Pammulanna, wettunna Allataala mammula pancajiwi sininna alangngé, iyaro linoé dé'pa nakkérupa, sibawa sigaru-garu mupi. Naiyaro tasi' lowangngé mabbombangngi, iya tongkoéngngi sininna séuwa-séuwaé, nassanraiwi pettang kape', iyakiya akuwasanna Allataala kédo-kédoi ri tompo'na uwai. Nakkedana Allataala, “Ancajino tajang!” Naengkana tajangngé. Namasennanna Allataala mitai gau'éro. Nanapassaranni iyaro tajangngé polé ri pettangngé. Nanasenni Allataala iyaro tajangngé “Esso” sibawa pettangngé “Wenni”. Nalabe'na wennié, nancajina éléé. Iyanaro esso mammulangngé. Nanasenni Allataala iyaro kubah-é “Langi”. Labe'ni wennié nancajina éléé. Iyanaro esso maduwaé. Nanakkeda Allataala, “Sitinajai sininna uwai iya engkaé ri yawana langié maddeppungengngi riséddié onrong, kuwammengngi napaita tanaé.” Nakajajiyanna gau'éro. Nasenni Allataala iyaro tanaé “Pottanang”, sibawa nasenni “Tasi” iyaro uwai maddeppungengngé. Namasennanna Allataala mitai gau'éro. Nanakkedana Allataala, “Sitinajai iyaro tanaé natuwongngi sakke rupa tanet-taneng, iya powassélé'é lise'-lise' sibawa iya powassélé'é buwa-buwa.” Nakajajiyanna gau'éro. Makkuwaniro tanaé natuwongngi sininna sakke rupaé tanet-taneng. Namasennanna Allataala mitai gau'éro. Labe'ni wennié nancajina éléé. Iyanaro esso matellué. Makkuwaniro Allataala pancajiwi iya duwa anu macakka iya battowaé, iyanaritu mataesso untu' makuwasaiwi essoé, sibawa kéteng untu' makuwasaiwi wennié; ri lainnaéro naébbu towi sining wéttowingngé. Nataroni Allataala iyaro anu macakkaé ri langié untu' tajangiwi linoé, untu' makuwasaiwi essoé sibawa wennié, enrengngé untu' passarangngi tajangngé polé ri pettangngé. Namasennanna Allataala mitai gau'éro. Labe'ni wennié nancajina éléé. Iyanaro esso maeppaé. Nanakkeda Allataala, “Sitinajai ri laleng uwai maddeppungeng maéga rupanna anu tuwo, sibawa ri elle'é makkaluttureng maéga manu'-manu'.” Nanapancajini Allataala olokolo battowaé ri tasi'é, sininna rupanna anu iya tuwoé ri laleng uwai, enrengngé sininna rupanna manu'-manu'é. Namasennanna Allataala mitai gau'éro. Nabarakkakini Allataala iya manennaro sibawa nawérénna parénta anu iya tuwoé ri laleng uwai kuwammengngi nabbija-bija sibawa pennoiwi tasi'é, enrengngé lao ri manu'-manu'é kuwammengngi natattamba maéga. Labe'ni wennié nancajina éléé. Iyanaro esso malimaé. Nanakkeda Allataala, “Sitinajai linoé passui sininna rupanna olokolo ri pottanangngé, iya makacuwaé sibawa iya maliyaé, battowa iyaré'ga baiccu.” Nakajajiyanna gau'éro. Makkuwaniro Allataala mébbui iya manennaro namasennanna mitai gau'éro. Nanakkeda Allataala, “Makkekkuwangngé maéloki mébbui rupatauwé iya mancajiyé matu pada-pada Idi sibawa sinrupa Idi. Makuwasai matu mennang risining balé, manu'-manu'é, sibawa sininna olokolo laingngé, muwi makacuwa iyaré'ga maliya, muwi battowa iyaré'ga baiccu.” Makkuwaniro Allataala pancajiwi rupatauwé, sibawa napancajiwi mennang pada-pada Aléna muto. Napancajiwi mennang worowané sibawa makkunrai. Nainappa nabarakkakiwi mennang sibawa makkeda, “Akkéana' eppono iya maégaé, kuwammengngi wija-wijammu monroiwi sininna linoé enrengngé makuwasaiwi. Uwérékko tugas murusu'i sining balé, manu'-manu'é, sibawa sininna olokolo laing iya maliyaé. Untu' inanrému Uwérékko sininna rupanna tanet-taneng iya powassélé'é lise'-lise' sibawa buwa-buwa. Iyakiya lao ri sininna manu'-manu'é sibawa olokolo maliya laingngé, Uwéréngngi wellaé sibawa tanet-taneng maddaungngé selaku inanréna.” Nakajajiyanna gau'éro. Naitani Allataala sininna séuwa-séuwa iya puraé naébburo, namasennang senna'na. Labe'ni wennié nancajina éléé. Iyanaro esso maennengngé. Napurana appancajingenna sininna alangngé. Ri esso iya mapitué purani napattépu Allataala jama-jamangngéro, nainappa mappésauni. Nanabarakkakiwi esso iya mapituéro sibawa napancajiwi esso iya ripallaingngé, nasaba ri essoéro mappésauwi Allataala puranana napattépu jama-jamanna. Iyanaro curitana appancajingenna alangngé. Wettunna Puwang Allataala naébbu sininna alangngé, dé'pa gaga biné lokko sibawa dé'pa gaga tanet-taneng ri linoé, nasaba dé'pa napateppai Puwangnge bosié sibawa dé'pa gaga tau untu' jamai iyaro tanaé. Iyakiya mammulani uwai mattemme polé ri yawa sibawa rica'i tompo'na linoé. Nainappa malani Puwang Allataala céddé tana, nanaébbui séddi tau tolinoé, nainappa nasseppungeng nappase iya mabbéré atuwong ri laleng sebbo inge'na; natuwona iyaro tolinoé. Nainappa mébbuni Puwang Allataala tammeng ri Edén, ri seddé alau, sibawa nataroni kuwaro tolino iya puraé naébburo. Napatuwoni Puwang Allataala sininna rupanna aju iya magelloé, iya powassélé'é buwa-buwa iya makessingngé. Ri tengnga-tengngana tammengngé tuwoni aju iya mabbéré atuwong, sibawa aju iya mabbéré pangissengeng passalenna iya makessingngé sibawa majaé. Séuwa salo massolo polé ri Edén, rica'i tammengngéro; na ri saliwenna Edén iyaro saloé tabbagéi mancaji eppa takké. Iya mammulangngé riyasengngi Pison; iyaro saloé massolo'i mattulilingiwi tana Hawila. Kuwaro engka ulaweng tuléng sibawato wangi-wangiyang iya mawatangngé rilolongeng, enrengngé batu-batu paramata. Salo iya maduwaé riyasengngi Gihon; uwaina massolo'i mattulilingiwi tana Kus. Salo iya matellué riyasengngi Tigris sibawa massolo'i ri seddé alauna Asyur. Salo iya maeppaé riyasengngi Efrat. Nainappa nataroni Puwangnge iyaro tolinoé ri Tammeng Edén untu' jamai sibawa piyarai iyaro tammengngé. Makkedai Puwang Allataala lao ri tolinoéro, “Weddikko manréi buwa-buwa polé ri sininna aju ri tammengngéwé, sangadinna polé ri aju iya mabbéré pangissengeng iya makessingngé sibawa iya majaé. Dé' nawedding muwanré buwana; rékko muwanréi, pasti matéko matu iyatoro essoé.” Nainappa makkeda Puwang Allataala, “Dé' namakessing tolinoé tuwo alé-aléna. Maélo-Ka mébburengngi sellao iya sicoco'é untu' bantui.” Nanalana céddé tana