታኒ ኔ ሱንꬃ ታ ኢሻቶ ኣዋጃና። ማባራ ሺቁዋንካ ኔና ጋላታና» ያጌ። ቃሲ ኢ፥ «ታኒ ታ ኣማኑዋ ፆሳን ዎꬃና» ቃሲካ፥ «ፆሳይ ታው ኢሜዳ ናናቱዋና ታኒ ሃዋን ዴዓይ» ያጌ። ናና ጊዴ ኢ ፄሲያዋንቱ፥ ኣሹዋፔኔ ሱꬃፔ ሜꬌቴዳ ኣሳቱዋ ጊዲያ ዲራው፥ ዬሱሲ ባሬ ሁጴው ኡንቱንታ ማላቲዴ፥ ኡንቱንቱ ሜꬌታ ኣኬዳ፤ ቃሲ ኢ ሄዋ ኦꬄዳዌ፥ ፃላሂያ ካፑዋ ሃይቁዋ ቦላ ማታይ ዴዒያዋ ባሬ ሃይቁዋን ꬋዪሳናሳ። ቃሲ ባሬንቱ ዴዑዋ ኡባን ሃይቆ ያዪዴ፥ ሃይቆ ኣይሌቲዴ ዴዒያዋንታ ኡባቱዋ ኣይሌቴꬃፔ ኬሴዳ። ኣዪሲ ጎፔ፥ ኣብራሃማ ዛሪያ ኢ ማዲያዋፔ ኣቲን፥ ኪታንቻቱዋ ማዴናዌ ኤሬቴዳ። ሄዋ ዲራው፥ ኣሳ ናጋራይ ኣቶ ጌቴታና ማላ፥ ፆሳ ኪታን ኣማኔቴዳ ማሪያ ቄሳቱዋ ኡባቱዋ ካፑዋ ጊዳና ማላ፥ ኡባባኒ ኢ ባሬ ኢሻቱዋ ማላታናው ቤሴ። ኣዪሲ ጎፔ፥ ኢ ባሬ ሁጴው ፓጬቴዳ ዲራዉኔ ዋዬቴዳ ዲራው፥ ፓጬቲያዋንታ ማዳናው ዳንዳዬ። ሄዋ ዲራው፥ ፆሳይ ፄሴዳ ጌሻ ኢሻቶ፥ ኑ ማርካቴꬃ ፆሳይ ኪቴዳዋ ቄሳቱዋ ኡባቱዋ ካፑዋ፥ ዬሱሲ ኪሪስቶሳ ቆፒቴ። ሙሴ ባሬ ኪታን ፆሳ ጎሊያ ኡባን ኣማኔቴዳዋ ጊዴዳዋዳን፥ ዬሱሲካ ባሬና ዶሪዴ፥ ሃ ኦሶ ዬዴዳ ፆሳው ኣማኔቴዳዋ። ኣዪሲ ጎፔ፥ ኬፄቲያ ጎሊያፔ ኬፂያ ቢታኒ ቦንቼቲያዋዳን፥ ሙሴዋፔ ኣꬊያ ቦንቹዋ ኢ ኣካናው ቤሲያዌ ኤሬቴዳዋ። ኣዪሲ ጎፔ፥ ጎሊያ ኡባ ኬፄዳዌ ኢቲ ኣሳ፤ ሺን ኡባባ ኬፄዳዌ ፆሳ። ሙሴ ፆሳ ጎሊያ ኡባን ኣማኔቴዳ ኦሳንቻ ጊዲዴ፥ ፆሳይ ሲንꬃፔ ጋናዋ ማርካቴዳ። ሺን ኪሪስቶሲ ፆሳ ጎሌን ናዓዳን ኣማኔቴዳዋ፤ ኑኒ ኣካና ጊዴ ናሼቻን ናጊያዋ ፃላቴꬃኒኔ ኣማኑዋን ናጎፔ፥ ፆሳው ጎሊያ ጊዴቶ። ሄዋ ዲራው፥ ጌሻ ኣያናይ ሃዋዳን ያጌ፤ «ፆሳ ቃላ ሂንቴንቱ ሃቼ ሲሲያባ ጊዶፔ፥ ሂንቴንቱ ኣዎቱ ታው ኢፂ ማካሊዴ፥ ኦይታሙ ላይꬃ ታ ኦሱዋ ቤዔዳ ባዙዋ ፓጪያ ጋላሳዳን፥ ሂንቴንቱካ ዞሪያ ኣኬናን ኢፆፒቴ። *** ሄዋ ዲራው፥ ታኒ ሄ ኣሳ ሃንቄታዴ፥ ‹ኡንቱንቱ ኡባ ዎዴ ባሬንቱ ዎዛናን ባሊኖ። ታ ኦጊያካ ኤሪቤይኪኖ› ያጋዲ። ሄዋዳንካ ቃሲ፥ ታኒ ሃንቄታ ጫቃዴ፥ b‹ታኒ ሼምፒያሳ ኡንቱንቱ ኡባካ ጌሊኪኖ› ያጋዲ» ያጌ። ታናዳን ኣማኒያዋንቶ፥ ዴዑዋ ፆሳፔ ሂንቴንታ ሻኪያ ኢታ ኣማኔና ዎዛናይ ሂንቴናን ኦናኒኔ ዴዔና ማላ ናጌቲቴ። ሺን ፆሳይ ሂንቴንታ ኡባ ጋላሲ ሃቼ ጊዴ ፄሲሺን፥ ሂንቴፔ ኦናኔ ናጋራይ ባሌꬂና፥ ዞሪያ ኣኬናን ኢፄና ማላ፥ ኢቱ ኢቱዋ ዞሪቴ። ኣዪሲ ጎፔ፥ ኑኒ ኮይሮ ኑሲ ዴዒያ ኣማኑዋ ዉርሴꬃይ ጋካናው ሎይꬂ ናጎፔ፥ ኪሪስቶሳና ኢቲፔ ሻካና። ፆሳ ማፃፋይ፥ «ፆሳ ቃላ ሂንቴንቱ ሃቼ ሲሲያዋ ጊዶፔ፥ ሄ ዎዴ ኡንቱንቱ ኢፂ ማካሌዳዋዳን፥ ዞሪያ ኣኬናን ኢፆፒቴ» ያጌዳ። ፆሳይ ጊያዋ ሲሲዴ፥ ኣው ማካሌዳ ኣሳቱ ኦኔ? ሙሴ ጊብፄፔ ካሌꬂና ኬሴዳ ኡባቱዋ ጊዲኪኖዬ? ፆሳይ ኦይታሙ ላይꬃ ኦናን ሃንቄቴዴ? ኣኃይ ዎራን ኣቴዳ ኣሳቱዋ፥ ናጋራ ኦꬄዳዋንታ ጊዲኪኖዬ? ቃሲ ፆሳይ ባሬው ኣዛዜቴናን ኢፄዳዋንቱ ኢ ሼምፒያ ሳዓ ኡባካ ጌሌና ማላ፥ ኡንቱንቱሲ ጫቄዳዋፔ ኣቲን፥ ኦሲ ጫቄዴ? ኡንቱንቱ ኣማኒቤና ዲራው፥ ሼምፒያሳ ጌላናው ዳንዳዪቤናዋ ኑኒ ቤዔቶ። ሲሚ ፆሳይ ኑና ባሬ ሼምፒያሳ፥ «ጌሊሳና» ጌዳዌ ቢራ ጊዶፔ፥ ሂንቴፔ ኦኒኔ ሄ ሼምፒያሳ ጌሌናን ኣቴና ማላ ናጌቶ። ኣዪሲ ጎፔ፥ ኡንቱንቱ ዎንጋላ ሚሺራቹዋ ሲሴዳዋዳን፥ ኑኒካ ሲሴዶ፤ ኡንቱንቱ ሲሴዲኖ፥ ሺን ኣማኒዴ ኣኪቤና ዲራው፥ ኣይኔ ኡንቱንታ ጎዒቤና። ጊዶፔካ፥ ፆሳ ኪታይ ሳዓይ ሜꬌቶዴፔ ዶሚና ፖሌቴዳዋ ጊዶፔኔ፥ ፆሳይ፥ «ታኒ ሃንቄታ ጫቃዴ፥ ‹ኡንቱንቱ ታኒ ሼምፒያሳ ኡባካ ጌሊኪኖ› ያጋዲ» ጌዳዋዳን፥ ኑኒ ኣማኔዳዋንቱ ኢ ሼምፒያሳ ጌላና። ኣዪሲ ጎፔ፥ ላፑንꬃ ጋላሳባ ኢቲሳዓን ፆሳ ማፃፋይ፥ «ፆሳይ ላፑንꬃ ጋላሳን ባሬ ኦሱዋ ኡባፔ ሼምፔዳ» ያጌዳ። ቃሲ ሄ ሳዓን፥ «ኡንቱንቱ ታኒ ሼምፒያሳ ኡባካ ጌሊኪኖ» ያጌዳ። ዎንጋላ ሚሺራቹዋ ኮይሮ ሲሴዳዋንቱ ኣዛዜቲቤና ዲራው፥ ሼምፑዋ ሳዓ ጌሊቤይኪኖ፤ ኢቲ ኢቲ ኣሳቱ ያ ጌላናዋንቱ ዴዒኖ። ፆሳይ ዳሮ ዎዲያፔ ጉዪያን፥ ዳዊታ ባጋና ላዔንꬁዋ ኢቲ ጋላሳ፥ «ሃቼ» ጊያ ቃላን ኬሪዴ፥ «ፆሳ ቃላ ሂንቴንቱ ሃቼ ሲሲያዋ ጊዶፔ፥ ዞሪያ ኣኬናን ኢፆፒቴ» ያጌዳ። ፆሳይ ሼምፒያሳ ኣሳ ኣፊዴ ኢያሱ ሼምፒሴዳዋ ጊዲንቶ፥ ፆሳይ ሃራ ጋላሳዋ ጉዬ ኬሬና። ሄዋ ዲራው፥ ፆሳ ኣሳው ሳምባታ ሼምፑ ናጌቲ ኡቴዳ። ኣዪሲ ጎፔ፥ ፆሳይ ሼምፒያሳ ጌሊያ ኦኒኔ፥ ፆሳይ ባሬ ኦሱዋፔ ሼምፔዳዋዳን፥ ኢካ ባሬ ኦሱዋፔ ሼምፓና። ሲሚ ኢስራዔሊያ ኣሳይ ኣዛዜቴናን ኢፂዴ፥ ፆሳና ኢቲፔ ሼምፒያሳ ጌሌናን ኣቴዳዋዳን፥ ኑፔ ኦኒኔ ሄዋ ማላ ኢፁዋን ያ ጌሌናን ኣቴና ማላ ሚኖይቴ። ኣዪሲ ጎፔ፥ ፆሳ ቃላይ ሚꬊናው ዴዒያዋኔ ኦꬂያዋ፤ ላዑ ባጋና ሌፌቴዳ ማሻፔካ ኣꬊዴ ኩሴ። ሄ ቃላይ ሼምፑኔ ኣያናይ፥ ኩሪኔ ኮልዚ ኢቲፔ ጋኬቲያሳ ሻካና ጋካናው ጫዴ። ቃሲ ኣሳ ዎዛናን ዴዒያ ኮሻኔ ቆፋ ኢ ሻኬ። ኑኒ ኦꬂያዋ ዎቺያ ፆሳ ሲንꬃን ኡባባይካ ቤቲያዋፔኔ ቆንጪያን ዴዒያዋፔ ኣቲን፥ ኣ ኣይፊያን ጌሚያ ሜꬌታይ ኣያይኔ ባዋ። ሲሚ ሳሉዋ ቤዳ፥ ቄሳቱዋ ኡባቱዋ ዎልቃማ ካፑ፥ ፆሳ ናዓይ ዬሱሲ፥ ኑሲ ዴዒያ ዲራው፥ ኑ ኣማኑዋ ሎይꬂ ናጌቶ። ኣዪሲ ጎፔ፥ ኑ ቄሳቱዋ ኡባቱዋ ካፑ ኑኒ ዳቡሪያ ዎዴ ኑሲ ቃሬታናው ዳንዳዬ፤ ናጋራ ኢ ኦꬂቤናዋፔ ኣቲን፥ ኑናዳን ኡባባንካ ፓጬቴዳ። ሲሚ ኑና ኮሺያ ዎዴ ማዲያ ማሮቴꬃ ኣካናዉኔ ኣꬎ ኬካቴꬃ ዴማናው፥ ኣꬎ ኬካቴꬃይ ዴዒያ ሳዓ ፆሳ ኣራታኮ፥ ያዬናን ሺቆይቴ። ቄሳቱዋ ኡባቱዋ ካፓቱ ሁጲያን ሁጲያን ባሬ ኣሳ ጊዶፔ ዶሬቲዴ፥ ሄ ኣሳ ጊሻታው ፆሳው ኦꬃናው፥ ኢሙዋ ኢማናዉኔ ናጋራ ያርሹዋ ያርሻናው ሱንꬄቴዲኖ። ኢ ባሬ ሁጴው ዳቡራንቻ ጊዲያ ዲራው፥ ታማሪቤናዋንቶኔ ባሊያዋንቶ ቃሬታናው ዳንዳዬ። ሄዋ ዲራው፥ ሄ ቄሳቱዋ ኡባቱዋ ካፑ ኣሳ ዲራው ያርሹዋ ያርሺያዋዳን፥ ባሬ ሁጴ ናጋራ ዲራዉካ ያርሻናው ቤሴ። ፆሳይ ኣሮና ቄሳቱዋ ኡባቱዋ ካፑዋ ጊዳና ማላ ፄሴዳዋዳን፥ ፆሳይ ፄሳናፔ ኣቲን፥ ኦኒኔ ቄሳቱዋ ኡባቱዋ ካፑዋ ጊዲያ ቦንቹዋ ባሬው ኣካናው ዳንዳዬና። ሄዋዳንካ፥ ኪሪስቶሲ ቄሳቱዋ ኡባቱዋ ካፑዋ ጊዲያ ቦንቹዋ ባሬው ኣኪቤና፤ ሺን ፆሳይ ኣ፥ «ኔኒ ታ ናዓ። ታኒ ሃቼ ኔው ኣዉዋ ጊዳዲ» ያጌዳ። ሄዋዳንካ ቃሲ ሃራሳን፥ «ማልኪ-ፄዴቂ ቄሳ ጊዴዳዋዳን፥ ኔኒካ ሜꬊናው ቄሳ ጊዳና» ያጌዳ። ዬሱሲ ሳዓን ዴዒያ ዎዴ፥ ባሬና ሃይቁዋፔ ኣሻናው ዳንዳዪያ ፆሳ ሎይꬂ ዬኪዴኔ ኣፎፂዴ ዎሴዳኔ ኦቼዳ፤ ፆሳይ ኣ ዎሳ ሲሴዳዌ፥ ኢ ባሬና ቶቼዳዋሳኔ ኣው ያዬዳዋሳ። ዬሱሲ ፆሳ ናዓ ጊዶፔኔ፥ ባሬ ዋዬቴዳ ዋዪያን ኣዛዜቲያዋ ታማሬዳ። ዬሱሲ ባሬ ኦሱዋ ፖሌዳ ዎዴ፥ ባሬው ኣዛዜቲያ ኡባው ሜꬊና ኣቶቴꬃ ዴማናው ጋሶ ጊዴዳ። ቃሲ ፆሳይ ማልኪ-ፄዴቃ ሱንꬃቴꬃዳን፥ ቄሳቱዋ ኡባቱዋ ካፑዋ ጊዳና ማላ፥ ኣ ሱንꬄዳ። ኑኒ ሃ ዬዉዋን ሃሳያናባይ ዳሮባይ ዴዔ፤ ሺን ሂንቴንቱ ኣኬካናው ኣዛላ ጊዲያ ዲራው፥ ሂንቴንቱሲ ኦዲ ጌሊሳናው ዋዪሴ። ኣዪሲ ጎፔ፥ ሂንቴንቱ ሃ ዎዲያን ታማሪሲያዋንታ ጊዳናው ቤሶፔካ፥ ፆሳ ቃላ ኮይሮ ቲሚርቲያ ሂንቴንታ ዛሪ ታማሪሲያ ኢቲ ኡራ ኮሼ፤ ሂንቴንታ ኡሺያ ማꬃ ኮሼፔ ኣቲን፥ ጮሚያ ቁማ ኮሼና። ማꬃ ፓኬቲዴ ዴዒያ ኦኒኔ ጋጪኖ ናዓ ጊዲያ ዲራው፥ ፂሎቴꬃ ቲሚርቲያዋ ኤሬና። ሺን ሚኖ ቁማይ ኢታኔ ኬካ ዴዑዋ ዳሩዋን ሻኪ ኤሬዳ ዎዛናማ ኣሳሳ። ሄዋ ዲራው፥ ኪሪስቶሳ ቲሚርቲያ ቢሮ ዶሚያዋ ኣጊዴ፥ ዎዛናማ ኣሳ ቲሚርቴው ሲንꬃው ቦይቴ፤ ኮይሮ ኑኒ ታማራናው ኮሺያ ቲሚርቲያ ዎꬊ ኤቂዴ ታማራናው ኑሲ ቤሴና፤ ሄ ቲሚርቲ ኣዬ ጎፔ፥ ማዴና ኦሱዋፔ ሲሚያዋ፥ ፆሳ ኣማኒያዋ፥ ፂንቃታቱዋባ፥ ኩሺያ ዎꬁዋባ፥ ሃይቁዋፔ ዴንዱዋባኔ ሜꬊና ፒርዳባ። *** ፆሳይ ኦꬂቴ ጎፔ፥ ሄዋ ኑኒ ኦꬃና። ኣዪሲ ጎፔ፥ ኢቶዴካ ፖዑ ፖዔዳዋንታኔ ሳሉዋ ኢሙዋ ባሪ ቤዔዳዋንታ፥ ቃሲ ጌሻ ኣያናካ ሻኪ ኣኬዳዋንታኔ ፆሳ ቃላይ ሎዓ ጊዴዳዋ ሲሲ ኤሬዳዋንታ፥ ሲንꬃፔ ያና ሳዓ ዎልቃካ ቦቺ ፄሌዳዋንታ፥ *** ሄዋፔ ጉዬ ሲሚዴ ካዴዳዋንታ ናጋራፔ ላዔንꬁዋ ዛራናዌ ዳንዳዬቴና። ኣዪሲ ጎፔ፥ ሄዋንቱ ፆሳ ናዓ ማስቃሊያ ቦላ ሚሲማሪያን ꬊሺዴ ካቂያዋንታኔ ኣሳ ሲንꬃን ካዉሺያዋንቱ ማላ። ኡባ ዎዴ ቡኪያ ኢራ ኡሺና፥ ጎሼዳ ኡራ ጎዒያ ካꬃ ሞኪያ ቢታ ፆሳይ ኣንጄ። ሺን ቡሉዋኔ ቡዙዋ ሞኮፔ፥ ኣይኔ ጎዔና፤ ሼቃው ሺቂ ኡቴዳ። ቃሲ ዉርሴꬃን ጉዴታና። ሺን ኑ ሲቃቶ፥ ኑኒ ሃዋዳን ሃሳዪያዋ ጊዶፔኔ፥ ሂንቴንቱ ኣቶቴꬃው ጊዲያ ሎዖባይ ሂንቴንቱሲ ዴዒያዋ ኤሬቶ። ኣዪሲ ጎፔ፥ ሂንቴንቱ ኦꬄዳ ኦሱዋኔ ቃሲ ኣማኒያዋንታ ማዴዳዋኒኔ ሃዒካ ማዲያዋን ፆሳ ሲቄዳ ሲቁዋ ፆሳይ ዶጋናው ማካላ ጊዴና። ሂንቴንቱ ሁጲያን ሁጲያን ዴማና ጊዴ፥ ሂዶታን ናጊ ኡቴዳ ኩሜንꬃ ቱማቴꬃ ዉርሴꬃይ ጋካናው፥ ካሴዋዳን ሚኒሲዴ ኦꬃና ማላ ኣሞቴቶ። ፆሳይ ኢማና ጌዳዋ ኣማኑዋኒኔ ጌንጫን ላቲያዋንቱ ማላ ሂንቴንቱ ጊዳናዋ ኑኒ ኮዪያዋፔ ኣቲን፥ ኣዛላ ጊዳናዋ ኮዮኮ። ፆሳይ ኣብራሃሞ ኢማና ጊዴ ጫቄዳ ዎዴ፥ ባሬፔ ኣꬊያ ዎልቃማይ ባይና ዲራው፥ ባሬ ሁጲያን ጫቄዳ። ፆሳይ ኣ፥ «ታኒ ኔና ኣንጃና፤ ኔ ዜሬꬃካ ጮሪሳና» ያጊዴ ጫቄዳ። ሄዋዳንካ፥ ኣብራሃሞ ጌንጪ ናጊዴ፥ ፆሳይ ኢማና ጌዳዋ ኣኬዳ። ኣዪሲ ጎፔ፥ ኣሳይ ባሬፔ ꬎቂያ ኡራን ጫቄ፤ ቃሲ ሄ ጫቁ ፓሉሚያ ኡባካ ቴዔ። ሄዋ ዲራው፥ ፆሳይ ባሬ ኢማና ጌዳዋ ላታናዋንቶ ባሬ ቆፋ ኡባካ ላሜናዋ ጌሺ ኦዳናው ሎይꬂ ኮዪዴ፥ ሄዌ ቱማ ጊዴዳዎ ጫቄዳ። ፆሳይ ዎርዶታናው ዳንዳዬና ሃ ላዑ ላሜቴና ዬዋቱዋን፥ ኢ ኢማና ጌዳ ኑ ሲንꬃን ዴዒያዋ ኦይቃናው ኣኮ ባቃቴዳ ኑሲ ዎልቃማ ሜንꬄꬁ ዴዔ። ሃ ኑኒ ዴማና ጊዴ ናሼቻን ናጊ ኡቴዳዌ፥ ኑ ሼምፖ ማርካቢያ ኦይቂያ ቃፄና ቢራታ ማላ፤ ሄ ኑኒ ዴማና ጊዴ፥ ናሼቻን ናጊ ኡቴዳዌ ኤሬቴዳ ሚኖ ጊዲዴ፥ ጋሪዱዋ ጊዶ ጌሻሳ ጌሌ። ቃሲ ዬሱሲ ማልኪ-ፄዴቃ ሱንꬃቴꬃዳን፥ ሜꬊናው ቄሳቱዋ ኡባቱዋ ካፑዋ ጊዲዴ፥ ኑ ጊሻታው ኑፔ ካሴቲዴ፥ ሄ ሳዓ ጌሌዳ። ሃ ማልኪ-ፄዴቂ፥ ሳሌማ ካቲ፥ ኡባፔ ቦላ ፆሳ ቄሳይ፥ ኣብራሃሞ ካቴቱዋ ዎꬊዴ ኦላፔ ሲሚሺን፥ ኣናና ጋኬቲዴ፥ ኣ ኣንጄዳ። ኣብራሃሞ ባሬ ኦሞዴዳ ኡባፔ ኣሲራታ ኬሲዴ፥ ኣው ኢሜዳ፤ ማልኪ-ፄዴቃ ሱንꬃው ኮይሮ ቢሌꬃይ ፂሎቴꬃ ካቲያ ጊያዋ፤ ቃሲ ሳሌማ ካቲያ ኢ ጊዲያ ዲራው፥ ላዔꬆ ቢሌꬃይ ሳሮቴꬃ ካቲያ ጊያዋ። ማልኪ-ፄዴቃው ዳያ ዎይ ኣዉ፥ ዎይ ኣው ዛሪያ ፓይዱ ባዋ፤ ቃሲ ኣ ዬሌታው ዶሜꬃይ ዎይ ኣ ሃይቆ ዉርሴꬃይ ባዋ፤ ሺን ፆሳ ናዓ ማላቲዴ፥ ሜꬊናው ቄሳ ጊዴዳ። ኑ ኣዎቱዋ ካፑ ኣብራሃሞ ኦላን ኦሞዲዴ፥ ኣሄዳዋፔ ኣሲራታ ኢሜዳ ማልኪ-ፄዴቂ ኣይ ኬና ꬎቁ ጊያዌንቶ ቤዒቴ። ቄሳ ጊዲያ ሌዊያ ዛራቱ ኢስራዔሊያ ኣሳፔ፥ ሄዌኔ ባሬንቱ ጋዴ ኣሳፔ ሃራይ ኣቶ ኡንቱንቱ ኣብራሃሞ ዛሬ ጊዶፔኔ፥ ኣሲራታ ኣካና ማላ፥ ሂጊያን ኣዛዜቴዲኖ። ማልኪ-ፄዴቂ ሌዊያ ዛሬ ጊዴና፤ ሺን ኣብራሃሞፔ ኣሲራታ ኣኪዴ፥ ፆሳይ ኢማና ጌዳዋ ናጊያ ኣብራሃማ ኣንጄዳ። ቃሲ ኣንጂያዌ ኣንጄቲያዋፔ ꬎቁ ጊያዌ ፓሉንꬄና። ኢቲ ባጋና፥ ሃይቂያ ኣሳይ ኣሲራታ ኬሴ፤ ሺን ሃራ ባጋና ቃሲ፥ ሃይቄና ጊዴ ማርካቲያ ኡራይ ኣሲራታ ኬሴ። ሃዋዳን ሃሳያናው ሃራይ ኣቶ፥ ኣሲራታ ኬሲያ ሌዊካ ኣብራሃሞ ባጋና ኣሲራታ ኢሜዳ። ኣዪሲ ጎፔ፥ ማልኪ-ፄዴቂ ኣብራሃሞና ጋኬቲያ ዎዴ፥ ሌዊ ቢሮ ዬሌቲቤና፤ ሺን ባሬ ዛሪያ ኣብራሃማ ጉልባታን ዴዔ። ኢስራዔሊያ ኣሳው ሂጊ ሌዊያ ዜሬꬃቱዋ ቄሴቴꬃ ባጋና ኢሜቴዳ። ሄ ቄሴቴꬃ ኪታይ ባላይ ባይናዋ ጊዶፔ፥ ኣሮናዋ ማላ ጊዴናን ማልኪ-ፄዴቃ ማላ ሃራ ቄሳይ ሱንꬄታናው ኣዪሲ ኮሺ? ኣዪሲ ጎፔ፥ ቄሴቴꬃይ ላሜቲያ ዎዴ፥ ሂጊካ ቃሲ ላሜታናው ኮሼ። ሃ ዬዉ ሃሳዬቴዳ ኡራይ ሃራ ዛሪ፤ ኣ ዛሪያፔ ኦኒኔ ያርሺያሳን ቄሳዳን ኦꬂቤና። ኑ ጎዳይ ዪሁዳ ዛሪያፔ ዬዳዌ ኤሬቴዳዋ ጊዲያ ዲራው፥ ሙሴ ቄሳቱዋባ ሃሳዪዴ፥ ሄ ዛሪያባ ኣይኔ ሃሳዪቤና። ማልኪ-ፄዴቃ ማላ ሃራ ቄሳይ ዬዳዋ ጊዲንቶ፥ ሃዌ ኣꬊዴ ኤሬታናዋ። ኢ ኣሳ ሂጊያኒኔ ዎጋን ቄሳ ጊዲቤና፤ ሺን ዉሬና ዴዑዋ ዎልቃን ቄሳ ጊዴዳ። ኣዪሲ ጎፔ፥ ፆሳ ማፃፋይ፥ «ማልኪ-ፄዴቂ ቄሳ ጊዴዳዋዳን፥ ኔኒካ ሜꬊናው ቄሳ ጊዳናዋ» ያጊዴ ማርካቴ። ቤኒ ዴዒያ ሂጊ ላፋኔ ማዴናዋ ጊዲያ ዲራው ኣቴዳ። ኣዪሲ ጎፔ፥ ሙሴ ሂጊ ኣያኔ ባላይ ባይናዋ ኦꬃናው ዳንዳዬና፤ ቃሲ ኑኒ ኣ ባጋና ፆሳኮ ሺቃና ጊዴ ናሼቻን ናጊ ኡቴዳ ኡባፔ ኣꬊያዌ ዬዳ። ሄዋ ቦላን ቃሲ ፆሳ ጫቁካ ዴዔ፤ ሃራቱ ቄሳ ጊዴዳ ዎዴ፥ ሄዋ ማላ ጫቁ ባዋ። ሺን ዬሱሲ ጫቁዋን ቄሳ ጊዴዳ፤ ፆሳይ ኣ፥ «ጎዳይ ጫቄዳ፤ ኢ ባሬ ቆፋ ላሜና። ‹ኔኒ ሜꬊናው ቄሳ ጊዳና› ጌዳ» ያጌዳ። ሄዋ ዲራው፥ ዬሱሲ ኡባፔ ኣꬊያ ጫቆ ዋሴ ጊዴዳ። ካሴ ቄሳቱዋ ፓይዱ ጮራ፤ ኣዪሲ ጎፔ፥ ኡንቱንቱ ኦꬃና ኦሱዋ ሃይቁ ዲጌዳ። ሺን ዬሱሲ ሜꬊናው ዴዒያ ዲራው፥ ኣ ቄሴቴꬃይ ላሜቴና። ሄዋ ዲራው፥ ኢ ኡንቱንቱ ጊሻታው ጋናታናው ሜꬊናው ዴዒያ ዲራው፥ ፆሳኮ ባሬ ባጋና ዪያዋንታ ኡባቱዋ ኣሻናው ዳንዳዬ። ኑሲ ጊጊያ ሃዋ ማላ፥ ቄሳቱዋ ኡባቱዋ ካፑ ዴዓናው ኮሼ፤ ኢ ጌሻ፤ ኣኒ ጌኒኔ ካꬌꬂያባይ ባዋ፤ ናጋራንቻቱዋና ኢ ጋኬቴና፤ ቃሲ ꬎቃ ሳሉዋንካ ኢ ቦንቼቴዳ። ሃራ ቄሳቱዋ ኡባቱዋ ካፓቱዋዳን፥ ኢ ኮይሮ ባሬ ሁጴ ናጋራሲ ያርሺዴ፥ ቃሲ ጉዬፔ ኣሳ ናጋራሲ ሃቼ ሃቼ ያርሻናው ኮሼና፤ ኢ ባሬና ያርሼዳ ዎዴ፥ ላዔንꬄናን ኢቲ ጌዴ ያርሼዳ። ኣዪሲ ጎፔ፥ ሙሴ ሂጊ ዳቡራንቻ ኣሳ ቄሳቱዋ ኡባቱዋ ካፑዋ ኡዲዴ ሱንꬄ፤ ሺን ፆሳይ ኢማና ጊዴ ጫቄዳ ሂጊያፔ ጉዬ ዬዳ ቃላይ ሜꬊናው ባላይ ባይናዋ፥ ፆሳ ናዓ ሱንꬄ። ኑኒ ሃሳዪያ ዎልቃማባይ ሃዋ፤ ሳሉዋን ኡባፔ ቦላ ፆሳይ ኡቲያ ካዉቴꬃ ኦይዲያፔ ኡሼቻ ባጋና ኡቴዳ ቄሳቱዋ ኡባቱዋ ካፑ፥ ሃዋ ማላይ ኑሲ ዴዔ። ጌሻ ሳዓኒኔ ቱሙ ዱንካኒያን ኢ ኦꬄ፤ ሄ ዱንካኒ ኣሳይ ኤሴዳዋ ጊዴናን፥ ፆሳይ ኤሴዳዋ። ቄሳቱዋ ኡባቱዋ ካፑ ኡባይ ኢሙዋኔ ያርሹዋ ፆሳው ኢማናው ሱንꬄቴዳ ዲራው፥ ሃ ቄሳቱዋ ኡባቱዋ ካፖካ ያርሻናው ኢቲባይ ዴዓናው ኮሼ። ሲሚ ሳዓን ኢ ዴዒያዋ ጊዶፔ፥ ኡባካ ቄሳ ጊዴና፤ ኣዪሲ ጎፔ፥ ሂጊ ኣዛዚያዋዳን፥ ኢሙዋ ኢሚያ ቄሳቱ ዴዒኖ። ኡንቱንቱ ቄሳቱዋዳን ኦꬂያ ኪታይ ሳሉዋን ዴዒያ ኦሶ ቱሙ ሌሚሱዋኔ ኤሹዋ፤ ኣዪሲ ጎፔ፥ ሙሴ ዱንካኒያ ኤሳና ሃኒሺን፥ ፆሳይ ኣ፥ «ኣኬካ፤ ኡባባካ ታኒ ኔና ዴሪያ ሁጲያን ቤሴዳ ሌሚሱዋ ካላዴ ኦꬃ» ያጌዳ። ሺን ዬሱሲ ጋናቲያ ጫቁ ካሴዋፔ ኣꬊያዋዳንካ፥ ኣው ኢሜቴዳ ኦሱካ ኡንቱንቱዋፔ ኣꬌ፤ ኣዪሲ ጎፔ፥ ሄ ጫቁ ፆሳይ ኢማና ጌዳ ኡባፔ ኣꬊያ ኪታን ኦሴቴዳ። ኣዪሲ ጎፔ፥ ኮይሮ ጫቁዋን ባላይ ባይናዋ ጊዲንቶ፥ ላዔንꬆ ጫቁዋ ኮሼና። ሺን ኡንቱንታ ቦሪዴ፥ ጎዳይ ሃዋዳን ያጌ፤ «ታኒ ኢስራዔሊያ ኣሳናኔ ዪሁዳ ኣሳና ኦራꬃ ጫቁዋ ጫቄቲያ ጋላሳቱ ያናዋ። ሄ ጫቁ ታኒ ጊብፄ ጋዲያፔ ኡንቱንቱ ኣዋቱዋ ኩሺያ ኦዪቃዴ፥ ጎቻ ኬሴዳ ዎዴ፥ ኡንቱንቱና ጫቄቴዳ ጫቁዋ ማላ ጊዴና። ኡንቱንቱ ታ ጫቁዋን ኣማኔቲቤና ዲራው፥ ታኒካ ኡንቱንታ ኣጋዲ። ታኒ፥ ጎዳይ፥ ሃዋ ኦዳይ። ኣዪሲ ጎፔ፥ ሄ ጋላሳቱዋፔ ጉዪያን፥ ታኒ ኢስራዔሊያ ኣሳና ጫቄታና ጫቁ ሃዋ፡ ታኒ ታ ሂጊያ ኡንቱንቱ ቆፋን ዎꬃና፤ ቃሲ ኡንቱንቱ ዎዛናንካ ፃፋና። ታኒ ኡንቱንቱ ፆሳ ጊዳና፤ ኡንቱንቱካ ታ ኣሳ ጊዳና። ኡንቱንቱፔ ኦኒኔ ባሬ ሾሩዋ ዎይ ባሬ ኢሻ፥ ‹ጎዳ ኤራ› ያጊዴ ታማሪሴና። ኣዪሲ ጎፔ፥ ኡንቱንቱ ናዓፔ ጪማ ጋካናው ኡባይ ታና ኤሪኖ። ታኒ ኡንቱንቱ ናቁዋ ማራና፤ ኡንቱንቱ ናጋራካ ላዔንꬆ ሃሳዪኬ» ያጌ። ፆሳይ ኦራꬃ ጫቁዋ ጊዴ ሃሳዪያዋን ኮይሮዋ ኤጪሴዳ፤ ቃሲ ኤጪያባዪኔ ዉሪያባይ ኤሌካ ꬋያና። ኮይሮ ጫቆ ፆሳው ጎዪኒያ ዎጋይኔ ኣሳይ ኦꬄዳ ጌሻ ጎሊ ዴዔ። ኣዪሲ ጎፔ፥ ኮይሮ ዱንካኒ ኤቄዳ፤ ኣ ጊዱዋን ሙቃዳ ዎꬂያዌ፥ ፃራጴዛይኔ ጎዳ ሲንꬃን ዎꬂያ ኡኪꬃይ ዴዔ፤ ሄ ሳዓይ ጌሻሳ ጊዴ ፄሴቴ። ላዔንꬆ ጋሪዱዋ ጉዬ ባጋና ኡባፔ ኣꬊያ ጌሻ ሳዓ ጌቴቲያ ዱንካኒ ዴዔ። ኣ ጊዱዋን ኢፃና ጩዋያናው ዎርቃፔ ኦꬄዳ ሳፂኒኔ ኡባሳና ዎርቃን ሼሼዳ ቃላ ጫቁዋ ታቦታይ ዴዔ። ሄ ቃላ ጫቁዋ ታቦታን ማናይ ዴዒያ ዎርቃ ፃሩ፥ ኣሮና ፃምዓይ ኣጬዳዌኔ ቃሲ ሙሴ ሂጊ ፃፌቴዳ ላዑ ማሴቴዳ ሹቻቱ ዴዒኖ። ሄ ቃላ ጫቁዋ ታቦታፔ ቦላ ባጋና ኣቶ ጊያ ሳዓ ቁምዒያ ባሬንቱ ቄፊያን ጌንꬂያ ቦንቾ ኪሩቤቱ ዴዒኖ፤ ሺን ሃ ኡባባ ሃዒ ዉርሲ ኦዳናው ዳንዳዮኮ። ሄዌ ሄዋዳን ጊጊ ዴዒሺን፥ ቄሳቱ ኡባ ዎዴ፥ ባሬንቱ ኦሱዋ ኦꬃናው ኮይሮ ዱንካኒያ ጌሊኖ። ሺን ቄሳቱዋ ኡባቱዋ ካፑዋ ፃላላይ ላዔንꬆ ዱንካኒያ ላይꬃፔ ኢቲ ጌዴ ጌሊዴ ባሬ ዲራዉኔ ኤሬናን ኣሳይ ኦꬄዳ ናጋራ ዲራው፥ ፆሳው ያርሺያ ሱꬃ ኣኪዴ ጌሌ። ኮይሮ ዱንካኒ ኤቂ ዴዒሺን፥ ኡባፔ ኣꬊያ ጌሻ ሳዓ ኣፊያ ኦጊ ቢሮ ዶዬቲቤናዋ ጌሻ ኣያናይ ሄዋን ኤሪሴ። ሄ ዱንካኒ ሃ ዎዴው ሌሚሱዋ፤ ሄዋ ጊያዌ ፆሳው ኢሚያ ኢሙኔ ያርሹ ጎዪኒያዋ ሱሬ ዎዛና ባላይ ባይናዋ ኦꬃናው ዳንዳዪኪኖ። ሄዋንቱ ሙሳባ፥ ኡሻባኔ ዱማ ዱማ ሜቻባ ኦዲያ ካሬ ባጋ ዎጋቱዋ፤ ኡንቱንቱ ኦራፂያ ዎዲ ጋካናው ኦሴቲያ ዎጋቱዋ። ሺን ኪሪስቶሲ ሃዋን ዴዒያ ሎዖባው ቄሳቱዋ ኡባቱዋ ካፑዋ ጊዲዴ ዪዲጌዳ። ኢ ጌሊዴ ኦꬂያ ዱንካኒ ኡባፔ ኣꬊያዋኔ ባላይ ባይናዋ፤ ቃሲ ሄ ዱንካኒያ ኣሳይ ኦꬂቤና፤ ሃ ሜꬌቴዳ ሳዓባካ ጊዴና። ኪሪስቶሲ ኡባፔ ኣꬊያ ጌሻ ሳዓ ጌሊያ ዎዴ፥ ዴሻ ሱꬃኔ ጋሎ ማራ ሱꬃ ኦይቂዴ ጌሊቤና፤ ሺን ባሬ ሱꬃ ኦይቂዴ፥ ኑሲ ሜꬊና ኣቶቴꬃ ኢሚዴ፥ ላዔꬄናን ኢቲ ጌዴ ጌሌዳ። ቱኔዳ ኣሳ ቦላ ኮሩማ ሱꬃኔ ዴሻ ሱꬃ ጫጫፊዴ፥ ጉዴቴዳ ኡሳቲ ቢዲንꬃ ቆሊና፥ ሄ ኡራ ቱናቴꬃፔ ጌሻናው ዳንዳዮፔ፥ ሜꬊና ጌሻ ኣያና ባጋና ባላይ ባይና ያርሹዋዳን፥ ፆሳው ባሬና ኢሜዳ ኪሪስቶሳ ሱꬃይ፥ ኑኒ ዴዑዋ ፆሳው ኦꬃና ማላ፥ ካሴ ኑ ሃይቄዳ ኦሱዋፔ ኑ ሱሬ ዎዛና ዎቲ ጌሻንዴሻ! ሄዋ ዲራው፥ ፆሳይ ፄሴዳዋንቱ ኢ ኢማና ጌዳ ሜꬊና ኣንጁዋ ላታና ማላ፥ ኪሪስቶሲ ኦራꬃ ጫቆ ጋናቴዳ፤ ሄዌ ሃናና ዳንዳዪያዌ፥ ኣሳይ ኮይሮ ጫቁዋፔ ጋርሳን ዴዒዴ ኦꬄዳ ባላ ኣይሌቴꬃፔ ኬሲያ ሃይቁ ዴዒያ ዲራሳ። ኣዪሲ ጎፔ፥ ሃይቂያ ኡራይ ዎይቴዳዌ ዴዖፔ፥ ሄ ኡራይ ሃይቆዌ ኤሬታናው ኮሼ። ኣዪሲ ጎፔ፥ ዎይቴዳ ኡራይ ሃይቄዳ ዎዴ፥ ኢ ዎይቴዳዌ ፖሌቴዳ፤ ሄ ዎይቴዳዌ ፓፃ ዴዒሺን፥ ኣይኔ ፖሌቴና። ሃራይ ኣቶ፥ ኮይሮ ጫቁካ ሱꬃይ ባይናን ኢንጄቲቤናዌ ሃዋሳ። ኣዪሲ ጎፔ፥ ሂጊያን ዴዒያ ኣዛዙዋ ኡባ ሙሴ ኣሳ ኡባው ኦዴዳ፤ ሄዋፔ ጉዪያን፥ ጋሎ ማራ ሱꬃኔ ዴሻ ሱꬃ፥ ሃꬃና፥ ዞዖ ዶርሳ ኢሲኪያናኔ ሂሶጲያ ጊያ ሚꬃ ቦንጪያና ኢቲፔ ኣኪዴ፥ «ሃዌ ሂንቴንታ ፆሳይ ኣዛዜዳ ጫቁዋ ሱꬃ» ያጊዴ፥ ሂጊያ ማፃፋ ቦላኔ ኣሳ ኡባ ቦላ ጫጫፌዳ። *** ሄዋዳንካ፥ ዱንካኒያ ቦላኔ ኦꬂያ ሚሻ ኡባ ቦላ ሱꬃ ሙሴ ጫጫፌዳ። ሂጊ ጊያዋዳን፥ ቱሙካ ኣማሬዳዋፔ ኣቲን፥ ኡባባይካ ሱꬃን ጌዬ፤ ሱꬃይ ጉካና ꬋዮፔ፥ ኣቶቴꬃይ ባዋ። ሄዋ ዲራው፥ ሳሉዋን ዴዒያዋንታ ማላቲያዋንቱ ሄ ያርሹዋን ጌያናው ኮሼ፤ ሺን ሳሉዋን ዴዒያዋንቱካ ባሬንቱ ሁጴው ጌያናው ኣꬊያ ያርሹዋ ኡንቱንታ ኮሼ። ኣዪሲ ጎፔ፥ ኪሪስቶሲ ቱሙ ጌሻሳን ሌሚሴቲያ ኣሳይ ኦꬄዳ ጌሻሳ ጌሊቤና፤ ሺን ኢ ሃዒ ኑ ጊሻታው ፆሳ ሲንꬃን ቤታናው ያ ሳሉዋ ጌሌዳ። ቄሳቱዋ ኡባቱዋ ካፑ ላይꬃን ላይꬃን ባሬ ሱꬃ ጊዴናዋ ኦይቂዴ፥ ጌሻ ሳዓ ጌሊያዋዳን፥ ኪሪስቶሲ ባሬና ኡባዴ ያርሻናው ጌሊቤና። ሄዋ ጊዲንቶ፥ ኪሪስቶሲ ሳዓይ ሜꬌቶዴፔ ዶሚዴ ዳሮ ጌዴ ዋዬታናው ኮሼ፤ ሺን ሃዒ ዎዲያ ዉርሴꬃን ናጋራ ꬋዪሳናው ባሬና ያርሺዴ፥ ላዔꬄናን ኢቲ ጌዴ ቤቴዳ። ኣሳይ ኡባይ ኢቲ ጌዴ ሃይቃናው ቤሴ፤ ሄዋፔ ጉዪያን ፆሳይ ኣሳ ፒርዳና። ሄዋዳንካ፥ ቃሲ ኪሪስቶሲ ዳሮ ኣሳ ናጋራ ꬋዪሳናው ኢቲ ጌዴ ያርሼቴዳ፤ ቃሲ ኢ ባሬና ሎይꬂ ናጊያዋንታ ኣሻናው ቤታናፔ ኣቲን፥ ላዔንꬆ ናጋራ ቶካናው ቤቴና። ኣዪሲ ጎፔ፥ ሂጌው ያና ሎዖባ ኤሹዋ ፃላላይ ዴዔ፤ ኣው ቱሙ ሌሚሱ ባዋ። ኡባ ዎዴ ላይꬃን ላይꬃን ኢቲ ማላ ያርሹ ያርሼቴ፤ ሄዋ ዲራው፥ ሂጊ ፆሳኮ ሺቂያ ኣሳ ሄ ያርሹዋን ባላይ ባይና ኣሳ ኦꬃናው ኡባካ ዳንዳዬና። ፆሳው ጎዪኒያ ኣሳይ ባሬ ናጋራፔ ኡባና ጌዬዳባ ጊዲንቶ፥ ሱሬ ዎዛናን ላዔꬁዋ ናጋራ ቆፔና፤ ቃሲ ያርሺያዋካ ኣጋና። ሺን ኣሳይ ላይꬃን ላይꬃን ሄ ያርሹዋን ባሬ ናጋራ ሃሳዬ። ኣዪሲ ጎፔ፥ ኮሩማ ሱꬃይኔ ዴሻ ሱꬃይ ናጋራ ꬋዪሳናው ኡባካ ዳንዳዬና። ሄዋ ዲራው፥ ኪሪስቶሲ ሃ ኣላሚያ ያና ሃኒዴ፥ ሃዋዳን ያጌዳ፤ «ኔኒ ያርሹዋኔ ኢሙዋ ኮያቤይካ፤ ሺን ታው ቦላ ጊጊሳዳ። ኔኒ ፁጊያ ያርሹዋኒኔ ናጋራ ያርሹዋን ኡባካ ናሼታካ። ታኒ ሄ ዎዴ፥ ‹ፃꬃ ማፃፋን ታባይ ፃፌቴዳዋዳንካ፥ ፆሳው፥ ታኒ ኔኒ ኮዪያዋ ኦꬃናው ያዲ› ያጋዲ» ያጌዳ። ያርሹ ያርሼታና ማላ፥ ሂጊ ኣዛዚያዋ ጊዶፔኔ፥ ኪሪስቶሲ ኮይሮ፥ «ኔኒ ያርሹዋ፥ ኢሞታ፥ ፁጊያ ያርሹዋኔ ናጋራ ያርሹዋ ኡባካ ኮያቤይካ፤ ሄዋንቱን ናሼታካ» ያጌዳ። ሄዋፔ ጉዪያን ኪሪስቶሲ፥ «ፆሳው፥ ታኒ ኔኒ ኮዪያዋ ኦꬃናው ያዲ» ያጌዳ። ሄዋ ዲራው፥ ኪሪስቶሲ ላዔንꬁዋ ኤሳናው ኮይሮዋ ꬋዪሴ። ዬሱሲ ኪሪስቶሲ ፆሳይ ኮዬዳዋ ኦꬄዳ ዲራው፥ ባሬ ኣሹዋ ላዔንꬄናን ኢቲ ጌዴ ያርሼዳዋን ኑኒ ኑ ናጋራፔ ጌዪ ኣጌዶ። ቄሳቱዋ ኡባቱ ሃቼ ሃቼ ኤቂዴ፥ ባሬ ኦሱዋ ኦꬂኖ፤ ቃሲ ናጋራ ꬋዪሳናው ኡባካ ዳንዳዬና ኢቲ ማላ ያርሹዋ ዛሪ ዛሪዴ ያርሺኖ። ሺን ኪሪስቶሲ ናጋራ ዲራው፥ ኡባ ዎዴው ጊዴዳ ኢቲ ያርሹዋ ያርሺዴ፥ ፆሳፔ ኡሼቻ ባጋና ኡቲ ኣጌዳ። ፆሳይ ሲንꬃፔ ኪሪስቶሳ ሞርኬቱዋ ኪሪስቶሳው ጌዲያን ዬꬊያዋ ኦꬃና ጋካናው፥ ያኒ ናጌ። ኣዪሲ ጎፔ፥ ኢ ኢቲ ጌዴ ያርሼዳዋን፥ ናጋራፔ ጌዬዳዋንታ ሜꬊናው ባላይ ባይናዋንታ ኦꬄዳ። ቃሲ ጌሻ ኣያናይ ኑሲ ማርካቲዴ፥ ሃዋዳን ያጌ፤ «ታኒ ሄ ጋላሳቱዋፔ ጉዪያን፥ ኡንቱንቱና ጫቄቲያ ጫቁ ሃዋ፡ ታኒ ታ ሂጊያ ኡንቱንቱ ቆፋን ዎꬃና፤ ቃሲ ኡንቱንቱ ዎዛናንካ ፃፋና» ያጌ። ቃሲ ሄዋፔ ጉዬና፥ «ታኒ ኡንቱንቱ ናጋራኔ ኡንቱንቱ ማካላ ኦሱዋ ላዔንꬆ ሃሳዪኬ» ያጌ። ፆሳይ ሄ ናጋራ ኣቶ ጌዳ ዎዴ፥ ናጋራ ꬋዪሳናው ሃዋፔ ሲንꬃው ያርሹዋ ኮሼና። ሲሚ ታናዳን ኣማኒያዋንቶ፥ ኑኒ ዬሱሳ ሱꬃ ባጋና ኡባፔ ኣꬊያ ጌሻ ሳዓ ጌላናው ኑሲ ፃላቴꬃይ ዴዔ። ኪሪስቶሲ ኑሲ ኦራꬃ ኦጊያኔ ዴዑዋ ኦጊያ ጋሪዱዋ ባጋና፥ ሄዋ ጉሳይ ባሬ ቦላ ባጋና ዶዬዳ። ኑሲ ፆሳ ጎሌን ሱንꬄቴዳ ዎልቃማ ቄሳይ ዴዒያ ዲራው፥ ኑኒ ሱሬ ዎዛናና፥ ቱሙ ኣማኑዋና፥ ኢታ ዎዛናፔ ጌዬዳ ዎዛናናኔ ቃሲ ፂሎ ሃꬃን ሜጬቴዳ ቦላና ፆሳኮ ሺቆይቴ። ኑሲ ኢማና ጌዳ ፆሳይ ኣማንꬂያ ዲራው፥ ኑኒ ዴማና ጊዴ ናሼቻን ናጊ ኡቴዳዋ ሎይꬂ ኦይቆይቴ። ኢቱ ኢቱዋና ዋኒ ሲቄታኔንቶኔ ቃሲ ሎዖ ኦሱዋ ዎቲ ኦꬃኔንቶ፥ ኢቱ ኢቱዋሲ ቆፔቶ። ኢቱ ኢቱ ሺቁዋ ዶያ ኡዲዴ ሺቂያዋዳን፥ ኑኒካ ኢቲፔ ሺቂያዋ ኣጎኮ፤ ሺን ጎዳ ጋላሳይ ማታቲያዋ ሂንቴንቱ ቤዒያ ዲራው፥ ኢቱ ኢቱዋ ሜንꬄꬄቶ። ኑኒ ቱማቴꬃ ኤራ ኣኪዲጊዴ፥ ኤሪዴ ናጋራ ኦꬂያዋ ጊዶፔ፥ ሃዋፔ ሲንꬃው ናጋራ ꬋዪሲያ ያርሹ ኢቲባይኔ ባዋ። ሺን ያሺያ ፒርዳ ናጊያዌኔ ፆሳ ኢፂያ ኡባ ማናው ዎልቃማ ታማይ ዴዔ። ሙሴ ሂጌው ኣዛዜቴና ኡራይ፥ ላዑ ኡራይ ዎይ ሄዙ ኡራይ ኣ ቦላ ማርካቶፔ፥ ቃሬቲ ባይናን ሃይቄ። ፆሳ ናዓ ካꬌዳ ኡራይ፥ ባሬና ናጋራፔ ጌሼዳ ፆሳ ጫቁዋ ሱꬃ ቱናባዳን ቆፔዳ ኡራይ፥ ቃሲ ኣꬎ ኬካቴꬃ ጌሻ ኣያና ቦሪያ ኡራይ፥ ኣይ ኬና ኢታ ፒርዳ ኣካናው ቤሲንቶኔ ኣኔ ቆፒቴ። ኣዪሲ ጎፔ፥ «ታኒ ሃሉዋ ኬሳናኔ ኩሺያ ዛራና» ጌዳዋ ኑኒ ኤሬቶ፤ ቃሲካ፥ «ጎዳይ ባሬ ኣሳ ፒርዳና» ያጌዳ። ዴዑዋ ፆሳ ኩሺያን ኩንዳናዌ ዳሮ ያሺያዋ። ሂንቴንቱሲ ፆሳ ፖዑ ፖዔዳዋፔ ጉዪያን፥ ሂንቴንቱ ዳሮባን ዋዬቲዴ፥ ዎልቃማ ዋꬌታን ጌንጬዳ ቤኒ ዎዲያ ሃሳዪቴ። ኢቲ ኢቲ ጌዴ ሂንቴንታ ኣሳ ሲንꬃን ቦሬዲኖኔ ፓፃ ካዔዲኖ፤ ቃሲ ሃራ ዎዴ ሄዋዳን ኦꬄዳዋንቱናኔ ኢቲፔ ዴዔዲታ። ኣዪሲ ጎፔ፥ ቃሹዋን ዴዒያ ኣሳቱዋሲ ሂንቴንቱ ቃሬቴዲታ፤ ያቲዴ ሂንቴንቱሲ ሜꬊናው ዉሬና ኡባፔ ኣꬊያ ሻሉ ሳሉዋን ዴዒያዋ ሂንቴንቱ ሁጴው ኤሬዳ ዲራው፥ ሂንቴባ ኡባ ኣኪዲጎፔ ሂዶታን ጌንጬዲታ። ሄዋ ዲራው፥ ዎልቃማ ዎዪታና ዴዒያ ሂንቴንቱ ፃላቴꬃ ኦሎፒቴ። ፆሳይ ኮዪያዋ ኡዲዴ፥ ኢ ሂንቴንቱሲ ኢማና ጌዳዋ ኣካናው ጌንጫና ኮሼ። ኣዪሲ ጎፔ፥ ፆሳ ማፃፋይ፥ «ኣማሬዳ ዎዲ ኣቴዳ። ዪያዌ ያናዋ፤ ጋሚዔና። ታ ፂሉ ኣማኔቲዴ ዴዓናዋ። ሺን ኦኒኔ ጉዬ ሲሞፔ፥ ታና ናሼቼና» ያጌ። ኑኒ ኣማኔቲዴ ኣቴዳዋንቱ ባጋ ጊዲያዋፔ ኣቲን፥ ጉዬ ሲሚዴ ꬋዬዳዋንቱ ባጋ ጊዶኮ። ኣማኑዋ ጊያዌ፥ ዴማና ጊዴ ናሼቻን ናጊ ኡቴዳባይ ኣማንꬂያዋኔ ቤዓናው ዳንዳዬናባ ኤሪሲያዋ። ፆሳይ ቤኒ ጪማ ኣሳው ማርካታዌ፥ ኡንቱንቱ ኣማኔዳዋና። ሳሉኔ ሳዓይኔ ፆሳ ቃላን ሜꬌቴዳዋ ኣማኑዋን ኑኒ ኤሬቶ፤ ሄዋ ዲራው፥ ቤቲያባይ ቤቴናባፔ ሜꬌቴዳ። ኣቤል ቃዔላዋፔ ኣꬊያ ያርሹዋ ፆሳው ያርሼዳዌ ኣማኑዋና። ፆሳይ ኣ ኢሙዋባ ማርካቲዴ፥ ኢ ፂሉዋ ጊዴዳዋካ ማርካቴዳ፤ ኣቤል ሃራይ ኣቶ ሃዪቄዳሺንካ፥ ባሬ ኣማኑዋን ሃዒ ጋካናው ሃሳዬ። ሄኖኪ ሃይቄናን ሳሉዋ ቤዳዌ ኣማኑዋና፤ ፆሳይ ኣፌዳ ዲራው፥ ኦኒኔ ኣ ቤዓናው ዳንዳዪቤና። ፆሳ ማፃፋይ፥ «ሄኖኪ ሳሉዋ ባናፔ ካሴ ፆሳ ናሼቼዳ» ያጌ። ኣማኑ ባይናን ኦኒኔ ፆሳ ናሼቻናው ዳንዳዬና፤ ኣዪሲ ጎፔ፥ ፆሳኮ ዪያ ኦኒኔ ፆሳይ ዴዒያዋኔ ባሬና ኮዪያዋንቶ ዎይታ ኢሚያዋ ኣማናናው ኮሼ። ኖሄ ቤዓናው ዳንዳዬና ሲንꬃፔ ሃናናባው ፆሳይ፥ «ኔና ናጋ» ጊና፥ ፆሳው ያዪዴ፥ ባሬናኔ ባሬ ሶይ ኣሳ ኣሻናው ማርካቢያ ሜꬌዳዌ ኣማኑዋና፤ ያቲዴ ሄዋን ሃ ሳዓ ቦላ ፒርዲዴ፥ ኣማኑዋን ቤቲያ ፂሎቴꬃካ ፆሳፔ ኣኬዳ። ኣብራሃሞ ላታናዳን፥ ፆሳይ ባሬው ኢማና ጌዳ ጋዲያ ባና ማላ፥ ፆሳይ ባሬና ፄሴዳ ዎዴ፥ ኣዛዜቴዳዌ ኣማኑዋና፤ ኢ ባሬ ጋዲያፔ ኬሲዴ ቢያ ዎዴ፥ ሃቃ ቢንቶኔ ኤሬናን ኬሴዳ። ኣብራሃሞ ፆሳይ ባሬው ኢማና ጌዳ ጋዲያን ሃራ ቢታ ኣሳዳን ዴዔዳዌ ኣማኑዋና፤ ፆሳይ ሄ ኢማና ጌዳዋ ባሬናና ኢቲፔ ላታና ዪሳቃናኔ ያዪቆባና ዱንካኒያን ዴዔዳ። ኣዪሲ ጎፔ፥ ኣብራሃሞ ፆሳይ ሎዖ ባሱዋን ቆፒዴ ኬፄዳ ካታማ ናጌ። ሳራ ባሬ ሁጴው ሃራይ ኣቶ ኤጫዴካ፥ ኢማና ጌዳ ፆሳይ ኣማኔቴዳዋ ጊዴዳዋ ኤሬዳ ዲራው፥ ናዓ ሻሃራናው ዎልቃ ዴሜዳዌ ኣማኑዋና። ሄዋ ዲራው፥ ሃይቄዳ ኣሳ ማላቲያ ኢቲ ቢታኒያፔ ሳሉዋን ዴዒያ ፆሊንቲያ ኬና፥ ኣባ ጋፃን ዴዒያ ፓይዱ ባይና ሻፊያ ኬና ዛሬቱ ዬሌቴዲኖ። ሄ ኣሳቱ ኡባቱ ኣማኑዋን ሃይቄዲኖ፤ ባሬንቶ ፆሳይ ኢማና ጌዳዋካ ኣኪቤይኪኖ፤ ሺን ሃኩዋን ሄዋ ቤዒዴ፥ ሳሮቴዲኖ። ቃሲ ኡንቱንቱ ሳዓን ኢማꬃኔ ዬዴሪሴቲዴ ኬሴዳ ኣሳቱዋ ጊዴዳዋ ኤሬዲኖ። ኣዪሲ ጎፔ፥ ሄዋዳን ጊያ ኣሳቱ ባሬንቱ ሁጴ ጋዲያ ኮዪያዋ ኤሪሲኖ። ኡንቱንቱ ሄ ዬጊዴ ኬሴዳ ጋዲያ ሲማናው ቆፔዳዋ ጊዲንቶ፥ ጉዬ ሲሚያ ካጫ ዴሜናን ኣጊኪኖ፤ ሺን ኡንቱንቱ ሄዋ ኣጊዴ፥ ሎዒያ ጋዲያ ላሞቲኖ፤ ሄዌ ሳሉዋ ጋዲያ። ሄዋ ዲራው፥ ፆሳይ ኡንቱንቱ ፆሳ ጌቴታናው ዬላቴና። ኣዪሲ ጎፔ፥ ኢ ኡንቱንቶ ካታማ ጊጊሲ ዎꬄዳ። ኣብራሃሞ ዪሳቃ ያርሻኔንቶ ዎይ ያርሼኔንቶ፥ ፆሳይ ኤራናው ፆሞሴዳ ዎዴ፥ ኣብራሃሞ ኣማኑዋን ኣ ያርሼዳ። ፆሳይ ኣብራሃማ፥ «ኔ ዛሪ ዪሳቃ ባጋና ፄሴታናዋ» ጌዳሺንካ፥ ኣብራሃሞ ባሬ ናዓ ዪሳቃ ያርሻናው ጊጌዳ። *** ኣብራሃሞ ፆሳይ ዪሳቃ ሃራይ ኣቶ፥ ሃይቁዋፔካ ፓꬃናው ዳንዳዪያዋ ኤሬዳ፤ ሄዋ ዲራው፥ ሃይቁዋፔ ጉዬ ኣ ዛሪዴ ኣኬዳ። ዪሳቂ ሲንꬃፔ ሃናናባው ያዪቆባኔ ኤሳ ኣንጄዳዌ ኣማኑዋና። ያዪቆቢ ሃይቃና ሃኒዴ፥ ዮሴፎ ናና ሁጲያን ሁጲያን ኣንጄዳዌኔ ጋቲማን ጉፌቲዴ፥ ፆሳው ጎዪኔዳዌ ኣማኑዋና። ዮሴፎ ሃይቃናው ማቲዴ፥ ኢስራዔሊያ ኣሳይ ጊብፄፔ ኬሳናዋ ሃሳዬዳዌኔ ባሬ ሜቄꬃ ኦꬃናባ ኡንቱንታ ኣዛዜዳዌ ኣማኑዋና። ሙሴ ዬሌቴዳዋፔ ጉዪያን፥ ኣዉኔ ኣታ ማላ ሎዖ ናዓ ጊዴዳዋ ቤዒዴ፥ ሄዙ ኣጌና ቆሴዳዌ ኣማኑዋና፤ ኡንቱንቱ ካቲያ ኣዋጆካ ያዪቤይኪኖ። ሙሴ ዲጬዳዋፔ ጉዪያን፥ ጊብፄ ካቲያ ናቲ ናዓ ጌቴታናዋ ኢፄዳዌ ኣማኑዋና። ናጋራን ሙሴ ጉꬃ ዎዲያ ናሼታናዋፔ፥ ፆሳ ኣሳና ዋዬታናዋ ዶሬዳ። ዎዴፔ ዴማና ዎይታ ኢ ቲሺ ኡዲዴ ፄሎ ዲራው፥ ጊብፄ ጋዲያ ሻሉዋ ኡባፔ ኪሪስቶሳ ዲራው ቦሬቲያዌ ዳሮ ኣꬊያ ዱሬቴꬃ ጊዴዳዋ ቆፔዳ። ካቲያ ሃንቆ ሙሴ ያዬናን፥ ጊብፄ ጋዲያፔ ኬሴዳዌ ኣማኑዋና፤ ኣዪሲ ጎፔ፥ ቤቴና ፆሳ ቤዔዳዋዳን፥ ጌንጪዴ ሲንꬃው ቤዳ። ሃይቁዋ ኪታንቻይ ኢስራዔሊያ ኣሳው ባይራ ናና ቦቼናዳን፥ ሙሴ ፓሲጋ ቦንቼዳዌኔ ጉባኒያን ሱꬃ ጫጫፊሴዳዌ ኣማኑዋና። ኢስራዔሊያ ኣሳይ ሜላ ቢታን ሃሜቲያዋዳን፥ ዞዖ ኣባ ፒኔዳዌ ኣማኑዋና፤ ሺን ጊብፄ ኣሳቱ ፓጬው ጌሊሺን፥ ሃꬃይ ኡንቱንታ ሚቲ ኣጌዳ። ኢስራዔሊያ ኣሳይ ኢያርኮ ጊያ ካታማ ሹቻ ዲርሳ ላፑ ጋላሳ ዩዪ ዩዪ ኣꬎዋፔ ጉዪያን፥ ሄ ሹቻ ዲርሳይ ኩንዴዳዌ ኣማኑዋና። ጫራታ ራዓባ ዬዉዋ ቆሪያዋንታ ሎይꬃ ሞኬዳ ዲራው፥ ፆሳው ኣዛዜቴናን ኢፄዳ ኣሳና ሃይቄናን ኣቴዳዌ ኣማኑዋና። ሲሚ ሃራባ ጉጃዴ ኣያ ኦዶ? ጌዶናባ፥ ባራቃባ፥ ሳሚሶናባ፥ ዮፍታሄባ፥ ዳዊቴባኔ ሳሜላባ፥ ቃሲ ናባቱዋባ ኦዳናው ታው ዎዲ ጊዴና። ኡንቱንቱ ካቲያ ኡባና ኦሌቲዴ ፆኔዳዌኔ ፂሎባ ኦꬄዳዌ ኣማኑዋና፤ ያቲዴ ፆሳይ ኢማና ጌዳዋ ኣኬዲኖ፤ ጋሞቱዋ ዶናካ ጎርዴዲኖ። ዎልቃማ ታማ ቶዪሴዲኖ፤ ኩሳ ማሻፔ ኣቴዲኖ፤ ኡንቱንቱ ዳቡራንቻ፤ ሺን ሚኔዲኖ፤ ቃሲ ኦላን ሚኒዴ፥ ሃራ ጋዲያ ኦላ ኣሳ ዬዴርሴዲኖ። ማጫዋንቱ ባሬንቱ ሃይቄዳዋንታ ሃይቁዋፔ ዴንዲና ኣኬዲኖ። ቃሲ ሃራንቱ ቃሹዋፔ ቢሌታናዋ ኢፂዴ፥ ኬኪያ ዴዖ ሃይቁዋፔ ዴንዳናው፥ ኡጋቲዴ ሃይቄዲኖ። ሃራቱዋ ቦላ ኣሳይ ቂሊጪ ካዔዳ፤ ሊሱዋን ሾጬቴዲኖኔ ሳንꬃላታን ቃሼቲዴ፥ ቃሾ ጎሊያ ጌሌዲኖ። ሹቻን ጫዴቴዲኖ፤ ማጋዚያን ላዑ ኬሲዴ ጳልቄቴዲኖ፤ ፓጬቴዲኖ፤ ማሻን ሃይቄዲኖ፤ ኡንቱንቶ ኡባባይካ ꬋዪና፥ ዋዬቲዴ ቱጋቲዴ፥ ዶርሳ ጫላኔ ዴሻ ጫላ ማዪዴ ዩዬዲኖ። ኡንቱንቱሲ ሃ ኣላሚ ጊጌናን ኢፂና፥ ዎራን፥ ዴሪያን፥ ጎንጎሉዋ ጊዶኒኔ ኦላ ጊዱዋን ዩዬዲኖ። ፆሳይ ኡንቱንቱ ኣማኑዋ ማርካቶፔካ፥ ሄዋንቱ ኡባቱ ኢ፥ ኢማና ጌዳዋ ኣኪቤይኪኖ። ፆሳይ ኑሲ ኢቲ ሎዖ ቆፋ ቆፒ ዎꬄዳ ዲራው፥ ኡንቱንቱ ኑኒ ባይናን ባላይ ባይናዋንታ ጊዲኪኖ። ሲሚ ኑሲ ሃዋ ኬና ዳሮ ኣሳይ፥ ሻሪያዳን ኑ ማታን ዩዪ ኣꬊዴ ማርካቲያዌ ዴዒሺን፥ ኑና ꬉቢያ ኡባባኔ ባቂ ኦይቂያ ናጋራ ዲጊዴ ኑ ሲንꬃን ዴዒያ ኑኒ ዎፃና ዎꬃ ጌንጪዴ ዎፆይቴ። ኑኒ ኑ ኣማኖ ኦጊያ ዶዬዳዋኔ ፖሊሲያዋ ጊዴዳ ዬሱሳ ፄሎይቴ። ዬሱሲ ዬላ ካꬊዴ፥ ሲንꬃፔ ኣው ዴዒያ ናሼቻ ዲራው፥ ማስቃሊያ ቦላ ሚሲማሪያን ꬊሼቲዴ ሃይቃናዋ ጌንጪዴ፥ ፆሳ ካዉቴꬃ ኦይዲያፔ ኡሼቻ ባጋና ኡቴዳ። ሂንቴንቱ ሂንቴንቱ ዎዛና ባዪዚዴ ዳቡሬና ማላ፥ ናጋራንቻቱ ባሬና ዳሮ ኢፂናካ ጌንጬዳ ዬሱሳ ቆፒቴ። ናጋራና ሂንቴንቱ ባፄቲዴ፥ ሱꬃ ጉሳና ጋካናው ቢሮ ኦሌቲ ዲጊቤይኪታ። ፆሳይ ባሬ ናናዳን፥ ሂንቴንታ ዞሪያዋ ዶጌዲቴ? ፆሳይ ሂንቴንታ፥ «ታ ናዓው፥ ፆሳይ ኔና ሙሪያ ዎዴ፥ ላፋባዳን ቆፖፓ። ኢ ኔና ሴሪያ ዎዴካ ያዮፓ። ኣዪሲ ጎፔ፥ ኢ ባሬ ሲቂያ ኡራ ሙሬ፤ ቃሲ ባሬ ናዓዳን ኣኪያ ኡባካ ሊሱዋን ሾጬ» ያጌዳ። ፆሳይ ሂንቴንታ ሙሪያ ዎዴ ጌንጪቴ። ኣዪሲ ጎፔ፥ ኢ ሂንቴንታ ናናዳን ኦꬄ። ኣዉ ሴሬና ናዓይ ዴዒ? ናና ኡባ ሴሪያዋዳን፥ ሂንቴንታ ሙሬናን ኣጎፔ፥ ካሬን ዬሌቴዳዋንታ ጊዲታፔ ኣቲን፥ ቱሙ ናና ጊዲኪታ። ሄዋ ቦላን ቃሲ፥ ኑና ዬሌዳ ኑ ኣዎቱ ኑና ሙሬዳ ዎዴ፥ ኑኒ ኡንቱንታ ቦንቼዶ። ያቲና፥ ኑኒ ዋኒዴ ኣያና ኣቦ ሎይꬂ ዳሪሲ ሞዴቲዴ ዴዖኮ? ኣዪሲ ጎፔ፥ ኑና ዬሌዳ ኑ ኣዎቱ ባሬንታ ሎዖዋዳን፥ ኣማሬዳ ዎዲያ ኑና ሙሬዲኖ፤ ሺን ፆሳይ ኑኒ ኣ ጌሻቴꬃ ኣካና ማላ፥ ኑና ማዳናው ሙሬ። ኑኒ ሙሬቲያ ዎዴ፥ ሃዒው ዪሎዬ፤ ናሼቼና። ሺን ሙሬዳዋንቶ ጉዬፔ ሄ ሙራይ ፂሎቴꬃ ዴዑዋ ሳሮቴꬃ ዎይታ ኢማና። ሄዋ ዲራው፥ ሂንቴንቱ ኣርጋጬዳ ኩሺያኔ ሂንቴንቱ ዳቡሬዳ ጉልባታ ሜንꬄꬂቴ። ዎቢያ ጌዲ ፓፃናፔ ኣቲን፥ ቡርቄና ማላ፥ ሱሬ ኦጊያን ሃሜቲቴ። ኣሳ ኡባና ሳሮ ዴዓናው ሚኒቴ፤ ቃሲ ጌሻ ዴዑዋ ዴዒቴ። ኣዪሲ ጎፔ፥ ጌሻቴꬃይ ባይናን ኦኒኔ ጎዳ ቤዓናው ዳንዳዬና። ፆሳ ኣꬎ ኬካቴꬃ ኦኒኔ ኣኬናን ኣቴና ማላ ናጌቲቴ፤ ቃሲ ዶላዴ፥ ባሬ ማርዚያን ኣሳ ዋዪሲያ ጫሞ ሚꬃዳን ሃኒዴ፥ ኦኒኔ ዳሮ ኣሳ ቱኒሴና ማላ ናጌቲቴ። ዎሹማናው ካጄሊያ ኣሳይ ኦኒኔ ዴዔና ማላ፥ ዎይ ቃሲ ኢቲ ጌዴ ሚያባው ባሬ ባይራቴꬃ ዛሊዔዳ፥ ኣያናባ ካዉሺሲያ ኤሳ ማላ ኣሳይካ ዴዔና ማላ ናጌቲቴ። ሄዋፔ ጉዪያን፥ ኤሳይ ባሬ ኣቡ ኣንጁዋ ኣካናው ኮዬዳዋ ኤሪታ፤ ሺን ኣ ኣቡ ኣ ኣንጄናን ኢፄዳ፤ ኣዪሲ ጎፔ፥ ናጋራፔ ሲሚያ ኦጊያ ኢ ሃራይ ኣቶ፥ ኣፎፂ ኮዪዴካ ዴማናው ዳንዳዪቤና። ሂንቴንቱ ቦቻናው ዳንዳዪያ ዴሪያኮኔ ኤፂያ ታማኮ፥ ꬉማኮ፥ ሻሪያኮኔ ጎቱዋኮ፥ ቃሲ ማላካታ ዋሱዋኮኔ ቃላ ኮሻኮ ዪቤይኪታ። ኣሳይ ሄ ኮሻ ሲሴዳ ዎዴ፥ ሃራ ጉጂ ሲሴና ማላ ዎሴዳ። ኣዪሲ ጎፔ፥ ፆሳይ ኡንቱንታ፥ «ሃራይ ኣቶ፥ ዶዓይካ ሄ ዴሪያ ቦቾፔ፥ ሹቻን ጫዴቲዴ ሃይቆ» ያጌዳ ኣዛዙዋ ኡንቱንቱ ጌንጫናው ዳንዳዪቤዪኪኖ። ኣይፊያን ቤቲያዌ ዳሮ ዳጋንꬂያዋ ጊዲያ ዲራው ሙሴ፥ «ታኒ ያሻን ኮኮራይ» ያጌዳ። ሺን ሂንቴንቱ ፂዮኔ ዴሪያ፥ ዴዖ ፆሳይ ዴዒያ ካታማ፥ ኢቲፔ ሺቂዴ ናሼቲያ ዳሮ ሻዓ ኪታንቻቱዋኮ ሳሉዋ ዬሩሳላሜ ዬዲታ። ፆሳ ባይራ ናናቱዋኮ፥ ኢቲፔ ሺቄዳዋንቱኮ፥ ኡንቱንቱ ሱንꬃይ ሳሉዋን ፃፌቴዳዋንቱኮ ዬዲታ፤ ቃሲ ኣሳ ኡባ ፒርዲያ ፆሳኮኔ፥ ባላይ ባይናዋንታ ኦꬄዳ ፂሎ ኣሳቱዋ ኣያናቱዋኮ ዬዲታ። ኦራꬃ ጫቆ ጋናቲያ ዬሱሳኔ ኣቤላ ሱꬃፔ ኣꬊያዋ ኦዲያ ጉኬዳ ሱꬃኮ ዬዲታ። ሂንቴንቱሲ ኦዲያ ኡራ ዬዉዋ ሲሲያዋ ሂንቴንቱ ኢፄና ማላ፥ ሂንቴንታ ናጊቴ። ፆሳ ኪታ ሳዓን ባሬንቶ ኦዲያዌ ኦዲያዋ ሲሴናን ኢፄዳዋንቱ ኣታና ꬋዮፔ፥ ሳሉዋን፥ «ሂንቴና ናጊቴ» ጊያ ፆሳፔ ኑኒ ዋኒዴ ኣታኔ? ሄ ዎዴ ኣ ኮሻይ ሳዓ ቃꬄዳ፤ ሺን ኢ ሃዒ፥ «ታኒ ሳዓ ፃላላ ጊዴናን፥ ኢቲ ጌዴ ጉጃዴ ሳሉዋካ ቃꬃና» ያጌዳ። «ኢቲ ጌዴ ጉጃዴ» ጊያ ቃላይ ቃፄናባይ ሚኒዴ ዴዓና ማላ፥ ሜꬌቴዳባይ ቃፃናዋኔ ኪቻናዋ ጌሺዴ ቤሴ። ኑኒ ቃፃናው ዳንዳዬና ካዉቴꬃ ኣኪያ ዲራው፥ ኣኔ ፆሳ ጋላቶይቴኔ ኣ ናሼቾይቴ፤ ኣው ቤሲያዋዳን ቦንቹዋኒኔ ያሻቴꬃን ኣው ጎዪኖይቴ። ኣዪሲ ጎፔ፥ ኑ ፆሳይ ቱሙ ባዪዚያ ታማ። ሂንቴንቱ ኢሻቱዋ ሲቂያዋ ኣጎፒቴ። ኢማꬃ ሞኪያዋካ ዶጎፒቴ። ኣዪሲ ጎፔ፥ ያቲያዋን ኢቲ ኢቲ ኣሳይ ኤሬናን ኪታንቻቱዋ ሞኬዳ። ቃሾ ጎሌን ዴዒያዋንቱባ ሂንቴንቱካ ኡንቱንቱና ኢቲፔ ቃሾ ጎሌን ዴዒያዋዳን ቆፒቴ፤ ቃሲ ሂንቴንቱ ሂንቴንቱ ሁጴው ዋዬቲያዋዳን፥ ዋዬቲያዋንቱባ ቆፒቴ። ኣኪያዋኔ ጌሊያዋ ኣሳይ ኡባይ ቦንቻናው ቤሴ፤ ቃሲ ኣሲናይኔ ማቻታ ኢቱ ኢቱዋሲ ኣማኔታናው ቤሴ፤ ኣዪሲ ጎፔ፥ ፆሳይ ዎሹማናው ካጄሊያዋንታኔ ዎሹሚያዋንታ ፒርዳና። ሚሻ ሲቁዋፔ ሂንቴንታ ናጊቴ፤ ሂንቴንቱሲ ዴዒያዌ ሂንቴንቱሲ ጊዶ። ኣዪሲ ጎፔ፥ ፆሳይ ባሬ ሁጴው፥ «ታኒ ኔና ኡባካ ዬጊኬ ዎይ ኣጊኬ» ያጌዳ። ሄዋ ዲራው፥ ኑኒ ፃሊዴ፥ «ጎዳይ ታና ማዲያዋ፤ ታኒ ያዪኬ። ኣሳይ ታና ኣይ ኦꬂ?» ያጌቶ። ፆሳ ቃላ ሂንቴንቱሲ ኦዴዳ ሂንቴንታ ካሌꬄዳዋንታ ሃሳዪቴ፤ ኡንቱንቱ ዋኒ ዴዔዲኖንቶኔ ሃሳዪቴ፤ ቃሲ ኡንቱንቱዋዳን ኣማኒቴ። ዬሱሲ ኪሪስቶሲ ዚኖካ ሃቼካ ሜꬊናዉካ ላሜቴና። ዱማ ዱማ ኦራꬃ ቲሚርቲያን ዎራ ቦፒቴ። ኑ ዎዛናይ ፆሳ ኣꬎ ኬካቴꬃን ሚኖፔ ሎዖ ጊዲያዋፔ ኣቲን፥ ቁማ ዎጋቶ ኣዛዜቲያዋ ጊዴና፤ ሄዎ ኣዛዜቴዳዋንቱካ ማዴቲቤይኪኖ። ኑሲ ያርሺያሳይ ዴዔ፤ ዱንካኒያ ጊዶን ኦꬂያዋንቱ ሄ ያርሺያሳፔ ማናው ኡንቱንቶ ማታይ ባዋ። ቄሳቱዋ ኡባቱዋ ካፑ ናጋራ ዲራው፥ ሜሂያ ሱꬃ ያርሻናው ኡባፔ ኣꬊያ ጌሻ ሳዓ ኣፌ፤ ሺን ሄ ሜሂያ ኣሹዋ ቃሲ ዲርሳፔ ካሬና ጉዴ። ሄዋ ዲራው፥ ዬሱሲካ ቃሲ ናጋራፔ ኣሳ ባሬ ሱꬃን ጌሻናው፥ ካታማ ፔንጊያፔ ካሬና ዋዬቴዳ። ሲሚ ኑኒ ኢ ቦሬቴዳ ቦሪያ ኣኪዴ፥ ዲርሳፔ ካሬ ኣኮ ኬሶይቴ። ኣዪሲ ጎፔ፥ ኑሲ ሃዋን ሜꬊናው ዴዒያ ካታማይ ባዋ፤ ሺን ኑኒ ያና ካታማ ናጌቶ። ሲሚ ፆሳው ዬሱሳ ባጋና ኡባ ዎዴ ጋላታ ያርሹዋ ኢሞይቴ፤ ሄዋ ጊያዌ ሜቴርሻይ ኣ ሱንꬃው ኢሚያ ጋላታ ጊያዋ። ሎዖባ ኦꬂያዋኔ ኢቱ ኢቱዋ ማዲያዋ ዶጎፒቴ። ኣዪሲ ጎፔ፥ ፆሳ ናሼቺያዌ ሄዋ ማላ ያርሹዋ። ሂንቴና ካሌꬂያዋንቶ ኣዛዜቲቴ፤ ቃሲ ኡንቱንቱ ኣዛዚያዋካ ኦꬂቴ። ኡንቱንቱ ባሬንቱ ኦꬄዳዋ ፆሳው ኦዳና ዲራው፥ ሂንቴንቱ ሼምፑዋ ሎይꬂ ናጊኖ፤ ሂንቴንቱ ኡንቱንቶ ኣዛዜቶፔ፥ ባሬንቱ ኦሱዋ ናሼቲዴ ኦꬃና፤ ሄዌ ꬋዮፔ፥ ኡንቱንቱ ዪሎቲዴ ኦꬃና፤ ሄዌ ሂንቴንታ ኣይኔ ማዴና። ኑሲ ፆሳ ዎሲቴ። ኑኒ ኡባ ዎዴ ሎዖባ ኦꬃናው ኮዪያ ዲራው፥ ኑና ዞሪያ ሎዖ ዎዛናይ ኑሲ ዴዔ። ፆሳይ ታና ሂንቴንቱኮ ኤሌካ ዛራና ማላ፥ ፆሳ ሂንቴንቱ ሎይꬂ ዎሳናዳን፥ ታኒ ሂንቴንታ ሎይꬃ ዎሳይ። ሳሮቴꬃ ፆሳይ፥ ኑ ጎዳ ዬሱሳ፥ ዶርሳቱዋ ሄንꬃንቻ ዎልቃማ፥ ሜꬊና ጫቁዋ ሱꬃን ሃይቁዋፔ ዴንꬄዳ። ፆሳይ ዬሱሲ ኪሪስቶሳ ባጋና ባሬ ሲንꬃን ባሬና ናሼቺያዋ ሂንቴንታ ኦሲሲዴ፥ ሂንቴንቱካ ኢ ኮዬዳዋ ኦꬃና ማላ፥ ሎዖ ኦሱዋ ኡባን ሂንቴንታ ኢ ጊጊሶ፤ ፆሳይ ሜꬊ ሜꬊናው ቦንቼቶ። ኣሜንዒ። ታናዳን ኣማኒያዋንቶ፥ ታኒ ሃ ዳቢዳቢያ ሂንቴንቱሲ ቃንꬃን ፃፌዳ ዲራው፥ ሂንቴንቱ ሃ ዞሪያ ሳሌቴናን ሲሳና ማላ፥ ታኒ ሂንቴንታ ዎሳይ። ኑ ኢሻይ፥ ፂሞቶሲ ቃሹዋፔ ቢሌቴዳዋ ኤሪቴ። ኤሌሊ ኢ ሃ ዮፔ፥ ታኒ ኣናና ባዴ ሂንቴንታ ቤዓና። ሂንቴና ካሌꬂያ ኡባቱዋኔ ፆሳ ኣሳቱዋ ኡባ ሳሮ ሳሮ ጊቴ። ፃሊያፔ ዬዳ ኣማኒያዋንቱ ሂንቴንታ ሳሮ ሳሮ ጊኖ። ኣꬎ ኬካቴꬃይ ሂንቴናና ኡባና ኢቲፔ ጊዶ። ኣሜንዒ። ታኒ ያዪቆቢ ፆሳ ኣይሊኔ ጎዳ ዬሱሲ ኪሪስቶሳ ኣይሊ፥ ቢታ ኡባን ላሌቴዳ ታማኔ ላዑ ዜሬꬃቶ ሳሮታ ኪታይ። ታናዳን ፆሳ ካሊያዋንቶ፥ ሂንቴ ኣማኑ ፓጬቲያዌ ሂንቴንቶ ዳንዳያ ኢማናዋ ኤሪዴ፥ ዱማ ዱማ ፓጪ ሂንቴና ጋኪያ ዎዴ፥ ሄዋ ኩሜንꬃ ናሼቻዳን ፓይዲቴ። *** ሂንቴ ዳንዳያይ ኣይኔ ባሊ ባይናን ሂንቴና ሚኔዳዋንታኔ ፓጪ ባዪናዋንታ ኦꬂዴ፥ ባሬ ኦሱዋ ፖሎ። ሺን ሂንቴፔ ኦኒኔ ባሬው ኣꬌዳ ኤራቴꬃይ ꬋዮፔ፥ ካꬌናኒ ኡባው ኬካቴꬃን ኢሚያ ፆሳ ዎሶ። ኢ ኣው ኢማና። ሺን ኢ ኣያኒኔ ሲꬌናን ኣማኑዋን ፆሳ ዎሶ። ኣዪሲ ጎፔ፥ ሲꬊያ ኡራይ ጫርኩ ሱጊና ቃፂያ ኣባ ቤታ ማላ። ኣዪሲ ጎፔ፥ ላዑ ቆፋይ ዴዒያ ኡራይ፥ ባሬ ኦጊያ ኡባን ባሬ ቆፋ ቃቼናዌ፥ ሄ ኡራይ ጎዳፔ ኣዪኔ ዴማናው ቆፖፖ። *** ሺን ሂዬሳ ኢሻይ ፆሳይ ኣ ꬎቁ ኦꬄዳ ዎዴ ናሼቶ። ቃሲ ዱሬ ኢሻይካ ፆሳይ ኣ ካዉሺሴዳ ዎዴ ናሼቶ። ኣዪሲ ጎፔ፥ ዱሬ ቢታኒ ማታ ጊዶን ዲጪያ ጪሻዳን ꬋያና። ኣዪሲ ጎፔ፥ ኣዋይ ባሬ ሴላና ኬሲዴ፥ ማታ ሜሊሲና፥ ጪሻይ ꬋዬ፤ ቃሲ ኣ ማላ ሎዖቴꬃይካ ꬋዬ፤ ሄዋዳንካ ቃሲ ዱሬ ቢታኒ ባሬዋ ኦꬂዴ ꬋያና። ዋዪያን ጌንጪያ ኡራይ ኣንጄቴዳዋ፤ ኣዪሲ ጎፔ፥ ሄ ዋዪያ ፆኔዳዋፔ ጉዪያን፥ ፆሳይ ባሬና ሲቂያዋንቶ ኢማና ጌዳ ዴዑዋ ኣኪሊሊያ ኢ ኣካና። ኦኒኔ ፓጬቴዳ ዎዴ፥ «ታና ፆሳይ ፓጬ» ጎፖ። ኣዪሲ ጎፔ፥ ፆሳይ ኢታን ፓጬታናው ዳንዳዬና፤ ቃሲ ኢ ባሬ ሁጴው ኦናኔ ፓጬና። ሺን ኣሳይ ሁጲያን ሁጲያን ባሬ ሁጴ ኢታ ኣሙዋን ጎሼቲያ ዎዴኔ ጪሜቲያ ዎዴ ፓጬቴ። ሄዋፔ ጉዪያን፥ ኣሙ ሻሃሪዴ፥ ናጋራ ዬሌ፤ ቃሲ ናጋራይ ዲጪዴ፥ ሃይቁዋ ዬሌ። ታናዳን ፆሳ ካሊያዋንቶ፥ ጪሜቶፒቴ። ሎዖ ኢሙዋ ኡባዪኔ ኩሜንꬃ ዎይታ ኡባይ ሳሉዋፔ ዬ። ሳሉዋ ፖዑዋ ሜꬌዳ ኣዉዋፔ ዬ፤ ፆሳይ ባሬ ሁጴው ዱማቴናኔ ዎይ ባሬ ኩዋ ላሜና። ኑኒ ኢ ሜꬌዳ ሜꬌታቱዋ ጊዶን ꬎቃሳ ኣካናዳን፥ ኑና ባሬ ሼኒያን ቱሙ ቃላን ዬሌዳ። ታናዳን ፆሳ ካሊያዋንቶ፥ ሃዋ ሃሳዪቴ፤ ኣሳይ ኡባይ ሲሳናው ኤሌሎ፤ ሺን ሃሳያናዉኔ ሃንቄታናው ኤሌሎፖ። ኣዪሲ ጎፔ፥ ኣሳ ሃንቁ ፆሳይ ኮዪያ ፂሎቴꬃ ኣሄና። ሄዋ ዲራው፥ ቱና ሃኖታ ኡባኔ ኢታቴꬃ ኡባ ሂንቴፔ ꬋዪሲዴ፥ ፆሳይ ሂንቴ ዎዛናን ቶኬዳ ሂንቴ ሼምፑዋ ኣሻናው ዳንዳዪያ ቃላ ኣሺኬቴꬃን ኣኪቴ። ሺን ፆሳ ቃላ ኦሱዋን ፔሺቴፔ ኣቲን፥ ሲሳ ፃላላን ሂንቴ ሁጲያ ጪሞፒቴ። ኣዪሲ ጎፔ፥ ቃላ ሲሲዴ ኦꬄና ኡራይ ዴዖፔ፥ ኢ ባሬ ማላ ማስቶቲያ ፄሊያ ኡራ ማላ። ኢ ባሬና ፄሊዴ ቤ፤ ኤሌካ ኢ ኣይ ማሌንቶኔ ዶጊ ኣጌ። ሺን ኦኒኔ ኣዪሌቴꬃፔ ኬሲያ ባሊ ባዪና ሂጊያ ፄሊዴ፥ ኣኒ ኣቂያዌ ቃሲ ኣ ናጊያዌ፥ ሲሴዳዋካ ዶጌናዌ፥ ሄ ኡራይ ባሬ ኦꬂያ ኦሱዋን ኣንጄታና። ባሬ ኢንፃርሳ ናጌናን ባሬና ጪሚዴ፥ ባሬው ፆሳ ጎዪኒያዋ ማላቲያ ኡራይ ዴዖፔ፥ ኣ ጎይናይ ሜላ። ፆሳ ኣዉዋ ሲንꬃን ፖኩ ባዪና ጌሻ ጎይናይ ሃዋ፤ ሄዌ ሃቃዌ ጎፔ፥ ኣታ ኣዉ ባዪና ናናቱዋኔ ዋዬቲያ ኣምዔቱዋ ማዳናዋኔ ሳዓ ናጋራ ቂታፔ ባሬ ሁጲያ ናጋናዋ። ታናዳን ፆሳ ካሊያዋንቶ፥ ሂንቴ ኑ ቦንቾ ጎዳ ዬሱሲ ኪሪስቶሳ ኣማኒ ዴዒዴ፥ ዴሙዋ ፄሊዴ፥ ኣሳ ቦንቾፒቴ። ኣዪሲ ጎፔ፥ ዎርቃ ሚጊዱዋ ዎꬂዴ፥ ሎዖ ማዩዋ ማዬዳ ኢቲ ኣሳይ ሂንቴ ሺቁዋ ዮፔ፥ ቃሲ ጩርቃ ማዩዋ ማዬዳ ሂዬሳ ኣሲካ ዮፔ፥ ሎዖ ማዩዋ ማዬዳ ቢታኒያ ሂንቴ ኣꬂ ቦንቺዴ ኣ፥ «ኔኒ ሃዋን ኡባፔ ሎዒያ ኦይዲያን ኡታ» ጊዴ ቃሲ ሂዬሳ ቢታኒያ፥ «ኔኒ ሂኒና ኤቃሻ፤ ዎይ ሃዋን ታ ጌዲያ ማታን ሳዓን ኡታ» ጎፔ፥ ያቲና ሂንቴ ሂንቴ ጊዶን ሻኮቴꬃ ሜꬊያዋንታኔ ኢታ ቆፋና ዴዒያ ዳናቱዋ ጊዲኪቴዬ? ታናዳን ፆሳ ካሊያዋንቶ፥ ሲሲቴ፤ ፆሳይ ሃ ሳዓን ዴዒያ ሂዬሳ ኣሳይ ኣማኑዋን ዱሬታናዉኔ ባሬና ሲቂያዋንቶ ኢማና ጌዳ ሳሉዋ ካዉቴꬃ ላታናው ዶሪቤኔዬ? ሺን ሂንቴ ሂዬሳቱዋ ቶቼዲታ። ዱሬቱ ሂንቴና ቱጋዪያዋንታ ጊዲኪኖዬ? ኡንቱንቱ ሂንቴና ዳናን ሞቲያዋንታ ጊዲኪኖዬ? ሂንቴው ኢሜቴዳ ሎዖ ሱንꬃ ቦሪያዋንቱ ኡንቱንታ ጊዲኪኖዬ? ሺን ፆሳ ማፃፋን፥ «ኔ ሾሩዋ ኔ ሁጲያዳን ሲቃ» ጌቴቲዴ ፃፌቴዳ ካቲያ ሂጊያ ሂንቴ ፖሎፔ፥ ሎዖባ ኦꬂታ። ሺን ሂንቴ ኣሳ ዴሙዋ ፄሊዴ ቦንቾፔ፥ ናጋራ ኦꬂታ፤ ቃሲ ሂጊ ሂንቴ ቦላ፥ ሂጊያ ሜንꬄዳዋንቱዳን ፒርዳና። ኣዪሲ ጎፔ፥ ኦኒኔ ሂጊያ ኡባ ናጊዴ፥ ኢቲኖ ሜንꬂያዋ ጊዶፔ፥ ሄ ኡራይ ሂጊያ ኡባ ሜንꬄ። ኣዪሲ ጎፔ፥ «ዎሹሞፓ» ጌዳዌ ቃሲ «ዎꬎፓ» ጌዳ፤ ሺን ኔኒ ዎሹማና ꬋዮፔካ፥ ዎꬌዳዋ ጊዶፔ፥ ሂጊያ ሜንꬃዳ። ኣሳ ኣይሌቴꬃፔ ኬሲያ ሂጊያን፥ ፒርዳ ኣካና ኣሳቱዋዳን ሃሳዪቴኔ ኡንቱንቱዋዳን ኦꬂቴ። ኣዪሲ ጎፔ፥ ኣሳ ማሪቤና ኡራ ፆሳይ ማሬናን ፒርዳና፤ ማሮቴꬃይ ፒርዳ ፆኔ። ታናዳን ፆሳ ካሊያዋንቶ፥ ኢቲ ኡራይ ባሬው ኣማኑ ዴዔ ጎፔ፥ ቃሲ ኣ ኣማኑዋ ኣ ኦሱ ኤሪሳና ꬋዮፔ፥ ኣ ኣይ ጎዓኔ? ኣ ኣማኑ ኣ ኣሻናው ዳንዳዪ? ኢቲ ኢሻይ፥ ዎይ ኢቲ ሚቻታ ካሎቶፔ፥ ቃሲ ኡንቱንቶ ኡባ ጋላሲ ሚያባይ ꬋዮፔ፥ ሂንቴፔ ኢቲ ኡራይ ኡንቱንታ፥ «ሳሮ ቢቴ። ታማ ሆዒቴ። ካሊዴ ሚቴ» ጊዴ፥ ኡንቱንቶ ኮሺያዋ ኢማና ꬋዮፔ፥ ኡንቱንታ ኣይ ጎዓኔ? ሄዋ ዲራው፥ ኣማኑ ኦሱ ባይናን ባሬካ ዴዖፔ ሃይቄዳዋ። ሺን ኢቲ ኡራይ፥ «ኔው ኣማኑ ዴዔ፤ ቃሲ ታው ኦሱ ዴዔ። ኔኒ ኔ ኣማኑዋ ኔ ኦሱዋፔ ሻካዴ ታና ቤሳ፤ ታኒካ ታ ኣማኑዋ ታ ኦሱዋን ኔና ቤሳና» ጋና። ኔኒ ኢቲ ፆሳይ ዴዒያዋ ኣማናሳ፤ ሄዌ ሎዓ። ፃላሄቱካ ቃሲ ኣማኒኖ፤ ያሻን ኮኮሪኖ። ኔኒ ኤያይ! ኣማኑ ኦሱዋፔ ሻኬቲዴ ጎዔናዋ ኤራናው ኮያይ? ኑ ኣቡ ኣብራሃሞ ባሬ ናዓ ዪሳቃ ያርሺያ ሳዓ ቦላ ዎꬄዳ ዎዴ፥ ባሬ ኦሱዋን ፂሊቤኔ? ኣ ኣማኑኔ ኣ ኦሱ ኢቲፔ ኦꬄዳዋኔ ኣ ኣማኑ ኣ ኦሱዋን ፖሌቴዳዋ ቤዒኪ? ፆሳ ማፃፋይ «ኣብራሃሞ ፆሳ ኣማኔዳ። ፆሳይካ ሄዋ ኣው ፂሎቴꬃን ፓይዴዳ» ጌዳዌ ፖሌቴዳ፤ ቃሲ ፆሳ ዳቦ ጌቴቲዴ ኢ ፄሴቴዳ። ኣሳይ ኣማኖ ፃላላና ጊዴናን፥ ኦሱዋን ፂሊያዋ ሂንቴ ቤዒታ። ሄዋዳንካ ቃሲ ጫራታ ራዓባ ኪቴቶዋንታ ሞካዴ ሃራ ኦጊያና ኡንቱንታ ሞዪዜዳ ዎዴ፥ ባሬ ኦሱዋን ፂላቤይኬ? ኣዪሲ ጎፔ፥ ሼምፑ ሻኬቴዳ ቦላይ ሃዪቄዳዋ ጊዲያዋዳን፥ ሄዋዳንካ ቃሲ ኦሱ ሻኬቴዳ ኣማኑ ሃይቄዳዋ። ታናዳን ፆሳ ካሊያዋንቶ፥ ኑኒ ሃራቱዋፔ ኣꬊያ ፒርዳ ኣካናዋ ሂንቴ ኤሪያ ዲራው፥ ሂንቴፔ ጮራቱ ታማሪሲያዋንታ ጊዶፒቴ። ኑኒ ኡባዪካ ዳሮባን ባሌቶ፤ ኢቲ ኡራይ ባሬ ሃሳያን ሙሌካ ባላና ꬋዮፔ፥ ኢ ባሬና ናጋናው ዳንዳዪያ ባሊ ባዪና ኣሳ። ፓራቱ ኑሲ ኣዛዜታና ማላ፥ ቢፃላ ባርሲዴ፥ ኑኒ ኮዪያሳ ኡባ ኡንቱንታ ኣፌቶ። ቤዒቴ፥ ማርካቤቱካ ቃሲ ሄዋ ኬና ዎልቃማ ጊዲዴ፥ ጎቱዋ ጫርኩዋን ላጌቶፔካ፥ ኡንቱንታ ላጊያዌ ባሬዋ ኮዪያሳ ዛሪዴ ላጊያ ቄሪ ጉꬃ ሚꬃን ላጌቲዴ ቢኖ። ሄዋዳን ኢንፃርሳይ ቦላ ጊዶን ጉꬃ ኣሳቴꬃ ጊዶፔካ፥ ዳሮ ዎልቃማባን ጬቄቴ። ጉꬃ ታማይ ዋኒዴ ዎልቃማ ዎራ ጉዲ! ኣኬኪቴ። ኢንፃርሳይካ ታማ ማላ። ኢ ኑ ኣሳቴꬃ ጊዶን ኢታባ ኡባ ኦꬃና ዳንዳዬ፤ ኣሳቴꬃ ኡባ ቱኒሴ። ቃሲ ኑ ዴዑዋ ዎꬃካ ታማን ጉዴ፤ ጋናሚያ ታማን ኢ ጉዴታናዋ። ኣዪሲ ጎፔ፥ ዶዓቱዋ፥ ካፋቱዋ ዛሪያ፥ ቲራን ጎሼቲያ ሾሻቱ ዛሪያኔ ኣባን ዴዒያ ሜꬌታቱዋ ዛሪያ ኡባ ኣሳይ ኣዲሴዳ፤ ቃሲ ኡንቱንቱካ ኣዴዲኖ። ሺን ኦኒኔ ኢንፃርሳ ኣዲሳናው ዳንዳዪቤና፤ ኢንፃርሳይ ዎꬊያ ማርዚ ኩሜዳ ጮዑ ጌና ኢታ ሜꬌታ። ኑኒ ኢንፃርሳን ኑ ጎዳኔ ኣዉዋ ጋላቴቶ፤ ቃሲ ኣኒካ ፆሳ ማላቲዴ ሜꬌቴዳ ኣሳ ሼቄቶ። ኢቲ ዶናፔ ጋላታይኔ ሼቃይ ኬሴ። ታናዳን ፆሳ ካሊያዋንቶ፥ ሄዌ ሄዋዳን ሃናናው ቤሴና። ፑልቱ ኢቲ ኦላፔ ማልዒያ ሃꬃኔ ጫሚያ ሃꬃ ፑልታናው ዳንዳዪ? ታናዳን ፆሳ ካሊያዋንቶ፥ ባላሲያ ጊያ ሚꬃይ ዎጋራ ኣዪፋናው ዳንዳዪ? ዎይ ዎዪኒያ ቱራይ ባላሲያ ጊያ ሚꬃ ኣዪፋናው ዳንዳዪ? ማፂኔ ማፂኔ ጊያ ሃꬃፔካ ማልዖ ሃꬃይ ኬሳና ዳንዳዬና። ሂንቴ ጊዶን ኣꬌዳ ኤራንቻዪኔ ኣኬካንቻይ ኦኔ? ባሬ ሎዖ ዴዑዋን ኦሴቴዳ ባሬ ኦሱዋ ኣꬌዳ ኤራቴꬃፔ ዪያ ኣሺኬቴꬃን ቤሶ። ሺን ሂንቴ ዎዛናን ጫሚያ ቃናቲኔ ዪርጊ ዴዖፖ። ቃሲ ቱማቴꬃ ቦላካ ዎርዶቶፒቴኔ ኦቶሬቶፒቴ። ሄዋ ማላ ኣꬌዳ ኤራቴꬃይ ሳሉዋፔ ዎꬊያዋ ጊዴና፤ ሺን ሄዌ ሳዓባ፥ ኣሳዋ፥ ፃላሃቱዋዋ። ኣዪሲ ጎፔ፥ ቃናቲኔ ዪርጊ ዴዒያሳን ዋላሳዪኔ ኢታ ኦሶ ኡባይ ዴዔ። ሺን ቦላፔ ዪያ ኣꬌዳ ኤራቴꬃይ ኡባፔ ካሴ ጌሻ። ቃሲ ሳሮቴꬃ ዶሲያዋ፥ ኣሺኬኔ ኤኖ ጊያዋ፤ ቃሲ ማሮቴꬃይኔ ሎዖ ኣይፊ ኩሜዳዋ። ሲꬊኔ ሎዖ ማላቲያ ኢታቴꬃይ ባዪናዋ። ፂሎቴꬃ ኣይፊ ሳሮቴꬃ ኦꬂያዋንቱ ሳሮቴꬃን ዜሬዳ ዜሬꬃፔ ቤቴዳ። ኦላይኔ ዋላሳይ ሂንቴ ጊዱዋ ሃቃፔ ዪ? ኡንቱንቱ ዬዳሳይ ሂንቴ ቦላ ጊዶን ኦሌቲያ ሂንቴ ናሼታናው ዎልቃማ ኣሙዋ ኣሞቲያዋፔ ጊዴኔ? ሂንቴ ኣሞቲታ፤ ሺን ዴሚኪታ፤ ዎꬊታ። ሎይꬂ ኮዪታ፤ ሺን ዴማናው ዳንዳዪኪታ፤ ዋላቄቲታኔ ኦሌቲታ። ሺን ፆሳ ዎሴና ዲራው፥ ሂንቴ ኮዪያዋ ዴሚኪታ። ፆሳ ዎሲታ፥ ሺን ዴሚኪታ፤ ጋሱካ ባላ ኦጊያን ዎሲታ። ሄዋ ሂንቴና ናሼቺያዋን ፔሻናው ኮዪያ ዲራሳ። ሲሚ ዎሹሚያዋንቶ፥ ሃ ኣላሚያና ዳቦቲያዌ ፆሳው ሞርኬ ጊዲያዋ ኤሪኪቴ? ኣዪሲ ጎፔ፥ ሃ ኣላሚያና ዳቦታናው ኮዪያዌ ኦኒኔ ፆሳና ሞርኬቴ። ዎይ ፆሳ ማፃፋይ፥ «ፆሳይ ኑናን ዎꬄዳ ኣያናይ ዎልቃማ ኣሙዋ ኑሲ ኣሞቴ» ጊያዋ ሂንቴንቶ ጮ ጊያዋ ማላቲ? ሺን ፆሳይ ኣꬎ ኬካቴꬃ ኣꬂዴ ኢሜ። ሄዋ ዲራው፥ ፆሳ ማፃፋይ፥ «ፆሳይ ኦቶሬቲያዋንታ ኢፄ፤ ሺን ባሬና ካዉሺያዋንቶ ኣꬎ ኬካቴꬃ ኢሜ» ያጌ። ሲሚ፥ ሂንቴ ፆሳው ሞዴቲቴ። ያቲዴ ፃላሂያና ኤቄቲቴ፤ ኢ ሂንቴፔ ባቃታና። ፆሳኮ ሺቂቴ፤ ኢካ ሂንቴኮ ሺቃና። ሂንቴኖ ናጋራንቻቶ፥ ሂንቴ ኩሺያ ሜጬቲቴ። ላዑ ቆፋይ ዴዒያዋንቶ፥ ሂንቴ ዎዛና ጌሺቴ። ቱጋቲቴ፤ ካዮቲቴኔ ዬኪቴ። ሂንቴ ሚቻ ዬኮ ላሚቴ፤ ሂንቴ ናሼቻካ ካዮ ላሚቴ። ጎዳ ሲንꬃን ሂንቴ ሁጲያ ቶቺቴ፤ ቃሲ ኢ ሂንቴና ꬎቁ ꬎቁ ኦꬃና። ታናዳን ፆሳ ካሊያዋንቶ፥ ኢቱ ኢቱዋ ዚጊሮፒቴ። ባሬ ኢሻ ዚጊሪያዌኔ ኣ ቦላ ፒርዲያዌ ሂጊያ ዚጊሬኔ ሂጊያ ቦላ ፒርዴ። ኔኒ ሂጊያ ቦላ ፒርዶፔ፥ ሂጊያ ቦላ ፒርዲያዋ ጊዳሳፔ ኣቲን፥ ሂጌው ኣዛዜቲያዋ ጊዳካ። ሂጊያ ኢሚያዌኔ ፒርዲያዌ ፆሳ ፃላላ፤ ኢ ኣሻናዉኔ ꬋዪሳናው ዳንዳዬ፤ ሺን ኔ ሾሩዋ ቦላ ፒርዲያዌ ኔኒ ኦኔ? ሂንቴኖ፥ «ኑኒ ሃቼ ዎይ ዎንቲ ሄ ካታማ ባና፤ ሄዋን ላይꬃ ኡታና፤ ዛሊዓናኔ ቃሲ ሚሻ ዎꬊሳና» ጊያዋንቶ፥ ቤዒቴ። ዎንቲ ሂንቴ ዴዑ ኣያ ሃናኔንቶኔ ኤሪኪታ፤ ጉꬃ ዎዴው ሂንቴ ቤቲዴ፥ ጉዬፔ ꬋዪያ ፔኑዋ ማላ። ሄዋ ኣጊዴ፥ «ጎዳይ ጎፔ፥ ኑኒ ዴዓና፤ ሃዋ ዎይ ሄዋ ኦꬃና» ጋናው ቤሴ። ሺን ሂንቴ ሃዒ ሂንቴንቱ ꬎቃቴꬃን ጬቄቲታ፤ ሄዋ ማላ ጬቁ ኡባይ ኢታ። ሄዋ ዲራው፥ ሎዖባ ኦꬃናው ኤሪዴ ኦꬄና ኡራው ሄዌ ናጋራ። ሃዒካ ሂንቴኖ ዱሬ ኣሳቶ፥ ሂንቴ ቦላ ዪያ ቱጋው «ኣዬ! ኣዬ!» ያጊዴ ዬኪቴኔ ዚላሊቴ። ሂንቴ ዱሬቴꬃይ ባይዲጌዳ፤ ቃሲ ሂንቴ ኣፊላካ ቢልዓይ ሚዲጌዳ። ሂንቴ ዎርቃይኔ ሂንቴ ቢራይ ሺዒ ዲጌዳ። ቃሲ ሄ ሺዓይ ሂንቴ ቦላ ማርካታና፤ ሂንቴ ቦላካ ታማዳን ማና። ሂንቴ ሂንቴ ሚሻ ሲንꬃው ዳጋይ ዴዒታ። ኣኬኪቴ፤ ሂንቴ ጋዴን ካꬃ ቆይጬዳ ኣሳቶ ጪጊቤና ኪራ ሚሻይ ዋሴ፤ ኡንቱንቱ ዋሱ ዎልቃማ ጎዳ ሃዪꬃን ሲሴቴዳ። ሂንቴው ኢንጄቲና፥ ሳዓን ኢሻሊዴ ዴዔዲታ፤ ሹካ ጋላሳው ꬊኪያዋዳን፥ ሂንቴ ቦላ ꬊኬዲታ። ፂሎ ኣሳ ቦላ ፒርዴዲታ፤ ቃሲ ኣ ዎꬌዲታ፤ ኢ ሂንቴናና ኤቄቴና። ሄዋ ዲራው፥ ታናዳን ፆሳ ካሊያዋንቶ፥ ጎዳይ ያና ጋካናው ጌንጪቴ፤ ቢታ ጎሺያዌ ኣዲሊያ ኢራይኔ ኣሱራ ኢራይ ያና ጋካናው ጌንጪዴ፥ ኣልዖ ካꬃ ኢ ዎቲ ናጊዴ ጋꬂ ኣኪንቶ ቤዒቴ። ሂንቴካ ቃሲ ጌንጪቴ፤ ሂንቴ ዎዛና ሚኒሲቴ። ኣዪሲ ጎፔ፥ ጎዳ ዩሳይ ማታቴዳ። ታናዳን ፆሳ ካሊያዋንቶ፥ ፆሳይ ሂንቴ ቦላ ፒርዴና ማላ፥ ኢቱ ኢቱዋ ቦላ ዙዙሞፒቴ። ቤዒቴ፥ ፒርዲያዌ ፔንጊያን ኤቄዳ። ታናዳን ፆሳ ካሊያዋንቶ፥ ዋዪያሲኔ ጌንጫሲ ሌሚሱዋ ጊዴዳዋንታ፥ ጎዳ ሱንꬃን ሃሳዬዳ ናባቱዋ ሃሳዪቴ። ቤዒቴ፥ ዳንዳዪዴ ጌንጬዳዋንታ ኑኒ ኣንጄቴዳዋንታ ጌቶ። ኢዮባ ጌንጫ ሂንቴ ሲሴዲታ፤ ቃሲ ጎዳይ ኣው ዉርሴꬃን ኢሜዳዋካ ቤዔዲታ። ኣዪሲ ጎፔ፥ ጎዳይ ማሮታይኔ ቃሬታይ ኩሜዳዋ። ሺን ኡባፔ ካሴ፥ ታናዳን ፆሳ ካሊያዋንቶ፥ ሳሉዋን ጊዲና፥ ዎይ ሳዓን ጊዲና፥ ዎይ ሃራ ጫቁዋን ጊዲና፥ ኣያንካ ጫቆፒቴ። ሺን ፆሳ ፒርዳን ሂንቴ ጌሌናዳን፥ ሂንቴ ዬዉ ኤ ጊያዋ ጊዶፔ፥ «ኤ» ጊቴ፤ ጊዴና ጊያዋ ጊዶፔ፥ «ጊዴና» ጊቴ። ሂንቴ ጊዶን ዋዬቲያ ኡራይ ኦኒኔ ዴዖፔ፥ ፆሳ ዎሶ፤ ናሼቲያ ኡራይ ኦኒኔ ዴዖፔ፥ ዬፂዴ ጋላቶ። ሂንቴፔ ሳኬቲያ ኡራይ ኦኒኔ ዴዖፔ፥ ኣማኒያ ኣሳ ካሌꬂያ ጪማቱዋ ባሬኮ ፄሶ፤ ኡንቱንቱ ጎዳ ሱንꬃን ዛይቲያ ኣ ኦኪዴ፥ ኣው ፆሳ ዎሲኖ። ኣማኑዋን ፆሳ ዎሴዳ ዎሳይ ሃርጋንቻ ፓꬃና፤ ጎዳይካ ኣ ሃርጊያፔ ዴንꬃና፤ ቃሲ ናጋራ ኢ ኦꬄዳዋ ጊዶፔካ ጎዳይ ኣው ኣቶ ጋና። ሄዋ ዲራው፥ ሂንቴ ፓፃና ማላ፥ ሂንቴ ናጋራ ኢቱ ኢቶ ፓፂቴኔ ኢቱ ኢቶ ፆሳ ዎሲቴ፤ ፂሎ ኣሳ ዎሳይ ዎልቃማ ኦሱዋ ኦꬄ። ኤላስ ኑ ማላ ኣሳ። ኢራይ ሳዓን ቡኬናዳን፥ ኢ ሚኒሲዴ፥ ፆሳ ዎሲና ሄዙ ላይꬃኔ ኡሱፑን ኣጌና ሳዓን ኢራይ ቡኪቤና። ላዔንꬁዋ ፆሳ ኢ ዎሲና፥ ሳሉዋፔ ኢራይ ቡኬዳ፤ ሳዓይካ ባሬ ካꬃ ሞኬዳ። ታናዳን ፆሳ ካሊያዋንቶ፥ ሂንቴፔ ኦኒኔ ቱሙዋፔ ዎራ ቦፔ፥ ቃሲ ኢቱ ኣ ጉዬ ሄ ቱሙዋኮ ዛሮፔ፥ ናጋራንቻ ኣ ባላ ኦጊያፔ ዛሪያ ኦኒኔ ኣ ሼምፑዋ ሃዪቁዋፔ ኣሻናዋኔ ዳሮ ናጋራ ካማናዋ ኤሮ። ታኒ፥ ዬሱሲ ኪሪስቶሲ ኪቴዳ ጴፂሮሲ፥ ፆሳይ ዶሬዳ ኣሳቶ ጳንፆሳ ጋዲያን፥ ጋላቲያ ጋዲያን፥ ቃጳዶቂያ ጋዲያን፥ ኢሲያ ጋዲያኒኔ ቢታኒያ ጋዲያን ቤቲያን ዴዒያዋንቶ ዳቢዳቢያ ፃፋይ። ዬሱሲ ኪሪስቶሳው ሂንቴ ኣዛዜታና ማላኔ ኣ ሱꬃን ጌያና ማላ፥ ፆሳይ ኣዉ ዶሬዳ ሂንቴንቶ ባሬ ኣያናን ጌሼዳዋንቶ፥ ኣꬎ ኬካቴꬃይኔ ሳሮቴꬃይ ጊዶ። ኑኒ ፆሳ፥ ኑ ጎዳ ዬሱሲ ኪሪስቶሳ ኣዉዋ፥ ባሬ ማሮቴꬃ ዳሩዋዳንካ ኑና ላዔꬁዋ ዬሌዳዋ፥ ዬሱሲ ኪሪስቶሳ ሃዪቁዋፔ ዴንꬄዳዋን ኑሲ ዴዑዋ ሂዶታ ኢሜዳዋ ጋላቴቶ። ቃሲ ፆሳይ ሂንቴንቶ ኢማና ዳሮ ላታይ ዎቄናዌ፥ ባዬናዌኔ ꬋዬናዌ ሳሉዋን ናጌ። ሄዌካ ሂንቴንቱሲ፥ ፆሳ ዎልቃን ኣማኑዋን ናጌቲ ኡቲዴ፥ ኣቶቴꬃው ጊጌዳዋንቱሲ ዉርሴꬃ ዎዲያን ቆንጫናዋ። ሃዒ ጉꬃ ዎዴው ሃራይ ኣቶ ዱማ ዱማ ፓጪያን ሂንቴ ፓጬታናው ኮሾፔካ፥ ሃዋን ዳሮ ናሼቲቴ። ሄዌ ሃራይ ኣቶ፥ ታማን ዬጊና ꬋዪያ ዎርቃፔካ ሂንቴ ኣማኑ ዳሮ ኣልዖኔ ባሊ ባዪናዋ ጊዲያዋ ቤሳናሳ፤ ያቲዴ ዬሱሲ ኪሪስቶሲ ቤቲያ ዎዴ፥ ጋላታ፥ ቦንቹዋኔ ሳባ ሂንቴ ኣካና። ሂንቴ ኣ ኤራና ꬋዮፔካ፥ ሲቂታ፤ ሂንቴ ሃዒ ኣ ቤዓና ꬋዮፔካ፥ ኣማኒታ። ቃሲ ሂንቴ ሂንቴ ኣማኖ ፖሎ ጊዲያ ሂንቴ ሼምፑዋ ኣቶቴꬃ ኣኪያ ዲራው፥ ኦዳናው ዳንዳዬቴና ቦንቹ ኩሜዳ ናሼቻ ናሼቲታ። *** ፆሳይ ሂንቴንቶ ኢማና ኣꬎ ኬካቴꬃባው ቲምቢቲያ ኦዴዳ ናባቱ ሎይꬂ ቢዲዴ፥ ሃ ኣቶቴꬃባ ኮዬዲኖ። ኡንቱንቱን ዴዒያ ኪሪስቶሳ ኣያናይ ኪሪስቶሳ ቱጋባኔ ሄዋፔ ጉዪያን ያና ቦንቹዋባ ካሴቲዴ ማርካቲዴ፥ ኣዉዴ ዎይ ዋኔዳ ዎዲያን ያኔንቶኔ ኣኬኪሴዳዋዳን፥ ኡንቱንቱ ኮዬዲኖ። ሄ ቲምቢቲያ ኦዲያዋንቱ ኦꬄዳ ኦሱ ሂንቴሳፔ ኣቲን፥ ኡንቱንቱ ሁጲያሳ ጊዴናዋ ፆሳይ ኡንቱንቶ ቆንጪሴዳ፤ ሃዒ ሂንቴ ሲሴዳ ሚሺራቹዋ ቃላ ሂንቴንቶ ኦዴዳ ኣሳቱ፥ ባሬው ሳሉዋፔ ኪቴቴዳ ጌሻ ኣያና ዎልቃን ኦዴዲኖ። ሄዋ ኪታንቻቱካ ቤዓናው ኣሞቲኖ። ሄዋ ዲራው፥ ኦሱዋ ኦꬃናው ሂንቴ ዎዛናን ቆፋ ጊጊሲዴ ሂንቴ ሁጲያ ናጊቴ። ዬሱሲ ኪሪስቶሲ ቆንጪያ ዎዴ ኣꬎ ኬካቴꬃ ሂንቴ ኣኪያ ዲራው፥ ኩሜንꬃ ሂዶታን ናጊቴ። ፆሳው ኣዛዜቲያ ናናዳን፤ ሂንቴ ካሴ ኤሬናን ኣሞቴዳ ኣሙዋ ካሎፒቴ። ሺን ሂንቴና ፄሴዳ ፆሳይ ጌሻ ጊዴዳዋዳን፥ ሂንቴካ ሂንቴ ኦሱዋ ኡባን ጌሻ ጊዲቴ። ፆሳ ማፃፋን፥ «ታኒ ጌሻ ጊዲያ ዲራው፥ ሂንቴካ ጌሻ ጊዲቴ» ጌቴቲዴ ፃፌቴዳ። *** ኣሳ ሁጲያን ሁጲያን ዴሙዋ ፄሌናን ኣ ኦሱዋዳን ፒርዲያ ፆሳ ዎሲዴ ሂንቴ፥ «ኑ ኣቦ» ጊዴ ኣ ፄሲያዋ ጊዶፔ፥ ሃ ኣላሚያን ቤቴ ጊዲዴ ሂንቴ ዴዒያ ዎዲያን ያሻቴꬃን ዴዒቴ። ሂንቴ ሂንቴ ኣዋቱዋፔ ላቴዳ ፓꬄና ዴዑዋፔ ዎዜቴዳዌ፥ ꬋዪያ ቢራ ዎይ ዎርቃ ማላና ጊዴናዋ ኤሪታ፤ ቦሪሲያባይ ዎይ ቂታይ ባዪና ዶርሳ ሱꬃዳን፥ ኣልዖ ኪሪስቶሳ ሱꬃን ሂንቴ ዎዜቴዲታ። *** ፆሳይ ሳዓይ ሜꬌታናፔ ካሴ ኪሪስቶሳ ዶሪ ዎꬄዳ፤ ሺን ሂንቴ ዲራው፥ ሃ ዎዲያ ዉርሴꬃን ኢ ቤቴዳ። ሂንቴ ኣማኑኔ ሂንቴ ኣካና ጊዴ ናሼቻን ናጊ ኡቴዳባይ ፆሳን ዴዓና ማላ፥ ፆሳይ ሃዪቁዋፔ ኣ ዴንꬂዴ፥ ኣው ቦንቹዋ ኢሜዳዋ ኣኒ ኣማኒታ። ቱማቴꬃው ሂንቴ ኣዛዜቲያዋን፥ ሎዓ ማላቲያ ኢታቴꬃይ ባዪናን ሂንቴ ኢሻቱዋ ሲቃናው ሂንቴ ሁጲያ ጌሺዴ፥ ኢቱ ኢቱዋና ሚኒሲዴ ዎዛናፔ ሲቄቲቴ። ሂንቴ ሃዪቂያ ዜሬꬃፔ ላዔንꬁዋ ዬሌቲቤይኪታ፤ ሺን ሜꬊናው ዴዒያዋኔ ሲንꬃዉካ ዴዓና ፆሳ ቃላን ሃይቄና ዜሬꬃፔ ዬሌቴዲታ። ኣዪሲ ጎፔ፥ ፆሳ ማፃፋይ፥ «ኣሳይ ኡባይ ማታ ማላ፤ ኣ ቦንቹ ኡባዪካ ማታ ጪሻ ማላ። ማታይ ሜሌ፤ ጪሻዪካ ቆቆፌቴ። ሺን ጎዳ ቃላይ ሜꬊናው ዴዔ» ያጌ። ሃዌ ሂንቴንቶ ጎዳይ ኦዴዳ ሚሺራቹዋ ቃላ። ሄዋ ዲራው፥ ሂንቴፔ ኢታቴꬃ ኡባ፥ ጪሚያዋ ኡባ፥ ሎዓ ማላቲያ ኢታቴꬃ፥ ቃናቲያኔ ዚጊርሳ ኡባ ዲጊቴ። ጎዳይ ኬካ ጊዴዳዋ ሂንቴ ዴዑዋን ቤዔዳዋ ጊዶፔ፥ ሃዒ ዬሌቴዳ ጋጪኖ ናናቱዋዳን፥ ኡሺዴ ዲጫናዉኔ ኣታናው ፂሎ ጊዴዳ ኣያና ማꬃ ላሞቲቴ። *** ጎዳኮ ዴዖ ሹቻኮ ሺቂቴ። ኣሳይ ኣ ኢፄዳ፤ ሺን ፆሳ ማታን ኢ ዶሬቴዳ ኣልዖ። ሂንቴካ ቃሲ ዴዖ ሹቻዳን፥ ጌሻ ቄሳ ጊዲዴ፥ ዬሱሲ ኪሪስቶሳ ባጋና ፆሳ ናሼቺያ ኣያና ያርሹዋ ፆሳው ያርሻናው፥ ሂንቴ ሂንቴ ሁጴው ኣያና ኬꬃዳን ኬፄቲቴ። ኣዪሲ ጎፔ፥ ፆሳ ማፃፋይ፥ «ቤዒቴ፥ ታኒ ፂዮኔ ጊያ ካታማን ጎሊያ ጎዳ ፃጱዋ ሚኒሲያ፥ ዶሬቴዳ፥ ኣልዖ ሹቻ ዎꬃይ፤ ኣኒ ኣማኒያ ኦኒኔ ዬላቴና» ያጌ። ሄዋ ዲራው፥ ሃ ሹቻይ ሂንቴንቶ ኣማኒያዋንቶ ዳሮ ኣልዓ፤ ሺን ኣማኔናዋንቶ፥ «ጊምቢያዋንቱ ካꬌዳ ሹቻይ ጎዳ ፃጱዋ ሚኒሲያ፥ ኡባፔ ኣꬊያ ሹቻ ጊዴዳ» ያጌ። ቃሲካ፥ «ሃ ሹቻይ ኣሳ ꬉቢያ ሹቻኔ ኣሳ ኩንዲሲያ ዛላ» ያጌ፤ ኡንቱንቱ ፆሳ ቃላ ኣማኔና ዲራው፥ ኡንቱንቶ ካሴና ቆፌቴዳዋዳን ꬉቤቴዲኖ። ሺን ፆሳይ ꬉማፔ ማላሊሲያ ባሬ ፖዖ ሂንቴና ፄሴዳ፤ ሂንቴ ኣ ኦራꬃ ኦሱዋ ኦዳናው ዶሬቴዳ ዛሬ፤ ሂንቴ ካቲያ ቄሳቱዋ፤ ጌሻ ኣሳኔ ፆሳሲ ቡዞ ኣሳ። ሂንቴ ካሴ ፆሳ ኣሳ ጊዲኪታ፤ ሺን ሃዒ ሂንቴ ኣ ኣሳ፤ ሂንቴ ካሴ ማሮቴꬃ ኣኪቤይኪታ፤ ሺን ሃዒ ማሮቴꬃ ኣኬዲታ። ታ ዳባቶ፥ ሂንቴ ሃ ሳዓን ኢማꬃኔ ቤቴ ጊዲዴ ዴዒያዋንታ ጊዴዳዋዳን፥ ኡባ ዎዴ ሂንቴ ሼምፑዋና ኦሌቲያ ኣሳቴꬃ ኣሙዋፔ ሂንቴ ሃካና ማላ፥ ታኒ ሂንቴና ዎሳይ። ኣሜኔና ኣሳይ ሂንቴና ኢታባ ኦꬂያዋንቱዳን ዚጊሪያ ዎዴ፥ ኪሪስቶሲ ዪያ ጋላሲ ሂንቴ ሎዖ ኦሱዋ ኡንቱንቱ ኣኬኪዴ፥ ፆሳ ጋላታና ማላ፥ ሂንቴ ዴዑዋ ኡንቱንቱ ጊዶን ሎይꬂ ናጊቴ። ጎዳ ዲራው፥ ኣሳ ሂጊያ ኡባው ሞዴቲቴ፤ ካቲካ ኡባፔ ቦላ ጊዲያ ዲራው፥ ኣው ሞዴቲቴ። ቃሲ ጋዲያ ሞዲያዋንቶካ ሞዴቲቴ። ኣዪሲ ጎፔ፥ ኡንቱንቱ ኢታባ ኦꬂያዋንታ ሙራናዉኔ ሎዖባ ኦꬂያዋንታ ጋላታናው ካቲያፔ ኪቴቴዲኖ። ኣዪሲ ጎፔ፥ ፆሳይ ሂንቴ ሂንቴ ሎዖ ኦሱዋን ካꬊያ ኤያ ኣሳቱዋ ሃሳያ ጮዑ ኡዳናዋ ኮዬ። ኣይሌቴꬃፔ ኬሲዴ፥ ፆሳ ኣዪሊያዳን ዴዒቴፔ ኣቲን፥ ሄ ኣዪሌቴꬃፔ ኬሴዳዋ ኢታቴꬃ ጌንꬂያዋ ኦꬆፒቴ። ኣሳ ኡባ ቦንቺቴ። ሂንቴ ኢሻቱዋ ሲቂቴ። ፆሳው ያዪቴ። ካቲያ ቦንቺቴ። ኣይላቶ፥ ሂንቴ ሎዖ ጎዳቱዋ ፃላላዉኔ ኣሺኬ ጎዳቱዋ ፃላላው ጊዴናን፥ ኢታቶካ ዳሮ ያዪዴ ሞዴቲቴ። ኣዪሲ ጎፔ፥ ኣሳይ ናቂያ ዎዴ ዋዬቲያ ኡራይ ፆሳ ቆፒዴ፥ ኦጌ ባይናን ናቄቶፔ ፆሳይ ኣ ኣንጃና። ኣዪሲ ጎፔ፥ ሂንቴ ናጋራ ኦꬂና፥ ሂንቴና ዴቺያ ዎዴ፥ ሂንቴ ዳንዳዮፔ፥ ሂንቴንቶ ኣይ ጋላታይ ዴዒ? ሺን ሎዖባ ኦꬂዴ ዋዪያ ሂንቴ ዳንዳዮፔ፥ ፆሳይ ሂንቴና ሄዎ ኣንጃና። ፆሳይ ሂንቴና ፄሴዳዌ ሄዋ ዲራሳ፤ ኣዪሲ ጎፔ፥ ኪሪስቶሲ ሂንቴንቶ ዋዬቴ፤ ሂንቴ ኣ ቃታማ ካላና ማላ፥ ሂንቴንቶ ሌሚሱዋ ጊዴዳ። ናጋራ ኢ ኦꬂቤና፤ ባሬ ዶናፔ ዎርዱዋ ሃሳዪቤና። ኣሳይ ባሬና ቦሪያ ዎዴ፥ ዛሪዴ ቦሪቤና፤ ዋዬቲያ ዎዴካ ማንዲቤና። ሺን ፂሉዋ ፒርዲያ ፆሳው ባሬና ኣꬂዴ ኢሜዳ። ኑኒ ናጋራው ሃዪቂዴ፥ ፂሎቴꬃው ዴዓና ማላ፥ ኪሪስቶሲ ባሬ ሁጴው ባሬ ኣሹዋን ኑ ናጋራ ማስቃሊያን ቶኬዳ፤ ሂንቴ ኣ ማይꬃን ፓፄዲታ። ኣዪሲ ጎፔ፥ ሂንቴ ኦጊ ባሌዳ ዶርሳ ማላ፤ ሺን ሃዒ ሂንቴ ሼምፑዋ ሄሚያዋኮኔ ናጊያዋኮ ሲሜዲታ። ሄዋዳንካ ማቼቶ፥ ሂንቴ ኣሲናቱዋፔ ፆሳ ቃላው ኣዛዜቴና ኢቱ ኢቱ ዴዖፔካ፥ ሂንቴ ፓሉሜቴናን፥ ኡንቱንቱ ሂንቴ ያሻቴꬃኔ ሂንቴ ጌሻ ዴዑዋ ቤዒዴ ፆኔታና ማላ፥ ኡንቱንቶ ሞዴቲቴ። *** ሂንቴ ሂንቴ ሁጲያ ኣልዖ ባን ጊጊሲያዋኒኔ ዎርቃ ዎꬂያዋን ዎይ ኣልዖ ማዩዋ ማዪያዋን ሂንቴንቱ ቦላ ባጋ ሎይꬆፒቴ። ሺን ሂንቴ ጋርሳን ቆሴቴዳ ኣሳቴꬃ ሎዖቴꬃይ ፆሳ ሲንꬃን ሂንቴንቶ ዳሮ ኣልዖ ጊዲዴ፥ ꬋዬና ኣሺኬኔ ዎፑ ጌዳ ኣያና ጊዶ። ኣዪሲ ጎፔ፥ ሄዋዳን ፆሳን ሂዶቴዳ ጌሻ ማጫ ኣሳቱ ቤኒ ዎዴ ባሬንቱ ኣሲናው ሞዴቲዴ፥ ባሬንታ ዳሮ ሎይꬄዲኖ። ሄዋዳን ሳራ ኣብራሃማ፥ «ታ ጎዳው» ያጋ ፄሳዴ፥ ኣው ኣዛዜታዱ፤ ሂንቴካ ኢቲባዉኔ ያዬናን ሎዖባ ኦꬆፔ፥ ኢ ናናቱዋ። ሄዋዳን ኣሲናቶ፥ ሂንቴ ማጫ ኣሳቱዋና ኣኬካን ኢቲፔ ዴዒቴ። ኡንቱንቶ ዳቡራንቻ ኣሳቴꬃይ ዴዒያ ዲራው፥ ኡንቱንታ ቦንቺቴ፤ ሂንቴ ዎሳይ ꬉቤቴና ማላ፥ ፆሳይ ኢሜዳ ዴዑዋ ኣꬎ ኬካቴꬃ ኡንቱንቱ ሂንቴናና ኢቲፔ ላቲኖ። ዉርሴꬃን፥ ኡባይ ኢቲ ቆፋን ዴዒቴ። ኢቱ ኢቶ ቃሬቲቴ፤ ኢሻቱዋዳን ሲቄቲቴ፤ ቃሲ ኢቱ ኢቶ ኬኪያዋንታኔ ሂንቴ ሁጲያ ካዉሺያዋንታ ጊዲቴ። ኢታ ዲራው ኢታ ዎይ ሼቃ ዲራው ሼቃ ዛሮፒቴ፤ ሄዋ ኣጊዴ፥ ፆሳይ ሂንቴንቱ ኣንጁዋ ላታናዳን ሂንቴና ፄሴዳ ዲራው፥ ኣንጂቴ። ኣዪሲ ጎፔ፥ ፆሳ ማፃፋይ ሃዋዳን ያጌ፤ «ዴዑዋ ዶሲያዌኔ ሎዖ ጋላሳ ቤዓናው ኮዪያዌ ኦና ጊዶፔኔ ባሬ ኢንፃርሳን ኢታባ ሃሳዪያዋኔ ዎርዱዋ ኦዲያዋ ኣጎ። «ኢታባ ኦꬂያዋ ኣጊዴ፥ ሎዖባ ኦꬆ፤ ሳሮቴꬃካ ሎይꬂ ኮዮኔ ካላናው ባፄቶ። «ኣዪሲ ጎፔ፥ ጎዳ ኣይፊ ፂሎቱዋኮ ፄሌ፤ ቃሲ ኣ ሃይꬃይ ኡባ ዎዴ ኡንቱንቱ ዎሳው ዶያ ዴዔ። ሺን ጎዳይ ኢታባ ኦꬂያዋንታ ባሬ ሃንቁዋ ሶምዒያን ፄሌ» ያጌ። ሂንቴ ሎዖባ ኦꬃናው ኣሞቶፔ፥ ሂንቴና ቆሃናዌ ኦኔ? ሺን ሃራይ ኣቶ፥ ፂሎቴꬃ ዲራው ሂንቴ ዋዬቶፔካ፥ ኣንጄቴዳዋንታ። ኣሳው ያዮፒቴኔ ሂርጎፒቴ። ሺን ኪሪስቶሳ ሂንቴ ዎዛናን ቦንቺቴኔ ኣ ሂንቴ ጎዳ ኦꬂቴ። ፆሳይ ሂንቴንቶ ሂዶቴዳ ዴዑዋሲ ጋሱዋ ኦቺያ ኦሲኔ ዛሩዋ ኢማናው ኡባ ዎዴ ጊጊ ኡቲቴ፤ ሺን ሄዋ ኣሺኬቴꬃኒኔ ያሻቴꬃን ኦꬂቴ። ቃሲ ኪሪስቶሳን ሂንቴ ዴዒያ ሎዖ ዴዑዋ ኢታባ ኦꬄዳዋዳን፥ ሂንቴ ቦላን ኢታባ ሃሳዪያ ኣሳይ ባሬ ዚጊሪያዋን ዬላታና ማላ፥ ሂንቴ ዎዛናይ ጌሻ ጊዶ። ኣዪሲ ጎፔ፥ ፆሳይ ጌዳዋ ጊዶፔ፥ ኢታባ ኦꬄዳ ዲራው ዋዬቲያዋፔ፥ ሎዖባ ኦꬄዳ ዲራው ዋዬቲያዌ ኬካ። ኣዪሲ ጎፔ፥ ኪሪስቶሲ ኑና ፆሳኮ ኣፋናው፥ ባሬው ፂሎ ጊዲዴ፥ ማካላንቻቱዋ ዲራው፥ ኢቲ ጌዴ ኡባ ናጋራው ሃዪቄዳ፤ ኢ ባሬ ኣሳቴꬃን ሃዪቄዳ፤ ሺን ኣያናን ፓፄዳ። ቃሲ ሄ ኣያናን፥ ቃሹዋን ዴዒያ ኣያናቱዋኮ ቢዴ፥ ኡንቱንቶ ቃላ ኦዴዳ። ሄ ኣያናቱ ኣማሬዳ፥ ሆስፑን ኣሳቱ ሃꬃን ኣቴዳ ማርካቢያ ኖሄ ኬፂሺን፥ ፆሳይ ዳንዳዪዴ ጋሚዔዳ ዎዴ፥ ፆሳው ኣዛዜቲቤና ኣሳ ኣያናቱዋ። ሄዌ ፂንቃታው ሌሚሱዋ ጊዲዴ፥ ሂንቴና ሃዒ ኣሼ፤ ሱሬ ዎዛናፔ ፆሳ ዎሲያዋፔ ኣቲን፥ ቦላ ቂታ ሜጪያዋ ጊዴና፤ ሄዌ ሂንቴና ዬሱሲ ኪሪስቶሲ ሃዪቁዋፔ ዴንዴዳዋን ኣሼ። ሳሉዋ ቢዴ ፆሳፔ ኡሼቻ ባጋን ኢ ኡቲዴ፥ ኪታንቻ ኡባ፥ ማታና ዴዒያዋንታኔ ዎልቃማቱዋ ሞዴ። ሄዋ ዲራው፥ ኪሪስቶሲ ባሬ ኣሹዋን ኑሲ ዋዬቴዳ ዲራው፥ ሂንቴካ ሄ ቆፋን ዳንጬቲቴ። ኣዪሲ ጎፔ፥ ባሬ ኣሹዋን ዋዬቴዳ ኡራይ ናጋራ ኦꬂያዋ ኣጌዳ። ሃዋፔ ሲንꬃን፥ ሃ ሳዓን ሼምፑዋና ዴዓናው ኣቴዳ ዎዲያን፥ ፆሳይ ኮዪያዋዳን ዴዓናው ቤሲያዋፔ ኣቲን፥ ኣሳ ኣሙዋዳን ዴዓናው ቤሴና። ኣዪሲ ጎፔ፥ ኣማኔና ኣሳይ ኦꬃናው ዶሲያዋ ሂንቴ ኦꬂዴ፥ ዎሹማናው ካጄሊያዋን፥ ኣሙዋን፥ ማꬁዋን፥ ዬꬃን፥ ኡሻን፥ ፖኪያ ኤቃው ጎዪኒያዋን፥ ዴዔዳ ካሴ ኣꬌዳ ዎዲ ሂንቴንቶ ጊዳናዋ። ኣማኔና ኣሳና ሂንቴ ሾራይ ባዪና ኦሱዋ ኢቲፔ ኦꬄና ዲራው ማላሌቲዴ፥ ሂንቴና ቦሪኖ። ሺን ኡንቱንቱ ፓፃ ዴዒያ ኣሳ ቦላኔ ሃይቄዳ ኣሳ ቦላ ፒርዳናው ጊጊ ኡቴዳ ፆሳው ዛሩዋ ኢማና። ሃይቄዳ ኣሳይ ባሬ ኣሳቴꬃን ኣሳይ ፒርዴቲያዋዳን ፒርዴታናዉኔ ቃሲ ኣያናን ፆሳይ ዴዒያዋዳን ዴዓናው፥ ዎንጋላ ሚሺራቹ ኡንቱንቶ ሄዎ ኦዴቴዳ። ኡባባዉካ ዉርሴꬃይ ማታቴዳ። ሄዋ ዲራው፥ ፆሳ ዎሳናው ቆፋን ጌዪዴ፥ ሂንቴና ናጊቴኔ ሚኒቴ። ሲቁ ዳሮ ናጋራ ካሚያ ዲራው፥ ኡባባፔ ኣꬂዴ ኢቱ ኢቱዋና ዎዛናፔ ሲቄቲቴ። ዙዙሜናን ኢቱ ኢቱዋ ኢማꬃቴꬃን ሞኪቴ። ሂንቴ ሁጲያን ሁጲያን ፆሳፔ ዱማ ዱማ ኣꬎ ኬካቴꬃ ኣኬዳዋዳንካ፥ ፆሳ ዱማ ኢሙዋ ሃዳራ ሎይꬂ ኬሲያዋንቱዳን፥ ኢቱ ኢቶ ኦꬂቴ። ዬሱሲ ኪሪስቶሳ ባጋና ኡባባኒ ፆሳይ ጋላቴታና ማላ፥ ኦኒኔ ኦዲያዋ ጊዶፔ፥ ቃላ ፆሳፔ ኣኪዴ ኦዲያዋዳን ኦዶ። ቃሲ ኦኒኔ ማዲያዋ ጊዶፔ፥ ፆሳይ ኣው ኢሚያ ዎልቃን ማዶ። ቦንቹኔ ጎዳቴꬃይ ፆሳሲ ሜꬊናፔ ሜꬊናው ጊዶ። ኣሜንዒ። ታ ሲቃቶ፥ ሂንቴ ጊዶን ታማዳን ጉዲዴ ፓጪያ ዋዪ ዪያዋ ኦራꬃባይ ሃኒያዋዳን ማላሌቶፒቴ። ሺን ኪሪስቶሳ ቦንቹ ቤቲያ ዎዴ ሂንቴ ናሼታና ማላ፥ ኣናና ዋዬቲያዋን ናሼቲቴ። ኣሳይ ሂንቴና ኪሪስቶሳ ሱንꬃ ዲራው ቦሪያዋ ጊዶፔ፥ ሂንቴ ኣንጄቴዳዋንታ፤ ኣዪሲ ጎፔ፥ ቦንቾ ኣያናይ፥ ፆሳ ኣያናይ፥ ሂንቴ ቦላ ሼምፓና። ሂንቴፔ ኦኒኔ ሼምፑዋ ዎꬌዳዋዳን፥ ዎይ ካዪሱዋዳን፥ ዎይ ኢታባ ኦꬄዳ ኣሳዳን፥ ዎይ ሃራ ኣሳ ዬዉዋ ጌሌዳዋዳን ዋዬቶፖ። ሺን ኦኒኔ ኪሪስታኒያ ጊዲያ ዲራው ዋዬቶፔ፥ ኪሪስቶሳ ሱንꬃ ዲራው፥ ፆሳ ጋላታናፔ ኣቲን፥ ዬላቶፖ። ኣዪሲ ጎፔ፥ ፒርዳይ ፆሳ ጎሊያን ዶሜቲያ ዎዲ ጋኬዳ። ቃሲ ሄ ፒርዳይ ኮዪሮ ኑ ቦላ ዶሜቲያዋ ጊዶፔ፥ ኣ ዎንጋላው ኣዛዜቴናዋንቱ ዉርሴꬃይ ኣያ ጊዳኔ? ፂሎ ኣሳይ ቱጋን ኣቲያዋ ጊዶፔ፥ ማካላንቻይኔ ናጋራንቻይ ያቲና ዋናኔ? ሄዋ ዲራው ቃሲ፥ ፆሳይ ጌዳዋዳን ዋዬቲያዋንቱ ሎዖባ ኦꬂዴ፥ ባሬንቱ ሼምፑዋ ሃዳራ ባሬና ሜꬌዳ ኣማኔቲያ ፆሳው ኢሚኖ። ሲሚ ታኒ ዎሳ ጎሊያ ጪማቱዋና ጪማ ጊዲያዌኔ፥ ኪሪስቶሳ ዋዪያ ማርካቲያዌ፥ ቃሲ ቆንጫና ቦንቹዋ ሻካናዌ ሂንቴ ጊዶን ዴዒያ ጪማቱዋ ዞራይ። ሂንቴ ጊዶን ዴዒያ ፆሳ ዉዲያ ፆሳይ ኮዪያዋዳን ሄሚቴ። ዶሱዋናፔ ኣቲን፥ ዎልቃን ጊዴና። ቃሲ ሂንቴ ጎዓ ፃላላ ፄሌናን፥ ሎዖ ቆፋን ሄሚቴ። ዉዴው ሂንቴ ሌሚሱዋ ጊዲቴፔ ኣቲን፥ ሂንቴ ሄሚያዋንታ ዎልቃን ሄሞፒቴ። ቃሲ ሄሚያዋንቱ ካፑ ቆንጪያ ዎዴ፥ ባዬና ቦንቾ ኣኪሊሊያ ሂንቴ ኣካና። ሄዋዳንካ ያላጋ ኣሳቶ፥ ጪማቶ ሞዴቲቴ። ኡባይካ ኢቱ ኢቶ ኦꬃናው ሂንቴ ሁጲያ ካዉሺያዋ ኣፊላዳን ማዪቴ። ኣዪሲ ጎፔ፥ ፆሳይ ኦቶሬቲያዋንታ ኢፄ፤ ሺን ባሬና ካዉሺያዋንቶ ኣꬎ ኬካቴꬃ ኢሜ። ፆሳይ ባሬ ሎዖ ዎዲያን ሂንቴና ꬎቁ ኦꬃና ማላ፥ ዎልቃማ ፆሳ ኩሺያፔ ጋርሳና ሂንቴና ቶቺቴ። ኢ ሂንቴንቶ ቆፒያ ዲራው፥ ሂንቴና ሂርጊሲያ ኡባባ ኣ ቦላ ኦሊቴ። ፃላሂያ ካፑ፥ ሂንቴ ሞርኪ፥ ሚቲያ ኡራ ኮዪዴ፥ ጉዲያ ጋሙዋዳን ሂንቴ ዩሹዋን ዩዪያ ዲራው ናጌቲቴኔ ቤጎቲቴ። ሳዓን ዴዒያ ሂንቴ ኢሻቱ ሄዋዳን ዋዬቲያዋ ኤሪዴ፥ ኣማኑዋን ሚኒዴ፥ ኣናና ኤቄቲቴ። ኣꬎ ኬካቴꬃ ኡባ ፆሳይ፥ ባሬ ሜꬊና ቦንቾ ኪሪስቶሲ ዬሱሳ ባጋና ሂንቴና ፄሴዳዌ፥ ኣማሬዳ ዎዲያ ሂንቴ ዋዬቴዳዋፔ ጉዪያን፥ ኢ ባሬ ሁጴው ሂንቴና ሺሪ ኦራꬃናኔ ሚኒሳና። ቃሲ ኢ ሂንቴና ማዳናኔ ባሲ ኤሳና። ዎልቃይ ሜꬊናፔ ሜꬊና ጋካናው ኣው ጊዶ። ኣሜንዒ። ሃዌ ፆሳ ቱሙ ኣꬎ ኬካቴꬃ ጊዲያዋ ታኒ ሂንቴንቶ ማርካታዴኔ ሂንቴና ዞራዴ፥ ሂንቴንቶ ቃንꬃን ፃፌዳ ዳቢዳቢያ ኣማኔቲያ ኢሻ ጋዴ ታኒ ቆፒያ ሲላሴ ቦላ ኪታዲ፤ ሄ ኣꬎ ኬካቴꬃን ሚኔዲታ። ሂንቴናና ኢቲፔ ዶሬቴዳ ባቢሎኔን ዴዒያ ዎሳ ጎሊያ ኣሳይኔ ታ ናዓይ ማርቆሲ ሂንቴና «ሳሮ ሳሮ» ጊኖ። ሲቁዋ ዬሬታ ዬሬቲዴ፥ ኢቱ ኢቱዋ ሳሮቲቴ። ሂንቴው፥ ኪሪስቶሳና ኢቱዋ ጊዴዳዋንቶ ኡባቱዋሲ ሳሮቴꬃይ ጊዶ። ኣሜንዒ። ታኒ ሲሞኒ ጴፂሮሲ፥ ዬሱሲ ኪሪስቶሳ ፂሎቴꬃ ባጋና ኑዋ ማላ ኣማኑዋ ኣኬዳዋንቶ፥ ሃ ዳቢዳቢያ ፃፋይ። ፆሳኔ ኑ ጎዳ ዬሱሳ ሂንቴ ኤሪያዋን ኣꬎ ኬካቴꬃይኔ ሳሮቴꬃይ ሂንቴንቶ ፓላሂዴ ጊዶ። ኑኒ ፆሳ ቦንቹዋኔ ሎዖቴꬃ ላታና ማላ፥ ኑና ፄሴዳዋ ኑኒ ኤሪያዋን፥ ዴዑዋሲኔ ፆሳ ማላቱሳሲ ኑና ኮሺያዋ ኡባ ፆሳ ዎልቃይ ኑሲ ኢሜዳ። ሂንቴ ኣ ኢሙዋ ባጋና ሳዓን ዴዒያ ባዪዚያ ኣሙዋፔ ኬሲ ኣካናዳኒኔ ፆሳ ፆሳቴꬃ ላታናዳን፥ ኢ ባሬ ኢማና ጌዳ ዳሮ ዎልቃማኔ ኣልዖ ኢሙዋ ኑሲ ኢሜዳ። ሄዋ ዲራው፥ ሂንቴና ቤሲያዋ ኡባ ሚኒ ኦꬂዴ፥ ሂንቴ ኣማኑዋ ቦላ ሎዖቴꬃ፥ ሎዖቴꬃ ቦላ ኤራቴꬃ፥ ኤራቴꬃ ቦላ ሂንቴና ናጊያዋ፥ ሂንቴና ናጊያዋ ቦላ ጌንጫ፥ ጌንጫ ቦላ ፆሳ ማላቲያዋ፥ ፆሳ ማላቲያዋ ቦላ ኢሻቴꬃ ሲቁዋ፥ ኢሻቴꬃ ሲቁዋ ቦላ ሲቁዋ ጉጂቴ። ኣዪሲ ጎፔ፥ ሃዋንቱ ሂንቴንቶ ሎይꬂ ዳሪያዋ ጊዶፔ፥ ሂንቴና ጎዳ ዬሱሲ ኪሪስቶሳ ኤራቴꬃን ቲሻኔ ኣዪፊያና ዴዒያዋንታ ኦꬃና። ሺን ሄዋንቱ ባይና ኡራይ ባሬ ማታን ዴዒያዋ ፃላላ ዴሜ፤ ቃሲ ኢ ቆቃ፤ ኢ ካሴ ኦꬄዳ ናጋራይ ኣቶ ጌቴቴዳዋ ዶጌዳ። ሄዋ ዲራው፥ ታናዳን ፆሳ ካሊያዋንቶ፥ ሂንቴና ፆሳይ ፄሴዳዋኔ ዶሬዳዋ ሎይꬂ ኤሪሳናው፥ ካሴዋፔ ኣꬊ ሚኒቴ፤ ኣዪሲ ጎፔ፥ ሂንቴ ሄዋ ኦꬂያዋ ጊዶፔ፥ ꬉቤቲኪታ። ሄዋዳን ቃሲ ኑ ጎዳኔ ኑና ኣሺያ ዬሱሲ ኪሪስቶሳ ሜꬊና ካዉቴꬃ ጌሊያ ኩሜንꬃ ማታይ ሂንቴንቶ ኢሜታና። ሄዋ ዲራው፥ ሂንቴ ሃ ዬዋቱዋ ኤሪያዋ ጊዶፔካ፥ ቃሲ ሂንቴ ኦይቄዳ ቱሙዋን ሚኔዳዋንታ ጊዶፔካ፥ ታኒ ሂንቴና ሃ ዬዋቱዋ ኡባ ዎዴ ሃሳዪሲያዋ ኣጊኬ። ታኒ ፓፃ ዴዔዳ ኬናን፥ ሂንቴና ሃሳዪሳዴ ቃሴꬃናው ኮሺያዋ ታው ማላቴ። ኑ ጎዳይ ዬሱሲ ኪሪስቶሲ ታው ቆንጪያን ኦዴዳዋዳን፥ ታኒ ሃ ሃዪቂያ ኣሳቴꬃ ጋሚዔናን ቃራ ኦላናዋ ኤራይ። ታኒ ሃይቄዳዋፔ ጉዪያን ጊዲናካ፥ ሂንቴ ሃ ዬዋቱዋ ኡባ ዎዴ ቆፓናው ዳንዳያና ማላ፥ ታው ዳንዳዬቴዳዋ ኡባ ኦꬃና። ኑኒ ኣ ዎልቃማ ቦንቹዋ ኑ ኣይፊያን ቤዒዴ ኦዴቶፔ ኣቲን፥ ሜꬊ ኣኬዳ ቶሳን ኑ ጎዳ ኪሪስቶሳ ዎልቃኔ ዩሳ ሂንቴንቶ ኦዲቤይኮ። ኣዪሲ ጎፔ፥ ዳሮ ዎልቃማ ቦንቹዋፔ፥ «ታኒ ኣኒ ዳሮ ናሼቲያ ታ ሲቆ ናዓይ ሃዋ» ያጊያ ኮሻይ ዬዳ ዎዴ፥ ፆሳ ኣዉዋፔ ቦንቹዋኔ ጋላታ ኢ ኣኬዳ። ቃሲ ኑኒካ ጌሻ ዴሪያ ቦላን ኣናና ዴዒዴ፥ ሄ ኮሻይ ሳሉዋፔ ዬዳዋ ሲሴዶ። ኣሳይ ሄዋፔ ሎይꬂ ኣꬊያ ቲምቢቲያ ኦዲያዋንቱ ሃሳዬዳ ኑና ሎይꬂ ኣማንꬂያ ቃላይ ኑሲ ዴዔ፤ ሂንቴ ሄ ቃላ ናጊያዋ ጊዶፔ ሎይꬄዲታ። ኣዪሲ ጎፔ፥ ሄዌ ሳዓይ ዎንታና ጋካናሲኔ ዎንታ ፆሊንቲያ ፖዑ ሂንቴ ዎዛናን ፖዓና ጋካናው፥ ꬉማኒ ፖዒያ ፖዑዋ ማላ። ኡባፔ ካሴቲዴ፥ ሃዋ ኤሪቴ፤ ፆሳ ማፃፋን ፃፌቴዳ ቲምቢቲያ ኦዴዳዋ ኦኒኔ ባሬካ ቢላናው ዳንዳዬና። ኣዪሲ ጎፔ፥ ቲምቢቲያ ኦዴዳዌ ኡባይ ጌሻ ኣሳቱ ጌሻ ኣያናይ ካሌꬂና፥ ፆሳ ቃላ ሃሳዬዲኖፔ ኣቲን፥ ኣሳ ሼኒያን ሃሳዬቲቤና። ሺን ቲምቢቲያ ኦዲያ ዎርዳቱ ኣሳ ጊዶን ካሴ ዴዒያዋዳን፥ ሂንቴ ጊዶኒካ ዎርዱዋ ታማሪሲያዋንቱ ዴዓና። ኡንቱንቱ ባሬና ዎዜዳ፥ ጎዳ ካዲዴ፥ ባዪዚያ ዎርዶ ቲሚርቲያ ኣሃና፤ ቃሲ ኡንቱንቱ ኣኬኬና ባሻ ባሬንቱ ቦላ ኣሃና። ቃሲ ዳሮ ኣሳይ ዬላዪያ ኡንቱንቱ ኢታ ኦጊያ ካላና፤ ኡንቱንቱ ጋሱዋን ቱሙዋ ኦጊ ቦሬታና። ዎርዱዋ ታማሪሲያ ሄዋንቱ ሻሎ ያሬቲያዋን ባሬንቱ ሜꬊ ኣኬዳ ቶሳን ሂንቴና ቦንቃና፤ ቤኒፔ ዶሚዴ፥ ኡንቱንቱ ፒርዳይ ጊጊ ኡቴዳ፤ ኡንቱንታ ꬋዪሲያዌ ቤጎቲዴ ናጌ። ናጋራ ኦꬄዳ ኪታንቻቶ ፆሳይ ቃሬቴናን፥ ፒርዳ ጋላሳይ ጋካናው ꬉማ ኦላን ኡንቱንቱ ቃሼቲ ኡቴዳ ጋናሚያን ዬጌዳ። ፆሳይ ናጋራንቻቱዋ ቦላ ባሻ ሃꬃ ዬዴዳፔ ኣቲን፥ ቤኒ ኣሳው ኬኪቤና፤ ሺን ፂሎቴꬃባ ኦዴዳ ኖሃኔ ሃራ ላፑ ኣሳቱዋ ኣሼዳ። ፆሳይ ሶዶማኔ ጋሞራ ጊያ ካታማቱዋ ቢታ ቢዲንꬃ ኡዲዴ፥ ጉዲ ꬋዪሲዴ፥ ናጋራንቻ ጊዲያዋንታ ጋካናባው ሌሚሱዋ ኦꬄዳ። ሂጌው ኣዛዜቴና ቱናቴꬃ ኦꬂያ ኣሳቱዋ ጊዶን ቱጋቲዴ ዴዒያ ፂሉዋ ሎፃ ፆሳይ ኣሼዳ። ሄ ሎዖ ቢታኒ ኡንቱንቱ ጊዶን ዴዒዴ፥ ኡንቱንቱ ኦꬂያ ኢታ ኦሱዋ ጋላሲ ጋላሲ ቤዔዳ ዎዴኔ ሲሴዳ ዎዴ ኣ ሎዖ ዎዛናይ ኡንዔቴዳ። ሄዋ ጊዶፔ፥ ጎዳይ ፆሳው ጎዪኒያ ኣሳቱዋ ፓጪያፔ ዎቲ ኣሻኔንቶ ኤሬ፤ ናጋራንቻቱዋ ቃሲ ኡባፔ ኣꬂዴ፥ ቱና ኣሙዋን ኣሹዋ ኣሙዋ ካሊያዋንታኔ ቃሲ ፆሳ ዎልቃ ካꬊያዋንታ፥ ፒርዳ ጋላሳይ ጋካናው ጎዳይ ሙሪዴ ዎꬃናዋካ ኤሬ። ዎርዱዋ ታማሪሲያ ሄዋንቱ ፃላኔ ኦቶራንቻ ጊዴዳዋን፥ ቦላን ዴዒያ ቦንቾ ሜꬌታ ቦሪኖፔ ኣቲን፥ ቦንቺኪኖ። *** ሄ ዎርዱዋ ታማሪሲያ ኣሳቱዋፔ ዳሮ ሚኖኔ ዎልቃማ ጊዲያ ኪታንቻቱካ ኡንቱንታ ጎዳ ሲንꬃን ቦሪያን ሞታናው ኮዪኪኖ። ሺን ሄ ኣሳቱ ኦይቄቲዴ ꬋያናው ዬሌቴዳ ባሬንቱ ሜꬌታን ዎዛናይ ባዪና ዎራ ዶዓቱዋዳን ሃኒኖ፤ ኡንቱንቱ ኤሬናባ ቦሪኖ፤ ቃሲ ባሬንቱ ባዪዙዋን፥ ኡንቱንቱ ጮ ꬋያና። ኡንቱንቱ ባሬንቱ ሜꬌዳ ሜቱዋን ሜቶታና፤ ጋላሲ ዬፂዴ ዱሪያዋ ናሼቺያባ ጊዴ ቆፒኖ፤ ኡንቱንቱ ካዉሺሲያዋንታኔ ቱናቱዋ ጊዲ ኡቲዴ፥ ሂንቴናና ሚያ ቁማ ሙሳን ናሼቲኖ። ጫራቲያ ማጫ ኣሳ ፄሊያዋ ኣጌና ኣይፊ ኡንቱንቶ ዴዔ፤ ቃሲ ናጋራ ኦꬂያዋካ ኣጊኪኖ። ኣማኑዋን ሚኒቤና ኣሳ ጪሚኖ። ኣሙዋ ዶዬዳ ዎዛናይ ኡንቱንቶ ዴዔ፤ ኡንቱንቱ ሼቄቴዳዋንታ። ሱሬ ኦጊያ ኣጊዴ ባሌዲኖ። ቢዖራ ናዓ ባላማ ኦጊያና ቤዲኖ፤ ባላሚ ማካላን ሚሻ ኣካናው ኮዬዳ። ኢ ቲምቢቲያ ኦዲያዋ፤ ሺን ኣ ናጋራ ዲራው፥ ኣ ሃሪ ኣሳዳን ሃሳያን ሴሪዴ፥ ጎሻ ማላ ሃኑዋፔ ኣ ቴዔዳ። ሄ ኣሳቱ ሜሊዲጌዳ ፑልቱዋ ማላ፤ ቃሲ ጎቱ ቶኪዴ ኣፊያ ሻሪያ ማላ፤ ፆሳይ ኡንቱንቶ ሳካና ꬉማ ጊጊሲ ዎꬄዳ። ኣዪሲ ጎፔ፥ ኡንቱንቱ ሜላኔ ኦቶሮ ሃሳያ ሃሳዪኖ፤ ባሊዴ ዴዒያ ኣሳፔ ኬሲ ዬዳዋንታ ዎልቃማ ኣሹዋ ኣሙዋን ጪሚኖ። ኡንቱንቱ ባሬው ባሻ ኣሙዋና ዴዒዴ ኡንቱንታ፥ «ሂንቴ ኣዪሌቴꬃፔ ኬሳና» ያጊኖ፤ ኣዪሲ ጎፔ፥ ኢቲ ኣሳይ ባሬና ፆኔዳባው ኣያዉኔ ኣዪሊያ። ኡንቱንቱ ኑ ጎዳኔ ኑና ኣሺያ ዬሱሲ ኪሪስቶሳ ኤራቴꬃን ሃ ሳዓ ቱናቴꬃፔ ኬሲ ኣኬዳዋፔ ጉዪያን፥ ጉዬ ሲሚዴ፥ ኣኒ ꬉቤቲዴ ፆኔቲያዋ ጊዶፔ፥ ካሴ ዴዒያ ዴዑዋፔ ጉዬዌ ኡንቱንቶ ኢታና። ኣዪሲ ጎፔ፥ ኡንቱንቶ ኢሜቴዳ ጌሻ ኣዛዙዋ ኤሪዴ ኣጊያዋፔ ኡንቱንቱ ፂሎቴꬃ ኦጊያ ኤሬናን ኣጊንቶ ሎዓ ሺን። «ካናይ ባሬ ጮሻኮ ጉዬ ሲሜ» ጊያ ሌሚሱኔ ቃሲ፥ «ሜጬቴዳ ጉዱንꬃይ ጉዬ ሲሚዴ፥ ኡርቃን ጎንዶሬቴ» ጊያ ሌሚሱ ቱማ ጊዲያዋ ኡንቱንታ ጋኬዳዌ ቤሴ። ታ ሲቃቶ፥ ሃዌ ታኒ ሂንቴንቶ ፃፌዳ ላዔንꬆ ዳቢዳቢያ፤ ታኒ ሄ ላዑ ዳቢዳባቱዋካ ሂንቴ ሱሬ ቆፋ ቆፓናዳን ዴንꬄꬃናው ሂንቴና ሃሳዪሳናዳን ፃፋዲ። ጌሻ ጊዴዳ ናባቱ ቤኒ ኦዴዳ ቃላ ሂንቴ ሃሳያና ማላኔ ጎዳይ ሂንቴና ኣሺያዌ፥ ባሬ ኪቴዳዋንቱ ባጋና ሂንቴና ኣዛዜዳ ኣዛዙዋ ሂንቴ ሃሳያና ማላ ኮያይ። ዎዲያ ዉርሴꬃን፥ ኣሳ ቶቺያ ባሬንቱ ኣሙዋዳን ዴዒያዋንቱ ኣሳ ቶቺዴ ዴንዳናዋ ኡባፔ ካሴቲዴ ኤሪቴ። ኡንቱንቱ፥ «ኢ ‹ያና› ያጌዳ። ጊቤኔ? ያቲና ሃቃን ዴዒ? ኣዪሲ ጎፔ፥ ኑ ኣዎቱ ሃዪቂ ዲጌዲኖ፤ ሺን ኡባባይካ ሳዓይ ሜꬌቶዴፔ ዶሚዴ ዴዒያዋዳንካ ዴዔ» ያጋና። ዳሮ ዎዲያፔ ካሴ ፆሳይ ሃሳዪና፥ ሳሉኔ ሳዓይ ሜꬌቴዳዋ ኤሪዴ፥ ኡንቱንቱ ኣኬኬናን ኢፄዲኖ። ሳዓይ ሃꬃፔኔ ሃꬃን ሜꬌቴዳ። ቃሲ ሄዋ ጋሱዋን፥ ሄ ዎዴ ዴዒያ ሳዓይ ሄ ሃꬃን ሚቴቲ ꬋዬዳ። ሺን ሃዒ ዴዒያ ሳሉኔ ሳዓይ፥ ፆሳው ጎዪኔና ኣሳቱ ፒርዴቲያ ጋላሳይኔ ꬋዪያ ጋላሳይ ጋካናው ታኪዴ፥ ሄ ቃላን ታማ ናጊኖ። ሺን ታ ሲቃቶ፥ ሃ ኢቲ ዬዋቶ ዶጎፒቴ፤ ጎዳ ማታን፥ ኢቲ ጋላሳይ ሻዓ ላይꬃ ማላ ጊዲያዋኔ፥ ቃሲ ሻዓ ላይꬃይ ኢቲ ጋላሳ ማላ ጊዲያዋ ዶጎፒቴ። ኢቱ ኢቱ ቆፒያዋዳን፥ ጎዳይ ባሬ ኦꬃና ጌዳዋ ኦꬃናው ታኬና፤ ሺን ኦኒኔ ባሬ ናጋራፔ ሲማናዳን ኮዬፔ ኣቲን፥ ኦኒኔ ꬋያና ማላ ኮዬና ዲራው፥ ሂንቴሲ ጊዴ ዳንዳያን ጋምዔ። ሺን ጎዳ ጋላሳይ ካዪሱዋዳን ያና። ሄ ጋላሲ ሳላቱ ዎልቃማ ጉንꬃን ꬋያና፤ ሳሉዋ ሜꬌታቱ ዎልቃማ ሴላን ሲላና፤ ሳዓይኔ ኣ ቦላን ዴዒያ ኡባባይ ꬋያና። ኡባባይካ ሄዋዳን ꬋዪያዋ ጊዶፔ፥ ሂንቴ ኣይ ማላ ኣሳ ጊዳናው ቤሲ? ሂንቴ ዴዑ ጌሻኔ ፆሳ ማላቲያዋ ጊዳናው ኮሼ። ሂንቴ ፆሳ ጋላሳ ናጊሺና፥ ሄ ጋላሳይ ኤሌካ ጋካናዳን፥ ሂንቴንቶ ዳንዳዬቲያዋ ኦꬂቴ፤ ሄ ጋላሲ ሳላቱ ጉዴቲዴ ꬋያናኔ ሳሉዋ ሜꬌታቱካ ዎልቃማ ሴላን ሲላና። ሺን ኑኒ ፆሳይ ኢማና ጌዳ ኦራꬃ ሳሉዋኔ ኦራꬃ ሳዓ ፂሉ ዴዓናሳ ናጌቶ። ሄዋ ዲራው፥ ታ ሲቃቶ፥ ሄ ጋላሳ ናጊዴ፥ ፖኩኔ ዬላዪያባይ ባዪናዋንታ ጊዲዴ፥ ኣናና ሳሮቴꬃን ዴዓና ማላ ሎዖባ ኡባ ኦꬂቴ። ጎዳ ዳንዳያይ ኣቶቴꬃ ጊዲያዋ ሂንቴ ዎዛናን ቆፒቴ፤ ሄዋዳን ቃሲ ኑ ሲቆ ኢሻይ ጳዉሎሲ፥ ፆሳይ ባሬው ኢሜዳ ኣꬌዳ ኤራቴꬃን ሂንቴንቶ ፃፌዳ። ባሬ ፃፊያ ዳቢዳቢያን፥ ሄ ዬዉዋባ ፃፊያ ዎዴ፥ ታማሪቤና ኣሳቱኔ ሚኒቤና ኣሳቱ ሃራ ፆሳ ማፃፋቱዋ ጌላዪያዋዳንካ፥ ሄ ዳቢዳቢያ ጊዶን ዴዒያ ኣኬካናው ዋዪሲያ ዬዉዋ ጌላዪኖ። ኡንቱንቱ ሄዋ ኦꬂያዋን ባሬንቱ ቦላ ባሻ ኣሂኖ። ሄዋ ዲራው፥ ታ ሲቃቶ፥ ሂንቴ ሄዋ ኤሪያ ዲራው፥ ማካላንቻቱዋ ባላን ጪሜቲዴ፥ ዎራ ቤና ማላኔ፥ ቃሲ ሚኒዴ ዴዒያ ሳዓፔ ኩንዴና ማላ ናጌቲቴ። ሺን ሂንቴ ኑ ጎዳ፥ ኑና ኣሺያ ዬሱሲ ኪሪስቶሳ ኣꬎ ኬካቴꬃኒኔ ኤራቴꬃን ዲጪቴ። ኣው ሃዒኔ ሜꬊና ጋላሳይ ጋካናው ጋላታይ ጋኮ። ኣሜንዒ። ኑኒ ኮዪሩዋፔ ዶሚዴ ዴዒያ፥ ኑ ኣዪፊያን ቤዒዴ፥ ኑ ኩሺያን ኣ ቦቺ ቤዔዳ ዴዑዋ ቃላባ ሂንቴንቶ ፃፌቶ። ኑኒ ኣ ቤዔዶ፤ ኑ ኩሺካ ኣ ቦቺ ቤዔዳ። ሄ ዴዑ ቆንጪና፥ ኑኒ ኣ ቤዒዴ፥ ኣባ ሂንቴንቶ ማርካቴቶ፤ ቃሲ ፆሳ ኣዉዋ ማታን ዴዒያ ኑሲ ቆንጬዳ ሜꬊና ዴዑዋባ ሂንቴንቶ ኦዴቶ። ቃሲ ኑናና ሂንቴንቶ ኢቲፔቴꬃይ ዴዓና ማላ፥ ኑኒ ቤዔዳዋኔ ሲሴዳዋ ሂንቴንቶ ኦዴቶ፤ ኑሲ ኣዉዋናኔ ኣ ናዓ ዬሱሲ ኪሪስቶሳና ኢቲፔቴꬃይ ዴዔ። ኑኒ ኑ ናሼቻይ ፖሌታና ማላ፥ ሃዋ ሂንቴንቶ ፃፌቶ። ኑኒ ፆሳ ናዓፔ ሲሲዴ፥ ሂንቴንቶ ኦዲያ ኪታይ፥ «ፆሳይ ፖዑዋ፤ ኣኒ ꬉማይ ሙሌካ ባዋ» ያጊያዋ። ኑኒ ኑሲ ኣናና ኢቲፔቴꬃይ ዴዔ ጊዴ ꬉማኒ ዴዖፔ፥ ኑ ሃሳያኒኔ ኑ ኦሱዋን ዎርዶቴቶ። ሺን ፖዑዋን ኢ ዴዒያዋዳን፥ ኑኒካ ፖዑዋን ዴዖፔ፥ ኑሲ ኢቶ ኢቱዋና ኢቲፔቴꬃይ ዴዔ፤ ቃሲ ኣ ናዓ፥ ዬሱሲ ኪሪስቶሳ ሱꬃይ ናጋራ ኡባፔ ኑና ጌሼ። ኑኒ ናጋራ ኦꬂቤይኮ ጎፔ፥ ኑሬካ ኑና ጪሜቶ፤ ኑናን ቱማቴꬃይካ ባዋ። ሺን ኑኒ ፆሳው ኑ ናጋራ ፓፆፔ፥ ኢ ኑ ናጋራ ኣቶ ጋናዉኔ ኑ ባዪዞ ኦሱዋ ኡባፔ ኑና ጌሻናው፥ ኣማኔቲያዋኔ ቱሙዋ ኦꬂያዋ። ኑኒ ናጋራ ኦꬂቤይኮ ጎፔ፥ ፆሳ ዎርዱዋ ጌቶ፤ ኣ ቃላይካ ኑ ዎዛናን ዴዔና። ታ ናቶ፥ ናጋራ ሂንቴ ኦꬄናዳን፥ ታኒ ሃዋ ሂንቴንቶ ፃፋይ፤ ሺን ኦኒኔ ናጋራ ኦꬆፔ፥ ኣዉዋ ማታን ኑሲ ጋናቲያ ዬሱሲ ኪሪስቶሲ፥ ፂሉ፥ ዴዔ። ቃሲ ኑኒ ኑ ናጋራ ኣቶ ጌቴቱሳ ኪሪስቶሳ ባጋና ዴሜቶ፤ ኪሪስቶሲ ያርሼቴዳዌ ኣሳ ኡባ ናጋራ ዲጋናሳፔ ኣቲን፥ ኑ ናጋራ ፃላላ ዲጋናሳ ጊዴና። ኑኒ ፆሳ ኣዛዙዋ ናጎፔ፥ ቱሙ ኣ ኤሪያዋ ሄዋን ሻካናው ዳንዳዬቶ። ኢቲ ኡራይ፥ «ታኒ ኣ ኤራይ» ጊዴ፥ ቃሲ ኣ ኣዛዙዋ ናጌናን ኣጎፔ፥ ሄ ኡራይ ዎርዱዋ፤ ቱማቴꬃይካ ኣኒ ባዋ። ሺን ኣ ቃላው ኣዛዜቲያ ኦና ጊዶፔኔ፥ ሄ ኡራይ ፆሳ ሲቂያዌ ቱሙ ፖሌቴዳ። ኑኒ ፆሳን ዴዒያዋ ሃዌ ኑና ኤሪሴ። ሄዌካ፥ «ታኒ፥ ፆሳን ዴዓይ» ጊያ ኦኒኔ ኪሪስቶሲ ዴዔዳዋዳን ዴዓናው ቤሴ። ታ ሲቃቶ፥ ታኒ ሂንቴንቶ ኮዪሩዋፔ ዴዒያ ኤጫ ኣዛዙዋ ፃፋይፔ ኣቲን፥ ኦራꬃ ኣዛዙዋ ፃፊኬ፤ ሄ ኤጫ ኣዛዙ ሂንቴ ሲሴዳ ቃላ። ጊዶፔካ፥ ታኒ ሂንቴንቶ ላዔንꬁዋ ኦራꬃ ኣዛዙዋ ፃፋይ፤ ሄ ኣዛዙዋ ቱማቴꬃይካ ኪሪስቶሳኒኔ ሂንቴናን ቤቴ። ኣዪሲ ጎፔ፥ ꬉማይ ꬋዬ፤ ቱሙ ፖዑ ሃዒ ፖዔ። ፖዑዋን ዴዓይ ጊዴ፥ ባሬ ኢሻ ኢፂያ ኦኒኔ ሃኖ ጋካናሲካ ꬉማኒ ዴዔ። ባሬ ኢሻ ሲቂያ ኦኒኔ ፖዑዋን ዴዔ፤ ሄ ኡራን ሃራ ኡራ ꬉቢያባይ ኣያይኔ ባዋ። ሺን ባሬ ኢሻ ኢፂያ ኦኒኔ ꬉማኒ ዴዔ፤ ꬉማኒ ሃሜቴ። ꬉማይ ኣ ኣይፊያ ቆቂሲ ዎꬄዳ ዲራው፥ ሃቃ ቢንቶኔ ኤሬና። ታ ናቶ፥ ፆሳይ ኪሪስቶሳ ሱንꬃ ዲራው፥ ሂንቴ ናጋራ ኣቶ ያጌዳ ዲራው፥ ታኒ ሂንቴንቶ ፃፋይ። ኣዎቶ፥ ኮዪሩዋፔ ዴዒያዋ ሂንቴ ኤሬዳ ዲራው፥ ሂንቴንቶ ፃፋይ። ያላጋቶ፥ ፃላሂያ ካፑዋ ሂንቴ ፆኔዳ ዲራው፥ ሂንቴንቶ ፃፋይ። ጉꬃ ናቶ፥ ፆሳ ኣዉዋ ሂንቴ ኤሬዳ ዲራው፥ ሂንቴንቶ ፃፋይ። ኣዎቶ፥ ኮዪሩዋፔ ዴዒያዋ ሂንቴ ኤሬዳ ዲራው፥ ሂንቴንቶ ፃፋይ። ያላጋቶ፥ ሂንቴ ሚኖ ጊዲያ ዲራዉኔ ፆሳ ቃላይ ሂንቴናን ዴዒያ ዲራው፥ ቃሲ ፃላሂያ ካፑዋ ሂንቴ ፆኔዳ ዲራው፥ ሂንቴንቶ ፃፋይ። ሃ ኣላሚያ ዎይ ኣላሚያን ዴዒያ ኣያኔ ሲቆፒቴ። ሂንቴ ሃ ኣላሚያ ሲቆፔ፥ ፆሳ ሲቁ ሂንቴናን ባዋ። ኣዪሲ ጎፔ፥ ሃ ኣላሚያን ዴዒያ ኡባባይ፥ ሄዌካ፡ ኣሳቴꬃ ኣሙ፥ ኣዪፊያን ፄሊዴ ካጄሊያዌኔ ባሬ ዴዒያዋን ጬቄቲያዌ ሃ ኣላሚያፔ ዬዳዋፔ ኣቲን፥ ፆሳፔ ዪቤና። ሃ ኣላሚኔ ሃ ኣላሚያን ኣሳይ ኣሞቲያ ኡባባይ ኣꬋና። ሺን ፆሳይ ጌዳዋ ኦꬂያ ኡራይ ሜꬊናው ዴዓና። ታ ናቶ፥ ዎዲያ ዉርሴꬃይ ማታቴዳ፤ ኪሪስቶሳ ኤቄቲያዌ ሲንꬃፔ ያናዋ ሂንቴ ሲሴዳዋዳን፥ ሃራይ ኣቶ ሃዒካ ኣ ኤቄቲያዋንቱ ጮራቱ ዴንዴዲኖ። ሄዋ ዲራው፥ ዎዲያ ዉርሴꬃይ ማታቴዳዋ ኑኒ ሄዋን ኤሬቶ። ሃ ኤቄቲያዋንቱ ኑ ባጋ ጊዴና ዲራው፥ ኑ ጊዶፔ ኬሴዲኖ፤ ኣዪሲ ጎፔ፥ ኡንቱንቱ ኑ ባጋ ጊዲያባ ጊዲንቶኔ፥ ኑ ጊዶን ዴዓና፤ ሺን ኡንቱንቱፔ ኦኒኔ ኑ ባጋ ጊዴናዌ ኤሬታና ማላ፥ ኑ ጊዶፔ ኬሴዲኖ። ሺን ኪሪስቶሲ ሂንቴ ቦላ ጌሻ ኣያና ጉሴዳ፤ ቃሲ ሂንቴ ኡባይ ቱሙዋ ኤሪታ። ቱሙዋ ሂንቴ ኤሪያ ዲራዉኔ ቃሲ ቱሙዋን ዎርዱ ኣያይኔ ባዪናዋ ሂንቴ ኤሪያ ዲራው፥ ታኒ ሂንቴንቶ ፃፋይፔ ኣቲን፥ ቱሙዋ ሂንቴ ኤሬና ዲራው ፃፊኬ። ዬሱሲ ኦኬቴዳ ኪሪስቶሳ ጊዲያዋ ኤሪኬ ጊያ ኡራፔ ኣቲን፥ ዎርዱ ኦኔ? ሄዌ ፆሳ ኣዉዋኔ ናዓ ኤሪኬ ጊያዌ ኪሪስቶሳ ኤቄቲያዋ። ፆሳ ናዓ ኤሪኬ ጊያ ኦናኔ ፆሳ ኣዉካ ኤሬና፤ ፆሳ ናዓ ኤራይ ጊያ ኦናኔ ቃሲ ፆሳ ኣዉካ ኤሬ። ሄዋ ዲራው፥ ኮዪሩዋፔ ሂንቴ ሲሴዳዋ ሂንቴ ዎዛናን ሚኒሲዴ ናጊቴ። ኮዪሩዋፔ ሲሴዳዋ ሂንቴ ናጎፔ፥ ሂንቴንቶ ቃሲ ፆሳ ናዓናኔ ፆሳ ኣዉዋና ኢቲፔቴꬃይ ዴዓና። ቃሲ ኪሪስቶሲ ባሬ ሁጴው ኑሲ ኢማና ጌዳዌ ሜꬊና ዴዑዋ። ታኒ ሃዋ ሂንቴንቶ ሄ ሂንቴና ባሌꬂያ ኣሳቱዋ ዲራው ፃፋዲ። ሺን ኪሪስቶሲ ሂንቴ ቦላ ባሬ ጌሻ ኣያና ጉሴዳ። ጌሻ ኣያናይ ሂንቴናን ዴዒያ ዲራው፥ ኦኒኔ ሂንቴና ታማሪሳና ኮሼና፤ ኣዪሲ ጎፔ፥ ኣ ጌሻ ኣያናይ ሂንቴና ኡባባ ታማሪሴ። ኢ ታማሪሲያዌ ቱሙዋፔ ኣቲን ዎርዱዋ ጊዴና። ሄዋ ዲራው ኣያና ጌሻ ቲሚርቴው ኣዛዜቲዴ፥ ኪሪስቶሳና ኢቲፔቴꬃን ዴዒቴ። ታ ናቶ፥ ቃሲ ኢ ቆንጪያ ዎዴ፥ ኑኒ ያሺ ባዪናዋንታ ጊዳናዳኒኔ፥ ኣ ዩሳ ጋላሲ ኣ ሲንꬃን ኑኒ ዬላቴናዳን፥ ኣናና ኢቲፔቴꬃን ዴዒቴ። ኪሪስቶሲ ፂሎ ጊዲያዋ ሂንቴ ኤሮፔ፥ ፂሎባ ኦꬂያ ኡባይ ፆሳ ናዓ ጊዲያዋ ኤራናው ቤሴ። ኑኒ ፆሳ ናናቱዋ ጌቴቲዴ ፄሴታና ማላ፥ ፆሳይ ኑና ኣይ ኬና ሲቄዴንቶኔ ቤዒቴ። ኑኒ ቱሙካ ኣ ናናቱዋ። ሃ ኣላሚ ፆሳ ኤሬና ዲራው፥ ኑናካ ኤሬና። ታ ሲቃቶ፥ ሃዒ ኑኒ ፆሳ ናናቱዋ፤ ኑኒ ኣያ ሃናኔንቶ ቢሮ ኤሬቲቤና፤ ሺን ኪሪስቶሲ ቆንጪያ ዎዴ፥ ኑኒ ኣ ማላታናዋ ኤሬቶ። ኣዪሲ ጎፔ፥ ኢ ቱሙ ኣ ጊዲያዋ ኑኒ ኩሜንꬃን ቤዓና። ቃሲ ኪሪስቶሳ ቤዓና ጊዴ ናሼቻን ናጊያ ኦኒኔ ኪሪስቶሲ ጌሻ ጊዴዳዋዳን፥ ባሬና ጌሼ። ናጋራ ኦꬂያ ኡባይ ፆሳ ሂጊያ ሜንꬄ፤ ኣዪሲ ጎፔ፥ ናጋራይ ፆሳ ሂጊያ ሜንꬁሳ። ኪሪስቶሲ ኣሳ ናጋራ ꬋዪሳናው ቆንጬዳዋ ሂንቴ ኤሪታ፤ ኣኒ ናጋራይ ባዋ። ኪሪስቶሳን ዴዒያ ኦኒኔ ናጋራ ኦꬂዴ ዴዔና፤ ቃሲ ናጋራ ኦꬂዴ ዴዒያ ኦኒኔ ኣ ቤዒቤና ዎይ ኤሪቤና። ታ ናቶ፥ ኦኒኔ ሂንቴና ባሌꬆፖ። ኪሪስቶሲ ፂሎ ጊዲያዋዳን፥ ፂሎባ ኦꬂያ ኡራይ ፂሉዋ። ፃላሂያ ካፑ ኮዪሩዋፔ ናጋራ ኦꬄዳ ዲራው፥ ናጋራ ኡባ ዎዴ ኦꬂያ ኡራይ ፃላሂያ ካፑዋሳ፤ ሄዋ ዲራው፥ ፆሳ ናዓይ ፃላሂያ ካፑዋ ኦሱዋ ꬋዪሳናው ቆንጬዳ። ፆሳ ናናቱዋ ጊዲያ ኡባይ ፆሳ ሜꬌታይ ኡንቱንቱን ዴዒያ ዲራው፥ ናጋራ ኡባ ዎዴ ኦꬂኪኖ፤ ቃሲ ፆሳይ ኡንቱንቱ ኣዉዋ ጊዲያ ዲራው፥ ናጋራ ኦꬃናው ዳንዳዪኪኖ። ፆሳ ናናቱዋ ጊዱዋኒኔ ፃላሂያ ካፑዋ ናናቱዋ ጊዶን ዴዒያ ዱማቴꬃይ ሃዋን ኤሬቴ፤ ፂሎባ ኦꬄናዋንቱኔ ዎይ ባሬ ኢሻ ሲቄናዋንቱ ኦኒኔ ፆሳ ናናቱዋ ጊዲኪኖ። ኣዪሲ ጎፔ፥ ኮዪሩዋፔ ሂንቴ ሲሴዳ ኪታይ፥ «ኢቱ ኢቱዋና ሲቄታናው ቤሴ» ያጊያዋ። ኑኒ ቃዬላ ማላ ጊዳናው ቤሴና። ቃዬሊ ፃላሂያ ካፑዋሳ፤ ሄዋ ጊዶ ዲራው፥ ባሬ ኢሻ ዎꬌዳ። ኢ ባሬ ኢሻ ኣዪሲ ዎꬌዴ? ኢ ኦꬄዳ ኦሱ ኢታ ጊዲና፥ ኣ ኢሻይ ኦꬄዳ ኦሱ ሎዓ ጊዴዳ ዲራው ዎꬌዳ። ታናዳን ፆሳ ካሊያዋንቶ፥ ሃ ሳዓ ኣሳይ ሂንቴና ኢፆፔ፥ ኦራꬃባ ጎፒቴ። ኑኒ ኣማኒያዋንታ ሲቂያ ዲራው፥ ሃዪቁዋፔ ዴዖ ፒኔዳዋ ኤሬቶ፤ ኣማኒያዋንታ ሲቄና ኡራይ ኦኒኔ ሃዪቁዋ ጊዶን ዴዔ። ኣማኒያዋንታ ኢፂያ ኦኒኔ ሼምፑዋ ዎꬌዳዋ፤ ቃሲ ሼምፑዋ ዎꬌዳዋን ሜꬊና ዴዑ ባዪናዋ ሂንቴ ኤሪታ። ኪሪስቶሲ ባሬ ሼምፑዋ ኑ ዲራው ኣꬂዴ ኢሜዳዋን ሲቁ ኣዬንቶ ኑኒ ኤሬዶ፤ ኑኒካ ኣማኒያዋንቱ ዲራው፥ ኑ ሼምፑዋ ኣꬂዴ ኢማናው ቤሴ። ሺን ዱሬ ኣሳይ ኦኒኔ ባሬ ኢሻይ ሜቶቲያዋ ቤዒዴ፥ ኣው ቃሬቴናን ኢፆፔ፥ ባሬ ዎዛናን ፆሳ ሲቃይ ጋናው ዋኒ ዳንዳዪ? ታ ናቶ፥ ኑኒ ኦሱዋኒኔ ቱማቴꬃን ሲቄቶይቴፔ ኣቲን፥ ጮ ሃሳያን ዎይ ቦላ ዶናን ሲቄታናው ቤሴና። ኑኒ ቱሙዋ ባጋን ዴዒያዋ ሄዋን ኤራና፤ ቃሲ ኑ ዎዛናይ ኑ ቦላ ፒርዲያ ዎዴ ኡባን፥ ፆሳ ሲንꬃን ቱማቴꬃ ኑና ሄዋን ኤሪሴ። ኣዪሲ ጎፔ፥ ፆሳይ ኑ ዎዛናፔ ዎልቃማ፤ ቃሲ ኢ ኡባባ ኤሬ። *** ታ ሲቃቶ፥ ኑ ዎዛናይ ኑ ቦላ ፒርዴናዋ ጊዶፔ፥ ኑኒ ፆሳ ሲንꬃን ያዮኮ። ኑኒ ኣ ኣዛዙዋ ናጊያ ዲራዉኔ ኣ ናሼቺያባ ኦꬂያ ዲራው፥ ዎሲያ ኡባባ ኣፔ ኣኬቶ። ፆሳ ኣዛዙ ሃዋ፡ ኪሪስቶሲ ኑና ኣዛዜዳዋዳንካ፥ ፆሳ ናዓ ዬሱሲ ኪሪስቶሳ ሱንꬃን ኑኒ ኣማናናዳኒኔ ኢቱ ኢቱዋና ሲቄታናዳን ፆሳይ ኑና ኣዛዜዳ። ፆሳ ኣዛዙዋ ናጊያ ኦኒኔ ፆሳ ጊዶን ዴዔ፤ ፆሳይካ ኣ ጊዶን ዴዔ፤ ፆሳይ ኑሲ ኢሜዳ ኣ ኣያና ባጋና ኢ ኑ ጊዶን ዴዒያዋ ኑኒ ኤሬቶ። ታ ሲቆቶ፥ ፆሳ ኣያናይ ታናን ዴዔ ጊያ ኡባ ኣማኖፒቴ፤ ሺን ኡንቱንቱን ዴዒያ ኣያናይ ፆሳፔዬ ዎይ ጊዴኔንቶ ፓጪቴ። ኣዪሲ ጎፔ፥ ጮራ ዎርዶ ናባቱ ኡባሳ ቤዲኖ። ፆሳ ኣያና ጊዲያዋ ሂንቴ ሃዋን ኤራና፤ «ዬሱሲ ኪሪስቶሲ ኣሳ ጊዲዴ ዬዳዋ ኣማናይ» ጊያ ኦናኒኔ ዴዒያ ኣያናይ ኡባይ ፆሳፔ ዬ። ቃሲ ኪሪስቶሲ ኣሳ ጊዲዴ ዬዳዋ ኣማናይ ጌናዋ ኣያናይ ኡባይ ፆሳፔ ዪቤና፤ ኣኒ ኪሪስቶሳ ኤቄቲያ ኣያናይ ዴዔ። ሂንቴ ሄዌ ያናዋ ካሴ ሲሴዲታ፤ ኢ ሃራይ ኣቶ ሃዒካ ሃ ኣላሚያን ዴዔ። ታ ናቶ፥ ሂንቴ ፆሳዋንታ፤ ሂንቴ ጊዶን ዴዒያ ጌሻ ኣያናይ ሃ ኣላሚያን ዴዒያ ኣያናፔ ዳሮ ዎልቃሚያ ዲራው፥ ዎርዶ ናባቱዋ ሂንቴ ፆኔዲታ። ኡንቱንቱ ሃ ኣላሚያ ኣሳ ጊዲያ ዲራው፥ ሃ ኣላሚያባ ሃሳዪኖ፤ ሃ ኣላሚያ ኣሳይካ ኡንቱንቱ ሃሳያ ሲሴ። ኑኒ ፆሳዋንታ፤ ፆሳ ኤሪያ ኦኒኔ ኑኒ ጊያዋ ሲሴ። ፆሳ ኤሬና ኦኒኔ ኑኒ ጊያዋ ሲሴና። ኑኒ ቱሙ ኣያናኔ ዎርዶ ኣያና ሄዋን ሻኬቶ። ታ ሲቃቶ፥ ሲቁ ፆሳፔ ዪያ ዲራው፥ ኣኔ ኢቱ ኢቱዋና ሲቄቶይቴ። ሲቄቲያ ኦኒኔ ፆሳ ናና፤ ፆሳካ ኤሪኖ። ፆሳ ኤሻይ ሲቆ ጊዲያ ዲራው፥ ሲቄና ኡራይ ኦኒኔ ፆሳ ኤሬና። ፆሳይ ኑና ባሬ ሲቁዋ ሃዋን ቤሴዳ፤ ኑኒ ኣ ባጋና ዴዑዋ ዴማና ማላ፥ ባሬ ኢቲ ናዓ ሃ ኣላሚያ ኪቴዳ። ሲቁዋ ጊያዌ ሃዋ፤ ፆሳይ ኑና ሲቂዴ፥ ኑኒ ኑ ናጋራፔ ማሮቴꬃ ዴሜዳ ባሬ ናዓ ኑሲ ኪቴዳፔ ኣቲን፥ ኑኒ ኣ ሲቄዳዋና ጊዴና። ታ ሲቆቶ፥ ፆሳይ ኑና ሃዋዳን ሲቄዳዋ ጊዶፔ፥ ኑኒካ ኢቱ ኢቱዋና ሲቄታናው ቤሴ። ፆሳ ኦኒኔ ሙሌካ ቤዒቤና፤ ኑኒ ኢቱ ኢቱዋና ሲቄቶፔ፥ ፆሳይ ኑ ጊዶን ዴዔ፤ ኣ ሲቁካ ኑ ጊዶን ፖሌቴዳ። ፆሳይ ባሬ ኣያና ኑሲ ኢሜዳ ዲራው፥ ኑኒ ፆሳ ጊዶን ዴዒያዋኔ ኢካ ኑ ጊዶን ዴዒያዋ ኤሬቶ። ፆሳ ኣዉ ባሬ ናዓ ሃ ኣላሚያ ኣሺያዋ ጊዳናው ኪቴዳዋ ኑኒ ቤዒዴ ማርካቴቶ። ዬሱሲ ፆሳ ናዓ ጊዲያዋ ማርካቲያ ኦ ጊዱዋኒኔ ፆሳይ ዴዔ፤ ኢካ ፆሳ ጊዶን ዴዔ። ፆሳይ ኑና ሲቂያዋ ኑኒ ኑ ሁጴው ኤሬቶኔ ኣማኔቶ። ፆሳይ ሲቁዋ። ሲቁዋን ዴዒያ ኦኒኔ ፆሳ ጊዶን ዴዔ፤ ፆሳይካ ኣ ጊዶን ዴዔ። ኑ ዴዑ ሃ ኣላሚያን ኪሪስቶሲ ዴዔዳዋ ማላ ጊዲያ ዲራው፥ ፒርዳ ጋላሲ ኑኒ ያዬና ማላ፥ ሲቁ ኑ ጊዶን ፖሌቴዳ። ሲቁዋን ያሺ ባዋ፤ ጋሱካ ቱሙ ሲቁ ያሻ ኬሲ ኦሌ። ያሻይኔ ሙራይ ኢቲፔ ቢያ ዲራው፥ ያዪያ ኡራ ሲቁ ኩሜንꬃ ጊዴና። ፆሳይ ኮይሮ ኑና ሲቄዳ ዲራው፥ ኑኒ ኣ ሲቄዶ። ኦኒኔ፥ «ታኒ ፆሳ ሲቃይ» ጊዴ ባሬ ኢሻ ኢፆፔ፥ ኢ ዎርዱዋ። ኣዪሲ ጎፔ፥ ቤዔዳ ባሬ ኢሻ ሲቄናዌ ቤዒቤና ፆሳ ሲቃናው ዋኒ ዳንዳዪ? ቃሲ ኪሪስቶሲ ኑሲ ኢሜዳ ኣዛዙ ሃዋ፤ ፆሳ ሲቂያ ኡራይ ባሬ ኢሻካ ሲቃናው ቤሴ። ኦኬቴዳ ኪሪስቶሳ ያጊዴ፥ ዬሱሳ ኣማኒያ ኡባይ ፆሳ ናና፤ ቃሲ ፆሳ ኣዉዋ ሲቂያ ኦኒኔ ኣ ናናቱዋካ ሲቄ። ኑኒ ፆሳ ሲቂያዋኒኔ ኣ ኣዛዙዋ ናጊያዋን፥ ፆሳ ናናቱዋ ሲቂያዋ ኤሬቶ። ኣዪሲ ጎፔ፥ ኑኒ ፆሳ ሲቂያዌ ኣ ኣዛዙዋ ናጊያዋ፤ ኣ ኣዛዙካ ዴፆ ጊዴና። ኣዪሲ ጎፔ፥ ፆሳ ናዓ ጊዲያ ኦኒኔ ሃ ኣላሚያ ፆናናው ዳንዳዬ፤ ኑኒካ ሃ ኣላሚያ ፆናናዌ ኑ ኣማኑዋና። ሃ ኣላሚያ ፆናናው ዳንዳዪያዌ ኦኔ? ዬሱሲ ፆሳ ናዓ ጊዲያዋ ኣማኒያዋ ፃላላይ ፆናና። ፂንቃታ ሃꬃናኔ ሃይቁዋ ሱꬃና ዬዳዌ ሃዋ፤ ኢካ ዬሱሲ ኪሪስቶሳ፤ ሃꬃናኔ ሱꬃና ኢ ዬዳዋፔ ኣቲን፥ ሃꬃ ፃላላና ዪቤና። ጌሻ ኣያናይ ቱማ ጊዲያ ዲራው፥ ሄዌ ቱማ ጊዲያዋ ኢ ባሬ ሁጴው ማርካቴ። ኣዪሲ ጎፔ፥ ሄዙ ማርካቱ ዴዒኖ። ሄዋንቱ፥ ፆሳ ኣያና፥ ሃꬃኔ ሱꬃ፤ ሃ ሄዛቱ ኢቱ ኢቱዋዋ ጳልቂኪኖ። ኑኒ ኣሳይ ማርካቲያዋ ኣማኖፔ፥ ፆሳይ ማርካቲያዌ ኣሳዋፔ ሎይꬂ ኣꬌ፤ ኣዪሲ ጎፔ፥ ፆሳይ ባሬ ናዓባ ማርካቴዳ ማርካቴꬃይ ሃዋ። ፆሳ ናዓ ኣማኒያ ኡራ ዎዛናን ሃ ማርካቴꬃይ ዴዔ። ፆሳ ኣማኔና ኡራይ ኦኒኔ ፆሳይ ባሬ ናዓው ማርካቴዳ ማርካቴꬃ ኣማኒቤና ዲራው፥ ፆሳ ዎርዱዋ ጌ። ሲሚ ማርካቴꬃይ ሃዋ፤ ፆሳይ ኑሲ ሜꬊና ዴዑዋ ኢሜዳ፤ ሄዌካ ኣ ናዓን ዴዔ። ፆሳ ናዓይ ዴዒያ ኦሲኔ ዴዑ ዴዔ፤ ፆሳ ናዓይ ባይና ኦሲኔ ዴዑ ባዋ። ፆሳ ናዓ ሱንꬃን ኣማኒያ ሂንቴንቶ ሜꬊና ዴዑ ዴዒያዋ ሂንቴ ኤራና ማላ፥ ሃዋ ሂንቴንቶ ፃፋዲ። ፆሳይ ኮዪያዋዳን፥ ኣዪኔ ኑኒ ኣ ዎሶፔ፥ ኢ ሲሲያዋ ኑኒ ኤሪያ ዲራው፥ ኣ ሲንꬃን ያዮኮ። ኑኒ ዎሲያ ኡባን ኢ ሲሲያዋ ኤሮፔ፥ ኑኒ ኣ ዎሴዳዋ ኢ ዛሬዳዋ ኤሬቶ። ኦኒኔ ሃይቁ ቤሴና ናጋራ ባሬ ኢሻይ ኦꬂሺን ቤዖፔ፥ ፆሳ ዎሳናው ቤሴ፤ ሃይቁ ቤሴና ናጋራ ኦꬄዳዋንቶ ፆሳይ ዴዑዋ ኢማና። ሃይቁ ቤሲያ ናጋራይ ዴዔ፤ ታኒ ሂንቴና ሄዎ ፆሳ ዎሲቴ ጊኬ። ባዪዞ ኦሱ ኡባይ ናጋራ፤ ሺን ሃይቁ ቤሴና ናጋራይ ዴዔ። ፆሳ ናናይ ኦኒኔ ናጋራ ኡባ ዎዴ ኦꬄናዋ ኑኒ ኤሬቶ። ኣዪሲ ጎፔ፥ ፆሳ ናዓይ ኡንቱንታ ናጌ፤ ቃሲ ፃላሂያ ካፑካ ኡንቱንታ ቆሃናው ዳንዳዬና። ኑኒ ፆሳዋንታ ጊዲያዋኔ ሃ ኣላሚ ኡባይ ፃላሂያ ካፑዋን ሞዴቴዳዌ ኤሬቶ። ኑኒ ቱሙ ፆሳ ኤራናዳን፥ ፆሳ ናዓይ ዬዳዋኔ ኑሲ ኣኬካ ኢሜዳዋ ኤሬቶ። ኑኒ ቱሙ ፆሳ ጊዶን፥ ኣ ናዓ ዬሱሲ ኪሪስቶሳ ጊዶን ዴዔቶ፤ ኢ ቱሙ ፆሳኔ ሜꬊና ዴዑዋ። ታ ናቶ፥ ኤቃቱዋፔ ሂንቴ ሁጲያ ናጊቴ። ታኒ ኣማኒያዋንታ ካሌꬂያ ጪማይ፥ ሂንቴንቶ፥ ዶሬቴዳ ጌኒዉኔ ኢዚ ናናው ሃ ዳቢዳቢያ ፃፋይ፤ ኑ ጊዶን ዴዒያ ቃሲ ኑናና ሜꬊናው ዴዓና ቱማቴꬃ ዲራው፥ ታኒ ሂንቴና ቱሙ ሲቃይ። ቃሲ ታ ፃላላ ጊዴናን፥ ቱማቴꬃ ኤሪያ ኡባቱ ሂንቴና ሲቂኖ። *** ፆሳ ኑ ኣዉዋኔ ኣ ናዓ ዬሱሲ ኪሪስቶሳ ኣꬎ ኬካቴꬃይ፥ ማሮቴꬃይኔ ሳሮቴꬃይ ቱማቴꬃኒኔ ሲቁዋን ኑናና ኢቲፔ ጊዶ። ፆሳ ኣዉ ኑና ኣዛዜዳዋዳን፥ ኔ ናናቱዋፔ ኣማሬዳዋንቱ፥ ቱማቴꬃን ዴዒያዋ ቤዓዴ ታኒ ዳሮ ናሼታዲ። ሲቆ ጌኔ፥ ሃዒካ ኑኒ ኡባይ ኢቱ ኢቱዋና ሲቄታና ማላ፥ ታኒ ኔና ዎሳይ፤ ሃ ኣዛዙ ካሴዴፔ ኑናና ዴዒያ ኣዛዙዋፔ ኣቲን፥ ታኒ ኔው ኦራꬃ ኣዛዙዋ ፃፊኬ። ሲቁዋ ጊያዌ ኑኒ ፆሳ ኣዛዙዋ ናጊዴ ዴዒያዋ ጊያዋ። ቃሲ ኮዪሩዋፔ ሂንቴ ሲሴዳዋዳንካ፥ ኣ ኣዛዙ ኣዬ ጎፔ፥ ሂንቴ ኡባይ ሲቁዋን ዴዓናዋ። ኣዪሲ ጎፔ፥ ዬሱሲ ኪሪስቶሲ ኣሳ ጊዲዴ ዬዳዋ ኣማኖኮ ጊያዋንቱ፥ ባሌꬂያ ዳሮ ኣሳቱ፥ ጋዴ ጊዶ ጌሌዲኖ። ሄዋ ማላ ኡራይ ኦኒኔ ኣሳ ባሌꬂያዋኔ ኪሪስቶሳ ኤቄቲያዋ። ሂንቴ ኦꬄዳዎ ኩሜንꬃ ዎይታ ኣካናፔ ኣቲን፥ ኑኒ ኦꬄዳዋ ባዪዜና ማላ፥ ሂንቴና ናጊቴ። ኪሪስቶሳ ቲሚርቲያፔ ሃኪያ ኡራዉኔ ቃሲ ኣ ቲሚርቲያን ዴዔና ኡራው ፆሳና ኢቲፔቴꬃይ ባዋ። ኪሪስቶሳ ቲሚርቲያን ዴዒያ ኡራው ፆሳ ኣዉዋናኔ ኣ ናዓና ኢቲፔቴꬃይ ዴዔ። ኦኒኔ ሂንቴኮ ዪዴ፥ ሃ ቲሚርቲያ ኣሄናን ኣጎፔ፥ ሂንቴ ጎሌ ኣ ጌሊሶፒቴ፤ ሳሮካ ጎፒቴ። ኣዪሲ ጎፔ፥ ኣ ሳሮ ጊያ ኡራይ ኣ ኢታ ኦሱዋ ኣናና ጊሼቴ። ታኒ ሂንቴንቶ ፃፋናው ኮዬዳ ዳሮባይ ዴዔ፤ ሺን ዋራቃታኒኔ ቃላሚያን ፃፋናው ኮያቤይኬ፤ ሺን ኑ ናሼቻይ ፖሌታና ማላ፥ ሂንቴናና ዶናን ሃሳያናው ሂንቴኮ ባና ጋዴ ቆፓይ። ሲቆ ጌኔ፥ ፆሳይ ዶሬዳ ኔ ሚቻቲ ናናይ ኔና ሳሮ ሳሮ ያጊኖ። ታኒ ኣማኒያዋንታ ካሌꬂያ ጪማይ፥ ቱሙ ሲቂያ ታ ሲቁዋ ጋዮሳው ሃ ዳቢዳቢያ ፃፋይ። ታ ሲቆ፥ ኔኒ ፆሳና ዴዒያ ዴዑ ሎዓ ጊዲያዋ ታኒ ኤሪያዋዳን፥ ኔና ኣያዪኔ ዋዪሴና ማላኔ ቃሲ ኔ ኣሳቴꬃይ ፓፃ ጊዳና ማላ፥ ፆሳ ዎሳይ። ኣዪሲ ጎፔ፥ ኣማሬዳ ኢሻቱ ዪዴ፥ ኡባ ዎዴ ኔኒ ቱማቴꬃን ዴዒያዋኔ ኔ ቱማቴꬃባ ማርካቴዳ ዎዴ፥ ታኒ ዳሮ ናሼታዲ። ታ ናናይ ቱማቴꬃን ዴዒያዋ ሲሲያዋፔ ኣꬊዴ፥ ታና ናሼቺያባይ ባዋ። ታ ሲቆ፥ ኑ ኢሻቱ ኢማꬃ ጊዶፔካ፥ ኔኒ ኡንቱንቶ ኦꬂያ ኦሱዋ ኡባን ኣማኔቴዳ ኦሱዋ ኦꬃዳ። ቃሲ ኡንቱንቱ ኔ ሲቁዋባ ኣማኒያ ኣሳቶ ማርካቴዲኖ፤ ኡንቱንቱ ቃንፄናን ባሬ ኦጊያ ባና ማላ ፆሳይ ዶሲያዋዳን፥ ኔኒ ሎዖባ ኦꬃዴ ኡንቱንታ ማዳሪኪ። ኣዪሲ ጎፔ፥ ፆሳ ኣማኔናውንቱፔ ኣዪኔ ኣኬናን፥ ኪሪስቶሳ ሱንꬃ ዲራው ኬሴዲኖ። ሄዋ ዲራው፥ ኑኒ ቱማቴꬃ ኡንቱንቱና ኢቲፔ ኦꬃና ማላ፥ ሃዋንቱ ማላ ኣሳቱዋ ማዳናው ቤሴ። ታኒ ኣማኒያዋንቶ፥ ዳቢዳቢያ ፃፋዲ፤ ሺን ኡንቱንቱ ካፑዋ ጊዳናው ኮዪያ ዲዮቲራፊሴ ኑኒ ጊያዋ ኣኬና። ሄዋ ዲራው፥ ታኒ ያ ቢያ ዎዴ፥ ኢ ኑ ቦላን ሃሳዪያ ኢታ ሃሳያኔ ኢ ኦꬄዳ ኦሱዋ ሂንቴንቶ ኦዳና፤ ቃሲ ኢ ሄዌ ጉፄዳ ጊዴ፥ ኑ ኢሻቱ ዪያ ዎዴ ሞኬና፤ ሃራይ ኣቶ ኡንቱንታ ሞካናው ኮዪያዋንታካ ዲጊዴ፥ ኣማኒያዋንቱ ጊዶፔ ኬሴ። ታ ሲቆ፥ ሎዖባፔ ኣቲን፥ ኢታባ ማላቶፓ። ሎዖባ ኦꬂያ ኦኒኔ ፆሳ ኣሳ፤ ሺን ኢታባ ኦꬂያ ኦኒኔ ፆሳ ኤሬና። ዲሜፂሮሲ ሎዓ ጊዲያዋ ኣሳይ ኡባይ ማርካቴ፤ ቱማቴꬃይ ባሬ ሁጲያንካ ኣባ ማርካቴ። ኑኒካ ቃሲ ኣባ ማርካቴቶ፤ ኑ ማርካቴꬃይ ቱማ ጊዲያዋ ሂንቴካ ኤሪታ። ታኒ ኔው ፃፋናው ኮዬዳ ዳሮባይ ዴዔ፤ ሺን ዋራቃታኒኔ ቃላሚያኒኔ ፃፋናው ኮዪኬ። ሺን ታኒ ማታን ኔናና ጋኬታናው ቆፓይ፤ ሄ ዎዴ ኑኒ ጋኬቲዴ ሃሳያና። ሳሮቴꬃይ ኔናና ጊዶ። ኔ ዳባቱ ኔና ሳሮ ሳሮ ያጊኖ። ኑ ዳባቱዋ ኡባ ኡንቱንቱ ሱንꬃ ሱንꬃ ፄሳዴ፥ ታና ሳሮ ሳሮ ጌዳ ያጋ። ታኒ ዬሱሲ ኪሪስቶሳ ቆማይ ዪሁዳይ፥ ያዪቆባ ኢሻይ፥ ፆሳይ ፄሴዳዋንቶ፥ ፆሳይ ኣዉ ሲቂያዋንቶ፥ ቃሲ ዬሱሲ ኪሪስቶሲ ናጊያዋንቶ፥ ሃ ዳቢዳቢያ ፃፋይ። ማሮቴꬃይ፥ ሳሮቴꬃይኔ ሲቆቴꬃይ ሂንቴናን ኩሞ። ታ ሲቃቶ፥ ኑኒ ኢቲፔ ሻኪ ኣካና ኣቶቴꬃባ ሂንቴንቶ ፃፋናው ታኒ ዳሮ ዳቡሪያ ዎዴ፥ ፆሳይ ባሬ ናናቶ ላዔꬄናን ኢቲ ጌዴ ኢሜዳ ኣማኖ ሂንቴ ባፄታና ማላ፥ ሂንቴና ዞራዴ ፃፋናው ኮሺያዋ ኣኬካዲ። ኣዪሲ ጎፔ፥ ፆሳ ኤሬና ኢቲ ኢቲ ኣሳቱ ኦኒኔ ቤዔናን ሂንቴ ጊዶ ጌሌዲኖ። ሄዋንቱ ኑ ፆሳ ኣꬎ ኬካቴꬃባ ኦዲያ ኪታ ኢታ ቱናቴꬃው ጌላይ ታማሪሲኖ፤ ኡንቱንቱ ኑ ኢቲ ካቲያ፥ ኑ ጎዳ ዬሱሲ ኪሪስቶሳ ኤሮኮ ያጊኖ፤ ቃሲ ኡንቱንቱ ፒርዳ ኣካናዋ ፆሳ ማፃፋቱ ዳሮ ዎዲያፔ ካሴ ኦዴዲኖ። ሺን ሂንቴ ሃ ኡባባ ኤሪያዋ ጊዶፔካ፥ ጎዳይ ኢስራዔሊያ ኣሳ ጊብፄ ጋዲያፔ ዎቲ ኣሼዴንቶኔ ቃሲ ኣማኒቤናዋንታ ጉዬፔ ዎቲ ꬋዪሴዴንቶ፥ ታኒ ሂንቴና ሃሳዪሳናው ኮያይ። ቃሲ ባሬንቱ ዴዒያሳ ኣጊዴ፥ ባሬንቶ ኢሜቴዳ ካፖቴꬃ ናጊቤና ኪታንቻቱ ፒርዳ ኣኪያ ዎልቃማ ጋላሳይ ጋካናው ፆሳይ ኡንቱንታ ናጊያሳን፥ ꬉማፔ ጋርሳን ሜꬊናው ቃቺ ዎꬄ። ሄዋዳን ሶዶማኔ ጋሞራ ጊያ ካታማቱዋኒኔ ኡንቱንቱ ሄራን ዴዒያ ካታማቱዋን ዴዒያ ኣሳይ ሄ ኪታንቻቱዋዳን ዎሹሜዲኖኔ ዎሹማናው ሎይꬂ ካጄሌዲኖ፤ ሄዋንቱ ሜꬊና ታማን ኤፂዴ፥ ሃራቶ ሌሚሱዋ ጊዴዲኖ። ሄዋዳን ቃሲ ሄ ኣኩሜቲያ ኣሳቱ ባሬንቱ ኣሳቴꬃ ቱኒሲኖ፤ ፆሳ ጎዳቴꬃ ካꬊኖ፤ ቦንቾ ሜꬌታቱዋካ ቦሪኖ። ሺን ኪታንቻቱዋ ካፑ ሚካዔሊ ሙሴ ኣኃባ ፃላሂያና ፓሉሜቴዳ ዎዴ፥ «ጎዳይ ኔና ሴሮ» ጌዳዋፔ ኣቲን፥ ቦሪያ ቃላን ኣ ቦላ ፒርዳናው ኮዪቤና። ሺን ሄ ኣሳቱ ባሬው ኣኬኬናባ ኡባ ቦሪኖ፤ ቃሲ ኡንቱንቱ ዩሺ ቆፔና ዶዓቱዋዳን፥ ሜꬌታ ኤራቴꬃን ኤሪያ ዬዋቱ ኡንቱንታ ꬋዪሲያዋንታ። ኡንቱንቶ ኣዬሮ! ኣዪሲ ጎፔ፥ ኡንቱንቱ ቃዬሊ ሃሜቴዳ ኦጊያ ሃሜቴዲኖ። ሻሉዋ ዲራው ጊዴ፥ ባላሚ ኦꬄዳዋ ማላ ባዪዙዋ ኦꬄዲኖ። ቃሲ ቆሬ ጊያ ቢታኒ ማካሊዴ ꬋዬዳዋዳን፥ ኡንቱንቱካ ማካሊዴ ꬋዬዲኖ። ሄዋንቱ ሲቁዋን ሾቢያ ሂንቴ ሚያሳን ሂንቴናና ያሺ ባዪናን ሚያ ዎዴ፥ ቆሴቴዳ ꬉቡዋ ማላ። ኡንቱንቱ ባሬንቱ ፃላላ ናጊኖ። ኡንቱንቱ ጫርኩ ኣፊያ ኢራይ ባዪና ሻሪያ ማላ፤ ቃሲ ኡንቱንቱ ቦኒያን ኣይፊያ ኣዪፌና፥ ፃጱዋና ሾዴቲዴ፥ ሙሌካ ሜሌዳ ሚꬃ ማላ። ኡንቱንቱ ባሬንቱ ፖኩዋ ጌንꬄና ሆሞቲያ፥ ኢታ ኣባ ቤታ ማላ። ኡንቱንቱ፥ ፆሳይ፥ ሜꬊናው ሳካና ꬉማኒ ሳዓ ጊጊሲ ዎꬄዳ ዩዪያ ፆሊንታቱዋ ማላ። ሄኖኪ ኣዳማፔ ዶሚና፥ ላፑንꬃ ዬሌታ ጊዲያዌ፥ ዳሮ ዎዲያፔ ካሴ ኡንቱንቱዋ ቲምቢቲያ ኦዲዴ፥ ሃዋዳን ያጌዳ፤ «ኣኬኪቴ፤ ፆሳ ኤሬና ናጋራንቻ ኣሳቱ ኦꬄዳ ኢታ ኦሱዋ ኡባዉኔ ቃሲ ፆሳ ኤሬና ሄ ኢታ ኣሳቱ ፆሳ ቦላ ሃሳዬዳ ኢታ ሃሳያ ኡባው፥ ጎዳይ ኡንቱንቱ ኡባ ቦላ ፒርዳናው፥ ባሬ ጮራ ሻዓ ጌሻቱዋና ኢቲፔ ያና» ያጌዳ። *** ሄ ኣሳቱ ኡባ ዎዴ ዙዙሚኖኔ ሃራቱዋ ኣማሳሊኖ፤ ቃሲ ባሬንቱ ኢታ ኣሙዋ ካሊኖ፤ ባሬንቱ ሁጴው ጎዓ ዴማናው ሃራቱዋ ሳቢኖኔ ባሬንቱ ኮሻ ዎጋፔ ኣꬂዴ፥ ꬎቁ ኦꬂ ሃሳዪኖ። ሺን ታ ሲቃቶ፥ ኑ ጎዳ ዬሱሲ ኪሪስቶሲ ኪቴዳዋንቱ ሂንቴንቶ ቤኒ ሃሳዬዳ ቃላ ኣኬኪቴ። ኡንቱንቱ ሂንቴንቶ፥ «ዉርሴꬃ ዎዲያን፥ ባሬንቶ ፆሳይ ባዪናዋንቱ፥ ባሬንቱ ኣሙዋ ካሊያዋንቱ፥ ቃሲ ሂንቴ ቦላ ቂሊጪያዋንቱ ያና» ያጌዲኖ። ሄዋንቱ ኣሳ ጊዶን ሻኮቴꬃ ሜꬊያዋንታኔ፥ ባሬንቱ ኢታ ኣሞ ሞዴቴዳዋንታ፤ ቃሲ ጌሻ ኣያናይ ባይናዋንታ። ሺን ታ ሲቃቶ፥ ኡባፔ ኣꬊያ ጌሻ ኣማኑዋን ሂንቴ ሁጲያ ኬፂቴ፤ ቃሲ ጌሻ ኣያና ዎልቃን ፆሳ ዎሲቴ። ቃሲ ኑ ጎዳይ ዬሱሲ ኪሪስቶሲ ባሬ ማሮቴꬃን ሂንቴንቶ ኢማና ሜꬊና ዴዑዋ ናጊዴ፥ ሂንቴ ሁጲያ ፆሳ ሲቁዋን ዎꬂቴ። ኢቲ ኢቲ ሲꬊ ዴዒያ ኣሳቶ ቃሬቲቴ። ኢቱዋ ኢቱዋ ታማፔ ዳፊ ኬሲዴ ኣሺቴ። ቃሲ ሃራይ ኣቶ ኡንቱንቱ ኢታ ኣሙዋን ቱኔዳ ማዩዋ ኢፂዴካ፥ ኢቶ ኢቶ ያሻቴꬃን ቃሬቲቴ። ሂንቴ ኩንዴናዳን፥ ሂንቴና ናጋናዉኔ ፖኩ ባይናዋንታ ኡዲዴ፥ ባሬ ቦንቹዋ ሲንꬃ ዎልቃማ ናሼቻን ሺሻናው ዳንዳዪያ ኑና ኣሺያ ኢቲ ፆሳው፥ ኑ ጎዳ ዬሱሲ ኪሪስቶሳ ባጋና ቦንቹ፥ ጊታቴꬃይ፥ ዎልቃይኔ ማታይ፥ ኣꬌዳ ዎዴ ኡባፔኔ ሃዒኔ ሜꬊና ጋካናው ጊዶ። ኣሜንዒ። *** ኤሌሊ ሃናናው ቤሲያዋ ባሬ ኦሳንቻቱዋ ቤሳና ማላ፥ ፆሳይ ዬሱሲ ኪሪስቶሳው ኢሜዳ ሳፃይ ሃዋ፤ ዬሱሲ ባሬ ኪታንቻ ኪቲዴ፥ ሃ ሳፃ ባሬ ኦሳንቻ ዮሃኒሳ ኤሪሴዳ። ዮሃኒሲ ቤዒዴ ቱማቴꬃን ኦዴዳ ኡባብይ፥ ፆሳ ቃላኔ ዬሱሲ ኪሪስቶሳ ማርካቴꬃ። ሃ ማፃፋ ናባቢያ ኡራይ ኣንጄቴዳዋ፤ ቃሲ ሃ ቲምቢቲያ ማፃፋ ሲሲያዋንቱኔ ሃ ማፃፋን ፃፌቴዳዋ ናጊያዋንቱ ኣንጄቴዳዋንታ፤ ኣዪሲ ጎፔ፥ ሃ ዬዉ ፖሌታናው ዎዲ ማታቴዳ። ታኒ ዮሃኒሲ፥ ኢሲያ ጋዲያን ዴዒያ ላፑ ዎሳ ጎሌቶ ያጋይ፤ ካሴ ዴዒያ ፆሳፔ፥ ሃዒካ ዴዒያ ፆሳፔ፥ ሲንꬃፔካ ያና ፆሳፔ፥ ቃሲ ኣ ካዉቴꬃ ኦይዲያ ሲንꬃን ዴዒያ ላፑ ኣያናቱዋፔ፥ ኣꬎ ኬካቴꬃይኔ ሳሮቴꬃይ ሂንቴንቱሲ ጊዶ። ቃሲ ኣማኔቴዳ ማርካ፥ ሃይቁዋፔ ኮይሮ ዴንዴዳ ናዓፔ፥ ሳዓ ካታቱዋ ሞዲያ ዬሱሲ ኪሪስቶሳፔ ኣꬎ ኬካቴꬃይኔ ሳሮቴꬃይ ሂንቴንቱሲ ጊዶ። ኢ ኑና ሲቄኔ ቃሲ ኑ ናጋራ ኣይሌቴꬃፔካ ባሬ ሱꬃን ኑና ኬሴዳ። ኑኒ ባሬ ፆሳዉኔ ኣዎ ኦꬃና ማላ፥ ኢ ኑና ካታቱዋኔ ቄሳቱዋ ኦꬄዳ፤ ኣው ሜꬊናፔ ሜꬊና ጋካናው ቦንቹኔ ሞዲያ ዎልቃይ ጊዶ። ኣሜንዒ። ቤዒቴ፥ ዬሱሲ ሻርያኒ ዬ። ኣሳይ ኡባይ፥ ሃራይ ኣቶ፥ ኣ ጫዴዳዋንቱካ ኣ ቤዓና፤ ሳዓን ዴዒያ ኣሳይ ኡባይ ኣ ጋሱዋን ዬካናዋንታ። ሃዌ ቱሙፔ ሃናናዋ። ኣሜንዒ። ካሴ ዴዒያዌ፥ ሃዒካ ዴዒያዌ፥ ሲንꬃፔካ ያና ጎዳይ፥ ኡባፔ ዎልቃማ ፆሳይ፥ «ኡባባው ኣልፋይኔ ኦሜጋይ፥ ኮይሩኔ ዉርሴꬃይ ታና» ያጌ። ታኒ ዮሃኒሲ፥ ሂንቴንቱ ኢሻይ፥ ሂንቴናና ዬሱሲ ኪሪስቶሳ ዋዪያኔ ኣ ካዉቴꬃ ቃሲ ኣ ዳንዳያ ኢቲፔ ሻኬቲያዌ፥ ፆሳ ቃላ ኦዴዳ ዲራዉኔ ዬሱሳዋ ማርካቴዳ ዲራው፥ ፒፂሞ ጊያ ሃꬃይ ዶዶ ቢታን ዴዓዲ። ጎዳ ጋላሳን ታኒ ኣያናን ዴዓይ፤ ታኒ ታፔ ጉዬና ማላካታ ዋሱዋ ማላ ዎልቃማ ኮሻ ሲሳዲ። ሄ ኮሻይ ታና፥ «ኔኒ ቤዒያዋ ማፃፋን ፃፋ፤ ኢሲያን ዴዒያ ላፑ ዎሳ ጎሌቶ፥ ኤፌሶና፥ ሳሚሪኔሳ፥ ጴርጋሞና፥ ቲያፂሮና፥ ሳርዴሳ፥ ፒላዴሊፊያ፥ ሎዶቂያ ዎሳ ጎሌቶ ዬዳ» ያጌዳ። ታኒ ታው ኦዲያ ኮሻ ቤዓናው ጉዬ ሲማዲ፤ ፆምፒያ ዎꬂያ ላፑ ዎርቃ ባላቱዋ ቤዓዲ። ሄ ባላቱዋ ጊዶን ኣሳ ናዓ ማላቲያዋ ቤዓዲ፤ ኣዱሳ ኣፊላ ባሬ ጌዲያ ጋꬂ ማዪዴ፥ ዎርቃ ዳንጩዋ ባሬ ቲራን ዩሺ ኣꬄዳ። ኣ ሁጲኔ ኣ ሁጲያ ቢናናይ ቦꬃ ዶርሳ ኢሲኪያኔ ሄዋፔካ ኣꬊዴ ሻቻ ማላቴ፤ ኣ ኣይፊካ ታማ ላጩዋ ማላቴ። ኣ ጌዲካ ጮጪያ ታማን ቴሪዴ ጶሊያ ናሃሲያ ጊያ ቢራታ ማላቴ፤ ኣ ኮሻይካ ዎልቃማ ሻፋ ጉንꬃ ማላ። ኢ ባሬ ኡሼቻ ኩሺያን ላፑ ፆሊንታቱዋ ኦይቄዳ። ኣ ዶናፔ ላዑ ባጋና ቃሬቴዳ ማሻይ ኬሴዳ። ኣ ዴሙካ ሎይꬂ ፖዒያ ኣዋይፊያ ማላቴ። ታኒ ኣ ቤዔዳ ዎዴ ሃይቄዳዋዳን ሃናዴ፥ ኣ ጌዲያ ማታን ኩንዳዲ። ባሬ ኡሼቻ ኩሺያ ታ ቦላ ዎꬂዴ፥ ታና ሃዋዳን ያጌዳ፤ «ያዮፓ፤ ኮይሩካ ዉርሴꬃይካ ታና። ታኒ ዴዑዋን ዴዒያዋ። ታኒ ሃይቃዲ፤ ሺን ቤዓ፥ ሜꬊ ሜꬊናዉካ ዴዑዋን ዴዓይ። ሃይቁዋ ቁልፒኔ ሲዖሊያ ቁልፒ ታ ኩሺያን ዴዔ። ሲሚ ኔኒ ቤዔዳባኔ ሃዒ ዴዒያዋ፥ ቃሲ ሲንꬃፔ ሃናናባ ፃፋ። ኔኒ ታ ኡሼቻ ኩሺያን ቤዔዳ ላፑ ፆሊንታቱዋ ቢሌꬃይኔ ቃሲ ፆምፓቱዋ ዎꬂያ ላፑ ዎርቃ ባላቱዋ ቢሌꬃይ ሃዋ፤ ላፑ ፆሊንታቱ ላፑ ዎሳ ጎሌቱዋ ኪታንቻቱዋ፤ ዎሳ ጎሊያ ላፑ ዎርቃ ባላቱ ላፑ ዎሳ ጎሊያ። «ኤፌሶኔን ዴዒያ ዎሳ ጎሌ ኪታንቻው ሃዋዳን ያጋዴ ፃፋ፡ ‹ባሬ ኡሼቻ ኩሺያን ላፑ ፆሊንቲያ ኦይቄዳዌ፥ ፆምፓቱዋ ዎꬂያ ላፑ ዎርቃ ባላቱዋ ጊዱዋና ሃሜቲያዌ ሃዋዳን ያጌ። ታኒ ኔ ኪታ፥ ኔ ዳቡራኔ ኔ ጌንጩዋ ኤራይ። ቃሲ ኔኒ ኢታ ኣሳቱዋ ጌንጫናው ዳንዳያቤናዋካ ታኒ ኤራይ፤ ዬሱሲ ኪቴዳዋንታ ጊዴናን ዴዒዴ ባሬንታ፥ ‹ኑኒ ዬሱሲ ኪቴዳዋንታ› ጊያዋንታ ኔኒ ፆሞሳዴ፥ ኡንቱንቱ ዎርዶ ጊዲያዋ ዴሜዳዋካ ኤራይ። ኔኒ ጌንጫዳ፤ ቃሲ ታ ሱንꬃ ዲራዉካ ሜቱዋ ዳንዳያዳ፤ ዳቡራቤይካ። ሺን ታኒ ኔና ካꬊያባይ ዴዔ፤ ኣዪሲ ጎፔ፥ ኔኒ ካሴ ኔ ሲቁዋ ኣጋዳ። ሲሚ ኔኒ ሃቃፔ ኩንዳዲንቶኔ ኣኬካ። ኔ ናጋራፔ ሲማ፤ ኔኒ ካሴ ኦꬂያ ኦሱዋ ኦꬃ። ሄዌ ꬋዮፔ፥ ታኒ ኔኮ ያና፤ ያዴ ኔኒ ኔ ናጋራፔ ሲማና ꬋዮፔ፥ ኔኒ ፆምፒያ ዎꬂያ ኔ ባላ ኣ ሳዓፔ ኣካዲጋና። ሺን ኢቲባ ሎይꬃዳ፤ ኒቆላዋቱዋ ኦሱዋ፥ ታኒ ኢፂያዋ ኔኒካ ኢፃዳ። ‹ሲሳናው ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ፤ ታኒ ፆኒያ ኡራው ፆሳ ጌኔቲያን ሞኪያ ዴዑዋ ሚꬃ ኣይፊያ ማናው ኢማና› ያጌ» ያጋዴ ፃፋ። «ሳሚሪኔሳን ዴዒያ ዎሳ ጎሌ ኪታንቻው ሃዋዳን ያጋዴ ፃፋ፡ ‹ሃይቄዳዌ፥ ሃይቁዋፔካ ዴንዴዳዌ፥ ኮይሩኔ ዉርሴꬃይ ሃዋዳን ያጌ። ‹ታኒ ኔ ዋዪያኔ ኔ ሂዬሳቴꬃ ኤራይ፤ ሺን ኔኒ ዱሬ። ኣዪሁዳ ጊዴናን ዴዒዴ ባሬንታ፥ ‹ኑኒ ኣዪሁዳ› ጊያዋንቱ ቦሪያዋ ታኒ ኤራይ፤ ሺን ኡንቱንቱ ሴፃና ማባራን ዴዒኖ። ኔኒ ዋዬታና ዋዬው ያዮፓ። ቤዓ፥ ፃላሂያ ካፑ ሂንቴፔ ኣማሬዳዋንታ ፆሞሳናው ቃሾ ጎሌን ዬጋና፤ ታሙ ጋላሳ ጋካናው ሂንቴንቱ ዋዬታና። ሃይቃና ጋካናሲካ ኣማኔቴዳዋ ጊዳ፤ ታኒ ኔው ዴዑዋ ኣኪሊሊያ ኢማና። ‹ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ፤ ፆኒያ ኡራይ ላዔꬁዋ ሃይቁዋን ቆሄቴና› ያጌ» ያጋዴ ፃፋ። «ጴርጋሞናን ዴዒያ ዎሳ ጎሌ ኪታንቻው ሃዋዳን ያጋዴ ፃፋ፡ ‹ላዑ ባጋና ሌፌቴዳ ማሻይ ዴዒያዌ ሃዋዳን ያጌ። ‹ታኒ ኔኒ ዴዒያ ሳዓ ኤራይ። ኔኒ ሴፃና ካዉቴꬃ ኦይዲ ዴዒያ ሳዓን ዴዓሳ፤ ታ ሱንꬃ ሚኒሳ ናጋሳ። ሃራይ ኣቶ፥ ሴፃናይ ዴዒያ ሳዓን ሂንቴንቱ ማታን ኣሳይ ዎꬌዳ ታኒ ኣማኒያ ማርካይ ኣንቲጳሲ ዴዒያ ዎዴካ ታና ኣማኒያዋ ኣጋቤይካ። ሺን ታኒ ኔና ቦሪያ ጉꬃባይ ዴዔ፤ ኢስራዔሊያ ኣሳይ ኤቃው ያርሼዳ ቁማ ማናዳኒኔ ዎሹማናዳን ኡንቱንታ ናጋራ ኦሲሴዳ ባላቃ ታማሪሴዳ ባላማ ቲሚርቲያ ታማሪያ ኣማሬዳ ኣሳቱ ኔናና ዴዒኖ። ሄዋዳንካ፥ ቃሲ ኒቆላዋቱዋ ቲሚርቲያ ታማሪያ ኣሳቱ ኔናና ዴዒኖ። ሄዋ ዲራው፥ ኔኒ ኔ ናጋራፔ ሲማ፤ ሄዌ ꬋዮፔ፥ ታኒ ኔኮ ኤሌካ ያና፤ ያዴ ሄ ኣሳቱዋና ታ ዶናፔ ኬሲያ ማሻን ኦሌታና። ‹ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ። ፆኒያ ኡራው ታኒ ጌማን ዴዒያ ማናፔ ኣማሬዳዋ ኢማና። ቃሲ ታኒ ቦꬃ ሹቻካ ኣው ኢማና፤ ኣኪያ ኡራፔ ኣቲን፥ ኦኒኔ ኤሬና ኦራꬃ ሱንꬃይ ሄ ሹቻ ቦላ ፃፌቲ ኡቴዳ› ያጌ» ያጋዴ ፃፋ። «ቲያፂሮኔን ዴዒያ ዎሳ ጎሊያ ኪታንቻው ሃዋዳን ያጋዴ ፃፋ፡ ‹ፆሳ ናዓይ፥ ታማ ላጩዋ ማላቲያ ኣይፊ ዴዒያዌ፥ ቃሲ ጮጪያ ታማን ቴሪዴ ጶሊያ ናሃሲያ ጌቴቲያ ቢራታ ማላቲያ ጌዲ ዴዒያዌ፥ ሃዋዳን ያጌ። ‹ታኒ ኔ ኦሱዋ፥ ኔ ሲቁዋ፥ ኔ ኣማኑዋ፥ ኔ ማዱዋኔ ኔ ጌንጩዋ ኤራይ፤ ኔኒ ኮይሮ ኦꬂያዋፔ ሃዒ ዳሪሳዴ ኦꬂያዋ ታኒ ኤራይ። ሺን ታኒ ኔና ካꬊያባይ ዴዔ፤ ባሬና፥ ‹ታኒ ናባቶ› ያጊያ ሚሺራቶ ኤልዛቤሎ ሼኔኮ ጋዳ፤ ሄ ሚሺራታ ታ ኦሳንቻቱ ዎሹማናዳኒኔ ኤቃው ያርሼዳ ቁማ ማናዳን፥ ታማሪሳዉኔ ባሌꬃው። ኢዛ ባሬ ናጋራፔ ሲማና ማላ፥ ታኒ ኢዚው ዎዲያ ኢማዲ፤ ሺን ዎሹማናው ካጄሊያዋፔ ኢዛ ሲማናው ኮያቤይኩ። ቤዒቴ፥ ታኒ ኢዞ ጊሱዋን ኩንዲሲና፤ ሳኩዋን ኢዛ ዋዬታና። ኢዚና ዎሹሚያዋንቱ ሄ ኢዚና ኦꬂያ ናጋራፔ ሲማና ꬋዮፔ፥ ኡንቱንታካ ዎልቃማ ዋዪያን ዬጋና። ታኒ ኢዚ ናናካ ዎꬋና፤ ቃሲ ዎሳ ጎሊያ ኡባይካ ታኒ ኣሳ ቆፋኔ ኣሙዋ ኤሪያዋ ጊዲያዋ ኤራና፤ ታኒ ሂንቴንቱሲ ሂንቴንቱ ኪታ ማላ ኢማና። ‹ቲያፂሮኔን ዴዒያ ሃራቶ፥ ሃ ኢታ ቲሚርቲያ ታማሪቤናዋንቶ፥ ሃራቱ፥ «ሴፃና ጪሞ ዬዉዋ» ጊያዋ ሂንቴንቱ ታማሪቤዪኪታ፤ ታኒ ሂንቴንታ ሃራ ዴፁዋ ቶሲኬ ጋይ። ሺን ታኒ ያና ጋካናው ሂንቴንቱሲ ዴዒያዋ ሎይꬂ ናጊቴ። ‹ፆኔዳዎኔ ዉርሴꬃይ ጋካናው ታ ኪታ ናጌዳዎ፥ ኣሳ ዛሪያ ኡባ ሞዳና ማላ፥ ታኒ ታ ኣዉዋፔ ኣኬዳ ማታ ማላ ኣው ኢማና፤ «ኢ ኣሳ ዛሪያ ኡባ ቢራታ ፃምዓን ሞዳናኔ ኡርቃፔ ሜꬌታ ሚሻ ሜንꬂያዋዳን ሜንꬃና።» *** ቃሲ ታኒ ኣው ባካሊያ ፆሊንቲያ ኢማና። ሲሳናው ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ› ያጌ» ያጋዴ ፃፋ። «ሳርዴሳን ዴዒያ ዎሳ ጎሊያ ኪታንቻው ሃዋዳን ያጋዴ ፃፋ፡ ‹ፆሳ ኣያና ላፑናቱኔ ላፑ ፆሊንታቱ ዴዒያዌ ሃዋዳን ያጌ። ‹ታኒ ኔ ኪታ ኤራይ፤ ኣሳይ ኔና ሼምፑዋና ዴዓሳ ጊንቶካ፥ ኔኒ ሃይቃዳ። ቤጎታ! ኣቴዳዋኔ ሃይቃናው ማቴዳዋ ሜንꬄꬃ። ኣዪሲ ጎፔ፥ ኔ ኪታይ ታ ፆሳ ሲንꬃን ፖሎ ጊዴናዋ ታኒ ዴማዲ። ሲሚ ኔኒ ኣኬዳዋኔ ሲሴዳዋ ኣኬካ፤ ናጋ፤ ኔ ናጋራፔካ ሲማ። ኔኒ ቤጎቴናዋ ጊዶፔ፥ ታኒ ኔኮ ካዪሱዋዳን ያና፤ ታኒ ዎይሳዴ ያኔንቶ ኔኒ ኤራካ። ሺን ባሬንቱ ማዩዋ ቂቲሲቤና ኣማሬዳ ኣሳቱ ሳርዴሳን ኔናና ዴዒኖ። ኡንቱንቱ ቦꬃ ማዩዋ ማዪዴ ታናና ሃሜታና፤ ኣዪሲ ጎፔ፥ ኡንቱንቱ ቦꬃ ማዩዋ ማያናው ቤሲያዋንታ። ፆኒያዌ ሄዋዳንካ ቦꬃ ማዩዋ ማያና። ታኒ ኣ ሱንꬃ ዴዑዋ ማፃፋፔ ቁጪኬ፤ ታኒ ታ ኣቡ ሲንꬃኒኔ ኣ ኪታንቻቱዋ ሲንꬃን ኢ ታዋ ጊዲያዋ ማርካታና። ‹ሲሳናው ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ› ያጌ» ያጋዴ ፃፋ። «ፒላዴሊፊያን ዴዒያ ዎሳ ጎሊያ ኪታንቻው ሃዋዳን ያጋዴ ፃፋ፡ ‹ዳዊቴ ቁልፒያ ኦይቄዳዌ፥ ኦኒኔ ጎርዳናው ዳንዳዬናዳን ዶዪያዌ፥ ቃሲ ኦኒኔ ዶያናው ዳንዳዬናዳን ጎርዲያዌ ጌሻይኔ፥ ቱማንቻይ ሃዋዳን ያጌ። ‹ታኒ ኔ ኪታ ኤራይ። ቤዓ፥ ታኒ ኔ ሲንꬃን ኦኒኔ ጎርዳናው ዳንዳዬና ፔንጊያ ዎꬃዲ፤ ኣዪሲ ጎፔ፥ ኔ ዎልቃይ ጉꬃ ጊዶፔኔ፥ ታ ቃላ ናጋዳኔ ታ ሱንꬃካ ኤሪኬ ጋቤይካ። ቤዓ፥ ኣዪሁዳ ጊዲኪኖ ሺን ባሬና፥ ‹ኑኒ ኣዪሁዳ› ጊዴ ዎርዶቲያ ሴፃና ኣዪሁዳ ዎሳ ጎሊያ ታኒ ኣሃዴ፥ ኔ ሲንꬃን ጎይኒሳናኔ ኔና ሲቂያዋካ ኡንቱንታ ኤሪሳና። ኔኒ ጌንጩዋን ታ ኣዛዙዋ ናጌዳ ዲራው፥ ሳዓን ዴዒያ ኣሳ ፓጫናው ኩሜንꬃ ሳዓ ቦላ ዪያ ዋዪያ ዎዲያፔ ታኒካ ኔና ናጋና። ታኒ ኤሌካ ያና፤ ኦኒኔ ኔ ኣኪሊሊያ ኣኬና ማላ፥ ኔው ዴዒያዋ ሚኒሳ ኦይቃ። ታኒ ፆኒያ ኡራ ታ ኣዉዋ ጌሻ ጎሊያን ቱሳ ኦꬃና፤ ኢ ሄዋፔ ኡባካ ኬሴና። ታኒ ታ ፆሳ ሱንꬃ፥ ታ ፆሳ ካታማ ሱንꬃኔ ታ ፆሳ ማታፔ ዎꬋና ኦራꬃ ዬሩሳላሜ ሱንꬃ ኣ ቦላ ፃፋና። ቃሲ ታኒ ታ ኦራꬃ ሱንꬃካ ኣ ቦላ ፃፋና። ‹ሲሳናው ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ› ያጌ» ያጋዴ ፃፋ። «ሎዶቂያን ዴዒያ ዎሳ ጎሊያ ኪታንቻው ሃዋዳን ያጋዴ ፃፋ፡ ‹ኣማኔቴዳ ቱማንቻ ማርካይ፥ ፆሳይ ሜꬌዳዋ ኮይሩ፥ «ኣሜንዒ» ጊያዌ› ሃዋዳን ያጌ። ‹ታኒ ኔ ኪታ ኤራይ። ኔኒ ኢርፃ ጊዳካ፤ ዎይ ሴሊያዋ ጊዳካ፤ ኢርፃ ዎይ ሴሊያዋ ጊዳሪኪ። ኔኒ ኢርፃ ዎይ ሴሊያዋ ጊዴናን፥ ዶምቦሎላ ጊዲያ ዲራው፥ ታኒ ኔና ታ ዶናፔ ጩቻና ሃናይ። ኣዪሲ ጎፔ ኔኒ፥ «ታኒ ዱሬ፤ ሚሻና ዴዓይ፤ ታና ኣይኔ ኮሼና» ያጋሳ። ሺን ኔኒ ሜቶቲያ ኣሳ፥ ቃሬꬂያ ኣሳ፥ ሂዬሳ፥ ቆቃኔ ካሎቴዳ ኣሳ ጊዲያዋ ኤራካ። ሄዋ ዲራው፥ ኔኒ ዱሬታና ማላ፥ ታማን ጌዬዳ ዎርቃ፥ ኔና ዬላዪያ ኔ ካሉዋ ካማናው ቦꬃ ማዩዋኔ ቃሲ ሎይꬃ ፄላናው ኔ ኣይፊያ ኦኪያ ꬋሊያ ታፔ ሻማናዳን፥ ታኒ ኔና ዞራይ። ታኒ ሲቂያ ኡባ ሴራይኔ ሙራይ፤ ሲሚ ሎይꬃ ሴሌታ፤ ኔ ናጋራፔካ ሲማ። ‹ቤዓ፥ ታኒ ካሬን ኤቃዴ ፄሳይ። ኦኒኔ ታኒ ፄሲያዋ ሲሲዴ፥ ካሪያ ዶዮፔ፥ ታኒ ኣኮ ጌላዴ ኣናና ኢቲፔ ካዉዋ ማና፤ ኢካ ታናና ኢቲፔ ማና። ቃሲ ታኒ ፆናዴ ታ ኣዉዋና ኣ ካዉቴꬃ ኦይዲያን ኡቴዳዋዳን፥ ፆኒያ ኡራው ታናና ታ ካዉቴꬃ ኦይዲያን ኡቲያ ማታ ኢማና። ‹ሲሲያ ሃይꬃይ ዴዒያ ኡራይ ጌሻ ኣያናይ ዎሳ ጎሌቶ ጊያዋ ሲሶ ያጌ› ያጋዴ ፃፋ» ያጌዳ። ሄዋፔ ጉዪያን፥ ታኒ ሳሉዋን ዶያ ፔንጊያ ቤዓዲ፤ ቃሲ ታው ማላካታዳን ኦዲሺን፥ ታኒ ሲሴዳ ኮይሮ ኮሻይ ታና፤ «ሃዋፔ ጉዪያን፥ ሃናናው ቤሲያዋ ታኒ ኔና ቤሳና፤ ሃ ኬሳ» ያጌዳ። ኤሌካ ታኒ ጌሻ ኣያና ሞዱዋ ጊዶ ጌላ ኣጋዲ። ቤዒቴ፥ ሳሉዋን ካዉቴꬃ ኦይዲ ዴዔ፤ ሄ ኦይዲያን ኢቱ ኡቴዳ። ሄ ኡቴዳዋ ማላይ ኣልዖ ኢያሲጲዲያ ሹቻዳኒኔ ኣልዖ ሴርዲኖኔ ሹቻዳኒ ጶሌ። ካዉታ ኦይዲ ዙሉዋን ዩዪ ኣꬊዴ ኡባ ባጋና ኣልዖ ማርጊዲያ ሹቻዳን ጶሌ። ሄ ካዉቴꬃ ኦይዲያ ዩዪ ኣꬊዴ፥ ሃራ ላታማኔ ኦይዱ ካዉቴꬃ ኦይዳቱ ዴዒኖ፤ ኡንቱንቱን ቦꬃ ማዩዋ ማዪዴ፥ ሁጲያን ዎርቃ ኣኪሊሊያ ዎꬄዳ ላታማኔ ኦይዱ ጪማቱ ኡቴዲኖ። ካዉቴꬃ ኦይዲያፔ ዋልቃንꬃይ፥ ኮሹንቻይኔ ጉጉንꬃ ጉንꬃይ ኬሴዳ፤ ቃሲ ካዉቴꬃ ኦይዲያ ሲንꬃን ላፑ ፆምፓቱ ፖዒኖ። ሄዋንቱ ፆሳ ላፑ ኣያናቱዋ። ካዉቴꬃ ኦይዲያ ሲንꬃን ቢሪሊያ ማላቲያ ቡርጩኩዋ ኣባይ ዴዔ። ሄ ካዉቴꬃ ኦይዲያፔ ሲንꬃናኔ ጉዬና ኣ ማታን ዩዪ ኣꬊዴ፥ ኣይፊ ኩሜዳ ኦይዱ ዴዑዋን ዴዒያ ሜꬌታቱ ዴዒኖ። ኮይሮ ዴዑዋን ዴዒያ ሜꬌታይ ጋሙዋ ማላቴ፤ ላዔንꬁ ሚዛ ማራ ማላቴ፤ ሄዜንꬁዋ ሶምዒ ኣሳ ዴሙዋ ማላቴ፤ ቃሲ ኦይዴንꬁ ፓሊያ ኣርጋንꬃ ማላቴ። ኦይዱ ዴዑዋን ዴዒያ ሜꬌታቶ ሁጲያን ሁጲያን ኡሱፑን ቄፊ ዴዔ፤ ኡንቱንቶ ቦላን ጋርሳንካ ኡባሳን ኣይፊ ኩሜዳ። ኡንቱንቱ ቃማኔ ጋላሲ፥ «ጌሻው፥ ጌሻው፥ ጌሻው፥ ካሴ ዴዒያዎ፥ ሃዒካ ዴዒያዎ፥ ቃሲ ሲንꬃፔ ያናዎ፥ ጎዳው፥ ኡባፔ ዎልቃማ ፆሳው» ጊያዋ ኣጊኪኖ። ሄ ሜꬌታቱ ካዉቴꬃ ኦይዲያን ኡቴዳ ሜꬊ ሜꬊናው ዴዑዋን ዴዒያዋ ማዚሙሪያን ሳቤዳ ዎዴ፥ ቦንቼዳ ዎዴኔ ጋላቴዳ ዎዴ፥ ላታማኔ ኦይዱ ጪማቱ ካዉቴꬃ ኦይዲያን ኡቴዳ ሜꬊ ሜꬊናው ዴዒያዋ ሲንꬃን ጉፋኒዴ፥ ኣው ጎዪኒኖ፤ ባሬንቱ ኣኪሊሊያ ካዉቴꬃ ኦይዲያ ሲንꬃን ዎꬂዴ ሃዋዳን ያጊኖ። «ኑ ጎዳው ፆሳው፥ ኔኒ ቦንቹዋ፥ ሳባኔ ዎልቃ ኣካናው ቤሳሳ። ኣዪሲ ጎፔ፥ ኡባባ ኔኒ ሜꬋዳ፤ ቃሲ ኡባባይካ ኔኒ ኮዬዳዋዳን ሃኔዳኔ ዴዔዳ» ያጊኖ። ኢቲ ፃፄቶ ማፃፋይ ካዉቴꬃ ኦይዲያን ኡቴዳዋ ኡሼቻ ኩሺያን ዴዒያዋ ቤዓዲ፤ ሄ ፃፄቶ ማፃፋይ ላዑ ባጋናካ ፃፌቲ ኡቴዳ፤ ቃሲ ላፑ ማታፋይ ኣ ቦላ ኣታሜቴዳ። ታኒ ኢቲ ዎልቃማ ኪታንቻይ ባሬ ቃላ ꬎቁ ኡዲዴ፥ «ማታፋ ዶዪዴ፥ ፃፄቶ ማፃፋ ቢላናው ቤሲያ ኡራይ ኦኔ?» ያጊዴ፥ ኣዋጂያዋ ቤዓዲ። ሳሉዋን ጊዲና ዎይ ሳዓን ጊዲና፥ ዎይ ሳዓፔ ጋርሳን ጊዲና፥ ሄ ፃፄቶ ማፃፋ ቢላናው ዎይ ኣ ጊዱዋ ፄላናው ኦኒኔ ቤሲያዌ ባዋ። ፃꬃ ማፃፋ ቢላናው ዎይ ኣ ጊዱዋ ፄላናው ቤሲያ ኡራይ ባይና ዲራው፥ ታኒ ዳሮ ዬካዲ። ጪማቱዋፔ ኢቱ ታና፥ «ዬኮፓ፤ ቤዓ፥ ዪሁዳ ዛሪያ ጊዴዳ ጋሙ፥ ዳዊቴ ዛሪ ፆኔዳ። ኢ ማታፋ ዶያናዉኔ ፃፄቶ ማፃፋ ቢላናው ቤሴ» ያጌዳ። ታኒ ካዉቴꬃ ኦይዲያፔ፥ ዴዑዋን ዴዒያ ኦይዱ ሜꬌታቱዋፔኔ ቃሲ ጪማቱዋፔ ጊዱዋን፥ ሹኬቴዳ ዶርሳ ማላቲዴ ኤቄዳዋ ቤዓዲ፤ ኣው ላፑ ካጬቱኔ ላፑ ኣይፌቱ ዴዒኖ። ሄዋንቱ ኣላሚያ ኡባ ኪቴቴዳ ፆሳ ላፑ ኣያናቱዋ። ሄ ዶርሳይ ቢዴ፥ ካዉቴꬃ ኦይዲያ ቦላ ኡቴዳዋ ኡሼቻ ኩሺያፔ ፃፄቶ ማፃፋ ኣኬዳ። ኢ ሄ ፃፄቶ ማፃፋ ኣኬዳ ዎዴ፥ ዴዑዋን ዴዒያ ኦይዱ ሜꬌታቱኔ ላታማኔ ኦይዱ ጪማቱ ኣ ሲንꬃን ኩንዴዲኖ። ኡንቱንቱ ሁጲያን ሁጲያን ዲꬃኔ ኢፃናይ ኩሜዳ ዎርቃ ሚሻ ኦይቄዲኖ። ሄ ኢፃናይ ጌሻቱ ፆሳ ዎሲያዋ። ኡንቱንቱ፥ «ፃꬃ ማፃፋ ኣካናዉኔ ማታፋ ዶያዴ ፄላናው ኔው ቤሴ። ኣዪሲ ጎፔ፥ ኔኒ ሹኬታዳ። ኔኒ ቆሙዋ ኡባፔ፥ ዱማ ዱማ ጋዲያ ቃላ ኡባፔ፥ ያራ ኡባፔኔ ዛሪያ ኡባፔ ኔ ሱꬃን ፆሳው ኣሳ ዎዛዳ። ኑ ፆሳው ኦꬃና ማላ፥ ኡንቱንታ ኔኒ ካታቱዋኔ ቄሳቱዋ ኦꬃዳ። ቃሲ ኡንቱንቱ ሳዓን ሞዳና» ያጊዴ ኦራꬃ ማዚሙሪያ ዬፂኖ። ሄዋፔ ጉዪያን፥ ታኒ ፄላዴ፥ ካዉቴꬃ ኦይዲያ፥ ዴዑዋን ዴዒያ ኦይዱ ሜꬌታቱዋኔ ጪማቱዋ ዩዪ ኣꬊዴ ኤቄዳ ዳሮ ኪታንቻቱዋ ኮሻ ሲሳዲ፤ ኡንቱንቱ ሻዓኒኔ ሚሎኒያን ፓይዴቴዲኖ። ሄ ኪታንቻቱ ባሬንቱ ቃላ ꬎቁ ኡዲዴ፥ «ሹኬቴዳ ዶርሳይ ዎልቃ፥ ዱሬቴꬃ፥ ኣꬌዳ ኤራ፥ ሚኖቴꬃ፥ ቦንቹዋ፥ ሳባ፥ ጋላታ ኣካናው ቤሴ!» ያጌዲኖ። ሄዋፔ ጉዪያን፥ ሳዓን፥ ሳሉዋን፥ ሳዓፔ ጋርሳኒኔ ኣባ ጊዱዋን ዴዒያ ሜꬌታ ኡባይኔ ቃሲ ሄዋንቱን ዴዒያ ሜꬌታ ኡባይ፥ «ካዉቴꬃ ኦይዲያ ቦላ ኡቴዳዎኔ ዶርሳው ጋላታይ፥ ቦንቹ፥ ሳባይኔ ዎልቃይ ሜꬊ ሜꬊናው ጊዶ!» ያጊዴ ዬፂሺን ሲሳዲ። ዴዑዋን ዴዒያ ኦይዱ ሜꬌታቱ፥ «ኣሜንዒ» ያጊና፥ ጪማቱ ጉፋኒዴ ጎዪኔዲኖ። ዶርሳይ ላፑ ማታፋቱዋፔ ኢቱዋ ዶዪሺን ቤዓዲ፤ ቃሲ ሼምፑዋና ዴዒያ ኦይዱ ሜꬌታቱዋፔ ኢቱ ጉጉንꬃ ጉንꬃ ማላቲያ ኮሻን፥ «ሃ ያ!» ያጊያዋ፥ ታኒ ሲሳዲ። ታኒ ኢቲ ቦꬃ ፓራ ቤዓዲ። ሄ ፓራ ቶጌዳዌ ዎንዳፊያ ኦዪቄዳ፤ ቃሲ ኣው ኣኪሊሊ ኢሜቴዳ። ኦላ ኢ ፆኒዲኔ ቃሲካ ፆናናው ኬሴዳ። ዶርሳይ ላዔንꬆ ማታፋ ዶዬዳ ዎዴ፥ ሼምፑዋና ዴዒያ ሜꬌታቱዋ ላዔንꬁ፥ «ሃ ያ!» ያጊያዋ፥ ታኒ ሲሳዲ። ቃሲ ሃራ ዳማ ፓራይ ኬሴዳ። ኣሳይ ኢቱ ኢቱዋና ሹኬታና ማላ፥ ሄ ፓራ ቶጌዳዎ ሳዓን ሳሮቴꬃ ዲጊያ ዎልቃይ ኢሜቴዳ። ዎጋ ማሻይ ኣው ኢሜቴዳ። ዶርሳይ ሄዜንꬆ ማታፋ ዶዬዳ ዎዴ፥ ዴዑዋን ዴዒያ ሜꬌታቱዋ ሄዜንꬁ፥ «ሃ ያ!» ያጊያዋ፥ ታኒ ሲሳዲ። ያታዴ ካሬꬃ ፓራይ ኬሴዳዋ ቤዓዲ፤ ቃሲ ሄ ፓራ ቶጌዳዌ ባሬ ኩሺያን ሚዛኒያ ኦዪቄዳ። ታኒ ዴዑዋን ዴዒያ ኦይዱ ሜꬌታቱዋ ጊዶፔ ኮሻ ማላቲያባ ሲሳዲ። ሄ ኮሻይ፥ «ኢቲ ጋላሳ ኦሶ ዲርጉ ባጋ ኪሉዋ ዛርጋ፤ ቃሲ ኢቲ ጋላሳ ኦሶ ዲርጉ ኢቲ ኪሉዋ ባጋ ባንጋ። ሺን ዛይቲያኔ ዎዪኒያ ኤሳ ቆሆፓ» ያጊያዋ ሲሳዲ። ዶርሳይ ኦይዴንꬆ ማታፋ ዶዬዳ ዎዴ፥ ዴዑዋን ዴዒያ ሜꬌታቱዋ ኦይዴንꬁ፥ «ሃ ያ!» ያጊያዋ፥ ታኒ ሲሳዲ። ታኒ ጊራጬ ፓራይ ኬሴዳዋ ቤዓዲ። ሄ ፓራ ቶጌዳዋ ሱንꬃይ ሃይቁዋ፤ ኣ ጌዱዋ ሲዖሊ ካሌዳ። ሃይቁኔ ሲዖሊ ሳዓፔ ኦይዴንꬆ ኩሺያ ኦላን፥ ኮሻን፥ ሃርጊያን፥ ዶዓን ዎꬊሳና ማላ፥ ኡንቱንቱሲ ማታይ ኢሜቴዳ። ዶርሳይ ኢቼሼንꬆ ማታፋ ዶዬዳ ዎዴ፥ ኡንቱንቱ ፆሳ ቃላ ኦዴዳ ዲራዉኔ ባሬንቱ ማርካቴꬃን ኣማኔቴዳ ዲራው፥ ሹኬዳ ኣሳ ሼምፑዋ ያርሹዋ ያርሺያሳፔ ጋርሳን ቤዓዲ። ኡንቱንቱ ባሬንቱ ቃላ ꬎቁ ኡዲዴ፥ «ኡባ ሞዲያ ጎዳው፥ ጌሻው፥ ቱማንቻው፥ ሳዓን ዴዒያ ኣሳ ቦላ ኣዉዴ ፒርዳይ? ቃሲ ኑ ሱꬃ ኣዉዴ ጪጌታይ?» ያጌዲኖ። ኡንቱንቶ ሁጲያን ሁጲያን ቦꬃ ማዩ ኢሜቴዳ። ኡንቱንቱዋዳን ሃይቃናው ቤሲያ ኡንቱንቱ ላጌꬃ ኦሳንቻቱዋ ፓይዱኔ ኡንቱንቱ ኢሻቱዋ ፓይዱ ኩማና ጋካናው፥ ኡንቱንቱ ኣማሬዳ ዎዲያ ታኪሻና ማላ፥ ኡንቱንቱሲ ኦዴቴዳ። ዶርሳይ ኡሱፑንꬃ ማታፋ ዶዬዳ ዎዴ፥ ታኒ ቤዓዲ፤ ቢታይ ሎይꬂ ቃፄዳ። ኣዋይፊ ካሬꬃ ማዩዋዳን ካሬፄዳ፤ ኣጌናይካ ሙሌ ሱꬃ ማላቴዳ። ባላሲያ ጊያ ሚꬃቲ ጋሚዔ ኣይፊ፥ ዎልቃማ ጫርኩ ቃꬂና፥ ሳዓን ቆቆፌቲያዋዳን፥ ፆሊንታቱ ሳሉዋፔ ሳዓን ቆቆፌቴዲኖ። ሳሉ ፃፄቶ ማፃፋይ ፃፄቲያዋዳን፥ ፃፄቲዴ ꬋዪ ኣጌዳ፤ ዴሪ ኡባቱኔ ሃꬃን ዶዴቴዳ ሳዓይ ኡባይ ባሬንቱ ዴዒያሳፔ ኪቺ ኣጌዲኖ። ሄዋፔ ጉዪያን፥ ሳዓ ካታቱ፥ ዴሪያ ሞዲያዋንቱ፥ ሻላቃቱ፥ ዱራቱ፥ ዎልቃማቱ፥ ቃሲ ሃራ ኣሳይ ኡባይ፥ ኣይሌቱ፥ ዎማናቱ፥ ዴሪያ ኬሲዴ፥ ጎንጎሉዋ ጊዶኒኔ ዴሪያን ዴዒያ ዛላ ጉዬ ባጋን ቆሴቴዲኖ። ያቲዴ ዴሬቱዋኔ ሹቻ፥ «ካዉቴꬃ ኦይዲያን ኡቴዳዋ ኣይፊያፔኔ ዶርሳ ሃንቁዋፔ ኑ ቦላ ኩንዲዴ፥ ኑና ጌንꬄርኪቴሻ! ኣዪሲ ጎፔ፥ ኡንቱንቶ ዎልቃማ ሃንቁዋ ጋላሳይ ጋኪኪቼዳ፤ ሄ ሃንቁዋ ዳንዳያናዌ ኦኔ?» ያጌዲኖ። ሄዋፔ ጉዪያን፥ ታኒ ኦይዱ ኪታንቻቱ ኦይዱ ባጋ ሳዓ ጋፃን ኤቄዳዋንታ ቤዓዲ። ሄ ኪታንቻቱ ሳዓ ቦላን፥ ዎይ ኣባ ቦላን፥ ዎይ ኣይ ሚꬃ ቦላን፥ ጫርኩ ጫርኬናዳን ቴዔዲኖ። ቃሲካ ዴዑዋ ፆሳ ማታፋ ኦይቂዴ ሃራ ኪታንቻይ ኣዋይ ሞኪያሳፔ ኬሲያዋ ታኒ ቤዓዲ። ሄ ኪታንቻይ ባሬ ኮሻ ꬎቁ ኡዲዴ፥ ሳዓኔ ኣባ ቆሃናው ዎልቃይ ኢሜቴዳ ኦይዱ ኪታንቻቱዋ ፄሲዴ፥ «ኑ ፆሳ ኦሳንቻቱዋ ዴሙዋን ኑኒ ማታፋ ዎꬃና ጋካናው፥ ሳዓ ጊዲና ዎይ ኣባ ጊዲና፥ ዎይ ሚꬃ ጊዲናካ ቆሆፒቴ» ያጌዳ። ታኒ ፆሳ ማታፋ ዴሙዋን ዎꬄዳዋንቱ ፓይዱዋ ሲሳዲ። ኢስራዔሊያ ዛሪያ ኡባፔ ኢቲ ፄታኔ ኦይታማኔ ኦይዱ ሻዓ ኣሳቱዋ ዴሙዋን ማታፋይ ዎꬌዳ። ዪሁዳ ዛሪያፔ ታማኔ ላዑ ሻዓ ዴሙዋን ማታፋይ ዎꬌዳ። ሮቤላ ዛሪያፔ ታማኔ ላዑ ሻዓ። ጋዴ ዛሪያፔ ታማኔ ላዑ ሻዓ። ኣሴራ ዛሪያፔ ታማኔ ላዑ ሻዓ። ኒፍታሌሜ ዛሪያፔ ታማኔ ላዑ ሻዓ። ሚናሴ ዛሪያፔ ታማኔ ላዑ ሻዓ። ሲሞና ዛሪያፔ ታማኔ ላዑ ሻዓ። ሌዊያ ዛሪያፔ ታማኔ ላዑ ሻዓ። ዪሳኮራ ዛሪያፔ ታማኔ ላዑ ሻዓ። ዛቢሎና ዛሪያፔ ታማኔ ላዑ ሻዓ። ዮሴፎ ዛሪያፔ ታማኔ ላዑ ሻዓ። ቢኒያማ ዛሪያፔ ታማኔ ላዑ ሻዓ ዴሙዋን ማታፋይ ዎꬌዳ። ሄዋፔ ጉዪያን፥ ዛሪያ ኡባፔ፥ ቆሙዋ ኡባፔ፥ ያራ ኡባፔኔ ዱማ ዱማ ጋዲያ ቃላ ኡባፔ ኦኒኔ ፓይዳናው ዳንዳዬና ዛዋይ ባይና ጮራ ኣሳ ታኒ ቤዓዲ። ሄ ኣሳይ ቦꬃ ማዩዋ ማዪዴ፥ ዛምባ ሃይꬃ ባሬንቱ ኩሺያን ኦይቂዴ፥ ካዉቴꬃ ኦይዲያ ሲንꬃኒኔ ዶርሳ ሲንꬃን ኤቄዳ። ኡንቱንቱ ባሬንቱ ቃላ ꬎቁ ኡዲዴ፥ «ኑ ኣቶቴꬃይካ ካዉቴꬃ ኦይዲያን ኡቴዳ ኑ ፆሳፔኔ ዶርሳፔ ዬ» ያጌዲኖ። ኪታንቻቱ ኡባይ ካዉቴꬃ ኦይዲያ፥ ጪማቱዋኔ ዴዑዋን ዴዒያ ኦይዱ ሜꬌታ ዩዪ ኣꬊዴ ኤቄዲኖ። ኡንቱንቱ ካዉቴꬃ ኦይዲያ ሲንꬃን ባሬንቱ ዴሙዋን ጉፋኒዴ ፆሳው ጎዪኒዴ፥ «ኣሜንዒ! ኣንጁ፥ ቦንቹ፥ ኣꬌዳ ኤራቴꬃይ፥ ጋላታይ፥ ሳባይ፥ ዎልቃይ፥ ሚኖቴꬃይ ሜꬊናፔ ሜꬊና ጋካናው ኑ ፆሳው ጊዶ። ኣሜንዒ!» ያጌዲኖ። ጪማቱዋፔ ኢቱ ታና፥ «ሃ ቦꬃ ማዩዋ ማዬዳ ኣሳቱ ኦኔ? ኡንቱንቱ ሃቃፔ ዬዲኖ?» ያጊዴ ኦቼዳ። ታኒ፥ «ታ ጎዳው፥ ኔኒ ኤራሳ» ያጋዲ። ኢ ታና ሃዋዳን ያጌዳ፤ «ሃዋንቱ ዳሮ ዋዪያ ዋዬቲዴ ዬዳዋንታ። ኡንቱንቱ ባሬንቱ ማዩዋ ዶርሳ ሱꬃን ሜጪዴ ቦፄዳዋንታ። ሄዋ ዲራው፥ ኡንቱንቱ ፆሳ ካዉቴꬃ ኦይዲያ ሲንꬃን ኤቂዴ፥ ቃማኔ ጋላሲ ኣ ጌሻ ጎሊያን ኣው ኦꬂኖ። ቃሲ ኢ ባሬ ካዉቴꬃ ኦይዲያን ኡቴዳዌ ኡንቱንቱ ጊዱዋን ዴዓና። ሃዋፔ ሲንꬃናው ኡባካ ኡንቱንቱ ኮሻቲኪኖ ዎይ ሳሜቲኪኖ። ኣዋይ ኡንቱንታ ሜና፤ ቃሲ ኣይ ሴላይካ ኡንቱንታ ጉዴና። ኣዪሲ ጎፔ፥ ካዉቴꬃ ኦይዴው ጊዱዋን ኡቴዳ ዶርሳይ ኡንቱንታ ሄማና። ዴዑዋ ሃꬃ ፑልቱዋኮካ ኡንቱንታ ካሌꬃና። ፆሳይካ ኡንቱንቱ ኣይፊያ ኣፎꬃ ኡባ ቁጪዲጋና» ያጌዳ። ዶርሳይ ላፑንꬃ ማታፋ ዶዬዳ ዎዴ፥ ባካ ሳቲያ ጊዲያዋ ኬና ሳሉ ጮዑ ጌዳ። ሄዋፔ ጉዪያን፥ ታኒ ላፑ ኪታንቻቱዋ ፆሳ ሲንꬃን ኤቂያዋንታ ቤዓዲ፤ ኡንቱንቱሲ ላፑ ማላካታይ ኢሜቴዳ። ኢፃና ጩዋዪያ ዎርቃ ሚሻ ኦይቄዳ ሃራ ኪታንቻይ ዪዴ፥ ያርሺያሳ ማታን ኤቄዳ። ዎርቃፔ ሜꬌቴዳ ያርሺያሳይ ካዉቴꬃ ኦይዲያ ሲንꬃን ዴዔ፤ ሄ ያርሺያሳ ቦላ ጌሻ ኡባቱዋ ዎሳ ጉጃና ማላ፥ ኪታንቻው ዳሮ ኢፃናይ ኢሜቴዳ። ኢፃና ጩዋይ ጌሻቱዋ ዎሳና ኢቲፔ ሄ ኪታንቻ ኩሺያፔ ፑዴ ፆሳኮ ቤዳ። ሄዋፔ ጉዪያን፥ ኪታንቻይ ኢፃና ጩዋዪያዋ ኣኪዴ፥ ያርሺያሳፔ ታማ ቦንቁዋ ኣኪዴ፥ ኣኒ ኩንꬄዳ። ሄ ኢፃና ጩዋዪያዋ ዱጌ ሳዓ ኦሊና፥ ጉጉንꬃይ ጉሜዳ። ዋልቃንꬃይ ዎልቃሜዳ፤ ቃሲ ቢታይካ ቃፄዳ። ቃሲ ላፑ ማላካታ ኦይቂዴ ላፑ ኪታንቻቱ ማላካታ ፑናናው ጊጌዲኖ። ኮይሮ ኪታንቻይ ባሬ ማላካታ ፑኒና ሱꬃና ዋላኬቴዳ ሻቻይኔ ታማይ ሳዓን ቡኬዳ። ሳዓፔ ሄዜንꬆ ኩሺ ጉዴቴዳ፤ ሚꬃፔካ ሄዜንꬆ ኩሺ ጉዴቴዳ፤ ማታ ኡባይካ ጉዴቴዳ። ላዔንꬆ ኪታንቻይካ ባሬ ማላካታ ፑኔዳ። ዎልቃማ ዴሪያ ማላቲያባይ ታማን ኤፂዴ፥ ኣባን ዬጌቴዳ፤ ያቲና፥ ኣባፔ ሄዜንꬆ ኩሺ ሱꬃ ጊዴዳ። ኣባን ዴዑዋን ዴዒያ ሜꬌታቱዋ ሄዜንꬆ ኩሺ ሃይቄዳ፤ ማርካቤቱዋፔካ ሄዜንꬆ ኩሺ ꬋዬዳ። ሄዜንꬆ ኪታንቻይ ባሬ ማላካታ ፑኒና ሻፋፔኔ ፑልቱዋ ሃꬃፔ ሄዜንꬆ ኩሺያ ቦላ ሳሉዋፔ ፆምፒያዳን ኤፂያ ዎልቃማ ፆሊንቲ ዎꬌዳ። ሄ ፆሊንቲያ ሱንꬃይ ጫሙዋ ጌቴቴ። ሃꬃፔ ሄዜንꬆ ኩሺ ጫሜዳ፤ ቃሲ ሃꬃይ ጫሜዳ ዲራው፥ ዳሮ ኣሳይ ሄ ሃꬃ ኡሺዴ ሃይቄዳ። ኦይዴንꬆ ኪታንቻይ ባሬ ማላካታ ፑኔዳ። ኣዋፔ፥ ኣጌናፔኔ ፆሊንቲያፔ ሄዜንꬆ ኩሺ ዴሼቴዳ፤ ኡንቱንቱ ፖዑዋፔካ ሄዜንꬆ ኩሺ ꬉሜዳ። ሄዋ ዲራው፥ ጋላሳፔ ሄዜንꬆ ኩሺ፥ ቃማፔካ ሄዜንꬆ ኩሺ ꬉሜዳ። ኢቲ ኣርጋንꬃይ ሳሉዋን ፓሊያዋ ታኒ ቤዓዲ። ሄ ኣርጋንꬃይ ባሬ ቃላ ꬎቁ ኡዲዴ፥ «ሄዙ ኪታንቻቱ ፑናና ቤሲያ ዮኮ ማላካታይ ፑኔቲያ ዎዴ፥ ሳዓን ዴዒያ ኣሳው ኣዬሮ! ኣዬሮ! ኣዬሮ!» ያጊያዋ ሲሳዲ። ሄዋፔ ጉዪያን፥ ኢቼሼንꬆ ኪታንቻይ ባሬ ማላካታ ፑኒና ሳሉዋፔ ዱጌ ሳዓ ኩንዴዳ ፆሊንቲያ ቤዓዲ። ሄ ፆሊንቴው ጪሞ ኦላ ቁልፒ ኢሜቴዳ። ፆሊንቲ ጪሞ ኦላ ዶዬዳ፤ ኣኮ ጮጪያፔ ኬሲያ ጩዋ ማላ ጩዋይ ሄ ጪሞ ኦላፔ ኬሴዳ። ቃሲ ኣዋይኔ ሳዓይ ሄ ጪሞ ኦላፔ ኬሴዳ ጩዋን ꬉሜዲኖ። ጩዋፔ ቦሊ ዱጌ ሳዓ ዬዳ። ሳዓን ዴዒያ ሶጋቶ ዴዒያ ዎልቃ ማላ ዎልቃይ ቦሌዉካ ኢሜቴዳ። ፆሳ ማታፋይ ዴሙዋን ባይና ኣሳ ፃላላ ቆሃናፔ ኣቲን፥ ሳዓን ዴዒያ ማታ ዎይ ኣጪያ ሚꬃ ጊዲና ዎይ ኣይ ሚꬃ ጊዲናካ ቆሄና ማላ፥ ቦሌው ኦዴቴዳ። ቦሊ ሄ ኣሳ ኢቼሹ ኣጌና ጊዲያዋ ፓፃ ካዓና ማላ፥ ማታይ ኢሜቴዳዋፔ ኣቲን፥ ኣው ኣሳ ዎꬋናው ማታይ ኢሜቲቤና። ሶጉ ኣሳ ዱኪዴ ሴሊሲያዋ ኬና ቦሊ ሴሊሴ። ሄ ጋላሳቱዋን ኣሳይ ሃይቁዋ ኮያና፤ ሺን ዴሜና። ቃሲ ሃይቃናዉካ ኣሞታና፤ ሺን ሃይቁ ኣሳፔ ባቃታና። ቦሊ ኦላው ጊጊ ኡቴዳ ፓራ ማላቴ። ቦሊያ ሁጲያን ዎርቃ ማላቲያ ኣኪሊሊ ዴዔ፤ ኣ ዴሙካ ኣሳ ዴሙዋ ማላቴ። ኣ ቢናናይካ ማጫ ኣሳ ቢናናይዳ ኣዱቄ፤ ኣ ኣቻይካ ጋሙዋ ኣቻ ማላቴ። ኣ ቲራይ ቢራታን ኦꬄዳ ጎንዳሊያ ማላቲያዋን ጎዜቲ ኡቴዳ፤ ቃሲ ኣ ቄፊያ ኮሻይ ኦላ ባናው ፒሪፂያ ፓራቱ ጎቺያ ጋሪያ ኮሻ ማላ። ኣው ሶጉዋ ዱፊያ ማላቲያ ዱፊ ዴዔ፤ ኣ ዱፊያን ዱኪያባይ ዴዔ። ሄ ዱፊያን ኢቼሹ ኣጌና ጊዲያዋ ኣሳ ቆሃናዳን፥ ኣው ማታይ ኢሜቴዳ። ኣ ሞዲያ ካቲ ዴዔ። ሄ ካቲ ጪሞ ኦላ ኪታንቻ። ኣ ሱንꬃይካ ኢብራዪስፄ ቃላን ኣቢዶና፤ ቃሲ ጊሪኬ ቃላን ኣጶሊዮና ጌቴቴ። ኣጶሊዮና ጊያዎ ቢሌꬃይ፥ ꬋዪሲያዋ ጊያዋ። ኮይሮ ኣዬሮ ጊያዌ ኣꬌዳ፤ ቤዓ፥ ቢሮ ሃራ ላዑ ኣዬሮ ጊያዌ ያናዋ። ኡሱፑንꬃ ኪታንቻይ ባሬ ማላካታ ፑኔዳ። ፆሳ ሲንꬃን ኤቄዳ ዎርቃፔ ሜꬌዳ ያርሺያሳን ዴዒያ ኦይዱ ጋፃ ካጬቱዋፔ ኢቲ ኮሻ ሲሳዲ። ሄ ኮሻይ ማላካታይ ዴዒያ ኡሱፑንꬃ ኪታንቻ፥ «ኤፊራፄሳ ጊያ ዎጋ ሻፋን ቃሼቴዳ ኦይዱ ኪታንቻቱዋ ቢላ» ያጌዳ። ኣሳ ዛሪያፔ ሄዜንꬆ ኩሺያ ዎꬋናው፥ ሃ ሳቲያሲ፥ ጋላሳሲ፥ ኣጌናሲኔ ላይꬃሲ ጊጊሲ ዎꬄዳ፥ ኦይዱ ኪታንቻቱ ቢሌቴዲኖ። ኦላ ፓራ ቶጊያ ኣሳ ፓይዱ ላዑ ፄቱ ሚሎኔ ጊዲያዋ ታኒ ሲሳዲ። ቃሲካ ታኒ ሳፃን ፓራቱዋኔ ሄ ፓራቱዋ ቶጌዳ ኣሳ ቤዓዲ። ኣሳው ቲራን ዎꬂያ ቢራታ ጎንዳሊያ ማላይ ዴዔ። ሄ ቲራን ዎꬂያ ቢራታ ጎንዳሊያ ማላይ ታማዳን ዞዖ፤ ሳማዪያ፤ ቃሲ ኤፂያ ዲኒያ ማላ። ፓራቱዋ ሁጲ ጋሙዋ ሁጲያ ማላ። ኡንቱንቱ ዶናፔ ታማይ፥ ጩዋይኔ ኣዲሊያ ጪሻ ማላቲያ ኤፂያ ዲኒያ ታማይ ኬሴዳ። ፓራቱዋ ዶናፔ ኬሴዳ ታማን፥ ጩዋኒኔ ኤፂያ ዲኒያን ሃ ሄዙ ቦሻቱዋን ኣሳ ዛሪያፔ ሄዜንꬆ ኩሺ ሃይቄዳ። ኣዪሲ ጎፔ፥ ፓራቶ ዎልቃይ ዶናኒኔ ዱፊያን ዴዔ። ኡንቱንቱ ዱፊካ ሁጲያና ዴዒያ ሾሻ ማላቴ፤ ሄዋን ኡንቱንቱ ኣሳ ቆሂኖ። ሃ ቦሻቱዋን ሃይቄናን ኣቴዳ ኣሳይ ባሬ ኩሺያን ኦꬂያዋ ኣጊቤና። ቃሲ ዎርቃፔ፥ ቢራፔ፥ ናሃሲያ ጌቴቲያ ቢራታፔ ሹቻፔኔ ሚꬃፔ ኦሴቴዳ፥ ፄላናው ዎይ ሲሳናው ዎይ ሃሜታናው ዳንዳዬና ኤቃሲኔ ፃላሂያሲ ጎዪኒያዋካ ኣጊቤና። ኣሳይ ኤሪዲ ዎꬌዳዋ፥ ዎይ ባሬ ቢቴዳዋ፥ ዎይ ባሬ ዎሹሜዳዋ፥ ዎይ ባሬ ዉዔዳዋ ኣጊዴ፥ ባሬ ናጋራፔ ሲሚቤና። ቃሲካ ታኒ ሃራ ዎልቃማ ኪታንቻይ ሳሉዋፔ ኬሲዴ፥ ዱጌ ዎꬊያዋ ቤዓዲ። ሻሪያ ኢ ማዪ ኡቴዳ፤ ቃሲ ዙሉ ኣ ሁጲያ ዩዪ ኣꬊ ኡቴዳ። ኣ ዴሙካ ኣዋ ማላ፤ ኣ ጌዲካ ታማ ቱሳ ማላ። ሄ ኪታንቻይ ዶያ ዴዒያ ኢቲ ጉꬃ ፃፄቶ ማፃፋ ባሬ ኩሺያን ኦይቄዳ። ባሬ ኡሼቻ ጌዲያ ኣባ ቦላ ኤሲዴ፥ ባሬ ሃዲርሳ ጌዲያ ቢታ ቦላ ኤሴዳ። ጉዲያ ጋሙዋዳን፥ ዎልቃፔ ጉዴዳ። ኢ ጉዴዳዋፔ ጉዪያን፥ ላፑ ዳዳቱ ኣናና ጉንꬃን ሃሳዬዲኖ። ኡንቱንቱ ጉሜዳ ዎዴ ታኒ ፃፋናው ቆፓዲ። ሺን ሳሉዋፔ፥ «ላፑ ዳዳቱ ሃሳዬዳዋ ኣሳው ቃቶፓኔ ፃፎፓ» ያጊያ ኮሻይ ታው ሲሴቴዳ። ሄዋፔ ጉዬ፥ ኣባ ቦላኒኔ ቢታ ቦላን ኤቂዴዒሺን ታኒ ቤዔዳ ኪታንቻይ፥ ባሬ ኡሼቻ ኩሺያ ሳሉዋ ፑዴ ሚጬዳ። ሳሉዋኔ ሳሉዋን ዴዒያ ኡባባ፥ ሳዓኔ ሳዓን ዴዒያ ኡባባ፥ ኣባኔ ኣባን ዴዒያ ኡባባ፥ ሜꬌዳ ሜꬊ ሜꬊናው ዴዒያ ፆሳ ሱንꬃን ጫቄዳ። ያቲዴ፥ «ዎዲ ዉራናው ጋሚዔና። ሺን ላፑንꬃ ኪታንቻይ ባሬ ማላካታ ፑኒያ ዎዴ፥ ፆሳይ ናባቱዋ ጊዴዳ ባሬ ኣሺካሬቶ ቃላ ኦዲ ዎꬄዳዋዳንካ፥ ኢ ፁሬዳ ቆፋይ ፖሌታና» ያጌዳ። ሄዋፔ ጉዪያን፥ ሳሉዋፔ ሃሳዪሺን ታኒ ሲሴዳ ኮሻይ ላዔንꬁዋ ዛሪዴ ታና፥ «ኣባ ቦላኒኔ ቢታ ቦላን ኤቄዳ ኪታንቻ ኩሺያን ዶያ ዴዒያ ፃፄቶ ማፃፋ ባዴ ኣካ» ያጊያዋ ሲሳዲ። ታኒ ሄ ኪታንቻኮ ባዴ፥ ጉꬃ ፃፄቶ ማፃፋ ታው ኢማና ማላ፥ ኣ ኦቻዲ። ኢ ታና፥ «ኣካዴ ማ፤ ማፃፋይ ኔ ኡሉዋ ጫሚሳናዋ፤ ሺን ኔ ዶናን ኤሳዳን፥ ኢ ማልዓናዋ» ያጌዳ። ሄዋፔ ጉዬ፥ ታኒ ኪታንቻ ኩሺያፔ ሄ ጉꬃ ፃፄቶ ማፃፋ ኣካዴ ማዲ፤ ታ ዶናን ማፃፋይ ኤሳዳን ማልዔዳ። ሺን ታኒ ሜዳዋፔ ጉዪያን፥ ታ ኡሎ ጊዱ ጫሜዳ። ቃሲካ ታና፥ «ያራ ኡባ፥ ዛሪያ ኡባ፥ ዱማ ዱማ ቢታ ቃላኔ ካታቱዋባ ኔኒ ቲምቢቲያ ቃንፄናን ሃሳያናው ቤሴ» ያጌዳ። ሄዋፔ ጉዬ፥ ማቃ ማላቲያ ሊኪያ ፃምዓይ ታው ኢሜቴዳ፤ ታና ጌዳዌ ሃዋ፤ «ባዴ ፆሳ ጌሻ ጎሊያኔ ያርሺያሳ ሊካ። ሄዋን ጎዪኒያዋንታካ ፓይዳ። ሺን ጌሻ ጎሌው ካሬ ባጋ ኣጋ ባሻ፤ ሄዋ ሊኮፓ። ኣዪሲ ጎፔ፥ ሄ ሳዓይ ኣዪሁዳ ጊዴና ኣሳው ኢሜቴዳ። ኣዪሁዳ ጊዴና ኣሳይ ጌሻ ካታማ ኦይታማኔ ላዑ ኣጌናው ዬꬋና። ታኒ ጋቢያ ማዬዳ ታ ላዑ ማርካቱዋ ኪታና፤ ኡንቱንቱ ኢቲ ሻዓኔ ላዑ ፄታኔ ኡሱፑን ታሙ ጋላሳን ፆሳ ኪታ ኦዳና» ያጌዳ። ሄ ላዑ ማርካቱ ሃ ሳዓ ጎዳ ሲንꬃን ኤቂያ ፆምፒያ ዎꬂያ ላዑ ባላቱዋ። ኦኒኔ ኡንቱንታ ቆሃናው ኮዮፔ፥ ኡንቱንቱ ዶናፔ ታማይ ኬሲዴ ኡንቱንቱ ሞርኬቱዋካ ꬋዪሴ። ቃሲ ኦኒኔ ኡንቱንታ ቆሃናው ኮዮፔ፥ ሄዋዳንካ ሃይቃና። ኡንቱንቱ ፆሳ ኪታ ኦዲያ ዎዲያን ኢራይ ቡኬናዳን፥ ሳሉዋ ጎርዳናው ኡንቱንቱሲ ማታይ ዴዔ። ኡንቱንቱሲ ሃꬃ ሱꬃ ኬሲያ ማታይካ ዴዔ፤ ቃሲ ኡንቱንቱ ባሬና ኮሺያ ዎዴ፥ ሳዓ ዱማ ዱማ ቦሻን ሾጫናው ኡንቱንቱሲ ማታይ ዴዔ። ኡንቱንቱ ባሬንቱ ማርካቴꬃ ዉርሴዳዋፔ ጉዪያን፥ ጪሞ ኦላፔ ፑዴ ኬሲያ ዶዓይ ኡንቱንቱና ኦሌታና። ሄ ዶዓይ ኡንቱንታ ፆኒዴ ዎꬋና። ኡንቱንቱ ጎዳይ ማስቃሊያ ቦላን ሚሲማሪያን ꬊሼቲዴ ሱሌቴዳ ካታማ ዎጋ ኦጊያን ኡንቱንቱ ኣኃይ ጊሳናዋ። ሄ ካታማይ ሌሚሱዋን ሶዶማ ዎይ ጊብፄ ጌቴቲዴ ፄሴቴ። ቃሲ ያራ ኡባፔ፥ ቆሙዋ ኡባፔ፥ ዱማ ዱማ ቢታ ቃላፔኔ ዛሪያ ኡባፔ ዬዳ ኣሳይ ኡንቱንቱ ኣኃ ሄዙ ጋላሳኔ ባጋ ቤዓና። ኣኃይ ሞጌቴና ማላ፥ ሄ ኣሳይ ዲጋና። ሳዓን ዴዒያ ኣሳይ ሃ ቲምቢቲያ ኦዲያ ላዑ ኣሳቱዋ ሃይቁዋን ናሼታና። ኣሳይ ኡንቱንቱ ሃይቁዋ ኢቱ ኢቱዋና ኢሞታ ላሜቲዴ ቦንቻናዋ፤ ኣዪሲ ጎፔ፥ ሳዓን ዴዒያ ኣሳ ኡንቱንቱ ዳሪሲ ሜቶꬄዲኖ። ሄዙ ጋላሳኔ ባጋፔ ጉዪያን፥ ዴዑዋ ሼምፑዋ ፆሳይ ኡንቱንቱን ሼምፒና፥ ኡንቱንቱ ዴንዲ ኤቄዲኖ። ኡንቱንታ ቤዔዳ ኡባይ ኢታ ያሻ ያዬዳ። ሄዋፔ ጉዪያን፥ ሄ ቲምቢቲያ ኦዲያ ላዑ ኣሳቱ ሳሉዋፔ፥ «ሃ ፑዴ ኬሲቴ» ጊያ ዎልቃማ ኮሻ ሲሴዲኖ። ባሬንቱ ሞርኬቱ ባሬንታ ፄሊሺን፥ ኡንቱንቱ ሻሪያን ጌሊዴ፥ ፑዴ ሳሉዋ ቤዲኖ። ሄ ሳቲያን ቢታይ ሎይꬂ ቃፂና ካታማፔ ታሙንꬃ ኩሺ ꬋዬዳ። ቃሲ ቢታ ቃꬃን ላፑ ሻዓ ኣሳይ ሃይቄዳ። ኣቴዳ ኣሳይ ሎይꬂ ኮኮሪ ያዪዴ፥ ሳሉዋ ፆሳ ጊታቴꬃ ሳቤዳ። ላዔንꬆ ኣዬሮ ጊያዌ ኣꬌዳ። ሺን ኣኬኪቴ፤ ሄዜንꬆ ኣዬሮ ጊያዌ ኤሌካ ያናዋ። ሄዋፔ ጉዪያን፥ ላፑንꬃ ኪታንቻይካ ባሬ ማላካታ ፑኔዳ። ሳሉዋን፥ «ኣላሚያ ካዉቴꬃይ ሃዒ ኑ ጎዳሳኔ ኣ ኪሪስቶሳሳ፤ ቃሲ ሜꬊናፔ ሜꬊና ጋካናው ኢ ሞዳና» ያጊያ ዎልቃማ ኮሻይ ሲሴቴዳ። ባሬንቱ ኦይዲያን ኡቴዳ ላታማኔ ኦይዱ ጪማቱ ፆሳ ሲንꬃን ዱጌ ጉፋኒዴ፥ ፆሳው ጎዪኒዴ ሃዋዳን ያጌዲኖ፤ «ሃዒ ዴዒያዎ፥ ካሴፔካ ዴዒያዎ፥ ጎዳው፥ ኡባፔ ዎልቃማ ፆሳው፥ ኔው ዎልቃማ ዎልቃይ ዴዒያ ዲራዉኔ ኔኒ ሞዳናው ዶሜዳ ዲራው፥ ኑኒ ኔና ጋላቴቶ። ኣዪሁዳ ጊዴና ኣሳይ ሃንቄቴዳ፤ ኔ ሃንቁካ ዬዳ። ሃይቄዳዋንቱ ፒርዴቲያ ዎዲ ሃዓ፤ ቃሲ ኔኒ ኔ ኦሳንቻቶ፥ ናባቶ፥ ጌሻቶ፥ ኔ ሱንꬃው ያዪያዋንቶ፥ ꬎቃቶኔ ላፋቶ ኡንቱንቱ ኦሱዋዳን ኢሚያ ዎዲካ ሃዓ። ሳዓ ꬋዪሲያዋንታካ ኔኒ ꬋዪሲያ ዎዲ ሃዓ» ያጌዲኖ። ሳሉዋን ዴዒያ ፆሳ ጌሻ ጎሊ ዶዬቴዳ፤ ኣ ጌሻ ጎሊያን ፆሳ ቃላ ጫቁዋ ታቦታይ ቤቴዳ። ቃሲ ዋልቃንꬃይ ዎልቃሜዳ፤ ጉንꬃይ ሲሴቴዳ፤ ጉጉንꬃይ ጉሜዳ፤ ቢታይ ቃፄዳ፤ ዎልቃማ ሻቻይካ ሻጬዳ። ሄዋፔ ጉዪያን፥ ሳሉዋን ዎልቃማ ማላይ ቤቴዳ። ኣዋ ማዬዳ ኢቲ ሚሺራታ፥ ኣጌና ቦላ ኤቄዳዉና፥ ታማኔ ላዑ ፆሊንቲያ ኣኪሊሊያ ባሬ ሁጲያን ዎꬄዳዉና ሄዋን ዴዓው። ሄ ሚሺራታ ሻሃራ፤ ኢዞ ዬሉዋ ኦይꬃይ፥ ኡንዔꬂና ዋሳዱ። ሃራ ኢቲ ዎልቃማ ማላይ ሳሉዋን ቤቴዳ። ታሙ ካጪያና ዴዒያ ላፑ ሁጲያን ኣኪሊሊያ ዎꬄዳ ኢቲ ዎልቃማ ዞዖ ዳዊ ዴዔ። ሄ ዳዊ ባሬ ዱፊያን ሄዜንꬆ ኩሼ ፆሊንቲያ ሳሉዋፔ ዳፊዴ፥ ሳዓን ኦሌዳ። ሄ ዳዊ ዬሌቲ ዎꬎሳናካ ናዓ ማናው ዬላና ሃኒያ ሚሺራቲ ሲንꬃን ኤቄዳ። ሚሺራታ ኣቱማ ናዓ፥ ኣዪሁዳ ጊዴና ኣሳ ኡባ ቢራታ ፃምዓን ሞዳናዋ ዬላዱ። ሺን ናዓይ ፆሳኮኔ ኣ ኣራታኮ፥ ፑዴ ኤሌካ ኣኬቴዳ። ሚሺራታ ኢቲ ሻዓኔ ላዑ ፄታኔ ኡሱፑን ታሙ ጋላሳው ሚዚዴኔ ኡሺዴ ዎꬃናው ፆሳይ ጊጊሲ ዎꬄዳ ሳዓ ባዙዋ ባቃታዱ። ሄዋፔ ጉዪያን፥ ሳሉዋን ኦላይ ዴንዴዳ። ሚካዔሊ ባሬ ኪታንቻቱዋና ኢቲፔ ዳዊያ ኦሌቴዳ፤ ዳዊካ ባሬ ኪታንቻቱዋና ጊዲዴ፥ ዛሪ ኦሌቴዳ። ሺን ዳዊ ፆኔቲና ዳዊያሲኔ ኣ ኪታንቻቱዋሲ ሳሉዋን ሳዓይ ꬋዬዳ። ዎሊቃማ ዳዊ፥ ፃላሂያ ካፑዋ ዎይ ሴፃና ጊያዌ፥ ቤኒ ሾሻይ፥ ኣላሚያ ኡባ ባሌꬂያዌ ኦሌቴዳ፤ ኢ ባሬ ኪታንቻቱዋና ኢቲፔ ዱጌ ሳዓው ኦሌቴዳ። ሄዋፔ ጉዪያን፥ ታኒ ሳሉዋፔ ሃዋዳን ያጊያ ኮሻ ሲሳዲ፤ «ፆሳ ኣቶቴꬃይ ሃዒ ዬዳ። ፆሳይ ባሬው ካቴ ጊዲያዋዳንካ ባሬ ዎልቃ ቤሴዳ፤ ኣ ኪሪስቶሲ ባሬ ማታ ቤሴዳ። ኣዪሲ ጎፔ፥ ቃማኔ ጋላሲ ፆሳ ሲንꬃን ኤቂዴ፥ ኑ ኢሻቱዋ ሞቲያዌ ሳሉዋፔ ዱጌ ኦሌቴዳ። ኑ ኢሻቱ ዶርሳ ሱꬃኒኔ ባሬንቱ ቱሙ ማርካቴꬃን ዳዊያ ኦሌቲዴ ፆኔዲኖ። ቃሲ ኡንቱንቱ ባሬንቱ ሼምፑዋ ኣꬂ ኢሚያዎ ቃሬቲቤይኪኖ። ሄዋ ዲራው፥ ሳሉኔ ሳሉዋ ጊዶን ዴዒያዋንቱ፥ ናሼቲቴ። ሺን ሳዓዉኔ ኣባው ኣዬሮ! ኣዪሲ ጎፔ፥ ፃላሂያ ካፑ ባሬው ጉꬃ ዎዲ ኣቴዳዋ ኤሪያ ዲራው፥ ዎልቃማ ሃንቁዋን ዱጌ ሂንቴንቱኮ ዎꬌዳ» ያጌዳ። ቃሲ ዳዊ ባሬና ዱጌ ሳዓ ኦሌዳዋ ቤዔዳዋፔ ጉዪያን፥ ሄ ኣቱማ ናዓ ዬሌዳ ሚሺራቶ ዬዴርሱዋ ዶሜዳ። ሚሺራቶ ሾሻይ ቆሄና ማላ፥ ሄዙ ላይꬃኔ ባጋ ማዴኔ ኡሻዴ ኢዛ ናጌቲያሳ ባዙዋ ፓላዴ ባና ማላ፥ ላዑ ዎልቃማ ኣርጋንꬃ ቄፊ ኢዚው ኢሜቴዳ። ሄዋፔ ጉዪያን፥ ሚሺራቶ ዲዑ ዲዒዴ ኣፋና ማላ፥ ሾሻይ ሻፋ ሃꬃ ኬና ሃꬃ ባሬ ዶናፔ ሚሺራቲ ጌዱዋን ጉሴዳ። ሺን ቢታይ ሚሺራቶ ማዴዳ፤ ቢታይ ባሬ ዶና ዶዪዴ፥ ዳዊያ ዶናፔ ኬሴዳ ሃꬃ ሚቲ ኣጌዳ። ዳዊ ሚሺራቲው ዳሪሲ ሃንቄቲዴ፥ ኢዚ ዜሬꬃ ፆሳ ኣዛዙዋ ናጊያ ኡባቱዋኔ ዬሱሲ ቆንጪሴዳ ቱሙ ኣማኔቲያዋንታ ኦላናው፥ ቢዴ ኣባ ዶናን ዴዒያ ሻፊያን ኤቄዳ። ሄዋፔ ጉዪያን፥ ኢቲ ዶዓይ ኣባፔ ኬሲሺን፥ ታኒ ቤዓዲ። ኣው ታሙ ካጪኔ ላፑ ሁጲ ዴዔ፤ ኣ ታሙ ካጪያ ቦላን ታሙ ኣኪሊሊ ዴዔ። ኣ ሁጲያንካ ቦሪያ ሱንꬃይ ፃፌቲ ኡቴዳ። ታኒ ቤዔዳ ዶዓይ ማሂያ ማላቴ፤ ኣ ጌዲ ባባንꬃ ጌቴቲያ ኢታ ዱዓ ጌዲያ ማላቴ፤ ኣ ዶናይ ጋሙዋ ዶና ማላቴ። ዳዊ ባሬ ዎልቃ፥ ባሬ ካዉቴꬃ ኦይዲያኔ ባሬ ዎልቃማ ማታ ሄ ዶዓው ኢሜዳ። ሄ ዶዓ ሁጴቱዋፔ ኢቱ ሃይቄዳዋ ማላቲያዋ ታኒ ቤዓዲ፤ ሺን ዎꬊያ ማይꬃይ ፓፄዳ። ሳዓ ኣሳይ ኡባይ ማላሌቲዴ፥ ሄ ዱዓ ጌዱዋ ካሌዳ። ዳዊ ባሬ ማታ ዶዓው ኢሜዳ ዲራው፥ ኣሳይ ኡባይ ዳዌው ጎዪኔዳ። ቃሲ ሄ ኣሳይ፥ «ዶዓ ማላይ ኦኔ? ኣናና ኦሌታናው ኦኒ ዳንዳዪ?» ያጊዴ፥ ዶዓው ጎዪኔዳ። ሄ ዶዓው ፓላ ዬዉዋኔ ቦሪያ ሃሳዪያ ዶናይ ኢሜቴዳ። ኦይታማኔ ላዑ ኣጌናሲ ኦꬃና ማላ፥ ኣው ማታይ ኢሜቴዳ። ሄ ዶዓይ ፆሳ፥ ኣ ሱንꬃ፥ ኢ ዴዒያሳኔ ሳሉዋን ዴዒያ ኡባቱዋ ቦሪያ ዶሜዳ። ሄ ዶዓይ ፆሳ ኣሳቱዋና ኦሌቲዴ፥ ኡንቱንታ ፆናና ማላ፥ ኣው ማታይ ኢሜቴዳ። ቆሙዋ ኡባ፥ ያራ ኡባ፥ ዱማ ዱማ ቢታ ቃላ ኡባኔ ዛሪያ ኡባ ሞዲያ ማታይ ኣው ኢሜቴዳ። ሳዓይ ሜꬌታናፔ ካሴ ሹኬቴዳ ዶርሳ ዴዑዋ ማፃፋን ሱንꬃይ ፃፌቲቤና ኣሳይ፥ ሳዓን ዴዒያዌ ኡባይ፥ ሄ ዶዓው ጎዪናና። ሲሲያ ሃይꬃይ ዴዒያ ኡራይ ሲሶ። ኦሞዴታና ኣሳይ ዴዖፔ፥ ኦኒኔ ኦሞዴታናዋ። ማሻን ሹኬታና ኣሳይ ዴዖፔ፥ ኦኒኔ ማሻን ሹኬታናዋ። ጌሻቱዋ ዳንዳያይኔ ኣማኑ ሃዋን ኤሬታናዋ። ሄዋፔ ጉዪያን፥ ሃራ ዶዓይ ሳዓፔ ኬሲያዋ ታኒ ቤዓዲ። ዶርሳ ካጪያ ማላቲያ ላዑ ካጪ ኣው ዴዔ፤ ሺን ሄ ዶዓይ ዳዊያዳን ሃሳዬዳ። ሄ ዶዓይ ኮይሮ ዶዓ ዎልቃማ ማታ ኡባ ኣ ሲንꬃን ኦꬄዳ። ሳዓይኔ ሳዓን ዴዒያ ኣሳይ ኡባይ ኣ ዎꬊያ ማይꬃይ ፓፄዳ ኮይሮ ዶዓው ጎዪናና ማላ፥ ሄ ዶዓይ ጎዳቴዳ። ሄ ላዔንꬆ ዶዓይ ዎልቃማ ማላታቱዋ ኦꬄዳ፤ ሃራይ ኣቶ ታማ ሳሉዋፔ ኣሳ ኡባ ሲንꬃ ሳዓ ዎꬃና ጋካናው ማላታቱዋ ኦꬄዳ። ኮይሮ ዶዓ ሲንꬃን ኦꬃናው፥ ኣው ኢሜቴዳ ማላታቱዋን ሳዓን ዴዒያ ኣሳ ኡባ ኢ ባሌꬄዳ። ማሻን ማይꬃቶፔኔ ፓፃ ዴዒያ ኮይሮ ዶዓ ቦንቾ ሚሲሊያ ጊጊሳናዳን፥ ሳዓ ኣሳ ኡባው ላዔንꬆ ዶዓይ ኦዴዳ። ቃሲ ኮይሮ ዶዓ ሚሲሊ ሃሳያናዳኒኔ ባሬው ጎዪኔና ኡባ ዎꬋናዳን፥ ላዔንꬆ ዶዓይ ባሬ ሼምፑዋ ኮይሮ ዶዓ ሚሲሊያን ሼምፑዋ ጌሊሳናው ኣዛዜቴዳ። ኣሳይ ኡባይ ዎጋይኔ ቄራይ፥ ማንቁኔ ዱሪ፥ ዎማኑኔ ኣይሊ ባሬ ኡሼቻ ኩሺያን ዎይ ባሬ ዴሙዋን ማላ ዎꬃናዳን፥ ሄ ላዔንꬆ ዶዓይ ጎዳቴዳ። ሄ ዶዓ ሱንꬃይ ዎይ ኣ ሱንꬃ ፓይዱ ዴዒያ ማላይ ባይና ኣሳይ ኦኒኔ ዛሊዓናዉኔ ሻማናው ዳንዳዬና። ኣꬌዳ ኤራቴꬃይ ሃዋን ዴዔ። ኤራይ ዴዒያ ኦኒኔ ሄ ዶዓ ፓይዱዋ ቢሌꬃ ኤሮ፤ ኣዪሲ ጎፔ፥ ሄ ፓይዱ ኢቲ ኣሳ ሱንꬃ። ኣ ፓይዱ ኡሱፑን ፄታኔ ኡሱፑን ታማኔ ኡሱፑና። ሄዋፔ ጉዪያን፥ ታኒ ቤዓዲ። ቤዒቴ፥ ዶርሳይ ፂዮኔ ዴሪያ ቦላ ኤቄዳ። ኣ ሱንꬃይኔ ኣ ኣቡ ሱንꬃይ ዴሙዋን ፃፌቴዳ፥ ኢቲ ፄታኔ ኦይታማኔ ኦይዱ ሻዓ ኣሳቱ ኣናና ኢቲፔ ዴዒኖ። ሳሉዋፔ ኩንꬆ ሃꬃ ጉንꬃኔ ዳዳ ጉንꬃ ማላቲያ ዎልቃማ ኮሻ ታኒ ሲሳዲ። ቃሲ ታኒ ሲሴዳ ኮሻይ ዲꬃ ዲፂያዋንቱ ባሬንቱ ዲꬃ ዲፂና ሲሴቲያ ኮሻ ማላቴ። ኢቲ ፄታኔ ኦይታማኔ ኦይዱ ሻዓ ኣሳቱ ካዉቴꬃ ኦይዲያ ሲንꬃን፥ ኦይዱ ፓፃ ዴዒያ ሜꬌታቱዋ ሲንꬃኒኔ ጪማቱዋ ሲንꬃን ኤቄዲኖ። ሳዓፔ ዎዜቴዳ ኡንቱንቱፔ ኣቲን፥ ሃራይ ኦኒኔ ታማራናው ዳንዳዬና ኦራꬃ ማዚሙሪያ ዬፄዲኖ። ሃዋንቱ ጌሻ ኣሳቱዋ ጊዲያ ዲራው፥ ማጫዋንቱና ጋኬቲዴ ባሬና ቱኒሲቤይኪኖ። ዶርሳይ ቢያሳ ኡባ ኡንቱንቱ ካሊኖ። ኡንቱንቱ ፆሳሲኔ ዶርሳሲ ባይራ ጊዳናው፥ ሳዓ ኣሳ ጊዶፔ ዎዜቴዳዋንታ። ኡንቱንቱ ኡባካ ዎርዶቲ ኤሪኪኖ፤ ኡንቱንቱን ባዪዙ ባዋ። ሳዓን ዴዒያ ኣሳ ኡባው፥ ዛሪያ ኡባው፥ ቆሙዋ ኡባው፥ ዱማ ዱማ ቢታ ቃላ ኡባዉኔ ያራ ኡባው ሜꬊና ዎንጋላ ሚሺራቹዋ ኣዋጃናው፥ ቦላ ሳሉዋን ፓሊያ ሃራ ኪታንቻ ታኒ ቤዓዲ። ሄ ኪታንቻይ ባሬ ቃላ ꬎቁ ኡዲዴ፥ «ፆሳው ያዪቴ፤ ኣ ቦንቺቴ። ኣዪሲ ጎፔ፥ ሳዓ ኣሳ ኢ ፒርዲያ ሳቲ ጋኬዳ። ሳሉዋ፥ ሳዓ፥ ኣባኔ ሃꬃ ፑልቱዋ ሜꬌዳ ፆሳው ጎዪኒቴ» ያጌዳ። ሃራ ላዔንꬆ ኪታንቻይ፥ «ዎልቃማ ባቢሎና ኩንዳዱ፤ ኢዛ ኩንዴዳ ጋሱኔካ ኣሳ ዛሪያ ኡባ ኢታ ኦሱዋ ኦሲሲያ ዲራሳ» ያጊዴ፥ ኮይሮ ኪታንቻ ካሌዳ። ሄዜንꬆ ኪታንቻይ ባሬ ኮሻ ꬎቁ ኡዲዴ፥ ሃዋዳን ያጊዴ፥ ኮይሮ ላዑ ኪታንቻቱዋ ካሌዳ፤ «ዶዓዉኔ ኣ ሚሲሌው ጎዪኒያ ኦኒኔ ቃሲ ኣ ማላ ባሬ ዴሙዋን ዎይ ባሬ ኩሺያን ዎꬂያ ኦኒኔ ዴዖፔ፥ ፆሳይ ባሬ ዎልቃማ ሃንቁዋ ቡርጩኩዋን ኩንꬄዳ ሃንቁዋ ዎዪኒያ ኤሳ ኢ ኡሻና። ሄዋ ኦꬄዳ ኡባይ ጌሻ ኪታንቻቱዋ ሲንꬃኒኔ ዶርሳ ሲንꬃን፥ ታማኒኔ ኤፂያ ዲኒያን ፓፃ ካዔታና። ኡንቱንታ ፓፃ ካዒያ ታማ ጩዋይ ሜꬊ ሜꬊናው ጩዋታና። ዶዓዉኔ ሄ ዶዓ ሚሲሌው ጎዪኒያ ኦሲኔ ቃሲ ሄ ዶዓ ሱንꬃ ማላታና ዴዒያ ኦሲኔ ቃማኔ ጋላሲ ሼምፑ ባዋ» ያጌዳ። ፆሳው ኣዛዜቲያኔ ዬሱሳው ኣማኔቲያ ጌሻቱ ዳንዳዪያ ዳንዳያይ ሃዋና። ሄዋፔ ጉዪያን ሳሉዋፔ፥ «ሃዋ ፃፋ፤ ሃዋፔ ሲንꬃው ጎዳን ሃይቂያዋንቱ ኣንጄቴዳዋንታ» ያጊያ ኮሻ ታኒ ሲሳዲ። ኣያናይ፥ «ቱማ፤ ኡንቱንቱ ባሬንቱ ዳቡራፔ ሼምፓና፤ ኣዪሲ ጎፔ፥ ኡንቱንቱ ሎዖ ኪታው፥ ፆሳይ ሎዑዋን ዛራና» ያጌ። ቃሲካ ታኒ ቤዓዲ። ቤዒቴ፥ ቦꬃ ሻሪ ዴዔ። ሻሪያ ቦላን ኣሳ ናዓ ማላቲያዌ ኡቴዳ፤ ኣ ሁጲያን ዎርቃ ኣኪሊሊ፥ ቃሲ ኣ ኩሺያን ቃራ ባጫይ ዴዔ። ሃራ ኪታንቻይ ጌሻ ጎሊያፔ ኬሲዴ፥ ሻሪያ ቦላን ኡቴዳዎ ባሬ ቃላ ꬎቁ ኡዲዴ፥ «ቆይቻ ሳቲ ጋኬዳ ዲራው፥ ኔ ባጫ ዬዳዴ ካꬃ ቆይጫ፤ ኣዪሲ ጎፔ፥ ሳዓ ካꬃይ ሜሌዳ» ያጌዳ። ሻሪያ ቦላን ኡቴዳዌ፥ ባሬ ባጫ ሳዓ ዬዲዴ፥ ሳዓ ካꬃ ጫኬዳ። ቃሲካ ሳሉዋን ዴዒያ ጌሻ ጎሊያፔ ሃራ ኪታንቻይ ኬሴዳ፤ ኣዉካ ኩሳ ባጫይ ዴዔ። ታማው ካፖ ጊዴዳ ሃራ ኪታንቻይ ያርሺያሳፔ ኬሲዴ፥ ኩሳ ባጫይ ዴዒያ ኪታንቻው ባሬ ቃላ ꬎቁ ኡዲዴ፥ «ዎዪኒያ ኣይፊ ቴሬዳ ዲራው፥ ኔ ኩሳ ባጫ ዬዳዴ፥ ሳዓን ዴዒያ ዎዪኒያ ቱራፔ ሆንዶዳ ኣይፊያ ቃንፃ!» ያጌዳ። ሄ ኪታንቻይ ባሬ ባጫ ሳዓ ዬዲዴ፥ ሳዓን ዴዒያ ዎዪኒያፔ ሆንዶዳ ኣይፊያ ቃንፄዳ፤ ፆሳ ዎልቃማ ሃንቁዋ ሄ ዎዪኒያ ጉሚዒያ ኦላን ዬጌዳ። ካታማፔ ጋፃን ዴዒያ ዎዪኒያ ኣይፊያ ጉሚዒያ ኦላን ዎዪኒያ ኣይፊ ጉሚዔቴ። ሱꬃይ ኬሲዴ፥ ሄ ዎዪኒያ ጉሚዒያ ኦላፔ ሄዙ ፄቱ ኪሎ ሚቲሪያ ኬና ሃኪዴ፥ ፓራው ፑሉዋ ጋኪያዋ ኬና ꬎቁ ጊዴ ኤሌዳ። ታኒ ሳሉዋን ሃራ ዎልቃማኔ ማላሊሲያ ማላ ቤዓዲ። ፆሳ ሃንቁ ኡንቱንቱ ቦላን ፖሌቲያ ዲራው፥ ዉርሴꬃ ላፑ ቦሻና ዴዒያ ላፑ ኪታንቻቱ ዴዒኖ። ቃሲካ ታኒ ቡርጩኩዋ ኣባ ማላቲያዋ ታማና ዋላኬቴዳዋ ቤዓዲ። ቃሲ ዶዓ፥ ኣ ሚሲሊያኔ ኣ ሱንꬃ ፓይዱዋ ፆኔዳዋንታ ቤዓዲ። ፆሳይ ኡንቱንቱሲ ኢሜዳ ዲꬃቱዋ ኦይቂዴ፥ ቡርጩኩዋ ማላቲያ ኣባ ማታን ኡንቱንቱ ኤቄዲኖ። ኡንቱንቱ፥ ፆሳ ኦሳንቻ ሙሴ ማዚሙሪያኔ ዶርሳ ማዚሙሪያ ሃዋዳን ዬፄዲኖ። «ጎዳው፥ ኡባፔ ዎልቃማ ፆሳው፥ ኔ ኪታይ ጊታኔ ማላሊሲያዋ። ኣሳ ዛሪያ ኡባ ካቴው፥ ኔ ኦጊ ፂሉዋኔ ቱሙዋ። ጎዳው፥ ኔው ያዬናዌኔ ኔ ሱንꬃ ቦንቼናዌ ኦኔ? ኣዪሲ ጎፔ፥ ጌሻይ ኔ ፃላላ። ኣሳ ዛሪያ ኡባይ ዪዴ፥ ኔ ሲንꬃን ጎዪናና፤ ኣዪሲ ጎፔ፥ ኔ ፂሎ ኪታይ ኡባው ቆንጬዳ» ያጊዴ ዬፂኖ። ሄዋፔ ጉዪያን፥ ታኒ ሳሉዋን ዴዒያ ጌሻ ጎሊ ዶዬቶዋ ሄዌካ ማርካቴꬃ ዱንካኒያ ቤዓዲ። ላፑ ቦሻና ዴዒያ ላፑ ኪታንቻቱ ጌሻ ጎሊያፔ ኬሴዲኖ። ኡንቱንቱ ጶሊዴ ቦፂያ ላይኑዋ ማዩዋ ማዬዲኖ፤ ባሬንቱ ቲራ ዎርቃ ዳንጩዋን ዩሺ ኣꬂዴ ቃቼዲኖ። ዴዑዋን ዴዒያ ኦይዱ ሜꬌታቱዋፔ ኢቱ፥ ሜꬊ ሜꬊናው ጋካናው ዴዒያ ፆሳ ሃንቁ ኩሜዳ ላፑ ዎርቃ ኬሬቱዋ ላፑ ኪታንቻቶ ኢሜዳ። ፆሳ ቦንቹዋፔኔ ኣ ዎልቃፔ ዬዳ ጩዋይ ጌሻ ጎሊያ ኩሜዳ። ላፑ ኪታንቻቱ ኣሄዳ ላፑ ቦሻቱ ፖሌታና ጋካናው፥ ጌሻ ጎሊያ ኦኒኔ ጌላናው ዳንዳዪቤና። ሄዋፔ ጉዪያን፥ ላፑ ኪታንቻቶ፥ «ቢዴ ፆሳ ሃንቁዋ ላፑ ኬሪያፔ ሳዓን ጉሲቴ» ያጊዴ፥ ጌሻ ጎሊያፔ ሃሳዪያ ዎልቃማ ኮሻ ታኒ ሲሳዲ። ኮይሮ ኪታንቻይ ቢዴ፥ ባሬ ኬሪያን ዴዒያዋ ሳዓን ጉሲና፥ ዶዓ ማላይ ዴዒያዋንቱ ቦላኔ ሄ ዶዓ ሚሲሌው ጎዪኒያዋንቱ ቦላ ሎይꬂ ሳኪያ ማይꬃ ኬሴዳ። ላዔንꬆ ኪታንቻይ ባሬ ኬሪያን ዴዒያዋ ኣባን ጉሲና ኣባ ሃꬃይ ሃይቄዳ ኣሳ ሱꬃ ማላቴዳ። ቃሲ ኣባን ዴዒያ ሜꬌታ ኡባይካ ሃይቂ ኣጌዳ። ሄዜንꬆ ኪታንቻይ ባሬ ኬሪያን ዴዒያዋ ሻፋቱዋኒኔ ፑልታቱዋን ጉሲና ኡንቱንቱ ሱꬃ ጊዴዲኖ። ሃꬃው ኣዎቲያ ኪታንቻይ ሃዋዳን ያጊያዋ፥ ታኒ ሲሳዲ፤ «ካሴካ ሃዒካ ዴዒያ ጎዳው፥ ጌሻው፥ ሃ ፒርዳ ፒርዴዳ ዲራው፥ ኔኒ ፂሉዋ። ኡንቱንቱ ጌሻቱዋ ሱꬃኔ ናባቱዋ ሱꬃ ጉሴዳ ዲራው፥ ኔኒ ኡንቱንታ ኡሻናው ሱꬃ ኡንቱንቶ ኢማዳ። ኡንቱንቱ ባሬንቶ ቤሲያዋ ኣኬዲኖ» ያጌዳ። ያርሹዋ ያርሺያሳፔ፥ «ጎዳው፥ ኡባፔ ዎልቃማ ፆሳው፥ ኔ ፒርዳይ ቱሙዋኔ ፂሉዋ!» ያጊያ ኮሻ ታኒ ሲሳዲ። ኦይዴንꬆ ኪታንቻይ ባሬ ኬሪያን ዴዒያዋ ኣዋይፊያ ቦላን ጉሲና ባሬ ታማ ሴላን ኣሳ ጉዳናው፥ ኣዋይፌው ማታይ ኢሜቴዳ። ኣሳይ ዎልቃማ ሴላን ጉዴቲዴ ሃ ቦሻቱዋ ቦላን ማታይ ዴዒያ ፆሳ ሱንꬃ ቦሬዳ። ሺን ባሬ ናጋራፔ ሲሚቤናኔ ፆሳ ጊታቴꬃካ ቦንቺቤና። ኢቼሼንꬆ ኪታንቻይ ባሬ ኬሪያን ዴዒያዋ ዶዓ ካዉቴꬃ ኦይዲያ ቦላ ጉሲና፥ ሄ ዶዓ ካዉቴꬃይ ꬉሜዳ። ኣሳይ ባሬ ሴላ ዲራው፥ ባሬ ኢንፃርሳ ሳዔዳ። ቃሲ ኣሳይ ባሬ ሴላ ዲራዉኔ ባሬ ማይꬃ ዲራው ሳሉዋ ፆሳ ሼቄዳ። ሺን ባሬ ኦꬄዳ ናጋራፔ ሲሚቤና። ኡሱፑንꬃ ኪታንቻይ ባሬ ኬሪያን ዴዒያዋ ዎጋ ኤፊራፄሳ ጌቴቲያ ሻፋን ጉሲና ኣዋይ ዶሊያ ባጋፔ ያና ካታቱዋሲ ኦጊ ጊጋናዳን፥ ሃꬃይ ሜሌዳ። ሄዋፔ ጉዪያን፥ ታኒ ሼꬊያ ማላቲያ ሄዙ ቱና ኣያናቱ ዳዊያ ዶናፔ፥ ዱዓ ዶናፔኔ ዎርዱዋ ቲምቢቲያ ኦዲያዋ ዶናፔ ኬሲሺን ቤዓዲ። ኡንቱንቱ ማላቱዋ ኦꬂያ ፃላሃቱዋ ኣያናቱዋ። ሄ ሄዙ ኢታ ኣያናቱ ኡባፔ ዎልቃማ ፆሳ ዎልቃማ ጋላሳን፥ ሳዓ ካታቱዋ ኡባ ኦላው ሺሻናው ባና። «ቤዓ፥ ታኒ ካዪሱዋዳን ያና። ኣሳ ሲንꬃን ካሎ ሃሜቲዴ ዬላቴና ማላ፥ ጌሚዒሼናን ባሬ ማዩዋ ማዪዴ ናጊያ ኡራይ ኣንጄቴዳዋ!» ያጌዳ። ሄ ኢታ ኣያናቱ ካቴቱዋ ኢብራዪስፄ ቃላን ኣሪማጌዶና ጌቴቲያ ሳዓ ሺሼዲኖ። ላፑንꬃ ኪታንቻይ ባሬ ኬሪያን ዴዒያዋ ጫርኩዋን ጉሲና፥ ጌሻ ጎሊያን ዴዒያ ኣራታፔ፥ «ፖሌቴዳ» ያጊያ ዎልቃማ ኮሻይ ዬዳ። ሄዋፔ ጉዪያን፥ ዋልቃንꬃይ ዎልቃሜዳ፤ ጉንꬃይ ሲሴቴዳ፤ ጉጉንꬃይካ ጉሜዳ። ቃሲ ቢታይ ፓላ ቃꬃ ቃፄዳ። ኣሳይ ሳዓን ሜꬌቶዴፔካ ቢታይ ሄዋ ማላ ቃꬃ ቃፂ ኤሬና፤ ሄዌ ኡባፔ ኣꬌዳ ቃꬃ። ዎሊቃማ ካታማይ ሄዙ ኬሲዴ ዛዔዳ። ቢታ ኡባን ዴዒያ ካታማቱ ꬋዬዲኖ። ፆሳይ ዎልቃማ ባቢሎኖ ቆፒዴ፥ ባሬ ኢታ ሃንቁዋ ዎዪኒያ ኤሳይ ኩሜዳ ቡርጩኩዋፔ ዎዪኒያ ኤሳ ባቢሎኖ ኡሼዳ። ኣባን ዶዴቴዳ ቢታይ ኡባይ ꬋዬዳ፤ ዴሪካ ቤቲቤና። ኣሳ ቦላ ኦይታሙ ኪሎ ኬና ዴፂያ ዎልቃማ ሻቻይ ሳሉዋፔ ዎꬌዳ። ኣሳይ ሄ ሻቻ ቦሻ ዲራው፥ ፆሳ ቦሬዳ፤ ኣዪሲ ጎፔ፥ ቦሻይ ዳሮ ዎልቃማ። ሄዋፔ ጉዪያን፥ ላፑ ኬሬቱ ዴዒያ ላፑ ኪታንቻቱዋፔ ኢቱ ታኮ ዪዴ፥ ታና ሃዋዳን ያጌዳ፤ «ሃ ያ፤ ዳሮ ሻፋቱዋ ጋፃን ዴዒያ ዎሹሚያ፥ ዎልቃማ ካታማታ፥ ዋና ሙሬታኔንቶ፥ ታኒ ኔና ቤሳና። ሳዓን ዴዒያ ካታቱ ኢዚና ዎሹሜዲኖ፤ ሳዓን ዴዒያ ኣሳይካ ኢዚ ዎዪኒያ ኤሳ ኡሺ ማꬆቲዴ ኢዚና ዎሹሜዳ» ያጌዳ። ሄ ኪታንቻይ ታና ኣያናን