ዳዉቴ ና፥ ኣብራሃሜ ና ጊዲዳ ዬሱስ ኪርስቶሳ ዬሌቴꬃ ዛርኬይ ሃይሳፌ ካሊዛይሳ፤ ኣብራሃሜይ ዪሳቃ ዬሊዴስ፤ ዪሳቂ ያቆቤ ዬሊዴስ፤ ያቆቤይ ዩሁዳኔ ኢዛ ኢሻታ ዬሊዴስ፤ ዩሁዳይ ቲማሪፔ ፋሬሳኔ ዛራ ዬሊዴስ፤ ፋሬሳይ ኤስሮሜ ዬሊዴስ፤ ኤስሮሜይ ኣራሜ ዬሊዴስ፤ ኣራሜይ ኣሚናዳቤ ዬሊዴስ፤ ኣሚናዳቤይ ኔዓሶኔ ዬሊዴስ፤ ኔዓሶኔይ ሳሎሞኔ ዬሊዴስ፤ ሳሎሞንካ ቦዔዜ ኤራዓቢፔ ዬሊዴስ፤ ቦዔዜይ ኡሩቲፔ ኢዮቤዴ ዬሊዴስ፤ ኢዮቤዴይ ኢሴዬ ዬሊዴስ፤ ኢሴዬይ ካዎ ዳዉቴ ዬሊዴስ፤ ዳዉቴይ ኦሪዮ ማቼይፌ ሶሎሞኔ ዬሊዴስ። ሶሎሞንካ ሮቢዓሜ ዬሊዴስ፤ ሮቢዓሜይ ኣቢያ ዬሊዴስ፤ ኣቢያይካ ኣሳፌ ዬሊዴስ፤ ኣሳፌይ ዮሳፒፄ ዬሊዴስ፤ ዮሳፒፄይ ኢዮራሜ ዬሊዴስ፤ ኢዮራሜይ ኦዚያ ዬሊዴስ፤ ኦዚያኔይ ኢዮዓታሜ ዬሊዴስ፤ ኢዮዓታሜይ ኣካዜ ዬሊዴስ፤ ኣካዜይ ሂዚቃሴ ዬሊዴስ፤ ሂዚቃሲ ሚናሴ ዬሊዴስ፤ ሚናሴይ ኣሞፄ ዬሊዴስ፤ ኣሞፄይካ ዮሲያሳ ዬሊዴስ፤ ዮሲያሲ ባቢሎኔ ዲዖ ላይꬅ ኢኮኛኔኔ ኢዛ ኢሻታ ዬሊዴስ። ባቢሎኔ ዲዖፔ ጉዬ ኢኮኛኔይ ሳላቲያሌ ዬሊዴስ፤ ሳላቲያሌይካ ዜሩባቤሌ ዬሊዴስ፤ ዜሩባቤሌይ ኣቢዮዴ ዬሊዴስ፤ ኣቢዮዴይ ኤሊያቄሜ ዬሊዴስ፤ ኤሊያቄሜይ ኣዛሬ ዬሊዴስ፤ ኣዛሬይ ሳዶቄ ዬሊዴስ፤ ሳዶቄይ ኣኪሜ ዬሊዴስ፤ ኣኪሜይካ ኤሊዮዴ ዬሊዴስ፤ ኤሊዮዴይ ኣላዛሬ ዬሊዴስ፤ ኣላዛሬይ ማታኔ ዬሊዴስ፤ ማታኔይ ያቆቤ ዬሊዴስ፤ ያቆቤይካ ኪርስቶሳ ጌቴቲዳይሳ ዬሱሳ ዬሊዳ ማራሞ ኤካና ጊጊሲዳ ዮሴፌ ዬሊዴስ። ሄሳ ጊሽ ኣብራሃሜፔ ዪዲ ዳዉቴ ጋካናስ ታማኔ ኦይዱ ዬሌቴꬅ፤ ቃሴ ዳዉቴፔ ባቢሎኔ ዲዖ ዎዴ ጋካናስ ታማኔ ኦይዱ ዬሌቴꬅ፤ ባቢሎኔ ዲዖፔ ኪርስቶሳ ዬሌቴꬅ ጋካናስ ታማኔ ኦይዱ ዬሌቴꬅ ጊዴስ። ዬሱስ ኪርስቶሳ ዬሌቴꬃ ታሪኬይ ሃይሳፌ ካሊ ዲዛይሳ፤ ኢዛ ኣያ ማራማ ዮሴፌስ ጊጌታ ዲሺን ኢዚ ኢዚራ ጋይቶንታ ፂሎ ኣያናን ቃንꬃታዳ ቤታዱስ። ኢዞ ጊጊሲዳ ዮሴፌይ ፂሎ ኣስ ጊዲዳ ጊሽ ማራሞ ኣሳ ሲንꬃን ቆንጬ ኬሶንታ ቆታራ ኣጋናስ ባ ዎዝናራ ቃቺዴስ። ሃይሳ ኢዚ ቆፒሺን ፆሳ ኪታንቻይ ኣጉሞራ ኢዛስ ቆንጪዲ “ዳዉቴ ና ዮሴፌ! ኔ ጊጊሲዳ ማራማ ቃንꬃቲዳይ ፂሎ ኣያናን ጊዲዳ ጊሽ ኢዞ ኔሶ ኤፋናስ ባቦፋ። ኢዛ ኣቱማ ና ዬላና፤ ኢዚ ኣሳ ናጋራፔ ኣሻናዴ ጊዲዳ ጊሽ ኢዛ ሱንꬅ ኔ ‘ዬሱሳ’ ጋ ሱንꬃና” ጊዴስ። ጎዳይ ናቤ ኢሳያሳ ዱናን “ሄኮ! ጌላዖይ ቃንꬃታና፤ ኣቱማ ናካ ዬላና፤ ናዛ ሱንꬃይካ ኣማኑዔላ ጌቴታና፤ ሄሳ ቢርሼꬂካ ‘ፆሲ ኑናራ ዴስ’ ጌቴቲዲ ፃፌቲዳይሲ ፖሌታና ማላ ሃይሲ ዉሪካ ሃኒዴስ” ጊዴስ። *** ዮሴፌይካ ꬊስኮፌ ቤጊዲ ጎዳ ኪታንቻይ ኢዛ ኣዛዚዳ ማላ ማራሞ ባሶ ኤፊዴስ። ጊዶ ኣቲን ባዳ ኢዛ ኮይሮ ናዛ ዬላና ጋካናስ ኢዞ ኤኪቤና። ዬሌቲዳ ጉꬃ ናዛ ሱንꬃ “ዬሱሳ” ጊዴስ። ካዎ ሄርዶሳ ዎዴ ዬሱሲ ቤቴሌሜ ዩሁዳን ዬሌቲዳፔ ጉዬ ኣዋ ኣርሼይ ሞኪዛ ባጋፌ ኤራንቻቲ ዬሩሳላሜ ዪዲ “ዬሌቲዳ ኣይሁዳ ካዎይ ኣዋን ዲዜ? ኣዋ ኣርሼይ ሞኪዛ ባጋራ ኢዛ ፆሊንቴዛ ቤዪዲ ኢዛስ ጎይናና ዪዶስ” ጊዲ ኦይቺዳ። ካዎ ሄርዶሲ ሄሳ ሲይዲ ዳጋሚዴስ፤ ዬሩሳላሜን ዲዛ ኣሳይ ዉሪ ኢዛራ ዳጋሚዴስ። ኢዚካ ቄሴታ ሃላቃታኔ ዎጋ ታማርሲዛይታ ኡባ ሺሺዲ “ኪርስቶሲ ኣዋን ዬሌታኔ?” ጊዲ ኦይቺዴስ። ኢስቲካ ኢዛስ “ናቤይ ‘ዩሁዳ ቢታን ዲዛሬ ሃኔ ቤቴሌሜ! ታ ዴሬ ኢስራዔሌ ናጊዛዴይ ኔፔ ኬዛና ጊሽ ሃንኮ ዩሁዳ ሃሪዛይታፔ ኣዛንካ ጉፃካ’ ጊዲ ፃፊዳ ጊሽ ኢዚ ቤቴሌሜ ዩሁዳን ዬሌታና” ጊዲ ዮቲዳ። *** ሄሳፌ ጉዬ ሄርዶሲ ሄ ኤራንቻታ ጌማራ ፄይጊሲዲኔ ኢስታ ሃሳይሲዲ ፆሊንቴዚ ኢስታስ ቤቲዳ ዎዴዮ ሻኪ ኤሪዴስ። ኤራንቻታ ቤቴሌሜ ዬዲዲ “ቢዲ ጉꬃ ናዛ ኮዪቴ፥ ታካ ባዳ ኢዛስ ጎይናና ማላ ዴሚዳ ማላ ሃ ታኮ ሲሚዲ ኢዚ ኣዋን ዲዛኮን ታስ ዮቲቴ” ጊዴስ። ኤራንቻቲካ ካዎይ ኢስታስ ጊዳይሳ ሲዪዳፔ ጉዬ ሲሚ ቢዳ፤ ኣዋ ኣርሼይ ሞኪዛ ባጋራ ኢስታስ ቤቲዳ ፆሊንቴይ ኢስታ ካሌꬂዲ ጉꬃ ናዚ ዲዛሶ ጋꬂዴስ። ኢስቲ ፆሊንቴዛ ቤዪዳ ዎዴ ዳሮ ኡፋዬቲዳ። ኬꬄ ጌሊዲ ጉꬃ ናዛ ኢዛ ኣዮ ማራሚራ ዴሚዲኔ ጉልባቲዲ ኢዛስ ጎይኒዳ፤ ባ ሳፂኔ ሳፂኔ ዶይዲ ዎርቃ፥ ኤፃኔኔ ካርቤ ጊዛ ሚሽ ኢዛስ ኢሚዳ። ኢስቲ ሄርዶሳኮ ሲሞንታ ማላ ኣጉሞን ኬሂ ናጌታና ማላ ጌቴቲዳ ጊሽ ሃራ ኦጌራ ባ ዴሬ ሲሚዳ። ኤራንቻቲ ቢዳፔ ጉዬ ጎዳ ኪታንቻይ ዮሴፌስ ኣጉሞራ ቤቲዲ “ሄርዶሲ ጉꬃ ናዛ ዎꬋና ኮዪዛ ጊሽ ኔ ሲማና ዎዴ ታ ኔና ኤሪሳና ጋካናስ ዴንዳዳ ጉꬃ ናዛ ኣዬይራ ኤካዳ ዱጌ ጊብፄ ቢታ ባቃታዳ ሄን ዳሻ” ጊዴስ። ሄሳ ጊሽ ዮሴፌይ ዴንዲዲ ኣዪዮ ናዛራ ኤኪዲ ጊዶꬃራ ዱጌ ጊብፄ ቢታ ቢዴስ። ሄርዶሲ ሃይቃና ጋካናስ ሄን ዴዒዴስ። ሄሳንካ “ታ ናዛ ታ ጊብፄ ቢታፌ ፄይጋዲስ” ጊዲ ጎዳይ ካሴ ናቤ ዱናን ሃሳዪዳይሲ ፖሌቲዴስ። ኤራንቻቲ ኢዛ ባሌꬂዳይሳ ኤሪዳ ዎዴ ሄርዶሲ ኬሂ ሃንቄቲዴስ። ኤራንቻቲ ኢዛስ ካሴ ዮቲዳ ማላ ባ ኣስ ኪቲዲ ናምዑ ላይꬃኔ ናምዑ ላይꬅ ኩሞንታይታ ቤቴሌሜኒኔ ቤታሌሜ ዩሾን ዲዛ ጉꬃ ኣቱማ ናይታ ኡባ ዎꬊሲዴስ። ሄሳን “ዬሆይኔ ጊታ ዋሶ ጊሪሳይ ኤራማን ሲዬቲዴስ፤ ኢራዔላ ባ ናይታስ ዬካዱስ፤ ናይቲ ዉሪ ዉሪዳ ጊሽ ሚናናስ ዳንዳዮንታ ኢፃዱስ” ጌቴቲዲ ናቤ ኤርማሳን ዮቴቲዳይስ ፖሌቲዴስ። *** ሄርዶሲ ሃይቂዳፔ ጉዬ ጎዳ ኪታንቻይ ኣጉሞራ ዮሴፌስ ጊብፄ ቢታን ቤቲዲ፥ “ዴንዳዳ ጉꬃ ናዛኔ ኢዛ ኣዪዮ ኤካዳ ኢስራዔሌ ቢታ ሲማ፤ ናዛ ዎꬋና ኮዪዛይቲ ሃይቂዳ” ጊዴስ። ዮሴፌይ ዴንዲዲ ናዛ ኣዪይራ ኤኪዲ ኢስራዔል ቢታ ሲሚዴስ። ጊዶ ኣቲን ኣርካላዎሲ ባ ኣዋ ሄርዶሳ ሶን ዩሁዳን ካዎቲዳይሳ ሲይዲኔ ሄ ባናስ ባቢዴስ፤ ጎዳይ ኣጉሞራ ኢዚ ሄ ቦንታ ማላ ዮቲዳ ጊሽ ጋሊላ ኣዉራጃ ቢዴስ። ናዚሬቴ ጌቴቲዛ ካታማዮ ቢዲ ሄን ዱስ ኦይኪዴስ። ሄሳንካ ካሴ ናቤታን “ናዚሬቴ ኣስ ጌቴታና” ጌቴቲዲ ካሴቲዲ ሲንꬃፌስ ሃሳዬቲዳይሲ ኩሚዴስ። ሄ ዎዴ ፃማቂዛ ዮሃኒሲ ኣሳስ “ሳሎ ካዎቴꬂ ማቲዳ ጊሽ ኢንቴ ናጋራፔ ሲሚቴ” ጊ ሳባኪሼ ዩሁዳ ባዞራ ዪዴስ። *** “ጎዳ ኦጌ ኦꬂቴ፥ ዎጋ ኦጌዛካ ሎዔꬂቴ ጊሼ ባዞ ቢታን ዋሲዛ ቃላ” ጌቴቲዲ ካሴ ናቤ ኢሳያሳን ዮቴቲዳይሲ ዮሃኒሳ ጊሻሳ። ዮሃኒሲ ጋሜላ ኢሲኬፌ ኦሴቲዳ ማይዖ ማይዔስ። ባ ፄሳን ዳፎ ጊፄስ፤ ኢዚ ሚዛ ቁማይ ዴጌራ ኤሳኔ ቦሌ። ዬሩሳላሜፔ፥ ኩሜꬃ ዩሁዳፔኔ ዮርዳኖሴ ሻፋ ማታን ዲዛ ዴሬ ኣሳይ ዉሪ ዮሃኒሳኮ ዎꬊዲ፥ ባ ናጋራካ ኢዛስ ፓፂሼ ዮርዳኖሴ ሻፋን ኢዛ ኩሼን ፃማቄቲዴስ። ዳሮ ፋርሳዌቲኔ ሳዱቃዌቲ ኢዚ ፃማቂዛሶ ዪሺን ቤዪዲ ዮሃኒሲ “ኢንቴኖ ሾሻቶ! ኢንቴ ሲንꬃራ ዲዛ ሃንቆፌ ኣታና ማላ ኢንቴና ኦኒ ቤሲዴ? ኢንቴ ኢንቴ ናጋራፔ ሲሚዳይሳ ቤሲዛ ኦሶ ኦꬂቴ። ‘ኑ ኣዋይ ኣብራሃሜይ ኑስ ዴስ’ ጊዛይሳን ኢንቴርካ ኢንቴና ባሌꬆፍቴ፤ ታ ኢንቴስ ፆሲ ሃይታ ሹቻታፔ ኣብራሃሜስ ና ኦꬂ ዴንꬃናስ ዳንዳዬስ ጋይስ። ሄኮ ካልታይ ቃንፃናስ ሚꬃታ ጋርሳን ጊጌቲ ኡቲዴስ፤ ሄሳ ጊሽ ሎዖ ኣይፌ ኣይፎንታ ሚꬂ ዉሪ ቃንፄታናኔ ታማን ዬጌታና። ታኒ ማሮቴꬃስ ሃꬃን ፃማቃይስ፤ ሃራይ ኣቶ ሺን ታ ኢዛ ጫማ ቶካናስ ቤሶንታዴይ ታፔ ኣꬊዛ ሚኖይ ጉዬራ ያና፤ ኢዚካ ፂሎ ኣያናኒኔ ታማን ኢንቴና ፃማቃና። ካꬅ ሱራጊዛ ፒꬃይ ኢዛ ኩሼን ዴስ፤ ኢዚካ ባ ካꬃ ባሌዛ ፒቲ ጌሻና፤ ባ ጊስቴዛካ ካꬃ ዲዔን ቆላና፤ ሃፓ ጊዲኮ ቶዖንታ ታማን ፁጋና” ጊዴስ። ሄ ዎዴ ዬሱሲ ዮሃኒሳን ፃማቄታናስ ጋሊላፔ ዮርዳኖሴ ሻፋ ቢዴስ። ጊዶ ኣቲን ዮሃኒሲ “ሃይሲ ሃኔና፤ ታኒ ኔናን ፃማቄታና ቤሲሺን ኔኒ ዋናዳ ታኮ ያይ?” ጊዲ ኢዛራ ማርሼቲዴስ። ዬሱሲካ “ኣይኮይ ባዋ፥ ኤሮ ጋርኪ? ሃይሳ ኦꬂዲ ኑኒ ፂሎቴꬅ ኡባ ፖላናስ ኑስ ቤሴስ” ጊዴስ። ዮሃንሲካ ኢዛ ቆፋ ኤሮ ጊ ኤኪዴስ። ዬሱሲ ፃማቄቲዲ ሃꬃፌ ኬዚዳ ማላ ሄራካ ሳሎይ ዶዬቲን ፆሳ ኣያናይ ሃራጴ ካፎ ሚሳቲዲ ኢዛ ቦላ ዎꬊሺን ቤዪዴስ። ሳሎፔካ “ታኒ ኢዛን ኡፋዬቲዛ ናዚኔ ታ ሲቂዛ ታ ናዚ ሃይሳ” ጊዛ ቃላይ ሲዬቲዴስ። ሄሳፌ ጉዬ ፂሎ ኣያናይ ፃላዔን ፓጬታና ማላ ዬሱሳ ዱጌ ባዞ ቢታ ኤፊዴስ። ኦይዱ ታሙ ጋላሲኔ ኦይዱ ታሙ ቃማ ፆሚዳፔ ጉዬ ዬሱሲ ጋፊዴስ። ፓጪዛይሲ ዬሱሳኮ ሺቂዲ “ኔ ፆሳ ና ጊዲኮ ኣኔ ሃይታ ሹቻታ ኡኬꬅ ጊዳና ማላ ኣዛዛ” ጊዴስ። ዬሱሲካ “ ‘ኣሲ ፆሳ ዱናፔ ኬዚዛ ቃላንፔ ኣቲን ካꬃን ፃላ ዴና’ ጌቴቲ ፃፌቲዴስ” ጊዲ ኢዛስ ዛሪዴስ። ቃሴካ ፃላዔይ ዬሱሳ ጌሻ ካታማዮ ኤፊ ፆሳ ኬꬃ ቁስቴ ቦላ ኬሲዲ፥ “ኔ ፆሳ ና ጊዲኮ ኣኔ ሃይሳፌ ዱጌ ጉፓ፤ ኣይሲ ጊኮ ‘ኔ ቶሆይ ሹቻን ꬉጴቶንታ ማላ ኪታንቻቲ ባ ኩሼራ ኔና ኦይኪ ዴንꬃና ማላ ኔ ጊሽ ፆሲ ባ ኪታንቻ ኪታና’ ጌቴቲ ፃፌቲዴስ” ጊዴስ። ዬሱሲካ “ጌሻ ማፃፋን ‘ኔ ጎዳ ፆሳ ፓጮፋ’ ጌቴቲ ፃፌቲዴስ” ጊዲ ዛሪዴስ። ቃሴካ ፃላዔይ ዬሱሳ ኬሂ ꬎቃ ዙማ ቦላ ኬሲዲ ሳሎ ጉፓንꬆን ዲዛ ካዎቴꬃ ቦንቾዛራ ኡባ ኤሂ ቤሲዲ፥ “ኔ ኩንዳዳ ታስ ጎይኒኮ ሃይሳ ኡባ ታ ኔስ ኢማና” ጊዴስ። ዬሱሲ “ሃይሶ ፃላዔ! ታ ሲንꬃፌ ሃካ! ‘ኔኒ ኔ ጎዳስ ፆሳስ ጎይና፤ ኢዛስ ፃላላ ኣዛዜታ’ ጌቴቲ ጌሻ ማፃፋን ፃፌቲዴስ” ጊዴስ። ሄሳፌ ፃላዔይ ኢዛ ኣጊዲ ቢዴስ፤ ኪታንቻቲካ ዪዲ ኢዛ ማዲዳ። ዬሱሲ፥ ዮሃኒሲ ቃሼቲዳይሳ ሲይዲ ጌዴ ጋሊላ ሲሚዴስ። ናዚሬቴ ካታማ ኣጊዲ ዛቢሎኔ ኒፍታሌሜ ሄራን ኣባ ማታን ዲዛ ቂፊርናሆሜ ካታማን ዱስ ኦይኪዴስ። “ሄሳን ዛቢሎኔኒኔ ኒፍታሌሜ ቢታን፥ ዮርዳኖሴፔ ሄ ፒንꬃን ኣባ ላንቄራ ኤፊዛ ኦጌ ማታን ዲዛ ኣይዛቤ ጊዲዳ ጋሊላ ዴሬ ኣሳይ፥ ꬉማን ዲዛ ዴሬይ ዎልቃማ ፖዖ ቤዪዴስ። ሃይቆ ኩዋ ጊዶን ዲዛ ዴሬስ ፖዖይ ፖዒዴስ” ጌቴቲዲ ናቤ ኢሳያሳ ዱናን ካሴቲዲ ሃሳዬቲዳይሲ ፖሌቲዴስ። *** *** ዬሱሲ ሄ ዎዴፔ ሃ ሲሚን “ሳሎ ካዎቴꬂ ማቲዴስ፥ ማሮታ ጌሊቴ” ጊዲ ሳባኮ ኦይኪዴስ። ዬሱሲ ጋሊላ ኣባ ላንቄራ ኣꬊሼ ናምዑ ኢሻንታ፤ ሄይቲካ ጴፅሮሳ ጌቴቲዛ ሲሞናኔ ኢዛ ኢሻ ኢንዲራሳ ቤዪዴስ። ኢስቲካ ሞሌ ኦይኪዛይታ ጊዲዳ ጊሽ ሞሌ ኦይኪዛ ጊቴ ኣባን ዬጊሼ ዴቴስ። ዬሱሲ ኢስታ “ሃ ዪቴ! ታና ካሊቴ! ታ ኢንቴና ኣስ ኦይኪዛ ኣስ ኬሳና” ጊዴስ። ኢስቲ ሄራካ ሞሌ ኦይኪዛ ጊቴዛ ዬጊ ኣጊዲ ዬሱሳ ካሊዳ። ጉꬅ ሲንꬄ ቢሼ ሃራ ናምዑ ኢሻንታ ዛቢዶሳ ና ናምዓታ ያቆቤኔ ዮሃኒሳ ቤዪዴስ፤ ኢስቲካ ባ ኣዋ ዛቢዶሳራ ዎጎሎ ጊዶን ሞሌ ጊቴ ሎዔꬄቴስ። ዬሱሲካ ኢስታ ፄይጊን፤ ኢስቲ ሄራካ ዎጎሎዛኔ ባ ኣዋ ኣጊዲ ካሊዳ። ዬሱሲ ኣይሁዳታ ኢስታ ዎሳ ኬꬃን ታማርሲሼኔ ካዎቴꬃ ሚሺራቾ ቃላ ሳባኪሼ ቃሴ ዴሬ ጊዶን ኣይ ሃርጌይካ ሳኪዛይታ ፓꬂሼ ኩሜꬃ ጋሊላን ዩዪዴስ። ሄሳ ጌዶን ሎዖ ናሾይ ኩሜꬃ ሶሪያ ቢታን ሲዬቲዴስ፤ ዴሬይካ ዱማ ዱማ ሳኮን ዳሮ ዋዬቲዛይታ፥ ዳይዳንꬂ ኢስታን ጌሊዳይታ፥ ቦላፌ ቢታን ዬጊዛ ሃርጌይ ዲዛይታኔ ሲሊዳይታ ኢዛኮ ኤሂን ኡባካ ፓꬂዴስ። ሄሳፌ ዴንዲዳይሳን ጋሊላፔ፥ ታሙ ካታማታፔ፥ ዬሩሳላሜፔኔ ዩሁዳፔ፥ ዮርዳኖሴ ሻፋ ፒንꬃፌ ዪዳ ዳሮ ኣሳይ ኢዛ ካሊዴስ። ዳሮ ዴሬይ ሺቂዳይሳ ቤዪዲ ዬሱሲ ፑዴ ዙማ ቦላ ኬዚ ኡቲዴስ፤ ኢዛ ካሊዛይቲካ ኢዛኮ ዪዳ። ኢዚካ ኢስታ ሂዝጊ ታማርሶ ኦይኪዴስ፤ “ኣያናን ባና ካዉሺዛይቲ ኣንጄቲዳይታ፤ ኣይሲ ጊኮ ሳሎ ካዎቴꬅ ኢስታሳ። ቃꬌቲዛይቲ ኣንጄቲዳይታ፥ ኣይሲ ጊኮ ኢስቲ ሚኔታና። ኣሽኬቲ ኣንጄቲዳይታ፤ ኣይሲ ጊኮ ኢስቲ ቢታ ላታና። ፂሎቴꬅ ጋፌቲዛይቲኔ ሳሞቲዛይቲ ኣንጄቲዳይታ፤ ኣይሲ ጊኮ ኢስቲ ካላና። ኣሳስ ሎዖ ኦꬂዛይቲ ኣንጄቲዳይታ፤ ኣይሲ ጊኮ ኢስታስካ ሎዖይ ኦሴታና። ዎዚና ፂሎቲ ኣንጄቲዳይታ፤ ኣይሲ ጊኮ ኢስቲ ፆሳ ቤያና። ሳሮቴꬅ ኦꬂዛይቲ ኣንጄቲዳይታ፤ ኣይሲ ጊኮ ኢስቲ ፆሳ ናይታ ጌቴቲ ፄይጌታና። ፂሎቴꬃ ጊሽ ጎዴቲዛይቲ ኣንጄቲዳይታ፤ ኣይሲ ጊኮ ሳሎ ካዎቴꬂ ኢስታሳ። “ታ ጌዶን ኣሳይ ኢንቴና ጫዪኮ፥ ጎዲኮኔ ኢታ ዮዖ ዎርዶራ ኢንቴ ቦላ ሃሳዪኮ ኢንቴ ኣንጄቲዳይታ። ኢንቴ ሳሎን ዴማና ዋጋይ ኬሂ ጊታ ጊዲዳ ጊሽ ኡፋይሳን ጉፒቴ። ኢንቴፌ ሲንꬃን ዲዛ ናቤታካ ሄሳꬆ ጎዲዳ። “ኢንቴ ሃ ቢታ ኣሳስ ማፂኔ ማላ። ማፂኔይ ባ ማልዖቴꬃ ዬዲዛ ጊዲኮ ጌዴ ካሬ ዬጌቲዲ ዬꬌቴꬃፌ ኣቲን፥ ዛሪዲ ዴማናስ ዳንዳዪዜ? ኢንቴ ዴሬስ ፖዖ። ዙማ ቦላ ዲዛ ካታማያ ቆቴታናስ ዳንዳዑኩ። ኣሲ ፆምፔ ኦይꬂዲ ኬꬃን ዲዛ ኣሳ ኩሜꬃስ ፖዓና ማላ ꬎቃሶን ዎꬄስ ኣቲን ጌማ ሶን ዎꬂ ኤሬና። ሄሳꬆካ ኣሳይ ኢንቴ ሎዖ ኦሶ ቤዪዲ ሳሎን ዲዛ ኢንቴ ኣዋ ቦንቻና ማላ ኢንቴ ፖዖይ ኣሳ ሲንꬃን ፖዖ። “ታኒ ሙሴ ዎጋኔ ናቤታ ቃላ ሻራና ዪዳ ኢንቴስ ሚሳቶፖ፤ ፖላናስ ያዲስ ኣቲን ሻራናስ ያቤኬ። ታ ኢንቴስ ቱሙ ጋይስ፤ ሳሎይኔ ሳዓይ ኣꬋና ጋካናስ ሙሴ ዎጋይ ዉሪ ፖሌታና ኣቲን ዎጋፔ ኢሲ ፒዳሌይካ ዎይኮ ቄሪኛካ ሻሬቱኩ። ሄሳ ጊሽ ኦኒካ ሃ ኣዛዞታፔ ጉፂዛሮ ጊዲኮካ ኦꬆንታ ዬጊ ኣꬊኮ፥ ሃንኮይታካ ዬꬊ ኣꬋና ማላ ታማርሲኮ ሳሎ ካዎቴꬃን ሄሳዴይ ጉꬅ ጌቴቲ ፄይጌታና፤ ጊዶ ኣቲን ሃይታ ኣዛዞታ ኦꬂ ፖሊሼ ሃንኮይታ ፖላና ማላ ታማርሲኮ ሄሳዴይ ሳሎ ካዎቴꬃን ጊታ ጌቴታና። ታ ኢንቴስ ጋይስ፥ ኢንቴ ፂሎቴꬂ ፋርሳዌታፔኔ ሙሴ ዎጋ ታማርሲዛይታ ፂሎቴꬃፔ ኣꬎንታ ኣጊኮ ሳሎ ካዎቴꬅ ጌላና ዳንዳዬኬታ። “ካሴ ኣሳታስ ‘ዎꬎፓ፤ ዎꬊዳዴ ቦላ ፒርዴታና’ ጌቴቲዳይሳ ኢንቴ ሲዪዴታ። ታ ቃሴ ኢንቴስ ጊዛይ ባ ኢሻ ቦላ ኦጌይ ባይንዳ ሃንቄቲዛዴ ቦላ ፒርዴታና፤ ኦኒካ ባ ኢሻ ‘ናፓይ’ ጊዛዴይ ዱላታ ሲንꬃን ኦይሼታና። ‘ኤያይ’ ጊዛዴ ጋናሜ ታማ ፒርዳይ ናጌስ። ሄሳ ጊሽ ኔኒ ያርሾ ሺሺዛሶን ፆሳስ ያርሻና ጊሺን ኔ ኢሻይ ኔ ቦላ ሚሼቲዳዚ ኔስ ቆፔቲኮ፥ ኔ ያርሺዛይሳ ሄን ያርሾሶን ኣጋጋዳ ኮይሮ ባዳ ኔ ኢሻራ ጊጋ፤ ሄሳፌ ጉዬ ሲማዳ ኔ ያርሾዛ ፆሳስ ሺሻ። “ኔና ሞቲዳ ኔ ሞርኬይ ኔ ቦላ ፒርዲሶንታ ማላ፥ ፒርዲዛ ዳናይ ቃቺዛይሳስ ኔና ኣꬂ ኢሞንታ ማላ፥ ቃሾ ኬꬃን ኔ ዎꬎንታ ማላ ቡሮ ኦጌ ቦላ ዳሼ ኔ ሞርኬራ ኤሌላ ጊጋይቻ። ታ ኔስ ቱሙ ጋይስ፤ ኢዚ ፒርዲሲ ዉርሲዳ ጊዲኮ ዉርሴꬃ ሳንቲዮ ቃንፃና ጋካናስ ቃሾፔ ቢርሼታካ። “ ‘ላይማቶፓ’ ጊዛይሳ ኢንቴ ሲዪዴታ። ታኒ ጊዲኮ ኢንቴና ሂዝጋይስ፤ ማጫሳ ኣሞ ኣይፌራ ፄሊዳዴይ ዉሪ ባ ዎዝናን ኢዚራ ላይማቲዴስ። ናጋራ ኦꬃናስ ኔ ኡሻቻ ኣይፌይ ኔስ ጋሶ ጊዲኮ ኔፔ ኬሳ ዎራ ዬጋ፤ ኔ ኣሳቴꬃይ ኩሜꬅ ጌዴ ጋናሜ ታማን ዬጌታናፔ ኔ ኣሳቴꬃፌ ኢሲና ፓጪኮ ሎዖ። ኔ ኡሻቻ ኩሼይ ናጋራ ኦሶስ ጋሶ ጊዲኮ ኔፔ ቃንፃ ዲጋ፤ ኔ ኣሳቴꬃይ ኩሜꬅ ጋናሜን ዬጌታናይሳፌ ኔ ኣሳቴꬃፌ ኢሲ ቢሊቴይ ኔስ ፓጬ ጊዲኮ ሎዖ። “ ‘ማቾ ኣንጂ ዬዲዛዴይ ፒርማ ዋራቃታ ኢዚስ ኢማና ቤሴስ’ ጌቴቲዴስ። ታኒ ቃሴ ኢንቴና ሂዝጋይስ፥ ሃራ ኣሳራ ላይማቲሺን ቤዮንታ ዲሼ ባ ማቾ ኣንጂዛዴይ ዉሪ ኢዛ ላይማታና ማላ ኦꬄስ። ሄሳꬆካ ኣንጄቲዳሮ ኤኪዛዴይካ ላይማቲዳ ማላ ቆዴቴስ። “ካሴ ኣሳታስ ‘ዎርዶ ጫቆፋ፤ ፆሳ ሲንꬃን ኔ ጫቂዳይሳ ናጋ’ ጌቴቲዳይሳ ኢንቴ ሲዪዴታ። ታ ቃስ ኢንቴና ኣይኮካ ጫቆፍቴ ጋይስ፤ ሳሎይ ፆሳስ ኡቲዛ ኣልጋ ጊዲዳ ጊሽ ሳሎን ጫቆፍቴ። ቢታይ ፆሳ ቶሆይ ዬꬊዛሶ ጊዲዳ ጊሽ ቢታንካ ጫቆፍቴ። ዎጋ ካዎ ካታማ ጊዲዳ ጊሽ ዬሩሳላሜንካ ጫቆፍቴ። ኢንቴ ሁዔንካ ጫቆፍቴ፤ ኢንቴ ሁዔ ቢናናፔ ኢሲኔዮካ ቦꬅ ዎይኮ ካሬꬅ ሂስታናስ ዳንዳዬኬታ። ሄሳ ጊሽ ኢንቴ ኢንቴ ጊዶን ሃሳዬቲሺን ኢንቴ ሃሳያይ “ኤ” ጋናዝ ጊዲኮ “ኤ” ጊቴ “ኣካይ” ጋናዝ ጊዲኮ “ኣካይ” ጊቴ፤ ሄሳፌ ካሬ ጊዲዳይ ዉሪ ኢታ ኣሳፔ ዪዛዛ። “ ‘ኣይፌ ጊሻስ ኣይፌ ኣቻ ጊሻስ ኣቻ’ ጌቴቲዳይሳ ኢንቴ ሲዪዴታ። ታ ቃሴ ኢንቴስ ጊዛይ ኢታ ኦꬂዳዴራ ኤቄቶፒቴ፤ ጊዶ ኣቲን ኔስ ኡሻቻ ሻጋላ ባቂዛዴስ ሃንኮይሳካ ዩሻ ቤሳ። ኢሲ ኣሲ ኔ ጊዶራ ማይዒዳይሳ ኔፔ ኤካናስ ኔና ሞቲኮ ቦላራ ማይዒዳይሳካ ጉጃዳ ኢዛስ ኢማ። ኢሲ ኣሲ ኔና ኢሲ ሳቴ ኦጌ ኔ ባና ማላ ዎልቃꬂኮ ኢሲፌ ናምዑ ዳኮ ጊዳና ኦጌ ኢዛራ ባ። ኔና ዎሲዛዴስ ኢማ፤ ኔፔ ታልዔ ኤካናስ ኮዪዛዴስ ዞኮ ዛሮፓ። “ ‘ኔ ላጌ ሲቃ፤ ኔ ሞርኬ ኢፃ’ ጌቴቲዳይሳ ሲዪዴታ። ታ ቃስ ኢንቴና ኢንቴ ሞርኬታ ዶሲቴ፤ ኢንቴና ጎዲዛይታስ ዎሲቴ ጋይስ። ኢንቴ ሄሳꬆ ኦꬂኮ ኢንቴ ሳሎ ኣዋስ ናይታ ጊዳና። ኢዚ ኣዋ ኣርሼ ኢታታሲኔ ሎዖታስ ኢሲ ቦላ ጋꬂ ኢሜስ። ኢራካ ፂሎታሲኔ ናጋራንቻታስ ኢሲ ቦላ ቡኪሴስ። ኢንቴና ዶሲዛይታ ፃላላ ኢንቴ ዶሲኮ ኢንቴስ ኣዛ ጎዓይ ዲዜ? ቃራፃ ቃንፂሲዝይቲ ሄሳꬆ ኦꬄቴኔ? ኢንቴ ኢሻታ ፃላ ኢንቴ ሳሮቲኮ ሃንኮይታፔ ኣዛን ሎዔቲ? ኣማኖንታይቲካ ሄሳꬆ ኦꬄቴስ። ሄሳ ጊሽ ኢንቴ ሳሎ ኣዋይ ዎሶይ ባይንዳይታ ጊዲዳ ማላ ኢንቴካ ዎሶይ ባይንዳዴ ጊዲቴ። “ኣሲ ኢንቴና ቤያና ማላ ኣሳ ሲንꬃን ሎዖ ኦꬆንታ ማላ ናጌቲቴ፤ ሄሳꬆ ኦꬂኮ ኢንቴ ሳሎ ኣዋፔ ጎዓ ዴሜኬታ። ኢንቴ ማንቆታስ ማዶ ኢሚዛ ዎዴ ኣሲ ታና ቤዮ ጊዲ ኣሳ ሲንꬃን ቦንቼታናስ ኦጌኒኔ ኣይሁዳ ዎሳ ኬꬃን ፁሩምባ ፑኒሲዛ ቆꬌፔ ቆሞን ሃኒዛይታꬆ ኦꬆፍቴ። ታ ኢንቴስ ቱሙ ጋይስ፤ ኢስቲ ባ ዋጋ ኡባ ሃን ኤኪቺዳ። ኢንቴ ማንቆታስ ኢሚሺን ኡሻቻ ኩሼይ ኦꬂዛ ሃዲሪሳ ኩሼይ ኤሮፖ። ኢንቴ ኢሞይ ጌማን ጊዶ፤ ቆታን ኦሴቲዳይሳ ቤዪዛ ኢንቴ ኣዋይካ ኢንቴ ዋጋ ኢንቴስ ኢማና። “ኢንቴ ዎሲሼ ቆꬌፔ ቆሞን ሃኒዛይታ ማላ ሃኖፒቴ፤ ኢስቲ ኣሲ ቤያና ማላ ኣይሁዳ ዎሳ ኬꬃታኒኔ ኦይዱ ኦጌ ቦላ ኤቂዲ ዎሳናስ ዶሴቴስ። ታ ኢንቴስ ቱሙ ጋይስ፤ ኢስቲ ኩሜꬃ ዋጋ ኤኪቺዳ። ኔ ዎሳና ጌሊዛ ኔ ኪፊሌ ጌላ፤ ካሬካ ኔ ቦላ ጎርዳዳ ጌማን ዲዛ ኔ ኣዋኮ ዎሳ። ጌማን ኦሴቲዳይሳ ቤዪዛ ኔ ኣዋይ ኔ ኦሶ ማላ ኔስ ኢማና። “ኣማኖንታ ኣሳይ ኢሲ ቃላ ዛሪ ዛሪ ዎሲኮ ኢስታስ ሲዬቲዛ ሚሳቲን ኢስቲ ዛሪ ዛሪ ጊዛይሳꬆ ኢንቴካ ዎሲሼ ኢሲ ቃላ ዛሪ ዛሪ ጎፒቴ። ጊዶ ኣቲን ኢንቴ ኣዋይ ኢንቴ ዎሳናፔ ካሴቲዲ ኢንቴስ ኣዚ ኮሺዛኮኔ ኤሪዛ ጊሽ ኢንቴ ኢስታ ሚሳቶፒቴ። ኢንቴ ዎሲሼ ‘ሳሎን ዲዛ ኑ ኣዋዉ! ኔ ሱንꬂ ኣንጄቶ። ኔ ካዎቴꬂ ሃዮ፤ ኔ ሼኔይ ሳሎን ጊዲዳ ማላ ሳዓንካ ሃኖ። ሃቺስ ጊዲዛ ካꬅ ኑስ ሃቺ ኢማ። ኑ ኑና ቆሂዳይታስ ኣቶ ጊዛ ማላ ኔካ ኑ ቆሆ ኑስ ኣቶ ጋ። ኢታፔ ኑና ኣሻ ኣቲን ኑና ፓጬን ጌልꬆፋ፤ ቦንቾይ ሜርፔ ሜርና ጋካናስ ኔይሳ። ኣሚን’ ጊ ዎሲቴ። “ኢንቴ ኢንቴና ቆሂዳይታስ ኣቶ ጊኮ ኢንቴ ሳሎ ኣዋይ ኢንቴስ ኣቶ ጋና። ቃሴ ኢንቴ ኣሳ ናጋራ ኣቶ ጎንታ ኢፂኮ ኢንቴ ኣዋይካ ኢንቴ ናጋራ ኣቶ ጌና። “ኢንቴ ፆማ ፆሚሼ ቆꬌፔ ቆሞራ ፆሚዛይታꬆ ሹሎፍቴ። ኢስቲ ባ ፆሚዛይሳ ኣሲ ኤራና ማላ ባ ኣይፌሶ ኢሴቴስ። ታ ቱሙ ጋይስ፤ ሄሳꬆ ኦꬂዛይቲ ባ ዋጋ ኩሜꬅ ኤኪቺዳ። ኔኒ ፆማ ፆማሼ ኔ ኣይፌሶ ሜጬታ፥ ኔ ሁዔ ቲዬታ። ሄሳꬆ ኔ ፆሚኮ ጌማን ዲዛ ኔ ኣዋይ ፃላላ ኤሪዛዚኔ ኣሲ ኦኒካ ኤሮንታ ቆታን ጊዳና። ቆታን ኦሴቲዳይሳ ቤዪዛ ኔ ኣዋይካ ኔ ዋጋ ኔስ ኢማና። “ቢላይ ሚዛሶን ቡቂዲኔ ሺይዲ ሞሬቲዛሶን ካይሶይ ቦኪዲ ካይሳናስ ዳንዳዪዛሶን፥ ሃ ቢታ ቦላ ኢንቴስ ሚሼ ሺሾፍቴ። ጊዶ ኣቲን ቢላይ ማናስ፥ ቡቂዲ ዎይኮ ሺይዲ ሞሬቶንታሶን፥ ካይሶይ ቦኪ ኤካና ዳንዳዮንታሶን ሄን ሳሎን ኢንቴስ ሚሺ ሺሺቴ። ኔ ሚሻይ ዲዛሶን ኔ ዎዝናይ ሄን ዴስ። “ኣይፌይ ኣሳቴꬃስ ፖዖ፤ ሄሳ ጊሽ ኔ ኣይፌይ ፓፃ ጊዲኮ፥ ኔ ኩሜꬃ ኣሳቴꬃይካ ፖዖ ጊዳና። ኔ ኣይፌይ ሃርጋንቻ ጊዲኮ፥ ኔ ኩሜꬃ ኣሳቴꬃይካ ꬉማ ፃላ ጊዳና። ሂስቲኮ ኔናን ዲዛ ፖዖይ ꬉማ ጊዲኮ፥ ቃሴ ꬉማይ ዋኒዳ ጊርድ ጊዳ ꬉማ ጊዳንዴ? “ኢሲ ኣሲ ናምዑ ጎዳስ ኦꬃና ዳንዳዬና። ኢሳ ኢፂዲ ናምዓንꬆዛ ዶሳና፤ ዎይኮ ኢሳ ቦንቺዲ ናምዓንꬃ ሌቃና፤ ፆሳሲኔ ሚሻስ ናምዓታስ ጋꬂ ኦꬃናስ ዳንዳዬቴና። “ሄሳ ጊሽ ታ ኢንቴና ኢንቴ ዱሳ ጊሽ ኣይ ሚኖ? ኣይ ኡዪኖ? ኣይ ማይዒኖ? ጊዲ ሂርጎፍቴ ጋይስ። ሼምፖይ ቁማፔ፥ ኣሾይ ማይዖፔ ኣꬌኔ? ኣኔ ሳሎ ካፎታ ፄሊቴ! ዜሬቴና፥ ማፄቴና፥ ዲዔን ቆሌቴና ሺን ኢንቴ ሳሎ ኣዋይ ኢስታ ሚዜስ። ኢንቴ ኢስታፌ ኬሂ ኣꬌኬቲ? ኣኔ ኢንቴፌ ዳሮ ዋዬቲዲ ባስ ኢሜቲዳ ላይꬃ ቦላ ሃራ ኢሲ ጋላስ ጉጃና ዳንዳዪዛ ኣሲ ዲዜ? “ቃሴ ማይዖ ጊሽ ኣዛስ ሂርጌቲ? ኣኔ ጮ ዴንባን ዲዛ ጪሻታ ፄሊቴ፤ ዳቡሬቴና ዎይኮ ሱቄቴና። ሄሳ ጊሽ ታ ኢንቴና ጊዛይ ሃራይ ኣቶ ሺን ካዎ ሶሎሞኒካ ባ ቦንቾራ ሃ ጪሻታፔ ኢሲኔይ ማላ ሎዖ ማይዒቤና። ኢንቴኖ ፓጬ ኣማኖይ ዲዛይቶ! ሃቺ ኣሳ ኣይፌን ቤቲዲ ዎንቶ ታማን ዎꬋና ማታ ሃይሳꬆ ማይዚዛ ፆሲ ኢንቴና ሄሳፌ ሎዔꬂ ኣꬂ ማይዛናስ ዳንዳዬኔ? ሄሳ ጊሽ ኑ ኣይ ማኔ? ኣይ ኡያኔ? ኣይ ማይዓኔ? ጊዲ ሂርጎፍቴ። ሃንኮ ኣማኖንታ ኣሳይ ሃይሳ ዴማናስ ዳሮ ቆፔስ። ሃይሲ ዉሪ ኢንቴስ ኮሺዛይሳ ኢንቴ ሳሎ ኣዋይ ኤሬስ። ሃራፔ ሲንꬃቲዲ ፆሳ ካዎቴꬃ ፂሎቴꬅ ኮዪቴ፤ ሃይቲ ዉሪ ኢንቴስ ጉጄታና። ሄሳ ጊሽ ዎንቶስ ኬሂ ቆፖፍቴ፤ ዎንቶ ሜቶይ ዎንቶስ ኣቆ፤ ኢሲ ኢሲ ጋላሳይ ባሲ ጊዲዛ ሜቶራ ዴስ። “ኢንቴ ቦላ ፒርዴቶንታ ማላ ሃራ ኣሳ ቦላ ፒርዶፍቴ። ኢንቴ ፒርዲዳ ማላ ኢንቴ ቦላካ ፒርዴታና። ኢንቴ ማኪዳ ሚሻራ ኢንቴስ ማኬታና። ኔ ኣይፌን ዲዛ ጊታ ሚꬃ ቤዮንታ ዳሼ ኔ ኢሻ ኣይፌን ዲዛ ቄሪ ቡራ ኣዛስ ፄላይ? ኔ ኣይፌን ጊታ ሚꬂ ዲሺን ኔ ኢሻ ‘ኣኔ ታ ኔ ኣይፌፔ ቄሪ ቡራዮ ኬሳይስ’ ጋናስ ዋና ዳንዳያይ? ኔኖ ቆꬌፔ ቆሞን ሃኒዛይሶ ካሴታዳ ኔ ኣይፌን ዲዛ ጊታ ሚꬃ ኬሳይቻ። ሄሳፌ ካላዳ ኔ ኢሻ ኣይፌን ዲዛ ቡራ ኬሳናስ ሎዔꬃ ፄላንዳሳ። ባ ቶሆን ዬꬎንታ ማላኔ ሲሚዲ ኢንቴና ሳፂ ዳኬሬꬆንታ ማላ ኣንጄቲዳይሳ ካናታ ሲንꬃን ዬጎፍቴ፤ ቃሴ ኢንቴ ዎርቃካ ጉዱንꬃታ ሲንꬃን ዬጎፍቴ። “ዎሲቴ ኢንቴስ ኢሜታና፤ ኮዪቴ ኢንቴ ዴማና፤ ካሬ ቆፂቴ ኢንቴስ ዶዬታና። ዎሲዳ ኡባስ ኢሜታና፤ ኮዪዛ ኣሲ ዴማና፤ ቆፂዛዴስ ካሬይ ዶዬታና። ኢንቴ ጊዶፌ ኢሳዴስ ናይ ኡኬꬅ ዎሲኮ ሹች ኢሚዛ ኣዋይ ዳንዴ? ዎይኮ ሞሌ ዎሲኮ ሾሽ ኢሚዛዴይ ዳንዴ? ሂስቲን ኢንቴ ኢታታ ጊዲ ኡቲዲ ኢንቴ ናይታስ ሎዖ ሚሽ ኢሞ ኤሪዛይታ ጊዲኮ ኢንቴ ሳሎ ኣዋይ ኢዛ ዎሲዛይታስ ዋኒዲ ኣꬊዛ ሎዖ ሚሽ ኢሜኔ? ሄሳ ጊሽ ሃራ ኣሲ ኢንቴስ ኦꬃና ማላ ኢንቴ ኮዪዛይሳ፥ ኢንቴካ ሃራታስ ኦꬂቴ። ሙሴ ዎጋይኔ ናቤቲ ሃይሳን ኩዬቴስ። “ፁንꬃ ፔንጌራ ጌሊቴ፤ ꬋዮሶ ኤፊዛ ኦጌይ ጊታ፤ ፔንጌይካ ኣሆ፤ ዳሮ ኣሳይ ሄ ፔንጌዛራ ጌሌስ። ዴዖስ ጋꬂዛ ኦጌይ ጊዲኮ ፁንꬃ፤ ፔንጌይካ ፁንꬃ፤ ጌላናይቲካ ጉꬃታ ፃላላ። “ኢስታስ ጊዶ ባጋይ ካና ሱይቴ ማላ ጊዲ ኡቲዲኔ ዶርሳ ኢቴ ማይዒዲ ኢንቴ ጊዶ ጌሊዲ ጊዶራ ኦꬂዛ ዎርዶ ናቤታፔ ናጌቲቴ። ኢንቴ ኢስታ፥ ኢስታ ኦሶን ኤራንዴታ። ኣጉንꬃ ዎራፔ ዎይኔይ፥ ኪንዲቾ ኣጉንꬃፌ ባላሴ ኣይፌይ ማፄቲዜ? ሄሳꬆካ ሎዖ ሚꬂ ዉሪ ሎዖ ኣይፌስ፤ ኢታ ሚꬂካ ኢታ ኣይፌ ኣይፌስ። ሎዖ ሚꬂ ኢታ ኣይፌ ኣይፋናስ ዳንዳዮንታይሳ ማላ ኢታ ሚꬂ ሎዖ ኣይፌ ኣይፋናስ ዳንዳዬና። ሎዖ ኣይፌ ኣይፎንታ ሚꬂ ዉሪካ ቃንፄታናኔ ታማን ዬጌታና። ሄሳ ጊሽ ኢንቴ ኢስታ ኢስቲ ኣይፊዛ ኣይፌን ሻኪ ኤራና። “ሳሎን ዲዛ ታ ኣዋ ሼኔ ፖሎንታ ዲሼ ታና ‘ጎዶ! ጎዶ!’ ጊዛይ ዉሪ ሳሎ ካዎቴꬅ ጌሌና። ሄ ጋላስ ዳሮቲ ‘ጎዶ! ጎዶ! ኑኒ ኔ ሱንꬃን ቲንቢቴ ዮቲቤኮኒ? ኔ ሱንꬃን ዳይዳንꬂ ኬሲቤኮኒ? ኔ ሱንꬃን ዳሮ ማላታ ኦꬂቤኮኒ?’ ጋና። ሄ ዎዴ ታ ኢስታስ ‘ታ ኢንቴና ሙሌካ ኤሪኬ! ኢንቴ ኢታቲ ታፔ ሃኪቴ’ ጋዳ ቆንጬራ ታ ኢስታስ ዮታና። “ሂስቲኮ ሃይሳ ታ ቃላ ሲይዲ ኦሶን ፔይሺዛዴይ ባ ኬꬄ ዛላ ቦላ ኬፂዛዴ ሚሳቴስ። ዴፆ ኢራይ ቡኪን፤ ሃሮይካ ሃሮቲዴስ፤ ጫርኮይካ ጫርኪዴስ፤ ኬꬃካ ሱጊዴስ ሺን ዛላ ቦላ ኬፄቲዳ ጊሽ ኩንዲቤና። “ሃይሳ ታ ቃላ ሲይዲ ኦꬆንታዴይ ጊዲኮ ባ ኬꬄ ኣጬ ቦላ ኬፂዳ ኤያ ኣሳ ማላ። ዴፆ ኢራይ ቡኪን ሃሮይካ ሃሮቲዴስ፤ ጫርኮይካ ጫርኪዴስ፤ ሄ ኬꬃካ ሱጊዴስ፤ ኬꬃይካ ኢታ ኩንዴꬅ ኩንዲዴስ” ጊዴስ። ዬሱሲ ታማርሲ ዉርሲን ኣሳይ ኢዛ ቲሚርቴዛን ማላሌቲዴስ። ጋሶይካ ሙሴ ዎጋ ታማርሲዛይታ ማላ ጊዶንታ ኢዚ ጎዳቴꬂ ዲዛ ኣሳ ማላ ታማርሲዴስ። ዬሱሲ ዙማ ቦላፌ ዎꬊን ዳሮ ዴሬይ ኢዛ ካሊዴስ። ኢሲ ኢንቺራቻ ሃርጌይ ዲዛዴይ ዬሱሳኮ ሺቂዲ ኢዛ ሲንꬃን ጉልባቲዲ “ጎዶ! ኔ ኮይኮ ታና ፓꬃናስ ዳንዳያሳ” ጊዴስ ዬሱሲ ባ ኩሼ ዬዲዲ “ታ ዶሳዲስ፤ ፓፃ!” ጊን ኣዴዚ ሄ ሃርጌዛፔ ሄራካ ፓፂዴስ። ቃሴካ ዬሱሲ ኣዴዛ “ኔ ፓፂዳይሳ ኦናስካ ዮቶፓ፤ ጊዶ ኣቲን ባዳ ኔና ቄሴስ ቤሳ። ኢስቲ ኣዛዚዳ ያርሾዛ ጋꬃ፤ ሄሲካ ኢስታስ ማርካ ጊዳና” ጊዴስ። ዬሱሲ ቂፊርናሆሜ ጋኪዳ ማላ ማቶ ሃላቃይ ኢዛኮ ሺቂዲ ኢዛ ሂዝጊ ዎሲዴስ። “ጎዶ! ታ ኣሽካራይ ኬሂ ሳኬቲዲ ኬꬃን ኢቺዲ ዴስ” ጊዴስ። ዬሱሲካ ኢዛስ “ታ ባዳ ፓꬃና” ጊዴስ። ማቶ ሃላቃይ ኢዛስ ዛሪዲ “ታ ኔና ታ ኬꬄ ጌልꬃናስ ቤሲዛዴ ጊዲኬ፤ ጊዶ ኣቲን ኔ ሃን ዳዳ ኢሲ ቃላ ፃላ ጊኮ ታ ኣሽካራይ ፓፃና። ታስካ ታና ኣዛዚዛ ሃላቃቲ ታፔ ቦላራ ዴቴስ፤ ቃሴካ ታስ ኣዛዜቲዛ ዎታዳራቲ ታፔ ጋርሳራ ዴቴስ፤ ኢስታፌ ኢሳ ‘ባ!’ ጊኮ ቤስ፤ ቃሴ ኢሳ ‘ሃያ!’ ጊኮ ዬስ፤ ታ ኣሽካራ ‘ሄሳ ኦꬃ!’ ጊኮ ኦꬄስ” ጊዴስ። ዬሱሲ ኢዛ ዛሮዛን ማላሌቲዲ ባና ካሊዛይታስ “ታ ኢንቴስ ቱሙ ጋይስ፤ ሃራይ ኣቶሺን ኢስራዔሌታ ጊዶን ሃይሳ ማላ ኣማኖይ ዲዛዴ ኢሳዴካ ዴማቤኬ። ታ ኢንቴስ ዮታይስ፤ ዳሮቲ ኣዋ ኣርሼይ ሞኪዛ ባጋፌኔ ዉሊዛ ባጋፌ ያና። ሳሎ ካዎቴꬃ ማዳን ኣብራሃሜንታራ ዪሳቃንታራኔ ያቆቤንታራ ኢሲፌ ኡታና። ሳሎ ካዎቴꬂ ኢስታስ ጊዳና ቤሲዛ ኣሳቲ ሄን ካሬ ꬉማን ዬጌታና። ሄንካ ዬሆይኔ ኣቻ ጋርጬች ጊዳና” ጊዴስ። ዬሱሲካ ማቶ ሃላቃስ “ኔ ባ ኔ ኣማኖ ማላ ኔስ ሃኖ” ጊዴስ፤ ኣሽካራዚ ሄራካ ፓፂዴስ። ዬሱሲካ ቡሮ ጴፅሮሳ ኬꬄ ጌልሺን ጴፅሮሳ ቦሎቴያ ሚሾ ሃርጌ ሳኬታዳ ኢቺዳሮ ቤዪዴስ። ኢዚ ኩሼ ዬሱሲ ቦቺን ሚሾ ሃርጌይ ኣጊዴስ። ኢዛካ ዴንዳዳ ዬሱሳ ሞካዱስ። ሄ ጋላሳ ኦማሪስ ዳይዳንꬂ ኦይኪዳ ዳሮ ኣሳታ ዬሱሳኮ ኤሂዳ። ኢዚካ ቱና ኣያናታ ባ ቃላራ ኢስታፌ ኬሲዴስ፤ ሃርጋንቻታካ ኡባ ፓꬂዴስ። ኢሳያሲ “ኢዚ ኑ ሃርጌ ኤኪዴስ፤ ኑ ሳኮካ ቶኪዴስ” ጊዳ ቃላይ ሃይሳን ፖሌቲዴስ። ዳሮ ኣሳይ ኢዛ ጊዶꬂዳይሳ ቢዪዲ ዬሱሲ ኣሳ ኣባፌ ሄ ፒንꬅ ፒናና ማላ ኣዛዚዴስ። ሄሳ ዎዴ ኢሲ ኣይሁዳ ኣማኖ ታማርሲዛዴይ ኢዛኮ ሺቂዲ “ኣስታማሬ! ኔ ቢዛሶ ኣዋካ ታ ኔና ካላና” ጊዴስ። ዬሱሲካ ኢዛስ ዛሪዲ “ዎርካናታስ ኦላይ ዴስ፤ ሳሎ ካፎታስ ኬꬂ ዴስ፤ ታስ ኣሳ ናስ ጊዲኮ ሁዔ ጌልꬂዛሶይ ባዋ” ጊዴስ። ኢዛ ካሊዛ ኢሲ ሃራ ኣሲ ቃሴ “ጎዶ! ኮይሮ ባዳ ታ ኣዋ ሞጎ?” ጊዴስ። ኢዚ ቃሴ “ሃይቂዳይቲ ባ ሃይቄꬅ ሞጌቶ፤ ኔኒ ጊዲኮ ታና ካላ” ጊዴስ። ሄሳፌ ጉዬ ዬሱሲካ ዎጎሎን ጌሊን ኢዛ ካሊዛይቲካ ኢዛራ ኢሲፌ ቢዳ። ቆፖንታ ኣባ ጊዶን ዳምባላይ ዴንዲዲ ዎጎሎዮ ሚታና ጋካናስ ኢስታ ዋይሲዴስ። ሄሲ ዉሪ ሃኒሺን ዬሱሲ ꬊስኪዴስ። ኢዛ ካሊዛይቲ ኢዛ ቤጎꬂዲ “ጎዶ! ኑ ꬋዮስ፤ ኑና ኣሻ!” ጊዳ። ዬሱሲካ ኢስታ “ኢንቴኖ ኣማኖይ ፓጪዳይቶ! ኣዛስ ሃይሳ ማላ ባቤቲ?” ጊዴስ። ሄሳፌ ዴንዲዲ ጫርኮዛኔ ኣባ ዳምባላ ኢዚ ሃንቂን ሄራካ ሲርጵ ጊዴስ። ኢስቲካ “ሃይሲ ኣባይኔ ጫርኮይካ ኢዛስ ኣዛዜቲዛዴይ ኢዚ ዋኒዳዴ?” ጊዲ ማላሌቲዳ። ኢዚ ኣባ ፒኒዲ ጌርጌሴኖኔ ጌቴቲዛ ዴሬ ጋኪዳ ማላ ዳይዳንꬂ ኦይኪዳ ናምዑ ኣስ ዳይቲ ባ ዲዛ ዱፎፔ ኬዚዲ ኢዛራ ጋጊዳ። ኣሲ ሄ ኦጌዛራ ኣꬋናስ ዳንዳዬቶንታ ማላ ኣሳስ ዳሮ ኬሂ ሜቶ ጊዲ ዴቴስ። ኢስቲካ “ፆሳ ናዉ! ኔስ ኑናራ ኣዛ ኢሲፌቴꬅ ዲዜ? ኑ ዎዴይ ጋኮንታ ዲሺን ኑና ፁጋና ያዲ?” ጊዲ ዋሲዳ። ሄን ኢስታፌ ጉꬅ ሃኪዲ ዳሮ ጉዱንꬃ ዉዴይ ኢሲ ቦላ ሄሜቴስ። ዳይዳንꬃቲ ዬሱሳ “ኔ ኑና ኬሳና ጊዲኮ ሃይታን ዳሮ ጉዱንꬃታን ኑ ጌላና ማላ ኑስ ፒቃዴ ኢማ” ጊዲ ዎሲዳ። ዬሱሲካ ኢስታ “ቢቴ!” ጊዴስ። ዳይዳንꬃቲካ ኢስታፌ ኬዚዲ ጉዱንꬃታን ጌሊዳ። ጉዱንꬃቲ ዉሪካ ባ ዲዛሶ ኣፎራ ቢቻርሼ ኣባን ጌሊዲ ሃꬃን ሚቴቲዲ ሃይቂዳ። ጉዱንꬃ ሄሚዛይቲ ኤሌሊዲ ካታማይ ዲዛሶ ቢዲ ጉዱንꬃይ ሃኖይሳኔ ዳይዳንꬂ ኢስታ ኦይኪዳ ኣሳታ ቦላ ሃኒዳይሳ ኡባ ኣሳስ ዮቲዳ። ካታማ ኣሳይ ዉሪ ዬሱሳራ ጋጋናስ ኬዚዴስ። ዬሱሳ ቤዪዲኔ ኢስታ ዴሬ ዬዲ ባና ማላ ኢዛ ዎሲዳ። ሄሳፌ ጉዬ ዬሱሲ ኣባ ቦላ ዎጎሎራ ፒኒዲ ካሴ ባ ዲዛ ካታማ ዪዴስ። ሄን ኢሲ ጉንዳ ኣዴዛ፥ ኣሳይ ሃላራ ቶኪዲ ዬሱሳኮ ኤሂዴስ። ዬሱሲካ ኢስታ ኣማኖ ቤዪዲ ጉንዳ ኣዴዛ “ኣይኮይ ባ፤ ሃይሶ ናዞ! ኔ ናጋራይ ኣቶ ጌቴቲዴስ” ጊዴስ። ሄ ዎዴ ሙሴ ዎጋ ታማርሲዛይቲ “ሃይሲ ፆሳ ጫሻ” ጊዲ ባ ዎዝናን ቆፒዳ። ዬሱሲ ኢስታ ቆፋ ኤሪዲ “ኢንቴ ዎዝናን ኢታ ዮዖ ኣዛስ ቆፔቲ? ‘ኔ ናጋራይ ኣቶ ጌቴቲዴስ’ ጉሳፌኔ ‘ዴንዳዳ ባ!’ ጉሳፌ ኣዋይሲ ካዉሼ? ጊዶ ኣቲን ኣሳ ናስ ቢታ ቦላ ኣሴ ናጋራፔ ማራናስ ሼኔይ ዲዛይሳ ኤራና ማላሳ” ጊዲ ጉንዳ ኣዴዛ “ዴንዳ! ኔ ሃላ ኤካዳ ጌዴ ኔሶ ባ” ጊዴስ። ጉንዳ ኣዴዚካ ዴንዲዲ ባሶ ቢዴስ። ዴሬይካ ሄሳ ቤዪዲ ማላሌቴꬃኒኔ ባቦን ኩሚዲ ሃይሳ ሲሬ ጎዳቴꬂ ኣሳስ ኢሚዳ ፆሳ ጋላቲዴስ። ዬሱሲ ሄፔ ዴንዲዲ ቢሼ ኢሲ ማቶሳ ጌቴቲዛዴይ ቃራፃ ቃንፂሲዛሶን ኡቲዳይሳ ቤዪዲ “ታና ካላ!” ጊን፥ ዴንዲዲ ኢዛ ካሊዴስ። ዬሱሲ ማቶሳሶን ማዳ ቦላ ዲሺን ዳሮ ቃራፃ ቃራፂዝይቲኔ ናጋራንቻቲ ኢዛኮ ዪዲ ኢዛራኔ ኢዛ ካሊዛይታራ ኢሲፌ ማናስ ኡቲዳ። ፋርሳዌቲ ሄሳ ቢዪዲ ዬሱሳ ካሊዛይታ “ኢንቴና ታማርሲዛይሲ ቃራፃ ቃንፂሲዛይታራኔ ናጋራንቻታራ ዎስቲ ኢስታራ ኢሲፌ ካꬅ ሚዜ?” ጊ ኦይቺዳ። ዬሱሲካ ኢስቲ ጊዛይሳ ሲይዲ ኢስታ “ኣኪሜይ ኮሺዛይ ሳኬቲዳይታስ ኣቲን ሳኬቶንታ ፓፃታስ ጊዴና። ሄሳ ጊሽ ‘ኢንቴ ቢዲ ያርሾ ጊዶንታ ማሮቴꬅ ዶሳይስ’ ጊዛ ቃላ ቢርሼꬅ ታማሪቴ። ናጋራንቻታ ፄይጋና ያዲስ ኣቲን ፂሎታ ፄይጋናስ ያቤኬ” ጊዴስ። ፃማቂዛ ዮሃኒሳ ካሊዛይቲ ዬሱሳኮ ዪዲ “ኑኒኔ ፋርሳዌቲ ፆሚሺን ኔና ካሊዛይቲ ኣዛስ ፆሜቴኔ?” ጊ ኦይቺዳ። ዬሱሲ ኢስታስ “ሚሺራ ላጌቲ ሚሺራዚ ኢስታራ ዲሺን ሙዞታና ቤሲዜ? ሚሺራይ ኢስታፌ ኤኬታና ዎዴይ ያና፤ ኢስቲ ሄ ዎዴ ፆማና። “ጋልዓ ማይዖ ቦላ ኦራꬃ ዎሶ ዎꬂ ሲኪዛ ኣሲ ዴና። ጋልዓ ቦላ ኦራꬅ ዎꬂ ሲኪኮ ኦራꬃዚ ጋላዓዛ ፔꬌሬꬂዲ ሃ ዳሲ ዳሪሳና። ኦኒካ ኦራꬃ ዎይኔ ጫጄ ጋልዓ ሉካሞን ጉጄና። ጉጂዛ ጊዲኮ ሉካሞዚ ꬉቃና፤ ዎይኔ ጫጄዚካ ጉካና፤ ሉካሞዚካ ጎዓይ ባይንዳዚ ጊዳና። ጊዶ ኣቲን ኦራꬃ ዎይኔ ጫጄይ ኦራꬃ ሉካሞዛን ጉጄቴስ። ሄሳ ማላራ ዎይኔ ጫጄዚኔ ሉካሞዚ ሎዖ ናጌቲዲ ጋምዓና” ጊዴስ። ዬሱሲ ኣሳ ሃሳይሶን ዲሺን ኢሲ ሹሜይ ኢዛ ሲንꬃን ኩንዲዲ “ታስ ና ዳራ ሃይቃና ጋዉስ። ኢዛ ፓፃ ዳና ማላ ያዳ ኔ ኩሼ ኢዚ ቦላ ዎꬃርኪ?” ጊን፥ ዬሱሲ ዴንዲዲ ኢዛራ ቢዴስ፤ ዬሱሳ ካሊዛይቲካ ኢዛራ ቢዳ። ታማኔ ናምዑ ላይꬅ ኩሜꬅ ኢዚፔ ሱꬂ ጉኪዛ ኢሲ ማጫሲ ዬሱሳፔ ጉዬራ ያዳ ኢዛ ኣፋላ ማጫራ ቦቻዱስ። ኢዛ ሄሳ ኦꬂዳይ “ታ ኢዛስ ኣፋላ ማጫራ ቦቺዳኮ ፓፃና” ጊዛ ኣማኖይ ኢዚ ዎዝናን ዲዛ ጊሽ ቦቻዱስ። ዬሱሲካ ጉዬ ሲሚ ፄሊዲ ማጫሳዮ “ኣይኮይ ባ፥ ታ ናዬ፤ ኔና ኔ ኣማኖይ ፓꬂዴስ” ጊን ማጫሳያ ሄራካ ፓፃጋዱስ። ዬሱሲካ ሹሜዛ ሶ ማታ ጋኪሺን ዴሬይ ዛዬራኔ ዲንኬራ ዋሲሼ ዬኪዛይሳ ቤዒዲ፥ “ኪቺቴ! ናያ ꬊስካዱስ ኣቲን ሃይቃቤኩ” ጊን ኢስቲ ኢዛ ቦላ ሚጪዳ። ዴሬይ ዉሪ ኬꬃፌ ኬዚን ኢዚ ኬꬄ ጌሊዲ ናይ ኩሼ ኦይኪዴስ፤ ናያካ ዴንዳ ኤቃዱስ። ኢዛ ጎባቴꬂ ሄ ዴሬ ኡባን ሴቴቲዴስ። ዬሱሲካ ሄፔ ቢሺን ናምዑ ቆቄቲ “ዳዉቴ ናዉ! ኑና ማራሪኪ!” ጊዲ ዋሲሼ ኢዛ ጌዶ ካሊዳ። ቆቄቲካ ዬሱሲ ጌሊዳ ኬꬃ ኢዛ ካሊዲ ጌሊዳ። ዬሱሲካ ኢስታ “ታ ኢንቴ ኣይፌ ፓꬃና ዳንዳዒዛይሳ ኣማኔቲ?” ጊዲ ኦይቺዴስ። ኢስቲካ “ኤ፥ ጎዶ!” ጊዳ። ሄሳፌ ጉዬ ዬሱሲ ኢስታ ኣይፌ ቦቺዲ “ኢንቴ ኣማኖ ማላ ኢንቴስ ሃኖ!” ጊዴስ። ኢስታ ኣይፌይካ ፄሊዴስ። ዬሱሲካ “ሃይሳ ኦኒካ ኤሮንታ ማላ” ጊዲ ሚንꬂ ዮቲዴስ። ጊዶ ኣቲን ኢስቲ ቢዲ፥ ሄራ ኡባሶን ዬሱሳ ጊሽ ዎሬሲዳ። ኢስቲ ሄፔ ኬዚሺን ዳይዳንꬂ ኦይኪዳ ኢሲ ዱና ዱዴ ኣስ ዬሱሳኮ ኤሂዳ። ዳይዳንꬃዚ ኬዚዳፔ ጉዬ ሄ ዱና ዱዴ ኣዴዚ ሃሳያ ኦይኪዴስ፤ ዴሬዚካ ማላሌቲዲ “ሃይሳ ማላ ሃኖይ ኢስራዔሌ ቢታን ሃኒን ኑ ቤዪ ኤሮኮ” ጊዳ። ጊዶ ኣቲን ፋርሳዌቲ ዛሪዲ ኢዛ “ዳይዳንꬂ ኬሲዛይ ዳይዳንꬃታ ሃላቃና” ጊዳ። ዬሱሲ ኣይሁዳታ ዎሳ ኬꬃን ኣይሁዳታ ታማርሲሼኔ ፆሳ ካዎቴꬃ ሚሺራቾ ቃላ ዮቲሼ ቃሴካ ሃርጌ ኡባፌ ኣሳ ፓꬂሼ ጉታታን ጉታታን ዩዪዴስ። ኣሳይ ዉሪ ሄሚዛዴይ ባይንዳ ዶርሳ ማላ ኬሂ ሜቶቴቲዲ ፄሊዛይ ባይንዳዴ ጊዲዳይሳ ቤዪዳ ዎዴ ኢስታስ ዳሮ ሚሼቲዴስ። ባና ካሊዛይታስካ “ማፃ ጋኪዳ ካꬃይ ዳሮ ሺን ማፂ ሺሺዛይቲ ጉꬃታ። ሄሳ ጊሽ ካꬃ ጎዳይ ካꬃኮ ኦሳንቻታ ዬዳና ማላ ዎሲቴ!” ጊዴስ። ዬሱሲ ባና ካሊዛ ታማኔ ናምዓታ ባኮ ፄይጊዲ፥ ኢስቲ ቱና ኣያናታ ኬሳና ማላ ቃሴካ ሳኮፔኔ ሃርጌፌ ፓꬃና ማላ ኢስታስ ጎዳቴꬅ ኢሚዴስ። ታማኔ ናምዑ ሃዋሬታ ሱንꬃይ ሃይሳፌ ካሊዛይሳ፤ ኮይሮ ጴፅሮሳ ጌቴቲዛ ሲሞና፥ ኢዛ ኢሻ ኢንዲራሳ፥ ዛቢዶሳ ና ያቆቤኔ ኢዛ ኢሻ ዮሃኒሳ፥ ፒሊጶሳኔ ባርቴሌሞሳ፥ ቶማሳኔ ቃራፃ ሺሺዛ ማቶሳ፥ ኢልፊዮሳ ና ያቆቤኔ ታዶሳ፥ ባ ባጋስ ሚሼቲዛ ሲሞናኔ ጉዬፔ ዬሱሳ ሃይቆስ ኣꬂ ኢሚዳ ኣስቆሮንቶ ዩሁዳ። ሃይታ ታማኔ ናምዓታ ኡባ “ጌዴ ኣይዛቤታ ጋꬅ ቦፒቴ፤ ሳማሪያ ኣሳ ካታማ ጌሎፒቴ። ጊዶ ኣቲን ኢስራዔሌ ዴራ ጋርሳፌ ꬋዪዳ ዶርሳታኮ ቢቴ። ቢዲኔ ‘ሳሎ ካዎቴꬅ ማቲዴስ!’ ጊዲ ሳባኪቴ። ሃርጋንቻታ ፓꬂቴ፥ ሃይቂዳይታ ሃይቆፔ ዴንꬂቴ፥ ኢንቺራቻ ሃርጊዛይታ ጌሺቴ፤ ዳይዳንꬃታ ኬሲቴ፤ ኢንቴ ሜላ ኤኪዳይሳ ሜላ ኢሚቴ፤ ዎርቃ፥ ቢራ ዎይኮ ፃርቂማላ ጊዲን ኢንቴ ኪሴን ኦይኮፍቴ። ኦሳንቻስ ሃቺስ ሃቺስ ጊዲዛዚ ኮሺዛ ጊሽ ኢንቴ ኦጌስ ጊዲ ሺንቄ፥ ኮሾንታ ማይዖ፥ ጫማ ዎይኮ ጉፌ ኤኪ ቦፒቴ። “ኢሲ ካታማ ዎይኮ ኢሲ ጉታ ኢንቴ ጌሊዛ ዎዴ ኢንቴና ሞካናዴ ኮዪ ዴሚዲ ኢዛ ኬꬃን ሼምፒቴ፤ ሄፔ ኬዛና ጋካናስ ሄን ዲሺቴ። ኢንቴ ኦና ኬꬂካ ጌሊሼ ‘ሳሮ’ ጊቴ። ሄ ኬꬃይ ሳሮታይ ቤሲዛ ኬꬄ ጊዲኮ ኢንቴ ሳሮታይ ሄ ኬꬃስ ጊዶ፤ ሶሮታይ ቤሶንታ ኬꬄ ጊዲኮ ኢንቴ ሳሮታይ ኣጊዲ ኢንቴስ ሲሞ። ኣይ ኣሲካ ኢንቴና ሞኪ ኤካናሲኔ ኢንቴ ጊዛ ሲያናስ ኮዮንታዴ ጊዲኮ ሄሳዴ ኬꬃፌ ዎይኮ ሄ ካታማፔ ኬዚሼ ኢስታ ቦላ ዪዛ ጎሜፔ ኢንቴ ኣቲዳይሳስ ማርካ ጊዳና ማላ ኢንቴ ቶሆ ቦላ ዲዛ ጉዱላ ፒቲዲ ኬዚቴ። ታ ኢንቴስ ቱሙ ጋይስ፤ ፒርዳ ጋላስ ሄ ካታማይ ቦላ ጋካና ፒርዳይ ሶዶሜ ቦላን ጋሞራ ቦላ ጋኪዳ ፒርዳፌ ዴፆ ጊዳና። “ታ ኢንቴና ዶርሳ ማላ ካና ሱይቴታ ጊዶራ ኪታይስ። ሄሳ ጊሽ ሾሻ ማላ ጪንጫታኔ ሃራጴ ማላ ኣሽኬታ ጊዲቴ። ኣሳይ ኢንቴና ኦይኪዲ ፒርዲዛ ዱላታስ ሺሻና፤ ኣይሁዳቲ ባ ዎሳ ኬꬃን ኢንቴና ጋራፋና፤ ሄሳ ጊሽ ኢስታፌ ናጌቲቴ። ታ ጌዶን ዴሬ ሃሪዛይታኮኔ ካዎታኮ ኢንቴና ኤፋና፤ ኢስታ ሲንꬄኒኔ ኣማኖንታ ኣሳታ ሲንꬃን ኢንቴ ማርካ ጊዳና። ኢንቴና ኢስቲ ኦይኪዛ ዎዴ ‘ኑ ኣይ ጊ ሃሳዪኖ? ዎዝጊ ዛሮ ኢሚኖ?’ ጊ ሂርጎፍቴ። ሄ ዎዴ ኢንቴ ጋናዚ ኢንቴስ ኢሜታና። ኢንቴናን ሃሳያናይ ኢንቴ ኣዋ ኣያናፔ ኣቲን ኢንቴና ጊዴኬታ። “ኢሻይ ባ ኢሻ ሃይቆስ ኣꬂ ኢማና፤ ኣዋይ ባ ና ቦላ፥ ናይቲ ባና ዬሊዳይታ ቦላ ማካላቴꬃን ዴንዲዲ ሃራ ኣሳን ዎꬊሳና። ታ ጊሽ ኣሲ ዉሪካ ኢንቴና ኢፃና። ጊዶ ኣቲን ዉርሴꬅ ጋካናስ ሚቅኒ ኤቂዳይ ኢዚ ኣታና። ኣሳይ ኢንቴና ኢንቴ ዲዛ ሄራፔ ጎዲኮ ሃራሶ ኪቺቴ! ታ ኢንቴስ ቱሙ ጋይስ፤ ኢንቴ ኢስራዔሌ ካታማ ኡባ ጋኮንታ ዲሺን ታ ኣሳ ናይ ያና። “ኣሽካራይ ጎዳፔ ዎይኮ ካሊዛዴይ ካሌꬂዛዴፌ ኣꬌና። ታማሬይ ባና ታማርሲዛይሳ ማላ ዎይኮ ኣሽካራይ ጎዳ ማላ ጊዲኮ ሄሲ ኢዛስ ጊዳና። ኬꬃ ኣዋ ‘ቢዔሊዜቡላ’ ጊኮ ሶ ኣሳ ኣይሲ ሄሳፌ ኢታ ጌቴኔ! “ሄሳ ጊሽ ኢስታስ ባቦፍቴ፤ ጌሜቲዳይ ቆንጮንታ ቆቴቲዳይ ጌሽ ኬዞንታ ኣቴና። ታ ኢንቴስ ꬉማራ ዮቲዳይሳ ፖዖን ሃሳዪቴ፤ ሃይꬃን ሲዪዳይሳ ቆንጬን ሃሳዪቴ። ኣሾ ዎꬊኮፌ ኣቲን ሼምፖ ዎꬋናስ ዳንዳዮንታይታስ ባቦፍቴ፤ ሄሳፌ ኣሾኔ ሼምፖ ጋꬂ ጋናሜ ታማን ꬋይሳናስ ዳንዳዪዛይሳስ ባቢቴ። ኢሲ ሳንቴን ባይዜቲዛ ናምዑ ሲኔ ካፎታፔ ኢሲኒያካ ኢንቴ ሳሎ ኣዋ ሼኔይ ባይንዳ ጮ ኩንዳ ኣቱኩ። ሃራይ ኣቶ ሺን ኢንቴ ሁዔ ቢናናይካ ታዪቦን ዴስ። ሄሳ ጊሽ ባቦፍቴ። ዳሮ ሲኔ ካፎታፔ ኢንቴ ዋጋይ ኣꬊ ቦንቼቲዳዛ። “ኣሳ ሲንꬃን ታስ ማርካቲዛዴስ ታካ ሳሎን ዲዛ ታ ኣዋ ሲንꬃን ኢዛዴስ ማርካታና። ቃሴ ኣሳ ሲንꬃን ታና ካዲዳዴ ታካ ሳሎን ዲዛ ታ ኣዋ ሲንꬃን ኢዛ ካዳና። “ታ ቢታ ቦላ ሳሮቴꬅ ኤሃናስ ዪዳ ኢንቴስ ሚሳቶፖ፤ ማሻ ኤሃናስ ኣቲን ሳሮቴꬅ ኤሃናስ ያቤኬ። ታኒ ዪዳይ ና ኣዋፔ፥ ማጫ ና ኣዪፔ፥ ና ማቾ ቦሎቲፔ ሻካናሳ። ኣሳስ ሞርኬይ ሶ ኣሳ ጊዳና። “ታፔ ኣꬂዲ ባ ኣዋ ዎይኮ ባ ኣዮ ሲቂዛዴይ ታስ ጊዳናስ ቤሴና። ታፔ ኣꬂዲ ባ ኣቱማ ና ዎይኮ፥ ማጫ ና ሲቂዛዴይ ታስ ጊዳናስ ቤሴና። ባ ማስቃሌ ቶኪዲ ታና ካሎንታ ኣሲ ታስ ጊዳናስ ቤሴና። ባ ሼምፖ ኣሻናስ ኮዪዛዴይ ꬋይሴስ፤ ባ ሼምፖ ታ ጊሽ ኣꬂ ኢሚዛዴይ ኣሼስ። “ኢንቴና ሞኪ ኤኪዛዴይ ታናካ ሞኪ ኤኬስ። ታና ሞኪ ኤኪዛዴይ ታና ኪቲዳዴካ ሞኪ ኤኬስ። ኢሲ ናቤ ናቤቴꬃን ሞኪ ኤኪዛዴይ ሄ ናቤዛ ዋጋ ዴማና። ፂሎ ኣስ ኢዛ ፂሎቴꬃ ጊሽ ሞኪ ኤኪኮ ሄ ፂሎዛ ዋጋ ኤካና። ሄሳ ጊሽ ታ ኢንቴስ ቱሙ ጋይስ፤ ኦኒካ ሃይታ ጉꬃታፔ ታና ካሊዛዴ ጊዲዳ ጊሽ ኢሲ ፁዓ ኢርፃ ሃꬅ ኡሺኮ ሂኒስካ ዋጋይ ꬋዬና” ጊዴስ። ዬሱሲካ ባና ካሊዛ ታማኔ ናምዑ ኣሳታስ ኣዛዞ ኢሚ ዉርሲዳፔ ጉዬ ታማርሳናሲኔ ሳባካናስ ጋሊላን ዲዛ ካታማታ ቢዴስ። ዮሃኒሲ ቃሾ ኬꬃን ዲሼ ኪርስቶሳስ ኦꬂዛ ሃኖታ ሲይዲ ባና ካሊዛይታ ኢዛኮ ዬዲዲ “ኣሲ ኣሺዛዴይ ያና ጌቴቲዳይ ኔኔዬ? ሃራ ናጊኖ?” ጊዲ ኦይቺዴስ። *** ዬሱሲካ ዛሪዲ “ቢዲ ኢንቴ ሲዳይሳኔ ኢንቴ ቤዪዳይሳ ዮሃኒሳስ ዮቲቴ። ቆቄቲ ፄሌቴስ፤ ዎቤቲ ሃሙቴቴስ፤ ኢንችራቻ ሃርጊዛይቲ ፓፄቴስ፤ ቱሌቲ ሲዬቴስ፤ ሃይቂዳይቲ ሃይቆፔ ፓፂ ዴንዴቴስ፤ ማንቆታስ ሚሺራቾ ቃላይ ዮቴቴስ። ታናን ꬉጴቶንታዴይ ኣንጄቲዳዴ” ጊዴስ። ዮሃኒሳ ካሊዛይቲ ቢዳፔ ጉዬ ዬሱሲካ ኣሳስ ዮሃኒሳ ጊሽ “ኣይ ቤያናስ ዱጌ ባዞ ቢዴቲ? ጫርኮይ ቃꬂዛ ሾምቦቆ ቤያናስ ዪዴቲ? ዎይኮ ኣይ ቤያናስ ኬዚዴቲ? ሎዖ ማይዖ ማይዒዲ ሎዒ ኡቲዳዴ ቤያና ዪዴቲ? ሎዖ ማይዖ ማይዒዲ ሎዒዛይቲ ካዎታ ኬꬃን ዴቴስ። ሂስቲን ኣይ ቤያና ኬዚዴቲ? ናቤ ቤያና ኬዚዴቲ? ኤ፥ ታ ኢንቴስ ጋይስ ናቤፔ ኣꬊዛይሳ ቤያናሳ። ‘ኔ ባና ኦጌ ኔስ ጊጊሳናዴ ኔፔ ካሴታ ታ ኔስ ኪታና ጌቴቲዲ ኢዛ ጊሽ ካሴ ፃፌቲዳዴይ ኢዛኮ!’ ጊዴስ። ታ ኢንቴስ ቱሙ ጋይስ፤ ማጫሳፔ ዬሌቲዳ ኣሳፔ ፃማቂዛ ዮሃኒሳ ሚሳቲዛ ኣሲ ቢታ ቦላ ዴንዲቤና። ጊዲኮካ ፆሳ ካዎቴꬃን ኣስ ኡባፌ ላፋ ኣሲ ዮሃኒሳፔ ኣꬋና። “ፃማቂዛ ዮሃኒሳ ዎዴፔ ሃ ሲሚን ሃዒ ጋካናስ ሳሎ ካዎቴꬃያ ዳሮ ባፄታ ቦላ ዳዉስ። ሚኖ ኣሳቲ ፃላ ኢዞ ዴማና። ናቤቲካ ሙሴ ዎጋይካ ዉሪ ዮሃኒሳ ዎዴ ጋካናስ ቡሮፔ ሃናናይሳ ዮቲዳ። ሂስቲኮ ኢንቴ ኤካና ኮይኮ ኢዚ ያና ጌቴቲዳ ኤላሲ ኢዛኮ! ሲዪዛ ሃይꬂ ዲዛ ኣስ ሲዮ! “ሃይሳ ሃ ዎዴ ኣሳ ኣዛን ሌሚሶ? ጊያን ኡቲዲ ባ ላጌታ ‘ኑ ኢንቴስ ዲꬂ ዲፂን ኢንቴ ዱርቤኬታ! ዬሆ ዚላልꬅ ዚላሊን ዬኪቤኬታ!’ ጊዛ ናይታ ሚሳቴቴስ። *** ዮሃኒሲ ሙሳፌኔ ኡሻፌ ናጌቲዲ ዪዳ ጊሽ ‘ኢዚ ዳይዳንꬃራ ዴስ’ ጊዳ። ታ ኣሳ ናይ ማሼኔ ኡያሼ ዪን ‘ሃይሲ ሚዲ ካሎንታ ኣሳ፥ ኡሻንቻ፥ ቃራፃ ሺሺዛይታሲኔ ናጋራንቻታስ ላጌኮ!’ ጊዳ። ጊዶ ኣቲን ፆሳ ኤራቴꬂ ባ ኦሶን ፂላዱስ” ጊዴስ። ሄሳፌ ጉዬ ዬሱሲ ኢዚ ማላታታ ኦꬂዳ ካታማ ኣሳይ ማሮቴꬃን ጌሎንታ ኣጊዳ ጊሽ “ኩራዚኔኔ ቤቴሳይዳ! ኢንቴና ኣዬ ኣና! ኢንቴ ቦላ ኦሴቲዳ ማላታይ ፂሮሴ ቦላኔ ሲዶና ቦላ ኦሴቲዳኮ ኢስቲ ማቃ ማይዒዲኔ ቢዲንꬃን ኡቲዲ ቤኒ ቤኒ ማሮቴꬃን ጌላናኮሺን። *** ሄሳ ጊሽ ታኒ ኢንቴስ ጊዛይ ፒርዳ ጋላስ ኢንቴፌ ኣꬊ ፂሮሴሲኔ ሲዶናስ ቂፃቴይ ካዉያና። “ሃኔ ቂፊርናሆሜ ፑዴ ሳሎ ꬎቁ ꬎቁ ጋናስ ኮያዲ? ጊዶ ኣቲን ኔኒ ዱጌ ሲዖሌ ዎꬋንዳሳ፤ ኔ ቦላ ኦሴቲዳ ማላታይ ሶዶሜን ኦሴቲዳኮ ሶዶሜይ ሃቺ ጋካናስ ዳናኮሺን። ሄሳ ጊሽ ታ ኔና ጊዛይ ፒርዳ ጋላስ ቂፃቴይ ኔፔ ሶዶሜስ ካዉያና” ጊዴስ። ሄ ዎዴ ዬሱሲ “ሳሎኔ ሳዓ ጎዶ! ታ ኣዋዉ! ሃይሳ ዳሮ ኤራንቻታፔኔ ጪንጫታፔ ቆታዳ ቄሪ ናይታስ ኔ ቆንጪሲዳ ጊሽ ታ ኔና ጋላታይስ። ታ ኣዋዉ! ኤ ሃይሲ ኔ ሲንꬃን ሎዖ ኔ ሼኔ ጊዲዲ ቤቲዴስ። “ዉሪካ ታ ኣዋፔ ታስ ኢሜቲዴስ፤ ኣዋፔ ኣቲን ናዛ ጊሽ ኤሪዛ ኣስ ባዋ፤ ቃሴ ናዛፔኔ ናዚ ባ ሼኔን ቆንጪሲዳ ኣሳፔ ሃራይ ኣዋ ኤሪዛ ኣስ ባዋ። “ቶሆይ ዴፂዳይቶ፥ ዳቡሪዳይቶ ኢንቴ ዉሪካ ታኮ ሃ ዪቴ፤ ታካ ኢንቴስ ሼምፖ ኢማና። ታ ቃምባራ ቶኪቴ፤ ታፔካ ታማሪቴ፤ ታኒ ታ ዎዝናን ኣዳኔ ኣሽኬ፤ ኢንቴ ሼምፖስ ኢንቴ ሼምፖ ዴማና። ታ ቃምባራይ ሻይኮኔ ታ ቶሆይ ካዉሻ” ጊዴስ። ሄሳፌ ጉዬ ዬሱሲ ሳምባታ ጋላስ ካꬃ ጊዶራ ኣꬊ ቢዴስ። ኢዛ ካሊዛይቲካ ጋፊዳ ጊሽ ቲያ ዱꬂዲ ሺጌቺ ሙስ ኦይኪዳ። ፋርሳዌቲ ሄሳ ቤዪዲ ዬሱሳ “ሄኮ ኔና ካሊዛይቲ ሳምባታ ጋላስ ኦꬄታናስ ቤሶንታይሳ ኦꬄቴስ” ጊዳ። ኢዚካ ኢስታስ ዛሪዲ “ዳዉቴይኔ ኢዛራ ዲዛ ኣሳቲ ጋፊዳ ዎዴ ኢዚ ኣይ ኦꬂዳኮኔ ናባቢቤኬቲ? ፆሳ ኬꬄ ጌሊዲ ቄሴታፔ ኣቲን ዳዉቴይኔ ኢዛራ ዲዛይቲ ቦቻናስ ቤሶንታ ዱማቲዳ ኡኬꬅ ሚዴስ። ቃሴ ቄሴቲ ሳምባታ ሻሪዲ ፆሳ ኬꬃ ጊዶን ኦሶ ኦꬂኮ ሞሮ ጊዶንታይሳ ሙሴ ዎጋፔ ናባቢቤኬቲ? ጊዲኮካ ታ ኢንቴስ ጊዛይ ፆሳ ኬꬃፌ ኣꬊዛዴይ ሃን ዴስ። ‘ታኒ ያርሾ ጊዶንታ ማሮቴꬅ ዶሳይስ’ ጊዛ ቃላይ ኣይ ጉሲኮኔ ኢንቴ ኤሪዛኮ ፂሎታ ቦላ ፒርዴኬታኮሺን። ኣሳ ናይ ሳምባታስ ጎዳ” ጊዴስ። ሄፔ ኢዚ ጌዴ ኣꬊሼ ኣይሁዳታ ዎሳ ኬꬃን ጌሊዴስ። ሄንካ ኢሲ ኩሼ ሲሊዳዴይ ዴስ። ዬሱሳ ሞታናስ ጋሶ ኮይዲ “ሳምባታ ጋላስ ፓꬃናስ ቤሲዜ?” ጊዲ ኢዛ ኦይቺዴስ። ኢዚካ ኢስታ “ኢንቴፌ ኢሳዴ ዶርሲ ሳምባታ ጋላስ ኦላን ጌሊኮ ባ ዶርሳ ኢዚ ጌሊዲ ኦላፌ ጎቺ ኬሲ ኤሬኔ? ሂስቲኮ ኣሲ ዶርሳፌ ኬሂ ኣꬌኔ? ሄሳ ጊሽ ሳምባታ ጋላስ ሎዖ ኦሶይ ዲጌቴና” ጊዴስ። ቃሴካ ኣዴዛ “ኔ ኩሼ ፒዲሳ!” ጊዴስ፤ ኣዴዚካ ባ ኩሼ ፒዲሲን ሂንኮ ኩሼዛ ማላ ፓፃ ጊዲዴስ። ጊዶ ኣቲን ፋርሳዌቲ ሄፔ ኬዚዲ፥ ዬሱሳ ዎስቲ ኦይኪ ዎꬋናኮኔ ባ ጊዶን ዞሬቲዳ። ዬሱሲ ኢስታ ቆፋ ኤሪዲ ሄፔ ሃራሶ ሼርዒ ጊዴስ። ዳሮ ዴሬይ ኢዛ ካሊዴስ፤ ሃርጋንቻታካ ኡባ ፓꬂዴስ። ኢዚ ኦናኮኔ ኣሳስ ዮቶንታ ማላ ኢስታ ኣዛዚዴስ። ሄሲካ ሃኒዳይ ናቤ ኢሳያሳን “ታ ዶሪዳይኔ ታ ኢዛን ኡፋዬቲዛ ታ ናይ ሃይሳኮ! ታ ኣያናፔ ታ ኢዛ ቦላ ዎꬃና፤ ኢዚካ ኣማኖንታ ዴሬታስ ቱሙ ፒርዳ ኣዋጃና፤ ማርሼቴና፤ ዎይኮ ዋሴና። ኢዛስ ቃላይካ ካሬን ሲዬቴና፤ ቱማ ፒርዳ ፆኖስ ጋꬃና ጋካናስ ዲንጬቲ ኡቲዳ ሾምቦቆካ ሜንꬄናኔ ጩዋቲዛ ሙቃዳካ ቶይሴና፤ ኣይዛቤቲ ኢዛ ኡፋይሳን ናጋና” ጌቴቲ ዮቴቲዳ ቲንቢቴ ቃላይ ፖሌታና። *** *** *** *** ሄሳፌ ጉዬ ዳይዳንꬂ ኦይኪን ፄላናሲኔ ሃሳያናስ ዳንዳዮንታ ኢሲ ኣስ ዬሱሳኮ ኤኪ ዪዳ። ዬሱሲካ ኢዛ ፓꬂን ኣዴዚ ፄላናሲኔ ሃሳያናስ ዳንዳዪዴስ። ኣሳይ ዉሪካ ማላሌቲዲ “ሃይሲ ኣዴዚ ዳዉቴ ናሻ?” ጊዴስ። ጊዶ ኣቲን ፋርሳዌቲ ሄሳ ሲዪዳ ዎዴ “ሃይሲ ኣዴዚ ዳይዳንꬅ ኬሲዛይ ዳይዳንꬃ ሃላቃ ቢዔሊዜቡላ ዎልቃን ፃላ ጊዳናስ ቤሴስ” ጊዳ። ዬሱሲካ ኢስታ ቆፋ ኤሪዲ “ባ ጊዶን ኢሶይ ኢሳፌ ሻኬቲዛ ካዎቴꬂ ዉሪካ ኩንዳና፤ ባ ጊዶን ሻኬቲዛ ካታማይ ዎይኮ ኬꬃ ኣሲ ሚኔና። ፃላዔይ ፃላዔ ኬሲዛ ጊዲኮ ፃላዔይ ባ ጊዶን ሻኬቲዴስ ጉሳ። ሄሳꬆ ሃኒኮ ኢዛ ካዎቴꬂ ዋኒ ሚናና ዳንዳዪዜ? ታኒ ቢዔሊዜቡላ ዎልቃን ኬሲዛ ጊዲኮ ኢንቴ ናይቲ ኣዛ ዎልቃን ኬሳኔ? ሄሳ ጊሽ ኢንቴ ናይቲ ኢንቴ ቦላ ፒርዳና። ጊዶ ኣቲን ታኒ ዳይዳንꬅ ኬሲዛይ ፆሳ ኣያናን ጊዲኮ ፆሳ ካዎቴꬂ ኢንቴኮ ዪዴስ ጉሳ። “ዎይኮ ኢሲ ኣስ ዎልቃራ ዲዛዴ ኬꬄ ጌሊዲ ሚሼ ቦንቃና ኮይኮ ካሴቲዲ ሄ ዎልቃራ ዲዛ ኣዴዛ ኦይኪ ቃቾንታ ዎስቲ ቦንቃኔ? ቃቺዳፔ ጉዬ ቦንቃና ዳንዳዬስ። “ታናራ ጊዶንታዴይ ታናራ ኤቄቴስ፤ ታናራ ኢሲፌ ሺሾንታ ኣሲ ዉሪካ ላሌስ። ሄሳ ጊሽ ታ ኢንቴስ ቱሙ ጋይስ፤ ናጋራ ኦሶይኔ ጫሺ ዉሪ ኣሳስ ኣቶ ጌቴታና ሺን ፂሎ ኣያና ጫዪዳዴይ ማሬቴና። ኣይ ኣሲካ ኣሳ ና ቦላ ሃሳዪዛ ኢታ ቃላ ጊሽ ማሬታና ሺን፥ ፂሎ ኣያና ቦላ ሃሳዪዛ ኢታ ቃላይ ጊዲኮ ሃይሳ ሃ ዎዴን ጊዲን ዎይኮ ቡሮ ያና ዎዴን ጊዲን ማሮይ ዴና። “ሚꬂ ዉሪ ኣይፌን ኤሬቲዛይሳ ማላ ኢንቴ ሎዖ ኣይፌ ዴማናስ ኢንቴስ ሎዖ ሚꬂ ዶ፤ ኢንቴስ ኢታ ሚꬂ ዲዛ ጊዲኮ ኢንቴ ኢታ ኣይፌ ኤካና። ኢንቴኖ ማርꬔራ ዲዛ ሾሻቶ! ኢንቴ ኢታታ ጊዲ ኡቲዲ ዎስቲ ሎዖ ሃሳያናስ ዳንዳዬቲ? ኡሎ ጊዶን ኩሚዳዚ ዱናራ ሃሳዬቴስ። “ሎዖ ኣሲ ባ ዎዝናን ኩንꬂ ዎꬂዳ ሎዖ ቆፋፔ ሎዖ ሃሳዬስ፤ ኢታ ኣሲካ ባ ዎዝናን ኩንꬂ ዎꬂዳ ኢታቴꬃፌ ኢታ ዮዖ ኬሴስ። ጊዶ ኣቲን ታ ኢንቴስ ጊዛይ ኣሳይ ባ ሃሳዪዳ ሃዳ ቃላ ኡባ ጊሽ ፒርዳ ጋላስ ዉሪካ ኦይሼታና። ጋሶይካ ኔ ቃላፔ ዴንዲዳይሳን ኔ ፂላዳ ኣታናኔ ኔ ቃላፔ ዴንዲዳይሳን ኔ ቦላ ፒርዴታና” ጊዴስ። ሄሳፌ ጉዬ ኢሲ ኢሲ ሙሴ ዎጋ ታማርሲዛይቲኔ ፋርሳዌቲ ዬሱሳ “ኣስታማሬ! ኑ ኔፔ ማላሊሲዛ ማላታ ቤያናስ ኮዮስ” ጊዳ። ኢዚ ኢስታስ ዛሪዲ “ሃ ኢታኔ ላይማ ዬሌታይ ማላታ ኦይቼስ፤ ጊዶ ኣቲን ናቤ ዮናሳ ማላታፔ ኣቲን ሃራ ማላታይ ኢሜቴና። ዮናሲ ጊታ ሞሌ ኡሎ ጊዶን ሄꬑ ቃማኔ ሄꬑ ጋላስ ጋምዒዳ ማላ ኣሳ ናይካ ሄꬑ ጋላሲኔ ሄꬑ ቃማ ቢታ ጋርሳን ጋምዓና። ናናዌ ኣሳይ ፒርዳ ጋላስ ሃይሳ ሃ ዬሌታራ ዴንዲዲ ሃ ዬሌታ ቦላ ፒርዳና፤ ጋሶይካ ናናዌ ኣሳይ ዮናሳ ማርካቴꬃን ማሮቴꬅ ጌሊዳ ጊሻሳ። ሄኮ ዮናሳፔ ኣꬊዛዴይ ሃን ዴስ። ዱጌሃ ዴሬ ካዎያ ሶሎሞኔ ኤራቴꬅ ሲያናስ ቢታ ጋፃፔ ዴንዳዳ ዪዳ ጊሽ ፒርዳ ጋላስ ኢዛ ሃይሳ ዬሌቴꬃራ ዴንዳዳ ሃ ዬሌቴꬃ ቦላ ፒርዳና። ሄኮ ሶሎሞኔፔ ኣꬊዛዴይ ሃይሳን ዴስ። “ቱና ኣያናይ ኣሳፔ ኬዚዲ ሼምፖ ዴማናስ ሃꬂ ባይንዳ ሜላ ቢታን ዳቡሬስ። ጊዶ ኣቲን ባ ኮዪዛ ሼምፖ ዴሜና። ሄሳፌ ቃሴ ካሴ ታ ዲዛሶ ሲማ ባና ጊዲ ቤኒሶ ኢዚ ሲሚሺን ካሴ ኢዚ ዲዛሶይ ኣይኮይኔ ባይንዳ ሜላ ኬꬄ ጊዲዲ ጌዬዳይሳኔ ጊጌቲ ዲዛይሳ ዴሜስ። ሄሳፌ ቢዲ ሃራ ባፔ ኢቲዛ ላፑን ኢታ ኣያናታ ባናራ ኤኪዲ ዬስ። ኢስቲካ ሄ ኣዴዛን ጌሊዲ ዴዓና። ሄ ኣዴዛስ ካሴ ዱሳፌ ጉዬ ዱሳይ ኢታ ጊዳና። ሃይሳ ኢታ ዬሌቴꬃስካ ሄሳ ማላ ሃናና” ጊዴስ። ዬሱሲ ኣሳስ ዮቲሺን ኢዛ ኣዬያኔ ኢሻቲ ኢዛ ዮቻና ኮይዲ ካሬን ኤቂዳ። ኢሲ ኣሲ “ሄኮ ኔ ኣያኔ ኔ ኢሻቲ ኔና ሃሳዪሳናስ ካሬን ኤቂዲ ኔና ኮዬቴስ” ጊዴስ። ዬሱሲካ “ታ ኣያ ኦኔ? ታ ኢሻቲች፥ ኢስቲ ኦናንቴ?” ጊዴስ። ባ ኩሼራ ባና ካሊዛይታኮ ማላቲዲ “ታ ኣያኔ ታ ኢሻቲ ሃይታንታ። ሳሎን ዲዛ ታ ኣዋ ሼኔ ኦꬂዛይቲ ዉሪካ ታስ ኢሻ፥ ሚቾኔ ኣዮ” ጊዴስ። ሄ ጋላሲ ዬሱሲ ኬꬃፌ ካሬ ኬዚዲ ኣባ ላንቄን ኡቲዴስ። ዳሮ ዴሬይ ኢዛ ዩዪ ኣꬊ ጊዶꬂዳ ጊሽ ኣሳ ኣባ ጋፃን ኣጊዲ ዎጎሎ ጊዶ ጌሊ ኡቲዲ፥ ዳሮ ዮዖ ሌሚሶራ “ኢሲ ጎሻንቻይ ዜሬꬅ ዜራናስ ኬዚዴስ። ኢዚ ዜሪሺን ኢሲ ኢሲ ዜሬꬂ ኦጌ ዱናን ዎꬊን ካፎቲ ዪዲ ማፂ ሚዳ። ኢሲ ኢሲ ዜሬꬂ ሜላኔ ሹቻቲዛ ቢታ ቦላ ዎꬊን ቢታይ ሜላ ቢታ ጊዲዳ ጊሽ ኤሌ ጫሪዴስ። ጊዶ ኣቲን ኣዋይ ኣዋቲን ሹሊዲኔ ፃጶ ዬዶንታ ኣጊዳ ጊሽ ሜሊዴስ። ኢሲ ኢሲ ዜሬꬃይ ኣጉንꬃ ጊዶን ዎꬊዴስ፤ ኣጉንꬃይካ ዲጪዲ ጫሬቻ ጩሊዴስ። ሃራ ዜሬꬂካ ሎዖ ኦርዴ ቢታን ዎꬊዲ ኣይፌካ ኣይፊዴስ፤ ኢሶይ ፄቱ፥ ኢሶይ ኡሱፑን ታሙ ኢሶይ ሄꬑ ታሙ ኣይፌ ኢሚዴስ። ሲዪዛ ሃይꬂ ዲዛዴይ ሲዮ!” ጊ ዮቲዴስ። ሄሳፌ ኢዛ ካሊዛይቲ ኢዛኮ ሺቂዲ “ኣዛስ ሌሚሶራ ዮታይ?” ጊዳ። ኢዚካ ኢስታስ “ሳሎ ካዎቴꬃ ፁራ ኤሮይ ኢንቴስ ኢሜቲዴስ፤ ኢስታስ ጊዲኮ ኢሜቲቤና። ዲዛዴስ ዲዛይሳ ቦላ ጉጄታናኔ ዳራና ሺን ባይንዳዴፌ ሂና ዲዛራካ ኤኬታይቻና። ታ ሃይሳꬆ ሌሚሶራ ዮቲዛይ ኢስቲ ሲዪሼ ኤዝጎንታ ጊሺኔ ፄሊሼ ዴሞንታ ጊሻሳ። “ኢሳያሲ ‘ኢንቴ ሲሳ ሲያናሺን ዩሺ ቆፔኬታ፤ ፄሎ ፄላና ሺን ዎዝናን ዎꬄኬታ፤ ዴሬዛ ዎዝናይ ሙሚዴስ፤ ኢስታ ሃይꬃይካ ሲዬና፤ ፄሎንታ ማላ ባ ኣይፌ ቂልምዒዳ፤ ሄሲ ባይንዳኮ ኢስቲ ባ ኣይፌራ ቤዪዲኔ ባ ሃይꬃራ ሲይዲ ባ ዎዝናን ዩሺ ቆፒዲ ታኮ ሃ ሲሚን ታ ኢስታ ፓꬃና ሺን’ ጊዳ ቲንቢቴ ቃላይ ኢስታን ፖሌቲዴስ። *** “ኢንቴ ኣይፌይ ፄሊዛ ጊሺኔ ኢንቴ ሃይꬃቲ ሲዪዛ ጊሽ ኢንቴ ኣንጄቲዳይታ። ታ ኢንቴስ ቱሙ ጋይስ፤ ዳሮ ናቤቲኔ ዳሮ ፂሎ ኣሳቲ ሃዒ ኢንቴ ቤዪዛይሳ ቤያናሲኔ ሃዒ ኢንቴ ሲዪዛይሳ ሲያናስ ኣሞቲዳ ሺን ኢስታስ ሃኒቤና። “ሂስቲኮ ሃዒ ዜሬꬃ ሌሚሶዛ ቢርሼꬅ ሲዪቴ፡ ካዎቴꬃ ቃላ ሲይዲ ዩሺ ቆፖንታ ኣይ ኣሳ ዎዝናፔካ ፃላዔይ ዪዲ ዜሬቲዳ ዜሬꬃ ኤሶን ማፂቻና። ሄሲካ ኦጌ ቦላ ዎꬊዳ ዜሬꬃ። ሹቻ ቦላ ዜሬቲዳይሲ ቃላ ሲዪዳ ማላ ኡፋይሳን ሲይዲ ሄራካ ኡፋይሳን ኤኪዛዴ ሚሳቴስ። ጊዶ ኣቲን ፃጶ ዬዳናስ ዳንዳዮንታ ኣጊዳ ጊሽ ዳሮ ጋምዖንታ ቃላ ጌዶን ሜቶይኔ ጎዴቴꬂ ዪዛ ዎዴ ኤሌሊ ꬉጴቴስ። ኣጉንꬃ ጊዶን ዜሬቲዳ ዜሬꬃይ ቃላ ሲይዲ ሃይሳ ሃ ኣላሜዛስ ዳሮ ሜቶቴꬃኔ ዱሬቴꬃ ቆፋን ባሌቲዲኔ ጩሌቲዲ ኣይፌ ኢሞንታ ኣሳ ማላ። ሎዖ ቢታን ዜሬቲዳ ዜሬꬃይ ቃሴ ቃላ ሲይዲ ዩሺ ቆፒዛዴ ሚሳቴስ፤ ቱሙ ኣይፌ ኣይፌስ፤ ኢሶይ ፄቱ፥ ኢሶይ ኡሱፑን ታሙ፥ ኢሶይ ሄꬑ ታሙ ኣይፌ ኢሚዴስ” ጊዴስ። ዬሱሲ ቃሴካ ሃራ ሌሚሶ ኢስታስ “ሳሎ ካዎቴꬂ ባ ጎሻ ጋዴን ሎዖ ዜሬꬅ ዜሪዳዴ ሚሳቴስ። ጊዶ ኣቲን ኣሲ ዉሪ ኢቺዳ ዎዴ ሞርኬይ ዪዲ ጊስቴዛ ጊዶን ሌሾ ዜሪዲ ቢዴስ። ጊስቴዚ ዲጪዲ ኣይፌ ኣይፊዛ ዎዴ ሌሾይካ ኢዛራ ኢሲፌ ቤቲዴስ። “ካꬃ ጎዳ ኣሽካራቲ ጎዳዛኮ ሺቂዲ ‘ጎዶ! ኔኒ ኔ ጎሻን ሎዖ ዜሬꬅ ዜራቤኪ? ሃይሲ ሌሾይ ኣዋፔ ዪዴ?’ ጊዳ። “ኢዚካ ኢስታስ ‘ሄሳ ሞርኬይ ኦꬂዴስ’ ጊዴስ። ኣሽካራቲካ ‘ኑ ቢዲ ሌሾዛ ሾዳና ማላ ኮያይ?’ ጊ ኦይቺዳ። “ኢዚካ ኢስታስ፥ ‘ኣካይ ሃኔና፤ ጋሶይካ ኢንቴ ሌሾዛ ሾዲሼ ጊስቴዛራ ጋꬂ ሾዳና፤ ኣጊቴ! ማፃ ዎዴይ ጋካናስ ኢሲፌ ዲጮ፤ ሄ ዎዴ ማፂዛይቲ ሌሾዛ ካሴቲዲ ቆሪ ማፂዲ ታማን ፁጋናስ ሚርቄን ሚርቄን ቃቺቴ፤ ጊስቴዛ ቃሴ ሺሺዲ ጎታራን ጌልꬂቴ’ ጋዳ ታ ኢንቴስ ዮታና” ጊ ዮቲዴስ። ሃራ ሌሚሶ ኢስታስ “ሳሎ ካዎቴꬂ ኢሲ ኣሲ ባ ጋዴ ጊዶን ዜሪዳ ባርዛፌ ሚꬃ ኣይፌ ማላ። ባርዛፌ ሚꬃ ኣይፌይ ሃራ ሚꬃ ኣይፌ ኡባፌ ዳሮ ላፋ ጊዲኮካ ዲጫዳ ሚꬃ ኡባፌ ጊታ ጊዳዉስ። ሳሎ ካፎቲካ ኢዚ ሃጋ ቦላ ኬፂዲ ዳና ጋካናስ ጊታ ሚꬂ ጊዳዉስ” ጊዴስ። ሃዒካ ሃራ ሌሚሶ ኢስታስ “ሳሎ ካዎቴꬂ ማጫሲ ሊፄይ ዴንዳና ማላ ሊፄ ጊዶን ጉጂዳ ጉꬃ ኢርሾ ሚሳታዉስ” ጊዴስ። ዬሱሲ ሃይሳ ኡባ ኣሳስ ሌሚሶራ ዮቲዴስ። ሌሚሶይ ባይንዳ ኢሲኖካ ዮቲቤና። ሄሳንካ ካሴ ናቤ ዱናን “ታ ዱና ታ ሌሚሶን ዶያና፤ ኣላሜይ ሜꬌቶሳፔ ሃ ሲሚን ቆቴቲዳይሳ ታ ሃሳያና” ጌቴቲ ዮቴቲዳይስ ፖሌቲዴስ። ሄሳፌ ዬሱሲ ኣሳ ኣጊዲ ሶ ጌሊዴስ። ኢዛ ካሊዛይቲ ኢዛኮ ሺቂዲ “ካꬃ ጊዶን ዲዛ ሌሾዛ ጊሽ ኔ ዮቲዳ ሌሚሶዛ ቢርሼꬅ ኑስ ዮታ” ጊዳ። ኢዚካ ኢስታስ ዛሪዲ “ሎዖ ዜሬꬅ ዜሪዳይ ኣሳ ና። ጎሻይ ሃይሳ ኣላሜዛ፤ ሎዖ ዜሬꬃይ ካዎቴꬃ ናይታ ጊዲዳይሳ ቤሴስ፤ ሌሾይ ቃሴ ፃላዔ ናይታ። ሌሾዛ ዜሪዲ ቢዳ ሞርኬይ ዳቡሎሳ። ማፃ ዎዴይ ኣላሜ ዉርሴꬂ ጊዲሺን ማፂዛይቲ ፆሳ ኪታንቻታ። “ሌሾይ ቆሬቲዲ ታማን ፁጌቲዛይሳ ማላ ኣላሜ ዉርሴꬃን ሄሳꬆ ሃናና። ኣሳ ናይ ባ ኪታንቻታ ኪታና፤ ኢስቲካ ናጋራስ ጋሶ ጊዲዳይታኔ ኢታ ኦꬂዛይታ ኢዛ ካዎቴꬃ ጊዶፌ ኡባ ቆሪ ኬሳና። ዬሆይ ዲዛሶኔ ኣች ጋርጪዛሶን ዳሮ ዎልቃማ ታማን ኢስታ ዬጋና። ሄሳ ዎዴ ፂሎቲ ባ ኣዋ ካዎቴꬃን ኣዋ ኣርሼ ማላ ፖዓና። ሲዪዛ ሃይꬂ ዲዛዴይ ሲዮ! “ሳሎ ካዎቴꬂ ጋዴ ጊዶን ቆቴቲዳ ሚሼ ሚሳቴስ። ኢሲ ኣስ ሄ ሚሻዮ ዴሚዲ ዛሪ ቆቲዴስ። ኡፋይሳፌ ዴንዲዳይሳን ቢዲ ባስ ዲዛዚ ኡባ ባይዚዲ ሄ ሚሺያ ዲዛ ቢታ ሻሚዴስ። “ሄሳꬆካ ሳሎ ካዎቴꬂ ኣልዖ ዎርቃ ኮዪዛ ዛልዓንቻ ሚሳቴስ። ዳሮ ኣልዖ ጊዲዳ ኢንቆ ጊዛ ሹቻ ዴሚዳ ማላ ቢዲ ባስ ዲዛዚ ኡባ ባይዚዲ ሻሚዴስ። “ቃሴካ ሳሎ ካዎቴꬂ ኣባ ጊዶን ዬጌቲዲ ዱማ ዱማ ሞሌ ኦይኪዳ ሞሌ ጊቴ ሚሳቴስ። ሞሌ ኦይኪዛይቲ ጊቴይ ኩሚን ጎቺዲ ኣባ ላንቄ ኬሲዳ። ሄን ኡቲዲ ሎዖ ሎዖ ሞሌ ቆሪዲ ኬሼን ጉጂዳ። ኢታ ሞሌታ ዎራ ዬጊዳ። ኣላሜ ዉርሴꬃን ሄሳꬆ ሃናና። ኪታንቻቲ ዪዲ ናጋራንቻታ ፂሎታፔ ሻኪዲ ዬኪዛሶኔ ኣች ጋርጪዛሶ ጌዴ ቶዖንታ ታማን ዬጋና። *** “ዬሱሲ ኢስታ ሃይሲ ዉሪ ኢንቴስ ጌሊዴ?” ጊዴስ። ኢስቲካ “ኤ” ጊዳ። ኢዚካ ዛሪዲ “ሄሳ ጊሽ ሳሎ ካዎቴꬃ ፁራይ ጌሊዳ ሙሴ ዎጋ ታማርሲዛዴይ ኦኒካ ኢዛስ ሚንጂ ዎꬂዳ ኣልዖ ሚሻፌ ኦራꬃኔ ካሴ ጋልዓ ሚሽ ኬሲዛዴ ሚሳቴስ” ጊዴስ። ዬሱሲካ ሃይታ ሌሚሶታ ዮቲ ዉርሲዲ ሄፔ ሃራሶ ቢዴስ። ጌዴ ባ ዴሬ ቢዲ ኣይሁዳታ ዎሳ ኬꬃን ኣሳ ታማርሶ ኦይኪዴስ። ኢስቲካ ማላሌቲዲ “ሃይሲ ኣዴዚ ሃይሳ ኤራቴꬃኔ ሃይታ ማላታታ ኦꬃና ዎልቃ ኣዋፔ ዴሚዴ? ሃይሲ ኣናፄዛ ና ዴኔ? ኢዛ ኣዬይ ሱንꬂ ማራሞ ጊዴኔ? ኢዛ ኢሻቲ ያቆቤ፥ ዮሴፌ፥ ሲሞናኔ ዩሁዳ ጊዴቴኔ? ሚቼቲ ኑናራ ዲዛይታ ጊዴቴኔ? ሂስቲን ሃይሲ ኣዴዚ ሃይሳ ኡባ ኣዋፔ ኤኪዴ?” ጊዳ። ሄሳ ጊሽ ኢስቲ ኢዚ ጊዛይሳ ኤኪቤቴና። ዬሱሲካ ኢስታስ “ናቤይ ባ ዴሬኒኔ ባ ኬꬃን ቦንቼቴና ኣቲን ሃራሶን ቦንቼቴስ” ጊዴስ። ኢስቲ ኣማኖንታ ኣጊዳ ጊሽ ዳሮ ማላታታ ሄን ኦꬂቤና። ሄ ዎዴ ጋሊላ ዴሬ ሃሪዛ ሄርዶሲ ኣሳይ ዬሱሳ ናሺዛይሳ ሲይዴስ። ሄርዶሲ ባ ኣሽካራታስ “ሄሳ ጊዲኮ፥ ፃማቂዛ ዮሃኒሲ ሃይቆፔ ዴንዲዲ ዪዴስ ጉሳካ! ሃይሲ ዉሪ ጊታ ማላታይ ኢዛ ኩሼን ኦሴቲዛይ ሄሳሳ” ጊዴስ። ሄርዶሲ ባ ኢሻ ፒሊጶሳ ማቾ ሄሮዲያዲ ጋሶን ዮሃኒሳ ኦይꬂዲ ቃሾ ኬꬃን ዬጊዴስ። ጋሶይካ ዮሃኒሲ ሄርዶሳ “ኔ ኢዞ ኤካና ማላ ዎጋ ጊዴና ጊዳ ጊሻሳ” ጊዴስ። ሄርዶሲካ ዮሃኒሳ ዎꬋናስ ኮዪሺን ኣሳይ ዮሃኒሳ ናቤ ማላ ፄሊዛ ጊሽ ባቢዴስ። ሄርዶሲ ባ ዬሌቴꬃ ጋላስ ሄሮዲያዲ ናያ ዬꬃን ኢዛ ኡፋይሲዳ ጊሽ ናያ ኢዛ ኦይቺዳዝ ኡባ ኢማናስ ኢዚስ ጫቂዴስ። *** ናያካ ኣዬይ ዞሬን “ፃማቂዛ ዮሃኒሳ ሁዔ ኬሬን ዎꬃዳ ሃዒ ሃኒን ታስ ኢማ” ጋዱስ። ሄ ዎዴ ካዎዚ ኢዛስ ሚሼቲዴስ። ጊዶ ኣቲን ጫቂዳ ጊሺኔ ኢዛራ ዲዛ ኢማꬃታ ጊሽ ጊዲ ናይ ኦይሾይ ፖሌታና ማላ ኣዛዚዴስ። ኪቲዲኔ ዮሃኒሳ ዎይኔ ኬꬃን ዲሺን ቆꬌ ቃንፂሲዴስ። ቃንፄቲዳ ሁዔዛ ኬሬን ዎꬂዲ ናይስ ኢሚዳ። ናያካ ኤካዳ ባ ኣዬይስ ኢማዱስ። ዮሃኒሳ ካሊዛይቲ ኢዛ ኣሃ ኤኪዲ ሞጊዲኔ ሃኒዳይሳ ኡባ ዬሱሳስ ዮቲዳ። ሄሳ ሲዪዳ ማላ ዬሱሲ ካሴ ባ ዲዛሶ ኣጊዲኔ ዎጎሎን ጌሊዲ ባርካ ሃራ ኣሲ ባይንዳሶ ቢዴስ። ዴሬይካ ሄሳ ሲይዲ ካታማይ ዲዛሶፔ ቶሆራ ኢዛ ካሊዴስ። ዬሱሲካ ዎጎሎዛፔ ዎꬊሼ ዳሮ ኣሳ ቤዪዲ ኣሳስ ሚሼቲዴስ። ሳኬቲዛይታካ ፓꬂዴስ። ጋዴይ ቃሚ ቃሚ ቢዛይሳ ቤዪዲ ኢዛ ካሊዛይቲ ኢዛኮ ሺቂዲ “ሃይሲ ኑ ዲዛሶይ ባዞ፤ ጋዴይካ ቃሚ ቃሚ ቢዛ ጊሽ ጌዴ ጉታታን ጉታታን ቢዲ ባሲ ማናዝ ሻማና ማላ ኣሳ ዬዳ” ጊዳ። ጊዶ ኣቲን ዬሱሲካ ኢስታ “ኢንቴ ኣሳስ ማናዝ ኢሚቴ ኣቲን ኣሳይ ባናስ ኮሼና” ጊዴስ። ኢስቲካ ኢዛስ ዛሪዲ “ሃይሳን ኑስ ኢቻሹ ኡኬꬂኔ ናምዑ ሞሌፔ ኣቲን ሃራይ ባዋ” ጊዳ። ኢዚካ ኢስታ “ኣኔ ሄይታ ዲዛይታ ሃ ታስ ኤኪ ዪቴ” ጊዴስ። ቃሴካ ኣሳይ ማታ ቦላ ኡታና ማላ ኣዛዚዴስ። ኢቻሹ ኡኬꬃኔ ናምዑ ሞሌታ ባ ኩሼን ኦይኪዲ ባ ኣይፌ ፑዴ ሳሎ ꬎቁ ሂስቲ ጋላቲዲ፥ ኡኬꬃ ሜንꬂ ባና ካሊዛይታስ ኢሚዴስ። ኢስቲካ ኣሳስ ኢሚዳ። ኣሳይ ዉሪካ ሚዲ ካሊዴስ። ሄሳፌ ጉዬ ኢዛ ካሊዛይቲ ኣሳፔ ሚሺን ኣቲዳይሳ ታማኔ ናምዑ ሌማቴ ኩሜꬅ ሺሺዳ። ሚዳ ኣሳይ ማጫሳቲኔ ጉꬃ ናይቲ ጉጄቶንታ ኣቱማሳይ ፃላላ ኢቻሹ ሺ ጊዳና። ሄራካ ኢዛ ካሊዛይቲ ዎጎሎን ጌሊዲ ጌዴ ፒንꬅ ኢዛፔ ካሴቲዲ ፒናና ማላ ኣዛዚዲ ኣሳ ሞይዛናስ ባሲ ጉዬ ኣቲዴስ። ዴሬዛ ሞይዚዳፔ ጉዬ ዎሳ ዎሳናስ ባርካ ዙማ ቦላ ኬዚዴስ። ጋዴይ ꬉሚንካ ያን ዙማ ቦላ ባርካ ዴስ። ሄሳ ዎዴ ዎጎሎያ ኣባ ካንꬃ ቢሺን ዳምባላይ ዴንዲዲ ዳሮ ሜቶꬆ ኦይኪዴስ። ቃማፔ ኮይሮ ኩቶይ ባቂሺን ዬሱሲ ኣባ ቦላራ ሃሙቲዲ ኢዛ ካሊዛይቲ ዲዛሶ ዪዴስ። ዬሱሳ ካሊዛይቲካ ኢዚ ኣባ ቦላራ ሃሙቲ ዪሺን ቤዪ ባቢዳ ጊሽ ኢዛ ሞይቲሌ ጊዲኔ ዋሲዳ። ዬሱሲ ሄራካ “ኣይኮይ ባ! ታናኮ፤ ባቦፍቴ!” ጊዴስ። ጴፅሮሲ “ጎዶ! ኔና ጊዲኮ ታ ኣባ ቦላራ ሃሙታዳ ኔኮ ባና ማላ ታና ኣዛዛ” ጊዴስ። ዬሱሲ ኢዛ “ሃያ!” ጊዴስ። ጴፅሮሲካ ዎጎሎዛፔ ዎꬊዲ ሃꬃ ቦላራ ሃሙቲዲ ዬሱሳኮ ዪዴስ። ጊዶ ኣቲን ጫርኮዛ ዎልቃ ቢዪዲ ባቢዳ ጊሽ ሃꬃን ሚቴቴꬅ ኦይኪዲ “ጎዶ! ታና ኣሻ!” ጊ ዋሲዴስ። ዬሱሲ ሄራካ ባ ኩሼ ዬዲ ኦይኪዲ “ኔኖ፥ ኣማኖይ ፓጪዳይሶ! ኣዛስ ሲꬋዲ?” ጊዴስ። ዬሱሲኔ ጴፅሮሲ ዎጎሎዛን ጌሊዳ ማላ ጫርኮይ ሲርጵ ጊዴስ። ሄሳፌ ጉዬ ዎጎሎን ዲዛይቲ “ኔኒ ቱሙ ፆሳ ና!” ጊዲ ኢዛስ ጎይኒዳ። ዬሱሲኔ ኢዛ ካሊዛይቲ ኣባ ፒኒዲ ጌንሴሬፄ ጌቴቲዛሶ ጋኪዳ። ሄን ዲዛይቲ ዬሱሳ ጊዲዳይሳ ኤሪዲ፥ ሄ ሄራን ዩዪ ኣꬋናስ ዲዛ ኣሳስ ኪታ ዬዲዳ። ኣሳይካ ሃርጋንቻታ ኡባ ዬሱሳኮ ኤሂዴስ። ሃርጋንቻቲ ኢዛ ኣፋላ ፄራ ፃላላ ቦቻና ማላ ዬሱሳ ዎሲዳ። ቦቺዳይቲ ዉሪካ ፓፂዳ። ቃሴካ ዬሩሳላሜፔ ዪዳ ፋርሳዌቲኔ ሙሴ ዎጋ ታማርሲዛይቲ ዬሱሳኮ ሺቂዲ “ኔና ካሊዛይቲ ካሴ ኑ ኣዋታ ዎጋ ኣዛስ ꬋይሲዞ? ቁማ ማናስ ኩሼ ሜጬቴቴና” ጊዳ። ዬሱሲካ ኢስታስ “ኢንቴ ኢንቴ ዎጋስ ጊዲ ፆሳ ኣዛዞ ኣይስ ሻሬቲ? ፆሲ ‘ኔ ኣዪዮኔ ኔ ኣዋ ቦንቻ፤ ባ ኣዋ ቦላ ዎይኮ ባ ኣዪ ቦላ ኢታ ቃላ ሃሳዪዳዴይ ሃይቆ!’ ጊ ኣዛዚዴስ። ኢንቴ ጊዲኮ ኣይ ኣሲካ ባ ኣዋ ዎይኮ ባ ኣዮ ‘ታ ኢንቴስ ኦꬃናስ ቤሲዛዝ ኣይ ሚሼካ ፆሳስ ያርሾ ኦꬃ ሺሻዲስ’ ጊኮ፥ ‘ሄ ኣዴዚ ባ ኣዋ ዎይኮ ባ ኣዮ ቦንቺዴስ’ ጌታ፤ ሄሳ ጊሽ ኢንቴ ዎጋ ጊሽ ፆሳ ቃላ ሻሬታ። ኢንቴኖ፥ ቆꬌፔ ቆሞን ሃኒዛይቶ! ኢሳያሲ ኢንቴ ጊሽ ዮቲሼ ‘ሃይሲ ዴሬይ ታና ዱናን ፃላላ ቦንቼስ፤ ዎዝናይ ጊዲኮ ታፔ ሃኪዴስ፤ ሜላ ሃዳ ታና ጎይኔስ፤ ኢስታ ቲሚርቴይካ ኣሲ ዎꬂዳ ዎጋ’ ጊዲዲ ሲንꬃፌ ሃናናይሳ ዮቲዳይሲ ቱማኮ” ጊዴስ። *** *** ዬሱሲ ኣሳ ባኮ ፄይጊዲ “ሲዪቴ ዎዝናን ዎꬂቴ። ኣስ ቱኒሲዛይ ኢዛዴ ዱናራ ሃ ኬዚዛይሳፌ ኣቲን ዱናራ ዱጌ ጌሊዛይ ቱኒሴና” ጊዴስ። ቃሴ ኢዛ ካሊዛይቲ ኢዛኮ ሺቂዲ “ፋርሳዌቲ ኔ ጊዳይሳ ሲይዲ ሃንቄቲዳይሳ ኤራዲ?” ጊዳ። ኢዚ ኢስታስ “ታ ኣዋ ሳሎይሲ ቶኮንታ ሚꬂ ዉሪካ ꬎቃሌታና። ኢስታ ኣጋጊቴ ኢስቲ ቆቄቲ ካሌꬂዛ ቆቄታ ጊዲዳ ጊሽ፥ ቆቄቲ ቆቄ ካሌꬂኮ ናምዓይ ኢሶይ ኢሳራ ኦይኬቲዲ ኣፎን ዉላና” ጊዴስ። ጴፅሮሲ ዬሱሳ “ኔ ዮቲዳ ሌሚሶዛ ኑስ ቢርሻ” ጊዴስ። ኢዚካ “ኢንቴ ሃዒ ጋካናስካ ኤሪቤኬታ ጉሴ? ዱናራ ጌሊዛይ ዉሪ ዱጌ ቃንꬄ ካንꬂዲ ጌዴ ካሬ ኬዚዛይሳ ኤሬኬቲ? ዱናራ ኬዚዛይ ጊዲኮ ዎዝናፔ ፑልቴስ። ኣስ ቱኒሲዛይ ሄሳ። ኢታ ቆፋይ፥ ሼምፖ ዎꬎይ፥ ላይማይ፥ ላይማታናስ ቃቃቶይ፥ ካይሶይ፥ ዎርዶ ማርካቴꬂኔ ኣሳ ሱንꬅ ሞሮይ ዉሪ ዎዝናፔ ፑልቴስ። ኣስ ቱኒሲዛይ ሃይታንታፌ ኣቲን ኩሼ ሜጬቶንታ ሙሲ ኣስ ቱኒሴና” ጊዴስ። ዬሱሲ ሄፔ ኬዚዲ ጌዴ ፂሮሴኔ ሲዶና ጌቴቲዛ ዴሬ ቢዴስ። ኢሲ ካናኔ ማጫሲ ዲዛራ ሄ ሄራፔ ኬዛዳ ዬሱሳኮ ያዳ “ጎዶ፥ ዳዉቴ ናዉ! ታስ ሚሼታ! ታ ናያ ቱና ኣያናይ ኦይኪን ኬሃ ዋያዉስ” ጋዳ ዋሳዱስ። ጊዶ ኣቲን ኢዚ ኢሲ ቃላካ ኢዚስ ዛሪቤና። ሂስቲን ሄ ዎዴ ኢዛ ካሊዛይቲ ኢዛኮ ሺቂዲ “ኑና ካላ ካላ ዋይሲዛ ጊሽ ኔ ኢዞ ሞይዚኮቺ?” ጊዲ ኢዛ ኦይቺዳ። ኢዚካ ኢስታስ “ታኒ ኢስራዔሌ ኬꬃፌ ꬋዪዳ ዶርሳታኮ ፃላላ ኪቴታዲስ” ጊዴስ። ማጫሳያካ ዬሱሳ ቶሆ ቦላ ኩንዳዳ “ጎዶ! ታና ማዳርኪ!” ጋዱስ። ኢዚካ ኢዚስ ዛሪዲ “ናይታ ካꬅ ኤኪዲ ካና ቡቱላታስ ዬጋናስ ቤሴና” ጊዴስ። ኢዛካ “ኤ ጎዶ፤ ቡታላቲካ ባ ጎዳ ማዳፔ ጋዴን ዎꬊዳ ካꬅ ማፂ ሜቴስ” ጋዱስ። ሂዝጊን ዬሱሲካ ማጫሳዮ “ሃኔ ማጫሳዬ፥ ኔ ኣማኖይ ጊታ! ኔ ኮይዳ ማላ ኔስ ሃኖ” ጊዴስ። ማጫሳይ ናያካ ሄራካ ፓፃዱስ። ዬሱሲ ሄፔ ዴንዲዲ ጋሊላ ኣባ ላንቄ ቢዲ ሄን ዲዛ ኢሲ ዙማ ቦላ ኬዚ ኡቲዴስ። ቆዳን ዳሮ ዴሬይ ዎቤታ፥ ቆቄታ፥ ሲላታ፥ ሃሳዮንታ ዱዴታ ሃራታካ ዳሮ ሃርጋንቻታ ኤሂዲ ኢዛ ሲንꬃን ዎꬂዴስ፤ ኢዚካ ኢስታ ፓꬂዴስ። ዱዴይ ሃሳዪሺን፥ ቶሆ ሲላይ ፓፂሺን፥ ዎቤይ ሲቲ ጊዲ ሃሙቲሺን፥ ቆቄይ ፄሊሺን ቤዪዲ ኣሳይ ማላሌቲዴስ፤ ኢስራዔሌ ጎዳካ ጋላቲዴስ። ዬሱሲ ባና ካሊዛይታ ፄይጊዲ “ኣሳይ ታናራ ሄꬑ ጋላስ ጋምዒዳ ጊሺኔ ማና ካꬂ ባይንዳ ጊሽ ኣሳይ ታና ሚቼስ። ኦጌ ቦላን ጋፋን ዳቡሪዲ ኩንዶንታ ማላ ሜላ ኡሎራ ዬዳናስ ኮዪኬ” ጊዴስ። ኢዛ ካሊዛይቲ “ሃይሳን ኣይኮይካ ባይንዳ ባዞ ቢታን ሃይሳ ኬና ዴሬ ሚዛናስ ጊዲዛ ቁማ ኑ ኣዋፔ ዴማኔ?” ጊዳ። ዬሱሲ ኢስታ “ኢንቴስ ኣፑን ኡኬꬂ ዲዜ?” ጊ ኦይቺን ኢስቲካ “ላፑን ኡኬꬂኔ ቂ ጉꬃ ሞሌቲ ዴቴስ” ጊዳ። ኢዚካ ዴሬዚ ጋዴን ኡታና ማላ ኣዛዚዴስ። ላፑን ኡኬꬃኔ ሞሌዛ ባ ኩሼን ኦይኪዲ ጋላቲዳፔ ጉዬ ሜንꬂዲ ባና ካሊዛይታስ ኢሚዴስ፤ ኢስቲካ ዴራስ ጊሺዳ። ኣሳይ ዉሪካ ሚዲ ካሊዴስ፤ ዬሱሳ ካሊዛይቲ ኣሳፔ ኣቲዳይሳ ላፑን ሌማቴ ኩሜꬅ ሺሺዳ። ሚዳይቲካ ናይቲኔ ማጫሳይ ባይንዳ ኣዴቲ ፃላላ ኦይዱ ሺ ጊዲዳ። ዬሱሲ ዴሬዛ ሞይዚዳፔ ጉዬ ዎጎሎን ጌሊዲ ሜጊዶኔ ጌቴቲዛሶ ቢዴስ። ፋርሳዌቲኔ ሳዱቃዌ ጌቴቲዛይቲ ዬሱሳኮ ሺቂዲ ኢዛ ፓጫናስ “ሳሎፔ ማላታ ቤሳ” ጊዲ ኦይቺዳ። ኢዚካ ኢስታስ “ኦማርሳ ዎዴ ሳሎይ ዞዒኮ ‘ጋዴይ ኣዋታና’ ጌታ። ዎንታ ቦላ ‘ሳሎይ ዴፂኮ ዴፂዴስ፤ ሃቺ ኢራይ ቡካና’ ጌታ፤ ሳሎ ሜꬋ ፄሊዲ ሻኪ ኤሬታ ሺን ታ ያና ዎዴ ማላታ ሻኪ ኤራናስ ዳንዳዬኬታ። ሃይሲ ኢታኔ ላይማ ዬሌታይ ማላታ ኮዬስ፤ ጊዶ ኣቲን ዮናሳ ማላታፔ ኣቲን ሃራ ማላታይ ኢዛስ ኢሜቴና” ጊዴስ። ዬሱሲ ኢስታ ሄን ኣጋጊዲ ሃራሶ ቢዴስ። ኣባ ፒኒዳ ማላ ዬሱሳ ካሊዛይቲ ቁማ ኦይካናይሳ ባሌቲዳ። ዬሱሲካ “ቆፒቴ፤ ፋርሳዌታ ኢርሾፌኔ ሳዱቃዌታ ኢርሾፌ ናጌቲቴ” ጊዴስ። ኢስቲ ቃሴ ባ ጊዶን “ኑኒ ካꬅ ኦይኮንታ ጊሽ ሄሳ ጊዴስ” ጊዲ ኢሶይ ኢሳራ ሃሳዬቲዳ ዬሱሲካ ኢስታ ቆፋ ኤሪዲ “ኢንቴኖ ኣማኖይ ፓጪዳይቶ! ካꬅ ኦይኮንታ ጊሽ ኣዛስ ኢሶይ ኢሳራ ሃሳዬቴቲ? ኢቻሹ ኡኬꬂ ኢቻሹ ሺ ኣሳስ ጊዲዲ ኣፑን ሌማቴይ ቲርፒን ኢንቴ ዴንꬂዳኮኔ ዩሺ ቆፔኬቲ? ሄሳꬆካ ላፑን ኡኬꬂ ኦይዱ ሺ ኣሳስ ጊዲዲ ኣፑን ሌማቴይ ቲርፒን ኢንቴ ዴንꬂዳኮኔ ዎዝናን ዎꬂቤኬታ ጉሴ? ሂስቲን ታ ኢንቴስ ዮቲዳይ ካꬃ ጊሽ ጊዶንታይሳ ዋንዲ ዩሺ ቆፔኬቲ? ሃዒካ ፋርሳዌታ ኢርሾፌኔ ሳዱቃዌታ ኢርሾፌ ናጌቲቴ” ጊዴስ። ሃዒ ኢዚ ኢስታ ቆፊሲዛይ ቡኬሶ ዴንꬃናስ ጉጂዛ ኢርሾ ጊሽ ጊዶንታ ፋርሳዌታኔ ሳዱቃዌታ ቲሚርቴፌ ናጌታና ማላ ጊዲዳይሲ ኢስታስ ጌሊዴስ። ዬሱሲ ቂሳሪያ ፒሊጲሲዮሴ ጌቴቲዛ ቢታ ጋኪዳ ዎዴ ባና ካሊዛይታ “ኣሳይ ታና ኣሳ ና ኦና ጊዜ?” ጊዲ ኦይቺዴስ። ኢስቲካ “ኢሲ ኢሲ ኣሳይ ‘ፃማቂዛ ዮሃኒሳ’ ጌስ፤ ባጋ ኣሳይ ‘ኤላሳ’ ጌስ፤ ባጋይ ‘ኤርማሳ ዎይኮ ናቤታፔ ኢሳዴ ጊዶንታ ኣጌና’ ጌስ” ጊዳ። ኢዚካ ኢስታ “ኢንቴ ታና ኦና ጌቲ?” ጊዴስ። ሲሞና ጌቴቲዛ ጴፅሮሲ “ኔኒ ኪርስቶሳ ዴዖ ፆሳ ና ጊዲኪ?” ጊዲ ዛሪዴስ። ዬሱሲ “ዮና ና ሲሞና ኔኒ ኣንጄቲዳዴ! ኔስ ሃይሳ ቆንጪሲዳይ ሳሎን ዲዛ ታ ኣዋፔ ኣቲን ኣሾኔ ሱꬂ ጊዴና። ኔኒ ዛላ፤ ሃይሳ ዛላ ቦላ ታኒ ታ ዎሳ ኬꬄ ኬፃና፤ ጋናሜ ፔንጌቲካ ኢዞ ፆኔቴና። ሳሎ ካዎቴꬃ ቁልፔታ ታ ኔስ ኢማና፤ ኔኒ ቢታ ቦላ ሃኖ ጊዛይ ዉሪ ሳሎኒካ ሃናና። ቢታ ቦላ ኔ ሃኖፖ ጊዳይሲ ዉሪካ ሳሎኒካ ሃኔና” ጊዴስ። ቃሴካ ኢዚ ኪርስቶሳ ጊዲዳይሳ ኢስቲ ኦናስካ ዮቶንታ ማላ ባና ካሊዛይታስ ሎዔꬂ ዮቲዴስ። ሄሳፌ ሃ ሲሚን ዬሱሲ ዬሩሳላሜ ባናይሳ፥ ሄን ዴሬ ጪማታን፥ ቄሴታ ሃላቃታኒኔ ሙሴ ዎጋ ታማርሲዛይታ ኩሼን ዋዬ ኤካናይሳ፥ ሃይቃናይሳኔ ሄꬓንꬆ ጋላስ ሃይቆፔ ዴንዳናይሳ ባና ካሊዛይታስ ቆንጪሲዲ ዮቲዴስ። ጴፅሮሲ ዬሱሳ ጌዴ ኢሲ ባጋ ዛሪዲ “ጎዶ! ሃይሲ ኔ ቦላ ጋኮፎ!” ጊዲ ሃንቂዴስ። ዬሱሲ ጴፅሮሳኮ ሺቂዲ “ሃይሶ ፃላዔ! ሃይሳፌ ኪቻ! ኔኒ ኣሳዛፔ ኣቲን ፆሳ ዮዖይ ኔ ዎዝና ጊዶን ባይንዳ ጊሽ ኔ ታስ ꬉጴ ጊዳዳሳ” ጊዴስ። ቃሴካ ዬሱሲ ባና ካሊዛይታስ “ታና ካላናስ ዶሲዛ ኣሲ ባና ካዶ፤ ባ ማስቃሌ ቶኪዲ ታና ካሎ። ባ ሼምፖ ኣሻና ኮዪዛ ኣሲ ዉሪ ꬋይሳና፤ ጊዶ ኣቲን ባ ሼምፖ ታ ጊሽ ꬋይሲዛዴይ ኣሻና። ኣሲ ኣላሜን ዲዛዝ ኩሜꬅ ሃሪድ ባ ሼምፖ ꬋይሲኮ ኢዛ ኣይ ማዳኔ? ዎይኮ ኣሲ ባ ሼምፖ ጊሽ ቃንፃና ዳንዳዪዛዚ ኣዜ? ኣሳ ናይ ባ ኣዋ ቦንቾራኔ ሳሎ ኪታንቻታራ ያና፤ ኢሳስ ኢሳስ ኢዛ ኦሶ ማላ ኢዛዴ ዋጋ ኢማና። ታ ኢንቴስ ቱሙ ጋይስ፤ ሃይሳን ኤቂዳ ኣሳታ ጊዶፌ ኣሳ ናይ ባ ካዎቴꬃራ ዪሺን ቤያና ጋካናስ ሃይቆይ ኢስታ ቦቾንታ ኣሳቲ ዴቴስ” ጊዴስ። ኡሱፑን ጋላሳፌ ጉዬ ዬሱሲ ጴፅሮሳኔ ያቆቤ ቃሴካ ያቆቤ ኢሻ ዮሃኒሳ ባናራ ኤኪዲ ኢስታራ ፃላላ ኢሲ ꬎቃ ዙማ ቦላ ኬዚዴስ። ኢስቲ ሄን ዲሺን ዬሱሳ ሜꬋይ ላሜቲዴስ፤ ኢዛ ኣይፌሶይ ኣዋ ኣርሼ ማላ ፖዒዴስ፤ ኢዛ ማይዖይካ ፖዖ ማላ ፆልቂዴስ። ሄራካ ሙሴይኔ ኤላሲ ዬሱሳራ ሃሳዪሼ ኢስታስ ቤቲዴስ። ጴፅሮሲ ዬሱሳ “ጎዶ! ኑ ሃኒን ዲዛኮ ኑስ ሎዖኮ! ኔ ሼኔ ጊዲኮ ኢሲ ዳሴ ኔስ፥ ኢሲ ዳሴ ሙሴስ፥ ኢሲ ዳሴ ኤላሳስ ሄꬑ ዳሴ ኦꬆ?” ጊዴስ። ኢዚ ቡሮ ሃሳያን ዲሺን ፖዒዛ ሻራይ ኢስታ ካሚዴስ፤ ሻራ ጋꬃራ “ታኒ ኢዛን ኡፋዬቲዛ ታ ዶሲዛ ታ ናይ ሃይሳ፤ ኢዚ ጊዛዝ ሲዪቴ” ጊዛ ቃላ ጊሪስ ሲዬቲዴስ። ኢዛ ካሊዛይቲካ ሄሳ ሲዪዳ ዎዴ ዳጋሚዲ ቢታ ቦላ ጉፋኒዳ። ዬሱሲ ኢስታኮ ሺቂ ኢስታ ባ ኩሼን ቦቺዲ “ዴንዲቴ፤ ባቦፍቴ!” ጊዴስ። ኢስቲ ꬎቁ ጊ ፄሊሺን ዬሱሳፔ ኣቲን ኢዛራ ሃራ ኣስ ኦናካ ቤዒቤቴና። ኢስቲ ዙማ ቦላፌ ዎꬊሺን ዬሱሲ “ኣሳ ናይ ሃይቆፔ ዴንዳና ጋካናስ ኢንቴ ቤዮይሳ ኦናስካ ዮቶንታ ማላ” ጊ ኣዛዚዴስ። ዬሱሳ ካሊዛይቲ “ሂስቲን ሙሴ ዎጋ ታማርሲዛይቲ፥ ኤላሲ ካሴቲዲ ያና ቤሴስ ኣዛስ ጊዞ?” ጊዲ ኦይቺዳ። ኢዚካ ኢስታስ “ቱማኮ፤ ኤላሲ ዪዲ ዉርሲካ ጊጊሳና ጊዲ ዛሪዴስ። ታ ኢንቴስ ጊዛይ ኤላሲ ዪዴስ፤ ጊዶ ኣቲን ኣሳይ ባ ኮይዳ ማላ ኢዛ ቦላ ኦꬂዴስ ኣቲን ኢዛ ኤርቤና፤ ሄሳꬆካ ኣሳ ናይ ኢስታ ኩሼን ዋዬ ቤያና” ጊዴስ። ሄ ዎዴ ዬሱሳ ካሊዛይቲ ዬሱሲ ኢስታስ ዮቲዛይስ ፃማቂዛ ዮሃኒሳ ጊሽ ጊዲዳይሳ ኤሪዳ። ዬሱሲኔ ኢዛ ካሊዛይቲ ኣሳኮ ሲሚዳ ማላ ኢሲ ኣሲ ዬሱሳኮ ሺቂዲ ኢዛ ሲንꬃን ጉልባቲዲ “ጎዶ! ታ ና ዳይሳ ቦላፌ ዬጊዛ ሃርጌይ ዳሮ ዋይሲዛ ጊሽ ታስ ማራሪኪ! ዳሮ ዎዴ ታማን ኩንዴስ፤ ሃꬃንካ ጌሌስ። *** ታኒ ናዛ ኔና ካሊዛይታኮ ኤሃዲስ ሺን ኢስቲ ኢዛ ፓꬃና ዳንዳዪቤቴና” ጊዴስ። ዬሱሲ “ኔኖ ኣማኖንታ ጌላ ዬሌታዞ! ኣይዴ ጋካናስ ታ ኢንቴናራ ዳኔ? ቃሴ ኣይዴ ጋካናስ ታ ኢንቴና ዳንዳያኔ? ኣኔ ናዛ ሃ ታኮ ኤሂቴ” ጊዴስ። ሄሳፌ ጉዬ ዬሱሲ ዳይዳንꬃ ሴሪዲ ናዛፔ ኬሲዴስ፤ ናዚካ ሄ ሳቴፔ ሲሚዲ ፓፂዴስ። ዬሱሳ ካሊዛይቲ ፃላላ ኢዛኮ ሺቂዲ “ኑኒ ዳይዳንꬃ ኬሳናስ ኣዛስ ዳንዳይቤይኮኒ?” ጊዲ ኦይቺዳ። ኢዚካ ኢስታስ “ኢንቴስ ኣማኖይ ፓጬ ጊዲዳ ጊሽ ዳንዳይቤኬታ፤ ታ ኢንቴስ ቱሙ ጋይስ፤ ቄሪ ጋሼ ኣይፌ ማላ ኣማኖይ ኢንቴ ቦላ ዲዛኮ ሃይሳ ዙማ ‘ሃይሳፌ ዴንዳዳ ጌዴ ባ!’ ኢንቴ ጊዳኮ ኢዚ ኢንቴስ ባና። ኢንቴና ፆናናይ ዴና። ሃይሳ ማላይ ጊዲኮ ፆማኒኔ ዎሳን ኣቲን ሃራን ኬዜና” ጊዴስ። ኢስቲ ጋሊላን ኢሲፌ ዲሺን ዬሱሲ ኢስታ “ታና ኣሳ ና ኣሳስ ኣꬂ ኢማና። ኢስቲካ ኢዛ ዎꬋና፤ ኢዚካ ሄꬓንꬆ ጋላስ ዴንዳና” ጊን ኢዛ ካሊዛይቲ ኬሂ ሚሼቲዳ። ዬሱሲኔ ኢዛ ካሊዛይቲ ቂፊርናሆሜ ጌቴቲዛሶ ጋኪዳፔ ጉዬ ፆሳ ኬꬃ ጊራ ኤኪዛይቲ ጴፅሮሳኮ ሺቂዲ “ኢንቴ ኣስታማሬይ ፆሳ ኬꬃ ጊራ ናምዑ ዲናሬዛ ኣይስ ቃንፄኔ?” ጊዳ። ኢዚካ ኢስታስ “ቃንፄስ” ጊዴስ። ጴፅሮሲ ሶ ጌሊዳ ማላ ዬሱሲ ካሴቲዲ “ሲሞና ዴሬ ካዎቲ ጊራ ጊዲን ዎይኮ ቃራፃ ጊዲን ባ ናይታፔ ኤኪዞዬ? ሃራታፔ ኤኪዛ ሚሳቲዜ?” ጊዴስ። ጴፅሮሲካ “ሃራታፔ ኤኬቴስ” ጊዴስ። ዬሱሲ “ሂስቲኮ ናይታ ቦላ ኣጮይ ባ ጉሳካ! ሂስቲኮካ ኢስታ ኑ ꬉጴꬆንታ ማላ ኔ ሞሌ ኦይኪዛ ጊቴ ኤካ ባዳ ኣባን ዬጋ፤ ኮይሮ ኦይኪዳ ሞሌዛ ዱና ኔ ፖቃዳ ዴሚዛ ሚሻ ኤካዳ ታ ሱንꬃራኔ ኔ ሱንꬃራ ጊራ ቃንፃ” ጊዴስ። ሄ ዎዴ ዬሱሳ ካሊዛይቲ ኢዛኮ ሺቂዲ “ሳሎ ካዎቴꬃን ኑ ጋራሳን ኡባፌ ኣꬋናዴይ ኦኔ?” ጊ ኦይቺዳ። ዬሱሲ ኢሲ ና ፄይጊ ኤሂዲ ኢስታ ጊዶን ኤሲዲ “ታ ኢንቴስ ቱሙ ጋይስ፤ ኢንቴ ሲሞንታ ኢፂኮኔ ጉꬃ ናይታ ማላ ሃኖንታ ኢፂኮ ሙሌካ ሳሎ ካዎቴꬅ ጌሌኬታ። *** ሄሳ ጊሽ ሃ ናዛ ማላ ባና ዚቂሲዛዴይ ሳሎ ካዎቴꬃን ኡባፌ ኣꬋና። ሃይሳ ማላ ጉꬃ ና ታ ሱንꬃን ኤኪዛዴይ ታና ኤኬስ። “ጊዶ ኣቲን ታና ኣማኒዛ ጉꬃታፔ ኢሳዴ ꬉጴꬂዛይ ዴፆ ዎፃ ሹች ባ ቆꬌን ቃሼቲዲ ኣባ ጪማን ዬጌቲዲ ሚቴቲኮ ኢዛስ ሎዖ ጊዳና” ጊዴስ። ሃና ኣላሜያ ኣሲ ꬉጳና ጋሶ ጊዲዳ ጊሽ ኢዚስ ኣዬ-ኣና! ꬉጴይ ዩስ ኣጌና ሺን ꬉጴዛስ ጋሶ ጊዲዛዴስ ኣዬ-ኣና! ኔ ኩሼይ ዎይኮ ኔ ቶሆይ ኔና ꬉጳናስ ጋሶ ጊዲኮ ኔፔ ቃንፃ ዲጋ! ኔ ናምዑ ኩሼራ ዎይኮ ናምዑ ቶሆራ ጌዴ ሜርና ታማን ዬጌታናፔ ዎቤ ዎይኮ ቶሆ ሲላ ጊዳዳ ሄ ጌዴ ዴዖይ ዲዛሶ ጌሎይ ኔስ ሎዓና። ሄሳꬆካ ኔ ኣይፌይ ኔስ ꬉጴ ጊዲኮ ኔፔ ኬሳ ዬጋ! ናምዑ ኣይፌራ ጌዴ ጋናሜ ታማን ኔ ዬጌታናፔ ኢሲ ኣይፌራ ዴዖይ ዲዛሶ ኔ ጌሊዛይሲ ኔስ ሎዖ። “ሃይታ ጉꬃታ ጊዶፌ ኢሲኒዮካ ኢንቴ ካꬎንታ ማላ ናጌቲቴ! ታ ኢንቴስ ቱሙ ጋይስ፤ ሳሎን ዲዛ ኢስታ ኪታንቻቲ ሳሎን ታ ኣዋ ኣይፌሶ ኡባ ጋላስ ፄሌቴስ። ኣሳ ናይ ꬋዪዳይታ ኣሻናስ ዪዴስ። “ኣኔ ታስ ዮቲቴ ኢሳዴስ ፄቱ ዶርሲ ዲኮ ቃሴ ኢስታፌ ኢሲና ꬋይኮ፥ ሃንኮ ኡዱፉን ታማኔ ኡዱፉናታ ዙማ ቦላ ዬጊዲ ꬋዪዳሮ ኮያና ቢ ኤሬኔ? ታ ኢንቴስ ቱሙ ጋይስ፤ ሃንኮ ꬋዮንታ ኣቲዳ ኡዱፉን ታማኔ ኡዱፉን ዶርሳታፔ ኣꬂዲ ቤቲዳ ዶርሳይን ኡፋዬቴስ። ሄሳꬆካ ሃ ጉꬃታ ጊዶፌ ኢሶይ ꬋያና ማላ ሳሎን ዲዛ ኢንቴ ኣዋ ሼኔ ጊዴና። “ኔ ኢሻይ ኔና ቆሂኮ ኢዛኮ ባዳ ኢዛ ፃላላ ኔናራ ኤካዳ ኢዛ ሞሮ ኢዛስ ዮታ፤ ኢዚ ኔ ጊዛ ሲዪኮ ኔ ኢሻ ኔ ኣስ ኦꬃሳ። ኢዚ ኔ ጊዛይሳ ሲዮንታ ኢፂኮ ዮዖይ ዉሪ ናምዑ ማርካን ዎይኮ ሄꬑ ማርካን ላꬊዛ ጊሽ ኢሳዴ ዎይኮ ናምዑ ኣስ ኔናራ ኤካ ባዳ ኢዛ ሃሳይሳ። ኢዚ ኢስታካ ሲዮንታ ኢፂኮ ዎሳ ኬꬃስ ዮታ፤ ዎሳ ኬꬃዮካ ሲዮንታ ኢፂኮ ኢዛዴ ኔ ኣማኖንታዴ ማላኔ ዮቲን ሲሞንታ ኢታ ኣሳ ማላ ቆዳ። “ታ ኢንቴስ ቱሙ ጋይስ፤ ኢንቴ ቢታ ቦላ ቃቺዳይ ዉሪካ ሳሎኒካ ቃሼቲዳ ጊዳና፤ ኢንቴ ቢታ ቦላ ቢርሺዳዚ ሳሎኒካ ቢርሼቲዳይሳ ጊዳና። ቃሴካ ታ ኢንቴስ ቱሙ ጋይስ፤ ኢንቴ ቢታ ቦላ ናምዑ ጊዲዲ ኣይ ሚሺካ ኤሮ ኤሮ ጊዲ ኢንቴ ኦይቺኮ ሳሎን ዲዛ ታ ኣዋይ ኢንቴስ ኢማና። ናምዑ ዎይኮ ሄꬑ ጊዲዲ ታ ሱንꬃን ኢንቴ ሺቂዛሶን ሄን ኢንቴ ጊዶን ታ ዳና” ጊዴስ። ሄሳ ዎዴ ጴፅሮሲ ዬሱሳኮ ሺቂዲ “ጎዶ! ታ ኢሻይ ታና ቆሂኮ ታ ኢዛስ ኣፑንቶ ኣቶ ጎ? ላፑንቶ ኣቶ ጎ?” ጊዴስ። ዬሱሲካ ኢዛስ ዛሪዲ “ላፑን ታሙቶ ላፑን ኣቲን ላፑንቶ ፃላላ ጋ፥ ጊኬ፤ “ሄሳ ጊሽ ሳሎ ካዎቴꬂ ኣሽካራ ቦላ ዲዛ ሚሼ ሺሻና ኮይዳ ካዎ ሚሳታዉስ። ሚሻ ቆዳ ኦይኪዳ ማላ ኢዛ ኣሽካራታፔ ዳሮ ሚሎኔ ቢራ ኣጮይ ኢዛ ቦላ ዲዛዴ ኤኪ ዪዳ። ኣሽካራይካ ኢዛ ቦላ ዲዛ ኣጮዛ ቃንፆይ ፆንዳ ጊሽ ኢዚካ ኢዛ ማቺያካ ኢዛ ናይቲኔ ኢዛስ ዲዛዚ ዉሪ ባይዜቲዲ ሚሻይ ቃንፄታና ማላ ኢዛ ጎዳይ ኣዛዚዴስ። ሄ ዎዴ ኣሽካራዚ ጎዳዛ ቶሆ ቦላ ኩንዲዲ ‘ታኒ ታ ቦላ ዲዛ ኣጮዛ ዉርሲ ኔስ ቃንፃና ጋካናስ ታስ ጉꬃ ዎዴ ኢማርኪ!’ ጊዲ ዎሲዴስ። ኢዛ ጎዳይካ ኢዛስ ሚሼቲዲ ኢዛ ኣጮዛ ዉርሲ ማሪዲ ዬዲዴስ። “ሄ ኣሽካራይካ ባ ጎዳ ኣቻፌ ኬዚዳ ማላ ጉꬃ ኣጮይ ኢዛ ቦላ ዲዛ ባ ላጌ ዴሚዲኔ ‘ኔ ቦላ ዲዛ ታ ሚሻዮ ሃዒ ሃኒን ቃንፃ’ ጊዲ ጩሊ ኦይኪዴስ። ሄ ኢዛ ላጌ ኣሽካራይ ‘ታስ ጉꬃ ዎዴ ኢማርኪ! ታ ኔስ ቃንፃና’ ጊዲ ኢዛ ቶሆ ቦላ ኩንዲዲ ዎሲዴስ። “ጊዶ ኣቲን ኢዛስ ጉꬃ ዎዴ ኢማናስ ኮዮንታ ኢፂዲ ኢዛ ላጌዚ ባ ቦላ ዲዛ ኣጮዛ ቃንፃና ጋካናስ ቃሾ ኬꬃን ዬጊዴስ። ሄሳ ኢዚ ኦꬂሺን ቤዪዳ ኣሳይኔ ሃንኮ ኢዛ ላጌ ኣሽካራቲ ዳሮ ሚሼቲዳ። ቢዲካ ሃኒዳይሳ ዉርሲ ባ ጎዳስ ዮቲዳ። “ሄ ዎዴ ጎዳዚ ሄ ኣሽካራ ፄይጊሲ ኤሂዲ፥ ሃይሶ ኔኖ! ኢታዞ፥ ኔ ታና ዎሲን ኔ ቦላ ዲዛ ኣጮዛ ታ ኔስ ኣጋዲሲሺን ታ ኔና ማሪዳ ማላ ኔካ ኔ ላጌዛ ማራናስ ቤሴኔ? *** ጊዲ ኢዛ ቦላ ዲዛ ኣጮዛ ኢዚ ዉርሲ ቃንፃና ጋካናስ ቃቻና ማላ ቃቺዛይታስ ኣꬂ ኢሚዴስ። ሄሳ ጊሽ ኢንቴ ኢሶይ ኢሳ ዎዝናፔ ማሮንታ ኣጊኮ ሳሎን ዲዛ ታ ኣዋይካ ኢንቴና ማሬና” ጊዴስ። ዬሱሲ ዮቲ ዉርሲዳፔ ጉዬ ጋሊላ ኣጊዲ ዮርዳኖሴ ፒንꬃን ዲዛ ዩሁዳ ኣዉራጃ ቢዴስ። ዳሮ ዴሬይ ኢዛ ሄን ካሊን ኢዚካ ሃርጋንቻታ ፓꬂዴስ። ፋርሳዌቲ ኢዛ ፓጫናስ ኢዛኮ ሺቂዲ ኣይ ጋሶንካ “ኣሲ ባ ማቾ ኣንጂ ዬዳና ቤሲዜ?” ጊዲ ኦይቺዳ። ኢዚካ ኢስታስ “ፆሲ ኮይሮፔ ማጫኔ ኣዴ ሜꬊዳይሳ ናባቢቤይኬቲ? ጊዴስ። ቃሴካ ‘ኣሲ ኣዋኔ ኣዮ ኣጊዲ ባ ማቺራ ኢሲፌ ጊዴስ። ናምዓይካ ኢሲ ኣሾ ጊዴቴስ’ ጌቴቲዳይሲ ሃይሳ ጌዶን ጊዴኔ? ጊዴስ። ናምዓይ ኢሲ ኣሾ ኣቲን ሲንꬃፌ ናምዑ ጊዴቴና። ሄሳ ጊሽ ፆሲ ጋꬂ ዋፂዳይሳ ኣሲ ሻኮፎ” ጊዴስ። ኢስቲካ ኢዛስ “ሂስቲን ሙሴይ ‘ኣሲ ባ ማቾ ኣንጂ ዬዲዳ ኣንጆ ዋራቃታ ኢዚስ ኢሚ ዬዶ’ ጊዲ ኣዛስ ኣዛዚዴ?” ጊዳ። ዬሱሲካ ኢስታስ “ሙሴይ ኢንቴ ዎዝና ሙሜቴꬅ ቤዪዲ ማቼታ ኢንቴ ኣንጃና ማላ ፒቃዴ ኢንቴስ ኢሚዴስ ኣቲን ኮይሮፔ ሄሳ ማላ ጊዴና። “ታ ኢንቴስ ቱሙ ጋይስ፤ ባ ኣዚናፔ ሃራራ ላይማቶንታ ዲሺን ባ ማቾ ኣንጂዲ ሃራ ማቾ ኤኪዛዴይ ዉሪ ላይማቴስ። ኣንጄቲዳሮካ ኤኪዛዴይ ኢዚራ ላይማቴስ” ጊዴስ። ዬሱሳ ካሊዛይቲ ኢዛስ “ማቺ ዎጋይኔ ኣዚና ዎጋይ ሃይሳ ማላ ጊዲኮ ማቾ ኤኮንታ ኣጎይ ሎዖ” ጊዳ። ጊዶ ኣቲን ዬሱሲ ኢስታስ “ኢሲ ኢሲ ኢሜቲዳ ኣሳታፔ ኣቲን ሃይሳ ቲሚርቴዛ ኦኒካ ኤካናስ ዳንዳዬና። ጋሶይካ ኢሲ ኢሲ ኣሳይ ባ ኣዪ ኡሎፔ ዬሌቲሼ ሹፋ ጊዲዲ ዬሌቴስ፤ ኢሲ ኢሲ ኣሳይ ኣሳ ኩሼን ቃራቴቲዲ ጉንዱሌስ፤ ኢሲ ኢሲ ኣሳይ ሳሎ ካዎቴꬃስ ጊዲ ባና ባርካ ጉንዱላ ኦꬂዛ ኣሲካ ዴስ። ሃይሳ ኤካናስ ዳንዳዪዛዴይ ኤኮ” ጊዴስ። ሄ ዎዴ ዬሱሲ ኢስታ ቦላ ባ ኩሼ ዎꬂዲ ዎሳና ማላ ጉꬃ ናይታ ኢዛኮ ኤኪ ኤሂዳ፤ ጊዶ ኣቲን ኢዛ ካሊዛይቲ ናይታ ኤሂዳ ኣሳታ ቦላ ሃንቄቲዳ። ዬሱሲ “ናይቲ ሃ ታኮ ዬቶ፤ ዲጎፍቴ፤ ሳሎ ካዎቴꬂ ሃይታንታ ማላሳ!” ጊዴስ። ባ ኩሼ ናይታ ቦላ ዎꬂዲ ኣንጂዳፔ ጉዬ ሄፔ ዴንዲ ቢዴስ። ሄሳፌ ጉዬ ኢሳዴይ ዬሱሳኮ ሺቂዲ “ኣስታማሬ! ሜርና ዴዖ ዴማናስ ታኒ ሎዖ ኦሶ ኣይ ኦꬆ?” ጊዲ ኦይቺዴስ። ዬሱሲካ “ታና ኣዛስ ሎዖ ጊሽ ኦይቻይ? ሎዖይ ኢሲ ፆሳ ፃላላ፤ ጌዴ ዴዖይ ዲዛሶ ኔ ጌላና ኮይኮ ኣዛዞታ ናጋ” ጊዴስ። ኣዴዚ “ኣዛዞቲ ኣዋይቴ?” ጊዲ ኦይቺዴስ። ዬሱሲካ ዛሪዲ “ኣስ ዎꬎፓ፤ ላይማቶፓ፤ ካይሶቶፓ፤ ዎርዶ ማርካቶፋ፤ ኔ ኣዋኔ ኔ ኣዮ ቦንቻ፤ ኔ ሾሮ ኔ ማላ ሲቃ” ጊዴስ። *** ናቴꬃዚ ዛሪዲ “ሃይሳ ዉርሳ ታ ናጋዲስ፤ ሃራይ ኣዚ ታስ ፓጪዴ?” ጊዴስ። ዬሱሲካ ዛሪዲ “ኔ ሙሌ ፂላና ኮይኮ ባዳ ኔ ሃሪዳዝ ዉርሳ ባይዛዳ ሚሻ ዉርሳ ማንቆታስ ኢማ፤ ኔኒ ሳሎን ሚሽ ዴማንዳሳ፤ ሄሳፌ ጉዬ ሲማ ያዳ ታና ካላ” ጊዴስ። ኣዴዚ ሄሳ ሲይዲ ኢዛስ ዳሮ ሚሺ ዲዛ ጊሽ ኬሂፔ ሚሼቲሼ ቢዴስ። ዬሱሲ ባና ካሊዛይታ “ታ ኢንቴስ ቱሙ ጋይስ፤ ዱሬቲ ሳሎ ካዎቴꬅ ጌላናይሲ ዳሮ ሜቶ። ቃሴካ ታኒ ኢንቴስ ጊዛይ ዱሬይ ሳሎ ካዎቴꬅ ጌላናይሳፌ ጋሜላይ ናርፔ ሉኮራ ኣꬌꬂ ካዉያና” ጊዴስ። ሄሳ ሲዪዳ ኢዛ ካሊዛይቲ ዳሮ ቆፒዲ “ሂስቲን ኦኒ ኣታናስ ዳንዳዪዜ?” ጊዲ ዬሱሳ ኦይቺዳ። ዬሱሲካ ኢስታ ፄሊዲ “ሃይሲ ኣሳ ኣቻን ዳንዳዬቴና፤ ፆሳ ኣቻን ጊዲኮ ዉሪካ ዳንዳዬቴስ” ጊዴስ። ጴፅሮሲ ኢዛስ ዛሪዲ “ኑ ዉርሲካ ኣጊዲ ኔና ካሊዶስ፤ ሂስቲን ሃዒ ኑ ኣይ ዴማኔሻ?” ጊዴስ። ዬሱሲካ ኢስታስ “ታ ኢንቴስ ቱሙ ጋይስ፤ ኣሳ ናይ ቡሮ ያና ኦራꬃ ኣላሜን ባ ቦንቾ ኣልጋ ቦላ ኡቲዛ ዎዴ ኢንቴ ታና ካሊዳይቲ ታማኔ ናምዑ ኣልጋ ቦላ ኡቲዲ ታማኔ ናምዑ ኢስራዔሌ ናይታ ቦላ ፒርዳና። ታ ሱንꬃ ጊሽ ጊዲ ባ ኬꬄ፥ ባ ኢሻታ፥ ባ ሚቼታ፥ ባ ኣዋ፥ ባ ኣዮኔ ባ ናይታ፥ ዎይኮ ባ ቢታ ኣጊዛ ኣሲ ዉሪ ፄቱ ኩሼ ዳኮ ኤካና፤ ሜꬊና ዴዖካ ላታና። ጊዶ ኣቲን ዳሮ ሲንꬄ ጊዲዳ ኣሳቲ ጉዬ ጊዳና፤ ዳሮ ጉዬን ዲዛ ኣሳቲ ሲንꬃታና። “ሳሎ ካዎቴꬂ ባ ዎይኔ ኣታኪልቴ ጊዶን ኦꬂዛ ኦሳንቻታ ቃፃራናስ ማላዶራ ኬዚዳ ኢሲ ኣታኪልቴይ ዲዛ ጋዳዴ ሚሳታዉስ። ኢሲ ጋላሳ ዳሞዛ ጊዲዛዝ ሃሳዬቲዲ ጊጊዳፔ ጉዬ ኦሳንቻታ ዎይኔ ኣታኪልቴ ኦሶ ኦይꬂዴስ። “ማላዶ ሄꬑ ሳቴን ኬዚዲ ኦሶይ ባይንዳ ሜላ ጊያይ ኤቂዛሶን ኤቂዳ ሃራ ኣሳታ ዴሚዴስ። ‘ኢንቴ ቢዲ ታ ዎይኔ ጊዶን ኦꬂቴ፤ ታ ኢንቴስ ቤሲዛ ሚሼ ኢማና’ ጊዴስ። ኢስቲካ ቢዳ። ቃሴካ ጋላሳፌ ኡሱፑን ሳቴኒኔ ኡዱፉን ሳቴ ቦላ ኬዚዲ ሃራ ኦሳንቻታ ኦሶን ጌልꬂዴስ። ኦማርሳ ዎዴ ታማኔ ኢሲ ሳቴ ጊዲዛ ዎዴ ኬዚዲ ጮ ኤቂዳይታ ሃራታ ዴሚዲ ‘ኢንቴ ኩሜꬃ ጋላስ ኦሶይ ባይንዳ ኣዛስ ሃይሳን ኤቄቲ?’ ጊዲ ኦይቺዴስ። “ኢስቲካ ‘ኑና ኦꬂሲዛ ኣሲ ꬋዪዳ ጊሽ ኤቂዶስ’ ጊዳ። ኢዚካ ኢስታ ‘ኢንቴካ ቢዲ ታ ዎይኔ ኣታኪልቴ ጊዶን ኦꬂቴ’ ጊዴስ። “ጋዴይ ቃሚሺን ዎይኔ ኣታኪልቴዛ ጎዳይ ኦሳንቻታ ኣላፌዛስ ‘ጉዬፔ ዪዳይታፔ ኦይካዳ ኮይሮ ዪዳይታ ጋካናስ ዲዛ ኦሳንቻታ ዉርሲ ፄይጋዳ ኢስታ ኦሶ ዋጋ ቃንፃ’ ጊዴስ። ታማኔ ኢሲንꬃ ሳቴ ቦላ ኦሶን ጌሊዳይቲ ዪዲ ኢሶይ ኢሶይ ኩሜꬃ ጋላሳ ዋጋ ኤኪዳ። “ኮይሮ ኦሶን ጌሊዳይቲ ዪሼ ባ ዎዝናራ ሂንኮይታፔ ቦላራ ዳሮ ዴማና ጊ ቆፒሺን ኢስታስካ ሂንኮይታራ ጊና ኢሚዴስ። ሚሻ ኤኪሼ ቃንፂዛዴ ቦላ ‘ሃይቲ ዉርሴꬃን ኦሶን ጌሊዲ ኢሲ ሳቴ ፃላላ ኦꬂዳይቲ ኩሜꬃ ጋላስ ኦሶን ዱሪዲኔ ኣዋን ፁጌቲዲ ፔዒዳ ኑሳራ ዎስታ ኢስታስ ኢሲ ጊና ቃንፃይ?’ ጊዳ። *** “ኢዚካ ኢስታፌ ኢሳዴስ ‘ታ ጃላዉ! ኔና ቆሃቤኬ፤ ኢሲ ጋላሳስ ጊዲዛ ዳሞዛን ኦꬃናስ ታናራ ጊጋቤይኪ? ሃዒ ሄሂ ኔ ጊሻ ኤካዳ ባ፤ ኔስ ኢሚዳይሳ ማላ ዉርሴꬃን ዪዳይሳስካ ታ ኢማና ኮያይስ። *** ሂስቲን ታ ሚሻን ታ ዶሲዳዚ ኦꬃናስ ዳንዳዒኪና? ዎይኮ ታ ኪያ ጊዲዳይሲ ኔና ቃናቲሲዜ?’ “ጉዬን ዲዛይቲ ሲንꬄ፥ ሲንꬄን ዲዛይቲ ጉዬ ኣꬋና” ጊዴስ። ዬሱሲ ዬሩሳላሜ ቢሼ ባና ካሊዛ ታማኔ ናምዓታ ዱማ ሻኪ ኤኪዲ “ሂያ ኑኒ ዬሩሳላሜ ባና ጎስ፤ ኣሳ ናይ ቄሴታ ሃላቃሲኔ ሙሴ ዎጋ ታማርሲዛይታስ ኣꬊ ኢሜታና፤ ኢስቲካ ኢዚ ሃይቃና ማላ ኢዛ ቦላ ፒርዳና። ኢዛ ቦላ ቂꬊ ካዓናሲኔ ጋራፋና ማላ፥ ዎꬋና ማላካ ዴሬታስ ኣꬂ ኢማና፤ ሄꬓንꬆ ጋላስ ኢዚካ ሃይቆፔ ዴንዳና” ጊዴስ። ሄሳፌካ ዛቢዶሳ ናይታ ኣያ ባ ናይታራ ዬሱሳኮ ሺቃዳ ኢዛ ሲንꬃን ጉልባታዳ ዬሱሲ ኢዚስ ኢሲ ሚሽ ኦꬃና ማላ ዎሳዱስ። ኢዚካ ኢዞ “ኣይ ኮያይ?” ጊዴስ፤ ኢዛካ “ሃይቲ ታ ና ናምዓቲ ኔ ካዎቴꬃን ኢሶይ ኔ ኡሻቻራ፥ ኢሶይ ኔ ሃዲርሳራ ኡታና ማላ ኦꬃርኪ!” ጋዱስ። ዬሱሲካ ዛሪዲ “ኢንቴ ዎሲዛዝ ኤሬኬታ፤ ታኒ ኡዪዛ ፁዓ ኢንቴ ኡያና ዳንዳያኔ?” ጊዴስ። ኢስቲካ “ኤ ዳንዳዮስ” ጊዳ። ኢዚካ “ታ ፁዓፔ ቱሙ ኢንቴ ኡያናሺን ታ ኡሻቻኒኔ ታ ሃዲርሳን ኡቴꬂ ታ ኣዋይ ጊጊሲዳዴንታስ ኣቲን ታኒ ኢሚዛዝ ዴና” ጊዴስ። ታማቲ ሄሳ ሲይዲ ናምዑ ኢሻታ ቦላ ሃንቄቲዳ። ዬሱሲ ኢስታ ኢሲ ቦላ ፄይጊዲ “ኣይዛቤ ሃላቃቲ ባ ሃሪዛ ዴሬ ቦላ ጎዳቲዛይሳ ማላ ጎዳቴꬂ ዲዛይቲ ዎልቃራ ሃሪዛይሳ ኢንቴ ኤሬታ። ኢንቴ ጊዶን ሄሳ ማላ ሃናናስ ቤሴና፤ ኢንቴፌ ጊታ ጊዳና ኮዪዛዴይ ኢንቴስ ኦꬂዛዴ ጊዶ። ኢንቴፌ ቦላ ጊዳናስ ኮዪዛዴይ ኢንቴፌ ጋርስ ጊዶ። ኣሳ ናይ ኣሳይ ኢዛስ ኦꬃና ማላ ጊዶንታ ኣሳስ ኦꬃናሲኔ ባ ሼምፖ ዳሮታ ጊሽ ኣꬂ ኢማናስ ዪዴስ” ጊዴስ። ዬሱሲ ባና ካሊዛይታራ ኢያርኮፌ ኬዚዲ ቢሺን ዳሮ ዴሬይ ኢዛ ካሊዴስ። ሄን ኣይፌይ ቆቂዳ ናምዑ ኣሳቲ ኦጌ ዱናን ኡቲ ዴቴስ። ዬሱሲ ኣꬊ ቢዛይሳ ሲይዲ “ጎዶ! ዳዉቴ ናዉ ኑና ማራ!” ጊዲ ዋሲዳ። ዴሬዚ “ሃይዚቴ!” ጊዲ ሃንቂዴስ፤ ጊዶ ኣቲን ኢስቲ ዳርሲ ዋሲሼ “ጎዶ! ዳዉቴ ናዉ ኑና ማራ!” ጊዳ። ዬሱሲካ ኤቂዲ ኢስታ ፄይጊዲ “ታ ኢንቴስ ኣይ ኦꬃና ማላ ኮዬቲ?” ጊዴስ። ኢስቲካ “ኑ ኣይፌይ ፄላና ማላ ኮዮስ” ጊዳ። ዬሱሲ ኢስታስ ሚሼቲዲ ኢስታ ኣይፌታካ ባ ኩሼራ ቦሼቺን ሄራካ ፄሊዲ ኢዛ ካሊዳ። ኢስቲ ዬሩሳላሜ ማታን ዳብራዛይቴ ዙማ ቦላ ዲዛ ቤቴፋጌ ጌቴቲዛሶ ጋኪዳ ማላ ዬሱሲ ባና ካሊዛይታፔ ናምዓታ ኪቲዴስ። “ሃኖ ኢንቴ ማታን ዲዛ ጉታዮ ቢዲ ኢንቴ ሄ ጋኪዳ ማላ ኢሲ ሃሬ ዲዛራ ባ ጉቴይራ ቃሼታ ዲሺን ኢንቴ ዴማና። ቢርሺዲ ሃ ታኮ ኤኪ ዪቴ። ኦኒካ ኢንቴና ‘ኣይስ ሃይሳꬆ ኦꬄቲ?’ ጊኮ ‘ጎዳይ ኢስታ ኮዬስ’ ጊቴ፤ ኢንቴና ኦይቺዛዴይ ሄራካ ዬዳና። “ሃይሲካ ሃኒዛይ ካሴ ናቤን ፂዮኒስ ሂዝጊቴ ‘ሄኮ! ኔ ካዎይ ኣሽኬ ጊዲዲ ሃሬዮኔ ሃሬይ ጉቴዮ ቶጊዲ ኔኮ ያና’ ጌቴቲዳይሲ ፖሌታናሳ” ጊዴስ። *** ኢዛ ካሊዛይቲ ዬሱሲ ኢስታስ ዮቲዳ ማላ ኦꬂዳ። ሃሬዮ ኢዚ ጉቴይራ ኤሂዲ ባ ማይዖ ኢስታ ቦላ ዎꬂን ኢዚካ ሃሬታ ቶጊዴስ። ዴራፔ ዳሪዛ ባጋይ ባ ማይዖ ኦጌ ቦላ ሚጪዴስ፤ ባጋ ኣሳይ ሚꬃ ቦንጮ ዱꬂ ዱꬂ ኦጌ ቦላ ኣꬂ ኣꬂ ዬጊዴስ። ኢዛፔ ሲንꬃራ ቢዛ ዴሬይኔ ጉዬራ ካሊዛ ዴሬይካ ባ ቃላ ꬎቁ ሂስቲዲ “ሆሳና! ዳዉቴ ናይ ጋላቴቶ! ጎዳ ሱንꬃን ዪዳይ ኣንጄቲዳዴ! ፆሲ ጋላቴቶ!” ጊዳ። ኢዚ ዬሩሳላሜ ጌሊዳ ዎዴ ካታማ ኣሳይ ዉሪ “ሃይሲ ኦኔ?” ጊዲ ያርክ ያርኪዴስ። ኢዛ ካሊዲ ዪዳ ዴሬይካ “ሃይሲ ጋሊላ ጊዶን ዲዛ ናዚሬቴፔ ዪዳ ናቤ ዬሱሳ ጊዴኔ?” ጊዴስ። ሄሳፌ ዬሱሲ ፆሳ ኬꬃ ጌሊዲ ፆሳ ኬꬃ ካሬ ጊዶን ጋꬃን ባይዚዛይታኔ ሻሚዛይታ ጎዲዴስ። ሚሽ ላሚዛይታ ፃራጴዛታኔ ሃራጴ ባዪዚዛይታ ኦይዴ ሺሪ ሺሪ ዬጊዲ “ ‘ታ ኬꬃይ ዎሳ ኬꬄ ጌቴቴስ’ ጌቴቲዲ ፃፌቲዴስ፤ ኢንቴ ቃሴ ቦንቂዛይታ ጎንጎሎ ሂስቲዴታ” ጊዴስ። *** ኣይፌ ቆቄታኔ ቶሆይ ሲሊዳ ኣሳታ ዬሱሳኮ ፆሳ ኬꬄ ኤሂዳ። ኢዚካ ኢስታ ፓꬂዴስ። ጊዶ ኣቲን ቄሴታ ሃላቃቲኔ ሙሴ ዎጋ ታማርሲዛይቲ ኢዚ ኦꬂዳ ማላታታ ቤዪዳይሳኒኔ ጉꬃ ናይቲ “ዎዜ ካዎ፥ ጋላታይ ዳዉቴ ናስ ጊዶ!” ጊዲ ዋሲዛይሳ ሲዪዳ ጊሽ ዳሮ ሃንቄቲዳ። ኢስቲካ ዬሱሳ “ሃይቲ ናይቲ ጊዛይሳ ሲያይ?” ጊዳ፤ ዬሱሲካ ኢስታስ “ኤ ሲያዲስ፤ ናይታ ዱናፔኔ ꬋሚዛ ቄሪ ናይታ ዱናን ታኒ ጋላታ ጊጊሳዲስ ጊዛሶ ሙሌራካ ናባቢ ኤሬኬቲ?” ጊዴስ። ኢስታ ዬጊ ኣጊዲ ሄ ካታማፔ ኬዚዲ ቢታኒያ ጌቴቲዛሶ ቢዲ ሄን ኣቂዴስ። ዬሱሲ ዎንቴꬃ ጋላስ ማላዶ ጉዬ ካታማ ሲሚሺን ኢዛ ጋፊሲዴስ። ኦጌ ማታን ኢሲ ባላሴ ጌቴቲዛ ሚꬂ ቤዪዲ ጌዴ ኢዚኮ ሺቂሺን ሃይꬅ ፃላላፔ ኣቲን ኣይፌይ ባይንዳይሳ ቤዪዲ “ሂያፔ ጉዬ ኔ ቦላ ኣይፌይ ዶፖ!” ጊን ባላሴ ሚꬃያ ሄራካ ሜላዱስ። ዬሱሳ ካሊዛይቲ ሄሳ ቤዪዲኔ ማላሌቲዲ “ሃና ባላሴያ ዋናዳ ሄራካ ሜላዴ?” ጊዳ። ዬሱሲካ ኢስታ “ታ ኢንቴስ ቱሙ ጋይስ፤ ኢንቴስ ኣማኖይ ዲኮኔ ኢንቴ ሲꬎንታ ኣጊኮ ባላሴ ሚꬃይ ቦላ ሃኒዳይሳ ማላ ፃላላ ጊዶንታ ሃይሳ ዙማ ‘ሃይሳፌ ꬎቃሌታዳ ዱጌ ኣባን ጌላ’ ኢንቴ ጊዳኮካ ኢዚ ጌላና” ጊዴስ። ኢንቴስ ኣማኖይ ዲኮ ኢንቴ ዎሳን ኦይቺዳ ሚሽ ዉርሲካ ኤካና። ዬሱሲ ፆሳ ኬꬄ ጌሊዲ ታማርሲሺን ቄሴታ ሃላቃቲኔ ዴሬ ጪማቲ ኢዛኮ ሺቂዲ “ሃይሳ ዉርሳ ኦና ሼኔን ኦꬃይ? ሃይሳ ኦꬃናስ ሼኔ ኔስ ኦኒ ኢሚዴ?” ጊዲ ኢዛ ኦይቺዳ። ዬሱሲካ ኢስታስ ዛሪዲ “ታካ ኢንቴና ኢሲኖ ኦይቻይስ፤ ኢንቴ ታስ ዛሪኮ ታካ ሃይታ ኦꬂዛይታ ኦና ሼኔን ኦꬂዛኮኔ ኢንቴስ ዮታና። ዮሃኒሳ ፂንቃቴይ ኣዋፔ ዪዴ? ሳሎፔ ዪዴዬ? ኣሳፔ?” ጊዴስ። ኢስቲካ “ኑ ‘ሳሎፔ ዪዴስ’ ጊኮ ‘ሂስቲን ኣዛስ ኣማኒቤኬቲ?’ ጋና ጊዲ ባ ጊዶን ኢሶይ ኢሶይ ኢሳራ ዞሬቲዳ። ቃሴ ኑ ‘ኣሳፔ’ ጊኮ፥ ኣሳይ ዉሪካ ዮሃኒሳ ናቤ ጊዲ ኣማኒዛ ጊሽ ኑ ባቦስ” ጊዳ። ሄሳ ጊሽ ዬሱሳስ “ኑ ኤሮኮ” ጊዲ ዛሪዳ። ኢዚካ ኢስታስ “ሃይታ ታ ኦꬂዛይታ ኦና ሼኔን ኦꬂዛኮኔ ታካ ኢንቴስ ዮቲኬ” ጊዴስ። ዬሱሲ ኢስታ “ኢንቴስ ኣይ ሚሳቲዜ? ናምዑ ኣቱማ ናይ ዲዛ ኢሳዴይ ዴስ፤ ኢዚካ ኮይሮ ናዛኮ ቢዲ ‘ታ ናዞ! ሃቺ ጌዴ ዎይኔ ሚꬃሶ ባዳ ኦꬃ’ ጊዴስ። ናዚ ቃሴ ‘ቢኬ!’ ጊዲኔ ጉዬፔ ሙዞቲዲ ቢዴስ። “ናምዓንꬆ ናዛካ ካሴይሳꬆካ ‘ባ!’ ጊን ናዚ ‘ኤሮ!’ ጊዲ ቦንታ ኣጋጊዴስ። ሃይታ ናምዓታፔ ኣዋ ሼኔ ፖሊዳይ ኣዋይሴ?” ጊዲ ኦይቺዳ። ኢስቲካ “ኮይሮ ናዛ!” ጊዳ። ዬሱሲካ ኢስታስ፥ “ታ ኢንቴስ ቱሙ ጋይስ፤ ቃራፃ ቃንፂሲዛይቲኔ ላይማቲዛይቲ ሳሎ ካዎቴꬂ ኢንቴፌ ሲንꬃን ጌላና። “ፃማቂዛ ዮሃኒሲ ኢንቴና ፂሎቴꬃ ኦጌ ቤሳናስ ኢንቴኮ ዪዴስ ሺን ኢንቴ ኢዚ ጊዛይሳ ኣማኒቤኬታ፤ ጊዶ ኣቲን ቃራፃ ቃንፂሲዛይቲኔ ላይማቲዛይቲ ጊዲኮ ኣማኒዳ፤ ኢዚ ሃኒዳይሳ ኢንቴ ቤዪ ሲሚዲካ ማሮቴꬃን ጌሊዲ ኣማኒቤኬታ” ጊዴስ። “ሃራ ሌሚሶካ ሲዪቴ፤ ዎይኔ ሚꬂ ቶኪዛሶይ ዲዛዴይ ሄ ዎይኔዛስ ቢርዳ ዩሺ ኣꬂዲ ዎይኔዛ ኣይፌ ጉምዓናስ ኦላ ቦኪዴስ። ዎይኔዛ ናጋናስ ሚꬃ ቦላ ሻኮ ጊጊሲዴስ። ሄሳፌ ጉዬ ጋዴዛ ዎይኔ ሚꬃራ ጎይዛይታስ ኪራ ኢሚዲ ሃራ ዴሬ ቢዴስ። ቦኔይ ጋኪሺን ዎይኔ ሚꬃዛ ኣይፌ ኤካናስ ባ ኣሽካራታ ጋዴዛ ጎይዛይታኮ ዬዲዴስ። ጋዴዛ ጎይዛይቲ ኣሽካራታ ኦይኪዲ ኢሳ ዎꬊዳ፤ ኢሳ ቃሴ ሹቻን ጫዲዳ። ጋዳ ጎዳይ ካሴይታፔ ኣꬊዛ ሃራ ኣሽካራታ ዬዲዴስ። ጎይዛይቲ ሃዒካ ካሴይታ ቦላ ኦꬂዳይሳ ማላካ ኢስታ ቦላካ ፖሊዳ። ዉርሴꬃን ኦኒ ኤሪዜ ‘ኢስቲ ኢዛ ቦንቻናኮኔ’ ጊዲ ባ ና ኣꬂ ዬዲዴስ። ጊዶ ኣቲን ጋዳ ጎይዛይቲ ናዛ ቤዪዳ ማላ ‘ሃይሲ ኢዛ ላታናይሳኮ! ኣኔ ሃ ዪቴ፥ ኢዛ ዎꬊዲ ጋዳ ላቶስ’ ጊዳ። ናዛ ኦይኪዲ ዎይኔይ ቶኬቲዳሶፔ ጌዴ ካሬ ኬሲዲ ዎꬊዳ። “ኤሮ! ዎይኔዛ ጎዳይ ዪዛ ዎዴ ሄ ጋዳ ጎዪዛ ኣሳታ ዎስታና ኢንቴስ ሚሳቲዜ?” ጊዴስ። ኢስቲካ “ሄይታንታ ኢታታ ዳሮ ዋይሲ ዎꬊዲ ዎይኔይ ቶኬቲዛ ጋዳፔ ቤሲዛ ዎይኔ ኣይፌ ዎዴራ ኢዛስ ኢሚዛ ሃራ ጋዴ ጎይዛይታስ ኪራሳና” ጊዲ ኢዛስ ዛሪዳ። ዬሱሲካ ኢስታስ “ጌሻ ማፃፋን ‘ጊምቤ ኬፂዛይቲ ኢታ ጊዲ ዎራ ዬጊዳ ሹቻይ ኬꬃስ ማዛኔ ቦላ ዎꬊዛ ሹች ጊዲዴስ፤ ፆሲ ሃይሳ ኦꬂዴስ፤ ኢዛ ኦሶይካ ኑ ኣይፌስ ማላሊሲዛዝ’ ጌቴቲ ፃፌቲዳይሳ ናባቢቤኬቲ? “ሄሳ ጊሽ ታ ኢንቴስ ፆሳ ካዎቴꬂ ኢንቴፌ ኤኬታዳ ኣይፌ ኣይፊዛ ዴሬታስ ኢሜታና። ሃይሳ ሹቻ ቦላ ኩንዲዛይ ሜቃና፤ ሹቻይ ኢዛ ቦላ ዎꬊዛዴይካ ሊቃና” ጊዴስ። ቄሴታ ሃላቃቲኔ ፋርሳዌቲ ኢዛ ሌሚሶይ ኢስታ ጊሽ ጊዲዳይሳ ኤሪዳ። ጊዶ ኣቲን ኢስቲ ኢዛ ኦይኪ ቃቾንታ ማላ ኣሳይ ዬሱሳ ናቤ ማላ ፄሊዛ ጊሽ ባቢዳ። ቃሴካ ዬሱሲ ሃራ ሌሚሶ “ሳሎ ካዎቴꬂ ባ ናስ ሳርጌ ጊጊሲዳ ኢሲ ካዎ ሚሳታዉስ። ካዎይካ ዲጊሳስ ዮቲዳይታ ፄይጋናስ ባ ኣሽካራታ ዬዲዴስ፤ ፄይጌቲዳይቲካ ‘ኑ ቦኮ’ ጊዳ። “ቃሴካ ሃራ ኣሽካራታ ‘ካሴ ኢስታስ ዮቲዳይታ ሄኮ ታ ሳንጋ ቦራታኔ ሞꬊዳ ሜሄታ ሹካዳ ዲጊሳ ጊጊሳዲስ፤ ዉሪካ ጊጌቲዳ ጊሽ ሳርጌሶ ሃ ዪቴ!’ ጊዲ ዮቲቴ። ፄይጌቲዳይቲ ጊዲኮ ኢዛ ፄይሳ ዉዳን ዬጎንታ ኣጊዲ ኢሶይ ባ ጎሻሶ፥ ኢሶይ ባ ዛልዔሶ ቢዴስ። ሃንኮ ኣቲዳይታ፥ ኣሽካራቲ ኦይኪዲ ዳሮ ዋይሲዲ ዎꬊዳ። “ካዎይካ ሃንቄቲዲ ዎታዳራታ ዬዲዲ ኣሽካራ ዎꬊዳይታ ꬋይሲዴስ፤ ኢስታ ካታማ ፁጊዴስ። ባ ኣሽካራታካ ‘ሳርጌዛ ዲጊሴይ ጊጊዴስ፤ ጊዶ ኣቲን ሳርጌዛሶ ፄይጌቲዳይቲ ሳርጌስ ቤሲዛይታ ጊዲቤቴና። ጌዴ ኦጌ ቦላ ኬዚዲ ኢንቴ ዴሚዳ ኣስ ዉርሲ ሃ ሳርጌ ዲጊሴስ ፄይጊቴ’ ጊዴስ። ኣሽካራቲካ ኦጌ ቦላ ኬዚዲ ባ ዴሚዳይታ ሎዖታካ ኢታታካ ዉርሲ ሺሺዲ ሳርጌዛሶ ኢማꬅ ኩንꬂዳ። “ካዎይካ ፄይጌቲዳ ኢማꬃ ቤያናስ ሶ ጌሊዛ ዎዴ ሳርጌ ማይዖ ማይዖንታ ኣስ ዴሚዴስ። ‘ሃይሶ! ሳርጌ ማይዖ ማይዖንታ ዋናዳ ሃይሳ ጌላናስ ዳንዳያዲ?’ ጊ ኦይቺን ኣዴዛስ ዛራና ቃላይ ꬋዪዴስ። ካዎይካ ባ ኣሽካራታ ‘ሃይሳ ኣዴዛ ቶሆኔ ኩሼ ሺሺ ቃቺዲ ሄን ካሬን ዲዛ ꬉማን ኬሲ ኦሊቴ፤ ሄን ዬሆኔ ኣቻ ጋርጬች ጊዳና።’ “ፄይጌቲዳይቲ ዳሮታ፤ ዶሬቲዳይቲ ጊዲኮ ጉꬃታ” ጊ ዮቲዴስ። ሄሳፌ ጉዬ ፋርሳዌቲ ኬዚ ቢሼ “ኢዛ ዱናፔ ባላ ቃላ ዎስቲ ዴሚ ኦይኪኖ?” ጊዲ ዞሬቲዳ። ባና ካሊዛይታ ሄርዶሳ ኣሳታራ ኢዛኮ ኪቲዲ “ኣስታማሬ! ኔኒ ቱማንቻኔ ፆሳ ኦጌ ቱማፔ ታማርሲዛዴ ጊዲዳይሳኔ ኦናስካ ዱማ ማዶ ኦꬆንታ ዉርሳካ ኢሲ ማላ ኔ ፄሊዛይሳ ኑ ኤሮስ። ኔስ ኣይ ሚሳቲዛኮኔ ኣኔ ኑስ ዮታ? ቄሳሬስ ጊራ ቃንፃናስ ቤሲዜ? ቤሴኔ?” ጊዳ። ዬሱሲካ ኢስታ ጌኔ ቆፋ ኤሪዲ “ኢንቴኖ ቆꬌፔ ቆሞን ሃኒዛይቶ ታና ዮዖን ባሌꬂ ኦይካናስ ኣዛስ ኮዬቲ? ኢንቴ ጊራ ቃንፂዛ ሚሻ ኣኔ ታና ቤሲቴ” ጊን ኢስቲካ ኢሲ ዲናሬ ጌቴቲዛ ሚሽ ኢዛስ ኤሂዳ። ኢዚካ “ሃይሳ ሚሻ ቦላ ዲዛ ሚሲሌይኔ ፃፌቲዳ ሱንꬃይ ኦናይሴ?” ጊዴስ። ኢስቲካ ኢዛስ “ቄሳሬይሳ” ጊዳ። ኢዚካ ኢስታስ ዛሪዲ “ቄሳሬይሳ ቄሳሬስ፥ ፆሳይሳ ፆሳስ ኢሚቴ” ጊዴስ። ሄሳ ሲዪዳ ዎዴ ማላሌቲዲኔ ኢዛ ኣጊ ቢዳ። “ሃይቂዳይታስ ዴንዶይ ባዋ” ጊዲ ኣማኒዛ ሳዱቃዌቲ ሄ ጋላስ ዬሱሳኮ ሺቂዲ፥ “ኣስታማሬ! ሙሴይ ‘ኢሳዴይ ማቾ ኤኪዲ ና ዬሎንታ ሃይቂኮ ኢዛ ኢሻይ ሃይቂዳይሳ ማቾ ኤኪዲ ባ ኢሻ ላቲዛ ና ኢዛስ ዬሎ’ ጊዴስ። ኑ ኣቻን ላፑን ኢሻቲ ዴቴስ ሺን ኮይሮ ኢሻይ ማቾ ኤኪዲ ና ዬሎንታ ሃይቂዳ ጊሽ ካሎ ኢሻይ ኢዛ ማቼዮ ኤኪዴስ። ናምዓንꬆ ኢሻይካ ሃይቂዳ ኢሻꬆ ና ዬሎንታ ሃይቂዴስ፤ ሄሳꬆካ ሃኒሺን ማጫሳያ ላፑንꬃ ኢሻ ጌላዱስ። ዉርሴꬃን ማጫሳያ ሃይቃዱስ። ሄሳ ጊሽ ላፑናቲ ዉሪካ ኢዞ ኤኪዳ ሺን ሃይቆፔ ዴንꬃ ጋላስ ማጫሳያ ላፑንታፔ ኣዋይሳ ማቾ ጊዳኔ?” ጊዳ። ዬሱሲካ ኢስታስ ዛሪዲ “ጌሻ ማፃፋታኔ ፆሳ ዎልቃ ኢንቴ ኤሮንታ ጊሽ ባሌቴታ። ሃይቆፔ ዴንዲዳፔ ጉዬ ኣሳይ ሳሎ ኪታንቻታ ማላ ጊዳና ኣቲን ኤኬቴቴናኔ ጌሌቴና። ሃይቂዳይታ ዴንꬃ ጊሽ ጊዲኮ ፆሲ ‘ታኒ ኣብራሃሜ ፆሳ፥ ዪሳቃ ፆሳ፥ ያቆቤ ፆሳ’ ጊዲ ኢንቴስ ዮቶይሳ ናባቢቤኬቲ? ፆሲ ፓፃታ ፆሳ ኣቲን ሃይቄꬃታ ፆሴ ጊዴና” ጊዴስ። *** ዴሬይካ ሄሳ ሲይዲ ኢዛ ቲሚርቴዛን ማላሌቲዴስ። ዬሱሲ ሳዱቃዌታ ጮዑ ሂስቲዳይሳ ሲይዲ ፋርሳዌቲ ኢሲ ቦላ ሺቄቲዳ። ኢስታ ጊዶፌ ኢሲ ሙሴ ዎጋ ሎዔꬂ ኤሪዛዴይ ዬሱሳ ፓጫናስ ኮይዲ “ኣስታማሬ! ሙሴ ዎጋታ ጊዶን ኡባፌ ኣꬊዛይ ኣዋይሴ?” ጊዲ ኦይቺዴስ። *** ኢዚካ ዛሪዲ “ ‘ኔ ጎዳ ፆሳ ኔ ኩሜꬃ ዎዝናፔ፥ ኔ ኩሜꬃ ሼምፖፌ፥ ኔ ኩሜꬃ ቆፋፔ ዶሳ።’ ሃይሲ ኮይሮኔ ኡባፌ ኣꬊዛ ኣዛዞ። ናምዓንꬆይካ ኢዛ ሚሳቴስ፥ ሄሲካ ‘ኔ ሾሮ ኔ ሁዔ ማላ ዶሳ’ ጊዛይሳ። ሙሴ ዎጋይኔ ናቤታ ቲሚርቴይ ዉሪካ ሃይታ ናምዑ ኣዛዞታን ቃሼቴስ” ጊዴስ። ፋርሳዌቲ ኢሲ ቦላ ሺቄቲ ዲሺን ዬሱሲ ኢስታ፥ “ኪርስቶሳ ጊሽ ኢንቴ ኣይ ጌቲ? ኢዚ ኦና ና?” ጊ ኦይቺዴስ፤ ኢስቲካ ኢዛስ ዛሪዲ “ኢዚ ዳዉቴ ና” ጊዳ። ኢዚካ ኢስታስ “ሂስቲን ዳዉቴይ ፂሎ ኣያና ዎልቃን ‘ፆሳይ ታ ጎዳ’ ጊዲ ዋኒ ፄይጊዴ? ‘ታ ኔ ሞርኬታ ኔ ቶሆ ጊዶን ጉልባቲሳና ጋካናስ ኔ ታ ኡሻቻን ኡታ!’ ጊዴስ። *** ሄሳ ጊሽ ዳዉቴይ ኢዛ ‘ታ ጎዳ’ ጊዲ ፄይጊኮ ዋኒዲ ኢዛስ ና ጊዳና ዳንዳዪዜ?” ጊዴስ። ኢዛስ ኢሲ ቃላ ዛራና ዳንዳዪዳ ኣሲ ዎይኮ ሄ ጋላሳፌ ሲሚን ኢዛ ኦይሾ ኦይቻና ፃሊዳ ኣሲ ኦኒካ ቤቲቤና። ቃሴካ ዬሱሲ ዴሬዛሲኔ ባና ካሊዛይታስ፥ “ሙሴ ዎጋ ታማርሲዛይቲኔ ፋርሳዌቲ ሙሴ ዎምባራ ቦላ ኡቲዳ። ሄሳ ጊሽ ኢስቲ ኢንቴስ ዮቲዛይሳ ዉርሲ ኦꬂቴኔ ናጊቴ፤ ጊዶ ኣቲን ኢስቲ ዱናን ሃሳዪዛይሳ ማላ ኦሶን ቤሶንታ ጊሽ ኢንቴ ኢስታ ኦሶ ካሎፍቴ። “ሄሳꬆካ ኣሲ ቶካናስ ዳንዳዮንታ ዴፆ ቶሆ ቃቺዲ ኣሳ ሃሼ ቦላ ዎꬄቴስ ሺን ባሲ ጊዲኮ ቢራꬌ ፄራንካ ቦቼቴና። ኢስታ ኦሶ ዉርሲ ኣሲ ቤያና ማላ ኦꬄቴስ፤ ባ ኣሼንኪታቤ ጌሻ ማፃፋ ጊዶፋ ፃፊ ኤኪዳ ኢሲ ኢሲ ፂቂሴታ ኪታቤ ሲኪዲ ሊጴ ቦላ ዎይኮ ኩሼን ቃቺዛዝ ኦꬄቴስ። ባ ማይዖ ማጫራ ኣዱሴቴስ። ዲጊሳይ ዲዛሶን ቦንቾ ሶ ኣይሁዳ ዎሳ ኬꬃንካ ሲንꬃራ ኡታና ዶሴቴስ። ሄሳꬆካ ጊያ ጊዶን ሳሮ ጌቴታናሲኔ ኣሳይ ኢስታ ‘ኣስታማሬ!’ ጋና ማላ ኮዬቴስ። “ኢንቴ ጊዲኮ ‘ኣስታማሬ’ ጌቴቲ ፄይጌቶፍቴ። ኢንቴ ኣስታማሬይ ኢሳ ፃላላ ጊዲሺን ኢንቴ ዉሪካ ኢሶይ ኢሳስ ኢሻንታ። ሳሎን ኢንቴስ ኢሲ ኣዋይ ፃላላ ዲዛ ጊሽ ቢታ ቦላ ኦናካ ‘ኣዋዉ!’ ጊዲ ፄይጎፒቴ። ኢንቴ ኣስታማሬይ ኢሲ ኪርስቶሳ ፃላ ጊዲዳ ጊሽ ኢንቴ ‘ኣስታማሬቶ!’ ጌቴቶፍቴ። ኢንቴ ጊዶን ኡባፌ ኣꬊዛዴይ ኢንቴስ ኦꬂዛዴ ጊዳና። ባና ꬎቂሲዛዴይ ካዉያና፤ ባና ካዉሺዛዴይ ቦንቼታና። “ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ኢንቴኖ ፋርሳዌቶ! ኣሳይ ፆሳ ካዎቴꬅ ጌሎንታ ማላ ኣሳ ቦላ ኢንቴ ፔንጌ ጎርዲዛ ጊሽ ኢንቴና ኣዬ-ኣና! ኢንቴ ኢንቴስ ጌሌኬታኔ ጌላናስ ኮዪዛይታካ ጌልꬄኬታ። ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ቃሴካ ፋርሳዌቶ! ኢንቴስ ኣዬ-ኣና! ኣዚናይ ባይንዳ ማጫሳታ ኬꬃ ካሎሲሼ ኣሳ ኣይፌ ሲንꬃን ኣዱሳ ዎሳ ኢንቴ ዎሲዛ ጊሽ ኢንቴ ኢታ ፒርዳ ፒርዴታና። “ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ቃሴካ ፋርሳዌቶ! ኢሲ ኣስ ኣይሁዳ ኣማኖን ጌልꬃናስ ኣባ ቦላራኔ ቢታ ቦላራ ዩዪ ዳቡርዲኔ ኣማንꬂዳ ኣሳ ኢንቴፌ ናምዑ ኩሼ ኣꬂዲ ጋናሜ ና ኢንቴ ኬሲዛ ጊሽ ኢንቴና ኣዬ-ኣና! “ኢንቴኖ! ኢንቴስ ቆቂ ኡቲዲ ሃራታ ካሌꬂዛይቶ! ኢንቴስ ኣዬ-ኣና! ‘ኦኒካ ፆሳ ኬꬃን ጫቂኮ ኣይኮይ ባ’ ጊዶ ኣቲን ‘ፆሳ ኬꬃ ጊዶን ዲዛ ዎርቃን ጫቂኮ ጫቆ ጎሜይ ጋካና’ ጌታ። ኢንቴኖ ቆቂዳይቶ! ባሌቲዳይቶ፥ ዎርቃፌኔ ዎርቃ ዱማሲዳ ፆሳ ኬꬃፌ ኣዋይሲ ኣꬊዜ? ሄሳꬆካ ‘ኦኒካ ያርሾ ያርሺዛሶ ቦላ ጫቂኮ ኣይኮይ ባዋ፤ ሺን ያርሺዛሶን ዲዛ ያርሾ ቦላ ጫቂኮ ጫቆይ ጎሜስ’ ጌታ። ኢንቴኖ ቆቄቶ! ያርሾፔኔ ያርሾ ሺሺዛሶፔ ኣዋይሴ ኣꬊዛይ? ሄሳ ጊሽ ያርሾ ሺሺዛሶ ቦላ ጫቂዛዴይ ያርሾሶዛ ቦላኔ ያርሺዛሶ ቦላ ዲዛ ኡባ ሚሻን ጫቄስ። ሄሳꬆካ ፆሳ ኬꬃዛ ቦላ ጫቂዳይ ፆሳ ኬꬃኒኔ ኢዛ ጊዶን ኣቂዛይሳን ጫቄስ። ሳሎን ጫቂዛዴይካ ፆሳ ኣልጋኒኔ ኣልጋ ቦላ ኡቲዳይሳን ጫቄስ። “ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ፋርሳዌቶ! ኢንቴና ኣዬ ኣና! ኣሱታፔ፥ ኣኑጋፔኔ ካትካልዓፌ ታማፌ ኢሲኖ ኢሜታ ሺን ዎጋታፔ ዋናቲዛይታ ሄይቲካ ቱማ ፒርዳ፥ ማሮቴꬂኔ ኣማኔቴꬅ ጊዲኮ ካꬊዴታ። ሄይታ ኣጎንታ ዲሼ ሃይታንታ ኢንቴ ኦꬃናስ ኢንቴስ ቤሴስ ሺን ኣጊዴታ። ኢንቴኖ ቆቂ ኡቲዲ ካሌꬂዛይቶ! ኡዔ ጋጪዲ ኡዬታ ሺን ጋሜላ ሙሜ ሚቴታ! “ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶኔ ፋርሳዌቶ! ኢንቴስ ኣዬ-ኣና! ፁዓሲኔ ኬሬስ ቦላ ባጋ ቁጬታ ሺን ኢዛ ጊዶን ዲዛይሳ ኢንቴ ቦንቃኒኔ ኡዜቴꬃን ሺሺዴታ። ኔኖ ቆቄ ፋርሳዌዞ! ኮይሮታዳ ፁዓሲኔ ኬሬስ ጊዶ ባጋ ጌሻ! ሄሳፌ ጉዬ ካሬ ባጋይ ጌሽ ጊዳና። “ኢንቴኖ ቆꬌፔ ቆሞን ሃኒዛይቶ፥ ሙሴ ዎጋ ታማርሲዛይቶ፥ ቃሴ ፋርሳዌቶ! ቦላ ባጋይ ኖራራ ሜሼቲዲ ሎዒዛይቲ ጊዶይ ጊዲኮ ሃይቂዳይታ ሜቄꬂኔ ዳሮ ቱናኔቴꬃን ኩሚዳ ዱፎታ ሚሳቲዛ ጊሽ ኢንቴና ኣዬ-ኣና! ኢንቴካ ቦላ ባጋራ ኣሳስ ፂሎ ኣሳታ ሚሳቴታ፤ ኢንቴ ጊዶይ ጊዲኮ ጪሞኒኔ ኢታቴꬃን ኩሚዴስ። “ኢንቴኖ ዱናን ጪሚዛይቶ! ሙሴ ዎጋ ኣስታማሬቶ፥ ቃሴካ ፋርሳዌቶ! ኢንቴስ ኣዬ-ኣና! ናቤታ ዱፎ ሎዔꬂዛይቶ፥ ፂሎ ኣሳታ ዱፎ ሃዉልቴራ ጊጊሲዛይቶ! ኑ ኣዋቲ ናቤታ ዎꬊዛ ዎዴ ኑ ዲዛኮ ኢስታራ ዙፔቶኮኮ ሺን፥ ኢንቴ ናቤታ ዎꬊዳ ኣሳታ ናይታ ጊዲዳይሳ ኢንቴ ዱናራ ኢንቴርካ ኢንቴ ኢንቴ ቦላ ማርካቴታ። ሂስቲኮ ኦሴቲዲ ፖሌቶንታ ኦጌ ቦላ ዲዛ ኢንቴ ኣዋታ ኦሶ ፖሊቴ። “ኢንቴኖ ዱኪዛ ኢታ ሾሻ ናይቶ! ጋናሜ ታማ ፒርዳፌ ኢንቴ ዋኒ ኣታኔ? ሄሳ ጊሽ ናቤታኔ ኤራንቻታ ኣስታማሬታካ ታ ኢንቴስ ዬዳና። ኢንቴ ኢስታ ጊዶፌ ኢሲ ኢሲ ኣሳታ ዎꬋና። ባጋይታ ኢንቴ ካቃና፤ ባጋይታ ኢንቴ ኣይሁዳ ዎሳ ኬꬃን ጋራፋናኔ ሃ ካታማፔ ሃራ ኢንቴ ጎዳና። ሄሳ ጊሽ ፂሎ ኣቤሌ ሱꬃፌ ሃ ሲሚን ፆሳ ኬꬃኒኔ ያርሾ ያርሺዛሶ ጊዶን ኢንቴ ዎꬊዳ ባራኪዮ ና ዛካራሳ ሱꬃ ጋካናስ ቢታ ቦላ ጉኪዳ ፂሎታ ሱꬃ ኡባስ ኢንቴ ኦይሼታና። ታ ኢንቴስ ቱሙ ጋይስ፤ ካሴ ኣꬊዳ ዮዖ ኡባስ ሃይሲ ሃ ዬሌታይ ኦይሼታና። “ሃኔ ዬሩሳላሜ! ናቤታ ዎꬊዛሬ! ኔኮ ኪቴቲዳይታ ሹቻራ ጫዲዛሬ! ሃኔ ዬሩሳሌሜ ኩቶ ኣያ ባ ጪዬታ ባ ቄፌ ጊዶ ሺሺዛ ማላ ታ ኔ ናይታ ሺሻናስ ኣፑን ዎዴ ኮያዲናሺን ኔ ጊዲኮ ኮያባካ። ሄኮ ኢንቴ ኬꬂ ካይስ ጊዲ ኣታና። ታ ኢንቴስ ቱሙ ጋይስ፤ ኢንቴ ጎዳ ሱንꬃን ዪዛዴይ ኣንጄቲዳዴ ጋና ዎዴይ ጋካናስ ናምዓንꬆ ታና ቤዬኬታ” ጊዴስ። ዬሱሲ ፆሳ ኬꬃፌ ኬዚ ቢሺን ኢዛ ካሊዛይቲ ፆሳ ኬꬃዚ ሹቻን ኬፄቲዳይሳ ቤሳና ኮይዲ ዬሱሳኮ ሺቂዳ። ኢዚካ ኢስታስ “ሃይሳ ዉርሲ ፄሌቲ? ታ ኢንቴስ ቱሙ ጋይስ፤ ሃይሲ ኢንቴ ቤዪዛ ኢሶይ ኢሳ ቦላ ዲዛ ሹቻይ ላሌቶንታ ኢሲ ሹቺካ ሃይሳꬆ ዴና” ጊዴስ። ኢዚ ዳብራዛይቴ ጌቴቲዛ ዙማ ቦላ ኡቲ ዲሺን ኢዛ ካሊዛይቲ ፃላላ ኢዛኮ ሺቂዲ “ኣኔ ኑስ ዮታ፤ ሃይሲ ኔ ጊዛይሲ ኣይዴ ሃናኔ? ኔ ዩሳሲኔ ዎዴ ዉርሴꬃስ ማላታይ ኣዜ?” ጊ ኦይቺዳ። ዬሱሲካ ዛሪዲ “ኦኒካ ኢንቴና ባሌꬆንታ ማላ ናጌቲቴ። ቡሮ ዳሮቲ ‘ታ ኪርስቶሳ’ ጊሼ ታ ሱንꬃን ያና፤ ዳሮታካ ባሌꬃና። ኦላኔ ኦላ ጊሽ ሃሳዬቲዛ ዎሬ ኢንቴ ሲያና። ሃ ዮዖቲ ዉሪካ ዎልቃራ ፖሌታና ሺን ዉርሴꬂ ቡሮ ጊዲዳ ጊሽ ኢንቴ ሃይሳን ዳጋሞንታ ማላ ናጌቲቴ። ዴሬይ ዴሬ ቦላ፥ ካዎይ ካዎ ቦላ ዴንዳና፤ ዱማ ዱማ ዴሬን ኮሻይኔ ቢታ ቃꬂ ሃናና። ሄሲ ዉሪካ ሚፃስ ሌሶ ማላ። ሄ ዎዴ ኢንቴና ዋዬስ ኣꬂ ኢማና፤ ኢንቴና ዎꬋና፤ ታ ሱንꬃ ጌዶን ዴሬ ኡባን ኢንቴ ኢፄቲዳይታ ጊዳና። “ሄ ዎዴ ዳሮ ኣሳይ ꬉጴታና፤ ኢሶይ ኢሳ ኣꬂ ኣꬂ ኢማናኔ ባ ጊዶን ኢፄታና። ዳሮ ዎርዶ ናቤቲ ዴንዳናኔ ዳሮታ ባሌꬃና። ኢታቴꬂ ዳሪዛ ጊሽ ዳሮታፔ ሲቆይ ኢርፃና። ዉርሴꬅ ጋካናስ ሚኒዳዴይ ኣታና። ዴሬ ኡባስ ማርካ ጊዳና ማላ ሃይሲ ካዎቴꬃ ሚሺራቾ ቃላይ ኩሜꬃ ኣላሜን ዮቴታና፤ ሄሳፌ ጉዬ ዉርሴꬂ ያና። “ሄሳ ጊሽ ናቤ ዳኔላን ዮቴቲዳይሳ ማላ ‘ሃራሲዛ ቱናቴꬂ’ ኣንጄቲዳሶን ኤቂዳይሳ ኢንቴ ቤዪዛ ዎዴ ናባቢዛዴይ ዎዝናን ዎꬆ። ሄ ዎዴ ዩሁዳን ዲዛይቲ ፑዴ ዙማ ቦላ ጋንጌቶ። ኬꬃ ካራ ቦላ ዲዛዴይ ኦኒካ ባ ሚሽ ኬꬃፌ ኬሳና ጊዲ ዱጌ ዎꬎፎ። ጋዴ ጊዶን ዲዛዴይ ኦኒካ ባ ማይዖ ኤካና ጊዲ ሶ ሲሞፎ። ሄ ጋላሳታን ቃንꬃራ ዲዛ ማጫሳታሲኔ ና ꬋንꬂዛ ኣዬታስ ኣዬ-ኣና! ሄሳ ጊሽ ኢንቴ ጋንጎይ ባልጎ ዎይኮ ሳምባታ ጋላስ ጊዶንታ ማላ ዎሲቴ። ሄ ዎዴ ኣላሜይ ሜꬌቶሳፔ ሃቺ ጋካናስ ሃኒ ኤሮንታ ሚሺ ሲንꬃፌካ ኢዛ ሚሳቲዛይ ባይንዳ ዎልቃማ ሜቶይ ሃናና። ሄ ጋላሳቲ ቃሞንታኮ ኣሾ ማይዒዳ ኣሲ ዉሪ ኣቴና ሺን ዶሬቲዳይታ ጊሽ ሄ ጋላሳቲ ቃማና። “ሄ ዎዴ ኦኒካ ‘ሄኮ ኪርስቶሲ ሃይሳን ዴስ!’ ዎይኮ ‘ሄሳን ዴስ’ ጊዛዴ ኣማኖፒቴ። ዎርዶ ኪርስቶሳኔ ዎርዶ ናቤቲ ቡሮ ዴንዲዲ ኢስታስ ዳንዳዬቲኮ ዶሬቲዳይታ ባሌꬃናስ ጊዲ ዎልቃማ ማላታታኔ ካሴ ኦሴቲ ኤሮንታ ሚሽ ኦꬃና። “ሄኮ ሃይሳ ታ ኢንቴስ ካሴታ ዮታይስ። ሄሳ ጊሽ ‘ሄኮ ሂርኪ ባዞን ዴስ’ ጊዲ ኢንቴስ ዮቲኮ ሄ ኬዞፒቴ፤ ‘ሄኮ ኢልፒኔን ዴስ’ ጊኮ ኣማኖፒቴ። ዎልቃንꬂ ኣዋ ኣርሼይ ሞኪዛሶራ ዎልቃሚዲ ኣዋ ኣርሼይ ዉሊዛሶ ጋካናስ ፖዒዛይሳ ማላ ኣሳ ና ዩሳይካ ሄሳꬆ ሃናና። ኣሃይ ዲዛሶ ኣንኮ ካፎይ ሺቄስ። “ሄራካ ሄ ኢታ ሜቶ ጋላሳታፔ ጉዬ ኣዋ ኣርሼይ ꬉማና፤ ኣጊናይ ባ ፖዖ ዲጋና፤ ፆሊንቴቲ ሳሎፔ ቆቆፌታና፤ ሳሎ ዎልቃማቲካ ቃፃና። ሄ ዎዴ ኣሳ ና ማላታይ ሳሎ ቦላ ቤታና። ቢታ ቦላ ዲዛ ዴሬይ ዉሪ ዬካና፤ ኣሳ ናይካ ሳሎ ሻራ ቦላ ዳሮ ዎልቃራኔ ጊታ ቦንቾራ ዪሺን ኣሳይ ቤያና። ኪታንቻታካ ዳሮ ዎልቃማ ፁሩምባ ጊሪሳራ ዬዳና። ኢስቲካ ዶሬቲዳይታ ኦይዱ ማዒዜኔፔ ሳሎስ ሃ ባጋ ጋፃፔ ሄ ጋፃ ባጋ ጋፃ ጋካናስ ዉርሲ ኢሲ ሶ ሺሻና። “ባላሴ ጌቴቲዛ ሚꬃፌ ሃይሳ ታማሪቴ፤ ባላሴ ሚꬃይስ ኡንቁሎይ ጪሊሊዛ ዎዴ ኢዛ ሃይꬅ ኬሲሺን ቦኔይ ማቲዳይሳ ኢንቴ ኤሬታ። ሄሳꬆ ሃይታ ኢንቴ ቤዪዛ ዎዴ ኢዚ ፔንጌ ማቲዳይሳ ኢንቴ ኤራና። ታ ቱሙ ጋይስ፤ ሃይሲ ዉሪ ፖሌታና ጋካናስ ሃ ዬሌታይ ኣꬌና። ሳሎይኔ ሳዓይ ኣꬋና ሺን ታ ቃላይ ጊዲኮ ሙሌካ ኣꬌና። “ሄ ጋላሳዮኔ ሄ ሳቴዮ ኣዋፔ ኣቲን ሳሎ ኪታንቻታ ጊዲንካ ናዛ ጊዲንካ ኦኒካ ኤሬና። ኖሄ ዎዴ ሃኒዳይሳ ማላ ኣሳ ና ዩሲ ሄሳ ማላ ጊዳና። ꬋይሲዛ ሃꬃፌ ካሴ ኖሄይ ማርካቤን ጌሊዛ ጋላስ ጋካናስ ኣሳይ ሚሼኔ ኡዪሼ፥ ኤኪሼኔ ጌሊሼ ጋምዒዴስ። ሄ ዎዴይ ጋካናስ ኣዚ ሃናናኮኔ ኣሳይ ኤሮንታኔ ቆፖንታ ባሻ ሃꬃይ ዪዲ ሚቲዳይሳ ማላ ታ ኣሳ ናይ ዪዛ ዎዴይካ ሄሳꬆ ሃናና። “ሄ ዎዴ ናምዑ ኣሳቲ ኢሲፌ ጎሻን ፔዓና ሺን ኢስታፌ ኢሳዴይ ኤኬታና፤ ኢሳዴይ ኣታና። ናምዑ ማጫሳቲ ዎፃን ኢሲፌ ጋጫና ሺን ኢስታፌ ኢሲኔያ ኤኬታና ኢሲኔያ ኣታና። “ሂስቲኮ ኢንቴ ጎዳይ ያና ጋላሳ ኢንቴ ኤሮንታ ጊሽ ቤጊዲ ናጊቴ። ሃይሳ ዎዝናን ዎꬂቴ፤ ካይሶይ ቃማፌ ኣፉንꬃ ሳቴ ቦላ ያናኮኔ ኤሪዛኮ ኢዛ ሚሽ ካይሶይ ኤኮንታ ማላ ኬꬃ ኣዋይ ቤጊዲ ናጋና። ኣሳ ናይካ ኢንቴ ቆፖንታ ሳቴ ቦላ ያና፤ ኢንቴካ ሄሳꬆ ጊጌቲዳይታ ጊዲቴ። “ዎዴራ ሶ ኣሳ ቁማ ሚዛና ማላ ጎዳይ ባ ኬꬃ ኣሳ ቦላ ሹሚዳ ኣማኔቲዛ ጪንጫ ኦሳንቻይ ኦኔ? ኬꬃ ኣዋይ ሲሚዲ ዪዛ ዎዴ ኢዛስ ኢሚዳ ሃዳራ ኦꬂ ፖሊሼ ቤቲዳ ኦሳንቻይ ኣንጄቲዳይሳ። ታ ኢንቴስ ቱሙ ጋይስ፤ ጎዳይ ኢዛ ባ ሃሪዳ ኡባ ቦላ ሹሜስ። ጊዶ ኣቲን ሄ ኦሳንቻይ ኢታ ጊዲዲ ‘ታ ጎዳይ ጋምዒዲ ያና’ ጊ ቆፒዲ፥ ዴንዲ ሃንኮ ኦሳንቻታ ዋꬋ ኦይኪኮ ማꬆቲዛይታራ ሚኮኔ ኡዪኮ፥ ኢዚ ቆፖንታ ጋላሳኒኔ ሳቴን ኢዛ ጎዳይ ዪዲ፥ ኢዛ ቃንፄꬂ ካዓና፤ ኢዛ ኤፃ ቆꬌፔ ቆሞን ሃኒዛይታራ ኦꬃና። ሄንካ ዬሆይኔ ኣቻ ጋርጬቺ ሃናና። “ሄ ዎዴ ሳሎ ካዎቴꬂ ሚሺራ ሞካናስ ፆምፔ ኦይኪዲ ኬዚዳ ታሙ ጌላዖታ ሚሳታዉስ። ሄ ታማታፔ ኢቻሹ ጌላዖቲ ኤያታ፥ ሃንኮ ኢቻሻቲ ቃሴ ጪንጫታ። ኤያቲ ኩራዜ ፆምፔ ኦይኪዳ ሺን ዉሪኮ ጉጃና ሃራ ናጌ ላምባ ኦይኪቤቴና። ጪንጫቲ ጊዲኮ ባ ኩራዜዛራ ዉሪኮ ጉጃና ላምባ ሃራ ፃርሙሴን ኦይኪዳ። ማቺዮ ኤካና ሚሺራይ ዮንታ ጋምዒን ꬊስኮይ ዴፂን ኣሳይ ዉሪካ ꬊስኪዴስ። “ሌላ ጊዶꬅ ጊዲሺን ‘ሚሺራዚ ዬስ! ኬዚዲ ሞኪ ኤኪቴ!’ ጊዛ ፄይሳ ቃላይ ሲዬቲዴስ። ሄሳ ዎዴ ጌላዖቲ ዉሪካ ዴንዲዲ ባ ፆምፔ ፆምፔ ኦይሴꬆኔ ጊጌቴꬅ ኦይኪዳ። ኤያቲ ጪንጫታ ‘ኑ ፆምፔይ ቶዓና ጊዛ ጊሽ ኢንቴ ላምባፔ ኑስ ኢሚቴ’ ጊዳ። “ጪንጫ ጌላዖቲ ኢስታስ ዛሪዲ ‘ኑስ ዲዛ ላምባይ ኑሳራኔ ኢንቴሳራ ጊዶንታ ጊሽ ቢዲ ላምባ ባይዚዛይታፔ ኢንቴስ ሻሚቴ’ ጊዳ። ኢስቲ ላምባ ሻማና ቢ ኪቺን ሚሺራዚ ጋኪ ዎꬊዴስ። ካሴ ጊጌቲ ኡቲዳ ጌላዖቲ ቡላቻሶ ኢዛራ ጌሊዳ፤ ካሬይካ ጎርዴቲዴስ። “ጉꬅ ጋምዒሼ ሃንኮ ጌላዖቲ ዪዲ ‘ጎዶ! ጎዶ! ካሬ ኑስ ዶያ!’ ጊዳ። ኢዚካ ዛሪዲ ‘ታ ኢንቴስ ቱሙ ጋይስ፤ ታ ኢንቴና ኤሪኬ!’ ጊዴስ። ሄሳ ጊሽ ያና ጋላሳ ዎይኮ ሳቴዛ ኢንቴ ኤሮንታ ጊሽ ጊጌቲዲ ናጊቴ። “ፆሳ ካዎቴꬂ ባሲ ዲዛዚ ዉርሲ ባ ኣሽካራታስ ሃዳራ ኢሚዲ ሃራ ዴሬ ባና ዴንዲዳ ኢሲ ኣስ ሚሳቴስ። ኣሽካራታስ ኢሳስ ኢሳስ ኢስታ ዎልቃ ማላ ጊጊሲዲ ኢሳስ ኢቻሹ ሺ ቢራ፥ ኢሳስ ናምዑ ሺ ቢራ፥ ሃንኮይሳስ ቃሴ ኢሲ ሺ ቢራ ኢሚዲ ቢዴስ። ኢቻሹ ሺ ቢራ ኤኪዳ ኣዴዚ ሄራካ ሚሻን ዛልዔ ኦይኪዲ ሃራ ኢቻሹ ሺ ቢራ ዎꬊሲዴስ። ቃሴካ ናምዑ ሺ ቢራ ኤኪዳይሲ ሃራ ናምዑ ሺ ቢራ ዎꬊሲዴስ። ኢሲ ሺ ቢራ ኤኪዳይሲ ባ ጎዳ ቢራ ቢታን ሞጊዲ ቆቲዴስ። “ኣሽካራታ ጎዳይ ባ ቢዳሶን ዳሮ ዎዴ ጋምዒ ሲሚዲ ሚሻ ኢስታራ ሳላዔቲዴስ። ኢቻሹ ሺ ቢራ ኤኪዳ ኣሽካራይ ሃራ ኢቻሹ ሺ ቢራ ዎꬊሲዳይሳ ኤኪ ዪዲ ‘ጎዶ! ኔ ታስ ኢቻሹ ሺ ቢራ ኢማዳሳ ሺን ሄኮ ሃይሳ ታ ሃራ ኢቻሹ ሺ ቢራ ዎꬊሳዲስ’ ጊዴስ። ኢዛ ጎዳይካ ‘ሎዖ ኦꬃዳሳ፤ ኔኖ ሎዖ ኣማኔቲዳ ኣሽካራዞ! ኔ ጉꬃ ሚሻን ኣማኔቲዳ ኣስ ጊዲዳ ጊሽ ታ ኔና ዳሮ ሚሻ ቦላ ሹማና፤ ጌዴ ኔ ጎዳ ኡፋይሳሶ ጌላ’ ጊዴስ። “ሄሳꬆካ ናምዑ ሺ ቢራ ኤኪዳይሲ ጎዳዛኮ ሺቂዲ ‘ጎዶ! ኔ ታስ ናምዑ ሺ ቢራ ኢማዳሳ ሺን ሄኮ ሃራ ናምዑ ሺ ቢራ ዎꬊሳዲስ’ ጊዴስ። ጎዳዚካ ‘ሎዔꬃዳሳ፤ ሃይሶ ሎዖኔ ታስ ኣማኔቲዳ ኣሽካራዞ! ኔኒ ጉꬃን ኣማኔቲዳዴ ጊዲዳ ጊሽ ታ ኔና ዳሮ ሚሻ ቦላ ሹማይስ፤ ጌዴ ኔ ጎዳ ኡፋይሳሶ ጌላ’ ጊዴስ። “ኢሲ ሺ ቢራ ኤኪዳ ኣሽካራይ ሺቂዲ ‘ጎዶ! ኔኒ ዜሮንታሶፔ ማፂዛዴኔ ላሎንታሶፔ ሺሺዛ ሜንፄ ኢታ ኣስ ጊዲዳይሳ ታ ኤራይስ። ሄሳ ጊሽ ታ ባባዳ ቢታ ቦካዳ ኔ ቢራ ቦኪዳ ኦላን ሞጋዳ ቆታዲስ፤ ኔ ሚሽ ሄሳ ቤያ!’ ጊዴስ። “ኢዛ ጎዳይ ዛሪዲ ‘ሃይሶ ኢታ ኣዛላ ኣሽካራዞ! ታኒ ዜሮንታሶፔ ማፂዛዴ ላሎንታሶፔ ሺሺዛዴ ጊዲዳይሳ ኔ ኤራይ? ሂስቲን ታ ሲማ ዪዛ ዎዴ ታ ሚሻ ዬሎራ ታ ኤካና ማላ ቲርፒሲ ዛልዒዛ ኣሳስ ኔ ኢማናስ ቤሴሴሺን’ ጊዴስ። “ ‘ኣኔ ሃዒ ኢዛፔ ሺ ቢራ ኤኪዲ ታሙ ሺ ቢራይ ዲዛዴስ ኢሚቴ። ዲዛዴስ ጉጄታናኔ ዳሪ ዳሪ ባና፤ ባይንዳዴፌ ሄ ዲዛ ጉꬃያካ ኢዛፔ ኤኬታይቻና። ሃይሳ ጎዓይ ባይንዳ ኣሽካራ ጌዴ ዬኪዛሶኔ ኣቼይ ጋርጬቲዛሶ ሄን ካሬን ዲዛ ꬉማን ኬሲ ዬጊቴ’ ጊዴስ። “ኣሳ ናይ ባ ኪታንቻታ ኡባራ ቦንቾን ዪዛ ዎዴ ባ ቦንቾ ኣልጋ ቦላ ኡታና። ዴሬይ ዉሪ ኢዛ ሲንꬂ ሺቃና፤ ኢዚካ ሜሄ ሄሚዛዴይ ዴይሺ ዶርሳፌ ቆሪ ሻኪዛ ማላ ኣሳ ኢሳ ኢሳፌ ቆሪ ሻካና። ዶርሳታ ኢዛስ ኡሻቻ ባጋራ፥ ዴይሻታ ሃዲርሳ ባጋራ ኤሳና። ሄ ዎዴ ካዎይ ኡሻቻ ባጋራ ዲዛይታ ‘ኢንቴኖ! ታ ኣዋይ ኢንቴና ኣንጂዳይቲ ሃ ዪቴ! ኣላሜይ ሜꬌቶሳፔ ኢንቴስ ጊጌቲዳ ካዎቴꬃ ላቲቴ! ጋና። ጋሶይካ ታኒ ጋፊን ታና ሚዚዴታ፤ ታ ሳሜቲን ታና ኡሺዴታ፤ ታ ኢማꬃ ጊዳዳ ዪን ታና ሞኪ ኤኪዴታ። ታ ካሎቲን ታና ማይዚዴታ፤ ታ ሳኬቲን ታና ሃርጊሲዴታ፤ ታ ቃሼቲን ታና ኦይቺዴታ’ ጋና። “ፂሎቲካ ዛሪዲ ‘ጎዶ! ኔ ጋፊን ኑ ኔና ኣይዴ ሚዚዶኒ? ዎይኮ ኔ ሳሞቲን ኣይዴ ቤዪዲ ኑ ኔና ኡሺዶኒ? ኑ ኣይዴ ኔና ቤዪዲ ኢማꬃቴꬅ ሞኪዶኒ? ዎይኮ ኣይዴ ኔ ካሎቲን ቤዪዲ ኔና ማይዚዶኒ? ሄሳꬆካ ኔ ሳኬቲን ዎይኮ ቃሼቲን ኣይዴ ቤዪዲ ኔና ኦይቺዶኒ?’ ጋና። ካዎይካ ዛሪዲ ‘ታ ኢንቴስ ቱሙ ጋይስ፤ ሃይታ ላፋ ጊዲዳ ታ ኢሻታፔ ኢሳዴስ ኦꬂዳይሲ ኢንቴ ታስ ኦꬂዳ ማላ’ ጋና። “ቃሴካ ሃዲርሳ ባጋራ ዲዛይታስ፤ ‘ኢንቴኖ ቃንጌቲዳይቶ! ታፔ ሻኬቲዲ ዳቡሎሳሲኔ ኢዛ ኪታንቻታስ ጊጌቲዳ ሜርና ታማን ቢቴ ጋና። ጋሶይካ ታ ጋፊን ታና ሚዚቤኬታ፤ ታ ሳሞቲን ታና ኡሺቤኬታ፤ ታና ኢማꬃቴꬅ ሞኪቤኬታ፤ ታ ካሎቲን ታና ማይዚቤኬታ፤ ታ ሳኬቲኒኔ ቃሼቲን ታና ኦይቺቤኬታ’ ጋና። “ኢስቲካ ዛሪዲ ‘ጎዶ፥ ኔ ጋፊን ዎይኮ ኔ ሳሞቲን ዎይኮ ኔ ኢማꬅ ጊዲን ዎይኮ ኔ ካሎቲኒኔ ኔ ሳኬቲን ዎይኮ ኔ ቃሼቲን ኑ ኔና ቤዪዲ ኣይዴ ኔስ ጋኪቤኮኒ?’ ጋና። “ሄ ዎዴ ኢዚካ ኢስታስ ዛሪዲ ‘ታ ኢንቴስ ቱሙ ጋይስ፤ ሃንታ ላፋ ታ ኢሻታፔ ኢሳዴስ ኢንቴ ኦꬆንታ ኣጊዳይሲ ታስ ኢንቴ ኦꬆንታ ኣጊዳ ማላ’ ጋና። ሄይቲ ጌዴ ሜርና ፒርዳን ባና፤ ፂሎቲ ጊዲኮ ሜርና ዴዖኮ ባና” ጊዴስ። ዬሱሲ ሄሳ ሃሳዪ ዉርሲዳፔ ጉዬ ባና ካሊዛይታስ “ናምዑ ጋላሳፌ ጉዬ ፓዚጋ ጊዲዳይሳ ኤሬቲ? ኣሳ ናይ ካቄታናስ ኣꬊ ኢሜታና” ጊዴስ። *** ሄሳፌ ጉዬ ቄሴታ ሃላቃቲኔ ዴሬ ጪማቲ ቃያፋ ጌቴቲዛ ቄሴታ ሃላቃ ጊቤን ሺቂዲ ሂላራ ዬሱሳ ኦይꬂዲ ዎꬊሳናስ ማቄቲዳ። *** ጊዶ ኣቲን “ኣሳ ጊዶን ኦሺ ዴንዶንታ ማላ ባዓሌ ጋላስ ጊዶፖ” ጊዲ ቃቺዳ። ዬሱሲ ቢታኒያን ኢንቺራቻ ሃርጌራ ዲዛ ሲሞና ጌቴቲዛዴ ሶን ዲሺን፥ ኢሲ ማጫሲ ዲዛራ ዋጋይ ኬሂ ኣልዖ ጊዲዳ ኣልባስፂሮሴ ጌቴቲዛ ሺቶ ቢልቃፄ ኩሜꬅ ኦይካዳ ዬሱሳኮ ሺቃዳ ኢዚ ማዳን ኡቲዲሺን ኢዛ ሁዔ ቦላ ሺቶዛ ጉሳዱስ። ኢዛ ካሊዛይቲ “ሄሳ ቤዪዲ ሃይሲ ኣዛስ ሜላ ሞሬቲዜ? ሺቶዚ ዳሮ ዋጋስ ባይዜቲዲ ሚሻይ ማንቆታስ ኢሜቲዛኮቺ?” ጊዳ። ዬሱሲ ሄሳ ኤሪዲ “ሃኖ ማጫሳዮ ኣዛስ ዋይሴቲ? ኢዛ ታስ ሎዖ ኦꬃዱስ። ማንቆቲ ኡባ ዎዴ ኢንቴናራ ዴቴስ፤ ታ ጊዲኮ ኡባ ዎዴ ኢንቴናራ ዲኬ ጊዴስ። ኢዛ ሺቶዛ ታ ቦላ ጉሲዳይሲ ታና ሞጎስ ጊጊሳናሳ። ታ ኢንቴስ ቱሙ ጋይስ፤ ሃይሲ ሚሺራቾ ቃላይ ሳባኬቲዛ ኣላሜ ዩሾን ኣዋንካ ኢዛ ኦꬂዳይሲ ኢዞ ቆፊሲዛዝ ጊዲዲ ሃሳዬታና” ጊዴስ። ሄሳፌ ጉዬ ታማኔ ናምዓታፔ ኢሶይ ኣስቆሮንቶ ዩሁዳ ጌቴቲዛይሲ ቄሴታ ሃላቃታኮ ቢዲ፥ “ታ ኢንቴስ ኢዛ ኣꬃ ኢሚኮ ኢንቴ ታስ ኣይ ኢማኔ?” ጊዴስ። ኢስቲካ ኢዛስ ሄꬑ ታሙ ቢራ ኢዛ ኩሼን ታዪቢ ኢሚዳ። ሄ ጋላሳፌ ሲሚዲ ዩሁዳይ ዬሱሳ ኢስታስ ኣꬂ ኢማናስ ኢንጄ ዎዴ ናጊሼ ጋምዒዴስ። ኡኬꬃ ባዓሌ ጌቴቲዛ ባዓሌ ጋላስ ኢዛ ካሊዛይቲ ዬሱሳኮ ሺቂዲ “ኔ ፓዚጋ ማናሶ ኣዋን ጊጊሳና ማላ ኮያይ?” ጊዳ። ኢዚካ ኢስታስ ዛሪዲ ጌዴ ካታማ ቢዲ ኤቤሎ ጌቴቲዛ ኣስ “ኣስታማሬይ ‘ታ ዎዴይ ማቲዳ ጊሽ ታና ካሊዛይታራ ፓዚጋ ታ ኔ ኬꬃን ቦንቻና ጊዴስ’ ጊዲ ዮቲቴ” ጊዴስ። ኢዛ ካሊዛይቲካ ዬሱሲ ኢስታ ኣዛዚዳ ማላ ፓዚጋ ካዎ ጊጊሲዳ። ጋዴይ ኦማርሲሺን ዬሱሲ ታማኔ ናምዓታራ ማዳን ኡቲዴስ። ኢስቲ ሙሳን ዲሺን ኢዚ ኢስታስ “ታ ቱሙ ጋይስ፤ ኢንቴፌ ኢሶይ ኣꬂ ኢማና” ጊዴስ። ኢስቲካ ኬሂ ሙዞቲዲ ታራን ታራን “ጎዶ ታኔሻ?” ጊዳ። ኢዚካ ዛሪዲ “ታና ኣꬂ ኢማናዴይ ኬሬን ታናራ ኩሼ ዬዲዛዴ። ኢዛ ጊሽ ካሴ ፃፌቲዳይሳ ማላ ኣሳ ናይ ባና፤ ጊዶ ኣቲን ኣሳ ና ኣꬂ ኢሚዛዴስ ኣዬ-ኣና! ሄሳዴይ ዬሌቶንታ ኣቲዳኮ ኢዛስ ሎዖኮሺን” ጊዴስ። ኢዛ ኣꬂ ኢማና ዩሁዳይ “ኣስታማሬ! ታኔሻ?” ጊዴስ። ኢዚካ “ኤ፥ ኔ ጊዳ ማላ” ጊዴስ። ኢስቲ ሙሳን ዲሺን ዬሱሲ ሚዛ ቁማፔ ኤኪዲ ኣንጂዴስ። ሜንꬂዲኔ ባና ካሊዛይታስ ኢሚዲ “ሄዪቴ ሚቴ፤ ሃይሲ ታ ኣሾኮ” ጊዴስ። ቃሴካ ኡሻ ዴንꬂዲ ጋላቲዲኔ ባና ካሊዛይታስ ኢሚዲ “ዉሪካ ሃይሳፌ ኡዪቴ፤ ዳሮ ኣሳ ናጋራፔ ማራና ጉኪዛ ታ ኦራꬃ ጫቆ ሱꬃይ ሃይሳ። ታ ኢንቴስ ጊዛይ ታ ኣዋ ካዎቴꬃን ታ ኢንቴናራ ኦራꬃ ዎይኔን ኡሻዛ ኡያና ጋካናስ ሃይሳፌ ሲንꬃን ሃይሳ ዎይኔ ኡሻ ኢንቴናራ ኡዪኬ” ጊዴስ። ማዛሙሬ ዬፂዳፔ ጉዬ ፑዴ ዳብራዛይቴ ጌቴቲዛ ዙማ ቦላ ኬዚዳ። ዬሱሲ ኢስታስ “ኢንቴ ዉሪ ሃቺ ኦማርሲ ታናን ꬉጴቲዲ ታና ዬጊ ባና፤ ‘ሄሚዛይሳ ታ ሾጫና፤ ሜሄቲኔ ላሌታና’ ጌቴቲዲ ካሴ ፃፌቲዴስ። ጊዶ ኣቲን ታኒ ዴንዲዳፔ ጉዬ ኢንቴፌ ሲንꬃታዳ ጌዴ ጋሊላ ባና” ጊዴስ። ጴፅሮሲ ዛሪዲ “ሃንኮይቲ ዉሪ ኔ ጌዶን ꬉጴቲኮካ ታኒ ሙሌካ ꬉጴቲኬ!” ጊዴስ። ዬሱሲካ ኢዛስ ዛሪዲ “ቱሙ ጋይስ፤ ሃቺ ቃማ ኩቶይ ዋሶንታ ካሴታዳ ሄꬑቶ ኔ ታና ካዳና” ጊዴስ። ጴፅሮሲ ቃሴ “ኔናራ ታ ሃይቃና ኮሺኮካ ሙሌካ ታ ኔና ካዲኬ!” ጊዴስ። ዬሱሳ ካሊዛ ሃንኮይቲካ ኩሜꬅ ኢዛይሳꬆካ ጊዳ። ሄሳፌ ጉዬ ዬሱሲ ባና ካሊዛይታራ ጌዴ ጌቴሴማኔ ጌቴቲዛሶ ቢዴስ። ኢስታካ “ሄ ባዳ ታ ዎሲሺን ኢንቴ ሃይሳን ኡቲሺቴ” ጊዴስ። ጴፅሮሳራ ዛቢዶሳ ናይታ ናምዓታ ባናራ ኤኪ ቢዲ ሙዞቴꬂኔ ዳሮ ቆፎ ኦይኪዴስ። ሄሳፌካ “ታ ሼምፖያ ሃይቃና ጋካናስ ዳሮ ሙዞታዱስ፤ ታናራ ሚኒዲ ሃኒን ታኪቴ” ጊዴስ። ኢስታፌ ጉꬅ ጌዴ ሃኪ ቢ ጉፓንዲ “ታ ኣዋዉ! ኔስ ዳንዳዬቲኮ ሃይሲ ሜቶይ ታፔ ኣꬎ፤ ጊዶ ኣቲን ታኒ ኮይዳ ማላ ጊዶንታ ኔኒ ኮይዳ ማላ ሃኖ” ጊ ዎሲዴስ። ሄሳፌ ሲሚዲ ባና ካሊዛይታኮ ዪዲ ኢስቲ ꬊስኪሺን ዴሚዴስ። ጴፅሮሳካ “ሃይቶ ኣሳቶ! ኢንቴ ታናራ ኢሲ ሳቴኮኔ ሚናናስ ፆኒዴ? ፓጬን ኢንቴ ጌሎንታ ማላ ሚኒዲ ዎሲቴ፤ ኣያናይ ጊጌቲዴስ ሺን ኣሾይ ጊዲኮ ዳቡራንቻ” ጊዴስ። ቃሴካ ናምዓንꬆ ቢዲ “ታ ኣዋዉ! ሃይሳ ኡያናሲ ታስ ኣቶንታ ሚሽ ጊዲኮ ኔ ሼኔይ ፖሌቶ” ጊዲ ዎሲዴስ። ቃሴካ ኢዚ ዪሺን ኢስታ ኣይፌን ꬊስኮይ ዴፂዳ ጊሽ ኢቺዳይታ ቤዪዴስ። ኢስታ ኣጊዲ ቃሴካ ቢዲ ሄꬓንꬆ ካሴ ዎሲዳ ቃላ ዛሪ ዎሲዴስ። ሄሳፌ ባና ካሊዛይታኮ ሲሚዲ “ሃዒካ ሼምፒዲ ꬊስኪዴቲ? ሄኮ ሃዒ ሳቴይ ማቲዴስ፤ ኣሳ ናይ ናጋራንቻታ ኩሼን ኣꬊ ኢሜታና። ዴንዲቴ ኣኔ ቦስ! ታና ኣꬂ ኢሚዛዴይ ዩሳ ቦላ ዴስ” ጊዴስ። ኢዚ ሃሳዪሺን ታማኔ ናምዓታፔ ኢሶይ ዩሁዳይ ዪዴስ። ቄሴታ ሃላቃቲኔ ዴሬ ጪማቲ ዬዲዳ ዳሮ ኣሳይ ቶራኔ ዱርቃ ኦይኪዲ ዩሁዳራ ኢሲፌ ዴስ። ዩሁዳይካ “ታ ዬሪዛዴይ ኢዛ ጊዲዳ ጊሽ ኦይኪቴ” ጊዲ ካሴ ዮቲ ዎꬂዴስ። ሲቲ ጊ ዬሱሳኮ ቢዲ “ኣስታማሬ! ሳሮ” ጊሼ ዬሱሳ ዬሪዴስ። ዬሱሲካ “ታ ላጌ! ኔ ዪዳ ቆፋ ፖላ” ጊዴስ። ሄራካ ኣሳይ ሺቄቲዲ ዬሱሳ ኦይኪዲ ቃቺዴስ። ዬሱሳራ ዲዛይታፔ ኢሶይ ጊꬃ ማሻ ሾዲዲ ቄሴታ ሃላቃዛ ኣሽካራ ሃይꬅ ቃንፂዴስ። ዬሱሲካ “ኣኔ ኔ ማሻ ኮሆን ዛራ ጌልꬃ፤ ማሻ ሾዲዛይቲ ማሻን ꬋያና። ኮሺኮ ታኒ ታ ኣዋ ኦይቺዛኮ ዳሮ ሺዬን ቆዴቲዛ ኦሊዛ ኪታንቻ ታስ ዬዶንታ ኣጋና ሚሳቲዜ? ሄሳꬆ ኦꬂኮ ቃሴ ጌሻ ማፃፋታን ሃናና ጌቴቲዳይሲ ዋኒ ፖሌታኔ?” ጊዴስ። ሄ ዎዴ ዬሱሲ ኣሳ “ፓንጋ ኦይኪዛ ኣሳꬆ ማሻኔ ዱርቃ ኤኪዲ ታና ኦይካና ዪዴቲ? ዎንቲን ዎንቲን ፆሳ ኬꬃን ኡታዳ ታ ታማርሲሺን ካሴ ኦይኪቤኬታ ሺን። ጊዶ ኣቲን ሃይሲ ዉሪካ ሃኒዳይሲ ካሴ ናቤቲ ጌሻ ማፃፋታን ዮቲዳይሲ ፖሌታናሳ” ጊዴስ። ሄ ዎዴ ዬሱሳ ካሊዛይቲ ኢዛ ዬጊዲ ꬋዪዳ። ሄ ዎዴ ዬሱሳ ኦይኪዲ ኣሳቲ ሙሴ ዎጋ ኣስታማሬቲኔ ዴሬ ጪማቲ ኢሲፌ ሺቂዳሶን ቄሴታ ሃላቃ ቃያፋኮ ኤፊዳ። ጊዶ ኣቲን ጴፅሮሲ ቄሴታ ሃላቃ ጊቤ ጋካናስ ሃሆራ ዬሱሳ ካሊዴስ። ጊቤ ጊዶ ጌሊዲ ሃኒዛይሳ ዉርሴꬅ ቤያናስ፥ ጊቤ ናጊዛይታራ ኡቲዴስ። ሄ ዎዴ ቄሴታ ሃላቃቲኔ ኣይሁዳታ ዱላታይ ኩሜꬅ ዬሱሳ ዎꬊሳናስ ዎርዶ ማርካ ኮዪዴስ። ዎርዶ ማርካቲ ዳሮቲ ሺቂኮካ ቤሲዛ ማርካቴꬅ ዴሚቤቴና፤ ጊዶ ኣቲን ጉዬፔ ናምዑ ኣስ ዳይቲ ሺቂዲ “ሃይሲ ኣዴዚ ‘ታ ፆሳ ኬꬃ ላላዳ ሄꬑ ጋላሳራ ዛራዳ ኬፃና ዳንዳያይስ’ ጊዴስ” ጊዲ ማርካቲዳ። *** ሄሳ ሲዪዳ ቄሴታ ሃላቃይ ኡቴꬃፌ ዴንዲ ኤቂዲ “ሃይቲ ኣሳቲ ኔ ቦላ ማርካቲዛይሳስ ኣይኮካ ዛሪኪ?” ጊዴስ። ዬሱሲካ ጮዑ ጊዴስ። ቄሴታ ሃላቃይ “ታ ኔና ዴዖ ፆሳ ሱንꬃን ኦይቻይስ! ኔኒ ኪርስቶሳ፥ ፆሳ ና ጊዲኮ ታስ ዮታ!” ጊዴስ። ዬሱሲካ “ኔ ጎይሳካ ማላ፤ ጊዶ ኣቲን ኢንቴስ ኡባስ ታ ዮቲዛይ ሲንꬃፌ ኣሳ ናይ ዎልቃማዛ ኡሻቻን ኡቲዲ ሳሎ ሻራራ ዪዛ ዎዴ ኢንቴ ቤያና” ጊዴስ። ሄ ዎዴ ቄሴታ ሃላቃይ ባ ማይዖ ዳኪዲ “ፆሳ ቦላ ጫሻ ቃላ ሃሳዪዴስ፤ ኑስ ሃይሳፌ ኣꬊዛ ሃራ ኣዛ ማርካ ኮሺዜ! ፆሳ ቦላ ጫሻ ቃላ ኢዚ ሃሳዪሺን ኢንቴ ኢንቴ ሃይꬃራ ሲዪዴታ። ኢንቴስ ኣይ ሚሳቲዜ?” ጊዴስ። ኢስቲካ ዛሪዲ ኢዛስ “ሃይቆይ ቤሴስ” ጊዳ። ሄ ዎዴ ዬሱሳ ኣይፌሶን ጩቲሼ ኢጪዳ፤ ባጋይቲ ባቂሼ፥ “ኪርስቶሳ! ኔ ኔና ናቤ ጋሳሺን ኔና ባቂዳይ ኦናኮኔ ኣኔ ኑስ ዮታ” ጊዳ። ሄሳፌ ጉዬ ጴፅሮሲ ቄሴታ ሃላቃ ጊቤን ኡቲ ዲሺን ኢሲ ኬꬃ ጊዶን ኦꬂዛ ማጫስ ዲዛራ ኢዛኮ ሺቃዳ “ኔኒካ ጋሊላ ዬሱሳራ ዲዛዴ!” ጋዱስ። ኢዚ ቃሴ “ኔ ኣይ ጊዛኮኔ ታ ኤሪኬ!” ጊዲ ኡባ ኣሳ ሲንꬃን ካዲዴስ። ጊቤዛፔ ኬዚዛ ፔንጌ ኢዚ ቢሺን ኢሲ ሃራ ኦሳንቻያ ኢዛ ፄላዳ ሄን ጋዳን ዲዛይታስ “ሃይሲ ኣዴዚ ናዚሬቴ ዬሱሳራ ዲዛዴኮ!” ጋዱስ። ኢዚካ “ታ ኢዛ ኤሪኬ!” ጊዲ ናምዓንꬆ ካዲዴስ። ጉꬅ ጋምዒሺን ሄን ኤቂዳ ኣሳቲ ሺቂዲ ጴፅሮሳ “ኔ ሃሳያይ ኔ ሃይታራ ዲዛይሳ ቆንጪሴስ፤ ቱማፔ ኔ ኢስታ ባጋ ኣሳ” ጊዳ። ኢዚካ ጫቂሼኔ ኣማቲሼ ሄሳ ኣዴዛ “ታ ኤሪኬ!” ጊዴስ። ሄራካ ኩቶይ ዋሲዴስ። ሄሳ ዎዴ ዬሱሲ ካሴ ጴፅሮሳስ “ኩቶይ ዋሳናስ ኔ ታና ሄꬑቶ ካዳና” ጊዲ ዮቲዳ ቃላይ ቆፌቲን፥ ጴፅሮሲ ካሬ ኬዚዲ ጫሞ ዬሆ ዬኪዴስ። ማላዶ ዎንታራ ቄሴታ ሃላቃቲኔ ዴሬ ጪማቲ ዉሪካ ዬሱሳ ዎꬋና ኦጌ ዞሬቲዳ። ዬሱሳ ቃቺ ኤፊዲ ጋዤ ጲላፆሳስ ኣꬂ ኢሚዳ። ኢዛ ኣꬂ ኢሚዳ ዩሁዳይካ ዬሱሳ ቦላ ፒርዴቲዳይሳ ቤዪዲ “ኣꬃ ኢሞንታ ኣጋርኪና” ጊዲ ባ ኤኪዳ ሄꬑ ታሙ ቢራ ቄሴታ ሃላቃታሲኔ ዴሬ ጪማታስ ዛሪ ኢሚዲ “ፂሎ ኣስ ኣꬃ ኢሚዳ ጊሽ ታ ሞራዲስ” ጊዴስ። ኢስቲካ “ሂስቲን ኑስ ኣይ ሜቶ! ኔ ኤራ ኤካ!” ጊዳ። *** ሄሳ ጊሽ ዩሁዳይ ቢራ ኤፊዲ ፆሳ ኬꬃ ጊዶን ዬጊዲ ኬዚ ቢዲ ጩሌቲ ሃይቂዴስ። ቄሴታ ሃላቃቲ ቢራ ዴንꬂዲ “ሱꬃ ዋጋ ጊዲዳ ጊሽ ፆሳ ኬꬃ ሚሻን ጉጃናስ ቤሴና” ጊዳ። ባ ጊዶን ዞሬቲዲ ኢማꬅ ጊዲዳ ኣሳታስ ዱፎ ጊዳና ማላ ኢሲ ኡርቃ ሚሽ ሜꬊዛ ሂላዛ ጋዴ ሻሚዳ። ሄሳ ጊሽ ሄ ጋዴይ ሃቺ ጋካናስ ሱꬃ ጋዴ ጌቴቴስ። ኢዛስ ዋጋ ጊዳና ማላ “ኢስራዔሌ ናይቲ ሄሬጊዳ ሄꬑ ታሙ ቢራ ቆዲ ኤኪዳ። ፆሲ ታና ኣዛዚዳ ማላ ኡርቃ ሜꬊዛ ሂላዛ ጋዴስ ኢሚዳ” ጌቴቲዲ ናቤ ኤርማሳ ዱናን ዮቴቲዳይሲ ፖሌቲዴስ። *** ሄ ዎዴ ዬሱሲ ዴሬ ሃሪዛይሳ ሲንꬅ ሺቂዴስ። ዴሬ ሃሪዛይሲካ “ኔኒ ኣይሁዳ ካዎ?” ጊዲ ኦይቺዴስ። ዬሱሲካ “ኔ ጊዳ ማላ ጊዶ” ጊዴስ። ቄሴታ ሃላቃቲኔ ዴሬ ጪማቲ ኢዛ ሞቲሺን ዬሱሲ ኢስታስ ኣይኔ ዛሪቤና። ሄ ዎዴ ጲላፆሲ ዬሱሳ “ኣፑን ዮዖን ኔና ሞቲዛኮኔ ሲዪኪ?” ጊዴስ። ዴሬ ሃሪዛይሲ ኬሂ ማላሌታና ጋካናስ ዬሱሲ ኢሲ ቃላካ ዛሪቤና። ዴሬ ሃሪዛይሳስ ባዓሌ ጋላስ ዴሬይ ቃሾ ኣሳፔ “ኤቤሎይ ኑስ ቢርሼቶ!” ጊ ኦይቺኮ ኢሳዴ ቢርሺዛ ዎጋይ ዴስ። ሄ ዎዴ ጌኔ ኦሶን ኤሬቲዳ ባርባኔ ጌቴቲዛ ኢሲ ቃሾ ኣሲ ዴስ። ዴሬይ ሺቂዳ ማላ ጲላፆሲ “ባርባኔፔኔ ኪርስቶሳ ጌቴቲዛ ዬሱሳፔ ታ ኢንቴስ ኦና ቢርሻና ማላ ኮዬቲ?” ጊዴስ። ጲላፆሲ ኢስቲ ጮ ቃናቴስ ኣꬂ ኢሚዳይሳ ኤሪሼ ኦይቺዴስ። ኢዚ ፒርዳ ኣልጋ ቦላ ኡቲ ዲሺን ኢዛ ማቼያ “ኢዛ ጌዶን ሃቺ ታኒ ኣጉሞራ ዳሮ ሜቶታዲስ፤ ሄሳ ፂሎ ኣዴዛ ቦላ ኔ ኣይኮካ ኦꬆንታ ማላ” ጊዛ ኪታ ጲላፆሳስ ዬዳዱስ። ጊዶ ኣቲን ቄሴታ ሃላቃቲኔ ጪማቲ ኢስታስ ባርባኔይ ቢርሼታና ማላኔ ቃሴ ዬሱሳ ዎꬋና ማላ ዎሳናስ ዴሬዛ ቃላይ ጋጋና ማላ ኦꬂዳ። ዴሬ ሃሪዛይሲ “ናምዓታፔ ኦና ቢርሻና ማላ ኮዬቲ?” ጊ ኦይቺን፥ ኢስቲ “ባርባኔ ቢርሻ!” ጊዳ። ጲላፆሲካ “ሂስቲኮ ኪርስቶሳ ጌቴቲዛ ዬሱሳ ዎስቶ?” ጊዴስ። ዉሪካ “ካቄቶ!” ጊዳ። ጲላፆሲካ ኣይሲ? “ኣይ ኢታ ኦꬂዴ?” ጊዲ ኢስታ ኦይቺዴስ። ኢስቲካ ቃሴ ኬሂ ዋሲዲ “ካቄቶ!” ጊዳ። ጲላፆሲ ሃኒዛይሲ ዉሪካ ኣሳይ ባ ጊዶን ቡልዓኬቴꬃፌ ኣቲን ሃራ ኣይ ጎዓይ ባይንዳይሳ ዩሺ ፄሊዲ “ሃይሳ ኣዴዛ ሱꬃ ጎሜፔ ታ ጌሻ፤ ሃይሳፌ ጉዬ ኢንቴ ሼኔ” ጊዲ ሃꬂ ኤሂሲዲ ዴሬዛ ሲንꬃን ባ ኩሼ ሜጬቲዴስ። ዴሬይ ዉሪ “ኢዛ ሱꬂ ኑ ቦላኔ ኑ ናይታ ቦላ ጋኮ” ጊዲ ዛሪዴስ። ሄ ዎዴ ባርባኔ ኢስታስ ቢርሺዲ ዬሱሳ ጋራፊሲዳፔ ጉዬ ካቃና ማላ ኣꬂ ኢሚዴስ። ሄሳፌ ዎታዳራቲ ዬሱሳ ጌዴ ዴሬ ሃሪዛይሳ ጊቤ ኤኪ ቢዲ ዉሪ ሺቂዲ ዬሱሳ ጊዶ ኣꬂዳ። ኢዛ ማይዖ ቃሪዲ ሃራ ዞዖ ማይዖ ማይዚዳ። ኣጉንꬃ ኣክሊሌ ፃፂዲ ጊጊሲዳ፤ ኢዛ ሁዔ ቦላ ዎꬂዳ፤ ሾምቦቆ ጉፌ ኡሻቻ ኩሼን ኦይꬂዲኔ ኢዛ ሲንꬃን ጉልባቲዲ “ኣይሁዳ ካዎ! ኢንቴስ ቶ!” ጊዲ ኢዛ ቂꬊዳ። ኢዛ ቦላ ጩቲዳ፥ ሾምቦቆ ጉፌዛ ኢዛ ኩሼፔ ኤኪዲ ዬሱሳ ሁዔን ዛሪ ዛሪዲ ሾጪዳ። ኢዛ ቦላ ቂꬊ ካዒዳይሳፌ ጉዬ ቃሴካ ዞዖ ማይዖዛ ቃሪ ኤኪዲኔ ካሴ ኢዛ ማይዖዛ ዛሪ ማይዚዲ ካቃናሶ ኤኪ ቢዳ። ኢስቲ ኤኪ ቢሺን ቃሬና ጌቴቲዛሶፔ ዪዳ ሲሞና ጌቴቲዛይሳ ዴሚዲ ማስቃሌዛ ኢዛ ዎልቃራ ቶሲዳ። ቢርሼቻይ “ሁዔ ጉጌ” ጌቴቲዛ ጎልጎታ ጋኪሺን ጪዬራ ዋላኬቲዳ ዎይኔ ጫጄ “ኡያ” ጊዲ ኢሚዳ፤ ጊዶ ኣቲን ኢዚ ጋንፂ ኤኪዲ ኡያና ኮይቤና። *** ኢዛ ካቂዳፔ ጉዬን ኢዛ ማይዖዛ ቦላ ሳማ ዬጊዲ ጊሼቲዳ። ሄን ኡቲዲ ኢዛ ናጊዳ። “ሃይሲ ኣይሁዳ ካዎ ዬሱሳ” ጊዛ ሞቶ ቃላ ኢዛ ሁዔፔ ቦላራ ዎꬂዳ። ናምዑ ዎምባዴታፔ ኢሶይ ዬሱሳፔ ኡሻቻ ባጋራ፥ ኢሶይ ሃዲርሳ ባጋራ ኢዛራ ኢሲፌ ካቄቲዳ። ኦጌራ ኣꬊ ቢዛ ኣሳይ ጫዪሼኔ ሁዔ ቃꬂሼ “ፆሳ ኬꬃ ላላዳ ሄꬑ ጋላሳን ሃራ ኬፃና ጊዛይሶ! ኣኔ ኔና ኣሻ፥ ኔ ፆሳ ና ጊዲኮ ኣኔ ማስቃሌ ቦላፌ ዎꬋ” ጊዳ። *** ቄሴታ ሃላቃቲ ዴሬ ጪማታራ ጊዲዲ ኢዛ ቦላ ቂꬊሼ፤ “ሃራ ኣሳ ኣሺዴስ ሺን ባና ኣሻናስ ዳንዳይቤና፤ ኢዚ ኢስራዔሌ ካዎ ጊዲኮ ኣኔ ሃዒ ማስቃሌ ቦላፌ ዎꬎ፤ ኑካ ኢዛ ኣማናና። ፆሳን ኣማኔቲዴስ፤ ባና ፆሳ ና ጊዳ ማላ ፆሲ ኢዛ ዶሲዛ ጊዲኮ ኣኔ ሃዒ ኢዛ ኣሾ” ጊዳ። ኢዛራ ኢሲፌ ካቄቲዳ ፓንጋቲካ ሄሳꬆ ጫሻ ቃላ ኢዛ ቦላ ቆቆፊዳ። ጋላሳፌ ኡሱፑን ሳቴፔ ቢዲ ኡዱፉን ሳቴ ጋካናስ ኩሜꬃ ቢታይ ꬉሚዴስ። ኡዱፉን ሳቴ ጊዲሺን ዬሱሲ ቃላ ꬎቁ ሂስቲዲ “ኤሎሄ! ኤሎሄ! ላማ ሳባቂታን” ጊዲ ዋሲዴስ። ሄሳ ጉሳስ ቢርሼꬃይ “ታ ፆሶ! ታ ፆሶ! ታና ኣይሲ ኣጋዲ?” ጉሳ። ሄን ጋዳን ኤቂዳ ኣሳታፔ ኢሲ ኢሲ ኣሳቲ ኢዛ ዋሶዛ ሲይዲ “ኤላሳ ፄይጌስኮ!” ጊዳ። ኢስታፌ ኢሳዴይ ዎፂ ቢዲ ዛንꬓ ሚሳቲዛ ሴፊኔጌ ጌቴቲዛ ሚሽ ኤኪዲ ጫሊዳ ዎይኔ ጫጄን ዬጊ ጫጲሲዲኔ ሾምቦቆ ጌቴቲዛ ሚꬃ ፄራን ቃጲዲ ኡያና ማላ ዬሱሳ ዱናኮ ሺሺዴስ። ሃንኮ ኣሳይ ቃሴ “ኣጋጊቴ ኣኔ፥ ኤላሲ ዪዲ ኢዛ ኣሺን ቤያና” ጊዳ። ዬሱሲ ቃሴካ ꬎቃ ቃላን ዋሲዲ ሼምፖ ኬዚዴስ። ሄ ዎዴ ፆሳ ኬꬃ ማጋላሻይ ቦላ ሁዔራ ዱጌ ሲሚ ዳኬቲዲ ናምዑ ኬዚዴስ፤ ቢታይ ቃፂዴስ፤ ዛላቲ ዛዒዳ። ዱፎቲ ዶዬቲዳ፤ ካሴ ሃይቂዳ ፆሳ ኣሳፔ ዳሮ ባጋይ ዴንዲዴስ። ዱፎፔ ኬዚዲ ዬሱሳ ዴንꬃፌ ጉዬ ጌዴ ጌሻ ካታማ ጌሊዲ ዳሮታ ኣይፌን ቤቲዳ። ማቶ ሃላቃይኔ ኢዛራ ኢሲፌ ዬሱሳ ናጊዛይቲ ቢታ ቃꬃኔ ሃኒዳይሳ ዉርሲ ቤዪዲ ዳሮ ባቢዳ። ቃሴ “ሃይሲ ቱማፔ ፆሳ ናኮ!” ጊዳ። ጋሊላፔ ዪዲ ዬሱሳ ኮሺዛዛን ኦꬂ ማዳናስ ካሊዛ ዳሮ ማጫሳቲ ሃኒዛይሳ ዉርሲካ ሃሆራ ፄሊሼ ሄን ዴቴስ። ኢስታ ጊዶን ማግዳሌፔ ዪዳ ማራሚራኔ፥ ያቆቤኔ ዮሴፌ ኣዮ ማራሚራ፥ ቃሴካ ዛቢዶሳ ናይታ ኣዬዪራ ኢሲፌ ዴቴስ። ጋዴይ ኦማርሲሺን ዮሴፌ ጌቴቲዛ ኢሲ ዱሬ ኣዴ ዳይሲ ኣርማቲያሳ ጌቴቲዛሶፔ ዪዴስ። ኢዚካ ባ ባጋራ ዬሱሳ ካሊዛዴ። ኢዚ ጲላፆሳ ሲንꬂ ሺቂዲ ዬሱሳ ኣሃ ኢዛስ ኢማና ማላ ዎሲን ጲላፆሲካ ኢዛስ ኢማና ማላ ኣዛዚዴስ። ዮሴፌይ ኣሃ ኤኪዲ ጌሺዛ ሞጎ ኣፋላን ፃፂዴስ። ሹች ዎጪዲ ባሲ ጊጊሲዳ ዱፎን ኤፊ ዎꬂዲ ጊታ ሹች ጌንዴርሲዲ ዱፎዛ ጎርዲዴስ። ሄሳ ዎዴ ማግዳሌ ማራሚራኔ ሃራ ማራሚራ ዱፎዛ ጊናን ኡቲዳ። ሳምባታስ ጊጌቲዛ ዎንቴꬃ ጋላስ ቄሴታ ሃላቃቲኔ ፋርሳዌቲ ጲላፆሳ ሲንꬅ ሺቂዲ፥ “ጎዶ! ሄ ዎርዶይ ካሴ ፓፃ ዲሼ ‘ሄꬑ ጋላሳፌ ጉዬ ታ ዴንዳና’ ጊዳ ቃላይ ኑ ዎዝናን ቱርቹ ጊዴስ። ሄሳ ጊሽ ኢዛ ካሊዛይቲ ኢዛ ኣሃ ካይሶቲ ኤኪዲ ዴሬስ ‘ኢዚ ሃይቆፔ ዴንዲዴስ’ ጊዲ ዎሬሶንታ ማላ ሄꬓንꬆ ጋላስ ጋካናስ ዱፎይ ናጌታና ማላ ኣዛዛ፤ ኣካይ ጊኮ ካሴይሳፌ ጉዬ ባላይ ኣꬌꬅ ጊዳና” ጊዳ። ጲላፆሲ “ኢንቴስ ናጊዛይቲ ዴቴስ፤ ቢዲኔ ኢንቴስ ኤሬቲዳ ማላ ናጊሲቴ” ጊዴስ። ኢስቲካ ቢዲ ዱፎዛ ዱና ማታሜን ጎርዲዲ ናጋና ዛቤ ኤሲዳ። ሳምባታይ ኣꬊዳፔ ጉዬ ሳሚንታፔ ኮይሮ ጋላስ ቡሮ ሳሎይ ዞዒሺን ማግዳሌ ማራማኔ ሃራ ማራማ ዱፎዛ ቤያና ቢዳ። ቆፖንታ ዲሺን ጊታ ቢታ ቃꬂ ሃኒዴስ፤ ጎዳ ኪታንቻይካ ሳሎፔ ዎꬊ ዱፋኮ ቢዲ ሹቻ ጌንዴርሲዲ ኢዛ ቦላ ኡቲዴስ። ኪታንቻስ ሜꬋይ ዎልቃንꬃ ፖዖ ማላ፤ ማይዖይካ ሻቻ ማላ ቦꬃ። ዱፎ ናጊዛይቲ ኪታንቻዛስ ባቢዲ ኮኮሪዲኔ ሃይቄꬅ ሚሳቲዳ። ኪታናቻይ ማጫሳታ “ባቦፍቴ፤ ኢንቴ ካቄቲዳ ዬሱሳ ኮዪዛይሳ ታ ኤራይስ፤ ኢዚ ሃዒ ሃን ባዋ፤ ኢዚ ካሴ ዮቲዳ ማላ ሃይቆፔ ዴንዲዴስ፤ ሃ ዪዲ ኢዚ ኢቺዳሶ ቤይቴ። *** ሃዒካ ኤሌሊ ቢዲ ኢዛ ካሊዛይታስ ‘ሃይቆፔ ዴንዲዴስ። ኢንቴፌ ካሴቲዲ ጋሊላ ቤስ፤ ኢንቴ ኢዛ ሄን ዴማና’ ጊዲ ዮቲቴ። ሂዓ ታ ኢንቴስ ዮታዲስ” ጊዴስ። ማጫሳቲካ ባቦኒኔ ኡፋይሳን ኩሚዲ ኢዛ ካሊዛይታስ ዮታናስ ኤሌሊዲ ዎꬃን ዱፎይ ዲዛሶ ዬጊ ኣጊዲ ቢዳ። ሄራካ ዬሱሲ ኢስታ ዴሚዲ “ሃይቶ ሳሮ” ጊዴስ። ኢስቲካ ዬሱሳኮ ሺቂዲኔ ኢዛ ቶሆ ኦይኪዲ ኢዛስ ጎይኒዳ። ዬሱሲ ኢስታ “ባቦፍቴ! ቢዲኔ ኢስቲ ጋሊላ ባና ማላ ታ ኢሻታስ ዮቲቴ። ኢስቲ ታና ሄን ቤያና” ጊዴስ። ማጫሳቲ ቡሮ ኦጌ ቦላ ዲሺን ናጊዛይታፔ ጉꬃ ባጋቲ ካታማ ቢዲ ሃኒዳይሳ ዉርሲ ቄሴታ ሃላቃታስ ዮቲዳ። ቄሴታ ሃላቃቲካ ዴሬ ጪማታራ ሺቄቲዲ ዞሬቲዳ፤ ዎታዳራታስ ጊዲዛ ሚሽ ኢሚዲ “ ‘ኑኒ ꬊሲኪዳሺን ኢዛ ካሊዛይቲ ቃማራ ዪዲ ካይሶቲ ኤፊዳ’ ጊቴ ጊዳ። *** ሃይሲ ዎሬይ ዴሬ ሃሪዛይሳ ማታን ሲዬቲኮካ ኑኒ ኢዛስ ሎዔꬂ ዮታና፤ ኣይኮ ኢታይካ ኢንቴ ቦላ ጋኮንታ ማላ ኑ ኦꬃና” ጊዳ። ዎታዳራቲካ ሚሻ ኤኪዲ ኢስቲ ጊዳ ማላ ኦꬂዳ፤ ሃይሲ ዮዖዚ ሃቺ ጋካናስ ኣይሁዳታ ኣቻን ዳሮሶን ዮቴቲሼ ዴስ። ሄሳፌካ ዬሱሳ ካሊዛ ታማኔ ኢሲኔቲ ዬሱሲ ኢስታ ቤሲዳ ጋሊላን ዲዛ ዙማ ቦላ ኬዚዳ። ዬሱሳ ቤዪዳ ማላ ኢዛስ ጎይኒዳ፥ ኢስታ ጋራሳፌ ጉፂዛ ባጋቲ ሲꬊዳ። ዬሱሲካ ባና ካሊዛይታኮ ሺቂዲ “ሳሎኒኔ ሳዓን ጎዳቴꬂ ታስ ኢሜቲዴስ። ሄሳ ጊሽ ቢዲ ዴሬ ኡባ ኣዋ፥ ናዛኔ ፂሎ ኣያና ሱንꬃን ፃማቂሼ፤ ታና ካሊዛይታ ኦꬂቴ፤ ታ ኢንቴና ኣዛዚዳይሳ ዉርሲ ናጋና ማላ ታማርሲቴ። ታካ ኣላሜ ዉርሴꬅ ጋካናስ ታ ኢንቴናራ ዳይስ” ጊዴስ። *** *** ፆሳ ና ዬሱስ ኪርስቶሳ ኮይሮ ሚሺራቾይ ሃይሳ፤ ናቤ ኢሳያሳ ባጋራ “ሄኮ ኔስ ኦጌ ሎዔꬃናዴ ታ ኪታናዴ ኔፔ ሲንꬃራ ዬዳና። ‘ጎዳስ ኦጌ ጊጊሲቴ፤ ኢዚ ባና ኦጌ ሱሪሲዲ ኦꬂቴ’ ጊሼ ባዞ ቢታን ዋሲዛ ጊሪስ” ጌቴቲ ፃፌቲዴስ። ሄሳꬆካ ፃማቂዛ ዮሃኒሲ ኣሳ ፃማቂሼኔ “ኢንቴ ናጋራፔ ሲሚዲ ፃማቄቲቴ፥ ፆሲ ኢንቴ ናጋራ ኣቶ ጋና” ጊ ኣዋጂሼ ባዞራ ኬዚ ዎꬊዴስ። ዩሁዳ ዴሬይ ኩሜꬅ ዬሩሳላሜ ኣሳይ ዉሪ ዮሃኒሳኮ ቢ ቢዲ ባ ናጋራ ናጋራ ፓፂ ፓፂ ዮርዳኖሴ ሻፋን ዮሃኒሳ ኩሼን ፃማቄቲዴስ። ሄ ዎዴ ዮሃኒሲ ማይዒዛይ ጋሜላ ኢሲኬፔ ኦሴቲዳ ማይዖ፤ ቃሴ ባ ፄሳን ዳፎ ጊፄስ። ኢዚ ሚዛ ቁማይ ቦሌኔ ዴጌራ ኤሳ። ኢዚ “ታኒ ሆካዳ ኢዛ ጫማ ቃሾ ቢርሻናስ ቤሶንታዴይ፥ ታፔ ኣꬊዛዴይ ታፔ ጉዬራ ያና። ታኒ ኢንቴና ሃꬃን ፃማቃይስ ኢዚ ጊዲኮ ኢንቴና ፂሎ ኣያናን ፃማቃና” ጊዲ ሳባኪዴስ። ሄ ዎዴ ዬሱሲ ጋሊላ ጊዶን ዲዛ ናዚሬቴ ጌቴቲዛ ካታማይፔ ዮርዳኖሴ ሻፋ ዪዲ ዮሃኒሳ ኩሼን ፃማቄቲዴስ። ዬሱሲ ፃማቄቲዲ ሃꬃፌ ኬዚዳ ማላ ሳሎይ ዶዬቲን ፂሎ ኣያናይ ኢዛ ቦላ ሃራጴ ካፎ ሚሳቲዲ ዎꬊሺን ቤዪዴስ። ቃሴካ “ታ ዶሲዛ ናይ ኔና፥ ኔናን ታ ኡፋዬታይስ” ጊዛ ቃላ ጊሪሲ ፑዴ ሳሎፔ ሴቴቲዴስ። ሄራካ ፂሎ ኣያናይ ኢዛ ዱጌ ባዞ ካሌꬂ ኤፊዴስ። ሄን ባዞንካ ኦይዱ ታሙ ጋላስ ጋካናስ ፃላዔራ ፓጬቲሼ ጋምዒዴስ። ዶዓታራ ኢሲፌ ዴዒዴስ። ኪታንቻቲካ ኢዛ ማዲዳ። ዮሃኒሲ ቃሾ ኬꬅ ጌሊዳይሳፌ ጉዬ ዬሱሲ ፆሳ ሚሺራቾ ቃላ ሳባኪሼ ጌዴ ጋሊላ ቢዲ “ዎዴይ ጋኪዴስ፤ ፆሳ ካዎቴꬂ ማቲዴስ፤ ናጋራፔ ሲሚቴ፥ ሚሺራቾ ቃላን ኣማንቴ” ጊዲ ሳባኪዴስ። *** ዬሱሲ ጋሊላ ኣባ ኣቻራ ኣꬊን ሲሞናይኔ ኢዛ ኢሻ ኢንዲራሲ ሞሌ ኦይኪዛይታ ጊዲዳ ጊሽ ኢስቲ ሞሌ ኦይኪዛ ጊቴ ኣባን ዬጊሺን ቤዪዴስ። ዬሱሲ ኢስታ “ሃ ዪቴ! ታና ካሊቴ፤ ኢንቴ ሞሌ ኦይኪ ሺሺዛ ማላ ታ ኢንቴና ኣስ ኦይኪዛይታ ኦꬃና” ጊዴስ። ኢስቲ ሄራካ ሞሌ ጊቴዛ ዬጊ ኣጊዲ ዬሱሳ ካሊዳ። ጉꬅ ጌዴ ሲንꬄ ኣꬊዲ ዛቢዶሳ ና ያቆቤይኔ ኢዛ ኢሻ ዮሃኒሲ ዎጎሎን ኡቲዲ ሞሌ ጊቴ ጊጊሲሺን ቤዪዲኔ ሄራካ ኢስታ ፄይጊዴስ። ኢስቲካ ባ ኣዋ ዛቢዶሳስ ቃፃሬቲዲ ኦꬂዛ ኣሳታራ ኢሲፌ ዎጎሎዛ ጊዶን ኣጊዲ ዬሱሳ ካሊ ቢዳ። ሄፔካ ቂፊርናሆሜ ቢዳ። ሄራካ ዬሱሲ ኣይሁዳታ ሳምባታ ጋላስ ኣይሁዳታ ዎሳ ኬꬄ ጌሊዲ ታማርሶ ኦይኪዴስ። ፃፌታ ማላ ጊዶንታ ጎዳቴꬃራ ዲዛ ኣሳ ማላ ኢዚ ታማርሲን ኣሳይ ዉሪ ኢዛ ቲሚርቴዛን ማላሌቲዴስ። ሄ ዎዴ ኣይሁዳታ ዎሳ ኬꬃን ዲዛ ቱና ኣያናይ ኢዛ ቦላ ዲዛ ኢሲ ኣዴይ “ናዚሬቴ ዬሱሳ ኔ ኑፔ ኣዚ ኮያይ? ኑና ꬋይሳና ያዲ? ኔ ኦናኮኔ ታ ኔና ኤራይስ፤ ኔኒ ፆሳ ጌሻዛ” ጊዲ ዋሲዴስ። ዬሱኣሲካ ቱና ኣያናዛ “ጮዑ ጋዳ ኢዛፔ ኬዛ!” ጊዲ ሃንቂዴስ። ቱና ኣያናይ ኣዴዛ ጌንዴርሲዲ ኢዚ ቃኬቲሺን ኢዛፔ ዋሲሼ ኬዚዴስ። ዴሬይ ዉሪ “ኣሶ ሃይሲ ኣዛ ፓላ? ሃይሲ ጎዳቴꬃራ ዲዛ ኦራꬃ ቲሚርቴ፤ ቱና ኣያናታካ ኣዛዜስ፤ ኢስቲካ ኢዛስ ኣዛዜቴቴስ” ጊ ማላሌቲሼ ኣሳይ ባ ጊዶን ኢሶይ ኢሳ ኦይሼቾ ኦይኪዴስ። ሄራካ ኢዛ ኦሶ ዎሬይ ኩሜꬅ ጋሊላ ዩሾን ዲዛ ዴሬ ኡባን ሲዬቲዴስ። ኣይሁዳታ ዎሳ ኬꬃፌ ኬዚዳ ማላ ያቆቤራኔ ዮሃኒሳራ ኢሲፌ ጌዴ ሲሞናሶኔ ኢንዲራሳሶ ጌሊዳ። ሄ ጌሊዳ ማላ ሲሞና ቦሎቴያ ሚሻ ሃርጌ ሳኬታዳ ኢቺዳይሳ ኢዛስ ዮቲዳ። ሄሳ ጊሽ ዬሱሲ ኢዚኮ ሺቂዲ ኢዚ ኩሼ ኦይኪዲ ዴንꬂዴስ። ሚሻይ ኣጊን ኢዛ ዴንዳዳ ኢስታ ሞካዱስ። ኣዋ ኣርሼይ ዉሊዳፔ ጉዬ ጋዴይ ꬉሚሺን ኣሳይ ሃርጋንቻታኔ ዳይዳንꬂ ኦይኪዳ ኣሳ ዉርሲ ዬሱሳኮ ኤኪ ዪዴስ። ሄ ካታማዪን ዲዛ ኣሳይ ዉሪ ኬꬃ ካሬን ሺቂዴስ። ኢዚካ ዱማ ዱማ ሃርጌን ሳኬቲዳይታ ዳሮታ ፓꬂዴስ። ዳሮ ዳይዳንꬃታካ ኬሲዴስ። ጊዶ ኣቲን ዳይዳንꬃቲ ዬሱሲ ኦናኮኔ ኤሪዛ ጊሽ ዳይዳንꬃቲ ሃሳያና ማላ ዬሱሲ ኮይቤና። ባዞይ ዞዖንታ ማላዶ ዎንታራ ዬሱሲ ዴንዲዲ ኢሲ ኣሲ ባይንዳሶ ቢዲ ሄን ዎሳ ኦይኪዴስ። ሲሞኒኔ ኢዛራ ዲዛይቲ ዬሱሳ ኮያና ኬዚ ቢዳ። ኢስቲ ኢዛ ዴሚዲ ኣሲ ዉሪ ኔና ኮሻን ዴስ ጊዳ። ዬሱሲካ “ታ ዪዳይ ታማርሳናስ ጊዲዳ ጊሽ ኣኔ ሚሺራቾ ቃላ ዮታናስ ማታን ዲዛ ጉታታ ቦስ” ጊዴስ። ሄሳ ጊሽ ኣይሁዳታ ዎሳ ኬꬃን ጌሊ ጌሊ ሳባኪሼኔ ዳይዳንꬂ ኬሲሼ ጋሊላ ኩሜꬃን ዩዪዴስ። ኢሲ ኢንቺራቻ ሃርጊዛዴይ ዬሱሳኮ ሺቂዲኔ ኢዛ ሲንꬃን ጉልባቲዲ “ኔ ሼኔ ጊዲኮ ኔ ታና ፓꬃና ዳንዳያሳ” ጊ ዎሲዴስ። ዬሱሲካ ኣዴዛስ ሚሼቲዲ ባ ኩሼ ዬዲ ኢዛ ቦቺዲኔ “ታ ኔ ፓፃና ማላ ኮያይስ፤ ፓፃ!” ጊዴስ። ሄራካ ኣዴዛ ኢንቺራቻ ሃርጌይ ኣጊን፥ ኣዴዚ ፓፂዴስ። ዬሱሲካ ኣዴዛስ “ኦናስካ ሃይሳ ኔ ሃሳዮንታ ማላ ናጌታ፤ ጊዶ ኣቲን ባዳ ቄሴስ ኔና ቤሳ። ዴሬዛስ ማርካ ጊዳና ማላ ኔ ፓፂዳይሳስ ሙሴይ ኣዛዚዳ ያርሾዛ ሺሻ” ጊዲ ኬሂ ሚንꬅ ዮቲዴስ። *** ጊዶ ኣቲን ኣዴዚ ኬዚ ቢዲ ባ ቢዳ ኡባሶን ዎሬ ዳርሲ ꬋርጪዴስ። ሄሳ ጌዶን ዬሱሲ ኣይ ካታማንካ ቆንጬራ ጌላናስ ዳንዳይቤና። ሄሳፌ ዴንዲዳይሳን ካታማፔ ካሬራ ኣሲ ባይንዳሶን ዱስ ኦይኪዴስ። ኣሳይ ጊዲኮ ዱማ ዱማሶፔካ ኢዛኮ ዪዴስ። ጉꬃ ጋላሳፌ ጉዬ “ዬሱሲ ቂፊርናሆሜ ሲሚዲ ሶን ዴስ” ጊዛ ዎሬ ኣሳይ ሲዪዴስ። ሄሳ ጊሽ ኬꬃራ ካሬራ ኡቲዛሶይ ꬋያና ጋካናስ ዳሮ ዴሬይ ሺቂዴስ። ኢዚካ ፆሳ ቃላ ኣሳስ ሳባኪዴስ። ኦይዱ ኣስ ዳይቲ ኢሲ ቶሆይ ሲሊዳ ኣስ ቶኪዲ ኢዛኮ ኤሂዳ። ኣሳ ዳሮቴꬃፌ ዴንዲዳይሳን ዬሱሲ ዲዛሶ ጋꬃናስ ዳንዳዮንታ ጊሽ ዬሱሲ ዲዛ ጊናራ ካራ ቃሪዲ ሃርጋንቻዛ ኢዚ ኢቺዳ ሃላራ ዬሱሳ ሲንꬅ ዱጌ ዎꬂዳ። ዬሱሲ ኣሳታ ኣማኖ ቤዪዲ ቶሆይ ሲሊዳ ኣዴዛ “ታ ናዞ! ኔ ናጋራይ ኣቶ ጌቴቲዴስ” ጊዴስ። ሄን ጋዳን ኡቲዳ ኢሲ ኢሲ ሙሴ ዎጋ ፃፌቲ ባ ዎዝናራ ሃይሲ ኣዴዚ ዎስቲ ሃይሳꬆ ጊዜ? “ፆሳ ቦላ ጫሻ ቃላ ሃሳዬስ። ኢሲ ፆሳፌ ኣቲን ናጋራ ማራና ዳንዳዪዛይ ኦኔ?” ጊዲ ቆፒዳ። *** ዬሱሲ ሄራካ ኢስቲ ባ ዎዝናን ቆፒዳይሳ ባ ኣያናን ኤሪዲ “ኢንቴ ዎስቲ ሃይሳꬆ ቆፔቲ? ቶሆይ ሲሊዳ ኣዴዛ፥ ‘ኔ ናጋራይ ኣቶ ጌቴቲዴስ’ ጉሳፌኔ ‘ዴንዳዳ ኔ ሃላ ቶካዳ ባ ጉሳፌ ኣዋይሲ ማቲዜ?’ ጊዶ ኣቲን ኣሳ ናስ ቢታ ቦላን ናጋራ ማራና ጎዳቴꬂ ዲዛይሳ ኢንቴ ኤራና ማላ” ጊዲ ቶሆ ሲላ ኣዴዛ፤ “ዴንዳዳ ኔ ቶኬታ ዪዳ ሃላ ቶካዳ ኔሶ ባ” ጊዴስ። ኢዚካ ዴንዲዲ ኣሳይ ዉሪ ቤዪሺን ሃላ ቶኪዲ ቢዴስ። ሄን ጋዳን ዲዛ ኣሳይ ዉሪ ሃኖዛን ማላሌቲዲ “ካሴ ሃይሳ ማላይ ሃኒን ቤይቦኮ” ጊዲ ፆሴ ጋላቲዴስ። ቃሴካ ዬሱሲ ጋሊላ ኣባ ላንቄ ቢዴስ። ዳሮ ዴሬይ ኢዛኮ ዪን ኢዚካ ዪዳ ኣሳ ታማርሲዴስ። ኢዚ ኦጌራ ኣꬊ ቢሺን ኢልፊዮሳ ና ሌዌይ ቃራፃ ሺሺዛሶን ኡቲዳይሳ ቤዪዲ “ሃያ ታና ካላ” ጊዴስ። ኢዚካ ዴንዲዲ ዬሱሳ ካሊዴስ። ሄሳፌ ጉዬ ሌዌ ሶን ካꬃ ማዳን ኡቲ ዲሺን ቃራፃ ሺሺዛ ዳሮ ኣሳቲኔ ናጋራንቻቲ ኢዛራ ካሊ ዪዳ ጊሽ ኢስቲ ዬሱሳራኔ ኢዛ ካሊዛይታራ ኢሲፌ ማዳን ኡቲዳ። ፋርሳዌታ ባጋፌ ጊዲዳ ሙሴ ዎጋ ታማርሲዛይቲ ዬሱሲ ናጋራንቻታራኔ ቃራፃ ሺሺዛይታራ ሚሺን ቤዪዲ ኢዛ ካሊዛይታ “ቃራፃ ቃንፂሲዛይታራኔ ናጋራንቻታራ ኣዛስ ሚዜ?” ጊዲ ኦይቺዳ። ዬሱሲካ ኢስቲ ጊዛይሳ ሲይዲ “ኣኪሜይ ሃርጋንቻታስ ኮሼስ ኣቲን ሃርጎንታይታስ ጊዴና። ታካ ናጋራንቻታ ፄይጋናስ ያዲስ ኣቲን ፂሎታ ፄይጋናስ ያቤኬ” ጊዴስ። ዮሃኒሳ ካሊዛይቲኔ ፋርሳዌቲ ፆማ ፆሜቴስ። ኢሲ ኢሲ ኣሳቲ ዬሱሳኮ ዪዲ “ዮሃኒሳ ካሊዛይቲኔ ፋርሳዌታ ካሊዛይቲ ፆሜቴስ ሺን ኔና ካሊዛይቲ ኣዛስ ፆሜቴኔ?” ጊ ኦይቺዳ። ዬሱሲካ ኢስታስ “ሚሺራይ ኢስታራ ዲሺን ሚሺራ ላጌቲ ፆሚ ኤሪዞ? ሚሺራይ ኢስታራ ዲሺን ፆሚ ኤሬቴና። ሚሺራይ ኢስታፌ ኤኬታና ዎዴይ ያና። ሄ ዎዴ ኢስቲ ፆማና። “ጋልዓ ማይዖ ቦላ ኦራꬃ ዎሶ ዎꬂ ሲኪዛዴይ ኦኒካ ዴና፤ ሄሳꬆ ኦꬂኮ ኦራꬃዚ ጋልዓ ዳኪ ዳኪ ዬጌስ፤ ዳኬꬃይካ ካሴፔ ጌዴ ኣꬊ ኢቴስ። ሄሳꬆካ ኦራꬃ ዎይኔ ጫጄ ጋልዓ ሉካሞን ዎꬂዛዴይ ዴና። ዎꬂዛ ጊዲኮ ዎይኔ ጫጄዚ ጋልዓ ሉካሞዛ ꬉሴስ፤ ዎይኔ ጫጄዚኔ ሉካሞዚ ናምዓይ ሞሬቴቴስ። ሄሳ ጊሽ ኦራꬃ ዎይኔ ጫጄይ ዳናስ ቤሲዛይ ኦራꬃ ሉካሞና” ጊዴስ። ዬሱሲ ኣይሁዳታ ሳምባታ ጋላስ ጊስቴ ቲያ ጊዶራ ኣꬊሺን ኢዛ ካሊዛይቲ ኢዛራ ኢሲፌ ቢሼ ቲያ ፁጶ ኦይኪዳ። ፋርሳዌቲ “ኔና ካሊዛይቲ ሳምባታ ጋላስ ዲጌቲዳ ሚሽ ኣዛስ ኦꬂዞ?” ጊዲ ዬሱሳ ኦይቺዳ። ኢዚካ ኢስታስ “ዳዉቴይ ጋፊዲ ሚዛ ሚሽ ኮይዳ ዎዴ ኢዛራ ኢሲፌ ዲዛይታራ ኢዚ ኦꬂዳይሳ ናቤቢቤኬቲ? ኣቢያታሬይ ቄሴታ ሃላቃቴꬃን ዲሺን ኢዚ ፆሳ ኬꬄ ጌሊዲ ቄሴቲ ፃላላ ማናስ ቤሲዛ ዱማ ካꬃ ባሲ ሚዲኔ ባናራ ዲዛይታስ ኢሚዴስ” ጊዴስ። ቃሴካ ዬሱሲ ኢስታስ “ሳምባታይ ኣሳስ ሜꬌቲዴስ ኣቲን ኣሲ ሳምባታስ ሜꬌቲቤና። ሄሳ ጊሽ ታ ኣሳ ናይ ሳምባታ ጎዳ” ጊዴስ። ሃራ ጋላስ ዬሱሲ ኣይሁዳ ዎሳ ኬꬄ ጌሊዴስ። ሄንካ ኩሼይ ሲሊዳዴይ ዴስ። ዬሱሳ ሞታናስ ጋሶ ኮዪዛ ኣሳቲ ኢዚ ኣይሁዳታ ሳምባታ ጋላስ ፓꬃናኮኔ ጊዲ ፓꬂሺን ቤያና ኮይዳ። ኢዚካ ኩሼይ ሲሊዳ ኣዴዛ “ሄን ሺቂ ኡቲዳ ኣሳ ሲንꬃን ዴንዳ ኤቃ” ጊዴስ። ሄሳፌ ጉዬ ዬሱሲ ኣሳ “ሳምባታ ጋላስ ቤሲዛይ ሎዖ ኦሶዬ? ኢታ ኦሶ? ኣሳ ሼምፖ ኣሾዬ? ዎይኮ ሼምፖ ዎꬎ?” ጊዲ ኦይቺዴስ። ኢስቲካ ጮዑ ጊዳ። ኢስታ ዎዝና ሹቻቴꬃን ሚሼቲዲ ኢዛ ጊዶꬂዲ ዩዪ ኣꬊ ኤቂዳ ኣሳ ሃንቆራ ፄሊዲ ኣዴዛ “ኔ ኩሼዛ ፒዲሳ!” ጊዴስ። ኣዴዚካ ባ ኩሼ ፒዲሲን ኩሼዚ ሙሌራ ፓꬂዴስ። ፋርሳዌቲ ኬዚ ቢዲ ኢዛ ዎስቲ ꬋይሳናኮኔ ሄርዶሳ ባጋ ጊዲዳ ኣሳታራ ዞሬቲዳ። ዬሱሲ ባና ካሊዛይታራ ኣባኮ ቢዴስ። ጋሊላፔኔ ዩሁዳፔ ዪዳ ዳሮ ዴሬይ ኢዛ ካሊዴስ። ኢዚ ኦꬂዛይሳ ሲይዲ ኣሳይ ዩሁዳፔ፥ ዬሩሳላሜፔ፥ ኤዶሜፔ፥ ዮርዳኖሴ ፒንꬃን ዲዛ ዴሬታፔ ቃሴ ፂሮሴፔኔ ሲዶና ሄራፔ ኢዛኮ ዪዴስ። ኣሳይ ዳሪዳ ጊሽ ኢዛ ኡንዔꬆንታ ማላ ጉꬃ ዎጎሎ ኢስቲ ጊጊሳና ማላ ባና ካሊዛይታ ኣዛዚዴስ። ኢዚ ዳሮ ሃርጋንቻታ ፓꬂዳ ጊሽ ሳኮይ ዋይሲዛይቲ ዉሪ ኢዛ ባ ኩሼራ ቦቻናስ ዳፌቲዳ። ቱና ኣያናቲካ ዬሱሳ ቤዪዳ ማላ ኢዛ ሲንꬃን ኩንዲዲ “ኔኒ ፆሳ ና” ጊዲ ዋሲዳ። ጊዶ ኣቲን ኢዚ ኦናኮኔ ቱና ኣያናቲ ቆንጪሶንታ ማላ ኬሂፔ ሃንቂዴስ። ዬሱሲ ፑዴ ዙማ ቦላ ኬዚዲ ባ ኮዪዛይታ ባኮ ያና ማላ ፄይጊዴስ፥ ኢስቲካ ኢዛኮ ዪዳ። ኢዛራ ኢሲፌ ጊዳና ማላኔ ሳባካናስ ዬዳና ማላ ታማኔ ናምዓታ “ሃዋሬታ” ጊ ሱንꬂዴስ። ኣሳፔ ዳይዳንꬃታ ኬሳና ማላ ኢስታስ ጎዳቴꬂ ኢሚዴስ። ኢዚ ሱንꬂዳ ታማኔ ናምዓታ ሱንꬂ ሃይሳፌ ካሊዛይሳ፤ ጴፅሮሳ ጌቴቲዳ ሲሞና፥ ቢዖሪኔጌሴ ዎይኮ ዳዳ ናይታ ጌቴቲዳ ዛቢዶሳ ናይታ ያቆቤኔ ዮሃኒሳ፥ ኢንዲራሳ፥ ፒሊጶሳ፥ ባርቴሌሞሳ፥ ማቶሳ፥ ቶማሳ፥ ኢልፊዮሳ ና ያቆቤ፥ ታዶሳ፥ ባ ባጋስ ሚሼቲዛ ሲሞና፥ ዬሱሳ ኣꬂ ኢሚዳ ኣስቆሮንቶ ዩሁዳ። ሄሳፌ ጉዬ ዬሱሲ ኢሲ ሶ ጌሊዴስ። ኢዚኔ ኢዛ ካሊዛይቲ ካꬅ ማና ዎዴይ ኢስታስ ꬋያና ጋካናስ ዴሬይ ቃሴካ ዳሪ ሺቂዴስ። ኢዛ ሃኖታ ሲዪዳ ኢዛ ዳቦቲ “ጎዮንታ ኣጌና” ጊዲ ባናራ ኤኪ ባናስ ኢዚ ዲዛሶ ጋኪዳ። ዬሩሳላሜፔ ዪዳ ፃፌቲካ “ቢዔሊዜቡላ ጌቴቲዛ ዳይዳንꬃታ ሃላቃይ ኢዛ ቦላ ዴስ። ኢዚ ዳይዳንꬃታ ኬሲዛይ ዳይዳንꬃታ ሃላቃ ዎልቃንኮ!” ጊዳ። ኢዚካ ኢስታ ፄይጊዲ ሌሚሶራ “ፃላዔይ ኣሳፔ ፃላዔ ዎስቲ ኬሳኔ? ባ ጊዶን ሻኮይ ዲዛ ካዎቴꬂ ሚናናስ ዳንዳዬና። ኢሲ ኬꬃ ኣሲካ ባ ጊዶን ሻኬቲኮ ኤቃናስ ዳንዳዬና። ሄሳꬆካ ፃላዔይ ባ ጋራሳን ኢሶይ ኢሳራ ሻኬቲኮኔ ኢፄቲኮ ሚኒ ኤቃናስ ዳንዳዬና። ሄሲካ ኢዛስ ዉርሴꬅ ጊዳና። “ሄሳ ጌዶን ኢሳዴይ ኮይሮቲዲ ዎልቃማ ኣስ ቃቾንታ ዲሼ ዎልቃማዛሶ ጌላናሲኔ ኢዛ ሚሼ ቦንቃናስ ዳንዳዬና፤ ኢዛ ኣቆ ቦንቃናስ ዳንዳዬቲዛይ ዎልቃማዛ ቃቺኮ ፃላላ። “ታ ኢንቴስ ቱሙ ጋይስ፤ ኣሳ ናይታስ ናጋራይኔ ጫሺ ዉሪ ማሬታና። ጊዶ ኣቲን ፂሎ ኣያና ቦላ ጫሻ ቃላ ሃሳዪዛ ኣሳ ኡባስ ሜርናስ ናጋራ ኣጮ ጊዳና ኣቲን ማሬቴና” ጊዴስ። ሄሳ ኢዚ ጊዳይ ኢስቲ ኢዛ “ኔ ቦላ ቱና ኣያናይ ዴስ” ጊዳ ጊሻሳ። ሄሳፌ ጉዬ ኢዛ ኣዬያኔ ኢዛ ኢሻቲ ካሬ ዪ ኤቂዲኔ ኣሴ ኢዛኮ ኪቲ ፄይጊሲዳ። ኢዛ ዩዪ ኣꬊ ኡቲዳ ዳሮ ኣሳይ “ሄኮ ኔ ኣዬያኔ ኔ ኢሻቲ ካሬን ኤቂዲ ኔና ኮዬቴስ” ጊዳ። ኢዚካ ዛሪዲ “ታ ኣያ ኦኔ? ታ ኢሻቲ ኦናንቴ?” ጊዴስ። ኢዛ ዩዪ ኡቲዳ ኣሳኮ ፄሊዲ “ታ ኣዬያኔ ታ ኢሻቲ ሃይታንታኮ! ፆሳ ሼኔ ኦꬂዛይ ዉሪ ኢዚ ታ ኢሻ፥ ታ ሚቾኔ ታ ኣዮ” ጊዴስ። ቃሴ ዬሱሲ ሃራ ዎዴ ኣባ ኣቻን ታማርሶ ኦይኪዴስ። ኢዛኮ ኬሂ ዳሮ ዴሬይ ሺቂዳ ጊሽ ኣባ ጊዶን ዲዛ ዎጎሎ ዲዛሪን ጌሊዲ ኡቲዴስ፤ ኣሳይካ ዉሪ ኣባ ኣቻን ሺቂዴስ። ኢዚካ ዳሮ ዮዖታ ሌሚሶ ሂዝጊ ታማርሲዴስ። “ሲዪቴ! ኢሳዴይ ዜሬꬅ ዜራናስ ኬዚዴስ። ኢዚ ዜሪሺን ኢሲ ኢሲ ዜሬꬂ ኦጌ ቦላ ዎꬊዴስ። ኦጌ ቦላ ዎꬊዳ ዜሬꬃ ካፎቲ ማፂ ሚዳ። ባጋይ ሜላ ቢታን ዎꬊዴስ። ሄ ቢታይ ሜላ ጊዲዳ ጊሽ ሄራካ ጫሪዴስ። ጊዶ ኣቲን ኣዋ ኣርሼይ ኬዚዳ ማላ ሹሊዲ ፃጶ ዬዶንታ ጊሽ ሜሊዴስ። ቃሴ ኢሲ ዜሬꬂ ኣጉንꬃ ጊዶን ዎꬊዴስ፤ ኣጉንꬃይካ ዲጪዲ ጩሊዳ ጊሽ ኣይፊቤና። ሃራ ዜሬꬂ ቃሴ ሎዖ ኦርዴ ቢታ ቦላ ዎꬊዳ ጊሽ ጫሪዲ ዲጪዴስ፤ ኣይፌካ ኣይፊዴስ፤ ኢሶይ ሄꬑ ታሙ፥ ኢሶይ ቃሴ ኡሱፑን ታሙ፥ ኢሶይ ቃሴ ፄቱ ኣይፊዴስ።” ዬሱሲ ቃሴካ “ሲዪዛ ሃይꬂ ዲዛዴይ ሲዮ!” ጊዴስ። ዬሱሲ ባርካ ዲሺን ታማኔ ናምዓቲኔ ካሴ ኢዛራ ዲዛ ኣሳይ ኢዚ ዮቲዳ ሌሚሶዛ ጊሽ ኢዛ ዛሪ ኦይቺዳ። ኢዚካ ኢስታስ “ኢንቴስ ፆሳ ካዎቴꬃ ፁራ ኤሮይ ጌሊዴስ ሺን ካሬን ዲዛይታስ ጊዲኮ ዮዖይ ዉሪ ሌሚሶራ ዮቴቴስ። ሄሲካ ካሴ ‘ኢስቲ ቤዪዲ ቤዪዳይሳ ኣኬኮንታ ማላኔ ሲሞንታ ማላ፥ ቃሴካ ኢስታ ናጋራይ ማሬቶንታ ማላኮ’ ” ጊዴስ። ቃሴካ ዬሱሲ “ሃይሲ ሌሚሶይ ኢንቴስ ጌሊቤኔ? ሂስቲን ሃራ ሌሚሶ ኢንቴ ዎስቲ ኤራኔ? ዜሪዛዴይ ቃላ ዜሬስ። ኢሲ ኢሲ ኣሳቲ ኦጌ ቦላ ዎꬊዳ ዜሬꬃ ሚሳቴቴስ፤ ኢስቲ ቃላ ሲዪዛ ዎዴ ፃላዔይ ዪዲ ሄራካ ኢስቲ ሲዪዳ ቃላ ኢስታ ዎዝናፔ ኤኪቼስ። ሄሳꬆካ ሃራቲ ሜላ ቢታ ቦላ ዎꬊዳ ዜሬꬃ ሚሳቴቴስ። ኢስቲ ቃላ ሲይዲ ኡፋይሳን ኤኬቴስ። ጊዶ ኣቲን ኢስቲ ፃጶ ዬዶንታ ጊሽ ጉꬃ ዎዴ ጋምዒሺን ቃላ ጌዶን ሜቶይ ዎይኮ ጎዴታይ ኣሳታ ቦላ ዪዛ ዎዴ ሄራካ ꬉጴቴቴስ። ሃራቲ ቃሴ ኣጉንꬃ ጊዶን ዎꬊዳ ዜሬꬃ ሚሳቴቴስ፤ ኢስቲ ቃላ ሲሲ ሲዬቴስ። ጊዶ ኣቲን ሃ ቢታ ሜቶይ፥ ሚሻ ሲቆይኔ ሃራ ኣሞይ ኢስቲ ሲዪዳ ቃላ ጩሊዲ ኣይፌ ኣይፎንታ ማላ ዲጌስ። ሃንኮይቲ ሎዖ ቢታን ዜሬቲዳ ዜሬꬃ ሚሳቴቴስ፤ ሄይቲካ ቃላ ሲይዲ ኤኪዛዴኔ ሄꬑ ታሙ ኣይፌ፥ ኡሱፑን ታሙ ኣይፌኔ ፄቱ ኣይፌ ኣይፊዛይታ” ጊዴስ። ቃሴካ ዬሱሲ “ፆምፔ ኦይꬂዲ ጌማሶን ዎይኮ ኣርሳ ጊዶን ዎꬂ ኤሬቲ? ፖዓና ማላ ቆንጬሶን ዎꬄታ ጊዴኔ? ሄሳ ጊሽ ቆቴቲዲ ቆንጬ ኬዞንታይ፥ ፖዖን ኬዞንታ ጌማን ኣታናይ ባዋ። ሄሳ ጊሽ ሲዪዛ ሃይꬂ ዲዛዴይ ሲዮ!” ጊዴስ። ጉጂዲካ “ኢንቴ ሲዪዛይሳ ዎዝናን ዎꬂቴ፤ ኢንቴ ማኪዛ ሚሻራ ኢንቴስ ማኬታና፤ ሄሳፌካ ዳሮይ ጉጄታና። ዲዛዴስ ጉጄታና ሺን ባይንዳዴፌ ኢዛስ ዲዛራካ ኤኬቲቻና” ጊዴስ። ቃሴካ ዬሱሲ “ፆሳ ካዎቴꬂ ዜሬꬅ ዜሪዛ ኢሲ ኣስ ሚሳታዉስ። ዜሪዳዴይ ኦማርስ ꬊሲኬስ። ዎንቲሺን ዴንዴስ፤ ጊዶ ኣቲን ኢዚ ኤሮንታ ዲሺን ዜሬቲዳ ካꬃይ ሞኪዲ ዲጬስ። ጋዴያካ ኮይሮ ጫሬች፥ ካሌꬃዳ ፑꬌ፥ ቅሴካ ፑꬌዛ ቦላ ሎዖ ኣይፌ ኢማዉስ። ካꬃይ ካፂዳፔ ጉዬ ቦኔይ ጋኪን ኬꬃ ኣዋይ ሄራካ ማፃ ኦይኬስ” ጊዴስ። ዬሱሲ “ፆሳ ካዎቴꬅ ኑ ኣዛራ ጊኒሳኔ? ኣዛራ ሌሚሳኔ? ቢታ ቦላ ኡባፌ ላፋ ጊዲዳ ሳናፊጬ ኣይፌ ሚሳታዉስ። ዜሬታዳ ዲጪዳፔ ጉዬ ቃስ ኣታኪልቴታ ኡባፌ ኣꬊዛ ጊሽ ካፎቲ ዪዲ ሄ ኣታኪልቴይ ሃጋታ ኩዋ ጊዶን ሼምፔቴስ” ጊዴስ። ዬሱሲካ ኣሳይ ኤካናስ ዳንዳዪዛይሳ ኬና ሃይታ ሚሳቲዛ ሃራ ዳሮ ሌሚሶራ ኢስታስ ዮቲዴስ። ኣይ ሚሽ ጊዲኮካ ኣሳስ ሌሚሶይ ባይንዳ ዮቲ ኤሬና። ኢዚኔ ኢዛ ካሊዛይቲ ፃላ ዲዛ ዎዴ ጊዲኮ ዉርሲ ቢርሽ ዮቴስ። ሄ ጋላስ ጋዴይ ቃሚሺን ባና ካሊዛይታ “ኣኔ ጌዴ ሄ ፒንꬅ ፒኖስ” ጊዴስ። ኢስቲ ኣሳ ሄን ኣጋጊዲ ኢዚ ኡቲ ዲዛ ዎጎሎዛራ ዬሱሳ ኤኪ ቢዳ። ሃራ ዎጎሎቲካ ኢስታራ ኢሲፌ ዴቴስ። ሄ ዎዴ ዎልቃማ ዳምባላይ ኣባ ቦላ ዴንዲዲ ዎጎሎዛ ሃꬂ ኩማና ጋካናስ ዳምባላይ ሾጬቺዴስ። ጊዶ ኣቲን ዬሱሲ ቦርኮꬅ ቦርኮቲዲ ዎጎሎዛስ ጉዬ ባጋን ኢቺዴስ። ኢስቲካ ኢዛ ዴንꬂዲ “ኣስታማሬ! ኑኒ ꬋዪሺን ኔና ሜቴኔ?” ጊዳ። ኢዚካ ዴንዲዲ ጫርኮዛ “ጮዑ ጋ!” ኣባካ “ዎፑ ጋ!” ጊዴስ፤ ጫርኮይካ ጮዑ ጊዴስ፤ ሙሌካ ጮዑ ጊዴስ። ባና ካሊዛይታካ “ሃይሳꬆ ኣዛስ ባቢዴቲ? ሃይሳ ጋካናስ ኢንቴስ ኣማኖይ ባዌ?” ጊዴስ። ኢስቲካ ኬሂ ባቢዲ ባ ጊዶን ኢሶይ ኢሳራ “ጫርኮይኔ ኣባይ ኢዛስ ኣዛዜቲዛይ ሃይሲ ኦኔ?” ጌቴቲዳ። ኣባ ፒኒዲ ጌዴ ጌርጌሴኖኔ ጌቴቲዛሶ ቢዳ። ዬሱሲ ዎጎሎዪፔ ዎꬊዳ ማላ ቱና ኣያናይ ኢዛ ቦላ ዲዛዴይ ዱፎፔ ኬዚዲ ዬሱሳራ ጋጋና ኢዛኮ ዪዴስ። ሃይሲ ኣዴዚ ዱፎሶን ዲዛዴኔ ሃራይ ኣቶሺን ኦኒካ ኢዛ ሳንሳላታንካ ቃቻናስ ዳንዳይቤና። ዳሮ ዎዴ ቶሆ ቢራታራኔ ሳንሳላታራ ቃሼቴስ። ጊዶ ኣቲን ኩሼ ሳንሳላታ ዱꬄꬂ ዬጌስ፤ ቶሆ ቢራታካ ሜንꬄሬꬂ ዬጌስ፤ ኦኒካ ኢዛ ኦይኪዲ ቴቃናስ ዳንዳይቤና። ጋላሲኔ ቃማ ዱፎታ ጊዶኒኔ ዙማታ ቦላ ዩዪ ዩዪ ዋሲሼ ባ ቦላ ሹቻራ ቃንፄሬꬂዲ ማዱንꬄስ። ኢዚካ ዬሱሳ ሃሆን ቤዪዳ ማላ ዎꬃን ኢዛኮ ዪዲ ኢዛ ሲንꬃን ጉልባቲዲ ጎይኒዴስ። ኬሂ ዋሲዲ “ሃይሶ ዎጋ ፆሳ ና ዬሱሳ፥ ኔስ ታናራ ኣዚ ዲዜ? ፆሳ ሱንꬃን ታ ኔና ዎሳይስ ታና ዋይሶፓ” ጊዴስ። ኢዚ ሄሳ ጊዳይ ዬሱሲ ካሴ “ኔኒ ቱና ኣያናይ ሃይሳፌ ኬዛ” ጊዳ ጊሻሳ። ሄሳፌ ቃሴ ዬሱሲ ኢዛ “ኔ ሱንꬂ ኦኔ?” ጊዲ ኦይቺዴስ። ኢዚካ “ኑኒ ዳሮታ ጊዲዳ ጊሽ ታ ሱንꬂ ሌጎኔ ጌቴቴስ” ጊዴስ። ሄ ዴሬፔ ኬሲ ዬዶንታ ማላ ዬሱሳ ኬሂ ዎሲዴስ። ሄን ማታን ዙማ ቦላ ዳሮ ጉዱንꬂ ሄሜቴስ። ቱና ኣያናቲ “ኑ ጉዱንꬃታን ጌላና ማላ ኑስ ኤሮ ጋርኪ?” ጊዲ ዬሱሳ ዎሲዳ። ኢዚካ ኢስታስ “ኤሮ” ጊዴስ። ቱና ኣያናቲካ ኣዴዛፔ ኬዚዲ ጉዱንꬃታን ጌሊዳ። ናምዑ ሺ ጊዲዳ ጉዱንꬃይ ዉሪ ኣፎዛራ ዱጌꬃ ጌንዴሬቲ ዎꬊዲ ኣባን ሚቴቲዳ። ጉዱንꬃ ሄሚዛይቲ ባቃቲዲ ሃኒዳይሳ ካታማኒኔ ዴሬ ጊዶን ዮቲዳ። ዴሬይካ ሃኒዳይሳ ቤያናስ ባ ዲዛሶፔ ዲዛሶፔ ኬዚዴስ። ዬሱሳኮ ዪዲ ዳሮ ዳይዳንꬂ ኢዛ ቦላ ዲዛ ኣዴዛ ዎዝናይ ኢዛስ ሲሚን ማይዖ ማይዒዲኔ ዎጋራ ኡቲዳይሳ ዪዳ ኣሳይ ቤዪዲ ባቢዴስ። ሃይሳ ቤዪዳ ኣሳይ ዳይዳንꬂ ኢዛ ቦላ ዲዛ ኣዴዛ ጊሺኔ ጉዱንꬃቲ ሃኖይሳ ዴሬዛስ ዮቲዳ። ሄሳፌ ጉዬ ሄ ዴሬ ኣሳይ ዬሱሲ ኢስታ ዴሬ ዬዲዲ ባና ማላ ዎሲዴስ። ዬሱሲ ዎጎሎን ጌሊሺን ዳይዳንꬃቲ ኢዛፔ ኬዚዳ ኣዴዚ ዬሱሳራ ዳናስ ዎሲዴስ። ዬሱሲ ቃሴ ኢዚ ኦይቺዳይሳ ኣካይ ጊዲኔ “ኔኒ ጌዴ ኔ ሶ ባ፥ ጎዳይ ኔስ ኣይ ማላ ጊታ ሚሽ ኦꬂዳኮኔ ኢዚ ኔስ ኦꬂዳ ማሮቴꬃ ኔ ሶ ኣሳስ ዮታ” ጊዴስ። ኣዴዚካ ባሶ ቢዲ ዬሱሲ ኢዛስ ኦꬂዳ ጊታ ሚሽ ዉርሲ ታሙ ካታማ ጌቴቲዛ ዴሬን ዮቲን ሲዪዳይ ዉሪካ ማላሌቲዴስ። ቃሴካ ዬሱሲ ዎጎሎን ጌሊዲ ጌዴ ፒንꬅ ፒኒዲ ኣባ ኣቻን ዲሺን ዳሮ ኣሳይ ኢዛ ኣቺ ሺቂዲኔ ኢዛ ጊዶꬂዴስ። ኣይሁዳታ ዎሳ ኬꬃ ሃላቃታፔ ኢሶይ ኢያዒሮሳ ጌቴቲዛይሲ ኢዚ ዲዛሶ ቢዲ ዬሱሳ ዴሚዳ ማላ ኢዛ ቶሆ ቦላ ኩንዲዲ “ታስ ጉꬃ ና ዲዛራ ሃይቃና ጋዉስ። ኢዛ ሃይቆንታ ፓፃ ዳና ማላ ኔ ሃ ያዳ ኔ ኩሼ ኢዚ ቦላ ዎꬃርኪ?” ጊዲ ኬሂ ዎሲዴስ። ዬሱሲካ ኢዛራ ኢሲፌ ቢዴስ። ዳሮ ኣሳይ ኢዛ ኡንዔꬃና ጋካናስ ካሊዴስ። ታማኔ ናምዑ ላይꬅ ኩሜꬅ ሱꬂ ኢዚ ቦላፌ ጉኪዛ ማጫስ ዲዛራ ሄን ኣሳራ ዳዉስ። ኢዛ ባሲ ዲዛ ሚሽ ዉርሳ ኦንጋና ጋካናስ ኣኪሜፔ ኣኪሜ ላሞን ዳሮ ዳቡራዱስ። ጊዶ ኣቲን ሳኮይ ኢዚስ ጌዴ ዳሪዴስ ኣቲን ኣይኮካ ሎዒቤና። ኢዛ ዬሱሳ ጊሽ ሲዪዳ ማላ ኣሳ ጊዶራ ዬሱሳ ጉዬራ ካላዳ ኢዛ ማይዖ ቦቻዱስ። ጋሶይካ “ታ ኣይ ሃናዳካ ኢዛ ማይዖ ኩሼራ ቦቾ ቦቺዳኮካ ታ ፓፃና” ጋዳ ቆፒዳ ጊሻሳ። ጉኪዛ ሱꬃይ ሄራካ ኤቂ ኣጊዴስ፤ ኢዛካ ፓፂዳይሳ ባ ኣሳቴꬃን ኤራዱስ። ባፔ ዎልቃይ ኬዚዳይሳ ዬሱሲ ኤሪዲ ጌዴ ኣሳኮ ሲሚዲ “ታ ማይዖ ኦኔ ቦቺዳይ?” ጊዴስ። ኢዛ ካሊዛይቲ ቃሴ “ሃይሲ ዴሬይ ኡንዔቲዲ ሱጌቲሺን ቤያሼ ዋናዳ ‘ታና ቦቺዳይ ኦኔ?’ ጋይ” ጊዳ። ዬሱሲ ሄሳ ኦꬂዳይ ኦናኮኔ ቤያናስ ዩሺ ፄሊዴስ። ማጫሳያካ ባስ ኣዚ ዋኒዳኮኔ ኤራዳ ባባሼኔ ኮኮራሼ ያዳ ዬሱሳ ሲንꬃን ጉፋናዳ ሃኒዳ ቱማ ዉርሳ ኢዛስ ዮታዱስ። ኢዚካ “ታ ናዬ! ኔ ኣማኖይ ኔና ኣሺዴስ። ሳሮን ባ! ኔ ዋዬፔ ፓፃ!” ጊዴስ። ዬሱሲ ቡሮ ሃሳያን ዲሺን ኣይሁዳታ ዎሳ ኬꬄ ሃላቃ ኢያዒሮሳ ሶፔ ዪዲ ኢያዒሮሳስ “ኔ ናያ ሃይቃዱስ፥ ጎዳ ሜላ ኣዛስ ዳቡሪሳይ?” ጊዳ። ጊዶ ኣቲን ዬሱሲ ኢስታ ሃሳያ ሌፒ ሂስቲዲ ኣይሁዳታ ዎሳ ኬꬃ ሃላቃዛ “ኔ ኣማኖ ፃላ ኣማና ኣቲን ባቦፋ!” ጊዴስ። ጴፅሮሳ ያቆቤራኔ ያቆቤ ኢሻ ዮሃኒሳፔ ኣቲን ሃራይ ኦኒካ ኢዛ ካላና ማላ ኮይቤና። ጌዴ ኣይሁዳታ ዎሳ ኬꬃ ሃላቃ ሶ ጋኪዳ ማላ ኣሳይ ዋሲሼ ጫሞ ዬሆ ዬኪዛይሳ ቤዪዴስ። ሶ ጌሊዲ “ሃይሲ ዉሪ ኣዛ ዋሶኔ ኣዛ ዬሆ? ናያ ꬊስካዱስ ኣቲን ሃይቃቤይኩ” ጊዴስ። ቃሴ ኣሳይ ዉሪ ኢዛ ቦላ ሚጪዴስ፤ ኣሳ ዉርሲካ ኬꬃፌ ኬሲዲ ናይ ኣዋኔ ናይ ኣዪዮ ቃሴካ ኢዛራ ኢሲፌ ዪዳይታ ኢዛ ካሊዛይታ ፃላ ካሌꬂዲ ናያ ዲዛ ሶ ጌሊዴስ። ናይ ኩሼካ ኦይኪዲ “ፃቢታ ኩም!” ጊዴስ። “ፃቢታ ኩም” ጉሳስ ቢርሼꬂ “ሃኔ ናዬ፥ ዴንዳ” ጉሳ። ናያካ ሄራካ ዴንዳ ኤቃዱስ፤ ሄኔ ሃኔ ሃሙታዱስ። ኢዚስካ ላይꬃይ ታማኔ ናምዑ ላይꬃ፤ ኣሳይካ ሄ ሃኖዛን ዳሮ ማላሌቲዴስ። ዬሱሲ ሃይሳ ኦኒካ ኤሮንታ ማላ ኬሂ ሚንꬂ ዮቲዴስ፤ “ናይስ ማና ቁማ ኢሚቴ” ጊዴስ። ሄሳፌ ጉዬ ዬሱሲ ሄፔ ዴንዲዲ ጌዴ ባ ዴሬ ቢዴስ። ኢዛ ካሊዛይቲካ ኢዛራ ቢዳ። ኣይሁዳታ ሳምባታይ ጋኪን ኣይሁዳታ ዎሳ ኬꬄ ጌሊዲ ታማርሲሺን ሲዪዳ ኣሳይ “ሃይሲ ኣዴዚ ሃይሳ ዉርሲ ኣዋፔ ኤኪዴ? ሃይሲ ኢዛስ ኢሜቲዳ ኤራቴꬃይ ኣዜ? ቃሴ ሃይቲ ኢዚ ኦꬂዛ ማላታቲ ዋኒ ኢዛ ኩሼን ሃኒዞ?” ጊሼ ማላሌቲዳ። “ሃይሲ ኣናፄዛ ጊዴኔ? ማራሚ ና ያቆቤንታ ዮሳንታ፥ ዩሁዳንታኔ ሲሞናንታ ኢሻ ጊዴኔ? ኢዛ ሚቼቲ ኑናራ ሃን ኑ ማታን ዲዛይታ ዴቴኔ?” ጊዲ ሄሳፌ ዴንዲዳይሳኒ ኢዛን ኡፋዬቲቤቴና። ዬሱሲካ ኢስታስ “ናቤይ ቦንቼቶንታይ ባ ዴሬን ባ ዳቦታ ጊዶኒኔ ባሶ ኣሳ ኣቻን ፃላ” ጊዴስ። ሄን ጉꬃ ሃርጋንቻታ ቦላ ኩሼ ዎꬂ ፓꬆሪፔ ኣቲን ሃራ ኣይኮ ማላታካ ኦꬃናስ ዳንዳይቤና። ኢስታስ ኣማኖይ ባይንዳይሳ ቤዪዲ ማላሌቲዴስ። ሄሳፌካ ዬሱሲ ጉታን ጉታን ዩዪ ዩዪ ታማርሲዴስ። ታማኔ ናምዓታ ባኮ ፄይጊዲ ናምዑ ናምዑ ሂስቲ ኪቲሼ ቱና ኣያናታ ቦላ ኢስታስ ጎዳቴꬂ ኢሚዴስ። ኢዚ “ኦጌስ ጊዲዛ ጉፌ ኣቲን ኦጌ ሺንቄ ዎይኮ ኮሮጆ ዎይኮ ሚሼ ኦይኮፍቴ። ጫማ ኣꬂቴ ጊዶ ኣቲን ላማና ማይዖ ኦይኮፍቴ። ኢሲ ኬꬄ ኢንቴ ጌሊኮ ሄ ካታማፔ ኢንቴ ኬዛና ጋካናስ ሄ ኬꬃን ዲቴ። ኣዋንካ ኦኒካ ኢንቴና ሞኪ ኤኮንታ ኢፂኮ ሄፔ ኬዚሼ ሄ ዴሬታ ቦላ ማርካ ጊዳና ማላ ኢንቴ ቶሆ ቦላ ዲዛ ጉዱላ ቆቆፍቴ” ጊዲ ኣዛዚዴስ። ኢስቲካ ሄፔ ኬዚዲ ዴሬይ ማሮቴꬃን ጌላና ማላ ሳባኪዳ። ዳሮ ዳይዳንꬃታ ኬሲዳ፤ ዳሮ ሃርጋንቻታ ዛይቴ ቲዪ ቲዪዲ ፓꬂዳ። ዬሱሳ ሱንꬂ ካሴፔ ኤሬቲ ኤሬቲ ቢሺን ካዎ ሄርዶሲ ሄሳ ሲዪዴስ። ኢሲ ኢሲ ኣሳቲ “ሃይሳ ማላ ማላታታ ኦꬂዛ ፃማቂዛ ዮሃኒሲ ሃይቆፔ ዴንዲኒኮ” ጊዳ። ባጋይቲ “ኤላሳ” ጌቴስ፤ ባጋ ኣሳይ ቃሴ “ካሴ ናቤታፔ ኢሳ ሚሳቴስ” ጌቴስ። ሄርዶሲ ዮዖዛ ሲይዲ “ታ ኢዛ ቆꬌ ቃንፂሲዳ ዮሃኒሲ ሃይቆፔ ፓፂ ዴንዲዴስ” ጊዴስ። ሄርዶሲ ባ ኢሻ ፒሊጶሳ ማቾ ሄሮዲያዶ ኤኪዳ ጌዶን ኦይኬቲዲ ቃሼታና ማላ ኣዛዚዲ ዮሃኒሳ ቃሾ ኬꬄ ጌልꬂዴስ። ዮሃኒሲ ሄርዶሳ “ኔ ኢሻ ማቾ ኔ ኤኮንታ ማላ ዎጋይ ኔና ዲጌስ” ጊዳ ጊሽ ቃቺዴስ። ሄሮዲያዳ ሄሳ ጊሽ ሆሎታዳ ኢዛ ዎꬊሳናስ ኮያዱስ ሺን ዳንዳያቤኩ። ጋሶይካ ዮሃኒሲ ፂሎኔ ጌሻ ኣስ ጊዲዳይሳ ሄርዶሲ ኤሪዛ ጊሽ ዮሃኒሳስ ባቤሲኔ ኢዛ ናጌስ። ዮሃኒሲ ዮቲዛይሳ ሄርዶሲ ሲይዲ ሂርጊዛ ጊዲኮካ ኢዚ ዮቲዛይሳ ዎዝናፔ ሲዬስ። ሄርዶሳ ዬሌታ ጋላስ ቦንቻናስ ꬎቃ ሹሜታስ፤ ኦላ ዎታዳራታ ኣዛዚዛ ዋናታሲኔ ጋሊላ ቢታን ኬሂ ኤሬቲዛ ጊታ ኣሳታስ ጊቢራ ኬሲዴስ፤ ሄሲካ ሄሮዲያዲስ ጊጋ ጋላስ ጊዲዴስ። ሄሮዲያዲ ማጫ ናያ ጌላዳ ኣሳ ሲንꬃን ዬꬅ ዬፂን ሄርዶሳኔ ኢዚ ፄይጊዳ ኣሳ ኢዚ ዬꬃይ ኡፋይሲዴስ። ካዎይካ ናዮ “ኔ ኮዪዛ ሚሽ ዉርሳ ታና ኦይቻ ታ ኔስ ኢማና” ጊዴስ። ቃሴካ ታ ካዎቴꬃ ባጋ ጊዲዳኮካ ኔ ኦይቺኮ ዉርሳ ታ ኔስ ኢማና ጊዲ ኢዚስ ጫቂዴስ። ናያካ ኤሌላ ኬዛዳ ባ ኣዬዮ “ካዎ ኣይ ኦይቾ?” ጋዱስ። ኣዪያካ “ፃማቂዛ ዮሃኒሳ ሁዔ ቃንፃዳ ኢማ ጋ” ጋዱስ። ናያካ ኤሌላ ኬዛዳ ካዎዛኮ ጌላዳ “ፃማቂዛ ዮሃኒሳ ሁዔ ኬሬን ዎꬃዳ ኔ ታስ ኢማና ማላ ኮያይስ” ጋ ኦይቻዱስ። ካዎይ ሄ ዮዖዛን ዳሮ ሞꬌቲዴስ፤ ጊዶ ኣቲን ፄይጌቲዳ ኢማꬃ ጊሺኔ ጫቂዳ ቃላ ጊሽ ኢዚስ ኣካይ ጋናስ ኮይቤና። ሄሳ ጊሽ ዎታዳራታፔ ኢሳ ኤሶን ኪቲዲ ዮሃኒሳ ቆꬌ ቃንፂዲ ኢዛ ሁዔ ኤኪ ያና ማላ ኣዛዚዴስ፤ ኢዚካ ቢዲ ቃሾ ኬꬃ ጊዶን ዮሃኒሳ ቆꬌ ቃንፂዴስ። ሁዔዛ ኬሬራ ኤሂዲ ናይስ ኢሚዴስ፤ ናያካ ባ ኣዬይሲ ኢማዱስ። ዮሃኒሳ ካሊዛይቲካ ሄሳ ሲዪዳ ማላ ዪዲ ዮሃኒሳ ኣሃ ኤኪ ኤፊዲ ሞጊዳ። ሄሳፌ ጉዬ ሃዋሬቲ ሲሚዲ ዬሱሳ ኣቻን ዩዪ ኣꬊ ባ ኦꬂዳይሳኔ ባ ታማርሲዳይሳ ዉርሲ ኢዛስ ዮቲዳ። ዳሮ ኣሳይ ዪሼኔ ቢሼ ጊዛ ጊሽ ቁማ ሚዛ ዎዴይካ ቤቲቤና፤ “ኣኔ ኢንቴ ፃላ ታናራ ኣሲ ባይንዳሶ ቢዲ ኣኔ ጉꬅ ሼምፒ ኤኪቴ” ጊዴስ። ሄሳ ጊሽ ኢስቲ ባርካ ዎጎሎን ጌሊዲ ኢሲ ኣሲ ባይንዳሶ ቢዳ። ኢስቲ ቢሺን ዳሮቲ ቤዪዲ ቶሆራ ዎꬃን ኢስታፌ ሲንꬄ ኣꬊዳ። ዬሱሲ ዎጎሎዛፔ ዎꬊዛ ዎዴ ዳሮ ዴሬይ ሺቂ ኡቲዳይሳ ቤዪዴስ። ሄሚዛዴይ ባይንዳ ሜሄ ማላ ጊዲዳ ጊሽ ኣሳስ ቃꬌቲዴስ። ዳሮ ዮዖካ ታማርሶ ኦይኪዴስ። ሄ ዎዴ ጋዴይ ቃሚ ቃሚ ቢዛ ጊሽ ኢዛ ካሊዛይቲ ኢዛኮ ሺቂዲ “ሃይሲ ኑ ዲዛሶይ ባዞኮ፥ ጋዴይካ ቃሚዴስ። ሃይሳ ሄራን ኣሲ ዲዛሶ ቢዲ ኣሳይ ባስ ሚዛ ካꬅ ሻሚ ማና ማላ ኣሳ ዬዳ” ጊዳ። ኢዚ ኢስታስ ዛሪዲ “ኣሳስ ሚዛ ሚሽ ኢንቴ ኢሚቴ” ጊዴስ። ኢስቲካ ማላሌቲዲ “ኑኒ ቢዲ ናምዑ ፄቱ ዲናሬራ ካꬅ ሻሚዲ ሃይሳ ኣሳስ ኢሚዛኮ ጊዳንዴ?” ጊዳ። ኢዚካ ኢስታስ “ኢንቴስ ኣይ ላጌ ኡኬꬂ ዲዛኮኔ ኣኔ ቢዲ ፄሊቴ” ጊን ኢስቲ ቢ ፄሊዲ “ኢቻሹ ኡኬꬂኔ ናምዑ ሞሌይ ዴስ” ጊዳ። ሄሳፌ ካሊዲ ኣሳ ጪሊላ ማታ ቦላ ኦይዳን ኦይዳን ኡቲሳና ማላ ኣዛዚዴስ። ኣሳይካ ፄቱ ፄቱኔ ኢቻሹ ታሙ ኢቻሹ ታሙ ጊዲዲ ኦይዳን ኡቲዴስ። ኢዚካ ኢቻሹ ኡኬꬃኔ ናምዑ ሞሌታ ባ ኩሼን ኦይኪዲ ፑዴ ሳሎ ፄሊዲ ኣንጂዲኔ ኡኬꬃ ሜንꬂ ሜንꬂ ኣሳስ ጊሻና ማላ ባና ካሊዛይታስ ኢሚዴስ፤ ናምዑ ሞሌታካ ኡባ ኣሳስ ሻኬሬꬂዴስ። ኣሳይ ዉሪካ ሚዲ ካሊዴስ። ዬሱሳ ካሊዛይቲ ኣሳይ ካሊ ሚን ኣቲዳይሳ ታማኔ ናምዑ ፒꬃ ኩሜꬅ ሺሺዳ። ካꬅ ሚዳ ኣሳፔ ኣቱማሳይ ፃላ ኢቻሹ ሺ። ሄራካ ኢዚ ኣሳ ሞይዚሼ ኢዛ ካሊዛይቲ ሲንꬃቲዲ ጌዴ ፒንꬅ ቤቴሳይዳ ጌቴቲዝሶ ፒናና ማላ ኣዛዚዴስ። ሄፔካ ኢስታ ኣጋጊዲ ዎሳናስ ፑዴ ዙማ ቦላ ኬዚዴስ። ጋዴይ ቃሚን ዎጎሎይ ኣባ ጊዶን ዲሺን ኢዚ ባርካ ቢታ ቦላ ዴስ። ኣባ ቦላ ጫርኮይ ኬሂ ሜቲዳ ጊሽ ኢዛ ካሊዛይቲ ኣባ ሺሪ ሺሪ ዎጎሎ ላጊዛ ሚሻራ ባፄቲሺን ዬሱሲ ቤዪዴስ። ዎንታ ቦላ ኢስታኮ ዪዴስ፤ ዪዲኔ ኢስታ ኣቻራ ኣꬊ ባናꬆ ሃኒዴስ። ጊዶ ኣቲን ኣꬊ ባና ሃኒሺን ኢዛ ቤዪዳ ማላ ሞይቲሌ ቤዪዳ ሚሳቲን ዉሪካ ዋሲዳ። ዉሪካ ኢዛ ቤዪዲ ዳጋሚዳ፤ ኢዚካ ሄራካ ኢስታ ዮቺዲኔ “ኣይኮይ ባ፤ ታናኮ ዳጋሞፍቴ!” ጊዴስ። ኢዚካ ዎጎሎን ኢስታኮ ጌሊን ጫርኮይ ጮዑ ጊዴስ፥ ኢስቲካ ዳሮ ማላሌቲዳ። ካሴ ኢዚ ኡኬꬃን ኦꬂዳ ማላታ ቢርሼꬅ ኢስቲ ኤሮንታ ጊሽ ኢስታ ዎዝናይ ዶጪዴስ። ኣባ ፒኒዲ ጌንሴሬፄ ጌቴቲዛሶ ጋኪዳ፤ ዎጎላፔ ዎꬊዲ ዎጎሎዛ ሄን ቃቺዲ ኣጊ ቢዳ። ኢስቲ ዎጎሎፔ ዎꬊዳ ማላ ኣሳይ ዬሱሳ ኤሪዴስ። ዉሪካ ባ ዲዛሶ ዲዛሶ ዎፄሬቲዲ ሃርጋንቻታ ሃላን ቶኪ ቶኪ ኤኪዲ ዬሱሲ ዲዛሶ ኤሂዳ። ኢዚ ጋኪዳ ጉታን ዎይኮ ካታማ ጊዶን ዎይኮ ዴሬ ጊዶን ጊዲን ሃርጋንቻቲ ኢዚ ኣꬊሺን ኢዛ ዎሲዲኔ ኢዛ ማይዖ ቦቺዲ ፓፃና ማላ ሺሺ ሺሺ ዱቡሻይ ዲዛሶን ዎꬂዳ። ኢዚ ኣꬊ ቢሺን ኢዛ ማይዖ ቦቺዳይቲ ዉሪ ፓፂዳ። ሄሳፌ ጉዬ ፋርሳዌቲኔ ዬሩሳላሜፔ ዪዳ ኢሲ ኢሲ ፃፌቲ ዬሱሳ ላንቄን ዩዪ ኣꬊዳ። ዬሱሳ ካሊዛይታፔ ባጋይቲ ሜጬቶንታ ቂታ ኩሼራ ካꬅ ሚሺን ቤዪዳ። ፋርሳዌቲኔ ካሴ ጪማ ኣይሁዳ ኣሳቲ ካሴ ዴሬ ዎጋ ናጋናስ ኩሼ ሎዔꬂ ሜጬቶንታ ካꬅ ሚ ኤሬቴና። ጊያ ቢ ሲሚኮካ ቦላ ሜጬቲ ጌዮንታ ዲሼ ካꬅ ሚ ኤሬቴና። ሄሳꬆካ ዋንጫካ፥ ኦቶካ፥ ኬሬካ፥ ኢቺዛ ሂꬄካ ሜቻ ማላታ ሃራ ዎጋታካ ናጌቴስ። ፋርሳዌቲኔ ፃፌቲ ዬሱሳ “ኔና ካሊዛይቲ ካሴ ኣዋታ ዎጋ ማላ ዱስ ኣጊዲ ኣዛስ ኩሼ ሜጬቶንታ ካꬅ ሚዞ?” ጊዲ ኦይቺዳ። ኢዚካ ኢስታስ “ኢሳያሲ ቆꬌፔ ቆሞን ሃኒዛ ኢንቴ ጊሽ ‘ሃይሲ ዴሬይ ባ ሜቴርሻን ፃላላ ታና ቦንቼስ፤ ዎዝናይ ጊዲኮ ታፔ ሃኪዴስ። ታስ ሜላ ሃዳ ጎይኔቴስ፤ ኢስታ ቲሚርቴይካ ኣሲ ዎꬂዳ ዎጋ ፃላ’ ጊዲ ዮቲዳይስ ቱማ” ጊዴስ። ፆሳ ዎጋ ኣጊዲ ኣሲ ዎꬂዳ ዎጋ ናጌቴስ። ቃሴካ “ኢንቴ ዎጋስ ጊዲ ፆሳ ዎጋ ኢንቴ ኣጋጊዛ ጪንጫቴꬃ ኦጌይ ኢንቴስ ዴስ። ኣይስ ጊኮ ሙሴይ ‘ኔ ኣዮኔ ኔ ኣዋ ቦንቻ፤ ባ ኣዮኔ ባ ኣዋ ጫዪዛዴይ ሙሌካ ሃይቆ’ ጊዴስ። ጊዶ ኣቲን ኢንቴ ቃሴ ‘ኢሲ ኣሲ ባ ኣዋ ዎይኮ ባ ኣዮ ኢንቴ ታፔ ዴማናስ ኮሺዛ ማዶ ታ ፆሳስ ኢማዲስ’ ጊኮ፤ ኢንቴ ቃሴ ሃይሳዴይ ባ ኣዋስካ ባ ኣዬይሲ ሃራ ኣይኮካ ኦꬃና ማላ ኮዬኬታ። ሄሳ ጊሽ ኢንቴ ዎጋ ናጋና ጊዲ ፆሳ ቃላ ላሜታ። ሄይታንታ ሚሳቲዛ ዳሮታ ኦꬄታ።” ጊዴስ። ቃሴካ ዬሱሲ ኣሳ ባኮ ፄይጊዲ “ዉሪካ ታ ጊዛ ሲዪቴኔ ዎዝናን ዎꬂቴ። ካሬፔ ኡሎ ጊዶ ጌሊዲ ኣስ ቱኒሲዛ ኢሲ ሚሺካ ዴና። ሃራፔካ ኣሴ ቱኒሲዛይ ኬꬃ ኣዋፔ ጌዴ ካሬ ኬዚዛ ሚሻ። ሲዪዛ ሃይꬂ ዲዛይ ሲዮ!” ጊዴስ። ኢዚ ኣሳ ካሬን ኣጊዲ ኬꬄ ጌሊን ኢዛ ካሊዛይቲ ኢዚ ዮቲዳ ሌሚሶዛ ቢርሼꬅ ዬሱሳ ኦይቺዳ። ኢዚካ ኢስታ “ኢንቴስካ ዮዖይ ጌሌኔ? ካሬፔ ጌሊዲ ኣሴ ቱኒሲዛ ሚሺ ኣዚካ ዴና። ካሬፔ ጌሊዛይ ጌዴ ዎዝናን ጊዶንታ፤ ዱጌ ቃንꬃ ጊዶ ጌሌስ ቃሴ ሄፔ ኢዛዴ ኣሳቴꬃፌ ጌዴ ካሬ ኬዜስ።” ዬሱሲ ሄሳ ጊዳይ ኣሲ ሚዛ ካꬂ ዉሪካ ጌሽ ጊዲዳይሳ ቆንጪሳናሳ። ካሌꬂዲካ “ኣሳፔ ኬዚዛዚ ኣሴ ቱኒሴስ። ኣሳ ዎዝና ጊዶፌ ኬዚዛይ ኢታ ቆፋታ፥ ላይማ ኣሞኔ ካይሶቴꬅ፥ ኣሴ ዎꬎ፥ ላይማቴꬅ፥ ዪቄቴꬅ፥ ኢታቴꬅ፥ ባሌꬆ፥ ላይማ ካስ፥ ቃናቴቴꬅ፥ ኣሳ ሱንꬅ ሞሮ፥ ኦቶሬቴꬂኔ ኣዛላ። ሃይቲ ኢታ ሃኖቲ ዉሪ ኣሳፔ ኬዜቴሲኔ ኣሴ ቱኒሴቴስ” ጊዴስ። ዬሱሲ ሄፔ ኬዚዲ ፂሮሴ ጌቴቲዛ ዴሬ ቢዴስ። ሄን ኢሳዴ ኬꬄ ጌሊዲ ኢዚ ሄን ዲዛይሳ ኣሲ ኤሮንታ ማላ ኮዪዴስ። ጊዶ ኣቲን ኢዚ ሄን ኢዛ ዱሳይ ቆቴታናስ ዳንዳዬቲቤና። ሄራካ ኢሲ ቱና ኣያናይ ኦይኪዳ ጉꬃ ና ዲዛሪ ኣያ ዬሱሲ ሄን ዲዛይሳ ሲያዳ ኢዛኮ ያዳ ኢዛ ቶሆ ቦላ ኩንዳዱስ። ማጫሳያ ኣይሁዳ ጊዶንታ ጊሪኬ ቃላ ሃሳዪዛ ማጫሳሺን ኢዛ ዬሌቲዳሶይ ሲሮፊንቄ ጌቴቴስ። ኢዛካ ዬሱሲ ናይፔ ቱና ኣያና ኬሳና ማላ ዎሳዱስ። ዬሱሲ ዛሪዲ ኢዚስ “ናይታ ቁማ ኤኪ ካናስ ዬጋናስ ቤሶንታ ጊሽ ኮይሮ ናይቲ ሚ ካሌቶ” ጊዴስ። ኢዛካ ዛራዳ “ኤ ጎዶ! ካናቲካ ማዳ ማታን ዴዒዲ ናይታ ኩሼፔ ጋዴን ዎꬊዳይሳ ሜቴሲኮ” ጋዱስ። ኢዚካ “ሂስቲኮ ኔኒ ሄሳ ጊዳ ጊሽ ባ! ዳይዳንꬃይ ኔ ናይፔ ኬዚዴስ” ጊዴስ። ኢዛ ሲማዳ ሶ ቢሺን ናያ ዳይዳንꬃይ ዬዲን ፓፃዳ ሂፃን ኢቺዳሮ ዴማዱስ። ሄሳፌ ዬሱሲ ፂሮሴ ቢታፌ ዴንዲዲ ሲዶና ጊዛሶራ ኣꬊ ታሙ ካታማ ጊዛሶራ ካንꬂዲ ጌዴ ጋሊላ ኣባኮ ጋኪዴስ። ኣሳይ ኢሲ ሃይꬃ ቱሌኔ ኣይፌ ቆቄ ኣሲ ኢዛኮ ሄ ኤኪ ዪዲ ዬሱሲ ኢዛ ቦላ ባ ኩሼ ዎꬃና ማላ ዎሲዳ። ዬሱሲካ ኢዛ ኣሳፔ ሻኪ ኤኪ ቢዲ ባ ኩሼ ቢራꬌታ ኣዴዛ ሃይꬃን ጌልꬂዴስ፤ ቃሴካ ጩች ጩቲዲ ኣዴዛ ኢንፃርሳ ቦቺዴስ። ፑዴ ሳሎ ፄሊዲኔ ቶኪ ሼምፒዲ “ኤፊታ” ጊዴስ። ሄሲካ “ፖጌታ” ጉሳ። ሄራካ ኣዴዛ ሃይꬃቲ ፖጌቲዳ፤ ኢንፃርሳይካ ቢርሼቲን ጌሺ ሃሳዪዴስ። ዬሱሲ ሃይሳ ቤዪዳይቲ ኦናስካ ዮቶንታ ማላ ኣዛዚዴስ፤ ጊዶ ኣቲን ኣሳይ ኢዚ ኣዛዚዛዳይሳፌ ቦላራ ኬሂ ጉጂዲ ዮቲዳ። ዴሬዚካ ዎጋፔ ኣꬂ ማላሌቲዲ “ኢዚ ኦꬂዳይሲ ዉሪ ሎዖ፤ ቱሌቲ ሲያና ማላ፥ ዱና ዱዴቲ ሃሳያና ማላ ኦꬂዴስ” ጊዳ። ሄ ዎዴ ቃሴ ዳሮ ኣሲ ሺቂዴስ። ሺቂዳ ኣሳስ ሚዛ ካꬂ ባይንዳ ጊሽ ዬሱሲ ባና ካሊዛይታ ፄይጊዲ፥ “ሃይቲ ኣሳቲ ታናራ ሄꬑ ጋላስ ጋካናስ ጋምዒዳ ጊሺኔ ቃሴካ ኢስታስ ሚዛ ካꬂ ባይንዳ ጊሽ ታና ሚቼቴስ። ኢስታፌ ኢሲ ኢሲ ኣሳቲ ሃሆፔ ዪዳ ጊሽ ሃይሳ ጋፋራ ታ ኢስታ ሶ ዬዲኮ ዳቡሪዲ ኦጌ ቦላ ኩንዳና” ጊዴስ። ኢዛ ካሊዛይቲካ ዛሪዲ “ሃይሳ ባዞን ሃይሳ ማላ ዴሬ ሚዛና ቁማ ኣዋፔ ዴማኔ?” ጊዳ። ኢዚካ ኢስታ “ኢንቴኮን ኣፑን ኡኬꬂ ዲዜ?” ጊ ኦይቺዴስ። ኢስቲካ “ላፑን ኡኬꬂ ዴስ” ጊዳ። ኢዚካ ኣሳይ ጋዴን ኡታና ማላ ኣዛዚዴስ፤ ላፑን ኡኬꬃ ባ ኩሼን ኦይኪ ጋላቲዲኔ ሜንꬂዲ ኣሳስ ጊሼቻና ማላ ባና ካሊዛይታስ ኢሚን ኢስቲካ ዴሬዛስ ጊሺዳ። ቃሴካ ሄን ዲዛ ቄሪ ጉꬃ ሞሌታ ጊሽ ፆሳ ጋላቲዲ ጉꬃ ሞሌታ ኣሳስ ጊሼቻና ማላ ባና ካሊዛይታ ኣዛዚዴስ። ዴሬይካ ሚዲ ካሊዴስ። ሄሳፌካ ኢዛ ካሊዛይቲ ማዳፌ ፓላሂዳ ካꬅ ላፑን ፒꬃ ኩሜꬅ ዴንꬂዳ። ሄሳ ሚዳ ኣሳይ ኦይዱ ሺ ጊዳና። ሄ ኣሳ ሞይዚዲ ባና ካሊዛይታራ ዎጎሎን ጌሊዲ ጌዴ ዳልማኑታ ጌቴቲዛሶ ቢዴስ። *** ፋርሳዌቲ ዪዲ ዬሱሳራ ፓላሜቴꬅ ኦይኪዳ። ኢዛ ፓጫናስ ኮዪዲ ባና ሳሎፔ ማላታ ቤሳና ማላ ኦይቺዳ። ኢዚካ ቶኪ ሼምፒዲ “ሃይሲ ዬሌታዚ ኣዛስ ማላታ ኮዪዜ? ታ ኢንቴስ ቱማ ጋይስ፤ ሃይሳ ዬሌታስ ኢሲ ማላታይካ ኢሜቴና” ጊዴስ። ኢስታ ሄን ኣጊዲኔ ዎጎሎን ጌሊዲ ሄ ፒንꬅ ፒኒዴስ። ኢዛ ካሊዛይቲ ካꬅ ኦይኮንታ ባሌቲዳ ጊሽ ኢሲ ኡኬꬅ ኣቲን ዎጎሎ ጊዶን ሃራ ኣይ ካꬂካ ዴና። ዬሱሲ ኢስታ “ፋርሳዌታ ኢርሾፌኔ ሄርዶሳ ኢርሾፌ ናጌቲቴ” ጊዲ ኣዛዚዴስ። ኢስቲ ቃሴ ባ ጊዶን ኢሶይ ኢሳራ “ኢዚ ኑና ሃይሳ ጊዛይ ኑስ ካꬅ ባይንዳ ጊሻሳ” ጊ ዮቴቲዳ። ቃሴ ዬሱሲ ኢስታ ቆፋ ኤሪዲ “ኑስ ካꬂ ባይንዳ ጊሽ ጋሳ ጊዲ ኢንቴ ጊዶን ኣዛስ ሃሳዬቴቲ? ሃዒካ ዩሺ ቆፔኬቲ? ዎዝናንካ ዎꬄኬቲ? ዎይኮ ኢንቴ ዎዝናይ ሹቻቲዴ? ኢንቴስ ኣይፌይ ዴስ ሺን ፄሌኬቲ? ሃይꬂ ዴስ ሺን ሲዬኬቲ? ኣኬኬኬቲ? ኢቻሹ ኡኬꬃ ኢቻሹ ሺ ኣሳስ ታ ሜንꬃ ኢሚን ኣፑን ፒꬃ ኩሜꬃ ካꬅ ዴንꬂዴቲ?” ጊዴስ። ኢስቲካ ዛሪዲ “ታማኔ ናምዑ” ጊዳ። ኢዚካ “ላፑን ኡኬꬃ ኦይዱ ሺ ኣሳስ ታ ሜንꬃ ኢሚን ኣፑን ፒꬃ ኩሜꬃ ካꬅ ዴንꬂዴቲ?” ጊ ኦይቺን ኢስቲካ “ላፑን” ጊዳ። ኢዚካ ኢስታ “ሂስቲን ሃዒ ጋካናስ ዩሺ ቆፒቤኬታካ!” ጊዴስ። ሄሳፌ ጌዴ ቤቴሳይዳ ጌቴቲዛሶ ቢዳ። ጉꬃ ኣሳቲካ ኢሲ ኣይፌ ቆቄ ኣሲ ዬሱሳኮ ኤሂዲ ዬሱሲ ኢዛ ቦቻና ማላ ዎሲዳ። ኢዚካ ሄ ቆቄዛ ኩሼ ኦይኪ ጎቺዲ ኣሲ ዲዛሶፔ ጌዴ ካሬ ኬሲ ኣዴዛ ኣይፌን ጩቲዲኔ ባ ኩሼ ኢዛ ቦላ ዎꬂዲ “ሃዒ ኔስ ኣዚ ቤቲዜ?” ጊ ኦይቺዴስ። ኢዚካ ꬎቁ ጊ ፄሊዲ “ኣሳይ ሚꬅ ሚሳቲዲ ቃፄቲሼ ቤቴስ” ጊዴስ። ቃሴካ ዬሱሲ ባ ኩሼታ ኢዛ ኣይፌታ ቦላ ዎꬂዴስ፤ ሄራካ ኢዛ ኣይፌቲ ፄሊዳ፤ ፖዖይካ ኢዛስ ሲሚን ዉርሲካ ጌሺ ፄሊዴስ። ቃሴ “ሃ ጉታታ ጊዶ ጌሎፓኔ ኦናስካ ዮቶፓ” ጊዲ ኢዛ ጌዴ ኢዛሶ ዬዲዴስ። ዬሱሲ ባና ካሊዛይታራ ቂሳሪያ ፒሊጲሲዮሴ ጌቴቲዛ ዴሬ ኣቻን ዲዛ ጉታታ ቢዴስ፤ ኢስቲ ኦጌ ቦላ ዲሺን ባና ካሊዛይታ “ታና ኣሳይ ኦና ጊዜ?” ጊዲ ኦይቺዴስ። ኢስቲካ ዛሪዲ ኔና “ፃማቂዛ ዮሃኒሳ ጊዛይቲካ ዴቴስ፥ ባጋቲ ቃሴ ኤላሳ ጌቴስ፥ ሃራቲ ቃስ ናቤታፔ ኢሳዴ ጌቴስ” ጊዲ ዮቲዳ። ካሌꬂዲካ ኢንቴች ታና ኦና ጌቲ? ጊዲ ኦይቺዴስ። ጴፅሮሲ “ኔኒ ኪርስቶሳ” ጊዴስ። ዬሱሲካ ባ ጊሽ ኦናስካ ኢስቲ ዮቶንታ ማላ ሚንꬂ ዮቲዴስ። ሄሳፌ ዬሱሲ ባና ካሊዛይታ፥ “ኣሳ ናይ ዳሮ ዋዬ ቤያናይሳኔ ዴሬ ጪማታን፥ ቄሴታ ሃላቃኒኔ ፃፌታን ካꬌታናይሳ ኣሳ ኩሼን ሃይቃናይሳ፥ ሃይቆፔ ሄꬓንꬆ ጋላስ ዴንዳናስ ቤሴስ” ጊዲ ታማርሶ ኦይኪዴስ። ኢዚካ ሄሳ ኢስታስ ቆንጪሲ ዮቲዴስ፥ ጴፅሮሲካ ኢዛ ዱማ ሻኪ ኤፊዲ “ሄሳꬆ ጎፓ!” ጊዲ ሃንቂዴስ። ዬሱሲ ቃሴ ባና ካሊዛይታ ዩሺ ፄሊሼ ጴፅሮሳ “ሃይሶ ፃላዔ ኔ ታፔ ጌዴ ጉዬ ባ! ኔኒ ኣሳዛፔ ኣቲን ፆሳዝ ቆፓካ!” ጊዲ ሃንቂዴስ። ሄሳፌ ጉዬ ኣሳ ባና ካሊዛይታራ ኢሲፌ ባኮ ፄይጊዲ “ታና ካላናስ ዶሲዛዴይ ዲኮ ባና ካዶ፤ ባ ማስቃሌ ቶኪዲ ታና ካሎ። ባ ሼምፖ ኣሻና ዶሲዛዴይ ꬋይሳና ሺን ታ ጊሺኔ ታ ሚሺራቾ ቃላ ጊሽ ባ ሼምፖ ꬋይሲዛዴይ ዉሪካ ኣሻና። ኣሲ ኣላሜ ኩሜꬅ ሃሪኮኔ ባ ሼምፖፌ ꬋይሲኮ ኢዛ ኣይ ጎዓኔ? ዎይኮ ኣሲ ባ ሼምፖ ጊሽ ላሜ ኤካናይ ኣዚ ዲዜ? “ሃይሳ ላይማኔ ናጋራንቻ ዬሌታ ጊዶን ዲሼ ታናኒኔ ታ ቃላን ዬላቲዛ ኣሲ ዉሪ ታ ኣሳ ናይ ታ ኣዋ ቦንቾራኔ ጌሻ ኪታንቻታራ ዪዛ ዎዴ ኢዛን ዬላታና” ጊዴስ። ካሌꬂዲካ ዬሱሲ “ታ ኢንቴስ ቱማ ጋይስ፤ ሃይሳን ኤቂዳ ኣሳፔ ፆሳ ካዎቴꬂ ዎልቃራ ዪሺን ቤያና ጋካናስ ሃይቆንታ ጋምዓና ኢሲ ኢሲ ኣሳቲ ዴቴስ” ጊዴስ። ኡሱፑን ጋላሳፌ ጉዬ ዬሱሲ ጴፅሮሳ ያቆቤኔ ዮሃኒሳ ባናራ ካሌꬂ ኤኪዲ ኢሲ ጊታ ዙማ ቦላ ኬዚዴስ። ኢስቲ ባርካ ዲሺን ኢስታ ሲንꬃን ኢዛ ሜꬋይ ላሜቲ ዎꬊዴስ። ኢዚ ማይዒዳ ማይዖይ ቢታ ቦላ ኦኒካ ማይዖ ሜጪዲ ሄሳ ማላ ቦꬃናስ ዳንዳዮንታ ቦꬅ ቦቲዴስ። ሄ ዎዴ ኤላሲኔ ሙሴይ ዬሱሳራ ሃሳዬቲሼ ኢስታስ ቤቲዳ። ጴፅሮሲ ዬሱሳ “ኣስታማሬ! ኑኒ ሃን ሃይሳን ዲዛኮ ኑስ ሎዖ፤ ኔስ ኢሲ ዳሴ፥ ሙሴስ ኢሲ ዳሴ፥ ቃሴ ኤላሳስ ኢሲ ዳሴ፥ ሄꬑ ዳሴታ ኑ ኦꬂኮቺ?” ጊዴስ። ዳሮ ባቢዳ ጊሽ ጴፅሮሲ ባ ጊዛይሳ ኤሪዲ ጊቤና። ሄራካ ሻራይ ኢስታ ካሚን ሻራ ጊዶራ “ሃይሲ ታ ዶሲዛ ታ ናዛኮ! ኢዚ ጊዛ ሲዪቴ” ጊዛ ቃላ ጊሪሲ ዪዴስ። ሄራካ ኢስቲ ዩሺ ፄሊን ዬሱሳፔ ኣቲን ኦኒካ ሃራ ኣስ ኢስታራ ዴና። ኢስቲ ዙማ ቦላፌ ዱጌ ዎꬊሺን ኣሳ ናይ ሃይቆፔ ዴንዳና ጋካናስ ሃይሳ ኢስቲ ቤዪዳይሳ ኦናስካ ዮቶንታ ማላ ኣዛዚዴስ። ኢስቲካ ባስ ዮቲዳ ቃላ ባ ዎዝናን ኦይኪዳ ሺን “ሃይቆፔ ዴንዶ ጉሲ ኣይ ጉሳኮኔ” ጊዲ ባ ጊዶን ሃሳዬቲዳ ቃሴ ኢስቲ ሙሴ ዎጋ ታማርሲዛይቲ “ካሴቲዲ ኤላሲ ያና ኮሼስ ኣዛስ ጊዞ?” ጊዲ ኢዛ ኦይቺዳ። ዬሱሲ ኢስታስ “ቱሙካ ኤላሲ ካሴቲ ዪዲ ዉርሲካ ጊጊሳና። ሂስቲንካ ኣሳ ናይ ዳሮ ዋዬ ኤካናሲኔ ካꬌታናስ ቤሴስ ጌቴቲ ፃፌቲዳይሲ ኢንቴስ ኣይ ሚሳቲዜ? ጊዶ ኣቲን ታ ኢንቴስ ጊዛይ ኤላሲ ጊዲኮ ዪዴስ ሺን ኣሳይካ ኢዛ ጊሽ ፃፌቲዳ ማላ ባና ኮሺዳ ማላ ኢዛ ቦላ ኦꬂዴስ” ጊዴስ። ዱጌ ጊዶን ኣቲዳ ዬሱሳ ካሊዛይታኮ ኢስቲ ሲሚ ዪሺን ዳሮ ኣሳይ ኢስታ ጊዶꬂን ሙሴ ዎጋ ታማርሲዛይቲ ኢስታራ ፓላሜቲዛይሳ ቤዪዳ። ዴሬይ ኢዛ ዴሚዳ ማላ ማላሌቲዲ ሳሮካናስ ኢዛኮ ዎፂዴስ። ኢዚካ ኢስታ “ኢንቴ ኢስታራ ኣዛ ጊሽ ፓላሜቴቲ?” ጊዲ ኦይቺዴስ። ኣሳ ጊዶፌ ኢሳዴይ “ኣስታማሬ! ቱና ኣያናይ ኢዛን ጌሊን ዱና ዱዲዳ ታ ና ዳይሳ ታ ኔኮ ኤካ ያዲስ። ኣያናዚ ዴንዲዛ ዎዴ ቦላፌ ዬጌስ፤ ዱናራ ጎፖንቶ ኬሲ ኬሲ ዬጌስ፤ ኣቻካ ጋርጬስ፤ ኣሳቴꬃካ ዞዲሴስ። ቱና ኣያና ኬሴቶ ጋዳ ኔና ካሊዛይታ ታ ኦይቺን ኢስቲካ ዳንዳዪቤቴና” ጊዴስ። ዬሱሲካ ኢስታስ ዛሪዲ “ኢንቴኖ ኣማኖንታ ዬሌታቶ፥ ኣይዴ ጋካናስ ታ ኢንቴናራ ዳኔ? ቃሴ ኣይዴ ጋካናስ ታ ኢንቴና ዳንዳያኔ? ኣኔ ናዛ ሃ ኤሂቴ” ጊዴስ። ኣሳይካ ናዛ ኢዛኮ ኤሂዴስ፥ ቱና ኣያናይ ዬሱሳ ቤዪዳ ማላ ናዛ ሄራካ ጋዴን ጌንዴርሲዲ ኮኮርሲዲኔ ዱናራ ጎፖንቶ ጮፑ ሂስቲዴስ። ዬሱሲ ናዛ ኣዋ “ሃይሲ ሃርጌይ ኢዛ ኣዪዴሳፔ ኦይኪዴ?” ጊዴስ። ናዛ ኣዋይካ “ናቴꬃፌ ዶሚዲ” ጊዴስ። “ኢዛ ዎꬋናስ ኮይዲ ዳሮ ዎዴ ታማንካ ሃꬃንካ ዬጌስ። ኔስ ዳንዳዬቲኮ ኑስ ሚሼታኔ ኑና ማዳ” ጊዴስ። ዬሱሲ ቃሴ “ ‘ኔስ ዳንዳዬቲኮ’ ጋይ? ኣማኒዛዴስ ዉሪካ ዳንዳዬቴስ” ጊዴስ። ናዛ ኣዋይ ሄራካ “ታ ኣማናይስ ሺን ታ ኣማኖይ ላፋ፥ ታና ማዳሪኪ?” ጊዲ ዋሲዴስ። ኣሳይ ዎጫሚሼ ቡሬቲ ኤኪዲ ኢዛኮ ዪዛይሳ ዬሱሲ ቤዪዲ “ሃይሶ ቱሌኔ ዱዴ ኣያናዞ! ሃይሳ ናዛፔ ኬዛ፥ ኔ ቃሴ ሲማዳ ጌሎንታ ማላ ታ ኔና ኣዛዛይስ” ጊዲ ቱና ኣያና ሴሪዴስ። ቱና ኣያናዚካ ኬሂ ዋሲዴስ፤ ናዚካ ኬሂ ቃኬቲዳፔ ጉዬ ናዛፔ ኬዚዴስ። ዳሮቲ ሃይቂዴስ ጋና ጋካናስ ናዚ ኣሃ ሚሳቲዴስ። ጊዶ ኣቲን ዬሱሲ ናዛ ኩሼ ኦይኪ ዴንꬂዴስ። ናዚካ ዴንዲ ኤቂዴስ። ዬሱሲ ሶ ጌሊዳፔ ጉዬ ኢዛ ካሊዛይቲ “ኑ ኢዛፔ ቱና ኣያና ኬሳናስ ኣዛስ ዳንዳዪቤይኮኒ?” ጊዲ ኢዛ ኦይቺዳ። ኢዚካ ኢስታስ “ሃይሳ ማላይ ኬዛና ዳንዳዪዛይ ዎሳኒኔ ፆማን ፃላ” ጊዴስ። ሄፔ ዴንዲ ጋሊላ ባጋራ ኣꬊ ቢዳ። ዬሱሲ ባ ዲዛሶ ኦኒካ ኤራና ማላ ኮይቤና። ጋሶይካ ዬሱሲ ባና ካሊዛይታስ “ኣሳ ናይ ኣሳ ኩሼን ኣꬊ ኢሜታና ኢስቲካ ኢዛ ዎꬋና፥ ሄꬓንꬆ ጋላሳፌ ጉዬ ኢዚ ዴንዳና” ጊዲ ኢስታ ታማርሲዛ ጊሻሳ። ጊዶ ኣቲን ኢዚ ጊዛይሲ ኢስታስ ጌሊቤና፤ ኢዛ ኦይቻናስካ ባቢዳ። ሄሳፌ ጉዬ ቂፊርናሆሜ ቢዳ። ኢዚ ኬꬄ ጌሊዲ “ኢንቴ ዪሼ ኦጌ ቦላ ኣዛ ጊሽ ፓላሜቲዴቲ?” ጊ ኦይቺዴስ። ኢስቲ ቃስ ኦጌ ቦላ “ኑ ጊዶን ኑፔ ኡባፌ ኣꬊዛይ ኦኔ?” ጊዲ ፓላሜቲዳ ጊሽ ዉሪካ ጮዑ ጊዳ። ኢዚ ኡቲዳፔ ጉዬ ታማኔ ናምዓታ ፄይጊዲ “ኮይሮ ጊዳና ኮዪዛዴይ ኡባፌ ዉርሴꬂኔ ኡባታስ ኣሽካራ ጊዶ” ጊዴስ። ቂ ጉꬃ ና ኤሂዲ ኢስታ ጊዶን ኤሲዴስ። ኢዲሚዲኔ “ሃይታ ጉꬃ ናይታፔ ኢሳዴ ታ ሱንꬃን ሞኪ ኤኪዛዴይ ታናካ ሞኪ ኤኬስ። ታና ሞኪ ኤኪዛዴይ ዉሪ ታና ፃላላ ጊዶንታ ታና ኪቲዳይሳካ ሞኪ ኤኬስ” ጊዴስ። ዮሃኒሲካ “ኣስታማሬ! ኢሳዴይ ኔ ሱንꬃን ዳይዳንꬂ ኬሲሺን ኑ ቤይዶስ። ኢዚ ኑና ካሎንታ ጊሽ ኬሶንታ ማላ ዲጊዶስ” ጊዴስ። ዬሱሲ ቃሴ “ዲጎፍቴ፤ ኦኒካ ታ ሱንꬃን ማላታ ኦꬂዲ ኤሶቲዲ ታ ቦላ ኢታ ሃሳያናስ ዳንዳዬና። ኑናራ ኤቄቶንታይ ዉሪ ኑናራ ዴስ። ታ ኢንቴስ ቱሙ ጋይስ፤ ኢንቴ ቲዬቲዳ ኪርስቶሳስ ጊዲዳ ጊሽ ታ ሱንꬃን ኢሲ ዋንጫ ሃꬅ ኢንቴና ኡሺዳዴይ ዉሪ ባ ኦሶይስ ዋጋ ꬋዬና። “ሃይታ ታና ኣማኒዛ ሃ ጉꬃታፔ ኢሳዴስ ꬉጴ ጊዲዛይ ዉሪ ዴፆ ዎፃ ሹቺ ኢዛ ቆꬌን ቃሼቲን ዱጌ ኣባ ጊዶ ኦሌቲዳኮ ኢዛስ ሎዖ ጊዳና። ሄሳ ጊሽ ኔ ኩሼይ ኔና ባሌꬂኮ ኔፔ ቃንፃ ዬጋ፤ ናምዑ ኩሼራ ዳዳ ጌዴ ጋናሜ ታማን ኔ ባናይሳፌ ኩሼ ዱፃ ጊዳዳ ጌዴ ዴዖን ጌሎይ ኔስ ሎዖ ጊዳና። ጋናሜን ጉፁኔይ ሃይቄና፥ ታማይኔ ቶዔና። ኔና ኔ ቶሆይ ባሌꬂኮ ኔፔ ቃንፃ ዲጋ፤ ናምዑ ቶሆራ ዳዳ ጌዴ ጋናሜ ታማን ዬጌታናፔ ኔ ዎቤ ጊዳዳ ጌዴ ዴዖሶ ጌሎይ ኔስ ሎዖ። ጋናሜን ጉፁኔይ ሃይቄና፥ ታማይኔ ቶዔና። ኔና ኔ ኣይፌይ ባሌꬂኮ ዎጫ ኬሳዳ ኔፔ ዲጋ፤ ናምዑ ኣይፌራ ዳዳ ጌዴ ጋናሜን ዬጌታናፔ ኢሲ ኣይፌራ ፆሳ ካዎቴꬅ ጌሎይ ኔስ ሎዖ። ጋናሜን ጉፁኔይ ሃይቄና ታማይኔ ቶዔና። “ቡሮ ኣሲ ዉሪ ታማን ፓጬታና። “ማፂኔይ ሎዖ፤ ጊዶ ኣቲን ማፂኔይ ባ ማፂኔቴꬃ ዬዲኮ ኢንቴ ዎስቲ ኢዛ ማልዖ ኤራኔ? ኢንቴ ኣሳቴꬃን ማፂኔይ ዴዖ። ኢንቴ ኢንቴ ጊዶን ዶሴቲቴ” ጊዴስ። ዬሱሲ ሄፔ ዴንዲዲ ጌዴ ዩሁዳ ጌቴቲዛ ዴሬኔ ዮርዳኖሴ ሻፋፔ ፒንꬃን ዲዛ ዴሬ ቢዴስ። ዴሬይካ ቃሴ ኢዛ ዩዪ ኣꬊን ኢዚ ካሴ ባ ኦꬂዛ ማላ ኣሳ ታማርሲዴስ። ኢሲ ኢሲ ፋርሳዌቲ ኢዛኮ ዪዲ “ኣሲ ባ ማቾ ኣንጂ ዬዳናስ ቤሲዜ?” ጊዲ ኢዛ ፓጬ ኦይሾ ኦይቺዳ። ኢዚካ ኢስታስ “ሙሴይ ኢንቴና ኣይ ጊ ኣዛዚዴ?” ጊዲ ዛሪ ኦይቺዴስ። ኢስቲካ ኢዛስ “ሙሴይ ታ ኢዞ ኣንጃ ዬዳዲስ ጊዛ ዋራቃታ ፃፊ ኢሚዲ ኣንጆ ጊዴስ” ጊዳ። ዬሱሲካ ዛሪዲ ኢስታ “ሙሴይ ሃይሳ ማላ ዎጋ ፃፊዳይሲ ኢንቴ ዎዝናይ ሚኒዳ ጊሻሳ። ጊዶ ኣቲን ኮይሮ ፆሲ ሜꬊሼ ማጫኔ ኣዴ ኦꬂ ሜꬊዴስ። ሄሳ ጊሽ ኣሲ ባ ኣዋኔ ባ ኣዮ ኣጊዲ ባ ማቺራ ዋፄቴስ። ናምዓይ ኢሲ ኣሾ ጊዴቴስ፤ ሄሳ ጊሽ ኢስቲ ናምዓይ ኢሲኖፔ ኣቲን ናምዑ ዴቴና። ሄሳ ጊሽ ፆሲ ጋꬂ ዋፂዳይታ ኣሲ ሻኮፎ።” ጊዴስ። ቃሴካ ኢስቲ ሶ ጌሊን ኢዛ ካሊዛይቲ ሄ ዮዖዛ ጊሽ ዛሪ ኢዛ ኦይቺዳ። ኢዚ ኢስታስ “ኦኒካ ባ ማቾ ኣንጂ ዬዲዲ ሃራ ማጫስ ኤኪኮ ሄ ማጫሳይ ቦላ ላይማ ኦꬄስ። ማጫሳያካ ባ ኣዚና ኣጋዳ ሃራ ኣዴ ጌሊኮ ኢዛካ ላይማታዉስ” ጊዴስ። ዬሱሲ ባ ኩሼ ዎꬃና ማላ ኣሳይ ናይታ ኢዛኮ ኤሂዴስ። ኢዛ ካሊዛይቲ ቃሴ ኤሂዳ ኣሳ ቦላ ሃንቄቲዳ። ዬሱሲ ሄሳ ቤዪ ሃንቄቲዲ “ናይቲ ታኮ ዬቶ፤ ዲጎፍቴ፤ ፆሳ ካዎቴꬂ ሃይታንታ ማላሳ። ታ ኢንቴስ ቱሙ ጋይስ፤ ፆሳ ካዎቴꬅ ሃይሳ ጉꬃ ናይታ ማላ ኤኮንታዴይ ኢዚን ሙሌካ ጌሌና” ጊዴስ። ናይታ ኢዲሚዲ ኢስታ ቦላ ባ ኩሼ ዎꬂዲ ኣንጂዴስ። ሄፔ ቡሮ ኦጌ ኬዚሺን ኢሳዴይ ዎፂሼ ኢዛኮ ጋኪዲኔ ኢዛ ሲንꬃን ጉልባቲዲ “ኪያ ኣስታማሬንቶ! ታኒ ሜርና ዴዖ ዴማና ማላ ኣይ ኦꬃና ታስ ቤሲዜ?” ጊ ኦይቺዴስ። ዬሱሲካ “ኣዛስ ታና ኪያ ጋይ? ኢሲ ፆሳፌ ኣቲን ኪያይ ባ” ጊዴስ። “ኔኒ ኣዛዞታ ኤራይ? ‘ዎꬎፓ፤ ላይማቶፓ፤ ካይሶቶፓ፤ ዎርዶ ማርካቶፋ፤ ኣስ ባሌꬆፋ፤ ኔ ኣዋኔ ኔ ኣዮ ቦንቻ’ ጊዛይታ” ጊዴስ። ኣዴዚካ ዛሪዲ “ኣስታማሬ! ታ ሃይታ ዉርሳ ናቴꬃፌ ኦይካዳ ናጋዲስ” ጊዴስ። ዬሱሲ ኢዛ ፄሊዲኔ ዶሲዲ “ሂስቲኮ ሃዒ ኔስ ኢሲ ሚሺ ፓጬስ። ባዳኔ ኔስ ዲዛ ዉርሳ ባይዛ፥ ሚሻ ማንቆታስ ኢማ፤ ኔኒ ሳሎን ሺቂዳ ሚሽ ዴማንዳሳ፤ ሂስታዳኔ ሃያ ታና ካላ” ጊዴስ። ኣዴዚካ ሄሳ ሲይዲ ዳሮ ዪሎቲዴስ። ኢዛስ ዳሮ ሃሮይ ዲዛ ጊሽ ሙዞቲሼ ቢዴስ። ዬሱሲ ዩሺ ኣꬂ ፄሊዲ ባና ካሊዛይታ “ዱሬታስ ፆሳ ካዎቴꬅ ጌሎይ ኣይ ማላ ዴፆ!” ጊዴስ። ኢዛ ካሊዛይቲካ ኢዛ ሃሳያን ማላሌቲዳ። ዬሱሲ ቃሴ ዛሪዲ “ናይቶ! ፆሳ ካዎቴꬅ ጌሎይ ኣይ ማላ ዴፆ ሚሼ! ዱሬይ ፆሳ ካዎቴꬅ ጌላናይሳፌ ጋሜላይ ናርፔ ሉኮራ ኣꬋናይሲ ካዉያና!” ጊዴስ። ኢዛ ካሊዛይቲካ ዳርሲ ማላሌቲዲ ባ ጊዶን ኢሶይ ኢሳ “ሂስቲን ኦኒ ኣታና ዳንዳዪዜ?” ጊዳ። ዬሱሲ ኢስታ ፄሊዲኔ “ሃይሲ ኣሳስ ዳንዳዬቴና፤ ፆሳ ማታን ጊዲኮ ሄሳ ማላ ጊዴና። ፆሳስ ዉሪካ ዳንዳዬቴስ” ጊዴስ። ጴፅሮሲ ቃሴ “ሄኮ፤ ኑኒ ዉርሲካ ኣጊዲ ኔና ካሊዶስ” ጊዴስ። ዬሱሲካ ዛሪዲ “ታ ኢንቴስ ቱሙ ጋይስ፤ ታ ጊሺኔ ሚሺራቾ ቃላ ጊሽ ጊዲ ባ ኬꬄ፥ ዎይኮ ባ ኢሻታ፥ ዎይኮ ባ ሚቼታ፥ ዎይኮ ባ ኣዮ፥ ዎይኮ ባ ኣዋ፥ ባ ናይታ፥ ዎይኮ ባ ጋዴ ኣጊዳ ኣስ ዉሪ፥ ሃይሳ ሃ ዎዴዛን ሃዒ ጎዴቴꬃራ ኬꬃታ፥ ኢሻታ፥ ሚቼታ፥ ኣዬታ፥ ናይታኔ ጋዴካ ፄቱ ኩሼ ኣꬂ ኤኮንታይኔ ቡሮ ያና ኣላሜዛንካ ሜርና ዴዖ ላቶንታዴይ ዴና። ጊዶ ኣቲን ሲንꬃቲዳ ዳሮቲ ጉዬታና፤ ጉዬቲዳይቲ ሲንꬃታና” ጊዴስ። ኢስቲ ዬሩሳላሜ ኤፊዛ ኦጌ ቦላ ዲሺን ዬሱሲ ኢስታፌ ሲንꬄ ሲንꬄ ቤስ። ኢዛ ካሊዛይቲ ኢዛ ቡሳን ማላሌቲዳ። ሃንኮ ኢዛ ጌዶን ዲዛ ኣሳይ ቃስ ኢዛስ ባቢዴስ። ቃሴካ ታማኔ ናምዓታ ዴሬዛፔ ዱማ ሻኪዲ ባ ቦላ ኣዚ ጋካናኮኔ ኢስታስ ሂዝጊ ዮቲዴስ፤ “ኑኒ ዬሩሳላሜ ኬዛና፤ ኣሳ ናይ ቄሴታ ሃላቃታሲኔ ሙሴ ዎጋ ታማርሲዛይታስ ኣꬊ ኢሜታና፤ ኢስቲካ ኢዛ ቦላ ሃይቆ ፒርዳ ፒርዳናኔ ዴሬ ኣሳስ ኣꬂ ኢማና። ኢዛ ቦላ ቂꬊ ካዓና፤ ኢዛ ቦላ ጩታና፤ ኢዛካ ጋራፋናኔ ዎꬋና ሺን ኢዚ ሄꬑ ጋላሳፌ ጉዬን ሃይቆፔ ዴንዳና።” ቃሴ ዛቢዶሳ ናይቲ ያቆቤይኔ ዮሃኒሲ ኢዛኮ ሺቂዲ “ኣስታማሬ! ኑኒ ኔና ዎሲዳይሳ ኔ ኑስ ዉርሳ ኦꬃና ማላ ኑ ኮዮስ” ጊዳ። ኢዚካ ኢስታስ “ታ ኢንቴስ ኣይ ኦꬃና ማላ ኮዬቲ?” ጊዴስ። ኢስቲካ “ኔኒ ኔ ካዎቴꬃ ቦንቾ ዎዴ ኑፔ ኢሳዴይ ኔ ኡሻቻን ኢሳዴይ ኔ ሃዲርሳን ኡታና ማላ ኑስ ኤሮ ጋርኪ?” ጊዳ። ዬሱሲካ “ኢንቴ ኦይቺዛይሳ ኤሬኬታ። ታኒ ኡያና ኡሻ ኡያናሲኔ ታኒ ፃማቄቲዛ ፂንቃታ ፃማቄታናስ ዳንዳያንዴቲ?” ጊዴስ። ኢስቲካ ዛሪዲ “ኤ፥ ዳንዳዮስ” ጊዳ። ዬሱሲካ “ታ ኡዪዛ ኡሻ ኢንቴ ኡያናኔ ታ ፃማቄቲዛ ፂንቃታ ኢንቴ ፃማቄታና። ጊዶ ኣቲን ታ ኡሻቻራ ዎይኮ ታ ሃዲሪሳራ ኡቴꬂ ፆሲ ኢስታስ ጊጊሲዳይታስ ኣቲን ታ ኢማና ሚሽ ጊዴና” ጊዴስ። ታማቲ ሄሳ ሲይዲ ያቆቤኔ ዮሃኒሳ ቦላ ሃንቄቲዳ። ዬሱሲካ ኢሲ ቦላ ሺሺዲ “ዴሬ ሃላቃ ጌቴቲዛይቲ ዴሬ ሃሪዛይሳ ማላ ኢስታ ሹሜቲ ኢስታ ቦላ ባ ጎዳቴꬅ ቤሲዛይሳ ኢንቴ ኤሬታ። ጊዶ ኣቲን ኢንቴ ጊዶን ጊታ ጊዳና ኮዪዛ ኡባይ ኣሽካራ ጊዶ። ሲንꬄ ኣꬋና ኮዪዛይ ዉሪካ ኡባስ ኣይሌ ጊዶ። ኣሳ ናይ ጊዲኮ ኣሳስ ኦꬃናሲኔ ባ ሼምፖ ዳሮታ ጊሽ ኣꬂ ኢማናስ ዪዴስ ኣቲን ኣሴ ኦሲሳናስ ዪቤና።” ጊዴስ። ሄፔ ጌዴ ያርኮ ቢዳ። ዬሱሲኔ ኢዛ ካሊዛይቲ ሃራ ዳሮ ኣሳታራ ኢያርኮፌ ኬዚሺን ፂሞሳ ና ባርፄሞሳ ጌቴቲዛ ኣይፌ ቆቄይ ኦጌ ቦላ ኡቲዲ ዎሴስ። ኢዚካ ዪዛይ ናዚሬቴ ዬሱሳ ጊዲዳይሳ ሲይዲ “ዳዉቴ ና ዬሱሳ ታና ማራ” ጊዲ ኬሂ ዋሲዴስ። ዳሮቲ ኢዚ ጮዑ ጋና ማላ ሃንቂዳ፤ ጊዶ ኣቲን ኢዚ “ዳዉቴኖ! ታና ማራ” ጊዲ ኬሂ ዋሲዴስ። ዬሱሲካ ኤቂዲ “ኢዛ ሃ ፄይጊቴ” ጊዴስ። ኢስቲካ ቆቄዛ “ኣይኮይ ባ ዴንዳ ኔና ፄይጌስ” ጊዳ። ኢዚካ ባ ማይዖ ቃሪ ዬጊዲ ፑሱኩ ጊ ዴንዲ ኤቂዲ ዬሱሳኮ ዪዴስ። ዬሱሲካ “ታ ኔስ ኣይ ኦꬃና ማላ ኮያይ?” ጊዴስ። ቆቄዚካ “ኣስታማሬንቶ! ታ ፄላናዉ ኮያይስ” ጊዴስ። ዬሱሲካ ዛሪዲ “ባ ኔና ኔ ኣማኖይ ፓꬂዴስ” ጊዴስ። ሄራካ ኢዛ ኣይፌይ ፄሊዴስ። ኢዚካ ዬሱሳ ካሊ ቢዴስ። ኢስቲ ጌዴ ዬሩሳላሜን ዳብራዛይቴ ጌቴቲዛ ዙማ ኣቻን ዲዛ ቤቴፋጌኔ ቢታኒያ ጌቴቲዛሶ ማቲዳ ዎዴ ዬሱሲ ባና ካሊዛይታፔ ናምዓታ ሂዝጊ ኪቲዴስ፥ “ጌዴ ኢንቴ ሲንꬃን ዲዛ ጉታዮ ቢቴ። ኢንቴ ሄ ጌሊዳ ማላ ሄን ኣሲ ቶጊ ኤሮንታ ቃሾን ዲዛ ሃሬ ጉቴ ኢንቴ ዴማና፤ ቢርሺዲ ኢዛ ሃ ኤኪ ዪቴ። ኦኒካ ኢንቴና ‘ሃይሳ ኣይስ ኦꬄቲ?’ ጊኮ ጎዳስ ኮሼስ ጊዲ ዮቲቴ፤ ኢዚካ ኢንቴስ ኤሶን ዛሪ ዬዳና” ጊዴስ። ኢስቲካ ቢዲ ኢሲ ኬꬃ ካሬን ኦጌ ቦላ ቃሼቲ ዲዛ ሃሬ ጉቴ ዴሚዲ ቢርሺዳ። ሄን ኤቂዳ ኢሲ ኢሲ ኣሳቲ “ሃሬ ጉቴዛ ኣዛስ ቢርሼቲ?” ጊ ኦይቺዳ። ዬሱሳ ካሊዛይቲ ዬሱሲ ኢስታስ ጊዳ ማላ ኣሳታስ ዮቲን ኤሮ ኤኪ ቢቴ ጊዳ። ጉቴዛካ ዬሱሳኮ ኤሂዲ ባ ማይዖ ኢዛ ዞኮ ቦላ ዬጊን ዬሱሲ ኢዛ ቶጊዴስ። ዳሮ ኣሳይ ባ ማይዖ ኬሲ ኬሲ ኦጌ ቦላ ሚጪዴስ። ባጋ ኣሳይ ጪሊላ ሚꬃ ሃይꬅ ቃንፂ ቃንፂዲ ኦጌ ቦላ ላሊዴስ። ዬሱሳፔ ሲንꬃራኔ ጉዬራ ዲዛ ኣሳይ ቃላ ꬎቁ ሂስቲዲ “ሆሳና፤ ጎዳ ሱንꬃን ዪዛዴይ ኣንጄቲዳዴ። ሃና ዪዛራ ኑ ኣዋ ዳዉቴ ካዎቴꬃያ ኣንጄቲዳሮ፤ ሆሳና! ቦላ ሳሎን ፆሲ ቦንቼቶ” ጊሼ ዋሲዴስ። ዬሱሲ ዬሩሳላሜ ጋኪዲ ሄሳፌካ ፆሳ ኬꬄ ጌሊዴስ። ሄ ሄራን ዲዛይሳ ዉርሲ ፄሊዲ ጋዴይ ቃሚዳ ጊሽ ታማኔ ናምዓታራ ጌዴ ቢታኒያ ኬዚዴስ። ዎንቴꬃ ጋላስ ኢስቲ ቢታኒያፔ ኬዚ ቢሺን ዬሱሲ ጋፊዴስ። ኢዚ ኢሲ ሃይꬂ ጪሊሊዳ ባላሴ ጌቴቲዛ ሚꬂ ሃሆን ቤዪዲ ኣይፌይ ዳናኮኔ ጊዲ ኢዚኮ ዪዴስ። ጊዶ ኣቲን ባላሴ ሚꬂ ኣይፎንታ ዎዴ ጊዲዳ ጊሽ ሃይꬃፌ ኣቲን ኢሲ ኣይፌካ ኢዚፔ ዴሚቤና። ሄሳ ጊሽ ሚꬃዮ “ሃኒፌ ጉዬ ሜርናስ ኦኒካ ኔፔ ኣይፌ ሞፖ!” ጊዴስ። ኢዛ ካሊዛይቲካ ኢዚ ጊዛይሳ ሲዪዳ። ጌዴ ዬሩሳላሜ ቢዳ፤ ሄፔካ ጌዴ ፆሳ ኬꬄ ጌሊዲ ሄን ባይዚዛይታኔ ሻሚዛይታ ኬሲ ጎዶ ኦይኪዴስ። ሚሼ ላሚዛይታ ፃራጴዛኔ ሃራጴ ባይዚዛይታ ኦይዴ ጉፋንꬂ ጉፋንꬂ ዬጊዴስ። ኦኒካ ኣይ ሚሽ ቶኪዲ ፆሳ ኬꬄ ጊቤ ጊዶራ ኣꬎንታ ማላ ዲጊዴስ። ኢስታካ ታማርሲሼ “ታ ኬꬂ ዴሬ ኡባስ ዎሳ ኬꬄ ጊዳና ጌቴቲ ፃፌቲቤኔ? ጊዶ ኣቲን ኢንቴ ቃሴ ካይሶታ ጎንጎሎ ኬሲዴታ” ጊዴስ። ቄሴታ ሃላቃቲኔ ሙሴ ዎጋ ታማርሲዛይቲ ሄሳ ሲይዲ ኢዛ ዎስቲ ꬋይሳናኮኔ ኦጌ ኮሽ ኦይኪዳ። ጊዶ ኣቲን ዴሬይካ ኢዛ ቲሚርቴዛን ማላሌቲዳ ጊሽ ኢዛስ ባቢዳ። ኢስቲካ ጋዴይ ቃሚን ካታማይፔ ኬዚ ቢዳ። ዎንቴꬃ ጋላስ ማላዶ ኢስቲ ኦጌራ ኣꬊ ቢሺን ባላሴ ሚꬃያ ፃጶፔ ሜሊዳሮ ቤዪዳ። ዮዖዚ ኢዛ ዎዝናን ኣኬኬቲን ጴፅሮሲ ዬሱሳ “ኣስታማሬ! ሄኮ፥ ሃና ኔ ቃንጊዳ ባላሴያ ሜላዱስ” ጊዴስ። ኢዚካ ዛሪዲ “ፆሳ ኣማንቴ። ታ ኢንቴስ ቱሙ ጋይስ፤ ‘ኦኒካ ሃይሳ ዙማዛ ኔ ꬎቃሌታዳ ጌዴ ኣባን ጌላ’ ጊዛኮኔ ሄሳካ ዎዝናን ሲꬎንታ ኣማኒዳኮ ኢዛዴስ ሃናና። ሄሳ ጊሽ ኢንቴ ዎሳን ኦይቺዳዝ ዉርሲ ኤኪዳ ማላ ኣማኒኮ ኢንቴስ ሃናና። ሄሳꬆካ ኢንቴ ዎሳስ ኤቂዛ ዎዴ ኢንቴ ሳሎ ኣዋይ ኢንቴ ናጋራ ኣቶ ጋና ማላ ኢንቴካ ኢንቴና ቆሂዳይታ ናጋራ ዉርሲ ኣቶ ጊቴ። ኢንቴ ኣቶ ጎንታ ኢፂኮ ኢንቴ ሳሎ ኣዋይካ ኢንቴ ናጋራ ኣቶ ጌና።” ጊዴስ። ቃሴካ ዬሩሳላሜ ዪዳ። ዬሱሲ ፆሳ ኬꬄ ካሬ ጊዶን ጌዴኔ ሃኔ ዩዬቲሺን ቄሴታ ሃላቃቲ፥ ሙሴ ዎጋ ታማርሲዛይቲኔ ዴሬ ጪማቲ ኢዛኮ ሺቂዲ፥ “ሃይሳ ኔ ኦꬂዛይ ኣይ ጎዳቴꬃራ? ሃይታ ኔ ኦꬃና ማላ ሃይሳ ማላ ጎዳቴꬅ ኔስ ኦኒ ኢሚዴ?” ጊዳ። ዬሱሲካ ኢስታስ ዛሪዲ “ኣኔ ታካ ኢንቴና ኢሲ ኦይሾ ኦይቻይስ ኢንቴካ ታስ ዛሪኮ ታካ ሃ ዮዖታ ኣይ ጎዳቴꬃራ ኦꬂዛኮኔ ኢንቴስ ዮታና። ዮሃኒሳ ፂንቃቴይ ፆሳፌዬ? ኣሳፔ? ኣኔ ታስ ዛሪቴ” ጊዴስ። ኢስቲካ ባ ጊዶን ኢሶይ ኢሳራ “ኑ ሳሎፔ ጊኮ ኢዚ ኑና ‘ሂስቲን ኣዛስ ኢዛ ኣማኒቤይኬቲ?’ ጋና፤ ‘ኑ ኣሳፔ’ ጊኮ” ዮሃኒሲ ቱሙ ናቤ ጊዲዳይሳ ዴሬይ ዉሪ ኣማኒዛ ጊሽ ሄሳꬆ ጋና ባቢዳ። ሄሳ ጊሽ “ኑ ኤሮኮ” ጊዲ ዬሱሳስ ዛሪዳ። ዬሱሲካ “ሂስቲኮ ታ ሃይታ ኣዛ ጎዳቴꬃራ ኦꬂዛኮኔ ታካ ኢንቴስ ዮቲኬ” ጊዴስ። ቃሴ ኢስታስ ሌሚሶራ ዮቲሼ “ኢሳዴይ ባ ዎይኔ ሚꬅ ቶኪዴስ። ኬላ ዩሺ ኣꬂ ኬሊዴስ፤ ዎይኔ ሚꬃ ኣይፌ ጉምዓና ኦላ ቦኪዴስ። ናጌ ኬꬄካ ኬፂዴስ። ሄሳፌ ጎሻንቻታስ ኪራ ኢሚዲ ሃራ ዴሬ ቢዴስ። ሚꬃይ ኣይፊዛ ዎዴ ዎይኔ ሚꬃ ኣይፌ ኤካዳ ያ ጊዲ ኣሽካራታፔ ኢሳዴ ጎሻንቻታኮ ዬዲዴስ። ጎሻንቻቲ ኣሽካራዛ ኦይኪ ሾጪዲ ጮ ሜላ ኩሼ ዬዲዳ። ናምዓንꬆካ ሃራ ኣሽካራ ዬዲዴስ። ጎሻንቻቲ ሃዒካ ኣሽካራ ኦይኪዲ ኢዛስ ሁዔታራ ቆዒዲኔ ካዉሺዲ ዛሪ ዬዲዳ። ሃዒካ ዛሪዲ ሃራ ኣሽካራ ዬዲዴስ። ሄ ዬዶይሳካ ዎꬊዳ፤ ሃራ ዳሮታ ጊዶፌ ኢሲ ኢሲ ኣሳታ ቆፂዳ፤ ባጋይታ ዎꬊዳ። “ሃዒካ ኪቶንታ ኣቲዛ ሃራይ ዴስ፤ ኢዚካ ኣዋይ ዶሲዛ ኢዛ ናዛ። ‘ታ ናዛ ኢስቲ ቦሳና’ ጊ ቆፒዲ ዉርሴꬃን ባ ናዛ ዬዲዴስ። ጎሻንቻቲ ቃስ ባ ጊዶን ‘ሃይሲ ዋና ኢዛ ላታና ናዛ፤ ሃ ዪቴ ኑ ኢዛ ዎꬊኮ ቢታይ ኑስ ጊዳና’ ጊዳ። ሄሳ ጊሽ ሄን ኦይኪ ዎꬊዲ ዎይኔ ሚꬃያ ዲዛሶፔ ሃራሶ ኬሲ ዬጊዳ። “ሂስቲን ዎይኔ ሚꬃ ጎዳይ ኢንቴስ ኣይ ኦꬃና ሚሳቲዜ? ኢዚ ያና፤ ጎሻንቻታካ ዎꬋና፤ ዎይኔ ሚꬃ ሃራታስ ኢማና። ጌሻ ማፃፋን ‘ሹቻ ኬꬄ ኬፂዛይቲ ሃኔና ጊዲ ዎራ ዬጊዳ ሹቻይ ኬꬃ ማዛኔስ ቦላ ሁዔ ጊዲዴስ፤ ሄሳካ ጎዳይ ኦꬂዴስ። ሄሲካ ኑ ኣይፌስ ማላሊሲዛዝ ጌቴቲዲ ፃፌቲዳይሳ ናቤቢቤኬቲ?’ ” ጊዴስ። *** ኢዚ ኢስታስ ሌሚሶዛ ዮቲዳይ ኢስታ ጊሽ ጊዲዳይሳ ኣይሁዳ ሃላቃቲ ኤሪዳ ጊሽ ኢዛ ኦይካናስ ኮይዳ። ጊዶ ኣቲን ኣሳስ ባቢዳ ጊሽ ኣጊ ቢዳ። ዬሱሳ ዮዖን ቃፃና ማላ ፋርሳዌታፔኔ ሄርዶሳ ባጋታፔ ጉꬃ ኣሳታ ዶሪዲ ኢዛኮ ዬዲዳ። ኢስቲካ ኢዛኮ ዪዲ “ኣስታማሬ! ኔኒ ሞሮይ ባይንዳ ኣስ ጊዲዳይሳ ኑ ኤሮስ፤ ኔ ኦናስካ ባባዳ ዎርዶ ማዳካ፤ ፆሳ ኦጌ ፃላላ ቱሙ ታማርሳሳ። ኦሮሜ ካዎ ቄሳሬስ ጊራ ቃንፃናስ ቤሲዜዬ? ቤሴኔ? ኑ ቃንፂኖዬ? ቃንፆፊኖ?” ዬሱሲ ኢስታ ኦይሾይ ቆꬌፔ ቆሞ ጊዲዳይሳ ኤሪዲ “ኣዛስ ታና ቃፃና ኮዬቲ? ኣኔ ኢሲ ዲናሬ ሃሚቴ ታ ቤያይስ” ጊዴስ። ኢስቲካ ሚሻ ኤሂን “ሃይሲ ኢዛ ቦላ ዲዛ ሚሲሌዚ ኦና ሚሲሌ? ኢዛ ቦላ ፃፌቲዳይሲ ኦና ጊዜ?” ጊዴስ። ኢስቲካ “ቄሳሬይሳኮ” ጊዳ። ዬሱሲካ “ቄሳሬይሳ ቄሳሬስ፥ ፆሳይሳ ፆሳስ ኢሚቴ” ጊዴስ። ኢስቲካ ኢዛ ዛሮን ማላሌቲዳ። ሄሳፌ ጉዬ ሃይቂዳይታስ ሃይቆፔ ዴንꬂ ባዋ ጊዛ ሳዱቃዌቲ ኢዛኮ ዪዲ ኢዛ ሂዝጊ ኦይቺዳ። “ኣስታማሬ! ኢሲ ኣሲ ማቾ ኤኪዲ ና ዬሎንታ ሃይቂኮ ሃይቂዳይሳ ኢሻይ ኢዛ ማቼዮ ኤኪዲ ኢዛስ ላታ ና ዬላና ማላ ካሴ ሙሴይ ኑስ ፃፊዴስ። ጊዶ ኣቲን ላፑን ኢሻንቲ ዴቴስ፤ ኢስታፌ ባይራይ ማቾ ኤኪዲ ና ዬሎንታ ሃይቂዴስ። ካሎዚ ሄ ማጫሳዮ ኤኪዲ ሃዒካ ና ዬሎንታ ሃይቂዴስ፤ ሄꬓንꬆይካ ዬሎንታ ሃይቂዴስ። ላፑናቲካ ሄ ማጫሳዮ ኤኪዲ ላታ ዬሊቤቴና ዉርሴꬃን ማጫሳያካ ሃይቃዱስ። ሂስቲን ላፑናቲካ ኢዞ ኤኪዳሺን ሃይቆፔ ዴንዶይ ዲዛ ጊዲኮ ሃ ማጫሳያ ኢስታፌ ኦና ማቾ ጊዳኔ?” ጊዳ። ዬሱሲካ ኢስታስ “ኢንቴ ባሌቲዛይ ጌሻ ማፃፋታኔ ፆሳ ዎልቃ ኤሮንታ ጊሻሳ። ሃይቂዳይቲ ዴንዲዛ ዎዴ ሳሎ ኪታንቻታ ማላ ጊዳና ኣቲን ኤኬቴቴናኔ ጌሌቴቴና። ሃይቂዳይታ ዴንꬃ ጊሻስ ጊዲኮ ሙሴ ማፃፋን ሄሲካ ቄሪ ዎራ ጊዶን ኤፂዛ ታማ ጊዶፌ ፆሲ ‘ታኒ ኣብራሃሜ ፆሳ፤ ዪሳቃ ፆሳ፤ ያቆቤ ፆሳ’ ጊዛይሳ ናባቢቤኬቲ? ፆሲ ፓፃታ ፆሳ ኣቲን ሃይቄꬃታ ፆሲ ጊዴና። ሄሳ ጊሽ ኢንቴ ዳሮ ባሌቲዴታ” ጊዴስ። ኢስቲ ፓላማን ዲሺን ፃፌታፔ ኢሳዴይ ኢስታ ፓላማ ሲይዲኔ ዬሱሲ ኦይሼቲዳይሳስ ሎዔꬅ ዛሪዳይሳ ኣኬኪዲ “ኤሮ! ኣዛዞታፔ ኡባፌ ኣꬊዛይ ኣዋይሴ?” ጊዲ ኦይቺዴስ። ዬሱሲ ኢዛስ ሂዝጊዴስ “ኡባፌ ኣꬊዛይ ሃይሳ ‘ኢስራዔሌ ሲያ! ጎዳ ፆሲ ኢሲ ጎዳ፥ ኔካ ጎዳ ኔ ፆሳ ኔ ኩሜꬃ ዎዝናፔ፥ ኔ ኩሜꬃ ሼምፖፌ፥ ኔ ኩሜꬃ ቆፋፔ፥ ኔ ኩሜꬃ ዎልቃፌ ዶሳ።’ ናምዓንꬆይካ ‘ኔ ላጌ ኔ ሁዔ ማላ ዶሳ’ ሃ ናምዓታፔ ኣꬊዛ ኣዛዞይ ባዋ።” ፃፌዚካ “ኣስታማሬ፥ ሎዖ ጋዳሳ፥ ‘ፆሲ ኢሲኖ ጊዲዳይሳኔ ኢዛፔ ሃራይ ባይንዳይሳ’ ኔ ዮቲዳይሲ ሊኬ። ኢዛ ኔ ኩሜꬃ ዎዝናፔ ኔ ኩሜꬃ ቆፋፔ ኔ ኩሜꬃ ዎልቃፌ ዶሶይ ቃሴካ ኔ ላጌ ኔ ሁዔ ማላ ዶሶይ ፁጌቲዛ ያርሾፌኔ ሃራ ያርሾ ኡባፌ ኣꬌስ” ጊዴስ። ዬሱሲካ ኣዴዚ ዩሺ ቆፒዲ ዛሪዳይሳ ቤዪዲ “ኔኒ ፆሳ ካዎቴꬃፌ ሃሆን ዳካ” ጊዴስ። ሄሳፌ ጉዬ ኢዛ ኦይቻናስ ፃሊዳዴይ ቤቲቤና። ዬሱሲ ፆሳ ኬꬄ ጋꬃን ታማርሲሼ “ሙሴ ዎጋ ታማርሲዛይቲ ኣዛስ ‘ኪርስቶሳ ዳዉቴ ና’ ጊዞ? ዳዉቴይ ፂሎ ኣያናን ሃሳዪሼ ‘ጎዳይ ታ ጎዳ ኔ ሞርኬታ ታ ኔ ቶሆ ጋርስ ኣꬃና ጋካናስ ታ ኡሻቻን ኡታ ጊዴስ’ ጌስ። ሂስቲን ዳዉቴይ ባ ዱናራ ኢዛ ‘ጎዳ’ ጊኮ ዋኒዲ ሲሚ ኢዛስ ና ጊዳኔ?” ጊዴስ። ዳሮ ዴሬይካ ኢዚ ጊዛይሳ ኡፋይሳራ ሲዪዴስ። ኢዚ ታማርሲሼ “ሙሴ ዎጋ ታማርሲዛይታፔ ናጌቲቴ፥ ጋዴራ ጎሼቲዛ ኣዱሳ ማይዖ ማይዒዲ ዩሽ ዩያና ዶሴቴስ፤ ኣዋንካ ኣꬊ ኣꬊ ኣሲ ኢስታስ ቦንቾ ሳሮታ ኢማና ማላ ኮዬቴስ። ኣይሁዳታ ዎሳ ኬꬃን ꬎቃሶ፥ ጊቢራሶካ ቦንቾሶ ኮዬቴስ። ኢስቲ ኣዚናይ ባይንዳ ማጫሳ ኬꬃ ካሎሴቴስ፤ ቃሴካ ባና ቤሳናስ ኣዱሳ ዎሳ ዎሴቴስ። ሃይታንቲ ኢታ ፒርዳ ፒርዴታና” ጊዴስ። ዬሱሲካ ኣሳይ ሙፁዋታ ዬጊዛሶን ኡቲዲ ዳሮ ኣሳቲ ኢሚዛይሳ ፆሳ ኬꬃ ሚሻ ሺሺዛ ሳፂኔን ዬጊዛይሳ ፄሊዴስ። ዳሮ ዱሬቲ ዳሮ ሚሽ ዬጊዳ። ኢሲ ኣዚናይ ባይንዳ ኣምዔ ዲዛራ ኢሲ ሲኪናፌ ዳሮንታ ፃርቂማላ ቢራታፔ ኦሴቲዳ ናምዑ ሚሽ ዬጋዱስ። ዬሱሲ ባና ካሊዛይታ ፄይጊዲ “ታ ኢንቴስ ቱሙ ጋይስ፤ ሳፂኔዛን ዬጊዳ ኡባፌ ሃና ማንቆ ኣምዔያ ኣꬌꬅ ዬጋዱስ። ሃይቲ ዉሪ ባስ ዲዛ ቲርፓ ሚሻፌ ዬጊዳሺን ሃና ቃሴ ባ ማንቆቴꬃፌ ባስ ዲዛይሳ ሲንꬃፌ ኢዞ ኮሺዛይሳራ ዉርሳ ኢማዱስ” ጊዴስ። ኢዚ ፆሳ ኬꬃፌ ኬዚሺን ኢዛ ካሊዛይታፔ ኢሶይ “ኣስታማሬ! ሃይሲ ኬꬃይኔ ኬꬃይ ኬፄቲዳ ሹቻይ ኣይ ማላ ሎዒዛኮኔ ሃይሳ ቤያይ?” ጊዴስ። ዬሱሲካ ዛሪዲ “ሃይታ ጊታ ኬꬃታ ፄላይ? ሹቻቲ ኢሶይ ኢሳ ቦላ ዲዛ ማላ ዴቴና፤ ዉሪካ ላሌታና” ጊዴስ። ዬሱሲ ፆሳ ኬꬃ ጊናራ ዳብራዛይቴ ዙማ ቦላ ኡቲዲሺን ጴፅሮሲ፥ ያቆቢ፥ ዮሃኒሲኔ ኢንዲራሲ ፃላ ኢዛኮ ሺቂዲ፥ “ሃይሲ ኣይዴ ሃናናኮኔ ኑስ ዮታ። ሃይሲ ዉርሴꬃን ፖሌታናስ ማላታይ ኣዜ?” ጊ ኦይቺዳ። ዬሱሲካ ኢስታስ “ኦኒካ ኢንቴና ባሌꬆንታ ማላ ናጌቲቴ። ቡሮ ዳሮቲ ‘ታ ኪርስቶሳ’ ጊሼ ታ ሱንꬃን ያና፤ ዳሮታካ ባሌꬃና። ኢንቴ ኦላኔ ኦላ ዎሬ ሲዪዛ ዎዴ ዳጋሞፍቴ። ሄሲ ሃናናይሲ ኣቴና። ዉርሴꬂ ጊዲኮ ቡሮና። ዴሬይ ዴሬ ቦላ ካዎይ ካዎ ቦላ ዴንዳና፥ ዳሮሶን ቢታ ቃꬂኔ ኮሻይ ሃናና፤ ሄይቲ ዉሪ ሚፃስ ሌሶ ማላ። “ኢንቴ ኢንቴስ ናጌቲቴ። ቡሮ ኢንቴና ዴሬ ዱላታን ኣꬂ ኢማና። ኢስቲ ኢንቴና ኣይሁዳታ ዎሳ ኬꬃን ጋራፋና። ኢንቴ ታ ማርካታ ጊዳና ማላ ታ ጊሽ ዴሬ ዳናታ ሲንꬃኒኔ ካዎታ ሲንꬃን ኤቃና። ኮይሮቲዲ ሚሺራቾ ቃላይ ዴሬ ኡባስ ሳባኬታና ቤሴስ። ኢንቴ ኦይኬቲዲ ፒርዳስ ሺቂዛ ዎዴ ሂኖ ሄ ሳቴዪን ኢንቴስ ኢሜቲዛሮ ሃሳዪቴ ኣቲን ቢዲ ኑ ኣይ ጊኖ? ጊዲ ካሴቲ ሂርጎፍቴ። ሃሳያናይ ፂሎ ኣያናፔ ኣቲን ኢንቴና ጊዴኬታ። “ኢሻይ ኢሻ፥ ኣዋይ ባ ና ሃይቆስ ኣꬂ ኢማና፤ ናይቲ ባና ዬሊዳይታ ቦላ ማካላናኔ ዎꬋና። ታ ጌዶን ኢንቴ ኣሳ ኡባን ኢፄቲዳይታ ጊዳና። ዉርሴꬅ ጋካናስ ሚኒ ኤቂዳዴይ ጊዲኮ ኣታና። “ኢንቴ ሃራሲዛ ቱናቴꬂ ኢዛስ ቤሶንታሶን ኤቂዳሼ ቤይኮ ናባቢዛዴይ ዎዝናን ዎꬆ፤ ዩሁዳን ዲዛይቲ ፑዴ ዙማ ቦላ ባቃቴቶ። ኬꬃ ካሬን ዲዛዴይ ሶ ጌሎፖ፤ ባ ሚሽ ኬሳና ጊዲ ኬꬄ ጌሎፖ። ጎሻሶን ዲዛዴይ ባ ማይዖ ኤካናስ ጉዬ ሲሞፎ። ሄ ጋላሳታን ሻራ ማጫሳታሲኔ ና ꬋንꬂዛይታስ ኣዬ-ኣና! ሄሲካ ባልጎን ጊዶንታ ማላ ፆሴ ዎሲቴ። ኮይሮ ፆሲ ሜꬌቴꬃ ዉርሲ ሜꬎሶፔ ሃዒ ጋካናስ ዎይኮ ሃይሳፌ ጉዬ ኢዛ ሚሳቲዛይ ባይንዳ ጊታ ሜቶይ ሃናና። ጎዳይ ሄ ጋላሳታ ቃንꬆንታኮ ኦኒካ ኣቴና ሺን ባሲ ዶሬቲዳይታ ጊሽ ሄ ጋላሳታ ቃንꬂዴስ። “ሄ ዎዴ ኦኒካ ሄኮ ኪርስቶሲ ሃይሳን ዴስ፤ ጊኮ ዎይኮ ሄኮ ሄን ዴስ ጊኮ ኣማኖፒቴ። ዎርዶ ኪርስቶሳቲኔ ዎርዶ ናቤቲ ቡሮ ዴንዲዲ ማላታታኔ ካሴ ሃኒ ኤሮንታ ፓላ ሚሽ ኦꬃና። ኢስታስ ዳንዳዬቲኮ ሃራይ ኣቶ ሺን ዶሬቲዳይታካ ባሌꬃና። ሄሳ ጊሽ ናጌቲቴ፤ ሄ ዎዴይ ጋኮንታ ዲሺን ሃራ ሃይሳ ዉርሳ ታ ኢንቴስ ዮታዲስ። “ሄ ዎዴ ሄ ሜቶዛፔ ካሊዲ ኣዋ ኣርሼይ ꬉማና፤ ኣጊናይካ ፖዑሱኩ። ፆሊንቴቲ ሳሎፔ ቆቆፌታና፥ ሳሎን ዲዛ ዎልቃማቲ ቃፃና። ሄ ዎዴ ኣሳ ናይ ጊታ ዎልቃራኔ ቦንቾራ ሳሎ ሻራራ ዪሺን ኣሳይ ኢዛ ቤያና። ኢዚካ ኪታንቻታ ዬዲዲ ኦይዱ ባጋፌ ቢታ ጋፃፔ ጋፃ ጋካናስ ዲዛ ባስ ዶሬቲዳይታ ሺሻና። “ሌሚሶዛ ባላሴ ሚꬃፌ ታማሪቴ። ኡንቁሎይ ጪሊሊዛ ዎዴ ሃይꬂ ኬሲሺን ቦኔይ ማቲዳይሳ ኢንቴ ኤሬታ። ሄሳꬆካ ሃይቲ ታ ጊዳይቲ ፖሌቲሺን ኢንቴ ቤይኮ ዎዴይ ማቲ ዪዲ ፔንጌ ጋኪዳይሳ ኤሪቴ። ታ ኢንቴስ ቱሙ ጋይስ፤ ሃ ዮዖቲ ፖሌታና ጋካናስ ሃይሲ ሃ ዬሌታይ ኣꬌና። ሳሎይኔ ሳዓይ ኣꬋና ሺን ታ ቃላይ ጊዲኮ ኣꬌና። “ቃሴ ሄ ጋላሳይ ጊሽ ዎይኮ ሄ ሳቴይ ጊሽ ታ ኣዋፔ ኣቲን ሳሎ ኪታንቻታ ጊዲንካ ናዛ ጊዲንካ ኦኒካ ኤሬና። ሄሳ ጊሽ ዎዴይ ኣይዴኮኔ ኢንቴ ኤሮንታ ጊሽ ናጌቲቴ፥ ሚኒቴኔ ዎሲቴ። ሄሲካ ባ ኬꬄ ኣሽካራታስ ኣጊዲ ኣሽካራታ ኢሳ ኢሳ ኦሶ ኦይꬂዲ ፔንጌ ናጊዛይሲ ቤጊዲ ናጋና ማላ ኣዛዚዲ ቢዳ ኣሳ ሚሳቴስ። “ሂስቲኮ ኬꬃ ኣዋይ ኣይዴ ያናኮኔ ዎይኮ ቃማ ሌላ ጊዶꬅ ያናኮኔ ዎይኮ ኮይሮ ኩቶይ ባቂሺን ያናኮኔ ዎይኮ ዎንታ ቦላ ባዞይ ዞዒሺን ያናኮ ኢንቴ ኤሮንታ ጊሽ ቤጊዲ ናጊቴ። ኢንቴ ቆፖንታ ዲሺን ኢዚ ዪዲ ኢንቴ ꬊስኪዲሺን ኢንቴና ዴሞፎ። “ታ ኢንቴስ ዮቲዛይሳ ኣሳ ኡባስ ዮታይስ፤ ሚኒዲ ናጊቴ! ጋይስ” ጊዴስ። ፓዚጋኔ ኡኬꬃ ሙሳ ባዓሌ ጋላሳይ ቦንቼታናስ ናምዑ ጋላሲ ኣቲሺን ቄሴታ ሃላቃቲኔ ሙሴ ዎጋ ታማርሲዛይቲ ዬሱሳ ባሌꬂ ኦይኪዲ ዎꬋና ኦጌ ኮይዳ። ጊዶ ኣቲን “ኣሳይ ሜቶ ሜꬎንታ ማላ ባዓሌ ጋላሳታን ጊዶፖ” ጊዳ። ኢዚ ቢታኒያ ጌቴቲዛ ሶን ኢሲ ኢንቺራቻ ሃርጋንቻ ጊዲዳ ሲሞና ሶን ቁማ ቦላ ዲሺን ዋጋይ ዳሮ ኣልዖ ጊዲዳ ናርዶሴ ጌቴቲዛ ሺቶይ ኩሚ ኡቲዳ ኣልባስፂሮሴ ቢልቃፄ ኦይኪዳ ኢሲ ማጫሳያ ቢልቃፄዛ ሜንꬃዳ ሺቶዛ ዬሱሳ ሁዔ ቦላ ጉሳዱስ። ሄን ጋዳን ዲዛ ኣሳታፔ ኢሲ ኢሲ ኣሳቲ “ሃይሲ ሺቶዚ ኣዛስ ዎጋይ ባይንዳ ጉኪዜ?” ጊዲ ባ ጊዶን ሃንቄቲዳ። “ሺቶዚ ባይዞ ባይዚዳኮ ሄꬑ ፄቱ ዲናሬፔ ቦላራ ባይዜቲዲ ማንቆታስ ኢሜቴኔሺን” ጊዲ ማጫሳዮካ ካꬊዳ። ጊዶ ኣቲን ዬሱሲ ኢስታስ “ኣጊቴ! ሃኖ ማጫሳዮ ኣዛስ ዋይሴቲ? ኢዛ ታስ ሎዖ ሚሽ ኦꬃዱስ። ማንቆቲ ኣይ ዎዴካ ኢንቴናራ ዴቴስ። ኢንቴ ኮይዳ ዎዴ ኣይዴካ ኢስታ ማዳናስ ዳንዳዬታ ሺን ታ ጊዲኮ ኡባ ዎዴ ኢንቴናራ ዲኬ። ሃና ባ ኦꬃናስ ዳንዳዪዛሪ ኬና ኦꬃዱስ። ታስ ሞጎስ ጊዳና ማላ ታ ኣሾ ካሴታ ቲያዱስ። ታ ኢንቴስ ቱሙ ጋይስ፤ ሃይሲ ሚሺራቾ ቃላይ ኣላሜ ኩሜꬃን ሳባኬቲዛሶን ኣዋንካ ኢዛ ኦꬂዳይሲ ኢዞ ሃሳዒሲዛዝ ጊዲዲ ሃሳዬታና” ጊዴስ። ሄሳፌ ጉዬ ታማኔ ናምዓታፔ ኢሶይ ኣስቆሮንቶ ዩሁዳይ ዬሱሳ ኣꬂ ኢማናስ ቄሴታ ሃላቃታኮ ቢዴስ። ኢስቲካ ሄሳ ሲይዲ ኡፋዬቲዳ፤ ኢዛስ ሚሼ ኢማናስ ኢዛራ ጊጊዳ። ሄሳ ጊሽ ዬሱሳ ኣꬂ ኢማናስ ኢንጄ ዎዴ ናጊሼ ጋምዒዴስ። ፓዚጋ ዶርሲ ሹኬቲዛ ኡኬꬃ ሙሳ ቦንቺዛ ኮይሮ ጋላስ ዬሱሳ ካሊዛይቲ ዬሱሳኮ ሺቂዲ “ፓዚጋ ካዎ ማናሶ ኣዋን ጊጊሳና ማላ ኮያይ?” ጊ ኦይቺዳ። ኢዚካ ባና ካሊዛይታፔ ናምዓታ “ጌዴ ካታማ ቢቴ፤ ኢንቴ ቢሺን ሃꬄ ኦቶራ ቶኪዳ ኢሳዴይ ኢንቴናራ ጋጋና። ኢዚ ቢዲ ጌሊዛሶ ጋካናስ ኢዛ ካሊቴ። ኬꬃዴዛስ ‘ኣስታማሬይ ኔና ታና ካሊዛይታራ ፓዚጋ ካዎ ማናስ ታስ ጊዲዛ ኢማꬃ ሼምፖሶይ ኣዋይሴ? ጊዴስ’ ጊቴ። ኢዚካ ቦላ ፖቄ ቦላ ዲዛ ጊጊ ኡቲዳ ኣሆ ሶ ኢንቴና ቤሳና፤ ሄን ኢዛን ጊጊሲቴ” ጊ ኪቲዴስ። ኢዛ ካሊዛይቲካ ኬዚዲ ጌዴ ካታማ ቢዳ። ዉሪካ ዬሱሲ ጊዳ ማላ ሃኒ ቤቲዴስ፤ ፓዚጋካ ሄን ጊጊሲዳ። ጋዴይ ቃሚሺን ዬሱሲ ባና ካሊዛ ታማኔ ናምዓታራ ጋኪዴስ። ኢስቲ ማዳን ዲሺን “ታ ኢንቴስ ቱሙ ጋይስ፤ ኢንቴ ጊዶፌ ኢሶይ ኢዚካ ታናራ ኢሲፌ ሚዛይሲ ታና ኣꬂ ኢማና” ጊዴስ። ኢስቲካ ሙዞቲዲ “ታኔሻ? ታኔሻ?” ጊዲ ኢሶይ ኢሶይ ዬሱሳ ኦይቺዳ። ኢዚካ ኢስታስ “ታማኔ ናምዓታፔ ኢሶይ ታናራ ባ ኩሼ ኬሬን ዬዲዛዴ። ካሴ ፃፌቲዳ ማላ ኣሳ ናይ ኢዛ ጊሽ ሃይቃና ሺን ኣሳ ና ኣꬂ ኢሚዛዴስ ኣዬ-ኣና! ሄሳዴይ ካሴ ዬሌቶንታ ኣጊዳኮ ኢዛስ ሎዖኮሺን!” ጊዴስ። ኢስቲ ሚሺን ኡኬꬃ ኤኪ ኣንጂዲኔ ሜንꬂዲ ባና ካሊዛይታስ “ሃይሳ ታ ኣሾ ሄይቴ” ጊ ኢሚዴስ። ኡሻካ ዴንꬂ ጋላቲዲ ኢስታስ ኢሚን ኢስቲ ዉሪካ ኡዪዳ። ቃሴ ዬሱሲ “ሃይሲ ዳሮታ ጊሽ ጉካና ታ ኦራꬃ ጫቆ ሱꬃ። ታ ኢንቴስ ቱሙ ጋይስ፤ ኦራꬃ ዎይኔፔ ጊጊዳ ኡሻ ፆሳ ካዎቴꬃን ታ ኡያና ዎዴ ጋካናስ ናምዓንꬆ ሃይሳ ኡዪኬ” ጊዴስ። ሄሳፌ ጉዬ ማዛሙሬ ኢሲፌ ዬፂዲ ፑዴ ዳብራዛይቴ ዙማ ቦላ ኬዚዳ። ዬሱሲ “ ‘ታ ሄሚዛይሳ ሾጫና ሄ ዎዴ ኢዛ ዶርሳቲ ላሌታና’ ጌቴቲ ፃፌቲዳይሳ ማላ ኢንቴ ዉሪካ ታናን ዱጴታና። ታ ዴንዲዳይሳፌ ጉዬ ጊዲኮ ታ ኢንቴፌ ካሴታዳ ጋሊላ ባና” ጊዴስ። ጴፅሮሲካ “ኣሳይ ዉሪ ꬉጴቲኮካ ታኒ ꬉጴቲኬ!” ጊዴስ። ዬሱሲካ “ታ ኔስ ቱሙ ጋይስ፤ ሃቺ ቃማ ኩቶይ ናምዑቶ ዋሳና ጋካናስ ኔኒ ታና ሄꬑቶ ካዳና” ጊዴስ። ጴፅሮሲ ቃስ “ታ ኔናራ ሃይቂዛኮካ ሙሌካ ኔና ካዲኬ” ጊዲ ኬሂ ሚንꬂ ዮቲዴስ። ሃንኮይቲካ ዉሪ ኢዛይሳꬆ ጊዳ። ሄሳፌ ጉዬ ጌቴሴማኔ ጌቴቲዛሶ ቢዳ ዬሱሲካ ባና ካሊዛይታ “ታኒ ዎሲሺን ኢንቴ ሃይሳን ጋምዒሺቴ” ጊዴስ። ጴፅሮሳ፥ ያቆቤኔ ዮሃኒሳ ባናራ ኤኪ ቢዴስ። ኬሂ ቆፒዴሲኔ ሜቶቲዴስ። ቃሴካ ኢስታስ “ታ ሼምፖያ ዳሮ ሜቶታዱስ ኢንቴ ሃን ዲሺቴ። ꬊስኮንታ ናጊቴ” ጊዴስ። ኢስታ ኣቻፌ ጉꬅ ጌዴ ፖቂዲ ቢታ ቦላ ጉፋኒዲ ሃንኮ ሄ ሳቴያ ኢዛፔ ኣꬋና ማላ ዎሲዴስ። “ታ ኣዋዉ! ኔስ ዉሪ ዳንዳዬቴስ፤ ሃይሳ ዋዬ ፁዓ ታፔ ሃሳ። ጊዲኮካ ኔ ሼኔፔ ኣቲን ታ ሼኔይ ሃኖፖ” ጊዴስ። ኢዚ ሄፔ ሲሚ ዪሺን ኢዛ ካሊዛይቲ ꬊሲኪዳይታ ቤዪዴስ። ጴፅሮሳካ “ሲሞና ꬊስካዲ? ሃራይ ኣቶ ሺን ኢሲ ሳቴካ ሚናዳ ናጎይ ኔና ፆኒዴ? ኢንቴ ፓጬን ጌሎንታ ማላ ቤጊዲ ዎሲቴኔ ሚኒቴ። ኣያናይ ጊጌቲ ኡቲዴስ ሺን ኣሾይ ጊዲኮ ዳቡራንቻ” ጊዴስ። ቃሴካ ቢዲ ኮይሮይሳꬆ ዎሲዴስ። ኢዚ ናምዓንꬆ ሲሚ ዪሺን ኢስታ ኣይፌን ꬊስኮይ ዴፂን ꬊስኪዳይታ ዴሚዴስ ሺን ኢስቲ ኢዛስ ኣይ ዛራናኮኔ ኤሪቤቴና። ሄꬓንꬆ ዪዲ “ሃዒካ ኢንቴ ኢቺዲ ሼምፔቲ? ሃዒ ጊዳና፥ ሳቴያካ ጋካዱስ፤ ሄኮ ኣሳ ናይ ናጋራንቻታ ኩሼን ኣꬊ ኢሜታና። ኣኔ ኤቂቴ ቦስ፤ ታና ኣꬂ ኢማናዴይ ዪዴስ” ጊዴስ። ዬሱሲ ቡሮ ሃሳያን ዲሺን ታማኔ ናምዓታፔ ኢሶይ ዩሁዳይ ዪዴስ። ኢዛራ ኢሲፌ ቄሴ ሃላቃታፔኔ ሙሴ ዎጋ ታማርሲዛይታፔ ኪቴቲዳ ዳሮ ኣሳይ ጊꬃ ማሻኔ ዱርቃ ኦይኪዲ ዪዴስ። ኢዛ ኣꬂ ኢማና ዩሁዳይ ኢስታስ “ኣሳ ጊዶፌ ታ ዬሪዛዴይ ኢዛ ጊዲዳ ጊሻስ ኦይኪዲ ሎዔꬂ ናጊ ኤፊቴ” ጊዲ ካሴቲ ማላታ ኢሚ ዎꬂዴስ። ጋኪዳ ማላ ዩሁዳይ ዬሱሳኮ ሺቂዲ “ኣስታማሬ!” ጊዲ ዬሪዴስ። ኣሳቲካ ዬሱሳ ኦይኪዳ። ኢዛ ኣቻን ኤቂዳ ኢሶይ ማሻ ኮሆፔ ሾዲ ቄሴታ ሃላቃ ኣሽካራ ሃይꬅ ቃንፂዴስ። ዬሱሲካ ኢስታስ “ፓንጋ ማላ ታና ኦይካና ማሻኔ ዱርቃ ኦይኪዲ ዬቲ? ዎንቲን ዎንቲን ፆሳ ኬꬃን ታማርሳሼ ታ ኢንቴናራ ዲሺን ኦይኪቤኬታ ሺን ካሴ ፃፌቲዳይሲ ፖሌታና ማላ ሃይሲ ሃኒዴስ” ጊዴስ። ሄሳ ዎዴ ኢዛ ካሊዛይቲ ዉሪ ኢዛ ዬጊ ኣጊ ቢዳ። ባ ካሎቴꬅ ቄሪ ናፃላን ካሚዳ ኢሲ ናይ ዬሱሳ ካሊሺን ኣሳይ ኢዛ ኦይኪን፥ ናዚ ናፃላ ዬጊዲ ካሎ ኪቺዴስ። ዬሱሳካ ጌዴ ቄሴታ ሃላቃኮ ኤፊዳ። ቄሴታ ሃላቃቲ፥ ዴሬ ጪማቲኔ ሙሴ ዎጋ ታማርሲዛይቲ ሄን ኢሲፌ ዉሪ ሺቂዳ። ጴፅሮሲካ ዬሱሳ ሃሆራ ካሊሼ ቄሴታ ሃላቃ ጊቤ ጋካናስ ቢዴስ። ኢዚ ሄን ኡቲዲ ሃራ ኣሳታራ ታማ ሆዒሺን፥ ቄሴታ ሃላቃቲኔ ዴሬ ጪማቲ ዉሪ ዬሱሳ ዎꬋናስ ማርካታና ኣስ ኮይዳ ሺን ዴማናስ ዳንዳዪቤቴና። ዳሮቲ ኢዛ ቦላ ዎርዶራ ማርካቲኮካ ማርካታ ቃላይ ኦይኬቲቤና። ኢሲ ኢሲ ማርካቲ ዴንዲዲ ዎርዶራ፥ “ሃይሲ ኣዴዚ ‘ታ ኣሳ ኩሼን ኬፄቲዳ ፆሳ ኬꬃ ላላዳ ኣሳ ኩሼይ ቦቾንታዝ ሃራ ፆሳ ኬꬃ ሄꬑ ጋላሳራ ታ ኬፃና’ ጊሺን ኑ ሲዪዶስ” ጊ ማርካቲዳ። ጊዶ ኣቲን ኢስታ ማርካቴꬂ ኢሲ ቦላ ዎꬊቤና። ቄሴታ ሃላቃይካ ኢስታ ሲንꬃን ኤቂዲ “ሃይቲ ኔ ቦላ ማርካቲዛይሲ ኣዜ? ኔ ኣዛስ ዱና ዛሪኪ?” ጊዲ ዬሱሳ ኦይቺዴስ። ጊዶ ኣቲን ዬሱሲ ኢስታስ ኣይኮካ ዛሮንታ ጮዑ ጊዴስ። ቄሴታ ሃላቃይ ቃሴካ “ኣንጄቲዳ ፆሳ ናይ ኪርስቶሲ ኔኔ?” ጊ ኦይቺዴስ። ዬሱሲካ ዛሪዲ “ኤ፤ ታናኮ! ኣሳ ናይ ዎልቃማ ፆሳ ኡሻቻን ኡቲሺኒኔ ሳሎ ሻራራ ዪሺን ኢንቴ ኢዛ ቤያና” ጊዴስ። ቄሴታ ሃላቃይ ባ ማይዖ ዳኪዲ “ኑስ ሃራ ኣዛ ማርካ ኮሺዜ? ኢዚ ጫሻ ቃላ ፆሳ ቦላ ሃሳይሺን ኢንቴ ሲዪዴታ፤ ሃዒች ኢንቴስ ኣይ ሚሳቲዜ?” ጊዴስ። ኢስቲካ “ኢዛስ ሃይቆይ ቤሴስ” ጊዲ ዉሪካ ኢሲ ቃላን ፒርዲዳ። ሄሳ ዎዴ ኢሲ ኢሲ ኣሳቲ ኢዛ ቦላ ጩች ጩቲዳ፤ ኢዛ ኣይፌ ጎዚ ኦይኪዲ ኢጪሼ “ኣኔ ቲንቢቴ ዮታ” ጊዳ። ባጋይቲ ቃሴ ሻጋላን ባቂሼ ኤፊዳ። ጴፅሮሲ ዱጌ ባጋራ ሄን ጊቤ ጊዶን ዲሺን ቄሴታ ሃላቃ ጋራዴታፔ ኢሲኒያ ያዱስ። ጴፅሮሲ ታማ ሆዒሺን ቲሺ ሂስታ ፄላዳ “ኔኒ ናዚሬቴ ዬሱሳራ ዳሳ ጊዲኪ?” ጋዱስ። ኢዚ ቃስ “ኔ ጊዛይሳዴ ታ ኤሪኬ፤ ኔ ጊዝይሲ ታስ ጌሌና” ጊዲ ካዲዴስ። ሄሳፌ ጌዴ ፔንጌ ፖቂ ኤቂ ዲሺን ሄራካ ኩቶይ ዋሲዴስ። ሄ ጋራዴያ ኢዛ ቤዪዳ ማላ ሄን ኤቂዳ ኣሳታስ “ሃይሲ ኣዴዚ ኢዛራ ዲዛ ኣሳታፔ ኢሳዴኮ!” ጋዳ ቃሴካ ሃሳያዱስ። ኢዚ ቃሴካ ካዲዴስ። ጉꬃ ዎዴ ጋምዒሺን ሄን ኤቂዳ ኣሳቲ ጴፅሮሳ “ኔኒ ጋሊላ ኣሳ፥ ሄሳ ጊሽ ቱማፔ ኔ ኢስታፌ ኢሳዴ” ጊዳ። ጊዶ ኣቲን ኢዚ ቃስ “ኢንቴ ጊዛዴ ታ ኤሪኬ!” ጊሼ ጫቆኔ ባና ቃንጌꬅ ኦይኪዴስ። ሄራካ ኩቶይ ናምዓንꬆ ዋሲዴስ። ጴፅሮሲካ “ኩቶይ ናምዓ ዋሳናስ ኔ ታና ሄꬓ ካዳና” ጊዳ ዬሱሳ ቃላይ ኢዛስ ቆፌቲን ሂቂሚዲ ዬኪዴስ። ማላዶ ዎንታራ ቄሴታ ሃላቃቲ፥ ዴሬ ጪማቲኔ ሙሴ ዎጋ ታማርሲዛይቲ ኩሜꬃ ሻንጎ ኣላፌታራ ኢሲፌ ዞሬቲዲ ዬሱሳ ቃቺ ኤኪ ኤፊዲ ጲላፆሳስ ኣꬂ ኢሚዳ። ጲላፆሲካ ዬሱሳ “ኔ ኣይሁዳታ ካዎ?” ጊ ኦይቺዴስ። ዬሱሲካ “ኤ፥ ኔ ጊዳ ማላ” ጊዲ ኢዛስ ዛሪዴስ። ቄሴታ ሃላቃቲካ ዳሮ ዮዖ ኢዛ ቦላ ሺሺ ሞቲዳ። ጲላፆሲ ቃስ “ኔ ኣዛስ ኦይሻ ዛሪኪ? ሄኮ ኔና ዳሮ ዮዖን ሞቴቴስ” ጊዲ ቃሴካ ኦይቺዴስ። ጊዶ ኣቲን ዬሱሲ ሃዒካ ኢዛስ ኣይኮካ ዛሮ ኢሞንታ ጊሽ ጲላፆሲካ ማላሌቲዴስ። ፓዚጋ ባዓሌ ጋላስ ጲላፆሲ ዴሬይ ቢርሻና ማላ ኦይቺዳዴ ቢርሺ ዬዲዛ ዎጋይ ካሴ ዴስ። ኢታ ኦሶን ዴሬ ቦላ ዴንዲዲ ሼምፖ ዎꬊዳ ኣሳታራ ኢሲፌ ቃሼቲዳ ባርባኔ ጌቴቲዛ ኢሳዴይ ዴስ። ዴሬይካ ዪዲ ካሴ ሎሴ ጊዲዳይሳ ኢዚ ኦꬃና ማላ ጲላፆሳ ዎሲዴስ። ጲላፆሲካ ኢስታስ “ታ ኢንቴስ ኣይሁዳ ካዎ ቢርሻና ማላ ኮዬቲ?” ጊ ኦይቺዴስ። ጲላፆሲ ሄሳꬆ ኦይቺዳይ ካሴ ቄሴታ ሃላቃቲ ዬሱሳ ቃናቴን ኣꬂ ኢሚዳይሳ ኤሪዛ ጊሻሳ። ቄሴታ ሃላቃቲ ቃስ “ኢዛ ኤፃ ባርባኔይ ቢርሼቶ!” ጊ ኦይቻና ማላ ዴሬዛ ዴንꬄꬂዳ። ጲላፆሲ “ሂስቲኮ ኢንቴ ኣይሁዳ ካዎ ጊዛ ኣዴዛ ዎስታና ማላ ኮዬቲ” ጊዴስ። ኢስቲ ቃሴካ “ካቃ! ካቃ!” ጊ ዋሲዳ። ጲላፆሲካ “ኣይ ኢታ ኦꬂዴ?” ጊ ኢስታ ኦይቺዴስ። ኢስቲ ቃስ “ካቃ! ካቃ!” ጊዲ ካሴፔ ኣꬂ ዋሲዳ። ጲላፆሲካ ዴሬዛ ኡፋይሳና ጊዲ ባርባኔ ኢስታስ ቢርሺዴስ። ዬሱሳ ጋራፊዲ ካቃናስ ኣꬂ ኢሚዴስ። ዎታዳራቲ ዬሱሳ ዴሬ ሃሪዛይሳ ጊቤ ኤኪ ቢዲ ኣቲዳ ዎታዳራታ ዉርሲ ሺሺዳ። ዬሱሳ ዞዖ ማይዖ ማይዚዳ፤ ኣጉንꬃ ኣክሊሌ ፃፂዲ ኢዛ ሁዔን ዎꬂዳ። ሄሳፌካ “ኣይሁዳ ካዎ ሳሮይ ኔስ ጊዶ!” ጊሼ ኢዛ ሳሮꬂዳ። ኢዛ ሁዔ ጉፌራ ሾጪዳ፤ ኢዛ ቦላካ ጩቲዳ ጉልባቲዲ ኢዛስ ጎይኒዳ። ኢዛ ቦላ ቂꬊ ካዒዳፔ ጉዬ ካሴ ማይዚዳ ዞዖ ማይዖዛ ቃሪ ኤኪዲ ካሴ ኢዛ ማይዖዛ ዛሪ ማይዚዲ ካቃናሶ ኤኪ ቢዳ። ኣላኪሳንድሮሳኔ ሩፎሳ ኣዋ ሲሞና ጌቴቲዛ ኢሲ ቃሬና ዴሬ ኣሲ ዴሬፔ ካታማ ዪዛይሳ ዬሱሳ ማስቃሌ ዎልቃራ ኦይኪ ቶሲዳ። ሄሳፌ ጉዬ ዬሱሳ ጎልጎታ ጌቴቲዛሶ ኤፊዳ፤ ኢዛስ ቢርሼꬃይ “ኣሳ ሁዔ ጉጌ” ጉሳ። ካርቤ ጌቴቲዛ ጫሞራ ዋላኬቲዳ ዎይኔ ጫጄ ኡያና ማላ ኢዛስ ኢሚን ኢዚ ኤኮንታ ኢፂዴስ። ሄሳፌ ጉዬ ኢዛ ካቂዳ፥ ኢዛ ማይዖ ኢሳዴ ኢሳዴ ኣዋይሲ ጋካናኮኔ ጊዲ ሳማ ዬጊዲ ጊሼቲዳ። ኢስቲ ኢዛ ካቂሺን ዎንታፌ ሄꬑ ሳቴ ጊዲዴስ። ኢስቲ ማስቃሌ ቦላ ፃፊ ሺሺዳ ሞቶ ቃላይ “ኣይሁዳ ካዎ” ጊዛ ቃላ። ኢዛራ ኢሲፌ ናምዑ ፓንጋታ ኢሳ ኢዛፔ ኡሻቻራ ኢሳ ሃዲርሳራ ካቂዳ። ሄሳንካ ካሴ ማፃፋይ “ኢታታራ ኢሲፌ ታይቤቲዴስ” ጊዳ ቲንቢቴ ቃላይ ፖሌቲዴስ። ኦጌራ ኣꬊ ቢዛይቲካ ባ ሁዔ ቃꬂሼ “ኦይ! ኦይ! ፆሳ ኬꬃ ላላዳ ሄꬑ ጋላሳን ኬፃናይ ኔኔ?” ጊዲ ኢታ ጫሼ ጫዪሼ፤ “ኣኔ ሃዒ ማስቃሌ ቦላፌ ዎꬋዳ ኔና ኣሻ” ጊዳ። ሄሳꬆካ ቄሴታ ሃላቃቲኔ ሙሴ ዎጋ ታማርሲዛይቲ ባ ጊዶን ኢሶይ ኢሳስ “ሃራታ ኣሺዴስ ሺን ባና ኣሻና ዳንዳይቤና” ጊዲ ኢዛ ቂꬊዳ። “ኑ ኢዛ ቤዪዲ ኣማናና ማላ ኣኔ ሃይሲ ኪርስቶሲ ኢስራዔሌታ ካዎይ ሃዒ ማስቃሌፔ ዎꬎ” ጊዳ። ኢዛራ ካቄቲዳይቲካ ኢዛ ቦላ ጫሼ ኮሪዳ። ኡሱፑን ሳቴፔ ኦይኪዲ ኡዱፉን ሳቴ ጋካናስ ቢታይ ዉሪ ꬉሚዴስ። ኡዱፉን ሳቴ ቦላ ዬሱሲ “ኤሎሄ! ኤሎሄ! ላማ ሳባቂታኔ” ጊዲ ቃላ ꬎቁ ሂስቲዲ ዋሲዴስ። ሄሳስ ቢርሼꬃይ “ታ ፆሶ! ታ ፆሶ! ኔ ታና ኣዛስ ኣጋዲ?” ጉሳ። ሄን ጋዳን ኤቂዳ ኣሳፔ ኢሲ ኢሲ ኣሳቲ ሄሳ ሲይዲ “ኤላሳ ፄይጌስኮ” ጊዳ። ሄሳፌ ኢሲ ኣሲ ኤሌሊ ቢዲ ጫሊዳ ዎይኔ ጫጄ ኢስፖንጄ ማላ ሚሻን ጌልꬂ ኬሲዲ ሚꬃ ፄራን ኦይꬂዲ ኡያና ማላ ዬሱሳስ ሺሺዴስ። ሄሳፌ ቃሴ “ኣኔ ኣጋጊቴ፤ ኤላሲ ዪዲ ኢዛ ካቆፔ ዎꬂሺን ኑ ቤያና” ጊዴስ። ሄሳፌ ዬሱሲ ቃላ ꬎቁ ሂስቲ ዋሲዲ ሼምፖ ኬዚዴስ። ፆሳ ኬꬄ ማጋላሻይ ሁዔራ ዱጌ ናምዑ ኬዚ ዳኬቲዴስ። ዬሱሳ ጊናራ ኤቂዳ ኢሲ ማቶ ሃላቃይ ዬሱሲ ሄሳꬆ ጊታ ቃላራ ዋሲዲ ሼምፖ ኬዚሺን ቤዪዲ “ሃይሳዴይ ቱሙ ፆሳ ናኮሺን” ጊዴስ። ሄሳ ዎዴ ማጫሳቲ ሃኒዛይሳ ሃሆን ዲዲ ፄሊዳ። ኢስታ ጊዶፌ ማግዳሌፔ ዪዳ ማራማኔ ካሎቲዛ ያቆቤኔ ዮሳ ኣዮ ማራሚራ ቃሴካ ሳሎሚራ ኢሲፌ ዴቴስ። ሄይቲ ማጫሳቲ ጋሊላን ዬሱሳ ካሊሼኔ ኢዛስ ኦꬂሼ ጋምዒዳይታ። ኢስታራካ ኢሲፌ ሃራ ዳሮ ማጫሳቲ ዬሩሳላሜ ቢዳ። ጋዴይ ቃሚ ቃሚ ቢሺን ሳምባታስ ጊጌቲዛ ጋላሲ ጋኪዴስ። ዴሬ ጪማታ ጊዶን ቦንቼቲዳ ኢሲ ኣርማቲያሳ ዴሬ ኣስ ዮሴፌ ጌቴቲዛይሲ ፆሳ ካዎቴꬅ ናጊሼ ዲዛዴይ ባቦንታ ጲላፆሳኮ ቢዲ ዬሱሳ ኣሃ ዎሲዴስ። ጲላፆሲካ ኢዚ ሂኒ ዎዴ ኤሌራ ሃይቂዳይሳ ሲይዲ ማላሌቲዴስ። ማቶ ሃላቃ ፄይጊስዲ “ኢዚ ሃይቂ ጋምዒዴ?” ጊዲ ኦይቺዴስ። ኢዚ ሃይቂዳይሳ ማቶ ሃላቃይ ጌሺ ኤሪዳፔ ጉዬ ዬሱሳ ኣሃ ዮሴፌስ ኢሚዴስ። ዮሴፌካ ሞጎ ማይዖ ሻሚዲ ኣሃ ማስቃሌፔ ዎꬂዲ ሞጎ ማይዖን ፃፂዲ ሹቻፌ ዎጬቲዳ ዱፎን ሞጊዴስ። ዱፋ ዱና ሹቻራ ጎርዲዴስ። ማግዳሌፔ ዪዳ ማራሚራኔ ዮሴፌ ኣዮ ማራሚራ ዬሱሳ ኣሃ ኣዋን ሞጊዳኮኔ ቤዪዳ። ሳምባታይ ኣꬊዳፔ ጉዬ ማግዳሌ ማራማ፥ ያቆቤ ኣዮ ማራሚራኔ ሳሎሚራ ኢሲፌ ቢዲ ዬሱሳ ኣሃ ቲያናስ ሺቶ ሻሚዳ። ሳሚንታፌ ኮይሮ ጋላስ ማላዶ ዎንታራ ቡሮ ኣዋ ኣርሼይ ኬዚዳ ማላ ዬሱሳ ዱፎኮ ቡሮ ቢሺን፥ “ዱፎዛ ዱናፔ ሹቻ ኑስ ኦኒ ጌንዴርሳኔ?” ጊዲ ባ ጊዶን ሃሳዬቲዳ። ኢስቲ ꬎቁ ጊ ፄሊሺን ዳሮ ጊታ ሹቻይ ዱፎዛ ዱናፔ ጌንዴሪዳይሳ ቤዪዳ። ጌዴ ዱፎዛ ጊዶ ጌሊዳ ማላ ኢሲ ቦꬃ ማይዖ ማይዒዳ ፓንꬂ ኡሻቻ ባጋራ ኡቲዳይሳ ቤዪዲ ዳጋሚዳ። ኢዚ ቃስ ኢስታስ “ዳጋሞፍቴ! ኢንቴ ካቄቲዳ ናዚሬቴ ዬሱሳ ኮዬታ፤ ኢዚ ዴንዲዴስ ሃን ዴና፥ ኢስቲ ኢዛ ዎꬂዳሶ ሃይሳ ቤይቴ። ጊዶ ኣቲን ኢንቴ ቢዲ ኢዛ ካሊዛይታሲኔ ጴፅሮሳስ ካሴ ኢንቴስ ዮቲዳ ማላ ኢንቴፌ ካሴቲዲ ኢዚ ጋሊላ ባና። ኢንቴ ኢዛ ሄን ዴማና ጊዲ ኢስታስ ዮቲቴ” ጊዴስ። ማጫሳቲካ ማላሌቲሼኔ ኮኮርሼ ዱፋፔ ኬዚ ባቃቲዳ። ባቢዳ ጊሽ ኦናስካ ኣይኮካ ቃቲቤቴና። ሳሚንታፌ ኮይሮ ጋላስ ዎጋ ዎንታ ማላዶራ ኢዚ ሃይቆፔ ዴንዲዳፔ ጉዬ ዬሱሲ ኢዚፔ ላፑን ዳይዳንꬂ ኬሲዳ ማግዳሌ ማራሚስ ኮይሮ ቤቲዴስ። ኢዛካ ባዳ ካሴ ኢዛራ ዲዛይቲ ካዮቲሼኔ ዬኪሼ ዲሺን ዴማዳ ዮታዱስ። ኢስቲ ዬሱሲ ፓፃ ዲዛይሳኔ ኢዛ ታ ዬሱሳ ቤያዲስ ጊዳይሳ ሲይዲ ኣማንቤቴና። ሄሳፌ ጉዬ ኢዛ ካሊዛይታፔ ናምዓቲ ጌዴ ዴሬ ጋርስ ቢሺን ዬሱሲ ኢስታስ ሃራ ኣስ ሚሳቲ ቤቲዴስ። ኢስቲካ ሲሚዲ ሄሳ ኢዛ ካሊዛይታፔ ኣቲዳይታስ ዮቲዳ። ጊዶ ኣቲን ኢዛ ካሊዛይቲ ሲይዲ ኣማንቤቴና። ሄሳፌ ጉዬ ታማኔ ኢሲኔቲ ማዳ ቦላ ዲሺን ዬሱሲ ኢስታስ ቆንጪዴስ። ኢዚ ሃይቆፔ ዴንዲን ኢዛ ቤዪዳ ኣሳቲ ኢስታስ ዮቲን ሲይዲ ኣማኖንታ ኣጊዳ ጊሽ ኢስታስ ኣማኖይ ባይንዳይሳኔ ኢስታ ዎዝና ሙሜቴꬃ ጊሽ ኢስታ ቦሪዴስ። ኢስታሲካ “ኣላሜ ኡባሶ ቢቴ፥ ሚሺራቾ ቃላ ሜꬌቴꬃ ኡባስ ሳባኪቴ። ኣማንዳይኔ ፃማቄቲዳይ ኣታና። ኣማኖንታይ ጊዲኮ ፒርዴታና። ታና ኣማኒዛይታ ሃይቲ ማላታቲ ካላና። ኢስቲ ታ ሱንꬃን ዳይዳንꬃታ ኬሳና፥ ኦራꬃ ቃላንካ ሃሳያና። ኢስቲ ሾሻታ ባ ኩሼራ ኦይካና፤ ዎꬊዛ ማርዜ ኡዪኮካ ኢስታ ቆሄና። ባ ኩሼ ሃርጋንቻታ ቦላ ዎꬂ ዎሲኮ ሃርጋንቻቲ ፓፃና” ጊዴስ። ጎዳ ዬሱሲ ሄሳ ዮቲዳፔ ጉዬ ፑዴ ሳሎ ዴንዲ ቢዲ ፆሳ ኡሻቻን ኡቲዴስ። ኢዛ ካሊዛይቲ ሄሳፌ ኬዚዲ ኡባሶን ኣꬊ ኣꬊ ሳባኪዳ። ጎዳይካ ኢስታራ ኦꬂዴስ። ኢስታ ቲሚርቴዛ ኤኪዲ ኦꬂዛይታስ ባ ዮቲዳ ቃላካ ማላታ ኦꬂ ኦꬂ ሚንꬂዴስ። ቦንቾ ቶፊሎሳ ኑ ኣቻን ሃኒዳ ዮዖታ ጊሽ ዳሮ ኣሳቲ ባሲ ሃኒዳ ማላ ፃፊዳ። ሄ ታሪኬዚካ ኮይሮፔ ዴንꬂዲ ባ ኣይፌራ ቤዪዳ ማርካቲኔ ፆሳ ቃላ ዮቲዳይቲ ኑስ ኣꬂዳይሳ። ታካ ታ ባጋራ ፃጶፔ ዴንꬃዳ ኬሃ ናጌታዳኔ ፓጫ ፄላዳ ታሪኬዛ ዉርሳ ሲንꬄ ፃፌታናስ ቤሲዛይሳ ሲንꬃሳዳ ካሊዲ ፃፌታናስ ቤሲዛይሳ ካሌꬃዳ ናጌታዳ ኔስ ፃፋና ማላ ታስ ሎዖ ጊዲ ቤቲዴስ። ሃይሳ ዉርሲሳ ታ ኦꬂዛይ ኔ ታማሪዳይሲ ቱማ ጊዲዳይሳ ኔና ኤሮ ጉሳሳ። ሄርዶሲ ዩሁዳ ቢታን ካዎቲዳ ዎዴ ኣቢያ ጌቴቲዛ ቄሴታ ሃላቃ ባጋፌ ቄሴቴꬃ ኦሶ ታራይ ኢዛ ጋኪዳ ዛካራሳ ጌቴቲዛ ኢሲ ቄሴይ ዴስ። ኢዛ ማቼያካ ኤሊሳቤፆ ጌቴታዉስ፥ ኢዛካ ኣሮኔ ባጋ ኣሳ። ናምዓቲካ ጎዳ ኣዛዞኔ ኢዛ ዎጋ ዎሶይ ባይንዳ ናጊዲ ዲዛይታኔ ፆሳ ሲንꬃን ፂሎ ኣሳ። *** ጊዶ ኣቲን ኤሊሳቤፃ ና ዬሎንታ ማካራ ጊዲዳ ጊሽ ኢስታስ ናይ ባዋ፤ ናምዓቲካ ዎዴይ ሱጌቲዳ ኣሳ። ዛካራሲ ፆሳ ሲንꬃን ቄሴቴꬃ ኦሶ ታራይ ኢዛ ጋኪን ኢዚ ኦꬂሺን ቄሴታስ ዲዛ ዎጋ ማላ ፆሳ ኬꬃን ጌሊዲ ኤፃኔ ጩዋሳና ማላ ኤፃይ ኢዛ ጋኪዴስ። ኤፃኔይ ጩዋቲሺን ኣሳይ ዉሪካ ካሬን ዲዲ ዎሴስ። ጎዳ ኪታንቻይ ኤፃኔይ ጩዋቲዛ ሶፔ ኡሻቻ ባጋራ ኤቂዲ ዛካራሳስ ቤቲዴስ። ዛካራሲካ ኢዛ ቤዪዲ ኬሂ ዳጋሚዲ ባቢዴስ። ኪታንቻይ ዛካራሳስ “ባቦፋ! ኔ ዎሳይ ሴቴቲዴስ፥ ኔ ማቼያ ኤሊሳቤፃ ኔስ ኣቱማ ና ዬላና ኢዛ ሱንꬃካ ኔ ዮሃኒሳ ጋዳ ሱንꬃና። ኢዛ ዬሌታን ኔኒ ዳሮ ኡፋዬታና፤ ዳሮ ኣሳይካ ኡፋዬታና። ጎዳ ሲንꬃን ኢዚ ጊታ ጊዳና። ዎይኔፔ ኦሴቲዳ ጫጄ ጊዲንካ ሃራ ማꬆሲዛ ኡሻ ጊዲንካ ኢዚ ኡዬና፤ ኢዚ ቡሮ ባ ኣዬይ ቃንꬃን ዲሼ ፂሎ ኣያናን ኩማና። ኢስራዔሌ ኣሳፔ ዳሮታ ኢስታ ፆሳኮ ዛራና። ኣዋታ ዎዝና ኢስታ ናይታኮ፥ ኣዛዜቶንታይቲካ ጌዴ ፂሎታ ጪንጫቴꬃኮ ዛራና ማላኔ ጎዳስ ቤሲዛ ዴሬ ጊጊሳና ማላ ኤላሳ ኣያናኔ ኢዛ ዎልቃን ጎዳፔ ሲንꬃራ ኢዚ ባና” ጊዴስ። ዛካራሲ ኪታንቻስ፥ “ታኒ ጪማ፤ ታ ማቼያካ ጪማዱስ፤ ታኒ ሃይሳ ኣዛን ኤራኔ?” ጊዲ ኦይቺዴስ። ኪታንቻይካ ዛሪዲ “ታኒ ፆሳ ሲንꬃን ኤቂዛ ጋብሬሌ። ታኒካ ሃ ሚሺራቾዛ ኔስ ጋꬃናስ ኪቴታዳ ያዲስ። ሄኮ ኔኒ ባ ዎዴን ፖሌታና ታ ቃላ ኣማኖንታ ኢፂዳ ጊሽ ኔ ዱናይ ዱዳና፥ ኔኒካ ሃሳያና ዳንዳያካ” ጊዴስ። ሄ ዎዴ ዴሬይ ዛካራሲ “ፆሳ ኬꬃፌ ኬዞንታ ኣዛስ ጋምዒዳኮ” ጊዲ ሞꬌቲሼ ናጊዴስ። ኢዚ ፆሳ ኬꬃፌ ኬዚዲ ኣሳ ሃሳዪሳናስ ዳንዳይቤና። ማላቲ ማላቲ ቤሶፔ ኣቲን ሃሳያናስ ዳንዳዮንታ ኣጊን ኣሳይ ኢዚ ፆሳ ኬꬃን ፆሳፌ ኦራꬃ ሚሽ ቤዪዳይሳ ኤሪዴስ። ዛካራሲካ ባ ኦሶ ታራይ ፖሌቲዳፔ ጉዬን ባሶ ሲሚዴስ። ሄሳፌ ካሊን ኢዛ ማቼያ ኤሊሳቤፃ ና ቃንꬃታዱስ፥ ኢቻሻንꬆ ኣጊናይ ጋካናስ ኣሲ ባና ቤዮንታ ማላ ቆቴታዱስ። ኢዛካ ጎዳይ ባ ማሮታን ታ ሌቄቲዳይሳ ኣሳ ጊዶፌ ዲጋናስ ሃ ዎዴዛን ሃይሳ ታስ ኦꬂዴስ ጋዱስ። ኤልሳቤፃ ቃንꬃቲዳ ኡሱፑንꬃ ኣጊናን፥ ፆሲ ባ ኪታንቻ ጋብሬሌ፥ ጋሊላ ቢታን ዲዛ፥ ናዚሬቴ ጊዛ ካታማ ዬዲዴስ። ኢዚካ ካዎ ዳዉቴ ዜሬꬅ ጊዲዳ ዮሴፌ ጌቴቲዛ ኣሳስ ጊጋ ኡቲዳ ማራሞ ጌቴቲዛ ጌላዖይኮ ኪቴቲዴስ። ዪዲኔ ኢዛ ዲዛሶ ጌሊዲ “ሃኔ ፆሲ ኔና ኣንጂዳሬ ሳሮ ፆሲ ጎዳይ ኔናራ ዴስ ኔንካ ኣንጄቲዳሮ” ጊዴስ። ማራማ ኪታንቻ ሃሳያን ኬሃ ዳጋማዳ፥ “ሃይሲ ኣይ ጊዛ ሳሮታ?” ጋዳ ዮዖዛ ኬሃ ቆፓዱስ። ኪታንቻይካ ማራሞ “ፆሲ ኔናን ኡፋዬቲዛ ጊሽ ባቦፋ! ኔኒ ቃንꬃታና፤ ኣቱማ ናካ ዬላና፥ ሱንꬃካ ዬሱሳ ጋዳ ሱንꬃና፤ ኢዚካ ጊታ ጊዳና፤ ኡባፌ ቦላ ፆሳ ና ጌቴታና፥ ጎዳ ፆሲ ኢዛ ኣዋ ዳዉቴ ካዎቴꬃ ኢዛስ ኢማና። ኢዚ ኢስራዔሌ ናይታ ቦላን ሜርናስ ካዎታና፤ ኢዛ ካዎቴꬃሲካ ዉርሴꬂ ዴና” ጊዴስ። ማራማካ ኪታንቻስ “ታኒ ኣዴ ጌላቤኬ፥ ሺን ሃይሲ ዋኒ ሃናኔ?” ጋዳ ኦይቻዱስ። ኪታንቻይካ ማራሚሲ “ፂሎ ኣያናይ ኔ ቦላ ዎꬋና ዉርሶፌ ቦላ ፆሳ ዎልቃይ ኔ ቦላ ኩዋሳና፤ ሄሳ ጊሽ ዬሌታና ናዚ ጌሻ ፆሳ ና ጌቴታና። ኣሲ ዬሉኩ ኢዛ ማካራ ጊዲ ሃሳዪዛ ኔ ዳቦያ ኤሊሳቤፃ ጪማቴꬃን ኣቱማ ና ቃንꬃታዳ ዬላናስ ኡሱፑንꬆ ኣጊና ኦይካዱስ። ፆሳሲ ሃኖንታ ሚሺ ባዋ” ማራማካ ዛራዳ “ሄኮ ታኒ ፆሳ ኣይሌ ዲኪና፤ ኔ ጊዳ ማላ ታስ ሃኖ” ጊን ኪታንቻይ ኢዚፔ ሻካቲዲ ቢዴስ። ማራማ ኤሊሳቤፆ ቤያና ባዱስ። ማራማካ ሄ ዎዴ ማታራ ኤሶታ ዴንዳዳ ፑዴ ጌዜ ዴሬን ዲዛ ኢሲ ዩሁዳ ካታማ ባዱስ። ዛካራሳ ኬꬄ ጌላዳ ኤሊሳቤፆ ሳሮታዱስ። ኤሊሳቤፃ ማራሚ ሳሮꬃ ሲዪዳ ማላ ቃንꬃን ዲዛ ናዚ ኢዚ ቃንꬃን ጉፒዴስ፥ ኤሊሳቤፂንካ ፂሎ ኣያናይ ኩሚዴስ። ኢዛካ ባ ቃላ ꬎቁ ኦꬃዳ “ማጫሳ ኡባፌ ኔ ኣንጄቲዳሮ፤ ኔ ቃንꬃን ዲዛ ናዚካ ኣንጄቲዳይሳ። ታ ጎዳ ኣያ ታኮ ያዳ ታና ኦይቻናስ ታኒ ኦኔ? ኔ ሳሮካ ቃላ ታ ሲዪዳ ማላ ታ ኡሎ ጊዶን ዲዛ ናይ ኡፋይሳ ጉፒዴስ። ፖሌታና ጊዲ ጎዳይ ኢዚስ ዮቲዳይሳ ኣማኒዳራ ኢዛ ኣንጄቲዳሮ” ጋዱስ ማራማካ “ኢዚ ባ ኣይሌ ካዉሻቴꬃ ፄሊዳ ጊሽ ታ ሼምፒያ ጎዳ ꬎቁ ኦꬃዳ ቦንቻዉስ። ታ ኣያናይካ ታና ኣሺዛ ታ ፆሳን ኡፋዬታዉስ። ዎልቃማ ጎዳይ ታስ ጊታ ሚሼ ኦꬂዳ ጊሽ ሃቺፌ ሲንꬃን ኣሲ ዉሪ ታና ኣንጄቲዳሮ ጋና። ኢዛ ሱንꬃይካ ጌሻ። *** *** *** ኢዛ ማሮይ ኢዛስ ባቢዛይታስ ና ና ጋካናስ ዳና። ባ ዎልቃን ዳሮ ሚኖ ኦሶ ኦꬂዴስ፤ ባ ዎዝና ቆፋን ኦቶሬቲዛይታ ላሊዴስ። ካዎታ ካዎቴꬃፌ ዎꬂዴስ፥ ኣሽኬታ ቃሴ ꬎቁ ꬎቁ ሂስቲዴስ። ጋፊዳይታ ሎዖ ሚሻን ካልꬂዴስ፤ ዱሬታ ጊዲኮ ሜላ ኩሼ ዬዲዴስ። ካሴ ኑ ኣዋታስ ኣብራሃሜሲኔ ኢዛ ቆሞታስ ጊዳ ቃላ ናጋናስ ባ ማሬቴꬃ ዩሺ ቆፒዲ ባ ኣይሌ ኢስራዔሌ ማዲዴስ” ጋዱስ። *** ማራማካ ኤሊሳቤፂ ኣቻን ሄꬑ ኣጊና ሲሬ ጋምዓዳ ባሶ ሲማዱስ። ኤሊሳቤፂስ ዬሎ ጋላሳይ ጋኪን ኣቱማ ና ዬላዱስ። ኢዚ ጉታቲኔ ዳቦቲካ ጎዳይ ኢዚስ ጊታ ማሬቴꬃ ኦꬂዳይሳ ሲይዲ ኢዚራ ኢሲፌ ኡፋዬቲዳ። ዬሌቲዳ ኦስፑንꬃ ጋላስ ቃፃራስ ዪዳ። ኢዛ ኣዋ ሱንꬃን ዛካራሳ ጊዲ ሱንꬃና ኮይዳ። ጊዶ ኣቲን ኣያ “ሃኔና፥ ኢዛ ሱንꬂ ዮሃኒሳ ጌቴቶ” ጋዱስ። ኢስቲካ ኢዚስ “ኔ ዳቦታፔ ዮሃኒሳ ጌቴቲዲ ፄይጌቲዳ ኣሲ ኦኒካ ባዋ” ጊዳ። ኣዋይ ዛካራሲ “ናዛ ኦና ጊዲ ሱንꬃና ኮዪዳኮኔ” ማላታን ኦይቺዳ። ዛካራስካ ፃፊዛ ሚሼ ኢዛስ ኢማና ማላ ኦይቺ ኤኪዲ ሱንꬃይ “ዮሃኒሳ” ጊዲ ፃፊን ኣሳይ ዉሪካ ማላሌቲዴስ። ሄራካ ዛካራሳ ዱናይ ፖጌቲዲ ኢንፃርሲ ቢርሼቲን ፆሳ ጋላታ ኦይኪዴስ። ኢዛ ጉታቲ ዉሪ ዳሮ ባቢዳ። ሃይሲ ዉሪካ ꬎቃ ጌዜ ቢታን ዩሁዳ ዴሬን፥ ኡባሶን ሃሳዬቲዴስ። ሃይሳካ ሲዪዳ ኣሲ ዉሪካ “ሃ ጉꬃ ናይ ኣይ ሃናኔሻ?” ጊዲ ሃኖዛ ዉርሲካ ባ ዎዝናን ኦይኪዴስ። ጎዳ ኩሼይ ቱማፔ ኢዛራ ኢሲፌ ዴስ። ናዛ ኣዋይ፥ ዛካራሲ ፂሎ ኣያናን ኩሚዲ ቲንቢቴ ሃሳዪሼ “ዪዲ ባ ኣሳ ኣሺዳ ጊሽ ኢስራዔሌ ፆሲ ጋላቴቶ። ቤኒ ዎዴ ባ ጌሻ ናቤታ ዱናን ሃሳዬቲዳይሳ ማላ ባ ኣይሌ ዳዉቴ ኬꬃን ኣሺዛ ዎልቃ ኑስ ዴንꬂዴስ። *** ኢዚ ኑና ኑ ሞርኬታፔኔ፥ ኑና ኢፂዛይታ ኩሼፔ ኣሼስ። ሃይሳ ኢዚ ኦꬂዳይ ኑ ኣዋታስ ባ ማሬቴꬃ ቤሳናሳ፥ ባ ጌሻ ጫቆዛ ዩሺ ቆፓናሳ። ካሴ ኑ ኣዋ ኣብራሃሜስ ጫቂዳይሳ ቆፓና ማላኔ ኑ ሞርኬታ ኩሼፔ ኢዚ ኑና ኬሲን ኑኒ ኢዛስ ባቦይ ባይንዳ ኦꬃናሲኔ ኑ ዲዛ ዎዴ ኡባን ባ ሲንꬃን ኑና ጌሻቴꬃኔ ፂሎቴꬃን ኤሳናሳ። *** *** ጎዳ ኦጌ ጊጊሳናስ ኔ ኢዛፔ ሲንꬃራ ቢዛ ጊሽ ታ ናዞ ኔኒ ዎጋ ፆሳ ናቤ ጌቴታና። ኣሳይ ባ ናጋራፔ ማሬቲዳ ጊሽ ዴሬስ ኣቶቴꬃ ኤራቴꬅ ኔ ኢማና ማላ ኑ ፆሳ ሎዖ ማሬቴꬃፌ ዴንዲዳይሳን ሳሎፔ ኑስ ኣዋይ ኬዚዴስ። ሄሲካ ꬉማን ዲዛይታሲኔ ሃይቆ ኩዋ ጊዶን ዲዛይታሲካ ፖዒሳና ማላኔ ኑ ቶሆታካ ሳሮቴꬃ ኦጌ ካሌꬃናሳ” ጊዴስ። ጉꬃ ናዚካ ዲጪዴስ፤ ኣያናኒካ ሚኒዴስ። ኢስራዔሌ ኣሳስ ቆንጬን ቤታና ጋካናስ ባዞ ቢታን ዴዒዴስ። ሄ ዎዴ ቢታ ቦላን ዲዛ ኣሲ ዉሪካ ታዪቤቲዲ ፃፌታና ማላ ኦሮሜ ካዎ ኣዉጊስፆሳፔ ኣዋጃይ ኬዚዴስ። ሄሲካ ቄሬኔዎሳ ጌቴቲዛይሲ ሶሪያ ጌቴቲዛ ዴሬ ሃሪዛ ዎዴ ሃኒዳ ኮይሮ ዴሬ ታይቦ። ሄሳ ጊሽ ኣሲ ዉሪ ፃፌታናስ ባ ዴሬ ዴሬ ቢዴስ። ዮሴፌይካ ኣሾ ዳቦቴꬃን ዳዉቴ ባጋፌ ጊዲዳ ጊሽ ጋሊላ ኣዉራጃ ጊዶን ዲዛ ናዚሬቴ ካታማፔ ዩሁዳ ኣዉራጃ ቤቴሌሜ ጌቴቲዛ ዳዉቴ ካታማፔ ዪዴስ። ኢዚ ፃፌታና ቢሺን ኢዛስ ጊጌታ ዳሼ ዬላና ማቲዳ ማራሚራ ቢዴስ። ኢስቲካ ሄን ዲሺን ኢዚስ ዬሎ ዎዴይ ጋኪዴስ። ኢዛካ ኮይሮ ኣቱማ ና ዬሊዳይሳፌ ጉዬ ኢማꬂ ኣቂዛ ኬꬃን ኣቂዛሶይ ባይንዳ ጊሽ ናዛ ጫርቃራ ፃፃዳ ሚዛ ሲንꬃን ኢሺሳዱስ። ቤታሌሜ ኣቻን ዶርሳ ሄሚዛ ኣሳቲ ዶርሳ ናጊሼ ቃማራ ካሬን ኣቂዛይቲ ዴቴስ። ጎዳ ኪታንቻይካ ኢስታኮ ዪዴስ፤ ጎዳ ቦንቾ ፖዖይካ ኢስታ ላንቄን ዩዪ ኣꬋናስ ፖዒዴስ። ኢስቲካ ኬሂ ዳጋሚዳ ጊሽ፥ ኪታንቻይ ኢስታ “ባቦፍቴ! ታኒ ኣሳ ኡባስ ጊዲዛ ጊታ ኡፋይሳ ሚሺራቾ ኤካ ያዲስ። ሃች ካዎ ዳዉቴ ካታማ ቤታሌሜን ሼምፖ ꬋሌይ ዬሌቲዴስ። ኢዚካ ጎዳ ኪርስቶሳ ጌቴቴስ። ጫርቃራ ፃፄቲ ኢቺዳ ጋጪኖ ና ዴማንዴታ ሄሲካ ኢንቴስ ማላታ ጊዶ” ጊዴስ። ኢዛራካ ሃራ ዳሮ ሳሎ ኪታንቻቲ ቤቲዳ። ፆሳ ጋላቲሼ፥ “ቦላ ሳሎን ፆሳስ ቦንቾይ ጊዶ ሳሮቴꬂካ ቢታ ቦላን ኢዚ ዶሲዛ ኣሳ ኡባስ ጊዶ” ጊዳ። ኪታንቻቲ ኢስታፌ ሻኬቲዲ ሳሎ ሲሚን ዶርሴ ሄሚዛይቲ ባ ጊዶን ኢሶይ ኢሳ “ኣኔ ሃ ዪቴ ጎዳይ ኑስ ቆንጪሲዳይሳኔ ሃኒዳይሳ ቤቴሌሜ ካታማ ቢዲ ቤዮስ” ጊዳ። ኢስቲካ ኤሌሊ ቢዲ ማራሚራ፥ ዮሴፌራኔ ሚዛ ሲንꬃን ኢቺዳ ናዛ ዴሚዳ። ቤይዳይሳፌ ጉዬን ጎዳ ኪታንቻይ ናዛ ጊሽ ኢስታስ ዮቲዳይሳ ዉርሲ ዛሪ ዮቲዳ። ሄሚዛይቲ ዮቲዳይሳ ሲዪዳ ኣሳይ ዉሪ ኬሂ ማላሌቲዴስ። ጊዶ ኣቲን ማራማ ዮዖዛ ዉርሳ ባ ዎዝናን ዎꬃ ዴንꬃ ቆፓሼ ጋምዓዱስ። ሄሚዛይቲካ ሃንዳይስ ዉሪካ ኪታንቻይ ኢስታስ ዮቲዳ ማላ ጊዲዲ ቤቲዳ ጊሽ ሲይዳይሳሲኔ ቤዪዳይሳስ ኡባስ ፆሳ ጋላቲሼኔ ቦንቺሼ ሲሚዳ። ናዚ ዬሌቲን ኦስፑንꬃ ጋላሳን ቃፃሬቲዛ ዎዴይ ጋኪን ኣዬያ ኢዛ ቃንꬃታናፔ ካሴ ኪታንቻይ ጊዳ ማላ ዬሱሳ ጌቴቲዲ ሱሚዴስ። ሙሴ ዎጋ ማላ ኢስቲ ጌዪዛ ዎዴይ ዉሪን ዮሴፌይኔ ማራማ ጉꬃ ና ዬሱሳ ጎዳ ፆሳ ሲንꬄ ሺሻናስ ኤኪዲ ዬሩሳላሜ ኬዚዳ። ሄሲካ ጎዳ ዎጋን ኮይሮ ዬሌቲዛ ኣቱማ ናይ ዉሪ ጎዳስ ዱማ ጊዳና ጌቴቲዲ ፃፌቲዳይሳ ፖላናሲኔ *** ቃሴካ ጎዳ ዎጋን ናምዑ ሃራጴ ካፎታኔ ዎይኮ ናምዑ ሃራጴ ካፎ ጪዬታ ጌቴቲዳይሳ ማላ ያርሾ ሺሻናሳ። ሄ ዎዴ ዬሩሳላሜ ካታማን ፂሎኔ ፆሳ ባቢዛ ኢሲ ሲሞና ጌቴቲዛ ኣሲ ዴስ፤ ኢዚካ ኢስራዔሌ ናይታ ኣቶቴꬃ ናጊዛ ኣሳኔ ፂሎ ኣያናይ ኢዛ ቦላ ሼምፒዳ ኣሳ። ቃሴካ ኪርስቶሳ ቤዮንታ ዲሼ ሃይቆንታ ማላ ፂሎ ኣያናይ ኢዛስ ቆንጪዴስ። ኢዚካ ሄ ዎዴ ፂሎ ኣያናይ ካሌꬂን ፆሳ ኬꬄ ላሻ ጋꬅ ጌሊዴስ። ናዛ ኣዬዪራኔ ኣዋራ ሙሴ ዎጋን ቤሲዛይሳ ፖላናስ ጉꬃ ና ዬሱሳ ኤኪዲ ጌሊዳ ዎዴ፥ ሲሞኒ ናዛ ኤኪ ኢዲሚዲ ፆሳ ጋላቲሼ፥ “ጎዶ! ኔ ጫቂዳ ቃላ ማላ ሃዒ ታኒ ኔ ኣይሌይ ኔ ኣሺዛይሳ ታ ኣይፌራ ቤዪዳ ጊሽ ሂዓ ታና ሳሮን ኤካ፤ ኣሳ ኡባ ሲንꬃን ኔ ጊጊሲዳ ኣቶቴꬃ ሃዒ ታኒ ታ ኣይፌራ ቤያዲስ። *** *** ሃይሲካ ኡባ ዴሬስ ጌሜቲዳይሳ ቆንጪሲዛ ፖዖ፥ ኔ ዴሬ ኢስራዔሌሲካ ቦንቾ” ጊዴስ። ኢዛ ኣዋይኔ ኣያ ኢዛ ጊሽ ሃሳዬቲዳ ዮዖዛን ማላሌቲዳ። ሲሞኒካ ኢስታ ኣንጂዴስ፤ ማራሞካ “ዳሮ ኣሳ ዎዝና ቆፋይ ቆንጫና ማላ ሃይሲ ኢስራዔሌን ዲዛ ዳሮታስ ꬋዮሲኔ ኣቶቴꬃሳ፤ ኢዛ ኢፂዛይታስ ቃሴ ማላታ ጊዳና ማላ ዶሬቲዴስ። ቃሴካ ዳሮታ ዎዝና ቆፋይ ቆንጫና ማላ ናዛ ሚሻይ ቃራ ማሻ ማላ ኔ ዎዝና ጳልቃና” ጊዴስ። ቃሴካ ኣሴሬ ባጋፌ ፋኑዔሌ ና ሃና ጌቴቲዛ ጪሚዳ ናቤይ ዳዉስ፤ ኢዛካ ባ ኮይሮ ኣዚናራ ላፑን ላይꬅ ኩሜꬅ ዴዓዱስ። ላይꬃይ ኢዚስ ኦሱፑን ታማኔ ኦይዱ ላይꬅ ጊዳና ጋካናስ ቃማኔ ጋላስ ፆማሼኔ ዎሳሼ ፆሳ ኬꬃፌ ሻኬቶንታ ኣምዔቴꬃን ጋምዓዱስ። ሄ ዎዴካ ሺቃዳ ፆሳ ጋላታዱስ። ዬሩሳላሜ ዎዜቴꬅ ናጊሼ ዲዛይታስ ኡባስ ጉꬃ ናዛ ጊሽ ዮታዱስ። ዮሴፌራኔ ማራሚራ ጎዳ ዎጋን ኣዛዜቲዳይሳ ፖሊዲ ጋሊላ ኣዉራጃን ዲዛ ባሶ ናዚሬቴ ካታማ ሲሚዳ። ጉꬃ ናዚካ ዲጪዲ ሚኒ ሚኒ ቢዴስ፤ ኣꬎ ኤራቴꬃን ኩሚዴስ፤ ፆሳ ኣꬎ ኪያቴꬃይካ ኢዛ ቦላ ዴስ። ኢዛ ኣዋይኔ ኣያ ላይꬃን ላይꬃን ፓዚጋ ቦንቻናስ ዬሩሳላሜ ቤቴስ። ናዛስ ላይꬃይ ታማኔ ናምዑ ላይꬅ ኩሚዳ ዎዴ ካሴ ሎሴ ጊዲዳይሳ ማላ ፓዚጋ ቦንቻና ኬዚዳ። ፓዚጋ ባዓሌዛ ቦንቺዲ ባሶ ሲሚሺን ዬሱሲ ዬሩሳላሜን ኣቲዴስ። ዬሊዳይቲካ ኢዚ ኣቲዳይሳ ኤሪቤይቴና። ባናራ ኢሲፌ ቢዛ ኦጌ ኣሳራ ዴስ ጊሼ ኢሲ ጋላሳ ኦጌ ቢዳ። ጊዶ ኣቲን ኢዚ ኢስታራ ባይንዳይሳ ኤሪዲ ባ ዳቦታ ኣቻኒኔ ላጌታ ኣቻን ዲዛኮኔ ጊዲ ኮይዳ። ኮዪ ኮይዲ ቤቶንታ ኢፂን ዬሩሳላሜ ሲሚዳ። ሄꬑ ጋላሳፌ ጉዬ ፆሳ ኬꬃን ታማርሲዛይታ ጊዶን ኡቲዲ ሲዪሼ፥ ኣሳታ ኦይቺሼኔ ኢስታ ኦይሻ ዛሪሼ ፆሳ ኬꬃን ዲሺን ዴሚዳ። ሲዪዳይቲ ዉሪ ዬሱሳ ኣኬካኒኔ ኢዛ ዛሮዛን ዳሮ ማላሌቲዳ። ዮሴፌይኔ ማራማ ኢዛ ቤዪዳ ዎዴ ማላሌቲዳ። ማራማካ “ታ ናዞ ኣይስ ሃይሳ ማላ ኦꬃዲ? ኔ ኣዋይኔ ታኒኔ ኔና ኮዪሼ ኬሂ ሜቶቴቲዶስ” ጋዱስ። ኢዚካ ዛሪዲ “ታና ኣይስ ኮዪዴቲ? ታኒ ታ ኣዋ ኬꬃን ዳናስ ቤሲዛይሳ ኤሪቤኬቲ ጊዴስ።” ጊዶ ኣቲን ኢስታስ ኢዚ ዮቲዳይሲ ጌሊቤና። ሄፔ ሲሚን ኢስታራ ኢሲፌ ናዚሬቴ ዎꬊዲ ኢስታስ ኣዛዜቲሼ ዴዒዴስ። ኢዛ ኣያ ማራማካ ሄ ሃኒዳ ሚሻ ዉርሳ ባ ዎዝናን ናጋሼ ጋምዓዱስ። ዬሱሲ ኣꬎ ኤራቴꬃን፥ ጌሳኒኔ ሳባን ፆሳ ሲንꬃኒኔ ኣሳ ሲንꬃን ዲጪዴስ። ፂቢራዶሴ ጌቴቲዛይስ ቄሳሬይ ካዎቲዳ ታማኔ ኢቻሻንꬆ ላይꬃን ጳንፆሳ ጲላፆሳ ጊዛይሲ ዩሁዳ ቢታ ሃሪዛ ዎዴ፥ ሄርዶሲ ጋሊላ ቢታ ሃሪዛ ዎዴ፥ ኢዛ ኢሻይ ፒሊጶሲ፥ ኢፁሪያሳኔ ፂራኮንዶሴ ቢታ ሃሪዛ ዎዴ፥ ሊሳኖሲካ ኣብሎኔ ቢታ ሃሪዛ ዎዴ፥ ሃናይኔ ቃያፋይ ቄሴታ ሃላቃ ጊዲዳ ዎዴ ፆሳ ቃላይ ባዞ ቢታን ዲዛ ዛካራሳ ና ዮሃኒሳኮ ዪዴስ። ዮሃኒሲ ዮርዳኖሴ ሻፋ ኣቻን ዲዛ ዴሬታ “ኢንቴ ናጋራ ኣቶ ጋናስ ናጋራፔ ሲሚዲ ፃማቄቲቴ” ጊዲ ዮቲዴስ ሄሲካ ቃሴ ናቤ ኢሳያሲ “ባዞን ሂዝጊዲ ዋሲዛ ኣሳ ኮሺንቺ ‘ጎዳስ ኦጌ ጊጊሲቴ ባሲዲካ ሎዔꬂቴ። ሾባ ቢታይ ዉሪ ኩማና፤ ዙማቲኔ ዙምቡላቲ ዉሪ ዚቂ ጋና፤ ጌላ ኦጌይ ሲቲ ጋና፤ ሞሬቲዳ ኦጌይ ሎዖ ጊዳና። ኣሳ ዜሬꬅ ኡባ ኣሺዛ ፆሳ ዎልቃ ቤያና’ ጊዲ ባዞን ዋሲዛ ኣሳ ቃላ ጊሪስ” ጊዲ ባ ማፃፋን ፃፊዳ ማላ። ዮሃኒሲካ ኢዛ ኩሼን ፃማቄታና ዪዛ ኣሳስ “ኢንቴኖ ሃ ሾሻ ናይቶ! ያና ዲዛ ፆሳ ሃንቆፌ ሃካና ማላ ኦኒ ኢንቴና ዞሪዴ? ኢንቴ ናጋራ ኦሶፔ ሲሚዳይሳ ኤሪሲዛ ኦሶ ኦꬂቴ ‘ኑ ኣዋይ ኣብራሃሜይ ኑስ ዴስ’ ጉስ ኣጊቴ ጊዴስ። ‘ፆሲ ባስ ጊኮ ሃ ሹቻታፔ ኣብራሃሜስ ና ኦꬂ ዴንꬃናስ ዳንዳዒዛይሳ ኤሪቴ’ ካልታይ ሚꬅ ቃንፃናስ ሚꬃ ፃጶን ዴስ። ሎዖ ኣይፌ ኣይፎንታ ኢታ ሚꬂ ዉሪ ቃንፄቲዲ ታማን ዬጌታና” ጊዴስ። ኣሳይካ “ሂስቲን ኣይ ኦꬆኒ?” ጊዲ ኦይቺዴስ። ዮሃኒሲካ ኣሳስ “ናምዑ ማይዖይ ዲዛይ ኢሲ ማይዖይ ባይንዳ ኣሳስ ኢሞ፤ ቃሴካ ቁማይ ዲዛይካ ባይንዳዴስ ሻኪዲ ኢሞ” ጊዴስ። ቃራፃ ሺሺዛይቲካ ፃማቄታናስ ዪዲ “ኣስታማሬ! ኑ ኣይ ኦꬂኖ?” ጊዳ። ኢዚካ “ኢንቴ ኣዛዜቲዳይሳፌ ቦላራ ቃራፃ ሺሾፒቴ” ጊዴስ። ዎታዳራቲካ “ኑኒ ቃሴ ኣይ ኦꬂኖ?” ጊዲ ኦይቺዳ። ኢዚካ “ኦና ሚሼካ ጊዲን ዎልቃን ኤኮፍቴ፤ ቃሴካ ኦናኔ ዎርዶን ሞቶፒቴ፤ ኢንቴ ዳሞዛይ ኢንቴስ ጊዳና” ጊዴስ። ኣሳይ ዮሃኒሳ ቤዪዲ “ሃይሲ ኪርስቶሴ?” ጊዲ ባ ዎዝናን ሲꬊዴስ። ዮሃኒሲካ ኡባስ “ታኒ ኢንቴና ሃꬃን ፃማቃይስ፤ ጊዶ ኣቲን ታ ኢዛ ጫማ ቢርሻናስ ቤሶንታ ታፔ ኣꬊዛዴይ ያና። ኢዚ ኢንቴና ፂሎ ኣያናኒኔ ታማን ፃማቃና። ባሌዛን ዲዛ ካꬃ ጋፌዛፔ ጌሻስ ካꬅ ሱራጊዛ ፒꬃይ ኢዛ ኩሼን ዴስ። ባሌዛ ኩሜꬃ ጌሻና፤ ጊስቴዛ ቃሴ ዲዔን ቆላና፤ ጋፌዛካ ቶዖንታ ታማን ፁጋና” ጊዴስ። ዮሃኒሲ ኣሳ ሃራ ዱማ ዱማ ዞሬ ቃላራ ሚኒꬄꬂ ዞሪሼ ሚሺራቾ ቃላ ዮቲዴስ። ጊዶ ኣቲን ጋሊላ ቢታ ሃሪዛ ሄርዶሲ ባ ኢሻ ማቾ ሄሮዲያዶ ኤኪዳ ጊሺኔ ሃራ ዳሮ ኢታ ኦꬂዳ ጊሽ ዮሃኒሲ ኢዛ ሃንቂዳ ጊሽ፥ ካሴ ሞሮ ቦላ ሃራ ጉጂዲ ሄርዶሲ ዮሃኒሳ ቃሾ ኬꬃን ዬጊዴስ። ኣሳይ ፃማቄቲዳፔ ጉዬ ዬሱሲካ ፃማቄቲዴስ፤ ኢዚ ዎሲሺን ሳሎይ ዶዬቲዴስ። ፂሎ ኣያናይካ ሃራጴ ሚሳቲዲ ኢዛ ቦላ ዎꬊዴስ። “ሳሎፔ ታ ዶሲዛ ናይ ኔና፤ ኔናን ታኒ ኡፋዬታይስ” ጊዛ ቃላይ ዪዴስ። ዬሱሲ ፆሳ ኦሶ ኦይኪሺን ላይꬃይ ኢዛስ ሄꬑ ታሙ ላይꬃ ማላ ጊዳና። ኣሳይካ ኢዚ ዮሴፌ ና፥ ኤሌ ና፥ ማቴ ና፥ ሌዌ ና፥ ሚልካ ና፥ ዩሁዳ ና፥ ዮሴፌ ና፥ ማቶቲዮ ና፥ ኣሞፄ ና፥ ናሆሜ ና፥ ኢሲሊሜ ና፥ ናጌ ና፥ ማቴ ና፥ ማቶቲዮ ና፥ ሴሜዬ ና፥ ዮሴፌ ና፥ ዩሁዳ ና፥ ዮናኔ ና፥ ሬሴ ና፥ ዜሩባቤሌ ና፥ ሴላቲያሌ ና፥ ኔሬ ና፥ ሚልካ ና፥ ሃዴ ና፥ ዮሳ ና፥ ቆሳሜ ና፥ ኤሊሞዳሜ ና፥ ኤራ ና፥ ኢያሶ ና፥ ኤሊዓዛሬ ና፥ ዮራሜ ና፥ ማቴ ና፥ ኤሌ ና፥ ሲሞና ና፥ ዩሁዳ ና፥ ዮሴፌ ና፥ ዮና ና፥ ኤሊያቄሜ ና፥ ሜሊያ ና፥ ማይናኔ ና፥ ማፃቴ ና፥ ናታኔ ና፥ ዳዉቴ ና፥ ኢሴዬ ና፥ ኢዮቤዴ ና፥ ቦዔዜ ና፥ ሶሎሞኔ ና፥ ናሶኔ ና፥ ኣምናዳቤ ና፥ ኣራሜ ና፥ ኣሮኔ ና፥ ኤስሮሜ ና፥ ፋሬሴ ና፥ ዩሁዳ ና፥ ያቆቤ ና፥ ዪሳቃ ና፥ ኣብራሃሜ ና፥ ታራ ና፥ ናኮሬ ና፥ ሴሮሄ ና፥ ራጉዌ ና፥ ፋሌቄ ና፥ ኣቤሬ ና፥ ሳላ ና፥ ቃዪኔሜ ና፥ ኣርፋኪሲዴ ና፥ ሴሜ ና፥ ኖሄ ና፥ ላሜሄ ና፥ ማቱሳላ ና፥ ሄኖኬ ና፥ ያሬዴ ና፥ ማላሊዔሌ ና፥ ቃዪናሜ ና፥ ሄኖሴ ና ሴቴ ና ኣዳሜ ና፥ ፆሳ ና፥ ሚሳቲዴስ። ዬሱሲ ፂሎ ኣያናን ኩሚዲ ዮርዳኖሴ ሻፋፔ ሲሚዳ ማላ ፂሎ ኣያናይ ኢዛ ካሌꬂዲ ባዞ ቢታ ኤፊዴስ። ሄንካ ፃላዔን ኦይዱ ታሙ ጋላስ ፓጬቲዴስ። ሄ ፓጬቲዛ ጋላሳታን ኣይኮካ ሞንታ ጊሽ ዉርሴꬃን ጋፊዴስ። ፃላዔይካ ዬሱሳ “ኔ ፆሳ ና ጊዲኮ ኣኔ ሃይሳ ሹቻ ካꬅ ጊዳና ማላ ኣዛዛ” ጊዴስ። ዬሱሲካ ዛሪዲ “ኣሲ ካꬃን ፃላ ዴና ጌቴቲዲ ፃፌቲዴስ” ጊዲ ፃላዔስ ዛሪዴስ። ሄሳፌ ካሊዲ ፃላዔይ ዬሱሳ ኢሲ ꬎቃ ዙማ ቦላ ኬሲዲ ሳሎ ጉፋንꬆን ዲዛ ካዎቴꬃ ቂጲዳ ኣይፌይ ፄላናስ ቤሲዲኔ፥ “ሃይሲ ኔ ቤዪዛ ቢታ ካዎታ ጎዳቴꬃይኔ ቦንቾይ ዉሪካ ታስ ኢሜቲዴስ፤ ታካ ታ ዶሲዛዴስ ኢማናስ ዳንዳዪዛ ጊሽ ኔስካ ኢማና። “ሄሳ ጊሽ ኔኒ ኩንዳዳ ታስ ጎይኒኮ ሃይሲ ዉሪካ ኔስ ጊዳና” ጊዴስ። ዬሱሲካ ዛሪዲ “ኔ ጎዳ ፆሳስ ኩንዳዳ ኢዛስ ፃላ ጎይና ጌቴቲዲ ፃፌቲዴስ” ጊዴስ። ሄሳፌካ ዬሱሳ ዬሩሳላሜን ፆሳ ኬꬃ ፄራ ኬሲ ኤሲዲ ፆሳ ማፃፋን “ኔና ናጋና ማላ ፆሲ ኔ ጊሽ ባ ኪታንቻ ኣዛዛና፤ ‘ኔ ቶሆይ ሹቻን ꬉጴቶንታ ማላ ኪታንቻቲ ባ ኩሼራ ኔና ꬎቁ ሂስቲ ኦይካና’ ጌቴቲዲ ፃፌቲዳ ጊሽ ኣኔ ኔ ፆሳ ና ጊዲኮ ሃይሳፌ ዱጌ ኩንዳ” ጊዴስ። *** *** ዬሱሲካ “ኔ ጎዳ ፆሳ ፓጮፋ” ጌቴቲዴስ ጊዲ ዛሪዴስ። ፃላዔይካ ባ ፓጫናይሳ ዉርሲዳፔ ጉዬን ሃራ ባስ ኢንጄ ዎዴይ ቤታናሼ ዬሱሳፔ ሻኬቲዴስ። ዬሱሲካ ፂሎ ኣያና ዎልቃን ጋሊላ ሲሚዴስ። ኢዛ ጎባቴꬃይ ጋሊላ ኣቻን ዲዛ ዴሬታን ሲዬቲዴስ። ኢዚካ ኣይሁዳታ ዎሳ ኬꬃን ታማርሲሺን ኢዛ ቲሚርቴይ ሎዒን ኣሳይ ዉሪካ ኢዛ ጋላቲዴስ። ሄፔ ባ ዬሌቲዳ ካታማ ናዚሬቴ ዪዲ ካሴ ሳምባታ ጋላስ ኣይሁዳ ዎሳ ኬꬄ ጌሊዛ ማላ ጌሊዲ ፆሳ ማፃፋ ናባባናስ ዴንዲ ኤቂዴስ። ናቤ ኢሳያሳ ማፃፋይ ኢዛስ ኢሜቲን ማፃፋ ዶዪዳ ማላ። “ጎዳ ኣያናይ ታ ቦላ ዴስ፤ ማንቆታስ ሚሺራቾ ቃላ ዮታና ማላ ታና ቲዪዴስ፤ ቃሼቲዳይታስ ቢርሼቴꬅ፥ ቆቄቲ ፄላና ኦጌ ታ ኣዋጃና ማላ፥ ሜቶቴቲዳይታ ኣሻና ማላ፥ ዶሴቲዳ ጎዳ ላይꬃ ኣዋጃ ታ ዮታና ማላ ታና ኪቲዴስ” ጊዛ ሶ ዴሚ ናባቢዲኔ። *** ማፃፋካ ጎርዲዲ ኣይሁዳ ዎሳ ኬꬄ ናጊዛይሳስ ዛሪ ኢሚዲ ኡቲዴስ። ኣይሁዳታ ዎሳ ኬꬃን ዲዛይቲ ዉሪካ ኢዛ ቲሺ ኦꬂ ፄሊዳ። ኢዚካ ኢስታስ “ሃይሲ ኢንቴ ኢንቴ ሃይꬃራ ሲዪዳ ማፃፋ ቃላይ ሃቺ ፖሌቲዴስ” ጊዴስ። ኣሳይ ዉሪካ ኢዛ ጊሽ ሎዖ ፃላላ ሃሳዬቴስ። ቃሴካ ኢዛ ዱናፔ ኬዚዛ ሎዖ ቃላፔ ዴንዲዳይሳን ማላሌቲዲ “ሃይሲ ዮሴፌ ና ጊዴኔ?” ጊዳ። ኢዚካ “ꬋሌ ጎዶ ኔርካ ኔና ፓꬃ። ቂፊርናሆሜን ኔኒ ኦꬂሺን ኑ ሲዪዳይሳ ሃይሳን ኔ ካታማንካ ኦꬃ ጊዛ ሌሚሶ ኢንቴ ታ ቦላ ማላታናይሳስ ሲꬌይ ባዋ” ጊዲ ኢስታስ ዮቲዴስ። ቃሴካ “ታ ኢንቴስ ቱማ ጋይስ ናቤይ ባ ዬሌቲዳ ዴሬን ቦንቼቲ ኤሬና። “ጊዶ ኣቲን ታ ኢንቴስ ቱማ ጋይስ ሄꬑ ላይꬂኔ ባጋ ጋካናስ ሳሎይ ጎርዴቲን ዎልቃማ ኮሻይ ቢታ ቦላ ሃኒዳ ኤላሳ ዎዴ ሄ ላይꬃታን ኣዚናይ ባይንዳ ዳሮ ማጫሳቲ ኢስራዔሌ ቢታን ዴቴስ ሺን ኤላሳይ ኢስታፌ ኢሲኔይኮካ ኪቴቲቤና። ጊዶ ኣቲን ሲዶና ጌቴቲዛ ቢታን ሴራጲታ ጌቴቲዛ ካታማን ዲዛ ኢሲ ኣዚናይ ባይንዳ ማጫሴይኮ ኪቴቲዴስ። *** ናቤ ኤሊሳዔ ዎዴ ኢስራዔሌ ዴሬን ዳሮ ኢንቺራቻ ሃርጊዛይቲ ዴቴስ ሺን ሶሪያ ቢታ ኣሳ ጊዲዳ ኒዒማኔፔ ኣቲን ሄ ዳሮታፔ ኦኒካ ኢንቺራቻ ሃርጌፌ ፓፂቤና” ጊዴስ። ኣይሁዳታ ዎሳ ኬꬃን ዲዛይቲ ዉሪካ ሄሳ ሲይዲ ዳሮ ሃንቄቲዳ። ባ ኡቲዳሶፔ ዴንዲ ኤቂዲ ዬሱሳ ካታማፔ ካሬ ኬሲዲ ዱጌ ዛሪ ዬዳናስ ኢስታ ካታማያ ኦሴቲዳ ዙማ ቦላ ኣፎቲዛሶን ኦሴቲዳሶ ኤኪ ኤፊዳ። ጊዶ ኣቲን ኢዚ ኢስታ ጊዶራ ሻኪ ዬጊዲ ኣꬊ ቢዴስ። ሄፔካ ጋሊላ ኣዉራጃን ዲዛ ቂፊርናሆሜ ጌቴቲዛ ካታማ ዎꬊዴስ። ሄንካ ሳምባታ ጋላስ ዳሮ ኣሳ ታማርሶ ኦይኪዴስ። ኢዚ ጎዳቴꬃራ ሃሳዪዛ ጊሽ ኢዛ ቲሚርቴዛን ማላሌቲዳ። ኣይሁዳታ ዎሳ ኬꬃን ቱና ኣያናይ ኦይኪዳ ኣዴይ ዴስ። ኢዚካ ባ ቃላ ꬎቁ ሂስቲዲ “ናዚሬቴ ዬሱሳ ሃዒ ታ ዋኖ? ኔናራ ታና ኣዚ ጋꬂዴ? ኔ ዪዳይ ኑና ꬋይሳናሴ? ኔ ኦናኮኔ ታ ኤራይስ ኔ ፆሳ ፂሎ ጊዲኪ?” ጊዲ ዋሲዴስ። ዬሱሲካ ቱና ኣያናዛ ሃ ኣዴዛፔ “ጮዑ ጋዳ ኬዛ” ጊዲ ሴሪዴስ። ቱና ኣያናይካ ዳሮ ኣሳ ሲንꬃን ኣዴዛ ቦላፌ ዬጊዲ ኢሲ ቆሆካ ጋꬆንታ ዬዲዲ ኬዚዴስ። ኣሳይ ዉሪካ ማላሌቲዲ ባ ጊዶን ኢሶይ ኢሳራ “ኣሶ ሃይሲ ኣይ ጊዛ ቲሚርቴ? ጎዳቴꬃራኔ ዎልቃራ ኢታ ኣያናን ኣዛዜስ፤ ኢስቲካ ኬዜቴስ” ጊዲ ሃሳዬቲዴስ። ዬሱሳ ጎባቴꬃይካ ኡባስ ጋኪዴስ። ሄሳፌ ጉዬ ዬሱሲ ኣይሁዳ ዎሳ ኬꬃፌ ኬዚዲ ሲሞና ኬꬄ ጌሊዴስ። ሲሞና ቦሎቴያ ዎልቃማ ሚሾ ሃርጌይ ኦይኪን ሳኬታዳ ዲሺን ዬሱሳ ኢዞ ፓꬃርኪ” ጊዲ ዎሲዳ። ዬሱሲካ ኢዚኮ ሺቂዲ ሚሾ ሃርጌዛ ሴሪዴስ። ሚሻ ሃርጌይካ ዬዲን ሄራካ ዴንዳ ኤቃዳ ኢማꬃታ ሞካዱስ። ኣዋ ኣርሼይ ዉላና ጊሺን ዱማ ዱማ ሃርጌይ ኦይኪዳ ኣሳ ዉርሲ ኢዛኮ ኤኪ ዪዳ። ኢዚካ ሃርጊዛ ኣሳታ ኡባ ቦላ ባ ኩሼ ዎꬂዲ ፓꬂዴስ። ቱና ኣያናንቲ ቃሴካ ዬሱሳ “ኔኒ ፆሳ ና” ጊሼኔ ዋሲሼ ዳሮ ኣሳታፔ ኬዚዳ፤ ጊዶ ኣቲን ኢዚ ኢስታ ሴሪዴስ፤ ቱና ኣያናንቲ ኢዚ ኪርስቶሳ ጊዲዳይሳ ኤሪዛ ጊሽ ኢስቲ ኢሲኖካ ሃሳያና ማላ ኮይቤና። ጋዴይ ዎኒቲሺን ዬሱሲ ኢሲ ኣሲ ባይንዳሶ ቢዴስ። ዳሮ ኣሳይካ ኢዛ ኮዪሼ ኢዚ ዲዛ ሶ ጋኪዴስ። ኢዚ ኢስታፌ ሻካቲዲ ቦንታ ማላ ዲጋናስ ኮይዳ። ጊዶ ኣቲን ኢስታስ “ጌዴ ሃራ ካታማ ባዳ ፆሳ ካዎቴꬃ ሚሺራቾ ቃላ ዮታናስ ታስ ቤሴስ፤ ታኒ ኪቴቲዳ ጊታ ቆፋይ ሄሳኮ” ጊዴስ። ኢዚካ ዩሁዳን ኣይሁዳ ዎሳ ኬꬃን ቃላ ጉጂ ዮቲዴስ። ዬሱሲ ጌንሴሬፄ ኣባ ላንቄን ኤቂዲ ፆሳ ቃላ ታማርሲሺን ሲዪዛ ኣሳይ ኢዛ ኡንዔꬂዴስ። ሄ ዎዴ ናምዑ ዎጎሎቲ ኣባ ኣቻን ዲሺን ዬሱሲ ቤዪዴስ። ሞሌ ኦይኪዛይቲ ዎጎሎታፔ ዎꬊዲ ሞሌ ጊቴታ ሜጬቴስ። ዬሱሲ ዎጎሎታፔ ሲሞና ዎጎሎን ጌሊዲ ቢታፌ ጌዴ ኣባ ጊዶ ሺሻና ማላ ኦይቺዲኔ ዎጎሎ ጊዶን ኡቲዲ ኣሳ ታማርሲዴስ። ታማርሲ ዉርሲዳፔ ጉዬ ሲሞና “ኣባይ ጪማቲዛሶ ሺቃ ሞሌ ኦይካናስ ኢንቴ ጊቴዛ ኣባ ጊዶ ዬጊቴ” ጊዴስ። ሲሞናይ ዬሱሳስ ዛሪዲ “ጎዶ! ቃማ ኩሜꬅ ዳቡሪ ኣቂዲ ኢሲኖካ ኦይኪቦኮ፤ ጊዶ ኣቲን ኔ ቃላን ጊቴዛ ዬጋና” ጊዴስ። ዬጊዳ ዎዴ ዳሮ ሞሌ ኦይኪዳ። ጊቴይካ ዳኬቲዴስ። ሃራ ዎጎሎን ዲዛይቲ ዪዲ ኢስታ ማዳና ማላ ኩሼራ ዉቲ ፄይጊዳ። ኢስቲካ ዪዲ ናምዑ ዎጎሎታ ሞሌ ኩንꬂዳ። ዎጎሎቲካ ዱጌ ሚቴቴꬅ ኦይኪዳ። ሲሞና ጌቴቲዛ ጴፅሮሲ ሄሳ ቤዪዲ ዬሱሳ ቶሆ ቦላ ኩንዲዲ “ጎዶ! ታ ናጋራንቻ ጊዲዳ ጊሽ ታ ኣቻፌ ኪቻ” ጊዴስ። ኢዚ ሄሳ ጊዳይ ኢዚኔ ኢዛራ ዲዛይቲ ኦይኪዳ ዳሮ ሞሌዛን ማላሌቲዳ ጊሻሳ። ቃሴካ ሲሞና ላጌቲ ዛቢዶሳ ናይቲ ያቆቤይኔ ዮሃኒሲካ ዉሪ ማላሌቲዳ። ዬሱሲካ ሲሞና “ባቦፋ! ሃይሳፌ ጉዬ ኔ ኣስ ኦይኪዛዴ ጊዳና” ጊዴስ። ኢስቲካ ዎጎሎታ ቢታኮ ሺሺዲ ዉርሲካ ዬጊ ኣጊዲ ዬሱሳ ካሊዳ። ዬሱሲ ካታማታፔ ኢሲኔዪን ዲሺን ኢንቺራቻ ሃርጌይ ቦላ ዉርሲ ኦይኪዳ ኢሲ ኣሲ ሄ ካታማን ዴስ። ሄ ኣዴዚካ ዬሱሳ ቤዪዲ ኢዛ ሲንꬃን ኩንዲዲ “ጎዶ! ኔ ኮይኮ ታና ፓꬃና ዳንዳያሳ” ጊዲ ዎሲዴስ። ዬሱሲ ባ ኩሼ ዬዲ ቦቺዲ “ታ ዶሳዲስ፥ ፓፃ” ጊዴስ። ኢንቺራንቻይ ሄራካ ꬋዪዴስ። ዬሱሲ ኢዛስ “ሃይሳ ኦናስካ ዮቶፓ፤ ጊዶ ኣቲን ባዳ ኔና ቄሴ ሃላቃስ ቤሳ፤ ኢስታስ ማርካ ጊዳና ማላ ኔ ጌዪዳይሳስ ሙሴይ ኣዛዚዳ ያርሾዛ ሺሻ” ጊዲ ኣዛዚዴስ። ጊዶ ኣቲን ኢዛ ጊሽ ኣሳይ ሃሳዪዛ ዎሬይ ካሴፔ ኣኪ ኣኪ ቢዴስ። ኬሂ ዳሮ ኣሳይ ኢዛ ሃሳያ ሲያናሲኔ ባና ሳኪዛ ሃርጌፌ ፓፃናስ ኢዛኮ ሺቂዴስ። ዬሱሲ ዳሮ ዎዴ ኣሲ ባይንዳሶ ቢዲ ዎሲዴስ። ዬሱሲ ታማርሲሺን ኣሳይ ጋሊላፔኔ ዩሁዳፔ ቃሴካ ዬሩሳላሜፔ ዪዳ ፋርሳዌቲኔ ዎጋ ታማርሲዛይቲ ሄን ኡቲዳ። ኢዚ ፓꬃና ማላ ጎዳ ዎልቃይ ኢዛራ ዴስ። ሄ ዎዴ ኣሳይ ኢሲ ኩሜꬃ ቦላይ ሲሊዲ ቃፆንታ ሃርጋንቻ ሃላራ ቶኪ ኤኪ ዪዲ ኬꬄ ጌልꬂዲ ዬሱሳ ሲንꬃን ዎꬃናስ ፓጪዳ። ኣሳ ዳሮቴꬃፌ ዴንዲዳይሳኒ ኬꬄ ጌልꬃናስ ፆኔቲዳ ጊሽ ፑዴ ኬꬃ ካራ ቦላ ኬዚዲኔ ካራ ቃሪዲ ሃርጋንቻ ሃላራ ቶኪ ኤሂዲ ኣሳ ጊዶራ ዬሱሳ ሲንꬃን ዎꬂዳ። ዬሱሲ ኢስታ ኣማኖ ቤዪዲ “ሃይሶ ኔኒ ኔ ናጋራፔ ማሬታዳሳ” ጊዴስ። ሙሴ ዎጋ ፃፊዛይቲኔ ፋርሳዌቲ “ሃይሲ ፆሳ ቦላ ፃላቴꬃን ሃይሳꬆ ሃሳዪዛይ ኢዚ ኦኔ? ኢሲ ፆሳፌ ኣቲን ናጋራ ማራናስ ኦኒ ዳንዳዪዜ?” ጊዲ ቆፒዳ። ዬሱሲ ኢስታ ቆፋ ኤሪዳ ጊሽ “ኢንቴ ኢንቴ ዎዝናን ኣይስ ሄሳꬆ ቆፔቲ? ‘ኔኒ ናጋራፔ ማሬታዳሳ’ ጉሳፌኔ ‘ዴንዳዳ ባ’ ጉሳፌ ኣዋይሲ ካዉሼ? ጊዶ ኣቲን ታ ሃይሳ ጊዳይ ኣሳ ናስ ቢታ ቦላ ኣሳ ናጋራፔ ማራናስ ጎዳቴꬂ ዲዛይሳ ኢንቴ ኤራና ማላ” ጊዴስ። ቃሴካ ሄ ሲላ ኣዴዛ “ኔና ጋይስ! ዴንዳ ኤቃ! ኔ ሃላ ቶካዳ ባ!” ጊዴስ። ኢዚ ሄራካ ኢስታ ሲንꬃን ዴንዲ ኤቂዴስ። ካሴ ባ ኢቺዳ ሃላ ቶኪዲ ፆሳ ጋላቲሼ ባሶ ቢዴስ። ሄ ዎዴ ኣሲ ዉሪ ማላሌቲዴስ። ፆሳ ጋላቲሼ “ሃች ማላሊሲዛዝ ቤይዶስ” ጊዲ ዳሮ ባቢዳ። ሄሳፌ ጉዬ ዬሱሲ ሄፔ ኬዚ ቢዴስ። ሌዌ ጊዛ ኢሲ ቃራፃ ቃንፂሲዛይሲ ቃራፃ ቃንፂዛሶን ኡቲዳይሳ ቤዪዲ “ታና ካላ” ጊዴስ። ኢዚካ ዉርሲ ኣጊዲ ኢዛ ካሊዴስ። ሌዌይካ ዬሱሳሲ ባ ኬꬃን ጊታ ዲጊሳ ዲጊሲዴስ። ቃራፃ ቃንፂሲዛ ዳሮ ኣሳቲኔ ሃራ ኣሳቲካ ኢስታራ ኢሲፌ ማዳን ኡቲዳ። ፋርሳዌቲኔ ኢስታ ፃፌቲ “ቃራፃ ቃንፂሲዛይታራኔ ናጋራንቻታራ ኢሲፌ ኣዛስ ሜቲ?” ጊዲ ዬሱሳ ካሊዛይታ ቦላ ዙዙሜቲዳ። ዬሱሲካ ኢስታስ “ሃርጋንቻታስ ኣቲን ፓፃ ኣሳስ ኣኪሜ ኮሼና። ታካ ናጋራንቻታ ማሮቴꬃኮ ዛራናስ ያዲስ ኣቲን ፂሎታ ፄይጋናስ ያቤኬ” ጊዴስ። ኢስቲካ ዛሪዲ “ዮሃኒሳ ካሊዛይቲ ዳሮ ዎዴ ፆሜቴሲኔ ዎሴቴስ። ፋርሳዌታ ካሊዛይቲካ ኢዛꬆ ኦꬄቴስ። ኔና ካሊዛይቲ ጊዲኮ ኡባ ዎዴ ሜቴሲኔ ኡዬቴስ” ጊዳ። ዬሱሲካ ኢስታስ ዛሪዲ “ሚሺራይ ኢሲፌ ዲሺን ዲጊሳስ ፄይጌቲዳይታ ፆሚሳናስ ቤሲዜ? ጊዶ ኣቲን ሚሺራይ ኢስታፌ ሻኬታና ዎዴይ ያና ኢስቲ ሄ ዎዴ ፆማና” ጊዴስ። ኢስታስ “ኦራꬅ ማይዖፔ ቃንፂ ኤኪዲ ጋልዓ ማይዖ ቦላ ዎꬂ ሲኪዛዴይ ዴና፤ ዎꬂ ሲኪኮ ኦራꬃዚ ጋልዓራ ጋጎንታ ጊሽ ጋልዓዛ ዳካና። ዎይኔፔ ኦሴቲዳ ኦራꬃ ጫጄ ጋልዓ ሉካሞን ኩንꬂዲ ዎꬂዛ ኣሲ ኦኒካ ባዋ፤ ዎꬂዛ ጊዲኮ ዎይኔፔ ኦሴቲዳ ኦራꬃ ጫጄይ ጋልዓዛ ዳካና። ዎይኔ ጫጄዚካ ቢታን ጉካና፤ ጋልዓ ሉካሞይ ሲንꬃፌ ጎዖንታዝ ጊዳና። ሄሳ ጊሽ ኦራꬃ ዎይኔ ጫጄይ ኦራꬃ ኦጎሮን ጉጄታናስ ቤሴስ። ሂስቲኮ ጫላ ዎይኔ ጫጄ ኡዪዳፔ ጉዬ ጫሎንታዚ ኡያና ኮዪዛይ ኦኒኔ ዴና ጋሶይካ ጫላይ ሎዖ ጊዛ ጊሻሳ” ጊዴስ። ኢሲ ሳምባታ ጋላስ ዬሱሲ ካꬃ ጊዶራ ኣꬊ ቢሺን ኢዛ ካሊዛይቲ ቲያ ፁጲ ኤኪዲ ባ ኩሼን ሺጊቺ ሚሺን፥ ፋርሳዌታፔ ኢሲ ኢሲ ኣሳቲ “ሳምባታ ጋላስ ኦꬃናስ ቤሶንታይሳ ኣይሲ ኦꬄቲ?” ጊዳ። ዬሱሲካ ኢስታስ “ዳዉቴይ ኢዛራ ዲዛ ኣሳቲ ጋፊዳ ዎዴ ኢዚ ኦꬂዳይሳ ናባቢቤኬቲ? ኢዚ ፆሳ ኬꬄ ጌሊዲ ቄሴቲ ፃላ ማና ማላ ኣዛዜቲዳ ዱማ ኡኬꬃ ባሲ ሚዲ ባናራ ዲዛይታስ ኢሚዴስ” ጊዲ ዛሪዴስ። ቃሴካ ዬሱሲ “ኣሳ ናይ ሳምባታ ጎዳ” ጊዲ ኢስታስ ዮቲዴስ። ዬሱሲካ ሃራ ሳምባታ ጋላስ ኣይሁዳ ዎሳ ኬꬄ ጌሊዲ ታማርሲሺን ኡሻቻ ኩሼይ ሲሊዳ ኢሲ ኣሲ ሄን ዴስ። ሙሴ ዎጋ ታማርሲዛይቲኔ ፋርሳዌቲ ዬሱሳ ሞታናስ ጋሶ ኮይዲ ኣኔ ኢዚ ሳምባታ ጋላሳን ኣዴዛ ፓꬂኮ ቤያና ጊዲ ናጊሼ ጋምዒዳ። ዬሱሲካ ኢስታ ዎዝና ቆፋ ኤሪዲ ኩሼይ ሲሊዳ ኣዴዛ ኡባ ሲንꬃን “ዴንዳ ኤቃ” ጊዴስ። ኣዴዚካ ዴንዲ ኤቂዴስ። ዬሱሲካ ኢስታ “ታ ኢንቴና ኢሲ ሚሽ ኣኔ ኦይቻይስ፤ ሳምባታ ጋላስ ኦꬃናስ ቤሲዛይ ሎዖ ኦሶዬ? ኢታ ኦሶ? ሼምፖ ኣሾ ዎይኮ ꬋይሶ?” ጊዲ ኦይቺዴስ። ቃሴካ ዬሱሲ ባ ዩሾን ዲዛ ዉርሲ ዩሺ ፄሊዳፔ ጉዬን ኣዴዛ “ኔ ኩሼ ፒዲሳ” ጊዴስ። ኣዴዚካ ዬሱሲ ጊዳ ማላ ኦꬂዴስ። ኢዛ ኩሼይካ ፓፂዴስ። ጊዶ ኣቲን ኣሳቲ ሃንቄቲዳ፤ ዬሱሳ ቦላ ኣይ ኦꬃናስ ኮሺዛኮኔ ባ ጊዶን ዞሬቲዳ። ሄ ጋላሳታፔ ኢሲ ጋላስ ዬሱሲ ዎሳናስ ዙማ ቦላ ኬዚዲ ቃማ ኩሜꬅ ፆሳ ዎሲሼ ኣቂዴስ። ጋዴይ ዎንቲሺን ባና ካሊዛይታ ፄይጊዲ ኢስታፌ ታማኔ ናምዓታ ዶሪዴስ። ኢስታካ “ሃዋሬታ” ጊዲ ሱንꬂዴስ። ኢስቲካ ጴፅሮሳ ጊዲ ሱንꬂዳ ሲሞናኔ ኢዛ ኢሻ ኢንዲራሳ፥ ያቆቤ፥ ዮሃኒሳ፥ ፒሊጶሳ፥ ባርቴሌሞሳ፥ ማቶሳ፥ ቶማሳ፥ ኢልፊዮሳ ና ያቆቤ፥ ባ ባጋስ ሚሼቲዛ ሲሞና፥ ያቆቤ ና ዩሁዳኔ ዬሱሳ ኣꬂ ኢሚዳ ኣስቆሮንቶ ዩሁዳ። ዬሱሲካ ኢስታራ ኢሲፌ ዙማ ቦላፌ ዱጌ ዎꬊዲ ዴንባሶን ኤቂዴስ። ኢዛ ካሊዛይታፔ ዳሮ ኣሳይ ሄን ዴስ፥ ዩሁዳፔኔ ዬሩሳላሜፔ፥ ቃሴካ ፂሮሴፔኔ ሲዶና ኣባ ኣቻፌ ዪዳ ኬሂ ዳሮ ኣሳይካ ሄን ዴስ። ኢስቲካ ዪዳይ ዬሱሲ ጊዛይሳ ሲያናሲኔ ሃርጌፌ ፓፃናሳ። ቱና ኣያናይካ ዋይሲዛይቲ ዉሪ ፓፂዳ። ዎልቃይካ ኢዛፔ ኬዚዲ ዳሮታ ፓꬂዛ ጊሽ ኣሳይ ዉሪ ኢዛ ቦቻናስ ዪዴስ። ዬሱሲካ ባና ካሊዛይታስ “ፆሳ ካዎቴꬃይ ኢንቴስ ጊዲዳ ጊሽ ኢንቴኖ ማንቆቶ! ኢንቴ ኣንጄቲዳይታ፤ ኢንቴ ጉዬፔ ካላና ጊሽ ሃዒ ጋፊዛይቶ! ኢንቴ ኣንጄቲዳይታ፤ ኢንቴ ጉዬፔ ሚጫና ጊሽ ኢንቴኖ ሃዒ ዬኪዛይቶ! ኢንቴ ኣንጄቲዳይታ፤ ኣሳይ ታ ጊሽ ኢንቴና ኢፂሺን ባ ጊዶፌ ሻኪሺን፥ ቦርሺኒኔ ኢንቴና ኢታ ሱንꬃራ ፄይጊሺን ኢንቴ ኣንጄቲዳይታ፤ “ኢንቴስ ሳሎን ጊታ ዎይቶይ ዲዛ ጊሽ ሄ ዎዴ ኡፋይሳን ጉፒቴ፤ ኣይስ ጊኮ ኢስታ ኣዋቲ ናቤታ ቦላ ሄሳꬆ ኦꬂዳ። ጊዶ ኣቲን ኢንቴኖ ዱሬቶ ኢንቴ ሃዒ ኡፋዬቲዳ ጊሽ ኢንቴና ኣዬ-ኣና! ኢንቴኖ ሃዒ ካሊዳይቶ ኢንቴና ኣዬ ኣና! ኢንቴ ጉዬፔ ጋፋና፤ ኢንቴኖ ሃዒ ሚጪዛይቶ! ኢንቴስ ኣዬ ኣና! ኢንቴ ጉዬፔ ሚሼታናኔ ዬካና። “ኣሲ ዉሪ ኢንቴ ጊሽ ሎዖ ሃሳዪዛ ዎዴ ኢንቴንስ ኣዬ-ኣና! ኣይስ ጊኮ ኢስታ ኣዋቲ ዎርዶ ናቤታስ ሄሳ ማላ ኦꬂዳ። “ጊዶ ኣቲን ታ ዮቲዛይሳ ሲዪዛይቶ ታኒ ኢንቴስ ዮቲዛይ ኢንቴ ሞርኬታ ሲቂቴ፤ ኢንቴና ኢፂዛይታስ ሎዖ ኦꬂቴ፤ ኢንቴና ቃንጊዛይታ ኣንጂቴ፤ ኢንቴና ቆሂዛይታስ ዎሲቴ፤ ኢሲ ሻጋላን ባቂኮ፥ ናምዓንꬆ ሻጋላ ጉጃ ቤሳ፤ ኦኒኔ ኔ ቦላራ ማይዒዳይሳ ቃሪ ኤኪኮ ጋꬃራ ማይዒዳይሳካ ዲጎፋ። “ኔና ዎሲዛ ኡባስ ኢማ፤ ኔ ሚሻ ኤኪዳ ኣሲ ዛሪ ኢማና ማላ ኦይቾፋ። “ኣሲ ኢንቴስ ኦꬃና ማላ ኢንቴ ኮዪዛይሳꬆ ኢንቴካ ሃራ ኣሳስ ኦꬂቴ። “ናጋራንቻቲካ ባና ሲቂዛይታ ሲቂዛ ጊሽ ኢንቴ ኢንቴና ሲቂዛይታ ፃላ ሲቂኮ ኢንቴስ ኣይ ዱማ ኣንጆይ ዲዜ? ኢንቴ ኢንቴስ ሎዖ ኦꬂዛይታስ ፃላላ ሎዖ ኦꬂኮ ኢንቴስ ኣይ ዱማ ኣንጆይ ዲዜ? ኣይሲ ጊኮ ናጋራንቻቲካ ሄሳꬆ ኦꬂዛ። ታልዔ ኤኪዲ ዛራና ዳንዳዬቴስ ጊዛይታስ ፃላ ኢንቴ ታልዒኮ ኢንቴ ሃራ ኣይ ዱማ ኣንጆ ዴማኔ? ኣይሲ ጊኮ ናጋራንቻቲካ ኢስቲ ታልዒዳይሳ ሲሬ ዛሪዲ ኤካናስ ናጋራንቻታስ ታልዔቴስ። ጊዶ ኣቲን ፆሲ ባና ጋላቶንታይታሲኔ ኢታታስ ኪያ ጊዲዳ ማላ ኢንቴ ሞርኬታ ሲቂቴ፤ ሎዖ ኦꬂቴ፤ ጉዬፔ ዛሪዲ ኤካናስ ቆፖንታ ዲሼ ታልዔ ኢሚቴ፤ ሄሳንካ ኢንቴስ ኩሼ ዛሮይ ጊታ ጊዳና፤ ቃሴካ ኢንቴ ዎጋ ፆሳ ና ጊዳና። ኢንቴ ኣዋይ ኪያ ጊዲዳ ማላ ኢንቴካ ኪያታ ጊዲቴ። “ኢንቴ ሃራታ ቦላ ፒርዶፍቴ ኢንቴ ቦላካ ፒርዴቴና፤ ኢንቴ ቦላ ፒርዳይ ዳሮንታ ማላ ሃራታ ቦላ ፒርዳ ዳርሶፍቴ፤ ኣሳስ ኣቶ ጊቴ ኢንቴስካ ኣቶ ጌቴታና። ኢሚቴ! ኢንቴስካ ኢሜታና፤ ኢንቴስ ኢንቴ ማኪዳ ሚሻን ሲሚዲ ማኬታና፤ ሃራፔካ ናቂ ባቄቲዲ ዪጌቲ ኩሚዲ ዎራ ጉካናሼ ሎዖ ማኪዛ ሚሻን ማኬቲዲ ኢንቴስ ኢሜታና” ጊዴስ። ቃሴካ ዬሱሲ ኢስታስ ሌሚሶን “ቆቄይ ቆቄ ካሌꬃናስ ዳንዳዪዜ? ካሌꬂኮካ ናምዓቲ ኢሶይ ኢሳራ ኦይኬቲዲ ኦላን ጌሌቴኔ? ታማሬይ ባና ታማርሲዛዴፌ ኣꬌና፥ ጊዶ ኣቲን ሎዔꬂ ታማሪዳ ኣሲ ዉሪ ባ ኣስታማሬ ማላ ጊዴስ። “ኔ ኣይፌ ጊዶን ዲዛ ቱሳ ፄሎንታ ዳሼ ኔ ኢሻ ኣይፌ ጊዶን ዲዛ ቡራ ኣይስ ፄላይ? ኔ ኣይፌን ዲዛ ቱሳ ቤዮንታ ኔ ኢሻ ‘ታኒ ኔ ኣይፌን ዲዛ ቡራ ኣኔ ኬሳይስ ጋናስ ዎስታ ዳንዳያይ?’ ኔኖ ቆꬌፔ ቆሞን ሃንዛይሶ ኮይሮታዳ ኔ ኣይፌን ዲዛ ቱሳ ኬሳ፤ ሄሳፌ ጉዬ ኔ ኢሻ ኣይፌን ዲዛ ቡራ ኬሳናስ ሎዔꬃ ፄላንዳሳ። “ሎዖ ሚꬂ ኢታ ኣይፌ ኣይፌና፤ ቃሴካ ኢታ ሚꬂ ሎዖ ኣይፌ ኣይፌና። ሚꬂ ዉሪካ ባ ኣይፌን ኣይፌን ኤሬቴስ፤ ኣጉንꬃፌ ባላሴ ጌቴቲዛ ሚꬃ ኣይፌይ ማፄቴና፤ ላዴፔ ዎይኔ ኣይፌይ ቃንፄቴና። ሎዖ ኣሲ ባ ዎዝና ኩሚዳ ሎዖ ሚሽ ኬሴስ፤ ኢታ ኣሲካ ባ ዎዝና ኩሚዳ ኢታ ሚሻፌ ኢታ ኬሴስ፤ ኣሲ ዉሪካ ባ ዎዝና ኩሚ ፓላሂዳይሳ ባ ዱናን ሃሳዬስ። “ታኒ ጊዛይሳ ኦꬄኬታ ሺን ኣይስ ታና ‘ጎዶ! ጎዶ!’ ጌቲ? ታኮ ዪዲኔ ታ ቃላ ሲይዲ ፖሊዛይ ዉሪ ኦና ሚሳቲዛኮኔ ታ ኢንቴና ቤሳና፤ ኬꬄ ኬፃናስ ዚቂ ኦꬂ ቦኪዲ ሹቻ ቦላን ባ ኬꬃ ኬፂዳ ኣሳ ሚሳቴስ። ሃሮ ሃꬂ ዪዲ ሄ ኬꬃ ሱጊዴስ፤ ጊዶ ኣቲን ሚኒ ኬፄቲዳ ጊሽ ቃꬃናስ ዳንዳይቤና። *** ጊዶ ኣቲን ታ ቃላ ሲይዲ ፖሎንታ ኣሲ ባ ኬꬄ ሎዔꬂ ባሶንታኔ ጊዶን ሹች ዬጎንታ ኬፂዳ ኣሳ ሚሳቴስ፤ ሃሮይካ ኬꬃ ሱጊን ኬꬃይ ሄራካ ኩንዲዲ ኢታ ላሌꬅ ላሌቲዴስ” ጊ ዮቲዴስ። ዬሱሲ ሄሳ ዉርሲካ ዴሬ ሲንꬃን ዮቲ ዉርሲዳይሳፌ ጉዬ ቂፊርናሆሜ ጊዛሶ ቢ ጌሊዴስ። ሄን ቂፍርናሆሜን ማቶ ሃላቃይ ዴስ፤ ሄ ኣዴዛስ ኢዚ ሲቂዛ ኣሽካራይ ሃርጊዲ ሃይቆስ ሼምፖ ቦላ ዴስ። ኢዚካ ዬሱሳ ጊሽ ሲይዲ “ባ ኣሽካራ ፓꬃና ማላ ዬሱሳ ዎሴሪኬቲ!” ጊዲ ኢሲ ኢሲ ኣይሁዳ ባጋ ኣሳታፔ ጪማታ ዬሱሳኮ ዬዲዴስ። ኪቴቲዲ ቢዳ ኣሳቲ ዬሱሳኮ ዪዲ “ሃይሳ ኣዴዛ ጊሽ ኔ ኣሽካራዛ ፓꬃና ቤሴስ። ኣይስ ጊኮ ሃይሲ ኣዴዚ ኑ ኣሳ ዳሮ ዶሴስ፤ ኑስካ ኣይሁዳ ዎሳ ኬꬄ ኬፂሲዳይ ኢዛ” ጊዲ ሚንꬂ ዎሲዴስ። ዬሱሲካ ኢስታራ ቢዴስ። ዬሱሲ ኣዴዛ ኬꬃኮ ማቲዛ ዎዴ ኣዴዚ ባ ላጌታ ዬሱሳኮ ዬዲዲ “ጎዶ! ኔ ታ ኬꬄ ጌላናስ ቤሴና፤ ታካ ኔና ታ ኬꬄ ጌልꬃናስ ቤሲዛ ኣሲ ጊዶንታ ጊሽ ሃ ያሼ ዳቡሮፓ። ታኒ ኔ ሲንꬃን ቤታናስ ቤሶንታ ኣሳ ጊዲዳ ጊሽ ኔኮ ባቤይኬ፤ ሄሳ ጊሽ ኔኒ ሄን ዳዳ ቃላ ፃላ ጊኮ ታ ኣሽካራይ ፓፃና። ታስካ ታና ኣዛዚዛ ኣሲ ታፔ ቦላራ ዴስ። ታፔ ጋርሳራ ታኒ ኣዛዚዛ ዎታዳራቲ ዴቴስ። ኢሳ ‘ሃያ!’ ጊኮ ዬስ፤ ኢሳ ‘ሄ ባ!’ ጊኮ ቤስ፤ ኣሽካራይካ ‘ሄሳ ኦꬃ!’ ጊኮ ኣዛዜቲዳይሳ ኦꬄስ” ጊዴስ። ዬሱሲካ ኣዴዚ ጊዳይሳ ሲይዲ ኣዴዛ ሃኖቴꬃን ማላሌቲዴስ። ጉዬ ሲሚዲ ባና ካሊዛ ዴራስ “ታ ኢንቴስ ጊዛይ ሃይሳ ማላ ጊታ ኣማኖ ሃራይ ኣቶ ሺን ኢስራዔሌ ናይታ ጊዶንካ ዴማቤኬ” ጊዴስ። ዬሱሳኮ ኪቴቲዳ ኣሳቲ ጉዬ ኪቲዳ ሃላቃሶ ሲሚዳ ዎዴ ኣሽካራያ ፓፂዳይሳ ቤዪዳ ሄሳፌ ጉዬን ዬሱሲ ጋምዖንታ ዲሼ ናይኔ ጌቴቲዛ ካታማ ባና ካሊዛይታራኔ ዳሮ ዴሬራ ኢሲፌ ቢዴስ። ኢዚ ቢዲ ካታማ ጌሊዛ ሚፃ ጋኪሺን ሄ ካታማይፔ ዳሮ ኣሳይ ኣሃ ቶኪ ኤኪዲ ኬዚ ዎꬊዴስ። ሃይቂዳይስ ባ ኣዬይስ ኢዚ ሜፂ ኢሲኖ። ኣዬይስካ ኣዚናይ ባዋ፤ ካታማፔ ዳሮ ኣሳይ ኢዚራ ኢሲፌ ዴስ። ጎዳይካ ኢዞ ቤዪዳ ዎዴ ኢዚስ ሚቼቲዲ “ኣይኮይ ባዋ፤ ዬኮፋ!” ጊዴስ። ሺቂዲኔ ኣሃ ቶኪዳ ሃላ ቦቺን ኣሃ ቶኪዳይቲ ሲቲ ጊ ኤቂዳ። ዬሱሲካ “ሃይሶ ናዞ ኔና ጋይስ ዴንዳ!” ጊዴስ። ሃይቂዳ ናዚካ ሱሪ ኡቲዲ ሃሳያ ኦይኪዴስ። ዬሱሲካ ናዛ ኣዬይስ ኤፊ ኢሚዴስ። ኣሳይ ዉሪካ ኬሂ ባቢዲ ፆሳ ጋላቲሼ “ጊታ ናቤይ ኑ ጊዶፌ ዴንዲዴስ፤ ፆሲካ ሃይሳ ዴሬዛ ዪዲ ቤይዴስ” ጊዴስ። ሃይሲ ዬሱሳ ጊሽ ሃሳዬቲዛ ሎዖ ሃሳያይ ኩሜꬃ ዩሁዳኒኔ ዩሁዳ ዩሾን ዲዛ ዴሬታን ኬዚዴስ። ፃማቂዛ ዮሃኒሳ ካሊዛይቲካ ሃይሳ ዉርሲ ዮሃኒሳስ ዮቲዳ። ዮሃኒሲካ ኢስታ ጊዶፌ ናምዓታ ፄይጊዲ፥ “ኢዚ ያና ጌቴቲዲ ሃሳዬቲዛይስ ኔኔዬ? ሃራ ኣስ ናጊኖ? ጊ ኦይቺቴ” ጊዲ ጎዳኮ ዬዲዴስ። ቢዳ ኣሳቲ ዬሱሳኮ ጋኪዲ “ፃማቂዛ ዮሃኒሲ ‘ኢዚ ያና ጌቴቲዲ ሃሳዬቲዛይሲ ኔኔዬ? ሃራ ኣስ ናጊኖ?’ ጊዲ ኔኮ ኑና ዬዲዴስ” ጊዳ። ሄ ዎዴ ዬሱሲ ዳሮ ኣሳ ዋዬፔ፥ ሃርጌፌኔ ቱና ኣያናታፔ ፓꬂዴስ። ዳሮ ቆቄታ ኣይፌይካ ፄሌስ። ዮሃኒሲ ኪቲን ኢዛኮ ዪዳይታ “ቢዲ ኢንቴ ኢንቴ ኣይፌራ ቤዪዳይሳኔ ሲዪዳይሳ ዮሃኒሳስ ዮቲቴ። ኣይፌ ቆቄቲ ፄሌቴስ፤ ቶሆ ዎቤቲ ሱሬ ሃሙቴቴስ፤ ኢንቺራቻ ሃርጊዛይቲ ፓፂዳ፤ ቱሌቲ ሲዪዳ፤ ሃይቂዳይቲ ሃይቆፔ ዴንዲዳ፤ ማንቆታስ ሚሺራቾ ቃላይ ዮቴቴስ። ታናን ꬉጴቶንታ ኣሲ ዉሪካ ኣንጄቲዳይሳ” ጊዴስ። ዮሃኒሲ ኪቲዳ ኣሳቲ ዬሱሳ ኣቻፌ ቢዳይሳፌ ጉዬ ዬሱሲ ዳሮ ኣሳስ ዮሃኒሳ ጊሽ “ኢንቴ ኣይ ቤያናስ ባዞ ኬዚዴቲ? ጫርኮይ ሄኔ ሃኔ ቃꬄꬂዛ ሾምቦቆ ቤያናሴ? ኣይ ቤያናስ ኬዚዴቲ? ሎዒዛ ማይዖ ማይዒዳ ኣስ ቤያና ኬዚዴቲ? ሎዖ ማይዖ ማይዒዲ ዋሪፅ ጊዛይቲ ኢሻሎ ዱሳ ዲዛይቲ ካዎ ኬꬃን ዴቴስ። ሂስቲኮ ኣይ ቤያናስ ኬዚዴቲ? ናቤ ቤያናሴ? ኤ ታ ኢንቴስ ቱማ ጋይስ፤ ኢንቴ ኬዚዳይ ናቤፔ ኣꬊዛዴ ቤያናሳ። ፆሳ ቃላን ‘ኔ ባና ኦጌ ኔስ ባሲ ሎዔꬃና ኪቴቲዳ ኣስ ታ ኔፔ ሲንꬃራ ዬዳና’ ጌቴቲዲ ኢዛ ጊሽ ፃፌቲዳይስ ኢዛኮ። “ታኒ ኢንቴስ ጊዛይ ማጫሳፔ ዬሌቲዳ ኣሳ ጊዶን ዮሃኒሳፔ ኣꬊዛዴይ ኦኒካ ዴና፤ ፆሳ ካዎቴꬃን ጊዲኮ ኣሳ ኡባፌ ጉꬅ ጌቴቲዳ ኣሲ ዮሃኒሳፔ ኣꬋና” ጊ ዮቲዴስ። ቃራፃ ቃንፂሲዛይቲካ ኣቶንታ ሃይሳ ዬሱሳ ቃላ ሲዪዳይቲ ዉሪካ ዮሃኒሳ ኩሼን ፃማቄቲዲ ፆሳስ ቤሲዛ ቦንቾ ኢሚዳ። ፋርሳዌቲኔ ሙሴ ዎጋ ኤራንቻቲ ዮሃኒሳ ኩሼን ፃማቄቶንታ ጊሽ ፆሲ ኢስታስ ዋና ቆፋ ኦꬂዲ ሺሺዳይሳ ሂራይሲዳ። ቃሴካ ዬሱሲ ዛሪዲ “ሂስቲኮ ሃዒ ዬሌታ ኣዛን ሌሚሶ? ኢስቲ ኣይ ሚሳቲዞ? ጊያን ኡቲዲ ባ ጊዶን ኢሶይ ኢሳራ ፄይጌቲዲ ‘ኢንቴስ ኑኒ ዲꬅ ዲፂዶስ ሺን ዱሪቤኬታ፤ ዚላሊስ ዚላሊዶስ ሺን ዬኪቤኬታ፤ ጊዛ ናይታ ሚሳቴቴስ’ ጊዴስ። ኣይስ ጊኮ ፃማቂዛ ዮሃኒሲ ካꬅ ሞንታኔ ዎይኔፔ ኦሴቲዳ ጫጄ ኡዮንታ ዪን ‘ዳይዳንꬂ ኢዛ ቦላ ዴስ’ ጊዴታ። ኣሳ ናይ ቃሴ ሚሼኔ ኡዪሼ ዪን ‘ጋንጃማኔ ኡሻንቻ፤ ቃራፃ ሺሺዛይታራኔ ናጋራንቻታራ ላጌቴስ’ ጊዴታ። ሄሳ ጊሽ ኤራቴꬃ ቱማቴꬃይ ኢዚ ናይታ ኡባታ ኣቻን ኣማኔቲዴስ” ጊዴስ። ሄሳፌ ጉዬ ፋርሳዌታፔ ኢሲ ኣሲ ዬሱሳ ቁማ ማናስ ባ ኬꬄ ፄይጊን ዬሱሲ ፄይጊዳ ፋርሳዌ ኬꬃ ቢዲ ኡቲዴስ። ሄ ካታማን ዲዛ ኢሲ ናጋራንቻ ማጫስ ዲዛራ ዬሱሲ ፋርሳዌ ኬꬃን ቁማ ማዳ ቦላን ዲዛይሳ ሲያዳ ኢሲ ኣልባስፂሮሴ ቢልቃፄ ሺቶ ኤካ ያዱስ። ያዳኔ ዬሱሳፔ ጉዬራ ኢዛ ቶሆ ኣቻን ኤቃዳ ዬካሼኔ ባ ኣፉንꬃን ኢዛ ቶሆ ጫጲሳዳ ባ ሁዔ ቢናናራ ቁጫሼኔ ዬራሼ ሺቶ ቲያዱስ። ዬሱሳ ቁማስ ፄይሲዳ ፋርሳዌይካ ሄሳ ቤዪዲ “ሃይሲ ኣዴዚ ናቤ ጊዲዳኮ ሃና ኢዛ ቦቺዳ ማጫሳያ ኢዛ ኦናኮኔ ኣይ ኦꬂዛ ኣሳኮኔ ኤራናኮ ሺን፤ ኢዛ ናጋራንቻኮ ሺን” ጊዲ ባ ዎዝናን ቆፒዴስ። ዬሱሲ “ሲሞና! ኔስ ታ ዮታናዚ ዴስ” ጊዴስ። ሲሞናይካ “ኣስታማሬ! ኤሮ ዮታ” ጊዴስ። ዬሱሲ ዛሪዲ “ኢሲ ሚሼ ታልዔ ኢሚዛዴፌ ታልዔ ኤኪዳ ናምዑ ኣሳቲ ዴቴስ፤ ኢስታፌ ኢሳ ቦላ ኢቻሹ ፄት ዲናሬይ ዴስ፤ ናምዓንꬆዛ ቦላ ኢቻሹ ታሙ ዲናሬይ ዴስ። ኢስታስ ቃንፂዛ ሚሺ ꬋዪን ታልዔ ኢሚዳይሲ ናምዓታ ኣጮዛ ዉርሲካ ማሪዴስ። ሂስቲኮ ሃ ናምዓታፔ ሃ ታልዔ ኢሚዳይሳ ዳርሲ ዶሳናይ ኣዋይሴ?” ጊዴስ። ሲሞናይካ ዛሪዲ “ዳሮ ኣጮይ ማሬቲዳይሳ ጋዳ ቆፓይስ” ጊዴስ። ዬሱሲካ “ቱሙ ፒርዳዳሳ” ጊዴስ። ሄ ማጫሳይኮ ዩዪዲ ሲሞና “ሃኖ ማጫሳዮ ፄላይ? ታ ኔ ኬꬄ ጌሊን ኔ ታ ቶሆስ ሃꬄ ሺሻቤካ፤ ኢዛ ጊዲኮ ታ ቶሆ ባ ኣፉንꬃን ጫጲሳዳ ባ ሁዔ ቢናናራ ቁጫዱስ። ኔኒ ኡባካ ታና ዬራቤካ፤ ኢዛ ግዲኮ ታ ጌሎሶፔ ኦይካዳ ታ ቶሆ ዬሮ ኣጋቤኩ። ኔ ታ ሁዔ ዛይቴ ቲያቤካ ሺን ኢዛ ጊዲኮ ታ ቶሆ ሺቶ ቲያዱስ። “ሄሳ ጊሽ ታ ኔና ጊዛይ ኢዛ ታና ኬሃ ዶሲዳ ጊሽ ኢዛ ባ ዳሮ ናጋራፔ ማሬታዱስ፤ ጉꬃራ ማሬቲዛ ኣሳ ሲቆይካ ጉꬃ” ጊዴስ። ዬሱሲ ማጫሳዮ “ኔ ናጋራፔ ማሬታዳሳ” ጊዴስ። ኢዛራ ኢሲፌ ማዳን ኡቲዳ ኢማꬃቲካ “ሃይሲ ናጋራ ማሪዛይ ኢዚ ኦኔ?” ጊዲ ባ ዎዝናራ ቆፒዳ። ዬሱሲካ ማጫሳዮ “ኔና ኔ ኣማኖይ ኣሺዴስ፤ ሳሮን ባ!” ጊዴስ። ሄሳፌ ጉዬ ዬሱሲ ፆሳ ካዎቴꬃ ሚሺራቾ ሳባኪሼ ዱማ ዱማ ካታማታ ጊዶራኔ ጉታታ ጊዶራ ኣꬊዴስ። ኣꬊዲ ቢዛ ዎዴ ኢዛ ካሊዛ ታማኔ ናምዓቲ ኢዛራ ዴቴስ። ቃሴካ ቱና ኣያናፔኔ ኢታ ሃርጌፌ ፓፂዳ ኢሲ ኢሲ ማጫሳቲ ኢዛራ ዴቴስ። ኢስቲካ ላፑን ቱና ኣያናይ ኢዚፔ ኬዚዳ ማግዳሌ ጌቴቲዛ ዴሬፔ ዪዳ ማራሞ፥ ካዎ ሄርዶሳሶን ኦꬂዛ ኩዛ ማቾ ዮሃኖ ቃሴካ ሶሲኖኔ ሃራ ዳሮ ማጫሳቲ ዴቴስ። ኢስቲካ ባስ ዲዛ ሚሻራ ዬሱሳስ ኦꬂዛይታ። ዳሮ ዴሬይ ኢሲፌ ሺቂዲ ዲሺን ቃሴካ ኣሳይ ዱማ ዱማ ካታማፔ ኢዛኮ ዎꬊዛ ዎዴ ዬሱሲ ሌሚሶራ ታማርሲሼ፥ “ኢሲ ጎሻንቻይ ዜሬꬂ ዜራናስ ኬዚዴስ፤ ኢዚ ዜሪሺን ባጋይ ኦጌን ዎꬊዲ ኣሳ ቶሆን ዬꬌቲዴስ፤ ሳሎ ካፎቲካ ዪዲ ማፂ ሚዳ፤ ኢሲ ዜሬꬃይ ሹቻ ጋዴን ዎꬊዲ ሄራካ ጫሪዴስ፤ ጋዴዚካ ሜላ ጋዴ ጊዲዳ ጊሽ ኤሌ ሜሊቺዴስ። ቃሴካ ሃራ ዜሬꬂ ኣጉንꬃ ጊዶን ዎꬊዴስ፤ ኣጉንꬃይካ ኢዛራ ኢሲፌ ዲጪዲ ጫሬቻይካ ዲጮንታ ማላ ጩሊዴስ። ቃሴካ ሃራ ዜሬꬃይ ሎዖ ኣራዳ ጋዴን ዎꬊዴስ፤ ጫሪዳ ዎዴካ ፄቱ ኩሼ ኣይፊዴስ” ጊዴስ። ዬሱሲ ሃሳያ ዉርሲዲ ቃላ ꬎቁ ሂስቲዲ “ሲዪዛ ሃይꬂ ዲዛ ኣሲ ሲዮ!” ጊዴስ። ዬሱሳ ካሊዛይቲ “ዜሬꬃ ሌሚሶዛስ ቢርሼꬅ ኢማ” ጊዲ ኦይቺን፥ ኢዚካ ኢስታስ “ፆሳ ካዎቴꬃ ፁራ ኤሮይ ኢንቴስ ኢሜቲዴስ፤ ሃራታስ ጊዲኮ ሌሚሶራ ዮታይስ ቃሴካ ሃራቲ ቤዪዲ ዎዝናን ዎꬆንታ ማላኔ ሲይዲ ዩሺ ቆፖንታ ማላ ሃኒዴስ። “ዜሬꬃ ሌሚሶይካ ሃይሳ፤ ዜሬꬅ ጌቴቲዳይሲ ፆሳ ቃላ። ኦጌ ላንቄን ዎꬊዳይሲ ቃላ ሲዪዛይታ፤ ጊዶ ኣቲን ኢስቲ ኣማኒዲ ኣቶንታ ማላ ፃላዔይ ዪዲ ቃላ ኢስታ ዎዝናፔ ኤኪቺዛይታ። ሹቻ ቦላ ዎꬊዳይቲካ ቃላ ሲይዲ ኡፋይሳራ ኤኪዛይታ፤ ኢስቲካ ሃዒስ ኣማኔቴስ ኣቲን ሜቶይ ኢስታ ቦላ ጋኪዛ ዎዴ ፃጶ ዬዶንታ ጊሽ ኤሌራ ኣማኖ ካዲዛይታ። ኣጉንꬃ ጊዶን ዎꬊዳይቲ ቃላ ሲዪዛይታ፤ ሄይቲካ ሃይሳ ሃ ኣላሜ ቆፋኒኔ ኣቆታን፥ ሃይሳ ቢታ ቦላ ዱሳ ሎዔቴꬃን ጩሌቲዲ ሎዔꬂ ኣይፌ ኢሜቴና። ኣራዳ ቢታን ዎꬊዳይሲ ቃላ ሱሬኒኔ ሎዖ ዎዝናን ሲይዲ ናጊዛይታኔ ዳንዳያን ሚኒዲ ኣይፌ ኣይፊዛይታ። “ፖዖ ፖዒሲዲ ባꬃ ጊዶን ዎይኮ ኣርሳ ጊዶን ዎꬂዛ ኣሲ ባዋ፤ ጊዶ ኣቲን ኬꬄ ጌሊዛ ኣሳስ ፖዓና ማላ ቆንጬሶን ዎꬄቴስ። ቆቴቲዲ ቆንጬ ኬዞንታይ፤ ፖዖን ኬዚዲ ኤሬቶንታ ጌማን ኣታና ሚሺ ዴና። “ሄሳ ጊሽ ኢንቴ ሲዪዛይሳ ናጌቲ ሲዪቴ፤ ዲዛ ኣሳስ ጉጄታና ባይንዳዴስ ኡባፌ ኢዛስ ዲዛ ሚሳቲዛራካ ኤኬታይቻና” ጊ ዛሪዴስ። ሄሳፌ ጉዬ ዬሱሳ ኣያኔ ኢዛ ኢሻቲ ዬሱሳኮ ዪዳ። ጊዶ ኣቲን ኣሳ ዳሮቴꬃፌ ዴንዲዳይሳን ኢዛኮ ሺቃናስ ዳንዳዪቤቴና። ሄ ዎዴ ኣሳይ ዬሱሳስ “ኔ ኣዬያኔ ኔ ኢሻቲ ኔና ቤያናስ ኮይዲ ካሬን ኤቂዳ” ጊዲ ዮቲዳ። ዬሱሲካ ዛሪዲ “ታ ኣያኔ ታ ኢሻቲ ፆሳ ቃላ ሲይዲ ናጊዛይታ” ጊዴስ። ኢሲ ጋላስ ዬሱሲ ባና ካሊዛይታራ ዎጎሎ ጊዶ ጌሊዲ “ኣባፌ ሄ ፒንꬅ ፒኖስ” ጊዴስ። ኢስቲካ ፒኒሺን ኣባ ቦላ ዳምባላይ ዴንዲዲ ዋይሲዛ ዎዴ ዬሱሲ ꬊስኪዴስ። ሃꬃይካ ዎጎሎዛ ጊዶ ጌሊን ኣሳይ ዳሮ ሜቶቴቲዴስ። ዬሱሳ ካሊዛይቲ ኢዛኮ ሺቂዲ “ጎዶ! ጎዶ! ኑ ዉራና ሃኖስ” ጊዲ ዬሱሳ ꬊስኮፌ ዴንꬂዳ። ኢዚካ ቤጊዲ ጫርኮዛኔ ኣባ ዳምባላ ሴሪን ጫርኮይኔ ኣባ ዳምባላይ ጮዑ ጊዴስ። ኢዚካ ባና ካሊዛይታ “ኢንቴ ኣማኖይ ኣዋ ቢዴ?” ጊዴስ። ኢስቲካ ባ ጊዶን ባቢሼኔ ማላሌቲሼ “ጫርኮኔ ሃꬄ ኣዛዚዛይ፤ ኢስቲካ ኢዛስ ኣዛዜቲዛይ ኢዚ ኦኔ?” ጊዳ። ኢዛፔ ጉዬ ጋሊላፔ ሄ ፒንꬃን ዲዛ ጌርጌሴኖኔ ጌቴቲዛ ዴሬ ዎጎሎራ ፒኒዳ። ዬሱሲ ዎጎሎዛፔ ጋዴን ዎꬊዳ ዎዴ ዳይዳንꬂ ኢዛ ቦላ ዲዛ ኢሳዴይ ካታማፔ ኬዚዲ ኢዛ ዴሚዴስ። ሄ ኣዴዚ ዳሮ ዎዴ ማይዖ ማይዖንታ ካሎ ዲዛዴኔ ኬꬃን ኣቆንታ ዱፎ ባስ ኣቆሶ ኦꬂዳ ኣሳ። ዬሱሳ ቤዪዳ ዎዴ ዋሲሼ ዬሱሳ ሲንꬃን ኩንዲዴስ፤ ቃላ ꬎቁ ሂስቲዲ “ቦንቾ ፆሳ ና ዬሱሳ! ታሲኔ ኔስ ኣይ ጋይቶቴꬂ ዲዜ? ኔ ታና ዋይሶንታ ማላ ታ ኔና ዎሳይስ” ጊዴስ። ቱና ኣያናይ ሄሳ ጋናስ ዳንዳዪዳይ ኣዴዛፔ ኬዛና ማላ ዬሱሲ ኣዛዚዳ ጊሻሳ። ቱና ኣያናዚካ ዎዴን ዎዴን ዴንዲዛ ጊሽ ኣዴዚ ሳንሳላታኒኔ ቢራታን ቶሆ ቃቺ ናጊንካ ቃሼቲዳ ሳንሳላታ ዱꬄሬꬂዲ ኢዛ ቦላ ዲዛ ዳይዳንꬃይ ኢዛ ዱጌ ባዞ ዛሪ ኤፌስ። ዬሱሲ “ኔ ሱንꬂ ኦኔ?” ጊዲ ኦይቺዴስ፤ ኢዚካ ዳሮ ዳይዳንꬃቲ ኢዛን ጌሊዲ ዲዛ ጊሽ ታ ሱንꬂ “ሌጎኔ” ጊዴስ። ዳይዳንꬃቲካ ባና ዉርሴꬂ ባይንዳ ጪማ ኦላን ዬጎንታ ማላ ሚንꬂዲ ዎሲዳ። ሄንካ ዙማ ቦላ ዳሮ ጉዱንꬂ ሄሜቴስ፤ ዳይዳንꬃቲ “ጉዱንꬃ ዉዴዛን ጌሊቴ” ጊዲ ኣዛዛና ማላ ዎሲን ዬሱሲ “ኤሮ ጌሊቴ!” ጊዴስ። ዳይዱንꬃቲ ኣዴዛፔ ኬዚዲ ጉዱንꬃታን ጌሊዳ። ጉዱንꬃቲ ኣፎዛ ዱጉንꬃራ ቢቻርሼ ቢዲ ኣባን ጌሊዲ ኣባን ሚቴቲዳ። ሄሚዛይቲ ሃኒዳይሳ ቤዪዳ ዎዴ ቤሮቲ ቢዲ ካታማ ኣሳሲኔ ዴሬ ኣሳስ ዮቲዳ። ሃንዳይሳ ቤያና ጊዲ ኣሳይ ባ ዲዛሶፔ ዬሱሳኮ ዪዴስ። ዳይዳንꬃይ ኢዛፔ ኬዚዳ ኣዴዚካ ዎዝናይ ካሃይ ሲሚን ኣፋላ ማዒዲ ዬሱሳ ቶሆ ጊዶን ኡቲዳይሳ ቤዪዲ ባቢዳ። ዳይዳንꬃን ኦይኬቲዳ ኣዴዚ ፓፂሺን ቤዪዳይቲ ኢዚ ዋኒ ፓፂዳኮኔ ዴሬዛስ ዮቲዳ። ጌርጌሴኖኔ ማታን ዲዛ ኣሳይ ኬሂ ባቢዳ ጊሽ ዬሱሳ “ሃይሳፌ ኪቻ!” ጊዲ ዎሲዳ፤ ኢዚካ ዎጎሎዛን ጌሊዲ ሲሚ ቢዴስ። ዳይዳንꬃይ ኢዛፔ ኬዚዳ ኣዴዚ ዬሱሳራ ኢሲፌ ዳና ማላ ዎሲዴስ። ጊዶ ኣቲን ዬሱሲ ኢዛ “ኔሶ ሲማዳ ፆሲ ኔስ ኦꬂዳ ጊታ ሚሽ ዮታ” ጊዲ ሞይዚዴስ። ኣዴዚካ ዬሱሲ ኢዛስ ኦꬂዳ ጊታ ሚሽ ባ ካታማን ዲዛ ኣሳስ ኡባስ ቆንጬን ዮቲሼ ቢዴስ። ኣሳይ ዉሪ ዬሱሳ ዩሳ ናጊሼ ጋምዒዳ ጊሽ ኢዚ ሲሚሺን ኡፋይሳን ሞኪ ኤኪዳ። ሄ ዎዴ ኢያዒሮሳ ጌቴቲዛ ኣይሁዳ ዎሳ ኬꬄ ሃላቃይ ዪዲ ዬሱሳ ቶሆ ቦላ ኩንዲዲ ባሶ ባና ማላ ዎሲዴስ። ኢዚ ሄሳꬆ ኦይቺዳይ ኢዛስ ታማኔ ናምዑ ላይꬅ ኩሚዳ ኢሲ ማጫ ናይ ሳኬታዳ ሼምፖ ቦላ ዲዛ ጊሻሳ። ኢዚ ሄ ቡሳን ዲሺን ዴሬይ ዳሪዲ ባ ጊዶን ሱጌቲዲ ኢዛ ኬሂ ኡንዒሲዴስ። ታማኔ ናምዑ ላይꬅ ሱꬂ ኢዚፔ ጉኪሺን ዲዛ ኢሲ ማጫሳያ ባስ ዲዛ ሚሻ ዉርሳ ꬋሌ ኤሪዛ ኣሳታስ ኢማ ዉርሲን ኢዞ ፓꬃናስ ዳንዳዪዳ ኣሲ ኢሳዴይካ ባዋ። ኢዛካ ጉዬራ ሺቃዳ ዬሱሳ ኣፋላ ማጫራታ ቦቻዱስ፤ ኢዚፔ ጉኪዛ ሱꬃይ ሄራካ ኤቂ ኣጊዴስ ዬሱሲካ “ታና ቦቺዳይ ኦኔ?” ጊዴስ። ዉሪካ ኑኒ ቦቺቤኮ ጊ ካዲዳ ዎዴ ጴፅሮሲ ዛሪዲ “ጎዶ! ኣሲ ዉሪ ዩዪ ኣꬊዲ ኔና ሱጌሬꬂዲ ኡንዒሴስ” ጊዴስ። ጊዶ ኣቲን ዬሱሲ “ኣሲ ታና ቦቺዴስ፤ ዎልቃይ ታፔ ኬዚዳይሳ ታ ኤራይስ” ጊዴስ። ማጫሳያ ኤሬቶንታ ቆቴታዳ ባናስ ዳንዳዮንታይሳ ኤራዳ ኮኮራሼ ያዳ ዬሱሳ ሲንꬃን ኩንዳዱስ። ኢዛካ ዬሱሳ ዋና ቦቺዳኮኔ ቃሴካ ኤሌራ ዋና ፓፂዳኮ ኡባ ኣሳ ሲንꬃን ዮታዱስ። ኢዚካ “ታ ናዬ! ኔ ኣማኖይ ኔና ፓꬂዴስ፤ ሳሮን ባ!” ጊዴስ። ዬሱሲ ቡሮ ማጫሳይስ ሃሳያ ቦላ ዲሺን ኣይሁዳ ዎሳ ኬꬄ ሃላቃ ኢያዒሮሳ ኬꬃፌ ኢሲ ኣሲ ኢያዒሮሳስ “ኔ ናያ ሃይቃዱስ፤ ሄሳ ጊሽ ሃይሳፌ ጉዬ ኣስታማሬዛ ሜላ ዳቡርሶፋ!” ጊዴስ። ዬሱሲ ሄሳ ሲይዲ ኢያዒሮሳ “ኣይኮይ ባ፤ ባቦፋ! ኣማና ኣቲን ኔ ናያ ፓፃና” ጊዴስ። ዬሱሲ ኢያዒሮሳ ኬꬄ ጌሊዛ ዎዴ ጴፅሮሳ፥ ዮሃኒሳኔ ያቆቤ ቃሴካ ናይ ኣዋፔኔ ኣዬዪፔ ኣቲን ሃራይ ኦኒካ ኢዛራ ጌላና ማላ ኮይቤና። ሄ ዎዴ ኣሳይ ዉሪ ናይስ “ዉ ዉይ!” ጊ ዋሲ ዬኪሺን ዬሱሲ “ዬኮፍቴ ኢዛ ኢቻዱስ ኣቲን ሃይቃቤኩ” ጊዴስ። ኣሳይካ ናያ ሃይቂዳይሳ ኤሪዛ ጊሽ ዬሱሳ ቦላ ሚጪዴስ። ጊዶ ኣቲን ኢዚ ናይ ኩሼ ኦይኪዲ “ታ ናዬ! ዴንዳ!” ጊዴስ። ናይስ ሼምፖይካ ሲሚዴስ። ሄራካ ዴንዳ ኤቃዱስ፤ ዬሱሲካ ኢዚስ ሚዛ ሚሽ ኢማና ማላ ኣዛዚዴስ። ናዮ ዬሊዳይቲካ ማላሌቲዳ። ጊዶ ኣቲን ኢዚ ሃኒዳይሳ ኦናስካ ዮቶንታ ማላ ኣዛዚዴስ። ዬሱሲካ ታማኔ ናምዑ ሃዋሬታ ኢሲፌ ፄይጊዲ ዳይዳንꬃታ ኬሳና ማላኔ ሃርጌፌ ፓꬃና ማላ ኢስታስ ዎልቃኔ ጎዳቴꬅ ኢሚዴስ፡ ቃሴካ ፆሳ ካዎቴꬃ ዮታናሲኔ ሃርጊዛይታ ፓꬃናስ ኢስታ ኪቲዴስ። ኢስታስ “ኦጌ ቢሼ ጉፌ ዎይኮ፥ ቃራፂቴ ዎይኮ፥ ቁማ ዎይኮ፥ ሚሼ ዎይኮ ናምዑ ማይዖ ኦይኪ ባናስ ኮሼና። ኢንቴካ ሄ ካታማይፔ ኬዛና ጋካናስ ኮይሮ ጌሊዳ ኦና ኬꬃንካ ጊዲን ሄን ጋምዒቴ። ካታማ ኣሳይ ኢንቴና ሞኪ ኤኮንታ ኢፂኮ ሄ ካታማይፔ ኬዚዲ ኢንቴና ሞኮንታይታስ ማርካ ጊዳና ማላ ኢንቴ ቶሆን ዲዛ ጉዱላ ፒቲዲ ኬዚቴ” ጊዴስ። ኢስቲካ ጎዳይ ጊዳ ማላ ኬዚዲ ሚሺራቾ ቃላ ዮቲሼኔ ሃርጋንቻታ ፓꬂሼ ጉታን ጉታን ዩዪዳ። ሄ ዎዴ ኢሲ ኢሲ ኣሳቲ “ዮሃኒሲ ሃይቆፔ ዴንዲዴስ” ባጋይቲ “ኤላሲ ኬዚዲ ቤቲዴስ።” ቃሴ ባጋይቲ “ቤኒ ናቤታፔ ኢሶይ ሃይቆፔ ዴንዲዴስ” ጊዲ ሃሳዬቲዛ ጊሽ ዩሁዳ ቢታ ሃሪዛ ሄርዶሲ ሄሳ ሲይዲ ሃኒዛ ሚሻን ባ ዎዝናን ሜቶቴቲዴስ። *** ሄርዶሲካ “ታኒ ኢዛ ቆꬌ ቃንፂዳ ፃማቂዛ ዮሃኒሲ ሃይቂዴስ። ሂስቲን ኢዛ ጊሽ ሃይሳ ማላ ሃሳዬቲሺን ታ ሲዪዛይስ ኢዚ ኦኔ?” ጊዲ ኢዛ ባ ኣይፌራ ቤያና ኮይዴስ። ሃዋሬቲካ ሲሚዲ ኢስቲ ኦꬂዳይሳ ዉርሲ ዬሱሳስ ዮቲዳ። ኢዚካ ኢስታ ፃላ ባናራ ኤኪዲ ቤቴሳይዳ ጌቴቲዛ ፖቄꬃን ዲዛ ካታማ ቢዴስ። ጊዶ ኣቲን ዳሮ ኣሳይ ሄሳ ኤሪዲ ኢስታ ካሊዴስ። ኢዚካ ኢስታ ሞኪ ኤኪዲ ፆሳ ካዎቴꬃ ጊሽ ዮቲዴስ። ቃሴካ ሃርጌፌ ፓꬃናስ ቤሲዛይታ ፓꬂዴስ። ጋዴይ ሌምዒሺን ታማኔ ናምዑ ሃዋሬቲ ኢዛኮ ሺቂዲ “ኑኒ ዲዛይ ባዞ ቢታን ጊዲዳ ጊሽ ኣሳይ ቢዲ ባስ ኣቃናሶኔ ሚዛ ሚሽ ኮያና ማላ ኣሳ ሞይዛ” ጊዳ። ጊዶ ኣቲን ኢዚ ኢስታስ ዛሪዲ “ኢንቴ ኢስታስ ሚዛዝ ኢሚቴ” ጊዴስ። ኢስቲካ “ኑስ ኢቻሹ ኡኬꬃፌኔ ናምዑ ሞሌፔ ሃራይ ባ። ሃ ኣሳስ ጊዲዛ ካꬅ ኮሺኮ ሻማናስ ቤሴስ” ጊዳ። ዬሱሲካ ባና ካሊዛይታ “ኣሳ ኢቻሹ ታሙ፥ ኢቻሹ ታሙ ሂስቲ ሻኪ ሻኪ ኡቲሲቴ” ጊዴስ። ሄንካ ኢቻሹ ሺ ጊዲዛ ኣቱማሳይ ዴስ። ዬሱሳ ካሊዛይቲካ ዬሱሲ ኣዛዚዳ ማላ ኣሳ ዉርሲ ኡቲሲዳ። ዬሱሲካ ኢቻሹ ኡኬꬃኔ ናምዑ ሞሌታ ኦይኪዲ ፑዴ ሳሎ ፄሊዲ ፆሳ ጋላቲዴስ። ኢዚካ ኡኬꬃ ሜንꬂዲ ኣሳ ጋꬃና ማላ ባና ካሊዛይታስ ኢሚዴስ። ኣሳይ ዉሪካ ሚዲ ካሊዴስ። ዬሱሳ ካሊዛይቲካ ኣሳፔ ኣቲዳ ታማኔ ናምዑ ሌማቴ ኩሜꬅ ማዳፌ ዴንꬂዳ። ኢሲ ጋላስ ዬሱሲ ባርካ ዎሲሺን ኢዛ ካሊዛይቲ ኢዛኮ ዪዳ። ኢዚካ ኢስታ “ኣሳይ ታና ኦና ጊዜ?” ጊዲ ኦይቺዴስ። ኢስቲካ ኢዛስ “ኢሲ ኢሲ ኣሳይ ፃማቂዛ ዮሃኒሳ፤ ባጋይቲ ኤላሳ፤ ሃራቲ ቃሴ ቤኒ ናቤታፔ ኢሶይ ሃይቆፔ ዴንዲዴስ ጌቴስ” ጊዳ። ኢዚካ ኢስታ “ኢንቴች ታና ኦና ጌቲ?” ጊዲ ኦይቺዴስ። ጴፅሮሲካ “ኔኒ ፆሳፌ ኪቴቲዳ ኪርስቶሳ” ጊዲ ዛሪዴስ። ዬሱሲካ ኢስታ “ሃይሳ ኦናስካ ዮቶፒቴ” ጊዲ ሚንꬂ ዮቲዲ ቃሴካ “ኣሳ ናይ ዳሮ ዋዬ ኤካናስ ቤሴስ፤ ዴሬ ጪማታን፥ ቄሴ ሃላቃታኒኔ ሙሴ ዎጋ ፃፊዛይታን ኢፄታናኔ ኢስታ ኩሼን ሃይቃናሲኔ ሄꬓንꬆ ጋላሳን ሃይቆፔ ዴንዳና” ጊዴስ። ቃሴካ ኡባስ “ባ ሼምፖ ኣሻና ጊዛ ኣሲ ዉሪ ꬋይሳና ሺን ባ ሼምፖ ታ ጊሽ ጊዲ ꬋይሲዛ ኣሲ ኣሻና። ሄሳ ጊሽ ታና ካላና ኮዪዛ ኣሲ ዲኮ ባና ካዶ፤ ኡባ ጋላስ ባ ማስቃሌ ቶኪዲ ታና ካሎ። *** ኣሲ ኣላሜ ጎዓ ሙሌ ዴሚዲ ባ ሼምፖ ꬋይሲኮ ኣዛ ጎዓይ ዲዜ? ኦኒካ ታናኒኔ ታ ቃላን ዬላቲኮ ኣሳ ናይ ባ ቦንቾራ፥ ኣዋ ቦንቾራኔ ጌሻ ኪታንቻታ ቦንቾራ ዪዛ ዎዴ ታኒ ኢዛን ዬላታና። ታ ኢንቴስ ቱሙ ጋይስ፤ ሃይሳን ኤቂዳ ኣሳፔ ሃይቃናፔ ሲንꬃን ፆሳ ካዎቴꬅ ቤያና ኢሲ ኢሲ ኣሳቲ ዴቴስ” ጊዴስ። ዬሱሲ ሄሳ ጊዳ ኦሱፑን ጋላሳ ማላፔ ጉዬ ዎሳናስ ዙማ ቦላ ኬዚዴስ። ቢሼ ባናራ ጴፅሮሳ፥ ዮሃኒሳኔ ያቆቤ ኤኪ ቢዴስ። ኢዚ ዎሲሺን ኢዛ ኣይፌሶይ ላሜቲዴስ። ኢዛ ሜꬋይካ ዎልቃንꬃ ማላ ፆሊቂዲ ቦቲዴስ። ናምዑ ኣሳቲ ሙሴይኔ ኤላሲ ኢዛራ ሃሳዬቲዳ ኢስቲካ ቦንቾራ ቆንጪዲ ዬሩሳላሜን ፖሌታና ዲዛ ዬሱሳ ሃይቆ ጊሽ ሃሳዔቲዳ። ጴፅሮሳኔ ኢዛራ ዲዛይታ ዴፆ ꬊስኮይ ኦይኪዴስ። ኢስቲካ ꬊስኮፌ ቤጊዲ ዬሱሳ ቦንቾኔ ናምዑ ኣሲ ኢዛራ ኤቂዳይታ ቤዪዳ። ሄ ናምዑ ኣሳቲ ዬሱሳፔ ሻኬቲ ቢሺን ጴፅሮሲ ዬሱሳ “ጎዶ! ኢሲ ዳሴ ኔስ፥ ኢሲ ዳሴ ሙሴስ፥ ኢሲ ዳሴ ኤላሳስ ኦꬂዲ ሃን ዲዛኮ ኑስ ሎዖኮ! ሺን” ጊዴስ። ጊዶ ኣቲን ጴፅሮሲ ባ ጊዛይሳ ኤሮንታ ጊዴስ። ኢዚ ሄሳ ሃሳዪሺን ሻራይ ዪዲ ኢስታ ጌንꬂዴስ። ሻራ ጊዶ ጌሊዲ ባቢዳ። ሻራ ጊዶፌካ “ታኒ ዶሪዳ ታ ናይ ሃይሳ፤ ኢዛ ሲዪቴ” ጊዛ ቃላይ ሴቴቲዴስ። ቃላይ ሴቴቲዳ ዎዴ ዬሱሲ ፃላ ቤቲዴስ። ዬሱሳ ካሊዛይቲካ ሃኒዳ ሚሻ ዉርሲ ባ ዎዝናን ኦይኪዳ ኣቲን ኦናስካ ዮቲቤቴና። ዎንቴꬃ ጋላስ ኢስቲ ዙማ ቦላፌ ዎꬊን ዳሮ ኣሳይ ዪዲ ዬሱሳራ ጋጊዴስ። ሄ ዎዴ ኣሳ ጊዶፌ ኢሳዴይ ቃላ ꬎቁ ሂስቲዲ “ታማሪሲዛይሶ! ታስ ኢሲ ናይ ፃላ ዲዛ ጊሽ ኢዛ ኔ ፄላና ማላ ታ ኔና ዎሳይስ። ኢዛ ኢታ ኣያናይ ኦይኪሺን ሃሳዓይ ባይንዳ ዋሴስ፤ ቃኬቲሼ ዱናራ ጎፖንቶ ኬሴስ፤ ቆሆ ጋꬂዳፔ ጉዬ ዳሮ ዋይሲዲ ኣጌስ። ኔና ካሊዛይቲ ናዛፔ ኬሳና ማላ ኢስታ ታ ዎሳዲስ፤ ጊዶ ኣቲን ኬሳና ዳንዳዪቤቴና” ጊዴስ። ዬሱሲካ ኢስታስ ዛሪዲ “ኣማኖንታ ሃ ዎዴ ዎቤ ኣሳቶ! ታኒ ኢንቴናራ ኣይዴ ጋካናስ ዳኔ? ኢንቴናካ ኣይዴ ጋካናስ ዳንዳያኔ? ናዛ ኣኔ ሃ ኤሃ!” ጊዴስ። ናዚ ዪሺን ኢታ ኣያናይ ኢዛ ቦላፌ ዬጊን ቃኬቲዴስ። ዬሱሲካ ኢታ ኣያናዛ ሴሪዲ ናዛ ፓꬂዲ ናዛ ኣዋስ ኢሚዴስ። ኣሳይካ ዉሪ ፆሳ ጊታቴꬃን ማላሌቲዴስ። ኢዚ ኦꬂዳይሳን ኣሳይ ዉሪ ማላሌቲሺን ዬሱሲ ባና ካሊዛይታ “ኣሳ ናይ ኣሳ ኩሼን ኣꬊዲ ኢሜታና፤ ኢንቴካ ሃ ዮዖዛ ባሎፒቴ” ጊዴስ። ጊዶ ኣቲን ኢዚ ጊዛይሲ ኢስታስ ጌሊቤና። ኣይስ ጊኮ ኢስቲ ኣኬኮንታ ማላ ዮዖዚ ኢስታፌ ጌሜቲዴስ፤ ዛሪዲካ ኦይቾንታ ማላ ባቢዳ። ኢዛ ካሊዛይቲ “ኦኒ ኦናፔ ኣꬊዜ?” ጊዲ ባ ጊዶን ፓላሜቲዳ። ዬሱሲካ ኢስታ ዎዝና ቆፋ ኤሪዲ ጉꬃ ና ኤኪ ዪዲ ባ ማታን ኤሲዲ “ሃ ጉꬃ ና ታ ሱንꬃን ኤኪዛዴይ ኦኒካ ዲኮ ታና ኤኬስ፤ ታና ኤኪዛዴይካ ታና ኪቲዳይሳ ኤኬስ። ኢንቴ ኡባፌ ጉꬃ ኣሲ ኢዚ ኡባፌ ኣꬌስ” ጊዴስ። ዮሃኒሲካ “ጎዶ! ኢሲ ኣሲ ኔ ሱንꬃን ዳይዳንꬅ ኬሲሺን ቤይዶስ። ጊዶ ኣቲን ኢዚ ኑናራ ካሎንታ ጊሽ ዲጋናስ ኮይዶስ” ጊዴስ። ዬሱሲካ “ኢንቴና ኢፆንታ ኣሲ ዉሪ ኢንቴ ባጋ ጊዲዳ ጊሽ ዲጎፍቴ” ጊዴስ። ዬሱሲ ሳሎ ቢዛ ዎዴይ ማቲዳ ጊሽ ዬሩሳላሜ ባናስ ዴንዲዴስ። ኢዚካ ሲንꬃꬂዲ ኣሴ ኪቲዴስ። ኢስቲካ ኮሺዛ ሚሽ ጊጊሳናፔ ካሴቲዲ ሳማሪያ ቢታን ዲዛ ኢሲ ጉታ ቢዳ። ጊዶ ኣቲን ዴሬይ ኢዚ ዬሩሳላሜ ቢዛይሳ ኤሪዳ ጊሽ ሞኪ ኤኪቤቴና። ኢዛ ካሊዛይታፔ ያቆቤይኔ ዮሃኒሲ ሃኒዛይሳ ቤዪዲ “ጎዶ! ኤላሲ ኦꬆይሳꬆ ‘ታማይ ሳሎፔ ዎꬊዲ ኢስታ ዲፕ ሂስቶ!’ ጊዲ ኣዛዛና ማላ ኮያይ?” ጊዳ። ጊዶ ኣቲን ዬሱሲ ኢስታኮ ዩዪዲ “ኢንቴስ ኣይ ማላ ኣያናይ ዲዛኮኔ ኤሬኬቲ? ኣሳ ናይ ዪዳይ ኣሳ ሼምፖ ኣሻናስ ኣቲን ꬋይሳናስ ጊዴና” ጊዲ ኢስታ ሴሪዴስ። ኢስቲ ዉሪካ ሃራ ጉታ ቢዳ። ኢስቲካ ቢርሺን ኢሲ ኣሲ ኢስታኮ ሺቂዲ “ታኒ ኔኒ ቢዛ ኡባሶ ኔና ታ ካላና” ጊዴስ። ዬሱሲ “ዎርኬናታስ ኣቂዛ ኦላይ፥ ካፎታስ ቃሴ ኣቂዛ ካፎ ኬꬂ ዴስ፤ ጊዶ ኣቲን ኣሳ ናስ ባ ሁዔ ኣይሲዛሶይካ ባዋ” ጊዴስ። ዬሱሲካ ሂንኮይሳ “ታና ካላ” ጊዴስ። ሄ ኣዴዚካ “ጎዶ! ታ ካሴታ ባዳ ታ ኣዋ ሞጎ?” ጊዴስ። ዬሱሲካ “ኣጋጋ፥ ሃይቂዳይቲ ሃይቂዳይታ ሞጌቶ። ኔኒ ጊዲኮ ባዳ ፆሳ ካዎቴꬃ ኣሳስ ዮታ” ጊዴስ። ቃሴካ ሃራ ኣሲ “ጎዶ! ታ ኔና ካላና ሺን ኮይሮ ሶ ባዳ ታ ኬꬃ ኣሳ ሳሮ ጋዳ ዮዖ?” ጊዴስ። ጊዶ ኣቲን ዬሱሲ “ቦራ ካሶ ኦይኪዲ ጎዪሼ ጉዬ ዛሪ ፄሊዛዴይ ኦኒካ ፆሳ ካዎቴꬃስ ቤሴና” ጊዴስ። ሄሳፌ ጉዬ ጎዳይ ሃራ ላፑን ታማኔ ናምዑ ኣስ ዶሪዲ ሱንꬂዴስ። ኢስታካ ናምዑ ናምዑ ሂስቲዲ ኢዚ ባና ሶሆታኔ ካታማታ ዉርሲካ ኢስቲ ካሴቲዲ ባና ማላ ኪቲዴስ። “ማፃ ጋኪዳ ካꬃይ ዳሮ፤ ካꬃ ማፂ ሺሺዛይቲ ጉꬃታ ሄሳ ጊሽ ካꬃ ጎዳይ ካꬃ ማፂዲ ሺሺዛይታ ካꬃይ ዲዛሶ ዬዳና ማላ ዎሲቴ። ሄሳ ጊሽ ቢቴ ዶርሳቲ ካና ሱይቴ ጊዶራ ቢዛ ማላ ታ ኢንቴና ዬዳይስ። ኮሮጆ ዎይኮ ቃራፂቴ ዎይኮ ጫማ ኤኮፍቴ፤ ኦጌ ቦላ ኦናካ ሳሮ ጎፒቴ። “ኢንቴ ኦና ኬꬂካ ጌሊዛ ጊዲኮ ኮይሮቲዲ ‘ኬꬃ ኣሶ ሳሮ!’ ጊቴ። ሄ ኬꬃን ሳሮ ዶሲዛ ኣሲ ዲኮ ኢንቴ ሳሮታይ ሄ ኬꬃን ሼምፓና፤ ሳሮ ዶሲዛ ኣሲ ዶንታ ኣጊኮ ኢንቴ ሳሮታይ ኢንቴስ ሲማና። ኢንቴስ ማና ሺሺዳ ካꬅ ዉርሲ ሚሼኔ ኡዪሼ ሄ ኢንቴ ጌሊዳ ኬꬃን ኡቲቴ፤ ኦꬂዛዴስ ባ ዎልቃ ዋጋ ኤካናስ ኢዛስ ቤሴስ። ሃ ኬꬃፌ ሄ ኬꬄ ዩዮፒቴ። “ኢንቴ ኣይ ካታማካ ጋኪዛ ዎዴ ኣሳይ ኢንቴና ሞኪ ኤኪኮ ኢስቲ ኢንቴስ ኣꬂዳ ቁማ ሚቴ። ሄ ካታማን ዲዛ ሃርጋንቻታ ፓꬂዲ ፆሳ ካዎቴꬂ ኢንቴኮ ማቲዴስ ጊዲ ዮቲቴ። ጊዶ ኣቲን ኢንቴ ቢዲ ኢሲ ካታማ ጌሊሺን ሄ ካታማ ኣሳይ ኢንቴና ሞኪ ኤኮንታ ኢፂኮ ሄ ካታማ ኣሳይ ሺቂዛ ዱቡሻ ኬዚዲ፤ ‘ኑ ቶሆ ቦላ ዲዛ ኢንቴ ካታማ ጉዱላ ኢንቴስ ማርካ ጊዳና ማላ ኑ ቶሆ ቦላፌ ፒቶስ ሺን ፆሳ ካዎቴꬃይ ኢንቴኮ ማቲዳይሳ ኤሪቴ’ ጊቴ። ታ ኢንቴስ ዮታይስ ፒርዳ ጋላስ ሄ ካታማ ፒርዳፌ ሶዶሜ ካታማ ፒርዳይ ካዉሼ ጊዳና። “ኩራዚኔ ኔና ኣዬ-ኣና! ቤቴሳይዳ ኔና ኣዬ ኣና! ኢንቴናን ኦሴቲዳ ማላታቲ ፂሮሴኒኔ ሲዶናን ኦሴቲዳኮ ኢስቲካ ማይዖ ማይዒዲኔ ቢዲንꬅ ጎርፔቲዲ ሄ ዎዴ ቤኒ ማሬታናሺን። ጊዶ ኣቲን ፒርዳ ዎዴ ኢንቴፌ ፂሮሴሲኔ ሲዶናስ ካዉያና። ሃኔ ቂፊርናሆሜ ፑዴ ሳሎ ꬎቁ ꬎቁ ጋዲ? ኔኒ ዱጌ ሲዖሌ ዎꬋና፥ “ኢንቴ ጊዛይሳ ሲዪዛ ኣሲ ታና ሲዬስ፤ ኢንቴና ኤኮንታ ኣሲ ታናካ ኤኬና፤ ታና ኤኮንታይካ ታና ኪቲዳይሳ ኤኬና” ጊዴስ። ላፑን ታማኔ ናምዓቲካ ኡፋዬቲሼ ሲሚዲ “ጎዶ! ሃራይ ኣቶ ሺን ዳይዳንꬃቲካ ኔ ሱንꬃን ኑስ ሃሬቲዳ” ጊዲ ዮቲዳ። ኢዚካ ኢስታስ “ፃላዔይ ዎልቃንꬃ ማላ ሳሎፔ ኩንዲሺን ታ ቤያዲስ። “ሂስቲኮ ሾሻኔ ማሲማሶ ኢንቴ ዬꬋና ማላ ሞርኬ ዎልቃ ኡባ ቦላ ኢንቴስ ጎዳቴꬅ ኢማዲስ፤ ኢንቴና ቆሂዛ ኢሲ ሚሺካ ዴና። ኢንቴ ሱንꬃይ ሳሎን ፃፌቲዳ ጊሽ ኡፋዬቲቴ ኣቲን ቱና ኣያናቲ ኢንቴስ ሃሬቲዳ ጊሽ ኡፋዬቶፍቴ” ጊዴስ። ሄ ዎዴ ዬሱሲ ፂሎ ኣያናን ኡፋዬቲዲ “ሳሎሲኔ ሳዓስ ጎዳ ጊዲዳ ኣቦ ሃይሳ ዉርሳካ ኣꬎ ኤራንቻታፔኔ ኤራቻታፔ ቆታዳ ቄሪ ጉꬃ ናይታስ ኔ ቆንጪሲዳ ጊሽ ታኒ ኔና ጋላታይስ፤ ኤ፥ ታ ኣዋዉ! ሃይሲ ኔ ሎዖ ሼኔይ ሃኒዴስ። “ዉሪ ታ ኣዋ ማታፔ ታስ ኢሜቲዴስ፤ ቃሴካ ኢዛ ናይ ኦናኮኔ ኣዋፔ ኣቲን ኤሪዛይ ባዋ። ኣዋይ ኦናኮኔ ናዛፔ ኣቲን ዎይኮ ናዚ ኢዛስ ቆንጪሳናስ ዶሲዳዴፔ ኣቲን ኤሪዛዴይ ባዋ” ጊዴስ። ባና ካሊዛይታኮ ሲሚዲ ኢስታስ ዱማ “ኢንቴ ቤዪዛይሳ ቤዪዛ ኣይፌቲ ኣንጄቲዳይታ። ታ ኢንቴስ ቱማ ጋይስ ዳሮ ናቤቲኔ ካዎቲ ኢንቴ ሃዒ ቤዪዛይሳ ቤያናስ ኮይዲ ቤይቤቴና፤ ኢንቴ ሃዒ ሲዪዛይሳካ ሲያናስ ኮይዲ ሲይቤቴና” ጊዴስ። ኢሲ ጋላስ ሙሴ ዎጋ ታማርሲዛ ኢሲ ኣሲ ዬሱሳ ፓጫናስ ኮይዲ “ታማሪሲዛይሶ ታኒ ሜርና ዴዖ ላታናስ ኣይ ኦꬆ?” ጊዲ ኦይቺዴስ። ዬሱሲካ ዛሪዲ “ዎጋ ማፃፋን ኣይ ጌቴቲ ፃፌቲዴ? ኢዛፔ ኔስ ጌሊዳይ ኣዜ?” ጊዲ ኦይቺዴስ። ኣዴዚ ዛሪዲ “ኔ ጎዳ ፆሳ ኔ ኩሜꬃ ዎዝናፔ፥ ኔ ኩሜꬃ ሼምፖፌ፥ ኔ ኩሜꬃ ዎልቃፌኔ፥ ኔ ኩሜꬃ ቆፋፔ ሲቃ፤ ኔ ላጌካ ኔ ሁዔ ማላ ሲቃ ጌስ” ጊዲ ዛሪዴስ። ዬሱሲካ “ሎዖ ዛራዳሳ። ኔኒካ ሄሳꬆ ኦꬂኮ ሜርና ዴዖ ዴማና” ጊዴስ። ኣዴዚ ባና ፂሊሳናስ ኮይዲ “ሂስቲን ታ ላጌይ ኦኔ?” ጊዲ ዬሱሳ ኦይቺዴስ ዬሱሲካ ዛሪዲ “ኢሲ ኣዴዚ ዬሩሳላሜፔ ኢያርኮ ዎꬊሺን ፓንጋቲ ዴሚዲ ኢዛ ማይዖ ቃሪ ኤኪዳ፤ ኬሂ ቆፄሬꬂዲ ሃይቆፔኔ ፓፃፔ ጊዶን ዬጊ ኣጊዲ ቢዳ። ኢሲ ቄሴይ ሄ ኦጌራ ባሲ ዱጌ ዎꬊሼ ኣሙንሶንታ ሄ ቆፄቲዳ ኣዴዛ ዴሚዲ ፖቄꬃራ ዬጊ ኣꬊዴስ። ቃሴካ ኢሲ ሌዌ ባጋ ኣሳፔ ኢሲ ኣዴዚ ሄ ኦጌራ ኣꬊሼ ቆፄቲዳ ኣዴዛ ቤዪዲ ሃዒካ ፖቂዲ ኣꬊዴስ። ኢሲ ሳማሪያ ቢታ ኣሲ ሄ ኦጌራ ኣꬊ ቢሼ ቆፄቲዳ ኣዴዛ ቦላ ጋኪ ዎꬊዴስ፤ ኣዴዛ ቤዪዲኔ ኬሂ ሚሼቲዴስ። ኣዴዛኮ ሺቂዲኔ ማዱንꬃ ꬋላና ማላ ዎጋራ ሚꬃ ዛይቴኔ ዎይኔ ጫጄ ማዱንꬃ ቦላ ጉሲዲ ቃቺዴስ፤ ኣዴዛ ባ ሃሬ ቶጊሲዲ ኢማꬂ ሼምፒዛሶ ኤፊዲ ሎዔꬂ ፄሊዴስ። ዎንቴꬃ ጋላስ ኢማꬂ ሼምፒዛ ኬꬃ ጎዳስ ናምዑ ዲናሬ ኢሚዲኔ ‘ኔና ሃራ ሚሻ ኬሲሲኮ ታ ሲማሼ ኔስ ኢማና፤ ኔፔ ኬሳዳ ሎዔꬃ ናጋ’ ጊዴስ። “ሂስቲኮ ሃ ሄꬑ ኣሳታፔ ፓንጋታን ቆፄቲዲ ሃይቆፔኔ ፓፃፔ ጊዶን ዬጌቲዳዴስ ኬሂ ማታ ላጌይ ኔስ ኣዋይሳ ሚሳቲዜ?” ጊዴስ። ሙሴ ዎጋ ታማርሲዛይሲካ “ሄሲ ኔ ሚቼቲዳይሳኔ ማዲዳይሳ!” ጊዴስ። ዬሱሲካ ኢዛስ “ኔካ ባዳ ኢዛይሳꬆ ኦꬃ” ጊዴስ። ዬሱሲኔ ኢዛ ካሊዛይቲ ኦጌ ቢሺን ዬሱሲ ኢሲ ጉታ ጌሊዴስ፤ ማርታ ጌቴቲዛ ኢሲ ማጫሲያ ባሶን ዬሱሳ ሞካ ኤካዱስ። ኢዚስ ማራሞ ጌቴቲዛ ኢሲ ሚቼያ ዳዉስ። ማራማካ ኢዛፔ ቃላ ሲያሼ ጎዳ ቶሆ ጋርሳን ኡታዱስ። ጊዶ ኣቲን ማርታይ ኦሶ ዳሮፔ ዴንዲዳይሳን ዳቡራዳ ዬሱሳኮ ሺቃዳ “ጎዶ! ታ ሚቺያ ኦሶ ዉርሳ ታ ቦላ ኣጋዳ ኡቲሺን ኔኒ ጮዑ ጋይ? ኢዛ ታና ማዳና ማላ ኢዚስ ዮታ ኣቲን” ጋዱስ። ጊዶ ኣቲን ጎዳይ “ሃኔ ማርታኔ! ኔኒ ዳሮ ሚሻ ጊሽ ቆፋ ዳራሳ፤ ዲርባታሳ፤ ቱጋታሳ። ኮሺዛይ ጊዲኮ ኢሲ ሚሽ ፃላ፤ ማራማካ ሎዖ ኤፃ ዶራዱስ፤ ሄሲካ ኢዚፔ ኤኬቴና።” ኢሲ ጋላስ ዬሱሲ ኢሲሶን ዎሲዴስ፤ ኢዚ ዎሳ ዉርሲሺን ኢዛ ካሊዛይታፔ ኢሶይ “ጎዶ! ፃማቂዛ ዮሃኒሲ ባና ካሊዛይታ ዎሳ ታማርሲዳይሳꬆ ኔካ ኑና ዎሳ ታማርሳ!” ጊዴስ። ኢዚካ ኢስታስ “ዎሲሼ ‘ኑ ኣዋዉ! ኔ ሱንꬂ ኣንጄቶ፤ ኔ ካዎቴꬂ ሃዮ፤ ሃቺስ ጊዲዛ ቁማ ኑስ ኢማ፤ ኑና ቆሂዳይታ ኑ ማሪዛ ማላ ኑና ማራ፤ ፓጬንካ ኑና ጌልꬆፋ’ ጊ ዎሲቴ” ጊዴስ። ቃሴካ “ኢንቴፌ ኢሳዴስ ላጌይ ዲኮ ሌላ ጊዶꬅ ሄ ላጌዛሶ ቢዲ ‘ታስ ኢሲ ኢማꬂ ኦጌፔ ዪን ሚዛና ካꬅ ባይንዳ ጊሽ ሄꬑ ሶሎይ ዲኮ ታስ ታልዓሪኪ?’ *** ላጌዚካ ዛሪዲ ‘ታና ዋይሶፓ፤ ካሬይካ ጎርዴቲዴስ፤ ታኒካ ናይታራ ኢቻዲስ። ሃዒ ዴንዳዳ ኢማናስ ዳንዳይኬ’ ጋንዴ? ታካ ኢንቴስ ዮታይስ ላጌቴꬃ ጊሽ ዴንዲዲ ኢሞንታ ኣጊኮካ ኢዚ ኦይቾን ሳሌꬂዳ ጊሽ ዴንዲዲ ኮዪዛይሳ ዉርሲ ኢሚዴስ። “ሄሳ ጊሽ ታኒ ኢንቴስ ጊዛይ፤ ዎሲቴ ኢንቴስ ኢሜታና፤ ኮዪቴ ኢንቴ ዴሜና፤ ካሬ ቆፂቴ ኢንቴስ ዶዬታና። ኣይስ ጊኮ ዎሲዛይ ዉሪ ኤካና፤ ኮዪዛይካ ዴሜና ካሬ ቆፂዛዴስካ ዶዬታና። “ኢንቴፌ ኣዋ ጊዲ ኡቲዲ ኢዚ ዬሊዳ ናይ ሞሌ ኦይቺኮ ሾሽ ኢሚዛይ ዳንዴ? ዎይኮ ጱጱሌ ኦይቺኮ ማሲማሶ ኢሚዛይ ዳንዴ? ኢንቴ ኢታታ ጊዲሼ ኢንቴ ናይታስ ሎዖ ኢሞታ ኢሞ ኤሪኮ፤ ሳሎን ዲዛ ኢንቴ ኣዋይ ባና ዎሲዛይታስ ፂሎ ኣያናን ዎስቲ ዳርሲ ኢሜኔ?” ጊዴስ። ኢሲ ጋላስ ዬሱሲ ሃሳይሶንታ ዱዴ ዳይዳንꬅ ኬሲዴስ። ዳይዳንꬃዚካ ኬዚዳፔ ጉዬ ዱና ዱዴ ኣዴዚ ሃሳይዴስ፤ ቤዪዳ ኣሳቲካ ዳርሲ ማላሌቲዳ። ጊዶ ኣቲን ኢሲ ኢሲ ኣሳቲ “ቢዔሊዜቡላ ጌቴቲዛ ዳይዳንꬃታ ሃላቃን ዳይዳንꬃታ ኬሴስ” ጊዳ። ኢሲ ኢሲ ኣሳይ ኢዛ ፓጫናስ “ሳሎፔ ማላታ ቤሳ” ጊዲ ኦይቺዳ። ጊዶ ኣቲን ዬሱሲ ኢስታ ቆፋ ኤሪዲ “ባ ጊዶን ሻኬቲዛ ካዎቴꬂ ዉሪ ꬋያና፤ ባ ጊዶን ሲጋይ ባይንዳ ኬꬂካ ኩንዳና። ኢንቴ ታና ‘ቢዔሊዜቡላን ዳይዳንꬃታ ኬሴስ’ ጊዲ ሃሳዬታ ሺን ፃላዔይካ ባ ጊዶን ኢሶይ ኢሳፌ ሻኬቲኮ ኢዛ ካዎቴꬂ ዋኒ ሚናኔ? ሂስቲኮ ታኒ ዳይዳንꬃታ ቢዔሊዜቡላ ኬሲኮ ኢንቴ ናይቲ ኦናን ኬሳንዴቶ? ሄሳ ጊሽ ኢንቴ ናይቲ ኢንቴ ቦላ ፒርዲዛይታ ጊዳና። ጊዶ ኣቲን ታኒ ዳይዳንꬃታ ኬሲዛይ ፆሳ ዎልቃን ጋኪዴስ፤ ፆሳ ካዎቴꬃይ ኢንቴኮ ማቲዳሮ ኤሪቴ። “ሚኖ ኣሲ ሎዔꬂ ጊፄቲዲ ባ ኬꬄ ናጊኮ ኬꬃን ዲዛ ሚሺ ሎዖን ናጌቴስ። ጊዶ ኣቲን ኢዛፔ ሃራ ሚኖ ኣሲ ዪዲ ፆኒኮ ኢዚ ኣማኔቲዳ ኦላ ሚሻታ ዎꬂ ኤኪዲ ኢዛስ ዲዛ ሃሮዛካ ዉርሲ ሃራስ ጊሻና። “ታናራ ጊዶንታይ ታናራ ኤቄቴስ፤ ታናራካ ሺሾንታዴይ ላሌስ፥ “ቱና ኣያናይ ኣሳፔ ኬዚዳ ዎዴ ሼምፖሶ ኮዪሼ ሃꬂ ባይንዳ ሜላ ሶን ዋዬቴስ፤ ሼምፖሶይ ꬋይኮ ‘ታኒ ካሴ ኬዚዳሶ ጉዬ ሲማና’ ጌስ። ኢዛፔ ሲሚዲ ዪሺን ካሴ ኢዚ ኣጊ ቢዳ ኬꬃይ ፒቴቲዲኔ ጊጊ ኡቲዳይሳ ዴሜስ። ሄሳፌ ሲሚ ቢዲ ባፔ ኢቲዛ ሃራ ላፑን ዳይዳንꬃታ ባናራ ኤኪዲ ዬስ፤ ኢስቲካ ጌሊዲ ሄን ዳና፤ ሄሳዴስካ ኮይሮይሳፌ ጉዬይሲ ኬሂ ኢታ ጊዳና” ጊዳ። ዬሱሲ ሄሳ ሃሳዪዛ ዎዴ ኣሳ ጊዶፌ ኢሲ ማጫስ ዲዛራ ባ ቃላ ꬎቁ ኦꬃዳ “ኔና ቶኪዳ ቃንꬂኔ ኔ ꬋሚዳ ꬋንꬃቲ ኣንጄቲዳይታ” ጋዱስ። ጊዶ ኣቲን ኢዚ “ኣንጄቲዳይቲ ፆሳ ቃላ ሲይዲ ኣዛዜቲዛይታ” ጊዴስ። ዳሮ ዴሬይ ዬሱሳኮ ሺቂዳ ዎዴ ዬሱሲ “ሃይሲ ዬሌታይ ኢታ ዬሌታ፤ ጊታ ማላታ ቤያናስ ኮዬስ። ጊዶ ኣቲን ዮናሳ ማላታፔ ሃራ ዱማ ማላታይ ኢሜቴና። ጋሶይካ ዮናሲ ናናዌ ኣሳስ ማላታ ጊዲዳ ማላ ኣሳ ናይ ታኒ ሃ ዬሌታስ ማላታ ጊዳና። ዱጌሃ ዴሬ ማጫ ካዎያ ሶሎሞኔ ኤራቴꬅ ቤያናስ ቢታ ጋፃፔ ዴንዳዳ ዪዳ ጊሽ ፒርዳ ዎዴ ኢዛ ሃ ዬሌታራ ዴንዳዳ ፒርዳና፤ ሄኮ ሶሎሞኔፔ ኣꬊዛዴይ ሃን ዴስ። ዮናሲ ሳባኪሺን ሲይዲ ናናዌ ኣሳይ ባ ናጋራፔ ማሮቲዳ ጊሽ ሃ ዬሌታራ ኢሲፌ ዴንዲዲ ፒርዳና። ጊዶ ኣቲን ዮናሳፔ ኣꬊዛይ ሃን ዴስ። “ፆምፔ ኦይꬂዲ ካሬፔ ጌሊዛ ኣሳስ ፖዓና ማላ ቆንጬሶን ዎꬄቴስ ኣቲን ጌማሶን ዎꬂዛ ኣሲ ዴና። ኔ ኣሳቴꬃስ ፖዖይ ኔ ኣይፌ፤ ኔ ኣይፌይ ፓፃ ጊዲኮ ኔ ኩሜꬃ ኣሳቴꬃይ ፖዖ ጊዳና። ኔ ኣይፌይ ሳኬቲኮ ኔ ኩሜꬃ ኣሳቴꬃይ ꬉማ ጊዳና። ሄሳ ጊሽ ኔናን ዲዛ ፖዖይ ꬉሞንታ ማላ ናጌታ። ሂስቲኮ ኔ ኣሳቴꬃይ ፖዖ ጊዲኮ ꬉሚዳ ኣሳቴꬂ ዴና ኣጊኮ ኔ ኩሜꬃ ኣሳቴꬃይ ፆምፔ ሎዔꬂ ፖዒዛ ማላ ሎዒ ቤታና” ጊዴስ። ዬሱሲ ሃሳያ ዉርሲዳ ማላ ኢሲ ፋርሳዌይ ባናራ ቁማ ማናስ ዬሱሳ ፄይጊዴስ። ዬሱሲ ቁማ ማና ኩሼ ሜጬቶንታ ኣጊዳይሳ ቤዪዲ ማላሌቲዳ። ጎዳይ ኢዛስ “ሃዒ ኢንቴ ፋርሳዌቲ ፁዓሲኔ ኬሬስ ቦላ ባጋ ሜጪ ጌሼታ፤ ኢንቴ ጊዶ ባጋዚ ኡዜቴꬃኒኔ ኢታቴꬃን ኩሚዴስ። ኢንቴኖ ኤያቶ! ካሬ ባጋ ሜꬊዳይ ጊዶ ባጋ ሜꬊቤኔ? ዮዖን ጊዲኮ ጊዶን ዲዛይሳ ሙፁዋታ ኢሚቴ፤ ሄ ዎዴ ዉሪካ ኢንቴስ ጌሽ ጊዳና። “ኢንቴኖ ፋርሳዌቶ! ኢንቴስ ኣዬ ኣና! ኣኑጋፔኔ ፃሎታፔ ቃሴካ ዱማ ዱማ ካꬃፌ ታማፌ ኢሲኖ ኬሴታ፤ ጊዶ ኣቲን ቱማ ፒርዳኔ ፆሳ ዶሳናይሳ ኣጊ ኣꬌታ። ዮዖን ጊዲኮ ኢንቴ ኣጊ ኣꬋናስ ቤሴና። ሃንኮይሳ ኣጎንታ ኢንቴ ኦꬃና ቤሲዛይቲካ ሃይታ። “ኢንቴኖ ፋርሳዌቶ! ኢንቴስ ኣዬ-ኣና! ኣይሁዳ ዎሳ ኬꬃን ኡታናስ ቦንቾ ኦይዴ ኮዬታ፤ ጊያ ጊዶንካ ኣሳይ ኢንቴ ሲንꬃን ሆካና ማላ ዶሴታ። ኣሲ ኤሮንታ ኢዛ ቦላራ ቢዛ ቆቴቲ ዲዛ ዱፎ ኢንቴ ሚሳቲዛ ጊሽ ኢንቴና ኣዬ-ኣና!” ጊዳ። ሙሴ ዎጋ ኤሪዛይታፔ ኢሶይ ዛሪዲ “ኣስታማሬ! ኔ ሄሳꬆ ሃሳዪዛ ዎዴ ኑናካ ጫያሳ” ጊዴስ። ዬሱሲካ ዛሪዲ “ኢንቴኖ ሙሴ ዎጋ ኤሪዛይቶ ኢንቴስካ ኣዬ-ኣና! ኣሲ ቶካናስ ዳንዳዮንታ ዴፆ ቶሆ ኣሳ ቶሴታ። ኢንቴ ጊዲኮ ኢንቴስ ቢራꬌ ፄራኒካ ቦቼኬታ። “ኢንቴ ኣዋቲ ዎꬊዳ ናቤታ ዱፎ ኢንቴ ሎዔꬂዛ ጊሽ ኢንቴስ ኣዬ ኣና። ሂስቲኮ ኢንቴ ኢንቴ ኣዋታ ኦሶ ሚንꬂዛ ማርካታ፤ ኢስቲ ናቤታ ዎꬊዳ፤ ኢንቴካ ኢስታ ዱፎ ሎዔꬄታ። “ሄሳ ጊሽ ፆሳ ኤራቴꬅ ሂዝጋዱስ ‘ናቤታኔ ሃዋሬታ ታ ኢስታስ ዬዳና፤ ኢስቲካ ኢስታፌ ኢሳ ኢሳ ዎꬋና፤ ሃራታካ ጎዳና። ሄሳ ጊሽ ሃ ዬሌታይ ቢታይ ሜꬌቶሶፔ ሃዒ ጋካናስ ጉኪዳ ናቤታ ኡባ ሱꬃ ጊሽ ኦይሼታና። ኣቤሌ ሱꬃፌ ኦይኪዲ ያርሺዛሶፔኔ ፆሳ ኬꬃ ጊዶን ጉኪዳ ዛካራሳ ሱꬃ ጋካናስ ኮዬቴስ።’ ኤ ታ ኢንቴስ ጊዛይ ሃ ዬሌታይ ሃይሳስ ኦይሼታና። “ኢንቴኖ ዎጋ ኤሪዛይቶ! ኢንቴስ ኣዬ-ኣና! ኤራቴꬃ ፔንጌ ቁልፌ ዎልቃራ ዎꬂ ኤኪዲ ኢንቴስካ ጌሊቤኬታ፤ ጌላናይታካ ዲጌታ” ጊዴስ። ዬሱሲ ሄፔ ኬዚዳፔ ጉዬ ፃፌቲኔ ፋርሳዌቲ ኤቄቲሼ ኦይሻን ሼምፖ ዲጊዳ። ኢዛ ዱናፔ ኬዚዛ ቃላን ኢዛ ቃፃናስ ናጌቲዳ። ሄ ዎዴ ዳሮ ዴሬይ ባ ጊዶን ኢሶይ ኢሳራ ዬꬌታና ጋካናስ ሺቂ ኡቲዳሼ ዬሱሲ ባና ካሊዛይታ “ፋርሳዌታ ኢርሾፌ ናጌቲቴ፤ ሄሲካ ቆꬌፔ ቆሞ ሃኖ። ቆንጮንታ ካሜቲዲ ኣታናይኔ ኤሬቶንታ ቆታን ኣታና ሚሺ ዴና። ሄሳ ጊሽ ኢንቴ ጌማን ሃሳዪዳዚ ዉሪ ቆንጬ ኬዛና፤ ቃሴካ ኢንቴ ቆልዓን ሃይꬃን ሳሱኬቲ ሃሳዪዳዚ ዉሪ ዴሬ ሲንꬃን ዮቴታና። “ታ ላጌቶ! ታ ኢንቴስ ጊዛይ ኣሾ ፃላ ዎꬋናፔ ኣቲን ሃራ ኣይኮካ ኦꬃናስ ዳንዳዮንታይታስ ባቦፍቴ። ጊዶ ኣቲን ኢንቴ ባባናስ ቤሲዛይ ኦናኮኔ ታ ኢንቴና ቤሳና፤ ኣሾ ዎꬊዳፔ ጉዬ ኣሾኔ ሼምፖ ኢሲፌ ጋꬂ ጋናሜ ታማን ዬጋናስ ዳንዳዪዛይሳስ ባቢቴ። ኤ ኢዛስ ባቢቴ ጋይስ። “ሲኔ ካፎ ኢቻሻቲ ናምዑ ሳንቴስ ባይዜቴቴስ፤ ጊዶ ኣቲን ኢስታፌ ኢሲኒዮካ ፆሲ ዶጌና። ኢንቴ ሁዔ ቢናናይ ኩሜꬅ ታይቦን ዴስ። ሄሳ ጊሽ ባቦፍቴ፤ ዳሮ ሲኔ ካፎታፔ ኢንቴ ኣꬌታ። “ታ ኢንቴስ ዮታይስ ታ ጊሽ ኣሳ ሲንꬃን ማርካቲዛ ኣሳ ኡባስ ኣሳ ናይ ቃሴካ ፆሳ ኪታንቻ ሲንꬃን ኢዛ ጊሽ ማርካታና። ጊዶ ኣቲን ኣሳ ሲንꬃን ታና ካዲዳዴይ ፆሳ ኪታንቻ ሲንꬃን ካዴታና። “ኣሳ ና ቦላ ካዉሻ ቃላ ሃሳዪዛዴስ ናጋራይ ዉሪ ማሬታና ሺን ፂሎ ኣያና ጫዪዛዴይ ማሬቴና። “ኣሳይ ኢንቴና ኦይኪዲ ዴሬ ሃሪዛይታኮኔ ጎዳቲዛይታኮ፥ ኣይሁዳ ዎሳ ኬꬄ ኦይኪ ኤፊኮ ‘ኣይ ጊ ዛሪኖ? ኣይ ጊኖ?’ ጊዲ ሂርጎፍቴ። ኣይስ ጊኮ ኢንቴ ሃሳያናስ ቤሲዛይሳ ፂሎ ኣያናይ ሄ ዎዴ ኢንቴና ታማርሳና።” ዳሮ ኣሳ ጊዶፌ ኢሳዴይ “ኣስታማሬ! ታ ኢሻይ ኑ ኣዋ ላታ ሚሻፌ ታና ጋኪዛይሳ ታስ ኢማና ማላ ኢዛስ ዮታ” ጊዴስ። ዬሱሲካ “ሃይሶ! ታና ኢንቴ ቦላ ፒርዲዛ ዳና ኦꬂዳይ ኦኔ?” ጊዴስ። ቃሴካ ኢስታስ “ኣሳስ ዳሮ ሚሽ ዲኮካ ሼምፖይ ሄ ዱሬቴꬃን ዶንታ ጊሽ ናጌቲቴ፤ ዪቄቴꬃፌ ኢንቴና ኬሂ ናጊቴ” ጊዴስ። ዛሬꬂዲካ ኢስታስ “ሎዔꬂ ካꬅ ኢሚዛ ጋዴ ጎዳ ጊዲዳ ኢሲ ዱሬ ኣሲ ዴስ። ሄ ኣዴዚካ ባ ዎዝናን ‘ታ ካꬃ ሺሻዳ ዎꬂዛሶይ ባይንዳ ጊሽ ኣይ ኦꬆ?’ ጊዲ ቆፒዴስ። “ኣዴዚካ ‘ታስ ዲዛ ጎታራታ ላላዳ ሃራ ኣኪዛዝ ኬፃና፤ ሂስታዳ ታስ ዲዛ ካꬃኔ ታስ ዲዛዝ ዉርሳ ኢዛን ሺሻና። ታ ሼምፖዮካ ታ ሼምፖዬ! ዳሮ ዎዴስ ጊዲዛ ካꬅ ሺሺዳ ጊሽ ሼምፓ ኡታዳ ማ፤ ኡያ፤ ኡፋዬታ’ ጋና ጊዴስ። “ጊዶ ኣቲን ‘ፆሲ ሃይሶ ኤያዞ! ኔ ሼምፖዮ ሃቺ ኦማርስ ኔፔ ኤካና ኮዬቴስ፤ ሄሳ ጊሽ ኔ ኔስ ሺሺዳይስ ኦናስ ጊዳኔ?’ ጊዴስ። “ሄሳ ጊሽ ፆሳ ኣቻን ዱሬ ጊዶንታ ባስ ሚሼ ሺሺዛ ኣሳ ዉርሴꬂካ ሄሳ ማላ” ጊ ሌሚሶን ዮቲዴስ። ሄሳፌ ጉዬ ዬሱሲ ባና ካሊዛይታስ “ኢንቴስ ታ ዮታይስ ኢንቴ ዱሳስ ‘ኣይ ማናኮኔ ዎይኮ ኢንቴ ቦላስ ኣይ ማይዓናኮኔ’ ጊዲ ጬጮፒቴ። ኣይስ ጊኮ ሼምፖይ ካꬃፌ ኣሳቴꬂ ቃሴ ማይዖፔ ኣꬌስ። ቁሮታ ፄሊቴ ዜሬቴና፤ ማፄቴና፤ ካꬅ ሺሺዛ ጎታራይ ኢስታስ ባዋ ሺን ፆሲ ኢስታ ሚዜስ። ሂስቲኮ ኢንቴ ኢስታፌ ኬሂ ኣꬌኬቲ? ጊዶ ኣቲን ኢንቴፌ ዳርሲ ቆፒዲ ባ ላይꬃ ቦላ ኢሲ ጋላስ ጉጃና ዳንዳዪዛይ ኦኔ? ሂስቲኮ ጉꬃ ሚሽ ኦሶይ ኢንቴስ ዳንዳዬቶንታሼ ኣይስ ሃራ ሚሻስ ኬሂ ቆፔቲ? “ጪሻቲ ዋኒዲ ዲጪዛኮኔ ኣኔ ፄሊቴ፤ ዋዬቴና፤ ሱቄቴና፤ ጊዶ ኣቲን ታ ኢንቴስ ዮታይስ፤ ሶሎሞኔይካ ጊታ ኣሳ ሺን ኢስታፌ ኢሲኔይꬆ ማይዒቤና። ሂስቲኮ ፆሲ ሃቺ ቤቲዲ ዎንቶ ታማን ዎꬋና ማታ ሃይሳꬆ ማይዚዛ ጊዲኮ ኢንቴኖ ኣማኖይ ፓጪዳይቶ! ኢንቴና ዎስቲ ኣꬂ ማዪዜኔ? “ሄሳ ጊሽ ‘ኣይ ሚኖ? ኣይ ማይዒኖ?’ ጊዲ ኢንቴ ዎዝናይ ዳርሲ ቆፖፎ። ቢታ ቦላን ዲዛ ኣሲ ዉሪ ሃይሳ ኮዬስ፤ ጊዶ ኣቲን ሃይሲ ዉሪ ኢንቴስ ኮሺዛይሳ ኢንቴ ሳሎ ኣዋይ ኤሬስ። ኡባፌካ ኮይሮꬂዲ ፆሳ ካዎቴꬅ ኮዪቴ፤ ሃይሲ ዉሪ ኢንቴስ ጉጄቲ ኢሜታና። “ኢንቴኖ ጉꬃ ዉዴ ሜሄ ማላ ጊዲዳይቶ! ካዎቴꬅ ኢንቴስ ኢማናስ ኢንቴ ኣዋስ ሎዖ ቆፋ ጊዲዳ ጊሽ ባቦፍቴ። ኢንቴስ ዲዛይሳ ባይዚዲ ማንቆታስ ኢሚቴ፤ ካይሶይ ኤኮንታሶን፥ ቢላይ ሞንታሶን፥ ጪሞንታ ኮሮጆን ዉሮንታ ሚሽ ሳሎን ሺሺቴ። ኢንቴ ዎዝናይ ኢንቴ ሚሺ ዲዛሶን ዳና” ጊዴስ። “ቃንꬃን ጊፂዲ ጊጌቲቴ፥ ኢንቴ ፖዖይካ ፖዖ፥ ኢስታ ጎዳይ ቡላቻ ዲጊሳፔ ሲሚዲ ያናሼ ናጌቲዛይታኔ ኢዚ ዪዲ ፔንጌ ቆፂሺን ኤሌ ዶያናስ ጊጊ ኡቲዳ ኣሳታ ሚሳቲቴ። ኢስታ ጎዳይ ዪዛ ዎዴ ꬊስኮንታ ናጊዲ ኡቲዳ ኣሽካራቲ ኢስቲ ኣንጄቲዳይታ፤ ታ ኢንቴስ ቱሙ ጋይስ፤ ኢስታ ጎዳይ ባስ ቃንꬃን ጊፂ ኤቂዲ ኢስታ ማዳን ኡቲሲዲ ሙዛና። ኦማርስ ዎይኮ ሌላ ጊዶꬃን ዪዲ ኢስቲ ꬊስኮንታ ዲሺን ዴሚኮ ሄ ኣሽካራቲ ኣንጄቲዳይታ። ካይሶይ ኣይ ዎዴ ያናኮን ኤሪዛ ጊዲዳኮ ኬꬃ ጎዳይ ካይሶይ ቦኪሺን ጮዑ ጊዲ ቤሶንታይሳ ኤሪቴ። ኣሳ ናይ ኢንቴ ቆፖንታ ዎዴን ያናይሳ ኤሪዲ ኢንቴካ ጊጌቲዲ ናጊቴ” ጊዴስ። ጴፅሮሲካ “ጎዶ! ሃይሳ ሌሚሶ ኔ ዮቲዛይ ኑስ ፃላዬ? ኡባ ኣሳሳራ?” ጊዴስ። ጎዳይካ “ሂስቲኮ ባሶ ኣሳስ ኮሺዛ ዎዴን ቁማ ኢማና ማላ ኬꬃዴይ ኬꬃ ኣሳ ቦላ ዎꬂዛ ኣማኔቲዳ ዎዝናማ ኣሲ ኦኔ? ጎዳይ ሲሚሺን ሄሳꬆ ኦꬂሼ ቤቲዛዴይ ኢዚ ኣንጄቲዳዴ። ታ ኢንቴስ ቱሙ ጋይስ፤ ባስ ዲዛ ሚሽ ኡባ ቦላ ሄሳዴ ጎዳሳና። ጊዶ ኣቲን ‘ኢዛዴይ ታ ጎዳይ ኤሌ ዬና ጋምዓና’ ጊዲ ቆፒዲ ኣዴ ኣሽካራታኔ ማጫ ኣሽካራታ ቡኪኮ፥ ቃሴካ ኮይዳ ማላ ሚዲኔ ኡዪዲ ማꬆቲኮ፥ ሄሳዴ ጎዳይ ኢዚ ቆፖንታ ጋላሳን ያና ጊዲ ኤዙጎንታ ሳቴን ያና። ዪዲካ ኢዛ ቃንፄሬꬂ ዬጊዲ ኢዛ ኤፃ ኣማኖንታይታራ ኢሲፌ ኦꬃና። “ባ ጎዳ ቆፋ ኤሪዲ ጊጌቶንታይኔ ጎዳ ሼኔ ኦꬆንታ ኣሽካራይ ኢታ ሾች ሾጬታና። ጊዶ ኣቲን ኤሮንታ ዲሼ ሾቻስ ቤሲዛ ሞሮ ኦꬂዳ ኣሽካራይ ጉꬃራ ሾጬታና። ዳሮ ኢሜቲዳ ኣሳ ኡባፌ ዳሮይ ኮዬቴስ፤ ዳሮ ሃዳራ ኤኪዳዴፌ ዳሮይ ኮዬቴስ። “ታኒ ዪዳይ ቢታ ቦላን ታማ ኤꬃናሳ። ሄ ታማይ ሃዒ ኤፂ ኬዚዳኮ ታና ዳሮ ኡፋይሳና። ጊዶ ኣቲን ታኒ ፃማቄታና ፂንቃታይ ዴስ፤ ሄ ፂንቃታይ ፖሌታናሼ ታኒ ኬሃ ሜቶቴታዲስ። ኢንቴስ ታኒ ቢታ ቦላ ሳሮ ኤሃና ዪዳ ሚሳቲዜ? ጊዴና፤ ታ ኢንቴስ ዮታይስ ታኒ ዪዳይ ኢሳ ኢሳፌ ሻካናሳ። ሃይሳፌ ሲንꬃን ኢሲ ኬꬃን ባ ጊዶን ሻኬቲዳ ኢቻሹ ኣሳቲ ዳና። ናምዓቲ ሄꬓታ ቦላ ሄꬓቲ ናምዓታ ቦላ ዴንዲዲ ባ ጊዶን ሻኬታና። ኣዋይ ባ ኣቱማ ና ቦላ፥ ኣቱማ ናይካ ባ ኣዋ ቦላ፥ ኣያ ባ ማጫ ናይ ቦላ ማጫ ናያካ ባ ኣዬይ ቦላ፥ ቦሎታ ባ ና ማች ቦላ፥ ና ማቻካ ባ ቦሎቲ ቦላ ዴንዲዲ ባ ጊዶን ሻኬታና” ጊዴስ። ቃሴካ ዴሬዛስ “ኢንቴ ኣዋ ኣርሼይ ሞኪዛ ባጋራ ሻራይ ኬዚሺን ቤዪዲ ‘ኤሌራካ ኢራይ ያና’ ጌስ ጌታ፤ ኢንቴ ጊዳ ማላካ ሃኔስ። ዱጌሃ ባጋራ ፑዴሃ ጫርኪሺን ጋላሳይ ሆዖ ጊዳና ጌታ፤ ኢንቴ ጊዳ ማላካ ሃኔስ። ኢንቴኖ! ሎዖ ሚሳቲዛ ኢታቶ፤ ሳሎይሳኔ ሳዓ ሜꬋ ቤዪዲ ሃናናይሳ ኤሬታ ሺን ሂስቲን ሃ ዎዴዛ ኤሮይ ኢንቴና ዋኒ ፆኒዜ?” ጊዴስ። “ሂስቲኮ ኢንቴ ኣይስ ቱማ ፒርዴኬቲ? “ኔ ሞርኬራ ዳና ሲንꬃን ኤቃና ቢሺን ቡሮ ኦጌ ቦላን ዳሼ ኢዛራ ጊጋና ኦጌ ኮያ፤ ኔ ሂስቶንታ ኣጊኮ ኢዚ ኔና ጎቺዲ ዳና ሲንꬅ ኤፋና፤ ዳናይካ ኔና ኣꬂዲ ሃላቃስ ኢማና፤ ሃላቃይካ ኔና ዎይኔን ዬጋና። ታ ኔስ ዮታይስ፤ ዳናይ ፒርዲዳ ዉርሴꬃ ሳንቲሜዮ ቃንፃ ዉርሳና ጋካናስ ሄፔ ኬዛካ።” ሄ ዎዴ ኢሲ ኢሲ ኣሳቲ ዬሱሳኮ ዪዲ “ጲላፆሲ ኢስታ ሱꬂ ኢስታ ያርሾራ ጋꬂ ዋላኪዳ ጋሊላ ኣሳታ” ጊሽ ዬሱሳስ ዮቲዳ። ኢዚካ ዛሪዲ “ሂስቲን ሄሳ ማላ ሜቶይ ኢስታ ቦላ ጋኪዳ ኣሳቲ ሃንኮ ዋዬይ ጋኮንታ ኣቲዳ ጋሊላ ኣሳ ኡባፌ ኣꬊዳ ናጋራንቻ ጊዲዳ ጊሽ ጊዲ ቆፔቲ? ጊዴና! ታ ኢንቴስ ዮታይስ ኢንቴ ማሬቶንታ ኢፂኮ ኢንቴ ዉሪካ ሄ ኣሳታ ማላ ꬋያና። ዎይኮ ሳልሆሜን ጊምቤይ ኢስታ ቦላ ኩንዲን ሃይቂዳ ታማኔ ኦሱፑን ኣሳቲ ዬሩሳላሜን ዲዛ ኣሳ ኡባፌ ናጋራንቻ ጊዲዳ ጊሽ ጊዲ ቆፔቲ? ጊዴና! ታ ኢንቴስ ዮታይስ ኢንቴ ማሬቶንታ ኢፂኮ ኢንቴ ዉሪካ ሄ ኣሳታ ማላ ꬋያና” ጊዴስ። ቃሴካ ኢስታስ “ኢሲ ኣሲ ዎይኔ ቶኪዛሶን ቶኬቲዳ ኢሲ ባላሴ ጊዛ ሚꬂ ዳዉስ፤ ሄ ባላሴ ሚꬃይኮ ኣይፌ ኮያና ዪዲ ኢሲ ኣይፌካ ዴሚቤና። ዎዪኔ ኣታኪልቴ ኦꬂዛይሳስ ‘ሄኮ ታኒ ኣይፌ ዴማና ጋዳ ሃቺራ ሄꬑ ላይꬅ ሃ ባላሴይኮ ሲሜሬታ ያዳ ኢሲ ኣይፌካ ዴማቤኬ፤ ሄሳ ጊሽ ኢዞ ቃንፃ ዲጋ፤ ኣዛስ ጮ ቢታ ፁንፃዜ?’ ጊዲ ሌሚሶ ዮቲዴስ። ኢዚካ ዛሪዲ ‘ጎዶ! ታኒ ኢዚ ፃጶን ኦሻ ዬጋዳ ኦሴꬃ ፄላና ማላ ሃላይꬃስ ኣጋጋርኪ? ዪዛ ላይꬃስ ኢዛ ኣይፊኮ ሎዖ፤ ኣይፎንታ ኢፂኮ ቃንፃንዳሳ’ ” ጊዴስ። ዬሱሲ ሳምባታ ጋላስ ኢሲ ኣይሁዳ ዎሳ ኬꬃን ታማርሲሺን፤ ታማኔ ኦሱፑን ላይꬅ ኩሜꬅ ኢታ ኣያናይ ኦይኪዲ ኣሳቴꬅ ፓጪሲዳ ኢሲ ማጫሳያ ሄን ዳዉስ፤ ኢዛካ ዞኮይ ቁኒዳ ጊሽ ሙሌካ ꬎቁ ጋናስ ዳንዳዑኩ። ዬሱሲ ኢዞ ቤዪዳፔ ጉዬ ፄይጊዲ “ሃኔ ማጫሳዬ! ኔኒ ኔና ሳኪዛ ሃርጌዛፔ ፓፃዳሳኮ” ጊዴስ። ዬሱሲ ባ ኩሼ ኢዚ ቦላ ዎꬂን ኢዛ ሄራካ ሲቲ ጋዳ ኤቃዱስ፤ ፆሳካ ጋላታዱስ። ኣይሁዳታ ዎሳ ኬꬃ ሃላቃዚካ ሳምባታ ጋላስ ፓꬂዳይሳስ ዬሱሳ ቦላ ሃንቄቲዲ ኢዛኮ ዪዛ ዴሬዛ “ኦሶስ ቤሲዛ ኡሱፑን ጋላሳቲ ዲዛ ጊሽ ሄ ኦሶ ጋላሳታን ዪዲ ፓፂቴ ኣቲን ሳምባታ ጋላስ ዮፒቴ” ጊዴስ። ጎዳይካ ዛሪዲ “ኢንቴኖ ቆꬌፔ ቆሞን ሃሳዪዛይቶ! ኢንቴ ጊዶፌ ኢሳዴይ ባ ቦራ ዎይኮ ባ ሃሬ ሳምባታ ጋላስ ባሶን ቃሼቲዳሶፔ ቢርሺዲ ሃꬄ ኡሻናስ ኤፊ ኤሬኔ? ሂስቲን ሃና ማጫሳያ ኣብራሃሜ ና ጊዳዳ ታማኔ ኦሱፑን ላይꬅ ኩሜꬅ ፃላዔይ ቃቺን ዲዛሶፔ ሳምባታ ጋላስ ቢርሼታናስ ኢዚስ ቤሴኔ?” ጊዴስ። ዬሱሲ ሂዝጊ ኦይቺዳ ዎዴ ኢዛራ ኤቄቲዛይቲ ዉሪካ ዬላቲዳ፤ ጊዶ ኣቲን ዴሬይ ዉሪካ ኢዚ ኦይቺዳ ማላሊሲዛ ኦይሻን ኡፋዬቲዴስ። ቃሴካ ዬሱሲ ዛሪዲ “ፆሳ ካዎቴꬂ ኣይ ሚሳቲዜ? ኢዞ ኣዛራ ሌሚሶ? ኢሲ ኣሲ ሳናፊጬ ጌቴቲዛ ሚꬃ ኣይፌ ባ ጋዴን ቶኪን ሞካ ዲጫዳ ጊታ ጊዲን ካፎቲ ኢዚ ሃጋ ጊዶን ዱሳሶ ጊጊሳና ጋካናስ ዲጪዳ ሳናፊጬ ሚꬅ ሚሳታዉስ” ጊዴስ። ቃሴካ “ፆሳ ካዎቴꬂ ኣዛራ ሌሚሶ? ኢሲ ማጫሲ ሙኑቃ ጫሊሳናስ ዳሮ ꬊሌራ ዋላኪዳ ጉꬃ ኢርሾ ሚሳታዉስ” ጊዴስ። ሄሳፌ ጉዬ ዬሱሲ ዬሩሳላሜ ቢሼ ካንꬂ ቢዛ ካታማኒኔ ጉታታን ኣሳ ታማርሲሼ ኣꬊሺን፥ ኢሳዴይ ኢዛኮ ሺቂዲ “ጎዶ! ፒርዳፌ ጉꬃ ኣሳቲ ፃላ ኣታኔ?” ጊዲ ኦይቺዴስ። ኢዚካ ዛሪዲ “ፁንꬃ ፔንጌይራ ጌላናስ ባፄቲቴ፤ ዳሮቲ ጌላናስ ኮዬቴስ ሺን ኢስታስ ሃኔና። *** ኬꬃ ጎዳይ ዴንዲዲ ባ ካሬ ጎርዲ ጊዲን ኢንቴ ካሬን ኤቂዲ ‘ጎዶ! ካሬ ዶያርኪ!’ ጊዲ ፔንጌ ቆፃና ሺን ኢዚ ዛሪዲ ‘ኢንቴ ኦናኮኔ ኣዋፔ ዪዳኮኔ ታ ኢንቴና ኤሪኬ’ ጋና ጊዴስ። “ኢንቴኒካ ኢዛስ ዛሪዲ ‘ኑኒ ኔናራ ኢሲፌ ሚዶሲኔ ኢሲፌ ኡዪዶስ፤ ኑ ዱቡሻን ኑና ኔ ታማርሳዳሳ’ ጋና። “ኢዚካ ዛሪዲ ‘ኢንቴና ኢንቴ ኦናኮኔ ኢንቴ ኣዋፔ ዪዳኮ ታ ኢንቴና ኤሪኬ፤ ኢንቴ ማካላቲ ዉሪካ ታፔ ሃኪቴ’ ጋና ጊዴስ። “ኢንቴ ኣብራሃሜ፥ ዪሳቃ፥ ያቆቤኔ ናቤታ ኡባታ ፆሳ ካዎቴꬃን ቤዪዛ ዎዴ ኢንቴ ካሬን ዬጌቲ ኣቲኮ ሄ ዎዴ ኢንቴስ ዬሆኔ ኣቻ ጋርጬች ጊዳና። ኣሳይ ኣዋ ኣርሼይ ሞኪዛ ባጋፌኔ ዉሊዛ ባጋፌ ፑዴሃፔኔ ዱጌሃፔ ዪዲ ፆሳ ካዎቴꬃ ማዳን ኡታና። ሄኮ ጉዬን ዲዛይታፔ ባጋይቲ ሲንꬄ ኣꬋና ሲንꬃን ዲዛይታፔ ባጋቲ ጉዬ ኣꬋናይቲ ዴቴስ” ጊዴስ። ሄ ዎዴ ፋርሳዌታፔ ኢሲ ኢሲ ኣሲ ዪዲ “ሄርዶሲ ኔና ዎꬋናስ ኮዪዛ ጊሽ ሃይሳፌ ዴንዳ ኪቻ” ጊዳ። ዬሱሲ ኢስታስ “ታኒ ቡሮ ‘ሃቺኔ ዎንቶ ዳይዳንꬃታ ኣሳፔ ኬሳና፤ ሃርጊዛይታካ ፓꬃና፤ ሄꬓንꬆ ጋላስ ታ ቆፋሶ ታ ጋꬃና’ ጊዴስ ጊዲ ሄ ዎርካናስ ዮቲቴ። ጊዶ ኣቲን ናቤይ ዬሩሳላሜፔ ካሬን ሃይቃናስ ቤሶንታ ጊሽ ሃቺኔ ዎንቶ ዎንቶፔይንካ ታ ሲንꬄ ቡስ ጉጃና። “ሃኔ ዬሩሳላሜ ናቤታ ዎꬊዛሬ ኔኮ ኪቴቲዳይታ ሹቻራ ጫዲዛሬ! ኩቶይ ባ ጪዬታ ባ ቄፌ ጋርስ ሺሺዛ ማላ ኔ ናይታ ሺሻናስ ኣፑን ዎዴ ኮያዲናሺን ኔ ጊዲኮ ኣካይ ጋዳሳ። ሄኮ ኢንቴ ኬꬃይ ካይዚዴስ፤ ታ ኢንቴስ ዮታይስ፥ ‘ጎዳ ሱንꬃን ዪዛዴይ ኣንጄቲዴስ’ ኢንቴ ጋና ዎዴይ ጋካናሼ ናምዓንꬆ ታና ቤዬኬታ” ጊዴስ። ኢሲ ጋላስ ዬሱሲ ቁማ ማናስ ፋርሳዌታ ሃላቃታፔ ኢሳ ሶ ጌሊዳ ዎዴ ኣሳይ ዉሪ ዬሱሳ ኣይ ኦꬃናኮኔ ጊዲ ኣይፌ ኢዛ ቦላ ቶኪ ፄሊዴስ። ሄንካ ኣሳቴꬃይ ኢዛስ ፑሪን ዋዬቲዛ ኢሲ ኣሲ ኢዛ ሲንꬃን ዴስ። ዬሱሲካ ሙሴ ዎጋ ኤሪዛይታኔ ፋርሳዌታ “ሳኬቲዛዴ ሳምባታ ጋላስ ፓꬃናስ ኮሺዜዬ? ኮሼኔ?” ጊዲ ኦይቺዴስ። ኢስቲካ ጮዑ ጊዳ፤ ኢዚካ ኣዴዛ ቦቺዲ ፓꬂ ዬዲዴስ። ቃሴካ “ኢንቴፌ ኢሲ ኣሳስ ሳምባታ ጋላስ ናይ ዎይኮ ቦራይ ኩንዲዲ ኦላን ጌሊኮ ኤሶን ሄራካ ኬሶንታዴይ ኦኔ?” ጊዴስ። ኢስቲካ ኦይሻስ ኣይኮ ዛሮካ ዴማናስ ዳንዳዪቤቴና ፄይጌቲዳ ኣሳቲ ኡታናስ ቦንቾ ሶ ኮዪሺን ዬሱሲ ቤዪዲ ሌሚሶራ ኢስታስ፥ “ኢሲ ኣሲ ኔና ሳርጌስ ፄይሲኮ ቦንቾሶን ኡቶፋ፤ ኔፔ ቦላራ ቦንቼቲዛዴይ ፄይሴቲኮ፤ ኢንቴና ናምዓታካ ፄይጊዳዴይ ዪዲ ‘ኔ ኡቲዳሶዛ ሃይሳዴስ ዬዳ’ ጋና፤ ኔኒካ ዬላታሼ ዚቃሶ ባንዳሳ። ጊዶ ኣቲን ኔ ፄይሴቲዳ ዎዴ ዚቃሶ ፄላዳ ኡታ፤ ኔና ፄይጊዳዴይ ዪዲ ‘ታ ላጌዞ! ሃያ ꬎቃሶን ኡታ’ ጋንዴስ፤ ኔኒካ ሄ ዎዴ ኔናራ ማዳን ኡቲዳ ኣሳ ኡባ ሲንꬃን ቦንቼታና። ኣይስ ጊኮ ባና ꬎቁ ሂስቲዛዴይ ዉሪ ዚቂ ጋና፤ ባና ዚቂ ሂስቲዛዴይ ዉሪ ꬎቁ ጋና” ጊዴስ። ዬሱሲካ ፄይጊዳዴዛ “ቁማ ዎይኮ ካዎ ሚዛናስ ፄይሲኮ ኔይሳꬆ ኔና ፄይሲዲ ሚዞንታ ማላ ኔ ላጌታ ዎይኮ ኔ ኢሻታ፥ ኔ ዳቦታ ዎይኮ ዱሬታ ዎይኮ ዱሬ ጉታታ ፄይጎፓ። ጊዶ ኣቲን ኣሳ ፄይሳዳ ሚዛና ኮይኮ ማንቆታ፥ ኩሼይ፥ ቶሆይ ባይንዳ ዎቤታኔ ቆቄታ ፄይሳ፤ ኔኒ ኣንጄታና። ፄይሴቲዳይቲ ኩሼ ዛራናስ ዳንዳዮንታ ጊሽ ፂሎታ ዴንꬃ ዎዴ ኔስ ኩሼይ ዛሬታና” ጊዴስ። ማዳን ዬሱሳራ ኢሲፌ ኡቲዳይታፔ ኢሶይ ሃይሳ ሲይዲ “ፆሳ ካዎቴꬃን ሺቂዲ ማዳፌ ሚዛ ኣሲ ኣንጄቲዳዴ” ጊዴስ። ዬሱሲካ “ኢሲ ኣሲ ዎልቃማ ዲጊሴ ጊጊሲዲ ዳሮ ኣስ ፄይጊዴስ። “ዲጊሴ ማና ዎዴይካ ጋኪን ፄይጌቲዳ ኢማꬃታ፥ ‘ዉሪካ ጊጊዳ ጊሽ ሃ ዪቴ!’ ጊዲ ፄይጋና ማላ ባ ኣሽካራ ዬዲዴስ። ጊዶ ኣቲን ዉሪካ ባሲ ሃራ ጋሶ ሺሺዲ ኢሶይ ‘ሃዒ ጋዴ ሻማዲስ፤ ታ ባዳ ቤያናስ ቤሴስ፤ ሃቺስ ታና ላንጮፋ’ ጊዴስ። “ሃንኮይሲካ ‘ታኒ ኢቻሹ ዋፃ ቦራ ሻማዲስ። ኢስታ ፓጫ ፄላና ጊሽ ሃቺ ታና ላንጮፋ’ ጊዴስ። “ቃሴ ሃራ ኢሳዴይካ ‘ታኒ ቡሮ ሚሺራቴꬃን ዳይስ፤ ባናስ ዳንዳይኬ’ ጊዴስ። “ኦሳንቻይካ ኪቴቲዳሶፔ ሲሚዲ ሄꬓቲ ጊዳይሳ ባ ጎዳስ ዮቲዴስ። ሄ ዎዴካ ዲጊሳ ጊጊሲዳይሲ ሃንቄቲዲ ኦሳንቻ ‘ኤሌላ ኦይዱ ኦጌ ኬዛዳ ማንቆታ፥ ኩሼይኔ ቶሆይ ባይንዳ ዎቤታ ቆማፃታኔ ኣይፌይ ባይንዳ ቆቄታ ሃ ጌልꬃ’ ጊዴስ። “ኦሳንቻዚካ ዛሪዲ ‘ታ ጎዶ! ኔ ታና ኣዛዚዳይሳ ዉርሳ ፖላዲስ፤ ሃዒካ ሃራ ኡቴꬃሶይ ዴስ’ ጊዴስ። “ጎዳዚካ ኦሳንቻዛ ‘ጌዴ ኦይዱ ኦጌ ኬዛዳ ታ ኬꬄ ኩማና ማላ ፑዴኔ ዱጌ ኣꬊዛይታ ዎልቃራ ሃ ጌልꬃ። ታኒ ቱማ ጋይስ፤ ዲጊሳ ማና ፄይሴቲዳይታፔ ኢሳዴይካ ዱናን ጌልꬄና’ ” ጊዴስ። ዳሮ ዴሬይ ኢዛራ ኢሲፌ ቢዛይሳ ዬሱሲ ቤዪዲኔ ጉዬ ሲሚ “ታኮ ዪዛይ ዉሪ ባ ኣዋ፥ ባ ማቾኔ ናይታ፥ ባ ኢሻታኔ ሚቼታ፥ ባ ሼምፖ ጊዲን ኢፆንታ ኣጊኮ ታና ካሊዛዴ ጊዳናስ ዳንዳዬና። ባ ማስቃሌ ቶኪዲ ታና ካሎንታይ ታና ካሊዛዴ ጊዳናስ ዳንዳዬና። “ኢንቴፌ ኢሲ ኣሲ ኬꬄ ኬፃናስ ኮይኮ ፖላናስ ዳንዳያናኮኔ ዳንዳዮንታኮ ኮይሮቲዲ ባስ ዲዛ ቢራ ቆፖንታይ ኦኔ? ኬꬃ ኬፃና ዶሚዲ ዉርሳናስ ሃኖንታ ኢፂኮ ቤዪዳ ኣሲ ዉሪ ኢዛ ቦላ ሚጫና። ኢስቲካ ‘ሃይሲ ኣዴዚ ኬꬄ ኬፆ ኦይኪዴስ ሺን ፖሊቤና’ ጊ ሚጫና። “ዎይኮ ኢሲ ካዎይ ሃራ ካዎራ ኦላስ ጊጌቲዲ ናምዑ ታሙ ሺ ኣሲ ኤኪ ዪዛ ካዎ ዛራናስ ታሙ ሺ ኦላ ኣሳራ ዛራናኮኔ ኡቲዲ ቆፖንታይ ኦኔ? ኦላ ዛራናስ ዳንዳዬቶንታ ሚሳቲዲ ቤቲኮ ቡሮ ሃሆን ዲሺን ማቃይናናስ ጋና ዬዴስ። ሄሳꬆካ ኢንቴፌ ኦናካ ጊዲን ባስ ዲዛይሳ ኣጎንታይ ታና ካሊዛዴ ጊዳናስ ዳንዳዬና። “ማፂኔይ ሎዖሺን ባ ማፂኔቴꬃ ማልዖ ዬዲኮ ዛሪዲ ዋኒ ማልዓና ዳንዳዪዜ? ጋዴን ዬጊን ኣራዲሶንታ ጊሽ ጮ ካሬ ዎራ ዬጌቴስ፤ ሲዪዛ ሃይꬂ ዲዛ ኣሲ ሲዮ!” ጊዴስ። ኢሲ ጋላስ ቃራፃ ሺሺዛይቲኔ ናጋራንቻቲ ዉሪ ዬሱሳፔ ሲያናስ ኢዛ ኣቺ ሺቂዳ። ፋርሳዌቲኔ ፃፌቲ “ሃይሲ ኣዴዚ ናጋራንቻታ ኢፄና፤ ኢስታራካ ሜስ” ጊዲ ባ ጊዶን ዙዙሜቲዳ። ዬሱሲካ ኢስታስ ሌሚሶ ሂዝጊ ዮቲዴስ፤ “ኢንቴ ጊዶፌ ኢሳዴስ ፄቱ ዶርሲ ዲኮ ሄ ፄቱ ዶርሳታፔ ኢሲና ꬋይኮ ኣቲዳ ኡዱፉን ታማኔ ኡዱፉናታ ዴንባን ዬጊዲ ꬋዪዳይሳ ዴማና ጋካናስ ኮያና ቦንታይ ኦኔ? ዴሚዲ ኡፋይሳራ ሃሼን ቶኪ ኤኪዲ፥ ባሶ ሲሜስ፥ ባ ላጌታኔ ጉታ ኣሳታ ኢሲ ቦላ ፄይጊዲ ‘ꬋዪዳ ታ ዶርሳዮ ዴማዲስ፤ ታናራ ኢሲፌ ኡፋዬቲቴ’ ጋና። ታ ኢንቴስ ዮታይስ ‘ሄሳꬆካ ማሮቴꬅ ኮሾንታ ኡዱፉን ታማኔ ኡዱፉን ፂሎታፔ ማሬቴꬃን ጌሊዛ ኢሲ ናጋራንቻን ሳሎን ኡፋይስ ጊዳና።’ “ዎይኮ ኢሲ ታሙ ቢራ ሳንቲሜይ ዲዛ ማጫሳያ ሄ ታማፌ ኢሲኔያ ꬋይኮ ፆምፔ ኦይꬃዳ ዴማና ጋካናስ ኬꬃ ጋርስ ፒታዳ ሎዔꬃ ኮዮንታ ማጫስ ኦኔ? ኢዛካ ዴሚዳ ዎዴ ባ ላጌታኔ ባ ጉታታ ኢሲፌ ፄይጋዳ ‘ታፔ ꬋይዳ ቢራ ሳንቲሜዮ ዴሚዳ ጊሽ ታናራ ኢሲፌ ኡፋዬቲቴ’ ጋንዱስ። ታ ኢንቴስ ዮታይስ ‘ሄሳꬆካ ማሮታን ጌሊዛ ኢሲ ናጋራንቻ ኣሳን ፆሳ ኪታንቻታ ኣቻን ኡፋይስ ጊዳና።’ “ኢሲዴስ ናምዑ ናይቲ ዴቴስ። ኢስታፌካ ካሎ ናዚ ባ ኣዋ ‘ኣቦ! ኔስ ዲዛ ሚሻፌ ታ ጊሻ ታስ ኢማ’ ጊዴስ። ኣዋይካ ባስ ዲዛ ሚሻ ባ ናይታስ ጊሺዴስ። “ዳሮ ዎዴ ጋምዖንታ ዲሼ ካሎ ናዚ ባ ሚሻ ዉርሲ ሺሺ ኤኪዲ ሃሆ ቢታ ቢዴስ። ሄንካ ባስ ዲዛ ሚሻ ጎዓይ ባይንዳ ጮ ሜላ ꬋይሲዴስ። ኢዚካ ባስ ዲዛይሳ ዉርሲ ꬋይሲዳፔ ጉዬን ሄ ቢታን ኢታ ኮሻይ ዴንዲን ዳሮ ዋዬቲዴስ። ሄሳ ጊሽ ሄ ዴሬን ዲዛ ኣሳፔ ኢሳዴኮ ሺቂዴስ። ኢዛዴይካ ባ ጉዱንꬅ ሄማና ማላ ጉዱንꬃ ሄሚዛሶ ዬዲዴስ። ናዚካ ጉዱንꬃቲ ሚዛ ሃርቆዛፔ ማናስ ኣሞቲዴስ ሺን ሄሳካ ኢሚዛዴይ ቤቲቤና። “ጊዶ ኣቲን ኢዛ ዎዝናይ ሲሚዳ ዎዴ ‘ታ ኣዋ ኣሽካራታ ኣፑናታፔ ካꬂ ቲርፒዜ ሺን ታኒ ሃይሳን ጋፋን ሃይቃና ማታዲና? ዴንዳዳ ታ ኣዋ ሶ ባዳ፥ ኣቦ! ሳሎን ፆሳ፥ ሳዓን ታ ኔና ቆሃዲስ።’ ሃይሳፌ ጉዬ ‘ታኒ ኔ ና ጌቴታዳ ፄይጌታናስ ታስ ቤሴና፤ ኔ ኣሽካራታፔ ኢሳ ማላ ታና ቆዳ’ ጊዴስ። ሄሳ ጊሽ ዴንዲዲ ባ ኣዋኮ ቢዴስ። ጊዶ ኣቲን ቡሮ ኢዚ ሃሆራ ዪሺን ኣዋይ ቤዪዲ ሚሼቲዲኔ ኢዛኮ ዎፂ ቢዲ ኢዲሚ ኦይኪዲ ዬሪዴስ። “ናዚካ ‘ኣቦ! ሳሎን ፆሳ፥ ሳዓን ታ ኔና ቆሃዲስ፤ ሃይሳፌ ጉዬ ታ ኔ ና ጌቴታዳ ፄይጌታናስ ታስ ቤሴና’ ጊዴስ። “ጊዶ ኣቲን ኣዋይ ኣሽካራታስ ‘ኤሶቲዲ ኡባፌ ዶሬቲዳ ማይዖ ኤሂዲ ማይዚቴ፤ ኢዛ ቢራꬌን ሚግዳ፥ ኢዛ ቶሆንካ ጫማ ኣꬂቴ። ሞꬎ ሚርጎ ቦራ ኤሂዲ ሹኪቴ፤ ሚዲ ኡፋዬቶስ። ሃይሲ ታ ናዚ ሃይቂዴስ ሺን ፓፂዴስ፤ ꬋዪዴስ ሺን ቤቲዴስ’ ጊዴስ፤ ሄሳፌ ጉዬን ኡፋዬቴꬅ ኦይኪዳ። “ሄሲ ሃኒዛ ዎዴ ባይራ ናዚ ጎሻሶን ዴስ፤ ሄፔካ ሲሚዲ ሶ ማቲዳ ዎዴ ዲꬃ ዱሪስ ሲይዴስ። ኢዚካ ኣሽካራታፔ ኢሳ ፄይጊዲ ‘ሄሲ ኣዜ?’ ጊ ኦይቺዴስ። ኣሽካራዚካ ‘ኔ ኢሻይ ዪዴስ፤ ኢዚ ሳሮኒኔ ሎዖን ሲሚዳ ጊሽ ኔ ኣዋይ ሞꬎ ሚርጎ ቦራ ሹኪዴስ’ ጊዴስ። “ባይራ ኢሻዚካ ሃንቄቲዲ ሶ ጌላናስካ ኮይቤና። ኣዋይካ ካሬ ኬዚዲ ኢዚ ሶ ጌላና ማላ ዎሲዴስ። ጊዶ ኣቲን ኢዚካ ዛሪዲ ኣዋስ ‘ሄኮ ታኒ ሃይሳ ጋካናስ ኔስ ኣይሌ ማላ ኦꬃዲስ፤ ኔ ኣዛዞፔ ኢሲኖካ ፓጪሳቤኬ፤ ጊዶ ኣቲን ታኒ ታ ላጌታራ ኡፋዬታና ማላ ኔ ታስ ኢሲ ዴይሻ ላቃካ ኢማቤካ። ጊዶ ኣቲን ሃይሲ ኔ ናዚ ኔስ ዲዛይሳ ዉርሲ ላይማቲዛይታራ ዉርሲዲ ዪሺን ሞꬎ ሚርጎ ቦራ ኢዛስ ሹካዳሳ’ ጊዴስ። “ኣዋይካ ‘ታ ናዞ ኔ ኡባ ዎዴ ታናራ ዳሳ፤ ታስ ጊዲዳይ ዉሪካ ኔሳ። ሃይሲ ኔ ኢሻይ ሃይቂዴስ ሺን ፓፂዴስ፤ ꬋዪዴስ ሺን ቤቲዴስ፤ ሄሳ ጊሽ ኑኒ ኡፋዬታናስ ቤሴስ’ ” ጊዴስ። ዬሱሲ ባና ካሊዛይታስ “ኢሲ ዱሬ ኣዴ ዳይሳስ ኢዛ ኬꬃ ኣይሲዛ ኢሲ ኣሲ ዴስ፤ ኢዚ ሄ ዱሬ ኣዴዛ ሚሻ ኦጌይ ባይንዳ ላሊዛይሳ ዎሬይ ሃ ዱሬ ኣዴዛ ሃይꬃን ዎꬊዴስ። ዱሬ ኣዴዚ ሄ ኣዴዛ ፄይጊዲ ‘ሃይሶ ታ ሲይዛይሲ ሄሲ ኣዜ? ሃይሳፌ ዶማዳ ኔ ታ ኬꬃስ ኣይሲዛዴ ጊዳናስ ዳንዳዮንታ ጊሽ ኔ ኣላፌቴꬃ ጊዶን ዲዛ ሚሻ ኦይኪዳ ማዝጋባ ታስ ዛራ’ ጊዴስ። “ኬꬃ ኣይሲዛ ኣዴዚ ባ ዎዝናራ ‘ታ ጎዳይ ታና ታ ኣላፌቴꬃፌ ጎዳና ጌስ፤ ጎያ ማናስ ታስ ዎልቃይ ባዋ፤ ዎሳናስ ዬላታይስ፤ ሄሳ ጊዲዳ ጊሽ ኣይ ኦꬆ?’ ጊዲ፥ ታኒ ኣላፌቴꬃፌ ኬዚኮ ኣሳይ ታና ሞኪ ኤካና ማላ ኦꬃና ኦጌ ታ ኤራይስ። “ሄሳ ጊሽ ኢዛ ጎዳ ኣጮይ ኢስታ ቦላ ዲዛ ኣሳታ ኢሳ ኢሳ ፄይጊዴስ። ኮይሮ ዪዳይሳ ‘ኔ ቦላ ጎዳ ኣጮይ ኣፑኔ?’ ጊዴስ። “ ‘ኢሲ ፄቱ ፃሮ ኩሜꬃ ዛይቴይ ታ ቦላ ዴስ’ ጊዴስ። ኣላፌዚ ዛሪዲ ካሴ ኔ ፋራሚዳ ዋራቃታ ሄዪ ኤካ ኡታዳ ኤሌ ኢቻሹ ታሙ ፃሮ ጋዳ ፃፋ ጊዴስ። “ካሊዲ ሃንኮይሳ ‘ኔች ኔ ቦላ ኣፑን ዲዜ?’ ጊዴስ። ‘ፄቱ ኦጎሮ ጊስቴይ ዴስ’ ጊዴስ። ኣላፌዚ ዛሪዲ ‘ካሴ ኔ ታልዓሼ ፋራሚዳ ዋራቃታ ሄይ ኦሱፑን ታሙ ኦጎሮ ጋዳ ፃፋ’ ጊዴስ። “ጎዳዚካ ሾጬቺዛ ኣላፌዚ ኦꬂዳ ጪንጫቴꬃ ጊሽ ኢዛ ናሺዴስ። ሃ ኣላሜ ናይቲ ባና ሚሳቲዛይታራ ዲዛ ጋጎቴꬃን ፖዖ ናይታፔ ኣꬊዳ ጪንጫታ። “ሄሳ ጊሽ ታኒ ኢንቴና ጊዛይ ሃ ቢታ ሚሻይ ዉሪዳ ዎዴ ሜርና ኬꬃን ኢንቴ ኤኬታና ማላ ሃዒ ኢንቴስ ዲዛ ሚሻራ ኢንቴስ ላጌ ሜꬊቴ ጋይስ። ጉꬃ ሚሻን ኣማኔቲዛዴይ ዳሮ ሚሻንካ ኣማኔታና፤ ጉꬃ ሚሻን ኣማኔቶንታዴይ ዳሮ ሚሻንካ ኣማኔቴና። ሂስቲኮ ኢንቴ ሃ ቢታ ሚሻን ኣማኔቶንታ ኢፂኮ ቱማ ሚሻ ሃዳራ ኦይኪቴ ጊዲ ኦኒ ኢንቴስ ኢማኔ? ኣሳ ሚሻን ኢንቴ ኣማኔቶንታ ኢፂኮ ኢንቴስ ቡዞ ጊዳና ሚሽ ኦኒ ኢማኔ? “ናምዑ ጎዳስ ኢሲቶ ኢሲ ቦላ ኣዛዜታና ዳንዳዪዛዴይ ኦኒካ ዴና፤ ዎይኮ ኢሳ ዶሲዲ ኢሳ ኢፄስ ዎይኮ ኢሳኮ ሺቂዲ ሃንኮይሳ ሌቄስ። ፆሳሲኔ ሚሻስ ኢሲፌ ጋꬂ ሃሬታናስ ዳንዳዬኬታ” ጊዴስ። ሚሽ ዳርሲ ሲቂዛ ፋርሳዌቲ ሄሳ ዉርሲ ሲይዲ ዬሱሳ ቂꬊዳ። ዬሱሲካ ኢስታስ “ኢንቴ ኢንቴና ኣሳ ኣቻን ፂሊሴታ፤ ጊዶ ኣቲን ፆሲ ኢንቴ ዎዝና ኤሬስ። ኣሳ ኣቻን ቦንቼቲዳዴይ ፆሳ ሲንꬃን ቱና” ጊዲ ኢስታስ ዮቲዴስ። “ሙሴ ዎጋይኔ ናቤቲ ዮሃኒሲ ያና ጋካናስ ዮቲሼ ጋምዒዳ። ሄሳ ካሊዲ ቃሴ ፆሳ ካዎቴꬃ ሚሺራቾ ቃላይ ሳባኬቲዴስ። ኣሲ ዉሪካ ሄ ጌላናስ ዋꬌቴስ። ጊዶ ኣቲን ሙሴ ዎጋፔ ኢሲ ቄሪና ኩንዳ ኣታናይሳፌ ሳሎይኔ ሳዓይ ኣꬋናይሲ ካዉሻ ጊዳና። “ባ ማቾ ኣንጂ ዬዲዲ ሃራ ማቾ ኤኪዛ ኣሲ ዉሪካ ላይማቴስ፤ ባ ኣዚናፔ ኣንጄታ ቢዳሮ ኤኪዳይሲካ ላይማቴስ። “ቃሴካ ዬሱሲ ኢስታስ ‘ሎዖ ማይዖ ማይዒዲ ጋላስ ጋላስ ሎዖ ዱሳ ኡፋይሳን ዲዛ ኢሲ ዱሬ ኣሲ ዴስ’ ጊዴስ። ሄ ኣዴዛ ፔንጌን ኩሜꬃ ቦላይ ማዱንꬅ ፃላ ጊዲዳ ኢሲ ኣላዛሬ ጌቴቲዛ ማንቆ ኣዴ ዲዛይሲ ኢቺዲ ዴስ። ኢዚካ ሄ ዱሬ ኣዴዛ ኬꬃን ኣሳይ ካꬅ ሚሺን ማዳፌ ጋዴን ዎꬊዛ ሱፓ ማፂ ማናስ ኣሞቴስ። ካናቲካ ኢዛ ማዱንꬃ ላጬቴስ። “ሃ ማንቆ ኣዴዚ ሃይቂን ሳሎ ኪታንቻቲ ኣብራሃሜ ኪዖ ኤኪ ቢዳ፤ ቃሴ ዱሬ ኣዴዚካ ሃይቂዲ ሞጌቲዴስ። ኢዚ ሲዖሌን ዋዬቲሼ ꬎቁ ጊዲ ሃሆን ኣብራሃሜ ፄሊዴስ፤ ኣላዛሬካ ባ ኪዖን ኦይኪ ዲሺን ቤይዴስ። “ዱሬ ኣዴዚ ‘ኣዋ ኣብራሃሜ! ሃይሳን ዋዬቲዛ ታስ ሚቼታርኪ! ጊ ኣላዛሬይ ባ ቢራꬌ ፄራ ኢርፃ ሃꬃን ቦቺዲ ታ ኢንፃርስ ኢርፂሳና ማላ ሃ ዬዳርኪ!’ ጊዲ ዋሲዴስ። “ጊዶ ኣቲን ኣብራሃሜይ ‘ታ ናዞ ኔኒ ቢታ ቦላ ዳሼ ሎዖ ዱስ ዴዒዳይሳ ማላ ኣላዛሬይ ካሴ ዋዬ ቤዪዳይሳ ኔ ቆፓ፤ ጊዶ ኣቲን ሃዒ ኢዚ ኡፋዬቲሺን ኔኒ ዋዬታሳ’ ጊዴስ። ሄሲ ዉሪ ሃኒሺን ሃን ዲዛ ኣሲ ሃፔ ሄ ኢንቴኮ ኣꬎንታ ማላ ቃሴካ ኢንቴኮን ዲዛይ ሃ ኑኮ ኣꬋና ኮዪዛዴይ ሃ ኣꬎንታ ማላ ኢንቴሲኔ ኑስ ጊዶን ጊታ ኣፎይ ጊጌቲዴስ ጊዴስ። “ዱሬ ኣዴዚ ቃሴ ‘ኣቦ! ሄሲ ሄሳ ጊዲኮ ኔኒ ኣላዛሬ ዱጌ ታ ኣዋሶ ዬዳና ማላ ታ ኔና ዎሳይስ፤ ታስ ኢቻሹ ኢሻቲ ዴቴስ፤ ሃይቲ ሃይሳ ሃ ዋዬሶ ዮንታ ማላ ቢዲ ኢስታስ ሎዔꬂ ዮታና ማላ ኣላዛሬ ዬዳርኪ?’ ጊዴስ። *** “ኣብራሃሜይ ኢዛስ ዛሪዲ ‘ሙሴይኔ ናቤቲ ሄን ኢስታ ኣቻን ዲዛ ጊሽ ኢስታፌ ሲዬቶ’ ጊዴስ። “ኢዚካ ዛሪዲ ‘ኣዋ ኣብራሃሜ ሄሳ ማላ ጊዴና፤ ሃይቂዳ ኣሳፔ ኢሲዴይ ሃይቆፔ ዴንዲ ቢኮ ኢስቲ ፆሳ ማሮቴꬃን ጌላና’ ጊዴስ። “ኣብራሃሜይካ ዛሪዲ ‘ሙሴይኔ ናቤቲ ጊዛይሳ ሲዮንታ ኢፂኮ ሃይቂዳ ኣሳፔ ኢሳዴይ ዴንዲዳኮካ ኢስቲ ኣማኔቴና’ ” ጊዴስ። ዬሱሲ ባና ካሊዛይታ “ኣሳ ꬉጲዲ ናጋራን ዬጊዛ ሚሺ ዮንታ ኣጌና፤ ጊዶ ኣቲን ያና ꬉጴዛስ ጋሶ ጊዲዛዴስ ኣዬ-ኣና! ሄ ኣዴዚ ሃ ጉꬃታፔ ኢሳስ ꬉጴ ጊዳናፔ ዎፃ ሹቺ ኢዛ ቆꬌን ቃሼቲን ኣባ ጊዶ ኢዚ ዬጌቲዛኮ ኢዛስ ሎዖ ጊዳና። ሄሳ ጊሽ ኢንቴ ሁዔስ ናጌቲቴ። ‘ኔ ኢሻይ ኔና ቆሂኮ ሃንቄታ፤ ኢዚ ባ ሞሮ ኤሪዲ ሲሚኮ ማራ።’ ኢሲ ጋላሳን ላፑንቶ ዛሪ ዛሪ ቆሂዲ ላፑን ቶካ ዛሪ ዛሪ ‘ማራ ጊኮ ማራ’ ” ጊዴስ። ሃዋሬቲካ “ጎዶ! ኑስ ኣማኖ ጉጃ” ጊዳ። ጎዳይካ “ጋሼ ኣይፌ ላጌ ኣማኖይ ኢንቴስ ዲኮ ሃይሳ ‘ኤꬃ ꬎቃሌታ ባዳ ኣባን ጌላ ቶኬታ’ ኢንቴ ጊኮ ኢዚ ኢንቴስ ኣዛዜታና” ጊዴስ። ቃሴካ ዬሱሲ “ኢንቴ ጊዶፌ ኢሲ ኣሳስ ጎሻንቻይ ዎይኮ ዶርሳ ሄሚዛ ኣሽካራይ ዲኮ ኢዚ ጎሻሶፔ ሲሚሺን ‘ታስ ማና ካዎ ጊጊሳ፤ ታ ማዳ ኡያና ጋካናስ ጊፄታዳ ታስ ኦꬃ፤ ሄሳፌ ጉዬ ባጋን ማንዳሳኔ ኡያንዳሳ’ ጌስ ኣቲን ሃዒ ቁማ ማና ሃ ኣꬋ ጊዜ? *** ሂስቲኮ ሄ ኣሽካራ ጎዳይ ኢዚ ኢዛ ኣዛዞ ፖሊዳ ጊሽ ኢዛ ጋላቲ ኤሪዜ? ሄሳ ጊሽ ኢንቴኒካ ኢንቴ ኣዛዜቲዳይሳ ዉርሲ ፖሊዳ ዎዴ ‘ኑኒ ጎዓይ ባይንዳ ኦሳንቻታ ኑስ ኦꬃናስ ቤሲዛይሳ ፖሊ ኦꬂዶስ’ ጊቴ” ጊዴስ። ሄሳፌ ጉዬ ዬሱሲ ዬሩሳላሜ ቢሼ ሳማሪያራኔ ጋሊላ ኣቻራ ኣꬊዴስ። ኢሲ ጉታ ጌሊዳ ዎዴ ኢንቺራቻ ሃርጊዛ ታሙ ኣሳቲ ኢዛ ዴሚዳ። ኢስቲካ ሃሆን ኤቂዲ፤ ባ ቃላ ꬎቁ ሂስቲዲ “ዬሱሳ! ጎዶ! ኑስ ሚሼታርኪ!” ጊዳ። ኢዚካ ኢስታ ቤዪዲ “ቢቴ! ኢንቴና ቄሴታስ ቤሲቴ” ጊዴስ። ኢስቲካ ቡሮ ቢሼ ኦጌ ቦላ ፓፂዳ። ኢስታፌ ኢሶይ ባ ፓፂዳይሳ ቤዪዲ ባ ቃላ ꬎቁ ሂስቲዲ ፆሳ ቦንቺሼ ሲሚዴስ። ኢዛዴይካ ዬሱሳ ቶሆ ቦላ ኩንዲዲ ጋላቲዴስ፤ ኢዚካ ሳማሪያ ቢታ ኣሳ። ዬሱሲካ ኣዴዛ “ፓፂዳይቲ ታም ኣስ ዴቴኔ? ሂስቲን ኡዱፉናቲ ኣዋ ቢዶ? ሃይሳ ዱማ ዴሬ ኣዴዛፔ ኣቲን ፆሳ ጋላቲዛይ ባዋ ጉሴ?” ጊዲ ኦይቺዴስ። ኣዴዛካ ዛሪዲ “ዴንዳዳ ባ! ኔና ኔ ኣማኖይ ፓꬂዴስ” ጊዴስ። “ፆሳ ካዎቴꬂ ኣይዴ ያኔ?” ጊዲ ፋርሳዌቲ ዬሱሳ ኦይቺዳ ዎዴ ዬሱሲ “ፆሳ ካዎቴꬂ ቤቲዛ ማላታታን ዩኩ። ኣሳይ ፆሳ ካዎቴꬂ ሃን ዳዉስ ዎይኮ ሄን ዳዉስ ጋናስ ዳንዳዬቴና፤ ፆሳ ካዎቴꬂ ኢንቴ ጊዶን ዳዉስ” ጊዲ ዛሪዴስ። ባና ካሊዛይታስካ “ኣሳ ና ጋላሳታፔ ኢሲ ጋላሳዮ ቤያናስ ኢንቴ ኣሞታና ዎዴይ ያና፤ ጊዶ ኣቲን ኢንቴ ቤዬኬታ። ኣሳይ ኢንቴስ ‘ሃን ዳዉስ’ ዎይኮ ‘ሄን ዳዉስ’ ጋና ሺን ኢንቴ ኢስታ ካሊዲ ቦፒቴ። ጋሶይካ ዎልቃንꬂ ዎልቃሚዲ ሃ ጋፃፔ ሄ ጋፃ ጋካናስ ፖዒሲዛ ማላ ኣሳ ናይ ዪዛ ጋላስ ኢዛ ማላ ሃናና። ጊዶ ኣቲን ሃይሲ ዉሪ ሃናናፔ ኮይሮ ኣሳ ናይ ዳሮ ሜቶ ኤካናሲኔ ሃይሳ ሃ ዬሌቴꬃን ካꬌታናስ ቤሴስ። “ኖሄ ዎዴ ሃኒዳይሳ ማላ ኣሳ ና ዎዴንካ ሄሳꬆ ሃናና። ኖሄይ ማርካቤን ጌላና ጋላስ ጋካናስ ኣሳይ ሚሺኒኔ ኡዪሺን፤ ኤኪሺኒኔ ጌሊሺን ꬋይሲዛ ሃꬂ ዪዲ ዉርሲካ ꬋይሲዴስ። “ሎፄ ዎዴካ ኢዛ ማላ ሃኒዴስ፤ ኣሳይ ሜሲኔ ኡዬስ፤ ባዪዜሲኔ ሻሜስ፤ ቶኪዛዝ ቶኬስ፤ ኬꬂካ ኬፄቴስ። ጊዶ ኣቲን ሎፄይ ሶዶሜፔ ኬዚዳ ጋላስ ሹቺኔ ሚꬅ ቆሮንታ ዲኔ ታማይ ሳሎፔ ቡኪዲ ዉርሲ ꬋይሲዴስ። “ኣሳ ናይ ቆንጪዛ ጋላስ ሄሳꬆ ሃናና። ሄ ዎዴ ባ ኬꬃ ቦላ ዲዛዴይ ኦኒካ ኬꬃ ጊዶን ዲዛ ሚሽ ኤካና ጊዲ ዱጌ ዎꬎፎ፤ ሄሳꬆካ ጎሻ ሶን ዲዛ ኣሲ ጉዬ ሶ ሲሞፎ። ሎፄ ማቾ ቆፒቴ። ባ ዴዖ ጋምዒሳና ኮዪዛይ ዉሪ ꬋይሳና፤ ባ ሼምፖ ኣꬂ ኢሚዛዴይ ጋምዒሳና። ታ ኢንቴስ ጊዛይ ሄ ዎዴ ኦማርስ ናምዑ ኣሲ ኢሲ ሂፃን ኢቻና፤ ኢሶኔያ ኤኬታና፤ ኢሶይ ኣታና። ናምዑ ማጫሳቲ ኢሲፌ ጋጪሺን ኢሲኔያ ኤኬታና፤ ሃንኮራ ኣታና። ናምዑ ኣሲ ኢሲፌ ጎሻሶን ዳና፤ ኢሶይ ኤኬታና፤ ኢሶይ ኣታና። “ኢስቲካ ዛሪዲ ‘ጎዶ! ኢስቲ ኣዋ ኤኬታኔ?’ ጊዳ። ኢዚካ ኣሃይ ዲዛሶን ኣንኮቲ ሺቃና” ጊዴስ። ባና ካሊዛይቲ ኣዛሎንታ ኡባ ዎዴ ዎሳናስ ቤሲዛይሳ ኤሪሳናስ ዬሱሲ ሃ ሌሚሶዛ ኢስታስ ዮቲዴስ። “ኢሲ ካታማን ፆሳስ ያዮንታ ኣሲኔ ቦንቾንታ ኢሲ ዳናይ ዴስ። ሄ ካታማንካ ኢሲ ኣምዔ ማጫሲ ዳዉስ። ኢዛካ “ታ ባልጋራራ ታስ ሞቶይ ዲዛ ጊሽ ፒርዳርኪ?” ጋሼ ኢዛኮ ሲሜሬታዱስ። ዳናዚካ ዳሮ ዎዴ ጋካናስ ኢዚስ ፒርዲቤና፤ ጊዶ ኣቲን ጉዬፔ ባ ዎዝናን “ፆሳስ ያዮንታ ኣሴካ ቦንቾንታ ኣጊኮ፥ ሃና ኣምዔ ማጫሳያ ታና ዋይሲዛ ጊሽ ታ ኢዚስ ፒርዳና’ ሄሳ ሂስቶንታ ኣጊኮ ኡባ ዎዴ ሲሜሬታዳ ኢዛ ታና ዳቡርሳና” ጊዴስ። ጎዳይካ “ማካላንቻ ዳናይ ጊዳይሳ ሲዪቴ፤ ፆሲ ቃማ፥ ጋላሲኔ ኦማርስ ኢዛኮ ዋሲዛ ዶሬቲዳይታስ ፒርዴኔዬ? ታና ኣይ ሜቲዴ! ጊዲ ባ ማዶ ጋምዒሳንዴ? ታ ኢንቴስ ጋይስ፤ ኢስታስ ኤሌ ፒርዳና፤ ጊዶ ኣቲን ኣሳ ናይ ዪዛ ዎዴ ቢታ ቦላ ኣማኖ ዴማንዴሻ?” ጊዴስ። ባና ፂሎ ኣሳ ማላ ቆዲዲ ጬቄቲዛይታሲኔ ሃራታ ሌቆ ኣይፌን ፄሊዛይታስ ሌሚሶራ፥ “ናምዑ ኣሳቲ ዎሳናስ ፆሳ ኬꬄ ቢዳ፤ ኢሶይ ፋርሳዌ፥ ሂንኮይሲ ቃራፃ ሺሺዛዴ። ፋርሳዌዚካ ኤቂዲ ባ ጊሽ ‘ፆሶ! ታኒ ሃራ ኣሳ ማላ ቦንቂዛዴ፥ ማካሊዛዴ፥ ላይማቲዛዴ ሃራፔካ ሃይሳ ቃራፃ ሺሺዛዴ ማላ ጊዶንታ ኣጊዳ ጊሽ ታ ኔና ጋላታይስ። ሳሚንታን ናምዓ ፆማይስ፤ ታስ ዲዛ ታማፌ ኢሳ ኢማይስ’ ጊዲ ዎሲዴስ። “ጊዶ ኣቲን ቃራፃ ሺሺዛዴዚ ሃሆን ኤቂዲ ፑዴ ሳሎ ꬎቁ ጊዲ ፄላናስ ኮይቤና፤ ጊዶ ኣቲን ባ ቲራ ኢጪሼ ‘ፆሶ! ታና ናጋራንቻዛ ማራርኪ!’ ጊዴስ። “ታ ኢንቴስ ዮታይስ፤ ፆሳ ሲንꬃን ፋርሳዌዚ ፂሎቴꬂ ዴሚቤና ሺን ሃይሲ ቃራፂዛይሲ ፂሊዲ ባሶ ሲሚዴስ። ባና ꬎቁሲዛይ ዉሪ ዚቂ ጋና፤ ባና ዚቂሲዛይ ጊዲኮ ꬎቁ ጋና” ጊዴስ። ዬሱሲ ቦሼሬꬃና ማላ ኣሳይ ጉꬃ ናይታ ኢዛኮ ኤሂዴስ። ኢዛ ካሊዛይቲካ ሄሳ ቤዪዲ ሃንቄቲዳ። ጊዶ ኣቲን ዬሱሲ ጉꬃ ናይታ ባኮ ፄይጊዲ “ጉꬃ ናይቲ ታኮ ያናይሳ ዲጎፍቴ፤ ፆሳ ካዎቴꬂ ሃይታንታ ማላታሳ። ታ ኢንቴስ ቱሙ ጋይስ፤ ፆሳ ካዎቴꬂ ጉꬃ ና ማላ ኤኮንታይ ዉሪ ኢዚን ጌሌና” ጊዴስ። ኣይሁዳታ ሃላቃታፔ ኢሶይ “ኪያ ኣስታማሬ! ሜርና ዴዖ ላታናስ ታ ኣይ ኦꬆ?” ጊዲ ኦይቺዴስ። ዬሱሲካ “ኣዛስ ታና ኪያ ጋይ? ኢሲ ፆሳፌ ኣቲን ሃራ ኪያይ ዴና። ‘ላይማቶፓ፤ ዎꬎፓ፤ ካይሶቶፓ፤ ዎርዶ ማርካቶፋ፤ ኔ ኣዋ ቦንቻ’ ጊዛ ኣዛዞዛታ ኔ ኤራሳ” ጊ ዛሪዴስ። ኣዴዚካ “ሃይታ ጊዲኮ ጉꬃ ናቴቴꬃፌ ዶማዳ ናጋዲስ” ጊዴስ። ዬሱሲካ ሄሳ ሲይዲ “ሂስቲኮ ኔስ ኢሲ ሚሺ ፓጬስ፤ ኔስ ዲዛዚ ዉርሳ ባዪዛዳ ማንቆታስ ኢማ፤ ሳሎ ማዝጋባን ዴማንዳሳ፤ ኢዛፔ ጉዬ ያዳ ታና ካላ” ጊዴስ። ጊዶ ኣቲን ኣዴዚ ሄሳ ሲዪዳ ዎዴ ዳሮ ሃሮይ ኢዛስ ዲዛ ጊሽ ኬሂ ሚሼቲዴስ። ዬሱሲካ ኣዴዛ ፄሊዲ “ዳሮ ሚሺ ዲዛ ኣሳቲ ፆሳ ካዎቴꬂ ጌላናይሲ ኣይ ማላ ሜቶ! ዱሬይ ፆሳ ካዎቴꬅ ጌላናይሳፌ ጋሜላይ ናርፔ ሉኮራ ኣꬋናይሲ ማታና” ጊዴስ። ሄሳ ሲዪዳ ኣሳይ “ሂስቲን ኦኒ ኣታና ዳንዳዪዜ?” ጊዴስ። ዬሱሲካ ኣሳ ኣቻን ዳንዳዬቶንታይ ፆሳ ኣቻን ዳንዳዬቴስ ጊዴስ። ጴፅሮሲካ “ሄኮ ኑኒ ኑስ ዲዛዝ ኡባ ኣጊዲ ኔና ካሊዶስ” ጊዴስ። ዬሱሲካ ኢስታስ “ታ ኢንቴስ ቱሙ ጋይስ፤ ፆሳ ካዎቴꬃ ጊሽ ጊዲ ባ ኬꬄ፥ ባ ማቾ፥ ባ ኢሻንታ ዎይኮ ባና ዬሊዳይታ ዎይኮ ባ ናይታ ኣጊዳዴይ፥ ሃዒ ዎዴ ዳሮ ዳኮ ኩሼ ኤኮንታይኔ ዪዛ ዎዴ ቃሴ ሜርና ዴዖ ኤኮንታይ ኦኒካ ዴና” ጊዴስ። ዬሱሲካ ባና ካሊዛ ታማኔ ናምዓታ ዱማ ኤፊዲ “ሃዒ ኑኒ ዬሩሳላሜ ኬዛና ጎስ፤ ናቤቲ ኣሳ ና ጊሽ ፃፊዳይሲ ዉሪ ፖሌታና። ዴሬ ኣሳስ ኣꬂ ኢማና፤ ኢስቲካ ኢዛ ቂꬊ ካዓናኔ ዋይሳና፤ ኢዛ ቦላ ጩታና። ጋራፋና፤ ሄሳፌካ ዛሪዲ ዎꬋና፤ ኢዚካ ሄꬓንꬆ ጋላስ ሃይቆፔ ዴንዳና” ጊዴስ። ኢዛ ካሊዛይቲ ጊዲኮ ሄሳ ኡባፌ ኢሲኖካ ኤሪቤይቴና። ኢዛ ጊዛይሲካ ኢስታስ ጌሊቤና። ኢዚ ኣዛ ጊሽ ሃሳዪዳኮኔ ኤሪቤይቴና። ዬሱሲ ኢያርኮ ጌቴቲዛሶ ማቲዳ ዎዴ ኢሲ ቆቄ ኣዴይ ኦጌ ዱናን ኡቲዲ ዎሴስ። ሄ ቆቄ ኣዴዚካ ዳሮ ኣሳይ ኦጌራ ኣꬊዛይሳ ሲይዲ “ሄሲ ኣዜ?” ጊ ኦይቺዴስ። ኢስቲካ ኢዛስ “ናዚሬቴ ዬሱሲ ሃይሳራ ኣꬌስ” ጊዲ ዮቲዳ። ኢዚካ “ዳዉቴ ና ዬሱሳ ታስ ቃꬌታ” ጊ ዋሲዴስ። ዬሱሳፔ ሲንꬄቲ ቢዛይቲ “ጮዑ ጋ!” ጊዲ ሃንቄቲዳ። ጊዶ ኣቲን ኢዚ “ዳዉቴ ናዉ! ታስ ቃꬌታ” ጊዲ ዳርሲ ዋሲዴስ። ዬሱሲካ ኤቂዲ ኣዴዛ ኢዛኮ ኤሃና ማላ ኣዛዚዴስ፤ ኢዚካ ኢዛኮ ሺቂዳ ዎዴ “ታ ኔስ ኣይ ኦꬃና ማላ ኮያይ?” ጊዲ ኦይቺዴስ። ቆቄዚካ “ጎዶ ፄላናስ ኮያይስ” ጊዴስ። ዬሱሲካ “ኔና ኔ ኣማኖይ ፓꬂዴስ ፄላ” ጊዴስ። ኣዴዚ ሄራካ ፄሊዴስ፤ ፆሳካ ቦንቺሼ ዬሱሳ ካሊዴስ። ሄሳ ቤዪዳ ዴሬይ ዉሪ ፆሳ ጋላቲዴስ። ዬሱሲ ኢያርኮ ጌቴቲዛሶራ ኣꬊ ቢሺን፥ ዜኪዮሳ ጌቴቲዛ ኢሲ ኣሲ ሄን ዬሱሲ ቢዛ ኦጌ ቦላ ዴስ። ኢዚካ ዴሬ ቃራፃ ቃንፂሲዛይታስ ሃላቃኔ ኬሂ ዱሬ ኣሳ። ኢዚ ዬሱሳ ጌቴቲዛይሲ ኣዋይሳኮኔ ቤያናስ ኮዪሺን ቃንꬃ ኣሳ ጊዲዳ ጊሺኔ ዳሮ ዴሬይ ዬሱሳ ካሊዛ ጊሽ ዬሱሳ ቤያናስ ዳንዳይቤና። ዬሱሲ ሄ ኦጌራ ኣꬊሺን ሲንꬄ ኣꬊዲ ኦጌ ቦላ ዲዛ ኢሲ ኤꬃ ሚꬃ ቦላ ኬዚዴስ። ዬሱሲ ኤꬃ ጋርስ ጋኪዲ ꬎቁ ሂስቲ ፄሊዲ “ዜኪዮሳ! ሃች ታ ኔ ኬꬃን ፔዓናስ ቤሴስ። ኤሌላ ዎꬋ” ጊዴስ። ኢዚካ ኤሌ ዎꬊዲ ኡፋይሳን ሞኪ ኤኪዴስ። ሄ ዎዴ ሄን ኢዛራ ዲዛ ኣሳይ ሄሳ ቤዪዲ “ናጋራንቻ ኣሳ ኬꬃን ኢማቶ ማና ጌስ” ጊዲ ዉሪካ ባ ጊዶን ዙዙሜቲዳ። ጊዶ ኣቲን ዜኪዮሲ ኤቂዲ “ጎዶ! ታኒ ታስ ዲዛ ሚሼ ኡባፌ ባጋ ሻካዳ ማንቆታስ ኢማና፤ ታኒ ኦናፔካ ዎርዶራ ቦንቃ ኤኪዳዚ ዲኮ ኦይዱ ኩሼ ጉጃዳ ኢዛዴስ ኢማና” ጊዴስ። ዬሱሲካ “ሃ ኣዴዚ ኣብራሃሜ ና ጊዲዳ ጊሽ ሃች ሃ ኬꬃስ ፓፃቴꬂ ዪዴስ” ጊዴስ። ሃይሳስ ጋሶይካ ኣሳ ናይ ሃ ዪዳይ ꬋዪዳይሳ ኮያናሲኔ ኣሻናሳ። ኣሳይ ሃይሳ ሲዪሺን ሌሚሶራ ሃሳያ ኦይኪዴስ፤ ጋሶይካ ኢዚ ዬሩሳላሜ ጋካናስ ማቲዳ ጊሺኔ ኣሳታስ ፆሳ ካዎቴꬅ ቆንጫና ሃኒዛ ሚሳቲዳ ጊሻሳ። ሄሳ ጊሽ “ኢሲ ካዎ ናይ ባ ካዎቴꬃ ሹሜቴꬅ ኤኪ ያናስ ሃሆ ቢታ ቢዴስ። ባ ኣሽካራታ ጊዶፌ ታማታ ፄይጊዲ ታሙ ሚናኔ ኢስታስ ኢሚዲ ‘ታ ሲማዳ ያና ጋካናስ ሃይሳ ሚሻን ዛልዒቴ’ ጊዴስ። “ሄ ዴሬ ኣሳቲ ቃሴ ኢዛ ኢፂዳ ጊሽ ‘ሃይሲ ኣዴዚ ኑ ቦላ ካዎታና ማላ ኮዮኮ’ ጊዲ ኣስ ኢዛ ጌዶራ ኪታ ኣꬂ ዬዲዳ። “ጊዶ ኣቲን ሃ ካዎ ናዚ ካዎ ጊዲዲ ጉዬ ባ ዴሬ ሲሚዴስ። ካሴ ቢሼ ታሙ ሚናኔ ኢሚዳ ታሙ ኣሽካራቲ ኢዚ ኢሚዳ ቢራን ዛልዒዲ ኣይ ኬና ቲርፊሲዳኮኔ ኤራናስ ኢስታ ፄይጊዴስ። “ኢስታፌ ኮይሮይ ሺቂዲ ‘ጎዶ! ኔ ታስ ኢሚዳ ታሙ ሚናኔይ ሃራ ታሙ ዬሊዴስ’ ጊዴስ። “ጎዳዚካ ኢዛ ‘ኔ ኣማኔቲዳ ኣሽካራ፤ ሎዖ ኦꬃዳሳ። ኔ ጉꬃ ሚሻን ኣማኔቲዳ ጊሽ ታሙ ካታማታ ኔ ሃራና ማላ ኔስ ኢማዲስ’ ጊዴስ። “ናምዓንꬆዚካ ኢዛኮ ሺቂዲ ‘ጎዶ! ኔ ታስ ኢሚዳ ሚናኔፔ ሃራ ኢቻሹ ሚናኔይ ዎꬊዴስ’ ጊዴስ። “ኢዛ ጎዳዚ ኢዛስ ዛሪዲ ‘ኔኒ ኣይሳና ማላ ታሙ ካታማቲ ኔስ ኢሜቲዳ’ ጊዴስ። “ቃሴካ ሃንኮ ኦሳንቻይ ሺቂዲ ‘ጎዶ! ኔኒ ዎꬆንታሶፔ ኤኪዛዴ፤ ዜሮንታሶፔ ማፂዛዴኔ ሜንፄ ኢታ ኣስ ጊዲዳ ጊሽ ታ ኔስ ባባዳ ጩርቃን ፃፃ ዎꬂዳ ኔ ሚናኔዮ ሄይ ኤካ’ ጊዴስ። *** “ኢዛ ጎዳዚ ዛሪዲ ኢዛስ ‘ሃይሶ ኢታ ኦሳንቻዞ! ታ ኔ ቃላን ኔና ዛራ ፒርዳይስ። ታኒ ዎꬆንታሶፔ ኤኪዛዴኔ ዜሮንታሶፔ ማፂዛ ሜንፄ ኢታ ኣስ ጊዲዳይሳ ኤራሳሺን ታኒ ታ ሚሻ ዬሎራ ኤካና ማላ ሄ ሚሻን ኦꬃና ኣሳታስ ኣዛስ ኢማቤኪ?’ ጊዴስ። *** ኢዛ “ጎዳዚካ ሄን ኤቂዳ ኣሳታ ‘ኢዛ ኩሼፔ ሚናኔዛ ኤኪዲኔ ታሙ ሚናኔይ ዲዛይሳስ ኢሚቴ’ ጊዴስ። “ኢስቲካ ዛሪዲ ‘ጎዶ! ኢዛስ ታሙ ሚናኔይ ዴሲኮ’ ጊዳ። “ኢዚካ ዛሪዲ ‘ዲዛዴስ ኡባስ ሃራይ ጉጄታና፤ ባይንዳዴስ ካሴ ዲዛይሲ ኢዛፔ ኤኬቲቻና። ጊዶ ኣቲን ታኒ ኢስታ ቦላ ካዎቶንታ ማላ ኮይዳይታ ሃይታ ታ ሞርኬታ ታኮ ሃ ኤሂዲ ታ ሲንꬃን ሹኪቴ’ ” ጊዴስ። *** ሄሳ ሃሳዪ ሲሚዲ ዬሱሲ ዬሩሳላሜ ኬዛናስ ኢስታፌ ሲንꬃቲ ቢዴስ። ዳብራዛይቴ ጌቴቲዛ ዙማ ቦላ ዲዛ ቤቴፋጌኔ ቢታኒያ ጌቴቲዛ ካታማታኮ ማቲዳ ዎዴ ባና ካሊዛይታፔ ናምዓታ “ሄኒ ኢንቴ ሲንꬃን ዲዛ ቄሪ ካታማዮ ቢቴ፤ ቢዲ ካታማዮ ኢንቴ ጌሊሺን ኦኒካ ቶጊ ኤሮንታ ኢሲ ቃሼቲ ዲዛ ሃሬ ጉቴ ኢንቴ ዴሜና፤ ኢዛ ቢርሺዲ ሃ ታስ ኤኪ ዪቴ፤ ኢንቴና ኦኒካ ‘ኣዛስ ቢርሼቲ?’ ጊዲ ኦይቺኮ ‘ጎዳስ ኮሼስ ጊቴ’ ” ጊ ኪቲዴስ። *** *** ኪቴቲዳይቲካ ቢዲ ኢዚ ኢስታስ ዮቲዳ ማላ ሃሬ ጉቴዛ ዴሚዳ። ኢስቲ ጉቴዛ ቢርሺን ጉቴዛ ጎዳቲ ቤዪዲ “ኣዛስ ቢርሼቲ?” ጊዲ ኦይቺዳ። ኢስቲካ “ጎዳስ ኮሼስ” ጊዳ። ሃሬ ጉቴዛ ዬሱሳኮ ኤሂዲ ባ ማይዖ ዉርሲ ጉቴዛ ቦላ ዬጊዲ ዬሱሳ ሃሬ ጉቴዛ ቶጊሲዳ። ኣሳይ ዉሪካ ባ ኣፋላ ዬሱሲ ቢዛ ኦጌ ቦላ ሚጪዴስ። ዳብራዛይቴ ዙማ ቦላራ ዱጌ ዎꬂዛ ኦጌዛኮ ማቲዳ ዎዴ ቆዳይ ባይንዳ ዴሬይ ባ ቤዪዳ ማላታ ጊሽ ዉሪካ ኡፋይሳራ ባ ቃላ ꬎቁ ሂስቲዲ “ጎዳ ሱንꬃን ዪዛ ካዎይ ኣንጄቲዳይሳ፤ ሳሮይ ሳሎን ቦንቾይ ሳሎፔ ቦላ ሳሎን ጊዶ” ጊዴስ። *** ዴሬታፔ ኢሲ ኢሲ ፋርሳዌቲ ዬሱሳ “ኣስታማሬ! ሃ ኔና ካሊዛ ኣሳይ ጊዛይሳ ጎንታ ማላ ሃንቃ” ጊዴስ። ኢዚካ ኢስታስ ዛሪዲ “ሃይቲ ጮዑ ጊዳኮኔ ሹቻቲካ ዋሳና” ጊዴስ። ዬሱሲ ዬሩሳላሜ ማቲሼ ካታማዮ ቤዪዲ ኢዚስ ዬኪዴስ። “ኔስ ሳሮ ጊዲዛዝ ሃቺ ኔ ኤሪዳኮ ኣዜ ዲዛይ? ሃዒ ኔ ኣይፌፔ ቆቴቲዳ ጊሽ ኔ ሞርኬቲ ሄራ ሃራ ኔና ጊዶꬂዲ ኡንዔꬃና ዎዴይ ያና። *** *** ኔናኔ ኔ ጊቤ ጊዶን ኔናራ ዲዛ ኔ ናይታ ዉርሲ ቢታ ኬሳና። ሹቻካ ሹቻ ቦላፌ ላሎንታ ኣጌቴና። ሄሲ ዉሪካ ፆሲ ኔና ኮዪሺን ኔኒ ኤሮንታ ኣጊዳ ጊሻሳ” ጊዴስ። ሄሳፌ ካሊዲ ዬሱሲ ፆሳ ኬꬄ ጌሊዲ ፆሳ ኬꬃ ጊዶን ዛልዒዛይታ ኬሲዴስ። ቃሴካ “ታ ኬꬃይ ዎሳ ኬꬃ ጊዳና ጌቴቲዲ ፃፌቲዴስ፤ ኢንቴን ጊዲኮ ፓንጋይ ዲዛ ጎንጎሎ ሂስቲዴታ” ጊዴስ። ዎንቲን ዎንቲን ፆሳ ኬꬃን ኢዚ ታማሪሲሺን ፃፌቲኔ ዴሬ ሃላቃቲ ኢዛ ዎꬋናስ ኮይዳ። ጊዶ ኣቲን ዴሬይ ዉሪካ ኢዛራ ኦይኬቲዲ ኢዚ ታማርሲዛይሳ ካሊዛ ጊሽ ኦꬃናዚ ኢስታስ ኪርቂ ጊዴስ። ኢሲ ጋላስ ዬሱሲ ኣሳ ፆሳ ኬꬃን ታማርሲሺኔ ሚሺራቾ ቃላ ሳባኪሺን ቄሴ ሃላቃቲ ፃፌቲኔ ዴሬ ጪማቲ ሺቄቲዲ ኢዛኮ ዪዳ። “ሃይሳ ኔ ኦꬂዛይ ኦና ሼኔኔ? ኔስ ሼኔ ኢሚዳይ ኦኔ?” ጊዲ ኢዛ ኦይቺዳ። ኢዚካ ኢስታስ “ታካ ኢንቴና ኢሲ ኦይሾ ኦይቻይስ፤ ኣኔ ታስ ዛሪቴ። ዮሃኒሳ ፂንቃታይ ሳሎፔዬ? ኣሳፔ?” ጊዴስ። ኢስቲካ ባ ጊዶን ኢሶይ ኢሳራ “ኑ ‘ዮሃኒሳ ፂንቃታይ ሳሎፔ’ ጊኮ ኢዚ ኑና ‘ሂስቲን ኣዛስ ኣማኒቤኬቲ?’ ጋና። ‘ኣሳፔ’ ጊኮ ኣሳይ ዉሪ ዮሃኒሲ ናቤ ጊዲዳይሳ ኣማኒዛ ጊሽ ኑና ሹቻራ ጫዳና” ጊ ዞሬቲዳ። ሄሳ ጊሽ “ኢዚ ኣዋፔኮኔ ኑ ኤሮኮ” ጊዲ ዛሪዳ። ዬሱሲካ ሂስቲኮ “ታካ ኣዛ ዎልቃን ኦꬂዛኮኔ ኢንቴስ ዮቲኬ” ጊዴስ። ቃሴካ ዬሱሲ ኣሳስ ሌሚሶራ “ኢሳዴይ ዎይኔ ሚꬅ ቶኪዴስ፤ ጋዴ ጎዪዛይታስ ኪራ ኢሚዲኔ ሃራ ዴሬ ቢዲ ሄን ጋምዒዴስ። ካፂዛ ቦኔ ዎዴ ካꬃፌ ኤኪ ያና ማላ ባ ኣሽካራታፔ ኢሳዴ ጋዴዛ ጎይዳ ኣሳታኮ ዬዲን ጋዳ ጎዪዛይቲ ኪታ ቢዳይሳ ቆፂዲ ሜላ ኩሼ ዬዲዳ። ካሌꬂዲካ ሃራ ኣሽካራ ዬዲን ጎሻንቻቲ ሃዒካ ኦይኪ ቆፂዲኔ ካዉሺዲ ሜላ ዬዲዳ። ሃዒካ ካሌꬂዲ ሄꬓንꬆ ኣሽካራ ዬዲን ጎሻንቻቲ ኢዛካ ቆፄሬꬂ ማዱንꬂዲ ጌዴ ካሬ ኬሲ ዬጊዳ። “ዎይኔ ሚꬃ ጎዳይ ‘ሃዒ ኣይ ኦꬆ? ኦኔ ኤሪዛይ ታ ኬሃ ሲቂዛ ታ ናዛ ዬዲዳኮ ኢዛ ቦንቻንዴቶሻ?’ ጊዴስ። “ጊዶ ኣቲን ቢታ ጎዪዛይቲ ናዛ ቤዪዳ ማላ ባ ጊዶን ‘ሃይሲ ኢዛ ላታና ናዛ ጊዴኔ? ሃ ዪቴ ኢዛ ዎꬊዲ ቢታ ላቶስ’ ጊዲ ዞሬቲዳ። ዎዪኔ ሚꬃ ቶኪዳሶፔ ጌዴ ካሬ ኬሲዲ ናዛ ዎꬊዳ። ሂስቲኮ ሃዒ ዎይኔ ሚꬃ ጎዳይ ሃ ኣሳታ ዎስታኔ? ዪዲኔ ሄ ጎሻንቻታ ꬋይሳና፤ ዎይኔ ሚꬃ ቶኪዛሶዛ ሃራታስ ኢማና” ጊዴስ። ዴሬይካ ሄሳ ኢዚ ጊዳይሳ ሲይዲ “ሃይሳ ማላይ ሃኖፖ” ጊዴስ። ዬሱሲካ “ኢስታኮ ፄሊዲ ‘ሂስቲን ሹቻን ኬꬄ ኬፂዛ ኣሳቲ ሌቂ ኣጊዳ ሹቻይ ኬꬃስ ዋና ሁዔ ጊዳና” ጌቴቲዲ ፃፌቲዳ ሌሚሶዛስ ቢርሼꬃይ ኣዜ?’ ጊዴስ። ሃ ሹቻ ቦላ ኩንዲዳይ ዉሪ ሹቻን ቆፄታና፤ ሹቻይካ ኢዛ ቦላ ዎꬊዳዴይ ዉሪካ ሊቃና” ጊዴስ። ፃፌቲኔ ቄሴታ ሃላቃቲ ሄሲ ሌሚሶዚ ኢስታ ቦላ ሃሳዬቲዳይሳ ኤሪዲ ሄራካ ኢዛ ኦይካናስ ኮይዳ ሺን ዴሬዛስ ባቢዳ። ዬሱሳ ዎልቃራ ሃሪዛይታስ ኣꬂ ኢማናስ ኢዛ ዱናፔ ኬዚዛ ባላ ቃላ ዴሚዲ ኦይካናስ ካሊ ካሊ ናጊዳኔ ፂሎ ኣሳ ሚሳቲዲ ኢዛ ካሊ ኢዛ ዱናፔ ዮዖ ናጊዛ ኣሳታ ኢዛኮ ዬዲዳ። ኢዛ ዱናፔ ዮዖ ኮዪዛ ኣሳቲ ዬሱሳ “ኣስታማሬ! ኔኒ ቱማ ሃሳዪዛይሳኔ ቱማ ታማርሲዛይሳ ቃሴካ ፆሳ ኦጌ ኔ ቱሙ ታማርሲዛይሳኔ ኦናካ ሻካ ማዶንታይሳ ኑ ኤሮስ። ጊዶ ኣቲን ቄሳሬስ ጊራ ጊራናስ ቤሲዜ? ቤሴኔ?” ጊዲ ኦይቺዳ። ኢዚካ ኢስታስ ዲዛ ጌኔ ቆፋ ኤሪዲ፥ “ኣኔ ኢሲ ዲናሬ ታና ቤሲቴ፥ ሃይሲ ኢዛ ቦላ ዲዛ ሜꬋዚኔ ፃፌቶይሲ ኦናይሴ?” ጊዴስ። ኢስቲካ “ቄሳሬይሳ” ጊዳ። ኢዚካ ዛሪዲ ኢስታስ “ቄሳሬይሳ ቄሳሬስ፥ ፆሳይሳ ፆሳስ ኢሚቴ” ጊዴስ። ሄሳ ጊሽ ኢዚ ሃሳዪዳ ቃላፔ ኤኪዲ ኣሳ ሲንꬃን ኢዛ ቃፃናስ ዳንዳይቤቴና፤ ኢዚ ኢሚዳ ቃላን ማላሌቲዲ ጮዑ ጊዳ። ሃይቂዳይታ ዴንꬂ ባዋ ጊዛ ሳዱቃዌታፔ ኢሲ ኢሲ ኣሳቲ ዬሱሳኮ ዪዲ ኦይሾ ሺሺዳ። “ጎዶ! ‘ኢሳዴይ ማቾ ኤኪዲ ና ዬሎንታ ሃይቂኮ ሄ ሃይቂዳይሳ ማቼዮ ኢዛ ኢሻይ ኤኪዲ ባ ኢሻ ላታና ና ኢዛስ ዬሎ’ ጊዲ ሙሴይ ኑስ ፃፊዴስ። ሂስቲን ላፑን ኢሻቲ ዴቴስ ሺን ኢስታፌ ባይራይ ማቺዲ ና ዬሎንታ ሃይቂዴስ። ኢዛ ካሎዚካ ኢዛꬆ ሃይቂዴስ፤ ሄꬓንꬆዚካ ኢዞ ኤኪዴስ፤ ላፑናቲ ዉሪካ ሄ ማጫሳዮ ኤኪዲ ዉሪካ ና ዬሎንታ ሃይቂዳ። ዉርሴꬃን ማጫሳያ ሃይቃዱስ። ላፑናቲካ ሃ ማጫሳዮ ኤኪዳ ሺን ሃ ማጫሳያ ዉርሴꬃን ሃይቂዳይቲ ዴንዲዛ ዎዴ ኢዛ ኣዋይሳ ማቾ ጊዳኔ?” ዬሱሲ ኢስታስ “ሃ ዴሬ ናይቲ ጌሌቴሲኔ ኤኬቴስ። ቡሮ ያና ኣላሜን ሃይቂዳይታ ዴንꬃ ዴማናስ ቤሲዛይቲ ጊዲኮ ጌሌቴናኔ ኤኬቴና። ኢስቲ ኪታንቻታ ማላ ጊዳና ጊሽ ሄሳፌ ጉዬ ሃይቄቴናኔ ሃይቆፔ ዴንꬃ ናይታ ጊዲዳ ጊሽ ኢስቲ ፆሳ ናይታ። ሙሴይ ቄሪ ዎራ ጊሽ ፃፌቲዳ ታሪኬዛን ጎዳ ‘ኣብራሃሜ ፆሳ፥ ዪሳቃ ፆሳ ያቆቤ ፆሳ’ ጉሳን ሃይቂዳይቲ ዴንዳናይሳ ቤሴስ። ዉሪካ ኢዛስ ዴዖይ ዲዛ ጊሽ ኢዚ ፓፃታ ፆሳፌ ኣቲን ሃይቄꬃታ ፆሴ ጊዴና” ጊዴስ። ኢሲ ኢሲ ፃፌቲ “ኣስታማሬ! ሎዖ ጋዳሳ” ጊዳ። ሄሳፌ ጉዬ ኣይ ኣሲካ ኢዛ ኦይቻናስ ፃሊቤና። ሄሳፌ ጉዬ ዬሱሲ “ኣሳይ ማሲሄ ዋኒዲ ኢዚ ዳዉቴ ና ጊዜ? ጋሶይካ ዳዉቴይ ባ ፃፊዳ ማዛሙሬ ማፃፋታን ‘ታ ኔ ሞርኬታ ኔ ቶሆ ጋርስ ኣꬃና ጋካናስ ጎዳይ ታ ጎዳ ኔ ታ ኡሻቻን ኡታ’ ዋኒዲ ጊዴ? *** ሂስቲኮ ዳዉቴይ ኢዛ ‘ጎዳ’ ጊ ፄይጊሼ ዋኒ ኢዛስ ና ጊዳኔ?” ጊዴስ። ዴሬይ ዉሪ ሲዪሺን ባና ካሊዛይታስ “ጎሼቲዛ ኣዱሳ ቃምሴ ማይዒዲ ዩሼ ዶሲዛይታፔኔ ጊያይ ዲዛሶን ሳሮኬቴꬅ ኮዪዛይታፔኔ ኣይሁዳ ዎሳ ኬꬃን ꬎቃ ኦይዴኔ ዲጊሳሶን ቦንቾሶ ኮዪዛይታፔ ፃፌታፔ ናጌቲቴ። ሃይታንቲ ኣምዔታ ኬꬃ ካሎሲዛይታ። ኣሲ ኢስታ ቤያና ማላ ዎሳ ኣዱሴቴስ፤ ሄይታንታ ኢታ ፒርዳይ ናጌስ” ጊዴስ። ዬሱሲ ꬎቁ ጊ ፄሊሺን ዱሬ ኣሳቲ ፆሳ ኬꬄን ሙፁዋታ ኢዛን ሺሺዛይሳ ጊዶን ሙፁዋታ ዬጊሺን ቤይዴስ። ቃሴካ ኢሲ ኣምዖ ዲዛራ ናምዑ ሲኪና ጊዲዛ ናምዑ ፃርቂማላ ሄ ሙፁዋታ ኢዛን ሺሺዛይሳን ዬጊሺን ፄሊዲ፥ “ታ ኢንቴስ ቱሙ ጋይስ፤ ሃና ኣምዔያ ኡባ ኣሳፔ ቦላራ ኣꬌꬅ ኢማዱስ ጊዴስ። ሃይቲ ኣሳቲ ኢሚዳይ ባስ ዲዛ ቲርፓፌ ጊዲሺን ኢዛ ጊዲኮ ባስ ባይንዳ ዎልቃፌ ባስ ዲዛሮኔ ባ ዱሳስ ኮሺዛሮ ዉርሳ ዬጋዱስ” ጊዴስ። ኢዛ ካሊዛይታፔ ኢሲ ኢሲ ኣሳቲ ፆሳ ኬꬃይ ሎዖ ሹቻኒኔ ኣሳይ ኢሚዳ ኢሞታን ኣይ ማላ ሎዒ ኬፄቲዳኮ ጊዲ ባ ጊዶን ሃሳዬቲሺን ዬሱሲ ሲይዲ “ሃይሲ ኢንቴ ቤዪዛይሲ ዉሪ ላሌቶንታ ሹቺ ሹቻ ቦላ ኬሌቲዳ ማላ ኣቶንታ ዎዴይ ያና” ጊዴስ። *** ኢስቲካ ኢዛ “ኣስታማሬ! ሃይሲ ዉሪ ኣይዴ ሃናኔ? ቃሴ ሃይሲ ሃናናይሳስ ማላታይ ኣዜ?” ጊዲ ኦይቺዳ። ኢዚካ ኢስታስ “ኢንቴ ባሌቶንታ ማላ ናጌቲቴ፤ ዳሮቲ ባና ‘ታ ኪርስቶሳኮ! ዎዴይካ ማቲዴስ’ ጊሼ ታ ሱንꬃራ ያና ሺን ኢንቴ ኢስታ ካሎፍቴ። ኦላ ጊሺኔ ዴሬ ማካላቴꬃ ጊሽ ሲዪዛ ዎዴ ዳጋሞፍቴ። ሄሲ ዉሪ ካሴቲዲ ሃናናስ ቤሴስ፤ ዉርሴꬂ ጋኪዴስ፤ ጊዶ ኣቲን ሄራካ ሃኔና” ጊዴስ። ቃሴ “ዴሬይ ዴሬ ቦላ፥ ካዎይ ካዎ ቦላ ዴንዳና። ቢታይ ዎልቃማ ቃꬅ ቃፃና፤ ኮሻይኔ ቦሻይ ዱማ ዱማሶን ሃናና፤ ዳሮ ባቢሲዛዚኔ ሳሎፔ ጊታ ማላታይ ቤታና። “ሄሲ ዉሪ ሃናናፔ ካሴቲዲ ኣሳይ ኢንቴና ኦይካናኔ ጎዳና፤ ኣይሁዳ ዎሳ ኬꬂኔ ቃሾ ኬꬄ ጌልꬃና፤ ካዎታ ሲንꬂኔ ዳናታ ሲንꬅ ሺሻና። ሄሲ ዉሪ ታ ሱንꬃ ጊሽ ኢንቴ ቦላ ጋካና። ሄሲ ዉሪካ ማርካታናስ ሎዖ ቃዳ ጊዳና። ሄሳ ጊሽ ኑና ኦይቺዛይታስ ኑ ኣይ ዛሪኖ? ጊዲ ካሴቲዲ ሂርጎንታ ማላ ሃይሳ ዎዝናን ዎꬂቴ። ኢንቴ ሞርኬታፔ ኦኒካ ኢንቴናራ ኤቄታናሲኔ ባሌꬃናስ ዳንዳዮንታ ቃላኔ ጪንጫቴꬅ ታ ኢንቴስ ኢማና። ኢንቴና ዬሊዳይቲኔ ኢንቴ ኢሻቲ፥ ኢንቴ ዳቦቲኔ ኢንቴ ላጌቲ ዉሪ ኢንቴና ኣꬂ ኢማና፤ ኢንቴፌ ባጋታ ዎꬋና። ታ ሱንꬃ ጊሽ ኡባ ኣሳ ኣቻን ኢንቴ ኢፄታና። ጊዶ ኣቲን ኢንቴ ሁዔ ቢናናታፔ ኢሲናካ ꬋዩኩ። ኢንቴ ሚኒ ኤቂኮ ኢንቴ ሼምፖ ኢንቴ ኣሻና። “ኦላ ኣሳይ ዬሩሳላሜ ጊዶꬂሺን ቤይኮ ኢዚስ ꬋዪዛ ዎዴይ ማቲዳይሳ ኤሪቴ። ሄ ዎዴ ዩሁዳን ዲዛይቲ ፑዴ ዙማ ቦላ ጋንጌቶ፤ ካታማን ዲዛይቲካ ካታማፔ ኬዚቴ፤ ዴሬ ጊዶን ዲዛይቲካ ሄ ካታማዮ ጌሎፔቶ። ፃፌቲዳይስ ዉሪ ፖሌታናስ ሃና ሃሎ ኬሲዛ ዎዴ። ቢታ ቦላ ጊታ ሜቶይ ሃናና፤ ሃይሳ ዴሬዛ ቦላ ሃንቆይ ያና፤ ሄሳ ጊሽ ሄ ዎዴ ቃንꬃራ ዲዛ ማጫሳታሲኔ ꬋንꬂዛ ኣዬታስ ኣዬ ኣና! ባጋ ኣሳይ ማሻን ሃይቃና፤ ባ ዴሬፔ ሃራ ዴሬ ዲዔታና፤ ዬሩሳላሜይካ ፆሴ ኤሮንታ ዴሬታ ዎዴይ ፖሌታና ጋካናስ፥ ፆሴ ኤሮንታ ኣሳታን ዬꬌቲዳሮ ጊዳና። “ኣዋ ኣርሼ ቦላ፥ ኣጊና ቦላኔ ፆሊንቴ ቦላ ማላታይ ቤታና፤ ኣባፌኔ ኣባ ዳምባላ ጊሪሳፌ ዴንዲዳይሳን ቢታ ቦላ ዲዛ ዴሬይ ሂርጋናኔ ሜቶቴታና። ሳሎ ዎልቃማቲ ቃፂዛ ጊሽ ኣሳይ ቢታ ቦላ ኣዜ ሃናኔሻ ጉሳኒኔ ናጎን ፃላ ዳቡራና። ሄ ዎዴ ኣሳ ናይ ዎልቃራ፥ ጊታ ቦንቾራኔ ሻራራ ዪሺን ቤያና። ኢንቴካ ሃይቲ ሃ ታ ጊዳይቲ ፖሌቴꬅ ኦይኪሺን ኢንቴስ ኣቴꬃ ዎዴይ ማቲዳ ጊሽ ሲቲ ጊ ኤቂቴ፤ ኢንቴ ኣይፌ ፑዴ ꬎቁ ሂስቲቴ” ጊዴስ። ካሌꬂዲ “ባላሴ ሚꬂኔ ሃራ ሚꬃታ ዉርሲ ፄሊቴ፤ ሄ ሚꬃቲ ሃይꬄ ኬሲሺን ኢንቴ ቤዪዛ ዎዴ ቦኔይ ማቲዳይሳ ኢንቴ ኤሬታ። *** ሄሳꬆካ ሃይታንቲ ጌቴቲዳይቲ ፖሌቲሺን ኢንቴ ቤዪዛ ዎዴ ፆሳ ካዎቴꬂ ኢንቴኮ ማቲዳይሳ ኤሪቴ። “ታ ኢንቴስ ቱሙ ጋይስ፤ ሃይሲ ዉሪ ፖሌታና ጋካናስ ሃ ዬሌታይ ኣꬌና። ሳሎይኔ ሳዓይ ኣꬋና ሺን ታ ቃላይ ኣꬌና። “ሂስቲኮ ዎጋይ ባይንዳ ዱሳን፥ ዳሮ ኡሻኒኔ ዱሳስ ሂርጋን ኢንቴ ዎዝናይ ዳቡሮፖ፤ ሄሳ ኦꬆንታ ኢፂኮ ሄ ጋላሳይ ኢንቴ ቆፖንታ ናርፃ ማላ ኢንቴ ቦላ ጋኮንታ ማላ ናጌቲቴ። ሃይሲ ቢታ ቦላን ዲዛ ኣሳ ኡባ ቦላ ጋካና። ሄሳ ጊሽ ቡሮ ያናይሳፌ ኢንቴ ኬሲ ኤካና ማላኔ ኣሳ ና ሲንꬃን ኤቃናስ ዳንዳያና ማላ ኡባ ጋላስ ሚኒዲ ዎሲቴ” ጊዴስ። ዬሱሲ ጋላስ ጋላስ ፆሳ ኬꬃን ታማርሲ ታማርሲዲ ኦማርስ ኦማርስ ዳብራዛይቴ ጌቴቲዛ ዙማ ቦላ ኬዚ ኬዚ ኣቄስ። ኣሳይ ዉሪካ ኢዛፔ ሲያናስ ማላዶ ዎንታራ ዬሱሳኮ ፆሳ ኬꬄ ዬስ። ሄ ዎዴ ፓዚጋ ጌቴቲዛ ኡኬꬃራ ቦንቼቲዛ ባዓሌይ ማቲ ኡቲዴስ። ቄሴታ ሃላቃቲኔ ፃፌቲ ሃንኮ ዴሬ ኣሳስ ባቢዛ ጊሽ ዬሱሳ ꬋይሳና ኦጌ ኮይዳ። ዬሱሳ ካሊዛ ታማኔ ናምዓታፔ ኣስቆሮንቶ ዴሬ ኣሳ ዩሁዳ ጌቴቲዛይሳን ፃላዔይ ጌሊዴስ። ዩሁዳይካ ቄሴታ ሃላቃታኮኔ ፆሳ ኬꬃ ኣላፌታኮ ቢዲ ኢስታስ ዬሱሳ ዎስት ኣꬂ ኢማናኮኔ ኢስታራ ሃሳዬቲዴስ። ኢስቲካ ሄሳን ኡፋዬቲዲ ሚሼ ኢማናስ ኢዛራ ጊጊዳ። ዩሁዳይካ ኢስታ ቆፋ ዶሲዴስ፤ ዬሱሳ ኢስታስ ኣሲ ቤዮንታ ኣꬂ ኢማናስ ኢንጄ ዎዴ ናጊሺን ፓዚጋ ዶርሳ ሹኪዲ ኡኬꬃራ ቦንቺዛ ባዓሌ ጋላስ ጋኪዴስ። *** ዬሱሲካ ባና ካሊዛይታ “ፓዚጋ ካዎ ማናስ ቢዲ ኑስ ጊጊሲቴ” ጊዲ ጴፅሮሳኔ ዮሃኒሳ ኪቲዴስ። ኢስቲካ “ኑ ኣዋን ጊጊሳና ማላ ኮያይ?” ጊዳ። ኢዚካ ዛሪዲ “ኢንቴ ጌዴ ዬሩሳላሜ ካታማ ጌሊሺን ሃꬃ ኦቶ ቶኪዳ ኣሲ ኢንቴና ዴሜና፤ ኢንቴካ ኢዚ ቢዲ ጌሊዛ ኬꬄ ጋካናስ ኢዛ ካሊቴ። ኬꬃዴዛስ ‘ኣስታማሬይ ታና ካሊዛይታራ ፓዚጋ ካዎ ማናስ ኢማꬃ ኬꬂ ኣዋን ዲዜ?’ ጌስ ጊቴ። ኢዚካ ኢማꬃስ ጊጌቲዳ ኣሆሶ ኢንቴና ቤሳና፤ ኢዚ ቤሲዛ ሶን ጊጊሲቴ” ጊዴስ። ኢስቲካ ቢዲ ዬሱሲ ጊዳ ማላ ኬꬃ ዴሚዲ ፓዚጋ ሄን ጊጊሲዳ። ዎዴይ ጋኪዳ ማላ ዬሱሲ ሃዋሬታራ ቁማ ማዳን ኡቲዲ “ታ ዋዬ ቤያናፔ ካሴታዳ ሃይሳ ፓዚጋ ኢንቴናራ ኢሲፌ ማናስ ኬሂ ኣሞታዲስ። *** ታ ኢንቴስ ቱሙ ጋይስ፤ ፆሳ ካዎቴꬃን ሃይሳ ቢርሼꬂ ፖሌታና ጋካናስ ሃይሳ ፓዚጋ ናምዓንꬆ ታ ኢንቴናራ ሚኬ” ጊዴስ። ዎይኔፔ ኦሴቲዳ ኡሻ ፁዓራ ኤኪዲኔ ፆሳ ጋላቲ ሲሚዲ “ሄይቴ፤ ዉሪካ ኢዛፔ ኡይቴ” ጊዲ ኢስታስ ኢሚዴስ። “ታ ኢንቴስ ቱሙ ጋይስ፤ ሃይሳፌ ጉዬ ፆሳ ካዎቴꬂ ያና ጋካናስ ናምዓንꬆ ሃ ዎይኔ ኡሻፌ ኡዪኬ” ጊዴስ። ኡኬꬃ ኤኪዲ ፆሳ ጋላቲዴስ። ኢዛፔ ኢስታስ ሜንꬂ ኢሚዲ “ሃይሲ ኢንቴ ጊሽ ኢሜታና ታ ኣሾ ሌሚሶ ጊዲዛ ጊሽ ሃይሳ ኡባ ዎዴ ታና ቆፓናስ ኦꬂቴ” ጊዴስ። ኢዛꬆካ ካዎፔ ጉዬ ኡሻ ፁዓ ዴንꬂዲ “ሃይሲ ኡሻይ ኢንቴ ጊሽ ታ ሱꬃን ሃናና ኦራꬅ ጫቆ ዎጋ። “ጊዶ ኣቲን ታና ኣꬂ ኢማናዴ ኩሼይ ታ ኩሼራ ኢሲፌ ማዳን ዴስ። ኣሳ ናይ ካሴቲዲ ኢዛ ጊሽ ሃናናይሲ ዉሪ ኡቲዳ ማላ ኢዚ ባና፤ ጊዶ ኣቲን ኢዛ ኣꬂ ኢሚዛዴስ ኣዬ-ኣና” ጊዴስ። ኢስቲካ ሄሳ ኦꬃናይ ኦኔ? ጊዲ ባ ጊዶን ኢሶይ ኢሳ ኦይሼሬꬂዳ። ቃሴካ “ኦኒ ኦናፔ ኣꬊዛኮኔ” ጊዲ ባ ጊዶን ኢሶይ ኢሳራ ፓላሜቲዳ። ዬሱሲካ ኢስታ “ዴሬ ሃሪዛ ካዎቲ ባ ዴሬ ኣሳ ዎልቃራ ሃሬቴሲኔ ኢስቲካ ሎዖ ካዎታ ጌቴቲዲ ፄይጌቴቴስ። “ኢንቴ ጊዲኮ ሄሳꬆ ሃኖፒቴ፤ ኢንቴፌ ጊታ ጊዲዳዴይ ዎይኮ ታ ኦፔካ ኣꬋይስ ጊዛ ኣሲ ኡባፌ ቄሪ ና ማላ ጊዶ፤ ሃሪዛዴይ ሃሬቲዛዴ ማላ ጊዶ። ቁማ ኤቂዲ ሚዚዳዴፌኔ ኡቲዲ ሚዛዴፌ ኦኒ ኣꬊዜ? ኡቲዲ ሚዛዴ ጊዴኔ? ታኒ ቃሴ ኢንቴ ጊዶን ኣሽካራ ማላ ዳይስ። “ኢንቴን ጊዲኮ ታፔ ሻኬቶንታ ታ ዋዪሺን ታ ማታን ኤቂዳይታ። ታ ኣዋይ ታና ካዎꬂዳይሳ ማላ ታኒካ ታ ካዎቴꬃን ኢንቴና ካዎꬃና። ሄሲካ ታ ካዎቴꬃን ታ ማዳፌ ኢንቴ ማና ማላኔ ኡያና ማላ። ቃሴካ ታ ካዎቴꬃ ኣልጋን ኡቲዲ ታማኔ ናምዑ ኢስራዔሌ ናይታ ቦላ ፒርዳናሳ” ጊዴስ። ቃሴካ ዬሱሲ ሲሞና ፄይጊዲ “ሲሞና! ፃላዔይ ኢንቴና ጊስቴ ማላ ሱራጋናስ ዎሲዴስ። ጊዶ ኣቲን ታኒ ኔፔ ኣማኖይ ꬋዮንታ ማላ ኔ ጊሽ ፆሳ ዎሳዲስ፤ ኔካ ሲሚዳ ዎዴ ኔ ኢሻታ ሚንꬄꬃ” ጊዴስ። ሲሞኒካ ዛሪዲ “ጎዶ! ታ ኔናራ ቃሼታናሲኔ ሃይቃናስ ጊጋ ኡታዲስ” ጊዴስ። ዬሱሲካ ዛሪዲ “ጴፅሮሳ ሃች ኩቶይ ኢሲቶ ዋሳናስ ‘ታ ኢዛ ኤሪኬ’ ጋዳ ሄꬑቶ ኔ ታና ካዳና” ጊዴስ። ቃሴካ ዬሱሲ ኢስታ “ታ ኢንቴና ካሴ ጫማይ፥ ኮሮጆይኔ ቃራፂቴ ባይንዳ ኪቲዳ ዎዴ ኢንቴስ ኣዚ ፓጪዴ?” ጊዲ ኦይቺዴስ። ኢስቲካ “ኣይኮይካ ፓጪቤና” ጊዳ። ኢዚካ ዛሪዲ “ሃዒ ጊዲኮ ኮሮጆካ ቃራፂቴይካ ዲዛዴይ ኦይኮ፤ ጊꬃ ማሻይ ባይንዳዴይ ባ ማይዖ ባይዚዲ ሻሞ። ታ ኢንቴስ ቱማ ጋይስ ‘ማካላታራ ኢዚ ኢሲፌ ታይቤቲዴስ’ ጌቴቲ ካሴ ፃፌቲዳ ቃላይ ታ ቦላ ፖሌታና ቤሴስ፤ ታ ጊሽ ፃፌቲዳይሳስ ፖሎይ ቱማፔ ጋኪዴስ” ጊዴስ። ኢዛ ካሊዛይቲ ቃሴ “ጎዶ! ሄኮ ናምዑ ጊꬃ ማሻቲ ሃይሳን ዴቴስ” ጊዳ። ኢዚካ ኢዛ ጊሽ “ሃይሲ ጊዳና” ጊዴስ። ካሴ ኢዛስ ሎሴ ጊዲዳ ማላ ፑዴ ዳብራዛይቴ ጌቴቲዛ ዙማ ቦላ ኬዚ ቢዴስ። ኢዛ ካሊዛይቲካ ኢዛ ካሊ ቢዳ። ሄ ጋኪዳ ማላ “ኢንቴ ፓጬን ጌሎንታ ማላ ዎሲቴ” ጊዴስ። ዬሱሲ ባና ካሊዛይታፔ ኣሲ ሹች ኦሊዲ ጋꬃናሶ ማላ ሃኪ ቢዲ ጉልባቲ ዎሲዴስ። “ታ ኣዋዉ! ኔ ሼኔ ጊዲኮ ሃኖ ሜቶዮ ታፔ ዲጋ፤ ጊዶ ኣቲን ኔ ሼኔይ ሃኖፔ ኣቲን ታ ሼኔይ ሃኖፖ” ጊዲ ዎሲዴስ። ሳሎፔ ኪታንቻይ ቆንጪዲ ዬሱሳ ሚንꬄꬂዴስ። ኢዚካ ኬሂ ፁጌቲዲ ዎሲሺን ኢዛ ኣሳቴꬃፌ ጫዋይ ሱꬃ ማላ ጉኪዴስ። ዎሳፔ ዴንዲዲ ባና ካሊዛይታኮ ቢዴስ። ኢስቲካ ኢዛስ ሚሼቲዲ ቆፒሺን ꬊስኮይ ኤፊዳሼ ዬሱሲ ኢስታኮ ዪዲ፥ “ኣይስ ꬊሲኬቲ? ኢንቴ ፓጬን ጌሎንታ ማላ ሃዒ ዴንዲዲ ዎሲቴ” ጊዴስ። ኢዚ ቡሮ ሃሳያን ዲሺን ዬሱሳ ካሊዛይታፔ ኢሶይ ዩሁዳ ጌቴቲዛይሲ ባናራ ዳሮ ኣሳ ካሌꬂ ኤኪ ዪዲ ዬሱሳ ዬራናስ ኢዛኮ ሺቂዴስ። ጊዶ ኣቲን ዬሱሲ ኢዛ “ዩሁዳ! ታና ኣሳ ና ዬሮን ኣꬃ ኢማይ?” ጊዴስ። ዬሱሳ ዩዪ ኣꬊ ዲዛ ኣሳይ ሃኖዛ ሎዔꬂ ፄሊዲ “ጎዶ! ሃይታንታ ማሻራ ቡꬂኖ?” ጊዳ። ኢስታፌ ኢሶይ ቄሴታ ኣላፌ ኣሽካራ ኡሻቻ ሃይꬄ ማሻራ ቃንፂዴስ። ዬሱሲ ኢስታ “ኢንቴ ሃዒ ታስ ኣጊቴ!” ጊዲ ኣሽካራ ሃይꬃ ቦቺዲ ፓꬂዴስ። ቃሴካ ኢዛ ኦይካና ዪዳ ቄሴታ ሃላቃታ ፆሳ ኬꬃ ኣላፌታኔ ጪማታ “ፓንጋ ኦይኪዛ ኣሳ ማላ ጊꬃ ማሻኔ ዱርቃ ኤኪዲ ዪዴቲ? ጋላስ ጋላስ ታ ኢንቴናራ ፆሳ ኬꬃን ዲሺን ታ ቦላ ኩሼ ዎꬂቤኬታ፤ ሃይሲ ꬉማይ ካዎቲዳ ኢንቴ ዎዴ” ጊዴስ። ሄሳፌ ጉዬ ዬሱሳ ኦይኪ ኤኪዲ ቄሴታ ሃላቃሶ ጌሊዳ፤ ጴፅሮሲካ ዬሱሳ ሃሆራ ካሊዴስ። ኣሳይ ቄሴታ ሃላቃ ጋꬃን ታማ ኤꬂዲ ሆዒሼ ኢሲ ቦላ ኡቲዳሼ ጴፅሮሲካ ኢስታራ ኢሲፌ ኡቲዴስ። ኢሲ ጋራዴያ ጴፅሮሲ ታማ ሆዒዛይታራ ኡቲዳይሳ ቤያዳኔ ቲሺ ኦꬃ ፄላዳ “ሃይሲ ኣዴዚካ ዬሱሳራ ዴስ!” ጋዱስ። ጴፅሮሲካ “ሃኔ ማጫሳዬ! ታ ኢዛ ኤሪኬ” ጊዲ ካዲዴስ። ጉꬅ ጋምዒሺን ሃራ ኢሳዴይ ኢዛ ቤዪዲ “ኔካ ኢዛራ ዲዛይታፔ ኢሳ ጊዲኪ?” ጊዴስ። ጴፅሮሲካ “ሃይሶ ታኒ ኢስታራ ዲኬ!” ጊዴስ። ኢሲ ሳቴ ማላ ጋምዒሺን ሃራ ኣሲ ቃሴካ “ጋሊላ ኣስ ጊዲዛ ጊሽ ሲꬌይ ባይንዳ ሃይሲ ኢዛራ ዴስ” ጊዴስ። ጴፅሮሲካ ቃሴ “ሃይሶ ኔ ጊዛዴ ታ ኤሪኬ!” ጊዴስ። ሂኖ ጊ ኬሶንታ ዲሺን ኩቶይ ዋሲዴስ። ጎዳይካ ጴፅሮሳኮ ዪሼ ፄሊን ጴፅሮሲ “ሃች ኩቶይ ዋሳናስ ኔ ታና ሄꬑቶ ካዳና” ጊዲ ጎዳይ ካሴ ዮቶ ቃላይ ኢዛ ዎዝናን ካርፕ ጊዴስ። ጴፅሮሲካ ካሬ ኬዚዲ ሂቂሚዲ ዬኪዴስ። ዬሱሳ ቃቺዲ ናጊዛ ኣሳቲካ ኢዛ ቦላ ቂꬊ ቂꬊ ካዒሼ ሾጬሬꬂዳ። ኢዛ ኣይፌ ጎዚዲ “ኔ ናቤ ጊዲኮ ኔና ሾጪዳይ ኦናኮኔ ኣኔ ኤራ!” ጊዲ ኦይቺዳ። ሃራ ዳሮ ጫሻ ቃላራ ካዉሺዳ። ጋዴይ ዎንቲን ዴሬ ጪማቲ፥ ቄሴታ ሃላቃቲኔ ሙሴ ዎጋ ታማርሲዛይቲ ዱላታ ሺቂዲ ዬሱሳ ዱላታኮ ሺሺዳ። ኢስቲካ ዬሱሳ “ኔ ኪርስቶሴ? ኣኔ ኑስ ዮታ” ጊዳ። ዬሱሲካ “ታ ኢንቴስ ዮቲዳኮካ ታና ኣማኔኬታ። ታ ኢንቴና ኦይቺዳኮ ታስ ዛሬኬታ። ጊዶ ኣቲን ሃዒፔ ዶሚዲ ኣሳ ናይ ዎልቃማ ፆሳ ኡሻቻን ኡታና” ጊዴስ። ሄ ዎዴ ዉሪካ “ሂስቲን ኔ ፆሳ ና?” ጊዲ ኦይቺዳ። ኢዚካ “ታ ፆሳ ና ጊዲዳይሳ ኢንቴካ ጌታ” ጊዴስ። ኢስቲካ “ሄኮ ኢዚ ባ ዱናራ ማርካቲሺን ኑ ሃይꬃራ ሲይዶስ፤ ሃይሳፌ ሃራ ማርካ ኣዛስ ኮሺዜ?” ጊዳ። ሄን ሺቂዳ ኣሳይ ዉሪ ዴንዲዲ ዬሱሳ ጲላፆሳኮ ኤኪ ቢዴስ። “ኣይስ ኑ ኣሳይ ቄሳሬስ ጊራ ጊሮንታ ማላ ባሌꬂሼኔ ባና ‘ታኒ ኪርስቶሲ ካዎ’ ጊዲ ባሌꬂሺን ሃይሳ ኣዴዛ ዴሚዶስ” ጊዲ ሞቲዳ። ጲላፆሲካ ዬሱሳ “ኔኒ ኣይሁዳታ ካዎ?” ጊዲ ኦይቺዴስ። ዬሱሲካ ዛሪዲ “ኔ ጊዳ ማላ” ጊዴስ። ጲላፆሲካ ቄሴታ ሃላቃታሲኔ ሺቂዳ ኣሳስ “ሃይሳ ኣዴዛ ቦላ ኢዛ ሞቲሲዛ ኢታ ዮዖ ዴማቤኬ” ጊዴስ። ኢስቲ ዛሪዲ “ሃይሲ ኣዴዚ ጋሊላፔ ሃይሳ ጋካናስ ኩሜꬃ ዩሁዳ ዋዪሶ ቦላ ዴስ” ጊዲ ሚንꬂ ዮቲዳ። ጲላፆሲ ኣሳይ ጊዛይሳ ሲይዲ “ዬሱሲ ጋሊላ ኣሳኮኔ ጊዲ ሎዔꬂ ኤራናስ” ኦይቺዴስ። ዬሱሲ ሄርዶሳ ካዎቴꬃ ጊዶን ዲዛይሳ ሻኪ ኤሪዲ ሄ ዎዴ ሄርዶሲ ዬሩሳላሜን ዲዛ ጊሽ ኢዛኮ ዬሱሳ ዬዲዴስ። ሄርዶሲካ ካሴ ዬሱሳ ቤያናስ ዳሮ ኮዪሼ ዲዛ ጊሽ ዬሱሳ ቤዪዲ ኬሂ ኡፋይዴስ። ኢዛ ጊሽ ካሴ ሲይዲ ኢዚ ኦꬂሺን ቤያናስ ኮይዲ ኡፋዬቲዴስ። ዳሮ ኦይሻታካ ኢዛ ኦይሼሬቺዴስ ሺን ዬሱሲ ኢዛ ኦይሻ ዛሪቤና። ቄሴ ሃላቃቲኔ ፃፌቲ ሄን ኢዛ ማታን ኤቂዲ ኬሂ ዎርዶ ሞቶ ሞቲዳ። ሄርዶሲካ ባ ዎታዳራታራ ኢሲፌ ኢዛ ካꬊዳ፤ ካዎ ማይዖ ማይዚዲ ጌዴ ጲላፆሳኮ ዛሪ ዬዲዴስ። ሄርዶሲኔ ጲላፆሲ ካሴ ባ ጊዶን ኢሶይ ኢሳራ ኦሻ ሺን ሄ ጋላስ ጊጊዳ። ጲላፆሲ ቄሴታ ሃላቃታራ፥ ዴሬ ዳናታራኔ ዴሬ ኣሳ ሺሺዲ፥ “ሃይሲ ኣዴዚ ኣሳይ ዉሪ ማካላና ማላ ዴንꬄꬄስ ጊዲ ኢንቴ ታኮ ኤሂን ታ ቆርን ኢዛ ኦይꬂዛ ኢሲ ኢታ ሚሺካ ዴማቤኬ። ቃሴካ ሄርዶሲ ኢሲ ኢታ ሚሺካ ኢዛ ቦላ ዴሞንታ ኣጊዳ ጊሽ ሃ ኑኮ ዛሪ ዬዲዴስ። ሃዒ ኢንቴ ቤዪዛ ማላ ኢዛ ሃይቆስ ጋꬂዛ ኢሲ ኢታ ሚሺካ ኦꬂቤና። ሄሳ ጊሽ ቃፃያዳ ታ ኢዛ ዬዳና” ጊዴስ። ኢዚ ሄሳ ጊዳይ ኢስታ ባዓሌ ጋላስ ቃሼቲዳ ኣሳፔ ኢሳዴ ቢርሺዛ ዎጋይ ዲዛ ጊሻሳ። ዴሬይ ዉሪካ ኢሲ ቦላ “ባርባኔ ቢርሻዳ ሃይሳ ኣዴዛ ዲጋ!” ጊዲ ዋሲዴስ። ባርባኔይ ካታማ ጊዶን ኣሳ ማካላ ዮዖን ዴንꬄꬂዲ ኣስ ዎꬊ ቃሼቲዳ ኣሳ። ጲላፆሲካ ዬሱሳ ቢርሻናስ ኮይዳ ጊሽ ቃሴካ ዛሪዲ ኦይቺዴስ። ኣሳይ ዛሪዲ ኢዛ “ካቃ! ካቃ!” ጊዲ ዋሲዴስ። ጲላፆሲ ሄꬓንꬆካ “ኣዛስ ካቆ? ሃይሲ ኣዴዚ ኣይ ኢታ ኦꬂዴ? ታኒ ኢዛ ሃይቆስ ጋꬂዛ ኢታ ኦሶ ኢዛ ቦላ ቤያቤኬ፤ ሄሳ ጊሽ ቃፃያዳ ታ ኢዛ ቢርሻ ዬዳና” ጊዴስ። ኣሳይካ ቃላ ꬎቁ ሂስቲዲ ዬሱሲ ካቄታና ማላ ጲላፆሳ ኬሂ ዎሲሼ ዋሲዳ። ሄሳ ጊሽ ጲላፆሲ ኢስታ ኦይሾይ ፖሌታና ማላ ኣዛዚዴስ። ኣሳ ማካሊሲዲ ሼምፖ ዎꬊዳ ጊሽ ቃሼቲዳይሳ ቢርሻና ማላ ኢስቲ ዎሲዳዴ ቢርሺዲ ቃሴካ ዬሱሳ ኢስቲ ዶሲዳ ማላ ኦꬄቶ ጊዲ ዴራስ ኣꬂ ኢሚዴስ። ኢስቲካ ዬሱሳ ኦይኪዲ ኤኪ ቢሺን ቃሬና ጌቴቲዛ ካታማፔ ኢሲ ሲሞና ጌቴቲዛ ኣዴይ ሃሆፔ ዪዛይሳ ዴሚዳ ዬሱሲ ካቄታና ማስቃሌ ኮጫ ኢዚ ቶኪዲ ዬሱሳ ካላና ማላ ዎልቃꬂዳ። ዳሮ ዴሬይ ባ ቲራ ኢጪ ኢጪ ዬኪዛ ማጫሳቲ፥ ዬሱሳፔ ጉዬራ ኢዛ ካሊዳ። ዬሱሲ ኢስታኮ ሲሚ ፄሊዲ “ኢንቴ ዬሩሳላሜ ማጫሳይ ኢንቴሲኔ ኢንቴ ናይታስ ዬኪቴ ኣቲን ታስ ዬኮፍቴ። ‘ሲንꬃፌ ኢንቴ ሄኮ ማካራ ጊዲዳ ማጫሳቲ፥ ዬሎንታ ኡሎቲኔ ናይ ꬋሞንታ ꬋንꬃቲ ኣንጄቲዳይታ!’ ጋና ዎዴይ ሲንꬃራ ዬስ። ሄ ዎዴ ኣሳይ ‘ዙማቶ! ኑ ቦላ ዎዲቴ፤ ቄሪ ዙማቲካ ኑና ቆቲቴ!’ ጋና። ሂስቲን ቃዬ ሚꬃ ቦላ ሃይሳꬆ ኦꬂዳይቲ ሜላ ሚꬃ ቦላ ዎስታኔሻ?” ጊዴስ። ኢዛራ ኢሲፌ ሃይቃና ማላ ሃራ ናምዑ ኢታ ኦꬂዳ ኣሳታ ኢዛራ ኤፊዳ። ቃራኒዮ ጌቴቲዛሶ ጋꬂዲ ካቂዳ። ኢታ ኦꬂዳይታፔ ኢሳ ኡሻቻ ባጋራ ኢሳ ሃዲርሳ ባጋራ ካቂዳ። ዬሱሲካ “ታ ኣዋዉ! ሃይቲ ባ ኦꬂዛይሳ ኤሪዲ ኦꬆንታ ጊሽ ኢስታስ ኣቶ ጋ!” ጊዴስ። ኢስቲካ ኢዛ ማይዖዛ ሳማ ዬጊዲ ባ ጊዶን ጊሼቲ ኤኪዳ። ሄሲ ሃኒሺን ኣሳይ ዉሪ ኤቂ ፄሊዴስ፤ ዳናቲካ “ኢዚ ሃራ ኣሳ ኣሺዴስ ሺን ፆሳፌ ዶሬቲዳ ኪርስቶሲ ኢዛ ጊዲኮ ኣኔ ሃዒ ባና ኣሾ” ጊዲ ቂꬊዳ። ዎታዳራቲካ ሺቂዲ ዎይኔፔ ኣጌቲዳ ጫላ ኡሻ ኡሺዲ ኢዛ ቂꬊዳ። “ኔኒ ኣይሁዳ ካዎ ጊዲኪ? ኣኔ ሃዒ ኔና ኣሻ” ጊዳ። ኢዛ ሁዔፔ ቦላ ባጋራ ማስቃሌ ኮጫ ቦላ “ሃይሲ ኣይሁዳታ ካዎ” ጊዛ ቃላ ፃፊ ቃጲዳ። ኢታ ኦꬂዲ ካቄቲዳ ኣሳታፔ ኢሶይ ጫሻ ቃላ ዬሱሳ ቦላ ቆቆፊዴስ። “ኔ ኪርስቶሳ ጊዲኪ? ኣኔ ኔናካ ኑናካ ኣሻ” ጊዴስ። ኢታ ኦሲዳይታፔ ኢሶይ “ኔኒ ኔስ ቤሲዛ ፒርዳ ኤካሼ ፆሳስ ባቢኪ? ኑኒ ኑ ኦꬂዳ ኢታ ኦሶስ ቤሲዛይሳ ኤኮስ፤ ሃይሲ ኣዴዚ ጊዲኮ ኢሲ ኢታካ ኦꬂቤና” ጊዴስ። ዬሱሳ “ኔኒ ኔ ካዎቴꬃራ ዪዛ ዎዴ ታና ቆፓ!” ጊዴስ። ዬሱሲካ ዛሪዲ “ታ ኔስ ቱሙ ጋይስ፤ ሃች ኔ ታናራ ጋናቴን ዳና” ጊዴስ። ሄሳ ዎዴ ጋዴይ ሴታ ጋላስ ሺን ቢዲ ኡዱፉን ሳቴ ጋካናስ ኩሜꬃ ቢታ ቦላ ꬉማይ ꬉሚዴስ። ኣዋ ኣርሼ ፖዖይ ዲጌቲዴስ። ፆሳ ኬꬃ ማጋላሻይካ ዳኬቲዲ ናምዑ ኬዚዴስ። ዬሱሲካ ኬሂ ዋሲዲ “ታ ኣዋዉ! ታኒ ታ ሼምፖ ኔ ኩሼን ኢማይስ” ጊዳ ማላ ሼምፖ ኬዚዴስ። ማቶ ሃላቃይ ሄሳ ቤዪዲ “ሃይሲ ኣዴዚ ቱማፔ ፂሎ ኣሳኮሺን” ጊዲ ፆሳ ጋላቲዴስ። ሄሳ ቤያናስ ሄን ሺቂዲ ዴሬይ ዉሪ ሄ ሃኒዳይሳ ቤዪዲ ቲራ ኢጪ ኢጪዲ ሲሚዴስ። ጊዶ ኣቲን ዬሱሳ ካሴ ሎዔꬂ ኤሪዛይቲ ዉሪ ቃሴካ ጋሊላፔራ ኢዛ ካሊዛ ማጫሳቲ ሄሳ ፄሊሼ ሃኪ ኤቂዳ። ኣይሁዳታ ዱላታ ኣሳፔ ኢሶይ ኢዚካ ዮሴፌ ጌቴቲዛይሲ ኢሲ ዳሮ ኪያኔ ፂሎ ኣሳ። ኢዚካ ካሴ ኣሳይ ዬሱሳ ቦላ ዱላቲሺን ሄ ዱላታን ዴና፤ ኢዚካ ኢሲ ኣርማቲያሳ ጌቴቲዛ ኣይሁዳታ ካታማ ኣሳ ሺን ፆሳ ካዎቴꬂ ያናይሳ ናጊሼ ጋምዒዴስ። ኢዚካ ጲላፆሳኮ ቢዲ ዬሱሳ ኣሃ ባስ ኢማና ማላ ጲላፆሳ ዎሲዴስ። ጲላፆሲ ኢዛስ ኤሮ ጊን ዮሴፌይ ኣሃ ማስቃሌ ኮጫፔ ዎꬂዳ ማላ ፃፂዲ ሹቻፌ ዎጬቲዳ ካሴ ሃራ ኣሲ ሞጌቶንታ ዱፎን ኤፊዲ ዎꬂዴስ። ሄ ጋላሳይ ኣሳይ ሳምባታስ ጊጌቲዛ ጋላስ ጊዲዳ ጊሽ ሳምባታይ ጌላና ሃኔስ። ጋሊላፔ ዴንዲዲ ዬሱሳራ ዪዳ ማጫሳቲካ ዮሴፌ ካሊ ቢዲ ዱፎዛ ቤዪዳ። ዬሱሳ ኣሃ ዎስት ዎꬂዳኮኔ ቤዪዳ። ሄፔ ሲሚዲ ሺቶኔ ቲዪዛ ሚሽ ጊጊሲዳ። ዎጋይ ጊዛ ማላ ሳምባታ ጋላስ ሼምፒዳ። ዎጋ ዎንታ ማላዶራ ማጫሳቲ ባ ጊጊሲዳ ሺቶዛ ኤኪዲ ዬሱሳ ዎꬂዳ ዱፎዛኮ ቢዳ። ሹቻይካ ዱፎዛ ዱናፔ ጌንዴሪዲ ዲዛይሳ ቤዪዳ። ጊዶ ኣቲን ጊዶ ጌሊዲ ዬሱሳ ኣሃ ዴሞንታ ኣጊዳ ጊሽ፥ ኢስታስ ሃንዛዚ ꬋዪን ኢስቲ ቶሉ ጊዳሼ ቆፖንታ ፆሊቄቲዛ ማይዖ ማይዒዳ ናምዑ ኣሳቲ ኢስታ ኣቻን ኤቂዳ። ማጫሳቲካ ኬሂ ባቢዲ ዱጌ ቢታ ፄሊሺን “ሄ ኣሳቲ ፓፂዲ ዴንዲዳይሳ ሃይቄꬃታ ጊዶን ኣይስ ኮዬቲ? ኢዚ ዴንዲዴስ! ሃን ባዋ። ቃሴካ ኢዚ ጋሊላን ዲሼ ኢንቴስ ካሴ ኣይ ጊዳኮኔ ኣኔ ቆፒቴ። ኣሳ ናይ ናጋራንቻታ ኩሼን ኣꬊ ኢሜታናሲኔ ካቄታናስ፥ ሃይቆፔካ ሄꬓንꬆ ጋላስ ዴንዳናስ ቤሴስ” ጊዲ ዮቲ ዎꬂዴስ። ማጫሳቲካ ሄ ዎዴ ካሴ ኢዚ ጊዳ ቃላ ሃሳዪዳ። ማጫሳቲ ዱፎሶፔ ሲሚዲ ሄሳ ዉርሲ ዬሱሳ ካሊዛ ታማኔ ኢሲኔታሲኔ ሃራታስ ዮቲዳ። ሄሳካ ሃዋሬታስ ዮቲዳይ ማግዳሌ ጊዛሶፔ ዪዳ ማራሞኔ ዮሃኖ ጌቴቲዛሪራ ያቆቤ ማራሞኔ ኢስታራ ኢሲፌ ዲዛ ሃራ ማጫሳታ። ጊዶ ኣቲን ኢስታስ ማጫሳቲ ዮቲዳይሲ ኣጉሞ ሚሳቲን ኣማኒቤቴና። ጊዶ ኣቲን ጴፅሮሲ ዎꬃን ዬሱሳ ዱፎኮ ጋኪዲኔ ሆኪዲ ዱፎ ጊዶ ፄሊሺን ኢዛ ኣሃ ፃፂዳ ማይዖይ ፃላ ዲዛይሳ ቤዪዲ ኬሂ ማላሌቲሼ ባሶ ሲሚዴስ። ሄ ጋላስ ኢዛ ካሊዛይታፔ ናምዓቲ ዬሩሳላሜፔ ታማኔ ኢሲ ኪሎሜቲሬ ሃኪዛ ኤማሆሴ ጌቴቲዛ ካታማ ቤቴስ። ቢሼ ኢስቲ ሄ ዎዴ ሃኒዳ ዬሱሳ ሃይቆ ጊሽ ባ ጊዶን ሃሳዬቴቴስ። ኢስቲ ሃሳዬቲሺን ዬሱሲ ኢስታኮ ሺቂዲ ኢስታራ ኢሲፌ ቢሺን፥ ኢስቲ ኢዛ ኤሮንታ ማላ ኢስታ ኣይፌይ ኦይኬቲዴስ። ዬሱሲ ኢስታ “ሃይሲ ኦጌ ሃሙቲሼ ኢንቴ ኢንቴ ጊዶን ሃሳዬቲዛይሲ ኣዜ?” ጊዴስ። ኢስቲካ ዳጋማራ ሞꬌቲሼ ሲቲ ጊ ኤቃጊዳ። ኢስታ ጊዶፌ ኢሶይ ቃሊዮጳ ጌቴቲዛይሲ ዛሪዲ “ሃ ማታ ጋላሳታን ዬሩሳላሜን ሃኒዳይሳ ኤሮንታ ኢማꬃ ኣሲ ኔና ፃላ?” ጊዴስ። ኢዚካ ኢስታስ ዛሪዲ “ኣዚ ሃኒዴ?” ጊን ኢስቲ ቃሴ ዛሪዲ ‘ፆሳ ሲንꬃኒኔ ኡባ ኣሳ ሲንꬃን ኦሶኒኔ ቃላን ሚኖ ናቤ ጊዲዳ ናዚሬቴ ዬሱሳ ጊሽ’ ጊዳ። ኢዛካ ቄሴታ ሃላቃቲኔ ዳናቲ ሃይቆ ፒርዳስ ኣꬂ ኢሚዳኔ ካቂዳ። ኑኒ ጊዲኮ “ኢስራዔሌ ዎዝናይ ኢዛ’ ጊዲ ኡፋዬቲዶሲሺን ሃራፔካ ሄሲ ሃኒን ቃሴ ሃች ሄꬓንꬆ ጋላሳ። ቃሴ ኑ ጊዶፌ ኢሲ ኢሲ ማጫሳቲ ኑና ኬሂ ማላሊሲዳ፤ ኢስቲካ ማላዶ ዎንታራ ጌዴ ኢዛ ዱፎኮ ቢዲ፥ ኢዛ ኣሃይ ቤቶንታ ኢፂን ዪዲ ኢዚ ፓፃ ዲዛይሳ ኢስታስ ዮቲን ኪታንቻታ ቤዪዳይሳ ኑስ ዮቲዳ። ኑፔካ ኢሲ ኢሲ ኣሲ ኢዛ ዱፎኮ ቢዲ ማጫሳቲ ጊዳ ማላ ቤዪዳ ኣቲን ዬሱሳ ዴሚቤቴና” ጊዳ። ኢዚካ ኢስታስ “ኢንቴ ዎዝናን ዎꬆንታይቶ! ኢንቴ ዎዝናይ ካሴ ናቤቲ ዮቲዳይሳ ኣማናናፔ ታኪዳይቶ! ፆሳፌ ኪቴቲዳይሲ ሃ ሜቶዛ ኤካናሲኔ ጌዴ ባ ቦንቾሶ ጌላናስ ቤሴኔ?’ ጊዴስ። ሙሴፔኔ ናቤታፔ ዶሚዲ ጌሻ ማፃፋታን ኢዛ ጊሽ ፃፌቲዳይሳ ኢስታስ ሎዔꬅ ዮቲዴስ። ኢስቲ ባ ቢዛሶ ማቲዳ ዎዴ ዬሱሲ ኣꬊ ቢዛ ሚሳቲዴስ። ኢስቲካ ቃሴ “ጋዴይ ቃሚዛ ጊሽ ኑናራ ኣቃ” ጊዲ ኢዛ ኬሂ ዎሲን ኢስታራ ኣቃናስ ጌሊዴስ። ኢስታራ ኢሲፌ ማዳን ኡቲዲ ኡኬꬅ ባ ኩሼን ኦይኪዲ ኢስታስ ሜንꬂ ሜንꬂ ኢሚዴስ። ሄሳ ዎዴ ኢስታ ኣይፌይ ዶዬቲን ኢዛ ጊዲዳይሳ ኤሪዳ፤ ኢዚካ ኢስታ ኣይፌፔ ጌሚዴስ። ኢስቲካ “ኑ ዪሼ ኦጌ ቦላ ዲሺን ኑና ሃሳዪሲዲ ጌሻ ማፃፋታካ ቆንጪሲዲ ኑስ ጌላናሼ ዮቲን ኑ ዎዝናይ ታማ ማላ ፁጌቲቤኔ?” ጊዲ ኢሶይ ኢሳራ ሃሳዬቲዳ ሄራካ ዴንዲዲ ዬሩሳላሜ ሲሚ ቢዳ። ታማኔ ኢሲኔቲኔ ኢስታራ ኢሲፌ ዲዛይቲካ ኢሲ ቦላ ሺቂ ዲዛይታ ዴሚዳ። ኢስቲካ ባ ጊዶን ኢሶይ ኢሳስ “ጎዳይ ቱሙ ዴንዲዴስ! ሲሞናስካ ቤቲዴስ” ጊዳ። ኢዛ ካሊዛይታፔ ናምዓቲ ኦጌ ቦላ ሃኒዳይሳኔ ዬሱሲ ኡኬꬃ ሜንꬂ ሜንꬂ ኢሚዳ ዎዴ ኢስቲ ዎስት ኤሪዳኮ ኢስታስ ዮቲዳ። ሄሳ ጊሽ ኢስቲ ባ ጊዶን ሃሳዬቲሺን ዬሱሲ ኢስታ ጊዶን ኤቂዲ “ሳሮይ ኢንቴስ ጊዶ!” ጊዴስ። ጊዶ ኣቲን ኢስቲ ሞይቲሌ ቤዪዳ ሚሳቲን ኬሂ ዳጋሚዳ። ኢዚካ ኢስታስ “ኣዛስ ዳሮ ቆፔቲ? ኣዛስ ኢንቴ ዎዝናራ ሲꬌቲ? ታ ኩሼታኔ ታ ቶሆታ ሃ ፄሊቴ ታናኮ፤ ቃሴካ ታና ኦይኪ ቤዪቴ፤ ታና ኢንቴ ቤዪዛይሳ ማላ ሞይቲሌስ ኣሾይኔ ሜቄꬂ ዴና” ጊዴስ። ሄሳ ጊ ሲሚዲ ባ ቶሆታኔ ባ ኩሼታ ኢስታ ቤሲዴስ። ኢስቲካ ኡፋይሳ ዳሮፔኔ ማላሌቴꬃፌ ዴንዲዳይሳን ቡሮ ኣማኖንታ ዲሺን ዬሱሲ ‘ሄሳን ኣይኮ ሚዛዚ ዲዜ?” ጊዲ ኢስታ ኦይቺዴስ። ኢስቲካ ሞሌ ፂፃ ኢሲ ባርስ ኢዛስ ኢሚዳ። ኢዚካ ኤኪዲ ኢስታ ሲንꬃን ሚዴስ። ኢዚካ “ኢንቴናራ ታ ዲዛ ዎዴ ‘ሙሴ ዎጋን ናቤታኒኔ ማዛሙሬ ማፃፋታን ታ ጊሽ ፃፌቲዳይሲ ዉሪካ ፖሌታናስ ቤሴስ’ ጋዳ ታ ኢንቴስ ዮቲዳ ታ ቃላይ ሃይሳኮ” ጊዴስ። ሄ ዎዴ ጌሻ ማፃፋታ ኢስቲ ኤራና ማላ ዎዝና ኢስታስ ዶዪዴስ። ኢስታስካ “ኪርስቶሲ ዋዬ ቤያና፤ ሄꬓንꬆ ጋላስ ሃይቆፔ ዴንዳና ጌቴቲዲ ፃፌቲዴስ። ዬሩሳላሜፔ ዶሚዲ ኡባ ዴሬስ ናጋራፔ ሲሞይኔ ማሮቴꬂ ኢዛ ሱንꬃን ዮቴታና። ኢንቴካ ሃይሳስ ማርካታ። ታካ ታ ኣዋይ ኢሚዳ ኡፋይሳ ኢንቴስ ዬዳና፤ ኢንቴ ቃሴ ዎልቃ ቦላፌ ማይዓና ጋካናስ ዬሩሳላሜ ካታማን ታኪቴ” ጊዴስ። ሄሳፌ ጉዬ ኢስታ ኤኪዲ ቢታኒያ ጌቴቲዛሶ ኬዚዴስ። ባ ኩሼታካ ዴንꬂዲ ኢስታ ኣንጂዴስ። ኢስታ ኣንጂሼ ኢስታፌ ሻካቲዲ ፑዴ ሳሎ ቢዴስ። ኢስቲካ ኢዛስ ሆኪ ጎይኒዳ፤ ኬሂ ኡፋዬቲሼ ዬሩሳላሜ ሲሚዳ። ኡባ ዎዴ ፆሳ ኬꬃን ፆሳ ጋላቲሼ ጋምዒዳ። ቃላይ ካሴ ኮይሮ ዴስ። ቃላይካ ፆሳ ኣቻን ዴስ። ሄ ቃላይካ ፆሳ። ኢዚ ኮይሮ ፆሳ ኣቻን ዴስ። ሜꬌቴꬂ ዉሪ ኢዛን ሜꬌቲዴስ። ሜꬌቲዳዛን ኢዚ ባይንዳ ሜꬌቲዳይ ኢሲናካ ዱኩ። ዴዖይ ኢዛን ዳዉስ። ሃና ዴዖያ ኣሳስ ፖዖ። ፖዖይ ꬉማን ፖዒሴስ። ꬉማይ ፖዖ ሙሌካ ፆኔና። ፆሳፌ ኪቴቲዳ ዮሃኒሳ ጌቴቲዛ ኢሳዴይ ዴስ። ኢዛ ማርካቴꬃን ኣሲ ዉሪ ኣማናና ማላ ፖዖስ ማርካ ጊዲ ዪዴስ። ኢዚ ፖዖ ጊሽ ማርካታና ዪዴስ ኣቲን ኢዚ ባ ሁዔስ ፖዖ ጊዴና። ኣሳ ኡባስ ፖዖ ኢሚዛ ቱሙ ፖዖይ ሃይሳ ሃ ኣላሜዛን ዬሱሳን ዴስ። ቃላይካ ካሴ ኣላሜን ዴስ። ኣላሜይካ ሜꬌቲዳይ ኢዛና። ጊዶ ኣቲን ኣላሜይ ኢዛ ኤሪቤና። ኢዚ ባ ባጋታኮ ዪን ኢዛ ባጋቲ ኢዛ ኤኪቤቴና። ጊዶ ኣቲን ኢዛ ኤኪዳይቲ ኢዛ ሱንꬃን ኣማኒዳይቲ ኢስቲ ፆሳ ናይታ ጊዳና ማላ ማታ ኢስታስ ኢሚዴስ። ኢስቲካ ፆሳ ናይታ ጊዲዳይ ፆሳፌ ዬሌቲዳ ጊሽ ኣቲን ኣሳ ዜሬꬃፌ ሄሲካ ኣሳ ዎጋን ዎይኮ ኣሾ ሼኔን ጊዴና። ቃላይካ ኣስ ጊዲዴስ። ፆሳ ኪያቴꬃኒኔ ቱማን ኩሚዲ ኑናን ኣቂዴስ፤ ኢሲ ናስ ኣዋ ማታን ዲዛ ቦንቾ ሚሳቲዛ ኢዛ ቦንቾ ኑ ቤይዶስ። ዮሃኒሲካ “ታፔ ጉዬራ ዪዛይሲ ታፔ ኣꬌስ። ጋሶይካ ኢዚ ታፔ ካሴካ ዴስ ጋዳ ታ ኢንቴስ ዮቲዳይሲ ሄኮ ሃይሲ ኢዛኮ!” ጊ ማርካቲዴስ። ኢዛ ኩሜꬃ ኪያቴꬃን ኑ ዉሪ ኪያቴꬃ ቦላ ኪያቴꬅ ኤኪዶስ። ዎጋይ ሙሴ ባጋራ ኢሜቲዴስ፤ ኪያቴꬂኔ ቱማይ ጊዲኮ ዬሱስ ኪርስቶሳ ባጋራ ኑስ ዪዴስ። ፆሴ ቤዪዳይ ኦኒካ ባዋ። ጊዶ ኣቲን ፆሳ ኣዋ ማታን ዲዛ ፆሳ ና ኢሶይ ፃላላ ኢዛ ቆንጪሲዴስ። ኣይሁዳታ ዳናቲ ዬሩሳላሜፔ ቄሴታኔ ሌዌ ናይታ ዮሃኒሳኮ ኪቲዲ “ኔ ኦኔ?” ጊዲ ኦይቺሺን፥ ዮሃኒሲ “ታኒ ኪርስቶሳ ጊዲኬ” ጊዲ ጌሺ ማርካቲዴስ ኣቲን ማርካታናስ ኢፂቤና። ኢስቲካ “ሂስቲን ኔ ኦኔ? ኔ ኤላሳ?” ጊዲ ኦይቺዳ። ኢዚካ “ጊዲኬ” ጊዲ ኢስታስ ዛሪዴስ። ኢስቲካ “ኢዚ ያና ጌቴቲዳ ናቤይ ኔኔ?” ጊዳ። ኢዚካ “ኣካይ ታና ጊዲኬ” ጊዴስ። ኢስቲ ቃስ “ሂስቲን ኔ ኦኔ? ኑና ኪቲዳ ኣሳስ ኑ ዮታና ማላ ኔ ኔና ኦና ጋይ?” ጊዳ። ኢዚካ “ናቤ ኢሳያሲ ዮቲዳ ማላ ታኒ ‘ፆሳ ኦጌ ሱሪሲቴ’ ጊሼ ባዞ ቢታን ዋሲዛዴ ቃላ ጊሪሳ” ጊዴስ ፋርሳዌታፔ ኪቴቲዳ ኢሲ ኢሲ ኣሳቲ ሄሳ ጊሽ “ኔ ፆሲ ኪቲዳዴ ዎይኮ ቡሮ ያና ጌቴቲዳ ናቤይ ኔና ጊዶንታ ጊዲኮ ሂስቲን ኣዛስ ኑና ፃማቃይ?” ጊዲ ኢዛ ኦይቺዳ። ዮሃኒሲካ ኢስታስ “ታ ሃꬃን ፃማቃይስ፤ ጊዶ ኣቲን ኢንቴ ኤሮንታዴይ ኢንቴ ጊዶን ኤቂዴስ። ታፔ ጉዬራ ያናይሲ ኢዛ። ታ ኢዛ ጫማ ቃሾ ቢርሻናስ ቤሲዛዴ ጊዲኬ” ጊዴስ። ሃይሲ ዉሪ ሃኒዳይ ዮሃኒሲ ፃማቂዛ ዮርዳኖሴ ሻፋፔ ሄ ፒንꬃን ዲዛ ቢታኒያ ጌቴቲዛ ካታማና። ዎንቴꬃ ጋላስ ዮሃኒሲ ዬሱሲ ባኮ ዪሺን ቤዪዲ “ዴሬ ናጋራ ቢታፌ ዲጋና ፆሳ ዶርሲ ሄኮ ሃይሲች! ‘ታፔ ጉዬራ ያናይሲ ኢዚ ታፔ ካሴካ ዲዛ ጊሽ ታፔ ኣꬌስ’ ጋዳ ታ ኢንቴስ ዮቲዛይ ሃይሲች! ታካ ታ ባጋራ ኢዛ ኤራቤኬ ሺን ጊዲኮካ ኢዚ ኢስራዔሌ ዴሬስ ቆንጫና ማላ ታ ሃꬃን ፃማቃሼ ያዲስ” ጊዴስ። ካሌꬂዲካ ዮሃኒሲ ሂዝጊ ማርካቲዴስ “ፂሎ ኣያናይ ሃራጴ ካፎ ሚሳትዲ ሳሎፔ ዎꬊሺኒኔ ኢዛ ቦላ ኡቲሺን ቤያዲስ። ታ ታ ባጋራ ኢዛ ኤሪኬ ሺን ታ ሃꬃን ፃማቃና ማላ ታና ኪቲዳዴይ ‘ፂሎ ኣያናይ ኢዛ ቦላ ዎꬊ ሼምፒሺን ኔ ቤያናዴይ ፂሎ ኣያናን ሜጫናይ ኢዛ’ ጊዲ ታስ ዮቲዴስ። ታካ ሄሳ ቤያዲስ። ሄሳ ጊሽ ኢዚ ፆሳ ና ጊዲዳይሳ ታ ማርካታይስ” ጊዴስ። ዎንቴꬃ ጋላስ ዮሃኒሲ ባና ካሊዛ ናምዓታራ ሄን ኤቂዴስ። ዬሱሲ ኢዛ ኣቻራ ኣꬊሺን ዮሃኒሲ ቤዪዲ “ፆሳ ዶርሲ ሄኮ ሃይሲች!” ጊዴስ። ዮሃኒሳ ካሊዛ ናምዓቲ ሄሳ ሲይዲ ዬሱሳ ካሊዳ። ኢስቲ ኢዛ ካሊሺን ዬሱሲ ጉዬ ዩይ ፄሊዲ “ኣይ ኮዬቲ?” ጊዴስ። ኢስቲካ “ኣስታማሬ! ኔ ዱሳሶይ ኣዋ?” ጊዳ። ኢዚካ ኢስታ “ሃ ዪዲ ቤይቴ” ጊዴስ። ሄሳ ጊሽ ቢዲ ኢዚ ኣዋን ዲዛኮ ቤዪዳኔ ሄ ጋላስ ኢዛራ ኢሲፌ ፔዒዳ። ዎዴይካ ጌዴ ታሙ ሳቴሶ ቢዴስ። ዮሃኒሲ ዮቲዳ ቃላ ሲይዲ ዬሱሳ ካሊዳ ናምዓታፔ ኢሶይ ሲሞና ጴፅሮሳ ኢሻ ኢንዲራሳ። ኢንዲራሲ ኮይሮ ባ ኢሻ ሲሞናኮ ቢዲኔ “ፆሲ ኪቲዳ ኪርስቶሳ ኑ ዴሚዶስ!” ጊዴስ። ሄሳፌ ጉዬ ኢንዲራሲ ሲሞና ዬሱሳኮ ኤኪ ዪዴስ። ዬሱሲካ ኢዛ ቲሺ ሂስቲ ፄሊዲ “ሃይሶ! ኔ ዮና ና ሲሞና፤ ሃይሳፌ ጉዬ ኔ ኬፋ ጌቴታና።” ኬፋ ጉሲ ጴፅሮሳ ጉሳ ዎይኮ ዛላ ሹች ጉሳ። ዎንቴꬃ ጋላስ ዬሱሲ ጋሊላ ባናስ ኮይዴስ። ፒሊጶሳካ ዴሚዲ “ታና ካላ” ጊዴስ። ፒሊጶሲካ ኢንዲራሳ ማላኔ ጴፅሮሳ ማላ ቤቴሳይዳ ካታማ ኣሳ። ፒሊጶሲ ናቲናዔሌ ዴሚዲ “ሙሴይ ዎጋ ማፃፋን ቃሴ ናቤቲካ ቡሮፔ ሃናናይሳ ዮቲዛ ባ ማፃፋታን ኢዛ ጊሽ ፃፊዳ ኣዴዛ ኑ ዴሚዶስ። ኢዚካ ዮሴፌ ና ናዚሬቴ ዬሱሳኮ!” ጊዴስ። ናቲናዔሌይ ቃስ “ናዚሬቴፔ ሎዖ ሚሺ ቤቲ ኤሪዜ?” ጊ ኦይቺን ፒሊጶሲ ኢዛ “ሃ ያዳ ቤያ” ጊዴስ። ናቲናዔሌይ ዬሱሳ ቤያና ዪሺን ዬሱሲ ቤዪዲ ኢዛ “ሄኮ! ጌኔይ ባይንዳ ቱሙ ኢስራዔሌ ኣሳ!” ጊዲ ኢዛ ጊሽ ዮቲዴስ። ናቲናዔሌይካ ዛሪዲ “ታና ዎስታ ኤራዲ?” ጊ ኦይቺን ዬሱሲካ “ፒሊጶሲ ኔና ፄይጋናፔ ካሴ ባላሴ ሚꬃ ጋርሳን ኔ ዲሺን ታ ኔና ቤያዲስ” ጊ ዛሪዴስ። ናቲናዔሌይ “ኣስታማሬ! ኔ ፆሳ ና፤ ኔ ኢስራዔሌ ካዎ” ጊዴስ። ዬሱሲካ ኢዛስ “ኔ ኣማኒዳይ፤ ታ ኔና ‘ባላሴ ሚꬃ ጋርሳን ቤያዲስ’ ጊዳ ጊሼ? ኔ ቡሮ ሄሳፌ ኣꬊዛ ዳሮ ሚሽ ቤያና። ጉጂዲካ ታ ኢንቴስ ቱሙ ጋይስ፤ ቡሮ ሳሎይ ዶዬቲን ፆሳ ኪታንቻቲ ኣሳ ና ቦላ ዎꬊሺኒኔ ኬዚሺን ኢንቴ ቤያና” ጊዴስ። ሄꬓንꬆ ጋላስ ጋሊላ ጊዶን ዲዛ ቃና ጌቴቲዛ ካታማን ሳርጌይ ዴስ። ዬሱሳ ኣዬያካ ሄን ዳዉስ። ዬሱሲኔ ኢዛ ካሊዛይቲካ ሳርጌዛሶ ፄይጌቲዳ። ሳርጌዛሶን ዎይኔፔ ኣጌቲዳ ኡሻይ ዉሪን ዬሱሳ ኣያ ዬሱሳ “ዎይኔ ኡሻይ ዉርዴስ” ጋዱስ። ዬሱሲካ ኢዞ “ኣዬ! ታስ ኔናራ ኣዚ ዲዜ? ታ ዎዴይ ጋኪቤና” ጊዴስ። ሄ ዎዴ ዬሱሳ ኣዬያ ማራማ ሄን ጋዴዛን ዲዛ ኦሳንቻታ “ኢዚ ኢንቴና ጊዛይሳ ኦꬂቴ” ጋዱስ። ኣይሁዳታስ ጌሾ ዎጋይ ዲዛ ጊሽ ኡሱፑን ሹቻፌ ሜꬌቲዳ ባꬃቲ ሄን ጋዳን ዴቴስ። ኢስቲካ ኢሶይ ኢሶይ ናምዑ ኦቶ ዎይኮ ሄꬑ ኦቶ ሃꬄ ኦይኬቴስ። ዬሱሲ ኦሳንቻታ “ባꬃታ ሃꬄ ኩንꬂቴ” ጊን ኢስቲካ ባꬃታ ዱና ጋካናስ ሲልቲ ሂስቲ ኩንꬂዳ። ሄሳፌ ቃሴካ ኦሳንቻታ “ኣኔ ሃዒ ዱቂዲ ሳርጌዛ ኣላፌዛስ ኢዛፔ ኢሚቴ” ጊዴስ። ኢስቲካ ዱቂ ዱቂ ኢሚዳ። ኣላፌዚካ ዎይኔ ኡሻን ላሜቲዳ ሃꬃ ጋንፂ ፄሊዲ ኢዚ ኣዋፔ ዪዳኮኔ ኤሪቤና። ሃꬃ ዱቂዳይቲ ጊዲኮ ኤሬቴስ። ሄሳ ጊሽ ሳርጌዛ ኣላፌይ ሚሺራዛ ፄይጊዲ፥ “ኣሲ ዉሪ ሳርጌሶን ኮይሮ ሎዖ ኡሺ ሺሼስ፤ ኣሳይ ማꬆቲዳፔ ጉዬ ኢታ ኤሄስ፤ ጊዶ ኣቲን ኔ ጊዲኮ ሎዖ ኡሺ ሃኖ ጋካናስ ዎꬃጋዳሳ” ጊዴስ። ዬሱሲ ሄሳ ማላሊሲዛ ማላታ ኡባፌ ኮይሮ ጋሊላ ጌቴቲዛ ዴሬን ቃና ካታማን ኦꬂዴስ። ባ ቦንቾካ ሄሳ ማላን ቆንጪሲዴስ። ኢዛ ካሊዛይቲካ ኢዛን ኣማኒዳ። ሄሳፌ ጉዬ ዬሱሲ ባ ኣዬይራ ባ ኢሻታራኔ ባና ካሊዛይታራ ዱጌ ቂፊርናሆሜ ዎꬊዲ ሄን ጉꬃ ዎዴ ታኪዳ። ኣይሁዳታ ፓዚጋ ባዓሌይ ማቲዳ ጊሽ ዬሱሲ ያሩሳላሜ ቢዴስ። ፆሳ ኬꬃ ጊቤ ጊዶን ቦራታ፥ ዶርሳታኔ ሃራጴታ ባይዚዛይታ ቃሴካ ሚሼ ላሚዛይቲ ሚሼ ላሚሺን ዴሚዴስ። ሄሳ ቤዪዲ ዎዶሮ ፁርቃፌፔ ዶቂ ኤኪዲ ኣሳኔ ቦራታካ ፆሳ ኬꬃ ጊቤፌ ኬሲዴስ፤ ሚሽ ላሚዛይታ ሚሻካ ꬋርጪዲ ኢስታ ፃራጴዛታካ ሺሪ ሺሪ ዬጊዴስ። ሃራጴ ባይዚዛ ኣሳካ “ሃይሳ ዉርሲ ጌዴ ዲጊቴ! ታ ኣዋ ኬꬃ ዛልዔ ኬꬄ ሂስቶፍቴ” ጊዴስ። ሄ ዎዴ ኢዛ ካሊዛይቲ “ኔ ኬꬃ ሚሻይ ታና ታማ ማላ ፁጌስ” ጌቴቲ ፃፌቲዳ ቃላ ሃሳዪዳ። ሄሳፌ ጉዬ ኣይሁዳ ኣሳ ሃላቃቲ ዬሱሳ “ኔ ሃይሳ ዉርሳ ኦꬃናስ ሼኔይ ኔስ ዲዛይሳ ቆንጪሳናስ ኔ ኑና ኣይ ማላሊሲዛ ማላታ ቤሳኔ?” ጊ ኦይቺዳ። ዬሱሲካ ኢስታስ “ኣኔ ሃይሳ ፆሳ ኬꬃ ላሊቴ፤ ታ ኢዛ ሄꬑ ጋላሳራ ዛራ ኬፃና” ጊ ዛሪዴስ። ኢስቲካ ኢዛ “ሃይሳ ፆሳ ኬꬃ ኬፃናስ ካሴ ኦይዱ ታማኔ ኡሱፑን ላይꬅ ኤኪዴስ፤ ሂስቲን ኔኒ ሄꬑ ጋላሳራ ኬፃ ኩንꬃኔ?” ጊ ኦይቺዳ። ጊዶ ኣቲን ዬሱሲ “ፆሳ ኬꬃ” ጊዳይ ባ ኣሳቴꬃ ጊሻሳ። ሄሳ ጊሽ ዬሱሲ ሃይቂ ዴንዲን ኢዛ ካሊዛይቲ ሄ ዮዖዛ ዩሺ ቆፒዲ ኤሪዳኔ ሃይሳ ካሴ ማፃፋን ፃፌቲዳይሳኔ ዬሱሲ ኢስታስ ካሴቲ ዮቲዳ ቃላ ኣማኒዳ። ፓዚጋ ባዓሌ ጋላስ ዬሱሲ ዬሩሳላሜን ዲሼ ኦꬂዳ ማላታታ ቤዪዲ ዳሮ ኣሳይ ኢዛ ኣማኒዴስ። ቃሴ ዬሱሲ ኣሳ ዉርሲ ኤሪዛ ጊሽ ኦናካ ኣማኒቤና። ኢዚ ኣሳ ዎዝናን ዲዛ ዉርሲ ኤሪዛ ጊሽ ኦኒካ ኢዛስ ኣሳ ጊሽ ዮታናስ ኮሺቤና። ፋርሳዌታ ባጋ ኣስ ጊዲዳ ኣይሁዳታ ሃላቃታፔ ኢሲ ኒቆዲሞሳ ጌቴቲዛ ኣሲ ዴስ። ኢዚ ቃማራ ዬሱሳኮ ቢዲ “ኣስታማሬ! ፆሲ ኢዛራ ዲዛዴ ጊዲኮፌ ኣቲን ሃይታ ኔ ኦꬂዛ ማላሊሲዛ ማላታታ ኦꬃናስ ዳንዳዪዛዴይ ዴና። ሄሳ ጊሽ ኔ ፆሳ ኣቻፌ ዪዳ ኣስታማሬ ጊዲዳይሳ ኑ ኤሮስ” ጊዴስ። ዬሱሲካ ኢዛስ ዛሪዲ “ታ ኔስ ቱሙ ጋይስ፤ ኣሲ ናምዓንꬆ ዬሌቶንታ ኣጊኮ ፆሳ ካዎቴꬅ ቤያናስ ዳንዳዬና” ጊዴስ። ኒቆዲሞሲካ ዛሪዲ “ሂስቲን ኣሲ ጪሚዳፔ ጉዬ ዋኒዲ ናምዓንꬆ ዬሌታና ዳንዳዪዜ? ቃሴካ ጌዴ ባ ኣዪ ኡሎን ሲሚ ጌሊዲ ዬሌታኔ?” ጊዲ ኦይቺዴስ። ዬሱሲካ ኢዛስ “ታ ኔስ ቱሙ ጋይስ፤ ኣሲ ሃꬃፌኔ ፂሎ ኣያናፔ ዬሌቶንታ ዲሼ ፆሳ ካዎቴꬅ ጌላናስ ዳንዳዬና። ኣሳፔ ዬሌቲዳይ ኣሳ። ኣያናፔ ዬሌቲዳይ ኣያና። ሄሳ ጊሽ ‘ኢንቴ ናምዓንꬆ ዬሌታናስ ኮሼስ’ ታ ኔና ጊዳ ጊሽ ማላሌቶፋ። ጫርኮይ ባ ኮይዳ ባጋ ጫርኬስ። ኔ ጫርኮስ ጊሪስ ሲያሳ ኣቲን ኢዚ ኣዋፔ ዪዛኮኔ ኣዋ ቢዛኮ ኤራካ። ኣያናፔ ዬሌቲዳይካ ሄሳ ማላ” ጊዴስ። ኒቆዲሞሲ “ሃይሲ ዋኒ ሃናና ዳንዳዒዜ?” ጊዲ ኦይቺዴስ። ዬሱሲካ ኢዛስ “ኢስራዔሌ ኣስታማሬ ጊዳ ኡታዳ ሄሳ ኔ ኤሪኪ? ታ ኔስ ቱሙ ጋይስ፤ ኑኒ ኑ ኤርዛይሳ ዮቶስ። ኑ ቤዪዳይሳ ማርካቶስ ጊዶ ኣቲን ኢንቴ ኑ ማርካቴꬅ ኤኬኬታ። ታ ኢንቴስ ሃይሳ ሃ ቢታ ዮዖ ዮቲን ኣማኖንታ ኢፂኮ ሳሎ ሚሽ ዮቲኮ ዎስቲ ኢንቴ ኣማናኔ? ሳሎፔ ዱጌ ዎꬊዳ ኣሳ ናፔ ኣቲን ፑዴ ሳሎ ኬዚዳይ ሃራይ ኦኒካ ዴና። “ባዞ ቢታን ሙሴይ ሾሽ ꬎቁ ሂስቲ ካቂዳይሳꬆ ሄሳꬆካ ኣሳ ናይ ꬎቃሶን ካቄታናስ ቤሴስ። ሄሲካ ኢዛን ኣማኒዛዴይ ዉሪካ ሜርና ዴዖ ዴማናሳ። ፆሳ ና ኣማኒዛይ ዉሪ ሜርና ዴዖ ዴማናፔ ኣቲን ꬋዮንታ ማላ ፆሲ ሃይሳ ኣላሜዛ ዳሮ ሲቂዳ ጊሽ ባ ሜፂ ኢሲ ናዛ ኢሚዴስ። ፆሲ ባ ናዛ ሃ ዱጌ ኣላሜ ኪቲዳይ ኣላሜ ኣሳይ ኢዛን ኣማኒዲ ኣታና ማላሳ ኣቲን ኢዚ ኣላሜ ኣሳ ቦላ ፒርዳናስ ጊዴና። “ኢዛ ኣማኒዛዴ ቦላ ፒርዴቴና። ኢዛ ኣማኖንታዴይ ጊዲኮ ፆሳ ና ኢሲኔዛን ኣማኖንታ ጊሽ ካሴካ ፒርዴቲ ኡቲዴስ። ፒርዳይካ ሃይሳ ማላ፥ ፖዖይ ሃ ኣላሜ ዪዴስ ሺን ኣሳስ ኦሶይ ኢታ ጊዲዳ ጊሽ ኣሳይ ፖዖፔ ዳሮ ꬉማ ዶሲዴስ። ኢታ ኦꬂዛዴይ ዉሪካ ፖዖ ዶሴና። ኢዚ ኦꬂዛ ኢታ ኦሶይ ቆንጪ ኬዞንታ ማላ ኢዚ ባ ሁዔስ ፖዖይ ዲዛሶ ኬዜና። ቱሙ ኦꬂዛዴይ ጊዲኮ ፖዖይ ዲዛሶ ዬስ። ኢዚ ፖዖይ ዲዛሶ ዪዛ ጋሶይ ፆሳ ኣዛዞ ማላ ኢዚ ኦꬂዳ ኦሶይ ቆንጫና ማላሳ” ጊዴስ። ሄሳፌ ካሊዲ ዬሱሲ ባና ካሊዛይታራ ዩሁዳ ዴሬ ቢዴስ፤ ሄንካ ኣሳ ፃማቂሼ ኢስታራ ጉꬃ ዎዴ ጋምዒዴስ። ሄ ዎዴ ሳሊሜ ኣቻን ሄኖኔ ጌቴቲዛሶን ዳሮ ሃꬂ ዲዛ ጊሽ ዮሃኒሲ ኣሳ ፃማቂሺን ኣሲካ ኢዛኮ ቢዲ ፃማቄቲዴስ። ሄሳ ዎዴ ዮሃኒሲ ቡሮ ቃሾ ኬꬄ ጌሊቤና። ሄ ዎዴ ዮሃኒሳ ካሊዛይታ ጊዶኒኔ ኢሲ ኢሲ ኣይሁዳ ኣሳታ ጊዶን ኣይሁዳታ ጌሾ ዎጋ ጊሽ ጊታ ፓላማይ ዴንዲዴስ። ዮሃኒሳ ካሊዛይቲ ኢዛኮ ሺቂዲ “ኣስታማሬ! ኔናራ ዮርዳኖሴ ሻፋ ፒንꬃን ኢሲፌ ዲሺን ኔ ኢዛ ጊሽ ማርካቶ ኣዴዚ ሄኮ ፃማቄስ፤ ኣሲካ ኢዛኮ ቤስ” ጊዳ። ዮሃኒሲካ ኢስታስ “ኦናስካ ፆሳፌ ኢሜቶንታ ዲሺን ኣይኮይካ ዳና ዳንዳዬና። “ታኒ ኢዛፔ ሲንꬃታ ኪቴታዲስ ኣቲን ያና ጊዳ ኪርስቶሲ ታና ግዲኬ’ ጋዳ ታ ኢንቴስ ዮቶይሳስ ኢንቴ ኢንቴ ሁዔራ ታ ማርካታ። ሳርጌ ዎዴ ኤካና ሚሺራይ ዲዛዴይ ኢዚካ ሚሺራ። ሚሺራ ላጌይ ጊዲኮ ሚሺራዛ ኣቻን ኤቂዲ ሚሺራዚ ጊዛዝ ሲዬስ። ሚሺራዛ ፃላ ሲይዲ ኡፋዬቴስ። ሄሳ ጊሽ ታ ኡፋይሲ ሃዒ ፖሌቲዴስ። ኢዚ ꬎቁ ꬎቁ ጋና ማላ ታካ ዚቂ ዚቂ ጋና ኮሼስ። “ፑዴፔ ዪዛዴይ ኡባፌ ቦላ። ጋርሳ ቢታፌ ዪዳዴይ ኢዚ ቢታፌኔ ቢታዚ ዮቴስ። ሳሎፔ ዪዛዴይ ኢዚ ኡባፌ ቦላ። ኢዚ ባ ቤዪዳዚኔ ባ ሲዪዳዝ ማርካቴስ። ጊዶ ኣቲን ኢዛ ማርካቴꬅ ኤኪዛዴይ ዴና። ኢዛ ማርካቴꬅ ኤኪዛዴይ ጊዲኮ ፆሳ ቱማንቻ ጊዲዳይሳ ቆንጪሴስ። ፆሲ ኪቲዳዴይ ፆሳ ቃላ ዮቴስ። ፆሲካ ኢዛዴስ ባ ኣያና ማኪ ኢሜና። “ኣዋይ ባ ና ዶሴስ። ሃኒዛ ዮዖ ዉርሲ ኢዛ ኩሼን ኣꬂ ኢሜስ። ናዛን ኣማኒዛዴስ ሜርና ዴዖይ ዴስ። ናዛን ኣማኖንታይ ጊዲኮ ፆሳ ሃንቆይ ኢዛ ቦላ ዳና ኣቲን ዴዖ ዴሜና” ጊዴስ። ሄ ዎዴ ዬሱሲ ዮሃኒሳፔ ቦላራ ዳሮ ኣሳ ባና ካሊዛዴይ ኦꬂዛይሳኔ ፃማቂዛይሳ ፋርሳዌቲ ሲዪዳ። ጊዶ ኣቲን ፃማቂዛይቲ ኢዛ ካሊዛይታፔ ኣቲን ኢዚ ፃማቂቤና። ኢዛ ጊሽ ሃሳዬቲዛይሳ ፋርሳዌቲ ሲይዳ ዬሱሲ ኤሪዲ ዩሁዳ ዴሬ ኣጊዲ ጋሊላ ዴሬ ሲሚ ቢዴስ። ኢዚ ሄ ቢሺን ሳማሪያራ ኣꬊ ባናይሲ ኢዛስ ኣቶንታዝ ጊዲዴስ። ሄሳ ጊሽ ሲካሮ ጌቴቲዛሶ ሳማሪያ ካታማ ቢዴስ። ሲካራ ያቆቤይ ባ ና ዮሴፌስ ኢሚዳ ቢታ ኣቻን ዳዉስ። ሄንካ ያቆቤ ሃꬃ ኦላይ ዴስ። ዬሱሲ ኦጌ ሃሙቲ ዳቡሪዳ ጊሽ ሄ ኦላይ ኣቻን ኡቲዴስ። ዎዴይካ ጋላሳፌ ኡሱፑን ሳቴ ማላ። ሄሳ ዎዴ ኢሲ ሳማሪያ ዴሬ ማጫስ ዲዛራ ሃꬄ ዱቃናስ ሄ ሃꬃ ኦላኮ ያዱስ። ዬሱሲካ ኢዞ “ታና ሃꬄ ኡሻ” ጊዴስ። ሄሲ ሃኒሺን ዬሱሳ ካሊዛይቲ ቁማ ሻማና ካታማ ቢዳ። ሂና ሳማሪያ ማጫሳያ ዬሱሳ “ኔ ኣይሁዳ ኣስ ጊዳ ኡታዳ ዋናዳ ታና ሳማሪያ ማጫስ ‘ሃꬄ ኡሻ’ ጋ ኦይቻይ?” ጋዱስ። ኢዛ ሄሳ ጊዳይ ኣይሁዳ ኣሳሲኔ ሳማሪያ ኣሳስ ጋጎቴꬂ ዶንታ ጊሻሳ። ዬሱሲካ ኢዚስ “ፆሳ ኢሞታይኔ ኔና ‘ታና ሃꬄ ኡሻ’ ጊዛዴይ ኢዚ ኦናኮኔ ኔ ኤሪዛኮ ኔ ኢዛ ዎሳናስ ቤሴስ። ኢዚካ ኔስ ዴዖ ሃꬄ ኢማናኮሺን” ጊዴስ። ኢዛካ ኢዛስ “ጎዶ! ኔስ ሃꬄ ዱቂዛ ሚሺ ዴና፤ ሃꬃ ኦላይካ ዳሮ ጪማ፤ ሂስቲን ኔ ዴዖ ሃꬂ ኣዋፔ ዴማኔ? ኔ ሃይሳ ሃꬃ ኦላዛ ኑስ ኢሚዳ ኑ ኣዋ ያቆቤፔ ኣꬋይ? ኢዚኔ ኢዛ ናይቲ ኢዛ ሜሄቲካ ሃይሳ ሃ ኦላፌ ሃꬄ ኡዪዳ” ጋዱስ። ዬሱሲ ኢዚስ “ሃይሳ ሃ ሃꬃፌ ኡዪዛይ ዉሪ ናምዓንꬆ ሳሞቲዲ ዛሪ ሃራ ኡያናሺን። ታ ኢሚዛ ሃꬄ ኡዪዛዴይ ጊዲኮ ሜርናስ ሙሌካ ሳሞቴና። ጋሶይካ ታ ኢሚዛ ሃꬄ ኡዪዛዴስ ሜርና ዴዖስ ፑልቲዛ ፑልቶ ሃꬄ ጊዳና” ጊዴስ። ማጫሳያካ “ጎዶ! ሃይሳፌ ጉዬ ታና ሃꬄ ሳሞንታ ማላኔ ቃሴካ ታ ሃꬄ ዱቃና ሃ ዮንታ ማላ ሄሳ ኔ ጊዛ ሃꬃ ማላ ሃꬄ ታስ ኢማርኪ?” ጋዱስ። ዬሱሲካ ኢዞ “ባዳኔ ኔ ኣዚና ፄይጋ ኤካዳ ያ” ጊዴስ። ማጫሳያካ ዛራዳ “ታስ ኣዚናይ ዴና” ጋዱስ። ኢዚ ሂዝጊን ዬሱሲ “ ‘ኔ ታስ ኣዚናይ ዴና’ ጉሳይ ቱሙኮ። ጋሶይካ ካሴ ኔስ ኢቻሹ ኣዚናቲ ዴቴስ። ቃሴ ሃዒ ኔናራ ዲዛይሲ ኔ ኣዚና ጊዴና። ሄሳ ጊሽ ኔ ቱሙ ጋዳሳ” ጊዴስ። ማጫሳያ ኢዛስ “ጎዶ! ኔኒ ናቤ ጊዲዳይሳ ታ ሃዒ ኤራዲስ። ካሴ ኑ ኣዋቲ ሃይሳ ዙማ ቦላ ጎይኒዳ። ኢንቴ ቃሴ ‘ኣሳይ ጎይናናስ ቤሲዛሶይ ዬሩሳላሜንኮ!’ ጌታ” ጋዱስ። ዬሱሲካ ኢዚስ “ሃኔ ማጫሳዬ፥ ፆሳ ኣዋስ ሃይሳ ዙማ ቦላ ዎይኮ ዬሩሳላሜን ኢንቴ ጎይኖንታ ዎዴይ ያናይሳ ኣማና፤ ኢንቴ ኢንቴ ኤሮንታ ፆሳስ ጎይኔታ። ኑ ጊዲኮ ኣሳስ ኣቶቴꬂ ኣይሁዳፔ ጊዲዳ ጊሽ ኑኒ ኑ ኤሪዛ ፆሳስ ጎይኖስ። ጊዶ ኣቲን ቱሙ ጎይኒዛይቲ ፆሳ ኣዋስ ኣያናኒኔ ቱማን ጎይኒዛ ዎዴይ ቡሮ ያና። ሃራይ ኣቶሺን ሃዒካ ዪዴስ። ፆሳ ኣዋይካ ኮዪዛይ ሄሳ ማላ ጎይኒዛይታ። ፆሲ ባ ሁዔስ ኣያና፤ ኢዛ ጎይኒዛይቲ ኣይናኒኔ ቱማን ጎይናናስ ቤሴስ” ጊዴስ። ማጫሳያካ “ኪርስቶሲ ያናይሳ ታ ኤራይስ፤ ኢዚ ዪዲ ሃኒዛዝ ዉርሲ ኑስ ዮታና” ጋዱስ። ዬሱሲካ ኢዚስ “ሃዒ ኔናራ ሃሳዪዛይ ታ ኢዛ” ጊዴስ። ሄሲ ሃኒሺን ኢዛ ካሊዛይቲ ባ ቢዳሶፔ ሲሚዳ። ዬሱሲ ማጫሳራ ሃሳዪዛይሳ ማላሌቲዳ። ጊዶ ኣቲን “ሃኔ ኣይ ኮያይ? ዎይኮ ሃኒራ ኣዛስ ሃሳያይ?” ጊዲ ኦኒካ ኦይቺቤና። ሄሳፌ ጉዬ ማጫሳያ ኦቶዛ ሄን ኣጋጋዳ ጌዴ ካታማ ባዳ ኣሳስ፤ “ታ ኦꬂዳዝ ዉርሲ ታስ ዮቲዳዴ ሃ ዪዲ ቤይቴ። ኦኔ ኤሪዛይ ፆሲ ቲዪዳ ኪርስቶሲ ኢዛኮኔ!” ጋዱስ። ኣስካ ካታማፔ ኬዚዲ ዬሱሳኮ ቢዴስ። ሄ ዎዴ ዬሱሳ ካሊዛይቲ ዬሱሳ “ኣስታማሬ! ቁማ ማ” ጊዲ ዎሲዳ። ኢዚ ቃስ “ኢንቴ ኤሮንታይ ታ ሚዛ ቁማይ ታስ ዴስ” ጊዴስ። ሄሳ ጊሽ ኢዛ ካሊዛይቲ “ኣይኮ ሚዛ ካꬅ ኣሲ ኢዛስ ኤሂዴሻ?” ጊዲ ባ ጊዶን ሃሳዬቲዳ ዬሱሲካ ኢስታስ ዛሪዲ “ታ ቁማይ ታና ኪቲዳ ታ ኣዋ ሼኔ ኦሶኔ ኢዛ ኦሶ ፖሎ። ኢንቴ ቃስ ‘ካꬃ ማፃይ ጋካናስ ቡሮ ኦይዱ ኣጊናይ ኣቲዴስ’ ጌታ ጊዴኬቲ? ቃስ ታ ጊዲኮ ኢንቴና ‘ꬎቁ ጊዲ ካꬃይ ማፃ ጋኪዳይሳ ፄሊቴ’ ጋይስ። ማፂዛዴይ ባ ዳሞዛ ኤካና። ሜርናስ ጊዲዛ ኣይፌ ሺሻና። ሄሳ ጊሽ ዜሪዛዴይኔ ማፂዛዴይ ኢሲፌ ኡፌዬታና። ሄሳ ጊሽ ኢሳዴይ ዜራና፤ ሃራ ኣሲ ማፃና ጌቴቲዛ ሌሚሶይ ቱማ። ታ ኢንቴና ኢንቴ ዳቡሮንታይሳ ማፃና ማላ ዬዳዲስ። ሃራቲ ኦሶን ዳቡሪዳ። ጊዶ ኣቲን ኢንቴ ኢስታ ዳቡርሳን ጎዔቲዴታ” ጊዴስ። ማጫሳያ “ታ ኦꬂዳዚ ዉርሲ ታስ ኢዚ ዮቲዴስ” ጋዳ ኣሳስ ማርካቲዳ ማላ ካታማፔ ዳሮ ሳማሪያ ኣሳይ ኢዛን ኣማኒዴስ። ሄሳ ጊሽ ሳማሪያ ኣሳይ ዬሱሳኮ ዪዲኔ ኢዚ ኢስታኮን ጋምዓና ማላ ዎሲዳ። ኢዚካ ናምዑ ጋላስ ሄን ጋምዒዴስ። ኢዛ ቃላ ሲይዲ ዳሮ ኣሳይ ኢዛ ኣማኒዴስ። ማጫሳዮካ “ሃዒ ኑ ኢዛ ኣማኒዛይ ኔ ዮቲዳ ቃላ ጊሽ ፃላ ጊዶንታ ኑካ ኑ ባጋራ ኢዛፔ ሲዪዳ ጊሺኔ ቱማፔ ኢዚ ዴሬ ኣሺዛዴ ጊዲዳይሳ ኤሪዳ ጊሻሳ” ጊዳ። ዬሱሲ ሳማሪያን ናምዑ ጋላስ ጋምዒዳፔ ጉዬ ጋሊላ ቢዴስ። ኢዚ ባ ባጋራ “ናቤይ ባ ዴሬን ቦንቼቴና” ጊ ዮቲዴስ። ጊዶ ኣቲን ኢዚ ጋሊላ ቢን ጋሊላ ኣሳይ ኢዛ ሎዔꬂ ሞኪ ኤኪዴስ። ጋሶይካ ፓዚጋ ባዓሌ ቦንቻና ዬሩሳላሜ ቢዳሶን ሄን ዲሺን ኢዚ ኦꬂዳይሳ ዉርሲ ቤዪዳ ጊሻሳ። ሄሳፌ ጉዬ ዬሱሲ ሃꬄ ዎይኔ ጫጄ ኦꬂዳ ጋሊላ ዴሬ ጊዶን ዲዛ ቃና ጌቴቲዛ ካታማ ናምዓንꬆ ቢዴስ። ሄ ዎዴ ቂፊርናሆሜን ኢዛስ ናይ ሳኬቲዳ ኢሲ ካዎ ሹሜይ ዴስ። ኢዚካ ዬሱሲ ዩሁዳ ዴሬፔ ጌዴ ጋሊላ ዪዳይሳ ሲይዲ ዬሱሳኮ ቢዴስ። ዬሱሲ ዱጌ ቂፊርናሆሜ ዎꬋና ማላኔ ዳሮ ሳኬቲዲ ሃይቃና ጊዛ ናዛ ፓꬃና ማላ ዬሱሳ ዎሲዴስ። ዬሱሲካ ኢዛስ “ኢንቴ ጊታ ማላታታኔ ማላሊሲዛዝ ቤዮንታ ኣይኮካ ኣማኔኬታ” ጊዴስ። ሹሜዚካ ዛሪዲ “ጎዶ፥ ታ ናዚ ሃይቆንታ ኤሌላ ዎꬋርኪ!” ጊዴስ። ዬሱሲካ ኢዛ “ኔኒ ኔሶ ባ! ናዚ ፓፂዴስ” ጊዴስ። ኣዴዚካ ዬሱሲ ኢዛስ ዮቲዳ ቃላ ኣማኒዲ ሶ ሲሚ ቢዴስ። ኢዚ ሶ ቢሺን ኢዛ ኣሽካራቲ ኢዛራ ኦጌን ጋጊዲ “ኔ ናዚ ፓፂዴስ” ጊዲ ኢዛስ ዮቲዳ። ሹሜዚካ ናዚ ኣይ ሳቴን ፓፂዳኮኔ ኢስታ ዛሪ ኦይቺዴስ። ኢስቲካ ኢዛስ “ቃማ ጋላሳፌ ላፑን ሳቴን ኢዛ ሚቺዛይሲ ኣጊዴስ” ጊዳ። ናዛ ኣዋይካ ዬሱሲ “ኔ ናዚ ፓፂዴስ” ጊዳይ ሄ ኢስቲ ኢዛስ ዮቲዛ ዎዴ ጊዲዳይሳ ኤሪዴስ። ሄሳ ጊሽ ሄ ጋላሳፌ ኦይኪዲ ኢዚኔ ኢዛ ሶ ኣሳይ ዉሪ ዬሱሳ ኣማኒዳ። ሃይሲ ማላታይ ዬሱሲ ዩሁዳፔ ጋሊላ ዪዲ ኦꬂዳ ናምዓንꬆ ማላታ። ሄሳፌ ካሊዲ ኣይሁዳታ ባዓሌይ ዲዛ ጊሽ ዬሱሲ ዬሩሳላሜ ቢዴስ። ዬሩሳላሜን ዶርሲ ጌሊዛ ፔንጌ ኣቻን ኢብራዌታ ቃላራ “ቤቴሳይዳ” ጌቴቲዛ ኢሲ ፑልቶፌ ሺቂዲ ኤሊዳ ሃꬂ ዴስ። ኢዛፔ ቦላራ ካማይ ዲዛ ኢቻሹ ኦጌቲ ዴቴስ። ዳሮ ሃርጋንቻቲ፥ ኣይፌ ቆቄቲ፥ ቶሆ ዎቤቲኔ ቶሆ ሲላቲ ኦጌ ቦላ ኢቺዲ ሃꬃይ ቃፄታና ጋካናስ ናጌቴስ። ኢሲ ኢሲ ዎዴ ጎዳ ኪታንቻይ ሃꬃን ዎꬊዲ ሃꬃ ቃꬄስ። ሃꬃ ቃꬃፌ ካሊዲ ኮይሮቲዲ ሃꬃን ጌሊዛ ሃርጋንቻይ ባና ሳኪዛ ኣይ ሃርጌፌካ ፓፄስ። ሄን ጋዳን ሄꬑ ታማኔ ኦሱፑን ላይꬅ ኩሜꬅ ሳኬቲዳ ኢሳዴይ ዴስ። ዬሱሲ ኣዴዛ ሄን ኢቺዳይሳ ቤዪዲኔ ኢዚ ዳሮ ላይꬅ ሳኬቲዳይሳ ኤሪዲ “ኔ ፓፃና ኮያይ?” ጊዴስ። ሃርጋንቻዚካ ዛሪዲ “ጎዶ! ሃꬃይ ቃፄቲዛ ዎዴ ታና ሃꬃን ጌልꬂዛ ኣሲ ዴና፤ ታ ቡሮ ባና ጊሺን ሃራይ ታፔ ካሴቲ ሃꬃን ጌሌስ” ጊዴስ ዬሱሲካ ኢዛ “ዴንዳ! ኔ ኢቺዳ ኣልጋ ቶካዳ ባ!” ጊዴስ። ኣዴዚካ ሄራካ ፓፂዴስ። ባ ኣልጋ ቶኪ ኤኪዲ ቢዴስ። ሄሲ ሃኒዳይ ኣይሁዳታ ሳምባታ ጋላሳ። ሄሳ ጊሽ ኣይሁዳታ ሃላቃቲ ፓፂዳ ኣዴዛ “ሃች ሳምባታራ ኔ ኣልጋ ቶካና ማላ ሙሴ ዎጋይ ኣዛዜና” ጊዳ። ኢዚካ ኢስታስ “ ‘ኔ ኢቺዳ ኣልጋ ቶካዳ ባ’ ጊ ዮቲዴስ” ጊዴስ። ኢስቲካ “ኔና ኣልጋ ቶካዳ ባ ጊዳይ ኦኔ?” ጊ ኦይቺዳ። ዴሬይ ዳሪዳ ጊሺኔ ዬሱሲ ሄፔ ሃኪ ቢዳ ጊሽ ኢዛ ኦኒ ፓꬂዳኮኔ ኣዴዚ ኤሪቤና። ሄሳፌ ጉዬ ዬሱሲ ኣዴዛ ፆሳ ኬꬃን ዴሚዲ “ሄኮ ሃዒ ኔ ፓፃዳሳ፤ ካሴይሳፌ ኣꬊዛ ኢታ ሚሺ ኔ ቦላ ጋኮንታ ማላ ናምዓንꬆ ናጋራ ኦꬆፋ” ጊዴስ ኣዴዚካ ቢዲኔ ኢዛ ፓꬂዳይ ዬሱሳ ጊዲዳይሳ ኣይሁዳታ ሃላቃታስ ዮቲዴስ። ኣዴዛ ሳምባታ ጋላስ ፓꬂዳ ጊሽ ኣይሁዳታ ዳናቲ ዬሱሳ ኦይካና ዬዴꬂዳ። ዬሱሲካ ኢስታስ “ታ ኣዋይ ኡባ ዎዴ ኦꬄስ፥ ታካ ኦꬃና” ጊዴስ፤ ሄሳ ጋሶን ኣይሁዳታ ዳናቲ ዬሱሳ ዎꬋና ማላ ካሴፔ ኣꬂ ዴንꬄꬂዳ። ቃሴ ኢዚ ሳምባታ ሞሪዳ ጊሽ ፃላ ጊዶንታ “ፆሲ ታ ኣዋ” ጊዳ ጊሺኔ ባና ፆሳራ ጊኒሲዳ ጊሻሳ። ዬሱሲ ኢስታስ “ታ ኢንቴስ ቱሙ ጋይስ፤ ኣዋይ ኦꬂሺን ቤዪዳይሳ ኦሶፔ ኣቲን ናዚ ባ ሼኔን ኣይኔ ኦꬄና። ኣዋይ ኦꬂዛይሳ ኢዛ ናይ ሄሳꬆካ ኦꬄስ። ጋሶይካ ኣዋይ ናዛ ዶሴስ። ባ ኦꬂዛይሳካ ዉርሲ ኢዛ ቤሴስ፤ ኢንቴ ማላሌታና ማላ ሃይሳፌካ ኣꬊዛ ኦሶ ቡሮ ቤሳና። ኣዋይ ሃይቂዳይታ ዴንꬂዛይሳꬆኔ ዴዖ ኢሚዛይሳꬆ ናዚካ ሄሳꬆ ባ ኮዪዳዴስ ዴዖ ኢማና። ኣዋይ ኦና ቦላካ ፒርዴና። ጊዶ ኣቲን ፒርዳ ማታ ዉርሲ ባ ናዛስ ኢሚዴስ። ኢዚ ሄሳꬆ ኦꬂዳይ ኣሳይ ዉሪ ኣዋ ቦንቻና ማላኔ ቃሴካ ናዛካ ቦንቻና ማላሳ። ናዛ ቦንቾንታይ ናዛ ኪቲዳ ኣዋካ ቦንቼና። “ታ ኢንቴስ ቱማ ጋይስ፥ ታ ቃላ ሲዪዛዴሲኔ ታና ኪቲዳዴን ኣማኒዛዴስ ሜርና ዴዖይ ዴስ። ኢዛዴይ ሃይቆፔ ጌዴ ዴዖን ፒኒዴስ ኣቲን ኢዛ ቦላ ፒርዴቴና። ታ ኢንቴስ ቱማ ጋይስ፥ ካሴ ሃይቂዳ ኣሳቲ ፆሳ ና ቃላ ሲዪዛ ዎዴይ ያና፤ ሄ ዎዴያካ ሃኖ፤ ሲዪዛይቲ ዉሪ ዴዖን ዴኣና። ጋሶይካ ኣዋይ ባ ባጋራ ዴዖይ ዲዛ ማላ ናዚካ ባ ባጋራ ዴዖይ ዳና ማላ ኦꬂዴስ። ኢዚ ኣሳ ና ጊዲዳ ጊሽ ፒርዳና ማላ ጎዳቴꬅ ኢዛስ ኢሚዴስ። ሃይሳን ኣይኮካ ማላሌቶፍቴ። ጋሶይካ ቡሮ ካሴ ሃይቂዲ ዱፎን ዲዛይቲ ዉሪ ኢዛ ቃላ ጊሪስ ሲዪዛ ዎዴይ ያና። ሎዖ ኦꬂዳይቲ ሃይቆፔ ዴንዲዲ ፓፃና። ጊዶ ኣቲን ኢታ ኦꬂዳይቲ ሃይቆፔ ዴንዲዲ ፒርዴታና። “ታ ታ ሼኔን ኣይኮካ ኦꬃናስ ዳንዳዪኬ፤ ጊዶ ኣቲን ታ ኣዋፔ ታ ሲዪዳ ማላ ፒርዳይስ። ታና ኪቲዳይሳ ሼኔ ኦꬃይስ ኣቲን ታ ሼኔን ታ ኦꬆንታ ጊሽ ታ ፒርዳን ባላይ ባዋ። ታኒ ታ ጊሽ ታርካ ማርካቲኮ ታ ማርካይ ቱሙ ጊዴና። ጊዶ ኣቲን ታ ጊሽ ማርካቲዛዴይ ሃራይ ዴስ። ኢዚካ ታ ጊሽ ማርካቲዛዴ ማርካቴꬃይ ቱሙ ጊዲዳይሳ ታ ኤራይስ። ኢንቴ ዮሃኒሳኮ ኣሴ ኪቲዴታ ሺን ኢዚካ ቱሙ ማርካቲዴስ። ታ ሃይሳ ጊዛይ ኢንቴ ኣታና ማላ ኣቲን ታስ ሃራ ማርካቴꬅ ኮሺዳ ጊሽ ጊዴና። ዮሃኒሲ ኤፂዲ ፖዒሲዛ ፖዖ ማላ። ኢንቴካ ጉꬃ ዎዴ ኢዛ ፖዖን ኡፋዬታና ኮዪዴታ። ታስ ጊዲኮ ዮሃኒሳ ማርካቴꬃፌ ኣꬊዛ ማርካይ ዴስ። ታ ማርካይካ ታ ኣዋይ ታስ ኢሚዳ ኦሶ። ሄሲካ ታ ኦꬂዛ ኦሶይ ታ ኣዋይ ታና ኪቲዳይሳ ታስ ማርካቴስ። ታና ኪቲዳ ታ ኣዋይካ ባ ሁዔራ ታስ ማርካቲዴስ። ኢንቴ ጊዲኮ ኢዛ ቃላ ጊሪስ ሙሌካ ሲይቤይኬታ። ኢዛስ ሜꬋካ ሙሌራ ቤይቤኬታ። ኢዚ ኪቲዳዴን ኢንቴ ኣማኖንታ ጊሽ ኢዛ ቃላይ ኢንቴ ኣቻን ዴና። ኢንቴስ ጌሻ ማፃፋታፔ ሜርና ዴዖ ዴማናስ ሚሳቲን ማፃፋታ ፒሊጌታ፤ ማፃፋቲካ ታ ጊሽ ማርካቴቴስ። ጊዶ ኣቲን ኢንቴ ዴዖ ዴማናስ ታኮ ሃ ያና ኮዬኬታ። “ታ ኣሳፔ ቦንቾ ኮዪኬ። ታ ኢንቴና ኤራይስ፤ ፆሳ ሲቆይ ኢንቴናን ባይንዳይሳካ ኤራይስ። ታኒ ታ ኣዋ ሱንꬃን ያዲስ ሺን ኢንቴ ታና ሞኪ ኤኪቤኬታ። ሃራ ኣሲ ቃሴ ባ ሱንꬃን ዪኮ ኢንቴ ኢዛ ሞኪ ኤኬታ። ኢንቴ ኢንቴ ጊዶን ኢሶይ ኢሳፌ ቦንቾ ኮዪዛይቶ! ኢሲ ፆሳፌ ቤቲዛ ቦንቾ ኮዮንታይቶ ኢንቴ ዋኒዲ ታና ኣማናና ዳንዳዬቲ? ታ ኣዋ ሲንꬃን ኢንቴና ሞታናይ ኢንቴስ ታና ሚሳቶፖ። ኢንቴና ሞታናይ ኢንቴ ኢዛ ሂዶታ ኦꬂዛ ሙሴ፤ ሙሴይ ታ ጊሽ ፃፊዳይሳ ኣማኒዳኮ ኢንቴ ታና ኣማናና። ኢዚ ፃፊዳይሳ ኢንቴ ኣማኖንታ ኣጊኮ ቃሴ ታ ቃላ ኢንቴ ዋኒ ኣማናኔ?” ጊዴስ። ሄሳፌ ጉዬ ዬሱሲ ፂቢራዶሴ ጌቴቲዛሶ ጋሊላ ኣባፌ ሄ ፒንꬅ ፒኒዴስ። ዬሱሲ ሃርጋንቻታ ፓꬂዳ ማላታ ቤዪዳ ጊሽ ዳሮ ኣሳይ ኢዛ ካሊዴስ። ዬሱሲ ባና ካሊዛይታራ ፑዴ ዙማ ቦላ ኬዚ ኡቲዴስ። ሄ ዎዴ ኣይሁዳታ ፓዚጋ ባዓሌይ ማቲ ኡቲዴስ። ሄ ዎዴ ዳሮ ዴሬይ ኢዛኮ ዪዛይሳ ዬሱሲ ꬎቁ ጊ ፄሊዲ ፒሊጶሳ “ሃይሳ ዴራስ ጊዳና ቁማ ኣዋፔ ሻማና ዳንዳዪዞኒ?” ጊዴስ። ዬሱሲ ፒሊጶሳ ሄሳꬆ ኦይቺዳይ ኢዛ ፓጫናስ ጊዲፔ ኣቲን ኢዚ ባ ኦꬃናይሳ ኤሬስ። ፒሊጶሲካ ኢዛስ “ኢሲ ኢሳዴስ ኢሲ ባርስ ጊዲዛ ካꬅ ሻሚዛኮካ ናምዑ ፄቱ ዲናሬን ሻሚዳ ካꬂካ ሃይሳስ ጊዴና” ጊዴስ። ዬሱሳ ካሊዛይታፔ ኢሶይ ሲሞና ጴፅሮሳ ኢሻ ኢንዲራሲ፥ “ኢቻሹ ባንጋ ኡኬꬂኔ ናምዑ ሞሌ ኦይኪዳ ኢሲ ናይ ሃይሳን ዴስ። ጊዶ ኣቲን ሃና ሃይሳ ሃ ዴሬዛስ ኣይ ጊዳኔ?” ጊዴስ። ዬሱሲካ ዛሪዲ “ኣሳ ኡባ ኡቲሲቴ” ጊዴስ። ሄን ጋዳን ዳሮ ማታይ ዲዛ ጊሽ ኣሳይ ኡቲዴስ። ኣሳ ቆዳይካ ኢቻሹ ሺ ጊዲዛዛ። ሄሳፌ ጉዬ ዬሱሲ ኡኬꬃ ኤኪዲ ጋላታ ዎሳ ዎሲዲ ኡቲዳ ኣሳስ ጊሺዴስ። ሞሌዛካ ሄሳꬆካ ጊሼቺዴስ። ኣሳይ ዉሪካ ባስ ጊዲዛዝ ዴሚዴስ። ኣሳይ ዉሪካ ካሊ ሚን ዬሱሲ ባና ካሊዛይታ “ማዳን ኣቲዳ ካꬃ ኢሲኖካ ኣሾንታ ሺሺቴ” ጊዴስ። ኢስቲካ ኣሳይ ሚሺን ኢቻሹ ኡኬꬃፌ ኣቲዳ ታማኔ ናምዑ ሌማቴ ኩሜꬅ ሺሺዳ። ኣሳቲካ ዬሱሲ ኦꬂዳ ማላታ ቤዪዲ “ሃይሳዴይ ቱማፔ ሃ ኣላሜ ያና ናቤዛኮ!” ጊዴስ። ኣሳይ ቃሴ ዎልቃራ ዬሱሳ ካዎꬃና ቆፒዳይሳ ኤሪዲ ዬሱሲ ቃሴካ ኢስታፌ ሃኪ ቢዲ ዙማ ቦላ ኬዚዴስ። ጋዴይ ቃሚሺን ዬሱሳ ካሊዛይቲ ዱጌ ኣባኮ ዎꬊዳ። ዎጎሎን ጌሊዲ ቂፊርናሆሜ ባና ኬዚዳ። ኢስቲ ኬዚሺን ጋዴይ ꬉሚዴስ። ዬሱሲ ሄሳ ጋካናሲካ ኢስታኮ ዪቤና። ዎልቃማ ጫርኮይ ጫርኪዛ ጊሽ ኣባይ ኬሂ ቃፂዴስ። ኢዛ ካሊዛይቲ ባጋ ሳቴ ኦጌ ማላ ዎጎሎዛ ላጊዳፔ ጉዬ ዬሱሲ ኣባ ቦላራ ቶሆራ ሃሙቲ ዎጎሎዛኮ ማቲሺን ዴሚዲ ባቢዳ። ኢዚካ ኢስታስ “ታናኮ! ባቦፍቴ!” ጊዴስ። ኢስቲካ ኢዛ ኡፋይሳራ ጌዴ ዎጎሎዛ ጊዶ ኤካና ኮይዳ። ሄራካ ዎጎሎዚካ ኢስቲ ባናሶ ጋኪዴስ። ኣባፌ ሄ ፒንꬃን ኣቲዳ ኣሳይ ዎንቴꬃ ጋላስ ኣባ ቦላ ኢሲ ዎጎሎይ ፃላ ዲዛሮ ቤዪዴስ። ዬሱሳ ካሊዛይቲ ካሴ ባርካ ቢዳይሳኔ ዬሱሲ ኢስታራ ዎጎሎን ጌሎንታይሳ ኤሪዳ። ጊዶ ኣቲን ሃንኮ ዎጎሎቲ ፂቢራዶሴፔ ዴንዲዲ ዬሱሲ ጋላታ ዎሳ ዎሲን ኣሳይ ካꬃ ሚዳሶ ዪዳ። ኣሳቲካ ዬሱሲ ዎይኮ ኢዛ ካሊዛይቲ ሄን ባይንዳይሳ ቤዪዲ ሄ ዎጎሎታን ጌሊዲ ዬሱሳ ኮሽ ቂፊርናሆሜ ቢዴስ። ኣባፌ ሄ ፒንꬃን ኢዛ ዴሚዲ “ኣስታማሬ! ኔ ኣይዴ ሃይሳ ያዲ?” ጊዳ። ዬሱሲካ ኢስታስ “ታ ኢንቴስ ቱማ ጋይስ ኢንቴ ታና ኮዪዛይ ካꬅ ሚ ካሊዳ ጊሽ ኣቲን ማላታ ቤዪዳ ጊሽ ጊዴና። ꬋያና ካꬃስ ኦꬆፍቴ። ጊዶ ኣቲን ሄሳፌ ኣꬂዲ ፆሳ ኣዋይ ኣማንꬂዛ ማታሜ ኢዛ ቦላ ሾጪዳ ጊሽ ኣሳ ናይ ኢንቴስ ኢሚዛ ሜርና ዴዖስ ጊዲዛ ካꬃስ ኦꬂቴ” ጊዴስ። ኢስቲካ ኢዛ “ሂስቲን ፆሳ ኦሶ ኦꬃናስ ኑ ኣይ ኦꬂኖ?” ጊዳ። ዬሱሲካ “ፆሳ ኦሶይ ፆሲ ኪቲዳ ኢዛ ናዛን ኣማኖ” ጊዲ ኢስታስ ዛሪዴስ። ኢስቲካ ኢዛስ “ኑ ቤዪዲ ኔና ኣማናና ማላ ኔ ኑና ኣይ ማላታ ቤሳኔ? ቃሴካ ኣይ ኦꬃኔ? ‘ኢስቲ ማና ማላ ኢስታስ ቁማ ሳሎፔ ኢሚዴስ’ ጌቴቲ ፃፌቲዳ ማላ ካሴ ኑ ኣዋቲ ባዞ ቢታን ማና ጌቴቲዛ ካꬅ ሚዳ” ጊዳ። ዬሱሲ ኢስታስ “ታ ኢንቴስ ቱሙ ጋይስ፤ ሳሎፔ ዎꬊዳ ቁማ ኢንቴስ ኢሚዳይ ሙሴ ጊዴና። ቱሙ ቁማ ሳሎፔ ኢንቴስ ኢሚዛይ ታ ኣዋ። ጋሶይካ ፆሳ ቁማይ ሳሎፔ ዎꬊዲ ኣላሜስ ዴዖ ኢሚዛይሳ” ጊዴስ። ሄሳ ጊሽ ኣሳይ “ጎዶ ሄሳ ማላ ቁማ ኑስ ኡባ ዎዴ ኢማርኪ!” ጊዴስ። ዬሱሲካ ኢስታስ “ዴዖ ቁማይ ታና፤ ታኮ ዪዛ ኣሲ ሙሌካ ጋፌቴና፤ ታና ኣማኒዛዴይ ኣይዴካ ሳሜቴና። ካሴ ታ ኢንቴስ ጊዳ ማላ ኢንቴ ታና ቤይዴታ ሺን ኣማኒቤይኬታ። ታ ኣዋይ ታስ ኢሚዛይ ዉሪካ ታኮ ያና። ታኮ ዪዛዴ ታ ጌዴ ካሬ ጎዲኬ። ጋሶይካ ታ ሳሎፔ ዎꬊዳይ ታና ኪቲዳይሳ ሼኔ ኦꬃናስ ኣቲን ታ ሼኔ ኦꬃናስ ጊዴና። ታና ኪቲዳይሳ ሼኔይ ታስ ኢሚዳይታፔ ኢሳዴካ ꬋይሶንታ ዉርሴꬃ ጋላስ ታ ዴንꬃና። ኤ ታ ሼኔይ ናዛ ቤዪዲ ኢዛ ኣማኒዛዴይ ዉሪ ሜርና ዴዖ ዴማናሳ። ታኒካ ዉርሴꬃ ጋላስ ኢዛ ሃይቆፔ ዴንꬃና” ጊዴስ። ሄሳ ጊሽ ዬሱሲ “ሳሎፔ ዎꬊዳ ቁማይ ታና” ጊዳ ጊሽ ኣይሁዳቲ ኢዛ ቦላ ዙዙሜቲዳ። “ሃይሲ ዮሴፌ ና ዬሱሳ ጊዴኔ? ኢዛ ኣዋኔ ኢዛ ኣዮ ኑ ኤሮኮኒ? ሂስቲን ሃዒ ኢዚ ‘ሳሎፔ ዎꬋዲስ’ ዋኒ ጊዜ?” ጊዳ። ዬሱሲካ ኢስታስ “ኢንቴ ኢንቴ ጊዶን ዙዙሜታ። ታና ኪቲዳ ታ ኣዋይ ፄይጊዳዴፌ ኣቲን ታኮ ያና ዳንዳዪዛዴይ ኦኒካ ዴና። ባርካ ታኮ ያና ዳንዳዪዛይ ኦኒካ ዴና። ታኮ ዪዛዴካ ዉርሴꬃ ጋላስ ታ ኢዛ ሃይቆፔ ዴንꬃና። ናቤታ ማፃፋታን ኣሳይ ዉሪ ፆሳፌ ታማሪዳዴ ጊዳና ጌቴቲ ፃፌቲዴስ። ሄሳ ጊሽ ኣዋፔ ሲይዲ ታማሪዳ ኣሲ ዉሪ ታኮ ያና። ሄሳ ጉሲ ኣዋ ቤዪዳ ኣሲ ዴስ ጉሲ ጊዴና። ኣዋ ቤዪዳይ ፆሳ ኣቻፌ ዪዳይሳ ፃላ። ታ ኢንቴስ ቱማ ጋይስ፤ ታናን ኣማኒዳ ኣሳስ ሜርና ዴዖይ ዴስ። ታኒ ዴዖ ቁማ። ካሴ ኢንቴ ኣዋቲ ባዞ ቢታን ማና ሚዳ። ጊዶ ኣቲን ዉሪካ ሃይቂዳ። ሳሎፔ ዎꬊዳ ቁማይ ሃይሳ። ሃይሳ ሚዛዴይ ሙሌካ ሃይቄና። ሳሎፔ ዎꬊዳ ዴዖ ቁማይ ታና። ሃይሳ ሃ ቁማፔ ሚዛዴይ ዉሪካ ሜርናስ ዳና። ኣላሜስ ዴዖ ጊዳና ማላ ታ ኢሚዛ ቁማይ ታ ኣሾዛ” ጊዴስ። ሄሳ ዎዴ ኣይሁዳቲ “ሃይሲ ኣዴዚ ኑ ኢዛ ኣሾ ማና ማላ ዎስቲ ኢማኔ?” ጊዲ ባ ጊዶን ፓላሜቲዳ። ሄሳ ጊሽ ዬሱሲ ኢስታ “ታ ኢንቴስ ቱሙ ጋይስ፤ ኣሳ ና ኣሾ ኢንቴ ሞንታ ኣጊኮ፥ ኢዛ ሱꬂካ ኡዮንታ ኣጊኮ ኢንቴስ ዴዖይ ዴና። ታ ኣሾ ሚዛዴሲኔ ታ ሱꬅ ኡዪዛዴስ ኡባስ ሜርና ዴዖይ ዴስ። ታካ ኢዛዴ ዉርሴꬃ ጋላስ ሃይቆፔ ዴንꬃና። ጋሶይካ ታ ኣሾይ ቱሙ ቁማ። ታ ሱꬃይካ ቱሙ ኡሻ። ታ ኣሾ ሚዛይኔ ታ ሱꬅ ኡዪዛይ ዉሪ ታናን ዳና። ታካ ኢዛዴን ዳና። ዴዖ ኣዋይ ታና ኪቲዳ ማላኔ ታካ ኢዛን ዴዖን ዲዛ ማላ ሄሳꬆካ ታ ኣሾ ሚዛዴይ ዉሪ ታናን ዴዖን ዳና። ሄሳ ጊሽ ሳሎፔ ዎꬊዳ ቁማይ ሃይሳ። ኢዚካ ካሴ ኢንቴ ኣዋቲ ሚዳይሳ ማላ ጊዴና። ጋሶይካ ሄ ቁማ ሚዳይቲ ሃይቂዳ። ሃ ቁማ ሚዛይቲ ጊዲኮ ሜርናስ ዳና” ጊዴስ። ዬሱሲ ሃይሳ ቂፊርናሆሜን ኣይሁዳታ ዎሳ ኬꬃን ታማርሲዛ ዎዴ ዮቲዴስ። ኢዛ ካሊዛይታፔ ዳሪዛይቲ ሄሳ ሲይዲ “ሃይሲ ዮዖዚ ዴፆ፤ ሃይሳ ኦኒ ኤካና ዳንዳዪዜ?” ጊዳ። ዬሱሲካ ኢዛ ካሊዛይቲ ሄሳ ዮዖዛ ጊሽ ዙዙሜቲዳይሳ ባ ዎዝናን ኤሪዲ “ሃይሲ ኢንቴና ዴፂዜ? ኣሳ ናይ ኪርስቶሲ ባ ዲዛሶ ሲሚ ኬዚሺን ቤይኮ ኢንቴ ኣይ ጋኔ? ኣሳስ ዴዖ ኢሚዛይ ፆሳ ኣያናኮ! ኣሳ ዎልቃይ ቃሴ ኣይኔ ጎዔና፤ ታ ኢንቴስ ዮቲዳ ቃላይ ዴዖ ኢሚዛ ኣያና። ጊዶ ኣቲን ኢንቴ ጊዶን ኢሲ ኢሲ ኣማኖንታ ኣሳቲ ዴቴስ” ጊዴስ። ዬሱሲ ኢስታስ ሄሳ ጊዳይ ኮይሮፔ ዶሚዲ ኢስታ ጊዶን ኣማኖንታይቲ ኦናንታኮኔ ቃሴ ኢዛ ኣꬂ ኢማናዴይካ ኦናኮኔ ኤሪዛ ጊሻሳ። ካሌꬂዲካ ዬሱሲ “ኣዋ ሼኔይ ባይንዳ ታኮ ሃ ያና ዳንዳዪዛዴይ ዴና ጋዳ ታ ኢንቴስ ዮቲዳይ ሄሳሳ” ጊዴስ። ሄሳፌ ዴንዲዳይሳን ኢዛ ካሊዛይታፔ ዳሮቲ ጉዬ ሲሚዳ። ሄ ጋላሳፌ ዶሚዲ ዬሱሳ ካሎ ኣጊዳ። ሄሳ ጊሽ ዬሱሲ ባና ካሊዛ ታማኔ ናምዓታ “ኢንቴካ ባና ኮዬቲ?” ጊዴስ። ሄሳ ዎዴ ሲሞና ጌቴቲዛ ጴፅሮሲ “ጎዶ ኔስ ሜርና ዴዖይ ቃላይ ዲሺን ኑ ኦናኮ ባኔ? ኔ ጌሻ ፆሳ ና ጊዲዳይሳ ኤሪዲ ኑኒ ኣማኒዶስ” ጊዴስ። ዬሱሲካ ኢስታ “ታ ኢንቴና ታማኔ ናምዓታ ዶራቤኪና? ሂስቲን ኢንቴፌ ኢሶይ ፃላዔ” ጊዴስ። ኢዚ ሄሳ ጊዳይ ሲሞና ና ኣስቆሮንቶ ዩሁዳ ጊሻሳ። ኣይሲ ጊኮ ዩሁዳይ ታማኔ ናምዓታፔ ኢሳ ጊዲዳኮካ ዬሱሳ ኣꬂ ኢማናይ ኢዛ ጊዲዳ ጊሻሳ። ሄሳፌ ጉዬ ዬሱሲ ጋሊላ ጊዶን ዩዬቲዴስ። ጊዶ ኣቲን ዩሁዳን ዩያናስ ኮይቤና። ጋሶይካ ኣይሁዳቲ ኢዛ ዎꬋና ኮዪዛ ጊሻሳ። ሄ ዎዴ ኣይሁዳታ ዳሴ ባዓሌይ ማቲ ኡቲዴስ። ሄሳ ጊሽ ዬሱሳ ኢሻቲ ኢዛኮ ሺቂዲ “ኔና ካሊዛይቲ ኔ ኦꬂዛ ኦሶዛ ቤያና ማላ ኔ ሃይሳፌ ዴንዳዳ ዩሁዳ ዴሬ ባ፤ ጋሶይካ ቆንጬን ኤሬታና ኮዪዛዴይ ባ ኦሶ ጌማን ኦꬄና። ኔካ ሃይታንታ ዉርሳ ኦꬃሼ ኔና ኣላሜን ቆንጪሳና ኮሼስ” ጊዳ። ኢስቲ ሄሳ ጊዳ ጋሶይ ኢዛ ኢሻታካ ጊዲን ኢዛን ኣማኖንታይታ ጊዲዳ ጊሻሳ። ዬሱሲካ ኢስታስ “ታ ዎዴይ ቡሮ ጋኪቤና፤ ኢንቴ ዎዴይ ጊዲኮ ኡባ ዎዴ ኢንቴስ ጊጋኮ። ዴሬይ ኢንቴና ኢፃና ዳንዳዬና። ታና ጊዲኮ ኢፄስ፤ ጋሶይካ ታ ኣላሜ ኦሶይ ኢታ ጊዲዳይሳ ኢዛስ ማርካቲዛ ጊሻሳ። ሃዒ ኢንቴ ጌዴ ባዓሌዛሶ ቢቴ። ታስ ዎዴይ ጋኮንታ ጊሽ ሃይሳ ሃ ባዓሌዛሶ ታ ቢኬ” ጊዴስ። ሄሳ ጊዲ ዬሱሲ ጋሊላን ኣቲዴስ። ጊዶ ኣቲን ኢዛ ኢሻቲ ባዓሌዛሶ ቢዳፔ ጉዬ ዬሱሲ ቆንጬራ ጊዶንታ ቆታራ ባዓሌዛሶ ቢዴስ። ኣይሁዳቲ “ኢዚ ኣዋን ዲዜ?” ጊሼ ባዓሌዛሶን ኮይዳ። ዴሬይካ ኢዛ ጊሽ ጊዶራ ሳሱኪ ሃሳዬቲዴስ። ኢሲ ኢሲ ኣሳቲ “ኢዚ ሎዖ ኣሳ” ጊሺን ባጋይ ቃሴ “ሎዖ ጊዴና። ኢዚ ዴሬ ባሌꬄስ” ጊዳ። ጊዶ ኣቲን ኣይሁዳታ ዳናታስ ባቢዛ ጊሽ ኦኒካ ኢዛ ጊሽ ቆንጬን ሃሳይቤና። ባዓሌዚ ዉራና ባጋ ጋኪሺን ዬሱሲ ፆሳ ኬꬄ ቢዲ ታማርሶ ኦይኪዴስ። ኣይሁዳቲ “ሃይሲ ኣዴዚ ታማሮንታ ዲሼ ሃይሳ ዉርሲ ዎስቲ ኤሪዴ?” ጊዲ ማላሌቲዳ። ሄሳ ጊሽ ዬሱሲ “ታ ታማርሲዛ ቲሚርቴይ ታና ኪቲዳ ታ ኣዋፔ ታስ ኢሜቲዴስ ኣቲን ታፔ ጊዴና። ታና ኪቲዳይሳ ሼኔ ኦꬃና ኮዪዛዴይ ዲኮ ሃይሲ ሃ ቲሚርቴይ ፆሳፌ ቤቲዳይሳ ዎይኮ ታ ታፔ ሃሳይዳይሳ ጊዲኮካ ኤራና። ባፔ ሃሳዪዛዴይ ባ ቦንቾ ኮዬስ። ኪቲዳዴ ቦንቾ ኮዪዛዴይ ጊዲኮ ኢዚ ቱማንቻ። ዎርዶይ ኢዛ ቦላ ዴና። ሙሴይ ኢንቴስ ዎጋ ኢሚዴስ ጊዴኔ? ጊዲኮካ ኢንቴ ጊዶን ዎጋ ናጊ ፖሊዳዴይ ኦኒካ ዴና። ኢንቴ ኣዛስ ታና ዎꬋና ኮዬቲ?” ጊዴስ። ዴሬይካ ኢዛ “ኔ ቦላ ዳይዳንꬂ ዴስ! ኔና ዎꬋና ኮዪዛይ ኦኔ?” ጊዴስ። ዬሱሲካ ኢስታስ “ታ ኢሲ ኦሶ ኦꬃዲስ፤ ኢንቴ ዉሪካ ሃኖ ሃ ኦሶይን ማላሌቴታ። ሙሴይ ኢንቴስ ቃፃራ ዎጋ ኢሚዴስ፤ ሄ ዎጋይካ ኢሜቲዳይ ካሴ ኣዋታፔ ቤቲዴስ ኣቲን ሙሴፔ ጊዴና። ሂስቲን ሄኮ ኢንቴካ ሳምባታ ጋላሲካ ኣስ ቃፃሬታ። ሂስቲኮ ሙሴ ዎጋይ ሻሬቶንታ ማላ ኣሲ ሳምባታ ጋላስ ቃፃሬቲዛዝ ጊዲኮ ሂስቲን ታ ሳምባታ ጋላስ ኣሳስ ኩሜꬃ ኣሳቴꬅ ፓꬂን ኣዛስ ታ ቦላ ሃንቄቴቲ? ሱሬ ፒርዳ ፒርዲቴ ኣቲን ኣሳ ኣይፌሶ ፄሊዲ ማዶ ፒርዳ ፒርዶፍቴ” ጊ ዛሪዴስ። ዬሩሳላሜ ኣሳፔ ኢሲ ኢሲ ኣሳቲ “ኢስቲ ዎꬋና ኮዪዛ ኣዴዚ ሃይሳ ጊዴኔ? ሄኮ ኢዚ ቆንጬን ሃሳዬስ ሺን ኢስቲ ኢዛ ኣይኮካ ጊቤቴና። ሃይስ ፆሲ ኪቲዳዴ ጊዲዳይሳ ዳናቲ ቱሙ ኤሪዞሻ? ሂስቲን ሃይሲ ኣዴዚ ኣዋ ኣሳኮኔ ኑ ኤሮስ። ፆሲ ኪቲዳዴይ ዪሺን ቃሴ ኢዚ ኣዋፔኮኔ ኤሪዛዴይ ኦኒካ ዴና” ጊዳ። ሄሳ ጊሽ ዬሱሲ ፆሳ ኬꬃን ታማርሲሼ ባ ቃላ ꬎቁ ሂስቲዲ “ኢንቴ ታና ቱሙ ኤሬታ። ታ ኣዋፔ ዪዳኮኔ ኢንቴ ኤሬታ። ቃሴ ታኒ ታ ሼኔን ያቤኬ። ታና ኪቲዳይሲ ኢዚ ቱማንቻ። ጊዶ ኣቲን ኢንቴ ቃሴ ኢዛ ኤሬኬታ። ታ ጊዲኮ ኢዛ ኣቻፌ ዪዳ ጊሺኔ ኢዚ ታና ኪቲዳ ጊሽ ታ ኢዛ ኤራይስ” ጊዴስ። ሄሳ ዎዴ ኢዛ ኦይካናስ ኮይዳ፤ ጊዶ ኣቲን ቡሮ ዎዴይ ጋኪቤና ጊሽ ኦኒካ ኦይኪቤና። ጊዲኮካ ዴሬዛፔ ዳሮይ ኢዛን ኣማኒዴስ። ኣሳይ “ፆሲ ኪቲዳዴይ ዪዛ ዎዴ ሃይሲ ኣዴዚ ኦሶ ማላታፔ ቦላራ ሃራ ኦꬃኔ?” ጊዴስ። ኣሳይ ዬሱሳ ጊሽ ጋርሳራ ሳሱኬቲ ሃሳዬቲሺን ፋርሳዌቲ ሲዪዳ። ሄሳ ጊሽ ቄሴታ ሃላቃቲኔ ፋርሳዌቲ ዬሱሳ ኦይካናስ ፆሳ ኬꬃ ፔንጌ ናጊዛይታ ዬዲዳ። ሄ ዎዴ ዬሱሲ “ታ ኢንቴናራ ጉꬃ ዎዴ ዳሻና፤ ሄሳፌ ጉዬ ታና ኪቲዳይሳኮ ታ ሲማ ባና። ኢንቴ ታና ኮያና ሺን ዴሜኬታ። ኢንቴ ታ ዲዛሶ ያናስ ዳንዳዬኬታ” ጊዴስ። ሄሳ ጊሽ ኣይሁዳታ ዳናቲ ባ ጊዶን ኢሶይ ኢሳራ “ሃይሲ ኣዴዚ ኑ ዴሞንታ ማላ ኣዋ ባኔሻ? ኦኔ ኤሪዛይ ጊሪኬታ ጊዶ ላሌቲ ዲዛ ኣይሁዳታኮ ቢዲ ጊሪኬታ ታማርሳኔሻ? ኢዚ ‘ኢንቴ ታና ኮያና ሺን ዴሜኬታ፤ ታ ዲዛሶ ኢንቴ ያናስ ዳንዳዬኬታ’ ጊሺን ሄሲ ኣይ ጉሴ?” ጊዳ። ጊታ ባዓሌዛ ዉርሴꬃ ጋላስ ዬሱሲ ዴንዲ ኤቂዲኔ ባ ቃላ ꬎቁ ሂስቲዲ “ሃꬅ ሳሜቲዳዴይ ዲኮ ሃ ታኮ ዪዲ ኡዮ። ጌሻ ማፃፋይ ጊዳ ማላ ታና ኣማኒዛዴፌ ዴዖ ሃꬃ ፑልቶይ ፑልታና” ጊዴስ። ኢዚ ሄሳ ጊዳይ ኢዛን ኣማኒዛይቲ ቡሮፔ ኤካና ፂሎ ኣያና ጊሻሳ። ጋሶይካ ዬሱሲ ቦንቼቲዛ ዎዴይ ቡሮ ጋኮንታ ጊሽ ፂሎ ኣያናይ ኢሜቲቤና። ሄሳ ጊሽ ዴሬዛፔ ኢሲ ኢሲ ኣሳቲ ሄ ቃላ ሲይዲ “ያና ጊዛ ናቤይ ቱማፔ ሃይሳ” ጊዳ። ሃራቲ “ሃይስ ፆሲ ኪቲዳዴ” ጊዳ። ባጋይቲ ቃሴ “ፆሲ ኪቲዳዴይ ጋሊላፔ ዋኒ ያኔ? ፆሲ ኪቲዳዴይ ዳዉቴ ዜሬꬃፌ ዬሌታናይሳኔ ዳዉቴ ካታማ ቤቴሌሜፔ ያናይሲ ካሴ ጌሻ ማፃፋን ፃፌቲቤኔ?” ጊዳ። ሄሳ ጊሽ ኢዛ ጋሶን ዴሬይ ባ ጊዶን ሻኬቲ ዎꬊዴስ። ኢስታፌ ኢሲ ኢሲ ኣሳቲ ኢዛ ኦይካና ኮይዳ። ጊዶ ኣቲን ኦኒካ ኢዛ ኦይኪቤና። ሄሳፌ ጉዬ ፆሳ ኬꬄ ናጊዛይቲ ቄሴታ ሃላቃታኮኔ ፋርሳዌታኮ ሲሚዲ ቢዳ። ኢስቲካ “ኣዛስ ኢዛ ኤኮንታ ዪዴቲ?” ጊዳ። ዎታዳራቲካ ዛሪዲ “ሃ ኣዴዚ ሃሳዪዛይሳ ማላ ኣይ ኣሲካ ሃሳዪ ኤሬና” ጊዳ። ፋርሳዌቲ ኢስታ “ኢንቴካ ባሌቲዴቲ? ዳናታፔ ዎይኮ ፋርሳዌታፔ ኢዛ ኣማኒዳይቲ ዲዞሻ? ሃይሲ ሙሴ ዎጋ ኤሮንታ ዴሬይ ቱማፔ ቃንጌቲዳይሳ” ጊዳ። ሃይሳፌ ካሴ ዬሱሳኮ ቢዳ ፋርሳዌታፔ ኢሳ ጊዲዳ ኒቆዲሞሲ ኢስታስ “ኑ ዎጋን ኢሲ ሞቴቲዛዴይ ባ ሞቶስ ዛሮ ኢሚን ሲዮንታኔ ኢዚ ኣይ ኦꬂዳኮኔ ኤሬቶንታ ዲሺን ፒርዳይ ፒርዴቲ ኤሪዜ?” ጊዴስ። ኢስቲካ “ኔካ ጋሊላ ኣሴ? ጋሊላፔ ናቤይ ዴንዶንታይሳ ፒልጋዳ ጋካ ኤራ” ጊዳ። ሄሳፌ ጉዬ ኢሶይ ኢሶይ ባሶ ቢዴስ። ሄሳፌ ጉዬ ዬሱሲ ዳብራዛይቴ ቢዴስ። ዎንቴꬃ ጋላስ ማላዶ ዎንታራ ፆሳ ኬꬄ ሲሚ ዪዴስ። ዴሬይካ ዉሪ ኢዛኮ ዪን ኢዚ ኡቲዲ ኢስታ ታማርሶ ኦይኪዴስ። ሙሴ ዎጋ ታማርሲዛይቲኔ ፋርሳዌቲ ኢሲ ላይማታሼ ኦይኬቲዳ ማጫስ ዲዛሮ ኤኪ ዪዲ ዴሬ ሲንꬃን ኤሲዳ። ዬሱሳካ “ኣስታማሬ! ሄኮ ሃና ማጫሳያ ላይማታሼ ኦይኬታዱስ። ሃኒ ማላ ማጫሲ ሹቻን ጫዴታ ሃይቃና ማላ ሙሴይ ኑ ዎጋን ኑና ኣዛዚዴስ፤ ኔኒች ሃኒ ጊሽ ኣይ ጋይ?” ጊዳ። ኢስቲ ኢዛ ሄሳ ጊዳይ ኢዛ ቦላ ሞቶስ ጊዲዛ ጋሶ ዴማናሲኔ ኢዛ ፓጫና ኮይዳ ጊሻሳ። ጊዶ ኣቲን ዬሱሲ ሆክዲ ቢታ ቦላ ባ ቢራꬌራ ፃፎ ኦይኪዴስ። ኢስቲ ኢዛ ዛሪ ዛሪ ኦይቺን ꬎቁ ጊዲ “ኢንቴ ጊዶፌ ናጋራይ ባይንዳ ኣሲ ኮይሮ ሹቺ ኢዚ ቦላ ኦሎ” ጊዴስ። ሄሳፌ ቃሴካ ሆኪዲ ቢታ ቦላ ፃፊዴስ። ኢስቲካ ሄሳ ሲይዲ ጪማታፔ ኦይኪዲ ዉሪካ ኢሶይ ኢሶይ ቢዴስ። ሄሳ ጊሽ ዬሱሲ ሄን ኤቂዳ ማጫሳይራ ፃላ ኣቲዴስ። “ሞቲዛይቲ ኣዋን ዲዞ? ኔ ቦላ ፒርዲዳይ ኦኒካ ዴኔ?” ጊዴስ። *** ኢዛካ “ጎዶ ኦኒካ ባዋ” ጋዱስ። ዬሱሲካ “ታካ ኔ ቦላ ፒርዲኬ፤ ባ! ናምዓንꬆ ናጋራ ኦꬆፋ” ጊዴስ። ቃሴ ዬሱሲ “ታኒ ኣላሜስ ፖዖ። ታና ካሊዛዴይ ዉሪ ዴዖ ፖዖ ዴማና። ꬉማን ሲሜሬቴና” ጊዲ ኢስታስ ዮቲዴስ። ፋርሳዌቲ “ኔኒ ኔ ጊሽ ማርካታሳ፤ ኔ ማርካይ ቱሙ ጊዴና” ጊዳ። ዬሱሲካ ኢስታስ “ታኒ ታ ጊሽ ኣይ ማርካቲኮካ ታ ኣዋፔ ዪዳኮኔ ቃሴ ታ ኣዋ ባናኮኔ ታ ኤሪዛ ጊሽ ታ ማርካቴꬅ ቱማ። ኢንቴ ጊዲኮ ታ ኣዋፔ ዪዳኮኔ ቃሴ ኣዋ ባናኮኔ ኤሬኬታ። ኢንቴ ኣሾ ቆፋ ማላ ፒርዴታ። ታ ጊዲኮ ኦና ቦላካ ፒርዲኬ። ታ ፒርዲኮካ ታ ፒርዳይ ቱሙ ፒርዳ። ጋሶይካ ታ ታርካ ፒርዲኬ፤ ታና ኪቲዳ ታ ኣዋይካ ታናራ ዴስ። ናምዑ ኣሳታ ማርካይ ቱሙ ጊዲዳይሲ ኢንቴ ዎጋን ፃፌቲዴስ። ሄሳ ጊሽ ታኒ ታ ጊሽ ማርካታይስ፤ ታና ኪቲዳ ታ ኣዋይካ ታስ ማርካቴስ” ጊ ዛሪዴስ። ኢስቲካ “ኔ ኣዋይ ኣዋን ዲዜ?” ጊዲ ኢዛ ኦይቺዳ። ዬሱሲካ ኢስታስ “ታና ጊዲን ታ ኣዋካ ጊዲን ኢንቴ ኤሬኬታ፤ ኢንቴ ታና ኤሪዛኮ ታ ኣዋካ ኤራናኮሺን” ጊዲ ኢስታስ ዛሪዴስ። ዬሱሲ ሄሳ ኢስታስ ዮቲዳይ ፆሳ ኬꬃ ጊቤን ሚሼ ዎꬂዛ ሳፂኔ ኣቻን ታማርሲሼ ዮቲዴስ ሺን ኢዛስ ኦይኬቲዛ ዎዴይ ጋኮንታ ጊሽ ኦኒካ ኢዛ ኦይኪቤና። ዬሱሲ ቃሴካ “ታ ባና ሺን ኢንቴ ታና ኮያናኔ ኢንቴ ኢንቴ ናጋራራ ሃይቃና ኣቲን ታ ቢዛሶ ባና ዳንዳዬኬታ” ጊዴስ። ኣይሁዳቲካ ባ ጊዶን ኢሶይ ኢሳራ ኢዚ “ ‘ታ ቢዛሶ ኢንቴ ባና ዳንዳዬኬታ’ ጊዛይ ባርካ ባና ዎꬋናሴሻ?” ጌቴቲዳ። ኢዚ ቃሴ ኢስታ “ኢንቴ ጋርሳ ኣሳ፤ ታኒ ቦላ ኣሳ፤ ኢንቴ ሃይሳ ኣላሜ ኣሳ፤ ታኒ ሃ ኣላሜፔ ጊዲኬ። ኢንቴ ታ ኦናኮኔ ኤሪዲ ኣማኖንታ ኣጊኮ ኢንቴ ኢንቴ ናጋራራ ሃይቃና ጊሽ ታ ኢንቴ ኢንቴ ናጋራራ ሃይቃና ጊዳይ ሄሳ ጊሻሳ” ጊዴስ። ኢስቲካ ኢዛ “ኔ ኦኔ?” ጊዳ። ዬሱሲካ ኢስታስ “ሃዒ ጋካናስ ታ ኢንቴስ ኢዛ ጊሽ ዮቲዛዴይ ታና። ታ ኢንቴ ቦላ ሃሳያናይሲኔ ፒርዳዛ ዮዖይ ዳሮይ ዴስ። ጊዶ ኣቲን ታና ኪቲዳዴይ ኣማኔቲዳዴ፤ ታካ ኢዛፔ ሲዪዳይሳ ሃ ኣላሜዛስ ዮታይስ” ጊዴስ። ኢዚ ኢስታስ ኣዋ ጊሽ ዮቲዛይሳ ኣኬኪቤቴና። ሄሳ ጊሽ ዬሱሲ “ኢንቴ ኣሳ ና ꬎቁ ሂስቲዲ ካቂዳ ዎዴ ታኒ ኢዛ ጊዳዴይ ታና ጊዲዳይሳ ኢንቴ ኤራና። ኣዋይ ታና ታማርሲዳይሳ ዮታዲስ ኣቲን ታኒ ታ ሼኔ ማላ ኣይኮካ ኦꬆንታይሳ ኢንቴ ኣኬካና። ታና ኪቲዳይሲ ኢዚ ታናራ ዴስ። ኣይ ዎዴካ ታ ኡፋይሲዛዝ ኦꬂዛ ጊሽ ኢዚ ታና ፃላላ ዬጊ ኣጊቤና” ጊዴስ። ኢዚ ሄሳ ዮቲዳ ማላ ዳሮ ኣሳይ ኢዛን ኣማኒዴስ። ዬሱሲ ባና ኣማኒዳ ኣይሁዳታ “ኢንቴ ቱሙ ታ ቃላን ዲኮ ኢንቴ ቱማፔ ታና ካሊዛይታ ጊዳና። ቱማይ ኣዛኮኔ ኢንቴ ኤራናኔ ቱማይካ ኢንቴና ዎዛና” ጊዴስ። ኢስቲካ ኢዛስ ዛሪዲ “ኑኒ ኣብራሃሜ ናይታኮ! ኑ ኦናስካ ኣይሌቲ ኤሮኮ። ሂስቲን ኔ ኑና ዋናዳ ኢንቴ ዎዜታና ጋይ?” ጊዳ። ዬሱሲካ ኢስታስ “ታ ኢንቴስ ቱሙ ጋይስ፤ ናጋራ ኦꬂዛዴይ ዉሪ ናጋራስ ኣይሌ፤ ኣይ ዎዴካ ኣይሌይ ሶን ሉፂ ዴዔና። ዬሎይ ጊዲኮ ኣይዴካ ሶን ዴስ። ሂስቲኮ ናዚ ኢንቴና ዎዚኮ ኢንቴ ዎዜቲዳይታ ጊዳና። ኢንቴ ኣብራሃሜ ናይታ ጊዲዳይሳ ታ ኤራይስ። ጊዶ ኣቲን ታ ቃላ ኢንቴ ኤሮ ጊ ኤኮንታ ጊሽ ታና ዎꬋናስ ኮዬታ። ታኒ ታ ኣዋ ኣቻን ቤዪዳይሳ ኢንቴስ ዮታይስ። ኢንቴ ቃሴ ኢንቴ ኣዋፔ ሲዪዳይሳ ኦꬄታ” ጊዴስ። ኢስቲካ ኢዛስ “ኑ ኣዋይ ኣብራሃሜ” ጊዲ ዛሪ ዮቲን፥ ዬሱሲ ኢስታስ “ኢንቴ ኣብራሃሜ ና ጊዲዳኮ ኣብራሃሜꬆ ኦꬃና። ኢንቴ ጊዲኮ ታ ፆሳፌ ሲዪዳ ቱማ ኢንቴስ ዮቲን ታና ዎꬋናስ ጊፂ ዴንዲዴታ። ጊዶ ኣቲን ኣብራሃሜይ ሄሳꬆ ኦꬂቤና። ኢንቴ ኢንቴ ኣዋꬆ ኦꬄታ” ጊዴስ። ኢስቲካ ዛሪዲ “ኑ ላይማን ዬሌቲዳ ና ጊዶኮ። ኑ ኣዋይ ኢሲ ፆሳ ፃላላ” ጊዲ ኢዛስ ዛሪዳ። ዬሱሲ ኢስታስ “ኢንቴ ኣዋይ ፆሳ ጊዲዳኮ ታካ ፆሳፌ ኬዛ ዪዳ ጊሽ ኢንቴ ታና ዶሳናኮሺን፤ ታና ኢዚ ኪቲዴስ ኣቲን ታ ታርካ ታ ሼኔን ያቤኬ። ታ ዮቲዛይሳ ኣይስ ዩሺ ቆፔኬቲ? ጋሶይካ ኢንቴ ታ ቃላ ሲያና ኮዮንታ ጊሻሳ። ኢንቴ ኢንቴ ኣዋ ፃላዔ ናይታ፤ ኢንቴ ኣዋ ኣሞ ፖላና ኮዬታ፤ ኢዚ ካሴካ ሼምፖ ዎꬊዳዴ። ኢዛ ኣቻን ቱማይ ዶንታ ጊሽ ኢዚ ቱማን ኤቂቤና። ኢዚ ባ ሁዔስ ዎርዳንቻኔ ዎርዶ ኣዋ ጊዲዳ ጊሽ ኢዚ ዎርዶ ሃሳያ ባፔ ሜꬊ ኤኪዲ ሃሳዬስ። ታ ቃሴ ቱሙ ሃሳዪዛ ጊሽ ኢንቴ ታና ኣማኔኬታ። ኢንቴ ጊዶፌ ታና ኔ ሃኖ ናጋራ ኦꬃዳሳ ጊዲ ማርካራ ላꬃናስ ሞታና ዳንዳዪዛዴይ ዲዜ? ታ ቱሙ ሃሳዪዛዴ ጊዲኮ ሂስቲን ኣዛስ ታና ኣማኔኬቲ? ፆሳፌ ጊዲዳ ኣሲ ፆሲ ጊዛ ሲዬስ። ኢንቴ ጊዲኮ ፆሳፌ ጊዶንታ ጊሽ ፆሳ ቃላ ሲዬኬታ” ጊዴስ። ኣይሁዳቲካ ዛሪዲ “ኑ ኔና ኔ ‘ሳማሪያ ኣሳ፤ ኔ ቦላ ዳይዳንꬂ ዴስ’ ጊዳይስ ቱሙ ዴኔ?” ጊዳ። ዬሱሲ ኢስታስ “ታኒ ታ ኣዋ ቦንቻይስ ኣቲን ዳይዳንꬂ ታ ቦላ ባዋ። ኢንቴ ጊዲኮ ታና ካዉሼታ። ታኒ ታስ ቦንቾ ኮይኬ። ታ ቦንቼታና ማላ ኮዪዛዴይ ቃሴ ዴስ። ኢዚካ ፒርዳ ፒርዳናዴ። ታ ኢንቴስ ቱሙ ጋይስ፤ ኦኒካ ታ ቃላ ናጊኮ ሃይቆ ሙሌካ ሃይቄና” ጊ ዛሪዴስ። ኣይሁዳቲ ኢዛ “ኔ ቦላ ዳይዳንꬂ ዲዛይሳ ሃዒ ኑኒ ኤሪዶስ። ኣብራሃሜይ ሃይቂዴስ፤ ናቤቲካ ኢዛꬆ ሃይቂዳ። ኔ ቃሴ ‘ኦኒካ ሙሌ ሃይቆ ቤዬና’ ጋ ዮታሳ። ኔ ኑ ኣዋ ኣብራሃሜፔ ኣꬋይ? ኢዚ ሃይቂዴስ፤ ናቤቲካ ሃይቂዳ ሂስቲን ኔ ኔና ኦና ጋና ኮያዲ?” ጊዳ። ዬሱሲካ ኢስታስ “ታ ታርካ ታና ቦንቺኮ ታ ቦንቾይ ሃዳ። ታና ቦንቺዛዴይ ጊዲኮ ኢንቴ ‘ኢዚ ኑ ፆሳ’ ጊዛይ ታ ኣዋ። ኢንቴ ኢዛ ኤሮንታ ኣጊኮካ ታ ቃሴ ኤራይስ። ታ ኢዛ ኤሪኬ ጊኮ፥ ታካ ኢንቴ ማላ ዎርዳንቻ ጊዳይስ። ታ ቃሴ ኢዛ ኤራይስ፥ ኢዛ ቃላካ ናጋይስ። ኢንቴ ኣዋ ኣብራሃሜይ ታ ጋላስ ቤያናስ ኣሞቲዲ ቤይዴሲኔ ኡፋዬቲዴስ” ጊዴስ። ኣይሁዳቲ ቃሴ “ኔስ ቡሮ ኢቻሹ ታሙ ላይꬅ ኩሞንታ ኔኒ ኣብራሃሜ ቤያዲ?” ጊዳ። ዬሱሲካ “ታ ኢንቴስ ቱሙ ጋይስ፤ ኣብራሃሜይ ዬሌታናፔ ካሴካ ታኒ ዳይስ” ጊዴስ። ኣይሁዳቲ ሄራካ ኢዛ ጫዳናስ ዉሪ ሹች ዴንꬂዳ። ጊዶ ኣቲን ዬሱሲ ኢስታ ማታፔ ቆቴቲዲ ፆሳ ኬꬃፌ ኬዚ ቢዴስ። ዬሱሲ ኦጌራ ኣꬊ ቢሼ ባ ኣዬይ ኡሎፔ ዬሌቶሳፌ ኣይፌ ቆቂዳዴ ቤዪዴስ። ኢዛ ካሊዛይቲ ኢዛ “ኣስታማሬ! ሃይሲ ኣዴዚ ቆቄ ጊዲ ዬሌታና ማላ ናጋራ ኦꬂዳይ ኦኔ? ኢዛ ዬሊዳይቲ ኦꬂዶዬ? ኢዚ ኦꬂዴ?” ጊዲ ዬሱሳ ኦይቺዳ። ዬሱሲካ ኢስታስ “ኢዛ ጊዲንካ ኢዛ ዬሊዳይቲካ ናጋራ ኦꬂቤቴና። ኢዚ ሄሳꬆ ሃኒዳይ ፆሳ ኦሶይ ኢዛ ቦላ ቆንጫናሳ። ጋላሳራ ታና ኪቲዳዴ ኦሶ ኦꬃናስ ታስ ቤሴስ። ቡሮ ኦኒካ ኦꬃናስ ዳንዳዮንታ ቃማይ ያና። ሃ ቢታ ቦላ ዲዛ ዎዴ ሃ ቢታስ ፖዖይ ታና” ጊዴስ። ሄሳ ጊ ሲሚዲ ቢታ ቦላ ጩች ጩቲዲ ባ ጩቻን ኡርቃ ሹጊሲዲ ኣዴዛ ኣይፌዛ ሄ ኡርቃ ቲዪዲ፥ “ባዳ ሴሊሆሜን ኣሳይ ፃማቄቲዛሶን ሜጬታ” ጊዴስ። ሴሊሆሜ ጉሲ ኪቴቲዳይሳ ጉሳ። ኣዴዚካ ቢዲ ሜጬቲዲኔ ፄሊሼ ሲሚ ዪዴስ። ኢዛ ዶꬃቲኔ ካሴ ኢዚ ሄን ዎሲሺን ቤዪዳ ኣሳይ “ሃይሳዴይ ካሴ ኡቲዲ ዎሲዛ ኣዴዛ ዴኔ?” ጊዳ። ኢስታፌ ኢሲ ኢሲ ኣሳቲ “ኤ ኢዛኮ” ጊዳ። ባጋይቲ “ኢዛ ዴና” ጊዳ። ኢዚ ቃሴ “ታ ኢዛኮ” ጊዴስ። ኢስቲካ “ሂስቲን ኔ ኣይፌይ ዋኒ ፄሊዴ?” ጊዲ ኦይቺዳ። ኢዚካ ዛሪዲ “ዬሱሳ ጌቴቲዛ ኣሲ ቢታ ቦላ ኡርቃ ሙኑቂዲ ታ ኣይፌዛ ሄ ኡርቃ ቲዪዲኔ ታና ‘ባዳ ሴሊሆሜን ሜጬታ’ ጊ ዮቲን ታ ባዳ ሜጬታዳ ፄላናስ ዳንዳያዲስ” ጊዴስ። ኢስቲካ “ሂስቲን ሄሳዴይ ሃዒ ኣዋን ዲዜ?” ጊዳ። ኢዚካ “ታ ኤሪኬ” ጊዴስ። ኢስቲካ ሄ ካሴ ኣይፌ ቆቄ ኣዴዛ ፋርሳዌታኮ ኤፊዳ። ዬሱሲ ኡርቃ ሙኑቂዲ ኣዴዛ ኣይፌ ፓꬂዳ ጋላሳይ ኣይሁዳታ ሳምባታ ጋላሳ። ሄሳ ጊሽ ፋርሳዌቲ ኣዴዛ ኢዚ ዎስቲ ፄሊዳኮኔ ኢዛ ኦይቺዳ። ኣዴዚካ ዛሪዲ “ኢዚ ታ ኣይፌን ኡርቃ ቲዪዴስ፤ ታካ ሜጬታዲስ፤ ሄኮ ሃዒ ፄላዲስ” ጊዴስ። ፋርሳዌታፔ ኢሲ ኢሲ ኣሳቲ “ሃይሲ ኣዴዚ ሳምባታ ቦንቾንታዴ ጊዲዳ ጊሽ ኢዚ ፆሳፌ ጊዴና” ጊዳ። ባጋይ ቃሴ “ናጋራንቻይ ሃይሳ ማላ ማላታ ዋኒ ኦꬃና ዳንዳይዜ? ጊዳ። ሄሳ ጊሽ ኢስታ ጊዶን ፓላማይ ሜꬌቲዴስ። ሂስቲን ካሴ ኣይፌ ቆቄ ኣዴዛኮ ሲሚዲ “ሃ ኔ ኣይፌ ፓꬂዳ ኣዴዛ ጊሽ ኔ ኣይ ጋይ? ጊዳ። ኣዴዚ ዛሪዲ “ኢዚ ናቤኮ!” ጊዴስ። ኣይሁዳቲ ኣዴዛ ዬሊዳ ኣዬይራኔ ኣዋራ ፄይጊሲ ኤሂሳና ጋካናስ ኣዴዚ ካሴ ቆቄ ጊዲዳይሳ ኣማኒቤቴና። ኢስቲካ ዬሊዳይታ “ኢንቴ ‘ኑስ ቆቄ ናይ ዬሌቲዴስ’ ጊዛ ናዚ ሃይሴ? ሂስቲን ሃዒ ዋኒዲ ፄላና ዳንዳዪዴ?” ጊዳ። ዬሊዳይቲካ ሂዝጊ ዛሪዳ “ኢዚ ኑ ና ጊዲዳይሳኔ ቆቄ ጊዲዲ ዬሌቲዳይሳ ኤሮስ። ሃዒ ቃሴ ኢዚ ዋኒ ፄላና ዳንዳዪዳኮኔ ኢዛ ኣይፌ ኦኒ ፖጊዳኮኔ ኑ ኤሮኮ። ኢዚ ባና ዳንዳዪዳዴ ጊዲዳ ጊሽ ኢዚ ባ ጊሽ ዮታናስ ዳንዳዬስ፤ ኢዛ ኦይቺቴ” ጊዳ። ኢዛ ዬሊዳይቲ ሄሳꬆ ጊዳይ ኦኒካ ዬሱሳ ኢዚ ኪርስቶሳ ጊዲ ማርካቲዳይ ዉሪ ኣይሁዳታ ዎሳ ኬꬃፌ ጎዴታና ማላ ኣይሁዳቲ ካሴ ሴራ ኦꬂዳ ጊሽ ኣይሁዳታስ ባቢዲ ጊዳ። ሄሳ ጊሽ “ኢዛ ዬሊዳይቲ ኢዚ ባና ዳንዳዪዳዴ ጊዲዳ ጊሽ ኢዛ ኦይቺቴ” ጊዳ። ካሴ ቆቄ ኣዴዛ ቃሴካ ፄይጊዲ “ሃይሶ ኔ ቱማዮ ዮታዳ ፆሳ ቦንቻ። ሃይሲ ኣዴዚ ናጋራንቻ ጊዲዳይሳ ኑ ኤሮስ” ጊዳ። ኢዚካ “ኢዚ ናጋራንቻ ጊዲን ታ ኤሪኬ። ጊዶ ኣቲን ታ ካሴ ቆቄ ጊዲዳሮኔ ቃሴ ሃዒ ታ ፄሊዛሮ ሃኖ ፃላ ኤራይስ” ጊዴስ። ኢስቲ ቃሴ ኢዛ “ኢዚ ኔስ ኣይ ኦꬂዴ? ኔ ኣይፌዛ ዎስቲ ፖጊዴ?” ጊዲ ኦይቺዳ ኢዚካ “ታ ኢንቴስ ካሴ ዮቲን ዎዝናን ዎꬂ ሲይቤኬታ ሺን ሃዒ ቃሴ ኣዛስ ዛሬꬂ ሲያና ኮዬቲ? ኢንቴካ ኢዛ ካሊዛይታ ጊዳና ኮዬቲ?” ጊዴስ። ሄሳፌ ጉዬ ኢዛ “ኑ ሙሴ ካሊዛዴንታ፤ ኔ ኢዛ ካሊዛዴ ጊዳ። ካሴ ፆሲ ሙሴራ ሃሳዬቲዳይሳ ኑ ኤሮስ። ሃይሲ ኣዴዚ ኣዋፔ ዪዳኮኔ ኑ ኤሮኮ” ጊዳ። ኣዴዚካ ኢስታስ “ኢዚ ኣዋፔኮኔ ኢንቴ ኤሮንታይሲ ማላሊሴስ። ጊዶ ኣቲን ታ ኣይፌ ፄሊሲዳዴይ ኢዛ። ፆሲ ባስ ያዪዛዴሲኔ ኢዛ ሼኔ ኦꬂዛዴስ ኣቲን ናጋራንቻ ኣስ ሲዮንታይሳ ኑ ኤሮስ። ኣይፌ ቆቂዲ ዬሌቲዳዴ ኣይፌይ ፄሊዴስ ጊዛይሳ ኣላሜይ ሜꬌቶሳፔ ኦኒካ ሲዪ ኤሬና። ሃይሳዴይ ፆሳፌ ጊዶንታኮ ሃይሳ ኦꬃናስ ዳንዳዬና” ጊ ዛሪዴስ። ኢስቲካ ኢዛ “ኔኒ ኔስ ሙሌ ኣሳቴꬃይ ናጋራን ሙኑቄቲን ዬሌቲዳይሲ ኑና ታማርሳና ዋና ፃላዲ?” ጊዲ ኢዛ ጎዲዳ። ኣዴዛ ጎዲዳይሳ ዬሱሲ ሲይዴስ። ኢዛ ዴሚዲኔ “ኔ ኣሳ ናን ኣማናይ?” ጊዴስ። ኣዴዚካ “ጎዶ! ታ ኢዛን ኣማናና ማላ ኢዚ ኦኔ?” ጊዲ ኦይቺዴስ። ዬሱሲካ “ኔ ኢዛ ቤያዳሳ፤ ሃዒ ኔናራ ሃሳዪዛይ ኢዛኮ!” ጊዴስ። ኣዴዚካ “ጎዶ! ኢዛ ኣማናዲስ” ጊዲ ኢዛስ ሆኪ ጎይኒዴስ። ዬሱሲካ “ቆቄቲ ፄላና ማላኔ ፄሊዛይቲ ቆቃና ማላ ፒርዳናስ ታ ሃይሳ ሃ ኣላሜ ያዲስ” ጊዴስ። ኢዛራ ዲዛ ፋርሳዌታፔ ኢሲ ኢሲ ኣሳቲ ሄሳ ሲይዲ “ሄሲ ኣይ ጉሴ? ሂስቲን ኑካ ቆቄ?” ጊዳ። ዬሱሲካ ኢስታ “ኢንቴ ቆቄታ ጊዲዳኮ ኢንቴስ ናጋራ ጊዴና ሺን ኢንቴ ሃዒ ‘ኑ ፄሎስ’ ጊዛ ጊሽ ኢንቴ ናጋራንቻ ጊዲዳ ማላ ዳና” ጊዴስ። ዬሱሲ፥ “ታ ኢንቴስ ቱሙ ጋይስ፤ ዶርሳታ ዪሬ ፔንጌራፔ ኣቲን ሃራ ባጋራ ጉፒ ጌሊዛይ ካይሶኔ ቦንቂዛዴ። ፔንጌራ ጌሊዛዴይ ኢዚ ዶርሳታ ሄሚዛዴ። ፔንጌ ናጊዛዴይ ኢዛስ ፔንጌዛ ዶዬስ። ዶርሳቲካ ኢዛ ቃላ ሲዬቴስ። ባ ዶርሳታ ሱንꬃራ ሱንꬃራ ፄይጊ ኬሴስ። ባይታ ዉርሲ ኬሲዳፔ ጉዬ ኢስታ ሲንꬅ ኣꬊዲ ካሌꬄስ። ዶርሳቲካ ኢዛ ቃላ ኤሪዛ ጊሽ ኢዛ ካሌቴስ። ኢማꬃ ኣሳ ቃላ ኤሮንታ ጊሽ ኢዛፔ ባቃቴቴስ ኣቲን ሙሌካ ኢዛ ካሌቴና። ዬሱሲ ሄሳ ሌሚሶዛ ኢስታስ ዮቲዴስ ሺን ኢስቲ ቃሴ ኢዚ ኢስታስ ዮቲዳይሳ ኣይኮካ ኤሪቤቴና። ሄሳ ጊሽ ዬሱሲ ቃሴካ ኢስታስ “ታ ኢንቴስ ቱሙ ጋይስ፤ ዶርሳታ ፔንጌይ ታና። ታፔ ካሴ ዪዳይቲ ዉሪ ካይሶኔ ቦንቂዛይታ። ዶርሳቲ ጊዲኮ ኢስቲ ጊዛ ሲይቤቴና ፔንጌይ ታና። ታ ባጋራ ጌሊዛዴይ ዉሪ ኣታና፤ ጌላናኔ ኬዛና፤ ሄሜቲዛሶካ ዴማና። ካይሶይ ካይሶታና፥ ዎꬋናሲኔ ꬋይሳናስ ፃላ ዬስ። ታ ጊዲኮ ኢንቴስ ዴዖይ ዳና ማላኔ ኢንቴስ ኬሂ ዳራና ማላ ያዲስ። “ታ ሎዖ ሄሚዛዴ፤ ሎዖ ሄሚዛዴይ ባ ሼምፖ ባ ዶርሳታ ጊሽ ኣꬂ ኢሜስ። ሚሼራ ቃፃሬቲዲ ሄሚዛዴይ ጊዲኮ ዶርሳቲ ኢዛስ ጊዶንታ ጊሽ ካና ሱይቴይ ዪዛ ዎዴ ዶርሳታ ዬጊዲ ባስ ባቃቴስ። ካና ሱይቴይካ ዶርሳታ ዳፊ ዳፊ ሜሲኔ ላሌስ። ባቃቲዛዴይ ሚሻን ቃፃሬቲዳዴ ጊዲዳ ጊሺኔ ዶርሳታስ ሚሼቶንታ ጊሻሳ። “ሎዖ ሄንꬃንቻይ ታና። ታኒ ታ ዶርሳታ ኤራይስ፤ ኢስቲካ ታና ኤሬቴስ። ሄሲካ ኣዋይ ታና ኤሪዛይሳ ማላ ታኒ ታ ሼምፖ ዶርሳታ ጊሽ ኣꬃ ኢማና። ሃይሳ ሃ ዶርሳ ዪሬን ጌሎንታይቲ ታስ ሃራ ዶርሳቲ ዴቴስ፤ ታ ኢስታካ ሃ ኤሃናስ ታስ ቤሴስ። ኢስቲካ ታ ቃላ ሲያናኔ ኢሲ ሜሄ ጊዳና። ሄሚዛይሲካ ኢሳዴ ጊዳና። ታ ዛራዳ ዴንꬃናስ ታ ሼምፖ ታ ኣꬃ ኢሚዛ ጊሽ ታ ኣዋይ ታና ዶሴስ። ታኒ ታ ሼምፖ ታ ዶሳራ ኣꬃ ኢማዲስ ኣቲን ኦኒካ ታፔ ዎꬂ ኤኬና፤ ታ ኣꬃ ኢማናስ ጊዲን ዎይኮ ዛራ ዴንꬃናስ ጊዲን ሼኔይ ታሳ፤ ሄሳ ሄ ኣዛዞዛ ታኒ ታ ኣዋፔ ኤካዲስ” ጊዴስ። ሄሳ ሄ ቃላፔ ዴንዲዳይሳን ኣይሁዳታ ጊዶን ቃሴካ ሻኬቴꬂ ሜꬌቲዴስ። ዳሮ ኣሳይ “ኢዛ ቦላ ዳይዳንꬂ ዲዛ ጊሺኔ ጎሽ ጊዲዳ ጊሽ ኢንቴ ኢዚ ጊዛይሳ ኣይስ ሲዬቲ? ጊዳ። ባጋይቲ ቃሴ “ዳይዳንꬂ ዲዛዴይ ሃይሳ ማላ ዴና። ዳይዳንꬂ ቆቂዳ ኣይፌ ፓꬂ ኤሪዜ?” ጊዳ። ዬሩሳላሜን ፆሳ ኬꬃ ኦራꬆ ባዓሌ ቦንቾ ዎዴይ ጋኪዴስ፤ ሄ ዎዴይካ ባልጎ። ዬሱሲ ፆሳ ኬꬃ ጊቤ ጊዶን ሶሎሞኔ ሲሜሬቴꬃሶራ ኣꬊሺን፥ ኣይሁዳቲ ኢዛ ጊዶ ኣꬂዲ “ኔ ኣይዴ ጋካናስ ኑ ዎዝና ሂርጋን ጋምዒሳኔ? ኔ ፆሲ ኪቲዳዴ ጊዲኮ ኑስ ቆንጪሳ ዮታ” ጊዳ። ዬሱሲካ ኢስታስ “ታ ኢንቴስ ዮታዲስኮ ሺን ኢንቴ ቃሴ ኣማኒቤይኬታ። ታ ኣዋ ሱንꬃን ታ ኦꬂዛ ማላታቲ ታ ጊሽ ዮቴቴስ። ኢንቴ ቃሴ ታ ዶርሳታ ጊዶንታ ጊሽ ታና ኣማኔኬታ። ታ ዶርሳቲ ታ ቃላ ሲዬቴስ። ታካ ኢስታ ኤራይስ፤ ኢስቲካ ታና ካሌቴስ። ታ ኢስታስ ሜርና ዴዖ ኢማና፤ ሙሌካ ኢስታ ꬋዬቴና፤ ኢስታ ታ ኩሼፔ ዎꬂ ኤካናስ ዳንዳያናዴይ ኦኒካ ዴና። ታስ ኢስታ ኢሚዳ ታ ኣዋይ ኡባፌ ኣꬌስ። ታ ኣዋ ኩሼፔ ኢስታ ኦኒካ ቦንቃናስ ዳንዳዬና። ታኒኔ ታ ኣዋይ ኑ ኢሲኖ” ጊዴስ። ኣይሁዳቲ ኢዛ ጫዳናስ ቃሴካ ሹች ዴንꬂዳ። ዬሱሲካ “ኣዋፔ ጊዲዳ ዳሮ ጊታ ማላታታ ታ ኢንቴና ቤሳዲስ። ሂስቲን ሃ ታ ቤሲዳይታፔ ኣዋሪ ጊሽ ታና ሹቻራ ጫዴቲ?” ጊዴስ። ኣዩሁዳቲካ “ኑ ኔና ሹቻራ ጫዲዛይ ኔ ጮ ኣስ ጊዳ ኡታዳ ኔና ኔርካ ፆሴ ኬሳዳ ጫሻ ቃላ ኔ ሃሳዪዳ ጊሻሳፌ ኣቲን ኔ ሎዖ ኦꬂዳይሳ ጊሽ ዴና” ጊዲ ኢዛስ ዛሪዳ። ዬሱሲካ ኢስታስ “ኢንቴ ዎጋ ጊዶን ‘ታ ኢንቴና ፆሳታ ጋዲስ’ ጌቴቲ ፃፌቲቤኔ? ፆሳ ቃላይ ኢስታስ ዪዳ ኣሳታ ‘ፆሴ ጊኮኔ ማፃፋይ ሻሬታናስ ዳንዳዮንታ ጊዲኮ’ ሂስቲን ‘ታ ፆሳ ና’ ጊዳ ጊሽ ኣዋይ ባ ሻኪ ዱማሲዳይሳኔ ሃ ዱጌ ኣላሜ ኪቲዳይሳ ኢንቴ ‘ኔ ጫያዳሳ’ ጊዲ ታና ዎርዶራ ኣዛስ ሞቴቲ? ታ ኣዋይ ኦꬂዛይሳ ታ ኦꬆንታ ኣጊኮ ታናን ኣማኖፒቴ። ታ ኢዛꬆ ኦꬂዛ ጊዲኮ ኢንቴ ታና ኣማኖንታ ኣጊኮካ ታ ኣዋይ ታናን ዲዛይሳ ታካ ኢዛን ዲዛይሳ ኢንቴ ኤራና ማላኔ ዩሺ ቆፓና ማላ ኢዚ ኦꬂዳ ማላታን ኣማኒቴ” ጊዴስ። ቃሴካ ኢስቲ ኢዛ ኦይካናስ ኮይዳ ሺን ኢዚ ኢስታ ኩሼፔ ኬሲ ኤኪ ቢዴስ። ሄሳፌ ጉዬ ዬሱሲ፥ ዮሃኒሲ ካሴ ፃማቂዛሶ ጌዴ ዮርዳኖሴፔ ሄ ፒንꬅ ሲሚዲ ሄን ጋምዒዴስ። ዳሮ ኣሳይ ኢዛኮ ዪዴስ፤ ኢስቲ ቃሴ “ዮሃኒሲ ኢሲ ማላታካ ኦꬂቤና፤ ጊዶ ኣቲን ሃይሳ ኣዴዛ ጊሽ ኢዚ ዮቲዳይሲ ዉሪካ ቱሙኮ” ጊዳ። ሄንካ ዳሮ ኣሳይ ዬሱሳን ኣማኒዴስ። ቢታኒያ ጌቴቲዛሶን ማራማኔ ማርታይ ዲዛ ጉታን ኣላዛሬ ጌቴቲዛዴይ ሳኬቲዴስ። ኢዚ ኢሻ ኣላዛሬይ ሳኬቲዳ ማራማ ካሴ ዬሱሳ ቶሆ ቦላ ሺቶ ጉሳዳ ዬሱሳ ቶሆ ባ ሁዔ ቢናናን ቁጪዳሮኮ። ሚቼቲካ “ጎዶ! ኔ ዶሲዛይሲ ሳኬቲዴስ” ጊዲ ኣስ ዬሱሳኮ ኪቲዳ። ዬሱሲ ሄሳ ሲይዲ “ሃ ሳኮይ ፆሳ ናይ ኢዛን ቦንቼታና ማላኔ ፆሲ ቦንቼታናሳፌ ኣቲን ኢዛ ሃይቆስ ጋꬂዛዝ ዴና” ጊዴስ። ዬሱሲ ማርታ ኢዚ ሚቼዮ ማራሞኔ ኣላዛሬ ሲቄስ። ጊዶ ኣቲን ኣላዛሬይ ሳኬቲዳይሳ ሲዪ ዎꬂዲ ሄን ባ ዲዛሶን ናምዑ ጋላስ ጋምዒዴስ። ሄሳፌ ጉዬ ባና ካሊዛይታ “ኣኔ ዩሁዳ ቢታ ሲሚ ቦስ” ጊዴስ። ኢስቲካ “ኣስታማሬ! ጉꬃ ዎዴፔ ካሴ ኣሳይ ኔና ሹቻራ ጫዳና ኮዬቴስኮሺን፤ ኔ ቃሴ ሃዒ ሄ ሲማ ባኔ?” ጊዳ። ዬሱሲ ኢስታስ “ኢሲ ጋላሳን ታማኔ ናምዑ ሳቴይ ዴስ ዴኔ? ጋላሳራ ሃሙቲዛ ኣሲ ሃ ኣላሜዛ ፖዖን ሲሜሬቲዛ ጊሽ ꬉጴቴና። ꬉጴቲዛዴይ ጊዲኮ ኢዚ ቃማራ ሃሙቲዛዴ። ጋሶይካ ፖዖይ ባይንዳ ጊሻሳ” ጊዴስ። ሄሳ ኢስታስ ዮቲዳፔ ጉዬ “ኑ ላጌ ኣላዛሬይ ꬊስኪዴስ፤ ታካ ኢዛ ꬊስኮፌ ዴንꬃና ባይስ” ጊዴስ። ኢዛ ካሊዛይቲ ኢዛ “ጎዶ! ኢዚ ꬊስኪዳ ጊዲኮ ዴንዳና” ጊዳ። ዬሱሲ ኢስታስ ሄሳ ዮቲዳይ ኣላዛሬ ሃይቆ ጊሻሳ ሺን ኢዛ ካሊዛይታስ ቃሴ ꬊስኮ ጊሽ ዮቲዳ ሚሳቲዴስ። ሄሳ ጊሽ ቆንጬራ ኢስታስ “ኣላዛሬይ ሃይቂዴስ። ኢንቴ ኣማናና ማላ ታ ሄን ዶንታ ኣጊዳይሲ ኢንቴ ጊሽ ታና ኡፋይሴስ፤ ሃዒ ጊዲኮ ኣኔ ጌዴ ኢዛኮ ቦስ” ጊዴስ። ቃሴ ዲዲሞሳ ጌቴቲዛ ቶማሲ ሃንኮ ዬሱሳ ካሊዛይታ “ኣኔ ኑካ ቢዲ ኢዛራ ኢሲፌ ሃይቆስ” ጊዴስ። ዬሱሲ ቢ ጋኪሺን ኣላዛሬይ ሃይቂ ሞጌቲን ኦይዱ ጋላስ ጊዲዴስ። ቢታኒያይ ዬሩሳላሜፔ ባጋ ሳቴ ኦጌ ሃኬስ። ኢስታ ኢሻይ ሃይቂዳ ጊሽ ማራሞኔ ማርታ ሚንꬄꬃናስ ዳሮ ኣይሁዳ ኣሳይ ኢስታኮ ሺቂዴስ። ዬሱሳ ዩሳ ማርታይ ሲያዳ ኢዛ ሞካ ኤካና ባዱስ፤ ማራማ ጊዲኮ ሶን ኡታዱስ። ማርታይ ዬሱሳ “ጎዶ! ኔ ሃን ዲዛኮ ታ ኢሻይ ሃይቄናኮሺን። ሃዒካ ጊዲኮ ኔ ዎሲዳ ዉርሲ ፆሲ ኔስ ኢማናይሳ ታ ኤራይስ” ጋዱስ። ዬሱሲካ ኢዚስ “ኔ ኢሻይ ዴንዳና” ጊዴስ። ማርታይ ቃሴ “ዉርሴꬃን ዴንꬃ ዎዴ ኢዚ ዴንዳናይሳ ታካ ኤራይስ” ጋዱስ። ዬሱሲካ ኢዚስ “ዴንዶይኔ ዴዖይ ታና፤ ታና ኣማኒዛዴይ ሃይቂኮካ ፓፃ ዳና። ታናን ዲዛዴይኔ ታና ኣማኒዛዴይ ሙሌካ ሃይቄና፤ ሄሳ ኔ ኣማናይ?” ጊዴስ። ኢዛካ ዛራዳ “ኤ ጎዶ! ኔኒ ዱጌ ሃ ኣላሜዛ ኪቴቲዳ ፆሳ ና ጊዲዳይሳ ታ ኣማናይስ” ጋዱስ። ሄሳ ጋዳኔ ሲማዳ ባ ሚቼዮ ማራሞ ዱማ ፄይጋ ኬሳዳ “ኣስታማሬይ ኔና ኮዬስ” ጋዱስ። ማራማካ ሄሳ ሲዪዳ ማላ ኤሌላ ዴንዳዳ ኢዛኮ ባዱስ። ሄሳ ጋካናስ ዬሱሲ ማርታራ ጋጊዳሶን ዴስ ኣቲን ጌዴ ጉታ ጊዶ ጌልቤና ማራሞ ሚንꬄꬂሼ ኢዚራ ሶን ዲዛ ኣይሁዳቲካ ማራማ ፑሱኩ ጋ ዴንዳ ኤቃዳ ኬዚዳይሳ ቤዪዲ ኢዛ ኣላዛሬ ዱፎ ኣቻን ዬካና ቢዛ ሚሳቲን ኢዞ ካሊዳ። ማራማ ዬሱሲ ዲዛሶ ጋካ ኢዛ ዴሚዳ ማላ ኢዛ ቶሆ ቦላ ጉፋናዳ “ጎዶ! ኔ ሃን ዲዛኮ ታ ኢሻይ ሃይቄናኮሺን” ጋዱስ። ኢዛኔ ኢዞ ካሊ ዪዳ ኣይሁዳቲ ዬኪዛይሳ ዬሱሲ ቤዪዲ ዳሮ ሚሼቲዲ “ኢዛ ኣዋን ሞጊዴቲ?” ጊዲ ኦይቺዴስ፤ ኢስቲካ “ጎዶ! ሃ ያዳ ቤያ” ጊዳ። ዬሱሲካ ኣፉንፂዴስ። ኣይሁዳቲካ “ኢዚ ኢዛ ኣይ ማላ ሲቂዛኮ ቤይቴ” ጊዳ። ኢስታ ጊዶፌ ኢሲ ኢሲ ኣሳቲ “ሃይሲ ቆቄ ኣዴዛ ኣይፌ ፖግዳይሲ ሃይሳዴይ ሃይቆንታ ማላ ኦꬃናስ ዳንዳዬኔ?” ጊዳ። ዬሱሲ ኢዛ ዎዝናይ ሚሼቲን ጌዴ ዱፎኮ ቢዴስ፤ ዱፎዚካ ሹቻራ ጎርዴቲዳ ጎንጎሎ። ኢዚካ ኢስታ “ሹቻ ዴንꬂቴ!” ጊዴስ። ሃይቂዳይሳ ሚቼያ ማርታይ “ጎዶ! ኢዚ ሃይቂን ሃቺ ኦይዱ ጋላስ ጊዲዳ ጊሽ ፂንቃናኮ!” ጋዱስ። ዬሱሲካ “ኔ ኣማኒዛ ጊዲኮ ፆሳ ቦንቾ ቤያንዳሳ ጋዳ ኔስ ታ ዮታቤይኪና?” ጊዴስ። ሄሳ ጊሽ ሹቻ ዴንꬂዳ፤ ዬሱሲካ ፑዴ ሳሎ ፄሊዲ “ታ ኣዋዉ! ኔ ታ ጊዛዝ ሲዪዳ ጊሽ ታ ኔና ጋላታይስ። ኔ ኡባ ጋላስ ታ ጊዛዝ ሲዪዛይሳ ታ ኤራይስ፤ ጊዶ ኣቲን ታ ሄሳ ጊዳይ ሃይሳን ኤቂዳ ኣሳቲ ኔ ታና ኪቲዳይሳ ኣማናና ማላሳ። ዬሱሲ ሄሳ ጊዳፔ ካሌꬂዲ ቃላ ꬎቁ ሂስቲዲ “ኣላዛሬ! ሃ ኬዛ!” ጊዲ ፄይጊዴስ። ሃይቂዳ ኣላዛሬይካ ኩሜꬃ ኣሳቴꬃይ ሞጎ ማይዖን ፃፄቲዳ ማላ ዱፎፔ ኬዚዴስ። ዬሱሲካ “ቢርሺ ዬዲቴ ቦ!” ጊዴስ። ሄሳ ጊሽ ማራሞ ሚንꬄꬃና ዪዳ ኣይሁዳታፔ ዳሮ ኣሳይ ዬሱሲ ኦꬂዳይሳ ቤዪዲ ኢዛን ኣማኒዴስ። ኢስታፌ ባጋቲ ቢዲ ዬሱሲ ኦꬂዳይሳ ፋርሳዌታስ ዮቲዳ። ሄሳ ቄሴታ ሃላቃቲኔ ፋርሳዌቲ ኣይሁዳታ ዱላታ ሺቃና ማላ ፄይጊዲ “ሃ ኣዴዚ ዳሮ ዱማ ዱማ ማላታታ ኦꬂዳዴ ጊዲዳ ጊሽ ኑ ኣይ ኦꬂኮ ሎዖ? ኑ ጮዑ ጊኮ ኣሲ ዉሪ ኢዛን ኣማናናኔ ኦሮሜ ኣሲካ ዪዲ ሃይሳ ኑ ቢታኔ ኑ ኣሳ ኑፔ ኤካና” ጊዳ። ኢስታ ጊዶፌ ኢሳዴይ ሄ ላይꬅ ቄሴታስ ዋና ሃላቃ ቃያፋይ “ኢንቴ ኣይኮካ ኤሬኬታ። ዴሬይ ዉሪ ꬋያናፔ ዴሬ ጊሽ ኢሲ ኣሲ ሃይቂኮ ሎዖ ጊዳናይሳ ጊሽ ዩሺ ቆፔኬቲ?” ጊዴስ። ኢዚ ሄሳ ባፔ ጊዶንታ ሄ ላይꬅ ኢዚ ቄሴታስ ሃላቃ ጊዲዳ ጊሽ ዬሱሲ ኣይሁዳ ዴሬ ጊሽ ሲንꬃፌ ሃይቃናይሳ ዮቲዴስ። ኢዚ ሃይቃናይ ሄ ዴሬ ኣሳስ ፃላላ ጊዶንታ ካሴ ላሌቲዳ ፆሳ ናይታካ ኢሲ ቦላ ሺሻናሳ። ሄ ጋላሳፌ ሃ ሲሚን ኢዛ ዎꬋናስ ማቄቲዳ። ሄሳ ጊሽ ዬሱሲ ሄ ጋላሳፌ ሃ ሲሚን ኣይሁዳታ ጊዶን ቆንጬራ ሲሜሬቲቤና። ጊዶ ኣቲን ዱጌ ባዞ ቢታ ማታን ዲዛ ኤፊሬሜ ጌቴቲዛ ካታማይ ዲዛሶ ቢዲ ባና ካሊዛይታራ ሄን ታኪዴስ። ኣይሁዳቲ ፓዚጋ ባዓሌይ ማቲዳ ማላ ባዓሌይ ጋካናፔ ካሴ ጌሾ ዎጋ ኦꬃናስ ዳሮ ኣሳይ ዱማ ዱማ ዴሬፔ ዬሩሳላሜ ዪዴስ። ኣሳይ ዬሱሳ ኮዪሼ ፆሳ ኬꬃን ኤቂዲ ባ ጊዶን ኢሶይ ኢሳራ “ኢንቴስ ኣይ ሚሳቲዜ? ባዓሌዛስ ዬኔሻ?” ጊዴስ። ቄሴታ ሃላቃቲኔ ፋርሳዌቲ ቃሴ ዬሱሳ ኦይካናስ ኢዚ ኣዋን ዲዛኮኔ ኤሪዛዴይ ኢስታስ ማላታና ማላ ካሴ ኣዛዚ ዎꬂዳ። ፓዚጋ ባዓሌስ ቡሮ ኡሱፑን ጋላሲ ኣቲሺን ዬሱሲ ሃይቆፔ ዴንꬂዳ ኣላዛሬይ ዲዛሶ ቢታኒያ ቢዴስ። ሄን ዬሱሳስ ካዎ ካꬂዲ ማርታይ ኢዛ ካዎ ሚዚሺን ኢዛራ ኢሲፌ ማዳን ኡቲዳይታፔ ኢሶይ ኣላዛሬ። ማራማ ዳሮ ኣልዖ ዋጋራ ሻሜቲዳ ባጋ ሊትሮ ጊዲዛ ጌሻ ናርዶሴ ሺቶ ኤካ ያዳ ዬሱሳ ቶሆ ቦላ ጉሳዳ ቶሆዛ ባ ሁዔ ቢናናራ ቁጫዱስ። ኬꬃካ ሺቶ ሳዎይ ኩሚዴስ። ዬሱሳ ካሊዛይታፔ ኢሶይ ዬሱሳ ኣꬂ ኢማና ኣስቆሮንቶ ዩሁዳይ፥ “ሃይሲ ሺቶዚ ሄꬑ ፄቱ ዲናሬስ ባይዜቲዲ ሚሻይ ኣዛስ ማንቆታስ ኢሜቲቤኔ?” ጊዴስ። ኢዚ ሄሳ ጊዳይ ሚሻ ሺሺዛ ካራፂቴ ኦይኪዛዴይ ኢዛ ጊዲዳ ጊሽ ሺቂዛ ሚሻፌ ባስ ሺሺዲ ጎዔቲዛዴ ጊዲዳ ጊሻሳ ኣቲን ማንቆታስ ሚሼቲዲ ጊዴና። ዬሱሲ ቃሴ “ሃይሲ ሺቶዚ ታስ ሞጎ ጋላሳስ ቆፌቲዳዝ ጊዲዳ ጊሽ ሄ ዎዴ ጋካናስ ኢዛ ባ ኣቻን ናጉ፥ ቦቾፍቴ። ማንቆቲ ኣይ ዎዴካ ኢንቴናራ ዴቴስ። ጊዶ ኣቲን ኢንቴ ታና ኡባ ዎዴ ዴሜኬታ” ጊዴስ። ሄ ዎዴ ዳሮ ኣይሁዳ ኣሳቲ ዬሱሲ ሄን ዲዛይሳ ኤሪዲ ኢዛኮ ዪዳ፤ ዪዳይቲካ ዬሱሳ ፃላላ ኮሽ ጊዶንታ ዬሱሲ ሃይቆፔ ዴንꬂዳ ኣላዛሬካ ቤያናሳ። ሄሳ ጊሽ ቄሴታ ሃላቃቲ ዬሱሳራ ኣላዛሬካ ጋꬂ ዎꬋናስ ባ ጊዶን ዞሬቲዳ። ሄሲካ ኣላዛሬ ጌዶን ዳሮ ኣይሁዳ ኣሳይ ዬሱሳኮ ቢ ቢዲ ኢዛ ኣማኒዛ ጊሻሳ። ዎንቴꬃ ጋላስ ባዓሌዛ ቦንቻና ዪዳ ዴሬይ ዬሱሲ ዬሩሳላሜ ዪዛይሳ ሲይዴስ። ዛምባ ሃይꬅ ኤኪዲ ዬሱሳ ሞካና ኬዚዴስ፤ ዴሬይ ቃላ ꬎቁ ሂስቲዲ “ሆሳና! ጎዳ ሱንꬃን ዪዛ ኢስራዔሌ ካዎይ ኣንጄቲዳይሳ!” ጊዴስ። ቤኒ “ሃኔ! ፂዮኔ ናዬ፥ ባቦፋ! ሄኮ ኔ ካዎይ ሃሬ ጉቴ ቶጊዲ ዬስ” ጌቴቲ ፃፌቲዳ ማላ ዬሱሲ ሃሬ ጉቴ ዴሚዲ ቶጊዴስ። *** ኢዛ ካሊዛይቲ ሄሳ ዉርሲ ኮይሮ ዎዝናን ዎꬂቤቴና። ኢዛ ጊሽ ፃፌቲዳይሳኔ ኢዛስ ኦሴቲዳ ሃኖካ ዉርሲ ዬሱሲ ሃይቆፔ ዴንዲዳፔ ጉዬ ኤሪዳ። ኣላዛሬ ዱፎፔ ፄይጊዲ ሃይቆፔ ዴንꬂዳ ዎዴ ኢዛራ ኢሲፌ ዲዛ ኣሳይ ኢዛ ዴንꬃ ጊሽ ማርካቲዳ። ዳሮ ኣሲካ ኢዚ ሄሳ ማላ ጊታ ማላታ ኦꬂዳይሳ ሲይዲ ኢዛ ሞካና ኬዚዴስ። ሄሳ ጊሽ ፋርሳዌቲ ባ ጊዶን ኢሶይ ኢሳ “ሂስቲን ኑኒ ኣይ ኦꬃና ዳንዳዪዞኒ? ቤይቴ! ኩሜꬃ ዴሬይ ኣቶንታ ኢዛ ካሌስ” ጊዳ። ጎይናናስ ባዓሌዛስ ሺቂዳ ኣሳ ጊዶን ጊሪኬ ዴሬ ኣሳቲካ ዴቴስ። ኢስቲካ ጋሊላ ጊዶን ዲዛ ቤቴሳይዳ ጌቴቲዛ ዴሬ ኣስ ፒሊጶሳ ጌቴቲዛዴኮ ቢዲ “ጎዶ! ኑ ዬሱሳ ቤያና ኮዮስ” ጊዳ። ፒሊጶሲካ ኢንዲራሳስ ዮቲዴስ። ኢንዲራሲኔ ፒሊጶሲ ቢዲ ዬሱሳስ ዮቲዳ። ዬሱሲካ ኢስታስ “ሄኮ ኣሳ ናይ ቦንቼቲዛ ሳቴይ ጋኪዴስ። ታ ኢንቴስ ቱሙ ጋይስ፤ ጊስቴ ኣይፌይ ቢታን ዎꬋዳ ሃይቆንታ ጮዑ ጋ ኡቲኮ ባርካ ኣታዉስ። ኢዛ ሃይቂዛ ጊዲኮ ሃራ ዳሮ ኣይፋዉስ። ባ ሼምፖ ዶሲዛዴይ ꬋይሴስ። ሃይሳ ቢታ ቦላ ባ ሼምፖ ኢፂዛዴይ ጊዲኮ ሜርና ዴዖ ዴሜስ። ታስ ኦꬃና ኮዪዛዴይ ታና ካሎ፤ ታስ ኦꬂዛዴይ ታ ዲዛሶን ዳና፤ ታስ ኦꬂዛዴ ታ ኣዋይ ኢዛ ቦንቻና” ጊዴስ። ቃሴካ ዬሱሲ “ሄኮ ታ ሼምፖያ ሜቶታዱስ ‘ታ ኣዋዉ! ሃ ሳቴይፔ ታና ኣሻ ጎሻ?’ ታ ሂዝጎንታ ማላ ታ ዪዳይ ሃኖ ሃ ሜቶ ሳቴይሳ። “ታ ኣዋዉ! ኔ ኔ ሱንꬃ ቦንቻ” ጊዴስ። ሄሳፌ ካሊዲ “ታኒ ታ ሱንꬃ ቦንቻዲስ፤ ቃሴካ ጉጃ ቦንቻና” ጊዛ ቃላይ ሳሎፔ ዪዴስ። ሄን ጋዳን ኤቂዳ ኣሳይ ሄሳ ሲይዲ “ዳዳይ ዳዳቴስ” ጊዳ። ባጋይቲ ቃሴ “ኪታንቻኮ ሃሳዪዛይ” ጊዳ። ዬሱሲ “ሃይሲ ጊሪሳይ ዪዳይ ኢንቴ ጊሻሳ ኣቲን ታ ጊሽ ጊዴና። ሃይሲ ኣላሜይ ፒርዴታና ዎዴይ ሃይሳ፤ ሃይሳ ዴሬዛ ሃሪዛ ፃላዔይ ሃዒ ጌዴ ካሬ ዬጌታና። ታኒ ꬎቁ ጋዳ ካቄቲዛ ዎዴ ኣሳ ዉርሳ ታኮ ዛራና” ጊዴስ። ዬሱሲ ሄሳ ዮቲዳይ ኢዚ ኣይ ማላ ሃይቆ ሃይቃናኮ ኤሪሳናሳ። ኣሳይ ቃሴ “ኑ ዎጋን ፃፌቲዳይ ‘ፆሲ ኪቲዳዴይ ሜርናስ ዳና’ ጌስ፤ ሂስቲን ኔ ቃሴ ዋናዳ ‘ኣሳ ናይ ꬎቁ ጊ ካቄታና ቤሴስ’ ጋይ? ኔ ጊዛ ኣሳ ናይ ኣዋይሴ?” ጊዲ ኦይቺዳ። ዬሱሲ ኢስታስ “ሃዒ ጉꬃ ዎዴስ ኢንቴናራ ፖዖይ ዴስ፤ ጋዴይ ꬉሞንታ ፖዖራ ሃሙቲቴ፤ ቃማራ ሃሙቲዛዴይ ኢዚ ኣዋ ቢዛኮኔ ኤሬና። ኢንቴ ፖዖ ናይታ ጊዳና ማላ ፖዖይ ዲሺን ፖዖን ኣማኒቴ” ጊዴስ። ዬሱሲ ሄሳ ጊዳፔ ጉዬ ቢዲ ኢስታ ኣይፌፔ ጌሚዴስ። ዬሱሲ ኢስታስ ሄሳ ማላ ማላታ ኢስታ ሲንꬃን ኦꬂንካ ኣይሁዳቲ ኢዛን ኣማኒቤቴና። ሄሲ ሃኒዳይ ናቤ ኢሳያሲ “ጎዶ! ኑ ማርካቴꬃ ኣማኒዳይ ኦኔ? ፆሳ ቃላይ ኦናስ ቆንጪዴ?” ጊዳ ማላ። ሄሳ ጊሽ ኣማናናስ ዳንዳይቤቴና፤ ጋሶይካ ናቤ ኢሳያሲ ካሴ፥ “ኢስቲ ባ ኣይፌን ቤዪዲ፥ ባ ዎዝናን ዩሺ ቆፒዲ፥ ሲሞንታ ማላኔ ኢዚ ኢስታ ፓꬆንታ ማላ ፆሲ ኢስታ ኣይፌ ቆቂሲዴስ፤ ኢስታ ዎዝናካ ሙሚሲዴስ” ጊ ፃፊዳ ጊሻሳ። ኢሳያሲ ሄሳ ጊዳይ ፆሲ ኪቲዳዴ ቦንቾ ቤዪዳ ጊሻሳ፤ ሄሳ ጊሽ ዬሱሲ ዮቲዴስ። ጊዲኮካ ኣይሁዳታ ሃላቃታፔ ዳሮ ኣሳይ ዬሱሳ ኣማኒዴስ። ጊዶ ኣቲን ኢስታ ኣይሁዳታ ዎሳ ኬꬃፌ ጎዶንታ ማላ ፋርሳዌታስ ባቢዲ ባ ኣማኖ ቆንጬን ማርካቲቤቴና። ኢስቲ ሄሳꬆ ሃኒዳይ ኢስታስ ፆሳፌ ኢሜቲዛ ቦንቾፌ ኣꬂዲ ኣሳፔ ኢሜቲዛ ቦንቾ ዶሲዳ ጊሻሳ። ዬሱሲ ባ ቃላ ꬎቁ ሂስቲዲ “ታና ኣማኒዛዴይ ታናን ፃላላ ጊዶንታ ታና ኪቲዳይሳንካ ኣማኔስ። ታና ቤዪዳዴይ ታና ኪቲዳይሳካ ቤያና። ታና ኣማኒዛይ ዉሪ ꬉማን ዶንታ ማላ ታ ፖዖ ጊዳዳ ሃይሳ ሃ ኣላሜዛ ያዲስ። ታ ቃላ ሲይዲ ኦꬆንታዴ ቦላ ፒርዳናይ ታና ጊዲኬ። ጋሶይካ ታ ዪዳይ ኣላሜ ኣሻናስ ኣቲን ኣላሜ ቦላ ፒርዳናስ ጊዴና። ታና ኮዮንታዴኔ ታ ቃላ ኤኮንታዴ ቦላ ፒርዳናዴይ ዴስ፤ ታ ኢዛስ ዮቲዳ ቃላይ ዉርሴꬃ ጋላስ ኢዛ ቦላ ፒርዳና። ጋሶይካ ታኒ ጮ ታ ሼኔን ዮታቤይኬ፤ ታ ጊዛይሳኔ ታ ዮቲዛ ኣዛዞ ታስ ኢሚዳይ ታና ኪቲዳ ታ ኣዋ ኢዛ ኣዛዞይ ሜርና ዴዖ ጊዲዳይሳ ታ ኤራይስ፤ ሄሳ ጊሽ ታ ዮቲዛይ ዉሪ ኣዋይ ታስ ዮቲዳይሳ” ጊዴስ። ሄ ዎዴይካ ኣይሁዳታ ፓዚጋ ባዓሌፔ ካሴ ዬሱሲ ሃይሳ ኣላሜዛ ዬዲዲ ኣዋኮ ባና ሳቴይ ጋኪዳይሳ ኤሪዴስ፤ ሃይሳ ኣላሜዛን ዲዛ ባ ባጋታ ዉርሲ ሲቂዴስ። ዉርሴꬂ ጋካናሲካ ዶሲዴስ። ዬሱሲኔ ኢዛ ካሊዛይቲ ኢሲፌ ካዎ ሚሺን ሲሞና ናይ ኣስቆሮንቶ ዩሁዳይ ዬሱሳ ኣꬂ ኢማና ማላ ፃላዔይ ኢዛ ዎዝናን ኢታ ቆፋ ጌልꬂዴስ። ዬሱሲ ኣዋይ ኢዛስ ጎዳቴꬅ ዉርሲ ኢሚዳይሳኔ ኢዚ ፆሳ ኣቻፌ ኬዚዲ ዪዳይሳ፥ ቃሴ ሲሚዲ ፆሳኮ ባናይሳ ኤሬስ። ሄሳ ጊሽ ማዳ ቦላፌ ዴንዲዲኔ ማይዖ ቃሪ ዎꬂዲ ፖፃ ኤኪዲ ፄሳን ጊፂዴስ። ቶሆ ሜጪዛ ጎንጌን ሃꬄ ጉጂዲ ባና ካሊዛይታ ቶሆ ሜቼ ኦይኪዴስ፤ ባ ጊፂዳ ፖፃንካ ሜጪዳ ቶሆዛ ቁጪዴስ። ዬሱሲ ሲሞና ጌቴቲዛ ጴፅሮሳኮ ሺቂን ሲሞና ጌቴቲዛ ጴፅሮሲ ኢዛ “ጎዶ! ኔ ታ ቶሆ ሜጫኔ?” ጊዴስ። ዬሱሲካ “ታኒ ኦꬂዛይሳ ኔ ሃዒ ኤራካ ጉዬፔ ቃሴ ኔ ኤራንዳሳ” ጊዴስ። ጴፅሮሲካ “ኔ ታ ቶሆ ሙሌካ ሜጫካ” ጊዴስ። ዬሱሲ ቃሴ “ታ ኔ ቶሆ ሜጮንታ ኣጊኮ ኔሲኔ ታስ ኢሲፌቴꬂ ዴና” ጊዴስ። ሲሞና ጌቴቲዛ ጴፅሮሲካ ዛሪዲ “ጎዶ ሄሳ ጊዲኮ ታስ ቶሆ ፃላላ ጊዶንታ ኩሼራ ሁዔራ ዉርሳ ሜጫ” ጊዴስ። ዬሱሲ ቃሴ “ባ ኣሳቴꬂ ሜጬቲዳዴስ ኩሜꬃ ቦላይ ጌሽ ጊዲዳ ጊሽ ኢዛስ ቶሆ ሜቻፌ ኣቲን ሃራ ኮሼና። ኢንቴ ጌሻ ሺን ኡባታ ዴኬታ” ጊዴስ። ዬሱሲ “ኢንቴ ኡባቲካ ጌሽ ዴኬታ” ጊዳይ ኢዛ ኣꬂ ኢማናዴይ ኦናኮኔ ኤሪዛ ጊሻሳ። ኢስታ ቶሆ ሜጪዳፔ ጉዬ ባ ማይዖ ኤኪ ማይዒዲ ካሴ ባ ኡቲዳሶን ሲሚ ኡቲዴስ። ቃሴ ኢስታስ “ታ ኢንቴስ ኣይ ኦꬂዳኮኔ ዎዝናን ዎꬂዴቲ? ኢንቴ ታና ኣስታማሬኔ ጎዳ ጌታ፤ ታ ቃስ ኣስታማሬኔ ጎዳ ጊዲዳ ጊሽ ኢንቴ ጉሳይ ቱሙኮ። ሂስቲኮ ታ ኢንቴስ ጎዳኔ ኣስታማሬ ጊዳሼ ኢንቴ ቶሆ ሜጪዛ ጊዲኮ ኢንቴካ ኢንቴ ጊዶን ኢሶይ ኢሳ ቶሆ ሜጫና ቤሴስ። ታ ኢንቴስ ኦꬂዳይሳ ማላ ኢንቴካ ኦꬃና ማላ ታ ኢንቴስ ሌሚሶ ቤሳዲስ። ታ ኢንቴስ ቱሙ ጋይስ፤ ኣሽካራይ ጎዳፔ ኣꬌና፤ ኪቴቲዳዴይ ኪቲዳዴፌ ኣꬌና። ኢንቴ ሃይሳ ኤሪዲ ኦሶን ፔይሺኮ ኢንቴ ኣንጄቲዳይታ። “ታ ሃይሳ ጊዛይ ኢንቴ ኡባታ ጊሽ ዴና። ታኒ ታ ዶሪዳይታ ዉርሳ ኤራይስ፤ ጊዶ ኣቲን ‘ታ ካꬅ ሚዳዴይ ታ ሞርኬ ጊዲዲ ታ ቦላ ዴንዲዴስ’ ጊዛ ማፃፋ ቃላይ ፖሌታናስ ኮሼስ። ታ ሃይሳ ሃዒራ ኢንቴስ ዮቲዛይ ኢዚ ፖሌቲዛ ዎዴ ታ ኦናኮኔ ኢንቴ ኣማናና ማላ። ታ ኢንቴስ ቱሙ ጋይስ፤ ታ ኪቲዳዴ ኤኪዛዴይ ታና ኤኬስ፤ ታና ኤኪዛዴይ ታና ኪቲዳዴ ኤኬስ” ጊዴስ። ዬሱሲ ሄሳ ጊ ሲሚዲ ኬሂ ቆፋን ጌሊዲኔ “ታ ኢንቴስ ቱሙ ጋይስ፤ ኢንቴ ጊዶፌ ኢሳዴይ ታና ኣꬂ ኢማና” ጊዲ ቆንጬን ዮቲዴስ። ኢዛ ካሊዛይቲ ሄሳ ኢዚ ኦና ጊሽ ጊዳኮኔ ኤሮንታ ጊሽ ባ ጊዶን ኢሶይ ኢሳራ ፄሌቲዳ። ኢዛ ካሊዛይታ ጊዶፌ ዬሱሲ ሲቂዛ ኢሶይ ዬሱሳ ኣቻን ኡቲዴስ። ሲሞና ጌቴቲዛ ጴፅሮሲ ዮሃኒሳ ሶምዒ ቤሲዲ “ኢዚ ኦና ጊሽ ጊዛኮኔ ኣኔ ኢዛ ኦይቻ” ጊዴስ። ሄሳ ጊሽ ኢዚ ባ ቆꬌ ጌዴ ዬሱሳ ሃይꬃኮ ሺሺዲ “ጎዶ! ኢዚ ኦኔ?” ጊዲ ኦይቺዴስ። ዬሱሲካ ዛሪዲ “ኢዛዴይ ታ ሃዒ ቡዴና ዎፄን ꬊምዓዳ ባርሲዛዴ” ጊዴስ። ሄሳ ጊ ሲሚዲ ቡዴና ዎፄን ꬊምዒ ኤኪዲ ኣስቆሮንቶፌ ዪዳ ሲሞና ና ዩሁዳ ባርሲዴስ። ዩሁዳይ ኢዛ ባꬊዳ ማላ ሄራካ ፃላዔይ ኢዛን ጌሊዴስ። ዬሱሲካ ዩሁዳ “ኔ ኦꬃናስ ቆፒዳይሳ ኤሌላ ኦꬃ” ጊዴስ። ዬሱሲ ሄሳ ኣዛስ ጊዳኮኔ ማዳን ኡቲዳ ኣሳፔ ዮዖይ ጌሊዳዴይ ኦኒካ ዴና። ዩሁዳይ ሚሽ ኦይኪዛዴ ጊዲዳ ጊሽ ዬሱሳ ካሊዛይታፔ ባጋቲ ዬሱሲ ዩሁዳ “ባዓሌዛስ ኮሺዛይሳ ሻማ ዎይኮ ማንቆታስ ሙፁዋታ ኢማ” ጊዳ ሚሳቲዴስ። ዩሁዳይካ ቡዴና ባꬊዳ ማላ ሄራካ ኬዚዲ ቢዴስ። ኢዚ ቢሺን ጋዴይ ቃማኮ። ዩሁዳይ ኬዚ ቢዳፔ ጉዬ ዬሱሲ “ኣሳ ናይ ሃዒ ቦንቼቲዴስ፤ ኢዛ ጋሶን ፆሲካ ቦንቼቲዴስ። ፆሲ ኢዛ ጋሶን ቦንቼቲዛ ጊዲኮ ፆሲካ ኢዛ ቦንቻና፤ ሄራካ ጋምዖንታ ቦንቻና። ታ ናይቶ፥ ታ ኢንቴናራ ዳሮ ዎዴ ጋምዒኬ፤ ኢንቴ ታና ኮያና፥ ታ ካሴ ኣይሁዳታ ሃላቃታስካ ‘ታ ቢዛሶ ኢንቴ ያና ዳንዳዬኬታ’ ጋዳ ዮቲዳ ማላ ሃዒካ ኢንቴስካ ሄሳꬆ ዮታይስ። ኢንቴ ኢንቴ ጊዶን ኢሶይ ኢሳራ ሲቄታና ማላ ታ ኢንቴስ ኦራꬃ ኣዛዞ ኢማይስ። ታ ኢንቴና ሲቂዳ ማላ ኢንቴ ኢንቴ ጊዶን ኢሶይ ኢሳራ ሲቄቲቴ። ኢንቴ ኢንቴ ጊዶን ሲቄቲኮ ኢንቴ ታና ካሊዛይታ ጊዲዳይሳ ኣሲ ዉሪ ኤራና” ጊዴስ። ሄሳፌ ጉዬ ሲሞና ጌቴቲዛ ጴፅሮሲ ዬሱሳ “ጎዶ! ኔ ኣዋ ባኔ?” ጊዲ ኦይቺዴስ። ዬሱሲ ቃሴ “ታ ቢዛሶ ኔ ሃዒ ታና ካላና ዳንዳያካ ሺን ጉዬፔ ኔ ታና ካላና” ጊዴስ። ጴፅሮሲ “ጎዶ! ታ ኔና ሃዒ ካላናስ ኣይስ ዳንዳዪኪና? ሃራይ ኣቶሺን ታኒ ታ ሼምፖካ ኔ ጊሽ ኣꬃ ኢማና” ጊዴስ። ዬሱሲካ ዛሪዲ “ኔኒ ኔ ሼምፖ ታ ጊሽ ኣꬃ ኢማኔ? ታ ኔስ ቱሙ ጋይስ፤ ሃች ኩቶይ ዋሳናፔ ካሴታዳ ኔ ታና ሄꬑቶ ካዳና” ጊዴስ። ካሌꬂድካ ዬሱሲ “ኢንቴ ዎዝናይ ሜቶቶፖ፤ ፆሴ ኣማኒቴ፤ ታናካ ኣማኒቴ። ታ ኣዋ ኣቻን ዳሮ ዱሳሶይ ዴስ፤ ሄሳ ጊዶንታኮ ‘ኢንቴስ ዳናሶ ጊጊሳናስ ታ ባና’ ጋናሺን። ባዳ ታ ኢንቴስ ሶ ጊጊሲዳፔ ጉዬ ኢንቴ ታ ዲዛሶን ዳና ማላ ታ ሲማ ያዳ ኢንቴና ኤካና። ታ ቢዛ ኦጌ ኢንቴ ኤሬታ” ጊዴስ። ቶማሲ “ጎዶ! ኔ ኣዋ ቢዛኮኔ ኑ ኤሮኮሺን፥ ኦጌዛ ኑ ዎስቲ ኤራናስ ዳንዳዪዞኒ?” ጊዴስ። ዬሱሲካ ኢዛስ “ኦጌይኔ፥ ቱማይ፥ ዴዖይካ ታና፤ ታ ባጋራ ጊዲኮፌ ኣቲን ኦኒካ ኣዋኮ ባና ኣሲ ዴና። ኢንቴ ታና ኤሪዛኮ ታ ኣዋካ ኤራናኮሺን፤ ሃዒ ሃይሳፌ ጉዬ ኢንቴ ኢዛ ኤራና፤ ኢዛ ቤዖካ ቤይዴታ” ጊ ዛሪዴስ። ፒሊጶሲ “ጎዶ! ኔ ኑና ኣዋ ቤሲኮ ኑስ ጊዳና” ጊዴስ። ዬሱሲካ ኢዛስ “ፒሊጶሳ! ሃይሳ ጋካናስ ታ ኢንቴናራ ዴዒንካ ኔ ታና ኤሪኪ? ታና ቤዪዳዴይ ኣዋካ ቤይዴስ፤ ሂስቲን ኔኒ ዋናዳ ‘ኑና ኣዋ ቤሳ ጋይ? ታኒ ታ ኣዋን፥ ታ ኣዋይካ ታናን ዲዛይሳ ኣማኒኪ? ታ ኢንቴስ ዮቲዛ ቃላ ዮቲዛይ ታ ሼኔ ማላ ዴና፤ ጊዶ ኣቲን ኦሶዛ ዉርሲ ኦꬂዛይ ታናን ዲዛ ታ ኣዋ። ታኒ ኣዋን ዲዛ ማላ፥ ኣዋይካ ታናን ዲዛይሳ ኢንቴ ኣማኒቴ፤ ኣካይ ጊኮ ታ ኦꬂዛ ኦሶታ ጊሺካ ታና ኣማኒቴ። ታ ኢንቴስ ቱሙ ጋይስ፤ ታና ኣማኒዛዴይ ታ ኦꬂዛ ኦሶ ኦꬃና፤ ሄሳፌካ ኣꬂ ኦꬃና፤ ጋሶይካ ታኒ ኣዋኮ ባና። ኣዋይ ናዛ ጋሶን ቦንቼታና ማላ ኢንቴ ታ ሱንꬃን ዎሲዳይሳ ታ ኢንቴስ ዉርሳ ኦꬃና። ኢንቴ ኣይ ሚሺካ ታ ሱንꬃን ዎሲዳይሳ ታ ዉርሳ ኦꬃና። “ኢንቴ ታና ዶሲዛ ጊዲኮ ታ ኣዛዞዮ ናጊቴ። ታኒ ኣዋ ዎሳና፤ ኢዚካ ኢንቴናራ ሜርናስ ዳና ማላ ሃራ ኢንቴና ሚንꬄꬃናዴ ኢንቴስ ኢማና። ሃይሲ ሚንꬄꬂዛ ኣያናይ ዴሬ ኣሳይ ኢዛ ቤዪ ኤሮንታ ጊሽ ኣላሜይ ኤካናስ ዳንዳዮንታ ቱሙ ኣያና፤ ጊዶ ኣቲን ኢንቴ ኢዛ ኤሬታ፤ ጋሶይካ ኢዚ ኢንቴናራ ዲዛ ጊሺኔ ኢዚ ኢንቴ ጋꬃን ዲዛ ጊሻሳ። “ኣዋይኔ ኣያ ባይንዳ ናይታ ማላ ታ ኢንቴና ፃላላ ኣጊኬ፤ ታ ሲማዳ ሃ ኢንቴኮ ያና። ጉꬃ ዎዴፔ ጉዬ ዴሬ ኣሳይ ታና ቤዬና ሺን ኢንቴ ጊዲኮ ቤያንዴታ፤ ታኒ ዴዖን ዲዛ ጊሽ ኢንቴካ ዴዖን ዳንዴታ። ታኒ ታ ኣዋን ዲዛ ማላ ኢንቴካ ታናን ዲዛይሳኔ ታካ ኢንቴናን ዲዛይሳ ኢንቴ ሄ ዎዴ ኤራንዴታ። “ታ ኣዛዞ ኤኪዲ ኦꬂዛዴይ ታና ዶሴስ፤ ታና ዶሲዛዴካ ታ ኣዋይ ዶሴስ፤ ታካ ኢዛ ዶሳና፤ ታናካ ኢዛዴስ ቆንጪሳና” ጊዴስ። ኣስቆሮንቶ ዩሁዳ ጊዶንታ ሃንኮ ዩሁዳይ “ጎዶ! ኔኒ ኣላሜ ኣሳስ ጊዶንታ ኑስ ዎስታ ቆንጪሳኔ?” ጊዴስ። ዬሱሲካ ኢዛስ “ታና ሲቂዛዴይ ታ ቃላ ናጋና፤ ታ ኣዋይካ ኢዛ ዶሳና፤ ኑኒ ኢዛኮ ያና፤ ዪዲካ ኢዛዴራ ኢሲፌ ዳና። ታና ዶሶንታዴይ ታ ቃላ ናጌና፤ ሃይሲ ኢንቴ ሲዪዛ ቃላይ ታና ኪቲዳ ታ ኣዋ ቃላፔ ኣቲን ታ ቃላ ጊዴና። “ታኒ ሃዒ ኢንቴናራ ዳሼ ሃይሳ ኢንቴስ ዮታዲስ። ኣዋይ ታ ሱንꬃን ዬዳና ሚንꬄꬂዛ ፂሎ ኣያናይ ቃስ ሃኒዛ ዉርሲ ኢንቴና ታማርሳና፤ ታ ኢንቴስ ዮቶይሳካ ዉርሲ ኢንቴ ዎዝናን ዎꬃና ማላ ማዳና። “ታ ኢንቴስ ሳሮቴꬅ ጊዶ ኣጋዳ ባይስ፤ ታ ሳሮቴꬂካ ታ ኢንቴስ ኢማና፤ ታ ኢንቴስ ኢሚዛ ሳሮቴꬂ ኣላሜይ ኢሚዛ ሳሮቴꬃ ማላ ዴና። ኢንቴ ዎዝናይ ሂርጎፎኔ ባቦፎ። “ ‘ታ ባና፤ ባዳካ ኢንቴኮ ሲማ ያና’ ጋዳ ታ ኢንቴስ ካሴ ዮቲዳይሳ ሲዪዴታ፤ ኢንቴ ታና ዶሲዛኮ ታኒ ታ ኣዋኮ ቢዛይሲ ኢንቴና ኡፋይሳናኮሺን። ጋሶይካ ኣዋይ ታፔ ኣꬌስ። ሃይሲ ሃኒዛ ዎዴ ኢንቴ ኣማናና ማላ ሃይሳ ኢንቴስ ካሴታ ዮታዲስ። ሃይሳ ኣላሜዛ ሃሪዛ ፃላዔይ ዪዛ ዎዴይ ጋኪዳ ጊሽ ሃዒ ታ ኢንቴናራ ዳሮ ሃሳይኬ፤ ኢዚ ታ ቦላ ኣይኮካ ኦꬃናስ ኢዛስ ዎልቃይ ዴና። ጊዶ ኣቲን ታኒ ኣዋ ዶሲዛይሳ ኣላሜይ ኤራና ማላ ኣዋይ ታና ኣዛዚዳይሳ ታ ዉርሳ ፖላና። ኣኔ ሃይሳፌ ቦስ፤ ዴንዲቴ” ጊዴስ። ቃሴካ ዬሱሲ “ቱሙ ዎይኔ ሚꬃ ኣኖይ ታና፤ ኣታኪልቴዛ ኦሳንቻይ ታ ኣዋ። ታ ቦላ ዲሼ ኣይፌ ኢሞንታ ሃጋ ዉርሲ ታ ኣዋይ ቃንፂ ዲጋና፤ ኣይፊዛ ሃጋ ጉጂ ኣይፋና ማላ ቂርፂ ጌሻና። ታ ኢንቴስ ዮቲዳ ቃላ ጋሶን ኢንቴ ሃዒ ጌሻታ። ታናን ዲቴ፤ ታካ ኢንቴናን ዳና፤ ሃጋይ ዎይኔ ኣኖ ቦላ ዶንታ ኣጊኮ ባርካ ኣይፌ ኣይፋና ዳንዳዮንታይሳ ማላ ኢንቴካ ታናን ዶንታ ኣጊኮ ኣይፌ ኣይፋናስ ዳንዳዬኬታ። “ታኒ ዎይኔ ሚꬃስ ኣኖ፤ ኢንቴ ቃስ ሃጋታ፤ ዳሮ ኣይፌ ኣይፊዛዴይ ታናን ዲዛዴኔ ታካ ኢዛን ዲዛዴ፤ ጋሶይካ ታ ባይንዳ ኢንቴ ኣይኮካ ኦꬃናስ ዳንዳዬኬታ። ታናን ባይንዳዴይ ቃንፄቲዲ ዎራ ዬጌቲዳ ሃጋ ማላ ካሬ ዬጌቲዲ ሄን ሜላና፤ ሄይታ ማላ ሃጋቲ ኢሲ ቦላ ሺቂዲ ታማን ዬጌታናኔ ኤፃና። ኢንቴ ታናን ዲኮ ታ ቃላይካ ኢንቴናን ዲኮ ኢንቴ ኮዪዳይሳ ኦይቺኮ ዴማና። ዳሮ ኣይፌ ኢንቴ ኣይፊሺን ታ ኣዋይ ቦንቼቴስ፤ ኢንቴ ታና ካሊዛይታ ጊዲዳይሲ ሄሳን ኤሬታና። “ኣዋይ ታና ዶሲዳይሳꬆ ታካ ኢንቴና ዶሳዲስ፤ ሄሳ ጊሽ ኢንቴ ታ ሲቆን ዲቴ። ታኒ ታ ኣዋ ኣዛዞ ፖላዳ ኢዛ ሲቆን ዲዳ ማላ ኢንቴካ ታ ኣዛዞ ፖሊኮ ታ ሲቆን ዳና። ሃይሳ ታ ኢንቴስ ዮቲዛይ ታ ኡፋይሲ ኢንቴናን ጊዳና ማላኔ ኢንቴ ኡፋይሲካ ኩሜꬅ ጊዳናሳ። ታ ኢንቴስ ኢሚዛ ኣዛዞይ ታ ኢንቴና ሲቂዳ ማላ ኢንቴካ ኢንቴ ጊዶን ኢሶይ ኢሳራ ሲቄታናሳ። ኣሲ ባ ላጌስ ባ ሼምፖ ኣꬂ ኢሞፔ ኣꬊዛ ሲቆይ ዴና። ታ ኢንቴና ኣዛዚዛይሳ ኡባ ኢንቴ ፖሊኮ ኢንቴ ታ ላጌታ። ኣሽካራይ ጎዳይ ኦꬂዛይሳ ኤሮንታ ጊሽ ሃይሳፌ ጉዬ ታ ኢንቴና ኣሽካራታ ጊኬ። ጊዶ ኣቲን ታኒ ታ ኣዋፔ ሲዪዳይሳ ዉርሳ ኢንቴስ ቆንጪሲዳ ጊሽ ታ ኢንቴና ታ ላጌታ ጋዲስ። ታ ኢንቴና ዶራዲስ ኣቲን ኢንቴ ታና ዶሪቤኬታ፤ ኢንቴ ቢዲ ዳሮ ኣይፌ ኣይፋና ማላ ኢንቴ ኣይፌይ ኤቂ ዳና ማላ ታ ኢንቴና ዎꬃዲስ፤ ሄሳ ጊሽ ኢንቴ ታ ሱንꬃን ዎሲዳይሳ ዉርሲ ኣዋይ ኢንቴስ ኢማና። ሄሳ ጊሽ ኢንቴ ኢንቴ ጊዶን ኢሶይ ኢሳራ ሲቄታና ማላ ታ ኢንቴና ኣዛዛይስ። “ካሌꬂዲካ ዬሱሲ ኢንቴና ኣላሜይ ኢፂኮ ኢንቴፌ ካሴ ታና ኢፂዳይሳ ኤሪቴ። ኢንቴ ኣማኖንታ ኣላሜ ኣሳ ጊዲኮ ኣላሜ ኣሳይ ባ ባጋ ጊዲዳዴ ዶሴስ። ጊዶ ኣቲን ኢንቴ ኣላሜ ባጋ ጊዶንታ ጊሽ ታ ኢንቴና ኣላሜፔ ሻካዳ ዶሪዳ ጊሽ ዴሬይ ኢንቴና ኢፄስ። ‘ኣሽካራይ ጎዳፔ ኣꬌና’ ጋዳ ታ ካሴ ኢንቴስ ዮቶይሳ ዩሺ ቆፒቴ፤ ኢስቲ ታና ጎዲዛይቲ ኢንቴናካ ጎዳና፤ ኢስቲ ታ ቃላ ናጊዛኮ ኢንቴ ቃላ ናጋና። ኢስቲ ታና ኪቲዳዴ ኤሮንታ ጊሽ ታ ጋሶን ኢንቴ ቦላ ሄሳ ዉርሲ ኦꬃና። ታ ያዳ ኢስታስ ዮቶንታኮ ኢስታስ ናጋራ ጊዴና። ሃዒ ቃስ ኢስታ ናጋራስ ሃኖ ጊዛ ጋሶይ ባዋ። ታና ኢፂዛዴይ ታ ኣዋካ ኢፄስ። ሃራ ኣሲ ኦꬆንታ ኦሶ ታ ኢስታ ጊዶን ኦꬆንታኮ ኢስታስ ናጋራ ጊዴናሺን፤ ሃዒ ኢስቲ ሄሳ ዉርሲ ቤዪዳፔ ጉዬ ታናካ ታ ኣዋካ ኢፂዳ። ሄሲካ ሃኒዳይ ካሴ ‘ታና ጋሶይ ባይንዳ ዲሺን ኢፂዳ’ ጌቴቲዲ ኢስታ ዎጋን ፃፌቲዳ ቃላይ ፖሌታናሳ። “ጊዶ ኣቲን ኣዋፔ ኬዚዲ ያናይስ ታካ ታ ኣዋ ኣቻፌ ኢንቴስ ዬዳናይስ ቱማ ኣያናይ ሚንꬄꬂዛይስ ዪዲ ኢዚ ታ ጊሽ ማርካታና። ኢንቴ ኮይሮፔካ ታናራ ዲዛ ጊሽ ታስ ኢንቴካ ማርካታንዴታ” ጊዴስ። ቃሴካ ዬሱሲ “ሄኮ ሃይሳ ዉርሳ ታ ኢንቴስ ኢንቴ ኣማኖይ ያርክ ያርኮፎ ጋዳ ዮታዲስ። ኢስቲ ኢንቴና ባ ኬꬃፌ ጎዳና፤ ሃራይ ኣቶሺን ኢንቴና ዎꬊዛዴይ ዉሪ ፆሳስ ኦꬂዛዴ ሚሳቲዛ ዎዴይ ያና። ኢስቲ ሄሳꬆ ኦꬂዛይ ታናካ ታ ኣዋካ ኤሮንታ ጊሻሳ። ታ ሃይሳ ኢንቴስ ሃራ ዮቲዛ ዎዴ ኢንቴ ታ ኢንቴስ ጊዳይሳ ቆፓናሳ” ጊዴስ። ካሌꬂዲካ ዬሱሳ “ሃይሳ ዉርሳ ታ ኢንቴስ ዮቶንታ ኣጊዳይ ታ ኢንቴናራ ኢሲፌ ዲዛ ጊሻሳ። “ሃዒ ቃሴ ታና ኪቲዳይሳኮ ባና ጋይስ፤ ጊዶ ኣቲን ኢንቴፌ ኦኒካ ‘ኔ ኣዋ ባኔ?’ ጊዲ ኦይቻናይ ባዋ። ጊዶ ኣቲን ሃይሳ ዉርሳ ታ ኢንቴስ ዮቲዳ ጊሽ ኢንቴ ዎዝናይ ሙዞቴስ። ታ ቃሴ ኢንቴስ ቱሙ ጋይስ፤ ታ ቡሲ ኢንቴስ ጎዓ ጊዳና፤ ጋሶይካ ታ ቦንታ ኣጊኮ ሚንꬄꬂዛ ኣያናይ ኢንቴኮ ዬና። ታ ቢዳፔ ጉዬ ኢዛ ኢንቴኮ ዬዳና። ኢዚ ዪዲ ኣሳ ናጋራ ጊሺኔ ፂሎቴꬃ ጊሽ ቃሴካ ፒርዳ ጊሽ ኤሪሳና። ኣሳ ናጋራ ጊሽ ኢዚ ኤሪሳናይ ኣሳይ ታና ኣማኖንታ ጊሻሳ። ፂሎቴꬃ ጊሽ ኢዚ ኣሳ ኤሪሳናይ ታኒ ታ ኣዋኮ ቢዛ ጊሺኔ ቃሴ ናምዓንꬆ ኢንቴ ታና ቤዮንታ ጊሻሳ። ፒርዳ ጊሽ ኢዚ ኤሪሳናይ ሃይሳ ኣላሜዛ ሃሪዛይሳ ቦላ ፒርዴቲዳ ጊሻሳ። “ታ ኢንቴስ ቡሮ ዮታና ዳሮ ዮዖይ ዴስ፤ ጊዶ ኣቲን ሃዒ ኢንቴና ዴፃና። ቱማ ኣያናይ ዪዲ ኢንቴና ቱማይ ዲዛሶ ካሌꬃና፤ ጋሶይካ ኢዚ ሲዪዳይሳ ዮታና ኣቲን ባፔ ጊዶንታ ጊሽ ኢዚ ሲንꬃፌ ሃናና ዮዖታ ኢንቴስ ዮታና። ታስ ዲዛይሳፌ ኤኪዲ ኢዚ ኢንቴስ ዮቲዛ ጊሽ ታና ቦንቻና። ኣዋስ ጊዲዳይ ዉሪካ ታይሳ፥ ‘ታስ ጊዲዳይሳፌ ኤኪዲ ኢዚ ኢንቴስ ዮታና’ ታ ጊዳይ ሄሳሳ” ጊዴስ። ዬሱሲ ጉጂዲ “ጉꬃ ዎዴፔ ጉዬ ኢንቴ ታና ቤዬኬታ፤ ቃሴካ ጉꬃ ዎዴፔ ጉዬ ኢንቴ ታና ቤያና” ጊዴስ። ኢዛ ካሊዛይታፔ ባጋቲ ባ ጊዶን “ ‘ሃይሲ ኑስ ጉꬃ ዎዴፔ ጉዬ ኢንቴ ታና ቤዬኬታ፤ ቃሴካ ጉꬃ ዎዴፔ ጉዬ ኢንቴ ታና ቤያና፤ ቃሴ ታ ኣዋኮ ባና’ ጉሲ ኣይ ጉሴ?” ጊዳ። “ሂስቲን ሃይሲ ‘ጉꬃ ዎዴፔ ጉዬ’ ጊዛይሲ ኢዚ ኣዜ? ኢዚ ዮቲዛይሲ ኑስ ኤሬቴና” ጊዲ ባ ጊዶን ዛሪ ዛሪ ኦይሼቲዳ። ኢስቲ ኢዛ ኦይቻናይሳ ዬሱሲ ኤሪዲ ኢስታስ ሂዝጊዴስ “ኢንቴ ኢንቴ ጊዶን ኢሶይ ኢሳራ ኦይሼቲዛይ ታ ኢንቴስ ‘ጉꬃ ዎዴፔ ጉዬ ኢንቴ ታና ቤዬኬታ፤ ቃሴካ ጉꬃ ዎዴፔ ጉዬ ኢንቴ ታና ቤያና’ ጊዳ ጊሻሴ? ታ ኢንቴስ ቱማ ጋይስ፥ ኢንቴ ዋሳናኔ ዬካናሺን ኣላሜይ ጊዲኮ ኡፋዬታና። ኢንቴ ሙዞቲሺን ኢንቴ ሙዞይ ኡፋይሳን ላሜታና። ማጫሲ ዬሎ ዎዴይ ጋኪሺን ሚፃስ ሂርጋዉስ ሺን ና ዬላ ዬጊዳፔ ጉዬ ቢታ ቦላ ናይ ዬሌቲዳ ጊሽ ኡፋይሳፌ ዴንዲዳይሳን ካሴ ባ ዋይዳይሳ ዛራ ቆፑኩ። ሄሳꬆ ኢንቴካ ሃዒ ሙዞቴታ፤ ቃሴ ታ ኢንቴና ቤያና ኢንቴ ዎዝናይካ ኡፋዬታና፤ ኢንቴ ኡፋይሳ ዛሪ ኤካናዴይ ዴና። “ኢንቴ ሄ ዎዴ ታፔ ኣይኮካ ዎሴኬታ፤ ታ ኢንቴስ ቱሙ ጋይስ፤ ታ ሱንꬃን ታ ኣዋ ዎሲኮ ኢዚ ኢንቴስ ዉርሲካ ኢማና። ሃኖ ጋካናስ ኢንቴ ታ ሱንꬃን ኣይኮካ ዎሲ ኤሬኬታ፤ ዎሲቴ ኢንቴ ኤካና፤ ኢንቴ ኡፋይሳይካ ኩሜꬅ ጊዳና። “ሃዒ ጋካናስ ታ ኢንቴስ ሌሚሶራ ዮታዲስ ሺን ሃይሳፌ ጉዬ ታ ሌሚሶራ ዮቶንታ ዎዴይ ያና። ጊዶ ኣቲን ኣዋ ጊሽ ኢንቴስ ዉርሳ ቆንጪሳ ዮታና። ሄ ዎዴ ኢንቴ ታ ሱንꬃን ዎሳና፤ ታካ ‘ኣዋ ኢንቴ ጊሽ ዎሳና’ ጊኬ። ጋሶይካ ኣዋይ ባ ባጋራ ኢንቴና ዶሲዛ ጊሻሳ። ኣዋይ ኢንቴና ዶሲዛይ ኢንቴ ታና ዶሲዛ ጊሻሲኔ ታ ፆሳ ኣቻፌ ዪዳ ኢንቴ ኣማኒዳ ጊሻሳ። ታኒ ኣዋ ኣቻፌ ኬዛዳ ሃይሳ ሃ ኣላሜ ያዲሲኔ ቃሴካ ሃ ኣላሜዛ ኣጋዳ ኣዋኮ ታ ሲማ ባና” ጊዴስ ኢዛ ካሊዛይቲ “ሄኮ ኔ ሃዒ ሌሚሶ ጊዶንታ ኑስ ቆንጬራ ዮታዳሳ። ኔ ዉርሳ ኤሪዛ ማላኔ ኦኒካ ኔና ኦይቻናስ ኮሾንታይሳ ሃዒ ኑ ኤሪዶስ። ሄሳ ጊሽ ኔ ፆሳ ኣቻፌ ኬዚዳይሳ ኑ ኣማኖስ” ጊዳ። ዬሱሲ ኢስታስ “ኢንቴ ሃዒ ኣማኒዴታ፤ ጊዶ ኣቲን ኢንቴ ኢንቴ ባጋራ ባጋራ ላሌቲዲ ታና ፃላ ኣጋና ዎዴይ ጋኪዴስ፤ ሄ ሳቴያካ ሃዒ ጋካዱስ። ጊዶ ኣቲን ኣዋይ ታናራ ጊዲዳ ጊሽ ታ ታርካ ዲኬ። ታ ሃይሳ ኢንቴስ ዮቲዛይ ኢንቴ ታናን ዴዒን ኢንቴስ ሳሮቴꬂ ዳና ማላ ጋዳ ዮታይስ። ኢንቴ ሃ ኣላሜን ዲሺን ኢንቴስ ዋዬይ ዴስ፤ ጊዶ ኣቲን ኣይኮይ ባ ታ ኣላሜ ፆናዲስ” ጊዴስ። ዬሱሲ ሄሳ ጊዳፔ ጉዬ ፑዴ ሳሎ ꬎቁ ጊ ፄሊዲ “ታ ኣዋዉ! ሄኮ ሃዒ ሳቴይ ጋኪዴስ፤ ኔ ናይ ኔና ቦንቻና ማላ ኔኒ ኔ ናዛ ቦንቻ። ኔ ቦንቻናይካ ኔ ኢዛስ ኢሚዳይታስ ኢዚ ሜርና ዴዖ ኢማና ማላ ኔ ኢዛስ ኣሳ ኡባ ቦላ ጎዳቴꬅ ኢሚዳ ጊሻሳ። ሜርና ዴዖይካ ኔ ፃላላ ቱሙ ፆሳኔ ኔ ኪቲዳ ዬሱስ ኪርስቶሳ ኤሮ ጉሳ። ኔ ታስ ኢሚዳ ኦሶ ታኒ ዉርሳዳ ሃ ቢታ ቦላ ኔና ቦንቻዲስ። ታ ኣዋዉ! ኣላሜይ ሜꬌታናፔ ካሴ ታስ ኔናራ ዲዛ ቦንቾን ሃዒካ ታና ኔ ኣቻን ቦንቻርኪ። “ሃይሳ ኣላሜ ኣሳፔ ኔ ታስ ዶራዳ ኢሚዳ ኣሳታስ ኔ ኦናኮኔ ታ ኢስታስ ኔና ቆንጪሳዲስ፤ ኢስቲ ካሴካ ኔይታ ሺን ኔ ታስ ኢማዳሳ፤ ኢስቲካ ኔ ቃላ ናጊዳ። ኔ ታስ ኢሚዳይሲ ዉሪካ ኔፔ ጊዲዳይሳ ኢስቲ ሃዒ ኤሪዳ። ኔ ታስ ኢሚዳ ቃላታካ ኢስታስ ኢማዲስ፤ ኢስቲካ ኤኪዳ፤ ታ ኔ ኣቻፌ ዪዳይሳ ኢስቲ ቱማፔ ኤሪዳ፤ ኔ ታና ኪቲዳይሳካ ኢስቲ ኣማኒዳ። “ታ ኢስታስ ዎሳይስ፤ ሄይቲ ኔ ታስ ኢሚዳይቲ ኢስቲ ኔይታ ጊዲዳ ጊሽ ታ ኢስታስ ዎሳይስ፤ ጊዶ ኣቲን ሃንኮ ኣላሜ ኣሳስ ዎሲኬ። ታስ ጊዲዳይ ዉሪካ ኔይሳ፤ ኔይሲ ዉሪካ ታይሳ፤ ታካ ኢስታን ቦንቼታና። ሃይሳፌ ጉዬ ታኒ ሃይሳ ኣላሜ ቦላ ዲኬ፤ ኢስቲ ጊዲኮ ሃ ኣላሜ ቦላ ዴቴስ። ሃዒ ታ ኔኮ ባይስ፤ ጌሻ ታ ኣዋዉ! ሃይታ ኔ ታስ ኢሚዳይታ ኢስቲ ኑ ማላ ባ ጊዶን ኢሲኖ ጊዳና ማላ ኔ ታስ ኢሚዳ ኔ ሱንꬃን ኢስታ ናጋ። ታ ኢስታራ ኢሲፌ ዳሼ ኔ ታስ ኢሚዳ ኔ ሱንꬃን ታ ኢስታ ናጋዲስ፤ ሄሳ ጊሽ ካሴ ፃፌቲዳ ጌኤሻ ማፃፋ ቃላይ ፖሌታና ማላ ኢዚ ካሴካ ꬋዮስ ዲዛ ናዛፔ ኣቲን ኢስታፌ ኦኒካ ꬋይቤና። ታ ቃሴ ሃዒ ኔኮ ባይስ፤ ታ ሃ ኣላሜዛ ቦላ ዳሼ ሃይሳ ዮቲዛይ ታ ኡፋይሲ ኢስታን ፖሌታና ማላ ጋዳ ዮታይስ። ታኒ ኔ ቃላ ኢስታስ ኢማዲስ፤ ታኒ ሃ ኣላሜ ኣስ ጊዶንታይሳ ማላ ኢስቲካ ሃ ኣላሜ ኣስ ጊዴቴና። ሄሳ ጊሽ ሃ ኣላሜ ኣሳይ ኢስታ ኢፂዴስ። ኔ ኢስታ ኢታፔ ናጋና ማላ ታ ኔና ዎሳይስ ኣቲን ኔ ኢስታ ሃ ኣላሜፔ ዴንꬃ ኤፋና ማላ ታ ኔና ዎሲኬ። ታኒ ኣላሜ ኣስ ጊዶንታይሳ ማላ ኢስቲካ ሃ ኣላሜ ኣስ ጊዴቴና። ኔ ኢስታ ኔ ቱማን ኔስ ሻካ፤ ኔ ቃላይካ ቱሙ ቃላ። ኔ ታና ሃ ኣላሜ ኪቶይሳꬆ ታካ ኢስታ ኣላሜዛ ቦላ ኪታዲስ። ኢስቲ ቱማፔ ኔስ ዱማ ኣስ ጊዲዳ ማላ ታኒካ ታና ኢስታ ጊሽ ዱማሳይስ። “ኢስታ ቃላ ማርካቴꬃን ታና ኣማናናይታ ጊሻራ ታ ኔና ዎሳይስ ኣቲን ታ ኔና ኢስታ ጊሽ ፃላላ ዎሲኬ። ታ ዎሲዛይ ኢስቲ ዉሪካ ኢሲኖ ጊዳና ማላሳ። ታ ኣዋዉ! ቃሴካ ኔ ታናን ዲዛ ማላ ኢስቲካ ኑናን ጊዳና ማላኔ ኔ ታና ኪቲዳይሳ ሃ ኣላሜይ ኣማናና ማላ ታ ኔና ዎሳይስ። ኑኒ ኑ ጊዶን ኢሲኖ ጊዲዳ ማላ ኢስቲካ ባ ጊዶን ኢሲኖ ጊዳና ማላ ኔ ታስ ኢሚዳ ቦንቾዛ ታካ ኢስታስ ኢማዲስ። ታ ኔና ዎሲዛይ ታ ኢስታን፤ ኔካ ታናን ጊዲዳ ማላ ኢስቲካ ኩሜꬅ ኢሲኖ ጊዳና ማላሳ። ቃሴካ ኔኒ ታና ኪቲዳ ማላኔ ታና ኔ ሲቂዳ ማላ ኢስታካ ኔ ሲቂዳይሳ ኣላሜ ኣሳይ ኤራናሳ። “ታ ኣዋዉ! ኔ ታና ሃይሲ ኣላሜይ ሜꬌታናፔ ካሴ ዶሲዳ ጊሽ ኔ ታስ ኢሚዳ ታ ቦንቾዛ ኢስቲ ቤያና ማላ ሃይታ ኔ ታስ ኢሚዳይቲካ ታ ዲዛሶን ታናራ ዳና ማላ ዶሳይስ። ፂሎ ጊዲዳ ታ ኣዋዉ! ኔና ኣላሜይ ኤሪቤና፤ ታ ጊዲኮ ኔና ኤራይስ፤ ሃይቲካ ኔ ታና ኪቲዳይሳ ኤሪዳ። ኔ ታና ሲቂዳ ሲቆይ ኢስታን ጊዳና ማላኔ ታካ ኢስታን ጊዳና ማላ ኢስቲካ ኔና ኤራና ማላ ኦꬃዲስ። ቃሴካ ኢስቲ ኤራና ማላ ኦꬃና” ጊዴስ። ሄሳ ዉርሲ ዮቲዳፔ ጉዬ ዬሱሲ ባና ካሊዛይታራ ቄዲሮኔ ጌቴቲዛ ሾባ ፒኒዲ ኣታኪልቴ ጊዶ ጌሊዴስ። ዬሱሲኔ ኢዛ ካሊዛይቲ ካሴካ ሄ ጋዴዪን ዳሮ ዎዴ ኢሲፌ ሺቂዛ ጊሽ ዬሱሳ ኣꬂ ኢሚዳ ዩሁዳይ ሄ ጋዴዮ ካሴካ ኤሬስ። ሄሳ ጊሽ ዩሁዳይ ዎታዳራታ፥ ቄሴታ ሃላቃታኔ ፋርሳዌታፔ ኪቴቲ ዪዳ ኣሽካራታ ዉርሲ ካሌꬂ ኤኪዲ ሄ ኢስቲ ሺቂዛሶ ዪዴስ። ኢዛራ ዪዳ ኣሳይ ፓኖሴ፥ ፆምፔ፥ ማሻኔ ቶራ ኦይኪዲ ዪዴስ። ዬሱሲ ባ ቦላ ጋካናይሳ ዉርሲ ኤሪዲ ዪዳ ኣሳኮ ቢዲ “ኦና ኮዬቲ?” ጊዴስ። ኢስቲ ቃሴ “ናዚሬቴ ዬሱሳ ኮዮስ” ጊዳ። ኢዚካ ኢስታስ “ታኒ ኢዛ” ጊዴስ። ኢስታስ ኣꬂ ኢሚዳ ዩሁዳይ ኢስታራ ኢሲፌ ኤቂዴስ። ዬሱሲ “ታ ኢዛ” ጊዳ ማላ ኣሳቲ ጉዬ ጋንዲጋሪዲ ቢታ ቦላ ኩንዲዳ። ዬሱሲ ሃዒካ “ኦና ኮዬቲ?” ጊዲ ኦይቺን ኢስቲ ዛሪዲ “ናዚሬቴ ዬሱሳ ኮዮስ” ጊዳ። ኢዚካ ዛሪዲ “ታኒ ኢዛኮ! ሂስቲን ኢንቴ ኮዪዛይ ታና ጊዲኮ ሃይቲ ቤቶ ቦቾፍቴ” ጊዴስ። ሄሲ ሃኒዳይ “ታ ኣዋዉ! ኔ ታስ ኢሚዳይታፔ ኢሳዴካ ታ ꬋይሳቤይኬ” ጊዳ ቃላይ ፖሌታና ማላሳ። ሲሞና ጌቴቲዛ ጴፅሮሲ ጊꬃ ማሻ ኦይኪዳ ጊሽ ማሻ ኮሆፔ ሾዲዲ ኢሲ ቄሴታ ሃላቃ ኣሽካራ ዲዛይሳ ሃይꬄ ማሻራ ቃንፂ ዬጊዴስ። ሄ ኣሽካራዛ ሱንꬂ “ማልኮሳ” ጌቴቴስ። ዬሱሲ ቃሴ ጴፅሮሳ “ኔ ማሻ ጌዴ ኮሆን ዛራ ጌልꬃ። ኣዋይ ታስ ኢሚዳ ዋዬ ኡሻ ታ ኡዮንታ ኣጋና ሚሳቲዜ?” ጊዴስ። ሄሳፌ ጉዬ ዎታዳራቲ፥ ኢስታ ኣዛዚዛይሲኔ ኣይሁዳታ ኣሽካራቲ ዬሱሳ ኦይኪዲ ቃቺዳ። ኮይሮ ሄ ላይꬃን ቄሴታስ ሃላቃ ቃያፋ ቦሎ ሃናኮ ኤፊዳ። ቃያፋይ “ዴሬ ጊሽ ኢሳዴይ ሃይቂኮ ሎዖ” ጊዲ ኣይሁዳታ ዳናታ ካሴ ዞሪዳዴ። ሲሞና ጌቴቲዛ ጴፅሮሲኔ ዬሱሳ ካሊዛይታፔ ኢሳዴይ ዬሱሳ ካሊዳ። ሄሳዴይ ቄሴታ ሃላቃ ኣቻን ኬሂ ኤሬቲዳዴ። ሄሳ ጊሽ ዬሱሳራ ኢሲፌ ቄሴታ ሃላቃዛ ጊቤ ጌሊዴስ። ጴፅሮሲ ጊዲኮ ፔንጌፌ ካሬ ባጋራ ኤቂዴስ። ቄሴታ ሃላቃ ኣቻን ኬሂ ኤሬቲዲ ዬሱሳ ካሊዛይሲ ዪዲኔ ፔንጌን ዲዛ ጋራዴያ ጴፅሮሳ ጊቤ ጊዶ ጌልꬃና ማላ ዮቲዲ ጴፅሮሳ ኤኪ ጌሊዴስ። ፔንጌ ናጊዛ ጋራዴያ ጴፅሮሳ “ኔካ ሄሳ ኣዴዛ ካሊዛ ኣሳታፔ ኢሳ ዲኪ?” ጋዱስ። ኢዚ ቃሴ “ታኒ ኢዛ ካሊዛዴ ጊዲኬ” ጊዴስ። ዎዴይ ሜጊዛ ዎዴ ጊዲዳ ጊሽ ኦሳንቻቲኔ ኣሽካራቲ ታማ ኤꬂዲ ኤቆን ሆዔቴስ። ጴፅሮሲካ ኢስታራ ኤቂዲ ሆዔስ። ሄ ዎዴ ቄሴታ ሃላቃይ ዬሱሳ ኢዛ ካሊዛይታ ጊሺኔ ኢዚ ታማርሲዳ ቲሚርቴ ጊሽ ኦይቺዴስ። ዬሱሲካ ኢዛስ “ታ ኣሳ ኡባስ ቆንጬን ዮታዲስ፤ ኣይሁዳቲ ሺቂዛ ኢስታ ዎሳ ኬꬃን ጊዲንካ ፆሳ ኬꬃን ታማርሳዲስ፤ ታ ቆታን ሃሳዪዳዚ ኣይኮይካ ዴና። ሂስቲን ኔ ታና ኦይቺዛይ ኣዜ? ታ ዮቲሺን ሲዪዳይታ ኦይቻ፤ ታ ዮቲዳይሳ ኢስቲ ኤሬቴስ” ጊዴስ። ዬሱሲ ሄሳ ጊዳ ማላ ሄን ኤቂዳ ኣሽካራታፔ ኢሶይ “ቄሴታ ሃላቃስ ሃይሳꬆ ዎስታ ዛራይ” ጊሼ ዬሱሳ ሻጋላን ባቃ ሻዪዴስ። ዬሱሲካ ዛሪዲ “ታ ኢታ ሃሳዪዳ ጊዲኮ ኣኔ ታ ጎይሳ ኔ ማርካታ፤ ታ ዮቲዳይ ሊኬ ጊዲኮ ታና ኣዛስ ባቃይ?” ጊዴስ። ሄሳፌ ጉዬ ሃናይ ዬሱሳ ቃቺዳ ማላ ቄሴታ ሃላቃ ቃያፋኮ ዬዲዴስ። ሄ ዎዴ ሲሞና ጌቴቲዛ ጴፅሮሲ ኤቂዲ ታማ ሆዒሺን ሃንኮ ኣሳይ ኢዛ ሃይሶ! ኔ ዬሱሳ ካሊዛይታፔ ኢሳ ዲኪ?” ጊዳ። ኢዚካ ዛሪዲ “ታ ኢዛ ካሊዛዴ ዲኬ” ጊዲ ካዲዴስ። ካሴ ጴፅሮሲ ኢዛ ሃይꬅ ቃንፂዳይሳ ዳቦይ ቄሴታ ሃላቃ ኣሽካራታፔ ኢሶይ “ዎና ታ ኔና ኣታኪልቴሶን ኢስታራ ዲሺን ቤያቤኪና?” ጊዴስ። ጴፅሮሲ ቃሴካ ካዲዴስ፤ ሄራካ ኩቶይ ዋሲዴስ። ሄሳፌ ጉዬ ዬሱሳ ቃያፋ ኬꬃፌ ዴሬ ኣይሲዛ ካዎዛ ጊቤ ማላዶ ዎንታራ ኤኪ ቢዳ። ኣይሁዳ ኣሳስ ፓዚጋ ባዓሌ ዶርሳ ኣሾ ሚዛ ዎዴ ጊዲዳ ጊሽ ባና ቱኒሶንታ ማላ ጊዲ ማላዶራ ዴሬ ኣይሲዛይሳ ጊቤ ጊዶ ጌሊቤቴና። ሄሳ ጊሽ ጲላፆሲ ጌዴ ኢስታኮ ኬዚዲ “ሃይሳ ኣዴዛ ኢንቴ ኣዛስ ሞቴቲ?” ጊዲ ኦይቺዴስ። ኢስቲ ቃሴ “ሃይሲ ኣዴዚ ኢታ ኦꬆንታዴ ጊዲዳኮ ኑ ኢዛ ኔስ ኣꬂ ኢሞኮሺን” ጊዳ ጲላፆሲካ “ኢንቴ ኢዛ ኤኪ ቢዲ ኢንቴ ዎጋ ማላ ፒርዲቴ” ጊዴስ። ኣይሁዳታ ኣይሲዛይቲ ቃሴ ዛሪዲ “ኑ ኣሲ ዎꬋና ማላ ኑስ ፒቃዴይ ኢሜቲቤና” ጊዴስ። ሄሲካ ሃኒዳይ ዬሱሲ ካሴ ኢስታስ ኢዚ ዋኒ ሃይቃናኮኔ ዮቲዳ ቃላይ ፖሌታና ጊሻሳ። ጲላፆሲ ቃሴካ ጉዬ ጊቤ ጊዶ ጌሊዲ ዬሱሳ ፄይጊሲዲ “ኔ ኣይሁዳታ ካዎ?” ጊዲ ኦይቺዴስ። ዬሱሲካ ዛሪዲ “ኔ ሄሳ ጊዛይ ኔፔዬ? ዎይኮ ሃራ ኣሳቲ ታ ጊሽ ኔስ ዮቲዶ?” ጊዴስ። ጲላፆሲካ “ታ ኣይሁዳ ኣሴ? ኔና ታስ ኣꬂ ኢሚዳይቲ ኔ ባጋታኔ ቄሴታ ሃላቃታኮ፤ ኔ ኣይ ኦꬃዲ?” ጊዴስ። ዬሱሲካ “ታ ካዎቴꬂ ሃይሳ ሃ ኣላሜ ቦላ ጊዴና። ታ ካዎቴꬂ ሃይሳ ሃ ኣላሜ ቦላ ጊዲዳኮ ኣይሁዳታ ዳናታ ኩሼን ታ ኩንዶንታ ማላ ታ ኣሽካራቲ ታ ጊሽ ኦሌታናኮሺን ታ ካዎቴꬂ ጊዲኮ ሃ ኣላሜ ቦላ ጊዴና” ጊዴስ። ጲላፆሲካ “ሂስቲን ኔ ካዎ?” ጊዴስ፤ ዬሱሲ ቃሴ “ታኒ ኔ ጊዳይሳ ማላ ኤ ካዎ፤ ታ ዬሌቲዳይኔ ሃ ቢታ ዪዳይ ቱማ ጊሽ ማርካታናሳ። ቱማፔ ጊዲዳይ ዉሪ ታ ቃላ ሲዬስ” ጊዴስ። ጲላፆሲካ “ቱማይ ኣዜ?” ጊዴስ። ሄሳፌ ጉዬ ጲላፆሲ ናምዓንꬆ ኣይሁዳታኮ ኬዚዲ “ታ ኢዛ ቦላ ኣይኮ ባላ ቤያቤኬ። ጊዶ ኣቲን ካሴካ ታ ኢንቴስ ፓዚጋ ባዓሌ ጋላስ ኢሲ ቃሾ ኣሲ ቢርሺዛ ማላ ሃይሳ ኣይሁዳታ ካዎ ኢንቴስ ቢርሻና ማላ ኮዬቲ?” ጊዴስ። ኢስቲ ጊዲኮ “ኑስ ባርባኔ ቢርሻ ኣቲን ሃይሳ ዴና!” ጊዲ ዋሲዳ። ባርባኔይ ባ ሁዔስ ፓንጋ። ሄሳፌ ጉዬ ጲላፆሲ ዬሱሳ ኤፊዲ ጋራፊሲዴስ። ዎታዳራቲካ ኣጉንꬃ ዛዉዴ ፃፂዲ ዬሱሳ ሁዔን ዎꬂዳ፤ ዞዖ ካባካ ማይዚዳ። ኢዛኮ ሺቂ ሺቂዲ “ኣይሁዳ ካዎ ሳሮ! ሳሮ!” ጊ ጊዲ ኢዛ ሻጋላን ባቂዳ። ጲላፆሲ ቃሴካ ካሬ ኬሲዲ “ሄኮ ታ ኢዛ ቦላ ኣይኮ ሞሮካ ዴሞንታይሳ ኢንቴ ኤራና ማላ ታ ኢዛ ኢንቴስ ሃ ካሬ ኬሳና” ጊዴስ። ሄሳ ጊሽ ዬሱሲ ኣጉንꬃ ዛዉዴ ሁዔን ዎꬂ ኤኪዲኔ ዞዖ ካባ ማይዒዲ ካሬ ኬዚዴስ። ጲላፆሲካ ኢስታስ “ሄኮ ኣዴዚ ሃይሲች!” ጊዴስ። ቄሴታ ሃላቃቲኔ ኢስታ ኣሽካራቲ ዬሱሳ ቤዪዲ “ኔ ኢዛ ካቃ! ካቃ!” ጊሼ ዋሲዳ። ጲላፆሲ ቃሴ “ታ ታ ባጋራ ኢዛ ቦላ ኢሲ ሞሮካ ዴማቤኬ፤ ኮይኮ ኢንቴ ኤፊዲ ካቂቴ” ጊዴስ። ኣይሁዳ ኣሳቲ ቃሴ “ኑስ ዎጋይ ዴስ፤ ሃይሲ ኣዴዚ ባና ፆሳ ና ጊዛ ጊሽ ኑ ዎጋ ማላ ኢዛስ ሃይቆይ ቤሴስ” ጊዳ። ጲላፆሲ ሄሳ ኢስቲ ጊዛይሳ ሲይዲ ዳሮ ባቢዴስ። ጌዴ ጊቤ ጌሊዲ ዬሱሳ “ኔ ኣዋፔ ያዲ?” ጊዲ ኦይቺዴስ። ዬሱሲ ቃሴ ኢዛስ ኣይ ዛሮካ ኢሚቤና። ሄሳ ጊሽ ጲላፆሲ “ኔ ታስ ዮቲኪ? ታ ኔና ካቃናስ ዎይኮ ቢርሻ ዬዳናስ ጎዳቴꬂ ታስ ዲዛይሳ ኤሪኪ?” ጊዴስ። ዬሱሲካ ኢዛስ ዛሪዲ “ሼኔይ ኔስ ፆሳፌ ኢሜቶንታኮ ኔስ ታ ቦላ ኣይ ጎዳቴꬂካ ዴናሺን፤ ጊዶ ኣቲን ታና ኔስ ኣꬂ ኢሚዳዴ ቦላ ጊታ ናጋራይ ዴስ” ጊዴስ። ጲላፆሲ ሄሳ ዬሱሳ ሃሳያ ሲዪዳፔ ጉዬ ኢዛ ቢርሺ ዬዳና ኮዪዴስ ሺን ኣይሁዳታስ ባቢዳ ጊሽ ኢስቲ “ኔ ሃይሳ ኣዴዛ ቢርሺኮ ኦሮሜ ካዎ ቄሳሬ ባጋ ጊዳካ፤ ጋሶይካ ባና ባርካ ካዎꬂዛዴይ ዉሪ ቄሳሬስ ሞርኬ” ጊሼ ዉሪካ ዋሲዳ። ጲላፆሲ ሄሳ ሲዪዳ ማላ ዬሱሳ ጌዴ ካሬ ኬሲዲ “ሎቻ ሹች” ጌቴቲዛ ሶን ፒርዳ ዎምቦራን ኡቲዴስ። ሄ ፒርዳሶይ ኣይሁዳታ ቃላራ “ጋባታ” ጌቴቴስ። ሄ ዎዴ ጋዴይ ኣሲ ፓዚጋ ባዓሌስ ጊጌቲዛ ጋላሳ። ዎዴይካ ጋላሳፌ ኡሱፑን ሳቴ ማላ ጊዲዴስ። ሄ ዎዴ ጲላፆሲ ኣይሁዳታ “ሄኮ ኢንቴ ካዎይ ሃይሲች!” ጊዴስ። ጊዶ ኣቲን ኢስቲ ቃስ “ጌዴ ዲጋ! ጌዴ ዲጋ! ካቃ!” ጊሼ ዋሲዳ። ጲላፆሲካ “ታ ኢንቴ ካዎ ካቆ?” ጊዴስ። ቄሴታ ሃላቃቲ ዛሪዲ “ኑስ ቄሳሬፔ ሃራ ካዎይ ዴና” ጊዳ። ሄሳፌ ሲሚዲ ጲላፆሲ ዬሱሳ ካቃና ማላ ኢስታስ ኣꬂ ኢሚዴስ። ኢስቲካ ዬሱሳ ኦይኪ ኤኪ ኤፊዳ። ሄሳፌ ጉዬ ዬሱሲ ባ ካቄታና ማስቃሌዛ ቶኪዲ “ኣሳ ሁዔ ጉጌ” ጌቴቲዛሶ ኬዚዴስ። ሄሶይ ኣይሁዳታ ቃላራ “ጎልጎታ” ጌቴቴስ። ኢዛ ሄን ካቂዳ። ዬሱሳ ጊዶ ጌልꬂዲ ሃራ ናምዑ ኣሳታ ኢዛꬆ ሃዲሪሳራኔ ኡሻቻራ ካቂዳ። ጲላፆሲ “ናዚሬቴ ዬሱሲ ኣይሁዳታ ካዎ” ጊዛ ቃላ ፃፊዲ ኢዛ ማስቃሌ ቦላ ኢዛስ ሁዔሶራ ቃጲዴስ። ዬሱሲ ካቄቲዳሶይ ካታማስ ማታ ጊዲዳ ጊሽ ዳሮ ኣይሁዳ ኣሳይ ጲላፆሲ ፃፊዳይሳ ናቤቢዴስ። ፃፌቲዳይሲካ ኣይሁዳታ ቃላራ፥ ላቲኔ ጌቴቲዛ ቃላራኔ ጊሪኬ ቃላራ። ኣይሁዳታ ቄሴታ ሃላቃቲ ጲላፆሳ “ኔ ኢዛ ኣይሁዳታ ካዎ” ጋዳ ፃፎፓ። ጊዶ ኣቲን “ ‘ሃይሲ ኣዴዚ ባና ታ ኣይሁዳታ ካዎ ጊዴስ’ ጋዳ ፃፋ” ጊዳ። ጲላፆሲ ቃስ “ታ ፃፊዳይሳ ፃፋዲስ” ጊዴስ። ዎታዳራቲ ዬሱሳ ካቂዳፔ ጉዬ ኢዛ ማይዖዛ ኤኪዲ ዎታዳራታ ኢሳ ኢሳ ጋካና ማላ ኦይዱ ኬሲ ሻኬሬꬂዳ። ጋርሳራ ማይዒዛ ማይዖዛካ ሄሳꬆ ሻኬሬꬂዳ። ጊዶ ኣቲን ጊዶራ ማይዒዛ ማይዖዚ ሲኬቶንታ ፑዴፔ ዱጌ ጋካናስ ጮ ዬዳ ዴስ። ሄሳ ጊሽ ዎታዳራቲ ባ ጊዶን “ጊሻን ኦና ጋካናኮኔ ኤራና ማላ ኢዛ ቦላ ሳማ ዬጋና ኣቲን ዳኮኮ” ጊዳ። ሄሲካ ሃኒዳይ ካሴ “ታ ማይዖ ኢስቲ ጊሼቲ ኤኪዳ፥ ታ ቦላራ ማይዒዛ ማይዖዛ ቦላ ሳማ ዬጊዳ” ጌቴቲዳ ጌሻ ማፃፋ ቃላይ ፖሌታና ማላሳ። ዎታዳራቲካ ሄሳ ኦꬂዳ። ዬሱሳ ማስቃሌ ኣቻን ኢዛ ኣዬያኔ ኣዬዪ ሚቼያ ቃሊዮጳ ማቻ ማራማኔ ሜግ ዳሌ ጌቴቲዛሶፔ ዪዳ ማራማ ሄን ኤቂዳ። ዬሱሲ ባ ኣዬዮኔ ኢዚ ሲቂዛ ኢዛ ካሊዛይሲ ባ ኣቻን ኤቂዳይታ ቤዪዲ፥ ባ ኣዬዮ “ኣዬ! ኔ ናዛ ሄሳ ቤያ” ጊዴስ። ሄሳፌ ካሌꬂዲ ባና ካሊዛይሳ “ኔ ኣዮ ሂኖ ቤያ” ጊዴስ። ሂኖ ሄ ሳቴይፔ ሲሚን ሄ ኢዛ ካሊዛይሲ ኣዬዮ ባሶ ኤፊዴስ። ሄሳፌ ጉዬ ዬሱሲ ሃዒ ዉሪካ ፖሌቲዳይሳ ኤሪዲ ጌሻ ማፃፋን ፃፌቲዳይሲ ፖሌታና ማላ “ታና ሳሜስ” ጊዴስ። ሄን ጋዳን ጫላ ጳንቂዳ ኡሺ ኩሚ ኡቲዳ ኢሲ ፃሮ ማላይ ዴስ። ሄሳ ጊሽ ሄን ጋዳን ዲዛይቲ ሄ ጫላ ኡሻ ዛንꬓ ሚሳቲዛ ሳፍናጌ ጌቴቲዛይሳራ ሂሶጴ ጌቴቲዛ ሚꬃ ፄራን ቃጲዲ ኢዛ ዱናኮ ሺሺዳ። ዬሱሲ ሄ ጫላ ኡሻ ፁንፂ ፄሊዲ “ፖሌቲዴስ!” ጊዴስ። ባ ሁዔ ዱጌ ዚቂሲዲ ሼምፖ ኬዚዴስ። ሄሳፌ ጉዬ ኣይሁዳታ ዳናቲ ካቄቲዳ ኣሳታ ሜቄꬅ ዎዲራፔ ሜንꬂዲ ኢስቲ ኢዛ ማስቃሌ ቦላፌ ዎꬃና ማላ ጲላፆሳ ዎሲዳ። ኢስቲ ሄሳ ኦꬂዳይ ኣይሁዳቲ ሳምባታስ ጊጌቲዛ ጋላስ ጊዲዳ ጊሺኔ ሄ ሳምባታይካ ዳሮ ጊታ ባዓሌ ጊዲዳ ጊሽ ሳምባታ ጋላስ ኣሃይ ማስቃሌ ቦላ ጋምዖንታ ማላ ኮይዳ ጊሻሳ። ሄሳ ጊሽ ዎታዳራቲ ቢዲ ዬሱሳራ ካቄቲዳ ኣሳታ ሜቄꬅ ዎዲራፔ ዎዲራፔ ሜንꬂዳ። ኢስቲ ዬሱሳኮ ቢን ኢዚ ካሴቲዲኔ ሃይቂዳይሳ ቤዪዲ ኢዛ ዎዲራ ሜቄꬅ ሜንꬂቤቴና። ጊዶ ኣቲን ዎታዳራታ ጊዶፌ ኢሳዴይ ቶራራ ኢዛ ሚሌን ጫዲን ሄራካ ሱꬂኔ ሃꬂ ጉኪዴስ። ሄሳ ቤዪዳዴይ ኢንቴ ኢዛን ኣማናና ማላ ማርካቲዴስ። ኢዛ ማርካይካ ቱማ። ኢዚ ዮቲዛይካ ቱሙ ጊዲዳይሳ ኢዚ ኤሬስ። ሄሲካ ሃኒዳይ “ኢዛ ሜቄꬃፌ ኢሲናካ ሜቁኩ” ጌቴቲዳ ጌሻ ማፃፋ ቃላይ ፖሌታናሳ። ቃሴካ ጌሻ ማፃፋን ሃራሶን “ኢስቲ ባ ጫዲዳዴ ቤያና” ጌስ። ኣይሁዳታ ዳናታ ባቢዲ ቆታን ዬሱሳ ካሊዛ ኣርማቲያሳ ጌቴቲዛሶፔ ዪዳ ዮሴፌይ ዬሱሳ ኣሃ ኤካናስ ጲላፆሳ ዎሲን ጲላፆሲካ ኢዛስ ኤሮ ጊዴስ። ሄሳ ጊሽ ዮሴፌይ ቢዲ ዬሱሳ ኣሃ ኤኪዴስ። ካሴ ዬሱሳኮ ቃማራ ዪዳ ኒቆዲሞሲካ ባጋ ኪሎ ጊዲዛ ካርቤኔ ጎዳሬ ኡꬃራ ዋላኬቲዳ ሺቶ ኤኪ ዪዴስ። ሄ ናምዑ ኣሳቲ ዬሱሳ ኣሃ ኤኪዲ ኣይሁዳቲ ኣሃ ፃፂዛ ማላ ሺቶ ፑኪዲ ሌዔ ማይዖራ ፃፂዳ። ዬሱሲ ካቄቲዳሶን ኢሲ ኣታኪልቴሶይ ዴስ። ሄ ኣታኪልቴዛሶን ኦኒካ ሞጌቶንታ ኦራꬃ ዱፎይ ዴስ። ኣይሁዳታ ሳምባታስ ጊጌቲዛ ጋላስ ጊዲዳ ጊሺኔ ዱፎይካ ማታን ዲዛ ጊሽ ዬሱሳ ኣሃ ሄን ሞጊዳ። ዎጋ ጋላስ ዎንታ ማላዶ ቡሮ ባዞይ ዞዒሺን ማግዳሌ ማራማ ዬሱሳ ዱፎኮ ባዱስ። ኢዛ ሄ ጋኪሺን ካሴ ዬሱሳ ዱፎ ኢዛራ ጎርዲዳ ሹቻይ ዱፎዛ ዱናፔ ዴንዲዲ ጌንዴሪዳይሳ ቤያዱስ። ሄሳ ጊሽ ኢዛ ዬሱሳ ካሊዛይታፔ ሲሞና ጌቴቲዛ ጴፅሮሳኮ ዬሱሲ ዶሲዛ ሃንኮ ኢዛ ካሊዛይሳኮ ዎፃ ባዳ “ጎዳ ዱፎፔ ኬሲ ኤኪዲ ኣዋን ዎꬂዳኮኔ ኑ ኤሮኮ” ጋዱስ። ሄራካ ጴፅሮሲኔ ዬሱሳ ካሊዛ ሂንኮ ኢሶይ ኬዚዲ ጌዴ ዱፎይ ዲዛሶ ቢዳ። ናምዓይካ ኢሲፌ ዎፂዳ። ጊዶ ኣቲን ዬሱሳ ካሊዛ ሂንኮይሲ ጴፅሮሳፔ ፒላቲ ዎፂዲ ካሴቲ ዱፎይ ዲዛሶ ጋኪዴስ። ዱፎዛ ሆኪ ፄሊዲ ኣሃይ ኢዛን ፃፄቲዳ ማይዖይ ፃላ ዲዛይሳ ቤዪዴስ፤ ጊዶ ኣቲን ጌዴ ዱፎዛ ጊዶ ጌሊቤና። ሲሞና ጌቴቲዛ ጴፅሮሲካ ኢዛ ካሊ ጋኪዲ ዱፎዛ ጊዶ ጌሊዴስ፤ ኣሃይ ኢዛን ፃፄቲዳ ጫርቃይ ሄን ዲዛይሳ ቤዪዴስ። ዬሱሳ ሁዔይ ፃፄቲዳ ጫርቃይ ሃንኮ ፃꬃ ጫርቃታራ ጊዶንታ ዱማ ሃራሶን ፃፄቲ ዲዛይሳ ቤዪዴስ። ኮይሮቲ ጋኪዳ ዬሱሳ ካሊዛይሲካ ዱፎዛ ጊዶ ጌሊ ቤዪዲ ኣማኒዴስ። ጋሶይካ “ኢዚ ሃይቆፔ ዴንዳና ቤሴስ” ጊዛ ማፃፋ ቃላ ኢስቲ ቡሮ ሃሳዪቤቴና። ሄሳፌ ጉዬ ናምዓቲካ ሲሚዲ ባሶ ባሶ ቢዳ። ማግዳሌ ማራማ ዬካሼ ዬሱሳ ዱፎፔ ካሬራ ኤቃዳ ሆካ ዱፎዛ ጊዶ ፄላዱስ። ዬሱሳ ኣሃይ ዲዛሶን ቦꬃ ማይዖ ማይዒዳ ናምዑ ኪታንቻታፔ ኢሶይ ሁዔሶን ኢሶይ ቶሆሶን ኡቲዳይታ ቤያዱስ። ኢስቲካ ማራሞ “ሃኔ ማጫሳዬ! ኣዛስ ዬካይ?” ጊዳ። ኢዛካ “ኢስቲ ታ ጎዳ ኤፊዲ ኣዋን ዎꬂዳኮኔ ታ ኤሪኬ” ጋዱስ። ኢዛ ሂኖ ጋዳ ጉዬ ዩዪሺን ዬሱሲ ኤቂዳይሳ ዴማዱስ ሺን ኢዚ ዬሱሳ ጊዲዳይሳ ኤራቤይኩ። ዬሱሲ ኢዞ “ሃኔ ማጫሳዬ! ኣዛስ ዬካይ? ቃሴ ኦና ኮያይ?” ጊዴስ፤ ኢዚካ ኢዚስ ኣታኪልቴ ናጊዛዴ ሚሳቲን “ጎዶ! ኔ ኤኪዳ ጊዲኮ ኔ ዎꬂዳሶ ታስ ዮታርኪ፤ ታ ኢዛ ታስ ኤካና” ጋዱስ። ዬሱሲ ኢዞ “ማራሜ!” ጊዴስ፤ ኢዛካ ጌዴ ኢዛኮ ሲማዳ ኣይሁዳታ ቃላራ “ሬቡኔ!” ጋዱስ፤ ሄሳ ቢርሼꬂ “ኣስታማሬ!” ጉሳ። ዬሱሲ ቃስ “ታ ቡሮ ፑዴ ታ ኣዋኮ ኬዛቤኬ፤ ታና ቦቾፋ፤ ጊዶ ኣቲን ኔ ሃዒ ታ ኢሻታኮ ባዳ ‘ታኒ ታ ኣዋኮኔ ኢንቴ ኣዋኮ፥ ታ ፆሳኮኔ ኢንቴ ፆሳኮ ኬዛና ጊዴስ’ ጋዳ ኢስታስ ዮታ” ጊዴስ። ሄሳ ጊሽ ማግዳሌ ማራማ ዬሱሳ ካሊዛይታኮ ባዳ ኢዛ ዬሱሳ ቤዪዳይሳኔ ኢዚ ኢዚስ ዮቲዳይሳ ኢስታስ ዮታዱስ። ሄ ጋላስ ዎጋ ኦማርስ ዬሱሳ ካሊዛይቲ ኣይሁዳታ ዳናታስ ባቢዲ ካሬ ባ ቦላ ጎርዲዲ ኬꬃ ጊዶን ሺቆን ዲሺን ካሬይ ዶዬቶንታ ዬሱሲ ኢዛ ካሊዛይቲ ሺቂ ዲዛ ኬꬃ ጌሊዴስ፤ ኢስታ ጊዶን ኤቂዲ “ሳሮይ ኢንቴስ ጊዶ!” ጊዴስ። ሄሳ ጊ ሲሚዲ ባ ኩሼታኔ ባ ሚሌ ኢስታ ቤሲዴስ፤ ኢዛ ካሊዛይቲካ ጎዳ ቤዪዲ ኬሂ ኡፋዬቲዳ። ሄሳፌ ጉዬ ቃሴካ ዬሱሲ ኢስታ “ኢንቴስ ሳሮይ ጊዶ! ታ ኣዋይ ታና ኪቲዳ ማላ ታካ ኢንቴና ኪታይስ” ጊዴስ። ሄሳ ጊ ሲሚዲ ኢስታ ቦላ ኡፉ ጊዲ “ኢንቴ ፂሎ ኣያና ኤኪቴ። ኢንቴ ኣሳ ናጋራ ኣቶ ጊኮ ኢስታስ ኣቶ ጌቴታና፤ ኢንቴ ኣሳ ናጋራ ኣቶ ጎንታ ኢፂኮ ቃስ ኢንቴስ ኣቶ ጌቴቴና” ጊዴስ። ዬሱሲ ባና ካሊዛይታኮ ዪዳ ዎዴ ታማኔ ናምዓታፔ ኢሶይ ዲዲሞሳ ጌቴቲዛ ቶማሲ ኢስታራ ዴና። ሄሳ ጊሽ ሃንኮ ዬሱሳ ካሊዛይቲ ቶማሳ “ኑ ጎዳ ቤይዶስ” ጊዳ። ቶማሲ ቃስ “ሚሲማሬን ጫዴቲዳ ኢዛ ኩሼታ ታኒ ታ ኣይፌራ ቤዮንታ ዳሼ፥ ቃሴካ ታ ቢራꬌ ሚሲማሬይ ጌሊዳሶን ጌልꬃ ፄሎንታ ዳሼኔ ታ ኩሼ ኢዛ ሚሌ ማዱንꬃን ጌልꬃ ፄሎንታ ዳሼ ኣማኒኬ” ጊዴስ። ሄሳፌ ካሊን ኦሱፑን ጋላሳፌ ጉዬ ኢዛ ካሊዛይቲ ቃሴካ ኬꬃ ጊዶን ዲሺን፤ ቶማስካ ኢስታራ ኢሲፌ ዲሺን፤ ካሬይካ ጎርዳን ዲሺን ዬሱሲ ዪዲ ኢስታ ጊዶን ኤቂዲ “ሳሮይ ኢንቴስ ጊዶ!” ጊዴስ። ሄሳፌ ጉዬ ቶማሳ “ኔ ቢራꬌ ሃ ኤሃዳ ታ ኩሼታ ቤያ። ኔ ኩሼ ሃ ኤሃዳ ታ ሚሌን ጌልꬃ ኣማና ኣቲን ኣማኖንታዴ ጊዶፓ” ጊዴስ። ቶማሲ “ታ ጎዶ! ታ ፆሶ!” ጊዴስ። ዬሱሲካ ቶማሳ “ኔኒ ታና ቤዪዳ ጊሽ ኣማናዳሳ፤ ታና ቤዮንታ ኣማኒዛይቲ ጊዲኮ ኢስቲ ኣንጄቲዳይታ” ጊዴስ። ሃይሳ ማፃፋን ፃፌቶንታ ዳሮ ማላታታ ባና ካሊዛይታ ሲንꬃን ዬሱሲ ኦꬂዴስ። ጊዶ ኣቲን ዬሱሲ ኢዚ ማሲሄ፥ ፆሳ ና ጊዲዳይሳ ኢንቴ ኤራና ማላኔ ኢንቴ ኢዛ ሱንꬃን ኣማኒዲ ዴዖ ዴማና ማላ ሃይሲ ፃፌቲዴስ። ሄሳፌ ጉዬ ዬሱሲ ፂቢራዶሴ ኣባ ኣቻን ባና ካሊዛይታስ ቃሴካ ቤቲዴስ። ሲሞና ጌቴቲዛ ጴፅሮሲ፥ ዲዲሞሳ ጌቴቲዛ ቶማሲ፥ ጋሊላ ቃና ኣስ ጊዲዳ ናቲናዔሌይ፥ ዛቢዶሳ ናይቲካ ዬሱሳ ካሊዛይታፔ ሃራ ናምዓቲካ ዉሪ ኢሲፌ ዲሺን ሲሞና ጌቴቲዛ ጴፅሮሲ ኢስታስ “ታ ሞሌ ኦይካና ባይስ” ጊዴስ፤ ኢስቲካ ኢዛስ “ኑካ ኔናራ ባና” ጊዳ። ኢዛራ ኬዚ ቢዲ ዎጎሎን ጌሊዳ ሺን ሄ ጋላስ ኦማርስ ኢሲ ሞሌካ ኦይኪቤቴና። ጋዴይ ዎንቲሺን ዬሱሲ ኣባ ኣቻን ኤቂዴስ፤ ኢዛ ካሊዛይቲ ቃስ ኢዚ ዬሱሳ ጊዲዳይሳ ኤሪቤቴና። ዬሱሲ ኢስታ “ናይቶ ሞሌይ ዲዜ?” ጊዴስ፤ ኢስቲካ “ኣይኮይካ ባዋ” ጊዳ። ኢዚካ “ጊቴዛ ዎጎሎዛፔ ኡሻቻ ባጋራ ኣባን ዬጊቴ፤ ኢንቴ ዴማና” ጊዳ ጊሽ ጊቴዛ ኣባ ጊዶ ዬጊዳኔ ዳሮ ሞሌይ ኦይኬቲዳ ጊሽ ጊቴዛ ሞሌዛራ ጎቻና ዳንዳይቤቴና። ሄሳ ዎዴ ዬሱሳ ካሊዛይታፔ ኢዚ ሲቂዛ ኢሶይ ጴፅሮሳስ “ሄሲ ጎዳኮ!” ጊዴስ። ሲሞና ጌቴቲዛ ጴፅሮሲ “ሄሲ ጎዳኮ!” ጊዛ ቃላ ሲዪዳ ማላ ካሴ ኦሶ ዲጎፎ ጊዲ ማይዖ ቃሪ ዎꬂዲ ካሎ ዲዛ ጊሽ ሄራካ ማይዖ ኤኪ ማይዒዲ ኣባ ጊዶ ጉፒ ጌሊዴስ። ዬሱሳ ካሊዛ ሃንኮይቲ ቃስ ቢታፌ ፄቱ ሜትሬ ማላ ሃኪ ዲዛ ጊሽ ሞሌይ ኩሚ ዲዛ ጊቴዛ ጎቺ ኤኪዲ ዎጎሎራ ጋኪዳ። ኢስቲ ዎጎሎዛፔ ዎꬊሺን ሞሌይ ኢዛ ቦላ ዲዛ ቦንቆ ታማኔ ኡኬꬂ ቤዪዳ። ዬሱሲ ኢስታ “ሃዒ ኢንቴ ኦይኪዳ ሞሌዛፔ ኣኔ ሃ ኤኪ ዪቴ” ጊዴስ። ሄሳ ጊሽ ሲሞና ጌቴቲዛ ጴፅሮሲ ዎጎሎዛ ጊዶ ጌሊዲ ፄታኔ ኢቻሹ ታማኔ ሄꬑ ዎጋ ጊታ ሞሌቲ ኩሚዳ ጊቴዛ ኣባፌ ጌዴ ጋዴ ቦላ ጎቺዴስ። ሄሳ ማላ ዳሮ ሞሌራ ዲንካ ጊቴዚ ዳኬቲቤና። ሄሳፌ ጉዬ ዬሱሲ ኢስታ “ሃ ዪዲ ሚቴ” ጊዴስ። ኢዚ ጎዳ ዬሱሳ ጊዲዳይሳ ዉሪ ኤሪዳ ጊሽ ኢዛ ካሊዛይታፔ ኢሳዴይካ “ኔ ኦኔ?” ጊ ኦይቻናስ ፃሊዳዴይ ባዋ። ዬሱሲ ዪዲ ኡኬꬃኔ ሞሌዛ ኤኪዲ ኢስታስ ኢሚዴስ። ዬሱሲ ሃይቆፔ ዴንዲን ኢዛ ካሊዛይቲ ኢዛ ቤዪሺን ሃይሲ ሄꬓንꬆ። ኢስቲ ሚ ጊጊሺን ዬሱሲ ሲሞና ጴፅሮሳ “ዮና ና ሲሞና! ሃይታንታፌ ኔ ታና ኣꬃ ታና ዶሳይ?” ጊዴስ። ኢዚካ “ኤ ታ ጎዶ! ታ ኔና ዶሲዛይሳ ኔካ ኤራሳ” ጊዴስ። ዬሱሲ ኢዛ “ታ ꬋሚዛይታ ሄማ” ጊዴስ፤ ናምዓንꬆካ “ዮና ና ሲሞና! ኔ ታና ዶሳይ?” ጊዴስ፤ ኢዚካ ዛሪዲ “ኤ ጎዶ! ታ ኔና ዶሲዛይሳ ኔካ ኤራሳ” ጊዴስ፤ ዬሱሲ ቃሴካ “ላቃታ ናጋ” ጊዴስ። ሄꬓንꬆ “ዮና ና ሲሞና! ኔ ታና ዶሳይ?” ጊዴስ። ኢዚ ሄꬓንꬆ “ኔ ታና ዶሳይ?” ጊዳ ጊሽ ጴፅሮሲ ሚቼቲዲኔ “ጎዶ! ኔ ዉርሳ ኤራሳ ታ ኔና ዶሲዛይሳካ ኔ ኤራሳ” ጊዴስ፤ ዬሱሲካ ቃሴካ “ታ ዶርሳታ ሄማ። ታ ኔስ ቱሙ ጋይስ፤ ኔ ናቴꬃን ዳሼ ኔ ጊꬄ ኔርካ ጊፃዳ ኔ ኮዪዳሶ ባሳሺን፤ ኔ ጪሚዛ ዎዴ ጊዲኮ ኔኒ ኔ ኩሼታ ፒዲሲን ሃራ ኣሲ ኔና ጊፂሳናኔ ኔ ዶሶንታሶ ኔና ኤፋና” ጊዴስ። ዬሱሲ ኢዛ ሄሳꬆ ጊዳይ ጴፅሮሲ ኣይ ማላ ሃይቆን ፆሴ ቦንቻናኮኔ ኢዛስ ኤሪሳናሳ፤ ሄሳፌ ጉዬ ጴፅሮሳ “ኔ ታና ካላ” ጊዴስ። ጴፅሮሲ ዩሺ ፄሊዲ ዬሱሲ ዶሲዛይሲ ኢዛ ካሊሺን ቤዪዴስ፤ ሄሳዴይ ካሴ ኢስቲ ካዎ ሚሺን ዬሱሳ ሃይꬃኮ ሺቂዲ “ጎዶ! ኔና ኣꬂ ኢማናዴይ ኢዚ ኦኔ?” ጊ ኦይቺዴስ። ጴፅሮሲ ኢዛ ቤዪዲ “ጎዶ! ሃይሳዴይ ዋናንዴ?” ጊዲ ዬሱሳ ኦይቺዴስ። ዬሱሲካ ኢዛስ “ታ ሃ ሲማ ያና ጋካናዉ ታ ኢዛ ፓፃ ዎꬂኮ ኔና ኣዚ ጋꬂዴ? ኔ ታና ካላ” ጊዴስ። ሄሳ ጋሶን ኢሻታ ጊዶን “ኢዚ ሃይቆ ሃይቄና” ጊዛ ዎሬይ ላሌቲዴስ። ጊዶ ኣቲን ዬሱሲ “ታ ያና ጋካናስ ፓፃ ዳና ማላ ታ ኮይኮ ኔና ኣዜ ጋꬂዳይ?” ጊዴስ ኣቲን “ሃይቃካ” ጊቤና። ሄ ዮዖታ ጊሽ ማርካቲዳይኔ ፃፊዳይ ሃ ዬሱሳ ካሊዛይሳ፤ ኢዛ ማርካቴꬂካ ቱሙ ጊዲዳይሳ ኑኒ ኤሮስ። ዬሱሲ ኦꬂዳ ሃራ ዳሮቲ ዴቴስ። ታስ ሚሳቲዛ ማላ ኢዚ ኦꬂዳ ሚሻታ ዉርሲ ኢሲ ቦላ ፃፊዛኮ ፃፌቲዛ ማፃፋታ ሃይሲ ኣላሜይ ቶካና ዳንዳዬና። ቶፊሎሳ፥ ዬሱሲ ኦꬃናሲኔ ታማርሳናስ ኦይኪዳይሳ ዉርሳ ታ ኔስ ኮይሮ ማፃፋን ፃፋዲስ። ሄሲካ ኢዚ ፑዴ ዴንꬃ ጋላስ ጋካናስ ባ ዶሪ ኪቲዳይታስ ፂሎ ኣያና ባጋራ ኢዚ ኢስታስ ኢሚዳ ኣዛዞኮ። ኢዚ ዳሮ ዋዬ ቤዪዳፔ ጉዬ ኢስታኮ ሺቂዲ ሃይቆፔ ዴንዳናይሳ ኢስታስ ዳሮ ማርካራ ቆንጪሲሼ ኦይዱ ታሙ ጋላስ ጋካናስ ኢስታስ ጋላስ ጋላስ ቤቲሼ ፆሳ ካዎቴꬃ ጊሽ ዮቲዴስ። ኢስታራ ኢሲፌ ማዳን ኡቲ ዲሼ ኢስታ “ዬሩሳላሜፔ ኬዞፒቴ፤ ጊዶ ኣቲን ታ ኢንቴስ ዮቲሺን ኢንቴ ሲዪዳይሳ ታ ኣዋይ ኢሚዳ ኡፋይሳ ናጊቴ። ዮሃኒሲ ሃꬃን ፃማቂዴስ ሺን ኢንቴ ቃስ ጉꬃ ዎዴፔ ጉዬ ፂሎ ኣያናን ፃማቄታና” ጊዲ ኣዛዚዴስ። ኢስቲካ ኢሲ ቦላ ሺቄቲ ዲሼ “ጎዶ! ኔ ኢስራዔሌታ ካዎቴꬅ ዛራዳ ሃዒ ኤሳኔ?” ጊ ኦይቺዳ። ኢዚካ ኢስታስ “ኣዋይ ባ ሼኔን ዎꬂዳ ዎዴ ኤሮይ ኢንቴስ ኢሜቲቤና። ጊዶ ኣቲን ፂሎ ኣያናይ ኢንቴ ቦላ ዎꬊዳ ዎዴ ኢንቴ ዎልቃ ኤካና። ዬሩሳላሜንካ፥ ዩሁዳኒካ፥ ሳማሪያንካ ኡባሶን ቢታ ጋፃ ጋካናስ ኢንቴ ታስ ማርካታ ጊዳና” ጊዴስ። ሄሳ ጊ ዮቲዳፔ ጉዬ ኢስቲ ፄሊሺን ፑዴ ሳሎ ዴንዲዴስ። ሳሎ ሻራይካ ኢስታ ኣይፌፔ ኢዛ ጌንꬂዴስ። ኢዚ ቢሺን ኢስቲ ኢዛ ቲሺ ሂስቲ ፑዴ ሳሎ ፄሊሺን ቦꬃ ማይዖ ማይዒዳ ናምዑ ኣሳቲ ቆፖንታ ኢስታ ኣቻን ኤቂዲ፤ “ኢንቴኖ ጋሊላ ኣሳቶ! ኢንቴ ፑዴ ሳሎ ፄሊሼ ሃይሳን ኣዛስ ኤቂዴቲ? ሃይሲ ኢንቴ ማታፔ ፑዴ ሳሎ ዴንዲሺን ኢንቴ ቤዪዛ ዬሱሲ ሳሎ ኬዚሺን ኢንቴ ቤዪዳ ማላ ሄሳꬆካ ኢዚ ሃ ሲሚ ያና” ጊዳ። ሄሳፌ ጉዬ ዳብራዛይቴ ጌቴቲዛ ዙማ ቦላፌ ዎꬊዲ ዬሩሳላሜ ሲሚዳ። ሄ ዙማይካ ዬሩሳላሜፔ ኢሲ ኪሎ ሜትሬ ማላ ሃኬስ። ጌዴ ካታማዮ ጌሊዳ ዎዴ ካሴ ባ ዲዛ ኬꬃ ፖቄ ቦላ ኬዚዳ፤ ሄይቲካ ጴፅሮሳ፥ ዮሃኒሳ፥ ያቆቤ፥ ኢንዲራሳ፥ ፒሊጶሳ፥ ቶማሳ፥ ባርቴሌሞሳ፥ ማቶሳ፥ ኢልፊዮሳ ና ያቆቤ፥ ባ ባጋ ማዲዛዴ ጌቴቲዛ ሲሞናኔ ያቆቤ ና ዩሁዳ። ሄይቲ ዉሪካ ማጫሳታፔ ዬሱሳ ኣዮ ማራሚራ ሄሳꬆካ ኢዛ ኢሻታራ ኢሲ ዎዝናን ኢሲ ቦላ ቃንፆንታ ሚኒ ዎሲዳ። ሄ ጋላሳታን ጴፅሮሲ ፄታኔ ናምዑ ታሙ ኣማኒዛ ኣሳ ጊዶን ኤቂዲ፥ “ታ ኢሻቶ! ዬሱሳ ኦይኪዳ ኣሳታ ካሌꬂ ኤሂዳ። ዩሁዳ ጊሽ ፂሎ ኣያናይ ካሴቲዲ ዳዉቴ ዱናን ሃሳዪዳ ጌሻ ማፃፋ ቃላይ ፖሌታና ኮሼስ። ኢዚካ ኑፔ ኢሳዴ ማላ ታይቤቲዲ ሃይሳ ሃ ኦሶዛን ጌላናስ ቃዳ ዴሚዴስ” ጊዴስ። ጊዲኮካ ሃይሳዴይ ባ ኢታ ኦሶን ዴሚዳ ሚሻን ጋዴ ሻሚዴስ፤ ሄንካ ባ ሊጴን ጉፋኒ ኩንዲን ኢዛ ኣሳቴꬃይ ጊዶፌ ጳልቄቲ ዎꬊዴስ፤ ኢዛ ማራጬይ ቢታ ቦላ ዛዜቲዴስ። ሄሲካ ዬሩሳላሜን ዲዛ ኣሳስ ኡባስ ሲዬቲዴስ። ቢታይካ ኢስታ ቃላራ “ኣኬልዳማ” ጌቴቲዴስ፤ ሄሳስ ቢርሼꬃይካ ሱꬃ ቢታ ጉሳ። ጉጂዲካ ጴፅሮሲ “ማዛሙሬ ማፃፋን ‘ኢዛ ጋዴይ ሜላ ኣቶ፥ ኢዛን ኣይ ኣሲካ ዶፖ፤ ቃሴካ ኢዛ ዳናቴꬅ ሃራ ኣሲ ኤኮ’ ጌቴቲ ፃፌቲዴስ። “ሄሳ ጊሽ ጎዳ ዬሱሲ ኑናራ ዲዛ ዎዴ ኡባን ኑናራ ኢሲፌ ዲዛይታ ጊዶፌ ኑ ኢሳዴ ዶራናስ ኮሼስ። ሄሲካ ዮሃኒሳ ፂንቃቴፔ ሃ ሲሚን ዬሱሲ ኑፔ ሻኬቲ ዴንዲ ባና ጋካናስ ኑናራ ዲዛዴ ጊዳናስ ቤሴስ። ጋሶይካ ሃ ኣሳታፔ ኢሳዴይ ኑናራ ዬሱሳ ዴንꬃስ ማርካ ጊዳና ኮሼስ” ጊዴስ። ሄሳ ጊሽ ባርሳባሳ ዎይኮ ዮስፆሳ ጌቴቲዛ ዮሴፌኔ ማቲያሳ ናምዓታ ሺሺዲ፥ “ጎዶ! ኔ ኣሳ ኡባ ዎዝና ኤራሳ፤ ሃይታ ናምዓታ ጊዶፌ ኔ ኦና ዶሪዳኮ ኢሳዴ ኑና ቤሳ። ዩሁዳይ ዬጊ ቢዳሶን ሃ ኦሳ ኦꬃናዴኔ ሃዋሬ ጊዳናዴ ኔ ዶራ” ጊ ዎሲዳ። ሄሳፌ ሳማ ዬጊን ሳማይ ማቲያሳስ ኬዚዴስ። ኢዚካ ታማኔ ኢሲ ሃዋሬታራ ኢሲፌ ታዪቤቲዴስ። ጴንፃቆስቴ ጌቴቲዛ ባዓሌ ጋላሲ ጋኪዳ ዎዴ ኣሳይ ዉሪካ ኢሲ ሶን ሺቂ ዲሺን፤ ቆፋይ ባይንዳ ዳሮ ሚኖ ጎቴ ጫርኮ ማላ ጊሪሲ ዪዴስ፤ ኣሳይ ዲዛ ኬꬃካ ኩሚዴስ። ታማ ላጮ ኢንፃርሳ ማላይ ኣሳስ ቤቲዲ ሻኬቲ ሻኬቲ ኢሲ ኢሲ ኣሳ ቦላ ኡቲዴስ። ኣማኒዛይቲ ዉሪ ፂሎ ኣያናን ኩሚዲ ኣያናይ ኢስታስ ሃሳያናስ ኢሚዳይሳ ኬና ሃራ ቃላራ ሃሳያ ኦይኪዳ። ሄ ዎዴ ሳሎ ጉፋንꬆን ዲዛ ዴሬፔ ዪዳ ፆሳስ ባቢዛ ኣይሁዳቲ ዬሩሳላሜን ዴቴስ። ሄ ጊሪሳ ሲይዲ ዴሬይ ሺቂዴስ። ኢሲ ኢሲ ኣሳይ ባ ቃላራ ሃሳዪዛይሳ ሲይዲ ማላሌቲዳ። ማላሌቲዲኔ ጋናዚ ꬋዪን “ሃይቲ ሃሳዪዛይቲ ዉሪካ ጋሊላ ኣስ ዴቴኔ? ሂስቲን ኑኒ ኑ ዬሌቲዳ ኑ ዴሬ ቃላራ ኢስቲ ሃሳዪሺን ዎስቲ ሲዪዞኒ? ኑኒ ጳርቴና ኣሳይ፥ ሜዴ ኣሳይ፥ ኤላሜ ኣሳይ፥ ሜሶፖቶሚያን፥ ዩሁዳን፥ ቆጶዶቂያን፥ ጳንፆሳን፥ ኢሲያን፥ ፊርጊያን፥ ጲንፊሊያን፥ ጊብፄን፥ ቃሬና ኣቻን ዲዛ ሊቢያፔኔ ኦሮሜፔ ዪዳይቲ ኣይሁዳቲኔ ጌዴ ኣይሁዳቴꬃን ጌሊዳ ቃርፄሴ ኣሳኔ ኣራቤ ኣሳታ ጊዲሺን ፆሳ ዎልቃማ ኦሶዛ ሃይቲ ኑ ቃላራ ሃሳዪሺን ኑ ሲዮስ” ጊዳ። ዉሪካ ኬሂ ማላሌቲዲኔ ጋናዚ ꬋዪን ባ ጊዶን “ሃይሲ ኣዜሻ?” ጌቴቲዳ። ባጋ ኣሳይ “ሃይቲ ዳሮ ዎይኔ ጫጄ ኡዪዳ” ጊዲ ኢስታ ቂꬊዳ። ሄ ዎዴ ጴፅሮሲ ታማኔ ኢሲኔታራ ኤቂዲኔ ባ ቃላ ꬎቁ ሂስቲዲ ዴራስ ሂዝጊዴስ “ኢንቴኖ ዩሁዳ ኣሳቶ! ዬሩሳላሜን ዲዛይቶ! ኢንቴ ዉሪካ ሃይሳ ኢሲ ሚሽ ኤሪቴኔ ታ ጊዛይሳ ሲዪቴ። ሃዒ ጋዴይ ዎንቲን ቡሮ ሄꬑ ሳቴ ጊዲዳ ጊሽ ኢንቴ ቆፒዛ ማላ ሃይቲ ኣሳቲ ማꬆቲቤቴና። ጊዶ ኣቲን ሃይሲ ካሴ ናቤ ኢዩዔሌን ሂዝጊ ዮቴቲዳ ቃላይ ፖሌታናሳ፥ ‘ፆሲ ዉርሴꬃ ጋላስ ታ ኣያና ኣሾ ማይዒዳ ኡባ ቦላ ታ ጉሳና፤ ኢንቴ ማጫ ናይቲኔ ኢንቴ ኣቱማ ናይቲ ቲንቢቴ ሃሳያና፤ ዬላጋ ናይቲ ኣጁታ ቤያና፤ ጪማቲ ኣጉሞ ኣጉሜታና። ሄ ዎዴ ታ ማጫ ኣሽካራታ ቦላኔ ታ ኣቱማ ኣሽካራታ ቦላ ታ ኣያናፔ ታ ጉሳና። ኢስቲካ ቲንቢቴ ሃሳያና። ቦላ ሳሎን ማላሊሲዛ ሃኖታ ታ ቤሳና፥ ጋርሳ ሳዓን ማላታታ ታ ቤሳና፤ ሱꬂ፥ ታማይኔ ቱላላይ ሃናና። ጊታኔ ቦንቾ ጊዲዳ ጎዳ ጋላሲ ያናፔ ካሴቲዲ ኣዋ ኣርሼይ ꬉማና፤ ኣጊናይካ ሱꬅ ሚሳታና። ጎዳ ሱንꬅ ፄይጊዛይ ዉሪ ኣታና’ ጊዴስ። “ኢስራዔሌ ናይቶ! ሃይሳ ቃላ ሲዪቴ፤ ኢንቴ ኢንቴ ባጋራ ኤሪዛይሳ ማላ ኢንቴ ጊዶን ማላታኔ ኣሲ ሲዪ ኤሮንታ ሚሻታ ኢዛ ኩሼን ኦꬂዲ ፆሲ ናዚሬቴ ዬሱሳስ ማርካቲዴስ። ፆሲ ካሴ ባ ቃቺዳይሳ ኢዛስ ቤኒ ኤራቴꬃ ማላ ሃይሳዴ ኢንቴ ኩሼን ኣꬂ ኢሚዴስ። ኢንቴካ ኢታ ኣሳታ ኩሼን ካቄቲ ሃይቃና ማላ ኦꬂዴታ። ጊዶ ኣቲን ፆሲ ኢዛ ቦላፌ ሃይቆ ዎልቃ ዲጊዲ ሃይቆፔ ዴንꬂዴስ። ሃይቆይካ ኢዛ ኦይኪ ኣሻናስ ዳንዳይቤና። ዳዉቴይካ ኢዛ ጊሽ ‘ታኒ ጎዳ ኡባ ዎዴ ታ ሲንꬃን ቤያይስ፤ ኢዚ ታ ኡሻቻን ዴስ፤ ሙሌካ ሂርጊኬ። ሄሳ ጊሽ ታ ዎዝናይ ኡፋዬቴስ፤ ታ ዱናይካ ጋላቴስ፤ ታ ኣሾይ ኡፋይሳን ዳና። ኔ ታ ሼምፖዮ ዱፎን ኣጋካ፤ ኔ ና ጌሻዛ ዎቃና ማላ ኣጋጋካ። ኔ ዴዖ ኦጌ ታ ኤራና ማላ ኦꬃዳሳ። ኔ ታናራ ዲዛ ጊሽ ታ ኡፋይሳይ ኩሜꬃ’ “ታ ኢሻቶ! ቤኒ ኣዋታፔ ዳዉቴይ ሃይቂ ሞጌቲዳይሳኔ ኢዛ ዱፎይ ሃች ጋካናስ ኑ ኣቻን ዲዛይሳ ባቦንታ ታ ኢንቴስ ዮታና ዳንዳዓይስ። ኢዚ ናቤ ጊዲዳ ጊሽ ፆሲ ኢዛ ዜሬꬃፌ ኢሳዴ ኢዛ ካዎቴꬃ ኣልጋ ቦላ ዎꬃናይሳ ካሴ ጫቆ ቃላን ዮቲዳይሳ ኤሪዴስ። ሄሳ ካሴቲዲ ኤሪዳ ጊሺኔ ኢዛ ኣሾይ ዎቂ ዱፎን ኣቶንታ ዶሬቲዳ ኪርስቶሳ ዴንꬃ ጊሽ ሃሳዪዴስ። ሄ ዬሱሳ ፆሲ ሃይቆፔ ዴንꬂዴስ። ኑካ ዉሪ ሃይሳስ ማርካታ። ሄሳ ጊሽ ኢዚ ፆሳ ኡሻቻን ꬎቁ ꬎቁ ጊዳፔ ጉዬ ፂሎ ኣያና ኡፋይሳ ባ ኣዋፔ ኤኪዲ ሃዒ ኢንቴ ቤዪዛይሳኔ ሲዪዛይሳ ዱጌ ጉሲዴስ። ዳዉቴይ ፑዴ ሳሎ ኬዚቤና፤ ኢዚ ባ ዱናን ‘ጎዳይ ታ ጎዳስ “ታ ኔ ሞርኬታ ኔ ቶሆ ጋርሳን ዬꬊሳና ጋካናስ ታ ኡሻቻን ኡታ” ጊዴስ።’ *** “ሄሳ ጊሽ ፆሲ ኢንቴ ካቂዳ ዬሱሳ ጎዳኔ ኪርስቶሳ ሂስቲዳይሳ ኢስራዔሌ ኣሳይ ዉሪ ሎዔꬂ ኤሮ” ጊዴስ። ዴሬይ ሄሳ ሲዪዳ ማላ ዎዝናይ ቦሼቲዴስ። ጴፅሮሳኔ ሃንኮ ዬሱሲ ኪቲዳይታ “ኑ ኢሻቶ! ሂስቲን ኑ ኣይ ኦꬂኖ?” ጊዳ። ጴፅሮሲካ “ማሮቴꬃን ጌሊቴ፤ ኢንቴ ናጋራይ ማሬታና ማላ ኢንቴፌ ኢሲ ኢሲ ኣሲ ዬሱስ ኪርስቶሳ ሱንꬃን ፃማቄቲቴ፤ ኢዚ ኢሚዛ ፂሎ ኣያና ኢንቴ ኤካና። ኡፋይሳ ቃላይ ኢንቴሲኔ ኢንቴ ናይታሳ፤ ቃሴካ ጎዳ ፆሲ ባኮ ፄይጊዛ ሃሆን ዲዛይታሳራ ኡባሳ” ጊዴስ። ሃራ ዳሮ ቃላራ ኢስታስ ማርካቲሼ “ሃይሳ ጌላ ዬሌቴꬃፌ ኢንቴና ኣሺቴ” ጊዲ ኢስታ ቆፊሲዴስ። ሄ ጋላስ ቃላ ኤኪዳይቲኔ ፃማቄቲዳይቲ ሄꬑ ሺ ማላ ኣሳይ ካሴይታ ቦላ ጉጄቲዴስ። ኢስቲካ ሃዋሬታ ቲሚርቴን፥ ኢሲፌ ቁማ ሙሳኒኔ ዎሳን ሚኒዳ። ሃዋሬታ ኩሼን ዳሮ ማላታቲ ኦሴቲዳ ጊሽ ኣሲ ኡባይ ኢስታስ ባቢዴስ። ኣማኒዳይቲ ዉሪካ ኢሲፌ ዴዒዳ፤ ባስ ዲዛዚካ ኡባ ኢሲ ቦላ ጎዔቲዳ። ባስ ዲዛ ሚሼኔ ሜሄ ባይዚ ባይዚ ባ ጊዶን ኮሺዳ ማላ ጊሼቺዳ። ጋላስ ጋላስ ፆሳ ኬꬃን ኢሲፌ ሺቄቴስ። ባ ኬꬃንካ ቁማ ኢሲፌ ኡፋይሳኒኔ ሱሬ ዎዝናራ ሜቴስ። ኢስቲ ፆሳ ጋላቲሼ ዴሬ ሲንꬃን ቦንቼቲዳ። ጎዳይካ ኢስታ ቦላ ጋላስ ጋላስ ኦራꬅ ኣማኒዛይታ ጉጂዴስ። ኢሲ ዎዴ ጋላሳፌ ኡዱፉን ሳቴ ቦላ ጴፅሮሲኔ ዮሃኒሲ ዎሳ ሳቴን ፆሳ ኬꬄ ባና ኬዚዳ። ኢሲ ዬሌቶሳፔ ዶሚዲ ቶሆይ ሲሊዳዴ ፆሳ ኬꬄ ጌሊዛ ኣሳፔ ሚሼ ዎሳና ማላ ኣሳይ ጋላስ ጋላስ ቶኪ ኤፊዲ ዎꬂን ኢሲ “ሎዖ” ጌቴቲዛ ፆሳ ኬꬃ ፔንጌን ዎሲዛዴይ ዴስ። ኢዚካ ጴፅሮሲኔ ዮሃኒሲ ፆሳ ኬꬄ ጌሊሺን ቤዪዳ ኢስታፌ ሚሼ ዎሲዴስ። ጴፅሮሲኔ ዮሃኒሲ ኢዛ ቲሺ ሂስቲ ፄሊዳ። ጴፅሮሲካ ኢዛ “ኣኔ ሃ ኑና ፄላ” ጊዴስ። ኣዴዚካ ኢስታፌ ኣይኮ ዴማና ጊዲ ኢስታ ቲሺ ሂስቲ ፄሊዴስ። ጊዶ ኣቲን ጴፅሮሲ ኢዛስ ዛሪዲ “ታስ ቢራይኔ ዎርቃይ ዴና፤ ጊዲኮካ ታስ ዲዛዝ ታ ኔስ ኢማይስ፤ ናዚሬቴ ዬሱስ ኪርስቶሳ ሱንꬃን ዴንዳዳ ኔ ቶሆራ ሃሙታ” ጊዴስ። ኢዛስ ኡሻቻ ኩሼ ኦይኪዲ ዴንꬂዴስ። ሄራካ ኣዴዛ ቶሆይኔ ቶሆ ቂርጴይ ሚኒዴስ። ጉፒ ዴንዲ ኤቂዲ ሃሙꬅ ኦይኪዴስ። ያኔ ሃኔ ሃሙቲሼኔ ጉፒሼ ፆሳካ ጋላቲሼ ኢስታራ ኢሲፌ ፆሳ ኬꬃ ጊቤ ጌሊዴስ። ኢዚ ፆሳ ጋላቲሼ ያኔ ሃኔ ሲሜሬቲሺን ኣሳይ ቤዪዴስ። ሃይሳዴይ ሃኒፌ ካሴ “ሎዖ” ጌቴቲዛ ፆሳ ኬꬃ ፔንጌን ኡቲዲ ሚሼ ዎሲዛይ ኢዛ ጊዲዳይሳ ኤሪዴስ። ኢዛ ቦላ ሃኒዳይሳፌ ዴንዲዳይሳን ኣሳይ ኬሂ ማላሌቲዴስ። ሃ ፓፂዳ ዎሳንቻይ ጴፅሮሳኮኔ ዮሃኒሳኮ ሺጵ ጊዲ ኢስታራ ኦይኬቲ ዲሺን ዴሬይ ዉሪ ማላሌቲዲ ኢስታኮ “ሶሎሞኔ ሲሜሬቴꬃሶ” ጌቴቲዛሶ ዎꬃን ዪዴስ። ጴፅሮሲ ሄ ኣሳ ቤዪዲ “ኢንቴኖ ኢስራዔሌ ዴሬቶ! ሃይሳን ኣዛስ ማላሌቴቲ? ቃሴካ ሃይሳ ኣዴዛ ኑኒ ኑ ዎልቃን ዎይኮ ኑኒ ኑ ፂሎቴꬃን ፓꬂዲ ሃሙቲሲዳ ማላ ቆዲዲ ኑና ኣዛስ ቲሺ ሂስቲ ፄሌቲ? ኑ ኣዋንታ ኣብራሃሜንታ፥ ዪሳቃንታ፥ ያቆቤንታ ፆሲ ባ ናዛ ዬሱሳ ቦንቺዴስ። ኢንቴ ቃስ ኢዛ ሃይቆስ ኣꬂ ኢሚዴታ፤ ጲላፆሲ ኢዚ ቢርሻና ኮይንካ ኢንቴ ‘ኮዮኮ’ ጊዴታ። ጌሻኔ ፂሎዛ ኢንቴ ካዲዲ ሼምፖ ዎꬊዛይሲ ቢርሼታና ማላ ዎሲዴታ። ዴዖ ኢሚዛዴ ኢንቴ ዎꬊዴታ፤ ጊዶ ኣቲን ፆሲ ኢዛ ሃይቆፔ ዴንꬂዴስ፤ ሄሳስ ኑኒ ማርካ። ሃይሲ ኢንቴ ቤዪዛይሲኔ ኢንቴ ኤሪዛይሲ ሚኒ ኤቂዳይ ዬሱሳ ሱንꬃን ኣማኒዳ ጊሻሳ። ኢንቴ ዉሪካ ቤዪዛ ማላ ኢዚ ኩሜꬃ ፓፃ ዴሚዳይ ዬሱሳ ሱንꬃኒኔ ኢዛ ሱንꬃን ቤቲዛ ኣማኖና። “ሃዒካ ታ ኢሻቶ! ኢንቴ ሄሳ ኦꬂዳይ ኢንቴ ሃላቃታ ማላ ኤሮንታ ጊዲዳይሳ ታ ኤራይስ። ጊዲኮካ ኪርስቶሲ ዋዬ ኤካናይሳ ፆሲ ካሴ ናቤታ ዱናን ሃሳዪዳይሳ ፖሊዴስ። ሄሳ ጊሽ ኢንቴ ናጋራይ ቁጬቲ ꬋያና ማላ ማሮቴꬃን ጌሊቴ። ኢንቴ ቢዛ ኦጌፔ ሲሚቴ፤ ጎዳ ማታፔ ኢንቴ ኦራፃና ዎዴይ ኢንቴስ ያና። ቃሴካ ፆሲ ካሴ ኢንቴስ ዶሪ ዎꬂዳ ዬሱስ ኪርስቶሳ ኢዚ ኢንቴስ ዬዳና። ፆሲ ካሴ ጌሻ ናቤታ ዱናን ሃሳዪዳይሳ ማላ ሃኒዛይሳ ዉርሲ ኦራፂሳና ዎዴይ ጋካናስ ኢዚ ሳሎን ጋምዓናስ ኮሼስ። ሙሴይካ ‘ኢንቴ ጎዳ ፆሳይ ኢንቴ ጊዶፌ ታ ማላ ናቤ ኢንቴስ ዴንꬃና። ኢዚ ኢንቴስ ዮቲዛይሳ ሲዪቴ። ሄ ናቤዛ ሲዮንታ ኢፂዳ ሼምፖይ ዉሪ ዴሬ ጊዶፌ ሻኬቲ ꬋዮ’ “ቱማፔ ሳሜላፔ ሃ ሲሚን ዴንዲዳ ናቤቲ ዉሪ ሃይታ ዎዴታ ጊሽ ሃሳዪዳ። ኢንቴካ ናቤታ ናይታ። ቃሴካ ፆሲ ኣብራሃሜስ ‘ኔ ዜሬꬃን ቢታ ኣሲ ዉሪ ኣንጄታና’ ጊዲ ኢዚ ጫቂዳ ጫቆዛ ኢንቴ ላታና። ፆሲ ናዛ ዴንꬂዳ ዎዴ ኢንቴና ኢሳ ኢሳ ኢንቴ ኢታቴꬃፌ ዛሪዲ ኣንጃና ማላ ካሴቲዲ ኢንቴኮ ኪቲዴስ” ጊዴስ። ጴፅሮሲኔ ዮሃኒሲ ኣሳስ ሃሳያን ዲሺን ቄሴታ ሃላቃቲኔ ፆሳ ኬꬃ ናጊዛይታ ሃላቃይ ቃሴካ ሳዱቃዌቲ ኣኬኮንታ ኢስታኮ ዪዳ። ዪዲኔ ሃዋሬቲ ኣሳ ታማርሲዛይሳሲኔ ዬሱሳ ባጋራ ቤቲዳ ሃይቂዳይታ ዴንꬃ ጊሽ ሳባኪዛይሳስ ኬሂ ሃንቄቲዳ። ጴፅሮሳኔ ዮሃኒሳ ጋዴይ ቃሚሺን ኦይኪዲ ዎንታና ጋካናስ ቃሾ ኬꬃን ኣይሲዳ። ጊዶ ኣቲን ቃላ ሲዪዳ ኣሳፔ ዳሪዛ ባጋይ ኣማኒዴስ። ኣማኒዛ ኣቱማ ኣሳታ ቆዳይ ጌዴ ኢቻሹ ሺ ጋካናስ ꬎቁ ጊዴስ። ዎንቴꬃ ጋላስ ኢስታ ሃላቃቲኔ ጪማቲ ቃሴካ ሙሴ ዎጋ ታማርሲዛይቲ ዬሩሳላሜን ሺቂዳ። ኢስታ ቄሴታ ሃላቃ ሃናይኔ ቃያፋይ፥ ዮሃኒሲ፥ ኢስኪንዲሮሲኔ ቄሴታ ሃላቃሶ ኣሳይ ዉሪ ሄ ጋዳን ቤቲዳ። ኢስቲካ ጴፅሮሳኔ ዮሃኒሳ ባ ጊዶን ኣꬂ ኤሲዲ “ሃይሳ ኢንቴ ኦꬂዛይ ኣዛ ዎልቃኔ? ዎይኮ ኦና ሱንꬃኔ?” ጊዲ ኦይቺዳ። ሄ ዎዴ ጴፅሮሲ ፂሎ ኣያናን ኩሚዲ “ኢንቴኖ ዴሬ ሃላቃቶ! ዴሬ ጪማቶ! ኢንቴ ሃች ሃ ቶሆ ሲላ ኣዴዛስ ኦሴቲዳ ሎዖ ኦሶይ ዋኒ ኢዚ ፓፂዳኮ ኢንቴ ኑና ኦይቺዛ ጊዲኮ፥ ኢንቴ ካቂን ፆሲ ሃይቆፔ ዴንꬂዳ ናዚሬቴ ዬሱስ ኪርስቶሳ ሱንꬃን ኢዚ ፓፂዳይሳኔ ኢንቴ ሲንꬃን ኢዚ ኤቂዳይሳ ኢንቴካ ኢስራዔሌ ዴሬ ኣሳይ ዉሪ ሃይሳ ኤሪቴ። ኢዚካ ኢንቴ ኬꬃ ሂላቲ ሌቂ ኣጊዳ ሹቻይ ጊንቤ ኬꬃስ ጉላ ቦላ ቦላራ ዎꬂዛ ሹች ጊዲዴስ። ኣቶቴꬂ ሃራ ኦናንካ ባ፤ ሳሎፔ ጋርሳ ባጋራ ኑ ኣሳ ናይቲ ኣታና ማላ ኑስ ኢሜቲዳይ ሃይሳፌ ሃራ ሱንꬂ ዴና” ጊዴስ። ኣይሁዳታ ዱላታ ኣሳይካ ጴፅሮሲኔ ዮሃኒሲ ሄሳꬆ ፃሊ ሃሳዪዛይሳ ቤዪዲ ኢስቲ ታማሮንታ ኣስ ጊዲዳይሳ ኤሪዲ ማላሌቲዳኔ ኢስቲ ካሴ ዬሱሳራ ዲዛይታ ጊዲዳይሳ ኣኬኪዳ። ሄ ፓፂዳ ኣዴዚ ኢስታራ ኤቂዲሺን ቤዪዳ ጊሽ ኢስታስ ሃራ ኦꬃናስ ጋሶይ ꬋዪዴስ። ሄሳ ጊሽ ኢስታ ዱላታፔ ኬሳና ማላ ኣዛዚዳ። ሄሳፌ ቃሴካ ሺቄቲዲ ባ ጊዶን ዞሬቲዳ። ባ ጊዶን “ሃይታ ኣሳታ ዎስቲኖ? ዬሩሳላሜን ዲዛ ኣሳይ ዉሪ ኢስታ ኩሼን ሃኒዳ ጊታ ማላታ ኤሪዴስ። ሄሳ ጊሽ ኑ ሃ ዮዖዛ ኣሳ ባሌꬃናስ ዳንዳዮኮ። ጊዶ ኣቲን ሃይሲ ዮዖዚ ዴሬ ጊዶን ኬሂ ኣኮንታ ማላኔ ሃይቲ ኣሳቲ ናምዓንꬆ ሃይሳ ሃ ሱንꬃን ሃራ ኦናስካ ዮቶንታ ማላ ኢስታስ ሎዔꬂ ዮታና” ጊዳ። ኢስታ ፄይጊዲኔ ሙሌካ ዬሱሳ ሱንꬃን ሃሳዮንታ ማላኔ ታማርሶንታ ማላ ኣዛዚዳ። ጴፅሮሲኔ ዮሃኒሲ ቃሴ ዛሪዲ “ኑኒ ፆሳፌ ቦላራ ኢንቴስ ኣዛዜታናስ ቤሲዛኮኔ ኣኔ ኢንቴ ፆሳ ሲንꬃን ፒርዲቴ። ኑኒ ኑ ቤዪዳይሳኔ ኑ ሲዪዳይሳ ሃሳያናፔ ጉዬ ጎኮ” ጊዳ። ቃሴካ ኢስታ ቦላ ማንዲዲ ዬዲዳ። ጋሶይካ ሃንኮ ዴሬይ ዉሪ ሃኒዳ ዮዖዛ ጋሶን ዉሪካ ፆሴ ጋላቲዛ ጊሽ ኢስታ ቃፃያናስ ዳንዳይቤቴና። ሄ ጊታ ማላታን ፓፂዳ ኣዴዛስ ላይꬂ ኦይዱ ታማፌ ቦላ። ጴፅሮሲኔ ዮሃኒሲ ቃሾፔ ቢርሼቲዲ ጌዴ ባ ኣሳታኮ ሲሚዲ ቄሴታ ሃላቃቲኔ ዴሬ ጪማቲ ኢስታ ጊዳይሳ ዉርሲካ ዮቲዳ። ኢስቲካ ሄሳ ሲዪዳ ማላ ባ ቃላ ꬎቁ ሂስቲዲ ኢሲፌ ፆሳኮ “ዎጋ ጎዳዉ! ኔኒ ሳሎኔ ሳዓ፥ ኣባኔ ኣባ ጊዶን ዲዛይታ ዉርሳ ሜꬋዳሳ። ኔ ኣሽካራ ኑስ ኣዋ ዳዉቴ ዱናራ ፂሎ ኣያናን ‘ዴሬ ኣሳይ ኣዛስ ሃንቄቲ ዴንዲዴ? ዴሬይ ኣዛስ ሜላ ማቄቲዜ? ቢታ ካዎቲ ኢሲፌ ጋጊዲ ቢታ ሃሪዛይቲ ኢሲ ቦላ ሺቄቲዲ ጎዳ ቦላን ኔ ዶሬቲ ቲዬቲዳይሳ ቦላ ዱላቲዳ’ ጊዲ ዋሲዳ። “ቱማፔ ሄርዶሲኔ ጳንፆሳ ጲላፆሲ ኢስራዔላታራኔ ሃራ ዴሬ ኣሳራ ሃኖ ካታማይን ኔ ዶራ ቲዪዳ ጌሻ ናዛ ዬሱሳ ቦላ ዮዖ ቃቻናስ ሺቄቲዳ። ሃይሳንካ ኔ ዎልቃኒኔ ኔ ሼኔን ካሴ ኔ ቆፒዳይሳ ኢስቲ ፖሊዳ። ጎዶ! ሃዒካ ኢስታ ማንዴዛ ኔ ቤያ፤ ኑኒ ኔ ኣይሌቲ ኔ ቃላ ባቦንታ ኩሜꬃ ፃላቴꬃራ ዮታና ማላ ዳንዳዪሳ። ፓꬃናስ ኔ ኩሼ ሚጫ። ኔ ና ጌሻዛ ሱንꬃን ጊታ ማላታ ኦꬃ” ጊዳ። ኢስቲ ዎሲዳፔ ጉዬ ኢስቲ ዲዛሶይ ቃፂዴስ። ዉሪካ ፂሎ ኣያናን ኩሚዲ ፆሳ ቃላ ፃላቴꬃን ዮቲዳ። ኣማኒዛይቲ ዉሪካ ኢሲ ዎዝናኒኔ ኢሲ ቆፋን ጋጊ ዴቴስ። ኢስታስ ዲዛይ ዉሪ ኢሲ ቦላ ዴስ ኣቲን ባስ ዲዛዝ “ሃይሲ ታስ ቡዞ ሚሻ” ጊዛዴይ ዴና። ሃዋሬቲካ ጎዳ ዬሱሳ ዴንꬃ ጊታ ዎልቃን ማርካቴꬅ ኦይኪዳ። ኡባ ቦላ ጊታ ፆሳ ኪያቴꬂ ዴስ። ኢስታ ጊዶን ሜቶታንቻይ ኢሳዴይካ ባዋ። ጋሶይካ ጋዴ ጊዲን ኬꬄ ጊዲን ባስ ዲዛ ዉርሲ ባይዚ ባይዚ ሺሺዳ ሚሽ ሃዋሬታ ኩሼን ዎꬂዲ ኢሲ ኢሳዴስ ኢዛስ ኮሺዛ ማላ ጊሼቴስ። ቆጲሮሴ ጌቴቲዛሶን ዲዛ ዮሴፌ ጌቴቲዛዴይ ኢሲ ሌዌ ባጋ ኣሲ ዴስ። ኢዚካ ሃዋሬታን “ባርናባሳ” ጌቴቲ ሱሚዴስ። ሄሳስ ቢርሼꬃይ “ሚንꬄꬆ ና” ጉሳ። ኢዚካ ባ ጋዴ ባይዚዳ ሚሻ ኤሂዲ ሃዋሬታ ኩሼን ዎꬂዴስ። ኢሲ ሃናኒያ ጌቴቲዛ ኣሲ ሳጲራ ጌቴቲዛ ባ ማቼይራ ባ ጋዴ ባይዚዴስ። ማቼያ ሳጲራይ ሎዔꬃ ኤሪሺን ጋዴዛ ባይዚዳ ሚሻፌ ባጋ ሻኪ ኣሺዲ ባጋ ኤሂዲ ሃዋሬታ ኩሼን ኢሚዴስ። ቃሴ ጴፅሮሲ “ሃይሶ ሃናኒያ! ኔኒ ፂሎ ኣያና ቦላ ዎርዶታናሲኔ ጋዴ ሚሻፌ ኣሻና ማላ ፃላዔይ ኣይስ ኔ ዎዝናን ጌሊዴ? ባይዛናፔ ካሴ ጋዴዚ ኔይሳ ጊዴኔ? ኔ ባይዚዳፔ ጉዬ ቃሴ ሚሻይ ኔ ኩሼን ዴኔ? ሂስቲን ኔ ሃይሳ ማላ ዎስታ ኔ ዎዝናን ቆፓዲ? ኔ ፆሳ ቦላ ዎርዶታዳሳ ኣቲን ኣሳ ቦላ ጊዴና” ጊዴስ። *** ሄሳ ሲዪዳ ማላ ሃናኒያይ ኩንዲ ሃይቂዴስ። ሄሳ ሲዪዳ ኣሳይ ዉሪ ዳሮ ባቢዴስ። ኣቱማሳይ ዴንዲዲ ኣሃ ፃፂዲኔ ሄራካ ኤፊዲ ሞጊዴስ። ሄꬑ ሳቴፔ ጉዬ ማቼያ ኢዚ ዋኒዳኮኔ ኤሮንታ ዳሼ ያዱስ። ጴፅሮሲካ “ኣኔ ታስ ዮታ፤ ኢንቴ ጋዴዛ ባይዚዳ ዋጋይ ሃኖ ፃላ?” ጊዴስ። ኢዛካ “ኤ ሃኖ ሃ ዋጋይን ባይዚዶስ” ጋዱስ። ጴፅሮሲካ “ኢንቴ ፆሳ ኣያና ፓጫናስ ኣይሲ ኢሲ ዱና ጊዲዴቲ? ሄኮ ኔ ኣዚና ሞጊዳ ኣሳቲ ሞጊ ሲሚዲ ካሬን ፔንጌ ቦላ ዴቴስ። ኢስቲ ኔናካ ኬሲ ኤኪ ኤፋና” ጊዴስ። ኢዛ ሲዪዳ ማላ ሄራካ ኢዛ ቶሆ ቦላ ኩንዳዳ ሃይቃዱስ። ኣቱማሳይካ ሶ ጌሊዳ ማላ ሃይቂዳሮ ቤዪዲ ኬሲ ኤፊዲ ኢዚ ኣዚና ኣቻን ሞጊዳ። ኩሜꬃ ዎሳ ኬꬃ ኣሳይኔ ሄሳ ሲዪዳ ኣሳይ ዉሪ ዳሮ ባቢዴስ። ሃዋሬቲካ ዴሬ ጊዶን ዳሮ ማላታኔ ማላሊሲዛ ሚሽ ኦꬂዳ። ኣማኒዛይቲ ዉሪ “ሶሎሞኔ ሲሜሬቴꬃሶ” ጌቴቲዛ ፔንጌን ሺቄቴስ። ኢስታስ ባቢዳ ጊሽ ኦኒካ ኢስታራ ዋላኬታናስ ኮዪቤና። ጊዶ ኣቲን ዴሬይ ኢስታ ኬሂ ቦንቼስ። ዳሮ ማጫሳቲኔ ኣዴቲ ዎዴፔ ዎዴን ጎዳን ኣማኒ ኣማኒ ኢስታ ቦላ ጉጄቲዳ። ሄሳ ጋሶን ጴፅሮሲ ኣꬊሺን ሃራይ ኣቲን ኢዛ ኤሾይ ሃርጋንቻታፔ ባጋ ሃርጋንቻታ ቦላ ዎꬋና ማላ ሃርጊዛይቲ ኢቺዛ ኣልጋ ቦላኔ ሃላ ቦላ ካሬን ኢሺሴቴስ። ዬሩሳላሜ ዩሾን ዲዛ ካታማታፔ ሃርጊዛይታኔ ቱና ኣያናይ ዋይሲዛይታ ኤሂን ዉሪ ፓፂዳ። ሄሳ ዎዴ ቄሴታ ሃላቃይኔ ኢዛራ ዲዛ ሳዱቃዌታ ባጋቲ ዉሪካ ቃናቴ ቃናቲዛይታ ፃላ ጊዲዳ። ሃዋሬታ ኦይኪዲ ቃሾ ኬꬄ ጌልꬂዳ። ጊዶ ኣቲን ጎዳ ኪታንቻይ ቃማራ ቃሾ ኬꬃ ካሬ ዶዪዲ ኢስታ ኬሲዲ፥ “ቢዲ ፆሳ ኬꬃ ጊቤ ጊዶን ኤቂዲ ሃይሳ ዴዖ ቃላ ኡባ ዴሬስ ዮቲቴ” ጊዴስ። ጋዴይ ዎንቲዳ ማላ ኢስታስ ዮቲዳይሳ ፆሳ ኬꬃ ጊቤ ጌሊዲ ዴሬዛ ታማርሶ ኦይኪዳ፤ ቄሴታ ሃላቃይኔ ኢዛራ ዲዛይቲ ዪዲ ኣይሁዳታ ዱላታኔ ኢስራዔሌ ዴሬ ጪማታ ኩሜꬅ ኢሲ ቦላ ሺሺዳ። ሃዋሬታ ቃሾ ኬꬃፌ ኤኪ ያና ማላ ኣስ ዬዲዳ። ኪቴቲ ቢዳ ኣሳቲ ቢዲ ኢስታ ቃሾ ኬꬃን ዴሚቤቴና፤ ሲሚዲኔ “ቃሾ ኬꬃይ ሎዔꬂ ቁልፌቲ ዴስ፤ ናጊዛይቲካ ፔንጌ ቦላ ኤቂ ዲሺን ቤዪዶስ፤ ጊዶ ኣቲን ኑ ዶይ ጌሊሺን ቃስ ኬꬃን ኦኒካ ባ” ጊዳ። ፆሳ ኬꬂ ናጊዛይታ ሃላቃይኔ ቄሴታ ሃላቃቲካ ሄሳ ሲዪዳ ማላ ሃኖዛን ዳሮ ማላሌቲዳኔ ኢስታስ ሃኖይ ዉሪ ቲኪ ጊዴስ። ሄራካ ኢሲ ኣሲ ዪዲ “ሄኮ ኢንቴ ቃሾ ኬꬄ ጌልꬂዳ ኣሳቲ ፆሳ ኬꬃ ጊቤ ጊዶን ኤቂዲ ዴሬ ታማርሶን ዴቴስ” ጊዴስ። ፆሳ ኬꬄ ናጊዛይታ ሃላቃይ ባ ኦሳንቻታራ ቢዲ ኢስታ ኦይኪ ኤኪ ዪዴስ። ኦይኪ ኤሂዳይቲ ኣሳይ ባና ሹቻራ ጫዶንታ ማላ ባቢዲ ዎልቃꬆንታ ሎዳራ ኤሂዳ። ሃዋሬታ ኤሂዲ ኣይሁዳ ዱላታ ሲንꬃን ኤሲዳ። ቄሴታ ሃላቃይካ ኢስታ “ሃይሳ ሃ ሱንꬃን ኢንቴ ታማርሶንታ ማላ ኢንቴስ ሎዔꬂ ዮቲዶስኮሺን ኢንቴ ኢንቴ ቲሚርቴዛ ዬሩሳላሜ ኡባን ኩንꬄታ። ቃሴ ኑናካ ሃ ኣዴዛ ሱꬃስ ኦይሼቲዛይታ ሂስታናስ ጊፂ ዴንዲዴታ” ጊዴስ። *** ጴፅሮሲኔ ሃንኮ ሃዋሬቲካ ዛሪዲ “ኑኒ ኣሳፔ ኣꬂዲ ፆሳስ ኣዛዜታናስ ቤሴስ። “ኢንቴ ኢዛ ሚꬃ ቦላ ካቂ ዎꬊዳ ዬሱሳ ኑ ኣዋንታ ፆሳይ ኢዛ ሃይቆፔ ዴንꬂዴስ። ኢዚካ ኢስራዔሌ ናይታስ ናጋራፔ ሲሚዲ ማሬታና ማላ ፆሲ ኢዛ ኡባፌ ቦላኔ ኣሺዛዴ ሂስቲዲ ባ ኡሻቻን ꬎቁ ꬎቁ ሂስቲዴስ። ኑኒካ ሃይሳስ ማርካታ። ቃሴካ ፆሲ ባስ ኣዛዜቲዛ ኦናስካ ኢሚዳ ፂሎ ኣያናይካ ማርካ” ጊዳ። ኣሳቲ ሄሳ ሲይዲ ኢታ ሃንቆ ሃንቄቲዳ። ዎꬋናካ ኮይዳ። ጊዶ ኣቲን ዴሬ ኣቻን ኬሂ ቦንቼቲዳ ኢሲ ዎጋ ኣስታማሬ፥ ኢዚካ ጋማልያሌ ጌቴቲዛ ፋርሳዌታ ባጋይ ዴሬ ጪማታ ጊዶን ዴንዲ ኤቂዲ ሃዋሬቲ ጉꬃ ዎዴ ካሬን ጋምዓና ማላ ኣዛዚዴስ። ዴሬ ጪማታስ ሂዝጊዴስ “ኢስራዔሌ ኣሳቶ! ኢንቴ ሃይታ ኣሳታ ቦላ ኦꬃናይሳ ዳሮ ኣኬካራ ኦꬃናስ ቤሴስ። ሃይሳፌ ካሴ ኢሲ ቴዎዳሳ ጌቴቲዛዴይ ባና ጊታ ኣስ ሂስቲ ቆዲ ዴንዲን ኦይዱ ፄቱ ዴሬይ ኢዛ ካሊዴስ። ጊዶ ኣቲን ኢዚ ኣሳ ኩሼን ሃይቂዴስ። ኢዛ ካሊዛይቲካ ጮ ላሌቲን ኢዛ ሃኖይ ጮ ሜላ ኣቲዴስ። ኢዛፔ ጉዬካ ዴሬይ ታይቤቲዛ ዎዴ ጋሊላ ዩሁዳይ ዴንዲዲ ዳሮ ዴሬ ባናራ ካሌꬂዴስ። ባና ካሊዛይታካ ዴሚዴስ ሺን ኢዚካ ꬋዪዴስ። ኢዛ ካሊዛይቲካ ዉሪ ꬋዪዳ። “ሄሳ ጊሽ ታ ሃዒ ኢንቴና ጊዛይ ሃይታ ኣሳታ ኣጊቴ፥ ቦቾፍቴ። ኢስታ ቆፋይ ዎይኮ ኢስታ ኦሶይ ኣሳፔ ጊዲኮ ꬋያና። ፆሳፌ ጊዲኮ ቃስ ኢንቴ ኢስታ ቴቃናስ ዳንዳዬኬታ። ኦኔ ኤሪዛይ ኢንቴ ፆሳራ ኦዬቲሼ ቤታናኮኔ” ጊዴስ። ኢስቲካ ኢዛ ዞሬዛ ኤኪዲ ሃዋሬታ ፄይጊዲ ጋራፊሲዳ። ናምዓንꬆ ዬሱሳ ሱንꬃን ሃሳዮንታ ማላ ኣዛዚዲ ዬዲዳ። ሃዋሬቲካ ኢዛ ሱንꬃ ጊሽ ካዉያናስ ቤሲዛ ጊሽ ዳሮ ኡፋዬቲሼ ዴሬ ጪማታ ኣቻፌ ኬዚ ቢዳ። ጋላስ ጋላስ ፆሳ ኬꬃኒኔ ኢሳ ኢሳ ኬꬃን ዬሱሲ ኢዚ ፆሲ ዶሪዳዴ ጊዲዳይሳ ታማርሶፌኔ ሳባኮፔ ሙሌካ ጉዬ ጊቤቴና። ኣማኒዛይታ ቆዳይ ዳሪ ዳሪ ቢዛ ዎዴ ጊሪኬ ቢታፌ ዪዳ ኣይሁዳ ኣሳቲ ዩሁዳን ዲዛ ኣይሁዳ ኣሳ ጉዬራ ዚጊሬቲዳ። ጋሶይካ ኡባ ዎዴ ሚዛ ካꬅ ጊሺሼ ኣምዔታ ዉዴቶንታ ኣጊዳ ጊሻሳ። ሄሳ ጊሽ ኑ ታማኔ ናምዑ ሃዋሬቲ ኣማኒዛ ሃራታ ኢሲ ቦላ ሺሺዲ “ኑኒ ካꬃ ጊሾን ጌሊዲ ፆሳ ቃላ ታማርሶ ኣጋናስ ቤሴና። ሄሳ ጊሽ ኑ ኢሻቶ! ኢንቴ ጊዶፌ ኤራንቻታ፥ ፂሎ ኣያናን ኩሚዳይታኔ ሎዖ ማርካቴꬅ ዲዛ ላፑን ኣሳታ ዶሪቴ፤ ሃይሳ ኣላፌቴꬅ ኑ ኢስታስ ኢማና። ኑኒ ጊዲኮ ዎሳኒኔ ቃላ ዮቶን ሚናና” ጊዳ። ኢስቲ ጊዳ ዮዖይ ሲዪዳይታ ኡፋይሲዴስ፤ ኣማኖኒኔ ፂሎ ኣያናን ኩሚዳይቲ ኢስቲፋኖሴ፥ ፒሊጶሳ፥ ጲሮስቆሮሳ፥ ኒቃሮና፥ ፂሞና፥ ጳርሜናኔ ዩሁዳቴꬃን ጌሊዳ ኣንፆኪያ ዴሬ ኣስ ኒቆሎሳ ዶሪዳ። ሄይታ ኤሂዲ ሃዋሬታ ሲንꬅ ሺሺዳ። ኢስቲካ ባ ኩሼ ኢስታ ቦላ ዎꬂዲ ኢስታስ ዎሲዳ። ፆሳ ቃላይ ኣኪ ኣኪ ቢዴስ። ኣማኒዛይታ ቆዳይ ዬሩሳላሜን ዳሪ ዳሪ ቢዴስ። ቄሴታፔ ዳሮቲ ኣማኒዳ። ሄ ዎዴ ኢስቲፋኖሲ ፆሳ ኢሞቴꬃኒኔ ዎልቃን ኩሚዲ ዴሬዛ ጊዶን ጊታ ማላሊሲዛ ማላታታ ኦꬂዴስ። ዎዜቲ ኬዚዳ ጌቴቲ ፄይጌቲዛሶፔ ኣይሁዳታ ዎሳ ኬꬃፌ ዪዳ ኣስ ጊዲዳ ቃሬናፔኔ ኢስኪንዲሪያፔ፤ ቃሴካ ኪልቂያፔኔ ኢሲያ ኣዉራጃታፔ ዪዳ ኣሳቲካ ዉሪ ኢስቲፋኖሴራ ማርሼቲዳ። ጊዶ ኣቲን ኤራቴꬃን ኢዚ ሃሳዪዛ ሃሳያኔ ኢዛን ዲዛ ኣያና ኤቄታናስ ዳንዳዪቤቴና። ሄሳ ጊሽ “ኢስቲፋኖሲ ሙሴኔ ፆሴ ጫዪሺን ኑ ሲዪዶስ” ጊዛ ኣሳታ ጉዬራ ጊጊሲዳ። ሄ ዎዴ ዴሬዛ፥ ዴሬ ጪማታኔ ዎጋ ታማርሲዛይታ ዴንꬄꬂዲኔ ኢስቲፋኖሴ ኦይꬂዲ ዴሬ ዱላታኮ ሺሺዳ። ኢዛ ቦላ “ሃይሲ ኣዴዚ ሃይሳ ፆሳ ኬꬃ ቦላኔ ዎጋ ቦላ ጫሻ ቃላ ሃሳያ ሙሌካ ኣጊቤና። ጋሶይካ ሃይሲ ኣዴዚ ‘ናዚሬቴ ዬሱሲ ሃይሳ ፆሳ ኬꬃ ꬋይሳና’ ጊሺኒኔ ‘ኑ ሙሴፔ ኤኪዳ ዎጋ ላማና’ ጊ ሃሳዪሺን ኑ ሲዪዶስ” ጊ ዎርዶራ ማርካቲዛ ኣሳታ ሺሺዲ ማርካሲዳ። ዱላታ ኡቲዳ ኣሳይ ዉሪ ኢስቲፋኖሴ ቲሺ ሂስቲ ፄሊሺን ኢዛ ኣይፌሶይ ኢስታስ ኪታንቻ ኣይፌሶ ሚሳቲ ቤቲዴስ። ቄሴታ ሃላቃይ ኢስቲፋኖሴ “ሃይሲ ኔ ቦላ ሺቂዳ ዮዖዚ ቱሜ?” ጊ ኦይቺዴስ። ኢስቲፋኖሲካ ሂዝጊዴስ “ታ ኢሻቶ! ታ ኣዋቶ! ታ ጊዛይሳ ሲዪቴ! ኑ ኣዋ ኣብራሃሜይ ካራኔ ጌቴቲዛሶ ያናፔ ካሴ ቡሮ ሜሶፖቶሚያን ዲሺን ቦንቾ ጎዳይ ኢዛስ ቆንጪዲ፥ ‘ኔ ዴሬፔኔ ኔ ዳቦፌ ሻኬታዳ ታ ኔና ቤሲዛሶ ባ’ ጊዴስ። ኢዚካ ካልዳዌታ ቢታፌ ኬዚዲ ካራኔ ጌቴቲዛ ቢታን ኡቲዴስ። ኢዛ ኣዋይ ሃይቂዳፔ ጉዬ ኢንቴ ሃዒ ዲዛሶ ሃ ዴሬ ኢዛ ኤሂዴስ። ሃራይ ኣቶሺን ኢሲ ቶሆይ ኤቂዛ ጋዴይ ኢዛስ ሃይሳፌ ኢሜቲቤና። ጊዶ ኣቲን ሄ ዎዴ ኢዛስ ኢሲ ናይካ ባይንዳ ዲሺን ኢዚኔ ኢዛፔ ጉዬን ኢዛ ዜሬꬂ ቢታዮ ላታና ማላ ፆሲ ኢዛስ ጫቂዴስ። ቃሴካ ፆሲ ኢዛስ ሂዝጊ ዮቲዴስ ‘ኔ ዜሬꬂ ኣላጋ ቢታን ቤቴ ኣስ ጊዳና። ኦይዱ ፄቱ ላይꬅ ኣይሌቴꬃ ቃምባራ ጊዶን ዋዬታና። ጊዶ ኣቲን ኢስታ ኣይሌ ማላ ሃሪዛ ዴሬ ታ ቃፃያና። ሄሳፌ ጉዬ ኢስቲ ሄ ቢታፌ ኬዚዲ ሃኖ ሃ ሶይን ታስ ጎይናና’ ጊዴስ። ሄሳፌ ጉዬ ቃፃራ ዎጋ ጫቆ ኢዛስ ኢሚዴስ። ኣብራሃሜይካ ዪሳቃ ዬሊዲ ኢዛ ኦስፑንꬃ ጋላስ ቃፃሪዴስ። ዪሳቃይካ ያቆቤ ዬሊዴስ። ያቆቤይካ ታማኔ ናምዑ ቆሞታ ዬሊዴስ። ሄ ቆሞታ ኣዋቲ ዮሴፌ ቦላ ቃናቲዲ ኢዛ ኣይሌቴꬃስ ዱጌ ጊብፄ ባይዚዳ። ጊዶ ኣቲን ፆሲ ኢዛራ ዴስ፤ ሜቶ ኡባፌ ኢዛ ኣሺዴስ። ጊብፄ ካዎ ፓሮኔ ሲንꬃን ቦንቾ ኢሚዴስ። ፓሮኔይ ኢዛ ጊብፄ ቢታኒኔ ባ ኬꬃ ኣሳ ኡባ ቦላ ኣላፌቴꬃን ሹሚዴስ። “ሄ ዎዴ ካናኔኒኔ ጊብፄን ዳሮ ሜቶ ኤሂዳ ጊታ ኮሻይ ዴንዲዴስ። ኑ ኣዋታስካ ሚዛ ካꬂ ꬋዪዴስ። ያቆቤይ ጊብፄ ዴሬን ካꬂ ዲዛይሳ ሲይዲ ኑ ኣዋታ ኮይሮ ጊብፄ ዬዲዴስ። ኢስቲ ናምዓንꬆ ቢዛ ዎዴ ዮሴፌይ ኢዚ ኦናኮኔ ባና ባ ኢሻታስ ቆንጪሲዴስ። ፓሮኔይካ ዮሴፌ ኢሻታ ኤሪዴስ። ሄሳፌ ጉዬ ዮሴፌይ ኪቲዲ ባ ኣዋ ያቆቤኔ ላፑን ታማኔ ኢቻሹ ጊዲዛ ባ ዳቦታ ኩሜꬅ ኤሂሲዴስ። ያቆቤይ ዱጌ ጊብፄ ዎꬊዴስ። ኢዚካ ኑ ኣዋቲካ ዉሪ ሄን ሃይቂዳ። ኢስታ ኣሃይካ ሴኬሜ ጌቴቲዛሶ ኤፊን ኣብራሃሜይ ኤሞሬ ናይታፔ ባ ሚሻን ሻሚዳ ዱፎን ሞጌቲዴስ። “ፆሲ ኣብራሃሜስ ጫቂዳ ቃላይ ፖሌቲዛ ዎዴይ ማቲሺን ጊብፄን ዲዛ ኑ ኣሳ ቆዳይ ዳሪ ዳሪ ቢዴስ። ሄሳፌ ጉዬ ጊብፄ ቢታን ዮሴፌ ኤሮንታ ሃራ ካዎይ ካዎቲዴስ። ኢዚካ ኑ ኣሳ ባ ጌኔ ኦሶን ሜቶꬂዴስ። ቡሮ ዬሌቲዳ ጉꬃ ናይቲ ሃይቃና ማላኔ ዬሊዳ ናይታ ካሬ ኬሲ ዎራ ዬጋና ማላ ዎልቃꬂዴስ። ሄ ዎዴ ሙሴይ ዬሌቲዴስ። ኢዚካ ፆሳ ኣቻን ዶሴቲዳ ማላ ሎዖ ና ጊዲዴስ። ባ ኣዋ ኬꬃን ሄꬑ ኣጊና ኣልዒሶን ዲጪዴስ። ኢዚ ጌዴ ዎራ ዬጌቲዳ ዎዴ ካዎ ፓሮኔ ማጫ ናያ ዴማዳ ባስ ኤካዱስ። ባ ና ማላ ኦꬃዳ ዲቻዱስ። ሙሴይካ ጊብፄታ ኣꬎ ኤራቴꬃ ዉርሲ ታማሪዴስ። ዮዖን ኤራ፤ ኦሶንካ ሚኖ ጊዲዴስ። “ሙሴ ላይꬂ ኦይዱ ታሙ ጊዲዳ ዎዴ ሙሴይ ባ ኢሻታ ኢስራዔሌ ናይታ ቤያናስ ባ ዎዝናን ቆፒዴስ። ኢዚካ ኢሲ ጊብፄ ኣሲ ሙሴ ባጋ ኣሳፔ ኢሳዴ ቦላ ቆሆ ጋꬂሺን ቤዪዲ ባ ባጋ ኣዴዛ ማዲዴስ፤ ሄ ጊብፄ ኣዴዛ ዎꬊዲ ሄ ቆሄቲዳይሳ ሃሎ ኬሲዴስ። ሙሴስ ፆሲ ኢዛ ኩሼን ኢስታ ዎዛናይሳ ኢዛ ኣሳይ ኣኬኪዛ ሚሳቲዴስ። ጊዶ ኣቲን ኢስቲ ሄሳ ዩሺ ቆፒቤቴና። ዎንቴꬃ ጋላስ ቃሴካ ኢስራዔሌ ናይታፔ ናምዓቲ ባ ጊዶን ኦዬቲሺን ጋኪዲ ኦዬቲዛይታ ጊጊሳናስ ኮይዲ ‘ሃይቶ! ኣሳቶ ኢንቴ ኢንቴ ጊዶን ኢሻንታኮ፤ ኢንቴ ዋኒዲ ኢሶይ ኢሳ ቆሄቲ?’ ጊዴስ። “ባ ላጌዛ ቦላ ቆሆ ጋꬂዳይሲ ሙሴ ሱጊ ዬጊዲ ‘ኔና ኑ ቦላ ኑና ሃሪዛዴኔ ኑ ቦላ ፒርዲዛዴ ኦꬂ ሹሚዳይ ኦኔ? ዎይኮ ቃማ ጊብፄ ኣዴዛ ዎꬎይሳꬆ ታናካ ዎꬋና ኮያይ?’ ጊዴስ። *** ሙሴይ ሄሳ ሲዪዳ ማላ ሚዲያሜ ቢታ ቤቲዲ ሄን ቤቴ ኣስ ጊዲ ዴዒዴስ፤ ያንካ ናምዑ ኣቱማ ና ዬሊዴስ። “ሄሳፌ ኦይዱ ታሙ ላይꬃፌ ጉዬ ሲና ዙማ ኣቻን ዲዛ ባዞ ቢታን ቄሪ ዎራ ጊዶን ኤፂዛ ታማ ላጮን ኪታንቻይ ኢዛስ ቤቲዴስ። ሙሴይካ ኢዛ ቤዪዳ ማላ ማላሌቲዴስ። ኣዛኮኔ ሻኪ ኤራናስ ኢዚ ሄን ኢዛኮ ሺቂሺን ጎዳ ቃላይ ‘ታኒ ኔ ኣዋንታ ፆሳ ኣብራሃሜ፥ ዪሳቃኔ ያቆቤ ፆሳ’ ጊሺን ሲይዴስ። ሙሴይካ ዳሮ ዳጋሚዴስ፤ ፄላናስካ ፃሊቤና። *** “ጎዳይካ ኢዛስ ‘ሃይሲ ኔ ኤቂዳሶይ ጌሻሶ ጊዲዳ ጊሽ ኔ ቶሆፔ ጫማ ሾዳ። ጊብፄን ዲዛ ታ ዴሬታ ዋዬ ታ ቱማፔ ቤያዲስ፤ ኢስቲ ዋሲዛ ዋዬ ዋሶዛ ታ ሲያዳ ኢስታ ኣሻናስ ዎꬋዲስ። ኔ ሃዒካ ሃያ፤ ታ ኔና ዱጌ ጊብፄ ዛራዳ ኪታና’ ጊዴስ። *** “ሂስቲን ሄይቲ ‘ኑ ቦላ ኔና ሃሪዛዴኔ ፒርዲዛዴ ሂስቲ ኦኒ ሹሚዴ?’ ጊዲ ኣሳይ ካሴ ካꬊዳ ሙሴ ፆሲ ቄሪ ዎራ ጊዶን ኢዛስ ቤቲዳ ኪታንቻ ባጋራ ኢስታ ሃሪዛዴኔ ኣሺዛዴ ሂስቲዲ ኢስታኮ ዛሪ ዬዲዴስ። ኢዚካ ኢስታ ካሌꬂዲ ጊብፄፔ ኬሲዴስ። ጊብፄን፥ ዞዖ ኣባኒኔ ባዞ ቢታን ኦይዱ ታሙ ላይꬂ ዳሮ ማላሊሲዛ ሚሻታኔ ጊታ ማላታታ ኢስታስ ኦꬂዴስ። “ኢስራዔሌ ናይታስ ‘ታ ማላ ናቤ ፆሲ ኢንቴ ጊዶፌ ዴንꬃና’ ጊዳይሲ ሃይሳ ሙሴኮ! ኢዚካ ሲና ዙማ ቦላ ሃሳዪዳ ኪታንቻራኔ ባዞ ቢታን ኑ ኣዋታራ ዴሬ ዱላታ ጊዶን ዴስ። ዴዖ ቃላካ ሃ ኑስ ኣꬃናስ ኤኪዴስ። “ኑ ኣዋቲ ጊዲኮ ኢዛራ ኤቄቲዳ ኣቲን ኢዛስ ኣዛዜታናስ ኮዮንታ ጊሽ ባ ዎዝናራ ጉዬ ጊብፄ ሲሚዳ። ኣሮኔስካ ‘ኑ ሲንꬃራ ቢዛ ኤቃ ኑስ ጊጊሳ! ኑና ጊብፄፔ ካሌꬂ ኬሲዳ ሙሴይ ዋኒዳኮ ኑ ኤሮኮ’ ጊዳ። ሄ ዎዴ ማራ ሚሲሌ ሜꬊዲ ኤቃስ ያርሾ ሺሺዳ። ባርካ ሜꬊዳ ባ ኩሼ ኦሶን ኡፋዬቲዲ ጉፒዳ። “ጊዶ ኣቲን ፆሲ ኢስታስ ዞኮ ዛሪዴስ። ኢስቲ ሳሎ ፆሊንቴታስ ጎይናና ማላ ኣꬂ ኢሚዴስ። ሄሲካ ናቤታ ማፃፋን ‘ኢንቴኖ ኢስራዔሌ ናይቶ! ኢንቴ ባዞ ቢታን ኦይዱ ታሙ ላይꬅ ዲዛ ዎዴ ኢንቴፌ ያርሾኔ ሙፁዋታ ታስ ሺሺ ኤሬቲ? ሃራፔካ ኢንቴ ጎይናናሶ ኦꬂዳ ኤቃ ሞሎኬ ዱንካናኔ ኢንቴ ኤቃ ራፋኔ ፆሊንቴ ሚሲሌዛ ꬎቁ ꬎቁ ሂስቲ ኦይኪዴታ። ሄሳ ጊሽ ታ ኢንቴና ኢንቴ ዲዛሶፔ ዴንꬃዳ ባቢሎኔራ ኣꬃ ዬዳና’ ጌቴቲዲ ፃፌቲዴስ። “ፆሲ ሙሴ ቤሲዳ ሌሚሶዛ ማላኔ ኣዛዚዳይሳ ማላ ኦሴቲዳ ፆሲ ኣሳራ ጋጊዛ ዱንካኔያ ኑ ኣዋታራ ባዞ ቢታን ዴዓዱስ። ኑ ኣዋቲ ዱንካኔዮ ኤኪዳይሳፌ ጉዬ ፆሲ ኢያሶ ካሌꬂን ካሴ ኢስታ ጎዲዳ ዴሬታ ላቲዳ ዎዴ ዱንካኔዮ ኤኪ ጌሊዳ። ዳዉቴ ዎዴ ጋካናስ ዱንካኔያ ሄ ቢታን ዴዓዱስ። ዳዉቴይካ ፆሳ ሲንꬃን ቦንቾ ዴሚዲ ያቆቤ ጎዳስ ኣቆሶ ጊጊሳናስ ዎሲዴስ። ጊዶ ኣቲን ሶሎሞኔይ ኢዛስ ኣቆሶ ኬፂዴስ። “ጊዶ ኣቲን ዎጋ ጎዳይ ኣሳ ኩሼይ ኬፂዳ ኬꬃን ዴና። ሄሲካ ናቤይ ካሴ ጌሻ ማፃፋን ፃፌቲዳ ማላ ‘ሳሎይ ታ ኡቲዛ ኣልጋ፤ ቢታይካ ታ ቶሆን ዬꬊዛሶ፤ ሂስቲን ኢንቴ ታስ ኣይ ማላ ኬꬄ ኬፄቲ? ዎይኮ ታ ሼምፓናሶይ ኣዋይሴ? ሃይሳ ዉርሲ ታ ኩሼይ ኦꬂቤኔ?’ ጌስ ጎዳይ ፆሳይ።” *** *** “ኢንቴኖ ዎዝና ሙሜቶ! ሃይꬃ ቱሌቶ! ኢንቴካ ኢንቴ ኣዋታ ማላ ኡባ ዎዴ ፂሎ ኣያናራ ኤቄቴታ። ናቤታፔ ኢንቴ ኣዋቲ ጎዶንታ ናቤይ ኦኔ? ፂሎዛ ዮሃኒሳ ካሴቲ ዮቲዳ ናቤታካ ዎꬊዳ፤ ኢንቴካ ሃዒ ኢዛ ኣꬂ ኢሚዴታኔ ዎꬊዴታ። ኪታንቻ ባጋራ ኢንቴስ ኢሜቲዳ ዎጋ ኤኪዴታ ኣቲን ናጊቤኬታ” ጊዴስ። ዱላታን ዲዛ ኣሳይ ሄሳ ሲዪዳ ማላ ዳሮ ሃንቄቲዲ፥ ኢዛ ቦላ ባ ኣቺ ጋርጪዴስ። ጊዲንካ ኢስቲፋኖሲ ፂሎ ኣያናን ኩሚዲኔ ፑዴ ሳሎ ቲሺ ሂስቲ ፄሊሺን ፆሳ ቦንቾን ዬሱሲ ፆሳ ኡሻቻን ኤቂዳይሳ ቤዪዲ “ሄኮ ታ ሳሎይ ዶዬቲዳይሳኔ ኣሳ ናይ ፆሳ ኡሻቻን ኤቂዳይሳ ቤያይስ” ጊዴስ። *** ሄሳ ዎዴ ኣሳይ ቃላ ꬎቁ ሂስቲ ዋሲሼ ባ ሃይꬄ ቱጪ ኦይኪዲ ኢዛኮ ኢሲፌ ዎፂዴስ። ኢስቲፋኖሴ ኦይኪዲ ካታማፔ ጌዴ ካሬ ኦሊዳ። ሹቻን ጫች ኦይኪዳ። ሄሲ ዉሪ ሃኒሺን ማርካቲካ ባ ማይዖ ሳዉሌ ጌቴቲዛ ፓንꬃ ኣቻን ዎꬂዳ። ኢስቲ ሹቻራ ኢዛ ጫዲሺን ኢስቲፋኖሲ “ታ ጎዳ ዬሱሳ ታ ሼምፖዮ ኔኮ ኤካ” ጊዲ ዎሲዴስ። ቃሴካ ጉልባቲዲ ꬎቃ ቃላን “ጎዶ! ሃይታንታ ናጋራ ቆዶፓ” ጊዲ ዋሲዴስ። ሄሳ ጊዳፔ ጉዬ ሃይቂዴስ። ሳዉሌይካ ኢስቲፋኖሴ ሃይቆን ኢስታራ ቆፋን ጋጊዴስ። ሄ ዎዴ ዬሩሳላሜን ዲዛ ኣማኒዛይታ ቦላ ጊታ ጎዴቴꬂ ዴንዲዴስ። ሃዋሬቲ ኣታፌ ኣማኒዛይቲ ዉሪ ዩሁዳ ኣዉራጃኒኔ ሳማሪያ ኣዉራጃን ኡባን ላሌቲዳ። ኣያና ኦሶን ሚኒ ኤቂዳ ኣሳቲ ኢስቲፋኖሴ ሞጊዲ፥ ኢዛስ ዳሮ ዬኪዳ። ሳዉሌይ ቃሴ ዎሳ ኬꬃ ꬋይሳናስ ጊፂ ዴንዲዴስ። ኣማኒዛ ኣሳ ኢሳ ኢሳ ኬꬄ ጌሊዲ ማጫታኔ ኣዴታ ጎቺ ጎቺ ኬሲዲ ቃሾ ኬꬃን ጌልꬂዴስ። ላሌቲዳይቲ ዉሪ ባ ቢዳሶን ቢዳሶን ፆሳ ቃላ ዮቲዳ። ፒሊጶሲካ ሳማሪያ ጌቴቲዛ ካታማ ዎꬊዲ ኣሳስ ኪርስቶሳ ሳባኪዴስ። ዳሮ ዴሬይ ፒሊጶሲ ኦꬂዛ ማላታ ቤዪዲ ኢዚ ዮቲዛ ቃላ ዎዝናፔ ሎዔꬂ ሲይዴስ። ቱና ኣያናቲካ ዳሮ ኣሳፔ ዋሲ ዋሲ ኬዚዳ። ዳሮ ቶሆ ሲላቲኔ ዎቤቲካ ፓፂዳ። ሄሳ ጊሽ ሄ ካታማ ኣሳይ ዳሮ ኡፋዬቲዴስ። ጊዶ ኣቲን ሄሳፌ ካሴ ሄ ካታማዪን ማሮ ማሮቲዲ ሳማሪያ ኣሳ ዳሮ ማላሊሲዛዝ ኦꬂዛ ኢሲ ሲሞና ጌቴቲዛ ማሮይ ዴስ። ኢዚካ ባና ጊታ ኣሳ ማላ ቆዲዛዴ። ኣሳይ ዉሪ ጉꬃታፔ ጊታታ ጋካናስ ዉሪካ “ሃይሲ ኣዴዚ ጊታ ዎልቃማ ጌቴቲዛ ፆሳ ዎልቃ” ጊሼ ኢዚ ጊዛይሳ ዉርሲ ዎዝናፔ ሲዬስ። ዳሮ ዎዴ ባ ማሮቴꬃ ኦሶን ኣሳ ማላሊሲዳ ጊሽ ኣሳይ ኢዛ ዎዝናፔ ካሊሼ ጋምዒዴስ። ጊዶ ኣቲን ፒሊጶሲ ፆሳ ካዎቴꬃ ጊሺኔ ዬሱስ ኪርስቶሳ ጊሽ ሳባኪዳይሳ ሲይዲ ኣማኒዳ ማጫሳይኔ ኣቱማሳይ ፃማቄቲዴስ። ሲሞኒካ ኣማኒዲ ፃማቄቲዴስ። ፒሊጶሳካ ካሊ ቢዲ ሃኒዛ ጊታ ማላታ ቤዪዲ ማላሌቲዴስ። ዬሩሳላሜን ዲዛ ሃዋሬቲ ሳማሪያ ኣሳይ ፆሳ ቃላ ኤኪዲ ኣማኒዳይሳ ሲይዲ ጴፅሮሳኔ ዮሃኒሳ ኢስታኮ ኪቲዳ። ኢስቲካ ሳማሪያ ጋኪዲ ኣማኒዳ ኣሳይ ፂሎ ኣያና ኤካና ማላ ኣሳስ ዎሲዳ። ጋሶይካ ሄ ዎዴ ኢስቲ ጮ ዬሱሳ ሱንꬃን ፃማቄቲዳ ኣቲን ቡሮ ፂሎ ኣያናይ ኢስታፌ ኢሳዴ ቦላካ ዎꬊቤና። ሄሳ ጊሽ ጴፅሮሲኔ ዮሃኒሲ ባ ኩሼ ኣሳ ቦላ ዎꬂን ኣሳይ ፂሎ ኣያና ኤኪዴስ። ሲሞኒካ ሃዋሬቲ ኩሼ ዎꬂ ዎሲን ፂሎ ኣያናይ ኢሜቲዛይሳ ቤዪዲ ጴፅሮሳሲኔ ዮሃኒሳስ ሚሼ ኤኪ ዪዲ፥ “ታ ኢዛ ቦላ ታ ኩሼ ዎꬂዛዴይ ዉሪ ፂሎ ኣያና ኤካና ማላ ሃይሳ ማላ ጎዳቴꬅ ታስካ ኢሚቴ” ጊን፥ ጴፅሮሲ ኢዛስ ዛሪዲ “ፆሳ ኢሞታ ኔ ሚሻን ሻማና ቆፒዳ ጊሽ ኔኒ ኔ ሚሻራ ኢሲፌ ꬋያ። ኔ ዎዝናይ ፆሳ ሲንꬃን ሱሬ ጊዶንታ ጊሽ ኔስ ሃይሳ ሃ ኦሶዛን ጊሻይ ዎይኮ ቃዳይ ዴና። ሃይሳ ኔ ኢታቴꬃ ጊሽ ሃዒ ኤሌ ማሮቴꬃን ጌላ፤ ኔ ዎዝና ቆፋ ኔስ ኣቶ ጋናኮኔ ኔስ ጎዳ ዎሳ። ጋሶይካ ኔኒ ኢታቴꬃን ኩሚዳይሲኔ ማካላን ቃሼታ ኡቲዳይሲ ታስ ቤቴስ” ጊዴስ። ሲሞኒካ ዛሪዲ “ኢንቴ ጊዳ ዮዖታፔ ኣይኮይካ ታ ቦላ ጋኮንታ ማላ ታስ ጎዳ ዎሲቴ” ጊዴስ። ጴፅሮሲኔ ዮሃኒሲ ጎዳ ቃላ ማርካቲዳይሳፌኔ ቆንጪሲ ዮቲዳይሳፌ ጉዬ ዳሮ ሳማሪያ ጉታታን ሚሺራቾ ቃላ ሳባኪሼ ዬሩሳላሜ ሲሚዳ። ጎዳ ኪታንቻይ ፒሊጶሳ “ዴንዳ! ዬሩሳላሜፔ ዱጌ ባጋራ ጌዴ ጋዛ ኤፊዛ ባዞ ኦጋራ ባ” ጊዴስ። ኢዚካ ዴንዲ ቢዴስ። ሂንዴኮ ጌቴቲዛ ቶጲያፔ ጊዲዳ ካዎያ ባ ኬꬃኒኔ ባ ካዎቴꬃን ዲዛ ኡባ ሚሻ ቦላ ኣላፌቴꬃን ዎꬂዳ ኢሲ ቶጲያ ጉንዱላ ኣሲ ኢዛራ ጋጊዴስ። ሄ ኣዴዚ ፆሳስ ጎይናና ዬሩሳላሜ ቢዴስ። ኢዚ ሄፔ ሲሚሼ ፓራ-ጋሬን ኡቲዲ ናቤ ኢሳያሳ ማፃፋ ናባቤስ። ኣያናይ ፒሊጶሳ “ባ! ጌዴ ፓራ-ጋሬዛኮ ሺቃ” ጊዴስ። ፒሊጶሲካ ኤሶቲዲ ፓራ-ጋሬዛኮ ቢዲ ኣዴዚ ናቤ ኢሳያሳ ማፃፋ ናባቢሺን ሲይዲ “ሄሲ ኔ ናባቢዛይሲ ኔስ ጌሊዜ?” ጊዴስ። ጉንዱላ ኣዴዚካ “ታና ኤሪሲዛ ኣሲ ባይንዳ ታ ዎስታ ኤሮ?” ጊዴስ። ኢዚካ ጌዴ ኢዛ ጋሬዛን ጌልዲ ኢዛ ኣቻን ኡታና ማላ ዎሲዴስ። ኢዚ ናባቢዛ ማፃፋይ “ኢዚ ዶርሳ ማላ ሹኬታና ላጌቲዴስ፤ ዶርሳ ላቃይ ኢሲኬ ቃንፂዛይሳ ሲንꬃን ጮዑ ጊዛ ማላ ሄሳꬆካ ኢዚ ባ ዱና ፖጊቤና። ባና ካዉሺዲ ፒርዳይ ባይንዳዴ ጊዲዴስ። ኢዛ ሼምፖይ ቢታ ቦላፌ ዲጌቲዴስ። ኢዛ ዬሌቴꬃ ጊሽ ሃሳያና ዳንዳዪዛይ ኦኔ?” ጌስ። ጉንዱላ ኣዴዚካ ዛሪዲ ፒሊጶሳ “ናቤዚ ሃይሳ ኦና ጊሽ ጊዜ? ባ ጊሽ ጊዜዬ? ዎይኮ ሃራ ኣሳ ጊሽ ጊዜ? ሃያና፥ ታስ ዮታርኪ!” ጊዴስ። ፒሊጶሲካ ባ ዱና ዶይዲ ሄ ማፃፋፔ ዶሚዲ ዬሱሳ ሚሺራቾ ቃላ ጊሽ ማርካቲዴስ። ኢስቲ ኢሲፌ ቢሼ ሃꬂ ዲዛሶ ጋኪዳ። ኣዴዚካ “ሄኮ ሃꬂ ሃይሳን ዴስ፤ ሂስቲን ታ ፃማቄቶንታ ማላ ዲጊዛይ ኣዜ?” ጊዴስ። ፒሊጶሲካ “ኔ ኩሜꬃ ዎዝናፔ ኣማኒኮ ፃማቄታና ዳንዳያሳ” ጊዴስ። ኣዴዚካ “ዬሱስ ኪርስቶሲ ፆሳ ና ጊዲዳይሳ ኣማናይስ” ጊዴስ። ኣዴዚ ፓራ ጋሬዚ ኤቃና ማላ ኣዛዚን ናምዓይ ኢሲፌ ሃꬃን ዎꬊን ፒሊጶሲ ኣዴዛ ፃማቂዴስ። ኢስቲ ሃꬃፌ ኬዚሺን ፆሳ ኣያናይ ፒሊጶሳ ዴንꬂ ኤፊዴስ። ኣዴዚ ሄሳፌ ጉዬ ኢዛ ቤይቤና። ጊዶ ኣቲን ኡፋይሳን ባ ኦጌ ቢዴስ። ሄሳፌ ጉዬ ፒሊጶሲ ኣዛፆኔ ጌቴቲዛሶን ቤቲዴስ። ቂሳሪያ ጌቴቲዛሶ ጋካናስ ኢዚ ቢዛ ኦጌ ቦላ ካታማን ኡባን ሚሺራቾ ቃላ ሳባኪዴስ። ሳዉሌይ ጎዳ ኣማኒዛ ኣሳ ዎꬋናስ ጬቄቲሼ ቄሴታ ሃላቃኮ ቢዴስ። ጎዳ ኦጌ ካሊዛይታ ማጫሳታኔ ኣዴታ ዴሚ ቃቺዲ ዬሩሳላሜ ኤኪ ያናስ ዳማስቆ ጌቴቲዛሶን ዲዛ ኣይሁዳታ ዎሳ ኬꬃስ ባብዳቤ ፃፋና ማላ ቄሴታ ሃላቃ ዎሲዴስ። ዳማስቆ ጋካና ማቲሺን ቆፖንታ ሳሎፔ ፖዖይ ኢዛ ዩሾን ፖልዑ ጊዴስ። ኢዚካ ሄራካ ቢታ ቦላ ኩንዲዲ ሳሎፔ “ሳዉሌ፥ ሳዉሌ፥ ታና ኣዛስ ጎዳይ?” ጊዛ ቃላ ሲይዴስ። ሳዉሌይካ “ጎዶ! ኔ ኦኔ?” ጊዴስ። ኢዚካ ኢዛስ “ታኒ ኔ ጎዴꬂዛ ዬሱሳኮ!” ኔ ሃዒ ዴንዳዳ ጌዴ ካታማ ጌላ፤ ኔ ኦꬃናስ ቤሲዛዝ ኔስ ታ ዮታና” ጊዴስ። ሳዉሌራ ኢሲፌ ቢዛ ኣሳቲ ቃላ ጊሪስ ሲሳፌ ኣቲን ኦናካ ቤዮንታ ጊሽ ባ ዱና ኦይኪ ኤቂዳ። ሳዉሌይ ባ ኩንዲዳሶፔ ዴንዲዲ ኣይፌ ዶዪ ፄሊዛ ዎዴ ኣይኮካ ዴማናስ ዳንዳይቤና። ሄሳ ጊሽ ኢዛራ ዲዛ ኣሳቲ ኢዛ ኩሼ ኦይኪዲ ካሌꬂ ኤኪዲ ዳማስቆ ኤፊዳ። ሄꬑ ጋላስ ጋካናስ ቆቂዲኔ ካꬅ ሃꬄ ቤይቤና። ዳማስቆን ኢሲ ሃናኒያ ጌቴቲዛ ኣማኒዛዴይ ዴስ። ኢዛስ ጎዳይ ኣጁታን “ሃናኒያ” ጊዲ ፄይጊዴስ፤ ኢዚካ “ዬ ጎዶ!” ጊዴስ። ጎዳይካ ኢዛ “ዴንዳ! ሱሬ ጌቴቲዛ ኦጌይራ ዩሁዳ ጌቴቲዛሶ ባ። ሄን ሳዉሌ ጌቴቲዛ ኢሲ ፃርሴሴ ኣሲ ዎሲሼ ዴስ፤ ኔ ኢዛ ኮያ ዴማ። ጋሶይካ ሃናኒያ ጌቴቲዛይሲ ሳዉሌይ ዲዛሶ ዪዲ ኢዚ ፄላና ማላ ኢዛ ቦላ ባ ኩሼ ዎꬂሺን ኣጁታን ቤዪዴስ።” ሃናኒያይካ ዛሪዲ “ጎዶ! ሃይሳዴይ ዬሩሳላሜን ዲዛ ጌሻታ ቦላ ኣይ ማላ ኢታ ሜቶ ጋꬂዳኮኔ ታ ዳሮ ኣሳፔ ሲያዲስ። ኢዚ ሃ ዪዳይ ኔ ሱንꬃ ፄይጊዛይታ ዉርሲ ቃቻናስ ቄሴታ ሃላቃታፔ ጎዳቴꬅ ኤኪዲኮ” ጊዴስ። ጎዳይካ ኢዛስ “ኔ ባ! ሃይሲ ኣዴዚ ኣይዛቤታ ሲንꬃኒኔ ካዎታ ሲንꬃን ሄሳꬆካ ኢስራዔሌ ዴሬ ሲንꬃን ታ ሱንꬅ ቶካና ማላ ኢዚ ታስ ዶሬቲዳይሳ። ኢዚ ታ ሱንꬃ ጊሽ ኣይ ማላ ዋዬ ቤያናኮ ታ ኢዛ ቤሳና” ጊዴስ። ሃናኒያይ ቢዲ ኢዛስ ዮቴቲዳሶ ጌሊዴስ። ሳዉሌ ቦላ ባ ኩሼ ዎꬂዲ “ታ ኢሻ ሳዉሌ ኔ ሃ ዪሺን ኔስ ኦጌ ቦላ ቆንጪዳ ጎዳ ዬሱሲ ኔ ኣይፌይ ፄላና ማላኔ ኔኒ ፂሎ ኣያናን ኩማና ማላ ታና ኔኮ ኪቲዴስ” ጊዴስ። ሄራካ ሳዉሌ ኣይፌፔ ፖቆ ማላይ ፖቄቲ ዎꬊን ኢዚ ፄላና ዳንዳዪዴሲኔ ዴንዲዲ ፃማቄቲዴስ። ካꬂካ ሚዲ ሚኒዴስ። ኡንዴና ዎዴ ኣማኒዛይታራ ዳማስቆን ጋምዒዴስ። ሄራካ ዬሱሲ ፆሳ ና ጊዲዳይሳ ኣይሁዳታ ዎሳ ኬꬃታን ታማርሶ ኦይኪዴስ። ሲዪዳ ኣሳይ ዉሪ “ሃይሲ ዬሩሳላሜን ሃ ሱንꬃ ፄይጊዛይታ ꬋዪሲዛ ኣዴዛ ጊዴኔ? ቃሴ ኢዚ ሃ ዪዳይ ሄ ኣሳታ ቃቺ ኤኪ ቄሴታ ሃላቃታኮ ኤፋናስ ዴኔ?” ጊሼ ማላሌቲዳ። ሳዉሌይ ካሴፔ ሚኒ ሚኒ ቢዴስ። ዳማስቆን ዲዛ ኣይሁዳታስ ዬሱሲ ኢዚ ፆሲ ኪቲዳዴ ጊዲዳይሳ ኣማንꬂሼ ኣሳ ዱና ኦይꬂዴስ። ዳሮ ጋላሳታፔ ጉዬ ኣይሁዳቲ ሳዉሌ ዎꬋናስ ዱላቲዳ። ኢዚካ ኢስታ ቆፋ ኤሪዴስ። ኢስቲካ ኢዛ ዎꬋናስ ካታማ ጌልꬂዛ ኦጌን ጋላሲኔ ቃማ ናጊዳ። ኣማኒዛይቲ ጊዲኮ ኢዛ ጊዶꬅ ካታማ ዩሾን ዲዛ ማስኮቴዛራ ኬሼን ዱጌ ዎꬂዳ። ሳዉሌይ ዬሩሳላሜ ዪዲ ኣማኒዛይታራ ዋላኬታና ኮዪን ኢዚ ቱሙ ኣማኒዛዴ ጊዲዳይሳ ኢስቲ ኣማኔቶንታ ጊሽ ኢዛስ ባቢዳ። ጊዶ ኣቲን ባርናባሲ ኢዛ ሃዋሬታኮ ኤፊን ሳዉሌይ ኢዚ ዳማስቆ ኦጌ ቦላ ጎዳ ዎስቲ ቤዪዳኮ፥ ጎዳይካ ኢዛስ ኣይ ዮቲዳኮኔ ቃሴካ ዳማስቆን ዲሼ ኢዚ ኣይ ማላ ፃላቴꬃራ ዬሱሳ ሱንꬃን ሳባኪዳኮ ኢስታስ ዮቲዴስ። ሄሳ ጊሽ ሳዉሌይ ኢስታራ ዲዴስ። ዬሩሳላሜን ዩዪ ዩዪ ኣስ ባቦንታ ጎዳ ሱንꬃን ታማርሲዴስ። ጊሪኬ ዴሬፔ ዪዳ ኣይሁዳታራ ሃሳይሼ ፓላሜቲዴስ፤ ጊዶ ኣቲን ኣሳይካ ኢዛ ዎꬋናስ ኮዪዴስ። ኣማኒዛይቲ ሄሳ ኤሪዲ ዱጌ ቂሳሪያ ጌቴቲዛሶ ዎꬂዲ ፃርሴሴ ዬዲዳ። ሄሳ ዎዴ ዩሁዳኒኔ ጋሊላን፥ ሳማሪያንካ ዲዛ ኣማኒዛይቲ ሳሮን ዲዲ ካሴፔ ሚኒዳ። ቃሴካ ፆሳ ያሻቴꬃን ሲሜሬቲሼ ፂሎ ኣያናን ሚኔቲዳኔ ካሴፔ ቆዳን ዳሪ ዳሪ ቢዳ። ጴፅሮሲ ዴሬፔ ዴሬን ዩዪሼ ሊዳ ካታማን ዲዛ ኣማኒዛይታ ቤያናስ ዱጌ ዎꬊዴስ። ሄን ኤኒያ ጌቴቲዛይሳ ኦሱፑን ላይꬅ ሂፃን ቃሼቲ ኡቲዳ ኢሲ ጉንዳ ኣስ ዴሚዴስ። ጴፅሮሲካ “ሃይሶ ኤኒያ! ዬሱስ ኪርስቶሲ ኔና ፓꬃና፤ ዴንዳ ኔ ሂፃ ዴንꬃ!” ጊዴስ። ኤኒያይ ሄራካ ፑሱኩ ጊ ዴንዲዴስ። ሊዳኒኔ ሳሮናን ዲዛ ኣሳይ ዉሪ ኢዛ ቤዪዲ ጎዳን ኣማኒዴስ። ኢዮጴ ጌቴቲዛሶን ፃቢታ ጌቴቲዛ ኢሲ ኣማኒዛራ ዳዉስ። ኢዚ ሱንꬃ ቢርሼꬂ ጊሪኬ ቃላራ “ዶርቃ” ጌቴቴስ። ኢዛ ኡባ ዎዴ ሎዖ ኦሶ ሚና ኦꬃሼኔ ማንቆታ ማዳሼ ዳዉስ። ሄ ዎዴ ኢዛ ሃርጋዳ ሃይቂን ኣሳይ ኣሃ ሜጪ ፑዴ ፖቄን ኬሲ ዎꬂዴስ። ሊዳይ ኢዮጴስ ማታ ጊዲዳ ጊሽ ኣማኒዛይቲ ጴፅሮሲ ሊዳን ዲዛይሳ ሲይዲ ናምዑ ኣሳታ ኪቲዲ “ኤሌ ሃ ያርኪ!” ጊ ዎሲዳ። ጴፅሮሲካ ዴንዲዲ ኪቴቲዳ ኣሳታራ ጋኪዳ ዎዴ ኢዛ ፑዴ ሄ ፖቄ ቦላ ኬሲዳ። ኣምዔቲካ ዉሪ ኢዛ ዩዪ ኣꬊ ኤቂዲ ዶርቃይ ፓፃ ዳሼ ኢስታራ ኦꬂዳ ቃሚሴታኔ ማይዖታ ቤሲሼ ዬኪዳ። ጴፅሮሲካ ኣሳ ዉርሲ ኪፍሌዛፔ ኬሲዲ ጉልባቲ ዎሲዴስ። ኣሃኮ ሲሚዲ “ሃኔ ፃቢታ ዴንዳ!” ጊዴስ። ኢዛካ ባ ኣይፌ ዶያዳ ፄላዱስ። ጴፅሮሳካ ቤያዳ ዴንዳ ኡታዱስ። ኢዚካ ኢዚ ኩሼ ኦይኪ ዴንꬂዴስ። ኣማኒዛይታኔ ኣምዔታ ፄይጊዲ ኢዞ ኢስታስ ፓꬂዲ ኢሚዴስ። ሄ ሃኖይ ኩሜꬃ ኢዮጴን ኤሬቲዴሲኔ ዳሮ ኣሳይካ ጎዳ ኣማኒዴስ። ጴፅሮሲካ ኢሲ ሲሞና ጌቴቲዛ ጋልባ ቃጪዛዴራ ኢዮጴን ዳሮ ዎዴ ዴዒዴስ። ቂሳሪያ ጌቴቲዛ ዴሬን “ፃላኔ ዎታዳራታ” ኢሲ ቡቴ ጊዶን ማቶ ሃላቃ ጊዲዳ ኢሲ ቆርኖሎሳ ጌቴቲዛይሲ ዴስ። ኢዚካ ባ ኬꬃ ኣሳ ኩሜꬃራ ኣያና ሃኖን ሚኖኔ ፆሴ ባቢዛዴ፤ ማንቆታስካ ዳሮ ሙፁዋታ ኢሚዛዴኔ ዳሮ ዎዴ ፆሴ ዎሲዛ ኣሳ። ኢሲ ጋላስ ጋላሳፌ ኡዱፉን ሳቴ ቦላ ፆሳ ኪታንቻይ ኢዛስ ኣጁታን ቤቲዲ ኢዛኮ ዪዲ “ቆርኖሎሳ” ጊ ፄይጊሺን ቆንጬን ቤዪዴስ። ቆርኖሎሲካ ዳጋማራ ቲሺ ሂስቲ ፄሊሼ “ጎዶ ሃይሲ ኣዜ?” ጊዴስ። ኪታንቻይካ ዛሪዲ “ኔ ዎሳይኔ ኔ ሙፁዋታይ ቆፌታናስ ፑዴ ፆሳ ሲንꬅ ጋኪዴስ። ኔ ሃዒ ኣስ ኢዮጴ ዬዳዳ ጴፅሮሳ ጌቴቲዛ ሲሞና ፄይጊሳ። ኢዚካ ኣባ ማታን ዲዛ ጋልባ ቃጪዛ ሲሞና ሶን ኢማꬃቴꬅ ዴስ” ጊዴስ። ቆርኖሎሳ ሃሳይሲዳ ኪታንቻይ ኢዛፔ ሻኬቲዲ ቢዳፔ ጉዬ ባ ኣሽካራታፔ ናምዓታ ቃሴ ኣያና ዮዖስ ሚኖኔ ኢዛስ ዳሮ ኣማኔቲዛ ዎታዳራታፔ ኢሳ ፄይጊሲዲ፥ ኢዚ ቤዪዳይሳ ዉርሲ ኢስታስ ዮቲዲ ኢዮጴ ኪቲዴስ። ኪቴቲዳ ኣሳቲ ዎንቴꬃ ጋላስ ጌዴ ካታማይኮ ማቲሺን ጴፅሮሲ ኡሱፑን ሳቴ ቦላ ዎሳና ፑዴ ፖቄ ቦላ ኬዚዴስ። ሄሳ ዎዴ ኢዚ ጋፊዳ ጊሽ ቁማይ ቡሮ ካፂሺን ꬊስኮ ማላ ሊጲጲ ሂስቲን ኣጁታራ ሳሎይ ዶዬቲን ኢሲ ጊታ ፃፄቲዳ ማይዖ ማላይ ኦይዱ ባጋራ ኦይኬቲዲ ዱጌ ቢታን ዎꬊሺን ቤዪዴስ። *** ሄ ማይዖዛ ቦላ ኦይዱ ቶሆይ ዲዛ ዱማ ዱማ ዶዓቲ ቢታራ ጎሼቲዛ ሜꬌቴꬃቲኔ ሳሎ ቦላ ፒራꬊዛ ካፎቲ ዴቴስ። ሄሳ ዎዴ “ጴፅሮሳ ዴንዳ ሃይታ ሹካዳ ማ” ጊዛ ቃላይ ኢዛስ ሲዬቲዴስ። ጴፅሮሲ ቃሴ “ጎዶ ሃይሲ ሃኔና! ጌሽ ጊዶንታይሳ ዎይኮ ቱና ሚሻ ታ ሙሌራካ ማ ኤሪኬ” ጊዴስ። ሄ ካሴ ቃላይ ቃሴካ ናምዓንꬆ ኢዛኮ ዪዲ “ፆሲ ጌሺዳይሳ ኔ ቱና ማላ ቆዶፓ” ጊዴስ። ሄሲካ ሄꬑቶ ሺሬቲ ሺሬቲ ኢዛኮ ዪዳፔ ጉዬ ማይዖ ሚሳቲዛይሲ ሄራካ ፑዴ ሳሎ ቢዴስ። ጴፅሮሲካ ባ ቤዪዳ ኣጁታዛ ቢርሼꬃ ኤራናስ ዳሮ ሜቶቲዲ ኬሂ ቆፎ ቦላ ዲሺን ቆርኖሎሲ ኪቲዳ ኣሳቲ ሲሞና ኬꬄ ኮዪሼ ዴሚዲ ፔንጌን ኤቂዳ። ቃላ ꬎቁ ሂስቲዲ “ጴፅሮሳ ጌቴቲዛ ሲሞኒ ዲዛሶይ ሃይሳን ኣዋኔ?” ጊ ኦይቺዳ። ጴፅሮሲ ባ ቤዪዳይሳ ኬሂ ቆፒሺን ፂሎ ኣያናይ ኢዛ “ሄኮ ሄꬑ ኣሳቲ ኔና ኮዬቴስ። ዴንዳ! ዱጌ ዎꬋዳ ኢስታ ዬዲዳይ ታና ጊዲዳ ጊሽ ሲꬌይ ባይንዳ ኢስታራ ባ” ጊዴስ። *** ጴፅሮሲካ ዱጌ ዎꬊዲ “ሄኮ ኢንቴ ኮዪዛዴይ ታናኮ! ኢንቴ ዪዳይ ኣዛሴ?” ጊዴስ። ኢስቲካ ኢዛስ “ኑኒ ማቶ ሃላቃ ቆርኖሎሳ ማታፔ ዪዶስ። ኢዚካ ፆሳስ ባቢዛ ፂሎ ኣሳኔ ኣይሁዳ ኣሳ ኡባ ማታን ዳሮ ቦንቼቲዳ ኣሳ። ኔካ ኢዛ ኬꬄ ባና ማላኔ ኔ ጊዛይሳ ኢዚ ሲያና ማላ ጌሻ ኪታንቻይ ኢዛስ ዮቲዴስ” ጊዳ። ጴፅሮሲካ ኣሳታ ባ ዲዛሶን ሞኪ ኤኪዲ ኣይሲዴስ። ጴፅሮሲካ ዎንቴꬃ ጋላስ ዴንዲዲ ኢስታራ ቢዴስ። ኢዮጴፌ ዪዳ ኢሲ ኢሲ ኣማኒዛ ኣሳቲ ኢዛራ ኢሲፌ ቢዳ። ቆርኖሎሲካ ባ ዳቦታኔ ማታ ላጌታ ባ ሶን ሺሺዲ ናጎ ቦላ ዲሺን ኢዚ ናምዓንꬆ ጋላስ ቂሳሪያ ጋኪዴስ። ጴፅሮሲካ ጌዴ ቆርኖሎሳ ኬꬄ ጌሊን ቆርኖሎሲ ኢዛ ሞኪ ኤኪዲ ኢዛ ቶሆ ቦላ ሆኪ ጎይኒዴስ። ጊዶ ኣቲን ጴፅሮሲ “ታካ ኔ ማላ ኣሳኮ! ዴንዳ” ጊዲ ዴንꬂዴስ። ጴፅሮሲካ ኢዛ ሃሳይሲሼ ኢዛራ ሶ ጌሊሺን ዳሮ ዴሬይ ሺቂ ኡቲዳይሳ ቤዪዴስ። ኢዚካ ኢስታስ “ኣይሁዳ ኣሲ ሃራ ዴሬ ኣሳራ ጋጎንታ ማላ ዎይኮ ሃራ ዴሬ ኣስ ጊዲዳይታ ማታ ሺቆንታ ማላ ኑ ዎጋይ ዲጊዛይሳ ኢንቴ ኤሬታ። ጊዶ ኣቲን ታ ኦናካ ቱና ዎይኮ ኢዚ ጌሽ ዴና ጎንታ ማላ ፆሲ ታስ ቆንጪሲዴስ። ሄሳ ጊሽ ታ ፄይጌቲዳ ዎዴ ሄኮ ሲꬎንታ ያዲስ። ሂስቲን ኢንቴ ታና ኣዛስ ፄይጊዳኮኔ ኤራና ኮያይስ” ጊዴስ። ቆርኖሎሲካ “ኦይዱ ጋላሳፌ ካሴ ሊኬ ሃኒ ዎዴ ጋላሳፌ ኡዱፉን ሳቴን ታኒ ታ ሶን ዎሲሺን ቆፖንታ ቦꬃ ማይዖ ማይዒዳ ኣሲ ዪዲ ታ ሲንꬃን ኤቂዲ ታና ‘ቆርኖሎሳ! ኔ ዎሳይ ሲዬቲዴስ፤ ኔ ማንቆታስ ኢሚዛ ሙፁዋታይ ፆሳ ሲንꬂ ጋኪዴስ። ሄሳ ጊሽ ኢዮጴ ካታማ ኣስ ኪታዳ ጴፅሮሳ ጌቴቲዛ ሲሞና ኤሂሳ። ኢዚ ኣባ ኣቻን ጋልባ ቃጪዛ ሲሞና ኬꬃን ኢማꬃቴꬅ ዴስ’ ጊዴስ። ታካ ሄራካ ኔኮ ኣስ ኪታዲስ። ኔ ዩሳይካ ሎዖ። ሂስቲኮ ጎዳይ ኔና ኣዛዚዳይሳ ኔ ኑስ ዮቲኮ ፆሲ ዮቲዳይሳ ኔፔ ሲያናስ ኑ ዉሪካ ሃይሳን ፆሳ ሲንꬃን ዶስ” ጊዴስ። ጴፅሮሲካ “ፆሲ ኦናካ ሻኪ ማዶንታይሳ ታ ቱማፔ ኤራዲስ። ጊዶ ኣቲን ፆሳስ ባቢዛይታኔ ፂሎ ኦꬂዛይታ ዉርሲ ኦና ባጋፌ ጊዲንካ ኢዚ ኤኬስ። ፆሲ ኡባስ ጎዳ ጊዲዳ ዬሱስ ኪርስቶሳ ባጋራ ኢስራዔሌ ኣሳስ ኪቲዳ ሳሮቴꬃ ሚሺራቾ ኪታይ ሃይሳ። ዮሃኒሲ ፂንቃታ ጊሽ ሳባኪዳፔ ጉዬን ጋሊላፔ ዶሚዲ ኩሜꬃ ዩሁዳን ሃኒዳይሳ ኢንቴ ኤሬታ። ፆሲ ናዚሬቴ ዬሱሳ ፂሎ ኣያናኒኔ ዎልቃን ቲዪዴስ። ኢዚካ ፆሲ ኢዛራ ዲዛ ጊሽ ባ ጋኪዳሶን ኡባን ሎዖ ኦꬂሼ ፃላዔ ጎዳቴꬃ ጊዶን ዲዛይታ ዉርሲ ፓꬂዴስ። “ኢዚ ኣይሁዳታ ዴሬኒኔ ዬሩሳላሜ ካታማን ኦꬂዳይሳ ኡባስ ኑ ማርካ። ቃሴካ ኣሳይ ኢዛ ሚꬃ ቦላ ካቂ ዎꬊዴስ። ጊዶ ኣቲን ፆሲ ኢዛ ሄꬓንꬆ ጋላስ ሄይቆፔ ዴንꬂዴሲኔ ኣሲ ኢዛ ቤያና ማላ ኦꬂዴስ። ኢዚ ቆንጪዳይ ኣሳ ኡባስ ጊዶንታ ሃይቆፔ ዴንዲን ኢዛራ ሚዳይታሲኔ ኢዛራ ኡዪዳይታስ ፆሲ ኮይሮ ዶሪዳ ኑስ ኢዛ ማርካታሳ። ኢዚ ኑ ዴሬዛስ ሳባካና ማላኔ ሃይቂዳይታ ቦላኔ ፓፃ ዲዛይታ ቦላ ፒርዳናስ ፆሲ ሹሚዳይ ኢዛ ጊዲዳይሳ ኑ ማርካታና ማላ ኑና ኣዛዚዴስ። ኢዛ ኣማኒዳዴይ ዉሪ ኢዛ ሱንꬃን ናጋራ ማሬቲዲ ጌያናይሳ ናቤቲ ኢዛስ ማርካቴቴስ” ጊ ዮቶ ዶሚዴስ። ጴፅሮሲ ሄሳ ሃሳዪሺን ቃላ ሲዪዛይታ ኡባ ቦላ ፂሎ ኣያናይ ዎꬊዴስ። ቃፃሬቲዳይታ ባጋፌ ጴፅሮሳራ ዪዳ ኣማኒዛይቲ ፂሎ ኣያና ኢሞቴꬂ ኣይዛቤታ ቦላ ዎꬊሺን ቤዪዲ ማላሌቲዳ። ሄሲካ ኢስቲ ዱማ ቃላን ሃሳዪሺኒኔ ፆሳ ጋላቲሺን ሲዪዳ ጊሻሳ። ሄ ዎዴ ጴፅሮሲ፥ “ሃይቲ ኣሳቲ ኑ ማላ ፂሎ ኣያና ኤኪዳ ጊሽ ኢስቲ ሃꬃን ፃማቄቶንታ ማላ ኢስታ ዲጋናይ ኦኔ?” ጊዴስ። ሄሳ ጊሽ ዬሱስ ኪርስቶሳ ሱንꬃን ፃማቄታና ማላ ኣዛዚዴስ። ሄሳፌ ጉዬ ጴፅሮሲ ጉꬃ ዎዴ ኢስታራ ዳና ማላ ዎሲዳ። ሃዋሬቲኔ ዩሁዳን ዲዛ ኣማኒዛይቲ ኣይዛቤቲ ፆሳ ቃላ ኤኪዳይሳ ሲዪዳ። ሄሳ ጊሽ ጴፅሮሲ ፑዴ ዬሩሳላሜ ኬዚን ቃፃሬቲዳ ኣይሁዳፔ ኣማኒዛይቲ ጴፅሮሳ፥ “ኔ ቃፃሬቶንታ ኣሳታ ኬꬅ ጌላዳ ኢስታራ ካꬅ ማዳሳ” ጊዲ ዋላሲዳ። ጴፅሮሲ ቃሴ ኢስታስ ጌላና ማላ ማራራ ሂዝጊ ዮቲዴስ። “ታኒ ኢዮጴ ካታማን ዎሲሺን ꬊሲኮ ማላ ታና ሊጲጲ ሂስቲዲ ኣጁታን ጊታ ማይዖ ሚሳቲዛ ሚሺ ኦይዱ ባጋራ ኦይኬቲዲ ሳሎፔ ታ ዲዛሶ ዎꬊሺን ቤያዲስ። ታ ቲሺ ሂስታ ፄሊሺን ኦይዱ ቶሆራ ዲዛ ሜሄታ፥ ዎራ ዶዓታ፥ ቢታ ቦላ ጎሼቲዛ ሜꬌቴꬃታኔ ሳሎ ቦላ ፒራꬊዛ ካፎታ ቤያዲስ። ሄራካ ታና ‘ጴፅሮሳ ዴንዳ! ሃይሳ ሹካዳ ማ’ ጊዛ ቃላ ሲያዲስ። “ታካ ‘ጎዶ ሄሲ ሃኔና፤ ታኒ ቱና ዎይኮ ጌሽ ጊዶንታይሳ ሙሌካ ታ ዱናኮ ሺሻ ኤሪኬ’ ጋዲስ። “ሄ ካሴ ቃላይ ቃሴካ ‘ፆሲ ጌሺዳይሳ ኔ ቱኒሶፓ’ ጊዲ ሳሎፔ ታስ ዮቲዴስ። ሄሲካ ሄꬑቶ ሺሬቲ ሺሬቲ ዮቴቲዳፔ ጉዬ ዉሪካ ሲሚዲ ፑዴ ሳሎ ቢዴስ። “ቂሳሪያፔ ታኮ ኪቴቲዳ ሄꬑ ኣሳቲ ሄራካ ሄ ሳቴይን ዪ ጋኪዲ ታ ዲዛ ኬꬃ ካሬን ኤቂዳ። ታ ኣይኔ ሲꬎንታ ኢስታራ ባና ማላ ፂሎ ኣያናይ ታስ ዮቲዴስ። ሄ ኡሱፑን ኢሻቲ ታናራ ኢሲፌ ቢዲ ኣዴዛ ኬꬄ ጌልዶስ። ኢዚካ ፆሳ ኪታንቻይ ኢዛ ኬꬃን ኤቂዲ ኢዛስ ቤቲዳይሳኔ ‘ኢዮጴ ጌቴቲዛሶ ኣስ ዬዳዳ ጴፅሮሳ ጌቴቲዛ ሲሞና ፄይጊሳ። ኢዚ ዪዲ ኔናኔ ኔሶ ኣሳ ዉርሲ ኣሻና ቃላ ዮታና’ ጊዳይሳ ኑስ ዮቲዴስ። “ታካ ባዳ ቡሮ ዮቶ ኦይኪሺን ኮይሮ ፂሎ ኣያናይ ካሴ ኑ ቦላ ዎꬎይሳꬆ ኢስታ ቦላካ ዎꬊዴስ። ካሴ ጎዳይ ኑስ ዮቲሼ ‘ዮሃኒሲ ሃꬃን ፃማቂዴስ ሺን ኢንቴ ፂሎ ኣያናን ፃማቄታና’ ጊዳ ቃላይ ሄራካ ታስ ቆፌቲዴስ። ሄሳ ጊሽ ኑኒ ጎዳ ዬሱስ ኪርስቶሳ ኣማኒሺን ኑስ ኢሚዳ ፂሎ ኣያና ፆሲ ኢስታስ ኢሚኮ ሂስቲን ፆሳራ ኤቄታናስ ታኒ ኦኔ?” ጊዴስ። ኢስቲ ሄሳ ሲዪዳ ዎዴ ኢስታስ ጊዛዚ ꬋዪን ጮዑ ጊ ሲሚዲ “ሃይሳ ማላ ጊዲኮ ኣይዛቤቲካ ሃ ኦራꬃ ዴዖኮ ያና ማላ ፆሲ ኣሳስ ማሮቴꬅ ኢሚዴስ ጉሳ” ጊዲ ፆሳ ጋላቲዳ። ኢስቲፋኖሴ ቦላ ዴንዲዳ ጎዴቴꬃ ጋሶን ላሌቲዳ ኣማኒዛ ኣሳይ ቃላ ኣይሁዳታስ ፃላላ ዮቲሼ ፒንቄ፥ ቆጲሮሴኔ ኣንፆኪያ ጌቴቲዛሶ ጋካናስ ካንꬂ ቢዳ። ቆጲሮሴፔኔ ቃሬናፔ ዪዳ ኢሲ ኢሲ ኣሳቲ ኣንፆኪያ ቢዲ ጊሪኬታሲካ ጎዳ ዬሱሳ ሚሺራቾ ቃላ ዮቲዳ። ጎዳ ማዶይካ ኢስታራ ዴስ፤ ቆዳን ኬሂ ዳሮ ኣሳይ ኣማኒዲ ጎዳኮ ሲሚዴስ። ሄሳ ዎሬይካ ዬሩሳላሜን ዲዛ ዎሳ ኬꬃ ኣሳ ሃይꬃን ዎꬊን ዎሳ ኬꬃያ ባርናባሳ ኣንፆኪያ ዬዳዱስ። ኢዚካ ሄ ቢ ጋኪዲ ፆሲ ባ ኣꬎ ኪያቴꬅ ዴራስ ኢሚዳይሳ ቤዪዲ ኡፋዬቲዴሲኔ ኣሳይ ዉሪካ ኩሜꬃ ዎዝናፔ ጎዳ ኣማኖን ሚናና ማላ ዞሪዴስ። ኢዚካ ፂሎ ኣያናኒኔ ኣማኖን ኩሚዳ ሎዖ ኣሳ። ዳሮ ዴሬይ ጎዳ ኣማኖን ጉጄቲዴስ። ሄሳፌ ካሊዲ ባርናባሲ ሳዉሌ ኮያና ፃርሴሴ ቢዴስ። ኢዛ ዴሚዲ ኣንፆኪያ ኤኪ ዪዴስ። ናምዓይካ ሄን ዲዛ ዎሳ ኬꬃ ኣሳራ ጊዲዲ ላይꬅ ኩሜꬅ ዳሮ ዴሬ ታማርሲዳ። ሄን ኣንፆኪያን ኣማኒዛይቲ ኮይሮ “ኪርሳኔ” ጌቴቲ ፄይጌቲዳ። ሄ ዎዴ ኢሲ ኢሲ ናቤቲ ዬሩሳላሜፔ ዱጌ ኣንፆኪያ ዎꬊዳ። ኢስታ ጊዶፌ ኢሶይ ኣጋቦሳ ጌቴቲዛይሲ ዴንዲ ኤቂዲ ፂሎ ኣያናይ ኢዛ ቤሲን ኣላሜ ኡባን ጊታ ኮሻይ ዴንዳናይሳ ዮቲዴስ። ሄሲካ ኦሮሜ ካዎ ቃላዎዶሳ ቄሳሬ ጌቴቲዛይሳ ካዎቴꬃ ዎዴ ፖሌቲዴስ። ኣማኒዛይቲ ዉሪ ኢሶይ ኢሶይ ባ ዎልቃ ኬና ሚሼ ኬሴቲዲ ዩሁዳን ዲዛ ኣማኒዛ ኢሻታ ማዳናስ ቃቺዳ። ማዶ ሚሻ ኬሴቲዲ ባርናባሳኔ ሳዉሌ ኩሼን ጪማታስ ጋꬃና ማላ ዬዲዳ። ሄ ዎዴ ካዎ ሄርዶሲ ኢሲ ኢሲ ኣማኒዛ ኣሳ ጎዲ ጎዲ ሜቶꬂዴስ። ዮሃኒሳ ኢሻ ያቆቤ ማሻን ዎꬊሲዴስ። ኢዚካ ሄሳ ኦꬂዳይ ኣይሁዳታ ኡፋይሲዳይሳ ቤዪዲ ጴፅሮሳካ ኦይꬂዴስ። ሄሲካ ሃኒዳይ ኣይሁዳታስ ኡኬꬃ ባዓሌ ጌቴቲዛ ባዓሌ ጋላሳ። ጴፅሮሳካ ቃሾ ኬꬄ ጌልሲዳፔ ጉዬ ኦይዱ ኦይዱ ዎታዳራቲ ታራን ታራን ናጋና ማላ ጊጌቲዳ ዎታዳራታስ ኢሚዴስ። ኢዚ ሄሳꬆ ኦꬂዳይ ፓዚጋ ባዓሌይ ኣꬊዳ ማላ ኬሲዲ ዴሬይ ፒርዳና ማላ ሺሻናሳ። ሄሳ ጊሽ ጴፅሮሳ ቃሾ ኬꬄ ጌልሲዲ ናጌቴስ። ጊዶ ኣቲን ዎሳ ኬꬃ ኣሳይ ኢዛስ ኬሂ ሚኖ ዎሳ ዎሲዴስ። ሄርዶሲ ጴፅሮሳ ዴሬዛ ሲንꬅ ሺሻና ቆፒ ኡቲ ዲሺን ሄ ቃማ ጊዶꬅ ናምዑ ሳንሳላታን ቃሼቲዲ ናምዑ ዎታዳራታ ጊዶን ኢቺዴስ። ቃሾ ኬꬃ ናጊዛይቲ ኬꬃ ፔንጌ ቦላ ኤቂ ናጊሺን፥ ጎዳ ኪታንቻይ ኤዚጎንታ ኢስታስ ቤቲዴስ። ኢስቲ ዲዛ ኪፊሌን ፖዖይ ፖዒዴስ። ኪታንቻዚካ ጴፅሮሳ ሚሌ ቦቺ ቤጎꬂዲ “ኤሌ ዴንዳ!” ጊዴስ። ሄራካ ሳንሳላታይ ኢዛ ኩሼፔ ጋዴን ዎꬊዴስ። ኪታንቻዚ ኢዛ “ኔ ማይዖ ማይዓ! ጫማካ ኣꬃ!” ጊን ጴፅሮሲካ ኣዛዜቲዳ ማላ ኦꬂዴስ፤ ቃሴካ ኪታንቻይ “ኔ ጋቤ ማይዓዳ ታና ካላ” ጊዴስ። ጴፅሮሲካ ቃሾ ኬꬃፌ ኢዛ ካሊ ኬዚዴስ። ጊዶ ኣቲን ኢዛስ ኣጉሞ ቤዪዛ ሚሳቲዴስ ኣቲን ኪታንቻዚ ኦꬂዛይሲ ቱሙ ጊዲዳይሳ ኤሪቤና። ኮይሮ ዛቤታፔኔ ናምዓንꬆ ዛቤታፔ ኣꬊዲ ጌዴ ካታማ ኬሲዛ ኦጌ ቦላ ዲዛ ቢራታ ፔንጋኮ ጋኪዳ። ፔንጌይካ ባርካ ዶዬቲ ዎꬊዴስ። ኢስቲ ኬዚ ቢዳ። ኢስቲ ቄሪ ኦጌ ዲዛሮ ኣꬊዳ ማላ ኪታንቻዚ ኢዛፔ ሻኬቲዴስ። ጴፅሮሳስ ካሃይ ሲሚሺን “ጎዳይ ባ ኪታንቻ ኪቲዲ ኢዛ ሄርዶሳ ኩሼፔኔ ኣይሁዳቲ ታ ቦላ ቆፒዳ ኡባፌ ታና ኬሲዳይሳ ታ ሃዒ ቱማፔ ኤራዲስ” ጊዴስ። ሄሳ ኣኬኪ ኤሪዳፔ ጉዬ ዳሮ ኣሳይ ኢሲ ቦላ ሺቄቲዲ ዎሲዛ ማርቆሳ ጌቴቲዛ ዮሃኒሳ ኣዮ ማራሚሶ ቢዴስ። ኢዚ ሄ ቢዲ ካሬ ፔንጌ ቆፂን ኢሲ ሮዶ ጌቴቲዛ ጋራዴያ ካሬ ኦኒ ቆፂዛኮኔ ኤራናስ ካሬ ማታ ባዱስ። ቃላይ ጴፅሮሳይሳ ጊዲዳይሳ ኤራዳ ኬሃ ኡፋዬቲዳ ጊሽ ካሬ ዶዮንታ ዎꬃን ጉዬ ሲማዳ “ጴፅሮሲ ካሬን ፔንጌ ቦላ ኤቂዴስ” ጋዱስ። ኣሳይካ ኢዞ “ሃኔ ጎያይ!” ጊዳ። ኢዛ ቃስ ዛራ ዛራ ኢስታስ ዮቲን “ሂስቲኮ ሄሲ ኢዛ ናጊዛ ኪታንቻ ጊዶንታ ኣጌና” ጊዳ። ጴፅሮሲ ቃስ ፔንጌ ቆꬅ ጉጂዴስ። ኢስቲካ ፔንጋ ዶይዲ ኢዛ ቤዪዳ ማላ ማላሌቲዳ። ኢዚካ ኢስቲ ጮዑ ጋና ማላ ባ ኩሼን ማላቲ ቤሲዲ ጎዳይ ኢዛ ቃሾሶፔ ዎስቲ ኬሲዳኮኔ ሎዔꬂ ዮቲዴስ። “ሃይሳ ዉርሲ ያቆቤሲኔ ሃንኮ ኣማኒዛይታስ ዮቲቴ” ጊዴስ። ሄሳፌካ ጌዴ ሃራሶ ቢዴስ። ዎንቴꬃ ጋላስ ዎንታራ ዎታዳራቲ “ጴፅሮሲ ዋኒዴ?” ጊሼ ባ ጊዶን ቡልዓኬቲዳ። ሄርዶሲ ጴፅሮሳ ኣስ ዬዲ ኮይሲዲ ኢዚ ꬋዪዳ ጊሽ ናጊዛይታ ሎዔꬂ ኦይቺዳፔ ጉዬ ኢስታ ዎꬋና ማላ ኣዛዚዴስ። ሄሳፌ ጉዬ ሄርዶሲ ዩሁዳፔ ዱጌ ቂሳሪያ ዎꬊዲ ሄን ኡቲዴስ። ሄርዶሲካ ፂሮሴ ኣሳራኔ ሲዶና ኣሳራ ኦሻ። ሄ ዴሬ ኣሳይ ካꬅ ዴሚዛይ ሄሮዶሳ ዴሬፔ ጊዲዳ ጊሽ ሄ ዴሬ ካዎ ፄሊዛዴ ቢላስፆሳፔ ማዶ ቃላ ዴሚዳ ማላ ኢሲ ቦላ ጊዲዲ ሄርዶሳራ ማቃይንꬃናስ ኦይቺዳ። ጊጋና ባሬቲዳ ጋላስ ሄርዶሲ ካዎቴꬃ ማይዖ ማይዒዲ ካዎቴꬃ ኣልጋን ኡቲዲ ዴራስ ሃሳዪዴስ። ዴሬዚካ “ሃይሲ ፆሳ ቃላፔ ኣቲን ኣሳ ቃላ ዴና!” ጊ ዋሲዴስ። ሄርዶሲካ ፆሳስ ቦንቾ ኢሞንታ ኣጊዳ ጊሽ ጎዳ ኪታንቻይ ሄራካ ሄርዶሳ ሾጪ ዬጊን ጉፁኒ ሃይቂዴስ። ፆሳ ቃላይ ጊዲኮ ዲጪዲ ኣኪ ኣኪ ቢዴስ። ባርናባሲኔ ሳዉሌይ ባ ኤኪ ቢዳ ኪታ ፖሊዲ ዬሩሳላሜ ሲሚዲ ማርቆሳ ጌቴቲዛ ዮሃኒሳካ ባናራ ኤኪ ሲሚዳ። ኣንፆኪያን ዲዛ ዎሳ ኬꬃን ናቤቲኔ ኣስታማሬቲ ዴቴስ። ሄይቲካ ባርናባሲኔ ኔጌሬ ጌቴቲዛ ሲሞናራ፥ ቃሬና ዴሬ ኣስ ሉቂዮሳራ፥ ሄርዶሳራ ኢሲፌ ዲጪዳ ሚናሄራኔ ሳዉሌራ ዉሪ ኢሲፌ ዴቴስ። ሄይቲ ዉሪ ጎዳስ ጎይኒሼኔ ፆሚሼ ዲሺን ፂሎ ኣያናይ “ባርናባሳኔ ሳዉሌ ታ ኢስታ ፄይጊዳ ኦሶስ ታስ ሻኪ ኬሲቴ” ጊዴስ። ኢስቲካ ፆሚ ዎሲዲ ባ ኩሼ ኢስታ ቦላ ዎꬂዳፔ ጉዬ ሞይዚዳ። ባርናባሲኔ ሳዉሌይ ፂሎ ኣያና ኪታን ዱጌ ሴላዉቂያ ዎꬊዳ፤ ሄፔካ ማርካቤን ጌሊዲ ቆጲሮሴ ቢዳ። ሳልሜና ጌቴቲዛሶ ጋኪዲ ኣይሁዳታ ዎሳ ኬꬃታን ፆሳ ቃላ ሳባኪዳ፤ ማርቆሳ ጌቴቲዛ ዮሃኒሲካ ኢስታራ ቢዲ ኢስታ ማዲዴስ። ኣባ ጊዶን ዲዛ ቢታ ቆጲሮሴ ጌቴቲዛ ዴሬዮ ሃ ጋፃፔ ሄ ጋፃ ጋካናስ ካንꬂ ኬዚዲ ጳፋ ጌቴቲዛሶ ጋኪሺን ኢሲ ኣይሁዳ ኣሳ ሺን ማሮኔ ዎርዶ ናቤ ባር-ዬሱሳ ጌቴቲዛ ኣስ ዴሚዳ። ኢዚካ ኢሲ ሳርጎሳ ጳዉሎሳ ጌቴቲዛ ዎዝናማ ዴሬ ኣይሲዛይሳራ ኢሲፌ ዴስ። ሃ ዴሬ ኣይሲዛ ኣዴዚ ፆሳ ቃላ ሲያና ኮይዲ ባርናባሳኔ ሳዉሌ ፄይጊሲዴስ። ማሮዚ ኤሊማሲ ባ ሱንꬃ ቢርሼꬃ ማላ ዴሬ ኣይሲዛይሲ ኣማኖንታ ማላ ꬉጳናስ ኮይዲ ኢስታራ ኤቄቲዴስ። ጳዉሎሳ ጌቴቲዳ ሳዉሌይ ፂሎ ኣያናይ ኢዛን ኩሚን ማሮዛ ቲሺ ሂስቲ ፄሊዲ፥ “ኔኖ ፂሎቴꬃ ኡባስ ሞርኬዞ! ጌኔይኔ ኢታቴꬂ ኔናን ኩሚዳይሶ ሃይሶ ዳቡሎሳ ናዉ! ጎዳ ሱሬ ኦጌ ጌላሴꬃፌ ሼምፒኪ? ሄኮ ሃዒ ጎዳ ኩሼይ ኔ ቦላ ዴስ። ኔ ቆቃና፤ ሃኒፌ ጉዬ ኣዋ ኣርሼ ፖዖ ኢሲኖካ ቤያካ” ጊዴስ። ሄራካ ሻሩማይኔ ꬉማይ ኢዛ ቦላ ዎꬊዴስ። ኩሼ ኦይኪ ባና ካሌꬃናዴ ኮሺ ያኔ ሃኔ ጊዴስ። ዴሬ ኣይሲዛይሲ ሃ ሃኒዳ ዮዖዛ ቤዪዲ ጎዳ ጊሽ ሲዪዳ ቲሚርቴን ማላሌቲዲ ኣማኒዴስ። ጳዉሎሲኔ ኢዛራ ዲዛይቲ ጳፋፔ ዴንዲዲ ጲንፊሊያ ጌቴቲዛሶን ዲዛ ጴርጌኔ ጌቴቲዛሶ ማርካቤን ጌሊ ቢዳ፤ ዮሃኒሲ ኢስታፌ ሻኬቲዲ ጉዬ ዬሩሳላሜ ሲሚዴስ። ኢስቲ ጊዲኮ ጴርጌኔፔ ዴንዲዲ ጲሲዲያ ጊዶን ዲዛ ጌዴ ኣንፆኪያ ቢዳ፤ ሳምባታ ጋላስ ኣይሁዳታ ዎሳ ኬꬅ ጌሊ ኡቲዳ። ሙሴ ዎጋ ማፃፋቲኔ ናቤታ ማፃፋቲ ናባቤቲዳፔ ጉዬ ኣይሁዳታ ዎሳ ኬꬃ ሃላቃቲ “ኑ ኢሻቶ! ኢንቴስ ሃይሳ ኣሳ ዞራና ቃላይ ዲኮ ሃሳይቴ” ጊዲ ኢስታኮ ኣሴ ዬዲዳ። ጳዉሎሲካ ዴንዲ ኤቂዲ ባ ኩሼራ ማላቲዲ “ኢንቴኖ ኢስራዔሌ ኣሳቶ! ቃሴካ ኢንቴኖ ፆሳስ ያዪዛ ኣይዛቤቶ! ሲዪቴ። ሃ ኢስራዔሌ ዴሬ ፆሳይ ካሴ ኑ ኣዋታ ዶሪዴስ፤ ኢስቲ ጊብፄ ዴሬን ዲሺን ኢስታ ꬎቁ ꬎቁ ሂስቲዴስ። ባ ዎልቃማ ቄሴራ ሄፔ ኢስታ ኬሲዴስ። ኦይዱ ታሙ ላይꬅ ኩሜꬅ ኢስታ ባዞ ቢታን ዳንዳዪዴስ። ካናኔ ቢታን ዲዛይታ ላፑን ካዎታ ꬋይሲዲ ኢስታ ቢታ ባ ዴሬታስ ጋዴ ሂስቲ ላቲሲዴስ። ሄሲ ዉሪ ፖሌቲዳይ ኦይዱ ፄታኔ ኢቻሹ ታሙ ላይꬃታ ጊዶና። ሄሳፌ ጉዬ ናቤ ሳሜላ ዎዴ ጋካናስ ኢስታ ፒርዲዛ ዳናታ ኢሚዴስ። “ሄሳፌ ጉዬ ዴሬይ ባ ቦላ ካዎ ካዎꬃና ማላ ሳሜላ ዎሲዴስ፤ ፆሳይካ ቢኒያሜ ባጋፌ ቂሴ ና ሳዖሌ ኢስታስ ኢሚዴስ። ኢዚካ ኢስታ ኦይዱ ታሙ ላይꬅ ሃሪዴስ። ሳዖሌ ሻሪዳፔ ጉዬ ዳዉቴ ካዎꬂዴስ፤ ኢዛ ጊሽ ‘ታ ዎዝና ማላ ሃኒዛይሳኔ ታ ኮዪዳይሳ ዉርሲ ኦꬂዛ ኢሴዬ ና ዳዉቴ ታ ዴማዲስ’ ጊዲ ዳዉቴ ጊሽ ፆሲ ማርካቲዴስ። ፆሲካ ባ ጫቆ ቃላꬆ ሃ ኣዴዛ ዜሬꬃፌ ኣስ ኣሺዛይሳ ዬሱሳ ኢስራዔሌስ ኤሂዴስ። ዬሱሲ ያናፔ ካሴ ዮሃኒሲ ኢስራዔሌ ዴሬይ ዉሪ ማሮቴꬃን ጌሊዲ ፃማቄታና ማላ ሳባኪዴስ። ዮሃኒሲ ባ ኪቴቲዳይሳ ፖሎ ቦላ ዲሼ ‘ታ ኢንቴስ ኦና ሚሳታዚና? ታ ኪቴቲዳይሳ ጊዲኬ ሃራይ ኣቶሺን ታ ኢዛስ ቶሆ ጫማ ኪሬ ቢርሻናስ ቤሶንታይሲ ታፔ ጉዬራ ያና’ ጊዴስ። “ኢንቴኖ ኣብራሃሜ ዜሬꬃፌ ዬሌቲዳ ኑ ኢሻቶ! ቃሴካ ኢንቴ ጊዶንካ ፆሳስ ያዪዛይቲ ዉሪ ሃይሲ ኣቶቴꬃ ኪታይ ኪቴቲዳይ ኑስ ኡባታሳ! ዬሩሳላሜ ኣሳቲኔ ኢስታ ሃላቃቲ ዬሱሳ ኤሪቤቴና፤ ጊዶ ኣቲን ኢስቲ ኢዛ ቦላ ፒርዲዳ፤ ሄሳንካ ሳምባታን ሳምባታን ናባቤቲዛ ካሴ ናቤታ ቃላይ ኢዛ ቦላ ፖሌቲዴስ። ኢዛ ሃይቆስ ጋꬂዛ ኢሲ ጋሶካ ኢስቲ ዴሞንታ ኣጊኮካ ጲላፆሲ ኢዛ ቦላ ሃይቆ ፒርዳ ፒርዳና ማላ ዎሲዳ። ኢዛ ጊሽ ፃፌቲዳይሳ ኢስቲ ዉርሲ ፖሊዳፔ ጉዬ ኢዛ ካቄቲዳ ሚꬃ ቦላፌ ጋዴን ዎꬂዲ ዱፎን ሞጊዳ። ጊዶ ኣቲን ፆሲ ኢዛ ሃይቆፔ ዴንꬂዴስ። ጋሊላፔ ዬሩሳላሜ ጋካናስ ባናራ ዲዛይታስ ዳሮ ዎዴ ቤቲዴስ፤ ሄይቲካ ሃዒ ኢዛ ጊሽ ዴሬታስ ማርካታ። “ኑካ ካሴ ፆሲ ኑ ኣዋታስ ጫቂዳ ሚሺራቾ ቃላ ኢንቴስ ሳባኮስ። ዬሱሳ ኪቲዲ ኢስታስ ጫቂዳ ቃላ ኑስ ኢስታ ናይታስ ፖሊዴስ፤ ሄሲካ ማዛሙሬ ማፃፋን ናምዓንꬆ ሼምፖን ‘ኔ ታ ናዛ፤ ታ ኔና ሃች ዬላዲስ’ ጌቴቲ ፃፌቲዴስ። ቃሴካ ኢዚ ዎቆንታይሳኔ ፆሲ ኢዛ ሃይቆፔ ዴንꬂዳይሳ ሻኪ ኤራና ማላ ‘ኣንጄቲዳይሳኔ ኣማኔቲዳ ዳዉቴ ኣንጆ ታ ኢንቴስ ኢማና’ ጊዴስ። ሄሳ ጊሽ ሃራሶንካ ‘ኔ ጌሻይ ሃይቂ ዎቃና ማላ ኔ ኮያካ’ ጌስ። “ዳዉቴይ ባ ዎዴን ፆሳ ሼኔ ማላ ኦꬂዳፔ ጉዬ ሃይቂዴስ፤ ካሴ ባ ኣዋታራ ሞጌቲን ኢዛ ኣሾይ ዎቂዴስ። ፆሲ ኢዛ ሃይቆፔ ዴንꬂዳይሲ ኢዚ ጊዲኮ ዎቂቤና። ሄሳ ጊሽ ታ ኢሻቶ! ናጋራስ ማሮቴꬂ ቤቲዛይ ዬሱሳ ባጋራ ጊዲዳይሲ ኢንቴስ ሳባኬቲዳይሳ ኤሪቴ። ኢዛ ኣማኒዛዴይ ዉሪ ካሴ ሙሴ ዎጋ ባጋራ ዴሞንታ ፂሎቴꬅ ዴማና። ሄሳ ጊሽ ካሴ ናቤቲ ‘ኢንቴኖ ቂꬊዛይቶ ፄሊቴ፥ ማላሌቲቴኔ፥ ꬋዪቴ፥ ኢንቴስ ኦኒካ ዮቲን ኣማናናስ ኢንቴና ሜቲዛ ሚሽ ታ ኢንቴ ዎዴን ኦꬃና’ ጊዳ ቃላይ ኢንቴ ቦላ ጋኮንታ ማላ ናጌቲቴ” ጊዴስ። *** ጳዉሎሲኔ ባርናባሲ ኣይሁዳታ ዎሳ ኬꬃፌ ኬዚሺን ኣሳይ ኢስታ ሄሳ ኢስቲ ዮቲዳ ቃላ ካሊዛ ሳምባታ ጋላስ ዛሪ ዮታና ማላ ዎሲዴስ። ሺቆይ ላሌቲዳፔ ጉዬ ዳሮ ኣይሁዳቲኔ ኣይሁዳታ ኣማኖን ጌሊዲ ፆሴ ጎይኒዛ ኣሳቲ ጳዉሎሳኔ ባርናባሳ ካሊዳ። ጳዉሎሳንቲካ ኢስታ ቆፍሲሼ ኢስቲ ፆሳ ኪያቴꬃን ሚኒ ዳና ማላ ዞሪዳ። ካሊዛ ሳምባታ ጋላስ ካታማ ኣሳፔ ጉꬃቲ ፃላላ ኣቲን ዳሪዛ ባጋይ ዉሪ ጎዳ ቃላ ሲያና ሺቂዴስ። ኣይሁዳቲካ ዳሮ ዴሬ ቤዪዲ ቃናቴቴꬃን ኩሚዳ። ጳዉሎሳ ሃሳያ ኤቄቲሼ ኢዛ ጫዪዳ። ጳዉሎሲኔ ባርናባሲ ባቦንታ ፃላቴꬃን “ፆሳ ቃላይ ኮይሮ ኢንቴስ ዮቴታናስ ቤሴስ። ጊዶ ኣቲን ኢንቴ ቃላ ሌቂዴታ። ኢንቴስ ሜርና ዴዖይ ቤሶንታይሳ ኢንቴርካ ኢንቴ ቦላ ፒርዲዳ ጊሽ ሃዒ ኑኒ ጌዴ ኣይዛቤታኮ ባና ኮዮስ። ቃሴካ ጎዳይ ኑና ‘ኣሳስ ኣቶቴꬃ ቃላ ቢታ ጋፃ ጋꬃና ማላ ታ ኔና ኣይዛቤታስ ፖዖ ሂስታ ኪታዲስ’ ጊ ኣዛዚዴስ” ጊዳ። *** ኣይዛቤቲ ሄሳ ሲይዲ ዳሮ ኡፋዬቲዳ። ጎዳ ቃላሲካ ቦንቾ ኢሚዳ። ሜርና ዴዖስ ጊጌቲዳ ዴሬይ ዉሪ ኣማኒዴስ። ጎዳ ቃላይ ሄራን ዲዛ ዴሬ ኡባሶ ጋኪዴስ። ኣይሁዳቲ ቃስ ኣያና ሃኖን ካሴፔ ሚኒዛይታኔ ዱሳን ቦንቼቲዳ ማጫሳታ ሄሳꬆካ ካታማን ዲዛ ጊታ ኣሳታ ዴንꬄꬂዲ ጳዉሎሳ ቦላኔ ባርናባሳ ቦላ ጎዴቴꬂ ዴንꬂዲ ባ ዴሬፔ ኬሲ ጎዲዳ። ጳዉሎሲኔ ባርናባሲ ኣሳይ ኢስታ ኢፂዳይሳ ቤሳናስ ባ ቶሆ ቦላ ዲዛ ጉዱላ ፒቲዲ ኢቆኒዮኔ ጌቴቲዛሶ ቢዳ። ኣማኒዛይቲ ኡፋይሳኒኔ ፂሎ ኣያናን ኩሚዳ። ኢቆኒዮኔን ጳዉሎሲኔ ባርናባሲ ኢሲፌ ኣይሁዳታ ዎሳ ኬꬄ ጌሊዳ። ሄንካ ኢስቲ ኣሳ ሎዔꬅ ታማርሲዳ ጊሽ ጊሪኬ ኣሳፔኔ ኣይሁዳ ኣሳፔ ዳሮይ ኣማኒዴስ። ሂንኮ ኣማኖንታ ኣይሁዳ ኣሳይ ኣይዛቤታ ኢስታ ቦላ ዴንꬄꬂዲ ኣሳይ ኣማኒዛይታ ኢፃና ማላ ኦꬂዴስ። ጳዉሎሲኔ ባርናባሲ ጎዳ ጊሽ ፃላቴꬃራ ኣሳስ ዮቲሼ ሄን ዳሮ ዎዴ ጋምዒዳ። ጎዳይካ ኢስቲ ዮቲዛ ኢዛ ቃላ ጊታ ማላታራኔ ዎልቃማ ኦሶን ቆንጪሲ ማርካቲዴስ። ካታማ ኣሳይ ባ ጊዶን ናምዑ ኬዚ ሻኬቲዲ ባጋይ ኣይሁዳታ ባጋ ባጋይ ጳዉሎሳንታ ባጋ ጊዲዴስ። ሄ ዎዴ ኣይሁዳቲኔ ኣይዛቤቲ ባና ካሌꬂዛይታራ ኢሲፌ ጊዲዲ ኢስታ ዋይሳናሲኔ ሹቻን ጫዳናስ ኮይዳ። ኢስቲካ ሄሳ ኤሪዳ ማላ ሊስቲራኔ ዴርቤኔ ጌቴቲዛሶ ጌዴ ሊቃዖኒያ ካታማታኔ ሄ ሄራን ዲዛ ዴሬ ባቃቲዳ። ሄንካ ሚሺራቾ ቃላ ሳባኮ ዶሚዳ። ሊስቲራን ዬሌቶሳፔ ባ ቶሆራ ሃሙቲ ኤሮንታ ኢሲ ቶሆ ሲላ ኣዴይ ዴስ። ሄሳዴይ ጳዉሎሲ ሳባኪሺን ኡቲ ሲዬስ፤ ጳዉሎሲካ ኢዛኮ ቲሺ ሂስቲ ፄሊዲ ኣዴዛ ፓꬃና ኣማኖይ ኢዛ ቦላ ዲዛይሳ ቤዪዲኔ ቃላ ꬎቁ ሂስቲዲ “ሲቲ ጋዳ ኔ ቶሆን ኤቃ!” ጊዴስ። ኣዴዚ ሄራካ ጉፒ ዴንዲዲ ሃሙꬅ ኦይኪዴስ። *** ኣሳይ ጳዉሎሲ ኦꬂዳይሳ ቤዪዲ ሊቃዖኒያ ቃላራ “ኤቃ ፆሳቲ ኣስ ሚሳቲዲ ሃ ኑኮ ዎꬊዳ” ጊዲ ዋሲዴስ። ባርናባሳ “ዲያ” ጊዳ ጳዉሎሳካ ሃሳዪዛ ዋናይ ኢዛ ጊዲዳ ጊሽ “ሄርሜኔ” ጊዳ። ካታማፔ ኣሲ ባይንዳሶን ዲዛ ዲያ ጌቴቲዛ ኤቃ ኬꬃ ቄሴይ ኮርማታኔ ፃፄቲ ጊጊዳ ጪሽ ጌዴ ካታማ ጌሊዛ ኦጌ ቦላ ኤፊዲ ዴሬዛራ ኢሲፌ ጊዲዲ ጳዉሎሳሲኔ ባርናባሳስ ያርሻና ኮዪዴስ። ሃዋሬቲ ባርናባሲኔ ጳዉሎሲ ሄሳ ሲዪዳ ማላ ባ ማይዖ ዳኪዲ ጌዴ ዴሬዛ ጊዶ ዎፂዳ፤ ባ ቃላ ꬎቁ ሂስቲዲ ሂዝጊዳ፤ “ሃይቶ ኣሳቶ! ሃይሳ ኣዛስ ኦꬄቲ? ኑካ ኢንቴ ማላ ኣሳኮ! ኢንቴካ ቃሴ ሃይሳ ሜላ ሃዳ ዮዖፔ ሃኪዲ ሳሎኔ ሳዓ፥ ኣባካ፥ ኣባታ ጊዶን ዲዛይታ ዉርሲ ሜꬊዳ ዴዖ ፆሳኮ ኢንቴ ሲማና ማላ ኢንቴስ ሚሺራቾ ቃላ ሳባኮስ። ኢዚ ካሴ ኣꬊዳ ዬሌቴꬃይኔ ዴሬይ ዉሪካ ባ ኮይዳ ማላ ሃናናስ ዬዲ ቤሲዴስ። ጊዶ ኣቲን ፆሲ ሳሎፔ ኢራኔ ሄሳꬆካ ካꬂ ካፂዛ ዎዴታ ኢሚዲ ኢንቴ ዎዝና ካꬃኒኔ ኡፋይሳ ኩንꬂዴስ፤ ኡፋይሳካ ኢንቴና ካልꬂዲ ሎዖ ኦሶን ባና ማርካይ ባይንዳ ኣጊቤና” ጊዳ። ሄሳ ዉርሲ ሃሳዪዲ ኣሳይ ኢስታስ ያርሾንታ ማላ ዋይዲ ዲጊዳ። ኣይሁዳቲ ቃስ ኣንፆኪያፔኔ ኢቆኒዮኔፔ ዪዳ ኣሳይ ኣሳ ዞሪዲ ጳዉሎሳ ሹቻን ጫዳና ማላ ኣማንꬂዳ። ጳዉሎሳካ ሹቻን ጫዲዲኔ ሃይቂዴስ ጊ ጎቺዲ ካታማፔ ጌዴ ካሬ ኬሲዳ። ጊዶ ኣቲን ኣማኒዛይቲ ኢዛ ዩዪ ኣꬊ ናጊሺን ጳዉሎሲ ዴንዲዲ ጌዴ ካታማ ጌሊዴስ። ዎንቴꬃ ጋላስ ባርናባሳራ ኢሲፌ ዴርቤኔ ጌቴቲዛሶ ቢዳ። ጳዉሎሲኔ ባርናባሲ ዳርቤን ሚሺራቾ ቃላ ሳባኪዳ ዳሮ ኣሳ ኣማንꬂዳፔ ጉዬ ጌዴ ሊስቲራ፥ ኢቆኒዮኔኔ ኣንፆኪያ ሲሚዳ። ኣማንዛይታ ዎዝና ሚንꬄꬂሼ ኢስቲ ኣማኖን ሚኒ ዳና ማላ ዞሪሼ “ኑ ፆሳ ካዎቴꬅ ጌላናስ ዳሮ ሜቶ ጊዶራ ኣꬋናስ ኮሼስ” ጊዳ። ሄሳፌ ጉዬ ዱማ ዱማ ዎሳ ኬꬃታን ጪማታ ዶሪዳፔ ጉዬ ፆማኒኔ ዎሳን ኣማኔቲዳ ጎዳስ ሃዳራ ኣꬂ ኢሚዳ። ጲሲዲያራ ኣꬊዲ ጲንፊሊያ ሲሚዳ። ጴርጌኔን ቃላ ሳባኪዲ ዱጌ ኣፃሊያ ጌቴቲዛሶ ዎꬊዳ። ኣፃሊያፔካ ሃዒ ጋካናስ ኢስቲ ኦꬂዳ ኦሶዛ ሃዳራ ኢስታስ ኢሜቲዳ ካታማ ሶሪያን ዲዛ ኣንፆኪያ ማርካቤን ጌሊዲ ሲሚዳ። ሄ ጋኪዳ ማላ ዎሳ ኬꬃ ኣሳ ዉርሲ ሺሺዲ ፆሲ ኢስታራ ኦꬂዳይሳ ቃሴካ ኣይዛቤታስ ኣማኖ ፔንጌይ ዋኒ ዶዬቲዳኮኔ ዉርሲ ዮቲዳ። ሄን ኣማኒዛይታራ ዳሮ ዎዴ ጋምዒዳ። ኢሲ ኢሲ ኣሳቲ ዩሁዳፔ ዱጌ ኣንፆኪያ ዎꬊዲ “ኢንቴ ሙሴ ዎጋ ማላ ቃፃሬቶንታ ኣጊኮ ኦኒካ ኣታናስ ዳንዳዬኬታ” ጊዲ ኣማኒዛይታ ታማርሶ ዶሚዳ። ሄሲካ ጳዉሎሳኔ ባርናባሳ ጊታ ፓላማኒኔ ኦሻ ጊዶ ጌልꬂዴስ፤ ሄሳ ጊሽ ጳዉሎሲኔ ባርናባሲ ሃራ ኢሲ ኢሲ ኣማኒዛ ኣሳታራ ዬሩሳላሜ ኬዚዲ ሃ ዮዖዛ ጊሽ ጪማታኔ ሃዋሬታ ኦይቻና ማላ ጌቴቲዴስ። ሄሳ ጊሽ ዎሳ ኬꬃያ ኢስታ ዬሩሳላሜ ባና ማላ ኪቲን ኢስቲ ፒንቄራኔ ሳማሪያራ ኣꬊ ቢሼ ሄን ዲዛ ኣሳ ኣይዛቤቲ ኣማኖን ሲሚዳይሳ ዮቲዳ፤ ሄ ዎዴ ኣማኒዛይቲ ሄሳ ሲይዲ ኬሂ ኡፋዬቲዳ። ኢስቲ ዬሩሳላሜ ጋኪን ዎሳ ኬꬃ ኣሳይ ሃዋሬቲኔ ጪማቲ ኢስታ ሞኪ ኤኪዳ፤ ኪቴቲ ቢዳይቲካ ፆሲ ኢስታራ ጊዲዲ ኦꬂዳይሳ ዉርሲ ኢስታስ ዮቲዳ። ፋርሳዌታ ባጋ ኣሳታፔ ኣማኒዳ ኢሲ ኢሲ ኣሳቲ ዴንዲዲ “ኣይዛቤቲ ቃፃሬታናሲኔ ሙሴ ዎጋ ናጋና ማላ ኢስታስ ዮታናስ ቤሴስ” ጊዳ። ሃዋሬቲኔ ጪማቲ ሄ ዮዖዛ ጊዶ ሎዔꬅ ፄላናስ ሺቂዳ። ዳሮ ፓላማፔ ጉዬ ጴፅሮሲ ዴንዲ ኤቂዲ፥ “ታ ኢሻቶ! ጉꬃ ዎዴፔ ካሴ ፆሲ ታና ኢንቴ ጊዶፌ ዶሪዲ ኣይዛቤቲ ታ ዱናፔ ሚሺራቾ ቃላ ሲይዲ ኣማናና ማላ ኦꬂዳይሳ ኢንቴ ኤሬታ። ኣሳ ዎዝና ኤሪዛ ፆሲ ኑስ ኢሚዳይሳ ማላ ኢስታስካ ፂሎ ኣያና ኢሚዲ ኢስታ ባስ ኤኪዳይሳ ማርካቲዴስ። ኢስታ ዎዝናካ ኣማኖን ጌሺዲ ኑ ጊዶኒኔ ኢስታ ጊዶን ኣይኮ ሻኮካ ኦꬂቤና። ሄሳ ጊሽ ኑ ኣዋቲኔ ኑካ ቶካናስ ዳንዳዮንታ ቃምባራ ኣማኒዛይታ ቶሳናስ ኢንቴ ኣዛስ ፆሴ ፓጬቲ? ኑ ኣቲዳይ ሊኬ ኢስታꬆካ ጎዳ ዬሱሳ ኣꬎ ኪያቴꬃን ጊዲዳይሳ ኣማኖስ” ጊዴስ። ሺቂዳ ኣሳይ ዉሪካ ጮዑ ጊን ባርናባሲኔ ጳዉሎሲ ፆሲ ኢስታ ባጋራ ኣይዛቤታ ጊዶን ኦꬂዳ ጊታ ማላታታ ጊሽ ዮቲሺን ማላሌቲዲ ሎዔꬂ ሲዪዴስ። ኢስቲ ዮቲ ዉርሲሺን ያቆቤይ ዴንዲ ኤቂዲ ሂዝጊዴስ “ታ ኢሻቶ! ታ ጊዛይሳ ሲዪቴ፤ ፆሲ ኣይዛቤታፔ ባስ ጊዳና ዴሬ ካሴቲዲ ኢዚ ዎስቲ ፄይጊ ዎꬂዳኮ ሲሞኒ ኑስ ሎዔꬂ ዮቲዴስ። ካሴ ናቤታን ሂዝጊ ፃፌቲዳ ቃላይ ሃይሳራ ጋጌስ። ‘ሃይሳፌ ጉዬ ታ ሲማዳ ላሌቲዳ ዳዉቴ ኬꬄ ኬፃና፤ ላሌቲዳይሳ ዛራ ኤሳና፤ ዛራዳካ ኬፃና። ሄሲካ ኣቲዳ ኣሳይ ጎዳ ኮያና ማላኔ ታ ሱንꬃን ፄይጌቲዳ ኣይዛቤቲ ታና ኮያና ማላ ጌስ ዉርሲ ኦꬂዳ ፆሲ፤ ሃይሳ ኮይሮፔካ ኤርሲዳ ፆሲ ታና’ ጊዴስ። “ሄሳ ጊሽ ሃ ፆሳኮ ሲሚዳ ኣይዛቤታ ኑ ሜቶꬆንታ ማላ ሃይሲ ታ ባጋራ ታስ ቃሾ። ጊዶ ኣቲን ኤቃስ ያርሼቲዲ ቱኒዳ ካꬅ ሞፒቴ፤ ላይማፔ ሃኪቴ፤ ባዉቲ ሃይቂዳ ሜሄ ኣሾ ሞፒቴ፤ ሱꬅ ኡዮፒቴ ጊዲ ኑ ኢስታስ ፃፋና ቤሴስ። ሙሴ ዎጋይ ጊዲኮ ቤኒሶፌ ሳምባታ ሳምባታ ጋላስ ኣይሁዳታ ዎሳ ኬꬃን ናቤቤቲሼኔ ካታማይ ዲዛሶን ሳባኬቲሼ ዴስ” ጊዴስ። ሄ ዎዴ ሃዋሬቲኔ ጪማቲ ኩሜꬃ ዎሳ ኬꬃ ኣሳራ ጊዲዲ ባ ጊዶፌ ኢሲ ኢሲ ኣሳታ ዶሪዲ ጳዉሎሳራኔ ባርናባሳራ ጋꬂ ኣንፆኪያ ዬዳናስ ቃቺዳ። ኣማኒዛ ኣሳ ጊዶፌ ዋናቲዛይታ ባርሳባሳ ጌቴቲዛ ዩሁዳኔ ሲላሴ ዶሪዳ። ኢስታ ኩሼን ኢሚ ዬዲዳ ዳብዳቤዚ “ኢንቴ ኢሻታፔ፥ ሃዋሬታፔ፥ ጪማታፔ፥ ኣይዛቤታፔ ኣማኒዳ ኣንፆኪያኒኔ ሶሪያን፥ ኪልቂያንካ ዲዛ ኣማኒዛይታስ ኑ ሳሮካይ ኢንቴና ጋኮ። “ኢሲ ኢሲ ኣሳቲ ኑፔ ጊዶንታ ባ ባጋራ ኑ ኣቻፌ ቢዲ ባ ሃሳያን ኢንቴ ዎዝና ያኔ ሃኔ ቃꬂዳይሳኔ ኢንቴና ቡልዓኪዳይሳ ኑ ሲዪዶስ። ሄሳ ጊሽ ጉꬃ ኣሳታ ዶሪዲ ዶሴቲዳ ባርናባሳራኔ ጳዉሎሳራ ኢንቴኮ ዬዳናስ ኑ ዉሪካ ቃላ ጋጊዶስ። ኢስቲ ጎዳ ዬሱስ ኪርስቶሳ ጊሽ ባ ሼምፖ ኣꬂ ኢሚዳይታ። ሄሳ ጊሽ ኑ ኢንቴስ ፃፊዳይሳ ኢስቲ ኢንቴስ ባ ዱናራ ሎዔꬂ ዮታና ማላ ዩሁዳኔ ሲላሴ ኢንቴኮ ዬዲዶስ። ሃይታ ኢንቴስ ኮሺዛ ዮዖታፔ ሃራ ዴፆ ቶሆ ኑ ኢንቴ ቦላ ዎꬆንታ ማላ ኑሲኔ ፂሎ ኣያናስ ሎዖ ሚሳቲ ቤቲዴስ። ሄሲካ ኢንቴ ኤቃስ ሹኬቲዳ ኣሾፔ፥ ሱꬃፌ፥ ባዉቲ ሃይቂዳ ሜሄ ኣሾፔኔ ላይማፔ ኢንቴ ሃካና ማላ፤ ኢንቴ ሃይታ ሚሳቲዛይታፔ ሃኪኮ ኢንቴስ ሎዖ፤ ሳሮን ዲቴ” ጌስ። ኪቴቲዳ ኣሳቲ ሞይዜቲዲ ዱጌ ኣንፆኪያ ዎꬊዳ፤ ሄን ኣማኒዛይታ ዉርሲ ሺሺዲ ኤሂዳ ዳብዳቤዛ ኢስታስ ኢሚዳ። ዴሬይካ ናባቢዲ ሚንꬄꬂዛ ቃላን ኡፋዬቲዴስ። ዩሁዳይኔ ሲላሲ ናቤታ ጊዲዳ ጊሽ ዳሮ ዞሪዲ ኣማኒዛይታ ሚንꬄꬂዳ። ሄን ጉꬃ ዎዴ ጋምዒዲ ኣማኒዛ ኣሳይ ሞይዚን ጉዬ ባና ኪቲዳይታኮ ሲሚዳ። ሲላሲ ቃስ ሄን ኣታናስ ኮዪዴስ። ጳዉሎሲኔ ባርናባሲ ሃራ ዳሮ ኣሳታራ ጊዲዲ ጎዳ ቃላ ታማርሲሼኔ ሳባኪሼ ኣንፆኪያን ጋምዒዳ። ጳዉሎሲ ጉꬃ ዎዴ ጋምዒዲ ባርናባሳ “ኑ ካሴ ጎዳ ቃላ ዮቲዳ ኡባ ካታማታ ቢዲ ኣማንዛይቲ ኣይ ማላ ዲዛኮኔ ኣኔ ዩዪ ቤዮስ፥ ዴንዳ” ጊዴስ። ባርናባሲካ ማርቆሳ ጌቴቲዛ ዮሃኒሲ ኢስታራ ባና ማላ ኮዪዴስ። ጳዉሎሲ ቃስ ኢዛ ኤኪ ባናስ ኮይቤና፤ ጋሶይካ ካሴ ማርቆሲ ኢስታፌ ሻኬቲዲ ጲንፊሊያ ጊዛሶን ጉዬ ኣቲዲ ኢስታራ ኦሶስ ሲንꬅ ኬዞንታ ኣጊዳ ጊሻሳ። ሂስቲን ዳሮ ፓላማይ ኢስታ ጊዶን ሜꬌቲዳ ጊሽ ባ ጊዶን ሻኬቲ ዎꬊዳ፤ ሄሳ ጊሽ ባርናባሲ ማርቆሳ ኤኪዲ ማርካቤን ጌሊዲ ቆጲሮሴ ቢዴስ። ጳዉሎሲ ቃስ ሲላሴ ዶሪዴስ። ኣማንዛይቲካ ጳዉሎሳ ጎዳ ኣꬎ ኪያቴꬃስ ሃዳራ ኢሚዳፔ ጉዬ ኢዚ ኢስታፌ ሻኬቲዲ ቢዴስ። ኣማኒዛይታ ሚንꬄꬂሼ ሶሪያራኔ ኪልቂያራ ኣꬊ ቢዴስ። ጳዉሎሲ ዴርቤኔ ጌቴቲዛሶኔ ሊስቲራ ጋኪዲ ኢዛ ኣዋይ ጊሪኬ ኣስ፥ ኣዪያ ቃስ ኣይሁዳ ኣስ ጊዲዳ ፂምቶሳ ጌቴቲዛ ኢሲ ኣማኒዛዴ ሄን ዴሚዴስ። ኢዚካ ሊስቲራኒኔ ኢቆኒዮን ኣማኒዛ ኣሳ ኣቻን ሎዖ ማርካቴꬅ ዲዛዴ። ጳዉሎሲካ ፂምቶሳ ባናራ ኤኪ ባናስ ኮዪዴስ። ሄሳ ጊሽ ሄ ሄራን ኣይሁዳታ ጊሽ ጊዲ ፂምቶሳ ቃፃሪዴስ። ጋሶይካ ኣይሁዳቲ ፂምቶሳ ኣዋይ ጊሪኬ ኣስ ጊዲዳይሳ ኤሪዛ ጊሻሳ። ኢስቲ ኢሲ ካታማፔ ሃራ ካታማ ኣꬊ ኣꬊ ቢሼ ሃዋሬቲኔ ዬሩሳላሜ ዎሳ ኬꬃ ጪማቲ ዬዲዳ ኪታ ኣሳይ ኤኪዲ ናጋና ማላ ኣማኒዛ ኣሳስ ኢሚ ኢሚ ኣꬊዳ። ዎሳ ኬꬃ ኣሳይ ኣማኖን ሚኒ ሚኒ ቢዴስ፤ ቃሴ ኣሳይካ ቆዳን ጋላስ ጋላስ ጉጄቲ ጉጄቲ ቢዴስ። ጳዉሎሲኔ ኢዛራ ዲዛ ዛታቲ ቃላ ኢሲያን ሳባኮንታ ማላ ፂሎ ኣያናይ ዲጊዳ ጊሽ ፒርጊያራኔ ጋላቲያ ዴሬራ ኣꬊ ቢዳ። ኢስቲ ሚሲያ ጌቴቲዛሶ ጋካና ማቲሼ ቢቲኒያ ጌቴቲዛሶ ጌላና ቆፒን ዬሱሳ ኣያናይ ኢስታ ዲጊዴስ። ሄሳ ጊሽ ሚሲያራ ኣꬊዲ ፂሮዓዳ ጌቴቲዛሶ ዎꬊዳ። ኢሲ ማቂዶኒያ ኣሲ ኤቂዲ ጳዉሎሳ ሃ ማቂዶኒያ ፒናዳ ኑና ማዳ ጊሺን ጳዉሎሲ ኦማርስ ኣጁታን ቤዪዴስ። ኢዚካ ሄ ኣጁታ ቤዪዲ ፆሲ ኑ ኢስታስ ሚሺራቾ ቃላ ዮታና ማላ ፄይጊዴስ ጊ ቃቺዲ ኑ ሄራካ ጌዴ ማቂዶኒያ ባና ኮዪዶስ። ማርካቤራ ፂሮዓዳ ጌቴቲዛሶፔ ዴንዲዲ ሲቲ ጊዲ ሳሞቲራቄ ጌቴቲዛሶ ቢዶስ። ዎንቴꬃ ጋላስ ናጱሌ ጊዛሶ ሲንꬅ ሃሙꬅ ጉጂዶስ። ሄፔካ ኦሮሜ ኣሳይ ቶራን ሃሪዳ ዴሬ ጊዲዳ ማቂዶኒያ ዴሬ ዋና ካታማ ጊዲዳ ፒሊጲሲዮሴ ጌቴቲዛሶ ጌሊዶስ። ሄንካ ኡንዴና ዎዴ ኡቲዶስ። ሳምባታ ጋላስ ዎሳ ዎሲዛሶ ኮዪሼ ካታማ ጌሊዛሶ ፔንጌ ኬዚዲ ዱጌ ሻፋ ዎꬎስ፤ ኑ ሄን ኡቲዲ ሺቂ ዲዛ ማጫሳስ ቃላ ዮቲዶስ። ቃላ ሎዔꬂ ሲዪዛ ማጫሳታፔ ኢሲ ሊዲያ ጌቴቲዛራ ኢዛካ ፆሴ ጎይንዛሮኔ ቲያፂሮኔ ካታማፔ ያዳ ዞዖ ሃሬ ማይዖ ዛልዒዛሮ ጳዉሎሲ ዮቲዛ ቃላ ኢዛ ዎዝናን ዎꬃ ሲያና ማላ ጎዳይ ኢዚ ዎዝና ዶዪዴስ። ኢዛኔ ኢዚሶ ኣሳይካ ፃማቄቲዳፔ ጉዬ ኢዛ ኢስታ ታ ፆሴ ኣማኒዲ ኢንቴ ቱሙ ኤሪዳ ጊዲኮ ሃ ታሶ ዪዲ ጉꬃ ዎዴ ዲሺቴ ጋዳ ኢስታ ሚንꬃ ዎሳዱስ። ኢሲ ጋላስ ኑ ዎሳሶ ቢሺን ካዮ ካዮታ ማሮትዛ ኢሲ ጋራዴ ና ዲዛራ ኑና ዴማዱስ። ኢዛካ ባ ማሮቴꬃን ባና ኣይሲዛይታስ ዳሮ ሚሽ ጌልꬃዉስ። ሃና ጋራዴ ናያ ጳዉሎሳኔ ኑና ካላ ካላ “ሃይቲ ኣሳቲ ኢንቴስ ኢንቴ ኣታና ኦጌ ዮቲዛይቲ ዎጋ ፆሳ ኦሳንቻታ” ጋ ጋ ዋሳዱስ። ሄሳካ ዳሮ ጋላስ ሺራ ሺራ ጋዱስ። ጊዶ ኣቲን ጳዉሎሲ ሃ ኢዚ ቃላን ዳሮ ሜቶቲዳ ጊሽ ኢዚኮ ሲሚዲ ኢዚ ዱናራ ሃሳዪዛ ቱና ኣያናዛ “ኔ ኢዚፔ ኬዛና ማላ ታ ኔና ጎዳ ዬሱስ ኪርስቶሳ ሱንꬃን ኣዛዛይስ” ጊዴስ። ሄ ኣያናይ ሄራካ ዬጊ ኢዚፔ ኬዚዴስ። ኢዞ ኣይሲዛ ኣሳቲ ኢስታስ ሚሼ ዴሚዛ ኦጌይ ዱፂን ኢስታ ኡፋይሲ ቃንፄቲዳይሲ ኢስታስ ጌሊን ጳዉሎሳኔ ሲላሴ ኦይኪዲ ቢታራ ጎቺዲ ዋናቲ ዲዛሶ ጊያ ጊዶ ኤፊዳ። ዴሬ ኣይሲዛ ዋናታኮ ሺሺዲ “ሃይቲ ኣሳቲ ባስ ኣይሁዳ ኣስ ጊዲ ኡቲዲ ኑ ካታማ ቡላኬቴስ፤ ቃሴ ኑ ኦሮሜ ኣሳቲ ኤካናስ ዎይኮ ኦꬃናስ ኑስ ቤሶንታ ዎጋ ኑ ኣሳ ጊዶን ላሌቴስ” ጊዳ። ዴሬይካ ኢሲ ቦላ ጊዲዲ ጳዉሎሳ ቦላኔ ሲላሴ ቦላ ዴንዲዴስ። ዴራ ኣይሲዛይቲ ጳዉሎሳንታ ማይዖ ቃሪ ኤኪዲ ዱርቃራ ቆፃና ማላ ኣዛዚዳ። ኢታ ቡካ ቡኪዲ ጌዴ ቃሾ ኬꬃን ዬጊዳ። ቃሾ ኬꬃ ናጊዛይሲካ ኢስታ ሎዔꬂ ናጋና ማላ ኣዛዚዳ። ኢዚካ ሄሳ ማላ ሚኖ ኣዛዞ ኤኪዲ ቃሾ ኬꬃስ ዋና ጊዶ ኪፊሌ ጌልꬂዲ ኢስታ ቶሆ ጊታ ዱሩማራ ሺሺ ቃቺዴስ። ጊዲ ጊዶꬅ ጊዲሺን ጳዉሎሲኔ ሲላሲ ዎሳኒኔ ማዛሙሬን ፆሳ ጋላቲሺን ቃሾ ኣሳይ ኢስታ ዬꬃኔ ጋላታ ኤዝጊ ሲዪዴስ። ሃሳዓይ ባይንዳ ዲንጋቴ ቃሾ ኬꬃ ፃጶፔ ቃꬂዛ ሚኖ ቢታ ቃꬂ ሃኒዴስ፤ ሄራካ ቃሾ ኬꬃ ፔንጌቲ ዶዬቲዳ። ቃሼቲዳ ኡባ ኣሳ ቃሾይ ቢርሼቲዴስ። ቃሾ ኬꬃ ናጊዛይሲ ꬊስኮፌ ቤጊዲ ቃሾ ኬꬃ ፔንጌቲ ዶያ ዲዛይሳ ቤዪዲ ቃሾ ኣሳይ ዉሪ ኬሲ ኤኪዳ ሚሳቲን ባና ዎꬋና ማሻ ሾዲዴስ። ጳዉሎሲ ቃስ ባ ቃላ ꬎቁ ሂስቲዲ “ኑ ዉሪ ሃን ዶስ! ኔ ቦላ ኣይኔ ኢታ ኦꬆፋ” ጊ ዋሲዴስ። ቃሾ ኬꬃ ናጊዛይሲ ፆምፔ ዎሲ ኤኪዲ ጌዴ ጊዶ ጉፒ ጌሊዴስ፤ ኮኮርሼ ጳዉሎሳ ቶሆ ቦላኔ ሲላሴ ቶሆ ቦላ ኩንዲዴስ። ኢስታ ኤኪ ካሬ ኬዚዲ “ሃ ኣሳቶ! ታ ኣታና ማላ ኣይ ኦꬆ?” ጊዴስ። ኢስቲካ ኢዛስ “ጎዳ ዬሱሳ ኣማና፤ ኔካ ኔሶ ኣሳይካ ኢንቴ ዉሪ ኣታና” ጊዳ። ሄሳፌ ጉዬ ኢዛሲኔ ኢዛሶን ዲዛ ኣሳስ ኡባስ ጎዳ ቃላ ዮቲዳ። ቃሾ ኬꬃ ናጊዛይሲ ሄራካ ሄ ጋላስ ቃማራ ኤፊዲ ኢስታ ማዱንꬃ ሜጪዴስ። ሄራካ ኢዚኔ ኢዛሶ ኣሳይ ዉሪ ፃማቄቲዳ። ቃሾ ኬꬃ ናጊዛይሲካ ኢስታ ባ ኬꬄ ኤፊዲ ኢስታስ ካꬅ ኣꬂዴስ። ባሶ ኣሳ ኡባራ ፆሳ ኣማኒዳ ጊሽ ኣዴዚ ዳሮ ኡፋዪዴስ። ጋዴይ ዎንቲሺን ዴሬ ኣይሲዛይቲ “ሄይታ ኣሳታ ቢርሻ ዬዳ” ጊዲ ባ ሹሜታ ቃሾ ኬꬃ ናጊዛይሳኮ ዬዲዳ። ቃሾ ኬꬃ ናጊዛይሲካ ኢስታስ “ዴሬ ኣይሲዛይቲ ኢንቴ ቢርሼታና ማላ ኣዛዚዳ፤ ሄሳ ጊሽ ሃዒ ሳሮን ኬዚ ቢቴ” ጊዲ ጳዉሎሳስ ዮቲዴስ። ጳዉሎሲ ቃስ “ኑ ኦሮሜ ዬሌቴꬅ ጊዲሺን ፒርዳይ ባይንዳ ዴሬ ሲንꬃን ዱርቃራ ቡኪዲኔ ቃሾ ኬꬃን ዬጊዳ። ሂስቲን ሃዒ ቃስ ኑና ቆታራ ኣሲ ኤሮንታ ኬሳና ኮዪዞ? ሄሲ ሃኔና፤ ኢስቲ ዪዲ ባርካ ቢርሼቶ!” ጊዴስ። ሹሜቲ ሄ ኢዚ ጊዳ ቃላ ዴሬ ኣይሲዛይታስ ዮቲዳ ኢስቲካ ጳዉሎሲኔ ሲላሲ ኦሮሜ ዬሌታ ጊዲዳይሳ ሲይዲ ዳጋሚዳ። ዪዲ ኢስታፌ ማሬቴꬅ ኦይቺዲ ዎይኔፔ ኬሲዳ። ኢስቲ ሄ ካታማዮ ኣጊዲ ሃራሶ ባና ማላ ኢስታ ዎሲዳ። ጳዉሎሲኔ ሲላሲ ቃሾ ኬꬃፌ ኬዚዲ ሊዲያሶ ቢዳ። ሄንካ ዲዛ ኣማኒዛይቲ ኢስታ ዳሮ ሚንꬄꬂዲ ሄፔ ኬዚ ቢዳ። ጳዉሎሲኔ ሲላሲ ኣንፊጶላኔ ኣጶሎኒያ ጌቴቲዛ ዴሬራ ኣꬊዲ ታሶሎንቄ ጌቴቲዛ ዴሬ ቢዳ። ሄንካ ኣይሁዳታ ዎሳ ኬꬂ ዴስ። ጳዉሎሲካ ኢዛስ ዶሴ ጊዲዳ ማላ ኣይሁዳታ ዎሳ ኬꬄ ጌሊዴስ። ሄꬑ ሳሚንታ ኩሜꬅ ቃላፔ ኤኪ ኤኪ ኢስታራ ሃሳዬቲዴስ። ኪርስቶሲ ዋዬ ኤካናሲኔ ሃይቂ ዴንዳናስ ቤሲዛይሳ ቆንጪሲ ኣማንꬆን “ሃይሲ ታ ሳባኪዛ ዬሱሲ ኢዚ ኪቴቲ ያና ጌቴቲዳይሳኮ!” ጊዴስ። ኣይሁዳታፔ ኢሲ ኢሲ ኣሳይ ባ ሲዪዳይሳ ኣማኒዲ ጳዉሎሳራኔ ሲላሴራ ኢሲፌ ጊዲዴስ። ቃሴካ ዳሮ ዴሬይ ፆሴ ባቢዛ ጊሪኬታፔ ዳሮ ኤሬቲዳ ማጫሳቲ ባ ሲዪዳ ቃላን ኣማኒዲ ኢስታራ ኢሲኖ ጊዲዳ። ኣይሁዳቲ ቃሴ ኢስታ ቃናቲዲ ጊያን ዲዛ ዎርዶ ኣሳታ ሺሺዲ ኩሜꬃ ዴሬዛ ኢስታ ቦላ ዴንꬄꬂዲ ካታማን ሺሮ ሜꬊዳ። ጳዉሎሳኔ ሲላሴ ሺሺዲ ዴራ ሲንꬃን ኤሳናስ ኢሲ ኢያሶኔ ጌቴቲዛይሳሶ ኮያናስ ኤሌሊ ቢዳ። ጊዶ ኣቲን ኢስታ ኢያሶኔ ኬꬃን ዴሞንታ ኣጊዳ ጊሽ ኢያሶኔኔ ሃራ ኣማኒዛ ኣሳታ ካታማ ዳናታ ሲንꬃራ ጎቺሼ “ሃይቲ ኣሳቲ ዴሬ ዉርሲ ቡልዓኪ ካዒሼ ጋምዒዲ ቃሴ ሃዒ ሃ ዪዳ። ኢያሶኔይካ ኢስታ ባ ኬꬃን ዎꬂዴስ። ሃይቲ ኣሳቲ ዉሪ ‘ዬሱሳ ጌቴቲዛ ሃራ ካዎይ ዴስ’ ጊዲ ቄሳሬ ዎጋ ኤኬቴና” ጊሼ ዋሲዳ። ዴሬይኔ ሄ ካታማ ዳናቲ ሄሳ ሲይዲ ባ ጊዶን ቡቄቲዳ። ኢያሶኔኔ ሃራታካ ዋሴ ፄይጊሲዲ ዬዲዳ። ኣማኒዛይቲ ሄራካ ጳዉሎሳኔ ሲላሴ ቃማራ ቤሪያ ዬዲዳ። ኢስቲካ ሄ ጋኪዳ ማላ ኣይሁዳታ ዎሳ ኬꬄ ጌሊዳ። ቤሪያ ኣሳይ ታሶሎንቄ ኣሳፔ ኣꬊዲ ኣኬካራ ዲዛ ኣሳ። ጋሶይካ ሃይሲ ዮዖዚ ቱሜሻ? ጊ ጊዲ ጌኤሻ ማፃፋታ ቃላ ዎንቲን ዎንቲን ፒልጊ ፄሊዲ ኡፋይሳን ኤኪዴስ። ሄሳ ጊሽ ኢስታፌ ዳሮ ኣሳይ ኣማኒዴስ። ቃሴካ ኢስታራ ቆዳን ዳሮቲ ቦንቼቲዳ ጊሪኬ ዴሬ ማጫሳቲኔ ኣዴቲካ ኣማኒዳ። ታሶሎንቄን ዲዛ ኣይሁዳ ኣሳቲ ጳዉሎሲ ፆሳ ቃላ ቤሪያንካ ሳባኪዛይሳ ኤሪዳ ማላ ዴሬዛ ዴንꬄꬃናስ ቃሴካ ጌዴ ኢስታኮ ቢዳ። ሄ ዎዴ ኣማንዛይቲ ጳዉሎሳ ኤሌሲዲ ጌዴ ኣባ ኣቺ ዬዲዳ። ሲላሲኔ ፂምቶሲ ሄን ኣቲዳ። ጳዉሎሳ ሞዪዚዳ ኣሳቲ ኢዛ ኣቴና ጋꬂዳ። ቃሴካ ሲላሲኔ ፂምቶሲ ኢዛኮ ኤሌሊ ጋካና ማላ ጊዛ ኪታ ጳዉሎሳፔ ኤኪዲ ሲሚዳ። ጳዉሎሲ ኣቴናን ኢስታ ናጊሺን ኣቴና ካታማን ኤቃቲ ኩሚዳይሳ ቤዪዲ ዳሮ ሼኔቲዴስ። ሄሳ ጊሽ ኣይሁዳታ ዎሳ ኬꬃን ኣይሁዳታራኔ ፆሳስ ያዪዛ ጊሪኬ ኣሳራ ቃሴካ ጊያይ ዲዛሶን ጋላስ ጋላስ ባናራ ጋጊዛ ኣሳራ ሃሳዬቲዴስ። ኤፊቆሮሴኔ ኢስቶይኮ ጌቴቲዛ ኤራንቻታ ባጋ ጊዲዳይቲ ጳዉሎሳኮ ሺቂዲ ኢዛራ ሃሳዬቲዳ ኢስታፌ ኢሲ ኢሲ ኣሳቲ “ሃይሲ ሎምዑ ሎምዓይ ኣይ ጋና ኮዪዜ?” ጊዳ። ባጋቲ ቃሴ ዬሱሳ ጊሺኔ ሃይቆፔ ኢዛ ዴንꬃ ሚሺራቾ ኢዚ ሳባኪሺን ሲይዲ “ሄይሲ ሃራ ኦራꬃ ኤቃታ ጊሽ ዮቲዛ ሚሳቴስ” ጊዳ። ኢዛ ኦይኪዲ ኣሪኦስፋጎሴ ጌቴቲዛ ዴሬ ዱላታ ሲንꬅ ኤፊዲ “ሃ ኔ ታማርሲዛ ኦራꬃ ቲሚርቴይ ኣዛኮኔ ኑ ኤራና ማላ ኔ ኮያይ?” ጊዳ። ቃሴ ኔ ኑና ኑ ሃይꬃን ሲሲዛ ዮዖይ ኑ ኤሮንታ ኦራꬅ ጊዲዳ ጊሽ ኢዚ ኣዛኮኔ ኑ ኤራና ኮዮስ። ኣቴና ኣሳይ ኩሜꬅ ቃሴካ ሃን ዲዛ ሃራ ዴሬ ኣሳይካ ባስ ዎዴ ኣꬃናስ ኦራꬃ ዮዖ ሃሳያኒኔ ሲሳን ኣቲን ሃራ ሚሻን ኣꬄቴና። ሄሳ ጊሽ ጳዉሎሲ ኣሪዮስፋጎሴ ጌቴቲዛ ዱላታን ሺቂዳ ዴሬዛ ሲንꬃን ኤቂዲ “ሃይቶ ኣቴና ኣሳቶ! ኢንቴ ቤቶ ሚሽ ዉርሲ ኣማኒዛይታ ጊዲዳይሳ ታ ቤያይስ። ታ ያኔ ሃ ዩዪሺን ኢንቴ ኢስታስ ጎይኒዛ ሚሻታ ታ ፄሊሺን ‘ኤሬቶንታ ፆሴ’ ጌቴቲ ፃፌቲዳይሳ ኢሲ ያርሾሶ ዴማዲስ፤ ሄሳ ጊሽ ሄሳ ኢንቴ ኤሮንታ ጎዪኒዛይሳ ታ ኢንቴና ኤሪሳና። ሃይሳ ኣላሜዛኔ ኢዛ ጊዶንካ ዲዛይሳ ዉርሲ ሜꬊዳ ፆሲ ኢዚ ሳሎኔ ሳዓ ጎዳ። ሄሳ ጊሽ ኢዚ ኣሳ ኩሼን ኬፄቲዳ ኬꬃን ዴና። ኢዚ ኣሳ ኡባስ ዴዖኔ ሼምፖ፤ ቃሴካ ሃራ ዉርሲ ኢሚዛይሳ ጊዲዳ ጊሽ ኢዛስ ፓጪዛዚ ዶንታ ጊሽ ኢዚ ኣሳ ኩሼፔ ማዶ ኤኬና። ኣሳ ዜሬꬅ ዉርሲ ኢሳዴፌ ሜꬊዲ ኣሲ ቢታ ቦላ ዳና ማላ ኦꬂዴስ፤ ኣሳይ ዳና ዎዴኔ ዉርሴꬃ ꬋስ ዎꬂዴስ። ሄሲካ ኣሲ ፆሴ ኮይዲኔ ፒልጊዲ ዴማናኮኔ ጊዲ ዎꬂዴስ፤ ሄሲ ሄሳ ጊዲኮካ ኢዚ ኑፔ ኢሲ ኢሳዴፌ ሃኪ ዲዛ ጊሽ ጊዴና። ኑ ዴዖ ዴሚዳይ፥ ዲዛይኔ ቃፄቲዛይ ኢዛና፤ ኢንቴ ዴሬን ዬꬅ ኬሲዛ ኢሲ ኢሲ ኣሳቲ ‘ኑካ ኢዛ ናይታ’ ጊዳ ማላ። “ሂስቲኮ ኑ ፆሳ ናይታ ጊዲኮ ፆሲ ኣሳ ኤራቴꬃን ሜꬊ ኬሲዳ ዎርቃ ዎይኮ ቢራ ዎይኮ ሹች ሚሳቴስ ጊዲ ኑ ቆፓናስ ቤሴና። ካሴቲዲ ፆሲ ሃይሳ ማላ ሃኖታ ኣሳይ ኤሮንታ ኦꬂዳይሳ ዳንዳያን ኣꬊዴስ፤ ሃዒ ጊዲኮ ኣሲ ዉሪ ባ ዲዛሶን ዲዛሶን ማሮቴꬃን ጌላና ማላ ኣዛዜስ” ጊዴስ። ኢዚ ባ ዶሲዳዴ ባጋራ ቢታ ቦላ ፂሎቴꬃን ፒርዳና ጋላስ ባሬ ዎꬂዴስ። ኢዛካ ሃይቆፔ ዴንꬂዲ ኣሳ ኡባስ ሃይሳ ቱማቴꬃ ኤሪሲዴስ። ኢስቲካ ሃይቂዳይታ ዴንꬃ ጊሽ ሲዪዳ ማላ ኢሲ ኢሲ ኣሳቲ ኢዛ ቂꬊዳ፤ ባጋቲ ቃስ “ሃይሳ ቃሴካ ኔፔ ሃራ ጋላስ ሲያና ኮዮስ” ጊዳ። ሄራካ ጳዉሎሲ ኢስታ ጊዶፌ ኬዚ ቢዴስ። ኢሲ ኢሲ ኣሳቲ ቃሴ ጳዉሎሳ ካሊዳኔ ኣማኒዳ፤ ሄይታፔካ ዲዮናሲዮሳ ጌቴቲዛ ኣሪዮስፋጎሴ ዱላታ ኬꬃ ኣባሌ ጊዲዳ ዴማሪሶ ጌቴቲዛ ማጫሳያኔ ሃራቲካ ኢሲፌ ዴቴስ። ሄሳፌ ጉዬ ጳዉሎሲ ኣቴናፔ ዴንዲዲ ቆሮንቶሴ ካታማ ቢዴስ። ሄንካ ጳንፆሳን ዬሌቲዳ ኣቂላ ጌቴቲዛ ኣይሁዳ ኣስ ዴሚዴስ፤ ኢዚካ ኣይሁዳቲ ዉሪ ኦሮሜፔ ኬዛና ማላ ቃላዎዶሳ ጌቴቲዛ ኦሮሜ ካዎይ ኣዛዚዳ ማላ ባ ማቼዮ ጲርሲቂላራ ማታ ዎዴ ኢፃሊያ ዴሬፔ ዪዳይሳ ቤያናስ ጳዉሎሲ ሄ ኢስታኮ ቢዴስ። ኢዚካ ኢስታꬆ ዱንካኔ ሲኪዛዴ ጊዲዳ ጊሽ ኢስታ ኣቻን ኡቲዲ ዱንካኔ ሲኮን ጌሊዴስ። ሳምባታ ሳምባታ ጋላስ ኣይሁዳታ ዎሳ ኬꬃን ኣዩሁዴታራኔ ጊሪኬ ኣሳታራ ሃሳዬቲሼ ኢስታ ኣማንꬃናስ ባፄቲዴስ። ሲላሲኔ ፂምቶሲ ማቂዶኒያፔ ዱጌ ኢዛኮ ዎꬊን ጳዉሎሲ ሳባኮን ሚኒዲ ዬሱሲ ኢዚ ኪርስቶሳ ጊዲዳይሳ ኣይሁዳታስ ማርካቲዴስ። ጊዶ ኣቲን ኢስቲ ኢዛራ ኤቄቲዲ ኢዛ ጫዪዳ ጊሽ ጳዉሎሲ ባ ማይዖ ቆቆፊዲ “ታ ኢንቴፌ ፂሎ፤ ኢንቴ ፒርዴታናይ ኢንቴ ሞሮን ጊዲዳ ጊሽ ታ ኢንቴ ሱꬃ ጎሜን ኦይሼቲኬ፤ ሄሳ ጊሽ ታ ጌዴ ኣይዛቤታኮ ባይስ” ጊዴስ። ሄፔ ኬዚዲ ቲቶሳ ኢዮስፆሳ ጌቴቲዛ ፆሴ ዎሲዛይሳሶ ቢዴስ፤ ሄ ኣዴዛ ኬꬃይ ኣይሁዳታ ዎሳ ኬꬃ ኣቻን ዴስ። ኣይሁዳታ ዎሳ ኬꬃ ሃላቃይ ቄሪስጶሲ ባሶ ኣሳ ኡባራ ጎዳ ኣማኒዴስ፤ ጳዉሎሲ ዮቲሺን ሲዪዳ ዳሮ ቆሮንቶሴ ካታማ ኣሳይ ኣማኒዲ ፃማቄቲዴስ። ጎዳይ ቃማን ኣጁታን ጳዉሎሳ “ባቦፋ፤ ዮታ፤ ጮዑ ጎፓ፤ ታ ኔናራ ዳይስ፤ ኦኒካ ኔ ቦላ ዴንዲ ኔና ቆሃናስ ዳንዳዬና፤ ሃኖ ሃ ካታማይን ታስ ዳሮ ኣሲ ዴስ” ጊዴስ። ሄሳ ጊሽ ጳዉሎሲ ፆሳ ቃላ ኣሳ ታማርሲሼ ኢሲ ላይꬂኔ ባጋ ኢስታራ ኡቲዴስ። ጋልዮሳ ጌቴቲዛ ዴሬ ኣይሲዛይሲ ኣካያን ዲዛ ዎዴ ኣይሁዳቲ ኢሲፌ ጊዲዲ ጳዉሎሳ ቦላ ዴንዲዳ፤ ፒርዳ ዎምቦራ ሲንꬅ ሺሺዲ፥ “ሃይሲ ኣዴዚ ዎጋፔ ካሬራ ኣሳይ ፆሳስ ጎይናና ማላ ኣሳ ባሌꬄስ” ጊዳ። ጳዉሎሲ ሃሳያና ቡሮ ዱና ዶዪሺን ጋልዮሲ ኣይሁዳታ “ኢንቴኖ ኣይሁዳ ኣሳቶ! ኢንቴ ሺሺዳ ዮዖይ ዴሬ ዴንꬄꬆ ዎይኮ ዴሬ ጊታ ሜቶን ዬጊዛ ዮዖ ጊዲዳኮ ታ ዎዝናፔ ሲያናሺን። ጊዶ ኣቲን ኢንቴ ፓላማይ ኢሲ ኢሲ ቃላታ ጊሺኔ ኢሲ ኢሲ ሱንꬃታ ጊሽ ቃሴካ ኢንቴ ዎጋ ጊሻስ ጊዲዳ ጊሽ ኢንቴ ሄን ኢንቴ ባጋራ ዉርሲቴ፤ ታ ሄሳ ማላ ዮዖ ፒርዳናስ ኮዪኬ” ጊዴስ። ሄሳ ጊሽ ፒርዳ ዎምቦራ ሲንꬃፌ ኢስታ ኬሲዴስ። ሄ ዎዴ ዉሪካ ኣይሁዳ ዎሳ ኬꬃ ሃላቃ ሶስቲኔሴ ጌቴቲዛይሳ ኦይኪዲ ፒርዳ ኬꬃ ሲንꬃን ቡኪዳ፤ ጋልዮሲ ጊዲኮ ሄሳ ዉዳንካ ዬጊቤና። ሄሳፌ ጉዬ ጳዉሎሲ ቆሮንቶሴ ካታማን ዳሮ ዎዴ ጋምዒዴስ። ሄፔካ ኣማኒዛ ኣሳይ ሞይዚን ጲርሲቂላራኔ ኣቂላራ ኢሲፌ ማርካቤን ጌሊዲ ሶሪያ ጌቴቲዛሶ ቢዴስ፤ ኣዲና ዲዛይሳ ጋꬃናስ ኪንኪራዖሴ ጌቴቲዛሶን ባ ሁዔ ሜዴቲዴስ። ኤፌሶኔ ጋኪዳ ማላ ጲርሲቂላኔ ኣቂላ ሄን ኣጋጊዲ ጳዉሎሲ ኣይሁዳታ ዎሳ ኬꬄ ጌሊዲ ኣይሁዳታራ ሃሳዬቲዴስ። ባናራ ጋምዓና ማላ ኢስቲ ኦይቺን ኢዚ “ኣካይ” ጊዲ ኢፂዴስ። ጊዶ ኣቲን ኢዚ ኢስታፌ ሻኬቲሼ “ፆሳ ሼኔ ጊዲኮ ታ ሲማዳ ያና” ጊዴስ፤ ኤፌሶኔፔ ዴንዲዲ ማርካቤን ጌሊዲ ቢዴስ። ቂሳሪያ ጌቴቲዛሶ ጋኪዳፔ ጉዬ ኬዚዲ ኣማኒዛይታ ሳሮ ጊዲ ሄፔ ኣንፆኪያ ዎꬊዴስ። ኣንፆኪያን ጉꬃ ዎዴ ታኪዳፔ ጉዬ ሄፔ ዴንዲዲ ጋላቲያ ባጋራኔ ፊርጊያ ጌቴቲዛ ዴሬታራ ዩይ ኣꬊዲ ኣማንዛይታ ሚንꬄꬂዴስ። ሄ ዎዴ ኢሲ ኢስኪንዲሪያ ካታማን ዬሌቲዳ ኣጲሎሳ ጌቴቲዛ ኢሲ ኣይሁዳ ኣሲ ኤፌሶኔ ዪዴስ፤ ኢዚካ ታማሪዳዴኔ ጌሻ ማፃፋታ ሎዔꬂ ኤሪዛዴ። ኢዚ ጎዳ ኦጌ ታማሪዳዴኔ ዬሱሳ ጊሽ ባላይ ባይንዳ ሃሳዪዛዴኔ ፂሎ ኣያናን ፁጌቲሼ ታማርሲዛዴ፤ ጊዶ ኣቲን ኢዚ ሎዔꬂ ኤሪዛይ ዮሃኒሳ ፂንቃቴ ፃላላ። ኢዚካ ኣይሁዳ ዎሳ ኬꬃን ባቦንታ ዮቶ ኦይኪዴስ፤ ጲርሲቂላይኔ ኣቂላይ ኢዚ ጊዛይሳ ሲይዲኔ ኢዛ ጌዴ ባሶ ኤፊዲ ፆሳ ኦጌ ኢዛ ካሴፔ ሎዔꬂ ኤሪሲዳ። ኣጲሎሲ ጌዴ ኣካያ ባናስ ኮዪን ኣማኒዛይቲ ኢዛ ሚንꬄꬂዳ፤ ሄን ዲዛ ኣማኒዛ ኣሳይካ ኢዛ ሞኪ ኤካና ማላ ኢዛስ ዳብዳቤ ፃፊዳ፤ ኢዚ ሄ ጋኪዳ ማላ ኢዛስ ዲዛ ኢሞታፔ ዴንዲዳይሳን ኣማኒዛይታ ዳሮ ማዲዛዴ ጊዲዴስ። ጌሻ ማፃፋታ ያይሳ ሃይሳራ ጋꬂ ማርካሲ ማርካሲ ዬሱሲ ኢዚ ኪርስቶሳ ጊዲዳይሳ ኣይሁዳታራ ዳሮ ፓላሜቲዲ ዴሬ ሲንꬃን ኢስታ ላꬂዴስ። ኣጲሎሲ ቆሮንቶሴን ዲዛ ዎዴ ጳዉሎሲ ፑዴሃ ባጋ ዴሬራ ካንꬂዲ ኤፌሶኔ ዪዲ ሄን ዲዛ ኢሲ ኢሲ ኣማኒዛ ኣሳታ ዴሚዲ “ኢንቴ ኣማኒዳ ዎዴ ፂሎ ኣያና ኤኪዴቲ?” ጊዴስ፤ ኢስቲካ “ኤኪቤይኮ ሃራይ ኣቶሺን ፂሎ ኣያናይ ዲዛኮኔ ኑ ሲቤይኮ” ጊዳ። ጳዉሎሲካ ኢስታ “ሂስቲን ኢንቴ ኣዛን ፃማቄቲዴቲ?” ጊዴስ፤ ኢስቲካ ኢዛስ “ዮሃኒሳ ፂንቃታን ፃማቄቲዶስ” ጊዳ። ጳዉሎሲካ ኢስታስ “ዮሃኒሳ ፂንቃታይ ጊዲኮ ኣሳይ ማሮቴꬃን ሲሚዳይሳ ቤሲዛ ፂንቃታኮ! ዮሃኒሲ ባ ባጋራ ኣሳይ ኢዛፔ ጉዬራ ዪዛ ዬሱሳ ኣማናና ማላ ዮቲዴስ” ጊዴስ። ኢስቲካ ሄሳ ሲዪዳፔ ጉዬ ጎዳ ዬሱሳ ሱንꬃን ፃማቄቲዳ። ጳዉሎሲካ ኢስታ ቦላ ባ ኩሼ ዎꬂዳ ማላ ፂሎ ኣያናይ ኢስታ ቦላ ዎꬊን ኢስቲ ዱማ ዴሬታ ቃላራ ሃሳዪዳ፤ ቲንቢቴካ ዮቲዳ። ሄ ኣሳቲ ዉሪካ ታማኔ ናምዑ ጊዲዛይታ። ጳዉሎሲ ኣይሁዳታ ዎሳ ኬꬄ ጌሊዲ ፆሳ ካዎቴꬃ ጊሽ ሃሳዬቲሼኔ ኢስታ ኣማንꬂሼ ሄꬑ ኣጊና ኩሜꬅ ኦናስካ ባቦንታ ኣሳስ ቆንጪሲ ዮቲዴስ። ኢሲ ኢሲ ኣሳይ ፓላማ ፂንዒ ጊዲ ኣማናናስ ኮይቤና፤ ጎዳ ኦጌ ቆንጬን ኢፂዳ፤ ሄሳ ጊሽ ጳዉሎሲ ኢስታ ኣጊዲ ሃራሶ ቢዴስ፤ ኣማኒዛይታካ ዱማ ሻኪ ኬሲዲ ፂራኖሴ ቲሚርቴ ኬꬃን ጋላስ ጋላስ ኢስታራ ሃሳዬቲዴስ። ሄሳ ማላ ኦሶን ናምዑ ላይꬅ ጋምዒዳ ጊሽ ኢሲያ ኣዉራጃን ዲዛ ኣይሁዳቲኔ ጊሪኬ ኣሳይ ዉሪ ጎዳ ቃላ ሲያና ዳንዳዪዴስ። ፆሲ ጳዉሎሳ ባጋራ ዳሮ ማላሊሲዛ ማላታ ኦꬂዴስ። ማራቤ ዎይኮ ኢዛ ኣሳቴꬅ ቦቺዳ ጫርቃ ኤፊዲ ሃርጋንቻታ ቦቺኮ ሃርጌይ ዬዴስ፤ ቱና ኣያናቲካ ባ ኦይኪዳ ኣሳፔ ኬዜቴስ። ዩዪ ዩዪ ኣሳፔ ዳይዳንꬂ ኬሲዛ ኢሲ ኢሲ ኣይሁዳ ኣሳቲ “ጳዉሎሲ ሳባኪዛ ዬሱሳ ሱንꬃን ኢንቴ ኬዛና ማላ ኣዛዛይስ” ጊዲ ጎዳ ሱንꬃ ቱና ኣያናቲ ኦይኪዳ ኣሳታ ቦላ ፄይጋና ፓጪዳ። ኢሲ ኣይሁዳታፔ ጊዲዳ ቄሴታ ሃላቃ ኣስቄዌስ ኣቱማ ና ላፑናቲ ሄሳꬆ ኦꬂዳ። ቱና ኣያናይካ “ታ ዬሱሳካ ኤራይስ፤ ጳዉሎሳካ ኤራይስ ሺን ኢንቴ ቃስ ኦናንቴ?” ጊዴስ። ቃሴካ ቱና ኣያናይ ኢዛ ኦይኪዳዴይ ጉፒዲ ኣሳታ ኦይኪዴስ፤ ኢስታ ቦላ ዎልቃቲዲ ዳሮ ሚኒን ማዱንፂዲ ኬꬃፌ ሜላ ካሎ ባቃቲዳ። ሄሲካ ኤፌሶኔን ዲዛ ኣይሁዳታ ኣቻኒኔ ጊሪኬ ኣሳ ኡባ ኣቻን ኤሬቲን ዉሪካ ባቢዳ፤ ሄሳንካ ጎዳ ዬሱሳ ሱንꬂ ቦንቼቲዴስ። ኣማኒዳ ኣሳፔ ዳሮይ ሺቂዲ ባ ኢታ ኦሶ ቆንጬን ፓፂዴስ። ማሮ ማሮቲዛይታፔ ዳሮቲ ባ ማሮቲዛ ማፃፋ ሺሺዲ ዴሬ ሲንꬃን ታማን ፁጊዳ፤ ማፃፋ ዋጋይ ሺሺ ቆዲን ኢቻሹ ታሙ ሺ ቢራ ማላ ጊዲዴስ። ሃይሳ ማላን ጎዳ ቃላይ ኬሂ ዲጪሼኔ ፆኒ ፆኒ ቢዴስ። ሃይሲ ዉሪ ሃኒዳፔ ጉዬ ጳዉሎሲ ማቂዶኒያራኔ ኣካያ ባጋራ ኣꬊዲ ዬሩሳላሜ ባናስ ቆፋ ቃቺዲ “ታ ሄ ጋኪዳፔ ጉዬ ታ ኦሮሜ ቃሴካ ቤያና ኮሼስ” ጊዴስ። ባና ማዲዛይታፔ ናምዓታ ፂምቶሳኔ ኤሪስፆሳ ጌዴ ማቂዶኒያ ጌቴቲዛሶ ኪቲዲ ባስ ኢሲያ ኣዉራጃን ጉꬃ ዎዴ ሄን ዴዒዴስ። ሄ ዎዴ ጎዳ ኦጌ ጊሽ ዳሮ ሺሮይ ሜꬌቲዴስ። ዲሜፂሮሳ ጌቴቲዛ ኢሲ ቢራ ቆፂዛይሲ ኣርፄሚሴ ጌቴቲዛ ኤቃ ሚሲሌ ቢራፔ ሴሪስ ሜꬊ ሜꬊ ሂላንቻታስ ዎꬌ ሚሼ ዴሚሴስ። ኢዚካ ሄ ሂላንቻታን ሄሳ ማላ ኦሶን ኣቂዛይታ ሃራ ኣሳታ ኢሲ ቦላ ሺሺዲ “ኣሶ! ሃይሲ ኦሶዚ ኑስ ሚሽ ኬሲዛይሳ ኢንቴ ኤሬታ፤ ሃይሲ ጳዉሎሳ ጌቴቲዛይሲ ኤፌሶኔን ፃላ ጊዶንታ ኩሜꬃ ኢሲያ ኣዉራጃን ዲዛ ዳሮ ዴሬዛ ኣማንꬂ ኣማንꬂ ባሌꬂዛይሳ ኢንቴ ዉሪካ ቤዪዛይሳ ማላኔ ሲዪዛይሳ ማላ ‘ኣሳ ኩሼን ኦሴቲዳ ኤቃቲ ሙሌካ ፆሴ ጊዴቴና’ ጊ ዮቴስ። ሃይሳ ኑ ኦሶዛስ ሎዖ ሱንꬃ ሂራይሲዛይሳፌ ቦላራ ኩሜꬃ ኢሲያይኔ ኩሜꬃ ኣላሜይ ጎይኒዛ ዎጋ ኣርፄሚሴ ኤቃ ኬꬃይካ ጎዓይ ባይንዳይሳ ጊዳና፤ ቃሴካ ኬሂ ꬎቁ ጊዳ ኢዚ ቦንቾይካ ካዉያና” ጊዴስ። ኣሳይ ሄሳ ሲይዲ ኢታ ሃንቆ ሃንቄቲዲ “ኤፌሶኔ ኣርፄሚሳ ዎጋ ጊታ!” ጊዲ ዋሶ ዶሚዴስ። ሄራካ ኩሜꬃ ካታማይ ሺሮቲዴስ፤ ዴሬይካ ዉሪ ኢሲ ቦላ ጊዲዲ ማቂዶኒያ ኣሳ ጊዲዳይታኔ ጳዉሎሳራ ኢሲፌ ዩዪዛ ኢዛ ላጌታ ጋዪዮሳኔ ኣሪስፂሮኮሳ ኦይኪዲ ዴሬይ ካሴ ካዒዛሶ ዎꬃን ጌሊዳ። ጳዉሎሲካ ካሬ ኬዚዲ ኣሳ ሲንꬅ ሺቃና ኮዪን ኣማኒዛይቲ ዲጊዳ። ሄ ኣዉራጃ ዳናታፔ ኢሲ ኢሲ ጳዉሎሳ ላጌቲ ጳዉሎሲ ኣሳይ ካሴ ካዒዛሶ ፃሊዲ ጌሎንታ ማላ ኣስ ኪቲዲ ዎሲዳ። ሺቂዳ ኣሳይ ኡንዔቲዲ ኢሳዴይ ኢሲ ሚሽ ሃሳዪሺን ሃራይ ቃስ ሃራ ሃሳዬሲኔ ኣሳይ ዉሪ ዋሴቴስ፤ ዳሪዛ ባጋ ኣሳይ ኣዛስ ሄን ሺቂዳኮኔ ኤሬና። ኣይሁዳ ኣሳይ ኢስኪንዲሮሳ ጌቴቲዛይሳ ዴራ ጊዶፌ ሱጌሬꬅ ጌዴ ሲንꬅ ኬሲዳ ዎዴ ኢሲ ኢሲ ኣሳቲ ባ ጊሽ ኢዚ ሃሳያና ማላ ዋሲዳ፤ ኢዚካ ኢስታ ጊሽ ፓላሜታና ኮይዲ ኣሳይ ጮዑ ጋና ማላ ማላቲ ቤሲዴስ። ጊዶ ኣቲን ኢዚ ኣይሁዳ ኣስ ጊዲዳይሳ ኤሪዳ ዎዴ ዉሪካ ኢሲ ቦላ “ኤፌሶኔ ኣርፂሚሳ ዎጋ፤ ጊታ!” ጊሼ ናምዑ ሳቴ ማላ ኣሳይ ዋሲዴስ። ሄ ካታማስ ዋና ፃፌይ ኣሳ ጮዑ ሂስቲዲ “ኢንቴኖ ኤፌሶኔ ኣሳቶ! ጊታ ኣርፄሚሲ ኤቃ ኬꬃይኔ ሳሎፔ ዎꬊዳ ኢዚ ሚሲሌ ናጊዛይ ኤፌሶኔ ካታማ ኣሳ ጊዲዳይሳ ኤሮንታይ ኦኔ? ሄሳ ጊሽ ሃይሲ ሃ ቱማይ ካዴታና ዳንዳዬቶንታይሳ ማላ ኢንቴ ጉꬂ ዩሺ ቆፓናሲኔ ሎዱ ጋናስ ቤሴስ። ሃይታ ኣሳታ ፆሳ ኬꬃ ቦንቆንታ ዎይኮ ኑ ፆሴ ጊዲዳይሳ ቦላ ጫሻ ቃላ ዴንꬆንታ ዲሺን ኢንቴ ኦይኪዲ ሃ ጋꬃናስ ጮ ኤሂዴታ። “ሄሳ ጊሽ ዲሞፂሮሲኔ ኢዛራ ዲዛ ቢራ ሴሪሲ ኦꬂዛ ሂላንቻቲ ኦና ቦላካ ሞቲዛ ዮዖይ ዲኮ ፒርዳ ኬꬃይ ኢስታስ ዶያ ዴስ፤ ዳናቲካ ዴቴስ፤ ኮዪዳዴ ሞታናስ ዳንዳዬስ። ሃይሳፌ ሃራ ጋናስ ኢንቴ ኮይኮ ዎጋይ ዲዛ ሺቆሶን ቤዬቶ። ሄሲ ኣቲኮ ሃች ሃኒዳ ሺሮይ ኑና ሞቲሶንታ ማላ ሂርጊሴስ፤ ሞቶስ ጋꬂዛ ጋሶይ ባይንዳ ጊሽ ሃ ሃኒዳ ሺሮዛ ጊሽ ኑ ኦይሼቲኮ ጋናዚ ኑስ ዴና” ጊዴስ። ኢዚ ሄሳ ጊዳፔ ጉዬ ሺቆይ ላሌቲዴስ። ኣሳይ ጮዑ ጊዳፔ ጉዬ ጳዉሎሲ ኣማኒዛይታ ኢሲ ቦላ ፄይጊዲ ኢስታ ሚንꬄꬂዛ ቃላራ ዞሪዳፔ ጉዬ ኢስታ ሳሮኪዲ ማቂዶኒያ ባና ኬዚዴስ። ኢዚ ኣꬊ ቢዛ ዴሬን ዲዛ ኣማኒዛ ኣሳ ሎዔꬅ ዞሬን ሚንꬄꬂሼ ጊሪኬ ዴሬ ቢዴስ። ጊሪኬን ሄꬑ ኣጊና ታኪዳፔ ጉዬ ማርካቤራ ሶሪያ ጌቴቲዛ ዴሬ ባናስ ቆፒዴስ ሺን ኣይሁዳ ኣሳቲ ኢዛ ቦላ ኢታ ኦꬃና ዞሬቲዳይሳ ኤሪዲ ማቂዶኒያ ባጋራ ባና ቆፋ ቃቺዴስ። ቤሪያፔ ጳሪዮሳ ና ሶጳፂሮሳ፥ ታሶሎንቄፌ ኣሪስፂሮኮሳኔ ሲኮንዶሳ፥ ዴርቤኔፔ ጋዪዮሲኔ ፂምቶሲ ኢሲያፔ ፂሮፊሞሲኔ ቲቂቆሲ ጳዉሎሳራ ኢሲፌ ቢዳ። ሄይቲ ዉሪ ኑፔ ካሴቲዲ ፂሮዓዳን ኑና ናጊዳ። ኑ ቃስ ኡኬꬃ ባዓሌፔ ጉዬ ፒሊጲሲዮሴፔ ማርካቤን ኢስቲ ዲዛሶ ፂሮዓዳ ጌቴቲዛሶ ኢቻሻንꬃ ጋላስ ጋኪዲ ሄን ላፑን ጋላስ ጋምዒዶስ። ሳሚንታፌ ኮይሮ ዎጋ ጋላስ ኢሲፌ ካꬅ ማናስ ኑ ሺቂ ዲሺን ጳዉሎሲ ዎንቶ ባናስ ኮሺዛ ጊሽ ሺቂዳ ኣሳስ ቃላ ዮቲሺን ኢዚ ዮዖዛ ሌላ ጊዶꬅ ጋካናስ ኣዱሲዴስ። ቦላ ፎቄን ዳሮ ፖዖይ ዲዛሶን ኑ ሺቂዶስ። ኣዉፄኪሴ ጌቴቲዛ ኢሲ ናቴꬃ ናይ ማስኮቴ ቦላ ኡቲ ዲሺን ጳዉሎሲ ዮዖዛ ኣዱሲዳይሳፌ ዴንዲዳይሳን ኢዛ ꬊስኮይ ኤኪ ቢዴስ፤ ዎልቃማ ꬊስኮን ፆኔቲዲ ቦላ ሄꬓንꬆ ፎቄፔ ዱጌ ኩንዲን ኣሳይ ዴንꬂዛ ዎዴ ሃይቂዲ ቤቲዴስ። ጊዶ ኣቲን ጳዉሎሲ ዱጌ ዎꬊዲ ናዛ ቦላ ሆኪ ኢዲሚዲኔ “ሃይቂቤና ፓፃ ዴስ፥ ዳጋሞፍቴ!” ጊዴስ። ጳዉሎሲ ሄሳፌ ፑዴ ፎቄ ኬዚዲ ኡኬꬃ ሜንꬂዲ ኣማኒዛይታራ ሚዴስ፤ ጋዴይ ዎንታና ጋካናስ ኣሳታራ ሃሳዬቲሼ ጋምዒዲ ቢዴስ። ኣሳይካ ሃይቆፔ ፓፂዳ ናዛ ጌዴ ኢዛሶ ኤፊዲ ዉሪካ ኡፋዬቲዴስ። ኑ ጳዉሎሳ ማርካቤን ጌልꬃና ኮይዳ ጊሽ ካሴቲዲ ማርካቤን ኣሶሳ ጌቴቲዛሶ ቢዶስ፤ ኑ ሄሳ ኦꬂዳይ ጳዉሎሲ ኣሶሳ ጋካናስ ቶሆራ ባና ኮይዳ ጊሻሲኔ ኑ ጌዴ ሲንꬅ ባና ማላ ኢዚ ኣዛዚዳ ጊሻሳ። ኑ ኢዛራ ኣሶሳን ጋጊዲ ኢዚ ማርካቤን ጌሊን ኢዛራ ኢሲፌ ሚፂሊኔ ቢዶስ። ዎንቴꬃ ጋላስ ሄፔ ዴንዲዲ ሲንꬃራ ዲዛ ኪዖሴ ጌቴቲዛሶ ጋኪዶስ፤ ቃሴ ዎንቴꬃ ጋላስ ሳሞሴ ጌቴቲዛሶ ፒኒዲ ሄፔ ዎንቴꬃ ጋላስ ሚሊፄ ጋኪዶስ። ጴንፃቆስቴ ጌቴቲዛ ኣይሁዳታ ፓዚጋ ባዓሌ ባስ ዳንዳዬቲዳ ማላ ቦንቻና ዬሩሳላሜን ቤታና ኮይዲ ኢዚ ኢሲያን ዎዴይ ኣꬎንታ ዲሺን ኤፌሶኔ ኣꬊ ባናስ ኮይዴስ። ኢሲያን ኢዛስ ዎዴይ ኣꬎንታ ማላ ኤፌሶኔ ዬጊ ኣꬋና ኮዪዴስ። ኢዚ ሄሳꬆ ኦꬃና ኮዪዳይ ጴንፃቆስቴ ባዓሌስ ዬሩሳላሜን ቤታናስ ኮይዳ ጊሻሳ። ጳዉሎሲ ሚሊፄፔ ኤፌሶኔ ዎሳ ኬꬃ ጪማታ ኣሴ ኪቲዲ ፄይጊሲዴስ። ኢስቲካ ዪን ጳዉሎሲ ኢስታ “ታ ኢሲያ ጌሊዳ ጋላሳፌ ሃ ሲሚን ኡባ ዎዴ ታ ኢንቴናራ ዋና ዋና ዴዒዳኮኔ ኢንቴ ኤሬታ። ኣይሁዳቲ ታ ቦላ ኣሳ ዴንꬂዲ ሂሊዳ ጌዶን ዳሮ ሜቶይ ታ ቦላ ጋኪኮካ ታ ኩሜꬃ ኣሽኬቴꬃራኔ ኣፉንꬃራ ጎዳስ ኦꬃዲስ። ጮ ዴንባንካ ኢንቴ ኢንቴሶን ታ ኢንቴና ታማርሳሼ ጎዒዛይሳ ዉርሳ ኢንቴስ ዮታዲስ ኣቲን ኢንቴና ጎዒዛ ሚሻፌ ኣይኮካ ኣሻቤኬ። ኣይሁዳ ኣሳታ ጊዲንካ ጊሪኬ ኣሳ ጊዲንካ ማሮቴꬃን ጌሊዲ ፆሳኮ ሲማና ማላኔ ጎዳ ዬሱሳን ኣማናና ማላ ሎዔꬃ ዮታዲስ። *** “ሃዒካ ታ ሄ ጋኪሺን ታ ቦላ ኣዚ ጋካናኮኔ ኤሪኬሺን ፂሎ ኣያናይ ታና ኣዛዚዳ ማላ ዬሩሳላሜ ባይስ። ሄን ዱማ ዱማ ታና ቃሾይኔ ሜቶይ ናጊዛይሳ ፂሎ ኣያናይ ታስ ዮቲዴስ። ጊዶ ኣቲን ጎዳ ዬሱሲ ታስ ኢሚዳ ዎꬃ ዎፃ ዉርሳና ጋካናሲኔ ኦሶ ታ ፖላና ጋካናስ ታኒ ታ ሼምፖስ ሚሼቲኬ፤ ታስ ኢሜቲዳ ኦሶይካ ፆሳ ሚሺራቾ ቃላ ዮቶኮ። “ሃዒ ጋካናስ ታ ኢንቴ ጊዶን ሲሜሬታሼ ፆሳ ካዎቴꬅ ሳባካዲስ፤ ሲማ ሃይሳፌ ጉዬ ኢንቴፌ ኦኒካ ሙሌ ታ ኣይፌሶ ቤዮንታይሳ ታ ኤራይስ። ሄሳ ጊሽ ኢንቴፌ ኢሳዴይካ ꬋይኮ ታ ኦይሼቶንታይሳ ሃች ታ ኢንቴና ኤሪሳይስ። ኣይሲ ጊኮ ታ ፆሳ ቆፋ ዉርሳ ኢንቴስ ዮታዲስ ኣቲን ኣይኮካ ታ ዮቶንታ ኣሺዳይሲ ዴና። ፂሎ ኣያናይ ኢንቴና ፆሳ ዶርሳታ ሄማናስ ሹሚዴስ፤ ሄሳ ጊሽ ኢንቴ ሁዔሲኔ ፆሳ ዶርሳታስ ናጌቲቴ፤ ጎዳይ ባ ሱꬃን ዎዚዳ ዎሳ ኬꬃዮ ናጊቴ። ታ ቢዳፔ ጉዬ ፆሳ ዶርሳታስ ሚቼቶንታ ኢታ ኣሳቲ ኢንቴ ጋርስ ጌላናይሳ ታ ኤራይስ። ሄሳꬆካ ኢሲ ኢሲ ኣሳቲ ኢንቴ ጊዶፌ ዴንዲዲ ጌላ ዮዖ ኢንቴና ታማርሲዲ ኣማኒዛ ኣሳፔ ዳሮታ ጌዴ ባኮ ዛራና። ሄሳ ጊሽ ኢንቴና ኢሳ ኢሳ ሄꬑ ላይꬅ ቃማኔ ጋላስ ኣፉንፃ ዞሪዳይሳ ዩሺ ቆፒቴኔ ናጌቲቴ። “ሃዒካ ኢንቴና ፆሳስ ሚንꬂ ኤሳናሲኔ ኣማኒዛይታ ጊዶን ኢንቴስ ላታሶ ኢማናስ ዳንዳዪዛ ኢዛ ኣꬎ ኪያቴꬃ ቃላስ ታ ሃዳራ ኢማዲስ። ታ ኦና ቢራካ ዎርቃ ዎይኮ ማይዖ ኣሞታቤኬ። ታ ታ ኩሼን ኦꬃ ኦꬃዳ ታስ ማዴታዳ ታናራ ዲዛዪታካ ማዲዳይሳ ኢንቴካ ኤሬታ። ‘ሃ ኤኪዛዴፌ ጌዴ ኢሚዛዴይ ኣንጄቲዳዴ’ ጊዛ ጎዳ ዬሱሳ ቃላ ኑ ዩሺ ቆፒዲ ኑርካ ኑ ኩሼራ ኑ ኦꬂ ዴሚዲ ሃራ ዳቡራንቻታ ጌዴ ማዳናስ ኑስ ቤሲዛይሳ ታ ኢንቴና ዳሮ ዱማ ዱማ ኦጌራ ቤሳዲስ” ጊዴስ። ሄሳፌ ጉዬ ጳዉሎሲ ኡባ ኣሳራ ጉልባቲዲ ዎሲዴስ። ኣሳይ ዉሪ ዬኪዲ ጳዉሎሳ ኢዲሚ ኦይኪዲ ዬሪዴስ። ሃራፔካ ኢስቲ ዳሮ ሚሼቲዳይ ኢዚ “ሃይሳፌ ጉዬን ኢንቴ ናምዓንꬆ ታና ቤዬኬታ” ጊዳ ጊሻሳ፤ ሄፔካ ኢዛ ማርካቤኮ ጋካናስ ሞይዚዳ። ኑ ኢስታፌ ሻኬቲዲኔ ማርካቤን ጌሊዲ ሲቲ ጊዲ ቆሴ ጌቴቲዛ ኣባ ጊዶን ዲዛ ዴሬ ቢዶስ፤ ዎንቴꬃ ጋላስ ሃራ ኤሮዶሴ ጌቴቲዛ ኣባ ጊዶን ዲዛ ዴሬ ጋኪዶስ። ሄፔካ ኢሲ ጳፂራ ጌቴቲዛ ካታማ ቢዶስ። ሄን ጌዴ ፒንቄ ጌቴቲዛሶ ቢዛ ማርካቤ ዲዛሮ ዴሚዲኔ ኢዚን ጌሊዲ ቢዶስ። ኣባ ጊዶን ዲዛ ቆጲሮሴ ጌቴቲዛ ዴሬፔ ሃዲርሳ ባጋን ዬጊዲ ሶሪያ ጌቴቲዛ ዴሬ ቢዲ ፂሮሴ ጌቴቲዛ ኣባ ኣቻን ዲዛ ዴሬ ቢዶስ፤ ሄሳስ ጋሶይ ማርካቤያ ባ ጫኔቲዳ ጫና ሄን ዎꬃናስ ኮሺዛ ጊሻሳ። ሄን ኣማንዛይታ ኮዪ ዴሚዲ ኢስታራ ላፑን ጋላስ ጋምዒዶስ፤ ኢስቲካ ፂሎ ኣያና ካሌꬆን ጳዉሎሳ “ዬሩሳላሜ ቦፓ” ጊዲ ዮቲዳ። ኑ ሄን ጋምዓና ዎዴይ ዉሪን ኢስታፌ ሻኬቲዲ ኑ ኦጌ ቢዶስ። ኢስቲ ዉሪ ባ ማቼታራኔ ባ ናይታራ ኢሲፌ ካታማፔ ካሬ ኬዛና ጋካናስ ኑና ሞዪዚዳ፤ ኣባ ኣቻን ኑ ዉሪ ጉልባቲዲ ዎሲዳፔ ጉዬ ዴንዲዲ ኢሶይ ኢሳራ ሳሮኬቲዲ ሻኬቲዶስ። ሄሳፌ ጉዬ ኑ ማርካቤን ጌሊን ኢስቲ ጌዴ ባሶ ሲሚዳ። ኑ ፂሮሴፔ ዴንዲዲ ጌዴ ጲፂላማይሴ ጌቴቲዛሶ ጋኪዶስ። ሄንካ ኣማኒዛ ኣሳራ ጋጊዲ ሳሮኬቲዲ ሄን ኢስታ ኣቻን ኢሲ ጋላስ ጋምዒዶስ። ዎንቴꬃ ጋላስ ሄፔ ኬዚዲ ቂሳሪያ ጌቴቲዛሶ ቢዶስ፤ ቂሳሪያን ላፑን ዳቆኔታፔ ኢሳ ዎንጌላዌ ጲልጶሳሶ ጌሊዲ ኢዛ ኣቻን ሼምፒዶስ። ኢዛስ ናቤ ጊዲዳ ኦይዱ ጌሎንታ ጌላዖ ናይቲ ዴቴስ። ዳሮ ጋላስ ኑ ሄን ጋምዒን ኢሲ ኣጋቦሳ ጌቴቲዛ ናቤይ ዩሁዳ ዴሬፔ ዪዴስ። ሄ ናቤይ ኑኮ ሺቂዲኔ ጳዉሎሳ ዳንጮ ኤኪዲ ባ ቶሆኔ ባ ኩሼ ቃቺዲ “ፂሎ ኣያናይ ሃይሳ ዳንጫ ጎዳ ዬሩሳላሜን ዲዛ ኣይሁዳ ኣሳቲ ሃይሳꬆ ቃቺዲ ኣይዛቤታስ ኣꬂ ኢማና ጌስ” ጊዴስ። ሄሳ ሲይዲ ኑካ ኑናራ ዲዛ ኣሳይካ ጳዉሎሲ ዬሩሳላሜ ቦንታ ማላ ዎሲዶስ። ቃስ ጳዉሎሲ “ኢንቴ ኣይሲ ዬኪ ዬኪዲ ታ ዎዝና ኣዛስ ሜንꬄቲ? ታኒ ጎዳ ዬሱሳ ሱንꬃ ጊሽ ዬሩሳላሜን ቃሾ ፃላላ ጊዶንታ ሃይቃናስካ ጊጌታዲስ” ጊዴስ። ኢዚ ኑ ዞሬ ኤኮንታ ኢፂን “ሂስቲኮ ጎዳ ሼኔይ ሃኖ” ጊዲ ኣጋጊዶስ። ኑ ሄን ጉꬃ ጋላሳታ ጋምዒዳፔ ጉዬ ኑ ሚሼ ዉርሲ ጊጊሲዲ ኤኪ ዬሩሳላሜ ቢዶስ። ቂሳሪያን ዲዛ ኢሲ ኢሲ ኣማንዛይቲ ኑናራ ኢሲፌ ዪዳ፤ ኢስቲካ ኑኒ ሚናሶኔ ኬꬃን ዳና ማላ ኑና ኢዛሶ ካሌꬂዳ፤ ሚናሶኒ ካሴቲዲ ኣማኒዳ ቆጲሮሴ ዴሬ ኣሳ። ኑ ዬሩሳላሜ ጋኪዳ ማላ ኣማንዛይቲ ኑና ኡፋይሳን ሞኪ ኤኪዳ። ዎንቴꬃ ጋላስ ጳዉሎሲ ኑናራ ያቆቤኮ ቢዴስ፤ ሄ ዎዴ ዎሳ ኬꬃ ጪማቲ ሄን ዴቴስ። ጳዉሎሲ ኣሳ ዉርሲ ሳሮꬂዳፔ ጉዬ ፆሲ ኢዛ ባጋራ ኣይዛቤታ ጊዶን ኦꬂዳይሳ ዉርሲ ኢሲኖ ኣሾንታ ዮቲዴስ። ሄሳ ሲይዲ ኣሳይ ዉሪ ፆሴ ጋላቲዴስ፤ ጳዉሎሲካ “ኑ ኢሻዞ ዳሮ ሺያን ቆዴቲዛ ኣማኒዛይቲ ኣይሁዳታ ጊዶን ዲዛይሳኔ ዉሪካ ሙሴ ዎጋ ዎዝናፔ ናጊዛይታ ጊዲዳይሳ ኔካ ኤራሳ። ኔኒ ኣይዛቤታ ጊዶን ዲዛ ኣይሁዳታ ‘ኢንቴ ናይታ ቃፃሮፒቴ ዎይኮ ዎጋታ ኦꬆፍቴ ጋዳ ኔ ታማርሲዳ ኣሳይ ሙሴ ዎጋ ሻራና ማላ ኦꬄስ ጊዛ ዎሬ ኣሳይ ሲይዴስ። ሂስቲን ሃዒ ኣዜ ሎዖይ? ሃዒ ኔ ዩሳ ኣሳይ ሲዮንታ ኣጌና። ሄሳ ጊሽ ኑ ኔና ጊዛይሳ ኦꬃ፤ ኑ ኣቻን ታሳላ ጋꬃና ዪዳ ኦይዱ ኣሳቲ ዴቴስ። ኔ ኢስታ ኔናራ ኤካዳ ኢስታራ ጊዳዳ ኔና ጌሻ፤ ኣሳቲ ባ ሁዔ ሜዴታና ማላኔ ፆሳ ኬꬃን ኢሜቲዛ ሙፁዋታ ሚሻ ኔ ኢስታስ ቃንፃ፤ ኔ ሄሳꬆ ኦꬂኮ ኔ ቦላ ዎሬቲዳይሲ ዉሪ ሜላ ጊዲዳይሳኔ ኔካ ሙሴ ዎጋ ፖላ ናጊዛዴ ጊዲዳይሳ ኣሳይ ዉሪ ኤራና። ሂንኮ ኣይዛቤታፔ ኣማኒዳይታ ጊሽ ጊዲኮ ‘ኤቃስ ሹኬቲዲ ቱኒዳይሳ ሞፒቴ፥ ሱꬂካ ኡዮፒቴ፥ ባዉታ ሃይቂዳ ሜሄ ኣሾ ሞፒቴ፥ ላይማፌ ሃኪቴ’ ጊዲ ጪማቲ ቃቺዳ ቃላ ዳብዳቤ ፃፊዲ ኑ ኢስታስ ዬዲዶስ።” ሄሳፌ ጉዬ ጳዉሎሲ ሄ ኦይዱ ኣሳታ ባናራ ኤኪዲ ዎንቴꬃ ጋላስ ኢስታራ ባና ጌሺዴስ፤ ኢስቲ ጌዪዛ ጋላሳቲ ኣፑን ጋላሲኮኔ ኢሳዴ ኢሳዴ ጊሽ ኢሜቲዛ ሚሽ ኢሚዛ ዎዴይ ኣይዴኮኔ ኤሪሳናስ ፆሳ ኬꬄ ጌሊዴስ። ላፑን ጋላስ ኩማና ማቲሺን ኢሲያ ዴሬፔ ዪዳ ኣይሁዳ ኣሳይ ጳዉሎሳ ፆሳ ኬꬃን ቤዪዲ ዴራ ኢዛ ቦላ ዴንꬄꬂዲ ኢዛ ኦይኪዳ። “ኢስራዔሌ ኣሳቶ! ኑና ማዲቴ! ኑ ኣሳኔ ኑ ዎጋ ሃይሳ ኑ ዲዛሶዛ ጫዪሼኔ ዴሬይ ዲዛሶን ኡባን ኣሳ ታማርሲዛይሲ ሃይሲ ኢዛኮ! ሄሲካ ጊዴና ጊዲ ኣይዛቤታ ፆሳ ኬꬄ ጌልꬂዲ ሃይሳ ጌሻ ሶዛ ቱኒሲዴስ” ጊሼ ዋሲዳ። ኢስቲ ሄሳ ጊዳ ጋሶይ ሃይሳፌ ካሴ ኤፌሶኔ ዬሌታ ጊዲዳ ፂሮፊሞሳ ኢዛራ ኢሲፌ ካታማ ጊዶን ቤዪዳ ጊሽ ኢዛ ጳዉሎሲ ፆሳ ኬꬄ ኤኪ ጌሊዳ ሚሳቲዳ ጊሻሳ። ኩሜꬃ ካታማይ ባ ጊዶን ሺሮቲዴስ፤ ዴሬይ ዉሪ ኢሲፌ ዎፂ ኮይዲ ጳዉሎሳ ኦይኪ ኤኪዲ ፆሳ ኬꬃ ጊቤፌ ጎሼቺ ኬሲዴስ፤ ፆሳ ኬꬃ ፔንጌቲ ሄራካ ጎርዴቲዳ። ኣሳይ ጳዉሎሳ ዎꬋና ኮዪሺን “ዬሩሳላሜ ዲዛ ኩሜꬃ ዴሬይ ባ ጊዶን ሺሮቲዴስ” ጊዛ ኪታይ ኦሮሜ ዎታዳራታ ኣዛዚዛይሳኮ ጋኪዴስ። ሄሳ ጊሽ ኢዚ ዎታዳራታኔ ማቶ ሃላቃታ ካሌꬂዲ ኤሶን ዎፂሼ ኣሳይ ዲዛሶ ቢዴስ፤ ኣሳይ ኦላንቻታ ኣዛዚዛይሳ ቤዪዲ ጳዉሎሳ ቡካ ኣጊዳ። ማቶ ሃላቃዚ ኢዛኮ ሺቂዲ ጳዉሎሳ ኦይኪዲ ናምዑ ሳንሳላታን ቃሼታና ማላ ኣዛዚዲ ኢዚ ኦናኮኔ ኣይ ኦꬂዳኮኔ ኤራናስ ኢዛ ኦይቺዴስ። ዴሬይካ ባ ጊዶን ባጋይ ሄሳ፥ ባጋይ ሃይሳ ጊዴስ፤ ማቶ ሃላቃዚ ዴሬዛ ዋሶፔ ዴንዲዳይሳን ቱማይ ኣዋይሳኮኔ ኤራናስ ዳንዳዬቶንታ ኢፂን ጳዉሎሳ ጌዴ ዎታዳራቲ ዲዛሶ ኤፋና ማላ ኣዛዚዴስ። ጳዉሎሲ ፑዴ ꬎቃሶ ጋኪሺን ዴሬይ ዳሮ ሃንቆን ኢዛ ቦላ ሜቶ ጋꬃናስ ኮይዳ ጊሽ ዎታዳራቲ ኢዛ ሃሼን ቶኪ ኤፊዳ። ዴሬይካ “ኢዚ ሃይቆ! ሃይቆ” ጊ ዋሲሼ ኢዛ ካሊዴስ። ዎታዳራቲ ጳዉሎሳ ባ ዲዛሶ ጌልꬃና ማቲሺን ጳዉሎሲ ዎታዳራታ ኣዛዚዛይሳ “ታ ኔስ ኢሲ ሚሽ ዮታና ማላ ዶሳይ?” ጊዴስ። ማቶ ሃላቃዚካ “ኔ ጊሪኬ ቃላ ኤራይ?” ሂስቲን ሃዒ ማታ ዴሬ ጊዶን ሜቶ ዴንꬄꬂዳ ሼምፖ ዎꬊዳ ኦይዱ ሺ ኣሳ ኤካዳ ባዞ ባቃቲዳ ጊብፄ ኣዴዚ ኔና ዲኪ?” ጊዴስ። ጳዉሎሲካ “ታኒ ኪልቂያ ጊዶን ዳሮ ኤሬቲዳ ፃርሴሴ ካታማን ዬሌቲዳ ኣይሁዳ ኣሳ፤ ሃይሳ ኣሳስ ታና ዮቻርኪ” ጊዴስ። ኢዚ ሃሳያና ማላ ኤሮ ጊን ጳዉሎሲ ꬎቃሶን ኤቂዲ ኣሳይ ጮዑ ጋና ማላ ባ ኩሼራ ማላቲዴስ፤ ኣሳይ ጮዑ ጊን ኢስራዔሌታ ቃላራ፥ “ታ ኢሻቶ! ታ ኣዋቶ! ታ ቦላ ዎርዶ ዎꬂዳይሳስ ታ ኢንቴስ ኢሚዛ ዛሮ ሲዪቴ!” ኢዚ ኣይሁዳታ ቃላራ ሃሳዪሺን ሲይዲ ካሴፔ ኣሳይ ጮዑ ጊዴስ፤ ጳዉሎሲካ ሃሳያ ጉጂዲ ሂዝጊዴስ። “ታኒ ኪልቂያ ጊዶን ዲዛ ፃርሴሴ ካታማን ዬሌቲዳ ኣይሁዳ ኣሳ፤ ታኒ ዲጪዳይ ጊዲኮ ሃኒን ዬሩሳላሜና፤ ታ ኑ ኣዋታ ዎጋ ዉርሳ ጋማልያሌፔ ሎዔꬃ ታማራዲሴኔ ኢንቴ ሃች ኦꬂዛይሳꬆ ፆሳስ ሱሬ ዎዝናፔ ኦꬃሼ ዴዓዲስ። ሃይሳ ሃ ኦጌዛ ካሊዛ ኣሳታ ኡባ ዎꬋና ጋካናስ ጎዳꬂዛ ኣሳኮሺን፤ ማጫታኔ ኣዴታ ቃቻ ቃቻ ቃሾ ኬꬄ ዬዲዛዴኮሺን። ሃይሲ ዉሪ ቱሙ ጊዲዳይሳ ቄሴታ ሃላቃቲኔ ዴሬ ጪማቲካ ዉሪ ታስ ማርካታና፤ ሃራይ ኣቶሺን ዳማስቆን ዲዛ ኣማኒዛ ኣሳ ቃቻ ዬሩሳላሜ ኤሃዳ ቃፃይሳናስ ዳማስቆን ዲዛይታስ ፃፌቲዳ ዳብዳቤ ቄሴታ ሃላቃታፔኔ ዴሬ ጪማታፔ ኤካዲስ። “ታኒ ዳማስቆ ቢሺኒኔ ካታማ ጌላና ማቲሺን ሴታ ጋላስ ታ ቆፖንታ ዲሺን ሳሎፔ ዎልቃማ ፖዖይ ታና ዩይ ኣꬊ ፖዒዴስ። ሄ ዎዴ ታኒ ቢታ ቦላ ኩንዳዳ ሳዉሌ! ሳዉሌ! ኔ ታና ኣዛስ ጎዳይ? ጊዛ ቃላ ሲያዲስ። ታካ ‘ጎዶ ኔ ኦኔ?’ ጋዲስ፤ ኢዚካ ‘ታ ኔኒ ጎዲዛ ናዚሬቴ ዬሱሳ’ ጊዴስ። ታናራ ኢሲፌ ዲዛ ኣሳቲ ፖዖዛ ቤዪዳ ኣቲን ኢዚ ታናራ ሃሳዪሺን ቃላ ሲይቤቴና። ታካ ‘ጎዶ ታ ኣይ ኦꬆ?’ ጋዲስ። ጎዳይካ ‘ዴንዳዳ ዳማስቆ ባ፥ ኔ ኦꬃናይሳ ኢስቲ ኔስ ሄን ዮታና’ ጊዴስ። ፖዖዛ ፆልቄቴꬃ ዳሮፔ ዴንዲዳይሳን ታ ፄላናስ ዳንዳያቤኬ፤ ታናራ ዲዛ ኣሳቲ ታ ኩሼ ኦይኪ ጎቺዲ ታና ዳማስቆ ጋꬂዳ። ሃናኒያ ጌቴቲዛ ኢሳዴይ ሄን ዴስ፤ ሃናኒያይ ዳማስቆን ዲዛ ኣይሁዳታ ኣቻን ዳሮ ጋላቴቲዳይሳኔ ዎጋ ቦንቺዛ ኣሳ። ኢዚ ታ ኣች ሺቂ ኤቂዲ ‘ታ ኢሻ ሳዉሌ ኔ ኣይፌይ ቃሴካ ፄሎ’ ጊዴስ፤ ሄራካ ታ ኣይፌይ ኢዛ ፄሊዴስ። ኢዚካ ታና ‘ኑ ኣዋንታ ፆሲ ኔ ኢዛ ሼኔ ኤራና ማላ፥ ኢዛ ፂሎዛ ኔ ቤያና ማላኔ ኢዚ ጊዛይሳ ኔ ሲያና ማላ ኔና ካሴቲ ዶሪዴስ። ኢዚ ሄሳ ኦꬂዳይ ኔ ቤዪዳይሳኔ ሲዪዳይሳ ኣሳ ኡባ ሲንꬃን ኢዛስ ኔ ማርካታናሳ። ሂስቲን ሃዒ ኣዛስ ጋምዓይ? ዴንዳዳ ኢዛ ሱንꬅ ፄይጋዳ ፃማቄታ፤ ኔ ናጋራፔካ ሜጬታ’ ጊዴስ። ሄሳፌ ጉዬ ታ ዬሩሳላሜ ሲማዳ ፆሳ ኬꬃን ዎሲሺን ኣጁታይ ታስ ቤቲዴስ። ጎዳይካ ታስ ቆንጪዲ ‘ኔ ታ ጊሽ ኢማና ማርካቴꬅ ኢስቲ ኤኮንታ ጊሽ ኔ ጋምዖንታ ዳሼ ዬሩሳላሜፔ ኤሌላ ኬዛ!’ ጊዴስ። ታካ ኢዛስ ‘ጎዶ ታ ኣይሁዳታ ዎሳ ኬꬃቲ ዲዛሶ ባዳ ኔና ኣማኒዛይታ ኡባ ቃቻዳ ኢስታ ቡኪዳይሳ ባ ባጋራ ኢስቲካ ኤሬቴስ። ኔ ጊሽ ማርካቲዛ ኢስቲፋኖሴ ኣሳይ ዎꬊዛ ዎዴ ታካ ሄ ዎꬊዛ ኣሳታ ኣቻን ኤቃዳ ኢስቲ ዎꬊዛይሳ ታካ ዶሳዲሴኔ ዎꬊዛይታ ማይዖካ ናጋዲስ’ ጊዴስ። ጎዳይካ ‘ሃሆን ዲዛ ኣይዛቤታኮ ታ ኔና ኪቲዛ ጊሽ ዴንዳዳ ባ!” ጊዴስ። ኣሳይ ሂኖ ጋካናስ ጳዉሎሳ ሃሳያ ዎዝናፔ ሎዔꬂ ሲዪሼ ኣጊዲ ባ ቃላ ꬎቁ ሂስቲዲ “ሃይሳ ማላ ኣሲ ኑ ቢታፌ ꬋዮ፤ ሃይሳ ማላ ኣሲ ኑ ቢታን ሼምፖራ ዳናስ ቤሴና” ጊሼ ዋሲዴስ። ኣሳይ ዋሲሼ ባ ማይዖ ቃሪ ቃሪ ዉፂሼኔ ቢታ ፑዴ ሳሎ ꬋርጪዴስ። ማቶ ሃላቃዚ ሄሳ ቤዪዲ ጳዉሎሳ ዎታዳራቲ ዲዛሶ ጌልꬃና ማላ ኣዛዚዴስ፤ ዴሬይካ ኢዛ ቦላ ኣዛስ ሄሳ ማላ ዋሲዛኮ ኤራና ማላ ኢዛ ጋራፊዲ ፓፂሳና ማላ ኣዛዚዴስ። ጊዶ ኣቲን ዳፎን ዋፂ ቃቺዲ ኢዛ ጋራፋና ጊጌቲሺን ጳዉሎሲ ባ ኣቻን ኤቂዳ ኢሲ ማቶ ሃላቃስ “ኦሮሜ ኣስ ፒርዳይ ባይንዳ ጋራፋናስ ኢንቴስ ፊቃዴይ ዲዜ?” ጊዴስ። ማቶ ሃላቃይ ሄሳ ሲዪዳ ማላ ጌዴ ሃላቃታ ኣዛዚዛይሳኮ ቢዲ “ኣይ ኦꬃና ጋይ? ሃይሲ ኣዴዚ ኦሮሜ ኣሳኮ!” ጊዴስ። ሄሳ ጊሽ ሃላቃታ ኣዛዚዛይሲ ጳዉሎሳኮ ሺቂዲ “ኣኔ ታስ ዮታ፥ ኔ ኦሮሜ ኣሴ?” ጊዴስ፤ ኢዚካ “ኤ ታ ኦሮሜ ኣሳ” ጊዴስ። ኣዛዚዛይሲካ “ታ ኦሮሜ ኣሳ ጊዳናስ ዳሮ ሚሼ ቃንፃዳ ሻማዲስ” ጊን ጳዉሎሲ “ታኒ ጊዲኮ ኦሮሜን ዬሌታዲስ” ጊዴስ። ሄሳ ጊሽ ኢዛ ማራማራናስ ጊጌቲዳ ኣሳቲ ሄራካ ኢዛ ኣቻፌ ሃኪዳ፤ ኣዛዚዛይሲካ ኢዚ ኦሮሜ ኣስ ሳንሳላታን ቃቺዳይሳ ዩሽ ቆፒዲ ባቢዴስ። ዎንቴꬃ ጋላስ ኣዛዚዛይሲ ኣይሁዳቲ ጳዉሎሳ ሞቲዛ ኣይፌ ዮዖይ ኣዛኮኔ ኤራናስ ኮዪዴስ፤ ቄሴታ ሃላቃቲኔ ኣይሁዳታ ሻንጎ ዱላታ ኣሳይ ዉሪ ኢሳዴይካ ኣቶንታ ኩሜꬅ ሺቃና ማላ ኣዛዚዴስ፤ ጳዉሎሳካ ቃሾፔ ቢርሺዲ ሺቂዳ ኣሳ ሲንꬅ ሺሺ ኤሲዴስ። ጳዉሎሲ ዱላታ ኣሳ ቲሺ ሂስቲ ፄሊዲ “ታ ኢሻቶ! ሃች ጋካናስ ታ ፆሳ ሲንꬃን ሎዖ ቆፋራ ዳይሲ” ጊዴስ። ቄሴታ ሃላቃ ሃናኒያይ ቃሴ ጳዉሎሳ ዱናን ሾጫና ማላ ኢዛ ኣቻን ኤቂዳይታ ኣዛዚዴስ። ሄራካ ጳዉሎሲ ሃናኒያ “ሃይሶ ኣኖራ ቲዬቲዳ ኬꬃዞ! ኔናካ ፆሲ ሾጫና፤ ዎጋራ ፒርዳና ኡታዳ ዎጋይ ባይንዳ ታና ሾጫና ማላ ኣዛዛይ?” ጊዴስ። ሄ ዎዴ ሄን ዲዛ ኣሳይ ጳዉሎሳ “ፆሳ ቄሴታ ሃላቃ ጫያይ?” ጊዴስ። ጳዉሎሲካ ኢስታስ “ታ ኢሻቶ! ኢዚ ቄሴታ ሃላቃ ጊዲዳይሳ ታ ኤራቤይኬ። ጋሶይካ ‘ኔ ዴሬ ሃላቃ ቦላ ኢታ ቃላ ጎፓ’ ጊዛይሲ ፃፌቲዴስ” ጊዴስ። ጳዉሎሲ ሄን ዲዛ ኣሳፔ ባጋይ ሳዱቃዌታ፥ ባጋይ ፋርሳዌታ ጊዲዳይሳ ኤሪዲኔ “ታ ኢሻቶ! ታ ፋርሳዌፔ ዬሌታዲሲኔ፤ ታካ ፋርሳዌ፤ ሄኮ ሃዒ ታ ፒርዴታና ሺቂዳይ ሃይቂዳይቲ ዴንዳናይሳ ታ ኡፋይስ ኦꬂዛ ጊሻሳ” ጊዲ ባ ቃላ ꬎቁ ሂስቲዲ ዱላታ ኣሳ ሲንꬃን ዮቲዴስ። ጳዉሎሲ ሄሳ ዮቲዳ ማላ ፋርሳዌታ ጊዶኒኔ ሳዱቃዌታ ጊዶንካ ኦሺ ዴንዲን ዱላታይ ናምዑ ሻኬቲ ዎꬊዴስ። ጋሶይካ ሳዱቃዌቲ “ሃይቂዳይታስ ዴንꬂ ዴና፤ ኪታንቻይካ ባዋ፤ ኣያናይካ ዴና ጊዛይታ፤ ፋርሳዌቲ ቃሴ ሄይቲ ዉሪካ ዴቴስ” ጊ ኣማኒዛይታ። ሄሳ ዎዴ ዳሮ ሺሮይ ኣሳ ጊዶን ሃኒዴስ፤ ፋርሳዌታ ባጋታ ጊዲዳ ኢሲ ኢሲ ሙሴ ዎጋ ታማሪዛይቲ ዴንዲዲ “ኑ ሃይሳ ኣዴዛ ቦላ ኣይኮካ ኢታ ሚሽ ዴሚቤኮ፤ ኣያናይ ዎይኮ ኪታንቻይ ኢዛስ ዮቲዳ ጊዳና፤ ኑ ኣይ ኤሪዞኒ?” ጊዲ ፓላሜቲዳ። ፓላማይ ሚኒ ሚኒ ቢዳ ጊሽ ኣሳይ ጳዉሎሳ ታርሼሬꬆንታ ማላ ባቢዲ ሃላቃታ ኣዛዚዛይሲ “ዱጌ ዎꬊዲ ጳዉሎሳ ኣሳ ጊዶፌ ሃ ኬሲ ኤኪ ዪዲ ጌዴ ዎታዳራቲ ዲዛሶ ኤፊቴ!” ጊዲ ዎታዳራታ ሃላቃታ ኣዛዚዴስ። ዎንቴꬃ ጋላስ ሌላ ጊዶꬅ ጎዳይ ጳዉሎሳ ኣቻን ኤቂዲ “ኣይኮይ ባ ኔ ዬሩሳላሜን ታስ ማርካቲዳይሳꬆ ኦሮሜንካ ኔ ታስ ማርካታናስ ቤሴስ” ጊዴስ። ጋዴይ ዎንቲን ኣይሁዳ ኣሳቲ ሺቄቲዲ “ኑ ጳዉሎሳ ዎꬎንታ ዲሼ ካꬅ ሞኮ፤ ሃꬂካ ኡዮኮ” ጊ ጫቄቲዳ። ሄሳ ሄ ማቆዛን ኢሲፌ ጊዲዳ ኣሳ ቆዳይ ኦይዱ ታማፌ ቦላራ ዴስ። ኢስቲካ ቄሴታ ሃላቃታኮኔ ዴሬ ጪማታኮ ቢዲ ኢስታስ “ኑ ጳዉሎሳ ዎꬎንታ ዲሼ ካꬅ ሞንታ ማላ ሚንꬂ ጫቂዶስ። ሄሳ ጊዲዳ ጊሽ ኢንቴ ዴሬ ጪማታራ ዞሬቲዲ ኢዛ ኬሂ ማራማሪዛ ሚሳቲዲ ኢስቲ ኢንቴስ ጳዉሎሳ ኤሃና ማላ ኣዛዚዛይሳ ኦይቺቴ፤ ኑካ ኢዚ ሃ ሃኖ ጋካናፔ ካሴቲዲ ኢዛ ዎꬋና ጊጌቲዶስ” ጊዳ። ጊዶ ኣቲን ኢሲ ጳዉሎሳስ ሚቺ ናይ ሄሳ ኢስታ ማቆዛ ሲዪዳ ጊሽ ዎታዳራቲ ዲዛሶ ቢ ጌሊዲ ዮዖዛ ጳዉሎሳስ ዮቲዴስ። ጳዉሎሲካ ማቶ ሃላቃታፔ ኢሳ ባኮ ፄይጊዲ “ሃይሲ ናዚ ዎታዳራታ ኣዛዚዛይሳስ ዮቲዛ ዮዖይ ዲዛ ጊሽ ጌዴ ኢዛኮ ኤፋ” ጊዴስ። ማቶ ሃላቃይ ናዛ ዋና ኣዛዚዛይሳኮ ኤኪ ጌሊዲ “ቃሼቲዳ ጳዉሎሲ ታና ባኮ ፄይጊዲ ሃይሲ ናዚ ኔስ ዮቲዛ ዮዖይ ዲዛ ጊሽ ታ ኢዛ ኔኮ ሺሻና ማላ ታና ዎሲዴስ” ጊዴስ። ኣዛዚዛይሲካ ናዛ ኩሼ ኦይኪ ኤኪዲ ሃራሶ ፖቂዲ “ኔ ታስ ዮታናይሲ ኣዜ?” ጊዲ ኢዛ ዱማ ኦይቺዴስ። ናዚካ “ኣይሁዳ ኣሳቲ ጳዉሎሳ ዮዖዛ ሎዔꬂ ማራማሪዛዴ ሚሳቲሲዲ ዎንቶ ኔ ኢዛ ኢስታስ ሺሻና ማላ ኦይቻናስ ቃቺ ዎꬂዳ። ጊዶ ኣቲን ኔ ኢስታስ ኤሮ ጎፓ፤ ጋሶይካ ‘ኑ ኢዛ ዎꬎንታ ዲሼ ካꬅ ሞኮ ሃꬂካ ኡዮኮ’ ጊዲ ጫቄቲዳይቲ ኦይዱ ታማፌ ቦላ ጊዲዛ ኣሲ ኢዛ ዎꬋናስ ኦጌ ቦላ ዙጌስ፤ ሃዒ ኢስቲ ናጊዛይ ኔ ዛሮ ፃላላ” ጊዴስ። ኣዛዚዛይሲካ “ኔ ሃይሳ ታስ ዮቲዳይሳ ሃራ ኦናካ ኤሪሶፋ” ጊዲ ናዛ ሞዪዚዴስ። ሄሳፌ ጉዬ ዎታዳራታ ኣዛዚዛይሲ ማቶ ሃላቃታፔ ናምዓታ ፄይጊዲ “ቃማፌ ሄꬑ ሳቴ ጊዲሺን ቂሳሪያ ጌቴቲዛሶ ባና ማላ ናምዑ ፄቱ ዎታዳራታ፥ ላፑን ታሙ ቶጋንቻታኔ ናምዑ ፄቱ ቶራ ኣሳ ጊጊሲቴ፤ ጳዉሎሳሲካ ፓራ ጊጊሲዲ ዴሬ ሃሪዛ ፊልኪሴኮ ሎዖን ጋካና ማላ ኦꬂቴ” ጊዴስ። ዳብዳቤ ሂዝጊ ፃፊዴስ፤ “ዴሬ ሃሪዛ ቦንቾ ፊልኪሴስ፥ ቃላዎዶሳ ሉሲዮሳፔ፤ ሳሮይ ኔስ ጊዶ። ሃይሳ ኣዴዛ ኣይሁዳ ኣሳቲ ኦይኪ ዎꬋና ጊሺን ኢዚ ኦሮሜ ኣሲ ጊዲዳይሳ ታ ጋካ ኤሪዳ ጊሽ ዎታዳራታራ ጋካዳ ኣሻዲስ። ኢስቲ ኢዛ ኣዛስ ሞቲዛኮኔ ታ ኤራና ኮያዳ ዴሬ ዱላታኮ ሺሻዲስ። ኢስቲ ኢዛ ቦላ ሺሺዳ ሞቶይ ባ ዎጋ ጊሽ ጊዲዳይሳ ኤራዲስ፤ ጊዶ ኣቲን ኢዛ ሃይቆስ ዎይኮ ቃሾስ ጋꬂዛ ሚሺ ዴና። ሃይሳ ኣዴዛ ዎꬋናስ ኣሳይ ማቄቲዳይሳ ታ ሲያዳ ሄራካ ሲዪዳ ማላ ኔኮ ዬዳዲስ፤ ሞቲዛይቲካ ሄን ኔ ሲንꬃን ባ ሞቶ ሺሻና ማላ ኢስታስ ዮታዲስ” ጊዴስ። ሄሳ ጊሽ ዎታዳራቲ ባ ኣዛዜቲዳ ማላ ጳዉሎሳ ቃማራ ኤፊዲ ኣንቲጳፂሮሴ ጌቴቲዛሶ ጋꬂዳ። ዎንቴꬃ ጋላስ ቶጋንቻቲ ጳዉሎሳራ ባና ማላ ኦꬂዲ ኢስቲ ቃስ ጉዬ ሶ ሲሚዳ። ቶጋንቻቲ ጌዴ ቂሳሪያ ጋኪዲ ዳብዳቤዛ ዴሬ ሃሪዛይሳስ ኢሚዲ ጳዉሎሳ ኢዛ ሲንꬅ ሺሺዳ። ዴሬ ሃሪዛይሲ ዳብዳቤዛ ናባቢዲኔ ጳዉሎሳ “ኔ ኣዋ ዴሬፔ ያዲ?” ጊ ኦይቺዴስ። ኢዚ ኪልቂያ ዴሬ ኣስ ጊዲዳይሳ ኤሪዲ፤ “ኔና ሞቲዛይቲ ዪሺን ታ ኔ ዮዖ ሲያና” ጊዴስ፤ ሄርዶሳ ጊቤ ጋꬃን ኢዚ ናጌታና ማላ ኣዛዚዴስ። ኢቻሹ ጋላሳፌ ጉዬ ቄሴታ ሃላቃ ሃናኒያይ ኢሲ ኢሲ ጪማታራኔ ፃርፁሎሳ ጌቴቲዛ ፃባቃራ ቂሳሪያ ቢዴስ፤ ኢስቲካ ዴሬ ኣይሲዛ ፊልኪሴኮ ሺቂዲ ጳዉሎሳ ሞቲዳ። ጳዉሎሲ ፄይጌቲ ሺቂን ፃርፁሎሲ ኢዛ ሂዝጊ ሞቲዴስ “ቦንቾ ፊልኪሴ! ኑ ኔ ባጋራ ዳሮ ሳሮቴꬅ ዴሚዶስ፤ ኔ ሎዖ ኣይሶንካ ኑ ዴሬስ ሎዔቴꬂ ቤቲዴስ። “ሄሳ ኔ ሎዖ ኦሶዛ ኑ ኣዋን ጊዲን ኣይዴካ ꬎቁ ጊዳ ቦንቾራኔ ጋላታራ ኤኮስ። ታ ሃዒ ኔና ጋምዒሶንታኔ ዳቡሪሶንታ ቃንꬃራ ኔስ ዮቲዛይሳ ኪያቴꬃን ኔ ኑ ጊዛይሳ ሲያና ማላ ዎሶስ። “ሃይሲ ኣዴዚ ኑስ ኢታ ሃርጌ ጊዲዴስ፤ ኣላሜን ዲዛ ኣይሁዳታ ኡባ ቦላ ሜቶ ሜꬌስ፥ ናዚራዌ ጌቴቲዛ ዎርዶ ኣሳታ ዋና ካሌꬂዛዴይ ኢዛኮ። ኢዚ ፆሳ ኬꬄ ቱኒሳና ጊሺን ኑ ኢዛ ኦይኪዶስ። [ኑ ዎጋ ማላ ኑ ኢዛ ቦላ ፒርዳና ቆፒዶስ። ጊዶ ኣቲን ዎታዳራታ ሃላቃታ ኣዛዚዛይሲ ሉሲዮሲ ጋኪዲ ኑ ኩሼፔ ኢዛ ዎልቃራ ዎꬂ ኤኪዴስ። ኢዛ ሞቲዛ ኣሳይካ ኔኮ ያና ማላ ኣዛዚዴስ።] ሃይሲ ኑ ኢዛ ቦላ ሺሺዳ ሞቶዚ ዉሪ ቱሙ ጊዲዳይሳ ኔ ኔ ባጋራ ኢዛ ኦይቻ ጋካናስ ዳንዳያሳ” ጊዴስ። ሂንኮ ኣይሁዳ ኣሳቲካ “ኤ ሃይሲ ዮዖዚ ዉሪካ ቱሙኮ” ጊዲ ኣማኔቲዳ። ዴሬ ኣይሲዛ ፊሊኪሴይ ጳዉሎሲ ሃሳያና ማላ ባ ኩሼራ ማላቲ ቤሲዴስ፤ ጳዉሎሲካ “ኔ ዳሮ ዎዴሶፔ ሃይሳ ዴሬዛ ኣይሲዛዴ ጊዲዳይሳ ታ ኤሪዛ ጊሽ ታ ቦላ ሺቂዳ ሞቶዛስ ታ ኔስ ኡፋይሳ ዛሮ ሺሻይስ። ታ ፆሳስ ጎይናናስ ዬሩሳላሜ ቢን ሃቺ ታማኔ ናምዑ ጋላሳፌ ዳሮንታይሳ ኔ ኔ ባጋራ ኤራናስ ዳንዳያሳ። ፆሳ ኬꬃን ጊዲን ኣይሁዳታ ዎሳ ኬꬃን ዎይኮ ካታማ ጊዶን ታ ኦናራካ ፓላሜቲሺን ዎይኮ ዴሬ ጊዶን ሜቶ ሜꬊሺን ታና ዴሚቤቴና። ሃዒ ታ ቦላ ኢስቲ ሺሺዳ ሞቶዛስ ኣይ ማርካካ ሺሻናስ ዳንዳዬቴና። “ጊዶ ኣቲን ታ ኔስ ቆንጪሳና ኮዪዛይ ኢስቲ ዎርዶ ጊዛ ጎዳ ኦጌራ ኑ ኣዋንታ ፆሳስ ጎይናይሲኔ ሙሴ ዎጋኔ ናቤታ ማፃፋን ፃፌቲዳይሳካ ኡባ ኣማናይስ። ኢስቲካ ኡፋይስ ኦꬂዛ ማላ ታካ ናጋራንቻቲኔ ፂሎቲ ሃይቆፔ ዴንዳናይሳ ፆሳን ኣማኔታይስ። ሄሳ ጊሽ ፆሳ ሲንꬃኒኔ ኣሳ ሲንꬃን ሲꬌይ ባይንዳ ሃኖይ ታስ ዳና ማላ ኡባ ዎዴ ሚናይስ። “ታ ዬሩሳላሜፔ ኬዚን ታስ ዳሮ ላይꬅ ጊዲዳፔ ጉዬ ታ ዴሬ ኣሳስ ማዶ ሚሼኔ ፆሳስ ኢሜቲዛ ሚሼ ኤካ ያዲስ። ታና ኢስቲ ፆሳ ኬꬃን ዴሚዳይ ታ ሄሳ ጋꬂሺና፤ ሄ ዎዴ ታ ጌይዛ ዎጋ ፖሊሺን ታናራ ዳሮ ኣሲ ዴና፤ ኦሺኔ ሺሮይካ ዴና። ጊዶ ኣቲን ኢሲያፔ ዪዳ ኢሲ ኢሲ ኣይሁዳ ኣሳቲ ዴቴስ፤ ኢስታሲካ ታና ሞቶስ ጋꬂዛዚ ዲዛ ጊዲኮ ኔ ሲንꬃን ታና ሞቴቶ። ሄሳፌ ጉዬ ታ ዱላታ ሲንꬅ ሺቂኮ ታ ኦꬂዳ ቆሆይ ዲኮ ሄ ኣሳቲ ዮቴቶ። ታና ሃይሳስ ጋꬂዳ ጋሶይ ታ ኢስታ ጊዶን ኤቃዳ ‘ሃይቂዳይታስ ዴንꬂ ዴስ ጋ ዮቲዳ ጊሽ ሃች ፒርዳስ ኢንቴ ሲንꬅ ሺቃዲስ’ ታ ጋዳ ቃላ ꬎቁ ሂስታ ዮታዲስ ኣቲን ሃራ ታ ኦꬂዳ ሚሺ ዴና” ጊዴስ። ፊልኪሴይ ጎዳ ኦጌ ሎዔꬂ ኤሪዛ ጊሽ “ዎታዴሬታ ሃላቃታ ኣዛዚዛይሳ ሉሲዮሲ ዪዛ ዎዴ ታ ኢንቴ ዮዖዛ ጊሽ ቃሾ ጊዲዛ ዮዖ ኢማና” ጊዲ ኢስታ ዬዲዴስ። ጳዉሎሳ ናጊዛ ማቶ ሃላቃይ “ኢዛ ዳሮ ዋይሶንታ ሎዔꬃ ናጋ፤ ኢዛ ላጌቲ ኢዛስ ኮሺዛ ሚሺ ኤኪ ዪኮ ዲጎፋ” ጊዴስ። ጉꬃ ዎዴፔ ካሊዲ ፊልኪሴይ ኣይሁዳ ኣስ ጊዲዳ ባ ማቼዮ ዱሪሲላራ ዪዴስ፤ ጳዉሎሳካ ፄይጊዲ ዬሱስ ኪርስቶሳን ኣማኖ ጊሽ ኢዚ ዮቲሺን ሲይዴስ። ጳዉሎሲ ፂሎቴꬃ ጊሽ፥ ኣሲ ባርካ ባና ሃሮ ጊሺኔ ቡሮፔ ያና ፒርዳ ጊሽ ዮቲን ፊልኪሴይ ባቢዲ “ሃዒ ኔ ባ፤ ሃራ ዎዴ ታስ ጊጊሺን ታ ኔና ፄይጋ ኤካና” ጊዴስ። ፊልኪሴይ ጳዉሎሳፔ ጉቦ ኤካናስ ኡፋይሲ ኦꬂ ናጊዳ ጊሽ ዳሮ ዎዴ ጋካናስ ፄይጊ ፄይጊ ሃሳይሲዴስ። ናምዑ ላይꬃፌ ጉዬ ጶርቂዮሳ ፊስፆሲ ፊልኪሴ ኦላን ሹሜቲዴስ፤ ፊልኪሴይ ኣይሁዳታ ኡፋይሳናስ ኮይዲ ጳዉሎሳ ቃሾሶን ኣጋጊዴስ። ፊስፆሲ ባ ኣይሲዛ ዴሬ ቂሳሪያ ጌሊዲ ሄꬑ ጋላስ ኣቄቲዲ ሄፔ ዬሩሳላሜ ቢዴስ። ሄን ዲዛ ቄሴታ ሃላቃቲኔ ኢሲ ኢሲ ኣይሁዳታ ጊዶፌ ጊታ ጊታ ኣሳቲ ጳዉሎሳ ቦላ ባ ሞቶ ሺሺዳ፤ “ጳዉሎሳ ሃ ዬሩሳላሜ ኤሂዲ ኑስ ሎዖ ኦሶ ኦꬃርኪ!” ጊዲ ዎሲዳ፤ ኢስቲ ሄሳ ጊዳይ ጳዉሎሳ ናጊዲ ኦጌ ቦላ ዎꬋናስ ኮይዳ ጊሻሳ። *** ጊዶ ኣቲን ፊስፆሲ “ጳዉሎሲ ቂሳሪያን ቃሾ ኬꬃን ናጌቴስ፤ ታካ ሃዒ ኤሌ ሲማዳ ሄ ኢዛኮ ባና። ኢንቴ ጊዶፌ ዳናቴꬂ ዲዛይቲ ታናራ ቂሳሪያ ቤቶ፤ ጳዉሎሲ ኦꬂዳ ቆሆይ ዲዛ ጊዲኮ ሄን ሞቴቶ” ጊዴስ። ፊስፆሲ ኦሱፑን ዎይኮ ታሙ ጋላሳፌ ዳሮንታ ዎዴ ኢስታራ ጋምዒዳፔ ጉዬ ቂሳሪያ ቢዴስ፤ ሄ ጋኪዳ ማላ ዎንቴꬃ ጋላስ ፒርዳ ዎምቦራ ቦላ ኡቲዲ ጳዉሎሳ ኢዛኮ ሺሻና ማላ ኣዛዚዴስ። ጳዉሎሲ ኢዛ ሲንꬅ ሺቂን ዬሩሳላሜፔ ዪዳ ኣይሁዳቲ ጳዉሎሳ ጊዶꬂዲ ማርካይ ባይንዳ ዳሮ ዴፆ ሞቶ ኢዛ ቦላ ሺሺዳ። ጳዉሎሲካ “ታኒ ኣይሁዳ ዎጋ ቦላ ጊዲን ፆሳ ኬꬃ ቦላ ዎይኮ ኦሮሜ ካዎ ቄሳሬ ቦላካ ጋꬂዳ ቆሆይ ዴና” ጊዲ ኢስታ ሞቶዛ ሻሪዛ ዛሮ ኢስታስ ኢሚዴስ። ጊዶ ኣቲን ፊስፆሲ ኣይሁዳታ ኡፋይሳናስ ኮይዲ ጳዉሎሳ “ኔ ዬሩሳላሜ ባዳ ሃይሳ ዮዖዛ ሄን ታ ሲንꬃን ፒርዴታና ኮያይ?” ጊዴስ። ጳዉሎሲ ቃሴ ሂዝጊዲ ኢዛስ ዛሪዴስ “ሄኮ ታ ፒርዴታናስ ታስ ቤሲዛ ቄሳሬ ፒርዳ ዎምቦራ ሲንꬃን ኤቃዲስ፤ ኔካ ሎዔꬃ ኤሪዛ ማላ ታ ኣይሁዳታ ቦላ ኦꬂዳ ኣይኮ ቆሆይካ ዴና። ታ ቆሂዳ ጊዲኮ ዎይኮ ታና ሃይቆስ ጋꬂዛ ቆሆ ታ ኦꬂዳ ጊዲኮ ታ ሃይቆፔ ኣታና ጊኬ፤ ጊዶ ኣቲን ኢስቲ ሺሺዛ ሞቶይ ሜላ ሃዳ ጊዲኮ ኦኒካ ታና ኢስታስ ኣꬂ ኢማናስ ዳንዳዬና፤ ታካ ታ ዮዖይ ቄሳሬ ሲንꬅ ሺቃና ማላ ‘ዪጊባይኔ’ ጋዲስ።” ሄሳ ዎዴ ፊስፆሲ ባና ዞሪዛይታራ ሃሳዬቲዲ “ኔ ቄሳሬኮ ‘ዪጊባይኔ’ ጊዛ ጊዲኮ ቄሳሬኮ ባንዳሳ” ጊዴስ። ጉꬃ ጋላሳታፔ ጉዬ ካዎ ኣጊርጳይኔ ባርኒቄይ ፊስፆሳ “ሃሹ ሎዖን ያዳሳ” ጊ ሞካናስ ጌዴ ቂሳሪያ ቢዳ። ኢስቲ ሄን ዳሮ ጋላስ ኡቲዳ ጊሽ ፊስፆሲ ጳዉሎሳ ዮዖዛ ካዎ ኣጊርጳስ ሂዝጊ ዮቲዴስ “ፊልኪሴይ ቃሾ ኬꬃን ዬጊ ኣጊዳ ኢሳዴይ ሃን ዴስ። ታ ዬሩሳላሜን ዲዛ ዎዴ ቄሴታ ሃላቃቲኔ ኣይሁዳታ ጪማቲ ሃ ኣዴዛ ዮዖ ታኮ ኤሂዲ ታ ኢዛ ቦላ ፒርዳና ማላ ኦይቺዳ። ታ ቃሴ ‘ሞቴቲዳዴይ ሞቲዛይታ ሲንꬃን ኤቂዲ ባና ሞቲዛ ዮዖዛስ ቤሲዛ ዛሮ ኢሞንታ ዲሺን ሞቴቲዳዴ ኣꬂ ኢሞይ ኦሮሜ ካዎቴꬃስ ዎጋ ጊዴና’ ጋዳ ዛራዲስ። “ሄሳ ጊሽ ኢዛ ሞቲዛይቲ ሺቄቲዲ ዪዳ ማላ ሄራካ ዎንቴꬃ ጋላስ ፒርዳ ዎምቦራን ኡታዳ ጳዉሎሳ ታ ሲንꬅ ሺሻና ማላ ኣዛዛዲስ። ኢዛ ሞቲዛይቲ ኢዛ ኣቻን ኤቂዳ ዎዴ ኢስቲ ኢዛ ቦላ ሺሺዳ ሞቶይ ታ ባጋራ ኢዚ ኢታ ኦሶንታ ኣጌና ጋዳ ቆፒዳ ማላ ጊዲቤና። ጊዶ ኣቲን ኢስቲ ኢዛራ ሞቴቲዛይ ባ ኣማኖ ጊሺኔ ጳዉሎሲ ኢሲ ሃይቂዳይሳ ‘ፓፃ ዴስ’ ጊዛ ዬሱሳ ጊሽ ጊዲዴስ። ታካ ሄሳ ማላ ዮዖ ቆራ ፄላናስ ታና ሜቲዳ ጊሽ ጳዉሎሳ ‘ኔ ዬሩሳላሜ ባዳ ሄሳ ዮዖዛ ሄን ፒርዴታና ኮያይ?’ ጋዲስ። ሂዝጊን ኢዚ ቃሴ ዮዖዚ ኦሮሜ ካዎ ሲንꬃን ቤዬታና ማላ ኮይዲ ‘ታ ዮዖይ ቄሳሬ ሲንꬅ ሺቃና ማላ ኦይቻይስ’ ጊዳ ጊሽ ኢዛ ዮዖ ቄሳሬኮ ታ ዬዳና ጋካናስ ኢዚ ቃሾ ኬꬃን ጋምዓና ማላ ኣዛዛዲስ” ጊዴስ። ኣጊርጳይ ፊስፆሳ “ታካ ኢዚ ጊዛ ሲያና ኮያይስ” ጊዴስ። ፊስፆሲካ “ዎንቶ ሲያንዳሳ” ጊዴስ። ሄሳ ጊሽ ዎንቴꬃ ጋላስ ኣጊርጳይኔ ባርኒቄይ ካዎቲ ማይዒዛ ማዮ ማይዒዲኔ ዳሮ ቦንቾራ ዎታዳራታ ሃላቃታራኔ ሄ ካታማን ዲዛ ጊታ ኣሳታን ኣዣቤቲ ዪዲ ፒርዳ ኬꬄ ጌሊዳ። ሄሳፌ ጉዬ ፊስፆሲ ጳዉሎሳ ፄይጊሲዴስ። ፊስፆሲ ሂዝጊዴስ “ካዎ ኣጊርጳ፥ ቃስ ኑናራ ዲዛ ኣሳቶ! ኣይሁዳ ኣሳቲ ዉሪ ‘ሃይሲ ኣዴዚ ሃይሳፌ ጉዬ ፓፃ ዳና ቤሴና’ ጊዲ ዋሲሼ ዬሩሳላሜንካ ሃንካ ኢዛ ቦላ ፒርዴታና ማላ ኢስቲ ታና ኦይቺዛይ ሃይሳ ኢንቴ ቤዪዛ ኣዴዛ ጊሻሳ። ታ ታ ባጋራ ኢዛ ሃይቆስ ጋꬂዛ ኢሲ ባላካ ኢዛ ቦላ ዴማቤኬ። ኢዚ ‘ታ ዮዖይ ኦሮሜ ካዎ ሲንꬅ ሺቂ ቤዬቶ’ ጊዳ ጊሽ ታ ኢዛ ሄ ዬዳናስ ቃቻዲስ። “ጊዶ ኣቲን ኢዛ ጊሽ ታኒ ታ ጎዳስ ፃፋና ጊዛ ኤሬቲዳ ዮዖይ ዴና፤ ሄሳ ጊሽ ኢዛ ኢሲ ኢሲ ፓጬ ኦይሾታ ኦይቺኮ ታስ ፃፋናይሲ ዳናኮኔ ጋዳ ኢንቴኮ፥ ሃራፔካ ካዎ ኣጊርጳ ኔኮ ሺሻዲስ። ጋሶይካ ቃሾ ኣሲ ፑዴ ቦላቲዛ ꬎቃ ዳናኮ ቢሺን ኢዚ ሞቴቲዛ ዮዖ ቆንጪሶንታ ኣጎይ ኣሳ ኤያ ኬሲዛይሲ ታስ ቤቲዴስ” ጊዴስ። ኣጊርጲ ጳዉሎሳ “ኔኒ ኔ ጊሽ ሃሳያናስ ዳንዳያሳ” ጊዴስ። ጳዉሎሲካ ባ ኩሼ ዴንꬂዲ ዛሮ ሂዝጊ ኢሚዴስ። “ካዎ ኣጊርጳ! ታና ኣይሁዳቲ ሞቲዛ ዮዖ ኡባስ ሃች ታ ኔ ሲንꬃን ታና ማዳና ዛሮ ኢሚዛ ጊሽ ታና ዳሮ ኡፋይሴስ። ጋሶይካ ኔ ኣይሁዳታ ዎጋኔ ኢስታ ፓላማ ኡባ ሎዔꬃ ኤራሳ፤ ሄሳ ጊሽ ኔ ታ ጊዛ ኡባ ዳንዳያዳ ሲያና ማላ ታ ኔና ዎሳይስ። “ታኒ ጉꬃ ናቴꬃ ዎዴፔ ዶማዳ ዋና ዴዒዳኮ ኣይሁዳ ኣሳቲ ኤሬቴስ። ኮይሮፔ ሃዒ ጋካናስ ታኒ ታ ዴሬ ኣሳ ጊዶኒኔ ዬሩሳላሜን ታ ዴዒዳ ዱሲ ኣሳይ ኤሬስ። ቃሴካ ኢስቲ ማርካታና ኮይኮ ኑ ኣማኖ ጊሽ ታ ኬሃ ሚንꬃ ዎጋ ናጊዛ ፋርሳዌ ባጋ ጊዳዳ ጋምዒዳዴ ጊዲዳይሳ ኢስቲ ኮይሮፔ ዴንꬂዲ ኤሬቴስ። ሃዒ ቃሴ ፒርዳስ ታና ሃይሳን ኤሲዳይ ፆሲ ካሴ ኑ ኣዋታስ ኢሚዳ ጫቆ ቃላ ኡፋይሳ ጊሻሳ። ሃ ኡፋይሳኮ ጋካናስ ኑ ዛርኬቲ ታማኔ ናምዓቲ ፆሳ ጋላሲኔ ቃማ ጎይኒሼ ናጊዳ። ካዎ ኢንቴስ ሆላ! ኣይሁዳቲ ታና ሞቲዛይ ሃ ዮዖዛ ጊሻሳ። ፆሲ ሃይቂዳይታ ዴንꬃናይሲ ዋኒዲ ኣይሁዳ ጊዲዳ ኢንቴ ኣቻን ኣማኔቲቤኔ? “ታካ ታ ባጋራ ናዚሬቴ ዬሱሳ ሱንꬃስ ኤቄታናስ ቤሴስ ጋዳ ቆፓዲስ ሺን፤ ታኒ ዬሩሳላሜን ኦꬂዳይካ ሄሳኮሺን፤ ቄሴታ ሃላቃታፔ ታ ኤኪዳ ጎዳቴꬃራ ኣማኒዛይታፔ ዳሮታ ቃሾ ኬꬃን ዬጊሳዲስ፤ ኢስታ ዎꬊሺን ዎꬊዛይታራ ኢሲፌ ዳይስ። ዳሮ ዎዴ ኣይሁዳታ ዎሳ ኬꬃቲ ዲዛሶን ኣዋንካ ኢስቲ ቃፃዬታና ማላኔ ባ ኣማኖ ካዳና ማላ ኦꬃዲስ፤ ኢስታ ቦላ ዳሮ ሃንቄታዳካ ኢስራዔሌፔ ካሬን ዲዛ ሃራ ካታማታካ ባዳ ኣማኒዛይታ ጎዳዲስ። “ሃይሳ ሃ ዮዖዛስ ቄሴታ ሃላቃታፔ ኩሜꬃ ጎዳቴꬂኔ ኣዛዞ ኤካዳ ዳማስቆ ጌቴቲዛሶ ታ ቢሺን፤ ካዎ ኢንቴስ ሆላ! ቡሮ ታ ኦጌን ዲሺን ጋዴይ ሴታ ጋላስ ጊዲሺን ኣዋ ኣርሼ ፖዖፔ ኣꬊዛ ፖዖ ቤያዲስ፤ ሄ ፖዖይ ታናኔ ታናራ ቢዛ ኣሳታ ዩይ ኣꬊዲ ሳሎፔ ፖዒዴስ። ኑ ዉሪካ ቢታ ቦላ ኩንዲ ዲሺን ኣይሁዳታ ቃላራ ‘ሳዉሌ! ሳዉሌ! ታና ኣዛስ ጎዳይ? ኔኒ ቃራ ማሻ ቦላ ኤቂኮ ኔርካ ኔና ቆሃሳ’ ጊዛ ቃላ ሲያዲስ። “ታካ ‘ጎዶ! ኔ ኦኔ?’ ጋዲስ፤ ጎዳይካ ‘ታኒ ኔ፥ ጎዲዛ ዬሱሳኮ! ሃዒ ዴንዳዳ ኔ ቶሆን ኤቃ፤ ታ ኔስ ቆንጪዳይ ኔ ታና ሃዒ ቤዪዳይሳኒኔ ሲንꬃፌ ታ ኔና ቤሳናይሳን ኔ ታስ ማርካቲዛዴ ጊዳና ማላ ታ ኔና ሹማና ኮያዲስ። ኢስራዔሌ ኣሳ ኩሼፔኔ ታ ኔና ኢስታኮ ኪቲዛ ኣይዛቤታ ኩሼፔካ ኣሻና። ኔ ኢስታ ኣይፌ ዶያና ማላኔ ꬉማፔ ፖዖን ኬሳና ማላ ቃሴካ ፃላዔስ ሃሬቲዛሶፔ ፆሳኮ ኔ ዛራና ማላ ኦꬃና፤ ኢስቲካ ታና ኣማኒዳ ጊሽ ባ ናጋራፔ ማሬታና ቃሴ ዶሬቲዳይታ ጊዶን ኢስቲ ላታ ጋዴ ዴማና’ ጊዴስ። “ሄሳ ጊሽ ካዎ ኣጊርጳ! ሳሎፔ ታስ ኢሜቲዳ ኣጁታስ ታ ኣዛዜታዲስ። ጊዶ ኣቲን ታ ካሴታዳ ዳማስቆን ዲዛ ኣሳ ካሌꬃዳ ዬሩሳላሜኒኔ ዩሁዳ ዴሬን ኡባን ዲዛይታ ቃሴካ ኣይዛቤቲካ ናጋራ ኦጌፔ ፆሳኮ ሲሚዲ ማሬታና ማላ ኤሪሳዲስ፤ ኢስቲ ናጋራፔ ሲሚዳይሳ ቤሲዛዚ ኦꬃና ማላ ታ ኢስታስ ዮታዲስ። ሄሳ ጋሶን ኣይሁዳቲ ታ ፆሳ ኬꬃን ዲሺን ታና ኦይኪዲ ዎꬋና ኮይዳ። ሃቺ ጋካናስካ ታስ ፆሳፌ ማዶይ ፓጪ ኤሬና። ሄሳ ጊሽ ጉꬃስካ ጊታስካ ማርካታሼ ሃይሳን ኤቃዲስ። ናቤቲኔ ሙሴይ ካሴቲዲ ሃይሳ ማላይ ሃናና ጊዳይሳ ዮቶፔ ኣቲን ታ ሃራ ኣይኮካ ዮታቤይኬ። ኢስቲካ ዮቲዳይሲ ‘ፆሲ ኪቲዳዴይ ሜቶ ቤያና። ሃይቆፔ ዴንዶን ኮይሮ ጊዲዲ ኣሲ ኣታና ፖዖ ኢስራዔሌ ዴሬሲኔ ኣይዛቤታስ ቆንጫና’ ጊዛይሳ” ጊዴስ። ጳዉሎሲ ሄሳ ዮቲሺን ፊስፆሲ “ጳዉሎሳ! ሃዒ ኔ ጎዮንታ ኣጋካ፤ ኔ ዳሮ ታማሪዳይሲ ኔና ጎሺዴስ” ጊ ዋሲዴስ። ጳዉሎሲ ጊዲኮ ኢዛስ “ቦንቾ ፊስፆሳ! ታ ኔስ ቱማ ኤራዳ ዮታይስ ኣቲን ጎያቤይኬ። ታ ኢዛ ሲንꬃን ቆንጬራ ዮቲዳ ካዎይ ሃይሳ ዮዖዛ ኤሬስ፤ ሃይሲካ ቆታራ ኦꬄቶንታይሳ ጊዲዳ ጊሽ ካዎይ ኤራናይሳ ታ ኣማኔታይስ። ካዎ ኣጊርጳ! ናቤታ ኣማናሳ ጊዲኪ? ኔ ኣማኒዛይሳ ታ ኤራይስ” ጊ ዛሪዴስ። ኣጊርጳይካ ጳዉሎሳ “ሄኮ ኔ ታና ሃኖ ጉꬃ ዎዴ ጊዶን ኣማንꬃና ኮያሳ” ጊዴስ። ጳዉሎሲካ ኢዛስ ዛሪዲ “ጉꬃ ዎዴን ጊዲንካ ዎይኮ ዳሮ ዎዴን ኔ ፃላ ጊዶንታ ዲሺን ሃች ታ ዮቲዳይሳ ሲዪዳይ ዉሪ ሃኖ ታ ቃሼቴꬃያ ኣታ ዉሪካ ታ ማላ ጊዳና ማላ ታ ፆሳ ዎሳይስ” ጊዴስ። ሄሳፌ ጉዬ ካዎይ፥ ዴሬ ኣይሲዛይሲ፥ ባርኒቄይኔ ኢስታራ ኡቲዳ ኣሳይካ ዉሪ ዴንዲዴስ። ኢስቲ ሄፔ ኬዚ ቢሼ ባ ጊዶን “ሃይሲ ኣዴዚ ሃይቆስ ዎይኮ ቃሾስ ጋꬂዛ ሚሼ ኣይኮካ ኦꬂቤና” ጊዳ። ኣጊርጳይካ ፊስፆሳ “ሃይሲ ኣዴዚ ዮዖዛ ቄሳሬስ ሺቆ ጎንታኮ ኣይኮ ዎሶይ ባይንዳ ሜላ ዬዴታናኮ ሺን” ጊዴስ። ኑኒ ፃላኔ ዴሬ ማርካቤን ባና ማላ ጌቴቲ ቃሼቲዳ ጊሽ ጳዉሎሳኔ ሃራ ቃሾ ኣሳታካ ካዎ ኣዉጊስፆሳ ዎታዳራታፔ ጊዲዳ ዩሊዮሳ ጌቴቲዛ ማቶ ሃላቃስ ኣꬂ ኢሚዳ። ኢሲያ ኣባ ኣቻን ዲዛ ዴሬታ ቢዛ ማርካቤን ጌሊዲ ቢዶስ። ታሶሎንቄን ዲዛ ኢሲ ማቂዶኒያ ኣስ ኣሪስፂሮኮሳ ጌቴቲዛይሲ ኑናራ ዴስ። ዎንቴꬃ ጋላስ ሲዶና ጊዛሶ ጋኪዶስ፤ ዩሊዮሲ ጳዉሎሳስ ሎዖ ጊዲዳ ጊሽ ጳዉሎሲ ባ ላጌታኮ ቢዲ ኣሳይ ኢዛስ ኮሺዛ ማዶ ኦꬃና ማላ ፒቃዴ ኢሚዴስ። ሄፔ ዴንዲ ኑ ቢሺን ሲንꬃ ባጋራ ጫርኮይ ኑ ቦላ ጫርኪዛ ጊሽ ኣባ ጊዶን ዲዛ ቆጲሮሴ ዴሬን ጌሜቲዲ ጌዴ ሲንꬄ ቢዶስ። ኪልቂያ ጊዛሶኔ ጲንፊሊያ ጌቴቲዛ ዴሬ ኣቻን ዲዛ ኣባ ፒኒዲ ሎቂያ ዴሬን ዲዛ ሙራ ጌቴቲዛ ካታማ ጋኪዶስ። ሄን ማቶ ሃላቃይ ኢፃሊያ ዴሬ ቢዛ ኢስኪንዲሪያ ዴሬ ማርካቤ ዴሚዲ ኑና ኢዛን ጌልꬂዴስ። ዳሮ ጋላስ ሎዱ ጊ ጊ ቢዲ ዳሮ ዋዬቲዲ ቃንዶሴ ጌቴቲዛ ካታማ ኣቺ ጋኪዶስ፤ ጫርኮይካ ኑ ሲንꬅ ቦንታ ማላ ዲጊን ሳልሞና ኣቻራ ኣꬊዲ ቃርፄሴ ጌቴቲዛ ኣባ ጊዶን ዲዛ ዴሬን ጌሜቲዲ ቢዶስ። ዳሮ ዋዬቲዲ ላንቄ ላንቄ ኦይኪ ኑ ኣꬊዳፔ ጉዬ ላሲያ ጌቴቲዛ ካታማ ኣቻን ዲዛ “ሎዖ” ጌቴቲዛ ማርካቤይ ኤቂዛሶ ጋኪዶስ። ኑ ቢዛ ኦጌ ቦላ ዳሮ ዳቡራን ፆማ ዎዴይ ኣꬊዳ ጊሽ ሃዒ ኣባ ቦላ ባናስ ዳሮ ሜቶ ጊዲዳ ጊሽ ጳዉሎሲ ባናራ ዲዛ ኣሳይ ናጌታና ማላ ሂዝጊዴስ፤ “ኣሶ! ሃይሳፌ ኑ ካሊዲ ባና ቡሳይ ዳሮ ሜቶራ ዲዛይሲ ታስ ቤቴስ፤ ማርካቤዛን ዲዛ ጫናዛ ቦላኔ ማርካቤዛ ቦላ ፃላላ ጊዶንታ ኣሳ ሼምፖ ቦላካ ጊታ ቆሆይ ጋካና።” ማቶ ሃላቃይ ቃስ ጳዉሎሳ ዞሬፔ ቦላራ ማርካቤዛ ላጊዛ ዋናዚኔ ማራካቤዛ ጎዳይ ጊዛይሳ ሲይዴስ። ሄ ማርካቤይ ኤቂዛሶይ ባልጎይ ኣꬋና ጋካናስ ማርካቤስ ሎዖ ሼምፖሶ ጊዶንታ ጊሽ ዳሪዛ ባጋ ኣሳይ “ሃሙꬃ ሲንꬅ ጉጃናስ ዳንዳዬቲኮ ኣዋ ኣርሼይ ዉሊዛሶፔ ዱጌሃ ባጋራኔ ፑዴሃ ባጋራ ዲዛ ፊንቄ ጌቴቲዛሶ ቃርፄሴ ማርካቤ ሼምፖሶ ኑ ጋኪዲ ባልጎ ሄን ኣꬆስ” ጊዲ ባ ቆፋ ሺሺዳ። ዱጌሃ ባጋራ ጉꬃ ጫርኮይ ጫርኪሺን ቤዪዲ ኢስቲ ቆፒዳ ማላ ሃናና ሚሳቲን ባና ኬዚዳ፤ ማርካቤይ ኤቂዛሶፔ ባና ዴንዲዲ ቃርፄሴ ኣቻራ ላንቄ ላንቄ ኦይኪዲ ኣꬊ ቢዳ። ጊዶ ኣቲን ጉꬃ ዎዴፔ ጉዬ “ኣዋ ኣርሼይ ሞኪዛሶፔ ፑዴሃፔ ዪዛ ጎቴ ጫርኮ” ጌቴቲዛ ኢታ ዎልቃማ ጫርኮይ ኣባ ጊዶን ዲዛ ዴሬዪፔ ዴንዲዲ ኢስታኮ ኣባ ጊዶ ዪዴስ። ማርካቤዛ ጫርኮይ ሱጊን ጫርካራ ኤቄታናስ ዳንዳዮንታ ኢፂን ኑ ጮዑ ጊዲ ጫርኮይ ኤፊዛሶ ቢዶስ። ቄዳ ጌቴቲዛ ኣባ ጊዶንኮ ዲዛ ዴሬ ዲዛሪን ጌሜቲዲ ኑ ቢሺን ዳሮ ዋዬቲዲ ማርካቤዛ ቄሪ ዎጎሎዪን ኦይኪዲ ኤሳናስ ዳንዳዪዶስ። ማርካቤዛ ላጊዛይቲ ቄሪ ዎጎሎዮ ማርካቤዛኮ ጎቺ ኬሲዲ ማርካቤዛ ዎዶሮራ ፃፂዳ። ማርካቤዚካ ሲርቲሴ ጌቴቲዛ ኣባ ኣጬይ ዳሪ ዲዛሶን ኩንዶንታ ማላ ባቢዲ ኢዛ ቦላ ዲዛ ሻራ ዎꬂዲ ጫርኮን ላጌቲ ቢዳ። ጎቴ ጫርኮይ ሚኒ ቢዳ ጊሽ ዎንቴꬃ ጋላስ ማርካቤዛን ጫኔቲዳ ሚሻታ ኢሳ ኢሳ ኣባ ጊዶ ዬጌꬅ ኦይኪዳ። ሄꬓንꬆ ጋላስ ማርካቤዛስ ኮሺዛ ሚሻታካ ባ ኩሼራ ኬሲ ኬሲ ዬጊዳ። ዳሮ ዎዴ ጋካናስ ኣዋ ኣርሼካ ፆሊንቴካ ቤዮንታ ኣጊዳ ጊሺኔ ጫርኮይካ ካሴፔ ሚኒ ሚኒ ቢዛ ጊሽ ሃይሳፌ ጉዬ ኑ ኣታና ዳንዳዮኮ ጊዛ ቆፋን ኡፋይስ ቃንፂዶስ። ኣሳይ ካꬅ ሞንታ ዳሮ ጋላስ ኡቲዴስ። ሄሳ ጊሽ ጳዉሎሲ ኣሳ ጊዶን ኤቂዲ “ሃ ኣሳቶ! ኢንቴ ታ ጊዛይሳ ሲይዲ ቃርፄሴፔ ዴንዶንታኮ ሃ ቆሆይኔ ሃ ꬋዮይ ኢንቴ ቦላ ጋኬናኮሺን። ሃዒካ ማርካቤዚ ፃላ ቆሄታና ኣቲን ኢንቴፌ ኢሳዴ ሼምፖይካ ꬋዬና። ሄሳ ጊሽ ኣይኮይ ባዋ፤ ባቦፍቴ ጋዳ ኢንቴና ዞራይስ። ቃማ ኦማርስ ታ ኢዛስ ጊዲዳ ታ ጎይኒዛ ፆሳይ ኪቲዳ ኪታንቻይ ታ ኣቻን ኤቂዲ ‘ጳዉሎሳ! ባቦፋ! ኔ ቄሳሬ ሲንꬃን ኤቃና ቤሴስ፤ ሄኮ ኔናራ ኢሲፌ ቢዛይታ ዉርሲ ፆሲ ኔ ጊሽ ሃይቆፔ ኣሻና’ ጊዲ ታስ ዮቲዴስ። ሄሳ ጊሽ ኢንቴኖ ሃ ኣሳቶ ኣይኮይ ባዋ፤ ፆሲ ታስ ሃይሳ ዮቲዳይሳ ፖላናይሳ ታ ኣማናይስ። ጊዲኮካ ሃይሲ ጎቴ ጫርኮዚ ጌዴ ኢሲ ኣባ ጊዶን ዲዛ ዴሬ ኣቺ ኤፊዲ ኑና ዬጋና” ጊዴስ። ታማኔ ኦይዳንꬆ ቃማ ኣንዲሪያ ኣባ ጊዶን ጫርኮይ ኑና ዋይሲሺን ቢሼ ሌላ ጊዶꬅ ማርካቤዛ ላጊዛይታስ ኣባፌ ቢታ ቦላ ጋኪዳ ሚሳቲዴስ። ሄሳ ጊሽ ኣባ ጪማቴꬂ ኤራናስ ኣባን ዬጊ ፄሊዛ ዎዶሮ ኢስቲ ዬጊ ፄሊሺን፤ ኣባ ጪማቴꬂ ኦይዱ ታሙ ሜትሬ ኬና ጊዲ ቤቲዴስ፤ ጋምዒሼ ሃዒካ ዬጊን ሄꬑ ታሙ ሜትሬ ኬና ጪማ ጊዲዳይሳ ዴሚዳ። ኑ ዲዛ ማርካቤይ ኣባ ጋፃን ዲዛ ዛላ ሹቻራ ኢጬቶንታ ማላ ባቢዲ ማርካቤዛፔ ጉዬ ባጋራ ማርካቤይ ቃፆንታ ማላ ናጊዛ ꬊሺኬ ዱጌ ኣባ ጊዶ ዬጊዳ። ሄሳፌ ጉዬ ኢስታስ ቃማይ ዎንታና ማላ ዎሳ ኦይኪዳ። ማርካቤዛ ላጊዛይቲ ማርካቤዛፔ ኬዚዲ ባቃታና ኮይዳ ጊሽ ማርካቤዛፔ ሲንꬃ ባጋራ ማርካቤ ናጊዛ ꬊሺኬ ዬጊዛ ሚሳቲዲ ማርካቤዛ ቦላ ዲዛ ቄሪ ዎጎሎዮ ዱጌ ኣባ ጊዶ ዬጊዳ። ሄሳ ዎዴ ጳዉሎሲ ማቶ ሃላቃኔ ዎታዳራታ “ሃይቲ ማርካቤዛን ዲዛ ኣሳቲ ማርካቤዛ ቦላ ሼምፒዲ ኡቶንታ ኣጊኮ ኢንቴካ ኣታና ዳንዳዬኬታ” ጊዴስ። ሄሳ ጊሽ ዎታዳራቲ ዎጎሎዮ ኦይኪዳ ዎዶሮዛ ቃንፂ ዬጊን ኢዛ ኣባ ቦላ ቶኬታና ማላ ዬዲ ኣጊዳ። ጋዴይ ዎንታና ጊሺን ዉሪካ ካꬅ ማና ማላ ጳዉሎሲ ኢስታ ሂዝጊ ዎሲዴስ “ኢንቴ ኣዚ ሃናኔሻ ጊዲ ሂርጋን ካꬅ ሞንታ ኣጊን ሃቺ ታማኔ ኦይዳንꬆ ጋላሳ። ሄሳ ጊሽ ኢንቴ ካꬅ ማና ማላ ታ ኢንቴና ዎሳይስ። ኢንቴ ሚኮ ሚናና፤ ሙሌካ ኣይኮ ቆሆይካ ኢንቴ ቦላ ጋኬና” ጊዴስ። ኢዚ ሄሳ ጊዳፔ ጉዬ ካꬅ ኤኪዲ ፆሴ ጋላቲዲ ኣሳ ኡባ ሲንꬃን ካꬂ ሙስ ኦይኪዴስ። ሄሳ ዎዴ ዉሪካ ሚኔቲዲ ካꬅ ሚዳ። ማርካቤዛ ጊዶን ዲዛ ኣሳይ ዉሪ ናምዑ ፄታኔ ላፑን ታማኔ ኡሱፑና። ዉሪካ ሚ ካሊዳፔ ጉዬ ማርካባን ጫኔቲዳ ጊስቴዛ ዱጌ ኣባ ጊዶ ዬጊዲ ማርካቤዛ ዴፆ ካዉሺዳ። ጋዴይ ዎንቲን ባ ዲዛሶ ኤሪቤቴና። ጊዶ ኣቲን ኣጬይ ዲዛሶ ኣባ ኩርቁንꬁ ዴሚዳ። ኢስታስ ዳንዳዬቲዛኮ ማርካቤዛ ሄ ሱጊ ሺሻና ቆፒዳ። ማርካቤዛ ኦይኪዛ ꬊሺኬ ቃንፂዲ ኣባ ጊዶ ዬጊዳ። ሄ ዎዴ ማርካቤ ላጊዛ ሚሻ ኦይኪዳ ዎዶሮታ ቢርሺዳ። ሃ ባጋራ ዲዛ ሻራ ጫርኮ ባጋ ꬎቁ ሂስቲዲ ኬዛና ኣባ ጋፃ ቢዳ። ጊዶ ኣቲን ማርካቤዚ ዳሮ ኣጬይ ኮሬቲ ኡቲዳይሳራ ኢጬቲዲ ዱጌ ጉፋኒዴስ፤ ሲንꬃ ቦላ ዱጌ ጉፋኒ ꬊሺኬቲዲ ቃፆንታይሳ ጊዲዴስ። ቃስ ኣባ ዳምባላይ ዳሮፔ ዴንዲዳይሳን ጉዬ ባጋራ ሜቄሬቴꬅ ኦይኪዴስ። ቃሾ ኣሳፔ ኢሳዴይካ ኣባን ዎꬊዲ ኬሲ ኤኮንታ ማላ ዎታዳራቲ ዎꬋና ቆፒዳ። ማቶ ሃላቃይ ቃስ ጳዉሎሳ ኣሻናስ ኮይዳ ጊሽ ኢስታ ቆፋ ኤካና ኮይቤና። ጊዶ ኣቲን ሃꬄ ዎꬊ ኤሪዛይቲ ማርካቤዛፔ ዱጌ ኣባን ጉፒ ጉፒ ዎꬊዲ ጌዴ ቢታ ቦላ ኬዛና ማላ ኣዛዚዴስ። ሃንኮ ኣቲዳይቲ ሜቂ ዎꬊዳ ሳንቃ ቦላ ኣባ ፒናና ማላ ኣዛዚዴስ፤ ሄሳꬆ ሃኒዲ ዉሪካ ሳሮን ኣባ ጊዶፌ ቢታ ቦላ ጋኪዳ። ኑ ቢታይ ዲዛሶ ሳሮቴꬃን ጋኪዳፔ ጉዬ ኑ ጋኪዳ ኣባ ጊዶን ዲዛ ዴሬይ ሜላፂያ ጌቴቲዛ ዴሬ ጊዲዳሮ ኤሪዶስ። ሄ ዴሬዪን ዲዛ ኣሳይ ዳሮ ማላሊሲዛ ኪያቴꬅ ኑስ ኦꬂዴስ። ሄ ዎዴ ኢራይ ቡኪዳ ጊሺኔ ሜጎ ጊዲዳ ጊሽ ታማ ኤꬂዲ ኑና ሞኪ ኤኪዳ። ጳዉሎሲ ኣፊራ ጊዛ ሚꬂ ሺሺዲ ታማን ጉጂን ታማ ሴላፔ ዴንዲዳይሳን ሾሺ ኬዚዲ ኢዛ ኩሼ ቦላ ፃፄቲዴስ። ማልታ ኣሳይ ሾሺ ጳዉሎሳ ኩሼ ቦላ ፃፄቲዳይሳ ቤዪዲ “ሃይሲ ኣዴዚ ሼምፖ ዎꬊዳዴ፤ ጋሶይካ ኣባ ዳምባላፔካ ኢዚ ኣቲዲ ዪኮካ ፒርዲዛ ፆሳፌ ኬሲ ኤኪዲ ፓፃ ዳና ዳንዳይቤና” ጊዲ ባ ጊዶን ሃሳዬቲዳ ጳዉሎሲ ቃስ ሾሻ ዱጌ ታማን ቆቆፍ ዬጊዲ ኣይኮካ ሃኒቤና። ኣሳይካ “ኣይዴፔ ኣይዴ ኢዛ ኣሳቴꬃይ ኪፃኔሻ፤ ዎይኮ ቆፖንታ ኩንዲዲ ሃይቃና” ጊዲ ናጊዴስ፤ ጊዶ ኣቲን ኢስቲ ዳሮ ዎዴ ናጊሺን ኢዛ ቦላ ኣይኮይኔ ሃኖንታይሳ ቤዪዲ ባ ቆፋ ላሚዲ “ሃይሲ ኣዴዚ ፆሳ!” ጊዴስ። ሄ ኑ ዲዛሶ ማታን ኣባ ጊዶን ዲዛ ዴሬዮ ኣይሲዛ ፑፑልዮሳ ጌቴቲዛዴስ ጋዴይ ዴስ፤ ሄ ኣዴዚ ኑና ሞኪ ኤኪዲ ባሶን ሄꬑ ጋላስ ጋካናስ ሎዔꬂ ኢማቲዴስ። ሄን ፑፑልዮሳ ኣዋ ሚሻይኔ ጉሶ ሃርጌይ ሳኪን ኢቺዲ ዴስ፤ ጳዉሎሲ ኢዛኮ ጌሊዲ ኢዛስ ዎሲዴሲኔ ኢዛ ቦላ ባ ኩሼ ዎꬂዲ ፓꬂዴስ። ሄሲ ሄሳꬆ ሃኒዳፔ ጉዬ ሄ ዴሬይን ዲዛ ሃራ ሃርጋንቻቲ ዪዲ ፓፂዳ። ኣሳይካ ኑስ ዳሮ ሚሽ ኤሂዲ ኑና ቦንቺዛይሳ ኑና ቤሲዳ፤ ኑ ማርካቤን ባና ዴንዲን ኑስ ኮሺዛይሳ ማርካቤን ዉርሲ ጫኒዳ። ኑ ሚሊፂኔን ሄꬑ ኣጊና ጋምዒዳፔ ጉዬ ባልጎይ ኣꬋና ጋካናስ ኣባ ጊዶን ዲዛ ዴሬዪን ጋምዒዲ ኢስኪንዲሪያፔ ዪዛ ማርካቤን ጌሊዲ ባና ዴንዲዶስ፤ ሄ ማርካቤዛ ቦላ ዲዮሲቆሮሳ ጌቴቲዛ ናምዑ ሜንቴ ኤቃታ ሚሲሌይ ዴስ። ጌዴ ሲራኩሴ ጌቴቲዛ ካታማ ጋኪዲ ሄን ሄꬑ ጋላስ ጋምዒዶስ። ሄፔ ኣባ ቦላራ ቢዲ ሬጊዮሜ ጌቴቲዛ ካታማ ጋኪዶስ፤ ሄን ኢሲ ጋላስ ኣቂዲ ዱጌ ባጋራ ዪዛ ጫርኮይ ጫርኪዳ ጊሽ ናምዓንꬆ ጋላስ ፑቲዮሎሴ ጌቴቲዛሶ ቢዶስ። ሄን ኣማኒዛይታ ዴሚዲ ኢስታራ ኑ ላፑን ጋላስ ጋካናስ ኡታና ማላ ኑና ዎሲዳ። ሄፔ ቃሴ ኦሮሜ ቢዶስ። ኦሮሜን ዲዛ ኣማኒዛ ኣሳይ ኑ ጊሽ ሲይዲ ኣፒዮሴ ጌቴቲዛ ጊያኔ “ሄꬑ ኣቆሶታ” ጌቴቲዛሶ ጋካናስ ኑና ሞካና ዪዳ፤ ጳዉሎሳይካ ኢስታ ቤዪዲ ፆሴ ጋላቲዴሲኔ ሚኔቲዴስ። ኑኒ ኦሮሜ ጌሊዳ ዎዴ ጳዉሎሳ ናጋናስ ኢሲ ዎታዳራይ ኢዛስ ኢሜቲን ጳዉሎሲ ባርካ ዳና ማላ ኢዛስ ፊቃዴይ ኢሜቲዴስ። ሄꬑ ጋላሳፌ ጉዬ ጳዉሎሲ ኦሮሜን ዲዛ ኣይሁዳታፔ ጊታ ኣሳታ ባኮ ፄይጊሲዴስ፤ ኢስቲካ ኢዛኮ ሺቂን “ታ ኢሻቶ! ታኒ ኢስራዔሌ ዴሬ ቦላኔ ኑ ኣዋታ ዎጋ ቦላ ኦꬂዳ ኢሲ ቆሆይካ ዴና፤ ጊዶ ኣቲን ዬሩሳላሜን ታና ቃቺዲ ኦሮሜ ኣሳታስ ኣꬂ ኢሚዳ። ኦሮሜ ኣሳቲ ታና ቆሪ ኦይቺዳፔ ጉዬ ታና ሃይቆስ ጋꬂዛ ሚሽ ዴሞንታ ኣጊዳ ጊሽ ቢርሺ ዬዳና ኮይዳ። ጊዶ ኣቲን ኣይሁዳ ኣሳይ ታ ቦላ ኢሲ ዎሶይ ባይንዳ ዬዴቶንታ ማላ ኤቄቲን ታ ዮዖይ ቄሳሬ ሲንꬅ ሺቂዲ ቤቶ ጋናስ ታስ ጊዴ ጊዲዴስ። ጊዶ ኣቲን ታኒ ታ ዴሬታ ሞቲዛ ጋሶይ ታስ ዴና። ታ ቃስ ሃዒ ኢንቴና ፄይጊሲዳይ ኢንቴና ቤያናሲኔ ሃኖ ኢንቴስ ዮታናሳ። ሃይሳ ሳንሳላታን ታኒ ቃሼቲዳይ ኢስራዔሌ ናይታስ ኢሜቲዳ ኡፋይሳ ጋሶና” ጊዴስ። ኢስቲካ ኢዛስ “ኔ ጊሽ ዩሁዳ ዴሬፔ ፃፌቲዳ ዴቢዳቤይ ኑና ጋኪቤና። ሃ ዪዳ ኣሳታፔ ኦኒካ ኔ ጊሽ ኢታ ሃሳዪዳይ ባዋ። ሃይሳ ኔ ካሊዛ ኣማኖዛ ጊሽ ኣዋንካ ኣሳይ ኢታ ሃሳዪዛይሳ ኑ ኤሮስ። ሄሳ ጊሽ ኔ ቆፋይ ኣዛኮኔ ኑ ሲያና ኮዮስ” ጊ ዛሪዳ። ባሬ ኢዛስ ኢሚዲ ሃራ ጋላስ ኩሼ ኩሚዲ ኢዚ ዲዛ ኬꬄ ዪዳ። ኢዚካ ማላዶፔ ኦማርስ ጋካናስ ፆሳ ካዎቴꬃ ጊሽ ማርካቴꬃን ባ ቆፋ ኢስታስ ቆንጪሲዴስ። ሙሴ ዎጋፔኔ ናቤታ ማፃፋታፔ ፃቃሲ ፃቃሲ ዬሱሳ ጊሽ ኢስታስ ቆንጪሲ ዮቲዴስ። ኢስታፌ ኢሲ ኢሲ ኣሳቲ ኢዚ ዮቲዳ ቃላ ኣማኒዳ፤ ባጋይቲ ቃስ ኣማኒቤቴና። ኢስቲካ ባ ጊዶን ኢሶይ ኢሳራ ቆፋን ጋጎንታ ሻኬቲዳ፤ ጳዉሎሲ ዉርሴꬃን ዮቲሼ “ፂሎ ኣያናይ ናቤ ኢሳያሳ ባጋራ ካሴ ኢንቴ ኣዋታስ ዮቲዳይሲ ቱማኮ! ኢዚ ዮቲዳ ቃላይ፥ ‘ሃይሳ ዴራኮ ባዳ ኢንቴ ሲሲ ሲያና ሺን ዩሺ ቆፔኬታ፥ ኣይፌራ ቤያና ሺን ዎዝናን ዎꬄኬታ ጋዳ ዮታ። ጋሶይካ ሄ ኣሳታ ዎዝናይ ሙሚዴስ፥ ኢስታ ሃይꬃይካ ቱሊዴስ፤ ኢስታ ኣይፌይ ቆቂዴስ። ሄሳꬆ ሃኖንታኮ ኢስቲ ባ ኣይፌራ ቤዪዲ ባ ሃይꬃራ ሲይዲ ባ ዎዝናን ዩሺ ቆፒዲ ታኮ ሃ ሲማናኔ ታካ ኢስታ ፓꬃናሺን” ጊዴስ። “ሂስቲኮ ፆሲ ኣስ ኣሺዛ ኪታይ ኣይዛቤታስካ ኪቴቲዳይሳ ኢንቴ ኤሪቴ፤ ኢስቲካ ኤሮ ጊዲ ኤኬቴስ” ጊዴስ። ጳዉሎሲ ሄሳ ዮቲዳፔ ጉዬ ኣይሁዳ ኣሳቲ ባ ጊዶን ዳሮ ፓላሜቲሼ ኬዚ ቢዳ። ጳዉሎሲ ኪራቲዳ ኬꬃን ናምዑ ላይꬅ ኩሜꬅ ዴዒዴስ፤ ባኮ ዪዛ ኣስ ዉርሲ ሞኪ ኤኪዴስ። ፆሳ ካዎቴꬅ ሳባኮን ጎዳ ዬሱስ ኪርስቶሳ ጊሽ ኦኒካ ኢዛ ዲጎንታ ፃላቴꬃራ ኣሳ ታማርሲዴስ። ዬሱስ ኪርስቶሳ ኣይሌኔ ሃዋሬ ጊዳናስ ፄይጌቲዳ ሚሺራቾ ቃላ ዮታናስ ጳዉሎሳፔ ኪቴቲዳ ኪታ። ሄ ሚሺራቾ ቃላ ጊሽ ካሴ ናቤታ ባጋራ ጌሻ ማፃፋታን ኡፋይሲ ኢሜቲዴስ። ሚሺራቾ ቃላይካ ባ ናዛ ጊሽ ኢዚ ኣሾ ባጋራ ዳዉቴ ዜሬꬃፌ ጊዲዳይሳ ዮቲዛ ጊሻሳ። ሄሳꬆካ ኑ ጎዳ ዬሱስ ኪርስቶሲ ባ ጌሻቴꬃ ኣያናን ሃይቆፔ ዴንዲዳይሲ ኢዚ ፆሳ ና ጊዲዳይሲ ጊታ ዎልቃን ቆንጪዴስ። ኪርስቶሳ ሱንꬃ ጊሽ ኣማኖንታ ዴሬይ ኣማናና ማላኔ ኣዛዜታና ማላ ኢዛ ባጋራ ኑኒ ሃዋራቴꬃስ ጋꬂዛ ኪያቴꬅ ኤኪዶስ። ኢንቴካ ዬሱስ ኪርስቶሳይታ ጊዳና ማላ ፄይጌቲዳይታራ ዴታ። ፆሳን ዶሴቲዳይታኔ ጌሻታ ጊዳናስ ፄይጌቲዳ ኦሮሜ ቢታን ዲዛ ኢንቴስ ኡባስ ኑ ኣዋ ፆሳፌኔ ኑ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ። ኢንቴ ኣማኖይ ኣላሜ ኩሜꬃን ሲዬቲዳ ጊሺኔ ኢንቴ ጊሽ ታ ጎዳ ፆሳ ዬሱስ ኪርስቶሳ ባጋራ ጋላታይስ። ታ ኢንቴ ጊሽ ኡባ ዎዴ ኣይ ማላ ቆፒዛኮኔ ፆሳ ና ሚሺራቾ ሳባኮን ታ ኩሜꬃ ዎዝናፔ ኢዛስ ኦꬂዛ ፆሳይ ታስ ማርካ። ታኒ ታ ዎሳን ኡባ ዎዴ ኢንቴና ቆፓይስ። ሃዒ ቃሴ ዉርሴꬃን ፆሳ ሼኔ ጊዲኮ ታ ኢንቴኮ ባና ማላ ፆሲ ታስ ኦጌ ዶያና ማላ ዎሳይስ። ኢንቴ ሚናና ማላ ማዲዛ ኣያና ኢሞቴꬂ ታ ኢንቴስ ጊሻናሲኔ ኢንቴና ኣይፌራ ቤያናስ ላሞታይስ። ሄሲካ ኢንቴኔ ታኒ ኢሶይ ኢሳራ ኣማኖን ሚኔታናሳ። ታ ኢሻቶ! ሃራሶን ኣማኖንታይታ ማታን ታስ ሃኒዳ ማላ ኢንቴ ማታንካ ታስ ኦሶ ኣይፌይ ቤታና ማላ ዳሮ ዎዴ ቆፓዲስ ሺን ሃኖ ጋካናስ ታ ዲጌታዳ ዲዛይሳ ኢንቴ ኤራና ማላ ኮያይስ። ታማሪዳይታስ ጊዲን ታማሮንታይታስካ፤ ኤራታሲኔ ኤያታስ ኡባስ ታ ቦላ ታማርሳና ኣጮይ ዴስ። ኢንቴስ ኦሮሜን ዲዛይታሲካ ታ ሚሺራቾ ቃላ ዮታናስ ታ ኣሞቲዛይ ሄሳሳ። ኣማንዛይቲ ዉሪ ኣታና ማላ ፆሳ ዎልቃ ጊዲዳ ጊሽ ታ ሚሺራቾ ቃላን ዬላቲኬ፤ ሄሲካ ኮይሮ ኣይሁዳታስ ካሊዲ ኣይዛቤታሳ። “ፂሎይ ፆሳ ኣማኖን ዴስ” ጌቴቲዲ ካሴ ፃፌቲዳ ማላ ፆሳ ፂሎቴꬅ ሚሺራቾ ቃላን ቆንጪና፤ ሄ ፂሎቴꬂ ኮይሮፔ ዉርሴꬅ ጋካናስ ኣማኖን ሃናና። ቱማ ባ ኢታቴꬃኒኔ ማካላን ቱጪ ኦይኪዛይታ ኢታቴꬃ ቦላኔ ኢስታ ማካላቴꬃ ኡባ ቦላ ፆሳ ሃንቆይ ሳሎፔ ቆንጫና። ኢስቲ ኤራናስ ቤሲዛዚ ፆሲ ዉርሲ ኢስታስ ቆንጪሲዳ ጊሽ ኢስቲ ፆሴ ኤራናስ ቆንጬ። ኣላሜይ ሜꬌቶሶፔ ሃ ሲሚን ኣሳ ኣይፌን ቤቲ ኤሮንታ ፆሳ ሃኖቴꬂ ሄሲካ ኢዛስ ዲዛ ሜርና ዎልቃይኔ ፆሳቴꬃይ ኢዚ ሜꬊዳ ሜꬌቴꬃን ቆንጬን ቤቴስ። ሄሳ ጊሽ ኣሳይ ሺሻና ጋሶይ ዴና። ኢስቲ ፆሴ ኤሪኮካ ኢዛ ፆሳቴꬃ ማላ ቦንቺቤቴናኔ ጋላቲቤቴና። ጊዶ ኣቲን ኢስታ ቆፋይ ሜላ ጎዓይ ባይንዳዚ ጊዲዴሲኔ ዩሺ ቆፖንታ ማላ ኢስታ ዎዝናይ ꬉሚዴስ። ኢስቲ ባና “ኤራ” ጊዛይታ ጊዲኮካ ኤያታ ጊዲዳ። ሜርና ፆሳ ቦንቾ ሃይቂዛ ኣሳኒኔ ካፎታን፤ ሜሄታኒኔ ቢታ ቦላ ጎሼቲዛ ሜꬌቴꬃታን ሚሳቲሲዲ ላሚዳ። ሄሳ ጊሽ ፆሲ ኢስታ ባ ጊዶን ኢሶይ ኢሳራ ባርካ ባ ኣሳቴꬃን ቱና ኦሶ ኦꬃና ማላ ጌሻቴꬂ ባይንዳ ላይማቴꬃስ ኣꬂ ኢሚዴስ። ኢስቲ ፆሳ ቱማቴꬅ ዎርዶን ላሚዳ፤ ሜꬊዳ ፆሳ ኣጊዲ ሜꬌቴꬃስ ጎይኒዳኔ ኢስታስ ኦꬂዳ። ሜꬊዳ ፆሲ ኢዚ ሜርናስ ጋላቴቲዳይሳ። ኣሚን። ሄሳ ጌዶን ፆሲ ኢስታ ዬላቺዛ ኣሞቴꬃስ ኣꬂ ኢሚዴስ። ኢስቲ ማጫሳቲ ባናራ ዚንዓናስ ቤሶንታይታራ ዚንዓና ማላ ባና ኣꬂ ኢሚዳ። ሄሳꬆካ ኣቱማ ኣሳይ ባሲ ቤሲዛ ማጫሳታራ ዚንዓናስ ቤሲሺን ኣዴይ ኣዴራ ዚንዓናስ ኣሞን ፁጌቲዲ ማጫሳታራ ዚንዒዛ ማላ ኣዴይ ኣዴራ ዚንዒዲ ፓላ ሚሺ ኦꬂዳ። ሄይታንቲ ባርካ ባ ኦꬂዳ ኢታ ኦሶዛስ ቤሲዛ ቂፃቴ ባ ቦላ ኤሂዳ። ቃሴካ ኢስቲ ባ ቆፋራ ፆሴ ኤሮይ ኑና ማዴና ጊዳ ጊሽ ኢስቲ ኦꬃናስ ቤሶንታይሳ ኦꬃና ማላ ፆሲ ኢስታ ጎዖንታ ቆፋስ ኣꬂ ኢሚዴስ። ኡባ ባጋራ ማካላኔ ኢታቴꬅ፥ ዪቄኔ ኢታ ኦሶን ፃላላ ኩሚዳ፤ ቃናቴቴꬃን፥ ሼምፖ ዎꬎን፥ ኦሻን፥ ባሌꬆኒኔ ጌኔን ኩሚዳይታ ቃሴካ ዚጊርዛይታ ጊዲዳ። ኣሳ ሱንꬅ ሞሪዛይታ፥ ፆሳ ኢፂዛይታ፥ ኣስ ጫይዛይታ፥ ኦቶራንቻታኔ ጬቄቲዛይታ ጊዲዳ፥ ኡባ ዎዴ ኢታ ኦꬃናስ ኦጌ ኮዪዛይታ፥ ባና ዬሊዳይታስ ኣዛዜቶንታይታ፥ ዩሺ ቆፖንታይታ፥ ጊዳ ቃላ ዛሪ ላሊዛይታ፥ ኣሳስ ሚሼቶንታይታ፤ ሜንፄ ኢታታ። ሄሳ “ኦꬂዛይቲ ዉሪካ ሃይቃናስ ቤሴስ” ጊዛ ፆሳ ዎጋ ኢስቲ ኤሪሼ ሄይታንታ ባሲ ኦሶ ፃላላ ጊዶንታ ሄሳꬆካ ኦꬂዛይታካ ሚንꬄꬄቴስ። ሄሳ ጊሽ ኔኖ ሃራ ቦላ ፒርዲዛይሶ ኔኒ ታ ሃኒ ጌዶን ኦꬃዲስ ጊዛ ጋሶይ ኔስ ዴና። ኔ ሃራ ኣሳ ቦላ ፒርዲዛይሳን ኔርካ ኔስ ኩናኔ ኤካሳ። ጋሶይካ ሃራ ኣሳ ቦላ ኔ ፒርዲዛይሳ ኔካ ዛራዳ ኢዛ ኦꬂዛ ጊሻሳ። ሃይታ ማላታ ኦꬂዛ ኣሳታ ቦላ ፆሳ ፒርዳይ ሊኬ ጊዲዳይሳ ኑ ኤሮስ። ሄሳ ጊሽ ኔ ኣሳ ቦላ ፒርዳሼ ሄ ኔ ፒርዲዛይሳ ዛራ ኦꬂዛዴ ጊዲኮ ኔ ፆሳ ፒርዳፌ ኬሳ ኤካ ኣታና ኔስ ሚሳቲዜ? ዎይኮ ፆሳ ኪያቴꬅ ኔና ማሮቴꬃኮ ካሌꬂዛይሳ ሻካ ኤሮንታ ዳሼ ኢዛ ጊታ ኪያቴꬃኔ ኢዛ ዳንዳያ ዱሬቴꬃ ኔ ሌቃይ? ጊዶ ኣቲን ኔኒ ኔ ዎዝና ሙሜቴꬃኒኔ ማሮቴꬅ ኮዮንታ ኔ ዎዝና ጌዶን ቱማ ፆሳ ፒርዳይ ቆንጪዛ ዎዴ ፆሳ ሃንቆ ጋላሳስ ኔ ቦላ ዳሮ ሃንቆ ሺሻሳ። ፆሲ ኢሳስ ኢሳስ ኢዛ ኦሶ ማላ ኢማና። ሎዖ ኦሶ ኣጎንታ ኦꬂዲ ቦንቾ ሳባኔ ሜርና ዴዖ ኮዪዛይታስ ሜርና ዴዖ ኢማና። ጊዶ ኣቲን ባርካ ባና ዶሲዛይታሲኔ ቱማ ኣጋጊዲ ኢታ ካሊዛይታ ቦላ ፒርዳይኔ ሃንቆይ ጋካና። ኢታ ኦꬂዛ ኣይ ኣሳ ቦላ ኮይሮ ኣይሁዳ ኣሳ ቦላ ካሊዲ ኣይዛቤታ ቦላ ዋዬይኔ ሜቶይ ጋካና። ጊዲኮካ ሎዖ ኦꬂዛዴስ ኦናስካ ኣይሁዳ ኣሳስ ጊዲን ኣይዛቤታስ ሳባይ፥ ሳሮቴꬂኔ ቦንቾይ ጊዳና። ፆሲ ኦናካ ሻኪ ማዴና። ካሴ ዎጋይ ኤቆንታ ዎዴ ናጋራ ኦꬂዳ ኣሳይ ዉሪካ ዎጋይ ባይንዳ ꬋያና፤ ዎጋይ ኤቂ ሲሚን ናጋራ ኦꬂዳይቲ ዎጋን ኦይኬቲዲ ፒርዴታና። ኣይሲ ጊኮ ፆሳ ኣቻን ፂሎ ጌቴቲዛይቲ ኤቂዳ ዎጋስ ኣዛዜቲዛይታፔ ኣቲን ዎጋ ሲሲ ሲዪዛይታ ፃላ ጊዴቴና። ዎጋይ ባይንዳ ኣይዛቤቲ ዎጋይ ዮቲዛይሳ ጮ ሜላ ሃኖቴꬃፌ ኤሪዲ ኦꬂሺን ኢስታስ ዎጋይ ባይንዳ ኣጊኮካ ኢስታስ ሜꬌቴꬃ ዎጋይ ዲዛ ጊሽ ኢስቲ ባ ኦꬃናይሳ ኤሬቴስ። ኢስታ ዎዝናይ ኢስታስ ማርካቲዛ ጊሺኔ ኢስታ ቆፋይ ኢስታ ሞቲዛ ጊሽ ቃሴካ ኢስታ ማዲዛ ጊሽ ዎጋይ ዮቲዛይ ኢስታ ዎዝናን ፃፌቲዳይሳ ኤሬቴስ። ሄሲካ ታ ሚሺራቾ ቃላን ታማርሲዛ ማላ ፆሲ ኣሳ ዎዝናን ቆቴቲዳይሳ ኪርስቶሳ ባጋራ ፒርዲዛ ጋላሳን ቆንጪሳና። ኔ ኔና ኣይሁዳ ኣስ ጊኮ ዎጋን ኣማኔታሳኔ ኔስ ፆሳራ ዲዛ ኢሲፌቴꬃን ጬቄታሳ። ዎጋ ካሊዛ ጊሽ ፆሳ ሼኔ ኤራዳ ኩሜꬅ ጊዲዛዝ ሻካ ኤሪዳ ጊዲኮ፥ ኔ ቆቄታ ካሌꬂዛዴ፤ ꬉማን ዲዛይታስ ፖዖ ጊዲዳይሳ ኔ ኣማኔቲዳዴ ጊዲኮ ዎጋፔ ኔ ዴሚዳ ኤራቴꬃኒኔ ቱማቴꬃን ሃንኮ ኤሮንታይታ ዞሪዛዴ፥ ጉꬃ ናይታ ታማርሲዛዴ ጊዲኮ ሂስቲኮ ኔኒ ሃራታ ታማርሶ ኣጋዳ ኔ ሁዔስ ኣዛስ ታማሪኪ? ኔ ሃራ ኣሲ ካይሶቶፓ ጋ ሳባካሼ ኔስ ካይሶታይ? ኔ ሃራ ኣሳይ ላይማቶንታ ማላ ዮታሼ ኔስ ላይማታይ? ኔስ ኤቃ ኢፃሳሺን ፆሳ ኬꬃ ሚሻ ቦንቃይ? ኔስ ዎጋን ጬቄታሳ ሺን ዎጋ ኔ ባጋራ ኦꬆንታ ኣጋዳ ፆሳ ካዉሻይ? ሄሲካ “ኢንቴ ጌዶን ፆሳ ሱንꬂ ኣይዛቤታ ኣቻን ጫዬቴስ” ጌቴቲ ፃፌቲዳ ማላ ሃኒዴስ። ኔ ዎጋ ናጋ ፖሊዛዴ ጊዲኮ ቃፃራስ ጎዓይ ዴስ። ኔ ዎጋ ኦꬆንታዴ ጊዲኮ ቃሴ ኔ ቃፃራይ ጮ ሃዳ። ቃፃሬቶንታ ዲሼ ዎጋይ ጊዛይሳ ፖሊኮ ቃፃሬቲዳዴራ ጊና ቆዴቴኔ? ኔስ ፃፌቲዳ ዎጋይኔ ቃፃራይ ኔስ ዲኮ ዲዛ ዎጋ ኔ ናጎንታዴ ጊዲኮ ሃንኮ ቃፃሬቶንታ ዳሼ ዎጋስ ኣዛዜቲዳይ ኔ ቦላ ፒርዳና። ኢሳዴይ ጮ ሜላ ሱንꬃስ ኣሳ ኣይፌን ታ ኣይሁዳ ኣስ ጊዳና ጊኮ ኢዚ ኣይሁዳ ኣሲ ጊዴና። ቱማፔ ቃፄሬቴꬂ ጮ ካሬራ ኣሾ ኣይፌን ቤቲዛ ቃፃራ ጊዴና። ጊዲኮካ ኢሲ ኣሲ ኣይሁዳ ኣስ ጊዳናስ ዳንዳዪዛይ ኢዛስ ጋꬃ ባጋራ ኣይሁዳ ኣስ ጊዲሺና። ቃፃራይካ ቃፃራ ጊዲዛይ ፃፌቲዳ ዎጋ ፃላላ ጊዶንታ ኣያናን ዎዝናፔ ጊዲዳ ቃፃራ ጊዲኮኮ! ሄሳ ማላ ኣሲ ጋላታ ኣሳፔ ጊዶንታ ፆሳፌ ዴሜስ። ሂስቲኮ ኣይሁዳ ኣስ ጊዴꬃስ ኣዛ ጎዓይ ዲዜ? ቃፃራይ ኣይ ጎዒዜ? ኣዋራካ ጊዲን ጎዓይ ዳሮ። ሃራፔ ኮይሮ ፆሳ ቃላይ ሃዳራ ኣይሁዳታስ ኢሜቲዴስ። ኢስታፌ ኢሲ ኢሳዴስ ኣማኖይ ባይንዳ ኣጊኮ ፆሳ ኣማኖቴꬅ ዲጊዜ? ሙሌካ ዲጌና! ኣሲ ዉሪካ ዎርዳንቻ ቅ1 “ኔኒ ኔ ቃላፔ ዴንዲዳይሳን ቱማንቻ፤ ቅ2 ፒርዳንካ ፆኒዛዴ ጊዳሳ” ሄሳꬆ ጌቴቲ ፃፌቲዳ ማላ ፆሲ ቃሴ ቱማንቻ። ኑ ማካላ ኦሶይ ፆሳ ፂሎቴꬅ ቆንጬን ቤሲዛይሳ ጊዲኮ ሂስቲን ኑ ኣይ ጋኔ? ጮ ኣሳ ዎጋ ማላ ፓላሜታናስ ፆሲ ባ ሃንቆ ኑ ቦላ ኤሂዛይሲ ኑስ ቤሴና ጋኔዬ? ሄሳካ ታ ጊዛይ ኣሳꬆ ቆፋና። ቱማፔ ሄሳꬆ ሃኔና። ሄሳꬆ ሃኒዛ ጊዲኮ ፆሲ ኣላሜ ቦላ ዎስቲ ፒርዳንዴ? ታ ዎርዶቴꬅ ፆሳ ቱማቴꬅ ቆንጪሲዛይሳን ኢዛ ቦንቾ ጌዴ ጉጂዛይሳ ጊዲኮ ሂስቲን ሃዒ ጋካናስ ዎስቲ ታ ቦላ ናጋራንቻ ማላ ፒርዴቲዜ? ጊዲ ፓላሜታና ኣሲ ዳና ዳንዳዬስ። ሄሳ ጉሲ “ሎዖይ ያና ማላ ኣኔ ኢታ ኦꬆስ” ጌቴስ ጊዲ ኢሲ ኢሲ ኣሳቲ ኑ ቦላ ዎሬሲዛይሳ ማላ። ሃይታ ኣሳታ ቦላ ጋኪዛ ፒርዳይ ቱሙ ፒርዳ። ሂስቲን ኑ ኣይ ጊኖ? ኑኒ ኢስታፌ ኣꬊዞኒ? ሙሌካ ኣꬎኮ። ኣይሁዳታ ጊዲኮካ ኣይዛቤታ ጊዲኮካ ዉሪካ ናጋራፔ ጋርሳ ባጋራ ዲዛ ጊሽ ታ ዉርሳካ ካሴታዳ ኢስታስ ዮታዲስ። “ፂሎይ ኦኒካ ዴና፤ ኢሳዴይካ ዴና። ዩሺ ቆፒዛዴይ ባዋ፤ ፆሴ ኮዪዛይ ኢሳዴይካ ባዋ። ዉሪካ ባሌቲዳኔ ኢሲ ቦላ ጎዖንታይታ ጊዲዳ። ሎዖ ኦꬂዛይ ኦኒካ ባዋ፤ ኢሳዴይካ ዴና። ኢስታ ዱናይ ዶያ ዲዛ ዱፎ ማላ፤ ኢስታ ዱናይ ኡባ ዎዴ ባሌꬆ ሃሳዬስ፤ ኢስታ ሜቴርሻይ ሾሻ ማርዜራ ዴስ። ኢስታ ዱናን ቃንጌꬂኔ ጫሞ ሚሽ ኩሚዴስ። ኢስታ ቶሆይ ሱꬅ ጉሳናስ ኤሶቴስ። ኢስታ ኦጌን ꬋዮይኔ ላፋቴꬅ ዴስ። ኢስቲ ሳሮቴꬃ ኦጌ ኤሬቴና። ኢስታ ኣይፌሶን ፆሳስ ባቦይ ባዋ” ጌቴቲ ፃፌቲዳ ማላ። ሄሳ ጊሽ ዱናይ ዉሪካ ጎርዴታና ማላ ዴሬይ ኩሜꬅ ፆሳስ ዛሮ ኢማና ማላ ዎጋይ ጊዛይ ዉሪካ ዎጋፔ ጊዶራ ዲዛይታስ ጊዲዳይሳ ኑ ኤሮስ። ሄሳ ጊሽ ዎጋይ ናጋራይ ኣዛኮኔ ኤሪሴስ ኣቲን ዎጋ ናጎን ኦኒካ ኢዛ ኣቻን ፂሎ ጌቴታናስ ዳንዳዬና። ሃዒ ቃሴ ዎጋ ካሴ ናቤቲ ኢዛስ ማርካቲዳይስ ዎጋፔ ካሬራ ጊዲዳ ፆሳ ፂሎቴꬂ ቆንጪዴስ። ሄሲ ፆሳ ፂሎቴꬂ ዬሱስ ኪርስቶሳ ኣማኖን ዱማቴꬂ ባይንዳ ቤቲዛ ፂሎቴꬃ። ጋሶይካ ኣሲ ዉሪካ ናጋራ ኦꬂዴስ። ፆሳ ቦንቾይካ ኣሳ ናስ ፓጪዴስ። ኣሳይ ዬሱስ ኪርስቶሲ ኣሳ ና ጊሽ ኦꬂዳ ኪያቴꬃፌ ዴንዲዳይሳን ጮ ሜላ ፂሊዴስ። ኢዛ ሱꬃን ጊዲዳ ኣማኖን ናጋራፔ ማሬታና ያርሾ ሂስቲዲ ፆሲ ዬሱሳ ሺሺዴስ። ኢዚ ሄሳ ኦꬂዳይ ካሴቲዲ ፖሌቲዳ ናጋራ ቃፃዮንታ ዳንዳያን ኣꬊዳ ባ ፂሎቴꬅ ቤሳናሳ። ኢዚ ሄሳ ሃ ዎዴዛን ኦꬂዳይ ባ ፂሎቴꬃ ሄሲካ ባ ባጋራ ፂሎ ጊዲዳ ዬሱስ ኪርስቶሳን ኣማኒዛዴ ፂሊሲዛይሳ ቤሳናሳ። ሂስቲን ኑኒ ኢዛን ጬቄቲዛ ሚሺ ኣዚ ዲዜ? ኣይኮ ሚሻንካ ጬቄቶኮ። ኑ ጬቄታና ጋሶይ ኣዜ? ዎጋ ናጊዛ ጊሼ? ጊዴና፥ ኣማኖና። ኣይ ኣሲካ ኣማኖን ኣቲን ዎጋ ናጎን ኣቶንታይሳ ኑ ጌሺ ዮቶስ። ፆሲ ኣይሁዳታ ፆሴ ፃላላ? ኣይዛቤታስካ ፆሴ ጊዴኔ? ኤ ኣይዛቤታስካ ኢዚ ፆሳ። ቃፃሬቲዳይሳ ኣማኖን ቃሴ ቃፃሬቶንታይሳካ ሄ ኣማኖንካ ፂሊሲዛይካ ኢዚ ኢሲ ፆሳ ፃላ። ሂስቲን ሄሲ ሄሳ ጊዲኮ ኣማኖ ጌዶን ዎጋ ጎዓይ ባይንዳ ሚሽ ኦꬂኖ? ሙሌካ ሄሳꬆ ሃኔና፤ ዎጋ ኑ ሚንꬃና ኣቲን። ሄሳ ጊሽ ቃሴ ኑ ኣብራሃሜይ ሃይሳፌ ኣይ ጎዓ ዴሚዴ ጊኖ? ኣብራሃሜይ ባ ኦሶን ፂሊዳኮ ኢዚ ጬቄታናዚ ኢዛስ ዴስኮ ሺን፤ ኢዚ ፆሳ ሲንꬃን ጬቄታናስ ዳንዳዬና። ጌሻ ማፃፋይ “ኣብራሃሜይ ፆሴ ኣማኒዴሲኔ ኢዛ ኣማኖይ ኢዛስ ፂሎቴꬃን ቆዴቲዴስ” ጌስ። ኢሳዴይ ኦሶ ኦꬂኮ ኢዚ ኤኪዛ ሚሻይ ኢዛስ ጮ ኪያቴꬅ ኢሜቲዛዝ ጊዶንታ ኢዛዴስ ኦሶ ዋጋ ጊዴስ። ጊዶ ኣቲን ኦሶ ኦꬆንታ ናጋራንቻ ኣሲ ፂሎ ኬሲዛ ፆሳን ኣማኒዛዴስ ኢዛ ኣማኖይ ኢዛስ ፂሎቴꬃን ታይቤቴስ። ዳዉቴይካ ፂሎቴꬂ ኢዛዴስ ቆዴቲዛይ ሎዖ ኦሶን ጊዶንታ ኣሳ ጊሽ፥ “ኢስታስ ኢስታ ባላ ኦሶይ ኣቶ ጌቴቲዳይቲኔ ናጋራፔ ማሬቲዳይቲ ኣንጄቲዳይታ! ኢዛ ናጋራ ጎዳይ ሙሌካ ቆዶንታዴይ ኢዚ ኣንጄቲዳይሳ!” ጊዴስ። ሃ ኣንጆዚ ቃፃሬቲዳይታስ ፃላላዬ? ዎይኮ ቃፃሬቶንታይታሳራ? “ካሴ ኮይሮ ኑ ኣዋ ኣብራሃሜ ኣማኖይ ኢዛስ ፂሎቴꬃን ቆዴቲዴስ” ጊዶስ። ሂስቲን ዋኒ ኢዛስ ሄሳꬆ ቆዴቲዴ? ኢዚ ቃፃሬቲዳፔ ጉዬ? ዎይኮ ቃፃሬታናፔ ካሴ? ኢዛስ ፂሎቴꬃን ቆዴቲዳይ ኢዚ ቃፃሬታናፔ ሲንꬃና። ኢዚ ካሴ ቃፃሬታናፔ ካሴ ዴሚዳ ፂሎቴꬃይ ቃፃራስ ማላታ ጊዳና ማላ ፂሎቴꬃስ ማታሜ ኤኪዴስ። ሄሳ ጊሽ ቃፃሬቶንታ ኣማኒዛይታስ ፂሎቴꬅ ቆዴታና ማላ ኡባታስ ኢዚ ኣዋ። ኢዚ ቃፃሬቲዳይታስካ ኣዋ፤ ቃፃሬቲዳይታስ ፃላላ ጊዶንታ ኑ ኣዋ ኣብራሃሜይ ካሴ ቃፃሬታናፔ ሲንꬄ ኢዛስ ዲዛ ኣማኖ ጌዶ ካሊዛይታስ ኡባሳ። ኢዚ ኣላሜ ላቲዛዴ ጊዳና ማላ ኣብራሃሜይኔ ኢዛ ዜሬꬃቲ ኡፋይሳ ቃላ ኤኪዳይ ዎጋ ባጋራ ጊዶንታ ኣማኖን ጊዲዳ ፂሎቴꬃና። ዎጋ ናጊዛይቲ ላቲዛይታ ጊዲኮ ኣማኖስ ጎዓይ ዴና፤ ሂዶታይካ ጮ ሃዳ ጊዳናሺን፤ ዎጋይ ሃንቆ ካሌꬄስ። ዎጋይ ባይንዳሶን ዎጋፔ ኣꬌꬅ ዴና። ሄሳ ጊሽ ሂዶታይ ኣማኖን ዪዴስ። ሄሲካ ኢዛ ሂዶታይ ኢዛ ኪያቴꬃን ጊዳና ማላኔ ኣብራሃሜ ዜሬꬃስ ኡባስ ኣማኔቲዛይሳ ጊዳና ማላ ሃኒዴስ። ሄሲካ ዎጋን ኢዛይታ ጊዲዳይታስ ፃላላ ጊዶንታ ኣማኖን ኣብራሃሜ ናይታ ጊዲዳይታስ ኡባታሳ። ኢዚካ ኑስ ኡባስካ ኣዋ። ሄሲካ “ታ ኔና ዳሮ ዴሬ ኣዋ ኦꬃዲስ” ጌቴቲ ፃፌቲዳ ማላ ሃኒዴስ። ኢዚካ ሃይቂዳይታስ ዴዖ ኢሚዛዴን ባይንዳይሳ ቃሴ ዲዛ ማላ ኦꬂዛዴን ኣማኒዳ ፆሳ ሲንꬃን ኢዚ ኑስ ኣዋ። ካሴ ኢዛስ “ኔ ዜሬꬂ ሄሳꬆ ሃናና” ጌቴቲዳ ማላ ኣይኮ ሂዶታይካ ባይንዳ ዲሺን ኣብራሃሜይ ፆሲ ሃናና ጊዳይሳ ኣማኒዲ ዳሮ ዴሬ ኣዋ ጊዲዴስ። ኣብራሃሜስ ዬሌቲን ፄቱ ላይꬅ ጊዲቺን ኣብራሃሜይ ባ ኣሳቴꬃይ ሃይቄꬃ ማላ ጊዲዳይሳኔ ሳራስ ዬሎ ዎዴይ ኣꬊ ቢዳይሳ ኤሪሼካ ኣማኖን ሌፒቤና። ጌዴ ጉጂዲ ኣማኖን ሚኒዲ ፆሳስ ቦንቾ ኢሚዴስ ኣቲን ፆሲ ጊዳ ቃላ ሲꬊቤና። ፆሲ ኢዛስ ኢሚዳ ሂዶታይ ፖሌታናይሳ ኩሜꬃ ዎዝናፔ ኣማኒዴስ። ሄሳ ጊሽ ኢዛስ ፂሎቴꬃን ቆዴቲዴስ። “ኢዛስ ፂሎቴꬃን ቆዴቲዴስ” ጊዛ ቃላይ ፃፌቲዳይ ኢዛስ ፃላላ ጊዴና። ጊዶ ኣቲን ፆሲ ኑ ፂሎቴꬃ ኢዛ ባጋራ ታዪቢዛ ኑ ጎዳ ዬሱሳ ሃይቆፔ ዴንꬂዳይሳን ኣማኒዛ ኑሳራ። ኢዚ ኑ ናጋራ ጊሽ ሃይቃናስ ኣꬊ ኢሜቲዴስ። ኢዚ ኑና ፂሊሳናስ ሃይቆፔ ዴንዲዴስ። ሂስቲኮ ኑኒ ኣማኖን ፂሊዳ ጊሽ ኑ ጎዳ ዬሱስ ኪርስቶሳ ባጋራ ኑስ ፆሳራ ሳሮቴꬅ ዴስ። ሃይሳ ሃ ኣማኖዛን ሚኒ ዲዛ ኪያቴꬃን ኑኒ ጌሊዳይ ኢዛ ባጋራ ጊዲዳ ጊሽ ኡፋይሳን ፆሳ ቦንቾ ጊሼቲ ኤኪዛይታ ጊዲዳ ጊሽ ኑ ኡፋዮስ። ሃይሳን ፃላላ ጊዶንታ ኑና ጋኪዛ ዋዬንካ ኡፋዬቶስ። ጋሶይካ ዋዬይ ዳንዳያን ጋꬂዛይሳ ኑ ኤሮስ። ዳንዳያይ ፓጬን ሚኖቴꬅ ኢሜስ፤ ፓጬን ሚኖቴꬅ ሂዶታ ኢሜስ። ሄ ሂዶታይ ቃሴ ኑና ዬላቼና። ፆሲ ኑስ ኢሚዳ ፂሎ ኣያናን ባ ሲቆ ኑ ዎዝናን ጉሲዳ ጊሽ ሄ ሂዶታይ ኑና ዬላን ጋꬄና። ኑ ዳቡራንቻታ ጊዲ ዲሺን ፆሳ ዎዴይ ጋኪዳ ማላ ኪርስቶሲ ኑ ናጋራ ጊሽ ሃይቂዴስ። ፂሎ ኣሳ ጊሽ ሃይቃና ኣሲ ቤታናይሲ ዳሮ ሜቴስ። ሎዖ ኣሳ ጊሽ ሃይቃናስ ፃላና ኣሲ ኦኔ ኤሪዛይ ቤታና ዳንዳዬስ። ጊዶ ኣቲን ኑ ቡሮ ናጋራንቻ ጊዲ ዲሺን ኪርስቶሲ ኑ ጊሽ ሃይቂዴስ። ሄሲካ ፆሲ ኑና ሲቂዛ ባ ሲቆ ሄሳን ቤሴስ። ኑኒ ኢዛ ሱꬃን ጌዪዳይታ ጊዲኮ ሃራፔካ ኢዛ ባጋራ ፆሳ ሃንቆፌ ኣታና። ኑ ፆሳስ ሞርኬታ ጊዲ ዲሺን ኢዛ ናዛ ሃይቆን ኢዛራ ጊጊዳይታ ጊዲኮ ኑ ኢዛራ ጊጊዳፔ ጉዬ ኢዛ ናዛ ዴዖ ባጋራ ኑኒ ፓፂዳይሲ ዋኒ ኬሂ ዳሬኔ! ሄሳ ፃላላ ጊዴና፤ ቃሴካ ኑኒ ሃዒ ኢዛራ ጊጋ ዴሚዳ ኑ ጎዳ ዬሱስ ኪርስቶሳ ባጋራ ፆሳንካ ኡፋይስ ኦꬆስ። ሄሳ ጊሽ ናጋራይ ኢሳዴ ጋሶን ዱጌ ሃ ኣላሜዛ ዪዳ ማላ ሃይቆይካ ናጋራ ጋሶን ዪዴስ። ሃይቆይካ ሄሳ ባጋራ ኣሳ ኡባኮ ዪዴስ። ሄሳስ ጋሶይ ኣሲ ዉሪካ ኢዛ ባጋራ ናጋራ ኦꬂዳ ጊሻሳ። ዎጋይ ኢሜታናፔ ካሴ ናጋራይ ቢታ ቦላ ዴስ ሺን ዎጋይ ባይንዳሶን ናጋራይ ናጋራ ጊዴና። ጊዶ ኣቲን ኣዳሜፔ ሃ ሲሚን ሙሴ ዎዴ ጋካናስ ዲዛ ዎዴን ኣዳሜ ማላ ዎጋ ሜንꬂዲ ናጋራ ኦꬆንታይታ ቦላካ ሃይቆይ ካዎቲዴስ። ኣዳሜይ ቡሮ ያና ኪርስቶሳስ ሌሚሶ። ጊዲኮካ ኢዛ ኪያቴꬃ ኢሞታይ ኣሳ ቆሆ ማላ ጊዴና። ኢሳዴይ ሞሪዳይሳን ዳሮ ኣሳይ ሃይቂኮካ ፆሳ ኪያቴꬃኒኔ ኢሲ ኣሲ ዬሱስ ኪርስቶሳ ኪያቴꬃን ዪዳ ኢሞታይ ዳሮታስ ኬሂ ዳሪ ኢሜቲዴስ። ቃሴካ ፆሳ ኢሞታይ ኢሳዴ ባጋራ ዪዳ ናጋራፔ ቤቲዳ ኣይፌ ማላ ጊዴና። ጋሶይካ ኢዛ ፒርዳይ ኢሳዴ ናጋራ ካሊዲ ፒርዳ ኤኪ ዪዴስ። ኢዛ ኢሞታይ ቃሴ ዳሮ ቆሆ ጋሶን ፂሎቴꬅ ኤሂዴስ። ሃይቆይ ኢሳዴ ባጋራ ካዎቲዳይሳ ጊዲኮ ዳሮ ቲርፓ ጊዲዳ ፆሳ ኪያቴꬂኔ ፂሎቴꬃ ኢሞታ ኤኪዳይቲ ኢሳዴ ባጋራ ሄሲካ ዬሱስ ኪርስቶሳ ባጋራ ፆንዲ ዴዖን ዳና። *** ሂስቲኮ ኢሳዴ ቆሆ ጌዶን ፒርዳይ ኣሳ ኡባ ቦላ ጋኪዳ ማላ ሄሳꬆካ ኢሳዴ ፂሎቴꬃ ኦሶን ኣስ ኡባስ ዴዖ ኢሚዛ ፂሎቴꬂ ቤቲዴስ። ኢሳዴይ ኣዛዜቶንታ ኢፂዳ ጊሽ ዳሮ ኣሳይ ናጋራንቻ ጊዲዳ ማላ ኢሳዴ ኣዛዜቴꬃን ቃሴ ዳሮቲ ፂላና። ዎጋይ ዪን ሞሮይ ዳሪዴስ። ጊዶ ኣቲን ናጋራይ ዳሮይሳፌ ቦላራ ፆሳ ኪያቴꬂ ኬሂ ዳሪዴስ። ሄሲካ ሃኒዳይ ናጋራይ ሃይቆ ቦላ ካዎቲዳይሳ ማላ ዬሱስ ኪርስቶሳ ባጋራ ቃሴ ሜርና ዴዖይ ቤታና ማላ ኢዛ ኪያቴꬂ ፂሎቴꬃን ካዎታናሳ። ሂስቲን ኑ ኣይ ጊኖ? ፆሳ ኪያቴꬂ ዳራና ማላ ናጋራ ጉጂ ኦꬂኖ? ሙሌካ ጊዴና። ኑኒ ናጋራስ ሃይቂዶስ። ሂስቲን ሃይሳፌ ጉዬ ኑ ዋኒ ናጋራን ዳኔ? ኑኒ ዬሱስ ኪርስቶሳራ ኢሲኖ ጊዳና ማላ ፃማቄቲዳይቲ ኢዛ ሃይቆን ኑ ኢሲፌ ጊዳናስ ፃማቄቲዳይሳ ሃይሳ ኢንቴ ኤሬኬቲ? ሄሳ ጊሽ ኪርስቶሲ ባ ኣዋ ቦንቾን ሃይቆፔ ዴንዲዳ ማላ ኑኒካ ሄሳꬆ ኦራꬃ ዴዖን ዳናስ ፂንቃቴን ሃይቂዲ ኢዛራ ሞጌቲዶስ። ኑኒ ሄሳ ማላ ሃይቆን ኢዛራ ኢሲኖ ጊዲኮ ቃሴ ዴንꬃንካ ኢዛራ ኢሲኖ ጊዶስ። ሃይሳፌ ጉዬ ኑ ናጋራስ ኣይሌ ጊዶንታ ማላ ናጋራ ኣሳቴꬃይ ኪቻና ማላ ካሴ ኑ ጬጋ ኣሳቴꬃይ ኢዛራ ኢሲፌ ካቄቲዳይሳ ኑ ኤሮስ። ጋሶይካ ሃይቂዳ ኣሲ ናጋራፔ ሼምፒዴስ። ኑኒ ኪርስቶሳራ ሃይቂዳይታ ጊዲኮ ኑ ኢዛራ ኢሲፌ ዳናይሳ ኣማኖስ። ኪርስቶሲ ሃይቆፔ ዴንዲዳ ጊሽ ናምዓንꬆ ኢዚ ሃይቆንታይሳኔ ኢዛ ቦላ ሃይቆስ ዎልቃይ ባይንዳይሳ ኑ ኤሮስ። ኢዚ ሃይቂዳ ዎዴ ኢሲቶ ዉርሲ ናጋራ ጊሽ ሃይቂዴስ። ጊዶ ኣቲን ፆሳስ ፓፃ ዱስ ዴስ። ሄሳꬆካ ኢንቴ ናጋራስ ሃይቂዲ ፆሳስ ዬሱስ ኪርስቶሳ ባጋራ ፓፃ ዲዛይሳ ኤሪቴ። ሄሳ ጊሽ ኢታ ኦꬃና ኮዪዛ ኢታ ኣሾ ቆፋ ኮይዲ ሃይቂዳ ኢንቴ ኣሳቴꬃ ቦላ ናጋራይ ካዎታና ማላ ኦꬆፍቴ። ኢንቴ ኣሳቴꬅ ኢታ ኦሶ ኦꬂዛ ሚሽ ኦꬂ ናጋራስ ሃሪሶፍቴ። ሄሳ ማላ ኦꬃናፔ ሃይቆፔ ጌዴ ዴዖን ፒኒዳ ኣሳታ ማላ ኢንቴና ፆሳስ ሃሪሲቴ። ኢንቴ ኣሳቴꬃ ፂሎቴꬃ ሚሻ ማላ ፆሳስ ሃሪሲቴ። ኢንቴ ፆሳ ኪያቴꬃ ጋርሳን ዴታ ኣቲን ዎጋ ጋርሳን ዶንታ ጊሽ ኢንቴና ናጋራይ ሃሬና። ሂስቲን ኣይ ኦꬂኖ? ዎጋ ጋርሳን ጊዶንታ ኑኒ ፆሳ ኪያቴꬃ ጋርሳን ዲዛ ጊሽ ናጋራ ኦꬂኖ? ሙሌ ኦꬃናስ ቤሴና። ኢንቴ ኢንቴና ኣይሌ ማላ ሺሺዛ ዎዴ ኢንቴ ኣዛዜቲዛዴስ ኣይሌ ጊዲዳይሳ ኤሬታ። ሄሳꬆካ ጌዴ ሃይቆኮ ኤፊዛ ናጋራስ ዎይኮ ፂሎቴꬃኮ ጋꬂዛ ኣዛዜቴꬃስ ኢንቴ ኣይሌ ጊዲዳይሳ ኤሬኬቲ? ኢንቴ ካሴ ናጋራስ ኣይሌታ ጊዲኮ ኢንቴስ ኢሜቲዳ ቲሚርቴዛስ ኢንቴ ዎዝናፔ ኣዛዜቲዳ ጊሽ ፆሲ ጋላቴቶ። ኢንቴ ናጋራፔ ዎዜቲዲ ፂሎቴꬃስ ኣይሌ ጊዲዴታ። ሃይሳ ታ ኣሳ ቃላን ኢንቴስ ቆንጬን ዮቲዛይ ኢንቴ ዬሌቴꬃን ዳቡራንቻ ጊዲዳ ጊሻሳ። ኢንቴ ካሴ ዎዴ ኢንቴ ኣሳቴꬃ ኣይሌቴꬃሲኔ ካሴፔ ኣꬊ ኢታና ማላ ኦꬂ ኢሜታ ሺን ሃዒ ቃሴ ጌዴ ጌሻቴꬃኮ ኤፊዛ ፂሎቴꬃስ ኣይሌ ሂስቲ ሃሪስቴ። ኢንቴ ካሴ ናጋራስ ኣይሌቲዲ ዲዛ ዎዴ ኢንቴ ፂሎቴꬃፌ ሜላ ኣቲዴታ ሺን፤ ሃዒ ቃሴ ኢንቴ ዬላቲዛ ሚሻታፔ ሄ ዎዴ ኣይ ጎዓ ዴሚዴቲ? ሄሳ ሄ ሃኖዛ ጎዓይ ሃይቆ። ሃዒ ቃሴ ኢንቴ ናጋራፔ ዎዜቲዲ ፆሳ ኣይሌታ ጊዲዴታ። ሄሲካ ኢንቴና ጌዴ ጌሻቴꬃኮ ካሌꬄስ። ዉርሴꬃይካ ሜርና ዴዖ። ናጋራ ዋጋይ ሃይቆ፤ ጊዶ ኣቲን ፆሳ ኢሞታይ ጊዲኮ ጎዳ ዬሱስ ኪርስቶሳ ባጋራ ሜርና ዴዖ። ታ ኢሻቶ! ታኒ ዎጋ ኤሪዛ ኣሳታስ ዮታይስ። ዎጋይ ሼምፖራ ፓፃ ዲዛ ኣሳ ፃላላ ሃሪዛይሳ ኢንቴ ኤሬኬቲ? ኢሲ ማጫሲ ኣዚና ጌሊኮ ባ ኣዚናራ ኢዛ ዎጋን ቃሼቲዛይ ኣዚናይ ፓፃ ዲዛ ዎዴ ጋካናሳ። ኣዚናይ ሃይቂኮ ኢዛ ማቾ ጊዲዛ ዎጋፔ ኣንጄታዉስ። ጊዶ ኣቲን ኣዚናይ ፓፃ ዲሺን ኢዛ ሃራ ኣዚና ጌሊኮ ላይማ ጌቴታዉስ። ኣዚናይ ሃይቂኮ ቃሴ ሃራ ኣሲ ጌሊኮ ካሴ ኣዚና ዎጋፔ ኣንጄታዱስ ኣቲን “ላይማ” ጌቴቱኩ። ሄሳ ጊሽ ታ ኢሻቶ! ኢንቴካ ዬሱስ ኪርስቶሳ ኣሳቴꬃ ባጋራ ዎጋስ ሃይቂዴታ። ኢንቴ ሃይቆፔ ዴንዲዳ ኪርስቶሳ ባጋ ጊዲን ኑኒ ፆሳስ ኣይፌ ኣይፋናሳ። ናጋራንቻ ሜꬌቴꬃ ሼኔን ኑ ዲዛ ዎዴ ሃይቆስ ጋꬂዛ ኣይፌ ኑ ኣይፋና ማላ ዎጋይ ዴንꬄꬂዳ ናጋራ ኣሞይ ኑ ቦላ ኦꬂዴስ። ሃዒ ጊዲኮ ካሴ ኑና ዋፂ ቃቺዳ ዎጋስ ሃይቂዳ ጊሽ ሄ ዎጋፔ ዎዜቲዶስ። ሄሲካ ካሴ ጬጋ ዎጋን ፃፌቲዳይሳን ጊዶንታ ዲሼ ኦራꬃ ኣያና ኦጌን ኑኒ ኦꬃናሳ። ሂስቲን ኑ ኣይ ጊኖ? ባ ሁዔስ ዎጋይ ናጋራ? ሙሌካ ጊዴና። ዎጋ ባጋራ ጊዶንታኮ ናጋራይ ኣዛኮኔ ኑ ኤሮኮኮ ሺን፤ ዎጋይ “ኣሞቶፋ!” ጎንታኮ ኣሞይ ኣዛኮኔ ቱማፔ ታ ኤሪኬ። ናጋራይ ቃሴ ዎጋፔ ኬዚዳ ኣዛዞይ ቤሲዳ ኦጌን ጎዔቲዲ ታ ጊዶን ዱማ ዱማ ኢታ ኣሞ ዴንꬄꬂዴስ። ዎጋይ ያናፔ ካሴ ናጋራይ ሃይቂዳዛ። ዎጋይ ባይንዳ ካሴ ታኒ ፓፃ ዳይሲሺን ዎጋይ ዪን ቃሴ ናጋራይ ፓፃ ጊዲዴስ። ታ ጊዲኮ ሃይቃዲስ። ኣስ ኣሻና ቆፌቲዳ ኣዛዞይካ ሃይቆ ኤኪ ዪዳይሳ ኤራዲስ። ናጋራይ ዎጋ ባጋራ ቤቲዳ ጋሶን ጎዔቲዲ ታና ባሌꬂዴሲኔ ኣዛዞን ዎꬊዴስ። ሄሳ ጊሽ ዎጋይ ባ ባጋራ ጌሻ። ኣዛዞይካ ጌሻ፤ ፂሎኔ ሎዖ። ጊዶ ኣቲን ሎዖስ ሃኒዳይሲ ታስ ሃይቆስ ጊዲዴ? ሙሌካ ጊዴና። ጊዶ ኣቲን ናጋራይ ባ ናጋራቴꬃን ኤሬታና ማላ ሎዖ ጊዲዳ ሃኖ ባጋራ ታ ቦላ ሃይቆ ኤሂዴስ። ሄሲካ ናጋራይ ኣዛዞ ባጋራ ካሴፔ ኣꬂ ናጋራ ዳርሲዴስ። ዎጋይ ኣያና ዮዖ ጊዲዳይሳ ኑ ኤሮስ። ታ ቃሴ ናጋራስ ኣይሌ ማላ ባይዜቲዳ ኣሳ። ታኒ ታ ኦꬂዛይሳ ኤሪኬ። ታ ኦꬃና ኮዪዛይሳ ኦꬃ ኤሪኬ ሺን ታ ኢፂዛ ሚሽ ኦꬃይስ። ታ ኦꬃና ኮዮንታ ሚሽ ኦꬂዛ ጊዲኮ ዎጋይ ሎዖ ጊዲዳይሳ ታ ማርካታይስ። ሄሳ ኦꬂዛይ ታና ጊዶንታ ታ ጋꬃን ዲዛ ናጋራይ ኦꬄስ። ታናን ሄሲካ ናጋራንቻ ጊዲዳ ታ ሜꬌቴꬃ ጊዶን ኣይኮ ሎዖ ሚሽ ባይንዳይሳ ታ ኤራይስ። ሎዖ ኦꬃናስ ታስ ኣሞቴꬅ ዴስ ሺን ፖላ ኦꬃ ኤሪኬ። ታ ኦꬂዛይ ኦꬃና ጋዳ ኮዪዛ ሎዖ ኦሶ ጊዴና። ጊዶ ኣቲን ታ ኦꬃና ኮዮንታ ኢታ ኦሶ ኦꬃይስ። ታኒ ኦꬃናስ ኮዮንታይሳ ኦꬂዛ ጊዲኮ ሄሳ ኦꬂዛይ ታና ጊዶንታ ታ ጊዶን ዲዛ ናጋራ። ሄሳ ጊሽ ሃይሲ ዎጋይ ኦሶን ዲዛይሲ ታስ ጌሊዴስ። ሄሲካ ታኒ ሎዖ ኦꬃና ኮያይሲሺን ኢታ ኦꬃይስ። ታኒ ታ ጋꬃራ ፆሳ ዎጋን ኡፋዬታይስ። ጊዶ ኣቲን ታ ኣሳቴꬃ ጊዶን ኦꬂዛ ናጋራ ዎጋይ ታና ቃቺ ኦይኪዲ ታ ቆፋ ዎጋራ ኦሌቲዛ ሃራ ዎጋይ ታ ኣሳቴꬃ ጊዶን ኦꬂሺን ቤያይስ። ታ ኣይ ማላ ላፋ ኣሴ! ሃይሳ ሃይቆስ ኢሜቲዳ ኣሳቴꬃፌ ታና ኣሻናይ ኦኔ? ኑ ጎዳ ዬሱስ ኪርስቶሳ ባጋራ ጋላታይ ፆሳስ ጊዶ። ሂስቲኮ ታኒ ታ ባጋራ ታ ቆፋን ፆሳ ዎጋስ ኣይሌ ጊዳሼ ታኒ ታ ሜꬌቴꬃ ዎጋን ናጋራ ዎጋስ ኣይሌ። ሄሳ ጊሽ ዬሱስ ኪርስቶሳ ኣማኒዛይታ ቦላ ፒርዳይ ዴና። ጋሶይካ ዴዖ ኣያና ዎጋይ ዬሱስ ኪርስቶሳ ባጋራ ናጋራፔ ኢስታ ጌሺዳ ጊሻሳ። ናጋራንቻ ኣሾፔ ዴንዲዳይሳን ዎጋይ ፖላናስ ዳንዳዮንታይሳ ፆሲ ባ ናዛ ናጋራንቻ ኣሳ ሌሚሶን ናጋራስ ያርሼታና ማላ ዬዲዲ ፖሊዴስ። ሂስቲዲ ናጋራ ኢዛ ኣሾን ፒርዲዴስ። ሄሲካ ኑኒ ኣሾን ጊዶንታ ኣያናን ሲሜሬቲዛ ኑፔ ዎጋይ ኮዪዛ ፂሎቴꬃ ፖላናሳ። ኣሾ ሼኔ ማላ ዳና ኮዪዛ ኣሳታ ዎዝናይ ኣሾይ ኮዪዛ ሚሻን ሼምፔስ። ኣያና ሼኔ ማላ ዲዛይቲ ቃሴ ባ ዎዝና ኣያናይ ኮዪዛ ሚሻ ቦላ ዎꬄቴስ። ኣሾስ ፃላላ ቆፋይ ሃይቆ ጊዲሺን ኣያና ዮዖስ ቆፋይ ጊዲኮ ዴዖኔ ሳሮቴꬃ። ናጋራስ ሃሬቲዛ ዎዝናይ ፆሳራ ኦሻ። ጋሶይካ ኢዚ ፆሳ ዎጋስ ሃሬቴናኔ ሃሬታናስ ዳንዳዬና። ኣሾ ሼኔ ማላ ዲዛ ኣሳቲካ ፆሴ ኡፋይሳስ ዳንዳዬቴና። ኢንቴ ቃሴ ፆሳ ኣያናይ ኢንቴናን ዲዛ ጊዲኮ ኣሾን ጊዶንታ ኣያናን ዴታ። ኪርስቶሳ ኣያናይ ኢዛ ቦላ ባይንዳዴይ ኪርስቶሳስ ጊዴና። ኪርስቶሲ ኢንቴ ጊዶን ዲኮ ቃሴ ኢንቴ ኣሳቴꬃይ ናጋራ ጌዶን ሃይቄꬅ ጊዲኮካ ኢንቴ ኣያናይ ቃሴ ፂሎቴꬃ ጋሶን ዴዖን ዴስ። ዬሱሳ ሃይቆፔ ዴንꬂዳ ኢዛ ኣያናይ ኢንቴ ቦላ ዲዛ ጊዲኮ ኪርስቶሳ ሃይቆፔ ዴንꬂዳይሲ ኢንቴ ጊዶን ዲዛ ኢዛ ኣያናይ ሃይቃናስ ዲዛ ኢንቴ ኣሳቴꬃስ ዴዖ ኢማና። ሄሳ ጊሽ ታ ኢሻቶ! ሄሲካ ሃናናይ ዶሳን ጊዴና ሺን ኑ ኣሾ ሼኔ ማላ ዳናስ ኣሾስ ጊዶኮ። ኣሾ ሼኔ ማላ ዲዛ ጊዲኮ ኢንቴ ሃይቃና፤ ኣሾ ኦሶ ኢታዛ ኢንቴ ኣያናን ዎꬊኮ ኢንቴ ዴዖን ዳና። ፆሳ ኣያናን ካሊዛይቲ ኢስቲ ፆሳ ናይታ። ኢንቴ ኤኪዳ ኣያናይ ዛሪዲ ኢንቴና ኣይሌቴꬃን ሃሪዛ ኣያና ጊዶንታ “ኑ ኣዋዉ” ጊ ፄይጊሲዛ ናቴꬃ ኣያና ኤኪዴታ። ኑኒ ፆሳ ናይታ ጊዲዳይሳ፤ ሄ ኣያናይ ባ ባጋራ ኑ ኣያናራ ኢሲፌ ኑስ ማርካቴስ። ኑኒ ፆሳ ናይታ ጊዲኮ ኢዛ ላቲዛይታ። ኑ ኪርስቶሳ ቦንቾዛ ላቲዛይታ ጊዳና ማላ ኣዳፌካ ኢዛራ ኢዛ ሜቶዛ ጊሼቲዛይታ ጊዲኮ ኑ ፆሴ ላቲዛይታ፤ ኪርስቶሳራካ ኢሲፌ ላቲዛይታ። ሃዒ ኑ ኤኪዛ ዋዬይ ቡሮ ኑስ ሲንꬃን ጊጊ ኡቲዳ ቦንቾዛራ ጋꬂ ፄሊሺን ኣይኮካ ጊዴና ጋይስ። ሜꬌቴꬃይ ዉሪካ ፆሳ ናይቲ ቆንጫናይሳ ላሞቴꬃን ናጎን ዴስ። ሜꬌቴꬂ ዉሪካ ሜላ ሃዳ ጊዳና ማላ ፒርዴቲዴስ። ሄሲካ ባ ዶሮን ጊዶንታ ሲንꬃፌስ ሃሬታና ማላ ኢዚ ባ ሼኔ ማላ ሃሪሲዳ ጊሻሳ። ሄሲካ ሜꬌቴꬅ ዉሪካ ꬋይሳ ኣይሌቴꬃፌ ዎዜቲዲ ፆሳ ናይታስ ጊዲዳ ጌዴ ቦንቼቲዳ ሼኔ ማላ ዲዛሶ ጋካናሳ። ሃዒ ጋካናስ ሜꬌቴꬂ ዉሪካ ዳሮ ዋዬን ሚፃቲሼ ዲዛይሳ ኑ ኤሮስ። ኢዛ ፃላላ ጊዶንታ ኮይሮ ፂሎ ኣያና ኢሞታ ዴሚዳ ኑኒካ ኑ ኣሳቴꬃይ ኣታና፤ ኑ ኢዛ ና ጊዳናይሳካ ላሞቲሼኔ ዎዝናራ ሚፃቲሼ ዶስ። ሃይሳ ሃ ሂዶታን ፃላላ ኣቲዶስ። ሂዶታይ ቃሴ ኣይፌን ቤቲዛ ሚሽ ጊዲኮ ቡሮፔ ናጊዛ ሚሽ ጊዴና፤ ሃዒ ባ ኣይፌን ቤዪዛ ሚሺ ቡሮፔስ ናጊዛይ ኦኔ? ጊዶ ኣቲን ኑኒ ቡሮ ኑ ኣይፌን ቤዮንታ ሚሽ ሂዶታን ናጊዛዝ ጊዲኮ ሳሌታይ ባይንዳ ናጎስ። ሄሳꬆካ ቃሴ ኑ ዳቡሪሺን ኣያናይ ኑና ማዴስ። ኑኒ ዎሳ ዎስቲ ዎሳናኮኔ ኤሮንታ ጊሽ ኣያናይ ኑኒ ቃላን ቆንጪሳናስ ዳንዳዬቶንታ ቃላራ ኑስ ዎሴስ። ኑ ዎዝና ፓጪ ኤሪዛ ኣያናይ ኢዚ ኣያና ቆፋ ኤሬስ። ጋሶይካ ኣያናይ ፆሳ ሼኔ ማላ ኣማኒዛ ኣሳስ ኑስ ዎሴስ። ፆሲ ባና ዶሲዛይታሲኔ ኢዛ ሼኔ ማላ ፄይጌቲዳይታስ ኡባስ ኦꬂዛ ሚሽ ዉርሲካ ሎዖስ ኦꬂዛይሳ ኑ ኤሮስ። ፆሲ ካሴፔ ባ ኤሪዛይታ ኢስቲ ኢዛ ናዛ ሚሳታና ማላ ካሴካ ዶሪ ዎꬂዴስ። ሄሲካ ዳሮ ባ ኢሻታ ጊዶፌ ኢዚ ባይራ ጊዳናሳ። ካሴ ኮይሮፔ ባ ዶሪዳይታ ኢስታ ፄይጊዴስ። ቃሴካ ፄይጊዳይታ ፂሊሲዴስ። ባ ፂሊሲዳይታካ ቦንቺዴስ። ሂስቲን ሄሳ ኑ ኣይ ጊኖ? ፆሲ ኑናራ ጊዲኮ ኑናራ ኤቄታናስ ዳንዳዪዛይ ኦኔ? ባ ናዛስ ሚሼቶንታ ኑ ጊሽ ኣꬂ ኢሚዳይ ኢዛ። ሂስቲን ኡባ ሚሽ ኑስ ኢዛራ ኪያቴꬃን ዉርሲ ኣዛስ ኢሜኔ? ፆሲ ዶሪዳይታ ሞቲዛይ ኦኔ? ፂሊሲዛይ ፆሳ። ሂስቲን ፒርዲዛይ ኦኔ? ሃይቂዲ ሃይቆፔ ዴንዲዲ ፆሳ ኡሻቻን ኡቲዳ ዬሱስ ኪርስቶሲ ኑ ጊሽ ጋናቴስ። ኑና ኪርስቶሳ ሲቆፔ ሻካናይ ኦኔ? ሜቶዬ? ዋዬ? ዎይኮ ጎዴቴꬄ? ዎይኮ ጋፋ? ዎይኮ ካሎቴꬄ? ዎይኮ ቆፖንታ ጋኪዛ ሜቶዬ? ማሻ? ሄሲካ ካሴ “ኔ ጊሽ ኑ ሹኬቲዛ ዶርሳ ማላ ቆዴቲዶስ። ጋላስ ኩሜꬅ ኔ ጊሽ ኑኒ ሃይቆራ ባፄታና” ጌቴቲ ፃፌቲዳይሳ ማላ። ኑና ኣዚካ ኢዛፔ ሻኬና። ሃይሳ ኡባን ኑና ሲቂዳይሳን ፆኒዛይታፔካ ኑ ኣꬎስ። ሄሳ ጊሽ ሃይቆ ጊዲን፥ ዴዖ ጊዲን፥ ኪታንቻታ ጊዲን፥ ዎይኮ ሃዒ ዲዛ ሚሽ ጊዲን፥ ቡሮ ያና ሚሽ ጊዲን፥ ዎይኮ ኣይ ዎልቃማ ጊዲን፥ ꬎቃ ጊዲን ዎይኮ ዚቃ ጊዲን፥ ዎይኮ ኣይ ሜꬌቴꬅ ጊዲን ጎዳ ዬሱስ ኪርስቶሳ ባጋራ ኑስ ዲዛ ፆሳ ሲቆፔ ኑና ሻካና ዳንዳዪዛ ሚሺ ባይንዳይሳ ታ ሻካ ኤራዲስ። ታ ዬሱሳ ሱንꬃን ቱሙ ጋይስ፤ ዎርዶቲኬ፤ ታ ዎዝናይካ ፂሎ ኣያና ባጋራ ታስ ማርካቴስ። ታስ ዎዝናፔ ኪቾንታ ጊታ ቆፋይኔ ሚሻይ ዴስ። ታ ዳቦታ ጊሽ ታ ቃንጌታዳኔ ኪርስቶሳፔ ሻኬታዳ ዎራ ዎꬊዳኮ ዶሳይስ። ኢስቲካ ኢስራዔሌ ናይታ፤ ኢስቲ ፆሳ ና ጊዳና ማላ ፆሳ ቦንቾይኔ ጫቆ ቃላይ፥ ዎጋይኔ ፆሳ ኬꬃ ዎጋ ሂዶታይ ኢስታስ ኢሜቲዴስ። ካሴ ኣዋቲካ ኢስታ ባጋ ኪርስቶሲ ኢስታ ዜሬꬃ ዛርኬን ቆዴቴስ። ኢዚካ ኡባፌ ቦላ ጊዲዳ ሜርናስ ጋላቴቲዳ ፆሳ። ኣሚን። ጊዶ ኣቲን ሄሳ ጉሲ ፆሳ ቃላይ ኣቲዴስ ጉሲ ጊዴና። ኢስራዔሌፔ ዬሌቲዳይ ዉሪ ኢስራዔሌ ኣስ ጊዴና። ኣብራሃሜፔ ዬሌቲዳይቲ ኢዛፔ ዬሌቲዳ ጊሽ ዉሪካ ኢዛ ናይታ ጊዴቴናሺን “ኔ ዜሬꬅ ዪሳቃ ባጋራ ፄይጌታና” ጌቴቲዳ ማላ ሃኒዴስ። ሄሳ ጉሲካ ፆሳ ና ጌቴቲዳይቲ ኢስቲ ኣሾን ዬሊዳይታ ጊዴቴና፤ ጊዶ ኣቲን ና ጊዳናይቲ ሂዶታ ቃላን ዮቴቲ ኡቲዳይታ። “ዪዛ ላይꬅ ሃኒ ዎዴ ታ ሃ ሲማና፤ ሳራይካ ኔስ ኣቱማ ና ዬላና” ጌቴቲዲ ኢዛስ ሂዶታ ቃላይ ኢሜቲዴስ። ሄሳ ፃላላካ ጊዴና። ኢርቢቃ ናይቲ ኢሳዴ ናኮ! ኢዚካ ኑ ኣዋ ዪሳቃ። ሜንቴቲ ዬሌቲዲ ቡሮ ኢታ ዎይኮ ሎዖ ኦꬆንታ ዲሺን ፆሳ ቆፋይ ሚናና ማላ፥ ኦሶን ጊዶንታ ፄይጊዳይሳፌ ጊዲዳ ጊሽ “ባይራይ ካሎዛስ ሃሬታና” ጌቴቲዲ ኢርቢቃስ ዮቴቲዴስ። ሄሲካ “ታ ያቆቤ ዶሳዲስ፤ ኤሳዌ ኢፃዲስ” ጌቴቲ ካሴ ፃፌቲዳ ማላ ሃኒዴስ። ሂስቲን ኑ ሃዒ ኣይ ጊኖ? ፆሲ ቤሶንታ ኦጌራ ማዲ ኤሪዜ? ሙሌካ ማዲ ኤሬና። ፆሲ ሙሴስ “ታ ማራና ኮዪዳዴ ማራና፤ ታ ሚሼታና ኮዪዛዴስካ ሚሼታና” ጌስ። ሄሳ ጊሽ ኣሲ ኮይዳ ማላ ጊዶንታ ዎይኮ ኣሳ ዳቡራን ጊዶንታ ፆሲ ማሪዳ ማላ ሃኔስ። ጌሻ ማፃፋይ ፋሮኔ “ታ ዎልቃይ ኔ ቦላ ቤታና ማላኔ ታ ሱንꬂ ቢታ ኡባ ቦላ ዮቴታና ማላ ታ ኔና ሃይሳስ ዴንꬃዲስ” ጌስ። ሄሳ ጊሽ ፆሲ ማራና ኮዪዛዴ ማሬስ። ኢዛ ዎዝና ሙሚሳና ኮዪዛዴ ዎዝና ሙሚሴስ። ኢንቴፌ ኢሳዴይ “ሂስቲን ሃኖይ ሄሳ ማላ ጊዲኮ ኑና ሃኖ ጋካናስ ኣዛስ ዋይሲዜ? ጋሶይካ ኢዛ ሼኔ ዲጋና ዳንዳዪዛይ ኦኔ?” ጋዳ ኔ ኦይቾንታ ኣጋካ። ጊዶ ኣቲን ፆሳስ ዛሮ ዛራ ኢሚዛይ ኔ ኦኔ? “ኦሴቲዳ ሚሽ ዛሪዲ ኦꬂዳይሳ ኔ ታና ኣዛስ ሃይሳꬆ ኦꬃዲ?” ጊ ኤሪዜ? ኡርቃ ሜꬊዛዴይ ሄ ኡርቃፌ ባጋ ቦንቾስ ባጋ ቃሴ ጮ ሂራይሶ ኦሶስ ሜꬋናስ ኢዛ ሼኔ ጊዴኔ? ፆሲካ ባ ሃንቆ ቤሳናሲኔ ባ ዎልቃ ኤሪሳናስ ኮይዲ ኢዛ ሃንቆ ቆንጪሲዛይታ፥ ꬋያናስ ጊጌቲዳይታ ꬋይሶንታ ኣጋጊኮቺ! ኮይሮ ቦንቾስ ጊጊሲዳ ኢዛ ማሮቴꬅ ቤሲዛይታስ ኢዛ ቦንቾ ዱሬቴꬃይ ኤሬታና ማላ ኢዚ ኦꬃናሳ። ፄይጊዳዴይ ኣይሁዳታ ባጋፌ ፃላላ ጊዶንታ ኣይዛቤታ ባጋፌ ጊዲዳ ኑናካ ኣሾንታ ፄይጊዴስ። ሆሴዔ ማፃፋን “ታ ዴሬ ጊዶንታይታ ታኒ ‘ታ ዴሬታ’ ጋ ፄይጋና፤ ዶሴቶንታይታ ኢስታ ታ ‘ዶሴቲዳይታ’ ጋዳ ፄይጋና። ቃሴካ ‘ኢንቴ ታ ዴሬ ዴኬታ’ ጌቴቲ ዮቴቲዳሶን ሄንካ ‘ኢስቲ ዴዖ ፆሳ ናይታ’ ጌቴቲ ፄይጌታና።” ኢሳያሲካ ኢስራዔሌ ናይታ ጊሽ “ኢስራዔሌ ናይታ ቆዳይ ኣባ ኣጬ ማላ ዳሪኮካ ጉꬃቲ ፃላላ ኣታና። ጎዳይ ባ ፒርዳ ቢታ ቦላ ኤሌ ፒርዳና” ጊ ዮቲዴስ። ሄሲካ “ዎጋ ጎዳይ ኑስ ዜሬꬅ ኣሾንታኮ ኑካ ሶዶሜ ካታማ ማላኔ ጋሞራ ካታማ ማላ ꬋያናሺን” ጌቴቲዲ ካሴ ኢሳያሳ ዱናን ዮቲዳይሳ ማላ ሃኒዴስ። ሂስቲን ኑ ኣይ ጊኖ? ኣማኖን ቤቲዳ ፂሎቴꬅ ዴማናስ ኣይዛቤይ ዳቡሮንታ ዴሚዴስ። ጊዶ ኣቲን ፂሎቴꬃ ዎጋ ካሊዛ ኢስራዔሌ ናይቲ ዴሚቤቴና። ሄሲ ኣዛስ ሄሳꬆ ሃኒዴ? ኢስቲ ኣማኖን ጊዶንታ ኦሶን ዴማና ካሊዳ ጊሻሳ። ኢስቲካ ꬉጴ ሹቻን ꬉጴቲዳ። ሄሲካ “ሄኮ ኣሳ ꬉጲዛ ሹች ኢስታ ኩንዲሲዛ ዛላ ፂዮኔ ቦላ ታ ዎꬃና፤ ኢዛን ኣማኒዛዴይ ዬላቴና” ጌቴቲዲ ካሴ ጌኤሻ ማፃፋን ፃፌቲዳይሳ ማላ ሃኒዴስ። ታ ኢሻቶ! ኢስራዔሌ ናይታ ጊሽ ታ ኣሞይኔ ታ ፆሴ ዎሲዛይ ኢስቲ ꬋዮንታ ኣታናሳ። ኢስቲ ፆሳ ዮዖስ ሚሼቲዛይታ ጊዲዳይሳ ታ ኢስታ ጊሽ ማርካታና ዳንዳያይስ፤ ኢስታ ሚሼቴꬂ ጊዲኮ ኤራቴꬃን ጊዴና። ፆሲ ኣስ ፂሊሲዛ ኦጌ ኤሮንታ ኣጊዲ ባ ፂሎቴꬃስ ኦጌ ካሊዳ ኣቲን ፆሳ ፂሎቴꬃ ኦጌ ካሊቤቴና። ኣማኒዛ ኣሳ ኡባ ፂሊሳናስ ኪርስቶሲ ዎጋ ኡባ ፖሊዴስ። ሙሴይ ዎጋ ባጋራ ቤቲዛ ፂሎቴꬃ ጊሽ ኤሪሲሼ “ሃይታ ዎጋታ ፖሊ ኦꬂዛዴይ ሃ ዎጋታን ዳና” ጊዛይሳ። ኣማኖን ቤቲዛ ፂሎቴꬂ ቃሴ ሂዝጌስ “ኔ ዎዝናራ ፑዴ ሳሎ ኦኔ ኬዛናይ? ጎፓ” ሄሳꬆ ጉሲ ኪርስቶሳ ሳሎፔ ዱጌ ሃ ዎꬃና ጉሳ። ዎይኮ “ ‘ዱጌ ጪማን ኦኔ ዎꬋናይ?’ ጎፓ!” ሄሲካ ኪርስቶሳ ሃይቆፔ ቡሮ ዴንꬃና ጉሳ። ጊዶ ኣቲን ቃላይ ኣይ ጊዜ? “ቃላይ ኔ ኣቻን ዴስ።” ኔ ዱናኒኔ ኔ ዎዝናን ዴስ። ኑኒ ኣማኖ ጊሽ ሳባኪዛ ቃላይ ሃይሳ። ኔኒ ኔ ዱናራ “ዬሱሲ ጎዳ” ጋዳ ማርካቲኮ ፆሲ ኢዛ ሃይቆፔ ዴንꬂዳይሳ ኔ ዎዝናን ኔ ኣማኒኮ ኣታና። ኔኒ ፂላናይ ዎዝናን ኣማኒኮኔ ኣታናይ ኔ ዱናራ ማርካቲና። ጌሻ ማፃፋይ ጊዛ ማላ “ኢዛን ኣማኒዛይ ዉሪካ ዬላቴና።” ኣይሁዳታ ጊዶኒኔ ኣይዛቤታ ጊዶን ዱማቴꬂ ዴና፤ ኢሲ ጎዳይ ኡባስካ ጎዳ፤ ኢዛ ዎሲዛይታ ጉጂ ኣንጄስ። “ጎዳ ሱንꬅ ፄይጊዛይቲ ዉሪካ ኣታና” ጌቴቲ ጌሻ ማፃፋን ፃፌቲዴስ። ሂስቲን ኢዛ ኣማኖንታይቲ ኢዛ ዎዝጊ ፄይጋኔ? ቃሴ ኢዛ ጊሽ ሲዮንታ ዲሼ ዎስቲ ኣማናኔ? ሳባኬይ ባይንዳ ዲሺን ዎስቲ ሲያኔ? ኪቴቶንታ ዎስቲ ሳባካንዴቶ? ሄሲካ “ሚሺራቾ ቃላ ኤኪ ዪዛይታ ዩሲ ኣይ ማላ ሎዖ” ጌቴቲ ጌሻ ማፃፋን ፃፌቲዳ ማላ ሃኒዴስ። ጊዶ ኣቲን ሲዪዳይቲ ዉሪካ ሚሺራቾ ቃላ ኤኪቤቴና፤ ኢሳያሲ “ጎዶ ኑ ዮቲዳይሳ ኦኒ ኣማኒዴ?” ጊዳ ማላ ሃኒዴስ። ሄሳ ጊሽ ኣማኖይ ቤቲዛይ ዮቲዛ ቃላ ሲዬꬃና። ዮቴቲዛ ቃላይካ ኪርስቶሳ ጊሽ ዮቲዛ ቃላፔ። ጊዶ ኣቲን ኣሳይ ሲይቤኔሻ? ጋዳ ታ ኦይቻይስ፤ ቱማፔ ኣሳይ ሲይዴስ፤ ጌሻ ማፃፋን ፃፌቲዳ ማላ “ኢስታ ቃላይ ቢታ ኡባኒኔ ኣላሜ ጋፃ ጋካናስ ሲዬቲዴስ።” ታ ቃሴካ ኦይቻይስ፤ ኢስራዔሌ ናይቲ ቃላ ኤሪቤቴኔሻ? ኮይሮ ሙሴይ ኢስታስ “ታ ዴሬ ጊዶንታይታን ታ ኢስታ ኣሞሲሳና፤ ዩሺ ቆፖንታ ዴሬታን ታ ኢስታ ዪሎቻና” ጊዴስ። ኢሳያሲካ ፃላቴꬃን “ታና ኮዮንታይታስ ታ ቤታዲስ፤ ታና ኦይቾንታይታስ ታና ቆንጪሳዲስ” ጊዴስ። ኢስራዔሌ ጊሽ ቃሴ “ታስ ኣዛዜቶንታ ዴሬኮኔ ታስ ኤኖ ጎንታ ዴሬኮ ኩሜꬃ ጋላስ ታ ኩሼ ሚጫዲስ” ጌስ። ሂስቲን ፆሲ ባ ዴሬታ ዬጊ ኣጊዴ? ጋዳ ታ ኦይቻይስ፤ ሙሌካ ኣጊቤና፤ ታካ ታ ባጋራ ቢኒያሜ ዛሪኬ፥ ኣብራሃሜ ዜሬꬅ ጊዲዳ ኢስራዔሌ ኣሳ። ፆሲ ኮይሮፔ ባ ኤሪዳ ዴሬዛ ዬጊቤና። ኤላሲ ኢስራዔሌ ናይታ ቦላ ሞቶ ፆሳኮ ዎስቲ ሺሺዳኮኔ ጌሻ ማፃፋይ ኢዛ ጊሽ ኣይ ጊዛኮ ኢንቴ ኤሬኬቲ? “ጎዶ! ኢስቲ ኔ ናቤታ ዎꬊዳ። ኔስ ያርሺዛሶታካ ላሊዳ። ቃሴ ታኒ ታርካ ኣታዲስ። ታናካ ዎꬋና ጌቴስ” ጊዴስ። ፆሲ ኢዛስ “ባዓሌ ጌቴቲዛ ኤቃስ ጎይኖንታይታ ላፑን ሺ ኣስ ታኒ ታስ ኣሻዲስ” ጊ ዛሪዴስ ሄሳ ማላካ ሃዒ ሃ ዎዴዛንካ ፆሳ ኪያቴꬃን ኢስራዔሌ ኣሳፔ ዶሬቲ ኣቲዳ ጉꬃቲ ዴቴስ። ሂስቲን ሄሲ ፆሳ ኪያቴꬃን ጊዲኮ ኣሳ ኦሶን ጊዴና። ኣሳ ኦሶን ጊዲዳኮ ፆሳ ኪያቴꬂ ኪያቴꬅ ጊዴና። ሂስቲን ኣይ ጋኔ? ኢስራዔሌ ናይቲ ሎዔꬂ ኮዪዳይሳ ዴሚቤቴና። ፆሳን ዶሬቲዳይቲ ጊዲኮ ዴሚዳ። ሃንኮ ኣቲዳይታ ዎዝናይ ሙሚዴስ። ካሴ “ኢስታ ኣይፌይ ፄሎንታ ማላ፥ ኢስታ ሃይꬃይካ ሲዮንታ ማላ ፆሲ ሃኖ ጋካናስ ኢስታስ ዶጪሲዛ ኣያና ኢሚዴስ” ጌቴቲ ጌሻ ማፃፋን ፃፌቲዳ ማላ። ዳዉቴይካ “ኢስታ ማዳይ ኢስታ ኦይኪዛ ናርፃኔ ያርዴ፤ ኢስታስ ꬉጲዛዚኔ ቂፃቴ ጊዶ። ኢስታ ኣይፌይ ፄሎፎ፤ ጎዜቶ፤ ኢስታ ዞኮይ ሜርናስ ኩኖ” ጊዴስ። ኣኔ ቃሴ ታ ዛራ ኦይቻይስ፤ ኢስራዔሌ ኣሳይ ናምዓንꬆ ኩንዴꬃፌ ዴንዴኔ? ዴንዳና። ሃራፔካ ኢስራዔሌ ናይታ ቃናቲሳና ጊሽ ኢስታ ሞሮ ጋሶን ኣቶቴꬂ ኣይዛቤታስ ጋኪዴስ። ጊዶ ኣቲን ቃሴ ኢስታ ሞሮይ ኣይዛቤታስ ኣንጆ ጊዲዴስ። ኢስታ ኩንዴꬂካ ቃሴ ኣይዛቤታስ ኣንጆ ጊዲኮ ኢስቲ ሲሚ ኣቲዳኮ ኣይ ማላ ጊታ ኣንጆ ጊዳንዴሺን! ኣይዛቤቶ! ታ ኢንቴስ ዮታይስ፥ ታ ኣይዛቤታስ ኪቴቲዳዴ ጊዲዳ ጊሽ ታ ኦሶዛ ሚናዳ ፖላና። ሄሲካ ታ ባጋ ኣሳቲ ኣሞዛና ማላ ዴንꬄꬃዳ ኢስታፌ ጉꬃ ኣሳታ ኣሻናስ ኡፋይሳ ኦꬃይስ። ፆሲ ኢስታ ኣጊዳ ኣይዛቤቲ ፆሳራ ጊጊኮ ፆሲ ኢስራዔሌ ናይታ ዛሪዲ ኤኪዛ ዎዴ ኢንቴስ ኣዚ ሃናና ሚሳቲዜ? ሄሳ ጉሲ “ሃይቆፔ ዴንዲዴስ” ጉሳ ማላ። ኮይሮ ቡኬሶይ ሎዖ ጊዲኮ ሃንኮ ኢዛፔ ኦሴቲዛይስ ዉሪካ ሎዖ ጊዴስ። ሄሳꬆካ ኢሲ ሚꬃ ፃጶይ ሎዖ ጊዲኮ ሃንኮ ኢዛ ቦላ ዲዛ ሃጋቲካ ሎዖ ጊዴቴስ። ኬꬃ ማታን ዲዛ ዎጋራ ሚꬃ ሃጋታ ማላቲ ኢንቴ ሜቂ ዎꬊን ሃንኮ ዎራን ዲዛ ዎጋራ ሚꬃታ ሚሳቲዛ ኣይዛቤቲ ኢንቴ ኪቾሳን ጊዲዲ ኢንቴ ሃሮኔ ኢንቴ ኣንጆ ሻኪ ኤኪዛዴንታ ጊዲኮ፤ ሄይታ ሄ ሜቂ ዎꬊዳ ሃጋታ ቦላ ኦቶሬቶፋ። ኢንቴ ኢስታ ቦላ ኦቶሬቲኮ ቃሴ ሃኖ ዎዝናን ዎꬂቴ። ሄ ሚꬃ ቶኪዳይ ኔና ጊዳካ። ሚꬃይ ኔና ቶኪዴስ ኣቲን። ሂስቲኮ “ሄ ሃጋቲ ሜቂ ዎꬊዳይ ኑኒ ኢስቲ ኪቾሳን ጌላና ማላሳ” ጎንታ ኣጌኬታ። ቱሙ ጊዴታ ሺን ኢስቲ ሜቂዳይ ኣማኖ ፓጬፔ ዴንዲዳይሳና። ኢንቴ ቃስ ኣማኖን ኤቂዴታ። ባቢቴ ኣቲን ኦቶሬቶፍቴ። ፆሲ ኮይሮፔ ዲዛ ሃጋታስ ሚሼቶንታዴ ጊዲኮ ኢንቴስካ ሚሼቴና። ሄሳ ጊሽ ፆሳ ኪያቴꬂኔ ኢዛ ሜንፄ ኢታቴꬃ ኣኔ ፄላ። ኢዛ ሜንፄ ኢታቴꬃይ ኩንዲዳይታ ቦላ። ኢዛ ኪያቴꬃይ ቃሴ ኢንቴ ኢዛ ቃꬌቴꬃ ጋርሳን ዲዛ ዎዴ ጋካናስ ፃላላ። ሄሲ ባይንዳ ኣጊኮ ኢንቴካ ቃንፄታና። ኢስቲ ኣማኖንታ ሚኒ ኤቂዳሶፔ ሲሚኮ ካሴ ባሶ ሲሚ ጌላና። ፆሲካ ኢስታ ዛርሲ ጌልꬃና ዳንዳዬስ። ኢንቴ ባዞ ዎጋራ ሚꬃፌ ቃንፄቲዳይቲ ካሴ ኢንቴ ሜꬌቴꬃፌ ጊዶንታ ሎዖ ሚꬃን ኢንቴ ጌላና ዳንዳዪኮ ኮይሮፔ ባ ሜꬌቴꬃ ሃጋታ ጊዲዳይቲ ሄይቲ ካሴ ኢዛ ቦላ ዲዛ ዎጋራ ሚꬃን ሲሚ ጌሎይ ኢስታስ ዋኒ ሃኔኔ? ታ ኢሻቶ! ኢንቴ ጪንጫ ኣስ ጊዲዳይሳ ኢንቴስ ሚሳቶንታ ማላ ሃይሳ ጊዶ ፁራ ዮዖዛ ኢንቴ ኤሮንታ ኣታና ማላ ታ ኮዪኬ። ሄሲካ ኣይዛቤታፔ ፄይጌቲዳይቲ ዉሪ ኣማናና ጋካናስ ኢስራዔሌ ናይታ ዎዝናይ ሙሚዴስ። ሄሳ ጊሽ ኢስራዔሌ ናይቲ ዉሪካ ኣታና። “ኣሺዛዴይ ፂዮኔፔ ያና፤ ያቆቤፔካ ኢታቴꬅ ዲጋና። ታኒ ኢስታ ናጋራ ዉርሳ ꬋይሲዳፔ ጉዬ ታ ኢስታራ ጫቆን ጌሊዛ ቃላይ ሄሳ” ጌቴቲዲ ካሴ ጌሻ ማፃፋን ፃፌቲዳ ማላ ሃኒዴስ። ኢንቴስ ኣይዛቤታስ ሚሺራቾ ቃላይ ጋካና ማላ ኢስራዔሌ ናይቲ ፆሳን ኢፄቲዳ ኣስ ጊዲዳ። ጊዲኮካ ካሴ ዶሮ ማላ ጊዲኮ ባ ኣዋታ ባጋራ ኢስቲ ዶሴቲዳይታ። ፆሲ ዶሪዳፔኔ ባ ኪያቴꬅ ኢሚዳፔ ጉዬ ባ ኦꬂዳ ሚሻን ሲሚዲ ሞꬌቴና። ኢንቴካ ካሴ ኣዛዜቶንታይታኮ! ኢስቲ ኣዛዜቶንታ ኢፂን ሃዒ ኢንቴና ማሪዳይሳꬆ፤ ፆሲ ኢንቴና ማሪዳ ጌዶን ኢስቲካ ማሬታና ማላ ሃዒ ኣዛዜቶንታይታ ጊዲዳ። ፆሲ ዉርሲካ ማራናስ ኣሲ ዉሪካ ኣዛዜቶንታ ማላ ጎርዲዴስ። ፆሳ ዱሬቴꬃይ፥ ኣꬎ ኤራቴꬃይኔ ኢዛ ኤራቴꬃይ ኣይ ማላ ጪማ! ኢዛ ፒርዳይ ኣይ ማላኮኔ ፓጬቴና። ኢዚ ኣꬊዳ ጌዶይካ ኤሬቴና። “ጎዳ ዎዝና ኤሪዳይ ኦኔ? ኢዛስ ዞሬ ኢሚዳይ ኦኔ? ፆሲ ዛሪ ኢማና ማላ ኢዛስ ታልዔ ኢሚዳይ ኦኔ?” ጌቴቲ ፃፌቲዳ ማላ። ዉሪካ ኢዛፔ፥ ኢዛን፥ ኢዛሳ፤ ኢዛስ ቦንቾይ ሜርናፔ ሜርናስ ጊዶ! ኣሚን። ሄሳ ጊሽ ታ ኢሻቶ! ኢንቴ ኣሳቴꬃ ጌሺኔ ፆሴ ኡፋይሲዛ ዴዖ ያርሾ ኦꬂዲ ኢንቴ ሺሻና ማላ ታ ኢንቴና ፆሳ ቃꬌታን ዎሳይስ። ሄሲካ ዎዝናማ ኣሳ ማላ ኢንቴ ፆሳስ ኦꬂዛ ኦሶ። ሎዖ፥ ኡፋይሲዛዚኔ ኩሜꬅ ጊዲዳ ፆሳ ሼኔይ ኣዛኮኔ ኢንቴ ፓጪ ኤራና ማላ ኢንቴ ቆፋን ኦራፂዲ ላሜቲቴ ኣቲን ሃይሳ ኣላሜ ኣሳ ሚሳቶፒቴ። ኢንቴስ ፆሲ ኢሚዳ ኣማኖ ማላ ኢንቴርካ ኢንቴና ፓጪ ፄሊቴ ኣቲን ሃዒ ዲዛይሳፌ ቦላራ ኢንቴና ꬎቂሲ ፄሎንታ ማላ ታኒ ታስ ኢሜቲዳ ፆሳ ኪያቴꬃን ኢንቴና ኢሳ ኢሳ ዞራይስ። ኑፔ ኢሲ ኢሲ ኣሳስ ኢሲ ኣሳቴꬃ ቦላ ዳሮ ቢሊቴቲ ዲዛ ማላ ሄይቲካ ሄ ቢሊቴቲ ኢሲ ማላ ኦሶ ኦꬆንታይሳꬆ፤ ሄሳꬆካ ኑኒ ዳሮታ ጊዲ ኡቲዲ ኪርስቶሳን ኢሲ ኣሾ፤ ኑኒ ኢሶይ ኢሳስ ኣሾ። ኑስ ኢሜቲዳ ኢሞታ ማላ ዱማ ዱማ ኢሞቴꬂ ዴስ። ኢሳዴስ ቡሮፔ ሃናናዝ ዮቶ ጊዲኮ ኢዛዴስ ኢሜቲዳ ኣማኖ ማላ ዮቶ። ኦꬂ ማዲዛዴይ ኦꬂ ማዶ፤ ታማርሲዛዴይካ ታማርሶ። ዞሪዛዴይ ጊዲኮ ዞሮ፤ ባይንዳይታስ ኢሚዛዴይ ጉጂ ኢሞ። ኣይሲዛዴይ ሚኒ ኣይሶ። ማሪዛዴይካ ኡፋይሳን ማሮ። ኢንቴ ሲቆቴꬂ ቆꬌፔ ቆሞን ጊዶፖ። ኢታ ጊዲዳይሳ ዉርሲካ ኢፂቴ። ሎዖ ጊዲዳይሳራ ኢሲፌ ኦይኬቲቴ። ኢንቴ ኢንቴ ጋርሳን ኢሶይ ኢሳራ ኢሻታ ማላ ሎዔꬂ ሲቄቲቴ። ኢሶይ ኢሳ ባፔ ኣꬂ ቦንቺዛይታ ጊዲቴ። ጎዳስ ኦꬃና ኣያናን ፁጌቲዛይታ ጊዲቴ ኣቲን ሄሳ ሄ ሚኖቴꬃፌ ጉዬ ጎፒቴ። ሂዶታን ኡፋዬቲዛይታ ጊዲቴ፤ ሜቶ ዳንዳዪቴ፤ ዎሳን ሚኒቴ። ኣማኒሼ ዋዬቲዛይታስ ኢንቴስ ዲዛይሳፌ ሻኪ ኢሚቴ። ኢማꬅ ሞኪቴ። ኢንቴና ቃንጊዛይታ ኣንጂቴ ኣቲን ቃንጎፍቴ። ኡፋዬቲዛይታራ ኡፋዬቲቴ፤ ሙዞቲዛይታራ ሙዞቲቴ። ኢንቴ ኢንቴ ጋርሳን ዶሴቴꬃን ዲቴ። ማንቆታራ ኢሲፌቴꬃን ዳናስ ኮዪቴ ኣቲን ኦቶሬቶፊቴኔ ጬቄቶፍቴ። ኦናስካ ኢታ ጊሽ ኢታ ዛሮፒቴ። ኣሳ ኡባ ኣቻን ሎዖ ሚሽ ኦꬃናስ ሚኒቴ። ኢንቴስ ዳንዳዬቲኮ ኢንቴ ኢንቴ ባጋራ ኣሳ ኡባራ ሳሮን ዲቴ። ታ ሲቆቶ! ኢንቴ ሃሎ ፆሲ ኬሶ ኣቲን ኢንቴርካ ሃሎ ኬሶፍቴ “ሃሎ ኬሳናይ ታና ጌስ ጎዳይ” ጌቴቲ ጌሻ ማፃፋን ፃፌቲዴስ። ሃሎ ኬሳናፔ “ኔኒ ኔ ሞርኬይ ጋፊኮ ሚዛ፤ ኢዚ ሳሞቲኮ ኡሻ፤ ኔ ሄሳꬆ ኦꬂኮ ታማ ቦንቆ ኢዛ ቦላ ኮራሳ” ጌቴቲዲ ጌኤሻ ማፃፋን ፃፌቲዴስ። ኢታ ሎዖ ኦሶን ፆና ኣቲን ኢታን ፆኔቶፋ። ኣይ ኣሲካ ባና ኣይሲዛ ዳናታስ ሃሬታናስ ቤሴስ። ፆሳፌ ኢሜቶንታ ዲሺን ዳናቴꬂ ዴና። ሃዒ ዲዛ ዳናቲ ፆሳፌ ዳናቲዳይታ። ሄሳ ጊሽ ዳና ቦላ ማካሊዳይ ፆሳ ዎጋ ቦላ ማካሌስ። ሄ ማካሊዛይቲካ ባ ቦላ ፒርዳ ኤሄቴስ። ዴሬ ኣይሲዛይቲ ኢታ ኦꬂዛይታ ባቢሴቴስ ኣቲን ሎዖ ኦꬂዛይታ ባቢሴቴና። ኔ ዴሬ ኣይሲዛዴስ ባቦንታ ኣጋና ኮያይ? ሂስቲኮ ሎዖ ኦꬃ፤ ኢዚካ ኔና ጋላታና። ኢዚ ኔስ ሎዖ ኦꬃናስ ፆሳ ኦሳንቻ። ጊዶ ኣቲን ኔ ኢታ ኦꬂዳ ጊዲኮ ኢዛስ ባባ። ጋሶይካ ኢዚ ማሻ ጮ ሜላ ጊፂቤና፤ ኢዚ ኢታ ኦꬂዛዴ ቃፃያናስ ፆሳ ኦሳንቻ። ሄሳ ጊሽ ኢዛ ቂፃቴስ ባቦ ፃላላ ጊዶንታ ኔ ቆፋንካ ዳናቲዛዴስ ኣዛዜታናስ ቤሴስ። ኢንቴ ጊራ ኢሚዛይ ሄሳሳ። ኣይሲዛይታ ሄሳ ሄ ኦሶዛ ቦላ ፆሲ ኢስታ ዎꬂዴስ። ኢስታፌ ኢሳስ ኢሳስ ቤሲዛይሳ ኢሚቴ። ጊራ ኢማና ቤሲዛይታስ ጊራ ኢሚቴ፤ ቃራፃ ቃንፃናስ ቤሲዛይታስ ቃራፃ ቃንፂቴ፤ ባባናስ ቤሲዛይታስ ባቢቴ፤ ቦንቻናስ ቤሲዛይታ ቦንቺቴ። ኢንቴ ጋርሳን ኢሶይ ኢሳራ ሲቄቴꬃፌ ኣቲን ኦና ቦላካ ኣጮይ ዶፖ። ኣስ ሲቂዛ ኣሲ ኢዚ ዎጋ ፖሊዴስ። “ላይማቶፓ፥ ዎꬎፓ፥ ኣሞቶፋ” ጊዛይቲኔ ሃራ ኣዛዞቲ ዲኮካ “ኣስ ኡባካ ኔ ማላ ሲቃ” ጊዛ ሃኖ ኢሲ ዎጋን ዉሪካ ኩዬቲዴስ። ሲቆይ ኣሳ ቦላ ኢታ ኦꬄና፤ ሄሳ ጊሽ ሲቆይ ዎጋ ኡባስ ኩሻ። ሃይሳ ዎዴዛ ጫዲ ፄሊዲ ሄሳ ኦꬂቴ። ሃዒ ሃና ኢንቴ ꬊስኮፌ ዴንዲዛ ዎዴ። ኑ ካሴ ኣማኖሳፔ ሃ ሲሚን ሃዒ ኑስ ኣቲዛ ዎዴይ ማቲዴስ። ቃማይ ኣꬊን ዎንታና ጌስ። ሄሳ ጊሽ ኣኔ ኑ ꬉማ ኦሶ ዎራ ዬጊዲ ፖዖ ኦላ ሚሺ ማይዖስ። ጋላሳራ ሃሙቲዛ ማላ ኣኔ ዎጋራ ሃሙቶስ። ማጉልꬃኒኔ ማꬆን ጊዶፖ፤ ላይማ ኣሞኒኔ ላይማን ጊዶፖ፤ ቃናቴቴꬃኒኔ ፓላማን ጊዶፖ። ሄሳ ኣጊዲ ዬሱስ ኪርስቶሳ ማይዒቴ። ኣሾ ኣሞ ፖላናስ ቆፖፍቴ። ኢንቴ ጋርሳን ኣማኖን ቡሮ ሚኖንታዴ ሺሺ ኤኪቴ ኣቲን ኢዛ ቆፋ ቦላ ፒርዶፍቴ። ኢሲ ኢሲ ኣሲ ቤቲዳይሳ ዉርሲ ማናስ ኣማኖይ ዴስ። ቃሴ ኣማኖን ሚኖንታዴይ ኣታኪልቴ ፃላላ ሜስ። ቤቲዳይሳ ዉርሲ ሚዛዴይ ዉርሲ ሞንታዴ ካꬎፓ። ሞንታዴይ ቃሴ ሚዛዴ ቦላ ፒርዶፎ። ፆሲ ኡባካ ኤኪዴስ። ሃንኮ ኦꬂዛዴ ቦላ ፒርዲዛዴይ ኔ ኦኔ? ኢዛዴይ ኩንዲኮ ዎይኮ ኤቂኮካ ጎዳሳ። ጎዳይ ኢዛ ኤሳናስ ዳንዳዪዛ ጊሽ ኢዚ ኤቃንዴስ። ኢሳዴይ “ጋላሳታፔ ኢሲ ጋላስ ሃራ ጋላሳፌ ኣꬂዲ ባሲ ዱማ ጋላስ” ጊ ቆፔስ። ሃራ ኣሲ ቃሴ “ጋላሳቲ ዉሪካ ኢሲ ጊና” ጊ ቆፔስ። ኢሲ ኢሲ ኣሲ ባ ዎዝናን ኣማኒዳ ማላ ኦꬆ። ኢሲ ጋላሲ ሃራ ጋላሳፌ ዱማሲ ቆፒዛዴይ ኢዚ ሄሳ ኦꬂዛይ ጎዳ ቦንቾስ ጊዲኮ ሚዛዴይካ ጎዳ ቦንቾስ ጊዲ ሜስ። ሚዲ ፆሴ ጋላቴስ። ሞንታዴይካ ጎዳ ቦንቾስ ጊዲ ሙስ ኣጌሲኔ ፆሳስ ጋላታ ኢሜስ። ኑፔ ኦኒካ ባሲ ዲዛዴይኔ ባፔ ባሲ ሃይቂዛዴይ ዴና። ኑ ዲኮካ ጎዳስ ዶስ። ሃይቂኮካ ጎዳስ ሃይቆስ። ሄሳ ጊሽ ዲኮካ ዎይኮ ሃይቂኮ ኑ ጎዳሳ። ሄሳ ጊሽ ሃይቂዳይታሲኔ ፓፃ ዲዛይታስ ጎዳ ጊዳናስ ኪርስቶሲ ሃይቂዲ ሃይቆፔ ፓፂ ዴንዲዴስ። ሂስቲን ኔ ኣዛስ ኔ ኢሻ ቦላ ፒርዳይ? ኣዛስ ኔ ኢሻ ሌቃይ? ኑ ዉሪካ ፆሳ ፒርዳ ዎምቦራ ሲንꬅ ሺቆስ ዶስ። “ታ ፓፃ ዳይስ። ጉልባቴይ ዉሪካ ታስ ጉልባታና። ኢንፃርሲ ዉሪ ፆሳስ ማርካታና” ጌቴቲ ካሴ ጌሻ ማፃፋን ፃፌቲዴስ። ሄሳ ጊሽ ኑኒ ኢሲ ኢሲ ኣሲ ፆሳ ሲንꬅ ሺቂዲ ኑ ኦሶ ጊሽ ኢዛስ ዛሮ ኢማና። ሄሳ ጊሽ ኑኒ ኑ ጋርሳን ኢሶይ ኢሳ ቦላ ፒርዳናፔ ኣኔ ናጌቶስ። ሄሳ ኣጊዲ ኑ ኢሻስ ꬉጴ ጊዲዛይሳ ዎይኮ ኢዛ ኦይኪዛ ናርፃ ዎꬆንታ ማላ ኣኔ ኑ ናጌቶስ። ታኒ ጎዳ ዬሱሳን ኣማናዳ ሚዛ ካꬃን ቱናይ ባይንዳይሳ ኤራዲስ። ጊዶ ኣቲን ኢሳዴይ ኢሲ ሚሽ ቱና ጊ ቆፒኮ ሄ ሚሻይ ኢዛዴሲ ቱና። ኔኒ ኔ ኢሻ ሚዛ ካꬃ ጌዶን ꬉጴ ጊዲኮ ሲቆን ሲሜሬታባካ። ኪርስቶሲ ኢዛ ጊሽ ሃይቂዳ ኔ ኢሻ ኔ ሚዛ ካꬃ ጋሶን ዎꬎፓ። ኢንቴ ሎዖ ጊዲ ቆፒዛ ሚሽ ኢታ ጌቴታና ማላ ኦꬆፍቴ። ፆሳ ካዎቴꬂ ፂሎ ኣያናን ቤቲዳ ፂሎቴꬅ፥ ሳሮቴꬂኔ ኡፋይሳፌ ኣቲን ሙሳ ዮዖኔ ኡሻ ዮዖ ጊዴና። ሃይሳꬆ ኪርስቶሳስ ኦꬂዛዴይ ፆሴ ኡፋይሴሲኔ ኣሳ ኣቻንካ ጋላቴቴስ። ሄሳ ጊሽ ሳሮቴꬂ ቤቲዛ ኦጌኔ ኑኒ ኑ ጋርሳን ሎዖናስ ቤሲዛ ኦጌ ኣኔ ኮዮስ። ኑኒ ሚዛ ካꬃ ጊሽ ጊዲ ፆሳ ኦሶ ኣኔ ላሎኮ። ካꬂ ዉሪካ ጌሻ። ጊዶ ኣቲን ሃራ ኣሳስ ꬉጴ ጊዲዛ ካꬅ ሙሲ ባላ ኦሶ። ኔ ኢሻስ ꬉጴ ጊዲዛዚ ጊዲኮ ኣሾካ ማናፔኔ ዎይኔ ጫጄ ኡያናፔ ዎይኮ ኣይ ሚሺካ ኔ ኦꬆንታ ኣጊኮ ሎዖ። ሄሳ ጊሽ፥ ሃይታንታ ሚሳቲዛ ሚሻታስ ኔስ ዲዛ ኣማኖይ ኔ ጊዶኒኔ ፆሳ ጊዶን ዴዖ። “ሃይሲ ሊኬኮ” ጊዲ ኣማኖን ኤኪዳ ሚሻን ባርካ ባ ቦላ ፒርዶንታዴይ ኢዛዴይ ኣንጄቲዳዴ። ጊዶ ኣቲን ዎዝናራ ሲꬊሼ ሚኮ ኢዚ ኣማኖን ሞንታ ጊሽ ኢዛ ቦላ ፒርዴቲዴስ። ኣማኖን ኦꬆንታዚ ዉሪካ ናጋራ። ኑኒ ኣማኖን ሚኒዳይቲ ሃንኮ ኣማኖን ሚኖታይታ ሜቶ ቶካናስ ቤሴስ ኣቲን ኑ ፃላ ኡፋዬቲዛይታ ጊዳናስ ቤሴና። ኑኒ ዉሪካ ሃራ ኣሲ ባ ኣማኖን ሚናና ማላ ኢዛ ጎዒዛዚኔ ኡፋይሲዛ ሚሽ ኣኔ ኦꬆስ። ኪርስቶሲ ባና ኡፋይሲቤና፤ ሃራፔካ “ኣሳይ ኔና ጫዪዳ ጫሻይ ታና ጋኪዴስ” ጌቴቲ ካሴ ጌሻ ማፃፋን ፃፌቲዳይሲ ፖሌቲዴስ። ኑኒ ጌሻ ማፃፋታፔ ዴሚዛ ዳንዳያይኔ ሚኖቴꬂ ኑስ ዳና ማላ ኮይሮፔ ፃፌቲዳይሲ ዉሪካ ኑ ኢዛፔ ኑስ ቲሚርቴ ዴማና ማላ ፃፌቲዴስ። ሚኖቴꬂኔ ዳንዳያ ኢሚዛ ፆሲ ኢንቴ ዬሱስ ኪርስቶሳ ካሊሺን ኢንቴስ ኢንቴ ጊዶን ኣያና ኢሲፌቴꬅ ኢሞ። ሄሲካ ኢንቴ ኢሲ ዎዝናኒኔ ኢሲ ዱና ጊዲዲ ኑ ጎዳ ዬሱስ ኪርስቶሳ ኣዋ ፆሳ ቦንቻናሳ። ሄሳ ጊሽ ፆሲ ኢንቴና ፆሳ ቦንቾን ሞኪ ኤኪዳ ማላ ኢንቴካ ኢሶይ ኢሳ ኡፋይሳን ሞኪ ኤኪቴ። ካሴ ኣዋታስ ኢሜቲዳ ሂዶታ ቃላ ፖላናስ ፆሳ ቱማቴꬂ ኤሬታና ማላ ኪርስቶሲ ኣይሁዳታስ ኦꬂዛዴ ጊዲዳይሳ ታ ኢንቴስ ዮታይስ። ሄሳꬆካ ኣይዛቤቲ ኢዛ ማሮቴꬃ ጊሽ ፆሴ ጋላታና ማላ፤ ሄሲካ “ታ ኔና ዴሬ ጊዶን ጋላታና፤ ኔ ሱንꬃስካ ጋላታ ዬꬅ ዬፃና” ጌቴቲ ጌሻ ማፃፋን ፃፌቲዳ ማላ። ቃሴካ “ኣይዛቤቶ! ኢንቴካ ፆሳ ዴሬታራ ኡፋዬቲቴ” ጌቴቲ ጌሻ ማፃፋን ፃፌቲዴስ። ናምዓንꬆካ “ኣይዛቤቲ ኢንቴ ዉሪካ ጎዳ ጋላቲቴ፤ ዴሬይ ዉሪ ኢዛ ሳቢቴ” ጌቴቲ ጌሻ ማፃፋን ፃፌቲዴስ። ሄሳꬆ ኢሳያሳን “ባ ዴሬ ኣሳ ቦላ ካዎቲዛ ኢሴዬ ናይ ያና። ኣላሜ ኣሳ ኣይሲዛዴይ ዴንዳና፤ ኢስቲካ ኢዛን ኡፋዬታና” ጌስ። ኢንቴ ኢዛን ኣማኒዛ ጊሽ ሂዶታ ፆሲ ኢንቴናን ኡፋይሲኔ ሳሮቴꬅ ኩንꬆ። ሄሲካ ፂሎ ኣያና ዎልቃ ሂዶታ ኢንቴስ ዳራናሳ። ታ ኢሻቶ! ኢንቴ ሎዔቴꬃን፤ ኤራቴꬅ ኡባን ኩሚዳይታኔ ሃራታ ዞራናስ ኤራይ ዲዛይታ ጊዲዳይሳ ታ ኣዳፌ ሻካ ኤራዲስ። ታ ፆሳፌ ኤኪዳ ኢሞቴꬃ ጊና ቃሴካ ኢንቴና ቆፊሳናስ ኢሲ ኢሲ ዮዖታ ፃላቴꬃን ኢንቴስ ፃፋዲስ። ሄሳ ሄ ኪያቴꬃይ ኢሜቲዳይ ታኒ ፆሳ ሚሺራቾ ቃላ ሃንኮ ዴሬታስ ዮታና ማላ፤ ቃሴካ ቄሴ ማላ ጊዲዳ ዬሱስ ኪርስቶሳስ ኦꬃናሳ፤ ሄሳ ጊሽ ሃንኮ ዴሬ ኣሳይ ፂሎ ኣያናን ዱማቲዲ ፆሴ ኡፋይሲዛ ያርሾ ጊዲዲ ሺቃና ማላ ኦꬃይስ። ሄሳ ታኒ ፆሳስ ኦꬂዛ ጊሽ ዬሱስ ኪርስቶሳን ጬቄታይስ። ታ ዮቲዳይሳኒኔ ታ ኦꬂዳይሳን ሃንኮ ዴሬ ኣሳይ ፆሳስ ኣዛዜታና ማላ ኪርስቶሲ ታናን ጊዲዲ ኦꬂዳዛፔ ኣቲን ሃራ ሃሳያና ፃሊኬ። ሄሲካ ሃኒዳይ ፂሎ ኣያና ዎልቃን ማላታታ ባጋራ ሃኒዴስ። ሄሳ ማላንካ ዬሩሳላሜፔ ኢልዋቆሬ ጋካናስ ታ ኪርስቶሳ ሚሺራቾ ቃላ ሳባካዲስ። ሃራ ኣሲ ካሴ ኦꬂዳሶን ታ ጌሎንታ ማላ ጋዳ ካሴ ኪርስቶሳ ሱንꬂ ፄይጌቲ ኤሮንታሶን ሚሺራቾ ቃላ ሳባካናይሲ ታስ ኣሞ። ሃራፔካ “ኢዛ ጊሽ ኢስታስ ዮቴቶንታይቲ ኢዛ ቤያና፤ ሲዪ ኤሮንታይቲ ሃሳዓና” ጌቴቲ ካሴ ጌሻ ማፃፋን ፃፌቲዳ ማላ ሃኒዴስ። ሄሳ ጌዶን ታ ኢንቴኮ ቦንታ ማላ ዳሮ ዎዴ ዲጌታዲስ። ሃዒ ቃስ ታስ ሃን ኦሶይ ባይንዳ ጊሽ ዳሮ ላይꬃታፔ ሃ ሲሚን ኢንቴና ቤያናስ ታ ዳሮ ላሞታዲስ። ሃይሳ ታ ቆፋ ታኒ ኢስፔኔ ቢዛ ዎዴ ፖላናስ ቆፓይስ። ሄራ ኣꬋሼ ኢንቴና ቤያናሲኔ ኢንቴናራ ጉꬃ ዎዴ ጋምዓዳ ላሞታ ኣꬂዳ ማላ ኢንቴ ታና ማዳና ጋዳ ሂዶታ ኦꬃይስ። ሃዒ ቃስ ኣማኒዛይታስ ኢሜቲዛ ማዶ ጊሽ ኤካዳ ዬሩሳላሜ ባይስ። ጋሶይካ ማቂዶኒያኒኔ ኣካያን ዲዛ ማንቆታ ማዳና ዴንዲዴስ። ሃይሳ ሃ ማዶዛ ኢስቲ ባ ዶሳን ኢሚዳይ ኢስቲ ኦꬃናስ ቤሲዛ ጊሻሳ፤ ኣይዛቤቲ ኣይሁዳታራ ኢሲፌ ኣያና ኣንጆ ኤኪዛይታ ጊዲኮ ኢስቲካ ባሲ ዲዛ ቢታ ኣንጆን ኣይሁዳታ ማዳናስ ቤሴስ። ሄሳ ጊሽ ሃይሳ ሺቂዳ ማዶ ሚሻ ዬሩሳላሜ ኢሚዳፔ ጉዬ ኢንቴ ኣቻን ታ ኢስፔኔ ባና። ታ ሄ ኢንቴኮ ባሼ ኢንቴስ ኪርስቶሳ ኣንጆ ኩንꬃ ኤካ ባናይሳ ታ ኤራይስ። ታ ኢሻቶ! ታኒ ፆሳ ዎሳን ባፄቲዛ ማላ ኢንቴካ ታናራ ባፄታና ማላ ታ ኢንቴና ጎዳ ዬሱስ ኪርስቶሳኒኔ ፂሎ ኣያና ሲቆን ዎሳይስ። ታኒ ዩሁዳን ዲዛ ኣማኖንታ ኣሳ ኩሼፔ ኣታና ማላኔ ዬሩሳላሜን ዲዛ ታ ኦꬆይካ ሄን ኣማኒዛይታ ኣቻን ኤኬታና ማላ ታስ ዎሲቴ። ሄሲካ ፆሳ ሼኔ ማላ ሄ ኢንቴኮ ታ ኡፋይሳራ ባና ማላኔ ኢንቴናራ ኢሲፌ ሼምፓና ማላ። ሳሮቴꬃ ጎዳይ ኢንቴናራ ኡባታራ ጊዶ። ኣሚን። ኪንኪራዖሴ ዎሳ ኬꬃን ኦꬂዛ ኣማኔቲዳ ሚቼዮ ፔቤኖ ኢንቴስ ሃዳራ ጋይስ። ኣማኒዛ ኣሳስ ቤሲዛ ሞኮ ኢንቴ ኢዞ ጎዳ ሱንꬃን ሞኪ ኤካና ማላኔ ኢዛ ኢንቴፌ ኮዪዛ ኣይ ሚሻንካ ኢንቴ ኢዞ ማዳና ማላ ታ ኢንቴና ቆፊሳይስ። ካሴ ታናራ ጎዳ ዬሱስ ኪርስቶሳስ ኢሲፌ ኦꬂዳ ጲርሲቂላሲኔ ኣቂላስ ታ ሳሮካ ጋꬂቴ። ኢስቲ ታ ጊሽ ሃይቃና ጋካናስ ባና ኣꬂ ኢሚዳ፤ ታና ፃላላ ጊዶንታ ኣይዛቤታፔ ኣማኒዳይቲካ ኢስታ ጋላቴቴስ። ኢስታ ኬꬃን ዲዛ ኣማኒዛ ኣሳካ ሳሮ ጊቴ። ኢሲያፔ ኮይሮ ኪርስቶሳን ኣማኒዳ ታ ሲቆዛ ኤጴኔፆሴ ሳሮ ጊቴ። ኢንቴስ ዳሮ ዳቡሪዳሮ ማራሞ ሳሮ ጊቴ። ታናራ ኢሲፌ ቃሼቲዳ ኣንዲራቆኔኔ ዩኒያሴ ሳሮ ጊቴ። ሄይታንቲ ሃዋሬታ ጋርሳን ሎዖ ሱንꬃራ ዲዛይታኔ ኪርስቶሳ ታፔ ካሴ ኣማኒዳይታ። ታኒ ጎዳ ባጋራ ዳሮ ሲቂዛ ጲልያፆኔ ሳሮ ጊቴ። ኪርስቶሳ ኦሶ ታናራ ኢሲፌ ኦꬂዛ ኢሮባኖኔኔ ታ ሲቂዛ ሴንፃኬካ ሳሮ ጊቴ። ኪርስቶሳን ኢዛ ኣማኖይ ፓጬቲዲ ጋላቴቲዳ ኤፄሴኔሴስ ታ ሳሮካ ጋꬂቴ። ኣርሲፃባሎሶ ኣሳስካ ታ ሳሮካ ጋꬂቴ። ታ ዳቦ ሄሮዲያና ሳሮ ጊቴ። ጎዳን ዲዛ ኒሪቃሶሶ ኣሳ ሳሮ ጊቴ። ጎዳን ጊዲዲ ሚኖቴꬃን ኦꬂዛ ማጫሳታ ቲሮፊሞኖኔ ፂሮፊሞኖ ሳሮ ጊቴ። ጎዳስ ኦሶን ዳሮ ዳቡሪዳሪስ ኪርስቶሳን ታኒ ኢዞ ሲቂዛ ፃርሲዲስ ታ ሳሮካ ጋꬂቴ። ጎዳን ዶሬቲዳ ሩፎኔስ፥ ታሲኔ ኢዛስ ኣዮ ጊዲዳሪስ ታ ሳሮካ ዮቲቴ። ኣስቄሮኔሲ፥ ኣፊላሶኔሲ፥ ሄሮሜኔሲ፥ ጳፂሮባኔሲ፥ ሄርማኔሲኔ ኢስታራ ዲዛ ኢሻታ ኡባታስ ታ ሳሮካ ጋꬂቴ። ፊሌጎኔስ፥ ዩሊያስ፥ ኔሪያሲኔ ኢዛ ሚቼይስ ሄሳꬆካ ኣልፆኔስ፥ ኢስታራ ዲዛ ኣማኒዛይታስካ ታ ሳሮካ ጋꬂቴ። ኢሶይ ኢሳ ዬሪ ዬር ኤኪዲ ሳሮኬቲቴ። ኪርስቶሳን ኣማኒዛ ዎሳ ኬꬃ ኣሳይ ዉሪካ ኢንቴና ሳሮ ጌስ። ታ ኢሻቶ! ኣሳ ጋርሳን ሻኬቴꬂ ሜꬊዛይታፔኔ ኢንቴ ታማሪዳ ቲሚርታ ኤኮንታ ኢፆን ኢንቴስ ꬉጴ ጊዲዛ ኣሳታፔ ኢንቴ ናጌቲቴ። ሄይታንታ ማላ ኣሳቲ ዬሱስ ኪርስቶሳስ ኦꬂዛይታ ጊዶንታ ባ ቃንꬃ ካꬃ ጊሽ ኦꬂዛይታ። ሹጎ ቃላራ ሃሳያኒኔ ዎዝና ኪያ ኣሳታ ባሌꬄቴስ። ኢንቴ ሚሺራቾ ቃላስ ኣዛዜቲዛይታ ጊዲዳይሳ ኣሲ ዉሪ ሲይዴስ። ሄሲካ ታና ዳሮ ኡፋይሲዴስ። ጊዲኮካ ኢንቴ ሎዖ ሃኖስ ጪንጫታ ቃሴ ኢታ ኦሶስ ኤያታ ጊዳና ማላ ታ ኮያይስ። ሳሮቴꬃ ጎዳይ ፃላዔ ኤሶን ኢንቴ ቶሆ ጋርስ ኣꬂ ዲንጬሬꬃና። ጎዳ ዬሱስ ኪርስቶሳ ኪያቴꬂ ኢንቴናራ ጊዶ። ታናራ ኢሲፌ ኦꬂዛ ፂምቶሲ ቃሴካ ታ ዳቦ ሉቂዮሲ፥ ኢያሶኔይኔ ሱሲጴፂሮሲ ኢንቴና ሳሮ ሳሮ ጌቴስ። ሃይሳ ኪታ ፃፊዳይ ታኒ ፄሪፂዮሲ ኢንቴና ጎዳ ሱንꬃን ሳሮ ጋይስ። ታኒኔ ሃይሳን ዲዛ ኩሜꬃ ዎሳ ኬꬃ ኣሳይ ሞኪ ኤኪዛ ጋዪዮሲካ ኢንቴና ሳሮ ጌስ፤ ካታማ ሚሻ ኦይኪዛ ኤሪስፆሲኔ ኑ ኢሻ ቆዓፂሮሲ ኢንቴና ሳሮ ጌቴስ። ጎዳ ዬሱስ ኪርስቶሳ ኪያቴꬅ ኢንቴናራ ኡባታራ ጊዶ። ኣሚን። ታኒ ዮቲዛ ሚሺራቾ ቃላይ ዬሱስ ኪርስቶሳ ጊሽ ዮቴቲዛ ኪታይኔ ቤኒ ዎዴፔ ዶሚዲ ቆታን ጋምዒዲ ሃዒ ቃሴ ቆንጪዳ ቱማ ፁራ ባጋራ ኢዚ ኢንቴና ኣማኖን ኤሳናስ ዳንዳዬስ። ሃዒ ቃሴ ሃይሲ ቱማይ ቆንጪዴስ። ሜርና ፆሳ ኣዛዞን ዉሪካ ኣማኒዲ ኣዛዜታና ማላ ናቤታ ማፃፋ ባጋራ ዴሬቲ ዉሪካ ኢዛ ኤራና ማላ ሃኒዴስ። ኢዚ ፃላላ ኤራ ጊዲዳ ጎዳስ ዬሱስ ኪርስቶሳ ባጋራ ሜርና ቦንቾይ ኢዛስ ጊዶ። ኣሚን። ፆሳ ሼኔን ዬሱስ ኪርስቶሳስ ኪቴታናስ ፄይጌቲዳ ጳዉሎሳፔኔ ኑ ኢሻ ሶስቲኔሴፔ፤ ቆሮንቶሴን ዲዛ ፆሳ ዎሳ ኬꬃስ፤ ጎዳ ዬሱስ ኪርስቶሳስ ዱማቲዳይታሲኔ ኢስታሳራ ኑሳራ ጎዳ ጊዲዳ ጎዳ ዬሱስ ኪርስቶሳ ሱንꬃ ኣዋን ኣዋንካ ፄይጊዛ ኣማኒዛይታራ ጊዳናስ ፄይጌቲዳ ኣሳ ኡባስ። ኑ ኣዋ ፆሳፌኔ ጎዳ ዬሱስ ኪርስቶሳፔ ኪያቴꬂኔ ሳሮይ ኢንቴስ ጊዶ። ጎዳ ዬሱስ ኪርስቶሳ ባጋራ ኢንቴስ ኢሜቲዳ ፆሳ ኪያቴꬃ ጊሽ ኡባ ዎዴ ኢንቴ ጊሺካ ታኒ ፆሳ ጋላታይስ። ጋሶይ ኣይ ዮዖንካ፤ ሄሲካ ሃሳያን ጊዲን ኤራቴꬃ ኢንቴ ኡባን ዱሬቲዴታ። ኪርስቶሳ ጊሽ ኑ ኢንቴስ ማርካቲዳይሲ ኢንቴ ኣቻን ሚኒዴስ። ሄሳ ጊሽ ኢንቴ ዬሱስ ኪርስቶሲ ቆንጫና ጋላስ ናጊሺን ኣያና ኢሞቴꬃታፔ ኣይኮይካ ኢንቴስ ፓጬና። ጎዳ ዬሱስ ኪርስቶሲ ናምዓንꬆ ያና ጋላሳን ኢንቴ ኢንቴ ቦላ ቦሮይ ባይንዳ ቤታና ማላ ዉርሴꬅ ጋካናስ ኢዚ ኢንቴና ሎዔꬅ ናጋና። ኢዚ ባ ናዛ ኑ ጎዳ ዬሱስ ኪርስቶሳ ኢሲፌቴꬃኮ ኢንቴና ፄይጊዳ ፆሲ ኢዚ ኣማኔቲዳ ፆሳ። ታ ኢሻቶ! ኢንቴ ጋርሳን ሻኬቴꬂ ዶንታ ማላ ኢንቴስ ኢሲ ዎዝናይኔ ኢሲ ቆፋይ ዳና ማላ ኢንቴ ኢንቴ ጋርሳን ኢሲኖ ጊዳና ማላ ጎዳ ዬሱስ ኪርስቶሳ ሱንꬃን ታ ኢንቴና ዎሳይስ። ታ ኢሻቶ! ኢንቴ ጋርሳን ፓላማይ ዲዛይሳ ታ ቃሎዔ ሶ ኣሳፔ ሲያዲስ። ዮዖዚካ ሃይሳ ማላ፤ ኢንቴ ጋርሳን ኢሲ ኢሲ ኣሳይ “ታ ጳዉሎሳ ባጋ” ጌስ፤ ባጋይ ቃሴ “ታ ኣጲሎሳ ባጋ” ጌስ፤ ባጋይ ቃሴ “ታ ኬፋ ባጋ” ጊሺን ሃራይ ቃሴ “ታ ኪርስቶሳ ባጋ” ጌስ። ሂስቲኮ ኪርስቶሲ ሻኬቲ ዎꬊዴ? ኢንቴ ጊሽ ጳዉሎሲ ካቄቲዴ? ዎይኮ ጳዉሎሳ ሱንꬃን ፃማቄቲዴቲ? ኢንቴ ጊዶፌ ቄሪስጶሳፔኔ ጋዪዮሳፔ ኣቲን ሃራ ኦናካ ታ ፃማቆንታ ጊሽ ፆሳ ጋላታይስ። ሄሳ ጊሽ ኦኒካ “ታ ጳዉሎሳ ሱንꬃን ፃማቄታዲስ” ጋና ኣሲ ዴና። ቱሙካ ኢስቲፋኖሴ ሶ ኣሳ ፃማቃዲስ። ሄይታፔ ሃራ ታ ፃማቂዳኮኔ ታ ኤሪዛዴይ ዴና። ኪርስቶሲ ታና ኪቲዳይ ሚሺራቾ ቃላ ዮታናስ ኣቲን ፃማቃናስ ጊዴና። ኪርስቶሳ ማስቃሌይ ሃዳ ጊዶንታ ማላ ታ ኣሳፔ ጊዲዳ ጪንጫቴꬃን ሳባኪኬ። ማስቃሌዛ ኪታይ ꬋያና ዲዛይታስ ኤያቴꬃ። ጊዶ ኣቲን ኣታና ዲዛ ኑስ ጊዲኮ ፆሳ ዎልቃ። “ጪንጫታ ጪንጫቴꬂ ታ ኢስታፌ ꬋይሳና፤ ኤራንቻታ ኤራቴꬃ ታ ሃዳ ኦꬃና” ጌቴቲ ጌሻ ማፃፋን ፃፌቲዴስ። ጪንጫይ ኣዋን ዲዜ? ታማሪዳ ኤራይ ኣዋን ዲዜ? ሃይሳ ዎዴዛ ፒልጊ ኤሪዛይ ኣዋን ዲዜ? ፆሲ ሃ ኣላሜዛ ኤራቴꬅ፥ ኤያቴꬅ ኦꬂቤኔ? ፆሳ ኤራቴꬃፌ ዴንዲዳይሳን ኣላሜይ ባ ኤራቴꬃ ጋሶን ፆሳ ኤሮይ ፆኒን ሳባኮ ኤያቴꬃን ኣማኒዛይታ ኣሻናስ ፆሳ ሼኔ ጊዲዴስ። ኣይ ዎዴካ ኣይሁዳቲ ዱማ ማላታ ኮዬቴስ። ጊሪኬ ኣሳቲ ቃሴ ኤራቴꬅ ኮዬቴስ፤ ኑኒ ጊዲኮ ካቄቲዳ ኪርስቶሳ ሳባኮስ። ሄሲካ ኣይሁዳታስ ꬉጴ፤ ኣይዛቤታስ ቃሴ ኤያቴꬃ። ፆሲ ፄይጊዳይታስ ኢስቲ ኣይሁዳታ ጊዲን ዎይኮ ጊሪኬ ዴሬ ኣሳ ጊዲኮካ ኪርስቶሲ ፆሳ ዎልቃኔ ፆሳ ኤራቴꬃ። ጋሶይካ ኣሳ ኤራፔ ፆሳ ኤያቴꬂ ኣꬊዳ ኤራቴꬃ፤ ኣሳ ሚኖቴꬃፌ ፆሳ ላፋቴꬂ ኣꬌስ፤ ታ ኢሻቶ! ካሴ ኢንቴ ፄይጌቲዛ ዎዴ ኢንቴ ኣይ ማላ ኣሳኮኔ ኣኔ ቆፒቴ። ኣሳ ቆፋ ማላ ጊዲኮ ኢንቴፌ ዳሪዛይቲ ኤራታ ጊዴኬታ። ኢንቴፌ ዳሮቲ ዎልቃይ ባይንዳይታ፤ ዳሮቲካ ጊታ ኬꬃ ኣሳፔ ዬሌቲቤኬታ። ጊዶ ኣቲን ፆሲ ኤራታ ዬላቻናስ ዴራፔ ኤያታ ዶሪዴስ፤ ፆሲ ሚኖታ ዬላቻናስ ኣላሜዛፔ ዳቡራንቻታ ዶሪዴስ። ፆሲ ሃንኮ ኣማኖንታ ኣሳ ኣቻን ዴቴስ ጌቴቲ ኤሬቲዛ ሚሻታ ባይንዳ ሚሻ ማላ ኦꬃና ሃይሳ ኣላሜዛን ሌቄቲዳይታኔ ካዉዪዳይታ ላፋታ ዶሪዴስ። ሄሳካ ኢዚ ኦꬂዳይ ኦኒካ ኢዛ ሲንꬃን ጬቄቶንታ ማላ። ኢንቴና ቃሴ ፆሲ ዬሱስ ኪርስቶሳራ ኢሲፌቴꬂ ዳና ማላ ኦꬂዴስ። ሄሳ ጊሽ ፆሲ ዬሱስ ኪርስቶሳ ኑ ኤራቴꬅ፥ ኑ ፂሎቴꬅ፥ ኑ ጌሻቴꬂኔ ኑና ኣሺዛዴ ጊዳና ማላ ኦꬂዴስ። ሄሳ ጊሽ ካሴ “ጬቂዛ ኣሲ ጎዳን ጬቆ” ጌቴቲ ጌሻ ማፃፋን ፃፌቲዳ ማላ። ታ ኢሻቶ! ታ ኢንቴኮ ፆሳ ፁራ ቆንጪሳና ቢዳይ ታስ ዱና ቃራቴꬂ ዎይኮ ኤራ ዳሮይ ዲዛ ጊሽ ጊዴና። ታ ኢንቴ ጊዶን ዲዛ ዎዴ ካቄቲዳ ዬሱስ ኪርስቶሳፔ ኣቲን ሃራ ኤሮንታ ማላ ታ ባጋራ ሙርታዲስ። ታ ኢንቴኮ ዳሮ ዳቡራን፥ ያሻቴꬃኒኔ ዳሮ ኮኮራሼ ባዲስ። ታ ቃላይኔ ሳባኮይካ ኣያና ዎልቃ ቆንጪሴꬃንፔ ኣቲን ጪሞኒኔ ኤራ ዳሮን ጊዴና። ሄሲካ ኢንቴ ኣማኖይ ፆሳ ዎልቃንፔ ኣቲን ኣሳ ጪንጫቴꬃ ቦላ ፃጶንታ ማላ ሃኒዴስ። ኑ ካሃ ኩንꬂዳ ኣሳታ ኣቻን ኤራ ሃሳያ ሃሳዮስ፤ ጊዶ ኣቲን ሃይሳ ሃ ኣላሜዛ ኤራቴꬅ ጊዴና፤ ዎይኮ ꬋያና ዲዛ ሃ ኣላሜዛ ሃሪዛይታ ኤራቴꬅ ጊዴና። ጊዶ ኣቲን ኑ ሃሳዪዛይ ካሴ ቆቴቲ ዲዛ ፆሳ ፁራ ኤራቴꬃ፤ ሄ ኤራቴꬃይ ፆሲ ዳሮ ዎዴፔ ካሴ ኑና ቦንቾስ ካሴቲዲ ዉርሲ ዎꬂዳይሳ። ሃ ኣላሜዛ ሃሪዛይታፔ ኦኒካ ሃ ኤራቴꬃ ኤሪቤና፤ ኤሪዳኮ ኢስቲ ቦንቾ ጎዳ ካቄቴና። ጊዶ ኣቲን ጌሻ ማፃፋን “ኣሳ ኣይፌይ ቤዮንታዝ፥ ኣሳ ሃይꬂ ሲዮንታዝ፥ ኣሳ ዎዝናይካ ቆፖንታዝ ፆሲ ባ ዶሲዛይታስ ጊጊሲዴስ” ጌስ። ፆሲ ጊዲኮ ሄሳ ባ ኣያና ባጋራ ኑስ ቆንጪሲዴስ። ኣያናይካ ፆሳስ ዲዛ ጪማ ዮዖ ኣሾንታ ዉርሲ ፒልጊ ፄሌስ። ኣሳ ጋርሳን ኢዛዴስ ዲዛ ኣያናፔ ኣቲን ኢዛዴ ዎዝና ኤሪዛይ ኦኔ? ሄሳꬆካ ፆሳ ኣያናፔ ኣቲን ፆሳ ቆፋ ኤሪዛይ ኦኒካ ዴና። ፆሳፌ ኑስ ኢሜቲዳይሳ ኑኒ ኤራና ማላ ፆሳ ኣያናይ ኑስ ኢሜቲዴስ ኣቲን ኑኒ ሃይሳ ሃ ኣላሜዛ ኣያና ኤኪቤኮ። ኑ ዮቲዛይ ሃይሳ፤ ኑ ኣሳፔ ታማሪዳ ቃላ ጊዶንታ ኣያናፔ ታማሪዳ ቃላ ሃሳዮስ። ኣያና ቱማቴꬃካ ኑ ቆንጪሲዛይ ኣያና ቃላና። ፆሳ ኣያናይ ኢዛን ባይንዳ ኣሲ ፆሳ ኣያናፔ ጊዲዳዝ ኤካናስ ዳንዳዬና፤ ጋሶይካ ሄሳ ማላ ዮዖይ ኢዛስ ኤያቴꬃ፤ ኢዚ ባሲ ኣያናን ፓጬቲዛዴ ጊዲዳ ጊሽ ኢዚ ኤራናስ ዳንዳዬና። ፆሳ ኣያናይ ኢዛን ዲዛዴይ ቃስ ዉርሲካ ፓጬስ ኣቲን ባሲ ኦናንካ ፓጬቴና። ሄሲካ “ጎዳ ቆፋ ኤራናስ ዳንዳዪዛይ ኦኔ? ኢዛ ዞራናስ ዳንዳዪዛይ ኦኔ?” ጌቴቲ ካሴ ጌሻ ማፃፋን ፃፌቲዳ ማላ፤ ኑስ ጊዲኮ ኪርስቶሳ ዎዝናይ ዴስ። ታ ኢሻቶ! ታ ኢንቴና ኢንቴ ኪርስቶሳን ቡሮ ጉꬃ ናይታ ማላኔ ቡሮ ኣማኖይ ጌሎንታ ኣሳ ማላፔ ኣቲን ኣያናን ኩሚዳ ኣሳ ማላ ጋዳ ኢንቴስ ሃሳያናስ ዳንዳያቤኬ። ኢንቴ ቡሮ ሚኖንታ ጊሽ ታ ኢንቴና ማꬅ ፓሃዲስ ኣቲን ቡሮ ሚኖ ካꬅ ሚዛቤኬ፤ ሃዒካ ጊዲኮ ኢንቴ ቡሮኮ! ኢንቴ ሃዒካ ቡሮ ኣማኖን ሚኖንታይታ ጊዲዳ ጊሽ ኢንቴ ጊዶን ቃናቴቴꬂኔ ፓላማይ ዴስ፤ ሂስቲን ኢንቴ ቡሮ ኣማኖን ሚኖንታ ኣሳ ማላ ጊዴኬቲ? ኢንቴ ኦሶይ ጮ ሜላ ኣሲ ኦꬂዛይሳ ማላ ጊዴኔ? ጋሶይካ ኢንቴ ጋርሳፌ ኢሶይ “ታ ጳዉሎሳሳ” ሃንኮይስ ቃስ “ታ ኣጲሎሳሳ” ጊኮ ኢንቴ ጮ ኣሾ ቆፋን ፃላላ ዲዛ ኣሳ ማላ ጊዴኬቲ? ኤሮ! ጊዶ ኣቲን ኣጲሎሲ ኣዜ? ጳዉሎሲካ ኣዜ? ኢስቲ ጎዳይ ኢስታስ ኢሳስ ኢሳስ ኢሚዳ ማላ ኦꬂዛ ኦꬃንቻታ፤ ኢንቴካ ኢስታ ባጋራ ኣማኒዴታ። ታ ቶካዲስ፤ ኣጲሎሲ ሃꬄ ኡሺዴስ፤ ዲቺዳይ ጊዲኮ ፆሳ። ሄሳ ጊሽ ዲቺዛይ ፆሴ ኣቲን ቶኪዛዴይካ፥ ሃꬄ ኡሺዛዴይካ ኣይኮካ ጊዴቴና። ቶኪዛዴ ጊዲን ዎይኮ ኡሺዛዴ ጊዲን ኢስቲ ኢሲኖ፤ ኢስታፌ ኢሳዴይ ኢሳዴይ ባ ኦሶ ማላ ዎይቶ ኤካና። ጋሶይካ ኑ ፆሳራ ኢሲፌ ኦꬂዛይታ። ኢንቴካ ፆሳ ጎሻ ጋዴኔ ፆሳ ኬꬃታ። ፆሳፌ ታስ ኢሜቲዳ ኢሞቴꬃ ጊና ኬꬄ ኬፂዛ ሂላ ማላ ኬꬃይ ኤቃናስ ሎዔꬃ ጊጊሳዲስ፤ ኢዛ ቦላ ሃራ ኣሲ ኬꬃ ኬፃና። ጊዶ ኣቲን ኬꬃ ኬፂዛዴይ ዎስቲ ኬፃናኮኔ ናጌታናስ ቤሴስ። ጋሶይካ ኬꬃይ ኬፄቴꬅ ኦይኬቲዳፔ ጉዬ ሃራ ዎꬂ ቃሴ ኬፃና ዳንዳዪዛዴይ ኦኒካ ባዋ፤ ሄሲካ ኬꬃስ ኮይሮይ ዬሱስ ኪርስቶሳ። ኦኒካ ኬꬃይ ኮይሮ ኬፄቲዳይሳ ቦላ ዎርቃን ዎይኮ ቢራን ቦንቼቲዳ ሹቻን ዎይኮ ሚꬃኒኔ ማታን ዎይኮ ማቃን ኬፂኮ፥ ኢዛዴ ኦሶይ ኣይ ማላ ፒርዳ ጋላስ ቆንጫና። ጋሶይካ ሄ ጋላሳይ ኢዛ ሃ ፖዖይ ዲዛሶ ኬሳና። ሄ ኦሶይ ታማን ፓጬታና ጊሽ ኢሳዴ ኢሳዴ ኦሶይ ኣይ ማላ ቡሮ ታማን ፓጬታና። ኦኒካ ኬፂዳ ኬꬂ ሚኒ ኤቂዛ ጊዲኮ ሄሳዴይ ባ ዎይቶ ኤካና። ኢዛ ኦሶይ ፁጌቲዳዴይ ጊዲኮ ዎይቶይ ኢዛስ ዴና ሺን ኢዛዴይ ባ ሁዔስ ኣታና። ጊዶ ኣቲን ኢዛዴ ኣቴꬂ ታማፔ ኣሲ ዋይዲ ኣቲዛ ኣቴꬃ ማላ ጊዳና። ኢንቴ ኢንቴ ሁዔስ ፆሳ ኬꬄ ጊዲዳይሳኔ ፆሳ ኣያናይ ኢንቴ ጊዶን ዲዛይሳ ኤሬኬቲ? ኦኒካ ፆሳ ኬꬄ ላሊኮ ፆሲ ኢዛዴ ላላና። ፆሳ ኬꬂ ጌሻ። ሄሲካ ኢንቴናኮ! ኦኒካ ባርካ ባና ባሌꬆፎ፤ ኢንቴፌ ኦኒካ ሃይሳ ሃ ኣላሜዛን ባና ኤራንቻ ማላ ቆፒኮ ኢዛዴይ ኤራንቻ ጊዳና ማላ ባና ባርካ ኤያ ማላ ቆዶ። ሃይሳ ሃ ዴሬዛ ኤራቴꬂ ፆሳ ኣቻን ኤያቴꬃ። ካሴ ጌሻ ማፃፋን “ኢዚ ኤራንቻታ ኢስታ ጌኔ ኦሶ ጌዶን ዛሪዲ ኦይካና” ጌቴቲ ፃፌቲዴስ። ቃሴካ ሃራሶን “ኤራንቻታ ቆፋይ ሜላ ሃዳ ጊዲዳይሳ ጎዳይ ኤሬስ” ጌቴቲ ፃፌቲዴስ። ሄሳ ጊሽ ዉሪካ ኢንቴስ ጊዲዳ ጊሽ ኦኒካ ኣሳን ጬቄቶፎ። ጳዉሎሳ ጊዲን፥ ኣጵሎሳ ጊዲን፥ ዎይኮ ኬፋ ጊዲን፥ ኣላሜ ጊዲን፥ ዴዖ ጊዲን፥ ዎይኮ ሃይቆ ጊዲን፥ ሃዒ ዲዛዝ ጊዲን፥ ዎይኮ ቡሮ ያና ሚሽ ጊዲን፥ ዉሪካ ኢንቴሳ። ኢንቴካ ኪርስቶሳይታ፤ ኪርስቶሲካ ፆሳይሳ። ሄሳ ጊዲዳ ጊሽ ኣሲ ዉሪካ ኑና ኪርስቶሳ ኦሳንቻታ ማላኔ ፆሳ ፁራ ቆንጪሳናስ ሃዳራ ኤኪዳ ኣሳ ማላ ቆዳናስ ቤሴስ። ሃዳራ ኤኪዳይቲካ ኣማኔቲዳይታ ጊዳናስ ቤሴስ። ታ ቦላ ኢንቴ ፒርዲንካ ዎይኮ ዱላታ ኣሳይ ፒርዲንካ ታ ባጋራ ታስ ኣይኮይ ባዋ። ሃራይ ኣቶሺን ታርካ ታ ቦላ ፒርዲኬ። “ታ ኤሪዛ ማላ ታኒ ታ ዎዝናራ ሲꬊዛ ሚሺ ባዋ፤ ጊዶ ኣቲን ሄሳ ጉስ ታ ቦላ ሞሮይ ባዋ” ጉስ ጊዴና። ቡሮ ታ ቦላ ፒርዳናይ ጎዳ። ሄሳ ጊሽ ፒርዳና ዎዴይ ጋኮንታ ሃራ ኣይ ዮዖካ ፒርዶፍቴ። ጎዳይ ያና ጋካናስ ናጊቴ፤ ኢዚ ꬉማ ጊዶን ቆቴቲዳይሳ ቡሮ ቆንጬ ኬሳና። ኣሳ ዎዝና ጊዶን ዲዛ ቆፋካ ቆንጬ ኬሳና። ሄ ዎዴ ኢሲ ኢሲ ኣሲ ባሲ ቤሲዛ ጋላታ ፆሳ ኣቻፌ ኤካና። ሄሳ ጊሽ ታ ኢሻቶ! ታ ኢንቴና ጎዓና ማላ ሃ ዮዖዛን ታናኔ ኣጲሎሳ ኢንቴስ ሌሚሶ ሺሻዲስ፤ ታ ሃይሳ ኦꬂዳይ “ፃፌቲዳይሳፌ ኣꬎፋ” ጊዛይሳ ኢንቴ ኑፔ ታማራና ማላ ጋዳ። ሄሳ ጊሽ ኢንቴ ኢሳዴ ሳቢዲ ሃራ ኣስ ካꬋናስ ቤሴና። ኔኒ ኣዛን ኣꬋይ? ኔኒ ሃራፔ ኤኮንታ ኣቲዳ ሚሺ ኣዜ? ሂስቲን ኔ ዉርሳካ ኤኪዳይ ሃራ ኣሳፔ ጊዲኮ፥ ሃራ ኣሳፔ ኤኮንታ ኣሳ ማላ ኣዛስ ጬቄታይ? ሃዒ ጊዲኮ ኢንቴስ ኮሺዛዝ ኢንቴ ዉርሲ ዴሚዴታኔ ዱሬቲዴታ፤ ኑፔካ ሻኬቲዲ ካዎቲዴታ። ኢንቴ ቱሙካ ካዎቲዳኮ ኑካ ኢንቴናራ ካዎታናኮ ሺን። ጋሶይካ ፆሲ ኑና ሃዋሬታ ኑ ቦላ ሃይቆ ፒርዳይ ፒርዴቲዳ ኣሳታ ማላ ኣሳ ኡባፌ ዉርሴꬂ ኦꬂዳዝ ታስ ሚሳቴስ። ሄሳ ጊሽ ኣላሜስ ኪታንቻታሲኔ ኣሳ ኡባስ ካሳ ሚሽ ጊዲዶስ። ኑ ኪርስቶሳ ጊሽ ኤያታ ጊዲዶስ። ኢንቴ ቃስ ኪርስቶሳን ኤራንቻታ፤ ኑኒ ዳቡራንቻታ፤ ኢንቴ ጊዲኮ ሚኖታ፤ ኢንቴ ቦንቼቲዳይታ፤ ኑኒ ጊዲኮ ካዉሻታ። ሃኖ ጋካናስ ኑ ጋፎስ፤ ሳሜቶስ፤ ካሎቶስ፤ ቡኬቶስ፤ ኣቂዛሶይ ꬋዪን ዋዬቶስ። ኑ ኩሼራ ኦꬂ ዳቡሪ ኣቆስ። ኑና ቃንጊሺን ኑ ቃስ ኣንጆስ፤ ኑና ጎዲሺን ኑ ዳንዳዮስ። ኑ ሱንꬅ ኢስቲ ሞሪሺን ኑ ቃስ ሎዖ ዛሮስ፤ ሃኖ ጋካናስ ኑ ቢታፌ ፒቴቲዳ ቡራ ጊዲዶስ። ታ ሃይሳ ኢንቴስ ፃፊዛይ ኢንቴና ታ ዶሲዛ ታ ናይታ ማላ ዞራናስ ጋዳ ኣቲን ኢንቴና ዬላቻናስ ጊዴና። ኢንቴና ኪርስቶሳን ዲቺዛ ዳሮ ኣሳቲ ዲኮካ ኢንቴስ ዳሮ ኣዋቲ ዴቴና። ታኒ ቃስ ዬሱስ ኪርስቶሳ ሚሺራቾ ቃላን ኢንቴና ዬላዲስ። ሄሳ ጊሽ ኢንቴ ታና ሚሳታና ማላ ታ ኢንቴና ዎሳይስ። ጎዳን ዳሮ ዶሴቲዳይሳኔ ኣማኔቲዳ ታ ና ፂምቶሳ ታ ኢንቴኮ ኪቲዳይ ሄሳ ጋሶና። ኢዚካ ዱማ ዱማ ሶን ዲዛ ዎሳ ኬꬃ ኣሳ ዉርሲ ታ ታማርሲዳ ቲሚርቴዛራ ጋጊዛይሳ ዬሱስ ኪርስቶሳን ዲዛ ዴዖ ኦጌ ጊሽ ኢንቴና ኢዚ ቆፊሳና። ኢንቴፌ ኢሲ ኢሲ ኣሳቲ ታ ናምዓንꬆ ኢንቴና ቤያናስ ቦንታዝ ኢስታስ ሚሳቲን ኦቶሬቲዳ። ጊዶ ኣቲን ጎዳ ሼኔ ጊዲኮ ማታራ ታ ኢንቴኮ ባና። ሄ ባዳ ሄ ኦቶራንቻቲ ሃሳዪዛዝ ፃላላ ጊዶንታ ኢስታስ ኣዛ ዎልቃይ ዲዛኮኔ ቤያና ኮያይስ። ጋሶይካ ፆሳ ካዎቴꬂ ጮ ዱና ፃላላ ጊዶንታ ዱናፔ ቦላራ ፆሳ ዎልቃ። ኤሮ! ኢንቴ ኮዪዛይ ኣዋይሴ? ዱርቃ ኤካ ቦዬ? ዎይኮ ሲቆራኔ ኣሽኬቴꬃ ኣያናራ ቦ? ኢንቴ ጋርሳን ዬላቺዛ ላይማይ ዲዛይሲ ዎሬቴስ። ሄሳ ማላ ቱናቴꬂ ኣማኖንታ ዴሬታ ኣቻንካ ዴና። ባ ኣዋ ማቾ ኤኪዳ ኣሲ ኢንቴኮን ዴስ። ሂስቲን ሄሳ ማላ ዬላቺዛ ሚሺ ኢንቴ ጊዶን ዲሺን ኣዛስ ኦቶሬቴቲ? ሄሳፌ ሄ ዮዖዛን ኢንቴ ሙዞታናስ ኢንቴና ቤሴኔ? ሄሳ ማላ ኦꬂዳዴ ኢንቴ ጋርሳፌ ዲጊቴ። ታ ኢንቴናራ ኣሾን ኢሲፌ ዶንታ ኣጊኮካ ኣያናን ቃስ ኢንቴናራ ዳይስ፤ ታ ሃዒ ኢንቴናራ ዲዛ ማላ ሄሳ ኦꬂዳዴ ቦላ ፒርዳዲስ። ኢንቴ ሺቂዛሶን ታ ኢንቴናራ ዲዛ ጊሽ ጎዳ ዬሱሳ ሱንꬃኒኔ ኢንቴ ጊዶን ዲዛ ኑ ጎዳ ዬሱሳ ዎልቃን ሄ ሞራንቻዛ ኣሾይ ꬋዪን ኢዛ ሼምፖይ ጎዳ ጋላሳን ኣታና ማላ ሄሳ ማላ ኣሲ ፃላዔስ ኣꬊ ኢሜቶ። *** ኢንቴ ጬቄቲዛይሲ ሎዖስ ጊዴና። ጉꬃ ኢርሾይ ዳሮ ቡኬሶ ዴንꬄꬂዛ ኤሬኬቲ? ኢንቴ ሃዒ ኢርሾይ ባይንዳ ኦራꬃ ቡኬሶ ጊዳና ማላ ካሴ ጫላ ኢርሾዛ ኢንቴ ጊዶፌ ዲጊቴ። ኑ ፓዚጋ ዶርስ ጊዲዳ ኪርስቶሲ ኑስ ያርሼቲዴስ። ሄሳ ጊሽ ኣኔ ኑኒ ፓዚጋ ባዓሌዛ ቆሆይኔ ኢታቴꬂ ኢዛን ኩሚዳ ካሴ ጫላ ኢርሾ ቦላ ጊዶንታ ኢርሾይ ባይንዳ ኡኬꬃን ሱሬቴꬃኒኔ ቱማን ቦንቾስ። ኢንቴስ ላይማቲዛ ኣሳታራ ኢሲፌቴꬂ ዶንታ ማላ ታ ኢንቴስ ካሴ ዳብዳቤ ፃፋዲስኮሺን። ኢንቴ ሜላ ኣማኖንታ ላይማቲዛ ኣሳራ ጊዶንታ ዎይኮ ጮ ጋጲጋጲዛይታራ፥ ካይሶቲዛይታራ፥ ኤቃስ ጎይኒዛይታራ ጋጎፍቴ ጉስ ጊዶንታ ዲሺን ሃዒ ታ ፃፊዳይ ኣማናይስ ጊሼ ላይማቲዛይታራ ዎይኮ ማꬆቲዛይታራ፥ ጋጲጋጲዛይታራ፥ ኤቃስ ጎይኒዛይታራ፥ ኣሳ ሱንꬅ ሞሪዛይታራ ዎይኮ ጫይዛይታራ፥ ኣሳ ሚሽ ቦንቂዛዴንታራ ኢንቴስ ኢሲፌቴꬅ ዶፖ። ሄይታንታ ማላራ ሃራይ ኣቶ ሺን ካꬂካ ኢሲፌ ሞፕቴ። *** ሃንኮ ኣማኖንታ ኣሳ ቦላ ፒርዳናስ ታና ኣዚ ጋꬂዜ? ዎሳ ኬꬃን ዲዛይታ ቦላ ኢንቴ ፒርዴኬቲ? ዎሳ ኬꬃፌ ካሬራ ዲዛይታ ቦላ ጊዲኮ ፆሲ ፒርዳና “ኢንቴ ኢንቴ ጊዶፌ ኢታ ኣስ ዲጊቴ” ጌቴቲ ጌሻ ማፃፋን ፃፌቲዴስ። ኢንቴ ጋርሳፌ ኢሳዴስ ሃራ ኣማኒዛዴራ ዮዖይ ዲኮ ሄ ዮዖዛ ኣማኒዛይታ ኣች ሺሻናይሳ ዎስቲ ኣማኖንታ ኣሳ ሲንꬃን ፒርዴታና ሺሺዜ? ኣማኒዛ ኣሳይ ኣማኖንታ ኣሳ ቦላ ፒርዳናይሳ ኢንቴ ኤሬኬቲ? ኢንቴ ቡሮ ኣላሜ ቦላ ፒርዳንዴታ። ጊዲኮካ ሄሳ ጉꬃ ዮዖ ቦላ ፒርዳናስ ዳንዳዬኬቲ? ሃይሳ ቢታ ቦላ ዲዛ ፒርዳይ ኣቶሺን ኢንቴ ቡሮ ኪታንቻታ ቦላ ፒርዳናይሳ ኤሬኬቲ? ኢንቴ ኢንቴ ጋርሳን ኦዬቲኮ ኣማኒዛይታ ማባራፔ ካሬን ዲዛይታኒኔ ካꬌቲዳ ኣሳታ ሲንꬃን ዎስቲ ኢንቴ ዮዖ ሺሼቲ? ታ ሄሳ ኢንቴስ ጊዛይ ኢንቴና ዬላቻናሳ። ኢንቴ ጋርሳን ኣማኒዛይታ ጊጊሳናስ ዳንዳዪዛ ዋዝናማ ኣሲ ዴኔ? ጊዶ ኣቲን ኣማኒዛዴይ ሃራ ኣማኒዛዴ ሞታናስ ኣላሜ ፒርዳ ኬꬄ ባናስ ቤሲዜ? ኢንቴ ጋርሳን ኢሶይ ኢሳ ሞቶይ ኢንቴ ኩንዴꬃስ ማላታ ቤሴስ። ኢንቴ ቆሃናፔ ቆሄቲኮ ሎዔኔ? ቃሴካ ኢንቴ ኣስ ባሌꬃናፔ ኢንቴና ኣሲ ባሌꬂኮ ሎዔኔ? ኢንቴ ሃ ቆሄታናፔ ጌዴ ቆሄታኔ ባሌꬄታ። ሄሲካ ኢንቴ ኢሻታ። ማካላንቻቲ ፆሳ ካዎቴꬅ ጌሎንታይሳ ኤሬኬቲ? ሄሳ ማላ ዮዖን ባሌቶፍቴ። ላይማታና ቃቃቲዛይቲ፥ ኤቃ ኤቂዛይቲኔ ኣዴይ ኣዴራ ላይማቲዛይቲ፥ ዎይኮ ካይሶቲ፥ ጋጲጋጲዛይቲ፥ ማꬆቲዛይቲ፥ ኣስ ጫይዛይቲኔ ቦንቂዛይቲ ፆሳ ካዎቴꬅ ላቴቴና። ኢንቴፌ ኢሲ ኢሲ ኣሳቲ ሄይታንታ ማላ ሺን ሃዒ ቃስ ጎዳ ዬሱስ ኪርስቶሳ ሱንꬃኒኔ ኑ ፆሳ ኣያናን ሜጬቲዴታ፤ ዱማቲዴታኔ ፂሊዴታ። ሃራይ ዉሪካ ታስ ኢሜቲዴስ፤ ጊዶ ኣቲን ዉሪካ ጎዒዛዝ ጊዴና። ዉሪካ ታስ ኢሜቲዴስ ጊዶ ኣቲን ኣይ ሚሺካ ታና ሃሬና። ቃሴ ካꬂ ኡሎሳ፤ ኡሎይካ ካꬃሳ፤ ጊዶ ኣቲን ፆሲ ናምዓካ ꬋይሳና፤ ኣሳቴꬂ ጎዳስፌ ኣቲን ላይማስ ጊዴና። ጎዳይካ ኣሳቴꬃሳ። ፆሲ ጎዳ ሃይቆፔ ዴንꬂዳ ማላ ኑናካ ቃሴ ኢዚ ባ ዎልቃን ሃይቆፔ ዴንꬃና። ኢንቴ ኣሳቴꬃይ ኪርስቶሳ ኣሳቴꬅ ቢሊቴ ጊዲዳይሳ ኢንቴ ኤሬኬቲ? ሂስቲን ታ ኪርስቶሳ ኣሳቴꬃፌ ኢሳ ላይማን ኣቂዛ ኣሳታራ ኢሲኖ ሂስቶ? ሙሌካ ቤሴና። ዎይኮ ላይማቲዛሪራ ኣቂዛዴይ ኢዚራ ኢሲ ኣሾ ጊዲዛይሳ ኢንቴ ኤሬኬቲ? “ናምዓይ ኢሲ ኣሾ ጊዴቴስ” ጌቴቲዴስ። ጊዶ ኣቲን ጎዳራ ኢሲኖ ጊዲዛዴይ ኢዛራ ኢሲ ኣያና ጊዴስ። ላይማፔ ሃኪቴ፤ ኣሲ ኦꬂዛ ሃራ ናጋራይ ዉሪ ኢዛዴ ኣሾፔ ካሬራ ሃኔስ። ላይማ ላይማቲዛዴይ ጊዲኮ ባርካ ባ ኣሳቴꬅ ቦላ ናጋራ ኦꬄስ። ኢንቴ ኣሳቴꬃይ ኢንቴ ጋꬃን ዲዛ ፂሎ ኣያናስ ዱሳሶ ጊዲዳይሳ ኢንቴ ኤሬኬቲ? ሄ ኣያናይካ ኢንቴ ፆሳፌ ኤኪዳይሳ። ኢንቴካ ኢንቴስ ጊዴኬታ። ኢንቴ ሚሻን ሻሜቲዴታ። ሄሳ ጊሽ ኢንቴ ኢንቴ ኣሳቴꬃን ፆሴ ቦንቺቴ። ኢንቴ ታስ ፃፊዳ ማላ ኣሲ ማጫሳኮ ጋኮንታ ኣጊዛኮ ሎዖኮ! ጊዶ ኣቲን ላይማፔ ናጌታናስ ኣቱማሳስ ኢሳስ ኢሳስ ማቻ ዱ። ማጫሳስካ ኢሲኔይስ ኢሲኔይስ ኣዚናይ ዶ። *** ኣዚናይ ባ ማቼይስ ኮሺዛዝ ዉርሲ ኦꬆ። ማቻካ ባ ኣዚናስ ኮሺዛዝ ዉርሳ ኦꬁ። ማቺ ኣሳቴꬂ ኢዚስ ፃላላ ጊዶንታ ኣዚናሳራ ኮꬃ። ሄሳꬆካ ኣዚና ኣሳቴꬂ ኢዛስ ፃላላ ጊዶንታ ማቼይሳራ ኮꬃ። ናምዓይ ዶሳን ዎሳስ ጊዲ ዞሬን ጊዶ ጊዲ ቃቺዳ ጋላሳታፔ ኣቲን ሃራ ጋላስ ኢሶይ ኢሳስ ኣካይ ጎፒቴ። ሄሳ ጋሶን ኢንቴስ ኢንቴና ሃሮይ ፆኒን ፃላዔይ ኢንቴና ፓጮንታ ማላ ናምዓይ ኢሲፌ ኣቂቴ። ታ ሄሳ ጊዛይ ጮ ኣዛዞ ማላ ጊዶንታ ዞሬ ዞራይስ። ኣሲ ዉሪ ታ ማላ ማቾ ኤኮንታ ዲዛኮ ታ ዶሳይስ። ጊዶ ኣቲን ኢሲ ኢሲ ኣሳስ ፆሳፌ ኢሜቲዳ ዱማ ኢሞታይ ዴስ። ኢሳስ ዱማ ኢሲ ኢሞታይ ዴስ። ሃንኮይሳስ ቃስ ሃራ ኢሞታይ ዴስ። ቡሮ ኤኮንታይታኔ ጌሎንታይታ ጊሽ ቃሴካ ኣዚናይ ሃይቂዳ ማጫሳታ ጊሽ ታ ጊዛይ ኢስቲ ጌሎንታኔ ኤኮንታ ታ ማላ ዲዛኮ ኢስታስ ሎዖ ጋይስ። ጊዶ ኣቲን ኢስቲ ባና ናጋናስ ዳንዳዮንታይታ ጊዲኮ ጌሌቶኔ ኤኬቶ፤ ጮ ኣሞን ፁጌታናፔ ኤኮይኔ ጌሎይ ሎዖ። ኤኪዳይታሲኔ ጌሊዳይታስ ታ ኢሚዛ ኣዛዞይ ሃይሳ። ሄሲካ ጎዳ ኣዛዞፔ ኣቲን ታ ኣዛዞ ጊዴና። ኣዚና ጌሊዳ ማጫሳያ ባ ኣዚናፔ ሻኬቱፉ። ሻኬቲዛ ጊዲኮ ሃራ ኣዚና ጌሎንታ ኡቱ። ኣካይ ጊኮ ባ ኣዚናራ ጊጉ። ኣዚናይካ ባ ማቾ ኣንጂ ዬዶፎ። ሃንኮ ኣሳስ ቃስ ታ ሂዝጋይስ። ሄሳ ጊዛይካ ታና ኣቲን ጎዳ ጊዴና። ኣማኖንታ ማቻ ዲዛ ኣማኒዛዴይ ማቼያ ኢዛራ ዳና ዶሲኮ ኢዚ ኢዞ ኣንጃናስ ቤሴና። ኣማኖንታ ኣዚናይ ዲዛ ኣማኒዛ ማጫሲያ ሄ ኣማኖንታ ኣዚናይ ኢዚራ ዳናስ ኮይኮ ኢዛ ኢዛፔ ኣንጄታ ባናስ ቤሴና። ጋሶይካ ኣማኖንታ ኣዚናይ ኣማኒዛ ባ ማቼዪን ኣንጄቴስ። ኣማኖንታ ማጫሳያካ ኣማኒዛ ባ ኣዚናን ኣንጄታዉስ። ሄሳꬆ ሃኖንታ ኣጊኮ ኢንቴ ዬሊዳ ናይቲ ቱናታ ጊዳና ሺን ሃዒ ቃስ ኣንጄቲዳይታ። ጊዶ ኣቲን ናምዓፌ ኢሶይ ኣማኖንታዴይ ሻኬታና ኮይኮ ሻኬቶ። ኣዴ ጊዲን ማጫ ጊዲን ኣማኒዛዴይ ሄሳ ማላ ዎጋን ቃሼቴና። ፆሲ ኑና ሳሮን ዳና ማላ ፄይጊዴስ። ሃኔ ኔኒ ኔ ኣዚና ኣሻናኮኔ ኣይ ኤራይ? ዎይኮ ሃይሶ ኔ ኔ ማቾ ኣሻናኮኔ ኣይ ኤራይ? ጮ ኢሲ ኢሲ ኣሲ ፆሲ ፄይጊዳ ማላኔ ጎዳይ ዎꬂዳ ማላ ዴዖ። ዎሳ ኬꬃታስ ታ ዎꬂዛ ዎጋይ ሄሳ። ኢሳዴይ ኣማናናፔ ካሴ ቃፃሬቲዳዝ ጊዲኮ ቃፃሬቶንታ ኣሳ ማላ ሃኖፖ። ቃስ ቃፃሬቶንታ ዲሼ ኣማኒዳዴይካ ቃፃሬቶፎ። ቃፃሬቲን ቃፃሬቶንታ ኣጊን ናምዓንካ ጎዓይ ባዋ። ዋና ኣይፌ ዮዖይ ፆሳ ኣዛዞ ፖሎ። ኢሲ ኢሲ ኣሲ ባ ፄይጌቲዳ ፄይጌቴꬃን ሚኒ ዴዖ። ኣማኒዛ ዎዴ ኔ ኣይሌ? ኔ ሄሳስ ዳሮ ሜቶቶፓ፤ ዎዜታና ዳንዳዪኮ ዎዜታ። ጋሶይካ ኣይሌ ጊዲ ዲሼ ጎዳ ኣማኒዳዴይ ኢዚ ጎዳ ጎቃ። ሄሳꬆካ ኣማኒዛ ዎዴ ጎቃ ጊዶንታዴይ ኢዚ ኪርስቶሳስ ኣይሌ። *** ኢንቴ ሚሻን ሻሜቲዴታ። ሄሳ ጊሽ ኣሳ ኣይሌ ጊዶፒቴ። ታ ኢሻቶ! ኢንቴፌ ኢሲ ኢሲ ኣሲ ባ ፄይጌቲዳ ማላ ፆሳራ ሚኒ ዴዖ። ጌላዖታኔ ፓንꬃታ ጊሽ ታስ ጎዳፔ ኢሜቲዳ ኣዛዞይ ዴና። ጊዶ ኣቲን ጎዳ ማሮቴꬃፌ ዴንዲዳይሳን ታ ኢንቴስ ኣማኔቲዳዴ ጊዳዳ ኢንቴና ዞራይስ። ሃይሳ ሃዒ ዎዴ ሜቶ ጋሶን ኢንቴ ሃዒ ዲዛ ማላ ዲዛኮ ታስ ሎዖ ሚሳቴስ። ኔ ማቺዳዴ ጊዲኮ ኣንጃናስ ኮዮፓ። ማቾንታዴ ጊዲኮ ማቾ ኤካናስ ኮዮፓ። ማቾ ኤኪኮካ ናጋራ ጊዴና። ጌላዖያካ ጌሊኮ ናጋራ ጊዴና። ጊዶ ኣቲን ኤኪዛ ኣሳታኔ ጌሊዛይታ ቦላ ሃይሳ ኣላሜዛን ኢስታ ዳሮ ሜቶይ ጋካና። ታ ቃስ ሄሲ ኢንቴ ቦላ ጋኮንታ ኣጋናይሳ ዶሳይስ። ታ ኢሻቶ! ታ ቆፋይ ሃይሳ ማላ፤ ዎዴዚ ቃንꬅ ጊዲዳ ጊሽ ማቻ ዲዛዴይ ማቻ ባይንዳዴ ማላ ዴዖ። ዬኪዛይቲ ዬኮንታ ኣሳ ማላ፥ ኡፋዬቲዛይቲ ኡፋዬቶንታ ኣሳ ማላ ጊዴቶ። ሚሼ ሻሚዳዴንቲ ሻሜቲዳ ሚሻ ባስ ጊ ቆፖፌቶ። ሃይሳ ኣላሜዛ ሚሻን ጎዔቲዛይቲ ዉርሲ ጎዔቶንታ ኣሳ ማላ ጊዲ ዴቶ። ጋሶይካ ሃይሳ ኣላሜዛ ሃኖይ ኣꬋናስ ዴስ። ኢንቴ ሂርጋይ ባይንዳ ዳና ማላ ታ ኮያይስ። ማቾንታዴይ ጎዳ ኡፋይሳናስ ጎዳ ጊሽ ቆፔስ። ማቺዳዴይ ቃስ ባ ማቺዮ ኡፋይሳናስ ሃይሳ ኣላሜዛ ሚሽ ቆፔስ። ሃይሳን ኢዛ ቆፋይ ናምዑ ኬዚ ሻኬቴስ። ጌሎንታ ማጫሳያ ዎይኮ ጌላዖያ ጎዳዝ ፃላላ ቆፓዉስ። ኢዚስ ጊታ ቆፋይካ ኣሾኒካ፥ ኣያናንካ ጎዳስ ዱማቴꬃ። ጌሊዳራ ጊዲኮ ባ ኣዚና ኡፋይሳናስ ሃይሳ ኣላሜዛ ሃኖ ፃላላ ቆፓዉስ። ታ ሄሳ ጊዛይ ኢንቴስ ሎዓናዝ ቆፓዳፔ ኣቲን ኢንቴና ዳሮ ቆፋን ዬጋናስ ጊዴና። ታስ ጊታ ቆፋይ ኢንቴ ዎዝናይ ሻኬቲ ናምዑ ኬዞንታ ኢንቴ ጎዳን ሚኒዲ ዎጋራ ዴ7ያናሳ። ኢሳዴይ ባ ኦይቺዳ ጌላዖዮ ዎጋራ ኦይኮንታ ኣጊኮ ኢዚ ዎዴይካ ጪሚ ጪሚ ቢኮ ኤካና ኮይኮ ባ ኮይዳ ማላ ኤኮ። ኤኪኮኔ ጌሊኮ ሎዖ። ናጋራ ጊዴና። ጊዶ ኣቲን ሃይሳ ሃ ዮዖዛን ኢዛ ዎዝናይ ቃፆንታ ባና ሃሪዲ ጌላዖዮ ኤኪኬ ጊዲ ሙርቲዳ ኣሲ ሎዖ ኦꬂዴስ። ሄሳ ጊሽ ጌላዖዮ ኤኪዳዴይ ሎዖ ኦꬂዴስ። ኤኮንታዴይካ ኣꬌꬃ ሎዖ ኦꬂዴስ። ኢሲ ማጫሲ ኣዚናይ ፓፃ ዲዛ ዎዴ ኩሜꬃን ባ ኣዚናራ ቃሼታዱስ። ኣዚናይ ሃይቂኮ ባ ኮይዳ ኣስ ጌላና ዳንዳያዉስ። ኢዛ ጌላናዴይ ኣማኒዛዴ ጊዶ ኣቲን ጌሉ። ታ ቆፋ ማላ ጊዲኮ ኢዛ ጌሎንታ ዲዛኮ ዳሮ ኡፋይሳን ዴዓንዱስ። ታስካ ታናን ፆሳ ኣያናይ ዲዛ ሚሳቴስ። ኤቃስ ሹኬቲዳ ኣሾ ጊሽ ኢንቴ ታስ ፃፊዳይሳ ማላ ጊዲኮ ቱሙካ ኑ ዉሪካ ኤሪዛ ሚሺ ዴስ። ኤሮይ ኦቶሪሴስ፤ ሲቆይ ቃስ ጎዔስ። ታ ኤራይስ ጊዛ ኣሲ ኤራናስ ቤሲዛ ማላ ቡሮ ኤሪቤና። ፆሴ ሲቂዛዴይ ጊዲኮ ኢዚ ፆሳ ኣቻን ኤሬቲዳዴ። ሄሳ ጊሽ ኤቃስ ያርሼቲዳ ኣሾ ሙሳ ጊሽ ታ ኢንቴስ ጊዛይ ሃይሳ ኣላሜዛን ኤቃይ ሃዳ ጊዲዳይሳኔ ኢሲ ፆሳፌ ኣቲን ሃራ ፆሲ ባይንዳይሳ ኑ ኤሮስ። ኣይዴካ ጊዲኮ ዳሮ ኤቃቲኔ ዳሮ ጎዳቲ ዴቴስ ሺን ሳሎን ጊዲን ሳዓ ቦላ ፆሴ ጌቴቲዛ ዳሮ ኤቃቲ ዲኮካ ኑስ ጊዲኮ ሃኒዳይ ዉሪካ ኢዛን ሃኒዴስ። ኑካ ኢዛስ ጊዲዳ ኢሲ ፆሲ ኣዋይ ዴስ። ቃሴካ ሃኒዳዚ ዉሪካ ኢዛን ሃኒዳይ ኑካ ኢዛን ሃኒዳ ኢሲ ጎዳይ ዬሱስ ኪርስቶሲ ፃላላ ኑስ ዴስ። *** ጊዶ ኣቲን ሄሳ ኣሲ ዉሪ ኤሬና። ኢሲ ኢሲ ኣሳቲ ሃኖ ጋካናስ ኤቃ ጎይኖ ዶሲዳ ጊሽ ሄሳ ማላ ኣሾ ሚሼ ኣዳካ ኤቃስ ሹኬቲዳይሳ ቆፔቴስ። ኢስታስ ቆፋይ ላፋ ጊዲዳ ጊሽ ኢስቲ ቱኔቴስ። ጊዶ ኣቲን ካꬂ ኑና ፆሳ ኣች ጋꬄና። ኑ ሞንታ ኣጊኮካ ኑስ ፓጪዛይ ዴና። ኑ ሚኮካ ኑስ ዎꬌይ ዴና። ጊዶ ኣቲን ኢንቴ ሜቶይ ባዋ ጉሳን ኦꬂዛይስ ኣማኖን ሚኖንታ ኣሳስ ꬉጴ ጊዶንታ ማላ ናጌቲቴ። ኔስ ሄሳ ሚሳቲዛ ኤራቴꬅ ዲዛ ጊሽ ሂንኮ ኣማኖን ሚኖንታዴይ ኤቃ ኬꬃን ኔ ሚዛይሳ ቤዪዲ ኤቃስ ሹኬቲዳይሳ ማናስ ፃሌኔ? ሄሳ ጊሽ ኪርስቶሲ ኢዛ ጊሽ ሃይቂዳ ሄ ኣማኖን ሚኖንታ ኢሻይ ኔ ኤራቴꬃ ጋሶን ꬋዬስ ጉሳ። ሄሳꬆካ ኢንቴ ኢንቴ ኢሻታ ቆሆኒኔ ኢስታ ላፋ ቆፋ ማዱንꬆን ኪርስቶሳ ቆሄታ። ሄሳ ጊሽ ታ ሚዛ ሚሺ ታ ኢሻ ꬉጲዛዝ ጊዲኮ ታ ኢሻ ታ ꬉጴꬆንታ ማላ ሙሌካ ኣሾ ሚኬ። ታኒ ጎቃ ኣስ ጊዲኪና? ታ ሃዋሬ ጊዲኪና? ኑ ጎዳ ዬሱሳ ታኒ ታ ኣይፌራ ቤያቤኪና? ኢንቴካ ጎዳን ታ ኦሶን ቤቲዳ ኣይፌ ጊዴኬቲ? ሃራታስ ታ ሃዋሬ ጊዶንታ ኣጊኮካ ታ ኢንቴስ ቱማፔ ሃዋሬ። ጋሶይካ ጎዳን ታ ሃዋሬቴꬃ ቤሲዛ ማታሜይ ኢንቴና። ታና ፓጪዛይታስ ታ ኢሚዛ ማልꬄይ ሄሳ። ኤሮ! ማናሲኔ ኡያናስ ኑስ ቤሴኔ? ሃራ ሃዋሬታ ማላ ጎዳ ኢሻታ ማላኔ ኬፋንታ ማላ ኑካ ኣማኒዛ ኑ ማቼታ ኤኪ ዩያና ዳንዳዮኮኒ? ዎይኮ ዋዬቲ ዳቡሪዲ ዳናስ ቤሲዛይ ታናኔ ባርናባሳ ፃላላ? ኤሮ! ባ ሚሻራ ዎታዳራቴꬅ ኦꬂዛይ ኦኔ? ዎይኔ ሚꬂ ቶኪዲ፥ ሄ ቶኪዳ ሚꬃ ኣይፌ ሞንታይ ኦኔ? ሜሄ ሄሚሼ ባ ሄሚዛ ሜሄዛ ማꬅ ኡዮንታይ ኦኔ? ታ ሃይሳ ጊዛይ ጮ ኣሳ ቆፋ ማላ ፃላላ? ሙሴ ዎጋይ ሄሳꬆ ጌኔ? ሙሴ ዎጋ ጋርሳን “ካꬅ ቡኪዛ ሜሄ ዱና ቃቾፋ” ጌቴቲ ፃፌቲዴስ። ሂስቲን ፆሴ ሜቲዳይ ሄ ሜሄዛ ቃንꬄ? ኢዚ ሄሳ ጊዳይ ቱማፔ ኑ ጊሽ ጊዴኔ? ሄሲ ፃፌቲዳይ ኣዳፌ ኑ ጊሻሳ። ጎሻንቻይኔ ቃሴካ ቡኪዛይሲ ባ ኦሶ ኣይፌፔ ባና ጋኪዛይሳ ኤካናስ ኡፋይስ ኦꬄስ። ኑ ኢንቴ ጊዶን ኣያና ዜሬꬂ ዜሪዳይቲ ኣሾስ ጊዲዛዝ ማፂኮ ሄሲ ጊታ ሚሼ? ሃራ ኣሳቲ ኢንቴፌ ሄሳ ማላ ጎዓ ኤካናስ ዳንዳዪኮ ኑ ቃስ ሄሳፌ ዳሮ ዴማናስ ቤሴኔ? ጊዶ ኣቲን ኑኒ ኑስ ቤሲዛ ማላ ጎዔቲቤኮ። ሃራፔካ ኑ ኪርስቶሳ ሚሺራቾ ቃላስ ꬉጴ ጊዶንታ ማላ ሃኒዛዝ ዉርሲካ ዳንዳዮስ። ፆሳ ኬꬃን ኦꬂዛይቲ ባ ማናይሳ ፆሳ ኬꬃፌ ኤኪዛይሳ ማላ ያርሾሶን ኦꬂዛይቲካ ሄ ባ ኦꬂዛ ያርሺዛይሳፌ ሚዛይሳ ኢንቴ ኤሬኬቲ? ሄሳꬆካ ሚሺራቾ ቃላ ሳባኪዛይቲ ባሲ ኮሺዛይሳ ሚሺራቾ ቃላ ኦꬂዛሶፔ ኤካና ማላ ጎዳይ ዎጋ ዎꬂዴስ። ታኒ ጊዲኮ ሄሳ ኡባፌካ ኣይኮካ ጎዔታቤኬ። ሃዒካ ታ ኢንቴስ ሃይሳ ፃፊዛይ ሄይታንታ ማላ ሚሽ ታስ ኦꬄቶ ጋዳ ጊዴና። ኣይሲ ጊኮ ኦኒካ ታኒ ታ ጎዳን ጬቄቲዛሮ ታፔ ዎꬂ ኤካናፔ ታስ ሃይቆይ ሎዖ። ሚሺራቾ ቃላ ሳባኪዳይሲ ታና ጬቂሴና። ታ ሳባኪዛይ ዶሳን ጊዲዳ ጊሽ ጊዶንታ ዎልቃራ ታና ጋኪዳ ጊሻሳ። ታ ሚሺራቾ ቃላ ሳባኮንታ ኣጊኮ ታና ኣዬ-ኣና! ሚሺራቾ ቃላ ታ ዶሳን ታ ሳባኪኮ ታስ ዎይቶይ ዴስ። ታኒ ታ ዶሳን ጊዶንታ ዎልቃራ ኦꬂዛይሳ ጊዲኮ ሃዳራ ፖላና ማላ ኦሶ ፃላላ ጊዳና። ሂስቲን ታስ ኣዛ ዎይቶይ ዲዜ? ታስ ዎይቶይ ዳናይ ሚሺራቾ ቃላ ሳባካሼ ታስ ቤሲዛይታ ታ ጎዔቶንታ ኣጊኮኮ። ታ ጎቃፔ ኣቲን ኦናስካ ኣይሌ ጊዲኬ። ጊዶ ኣቲን ዳሮታ ጎዳኮ ዛራና ጊሽ ኣሳ ኡባስ ኣይሌ ማላ ጊዳዲስ። ኣይሁዳታ ኣሻናስ ኣይሁዳታራ ኢስታ ሚሳታዲስ። ታኒ ታ ባጋራ ሙሴ ዎጋፔ ጋራሳራ ጊዶንታ ዳሼ ሙሴ ዎጋፔ ጋርሳራ ዲዛይታ ኣሻናስ ኢስታ ሚሳታዲስ። ታኒ ታ ባጋራ ፆሳ ዎጋይ ዲዛዴኔ ኪርስቶሳ ዎጋስ ሃሬቲዛዴ ጊዲኮካ ዎጋይ ባይንዳይታ ኣሻናስ ኢስታ ማላ ዎጋይ ባይንዳዴ ጊዳዲስ። ዳቡራንቻታ ኣሻናስ ጋዳ ታካ ዳቡራንቻታራ ኢስታ ማላ ዳቡራንቻ ጊዳዲስ። ታስ ዳንዳዬቲዳ ማላ ኡባን ኢሲ ኢሲ ኣሳታ ኣሻናስ ኣሳ ኡባራ ኢስቲ ሃኒዛዝ ሃናዲስ። ታ ሃይሳ ዉርሳ ኦꬂዛይ ሚሺራቾ ቃላ ኣንጆ ኢስታራ ጊሼታናስ ሚሺራቾ ቃላ ጊሽ ኦꬃዲስ። ጋዴ ዎꬂ ዎፂዛይቲ ዳሮ ሺን ፆኒዲ ሺልማቴ ዴሚዛይ ኢሳዴ ፃላላ ጊዲዳይሳ ኢንቴ ኤሬኬቲ? ሄሳ ጊሽ ሺልማቴ ኤካናስ ዎፂዛዴ ማላ ኢንቴካ ዎፂቴ። ጋዴን ዎፂ ኣꬋናስ ጊጌቲዛዴይ ኦኒካ ሃኖ ባርካ ባና ናጌስ። ሄይታንቲ ኣꬋናኔ ꬋያና ኣክሊሌ ኤካናስ ዳቡሬቴስ ሺን ኑ ቃስ ሜርናስ ꬋዮንታ ኣክሊሌ ዴማናስ ዳቡሮስ። ሄሳ ጊሽ ታ ቃስ ፖሎይ ባይንዳ ጮ ሜላ ዎፂዛዴ ማላ ዎፂኬ። ቃሴካ ጫርኮራ ባፄቲዛዴ ማላ ጮ ሜላ ጋዴን ባፄቲኬ። ታ ቃስ ሃራታስ ሳባካ ፔዓዳ ታስ ኩንዳ ኣቶንታ ማላ ታ ኣሳቴꬅ ሺሻ ኦይካዳ ሃራይስ። ታ ኢሻቶ! ካሴ ኑ ኣዋቲ ሻራይ ኢስታፌ ቦላራ ጊዲዲ ካሌꬂዳይሳ ማላኔ ኢስቲ ዉሪካ ዞዖ ኣባ ፒኒዳይሳ ታ ኢንቴና ቆፒሳናስ ኮያይስ። ኢስቲ ሙሴራ ጊዳናስ ጊዲ ሻራኒኔ ኣባን ፃማቄቲዳ። ዉሪካ ኢሲ ኣያና ቁማ ሚዳ። ዉሪካ ኢሲ ኣያና ኡሺ ኡዪዳ። ኢስቲ ኡዪዳይካ ባና ካሊዛ ኣያና ዛላፌ ፑልቲዳይሳፌ። ሄ ዛላይካ ኪርስቶሳ። ጊዶ ኣቲን ፆሲ ዳሮታን ኡፋዬቲቤና። ሄሳ ጊሽ ኢስታ ኣሃይ ባዞን ኩንዲ ኣቲዴስ። ኢስቲ ኢታ ሚሽ ኣሞቲዳይሳꬆ ኑካ ኣሞቶንታ ማላ ሄ ኢስታ ሃኖይ ኑ ናጌታና ማላ ኑስ ሌሚሶ ጊዲዴስ። “ዴሬይ ማናሲኔ ኡያናስ ኡቲዴስ፤ ዬፃናስካ ዴንዲዴስ” ጌቴቲ ካሴ ጌሻ ማፃፋን ፃፌቲዳ ማላ ኢስታ ጋርሳፌ ኢሲ ኢሲ ኣሳቲ ኦꬆይሳꬆ ኢንቴካ ኤቃ ጎይኒዛያታ ጊዶፒቴ። ኢስታ ጋርሳፌ ኢሲ ኢሲ ኣሳቲ ላይማቲዲ ኢሲ ጋላስ ናምዑ ታማኔ ሄꬑ ሺ ኣሳይ ዲፒ ጊ ዉሮይሳꬆ ዉሮንታ ማላ ኑካ ኣኔ ላይማቶኮ። ኢስታ ጋርሳፌ ኢሲ ኢሲ ኣሳቲ ጎዳ ፓጪዲ ሾሻን ዱኬቲ ሃይቂ ꬋዪዳይሳ ማላ ኑካ ኣኔ ጎዳ ፓጮኮ። ኢስታ ጋርሳፌ ኢሲ ኢሲ ኣሳቲ ዙዙሜቲዲ ꬋይሲዛ ቦሻ ኪታንቻን ꬋዪዳይሳꬆ ኢንቴካ ꬋዮንታ ማላ ዙዙሞፒቴ። ሄሲ ዉሪ ኑስ ሌሚሶ ጊዳና ማላ ኢስታ ቦላ ጋኪዴስ። ዎዴ ዉርሴꬃን ዲዛ ኑስ ቲሚርቴ ጊዳና ማላ ኑስ ፃፌቲዴስ። ሄሳ ጊሽ ታ ሚና ኤቃ ዳይስ ጊዛዴይ ዲኮ ኩንዶንታ ማላ ባሲ ናጌቶ። ኣሳ ቦላ ጋኪዳ ፓጬፔ ሃራ ኣꬊዛ ፓጬይ ኢንቴ ቦላ ጋኪቤና። ፆሲ ኣማኔቲዛ ፆሴ ጊዲዳ ጊሽ ኢንቴ ዳንዳዮንታ ኢንቴ ዎልቃፌ ቦላራ ኢንቴ ፓጬቴና ማላ ኢዚ ኢንቴና ኣጋጌና። ጊዶ ኣቲን ኢንቴ ፓጬቲዛ ዎዴ ሄ ፓጬዛ ኢንቴ ዳንዳያና ማላ ዎልቃ ኢሚዲ ፓጬፔ ኢንቴ ኬሲ ኤካና ኦጌ ኢዚ ኢንቴስ ጊጊሳና። ሄሳ ጊሽ ታ ሲቆቶ! ኤቃስ ጎይኖፒቴ፤ ኢዛፔ ሃኪቴ። ታ ኢንቴስ ሃይሳ ጊዛይ ዎዝናማ ጊዲዳ ጊሻሳ። ሄሳ ጊሽ ታ ዮቲዛይሳ ኣኔ ኢንቴ ኢንቴርካ ፒርዲቴ። ኑኒ ፆሳ ጋላቲዲ ኤኪዛ ኡሻይ ኪርስቶሳ ሱꬃራ ጋጎቴꬂ ዲዛይሳ ጊዴኔ? ሄሳꬆካ ኑ ባꬂ ባꬂ ጊሼቲ ሚዛ ኡኬꬃይ ኪርስቶሳ ኣሾራ ጋጎቴꬂ ዲዛይሳ ጊዴኔ? ኡኬꬃይ ኢሲኖ ጊዲዳ ማላ ኑኒካ ዳሮ ጊዲ ኡቲዲካ ዉሪካ ኢሲ ኣሾ። ኑ ዉሪካ ኢሲ ኡኬꬃዛ ጊሼቲ ሞስ። ኣኔ ኢንቴ ኢስራዔሌ ናይቲ ኦꬂዳይሳ ቆፒቴ። ሺቅዛ ያርሾዛፔ ሚዛይታስ ያርሾይ ሺቅዛሶራ ጋጎቴꬂ ዴኔ? ሂስቲን ኤቃስ ያርሼቲዳ ያርሾ ጊዲን ዎይኮ ኤቃይ ባ ባጋራ ጎዓራ ዴስ ጋዚና? ጊዴና! ኣማኖንታ ኣሳይ ሺሺዛ ያርሾይ ፆሳስ ጊዶንታ ፃላዔሳ። ኢንቴስ ፃላዔራ ኢሲፌቴꬂ ዳና ማላ ታ ኮዪኬ። ፃላዔ ኡሺኔ ጎዳ ኡሺ ኢንቴ ኢሲፌ ጋꬂ ኡያና ዳንዳዬኬታ። ጎዳ ማዳፌኔ ፃላዔ ማዳፌ ጋꬂ ማና ዳንዳዬኬታ። ኑኒ ጎዳ ሃንቄꬂኖ? ኑ ኢዛፔ ሚኒዞኒ? ዉሪካ ታስ ኢሜቲዴስ ሺን ዉሪካ ታና ጎዒዛዝ ጊዴና። ዉሪካ ታሳ ሺን ዉሪካ ታና ማዴና። ኣሲ ዉሪካ ባ ላጌ ጎዓናዝ ጋꬂ ፄሎ ኣቲን ባና ጎዓናዝ ፃላላ ኮዮፖ። ጊያን ባይዜቲዛ ኣሾ ዉርሲ ሲꬌይ ባይንዳ ሚቴ። ቢታይኔ ቢታ ቦላ ዲዛይ ዉሪካ ጎዳይሳ። ኣማኖንታ ኣሲ ኢንቴና ባሶ ፄይጊዲ ሺሺዳ ካꬅ ዉርሲ ኣይኮካ ሲꬎንታ ሚቴ። ጊዶ ኣቲን ኢሳዴይ “ሃይሲ ኤቃስ ያርሼቲዳ ካꬃ” ጊኮ ሄ ካꬃ ሄ ኣዴዛ ቆፋ ጊሺኔ ኢንቴና ሲꬊሲኮ ሞፒቴ። ታ ኢንቴስ ሄሳ ጊዛይ ሄ ዮቲዳዴ ቆፋ ጊሽ ጋዲስ ኣቲን ኢንቴ ቆፋ ጊሽ ጋቤይኬ። ታ ፂሎ ጊዳ ዲሺን ኣዛስ ሃራ ኣሳ ቆፋ ጌዶን ታ ቦላ ፒርዴቲዜ? ታ ፆሴ ጋላታዳ ሚዛዴ ጊዳ ኡታዳ ኣዛስ ሃራ ኣሳን ፒርዴቶ? ሂስቲኮ ኢንቴ ኣይ ሚኮካ፥ ኣይ ኡዪኮካ ዎይኮ ኣይኮ ኦꬂኮ ዉርሲካ ፆሳ ቦንቾስ ኦꬂቴ። ኣይሁዳ ኣሳስ ጊዲን ኣይዛቤታስ ጊዲን ዎይኮ ፆሳ ዎሳ ኬꬃስ ኦናስካ ꬉጴ ጊዶፒቴ። ታ ኣስ ዉርሳካ ኣይ ኦጌራካ ኡፋይሳና ኮዪዛ ማላ ኢንቴካ ሄሳꬆ ኦꬂቴ። ዳሮቲ ኣታና ማላ ታ ታና ጎዒዛዝ ጊዶንታ ኢስታ ጎዒዛዝ ኮያይስ። ታኒ ኪርስቶሳ ሚሳታዳ ኢዛ ካሊዛይሳꬆ ኢንቴካ ታና ሚሳቲዲ ካሊቴ። ኢንቴ ታስ ዉርሲ ቆፒዛ ጊሺኔ ታፔ ኤኪዳ ቲሚርቴዛ ሎዔꬂ ኦይኪዳ ጊሽ ታ ኢንቴና ጋላታይስ። ጊዶ ኣቲን ታ ኢንቴ ኤራና ማላ ኮዪዛይ ኣቱማሳስ ኡባስ ሁዔይ ኪርስቶሳ ጊዲዳይሳ ማላ ኣቱማሳይ ማጫሳስ ኡባስ ሁዔ። ቃሴ ፆሲ ኪርስቶሳስ ሁዔ። ባ ሁዔ ጉሉንቲዲ ፆሴ ዎሲዛዴይ ዎይኮ ቃላ ዮቲዛዴይ ኦኒካ ባርካ ባና ካዉሼስ። ባ ሁዔ ጎዞንታ ዎሲዛ ማጫሲያ ዎይኮ ቲንቢቴ ቃላ ዮቲዛ ኣይ ማጫስካ ባርካ ባና ካዉሻዉስ። ሄሲ ኢዛ ባ ሁዔ ቡሊሲዳዴራ ጊና። ማጫሲ ባ ሁዔ ጎዞንታ ኣጊኮ ሜዴቱ ዎይኮ ቃንፂሱ። ኢዚስ ባ ሁዔ ሜዴቴꬂ ዎይኮ ቃንፂሴꬂ ዬላቺዛዝ ጊዲኮ ጎዙ። ኣዴይ ባ ሁዔ ጉሉንታናስ ቤሴና። ኣቱማሲ ፆሳ ሌሚሶኔ ፆሳ ቦንቾ። ማጫሲ ጊዲኮ ኣዴስ ቦንቾ። ጋሶይካ ማጫሲ ኣዴፌ ሜꬌታዱስ ኣቲን ኣቱማሲ ማጫሳፔ ሜꬌቲቤና። ቃሴካ ማጫሲ ኣዴስ ሜꬌታዱስ ኣቲን ኣዴይ ማጫሳስ ሜꬌቲቤና። ሄሳ ጊሽ ኪታንቻቲ ቤያናስ ናጊዛ ማጫሳስ ኢሜቲዳ ማታ ቤሲዛ ጎሴ ባ ሁዔን ጎዙ። ጎዳ ኣቻን ጊዲኮ ማጫሲ ኣዴይ ባይንዳ፥ ኣዴይካ ማጫሲ ባይንዳ ዴዬቴና። ማጫሲ ኣዴፌ ቤቲዳይሳꬆ ኣዴይካ ማጫሳፔ ዬሌቴስ። ጊዶ ኣቲን ናምዓይካ ፆሳፌ ቤቲዳ። ማጫሲ ባ ሁዔ ጎዞንታ ፆሴ ዎሳናስ ቤሲዛኮኔ ኣኔ ኢንቴ ፒርዲቴ። ኣቱማሲ ባ ሁዔ ኣዱሲ ዲቺኮ ቦርሶ ጊዲዳይሳ ኢንቴና ሜꬌቴꬃ ሃኖቴꬂ ኤሪሱዌ? ማጫይ ጊዲኮ ባ ሁዔ ቢናና ዲቺኮ ሄሲ ኢዚስ ቦንቾ ጊዴኔ? ኢዚስ ኣዱሳ ሁዔ ቢናናይ ኢሜቲዳይ ሴሎ ጊዳናሳ። ሄሳ ጊሽ ኦኒካ ሃይሳ ሃ ዮዖዛን ፓላሜታና ኮይኮ ኑስ ጊዲንካ ፆሳ ዎሳ ኬꬃታስ ሃይሳፌ ሃራ ዎጋይ ዴና። ኢንቴ ኢሲ ሶ ሺቄቲዛ ዎዴ ቆሆስ ኣቲን ጎዓስ ጊዶንታ ጊሽ ታ ሃይሳ ኣዛዞዛ ኢንቴስ ኣꬂዛይ ኢንቴና ጋላታሼ ጊዴና። ኢንቴ ዎሳ ኬꬃን ሺቂዛ ዎዴ ኢንቴ ጋርሳን ሻኮቴꬂ ዲዛይሳ ታ ካሴታ ሲያዲስ። ታ ሲዮይሳፌ ባጋይ ቱሙ ጊዳናይሳ ታ ኣማናይስ። ኢንቴ ጊዶፌ ቱማንቻቲ ሻኬቲ ኤሬታና ማላ ሄሳ ማላ ሻኮይ ኢንቴ ጊዶን ዳናይሲ ዶሳ ጊዴና። ኢንቴ ኢሲፌ ሺቄቲዲ ሚዛይ ጎዳ ካዎ ጊዴና። ኢንቴ ሺቄቲዲ ኢሶይ ኢሳ ናጎንታ ዲሼ ካꬅ ሜታ። ኢንቴፌ ኢሳዴይ ጋፋን ዲሺን ሃንኮይሲ ቃስ ማꬆቴስ። ሂስቲን ኢንቴስ ኡያናሶይኔ ማናሶይ ባዌ? ዎይኮ ፆሳ ኬꬄ ሌቂዲ ኣይኮይካ ባይንዳይታ ዬላቼቲ? ሂስቲን ታ ኢንቴና ኣይ ጎ? ሃይሳ ሃ ሃኖዛስ ኢንቴና ጋላቶ? ሙሌካ ጋላቲኬ። ታ ጎዳፔ ኤኪዳይሳ ኢንቴስ ኣꬃዲስ። ሄሲካ ጎዳ ዬሱሲ ኣꬊ ኢሜቲዳ ኦማርስ ኡኬꬅ ዴንꬂዲኔ ፆሴ ጋላቲ ባꬂዲ “ሄዪቴ! ሚቴ! ሃይሲ ኢንቴስ ጊዲዛ ታ ኣሾ። ታና ቆፓናስ ኢንቴ ሃይሳ ኦꬂቴ” ጊዴስ። *** ሄሳꬆካ ካዎፔ ጉዬ ኡሻ ዴንꬂዲ “ሃይሲ ኡሻይ ታ ሱꬃን ሃኒዛ ኦራꬃ ጫቆ። ሄሳ ጊሽ ኡሻፌ ኢንቴ ኡዪዛ ዎዴ ሃይሳ ታና ቆፓና ማላ ኦꬂቴ” ጊዴስ። ሃይሳ ኡኬꬃ ኢንቴ ሚዛ ዎዴኔ ሃይሳ ኡሻካ ኡዪዛ ኡባ ዎዴ ጎዳይ ያና ጋካናስ ኢንቴ ኢዛ ሃይቆ ዮታና። ሄሳ ጊሽ ኦኒካ ቤሶንታ ዲሺን ሃይሳ ኡኬꬃ ሚኮ ዎይኮ ጎዳ ኡሻ ኡዪኮ ኢዛዴይ ጎዳ ኣሾኔ ኢዛ ሱꬃ ካዉሺዳ ጊሽ ኢዚ ኦይሼታና። ኦኒካ ሃይሳ ሃ ኡኬꬃ ማናፔኔ ኡሻፌ ኡያናፔ ካሴቲ ባርካ ባና ፓጮ። ጋሶይካ ኦኒካ ጎዳ ኣሾ ባሲ ጌሎንታ ዲሺን ሚኮኔ ጎዳ ኡሻ ኡዪኮ ኢዛዴይ ባርካ ባ ቦላ ፒርዳ ኤሄስ። ኢንቴ ጋርሳን ዳሮ ኣሳይ ዳቡሪዳይኔ ሳኬቲዳይ ቃሴካ ባጋይ ሃይቂዳይ ሄሳ ጋሶና። ኑ ኑርካ ኑና ፓጪዛኮ ኑ ቦላ ፒርዳና። ጊዶ ኣቲን ጎዳይ ፒርዲዛ ዎዴ ኑ ሃንኮ ኣማኖንታ ኣሳራ ፒርዴቶንታ ማላ ኢዚ ኑና ካሴቲ ሙሬስ። ሄሳ ጊሽ ታ ኢሻቶ! ኢንቴ ማና ሺቂዛ ዎዴ ኢሶይ ኢሳራ ናጌቲቴ። ኢንቴ ሺቂዛ ሺቆይ ፒርዳስ ጊዶንታ ማላ ኢንቴፌ ኦኒካ ጋፊዳዴይ ዲኮ ካሴቲዲ ባ ሶን ሞ። ሃንኮ ኣቲዳይሳ ታኒ ሃራ ዎዴ ሄ ኢንቴኮ ባዳ ዎጋ ዎꬃና። ታ ኢሻቶ! ኣያናይ ኢሚዛ ኢሞቴꬃ ጊሽ ኢንቴ ኢሲ ሚሽ ኤራና ማላ ታ ኮያይስ። ኢንቴ ኣማናናፔ ካሴ ጮ ሜላ ያኔ ሃኔ ጉሳን ኢንቴ ኤሮንታ ካሌꬄቲዲ ዱና ዱዴ ጊዲዳ ኤቃታኮ ቢዳይሳ ኢንቴካ ኤሬታ። ሄሳ ጊሽ ኦኒካ ፆሳ ኣያናን ሃሳዪሼ “ዬሱሲ ቃንጌቲዳዴ” ጌና። ሄሳꬆካ ፂሎ ኣያናን ጊዲዲ ኣቲን ኦኒካ “ዬሱሲ ጎዳ” ጋና ኣሲ ዶንታይሳ ታ ኢንቴስ ዮታይስ። ኣሳስ ኢሞቴꬂ ዱማ ዱማ ጊዲሺን ኣያናይ ጊዲኮ ኢሲኖ። ኦሶይካ ዱማ ዱማ ጊዲሺን ጎዳይ ጊዲኮ ኢሲኖ። ዱማ ዱማ ኦሶ ኦጌቲ ዲኮካ ዉርሲካ ኦꬂዛይ ኢሲ ፆሳ። ጊዶ ኣቲን ፂሎ ኣያና ቆንጪሶ ኢሞታይ ኢሳዴስ ኢሜቲዛይ ኢሲፌ ጎዔታናሳ። ኢሳዴስ ሂላን ሃሳያና ኤራቴꬂ ኢሜቴስ። ሃራ ኣሳስ ቃስ ሄ ኣያናንካ ኤራቴꬃ ቃላን ሃሳያና ቃላይ ኢሜቴስ። ኢሳዴስ ሄ ኣያናን ኣማኖይ ኢሜቴስ። ሃራ ኣሳስ ቃስ ሄ ኣያናኒካ ሃርጊዛይታ ፓꬂዛ ኢሞታይ ኢሜቴስ። ኢሳዴስ ማላሊሲዛ ኦሶ ኦꬂዛ ኢሞታይ፤ ቃሴካ ሃራ ኣሳ ቡሮ ቲንቢቴ ቃላ ሃሳያ ኢሞታይ፤ ሃራ ኣሳ ቃሴካ ኣያናታ ሻኪ ኤሮይ፤ ሃራ ኣሳስ ዱማ ዱማ ቃላን ሃሳያይ፤ ቃሴካ ሃራ ኣሳስ ሃራ ዱማ ዱማ ቃላን ሃሳዬቲዳይሳ ቢርሻና ኢሞታይ ኢሜቴስ። ሄይቲ ዉሪካ ሄ ኢሲ ኣያናይ ኢሚዛ ኢሞታ ጊዲሺን ኢሲ ኢሲ ኣሳስ ባ ኮይዳ ማላ ኢሜስ። ኢሲ ኣሳቴꬃ ቦላ ዳሮ ቢሊቴቲ ዲኮካ ኣሳቴꬃይ ኢሲኖ። ጊዶ ኣቲን ቢሊቴቲ ዳሮ ጊዲኮካ ኣሳቴꬃይ ኢሲኖ ፃላላ። ኪርስቶሲካ ሄሳ ማላ። ኣይሁዳ ኣሳታ ጊዲንካ ጊሪኬ ኣሳታ ጊዲንካ፥ ኣይሌ ጊዲንካ ዎይኮ ጎቃ ኣሳታ ጊዲንካ ኑ ዉሪካ ኢሲኖ ጊዳናስ ኢሲ ኣያናን ፃማቄቲዶስ። ኑ ዉሪካ ሃ ኢሲ ኣያናፔ ኡዪዶስ። ኣሳቴꬂ ሜꬌቲዳይ ዳሮ ቢሊቴታፔ ኣቲን ኢሲ ቢሊቴፔ ፃላላ ጊዴና። ቶሆይ “ታ ኩሼ ጊዶንታ ጊሽ ኣሳቴꬃ ጊዶን ዲኬ” ጊኮ ኢዚ ሂዝጊዳ ጊሽ ኢዛስ ኣሳቴꬃን ዱሲ ኣታኔ? ሃይꬂ “ታ ኣይፌ ጊዶንታ ጊሽ ኣሳቴꬃ ጊዶን ዲኬ” ጊኮ ሄሳ ጊሽ ኣሳቴꬅ ጊዶን ዱሲ ኢዛስ ኣታኔ? ኣሳቴꬂ ዉሪካ ኣይፌ ፃላላ ጊዲዳኮ ኣዛን ሲያኔ? ኣሳቴꬂ ዉሪካ ሃይꬄ ፃላላ ጊዲዳኮ ኣዛን ሲንጋኔ? ጊዶ ኣቲን ፆሲ ኢሳ ኢሳ ባ ኮይዳ ማላ ኣሳቴꬃ ጊዶን ዳናስ ቤሲዛሶን ዎꬂዴስ። ቢሊቴይ ዉሪካ ኢሲኖ ጊዲዳኮ ኩሜꬃ ኣሳቴꬂ ኣዋፔ ቤታኔ? ሄሳ ጊሽ ቢሊቴቲ ዳሮ ሺን ኣሳቴꬂ ጊዲኮ ኢሲኖ ፃላላ። ኣይፌይ ኩሼ “ኔና ታ ኮዪኬ” ጋናስ ዳንዳዬና። ሁዔይ ቶሆ “ኔና ታስ ኮሼና” ጋና ዳንዳዬና። ሃራይ ኣቶሺን ኡባፌ ላፋ ሚሳቲዛ ቢሊቴቲ ዳሮ ኮሺዛይታ። ኑኒ ላፋ ጊ ሌቂዛ ቢሊቴታ ሃንኮይታፔ ኣꬂ ቦንቾስ። ቃሴካ ኑ ኢስታን ዬላቲዛ ቢሊቴታ ሃራፔ ኣꬂ ናጎስ። ኑ ኢስታን ዬላቶንታ ቢሊቴታስ ጊዲኮ ሄሳ ማላ ቦንቾ ኮሼና። ፆሲ ጊዲኮ ኣሳቴꬅ ቢሊቴታ ኢሲ ቦላ ኦይꬄꬂዲ ቦንቾይ ፓጪዛይታስ ኣꬌꬃ ቦንቾ ኢሚዴስ። ኢዚ ሄሳ ኦꬂዳይ ኣሳቴꬃ ቢሊቴታ ጋርሳን ሻኮቴꬂ ዶንታ ኢስቲ ባ ጋርሳን ኢሶይ ኢሳ ባናራ ጊና ጊ ቆፓናሳ። ኢሲ ቢሊቴይ ሳኬቲኮ ሃንኮ ቢሊቴቲ ዉሪካ ኢዛራ ኢሲፌ ሳኬቴቴስ። ኢሲ ቢሊቴይ ቦንቼቲኮ ቢሊቴቲ ዉሪካ ኢሲፌ ኡፋዬቴቴስ። ሂስቲኮ ኢንቴ ዉሪካ ኪርስቶሳ ኣሳቴꬅ፤ ኢንቴ ኢሶይ ኢሶይ ኢዛ ኣሳቴꬃ ቢሊቴታ። ፆሲ ዎሳ ኬꬃ ጊዶን ኮይሮ ሃዋሬታ፥ ናምዓንꬆ ቃሴ ናቤታ፥ ሄꬓንꬆ ኣስታማሬታ፥ ካሌꬂዲ ማላታ ኦꬂዛይታ፥ ፓꬂዛ ኢሞቴꬂ ዲዛይታ፥ ሃራታካ ኣስ ማዲዛ ኢሞታይ ዲዛይታ፥ ዴሬ ኣይሶ ኤራቴꬂ ዲዛይታኔ ዱማ ዱማ ቃላ ሃሳያና ኢሞቴꬂ ዲዛ ኣሳታ ዎꬂዴስ። ዉሪካ ሃዋራቴ? ዉሪካ ናቤቴ? ዉሪካ ኣስታማሬቴ? ዉሪካ ማላሊሲዛ ሚሼ ኦꬂዞ? ኡባስካ ሃርጊዛይታ ፓꬂዛ ኢሞታይ ዲዜ? ኣሲ ዉሪካ ዱማ ቃላን ሃሳዪዜ? ዱማ ቃላን ሃሳዬቶይሳ ኣሲ ዉሪ ቢርሺዜ? ጊዶ ኣቲን ኢንቴ ዉሪካ ኡባፌ ኣꬊዛ ኢሞቴꬅ ሎዔꬂ ኮዪቴ። ቃሴካ ሃራ ኡባፌ ኣꬊዛ ኦጌ ታ ኢንቴና ቤሳና። ታ ኣሳ ቃላኒኔ ሳሎ ኪታንቻታ ቃላን ሃሳዪኮካ ታስ ሲቆይ ባይንዳ ኣጊኮ ጮ ሜላ ቢራታ ጊሪሳ ማላ ዎይኮ ዳላ ጊሬꬃ ማላ። ቲንቢቴ ሃሳዪዛ ኢሞታይ ታስ ዲኮካ፥ ዎይኮ ፁራ ዮዖታኔ ኤራቴꬅ ዉርሳ ታ ኤሪኮካ፥ ዙማይ ኢዚ ዲዛሶፔ ꬎቃዳ ሃራሶ ዲጊዛ ኣማኖይ ታስ ዲኮካ ሄሳ ዉርሳካ ሲቆይ ባይንዳ ታ ኦꬂኮ ሄሲ ሜላ ሃዳ። ታስ ዲዛዝ ዉርሳ ማንቆታስ ታ ኢሚኮካ፥ ታ ኣሳቴꬅ ታ ታማን ፁጊኮካ፥ ሲቆይ ባይንዳ ኣጊኮ ታና ሄሲ ኣይኮካ ማዴና። ሲቆይ ዳንዳያ፥ ቃሴካ ኪያ፤ ሲቆይ ሚቃይኔና፤ ጬቄቴና፤ ኦቶሬቴና፤ ቤሶንታዝ ኦꬄና፥ ባርካ ባ ጎዓ ፃላላ ፄሌና። ቆሆ ቆዳን ዬጌና። ሲቆይ ቱማንፔ ኣቲን ማካላን ኡፋዬቴና። ሲቆይ ኡባ ዎዴ ዳንዳዬስ። ኡባ ዎዴካ ኣማኔስ። ኡፋይስ ኦꬄሲኔ ሚኒ ኤቄስ። ሲቆይ ሙሌካ ኩንዴና። ቲንቢቴይ ጊዲኮ ኣታና። ሃራ ቃላን ሃሳያይካ ኣታና። ኤራቴꬂካ ሻሬታና። ጋሶይካ ኑ ኤሪዛይ ዉርሲ ጊዶንታ ሻኪ ኤሮስ። ቲንቢቴ ሃሳያ ጊዲኮካ ባጋ ሃሳዮስ። ጊዶ ኣቲን ዉርሴꬂ ጋኪዛ ዎዴ ኩሜꬅ ጊዶንታ ኢሞታይ ሄ ዎዴ ሻሬታና። ታ ጉꬃ ናቴቴꬃን ዳሼ ና ማላ ሃሳያይሲኔ ና ማላ ቆፓይስ። ና ማላካ ዩሻ ቆፓይስ። ካሃ ኩንꬂዳፔ ጉዬ ካሴ ናቴꬃን ሃኒዛይሳ ዉርሳካ ዬጋ ኣጋዲስ። ኑኒ ሃዒ ቤይዛይሲ ሃꬃን ፄሊዛ ማላ ጮ ቦዢ ቦዤስ ሺን ሄ ዎዴ ጊዲኮ ኑ ኢዛ ኣይፌሶ ሎዔꬂ ቤያና። ታ ሃዒ ኩሜꬅ ጊዶንታ ባጋ ፃላላ ኤራይስ። ሄ ዎዴ ጊዲኮ ታኒ ታ ሁዔስ ኤሬቲዳይሳ ማላ ኤራና። ሄሳ ጊሽ ኣማኖይ፥ ሂዶታይኔ ሲቆይ ሃይቲ ሄꬓቲ ኤቂ ዳና። ሃይታ ኡባፌ ኣꬊዛይ ሲቆ። ሲቆ ካሊቴ፤ ኣያና ኢሞቴꬃታ ሃራፔካ ቲንቢቴ ሃሳዪዛ ኢሞታታ ሎዔꬂ ኮዪቴ። ሃራ ቃላን ሃሳዪዛዴይ ፆሳስ ኣቲን ኣሳስ ሃሳዬና። ፁራ ጊዲዳ ዮዖ ኣያናን ሃሳዪዛ ጊሽ ኢዚ ጊዛይ ኣሳስ ጌሌና። ቲንቢቴ ሃሳዪዛዴይ ኣሳ ሚንꬄꬃናስ፥ ዴንꬄꬃናሲኔ ጎዓናስ ሃሳዬስ። ሃራ ቃላን ሃሳዪዛዴይ ቃስ ባርካ ባና ሚንꬄꬄስ። ቲንቢቴ ሃሳዪዛዴይ ጊዲኮ ዎሳ ኬꬃ ጎዔስ። ኢንቴ ዉሪካ ሃራ ቃላን ሃሳዪዛኮ ታ ዶሳይስ ሺን ሄሳፌካ ቦላራ ኢንቴ ቲንቢቴ ቃላን ሃሳዪዛኮ ታ ዶሳይስ። ዎሳ ኬꬃይ ሚናና ማላ ሃራ ቃላራ ሃሳዪዛዴይ ባ ሃሳዪዛይሳ ቢርሾንታ ኢዚ ሃራ ቃላራ ሃሳዪዛይሳፌ ቲንቢቴ ሃሳዪዛዴይ ኣꬌስ። ሄሳ ጊሽ ታ ኢሻቶ! ታ ኢንቴኮ ቢዛ ዎዴ ታ ኢንቴስ ቆንጪሴꬃን ዎይኮ ኤራቴꬃን ዎይኮ ቲንቢቴን፥ ዎይኮ ቲሚርቴን ዮቶንታ ሃራ ቃላራ ዮቲኮ ሄሲ ኢንቴና ኣይ ጎዓኔ? ሄሲ ጮ ሱሱልዔ ማላኔ ዲꬃ ማላ ሼምፖይ ባይንዳ ኢስታ ጊሪሳስ ዱማቴꬂ ሻኬቲ ኤሬቶንታ ኣጊኮ ኢዛ ዎስቲ ኤራኔ? ቃሴካ ፁሩምባይ ኣዛስ ፑኔቲዛኮ ዎይኮ ዛዬይ ኣዛስ ዛዬቲዛኮኔ ሻኪ ኤሬቶንታ ኦጌራ ፑኔቲኮ ኦኒ ኦላስ ጊጌታኔ? ኢንቴካ ሄሳ ማላ። ኢንቴ ዱናፔ ኤሬቲዛ ቃላይ ኬዞንታ ኣጊኮ ኢንቴ ጊዛይሳ ኦኒ ኤራኔ? ጮ ሜላ ጫርኮን ꬋያና። ኣላሜ ቦላ ዳሮ ዱማ ዱማ ቃላይ ዴስ ሺን ቢርሼꬂ ባይንዳ ቃላይ ባዋ። ሄሳ ጊሽ ኢሳዴይ ሃሳዪዛ ቃላ ቢርሼꬂ ታ ኤሮንታ ኣጊኮ ሃሳዪዛዴስ ታ ኢማꬄ ጊዳይስ። ኢዛዴይካ ታስ ኢማꬅ ጊዴስ። ኢንቴካ ሄሳ ማላ ኣያናን ኢሞቴꬃታ ዴማናስ ኮዪዛ ጊሽ ዎሳ ኬꬃ ጎዒዛ ኢሞቴꬅ ዴማናስ ሎዔꬂ ኮዪቴ። ሄሳ ጊሽ ሃራ ቃላን ሃሳዪዛ ኣሲ ባ ሃሳዪዳይሳ ቢርሼꬂ ኤራና ማላ ባሲ ዎሶ። ታኒ ሃራ ቃላራ ዎሲዛ ዎዴ ታ ኣያናን ዎሳይስ ኣቲን ታ ኢዛፔ ኣይኮካ ኤሪኬ። ሂስቲን ታ ኣይ ኦꬃና ማላ ታስ ቤሲዜ? ታኒ ታ ኣያናንካ ዎሳና። ዎዝናን ዎꬃዳካ ዎሳና። ታ ኣያናንካ ዬፃና። ዎዝናራካ ዬፃና። ሄሳꬆ ጊዶንታ ኣጊኮ ኔ ፆሴ ኣያናን ጋላቲዛ ዎዴ ሄሳ ኤሮንታ ኢሲ ኢማꬃ ኣሲ ኔ ጋላታ ዎሳ ዎስቲ “ኣሚን” ጋናስ ዳንዳዪዜ? ኔ ቤሲዛ ማላ ጋላታናስ ዳንዳያሳ። ሃንኮይሲ ጊዲኮ ኢዛን ጎዔቴና። ታኒ ኢንቴፌ ቦላራ ሃራ ቃላን ሃሳዪዛ ጊሽ ፆሴ ጋላታይስ። ጊዶ ኣቲን ዎሳ ኬꬃን ኤሬቶንታ ዳሮ ሺ ቃላታ ሃሳያናፔ ሃራ ኣሳታ ታማርሳናስ ኣሳይ ኤሪዛ ኢቻሽ ቃላ ሃሳያና ዶሳይስ። ታ ኢሻቶ! ኢንቴ ኢንቴ ቆፋን ጉꬃ ናይታ ማላ ጊዶፒቴ። ኢታ ኦሶስ ጊዲኮ ጉꬃ ናይታ ማላ ጊዲቴ። ቆፋን ጊዲኮ ካሃ ኩንꬂዳ ኣሳታ ጊዲቴ። ካሴ ዎጋንካ “ ‘ኢስታ ቃላይ ኢማꬅ ጊዲዳ ኣላጋ ኣሳታ ቃላራ ታ ሃይሳ ኣሳስ ዮታና። ሄሳꬆ ዮቲንካ ታ ጊዛዝ ኢስቲ ሲዬቴና’ ጌስ ጎዳይ” ጌቴቲ ካሴ ጌሻ ማፃፋን ፃፌቲዴስ። ሄሳ ጊሽ ሃራ ቃላን ሃሳያይ ኣማኖንታ ኣሳስ ማላታ ጊዴስ ኣቲን ኣማኒዛይታስ ማላታ ጊዴና። ቲንቢቴይ ጊዲኮ ኣማኒዛይታስ ኣቲን ኣማኖንታይስ ጊዴና። ሂስቲኮ ዎሳ ኬꬃን ኣማኒዛ ኣሳይ ኢሲፌ ሺቂዳሶን ዉሪካ ኤሮንታ ሃራ ቃላን ሃሳዪሺን ኢማꬃ ኣሳቲ ዎይኮ ኣማኖንታ ኣሳይ ሺቂዲ ሃሳዪዛሶ ጌሊኮ “ሃይቲ ጎዬቴስ” ጌቴኔ? ጊዶ ኣቲን ኣሳይ ዉሪ ቲንቢቴ ቃላ ሃሳዬቲሺን ኢማꬂ ዎይኮ ኣማኖንታዴይ ጌሊኮ ባ ሲዪዳይሳ ኡባ ኤራናኔ ሄ ቃላን ፒርዴታና። ኢዛዴይ ባ ዎዝናን ቆቲ ዎꬂዳዚ ዉሪ ቆንጫናኔ ኢዚካ ባ ባጋራ “ቱማፔ ፆሲ ኢንቴናራ ዴስ” ጊዲ ጉፋኒዲ ፆሳስ ጎይናና። ሄሳ ጊሽ ታ ኢሻቶ! ሂስቲን ኣይ ጊኖ? ኢንቴ ኢሲፌ ሺቂዛ ዎዴ ኢንቴፌ ኢሲ ኢሲ ኣሳስ ዬꬅ ቃሴ ኢሲ ኢሲ ኣሳስ ቲሚርቴይ ዴስ። ኢሲ ኢሲ ኣሳስ ቆንጮንታ ፁራ ሚሻታ ቆንጪሲዛ ኢሞታይ ዴስ። ሃራ ኣሳስ ዱማ ቃላን ሃሳያና ኢሞታይ ዴስ። ሃራስ ቃሴ ሄ ቃላ ቢርሼꬃ ኢሞታይ ዴስ። ሄሲ ሄ ኢሞታይ ዉሪካ ኣማኒዛይታ ጎዓናስ ቤሴስ። ሃራ ቃላራ ሃሳዪዛይ ዲኮ ናምዑ ኣስ ዎይኮ ዳሪ ዳሪኮ ሄꬑ ጊዲዲ ታራን ታራን ዮቴቶ። ሃራ ኣሲ ቃሴ ቢርሾ። ቢርሺዛዴይ ባይንዳ ኣጊኮ ሺቂዳ ኣሳ ጊዶን ጮዑ ጊዲ ባሲ ፃላላኔ ፆሳስ ፃላላ ዮቶ። ቲንቢቴ ሃሳያ ኢሞታይ ዲዛይቲ ናቤቲ ናምዓቲ ዎይኮ ሄꬓቲ ቲንቢቴ ሃሳዬቶ። ሃንኮ ኣሳይ ዮቴቲዳይሳ ሎዔꬂ ፓጮ። ኡቲዳ ኣሳ ጋርሳፌ ኢሳዴይ ኢሲ ሚሺ ቆንጪኮ ኮይሮ ሃሳዪዛይሲ ጮዑ ጎ። ኢንቴ ጋርሳፌ ኢሲ ኢሲ ኣሲ ታማራና ማላኔ ሚኔታና ማላ ኢንቴ ዉሪካ ታራን ታራን ቲንቢቴ ዮታናስ ዳንዳዬታ። ናቤታ ኣያናይ ናቤታስ ኣዛዜቴስ። ጋሶይካ ፆሲ ሳሮቴꬃ ፆሳፌ ኣቲን ዎጫማ ፆሴ ጊዴና። ኣማኒዛይታ ዎሳ ኬꬄ ኡባሶንካ ሄሳ ማላ። *** ኣማኒዛ ኣሳይ ጎይኖስ ሺቂዛሶን ማጫሳቲ ጮዑ ጌቶ። ሙሴ ዎጋይ ካሴ ጊዳ ማላ ኢስቲ ኣዛዜቴቶ ኣቲን ሺቆሶን ኢስቲ ሃሳያና ማላ ኢስታስ ኢሜቲቤና። ማጫሳቲ ኤራናስ ኮዪዛ ኢሲ ኢሲ ዮዖቲ ዲኮ ባ ኬꬃን ባ ኣዚናታ ኦይቼቶ። ጋሶይካ ማጫሲ ሺቆሶን ሃሳያይ ዬላቺዛዛ። ፆሳ ቃላይ ኢንቴፌ ኬዚዴ? ዎይኮ ኢንቴኮ ፃላላ ጋኪዴ? ኦኒካ ባና “ናቤ” ጊኮ ዎይኮ “ታስ ፂሎ ኣያናፔ ኢሞቴꬂ ዴስ” ጊዛዴይ ዲኮ ሃይሲ ታ ኢንቴስ ፃፊዳይሲ ጎዳ ኣዛዞ ጊዲዳይሳ ኤሮ። ሃይሳ ኤሮንታ ኣሲ ዲኮ ኢዚ ባ ሁዔስ ኤሬቴና። ሄሳ ጊሽ ታ ኢሻቶ! ቡሮ ቲንቢቴ ሃሳያናስ ሎዔꬅ ኮዪቴ። ዱማ ዱማ ቃላን ሃሳያካ ዲጎፍቴ። ጊዲኮካ ዉሪካ ማራራኔ ዎጋራ ጊዶ። ሃዒካ ታ ኢሻቶ! ታ ኢንቴና ሳባኪን ኢንቴ ኤኪዲኔ ኢዛን ሚኒ ኤቂዳ ሚሺራቾ ቃላ ሃዒ ቆፊሳና ኮያይስ። ታ ኢንቴስ ሳባኪዳ ቃላ ኢንቴ ሎዔꬂ ኦይኪኮ ሄ ሚሺራቾ ቃላን ኢንቴ ኣታና። ሄሳ ማላ ጊዶንታ ኣጊኮ ኢንቴ ኣማኖይ ጮ ሜላ ሃዳ። ታኒ ታስ ኤኪዳይሳኔ ኡባፌ ኣꬊዛይሳ ኢንቴስ ኣꬃ ኢማዲስ። ጌሻ ማፃፋቲ ጊዛይሳ ማላ ኪርስቶሲ ኑ ናጋራ ጊሽ ሃይቂዴስ። ሞጌቲዴስ፤ ጌሻ ማፃፋታን ፃፌቲዳይሳ ማላ ሄꬓንꬆ ጋላስ ሃይቆፔ ዴንዲዴስ። ሄሳፌ ካሊዲ ጴፅሮሳስ ቤቲዴስ። ቃሴካ ዬሱሳ ካሊዛ ታማኔ ናምዓታስ ቤቲዴስ። ሄሳፌ ጉዬ ኢቻሹ ፄቱፔ ቦላራ ዲዛ ኣማኒዛይታስ ኢሲቶ ቤቲዴስ። ሄ ኢዛ ቤይዳ ኣሳፔ ዳሪዛ ባጋይ ፓፃ ዴስ። ባጋይ ቃሴ ሃይቂዴስ። ሄሳፌ ጉዬ ያቆቤስ ቤቲዴስ። ካሊዲካ ኩሜꬃ ሃዋሬታስ ቤቲዴስ። ታኒ ሃዋሬታ ኡባፌ ላፋኔ ካሴ ፆሳ ዎሳ ኬꬄ ጎዲዳ ጊሽ ሃዋሬ ጌቴታናስ ታኒ ቤሶንታዴኮ ሺን ኣሳ ዉርሶፌ ኣዉጫያ ሚሳቲዛ ታስካ ቤቲዴስ። *** ጊዶ ኣቲን ፆሳ ኪያቴꬃን ሃዒ ታ ሃናናይሳ ሃናዲስ። ታስካ ኢሜቲዳ ፆሳ ኪያቴꬂ ሜላ ሃዳ ጊዲቤና። ታኒ ኦናፔካ ቦላራ ዳሮ ሚና ኦꬃዲስ። ጊዶ ኣቲን ሄሳ ኦꬂዳይ ታና ጊዶንታ ፆሳ ኣꬎ ኪያቴꬂ ኦꬂዴስ። ሄሳ ጊሽ ታና ጊዲን ኢስታካ ጊዲን ኑ ዉሪካ ሳባኪዛይ ሄሳ። ኢንቴካ ኣማኒዳይ ሄሳ። ኪርስቶሲ ሃይቆፔ ዴንዲዳይሳ ኑ ታማርሲኮ ሂስቲን ኢንቴ ጋርሳፌ ኢሲ ኢሲ ኣሳቲ ዋኒዲ ሃይቆፔ ዴንዶይ ባዋ ጊዞ? ሃይቂዳ ኣሳስ ዴንꬂ ዶንታዝ ጊዲኮ ኪርስቶሲካ ዴንዲቤና ጉሳካ? ኪርስቶሲካ ሃይቆፔ ዴንዶንታዝ ጊዲኮ ኑ ሳባኮስ ጎዓይ ባዋ። ኢንቴ ኣማኖይካ ጮ ሜላ ሃዳ። ሄሳፌካ ቦላራ “ፆሲ ኪርስቶሳ ሃይቆፔ ዴንꬂዴስ” ጊዲ ኑ ማርካቲዳ ማርካይካ ኑና ዎርዶ ፆሳ ማርካታ ኬሲዴስካ? ሃይቂዳ ኣሳይ ሃይቆፔ ዴንዶንታዝ ጊዲኮ ፆሲ ኪርስቶሳካ ዴንꬂቤና ጉሳ። ጋሶይካ ሃይቂዳይቲ ዴንዶንታዝ ጊዲኮ ኪርስቶሲካ ሃይቆፔ ዴንዲቤና። ኪርስቶሲ ሃይቆፔ ዴንዶንታዝ ጊዲኮ ኢንቴ ኣማኖይ ጮ ሜላ። ኢንቴካ ሃኖ ጋካናስ ኢንቴ ናጋራራ ዴታ ጉሳ። ሃኖይ ሄሳ ማላ ጊዲኮ ኪርስቶሳ ኣማኒዲ ሃይቂዳይቲ ዉሪካ ꬋዪዳ ጉሳ። ኑኒ ኪርስቶሳን ኡፋይስ ኦꬂዛይ ሃኖ ቢታይ ቦላ ዱሳስ ፃላላ ጊዲኮ ኑ ኣሳ ኡባፌ ላፋታ። ጊዶ ኣቲን ኪርስቶሲ ሃይቂዳይታስ ኡባስ ባይራ ጊዲዲ ሃይቆፔ ቱሙ ዴንዲዴስ። ሃይቆይ ኢሲ ኣሳ ኣዳሜ ባጋራ ዪዳ ማላ ሃይቂዳይታ ዴንꬂ ኪርስቶሳ ባጋራ። ኣሲ ዉሪካ ኣዳሜ ባጋራ ሃይቂዳ ማላ ሄሳꬆካ ኣሲ ዉሪካ ኪርስቶሳ ባጋራ ሃይቆፔ ዴንዳና። ጊዶ ኣቲን ዉሪካ ባ ታራራ ታራራ ዴንዳና። ኮይሮ ባይራ ጊዲዳ ኪርስቶሲ ዴንዲዴስ። ኢዛፔ ካሊዲ ኢዚ ዪዛ ዎዴ ኪርስቶሳስ ጊዲዛይቲ ዴንዳና። ሄሳፌ ጉዬ ሃሬቲዛ ዴሬታ ጎዳቴꬂኔ ዎልቃማታ ዉርሲ ꬋይሲዳፔ ጉዬ ካዎታ ፆሳ ኣዋስ ኣꬂ ኢሚዛ ዎዴ ሄ ዎዴ ዉርሴꬅ ጊዳና። ኢዚ ባ ሞርኬ ዉርሲካ ባ ቶሆ ጋርስ ኣꬃና ጋካናስ ኢዚ ካዎታናስ ቤሴስ። ቡሮ ዉርሴꬃን ፆኔቲ ꬋያና ሞርኬይ ሃይቆ። “ፆሲ ዉርሲካ ኢዛ ጎዳቴꬃፌ ጋርሳን ዎꬂዴስ” ጊዛዚ ጌሻ ማፃፋን ፃፌቲዴስ። ጊዶ ኣቲን “ዉሪካ ኢዛ ጎዳቴꬃ ጋርሳን ጊዲዴስ” ጊሺን ዉሪካ ኢዛ ጎዳቴꬃ ጋርሳን ኦꬂዳ ፆሳ ኣዋ ጉጄና። ዉሪካ ኢዛስ ሃሬቲዳይሳፌ ጉዬ ፆሲ ዉርሶፌ ቦላ ጊዳና ማላ ፆሳ ናይ ቃሴ ኡባ ባሲ ሃሪሲዳይሳስ ፆሳ ኣዋስ ሃሬታና። ሃይቆፔ ዴንꬂ ዶንታ ኣጊኮ ሂስቲን ሃይቂዳ ኣሳ ጊሽ ጊዲ ፃማቄቲዛ ኡባስ ጎዓይ ኣዜ? ሃይቂዳይቲ ሙሌካ ዴንዶንታዝ ጊዲኮ ሂስቲን ኣሳይ ኢስታ ጊሽ ኣዛስ ፃማቄቲዜ? ኑ ቃስ ኡባ ዎዴ ኢታ ሜቶስ ኣꬊ ኢሜቲዛይ ኣዛሴ? ታ ኢሻቶ! ሃች ሃች ሃይቆይ ታናራ ጋጌስ። ሄሳካ ኑ ጎዳ ዬሱስ ኪርስቶሳ ጌዶን ኢንቴ ቦላ ዲዛ ኣማኔቴꬅ ታ ኢንቴስ ቆንጪሳይስ። ታኒ ኤፌሶኔን ዶዓ ሚሳቲዛ ኣሳታራ ባፄቲዳይሲ ኣሲ ቤያና ማላ ፃላላ ጊዲኮ ታስ ኢዛን ኣዛ ዎꬌይ ዲዜ? ሃይቂዳይታስ ዴንꬂ ዶንታ ኣጊኮ “ኑ ዎንቶ ሃይቃና ጊሽ ኣኔ ሞስ፥ ኣኔ ኡዮስ” ጊዛይታ ማላ ኑካ ኢስታ ማላ ጊዶስ። ኢንቴ ባሌቶፍቴ! ኢታ ላጌቴꬂ ሎዖ ኣማሌራ ዲዛይታ ሞሬስ። ዎዝናማ ጊዲቴ፤ ናጋራ ኦꬆፍቴ፤ ፆሴ ኤሮንታይታ ኢሲ ኢሲ ኣሳቲ ኢንቴ ጋርሳን ዲዛ ጊሽ ታ ሄሳ ኢንቴና ዬላቻናስ ጋይስ። “ሃይቂዳይቲ ዋኒ ዴንዳኔ? ኣይ ማላ ኣሾራ ዴንዳኔ?” ጊዛዴይ ዳና ዳንዳዬስ። ኔኖ ኤያዞ! ኔ ዜሪዛ ዜሬꬃይ ሃይቆንታ ዲሼ ጫሬና። ኔኒ ዜሪዛ ካꬃ ሞꬌያ ጊስቴ ዎይኮ ሃራ ካꬃ ኣይፌ ጊዲኮካ ጉዬፔ ኔ ኤካናራ ሃዒ ኔ ዜሮሮ ጊዱኩ። ፆሲ ቃሴ ባ ኮይዳ ማላ ሄ ዜሬꬃስ ኢዛ ማላ ሜꬎ ኢሜስ። ዜሬꬃ ቆሞታስ ኢሳስ ኢሳስ ኢዛ ሚሳቲዛ ኣሳቴꬅ ኢሜስ። ኣሾይ ዉሪካ ኢሲ ማላ ጊዴና። ኣሳ ኣሾይ ኢሳ ጊዲሺን ሜሄ ኣሾይ ቃሴ ሃራ፤ ካፎ ኣሾይ ሃራ፤ ሞሌ ኣሾይካ ሃራ ቆሞ። ሄሳ ማላካ ሳሎን ዲዛይታሲካ ኢስታ ሚሳቲዛ ሜꬎይ ዴስ። ቢታ ቦላ ዲዛይታሲካ ኢስታ ሚሳቲዛ ሜꬎይ ዴስ። ጊዶ ኣቲን ሳሎይታ ቦንቾይ ኢሲ ማላ። ቢታ ቦላ ዲዛይታ ሜꬎ ቦንቾይካ ዱማ። ኣዋ ኣርሼ ቦንቾይ ኢሲኖ። ጊዶ ኣቲን ኣጊና ቦንቾይ ቃሴ ዱማ። ፆሊንቴታ ቦንቾይካ ሃራ። ኢሲ ፆሊንቴ ቦንቾይ ሃራ ፆሊንቴ ቦንቾፌ ዱማቴስ። ሃይቂዳ ኣሳ ዴንꬂካ ሄሳ ማላ። ዎቂዛ ሜꬎይ ዜሬቲን ዎቆንታ ሜꬎይ ዴንዳና። ካዉሻቴꬃን ዜሬታና ሺን ቦንቾን ዴንዳና። ዳቡርሳን ዜሬታና ሺን ዎልቃማ ጊዲዲ ዴንዳና። ሜꬌቴꬅ ሜꬎይ ዜሬታና ሺን ኣያና ሜꬎይ ዴንዳና። ሜꬌቴꬅ ሜꬎይ ዲኮ ቃሴካ ኣያና ሜꬎይካ ዴስ። ሄሳ ጊሽ “ኮይሮ ኣስ ኣዳሜይ ዴዖይ ዲዛ ሜꬌቴꬅ ጊዲዴስ” ጌቴቲ ጌሻ ማፃፋን ፃፌቲዴስ። ናምዓንꬆ ኣዳሜ ጊዲዳ ኪርስቶሲ ጊዲኮ ኣሳስ ዴዖ ኢሚዛ ኣያና። ጊዶ ኣቲን ኮይሮ ዪዳይ ኣያናይሳ ጊዶንታ ሜꬌቴꬃይሳ። ኣያናይሲ ቃስ ጉዬፔ ዪዳይሳ። ኮይሮ ዪዳ ኣዳሜይ ቢታፌ ሜꬌቲዳ ጊሽ ኢዚ ቢታፌ። ናምዓንꬆ ዪዳይሲ ሳሎፔ። ቢታፌ ጊዲዳይቲ ኢስቲ ቢታፌ ሜꬌቲዳይሳ ማላ። ሳሎፔ ጊዲዳይቲ ሳሎፔ ዪዳይሳ ማላ። ኑኒ ቢታ ኣሳ ሜꬋ ማዮዖይሳꬆካ ሳሎይሳ ሜꬋካ ማይዓና። ታ ኢሻቶ! ታ ሃይሳ ኢንቴስ ዮታይስ ኣሾይኔ ሱꬂ ፆሳ ካዎቴꬅ ላቴቴና። ꬋያናይሲ ꬋዮንታይሳ ላቴና። ኣኔ ታ ኢንቴስ ኢሲ ፁራ ዮዖ ዮታይስ። ኑኒ ዉሪካ ሃይቆኮ። ጊዶ ኣቲን ኑ ዉሪካ ላሜታና። ሄሲካ ሃናናይ ኑ ቆፖንታ ዲሺን ዉርሴꬃ ፁሩምባይ ፑኔቲዛ ዎዴ ቂጲዳ ኣይፌይ ፄሊዛ ማላ ኢሲቶ ሃናና። ፁሩምባይ ፑኔታና፤ ሃይቂዳ ኣሳይ ዎቆንታይታ ጊዲዲ ዴንዳና። ኑኒካ ላሜታና። ꬋዪዛይሲ ꬋዮንታይሳ ማይዓናስ፥ ሃይቂዛይ ሃይቆንታይሳ ማይዓናስ ቤሴስ። ꬋዪዛይ ꬋዮንታዝ፥ ሃይቂዛይ ሃይቆንታዝ ማይዒዛ ዎዴ “ሃይቆይ ፆኔቲ ሚቴቲዴስ” ጌቴቲ ካሴ ጌሻ ማፃፋን ፃፌቲዳ ቃላይ ፖሌታና። ሄሳꬆካ “ሃይቆ! ካሴ ኔ ፆኖይ ኣዋን ዲዜ? ሃይቆኮ! ኔ ኢዛራ ጫዲዛ ዪሻይ ኣዋን ዲዜ?” ጌቴቲ ፃፌቲዴስ። ሃይቆይ ኢዛራ ዱኪዛ ዎልቃይ ናጋራ፤ ናጋራ ዎልቃይ ዎጋ። ጊዶ ኣቲን ጎዳ ዬሱስ ኪርስቶሳ ባጋራ ኑስ ፆኖ ኢሚዛ ፆሳስ ጋላታይ ጊዶ። ሄሳ ጊሽ ታ ሲቆ ኢሻቶ! ሚኒ ኤቂቴ። ኣይ ሚሻንካ ያርክ ያርኮፍቴ። ጎዳ ኦሶስ ኢንቴ ዳቡሪዛ ዳቡርሳይ ሃዳ ጊዶንታይሳ ኤሪዲ ኡባ ዎዴ ፓጬይ ባይንዳ ጎዳስ ኦꬃናስ ሚኔቲቴ። ሃዒ ቃሴ ኣማኒዛይታስ ሚሻ ኬሶ ጊሽ ጋላቲያን ዲዛ ዎሳ ኬꬃታስ ታኒ ኢሚዳ ኣዛዞ ማላ ኢንቴካ ኦꬂቴ። ሚሻይ ኬዛናይ ቡሮ ታ ሄ ቢን ጊዶንታ ማላ ኢንቴፌ ኢሲ ኢሲ ኣሲ ባሲ ዲዛ ማላ ሳሚንታን ሳሚንታን ኢሲ ጋላስ ዎጋ ዎጋ ኬሲ ዎꬆ። ታ ሄ ቢዛ ዎዴ ኢንቴ ዶሪዳ ኣሳታስ ታ ሞይዞ ዳብዳቤ ፃፋ ኢማዳ፥ ኢስቲ ኢንቴ ኢሚዳ ኢሞታ ዬሩሳላሜ ጋꬃና ማላ ሃፔ ታ ኪታና። ታ ኢስታራ ባናስ ኮሺዛዝ ጊዲኮ ታናራ ባንዴቴስ። ታኒ ባሼ ማቂዶኒያራ ኣꬋ ቡሲ ታስ ኣቶንታ ጊሽ ታ ማቂዶኒያ ጋካዳ ሄራ ኢንቴኮ ባና። ታ ኣዋካ ቢሺን ታና ኦጌይ ዋይሶንታ ማላ ኢንቴ ታና ማዳና ማላ ባሼ ታ ኢንቴ ኣቻን ጋምዖንታ ኣጊኬ። ኦኔ ኤሪዛይ ባልጎይ ኣꬋና ጋካናስ ታ ኢንቴ ኣቻን ባልጎዛ ኣꬆንታ ዋያ ኣጋና። ታ ኢንቴ ኣቻን ዳሮ ዎዴ ጋምዓናስ ኮዪዛ ጊሽ ኢንቴና ጮ ኦጌራ ኣꬋ ባሼ ቤያናስ ኮዪኬ። ጎዳ ሼኔ ጊዲኮ ኢንቴ ኣቻን ኣዱሳ ዎዴ ጋምዓናስ ኮያይስ። ጊዶ ኣቲን ጴንፃቆስቴ ጌቴቲዛ ባዓሌ ጋላስ ጋካናስ ታ ኤፌሶኔን ጋምዓና። ታ ሄን ጋምዓና ጋሶይካ ታስ ሄን ጊታ ኦሶ ፔንጌይ ዶዬቲዴስ ሺን ታናራ ኤቄቲዛይቲ ዳሮቲ ዴቴስ። ፂምቶሲ ኢንቴኮ ቢኮ ኢዚ ታ ማላ ጎዳ ኦሳንቻ ጊዲዳ ጊሽ ኢዚ ባቦይ ባይንዳ ዳና ማላ ኢንቴ ኢዛ ማዲቴ። ሄሳ ጊሽ ኦኒካ ኢዛ ካꬎፖ። ኢዚ ታኮ ሳሮን ሲማና ማላ ኢንቴ ማዲቴ። ኑካ ሃራ ኣማኒዛይታራ ኢዛ ዩሳ ናጎን ዶስ። ኑ ኢሻ ኣጲሎሲ ሃራ ኣማኒዛይታራ ኢንቴኮ ባና ማላ ኬሃ ዎሳዲስ ሺን ኢዚ ቃስ ሃዒ ኢንቴኮ ባናስ ኮይቤና። ጊዶ ኣቲን ባና ኦጌይ ጊጊሺን ኢዚ ኢንቴኮ ባና። ቤጊቴ! ኣማኖን ሚኒ ኤቂቴ፤ ሚኒቴ፤ ጎብቴ። ኢንቴ ኦꬂዛዝ ዉርሲካ ሲቆን ኦꬂቴ። ታ ኢሻቶ! ኣካያ ቢታን ኮይሮ ኣማኒዳይ ኢስቲፋኖሴሶ ኣሳ ጊዲዳይሳኔ ኣማኒዛ ኣሳ ማዳናስ ኢስቲ ባና ኣꬂ ኢሚዳይሳ ኢንቴካ ኤሬታ። ኢስታ ሚሳቲዛ ኣሳታሲኔ ኢስታራ ኢሲፌ ዳቡሪዛ ኣሳታስ ኡባስ ኣዛዜታና ማላ ታ ኢንቴና ዎሳይስ። ኢስቲፋኖሲ፥ ፌርዶናፆሲኔ ኣካይቆሲ ዪዳ ጊሽ ታ ዳሮ ኡፋዬታይስ። ጋሶይካ ኢንቴ ሃን ታናራ ዶንታ ጊሽ ኢስቲ ታስ ፓጪዛዝ ዉርሲ ኩንꬂዳ። ታ ዎዝናኔ ኢንቴ ዎዝና ዉርሲ ሼምፒሲዳ። ሄሳ ጊሽ ሄሳንታ ማላ ኣሳታ ሙሌ ባሎፒቴ። ኢሲያ ቢታን ዲዛ ዎሳ ኬꬃቲ ኢንቴና ሳሮ ጌቴስ። ኣቂላይኔ ጲርሲቂላይካ ኢስታ ሶን ሺቂዛ ኣማኒዛ ኣሳይ ጎዳ ሱንꬃን ቦንቾ ሳሮታ ኢንቴስ ሺሼቴስ። ሃን ኣማኒዛይቲ ዉሪካ ኢንቴና ሳሮ ጌቴስ። ኢንቴ ኢንቴ ጊዶን ኢሶይ ኢሳራ ሲቆ ዬሬቴꬅ ዬሬቲቴ። ሃይሳ ሳሮካ ታ ኩሼራ ፃፊዳይ ታና ጳዉሎሳ። ጎዳ ዶሶንታዴይ ዲኮ ኢዚ ቃንጌቲዳዴ ጊዶ! ጎዶ ሃያ! ጎዳ ዬሱሳ ኪያቴꬂ ኢንቴናራ ጊዶ። ታ ሲቆይ ጎዳ ዬሱስ ኪርስቶሳ ባጋራ ኢንቴስ ኡባስ ጊዶ። ኣሚን። ፆሳ ሼኔ ማላ ዬሱስ ኪርስቶሳስ ኪቴቲዳ ጳዉሎሳፔኔ ኑ ኢሻ ፂምቶሳፔ ቆሮንቶሴን ዲዛ ፆሳ ዎሳ ኬꬄይስ ቃሴካ ኣካያ ቢታን ኣማኒዛ ኩሜꬃ ኣሳስ። ኑ ኣዋ ፆሳፌኔ ጎዳ ዬሱስ ኪርስቶሳፔ ኪያቴꬂኔ ሳሮይ ኢንቴስ ጊዶ። ማሪዛ ኣዋሲኔ ዉርሲካ ሚንꬄꬂዛ ኑ ጎዳ ዬሱስ ኪርስቶሳ ኣዋ ፆሳስ ጋላታይ ጊዶ። ኑካ ኑ ባጋራ ፆሳፌ ዴሚዳ ሚኖቴꬃን ሜቶቴቲዛይታ ሚንꬄꬃናስ ዳንዳያና ማላ ኑ ሜቶን ኢዚ ኑና ሚንꬄꬄስ። ኪርስቶሳ ዋዬይ ኑ ቦላ ዳሪዳይሳ ማላ ኑስካ ኪርስቶሳ ባጋራ ሚንꬄꬆይ ዳሬስ። ኑ ሜቶን ኢንቴ ኣቶቴꬂኔ ሚኖቴꬅ ዴሜታ። ኑኒ ሜቶቲሺን ቃሴ ኢንቴካ ካሴ ኤኪዳ ሜቶዛ ማላ ጌንጪ ኤኪዲ ሚኔታንዴታ። ኑ ሜቶ ኢንቴ ኑናራ ሻኪ ኤኪዳ ማላ ኑናራካ ኢንቴ ሚኔታናይሳ ኑኒ ኤሪዛ ጊሽ ኑስ ኢንቴ ቦላ ዲዛ ኡፋይሲ ጊታ። ታ ኢሻቶ! ኢሲያ ቢታን ኑ ቦላ ጋኪዳ ሜቶ ጊሽ ኢንቴ ኤራና ማላ ኑ ኮዮስ። ሄ ኑ ቦላ ጋኪዳ ሜቶዚ ኑ ቶካናፔ ዴፆ ጊዲዳ ጊሽ ሃይቆንታ ፓፃ ዳና ጊዲ ቆፒቤኮ። ኣዳፌካ ኑ ቦላ ሃይቆ ፒርዳይ ፒርዴቲዳ ሚሳቲዴስ፤ ሄሲ ዉሪካ ኑ ቦላ ጋኪዳ ጋሶይ ኑኒ ሃይቂዳይታ ዴንꬂዛ ፆሳን ኣማኔታናሳፌ ኣቲን ኑ ዎልቃን ኣማኔቶንታ ማላ ሃኒዴስ። ኢዚ ኑና ሄሳ ማላ ቆፖንታ ሃይቆፔ ኣሺዴስ። ሃዒካ ዎዴፔካ ኢዚ ኑና ኣሻናይሳ ኑ ኣማኔቶስ። ኢንቴካ ኢንቴ ዎሳን ኑና ማዲቴ። ዳሮ ኣሳ ዎሳን ኑስ ኢሜቲዳ ኢሞታሲኔ ኑ ጊሽ ዳሮቲ ፆሳ ጋላቴቴስ። ሂስቲኮ ኑ ጬቄቴꬂ ሃይሳ ማላ። ሃ ኣላሜዛን ሃራፔካ ኢንቴሳራ ኑሳራ ዲዛ ጋይቶቴꬃን ፆሳፌ ጊዲዳ ጌሻቴꬃኒኔ ሱሬቴꬃን ኑ ዴዒዳይሳ ኑ ዎዝናይ ኑስ ማርካቴስ። ሄሲካ ኣሳ ጪንጫቴꬃን ጊዶንታ ፆሳ ኪያቴꬃና። ኢንቴ ናባቢዲ ኤራናስ ዳንዳዮንታ ሚሽ ኑ ኢንቴስ ፃፎኮ። ኢንቴ ዉርሲካ ናባቢዲ ኤራናይሳ ኑ ኤሮስ። ኢንቴ ኑናን ጬቄቲዛይሳ ማላ ኑካ ኢንቴናን ጬቄቲዛይሳ ሃዒ ዉርሲ ኤሮንታ ኣጊኮካ ጎዳ ዬሱሲ ሲሚ ዪዛ ጋላስ ዉርሲካ ኤራና። ታኒ ሃይሳ ሻካ ኤሪዛ ጊሽ ናምዑቶ ኢንቴ ጎዔታና ማላ ኮይሮ ኢንቴና ቤያና ቆፓዲስ። ሄሲካ ታ ካሴ ማቂዶኒያ ባሼ ኢንቴና ቤያዳ ማቂዶኒያፔካ ሲማሼ ኢንቴ ኣቻራ ኣꬋዳ ታ ዩሁዳ ቢሺን ኢንቴ ታና ማዳና ማላ ቆፓዲሲኮሺን። ሃይሲ ታ ቆፋይ ኢንቴስ ታ ሎዔꬃ ቆፖንታ ቆፋ ሚሳቲዜ? ዎይኮ ኣይዛቤታስ ዶሴ ጊዲዳይሳꬆ ታካ ኢሲቶ “ኤሮ ኤሮ ቃሴካ ኣካይ ኣካይ” ጊዛ ሚሳቲዜ? ፆሲ ኣማኔቲዳ ፆሴ ጊዲዳ ማላ ኑ ኢንቴስ ዮቲዛ ቃላይካ “ኤ” ጊዲ “ኣካይ” ጊዛዝ ጊዴና። ጋሶይካ ታና ጊዲን ዎይኮ ሲልዋኖሴኔ ፂምቶሳ ጊዲን ኑ ኢንቴስ ሳባኪዳ ፆሳ ና ዬሱስ ኪርስቶሲ “ኤኔ ኣካይ” ጊዴና። ጊዶ ኣቲን ኡባ ዎዴ ኢዛን “ኤ” ፃላላይ ዴስ። ፆሳፌ ኢሜቲዳ ሂዶታቲ ዉሪካ “ኤ” ጊዲዳይ ኢዛና። ኑካ ኢዛ ባጋራ ፆሳ ቦንቾስ “ኣሚን” ጊዛይ ሄሳ ጊሻሳ። ሄሳ ጊሽ ኢንቴካ ኑኒካ ኪርስቶሳን ሚኒ ኤቃና ማላኔ ባ ኦሶስ ዶሪዳይ ፆሳ። ኑ ኢዛይታ ጊዲዳይሳ ኤሪሳናስ ባ ማታሜ ኑ ቦላ ሾጪዳይኔ ኑ ሲንꬃፌ ዴማና ሚሻስ ኣያና ዋሴቴꬅ ኑ ዎዝናን ዎꬂዳይ ኢዛ። ታኒ ቆሮንቶሴ ሲማዳ ኢንቴኮ ቦንታ ኣጊዳይ ኢንቴና ሚሺሲኬ ጋዳኮ፤ ቃሴ ሄሲ ቱሙ ጊዶንታ ዎርዶ ጊዲኮ ፆሲ ታ ቦላ ማርካቶ። ኢንቴ ኣማኖን ኤቂዳ ጊሽ ኢንቴና ኡፋይሳናስ ኑ ኢንቴናራ ኦꬃና ኣቲን ኢንቴ ኣማኖ ቦላ ጎዳታናስ ጊዴና። ታ ኢንቴና ሚሺሳናስ ኮዮንታ ጊሽ ቃሴካ ኢንቴኮ ቢኬ ጋዳ ቆፋ ቃቻዲስ። ታ ኢንቴና ሚሺሲዳዝ ጊዲኮካ ሚሼቲዳ ኢንቴፌ ኣꬊ ኡፋይሲዛይ ታስ ሃራይ ኦኒ ዲዜ? ታ ካሴ ኢንቴስ ፃፊዳይ ታ ኢንቴኮ ቢዛ ዎዴ ታና ኡፋይሳናስ ቤሲዛ ኣሳቲ ታና ሚሺሶፔቶ ጋዳ ፃፋዲስ። ጋሶይካ ታ ኡፋዬቲኮ ኢንቴስ ኡባስካ ኡፋይስ ጊዳናይሳ ታ ኣማናይስ። ታ ኢንቴስ ሄሳꬆ ፃፊሺን ታ ዎዝናን ዳሮ ሚሻይኔ ዳሮ ቆፋይ ኩሚ ዲሺን ዳሮ ኣፉንፃሼ ፃፋዲስ። ሄሳካ ታ ኦꬂዳይ ታ ኢንቴና ዳሮ ሲቂዛይሳ ኢንቴ ኤራና ማላ ጋዳ ኣቲን ኢንቴና ሚሺሳናስ ጊዴና። ኦኒካ ኣሴ ቆሂዳ ጊዲኮ ጉጄቾ ጊዶንታ ማላ ሄ ቆሂዳዴይ ታና ፃላላ ጊዶንታ ጉꬃራ ጊዲኮካ ኢንቴናካ ዉርሲ ቆሂዴስ። ሄሳ ማላ ኣሳስ ዳሮ ኣሳይ ኢዛ ቦላ ዎꬂዳ ቂፃቴይ ኢዛዴስ ጊዳና። ሄ ኣዴይ ኬሂ ሙዞቲዲ ሂዶታ ቃንፆንታ ማላ ኢንቴ ሄሳዴስ ኣቶ ኢዛ ጊዲ ሚንꬄꬃናስ ቤሴስ። ሄሳꬆካ ኢንቴ ኢዛ ሲቂዛይሳ ዛሬꬂዲ ኢዛ ቤሳና ማላ ታ ኢንቴና ዎሳይስ። ታ ሃይሳ ኢንቴስ ፃፊዳይ ኢንቴ ኢንቴና ጋኪዛ ፓጬ ፆኒዲ ኡባን ኢንቴ ኣዛዜቲዛኮኔ ኤራናሳ። ኢንቴ ኣቶ ጊዛዴስ ታካ ኣቶ ጋይስ። ቃሴ ታ ቱማፔ ኣቶ ጋናዚ ዲዛ ጊዲኮ ኪርስቶሳ ሲንꬃን ታ ኣቶ ጊዛይ ኢንቴ ጊሽ ጋዳ። ታ ሄሳꬆ ኦꬂዛይ ፃላዔይ ጌሊዛ ፆዔ ዴሞንታ ማላ ጋዳኮ! ኑ ኢዛ ጌኔ ቆፋ ባሎኮ። ታኒ ኪርስቶሳ ሚሺራቾ ቃላ ዮታናስ ፂሮዓዳ ቢዳ ዎዴ ጎዳይ ታስ ኦሶ ኦጌ ዶዪዴስ። ጊዶ ኣቲን ታኒ ታ ኢሻ ቲቶሳ ሄን ዴሞንታ ኣጊዳ ጊሽ ታ ዎዝናይ ሼምፖንታ ኢፂዳ ጊሽ ኢስቲ ታና ሄፔ ሞይዚን ማቂዶኒያ ዴሬ ባዲስ። ጊዶ ኣቲን ኪርስቶሳ ባጋራ ኡባ ዎዴ ኑና ፆኖ ኦጌን ካሌꬂ ዩሺዛኔ ባ ሎዖ ኤራቴꬃ ኑ ባጋራ ኡባ ሶን ቆንጪሲዛ ጎዳስ ጋላታይ ጋኮ። ጋሶይካ ኑኒ ꬋያናይታሲኔ ኣታናይታስ ጊዶን ኪርስቶሳ ባጋራ ፆሳስ ሺቂዳ ሳዎ ቱኑ ጊዛ ኤፃኔ ማላ። ꬋያናይታስ ኑኒ ዎꬊዛ ፂንቆ። ኣታናይታስ ቃሴ ሃይቆፔ ጌዴ ዴዖሶ ኤፊዛ ዴዖ ሳዎ። ሂስቲን ሃይሳስ ቤሲዛዴይ ኦኔ? ኑኒ ዎꬌ ዴማናስ ጊዲ ፆሳ ቃላ ሻቃጫ ማላ ዋላኬሬꬂዲ ባይዚዛ ዳሮ ኣሳታ ማላ ጊዶኮ። ጊዶ ኣቲን ፆሳፌ ኪቴቲዳ ሱሬ ኣሳ ማላ ጊዲዲ ኪርስቶሳን ፆሳ ሲንꬃን ሱሬ ዮቶስ። ኑኒ ሃዒ ኑርካ ኑና ዛሪዲ ጋላቲኖ? ዎይኮ ሃራ ኣሳታ ማላ ኢንቴስ ጊዲን ዎይኮ ኢንቴፌ ሃ ኑስ ፃፌቲዳ ጋላታ ዳብዳቤ ኮሺዜሻ? ኢንቴ ቃሴ ኣሲ ዉሪ ኤሪዛይኔ ናባቤቲዛ ኑ ዎዝና ጋርሳን ፃፌቲዳ ዳብዳቤታ። ኢንቴ ቃላሜን ፃፌቲዳይታ ጊዶንታ ዴዖ ፆሳ ኣያናን ፃፌቲዳይታ፤ ቃሴካ ሹቻ ቦላ ዎጬቲ ፃፌቲዳይታ ጊዶንታ ኣሳ ዎዝናን ፃፌቲዳይታኔ ኢንቴ ኑናን ጎዔቲዳ ኪርስቶሳስ ቆንጬ ዳብዳቤታ። ኪርስቶሳ ባጋራ ኑስ ፆሳ ቦላ ዲዛ ኣማኖይ ሄሳ ሚሳቴስ። ኑና ሄሳስ ጋꬂዳይ ፆሳፌ ኣቲን ኑኒ ኑ ዎልቃን ኦꬂዶስ ጊዛ ሚሺ ኢሲናካ ባዋ። ሄሲካ ፒዳሌን ፃፌቲዳ ዎጋን ጊዶንታ ኣያናን ፃፊዳ ኦራꬃ ጫቆ ቃላ ኦሳንቻታ ኑ ጊዳና ማላ ኦꬂዴስ። ጋሶይካ ፒዳሌን ፃፌቲዳ ዎጋይ ዎꬌስ፤ ኣያናይ ጊዲኮ ዴዖ ኢሜስ። ሄሳ ጊሽ ኢስራዔሌ ናይቲ ኢዛ ኣይፌሶን ዲዛ ቦንቾ ጋሶቴꬃን ሙሴ ኣይፌሶ ቲሺ ሂስቲ ፄሎይ ኢስታ ፆናና ጋካናስ ሄሲ ጉዬፔ ꬋያናይሲኔ ሹቻ ቦላ ፒዳሌን ዎጬቲ ፃፌቲዲ ሃይቆ ኦሶስ ጊዲዳይሲ ቦንቾን ቆንጪዛይሳ ጊዲኮ፤ ሂስቲን ኣያና ኦሶስ ዋኒዲ ሄሳፌ ኣꬊዛ ቦንቾይ ዴኔ? ኣሲ ኢዛን ፒርዴቲዛ ኦሶይ ሄሳ ማላ ቦንቼቲዛይሳ ጊዲኮ ኣሲ ኢዛን ፂሊዛ ኦሶይ ሄሳፌ ኬሂ ኣꬊዛ ቦንቾይ ኢዛስ ዋኒ ዴኔ? ሃይሳፌ ካሴ ቦንቼቲዳይሲ ሃራ ኢዛፔ ኣꬊዛ ቦንቾይ ዲዛይሳራ ጊጊሲሺን ቦንቾይ ባይንዳይሳ ጊዲዴስ። ꬉሚ ꬉሚ ቢዛይሳስ ሄሳ ማላ ቦንቾይ ዲኮ ሜርናስ ሚኒ ኤቂ ዳናይሳስ ሄሳፌ ኬሂ ኣꬊዛ ቦንቾይ ዋኒ ዴኔ? ሄሳ ጊሽ ሄሳ ማላ ሂዶታይ ኑስ ዲዛ ጊሽ ኑኒ ፃላቴꬃን ሃሳዮስ። ኢስራዔሌ ናይቲ ሙሴ ኣይፌሶይ ፆሊቂዛይሳ ኣጊ ኣጊ ቢሺን ኢስቲ ዉርሴꬃ ቤዮንታ ማላ ኢዚ ባ ኣይፌሶ ጎዚዳ ሙሴ ማላ ጊዶኮ። ጊዶ ኣቲን ካሴ ጋልዓ ጫቆ ቃላይ ናባቤቲሺን ሄ ዎዴ ጎሳዚ ሃች ጋካናስ ኪቾንታ ጊሽ ኢስታ ዎዝናይ ዶጪዳ ማላ ዴስ። ሄ ጎሳይ ሃዒካ ኪቺቤና። ኢዚካ ኪቻናይ ኪርስቶሳን ፃላላ። ሃች ጋካናሲካ ሙሴ ማፃፋቲ ናባቤቲዛ ዎዴ ሄ ዎዴ ጎሳይ ሃዒካ ኢስታ ዎዝና ጎዚ ኦይኬስ። ጊዶ ኣቲን ኢሳዴይ ጎዳኮ ሲሚዛ ዎዴ ጎሳዚ ቃሬቲ ኪቼስ። ጎዳይ ኣያና። ጎዳ ኣያናይ ዲዛሶን ኣይሌቴꬅ ዴና። ኑኒካ ጎዳ ቦንቾ ማስቶቴ ማላ ፆልቄቲሼ ኢዛ ሚሳታናስ ሃ ቦንቾፌ ጌዴ ሃራ ቦንቾን ላሜታና። ሄሲካ ኣያና ጊዲዳ ጎዳፔ። ፆሳ ማሮቴꬃ ዳሮፔ ዴንዲዳይሳን ሃይሲ ሃ ኦሶዚ ኑስ ዲዛ ጊሽ ኑኒ ሂዶታ ቃንፆኮ። ጊዶ ኣቲን ጌማራ ሃኒዛ ዬላሲዛ ዮዖታ ኑ ኣጊዶስ። ኣስ ባሌꬆኮ፤ ፆሳ ቃላ ዎርዶራ ዋላኮኮ። ሄሳ ሂስታናፔ ቱሙ ዮዖታ ቆንጬራ ዮቲሼ ኣሲ ዉሪካ ኑ ጊዛይሳ ኤካና ማላ ኑናቴꬃ ፆሳ ሲንꬅ ሺሾስ። ኑ ሚሺራቾ ቃላይ ጎርዴቲኮካ ኢዚ ጎርዴቲዳይ ꬋያናይታሳ። ፆሳ ሌሚሶ ጊዲዳ ኪርስቶሳ ቦንቾ ሚሺራቾ ቃላ ፖዖዛ ሃ ኣላሜ ኣሳይ ቤዮንታ ማላ ሃይሳ ሃ ኣላሜዛ ፆሲ ኣማኖንታ ኣሳ ዎዝና ሙሚሲዴስ። ኑኒ ዬሱስ ኪርስቶሲ ጎዳ ጊዲዳይሳ ሳባኮስ ኣቲን ኑና ሳባኮኮ። ኑካ ኑ ባጋራ ዬሱሳ ጊሽ ኢንቴስ ኦꬂዛዴንታ ጊዲዶስ። ኪርስቶሳ ሲንꬃን ፆሲ ባ ቦንቾ ኤራቴꬃ ፖዖ ኑስ ኢማናስ “ፖዖይ ꬉማን ፖዖ” ጊዳ ፆሲ ባ ፖዖ ኑ ዎዝናን ፖዒሲዴስ። ጊዶ ኣቲን ሃይሲ ጊታ ዎልቃይ ኑስ ፆሳፌ ኢሜቲዴስ ኣቲን ኑፔ ጊዶንታይሳ ቤሳና ማላ ሃይሲ ቦንቾ ሚሻይ ኑናን ኦቶ ሚሳቲዛይታ ጊዶን ዴስ። ኣዋ ባጋራካ ኑና ሱጊኮካ ኑኒ ቲንꬅ ጊ ሜቆኮ። ኑስ ዮዖይ ቲፒ ጊኮካ ሂዶታ ቃንፆኮ። ኑ ጎዴቲኮካ ዎራ ዎꬊ ኣቶኮ። ኢስቲ ኑና ሾጪ ጌንዴርሲኮካ ኑ ꬋዮኮ። ዬሱሳ ዴዖይ ኑ ኣሳቴꬃን ቆንጫና ማላ ኑኒ ኢዛ ሃይቆ ኡባ ዎዴ ቶኪ ዩዮስ። ዬሱሳ ዴዖይ ሃይቂዛ ኑ ኣሳቴꬃን ቆንጫና ማላ ፓፃ ዲዛ ኑኒ ኡባ ዎዴካ ዬሱሳ ጊሻስ ሃይቆስ ኣꬊ ኢሜቶስ ሄሳ ጊሽ ኑ ሃይቆስ ኣꬊ ኢሜቲሺን ኢንቴ ቃስ ዴዖን ጋኬታ። ካሴ ጌሻ ማፃፋን ፃፌቲዳ ማላ “ታ ኣማኒዳ ጊሽ ሃሳያዲስ” ጌቴቲዳይሳ ኑካ ሄሳ ሄ ኣማኖ ኣያናን ኣማኒዛ ጊሽ ሃሳዮስ። ጋሶይካ ጎዳ ዬሱስ ኪርስቶሳ ሃይቆፔ ዴንꬂዳይሲ ኑናካ ኢዛራ ኢሲፌ ዴንꬂዲ ኢንቴናራ ባ ሲንꬅ ሺሻናይሳ ኑ ኤሮስ። ዳሮ ኣሳ ጋኪሼ ዲዛ ኪያቴꬂ ፆሳ ቦንቾስ ጋላታ ቦላ ጋላታ ጉጃና ማላ ሃይሲ ዉሪካ ኢንቴና ጎዓናስ ሃኒዴስ። ሄሳ ጊሽ ኑ ሂዶታ ቃንፆኮ፤ ኑስ ካሬ ባጋ ኣሳቴꬃይ ꬋይ ꬋይ ቢኮካ ኑስ ጋꬃ ባጋ ኣሳቴꬃይ ጋላስ ጋላስ ኦራፂ ኦራፂ ባሲ። ሄሳስ ሃዒ ጉꬃ ዎዴስ ኑና ጋኪዛ ዋዬይ ኢዛራ ጊጋናስ ዳንዳዮንታ ሜርናስ ጊዲዛ ቦንቾን ኑና ጋꬃና። ሄሳ ጊሽ ኑ ቲሺ ሂስቲ ፄሊዛይ ሃዒ ኣይፌን ቤቲዛ ሚሻ ቦላ ጊዶንታ ሃዒ ኣይፌን ቤቶንታ ሚሻ ቦላ ዴስ። ሃዒ ቤቲዛይሲ ኢዚ ሃዒስ ፃላላ። ሃዒ ኣይፌን ቤቶንታይስ ጊዲኮ ኢዚ ሜርናሳ። ኑኒ ኢዛን ቢታ ቦላ ዲዛ ዱንካኔይ ላሌቲኮካ ኣሳ ኩሼን ጊዶንታ ፆሳ ኩሼን ኦሴቲዳ ሜርና ኬꬂ ኑስ ሳሎን ዲዛይሳ ኑ ኤሮስ። ሄ ዎዴይ ጋካናስ ኑ ኬꬃ ሳሎይሳ ማይዓናስ ኑ ላሞቲ ናጎስ። ቱማፔ ሄሳ ኑ ማይዒዳፔ ጉዬ ካሎቶኮ። ኑኒ ሃይሳ ሃ ዱንካኔዛን ዲዛ ዎዴ ኡባን ኢዚ ዴፂዛ ጊሽ ዳቡራ ፒꬊ ጎስ። ሄሳስ ጋሶይካ ሃይቂዛይሲ ዴዖን ላሜታና ማላ ኑኒ ሳሎን ዳና ሶዛ ማይዓና ኣቲን ኑፔ ቃሬታና ማላ ኑ ኮዮኮ። ሄሳስ ኑና ጊጊሲዳይ ፆሳ። ቡሮ ያናይሳስ ዋሴ ጊዳና ማላ ኑስ ባ ኣያና ኢሚዳይ ኢዛ። ኑኒ ኣሾን ዲዛ ዎዴ ጎዳፔ ሃኪ ዲዛይሳ ኤሪኮካ ኢዛን ኣማኔቲዲ ዶስ። ኑኒ ዲዛ ዱሳይ ጎዳን ኣማኒዲ ኣቲን ኣይፌን ቤዖን ጊዴና። ኑኒ ኣሾፔ ሻኬቲዲ ጎዳራ ዱስ ዶራናይሳ ታ ሲꬎንታ ዮታይስ። ሄሳ ጊሽ ኑ ኣሾን ዲኮ ዎይኮ ኣሾፔ ሻኬቲኮካ ኑስ ዋና ቆፋይ ጎዳ ኡፋይሶ። ኑኒ ዉሪካ ኪርስቶሳ ፒርዳ ዎምቦራ ሲንꬂ ሺቃናይሲ ኣቴና፤ ኑፔ ኢሶይ ኢሶይ ቢታ ቦላ ባ ኦꬂዳ ኢታ ጊዲን ዎይኮ ሎዖ ጊዲን ባ ኦሶ ማላ ቤሲዛ ዋጋ ኤካና። ሄሳ ጊሽ ጎዳስ ባቦ ጉሲ ኣይ ጉሳኮኔ ኑ ኤሪዛ ጊሽ ኣሳይ ኑ ዮቲዛይሳ ኤሮ ጊ ኤካና ማላ ኦꬃናስ ዳቡሮስ። ኑኒ ኦናንታኮኔ ፆሳ ኣቻን ቆንጬ። ቃሴካ ኢንቴ ዎዝናንካ ቆንጬ ጊዲዳይሳ ታ ኣማናይስ። ታ ሄሳ ጊዛይ ኑና ኢንቴ ሲንꬃን ጋላታናስ ጊዶንታ ዲሺን ኢንቴ ኑናን ጬቄታና ማላ ኣቲን ዎዝናፔ ጊዶንታ ኣይፌን ቤቲዛ ሚሻን ጬቄቲዛይታስ ኢንቴ ዛሮ ኢማናስ ዳንዳያና ማላ ጋዳ ጋይስ። ኑ ጎሽ ጊዲኮ ፆሳ ጊሽ ጊዲ ጎዪዶስ። ኤራታ ጊዲኮካ ኢንቴስ ጊዲኮ! ኪርስቶሲ ኡባስ ኢሲቶ ሃይቆይሳኔ ሃራይ ዉሪካ ኢዛራ ኢሲፌ ሃይቂዳይሳ ኑ ኤሪዳ ጊሽ ኪርስቶሳ ሲቆይ ኑና ዎልቃራ ኦሲሴስ። ሼምፖራ ፓፃ ዲዛይቲ ዉሪካ ሄ ሃይቂዳይሳሲኔ ሃይቆፔ ዴንዲዳይሳስ ዳና ማላፔ ኣቲን ሃይሳፌ ጉዬ ኢስቲ ባሲ ዶንታ ማላ ኪርስቶሲ ኡባስ ሃይቂዴስ። ሄሳ ጊሽ ሃይሳፌ ጉዬ ኑኒ ኦና ኣሲካ ኣሾ ኣይፌን ፄሎኮ። ኑኒ ሃይሳፌ ካሴ ኪርስቶሳ ኣሾ ኣይፌን ፄሊዳይ ጮ ሜላ ኣሳ ማላ ፄሎ፥ ጊዲኮካ ሃይሳፌ ጉዬ ሲንꬃስ ጊዲኮ ሄሳꬆ ፄሎ። ሄሳ ጊሽ ኦኒካ ኪርስቶሳ ባጋ ጊዲኮ ኢዚ ኦራꬃ ሜꬌቴꬃ። ካሴ ጬጋ ሜꬌቴꬃይ ኣꬊዴስ። ሄ ኢዛ ኪቾሳን ሃራ ኦራꬃ ሜꬌቴꬂ ጌሊዴስ። ሄሲ ዉሪ ሃኒዳይ ኢዚ ኑና ባናራ ኪርስቶሳ ባጋራ ማቃይንꬂዲኔ ማቃይንꬆ ኦሶ ኑስ ኢሚዳ ፆሳና። ሄሲካ ፆሲ ኪርስቶሳ ባጋራ ሃንኮ ኣላሜ ኣሳ ዉርሲካ ባናራ ማቃዪንꬂዴስ ጉሳ። ኢስቲ ቆሆዛካ ቆዲቤና። ኑስካ ኑ ኣሳ ጎዳራ ማቃዪንꬃና ቃላ ኢሚዴስ። ፆሲ ኑ ባጋራ ኣስ ፄይጊዛ ጊሽ ኑኒ ቃሴ ኪርስቶሳ ኦጋꬃታ። ሄሳ ጊሽ “ኢንቴ ፆሳራ ማቃይኒቴ!” ጊዲ ኑ ኢንቴና ኪርስቶሳ ሱንꬃን ዎሶስ። ኑኒ ኪርስቶሳ ባጋራ ፆሳ ፂሎቴꬅ ጊሼቲ ኤኪዛይታ ጊዳና ማላ ፆሲ ኢዛ ቦላ ናጋራይ ባይንዳ ኪርስቶሲ ኢዚ ኑ ናጋራ ቶካና ማላ ኦꬂዴስ። ኑኒ ፆሳራ ኦꬂዛይታ ጊዲዳ ማላ ኢንቴ ኤኪዳ ፆሳ ኪያቴꬃ ጮ ሜላ ኣሾፍቴ ጊሼ ኑ ኢንቴና ዎሶስ። ፆሲ “ታኒ ታስ ጊጊዳ ጋላስ ኔና ሲያዲስ! ኣቲዛ ጋላስ ታ ኔና ማዳዲስ!” ጊዛ ጊሽ ሎዖ ዎዴይ ሄኮ ሃዒ! ኣቴꬃ ጋላሲካ ሃዒኮ! ኑ ኦሶይ ሌቄቶንታ ማላ ኣይ ዎዴካ ኦናስካ ኑኒ ꬉጴ ጊዶኮ። ሄሳፌ ኣꬂዲ ዋዬኔ ሜቶ ኡንዖካ ዳንዳያን ፆሳስ ኦꬂዛ ኣሳታ ማላ ኣይ ኦጌራካ ኑናቴꬃ ኣꬂ ኢሞስ። ኑኒ ፆሳስ ኦꬂዛይታ ጊዲዳይሳ ቤሲዛይ ጋራፌቴꬃን፥ ቃሼቴꬃን፥ ሂርጋን፥ ዳቡሪ ኦሶን፥ ꬊሲኮ ꬋዮኒኔ ጋፋና። ሄሳꬆካ ጌሻቴꬃን፥ ኤራቴꬃን፥ ዳንዳያን፥ ኪያቴꬃን፥ ፂሎ ኣያና ካሎኒኔ ቆꬌፔ ቆሞን ጊዶንታ ሲቆን፥ ቱማ ቃላኒኔ ፆሳ ዎልቃና። ኑ ኢዛን ጌዴ ኦሊ ፆኒዛ ኦላ ሚሺኔ ካሜቲ ኣቲዛ ጎንዳሌይ ፂሎቴꬃ። ቦንቾስ ጊዲን ዎይኮ ካዉሻስ፥ ቆꬌታናስ ዎይኮ ጋላታናስ ኑኒ ጊጌቲዳይታ። ኑኒ ቱማንቻታ ሺን ኣሴ ባሌꬂዛይታ ጌቴቲዶስ። ኑኒ ኤሬቲዳይታ ሺን ኤሬቶንታይታ ጊዲዶስ። ኢስቲ ሃይቂዳይታኮ ጊሺን ኑኒ ፓፃ ዶስ። ኣሳይ ኑና ቡኪ ቡኪንካ ኑ ሃይቂቤኮ። ሙዞይ ኑና ጋኪኮካ ኡባ ዎዴ ኡፋዬቶስ። ኑ ማንቆኮ ሺን ዳሮ ማንቆታ ዱሬ ኬሶስ። ኑስ ኣይኮይካ ባይንዳይታ ሺን ዉሪካ ኑስ ዴስ። ኢንቴኖ ቆሮንቶሴን ዲዛይቶ! ታ ካሴ ኢንቴስ ቆንጬን ዮታዲስ። ኑኒ ኑ ዎዝና ኢንቴና ዉርሲ ቤሲዶስ። ኢንቴ ቃሴ ኑና ኢንቴ ሲቆ ቤሳናስ ኡዜቲዴታ ኣቲን ኑ ኢንቴና ኑ ሲቆ ቤሳናስ ኡዜቲቤኮ። ኣዋይ ባ ናስ ዮቲዛ ማላ ታካ ኢንቴስ ኣኔ ዮታይስ። ኑኒ ኑ ዎዝና ኬሂ ዶዪዲ ኑ ቆፋ ኢንቴስ ቆንጪሶይሳꬆ ኢንቴካ ኑስ ሄሳꬆ ቆንጪሲቴ። ኣማኖንታ ኣሳራ ጊጋይ ባይንዳ ኢሲፌቴꬃን ኦይኬቶፍቴ። ፂሎቴꬂኔ ናጋራይ ዋኒ ኢሲፌታናስ ዳንዳዪዜ? ፖዖይኔ ꬉማይ ኢሲፌ ዋኒ ዳና ዳንዳዪዜ? ኪርስቶሲኔ ዳቡሎሲ ዋኒ ጋጋናስ ዳንዳዪዞ? ኣማኒዛዴይ ኣማኖንታዴራ ኣዛን ላጌታናስ ዳንዳዪዜ? ፆሳ ዎሳ ኬꬃስ ኤቃታራ ኣዛ ጋጎይ ዲዜ? ፆሲካ “ታኒ ታ ዱሳሶ ታ ዴሬዛ ጊዶን ኦꬃና፤ ታካ ኢስታራ ዳና፤ ኢስታሲካ ጎዳ ጊዳና። ኢስቲካ ታ ዴሬታ ጊዳና” ጊዲ ካሴ ዮቲዳ ማላ ኑኒ ኢሶይ ኢሶይ ዴዖ ፆሳ ኬꬃታ። ጎዳይ “ኢንቴ ኢስታ ጊዶፌ ሻኬቲዲ ኬዚቴ! ቱና ሚሽ ቦቾፍቴ፤ ታካ ኢንቴና ኤካና። ታ ኢንቴስ ኣዋ ጊዳና፤ ኢንቴካ ታስ ኣቱማ ናይታኔ ማጫ ናይታ ጊዳንዴታ” ጌስ ዉርሲካ ዳንዳዪዛ ጎዳይ። ሄሳ ጊሽ ታ ሲቆቶ! ሃይሲ ሂዶታይ ኑስ ኢሜቲዳ ጊሽ ኣሾኔ ኣያና ቱኒሲዛ ኣይ ሚሻፌካ ኣኔ ኑና ጌሾስ። ፆሳስ ያሻን ኑ ጌሻቴꬃ ኣኔ ኩሜꬅ ሂስቶስ። ኢንቴ ኑና ኡፋይሳን ሞኪ ኤኪቴ። ኑኒ ኦናካ ቆሂቤኮ፤ ኦናካ ናቂቤኮ፤ ኦና ጎዓካ ኑስ ባሌꬂ ኤኪቤኮ። ታኒ ሄሳꬆ ጊዛይ ኢንቴ ቦላ ፒርዳናስ ጊዴና። ሃይሳፌ ካሴ ታ ኢንቴስ ዮቲዳ ማላ ኢንቴ ኑ ዎዝናን ዴታ። ሄሳ ጊሽ ሃይቆንካ ጊዲን ፓፃንካ ኡባ ዎዴ ኑ ኢንቴፌ ሻኬቶኮ። ታስ ኢንቴ ቦላ ዲዛ ኣማኖይኔ ጬቄቴꬂ ዳሮ ጊታ። ታ ኢንቴናን ሚኔታይስ። ኑና ጋኪዛ ሜቶ ኡባን ታኒ ኬሃ ኡፋዬታይስ። ኑኒ ማቂዶኒያ ጋኪዳ ዎዴካ ዱማ ዱማ ባጋራ ሜቶይ ኑና ጋኪዴስ ኣቲን ኑኒ ኣይኮካ ሼምፖ ዴሚቤኮ። ኑስ ሶራ ሂርጋይ፥ ካሬራ ቃስ ኦሺ ዴስ። ጊዶ ኣቲን ሙዞቲዳይታ ሚንꬄꬂዛ ጎዳይ ቲቶሳ ዩሳን ኑና ሚንꬄꬂዴስ። ኑኒ ሚኔቲዳይ ኢዛ ዩሳን ፃላላ ጊዶንታ ዲሺን ኢንቴ ኢዛ ሚንꬄꬂዳይሳ ኑ ጉጂ ሲዪዳ ጊሻሳ። ኢንቴ ታና ላሞቲዳይሳ ታስ ቃꬌቲዛይሳ ቆፒዛይሳካ ኢዚ ኑስ ዮቲን ሲያዳ ታኒ ዳሮ ኡፋዬታዲስ። ታኒ ሃይሳፌ ካሴ ኢንቴስ ፃፊዳ ኪታይ ኢንቴና ሚሺሲዳ ጊዲኮካ ሄ ኪታ ፃፊዳ ጊሽ ታኒ ሄሳꬆ ኣዛስ ፃፋዲና ጋዳ ሞꬌቲኬ። ሞꬌቲኮካ ታ ሞꬌታናይ ጉꬃ ዎዴስ ኢንቴ ታና ሚሺሲዳ ጊሻሳ። ሃዒ ጊዲኮ ታ ኡፋዬታይስ። ታኒ ኡፋዬቲዳ ጋሶይ ታኒ ኢንቴና ሚቺሲዳ ጊሽ ጊዶንታ ኢንቴ ሄ ሚሻፔ ዴንዲዳይሳን ማሮቴꬃን ጌሊዲ ላሜቲዳ ጊሻሳ። ሄሳ ጊሽ ኢንቴ ሚሼቲኮካ ፆሳ ሼኔ ማላ ጊዲዳ ጊሽ ኑኒ ኢንቴና ኣይኮካ ቆሂቤኮ ጉሳ። ፆሳ ሼኔ ማላ ጊዲዳ ሚሼቴꬂ ጌዴ ማሬቲ ኣታናሶ ጋꬄስ። ሄሳስካ ሞꬌቴꬂ ዴና፤ ዎዝናፔ ጊዶንታ ማሬቴꬅ ጊዲኮ ሃይቆን ጋꬄስ። ሃይሲ ኢንቴ ሙዞቴꬃይ ፆሳ ሼኔ ማላ ጊዲዳ ጊሽ ሄሲ ኣይ ማላ ሚኖቴꬃን፥ ኣይ ማላ ኦይሻ ዛሮን፥ ኣይ ማላ ኤሌ ሃንቄቴꬃን፥ ኣይ ማላ ያሻቴꬃን፥ ኣይ ማላ ላሞቴꬃን፥ ኣይ ማላ ሎዖ ኣሞን፥ ኣይ ማላ ሙራን ኢንቴና ጋꬂዳኮኔ ኣኔ ኢንቴ ዎዝናን ዩሺ ቆፒቴ። ኢንቴ ቃሴ ሃኒዳ ኡባንካ ሄ ሃኖዛፔ ጌሽ ጊዲዳይሳ ማርካሲዴታ። ሄሳ ጊሽ ታ ኢንቴስ ፃፊዳይሲ ኢንቴ ኑስ ኣይ ማላ ኣማኔቲዛይታኮኔ ኢንቴ ኢንቴና ፆሳ ሲንꬃን ቤያና ማላፔ ኣቲን ቆሂዳዴ ጊሺኔ ቆሄቲዳዴ ጊሽ ጋዳ ጊዴና። ኑኒ ሚኔቲዳይሳፌ ቦላራ ቲቶሲ ዴሚዳ ኡፋይሳን ዳሮ ኡፋዬቲዶስ። ኑኒ ኡፋዬቲዳይካ ኢንቴ ዉሪካ ቲቶሳ ሚንꬄꬂዳ ጊሺኔ ኢዛ ዎዝና ሼምፒሲዳ ጊሻሳ። ታኒ ኢንቴናን ጬቄቲዛይሳ ካሴ ቲቶሳስ ዮታ ዎꬃዲስ። ኢንቴካ ታና ዬላሲቤይኬታ። ኡባ ዎዴ ታ ኢንቴስ ቱማ ፃላላ ዮታሼ ዳይስ። ሄሲካ ኑኒ ኢንቴ ጊሽ ቲቶሳስ ዮቲዳ ዮዖይ ቱሙ ጊዲ ኣማኔቲዴስ። ኢንቴ ዉሪካ ኣዛዜቲዛይታ ጊዲዳይሳ፥ ያሻቴꬃኒኔ ኮኮሪሼ ኢንቴ ኢዛ ሞኪ ኤኪዳይሳ ቲቶሲ ቆፒ ኤኪዲ ኢዚ ኢንቴና ሲቂዛይሳስ ዛዋይ ባዋ። ታካ ኡባ ባጋራ ኢንቴናን ኣማኔታናስ ዳንዳዪዳ ጊሽ ታ ዳሮ ኡፋዬታዲስ። ታ ኢሻቶ! ፆሲ ማቂዶኒያን ዲዛ ኣማኒዛ ኣሳስ ኢሚዳ ኪያቴꬃ ኢንቴ ኤራናይሳ ታ ኮያይስ። ኢስቲ ዳሮ ሜቶቲ ዲሼ ዳሮ ኡፋዬቲዳ። ኬሂ ማንቆታ ጊዲኮካ ዳሮ ኪያቲዳ። ኢስቲ ባሲ ዳንዳዬቲዛይሳ ማላኔ ባሲ ዳንዳዬቲዛይሳፌካ ኣꬂ ኢሚዳይሳ ታ ኢስታ ጊሽ ማርካታይስ። ዩሁዳን ዲዛ ኣማኒዛይታስ ማዶ ኢማናስ ዲጌቶንታ ማላ ኑና ኬሂ ዎሲዳ። ኢስቲ ኑኒ ቆፒዳይሳፌ ቦላራ ኣꬂ ኦꬂዳ። ኢስቲ ኮይሮ ባና ጎዳስ ኢሚዳ። ዛርዲካ ፆሳ ሼኔ ማላ ባናካ ኑስ ኢሚዳ። ሃይሳ ኦሶዛ ኮይሮ ቲቶሲ ዶሚዳ ጊሽ ሃዒካ ሃይሳ ማዶ ኢሞዛ ኢዚ ፖላና ማላ ኑ ኢዛ ዎሲዶስ። ኢንቴ ኣማኖን፥ ሃሳያን፥ ኤራቴꬃን፥ ሚኖ ኦሶን፥ ኢንቴ ኑና ሲቂዛ ሲቆን፥ ኡባ ዮዖን ኣꬌታ። ሄሳꬆካ ኪያቴꬃ ኦሶንካ ኣꬊዛይታ ጊዲቴ። ታ ሄሳ ጊዛይ ኢንቴና ጮ ሜላ ኣዛዛናስ ጊዴና። ጊዶ ኣቲን ሃንኮ ሃራ ኣሳይ ሚኒ ኢሚዛይሳ ኢንቴናራ ጋꬃ ቤይሺን ኢንቴ ሲቆይ ቱሙ ጊዲዳይሳ ሻካ ኤሬናሳ። ኢንቴ ኑ ጎዳ ዬሱስ ኪርስቶሳ ኪያቴꬅ ኤሬታ። ሃይሳ ሃ ሃኖዛን ታስ ሎዖ ጊዲ ቤቲዳ ዞሬ ታ ኢንቴስ ኢማይስ። ዚላይꬂ ኢንቴ ኢሞ ፃላላ ጊዶንታ ዲሺን ኢማናስ ኮይሮፔ ቆፒዳይ ኢንቴና። ሄሳ ጊሽ ኢንቴ ኢማናስ ኮይዳይሲ ፖሌታና ማላ ኢንቴስ ዲዛ ማላ ካሴ ኢንቴ ቆፒዳይሳ ሃዒ ኦꬂቴ። ኣሲ ኢማናስ ዎዝናፔ ኮይኮ ኢዛዴይ ኪያቴꬃን ኢሚዛይሲ ኤኬቲዛይ ኣሲ ባሲ ዲዛሪ ማላ ኢሚኮ ኣቲን ባሲ ባይንዳይሳፌ ኢሚሺን ጊዴና። ታ ሃይሳꬆ ጊዛይ ኢንቴ ዉሪካ ጊና ጊዳና ማላ ኣቲን ኢንቴ ኢሞን ዋዬቲሺን ሃራቲ ሼምፓና ማላ ጋዳ ጊዴና። ኢንቴ ዋዬቲሺን ኢስታ ሚሻይ ኢንቴ ሜቶ ኣሻና ማላ ሃዒ ቃሴ ኢንቴ ሚሻይ ኢስታ ሜቶ ኣሾ። ሄሳ ማላን ኢንቴ ጊዶን ጊናቴꬂ ዳና። ሄሲካ “ዳሮ ሺሺዳዴስ ዎꬊቤና፤ ጉꬅ ሺሺዳዴሲካ ፓጪቤና” ጌቴቲ ጌሻ ማፃፋን ፃፌቲዳ ማላ። ታኒ ኢንቴስ ቆፒዛይሳ ማላ ቲቶሳይካ ኢንቴስ ዎዝናፔ ቆፓና ማላ ኦꬂዳ ጎዳይ ጋላቴቶ። ቲቶሲ ኢንቴኮ ቢዛይ ባርካ ባ ቆፋን ኡፋይሳንፔ ኣቲን ኑኒ ኢዛ ዎሲዳ ጊሽ ፃላላ ጊዴና። ሚሺራቾ ቃላ ኦሶን ዎሳ ኬꬃታን ኡባን ዶሴቲዳ ኢሻዛ ኑ ኢዛራ ጋꬂ ዬዶስ። ሄሳፌካ ቦላራ ሃይሲ ኑ ኢሻይ ኑኒ ሃይሳ ሎዖ ኦሶዛ ጎዳ ቦንቾስ ኦꬂሺኒኔ ኑኒ ኦꬃናስ ኮዪዛይሳ ኢዛስ ቆንጪሲሺን ኢዚ ኑናራ ቢዲ ኦꬃናስ ዎሳ ኬꬃቲ ዶሪዳዴ። ሃይሳ ኪያቴꬅ ኢሜቲዳ ሚሻዛ ኑኒ ኦይኪሺን ኑ ቦላ ኣይኮ ቦሮይካ ጋኮንታ ማላ ኑኒ ናጌቶስ። ጋሶይካ ኑስ ዋና ቆፋይ ጎዳ ሲንꬃን ፃላላ ጊዶንታ ኣሳ ሲንꬃንካ ሎዖ ኦꬃናሳ። ዳሮ ዎዴ ዳሮ ሚሻን ፓጬቲዲ ሚኖ ጊዲዳ ኑ ኢሻ ቲቶሳራ ኑ ኢዛ ዬዲዳይ ሄሳሳ። ኢዛስ ኢንቴ ቦላ ዲዛ ኣማኖይ ዳሮ ጊታ ጊዲዳ ጊሽ ኢዚ ሃዒ ኢንቴና ማዳናስ ካሴፔ ኣꬂ ኮዬስ። ኢንቴ ቲቶሳ ጊሽ ኤራናስ ኮይኮ ኢዚ ኢንቴና ማዳናስ ታናራ ኦꬂዛዴ። ኢዛራ ኢሲፌ ቢዛ ሃንኮ ኢሻቲ ቃሴ ዎሳ ኬꬃቲ ባ ጊሽ ዬዲዳ ኪርስቶሳ ቦንቾስ ኤቂዳይታ። ሄሳ ጊሽ ኢንቴ ኢስታስ ኢንቴ ሲቆ ቤሲቴ። ኢንቴ ሄሳꬆ ሂስቲኮ ኢንቴ ሲቆይኔ ኑ ኢንቴናን ጬቄቲዛ ጬቄቴꬃይ ጮ ሜላ ጊዶንታይሳ ኢንቴ ዎሳ ኬꬃታስ ቤሳንዴታ። ዩሁዳን ዲዛ ኣማኒዛይታስ ኬሲዛ ሚሻ ጊሽ ታ ኢንቴስ ፃፋናስ ኮሼና። ኢንቴስ ኣካያን ዲዛ ኣሳስ ማዳና ሎዖ ቆፋይ ዲዛይሳ ታ ኤራዳ “ኣካያ ኣሳይ ዚላይꬃፌ ኦይኪዲ ማዶስ ጊጌቲዴስ” ጋዳ ማቂዶኒያ ኣሳስ ዮታዲስ። ሃራፔካ ኢንቴ ማዳናስ ኮይዳ ሱሬ ቆፋይ ዳሮታ ሎዖ ኦሶስ ዴንꬄꬂዴስ። ሃይሳ ሃ ሃኖዛን ኑ ኢንቴናን ጬቄቲዛይሲ ጮ ሜላ ጊዶንታ ማላ ሃይታ ኑ ኢሻታ ታ ኪታዲስ። ኢንቴካ ታ ካሴ ኢንቴስ ጊዳ ማላ ናጌቲ ኡቲቴ። ማቂዶኒያ ኣሳቲ ታናራ ኢንቴኮ ቢሺን ኢንቴ ጊጌቶንታ ዲዛይሳ ቤኮ ኑኒ ኢንቴናን ጬቄቲዛይሳን ዬላታና። ኢንቴ ቃሴ ዳሮ ዬላታና። ሄሳ ጊሽ ኢንቴ ካሴ ኢማና ጊዳይሳ ካሴቲዲ ጊጊሳና ማላ ኢንቴና ቆፊሳናስ ጋዳ ሃይቲ ኢሻቲ ታፔ ካሴቲዲ ኢንቴኮ ጋካና ማላ ኮሺዛይሲ ታስ ቤቲዴስ። ሄሳꬆካ ታኒ ቢዛ ዎዴ ኢንቴ ኢማናይሲ ጊጊ ኡቲዳዝ ጊዳና። ኢንቴካ ኢማናይሲ ዎልቃራ ጊዶንታ ዶሳን ጊዲዳይሳ ቤሳና። “ጉꬅ ዜሪዳ ኣሲ ጉꬅ ሺሻና፤ ዳሮ ዜሪዳዴይ ቃስ ዳሮ ካꬅ ሺሻና” ጊዛ ቃላ ዩሺ ቆፒቴ። ፆሲ ዶሲዛይ ባ ዶሳን ኢሚዛዴ ጊዲዳ ጊሽ ኢሲ ኢሲ ኣሲ ኢማናስ ባ ዎዝናን ቆፒዳሮ ኡፋይሳን ኢሞ ኣቲን ሞꬌቲሼ ጮ ዎልቃራ ኢሞፎ። ኡባ ዎዴ ሃኒዛ ኡባን ኢንቴ ኢንቴስ ጊዲ ፓላሂዲ ሃራ ሎዖ ኦሶስ ጊዳና ማላ ፆሲ ኢንቴስ ባ ኣንጆ ጉጂ ኢማናስ ዳንዳዬስ። ሄሲካ “ማንቆታስ ኪያቴꬃን ኢሚዴስ፤ ኢዛ ፂሎቴꬂ ሜርናስ ዴያና” ጌቴቲ ጌሻ ማፃፋን ፃፌቲዳ ማላ። ዜሪዛዴስ ዜሬꬂ፥ ማናስ ካꬅ ኢሚዛ ጎዳይ ኢንቴ ዜሪዛ ዜሬꬃ ኢዚ ኬሂ ዳርሲ ኢማና። ኢዚ ኢንቴ ኪያቴꬃ ኦሶዛ ኣይፌ ኢንቴስ ዳርሳና። ኢንቴ ኪያቴꬃን ኢሞይሲ ኑ ባጋራ ኢስታ ጋኪዛ ኣሳቲ ፆሴ ጋላታና ማላ ኢንቴ ኡባ ዎዴ ኪያቴꬂ ኢማና ማላ ፆሲ ኢንቴና ኡባሶራ ዱሬሳና። ሃይሲ ኢንቴ ኢሚዛ ኪያቴꬃ ኦሶይ ኣማኒዛይታ ሜቶ ማዶፔ ቦላራ ኣሳይ ፆሳ ዳርሲ ጋላታና ማላ ኦꬄስ። ሃይሲ ኢንቴ ኪያቴꬃ ኦሶዚ ኢንቴ ኪርስቶሳ ሚሺራቾ ቃላን ኣማኒዲ ኣማኔቲዳይታ ጊዲዳይሳ፥ ኢስታሲኔ ሃራታስካ ኢንቴ ኪያቴꬅ ኢሚዳይሳ ኤሪሲዛዝ ጊዲዳ ጊሽ ኢስቲ ዉሪካ ፆሴ ጋላታና። ኢስቲ ቃሴ ፆሲ ኢንቴስ ኢሚዳ ጊታ ኪያቴꬃ ጌዶን ኢንቴና ሲቂዛ ጊሽ ኢንቴስ ዎሳና። ኣሳ ቃላን ቆንጪሴꬃፌ ቦላ ጊዲዳ ፆሳ ኢሞቴꬃ ጊሽ ፆሲ ጋላቴቶ። ታ ጳዉሎሲ ኢንቴናራ ዲሺን ኢዚ ኣሺኬ ጌቴታዲስ ሺን ታ ኢንቴፌ ሃኪሺን ቃስ ኢንቴ ቦላ ፃሊዳዴ ጌቴቲዳ ታ ጳዉሎሲ ኪርስቶሳ ኣሽኬቴꬃኒኔ ኢዛ ሎዔቴꬃን ኢንቴና ዎሳይስ። ታኒ ኢንቴና ዎሲዛይ ታ ኢንቴኮ ሄ ቢዛ ዎዴ ኢንቴ ታና ፃላቴꬃን ሃሳዪሶንታ ኣጋና ማላ። ኑኒ ኣሾ ቆፋን ሲሜሬቲዛ ማላ ኑና ፄሊዛ ኢሲ ኢሲ ኣሳታ ሲንꬃን ታኒ ፃላቴꬃን ሃሳያናስ ኮያይስ። ኑኒ ዲዛይ ሃይሳ ኣላሜዛ ቦላ ጊዲኮካ ኑ ኦሌቲዛይ ሃ ኣላሜዛ ኣሳ ኦላ ማላ ጊዴና። ኑ ኦላ ሚሻይካ ኦላ ሚፃ ላላናስ ዳንዳዪዛ ፆሳ ዎልቃይ ዲዛይሳ ኣቲን ሃይሳ ኣላሜዛ ኦላ ቶራ ጊዴና። ፆሴ ኤሮንታ ማላ ꬉጴ ጊዲ ዴንዲዛ ፓላማኔ ኦቶሬቴꬅ ኑ ላሎስ። ኣሳ ቆፋ ዉርሲ ዲዒ ኤኪዲ ኪርስቶሳስ ኣዛዜታና ማላ ኦꬆስ። ኢንቴ ኣዛዜቴꬂ ፖሌቲዛ ዎዴ ኣዛዜቶንታ ኣይ ሚሼካ ቃፃያናስ ኑኒ ጊጌቲ ኡቲዶስ። ኢንቴ ፄሊዛይ ካሬ ባጋራ ቤቲዛዚ ፃላላ። ኦኒካ ታኒ ኪርስቶሳስኮ ጊ ኣማኔቲኮ ዛሬꬂ ቆፖ። ኑካ ኢዛ ማላካ ኪርስቶሳይታ ጊዲዳይሳ ኢዛዴይ ዎዝናን ዎꬆ። ጎዳይ ኑስ ኢሚዳ ማታ ጊሽ ታኒ ኢዛን ጬቂኮካ ዬላቲኬ። ሄሲ ማታይ ታስ ኢሜቲዳይ ኑኒ ኢንቴና ሚኒሳናስ ኣቲን ላላናስ ጊዴና። ታኒ ሃ ኪታን ኢንቴና ባቢሶስ ኦꬂዛ ሚሳቶፖ። ኦኔ ኤሪዛይ ኢሲ ኢሲ ኣሳቲ “ጳዉሎሳ ኪታቲ ዴፆኔ ዎልቃማ፤ ጊዶ ኣቲን ኢዚ ኑ ኣቻን ዲዛ ዎዴ ኢዚ ላፋ፤ ኢዛ ሃሳያይካ ሌቄቲዳዛኮ!” ጊዛዚ ጊዳና። ሄሳꬆ ጊዛ ኣሳቲ ኑኒ ሃሆን ዲሼ ፃፊ ኪቲዳይሳሲኔ ቃስ ኢንቴናራ ዲሼ ኑ ኦꬂዛይሳ ጊዶን ኣይኮ ዱማቴꬂ ባይንዳይሳ ሻኪ ኤሬቶ። ጊዲኮካ ባርካ ባና ናሺዛ ኢሲ ኢሲ ኣሳታራ ኑና ኑርካ ጋꬂ ፄላናስ ዎይኮ ኢስታራ ኑና ጊጊሳናስ ፃሎኮ። ኢስቲ ቃሴ ባርካ ባና ባናራ ጋꬂ ፄሊዛ ጊሽ ኢስቲ ዩሺ ቆፒዛይታ ጊዴቴና። ኑ ቃሴ ኢንቴኮ ጋካና ጋካናስ ፆሲ ኑስ ኢሚዳ ኦሶ ዛዋን ሲሜሬቶስ ኣቲን ዎጋፔ ኣꬂ ጬቄቲዛይታ ጊዶኮ። ኢንቴ ቃሴ ኑ ኦꬂዛሶን ዲዛ ጊሽ ኪርስቶሳ ሚሺራቾ ቃላ ታማርሳናስ ኑ ኢንቴኮ ቢዳ ዎዴ ኑኒ ሄ ኑ ዛዋፔ ኣꬊቤኮ። ሄሳ ጊሽ ፆሲ ኑስ ኢሚዳ ዛዋፔ ኣꬊዲ ሃራ ኣሳታ ኦꬆን ጌሊዲ ዎጋፔ ኣꬊ ጬቄቶኮ። ሄሳፌ ቦላራ ኢንቴ ኣማኖይ ዲጫና ማላኔ ኑ ኦሶይካ ፆሲ ኑስ ኢሚዳ ዛዋን ኢንቴ ጊዶን ኣካናይሳ ናጎን ዶስ። ሄሳ ጊሽ ኑ ሃራ ኣሲ ኦꬂዛ ዛዋ ኣꬊዲ ካሴቲዲ ኦꬄቲዳ ኦሶን ጬቄቶንታ ዲሼ ኢንቴፌ ሄኒን ዲዛ ዴሬታስ ሚሺራቾ ቃላ ዮታናስ ዳንዳዮስ። ጊዶ ኣቲን ፆሳ ማፃፋይ “ጬቄቲዛ ኣሲ ጎዳን ጬቄቶ” ጊዴስ። ኣሲ ጋላቴታናስ ዳንዳዪዛይ ጎዳይ ጋላቲኮ ኣቲን ባርካ ባና ጋላቲን ጊዴና። ታ ጉꬃ ኤያቴꬃ ኢንቴ ዳንዳያና ማላ ታ ሂዶታ ኦꬆይሳ ሃያና ዳንዳዪቴ። ኢሲ ጌሎንታ ጌሻ ጌላዖያ ባ ጌላዖቴꬃን ኢሲ ኣዚናስ ጊጊዛ ማላ ታካ ኢንቴና ኪርስቶሳስ ጊጊሲዳ ጊሽ ታ ኢንቴ ጊሽ ሎዖ ቆፋ ቆፓይስ። ሾሻይ ባ ጌኔራ ሄዋኖ ባሌꬂዳይሳꬆ ኦኔ ኤሪዛይ ኢንቴ ቆፋይካ ሞሬቲን ኪርስቶሳስ ዲዛ ሱሬኔ ጌሽ ጊዲዳ ኣማኔቴꬃ ኢንቴና ኣጋጋንዴቶ ጋዳ ታ ሂርጋይስ። ኢሲ ኣሲ ኢንቴኮ ዪዲ ኑ ካሴ ኢንቴስ ሳባኪዳይሳ ጊዶንታ ሃራ ዬሱሳ ሳባኪኮ ዎይኮ ካሴ ኤኪዳ ኣያና ጊዶንታ ሃራ ኣያና ኤኪኮ ዎይኮ ካሴ ኢንቴ ኤኪዳ ሚሺራቾ ቃላ ጊዶንታ ሃራ ሚሺራቾ ቃላ ኤኪኮ ጮ ሜላ ኢንቴ ፆኔቲዴታ ጉሳ። ጊዲኮካ ታኒ ሃይታ ጊታ ሃዋሬታፔ ኣይኮንካ ጉፂዛ ታስ ሚሳቴና። ሃሳያን ጪንጫ ጊዶንታ ኣጊኮካ ታስ ኤራይ ፓጪቤና። ሄሳ ኑኒ ኢንቴስ ዱማ ዱማ ኦጌራ ቆንጬን ኤርሲዶስ። ታኒ ኢንቴስ ፆሳ ሚሺራቾ ቃላ ዳሞዛይ ባይንዳ ሳባኪዳይኔ ኢንቴና ꬎቁ ሂስታናስ ታኒ ታና ካዉሺዳይሲ ኦኔ ኤሪዛይ ታስ ናጋራ ጊዲ ቆዴቲዴሻ? ኢንቴስ ኦꬃናስ ሃንኮ ዎሳ ኬꬃታፔ ታኒ ማዶ ኤኪዳይሲ ኢስታፌ ሺሻ ኤካዳኮ። ታኒ ኢንቴናራ ዲሺን ታና ሜቲን ማቂዶኒያፔ ዪዳ ኢሻቲ ታስ ኮሺዛዛን ታና ማዲዳ ጊሽ ኦናስካ ቶሆ ጊዳቤኬ። ሃኖ ጋካናስካ ኣይ ሚሻንካ ኢንቴስ ቶሆ ጊዳቤኬ። ሲንꬃፌካ ታ ኢንቴስ ቶሆ ጊዲኬ። ኪርስቶሳ ቱማቴꬂ ታናን ዲዛ ጊሽ ታኒ ጬቄቶንታ ማላ ታና ዲጊዛይ ኣካያ ዴሬን ኦኒካ ባዋ። ሄሳስ ጋሶይ ኣዜ? ታኒ ኢንቴና ሲቆንታ ጊሼ? ታ ኢንቴና ሲቂዛይሳ ፆሲ ኤሬስ። ሄይቲ ዎርዶ ሃዋሬቲ “ኑካ ኢስታꬆ ኦꬆስ” ጊሼ ኢስቲ ጬቄቲዛይሳ ዲጋናስ ታ ሃዒ ኦꬂዛይሳꬆ ሲንꬃፌካ ኦꬃና። ሄይታንታ ማላ ኣሳቲ ኪርስቶሳ ሃዋሬታ ሚሳታናስ ባርካ ባና ላሚዛ ዎርዳንቻ ሃዋሬታኔ ባሌꬂዛ ኦሳንቻታ። ሄሲካ ዳሮ ማላሊሲዛዚ ጊዴና። ፃላዔይካ ባና ፖዖ ኪታንቻ ሚሳቲሲዲ ላሜቴስ። ሄሳ ጊሽ ሄይቲ ፃላዔ ኦሳንቻቲ ሃንኮ ፂሎ ኦሳንቻታ ሚሳታናስ ባርካ ባናቴꬃ ላሚኮ ኣይኮካ ማላሊሴና። ዉርሴꬃን ኢስቲ ባ ኦሶ ዋጋ ኤካና። ኦናስካ ታኒ ኤያ ጊዲዳዚ ሚሳቶፖ ጋዳ ቃሴካ ዮታዲስ። ታ ኢስታስ ኤያ ሚሳቲኮካ ጉꬃ ዎዴስ ታ ጬቄታና ማላ ታና ኢንቴ ኤያ ማላ ቆዲቴ። ታኒ ሄሳꬆ ዱና ኩንꬃ ሃሳዪዛይ ጎዳ ሼኔ ማላ ጊዶንታ ኤያ ኣሳ ማላ ጊዳዳ። ዳሮቲ ባ ኣሾ ቆፋን ጬቄቲዛይሳꬆ ታካ ጬቄታና። ኢንቴ ቃስ ዩሺ ቆፒዛይታ ጊዲዳ ማላ ሃንኮ ኤያታ ኡፋይሳናስ ዳንዳዬታ። ሄሳꬆካ ኦኒካ ኢንቴና ባሲ ኣይሌስኮኔ ኦኒካ ኢንቴና ቦንቂኮ፥ ኦኒካ ኢንቴናን ጎዔቲኮ፥ ኦኒካ ኢንቴና ሌቂኮ፥ ኦኒካ ኢንቴስ ሻጋላን ባቂኮ ኢንቴ ዳንዳዬታ። ኢዚ ታና ዬላሲዛዚ ጊዲኮካ ሃይታ ሃ ሃኖታ ኦꬃናስ ኑኒ ሚኖ ጊዶንታይሳ ታኒ ኢንቴስ ቆንጪሳይስ። ጊዶ ኣቲን ኦኒካ ጬቄታናስ ፃሊኮ ታካ ኢዛꬆ ፃላዳ ጬቄታና። ታኒ ሄሳ ጊዛይ ሃዒካ ኤያ ጊዳዳ። ሄይታንቲ ኢስቲ ኢብራዌ ኣሳቴ? ታካ ኢብራዌኮ! ኢስቲ ኢስራዔሌ ኣሳቴ? ታካ ኢስራዔሌ ኣሳኮ! ኢስቲ ኣብራሃሜ ዜሬꬃቴ? ታካ ኣብራሃሜ ዜሬꬂኮ! ሄይታንቲ ኪርስቶሳ ኦሳንቻቴ? ታኒ ቃስ ኢስታፌ ቦላራ ኪርስቶሳስ ኦꬂዛዴ። ታ ሄሳꬆ ጊዛይ ጎሻ ማላ ጊዳዳኮ! ታኒ ኢስታፌ ዳሮ ዎዴ ኦሶን ዳቡራዲስ፤ ዳሮ ዎዴ ቃሼታዲስ፤ ዳሮ ዎዴ ጋራፌታዲስ፤ ዳሮ ዎዴ ሃይቆስ ጋካዲስ። ሄꬑ ታማኔ ኡዱፉን ፁርቃፌ ኢቻሹቶ ኣይሁዳታን ጋራፌታዲስ። ሄꬑቶ ዱርቃን ቡኬታዲስ፤ ኢሲቶ ሹቻን ጫዴታዲስ፤ ሄꬑቶ ማርካቤ ጊዶን ታ ቦላ ሜቶይ ጋኪዴስ፤ ኢሲ ኦማርሲኔ ኢሲ ጋላስ ኣባ ጊዶን ጋምዓዲስ። ታ ሃሙꬃ ዳሮ ጋሶን ሃꬃ ኪፃይኔ ዲዖይ፥ ፓንጋታፔ ሜቶይ ታና ጋኪዴስ። ታ ቆሞ ኣይሁዳ ኣሳፔኔ ኣይዛቤታፔ ዋዬይኔ ሜቶይ ታና ጋኪዴስ። ካታማንካ ባዞንካ ኣባ ቦላንካ ታና ሜቶይ ጋኪዴስ፤ ሄሳꬆካ ዎርዶ ኣማኒዛይታፔ ሜቶይ ታና ጋኪዴስ። ዳሮ ኦꬃ ዳቡራዲስ፤ ዳሮ ዎዴ ꬊስካቤኬ፤ ጋፋኒኔ ሃꬃ ሳሞን ዋዬታዲስ፤ ዳሮ ዎዴ ሚዛ ካꬂ ታስ ꬋዪዴስ፥ ሜጎይኔ ካሎቴꬅ ታና ጋኪዴስ። ታኒ ሃራ ሚሺ ቆፖንታ፥ ጋላስ ጋላስ ታና ቆፒሲዛይ ዎሳ ኬꬃታ ኡባ ጊሽ ቆፒዛ ቆፋ። ኢሲ ኣሲ ዳቡሪሺን ታኒ ኢዛራ ዳቡሮንታ ኣይዴ ኣጋዲና? ኢሲ ኣሲ ናጋራን ኩንዲሺን ታ ቃሴ ኢዛ ሃንቄቶንታ ኣይዴ ኣꬋ ኤራዚና? ጬቄታናስ ኮሺዛዚ ጊዲኮ ታ ጬቄታናይ ታ ዳቡራንቻ ጊዲዳይሳ ታና ቤሲዛ ሚሻን ጬቄታይስ። ሜርናስ ጋላቴቲዳ ጎዳ ዬሱስ ኪርስቶሳ ኣዋ ፆሲ ታ ዎርዶቶንታይሳ ኤሬስ። ታኒ ዴማስቆ ካታማን ዲሺን ካዎ ኣርሲፆሲዮሳፔ ጋርሳራ ዴሬ ኣይሲዛይሲ ታና ኦይካናስ ኮይዲ ሄ ካታማ ፔንጌታ ዛቤታን ናጊሲዴስ። ጊዲኮካ ኣሳይ ታና ኬሼን ዬጊዲ ሄ ካታማ ጊንቤ ማስኮቴራ ዱጌ ዎꬂ ዬዲን ኬሳ ኤካ ኣታዲስ። ጬቄቴꬃን ኣይኔ ጎዓይ ባይንዳ ኣጊኮካ ጬቄታናስ ኮሺኮ ጎዳይ ታስ ቆንጪሲ ኢሚዳይሳኒኔ ኢዚ ቤሲዳ ኣጁታን ታ ጬቄታና። ኪርስቶሳስ ጊዲዳ ኢሳዴ ታ ኤራይስ። ሄ ኣዴዚ ታማኔ ኦይዱ ላይꬃፌ ካሴ ሄꬓንꬆ ሳሎ ኤኬቲ ቢዴስ። (ኢዚ ኤኬቲዳይ ባ ኣሾራ ጊዲን ዎይኮ ኣሾራ ጊዶንታ ኣጊን ኤሪኬ ሺን ፆሲ ቃሴ ኤሬስ።) ጊዲኮካ ኢዚ ባ ኣሾዛራ ቢን ዎይኮ ሜላ ቢን ታ ኤሪኬ። ፆሲ ቃሴ ኤሬስ። ኢዛዴይካ ፑዴ ጋናቴ ኤኬቲዲ ኣሳ ቃላን ቆንጪሳናሲኔ ኣሲ ጋናስ ዳንዳዮንታዝ ኢዚ ሲይዴስ። ታኒ ሄሳ ማላ ኣሳን ጬቄታይስ። ታ ሁዔስ ጊዲኮ ታ ዳቡርሳፌ ሃራ ታ ኢዛን ጬቄታና ሚሺ ታስ ዴና። ሂስቲን ታኒ ቱማ ሃሳዪዛ ጊሽ ጬቄታናስ ኮዪኮካ ታ ኤያ ጊዲኬ። ጊዶ ኣቲን ኦኒካ ታ ቦላ ባ ቤዪዛዛፔኔ ታፔ ሲዪዛይሳፌ ቦላራ ቆፖንታ ማላ ጋዳ ጬቄታናፔ ናጌታይስ። ሃይታ ታስ ቆንጪዳ ጊታ ሃኖታ ጋሶን ታኒ ኦቶሬቶንታ ማላ ታ ኣሳቴꬅ ኣጉንꬃ ማላ ጫዲዛ ሳኮይ ታስ ኢሜቲዴስ። ሄሲካ ፃላዔፔ ኪቴቲዲ ታና ጫቻን ዋይሲዲ ታ ጬቄቶንታ ማላ ዲጌስ። ሃይሲ ታና ዋይሲዛይሲ ታፔ ኪቻና ማላ ታኒ ጎዳ ሄꬑቶ ዎሳዲስ። ጊዶ ኣቲን ጎዳይ ቃሴ “ታ ዎልቃይ ኩሜꬅ ጊዲ ቆንጫናይ ኔ ዳቡርሳን ጊዲዳ ጊሽ ታ ኪያቴꬂ ኔስ ጊዳና” ጊዴስ። ሄሳ ጊሽ ኪርስቶሳ ዎልቃይ ታ ቦላ ጊዳና ማላ ኣይ ዎዴፔካ ቦላራ ታኒ ዳቡርሺን ሄ ዎዴ ኡፋይሳን ጬቄታናስ ዶሳይስ። ታኒ ዎልቃ ዴሚዛይ ዳቡሪዛ ዎዴ ጊዲዳ ጊሽ ታ ኪርስቶሳ ጊሽ ዳቡሪሺን፥ ጫዬቲሺን፥ ሜቶቲሺን፥ ጎዴቲሺን፥ ሙዞቲሺን ታና ኡፋይሴስ። ታኒ ኤያ ኣሳ ማላ ሃሳያዲስ! ታኒ ሄሳꬆ ሃሳያና ማላ ኦꬂዳይ ኢንቴናኮ! ኢንቴ ታና ጋላታናስ ቤሴሲኮ ሺን ታ ኦናኮኔ ኤሬቶንታዴ ጊዲኮካ ሃንኮ ጊታ ጌቴቲዳ ሃዋሬታፔ ታኒ ኣዛንካ ጉፂኬ። ታኒ ቱሙ ሃዋሬ ጊዲዳይሳ ኤሪሲዛ ሃኖቲ ታ ኢንቴናራ ዳሼ ዳንዳያን ፖሊዳ ኦሶታ። ሄይቲካ ማላታታ፥ ጊታ ኦራꬃ ሚሼታኔ ማላሊሲዛ ኦሶታ። ታኒ ኢንቴስ ቶሆ ጊዶንታ ኣጎሪፔ ኣቲን ሃንኮ ሃራ ዎሳ ኬꬃታፔ ኢንቴና ኣዛን ፓጪሳዲና? ሄሲካ ሞሮ ጊዲኮ ኢንቴ ታና ማሪቴ። ታኒ ሄ ኢንቴኮ ባናስ ጊጌቲሺን ሃይሲ ሄꬓንꬆ። ታኒ ኢንቴስ ቶሆ ጊዳናስ ኮዪኬ። ታኒ ኢንቴና ኮያይስ ኣቲን ኢንቴ ሚሻ ኮዪኬ። ኣዋቲ ናይታስ ሚሻ ሺሼቴስ ኣቲን ናይቲ ኣዋታስ ሚሻ ሺሺ ኤሬቴና። ታኒ ኢንቴ ጊሽ ታናካ ታስ ዲዛዝ ዉርሳ ኢንቴስ ኣꬃ ኢሚዳኮ ታና ዳሮ ኡፋይሴስ። ሂስቲን ታኒ ኢንቴና ሃይሳ ማላ ዳሮ ሲቂሺን ኢንቴ ቃስ ታና ዋኒ ጉꬃራ ሲቄቲ? ኣይ ጊዲኮካ ታ ኢንቴስ ቶሆ ጊዳቤኬ ሺን ኢንቴስ ታ ኢንቴና ጮ ጌኔን ባሌꬃ ኦይኪዳዚ ሚሳቴስ። ታ ኢንቴኮ ኪታ ዬዲዳ ኣሳታፔ ኢሳዴ ባጋራካ ኢንቴፌ ጎዔታዲና? ቲቶሲ ኢንቴኮ ባና ማላ ታ ኢዛ ዎሳዲስ። ሄሳ ኑ ኢሻዛካ ኢዛራ ጋꬃ ዬዳዲስ። ሂስቲን ቲቶሲ ኢንቴፌ ኣይኮ ጎዔቲዴ? ታኒኔ ኢዚ ኢንቴስ ኦꬂዳይ ኢሲ ዎዝናን ጊዴኔ? ካሴ ኑ ሃኖይ ኢሲ ማላ ጊዴኔ? ኢንቴ ዉሪካ ሃዒ ጋካናስ ቆፒዛይ ኑ ኢንቴ ሲንꬃን ኑና ኣሻናስ ሃኒዛ ሚሻ ማላ ፄሌቲ? ኑኒ ኪርስቶሳን ጊዲዲ ኢንቴስ ዮቲዛይሲ ፆሳ ሲንꬃና። ታ ሲቆቶ! ኑ ሃይሳ ዉርሲ ዮቲዛይ ኢንቴና ጎዓናስ ጊዲኮ! ታኒ ሄ ቢዛ ዎዴ ኦኔ ኤሪዛይ ኢንቴ ታ ኮይዳ ማላ ሃኖንታ ኣጊኮ ታካ ኢንቴ ኮዪዛ ማላ ጊዶንታ ዳሼ ጋጌታኔሻ ጋዳ ሂርጋይስ። ሄሳꬆካ ኢንቴ ጊዶን ኦሺ፥ ቃናቴቴꬂ፥ ሃንቆይ፥ ዙፔቴꬂ፥ ኣሳ ሱንꬅ ኢሶይ፥ ዚጊርሲ፥ ኦቶሬቴꬂኔ ካቺ ዱስ ኣጌና ጋዳ ሂርጋይስ። ታኒ ቃሴካ ሄ ኢንቴኮ ቢሺን ኦኔ ኤሪዛይ ታ ጎዳይ ታና ኢንቴ ሲንꬃን ካዉሻንዴ ጋዳ ሂርጋይስ። ሃይሳፌ ካሴ ናጋራ ኦꬂዲ ሄ ኦꬂዳ ቱናቴꬃን፥ ላይማኒኔ ጮ ሜላ ዬዳ ዱሳስ ማሮቴꬃን ጌሎንታ ኣሳታ ጋሶን ታ ሙዞቴꬃን ዎꬋንዲና ጋዳ ሂርጋይስ። ሂስቲኮ ታኒ ኢንቴኮ ቢሺን ሃይሲ ታስ ሄꬓንꬆ። ኣይዴካ ጊዲን ዮዖይ ሚኒዛይ ናምዑ ማርካን ዎይኮ ሄꬑ ማርካና። ኢንቴና ቤያናስ ታ ናምዓንꬆ ቦይሳን ታ ኢንቴናራ ዳሼ ኢንቴ ናጌታና ማላ ታ ኢንቴስ ሚንꬃ ዮታዲስኮሺን፤ ሃዒካ ቃሴ ሃሆን ዳዳ ሃይሳፌ ካሴ ናጋራ ኦꬂዳይታሲኔ ሃንኮይታስ ሚንꬃ ዮታይስ። ሃዒ ታ ኢንቴኮ ሄ ሲማ ቢኮ ኢስታፌ ኦናስካ ሚሼቲኬ። ሄሲካ ቃሴ ታናን ጊዲዲ ኢንቴስ ዮቲዛይ ኪርስቶሳ ጊዲዳይሳ ኢንቴ ሻኪ ኤራናስ ኮዪዛይሳ ቤሴስ። ኢንቴ ኣቻን ዲዛ ኪርስቶሲ ዎልቃማ ኣቲን ላፋ ጊዴና። ኢዚ ማስቃሌ ቦላ ካቄቲዲ ዳቡራን ሃይቂኮካ ሃዒ ቃስ ፆሳ ዎልቃን ፓፃ ዴስ። ኑካ ኢዛራ ላፋታ ጊዲኮካ ኢንቴ ጊሽ ጊዲ ፆሳ ዎልቃን ሚኒ ዶስ። ኢንቴ ኣማኖን ሚኒ ዲዛኮኔ ኤራናስ ኣኔ ኢንቴርካ ኢንቴና ፓጪ ፄሊቴ። ዬሱስ ኪርስቶሲ ኢንቴናን ዲዛይሳ ሻኪ ኤሪቤይኬቲ? ሄሳꬆ ሃኖንታ ኣጊኮ ኢንቴ ፓጬን ኩንዲዴታ ጉሳ። ኑኒ ፓጬን ኩንዶንታይሳ ኢንቴ ሻኪ ኤራና ጋዳ ሂዶታ ኦꬃይስ። ኢንቴ ኢታ ሚሺ ኦꬆንታ ማላ ኑኒ ፆሴ ዎሶስ። ኑኒ ዎሲዛይካ ኑ ኣይኮካ ዳንዳዪዛይታ ጊዶንታ ኣጊኮካ ኢንቴ ኡባ ዎዴ ሎዖ ኦሶ ኦꬃናፔ ኣቲን ኑ ጎባቴꬂ ኢንቴና ቤሳናስ ጊዴና። ኑኒ ቱማቴꬃስ ኦꬆስ ኣቲን ቱማፔ ካሬራ ኣይኮካ ኦꬃና ዳንዳዮኮ። ኑኒ ዳቡራንቻታ ጊዲን ኢንቴ ቃስ ሚኖታ ጊዲሺን ኑና ኡፋይሴስ። ኑ ዎሳይ ኢንቴ ቦላ ዎሶይ ባይንዳይታ ጊዳና ማላሳ። ታኒ ሃይሳ ኢንቴስ ዬዲዛ ኪታዛ ኢንቴፌ ሃካ ዳሼ ፃፊዳይ ሄሳ ጊሻሳ። ሄሳ ማላን ታ ኢንቴኮ ቢዛ ዎዴ ታስ ጎዳይ ኢሚዳ ኣዋቴꬃን ታ ኢንቴና ዋይሲኬ። ጎዳይ ታስ ኣዋቴꬅ ኢሚዳይ ኢንቴና ሚንꬃናስ ኣቲን ላላናስ ጊዴና። ኣኔ ሃዒ ታ ኢሻቶ! ሳሮ ዲቴ፤ ኢንቴ ዱሳ ሎዔꬂቴ፤ ታ ኢንቴና ዞሮይሳ ካሊቴ፤ ኣሳይ ኢሶይ ኢሳራ ሲጌቲቴ። ሳሮን ዲቴ፤ ሲቆኔ ሳሮ ጎዳይ ኢንቴናራ ጊዳና። ሲቆ ዬሬቴꬅ ዬሬቲዲ ኢሶይ ኢሳራ ሳሮኬቲቴ። ኣማኒዛ ኣሳይ ዉሪካ ኢንቴና ሳሮ ጌስ። ጎዳ ዬሱስ ኪርስቶሳ ኪያቴꬂ፥ ፆሳ ሲቆይኔ ፂሎ ኣያና ኢሲፌቴꬅ ኢንቴናራ ኡባታራ ጊዶ። ኣሲ ኪቲዳዴ ጊዶንታ ዬሱስ ኪርስቶሳ ሃይቆፔ ዴንꬂዳ ኢዛ ኣዋ ፆሳፌ ኪቴቲዳ ጳዉሎሳፔ። ታናራ ዲዛ ኢሻታ ኡባፌ ጋላቲያን ዲዛ ዎሳ ኬꬃታስ። ኑ ኣዋ ፆሳፌ ጎዳ ዬሱስ ኪርስቶሳፔ ፆሳ ኪያቴꬂኔ ሳሮይ ኢንቴስ ጊዶ። ኑ ኣዋ ፆሳ ሼኔ ጊዲን ኢታ ኣላሜዛፔ ኑና ኣሻናስ ባና ኣꬂ ኢሚዳይሳስ፥ ሜርፔ ሜርና ጋካናስ ኢዛስ ቦንቾይ ጊዶ። ኢንቴ ኪርስቶሳ ኪያቴꬃን ፄይጊዳይሳ ኣጋጊዲ ሃራ ዱማ ሻኮ ሚሺራቾ ቃላኮ ሲሚዳይሲ ታና ዳሮ ማላሊሴስ። ታ ሄሳ ጊዳ ጋሶይ ኢንቴና ባሌꬂዛይቲኔ ኪርስቶሳ ሚሺራቾ ቃላ ሚርቂዛ ኢሲ ኢሲ ኣሳቲ ዲዛ ጊሻሳ፤ ቱማ ጊኮ ሚሺራቾ ቃላይ ኢሲኖ ፃላ። ጊዶ ኣቲን ኑና ጊዲን ዎይኮ ሳሎ ኪታንቻ ጊዲንካ ኑ ኢንቴስ ሳባኪዳ ሚሺራቾ ቃላፔ ሃራ ዱማ ሚሺራቾ ቃላ ሳባኪኮ ሄሳዴይ ሜርናስ ቃንጌቲዳዴ ጊዶ። ታ ካሴ ጊዳ ማላካ ሃዒካ ዛራዳካ ካሴ ኢንቴ ኤኮ ሚሺራቾ ቃላፔ ሃራ ዱማ ሚሺራቾ ቃላ ሳባኪኮ ኢዛዴይ ሜርናስ ቃንጌቲዳዴ ጊዶ ጋይስ። ሃዒ ታ ኣሲ ታና ኤሮሾ! ሃሹ ጋና ማላ ኮያዚናዬ? ፆሲ ሃሹ ጋና ማላ ኮያዚና? ዎይኮ ኣስ ኡፋይሳና ኮያዚና? ታ ኣስ ኡፋይሳና ኮዪዛኮ ኪርስቶሳ ኦሳንቻ ጊዲኬ። ታ ኢሻቶ! ታ ኢንቴስ ሳባኪዳ ሚሺራቾ ቃላይ ኣሳ ኦሶ ጊዶንታይሳ ኢንቴ ኤራና ማላ ኮያይስ። ሃይሳ ሃ ሚሺራቾ ቃላዛ ዬሱስ ኪርስቶሲ ታስ ቆንጪሲዴስ ኣቲን ታ ኦናፔካ ኤካቤኬ፤ ዎይኮ ኦኒካ ታና ታማርሲቤና። ታኒ ካሴ ኣይሁዳታ ኣማኖን ዋና ዲዛኮኔ ፆሳ ዎሳ ኬꬄ ታ ኣይ ማላ ጎዲዳኮኔ ቃሴ ሙሌ ꬋይሳናስ ታ ኣይ ማላ ዳፌቲዳኮኔ ኢንቴ ሲዪዴታ። ካሴ ታ ዲዛ ዎዴን ዲዛ ዳሮ ኣይሁዳ ኣሳታ ዳሮታፔ ኣማኖን ኣꬋይስ። ካሴ ኑ ኣዋታ ዎጋ ናጋናስ ዳሮ ዳፌታይሲሺን። ጊዶ ኣቲን ካሴ ኮይሮ ታኒ ታ ኣዪ ኡሎን ዲሺን ባሲ ዶሪዲ ባ ኪያቴꬃን ታና ፄይጊዳ ፆሳይ ኣይዛቤታ ጊዶን ኢዛ ናዛ ጊሽ ታ ሳባካና ማላ ባ ናዛ ታናን ቆንጪሳናስ ዶሲዳ ጊሽ ታ ኦና ኣሳራካ ዞሬታቤኬ። ታፔ ካሴ ሃዋሬ ጊዲዳይታኮ ዬሩሳላሜ ባቤኬ ሺን ኣማኒዳ ማላ ሄራካ ኣራቤ ቢታ ባዲስ፤ ሄፔካ ዳማስቆ ሲማዲስ። ሄፔካ ሄꬑ ላይꬃፌ ጉዬ ጴፅሮሳራ ጋጋናስ ዬሩሳላሜ ባዲስ። ኢዛራ ጋጋዳ ታማኔ ኢቻሹ ጋላስ ጋካናስ ሄን ጋምዓዲስ። ጊዶ ኣቲን ጎዳ ኢሻ ያቆቤፔ ኣቲን ሃዋሬታፔ ኦናካ ቤያቤኬ። ሃይሳ ታ ኢንቴስ ፃፊዛይሳን ታ ዎርዶ ሃሳዮንታይሳ ፆሳ ሲንꬃን ዮታይስ። ሄሳፌ ጉዬ ጌዴ ሶሪያኔ ኪልቂያ ጌቴቲዛ ዴሬ ባዲስ። ዩሁዳ ዴሬን ዲዛ ኪርስቶሳን ኣማኒዛ ኣሳይ ታና ቤይቤና። ጊዶ ኣቲን “ቤኒ ኑና ኣማኖ ጊሽ ጎዲ ꬋይሳና ኮዪዛ ኣዴዚ ሃዒ ሄ ኣማኖ ዛሪ ሳባኬስ” ጊዛ ዎሬ ፃላ ሲዪዳ። ሄ ኣሳይ ታ ጋሶን ፆሴ ጋላቲዴስ። ታማኔ ኦይዱ ላይꬃፌ ጉዬ ቃሴካ ዬሩሳላሜ ባዲስ፤ ሄ ዎዴ ባርናባሳራ ዳይስ፤ ቲቶሳካ ታናራ ኤካ ባዲስ። ታስ ቆንጪዳ ጊሽ ሄ ባዲስ። ኣይዛቤታ ጊዶን ታ ሳባኪዛ ሚሺራቾ ቃላካ ኢስታስ ዮታዲስ። ጊዶ ኣቲን ታ ካሴ ሜላ ዎፂዳኮ ጋዳኔ ቃሴካ ሲንꬃፌ ጮ ሜላ ዎፆንታ ማላ ሂርጋዳ ዋናቲዛይታስ ዱማ ኤሪሳዲስ። ሃራይ ኣቶሺን ታናራ ዲዛ ቲቶሲ ኢዚ ጊሪኬ ኣስ ሺን ኢዚ ቃፃሬታና ማላ ዎልቃꬂቤቴና። ሃይሲ ሃ ዮዖዚ ዴንዲዳይ ኢሲ ኢሲ ዎርዶ ኣማኒዛይቲ ኑኒ ዬሱስ ኪርስቶሳን ዴሚዳ ጌሻቴꬃ ዩዪ ዩዪ ፓጪ ቤያናሲኔ ኑና ኣይሌቴꬃን ዛሪ ጌልꬃናስ ሎዳራ ኑኮ ሳሊ ጌሊዳ ጊሻሳ። ሃይታ ሄ ኣሳታስ ኑኒ ኢሲቶካ ሃሬቲቤኮ። ሄሲካ ኢንቴ ሚሺራቾ ቃላ ቱማቴꬃን ኤቂ ዳና ማላ ጊዲኮ። ዋና ሚሳቲዛ ኣሳቲ ታስ ኣይኮካ ሚሳቴቴና፤ ፆሲ ኣሳ ኣይፌሶ ቤዪዲ ማዶ ኦꬂ ኤሬና። ሄይቲ ሄ ኣሳቲ ታ ኪቲዛ ዮዖታስ ታስ ኣይኮካ ጉጂቤቴና። ጊዶ ኣቲን ጴፅሮሲ ቃፃሬቲዳይታስ ሚሺራቾ ቃላ ሳባካናስ ሃዳራ ኤኪዳይሳ ማላ ታካ ቃፃሬቶንታይታስ ሚሺራቾ ቃላ ሳባካናስ ሃዳራ ኤኪዳይሳ ኢስቲ ኤሪዳ። ጴፅሮሲ ኣይሁዳታስ ሃዋሬ ጊዲ ኦꬃና ማላ ኦꬂዳ ፆሳይ ታካ ኣይዛቤታስ ሃዋሬ ጊዳ ኦꬃና ማላ ታስ ኦꬂዴስ። ዋናቲ ያቆቤይ፥ ጴፅሮሲኔ ዮሃንሲካ ታስ ኢሜቲዳ ፆሳ ኢሞታ ኣኬኪዲ ታሲኔ ባርናባሳስ ባ ኡሻቻ ኩሼ ኢሚዳ፤ ሄሳፌ ጉዬ ኑኒ ኣይዛቤታስ ኢስቲ ቃስ ኣይሁዳታስ ቃላ ዮታናስ ቃላ ኤሮ ጊ ኤኪዳ። ኢስቲ ኑስ ሃዳራ ጊዳይ ማንቆታስ ቆፋ ኑ ኣጎንታ ማላ። ታ ኣሞይካ ሄሳ ኦꬃናሳ። ጴፅሮሲ ኣንፆኪያ ዪዳ ዎዴ ኤሬቲዳ ባላ ኦꬂዳ ጊሽ ታ ኢዛ ቆንጬን ቆጳዲስ። ኢሲ ኢሲ ኣሳቲ ያቆቤ ኣቻፌ ያናፔ ካሴ ጴፅሮሲ ኣይዛቤታራ ኢሲፌ ካꬅ ሚዛይሳ ኣጊዲ ኣሳቲ ዪዳፔ ጉዬ ቃፃሬቲዳ ኣሳታስ ባቢዲ ኣይዛቤታፔ ሻኬቲዳ ጉዬ ጉዬ ጉሲ ኦይኪዴስ። ባርናባሲካ ኢስታꬆ ቆꬌፔ ቆሞን ሃኖን ኤኬታና ጋካናስ ሃራ ኣይሁዳ ባጋፌ ኣማኒዳ ኣሳይካ ኢዛራ ኢሲፌቲዴስ። ኢስታ ኦሶይ ሚሺራቾ ቃላ ቱማን ጊዶንታይሳ ታ ኤራዳ ኩሜꬃ ኣሳ ኣቻን ጴፅሮሳ “ኔ ኣይሁዳ ኣስ ሺን ኣይዛቤታ ዎጋን ኣቲን ኣይሁዳታ ዎጋን ዳቤዪካ፤ ሂስቲን ኣይዛቤቲ ኣይሁዳታ ዎጋ ካላና ማላ ኣዛስ ዎልቃꬃይ?” ጋዲስ። “ኑኒ ኑ ዬሌቴꬃን ኣይሁዳታፔ ኣቲን ኣይዛቤታ ማላ ናጋራንቻ ጊዶኮ። ኣሲ ዬሱስ ኪርስቶሳን ኣማኖን ፂላና ኣቲን ዎጋ ናጎን ፂሎንታይሳ ኑ ኤሮስ። ሄሳ ጊሽ ዎጋ ናጎን ጊዶንታ ኪርስቶሳ ኣማኖን ኑ ፂላና ማላ ኑካ ቃሴ ዬሱስ ኪርስቶሳ ኣማኒዶስ። ዎጋ ናጎን ኦኒካ ፂሌና። ኑ ኪርስቶሳን ፂላና ኮይኮ ኑ ናጋራንቻታ ጊዲዳይሲ ቆንጪ ኤሬቲዴስ። ሂስቲን ኪርስቶሲ ናጋራይ ዳሪ ዳሪ ባና ማላ ኮዪዜ? ኮዬና። ታኒ ላሊዳይሳ ዛራዳ ታርካ ታ ኩሼራ ኬፂኮ ታካ ዎጋ ሞሪዳዴ ጊዲዳይሳ ኣማኔታይስ። ታኒ ፆሳስ ዳና ማላ ዎጋ ባጋራ ሄ ዎጋስ ሃይቃዲስ። ታኒ ኪርስቶሳራ ካቄታዲስ፤ ሃይሳፌ ጉዬ ታኒ ታስ ዲኬ፤ ጊዶ ኣቲን ኪርስቶሲ ታ ጊዶን ዴስ። ሃዒካ ታ ኣሾን ዲዛ ዱሳይ ታና ዶሲዲ ባና ታ ጊሽ ኣꬂ ኢሚዳ ፆሳ ና ቦላ ዲዛ ኣማኖን ዲዛ ዱሳ። ታኒ ፆሳ ኪያቴꬅ ካዉሺኬ። ፂሎቴꬂ ዎጋ ናጎን ቤቲዛ ሚሽ ጊዲኮ ኪርስቶሲ ሜላ ሃዳ ሃይቂዴስ ጉሳካ!” ኢንቴኖ ዩሺ ቆፖንታ ጋላቲያ ኣሳቶ! ኢንቴስ ባሌቶንታ ማላ ኢዛ ካቄቴꬃ ታ ኢንቴ ሲንꬃን ሚሲሌ ማላ ጊጊሳ ቤሳዲስኮ ሺን ኢንቴና ኦኔ ቢቲዳይ? ኢንቴ ፂሎ ኣያና ኤኪዳይ ዎጋ ናጎኔዬ? ሳባኬቲዳ ቃላ ኣማኖኔ? ታ ሃኖ ኢሲኒዮ ኢንቴፌ ኤራና ኮያይስ። ኢንቴ ሄሳ ማላ ቆፒ ኤሮንታ ኣሴ? ፆሳ ኣያናን ኦይኪዳይሳ ዛሪዲ ኣሾ ሃኖን ፖላናስ ዋዬቴቲ? ቱሙ ኢንቴ ሃኖ ጋካናስ ዳቡሪዳ ዳቡርሳይ ጮ ሜላ? ጮ ሜላ ጊዲኮ ሃዳ ዳቡሪዴታ። ፆሲ ኢንቴስ ኣያና ኢሚዳይኔ ኢንቴ ኣቻን ማላታ ኦꬂዳይ ኢንቴ ዎጋ ናጊዳ ጊሼዬ? ዎይኮ ኢንቴ ሲዪዳ ቃላን ኣማኒዳ ጊሼ? ኣኔ ኢንቴ ኣብራሃሜ ጊሽ ቆፒቴ፤ ጌሻ ማፃፋን “ኢዚ ፆሴ ኣማኒን ኣማኖይ ኢዛስ ፂሎቴꬃን ቆዴቲዴስ” ጌቴቲ ፃፌቲዴስ። ሄሳ ጊሽ ኣማኒዛይቲ ኣብራሃሜ ናይታ ጊዲዳይሳ ዎዝናን ዎꬂቴ። ኣይዛቤይ ኣማኖን ኣታናይሳ ኤሪዲ ፆሲ ካሴ ጌሻ ማፃፋን “ዴሬይ ዉሪ ኔ ባጋራ ኣንጄታና” ጊዲ ሚሺራቾ ቃላ ኣብራሃሜስ ዮቲ ዎꬂዴስ። ሄሳ ጊሽ ኣማኒዛይቲ ዉሪ ኣማኒዛ ኣብራሃሜራ ኢሲፌ ኣንጄቲዳይታ። “ዎጋ ናጎን ኣማኔቲዛይቲ ዉሪካ ቃንጌꬃ ጋርሳን ዴቴስ። ዎጋ ማፃፋታን ፃፌቲዳይሳ ዉርሲ ኦꬆንታዴይ ኢዚ ቃንጌቲዳዴ” ጌቴቲ ፃፌቲዴስ። “ፂሎ ኣሲ ኣማኖን ዴዔስ” ጊዛ ጊሽ ኦኒካ ፆሳ ሲንꬃን ዎጋን ኣቶንታይሲ ጌሻ። ዎጋይ ኣማኖን ፃጲቤና። ጊዶ ኣቲን “ዎጋታ ዉርሲ ናጊዛዴይ ሄ ኢዚ ናጊዳይሳን ዴዖን ዳና” ጌቴቲዴስ። “ሚꬃ ቦላ ካቄቲዛ ኣሲ ቃንጌቲዳዴ” ጌቴቲ ፃፌቲዳ ጊሽ ኪርስቶሲ ኑ ጊሽ ቃንጌቲዳዴ ጊዲዲ ኑና ዎጋ ቃንጌꬃፌ ዎዚዴስ። ኣብራሃሜስ ኢሜቲዳ ኣንጆይ ዬሱስ ኪርስቶሳ ባጋራ ዴሬስ ጋካና ማላ ኑና ዎዚዴስ። ሄሲካ ኑኒ ኣማኖን ፂሎ ኣያና ኤካና ማላ ሃኒዴስ። ታ ኢሻቶ! ኣኔ ታ ኢንቴስ ኣሲ ባ ዱሳን ሃኒዛ ሚሽ ሌሚሶ ኢማይስ። ሃራይ ኣቶ ሺን ኣሲ ኢሲቶ ጫቂዳ ቃላ ኢሲቶ ጫቂዳፔ ጉዬ ኦኒካ ሻራናስ ዎይኮ ሃራ ኢዛ ቦላ ጉጃና ዳንዳዮንታይሳ ማላ ሃይሲካ ሄሳ ማላ። ፆሲ ኣብራሃሜስ ዮቲዳ ቃላይ ኣብራሃሜሲኔ ኢዛ ዜሬꬃሳ። ጌሻ ማፃፋይ ዳሮ ኣሳስ ዮቲዛ ማላ “ኢዛ ዜሬꬃታስ” ጌና፤ ጊዶ ኣቲን ኢሲ ኣሳስ ዮቴቲዛ ማላ “ኔ ዜሬꬃስ” ጌስ። ሄሲካ ኪርስቶሳ። ታ ጊዛይካ ሃይሳ፤ ኦይዱ ፄታኔ ሄꬑ ታሙ ላይꬃፌ ጉዬን ኢሜቲዳ ዎጋይ ካሴቲዲ ፆሲ ሚንꬂዳ ጫቆዛ ላሊዲ ቡሮ ሃናና ሂዶታ ቃላ ሻሬና። ላታይ ዎጋን ሃኒዛኮ ሂዶታ ቃላን ጌላናስ ኮሼና ሺን፤ ፆሲ ባ ኪያቴꬃ ቃላን ኣብራሃሜስ ኢሚዴስ። ሂስቲን ዎጋይ ኣዛስ ኢሜቲዴ? ዎጋይ ኢሜቲዳይ ኣሳይ ዎጋ ዬꬊ ኣꬊዛ ጊሽ ሄ ኡፋይሳይ ቤሲዛ ዜሬꬃይ ያና ጋካናሳ፤ ዎጋይ ዪዳይካ ኪታንቻታ ባጋራ ጋና ጊዲዛ ኢሳዴ ባጋራ ዪዴስ። ጊዲኮካ ጋናዚ ኢሳ ባጋ ፃላ ፄሊዛዴ ጊዴና። ፆሲ ጊዲኮ ኢሳ ፃላ። ሂስቲን ዎጋይ ሲንꬃፌ ፆሲ ዎꬃና ቃላ ዲጊዛዜ? ሙሌካ ዲጌና። ዎጋይ ኢሜቲዳይ ኣሲ ኢዛን ዴዖ ዴማናስ ጊዲዳኮ ቱሙካ ፂሎቴꬂ ዎጋ ባጋራ ቤታናኮሺን። ቃሴ ጌሻ ማፃፋይ ሃይሲ ኣላሜይ ዉሪካ ናጋራን ቃሼቲዳይሳ ኣዋጄስ። ሄሲካ ኣሲ ዉሪካ ዬሱስ ኪርስቶሳ ኣማኖን ቤቲዛ ሂዶታይ ኣማኒዛይታስ ኡባስ ኢሜታናሳ። ሃይሲ ኣማኖይ ያናፔ ካሴ ኑኒ ዎጋን ቃሼቲዲ ጎርዳን ዶስ። ሄሳ ጊሽ ኑ ኣማኖን ፂላና ማላ ዎጋይ ኑና ኪርስቶሳኮ ጋꬃናስ ናጊዛዴ ማላ ጊዲዲ ኑና ናጊዴስ። ሃዒ ቃሴ ሄ ኣማኖይ ዪዳ ጊሽ ሃይሳፌ ጉዬ ኑኒ ዎጋ ጋርሳን ዶኮ። ኢንቴ ዉሪካ ዬሱስ ኪርስቶሳ ኣማኖን ፆሳ ናይታ። ኢንቴ ኪርስቶሳራ ኢሲኖ ጊዳናስ ፃማቄቲዳይቲ ዉሪካ ኪርስቶሳ ማይዖ ማላ ማይዒዴታ። ኢንቴ ዉሪካ ዬሱስ ኪርስቶሳን ኢሲኖ ኣቲን ኣይሁዳኔ ጊሪኬ፥ ኣይሌኔ ጎቃ፥ ማጫኔ ኣዴ ጊዛ ዱማቴꬂ ዴና። ኢንቴ ዉሪካ ዬሱስ ኪርስቶሳን ኢሲኖ። ኢንቴ ኪርስቶሳይታ ጊዲኮ ኢንቴ ኣብራሃሜ ዜሬꬃታ፤ ካሴ ኢሜቲዳ ሂዶታ ቃላ ማላ ኢንቴ ላታናይታ። ታ ጊዛይ ዬሌቲዳ ናይ ላታይ ኢዛስ ጊዲኮካ ኢዚ ቢዲ ላታና ጋካናስ ኣይሌፌ ዱማ ጊዴና። ኢዛ ኣዋይ ጊዳ ዎዴይ ጋካናስ ኢዚ ባና ዲቺዛይታ፥ ታማርሲዛይታ ኩሼን ጋምዔስ። ኑካ ካሴ ኣያና ዮዖስ ጉꬃ ና ማላ ዲዛ ዎዴ ሃይሳ ሃ ኣላሜዛ ዎጋ ጋርሳን ሃሬቲ ዴዒዶስ። ጊዶ ኣቲን ካሴ ባ ቆፒ ዎꬂዳ ዎዴይ ጋኪን ፆሳይ ማጫሳፔ ዬሌቲዲ ዎጋ ናጊዳ ባ ናዛ ኑስ ዬዲዴስ። ሄሲካ ኑኒ ኢዛ ናይታ ጊዳና ማላኔ ዎጋ ጋርሳን ዲዛይታ ዎዛና ማላ ሃኒዴስ። ኢንቴ ኢዛ ናይታ ጊዲዳ ጊሽ ፆሳ “ኣቦ” ጊዲ ፄይጊዛ ባ ናዛ ኣያና ኑ ዎዝናን ዬዲዴስ። ሄሳ ጊሽ ሃይሳፌ ጉዬ ኔ ናፔ ኣቲን ኣይሌ ጊዳካ። ኔኒ ና ጊዲዳ ጊሽ ፆሲ ኔና ባይሳ ላቲዛዴ ሂስቲዴስ። ኢንቴ ፆሴ ኤራናፔ ካሴ ፆሴ ጊዶንታ ኤቃታስ ኣይሌታ። ሃዒ ጊዲኮ ፆሴ ኤሪዴታ፤ ቃሴካ ፆሳን ኤሬቲዴታ። ሂስቲን ቃሴካ ጉዬ ሲሚዲ ጌዴ ጎዓይ ባይንዳ ጮ ዳቡሪሲዛ ቲሚርቴኮ ዋኒዲ ሲሚዴቲ? ሲሚዲ ቃሴካ ኣይሌቴꬃ ቃምባራን ዋፄታና ኮዬቲ? ዱማ ጋላሳታ፥ ኣጊናታ፥ ዎዴታኔ ላይꬃታ ኢንቴ ቦንቼታ። ታ ኢንቴናራ ዳቡሪዳይሲ ጮ ሜላ ጊዳንዴ ጋዳ ባባይስ። ታ ኢሻቶ! ታ ኢንቴና ሚሳቲዳ ማላ ኢንቴካ ታና ሚሳታና ማላ ታ ኢንቴና ዎሳይስ። ኢንቴ ታና ኣይኮካ ቆሂቤይኬታ። ኢንቴ ኤሪዛ ማላ ታ ኢንቴስ ኮይሮ ሚሺራቾ ቃላ ሳባኪዳይ ሳኮ ጋሶና። ታ ሳኮይ ኢንቴስ ሜቶ ጊዲንካ ታና ሳሌቲቤይኬታ ዎይኮ ታና ሃራሴቲቤይኬታ፤ ጊዶ ኣቲን ኢንቴ ታና ፆሳ ኪታንቻ ማላኔ ሄሳፌካ ቦላራ ዬሱስ ኪርስቶሳ ማላ ሞኪ ኤኪዴታ። ሂስቲን ሃዒ ሄ ኢንቴ ኡፋይሳይ ኣዋ ቢዴ? ኢንቴስ ሃኒዛዝ ጊዲዳኮ ኢንቴ ኢንቴ ኣይፌ ታስ ኬሲ ኢማናስ ጉዬ ጎንታይሳ ታ ኢንቴስ ማርካታይስ። ታኒ ቱማ ኢንቴስ ኬሳ ዮቲዳ ጊሽ ኢንቴስ ሞርኬ ጊዳዲናሻ? ሄይቲ ኣሳቲ ኢንቴና ባኮ ኤካናስ ዳቡሬቴስ ኣቲን ሎዖስ ዳቡሬቴና። ኢስቲ ኮዪዛይ ኢንቴና ኑፔ ሻኪዲ ባ ኣስ ሂስታናሳኮ! ሎዖስ ሚንዳቴꬂ ሎዖ፤ ሄሲካ ሃናናስ ቤሲዛይ ኡባ ዎዴ ጊዲኮፌ ኣቲን ታ ኢንቴናራ ዲዛ ዎዴ ፃላ ጊዶፖ። ታ ናይቶ ኪርስቶሲ ኢንቴ ዎዝናን ፃፌቲን ታ ቤያና ጋካናስ ኢንቴ ጊሽ ታ ሚፃታይስ። ታ ኢንቴ ጊሽ ቆፋን ሜቶታዲስ። ታ ዳንዳዪዛኮ ሃዒ ኢንቴ ጊዶን ቤታዳ ኢንቴና ሎዔꬃ ታማርሲዛኮ ኣይ ማላ ዶሳዚና! ኢንቴኖ! ዎጋ ጋርሳን ኣቃና ኮዪዛይቶ ኣኔ ታስ ዮቲቴ፤ ዎጋይ ኣይ ጊዛኮኔ ሲይቤይኬቲ? ኣብራሃሜስ ኢሶይ ኣይሌፌ ኢሶይ ቃስ ጎቃይፌ ዬሌቲዳ ናምዑ ናይቲ ዲዛይሲ ጌሻ ማፃፋን ፃፌቲዴስ። ኣዪሌፌ ዬሌቲዳ ናዚ ኣሾ ዎጋ ማላ ዬሌቲዴስ። ሃንኮ ጎቃይፔ ዬሌቲዳይሲ ኡፋይሳ ቃላ ማላ ዬሌቲዴስ። ሃይቲ ናምዑ ማጫሳቲ ናምዑ ጫቆታ ቤሲዛይታ ጊዲዳ ጊሽ ሃይሲ ሌሚሶስ ኢሜቲዴስ። ኮይሮ ጫቆያ ሲና ዙማ ቦላ ጊዳሼ ኣይሌቴꬃስ ጊዲዛ ናይታ ዬሊዛሮ፤ ኢዛካ ኣጋሮ። ሄሳ ጊሽ ኣጋራ ኣራቤ ቢታን ዲዛ ሲና ዙማ ጊሽ ጊዳዳ ሃዒ ዲዛ ዬሩሳላሜ ካታማዮ ሚሳታዉስ፤ ኢዛ ባ ናይታራ ኣይሌቴꬃን ዳዉስ። ፑዴ ቦላ ሳሎን ዲዛ ዬሩሳላሜይ ጊዲኮ ጎቃ ጊዳዳ ዳዉስ፤ ኢዛካ ኑ ኣዮ። “ኔኒ ዬሎንታ ማካራዬ ኡፋዬታ! ሃኔ ሚፃታ ኤሮንታሬ! ‘ኢሊሊ’ ጋ ዋሳ፤ ኣዚናይ ዲዛሪፔ ኣዚናይ ባይንዳሪ ናይቲ ዳሪዳ” ጌቴቲ ጌሻ ማፃፋን ፃፌቲዴስ። ሄሳ ጊሽ ታ ኢሻቶ! ኢንቴካ ዪሳቃ ማላ ኡፋይሳ ቃላ ናይታኮ። ኣሾ ሼኔ ማላ ዬሌቲዳይሲ ኣያና ዎልቃን ዬሌቲዳይሳ ጎዲዴስ፤ ሃዒካ ጎዴꬆን ዴስ። ጊዶ ኣቲን ጌሻ ማፃፋይ ቃሴ ኣይ ጊዜ? “ኣይሌዮ ኢዚ ናዛራ ዲጋ፤ ኣይሌ ናይ ጎቃይ ናራ ላቴና” ጌስ። ሄሳ ጊሽ ታ ኢሻቶ! ኑኒ ጎቃይ ናይታ ኣቲን ኣይሌ ናይታ ጊዶኮ። ኑና ኪርስቶሲ ጌሺዳይ ኑኒ ጌሻቴꬃን ዳናሳ። ሄሳ ጊሽ ሚኒ ኤቂቴ፤ ናምዓንꬆ ኣይሌቴꬃ ቃምባራን ጌሎፒቴ። ታ ኢንቴስ ጊዛይሳ ዎዝናን ዎꬂቴ፤ ኢንቴ ቃፃሬታና ኮይኮ ኪርስቶሲ ኢንቴና ኣይኔ ጎዔና ጋዳ ታ ጳዉሎሲ ኢንቴስ ዮታይስ። ቃፃሬታና ኮዪዛይቲ ዉሪ ዎጋ ዉርሲ ፖላናይሲ ዶሳ ጊዶንታይሳ ታ ኢንቴስ ኢሳስ ኢሳስ ቆንጬን ዮታይስ። ኢንቴኖ! ዎጋ ናጎን ፂላና ዋይቲዛይቶ፤ ኢንቴ ኪርስቶሳፔ ሻኬቲዴታ፤ ኢዛ ኪያቴꬃፌካ ሃኪዴታ። ኑ ቃስ ኡፋይሳ ናጌቲዛ ፂሎቴꬃ ፆሳ ኣያና ባጋራ ኣማኖን ላሞቴꬃን ናጎን ዶስ። ኣሲ ዬሱስ ኪርስቶሳን ዲኮ ቃፃሬቲን ዎይኮ ቃፃሬቶንታ ኣጊን ኣይኔ ጎዔና፤ ጎዓይ ዲዛይ ሲቆን ቆንጪዛ ኣማኖን ፃላ። ካሴ ሎዖ ዎꬅ ዎፄታ ሺን፤ ሃዒ ኢንቴስ ꬉጴ ጊዲዲ ቱማስ ኢንቴ ኣዛዜቶንታ ማላ ኢንቴና ዲጊዳይ ኦኔ? ሄሳ ማላ ባሌꬆይ ኢንቴና ፄይጊዳ ፆሳፌ ጊዴና። “ጉꬃ ኢርሾይ ሊፄ ዉርሲ ዴንꬄስ” ጌቴቲዛ ማላ። ኢንቴስ ሃራ ቆፋይ ዴና ጋዳ ታኒ ጎዳን ኣማኔታይስ፤ ኢንቴስ ቲኪ ጊዛዝ ኦꬂዛይ ኦና ጊዲኮኔ ኢዚ ባ ፒርዳ ኤካና። ታ ኢሻቶ! ሃኖ ጋካናስ ታ ሳባኪዛይሲ ኣሲ ኣታናስ ቃፃሬታና ቤሴስ ጊዛዝ ጊዲዳኮ ሂስቲን ሃኖ ጋካናስ ኣዛስ ታና ጎዲዞ? ሄሳ ማላ ጊዲዳኮ ኪርስቶሳ ማስቃሌይ ኣሳስ ꬉጴ ጊዴናኮሺን። ኢንቴስ ቲኪ ጊዛዝ ኦꬂዛ ኣሳቲ ጮ ዎጋራ ቃፃሬቴꬅ ኣጊዲ ሙሌራ ቃንፂ ዬጌቶ። ታ ኢሻቶ! ኢንቴ ጌሻቴꬃስ ፄይጌቲዴታ፤ ኢንቴ ኢንቴ ጌሻቴꬃ ዛሪዲ ኢንቴስ ኣሾ ኣሞ ፖላናስ ጎዔቶፍቴ። ሄሳፌ ኢንቴ ኢንቴ ጋርሳን ሲቆን ኢሶይ ኢሳ ማዲቴ። ዎጋይ ዉሪ ሺቄቲዲ ኢሲ ቃላን ቃሼቴስ፤ ሄሲካ “ኔኒ ኣሴ ኔ ማላ ዶሳ!” ጊዛይሳ። ጊዶ ኣቲን ኢንቴ ኢሶይ ኢሳራ ሳፄቲዛይታ ጊዲኮ ኢንቴ ኢንቴ ጋርሳን ዉሮንታ ማላ ናጌቲቴ። ሄሳ ጊሽ ታ ኢንቴና ኣያናን ሲሜሬቲቴ፤ ቃሴካ ኣሾ ኣሞካ ፖሎፒቴ ጋይስ። ኣሾይ ኣያናይ ኮዮንታዝ ኣሞቴስ። ኣያናይካ ኣሾይ ኮዮንታዝ ኣሞቴስ፤ ሃይቲ ኢሶይ ኢሳራ ባ ጋርሳን ኢፄቲዛ ጊሽ ኢንቴ ኢንቴ ኮይዳ ማላ ኦꬄኬታ። ኢንቴ ኣያናን ዲዛይታ ጊዲኮ ዎጋስ ሃሬቲዛይታ ጊዴኬታ። ኣሾ ኦሶይ ቆንጬን ኤሬቴስ፤ ሄሲካ ላይማቴꬅ፥ ቱናቴꬅ፥ ላይማ ካስ፥ ኤቃስ ጎይኖ፥ ቢታ፥ ኢፄቴꬅ፥ ኦሽ፥ ቃናቴቴꬅ፥ ሃንቆ፥ ባና ፃላ ዶሶ፥ ሻኬቴꬅ፥ ዙፔቴꬅ፥ ቃናቴቴꬅ፥ ማꬆቴꬅ፥ ኣላሜ ዬꬅ ዬፄꬂኔ ሄይታንታ ሚሳቲዛይታ። ታኒ ኢንቴስ ካሴ ዮቲዳ ማላ ሃዒካ ኢንቴ ናጌታና ማላ ቆፊሳይስ። ሄሳ ማላ ዱስ ዲዛይቲ ዉሪካ ፆሳ ካዎቴꬅ ላቴቴና። ኣያና ኣይፌይ ጊዲኮ ሲቆ፥ ኡፋይስ፥ ሳሮቴꬅ፥ ዳንዳያ፥ ኪያቴꬅ፥ ሎዔቴꬅ፥ ኣማኔቴꬅ፥ ኣሽኬቴꬅ፥ ባርካ ባና ሃሮ፤ ሃይታንታ ማላ ዲጊዛ ዎጋይ ባዋ። ዬሱስ ኪርስቶሳስ ጊዲዳይቲ ኣሾ ኢዛ ኢታ ቆፋራኔ ኢዛ ኢታ ኣሞቴꬃራ ኢሲፌ ካቂዳ። ኑ ኣያናን ዳና ኮይኮ ኣኔ ኣያናን ሲሜሬቶስ። ኑኒ ኢሶይ ኢሳ ኢታስ ዴንꬄꬂሼኔ ቃናቴቲሼ ጮ ሜላ ጬቄቲዛይሳ ኣኔ ኣጎስ። ታ ኢሻቶ! ኢሲ ኣሲ ናጋራ ኦꬂ ቤቲኮ ኢንቴ ቃስ ኣያናን ሎዖ ዲዛይቲ ኢዛ ኣሺኬቴꬃራ ዛራናስ ቤሴስ፤ ጊዶ ኣቲን ኔካ ኢዛዴ ማላ ፓጬቶንታ ማላ ኔ ሁዔስ ናጌታ። ኢንቴ ኢሶይ ኢሳ ዴፆ ቶሆ ቶኪቴ፤ ሄሳ ማላ ኦሶን ኪርስቶሳ ዎጋ ፖሌታ። ኢሳዴይ ኣይኔ ሃኖንታ ዲሼ ባና ጊታሲዛ ሚሳቲኮ ሄሳዴይ ባርካ ባና ባሌꬄስ። ኢሲ ኢሲ ኣሲ ባ ኦሶ ባርካ ፓጪ ፄሎ። ሄሳፌ ጉዬ ሃራ ኣሳራ ባና ጊናሶንታ ዲሼ ኢዚ ባና ጬቂሲዛዚ ዴማና። ኢሲ ኢሲ ኣሲ ባርካ ባ ቶሆ ቶካናስ ቤሴስ። ቃላ ታማሪዛይ ኦኒካ ባ ታማሪዳ ሎዖ ሚሻ ባ ኣስታማሬዛራ ጊሼቶ። ባሌቶፍቴ ፆሲ ቂሊጫ ኤሬና። ኣሲ ባ ዜሪዳሮ ኢዞ ዛሪ ማፃና። ባ ኣሾ ኣሞ ኩንꬃናስ ዜሪዛዴይ ኣሾፔ ꬋይሲ ማፃና። ኣያና ኡፋይሳናስ ዜሪዳዴይ ጊዲኮ ኣያናፔ ሜርና ዴዖ ማፃና። ኣኔ ኑ ሎዖ ኦሶ ኦꬃናስ ኣዛሎኮ፤ ኑ ኡፋይሲ ቃንፆንታ ኣጊኮ ዎዴይ ጋኪሺን ጋኪዳ ካꬅ ኑ ማፃና። ሄሳ ጊሽ ኑስ ዳንዳዬቲኮ ኣሳ ኡባስ ሃራፔካ ኣማኒዛ ኣሳስ ኣኔ ሎዖ ኦꬆስ። ታኒ ታ ኩሼራ ኢንቴስ ኣይ ማላ ጊታ ፒዳሌን ፃፊዳኮኔ ኣኔ ፄሊቴ። ጮ ካሬ ባጋራ ቤታና ኮዪዛ ኣሳቲ ኢንቴ ቃፃሬታና ማላ ዎልቃꬃና ኮዬቴስ። ኢስቲ ሄሳ ኦꬂዛይ ኪርስቶሳ ማስቃሌ ጊሽ ጊዲ ጎዴቶንታ ማላሳ። ኢስቲ ኢንቴ ቃፃሬታና ማላ ኮዪዛይ ኢንቴ ኣሾን ጬቄታናስ ኮዪዛ ጊሽ ኣቲን ቃፃሬቲዳይቲ ዎጋ ናጊዛይታ ጊዴቴና። ቃሴ ኣላሜይ ታስ፤ ታካ ኣላሜስ፤ ካቄቲዳ ጎዳ ዬሱስ ኪርስቶሳ ማስቃሌንፔ ኣቲን ሃራን ጬቆይ ታፔ ሃኮ። ቃፃሬቲን ዎይኮ ቃፃሬቶንታ ኣጊን ኢዛስ ጎዓይ ባዋ። ጎዓይ ኦራꬃ ሜꬌቴꬅ ጊዴꬃ። ሃይሳ ሃ ኣዛዞዛ ካሊዛ ኡባታሲኔ ፆሳ ዴሬ ጊዲዳ ኢስራዔሌ ኣሳታስ ሳሮቴꬂኔ ማሮቴꬅ ጊዶ። ታኒ ዬሱሳ ማላታ ታ ኣሳቴꬃን ቶካዲስ፤ ሄሳ ጊሽ ሃዒ ታና ኦኒካ ዋይሴና። ታ ኢሻቶ! ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ! ኣሚን። ፆሳ ሼኔ ማላ ዬሱስ ኪርስቶሳ ሃዋሬ ጊዲዳ ጳዉሎሳፔ። ዬሱስ ኪርስቶሳን ዲዛ ኣማኔቲዛይታስ ኤፌሶኔን ኣማኒዛ ኣሳስ። ኑ ኣዋ ፆሳፌኔ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ። ኑ ጎዳ ዬሱስ ኪርስቶሳ ባጋራ ሳሎን ኣያና ኣንጆ ኡባን ኑና ኣንጂዳ ጎዳ ዬሱስ ኪርስቶሳ ኣዋይ ፆሲ ኣንጄቶ። ኑ ኢዛ ሲንꬃን ጌሺኔ ዎሶይ ባይንዳይታ ጊዳና ማላ ቡሮ ኣላሜይ ሜꬌታናፔ ካሴ ባ ሲቆን ኪርስቶሳ ባጋራ ኑና ዶሪዴስ። ዬሱስ ኪርስቶሳ ባጋራ ኑ ኢዛ ና ጊዳና ማላ ባ ሎዖ ቆፋን ኮይሮ ዉርሲ ዎꬂዴስ። ሄሲካ ባ ዶሲዛዴ ባጋራ ጮ ሜላ ኑስ ኢሜቲዳ ቦንቾ ኪያቴꬃይ ጋላቴታና ማላ። ፆሳ ኣꬎ ኪያቴꬃ ዱሬቴꬃፌ ዴንዶይሳን ዬሱሳ ሱꬃን ዎዜቲዲ ናጋራፔ ኑ ማሬቲዶስ። ኢዚ ባ ኪያቴꬃ፥ ሂላቴꬃኒኔ ኤራቴꬅ ኡባን ኑ ቦላ ኬሂ ዳርሲዴስ። ፆሲ ቆፒዳ ፁራ ባ ቆፋ ኪርስቶሳ ባጋራ ባ ሎዖ ቆፋ ማላ ኑና ኤሪሲዴስ። ቡሮፔ ዎዴ ዉርሴꬃን ሃናናስ ዲዛ ኢዛ ቆፋይ ሳሎ ቦላኔ ቢታ ቦላ ዲዛይታስ ኡባስ ሁዔ ጊዲዳ ዬሱስ ኪርስቶሳፔ ዉርሲ ጋርስ ኣꬃናሳ። ዉርሲካ ባ ሼኔ ማላ ኦꬂዛ ኢዛ ሼኔን ኮይሮካ ኢዚ ቆፒ ዎꬂዳይቲ ኑኒ ኢዛን ዶሬቲዶስ። ኑኒ ካሴቲዲ ኪርስቶሳ ባጋራ ኤካና ጊዲ ኡፋይሳን ናጊዛይቲ ፆሳ ቦንቾ ጋላታን ቆንጪሳናሳ። ኢንቴካ ቃሴ ቱማ ቃላ ሄሲካ ኢንቴና ኣሺዛ ሚሺራቾ ቃላ ሲይዲ ኪርስቶሳን ኣማኒዴታ። ኢዛ ኣማኒዲ ካሴ ኢሜታና ጌቴቲዳ ፂሎ ኣያና ማታሜን ኣታሜቲዴታ። ሄ ኣያናዚካ ኢዛ ቦንቾ ጋላታን ቆንጪሳና ማላ ፆሲ ኤራይስ ጊዲዳይታ ኡባታ ዎዛና ጋካናስ ኑ ላታስ ኦይꬆ። ሄሳ ጊሽ ኢንቴ ጎዳ ዬሱሳ ኣማኒዳ ጊሺኔ ኣማኒዛ ኣሳ ኢንቴ ሲቂዛይሳ ታ ሲዮሳፔ ሃ ሲሚን ኢንቴና ቆፓ ቆፓ ኤካዳ ታኒ ታ ዎሳን ኢንቴ ጊሽ ፆሳስ ጋላታ ሺሾ ኣጋቤይኬ። *** ቦንቾ ኣዋ ጊዲዳ ኑ ጎዳ ዬሱስ ኪርስቶሳ ኣዋ ፆሳ ኢንቴ ሎዔꬂ ኤራና ማላ ቆንጪሲዛ ኣያናይኔ ኤራቴꬃ ኣያናይ ኢንቴስ ኢሜታና ማላ ታ ኢንቴስ ፓጬይ ባይንዳ ዎሳይስ። ሄሳꬆካ ኢንቴ ኢዛን ፄይጌቲዳ ኡፋይሳይ ሄሲካ ኣማኒዛይታ ኣቻን ዲዛ ኢዛ ዱሬቴꬃይ ኣዛኮኔ ኢንቴ ኤራና ማላ ኢንቴ ዎዝና ኣይፌይ ፖዓና ማላ ዎሳይስ። ኑስ ኣማኒዛይታስ ኡባፌ ቦላ ጊዲዳ ኢዛ ዎልቃ ꬎቃቴꬅ ኢንቴ ኤራና ማላ ታ ዎሳይስ። ሄ ዎልቃይካ ኢዛ ጊታቴꬃ ሚኖቴꬃ ኦሶን ቤሲዳይሲ ሃይቆፔ ኪርስቶሳ ዴንꬂዲ ሳሎን ባ ኡሻቻን ኡቲሲዳ ኪርስቶሳ ባጋራ። *** ኣይሲዛይታፔ፥ ጎዳቴꬃፔ፥ ዎልቃፌኔ ካዎቴꬃፌ ቃሴካ ሃዒ ፃላ ጊዶንታ ቡሮፔ ያና ዎዴካ ጊዲን ሱንꬅ ኡባፌ ኢዚ ቦላ። ፆሲ ሃራ ዉርሲ ኢዛ ቶሆፔ ጋርሳን ሃሪሲዴስ። ዎሳ ኬꬃንካ ኡባ ቦላ ሁዔ ኦꬂዴስ። ዎሳ ኬꬂያ ኪርስቶሳ ኣሳቴꬃ። ሄ ኢዛካ ኡባሶን ኡባ ሚሽ ኩንꬂዛ ሄ ኢዛ ኩሜꬃ። ኢንቴ ኢንቴ ቆሂዳ ቆሆ ጊሺኔ ኢንቴ ናጋራ ጋሶን ሃይቂዴይታ ሺን፥ ሄሳ ኢንቴ ሃይሳ ኣላሜዛ ኢታ ኦጌ ካሊዴታ። ቦላ ጫርኮ ቦላ ዲዛ ዎልቃማ ሃሪዛይሳስ ሃዒካ ፆሳስ ኣዛዜቶንታ ኣሳ ቦላ ኦꬂዛ ኢታ ኣያናስ ኢንቴ ኣዛዜቲሼ ጋምዒዴታ። ሃይሳፌ ካሴ ኑኒ ኑ ኣሾ ኣሞቴꬅ ፖሊሼ ኣሾይ ኮዪዛ ኦጌ ካሊሼ ኢስታራ ዶስ። ኑኒካ ሃንኮ ኣሳ ማላ ኑ ሜꬌቴꬃፌ ፆሳ ሃንቆ ጊዶን ዴዖስ። ጊዶ ኣቲን ፆሲ ኬሂ ሲቂዳ ጊሽ ባ ማሮቴꬃ ዳሮን ኑኒ ኑ ቆሆ ዳሬቴꬃን ሃይቂዳይታ ጊዲ ዲሺን ኪርስቶሳ ባጋራ ኑና ኣሺዴስ። ኢንቴ ፓፂዳይ ኢዛ ኪያቴꬃና። *** ፆሲ ኑና ኪርስቶሳራ ጋꬂ ዴንꬂዴስ። ዬሱስ ኪርስቶሳ ባጋራ ኑና ሳሎን ባናራ ኡቲሲዴስ። ሄሲካ ሃይሳፌ ጉዬ ያና ዎዴዛን ዬሱስ ኪርስቶሲ ኑስ ባ ኪያቴꬃን ቆንጪሲዳ ዛዋይ ባይንዳ ባ ኪያቴꬃ ዱሬቴꬃ ኑና ቤሳናሳ። ኢንቴ ፆሳ ኪያቴꬃን ኣማኖን ኣቲዴታ። ሄሲካ ፆሲ ኢንቴስ ሜላ ጮ ኢሚዳዛፔ ኣቲን ኢንቴ ኦሶፔ ጊዴና። ኦኒካ ጬቄቶንታ ማላ ኦሶፔ ጊዴና። ሄሲካ ፆሲ ካሴ ኮይሮ ጊጊሲ ዎꬂዳ ሎዖ ኦሶ ኑኒ ኦꬃና ማላ ዬሱስ ኪርስቶሳ ባጋራ ኑኒ ናምዓንꬆ ሜꬌቲዳይታኔ ፆሳ ሜꬌቴꬃታ። ሄሳ ጊሽ ኢንቴ ካሴ ኢንቴ ዬሌቴꬃን ኣይዛቤቲ ኢንቴ ኣሳቴꬃ ቦላ ኣሳ ኩሼ ኦሶ ጌዶን “ኑኒ ቃፃሬቲዶስ” ጊዛ ኣሳቲ ኢንቴና “ቃፃሬቶንታይታ” ጊዛይቶ! ኢንቴ ሄሳ ኣኔ ዎዝናን ዎꬂቴ። ኢንቴ ሄ ዎዴ ኪርስቶሳፔ ሻኬቲዲ፥ ኢስራዔሌ ናይታፔ ሃኪዲ፥ ጫቆ ቃላሲካ ኣላጋ ጊዲዲ፥ ሃይሳ ኣላሜዛ ቦላ ሂዶታይኔ ፆሲ ባይንዳ ኢንቴ ካሴ ዲዛይሳ ዩሺ ቆፒቴ። ሃዒ ቃሴ ኢንቴ ካሴ ሃሆን ዲዛይቲ ዬሱስ ኪርስቶሳን ጊዲዲ ኢዛ ሱꬃ ባጋራ ሺቂዴታ። ናምዓታ ኢሲ ቦላ ጋꬂዲ ጊዶን ሻኪ ኦሺዛ ሚሻ ላሊዳ ኑ ሳሮይ ኢዛ። ዎጋ፥ ዎጋ ኣዛዞራ ጋꬂ ኢሲፌ ባ ኣሾን ሻሪዴስ። ሄሳ ኢዚ ኦꬂዳ ጋሶይ ኢዛስ ዋና ቆፋይ ናምዓታፔ ኢሲ ኦራꬃ ኣስ ባ ባጋራ ሜꬊዲ ሳሮቴꬅ ኤሃናሳ። ኢዚ ማስቃሌ ቦላ ሃይቂዲ ሞርኬቴꬅ ዲጊዴስ። ናምዓታካ ኢሲ ኣሾ ሂስቲዲ ፆሳራ ማቃዪንꬂዴስ። ኢዚ ዪዲ ኢንቴና ሃኪ ዲዛይታሲኔ ማታን ዲዛይታስ ጋꬂ ሳሮቴꬅ ሳባኪዴስ። ኑ ዉሪካ ኢዛ ባጋራ ኢሲ ኣያናን ኣዋ ኣች ሺቃና። ሄሳ ጊሽ ኢንቴ ኣማኒዛይታራ ኢሲፌ ኢሲ ዴሬ ኣሳኔ ፆሳስ ሶ ኣሳ ኣቲን ሃይሳፌ ጉዬ ቤቴታኔ ኢማꬃታ ጊዴኬታ። ኢንቴ ሃዋሬታኔ ናቤታ ባሳን ኬፄቲዴታ፤ ኬꬃስ ዉርሴꬃ ኩሻይ ዬሱስ ኪርስቶሳ። ኬꬃዚ ዉሪካ ኢሲፌ ኦይኬቲዲ ጎዳስ ዱማ ኬꬄ ጊዳናስ ዲጬስ። ኢንቴንካ ፆሲ ባ ኣያናን ዳናስ ኢዛስ ዱሳሶ ጊዳና ማላ ኢሲፌ ኬፄቲሼ ዴታ። ሄሳ ጌዶን ታ ጳዉሎሲ ኢንቴስ ኣማኖንታይታ ጊሽ ዬሱስ ኪርስቶሲ ቃቺዳዴ ጊዳዲስ። ታ ኢንቴና ጎዓና ማላ ፆሲ ኪያቴꬃን ታስ ኦሶስ ኤፃ ኢሚዳይሳ ኢንቴ ቱማፔ ሲዪዴታ። ሃይሳፌ ካሴ ታ ኢንቴስ ቃንꬃራ ፃፊዳ ማላ ታስ ቆንጪን ታ ኤራናስ ዳንዳዪዳ ፁራይ ሃይሳ። ሄሳ ጊሽ ኢንቴ ሄሳ ናባቢሼ ኪርስቶሳ ፁራ ታ ኣይ ማላ ኤሪዳኮኔ ኢንቴካ ኤራናስ ዳንዳዬታ። ሄ ፁራይካ ሃዒ ኣማኒዛ ሃዋሬታሲኔ ናቤታስ ቆንጪዳ ማላ ካሴ ቤኒ ኣꬊዳ ዎዴ ዲዛ ኣሳታስካ ቆንጪቤና። ሄሲ ሄ ፁራይ ኣይዛቤቲ ሚሺራቾ ቃላ ባጋራ ኢስራዔሌ ናይታራ ኢሲፌ ላቲዛይታ፤ ኢሲፌ ኢሳዴ ኣሳቴꬅ ማላ ጊዲዲ ዬሱስ ኪርስቶሳ ባጋራ ቤቲዳ ሂዶታ ኢሲፌ ጊሼቲ ላቲዛይታ ጊዳናሳ። ታካ ኢዛ ዎልቃ ኦሶ ማላ ታስ ኢሜቲዳ ፆሳ ኪያቴꬃ ኢሞታ ማላ ሃይሳ ሚሺራቾ ቃላ ኦሳንቻ ጊዳዲስ። ታ ቃስ ሃንኮ ኣማኒዛ ኣሳፔ ላፋ ጊዲኮካ ኦኒካ ዛዋይ ባይንዳ ኪርስቶሳ ዱሬቴꬅ ኣይዛቤታስ ሳባካና ማላ ፆሳ ኪያቴꬃን ሃይሲ ታስ ኢሜቲዴስ። ሄሳꬆካ ዉርሲካ ሜꬊዳ ፆሳን ቤኒ ዎዴ ቆቴቲ ዲዛ ፆኦሳስ ፁራ ቆፋይ ኣዛኮኔ ኡባስ ታ ቆንጪሳና ማላ ታስ ፆሳ ኪያቴꬂ ኢሜቲዴስ። ኢዛ ቆፋይ ሃዒ ዎዴ ዎሳ ኬꬃ ባጋራ ዱማ ዱማ ሜꬋይ ዲዛ ፆሳ ሂላቴꬂ ሳሎን ዲዛ ሃላቃታሲኔ ጎዳታስ ኤሬታና ማላ ሃኒዴስ። ፆሲ ኑ ጎዳ ዬሱስ ኪርስቶሳ ባጋራ ሃይሳ ፖሊዳይ ሜርና ባ ቆፋ ማላ። ኑኒ ኢዛይታ ጊዲዳ ጊሺኔ ኢዛን ኣማኒዳ ጊሽ ጌሻቴꬃራኔ ሂርጋይ ባይንዳ ኑኒ ፆሳኮ ሺቃና ዳንዳዮስ። ሄሳ ጊሽ ኢንቴ ቦንቼታና ማላ ታኒ ኢንቴ ጊሽ ታ ቦላ ጋኪዳ ዋዬዛን ኢንቴ ኡፋይስ ቃንፆንታ ማላ ታ ኢንቴና ሃዳራ ጋይስ። ሄሳ ጊሽ ታኒ ፆሳ ሲንꬃን ጉልባታይስ። ሳሎን ዲዛይኔ ቢታ ቦላ ዲዛ ኢዛሶ ኣሳይ ዉሪካ ኢዚ ሱንꬂን ሱሜስ። ኢንቴ ጋርሳ ባጋራ ሚናና ማላ ኣያና ባጋራ ኢዛ ቦንቾ ዱሬቴꬃይ ኢንቴስ ኢሜታና ማላ ታ ዎሳይስ። ሄሲካ ኪርስቶሲ ኢንቴ ዎዝናን ኣማኖን ዳና ማላኔ ቃሴካ ኢንቴ ኢዛን ፃጲዲ ሲቆን ሚናና ማላ። ኪርስቶሳ ሲቆስ ኣሆቴꬃይ፥ ኣዱሳቴꬃይ፥ ꬎቃቴꬃይኔ ጪማቴꬃይ ኣይ ጊናኮ ኢንቴ ኣማኒዛ ኣሳ ኡባራ ኢሲፌ ሻኪ ኤራና ማላ። ኢንቴ ፆሳ ኩሜꬃራ ሻኪ ኤሪዲ ኢዛን ኩሜꬅ ጊዳና ማላ ኣሳ ኤራፔ ቦላ ጊዲዳ ኪርስቶሳ ሲቆ ኢንቴ ኤራና ማላ ታ ዎሳይስ። ሄሳ ጊሽ ኑ ጊዶን ኦꬂዛ ባ ዎልቃ ጊና ኑ ዎሲዛይሳፌኔ ዎይኮ ኑ ቆፒዛይሳፌ ኡባፌ ቦላራ ኬሂ ዳርሲ ኦꬃናስ ዳንዳዪዛ ፆሳስ፥ ዎሳ ኬꬃን ቃሴካ ዬሱስ ኪርስቶሳ ባጋራ ዎዴ ኡባን ሜርናፔ ሜርና ጋካናስ ኢዛስ ቦንቾይ ጊዶ። ኣሚን። ሄሳ ጊሽ ጎዳ ሱንꬃን ቃሼቲዳ ታኒ ኢንቴ ፄይጌቲዳ ፄይሳስ ቤሲዛ ዱስ ዳና ማላ ኢንቴና ዎሳይስ። ሙሌካ ኣሽኬታኔ ሹጎታ ጊዲቴ። ኢሶይ ኢሳራ ሲቆን ዲቴኔ ኢሶይ ኢሳ ዳንዳዪቴ። ሳሮቴꬅ ኢሚዛ ኣያና ኢሲፌቴꬅ ናጋናስ ሚኒቴ። ኢንቴ ፄይጌቲዳ ጋላስ ኢሲ ሂዶታኮ ፄይጌቲዳ ማላ ኢሲ ኣሳቴꬂኔ ኢሲ ኣያናይ ዴስ። ኢሲ ጎዳይ፥ ኢሲ ኣማኖይኔ ኢሲ ፂንቃታይ ዴስ። ኡባፌ ቦላራ ጊዲዳይ፥ ኡባ ቦላ ኦꬂዛይ፥ ኡባሶን ዲዛይ፥ ኡባስ ኣዋ ጊዲዳ ኢሲ ፆሲ ዴስ። ጊዲኮካ ኪርስቶሲ ኢማና ጊ ቃቺዳ ማላ ኑስ ኢሳስ ኢሳስ ዱማ ዱማ ኢሞቴꬂ ኢሜቲዴስ። ሄሳ ጊሽ “ኢዚ ፑዴ ኬዚዳ ዎዴ ዲዖ ዲዒዴስ፤ ኣሳስ ኪያቴꬃ ኢሞታ ኢሚዴስ” ጌቴቲ ጌሻ ማፃፋን ፃፌቲዴስ። ሂስቲን “ኢዚ ፑዴ ኬዚዴስ” ጉሲ ቃሴካ ዱጌ ቢታ ጋርስ ዎꬊዴስ ጉስ ጊዶንታ ኣጊኮ ሄሲ ኣይ ጉሴ? ኢዚ ዱጌ ጋርሴ ዎꬊዳይሲ ኩሜꬅ ኣላሜ ሜꬌቴꬅ ኩማና ማላ ሳሎፔካ ቦላ ኬዚዳይ ኢዛ። ኢሲ ኢሲ ኣሳቲ ሃዋሬታ፥ ባጋቲ ናቤታ፥ ሃራቲ ሚሺራቾ ቃላ ሳባኬ፥ ባጋይቲ ቃሴ ሄሚዛይታኔ ታማርሲዛይታ ጊዳና ማላ ኢዚ ኢሞታ ኢሚዴስ። ሄሲካ ኪርስቶሳ ኣሳቴꬅ ጊዲዳ ዎሳ ኬꬂያ ኬፄታና ማላ ኣማኒዛይታ ኣማኖ ኦሶስ ጊጊሳናሳ። ሄሲካ ሃናናይ ኑ ዉሪካ ፆሳ ና ኣማኖኒኔ ኢዛ ኤሮን ቤቲዛ ኢሲፌቴꬃኮ ጋኪዲ ኩሜꬃ ኣስ ጊዳናስ ኪርስቶሳን ኑኒ ኪርስቶሳꬆ ኩሜꬂኔ ፖሎ ጊዳና ማላ። ሄሳ ጊሽ ኣባ ቦላ ዴንዲዛ ጎቴ ጫርኮይ ሄኔ ሃ ሾጬቺዛ ማላ ዱማ ዱማ ቲሚርቴ ጫርኮን ኣሳ ጌኔኒኔ ባሌꬆን ኣኔ ኑኒ ሄኔ ሃ ጶንቄቲሼ ቄሪ ጉꬃ ናይታ ማላ ሃኖኮ። ሄሳꬆ ሃኖ ኣጊዲ ቱማ ሲቆን ሃሳዪሼ ሁዔ ጊዲዳይሳኮ ሃኒዛዛን ኡባን ኣኔ ዲጮስ። ሄ ሁዔዚካ ኪርስቶሳ። ኢዛ ጌዶን ኣሳቴꬂ ዉሪ ፃጶን ኦይኬቲዲ ኢሲ ኢሲ ኣሳቴꬂ ባ ኦሶ ኦꬂሼ ዉሪካ ሲቆን ዲጬሲኔ ባናካ ሚንꬄስ። ኣይዛቤታ ማላ ጮ ሜላ ቆፋን ሜላ ሲሜሬታናስ ኢንቴስ ቤሴና ጋዳ ታ ኢንቴና ዞራይስ። ኢስታ ዎዝናይ ሙሚዳ ጊሺኔ ዩሺ ቆፖንታ ጊሽ ኢስታ ዎዝና ኣይፌይ ቆቂዴስ። ኢስቲ ፆሳ ዴዖፔ ሻኬቲዳ። ኢስታ ዎዝናይ ዶጪዳ ጊሽ ካሎይ ባይንዳ ባ ኮይዳ ማላ ባና ካልꬆንታ ኣሞኒኔ ቱናቴꬃን ዳናስ ዎጋይ ባይንዳ ኢታ ኦሶስ ባና ኣꬂ ኢሚዳ። ኢንቴ ቃሴ ኪርስቶሳ ሄሳ ማላን ኤሪቤይኬታ። ኤ ቱሙካ ኢንቴ ኢዛ ጊሽ ሲዪዴታኔ ዬሱሳን ዲዛ ቱማ ኢዛፔ ታማሪዴታ። ኢንቴ ካሴ ዲዛ ዱሳይ ባሌꬂዛ ኣሞን ቂታቲዳ ጊሽ ካሴ ጬጋ ኣሳቴꬅ ኢንቴፌ ቃሪ ዬጋና ማላ ታማሪዴታ። ቃሴካ ኢንቴ ቆፋይ ኣያናን ኦራፆ። ቱሙ ፂሎቴꬃኒኔ ጌሻቴꬃን ፆሴ ሚሳታና ሜꬌቲዳ ኦራꬃ ኣሳቴꬅ ማይዒቴ። ኑ ዉሪካ ኢሲ ኣሾ ጊዲዳ ጊሽ ዎርዶቴꬅ ዲጊዲ ኑኒ ኑ ጋርሳን ኢሶይ ኢሳራ ኣኔ ቱማ ሃሳዮስ። ሃንቄቲቴ ሺን ናጋራ ኦꬆፍቴ፤ ኢንቴ ሃንቆን ዲሺን ኣዋ ኣርሼይ ዉሎፎ። ፃላዔስ ሶሆ ኢሞፍቴ። ካሴ ካይሶቲዛዴይ ሃይሳፌ ጉዬ ካይሶቶፓ። ጊዶ ኣቲን ሜቶቴቲዲ ኢዛ ዎሲዛይታስ ኢሚዛ ሚሽ ኢዛ ኩሼን ዳና ማላ ሎዖ ሚሽ ባ ኩሼራ ኦꬂ ዴማናስ ዳቡሮ። ኮሺዛ ማላ ሃንኮ ሲዪዛይታ ጎዒዛዚኔ ማዲዛ ቃላፔ ኣቲን ጎዖይ ባይንዳ ቃላይ ኢንቴ ዱናፔ ኬዞፖ። ኢንቴ ኣታና ጋላሳስ ኣታሜቲዳ ፆሳ ፂሎ ኣያና ሚሺሶፒቴ። ጫሞ ዮዖ ዉርሲ ሃንቆካ፥ ዪሎ፥ ኦሽ፥ ጫሼ፥ ቃሴካ ሃንኮ ሃራ ኢታቴꬅ ዉርሲ ኢንቴፌ ዲጊቴ። ኢንቴና ፆሲ ኪርስቶሳ ባጋራ ኣቶ ጊዳ ማላ ኢንቴካ ኢንቴ ጋርሳን ኣቶ ኣቶ ጌቴቲቴ፤ ኢሶይ ኢሳራ ኪያታኔ ኢሶይ ኢሳስ ቃꬌቲዛይታ ጊዲቴ። ሄሳ ጊሽ ኢንቴ ዶሴቲዛ ናይታ ማላ ፆሴ ሚሳቲቴ። ኪርስቶሲ ኑና ሲቂዳ ማላ ቃሴካ ኑ ጊሽ ባና ሳዊዛ ያርሾ ኦꬅ ፆሳስ ኢሚዳ ማላ ኢንቴካ ሲቆን ሲሜሬቲቴ። ላይማይ ዎይኮ ቱናቴꬂ ዎይኮ ኡዜቴꬂ ሙሌካ ኢንቴ ጊዶን ቤቶይ ኣቲን ዚጊርሲካ ሲዬቶፎ። ሄሳ ማላይ ጌሻ ፆሳ ኣሳስ ቤሴና። ኢንቴ ጋላታ ጋላቲዛይታ ጊዲቴ ኣቲን ኣሴ ዬላቺዛ ላፋ ሃሳያይ ጮ ኤያቴꬃ ዮዖይ ኢንቴስ ቤሶንታ ጊሽ ሄሳ ማላይ ኢንቴ ጋርሳን ዶፖ። ቃሴካ ኢንቴ ላይማቲዛይታስ ዎይኮ ቱናታስ ዎይኮ ኡዜቲዛይታሲኔ ኤቃስ ጎይኒዛይታስ ኪርስቶሳ ካዎቴꬃኒኔ ፆሳ ካዎቴꬃን ኢስታስ ላታሶይ ባይንዳይሳ ኢንቴ ኤሪቴ። ኢንቴና ኦኒካ ዎርዶ ሃሳዮን ባሌꬆፎ። ጋሶይካ ፆሳ ሃንቆይ ኢዛስ ኣዛዜቶንታ ናይታ ቦላ ያናይ ሃይታንታ ማላና። ሄሳ ጊሽ ሄሳንታ ማላራ ዙፔቶፒቴ። ካሴ ኢንቴ ꬉማ ሺን ጎዳን ሃዒ ኢንቴ ፖዖ። ኢንቴ ፖዖ ናይታ ማላ ዲቴ። ፖዖስ ኣይፌይ ሎዔቴꬃን፥ ፂሎቴꬃኒኔ ቱማቴꬃን ኡባን ዴስ። ሄሳꬆካ ጎዳ ኡፋይሲዛ ሚሽ ኮዪቴ። ኣይፌይ ባይንዳ ꬉማ ኦሶራ ኢንቴስ ኣይኮ ጋጎቴꬂ ዶፖ። ሄሳፌ ኢታ ኦሶ ቆንጬ ኬሲቴ። ꬉማን ዲዛ ኣሳቲ ጌማን ኦꬂዛ ሚሻ ጊሽ ሃሳያይካ ዬላቼስ። ፖዖይ ፖዒዳዚ ዉሪ ቆንጬን ቤቴስ። ጋሶይካ ዉርሲ ቤሲዛይ ፖዖ። ሄሳ ጊሽ “ኔኖ፥ ꬊስኪዛይሶ ቤጋ! ሃይቆፔ ዴንዳ፥ ኪርስቶሲ ኔስ ፖዒሳና” ጌቴቲዴስ። ሄሳ ጊሽ ኤራቴꬂ ባይንዳይታ ማላ ጊዶንታ ኢንቴ ዋኒዲ ኤራታ ማላ ዳናኮኔ ናጌቲቴ። ሃይሲ ዎዴዚ ኢታ ጊዲዳ ጊሽ ሄሳ ሎዔꬂ ኤሪቴ። ሄሳ ጊሽ ኤያታ ጊዶፒቴ፤ ጎዳ ሼኔይ ኣዛኮኔ ዩሺ ቆፒቴ። ኣያናይ ኩሚዳይታ ጊዲቴ ኣቲን ማꬆሲዛ ኡሻን ማꬆቶፍቴ። ሄሲ ሜላ ሚሻ ላሌꬃ። ኣያና ዬꬃን ጋላታራ ጋꬂ ዬፂሼ ኢንቴ ጊዶን ኢሶይ ኢሳራ ሃሳዬቲቴ። ኢንቴ ሳባኒኔ ዬꬃን ኩሜꬃ ዎዝናፔ ጎዳ ጋላቲቴ። ሄሳን ፆሳ ኣዋ፥ ጎዳ ዬሱስ ኪርስቶሳ ሱንꬃ ኡባ ሚሻስ ኡባ ዎዴ ጋላቲቴ። ኢንቴ ኪርስቶሳ ቦንቾስ ጊዲ ያሻራ ኢሶይ ኢሳስ ኣዛዜቲቴ። ማቼቶ ኢንቴ ጎዳስ ሃሬቲዛ ማላ ኢንቴ ኣዚናታስ ሃሬቲቴ። ኪርስቶሲ ባ ኣሾ ጊዲዳ ዎሳ ኬꬃይስ ሁዔ ጊዲዳ ማላ ኣዚናይካ ባ ማቼይሲ ሁዔ። ሄሳ ጊሽ ዎሳ ኬꬂያ ኪርስቶሳስ ኣዛዜቲዛ ማላ ማቼቲካ ባ ኣዚናታስ ኣይ ሃኖንካ ኣዛዜታናስ ቤሴስ። ኣዚናቶ! ኪርስቶሲ ዎሳ ኬꬃዮ ሲቂዳ ማላኔ ባና ኢዚ ጊሽ ኣꬂ ኢሚዳ ማላ ኢንቴካ ኢንቴ ማቼታ ሲቂቴ። ባ ቃላ ባጋራ ሃꬃን ሜጪ ጌሺዲ ኤራይስ ዱማሲዳ ማላ። ሄሳꬆካ ቂታይ ዎይኮ ኣይፌሶ ፂርጶቴꬂ ዎይኮ ኢሲ ኢታይ ኢዚ ቦላ ቤቶንታ ጌሺኔ ባላይ ኢዚ ቦላ ባይንዳሮ ቦንቾ ዎሳ ኬꬄ ሂስቲዲ ኤራይስ ሺሻናሳ። ኣዚናቲካ ሄሳꬆ ባ ማቼታ ባ ኣሾ ማላ ሲቃናስ ቤሴስ። ባ ማቾ ሲቂዛዴይ ባና ሲቄስ። ባርካ ባና ኢፂዛዴይ ኦኒካ ባዋ። ባ ኣሾስ ሜሲኔ ባና ናጌስ። ኪርስቶሲካ ዎሳ ኬꬃስ ሂኒꬆ ኦꬂዴስ። ኑኒ ኪርስቶሳ ኣሳቴꬃ። ሄሳ ጊሽ “ኣሲ ኣዮኔ ኣዋ ኣጊዲ ባ ማቼይራ ኢሲኖ ጊዴስ፤ ናምዓይካ ኢሲ ኣሾ ጊዴቴስ” ጌቴቲ ጌሻ ማፃፋን ፃፌቲዴስ። ሃይሲ ዳሮ ፁራ ዮዖ፥ ታካ ሃይሳ ኪርስቶሳ ጊሺኔ ዎሳ ኬꬃ ጊሽ ዮታይስ። ጊዲኮካ ኢንቴፌ ኢሲ ኢሳዴይ ባ ማቾ ባና ሲቂዛ ማላ ሲቆ፤ ማቻካ ባ ኣዚና ቦንቹ። ናይቶ! ኢንቴ ኢንቴና ዬሊዳይታስ ጎዳን ኣዛዜቲቴ። ሄሲ ኢንቴስ ቤሴስ። “ኔ ኣዋኔ ኔ ኣዪዮ ቦንቻ” ጊዛ ኣዛዞ ጊዶን ዲዛ ሂዶታይ ኮይሮ ኣዛዞ። ኔ ሄሳꬆ ኦꬂኮ ኔስ ሎዓናኔ ኔስ ላይꬃይ ቢታ ቦላ ኣዱቃና። ዬሊዳይቶ! ኢንቴካ ኢንቴ ናይታ ሃንቄꬆፍቴ፤ ጊዶ ኣቲን ኢንቴ ናይታ ጎዳ ዞሬኒኔ ሴራን ዲቺቴ። ኦሳንቻቶ ኢንቴ ኪርስቶሳስ ኣዛዜቲዛ ማላ ቢታ ቦላ ኢንቴና ኦꬂሲዛይታስ ያሻቴꬃኒኔ ቦንቾን ሱሬ ዎዝናፔ ኣዛዜቲቴ። ጮ ኣሳ ኣይፌን ቤታና ማላኔ ኦꬂሲዛይታፔ ዱና ኣንጆ ኤካናስ ጊዶንታ ኢንቴ ኪርስቶሳ ኣይሌታ ማላ ፆሳ ሼኔ ኩሜꬃ ዎዝናፔ ፖላና ማላ ዎዝናፔ ኣዛዜቲቴ። ኣሳስ ኦꬂዛ ማላ ጊዶንታ ጎዳስ ኦꬂዛ ማላ ኢንቴ ኩሜꬅ ዎዝናፔ ኦꬂቴ። ጋሶይካ ኣይሌ ጊዲን ዎይኮ ጎዳ ጊዲን ባ ኦꬂዛ ሎዖ ኦሶስ ኡባስ ዎይቶ ኤካናይሳ ኢንቴ ኤሬታ። ኢንቴኖ ጎዳቶ! ኢንቴካ ኢንቴ ኦꬂሲዛይታስ ሄሳꬆ ኦꬂቴ። ኢስታሲኔ ኢንቴስ ጎዳ ጊዲዳይ ቦላ ሳሎን ዲዛይሳ፤ ኢዚካ ኣስ ኣይፌሶ ፄሊ ማዶንታይሳካ ኢንቴካ ኤሪዛ ጊሽ ኦሳንቻታ ባቢሶ ኣጊዲ ሎዖ ኦꬂቴ። ሃራ ባጋራ ሚኖ ጎዳኒኔ ኢዛ ጊታ ዎልቃን ሚኒቴ። ዳቡሎሳ ጌኔ ኦሶ ኢንቴ ኤቄታናስ ዳንዳያና ማላ ፆሳ ኦላ ማይዖታ ማይቴ። ጋሶይካ ኑ ኦሌታናይ ኣሾራኔ ሱꬃራ ጊዶንታ ሃይሳ ꬉማ ኣላሜዛ ሃሪዛ ጎዳታራኔ ዎልቃማታራ ቃሴካ ሳሎ ቦላ ዲዛ ቱና ኣያና ኦላንቻታራ ኦሌቶስ። ኢታ ጋላሳይ ጋኪሺን ኢንቴ ሞርኬ ዎልቃራ ኤቄታናስ ዳንዳያና ማላ ፆሳ ኦላ ማይዖታ ኩሜꬅ ማይዒቴ። ኢንቴ ኡባካ ፖሊዳፔ ጉዬ ሚኒ ኤቃናስ ዳንዳዬታ። ሄሳ ጊሽ ኢንቴ ፄሳን ቱማ ዚናሬ ማላ ዳንጬቲዲ ፂሎቴꬃ ፁሩሬታ ማላ ቲራን ማይዒዲ፥ ሳሮቴꬃ ሚሺራቾ ቃላ ቶሆን ጫማ ማላ ኣꬂዲ ጊጌቲ ኤቂቴ። ሄይታንታፌካ ቦላራ ታማ ማላ ፖፖልዑ ጊዛ ኢታ ኣያና ዎንዳፌታ ኢንቴ ዉርሲ ቶይሳና ዳንዳያና ማላ ኣማኖ ጎንዳሌ ማላ ዴንꬂቴ። ኣቶቴꬅ ቢራታ ቆቤ ማላ ሁዔን ዎꬂቴ። ኣያና ጊꬃ ማሻ ኦይኪቴ፤ ሄሲካ ፆሳ ቃላ። ዎሳን ኣይ ሃኖንካ ኣያናን ዎሲቴ። ሄሳ ቆፒዲ ቤጊቴ፤ ኣማኒዛይታ ኡባ ጊሽ ቃንፆንታ ዎኣሲቴ። ታኒ ሚሺራቾ ቃላ ፁራ ኣሳስ ቆንጪሳናስ ዱና ዶዪዛ ኡባ ዎዴ ያሺ ባይንዳ ታ ፃላቴꬃን ዮታና ቃላይ ታስ ኢሜታና ማላ ታስ ዎሲቴ። ታኒ ሚሺራቾ ቃላ ጊሽ ሳንሳላታን ቃሼታዳ ኪቴቲዳዴ ጊዲዳይ ሄሳሳ። ሄሳ ጊሽ ታ ዮታናስ ቤሲዛይሳ ባቦንታ ዮታና ማላ ታስ ዎሲቴ። ታ ኣይ ማላ ዲዛኮኔ ኣይ ኦꬂዛኮ ኢንቴ ኤራና ማላ ዶሴቲዳ ታ ኢሻይ ጎዳስ ኣማኔቲዳ ኦሳንቻይ ቲቂቆሲ ኢንቴስ ሃኒዳይሳ ዉርሲካ ኢንቴስ ዮታና። ኢንቴ ኑ ሃኖቴꬅ ኤራና ማላኔ ኢንቴ ዎዝና ኢዚ ሚንꬄꬃና ማላ ታ ኢዛ ኢንቴኮ ዬዳዲስ። ኣዋ ፆሳፌ፥ ጎዳ ዬሱስ ኪርስቶሳፔ ሳሮቴꬂኔ ሲቆይ ኣማኖራ ኢንቴስ ታ ኢሻታስ ጊዶ። ጎዳ ዬሱስ ኪርስቶሳ ፓጬይ ባይንዳ ሲቂዛ ኡባስ ሳሮቴꬂ ጊዶ። ኣሚን። ዬሱስ ኪርስቶሳ ኦሳንቻ ጊዲዳ ጳዉሎሳፔኔ ፂምቶሳፔ ዎሳ ኬꬃ ጪማታራኔ ዳቆኔታራ ኢሲፌ ፒልጲሲዮሴ ዴሬን ዲዛ ኣማኒዛይታስ ዬሱስ ኪርስቶሳስ ዱማቲዳይታስ ኡባስ፤ ኑ ኣዋ ፆሳፌ፥ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ። ኢንቴና ቆፒዛ ኡባ ጋላስ ታኒ ታ ፆሳ ጋላታይስ። ኡባ ጋላስ ኢንቴ ጊሽ ታ ዎሲዛ ዎዴ ኡፋይሳን ዎሳይስ። ኮይሮ ጋላሳፌ ሃ ሲሚን ሃኖ ጋካናስ ሚሺራቾ ቃላ ኦሶን ኢንቴ ታናራ ዴታ። ኢንቴናን ሎዖ ኦሶ ዶሚዳይሲ ኢዚ ዬሱስ ኪርስቶሲ ዉርሴꬃ ፒርዳስ ያና ጋካናስ ኢንቴና ዳንዳዪሳናይሳ ታ ኣማናይስ። ታ ሃዒ ቃሾ ኬꬃን ዲሺኒኔ ታ ቃሼታናፔካ ካሴ ሚሺራቾ ቃላ ቱማ ናጋናሲኔ ሚንꬄꬃናስ ፆሲ ታስ ባ ኪያቴꬃን ኢሚዳ ማዶን ኢንቴ ዉሪካ ታናራ ኢሲፌ ኦꬂዳይታ ጊዲዳ ጊሽ ኢንቴ ኡባ ጋላስ ታ ዎዝናፔ ꬋዬኬታ። ሄሳ ጊሽ ታ ኢንቴ ጊሽ ቆፓናስ ታስ ቤሴስ። ታ ኢንቴና ዬሱስ ኪርስቶሳ ሲቆን ዎስታ ላሞቲዛኮኔ ፆሲ ታስ ማርካ። ኢንቴ ሲቆይ ኤራቴꬃኒኔ ኣኬካን ኬሂ ዳራና ማላ ታ ዎሳይስ። ሄሲካ ኢንቴ ኡባፌ ኣꬊዛይሳ ሻኪ ኤራና ማላኔ ዬሱስ ኪርስቶሳ ዩሳ ጋላስ ጋካናስ ኢንቴ ጌሻታኔ ዎሶይ ባይንዳይታ ጊዳና ማላ ኮያይስ። ፆሳ ቦንቺሲዛይሳኔ ጋላቲሲዛይሳ ኢንቴ ኦꬃና ማላ ዬሱስ ኪርስቶሳን ቤቲዛ ጌሻቴꬃ ኣይፌን ኢንቴ ዎዝናይ ኩሞ። ሃዒካ ታ ኢሻቶ! ታ ቦላ ጋኪዳ ሜቶይ ሚሺራቾ ቃላይ ካሴፔ ዳሪ ኣካናስ ጊዲዳይሳ ኢንቴ ኤራና ማላ ታ ኮያይስ። ሄሳ ጊሽ ታ ቃሼቴꬃይ ኪርስቶሳ ጊሽ ጊዲዳይሲ ካዎ ኬꬃ ዛቤታሲኔ ሃራታስካ ኤሬቲዴስ። ታ ቃሼቲዳይሳ ጌዶን ኣማኒዛይቲ ፆሳ ቃላ ባቦንታ ፃላቴꬃን ኣሳስ ማርካታናስ ሚኖቴꬅ ዴሚዳ። ኢሲ ኢሲ ኣሳቲ ጮ ኑ ኢዛፔ ዋኒዶን ጌꬃኒኔ ሆሎቴꬃን ሳባኬቴስ። ባጋይቲ ቃሴ ሎዖ ቆፋራ ኪርስቶሳ ጊሽ ሳባኬቴስ። ባጋይቲ ታ ሚሺራቾ ቃላ ጊሽ ሞቴታና ሃን ዲዛይሳ ኤሪዛ ጊሽ ሲቆን ሳባኬቴስ። ሃንኮይቲ ቃሴ ሎዖ ቆፋን ጊዶንታ ታና ጋኪዳ ቃሾዛ ቦላ ሃራ ዋዬ ጋꬃናሲኔ ባ ኢታ ቆፋ ፖላናስ ኪርስቶሳ ሳባኬቴስ። ሄሳ ጊዲኮ ኣይ ሜቶ ዲዛይ! ዋና ኣይፌ ዮዖይ ሱሬቴꬃን ጊዲን ዎይኮ ሚሳቲሶን ጊዲንካ ኣዋራካ ኪርስቶሳ ሳባኪዛ ጊሽ ታ ኡፋዬታይስ። ቃሴካ ታ ኡፋዬታና። ታ ቦላ ጋኪዳ ሜቶፔ ታ ኣꬋናይ ኢንቴ ዎሳኒኔ ዬሱስ ኪርስቶሳ ኣያና ማዶን ጊዲዳይሳ ታ ኤራይስ። ታ ኣይ ኦጌራካ ዬላቶንታ ማላ ሚኖ ኡፋይሲኔ ላሞታይ ታስ ዴስ። ጊዶ ኣቲን ካሴካ ሃቺካ፤ ታ ሃይቂንካ ፓፃ ዲንካ ኪርስቶሲ ታ ኣሾን ቦንቼታናይሳ ታ ፃላቴꬃን ሃሳያይስ። ታስ ዱስ ጉሲ ኪርስቶሳ። ሃይቆይካ ታስ ጎዓ። ጊዶ ኣቲን ታኒ ሃይሳ ኣሾ ዱሳን ጉጃ ዲዛኮ ኣይፌ ኢሚዛ ኦሶ ኦꬃይስ ጉሳ። ታ ኣዋይሳ ዶራናኮኔ ታስ ኤሬቴና። ሃ ናምዑ ሃኖታን ሜቶቴታዲስ። ታ ባዳ ኪርስቶሳራ ዳናስ ላሞታይስ። ሄሲ ሃራ ኡባፌ ኬሂ ሎዖ። ጊዶ ኣቲን ታስ ኣሾን ዱሲ ኢንቴስ ኬሂ ኮሼስ። ሄሳ ኣኬካዳ ኢንቴ ኣማኖን ዲጫና ማላኔ ኡፋዬታና ማላ ኢንቴ ኡባታ ማታን ጋምዓናይሳኔ ዳናይሳ ታ ኤራይስ። ታ ሄ ባዳ ኢንቴ ኣቻን ዴዪኮ ታ ጋሶን ኢንቴስ ኪርስቶሳን ዲዛ ጬቄቴꬂ ዳራና። ኪርስቶሳ ሚሺራቾ ቃላስ ቤሲዛ ማላ ዲቴ። ሄሳꬆ ሃንካ ታ ኢንቴና ሄ ባዳ ቤይዳኮ ዎይኮ ሃሆን ዳዳ ኢንቴ ጊሽ ታ ሲዪዛኮ ኢንቴ ሚሺራቾ ቃላ ኣማኖስ ኢሲኖ ኦሌቲሼ ኢሲ ኣያናን ኢንቴ ሚኒ ኤቅናይሳ ታ ኤራይስ። ኣይ ኦጌራካ ኢንቴናራ ኤቄቲዛይታስ ሂርጎፍቴ። ሄሲ ኢስቲ ꬋያናይሳሲኔ ኢንቴ ኣታናይሳስ ፆሳፌ ኢሜቲዳ ማላታ። ኢንቴ ኪርስቶሳ ኣማኒዛይታ ፃላላ ጊዶንታ ኢዛ ጊሽ ዋዬ ኤኪዛይታ ጊዳና ማላ ሃይሲ ፆሳ ኪያቴꬂ ኢንቴስ ኢሜቲዴስ። ኢንቴ ካሴ ቤዪዳ ማላ ሃዒካ ታ ቦላ ዲዛይሳ ኢንቴ ሲዪዛይሳ ማላ ሄሳꬆ ኢንቴናካ ዋዪሶን ዴስ። ኢንቴስ ኪርስቶሳ ባጋራ ቤቲዳ ኢሲፌቴꬃ ጋሶን ኢሶይ ኢሳ ሚንꬄꬂዛዝ ሲቆ ጊዲንካ ዎይኮ ኣያና ኢሲፌቴꬅ ዎይኮ ማሮይኔ ኣሳስ ሚሼቴꬅ ኢንቴ ጋርሳን ዲኮ ኢንቴ ኣስ ሲቆን ኢሲ ኣያናኒኔ ኢሲ ቆፋን ጊዲዲ ታ ኡፋይስ ፖሊቴ። *** ኣስ ኡባ ኢንቴፌ ቦላራ ፄሊቴ ኣቲን ኢንቴርካ ኢንቴና ዶሶን ዎይኮ ጎዓይ ባይንዳ ጋላታ ኤካናስ ኢሲ ሚሺካ ኦꬆፍቴ። ኢንቴፌ ኢሲ ኢሲ ኣሲ ሃራ ኣስ ጎዒዛይሳ ፄሊቴ ኣቲን ኢንቴ ጎዓ ፃላላ ፄሎፍቴ። ዬሱስ ኪርስቶሳስ ዲዛ ኣሽኬቴꬂ ኢንቴ ኣቻንካ ዶ። ኢዚ ኤራይስ ፆሳኮሺን ባና ፆሳራ ጊኒሳናስ ኮይቤና። ጊዶ ኣቲን ኣይሌ ሜꬋ ኤኪዲ ኣስ ሚሳቲዲ ባርካ ባና ኤያ ኣስ ኬሲዴስ። ኣስ ጊዲ ቆንጪዲካ ባና ኣሳፔ ዚቃ ኦꬂዴስ። ሃይቃና ጋካናስ ሄሲካ ማስቃሌ ቦላ ካቄቲ ሃይቃና ጋካናስ ኣዛዜቲዴስ። ሄሳ ጊሽ ፆሲ ኢዛ ዳሮ ꬎቁ ሂስቲዴስ። ሱንꬃ ኡባፌ ꬎቁ ጊዳ ሱንꬅ ኢዛስ ኢሚዴስ። ሄሲካ ሳሎንካ ቢታ ቦላን ቢታፌ ጋርሳንካ ዲዛ ሜꬌቴꬂኔ ጉልባቴይ ዉሪ ዬሱሳ ሱንꬃስ ጉልባታና ማላ። ኣሳ ኢንፃርሲ ዉሪካ ፆሳ ኣዋ ቦንቾስ ዬሱስ ኪርስቶሲ ጎዳ ጊዲዳይሳ ማርካታናሳ። ሄሳ ጊሽ ታ ኢሻቶ! ኢንቴ ካሴ ኡባ ዎዴ ኣዛዜቲዛይታ ጊዲዳ ማላ ሃዒካ ታ ማታን ዶንታ ኢንቴፌ ሃሆን ዲኮካ ኢንቴ ኣቴꬃይ ኩሜꬅ ጊዳና ማላ ያሻቴꬃኒኔ ቦንቾን ፖሊቴ። ፆሲ ኢንቴስ ኣዛዜቴꬅ ኢሚሼ ባ ቆፋ ዉርሴꬅ ጋካናስ ኢንቴ ጊዶን ኦꬄስ። ኣይ ሚሺካ ዙዙንꬂኔ ፓላማይ ባይንዳ ኦꬂቴ። ሄሲካ ኢንቴ ኢታኔ ጌላ ኣሳ ጊዶን ጌሻታኔ ዎሶይ ባይንዳ ፆሳ ናይታ ጊዲዲ ኣላሜ ቦላ ኣዋ ኣርሼ ማላ ዴሬ ኡባስ ፖዓናሳ። ኢንቴ ኤኪዳ ዴዖ ቃላ ሎዔꬂ ኦይኪኮ ኪርስቶሲ ሃ ሲሚ ዪዛ ዎዴ ታ ሜላ ዳቡሮንታይሳ ጊሽ ታ ጬቄታናዚ ታስ ዴስ። ቃሴካ ኢንቴስ ጎዳን ዲዛ ኣማኖይ ኢንቴ ፆሳስ ሺሻዳ ዱማ ያርሾ ማላ ታ ሼምፖይ ኢንቴ ያርሾራ ኢሲፌ ያርሾ ማላ ጉኪዛኮ ኢንቴናራ ታካ ኡፋዬታና። ሄሳꬆካ ኢንቴ ኢንቴስ ኡፋዬቲዲ ታናካ ኡፋይሳናስ ቤሴስ። ጎዳይ ማዲኮ ፂምቶሳ ኢንቴኮ ዬዳዳ ኢንቴ ሎዔቴꬃ ጊሽ ሎዖ ዎሬ ሲያናስ ኮያይስ። ኢንቴ ሎዔቴꬃ ጊሽ ቆፒዛ ኣሲ ሃራ ኢዛ ማላይ ኦኒካ ባዋ። ሃራይ ዉሪካ ዬሱስ ኪርስቶሳይሳ ጊዶንታ ባ ጎዓስ ዎፂዛዴ ፃላላ። ጊዶ ኣቲን ኢንቴ ኤሪዛይሳ ማላ ፂምቶሲ ኢዚ ኣይ ማላ ኣሳኮኔ ባ ጊሽ ማርካሲዴስ። ናይ ባ ኣዋራ ኦꬂዛ ማላ ታናራ ሚሺራቾ ቃላ ዮቲዴስ። ሄሳ ጊሽ ሃይሳፌ ሲንꬃን ታ ዋናናኮኔ ሻካ ኤሪዳፔ ጉዬ ኢዛ ታ ኢንቴኮ ኪታና ቆፓይስ። ታካ ኢንቴኮ ማታ ዎዴ ባናይሳ ጎዳን ኣማኔታይስ። ሄሳꬆካ ኢንቴ ታና ኮሺዛ ሚሻን ኡባን ማዳና ማላኔ ሎዔꬂ ኦይካና ማላ ዬዲዳ ኣፍሮዲፆ ታ ኢንቴኮ ዛራ ዬዳና ማላ ኮሺዛይሲ ታስ ኤሬቲዴስ። ጋሶይካ ኢዚ ኢንቴና ኩሜꬃታ ቤያናስ ላሞቲዳ ጊሺኔ ቃሴካ ኢንቴ ኢዛ ሳኮዛ ሲዪዳይሳስ ቆፒዳ ጊሻሳ። ቱማፔካ ሃርጊዲ ሃይቂሼ ኣቲዴስ። ጊዶ ኣቲን ፆሲ ኢዛ ማሪዴስ። ታ ካሴ ሙዞቲዛይሳ ቦላ ሃራ ሙዞይ ጉጄቶንታ ማላ ታናካ ማዲዴስ። ሄሳ ጊሽ ኢንቴ ኢዛ ቤይዲ ኡፋዬታና ማላኔ ታካ ሂርጋፌ ሼምፓና ማላ ኣሞታይስ። ኢንቴ ኢዛ ኬሂ ኡፋይሳን ሞኪ ኤኪቴ። ኢዛ ማላ ኣሳታካ ቦንቺቴ። ኢንቴ ታና ማታን ዲዲ ኦꬂ ማዳናስ ዳንዳዮንታ ጊሽ ኢዚ ባ ሼምፖስ ሚሼቶንታ ታና ኦꬂ ማዲዲ ኪርስቶሳ ኦሶን ሃይቂሼ ኣቲዴስ። ታ ኢሻቶ! ሃይሳፌ ሃራ ታ ኢንቴና ጊዛይ ጎዳን ኡፋዬቲቴ። ሃዒካ ዛራዳ ኢዞ ታ ኢንቴስ ፃፊኮ ታና ሳሌꬄና። ኢንቴናካ ጎዓና። ሄይታ ካና ማላ ሁስካቲዛይታፔ፥ ኢታ ኦꬂዛይታፔኔ ኣሳስ ሜቄꬅ ሜንꬂዛ ኣሳታፔ ናጌቲቴ። ቱሙ ቃፃሬቲዳይቲ፥ ፆሴ ዎሲዛይቲ፥ ዬሱስ ኪርስቶሳን ጬቂዛይቲ፥ ኣሾን ጬቄቶንታይቲኔ ኣሾንካ ኣማኔቶንታይቲ ኑና። ታ ጬቃና ኮይኮ ኣሾ ባጋራ ጬቃና ሚሺ ታስካ ዴስ። ኦናስካ ኣሾን ጬቂዛ ሚሺ ዲዛ ሚሳቲኮ ታ ኢዛፔ ኣꬋይስ። ታኒ ዬሌቲዳ ኦስፑንꬃ ጋላስ ቃፃሬታዲስ። ታ ኢስራዔሌ ዜሬꬂኔ ቢኒያሜ ኮቻፌ ዬሌታዲስ። ኢብራዌታ ጊዶን ታካ ኣዳ ኢብራዌ። ዎጋ ባጋራ ኦይቺዛዴይ ዲኮ ታ ካሴ ፋርሳዌ። ሙሴ ዎጋስ ዚልዔቲዛይሳ ጊዲኮ ታኒ ካሴ ዎሳ ኬꬃ ጎዲዛዴ። ዎጋ ናጎን ቤቲዛ ፂሎቴꬂ ጊዲኮ ካሴ ታ ቦላ ኢሲ ዎሶይካ ዴና። ጊዶ ኣቲን ታስ ጎዓ ጊዲዳይሳ ኡባ ኪርስቶሳ ጊሽ ጋዳ ጎዓይ ባይንዳ ሚሻ ማላ ቆዳዲስ። ሄሳፌካ ታ ጎዳ ዬሱስ ኪርስቶሳ ኤሮፔ ኣꬊዛይ ሃራይ ኣይኮይካ ባይንዳይሳ ታ ኣማኒዛ ጊሽ ኡባካ ጮ ሜላ ጎዓይ ባይንዳ ሚሻ ማላ ቆዳዲስ። ታኒ ኢዛ ጊሽ ጋዳ ኡባካ ኣጋዲስ። ታ ኪርስቶሳ ዴማና ጋዳ ኡባ ሚሻካ ዎራ ዎꬊዳ ኢታ ሚሻ ማላ ቆዳዲስ። ታኒ ሄሳꬆ ኦꬂዛ ጋሶይ ካሴ ሙሴ ዎጋን ታስ ዲዛ ፂሎቴꬃ ኣጋዳ ኣማኖን ቤቲዛ ፆሳ ፂሎቴꬅ ኪርስቶሳን ኣማናዳ ዴማናሲኔ ታ ኢዛራ ኢሲፌ ዴዓናሳ። ኪርስቶሳኔ ኢዚ ሃይቂ ዴንዲዳ ዴንꬃ ዎልቃ ታ ኤራና ማላ ኢዛ ዋዬካ ታ ኢዛራ ጊሼታና ማላኔ ሃይቆንካ ታ ኢዛ ሚሳታና ማላ ኣሞታይስ። ሄሳꬆካ ታ ሃይቃ ዴንዲዳፔ ጉዬ ሜርናስ ዳናስ ኮያይስ ታ ሃይሳ ዉርሳ ዴማዲስ ዎይኮ ሃይሳꬆ ሃናዲስ ጉስ ጊዴና። ጊዶ ኣቲን ዬሱስ ኪርስቶሲ ታና ኤራይስ ሂስቲዲ ታስ ጊጊሲዳ ዎይቶ ኤካናስ ሚና ዎꬃ ቦላ ዳይስ። ታ ኢሻቶ! ታ ሃዒ ታ ኮዪዛይሳካ ኦይኪዳ ማላ ቆዲኬ። ጊዶ ኣቲን ታ ኢሲ ሚሺ ኦꬃና። ታፔ ጉዬራ ዲዛይሳ ኣጋ ኣጋዳ ታፔ ሲንꬃን ዲዛይሳ ኦይካናስ ዛራꬋይስ። ፆሲ ታና ዬሱስ ኪርስቶሳ ባጋራ ፑዴ ፄይጊዳ ጊሽ ዎይቶ ጋካ ኤካናስ ኤሌላይስ። ሄሳ ጊሽ ኑኒ ኣማኖን ሚኒዳይቲ ዉሪካ ሃኒዛ ዮዖ ዉርሲ ሄሳꬆ ፄላናስ ቤሴስ። ኢሲ ኢሲ ዱማ ቆፋይ ኢንቴስ ዲኮ ሄሳካ ፆሲ ኢንቴስ ቆንጪሳና። ጊዲኮካ ኑ ሃዒ ጋኪ ኤሪዳዛን ኣኔ ሲሜሬቶስ። ታ ኢሻቶ! ኣኔ ኢንቴ ታ ሃኒዛ ማላ ታና ካሊቴኔ ሃራታራካ ኢሲፌ ዴዒቴ። ኑ ኑና ኢንቴስ ሌሚሶ ሂስቲ ቤሲዳ ማላ ዲዛ ኣሳታ ዎዝናን ዎꬂቴ። ጋሶይካ ሃይሳፌ ካሴ ታ ኢንቴስ ዛራ ዛራ ዮቲዳ ማላ ሃዒካ ዛራዳ ኣፉንꬃራ ኢንቴስ ዮታይስ። ዳሮቲ ኪርስቶሳ ማስቃሌስ ሞርኬ ጊዲዲ ሲሜሬቴቴስ። ኢስታ ዉርሴꬅ ꬋዮ። ኢስታ ኡሎይ ኢስታ ፆሳ። ኢስታስ ካዉሻቴꬃይ ኢስታስ ቦንቾ። ኢስታ ዎዝናይ ሼምፒዳይ ሃ ቢታ ዱሳና። ኑ ዴሬይ ጊዲኮ ሳሎና። ሄፔ ቡሮ ያናይሳ ኑና ኣሺዳ ጎዳ ዬሱስ ኪርስቶሳ ዩሳ ላሞቴꬃን ናጎን ዶስ። ኢዚካ ዉርሲ ባፔ ጋርሳን ሃሪሳና ዳንዳዪዛ ባ ዎልቃና፥ ዳቡራንቻ ጊዲዳ ኑ ኣሳቴꬅ ቦንቼቲዳ ባ ኣሳቴꬅ ሚሳቲሲዲ ላማና። ታ ኢንቴና ዶሲዛይቶ! ታ ኢንቴና ላሞቲዛይቶ! ታስ ኡፋይሲኔ ኦሶ ዛዉዴ ጊዲዳ ታ ኢሻቶ! ጎዳን ሚኒ ኤቂቴ። ኢንቴ ቆፋይ ጎዳን ኢሲኖ ጊዳና ማላ ኤዎዲያኔ ሲንፄኬይ ባ ጋርሳን ሲቄታና ማላ ታ ኢስታ ዎሳይስ። ኤሮ! ኔኖ! ታናራ ኢሲፌ ኣማኔቲዳ ኦሳንቻዞ፥ ሚሺራቾ ቃላ ዮቶስ ታናራኔ ቃላሜንፆሳራ ቃሴካ ኢስታ ሱንꬃይ ዴዖ ማፃፌን ፃፌቲዳ ሃንኮ ታናራ ኦሶ ላጌታራ ኢሲፌ ዋዪዳይታ ሄ ማጫሳታ ኔ ማዳና ማላ ታ ኔና ዎሳይስ። ኣይ ዎዴካ ጎዳን ኡፋዬቲቴ። ቃሴካ ታ ኢንቴና ኡፋዬቲቴ ጋይስ። ኢንቴ ኪያቴꬂ ኣሳ ኡባ ኣቻን ኤሬቶ። ጎዳይ ያና ማቲዴስ። ሃኒዛ ዮዖን ኡባን ጋላታን፥ ዎሳኒኔ ጋናቴꬃን ፆሳ ሲንꬂ ሺቂቴ ኣቲን ኣይ ሚሻንካ ሂርጎፍቴ። ኣሳ ቆፋፔ ቦላራ ዲዛ ፆሳ ሳሮቴꬂ ኢንቴ ዎዝናኔ ኢንቴ ቆፋ ዉርሲ ዬሱስ ኪርስቶሳን ናጌስ። ዉርሴꬃ ቦላ ታ ኢሻቶ! ቱሙ ጊዲዳ ዮዖ ዉርሲ፥ ቦንቾ ጊዲዳ ዮዖ ዉርሲ፥ ኣዳ ጊዲዳ ዮዖ ዉርሲ፥ ጌሺ ጊዲዳ ዮዖ ዉርሲ፥ ዶሴቲዳ ሚሺ ዉርሲ፥ ሎዖ ጊዲዳ ዮዖ ዉርሲ፥ ሎዔቴꬂ ጊዲንካ ጋላታካ ሃይታንታ ሚሳቲዛዝ ዉርሲ ቆፒቴ። ኢንቴ ታፔ ታማሪዳይሳ ዎይኮ ኢንቴ ታፔ ኤኪዳይሳኔ ሲዪዳይሳ ዎይኮ ቤይዳይሳ ኣይ ጊዲኮካ ዉርሲ ኦꬂቴ። ጎዳይ ኢንቴናራ ጊዳና። ዳሮ ዎዴፔ ጉዬ ኦራꬃ ቆፋራ ኢንቴ ታ ጊሽ ቆፎ ኦይኪዴታ። ሄሲካ ጎዳ ባጋራ ታና ኬሂ ኡፋይሴስ። ቱሙካ ኢንቴ ታስ ቆፎ ኣጊቤይኬታሺን ኢንቴ ቆፒዳ ማላ ኦꬃናስ ኢንቴስ ሃኖ ኢፂዴስ። ታኒ ሄሳ ጊዛይ ታና ሜቲዳ ጊሽ ጊዴና። ጋሶይካ ታ ኣይ ሃኒኮካ “ዲዛይሲ ታስ ጊዳና” ጉስ ታማራዲስ። ፓጬካ ታ ኤራይስ፤ ዴማዳካ ኤራይስ፤ ታ ጋፋዳካ፥ ካላዳካ ኤራይስ፤ ዲንካ ꬋዪንካ ኤራይስ፤ ኣይ ጊዲኮካ ታስ ዲዛይ ታስ ጊዳና ጉሳ ፁራ ታ ሎዔꬃ ኤራይስ። ታስ ዎልቃ ኢሚዛ ኪርስቶሳን ታኒ ኡባ ሚሼ ኦꬃናስ ዳንዳያይስ። ጊዲኮካ ኢንቴ ታና ታ ዋዬን ማዲዳ ጊሽ ሎዖ ኦꬂዴታ። ኢንቴ ፒሊጲሲዮሴ ኣሳቲ ሄሳፌ ቦላራ ኢንቴ ኤሪዛይ ኮይሮ ሚሺራቾ ቃላ ኢንቴ ኤኪዳ ዎዴ ታኒ ማቂዶኒያፔ ዴንዳሼ ኢንቴፌ ኣቲን ጌዴ ኢሚዲካ ሃ ኤኪዲካ ማዴቲዲኔ ማዲዲ ጊዛ ዎሳ ኬꬂ ታስ ዴና። ሃራይ ኣቶ ሺን ታ ካሴ ታሶሎንቄን ዲዛ ዎዴካ ታኒ ሜቶቲን ኢንቴ ዛሪ ዛሪ ታስ ማዶ ዬዲዴታ። ታ ሄሳ ጊዛይ ኢሚዳ ጊሽ ኢንቴስ ኣንጆይ ዳራና ማላ ጋዳ ኣቲን ታ ኢንቴፌ ማዶ ኤካናስ ኣሞታዳ ጊዴና። ታስ ኮሺዛይሳኔ ታና ኮሺዛይሳፌካ ቦላራ ኤካዲስ። ኢንቴ ታስ ዬዲዳ ማዶ ሚሻ ኣፍሮዲፆ ኩሼፔ ኤኪን ታ ፓጬይ ኩሚዴስ። ሃይሲ ዳሮፔ ፆሳ ኣቻን ኤኬቲዳ ዳሮ ሎዖ ሳዊዛ ያርሾ ማላ። ፆሲ ባ ዱሬቴꬃ ጊና ኢንቴና ኮሺዛይሳ ጎዳ ዬሱስ ኪርስቶሳ ባጋራ ኢንቴስ ኩንꬃና። ኑ ኣዋሲኔ ኑ ፆሳስ ሜርናፔ ሜርናስ ቦንቾይ ጊዶ። ኣሚን። ኣማኒዛ ኣሳ ኡባ ዬሱስ ኪርስቶሳ ሱንꬃን ሳሮ ጊቴ። ታናራ ዲዛ ኢሻቲ ዉሪካ ኢንቴና ሳሮ ጌቴስ። ኣማኒዛይቲ ዉሪ ሃራፔካ ቄሳሬሶ ኣሳፔ ኣማኒዛይቲ ዉሪካ ኢንቴና ሳሮ ጌቴስ። ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ። ኣሚን። ፆሳ ሼኔን ዬሱስ ኪርስቶሳን ኪቴቲዳ ጳዉሎሳፔኔ ኑ ኢሻ ፂምቶሳፔ፥ ቆላሲያሴን ዲዛ ኪርስቶሳን ዱማቲዳይታሲኔ ኣማኔቲዳ ኢሻታስ ኑ ኣዋ ፆሳፌ ሳሮቴꬂኔ ኪያቴꬅ ኢንቴስ ጊዶ። ኑ ኢንቴ ጊሽ ዎሲዛ ኡባ ጋላስ ኑ ጎዳ ዬሱስ ኪርስቶሳ ኣዋ ፆሳ ጋላቶስ። ጋሶይካ ኢንቴስ ዬሱስ ኪርስቶሳን ዲዛ ኣማኖኒኔ ኣማኒዛ ኣሳ ኢንቴ ዉርሲ ሲቂዛይሳ ኑ ሲዪዳ ጊሻሳ። ሄሲ ዉሪካ ሃኒዳይ ሳሎን ኢንቴስ ጊጌቲዳ ሂዶታፔ ዴንዲዳይሳና። ሄሳ ሄ ሂዶታ ጊሽ ሚሺራቾ ቃላ ኢንቴ ካሴቲዲ ሲዪዴታ። ሄሲካ ሄ ኢንቴኮ ጋኪዴስ። ሄሳ ሚሺራቾ ቃላ ኢንቴ ሲዮሳፔኔ ፆሳ ኪያቴꬃ ቱማቴꬃ ኢንቴ ኤሮ ጋላሳፌ ሃ ሲሚን ኣላሜ ዩሾን ኢዚ ኦꬂሼ ዲዛይሳ ማላ ኢንቴ ኣቻን ኣይፌ ኣይፊሼኔ ዲጪሼ ዴስ። ሄሳካ ሃዒ ኑ ጊሽ ጊዲዲ ኪርስቶሳስ ኣማኔቲዳ ኦሳንቻ ጊዲዳይሲኔ ኑናራ ኢሲፌ ኦꬂዛኔ ሲቂዛ ኤጳፒራይ ኢንቴና ታማርሲዴስ። ቃሴካ ኢዚ ኢንቴናን ዲዛ ኣያና ሲቆቴꬃ ኑስ ዮቲዴስ። ኑ ቃሴ ሄሳ ሲዮሳፔ ሃ ሲሚን ኢንቴ ፆሳ ሼኔ ኤራቴꬃኒኔ ኣኬካን ኢንቴና ኩንꬃና ማላ ኢንቴ ጊሽ ዎሳ ቃንፂቤኮ። ሄሳꬆካ ጎዳስ ቤሲዛ ዱስ ዳና ማላ ኢንቴ ኢዛ ፖሊ ኡፋይሳና ማላ ሎዖ ኦሶ ኡባን ኣይፌ ኢማና ማላኔ ፆሴ ኤሮን ዲጪ ዲጪ ባና ማላ ኑ ኢንቴስ ዎሶስ። ጎዳይ ባ ጊታ ዎልቃን ባ ሚኖቴꬅ ኡባ ኢንቴስ ኢሞ፤ ዉርሲካ ኢንቴ ዳንዳያና ማላኔ ኡፋይሳን ጊጌቲዳይታ ጊዳና ማላ ኢንቴና ኢዚ ማዶ። ኣማኒዛይቲ ላቲዛሶ ፖዖ ካዎቴꬅ ላቲዛይታ ኑ ጊዳና ማላ ኑና ጋꬂዳ ኑ ኣዋ ኢንቴ ጋላታናሳ። ኢዚ ኑና ꬉማን ሃሬቴꬃፌ ኣሺዲ ጌዴ ባ ዶሲዛ ናዛ ካዎቴꬃን ኑና ፒንꬂዴስ። ኑ ኢዛን ዎዜቲዲ ናጋራፔ ማሬቲዶስ። ኪርስቶሲ ኣይፌን ቤቶንታ ፆሳስ ቱሙ ሌሚሶ፤ ሜꬌቴꬃ ኡባፌ ጊታኔ ባይራ። ሜꬌቴꬅ ዉሪ ኢዛን ሜꬌቲዴስ። ሳሎኒኔ ሳዓን ዲዛይቲ፥ ኣይፌን ቤቲዛይቲኔ ቤቶንታይታ ጊዲንካ፥ ዎልቃማታ ጊዲንካ፥ ሃሪዛይታ ጊዲንካ ዎይኮ ጎዳቴꬅ ዲዛይቲ ሃኒዳይ ዉሪካ ኢዛን ኢዛስ ሜꬌቲዴስ። ኢዚ ኡባፌ ካሴ ዴስ። ዉሪካ ኢሲ ቦላ ኦይኬቲ ሚኒዳይ ኢዛና። ኢዚ ባ ኣሳቴꬅ ጊዲዳ ዎሳ ኬꬃይስ ሁዔ። ኡባስ ቦላ ጊዳና ማላ ኢዚ ሃይቂዳ ኣሳ ኡባፌ ኮይሮ ዴንዲዴስ። ሄሲካ ሃኒዳይ ኩሜꬃ ፆሳቴꬃይ ኢዛ ናዛን ዴዓና ማላ ፆሳ ኣዋ ሼኔ ጊዲዳ ጊሻሳ። ማስቃሌ ቦላ ኢዛፔ ጉኪዳ ሱꬃን ሳሮቴꬅ ሜꬊዲ ቢታ ቦላ ጊዲን ሳሎ ቦላ ዲዛይሳ ዉርሲ ኢዛ ባጋራ ባናራ ማቃዪንꬂዴስ። ኢንቴ ኢታ ኣማሌ ጋሶን ካሴ ኢንቴ ፆሳፌ ሻኬቲዲ ኢንቴ ኢንቴ ቆፋራ ኢዛስ ሞርኬታኮሺን። ሃዒ ቃሴ ኢንቴ ቦላ ባላይኔ ዎሶይ ባይንዳ ጌሻታ ኦꬂዲ ኢንቴና ባ ሲንꬅ ሺሻናስ ኪርስቶሳ ኣሾ ሃይቆ ባጋራ ፆሲ ኢንቴና ባናራ ማቃዪንꬂዴስ። ሄሲካ ሃናናይ ኢንቴ ኣማኖን ፃጲዲኔ ጊጌቲዲ ኢንቴ ኢንቴ ኣማኖን ኤኪዳ ሚሺራቾ ቃላፔ ቃፆንታ ሚኒ ኤቂኮና። ኢንቴሲኔ ሳሎ ጉፋንꬆን ዲዛ ሜꬌቴꬃስ ሳባኬቲዳ ሚሺራቾ ቃላይ ሄሳ። ታ ጳዉሎሲካ ሃይሳ ሃ ሚሺራቾ ቃላስ ኦሳንቻ ጊዳዲስ። ታ ኢንቴ ጊሽ ዋዬ ቤይዳይሲ ሃዒካ ታና ኡፋይሴስ። ኪርስቶሲ ባ ኣሳቴꬅ፤ ሄሲካ ዎሳ ኬꬃ ጊሽ ኢዚ ኤኪዳ ዋዬዛፔ ኤኪሺን ፓጪዳይ ዲኮ ታኒ ታ ኣሾን ኩንꬃና። ፆሳ ቃላ ታ ኢንቴስ ፓጬይ ባይንዳ ጋꬃና ማላ ታስ ፆሳፌ ኢሜቲዳ ሃዳራ ማላ ታ ዎሳ ኬꬃ ኦሳንቻ ጊዳዲስ። ሃ ቃላይ ቤኒ ዎዴፔኔ ካሴ ዬሌቴꬃፌ ጌሚዲ ፁራ ጊዲ ጋምዒዴስ። ሃዒ ጊዲኮ ኣማኒዛይታስ ኡባስ ቆንጪዴስ። ፆሲ ባ ኣሳስ ቆንጪሳናስ ኮይዳ ፁራይ ኢዛ ቦንቾ ዱሬቴꬃይ ኣይዛቤ ጊዲዳ ኢንቴ ጊዶን ኣይ ማላ ጊታኮኔ ቤሳናሳ። ኢዚካ ኢዛ ቦንቾ ሂዶታ ጊዲዳ ኢንቴ ጊዶን ዲዛ ኪርስቶሳ። ኑካ ኢሲ ኢሲ ኣስ ኪርስቶሳስ ኩሜꬃ ኣስ ሂስቲ ሺሻናስ ዳንዳያና ማላ ኣስ ዉርሲ ሂላራ ዞሪሼኔ ታማርሲሼ ኪርስቶሳ ጊሽ ሳባኮስ። ታካ ታ ጋርሳን ሚንꬃ ኦꬂዛ ኢዛ ዎልቃን ዉርሳ ባፄታሼ ሄ ቆፋ ፖላናስ ዳፌታይስ። ኢንቴ ጊሺኔ ሎዶቂያን ዲዛይታኔ ሄሳꬆካ ታና ባ ኣይፌራ ቤዪ ኤሮንታ ኣሳ ኡባስ ታ ኣይ ማላ ባፄቲኮኔ ኢንቴ ኤራና ማላ ታ ኮያይስ። ቃሴካ ኢስታ ዎዝናይ ሚናና ማላኔ ኢስቲ ሲቆቴꬃን ኢሶይ ኢሳራ ኦይኬታና ማላ ኩሜꬅ ጊዲዳይሳ ዩሺ ቆፒ ኤሮ ዱሬቴꬅ ዴሚዲ ፆሳ ፁራ ጊዲዳ ኪርስቶሳ ኢስቲ ኤራና ማላ ታ ዳፌታይስ። ቆታን ዲዛ ጪንጫቴꬂኔ ኤራቴꬃ ሃሮይ ዉሪካ ቤቲዛይ ኪርስቶሳ ኣቻና። ኦኒካ ኢንቴና ዱና ማልዔꬆን ባሌꬆንታ ማላ ታ ኢንቴስ ዮታይስ። ታ ኢንቴፌ ኣሾ ኣይፌን ሃካ ዲኮካ ኣያናን ኢንቴናራ ኢሲፌ ዳይስ። ኢንቴ ዎጋራ ዲዛይሳኔ ኢንቴ ኪርስቶሳ ሎዔꬅ ኣማኒዛይሳ ቤያዳ ታ ዳሮ ኡፋዬታይስ። ሄሳ ጊሽ ኢንቴ ጎዳ ዬሱስ ኪርስቶሳ ኣማኒዳ ማላ ኢዛን ዴዒቴ። ኢንቴ ኢዛን ቶኬቲዲኔ ኬፄቲዲ ኢንቴ ታማሪዳ ማላ ኣማኖን ሚኒ ዳሮ ቲርፓ ጋላታ ኢዛስ ሺሺሼ ዲቴ። ኪርስቶሳን ፃጲዳዝ ጊዶንታ ኣሳ ዎጋኒኔ ጎዓይ ባይንዳ ሃ ኣላሜዛ ላፋ ዎጋን ኤቂዳ ኣሳ ኤራቴꬃኒኔ ጮ ሜላ ባሌꬆ ሃሳያን ኢንቴና ኦኒካ ዲዖንታ ማላ ናጌቲቴ። ጋሶይካ ኩሜꬃ ፆሳቴꬅ ኢዛ ኣሳቴꬃን ዴስ። ኢንቴካ ሃሪዛይታሲኔ ጎዳታ ኡባስ ሁዔ ጊዲዳ ኪርስቶሳን ኩሜꬅ ጊዲቴ። ኢንቴ ኢዛን ቃፃሬቲዴታ። ሄሲ ሄ ቃፃራዚካ ናጋራ ጊዲዳ ኣሾ ቆፋ ዲጋናስ ኪርስቶሳን ሃኒዳይሳ ኣቲን ኣሳ ኩሼን ሃኒቤና። ፂንቃታን ኢዛራ ኢሲፌ ሞጌቲዴታ። ኢዛ ሃይቆፔ ዴንꬂዳ ፆሳ ዎልቃን ኣማኒዲ ቃሴካ ኢዛራ ኢሲፌ ዴንዲዴታ። ኢንቴ ካሴ ኢንቴ ሞሮኒኔ ኢንቴ ኣሾ ናጋራ ሃኖቴꬃ ኢንቴፌ ዲጎንታ ኣጊዳ ጊሽ ሃይቂዳይታኮ ሺን ፆሲ ኢንቴና ኪርስቶሳ ባጋራ ፓꬂዴስ፤ ኢንቴ ናጋራካ ኡባ ኣቶ ጊዴስ። ካሴ ኑና ሞቲሼኔ ኑናራ ኤቄቲሼ ዲዛ ሙሴ ዎጋን ኣጮ ሞቶስ ፃፌቲዳይሳ ቁጪ ዲጊዴስ። ማስቃሌ ቦላ ቶርጊዲ ኑ ቦላፌ ዲጊዴስ። ሃላቃታኔ ጎዳቲዛይታ ጎዳቴꬅ ኢስታፌ ዎꬂ ኤኪዲኔ ማስቃሌ ቦላ ሃይቂዲ ፆኒ ዴንዲዲ ዲዔቲዳይታ ቆንጬን ዩሺ ቤሲዴስ። ሄሳ ጊሽ ሙሳን ዎይኮ ኡሻን፥ ኢሲፌ ቦንቾን ዎይኮ ኣጊና ፄሮኒኔ ሳምባታ ጋላስ ቦንቾ ጊሽ ኢንቴ ቦላ ኦኒካ ፒርዶፎ። ሄይቲ ዉሪካ ቡሮ ያና ሃኖታስ ኤሾታ ጊዲሺን ዋና ኣሳቴꬃይ ጊዲኮ ኪርስቶሳ። ቤሶንታ ኣሽኬቴꬂኔ ኪታንቻታስ ጎይኖ ዶሲዛ ኣሲ ኦኒካ ኢንቴና ꬉጲዲ ሜላ ኣሾንታ ማላ ናጌቲቴ። ሄሳ ማላ ኣሲ ባ ቤዪዳ ኣጉሞስ ዎጋይ ባይንዳ ባና ናሺሼ ሃዳ ኣሾ ቆፋን ኩሚዲ ኦቶሬቴስ። ሄሳ ማላ ኣሳስ ሁዔ ጊዲዳ ኪርስቶሳራ ኣይኮ ጋይቶቴꬂካ ዴና። ኩሜꬃ ኣሳቴꬅ ሻያኒኔ ኮልꬔ ጋꬂ ኦይꬄꬂ ዲቺዛ ሁዔይ ኪርስቶሳ። ፆሲ ኪርስቶሳ ኣሳቴꬅ ኩሜꬅ ዲቺዛይ ሄሳ ማላና። ሃይሳ ሃ ኣላሜዛ ዎጋስ ኢንቴ ኪርስቶሳራ ሃይቂዳይታ ጊዲኮ ሂስቲን ሃዒ ኣዛስ ሄ ዎጋስ ሃሬቴቲ? ኦይኮፋ፥ ላጫ ቤዮፓ፤ ቦቾፋ ጊዛይታ ማላ። ሃይቲ ዉሪ ኣሳ ኣዛዞኒኔ ኣሳ ቲሚርቴን ዎꬊዳ ዎጋታ ጊዲዳ ጊሽ ኦꬄቲዳፔ ጉዬ ጮ ꬋያናስ ዴቴስ። ሃ ኣዛዞቲ ባርካ ባፔ ሜꬊ ኤኪዳ ጎይኖ ቆፋይ ጮ ቤሶንታ ኣሽኬቴꬂኔ ባ ኣሳቴꬅ ናቂ ኦይꬃን ኢስታስ ቱሙ ኣꬎ ኤራቴꬅ ዲዛይታ ሚሳቴቴስ። ጊዶ ኣቲን ኣሾ ኣሞቴꬅ ሺሺ ኦይኪዛ ዎልቃይ ኢስታስ ባዋ። ሂስቲኮ ኢንቴ ኪርስቶሳራ ኢሲፌ ዴንዲዳይታ ጊዲኮ ኪርስቶሲ ፆሳ ኣቻን ኡቲዳሶን ፑዴን ዲዛ ሃኖቴꬃ ኮዪቴ። ኢንቴ ቆፋይ ፑዴ ቦላን ዲዛ ሚሻ ቦላ ጊዶ ኣቲን ሃ ቢታ ዮዖ ቦላ ጊዶፖ። ጋሶይካ ኢንቴ ሃይቂዴታኔ ኢንቴ ዴዖይካ ኪርስቶሳራ ፆሳ ኣቻን ቆቴቲዴስ። ኢንቴስ ዴዖ ጊዲዳ ኪርስቶሲ ቆንጪዛ ጋላስ ኢንቴካ ሄ ዎዴ ኢዛራ ኢሲፌ ቦንቾራ ቆንጫና። ሄሳ ጊሽ ኢንቴስ ቢታ ቦላ ዲዛ ኣሞቴꬅ ዲጊቴ። ሄይቲካ ላይማ፥ ቱናቴꬅ፥ ኣሾ ኣሞ፥ ኢታ ኣሞቴꬂኔ ኤቃስ ጎይኖ ማላ ጊዲዳ ጋጲጋጶ። ሄይታንታ ጋሶን ፆሳ ሃንቆይ ፆሳስ ኣዛዜቶንታይታ ቦላ ያና። ኢንቴካ ካሴ ዲዛ ዱሳን ሄ ሚሻታ ኦꬂዴታ። ሃዒ ጊዲኮ ሃንቆ፥ ዪሎ፥ ጫሼ፥ ዚጊርሲኔ ዬላሲዛ ሃሳያ ሄይታንታ ሚሳቲዛይታ ዉርሲ ዲጊቴ። ካሴ ጬጋ ኣሳቴꬅ ኢዛ ኦሶራ ጋꬂ ኢንቴፌ ቃሪ ዬጊዳ ጊሽ ኢንቴ ኢንቴ ጋርሳን ኢሶይ ኢሳራ ዎርዶ ሃሳዮፒቴ። ባና ሜꬊዳይሳ ሚሳታና ማላ ኤራን ኦራፂዳ ኦራꬃ ኣሳቴꬅ ማይዒዴታ። ሄን ጊሪኬ ኣስ ጊዲን ዎይኮ ዩሁዳ ኣስ ዎይኮ ቃፃሬቲዳይታ ዎይኮ ቃፃሬቶንታይታ ዎይኮ ታማሪዳይታኔ ታማሮንታይታ ዎይኮ ማሬቶንታይታ ዎይኮ ኣይሌ ዎይኮ ጎቃ ጌቴቲዛ ዱማቴꬂ ዴና። ኪርስቶሲ ሄይታንታ ኡባሳ። ቃሴ ኡባንካ ዴስ። ሄሳ ጊሽ ዱማ ጊዲዲ ዶሴቲዳይቶ፥ ኢንቴ ፆሳስ ዶሬቲዳይታ ጊዲዳ ማላ ሚሼቴꬂኔ ኪያቴꬅ፥ ኣሽኬቴꬅ፥ ቦንቾኔ ዳንዳያ ማይዒቴ። ኢንቴ ኢሶይ ኢሳ ዳንዳዪቴ፥ ኢንቴፌ ኢሳዴይ ኢሳዴ ቦላ ሚሼቲኮ ዮዖይካ ኢዛ ቦላ ዲኮ ኢሶይ ኢሳስ ኣቶ ኣቶ ጌቴቲቴ። ጎዳይካ ኢንቴስ ኣቶ ጊዳ ማላ ኢንቴካ ሃራ ኣሳስ ኣቶ ጊቴ። ሄሳ ኡባ ቦላ ኡባ ኩሜꬃ ኢሲፌቴꬃን ሺሺ ቃቺዛ ሲቆ ማይዒቴ። ኢንቴ ዉሪካ ኢሲ ኣሾ ጊዲዲ ሳሮቴꬃስ ፄይጌቲዳ ኪርስቶሳ ሳሮቴꬂ ኢንቴ ዎዝናን ካዎቶ። ኢንቴ ጋላቲዛይታ ጊዲቴ። ኪርስቶሳ ቃላይ ኢንቴናን ኩሜꬅ ጊዶ። ኢንቴ ኢንቴ ጋርሳን ኣꬎ ኤራቴꬃን ታማሪቴኔ ዞሬቲቴ፤ ማዛሙሬኒኔ ሳባን ኣያና ዬꬃን ጋላታራ ጋꬂ ኢንቴ ዎዝናራ ፆሳስ ዬፂቴ። ኢዛ ባጋራ ፆሳ ኣዋስ ጋላታ ሺሺሼ ቃላን ጊዲን ዎይኮ ኦሶን ኢንቴ ኦꬂዛይሳ ዉርሲ ጎዳ ዬሱሳ ሱንꬃን ኦꬂቴ። ማቼቶ! ጎዳ ኣቻን ኢንቴስ ቤሲዛ ሚሽ ጊዲዳ ጊሽ ኢንቴ ኣዚናታስ ኣዛዜቲቴ። ኣዚናቶ! ኢንቴ ኢንቴ ማቼታ ሲቂቴኔ ኢስታስ ሜንፄ ኢቶፒቴ። ናይቶ! ኢንቴ ጎዳ ኡፋይሳና ማላ ኢንቴ ኢንቴና ዬሊዳይታስ ኡባ ሚሻን ኣዛዜቲቴ። ኣዋቶ! ናይቲ ሂዶታ ቃንፆንታ ማላ ኢንቴ ናይታ ሃንቄꬆፍቴ። ኣይሌቶ! ኣስ ኡፋይሳሲኔ ጮ ኣይፌሶን ቤታናስ ጊዶንታ ሱሬ ዎዝናፔ ኢንቴ ጎዳስ ባቢቴ። ሃይሳ ቢታን ሃሪዛ ጎዳታስካ ሃኖ ኡባን ኣዛዜቲቴ። ኢንቴ ኦꬂዛ ሚሽ ዉርሲ ኣሳስ ጊዶንታ ጎዳስ ኦꬂዛ ማላ ታይቢዲ ኩሜꬃ ዎዝናፔ ኦꬂቴ። ኢንቴ ጎዳ ኣቻፌ ኢንቴ ኦሶ ማላ ኤካናስ ላታይ ዲዛይሳ ኢንቴ ኤሬታ። ኢንቴ ኦꬂዛይ ጎዳ ዬሱስ ኪርስቶሳሳ። ቆሆ ኦꬂዳዴይ ባ ኦꬂዳሪ ኩሼ ኤካና። ኢዛ ኣቻን ዱማ ማዶይ ዴና። ጎዳቶ! ኢንቴስ ሳሎን ጎዳይ ዲዛይሳ ኢንቴ ኤሪዛ ጊሽ ኢንቴስ ኦꬂዛይታስ ቱማኒኔ ሱሬቴꬃን ኦꬂቴ። ቤጊዲ ጋላታራ ጋꬂ ፓጬይ ባይንዳ ፆሳ ዎሲቴ። ታ ኢዛ ጊሽ ቃሼቲዳ ኪርስቶሳ ፁራ ኣዋጃናስ ዳንዳያና ማላ ፆሲ ኑስ ቃላ ዮታናስ ኦጌ ዶያና ማላ ኑ ጊሺካ ዎሲቴ። ቃሴካ ሃሳያናስ ቤሲዛ ቃላ ቆንጬን ታ ሃሳያና ማላ ታስ ዎሲቴ። ኣማኖንታ ኣሳታራ ኢንቴስ ዲዛ ሃኖቴꬃን ኣꬎ ኤራቴꬃን ሲሜሬቲቴ። ኢንቴስ ቤቲዳ ሎዖ ቃዳን ጎዔቲቴ። ኢሶስ ኢሳስ ኢንቴ ዛሮ ዎስቲ ኢማናኮኔ ኢንቴ ኤራና ማላ ኢንቴ ሃሳያይ ማፂኔራ ካፂዳ ካꬃ ማላ ማልዖ ጊዶ። ቲቂቆሲ ታ ዱሳ ጊሽ ዉርሲ ኢንቴስ ዮታና። ኢዚ ዳሮ ዶሴቲዳ ኢሻኔ ጎዳስ ታናራ ኢሲፌ ኦꬂዛ ኣማኔቲዳ ኦሳንቻ። ኑ ዱሳ ጊሽ ኢንቴ ኤራና ማላኔ ኢንቴ ዎዝና ሚንꬃና ማላ ታኒ ኢዛ ኢንቴኮ ኪታዲስ። ኢዚ ኢንቴ ባጋ ጊዲዲ ኣማኔቲዳዴኔ ዶሴቲዳዴ ጊዲዳ ኑ ኢሻ ኣናስሞሳራ ኢንቴኮ ኤራይስ። ኢስቲካ ሃን ዲዛ ሃኖዛ ዉርሲ ኢንቴስ ዮታና። ባርናባሳ ኣዋ ሚቼይ ና ማርቆሲኔ ታናራ ኢሲፌ ቃሼቲዳ ኣርፂሮኮሲ ኢንቴና ሳሮ ጌቴስ። ማርቆሳ ጊሽ ኢንቴ ኣይ ኦꬃናኮኔ ካሴ ኢንቴና ታ ቆፊሳ ዎꬂዳ ማላ ኢዚ ኢንቴኮ ጋኪሺን ሞኪ ኤኪቴ። ኢዮስፆሳ ጌቴቲዛ ኢያሶይካ ኢንቴና ሳሮ ጌስ። ኣይሁዳ ኣሳ ጊዶፌ ፆሳ ካዎቴꬃስ ታናራ ኦꬂዛይቲ ሃይታንታ ፃላ። ኢስቲ ታና ሚንꬄꬂዳ። ኢንቴ ባጋፌ ጊዲዳ ዬሱስ ኪርስቶሳ ኦሳንቻ ኤጳፒራይ ኢንቴና ሳሮ ጌስ። ኢዚካ ኢንቴና ኣያና ዱሳን ሎዔꬂ ሚኒዲኔ ሙሌራ ዎፑ ጊዲ ፆሳ ሼኔን ሚኒ ኤቃና ማላ ኡባ ዎዴ ኢንቴ ጊሽ ዎሳን ባፄቴስ። ቃሴካ ኢንቴ ጊሽ ሄሳꬆካ ሎዶቂያኒኔ ኢያርፖሊሴ ካታማን ዲዛይታስ ኢዚ ፓጬይ ባይንዳ ኦꬂዛይሳ ታ ኢዛስ ማርካታይስ። ዳሮ ዶሴቲዳ ኣኪሜ ሉቃሲኔ ዴማሲ ኢንቴና ሳሮ ጌቴስ። ሎዶቂያን ዲዛ ኑ ኢሻታስ፥ ኒምፑሲኔ ኢዚ ኬꬃን ሺቂዛ ኣማኒዛ ኣሳታስ ታ ሳሮካ ዮቲቴ። ሃና ታ ኪታያ ኢንቴስ ናባቤቲዳ ማላ ቃሴካ ሎዶቂያን ዲዛ ዎሳ ኬꬃይን ናባቤታና ማላ ኦꬂቴ። ኢንቴካ ቃሴ ሎዶቂያፔ ኢንቴስ ኪቴቲዳ ኪታ ናባቢቴ። ኣኪሪጳስ “ኔኒ ጎዳፔ ኤኪዳ ኦሶዛ ዉርሴꬅ ጋꬃናስ ሚና” ጊቴ። ሃይሳ ሳሮካ ታኒ ጳዉሎሲ ታ ኩሼራ ፃፋዲስ። ታ ቃሼታ ዲዛይሳ ዶጎፒቴ። ፆሳ ኪያቴꬂ ኢንቴናራ ጊዶ። ጳዉሎሳፔ፥ ሲልዋኖሴፔኔ ፂምቶሳፔ፤ ፆሳ ኣዋሲኔ ጎዳ ዬሱስ ኪርስቶሳይታ ጊዲዳ ታሶሎንቄን ዲዛ ኣማኒዛ ኣሳስ ኑ ኣዋ ፆሳፌኔ ጎዳ ዬሱስ ኪርስቶሳ ኪያቴꬂኔ ሳሮቴꬅ ኢንቴስ ጊዶ። ኑ ኢንቴና ኑ ዎሳን ቆፒሼ ኡባ ዎዴ ፆሳ ኢንቴ ጊሽ ጋላቶስ። ኣማኖኒኔ ሚኖ ሲቆቴꬃን ኢንቴ ኦꬂዳ ኦሶ ጊሽ ጎዳ ዬሱስ ኪርስቶሳ ቦላ ዲዛ ኢንቴ ሚኖ ኡፋይሳን ቤቲዳ ኢንቴ ሚኖቴꬃ ጊሽ ኑ ጎዳ ፆሳ፥ ኑ ኣዋ ሲንꬃን ኡባ ጋላስ ኢንቴ ጊሽ ቆፖስ። ፆሳን ዶሴቲዳ ኑ ኢሻቶ! ኢዚ ኢንቴና ዶሪዳይሳ ኑ ኤሮስ። ጋሶይካ ሚሺራቾ ቃላይ ኢንቴኮ ዪዳይ ዎልቃራ ፂሎ ኣያናኒኔ ሎዔꬂ ሻኪ ኤሪን ኣቲን ጮ ቃላ ፃላን ጊዴና፤ ቃሴካ ኑ ኢንቴ ጊሽ ጊዲ ዋኒ ዴዒዳኮኔ ኢንቴ ኤሬታ። ሃዒ ኢንቴ ኑናኔ ጎዳ ሚሳቲዴታ። ኢንቴ ቦላ ኣይ ሜቶይ ጋኪዳ ጊዲኮካ ፂሎ ኣያና ኡፋይሳ ቃላ ኢንቴ ኤኪዴታ። ሄሳፌ ዴንዲዳይሳን ኢንቴ ማቂዶኒያኒኔ ኣካያን ኣማኒዛ ኣሳ ኡባስ ሎዖ ሌሚሶታ ጊዲዴታ። ጎዳ ቃላይ ኢንቴፌ ኬዚዲ ማቂዶኒያኒኔ ኣካያን ሲዬቴꬅ ፃላ ጊዶንታ ኢንቴስ ፆሳ ቦላ ዲዛ ኣማኖይ ኡባሶን ኤሬቲዴስ፤ ሄሳ ጊሽ ኑ ኢንቴስ ዮታናስ ኣይኮካ ኮሼና። ኢንቴ ኑና ዎስቲ ሞኪ ኤኪዳኮኔ ዴዖን ዲዛ ቱሙ ፆሳስ ኦꬃናስ ኢንቴ ኤቃታፔ ፆሳኮ ዋኒ ሲሚዳኮ ኣሳይ ኢንቴ ጊሽ ሃሳዬስ። ቃሴካ ፆሲ ሃይቆፔ ዴንꬂዳይሳ ቡሮ ያና ሃንቆፌ ኑና ኣሻና ሳሎፔ ያና ፆሳ ና ዬሱሳ ዩሳ ኢንቴ ዎስቲ ናጊዛኮኔ ኣሳይ ሃሳዬስ። ኑ ኢሻቶ! ኑ ኢንቴኮን ጋምዒዳ ጋምዖይ ጮ ሜላ ጊዶንታይሳ ኢንቴካ ኤሬታ። ኢንቴካ ኤሪዛይሳ ማላ ሃይሳፌ ካሴ ፒሊጲሲዮሴን ኑ ዋዬኔ ሜቶ ቤይዶሲኔ ጫዬቲዶስ፤ ጊዶ ኣቲን ኣይኔ ሚኖ ዋዬይ ኑና ጋኪኮካ ፆሳ ሚሺራቾ ቃላ ኢንቴስ ዮታናስ ኑ ጎዳፔ ፃላቴꬅ ዴሚዶስ። ኑ ኢንቴና ዞሪዳ ዞሬይ ኢታ ቆፋራ ዎይኮ ኢንቴና ባሌꬃናስ ኮይዲ ጊዴና። ጊዶ ኣቲን ኑ ሚሺራቾ ቃላ ሃዳራ ኤካናስ ዳንዳዪዛ ኣሳታ ማላ ፆሲ ኑና ቆዲዳ ጊሽ ኑ ሃሳዮስ፤ ሄሳካ ኑ ኦꬂዛይ ኑ ዎዝና ፓጪ ኤሪዛ ፆሳ ኡፋይሳናስ ኣቲን ኣስ ኡፋይሳናስ ጊዲ ጊዴና። ኑ ሙሌካ ባሌꬆ ቃላ ዮቲቤኮ ዎይኮ ኑ ኡዜቴꬅ ካማናስ ጊዲ ባሌꬆ ሃኖ ኑ ሃኖታይሳ ኢንቴ ኤሬታ። ሃይሳስካ ኑ ማርካይ ፆሳ። ኢንቴፌ ጊዲን ዎይኮ ሃራታፔ ኦናፔካ ኣሳፔ ኢሜቲዛ ቦንቾ ኑ ኮይቤኮ። ኑ ኪርስቶሲ ኪቲዳይታ ጊዲዳ ጊሽ ኢንቴስ ቶሆ ጊዳናስ ዳንዳዮስ፤ ጊዶ ኣቲን ኣያ ባ ናይታ ዲቺዛ ማላ ኑካ ኢንቴ ጊዶን ኣሽኬቴꬃን ሲሜሬቲዶስ። ፆሳ ቃላ ፃላ ጊዶንታ ዲሺን ኑ ሼምፖካ ኢንቴ ጊሽ ኡፋይሳን ኢማና ጋካናስ ኢንቴና ሲቂዶስ። ጋሶይካ ኑ ኢንቴና ዳሮ ሲቂዳ ጊሻሳ። ኑ ኢሻቶ! ኑ ዳፌቴꬃኔ ኑ ዳቡራ ኢንቴ ኤሬታ፤ ኦናስካ ቶሆ ጊዶንታ ማላ ቃማኔ ጋላስ ኑስ ኦꬂሼ ሚሺራቾ ቃላ ኢንቴስ ዮቲዶስ። ኑ ኢንቴናራ ኣማኒዛይታራ ዲዛ ዎዴ ፂሎቴꬃኒኔ ጌሻቴꬃን ቃሴካ ዎሶይ ባይንዳ ኑ ዋኒ ዴዒዳኮኔ ኢንቴካ ፆሲካ ኑስ ማርካ። ኣዋይ ባ ናይታስ ሃኒዛ ማላ ኑካ ኢንቴስ ኢሳስ ኢሳስ ኣይ ሃኒዳኮኔ ኢንቴ ኤሬታ። ኢንቴ ኢንቴና ባ ካዎቴꬃሲኔ ባ ቦንቾስ ፄይጊዳ ፆሳስ ቤሲዛ ማላ ኢንቴ ዳና ማላ ኑ ኢንቴና ሚንꬂዶስ፤ ሎዔꬂ ዞሪዶሲኔ ሃዳራ ጊዶስ። ኢንቴ ኑፔ ሲዪዳ ፆሳ ቃላ ኤኪዳ ዎዴ ኣማኒዛ ኢንቴ ኣቻን ቱሙ ኦꬂዛ ፆሳ ቃላ ማላ ኤኪዴታ ኣቲን ጮ ኣሳ ቃላ ማላ ኢንቴ ኤኮንታ ኣጊዳ ጊሽ ኑ ፆሳ ቃንፆይ ባይንዳ ጋላቶስ። ኑ ኢሻቶ! ዩሁዳ ቢታን ዬሱስ ኪርስቶሳ ኣማኒዛ ፆሳ ዎሳ ኬꬃታ ሚሳቲዴታ፤ ኢስቲ ኣይሁዳታፔ ሜቶኔ ዋዬ ኤኪዳ ማላ ኢንቴካ ኢንቴ ኣሳፔ ዋዬ ኤኪዴታ። ኢስቲ ጎዳ ዬሱሳኔ ካሴ ናቤታካ ዎꬊዳ፤ ኑናካ ጎዲዳ፤ ፆሳካ ኡፋይሲቤቴና፤ ኣሳ ኡባራ ኤቄቲዛይታ ጊዲዳ። ሄሲካ ኣይዛቤቲ ሲይዲ ኣታና ቃላ ኑ ኢስታስ ዮቶንታ ማላ ዲጋናሳ። ሄሳ ማላ ኦሶን ባ ናጋራ ኡባ ዎዴ ባ ቦላ ዉርሴꬅ ጋካናስ ጉጂ ጉጂ ቤቴስ፤ ፆሳ ሃንቆይካ ኢስታ ቦላ ዎꬊዴስ። ጊዲኮካ ኑ ኢሻቶ! ኑ ጉꬃ ዎዴስ ኢንቴፌ ኣያናን ጊዶንታ ኣሾን ሻኬቲኮካ ኢንቴ ላሞታይ ኑና ዎꬊዛ ጊሽ ኢንቴ ኣይፌሶ ቤያናስ ዳሮ ዳፌቴꬃን ዶስ። ኑ ኢንቴኮ ባናስ ዳሮ ላሞቲዶስ ሺን ሃራፔካ ታ ጳዉሎሲ ዳሮ ዎዴ ዳፌታዲስ ሺን ፃላዔይ ኑና ዲጊዴስ። ጎዳ ዬሱሲ ሃ ዪዛ ዎዴ ኢዛ ሲንꬃን ኑ ኣሞይ ዎይኮ ኑ ኡፋይሲ ዎይኮ ኑ ዛዉዴይ ኑስ ኢንቴፌ ሃራይ ኦኔ? ቱማፔካ ኑ ኡፋይሲኔ ኑ ቦንቾይ ኢንቴና። ሄሳ ጊሽ ኑስ ዳንዳዬቶንታ ኢፂን ሄ ዎዴ ኣቴናን ኑርካ ኑ ኣታናይሲ ኑስ ሎዖ ጊዲ ቤቲዴስ። ኢንቴና ኣማኖን ሚንꬃና ማላ ኑናራ ኣሳስ ኪርስቶሳ ሚሺራቾ ቃላ ዮቲዛ ፆሳ ኣሽካራ ጊዲዳ ፂምቶሳ ኢንቴኮ ዬዲዶስ። ሄሲካ ሃይሳ ፓጬዛን ኦኒካ ኣማኖፔ ቃንፆንታ ማላ፤ ኑካ ሃይሳስ ዶሬቲዳይሳ ኢንቴካ ኤሬታ። ኑ ቃሴ ኢንቴናራ ዲዛ ዎዴ ዋዬይ ኑ ቦላ ጋካናይሳ ካሴቲዲ ኢንቴስ ዮቲዶስ፤ ኢንቴ ኤሪዛ ማላካ ሃኒዴስ። ሄሳ ጊሽ ኣይኮካ ታ ጌንጬጪን ታስ ዳንዳዬቶንታ ኢፂዳ ጊሽ ኢንቴ ኣማኖ ጊሽ ኤራናስ ጋዳ ፂምቶሳ ኪታዲስ። ታ ሄሳ ኦꬂዳይ ኦኒ ኤሪዜ ፓጪዛዴይ ኢስታ ፓጪን ሃኒ ዎዴ ኑ ዳቡራይ ዉሪካ ሜላ ጊዶንታ ኣጌና ጋዳ ባቢዳ ጊሻሳ። ሃዒ ቃሴ ፂምቶሲ ኢንቴ ኣቻፌ ኑኮ ዪዲ ኢንቴ ኣማኖ ጊሺኔ ኢንቴ ሲቆቴꬃ ጊሽ ሎዖ ዎሬ ኑና ሲሲዴስ። ቃሴካ ኢንቴ ኡባ ዎዴ ኑና ሎዔꬂ ቆፒዛይሳኔ ኑካ ኢንቴና ቤያናስ ላሞቲዛ ማላ ኢንቴካ ኑና ቤያናስ ላሞቲዛይሳ ኑስ ዮቲዴስ። ሄሳ ጊሽ ኑ ኢሻቶ! ኑ ዲዛይ ዋዬኒኔ ሜቶ ጋርሳን ጊዲኮካ ኢንቴ ኣማኖ ጋሶን ኢንቴናን ሃዒ ኑ ሚኔቶስ። ኢንቴ ጎዳን ሚኒ ኤቂዳ ጊሽ ቱማፔ ሃዒ ኑ ፓፃ ዳና። ኢንቴ ጌዶን ኑ ፆሳ ሲንꬃን ኑ ዴሚዳ ኡፋይሳ ኡባ ጊሽ ፆሳ ኣይ ማላ ጋላታናስ ዳንዳዪዞኒ? ቃሴካ ኑ ኢንቴና ቤያናሲኔ ኢንቴ ኣማኖፔ ፓጪዳይሳ ኩንꬃናስ ኦማርሲኔ ጋላስ ኬሂ ዎሶስ። ሃዒካ ኑ ኢንቴኮ ባና ማላ ኑ ኣዋይ ፆሲ ጎዳ ዬሱስ ኪርስቶሲ ኦጌዛ ኢዚ ኑስ ሱሪሶ። ኑ ኢንቴና ሲቂዛ ማላ ኢንቴስ ኢንቴ ጋርሳን ዲዛ ሲቆኔ ኢንቴ ሃራታ ሲቂዛ ሲቆዛ ጎዳይ ዳርሶኔ ኬሂ ጉጆ። ኑ ጎዳ ዬሱስ ኪርስቶሲ ጌሻታ ኡባታራ ዪዛ ዎዴ ኑ ኣዋ ጎዳ ፆሳ ሲንꬃን ኢንቴ ዎሶይ ባይንዳይታኔ ጌሻታ ጊዲዲ ቤታና ማላ ኢንቴ ዎዝና ኢዚ ሚኒሶ። ሃዒ ዉርሴꬃን ታ ኢሻቶ! ኢንቴ ፆሳ ኡፋይሳናስ ኢንቴ ዋኒ ዋኒ ዳና ቤሲዛኮኔ ኑ ኢንቴና ታማርሲዶስ። ቱማፔካ ኑ ታማርሲዳ ማላ ዴታ፤ ሄሳ ጊሽ ጎዳ ዬሱስ ኪርስቶሳን ኑ ኢንቴና ዎሲዛይኔ ዞሪዛይ ሃይሳፌካ ኣꬊዛ ሃኖራ ኢንቴ ሲንꬄ ጉጃና ማላ። ጎዳ ዬሱስ ኪርስቶሳ ዎልቃን ኑ ኢንቴስ ኣይ ኣዛዞ ኢሚዳኮኔ ኢንቴ ኤሬታ። ፆሳ ሼኔይ ኢንቴ ላይማፔ ሃኪዲ ዱማታናሳ። ቃሴ ኢሲ ኢሲ ኣሳይ ባ ማቾ ጌሻቴꬃኒኔ ቦንቾን ኣይሶ ቤሲዛይሳ ሻኪ ኤሮ። ሄሲካ ፆሴ ኣማኖንታ ኣይዛቤታ ማላ ላይማ ቃቄቴꬃን ጊዶፖ። ሄሳ ማላን ኦኒካ ባሌቲዲ ባ ኢሻ ባሌꬆፎ፤ ጋሶይካ ሃይሳፌ ካሴ ኑ ኢንቴስ ዮቲዳ ማላኔ ናጌታናስ ኣኬኪሲዳ ማላ ጎዳይ ሄይታንታ ማላ ናጋራ ኦꬂዛ ኡባታ ቦላ ባ ሃንቆ ኤሃና። ፆሲ ኑና ጌሻቴꬃስ ፄይጊዴስ ኣቲን ቱናቴꬃስ ፄይጊቤና። ሄሳ ጊሽ ሃይሳ ሃ ዞሬዛ ካꬊዲ ኤኮንታዴይ ፂሎ ኣያና ኢዛስ ኢሚዳ ፆሳ ካꬌስ ኣቲን ኣስ ካꬊዛዴ ጊዴና። ኢሻታ ሲቆቴꬃ ጊሽ ኢንቴስ ኦኒካ ፃፋናስ ኮሼና፤ ጋሶይካ ኢንቴ ኢንቴ ጊዶን ሲቄታና ማላ ኢንቴ ኢንቴ ባጋራ ፆሳፌ ታማሪዴታ። ኩሜꬃ ማቂዶኒያን ዲዛ ኣማኒዛ ኣሳ ኢንቴ ዉርሲ ሲቂዛይስ ኤሬቲዳይሳ። ጊዶ ኣቲን ኑ ኢሻቶ! ሲንꬃ ባጋን ኢንቴ ሃይሳፌ ኣꬂ ሲቄታና ማላ ኑ ኢንቴና ዞሮስ። ኑ ሃይሳፌ ካሴ ኢንቴና ኣዛዚዳ ማላ ኢንቴ ኢንቴ ኩሼራ ኦꬂቴ፤ ዎፑ ጊ ዲቴ፤ ኢንቴስ ጊዲዛይሳ ሎዔꬂ ፄሊቴ። ሄሲካ ጋላስ ጋላስ ኢንቴ ዱሳይ ሃንኮ ኣማኖንታ ኣሳ ኣቻን ኢንቴና ቦንቺሳና ማላኔ ኢንቴ ኣይ ኣሳስካ ቶሆ ጊዶንታ ማላ። ታ ኢሻቶ! ኢንቴ ኣሾን ሃይቂዳይታ ጊሽ ኤሮንታ ኣታና ማላ ኑ ኮዮኮ። ቃሴካ ሂዶታይ ባይንዳ ሃራ ኣሳታ ማላ ኢንቴ ካዮታና ማላ ኑ ኮዮኮ። ዬሱሲ ሃይቂዲ ዴንዲዳይሳ ኑ ኣማኒዛ ጊዲኮ ዬሱሳ ኣማኒዳይታ ፆሲ ዬሱሳራ ሄሳꬆካ ዛሪ ሃ ዬዳና። ኑ ጎዳ ቃላን ኢንቴስ ጊዛይ ሃይሳ። ኑኒ ሃይቆንታ ፓፃ ዲዛይቲኔ ጎዳይ ያና ጋካናስ ጋምዓናይቲ ካሴ ሃይቂዳይታፔ ሲንꬃቶኮ። ጎዳይ ባ ሁዔራ ጊታ ኣዛዞን ኪታንቻታ ሃላቃ ጊሪሳራ ፆሳ ፁሩምባ ጊሪሳን ሳሎፔ ዎꬋና። ካሴ ኪርስቶሳ ኣማኒዲ ሃይቂዳይቲ ኢስቲ ካሴቲ ዴንዳና። ሄሳፌ ጉዬ ኑ ቃሴ ፓፃ ዲዛይቲ ጎዳ ጫርኮ ቦላ ጋጋናስ ኢስታራ ኢሲፌ ሻራራ ዴንዳና፤ ሄሳꬆካ ኑ ሜርናስ ጎዳራ ዳና። ሄሳ ጊሽ ሃይሳ ቃላን ኢሶይ ኢሳራ ሚኔቲቴ። ታ ኢሻቶ! ሄሲ ሃናና ዎዴዛ ጊሽ ኑ ኢንቴስ ፃፋናስ ኮሼና። ካይሶይ ቃማን ዪዛ ማላ ጎዳ ጋላሲካ ሄሳ ማላ ያናይሳ ኢንቴ ኢንቴ ባጋራ ሎዔꬂ ኤሬታ። ኣሳይ “ጋዴይ ሳሮኔ ሎዖኮ” ጊሺን ሚፃይ ቃንꬃራ ዲዛ ማጫስ ኦይኪዛ ማላ ሄሳꬆካ ኣስ ꬋይሲዛይ ቆፖንታ ኣሳ ቦላ ጋካና። ኦኒካ ኬሲ ኤኬና። ኢንቴኖ ኢሻቶ! ሄ ጋላሳይ ካይሶ ማላ ኢንቴና ዳጋንꬃናስ ኢንቴ ꬉማን ዴኬታ። ኢንቴ ዉሪካ ፖዖ ናይታ፤ ኑኒ ꬉማ ዎይኮ ቃማ ባጋ ጊዶኮ። ሂስቲኮ ኣኔ ቤጎስ፤ ኣኔ ኑርካ ኑና ሃሮስ ኣቲን ሃንኮ ꬊስኪዛ ኣሳ ማላ ኑካ ኣኔ ꬊስኮኮ። ꬊሲኪዛይቲ ቃማራ ꬊሲኬቴስ፤ ማꬆቲዛይቲካ ቃማራ ማꬆቴቴስ። ኑ ቃስ ጋላሳ ኣሳታ ጊዲዳ ጊሽ ኣማኖኔ ሲቆ፥ ቲራን ማይዒዛ ፁሩሬ ማይዖ ማላ ማይዒዲ ኣቶቴꬃ ሂዶታ ሁዔን ዎꬂዛ ቢራታ ቆቤ ማላ ሁዔን ዎꬂዲ ኣኔ ኑናቴꬃ ሃሪዲ ዴዖስ። ፆሲ ኑ ጎዳ ዬሱስ ኪርስቶሳ ባጋራ ኣቶቴꬅ ዴማና ማላ ኣቲን ኑና ሃንቆስ ፄይጊቤና። ኑ ሃይቂኮካ ዎይኮ ፓፃ ዲኮካ ኢዛራ ዳና ማላ ኢዚ ኑ ጊሽ ሃይቂዴስ። ሄሳ ጊሽ ቱማፔ ኢንቴ ሃዒ ኦꬂዛይሳ ማላካ ኢሶይ ኢሳራ ሚኔቲቴኔ ሚንꬄꬂቴ። ሂስቲኮ ታ ኢሻቶ! ኢንቴ ጊዶን ሚኒ ኦꬂዛይታ ጎዳን ኢንቴፌ ቦላራ ዲዛ ሃላቃታኔ ኢንቴና ዞሪዛይታ ኢንቴ ቦንቻና ማላ ኑ ኢንቴና ዎሶስ። ኢስታ ኦሶ ጊሺካ ኢስታ ሲቆራ ሎዔꬂ ቦንቺቴ፤ ኢንቴ ኢንቴ ጊዶን ሳሮን ዲቴ። ታ ኢሻቶ! ኑ ኢንቴና “ኦሶ ኦꬆንታ ኣሳታ ሃንቄቲቴ፤ ባቢዛይታ ሚኒሲቴ፤ ዳቡራንቻታ ማዲቴ፤ ኣስ ኡባ ዳንዳዪቴ” ጊ ዞሮስ። ኦናስካ ኢታ ጊሽ ኢታ ዛሮንታ ማላ ናጌቲቴ፤ ጊዶ ኣቲን ኢንቴ ኢንቴ ጊዶን ጊዲን ሃራ ኣሳራ ጊዲን ኡባ ዎዴ ሎዖ ጊዲዛይሳ ኦꬃናስ ባፄቲቴ። ኡባ ዎዴ ኡፋዬቲቴ። ቃንፆንታ ዎሲቴ። ኣይ ሃኖንካ ጋላቲቴ ፆሳ ሼኔይ ኢንቴስ ዬሱስ ኪርስቶሳ ባጋራ ሄሳ። ፂሎ ኣያና ታማ ቶይሶፍቴ። ቲንቢቴ ቃላ ካꬎፒቴ። ዉርሲካ ፓጪ ፄሊቴ፥ ሎዖ ጊዲዳዝ ኦይኪቴ። ኢታ ጊዲዳ ኣይ ሚሻፔካ ሃኪቴ። ሳሮቴꬃ ጎዳይ ኢዚ ኢንቴናቴꬃ ኤራይስ ዱማሶ፤ ኢንቴ ኣያናይ፥ ኢንቴ ሼምፖይኔ ኢንቴ ኣሾይ ጎዳ ዬሱስ ኪርስቶሲ ዪዛ ዎዴ ዎሶይ ባይንዳ ናጌቶ። ኢንቴና ፄይጊዳይሲ ኣማኔቲዳዴ ጊዲዳ ጊሽ ኢዚ ሄሳ ኦꬃና። ኑ ኢሻቶ! ኑ ጊሺካ ዎሲቴ። ኣማኒዛይታ ኡባ ጌሻ ዬሬቴꬃን ሳሮኪቴ። ሃ ኪታይ ኣማኒዛይታስ ኡባስ ናባቤታና ማላ ጎዳ ሱንꬃን ሃዳራ ጋይስ። ኑ ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ። ጳዉሎሳፔ፥ ሲልዋኖሴፔኔ ፂምቶሳፔ፤ ኑ ኣዋ ፆሳኒኔ ጎዳ ዬሱስ ኪርስቶሳን ጊዲዳ ታሶሎንቄን ኣማኒዛ ኣሳስ። ፆሳ ኣዋፔኔ ጎዳ ዬሱስ ኪርስቶሳፔ ኪያቴꬂኔ ሳሮቴꬅ ኢንቴስ ጊዶ። ታ ኢሻቶ! ኢንቴ ኣማኖይ ዎዴፔ ዎዴን ዲጪ ዲጪ ቢዛ ጊሺኔ ኢንቴ ሲቆይካ ካሴፔ ጉጄቲ ጉጄቲ ቢዛ ጊሽ ኑ ኢንቴ ጊሽ ፆሳ ሎዔꬂ ጋላታናስ ቤሴስ። ሄሳ ጊሽ ኢንቴ ቦላ ጋኪዳ ጎዴቴꬃኒኔ ሜቶ ኡባን ኢንቴ ሚኒዳ ጊሽ ኑኒ ኑ ባጋራ ኢንቴ ዳንዳያ ጊሺኔ ኢንቴ ኣማኖ ጊሽ ኣማኒዛ ኣሳ ኡባ ኣቻን ጬቄቶስ። ሄሲ ዉሪካ ፆሳ ፒርዳይ ሱሬ ጊዲዳይሳ ቤሴስ። ሄሳ ጌዶን ዋዬ ቤዪዛ ኢንቴ ፆሳ ካዎቴꬃስ ቤሲዛይታ ጊዲ ቤቲዴታ። ፆሲ ፂሎ ጊዲዳ ጊሽ ኢንቴና ዋይሲዛይታ ኢዚ ዋይሳና። ዋዬ ኤኪዳ ኢንቴሲኔ ኑስ ሼምፖ ኢማና። ሄሲካ ጎዳ ዬሱስ ኪርስቶሲ ዎልቃማ ሳሎ ፆሳ ኪታንቻታራ ሳሎ ቦላ ቆንጪዛ ዎዴ ሃናና። ሄ ዎዴ ፆሴ ኤሮንታ ኣሳታኔ ጎዳ ዬሱስ ኪርስቶሳ ሚሺራቾ ቃላስ ኣዛዜቶንታ ኣሳታ ቦላ ኢዚ ባ ሃሎ ላጮ ታማን ኬሳና። ኢስቲካ ጎዳ ሲንꬃፌኔ ኢዛ ቦንቾ ዎልቃ ኣቻፌ ኪቺዲ ሜርናስ ꬋዮን ቃፃዬታና። ኢስቲ ቃፃዬታናይ ኢዚ ጌሻታ ኣቻን ቦንቼታናሲኔ ኣማኒዛይቲ ዉሪ ኢዛን ማላሌታና ማላ ኢዚ ዪዛ ጋላሳን ሃናና። ኢንቴካ ሄ ኣማኒዛ ኣሳራ ዳና፤ ጋሶይካ ኑ ኢንቴስ ማርካቲዳይሳ ኢንቴ ኣማኒዳ ጊሻሳ። ኑ ሄሳ ቆፒሼ ኑ ፆሲ ኢንቴና ባ ፄይሳስ ጊዲዛይታ ሂስቲ ቆዳና ማላ ኢንቴ ሎዖ ኦꬃናስ ኣሞቲዛ ኣሞዛኔ ኣማኖን ኢንቴ ኦꬂዳ ኦሶዛ ዉርሲ ኢዚ ኢንቴስ ባ ዎልቃን ፖላና ማላ ኑ ኢንቴስ ኡባ ዎዴ ዎሶስ። ቃሴካ ኑ ጎዳ ፆሳኔ ኑ ጎዳ ዬሱስ ኪርስቶሳ ኪያቴꬃ ማላ ዬሱስ ኪርስቶሳ ሱንꬂ ኢንቴ ኣቻን ቦንቼታና ማላኔ ኢንቴካ ኢዛን ቦንቼታና ማላ ኑ ኢንቴስ ዎሶስ። ታ ኢሻቶ! ጎዳ ዬሱስ ኪርስቶሳ ዩሳ ጊሺኔ ኑ ኢዛኮ ባና ቡሳ ጊሽ ኑ ኢንቴና ቆፊሶስ። ኣያናይ ቆንጪሲዴስ ዎይኮ ቃላይ ጌስ ጊዲ ዎይኮ ኑፔ ኢንቴስ ኪቴቲዳ ኪታ ማላ “ጎዳ ዩሳ ጋላስ ጋኪዴስ” ጊዲ ኢንቴ ቆፋን ያርክ ያርኮፊቴኔ ዳጋሞፍቴ። ኦኒካ ኣይ ሃኖንካ ኢንቴና ባሌꬆፎ። ዳሮ ኣሳይ ኣማኖ ካዳናፔ ሲንꬄ ꬋያናስ ቤሲዛ ኢሲ ማካላ ኣሲ ቆንጮንታ ዲሺን ሄ ጋላሳይ ጋኬና። ኢዚካ ፆሴ ጌቴቲ ጎይኔቲዛ ኤቃ ፆሳታ ኡባፌ ቦላራ ባና ꬎቁ ꬎቁ ሂስቲዛዴኔ ፆሳራ ኤቄቲዛዴ። ኢዚካ ፆሳ ኬꬃን ኡቲዲ ባና “ታኒ ፆሳ” ጊዲ ኣዋጃ ኣዋጂሳና። ታ ኢንቴናራ ዲዛ ዎዴ ሃይታ ሃ ዮዖታ ኢንቴስ ታ ዮቲዳይሲ ኢንቴስ ቆፌቲዜሻ? ኢዚ ባ ዎዴን ቆንጫና ጋካናስ ሃዒ ኢዚ ቆንጮንታ ማላ ኣዚ ዲጊዛኮኔ ኢንቴ ኤሬታ። ማካላንቻ ፁራይ ሃራይ ኣቶሺን ሃዒካ ኦሶ ቦላ ዴስ። ጊዶ ኣቲን ሃይሲ ሃናናይ ኢዚ ሃዒ ኦꬆንታ ማላ ኢዛ ዲጊዛዴይ ኢዛ ኦጌፔ ኪቻና ጋካናስ ፃላ። ሄሳፌካ ካሊዲ ጎዳ ዬሱሲ ባ ዱና ፔኖኒኔ ባ ቦንቾ ዩሳን ꬋይሳና፤ ማካላንቻይ ቆንጫና። ሄ ማካላንቻ ዩሲ ፃላዔ ዎልቃን ሄሲካ ኣስ ባሌꬂዛ ማላታታኒኔ ማላሊሲዛ ሚሻታን ሃናና። ሄሳꬆካ ኤኪዲ ኣቶንታ ማላ ቱማ ኢፂዲ ꬋዪዛ ኣሳታ ባሌꬃናስ ዱማ ዱማ ኢታ ኦሶይ ያና። ሄሳ ጌዶን ኢስቲ ዎርዶ ዮዖ ኣማናና ማላ ፆሲ ኢስታ ቦላ ባላ ኦሶ ኪታና። ሄሲ ሃናናይ ቱማ ኣማኖንታ ኢፂዲኔ ዎርዶ ዮዖን ኡፋዬቲዛይቲ ዉሪ ፒርዴታናሳ። ጎዳን ዶሴቲዳ ታ ኢሻቶ! ኑ ጊዲኮ ኡባ ዎዴ ኢንቴ ጊሽ ፆሴ ጋላታናስ ኑስ ቤሴስ። ጋሶይካ ፆሲ ኢንቴና ኮይሮፔ ኦይኪዲ ኢንቴ ፂሎ ኣያናን ዱማቲዳይታኔ ቱሙ ኣማኒዲ ኢንቴ ኣታና ማላ ኢንቴና ዶሪዴስ። ኑ ጎዳ ዬሱስ ኪርስቶሲ ቦንቾ ጊሼቲዛይታ ኢንቴ ጊዳና ማላ ኑ ዮቲዳ ሚሺራቾ ቃላ ባጋራ ኢንቴና ፄይጊዴስ። ሄሳ ጊሽ ታ ኢሻቶ! ኢንቴ ሚኒ ኤቂቴ፥ ኑ ኑ ዱናን ጊዲን ዎይኮ ኪታን ዎይኮ ኑ ኢንቴስ ኣꬂ ዬዲዳ ቲሚርቴዛ ሎዔꬂ ኦይኪቴ። ኢዚ ኑ ጎዳ ዬሱስ ኪርስቶሲ ቃሴ ኑና ሲቂዳይኔ ባ ኪያቴꬃን ሜርና ሚንꬄꬆኔ ሎዖ ሂዶታ ኢዚ ኑስ ኢሚዳ ኑ ኣዋ ፆሳይ፥ ኢዚ ኢንቴ ዎዝና ሎዖ ኦሶኒኔ ቃላን ሚንꬆ። ዉርሴꬃን ታ ኢሻቶ! ቃሴካ ጎዳ ቃላይ ኢንቴ ኣቻን ሃኖይሳꬆካ ኤሌሊ ኡባሶ ጋካና ማላኔ ቦንቼታና ማላ ኑስ ዎሲቴ። ቃሴካ ኣሲ ዉሪ ኣማኒዛይሳ ጊዶንታ ጊሽ ማካላንቻታፔኔ ኢታ ኣሳታፔ ኑ ኣታና ማላ ኑስ ዎሲቴ። ጎዳይ ጊዲኮ ኣማኔቲዳይሳ። ኢዚካ ኢንቴና ሚንꬃና፤ ፃላዔፓካ ኢንቴና ናጋና። ኑ ኢንቴና ኣዛዚዳይሳ ኢንቴ ሃዒ ኦꬂዴታ ሺን ሲንꬃፌካ ኢንቴ ኦꬃናይሳ ኑኒ ጎዳን ኣማኔቶስ። ጎዳይ ኢንቴ ዎዝና ፆሳ ሲቆኮኔ ኪርስቶሳ ዳንዳያኮ ካሌꬆ። ታ ኢሻቶ! ኦሶ ኦꬆንታ ኣሳፔኔ ኢንቴ ኑፔ ኤኪዳ ቲሚርቴዛ ማላ ዶንታ ኣማኒዛይታፔ ኢንቴ ሃካና ማላ ጎዳ ዬሱስ ኪርስቶሳ ሱንꬃን ኢንቴና ኑ ኣዛዞስ። ኢንቴ ኑ ሌሚሶ ዎስቲ ካላናኮኔ ኢንቴ ኢንቴ ባጋራ ኤሬታ። ኑ ኢንቴናራ ዲዛ ዎዴ ኦሶ ኦꬆንታ ጮ ዴዒቤኮ። ቃሴካ ኦና ሶፔካ ካꬅ ጮ ሜላ ሚቤኮ። ጊዶ ኣቲን ኢንቴፌ ኦናሲካ ኑ ቶሆ ጊዶንታ ማላ ቃማኔ ጋላስ ዳቡራን ኦꬂ ሚዶስ። ኑ ሄሳ ኦꬂዳይ ኢንቴ ኑና ካላና ማላ ኢንቴስ ሎዖ ሌሚሶ ጊዳና ጊዲፔ ኣቲን ኑስ ኮሺዛይሳ ኢንቴፌ ኤካና ኑና ዲጊዛ ዎጋይ ዲን ጊዴና። ኑ ኢንቴናራ ዲዛ ዎዴ “ኦሶ ኦꬃናስ ዶሶንታ ኣሲ ካꬅ ሞፖ” ጊዛ ኣዛዞ ኢንቴስ ኢሚዶስ። ኢንቴ ጊዶን ኢሲ ኢሲ ኣሳቲ ኦሶ ኦꬆንታይሳ ኑ ሲዪዶስ። ሄይታንቲ ኦሶ ኦꬆንታ ሜላ ኣሳ ዮዖን ጌሊዛ ኣሳታ። ሄይታ ማላ ኣሳቲ ባ ኦሶ ጮዑ ጊ ኦꬃና ማላኔ ባ ካꬅ ማና ማላ ጎዳ ዬሱስ ኪርስቶሳ ሱንꬃን ኑ ኢስታ ኣዛዞሲኔ ዞሮስ። ኢንቴ ጊዲኮ ታ ኢሻቶ! ሎዖ ኦሶ ኦꬃናፔ ሙሌካ ኣዛሎፍቴ። ሃይሳ ኑ ኪቲዳ ቃላስ ኣዛዜቶንታይ ኦኒካ ዲኮ ሄሳ ሚሳቲዛዴ ሎዔꬂ ካሊቴኔ ኢዚ ባ ኦሶን ዬላታና ማላ ኢዛራ ጋጎፍቴ። ጊዶ ኣቲን ኢዛ ኢንቴ ኢሻ ማላ ሃንቂቴ ኣቲን ሞርኬ ማላ ፄሎፍቴ። ሳሮቴꬃ ጎዳይ ኢዚ ባ ባጋራ ዮዖ ኡባን ኢንቴስ ሳሮቴꬅ ኢሞ። ጎዳይ ኢንቴናራ ኡባራ ጊዶ። ሃይሳ ሳሮካ ታ ታ ኩሼራ ኢንቴስ ፃፊዳይ ታና ጳዉሎሳ። ታ ኪታስ ዱማ ማላታይ ሃይሳ፤ ኢዚካ ሃይሳ ታኒ ታ ኩሼን ፃፎይሳ። ኑ ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ኡባራ ጊዶ። ኑና ኣሺዳ ፆሳን፥ ኑስ ሂዶታ ጊዲዳ ዬሱስ ኪርስቶሳ ኣዛዞን ሃዋሬ ጊዲዳ ጳዉሎሳፔ ኣማኖን ታስ ቱሙ ና ጊዲዳ ፂምቶሳስ ፆሳ ኑ ኣዋፔ ኑ ጎዳ ዬሱስ ኪርስቶሳፔ ኪያቴꬅ፥ ማሮቴꬂኔ ሳሮይ ኔስ ጊዶ። ታኒ ማቂዶኒያ ባሼ ኔና ሃዳራ ጊዳ ማላ ሃይሳፌ ሲንꬃን ኢሲ ኢሲ ኣሳቲ ዎርዶ ቲሚርቴ ታማርሶንታ ማላ ኔ ኣዛዛናስ ኤፌሶኔን ዳሻ። ቃሴካ ኣሳይ ዮቲን ዉሮንታ ቤኒ ዎዴ ሃይሲዔን ባ ዎዴ ዉርሶንታ ማላ ኣዛዛ። ሄይታ ማላ ዮዖይ ፓላማ ዴንꬄꬄስ ኣቲን ኣማኖን ኦሴቲዛ ፆሳ ኦሶስ ኣይኮካ ጎዔና። ሃ ኣዛዞዛስ ዋና ኣይፌ ዮዖይ ጊዲኮ ጌሻ ዎዝናፔ ሎዖ ቆፋራ ሄሳꬆካ ቱሙ ኣማኖፔ ቤቲዛ ሲቆ። ኢሲ ኢሲ ኣሳይ ሃይታፔ ፖቂ ኤቂዲ ጎዓይ ባይንዳ ዮዖታኮ ሲሚዴስ። ዎጋ ታማርሲዛይታ ጊዳና ማላ ኮዬቴስ። ጊዲኮካ ኢስቲ ባ ዮቲዛይሳ ዎይኮ ኬሂ ሞቴቲዛ ዮዖዛ ሎዔꬂ ኤሬቴና። ጊዶ ኣቲን ኣሲ ማራን ጎዔቲዛኮ ዎጋይ ሎዖ ጊዲዳይሳ ኑ ኤሮስ። ቃሴካ ዎጋይ ኢሜቲዳይ ፂሎ ኣሳስ ጊዶንታ ዎጋ ዬꬊ ኣꬊዛይታስ፥ ኣዛዜቶንታይታስ፥ ፆሳስ ባቦንታይታስ፥ ናጋራንቻታስ፥ ጌሻቴꬂ ባይንዳይታስ፥ ፆሴ ሌቂዛይታስ፥ ባ ኣዮኔ ባ ኣዋ ዎꬊዛይታሲኔ ሼምፖ ዎꬊዛይታስ ጊዲዳይሳ ኑ ኤሮስ። ሄሳꬆካ ላይማቲዛይታስ፥ ኣዴራ ኣቂዛ ኣዴታስ፥ ኣስ ባይዚዛይታሲኔ ሻሚዛይታስ፥ ዎርዳንቻታስ፥ ኣሳስ ዎርዶራ ጫቂዛይታስ፥ ሎዖ ቲሚርቴራ ኤቄቲዛ ኡባታሳ። ሄ ሎዖ ቲሚርቴይ ኣንጄቲዳ ፆሲ ታስ ሃዳራ ኢሚዳ ቦንቾ ሚሺራቾ ቃላራ ጋጊዛይሳ። ታና ባ ኦሶስ ሹሚዲኔ ኣማኔቲዛዴ ኦꬂ ኤኪዲኔ ታስ ሚኖቴꬅ ኢሚዳ ኑ ጎዳ ዬሱስ ኪርስቶሳ ታ ጋላታይስ። ሃይሳፌ ካሴ ታ ኣይ ማላ ኣስ ጫዪዛዴኔ ጎዴꬂዛዴ፥ ቃሴ ማካላ ኣስ ጊዲኮካ ሄሳ ታ ኤሮንታኔ ኣማኖንታ ዳሼ ኦꬂዳ ጊሽ ፆሲ ታና ማሪዴስ። ዬሱስ ኪርስቶሳፔ ጊዲዳ ኣማኖራኔ ሲቆራ ኑ ጎዳ ኪያቴꬅ ታስ ኬሂ ዳሪዴስ። ዬሱስ ኪርስቶሲ ናጋራንቻታ ኣሻናስ ዱጌ ሃይሳ ሃ ኣላሜ ዪዴስ ጊዛ ቃላይ ቱማኔ ኣሲ ዉሪካ ኤካናስ ቤሲዛይሳ። ናጋራንቻታፔካ ኣꬊዛ ናጋራንቻይ ታና። ጊዶ ኣቲን ታ ማሬቲዳይካ ዬሱስ ኪርስቶሲ ዛዋይ ባይንዳ ባ ዳንዳያ፥ ኡባፌ ኣꬊዳ ናጋራንቻ ጊዲዳ ታ ቦላ ቤሲዳይ ኢዛን ኣማናናይታሲኔ ሜርና ዴዖ ዴማናይታስ ሌሚሶ ጊዳና ማላ። ሄሳ ጊሽ ሜርናስ ሃይቂ ኤሮንታ፥ ኣይፌን ቤቲ ኤሮንታ ባርካ ፃላ ፆሴ ጊዲዳ ካዎስ ሜርናፔ ሜርና ጋካናስ ኢዛስ ቦንቾይኔ ጋላታይ ጊዶ። ኣሚን። ታ ና ፂምቶሳ ኔ ጊሽ ካሴቲዲ ዮቴቲዳ ማላ ሃይሳ ኣዛዞዛ ታ ኔስ ኢማዲስ። ሄሲካ ኔ ሄ ቃላ ካላሼ ሎዖ ባፄ ባፄታናሳ። ኣማኖይኔ ሎዖ ቆፋይ ኔስ ዴዖ። ኢሲ ኢሲ ኣሳቲ ባ ሎዖ ቆፋ ዬꬊ ኣꬊዲ ኣባ ቦላ ሜቶይ ኢዛ ቦላ ጋኪን ዋዬቲዛ ማርካቤ ማላ ባ ኣማኖ ꬋይሲዳ። ኢስታ ጊዶን ፆሳ ጫሽ ኣጊዲ ታማራና ማላ ታኒ ፃላዔስ ኣꬃ ኢሚዳይቲ ሄሜኔዎሲኔ ኢስኪንዲሮሲ ዴቴስ። ሄሳ ጊሽ ኡባፌ ኮይሮ ሃራ ኣሳስ ሾቤꬃ ዎሳ፥ ጋናቴꬃ ዎሳኔ ጋላታ ዎሳ ኣሳ ኡባስ ካዎታሲኔ ዴሬ ኣይሲዛይታስ ኡባስ ዎሳና ማላ ታ ኔና ቆፊሳይስ። ሄሲካ ቱሙ ኣያና ዱሳኒኔ ጌሻቴꬅ ኡባን ኑኒ ሳሮቴꬃኒኔ ዎጋን ዳና ማላሳ። ሃይሲ ኑና ኣሺዛ ፆሳ ኣቻን ሎዖኔ ኡፋይሲዛዛ። ኢዚ ኣሲ ዉሪ ኣታና ማላኔ ቱማ ኤራና ማላ ኮዬስ። ኢሲ ፆሲ ፃላ ዴስ። ቃሴካ ፆሳሲኔ ኣሳስ ጊዶን ኢሲ ጊጊሲዛ ጋናይ ዴስ። ኢዚካ ኣስ ጊዲዳ ዬሱስ ኪርስቶሳ። ኢዚ ባና ኣሳ ኡባስ ኣꬂ ኢሚዴስ። ሄሲካ ሄራካ ዎዴይ ኣꬎንታ ኢዛስ ማርካቲዴስ። ታካ ሃይሳስ ሚሺራቾ ዮታናስ ኪቴቲዳዴ። ቃሴካ ዴሬታስ ቱሙ ኣማኖ ኣስታማሬ ጊዳዳ ሹሜታዲስ። ሄሳካ ታ ዎርዶቶንታ ቱሙ ዮታናሳ። ሄሳ ጊሽ ኣቱማ ኣሳይ ኡባ ሶን ሃንቆይ ባይንዳኔ ፓላማይ ባይንዳ ባ ጌሻ ኩሼታ ፑዴ ꬎቁ ሂስቲዲ ዎሳና ማላ ታ ኮያዪስ። ሄሳꬆካ ማጫሳቲ ቦንቾራ ባና ሺሺ ኤኪዲ ቤሲዛ ማይዖ ማይዔቶ፥ ኣቲን ባ ሁዔ ዳዲ ኤኪዲ ዎይኮ ኣልዖ ማይዖ፥ ዎርቃኔ ኢንቁ ኣꬂዲ ዋልቅ ዋልቅ ጎፔቶ። ጊዶ ኣቲን ፆሴ ዎሶስ ጊዛ ማጫሳቲ ኢስታስ ኦꬃና ቤሲዛ ሎዖ ኦሶን ሎዔቶ። ማጫሲ ጮዑ ጋዳ ኩሜꬃራ ኣዛዜቴꬅ ታማሩ። ማጫሲ ጮዑ ጋናፔ ኣቲን ኢዛ ታማርሳና ማላ ዎይኮ ኣዴ ቦላ ጎዳታና ማላ ታ ኮዪኬ። ጋሶይካ ኮይሮ ኣዳሜይ ሜꬌቲዴስ፤ ካላዳ ሄዋና ሜꬌታዱስ። ቃሴካ ኮይሮ ባሌቲዳይ ኣዳሜ ጊዴና። ባሌታዳ ፆሳ ዎጋፔ ኣꬊዳይ ማጫሳዮ። ጊዲኮካ ማጫሲ ኣማኖኒኔ ሲቆን ጌሻቴꬃን ባርካ ባና ሃሮን ሚኒኮ ና ዬሎን ኣታና። “ኦኒካ ዎሳ ኬꬃ ጪማ ጊዳና ኮይኮ ሎዖ ኦሶ ኣሞቴስ” ጊዛ ቃላይ ቱማ። ሄሳ ጊዲኮ ዎሳ ኬꬄ ካሌꬂዛዴይ ቦሬይ ባይንዳዴ፤ ኢሲ ማቻ ዲዛ ኣዴ፤ ጊናራ ዲዛዴ፤ ባና ሃሪዛዴ፤ ዎጋራ ኣቂዛዴ፤ ኢማꬅ ሞኪዛዴ፤ ታማርሳናስ ዳንዳዪዛዴ፤ ማꬆቶንታዴ፥ ኦሽ ኦዬቶንታዴ፥ ቃስ ማራጌ ኣስ፥ ኣሳራ ፓላሜቶንታዴ፥ ሚሽ ጎዶንታዴ፥ ጊዳናስ ቤሴስ። ባ ናይታ ኣዛዜቲዛይታኔ ኣስ ቦንቺዛይታ ሂስቲ ዲቺዲ ባ ኬꬃ ኣሳ ዎጋራ ኣይሲዛዴ ጊዳናስ ቤሴስ። ኢሳዴይ ባ ኬꬃ ኣሳ ዎጋራ ኣይሶ ኤሮንታ ኣጊኮ ፆሳ ዎሳ ኬꬄ ዎስቲ ናጋና ዳንዳዪዜ? ኦቶሬቴꬃን ፑርዲ ፃላዔይ ኩንዲዳ ፒርዳን ኢዚ ኩንዶንታ ማላ ኦራꬅ ኣማኒዛዴ ጊዶፖ። ቃሴካ ኢዛ ሱንꬃን ቦሬቶንታ ማላኔ ፃላዔ ናርፃን ኢዚ ጌሎንታ ማላ ኣማኖንታ ኣሳ ኣቻን ሎዖ ማርካቴꬅ ዳናስ ኮሼስ። ዳቆኔቲካ ሄሳꬆ ቦንቼቲዳይታኔ ባ ጊዳ ቃላ ላሚ ላሚ ዬጎንታይታ፥ ዳሮ ዎይኔ ኡሻስ ኣሞቶንታይታ፥ ኦጌይ ባይንዳ ጎዓ ጎዶንታይታ ጊዳናስ ቤሴስ። ኣማኖ ፁራ፥ ሎዖ ቆፋራ ናጋናስ ቤሴስ። ሃይታንቲካ ኮይሮቲ ፓጬቴቶ። ኢሲ ኢታይ ኢስታ ቦላ ቤቶንታ ኣጊኮ ሄሳፌ ጉዬ ዳቆኔቴꬃን ኦꬄቶ። ማጫ ዳቆኔቲካ ቦንቼቲዳይታ፥ ዚጊሮንታይታ፥ ቃስ ዎጋራ ዲዛይታ፥ ሃኖ ኡባን ኣማኔቲዳይታ ጊዳናስ ቤሴስ። ዳቆኔቲ ኢሲ ማች ኣዴ ጊዳናስ ቤሴስ። ቃሴካ ባ ናይታኔ ባ ኬꬃ ኣሳ ዎጋራ ኣይሲዛይታ ጊዳናስ ቤሴስ። ዎጋራ ኦꬂዳይቲ ኤራይስ ጊታ ቦንቾኔ ዬሱስ ኪርስቶሳን ኢስታስ ዲዛ ኣማኖን ዳሮ ፃላቴꬅ ዴማና። ታ ኔኮ ኤሌ ባና ኮይኮካ ሃይታ ኣዛዞታ ኔስ ፃፋይስ። ታ ሃኖ ኔስ ፃፊዛይ ታ ጋምዒዛ ጊዲኮካ ኣሳይ ፆሳ ኬꬃን ዋኒ ዳናኮኔ ኔ ኤራና ማላ ጋዳኮ! ኬꬃይ ዴዖ ፆሳ ዎሳ ኬꬃ፤ ሄሲካ ቱሙ ቱሲኔ ፃጶ። ቱሙ ኣያና ዱሳ ፁራይ ሲꬌይ ባይንዳ ጊታ፤ ኢዚካ “ኣሴ ጊዲዴስ፤ ኢዛ ፂሎቴꬂ ፂሎ ኣያናን ቆንጪዴስ፤ ኪታንቻታስ ቤቲዴስ፤ ዴሬ ኡባስ ሳባኬቲዴስ፤ ኣላሜን ዲዛይታን ኣማኔቲዴስ፤ ቦንቾራ ፑዴ ዴንዲ ቢዴስ” ጊዛይሳ። ዎዴ ዉርሲሴꬃ ቦላ ኢሲ ኢሲ ኣሳይ ኣማኖ ኣጊዲ ባሌꬂዛ ኣያናታኔ ኢታ ኣያና ቲሚርቴ ካላናይሳ ፂሎ ኣያናይ ቆንጬራ ዮቴስ። ሄሳ ማላ ቲሚርቴይ ኢስታ ቆፋይ ቦንቆ ቢራታን ፁጌቲዳ ማላ ጌላቴꬃን ዶጪዳ ቆꬌፔ ቆሞን ሃኒዛ ዎርዳንቻ ኣሳታፔ ያና። ሄ ኣሳቲ ኣሳይ ኤኮንታ ማላኔ ጌሎንታ ማላ ዲጋና። ኣማኒዛይቲኔ ቱማ ሻኪ ኤሪዛ ኣሳይ ፆሲ ሜꬊዳ ካꬅ ጋላታራካ ኤኪዛይቲ ሞንታ ማላ ዲጋናኔ ኣዛዛና። ፆሲ ሜꬊዳይ ዉሪካ ሎዖ። ኣሲ ጋላታራ ኤኪኮ ዎራ ዎꬊዛይ ኢሲናካ ባዋ። ዉሪካ ፆሳ ቃላኒኔ ዎሳን ጌያና። ሃይሳ ሃ ኣዛዞዛ ኣማኒዛ ኣሳ ኔ ቆፍሲኮ፥ ኣማኖ ቃላኒኔ ኔ ኤኪዳ ሎዖ ቲሚርቴዛን ሚናዳ ዬሱስ ኪርስቶሳስ ሎዖ ኦሳንቻ ጊዳንዳሳ። ፆሴ ቦንቺሶንታ ጎዓይ ባይንዳ ሃይሲዔፔኔ ጪማ ማጫሳታ ሃይሲዔፔ ሃካዳ ቱማ ኣያና ኦሶስ ኔ ኣሳቴꬅ ጊጊሳ። ኣሳቴꬃ ኣሾ ኦጌን ዶሲሶይ ጉꬃ ዎዴስ ጎዔስ ሺን ቱሙ ኣያና ዱሳስ ባና ታማርሶይ ጊዲኮ ሃይሳ ሃ ኣላሜዛሲኔ ቡሮ ያና ዱሳስ ሂዶታይ ዲዛ ጊሽ ኡባስ ጎዔስ። ሃይሲ ሃ ቃላይ ኣማኔቲዳይሳኔ ዉርሲ ኤካናስ ቤሲዛ ቃላ። ኑ ሄሳስ ጊዲ ዳፌቶሲኔ ዳቡሮስ። ሄሲካ ኣሳ ኡባስ ሃራፔካ ኣማኒዛይታስ ኣሺዛ ዴዖ ፆሳን ኑ ሂዶታ ኦꬂዛ ጊሻሳ። ሃይታ ዮዖታ ኣዛዛኔ ታማርሳ። ኔ ያላጋቴꬃ ኦኒካ ሌቆፎ፤ ጊዶ ኣቲን ኔ ሃሳያን፥ ኔ ዱሳን፥ ሲቆን፥ ኣማኖኒኔ ጌሻቴꬃን ኣማኒዛይታስ ሎዖ ሌሚሶ ጊዳ። ታ ሄ ባና ጋካናስ ቃላ ናባባናስ፥ ዞራናሲኔ ታማርሳናስ ሚና። ጪማቲ ኔ ቦላ ባ ኩሼ ዎꬂ ዎሲሺን፥ ኔስ ኢሜቲዳ ቲንቢቴ ኢሞቴꬃ ሌፒ ሂስታ ኣጎፋ። ኣሲ ዉሪ ኔ ዲቻ ቤያና ማላ ሃ ዮዖታ ሎዔꬃ ሚንꬃዳ ዳንዳያን ፖላ። ኔ ዱሳ ጊሺኔ ኔ ታማርሲዛ ቲሚርቴዛስ ናጌታ፥ ሃይታን ሚና። ኔ ሄሳ ኦꬂኮ ኔናኔ ኔ ጊዛይሳ ሲዪዛይታ ኣሻና። ጪማ ኣሳ ኔ ኣዋ ማላ ቦንቾራ ዞራ ኣቲን ዶምዖፋ። ናቴꬃ ኣቱማ ናይታ ኔ ኢሻታ ማላ ፄላ። ሄሳꬆካ ጪማ ማጫሳታ፥ ኔ ኣይ ማላ፥ ናቴꬃ ማጫሳታ ቃሴ ኔ ሚቼታ ማላ ሱሬ ዎዝናፔ ፄላ። ኣዳፌ ሜቶቴቲዳ ኣምዔታ ሎዔꬃ ናጋ። ኢሲ ኣምዔይስ ናይ ዎይኮ ና ናይ ዲዛ ጊዲኮ፥ ሄ ናይቲ ባሶ ኣሳታ ማዳናሲኔ ባና ዬሊዳይታስ ካሴ ኢስቲ ኦꬂዳይሳ ኩሼ ዛሮን ሃራፔ ካሴቲዲ ባ ኣማኖ ኦሶን ቤሳናሲኔ ታማራናስ ቤሴስ። ሄሲካ ፆሳ ኡፋይሲዛይሳ። ቃሴ ቱማፔ ማዶይ ባይንዳ፥ ባርካ ዲዛ ኣምዔያ ፆሴ ፃላ ፄላዉስ። ዎሳሲኔ ፆሳፌ ማዶ ዴማናስ ጋላሲኔ ቃማ ሚኔታዉስ። ሃ ቢታ ሎዖ ዱሲ ፃላ ኮዪዛ ኣምዔያ ጊዲኮ ኢዛ ፓፃ ዳሼ ሃይቂዳሮ። ኦና ቦላካ ዎሶይ ዶንታ ማላ ሃይሳ ኣዛዞዛ ኣሳስ ኣꬃ። ኢሲ ኣሲ ባ ዳቦታ ሃራፔካ ባሶ ኣሳ ማዶንታይሳ ጊዲኮ ኢዚ ኣማኖ ካዲዳዴኔ ኣማኖንታ ኣሳፔካ ኣꬊ ኢታ ኣሳ። ኢዚስ ላይꬃይ ኡሱፑን ታሙ ላይꬃፌ ጋርሳን ዲዛ ኣምዔይ ሱንꬅ፥ ኣምዔታ ማዝጋባን ፃፎፓ። ቃሴካ ኢዛ ካሴ ኢሳዴ ፃላ ጌልዳሮ ጊዳናስ ቤሴስ። ናይታ ዲቾኒኔ ኢማꬃ ሞኮን፥ ኣማኒዛይታ ቶሆ ሜቻን፥ ሜቶቲዳይታ ማዶኒኔ ሎዖ ኦሶን ኡባን ባና ኣꬃ ኢማዳ ሎዖ ኦሶንካ ኬሃ ኤሬቲዳሮ ጊዳናስ ቤሴስ። ናቴꬃ ኣምዔታ ጊዲኮ ሄሳ ማላ ማዝጋባን ፃፎፓ። ጋሶይካ ኢስታስ ዲዛ ኣዚናራ ዳና ኣሞይ ኢስቲ ኪርስቶሳስ ኦꬃና ጊ ጌሊዳ ቃላፔ ቦላራ ኣꬊዛ ዎዴ ኣዴ ጌላና ኮዬቴስ። ኢስቲ ካሴ ጫቂዳ ቃላ ሚዛ ጊሽ ሄ ዮዖዛን ባ ቦላ ፒርዳ ኤሄቴስ። ሄሳፌካ ኦሶ ኦꬃናፔ ዩዪ ዩዪ ኣሳ ኬꬄ ጌላና ዶሴቴስ። ኦሶ ኢፆ ፃላ ጊዶንታ ሃሳያናስ ቤሶንታይሳ ሃሳዪሼ ዚጊርዛይታኔ ኮሾንታ ኣሳ ዮዖ ጊዶ ጮ ዎፂ ጌሊዛይታ ጊዴቴስ። ሄሳ ጊሽ ኣዚናቲ ሃይቂዳ ናቴꬃ ማጫሳቲ ኣዴ ጌላና ማላ፥ ናይታ ዬላና ማላኔ ባሶ ኣስ ኣይሳና ማላ፥ ሞርኬይካ ኢስታ ቦላ ዎꬂዛ ሚሼ ዴሞንታ ማላ ታ ዞራይስ። ኣዳካ ሃይሳፌ ካሴ ኢሲ ኢሲ ኣሳቲ ፃላዔ ካላና ጉዬ ሼርዒ ጊዳ። ኣማኒዛ ማጫሲ ኦኒካ ባሶ ኣሳ ጊዶን ኣምዔቲ ዲዛ ጊዲኮ ዎሳ ኬꬂ ቱሙ ኣምዔታ ፃላ ማዳና ማላ ኢዛካ ባ ባጋራ ባ ኣምዔታ ማዱ ኣቲን ዎሳ ኬꬃስ ቶሆ ጊዳና ማላ ኣጋጉፑ። ዎሳ ኬꬃ ሎዔꬂ ኣይሲዛይቲ ሃራፔካ ሳባኮኒኔ ታማርሶን ሚኒዛ ጪማቲ ጊዲኮ ዳኮ ማዶ ማዴታናስ ቤሴስ። ማፃፋን “ካꬅ ቡኪዛ ቦራ ዱና ቃቾፋ” ቃሴካ “ኦሶ ኦꬂዛዴይ ዳሞዛ ኤካና ቤሴስ” ጌስ። ናምዑ ማርካይ ዎይኮ ሄꬑ ማርካይ ማርካቶንታ ዲሺን ጪማ ቦላ ሺቂዛ ሞቶ ኤኮፋ። ሃራቲ ቤይዲ ናጌታና ማላ ናጋራ ኦꬂዛይታ ኣሳ ኡባ ሲንꬃን ሃንቃ። ፆሳኒኔ ዬሱስ ኪርስቶሳን ዶሬቲዳ ኪታንቻታ ሲንꬃን ሃይታ ኣዛዞታ ኦናካ ማዶንታ ኔ ናጋና ማላኔ ኢሲ ሚሺካ ታ ጎሪፔ ዚቂ ꬎቁ ሂስቶንታ ማላ ታ ኔና ሃዳራ ጋይስ። ፆሳ ኦሶስ ዶራናስ፥ ኦና ቦላካ ኔ ኩሼ ዎꬃ ዎሳናስ ኤሶቶፓ። ቃሴ ሃራታራ ናጋራ ኦꬃናስ ዙፔቶፓ። ናጋራፔ ኔና ፂሎቴꬃን ናጋ። ኔና ቃንꬃን ሳኪዛይሳሲኔ ዴንꬃ ሳኮዛ ጊሽ ዎይኔ ጫጄፌ ጉꬅ ጉጃዳ ኡያ ኣቲን ሃይሳፌ ጉዬ ሃꬄ ፃላ ኡዮፓ። ኢሲ ኢሲ ኣሳ ናጋራይ ፒርዳይ ያናፔ ካሴቲዲ ቆንጬስ፤ ባጋይታ ናጋራይ ቃስ ፒርዳፌ ጉዬ ቆንጬስ። ሎዖ ኦሶይካ ሄሳ ማላ ቆንጬ። ቆንጮንታይ ዲኮካ ቆቴቲ ኣቴና። ፆሳ ሱንꬂኔ ኢዛ ቲሚርቴይ ጫዬቶንታ ማላ ኣይሌቴꬃ ቃምባራ ጊዶን ዲዛይቲ ዉሪ ባ ጎዳስ ኩሜꬃ ቦንቾይ ቤሲዛይሳ ኤሬቶ። ኣማኒዛ ጎዳቲ ዲዛ ኣማኒዛ ኣሽካራቲ ጎዳቲ ኢስታስ ኢሻታ ጊዲዳ ጊሽ ጎዳታስ ቤሲዛ ቦንቾ ኢሜቶ። ሃራፔካ ኢስታ ኦሶን ማዴቲዛ ኣማኒዛ ጎዳቲ ኢስታስ ዶሴቲዳይታ ጊዲዳ ጊሽ ኔካ ሃይታንታ ማላ ዮዖታ ታማርሳናሲኔ ዞራናስ ቤሴስ። ኦኒካ ዎርዶ ቲሚርቴ ታማርስኮ ጎዳ ዬሱስ ኪርስቶሳ ሎዖ ቃላኔ ኣያና ቱማቴꬃ ሚኒሲዛ ቲሚርቴራ ጋጎንታይሳ ጊዲኮ፥ ሄሳዴይ ኦቶሬቴꬃን ኩሚዴሲኔ ኣይኮካ ዩሺ ቆፔና። ኢሲ ኢሲ ቃላታ ጊሽ ፓላሜታናሲኔ ኦዬታናስ ኢታ ኣሞይ ኢዛን ዴስ። ሄይቲካ ቃናቴቴꬅ፥ ኦሽ፥ ጫሽ፥ ኢታ ሲꬌ ካሌꬄቴስ። ቱማይ ኢስታፌ ኤኬቲ ጊዲን ኤራይስ ኣያና ኦሶን ዎꬌ ዴማና ሚሳቲዛ ኣሳታኔ ቆፋ ፓጬ ኣሳታ ጊዶን ጎሼቲዲ ዱፆንታ ኦሽ ኤሄቴስ። ጊዶ ኣቲን ቱሙ ኣያና ኣስ ጊዴꬅ ኑስ ዲዛይሳን ዎፑ ጊዲ ዱሳራ ጊታ ዎꬌ። ጋሶይካ ኑ ሃይሳ ሃ ኣላሜዛ ዪሼ ኣይኮካ ኤኪ ዪቤኮ፤ ቢሼካ ቃሴ ኣይኮካ ኤኪ ቦኮ። ጊዶ ኣቲን ኑስ ማናይሲኔ ኑ ማይዓናይስ ዲኮ ጊዳና። ዱሬ ጊዳናስ ኮዪዛይቲ ጊዲኮ ጌዴ ፓጬኒኔ ናርፃን ጌሊዲ ኦይኬቲዛይሳ ማላ ዳሮ ሃዳኒኔ ኢታ ኣሞን ኡንዔቴቴስ። ጋሶይካ ሚሻ ሲቆይ ኢታቴꬅ ኡባስ ፃጶ። ኢሲ ኢሲ ኣሳቲ ዱሬ ጊዳና ጊዲ ኣሞፔ ዴንዲዳይሳን ኣማኖ ኦጌፔ ባሌቲዲ ሃራሶ ቢዳኔ ባርካ ባና ዳሮ ሜቶ ጊዶ ጌልꬂዳ። ኔኖ ፆሳ ኣሶ! ኔ ሄሳ ኡባፌ ባቃታ። ፂሎቴꬅ፥ ቱሙ ኣያናን ዱስ፥ ኣማኖ፥ ሲቆ፥ ዳንዳያኔ ኣሽኬቴꬅ ካላ። ኣማኖ ባፄ ሎዔꬃ ባፄታ። ዳሮ ማርካታ ሲንꬃን ሎዖ ኣማኔቴꬃን ኔ ማርካቲዳይሳኔ ኔ ኢዛስ ፄይጌቲዳ ሜርና ዴዖዛ ሎዔꬃ ኦይካ። ኡባስካ ዴዖ ኢሚዛ ፆሳ ኣቻን ሄሳꬆካ ጳንፆሳ ጲላፆሳ ሲንꬃን ቱማ ማርካቲዳ ዬሱስ ኪርስቶሳ ሲንꬃን ታ ኔና ሃዳራ ጊዛይ፥ ጎዳ ዬሱስ ኪርስቶሲ ቆንጫና ጋካናስ ኔስ ኢሜቲዳ ኦሶዛ ዎሶይ ባይንዳ ኔ ፖላና ማላ። ሄ ቆንጬꬃይ ኣንጄቲዳይሲ ባርካ ኡባ ሃሪዛይሲኔ ካዎታ ካዎይ፥ ጎዳታስ ጎዳይ ኢዚ ባ ዎዴን ቤሳና። ኢዚ ፃላ ሃይቆንታይሳ። ኦኒካ ሺቃናስ ዳንዳዮንታ ፖዖ ጊዶን ዴስ። ኢዛ ቤዪዳ ኣሲ ኦኒካ ባዋ፥ ቤያና ዳንዳዪዛዴይካ ዴና። ኢዛስ ዎልቃይኔ ቦንቾይ ሜርናፔ ሜርናስ ጊዶ። ኣሚን። ሃይሳ ሃ ኣላሜዛን ዱሬቲዳይቲ ኦቶሬቶንታ ማላ ኣዛዛ፤ ኑ ኡፋዬታና ማላ ዉርሲካ ዳርሲ ቲርፊሲዲ ኑስ ኢሚዛ ፆሳን ኣቲን ኣማንꬆንታ ሚሻን ኣማኔቶንታ ማላ ኣሳስ ዮታ። ሎዖ ኦꬃና ማላኔ ሎዖ ኦሶን ዱሬታ ጊዳና ማላ፥ ኪያታኔ ሻኪ ኢማናስ ዶሲዛይታ ጊዳና ማላ ኣሳ ኣዛዛ። ሄሳꬆካ ቱሙ ጊዲዳ ዴዖ ዴማና ማላ ቡሮፔ ያና ዎዴስ ኣሳይ ሚኖ ፃጶ ጊዲዛ ሃሮ ኤራይስ ሺሻና። ፂምቶሳ፥ ኔ ሃዳራ ኤኪዳይሳ ዉርሳ ናጋ። ፆሳ ቦንቺሶንታ ሃዳ ዱና ሎምዑ ሎምዓፔኔ ዎርዶ ኤራቴꬅ ጌቴቲዛ ኣሲ ባፔ ሜꬊ ኬሲዳ ቲሚርቴፌ ሃካ። ኑስ ሄሳ ማላ ኤራቴꬅ ዴስ ጊዛ፥ ኢሲ ኢሲ ኣሳቲ ሄሳꬆ ኦሶን ኣማኖ ኦጌፔ ባሌቲዳ። ፆሳ ኪያቴꬂ ኢንቴናራ ጊዶ። ዬሱስ ኪርስቶሳራ ኢሲፌቴꬃን ዲዛ ዴዖ ሂዶታ ቃላ ጊሽ ዮታና ማላ ፆሳ ሼኔን ዬሱስ ኪርስቶሳ ሃዋሬ ጊዲዳ ጳዉሎሳፔ፥ ዶሴቲዳ ታ ና ፂምቶሳስ ኪያቴꬂ፥ ማሮቴꬂኔ ሳሮቴꬂ ፆሳ ኣዋፔ ጎዳ ዬሱስ ኪርስቶሳፔ ኔስ ጊዶ። ፓጬይ ባይንዳ ጋላሲኔ ቃማ ኔ ጊሽ ዎሳን ቆፊሳሼ ካሴ ኣዋቲ ኦꬂዳ ማላ ጌሻ ዎዝናራ ታ ጎይኒዛ ፆሳ ታ ጋላታይስ። ካሴ ኔ ኣፉንꬃ ቆፓ ኤካዳ ታ ኔና ቤያዳ ኡፋዬታና ላሞታይስ። ቆꬌፔ ቆሞን ጊዶንታ ኔ ኣማኖዛ ታ ቆፓይስ። ሄ ኣማኖይካ ኮይሮ ኔ ኣዬይ ኣይን ሎይዲኒኔ ቃሴካ ኔ ኣዬይን ኤዎንቄን ዴስ። ሃዒ ቃስ ኔ ቦላ ዲዛይሳካ ታ ኤራዲስ። ሄሳ ጊሽ ታኒ ታ ኩሼ ኔ ቦላ ዎꬂን ኔ ኤኪዳይሳ ኔ ቦላ ዲዛ ፆሳ ኢሞታ ኔ ዴንꬄꬃና ማላ ታ ኔና ቆፊሳይስ። ፆሲ ኑስ ኑኒ ኑ ሁዔ ሃራናስ ፆሳ ዎልቃ ኤራናሲኔ ሲቄታና ኣያና ኢሚዴስ ኣቲን ባቦ ኣያና ኢሚቤና። ሄሳ ጊሽ ጎዳ ጊሽ ማርካታናስ ዎይኮ ጎዳ ጊሽ ቃሼቲዳ ታናን ዬላቶፓ። ጊዶ ኣቲን ፆሳ ዎልቃራ ሚሺራቾ ቃላ ጊሽ ታናራ ሜቶ ኤካ። ኑ ኣይኮካ ኦꬂዳ ጊሽ ጊዶንታ ዲሺን ባ ቆፋ ማላኔ ባ ኪያቴꬃ ማላ ኑና ኣሺዳይኔ ኑና ኤራይስ ዱማሲዲ ኢዚ ፄይጊዴስ። ሄ ኢዛ ኪያቴꬃይ ሜርና ዎዴፔ ካሴ ዬሱስ ኪርስቶሳ ባጋራ ኑስ ኢሜቲዴስ። ሃዒ ቃስ ኢዚ ሃይቆ ዉርሲ ꬋይሲዲ ሚሺራቾ ቃላ ባጋራ ኑና ፖዖን ኬሲዳ ኑ ꬋሌ ዬሱስ ኪርስቶሳ ዩሳን ቆንጪዴስ። ታካ ሃይሳ ሃ ሚሺራቾ ቃላ ዮቲዛዴ፥ ኪቴቲዳዴኔ ኣስታማሬ ጊዳዳ ሹሜታዲስ። ታኒ ሜቶ ቤዪዛይካ ሄሳ ጊሻሳ። ጊዲኮካ ታ ኦና ኣማኒዛኮኔ ታኒ ታ ኣማኒዛዴ ሻካ ኤሪዛ ጊሽ ኢዛን ዬላቲኬ። ታ ኢዛስ ኢሚዳ ሃዳራ ሄ ጋላሲያ ጋካናስ ኢዚ ናጋናስ ዳንዳዪዛይሳ ታ ሻካ ኤራዲስ። ኔ ታፔ ሲዪዳ ቲሚርቴዛ ዬሱስ ኪርስቶሳራ ኢሲፌቴꬃን ዲዛ ኣማኖኒኔ ሲቆን ሌሚሶ ሂስታዳ ኦይካ። ኔስ ኢሜቲዳ ሎዖ ሃዳራ ኑናን ዲዛ ፂሎ ኣያናን ናጋ። ኢሲያ ኣዉራጃ ጊዶን ዲዛይቲ ዉሪካ ታና ኣጊዳይሳ ኔ ኤራሳ። ፊልጎሲኔ ሄርሞጌኔሲ ታና ኣጊዳ ኣሳ ጊዶን ዴቴስ። ሄኔሲፎሬ ሶ ኣሳ ጎዳይ ማሮ፤ ኣይሲ ጊኮ ኢዚ ታና ዳሮ ዎዴ ሚንꬄꬂዴሲኔ፤ ታ ሳንሳላታን ቃሼታ ዲሺን ታና ቤይዲ ዬላቲቤና። ሃራፔካ ኢዚ ኦሮሜ ዪዳ ዎዴ ታና ኮይ ኮይዲ ዴሚዴስ። ዉርሴꬃ ፒርዳ ጋላስ ጎዳይ ኢዛ ፒርዳፌ ኣሾ። ኢዚ ታና ኤፌሶኔን ኣይ ማላ ማዲዳኮኔ ኔ ሎዔꬃ ኤራሳ። ሄሳ ጊሽ፥ ታ ናዞ ኔኒ ጎዳ ዬሱስ ኪርስቶሳ ኪያቴꬃን ሚና። ዳሮ ማርካታ ሲንꬃን ኔ ታፔ ሲዪዳይሳ ሃራታ ታማርሳናስ ዳንዳዪዛይታሲኔ ኣማኔቲዳ ኣሳታስ ሃዳራ ኢማ። ዬሱስ ኪርስቶሳስ ኣማኔቲዳ ሎዖ ዎታዴራ ማላ ታናራ ሜቶ ኤካ። ዎታዳራቴꬃን ኦꬂዛዴይ ባ ሃላቃ ኡፋይሳናስ ዳፌቴስ ኣቲን ሃራ ባና ቃፄꬂዛ ኦሶን ጌሊ ኤሬና። ሄሳꬆካ ጋዴ ዎፂዛዴይ ዎꬃ ዎጋ ናጎንታ ዎፂኮ ፆኖ ኣክሊሌ ኤኬና። ጎባ ጎሻንቻይ ባ ጎዪ ኬሲዳ ካꬃ ፄራ ሚዛዴ ጊዳናስ ቤሴስ። ታ ኔስ ጊዛይሳ ኔ ዎዝናን ዎꬃ ሲዪኮ ጎዳይ ኔስ ዮዖ ኡባን ኣኬካ ኢማና። ሃይቆፔ ዴንዲዳ ዳዉቴ ዜሬꬅ ጊዲዳ ዬሱስ ኪርስቶሳ ቆፓ፤ ታ ዮቲዛ ሚሺራቾ ቃላይካ ሄሳ። ሄሳ ጌዶን ኢታ ኦꬂዳ ኣሳ ማላ ቃሼታና ጋካናስ ዋዬ ቤያይስ። ጊዶ ኣቲን ፆሳ ቃላይ ቃሼቴና። ሄሳ ጊሽ ኪርስቶሳ ባጋራ ዲዛ ኣቶቴꬂኔ ሜርና ቦንቾ ዴማና ዶሬቲዳይታ ጊሽ ጋዳ ዉርሳካ ዳንዳያዲስ። “ኑ ኢዛራ ኢሲፌ ሃይቂኮ ቃሴ ኑ ኢዛራ ዴዖን ዳና። ዳንዳያን ሚኒኮ ኑ ኢዛራ ካዎታና። ኑ ኢዛ ካዲኮ ኢዚካ ኑና ካዳና። ኑ ኢዛስ ኣማኔቶንታይታ ጊዲኮ ኢዚ ሜርናስ ኣማኔቲዳ ማላ ዳና። ኢዚ ባርካ ባና ካዳና ዳንዳዬና” ጌቴቲዳ ቃላይ ኣማኔቲዳይሳ። ሃይታ ሃ ዮዖታ ጊሽ ኣሳ ቆፊሶ ኣጎፋ። ኣሳይ ባ ጊዶን ኢሶይ ኢሳራ ቃላ ጌዶን ፓላሜቶንታ ማላ ፆሳ ሱንꬃን ዞራ። ሄሳ ማላ ዮዖይ ሲዪዛይታ ሞሬስ። ቱሙ ፆሳ ቃላ ዮቲዛዴ፥ ዬላቾንታ ኦሳንቻኔ ኣሲ ኔ ጊሽ ሎዖ ማርካቲዛዴ ጊዳዳ ኔናቴꬅ ዉርሳ ፆሳ ሲንꬅ ሺሻናስ ሚና። ጮ ሜላ ዱና ላላቤቴꬃፌ ሃካ። ሄሳ ማላ ዮዖን ዋፄቲዳ ኣሳቲ ፆሳፌ ሃኪ ሃኪ ቤቴስ። ኢስታ ቲሚርቴይ ሳኪዲ ፓፆንታ ጌዴ ጉጂ ጉጂ ዳኬቲ ቢዛ ማዱንꬃ ማላ። ሄሜኔዎሲኔ ፊልፆሳ ጌቴቲዛይቲ ሄሳ ማላ ቲሚርቴ ታማሪዛይታ ጊዶን ዴቴስ። ሄይቲ ቱማቴꬃፌ ሃኪዲ ጮ ሜላ ዋዬቴስ። ኢስቲካ ሃይቆፔ ዴንꬂ ሃይሳፌ ካሴ ሃኒ ኣꬊዴስ ጊዲ ኢሲ ኢሲ ኣሳ ኣማኖ ጉዬ ሺሪ ዬጌቴስ። ጊዶ ኣቲን “ጎዳይ ኤራይስ ጊዲዛይታ ኤሬስ” ቃሴካ “ጎዳ ሱንꬅ ፄይጊዛይ ዉሪ ኢታፔ ሃኮ” ጊዛ ማታሜይ ኢዛ ቦላ ዲዛ ላሜቶንታ ፆሳ ኮይሮ ቆፋይ ላሜቲቤና። ኢሲ ጊታ ኬꬃን ዎርቃፌኔ ቢራፔ ፃላ ጊዶንታ ሚꬃፌኔ ኡርቃፌ ኦሴቲዳይቲ ዲዛይሳꬆ ሄይታንታፌካ ባጋይቲ ቦንቾ ኦሶስ፥ ባጋይቲ ቃስ ሂራይሶ ኦሶስ ኤኬቴቴስ። ሄሳ ጊሽ ኦኒካ ሃይታ ታ ጊዳ ኢታ ዮዖታፔ ባና ጌሺኮ ሄሳዴይ ቦንቾ ኦሶስ ጊዲዛዴኔ ኣንጄቲዳዴ፤ ጎዳ ጎዒዛዴኔ ሎዖ ኦሶስ ጊጌቲዳዴ ጊዳና። ፓንꬃቴꬃ ኢታ ኣሞቴꬃፌ ባቃታ። ጌሻ ዎዝናራ ጎዳ ፄይጊዛ ኣሳታራ ፂሎቴꬅ፥ ኣማኖ፥ ሲቆኔ ሳሮቴꬅ ካላ። ጎዓይኔ ሂዶታይ ባይንዳ ኤያታ ፓላማፔ ሃካ። ኣይሲ ጊኮ ሄሳንታ ማላይ ኦሽ ካሌꬂዛይሳ ኔ ኤራሳ። ጎዳ ኦሳንቻይ ኣሳራ ኦዬታናስ ቤሴና። ሄሳፌ ኣሳ ኡባ ኣቻን ኪያ፥ ኣስ ታማርሳናስ ዳንዳዪዛዴኔ ሚኖ ኣስ ጊዳናስ ቤሴስ። ኢዚ ባናራ ኤቄቲዛ ኣሳታ ኣሽኬቴꬃራ ኦይኪዛዴ ጊዳናስ ቤሴስ። ኦኔ ኤሪዛይ ኢስቲ ቱማ ኤራና ማላ ፆሲ ኢስታስ ማሬታናስ ዎዴ ኢማና ዳንዳዬስ። ሄሲካ ኢስቲ ዩሺ ቆፒ ሲሚዲ ኢዛ ሼኔ ኩንꬃና ማላ ኢስታ ዲዒ ኤፊዳ ፃላዔ ናርፃፌ ኢስቲ ኬሲ ኤካና። ጊዶ ኣቲን ዎዴ ዉርሴꬃን ኣስ ሜቲዛ ዎዴይ ያናይሳ ኔ ኤራ። ኣሳይ ባና ዶሲዛዴ ጊዳና፥ ሚሼ ሲቂዛይታ፥ ባናን ጬቄቲዛይታ፥ ኦቶራንቻታ፥ ጫሻንቻታ፥ ባና ዬሊዳይታስ ኣዛዜቶንታይታ፥ ጋላቶንታይታኔ ጌሻቴꬂ ባይንዳይታ፥ ሲቆይ ባይንዳይታ፥ ኣቶ ጊ ማሮንታይታ፥ ኣሳ ሱንꬅ ሞሪዛይታ፥ ባርካ ባና ሃሮንታይታ፥ ሜንፄ ኢታ፥ ሎዖ ሚሽ ዶሶንታይታ፥ ካዲዛይታ፥ ናጌቶንታይታ፥ ጮ ሜላ ኦቶሬቴꬃን ኩሚዳይታ፥ ፆሳፌ ኣꬂዲ ሎዖ ዴꬅ ዶሲዛይታ ጊዳና። ኣማኒዛ ኣስ ሚሳታና ሺን ኣማኖስ ዲዛ ዎልቃ ካዳና። ሄይታ ማላታፔ ኔ ሃካ። ሄይታንቲ ኢሲ ኢሲ ኬꬄ ካልፂ ጌሊዲ ዳሮ ዴፆ ናጋራኒኔ ዱማ ዱማ ኢታ ኣሞቴꬃ ጋርስ ጌሊዲ ሄኔ ሃ ቃፂዛ ኣማኖን ላፋ ማጫሳታ ቃፂ ኦይኬቴስ። ሄይታ ማላ ማጫሳቲ ኡባ ዎዴ ታማሬቴስ ሺን ቱማ ኤሪ ኤሬቴና። ኢያኔሲኔ ኢያንባራሲ ሙሴ ቦላ ዴንዲዳ ማላ ሃይቲካ ኢስታ ቆፋይ ሞሬቲን ኤራይስ ኣማኖፔ ኩንዲዳ ጊሽ ቱማቴꬅ ኢፄቴስ። ጊዶ ኣቲን ኢስታ ቆፋይ ኩሜና። ጋሶይካ ኢያኔሳኔ ኢያንባራሳ ኤያቴꬅ ኣሳስ ቆንጪዳ ማላካ ሃይታ ሃኖይካ ኡባስ ቆንጫና። ኔ ጊዲኮ ታ ቲሚርቴዛ፥ ታ ዱሳ፥ ታ ዋና ቆፋ፥ ታ ኣማኖዛ፥ ታ ዳንዳያ፥ ታ ሲቆዛኔ ታ ሚኖቴꬃ ዉርሳ ኤራሳ። ታ ጎዴቴꬃኔ ታ ዋዬዛ ኣንፆኪያን፥ ኢቆኒዮኒኔ ሊስቲራንካ ታ ቦላ ጋኪዳይሳ ዉርሳ ታ ዳንዳያን ኤኪዳይሳ ኔ ኤራሳ። ጊዲኮካ ጎዳይ ሄሳ ኡባፌ ታና ኣሺዴስ። ቱማፔ ዬሱስ ኪርስቶሳ ጌሻ ዎዝናፔ ኣማኒ ዳና ጊዛይቲ ዉሪካ ጎዴቲዛይታ ጊዳና። ኢታ ባሌꬂዛ ኣሳቲ ኤራይስ ባሌቲዲ ኣሳ ባሌꬂሼ ኢታቴꬃ ቦላ ኢታቴꬅ ጉጂ ጉጂ ባና። ኔ ጊዲኮ ካሴ ኔ ታማራዳ ኤሪዳ ኦጌን ሚና። ሄሳ ኦናፔ ታማሪዳኮኔ ኔ ኤራሳ። ኔ ጉꬃ ናቴꬃፌ ሃዒ ጋካናስ ዬሱስ ኪርስቶሳ ኣማኖን ኣቶቴꬂ ቤቲዛ ቲሚርቴ ኢሚዛ ጌኤሻ ማፃፋታ ሎዔꬃ ኤራዳሳ። ጌሻ ማፃፋቲ ዉሪካ ፆሳ ኣያናይ ካሌꬂን ፃፌቲዳይታ፤ ኢስቲካ ኣስ ታማርሳናስ፥ ሃንቃናስ፥ ሱሪሳናስ ቃሴካ ፂሎቴꬃ ኦጌን ካሌꬃናስ ጎዔቴስ። ሄሲካ ፆሳ ኣሲ ሎዖ ኦሶ ኡባስ ቤሲዛዴ ጊዳና ማላሳ። ፆሳ ሲንꬃኒኔ ሄሳꬆካ ፓፃ ዲዛይታ ቦላኔ ሃይቂዳይታ ቦላ ፒርዳናስ ዲዛ ዬሱስ ኪርስቶሳ ሲንꬃን ኢዛ ቆንጬꬃኔ ኢዛ ካዎቴꬃ ቆፋራ ሃይሳ ኔስ ሃዳራ ጋይስ። ቃላ ሳባካ፤ ኔስ ጊጊን ዎይኮ ጊጎንታ ኣጊን ኔኒ ኔ ባጋራ ጊጋ ኡታ። ዳሮ ዳንዳያራ ታማርሶን ኣሳ ሱሪሳ፤ ሃንቃኔ ዞራ። ጋሶይካ ኣሳይ ዉሪ ሱሬ ጊዲዳ ቲሚርቴ ኤኮንታ ኢፃና ዎዴይ ያና። ሄሳፌ ቦላራ ኣሳይ ባ ኣሞራ ጋጊዛይሳ ኢስታ ሃይꬄይ ሲያና ኮዪዛይሳ ፃላ ኢስታስ ዮታና ማላ ባና ታማርሳና ዳሮ ኣስታማሬታ ባ ኣቺ ሺሻና። ቱማ ሲያናፔ ባ ሃይꬅ ሃራሶ ዛሪዲ ሃይሲዔ ባጋ ሲማና። ኔ ጊዲኮ ሃኒዛ ዮዖን ኡባን ሎዱ ጋ፤ ሜቶ ዳንዳያ፤ ሚሺራቾ ቃላ ዮቶ ኔስ ኦሶ ሂስታ፤ ኔ ኦꬆዛካ ፖላ። ታ ቃስ ያርሼታናስ ማታ ኡታዲስ፤ ሃይሳ ሃ ኣላሜዛፔ ሻኬታ ቡሳ ዎዴይ ታስ ጋኪዴስ። ሎዖ ባፄ ታ ባፄታዲስ፤ ታ ዎፃና ዎꬄ ዉርሲሳዲስ። ኣማኖካ ናጋዲስ። ሲንꬃፌ ታስ ኣክሊሌይ ጊጊ ኡቲዴስ፤ ሄሲካ ፂሎቴꬃ። ሄሳካ ቱሙ ፒርዲዛ ጎዳይ ሄ ጋላስ ታስ ኢማና። ሄሲካ ታስ ፃላ ጊዶንታ ኢዛ ዩሳ ላሞቲዛይታስ ኡባስካ ኢማና። ታኮ ኤሌላ ያናስ ኔስ ዳንዳዬቲዳ ማላ ኦꬃ። ዴማሲ ሃይሳ ኣላሜዛ ሲቂዲ ታና ዬጊ ኣጊዲ ታሶሎንቄ ቢዴስ። ቃርቂሲ ጋላቲያ ቢዴስ። ቲቶሲ ጌዴ ዳልማፂያ ቢዴስ። ሉቃሲ ፃላ ታናራ ዴስ። ማርቆሲ ታና ኦሶን ማዲዛ ጊሽ ኢዛ ኔናራ ኤካ ያ። ቲቂቆሳ ኤፌሶኔ ዬዳዲስ። ኔ ሃ ያሼ ታ ፂሮዓዳን ኣኪርጳ ኣቻን ዎꬂዳ ታ ማቃኔ ማፃፋታ ሃራፔካ ጋልባን ፃፌቲዳ ማፃፋታ ታስ ኤካ ያ። ፃርቂማላ ቆፂዛ ኢስኪንዲሮሲ ታ ቦላ ዳሮ ቆሆ ጋꬂዴስ ሺን ጎዳይ ኢዛስ ኢዛ ኦሶ ማላ ኢማና። ኢዚ ኑ ዮቲዛ ቃላ ኬሂ ኢፂዴስ። ኔካ ኢዛፔ ናጌታ። ታና ሞቲዛ ዮዖዛስ ኮይሮ ታና ኣሻና ማርካ ታ ሺሺን ኦኒካ ታና ማዳና ዪቤና። ጊዶ ኣቲን ዉሪካ ታና ዬጊዲ ቢዳ። ሄሳካ ኢስታ ቦላ ፆሲ ቆሆ ኦꬂ ቆዶፖ። ጊዶ ኣቲን ቃላ ኪታይ ታ ባጋራ ኩሜꬅ ዮቴታና ማላኔ ዴሬ ኣሳይ ዉሪ ሲያና ማላ ጎዳይ ታ ኣቻን ኤቂዲ ታና ሚኒሲዴስ፤ ጋሞ ዱናፔካ ታና ኣሺዴስ። ጎዳይ ኢታ ዮዖ ኡባፌ ታና ኣሻና። ጌዴ ባ ሳሎ ካዎቴꬃስ ታና ሳሮራ ጋꬃና። ኢዛስ ሜርናፔ ሜርና ጋካናስ ቦንቾይ ጊዶ። ኣሚን። ጲርሲቂላስ፥ ኣቂላስ፥ ሄኔሲፎሬ ሶ ኣሳስካ ታ ሳሮካ ጋꬃ። ኤሪስፆሲ ቆሮንቶሴን ኣቲዴስ። ፂሮፎሞሲ ሳኬቲዳ ጊሽ ኢዛ ታ ሚሊፄን ኣጋዲስ። ባልጎይ ጋካናፔ ሲንꬄታዳ ታኮ ሃ ጋካናስ ኔስ ዳንዳዬቲዳ ማላ ኦꬃ። ኤዉጉሎሲ፥ ጱዴሲ፥ ቃሴካ ሊኖሲ፥ ቂላዉዲያይኔ ኣማኒዛይቲ ዉሪካ ኔና ሳሮ ሳሮ ጊዳ። ጎዳይ ኔናራ ጊዶ። ጎዳ ኪያቴꬂ ኢንቴናራ ጊዶ። ፆሳስ ዶሬቲዳይታ ኣማኖኒኔ ቱሙ ኣያናን ካሌꬂዛ ቱማ ኤራቴꬃን ዲቻና ማላ ፆሳ ኣይሌኔ ዬሱስ ኪርስቶሳ ሃዋሬ ጊዲዳ ጳዉሎሳፔ። ኢዛ ኣማኖይኔ ኤራቴꬃይ ካሴፔ ኦይኪዲ ዎርዶቶንታ ጎዳይ ዳሮ ዎዴፔ ካሴ ባ ኢሚዳ ሜርና ዴዖ ሂዶታ ማላ። ኢዚ ካሴ ጊዳ ዎዴይ ጋኪዳ ማላ ኑና ኣሺዳ ፆሳ ኣዛዞን ታስ ሳባካናስ ኢሜቲዳ ሃራ ባጋራ ፆሲ ባ ቃላ ቆንጪሲዴስ። ኑስ ኮꬄ ጊዲዳ ኣማኖ ኢሲፌቴꬃን ኣማኖን ታስ ቱሙ ና ጊዲዳ ቲቶሳስ “ፆሳ ኣዋፔኔ ኑና ኣሺዳ ዬሱስ ኪርስቶሳፔ ኪያቴꬂኔ ሳሮቴꬅ ኔስ ጊዶ” ጊዴስ። ታ ኔና ቃርፄሴን ኣጊዳይ ቡሮፔ ጊጋና ቤሲዛ ዳሮ ሚሺ ዲዛይሳ ጊሽ ኔ ጊጊሳናሲኔ ታ ኔና ኣዛዚዳ ማላ ካታማይ ዲዛሶን ዎሳ ኬꬃ ጪማታ ኔ ዶራናሳ። ጪማቴꬃን ዶሬታናይቲ ኢስታ ቦላ ቦሮይ ባይንዳይታ፥ ኢሲ ማቺ ኣዚናታ፥ ናይቲ ኣማኒዛይታኔ ዋይሶንታይታ ዎይኮ ኣዛዜቲዛ ናይታ ኣዋታ ጊዴቶ። ዎሳ ኬꬃ ጪማይ ፆሳስ ኦꬃና ሃዳራ ኤኪዳዴ ጊዲዳ ማላ ኢዛ ቦላ ዎሶይ ባይንዳዴ ጊዳናስ ቤሴስ። ሄሲካ ጬቄቲዛዴ፥ ጉꬃ ሚሻን ዪሎቲዛዴኔ ማꬆቲዛዴ፥ ኡሻንቻኔ ኢዛስ ቤሶንታ ኦጌራ ጎዓ ጊዲዳዝ ጎዲ ኤኪ ቢዛዴ ጊዳናስ ቤሴና። ሄሳፌ ቦላራ ኢዚ ኢማꬅ ሞኪዛዴ፥ ሎዖ ኦሶ ዶሲዛዴ፥ ባርካ ባና ሃሪዛዴ፥ ሱሬ ኣስ፥ ፂሎኔ ኤራይስ ናጌቲዛዴ ጊዳናስ ቤሴስ። ሃራ ኣሳታ ሎዖ ቲሚርቴን ሚንꬄꬂዛዴኔ ሄ ሎዖ ቲሚርቴዛ ኢፂዛይታ ሃንቃናስ ባ ታማሪዳ ማላ ቃላን ሚኒዛዴ ጊዳናስ ቤሴስ። ዋይሲዛይቲኔ ዱናን ፃላላ ባሌꬂዛይቲ ዳሮቲ ዴቴስ፤ ሃራፔካ ሄይቲ ቃፃሬቲዳ ኣይሁዳ ኣሳታፔ ኣማኒዳ ኣሳታ ባጋታ። ሄይታንታ ጮዑ ሂስቴꬅ ቤሴስ። ጋሶይካ ኢስቲ ቤሶንታ ኦጌራ ባሲ ጎዓ ዴማናስ ቤሶንታ ቲሚርቴ ታማርሶን ኬꬃ ኣሳ ዉርሲ ሞሮን ዴቴስ። ኢስታ ናቤታፔ ኢሳዴይ ኢስታ ጊሽ ሃሳዪሼ “ቃርፄሴ ኣሳይ ኡባ ዎዴ ዎርዳንቻታ፥ ኢታ ዶዓታ፥ ጋንጃማታኔ ኣዛላታ” ጊዴስ። ሄ ማርካቴꬃይ ቱማ፤ ሄሳ ጊሽ ኔ ኢስታ ሎዔꬃ ሃንቄታ። ጋሶይካ ኢስታስ ቱሙ ኣማኖይ ዳና ማላኔ፥ ኣይሁዳታ ሃይሲዔ ዎይኮ ቱሙ ዮዖፔ ሃኪዳ ኣሳታ ኣዛዞ ኢስቲ ሲዮንታ ማላሳ። ጌሻታስ ሚሺ ዉሪካ ጌሻ ሺን ቱናታሲኔ ኣሞንታይታስ ጊዲኮ ዉሪካ ቱና። ሃራፔካ ኢስታ ቆፋይ ዉሪካ ቱኒዴስ። ኢስቲ ባና ኑ ፆሴ ኤሮስ ጌቴስ ሺን ባ ሃኖቴꬃን ጊዲኮ ካዴቴስ። ኢስቲ ሹኒዛይታ፥ ኣዛዜቶንታይታኔ ሎዖ ኦሶስ ቤሶንታይታ። ኔ ጊዲኮ ኣሳ ቱሙ ጊዲዳዝ ታማርሳ። ጪማ ኣሳይ ዎዝናማ፥ ቦንቼቲዳይታ፥ ባና ባርካ ሃሪዛይታ፤ ኣማኖኒኔ ሲቆን ዳንዳያንካ ሎዖ ጊዳና ማላ ኢስታ ዞራ። ሄሳꬆካ ጪማ ማጫሳቲ ባ ዲዛ ዱሳን ቦንቾራ ዲዛይታኔ ሎዖ ሃኖቴꬅ ኣሳ ታማርሲዛይታ ጊዴቶ ኣቲን ኣሳ ሱንꬅ ኢሲዛይታ ዎይኮ ዎይኔ ጫጄ ኡሻ ሱኬን ዋፄቲዳይታ ጊዶንታ ማላ ኢስታ ታማርሳ። ሄሳꬆ ኦꬂኮ ናቴꬃ ማጫሳቲ ባ ኣዚናታኔ ባ ናይታ ዶሳና ማላ ታማርሳናስ ዳንዳዬቴስ። ፆሳ ቃላይ ኦና ኣቻንካ ጫዬቶንታ ማላ ኢስቲ ባርካ ባና ሃሪዛይታኔ ጌሻታ፥ ኬꬃ ጊዶን ኢስታ ኦሶይ ኦይኪዳይታኔ ኣሳስ ኪያታ፥ ባ ኣዚናታስ ኣዛዜቲዛይታ ጊዳና ማላ ጪማ ማጫሳቲ ኢስታ ታማርሴቶ። ሄሳꬆካ ያላጋ ኣቱማሳይ ባርካ ባና ሃራና ማላ ኔ ኢስታ ዞራ። ኣይ ሃኖንካ ኔ ኣሳስ ሎዖ ሌሚሶ ጊዳ። ኔ ኣሳ ታማርሲዛ ቲሚርቴዛ ኔካ ዎዝናፔ ታማርሲዛዴኔ ናጊዛዴ ጊዳ። ኑ ጊሽ ኢታ ሃሳዪዛ ኣሳይ ሃሳያናስ ኢታ ዴሞንታ ኣጊዲ ዬላታና ማላ ኔ ሃሳዪዛ ሃሳያ ጊዶን ቦርሶ ዮዖይ ዶፖ። ኣይሌቲ ኣዛንካ ባ ጎዳታስ ሃሬታና ማላኔ ኡፋይሳና ማላ፤ ቃሴካ ኣዉቴ ዛሮንታ ማላ ታማርሳ። ሃኒዛዛን ኡባን ኑና ኣሺዳ ፆሳ ቲሚርቴይ ዶሴታና ማላ ኢስቲ ሎዖ ማርካቴꬅ ቤሳና ማላ ባ ጎዳታ ሚሽ ካይሶቶፔቶ። ኣሳስ ኢዛፔ ማሮይ ቤቲዛ ፆሳ ኪያቴꬂ ኣሳ ኡባስ ቆንጪዴስ። ሄ ኪያቴꬃይካ ኑኒ ናጋራን ዱሲኔ ሃ ኣላሜ ኣሞቴꬃ ካዲዲ ሃይሳ ሃ ዎዴዛን ኑርካ ኑና ሃሪዲኔ ፂሎቴꬃን ቱሙ ኣያና ዱስ ዳናይሳ ኑና ታማርሴስ። ሄሲካ ኑስ ኣንጄቲዳ ሂዶታ ጊዲዳ ዎጋ ፆሳኔ ኑና ኣሺዳ ዬሱስ ኪርስቶሳ ቦንቾይ ቆንጫናይሳ ናጋናሳ። ኢዚካ ኑና ኢታቴꬃፌ ዎዛናሲኔ ሎዖ ኦꬃናስ ሚኒዛ ባ ዴሬ ኤራይስ ዶራናስ ባና ኑስ ኣꬂ ኢሚዴስ። ሄሳ ጊሽ ኔ ታማርሳናይቲ ሄይታንታ። ሄሳካ ኔ ኩሜꬃ ጎዳቴꬃራ ዞራኔ ሃንቃ፤ ኔና ኦኒካ ሌቆፎ። ኣሳይ ዴሬ ኣይሲዛይታስ ሃሬታና ማላኔ ሎዖ ጊዲዳ ሚሽ ዉርሲ ኦꬃናስ ጊጋ ጊዳና ማላ ኣሳ ቆፊሳ። ቃሴካ ኦኒካ ኣሳ ቦላ ኢታ ሃሳዮንታ ማላኔ ሎዖ ኣሳ ጊዳና ማላ ኣሳ ኡባስ ኩሜꬃ ዎዝናፔ ባ ኣሽኬቴꬅ ቤሳና ማላ ኡባ ቆፊሳ። ኑካ ካሴ ቆፋይ ባይንዳይታ፥ ኣዛዜቶንታይታ፥ ባሌቲዛይታ፥ ዱማ ዱማ ኣሞኒኔ ሎዖ ዱሳስ ኣይሌቴꬃን ሃሬቲዛይታ። ኣሳራኔ ኑርካ ኑ ጋርሳንካ ኦዬቲሼ ኢታቴꬃኒኔ ሚቃይኔቴꬃን ዶስ። ጊዶ ኣቲን ኑና ኣሺዳ ፆሳ ኪያቴꬂኔ ኢዛ ሲቆይ ቆንጪዳ ዎዴ ኑ ኦꬂዳ ፂሎቴꬃን ጊዶንታ ዲሺን ኢዛ ማሮቴꬃ ዳሮን ኣቲዶስ፥ ኢዚ ኑና ኣሺዳይ ናምዓንꬆ ዬሌቴꬅ ጊዲዳ ሜቻኒኔ ፂሎ ኣያናን ኦራፄቴꬃና። *** ሄሳካ ፂሎ ኣያናይ ኑ ቦላ ኑ ጎዳ ፆሲ ኑና ኣሺዳ ዬሱስ ኪርስቶሳ ባጋራ ዳርሲ ጉሲዴስ። ሄሲካ ኑ ኢዛ ኪያቴꬃን ፂሊዲ ሜርና ዴዖ ሂዶታ ኦይኪዲ ላቲዛይታ ጊዳናሳ። ሄሲካ ኣማኔቲዳ ቃላ። ፆሳ ኣማኒዛይቲ ሎዖ ኦሶስ ባና ኣꬂ ኢማና ማላ ሃይሳ ዉርሳ ኔ ሎዔꬃ ዮታና ማላ ታ ኮያይስ። ሄሲካ ሎዖኔ ኣይ ኣሲካ ኮዪዛዛ። ቃሴካ ጮ ሃዳ ፓላማፔኔ ኣሳይ ባ ቆሞ ቆዲዛዛፔ፥ ማርሼፌኔ ዎጋ ጊሽ ዴንዲዛ ኦሻፌ ኔ ሃካ። ሄይታንቲ ጎዖይ ባይንዳ ፓꬆንታ ዮዖ። ኣሳ ጊዶን ሻኮቴꬅ ሜꬊዛ ኣስ ኢሲቶ ናምዑቶ ኔ ዞሪን ኤኮንታ ኢፂኮ ኢዛዴራ ኔስ ኢሲፌቴꬂ ዶፖ። ሄሳ ማላ ኣሲ ባሌቲዳ ናጋራንቻ ኣሳ፤ ኢዛዴይ ባርካ ባ ቦላ ፒርዲዳይሳ ኔ ኤራ። ኣርፂሞኔ ዎይኮ ቲቂቆሳ ታ ኔኮ ኪቲኮ ኔ ታኮ ኒቆጶሊዮኔ ያናስ ኔስ ዳንዳዬቲዛዚ ዉርሳ ኦꬃ። ታኒ ሃላይꬃ ባልጎ ሄን ኣꬃና ጋዳ ቃቻዲስ። ዎጋ ኤሪዛ ዜማሲኔ ኣጲሎሲ ቢሺን ኢስታስ ኮሺዛዝ ዉርሳ ኩንꬃ ማዳ። ኑ ባጋታስ ሃቺስ ሃቺስ ኢስታ ኮሺዛዝ ኢስቲ ዴማና ማላኔ ኢስታ ዴꬃይ ጎዓይ ባይንዳዚ ጊዶንታ ማላ ኢስቲ ሎዖ ኦሶ ኦꬂ ሚናና ማላ ታማራናስ ኮሼስ። ታናራ ዲዛይቲ ኢንቴና ሳሮ ጌቴስ። ኣማኖ ጌዶን ኑና ሲቂዛይታ ዉርሲ ሳሮ ጊቴ። ፆሳ ኪያቴꬂ ኢንቴናራ ጊዶ። ዬሱስ ኪርስቶሳ ጊሽ ቃሼቲዳ ታፔ ጳዉሎሳፔኔ ኑ ኢሻ ፂምቶሳፔ ኑ ሲቆ ኢሻ ጊዲዲ ኑናራ ኢሲፌ ኦꬂዛ ፒልሞናስ፤ ኔ ኬꬃን ሺቂዛ ኣማኒዛ ኣሳሲኔ ኑ ሚቼዮ ኣምፒብያስ ቃሴካ ኑናራ ኢሲፌ ኪርስቶሳ ዎታዳራ ጊዲዳ ኣርኪጳሴስ፤ ኑ ኣዋ ፆሳፌ ኑ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ። ታኒ ታ ዎሳን ኔና ቆፓሼ ኡባ ዎዴ ፆሳ ጋላታይስ። ጋሶይካ ኔ ፆሳ ኣሳ ሲቂዛይሳኔ ጎዳ ዬሱስ ኪርስቶሳን ኔ ኣማኒዛይሳ ታ ሲያዲስ። ኑኒ ኪርስቶሳስ ጊዲዳይሳኔ ኑስ ዲዛ ሎዖ ዮዖይ ዉሪ ቆንጬን ኤሬታና ማላ ኔካ ኔ ኣማኖ ሃራ ኣሳስ ቤሳና ማላ ታ ኔስ ሚና ዎሳይስ። ታ ኢሻዞ! ኔ ሃኖን ፆሳ ኣሳ ዎዝናይ ኦራፂዳ ጊሽ ኔ ሲቆይ ታ ዎዝና ኬሂ ሚንꬂዴስ። ሄሳ ጊሽ ኔ ኦꬃናስ ቤሲዛይሳ ኦꬃና ማላ ኔና ኣዛዛናስ ታስ ኪርስቶሳን ፃላቴꬅ ዴስኮሺን። ጊዲኮካ ታ ኔና ኣዛዛናፔ ሲቆራ ዎሳይስ። ጋሶይካ ታኒ ዬሱስ ኪርስቶሳ ጊሽ ቃሼታዳ ቃሾ ኬꬃን ዲዛ ጳዉሎሳ። ታ ኔና ዎሲዛይ ታ ቃሾ ኬꬃን ዳሼ ዬሱስ ኪርስቶሳን ዬሊዳ ና ኣናስሞሳ ጊሻሳ። ኣናስሞሲ ሃይሳፌ ካሴ ኔና ጎዒቤና ሺን ሃዒ ጊዲኮ ኢዚ ኔናካ ታናካ ጎዒዛዴ። ታ ሃዒ ኢዛ ኔኮ ዛራ ዬዳዲስ። ታ ኔኮ ዬዲዛይ ኢዛ ጊዶንታ ታ ዎዝና ኔኮ ዛራ ዬዲዛ ማላ ቆዳይስ። ሚሺራቾ ቃላ ጋሶን ታ ሃን ቃሼታ ዲሺን ኔ ታና ኦꬃ ማዳናይሳ ኢዚ ታናራ ዴዪዳኮ ታና ኡፋይሴስ። ጊዶ ኣቲን ኔ ሎዖ ኦሶይ ኔ ዶሳንፔ ኣቲን ዎልቃራ ጊዶንታ ማላ ጋዳ ኔና ኦይቾንታ ኣይኮካ ኦꬃና ኮያቤይኬ። ኣናስሞሲ ሃኖ ጋካናስ ኔፔ ጉꬃ ዎዴ ሻኬቲኮካ ኦኔ ኤሪዛይ ሃይሳፌ ጉዬ ኡባ ዎዴ ኔናራ ዳና ዳንዳዬስ። ሃይሳፌ ጉዬ ኢዚ ኔናራ ዳናይ ኣይሌ ማላ ጊዶንታ ኣይሌፌ ኣꬊ ኔስ ኣሾ ኢሻ ማላ ጊዳና። ኢዚ ታስ ዶሴቲዳ ኢሻ። ጊዶ ኣቲን ኢዚ ኔና ኦꬂ ጎዓና ኣስ ጊዲዳ ጊሺኔ ኢዚ ኔስ ኪርስቶሳ ባጋራ ኢሻ ጊዲዳ ጊሽ ኔስ ኬሂ ዶሴቲዳዴ ጊዳና። ኑስ ዲዛ ኢሲፌቴꬃ ጋሶን ኔ ታና ኔስ ኢሻ ማላ ቆዲዛ ጊዲኮ ታና ኔ ሞካ ኤኪዛ ማላ ኢዛካ ሞካ ኤካ። ኢዚ ኔ ቦላ ጋꬂዳ ቆሆይ ዲኮ ዎይኮ ኔ ኣጮይ ኢዛ ቦላ ዲኮ ኢዛ ኣጮዛ ታ ቦላ ቆዳ። ሄኮ ታ ጳዉሎሲ “ኢዛ ኣጮዛ ታ ኔስ ቃንፃና” ጋዳ ታ ኩሼራ ፃፋዲስ። ጊዲኮካ ኔ ኪርስቶሳ ኣማኒዳይ ታ ባጋራ ጊዲዳ ጊሽ ሃራይ ኣቶሺን ኔካ ታስ ቃንፃና ኣጮይ ዲዛዴ ጊዲዳይሳ ታ ኔና ኤሪሳናስ ኮሼና። ሂዓ ታ ኢሻዞ ሄሳ ሎዖ ኦሶ ኔ ታስ ኦꬃና ማላ ጎዳ ሱንꬃን ኪርስቶሳ ጊሽ ጋዳ ኔ ታ ዎዝና ሼምፒሳና ማላ ኔና ዎሳይስ። ታ ኔስ ሃይሳ ፃፊዳይ ኔ ታስ ኣዛዜታናይሳ ኣማናዳኮ! ታ ኔና ኦይቺዳይሳፌ ኔ ኣꬃ ኦꬃናይሳ ታ ኤራይስ። ፆሲ ኢንቴ ዎሳ ሲይዲ ታ ኢንቴኮ ባና ማላ ታስ ሂዶታይ ዲዛ ጊሽ ታ ባዳ ኢንቴኮን ሼምፓናሶ ታስ ሃያና ጊጊሳ። ዬሱስ ኪርስቶሳ ጋሶን ታናራ ቃሼቲዳ ኤጳፒራይ ኔና ሳሮ ጌስ። ሄሳꬆካ ታናራ ኦꬂዛይቲ ማርቆሲ ኣርሲፂሮኮሲ፥ ዴማሲኔ ሉቃሲ ኔና ሳሮ ጌቴስ። ጎዳ ዬሱስ ኪርስቶሳ ኪያቴꬅ ኢንቴናራ ጊዶ። ቤኒ ዎዴፔ ኦይኪዲ ፆሲ ዱማ ዱማ ኦጌራ ናቤታ ባጋራ ካሴ ኑ ኣዋታስ ዳሮ ዎዴ ዮቲዴስ። ቃሴ ሃይሳ ዉርሴꬃ ዎዴ ቦላ ዉርሲ ላቲሲዳዴኔ ሃ ኣላሜዛ ሜꬊዳ ባ ናዛ ባጋራ ኑስ ዮቲዴስ። ኢዚካ ፆሳ ቦንቾ ቤሲዛዴኔ ፆሳ ፆሳቴꬃስ ሎዖ ሌሚሶ ጊዲዲ ባ ዎልቃማ ቃላን ዉርሲካ ሺሺ ኦይኪዴስ። ኢዚ ኣሳ ናጋራፔ ጌሺዳፔ ጉዬ ሳሎን ቦንቾ ፆሳ ኡሻቻን ኡቲዴስ። ሄሳ ጊሽ ኢዛስ ኢሜቲዳ ሱንꬃይ ኪታንቻታ ሱንꬃፌ ኣꬊዛይሳ ማላ ኢዚካ ኪታንቻታፔ ኬሂ ኣꬌስ። ፆሲ ኪታንቻፔ “ኔኒ ታ ና፤ ታ ኔና ሃቺ ዬላዲስ። ዎይኮ ታ ኢዛስ ኣዋ ጊዳና፤ ኢዚካ ታ ና ጊዳና” ኦናስ ጊዴ? ቃሴካ ፆሲ ባ ባይራ ናዛ ዱጌ ሃ ቢታ ቦላ ዬዲሼ “ፆሳ ኪታንቻቲ ዉሪካ ኢዛስ ጎይኔቶ” ጊዴስ። ኪታንቻታ ጊሽ ሃሳዪሼ ቃሴ “ኪታንቻታ ኣያናታ፤ ባ ኦሳንቻታካ ታማ ላጮ ኬሴስ” ጊዴስ። ናዛ ጊሽ ቃሴ “ጎዶ! ኔ ዙፋኔይ ሜርናፔ ሜርና ጋካናስ ሚኒ ዳና። ኔኒ ኔ ካዎቴꬃ ሊኬ ካሌꬃሳ። ኔኒ ፂሎቴꬅ ዶሳዳሳ፤ ማካላካ ኢፃሳ፤ ሄሳ ጊሽ ፆሲ ኔ ጎዳይ ኔና ኔ ላጌታፔ ቦላ ኬሲዴስ። ኔና ኡፋይሳ ዛይቴ ቲዪዴስ” ጌስ። ቃሴ “ጎዶ ኔኒ ኮይሮ ቢታ ሜꬋዳሳ። ሳሎቲካ ኔ ኩሼን ኦሴቲዳ። ኢስቲ ꬋያና፥ ኔኒ ጊዲኮ ሚና ዳና። ኢስቲ ዉሪካ ማይዖ ማላ ጋልዓና። ኔኒ ኢስታ ማይዖ ማላ ቃላምዓና። ኢስቲካ ማይዖ ማላ ላሜታና። ኔ ጊዲኮ ኣይዴካ ኔኒ ኔና። ኔ ዱሳስ ዉርሴꬂ ዴና” ጌስ። ፆሲ ኪታንቻታፔ “ታኒ ኔ ሞርኬታ ኔ ቶሆ ጋርሳን ዬꬊሳና ጋካናስ ኔ ታ ኡሻቻን ኡታ” ኦና ጊዴ? ኪታንቻቲ ዉሪካ ኣቶቴꬃ ላታና ኣሳታ ኦꬃናስ ፆሳፌ ኪቴቲዛ ኦሳንቻ ኣያና ጊዴቴኔ? ሄሳ ጊሽ ኑኒ ሲዪዳ ቃላፔ ባሌቲዲ ኩንዶንታ ማላ ኑ ሲዪዳ ቃላ ሎዔꬂ ናጋናስ ቤሴስ። ኣዛስ ጊኮ ካሴ ኪታንቻታ ባጋራ ዮቴቲዳ ቃላይ ቱሙ ጊዲዳ ሄ ቃላ ዬꬊ ኣꬊዳይ ባስ ቤሲዛ ቂፃቴ ኤኬስ። ኑ ቃሴ ሄሳ ማላ ጊታ ማሮቴꬅ ጮ ሌፕ ሂስቲኮ ዋኒ ኣታኔ? ሃይሲ ማሮቴꬃይ ኮይሮ ጎዳ ባጋራ ኑስ ዮቴቲዴስ። ኢዛፔ ሲዪዳይቲካ ኑስ ጌሺ ዮቲዳ። ፆሲ ቃሴካ ማላታታ፥ ማላሊሲዛ ሚሻታ፥ ዱማ ዱማ ማላታታ ኦሶኒኔ ባ ሼኔ ማላ ኢሚዳ ፂሎ ኣያና ኢሞታታ ባጋራ ኢስታ ማርካቴꬃ ሚንꬂዴስ። ፆሲ ሃይሳ ኑ ኢዛ ጊሽ ሃሳዪዛ ቡሮ ያና ኣላሜዛ ኪታንቻስ ሃርሲቤና። ጊዶ ኣቲን ጌሻ ማፃፋይ ሃራሶን “ኔ ኢዛስ ዩሻ ቆፓናስ ኣሲ ኣዜ? ኢዛስ ኔ ቆፓናስ ኣሳናይ ኢዚ ኣዜ? ኔ ኢዛ ኪታንቻታፔ ጉꬃራ ጉꬃዳሳ። ቦንቾ ዛዉዴኔ ጋላታ ኢዛ ሁዔን ዎꬃዳሳ። ኔኒ ኢዛ ኔ ኩሼ ኦሶታ ቦላ ሹማዳስ። ኔ ዉርሳካ ኢዛ ቶሆ ጋርሳን ሃሪሳዳሳ፤ ፆሲ ኡባካ ኢዛፔ ጋርሳራ ኢዛስ ሃሪሲሺን ኣቲዳይ ኣይ ሚሺካ ዴና። ጊዶ ኣቲን ሃዒ ቃሴ ዉሪካ ኢዛስ ሃሬቲሺን ኑ ቤይቤኮ” ጊዴስ። ጊዶ ኣቲን ፆሳ ኪያቴꬃን ኣሳ ኡባ ጊሽ ሃይቃናስ ኪታንቻታፔ ጉꬃ ዎዴ ጉፂዳ ዬሱሲ ዋዬ ሃይቆ ሃይቂዲ ሃዒ ቦንቾኔ ጋላታ ዛዉዴ ባ ሁዔን ዎꬂዳይሳ ኑ ቤዮስ። ሃኒዛይ ዉሪካ ኢዛፔ ኢዛስ ሜꬌቲዳ ፆሲ ዳሮ ናይታ ቦንቾስ ኤፋናስ ኢስታ ማሮቴꬃስ ሁዔ ጊዲዳ ዬሱሲ ዋዬን ፖላናስ ኮሺዛዝ ጊዲዴስ። ኣስ ጌሺዛይኔ ኢዛን ጌዪዛ ኣሳይ ሄይቲ ኢሲ ኬꬃ ኣሳታ። ሄሳ ጊሽ ዬሱሲ ኢስታ “ታ ኢሻቶ” ጊ ፄይጋናስ ዬላቴና። “ታኒ ኔ ሱንꬃን ታ ኢሻታስ ዮታና ሺቂዳ ዴሬዛ ሲንꬃን ኔና ጋላቲዛ ዬꬅ ታ ዬፃና።” ሄሳꬆካ “ታ ኢዛን ኣማኔታና” ቃሴካ “ታኒኔ ታስ ፆሲ ኢሚዳ ናይቲ ኑ ሃን ዶስ” ጌስ ጌሻ ማፃፋይ። ናይታስ ኣሾይኔ ሱꬂ ዲዛ ማላ ኢዚካ ኢስታ ማላ ኣሳ። ሄሲካ ሃይቆ ቦላ ኢዛስ ዎልቃይ ዲዛ ዳቡሎሳ ኢዚ ባ ሃይቆ ዎልቃን ዛራናሳ። ሄሳꬆካ ባ ዲዛ ዎዴ ኡባን ሃይቆስ ባቦን ሃሬቲ ቃሼቲዳይታ ሃይቆፔ ዎዛናሳ። ኢዚ ሃ ዪዳይ ኪታንቻታ ማዳናስ ጊዶንታ ኣብራሃሜ ዜሬꬃታ ማዳናስ ዪዴስ። ሄሳ ጊሽ ኡባ ባጋራ ኢዚ ባ ኢሻታ ሚሳታናስ ቤሲዛዴ ጊዲዴስ፤ ኢዚ ሄሳ ኦꬂዳይ ማሪዛዴኔ ኣማኔቲዳ ዋና ቄሴ ሃላቃ ጊዲዲ ፆሳስ ኦꬃናሲኔ ዴሬዛ ናጋራፔ ማራናሳ። ኢዚ ባ ሁዔን ፓጬቲዲ ሜቶ ኤኪዳ ጊሽ ፓጬቲዛይታ ማዳናስ ዳንዳዬስ። ሄሳ ጊሽ ሳሎፔ ፄይሲ ኢንቴና ጋኪን ኣማኒዛ ኑ ኢሻቶ! ኑ ኣማኖስ ሃዋሬኔ ቄሴታ ሃላቃ ጊዲዳ ዬሱሳ ቆፒቴ። ሙሴይ ፆሳ ኬꬃ ኡባ ቦላ ኣማኔቲዳዴ ጊዲዳ ማላ ዬሱሲካ ባና ሹሚዳዴስ ኣማኔቲዳዴ። ኬꬄ ኬፂዳዴስ ኬꬃፌ ቦላራ ቦንቾይ ዲዛ ማላ ዬሱሳሲካ ሙሴፔ ኣꬊዛ ቦንቾይ ቤሲዛዴ ጊዳናስ ቤሴስ። ኬꬄ ኡባስካ ኬፂዳዴይ ዴስ፤ ጊዶ ኣቲን ዉርሲካ ኦꬂዳዴይ ፆሳ። ሙሴይ ቲንቢቴ ማርካቲሼ ፆሳ ኬꬃ ኡባ ቦላ ኢሲ ኣማኔቲዳ ኦሳንቻ ማላ ጊዲ ዴዒዴስ። ኪርስቶሲ ጊዲኮ ፆሳ ኬꬃ ቦላ ኣማኔቲዳ ና ማላ። ኑኒካ ኢዛ ቦላ ኣማኔቲዛ ኡፋይሳይኔ ጬቄቲዛ ሂዶታ ሎዔꬂ ኦይኪኮ ኑ ኢዛስ ዱሳ ኬꬃ። ሄሳ ጊሽ ፂሎ ኣያናይ ጊዛ ማላ “ኢንቴ ሃች ኢዛ ቃላ ሲዪኮ ባዞ ቢታን ኢንቴ ታና ፓጪዳ ዎዴ ማካሊዳይሳꬆ ኢንቴ ዎዝና ሙሚሶፒቴ። ኢንቴ ኣዋቲ ካሴ ሄን ታና ፓጪዳኔ ታናራ ኤቄቲዳ። ታ ኦꬂዳይሳ ዉርሲ ኦይዱ ታሙ ላይꬅ ጋካናስ ቤዪዳ። ሄ ዎዴ ዬሌቴꬃታ ቦላ ታ ሃንቄታዳ፤ ኢስታ ዎዝናይ ኡባ ዎዴ ባሌቴስ፤ ኢስቲ ታ ኦጌ ኤሪቤይቴና። ቃሴ ‘ታ ኢስታስ ኢሚዛ ሼምፖሶ ኢስቲ ሙሌካ ጌሌቴና!’ ጋዳ ታኒ ታ ሃንቆን ጫቃዲስ” ጌስ። ታ ኢሻቶ! ኢንቴፌ ኦኒካ ዴዖ ፆሳፌ ሃራሶ ኢንቴና ሃሲዛ ኢታኔ ኣማኖንታ ዎዝናይ ዶንታ ማላ ናጌቲቴ። ሃራፔካ ኢንቴ ጋርሳፌ ኦኒካ ናጋራን ባሌቲዲ ባ ዎዝና ሙሚሶንታ ማላ “ሃች” ጌቴቲሺን ሃች ሃች ኢንቴ ኢንቴ ጋርሳን ሚኔቲቴ። ኑስ ካሴ ኮይሮፔ ዲዛ ኣማኖ ኑኒ ዉርሴꬅ ጋካናስ ሎዔꬂ ሚንꬂ ኦይኪኮ ኑኒ ኪርስቶሳራ ኢሲፌ ላታና። ሄሲካ “ኢንቴ ሃች ኢዛ ቃላ ሲዪኮ ካሴ ማካሊዳይታይሳ ማላ ሃዒካ ኢንቴ ዎዝና ኢንቴ ሚንꬆንታ ማላ” ጌቴቲ ጌሻ ማፃፋን ፃፌቲዳይሳꬆ ሃኒዴስ። ሲይዲ ማካልዳይቲ ኢስቲ ኦናንቴ? ሙሴይ ጊብፄፔ ካሌꬅ ኬሲዳይታ ኡባታ ጊዴቴኔ? ፆሲ ኢስታ ቦላ ኦይዱ ታሙ ላይꬃ ሃንቄቲዳይቲ ኢስቲ ኦናንቴ? ናጋራ ኦꬂን ኢስታ ኣሃይ ባዞ ቢታን ኩንዲ ኣቲዳይታ ጊዴቴኔ? ኢዛስ ኣዛዜቶንታ ኢፂዳይታፔ ኣቲን ኢዛ ሼምፖሶ ጌሎንታ ማላ ኢዚ ጫቂ ዲጊዳይ ሃራይ ኦናንቴ? ሄሳ ጊሽ ኢስቲ ጌሎንታ ኣቲዳይ ኣማኖይ ባይንዳ ጊሽ ጊዲዳይሳ ኑ ኤሮስ። ጌዴ ሼምፖሶ ጌላናስ ኢሜቲዳ ሂዶታይ ሃዒካ ናጌቲ ዲዛ ጊሽ ኢንቴ ጊዶፌ ኦኒካ ሄሳስ ቤሶንታዴ ጊዶንታ ማላ ኣኔ ናጌቶስ። ሄይታንታስ ሳባኬቲዳ ማላ ኑስካ ሚሺራቾ ቃላይ ሳባኬቲዴስ። ጊዲኮካ ሲዪዳ ኣሳታራ ሲዪዳ ቃላይ ኢስታራ ኣማኖን ዋላኬቶንታ ኣጊዳ ጊሽ ኢስታ ማዲቤና። ኑ ቃስ ኣማኒዛይቲ ሄ ሼምፖሶዛ ጌላና። ፆሲ “ሄሳ ጊሽ ታኒ ታ ሃንቆን ‘ኢስቲ ታ ሼምፖሶ ሙሌካ ጌሌቴና’ ጋዳ ታ ጫቃዲስ” ጊዴስ። ጊዶ ኣቲን ሃይሲ ኣላሜይ ሜꬌቶሳፔ ሃ ሲሚን ኢዛ ኦሶይ ፖሌቲዴስ። ኢሲ ሶን ላፑንꬆ ጋላሳ ጊሽ “ላፑንꬆ ጋላሲ ፆሲ ኦሶ ኡባፌ ሼምፒዴስ” ጌቴቲ ጌሻ ማፃፋን ፃፌቲዴስ። ቃሴካ ሄ ሶዛን “ቱማፔ ኢስቲ ታ ሼምፖሶ ሙሌካ ጌሌቴና” ጌስ። ኢዛ ሼምፖሶ ቡሮ ጌላና ኢሲ ኢሲ ኣሳቲ ዴቴስ። ካሴ ኢስታስ ሚሺራቾ ቃላይ ሳባኬቲዳይቲ ኣዛዜቶንታ ኢፂዳ ጊሽ ኢዛ ሼምፖሶ ኢስቲ ጌሊቤቴና። ሄሳ ጊሽ ፆሲ “ሃች” ጊዲ ቃሴካ ሃራ ጋላስ ዎꬂዴስ፤ ሄሲካ ዳሮ ላይꬃታፔ ጉዬ ዳዉቴ ባጋራ “ሃች ኢንቴ ኢዛ ቃላ ሲዪኮ ኢንቴ ዎዝና ሙሚሶፒቴ” ጌቴቲ ካሴ ዮቴቲዳ ማላ ሃኒዴስ። ኢያሶይ ኢስታስ ሼምፖ ኢሚዳኮ ፆሲ ሃራ ጋላስ ጊዲ ዮቴናኮሺን። ሄሳ ጊሽ ሳምባታ ጋላስ ሼምፖይ ፆሳ ዴሬስ ሃዒካ ዴስ። ጋሶይካ ፆሳ ሼምፖሶ ጌሊዛይ ዉሪ ፆሲ ኦꬂ ሼምፒዳ ማላ ኢዚካ ባ ኦሶፔ ሼምፓና። ሄሳ ጊሽ ኦኒካ ሄይታንታ ማላ ኣዛዜቶንታ ኢፂዳይሳ ሌሚሶ ካሊዲ ኩንዶንታ ማላ ሄ ሼምፖሶዮ ጌላናስ ኣኔ ሚኖስ። ፆሳ ቃላይ ፓፃ ዲዛይሳኔ ኦꬂዛ ቃላ። ናምዑ ባጋ ቃራ ማሻፌካ ኣꬊ ቃራ፤ ሼምፖኔ ኣያና፥ ሻያኔ ኮልꬔካ ሻካና ጋካናስ ጫዴስ፤ ዎዚና ቆፋኔ ኣሞቴꬃካ ፓጪ ፄሌስ። ፆሳ ኣይፌፔ ጌሜቲዳ ሜꬌታይ ሙሌካ ዴና። ኑ ኢዛስ ኑ ጊሽ ዛሮ ኢማናስ ቤሲዛ ኢዛ ሲንꬃን ሃኖይ ዉሪካ ካሎ ቆንጬን ቤታና። ሄሳ ጊሽ ፑዴ ሳሎ ቢዳ ቄሴታ ሃላቃ ፆሳ ና ዬሱሲ ኑስ ዲዛ ጊሽ ኣኔ ኑኒ ኑ ኣማኖ ሚንꬂ ኦይኮስ። ኑ ዳቡሪሺን ኑስ ቃꬌታና ዳንዳዪዛ ቄሴታ ሃላቃይ ኑስ ዴስ። ኢዚ ኑ ማላ ኡባ ሚሻን ፓጬቲዴስ፤ ጊዲኮካ ኢዚ ኣይኮ ናጋራካ ኦꬂቤና። ሄሳ ጊሽ ኑኒ ማሮቴꬅ ኤካናሲኔ ኑና ኮሺዛ ዎዴ ኑና ማዲዛ ኢዛ ኪያቴꬅ ኑ ዴማና ማላ ጌዴ ኢዛ ማሮቴꬃ ኣልጋኮ ኣኔ ኣማኖን ሺቆስ። ቄሴታ ሃላቃ ጊዲ ሹሜቲዛዴይ ዳሮ ኣሳ ጊዶፌ ዶሬቴሲኔ ኣሳ ጊሽ ጊዲዲ ኢሞታኔ ናጋራ ጊሽ ያርሾ ሺሻናስ ዶሬቴስ። ኢዚካ ባ ባጋራ ዳቡራንቻ ጊዲዳ ጊሽ ኤሮንታ ኣሳታሲኔ ኦጌ ባሊዳይታስ ቃꬌታና ዳንዳዬስ። ኢዚ ባ ናጋራ ጊሺኔ ሃራ ኣሳታ ናጋራ ጊሽ ያርሾ ሺሻናስ ኢዛስ ቤሲዛይ ሄሳ ጊሻሳ። ኣሮኔይ ፄይጌቲዳይሳꬆ ኢዚ ፆሲ ፄይጊዳዴ ጊዳናስ ቤሴስ ኣቲን ሄሳ ሄ ቦንቾዛ ባርካ ባስ ኤኪዛዴይ ዴና። ሄሳꬆካ ኪርስቶሲ ቄሴታ ሃላቃ ጊዳና ቦንቾ ባርካ ባስ ኤኪቤና። ጊዶ ኣቲን “ኔ ታ ናኮ፤ ታ ኔስ ሃች ኣዋ ጊዳዲስ” ጊዳ ፆሳፌ ኤኪዴስ። ሄሳꬆካ ሃራሶን “ማልኬፄዴቄ ሹሜታ ማላ ኔኒ ሜርናስ ቄሴታ ሃላቃ” ጌስ። ዬሱሲ ሃይሳ ቢታ ቦላ ዲዛ ዎዴ ኢዛ ሃይቆፔ ኣሻና ዳንዳዪዛይሳኮ ኣፉንፂሼ ጊታ ቃላራ ዎሳ ዎሲዴስ። ኣዳፌ ኣሽኬቴꬃራ ኢዚ ኣዛዜቲዳ ጊሽ ኢዛ ዎሳ ፆሲ ሲዪዴስ። ኢዚ ፆሳ ና ጊዲኮካ ባ ኤኪዳ ዋዬዛፔ ኣዛዜቴꬅ ታማሪዴስ። ሄሳ ባጋራ ፓጬይ ባይንዳዴ ጊዲ ቤቲዳይሳፌ ጉዬ ባና ኣዛዜቲዛይታስ ኡባስ ሜርና ኣቶቴꬃስ ጋሶ ጊዲዴስ። ማልኬፄዴቄ ሹሜቴꬃ ማላ ቄሴታ ሃላቃ ጌቴቲ ፆሳን ሹሜቲዴስ። ሄሳ ጊሽ ኑ ሃሳያና ሚሺ ቡሮ ዳሮይ ዴስ። ጊዶ ኣቲን ኢንቴ ዶታዓታ ጊዲዳ ጊሽ ኢንቴና ኤሪሶይ ሜቶ። ኢንቴ ሃኒ ዎዴ ኣስታማሬ ጊዳናስ ቤሲሺን ፆሳ ቃላ ቡሮ ኮይሮፔ ዴንꬂዲ ኢንቴና ታማርሲዛ ኣስ ኢንቴስ ኮሼስ። ኢንቴስ ኮሺዛይ ሚኖ ካꬅ ጊዶንታ ማꬃ። ማꬅ ፓሄቲዛይ ቂ ጉꬃ ና ጊዲዛ ጊሽ ሎዖኔ ኢታ ሻኪዛ ቲሚርቴ ሻኪ ኤሬና። ሚኖ ካꬅ ጊዲኮ ሎዖኔ ኢታ ሻካናስ ባናቴꬃ ዶሲሲዳ ዎዝና ኩንꬂዳ ኣሳታሳ። ሄሳ ጊሽ ኮይሮፔ ኪርስቶሳ ጊሽ ኢሜቲዳ ቲሚርቴዛ ኣጊዲ ኣኔ ጌዴ ሚኖ ቲሚርቴኮ ቦስ። ሃይቂዳ ኦሶፔ ማሮቴꬃን ጌሎ ጊሺኔ ፆሳን ኣማኖ ጊሽ ቡሮ ኣኔ ኢዛን ዎꬊ ማꬎኮ። ሄሳꬆካ ፂንቃቴ ጊሺኔ ኩሼ ኣሳ ቦላ ዎꬆ ጊሽ ቃሴካ ሃይቂዳያታ ዴንꬃ ጊሺኔ ሜርና ፒርዳ ጊሽ ቡሮ ዎꬂ ዶሞኮ። ፆሳ ሼኔ ጊዲኮ ኑ ሄሳꬆ ኦꬃና። ባ ኣማኖ ካዲዳ ኣሳታ ኢስታ ማሮቴꬃን ዎስቲ ዞራኔ? ፖዖይ ኢስታስ ኢሲቶ ፖዒዳይታ ሳሎ ኢሞቴꬃ ኤኪ ቤዪዳይታ፥ ፂሎ ኣያና ኤኪ ቤዪዳይታ፥ ሎዖ ፆሳ ቃላኔ ቡሮ ያና ኣላሜዛ ዎልቃ ኤኪ ቤዪዳይታ፤ ዛሪዲ ካዲዳይታ ኢስታ ናምዓንꬆ ዛሪዲ ማሮቴꬃን ኤኮይ ዳንዳዬቴና። ጋሶይ ኢስቲ ባ ሞሮስ ፆሳ ና ዛሪ ካቄቴሲኔ ካዉሼቴስ። ኡባ ዎዴ ባ ቦላ ኢራ ኡዪዛ ቢታይ ቃሴካ ኢዛ ጎይዛዴስ ኣይፌ ኢሚዛ ቢቲያ ፆሳ ኣቻን ኣንጄታዱስ። ጊዶ ኣቲን ኣጉንꬂኔ ኦዶሮይ ሞኪዛ ቢታያ ጎዓይ ቤዪዳሮ ጊዳና። ሄ ቢታይስ ቃንጌቴꬂ ማታን ዴስ። ኢዚ ዉርሴꬂ ታማን ፁጌቴꬅ ጊዳና። ታ ኢሻቶ! ኑኒ ሄሳꬆ ሃሳይኮካ ኢንቴስ ኢንቴ ኣቶቴꬃራ ኦይኬቲዳ ሎዖ ሚሽ ዲዛይሳ ኑ ሲꬎኮ። ካሴ ጊዲን ዎይኮ ሃዒ ጊዲንካ ኢንቴ ኣማኒዛይታ ማዲዳይሳኔ ኢዛ ሱንꬃ ጊሽ ኢንቴ ቤሲዳ ሲቆቴꬃ ባላናስ ፆሲ ማካላንቻ ጊዴና። ኢንቴስ ኢሜቲዳ ሂዶታይ ፖሌታና ጋካናስ ኢንቴፌ ኢሲ ኢሲ ኣሲ ሄሳ ማላ ኦሶ ዉርሴꬅ ጋካናስ ጌንጪዲ ኦꬃና ማላ ኑ ኣሞቶስ። ኣማኖኒኔ ዳንዳያን ኢንቴ ኢዛ ሂዶታ ቃላ ላቲዛይታ ሚሳታናፔ ኣቲን ዶታዓታ ጊዳናይሳ ኑ ኮዮኮ። ፆሲ ኣብራሃሜስ ሂዶታ ኢሚዳ ዎዴ ጫቂሼ ሃራ ኢዛፔ ኣꬊዛዴይ ባይንዳ ጊሽ ባርካ ባናን፥ “ታ ኔና ቱማፔ ኣንጃና፤ ታኒ ኔ ዜሬꬅ ዳርሳና” ጊ ጫቂዴስ። *** ኣብራሃሜይካ ጌንጪ ናጊዳፔ ካሊዲ ኢዛስ ኢሜቲዳ ሂዶታ ዴሚዴስ። ኣሳይ ጫቆ ጫቂሼ ባፔ ꬎቃን ጫቄስ። ጫቆዚካ ጌቴቲዳይሲ ፖሌታና ማላ ሚንꬂዛ ጊሽ ጫቂዳይታ ጊዶን ፓላማይ ዴንዲኮ ካሴ ጫቆ ቃላይ ዲጌስ። ፆሲ ላሜቶንታ ባ ቆፋ ሂዶታ ቃላ ላታናይታስ ቆንጪሳና ማላ ኮይዳ ጊሽ ጫቆ ቃላን ሚንꬂዴስ። ፆሲ ኣይ ዎዴካ ዎርዶታናስ ዳንዳዬና፤ ኢዚ ላሜቶንታ ናምዑ ሚሻታን ኑ ሲንꬃን ዲዛ ሂዶታ ኦይካናስ ኢዛኮ ሺቂዳ ኑኒ ጊታ ሚኖቴꬅ ዴማና ማላ ኦꬂዴስ። ኑካ ሼምፖ ቴቄ ጊዲዳ ሚኖኔ ኣማንꬂዛ ሂዶታ ዴሚዶስ፤ ሄ ሂዶታይካ ማጋላሻዛፔ ጉዬ ባጋራ ዲዛ ጌዴ ፆሳ ኬꬃ ጊዶ ጌሌስ። ሄ ሶዚካ ኑ ጊሽ ዬሱሲ ካሴቲ ጌሊዳ ሶ፤ ኢዚካ ማልኬፄዴቄ ሹሜቴꬃ ማላ ሜርናስ ቄሴታ ሃላቃ ጊዲዴስ። ሄሲ ማልኬፄዴቄይ ሳሌሜ ካዎኔ ፆሳ ቄሴ፤ ኢዚካ ኣብራሃሜይ ካዎታ ኦሊ ፆኒዲ ሲሚሺን ዴሚዲ ኣብራሃሜ ኣንጂዴስ። ኣብራሃሜይካ ባስ ዲዛ ኡባፌ ታሙ ኩሼፔ ኢሲ ኩሼ ኢዛስ ኢሚዴስ። ኮይሮ ኢዛ ሱንꬃስ ቢርሼꬂ “ፂሎ ካዎ” ጉሳ። ካሊዲ ቃሴ “ሳሌሜ ካዎ” ጉሲ “ሳሮቴꬃ ካዎ” ጉሳ። ኢዛስ ኣያካ፥ ኣዋይካ ዎይኮ ኢዛ ዬሌቴꬃስ ዛርኬይካ ባዋ። ኢዚ ኣይዴ ዬሌቲዲ ኣይዴ ሃይቂዳኮኔ ኤሬቲቤና፤ ኢዛስ ዶሜꬂኔ ዉርሴꬂ ባዋ፤ ጊዶ ኣቲን ፆሳ ና ማላ ሜርናስ ኢዚ ቄሴ ጊዲዲ ዴስ። ኣኔ ኢንቴ ኢዚ ኣይ ማላ ጊታኮኔ ቆፒቴ። ሃራይ ኣቶሺን ኣዋታስ ኡባስ ኮይሮይ ኣብራሃሜይ ባ ዲዒ ኤኪዳይሳ ኡባፌ ታማፌ ኢሳ ኬሲ ኢሚዴስ። ኢስታስ ቄሴቴꬂ ኢሜቲዳ ሌዌ ናይቲ ኢስታ ኢሻቲ ኣብራሃሜ ዜሬꬃታ ጊዲኮካ ዴራፔ ሄሲካ ባ ኢሻታፔ ታማፌ ኢሳ ኤካና ማላ ኢስታስ ዎጋን ኣዛዜቲዴስ። ሃይሳ ሃ ኣዴዛ ዜሬꬂ ሌዌ ዜሬꬅ ጊዴና። ጊዶ ኣቲን ኢዚ ኣብራሃሜፔ ታማፌ ኢሳ ኤኪዴስ። ካሴ ኢዛስ ሂዶታ ቃላይ ኢሜቲዳ ኣብራሜ ኣንጂዴስ። ባይራይ ካሎ ኣንጂዛይሲ ዎጋ። ኢሲ ባጋራ ታማፌ ኢሳ ኤኪዛይቲ ሃይቂዛይታ። ሃራ ባጋራ ቃሴ ታማፌ ኢሳ ኤኪዛዴይ ሃይቆንታ ፓፃ ዲዛ ማላ ኢዛስ ማርካቲዳዴይ ማልኬፄዴቄ። ሃራይ ኣቶሺን ሌዌይካ ኣብራሃሜ ባጋራ ታማፌ ኢሳ ኬሲዴስ ጋናስ ዳንዳዬቴስ። ጋሶይካ ማልኬፄዴቄይ ኣብራሃሜ ጋጊዛ ዎዴ ሌዌይ ቡሮ ባ ኣዋ ኣብራሃሜፔ ዬሌቲቤና። ፓጬይ ባይንዳ ፖሎይ ቤቲዳይኔ ዎጋይ ዴሬዛስ ኢሜቲዳይ ሌዌ ቄሴቴꬃ ማላ ጊዲዳኮ ኣሮኔ ማላ ጊዶንታ ማልኬፄዴቄ ሹሜቴꬃ ማላይ ሃራ ቄሴይ ያናስ ኣዛስ ኮሺዴ? ቄሴቴꬃ ዛርኬይ ላሜቲዛ ዎዴ ዎጋይካ ላሜታናይሲ ኣቶንታ ሚሻ። ሄሲ ዉሪካ ኢዛስ ዮቴቲዳ ቄሴይ ኢዚ ሃራ ዜሬꬃ። ኢዛ ዜሬꬃፌ ኦኒካ ያርሾሶን ኦꬂ ኤሪዛዴይ ባዋ። ኑ ጎዳይ ዩሁዳ ባጋፌ ዪዳይሲ ቱማ። ሙሴይ ቄሴታ ጊሽ ዮቲሼ ሃ ዜሬꬃ ጊሽ ዮቲዳይሲ ኢሲ ሚሺካ ባዋ። ማልኬፄዴቄ ማላይ ሃራ ቄሴይ ዴንዲኮ ኑ ካሴ ዮቲዳ ዮዖይ ዳሮ ቆንጬ ጊዴና። ኢዚ ቄሴ ጊዲዳይ ꬋዮንታ ዴዖ ዎልቃን ኣቲን ዜሬꬃፌ ዪዳ ዎጋፔ ጊዴና። ኢዛስ “ኔ ማልኬፄዴቄ ሹሜቴꬃ ማላ ሜርናስ ቄሴ” ጊ ማርካቲዴስ። ካሴ ኣዛዞይ ላፋኔ ጎዖንታይሳ ጊዲዳ ጊሽ ኣቲዴስ። ዎጋይ ኦናካ ጌሻናስ ዳንዳዮንታ ጊሽ ኑ ፆሳ ኣቺ ሺቃናስ ኢዛፔ ኣꬊዛ ሃራ ሂዶታይ ኑስ ኢሜቲዴስ። ሄሲካ ጫቆይ ባይንዳ ሃንቤና፤ ሃንኮ ቄሴ ጊዲዳይቲ ጫቆይ ባይንዳይታ። ኢዚ ጊዲኮ ቄሴቴꬃ ጫቆን ኤኪዴስ። ጋሶይካ ፆሲ ኢዛ ጊሽ “ጎዳይ ጫቂዴስ፤ ባ ቆፋ ኢዚ ላሜና፥ ‘ኔ ሜርናስ ቄሴ’ ” ጊዴስ። ሄሳ ማላ ጫቆፔ ዴንዲዳይሳን ዬሱሲ ሄሳፌ ኣꬊዛ ጫቆ ቃላስ ዋሴ ጊዲዴስ። ካሴ ቄሴቲ ባ ኦሶን ሲንꬄ ጉጆንታ ማላ ሃይቆይ ኢስታ ዲጊዳ ጊሽ ቆዳይ ኢስታስ ዳሮ። ዬሱሲ ጊዲኮ ሜርናስ ዲዛዴ ጊዲዳ ጊሽ ኢዛ ቄሴቴꬂ ሻሬቶንታ ቄሴቴꬃ። ሄሳ ጊሽ ኢዚ ኢስታ ጊጊሳና ጋናቲሼ ኡባ ዎዴ ሃይቆንታ ፓፃ ኤቂ ዲዛ ጊሽ ኢዛ ባጋራ ፆሳኮ ዪዛይታ ዉርሲ ኣሻናስ ዳንዳዬስ። ሄሳ ጊሽ ኑስ ኮሺዛ ቄሴታ ሃላቃይ ሄሳ ማላ ጌሺኔ ዎሶይ ኢዛ ቦላ ባይንዳ ፂሎኔ ናጋራንቻታፔ ሻኬቲዲ ሳሎታፔ ቦላራ ቦንቼቲዳ ቄሴታ ሃላቃ። ኢዚ ሃንኮ ቄሴታ ሃላቃታ ማላ ኮይሮ ባ ናጋራ ጊሽ ቃሴካ ካሌꬂዲ ሃንኮ ዴሬዛ ናጋራ ጊሽ ጋላስ ጋላስ ያርሾ ሺሻናስ ኢዛ ኮሼና። ኢዚ ባና ኣꬂ ኢሚዳ ዎዴ ኣሳ ናጋራ ጊሽ ኢሲቶ ሲንꬃ ባጋሳራ ያርሾ ዉርሲ ፖሊዴስ። ዎጋይ ዳቡራንቻ ኣሳታ ቄሴታስ ዋና ሃላቃ ሂስቲ ሹሜስ። ዎጋፔ ካሊዲ ዪዳ ጫቆ ቃላይ ጊዲኮ ሜርናስ ኢዛ ቦላ ዎሶይ ባይንዳ ናዛ ሹሚዴስ። ሄሳ ጊሽ ኑ ሃዒ ኦꬃና ዋና ዮዖይ ሃይሳ። ሃይሳ ማላ ሳሎ ቦላ ፆሳ ቦንቾ ኣልጋ ኡሻቻን ኡቲዳ ቄሴታ ሃላቃይ ኑስ ዴስ። ኢዚ ኣሲ ቶኪዳ ዱንካኔ ጊዶን ኦꬂዛዴ ጊዶንታ ጎዳ ፆሲ ቶኪዳ ቱሙ ዱንካኔን ጌሻሶን ኦꬂዛዴ። ቄሴታ ሃላቃይ ሹሜቲዛይ ኣሳይ ፆሳስ ኢሚዛይሳ ፆሳስ ሺሻናሲኔ ያርሾ ያርሻናሳ። ሄሳ ጊሽ ሃይሲ ሃ ቄሴታ ሃላቃይካ ፆሳስ ሺሻናስ ኢሲ ሺሺዛ ሚሺ ኢዛስ ኮሼስ። ኢዚ ቢታ ቦላ ዲዛኮ ቄሴ ጊዴና። ኣዛስ ጊኮ ዎጋይ ጊዛ ማላ ያርሾ ሺሺዛ ሃራ ቄሴቲ ዴቴስ። ኢስቲ ካሴ ሳሎን ዲዛ ፆሳ ኬꬃይስ ሌሚሶኔ ኤሾ። ሙሴይ ዱንካኔዛ ኦꬃና ጊሺን “ኔስ ዙማ ቦላ ቆንጪዳይሳꬆ ዉርሳ ኦꬃናስ ናጌታ” ጊዛ ኣዛዞይ ሄሳ ጊሽ ኢዛስ ኢሜቲዴስ። ጊዶ ኣቲን ዬሱሲ ጊዶ ጌሊ ጋናቲዛይ ጫቆ ቃላይ ካሴይሳፌ ኣꬊዛይሳ ማላ ኢዚ ኤኪዳ ኦሶይካ ካሴይታ ኦሶፔ ኣꬌስ። ሄሲካ ካሴይሳፌ ሎዒዛ ሂዶታ ቃላና። ካሴ ጫቆ ቃላን ፓጬይ ባይንዳኮ ናምዓንꬆ ሃራ ጫቃናስ ኮሼና። ጊዶ ኣቲን ፆሲ ዴሬዛ ቦላ ፓጬይ ዲዛይሳ ዴሚዳ ጊሽ “ኢስራዔሌ ኣሳራኔ ዩሁዳ ኣሳራ ታኒ ኦራꬃ ጫቆ ጫቄታና ዎዴይ ያና። ሄሲካ ታ ኢስታ ጊብፄፔ ኬሳናስ ኢስታ ኩሼ ኦይካዳ ካሴ ኢስታ ኣዋታራ ጫቄቲዳ ቃላ ማላ ጊዴና። ጋሶይካ ኢስቲ ካሴ ታ ጫቆ ቃላን ኤቂቤቴና። ታካ ኢስታ ዬዳ ቤሳዲስ። ሄሳፌ ጉዬ ኢስራዔሌ ኣሳራ ታ ጫቄታና ቃላይ ሃይሳ ማላ ጌስ ጎዳይ። ታኒ ታ ዎጋ ኢስታ ዎዝናን ዎꬃና። ኢስታ ዎዝና ቦላካ ፃፋና። ታ ኢስታ ፆሴ ጊዳና። ኢስቲካ ታ ዴሬ ጊዳና። ሃይሳፌ ጉዬ ኣሲ ባ ጉታ ኣሳ ዎይኮ ባ ኢሻ ‘ኔ ጎዳ ኤራ’ ጊ ታማርሴና። ጋሶይካ ኣሲ ጉꬃፌ ጊታታ ጋካናስ ዉሪካ ታና ኤራና። ኢስታ ቆሆዛ ታ ማራና። ሃይሳፌ ሲንꬃን ታ ኣሳ ናጋራ ናምዓንꬆ ዛራ ቆፒኬ” ጌስ። ሃይሳ ሃ ጫቆዛ ኢዚ “ኦራꬃ ጫቆ” ጊዲ ካሴ ጫቆዛ ጋልዓ ኬሲዴስ። ሄሳ ጊሽ ጋልዒዲ ዉሪዳይሲ ꬋያና ዎዴይ ማቲዴስ። ኮይሮ ጫቆ ቃላዛን ፆሳስ ጎይኒዛ ዎጋይኔ ቢታ ቦላ ዲዛ ፆሳ ኬꬂ ዴስ። ካሴ ናምዑ ኪፊሌራ ዲዛ ዱንካኔይ ጊጌቲ ዴስ። ኮይሮ ኪፊሌዛን ፆምፔ ዎꬂዛሶይኔ ፃራጴዛይ ቃሴ ኡኬꬂ ዴስ። ሄሳ ሄ ኪፊሌዚ ዱማ ኪፊሌ ጌቴቴስ። ናምዓንꬆ ኪፊሌዚ ናምዓንꬆ ማጋላሻፔ ጉዬ ባጋራ ዲዛ ኪፊሌይ ኡባፌ ዱማ ጌቴቴስ። ሄሳ ጊዶን ዎርቃፌ ኦሴቲዳ ኤፃኔ ጩዋሲዛ ቄሪ ሼልዔ ማላይኔ ዎርቃን ሜሼቲዳ ጫቆ ታቦታይ ዴስ። ሄ ታቦታይካ ኢዛ ጊዶን ማናይ ዲዛ ዎርቃ ሌማቴይ፥ ጪሊሊዳ ኣሮኔ ጉፌይኔ ጫቆ ቃላቲ ኢዛ ቦላ ፃፌቲዳ ሹቻ ማሴꬂ ዴስ። ሄ ታቦታዛ ቦላ ዲዛ ናጋራፔ ማሮቴꬃ ካማዛ ቦላ ባ ቄፌራ ካሚዛ ቦንቾ ኩሩቤቲ ዴቴስ። ሃዒ ቃሴ ኑ ሄይታንታ ኢሳ ኢሳ ጊሽ ሻኪ ሻኪ ሃሳያናስ ዳንዳዮኮ። ዉሪካ ሄሳꬆ ጊጌቲዳፔ ጉዬ ቄሴቲ ባ ኦሶ ፖላናስ ዱንካናስ ኮይሮ ኪፊሌ ጌሌቴስ። ጊዲኮካ ኡባፌ ጊዶቲዛ ኪፊሌ ቄሴታ ሃላቃይ ፃላላ ጌሌስ። ሄሲካ ላይꬃን ኢሲቶ ፃላላ ጊዲሺን ኢዚ ባ ናጋራ ጊሺኔ ዴሬይ ኤሮንታ ኦꬂዳ ናጋራ ጊሽ ሺሺዛ ያርሾ ሱꬅ ኦይኮንታ ሙሌካ ጌሌና። ኮይሮ ዱንካኔዚ ካሴ ዲዛ ዎዴ ጌዴ ኡባፌ ዱማ ጌቴቲዛሶ ኤፊዛ ኦጌይ ሄ ዎዴ ቆንጬ ጊዶንታይሳ ፂሎ ኣያናይ ቤሴስ። ሄሲካ ሃይሳ ሃ ዎዴዛስ ሌሚሶ ጊዲሺን ካሴ ሺቂዛ ያርሾቲኔ ጮ ኢሜቲዛ ኢሞታቲ ኢሚዛይታ ዎዝና ሼምፒሳናሲኔ ሙሌ ጌሻናስ ዳንዳይቤቴና። ሄይታንቲ ዉሪካ ኦራꬃ ዎጋይ ያና ጋካናስ ጮ ሜላ ዱና ሃሳያ ማላ። ቃሴካ ኢስቲ ሙሳ ጊሺኔ ኡሻ ጊሽ ቃሴካ ዱማ ዱማ ጌሾ ዎጋታ ፃላላ። ጊዲኮካ ኪርስቶሲ ቡሮፔ ያናስ ዲዛ ሎዖ ሚሻታስ ቄሴታ ሃላቃ ጊዲዲ ቆንጪዴስ፤ ኢዚ ኢዛን ጌሊዳ ዱንካኔዚ ጊታኔ ጌሻ። ሄ ዱንካኔዚ ኣሳ ኩሼን ኦሴቶንታይሳኔ ሃይሳ ሃ ሜꬌቴꬃፌ ጊዴና። ኢዚ ሄ ዱንካኔዛን ጌሊሼ ዴይሻታ ሱꬁኔ ዎፓኖ ቦራታ ሱꬅ ኤኪ ጌሊቤና። ጊዶ ኣቲን ኣስ ኣሻናስ ሜርናስ ባ ሱꬅ ኤኪዲ ኡባፌ ዱማ ጌቴቲዛ ኪፊሌ ሃራ ዎዴ ናምዓንꬆ ጌሎንታ ማላ ዉርሴꬃ ጌሎ ጌሊዴስ። ኢስታስ ካሬ ባጋ ኣሳቴꬃይ ቱኒዳ ኣሳታ ቦላ ኣራጪዛ ዴይሻ ሱꬂኔ ዎፓኖ ቦራታ ሱꬂ ሄሳꬆካ ያርሾስ ፁጌቲዳ ኡሳ ቢዲንꬂ ኢስታ ጌሺዛይሳ ጊዲኮ፥ ሜርና ኣያናን ባና ዎሶይ ባይንዳ ያርሾ ኦꬂ ፆሳስ ሺሺዳ ኪርስቶሳ ሱꬂ ኑኒ ዴዖ ፆሳስ ጎይናናስ ሃይቄꬃ ኦሶፔ ኑና ኣይ ማላ ኣꬂ ጌሻንዴ? ሄሳ ጊሽ ፄይጌቲዳይቲ ኢስታስ ኢማና ጌቴቲዳ ሜርና ላታ ኤካና ማላ ኪርስቶሲ ኦራꬃ ጫቆስ ጋናቲዛዴ ጊዲዴስ። ኮይሮ ጫቆዛ ጋርሳን ዲዛ ዎዴ ኢስቲ ኦꬂዳ ናጋራፔ ጌያና ማላ ኢስታ ጊሽ ኢዚ ሃይቂዴስ። ባዛይ ባዜቲዛይሳ ጊዲኮ ባዚዳዴ ሃይቆ ሻኪ ኤራናስ ቤሴስ። ጋሶይካ ባዛይ ሚኒዛይ ባዚዳዴይ ሃይቂና። ባዚዳዴይ ፓፃ ዲሺን ባዛይ ኣይኮካ ኦꬄና። ሄሳ ጊሽ ኮይሮ ጫቆ ቃላይ ሱꬂ ባይንዳ ሚኒቤና። ሙሴይ ባ ኣዛዞ ዎጋ ዴራስ ዮቲ ሲሚዲ ዴይሻታ ሱꬂኔ ዎፓኖ ቦራታ ሱꬅ ሃꬃራ ኤኪዲ ዞዖ ዶርሳ ኢሲኬን ኤጬሬ ዉርጬ ማላ ሄሶጴ ጌቴቲዛ ሚꬃራ ኤኪዲ ባ ፃፊዳ ዎጋ ማፃፋ ቦላኒኔ ዴሬዛ ቦላ ዉፂዴስ። “ኢንቴ ናጋና ማላ ኢንቴና ፆሲ ኣዛዚዳ ጫቆ ቃላ ሱꬃይ ሃይሳ” ጊዴስ። ሄሳꬆካ ዱንካኔዛኔ ኢዛ ጊዶን ዲዛ ኦሶ ሚሻ ቦላ ኡባ ሱꬅ ዉፂዴስ። ኣዳፌካ ጉꬃ ሚሻቲ ኣቲሺን ሃንኮ ዳሮ ሚሻይ ሱꬃን ጌያናስ ቤሲዛይሳ ዎጋይ ኣዛዜስ። ሱꬂ ጉኮንታ ዲሺን ማሮይ ባዋ። ሄሳ ጊሽ ሳሎ ሚሻታስ ሌሚሶ ጊዲዳይቲ ሃይታንታን ጌያናይስ ኣቴና ሺን። ሳሎን ዲዛ ሚሻቲ ጊዲኮ ሃይሳፌካ ኣꬊዛ ያርሾን ጌያናስ ቤሴስ። ኪርስቶሲ ቱሙ ዱንካኔይስ ሌሚሶኔ ኣሳ ኩሼን ኦሴቲዳ ፆሳ ኬꬄ ጌሊቤና፤ ጊዶ ኣቲን ሃዒ ኑ ጊሽ ፆሳ ሲንꬃን ቤታናስ ፑዴ ሳሎ ጌሊዴስ። ቄሴታ ሃላቃይ ባ ሱꬅ ጊዶንታ ሱꬅ ኤኪዲ ላይꬃን ላይꬃን ኡባፌ ዱማ ኪፊሌ ጌሊዛይሳꬆ ኪርስቶሲ ባና ያርሻናስ ፑዴ ሳሎ ሺሬቲ ሺሬቲ ጌሊቤና። ሄሳ ማላ ጊዲዛኮ ኪርስቶሲ ኣላሜይ ሜꬌቶሳፔ ሃ ሲሚን ዳሮ ዎዴ ሜቶ ኤካናስ ቤሴስ፤ ሃዒ ቃሴ ዎዴ ዉርሴꬃን ባና ያርሺዲ ናጋራ ዲጋናስ ዉርሴꬃስ ኢሲቶ ቆንጪዴስ። ሄሳꬆካ ኣሲ ኢሲቶ ሃይቄስ፤ ሄሳፌ ካሊዲ ፒርዳ ሲንꬃን ኤቃናስ ጊጊ ኡቲዴስ። ኪርስቶሲ ዳሮ ኣሳ ናጋራ ዲጋናስ ኢሲቶ ያርሼቲዴስ። ናምዓንꬆካ ኢዚ ቆንጫና፤ ሄሲ ኢዛ ናጊዛይታስ ኣቶቴꬂ ኤኪ ያናስ ኣቲን ናምዓንꬆ ዛሪ ናጋራ ቶካናስ ጊዴና። ሙሴ ዎጋይ ቡሮ ሲንꬃራ ያና ሎዖ ሃኖታስ ኤሾፔ ኣቲን ቱሙ ኣዳ ሜꬋይ ኢዛስ ዴና። ሄሳ ጊሽ ላይꬃን ላይꬃን ፓጬይ ባይንዳ ሺሪ ሺሪ ሺሺዛ ያርሾይ ፆሴ ጎይናናስ ሺቂዛ ኣሳ ጌሻናስ ሙሌካ ዳንዳይቤና። ኣሳ ሙሌራ ጌሻና ዳንዳዪዛይሳ ጊዲዳኮ ኢስቲ ያርሾ ያርሻናይሳ ኣጋጌቴኔ? ቃሴካ ፆሴ ጎይናና ሺቂዛ ኣሳይ ኢሲቶ ጌዪዛኮ ባ ዎዝናራ ናጋራንቻ ጊዲዳይሳ ሲꬋና። ጊዶ ኣቲን ሄይቲ ያርሾቲ ላይꬃን ላይꬃን ናጋራ ዛሪ ዛሪ ቆፊሴቴስ። ጋሶይካ ዎፓኖታኔ ዴይሻታ ሱꬂ ኣሳፔ ናጋራ ዲጋናስ ዳንዳዬና። ሄሳ ጊሽ ኪርስቶሲ ሃይሳ ሃ ኣላሜዛ ዪዲ “ኔኒ ኢሞታኔ ያርሾ ኮያቤይካ ሺን ኔ ታስ ኣሾ ጊጊሳዳሳ። ታማን ፁጌቲዛ ያርሾኔ ናጋራ ጊሽ ሺቂዛ ያርሾን ኡፋዬታቤይካ” ጊዴስ። ሄ ዎዴ ታኒ “ታ ጊሽ ጌሻ ማፃፋን ፃፌቲዳ ማላ ‘ፆሶ ሄኮ ታኒ ኔ ሼኔ ኦꬃናስ ያዲስ’ ጋዲስ” ጊዴስ። ሙሴ ዎጋይ ሄሲ ሄሳꬆ ሃናና ማላ ኣዛዚኮካ ኢዚ ቃሴ ኮይሮ “ያርሾ፥ ኢሞታ፥ ፁጌቲዛ ያርሾኔ ናጋራ ጊሽ ሺቂዛ ያርሾ ኔ ኮያቤይካኔ ኢዛን ኡፋዬታቤይካ” ጌስ። ካሌꬂዲካ “ሄኮ ታ ኔ ሼኔ ኦꬃና ያዲስ” ጊዴስ። ናምዓንꬆዛ ኤሳናስ ኮይሮይሳ ዲጊዴስ። ሃይሳ ሃ “ኢዛ ሼኔ” ጊዛ ቃላ ማላ ሃራ ያርሾ ዛሬꬂ ሺሻናስ ኮሾንታ ማላ ዬሱስ ኪርስቶሳ ባጋራ ኢሲቶ ሺቂዳ ያርሾን ጌዪዶስ። ቄሴይ ሃች ሃች ኤቂዲ ባ ኦሶ ፖሌስ። ኣስ ናጋራፔ ጌሻናስ ዳንዳዮንታያታ ዎንቲን ዎንቲን ሺሼስ። ኪርስቶሲ ጊዲኮ ያርሾ ኢሲቶ ሜርናስ ጊዳናይሳ ሺሺዲ ኣዋ ኡሻቻን ኡቲዴስ። ሄ ጋላሳፌ ሲሚን ኢዛ ሞርኬቲ ኢዛ ቶሆ ጋርሳን ዬꬌታና ጋካናስ ናጎን ዴስ። ጋሶይካ ኢሲቶ ሺሺዳ ያርሾን ጌያና ኣሳታ ሜርናስ ጌሺዴስ። ሄሳ ሄ ሃኖዛ ጊሽ ፂሎ ኣያናይካ ኑስ ማርካቴስ። ኮይሮ፥ “ሄሳፌ ጉዬ ታ ኢስታራ ጌላና ጫቆ ቃላይ ሃይሳ። ታ ዎጋ ታ ኢስታ ዎዝናን ዎꬃና። ኢስታ ዎዝናን ታ ፃፋና” ጌስ ጎዳይ። ቃሴካ “ታ ኢስታ ናጋራኔ ማካላ ናምዓንꬆ ቆፒኬ” ጌስ ጎዳይ። ሄይታንቲ ዉሪካ ኣቶ ጌቴቲዳፔ ጉዬ ናምዓንꬆ ናጋራስ ሺቃና ሃራ ያርሾይ ዴና። ሄሳ ጊሽ ታ ኢሻቶ፤ ኑኒ ዬሱስ ኪርስቶሳ ሱꬃ ባጋራ ጌዴ ኡባፌ ዱማ ጌሽ ጌቴቲዛሶዮ ጌላናስ ፃላቴꬅ ዴሚዶስ። ሄሲካ ማጋላሻ ባጋራ፤ ሄሲካ ኢዚ ባ ኣሾ ባጋራ ኑስ ዶዪዳ ኦራꬂኔ ዴዖ ጊዲዳ ኦጌና። ፆሳ ኬꬃ ቦላ ሹሜቲዳ ቄሴታ ሃላቃይ ኑስ ዲዛ ጊሽ፥ ኑኒ ኑ ኢታ ቆፋፔ ጌያናስ ኑ ዎዝና ኣራጬቲዲ ኑ ኣሳቴꬃካ ፂሎ ሃꬃን ሜጬቲዲ ቱሙ ዎዝናፔኔ ኩሜꬃ ኣማኖን ፆሳኮ ኣኔ ሺቆስ። ኑስ ሂዶታ ቃላ ኢሚዳዴይ ኣማኔቲዛዴ ጊዲዳ ጊሽ ኑኒ ኣማኒዲ ኢዛ ጊሽ ማርካቲዛ ሂዶታፔ ሄ ሃ ጎንታ ኣኔ ሎዔꬂ ኦይኮስ። ሲቆኒኔ ሎዖ ኦሶን ኑ ሚኒ ዳና ማላ ኣኔ ኢሶይ ኢሳ ቆፊሶስ። ኣኔ ኑ ኡባ ጋላስ ኢሶይ ኢሳራ ጋኪ ጋኪ ኢሶይ ኢሳ ሚንꬄꬆስ ኣቲን ኢሲ ኢሲ ኣሳቲ ሺቆ ኣጊዳ ማላ ኣኔ ኑኒ ሺቆዛ ኣጎኮ፤ ሃራፔካ ጎዳ ዬሱሲ ማታቲዳይሳ ቆፒሼ ካሴፔ ሚኒ ሺቂቴ። ኑኒ ቱማ ሻኪ ኤሪዲ ኤኪዳይሳፌ ጉዬ ኤሪሼ ናጋራ ኦꬂኮ ሃይሳፌ ጉዬ ናጋራስ ሺቃናስ ሃራ ያርሾይ ዴና። ሃራ ቡሮ ሃናናይ ዳሮ ባቢሲዛ ፒርዳይ ፆሳ ሞርኬታ ፁጋና ናጊዛ ሚኖ ታማይ ፃላላ ዴስ። ሙሴ ዎጋ ካꬊዳ ኣሲ ናምዑ ዎይኮ ሄꬑ ማርካቲ ማርካቲኮ ማሮይ ባይንዳ ሃይቆን ቃፃዬቴስ። ሂስቲን ፆሳ ና ካꬊዳ ኣሲ ኢዛን ጌዪዳ ጫቆ ሱꬃ ሂራይሶ ሚሻ ማላ ቆዲዳዴሲኔ ኢዛ ኪያቴꬃ ኣያና ኢሴꬂዳዴስ ኣይ ማላ ሄሳፌ ኣꬊዛ ፒርዳይ ኢዛስ ቤሲዛ ኢንቴስ ሚሳቲዜ? ታኒ ኢዛስ ሃሎ ኬሳና፤ ኢዛዴ ኦሶ ማላ ኢዛዴስ ታ ዛራና” ጊዳይሳ ኑ ኤሮስ። ቃሴካ “ጎዳይ ባ ዴሬዛ ቦላ ፒርዳና” ጌስ ጎዳይ። ዴዖ ፆሳ ኩሼን ኩንዴꬂ ዳሮ ባቢሴስ። ኢንቴስ ኢሲቶ ፖዖይ ፖዒዳፔ ጉዬ ሜቶ ዎዴ ዳሮ ባፄን ኢንቴ ካሴ ሚኒ ኤቂዳ ቤኒ ዎዴዛ ዩሺ ቆፒቴ። ኢሲ ኢሲ ዎዴ ኢንቴ ዱላታ ዴሬ ሲንꬃን ጫሻሲኔ ጎዴቴꬃስ ኣꬊ ኢሜቲዴታ። ቃሴ ሃራ ዎዴካ ሄሳ ማላ ዋዬይ ኢስታ ቦላ ጋኪዳ ኣሳታራ ኢንቴካ ኢሲፌ ዋዬ ቤይዴታ። ኢንቴ ኢንቴስ ሃራፔ ኣꬊዛ ሜርናስ ዳና ሃሮይ ዲዛይሳ ኤሪዛ ጊሽ ቃሼቲዳይታስ ሚሼቲዴታኔ ኢንቴ ሃሮይ ቦንቄቲሺን ኡፋይሳን ዳንዳይዴታ። ሄሳ ጊሽ ጊታ ዋጋይ ዲዛ ካሴ ኢንቴ ኣማኔቴꬃ ኣጎፍቴ። ኢንቴ ፆሳ ሼኔ ፖሊዲ ኢዚ ኢንቴስ ኢሚዳ ኡፋይሳ ቃላ ኤካናስ ሚኒ ኤቃናስ ኢንቴና ኮሼስ። ጋሶይካ ጉꬃ ዎዴፔ ካሊዲ “ያናይሲ ኢዚ ያና፤ ጋምዔና” ፂሎ ኣሲ ጊዲኮ ኣማኖን ዴዖ ዴማና፤ ጉዬ ኡንዱዲዛዴይ ዲኮ ታ ሼምፖያ ኢዛዴ ቦላ ኡፋዬቱኩ። “ኑኒ ጊዲኮ ኣማኒዲ ኣቲዳይታ ባጋ ኣቲን ጌዴ ጉዬ ኡንዱዲ ꬋዪዛይታ ባጋ ጊዶኮ” ጊዴስ። ኣማኖ ጌꬂ ኢሲ ሚሼ ሃናና ጊዲ ኑ ሲꬎንታ ዲሼ ቤዮንታ ሚሼካ ቤዪዳ ማላ ኤሮ ጊ ኤኮ። ካሴ ኣዋቲ ጋላቴቲዳይ ሄሳ ማላ ኣማኖና። ሃይሲ ሃ ኣላሜይ ፆሳ ቃላን ሜꬌቲዳይሳ ኑ ኣማኖን ኤሮስ። ሄሳꬆካ ኣይፌን ቤቲዛይሲ ሜꬌቲዳይ ቤቲዛ ሚሻፌ ጊዶንታይሳ ኑኒ ኤሮስ። ኣቤሌይ ፆሳስ ቃዬሌ ያርሾፌ ኣꬊዛ ያርሾ ኣማኖን ሺሺዴስ። ፆሲ ኢዛ ያርሾዛ ጊሽ ሃሳዪሼ ኢዚ ኣማኖን ጌሽ ጊዲዳይሳ ማርካቲዴስ። ኢዚ ሃይቂንካ ኢዛ ኣማኖይ ሃዒ ጋካናስ ሃሳዬቴስ። ሄኖኬይ ሃይቆ ቤዮንታ ማላ ሃይሳ ኣላሜዛፔ ኣማኖን ኤኬቲዴስ። ፆሲ ኢዛ ኤኪዳ ጊሽ ኢዚ ቤቲቤና፤ ኤኬታናፔ ካሴቲዲ ኢዚ ፆሳ ኡፋይሲዳይሲ ዮቴቲዳ ጊሽ ኢዚ ኤኬቲዴስ። ቃሴካ ኣማኖይ ባይንዳ ዲሺን ፆሳ ኡፋይሳናስ ሙሌካ ዳንዳዬቴና። ጋሶይካ ፆሳኮ ሺቂዛዴይ ዉሪካ ፆሲ ጊዛይሳኔ ዎዝናፔ ኢዛ ኮዪዛይታስ ኢዚ ዋጋ ኢማናይሳ ኣማናናስ ቤሴስ። ኖሄስ ፆሲ ቡሮ ኖሄይ ባ ኣይፌን ቤዮንታ ሚሻ ጊሽ ናጌታና ማላ ዮቲን ኖሄይ ፆሳ ባቢዲ ባሶ ኣሳ ኣሻናስ ኣማኖን ማርካቤ ኬፂዲ ኣላሜ ኣሳ ፒርዲሲዴስ፤ ኣማኖን ቤቲዛ ፂሎቴꬅ ላቲዛዴ ጊዲዴስ። ኣብራሃሜይ ባስ ላታ ቢታ ኤካናስ ፄይጌቲዳ ዎዴ ኣማኖን ኣዛዜቲዴስ። ኣዋ ቢዛኮኔ ኤሮንታ ኣጊኮካ ኤሮ ጊዲ ቢዴስ። ኣላጋ ቢታን ቤቴ ኣሳ ማላ ቡሮ ኔስ ኢሜታና ጌቴቲዳ ቢታን ኣማኖን ኡቲዴስ። ኢዛስ ኢሜቲዳ ሂዶታ ቃላ ኢዛራ ኢሲፌ ላታና ዪሳቃ ማላኔ ያቆቤ ማላ ዱንካኔን ዴዒዴስ። ጋሶይካ ሚና ዲዛሮ ፆሲ ኢዞ ቆፒ ሜꬊዳ ካታማዮ ኤካና ናጊዴስ። ኣብራሃሜስ ዎዴይ ጌዴ ቢዳዴ ጊዲኮካ ሳራይካ ዬሎንታ ማካራ ጊዲኮካ ሂዶታ ኢስታስ ኢሚዳዴይ ኣማኔቲዳዴ ሂስቲ ፄሊዲ ኣማኖን ና ኣዋ ጊዳናስ ጋኪዴስ። ሄሳ ጊሽ ሃይሳ ሃይቂዳ ኣሳ ማላ ቆዴቲዳ ኢሲ ኣብራሃሜፔ ሳሎ ፆሊንቴ ማላኔ ኣባ ኣጬ ማላ ቆዳይ ባይንዳ ዳሮ ዜሬꬃይ ቤቲዴስ። ሄይቲ ዉሪካ ኢስታስ ኢሜቲዳ ሂዶታ ቃላ ዴሞንታ ባ ኣማኖን ናጊዳ ማላ ሃይቂዳ። ጊዲኮካ ኢስቲ ሃይሳ ቢታ ቦላ ኢማꬄኔ ቤቴ ኣስ ጊዲዳይሳ ኤሪዳ ጊሽ ሃሆን ዲሼ ቤዪዲ ኩሼን ኣꬂዳ ማላ ኡፋይሳን ኤኪዳ። ሄሳ ማላ ጊዛ ኣሳቲ ኢስታ ዴሬይ ኣዋኮኔ ባ ዴሬ ናጊዛይሳ ቆንጬን ቤሴቴስ። ኢስቲ ባ ዬጊ ኬዚዳ ዴሬ ዛሪ ቆፒዛኮ ጉዬ ሲሚ ባና ዳንዳዬቴስ። ሃዒ ሄሳፌ ኣꬊዛ ፑዴ ሳሎን ዲዛ ዴሬ ላሞቴቴስ። ሄሳ ጊሽ ፆሲ ኢስታስ ሳሎን ካታማ ጊጊሲዳ ጊሽ “ኢስታ ፃላ ፆሳ” ጌቴቲ ፄይጌታናስ ዬላቲቤና። ፆሲ ኣብራሃሜይ ባ ናዛ ዪሳቃ ሹካና ማላ ፓጪን ኣብራሃሜይ ዪሳቃ ያርሻናስ ኣማኖን ሺሺዴስ። ፆሲ ኢዛስ ኢማና ጊዳይሳ ኢዚካ ባ ና ኢሲኔዛ ሹካናስ ጊጌቲዴስ። ሄሲካ ፆሲ ኢዛስ “ኔ ዜሬꬂ ዪሳቃ ባጋራ ፄይጌታና” ጊዳይሳ ማላ። ፆሲ ሃይቂዳዴ ዴንꬃናስ ዳንዳዪዛይሳ ኣብራሃሜይ ኣማኒዳ ጊሽ ዪሳቃካ ሃይቆፔ ዴንዲዳ ኣሳ ማላ ናምዓንꬆ ዴሚዴስ። ዪሳቃይ ቡሮፔ ሃናናይሳ ቆፒ ኤኪዲ ያቆቤኔ ኤሳዌ ኣማኖን ኣንጂዴስ። ያቆቤይ ሃይቃና ጊሽ ዮሴፌ ናይታ ኢሳ ኢሳ ኣማኖን ኣንጂዳይኔ ባ ጉፌ ቦላ ዳርቲ ኤቂዲ ጎይኒዳይ ኣማኖና። ዮሴፊ ሃይቃና ጊሽ ኢስራዔሌ ኣሳይ ጊብፄፔ ኬዛናይሳ ኢዚ ዮቲዳይኔ ባ ሜቄꬃ ጊሽ ኢስቲ ኣይ ኦꬃናኮኔ ኢስታ ኣዛዚዳይ ኣማኖና። ሙሴይ ዬሌቲን ኢዛስ ማላይ ሎዖ ጊዲዳይሳ ቤዪዲ ኢዛ ዬሊዳይቲ ኢዛ ሄꬑ ኣጊና ጋካናስ ካዎዛ ኣዛዞ ባቦንታ ቆቲዳይ ኣማኖና። ሙሴይ ዲጪ ጋኪዲ “ፓሮኔስ ናይ ና” ጌቴታናይሳ ኣማኖን ኢፂዴስ። ጉꬃ ዎዴስ ናጋራን ቤቲዛ ኡፋይሳፌ ኣꬂዲ ፆሳ ኣሳራ ሜቶ ቤያናስ ዶሪዴስ። ጊብፄ ዴሬን ዲዛ ሃሮፔ ቦላራ ኪርስቶሳ ጊሽ ዋዬ ኤኮይ ዳሮ ኣꬊዛ ሃሮ ጊዲዳይሳ ዩሺ ቆፒዴስ። ጋሶይካ ኢዚ ሲንꬃፌ ኤካናይሳ ቡሮ ሃሆን ቤዪዳ ጊሻሳ። ካዎ ሃንቆስ ባቦንታ ኣማኖን ጊብፄ ዬጊ ኬዚዴስ። ቡሮ ቤቶንታይሳ ቤዪዛ ማላ ቆፒዲ ሄ ቆፋን ሚኒ ኤቂዴስ። ባይራታ ዉርሲ ዎꬊዛይሲ ኢስራዔሌታ ባይራ ናይታ ዎꬎንታ ማላ ኣማኖን ፓዚጋኔ ሱꬃ ዉፄꬃ ዎጋ ዎꬂዴስ። ኢስራዔሌ ኣሳይ ሜላ ቢታ ቦላ ሃሙቲዛ ማላ ዞዖ ኣባ ጊዶራ ኣማኖን ፒኒዴስ። ጊብፄ ኣሳይ ቃሴ ኢስታꬆ ሃናና ጊሽ ኣባን ሚቴቲዴስ። ኢስራዔሌ ኣሳይ ኢያርኮ ጊምቤዛ ላፑን ቃማ ዩዪ ዩዪ ኣꬊዳፔ ጉዬ ጊምቤዛ ኣማኖን ላሊዴስ። ላይማን ኣቂዛ ኤራዓባ ዴሬ ፆሞሳና ዪዳይታ ሳሮን ሞካ ኤኪዳ ጊሽ ሃንኮ ኣዛዜቶንታ ኣሳራ ꬋዮንታ ኣማኖን ኣታዱስ። ሃይሳፌ ኣꬌꬅ ሃራ ኣይ ጋኔ? ጌዶኔ ጊሽ፥ ባራቄ ጊሽ፥ ሳምሶኔ ጊሽ፥ ዮፊታሄ ጊሽ፥ ዳዉቴ ጊሽ፥ ሳሜላ ጊሽ ቃሴ ናቤታ ጊሽ ታ ዮቶንታ ማላ ታስ ዎዴይ ዴና። ሄይታንቲ ኣማኖን ካዎታ ፆኒዳ፤ ሱሬ ፒርዳ ፒርዲዳ፤ ባስ ኢሜቲዳ ሂዶታ ቃላ ኤኪዳ፤ ጋሞታ ዱና ጎርዲዳ፤ ታማ ዎልቃ ቶይሲዳ፤ ቃራ ማሻፌ ኬሲ ኤኪ ኣቲዳ፤ ዳቡራፔ ሚኒዳ፤ ኦላሶን ጎባታ ጊዲዳ፤ ኣላጋ ኣሳ ኦላ ጎዲዳ፤ ማጫሳታስ ሃይቂዳይቲ ፓፂዳ፤ ባጋይቲ ቃሴ ሄሳፌ ኣꬊዛ ሃይቆፔ ዴንꬂ ዴማናስ ጊዲ ሃይቆፔ ኣቴꬂ ሌቂዲ ሃይቆስ ባና ኣꬂ ኢሚዳ፤ ዋዬፔ ኣታናስ ኮይቤቴና። ኢሲ ኢሲ ኣሳቲ ኣሳን ካዔቲዳ፤ ጋራፌቲዳ፤ ባጋይቲ ቃሴ ቃሾ ኬꬂ ጌሊዳ። ሹቻን ጫዴቲዳ፤ ማጋዜንካ ናምዑ ኬዚ ጳሊቄቲዳ፤ ማሻን ሹኬቲ ሃይቂዳ፤ ዋዬቲሼ፥ ጎዴቲሼኔ ዳቡርሼ ዶርሳ ኢቴኔ ዴይሻ ኢቴ ማይዒዲ ዋዬቲዳ። ሃ ኣላሜይ ኢስታስ ቤሶንታይሳ ጊዲዳ ጊሽ ባዞኒኔ ጌዜን ጎንጎሎኒኔ ኦላ ጊዶን ዋዬቲዳ። ሄይታንታ ኡባታ ኣማኖ ጊሽ ማርካቲኮካ ኢስታፌ ኦኒካ ኢሜታና ጌቴቲዳ ሂዶታ ቃላ ጋኪዲ ኤኪዳዴይ ዴና። ፆሲ ኑስ ሄሳፌ ኣꬊዛዝ ጊጊሲዳ ጊሽ ኑ ባይንዳ ኢስቲ ፃላላ ኩሜꬅ ጊዳና ዳንዳይቤቴና። ሄሳ ጊሽ ሻራ ማላ ኑና ዩይ ኣꬊዳ ዳሮ ማርካቲ ኑስ ዲሺን ኑና ዴፂዛ ቶሆኔ ቃሴ ኑና ቃቺ ኦይኪዛ ናጋራ ዉርሲ ኑፔ ዎራ ዬጊዲ ኑ ሲንꬃን ዲዛ ዎꬃ ጌንጫኒኔ ዳንዳያን ኣኔ ዎፆስ። ኑ ኣማኒዛ ኣማኖዛስ ኮይሮኔ ፖሎ ጊዲዳ ዬሱሳ ኣኔ ፄሎስ። ኢዚ ባ ሲንꬃን ዲዛ ኡፋይሳ ጊሽ ማስቃሌ ቦላ ሃይቆ ዳንዳዪዲ ማስቃሌ ቦላ ባና ጋካና ካዉሻቴꬃ ሌቂዲ ፆሳ ኣልጋስ ኡሻቻን ኡቲዴስ። ሂስቲኮ ኢንቴ ዳቡሪዲ ሂዶታ ቃንፆንታ ማላ ሄሳꬆካ ናጋራንቻታፔ ካሴ ኢዛ ቦላ ጋኪዳ ሄሳ ማላ ኤቄቴꬅ ዳንዳዪዳ ዬሱሳ ቆፒቴ። ሱꬂ ጉካና ጋካናስ ናጋራራ ኢንቴ ቡሮ ኤቄቲቤይኬታ። ኢንቴ ፆሳ ናይታ ጊዲ ኡቲዲ ቃላይ ጊዛይሳ ባሊዴታ። “ታ ናዞ ፆሳ ሴራ ካዉሻን ፄሎፋ፤ ኔና ኢዚ ሴሪዛ ዎዴ ሂዶታ ቃንፆፋ። ጋሶይካ ጎዳይ ባ ዶሲዛዴ ሃንቄስ፤ ኢዚ ባ ዶሲዛዴ ሴሬስ። ኢዚ ባ ና ማላ ፄሊዛዴ ቃፃዬስ” ጊዴስ። ፆሲ ኢንቴና ባ ና ማላ ቆዲዛ ጊሽ ሃንቆ ዳንዳዪቴ። ኣዋይ ሃንቆንታ ናይ ኦኔ? ናይ ዉሪ ሴራን ዲጪዛꬆ ኢንቴ ዲጮንታ ኣጊኮ ኢንቴ ካሬን ዬሌቲዳ ና ኣቲን ሶ ና ጊዴኬታ። ሄሳ ኡባፌ ቦላራ ሃይሳ ቢታ ቦላ ኑና ሃንቂ ዲቺዳ ኣሾ ኣዋቲ ዴቴስ። ኑካ ኢስታ ቦንቾስ። ሂስቲን ዴዖን ዴያናስ ኑስ ኣያና ኣዋ ጊዲዳይሳስ ኣዛስ ሄሳፌ ኣꬂ ኣዛዜቶኮኒ? ኑ ኣዋቲ ኑና ባስ ሎዖ ሚሳቲ ቤቲዳ ማላ ጉꬃ ዎዴስ ቃፃዬቴስ። ፆሲ ጊዲኮ ኑኒ ኢዛ ጌሻቴꬃ ኢዛፔ ዴማና ማላ ኑና ጎዓናስ ቃፃዬስ። ቂፃቴይ ዉሪካ ሃዒስ ኡፋይሶንታ ኢታ ሚሳቴስ ሺን ጉዬፔ ቃሴ ዶሲ ኤኪዳ ኣሳታስ ሳሮቴꬂ ኢዛን ኩሚዳ ፂሎቴꬃ ኣይፌን ጋꬄስ። ሄሳ ጊሽ ዳቡሪዳ ኢንቴ ቄሴኔ ኢንቴ ጉልባቴ ሚኒሲቴ። ዎቤይ ፓፃና ማላ ኣቲን ካሴፔ ኣꬂ ዎቦንታ ማላ ኢንቴ ቶሆስ ሎዖ ኦጌ ጊጊሲቴ። ኣሲ ኡባራ ሳሮ ዳና ማላ ኢንቴስ ዳንዳዬቲዛይሳ ዉርሲ ኦꬂቴ። ጌያና ማላ ኮዪቴ። ጌሻቴꬂ ባይንዳ ጎዳ ቤያናስ ዳንዳዬቴና። ኢንቴፌ ኢሳዴስካ ፆሳ ኪያቴꬂ ፓጮንታ ማላ ቃሴካ ጫሞ ኣይፌ ኣይፊዛ ሚꬂ ሞኪዲ ሜቶ ሜꬎንታ ማላኔ ዳሮታ ሞሮንታ ማላ ናጌቲቴ። ኢሲቶ ማና ካꬃስ ባ ባይራቴꬅ ባይዚዳ ኤሳዌ ማላ ኢንቴፌ ኦኒካ ላይማቲዛዴ ዎይኮ ፆሴ ቦንቾንታዴ ጊዲ ቤቶንታ ማላ ናጌቲቴ። ኤሳዌይ ጉዬፔ ካሴ ባ ኣንጆዛ ላታናስ ዛሪ ኮዪን ኢዛስ ኢሜቶንታ ዲጌቲዳይሳ ኢንቴ ኤሬታ። ኢዚ ባና ጋኪዛ ኣንጆዛስካ ዳሮ ዬኪሼ ኮዪዲካ ዛሪ ዴማናስ ዳንዳይቤና። ኩሼን ቦቺኮ ቦሼቲዛ ታማይ ኢዛ ቦላ ኤፂዛ ሲና ዙማኮ ሄ ꬉማኮ፥ ሄ ቱላሌዛኮኔ ሄ ጎቴ ጫርኮዛኮ ኢንቴ ጋኪቤይኬታ። ኢንቴ ዛዬ ጊሪሳኮ ዎይኮ ሃይꬃን ሲዬቲዛ ቃላ ጊሪሳኮ ጋኪቤይኬታ። ሄሳ ሲዪዳ ኣሳቲካ ሃራ ቃላ ጉጆንታ ማላ ዎሲዳ። ሄሳስ ጋሶይካ “ሃራይ ኣቶሺን ሜሄይካ ዙማ ቦቺዛ ጊዲኮ ሹቻን ጫዴቲ ሃይቆ” ጊዛ ኣዛዞዛ ኣሳይ ናጋናስ ዳንዳይቤና። ሄ ዎዴ ሄን ሃኒዛይሲ ዉሪካ ዳሮ ባቢሲዛይሳ ጊዲዳ ጊሽ ሙሴይካ “ታ ባባዳ ኮኮራዲስ” ጊዴስ። ኢንቴ ቃሴ ሃ ፂዮኔ ዙማ ቦላ፥ ፑዴ ሳሎ ዬሩሳላሜ፥ ዴዖ ፆሳ ካታማ ኡፋይሳን ሺቂዳ ቆዳይ ባይንዳ ኪታንቻታኮ ዪዴታ። ኢስታ ሱንꬂ ሳሎን ፃፌቲዳ ባይራታ ማባራንኮ፤ ኡባስ ዳና ጊዲዳ ፆሳኮ ኢስታ ቦላ ዎሶይ ባይንዳ ፂሎ ኣሳታ ሼምፖይ ዲዛሶ ማቲዴታ። ኦራꬃ ጫቆን ማቃዪንꬂዛ ዬሱሳኮ ሄሳꬆካ ኣቤሌይ ሺሺዳ ሱꬃፌ ኣꬊዛ ጫቆ ቃላ ዮቲዛ ኣራጬቲዳ ሱꬃኮ ጋኪዴታ። ኢንቴስ ዮቲዛይሳ ኢንቴ ኣካይ ጎንታ ማላ ናጌቲቴ፤ ሄይታንቲ ፆሲ ቢታ ቦላ ዲዛ ኣሳ ባጋራ ኢስታስ ዮቲዛይሳ ኤኮንታ ኢፂዲ ኢዛፔ ኣታናስ ዳንዳዮንታ ኣጊኮ ኑኒ ሳሎፔ ዪዳይሲ ኑስ ዮቲሺን ኑ ኤኮንታ ኢፂኮ ኢዛፔ ዋኒዲ ኣታኔ? ሄ ዎዴ ቃላ ጊሪሳን ቢታ ቃꬂዴስ። ሃዒ ቃሴ ቢታ ፃላላ ጊዶንታ ታ ሳሎካ ቃሴካ ዛራዳ ኢሲቶ ቃꬃና” ጊዛ ቃላ ዮቲ ዎꬂዴስ። ሃይሲ “ቃሴካ ታ ዛራዳ ኢሲቶ” ጊዛ ቃላይ ኑና ቤሲዛይ ቃፆንታይቲ ሚኒ ዳና ማላኔ ቃፂዛይቲ ሄይቲካ ሜꬌቲዳይቲ ኪቻናይሳ ቤሴስ። ሄሳ ጊሽ ኑኒ ሙሌካ ቃፆንታ ካዎቴꬅ ላታና ጊሽ ኣኔ ፆሴ ጋላቶስ። ቃሴካ ኢዛ ኡፋይሲዛ ኦጌራ ቦንቾሲኔ ያሻቴꬃን ኣኔ ኢዛስ ጎይኖስ። ኑ ፆሳይ ፁጊዛ ታማ ማላ። ኢንቴ ኢንቴ ጊዶን ኢሻታ ማላ ዶሴቲቴ። ኢማꬃ ሞኮ ባሎፒቴ፤ ኢሲ ኢሲ ኣሳቲ ሄሳꬆ ኦꬂሼ ኤሮንታ ኪታንቻታ ኢማꬃቴꬅ ሞኪ ኤኪዳ። ቃሾ ኬꬃን ዲዛይታራ ኢንቴካ ቃሼቲዳ ማላ ኢስታስ ቆፒቴ። ሄሳꬆካ ኣሳ ኩሼን ዋዬቲዛይታራ ኢንቴካ ዋዬቲዛ ማላ ኢስታስ ቆፒቴ። ኤኮይ ጌሎይ ኡባ ኣሳ ኣቻን ቦንቼቶ። ኢንቴ ሂꬄይ ጌሽ ጊዶ። ጋሶይካ ላይማ ኣሞይ ዲዛይታኔ ላይማቲዛይታ ቦላ ፆሲ ፒርዳና። ሚሻ ሲቆፔ ናጌቲቴ። ኢንቴስ ዲዛይሲ ጊዳና፤ ሄሳስ ጋሶይ ፆሲ “ታ ኢንቴና ሙሌካ ኣጊኬኔ ዬጊኬ” ጊዴስ። ሄሳ ጊሽ ኩሜꬃ ዎዝናፔ ኑኒ “ጎዳይ ታስ ማዶ፤ ታ ባቢኬ። ታና ኣሲ ኣይ ኦꬃና ዳንዳዪዜ?” ጎስ። ኢንቴስ ፆሳ ቃላ ኮይሮፔ ዮቲ ካሌꬂዛይታ ባሎፒቴ። ኢስታ ዱሳን ቤቲዛ ሎዖ ኣይፌይ ዲዛይሳ ዩሺ ቆፒቴ። ኢንቴካ ኣማኖን ኢስታ ሚሳቲቴ። ዬሱስ ኪርስቶሲ ሃቺካ ዎንቶካ ሜርናስካ ኢዚ ኢዛኮ! ዱማ ዱማ ኢማꬃ ቲሚርቴ ኤኮፍቴ፤ ኑ ዎዝናይ ሚኒ ኤቂዛይ ፆሳ ኪያቴꬃን ኣቲን ካꬃ ዎጋ ናጎን ጊዴና። ሄሳ ሄ ዎጋ ናጊዛይቲካ ኢዛን ጎዔቲቤቴና። ኑስ ያርሾሶይ ዴስ። ጊዲኮካ ዱንካኔዛ ጊዶን ኦꬂዛ ቄሴቲ ሄ ያርሾሶዛ ቦላ ዲዛ ካꬃፌ ኤኪ ሞንታ ማላ ዲጌቲዳ። ቄሴታ ሃላቃይ ናጋራ ቴቂዛ ሜሄ ሱꬅ ኤኪዲ ኡባፌ ዱማ ጌቴቲዛ ኪፊሌ ጌሌስ። ሜሄታ ኣሾይ ጊዲኮ ካታማፔ ካሬን ፁጌቴስ። ሄሳꬆካ ዬሱሲ ባ ሱꬃ ባጋራ ኣሳ ጌሻናስ ካታማ ፔንጌፌ ካሬን ሜቶ ቤዪዴስ። ሄሳ ጊሽ ኑካ ኢዚ ቶኪዲ ካዉሻቴꬃ ቶኪዳ ኑ ዲዛሶፔ ጌዴ ኢዛኮ ካሬ ኣኔ ኬዞስ። ጋሶይካ ሃይሳን ኤቂ ዳና ካታማይ ኑስ ዴና። ጊዶ ኣቲን ቡሮ ሲንꬃፌ ያና ካታማዮ ናጎስ። ሄሳ ጊሽ ኡባ ዎዴ ጋላታ ያርሾ ሄሲካ ኢዛ ሱንꬃስ ማርካቲዛ ኑ ዱናፔ ቤቲዛ ኣይፌ ጊዲዳዝ ዬሱሳ ባጋራ ፆሳስ ኣኔ ሺሾስ። ቃሴካ ሎዖ ኦሶኔ ኢንቴስ ዲዛይሳፌ ሃራታስ ኢሞ ባሎፒቴ። ፆሲ ሄይታንታ ማላ ያርሾን ኡፋዬቴስ። ኢንቴና ካሌꬂዛይታስ ኣዛዜቲቴኔ ሃሬቲቴ። ሄሳስ ጋሶይካ ኢንቴ ጊሽ ኢስታ ኣላፌቴꬃን ዳሮ ኦይቺዛ ጉዳይ ዲዛ ጊሽ ኢንቴ ሼምፖ ጊሽ ዳሮ ባፄቴቴስ። ሄሳ ጊሽ ኢስቲ ባ ኦꬂዛ ኦሶዛ ላንጬቲሼ ጊዶንታ ኡፋይሳን ኦꬃና ማላ ኢንቴ ኢስታስ ኣዛዜቲቴ። ኢንቴ ሄሳꬆ ሂስቶንታ ኣጊኮ ኢንቴስ ሎዔና። ኑስካ ዎሲቴ። ኡባሶራካ ሎዖ ዱስ ዳናስ ላሞቲዛ ሎዖ ቆፋይ ኑስ ዲዛይሳ ኑ ሲꬎኮ። ሃራፔካ ታ ኢንቴኮ ኤሌን ሲማ ባና ማላ ታስ ኢንቴ ዎሳና ማላ ሃዳራ ጋይስ። ዶርሳታ ሄንꬃንቻይ ዎጋ ጎዳ ዬሱስ ኪርስቶሳ ባ ሜርና ጫቆ ቃላ ሱꬃን ኢዛ ሃይቆፔ ዴንꬂዳ ሳሮቴꬃ ፆሲ፥ ኢንቴ ኢዛ ሼኔ ፖላና ማላ ሎዔቴꬃን ኢንቴና ጊፂሶ። ፆሳ ኡፋይሲዛይሳ ዬሱስ ኪርስቶሳ ባጋራ ኑናን ኦꬆ። ኢዛስ ሜርናፔ ሜርናስ ቦንቾይ ጊዶ። ኣሚን። ታ ኢሻቶ! ኢንቴስ ፃፊዳ ዞሬ ቃላይ ጉꬅ ጊዲዳ ጊሽ ኢንቴ ሃንቄቶንታ ማላ ታ ኢንቴና ሃዳራ ጋይስ። ኑ ኢሻ ፂምቶሲ ቢርሼቲዳይሳ ኢንቴ ኤራና ማላ ታ ኮያይስ። ኢዚ ኤሶን ታኮ ዪኮ ታ ኢዛራ ሄ ባዳ ኢንቴና ሄን ቤያና። ኢንቴና ካሌꬂዛይታ ኡባታሲኔ ኣማኒዛ ኣሳ ኡባስ ታ ሳሮካ ዮቲቴ። ኢፃሊያን ዲዛ ኣማኒዛ ኣሳይካ ኢንቴና ሳሮ ጌስ። ፆሳ ኪያቴꬂ ኢንቴናራ ጊዶ። ኣሚን። ፆሳ ኦሳንቻኔ ዬሱስ ኪርስቶሳ ኦሳንቻ ጊዲዳ ያቆቤፔ ቢታ ቦላ ላሌቲዳ ታማኔ ናምዑ ኮቻታስ ሳሮቴꬂ ኢንቴስ ጊዶ። ታ ኢሻቶ! ኢንቴ ቦላ ዱማ ዱማ ዋዬይ ጋኪኮ ሄሳ ዉርሲ ኡፋይሳን ቆዲቴ። ጋሶይካ ኢንቴ ኣማኖ ፓጬቴꬂ ኢንቴስ ዳንዳያ ኢሚዛይሳ ኢንቴ ኤሬታ። ኢንቴ ዳንዳያን ሚኒ ኤቃናይሲ ኢንቴስ ኢሲ ሚሺካ ፓጮንታ ኩሜꬃ ኣሲኔ ዎሶይ ባይንዳይታ ጊዳና ማላ ኦꬆ። ኢንቴ ጊዶፌ ኦናስካ ኤራቴꬂ ፓጪኮ ኦናካ ሌቆንታ ባ ኪያቴꬃራ ኡባስ ኢሚዛ ፆሳ ዎሶ፤ ኢዛዴስካ ኢሜታና። ጊዶ ኣቲን ሲꬌይ ባይንዳ ኣማኖን ዎሶ። ጋሶይካ ሲꬊዛዴይ ኣባ ቃꬂዛ ዳምባላ ጫርኮ ማላ። ሄሳዴይ ጎዳፔ ኣይኮካ ዴማና ጊዲ ቆፖፎ። ሄሳዴይ ናምዑ ቆፋን ኦይኬቲዲ ባ ቢዛ ኦጌ ቦላ ያኔ ሃኔ ጊዛ ኣሳ ማላ። ካሴ ዚቃ ዱሳን ዲዛዴ ፆሲ ꬎቁ ሂስታና ጊሽ ኡፋዬቶ። ኣሳ ዱሬቴꬅ ማታ ጪሻ ማላ ቆካና ጊሽ ዱሳን ꬎቁ ጊዳዴይ ፆሲ ኢዛ ዚቂ ሂስቲኮ ኡፋዬቶ። ኣዋ ኣርሼይ ፁጊዲ ማታ ሹሊሴስ፤ ማታ ጪሻይካ ሹሌስ፤ ኢዛ ሎዔቴꬂካ ꬋዬስ፤ ሄሳꬆካ ዱሬይ ሃች ሃች ዳቡርሳን ዲሺን ኢዛ ዱሬቴꬂ ꬋዬስ። ፓጬን ሚኒ ኤቂዳዴይ ኢዚ ኣንጄቲዳዴ። ጋሶይካ ኢዚ ፓጬራ ኤቄቲሺን ፆሲ ባና ዶሲዛይታስ ኢሚዳ ሂዶታ ዴዖ ኣክሊሌ ኢዚ ኤካና። ኦኒካ ፓጬቲዛ ጊዲኮ ታና ፆሲ ፓጬስ ጎፖ፤ ጋሶይካ ፆሲ ኣሴ ኢታን ፓጬና፤ ኢዚ ኦናካ ፓጪ ኤሬና። ጊዶ ኣቲን ኢሲ ኢሲ ኣሲ ፓጬቲዛይ ባርካ ባ ኢታ ኣሞ ካሊሼኔ ባሌቲሼ ፓጬቴስ። ኣሞይ ቃንꬃቲዲ ናጋራ ዬሌስ፤ ናጋራይካ ዲጪዳፔ ጉዬ ሃይቆ ዬሌስ። ታ ሲቆ ኢሻቶ! ኢንቴ ባሌቶፍቴ። ሎዖ ኢሞቴꬂኔ ኩሜꬃ ኣንጆይ ዉሪ ቦላ ሳሎ ፖዖታ ኣዋፔ ዎꬌቴስ። ኢዛ ኣቻን ሄኔ ሃ ዩዪዛ ኤሾይካ ዴና። ኑ ኢዛ ሜꬌቴꬃስ ኮይሮ ባይራታ ጊዳና ማላ ባ ሼኔኒኔ ባ ቱማ ቃላን ኑና ዬሊዴስ። ዶሴቲዳ ታ ኢሻቶ! ሃይሳ ዩሺ ቆፒቴ፤ ኣሲ ዉሪካ ሲያናስ ኤሶቶ፤ ሃሳያሲኔ ሃንቆስ ኤሶቶፖ። ኣሳ ሃንቆይ ፆሳ ፂሎቴꬅ ኦꬄና። ሄሳ ጊሽ ቱናቴꬂኔ ዳልጊዳ ኢታቴꬅ ኢንቴፌ ኬሲ ዬጊዲ ኢንቴ ሼምፖ ኣሻናስ ዳንዳዪዛ ኢንቴ ጊዶን ቶኬቲዳ ቃላ ኣሽኬቴꬃራ ኤኪቴ። ቃላይ ጊዛይሳ ኦꬂቴ ኣቲን ሜላ ሲሲ ፃላላ ሲዪዛዴንታ ጊዲዲ ኢንቴርካ ኢንቴና ባሌꬆፍቴ። ቃላ ሲዪሼ ሲዪዳ ቃላይ ጊዛይሳ ኦꬆንታዴይ ባ ኣይፌሶ ማስቶቴራ ፄሊዛ ኣሳ ማላ። ባና ፄሊ ቤዪዲ ቤስ፤ ኢዚ ኣይ ሚሳቲዛኮኔ ሄራካ ባሌቲቼስ። ጊዶ ኣቲን ባና ጌሺዛ ሎዖ ዎጋ ፄሊ ቤዪዲ ኢዛን ሚኒዛዴይ ባ ሲዪዳይሳ ኦꬂዛዴይኔ ባሎንታዴይ ኢዚ ባ ኦሶን ኣንጄቲዳዴ ጊዳና። ባ ዱና ናጎንታ ባርካ ባ ዎዝና ባሌꬂሼ ታ ኣማናይስ ጊዛዴይ ባርካ ባና ባሌꬄስ። ኢዛ ኣማኖይካ ሜላ ሃዳ ኣማኖ። ፆሳ ኣዋ ሲንꬃን ኢታቴꬂ ባይንዳ ሎዖ ኣማኖይ፤ “ኣያኔ ኣዋይ ሃይቂዳ ናይታ፥ ኢስታ ኣዚናቲ ሃይቂዳ ማጫሳታ ሜቶቴቲሺን ማዶኔ ሃይሳ ኣላሜዛ ቱናቴꬃፌ ባና ናጎ። ታ ኢሻቶ! ኢንቴ ቦንቼቲዳ ጎዳ ዬሱስ ኪርስቶሳ ኣማኒዛይታ ጊዲዳ ማላ ኣሴ ቤሶንታ ኦጌራ ማዶፍቴ። ዎርቃ ዪች ቢራꬌን ኣꬂዲ ሎዖ ማይዖ ማይዒዳ ኣሲ ኢንቴ ሺቂዛሶ ዪኮ ሄሳꬆካ ቂታ ማይዖ ማይዒዳዴይ ሄ ሺቂዛሶ ዪኮ ቃሴካ ሃራ ቂታ ማይዖ ማይዒዳ ማንቆ ኣሲ ጌሊኮ ሎዖ ማይዒዳይሳ ዱማ ቦንቾ ቦንቺዲ “ኔስ ቤሲዛ ሎዖ ኡቲዛሶ ሄሳ ቤያ” ጊዲ ሃንኮ ማንቆዛ ቃሴ “ኔ ሄን ሄሳን ኤቃ፤ ዎይኮ ሃ ያ፥ ታ ጋርሳን ዉጌን ኡታ” ኢንቴ ጊኮ፥ *** ኢንቴ ኢንቴ ጊዶን ቤሶንታ ማዶ ኦꬄታ ጊዴኬቲ? ቃሴካ ኢንቴ ኢታ ቆፋን ኦይኬቲዳ ኢታ ፒርዳ ፒርዲዛይታ ጊዴኬቲ? ታ ሲቆ ኢሻቶ! ኣኔ ሲዪቴ፤ ኢስቲ ኣማኖን ዱሬታ ጊዳና ማላ ፆሲ ባና ዶሲዛይታስ ሂዶታ ኢስታስ ኢሚዳ ካዎቴꬃ ኢስቲ ላታና ማላ ሃይሳ ሃ ኣላሜዛን ዲዛ ማንቆታ ዶሪቤኔ? ኢንቴ ቃሴ ማንቆታ ካዉሼታ። ኢንቴና ዋይሲዛይ ዱሬታ ጊዴቴኔ? ኢንቴና ፒርዳሶ ጎቺዛይ ኢስታ ጊዴቴኔ? ኢንቴናን ፄይጌቲዳ ቦንቾ ፆሳ ሱንꬃ ዚጊርዛይቲ ኢስታ ጊዴቴኔ? ማፃፋን “ኔ ላጌ ኔ ሁዔ ማላ ሲቃ” ጌቴቲ ፃፌቲዳ ካዎ ዎጋ ኢንቴ ፖሊኮ ሎዖ ኦꬄታ። ኢንቴ ቤሶንታ ማዶ ማዲኮ ናጋራ ኦꬄታ። ዎጋ ሲንꬃንካ ኢንቴ ዎጋ ዬꬊዳዴ ጊዲ ቆዴታና። ጋሶይካ ዎጋ ዉርሲ ፖሊዛዴይ ቃሴካ ዎጋፔ ኢሲኔዪን ꬉጴቲዛ ኣሲ ዉርሲካ ሞሪዳዴ ማላ ቆዴቴስ። “ላይማቶፓ” ጊዳዴይ ኢዚካ ዛሪዲ “ዎꬎፓ” ጊዴስ። ኔ ላይማቶንታ ኣጊኮካ ኔ ኣሳ ዎꬊኮ ዎጋፔ ኣꬊዳዴ ጊዳሳ። ኢንቴ ሃሳያ ሃሳዪሼ ዎይኮ ኢሲ ሚሽ ኦꬂሼ ኢንቴና ፂሊሲዛ ኣሳ ማላ ጊዲቴ። ጋሶይካ ማሮንታይ ዉሪካ ማሮይ ባይንዳ ፒርዴታና። ማሮይ ፒርዳ ፆኔስ። ታ ኢሻቶ! ኢሲ ኣሲ ታስ ኣማኖይ ዴስ ጊኮ ቃሴ ኦሶን ቤሶንታዴ ጊዲኮ ኢዛ ኣይ ማዳኔ? ሄሳ ማላ ኣማኖይ ኢዛ ኣሻኔ? ኣኔ ቆፒቴ፥ ኢሲ ኢሻይ ዎይኮ ኢሲ ሚቺያ ማይዖይ ዎይኮ ሚዛይሲ ባይንዳ ኣጊኮ ኢንቴፌ ኢሳዴይ “ኢንቴ ሳሮን ቢቴ! ኢንቴና ሜጎፎ! ካሊቴ!” ጊኮ ኢስታ ኣሾስ ኮሺዛይሳ ኢሞንታ ኣጊኮ ኣይ ማዳኔ? *** ሄሳꬆካ ኦሶይ ባይንዳ ኣማኖይካ ባስ ሃይቂዳይሳ። ጊዶ ኣቲን ኢሳዴይ “ታስ ኦሶይ ዴስ ኔስ ኣማኖይ ዴስ። ኔኒ ኔ ኣማኖ ኦሶፔ ሻካዳ ታና ቤሳ፤ ታ ቃሴ ታ ኣማኖ ኦሶን ኔና ቤሳና” ጊኮ፥ ኔ “ኢሲ ፆሲ ዲዛይሳ ኣማናሳ” ሄሲካ ሎዖ፤ ዳይዳንꬃቲካ ሄሳ ማላ ኣማኔቴሲኔ ኬሂ ኮኮሬቴስ። ኔኖ ኤያዞ! ኦሶይ ባይንዳ ኣማኖስ ጎዓይ ባይንዳይሳ ኤራናስ ማርካ ኮያይ? ኑ ኣዋ ኣብራሃሜይ ባ ና ዪሳቃ ያርሺዛሶዛ ቦላ ሺሺዳ ዎዴ ኦሶን ፂሊቤኔ? ሄሳን ኣማኖዛ ኦሶራ ጋꬂ ኦꬂዛይሳ ኔ ቤያሳ፤ ኣማኖይካ ኦሶን ፖሌቲዴስ። “ኣብራሃሜይ ፆሴ ኣማኒዴስ፤ ሄ ኣማኖይ ኢዛስ ፂሎቴꬃን ቆዴቲዴስ” ጊዛ ማፃፋ ቃላይ ፖሌቲዴስ፤ ኢዚካ ፆሲ ዶሲዳዴ ጌቴቲዴስ። ሄሳ ጊሽ ኣሲ ኣማኖን ፃላላ ጊዶንታ ኦሶንካ ፂሊዛይሳ ኢንቴ ቤዬታ። ሄሳꬆካ ላይማን ዲዛ ኤራዓባ ኪቴቲ ቢዳ ኣሳታ ሞካ ኤካዳ ሃራ ኦጌራ ሞዪዛ ዬዲዳ ጊሽ ባ ኦሶን ፂላቤይኬ? ሼምፖፌ ሻኬቲዳ ኣሾይ ሃይቄꬅ ጊዲዳ ማላ ኦሶፔካ ሻኬቲዳ ኣማኖይ ሃይቄꬃ። ታ ኢሻቶ! ኢንቴፌ ዳሮቲ ኣስታማሬታ ጊዶፔቶ፤ ጋሶይካ ኑ ኣስታማሬ ጊዲዳይቲ ኣꬌꬃ ፒርዳ ኤካናይሳ ኢንቴ ኤሬታ። ኑ ዉሪካ ዳሮ ሚሻን ꬉጴቶስ። ሃሳያን ꬉጴቶንታዴይ ዲኮ ኢዚ ባ ኣሳቴꬅ ሎዔꬂ ናጋናስ ዳንዳዪዛ ኩሜꬃ ኣሳ። ኑኒ ፓራታ ኣዛዛናስ ቢፃላ ባርሲዲ ኑ ኮይዳ ማላ ኢስታ ኣዛዞስ። ዎይኮ ኣኔ ማርካቤታ ፄሊቴ። ኢስቲ ኣይ ጊታታኔ ጫርኮን ሱጌቲ ቢዛይታ ጊዲኮካ ማርካቤ ላጊዛዴይ ቄሪ ላፋ ላጊዛ ሚሻራ ባ ኮዪዛሶ ኤፌስ። ሄሳꬆካ ኣሳቴꬃ ጋርሳን ኢንፃርሲ ጉꬅ ጊዳ ኡታዳ ጊታ ዎልቃማ ኦቶሮ ኦቶሬታዉስ፤ ቄሪ ታማይ ጊታ ዎራ ዎስቲ ፁጊ ꬋይሲዛኮኔ ኣኔ ዩሺ ቆፒቴ። ኢንፃራሲካ ባ ባጋራ ታማ ማላ፤ ኑ ኣሳቴꬃ ጊዶን ዲዛ ኢታ ኣላሜ። ኣሳቴꬃ ዉርሳ ቱኒሳዉሲኔ ኣሳቴꬃ ቦላ ታማ ጉጃዉስ፤ ባስካ ጋናሜ ታማን ፁጌታና። ሜሄይ፥ ዶዓይ፥ ካፎቲ ሃይሳꬆካ ቢታ ቦላ ጎሼቲዛይታኔ ኣባ ጊዶን ዲዛ ሜꬌቴꬃታ ዉርሲ ኣሲ ሃራና ዳንዳዬስ፤ ኢስቲካ ሃሬቲዳ። ጊዶ ኣቲን ኢንፃርስ ሃራናስ ዳንዳዪዳዴይ ኦኒካ ዴና። ዎꬊዛ ማርꬔይ ኢዚን ኩሚዳሮኔ ኢዛ ሼምፓ ኤኮንታ ኢታ ሚሻ። ኑኒ ኑ ኢንፃርሳይራ ጎዳኔ ኣዋ ኣንጆስ። ኢዚንካ ፆሳ ሌሚሶን ሜꬌቲዳ ኣሳ ናይታ ዛሪዲ ቃንጎስ። ኣንጆይኔ ቃንጌꬂ ኢሲ ዱናራ ኬዜስ። ታ ኢሻቶ! ሄሲ ሄሳꬆ ሃናናስ ቤሴና። ኢሲ ፑልቶ ኦላፌ ማልዖ ሃꬂኔ ጫሞ ሃꬂ ፑልቲ ኤሪዜ? ታ ኢሻቶ! ባላሴ ጌቴቲዛ ሚꬂ ዎጋራ ኣይፌ ዎይኮ ዎይኔ ሚꬂ ባላሴ ሚꬃ ኣይፌ ኣይፋናስ ዳንዳዪዜ? ሄሳꬆካ ጫሚዛ ሃꬃፌ ማልዒዛ ሃꬂ ቤታና ዳንዳዬና። ኢንቴ ጋራሳፌ ኣኬካራ ዲዛ ኤራ ኣሲ ኦኔ? ኤራይ ዲዛ ጊዲኮ ኣኔ ባ ኦሶ ኣሽኬቴꬃኒኔ ኣꬎ ኤራቴꬃራ ባ ሎዖ ዱሳን ቤሶ። ቃሴ ጫሞኔ ቃናቴይ፥ ኢንቴና ፃላላ ዶሲዛ ሃኖይ ኢንቴ ዎዝናን ዲዛ ጊዲኮ ኦቶሬቴꬅ ኢንቴስ ሲዬቶፎ። ቱማካ ካዶፊቴ። ሂኒ ማላ ኤራቴꬃያ ሳሎፔ ጊዲኩ። ሂና ቃሴ ቢታፌ፥ ኣሾፔኔ ፃላዔፔኮ! ቃናቴይኔ ባርካ ባና ሲቆይ ዲዛሶን ዋሶይኔ ኢታ ኦሶይ ዉሪ ዴስ። ሳሎፔ ጊዲዳ ኤራቴꬃያ ጊዲኮ ኮይሮ ጌሻ፥ ጉዬፔካ ሳሮቴꬅ ዶሲዛሮ፥ ዳንዳዪዛሮ፥ ኤሮ ጊዛሮ፥ ማሮቴꬂኔ ሎዖ ኣይፌይ ኩሚዳሮ፤ ቃሴ ዎርዶ ማዶንታሮኔ ኡሎን ጌኔይ ባይንዳሮ። ሳሮቴꬅ ዶሲዛ ኣሳቲ ሳሮቴꬃን ዜሪዲ ፂሎቴꬃ ኣይፌ ማፄቴስ። ኢንቴ ጊዶን ዲዛ ኦላይኔ ኦሻይ ኣዋፔ ዪዴ? ኢንቴ ዎዝናን ዲዛ ኣሞቴꬃፌ ዴንዲዳ ኦላ ጊዴኔ? ኢንቴ ኣሞቴታ ሺን ዴሜኬታ። ኢንቴ ኣስ ዎꬌታኔ ኬሂ ኣሞቴታ ሺን ዴማና ዳንዳዬኬታ። ኢንቴ ኢንቴ ጋርሳን ኦዬቲዛ ጊሻኔ ኦሌቲዛ ጊሽ ቃሴ ዎሶንታ ጊሽ ኢንቴስ ኢሜቴና። ኢንቴ ኢንቴ ኣሾ ኡፋይሳናስ ኢታ ቆፋን ዎሲዛ ጊሽ ዎሲዳይሳ ኢንቴ ኤኬኬታ። ኢንቴኖ ላይማቲዛይቶ! ኣላሜራ ሲቄቴꬂ ፆሳራ ሞርኬቴꬅ ጊዲዳይሳ ኤሬኬቲ? ሄሳ ጊሽ ሃይሳ ኣላሜዛራ ሲቄቴꬂ ኮዪዛይ ዉሪካ ፆሳስ ሞርኬ። ዎይኮ ጌሻ ማፃፋ ጊዶን “ኑናን ኢዚ ኣይሲዳ ኣያናይ ኑ ኢዛይታ ጊዳና ማላ ዳሮ ኣሞቴስ” ጊዛይሲ ኢንቴስ ጮ ሜላ ጊዳ ሚሳቲዜ? ጊዶ ኣቲን ኢዚ ባ ኪያቴꬅ ኑስ ጉጂ ኢሜስ። ማፃፋይካ “ፆሲ ኦቶራንቻታራ ኤቄቴስ፥ ኣሽኬታስ ቃሴ ባ ኪያቴꬅ ኢሜስ” ጊዳይ ሄሳሳ። ሄሳ ጊሽ ኢንቴና ፆሳስ ሃሪሲቴ። ዳቡሎሳራ ኤቄቲቴ፥ ኢዚ ኢንቴፌ ባቃታና። ፆሳኮ ሺቂቴ፤ ኢዚካ ኢንቴኮ ሺቃና። ኢንቴኖ ናጋራንቻቶ! ኢንቴ ኢንቴ ኩሼ ጌሺቴ፥ ኢንቴ ናምዑ ቆፋን ቃፂዛይቶ! ኢንቴ ኢንቴ ዎዝና ጌሺቴ። ዳርሲ ቆፒቴ፤ ሙዞቲቴ፤ ዬኪቴ፤ ኢንቴ ሚቻይ ዬሆን፤ ኡፋይሳይ ቃሴ ሙዞቴꬃን ሲሞ። ጎዳ ሲንꬃን ኢንቴ ኢንቴና ካዉሺቴ፤ ቃሴ ኢዚ ኢንቴና ꬎቁ ꬎቁ ሂስታና። ታ ኢሻቶ! ኢንቴ ኢንቴ ጋርሳን ኢሶይ ኢሳ ሞቶፒቴ፤ ባ ኢሻ ሞቲዛዴይኔ ባ ኢሻ ቦላ ፒርዲዛዴይ ዎጋ ቦላ ኢታ ሃሳዬሲኔ ዎጋ ቦላ ፒርዴስ። ሂስቲኮ ኔ ዎጋ ቦላ ፒርዲዛዴ ኣቲን ዎጋ ናጊዛዴ ጊዳካ። ዎጋ ዎꬂዳዴይኔ ፒርዲዛዴይ ኢሳዴ ፃላላ። ኢዚካ ꬋይሳናሲኔ ኣሻናስ ዳንዳዪዛዴ። ጊዶ ኣቲን ኔኒ ኔ ላጌ ቦላ ፒርዲዛዴይ ኦኔ? “ኢንቴ ሃቺ ዎይኮ ዎንቶ ሃኖ ሃ ካታማዮ ዎይኮ ሂኖ ሄ ካታማዮ ኑ ባና፤ ቢዲ ሄን ኢዚን ኢሲ ላይꬅ ኡታናኔ ዛልዒ ዎꬊሳና” ጊዛይቶ! ኣኔ ሃ ሲዪቴ። ዎንቶ ሃናናይሳ ኢንቴ ኤሬኬታ። ኢንቴ ሼምፖይ ኢዛ ኣዜ? ኢንቴ ጉꬃ ዎዴ ኣይፌን ቤቲዲ ꬋዪዛ ሃꬃ ፔንታ ማላ። ሃይሳ ጋናፔ “ጎዳ ሼኔ ጊዲኮኔ ኑ ፓፃ ዲኮ ሄሳካ ሃይሳካ ኦꬃና” ጋናስ ኢንቴስ ቤሴስ። ሃዒ ጊዲኮ ኢንቴ ኦቶሬቴꬃን ጬቄቴታ። ሄሳ ማላ ኦቶሬቴꬂ ዉሪካ ኢታ። ሄሳ ጊሽ ሎዖ ጊዲዛይሳ ኦꬃናስ ቤሲዛይሳ ኤሪሼ ኦꬆንታዴስ ናጋራ ጊዳና። ሂስቲኮ ኢንቴኖ ዱሬ ኣሳቶ! ኣኔ ሲዪቴ። ቡሮ ኢንቴ ቦላ ጋካና ሜቶዛ ጊሽ ዬኪቴ፤ ዉ ዉይ! ጊ ዋሲቴ። ኢንቴ ሃሮይ ቡቂዴስ፥ ኢንቴ ማይዖካ ቢላይ ሚዴስ። ኢንቴ ዎርቃይኔ ኢንቴ ቢራይ ሺይዴስ። ሄ ሺይዳይሲካ ኢንቴ ቦላ ማርካቴሲኔ ኢንቴ ኣሾ ታማ ማላ ፁጌስ። ኢንቴ ዎዴ ዉርሴꬃስ ሚሼ ሺሺዴታ። ኢንቴ ኢንቴ ዎዝናን ዎꬂቴ፤ ኢንቴ ካꬅ ማፂሼ ፔይዳይታስ ኢስታ ዎልቃ ዋጋ ኢንቴ ቃንፆንታ ኣጊዳ ጊሽ ኢንቴ ቦላ ዋሲሼ ኢንቴ ኣቻን ዴቴስ። ካꬅ ማፂዛይታ ዋሶይ ኡባ ዳንዳዪዛ ጎዳ ሃይꬃን ጋኪዴስ። ኢንቴ ቢታ ቦላ ኢሻሎኔ ኣልዔቴꬃን ዴዒዴታ፥ ኢንቴ ዎዝና ሹካስ ꬊኪዳ ሜሄ ማላ ሞꬊሲዴታ። ኢንቴ ኢንቴናራ ኤቄቶንታ ፂሎ ኣሳታ ቦላ ዎርዶ ዎꬂዲ ዎꬊዴታ። ሄሳ ጊሽ ታ ኢሻቶ! ጎዳይ ሃ ያና ጋካናስ ዳንዳዪቴ። ጎሼ ጎዪዛዴይ ቢታይ ሎዖ ካꬂ ካፃና ጋካናስ ዋኒ ዳንዳዪዛኮኔ ኮይሮ ኢራኔ ዉርሴꬃ ኢራ ኢዚ ዎስቲ ናጊዛኮ ኣኔ ኣኬኪቴ። ኢንቴካ ሄሳꬆ ዳንዳዪቴ። ኢንቴ ዎዝና ሚንꬂቴ። ጋሶይካ ጎዳ ዩሳ ጋላሲ ማቲዴስ። ታ ኢሻቶ! ኢንቴ ኢንቴ ጊዶን ዚግሬቶፊቴ፤ ኢንቴ ዚግሬቲኮ ኢንቴ ቦላ ፒርዴታና። ፒርዳናዴይ ሄኮ ኢንቴ ፔንጌ ቦላ ኤቂዴስ። ታ ኢሻቶ! ጎዳ ሱንꬃን ኢንቴስ ዮቲዳ ናቤታ ዋዬቴꬂኔ ኢስታ ዳንዳያ ኢንቴስ ሌሚሶ ሂስቲ ፄሊቴ። ዳንዳያን ጌንጪዳ ኣሳታ ኑ ኢስታ “ኢስቲ ኣንጄቲዳይታ” ጊ ቆዲዛይሳ ኢንቴ ኤሬታ። ኢዮቤይ ዋኒ ዳንዳዪዳኮኔ ኢንቴ ኢዛ ጊሽ ሲዪዴታ። ጎዳይ ኢዛ ዉርሴꬃን ኣይ ኦꬂዳኮኔ ኢንቴ ቤይዴታ። ጎዳይ ኣሳስ ኬሂ ሚሼቲዛዴኔ ማሪዛዴ። ሃራፔካ ታ ኢሻቶ! ሳሎን ጊዲን ዎይኮ ሳዓን ጊዲን ዎይኮ ኣይ ሚሻንካ ጫቆፍቴ፤ “ኤ” ጋናስ ቤሲዛ ሚሽ ጊዲኮ “ኤ” ጊቴ። “ኣካይ” ጋናስ ጊዲኮ “ኣካይ” ጊቴ ሄሳፌ ሃራ ጊኮ ኢንቴ ቦላ ፒርዴታና። ኢንቴ ጋርሳን ሜቶቲዛ ኣሲ ዲዜ? ዲዛ ጊዲኮ ኢዚ ዎሶ። ኡፋዬቲዛዴይ ዲዜ? ዲዛ ጊዲኮ ኡፋይሳ ዬꬅ ዬፆ። ኢንቴ ጊዶን ሳኬቲዛ ኣሲ ዲዜ? ዲኮ ዎሳ ኬꬃ ጪማታ ፄይጎ። ኢስቲካ ጎዳ ሱንꬃን ዛይቴ ኢዛ ቦላ ቲይዲ ኢዛስ ዎሴቶ። ኣማኖን ዎሲዳ ዎሳይ ሃርጊዳዴ ፓꬃና። ጎዳይካ ኢዛ ዴንꬃና። ኢዚ ናጋራ ኦꬂዳዴ ጊዲኮካ ፆሲ ኢዛ ማራና። ሄሳ ጊሽ ኢንቴካ ኢንቴ ጋርሳን ኢሶይ ኢሳራ ኢንቴ ናጋራ ፓፄቲቴ፤ ፓፃና ማላ ኢሶይ ኢሳስ ዎሲቴ። ፂሎ ኣሳ ዎሳይ ዎልቃራ ዴስ፤ ዎልቃማ ኦሶካ ኦꬄስ። ኤላሲ ኑ ማላካ ኣሳ። ኢዚ ኢራይ ቡኮንታ ማላ ሚንꬂ ዎሲን ቢታ ቦላ ሄꬑ ላይꬂኔ ባጋ ጋካናስ ኢራይ ቡኪቤና። ቃሴካ ዛሪ ዎሲን ኢራይ ሳሎፔ ቢታ ቦላ ቡኪዴስ። ቢታይካ ካꬅ ኢሚዴስ። ታ ኢሻቶ! ኢንቴፌ ኢሳዴይ ቱማፔ ባሌቲን ሃራ ኣሲ ኢዛ ዛሪኮ ሄሳ ዎዝናን ዎꬂቴ። ናጋራንቻ ኢዚ ባሌቲዳ ኦጌፔ ኢዛ ዛሪዳዴይ ሄሳዴ ሼምፖ ሃይቆፔ ኣሼሲኔ ኢዛዴ ናጋራ ዳሮዛካ ካሜስ። *** ዬሱስ ኪርስቶሳ ሃዋሬ ጊዲዳ ጴፅሮሳፔ፥ ኣሳ ቢታን ቤቴን ዲዛይታስ ጳንፆሳን፥ ጋላቲያን፥ ቃጶዶቂያን፥ ኢሲያኒኔ ቢቲኒያ ቢታን ላሌቲ ዲዛ ኢንቴስ፥ ኣዋይ ፆሲ ካሴ ኢንቴና ኤሪዳ ማላ ዶሬቲዳይታስ፥ ዬሱስ ኪርስቶሳስ ኣዛዜታናሲኔ ኢንቴ ኢዛ ሱꬃን ኣራጬቲዲ ጌያና ማላ ፂሎ ኣያናን ዱማቲዳ ኢንቴስ ኪያቴꬂኔ ሳሮቴꬂ ዳሮ። ዬሱስ ኪርስቶሲ ሃይቆፔ ዴንዲዳ ጊሽ ኑስ ዴዖ ጊዲዳ ሂዶታ ኢሚዳይሲ ባ ጊታ ማሮቴꬃን ኑና ባስ ኦራꬃ ናይታ ሂስቲዳ ኑ ጎዳ ዬሱስ ኪርስቶሳ ኣዋይ ፆሲ ጋላቴቶ። ኢዚ ꬋዮንታ፥ ሞሬቶንታኔ ጬጎንታ ላታሶ ኢንቴስ ሳሎን ጊጊሲ ዎꬂዴስ። ኢንቴካ ዉርሴꬃ ጋላሳን ቡሮ ቆንጫና ኣቶቴꬃስ ኣማኖ ጌዶን ፆሳ ዎልቃን ናጌቲዴታ። ሃዒ ጉꬃ ዎዴስ ዱማ ዱማ ፓጬቲ ኢንቴና ዋይሲኮካ ኢንቴ ሄሳን ኡፋዬቲቴ። ሄሲ ሄ ፓጬዚ ኢንቴ ቦላ ጋኪዛይ ኢንቴ ኣማኖዚ ቱሙ ጊዲዳይሳ ቆንጪሳናሳ። ꬋያና ዎርቃይካ ታማን ፓጬቴስ። ዎርቃፌ ኣꬊ ቦንቾ ጊዲዳ ኢንቴ ኣማኖይካ ሄሳꬆ ፓጬታናስ ቤሴስ። ሄሲ ሄ ፓጬቲዳ ኢንቴ ኣማኖይ ዬሱስ ኪርስቶሲ ቆንጪዛ ጋላስ ጋላታስ፥ ቦንቾሲኔ ሳባስ ኢንቴና ጋꬃና። ኢንቴ ዬሱስ ኪርስቶሳ ኣይፌራ ቤዮንታ ኣጊኮካ ኢንቴ ኢዛ ዶሴታ፤ ሃዒካ ኢንቴ ኢዛ ቤዮንታ ኣጊኮካ ኢዛ ኣማኔታ፤ ጮ ቃላን ቆንጪሳና ዳንዳዮንታ ጊታ ቦንቾ ኡፋይስ ኢንቴ ኡፋዬቴታ። ኢንቴ ናጊዛ ኢንቴ ሼምፖይስ ኣቶቴꬅ ኢንቴ ኣማኖን ዴሚዴታ። ሄ ኣቶቴꬃዛ ጊሽ ኢንቴስ ኢሜታና ኪያቴꬃስ ካሴ ናቤቲ ሎዔꬂ ዎዝናፔ ፒልጊ ፄሊዳ። ካሴ ኢስታን ዲዛ ኪርስቶሳ ኣያናይ ፆሳፌ ቲዬቲዳይሳ ቦላ ጋካና ዋዬዛኔ ሄ ዋዬዛፔ ጉዬ ኢዚ ዴማና ቦንቾዛ ጊሽ ካሴ ባስ ዎꬂዴስ። ኢስቲ ቃስ ሄሲ ዉሪካ ኣይዴ ዋኒ ሃናናኮኔ ዩሺ ቆፒዳ። ሄ ካሴ ናቤቲ ኢንቴስ ኦꬂዳ ኣቲን ኢስቲ ባስ ኦꬆንታይሲ ኢስታስ ቆንጬን ኤሬቲዴስ። ኢስቲ ኢንቴስ ኦꬂዳይ ቦላ ሳሎፔ ኪቴቲዳ ፂሎ ኣያና ባጋራ ሃዒ ኢንቴስ ሚሺራቾ ቃላ ዮቲዳ ኣሳቲ ኢንቴስ ዮቲዳይሳ ቆንጪሳናሳ። ሄሳ ኔ ቃላ ኪታንቻቲካ ቤያናስ ኣሞቲዳ። ሄሳ ጊሽ ኢንቴ ኢንቴ ዎዝና ሱሪሲዲ ኦሶስ ጊጌቲቴ። ዎጋራ ዴዒቴ። ዬሱስ ኪርስቶሲ ቆንጪዛ ዎዴ ኢንቴ ኢዛ ኪያቴꬃ ዴማናስ ኢንቴስ ኩሜꬃ ሂዶታይ ዴዖ። ኢንቴ ኣዛዜቲዛ ናይታ ጊዲዲ ኤሮንታ ዲሼ ኢንቴ ካሴ ኢዛን ዲዛ ኢታ ቆፋ ካሎፍቴ። ኢንቴና ፄይጊዳ ፆሳይ ዱማ ጊዲዳ ማላ ኢንቴካ ኢንቴ ዱሳን ኡባን ዱማቲቴ። ጋሶይካ “ታኒ ጌሽ ጊዲዳ ጊሽ ኢንቴካ ጌሽ ጊዲቴ” ጌቴቲ ጌሻ ማፃፋን ካሴ ፃፌቲዴስ። ኦናካ ዱማ ሻኪ ማዶንታ ኢሳ ኢሳስ ኢዛዴ ኦሶ ማላ ፒርዲዛ ፆሳ “ኢዚ ኑ ኣዋ” ጊዲ ኢንቴ ፄይጊኮ ሃይሳ ኣላሜዛን ኢንቴ ኢማꬄኔ ቤቴ ኣስ ጊዲዲ ዲዛ ዎዴ ኡባን ኢዛስ ባቢቴ። ኢንቴ ካሴ ኢንቴ ኣዋታፔ ላቲዳ ጮ ሜላ ሃዳ ዱሳፌ ዎዜቲዳይ ꬋዪዛ ቢራን ዎይኮ ዎርቃን ጊዶንታይሳ ኢንቴ ኤሬታ። ጊዶ ኣቲን ኢንቴ ዎዜቲዳይ ኢታይኔ ዎሶይ ኢዛ ቦላ ባይንዳ ጌሻ ዶርሳ ማላ ጊዲዳ ኪርስቶሳ ቦንቾ ሱꬃና። ኢዚ ኤሬቲዳይ ሃይሲ ኣላሜዚ ሜꬌታናፔ ካሴ ጊዲሺን ሃዒ ቃስ ዉርሴꬃ ዎዴን ኢንቴስ ቆንጪዴስ። ኢንቴስ ኣማኖይኔ ኢንቴ ሂዶታይ ፆሳን ጊዳና ማላ ዬሱስ ኪርስቶሳ ባጋራ ሄ ኢዛ ሃይቆፔ ዴንꬂዲ ኢዛስ ቦንቾ ኢሚዳ ፆሳን ኢንቴ ኣማኔቴታ። ኢንቴ ኣማኒዛይታ ሱሬ ዎዝናፔ ሲቃና ማላ ቱማስ ኣዛዜቴꬃን ኢንቴ ኢንቴ ኣሳቴꬅ ጌሺዴታ። ሄሳ ጊሽ ኢንቴ ኢንቴ ጊዶን ኢሶይ ኢሳራ ሎዔꬂ ሲቄቲቴ። ኢንቴ ናምዓንꬆ ዬሌቲዳይ ሜርናስ ሚኒ ዲዛ ꬋዮንታ ዴዖ ፆሳ ቃላን ꬋዮንታ ዜሬꬃፌ ኣቲን ꬋዪዛ ዜሬꬃፌ ጊዴና። ጌሻ ማፃፋይ ጊዛ ማላ “ኣሾ ማይዒዳይ ዉሪካ ማታ ማላ፤ ኢዛ ቦንቾይካ ዉሪካ ዎራ ጪሻ ማላ፤ ማታይካ ሜሌስ፤ ጪሻይካ ቆኬስ። ጎዳ ቃላይ ጊዲኮ ሜርናስ ኤቂ ዴስ።” ኢንቴስ ሳባኬቲዳ ሚሺራቾ ቃላይካ ሄሳ። ሄሳ ጊሽ ኢታቴꬅ ዉርሲ፥ ባሌꬆ ዉርሲ፥ ቆꬌፔ ቆሞን ሃኖ፥ ቃናቴቴꬅ ኣይኮ ቆሞ ዚጊርስ ኢንቴፌ ዲጊቴ። ሃዒ ዬሌቲዳ ጉꬃ ናይቲ ማꬅ ኣሞቲዛይሳ ማላ ኢንቴካ ኣታናስ፥ ኢዛን ዲጪ ዲጪ ባናስ ጌሺ ጊዲዳ ኣያና ቲሚርቴ ላሞቲቴ። ኢንቴ ላሞታናስ ቤሲዛይ ጎዳይ ኪያ ጊዲዳይሳ ሻኪ ኤርኮኮ! ሄሳ ጊሽ ጌዴ ዴዖ ሹች ጊዲዳ ዬሱሳኮ ሺቂቴ። ሄ ሹቻይ ኣሳይ ሌቂ ኣጊዳይሳ ሺን ፆሳ ኣቻን ቃስ ዶሬቲዳይሳኔ ቦንቾ ዋጋይ ዲዛይሳ። ኢንቴ ጌዴ ጎዳ ዬሱሳኮ ሺቃናይካ ዴዖ ሹቻ ማላ ፂሎ ኣያና ዱሳሶ ጊዳና ማላ ኦሴቴታ፤ ሄሳꬆካ ኢንቴ ዬሱስ ኪርስቶሳ ባጋራ ኡፋይሲዛ ኣያና ያርሾ ፆሳስ ሺሻናስ ጌሻ ቄሴታ ጊዳንዴታ። ጌሻ ማፃፋን “ሄኮ ዶሬቲዳ ቦንቾ ጊዲዳ ኬꬃስ ማዜኔን ኡቲዛ ሹች ታኒ ፂዮኔን ዎꬃና። ኢዛን ኣማኒዛዴይ ዬላቴና” ጊዛ ቃላይ ፃፌቲ ኡቲዴስ። ሄሳ ጊሽ ኢንቴስ ኣማኒዛይታስ ሄ ሹቻይ ቦንቾ ሹቺኮ ሺን ሂንኮ ኢዛን ኣማኖንታይታስ ቃስ “ሹቻን ኬፂዛ ኬꬃ ሂላቲ ሌቂ ዎራ ዬጊዳይስ ኢዚ ኬꬃ ማዜኔስ ሁዔ ጊዲዴስ” ቃሴካ “ሄኮ ኣሴ ꬉጲዛ ሹቻይ ሃይሲች! ኣሳ ꬉጲ ኩንዲሲዛ ዛላ ሹቻይ ሃይሳኮ” ጌስ። ኢስቲ ቃላ ኣማኖንታ ኢፂዳ ጊሽ ꬉጴቴቴስ። ካሴካ ኢስቲ ሄሳስ ዲዛይታ። ኢንቴ ቃስ ꬉማፔ ጌዴ ዳሮ ማላሊሲዛ ኢዛ ፖዖኮ ፄይጊዳ ማላሊሲዛ ፆሳ ኦꬆ ኣዋጃናስ ዶሬቲዳ ዬሌቴꬅ፥ ካዎ ቄሴታ፥ ፆሲ ኢንቴና ባስ ሂስቲዳ ኢንቴ ዱማ ዴሬታ። ኢንቴ ካሴ ፆሳ ዴሬ ጊዴኬታ ሺን ሃዒ ጊዲኮ ኢንቴ ፆሳ ዴሬ። ኢንቴ ካሴ ኢንቴስ ፆሴ ቃꬌቶንታ ዴሬኮ ሺን ሃዒ ጊዲኮ ቃꬌቲዴስ። ታ ሲቆቶ! ኢንቴ ሃይሳ ኣላሜዛ ቦላ ኢማꬄኔ ቤቴ ኣስ ጊዲዳ ጊሽ ሼምፖራ ኦሌቲዛ ኣሾ ኣሞቴꬃታፔ ሃካና ማላ ታ ኢንቴና ሃዳራ ጋይስ። ኦኔ ኤሪዛይ “ኢንቴና ኢስቲ ኢታ ኦꬄቴስ” ጊዲ ኣሳይ ዚጊሪኮካ ፆሲ ኑና ቤያናስ ዪዛ ጋላስ ኣይዛቤቲ ኢንቴ ኦሶይ ሎዖ ጊዲዳይሳ ቤዒዲ ፆሴ ጋላታና ማላ ኢንቴ ኢስታራ ዲዛ ዎዴ ኢንቴ ኣማሌይ ሎዖ ጊዶ። ኢንቴ ጎዳ ዬሱሳ ጊሽ ጊዲ ዴሬ ኣይሲዛይታስ ኣዛዜቲቴ። ካዎይ ቃስ ኡባፌ ቦላራ ዲዛ ጊሽ ካዎሲካ ኣዛዜቲቴ። ዴሬ ኣይሲዛይታስ ኣዛዜቲቴ። ኢስቲ ኢታ ኦꬂዛይታ ቃፃያናሲኔ ሎዖ ኦꬂዛይታ ጋላታናስ ካዎፔ ኪቴቲዛይታ። ኢንቴ ሎዖ ኦሶን ሃንኮ ኤራይ ባይንዳ ኤያቴꬃን ሃሳዪዛይታ ጮዑ ሂስታና ማላ ሄሲካ ፆሳ ሼኔ። ኢንቴ ፆሳስ ኦꬂዛ ኣሳታ ማላ ጊዲዲ ሂርጋይ ባይንዳ ዴዒቴ ኣቲን ኢንቴ ኢንቴ ሼኔ ማላ ዲዛ ዱሳ ኢታቴꬃ ካሚዛ ሚሽ ሂስቶፍቴ። ኣስ ኡባካ ቦንቺቴ። ኣማኒዛይታ ሲቂቴ። ፆሳስ ባቢቴ። ካዎ ቦንቺቴ። ኢንቴኖ ኣሳስ ኦꬂ ኣቂዛይቶ! ኢንቴና ኦሲሲዛ ጎዳታስ ቦንቾን ኣዛዜቲቴ። ኢንቴ ኣዛዜታናይ ሎዖታሲኔ ኣሽኬታስ ፃላላ ጊዶንታ ሃንኮ ኢታታሳራኮ! ኣሲ ጋላቴቲዛይ ጮ ሜላ ቆሄቲሼ፤ ሄሲካ ፆሳ ጊሽ ጊዲ ዳንዳያና። ኢንቴ ኢታ ኦꬂዳ ጊሽ ቃፃዬቲሼ ዳንዳዪኮ ኢንቴስ ኣዛ ጋላታይ ዳኔ? ኢንቴ ሎዖ ኦꬂዲ ዋዬ ኤኪሼ ዳንዳዪኮ ኢንቴ ፆሳፌ ጋላታ ኤካንዴታ። ኢንቴ ፄይጌቲዳይካ ሄሳሳ። ኢንቴ ኢዛ ሌሚሶ ካላና ማላ ኪርስቶሲ ኢንቴ ጊሽ ዋዬ ኤኪዲ ኢንቴስ ሌሚሶ ጊዲዴስ። ኢዚ ኣይኮ ናጋራካ ኦꬂቤና። ኢዛ ዱናን ጌኔይ ቤቲቤና። ኣሳይ ኢዛ ጫዪሺን ኢዚ ዛሪ ጫዪቤና። ዋዬቲሼ ባና ቱሙ ፒርዲዛ ጎዳስ ሃዳራ ኣꬂ ኢሚዴስ ኣቲን ሃሎ ኬሳና ማንዲቤና። ኑኒ ናጋራፔ ሻካቲዲ ፂሎቴꬃን ዳና ማላ ኢዚ ባርካ ባ ኣሾን ኑ ናጋራ ማስቃሌ ቦላ ቶኪዴስ። ኢንቴ ኢዛ ማዱንꬃን ፓፂዴታ። ኢንቴ ꬋዪዳ ዶርሳታ ማላ ጮ ሜላ ቱይሩ ቱይሪዴታ ሺን ሃዒ ቃስ ኢንቴ ሼምፖ ሄሚዛይሳኮኔ ናጊዛይሳኮ ሲሚዴታ። ሄሳꬆካ ማቼቶ! ኢንቴ ኢንቴ ኣዚናታስ ኣዛዜቲቴ። ሄሳꬆ ኢሲ ኢሲ ኣዚናቲ ፆሳ ቃላ ኣማኖንታይታ ጊዲኮካ ጮ ሜላ ባ ማቼታ ሎዔቴꬃን ፃላላ ሲሞንታ ኣጌቴና። ኢስቲ ሲማና ዳንዳዪዛይ ኢንቴ ጌሻቴꬃኔ ኢንቴ ኣሴ ቦንቺዛ ዱስ ዲዛይሳ ቤዪዲኮ። ኢንቴ ሎዔቴꬂ ጮ ሜላ ሁዔ ዳꬃኒኔ ዎርቃን ጌፄቴꬃን፥ ኣልዖ ማዮ ማይዖን፥ ጮ ሜላ ኣይፌን ቤቲዛ ጌፄን ጊዶፖ። ኢንቴ ሎዖይ ፆሳ ሲንꬃን ዋጋራ ዲዛ ኬሂ ቦንቼቲዳዚኔ ꬋዮንታ ጌፄን፥ ኣሽኬቴꬃን፥ ኣዳቴꬃኒኔ ኣያናን ጌፄቲዳ ዎዝና ጋርሳን ቆቴቲ ዲዛ ጊዶ ዎዝና ሎዔቴꬅ ጊዶ። ቤኒ ዎዴ ባ ሂዶታ ፆሳን ኦꬂዳ ጌሻ ማጫሳቲ ጌፄቲዳይ ሃይሳ ማላና። ኢስቲ ባ ኣዚናታስ ኣዛዜቲዳ። ኢስቲ ኣዛዜቲዳይካ ሳራይ ኣብራሃሜ “ታ ጎዶ!” ጋዳ ኣዛዜቲዳይሳ ማላ። ኢንቴካ ሎዖ ሚሽ ኦꬂኮኔ ኢሲ ኢታ ሚሺ ኢንቴና ዳጋንꬆንታ ኣጊኮ ኢንቴ ሳራ ናይታ። ኣዚናቶ! ኢንቴ ኢንቴ ማቼታራ ኣኬካን ኢሲፌ ዴዒቴ። ኢስቲ ኢንቴፌ ዳቡራንቻ ሜꬌቴꬅ ጊዲዳ ጊሺኔ ቃሴካ ፆሲ ጮ ሜላ ኪያቴꬃን ኢሚዛ ዴዖ ኢስቲ ኢንቴናራ ኢሲፌ ላታናይሳ ጊሽ ኢንቴ ኢስታ ቦንቺቴ። ኢንቴ ሄይሳꬆ ኦꬂኮ ኢንቴ ዎሳ ꬉጲዛ ሚሺ ዴና። ሄሳፌ ኣሳ ባጋራ ቃስ ኢንቴ ኢሶይ ኢሳራ ሲቆን ዲቴ። ሃራ ኣሳ ቦላ ጋኪዛ ሜቶ ኢንቴ ሜቶ ማላ ፄሊቴ። ኢንቴ ኢንቴ ጋርሳን ኢሻንታ ማላ ሲቄቲቴ። ኣሺኬታኔ ኪያታ ጊዲቴ። ኣንጂቴ ኣቲን ኢስታስ ኢታ ጫሻስ ጫሽ ዛሮፒቴ። ኢንቴ ፄይጌቲዳይ ሄሳꬆ ኦꬂዲ ኣንጆ ላታናሳ። ጌሻ ማፃፋይ ጊዛ ማላ “ዴዖን ዳና ኮዪዛይኔ ሎዖ ጋላሳታ ቤያናስ ኮዪዛ ኣሲ ባ ዱናፔ ኢታ ሃሳዮንታ ማላኔ ባ ሜቴርሻቲካ ጌኔ ሃሳዮንታ ማላ ናጌቶ። ኢታ ዮዖፔ ሃኮ፥ ሎዖ ኦꬆ፤ ሳሮቴꬅ ኮዮኔ ካሎ። ጎዳ ኣይፌቲ ፂሎታ ባጋ ፄሌቴስ። ኢዛ ሃይꬄቲካ ኢስታ ዎሳ ሲያናስ ዶያ ዴቴስ። ሂንኮ ኢታ ኦꬂዛይታ ቃስ ጎዳይ ባ ሃንቆ ኣይፌሶ ቤሳና” ጊዴስ። ኢንቴ ሎዖ ኦꬃናስ ሚኔቲኮ ኢንቴ ቦላ ኢታ ሚሽ ጋꬃናይ ኦኔ? ኢንቴ ሎዖ ኦꬂዳ ጊሽ ዋዬ ቤዒኮካ ኢንቴ ኣንጆ ኤካና። ኣሳይ ኢንቴ ቦላ ኢታ ኦꬃናስ ማንዴቲዛይሳስ ባቦፊቴኔ ዳሮ ቆፖፍቴ። ጎዳ ኪርስቶሳ ኢንቴ ዎዝናን ቦንቺቴኔ ኢዛ ኢንቴ ዴዖስ ጎዳ ሂስቲቴ። ኢንቴስ ዲዛ ሂዶታ ጊሽ ኢንቴና ኦይቺዛይታስ ኡባስ ዛሮ ኢማናስ ኡባ ዎዴ ጊጌቲ ኡቲቴ። ኢንቴ ኢስታስ ኢማና ዛሮይ ቃስ ኣሽኬቴꬃኒኔ ቦንቾን ጊዶ። ኢንቴ ኪርስቶሳይታ ጊዲዳ ጊሽ ኢንቴስ ዲዛ ሎዖ ኣማሌዛ ጊሽ ኢታ ሃሳዪዛ ኣሳይ ባ ኢታ ሃሳያን ዬላታና ማላ ኢንቴስ ሎዖ ቆፋይ ዴዖ። ፆሳ ሼኔ ጊዲኮ ኢንቴ ኢታ ኦሶ ኦꬂዲ ዋዬታናይሳፌ ሎዖ ኦሶ ኦꬂዲ ዋዬቲኮ ሎዖ። ኪርስቶሲካ ኑና ፆሳኮ ሺሻናስ ኢዚ ባ ሁዔስ ፂሎኮ ሺን ሃንኮ ፂሎ ጊዶንታ ኑ ናጋራ ጊሽ ናምዓንꬄቶንታ ማላ ኢሲቶ ዋዬቲዲ ሃይቂዴስ። ኢዚ ኣሾን ሃይቂዴስ ሺን ኣያናን ቃስ ፓፂዴስ። ሄሳ ሄ ኣያናን ቃሾ ኬꬃን ዲዛ ሼምፖታኮ ቢዲ ኢስታስ ሚሺራቾ ቃላ ዮቲዴስ። ሄይቲ ሄን ዎይኔ ኬꬃን ዲዛ ሼምፖቲ ካሴ ኖሄ ዎዴ ማርካቤዚ ኦꬄቲ ጊጊሺን ኢስቲ ሲማና ማላ ፆሲ ዳንዳያን ናጊሺን ኑኒ ኔስ ኣዛዜቶኮ ጊዳይታ። ሄ ማርካቤዛን ጌሊን ሃꬄፌ ኣቲዳይታ ቆዳይ ኦሱፑን ጊዲዳ ጉꬃ ኣሳታ ፃላላ። ሄሲ ሄ ሃꬃይ ሃዒ ቃስ ኢንቴ ኢዛን ኣቲዛ ፂንቃቴ ሌሚሶ። ሃይሲ ፂንቃቴይ ቂታ ቦላ ጌያናስ ሜጬቴꬂ ጊዶንታ ጌሻ ቆፋ ኤካናስ ፆሳኮ ሺሺዛ ዎሳ። ኢዚ ኢንቴና ኣሻናይካ ዬሱስ ኪርስቶሳ ዴንꬃ ባጋራ። ኢዚ ፑዴ ሳሎ ቢዲ ሃዒ ፆሳ ኣቻን ዴስ። ኪታንቻቲኔ ጎዳቴꬂ ኢስታስ ዲዛይቲ ዎልቃማታካ ኢዛስ ሃሬቲዳ። ኪርስቶሲ ባ ኣሾን ዋዬ ኤኪዳ ጊሽ ኢንቴካ ኦላ ኦሌቲዛ ሚሼ ጊፂዳ ኣሳ ማላ ሃይሳ ሃ ቆፋን ሚኒዲ ጊጌቲቴ። ባ ኣሾን ዋዬ ቤዪዳ ኣሲ ናጋራ ኦሶ ኣጊዴስ። ሄሳፌ ጉዬ ባ ዲዛ ዎዴ ኡባን ኢዚ ዳናይ ኢታ ኣሾ ኣሞቴꬂ ኦሶን ጊዶንታ ዲሼ ፆሳ ሼኔ ፖሎና። ሂንኮ ዴሬ ኣሳቲ ኦꬂዛይሳ ማላ ኢንቴ ጮ ሜላ ዬዳ ዱሳን ኣሾ ኣሞን፥ ማꬆን፥ ኦጌይ ባይንዳ ካሳን፥ ዎጋፔ ኣꬂ ኡዪዲ ዱሩሳኒኔ ሃራሲዛ ኤቃ ጎይኖን ካሴ ኢንቴ ኣꬂዳ ዎዴዚ ኢንቴስ ጊዳና። ሃዒ ቃስ ኢንቴ ሃ ዮዖዛን ኢስታራ ዎጋይ ባይንዳ ቂፂ ቂፆንታ ጊሽ ኢስቲ ማላሌቴቴሲኔ ኢንቴና ጫዬቴስ። ጊዶ ኣቲን ሃይቂዳይታ ቦላኔ ፓፃ ዲዛይታ ቦላ ፒርዳናስ ጊጊ ኡቲዳይሳስ ኢስቲ ዛሮ ኢማና። ሃይቂዳይታሳራ ሚሺራቾ ቃላይ ዮቴቲዳይ ሄሳ ጊሻሳ። ሄሳꬆካ ኣይ ኣሳ ቦላካ ፒርዲዛ ማላ ኢስታ ኣሾ ቦላ ፒርዳና። ኢስታ ሼምፖይ ቃስ ፆሲ ዲዛ ማላ ዴዖን ዴያና። ሄሳ ጊሽ ዎዴ ዉርሴꬂ ማቲዴስ። ኢንቴ ሚኒ ዎሳናስ ዳንዳያና ማላ ዎጋራ ዲቴኔ ዎፑ ጊዳ ቆፋይ ኢንቴስ ዴዖ። ሲቆይ ዳሮ ናጋራ ካሚዛ ጊሽ ሃራፔ ቦላራ ኢንቴ ኢንቴ ጋርሳን ሎዔꬂ ሲቄቲቴ። ዙዙንꬂ ባይንዳ ኢሶይ ኢሳ ኢማꬃቴꬅ ሞኪ ኤኪቴ። ዱማ ዱማ ጊዲዳ ፆሳ ኪያቴꬃ ኢሞታታ ኣማኔቴꬃን ኦይኪዲ ኢንቴፌ ኢሲ ኢሲ ኣሲ ባስ ኢሜቲዳ ፆሳ ኪያቴꬃ ኢሞታን ሃራ ኣስ ማዶ። ታማርሲዛዴይ ፆሳ ቃላ ታማርሲዛ ማላ ታማርሶ፤ ሃጋዚዛዴይ ፆሲ ኢዛስ ኢሚዛ ዎልቃን ሃጋዞ፤ ሄሳ ማላን ፆሲ ዬሱስ ኪርስቶሳ ባጋራ ሃኒዛ ኡባን ጋላቴታና። ቦንቾይኔ ጎዳቴꬅ ሜርናፔ ሜርና ጋካናስ ኢዛስ ጊዶ። ኣሚን! ታ ሲቆቶ! ኢንቴ ታማ ማላ ፓጪዛ ሜቶ ጊዶን ጌሊዛ ዎዴ ሄሳ ማላይ ካሴ ባይንዳ ኦራꬃ ሚሺ ጋኪዳዝ ኢንቴስ ሚሳቲን ማላሌቶፍቴ። ሄሳፌ ቦላራ ኪርስቶሳ ቦንቾይ ቆንጪዛ ዎዴ ኢንቴ ኬሂ ኡፋዬታና ማላ ኢንቴ ኢዛራ ኢዛ ዋዬዛ ኤኪዛይታ ጊዲዳ ማላ ኡፋዬቲቴ። ኢንቴ ኪርስቶሳ ሱንꬃ ጊሽ ጫዬቲኮ ቦንቾ ኣያናይ ሄሲካ ፆሳ ኣያናይ ኢንቴ ቦላ ሼምፒዛ ጊሽ ኡፋዬቲቴ። ኢንቴፌ ኦና ቦላካ ሜቶይ ጋኪኮ ሄሳዴይ ሼምፖ ዎꬊዳ ኣሳ ማላ፥ ካይሶ ማላ፥ ኢታ ኦꬂዳ ኣሳ ማላኔ ኣሳ ዮዖ ጊዶ ጮ ዎፂ ጌሊዳዴ ማላ ጊዶፖ። ኢዚ ኣማኒዛዴ ጊዲዳ ጊሽ ኢዛ ቦላ ጋኪዛ ሜቶይ ዲኮ ቃስ ኪርስቶሳ ሱንꬃን ኢዚ ፆሳ ጋላቶ ኣቲን ዬላቶፖ። ፒርዳይ ዶሜታናስ ዎዴይ ማቲዴስ። ሄ ፒርዳይ ዶሜታናይ ኮይሮ ፆሳ ኣሳ ቦላኮ! ሂስቲን ፒርዳይ ኑናን ዶሚኮ ፆሳ ሚሺራቾ ቃላስ ኣዛዜቶንታ ኢፂዳ ኣሳ ዉርሴꬂ ኣይ ጊዳኔ? ጌሻ ማፃፋይ “ፂሎይካ ዋይዲ ኣታናዝ ጊዲኮ፥ ሃንኮ ፆሳስ ጎይኖንታ ኣሳይኔ ናጋራንቻቲ ዋናንዴቶ?” ጊዛ ማላ። ሄሳ ጊሽ ፆሳ ሼኔ ማላ ዋዬቲዛ ኣሳቲ ባናቴꬃ ዉርሲ ኣማኔቲዳ ባና ሜꬊዳይሳስ ሃዳራ ኢሚዲ ሎዖ ኦሶ ኦꬆንታ ኣጎፌቶ። ሄሳ ጊሽ ታካ ኢስታራ ኢሲፌ ዎሳ ኬꬃስ ጪማኔ ኪርስቶሳ ዋዬዛስ ማርካ ጊዲዳ ታኒ ቃሴካ ቡሮፔ ቆንጫና ቦንቾዛ ጊሼታናስ ዲዛ ታኒ ኢንቴናራ ዲዛ ዎሳ ኬꬃ ጪማታ ዞራይስ። ኢንቴስ ሃዳራ ኢሜቲዳ ፆሳ ዉዴ ናጊቴ። ሄ ኢዛ ዉዴዛ ዎልቃራ ጊዶንታ ፆሲ ኮዪዛ ኦጌራ ዶሳራ ሄሚቴ። ሚሼስ ዪቄቴꬃን ጊዶንታ ሃጋዛናስ ዎዝናፔ ኮሻን ጊዶ። ሄሳꬆካ ኢንቴ ኣላፌቴꬃ ጋርሳን ዲዛይታ ዬꬊ ሃሮን ጊዶንታ ዉዴዛስ ሎዖ ሌሚሶ ቤሶን ጊዶ። ኢንቴ ሄሳꬆ ኦꬂኮ ሃንኮ ዋና ሄሚዛይሲ ቆንጪዛ ዎዴ ኢንቴ ሞሬቶንታ ቦንቾ ኣክሊሌ ኤካና። ሄሳꬆካ ኢንቴኖ ናቴꬃቶ! ኢንቴ ጪማታስ ኣዛዜቲቴ። ኢንቴ ዉሪካ ኣሽኬቴꬅ ኣፋላ ማላ ማይዒዲ ኢሶይ ኢሳስ ኦꬂቴ። “ፆሲ ኦቶሪዛይታ ኢፄስ። ኣሽኬታስ ቃሴ ባ ኪያቴꬅ ኢሜስ” ጌቴቲ ካሴ ጌሻ ማፃፋን ፃፌቲዴስ። ሄሳ ጊሽ ፆሲ ባ ዎዴን ꬎቁ ሂስታና ማላ ሚኖ ፆሳ ኩሼፔ ጋርሳራ ኢንቴና ዚቂ ሂስቲቴ። ኢዚ ኢንቴስ ቆፒዛ ጊሽ ኢንቴና ሜቲዛ ቆፋ ዉርሲ ኢዛ ቦላ ዬጊቴ። ዎጋራ ዴዒቴ! ቤጊቴ! ኢንቴ ሞርኬ ዳቡሎሲ ባስ ሚታና ሚሽ ኮዪሼ ፃጊዛ ጋሞ ማላ ኢንቴ ዩሾን ሃርቡቄስ። ኣላሜ ኩሜꬃን ዲዛ ኢንቴ ኢሻቲ ሄሳ ማላ ሜቶ ኤካና ዲዛይሳ ኢንቴ ኤሪዲ ኣማኖን ሚኒ ኤቂዲ ኢዛራ ኤቄቲቴ። ኢንቴ ጉꬃ ዎዴስ ዋዬቲዳይሳፌ ጉዬ ኢንቴና ኪርስቶሳ ባጋራ ጌዴ ሜርና ቦንቾስ ፄይጊዳ ኪያቴꬅ ኡባስ ጎዳይ ኢዚ ባርካ ኢንቴና ጋኪዳ ዋዬዛፔ ኣሻና፥ ማዳናኔ ሚንꬄꬃና ቃሴካ ዳዝጊሳና። ቦንቾይኔ ዎልቃይ ሜርናፔ ሜርና ጋካናስ ኢዛስ ጊዶ። ኣሚን። ታኒ ኢዛን ኣማኔቲዳ ኢሻ ጋ ቆፒዛ ሲልዋኖሴ ባጋራ ሃይሳ ኪታዛ ቃንꬃራ ኢንቴስ ፃፋዲስ። ታ ሄሳ ፃፊዳይ ኢንቴና ዞራናሲኔ ሃይሲ ቱሙ ፆሳ ኪያቴꬅ ጊዲዳይሳ ኢንቴስ ቆንጪሳናስ ጋዳ። ሄሳ ጊሽ ኢንቴ ሃይሳን ፆሳ ኪያቴꬃን ሚኒ ኤቂቴ። ኢንቴ ማላ ዶሬቲዳራ ባቢሎኔን ዲዛ ሚቾ ጊዲዳ ዎሳ ኬꬃያ ኢንቴስ ሳሮካ ሺሻዉስ። ታ ና ማርቆሲካ ኢንቴና ሳሮኬስ። ኣማኖ ሲቆቴꬃን ኢንቴ ኢሶይ ኢሳ ዬሪ ኤኪዲ ሳሮኬቲቴ። ኢንቴስ ኪርስቶሳይታስ ኡባስ ሳሮይ ጊዶ። ዬሱስ ኪርስቶሳ ኦሳንቻኔ ኢዛን ሃዋሬ ሲሞና ጴፅሮሳፔ፥ ኑ ጎዳፔኔ ኑ ꬋሌ ዬሱስ ኪርስቶሳፔ ቤቲዳ ፂሎቴꬃ ባጋራ ኑ ዴሚዳ ኣማኖ ማላ ቦንቼቲዳ ኣማኖ ዴሚዳይቶ! ፆሳኔ ኑ ጎዳ ዬሱሳ ኤሮን ኪያቴꬂኔ ሳሮይ ኢንቴስ ጊዶ። ባ ቦንቾኒኔ ባ ኪያቴꬃን ኑና ፄይጊዳይሳ ኑኒ ኢዛ ኤሪዳ ጊሽ ኢዛ ፆሳቴꬃ ዎልቃይ ዴዖሲኔ ፆሴ ጎይናናስ ኑስ ኮሺዛዝ ዉርሲ ኢሚዴስ። ባ ቦንቾኒኔ ባ ኪያቴꬃን ቦንቾ ዎጋይ ዲዛይሳኔ ኬሂ ጊታ ጊዲዳ ኢዛ ሂዶታ ኑኒ ዴሚዶስ። ሄይታንታ ባጋራ ኢንቴ ኢታ ኣሞ ጋሶን ሃይሳ ሃ ኣላሜዛን ዲዛ ꬋዮፔ ኬሲ ኤኪዲ ፆሳቴꬃ ሃኖዛፔ ኢዛራ ጊሼቲዛዴንታ ጊዲዴታ። ሄሳ ጌዶን ሃይሳፌ ካሊዛ ሚሻቲ ኢንቴስ ጉጄታና ማላ ኣኔ ሚኒቴ። ኣማኖ ቦላ ኪያቴꬅ፥ ኪያቴꬃ ቦላ ኤራቴꬅ፤ ኤራቴꬃ ቦላ ባና ሃሮ ባና ሃሮ ቦላ ዳንዳያን ሚኔቴꬅ፤ ዳንዳያን ሚኔቴꬃ ቦላ ፆሴ ጎይኖ፥ ፆሴ ጎይኖ ቦላ ኢሻንታ ዶሴቴꬂ፥ ኢሻንታ ዶሴቴꬃ ቦላ ሲቆ ጉጂቴ። ሃይቲ ኢንቴስ ዳሪ ዲዛዝ ጊዲኮ ሄይቲ ኢንቴና ኢንቴ ጎዳ ዬሱስ ኪርስቶሳ ኤሮን ጎዓይኔ ኣይፌይ ባይንዳይታ ጊዶንታ ማላ ናጋና። ሃይቲ ሃ ሚሻቲ ባይንዳ ኣሲ ጊዲኮ ሃሆን ዲዛ ሚሽ ዴሞንታ ቆቄ ኣሳ ማላ። ሄሳዴይ ካሴ ኣꬊዳ ባ ናጋራፔ ጌይዳይሳካ ባሌቲዴስ። ታ ኢሻቶ! ሄሳ ጊሽ ኢንቴ ፄይጌቲዳይሳኔ ዶሬቲዳይሳ ሻኪ ኤራናስ ኬሂ ኣሞቲዛይታ ጊዲቴ። ኢንቴ ሄሳꬆ ኦꬂኮ ሙሌካ ꬉጴቴኬታ። ኢንቴ ሄሳꬆ ሃኒኮ ሜርናፔ ሜርናስ ዲዛ ኑ ጎዳ ዬሱስ ኪርስቶሳ ካዎቴꬃን ጌላናስ ኢንቴስ ኩሜꬃ ማታይ ኢሜታና። ኢንቴ ሃይታ ሃ ዮዖታ ኤሪዲኔ ሄ ኢንቴ ኤሪዳ ቱማን ሚኒ ዴዒኮካ ሄይታ ታኒ ኢንቴና ቆፊሳናፔ ጉዬ ጊኬ። ታኒ ፓፃ ዲዛ ዎዴ ኡባን ኢንቴና ኡባ ዎዴ ዴንꬄꬃናይሲ ቤሲዛዝ ሚሳቲዲ ታስ ቤቴስ። ኑ ጎዳ ዬሱስ ኪርስቶሲ ታስ ቆንጪሲዳ ማላ ታኒ ሃይሳ ኣላሜዛፔ ኤሌላዳ ሃይቃናይሳ ታ ኤራይስ። ታኒ ሃዒ ሚኔቲዛይ ታ ሃይቃዳ ኢንቴፌ ሻኬቲዳፔ ጉዬ ኢንቴ ሃይታ ሃ ዮዖታ ኡባ ዎዴ ቆፓና ማላሳ። ጎዳ ዬሱስ ኪርስቶሳ ዎልቃፌ ኢዛስ ዩሳ ጊሽ ኑ ኢንቴስ ዮቲዳ ዎዴ ኑኒ ኑ ኣይፌራ ኢዛ ቦንቾዛ ቤዪዲ ማርካቶስ ኣቲን ኣሲ ጮ ሜላ ሜꬊ ኤኪዲ ጌኔ ሃሳዪዛ ሃይሲዔ ማላ ጊዴና። “ታኒ ኢዛን ኡፋዬቲዛዴይ ታ ዶሲዛ ታ ናዚ ሃይሳ” ጊዛ ቃላ ጊሪሳይ ጊታ ቦንቾራ ኢዛስ ዪዳ ዎዴ ኢዚ ፆሳ ኣዋፔ ቦንቾኔ ጊታቴꬅ ኤኪዴስ። ኑኒ ኢዛራ ኣንጄቲዳ ዙማ ቦላ ዲሼ ሃይሳ ሃ ሳሎፔ ዪዳ ጊሪሳ ኑኒ ኑ ሃይꬃን ሲዪዶስ። ሄሲ ዉሪካ ካሴ ናቤቲ ዮቲዳይሲ ቱሙ ጊዲዳይሳ ሎዔꬅ ቆንጪሴስ። ሄሳ ጊሽ ኢንቴ ꬉማሶን ፆምፔስ ሎዔꬅ ናጌቲዛይሳ ማላ ካሴ ናቤቲ ዮቲዳይሳ ሎዔꬂ ናጌቲቴ። ኢንቴ ሄሳꬆ ኦꬃናይ ጋዴይ ዎንታናስ፥ ባዞይ ዞዓና ጋካናሲኔ ዎንት ማꬃ ፆሊንቴዚ ኢንቴ ዎዝናን ፖዓና ጋካናሳ። ኢንቴ ሃራፔ ኣꬂ ቆፓናስ ቤሲዛይ ጌሻ ማፃፋን ዲዛ ቲንቢቴ ቃላን ዮቴቲዳ ኣይ ሚሺካ ኦኒካ ባስ ሚሳቲዳ ማላ ቢርሻናስ ቤሴና። ኣይ ቲንቢቴይካ ኣሳ ሼኔ ማላ ሙሌካ ዪቤና። ጊዶ ኣቲን ቲንቢቴይ ዉሪካ ፂሎ ኣያናይ ካሌꬂን ኢዛ ካሊዳ ኣሳቲ ፆሳፌ ኤኪዲ ዮቲዳዛ። ጊዶ ኣቲን ቤኒ ዎዴ ዎርዶ ናቤቲ ዴሬዛ ጊዶን ዲዛይሳ ማላ ሄሳꬆካ ሃዒ ኢንቴ ጊዶን ዎርዶ ኣስታማሬቲ ዴዓንዴቴስ። ሄይታንቲ ኣሳ ꬋይሲዛ ዎርዶ ቲሚርቴ ቆታራ ዲጫና ማላ ኦꬄቴስ። ባና ኣሺዳ ጎዳካ ካዲዲ ባና ኤሶን ꬋይሲዛዝ ባ ቦላ ኤሄቴስ። ሄሳ ጌዶን ዳሮ ኣሳይ ዬላቺዛ ኢስታ ኦጌዛ ካሌስ። ሄ ኢስታ ኦሶዛ ጌዶን ቱማ ኦጌይ ጫዬቴስ። ሄይቲ ዎርዶ ኣስታማሬቲ ሚሻስ ጋጲጋጲዛ ጊሽ ባርካ ሜꬊ ኤኪዳ ዮዖ ዮቲ ዮቲዲ ኢንቴስ ዲዛዝ ባስ ቦንቂ ኤኬቴስ። ቤኒ ቤኒ ዎዴሶፔ ፒርዳይ ኢስታስ ጊጌቲ ኡቲዴስ። ኣዳፌ ኢስታ ꬋዮይ ናጌስ። ሃራይ ኣቶ ሺን ናጋራ ኦꬂዳ ኪታንቻታስ ፆሲ ሚሼቶንታ ኢስቲ ጪማ ጊዲዳ ꬉማ ኦላ ጊዶን ዴዒዲ ፒርዳ ጋላስ ጋካናስ ናጌታና ማላ ጌዴ ጋናሜን ዬጊዴስ። ሄሳꬆካ ፂሎቴꬃ ጊሽ ሳባኬ ጊዲዳ ኖሄ ሃንኮ ላፑን ኣሳታራ ኣሺዲ ፆሳስ ጎይኖንታ ኣሳቲ ዲዛ ኣላሜዛ ቦላ ꬋይሲዛ ሃꬄ ኤሂሼ ቃꬌቲዲ ካሴ ሄ ዎዴ ኣላሜዛ ማሪቤና። ቃሴካ ፆሴ ጎይኖንታይታ ቃፃያናስ ኡባስ ሌሚሶ ጊዳና ማላ ሶዶሜይኔ ጋሞራ ካታማቲ ቢዲንꬅ ጊዳና ጋካናሲኔ ፁጌቲ ꬋያና ጋካናስ ኢስታ ቦላ ፒርዲዴስ። ዎጋይ ባይንዳ ዬላቺዛ ኦሶ ኦꬂዛ ኣሳታ ኦሶን ኡባ ዎዴ ሶዑ ጊሼ ዲዛ ፂሎ ሎፄ ጊዲኮ ኣሺ ኤኪዴስ። ሄ ፂሎ ኣዴዚ ኢስታ ጊዶን ዲሺን ጋላስ ጋላስ ኢዚ ቤዪዛይሳኒኔ ሲዪዛይሳን ሄ ዎጋይ ባይንዳ ኣሳታ ኦሶዛን ኢዛ ሼምፖያ ዋዬታዱስ። ሂስቲን ሄሲ ዉሪካ ሄሳ ማላ ጊዲኮ ጎዳይ ባስ ጎይኒሼ ዲዛ ኣሳታ ፓጬፔ ኣሻናይሳኔ ናጋራንቻታካ ዎስቲ ቃፃያናኮኔካ ፒርዳ ጋላሳስ ዎስቲ ኢስታ ናጊዲ ጋꬃናኮኔ ሄሳ ኢዚ ኤሬስ ጉሳ። ሃራፔካ ሄይቲ ቱና ጊዲዳ ባ ኣሾ ኣሞ ካሊዛይታኔ ፆሳ ጎዳቴꬅ ካꬊዛይታ ፒርዳ ጋላሳስ ናጊ ዎꬂዴስ። ሄይቲ ዎርዶ ኣስታማሬቲ ኢስቲ ፃላታኔ ኦቶራንቻታ ጊዲዳ ጊሽ ሳሎ ቦላ ኢስታስ ጎዳቴꬂ ዲዛይታ ጫዪሼ ባቤቴና። ኪታንቻቲ ኢስታፌ ቦላራ ዎልቃይኔ ጎዳቴꬂ ዲዛይታ ጊዲኮካ ጎዳ ሲንꬃን ኢስታ ቦላ ካꬌ ቃላ ኬሲ ሞቴቴና። ሄይቲ ዎርዶ ኣስታማሬቲ ቃስ ባስ ኤሬቶንታ ኢፂዳ ሚሽ ዉርሲ ጫሺ ጫዬቴስ። ሄይታንቲ ናርፃን ኦይኬታናሲኔ ሃይቃናስ ዬሌቲዳ። ጮ ሜላ ባ ሼኔን ዲዛይታኔ ቆፋይ ባይንዳ ዶዓታ ማላ። ዶዓቲ ጮ ሜላ ꬋዪዛይሳꬆ ኢስቲካ ሙሌራ ꬋያና። ቆሆ ኦሶ ኦꬂዳ ጊሽ ኢስቲ ሙሌራ ባ ኦሶ ዋጋ ኤካና። ኢስታ ኡፋይሲ ሴታ ጋላስ ማꬆቴꬂኔ ዎጋይ ባይንዳ ቡራቆ። ኢስቲ ሄሳ ማላ ዎጋይ ባይንዳ ጉፋን ኢንቴናራ ኢሲፌ ፄይጌቲዛ ዎዴ ኣስ ባሌꬂዛ ባ ኣሾ ኦሶዛን ኢስቲ ኢታኔ ዬላቺዛይታ። ኢስታስ ናጋራ ኦሶፔ ናጌቶንታ ኣሞቲዛ ኣይፌይ ዴስ። ኢስታስ ናጋራ ኦሶ ሲቂዛ ኣሞቴꬂ ኣይ ዎዴካ ሲሜና። ኣማኖን ቡሮ ሚኒ ኤቆንታ ኣሳታ ባሌꬄቴስ። ሚሻስ ጋጲጋጴቴስ። ኢስቲ ቃንጌቲዳይታ። ኢስቲ ሱሬ ኦጌዛ ኣጋጊዲ ꬋዪዳ። ኢታ ኦሶ ኦꬂዲ ዴሚዛ ሚሽ ሲቂዳ ቢዖሬ ና ባላዓሜ ኦጌ ቢዲ ባሌቲዳ። ባላዓሜይ ጊዲኮ ባ ኦꬂዳ ናጋራ ጊሽ ሴሬቲዴስ ሺን ሃሳያ ኤሮንታ ሃሬያ ኣሳ ቃላን ኢዛስ ሃሳያዳ ሄ ናቤዛ ባላፔ ሴራ ዛራዱስ። ሄይቲ ሄ ኣሳቲ ሃꬂ ባይንዳ ፑልቶታ። ጎቴ ጫርኮን ቢዛ ሻራ ማላ፤ ኢስታ ሳካና ꬉማይ ናጌስ። ካሴ ባላ ጋርሳን ዲዛ ኣሳታ ጊዶፌ ኬሲ ኤኪ ዪዲ ዳሮ ጋምዖንታ ኣሳታ፥ ጮ ሜላ ሃዳ ጊዲዳ ኦቶሮ ቃላ ሃሳያን፥ ኣሾ ኣሞኒኔ ላይማን ባሌꬄቴስ። “ኢንቴ ዎዜታና” ጊሼ ኢንቴስ ኡፋይስ ኢሜቴስ። ፆኔቲዳ ኣሲ ባና ፆኒዳዴስ ኣይሌ ጊዲ ሃሬቲዛይሳꬆ ኢስቲካ ባስ ናጋራስ ኣይሌ። ኑ ጎዳኔ ኑና ኣሺዳ ዬሱስ ኪርስቶሳ ኤሪዲ ሃ ኣላሜዛ ቱናቴꬃፌ ኬሲ ኤኪዳፔ ጉዬ ቃሴካ ጉዬ ሲሚዲ ሄ ካሴ ቱናቴꬃን ፆኔቲዲ ጌሊኮ ኢስታስ ካሴይሳፌ ጉዬይሲ ኣꬎ ኢታ ጊዳና። ኢስቲ ፂሎቴꬃ ኦጌ ሻኪ ኤሪዳፔ ጉዬ ኢስታስ ኢሜቲዳ ጌሻ ኣዛዞዛፔ ጉዬ ሲማናፔ ኢስቲ ካሴ ሄ ፂሎቴꬃ ኦጌዛ ኤሮንታ ኣጊዳኮ ኢስታስ ሎዖሺን። “ካናይ ባ ጮዪዳ ጮሻ ማናስ ጉዬ ሲሜስ” ሄሳꬆካ “ጉዱንꬂ ሜጬቲዲ ጉዬ ሲሚ ኡርቃን ጌንዴሬቴስ” ጌቴቲዛ ቱሙ ሌሚሶይ ኢስታ ቦላ ጋኪዴስ። ታ ሲቆቶ! ታኒ ኢንቴስ ፃፊሺን ሃይሲ ናምዓንꬆ ኪታ። ታኒ ኢንቴስ ናምዑ ኪታታካ ፃፊዳይ ሃይታ ሃ ዮዖታ ኣኬኪ ኤኪዲ ኢንቴ ሱሬ ቆፋ ቆፓና ማላ ኢንቴና ቤጎꬃና ጋዳ። ሃይሳፌ ካሴ ጌሻ ናቤቲ ዮቲዳ ቃላኔ ቃስ ኢንቴ ሃዋሬታ ባጋራ ኢንቴ ዴሚዳ ኑ ጎዳኔ ኑና ኣሺዳይሳ ኣዛዞ ኢንቴ ዩሺ ቆፓና ማላ ታ ኮያይስ። ሃራ ኡባፌ ካሴቲዲ ሃይሳ ዩሺ ቆፒቴ። ዉርሴꬃ ጋላሳታን ቂꬊዛይቲኔ ባ ኢታ ኣሞ ካሊሼ ኣሳ ካꬊዛይቲ ያና። ኢስቲ ቃስ “ጎዳ ዬሱሲ ‘ያና’ ጊዛ ሂዶታይ ዮቴቲቤኔ? ሂስቲን ኢዚ ኣዋን ዲዜ? ቤኒ ኑ ኣዋቲ ሃይቆሳፔ ሃ ሲሚን፥ ሃኒዛ ሚሺ ዉሪካ ሜꬌቶሳፔ ሃ ሲሚን ሄኮ ካሴ ባ ዲዛ ማላ ዴስ” ጌቴስ። ሄይቲ ሄ ኣሳቲ ካሴ ዳሮ ዎዴፔ ካሴ ሳሎይ ፆሳ ቃላን ሜꬌቶይሳኔ ቢታይካ ሃꬃፌኔ ሃꬃን ዲዛይሳ ኤሪሼ ካዴቴስ። ሄ ዎዴ ዲዛ ኣላሜዚ ሃꬃን ሚቴቲ ꬋዪዴስ። ሄሳꬆካ ሃዒ ዲዛ ሳሎይኔ ቢታይ ናጋራንቻቲ ꬋያና ዲዛ ፒርዳ ጋላስ ጋካናስ ታማስ ጊጊ ኡቲዳ። ታ ሲቆቶ! ኢንቴ ጊዲኮ ጎዳ ኣቻን ኢሲ ጋላሲ ሺ ላይꬃ ማላ፥ ቃሴካ ሺ ላይꬂ ኢሲ ጋላሳ ማላ ጊዲዳይሳ ሄሳ ሄ ሃኖዛ ባሎፒቴ። ኢሲ ኢሲ ኣሳታስ ሚሳቲዛ ማላ ጎዳይ ባ ዮቲዳ ሂዶታ ቃላ ፖላናስ ጋምዔናኮ ሺን ኣሲ ዉሪካ ማሬታና ማላኔ ኣይ ኣሲካ ꬋዮንታ ማላ ኮይዲ ኢዚ ኢንቴ ጊሽ ታኬስ። ጎዳ ጋላሳይ ቃሴ ካይሶ ዬꬃ ማላ ቆፖንታ ዲሺን ጋኪ ዎꬋና። ሄ ጋላስ ሳሎቲ ጊታ ጊሪሳን ኣꬋና። ሜꬌቴꬂ ዉሪካ ታማን ፁጌቲ ꬋያና፤ ቢታይኔ ኢዛ ቦላ ዲዛዚ ዉሪካ ፁጌታና። ሄሳ ጊሽ ሄይቲ ዉሪካ ሄሳꬆ ꬋያናዚ ጊዲኮ ሂስቲን ኢንቴ ጌሻቴꬃን ፆሳስ ጎይኒሼ ዳናስ ኢንቴስ ዋኒ ቤሴኔ? ሄሳ ጊሽ ፆሳ ጋላሳይ ያናይሳ ኢንቴ ላሞቲዛይታኔ ኢዚ ኤሌሊ ያና ማላ ኦꬂዛይታ ጊዲቴ። ሄ ጋላስ ሳሎይ ታማን ፁጌቲ ꬋያና። ሜꬌቴꬃቲካ ታማ ሴላን ሴራና። ጊዶ ኣቲን ኑኒ ኢዚ ኑስ ኢሚዳ ሂዶታ ማላ ፂሎቴꬃ ኦሶይ ኦሴቲዛሶ ኦራꬃ ሳሎኔ ኦራꬃ ቢታ ናጎስ። ሄሳ ጊሽ ታ ሲቆቶ! ሄሲ ዉሪካ ሃናና ጋላስ ኢንቴ ናጊሼ ዲኮ ጎዳይ ኢንቴና ኢንቴ ቦላ ቦሮይ ባይንዳ ዲሺን ሳሮቴꬃን ዴማና ማላ ሚኒ ዲቴ። ኑ ጎዳ ዳንዳያይ ኢንቴና ኣሻናስ ጊዲዳይሳ ኢንቴ ኤሪቴ። ኑ ሲቆ ኢሻ ጳዉሎሲ ባስ ኢሜቲዳ ኤራቴꬃ ማላ ኢዚ ኢንቴስ ፃፊዳይሲ ሃይሳ። ኢዚ ሃይሳ ሃ ሃኖዛ ጊሽ ባ ኪታታን ኡባን ሃይሳꬆካ ፃፊዴስ። ኢዛ ኪታታ ጊዶን ኤራናስ ዋይሲዛ ኢሲ ኢሲ ሃኖቲ ዴቴስ። ኤራቴꬂ ኢስታስ ፓጪዳይቲኔ ናምዑ ቆፋን ዮቁ ጊዛይቲ ሃራ ጌሻ ማፃፋታ ሚርቂዛይሳꬆካ ሃይታካ ኢስቲ ሚርቃና። ኢስቲ ሄሳꬆ ኦꬂዛይ ባስ ꬋያናሳ። ታ ኢሻቶ! ኢንቴ ቃስ ሄሳ ካሴቲዲ ኤሪዳ ጊሽ ሃንኮ ማካላታ ባላ ጌዶን ጎሼቲ ቢዲ ካሴ ኢንቴ ሚኒ ዲዛሶፔ ኩንዶንታ ማላ ናጌቲቴ። ሄሳፌ ቦላራ ኑ ጎዳኔ ኑ ꬋሌ ዬሱስ ኪርስቶሳ ኪያቴꬃኒኔ ኢዛ ሻኪ ኤሮን ፑዴ ዲጪቴ። ኢዛስ ሃዒካ ሜርናስካ ቦንቾይ ጊዶ። ኣሚን። ዴዖ ቃላ ጊሽ ኮይሮፔ ዲዛይሳ ኑኒ ኑ ሃይꬃን ሲዪዳይሳኔ ኑ ኣይፌራ ቤዪዳይሳ ሎዔꬂ ፄሊዳይሳ፥ ኑ ኩሼራ ኦይኪ ቤዪዳይሳ ጊሽ ሃሳዮስ። ዴዖይካ ቆንጪዴስ፤ ኑካ ኑ ኣይፌራ ቤዪዲ ማርካቶስ። ኢዛስ ኢዛ ኣዋ ኣቻን ዲዛይሳኔ ኑስካ ቆንጪዳ ሜርና ዴዖ ጊሽ ኑ ኢንቴስ ዮቶስ። ኢንቴስካ ኑናራ ኢሲፌቴꬂ ዳና ማላ ኑኒ ቤዪዳይሳኔ ሲዪዳይሳ ኢንቴስ ዮቶስ። ኑ ኢሲፌቴꬃይካ ኣዋራኔ ኢዛ ና ዬሱስ ኪርስቶሳራ። ኑ ኡፋይሳይ ኩሜꬅ ጊዳና ማላ ኑ ሃይሳ ኢንቴስ ፃፎስ። ኑ ኢዛፔ ሲይዲ ኢንቴስ ዮቲዛ ኪታይ “ፆሲ ፖዖ፤ ኢዛ ኣቻን ሙሌካ ꬉማይ ዴና” ጊዛይሳ። “ኑ ꬉማን ሲሜሬቲሼ ኢዛራ ኑስ ኢሲፌቴꬂ ዴስ” ጊኮ ዎርዶቶስ ኣቲን ቱማን ዶኮ። ጊዶ ኣቲን ኢዚ ፖዖን ዲዛ ማላ ኑካ ፖዖን ሲሜሬቲኮ ኑ ጋርሳን ኑስ ኢሲፌቴꬂ ዴስ፤ ኢዛ ና ዬሱስ ኪርስቶሳ ሱꬂ ኑና ናጋራ ኡባፌ ጌሼስ። ኑ ኑናን ናጋራይ ባዋ ጊኮ ኑርካ ኑና ባሌꬆስ፤ ቱማይካ ኑናን ዴና። ኑኒ ኑ ናጋራ ፓፂኮ ኢዚ ኑ ናጋራ ኣቶ ጋናሲኔ ኑ ቆሆፔ ኑና ዉርሲ ጌሻናስ ኢዚ ኣማኔቲዳዴኔ ፂሎ። ኑ ናጋራ ኦꬂቤኮ ጊኮ ኢዛ ኑ ዎርዳንቻ ኬሶሲኔ ኢዛ ቃላይካ ኑናን ዴና። ታ ናይቶ! ታ ኢንቴስ ሃይሳ ፃፊዛይ ኢንቴ ናጋራ ኦꬆንታ ማላሳ። ጊዶ ኣቲን ኦኒካ ናጋራ ኦꬂኮ ኣዋ ኣቻን ኑስ ፃባቃይ ዴስ። ኢዚካ ፂሎዛ ዬሱስ ኪርስቶሳ። ኢዚ ኑ ናጋራይ ኣቶ ጌቴታና ማላ ኦጌ ጊጊሲዛዴ፤ ሄሲካ ኑና ፃላላ ጊዶንታ ኩሜꬃ ኣላሜ ኣሳሳራ ኣቲን ኑስ ፃላ ጊዴና። ኑ ኢዛ ኣዛዞታ ፖሊኮ ኑ ኢዛ ኤሪዳይሳ ሄሳን ኣማኔቶስ። “ታ ኢዛ ኤራይስ” ጊሼ ኢዛ ኣዛዞ ፖሎንታዴ ጊዲኮ ሄሳዴይ ዎርዶ ኣሳ ኣቲን ቱማይ ኢዛዴን ዴና። ቃሴ ኦኒካ ኢዛ ቃላ ናጊኮ ቱሙ ፆሳ ሲቆይ ኢዛዴን ፖሌቲዴስ። ኑኒ ኢዛን ዲዛይሳ ኤሪዛይ ሄሳና። ታ ኢዛን ዳይስ ጊዛ ኣሲ ኦኒካ ዬሱሲ ሲሜሬቲዳ ማላ ሲሜሬታናስ ቤሴስ። ታ ሲቆቶ! ታ ኢንቴስ ፃፊዛይሲ ካሴ ኢንቴስ ዲዛሮ ኢንቴኮን ጋምዒዳ ኣዛዞዮ ኣቲን ሃራ ኦራꬃ ኣዛዞ ጊዴና፤ ጋምዒዳ ኣዛዞያ ካሴ ኢንቴ ሲዪዳ ቃላ። ሃራ ባጋራ ታ ኢንቴስ ፃፊዛይ ኪርስቶሳ ኣቻኒኔ ኢንቴ ኣቻን ቱሙ ጊዲዳ ኦራꬃ ኣዛዞ፤ ጋሶይካ ꬉማይ ኣꬊን ቱሙ ፖዖይ ፖዖ ቦላ ዴስ። ፖዖን ዳይሲ ጊሼ ባ ኢሻ ኢፂዛዴይ ሃዒካ ꬉማን ዴስ። ባ ኢሻ ሲቂዛዴይ ፖዖን ዴስ፤ ሄሳዴስ ꬉጴ ጊዲዛ ሚሺ ዴና። ጊዶ ኣቲን ባ ኢሻ ኢፂዛዴይ ጊዲኮ ꬉማ ጊዶን ዴስ፤ ꬉማን ሲሜሬቴስ፤ ꬉማይ ኢዛ ቆቂሲዳ ጊሽ ኢዚ ኣዋ ቢዛኮኔ ባ ቢዛሶ ኤሬና። ታ ናይቶ! ኢንቴ ናጋራይ ዬሱስ ኪርስቶሳፔ ዴንዲዳይሳን ኣቶ ጌቴቲዳ ጊሽ ታ ኢንቴስ ፃፋይስ። ኣዋቶ! ካሴ ኮይሮፔ ዲዛይሳ ኢዛ ኢንቴ ኤሪዛ ጊሽ ታ ኢንቴስ ፃፋይስ፤ ናቴꬃቶ! ኢንቴ ኢታ ጊዲዳ ፃላዔ ፆኒዳ ጊሽ ታ ኢንቴስ ፃፋይስ። ናቴꬃ ናይቶ! ኢንቴ ኣዋ ኤሪዳ ጊሽ ታ ኢንቴስ ፃፋይስ። ኣዋቶ! ኮይሮፔ ዲዛይሳ ኢዛ ኢንቴ ኤሪዳ ጊሽ ታ ኢንቴስ ፃፋይስ። ናቴꬃቶ! ኢንቴ ሚኖታ ጊዲዳ ጊሺኔ ፆሳ ቃላይ ኢንቴናን ዲዛ ጊሽ ኢንቴ ኢታ ጊዲዳ ፃላዔ ፆኒዳ ጊሽ ታ ኢንቴስ ፃፋይስ። ሃይሳ ኣላሜዛ ዎይኮ ሃ ኣላሜዛን ዲዛ ኣይ ሚሼካ ዶሶፒቴ። ኦኒካ ሃ ኣላሜዛ ዶሲኮ ኣዋ ሲቆይ ኢዛዴ ኣቻን ዴና። ጋሶይካ ሃ ኣላሜዛን ዲዛይ ዉሪ ኣሾ ኣሞቴꬅ፥ ኣይፌስ ሎዖኔ ዱሳን ጬቄቴꬅ፤ ሃይቲ ኣላሜፔ ኣቲን ፆሳ ኣዋፔ ዪዛይታ ጊዴቴና። ኣላሜይኔ ኣላሜን ዲዛ ኣሞቴꬂ ኣꬋና ሺን ፆሳ ሼኔ ፖሊዛይቲ ጊዲኮ ሜርናስ ዳና። ናይቶ! ሃይሲ ዉርሴꬃ ሳቴ። ኢንቴ ሲዪዳ ማላ ኪርስቶሳራ ኤቄቲዛዴይ ያና። ሃዒካ ኪርስቶሳራ ኤቄቲዛ ዳሮቲ ዪዳ። ሃይሲ ዉርሴꬃ ሳቴ ጊዲዳይሳ ኑ ሃይሳን ኤሮስ። ኢስቲ ኑ ጊዶፌ ኬዚዳ። ጊዶ ኣቲን ኢስቲ ካሴካ ኑ ባጋ ጊዴቴና። ኢስቲ ኑ ባጋ ጊዲዳኮ ኑናራ ሚኒ ኤቃናኮሺን፤ ጊዶ ኣቲን ኢስቲ ዉሪ ኑ ባጋ ጊዶንታይሲ ኤሬታና ማላ ኑፔ ሻኬቲዳ ኢንቴና ቃሴ ኪርስቶሲ ፂሎ ኣያናን ቲዪዴስ፤ ሄሳ ጊሽ ኢንቴ ዉሪካ ቱማ ኤሬታ። ታ ኢንቴስ ፃፊዛይ ኢንቴ ቱማ ኤሮንታ ጊሽ ጊዴና፤ ጊዶ ኣቲን ኢንቴ ቱማ ኤሪዛ ጊሺኔ ቱማ ጋርሳፌ ኣይኮ ዎርዶይካ ቤቶንታይሳ ኢንቴ ኤሪዛ ጊሻሳ። ዬሱሳ ኢዚ ኪርስቶሳ ጊዴና ጊ ካዲዛዴፌ ሃራ ዎርዳንቻይ ኦኔ? ሄሳዴይ ኣዋኔ ናዛ ካዲዛ ኪርስቶሳራ ኤቄቲዛዴ። ናዛ ካዲዛዴስ ኦናሲካ ኣዋይ ዴና፤ ናዛ ኤኪዛዴስ ኡባስ ኢዛስ ኣዋይካ ዴስ። ኢንቴ ኮይሮ ሲዪዳ ቃላያ ኢንቴናን ዱ፤ ኢንቴ ኮይሮ ሲዪዳራ ኢንቴናን ዲኮ ኢንቴካ ናዛኔ ኣዋን ዳና። ሜርና ዴዖይ ኢዚ ኑስ ኢማና ጊዳ ሂዶታ ቃላ። ኢንቴና ባሌꬂዛ ኣሳታ ጊሽ ሃይሳ ኢንቴስ ፃፋዲስ። ኢንቴ ቃሴ ኢዛፔ ኤኪዳ ፂሎ ኣያናይ ኢንቴናን ዲዛ ጊሽ ሃራይ ኦኒካ ኢንቴና ታማርሳናስ ቤሴና። ኢዚ ኢንቴና ታማርሳናይሲ ቱሙ ኣቲን ዎርዶ ጊዴና፤ ሄሳ ጊሽ ፂሎ ኣያናይ ኢንቴና ታማርሲዳ ማላ ኪርስቶሳን ዴዒቴ። ሄሳ ጊሽ ናይቶ! ኢዚ ቆንጪዛ ዎዴ ኑስ ፃላቴꬂ ዳና ማላ ኢዚ ዪዛ ዎዴካ ኑ ኢዛ ሲንꬃን ዬሌቶንታ ማላ ኢንቴ ኢዛን ዴዒቴ። ኢዚ ፂሎ ጊዲዳይሳ ኢንቴ ኤሪዛ ጊዲኮ ፂሎ ኦꬂዛይ ዉሪ ኢዛፔ ዬሌቲዳይሳ ኢንቴ ኤሬታ። ኑኒ ፆሳ ናይታ ጌቴታና ማላ ኣዋይ ዳርሲ ሲቂዳ ኢዛ ሲቆይ ኑስ ኣይ ማላ ጊታኮኔ ኣኔ ቤዪቴ! ቱሙካ ኑ ኢዛ ናይታ። ኣላሜይ ኑና ኤሮንታ ኣጊዳይ ኢዛ ኤሮንታ ኣጊዳ ጊሻሳ። ታ ኢሻቶ! ኑኒ ሃዒ ፆሳ ናይታ፤ ቡሮ ኑ ኣይ ሃናናኮኔ ሃዒ ቆንጪቤና፤ ኪርስቶሲ ቆንጪዛ ዎዴ ኑ ኢዛ ቤያናኔ ኑካ ኢዛ ሚሳታናይሳ ኑ ኤሮስ። ሃይሳ ኢዛን ሂዶታ ኦꬂዛይ ዉሪ ኢዚ ጌሽ ጊዲዳ ማላ ባና ጌሼስ። ናጋራ ኦꬂዛይ ዉሪካ ማካላ ኦꬄስ፤ ናጋራይካ ማካላ። ኢዚ ናጋራ ꬋይሳናስ ቆንጪዳይሳ ኢንቴ ኤሬታ። ኢዛን ናጋራይ ባዋ። ኢዛን ዲዛ ኣሲ ኦኒካ ናጋራ ኦꬄና። ናጋራ ኦꬂዛዴይ ኦኒካ ጊዲኮ ኢዛ ቤይቤና ዎይኮ ኤሪቤና። ታ ናይቶ! ኢንቴና ኦኒካ ባሌꬆንታ ማላ ናጌቲቴ። ኢዚ ፂሎ ጊዲዳ ማላ ፂሎ ኦꬂዛዴይካ ፂሎ። ናጋራ ኦꬂዛይ ፃላዔፔ፤ ጋሶይካ ፃላዔይ ኮይሮፔካ ናጋራ ኦꬂዛዴ። ፆሳ ናይ ቆንጪዳይካ ፃላዔ ኦሶ ላላናሳ። ፆሳፌ ዬሌቲዳይ ዉሪ ናጋራ ኦꬄና። ፆሳ ዜሬꬂ ኢዛን ዲዛ ጊሺኔ ኢዚ ፆሳፌ ዬሌቲዳ ጊሽ ናጋራ ኦꬃና ዳንዳዬና። ፆሳ ናይቲኔ ፃላዔ ናይቲ ሻኬቲ ኤሬቴዛይ ሄሳና። ፂሎ ኦꬆንታይኔ ባ ኢሻ ሲቆንታይ ዉሪ ፆሳፌ ጊዴና። ኢንቴ ኮይሮ ሲዪዳራ “ኑ ኑ ጋርሳን ሲቄታና ቤሴስ” ጌቴቲዳ ኪታያ ሃኖ። ኢታ ባጋ ጊዲዲ ባ ኢሻ ዎꬊዳ ቃዬሌ ማላ ጊዶፒቴ። ኢዚ ኣዛስ ዎꬊዴ? ጋሶይካ ኢዛ ኦሶይ ኢታ፤ ኢሻ ኦሶይ ሎዖ ጊዲዳ ጊሻሳ። ታ ኢሻቶ! ኢንቴና ኣላሜ ኣሳይ ኢፂኮ ማላሌቶፍቴ። ኑኒ ኑ ኢሻታ ዶሲዛ ጊሽ ሃይቆፔ ጌዴ ዴዖን ፒኒዳይሳ ኑ ኤሮስ። ሲቆይ ባይንዳዴይ ዉሪ ሃይቆ ጊዶን ዴስ። ባ ኢሻ ኢፂዛዴይ ሼምፖ ዎꬊዳ ኣሳ። ሼምፖ ዎꬊዳዴስ ሜርና ዴዖይ ባይንዳይሳ ኢንቴ ኤሬታ። ዬሱስ ኪርስቶሲ ባ ሼምፖ ኑ ጊሽ ኣꬂ ኢሚዳ ጊሽ ሲቆይ ኣዛኮኔ ኑ ሄሳን ኤሮስ። ኑካ ኑ ሼምፖ ኑ ኢሻታ ጊሽ ኣꬂ ኢማናስ ኑስ ቤሴስ። ሚሺ ዲዛዴይ ኦኒካ ባ ኢሻይ ዋዬቲሺን ቤዪዲ ኢዛስ ሚሼቶንታ ኣጊኮ ፆሳ ሲቆይ ኢዛን ዋኒ ዳኔ? ታ ናይቶ! ቱሙ ኦሶንፔ ኣቲን ጮ ዱናኒኔ ቃላን ፃላላ ሲቄቴꬅ ኣኔ ኣጎስ። ኑኒ ቱሙ ባጋ ጊዲዳይሳ ሃይሳን ኤሮሲኔ ኑ ዎዝናካ ኢዛ ሲንꬃን ሼምፒሶስ። ሄሲካ ኑ ዎዝናይ ኑ ቦላ ፒርዲዛ ሚሻን ኡባን ፆሲ ኑ ዎዝና ቆፋፔ ቦላራ ጊዲዳ ጊሽ ኢዚ ዉርሲ ኤሬስ። ታ ኢሻቶ! ኑ ዎዝናይ ኑ ቦላ ፒርዶንታ ኣጊኮ ኑስ ፆሳ ሲንꬃን ባቢዛ ሚሺ ዴና። ኑ ኣዛዞታ ናጊዛ ጊሺኔ ኢዛ ኡፋይሲዛዝ ኦꬂዛ ጊሽ ኑ ኢዛ ዎሲዛዝ ዉርሲ ኑ ኢዛፔ ኤካና። ኢዛ ኣዛዞይካ ኑ ኢዛ ናዛ ዬሱስ ኪርስቶሳ ኣማናናሲኔ ኢዚ ኑና ኣዛዚዳ ማላ ኑኒ ኑ ጊዶን ዶሴታና ማላሳ። ኢዛ ኣዛዞታ ናጊዛይቲ ዉሪ ኢዛን ዴቴስ፤ ኢዚካ ኢስታን ዴስ። ኢዚ ኑናን ዲዛይሳ ኑ ኢዚ ኑስ ኢሚዳ ኣያናን ኤሮስ። ታ ኢሻቶ! ኣያና ዉርሲ ኣማኖፒቴ፤ ጊዶ ኣቲን ኣያናቲ ፆሳፌኮኔ ፓጪ ቤይቴ። ጋሶይካ ዳሮ ዎርዶ ናቤቲ ቢታ ቦላ ላሌቲዳ። ኢንቴ ፆሳ ኣያና ኤራና ኦጌይ “ዬሱስ ኪርስቶሲ ኣሳ ኣሾ ማይዒዲ ዪዴስ” ጊዛ ኣያናይ ዉሪ ፆሳፌኮ! “ዬሱስ ኪርስቶሲ ኣሳ ኣሾ ማይዒዲ ዪዴስ” ጎንታ ኣያናይ ፆሳፌ ጊዴና፤ ካሴ ኢዚ ያና ጊሺን ኢንቴ ሲዪዳ ኪርስቶሳራ ኤቄቲዛ ኣያናይ ሄሳ፤ ሃዒካ ኢዚ ኣላሜ ቦላ ዴስ። ታ ናይቶ! ኢንቴ ፆሳይታ። ኢንቴ ኢስታ ፆኒዴታ፤ ጋሶይካ ኢንቴናን ዲዛይ ኣላሜን ዲዛይሳፌ ኣꬌስ። ኢስቲ ኣላሜ ባጋኮ፤ ሄሳ ጊሽ ኢስቲ ሃሳዪዛይ ዉሪ ኣላሜፔ ኬዚዛይሳ፤ ኣላሜ ኣሳይ ኢስቲ ጊዛይሳ ሲዬስ። ኑ ቃሴ ፆሳ ባጋ፤ ፆሴ ኤሪዛይ ኑ ጊዛዝ ሲያና ሺን ፆሳ ባጋ ጊዶንታዴይ ጊዲኮ ኑ ጊዛዝ ሲዬና። ቱማ ኣያናኔ ዎርዶ ኣያና ኑ ሻኪ ኤሪዛይ ሃይሳና። ታ ኢሻቶ! ሲቆይ ፆሳፌ ጊዲዳ ጊሽ ኑኒ ኣኔ ሲቄቶስ። ኣሳ ሲቂዛ ኣሲ ዉሪ ፆሳፌ ዬሌቲዳዴኔ ፆሴ ኤሪዛዴ። ኣስ ሲቆንታ ኣሲ ፆሴ ኤሬና። ኣዛስ ጊኮ ፆሲ ሲቆ። ፆሳይ ኑ ጊዶን ባ ሲቆ ቆንጪሲዳይ ኑ ኢዛ ባጋራ ዴዖ ዴማና ማላ ባ ና ኢሲኔዛ ሃ ዱጌ ሃ ኣላሜዛን ዬዲዳይሳና። ኑኒ ፆሴ ሲቂቤይኮ ሺን ኢዚ ኑና ሲቂዴስ። ኑ ናጋራ ꬋይሳና ማላ ባ ናዛ ዬዲዴስ። ሲቆ ጉሲካ ሄሳ። ታ ኢሻቶ! ፆሲ ኑና ሃይሳꬆ ሲቂኮ ኑካ ኑ ጊዶን ሲቄታናስ ቤሴስ። ፆሴ ቤዪዳ ኣሲ ኦኒካ ባዋ። ኑኒ ኑ ጊዶን ሲቄቲዛ ጊዲኮ ፆሲ ኑናን ዳና። ኢዛ ሲቆይካ ኑናን ፖሌታና። ኢዚ ኑስ ባ ኣያና ኢሚዳ ጊሽ ኑ ኢዛን ዲዛይሳኔ ኢዚካ ኑናን ዲዛይሳ ኑ ሄሳን ኤሮስ። ኣዋይ ባ ናዛ ሃይሳ ሃ ኣላሜ ኣሳ ኣሻናስ ዬዲዳይሳ ኑ ቤይዶሲኔ ኢዛ ጊሽ ማርካቶስ። ዬሱሲ ፆሳ ና ጊዲዳይሳ ኣማኒዲ ማርካቲዛ ኡባን ፆሲ ዴሲኔ፥ ኢዛዴይካ ፆሳን ዴስ። ሄሳ ጊሽ ፆሲ ኑና ሲቂዛ ሲቆ ኑ ኤሮስ። ኑ ኢዛ ሲቆን ኣማኔቶስ። ፆሲ ሲቆ። ሲቆን ዲዛዴይ ፆሳን ዴስ። ፆሲካ ሄሳዴን ዴስ። ኑኒ ሃይሳ ቢታ ቦላ ዴዒዛይ ኪርስቶሲ ዴዒዳ ማላ ጊዲዳ ጊሽ ኑስ ፒርዳ ጋላስ ባቦይ ዴና። ሄሳንካ ሲቆይ ኑናን ኩሜꬅ ጊዴስ። ሲቆ ጊዶን ባቦይ ባዋ፤ ቱሙ ሲቆይ ጊዲኮ ባቦ ኬሲ ዎራ ዬጌስ። ባቦይ ቂፃቴራ ኢሲፌ ኦይኬቲ ዴስ። ባቢዛዴ ሲቆይ ኩሜꬅ ጊዴና። ኢዚ ካሴቲዲ ኑና ሲቂዳ ጊሽ ኑካ ኢዛ ሲቆስ። ኦኒካ ፆሴ ሲቃይስ ጊሼ ባ ኢሻ ኢፂኮ ሄሳዴይ ዎርዶ። ባ ኣይፌራ ቤዪዛ ባ ኢሻ ሲቆንታ ኣሲ ባ ኣይፌን ቤዮንታ ፆሳ ሲቃናስ ዳንዳዬና። “ፆሴ ሲቂዛ ኣሲ ዉሪካ ባ ኢሻ ሲቃናስ ቤሴስ” ጊዛ ሃ ኣዛዞዛ ኢዚ ኑስ ኢሚዴስ። ዬሱሲ ኢዚ ኪርስቶሳ ጊዲዳይሳ ኣማኒዛይ ዉሪ ፆሳፌ ዬሌቲዴስ። ኣዋ ዶሲዛይ ዉሪ ናዛካ ኢዛꬆ ዶሴስ። ኑኒ ፆሴ ዶሲኮኔ ኢዛ ኣዛዞ ናጊኮ ኑ ፆሳ ናይታ ሲቂዛይሳ ሄሳን ኤሮስ። ፆሳ ዶሶ ጉሲ ኢዛ ኣዛዞ ናጎ፤ ኢዛ ኣዛዞቲ ዴፆ ጊዴቴና። ጋሶይካ ፆሳፌ ዬሌቲዳይ ዉሪ ኣላሜ ፆኔስ። ኣላሜ ፆኒዛይካ ኑ ኣማኖ። ዬሱሲ ፆሳ ና ጊዲዳይሳ ኣማኒዛዴፌ ኣቲን ኣላሜ ፆኒዛይ ሃራይ ኦኔ? ሃꬃኒኔ ሱꬃን ዪዳይ ሃይሳ ዬሱስ ኪርስቶሳ። ኢዚ ሃꬃኒኔ ሱꬃን ዪዴስ ኣቲን ሃꬃን ፃላ ዪቤና። ሄሳካ ኢዛ ጊሽ ማርካቲዛይ ኣያና። ሄ ኣያናይ ቱሙ ኣያና። ሄሳ ጊሽ ኢዛስ ሄꬑ ማርካቲ ዴቴስ። ሄይቲካ ኣያና፥ ሃꬄኔ ሱꬃ፤ ሄꬓታ ቃላይካ ኢሲኖ። ኑ ኣሳ ማርካቴꬅ ኣማኒኮ ፆሳ ማርካቴꬂ ሄሳፌ ኣꬌስ። ሄሲካ ኢዚ ባ ናዛ ጊሽ ኢሚዳ ፆሳ ማርካቴꬃ። ፆሳ ናን ኣማኒዛዴ ኡባ ዎዝናን ኢዛ ጊሽ ማርካይ ዴስ። ፆሴ ኣማኖንታይ ዉሪካ ፆሲ ባ ናዛ ጊሽ ኢሚዳ ማርካቴꬃ ኣማኖንታ ጊሽ ኢዛ ዎርዶሴስ። ኢዛ ማርካቴꬃይካ ፆሲ ሜርና ዴዖ ኑስ ኢሚዴስ፤ ሄ ዴዖይካ ኢዛ ናዛን ዴስ ጊዛይሳ። ናዚ ዲዛዴስ ዴዖይ ዴስ፤ ፆሳ ናይ ባይንዳዴስ ዴዖይ ባዋ። ኢንቴስ ፆሳ ናን ኣማኒዛይታስ ሜርና ዴዖይ ዲዛይሳ ኢንቴ ኤራና ማላ ታ ሃይሳ ኢንቴስ ፃፋይስ። ኑ ፆሳ ሲንꬅ ሺቃናስ ኑስ ዲዛ ፃላቴꬂ ሃይሳ። ኑ ኣይ ሚሺካ ኢዛ ሼኔ ማላ ዎሲኮ ኢዚ ኑ ዎሳ ሲያና። ኑ ኢዛ ዎሲዛ ሚሽ ኢዚ ዉርሲ ሲዪዛይሳ ኑ ኤሪዛ ጊዲኮ ኑ ዎሲዳ ሚሻ ዉርሲ ኤካናይሳ ኑ ኤሮስ። ኦኒካ ባ ኢሻይ ባና ሃይቆስ ጋꬆንታ ናጋራ ኦꬂሺን ቤዪኮ ኢዛስ ዎሶ። ፆሲካ ሃይቆስ ጋꬆንታ ናጋራ ኦꬂዳይታስ ዴዖ ኢማና። ሃይቆስ ጋꬂዛ ናጋራይካ ዴስ። ሃይቆስ ጋꬂዛ ናጋራ ጊሽ ዎሶ ጊኬ። ማካላይ ዉሪካ ናጋራ፤ ሃይቆስ ጋꬆንታ ናጋራይካ ዴስ። ፆሳፌ ዬሌቲዳይ ዉሪ ናጋራ ኦꬄና፤ ጋሶይካ ፆሳ ናይ ኢዛ ናጊዛይሳኔ ኢታይ ኢዛ ቦቾንታይሳ ኑ ኤሮስ። ኑኒ ፆሳፌ ጊዲዳይሳኔ ኣላሜይ ኩሜꬅ ኢታ ኣሳ ኩሼን ዲዛይሳ ኑ ኤሮስ። ፆሳ ናይ ዪዳይሳ ቱሙ ጊዲዳ ኢዛ ኑ ኤራና ማላ ኣኬካ ኢዚ ኑስ ኢሚዳይሳ ኑ ኤሮስ። ኑካ ቱሙ ጊዲዳ ኢዛ ናዛ ዬሱስ ኪርስቶሳን ዶስ፤ ኢዚካ ቱሙ ፆሳን ሜርና ዴዖ። ናይቶ! ኢንቴናቴꬃ ኤቃታፔ ናጊቴ። ታፔ ጪማዛፔ፤ ቱማፔ ታ ዶሲዛ ዶሬቲዳ ጎዳቴይሲኔ ኢዚ ናይታስ፤ ታና ፃላ ጊዶንታ ቱሙ ኤሪዛይቲ ዉሪ ዶሲዛሪስ ኪቴቲዳ ኪታ። ጋሶይካ ሃይሲ ቱማይ ሃዒካ ኑ ጊዶን ዲዛይሳኔ ሲንꬃፌካ ሜርናስ ዳናይሳ። ፆሳ ኣዋፔኔ ኢዛ ና ዬሱስ ኪርስቶሳፔ ኪያቴꬂ፥ ማሮቴꬂኔ ሳሮይ ቱማኒኔ ሲቆን ኑናራ ጊዶ። ኔ ናይታፔ ባጋቲ ኣዋፔ ኑስ ኢሜቲዳ ኣዛዞዛ ማላ ቱማን ሚኒ ዲዛይታ ታ ቤዪዳ ጊሽ ዳሮ ኡፋዬታዲስ። ሃዒካ ጎዳቴዬ! ካሴፔካ ዲዛሮ ኣቲን ታ ኔስ ሃራ ኦራꬃ ኣዛዞ ፃፊኬ፤ ሄሲካ ኑኒ ኑ ጊዶን ሲቄታናይሳ። ሄ ሲቆይካ ኑ ኢዛ ኣዛዞዛ ማላ ዳናይሳ። ኣዛዞዚካ ኢንቴ ኮይሮ ሲዪዳ ማላ ሲቆን ዳና ማላ። ዬሱስ ኪርስቶሲ ኣሳ ኣሾ ማይዒዲ ዪቤና ጊዛ ኣማኖንታ ዳሮ ባሌꬂዛይቲ ኣላሜ ቦላ ላሌቲዳ። ሄይታ ማላይ ኣይ ኣሲካ ኣስ ባሌꬂዛዴኔ ኪርስቶሳራ ኤቄቲዛዴ። ኢንቴ ጊዲኮ ኢንቴ ዳቡራ ዋጋፔ ሜላ ኣቶንታ ማላኔ ኩሜꬃ ዎይቶ ኤካና ማላ ኢንቴ ሁዔስ ናጌቲቴ። ኪርስቶሳ ቲሚርቴ ማላ ዶንታ ኣሲኔ ኢዛ ቲሚርቴፌ ባሌቲዲ ካሬ ኬዚዛ ኣስ ኦናንካ ፆሲ ዴና። ኪርስቶሳ ቲሚርቴን ዲዛዴይ ጊዲኮ ኢዛስ ኣዋይኔ ኣዋ ናይ ዴቴስ። ኦኒካ ኢንቴኮ ዪሼ ሄሳ ሄ ቲሚርቴዛ ኤኪ ዮንታ ኣስ ሞኪ ኤኮፍቴኔ ሳሮካ ጎፒቴ። ሞኪ ኤኪዲ ባሶ ጌልꬂዛዴይ ሄሳዴ ኦሶን ኢዛራ ኢሲኖ ጊዴስ። ታ ኢንቴስ ፃፋናስ ኮዪዛ ዳሮ ሚሺ ዴሲሺን ዋራቃታኒኔ ቃላሜን ፃፋና ማላ ኮይኬ። ጊዲኮካ ኑ ኡፋይሳይ ኩሜꬅ ጊዳና ማላ ታ ኢንቴኮ ባዳ ኢንቴ ሲንꬃን ኢንቴናራ ሃሳያናስ ሂዶታ ኦꬃይስ። ዶሬቲዳ ኔ ሚቼይ ናይቲ ኔና ሳሮ ጌቴስ። ታፔ ጪማዛፔ ቱማፔ ታ ሲቂዛ ታ ሲቆ ላጌ ጋዪዮሳስ። ታ ኢሻዞ! ኔ ሼምፖይ ሎዖን ዲዛ ማላ ኔ ኣሳቴꬃይ ሎዖ ዳና ማላኔ ኔ ኦꬂዛዚ ዉሪካ ኔስ ጊጋ ጊዳና ማላ ታ ኔስ ዎሳይስ። ኔ ቱማስ ኣማኔቲዳዴ ጊዲዳ ማላ ቃሴካ ኔ ሃኖይ ዉሪ ቱሙ ጊዲዳይሳ ኢሲ ኢሲ ኣማኒዛ ኣሳቲ ታኮ ዪዲ ኔ ጊሽ ዮቲን ሲያዳ ታ ዳሮ ኡፋዬታዲስ። ጋሶይካ ታ ናይቲ ሎዖኔ ቱማን ሲሜሬቲሺን ሲሳፌ ኣꬊዛ ሃራ ኡፋይሲ ታስ ዴና። ታ ኢሻዞ! ኢስቲ ኔስ ኢማꬅ ጊዲኮካ ኔኒ ኔ ኢሻታስ ኦꬂዳ ሚሼ ኡባን ኣማኔታዳሳ። ኔ ቦላ ኣይ ማላ ሲቆይ ዲዛኮኔ ኢስቲ ኔ ጊሽ ዎሳ ኬꬃ ኣሳ ሲንꬃን ማርካቲዳ። ኢስቲ ቢዛ ኦጌን ፆሴ ኡፋይሲዛ ሃኖን ኔ ኢስታ ማዲኮ ሎዖ ኦꬃሳ። ኣይሲ ጊኮ ኢስቲ ፆሳ ኣማኖንታይታፔ ኣይኮካ ኤኮንታ ኪርስቶሳ ሱንꬃ ጊሽ ሜላ ኬዚዳ። ሄሳ ጊሽ ኑ ኢሲፌ ቱማስ ኦꬃና ማላ ሄይታንታ ማላታ ሞኪ ኤካናስ ቤሴስ። ታ ዎሳ ኬꬃስ ሃይሳፌ ካሴ ፃፋዲስ። ጊዶ ኣቲን ካሌꬂዛዴ ጊዳና ኮዪዛ ዲዮፂራፆሲ ኑ ጊዛዝ ኤኬና። ሄሳ ጊሽ፥ ታ ሄ ቢኮ ኢዚ ባ ኢታ ቃላን ኑ ሱንꬅ ሞራናስ ኦꬂዳይሳ ታ ኢንቴስ ቆንጪሳና። ሄሲካ ኢዛስ ጊዶንታ ኢፂን ኣማኒዛ ኣሳ ሞኪ ኤኬና፤ ሞኪ ኤካና ኮዪዛይታካ ዲጌሲኔ ዎሳ ኬꬃፌ ኬሲ ጎዴስ። ታ ኢሻዞ! ሎዖታ ሚሳታ ኣቲን ኢታ ኣሳታ ሚሳቶፓ። ሎዖ ኦꬂዛዴይ ዉሪካ ፆሳ ኣሳ። ኢታ ኦꬂዛዴይ ቃሴ ፆሴ ቤይቤና። ዲሜፂሮሳስ ኣሲ ዉሪ ሎዖ ማርካቴስ። ቱማይካ ኢዛስ ማርካታዉስ። ኑካ ኢዛስ ማርካቶስ፤ ኢንቴካ ኑ ማርካይ ቱሙ ጊዲዳይሳ ኤሬታ። ታ ኔስ ፃፋና ቡሮ ዳሮ ዮዖይ ዴስ ሺን ታ ኔስ ዋራቃታን ፃፋናስ ኮዪኬ። ታ ኔና ማታ ዎዴ ቤያናስ ሂዶታ ኦꬃይስ፤ ሄ ዎዴ ኑ ኢሲፌ ኡቲ ሃሳያና። ኣኔ ሳሮን ዳ፤ ኔ ላጌቲ ኔና ሳሮ ሳሮ ጌቴስ፤ ታ ላጌታ ሱንꬃን ሱንꬃን ፄይጋዳ ሳሮ ጋ። ዬሱስ ኪርስቶሳስ ኦꬂዛ ያቆቤ ኢሻ ዩሁዳፔ፥ ኢንቴስ ፄይጌቲዳይታስ፥ ፆሲ ኣዋይ ሲቂዛይታሲኔ ዬሱስ ኪርስቶሲ ናጊዳይታስ ኡባታስ፤ ማሮቴꬂ፥ ሳሮቴꬂኔ ሲቆይ ኢንቴስ ዳሮ። ታ ሲቆቶ! ኑ ኢሲፌ ኣቲዳ ኣቶቴꬃ ጊሽ ታ ኢንቴስ ፃፋናስ ዳሮ ኮያዲሲሺን ሃዒ ቃሴ ናምዓንꬆንታ ኢሲቶ ፆሲ ኣሳስ ኢሚዳ ኣማኖ ጊሽ ኢንቴ ዳሮ ባፄታና ማላ ታ ኢንቴና ዞራይስ። ታ ኢንቴስ ፃፋናስ ታስ ቶሆ ጊዲዴስ። ኢስታ ቦላ ፒርዴታናይስ ዳሮ ዎዴፔ ካሴ ኢስታ ጊሽ ፃፌቲዳ ኣሳቲ ኢንቴኮ ካልፂ ጌሊዳ። ሄይታንቲ ፆሴ ኤሮንታይታ፤ ኑ ጎዳ ኪያቴꬃ ጮ ሜላ ላሚዛይታኔ ፆሳ ጎይኖንታይታ። ኢዚ ባርካ ኑና ሃሪዛይሳኔ ኑስ ጎዳ ጊዲዳ ዬሱስ ኪርስቶሳካ ካዴቴስ። ኢንቴ ሄሳ ኡባካ ካሴቲ ኤሪኮካ ጎዳይ ባ ዴሬዛ ጊብፄፔ ኬሲዲ ኣሺዳይሳኔ ሃንኮ ኣማኖንታይታ ጉዬፔ ꬋይሲዳይሳ ታ ኢንቴና ኣኬኪሳና ኮያይስ። ሄሳꬆካ ባ ቦንቾ ናጎንታ ኢፂዲ ባ ዲዛሶ ዬዲዳ ኪታንቻታ ኢንቴ ዩሺ ቆፓና ማላ፤ ፆሲ ኢስታ ጊታ ፒርዳ ጋላስ ጋካናስ ሜርና ቃሾስ ጊርድ ጊዳ ꬉማን ናጊ ዎꬂዴስ። ሄሳꬆካ ሶዶሜይኔ ጋሞራይ ቃሴካ ኢስታ ሄራን ዲዛ ካታማቲካ ላይማቲዳኔ ሳሎ ሜꬌቴꬃታራ ላይማታናስ ኣሞቲዳ። ሄሳ ጊሽ ኢስቲ ሜርና ታማን ፁጌታናይታስ ሌሚሶ ጊዲዳ። ሄሳꬆካ ሄይቲ ሄ ኣሳቲ ባርካ ባ ኣጉሞ ካሊዲ ባርካ ባ ኣሾ ቱኒሴቴስ። ባፔ ቦላራ ዲዛይታስ ኣዛዜቴቴና። ኢስቲ ሳሎን ቦንቾራ ዲዛይታካ ጫዬቴስ። ሃራይ ኣቶሺን ሳሎ ኪታንቻታ ሃላቃይ ሚካሌይ ሙሴ ኣሾ ጊሽ ኢዛራ ፓላሜቲሼ “ኔና ጎዳይ ሃንቄቶ!” ጊዴስ ኣቲን ኢዛስ ጫሻ ቃላ ዛሪቤና። ሃይቲ ኣሳቲ ቃሴ ኢስታስ ኤሬቶንታ ኢፂዳ ሚሽ ዉርሲ ጫሽ ጫዬቴስ። ኣይኮካ ኤሮንታ ሜሄታ ማላ ጮ ሜላ ቆፒ ኤኪዳ ሚሺ ኢስታስ ዲኮ ኢስቲ ሄሳን ꬋያና። ኢስቲ ቃዬሌ ኦጌን ቢዳ ጊሽ ሚሻስ ጊዲ ባላዓሜ ማላ ባላን ኩንዲዳ። ቃሴ ቆሬይ ኤቄቲዳ ማላ ኢስቲካ ኤቄቲዲ ꬋዪዳ ጊሽ ኢስታስ ኣዬ-ኣና! ሃይቲ ሃ ኣሳቲ ዬላይ ባይንዳ ላይማ ሃኖራ ኢሲ ቦላ ኢንቴ ዲጊሴሶን ቤቲዛ ዎዴ ኢንቴስ ꬉጴ ጊዴቴስ። ኢስቲ ባስ ፃላላ ቆፔቴስ። ኢስቲ ጫርኮን ቢዛ ኢራይ ባይንዳ ሻራ ማላ። ኣይፌይ ኣይፊዛ ዎዴን ኣይፌይ ባይንዳ ፃጶፔ ꬎቃሌቲዲ ናምዑቶ ሜሊዳ ሚꬃ ማላ። ኢስቲ ዬላቺዛ ባ ኦሶዛ ዎልቃማ ኣባ ዳምባላ ማላ ጎፖንቶ ጮፑ ሂስቲዛይታ። ጊርድ ጊዳ ꬉማይ ኢስታ ሜርናስ ናጊዛይሳኔ ጮ ሜላ ዋዬቲዛ ፆሊንቴታ ማላኮ! ኣዳሜፔ ሃ ሲሚን ላፑንꬆ ዬሌቴꬅ ጊዲዳ ሄኖኬይ “ሄኮ ፆሲ ቆዳይ ባይንዳ ጌሻ ኪታንቻታራ ኣሳ ኡባ ቦላ ፒርዳናስ ያና። ሄይታ ፆሳስ ጎይኖንታ ኣሳቲ ኦꬂዳ ኢታ ኦሶ ጌዶን ኢስታ ኢዚ ቃፃያና። ኣዳፌካ ፆሲ ሄይታ ባስ ጎይኖንታ ናጋራንቻታ ቦላ ኢስቲ ሃሳዪዳ ኢታ ሚሻታ ጊሽ ኢዚ ኢስታ ቦላ ፒርዳና” ጊዴስ። ሄይቲ ሄ ኣሳቲ ኡባ ዎዴ ዙዙሜቲዛይታኔ ኣይ ሚሻንካ ኡፋዬቲ ኤሮንታይታ። ኢስቲ ባ ኢታ ኣሞ ካሊዛይታ፤ ኢስታ ዱናን ኦቶሬቴꬃ ቃላይ ኩሚዴስ። ባስ ባ ጎዓ ኮዪሼ ኣስ ኣዳሼቴስ። ኢንቴ ታ ሲቆቶ! ኑ ጎዳ ዬሱስ ኪርስቶሳ ሃዋሬቲ ሃይሳፌ ካሴ ዮቲዳ ቃላ ኣኬኪቴ። ኢስቲ “ዎዴ ዉርሴꬃን ፆሳ ሼኔፔ ሃኪዳይቲ ባርካ ባ ኢታ ኣሞ ካሊሼ ኣስ ቂꬊዛይቲ ያና” ጊዲ ኢንቴስ ካሴ ዮቲ ዎꬂዳ። ሄይቲ ኣሳ ኢሳ ኢሳፌ ሻኪዛይታ፤ ኣሾ ኣሞቴꬅ ካሊዛይታኔ ኢስታን ፂሎ ኣያናይ ባይንዳይታ። ታ ኢሻቶ! ኢንቴ ቃሴ ኡባፌ ቦላራ ኢንቴ ጌሻ ኣማኖን ሚኒ ኤቂቴ፤ ፂሎ ኣያናንካ ሚኒ ዎሲቴ። ኑ ጎዳ ዬሱስ ኪርስቶሲ ባ ማሮቴꬃን ኢንቴና ሜርና ዴዖን ጋꬃናይሳ ናጌቲሼ ኢንቴናቴꬃ ፆሳ ሲቆን ናጊቴ። ሲꬊሼ ዲዛ ኣሳታስ ሚሼቲቴ፤ ኢሲ ኢሲ ኣሳታ ታማፔ ኬሲ ኣሺቴ፤ ሃራታስ ያሻቴꬃን ሚሼቲቴ ሺን ናጋራን ቱኒዳ ኢስታ ኣሳቴꬅ ቦቺዳ ማዮካ ዉርሲ ኢፂቴ። ኢንቴና ኩንዴꬃፌ ኣሻናሲኔ ኢንቴና ዎሶይ ባይንዳይታ ሂስቲዲ ኡፋይሳን ባ ቦንቾ ሲንꬂ ሺሻናስ ዳንዳዪዛይሳስ፤ ኢዚ ፃላላ ኑስ ፆሳኔ ꬋሌ ጊዲዳ ጎዳ ዬሱስ ኪርስቶሳ ባጋራ ቤኒፔ ዶሚዲ ሃዒ ጋካናሲኔ ሜርናስካ ቦንቾይኔ ጊታቴꬅ፥ ዎልቃይኔ ጎዳቴꬂ ኢዛስ ጊዶ። ኣሚን። ሃይሲ ኣጁታዚ ማታ ዎዴ ቢታ ቦላ ሃናናይሳ ባስ ኦꬂዛይታ ቤሳና ማላ ፆሲ ዬሱስ ኪርስቶሳስ ኢሚዳይሳ። ዬሱስ ኪርስቶሲካ ባ ኪታንቻ ኪቲዲ ባ ኦሳንቻዛ ዮሃኒሳስ ሃይሳ ኣጁታዛ ቆንጪሲዴስ። ዮሃኒሲካ ፆሳ ቃላ ጊሺኔ ዬሱስ ኪርስቶሲ ታማርሲዳ ቱማ ጊሽ ቃሴካ ኢዚ ባ ኣይፌን ቤዪዳይሳካ ዉርሲ ማርካቲዴስ። ሃይሲ ዉሪካ ሃናናይ ማታ ዎዴን ጊዲዳ ጊሽ ሃይሳ ቲንቢቴ ቃላ ናባቢዛ ኣሲ ኣንጄቲዳዴ። ሄሳꬆካ ቲንቢቴ ቃላ ሲዪዛይቲኔ ሃ ቲንቢቴ ቃላ ፃፌቲዳይሳ ፖሊ ኦꬂዛይቲ ኢስቲ ኣንጄቲዳይታ። ኢሲያን ዲዛ ላፑን ዎሳ ኬꬃታስ ካሴካ ዲዛይሳፌ፥ ሃዒካ ዲዛይሳፌኔ፥ ቡሮካ ያና ፆሳፌ ኢዛ ኣልጋ ሲንꬃን ዲዛ ላፑን ኣያናታፔ ሄሳꬆካ ሃይቆፔ ዴንꬃን ባይራ ጊዲዳይሳፌ፥ ሃ ቢታ ካዎታስ ካዎኔ ኣማኔቲዳ ማርካ ጊዲዳይሳፌ፥ ኑና ሲቂዛይሳፌኔ ባ ሱꬃን ኑና ኑ ናጋራፔ ጌሺዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ። *** ኑኒ ዬሱስ ኪርስቶሳ ኣዋ ፆሳስ ኦꬃና ማላ ኑና ኢዚ ካዎታኔ ቄሴታ ኬሲዳ ዬሱስ ኪርስቶሳስ ቦንቾይኔ ዎልቃይ ሜርናፔ ሜርና ጋካናስ ኢዛስ ጊዶ! ኣሚን። ሄኮ ኢዚ ሳሎፔ ሻራራ ጊታ ቦንቾራ ያና። ካሴ ኢዛ ጫዲ ዎꬊዳይቲካ ኣቶንታ ኣሲ ዉሪካ ኢዛ ቤያና። ቢታ ቦላ ዲዛ ዴሬይካ ዉሪካ ኢዛ ጊሽ ዬካና። ሃይሲ ሃ ዮዖዚ ቱሙኮ! ኣሚን። ካሴካ፥ ሃዒካ ዲዛይሲ ቡሮፔካ ያናይሲ ዉርሲ ዳንዳዪዛ ጎዳ ፆሲ “ኣልፋይኔ ኦሜጋይ፥ ኮይሮይኔ ዉርሴꬂ ታና” ጌስ። ታኒ ዬሱሳ ዋዬዛ ኢዛ ካዎቴꬃ ቃሴካ ኢዛ ዳንዳያን ኢንቴናራ ኢሲፌ ጊዲዳ ታ ኢንቴ ኢሻይ ዮሃኒሲ ፆሳ ቃላኒኔ ዬሱሳስ ማርካቲዳ ጊሽ ቃሼታዳ ፊፂሞ ጌቴቲዛ ኣባ ጊዶን ዲዛ ዴሬ ዳሪን ዳይስ። ታኒ ጎዳ ጋላስ ፂሎ ኣያናን ꬊስኮ ማላ ጮ ሊጲጲ ጊሺን ዲንኬ ጊሪሳ ማላይ ጊታ ጊሪስ ታፔ ጉዬራ፥ “ኔኒ ቤዪዛይሳ ዋራቃታን ፃፋዳ ላፑን ዎሳ ኬꬃታስ ሄይቲካ ኤፔሶኔስ፥ ሳሜርኔሴስ፥ ጴርጋሞኔስ፥ ቲያፂሮኔስ፥ ሳርዴሴስ፥ ፒላዴልፊያሲኔ ሎዶቂያስ ዬዳ” ጊሺን ሲያዲስ። ሄሳ ታስ ኦኒ ዮቲዳኮኔ ኤራና ጋዳ ታ ጉዬ ዩያ ፄሊዛ ዎዴ ፆምፔ ኢስታ ቦላ ዎꬂዛ ዎርቃፌ ኦሴቲዳ ላፑን ባላታ ቤያዲስ። ሄ ኢስታ ቦላ ፆምፔ ዎꬂዛ ባላታ ጊዶን ኣሳ ና ሚሳቲዛዴ ዴማዲስ። ኢዚካ ሂርኪ ቶሆ ቂርጴ ጋኪዛ ኣዱሳ ማይዖ ማይዒዴስ፤ ቲራ ቦላካ ዎርቃ ማይዖ ማይዒዴስ። ኢዛ ሁዔይኔ ኢዛ ሁዔ ቢናናይ ቃስ ቦꬃ ሻች ሚሳቲዛ ቦꬃ ሱፌ ጌቴቲዛ ካꬃ ማላ። ኢዛ ኣይፌቲካ ታማ ላጮ ሚሳቴቴስ። ኢዛ ቶሆቲ ታማ ቦንቆን ቆፄቲ ኬዚዳ ፃርቂማላ ሚሳቴቴስ። ኢዛ ቃላይካ ዎልቃማ ፒሳ ሃꬄ ጊሪዛ ማላ ጊሬስ። ኢዚ ባ ኡሻቻ ኩሼን ላፑን ፆሊንቴታ ኦይኪዲ ኡቲዴስ። ኢዛ ዱናፔ ናምዑ ባጋራ ቃራ ማሻይ ኬዜስ። ኢዛ ኣይፌሶይ ኣዋ ኣርሼ ማላ ፆልቄቴስ። ታኒ ሄሳ ቤያዳ ሃይቂዳ ኣስ ሚሳታዳ ኢዛ ቶሆ ጋርሳን ኩንዳዲስ። ኢዚ ቃስ ታ ቦላ ባ ኡሻቻ ኩሼ ዎꬂዲ “ኔ ባቦፋ! ኮይሮይኔ ዉርሴꬂ ታና። ታኒ ፓፃ ዳይስ። ካሴ ሃይቃዲስኮሺን ሄኮ ታኒ ሃይሳፌ ሜርናስ ፓፃ ዳና። ሃይቆ ቦላኔ ሲዖሌ ቦላ ታኒ ጎዳ። ሄሳ ጊሽ ኔኒ ቤዪዳይሳ ሃዒ ዲዛይሳኔ ጉዬፔ ሃናናይሳ ፃፋ። ኔኒ ታ ኡሻቻ ኩሼን ቤዪዳ ላፑን ፆሊንቴታኔ ፆምፔ ኢስታ ቦላ ዎꬂዛ ዎርቃፌ ኦሴቲዳ ላፑን ባላታ ፁራይ ሄኮ ሃይሳ። ላፑን ፆሊንቴቲ ላፑን ዎሳ ኬꬃታ ኪታንቻታ። ፆምፔ ኢስታ ቦላ ዎꬂዛ ላፑን ዎርቃ ባላቲ ላፑን ዎሳ ኬꬃታ።’ “ኤፌሶኔን ዎሳ ኬꬃ ኪታንቻስ ‘ሃይሲ ላፑን ፆሊንቴታ ባ ኡሻቻ ኩሼን ኦይኪዳዴፌኔ ኢስታ ቦላ ፆምፔ ዎꬂዛ ላፑን ዎርቃ ባላታ ጊዶን ሲሜሬቲዛዴፌ ዮቴቲዴስ። ታኒ ኔ ኦሶዛ፥ ዳፌቴꬃኔ ዳንዳያካ ኤራይስ። ኔኒ ቃስ ኢታታ ዬጋ ኣꬋናስ ዳንዳዮንታይሳ ሃዋሬታ ጊዶንታ ዲሼ ባና ሃዋሬታ ጊዛይታካ ሻካዳ ኢስቲ ዎርዳንቻታ ጊዶይሳ ኔ ጋካ ዴሚዳይሳ ታ ኤራይስ። ኔኒ ዳንዳያን ሚና ኤቂዳይሳኔ ታ ሱንꬃ ጊሽ ሳሌቶንታ ኔ ዋዬ ቤዪዳይሳ ታ ኤራይስ። ጊዲኮካ ታ ኔና ካꬊዛ ኢሲ ሚሺ ዴስ። ሄሲካ ኔኒ ካሴ ኔ ሲቆዛ ኣጋዳሳ። ኔኒ ካሴ ኣይ ማላ ꬎቃሶን ዳሼ ሃዒ ቃስ ኔ ዋና ኩንዲዳኮኔ ኣኔ ዩሻ ቆፓዳ ማሮቴꬃን ሲማ ጌላ። ኔ ካሴ ኦꬂዛ ቤኒ ኔ ኦሶዛ ዛራ ኦꬃ። ኔ ሄሳ ዉርሳ ዛራ ኦꬆንታ ኢፂኮ ታ ኔኮ ያና። ኔኒ ማሮቴꬃን ጌሎንታ ኢፂኮ ኔ ፆምፔ ኢዛ ቦላ ዎꬂዛ ባላ ሄ ኢዚ ዲዛሶፔ ታ ዴንꬃዪቻና። ጊዶ ኣቲን ታ ኔና ጋላቲዛ ኢሲ ሚሺ ዴስ። ሄሲካ ታኒ ኢፂዛ ኒቆላ ባጋ ኣሳ ኦሶ ኔካ ኢፃዳሳ። “ኣያናይ ዎሳ ኬꬃታስ ጊዛይሳ ሃይꬂ ዲዛዴይ ዉሪካ ሲዮ! ‘ፆኒዳዴይ ፆሳ ጋናቴ ጊዶን ዲዛ ዴዖ ሚꬃ ኣይፌ ማና ማላ ታ ኦꬃና።’ “ሳሜርኔሴ ዎሳ ኬꬃ ኪታንቻስ፥ ሃይሲ ኮይሮኔ ዉርሴꬅ ጊዲዳይሳፌ ካሴ ሃይቂዳይሳፌኔ ሃዒ ቃስ ፓፃ ዲዛይሳፌ ዮቴቲዳዛ። ታኒ ኔ ዋዬዛኔ ኔ ማንቆቴꬃ ኤራይስ። ጊዲኮካ ኔኒ ዱሬኮ። ኣይሁዳ ጊዶንታ ዲሼ ባና ኑኒ ኣይሁዳኮ ጊዛ ፃላዔ ማባራ ጊዲዳይቲ ሄይቲ ኔ ሱንꬅ ሞሮይሳ ታ ኤራይስ። ቡሮ ሲንꬃፌ ኔ ቦላ ጋካና ሜቶስ ባቦፋ። ኢንቴ ፓጬታና ማላ ኢንቴፌ ኢሲ ኢሲ ኣስ ዳቡሎሲ ቃሾ ኬꬄ ጌልꬃና። ታሙ ጋላስ ጋካናስ ኢንቴ ዋዬ ቤያናሺን ኔ ሃይቃና ጋካናስ ኣማኔቲዳዴ ጊዳ። ታኒ ኔስ ሜርና ዴዖ ኣክሊሌ ሂስታ ኢማና። “ኣያናይ ዎሳ ኬꬃታስ ጊዛይሳ ሃይꬂ ዲዛዴይ ሲዮ! ፆኒዳዴይ ናምዓንꬆ ሃይቆን ቆሄቴና” ጋ ፃፋ ጊዴስ። ጴርጋሞኔ ዎሳ ኬꬃ ኪታንቻስ “ሃይሲ ናምዑ ባጋራ ቃራ ማሻ ኦይኪዳይሳፌ ዮቴቲዳዛ። ኔኒ ፃላዔ ኣልጋይ ዲዛሶን ዲዛይሳ ታኒ ኤራይስ። ጊዶ ኣቲን ኔኒ ታ ሱንꬃ ሎዔꬃ ኦይካዳሳ። ኔ ታና ኣማኒዛይሳ ኣጋቤይካ። ታስ ኣማኔቲዳ ማርካ ጊዲዳ ኣንቲጳሲ ፃላዔይ ዲዛ ኢንቴ ካታማን ኣሳ ኩሼን ሃይቂዳ ዎዴካ ኔ ታና ኣማኖ ኣጋቤይካ። ጊዲኮካ ታ ኔና ካꬊዛ ኢሲ ሚሺ ኔ ቦላ ዴስ። ሄሲካ ባላዓሜ ቲሚርቴ ኦይኪዳ ኢሲ ኢሲ ኣሳቲ ኢንቴ ጊዶን ዴቴስ። ሄሲ ባላዓሜይ ኢስራዔሌ ኣሳይ ኤቃስ ያርሼቲዳ ካꬅ ሚዲኔ ላይማ ላይማቲዲ ꬉጴታና ማላ ባላቄ ዞሪዳዴ። ሄሳꬆካ ኒቆላ ባጋ ኣሳታ ቲሚርቴ ኦይኪዳ ኣሳቲካ ኢንቴ ጊዶን ዴቴስ። ሄሳ ጊሽ ማሮቴꬃን ጌላ፤ ኣካይ ጊኮ ታኒ ኤሌሳዳ ኔኮ ባዳ ኔና ታ ዱናፔ ኬዚዛ ማሻ ሚሳቲዛ ቃላራ ኦላና። “ኣያናይ ዎሳ ኬꬃታስ ጊዛይሳ ሃይꬂ ዲዛዴይ ሲዮ! ፆኒዳዴስ ታ ቆታን ዲዛ ማናፌ ኢማና። ኢዚ ታስ ጊዲዳይሳ ቤሳናስ ኢዛ ቦላ ኦራꬃ ሱንꬂ ፃፌቲዳ ቦꬃ ሹች ኢዛስ ታ ኢማና። ሄሳካ ኤኪዳዴፌ ኣቲን ሃራ ኣሲ ኦኒካ ኤሬና። “ቲያፂሮኔ ዎሳ ኬꬃ ኪታንቻስ ሂዝጋ ፃፋ ‘ሃይሲ ታማ ላጮ ሚሳቲዛ ኣይፌቲ ዲዛዴፌኔ ቦንቂዳ ታማን ጌሊ ቆፄቲ ኬዚዳ ፃርቂማላ ሚሳቲዛ ቶሆቲ ዲዛዴፌ ፆሳ ናፔ ኪቴቲዳዛ። ታኒ ኔ ኦሶኔ ኔ ሲቆ፥ ኔ ኣማኖኔ ኔ ሃጋዞ፥ ኔ ዳንዳያን ሚኖይሳካ ኤራይስ። ካሴ ኦሶዛፔ ጉዬይሲ ኣꬊዛይሳካ ታ ኤራይስ። ጊዶ ኣቲን ታ ኔና ካꬊዛ ሚሺ ዴስ። ሄሲካ ባና ‘ታ ናቤ’ ጊዛ ማጫሳዮ ኤሊዛቤሎ ኔኒ ቤሳ ኣጊዳ ጊሽ ኢዛ ታስ ኦꬂዛይቲ ላይማ ላይማታና ማላኔ ኤቃስ ያርሼቲዳ ካꬅ ማና ማላ ኢዛ ታማርሳዳ ባሌꬃዱስ። ኢዛ ማሮቴꬃን ጌላና ማላ ታ ኢዚስ ዎዴ ኢማዲስሂን፥ ኢዛ ቃስ ባ ላይማቴꬃፌ ሲማናስ ኮያቤይኩ። ሄሳ ጊሽ ታ ኢዞ ዋዬ ኣልጋ ቦላ ዬጋና። ኢዚራ ኦꬂዳ ኣሳቲ ባ ኢታ ኦሶፔ ማሮቴꬃን ሲሞንታ ኢፂኮ ኢዚራ ኢሲፌ ላይማቲዳ ኡባታ ቦላ ጊታ ሜቶ ታ ኤሃና። ታኒ ኢዚ ናይታ ሃይቆን ቃፃያና። ዎሳ ኬꬃቲ ዉሪካ ኣሳ ቆፋኔ ኣሳ ኣሞ ሻካ ኤሪዛይ ታና ጊዲዳይሳ ኤራና። ታኒ ኢንቴስ ኢሳስ ኢሳስ ኢዛዴ ኦሶ ማላ ኢማና። “ቲያፂሮኔን ዲዛይታስ ኢንቴሲኔ ሃይሳ ኢታ ቲሚርቴ ታማሮንታይታስ ኡባስ ሄሳꬆካ ኢሲ ኢሲ ‘ፃላዔስ ሃይሲ ጪማ ፁራ’ ጌቴቲዛይሳ ካሎንታይታ ኢንቴና ታኒ ሃራ ቶሆ ቶሲኬ። ጊዲኮካ ታ ሄ ባና ጋካናስ ኢንቴስ ዲዛዝ ዉርሲ ሚንꬂ ኦይኪቴ። ፆኒዳዴሲኔ ታ ኦሶን ዉርሴꬅ ጋካናስ ሚኒዛዴስ ኣይዛቤታ ቦላ ታ ጎዳቴꬅ ኢማና። ኢዚ ኢስታ ቢራታ ጉፌራ ሃራና። ኡርቃፌ ሜꬌቲዳ ሚሻ ማላ ኢዚ ቡኪዲ ሊቂሳና። ሄሲ ሄ ጎዳቴꬃይካ ታኒ ታ ኣዋፔ ኤኮ ጎዳቴꬃ ማላ። ታ ኢዛስ ዎንታ ቦላ ኬዚዛ ፆሊንቴዛ ኢማና። ኣያናይ ዎሳ ኬꬃታስ ጊዛይሳ ሃይꬂ ዲዛይ ዉሪ ሲዮ!” ጋዳ ፃፋ ጊዴስ። ሳርዴሴ ዎሳ ኬꬃ ኪታንቻስ፥ “ሃይሲ ፆሳ ኣያና ላፑናታፔኔ ፆሊንቴታ ኦይኪዳዴፌ ዮቴቲዳዛ። ታ ኔ ኦሶ ኤራይስ። ኔኒ ሱንꬃን ፓፃ ዳሳ ሺን ቃስ ሃይቃዳሳ። ቤጋ! ሃይቃና ማቲዳይሳኔ ኔስ ዉራሼ ጉꬅ ኣቲዳ ዎልቃዮ ዛራ ሚንꬃ። ታኒ ታ ጎዳ ሲንꬃን ኔ ኦሶይ ኩሜꬅ ጊዲን ቤያቤኬ። ሄሳ ጊሽ ኔኒ ኣይ ማላ ቲሚርቴ ኤኪዳኮኔ ኔ ሲዮይሳ ዩሻ ቆፓኔ ናጋ። ማሮቴꬃንካ ጌላ፤ ኔኒ ቤጎንታ ኣጊኮ ቃስ ታ ካይሶ ማላ ኔ ቆፖንታ ፑቱ ጋና። ታ ኣይ ሳቴን ኔኮ ያናኮኔ ኔ ኤራካ። ጊዶ ኣቲን ባ ማይዖ ቱኒሶንታይቲ ሳርዴሴን ጉꬃ ኣሳቲ ኔናራ ዴቴስ። ሄይቲ ቦꬃ ማይዖ ማይዓናይሲ ኢስታስ ቤሲዛ ጊሽ ኢስቲ ቦꬃ ማይዖ ማይዒዲ ታናራ ባና። ፆኒዳዴይ ኢስታꬆካ ቦꬃ ማይዖ ማይዓና። ኢዛዴ ሱንꬅ ታኒ ታ ኣዋ ሲንꬃኒኔ ኪታንቻታ ሲንꬃን ኤሪሳና። ዴዖን ዲዛይታ ሱንꬂ ፃፌቲዳ ዴዖ ማዝጋባፔ ቁጪኬ። “ኣያናይ ዎሳ ኬꬃታስ ጊዛይሳ ሃይꬂ ዲዛዴይ ሲዮ! ፊላዴልፊያ ዎሳ ኬꬃ ኪታንቻስ “ሃይሲ ጌሺኔ ቱማንቻ ጊዲዳይሳፌ ዳዉቴ ኬꬃ ቁልፔ ኦይኪዳይሳፌ ዮቴቲዳይሳ። ኢዚ ዶዪዳይሳ ኦኒካ ጎርዴና። ኢዚ ጎርዲዳዝ ኦኒካ ዶዬና። ታኒ ኔ ኦሶ ኤራይስ፤ ሄኮ ኦኒካ ጎርዳናስ ዳንዳዮንታ ዶያ ፔንጌ ኔ ሲንꬃን ዎꬃዲስ፤ ኔ ዎልቃይ ጉꬅ ጊዲዳይሳ ታ ኤራይስ፤ ጊዲኮካ ኔ ታ ቃላ ናጋዳሳ፤ ታ ሱንꬃካ ኔ ካዳቤይካ። ሄሳ ጊሽ ባስ ኣይሁዳ ጊዶንታ ዲሼ ባና ኣይሁዳ ጊዛይቲ ሄይቲ ፃላዔ ማባራፔ ጊዲዳ ዎርዶቲ ዪዲ ኔ ቶሆ ቦላ ኩንዳና ማላ ታ ኦꬃና። ታኒ ኔና ሲቂዳይሳ ኢስቲ ኤራና ማላ ታ ኦꬃና። ኔኒ ዳንዳዪዛዴ ጊዳ ጋዳ ታ ኔስ ዮቶ ቃላ ኔ ናጊዳ ጊሽ ታካ ቡሮ ቢታ ቦላ ዲዛ ኣሳ ፓጫናስ ኩሜꬃ ኣላሜ ቦላ ያና ዋዬዛ ጋላሳፌ ታ ኔና ናጋና። ሄኮ ታ ኤሶን ያና። ኔ ኣክሊሌ ኦኒካ ኤኮንታ ማላ ኔስ ዲዛዝ ሎዔꬃ ኦይካ። ፆኒዳዴ ታኒ ታ ጎዳ ፆሳ ኬꬃን ቱስ ኦꬃና። ኢዚ ሄፔ ሙሌካ ኬዜና። ታ ጎዳ ሱንꬂኔ ታ ጎዳ ካታማዛ ሱንꬂካ ታ ኢዛ ቦላ ፃፋና። ሃና ካታማያ ሳሎፔ ታ ጎዳ ኣቻፌ ዎꬋና ኦራꬃ ዬሩሳላሜ። ታካ ታ ኦራꬃ ሱንꬃ ሄ ኢዛዴ ቦላ ፃፋና። ኣያናይ ዎሳ ኬꬃታስ ዮቲዛይሳ ሃይꬅ ዲዛዴይ ሲዮ! “ሎዶቂያ ዎሳ ኬꬃ ኪታንቻስ ‘ሃይሲ ኣሚን’ ጊዳይሳፌ ቱሙ ኣማኔቲዳ ማርካ ጊዲዳዴፌ ፆሳ ሜꬌቴꬂ ዉሪ ኢዛፔ ቤቲዳዴፌ ዮቴቲዳዛ። ታኒ ኔ ኦሶ ኤራይስ። ኔኒ ኢርፃ ዎይኮ ሚሻ ጊዳካ። ኔኒ ኢርፃ ዎይኮ ሚሻ ጊዲዳኮ ሎዖኮሺን። ኢርፃ ዎይኮ ሚሻ ጊዶንታ ኔ ጮ ዶንቦላ ጊዲዳ ጊሽ ታ ኔና ታ ዱናፔ ኬሳ ጩታና ጋይስ። ‘ታ ዱሬኮ፤ ታስ ዳሮ ሃሮይ ዴስ፤ ታስ ኣይኮይካ ፓጪቤና’ ጋሳ ሺን ኔ ቃስ ጊልቃ፤ ኣይኮይ ባይንዳ ሂዬሳ፥ ማንቆ፥ ቆቄኔ ኔ ካሎ ዲዛዴ ጊዲዳይሳ ኤራቤካ። ኔ ዱሬ ጊዳና ኮይኮ ታፔ ታማን ፓጬቲዳ ዎርቃ ሻማና ማላ ኔኒ ኔ ካሎቴꬃ ዬላቴꬃ ካማናስ ቦꬃ ማይዖ ማይዓና ማላኔ ፄላናስካ ዳንዳያና ማላ ኣይፌ ꬋሌ ሻማዳ ኔ ቲዬታና ማላ ታ ኔና ዞራይስ። ታኒ ታ ዶሲዛይታ ዉርሳ ሃንቃይሲኔ ቃፃያይስ፤ ሄሳ ጊሽ ኔኒ ሚና፤ ማሮቴꬃንካ ጌላ። ሄኮ! ታኒ ፔንጌን ኤቃዳ ፄይጋይስ፤ ኦኒካ ታ ቃላ ሲይዲ ባ ፔንጌዛ ታስ ዶዪኮ ታ ኢዛኮ ጌላዳ ኢዛዴራ ማና። ኢዛዴይካ ታናራ ማና። ታኒ ፆናዳ ታ ኣዋራ ኢዛ ኣልጋን ኡቲዳይሳꬆ ፆኒዳዴይ ታናራ ኢሲፌ ታ ኣልጋ ቦላ ታ ኡቲሳና። “ኣያናይ ዎሳ ኬꬃታስ ጊዛይሳ ሃይꬅ ዲዛይ ሲዮ!” ጋ ፃፋ ጊዴስ። ሄሳፍ ጉዬ ታኒ ሳሎን ዶያ ዲዛ ፔንጌ ቤያዲስ። ታኒ ኮይሮ ሲዪዳይ ዲንኬ ጊሪሳ ማላ ጊሪስ “ሃ ፑዴ ኬዛ፥ ቡሮፔ ሃናና ሚሻታ ታ ኔና ቤሳና” ጊዴስ። ታኒ ሄራካ ኣያናን ሊጲጲ ጋዳ ሳሎን ዲዛ ኣልጋ ቤያዲስ። ሄ ኣልጋዛ ቦላካ ኢሳዴይ ኡቲዴስ። ሄ ኣልጋ ቦላ ኡቲዳይሳ ሜꬋይ ኢያሲጲዴኔ ሴርዲኖኔ ኢንቁ ሚሳቲዛ ኣልጋዛ ዩዪ ኣꬊዲ ማርጊዴ ጌቴቲዛ ኢንቁ ሚሳቲዛ ዙላይ ዴስ። ሄሳꬆካ ሄ ኣልጋዛ ዩዪ ኣꬊዳ ናምዑ ታማኔ ኦይዱ ኣልጋቲ ዴቴስ። ሄ ኣልጋታ ቦላ ቃስ ቦꬃ ማይዖ ማይዒዲ ባ ሁዔ ቦላ ዎርቃ ኣክሊሌ ዎꬂዳ ናምዑ ታማኔ ኦይዱ ጪማቲ ኡቲዳ። ሄ ኣልጋፌ ቃስ ዎልቃንꬂኔ ዳዳ ጊሪስ ኬዜስ። ሄ ኣልጋ ሲንꬃን ፖዒዛ ላፑን ፆምፔቲ ዴቴስ። ሄይቲካ ፆሳ ኣያና ላፑናታ። ሄ ኣልጋ ሲንꬃን ጌሽ ሚልፂ ጊዳ ፆልቂዛ ማስቶቴ ሚሳቲዛ ኣባይ ዴስ። ኢዛ ጊዶን ኣልጋ ዩሾን ዳሮ ኣይፌራ ዲዛ ኦይዱ ዶዓቲ ዴቴስ። ኮይሮ ዶዓዚ ጋሞ ሚሳቴስ። ናምዓንꬆዚ ቃስ ቦራ ሚሳቴስ። ሄꬓንꬆዛ ኣይፌሶይ ኣሳ ኣይፌሶ ሚሳቴስ። ኦይዳንꬆዚ ቃስ ፒራꬊዛ ጎሌ ካፎ ሚሳቴስ። ሄ ኦይዱ ዶዓቲ ኢሶይ ኢሶይ ኡሱፑን ቄፌራ ዴቴስ። ቄፌታ ዩሾኒኔ ቄፌታ ጊዶን ኣይፌይ ኩሚዴስ። ኢስቲ ቃማኔ ጋላስ፥ “ጌሻዉ! ጌሻዉ! ጌሻዉ! ዉርሳ ዳንዳዪዛ ጎዶ! ካሴካ ሃዒካ ዲዛይሶ፥ ቡሮካ ያናይሶ ጉሳፌ ሼምፒ ኤሬቴና። ሄ ዶዓቲ ሄ ኣልጋ ቦላ ኡቲዳይሳሲኔ ሜርናፔ ሜርና ጋካናስ ዲዛይሳስ ጊታቴꬅ፥ ቦንቾኔ ጋላታካ ሺሺዛ ዎዴ ኡባን፥ ናምዑ ታማኔ ኦይዱ ጪማቲ ሜርናፔ ሜርና ጋካናስ ዲዛ ባ ኣልጋ ቦላ ኡቲዳይሳ ሲንꬃን ጉፓኒዲ ኢዛስ ጎይኔቴስ። ባ ኣክሊሌታካ ሄ ኣልጋ ሲንꬃን ዎꬂዲ፥ “ኑ ጎዳ ፆሶ፥ ኔኒ ዉርሳ ሜꬊዳ ጊሽ ሜꬌቴꬂ ዉሪካ ሜꬌቲዳይኔ ሼምፖራ ዲዛይ ኔ ሼኔን ጊዲዳ ጊሽ ጊታቴꬂ፥ ቦንቾይኔ ዎልቃይካ ኔስ ቤሴስ” ጊዳ። ሄ ኣልጋ ቦላ ኡቲዳይሳ ኡሻቻ ኩሼ ቃዓ ጋርሳኒኔ ቦላ ባጋራ ፃፌቲ ኡቲዳ ላፑን ማታሜን ጎርዴቲዳ ኢሲ ፃፄቲ ኡቲዳ ማፃፋ ቤያዲስ። ኢሲ ሚኖ ኪታንቻ ዳይሲ ጊታ ቃላራ “ሃይታ ማታሜታ ቢርሺዲ ሃ ፃꬃ ማፃፋ ዶያናስ ቤሲዛዴይ ኦኔ?” ጊ ሃሳዪሺን ታ ቤያዲስ። ጊዶ ኣቲን ሳሎንካ ጊዲን ዎይኮ ሳዓ ቦላ ዎይኮ ቢታፌ ጋርሳ ባጋንካ ሄ ፃꬃ ማፃፋ ዶዪዲ ኢዛ ጊዶን ዲዛይሳ ፄላናስ ዳንዳዪዳ ኣሲ ኦኒካ ቤቲቤና። ታካ ሄ ፃꬃ ማፃፋ ቢርሺዲ ኢዛ ጊዶ ፄላናስ ቤሲዛዴይ ቤቶንታ ኣጊዳ ጊሽ ዳሮ ዬካዲስ። ሄ ዎዴ ጪማታፔ ኢሳዴይ ታስ “ኔ ዬኮፋ! ሄኮ ዩሁዳ ባጋ ጊዲዳ ዳዉቴ ዛርኬፌ ዴንዲዳ ጋሞይ ኢዚ ካሴ ፆኒዴስ። ኢዚ ሄ ፃꬃ ማፃፋዛኔ ሄ ላፑን ማታሜዛ ዶያናስ ዳንዳዬስ” ጊዴስ። ሄሳፌ ጉዬ ኣልጋ ቦላን ኦይዱ ዶዓታ ጊዶን ሄ ጪማታ ጊዶንካ ሹኬቲዳ ዶርሳ ሚሳቲዛይሲ ኤቂዳይሳ ታ ቤያዲስ። ሄ ዶርሳዛስ ላፑን ካጬይኔ ላፑን ኣይፌይ ዴስ። ሄ ኣይፌቲካ ኩሜꬃ ኣላሜ ኪቴቲዳ ፆሳ ኣያና ላፑናታ። ሄ ዶርሳይ ዪዲኔ ኣልጋ ቦላ ኡቲዳይሳፌ፥ ኡሻቻ ኩሼን ዲዛ ፃꬃ ማፃፋ ኤኪዴስ። ሄ ፃꬃ ማፃፋዛ ኤኪዳ ማላ ኦይዱ ዶዓቲኔ ናምዑ ታማኔ ኦይዱ ጪማቲ ሄ ዶርሳ ሲንꬃን ባ ሊጴን ጉፓኒዳ። ኢስቲካ ኢሶይ ኢሶይ ባ ኩሼን ዲꬃ ማላ ሚሽ ኦይኪዴስ። ሄሳꬆካ ጌሻታ ዎሳ ጊዲዳ ኢዛን ኤፃኔይ ኩሚዳ ዎርቃ ፃሮ ባ ኩሼን ኦይኪ ዴቴስ። ኦራꬃ ዬꬅ ሂዝጊ ዬፂዳ “ኔኒ ኣሳ ዱማ ዱማ ኮቻፌ፥ ዱማ ዱማ ቃላን ሃሳዪዛይታፔ፥ ዱማ ዱማ ቆሞፌኔ ዱማ ዱማ ዴሬፔ ፆሳስ ዎዛናስ ኔ ሹኬቲዳ ጊሽ ሄ ፃꬃ ማፃፋዛ ኤካናሲኔ ማታሜታካ ዶያናስ ቤሲዛዴ ጊዳዳሳ። ኔ ኢስታ ኑ ጎዳ ፆሳስ ካዎታኔ ቄሴታ ኦꬃዳሳ። ኢስቲካ ቢታ ቦላ ካዎታና።” ታኒ ጌዴ ዛራ ፄሊሺን ሄ ኣልጋዛ፥ ዶዓታኔ ጪማታ ዩዪ ኣꬊዳ ዳሮ ኪታንቻታ ቃላ ጊሪስ ሲያዲስ። ኢስታስ ጮራቴꬃይ ዳሮ ሺያኒኔ ዳሮ ሚሎኔን ቆዴቴስ። ኢስቲ ዳሮ ጊታ ቃላን “ሃ ሹኬቲዳ ዶርሳይ ዎልቃ፥ ዱሬቴꬅ፥ ኤራቴꬅ፥ ሚኖቴꬅ፥ ጊታቴꬅ፥ ቦንቾኔ ጋላታ ኤካናስ ቤሴስ” ጊዳ። ሳሎንካ ሳዓ ቦላካ፥ ቢታፌ ጋርሳንካ፥ ኣባ ጊዶን ዲዛ ሜꬌቴꬃ ኡባን “ኣልጋ ቦላ ኡቲዳይሳሲኔ ዶርሳስ ጋላታይኔ ꬎቃቴꬂ፥ ቦንቾይኔ ዎልቃይ ሜርናፔ ሜርና ጋካናስ ኢዛስ ጊዶ!” ጊሺን ታ ሲያዲስ። ኦይዱ ዶዓቲካ “ኣሚን” ጊዳ። ጪማቲካ ባ ሊጴን ጉፋኒዲ ኢዛስ ጎይኒዳ። ሄሳፌ ጉዬካ ሄ ዶርሳይ ላፑን ማታሜታፔ ኮይሮ ማታሜዛ ዶዪሺን ታ ቤያዲስ። ሄ ኦይዱ ዶዓታፔ ኢሶይ ዳዳ ጉጉንꬃ ማላ ቃላራ “ሃ ያ!” ጊሺን ሲያዲስ። ቃሴካ ቦꬃ ፓራ ቤያዲስ። ሄ ፓራዛ ቦላ ባ ኩሼን ዎንዳፌ ኦይኪዳዴይ ዴስ። ኢዛስ ቃስ ኣክሊሌይካ ኢሜቲዴስ። ኢዚካ ፆኒዛዴ ጊዲዲ ፆኖፔ ጌዴ ፆኖን ባናስ ኬዚዴስ። ሄ ዶርሳይ ናምዓንꬆ ማታሜዛ ዶይዳ ማላ ናምዓንꬆ ዶዓዚ “ሃ ያ!” ጊሺን ታ ሲያዲስ። ቃሴካ ሃራ ፄቃ ዞዖ ፓራይ ኬዚዴስ። ሄ ፓራ ቶጊዳዴይ ቢታ ቦላፌ ሳሮቴꬅ ꬋይሳና ማላኔ ኣሳይ ባ ጋርሳን ኢሶይ ኢሳ ዉርሳና ማላ ኦꬂሳናስ ኢዛስ ጎዳቴꬂኔ ዎጋ ጊታ ማሻይ ኢሜቲዴስ። ዶርሳዚ ሄꬓንꬆ ማታሜዛ ዶዪን ሄꬓንꬆ ዶዓዚ “ሃ ያ!” ጊሺን ታ ሲያዲስ። ቃሴ ካሬꬃ ፓራ ቤያዲስ። ሄ ፓራ ቦላ ኡቲዳይሲ ባ ኩሼን ማካ ሚሽ ኦይኪዴስ። ኦይዱ ዶዓታ ጊዶፌ ዪዳ ሚሳቲዛ ቃላ ሲያዲስ፤ ሄ ጊሪሳይካ “ባጋ ኪሎ ጊዲዛ ጊስቴ ኢሳዴስ ኢሲ ጋላሳ ዳሞዛ፤ ቃሴ ኢሲ ኪሎ ኩማና ሳይሶ ፓጬ ጊዲዛ ባንጋይ ኢሲ ጋላሳ ዳሞዛ ጊዶ። ጊዶ ኣቲን ዛይቴኔ ዎይኔ ሚꬅ ቆሆፓ” ጊሺን ታ ሲያዲስ። ሄ ዶርሳይ ኦይዳንꬆ ማታሜዛ ዶዪን ኦይዳንꬆ ዶዓዛ ቃላይ “ሃ ያ!” ጊሺን ሲያዲስ። ቃሴካ ጮሎሎ ፓራ ቤያዲስ። ፓራ ቶጊዳይሳ ሱንꬂ ሃይቆ ጌቴቴስ። ኢዛ ቃስ ዱፎይ ካሌስ። ሃይቆይኔ ዱፎይ ቢታፌ ሳይሶ ኦላን፥ ጋፋን፥ ቦሻኒኔ ባዞ ዶዓን ዎꬋና ማላ ጎዳቴꬂ ኢስታስ ኢሜቲዴስ። ኢቻሻንꬆ ማታሜዛ ኢዚ ዶዪን ፆሳ ቃላ ጊሺኔ ባ ማርካቲዳ ማርካቴꬃ ጊሽ ሃይቂዳይታ ሼምፖታ ያርሾ ያርሺዛሶዛ ጋርሳን ቤያዲስ። ኢስቲ ቃስ ቃላ ꬎቁ ሂስቲዲ “ጌሻኔ ቱማንቻ ጎዳዉ! ኔኒ ቢታ ቦላ ዲዛ ኣሳ ቦላ ፒርዶንታይኔ ኑ ሱꬃ ጊሽ ኔ ሃሎ ኬሶንታይ ኣዪዴ ጋካናሴ?” ጊዲ ዋሲዳ። ኢስታስ ኢሳስ ኢሳስ ቦꬃ ማይዖይ ኢሜቲዴስ። ኢስታ ማላቲካ ቡሮ ሃይቃና። ኢስታ ማላ ኦሳንቻ ጊዲዳ ኢስታ ላጌቲኔ ኢስታ ኢሻታ ቆዳይ ኩማና ጋካናስ ኢስቲ ጉꬃ ዎዴስ ሼምፒዲ ታካና ማላ ኢስታስ ዮቴቲዴስ። ሄሳፌ ጉዬ ሄ ዶርሳይ ኡሱፑንꬆ ማታሜዛ ዶዪን ታኒ ጌዴ ኢዛኮ ፄላዲስ፤ ሄኮ ቢታይ ዎልቃማ ቃꬅ ቃፂዴስ። ኣዋ ኣርሼይ ኣሲ ካዮስ ማይዒዛ ካሬꬃ ማይዖ ማላ ካሬፂዴስ። ኣጊናይካ ኩሜꬃራ ሱꬃ ማላ ዞዓዱስ። ዎልቃማ ኣሱራ ጫርኮይ ጫርኪዲ ሚꬃ ኣይፌ ቆቆፊዛ ማላ ሳሎፔ ፆሊንቴይ ቆቆፌቲዴስ። ሳሎይካ ዋራቃታ ማላ ፃፄቲዲ ኪቺዴስ። ዙማቲኔ ኣባ ጊዶን ዲዛ ጋዴቲ ዉሪካ ባ ዲዛሶፔ ꬋዪቺዳ። ቢታ ቦላ ዲዛ ካዎቲ ቢታ ሃሪዛይቲ፥ ኦላ ሃላቃቲ፥ ዱሬቲ፥ ዎልቃማቲ፥ ኣሽካራቲኔ ጎዳቲ ዉሪካ ጎንጎሎ ጊዶኒኔ ዙማታ ጋርሳን ዛላታ ጋርሳን ቆቴቲዳ። ዙማታኔ ዛላታካ “ኑና ካሚቴ! ኣልጋ ቦላ ኡቲዳይሳ ሲንꬃፌ፥ ሄ ዶርሳዛ ሃንቆፌ ኑና ቆቲቴ። ዎልቃማ ሃንቆ ጋላሳይ ጋኪዴስ። ኢዛ ኦኔ ዳንዳያናይ?” ጊዳ። ሄሳፌ ጉዬ ኦይዱ ኪታንቻታ ቢታ ቦላ ኦይዱ ባጋራ ኤቂዳይታ ቤያዲስ። ኢስቲካ ቢታ ቦላ ጊዲን ዎይኮ ኣባ ቦላ ዎይኮ ሚꬃ ቦላ ኣይ ጫርኮይካ ጫርኮንታ ማላ ኦይዱ ባጋራ ዪዛ ቦሻ ጫርኮ ዉርሲ ኦይኪዳ። ዴዖ ፆሳ ማታማ ኦይኪዳ ሃራ ኪታንቻይ ኣዋ ኣርሼይ ሞኪዛ ባጋራ ሃ ዪሺን ታ ቤያዲስ። ቢታኔ ኣባ ቆሃናስ ኢስታስ ጎዳቴꬂ ኢሜቲዳ ኦይዱ ኪታንቻታ ባ ቃላ ꬎቁ ሂስቲዲ፥ “ኑኒ ኑ ጎዳ ኦሳንቻታ ሊጴ ቦላ ማታሜ ዎꬃና ጋካናስ ቢታ ቦላ ጊዲን ዎይኮ ኣባ ጊዶን ዲዛይታ ጊዲን ዎይኮ ሚꬃታ ጊዲንካ ሄይታንታ ቆሆፒቴ” ጊ ዋሲዴስ። ታካ ማታሜይ ኢስታ ቦላ ዎꬊዳይታ ቆዳ ሲያዲስ። ኢስራዔሌ ኣሳ ኮቻ ኡባፌ ማታሜይ ኢስታ ቦላ ሾጬቲዳይታ ቆዳይ ፄታኔ ኦይዱ ታማኔ ኦይዱ ሺ ኣሳ። ዩሁዳ ቆሞፌ ማታሜይ ኢስታ ቦላ ሾጬቲዳይቲ፥ ታማኔ ናምዑ ሺ፥ ሮቤሌ ቆሞፌ ታማኔ ናምዑ ሺ፥ ጋዴ ቆሞፌ ታማኔ ናምዑ ሺ፥ ኣሴሬ ቆሞፌ ታማኔ ናምዑ ሺ፥ ኒፍታሌሜ ቆሞፌ ታማኔ ናምዑ ሺ፥ ሚናሴ ቆሞፌ ታማኔ ናምዑ ሺ፥ ሲሞና ቆሞፌ ታማኔ ናምዑ ሺ፥ ሌዌ ቆሞፌ ታማኔ ናምዑ ሺ፥ ዪሳኮሬ ቆሞፌ ታማኔ ናምዑ ሺ፥ ዛቢሎኔ ቆሞፌ ታማኔ ናምዑ ሺ፥ ዮሴፌ ቆሞፌ ታማኔ ናምዑ ሺ፥ ቢኒያሜ ቆሞፌ ታማኔ ናምዑ ሺ። ሄሳፌ ጉዬ ታ ፄሊሺን ቆዳይ ባይንዳ ዳሮ ዴሬይ ዲዛይሳ ቤያዲስ። ሄይታንቲካ ዴሬፔ፥ ዱማ ዱማ ቆሞፌ፥ ዱማ ዱማ ዛርኬፌኔ ዱማ ዱማ ቃላ ሃሳዪዛይታፔ ሺቄቲዳይታ። ሄይቲ ዉሪ ቦꬃ ማይዖ ማይዒዲ ዛምባ ሃይꬅ ባ ኩሼን ኦይኪዲ ኣልጋ ሲንꬃኒኔ ዶርሳዛ ሲንꬃን ኤቂዳ። ቃላ ꬎቁ ሂስቲዲ “ኣቶቴꬂ ኣልጋ ቦላ ኡቲዳ ኑ ጎዳፔኔ ዶርሳዛፔኮ!” ጊዳ። ኢዛ ኪታንቻቲ ዉሪካ ኢዛ ኣልጋስ፥ ጪማታኔ ኦይዱ ዶዓታ ዩይ ኣꬊ ኤቂዳ ኣልጋዛ ሲንꬃን ጉፋኒዲ ፆሳስ ጎይኒዳ። “ኣሚን! ሳባይ፥ ጊታቴꬂ፥ ኤራቴꬂ፥ ጋላታይ፥ ቦንቾይ፥ ዎልቃይኔ ሚኖቴꬂ ኑ ጎዳስ ፆሳስ ሜርናፔ ሜርናስ ጊዶ። ኣሚን!” ጊዳ። ጪማታ ጊዶፌ ኢሳዴይ ታኮ ሲሚዲ ታና “ሃይቲ ቦꬃ ማይዖ ማይዒዳይቲ ኦናንቴ? ኢስቲ ኣዋፔ ዪዳይቴ?” ጊዴስ። ታካ “ጎዳዉ! ኔ ኤራሳ” ጋዲስ። ኢዚካ ታስ “ሃይቲ ዎልቃማ ዋዬዛ ካንꬂዲ ዪዳይታ። ኢስቲ ባ ማዮካ ዶርሳ ሱꬃን ሜጪ ጌሺዳ። ሄሳ ጊሽ ፆሳ ኣልጋ ሲንꬃን ዴዒዲ ቃማኔ ጋላስ ኢዛ ኬꬃን ኢዛስ ኦꬄቴስ። ኣልጋ ቦላ ኡቲዳይሲ ባ ቦንቾራ ቤቲዲ ኢስታስ ኩዋሶ ጊዳና። ሃይሳፌ ጉዬ ኢስቲ ጋፌቴና፥ ሳሞቴቴና፤ ኣዋ ኣርሼ ሴላይካ ኢስታ ቦቼናኔ ሆምቤይካ ኢስታ ሆምቤና። ኣልጋዛስ ጊዶ ኣዳን ኡቲዳ ዶርሳይ ኢስታ ሄሚዛዴ ጊዳና። ኢስታካ ጌዴ ዴዖ ሃꬃ ፑልቶይ ዲዛሶ ካሌꬃና። ፆሲ ኢስታ ኣይፌፔ ኣፉንꬃ ቁጫና” ጊዴስ። ዶርሳይ ላፑንꬆ ማታሜዛ ዶዪን ባጋ ሳቴ ጊዲዛይሳ ኬና ሳሎይ ጮዑ ጊዴስ። ፆሳ ሲንꬃን ኤቂዛ ላፑን ኪታንቻታ ታኒ ቤያዲስ። ሄ ኣሳታስካ ላፑን ዲንኬይ ኢሜቲዴስ። ኤፃኔ ኢዛን ጩዋሲዛ ዎርቃፍ ኦሴቲዳይሳ ኦይኪዳ ኪታንቻይ ዪዲ ያርሾ ኢዛን ያርሺዛሶዛ ኣቻን ኤቂዴስ። ኣልጋ ሲንꬃን ዲዛ ዎርቃፌ ኦሴቲዳ ያርሾ ኢዛ ቦላ ያርሺዛይሳ ቦላ ጌሻታ ዎሳራ ኢሲፌ ሺሺዛ ዳሮ ኤፃኔይ ኢዛስ ኢሜቲዴስ። ሄ ኤፃኔዛ ጩዋይ ፆሳስ ዱማቲዳ ኣሳታ ዎሳስ ሄ ኪታንቻ ኩሼፔ ፑዴ ፆሳ ሲንꬅ ኬዚዴስ። ሄሳፌ ጉዬ ኪታንቻዚ ኤፃኔ ኢዛን ጩዋሲዛይሳ ኦይኪዲ ያርሾ ያርሺዛሶዛፔ ታማ ኤኪ ኢዛን ኩንꬂዲ ዱጌ ቢታ ቦላ ዬጊዴስ። ዳዳይ ዳዳቲዴስ፤ ጊርሲ ጊርዴስ፤ ዎልቃንꬂ ዎልቃሚዴስ፤ ቢታይካ ቃፂዴስ። ላፑን ዛዬ ኦይኪዳ ላፑን ኪታንቻቲ ባ ዛዬ ፑናናስ ጊጌቲዳ። ኮይሮ ኪታንቻዚ ባ ዛዬዛ ፑኒዴስ፤ ሻቺኔ ሱꬂ ዋላኬቲዳ ታማይ ሜꬌቲዲ ዱጌ ቢታ ቦላ ዬጌቲዴስ፤ ቢታፌ ጪጎይ ፁጌቲዴስ፤ ሚꬃፌካ ጪጎይ ፁጌቲዴስ፤ ጪሊላ ማታይካ ዉሪ ፁጌቲዴስ። ናምዓንꬆ ኪታንቻይካ ባ ዛዬዛ ፑኒዴስ፤ ኢሲ ጊታ ዙማ ሚሳቲዛ ሚሺ ኤፂሼ ዱጌ ኣባ ጊዶ ዬጌቲዴስ፤ ኣባስ ጪጎይ ሱꬅ ጊዲዴስ። ኣባ ጊዶን ሼምፖራ ዲዛ ሜꬌቴꬃፌ ጪጎይ ዉሪ ሃይቂዴስ። ማርካቤታፔካ ጪጎይ ኩሜꬅ ꬋዪዴስ። ሄꬓንꬆ ኪታንቻዚ ባ ዛዬዛ ፑኒዴስ። ፆምፔ ማላ ኤፂዛ ኢሲ ጊታ ፆሊንቴይ ሳሎፔ ዱጌ ኩንዲዴስ። ኢዚ ኩንዲዳይ ሻፋታ ጪጎ ቦላኔ ሃꬃ ፑልቶታ ጪጎ ቦላ። ሄ ፆሊንቴዛ ሱንꬃይ ጫሞ ጌቴቴስ፤ ሃꬃስ ጪጎይ ጫሞ ጊዲዴስ፤ ሄ ጫሞ ሃꬃ ጋሶን ዳሮ ዴሬይ ሃይቂዴስ። ኦይዳንꬆ ኪታንቻይ ባ ዛዬዛ ፑኒዴስ፤ ኣዋ ኣርሼስ ጪጎይ፥ ኣጊናስ ጪጎይ፥ ፆሊንቴታስ ጪጎይ ሾጬቲዴስ፤ ሄሳ ጊሽ ሄይታንታ ፖዖፔ ጪጎይ ꬉሚዴስ፤ ሄሳ ማላንካ ጋላሳፌ ጪጎይ ኦማርስ ጊዲዴስ። ሄሳꬆካ ኦማርሳፔ ጪጎይ ፖዖይ ባይንዳ ꬉማ ጊዲዴስ። ታ ቃስ ዛራ ፄሊሺን ኢሲ ጎሌ ካፎይ ሳሎ ቦላ ፒራꬊሼ ጊታ ቃላን “ሃንኮ ኣቲዳ ሄꬑ ኪታንቻቲ ባ ዲንኬታ ጊሪስ ሲሲዛ ዎዴ ቢታ ቦላ ዲዛ ኣሳስ ኣዬ-ኣና! ኣዬ-ኣና! ኣዬ-ኣና!” ጊሺን ሲያዲስ። ኢቻሻንꬆ ኪታንቻይ ባ ዛዬዛ ፑኒዴስ። ታ ቃስ ሳሎፔ ካሴ ዱጌ ቢታ ቦላ ኩንዲዳ ፆሊንቴዛ ቤያዲስ። ኢዛስ ቃስ ጪማ ኦላ ዶዪዛ ቁልፔይ ኢሜቲዴስ። ኢዚካ ሄ ጪማ ኦላዛ ዶዪዴስ። ሄ ጪማ ኦላፔ ዎልቃማ ታማ ጩዋ ማላ ጩዋይ ኬዚዴስ። ሄ ኦላፌ ኬዚዳ ጩዋዛ ጌዶን ኣዋ ኣርሼይኔ ሳሎይ ꬉሚዴስ። ሄ ጩዋፔ ቢታ ቦላ ቦሌይ ኬዚዴስ። ቢታ ቦላ ዲዛ ማስማሶታስ ዲዛ ዎልቃ ማላ ዎልቃይ ኢስታስ ኢሜቲዴስ። ቢታ ቦላ ዲዛ ማታ ጊዲን ዎይኮ ኣይ ሚሺካ ሃራ ጪሊላ ሚሽ ሞንታ ማላ ዎይኮ ኣይ ሚꬂካ ቆሆንታ ማላ ኢስታስ ዮቴቲዴስ። ኢስቲ ቆሃና ቤሲዛይ ቃስ ሊጴ ቦላ ፆሳ ማታሜይ ባይንዳ ኣሳታ ፃላላ ጊዳና ማላ። ሄ ኢስታካ ኢቻሹ ኣጊና ጋካናስ ዋዬ ፃላላ ዋዪሳና ኣቲን ዎꬎ ዎꬋና ማላ ፒቃዴይ ኢስታስ ኢሜቲቤና። ሄ ቦሌቲ ኣሳ ቦላ ጋꬂዛ ዋዬዚ ማሲማሶይ ኣስ ዱኪኮ ኣስ ሴሊዛ ሴላ ማላ። ሄ ጋላሳታን ኣሳይ ሃይቃና ኮያና ሺን ሃይቆ ዴሜና። ሃይቃናስ ኣሞታና ሺን ሃይቆይ ኢስታፌ ባቃታና። ቦሌቲ ቃስ ኦላስ ጊጌቲዳ ፓራታ ሚሳቴቴስ፤ ኢስታስ ሁዔ ቦላ ዎርቃ ኣክሊሌ ሚሳቲዛ ሚሺ ዴስ። ኢስታ ኣይፌሶይ ኣሳ ኣይፌሶ ሚሳቴስ። ኢስታ ሁዔ ኢꬂኬይ ማጫሳ ሁዔ ኢሲኬ ሚሳቴስ፤ ኢስታ ኣቼይ ቃስ ጋሞ ኣቼ ሚሳቴስ። ቢራታፔ ኦሴቲዳ ፁሩሬ ጌቴቲዛ ማይዖ ማላ ቲራ ቦላ ማይዒዛ ማይዖይ ኢስታስ ዴስ፤ ኢስታ ቄፌይ ጊሪዛ ጊሪሳይ ኦላስ ቶጌቲዛ ዳሮ ፓራኔ ፓራ-ጋሬታ ጊሪሳ ማላ ጊሬስ። ኢስታስ ማሲማሶ ጎይና ማላይኔ ዱኪዛሶይ ዴስ። ኢስታስ ጎይና ጊዶን ኢቻሹ ኣጊና ጋካናስ ኣስ ቆሂዛ ዎልቃይ ዴስ። ካዎይካ ኢስታስ ዴስ። ሄ ኢዚካ ጪማ ኦላ ኪታንቻዛ። ኢዛ ሱንꬃይካ ኢብራዌታ ቃላራ “ኣባዶኔ” ጌቴቴስ። ቃሴ ጊሪኬ ቃላራ “ኣጲሊዮኔ” ጌቴቴስ። ሄሳ ጉሲካ ፒቲ ꬋይሲዛይሳ ጉሳ። ኮይሮ ሂርጊሶ ዋሶይ ኣꬊዴስ። ሄሳፌ ቃስ ሃራ ናምዑ ዋሶይ ቡሮ ያና። ኡሱፑንꬆ ኪታንቻይካ ባ ዛዬዛ ፑኒዴስ። ሄኮ! ፆሳ ሲንꬃን ዲዛ ዎርቃፌ ኦሴቲዳ ያርሾ ያርሺዛሶዛን ዲዛ ካጬታ ጊዶፌ ጊሪስ ሲያዲስ። ሄ ጊሪሳይካ ዲንኬ ኦይኪዳ ኡሱፑንꬃ ኪታንቻዛꬆ “ዎጋ ሻፋን ኤፊራፂሴን ቃሼቲ ዲዛ ኦይዱ ኪታንቻታ ቢርሻ ዬዳ” ጊዴስ። ሃይሳ ሃ ሳቴዛሲኔ ሃ ጋላሳስ፥ ሃ ኣጊናሲኔ ሃ ላይꬃስ ጊጌቲዳ ኦይዱ ኪታንቻቲ ኣሳ ዜሬꬃፌ ጪጎ ባጋ ዎꬋና ማላ ቢርሼቲዳ። ሄ ፓራን ኦሊዛ ኣሳታ ጮራቴꬃይ ፄታታን ቆዴቲዛ ሚሎኔ ጊዲዳይሳ ታኒ ሲያዲስ። ፓራቲኔ ሄ ፓራታ ቶጊዳ ኣሳታ ታኒ ኣጁታን ቤዪዳይቲ ሃይሳፌ ካሊዛይሳ ማላኮ! ኢስታስ ቲራ ቦላ ዲዛ ፁሩሬዚ ታማ ቦንቆ ማላ ዞዖ፤ ሳሎ ማላ ካሬꬂኔ ጋላልዖ ሚሳቴስ። ፓራታ ሁዔይ ጋሞ ሁዔ ሚሳቴስ። ኢስታ ዱናፔ ታማይኔ ጩዋይ ዲኔ ጌቴቲዛ ሚሼ ኬዜስ። ኢስቲ ባ ዱናፔ ኬሲዳ ታማይ ጩዋይኔ ዲኔይ ሃ ሄꬑ ቦቻታን ኣሳ ዜሬꬃፌ ጪጎይ ሃይቂዴስ። ሄ ፓራታ ዎልቃይ ኢስታስ ዱና ጊዶኒኔ ጎይና ቦላ ዴስ። ኢስታ ጎይናይ ሾሽ ሚሳቴስ። ኢዛስ ሾሻ ሁዔይካ ዴስ። ኢስቲ ኣሴ ሄሳን ቆሄቴስ። ሃይታ ሃ ቦቻታን ሃይቆፔ ኣቲዳ ኣሳ ዜሬꬃቲ ካሴ ባ ኦꬂዳ ኢታ ኦሶፔ ሲሚዲ ማሮቴꬃን ጌሊቤይቴና። ዳይዳንꬃስ ዎርቃፌ፥ ቢራፔ፥ ፃርቂማላፔ፥ ሹቻፌ፥ ሚꬃፌ፥ ኦሴቲዳ ፄላናስ ዎይኮ ሃይꬃን ሲያናስ ዎይኮ ሃሙታናስ ዳንዳዮንታ ኤቃታስ ጎይኖ ኣጊቤይቴና። ሄሳꬆካ ሼምፖ ዎꬎፔ፥ ቢታፔ፥ ላይማፌኔ ካይሶቴꬃፌ ሲሚዲ ማሮቴꬃን ጌሊቤይቴና። ሄሳፌ ጉዬ ሻራ ማይዒዳ ሃራ ሚኖ ኪታንቻይ ሳሎፔ ዱጌ ዎꬊዛይሳ ቤያዲስ፤ ዙላይ ኢዛ ሁዔ ዩይ ኣꬊዴስ። ኢዛ ኣይፌሶይ ኣዋ ኣርሼ ሚሳቴስ። ኢዛ ቶሆቲካ ታማ ቱስ ሚሳቴቴስ። ፃꬃፌ ቢርሼቲዳ ኢሲ ጉꬃ ማፃፋ ዲዛሮ ባ ኩሼን ኦይኪ ኡቲዴስ። ኢዚ ባ ኡሻቻ ቶሆዛን ኣባ ሃዲሪሳ ቶሆዛን ቃስ ቢታ ዬꬊ ኤቂዴስ። ጋሞ ፃጎ ማላ ጊታ ቃላራ ፃጊዴስ። ኢዚ ፃጊዳ ማላ ላፑን ዳዳቲ ባ ጊሪሳ ሲሲዳ። ላፑን ዳዳቲ ባ ጊሪሳ ሲሲዳ ማላ ታ ፃፋና ጋዳ ቆፓዲስ ሺን “ሃ ላፑን ዳዳቲ ዮቶይሳ ቁምዓ ዎꬃ ኣቲን ፃፎፓ!” ጊዛ ቃላ ሳሎፔ ሲያዲስ። ሄሳፌ ካሊዲ ኣባ ቦላኔ ቢታ ቦላ ኤቂ ዲሺን ታ ቤዪዳ ኪታንቻዚ ባ ኡሻቻ ኩሼ ፑዴ ሳሎ ዴንꬂዲ፥ ሜርናፔ ሜርናስ ዲዛይሳን ሳሎኔ ሳሎን ዲዛይታ ቃሴካ ቢታኔ ቢታ ጋርሳን ዲዛይታ፥ ኣባኔ ኣባ ጊዶን ዲዛይታ ሜꬊዳ ፆሳ ሱንꬅ ፄይጊ ጫቂዲ “ሃይሳፌ ጉዬ ኢዚ ጋምዔና! ጊዶ ኣቲን ላፑንꬃ ኪታንቻይ ባ ዛዬዛ ፑኒ ሲሲዛ ጋላሳታን ኢዚ ባ ኦሳንቻታሲኔ ናቤታስ ኤሪሲዳ ማላ ፆሳ ፁራይ ፖሌታና” ጊዴስ። ሄሳፌ ጉዬ ታኒ ሳሎፔ ሲዪዳ ቃላይ “ኣባ ቦላኔ ቢታ ቦላ ኤቂዳ ኪታንቻ ኩሼን ዶዬቲ ዲዛ ፃꬃ ማፃፋዛ ባዳ ኤካ!” ጊዲ ቃሴካ ታስ ዮቲዴስ። ታኒ ቃስ ኪታንቻዛኮ ባዳ “ሂኖ ቄሪ ፃꬃን ዲዛ ማፃፋዮ ታስ ኢማ” ጋዲስ። ኢዚካ “ሄይ ኤካዳ ማ! ኢዛ ኔና ኔ ኡሎ ጊዶን ጫማና ሺን ዱናን ቃሴ ኔና ኤሳ ማላ ማልዓና” ጊዴስ። ታካ ሄ ቄሪ ፃꬃ ማፃፋዮ ኪታንቻዛ ኩሼፔ ኤካዳ ማዲስ። ኢዛካ ታ ዱናን ታና ኤሳ ማላ ማልዓዱስ ሺን ታ ማዳ ኣጊን ጉዬፔ ታ ኡሎ ጊዶን ታና ጫማዱስ። ሄሳፌ ቃሴ “ዳሮ ዱማ ዱማ ቆሞ ኣሳ ጊሽ ዱማ ዱማ ቃላን ሃሳዪዛ ኣሳታ ጊሺኔ ካዎታ ጊሽ ቃሴካ ቲንቢቴ ኔ ዮታና ማላ ኔስ ቤሴስ” ጌቴቲዲ ታስ ዮቴቲዴስ። ሄሳፌ ጉዬ ታ ኢዛራ ዋꬋ ዋꬋናስ ጉፌ ሚሳቲዛ ሾምቦቆይ ታስ ኢሜቲዴስ። ታስ ሂዝጌቲዴስ “ኔኒ ዴንዳዳ ፆሳ ኬꬃዛኔ ጊዶ ኪፊሌታ ዋꬋ! ሄን ጎይኒዛያታ ታይባ። ፆሳ ዎሳ ኬꬃፌ ካሬራ ጮ ዲዛሶዛ ኣጋጋ። ሄሲ ኣይዛቤታስ ኢሜቲዳሶ ጊዲዳ ጊሽ ኔ ኢዛ ዋꬎፋ። ኣይዛቤቲ ጌሻ ካታማዮ ኦይዱ ታማኔ ናምዑ ኣጊና ጋካናስ ዬꬊ ሃራና። ታ ማርካ ናምዓቲ ካዮ ማይዖ ማይዒዲ ኢሲ ሺያኔ ናምዑ ፄታኔ ኡሱፑን ታሙ ጋላስ ጋካናስ ቲንቢቴ ዮታና ማላ ታ ኢስታስ ዎልቃ ኢማና።” ሄይቲ ቢታ ጎዳ ሲንꬃን ኤቂዛ ናምዑ ዎጋራ ሚꬃቲኔ ኢስታ ቦላ ፆምፔ ዎꬂዛ ናምዑ ባላታ። ኦኒካ ኢስታ ቆሃናስ ኮይኮ ኢስታ ዱናፔ ታማይ ኬዚዲ ኢስታ ሞርኬታ ፁጋና። ኢስታ ቆሃና ኮዪዛዴንቲ ዉሪ ሃይቃናይ ሄሳ ማላና። ኢስቲ ቲንቢቴ ዮቲዛ ሄ ጋላሳታን ኢራይ ቡኮንታ ማላ ሳሎ ጎርዳናስ ማታይ ኢስታስ ዴስ። ሄሳꬆካ ሃꬃታ ሱꬃን ላማናስ ኮይኮካ ሃራ ኣይ ማላ ቦሻንካ ቢታ ሾጫናስ ዎልቃይ ኢስታስ ዴስ። ኢስቲ ባ ማርካቴꬃ ዉርሲዳፔ ጉዬ ሂርኪ ጪማ ኦላፌ ኬዚዛ ዶዓይ ኢስታራ ኦሌቲዲ ኢስታ ፆናናኔ ዎꬋና። ኢስታ ኣሃይ ሌሚሶራ ሶዶሜኔ ጊብፄ ጌቴቲዛ ጊታ ካታማይን ጮ ዴንባን ዚንዓና። ሂና ካታማያ ካሴ ኢስታ ጎዳይ ኢዚን ካቄቲዳሶዮ። ዱማ ዱማ ቆሞቲኔ ዱማ ዱማ ዛርኬቲ፥ ዱማ ዱማ ቃላን ሃሳዪዛይቲኔ ዴሬቲ ሄꬑ ጋላሲኔ ባጋ ጋካናስ ኢስታ ኣሃ ፄላናኔ ሄ ኢስታ ኣሃይ ሞጌቶንታ ማላ ዲጋና። ሄይቲ ናምዑ ናቤቲ ካሴ ቢታ ቦላ ዲዛ ኣሳ ዋይሲዳ ጊሽ ሃዒ ቃስ ቢታ ቦላ ዲዛ ኣሳይ ሃ ናቤቲ ሃይቂዳ ጊሽ ኡፋዬታና። ሄ ኡፋይሳስ ባዓሌ ኦꬂዲ ኢሶይ ኢሳስ ዬስ ኢማና። ጊዶ ኣቲን ሄꬑ ጋላሲኔ ባጋይ ኣꬊዳፔ ጉዬ ኢስታስ ሼምፖ ኢሚዛ ፔኖይ ፆሳ ኣቻፌ ዪዲ ኢስታ ኣሃን ጌሊዴስ። ኢስቲካ ባ ቶሆን ኤቂዳ ኢስታ ቤዪዳ ኣሳይ ዳሮ ባቢዴስ። ሄሳፌ ጉዬ ሄ ናምዑ ናቤቲ “ሃ ፑዴ ኬዚቴ!” ጊዛ ቃላ ሳሎፔ ሲዪዳ። ኢስታ ሞርኬቲ ኢስታ ፄሊሺን ኢስቲ ሻራራ ፑዴ ሳሎ ኬዚዳ። ሄ ሳቴዪንካ ዎልቃማ ቢታ ቃꬂ ሃንዴስ። ሄ ካታማስ ታማፌ ኢሲ ኩሼይ ላሌቲዴስ። ቢታ ቃꬃ ጋሶን ላፑን ሺ ዴሬይ ሃይቂዴስ። ሃይቆንታ ኣቲዳ ኣሳይ ቃስ ዳሮ ባቢዴሲኔ ሳሎ ፆሳካ ቦንቺዴስ። ኣዬ ኣና! ጊዛ ቃላ ናምዓንꬆዚ ኣꬊን ሄꬓንꬆዛ ዋሶይ ኤሶን ጋካና። ላፑንꬆ ኪታንቻይካ ባ ዛዬዛ ፑኒዴስ። ሳሎን ቃስ “ኣላሜ ካዎቴꬂ ኑ ጎዳ ፆሳሲኔ ኪርስቶሳስ ጊዲዴስ። ኢዚካ ሜርናፔ ሜርና ጋካናስ ካዎታና” ጊዛ ጊታ ቃላይ ሲዬቲዴስ። ፆሳ ሲንꬃን ባ ኣልጋ ኣልጋ ቦላ ኡቲዳ ናምዑ ታማኔ ኦይዱ ጪማቲካ ባ ሊጴን ጉፋኒዲ ፆሳስ ጎይኒዳ። ቃሴካ “ካሴካ፥ ሃዒካ ዲዛይሶ! ኡባካ ዳንዳዪዛ ጎዳ ፆሶ! ኔኒ ኔ ጊታ ጎዳቴꬃ ኔ ኩሼን ኦይኪዳ ጊሺኔ ካዎቲዳ ጊሽ ኑኒ ኔና ጋላቶስ። ኣይዛቤይ ሃንቄቲዴስ፤ ካሴ ሃይቂዳይቲ ፒርዳ ዴሚዛ ዎዴይ ጋኪዴስ፤ ካሴ ኔ ኦሳንቻታ ናቤታሲኔ ጌሻታስ ኔ ሱንꬃካ ቦንቺዛይታስ፤ ጉꬃታሲኔ ጊታታስ፤ ኔኒ ኢስታስ ኢስታ ዋጋ ኢሚዛ ዎዴይ ሃዒ ጋኪዴስ። ቢታ ꬋይሲዳይታ ኔ ꬋይሳናስ ዎዴይ ጋኪዴስ” ጊዳ። ሳሎን ዲዛ ፆሳ ኬꬃ ጊዶ ኪፊሌይ ዶዬቲዴስ። ኢዛ ጫቆ ታቦታዚካ ሄን ፆሳ ኬꬃስ ጊዶ ኪፊሌን ቤቲዴስ። ዎልቃንꬂ ዎልቃሚዴስ፤ ጊርሲ ጊርዴስ፤ ዳዳይ ዳዳቲዴስ፤ ቢታ ቃꬂኔ ዎልቃማ ሻቺ ቡኪዴስ። ሄሳፌ ጉዬ ጊታ ማላሊሲዛ ማላታይ ቦላ ሳሎ ቦላ ቤቲዴስ። ኢሲ ማጫሲያ ኣዋ ኣርሼ ማይዓዳ፥ ኣጊና ባ ቶሆን ዬꬋዳ ታማኔ ናምዑ ፆሊንቴታ ኣክሊሌ ማላ ባ ሁዔን ዎꬃዳ ቤታዱስ። ኢዛካ ሻራራ ዳዉስ። ዬሎ ሚፃይ ኢዞ ኦይኪን ሜቶታዳ ዋሳዱስ። ሄሳꬆካ ሃራ ማላታይ ሳሎ ቦላ ቤቲዴስ። ኢዛስ ላፑን ሁዔይኔ ታሙ ካጬቲ ዲዛ ኢሲ ጊታ ዳዌይ ቤቲዴስ። ኢዛ ሁዔታ ቦላካ ላፑን ዛዉዴቲ ዴቴስ። ኢዚ ባ ጎይናራ ሳሎ ፆሊንቴታፔ ጪጎ ጊዲዛይታ ሳሎፔ ዱጌ ቢታን ዬጊዴስ። ሄ ማጫሳያ ዬሊሺን ኢዛ ዬሊዛ ናዛ ሚታናስ ቆፒዲ ዳዌዚ ሄ ዬላናስ ማቲዳ ማጫሳይስ ሲንꬃን ኤቂዴስ። ማጫሳያካ ካሴ ዴሬታ ኡባ ቢራታ ጉፌራ ሃሪዛ ኣቱማ ና ዬላዱስ ሺን ናዚ ቃስ ፑዴ ፆሳኮኔ ፆሳ ኣልጋኮ ኤኬቲዴስ። ማጫሳያካ ዱጌ ባዞ ቢታ ቤታዱስ። ሄ ባዳ ኢሲ ሺያኔ ናምዑ ፄታኔ ኡሱፑን ታሙ ጋላስ ጋካናስ ቦንቾን ዳናሶ ፆሲ ካሴ ኢዚስ ጊጊስ ዎꬂዴስ። ሳሎ ቦላ ኦላይ ዴንዲዴስ። ሚካሌይኔ ኢዛ ኪታንቻቲ ዳዌዛራ ኦሌቲዳ። ዳዌዚኔ ኢዛ ኪታንቻቲካ ዛሪዲ ሚካሌራኔ ኢዛ ኪታንቻታራ ኦሌቲዳ። ጊዶ ኣቲን ዳዌዚኔ ኢዛ ኪታንቻቲ ፆኔቲዳ። ሄሳፌ ጉዬ ኢስታስ ሳሎን ዳናሶይ ቤቲቤና። ሄ ጊታ ዳዌዚ ዱጌ ዬጌቲዴስ። ኢዚካ ኩሜꬃ ኣላሜዛ ባሌꬂዛ ዳቡሎሳ ዎይኮ ፃላዔ ጌቴቲ ፄይጌቲዛ ቤኒ ዎዴ ሾሻዛ። ኢዚ ቃስ ዱጌ ቢታ ቦላ ዬጌቲዴስ። ኢዛ ኪታንቻቲካ ኢዛራ ኢሲፌ ዬጌቲዳ። ሄሳፌ ጉዬ ኢሲ ጊታ ጊሪስ ሳሎፔ ሂዝጊሺን ታ ሲያዲስ “ሄኮ ኣሴ ኣሾይ፥ ዎልቃይኔ ካዎቴꬂካ ኑ ጎዳስ ጊዲዴስ። ማታይካ ኪርስቶሳስ ጊዲዴስ። ኑ ኢሻታ ኑ ጎዳ ሲንꬃን ጋላሲኔ ቃማ ሞቲዛ ኑ ኢሻታ ባርጋራይ ዱጌ ዬጌቲዴስ። ኢስቲ ዶርሳዛ ሱꬃኒኔ ባ ዮቲዳ ማርካቴꬃ ቃላን ኢዛ ፆኒዳ። ኢስቲ ባ ሼምፖስ ሚሼቶንታ ዲሼ ባና ሃይቆስ ኣꬂ ኢሚዳ። ሄሳ ጊሽ ሳሎቲኔ ኢስታ ጊዶን ዲዛይቲ ኢንቴ ዉሪካ ኡፋዬቲቴ። ኢዛስ ጉꬃ ዎዴይ ኣቲዳይሳ ኤሪዳ ጊሽ ዳቡሎሲ ጊታ ሃንቆራ ዱጌ ኢንቴኮ ዎꬊዳ ጊሽ ቢታሲኔ ኣባስ ኣዬ ኣና! ኣዬ ኣና!” ዳዌዚ ዱጌ ቢታ ቦላ ዬጌቲዳይሳ ቤዪዲ ኣቱማ ና ዬሊዳ ማጫሳዮ ጎዴሬꬂዴስ። ማጫሳያካ ባስ ጊጌቲ ዲዛሶ ፒራꬋዳ ዱጌ ባዞ ባና ማላ ኢዚስ ጊታ ጎሌ ካፎ ቄፌ ሚሳቲዛ ናምዑ ቄፌቲ ኢሜቲዳ። ኢዛ ሄን ዳዌዛ ሲንꬃፌ ሃካዳ ሄꬑ ላይꬂኔ ባጋ ጋካናስ ሎዖ ቦንቾን ናጌታዱስ። ሄ ማጫሳዮ ዲዖይ ኤኪ ባና ማላ ሾሻዚ ሻፋ ሃꬄ ኬና ሃꬄ ባ ዱናፔ ጩቲዲ ኢዚፔ ጉዬ ባጋራ ጉሲዴስ። ጊዶ ኣቲን ቢታያ ሄ ማጫሳዮ ማዳዱስ። ባ ዱና ዶያዳኔ ሄ ዳዌዚ ጩቲዲ ጉሲዳ ሃꬃካ ፁንፃዱስ። ዳዌዚ ማጫሴይ ቦላ ሃንቄቲዲ ሃንኮ ኣቲዳ ኢዚ ዜሬꬃታራ ኦሌታናስ ቢዴስ። ኢስቲካ ፆሳ ኣዛዞታ ናጊዛይታኔ ዬሱሳስ ኣማኔቲዲ ማርካቲዛይታ። ዳዌዚካ ኣባ ኣቻን ኣጬ ቦላ ኤቂዴስ። ሄሳፌ ጉዬ ኢሲ ዶዓይ ኣባፌ ኬዚሺን ቤያዲስ። ኢዛስ ታሙ ካጬይኔ ላፑን ሁዔይ ዴስ። ካጬታ ቦላ ታሙ ዛዉዴቲ ዴቴስ። ሁዔታ ቦላ ጫሻ ሱንꬃቲ ዴቴስ። ታ ቤዪዳ ዶዓዚ ማሄ ሚሳቴስ። ኢዛ ቶሆይ ዶዓ ዛርዶ ቶሆ ሚሳቴስ። ኢዛ ዱናይ ቃስ ጋሞ ዱና ሚሳቴስ፤ ዳዌዚ ባ ዎልቃ፥ ባ ኣልጋዛኔ ባ ጎዳቴꬃካ ሄ ዶዓዛስ ኢሚዴስ። ሄ ዶዓዛ ሁዔታፔ ኢሳ ቦላ ዎꬊዛ ማዱንꬂ ዲዛይሳ ታ ቤያዲስ ሺን ኢዛ ሃይቆስ ጋꬂዛ ማዱንꬃዚ ፓፂዴስ። ኩሜꬃ ኣላሜይ ማላሌቲዲ ሄ ዶዓዛ ካሊዴስ። ሄ ዶዓዛስ ጎዳቴꬂ ኢሜቲዳ ጊሽ ኣሳይ ዉሪካ ሄ ዳዌዛስ ጎይኒዴስ። “ሃይሳ ዶዓዛ ሚሳቲዛይ ኦኔ? ኢዛራ ኦሌታናስ ዳንዳዪዛይ ኦኔ?” ጊሼ ኢዛስ ጎይኒዴስ። ኢዛስ ቃስ ኦቶሬቴꬂኔ ጫሻ ቃላ ሃሳይዛ ዱናይ ኢሜቲዴስ። ኢዚ ኦይዱ ታማኔ ናምዑ ኣጊና ጋካናስ ጎዳቴꬃን ኦꬃና ማላ ኢዛስ ኢሜቲዴስ። ፆሳኔ ፆሳ ሱንꬅ ኢዚ ዲዛሶዛኔ ሳሎን ዲዛይታ ጫሼ ኦይኪዴስ። ኢዚ ጌሻታ ኦላና ማላኔ ፆናና ማላ ኢዛስ ጎዳቴꬂ ኢሜቲዴስ። ዱማ ዱማ ቆሞታኔ ዛርኬታ፥ ዱማ ዱማ ቃላን ሃሳዪዛ ዴሬታ ኡባ ቦላ ኢዛስ ጎዳቴꬂ ኢሜቲዴስ። ኣላሜይ ሜꬌቶሳፔ ሃ ሲሚን ኢስታ ሱንꬂ ሹኬቲዳ ዶርሳዛ ዴዖ ማፃፋን ፃፌቶንታ ኣላሜ ቦላ ዲዛ ኣሳይ ዉሪካ ሄ ዶዓዛስ ሆኪ ጎይናና። ሃይꬂ ዲዛዴይ ሲዮ! “ዲዔታናስ ዲዛዴይ ዲዔታና፤ ማሻን ሃይቃናስ ዲዛዴይ ማሻን ሃይቃና” ሄሳ ጊዲዳ ጊሽ ኣማኒዛይታ ዳንዳያይኔ ኢስታ ኣማኔቴꬅ ኮሺዛይ ሃኒና። ቃሴካ ሃራ ዶዓይ ቢታፌ ኬዚሺን ቤያዲስ። ኢዛስ ቃስ ዶርሳ ካጬ ማላ ናምዑ ካጬይ ዴስ። ኢዚ ዳዌꬆ ሃሳዬስ። ኢዚ ካሴ ኮይሮ ዶዓዛ ኦላ ጌሊዲ ሄ ካሴይሳ ጎዳቴꬃን ኦꬄስ። ቢታያኔ ቢታ ቦላ ዲዛይቲ ዉሪካ ካሴ ኮይሮ ዶዓዛስ ጎይናና ማላ ኦꬂዴስ። ሄ ዶዓዚ ቃስ ካሴ ኢዛ ሃይቆስ ጋꬂዛ ማዱንꬃይ ፓፂዳ ኮይሮ ዶዓዛ። ሄሲ ናምዓንꬆ ዶዓዚ ቃስ ኣሳ ሲንꬃን ታማ ሳሎፔ ዱጌ ዬጋና ጋካናስ ጊታ ማላታታ ኦꬂዴስ። ኢዚ ኮይሮ ዶዓዛ ሲንꬃን ማላታ ኦꬃና ማላ ኢዛስ ኢሜቲዳ ማላታ ጌዶን ቢታ ቦላ ዲዛ ኣሳ ኢዚ ባሌꬂዴስ። ማሻን ማዱንፂዲ ፓፂዳ ዶዓዛ ቦንቾስ ሚሲሌ ኦꬃና ማላ ቢታ ቦላ ዲዛ ኣሳ ዉርሲ ኢዚ ኣዛዛና። ናምዓንꬆ ዶዓዚ ኮይሮ ዶዓዛ ሚሲሌዛስ ሼምፖ ኢማና ማላ ኢዛስ ጎዳቴꬂ ኢሜቲዴስ። ዴዖ ሼምፖ ኢማናስ ኢዛስ ጎዳቴꬂ ኢሜቲዳ ሚሲሌዚ ሃሳያና ማላኔ ሄ ኢዛስ ሆኪ ጎይኖንታዴ ኢዚ ዉርሲካ ዎꬋና ማላሳ። ናምዓንꬆ ዶዓዚ ቃስ ጉꬃታ ጊዲን ዎይኮ ጊታታ ጊዲን፥ ዱሬታ ጊዲን ዎይኮ ማንቆታ ጊዲን፥ ጎዳታ ጊዲን፥ ዎይኮ ኣሽካራታ ጊዲን፥ ዉሪካ ባ ኡሻቻ ኩሼን ዎይኮ ባ ሊጴ ቦላ ማላታ ዎልቃራ ዎꬂሳና። ሄሳ ማላን ሄ ዶዓዛ ሱንꬅ ኤሪሲዛ ዱማ ማላታይ ዎይኮ ኢዛ ሱንꬂ ኢዛ ቦላ ፃፌቲዳ ቁፁሬይ ባይንዳዴይ ኦኒካ ጊያ ጌሊዲ ሻማናሲኔ ባይዛናስ ዳንዳዬና። ሄሳ ጊሽ ኣሲ ኤራ ጊዳናይ ሃኒና። ዎዝናራ ዲዛዴይ ኣኬኮ፤ ሄ ዶዓዛ ቁፁሬዚካ ሃይሳፌ ካሊ ዲዛይሳኮ። ሄሲካ ኡሱፑን ፄታኔ ኡሱፑን ታማኔ ኡሱፑና። ሄሳፌ ጉዬ ሄኮ ሄ ዶርሳዚ ፂዮኔ ዙማ ቦላ ኤቂዳይሳ ታ ቤያዲስ። ኢዛ ሱንꬂኔ ኢዛ ኣዋ ሱንꬂ ኢስታ ሊጴ ቦላ ፃፌቲዳይቲ ፄታኔ ኦይዱ ታማኔ ኦይዱ ሺ ኣሳቲ ኢዛራ ኢሲፌ ዴቴስ። ሳሎፔ ዎልቃማ ፒሳ ሃꬃ ጊሪሲኔ ዎልቃማ ዳዳ ጊሪስ ሚሳቲዛ ጊሪሲካ ሲያዲስ። ታኒ ሲዪዳ ጊሪሳይ ዲꬂ ሚሳቲዛ ባጋና ጌቴቲዛይሳ ዲፂዲ ኣሳይ ሲሲዛ ጊሪሳ ማላ ጊሪዛይሳ። ኣልጋ ሲንꬃኒኔ ኦይዱ ዶዓታ ሲንꬃን ጪማታ ሲንꬃን ፄታኔ ኦይዱ ታማኔ ኦይዱ ሺ ኣሳይ ኦራꬃ ዬꬅ ዬፂዴስ። ሄ ዬꬃዛካ ዴራ ጋርሳፌ ዶሬቲዳ ፄታኔ ኦይዱ ታማኔ ኦይዱ ሺ ኣሳፔ ኣቲን ሃራይ ኦኒካ ኢዛ ታማራናስ ዳንዳይቤና። ሄይቲ ማቾንታይታ ጊዲዳ ጊሽ ኢስቲ ማጫራ ኣቂዲ ቱንቤቴና። ኢስቲ ዶርሳይ ቢዛሶ ኢዛ ካሌቴስ። ኢስቲ ፆሳሲኔ ኢዛ ዶርሳዛስ ኣሳ ጋርሳፌ ፄራ ካꬃ ማላ ሺቂዳይታ። ኢስቲ ዎርዶ ሃሳያ ኤሬቴና። ዎሶይካ ኢስታ ቦላ ባዋ። ሄሳፌ ጉዬ ቢታ ቦላ ዲዛ ዱማ ዱማ ቃላን ሃሳዪዛ ዱማ ዱማ ዴሬታ፥ ዛርኬታስ፥ ቆሞታስ፥ ኡባስ ዮታናስ ሜርና ሚሺራቾ ቃላ ኦይኪዳ ሃራ ኢሲ ኪታንቻይ ሳሎን ቦላን ፒራꬊሺን ቤያዲስ። ኢዚካ ባ ቃላ ꬎቁ ሂስቲዲ “ፆሳስ ባቢቴኔ ኢዛ ቦንቺቴ። ኢዛ ፒርዳ ዎዴይ ጋኪዴስ። ሳሎኔ ቢታ፥ ኣባኔ ሃꬃ፥ ፑልቶካ ሜꬊዳ ፆሳስ ጎይኒቴ” ጊዴስ። ሃራ ናምዓንꬆ ኪታንቻይ ቃስ “ዴሬዛ ዉርሳ ማꬆሲዛ ላይማ ዎይኔ ጫጄ ኡሺዳ ማጫሳያ ሂናካ ዎጋ ጊታ ባቢሎና ኩንዳዱስ! ኩንዳዱስ!” ጊሼ ኮይሮ ኪታንቻዛ ካሊዴስ። ሃራይ ሄꬓንꬆ ኪታንቻይ ቃስ ጊታ ꬎቃ ቃላን ሂዝጊሼ ኢስታ ካሊዴስ “ሄ ዶዓዛሲኔ ኢዛ ሚሲሌዛስ ጎይኒዛይቲኔ ባ ሊጴ ቦላ ዎይኮ ባ ኩሼ ቦላ ዎꬂዛይቲ ዉሪካ፥ ፆሳ ሃንቆ ዎይኔ ጫጄዛ ኡያና። ሄሲካ ሄ ዎይኔ ጫጄዚ ሃራራ ዋላኬቶንታ ኢዛ ሃንቆ ፁዓፔ ዱቄቲዳይሳ። ሄሳꬆካ ሃንኮ ጌሻ ኪታንቻታ ሲንꬃኒኔ ዶርሳዛ ሲንꬃን ታማኒኔ ዲኔ ታማን ፁጌታና። ኢስቲ ኢዛን ፁጌቲዛ ታማፔ ኬዚዛ ጩዋዚ ሜርፔ ሜርናስ ፑዴ ኬዚሼ ዳና። ሄ ዶዓዛሲኔ ኢዛ ሚሲሌዛስ ጎይኒዛይቲ ዎይኮ ኢዛ ሱንꬃ ማላታ ባ ቦላ ዎꬂዳይቲ ዉሪካ ዎንታኔ ቃማን ኢስታስ ሼምፖይ ዴና።” ፆሳ ኣዛዞ ናጊዛይታፔኔ ዬሱሳ ኣማኖን ሚኒዳ ጌሻታፔ ኮዬቲዛ ዳንዳያይ ሃኒንኮ። ታኒ ሳሎፔ ሂዝጊዛ ቃላ ሲያዲስ “ሃይሳፌ ጉዬ ጎዳ ዬሱሳይታ ጊዲዲ ሃይቃናይቲ ኢስቲ ኣንጄቲዳይታ።” ፂሎ ኣያናይካ “ኤ፥ ኢስቲ ባ ዳቡርሳፌ ሼምፓና ማላ ኢስታ ኦሶይ ኢስታ ካላና” ጌስ። ሄሳፌ ጉዬ ታ ፄሊሺን ታስ ቦꬃ ሻራይ ቤቲዴስ። ሄ ሻራ ቦላ ቃስ ና ሚሳቲዛይ ኡቲዴስ። ኢዚ ቃስ ባ ሁዔ ቦላ ዎርቃ ኣክሊሌ ዎꬂዴስ። ባ ኩሼንካ ቃራ ባጫ ኦይኪዴስ። ሃራ ኪታንቻይ ፆሳ ኬꬃፌ ኬዚዲኔ ሻራ ቦላ ኡቲዳይሳስ ꬎቃ ቃላራ “ቢታ ቦላ ቦኔይ ጋኪዴስ! ካꬃይ ጫኬቲዛ ሳቴይ ማቲዴስ” ጊሼ ዋሲዴስ። ሄ ሻራ ቦላ ኡቲዳይሲ ባጫዛ ዱጌ ቢታ ቦላ ዬዲዴስ። ቢታይካ ጫኬቲዴስ። ቃሴ ሃራ ኪታንቻይ ቦላ ሳሎን ዲዛ ዎሳ ኬꬃፌ ኬዚዴስ። ሄ ኢዚካ ቃራ ባጫ ባ ኩሼን ኦይኪዴስ። ታማ ቦላ ኢዛስ ጎዳቴꬂ ዲዛ ሃራ ኪታንቻይ ያርሾ ኢዛ ቦላ ሺሺዛሶዛ ኣቻፌ ኬዚዲ ሄ ቃራ ባጫ ኦይኪዳ ኪታንቻዛስ “ሚꬃ ኣይፌይ ካፂዳ ጊሽ ኔኒ ሃዒ ኔ ቃራ ባጫዛ ዬዳዳ ዎይኔ ሚꬃ ኣይፌዛ ዉርሳ ጫካዳ ቢታፌ ሺሻ” ጊዲ ጊታ ቃላን ዋሲዴስ። ኪታንቻዚካ ባጫዛ ዱጌ ቢታ ቦላ ዬዲዲ ቢታን ዲዛ ዎይኔ ሚꬃ ኣይፌዛ ጫኪዲ ዎጋ ፆሳ ሃንቆ ዎይኔ ኣይፌ ጉምዒዛሶን ዬጊዴስ። ካታማፔ ካሬ ባጋራ ዲዛ ዎይኔ ሚꬃ ኣይፌ ጉምዒዛሶን ጉሜዔቲዴስ። ሄ ጉምዒዛሶዛፔካ ቢታፌ ꬎቃቴꬂ ፓራ ቢፃላ ጋካናሲኔ ኢሲ ሺያኔ ኡሱፑን ፄት ኪሎሜቲሬ ጊዲዛሶ ጋካናስ ሱꬂ ጎጊዴስ። ታኒ ሃራ ዎልቃማ ማላታ ሳሎ ቦላ ቤያዲስ። ፆሳ ሃንቆይ ኢስታን ፖሌታናስ ዉርሴꬅ ጊዲዳ ላፑን ቦሻታ ኦይኪዳ ላፑን ኪታንቻታ ቤያዲስ። ሄሳፌ ጉዬ ታማራ ዋላኬቲዳ ማስቶቴ ኣባ ሚሳቲዛ ሚሽ ቤያዲስ። ሄሳꬆካ ሄ ዶዓዛኔ ኢዛ ሚሲሌዛ ኢዛ ሱንꬃ ቁፁሬዛ ማላታ ፆኒዳይታ ቤያዲስ። ፆሲ ኢስታስ ኢሚዳ ዲꬃ ማላ ባጋና ጌቴቲዛይሳ ኦይኪዲ ማስቶቴ ሚሳቲዛ ኣባ ኣቻን ኤቂዳ። ፆሳ ኦሳንቻ ሙሴ ዬꬂኔ ዶርሳዛ ዬꬅ፥ “ኡባ ዳንዳዪዛ ጎዳ ፆሶ! ኔ ኦሶይ ጊታኔ ማላሊሲዛዛ፤ ዴሬ ካዎዞ! ኔ ኦጌይ ሊኬኔ ቱማ። ጎዶ ኔስ ባቦንታ ኣሲኔ ኔ ሱንꬅ ቦንቾንታ ኣሲ ኦኔ? ኔኒ ኔርካ ጌሻ፥ ኔ ቱማ ፒርዳይ ቆንጪዳ ጊሽ ዴሬቲ ዉሪ ዪዲ ኔ ሲንꬃን ኔስ ጎይናና” ጊ ዬፂዳ ሄሳፌ ጉዬ ታ ዛራ ፄሊሺን ካሴ ማርካቴꬃ ዱንካኔ ጊዲዳይሲ ፆሳ ኬꬂ ሳሎን ዶዬቲዴስ። ላፑን ቦሻታ ኦይኪዳ ላፑን ኪታንቻቲ ፆሳ ኬꬃፌ ኬዚዳ። ኢስቲ ቃስ ጌሽ ጊዲዲ ፆልቂዛ ቦꬃ ማይዖ ማይዒዳ። ዎርቃፌ ኦሴቲዳ ዳንጮ ማላ ማይዖ ቲራ ቦላ ቃቺዳ። ኦይዱ ዶዓታፔ ኢሶይ ላፑን ኪታንቻታስ ሜርናፔ ሜርናስ ዲዛ ፆሳ ሃንቆይ ኢስታን ኩሚ ኡቲዳ ላፑን ዎርቃ ፁዓታ ኢሚዴስ። ፆሳ ኬꬃይካ ፆሳ ቦንቾፌኔ ኢዛ ዎልቃፌ ዴንዲዳይሳን ጩዋይ ኢዛን ኩሚዴስ። ላፑን ኪታንቻቲ ባ ኩሼን ኦይኪዳ ላፑን ቦሻቲ ፖሌታና ጋካናስ ኦኒካ ሄ ፆሳ ኬꬄ ጌላናስ ዳንዳይቤና። ሄሳፌ ጉዬ ላፑን ኪታንቻታ “ኢንቴ ቢዲ ፆሳ ሃንቆ ኦይኪዳ ላፑን ፁዓታ ዱጌ ቢታ ቦላ ጉሲቴ!” ጊዛ ጊታ ቃላይ ፆሳ ኬꬃፌ ኬዚሺን ታ ሲያዲስ። ኮይሮ ኪታንቻዚ ቢዲ ፁዓዛ ቢታ ቦላ ጉሲዴስ። ዶዓዛ ማላታይ ኢስታ ቦላኔ ሄ ዶዓዛ ሚሲሌስ ጎይኒዛያታ ቦላ ኢታ ዋይሲዛ ማዱንꬅ ኬዚዴስ። ናምዓንꬆ ኪታንቻዚ ቃስ ፁዓዛ ኣባ ቦላ ጉሲዴስ። ኣባይካ ሃይቂዳ ኣሳ ሱꬃ ማላ ጊዲዴስ። ኣባ ጊዶን ሼምፖራ ዲዛይቲ ዉሪካ ሃይቂዳ። ሄꬓንꬆ ኪታንቻይ ባ ፁዓዛ ሻፋታ ቦላኔ ፑልቶ ሃꬃታ ቦላ ጉሲዴስ። ሄ ኢስቲካ ሱꬅ ጊዲዳ። ሃꬃ ቦላ ኢዛስ ጎዳቴꬂ ዲዛ ኪታንቻዚ፥ “ካሴካ ሃዒካ ዲዛ ጌሻ ጎዶ! ኔኒ ሄሳꬆ ፒርዲዳ ጊሽ ኔኒ ቱማንቻ። ኣሳይ ካሴ ኣማኒዛይታ ሱꬂኔ ናቤታ ሱꬅ ጉሲዳ ጊሽ ኔ ኢስታ ሱꬅ ኡሻዳሳ። ሄሲካ ኢስታስ ቤሴስ” ያርሾ ያርሺዛሶዛፔ ቃስ “ኤ ዉርሳ ዳንዳዪዛ ጎዳ ፆሶ! ኔ ፒርዳቲ ዉሪካ ቱማኔ ሊኬ” ጊዛ ቃላ ሲያዲስ። ኦይዳንꬆ ኪታንቻዚ ባ ፁዓዛ ኣዋ ኣርሼ ቦላ ጉሲዴስ። ኣዋ ኣርሼይካ ኣሳ ባ ሴላን ፁጋና ማላ ኣዋ ኣርሼስ ዎልቃይ ኢሜቲዴስ። ኣሳይካ ዎልቃማ ሴላን ፁጌቲዴስ። ሄ ቦሻታ ቦላ ሼኔይ ኢዛስ ዲዛ ፆሳ ሱንꬅ ኣሳይ ጫዪዴስ ኣቲን ማሮቴꬃን ጌሊቤናኔ ኢዛካ ቦንቺቤና። ኢቻሻንꬃ ኪታንቻይ ባ ፁዓ ዶዓዛ ኣልጋ ቦላ ጉሲዴስ። ሄ ዶዓዛ ካዎቴꬂ ቃስ ꬉሚዴስ። ኣሳይ ቃስ ዋዬዛፔ ዴንዲዳይሳን ባርካ ባ ኢንፃርስ ጋርጪዴስ። ኢስቲ ቃስ ሄ ማዱንꬃ ሳኮፔ ዴንዲዳይሳን ሳሎ ፆሳ ቃንጊዳ ኣቲን ማሮቴꬃን ጌሊቤቴና። ኡሱፑንꬃ ኪታንቻይ ቃስ ባ ፁዓዛ ዎጋ ኤፊራፂሴ ሻፋን ጉሲዴስ። ኣዋ ኣርሼይ ሞኪዛ ባጋፌ ያና ካዎታስ ኦጌ ጊጊሳና ማላ ሻፋዚ ሜሊዴስ። ሄ ዳዌዛ ዱናፔኔ ሄ ዶዓዛ ዱናፔ፥ ዎርዶ ናቤዛ ዱናፔ ኦቃርስ ሚሳቲዛ ሄꬑ ቱና ኣያናቲ ኬዚሺን ታ ቤያዲስ። ሄይቲ ቃስ ማላታታ ኦꬂዛ ዳይዳንꬃ ኣያናታ። ሄይቲ ኣያናቲ ዉርሲ ዳንዳዪዛ ጎዳ ጊታ ጋላስ ሃናና ኦላስ ኣሳ ሺሻናስ ኣላሜ ካዎቲ ዲዛሶ ኡባ ባና። “ሄኮ ታኒ ካይሶ ማላ ቆፖንታ ጋካ ዎꬋና። ኢዚ ካሎቲን ኣሳይ ኢዛ ካሎቴꬅ ቤዮንታ ማላ ቤጊዲኔ ባ ማይዖ ናጊዛ ኣሲ ጋላቴቲዳዴ!” ኣያናቲካ ካዎታ ኢብራዌ ኣሳ ቃላራ፥ “ኣርማጌዶኔ” ጌቴቲዛ ሶ ሺሺዳ። ላፑንꬆ ኪታንቻዚ ባ ፁዓዛ ጫርኮ ቦላ ጉሲዴስ። ፆሳ ኬꬃ ጊዶን ዲዛ ኣልጋዛፔ “ፖሌቲዴስ” ጊዛ ዎልቃማ ቃላይ ኬዚዴስ። ዎልቃንꬂ፥ ዳዳ ጊሪሲኔ ጉጉንꬂ፥ ጊታ ቢታ ቃꬂ ሃኒዴስ። ኣሲ ቢታ ቦላ ሜꬌቶሳፔ ሃኖ ጋካናስ ሄሳ ማላይ ቢታ ቦላ ሃኒ ኤሬና። ዎጋ ካታማያ ሄꬑ ኬዛ ሻኬታ ዎꬋዱስ። ኣይዛቤታ ካታማቲ ላሌቲዳ ፆሲ ዎጋ ካታማዮ ባቢሎኔ ዛሪ ቆፒዴስ። ሚኖ ሃንቆ ፁዓን ኩሚ ኣቲዳ ዎይኔ ጫጄ ኡሻ ኡያና ማላ ኦꬂዴስ። ኣባ ጊዶን ዲዛ ዴሬቲ ዉሪካ ባቃቲዳ፤ ዙማቲካ ቤቲቤቴና። ኢሲ ኢሲ ሻቺ ኦይዱ ታማኔ ኢቻሹ ኪሎ ጊዲዛ ሻቺ ሳሎፔ ዱጌ ኣሳ ቦላ ዎꬊዴስ። ቦቻዚ ዳሮ ኢታ ጊዲዳ ጊሽ ኣሳይ ሄ ሻቻ ቦሻ ጌዶን ፆሳ ጫዪዴስ። ላፑን ፁዓታ ባ ኩሼን ኦይኪዳ ላፑን ኪታንቻታፔ ኢሶይ ሃ ታኮ ዪዲ ታስ “ሃ ያ፥ ዳሮ ሃꬃታ ቦላ ኡቲዳ ሄ ኢታ ላይማ ማጫሳይ ቦላ ጋኪዛ ፒርዳ ታ ኔና ቤሳና። ቢታ ቦላ ዲዛ ካዎቲ ዉሪካ ኢዚራ ላይማቲዳ። ቢታ ቦላ ዲዛ ኣሳይካ ኢዚ ላይማቴꬃ ዎይኔ ጫጄን ማꬆቲዴስ” ጊዴስ። ሄሳፌ ጉዬ ኪታንቻዚ ታና ኣያናን ዱጌ ባዞ ቢታ ኤፊዴስ። ኢዛ ኣሳቴꬃዚ ኩሜꬅ ጫሻ ሱንꬃን ፃፌቲዳ ላፑን ሁዔቲኔ ታሙ ካጬቲ ዲዛ ኢሲ ዞዖ ዶዓዛ ቦላ ኡቲዳ ኢሲ ማጫሳዮ ቤያዲስ። ሄ ማጫሳያ ጋላልዖ ማላ ማይዖኔ ዞዖ ማይዖ ማይዓዱስ፤ ዎርቃን፥ ቦንቾ ሹቻኒኔ ኢንቆ ጌቴቲዛ ኣልዖ ሚሺ ማይዓዳ ጶላዉስ፤ ኢዛ ባ ኩሼን ቃስ ኢታ ሹኒዛ ሚሺኔ ባ ቱና ላይማቴꬂ ኢዛን ኩሚዳ ዎርቃ ፁዓ ኦይካ ኡታዱስ። ኢዚ ሊጴ ቦላ “ፁራ፥ ላይማቲዛይታሲኔ ቢታ ቦላ ቱና ኦꬂዛይታስ ኣዮ ዎጋ ባቢሎኔ” ጌቴቲዛ ሱንꬂ ፃፌቲ ኡቲዴስ። ሂና ሄ ማጫሳያ ጌሻታ ሱꬃኒኔ ዬሱሳ ሱንꬃን ሃይቂዳ ኣሳ ሱꬃን ማꬆቲዳሮ ታኒ ቤያዲስ። ታ ኢዞ ቤያዳ ዳሮ ማላሌታዲስ። ጊዶ ኣቲን ኪታንቻዚ ቃስ ታና “ኔ ኣዛስ ማላሌታይ? ሃ ማጫሳያ ፁራ ዮዖኔ ኢዛ ኢስታ ቦላ ኡቲዳ ላፑን ሁዔታኔ ታሙ ካጬቲ ኢዛስ ዲዛ ዶዓዛ ፁራ ታ ኔስ ቆንጪሳና። ኔ ቤዪዳ ዶዓዚ ካሴካ ዲዛይሳኮ ሺን ሃዒ ዴና። ኢዚ ጉዬፔ ጪማ ኦላ ጊዶፌ ኬዛናኔ ጌዴ ꬋዮሶ ባና፤ ኣላሜይ ሜꬌቶሳፔ ኢስታ ሱንꬂ ዴዖ ማፃፋን ፃፌቶንታ ቢታ ቦላ ዲዛ ኣሳይ ሄ ዶዓዚ ካሴካ ዲዛይሳ ሃዒ ቃስ ዶንታይሳ ጉዬፔ ያናይሳ ጊዲዳይሳ ቤዪዲ ማላሌታና። “ዩሺ ቆፒዛ ኤራ ኣሲ ኮዬቲዛይ ሃኒና። ላፑን ሁዔቲ ሄ ማጫሳያ ኢስታ ቦላ ኡቲዳ ላፑን ዙማታ። ሄይቲካ ላፑን ካዎታኮ። ሄ ላፑን ካዎታፔ ኢቻሻቲ ኩንዲዳ። ኢሶይ ሃዒ ዴስ። ሃንኮይሲ ቃስ ቡሮ ዪቤና። ኢዚ ዪዲ ጉꬃ ዎዴ ታካናስ ቤሴስ። ኦስፑንꬆ ካዎዚ ካሴ ዲዛዴ ሺን ሃዒ ቃስ ባይንዳ ዶዓኮ። ኢዚ ላፑናታፔ ኢሳ። ኢዚካ ጌዴ ꬋዮሶ ባና። “ኔ ቤዪዳ ታሙ ካጬቲ ቡሮ ካዎቶንታ ታሙ ካዎታ። ጊዲኮካ ኢስቲ ሄ ዶዓዛራ ኢሲፌ ኢሲ ሳቴስ ዶዓዛራ ካዎታናስ ካዎቴꬃ ዎልቃ ዴማና። ሄ ታሙ ካዎታስ ኢሲ ቆፋይ ዴዓና። ኢስቲ ባ ዎልቃኔ ባ ጎዳቴꬅ ሄ ዶዓዛስ ኣꬂ ኢማና። ኢስቲ ዶርሳዛ ቦላ ኦላ ዴንꬃና ሺን ዶርሳዚ ጎዳታስ ጎዳኔ ካዎታስ ካዎ ጊዲዳ ጊሽ ኢዚ ኢስታ ፆናና። ኢዛራ ዲዛይቲ ፄይጌቲዳይታ፥ ዶሬቲዳይታኔ ኣማኔቲዳይታ” ጊዴስ። ሄ ኪታንቻዚካ ታስ “ሃ ላይማ ማጫሳያ ኢስታ ቦላ ኡታ ዲሺን ኔኒ ቤዪዳ ሃꬃታ፥ ዴሬታ፥ ኣሳታ፥ ዱማ ዱማ ቆሞታ ቃሴካ ዱማ ዱማ ቃላን ሃሳዪዛይታ። ሄ ዶዓዚኔ ኔ ቤዪዳ ታሙ ካጬቲ ሄ ላይማ ማጫሳዮ ኢፄቴስ። ኢስቲ ኢዞ ꬋዮሶ ጋꬃና፤ ካሎ ሜላ ኣሻና፤ ኢስቲ ኢዚ ኣሾ ማናኔ ኢዞ ታማንካ ፁጋና። ባ ቆፋ ፖላናስ ሃይሳꬆ ኦꬃና ማላ ሄሳ ሄ ቆፋ ኢስታ ዎዝናን ዎꬂዳይ ፆሳ። ሄሳ ጊሽ ፆሳ ቃላይ ፖሌታና ጋካናስ ኢስቲ ቆፋን ኢሲኖ ጊዳና። ባ ካዎቴꬃ ጎዳቴꬃካ ሄ ዶዓዛስ ኣꬂ ኢማና። ኔ ቤዪዳ ማጫሳያ ቢታ ካዎታፔ ቦላራ ካዎታና ዲዛ ዎጋ ጊታ ካታማዮ” ጊዴስ። ሄሳፌ ጉዬ ጎዳቴꬂ ኢዛስ ዲዛ ሃራ ኪታንቻይ ሳሎፔ ዱጌ ዎꬊሺን ቤያዲስ። ኢዛ ቦንቾ ፖዖፔ ዴንዲዳይሳን ቢታይካ ፖዒዴስ። ኢዚ ቃስ ꬎቃ ቃላን “ጊታ ባቢሎና ኩንዳዱስ! ኩንዳዱስ! ኩንዳዱስ! ዳይዳንꬃ ዱሳ ሶ ጊዳዱስ! ቱና ኣያናታስ ኣቆሶ ጊዳዱስ! ሃራሲዛ ኢታ ካፎታስ ሼምፖሶ፥ ኢታኔ ሃራሲዛ ዶዓታሲካ ኣቆሶ ጊዳዱስ። ዴሬ ኣሳ ዉርሳ ማꬆሲዛ ባ ላይማቴꬃ ዎይኔ ጫጄዛ ኡሻዱስ። ቢታ ቦላ ዲዛ ካዎቲ ኢዚራ ላይማቲዳ። ቢታ ቦላ ዲዛ ዛልዓንቻቲ ኢዚስ ዲዛ ኢሻሎ ዱሳፌ ዴንዲዳይሳን ዳሮ ዱሬቲዳ” ጊ ዋሲዴስ ቃሴካ ሃራ ቃላይ ሳሎፔ “ታ ዴሬቶ! ኢንቴ ኢዚራ ኢዚ ናጋራን ዙፔቶንታ ማላኔ ኢዞ ጋኪዛ ቦሻ ኢንቴ ኢዚራ ጊሼቲ ኤኮንታ ማላ ኢዚፔ ሻኬቲ ኬዚቴ። ኢዚ ናጋራይ ዶሬቲዲ ፑዴ ሳሎ ጋኪዴስ። ፆሲካ ኢዚ ሞሮዛ ኣኬኪዴስ። ኢዚ ኢሚዳሪ ጊና ኢዚስ ኩሼ ዛሪቴ፤ ኢዚ ኦሶ ጊሽ ኢዚስ ናምዑ ኩሼ ጪጊቴ፤ ኢዚስ ናምዑ ኩሼ ኢዚይሳፌ ኣꬂ ዋላኪቴ። ኢዛ ባስ፥ ባ ቦንቾሲኔ ባስ ጊጋና ማላ ኢሞይሳ ጊና ዋዬኔ ሙዞቴꬅ ኢዚስ ኢሚቴ፤ ኢዛ ባ ዎዝናራ ‘ታኒ ካዎ ማቺ ማላ ኡታዲስ ኣቲን ኣምዒ ማላ ጊዲኬ። ታና ሙዞቴꬂ ሙሌካ ጋኬና’ ጋዳ ጬቄታዉስ። ሄሳ ጊሽ ኢዚ ቦላ ቦቻይ ዉሪካ ኢሲ ጋላስ ጋካና። ሃይቆይ፥ ሙዞቴꬂኔ ጋፋይ ኢዞ ጋካና፤ ኢዛ ታማን ፁጌታና፤ ኢዚ ቦላ ፒርዲዛ ጎዳይ ፆሲ ኢዚ ሚኖ” ጊሺን ታኒ ሲያዲስ። ኢዚራ ላይማቲሼ ኢሻሎ ዱስ ዴዪዳ ሃ ቢታ ካዎቲ ኢዛ ፁጌቲሺን ጩዋቲዛ ጩዋ ቤዪዲ ኢዚ ጊሽ ዋሲዲ ዬካና። ኢዚ ዋዬዛስ ባቢዳ ጊሽ ሃሆን ኤቂዲ “ሃኔ ጊታ ካታማዬ! ሃኔ ሚኖ ካታማዬ ባቢሎኔ! ኔ ፒርዳይ ሜፂ ኢሲ ሳቴ ጊዶን ዪዳ ጊሽ ኔስ ኣዬ ኣና! ኣዬ ኣና!” ጋና። ሃይሳፌ ጉዬ ኢስታ ማርካቤን ጫኔቲዳዝ ሻሚዛ ኣሲ ባይንዳ ጊሽ ቢታ ቦላ ዲዛ ዛልዓንቻቲ ኢዚስ ዬካናኔ ካዮታና። ኢስታ ማርካቤን ጫኔቲዳይ ዎርቃ፥ ቢራ፥ ኣልዖ ሹች ኢንቁ፥ ሌዔ ማይዖ፥ ጋላልዖ ማላ ማይዖ፥ ሃሬ ጌቴቲዛ ማይዖ፥ ዞዖ ማይዖኔ ሎዖ ሳዎ ሳዊዛ ሚꬅ ኡባ፥ ዳንጋርሳ ዛሌ፥ ኣልዖ ሚꬃፌ፥ ፃርቂማላፔ ቢራታፔኔ ዎሊዎጆፌ ኦሴቲዳ ሚሺ ዉሪካ ቃራፋ፥ ሳዎ፥ ሳዊዛ ሚꬂ፥ ካርቤ፥ ኤፃኔ፥ ዎይኔ ጫጄ፥ ዎጋራ ዛይቴ፥ ꬊሌ፥ ጊስቴ፥ ሚዝ፥ ዶርሳታ፥ ፓራታ፥ ፓራ-ጋሬታ፥ ኣይሌታኔ ሃራ ኣሳታኮ። ዛልዓንቻቲ “ሃኔ ኔኒ ኣሞቲዳ ሎዖ ሚሻቲ ዉሪካ ኔፔ ሃኪ ቢ ጊዲዳ። ኔ ሃሮይካ ኔ ጌፄይካ ዉሪካ ꬋዪዴስ። ሃይሳፌ ጉዬ ኔኒ ሄይታንታ ሙሌካ ዛራ ዴማካ!” ጋና። ሄይታንታ ዉርሲ ሻሚ ሻሚዲ ዱሬቲዳ። ዛልዓንቻቲ ኢዚ ቦላ ጋኪዳ ዋዬዛስ ባቢዲ ሃሆን ኤቃና፥ ዬኪሼኔ ሙዞቲሼ “ካሴ ሌዔ ማይዖኔ ጋላልዖ ማይዖ ቃሴካ ዞዖ ማይዖ ማይዒዛሪስ፥ ዎርቃኒኔ ቦንቾ ሹቻን፥ ኢንቁንካ ጶሊዳ ጊታ ካታማይስ ኣዬ ኣና! ኣዬ ኣና! ሄሳ ማላ ሃሮይ ኢሲ ሳቴ ጋርሳን ꬋዪዴስ” ጋና። ማርካቤ ኣዛዚዛይቲ ዉሪ ማርካቤን ቢዛይቲ ዉሪ ማርካቤ ጊዶን ኦꬂዛይቲ ዉሪካ ኣባ ጊዶን ዛልዓንቻቲ ዉሪካ ሃሆን ኤቃና። ኢዛ ፁጌቲሺን ጩዋቲዛ ጩዋ ቤዪዲ “ሃኖ ሃ ጊታ ካታማዮ ሚሳቲዛ ካታማይ ሃራይ ኣዋን ዳንዴ?” ጊሼ ዋሲዳ። ባ ሁዔን ጉዱላ ቆሊዲ ዬኪሼኔ ሙዞቲሼ “ኣባ ቦላ ማርካቤይ ዲዛይቲ ዉሪካ ኢዚ ሚሼን ዱሬቲዳይቲ፥ ሂና ጊታ ካታማያ ኢሲ ሳቴ ጊዶን ሙሌራ ꬋይዳ ጊሽ ኢዚስ ኣዬ-ኣና! ኣዬ-ኣና!” ጊ ዋሲዳ። ሳሎዞ! ኢዚ ጌዶን ኔ ኡፋዬታ፤ ፆሲ ኢንቴ ጊሽ ኢዚ ቦላ ፒርዲዳ ጊሽ ኢንቴ ጌሻቲ፥ ሃዋሬቲኔ ናቤቲካ ኡፋዬቲቴ። ሄሳፌ ጉዬ ኢሲ ሚኖ ኪታንቻይ ዎልቃማ ዎፃ ሹች ሚሳቲዛ ኢሲ ሹች ዴንꬂዲ “ጊታ ካታማያ ባቢሎና ሄሳꬆካ ዎልቃራ ሱጌታዳ ኩንዳና። ሃይሳፌ ጉዬ ሙሌካ ቤቱኩ። ዲꬅ ሚሳቲዛ ባጋና ጌቴቲዛይሳ ሾጪዛይታኔ ዬꬅ ዬፂዛይታ ዬꬃ ሱሱልዔ ሱሱልዒዛ ኣሳይኔ ዲንኬ ፑኒዛይታ ጊሪስ ናምዓንꬆ ኔናን ሲዬቴና። ኣይ ማላ ኩሼ ሂላቴꬅ ኦꬂዛ ኤራ ኣሲ ሃይሳፌ ጉዬ ኔናን ቤቴና፤ ዎፃ ጊሪስ ሃይሳፌ ጉዬ ኔናን ሲዬቴና። ታማ ፖዖይ ሃይሳፌ ጉዬ ኔናን ፖዔና። ኣዴኔ ማጫ ሚሺራ ቃላይ ሃይሳፌ ጉዬ ኔናን ሲዬቴና። ኔ ዛልዓንቻቲ ካሴ ኣላሜን ኤሬቲዳይታ። ኔኒ ቃስ ኣሳ ዉርሳ ሙሬኖን ባሌꬃዳሳ። ኢዚ ጊዶን ናቤታ ሱንꬂ፥ ጌሻታ ሱንꬂኔ ቢታ ቦላ ኣሳ ኩሼን ሃይቂዳይታ ኡባታ ሱንꬂ ቤቲዴስ” ጊሼ ዱጌ ኣባ ጊዶ ዬጊዴስ። ሄሳፌ ጉዬ ዳሮ ኣሳ ቃላ ጊሪስ ሚሳቲዛ ጊታ ቃላ ጊሪስ ሳሎፔ “ሃሌ ሉያ! ኣቶቴꬂ፥ ቦንቾይ፥ ዎልቃይካ ኑ ጎዳሳ። ኢዛ ፒርዳይ ቱማኔ ኣዳ፤ ኢዛ ቢታ ባ ላይማቴꬃን ቱኒሲዳ ዎጋ ጊታ ላይማዮ ኢዚ ባ ፒርዳን ኢዞ ቃፃይዴስ፤ ኢዞ ቃፃይዲ ባ ኦሳንቻታ ሱꬃ ሃሎ ኬሲዴስ” ጊሺን ታ ሲያዲስ። ቃሴካ “ሃሌ ሉያ፤ ኢዚፔ ኬዚዛ ጩዋይ ሜርናፔ ሜርና ጋካናስ ፑዴ ጩዋቲሼ ዴዓና” ጊሼ ዋሲዳ። ናምዑ ታማኔ ኦይዱ ጪማቲኔ ኦይዱ ዶዓቲ ኣልጋ ቦላ ኡቲዳ ፆሳስ ባ ሊጴ ቦላ ኩንዲዲ “ኣሚን፤ ሃሌ ሉያ!” ጊሼ ኢዛስ ጎይኒዳ። ሄሳፌ ጉዬ “ኢዛስ ያዪዛ ኢዛ ኦሳንቻቲ ዉሪካ ጉꬃቲኔ ጊታቲ ኑ ጎዳ ጋላቲቴ” ጊዛ ቃላይ ኣልጋፌ ኬዚዴስ። ዳሮ ኣሳ ቃላ ጊሪስ ሚሳቲዛይ፥ ሻፋ ሃꬃ ጊሪስ ሚሳቲዛ ጊሪስ፥ ዎልቃማ ዳዳ ጊሪስ ሚሳቲዛ ጊሪስ “ሃሌ ሉያ! ዉርሲ ዳንዳዪዛ ጎዳይ ካዎቴስ! ዶርሳዛ ሳርጌ ጋላሲ ጋኪዳ ጊሺኔ ኢዛ ሚሺራያ ጊጌታ ኡቲዳ ጊሽ ሃ ዪቴ፤ ኣኔ ኡፋዬቶስ! ኣኔ ኡፋይሳን ኢዛ ቦንቾስ። ኢዛ ፆልቄቲዛ ጌሻ ሎዖ ማይዖ ማይዓና ማላ ኢዚስ ኢሜቲዴስ” ጊሺን ሲያዲስ። ሄ ሌዔ ማይዖዚ ጌሻታ ፂሎቴꬃ ኦሶ። ሄሳፌ ኪታንቻዚ ታና “ጌዴ ዶርሳዛ ሳርጌስ ፄይጌቲዳይቲ ኣንጄቲዳይታ ጋዳ ፃፋ” ጊዴስ። ካሌꬂዲካ “ሃይሲ ቱሙ ፆሳ ቃላ” ጊዴስ። ታካ ሄ ኪታንቻዛስ ጎይናናስ ኢዛ ቶሆ ቦላ ታ ሊጴን ጉፋናዲስ-ሺን ኢዚ ታና “ኣጋ! ሄሳꬆ ኦꬆፋ! ታካ ኔናራ ዬሱስ ኪርስቶሳ ማርካቴꬅ ኦይኪዳ ኢሻታራ ኢሲፌ ኦꬂዛዴ፤ ኔኒ ፆሳስ ጎይና! ዬሱሳ ማርካይ ቲንቢቴ ኣያና” ጊዴስ። ሄሳፌ ጉዬ ሳሎይ ዶዬቲዳይሳ ታ ቤያዲስ። ቃሴካ ቦꬃ ፓራካ ቤያዲስ። ሄ ፓራዛ ቶጊዳይሲ ኣማኔቲዳዴኔ ቱማንቻ ጌቴቲዛዴ። ኢዚ ቃስ ቱማን ፒርዴሲኔ ኦሌቴስ። ኢዛ ኣይፌቲ ታማ ላጮ ሚሳቴቴስ። ኢዛ ሁዔ ቦላ ዳሮ ዛዉዴቲ ዴቴስ። ኢዛፔ ኣቲን ሃራ ኣሲ ኦኒካ ኤሮንታ ሱንꬂ ኢዛ ቦላ ፃፌቲ ኡቲዴስ። ኢዚ ቃስ ሱꬃን ማꬌቲዳ ማይዖ ማይዒዴስ። ኢዛ ሱንꬃይ ቃስ “ፆሳ ቃላ” ጌኣቴቴስ። ቦꬃ ፓራታ ቶጊዲ ቦꬂኔ ጌሽ ጊዲዳ ሎዖ ማይዖ ማይዒዳ ሳሎ ኦላንቻቲ ኢዛ ካሊዳ። ኣይዛቤታ ኢዛራ ቃንፂዛ ቃራ ማሻይ ኢዛ ዱናፔ ኬዜስ። ኢዚ ኢስታ ቢራታ ጉፌራ ሃራና። ኢዚ ዉርሲካ ዳንዳዪዛ ፆሳ ሚኖ ሃንቆ ቆንጪሲዛ ዎይኔ ጫጄ ዬꬊዛሶን ኢስታ ዬꬋና። ኢዛ ማይዖ ቦላኔ ኢዛ ዎዲራ ቦላ “ኢዚ ካዎታስ ካዎ፥ ጎዳታስ ጎዳ” ጊዛ ሱንꬂ ፃፌቲ ኡቲዴስ። ሄሳፌ ጉዬ ቃስ ኣዋ ኣርሼ ቦላ ኤቂዳ ኢሲ ኪታንቻ ቤያዲስ። ኢዚ ቃስ ሳሎ ቦላ ፒራꬊዛ ካፎታስ “ዎጋ ፆሳ ዲጊሳ ማናስ ሃ ዪቴ! ሃ ሺቂቴ! ካዎታ ኣሾ፥ ኦላንቻታ ኣዛዚዛይታ ኣሾ፥ ጎባ ኦላንቻታ ኣሾ፥ ፓራታ ኣሾኔ ፓራ ቶጊዛይታ ኣሾ፥ ጎዳታ ኣሾኔ ኢስታ ኣሽካራታ ኣሾ፥ ጉꬃ ናይታኔ ጪማ ኣሳታ ኣሾ ጊዲዳ ኣሳ ኡባ ኣሾ ሃ ዪዲ ሚቴ!” ጊሼ ጊታ ቃላን ዋሲዴስ ሄሳꬆካ ዶዓዚኔ ቢታ ካዎቲ ኢስታ ኦላ ኣሲካ ቦꬃ ፓራ ቶጊዳይሳራኔ ኢዛ ኦላ ኣሳራ ኦሌታናስ ሺቂዳይታ ቤያዲስ። ጊዶ ኣቲን ሄ ዶዓዚ ኦይኬቲዴስ። ካሴ ኢዛራ ዳሮ ማላታ ኦꬂዳ ዎርዶ ናቤዚካ ኢዛራ ኦይኬቲዴስ። ኢዚ ቃስ ሄ ዶዓዛ ማላታይ ኢስታ ቦላ ዲዛይታኔ ሄ ዶዓዛ ሚሲሌዛስ ጎይኒዳይታኔ ጊታ ማላታታ ኦꬂ ኦꬂዲ ኢስታ ባሌꬂሼ ጋምዒዴስ። ሄይቲ ናምዓቲ ዲኔ ጌቴቲዛ ታማን ኤፂዛ ታማ ኣባን ሃይቆንታ ፓፃ ዲሼ ዬጌቲዳ። ሃንኮ ኣቲዳይቲ ቃስ ቦꬃ ፓራ ቶጊዳይሳ ዱናፔ ኬዚዳ ማሻን ሃይቂዳ፤ ካፎቲካ ዉሪ ኢስታ ኣሾዛ ሚ ካሊዳ። ሄሳፌ ጉዬ ጪማ ኦላዛ ዶዪዛ ቁልፔኔ ጊታ ሳንሳላታ ባ ኩሼን ኦይኪዳ ኪታንቻይ ሳሎፔ ዱጌ ዎꬊሺን ታ ቤያዲስ። ሄ ዳዌዛ ኦይኪዲ ሺ ላይꬅ ቃቺዴስ። ሄሲ ዳዌዚ ዳቡሎሳ ዎይኮ ፃላዔ ጌቴቲዛ ካሴ ቤኒ ሾሻዛ። ሺ ላይꬅ ጋካናስ ኢዚ ዴሬ ኣሳ ባሌꬆንታ ማላ ሄ ኪታንቻዚ ዳዌዛ ዱጌ ጪማ ኦላን ዬጊዴስ፤ ኢዛ ቦላ ጎርዲዲ ማታማ ዎꬂዴስ። ኢዚ ሄሳፌ ጉꬃ ዎዴስ ቢርሼታናስ ቤሴስ። ሄሳፌ ጉዬ ታኒ ኣልጋታ ቤያዲስ። ሄ ኣልጋታ ቦላ ፒርዳ ፒርዳናስ ጎዳቴꬂ ኢስታስ ኢሜቲዳይቲ ኡቲዳይታ ቤያዲስ። ቃሴካ ዬሱሳ ጊሽ ኢስቲ ማርካቲዳ ጊሺኔ ፆሳ ቃላ ጊሽ ኢስታ ቆꬌይ ቃንፄቲዳ ኣሳታ ሼምፖካ ቤያዲስ። ሄይታንቲ ዶዓዛሲኔ ኢዛ ሚሲሌዛስ ጎይኒቤቴና። ኢዛ ማላታካ ባ ሊጴ ቦላ ጊዲን ባ ኩሼ ቦላ ዎꬆንታይታ። ኢስቲ ሃይቆፔ ዴንዲዳ ኪርስቶሳራ ኢሲፌ ሺ ላይꬅ ካዎቲዳ። ሃንኮ ኣቲዳ ሃይቄꬃቲ ቃስ ሄ ሺ ላይꬃይ ፖሌታና ጋካናስ ሃይቆፔ ዴንዲቤቴና። ሄሲካ ሃይቆፔ ኮይሮ ዴንꬃ። ኮይሮ ዴንꬃን ዲዛይቲ ሄይቲ ኣንጄቲዳይታኔ ጌሻታ። ናምዓንꬆ ሃይቆይ ኢስታ ቦላ ዎልቃይ ዴና። ኢስቲ ፆሳ ቄሴታኔ ኪርስቶሳ ቄሴታ ጊዳና። ኢስቲ ኪርስቶሳራ ሺ ላይꬅ ካዎታና። ሄ ሺ ላይꬃይ ፖሌቲዳ ማላ ፃላዔይ ባ ቃሼቲዳሶፔ ቢርሼታና። ኣላሜ ቦላ ዲዛይቲ ሄይቲካ ጎጌኔ ማጎጌ ጌቴቲዛይታ ባሌꬃናሲኔ ኢስታ ኦላስ ኤኪ ባናስ ኬዛና፤ ሄይታንታ ቆዳይ ኣባ ኣቻን ዲዛ ኣጬ ማላ። ኢስቲ ኩሜꬃ ቢታ ቦላ ላሌቲዲ ጌሻቲ ዲዛሶዮ ዶሴቲዳ ካታማዮ ጊዶꬂዳ ሺን ሳሎፔ ዎꬊዳ ታማይ ኢስታ ዲፒ ሂስቲ ፁጊዴስ። ካሴ ኢስታ ባሌꬂዳ ዳቡሎሲ ሄ ዶዓዚኔ ዎርዶ ናቤዚ ዲዛሶይ ዲኔን ኤፂዛ ታማ ኣባ ጊዶን ዬጌቲዳ። ኢስቲ ሄን ቃማኔ ጋላስ ሜርናፔ ሜርና ጋካናስ ፁጌታና። ሄሳፌ ጉዬ ኢሲ ጊታ ቦꬃ ኣልጋኔ ሄ ኣልጋ ቦላ ኡቲዳይሳ ቤያዲስ፤ ቢታይኔ ሳሎይ ኢዛ ሲንꬃፌ ባቃቲዳ ሺን ኢስቲ ቢዲ ጌላናሶይ ቤቲቤና። ሄ ኣልጋዛ ሲንꬃን ሃይቂዳ ጪማታኔ ናቴꬃታ ቤያዲስ። ማፃፋቲካ ዶዬቲዳ ሃራ ዴዖ ማፃፋይካ ዶዬቲዴስ፤ ሃይቂዳይቲካ ማፃፋታን ካሴ ፃፌቲ ዲዛ ባ ኦሶ ኦሶ ማላ ፒርዳ ኤኪዳ። ኣባይካ ባ ጋርሳን ዲዛ ሃይቄꬃታ ኢሚዴስ። ሃይቆይኔ ዱፎይ ቃስ ባ ጊዶን ዲዛይቲ ካሴ ሃይቂዳይታ ኢሚዳ። ኢሲ ኢሲ ኣሲ ባ ኦሶ ኦሶ ማላ ፒርዳ ኤኪዴስ። ሃይቆይኔ ዱፎይ ታማ ኣባ ጊዶ ዬጌቲዳ። ሄ ታማ ኣባዚ ናምዓንꬆ ሃይቆ። ኢዛ ሱንꬂ ዴዖ ማፃፋን ፃፌቶንታዴይ ዉሪካ ታማ ኣባን ዬጌቲዴስ። ሄሳፌ ጉዬ ታኒ ኦራꬃ ሳሎኔ ኦራꬃ ሳዓ ቤያዲስ። ካሴ ሳሎይኔ ካሴ ቢታይ ኣꬊ ቢዳ። ሃይሳፌ ጉዬ ኣባይካ ዴና። ጌሻ ካታማያ ኦራꬃ ዬሩሳላሜይ ባ ኣዚናስ ጊጌቲዳ ሚሽራ ማላ ሎዓ ጊጌታዳ ሳሎ ፆሳ ኣቻፌ ዎꬊሺን ታኒ ቤያዲስ። ኣልጋዛፔ “ሄኮ ፆሳ ኣቆሶይ ኣሳራ ዴስ። ኢዚ ኢስታራ ዳና። ኢስቲካ ኢዛ ዴሬታ ጊዳና። ፆሲ ባ ቦንቾን ኢስታራ ኢሲፌ ጊዳና። ኢዚ ኢስታ ፆስ ጊዳና። ኢዚ ኢስታ ኣይፌፔ ኣፉንꬅ ዉርሲ ቁጫና። ካሴ ዎጋይ ኣꬊዳ ጊሽ ሃይቆይ ዎይኮ ሙዞቴꬂ ዎይኮ ዬሆይ ዎይኮ ዋዬይ ሃይሳፌ ጉዬ ዴና” ጊዛ ጊታ ቃላይ ኬዚሺን ታኒ ሲያዲስ። ሄ ኣልጋ ቦላ ኡቲዳይሲካ “ሄኮ ታኒ ዉርሳካ ኦራꬂ ኬሳና!” ጊዴስ። ቃሴካ ታና “ሃይሲ ቃላዚ ኣማኔቲዳ ቱሙ ጊዲዳ ጊሽ ኔ ሃይሳ ፃፋ!” ጊዴስ። ሄሳፌ ጉዬ ታስ “ፖሌቲዴስ! ኣልፋይኔ ኦሜጋይ፤ ኮይሮይኔ ዉርሴꬂ ታና፤ ሳሞቲዳዴስ ታኒ ዴዖ ፑልቶ ሃꬄ ሚሼ ቃንፂሶንታ ኢዛስ ጮ ሜላ ኢማና። ፆኒዳዴይ ሃይሳ ላታና። ታካ ኢዛዴስ ፆሳ ጊዳና። ኢዚካ ታስ ና ጊዳና። ጊዶ ኣቲን ሃንኮ ባቦቲ፥ ኢስታስ ኣማኔቶንታይቲ፥ ቱናቲ፥ ኣሳ ሼምፖ ዎꬊዛይቲ፥ ላይማቲዛይቲ፥ ቢቲዛይቲ፥ ኤቃስ ጎይኒዛይቲ፥ ዎርዶቲዛይቲ፥ ሄይታ ኡባታ ቃዳይ ዲኔን ኤፂዛ ታማ ኣባ ጊዶን ጊዳና። ሄሲካ ናምዓንꬆ ሃይቆ” ጊዴስ። ዉርሴꬃን ላፑን ቦሻቲ ኢስታን ኩሚዳ ላፑን ፁዋታ ኦይኪዳ ላፑን ኪታንቻታፔ ኢሶይ ታኮ ዪዲ ታና “ሃ ያ! ታ ኔና ዶርሳዛ ማቼዮ ሚሺራዮ ቤሳና” ጊዴስ። ኢዚ ታና ኣያናን ኢሲ ጊታ ꬎቃ ዙማ ቦላ ኬሲዲ ጌሻ ካታማያ ኦራꬃ ዬሩሳላሜይ ፆሳ ኣቻፌ ሳሎፔ ዎꬊዛሮ ቤሲዴስ። ኢዛካ ፆሳ ቦንቾን ፖዒሳዉስ። ኢዚ ፖዖዛ ሎዔቴꬃይ ቃስ ኬሂ ቦንቼቲዛ ሹቻ ማላኔ ቢሪሌ ማላ ጌሺኔ ኢያሲጲዴ ጌቴቲዛ ኢንቆ ማላ። ኢዚስ ታማኔ ናምዑ ፔንጌታራ ዲዛ ጊታ ኣዱሳ ጊንቤ ላሻይ ዴስ። ሄ ታማኔ ናምዑ ፔንጌታን ታማኔ ናምዑ ኪታንቻቲ ኤቂዲ ናጌቴስ። ሄ ፔንጌታ ቦላ ታማኔ ናምዑ ኢስራዔሌ ኮቻታ ሱንꬂ ፃፌቲ ኡቲዴስ። ኣርሼይ ሞኪዛ ባጋራ ሄꬑ ፔንጌይ ዴስ። ፑዴ ባጋራ ሄꬑ ፔንጌይ ዴስ። ዱጌሃ ባጋራ ሄꬑ ፔንጌይ ዴስ። ኣርሼይ ዉሊዛ ባጋራ ሄꬑ ፔንጌይ ዴስ። ሄ ካታማይ ጊንቤ ላሻዛስ ታማኔ ናምዑ ዋና ማሳራቴቲ ዴቴስ። ሄ ማሳራቴታ ቦላ ታማኔ ናምዑ ሄ ዶርሳዛ ሃዋሬታ ሱንꬂ ፃፌቲ ኡቲዴስ። ሄሳ ታስ ዮቲዳ ኪታንቻዛስ ሄ ካታማዮኔ ኢዚ ፔንጌታ ቃሴካ ሄ ጊንቤ ላሻዛ ኢዛራ ዋꬊዛ ዎርቃ ዛንጌይ ዴስ። ሄ ካታማይ ኣዱሳቴꬂኔ ኣሆቴꬂ ኦይዱ ባጋራካ ኢሲ ጊና። ሄ ኪታንቻይካ ካታማዮ ባ ኢዛራ ዋꬊዛ ዋꬋ ዛንጌዛራ ዋꬊን ኣዱሳቴꬃይ ታማኔ ናምዑ ሺ ኪሎሜቲሬ ማላ ጊዲዴስ። ኢዚ ꬎቃቴꬂኔ ኣሆቴꬂካ ኢዚ ኣዱሳቴꬃ ጊና ጊዲዴስ። ኪታንቻዚ ጊንቤዛ ዋꬊዴስ። ሄ ኪታንቻዚ ኢዛራ ዋꬊዛ ሚሻዚ ኤሬቲዳ ዋꬋ ሚሻዚ ፄታኔ ኦይዱ ታማኔ ኦይዱ ሜትሬ ማላ ጊዲዴስ። ሄ ጊንቤዚ ጊንቤቲዳይ ኢያሲጲዴ ጌቴቲዛ ሹቻና። ሄ ካታማያካ ማስቶቴ ማላ ጌያ ኡቲዳ ጌሻ ዎርቃፌ ኦሴታዱስ። ሄ ካታማይሲ ጊዶ ማሳራቴ ሹቻይ ዱማ ዱማ ኣልዖ ሹቻን ሎዒ ጊጊዴስ። ኮይሮ ማሳራቴዚ ኢያሲጲዴ፥ ናምዓንꬆዚ ሲምፔሬ፥ ሄꬓንꬆዚ ኬልቄዶኔ፥ ኦይዳንꬆዚ ማርጊዴ፥ ኢቻሻንꬆይ ሳርዶንኪሴ፥ ኡሱፑንꬆይ ሳርዲዮኔ፥ ላፑንꬆይ ኪርስቶሎቤ፥ ኦስፑንꬆይ ቢሪሌ፥ ኡዱፉንꬆይ ቶጳዚዮኔ [ዉራዉሬ]፥ ታማንꬆይ ኪሪስጲራሲሴ፥ ታማኔ ኢሲንꬆይ ያኪንቴ፥ ታማኔ ናምዓንꬆይ ኣሜቲስፂኖሴ ጌቴቲዛ ሹቻታፔ። ሄ ታማኔ ናምዑ ፔንጌቲካ ታማኔ ናምዑ ኢንቆታ። ፔንጌቲ ዉሪካ ኢሶይ ኢሶይ ኢሲ ኢንቆፌ ኦሴቲዳ ሄ ካታማይ ጊዶ ኦጌይ ማስቶቴ ማላ ሃ ዛሪ ቤሲዛ ሙሩታ ዎርቃፌ ኦሴቲዴስ። ዉርሲ ዳንዳዪዛ ጎዳ ፆሲኔ ዶርሳዚ ኢዚስ ፆሳ ኬꬄ ጊዲዳ ጊሽ ሄ ካታማይ ጊዶን ሃራ ፆሳ ኬꬅ ቤያቤኬ። ፆሳ ቦንቾይ ኢዚስ ፖዒዛ ጊሺኔ ዶርሳዚ ኢዚ ፖዖ ጊዲዳ ጊሽ ሄ ካታማይስ ኣዋ ኣርሼይ ዎይኮ ኣጊናይ ፖዒሳናስ ኮሼና። ዴሬቲ ኢዚ ፖዖዛን ሲሜሬታና። ቢታ ካዎቲ ዉሪካ ባ ቦንቾ ኢዚስ ኤሃና። ሄ ካታማይን ቃማይ ባይንዳ ጊሽ ኢዚ ፔንጌቲ ኣይ ዎዴካ ጎርዴቴቴና። ሃራ ካዎታ ጊታቴꬂኔ ቦንቾይ ኢዚስ ያና። ሃራሲዛ ሚሺ ሙሌካ ጌዴ ኢዚን ጌሌና። ቱናቴꬅ ኦꬂዛይቲኔ ዎርዶ ሃሳዪዛይቲ ሙሌካ ሄ ኢዚኮ ጌሌቴና። ሄ ኢዚን ጌላናይታ ሱንꬂ ካሴ ሄ ዶርሳዛ ዴዖ ማፃፋን ፃፌቲዳይታ ፃላላ። ሄሳፌ ጉዬ ሄ ኪታንቻዚ ፆሳ ኣልጋፌኔ ዶርሳዛ ኣልጋፌ ኬዚዛ ማስቶቴ ማላ ፂሎ ቂዢ ጊዳዳ ዴዖ ሃꬃ ሻፋ ታና ቤሲዴስ። ሄ ሻፋዚ ሄ ካታማይስ ዋና ኦጌዛ ጊዶ ኣዳን ሻኪ ዬጊዲ ኣꬊ ቤስ። ሄ ሻፋዛስ ሃዲርሳ ባጋራኔ ኡሻቻ ባጋራ ኣጊናን ኣጊናን ፓጬይ ባይንዳ ላይꬃን ታማኔ ናምዑ ኣጊና ኩሜꬅ ኣይፊዛ ዴዖ ሚꬂ ዴስ። ሄ ሚꬃ ሃይꬃይ ዴሬ ፓꬄስ። ሄሳፌ ጉዬ ቃንጌꬅ ሙሌካ ዴና። ፆሳ ኣልጋይኔ ዶርሳ ኣልጋይ ሄ ካታማይን ዳና። ኢዛ ኦሳንቻቲ ኢዛስ ጎይናና። ኢስቲ ኢዛ ኣይፌሶ ቤያና። ኢዛ ሱንꬂ ኢስታ ሊጴ ቦላ ዳና። ሄሳፌ ጉዬ ቃማይ ዴና። ጎዳ ፆሲ ኢስታስ ፖዒዛ ጊሽ ታማ ፖዖይ ዎይኮ ኣዋ ኣርሼ ፖዖይ ኢስታስ ኮሼና። ኢስቲ ሜርናፔ ሜርናስ ካዎታና። ሄሳፌ ጉዬ ኪታንቻዚ ታስ “ሃይቲ ቃላቲ ኣማኔቲዳይታኔ ቱማታ። ናቤታ ሃሳይሲዛ ጎዳ ፆሲ ማታ ዎዴ ሃናናይሳ ባ ኦሳንቻታስ ቆንጪሳናስ ባ ኪታንቻዛ ኪቲዴስ” ጊዴስ። ዬሱሲካ “ሄኮ ታ ኤሶን ያና፤ ሃይሳ ማፃፋዛ ቲንቢቴ ቃላ ናጊዛዴይ ኢዚ ኣንጄቲዳዴ” ጊዴስ። ሃይታ ሃ ዮዖታ ሲዪዳይኔ ቤዪዳይ ታና ዮሃኒሳ። ታኒ ሃይታ ሃ ዮዖታ ሲዪዳ ዎዴኔ ቤዪዳ ዎዴ ሃይታ ሃ ዮዖታ ታና ቤሲዳ ኪታንቻዛ ሲንꬃን ኢዛስ ጎይናናስ ሆካዳ ኢዛ ቶሆ ቦላ ኩንዳዲስ። ሄ ኪታንቻዚ ቃሴ “ሃይሶ ኣጋ! ሃይሳꬆ ኦꬆፋ! ታካ ኔናራ ኔ ኢሻታራኔ ናቤታራ ቃሴካ ሃይሳ ማፃፋዛ ቃላ ፖሊዛ ኣሳታራ ኦꬂዛዴ። ኔኒ ፆሳስ ፃላላ ጎይና” ጊዴስ። ቃሴካ “ዎዴይ ማቲዳ ጊሽ ኔኒ ሃይሳ ማፃፋዛን ፃፌቲዳ ቲንቢቴ ቃላ ማታሜን ጎርዶፋ። ሃይሳፌ ጉዬ ማካልዛይ ጉጂ ማካሎ፥ ቱናይካ ቱኖ፥ ፂሎይካ ፂሊ ካሎ፥ ጌሻይካ ጌዮ” ጊዴስ “ሄኮ! ታ ኤሶን ያና! ኢሳዴስ ኢሳዴስ ኢዛ ኦሶ ማላ ታ ኢዛስ ኢዛስ ኢማና ዋጋ ታኒ ታ ኩሼን ኦይካ ኡታዲስ። ኣልፋይኔ ኦሜጋይ፥ ሲንꬂኔ ጉዬይ፥ ኮይሮይኔ ዉርሴꬂ ታና” ጊዴስ። ሄ ዴዖ ሚꬃ ኣይፌ ማናሲኔ ሄ ካታማዮ ኢዚ ፔንጌራ ጌላናስ ቤሲዛይቲ ባ ማይዖ ሜጪዳይቲ ኣንጄቲዳይታ። ካና ማላ ጮ ሆꬁ ሆꬂዛይቲ ቢታ ቢቲዛይቲ፥ ላይማቲዛይቲ፥ ሼምፖ ዎꬊዛይቲ፥ ኤቃስ ጎይኒዛይቲ፥ ዎርዶ ሲቂዛይቲኔ ዎርዶ ኦꬂዛይቲ ዉሪካ ሄ ካታማይፔ ካሬን ኣታና። “ታኒ ዬሱሲ ሃይሳ ኢንቴስ ማርካታና ማላ ታ ኪታንቻዛ ዎሳ ኬꬃታስ ዬዳዲስ። ታስ ዬሌቴꬃ ዛርኬይኔ ቆሞይ ካሴ ዳዉቴኮ። ታኒ ፖዒሲዛ ዎንታ ፆሊንቴ።” ፂሎ ኣያናይኔ ኢዛ ሚሺራያ “ሃያ!” ጌቴስ። ሄሳ ሲዪዛዴይካ “ኔ ሃያ!” ጎ። ሳሞቲዳዴይካ ሃዮ፥ ኮይዳዴይ ዴዖ ሃꬄ ኣይኮ ዋጋካ ቃንፆንታ ጮ ሜላ ኡዮ። ሄኮ ታኒ ሃይሳ ማፃፋዛን ፃፌቲዳ ቲንቢቴ ቃላ ሲዪዛይቲ ናጌታና ማላ ዮታይስ። ኦኒካ ሃይሳ ሃ ቃላ ቦላ ኣይኮካ ጉጂኮ ሃይሳ ሃ ማፃፋዛን ፃፌቲዳ ቦሻታ ፆሲ ኢዛ ቦላ ጉጃና። ኦኒካ ሃይሳ ቲንቢቴ ማፃፋን ፃፌቲዳ ቃላታፔ ኢሲኖካ ፓጪሲኮ ሃይሳ ሃ ማፃፋዛን ዮቴቲዳ ዴዖ ሚꬃ ኣይፌፔኔ ጌሻ ካታማይፔ ፆሲ ኢዛ ጊሻዛ ፓጪሳና። ሃይታንታ ታ ማርካቲዛይሲ “ታኒ ኣዳፌ ኤሶን ያና!” ጌስ። ኣሚን! ጎዳ ዬሱሳ ሃያ። ጎዳ ዬሱሳ ኪያቴꬂ ኢንቴናራ ኡባትራ ጊዶ። ኣሚን!