ባዙዋ ኣፌዳ። ሄዋን ታኒ ኢቲ ሚሺራቶ ቦሪያ ሱንꬃይ ቦላ ኡባን ፃፌቲ ኡቴዳ ዞዖ ዶዓ ቶጌዳዉኖ ቤዓዲ፤ ሄ ዶዓው ላፑ ሁጲያን ታሙ ካጪ ዴዔ። ሄ ሚሺራታ ቴራ ኦቻ ማላቲያ ማዩዋኔ ዞዖ ማዩዋ ማያዱ፤ ኢዛ ቃሲ ዎርቃን፥ ቦንቾ ሹቻኒኔ ኢንቁዋ ጌቴቲያ ኣልዖ ሹቻን ኣሌቃዱ። ኢዛ ዎሹሚያ ቱናባይኔ ሼኔዪያባይ ኩሜዳ ዎርቃ ቡርጩኩዋ ባሬ ኩሺያን ኦይቃዱ። ኢዚ ዴሙዋን ፁራ ዬዉዋ ቢሌꬃይ ዴዒያ ሱንꬃይ፥ ቃሲ ሄ ሚሺራታ ጌሻቱዋ ሱꬃኔ ዬሱሳው ማርካቲሺን ዎꬌዳዋንቱ ሱꬃ ኡሻዴ ማꬆቴዳዉኖ ታኒ ቤዓዴ ማላሌታዲ። ኪታንቻይ ታና፥ «ኔኒ ኣዪሲ ሃዋዳን ማላሌታዲ? ታኒ ኔው ሚሺራቲ ፁራ ዬዉዋኔ ኢዛ ቶኬዳ ላፑ ሁጲያን ታሙ ካጪ ዴዒያ ዱዓ ፁራ ዬዉዋ ኦዳና። ኔኒ ቤዔዳ ዶዓይ ካሴ ዴዔ፤ ሺን ሃዒ ባዋ። ሄ ዶዓይ ጪሞ ኦላፔ ኤሌ ኬሲዴ፥ ባሻው ባናዋ። ኣላሚ ሜꬌቶዴፔ ዶሚዴ፥ ዴዑዋ ማፃፋን ኡንቱንቱ ሱንꬃይ ፃፌቲቤና ሳዓን ዴዒያ ኣሳይ ዶዓ ቤዒዴ ማላሌታና። ኣዪሲ ጎፔ፥ ኢ ካሴ ዴዔ፤ ሃዒ ባዋ፤ ሺን ሲንꬃፔ ያናዋ። «ሃዌ ኣꬌዳ ኤራቴꬃኔ ኣኬካ ኮዬ። ላፑ ሁጲ ሚሺራታ ኡቲያ ላፑ ዴሬቱዋ፤ ሄዋንቱ ቃሲ ላፑ ካታቱዋ። ኡንቱንቱፔ ኢቼሹ ካታቱ ኩንዴዲኖ። ኢቱ ሃዒ ጋካናሲካ ሞዴ፤ ዮኮ ካቲ ዪቤና። ኢ ዪዴ፥ ጉꬃ ዎዲያ ታካናው ቤሴ። ካሴ ዴዔዳ ዶዓይ፥ ሃዒ ባይናዌ፥ ኢ ባሬ ሁጴው ሆስፑንꬃ ዱዓ። ኢ ላፑ ዶዓቱዋፔ ኢቱዋ፤ ኢ ꬋያናው ቤ። «ኔኒ ቤዔዳ ታሙ ካጬቱ ሞዳናው ዶሚቤና ታሙ ካቴቱዋ። ሺን ኡንቱንቱ ዶዓና ኢቲፔ ኢቲ ሳቴው ካቴቱዋዳን ሞዳናው ኡንቱንቱሲ ማታይ ኢሜታና። ኡንቱንቱሲ ኡባው ኢቲ ቆፋይ ዴዔ፤ ኡንቱንቱ ባሬንቱ ዎልቃኔ ባሬንቱ ማታ ዶዓው ኢማና። ኡንቱንቱ ዶርሳና ኦሌታና፤ ሺን ዶርሳይኔ ዶርሳና ዴዒያዋንቱ፥ ኢ ፄጌዳዋንቱኔ ዶሬዳዋንቱ፥ ኣ ካሊያ ኣማኔቴዳዋንቱ፥ ሄ ካቴቱዋ ፆናና፤ ኣዪሲ ጎፔ፥ ኢ ጎዳቱዋ ጎዳኔ ካቴቱዋ ካቲያ» ያጌዳ። ኪታንቻይ ቃሲካ ታና ሃዋዳን ያጌዳ፤ «ጫራታ ኡቴዳ ሄ ኔኒ ቤዔዳ ሃꬃይ ያራቱዋ፥ ጮራ ኣሳ፥ ኣሳ ዛሬቱዋኔ ዱማ ዱማ ቢታ ቃላ። ቃሲ ኔኒ ቤዔዳ ታሙ ካጪኔ ዶዓይ ዎሹሜዉኖ ኢፃናዋንታ። ኡንቱንቱ ኢዚው ዴዒያ ኡባባ ኣኪዲጋና። ቃሲ ኢዞ ካሎ ኣሻናኔ ኢዚ ኣሹዋ ሚዲጋና፤ ያቲዴ ኡንቱንቱ ኢዞ ታማን ጉዳና። ኣዪሲ ጎፔ፥ ፆሳ ቃላይ ቱማታና ጋካናው፥ ኡንቱንቱ ቆፋይ ኢቱዋ ጊዳናዳን፥ ኡንቱንቱ ባሬንቱ ሞዲያ ዎልቃ ዶዓው ኢማናዳኒኔ ፆሳይ ቆፔዳዋ ኡንቱንቱ ኦꬃናዳን፥ ኡንቱንቱ ዎዛናን ፆሳይ ኣሙዋ ዎꬄዳ። «ሄ ኔኒ ቤዔዳ ሚሺራታ ሳዓ ካቴቱዋ ሞዲያ ዎልቃማ ካታማቶ» ያጌዳ። ሄዋፔ ጉዪያን፥ ዎልቃማ ማታይ ዴዒያ ሃራ ኪታንቻይ ሳሉዋፔ ዎꬊሺና፥ ታኒ ቤዓዲ። ሄ ኪታንቻ ቦንቹ ሳዓ ፖዒሴዳ። ሄ ኪታንቻይ ባሬ ኮሻ ꬎቁ ኡዲዴ፥ «ኢዛ ኩንዳዱ! ዎልቃማ ባቢሎና ኩንዳዱ! ባቢሎና ፃላሃቱ ኣቂያሳ ጊዳዱ፤ ኢታ ኣያናቱ ኡባቱኔ ኢፄቲያ ኢታ ካፋቱ ኡባቱ ኢኒ ዴዒኖ። ኣዪሲ ጎፔ፥ ኣሳ ዛሪያ ኡባ ባሬ ማꬆዪያ ዎዪኒያ ኤሳ ኡሺና ኢዚና ዎሹሜዲኖ። ቃይካ ሳዓ ካታቱ ኢዚና ዎሹሜዲኖ። ኢዚ ኢሻሎ ዎልቃ ጋሱዋን ሳዓን ዴዒያ ዛሊዓንቻቱ ዱሬቴዲኖ» ያጌዳ። ሄዋፔ ጉዪያን፥ ታኒ ሳሉዋፔ ሃዋዳን ያጊያ ሃራ ኮሻ ሲሳዲ፤ «ታ ኣሳው፥ ኢፔ ኬሲቴ! ኢዚ ናጋራ ኢዚና ኮፆፒቴ! ኢዚ ሙራ ጊሼቶፒቴ። ኣዪሲ ጎፔ፥ ኢዚ ናጋራይ ሳሉዋ ጋካናው ዶሬቲ ኡቴዳ። ፆሳይ ኢዚ ኢታ ባዪዙዋ ሃሳዬዳ። ኢዛ ኢሜዳዋ ኬና ዛሪዴ፥ ኢዚው ኢሚቴ። ኢዛ ኦꬄዳዎ ላዑ ኩሺያ ኢዚው ቃንፂቴ። ኢዛ ሂንቴንቱሲ ጊጊሴዳ ኡሻፔ ላዑ ኩሺያ ኡሻ ኢዚ ቡርጩኩዋ ኩንꬂቴ። ኢዛ ቦንቼቴዳዋኔ ኢሻሌዳዋ ኬና ኢዞ ቱጋዪቴኔ ካዮዪቴ። ኢዛ ባሬ ዎዛናን፥ ‹ታኒ ካታቲዳን ኡታይ፤ ታኒ ኣሲናይ ባይና ማጫዉኖ ጊዲኬ፤ ቃሲ ኡባካ ካዮቲኬ› ያጋው። ሄዋ ዲራው፥ ኢዚ ቦሻ ኡባይ ሃርጊ፥ ካዩኔ ኮሻይ ኢዞ ኢቲ ጋላሲ ኦይቃና። ቃሲ ኢዛ ታማን ጉዴታና፤ ኣዪሲ ጎፔ፥ ኢዚ ቦላ ፒርዲያ ጎዳ ፆሳይ ዎልቃማ» ያጌዳ። ሳዓ ካታቱ፥ ኢዚና ዎሹሚዴ ኢሻሌዳዋንቱ ሄ ካታማታ ጉዴቲና፥ ኬሲያ ጩዋ ቤዔዳ ዎዴ፥ ካታማቲው ኡንቱንቱ ዋሳናኔ ዬካና። ኡንቱንቱ ሄ ካታማቲ ኡጋው ያዬዳ ዲራው፥ ሃኪ ኤቂዴ፥ «ሃ ዎልቃማ ካታማቴ! ዎልቃማ ካታማቴ! ባቢሎኔ፥ ኔው ኣዬሮ! ኔኒ ኣይ ማላ ቱጋታኒሻ። ኔኒ ኢቲ ሳቲያ ጊዶን ኔ ፒርዳ ኣካዳ» ያጋና። ኡንቱንቱ ማርካቢያ ጫና ሃዋፔ ሲንꬃናው ሻሚያባይ ባይና ዲራው፥ ሳዓን ዴዒያ ዛሊዓንቻቱ ሄ ካታማቲው ዋሳናኔ ካዮታና። ኡንቱንቱ ዎርቃ፥ ቢራ፥ ቦንቾ ሹቻ፥ ኢንቁዋ ጌቴቲያ ኣልዖ ሹቻ፥ ቴራ ኦቻ ማላቲያ ማዩዋ፥ ሱፊያ ማላ ማዩዋ፥ ሃሪያ ጌቴቲያ ማዩዋ፥ ዞዖ ማዩዋ፥ ኡባ ቆሞ ሳዊያ ሚꬃ፥ ኡባ ቆሙዋን ኦꬄዳ ዳንጋርሳ ኣቻ፥ ኣልዖ ሚꬃፔ ሜꬌቴዳባ፥ ናሃሲያ፥ ቢራታ፥ ኢቢኔቤሬዲያ ጌቴቲያ ሹቻ፥ ቃራፋ፥ ቂማሚያ፥ ኢፃና፥ ሺቱዋ፥ ሳዊያ ኢፃና ꬊሊያ፥ ዎዪኒያ ኤሳ፥ ዎጋራ ዛይቲያ፥ ሊቄዳ ꬊሊያ፥ ዛርጋ፥ ሚዛ፥ ዶርሳ፥ ፓራኔ ፓራይ ጎቺያ ጋሪያ፥ ኡንቱንቱ ኣይሌቱዋኔ ሃራይ ኣቶ ኣሳ ሼምፑኔ ሻሚያባይካ ባዋ። ዛሊዓንቻቱ ሚሺራቲው፥ «ኔኒ ኣሞቴዳ ሎዖባይ ኡባይ ኔፔ ሃሊዲጌዳ። ኔ ዴዑኔ ኣሌቄቲያባይ ኡባይ ꬋዪዲጌዳ። ኔኒ ላዔንꬆ ኡንቱንታ ኡባካ ዴማካ» ያጌዲኖ። ሄ ካታማቲን ዛሊዒዴ ዱሬቴዳ ዛሊዓንቻቱ ኢዚ ኡጋው ያዪዴ፥ ኢፔ ሃኪዴ ኤቃና። ኡንቱንቱ ዬካናኔ ካዮታና። ቃሲ፥ «ሱፊያ ጌቴቲያ ኪሪያን ዳዴቴዳ ማዩዋ፥ ቴራ ኦቻ ማላቲያ ማዩዋኔ ዞዖ ማዩዋ ማያዴ፥ ዎርቃ ኣሌቁዋን፥ ቦንቾ ሹቻኒኔ ኢንቁዋ ጌቴቲያ ኣልዖ ሹቻን ኣሌቄዳ፥ ሄ ዎልቃማ ካታማቲው ኣዬሮ! ሃዋ ኬና ዎልቃማ ማፁ ኡባይ ኢቲ ሳቲያ ጊዶን ዲፒ ጊ ꬋዪ ኣጌዳ» ያጌዲኖ። ማርካቢያ ላጊያ ኡባቱ፥ ማርካቢያን ቢያ ኡባቱ፥ ማርካቢያን ኦꬂያ ኡባቱኔ ኣባን ኦꬂ ጎዔቲያ ኡባቱ ሃኪ ኤቄዲኖ። ሄ ካታማታ ጉዴቲና ኬሲያ ጩዋ ቤዔዳ ዎዴ ባሬንቱ ኮሻ ꬎቁ ኡዲዴ፥ «ሃ ዎልቃማ ካታማቶ ማላቲያ ካታማይ ኡባካ ባዋ» ያጌዲኖ። ኡንቱንቱ ባሬንቱ ሁጲያን ባና ቆሊዴ፥ ዋሴዲኖኔ ካዮቴዲኖ፤ «ኣባን ማርካቤቱ ዴዒያ ኡባ ባሬ ማፁዋን ዱሬዬዳ ዎልቃማ ካታማቲው ኣዬሮ! ቃሲ ኢዚው ዴዒያባይ ኡባይ ኢቲ ሳቲያ ጊዶን ꬋዪ ኣጌዳ። ሄ ካታማታ ꬋዬዳ ዲራው፥ ሳሎ፥ ናሼታ! ጌሻቶ፥ ዬሱሲ ኪቴዳዋንቶ፥ ናባቶ፥ ናሼቲቴ! ኣዪሲ ጎፔ፥ ኢዛ ሂንቴንታ ኦꬄዳዋ ዲራው ፆሳይ ኢዞ ፒርዴዳ» ያጌዳ። ሄዋፔ ጉዪያን፥ ዎልቃማ ኪታንቻይ ዎፃ ማላቲያ ዎልቃማ ሹቻ ዴንꬂ ኣባን ኦሊዴ ሃዋዳን ያጌዳ፤ «ዎልቃማ ካታማታ ባቢሎና ሱጊና፥ ሃዋዳን ኩንዳና፤ ኢዛ ሃቼፔ ሲንꬃው ኡባካ ቤቱኩ። ዲꬃ ዲፂያዋንቱኔ ማዚሙሪያ ዬፂያዋንቱ፥ ሱሱሊያኔ ማላካታ ፑኒያዋንቱ ኮሻይ ሃዋፔ ሂኒ ባጋን ኔ ጊዶን ኡባካ ሲሴቴና። ኩሺያ ሂላ ኤሪያ ኦኒኔ ላዔꬆ ኡባካ ዴዔና። ዎፃ ኮሻይካ ሃዋፔ ሲንꬃው ኔ ጊዶን ሲሴቴና። ፆምፒያ ፖዑካ ላዔꬁዋ ኔ ጊዶን ፖዔና። ኣኪያዋ ኮሻይኔ ጌሌዉኒ ኮሻይ ሲንꬃው ኔ ጊዶን ሲሴቴና። ኔ ዛሊዓንቻቱ ሳዓ ኡባን ኤሬቴዳ ዎልቃማቱዋ። ኔ ቢቲያዋን ኣሳ ዛሪያ ኡባይ ጪሜቴዳ። ናባቱዋ ሱꬃይ፥ ጌሻቱዋ ሱꬃይኔ ሳዓን ሃይቄዳ ኡባቱዋ ሱꬃይ ኢዚን ቤቴዳ ዲራው፥ ባቢሎና ሙሬታዱ» ያጌዳ። ሄዋፔ ጉዪያን፥ ሳሉዋን ጮራ ኣሳ ኮሻዳን ኮሹሚያ ዎልቃማ ኮሻይ ሃዋዳን ያጊያዋ ታኒ ሲሳዲ፤ «ፆሳ ጋላታይ ጋኮ። ኣቶቴꬃይ፥ ቦንቹኔ ዎልቃይ ኑ ፆሳሳ። ኣ ፒርዳይ ቱሙዋኔ ፂሉዋ። ጫራታዴ ሳዓ ቱኒሴዳ ዎልቃማ ጫራቶ ፆሳይ ፒርዴዳ፤ ፆሳ ኦሳንቻቱዋ ኢዛ ዎꬌዳ ዲራው፥ ፆሳይ ኢዞ ሙሬዳ» ያጌዳ። ኣሳይ ላዔንꬁዋ ባሬ ኮሻ ꬎቁ ኡዲዴ፥ «ፆሳ ጋላታይ ጋኮ። ሄ ካታማታ ሜꬊ ሜꬊናው ጩዋታና» ያጌዲኖ። ላታማኔ ኦይዱ ጪማቱኔ ሼምፑዋና ዴዒያ ኦይዱ ሜꬌታቱ ካዉቴꬃ ኦይዲያን ኡቴዳ ፆሳው ጉፋኒዴ፥ «ኣሜንዒ። ፆሳ ጋላታይ ጋኮ» ያጊዴ ጎዪኔዲኖ። ሄዋፔ ጉዪያን፥ «ፆሳ ኣይላቱ ኡባይ፥ ፆሳው ያዪያ ጉꬃይ፥ ዳሩ ኡባይ ኑ ፆሳ ጋላቲቴ» ያጊያ ኮሻይ ካዉቴꬃ ኦይዲያፔ ኬሴዳ። ሄዋፔ ጉዪያን፥ ጮራ ኣሳዳን ኮሹሚያ፥ ዎልቃማ ሻፋዳን ጉሚያ፥ ዎልቃማ ጉጉንꬃዳን ጉጉሚያ ኮሻ ታኒ ሲሳዲ። ሄ ኮሻይ፥ «ፆሳ ጋላታይ ጋኮ። ኣዪሲ ጎፔ፥ ኑ ጎዳይ፥ ኡባፔ ዎልቃማ ፆሳይ ካዉቴዳ። ዶርሳ ቡላቻ ጋላሳይ ጋኬዳ ዲራዉኔ ጌሌዉናካ ቡላቻው ባሬና ጊጊሴዳ ዲራው፥ ኑኒ ፓሺኮይቴኔ ናሼቶይቴ፤ ቃሲ ዶርሳ ቦንቾይቴ። ጌሌዉኒው ማያናው ሱፊያ ጌቴቲያ ኪሪያን ዳዴቴዳ ጶሊያ ቦꬃ ማዩ ኢሜቴዳ። ሱፊያ ጌቴቲያ ኪሪያን ዳዴቴዳ ማዩ ጌሻቱዋ ፂሎ ኦሱዋ» ያጊያዋ፥ ታኒ ሲሳዲ። ሄዋፔ ጉዪያን፥ ኪታንቻይ ታና፥ « ‹ዶርሳ ቡላቻው ፄሴቴዳዋንቱ ኣንጄቴዳዋንታ› ያጋዴ ፃፋ» ያጌዳ። ሄ ኪታንቻይ ቃሲካ ታና፥ «ሃዌ ፆሳ ቱሙ ቃላ» ያጌዳ። ሄዋፔ ጉዬ ታኒ ኣው ጎዪናናው ኣ ጌዲያን ኩንዳዲ። ሺን ኢ ታና፥ «ሄዋ ኦꬆፓ። ታኒ ኔ ማላኔ ዬሱሲ ኡንቱንቱሲ ቆንጪሴዳ ቱማቴꬃ ኦይቄዳ ኔ ኢሻቱዋ ኡባ ማላ ኣይሊያ። ፆሳው ጎዪና። ኣዪሲ ጎፔ፥ ዬሱሲ ቆንጪሴዳ ቱማቴꬃይ ቲምቢቲያ ኦዲያዎ ዴንꬄꬂያዋ» ያጌዳ። ያቲና፥ ሳሉ ዶዬቴዳዋ ታኒ ቤዓዲ። ሄዋን ቦꬃ ፓራይ ዴዔ፤ ሄ ፓራ ቶጌዳዌ ኣማኔቲያዋኔ ቱማንቻ ጊዴ ፄሴቴ። ቶጌዳዌ ፂሎቴꬃን ፒርዴኔ ባሬ ኦላካ ኦሌቴ። ኣ ኣይፊ ታማ ላጩዋ ማላቴ፤ ቃሲ ኢ ባሬ ሁጲያን ዳሮ ኣኪሊሊያ ዎꬄዳ። ኣ ቦላ ፃፌቲ ኡቴዳ ሱንꬃይ ዴዔ፤ ሺን ሄ ሱንꬃይ ኣዬንቶኔ ኣፔ ኣቲን፥ ኦኒኔ ኤሬና። ኢ ማዬዳ ማዩ ሱꬃን ሙኪ ኬሴዳዋ። ኣ ሱንꬃይካ ፆሳ ቃላ። ሳሉዋ ዎታዳራቱ ቦꬃ ጌሻ ሱፊያ ጌቴቲያ ኪሪያን ዳዴቴዳ ማዩዋ ማዪዴ፥ ቦꬃ ፓራቱዋ ቶጊዴ፥ ኣ ጌዱዋ ካሊኖ። ኣሳ ዜሬꬃ ኢ ꬋዪሲያ ኩሳ ማሻይ ኣ ዶናፔ ኬሴ። ቢራታ ፃምዓን ኣሳ ኢ ሞዳና። ኡባፔ ዎልቃማ ፆሳይ ባሬ ሃንቁዋ ዎዪኒያ ኤሳይ ጉሚዔቲያሳን፥ ጉሚዒዴ ቤሳና። ኣ ማዩዋ ቦላኔ ኣ ዎዲሪያ ቦላ፥ «ካታቱዋ ካቲያኔ ጎዳቱዋ ጎዳ» ያጊያ ሱንꬃይ ፃፌቲ ኡቴዳ። ሄዋፔ ጉዪያን፥ ታኒ ኢቲ ኪታንቻይ ኣዋን ኤቄዳዋ ቤዓዲ። ሄ ኪታንቻይ ሳሉዋን ꬎቂዴ ፓሊያ ካፉዋ ኡባቶ ባሬ ኮሻ ꬎቁ ኡዲዴ፥ «ሃ ዪቴ። ፆሳ ካዉዋሲ ኢቲሳዓ ሺቂቴ። ዪዴ ካታቱዋ ኣሹዋ፥ ሻላቃቱዋ ኣሹዋካ ዎታዳራቱዋ ኣሹዋ ሚቴ፤ ፓራቱዋ ኣሹዋካ ፓራቱዋ ቶጌዳዋንቱ ኣሹዋካ ሚቴ፤ ቃሲ ኣሳ ኡባ ኣሹዋ ኣይሊያዋኔ ዎማኑዋ፥ ꬎቃዋኔ ሆካዋ ሚቴ» ያጌዳ። ፓራ ቶጌዳዋናኔ ኣ ዎታዳራቱዋና ኦሌታናው፥ ዶዓይኔ ሳዓ ካታቱ ቃሲ ኡንቱንቱ ዎታዳራቱ ኢቲ ሳዓ ሺቂ ኡቴዳዋንታ ታኒ ቤዓዲ። ሄ ዶዓይ ኣ ሲንꬃን ማላታ ኦꬄዳ ዎርዶ ናቢያና ኢቲፔ ኦይቄቴዳ። ዶዓ ማላይ ዴዒያዋንታኔ ዶዓ ሚሲሌው ጎዪኔዳዋንታ ኢ ባሌꬄዳዌ ሄ ኦꬂያ ማላታቱዋና። ዶዓይኔ ዎርዱዋ ቲምቢቲያ ኦዲያዌ ላዓቱካ ዲኒያን ኤፂያ ታማ ኣባን ፓፃ ዬጌቴዲኖ። ኡንቱንቱ ዎታዳራቱ ፓራ ቶጌዳዋ ዶናፔ ኬሲያ ማሻን ሃይቄዲኖ። ካፋቱ ኡባቱ ኡንቱንቱ ኣሹዋፔ ባሬንቶ ዳንዳዬዳዋ ኬና ሜዲኖ። ጪሞ ኦላ ቁልፒያኔ ዎልቃማ ሳንꬃላታ ባሬ ኩሺያን ኦይቄዳ ኢቲ ኪታንቻይ ሳሉዋፔ ዪያዋ ታኒ ቤዓዲ። ኪታንቻይ ዳዊያ፥ ሄ ቤኒ ሾሻ፥ ፃላሂያ ካፑዋ ዎይ ሴፃና ጊያዋ ኦይቄዳ፤ ያቲዴ ሻዓ ላይꬃው ቃቼዳ። ኪታንቻይ ጪሞ ኦላን ኣ ዬጊዴ፥ ሻዓ ላይꬃይ ዉራናው፥ ኣሳ ዜሬꬃ ላዔꬁዋ ባሌቴና ማላ፥ ሄ ጪሞ ኦላ ቁልፒ ጎርዲዴ ኣታሜዳ። ሄዋፔ ጉዪያን፥ ዳዊ ኣማሬዳ ዎዲያ ቢሌታናው ቤሴ። ሄዋፔ ጉዪያን፥ ታኒ ኣራታቱዋኔ ኡንቱንቱን ኡቴዳዋንታ ቤዓዲ፤ ኡንቱንቱሲ ፒርዲያ ማታይ ኢሜቴዳ። ዬሱሲ ቆንጪሴዳ ቱማኔ ፆሳ ቃላ ኣዋጄዳ ዲራው፥ ባሬንቱ ቆꬊያ ቃንፄቴዳ ኣሳ ሼምፑዋካ ታኒ ቤዓዲ። ኡንቱንቱ ዶዓው ዎይ ዶዓ ሚሲሌው ጎዪኒቤይኪኖ። ኡንቱንቱ ዶዓ ማላ ባሬንቱ ዴሙዋን ዎይ ባሬንቱ ኩሺያን ዎꬂቤይኪኖ። ኡንቱንቱ ሃይቁዋፔ ዴንዲዴ፥ ኪሪስቶሳና ኢቲፔ ካቴቱዋዳን ሻዓ ላይꬃው ሞዴዲኖ። ሃይቄዳዋንቱፔ ጮራቱ ሻዓ ላይꬃይ ዉራና ጋካናው፥ ሃይቁዋፔ ዴንዲቤይኪኖ። ሄዌ ኮይሮ ዴንዱዋ። ኮይሮ ዴንዱዋን ዴንዴዳዋንቱ ኣንጄቴዳዋንታኔ ፆሳ ኣሳቱዋ። ኡንቱንቱ ቦላ ላዔንꬆ ሃይቆ ዎልቃይ ባዋ። ኡንቱንቱ ፆሳሲኔ ኪሪስቶሳሲ ቄሳቱዋ ጊዳና፤ ኡንቱንቱ ኣናና ኢቲፔ ሻዓ ላይꬃው ሞዳና። ሻዓ ላይꬃይ ዉሬዳዋፔ ጉዪያን፥ ሴፃናይ ቃሹዋፔ ቢሌታና። ኢ ሳዓን ኡባሳን ዴዒያ ኣሳ ዜሬꬃ ባሌꬃናው ኬሳና፤ ሄዌ ጎጋኔ ማጎጋ ጌቴቲያዋ። ሴፃናይ ኣባ ሻፊያ ኬና ዜሬꬃ ኦላው ሺሻና። ሄ ዛሬቱ ቢታ ኡባ ማዪዴ ጌሻቱዋ ሄራኔ ፆሳይ ሲቂያ ካታማቶ ዩዪ ኣꬊ ኤቄዲኖ። ሺን ታማይ ሳሉዋፔ ዎꬊዴ፥ ኡንቱንታ ሜዳ። ዶዓይኔ ዎርዶ ናቢ ዬጌቴዳ ኤፂያ ዲኒያ ታማ ኣባን ፃላሂያ ካፑ፥ ኣሳ ዜሬꬃ ባሌꬄዳዌ፥ ዬጌቴዳ። ኡንቱንቱ ቃማኔ ጋላሲ ሜꬊ ሜꬊናው ፓፃ ካዔታና። ሄዋፔ ጉዪያን፥ ታኒ ዎልቃማ ቦꬃ ኣራታኔ ሄ ኣራታን ኡቴዳዋ ቤዓዲ። ሳዓይኔ ሳሉ ኣ ሲንꬃፔ ባቃቴዲኖ፤ ላዔንꬆ ቤቲቤይኪኖ። ሃይቄዳዋንቱ፥ ꬎቁ ጊያዋንቱኔ ጉꬃቱ ኣራታ ሲንꬃን ኤቄዳዋንታ ታኒ ቤዓዲ። ማፃፋቱ ዶዬቴዲኖ፤ ሃራ ማፃፋይ፥ ዴዑዋ ማፃፋይካ ዶዬቴዳ። ሃይቄዳዋንቱ ባሬንቱ ኦሱዋዳን፥ ማፃፋቱዋን ፃፌቲ ኡቴዳዋዳንካ ፒርዴቴዲኖ። ኣባይ ባሬ ጊዶን ዴዒያ ሃይቄዳዋንታ ኢሜዳ፤ ሃይቁኔ ሲዖሊ ባሬንቱ ጊዶን ዴዒያ ሃይቄዳዋንታ ኢሜዲኖ። ኡባይካ ባሬንቱ ኦሱዋዳን ፒርዴቴዲኖ። ሄዋፔ ጉዪያን፥ ሃይቁኔ ሲዖሊ ታማ ኣባን ዬጌቴዲኖ። ሄ ታማ ኣባይ ላዔꬆ ሃይቁዋ። ዴዑዋ ማፃፋን ባሬ ሱንꬃይ ፃፌቲቤና ኣሳይ ኦኒኔ ታማ ኣባን ዬጌቴዳ። ሄዋፔ ጉዪያን፥ ታኒ ኦራꬃ ሳሉዋኔ ኦራꬃ ሳዓ ቤዓዲ። ኮይሮ ሳሉኔ ኮይሮ ሳዓይ ꬋዬዳ። ኣባይካ ꬋዬዳ። ጌሻ ካታማታ ኦራꬃ ዬሩሳላሜ፥ ባሬ ኣሲናው ማያዴ ጊጌዳ ጌሊያ ዎዶሮ ናቲዳን፥ ጊጋ ኡቴዳዉና ሳሉዋፔ ፆሳ ማታፔ ዱጌ ዎꬌዉኖ ታኒ ቤዓዲ። ዎሊቃማ ኮሻይ ኣራታፔ ሃዋዳን ያጊዴ፥ ሃሳዪሺን፥ ታኒ ሲሳዲ፤ «ፆሳ ጎሊ ኣሳና ዴዔ፤ ፆሳይ ኣሳና ኢቲፔ ዴዓና። ኡንቱንቱ ኣ ኣሳ ጊዳና፤ ፆሳይ ባሬ ሁጴው ኡንቱንቱና ዴዓና። ኢ ኡንቱንቱ ፆሳ ጊዳና። ፆሳይ ኡንቱንቱ ኣይፊያ ኣፉꬃ ኡባ ቁጫና። ሃዋፔ ሲንꬃናው ሃይቁኔ ካዩ ዎይ ዋሱኔ ሳኩ ባዋ። ኣዪሲ ጎፔ፥ ኤጫባይ ꬋዬዳ» ያጌዳ። ኣራታን ኡቴዳዌ፥ «ታኒ ኡባባ ኦራፂሳይ» ያጌዳ። ቃሲካ ጉጂዴ ታና፥ «ታኒ ሃሳዪያዌ ኣማኔቲያዋኔ ቱማ ጊዲያ ዲራው ፃፋ» ያጌዳ። ቃሲካ ታና ሃዋዳን ያጌዳ፤ «ፖሌቴዳ። ታኒ ኣልፋኔ ኦሜጋ፤ ዶሜꬃኔ ፖሉዋ። ሳሜቴዳ ኦናኔ ታኒ ዴዑዋ ሃꬃ ፑልቱዋፔ ጮ ኡሻና። ፆኒያ ኡራይ ኦኒኔ ሃዋ ኡባ ላታና። ታኒ ኣው ፆሳ ጊዳና፤ ኢካ ታ ናዓ ጊዳና። ሺን ያዪያዋንቱ፥ ኣማኔናዋንቱ፥ ቱናቱ፥ ሼምፑዋ ዎꬊያዋንቱ፥ ዎሹሚያዋንቱ፥ ቢቲያዋንቱ፥ ኤቃሲ ጎዪኒያዋንቱኔ ዎርዶቲያዋንቱ ኡባይ ዴዒያ ሳዓይ ታማይኔ ኤፂያ ዲኒ ኤፂያ ኣባ ጊዳናዋ። ሄዌ ላዔንꬆ ሃይቁዋ» ያጌዳ። ላፑ ዉርሴꬃ ቦሻቱ ኩሜዳ ላፑ ኬሬቱዋ ኦይቄዳ ላፑ ኪታንቻቱዋፔ ኢቱ ታኮ ዪዴ ታና፥ «ሃ ያ። ታኒ ኔና ጌሌዉኖ ዶርሳ ማቻቶ ቤሳና» ያጌዳ። ኪታንቻይ ታና ዳሮ ꬎቃ ዴሪያ ሁጲያ ኣያናን ኬሲዴ ጌሻ ካታማታ፥ ዬሩሳላማ ሳሉዋፔ ፆሳ ማታፔ ዱጌ ዎꬌዉኖ ታና ቤሴዳ። ሄ ካታማታ ፆሳ ቦንቹዋን ፖዓው። ሄ ካታማቲ ፖዑ ያስጲዲያ ጌቴቲያ ኣልዖ ሹቻ ማላ፤ ቢሪሊያዳን ጶላው። ሄ ካታማቲው ታማኔ ላዑ ፔንጌቱኔ ሄ ፔንጌቱዋን ታማኔ ላዑ ኪታንቻቱ ናጊያ ዎልቃማ ኣዱሳ ዲርሳይ ዴዔ። ፔንጌቱዋን ታማኔ ላዑ ኢስራዔሊያ ዛሬቱዋ ሱንꬃይ ፃፌቲ ኡቴዳ። ኣዋይ ዶሊያ ባጋና ሄዙ ፔንጌቱ ዴዒኖ። ቃሲ ሂርኪ ባጋና ሄዙ ፔንጌቱኔ ሁጲሳ ባጋና ሄዙ ፔንጌቱ ዴዒኖ። ኣዋይ ዉሊያ ባጋናካ ሄዙ ፔንጌቱ ዴዒኖ። ካታማቲ ዲርሳይ ዶርሳይ ኪቴዳ ታማኔ ላዓቱዋ ሱንꬃይ ፃፌቴዳ ታማኔ ላዑ ሹቻቱዋ ቦላ ጊምቤቴዳ። ታናና ሃሳዬዳ ኪታንቻው ካታማቶ፥ ኢዚ ፔንጌቱዋኔ ኢዚ ዲርሳ ሊኪያ ዎርቃ ጋቲማይ ዴዔ። ካታማቲው ኦይዱ ጋፃይ ዴዔ፤ ካታማቲ ጌሳይኔ ጎምፓይ ኢቲ ማላ። ኪታንቻይ ካታማቶ ባሬ ጋቲማን ሊኬዳ። ካታማታ ላዑ ሻዓኔ ላዑ ፄቱ ኪሎ ሚቲሪያ ጊዳዱ፤ ካታማቲ ጌሳይ፥ ጎምፓይኔ ꬎቃቴꬃይ ኢቲ ማላ። ኪታንቻይ ቃሲ ዲርሳካ ሊኬዳ። ኣሳ ኩሺያን ኢቲ ፄታኔ ኦይታማኔ ኦይዱ ዋꬋ ጊዴዳ። ሄዌ ኦኒኔ ሊኪያ ኦጊያን ኪታንቻይ ሊኪናዳ። ካታማቲ ዲርሳይ ያስጲዲያ ጌቴቲያ ሹቻን ዲሬቴዳ። ካታማታ ቢሪሊያዳን ጶሊያ ጌሻ ዎርቃን ሜꬌታዱ። ካታማቲ ዲርሳው ሂፄቴዳ ሹቻይ ቦንቼቴዳ ሹቻ ኡባን ኣሌቄቴዳ፤ ኮይሮ ሂፄቴዳ ሹቻይ ያስጲዲያ፤ ላዔንꬁ ሳምፔሪያ፤ ሄዜንꬁ ኬልቄዶኒያ፤ ኦይዴንꬁ ባሉሪያ፤ ኢቼሼንꬁ ሳርዶንኪሳ፤ ኡሱፑንꬁ ሳርዲዮና፤ ላፑንꬁ ኪሪስቲሎባ፤ ሆስፑንꬁ ቢራሊ፤ ኡዱፑንꬁ ቶጳዚዮኒያ፤ ታሙንꬁ ኪሪስጲራሲሳ፤ ታማኔ ኢቴንꬁ ያኪንቲያ፤ ታማኔ ላዔንꬁ ኣሜቴስፂኖሲያ። ታማኔ ላዑ ፔንጌቱ ታማኔ ላዑ ኢንቁዋ ጌቴቲያ ኣልዖ ሹቻ፤ ኢቲ ኢቲ ፔንጊ ኢቲ ኢንቁዋን ኦሴቴዳ። ካታማቲ ኦጊ ቢሪሊያ ማላ ጌሻ ዎርቃ። ጎዳይ፥ ኡባፔ ዎልቃማ ፆሳይኔ ዶርሳይ ካታማቲ ጌሻ ጎሊያ ጊዲያ ዲራው፥ ታኒ ሄ ካታማቲን ጌሻ ጎሊያ ቤዓቤይኬ። ካታማቲው ፖዒያ ኣዋይ ዎይ ኣጌናይ ኮሼና። ኣዪሲ ጎፔ፥ ፆሳ ቦንቹ ሄ ካታማቲን ፖዔ፤ ዶርሳይካ ሄ ካታማቲው ፆምፒያ። ኣሳ ዜሬꬃይ ካታማቲ ፖዑዋን ሃሜታና። ሳዓ ካታቱካ ባሬንቱ ቦንቹዋ ሄ ካታማቲኮ ኣሃና። ካታማቲ ፔንጌቱ ኡባ ጋላሲካ ዶያ ዴዓና፤ ኡባካ ጎርዴቲኪኖ። ኣዪሲ ጎፔ፥ ሄዋን ቃማይ ባዋ። ኣሳ ዜሬꬃ ጊታቴꬃይኔ ቦንቹ ሄ ካታማቲኮ ሺቃና። ሺን ቱናባይ ዎይ ካዉሻባ ኦꬂያዌ፥ ዎይ ዎርዶቲያዌ ኦኒኔ ሄ ካታማቶ ጌሌና። ቃሲ ዶርሳ ዴዑዋ ማፃፋን ሱንꬃይ ፃፌቴዳዋንቱ ፃላላይ ሄ ካታማቶ ጌላና። ሄዋፔ ጉዪያን፥ ኪታንቻይ ታና ፆሳ ካዉቴꬃ ኦይዲያፔኔ ዶርሳ ካዉቴꬃ ኦይዲያፔ ጎጊያ ቢሪሊያዳን ጶሊያ ዴዑዋ ሃꬃ ሻፋ ቤሴዳ። ሄ ሻፋይ ካታማ ኦጊያ ጊዱዋና ዱጌ ጎጌ። ሻፋፔ ሄፊንꬃ ባጋናኔ ሃፊንꬃ ባጋና ኣጌናን ኢቲ ጌዴኔ ላይꬃን ታማኔ ላዑ ጌዴ ኣይፊያ ዴዑዋ ሚꬃይ ዴዔ። ሄ ሚꬃ ቦንቹ ዴዒያዌ፥ ዛሪያ ኡባ ሃርጊያፔ ፓꬃናሳ። ሄ ካታማን ፆሳ ሼቃይ ኣይኔ ባዋ። ፆሳ ካዉቴꬃ ኦይዲኔ ዶርሳ ካዉቴꬃ ኦይዲ ሄ ካታማን ዴዓና። ፆሳ ኦሳንቻቱ ፆሳው ጎዪናና። ኡንቱንቱ ኣ ዴሙዋ ቤዓና፤ ኣ ሱንꬃይ ኡንቱንቱ ዴሙዋን ፃፌታና። ሄዋፔ ሲንꬃው ሃራ ቃማይ ባዋ። ኡንቱንቶ ፆምፒያ ዎይ ኣዋ ፖዑዋ ኮሼና፤ ኣዪሲ ጎፔ፥ ጎዳይ ፆሳይ ኡንቱንቱሲ ፆምፒያ ጊዳናዋ። ኡንቱንቱ ሜꬊ ሜꬊናው ካዉታና። ሄዋፔ ጉዪያን፥ ኪታንቻይ ታና ሃዋዳን ያጌዳ፤ «ሃ ታኒ ሃሳዪያዌ ቱሙዋኔ ኣማኔቲያዋ። ናባቶ ባሬ ጌሻ ኣያና ኢሚያ ጎዳይ ፆሳይ፥ ማታን ሃናናው ቤሲያዋ ባሬ ኦሳንቻቱዋ ቤሳናው ባሬ ኪታንቻ ኪቴዳ» ያጌዳ። ዬሱሲ፥ «ቤዓ! ታኒ ኤሌካ ያና። ሃ ማፃፋን ዴዒያ ቲምቢቲያ ናጊያዋንቱ ኣንጄቴዳዋንታ» ያጌዳ። ታኒ ዮሃኒሲ፥ ሃ ኡባባ ሲሳዲኔ ቤዓዲ። ታኒ ሃዋ ሲሴዳ ዎዴኔ ቤዔዳ ዎዴ፥ ሄዋ ታና ቤሴዳ ኪታንቻው ጎዪናናው፥ ኣ ጌዲያን ኩንዳዲ። ሺን ኪታንቻይ ታና፥ «ሄዋ ኦꬆፓ። ታኒ ኔናዳኒኔ ናቤ ጊዴዳ ኔ ኢሻቱዋዳን፥ ቃሲ ማፃፋን ዴዒያባው ኣዛዜቲያ ኡባቱዋዳን ኣይሊያ። ፆሳው ጎዪና» ያጌዳ። ሄዋፔ ጉዪያን፥ ኪታንቻይ ታና፥ «ሃናና ጌዳ ሃ ማፃፋ ቃላ ማታፋን ጎርዶፓ። ኣዪሲ ጎፔ፥ ሃ ኡባባይ ፖሌቲያ ዎዲ ማታቴዳ። ኢታባ ኦꬂያዌ ጉጂዴካ ኢታባ ኦꬆ፤ ቱናይ ጉጂዴካ ቱኖ። ሎዖባ ኦꬂያዌ ጉጂዴካ ሎዖባ ኦꬆ፤ ጌሻይኔ ጉጂዴካ ጌሻ ጊዶ» ያጌዳ። ዬሱሲ፥ «ቤዓ! ታኒ ኤሌካ ያና። ኣሳ ኡባው ኣ ኦሱዋዳን ኢማናው፥ ታ ዎይታ ኣካ ያና። ታኒ ኣልፋኔ ኦሜጋ፤ ኮይሩዋኔ ዉርሴꬃ፤ ዶሜꬃኔ ፖሉዋ» ያጌዳ። ባሬንቱ ማዩዋ ጌሺ ሜጪያዋንቱ ኣንጄቴዳዋንታ። ዴዑዋ ሚꬃ ኣይፊያ ማናዉኔ ካታማ ፔንጊያና ጌላናው ኡንቱንቱሲ ማታይ ኢሜቴዳ። ሺን ካናቱ፥ ቢቲያዋንቱ፥ ዎሹሚያዋንቱ፥ ሼምፑዋ ዎꬊያዋንቱ፥ ኤቃሲ ጎዪኒያዋንቱኔ ባሬንቱ ሃሳያኒኔ ባሬንቱ ኪታን ዎርዶቲያዋንቱ ካሬና ዴዒኖ። «ታኒ ዬሱሲ፥ ሃ ዬዉዋ ሂንቴንቱሲ ዎሳ ጎሌቱዋን ማርካታና ማላ፥ ታ ኪታንቻ ኪታዲ። ታኒ ዳዊታ ጎሊያ ዬሌታ። ታኒ ፖዒሲያ ዎንታ ባካሊያ» ያጌዳ። ጌሻ ኣያናይኔ ጌሌዉና፥ «ሃ ያ» ያጊኖ። ቃሲ ሃዋ ሲሲያዌ ኦኒኔ፥ «ሃ ያ» ያጎ። ሳሜቴዳ ኣሳይ ኦኒኔ ሃ ዮ። ዴዑዋ ሃꬃ ኮዪያ ኣሳይ ኦኒኔ ጮ ኣኮ። ታኒ ሃ ማፃፋን ፃፌቴዳ ሃናና ጌዳ ቃላ ሲሲያ ኦናኔ ዞራይ። ኦኒኔ ሃ ቃላ ቦላ ኢቲባ ጉጆፔ፥ ፆሳይ ሃ ማፃፋን ፃፌቴዳ ቦሻ ኣ ቦላ ጉጃና። ኦኒኔ ማፃፋን ዴዒያ ቲምቢቲያ ቃላፔ ኣያኔ ፓጪሶፔ፥ ሃ ማፃፋ ጊዶን ቆንጪሴዳ ዴዑዋ ሚꬃ ኣይፊያፔኔ ጌሻ ካታማፔ ኣ ጋኪያ ጊሹዋ ፆሳይ ፓጪሳና። ሃ ኡባባው ማርካቲያዌ፥ «ቱማ! ታኒ ኤሌካ ያና» ያጌ። ኣሜንዒ። ጎዳ ዬሱሳ፥ ኔኒ ሃያ። ጎዳ ዬሱሲ ኪሪስቶሳ ኣꬎ ኬካቴꬃይ ሂንቴናና ኡባና ጊዶ። ኣሜንዒ።