nanaébbui sininna rupanna olokolo pottanangngé sibawa olokolo ri yelle'é. Iya manenna natiwii Allataala lao ri tolinoéro untu' mitai aseng aga iya nawéréngngéngngi matu lao ri olokolo'éro. Iyanaro assalenna olokolo'é ri pottanangngé sibawa ri elle'é lolongengngi asenna tungke'-tungke'. Makkuwaniro tolinoé mpéréngngi aseng lao risininna olokolo ri pottanangngé sibawa ri yelle'é. Iyakiya dé' muwi séddi ri yelle'na wedding mancaji sellao iya sicoco'é untu' bantui. Nainappa naébbu Puwang Allataala iyaro tolinoé memme tinrona, na wettunna matinro mupa, napassuni Puwang Allataala sala séddinna rusu'na polé ritolinoéro, nainappa natongko baténa sibawa juku. Polé ri rusu'éro naébbuni Puwangnge séddi tau makkunrai, nainappa natiwi lao ri worowanéro. Nakkedana iyaro tolinoé, “Iyanaé tau iya pada-padaé sibawa iyya – buku polé ri bukukku, sibawa juku polé ri jukuku. Uwasengngi makkunrai, nasaba riyalai polé ri worowané.” Iyanaro saba'na tau worowané nasalaiwi ambo' sibawa indo'na, nanasséddi sibawa bainéna, namancaji séddina iya duwa. Iyaro worowané sibawa makkunraié mabbélampélangngi, iyakiya dé' mennang napéneddingiwi sirié. Ulaé iyanaritu olokolo iya kaminang maccaé mabbellé polé ri sininna olokolo iya naébbué Puwang Allataala. Makkutanai iyaro ulaé lao ri makkunraiéro, “Tonget-tongengngiga Allataala mattéyakko manréi buwa-buwa polé ri sininna ajué ri tammengngéwé?” Nappébali iyaro makkunraié, “Weddikki manréi buwa-buwa polé ri tungke' aju ri laleng tammengngéwé, sangadinna polé ri aju iya engkaé ri tengnga-tengngana tammengngé. Nattéyakki Allataala manréi buwa polé ri ajuéro iyaré'ga géssai; rékko ripogau'i, matéki matu.” Nappébali iyaro ulaé, “Dé' natongeng iyaro; dé' mumaté matu. Napowadai Allataala iyaro nasaba naissengngi makkedaé rékko muwanréi iyaro buwaé, tattimpa'i matu pikkirammu; mancajiko matu pada-pada Allataala sibawa muwissenna aga iya makessingngé sibawa aga iya majaé.” Naitani iyaro makkunraié makkedaé iyaro ajué magello, sibawa buwana paitai malunra untu' riyanré. Sibawa mappikkiri'i temmaka kessinna rékko mancajiwi mapanré. Rimakkuwannanaro nacéppuni buwana iyaro ajué, nananréi, sibawa nawéréng towi lakkainna, nanaanré toni lakkainna. Purana muwa naanré iyaro buwaé, tattimpa'ni pikkiranna mennang sibawa namaingekini mennang makkedaé mallusu-lusui mennang. Rimakkuwannanaro nasamponi mennang tubunna sibawa daung ara iya natoloé mennang. Iyaro arawéngngé naéngkalingani mennang Puwang Allataala joppa ri laleng tammengngé, nanassubbuna mennang iya duwa ri yelle'na aju-kajungngé kuwammengngi dé' nariita ri Puwangnge. Iyakiya mangobbii Puwang Allataala lao ri worowanéro, “Kégako?” Nappébali iyaro worowané, “Uwéngkalinga-Ko ri Tammengngé; métauka, jaji massubbuka nasaba mallusu-lusuka.” Nakkutana Allataala, “Niga powadakko makkedaé mabbélampélakko? Muwanréiga buwa iya Uwattéyangngé muwanréro?” Nappébali iyaro worowané, “Makkunrai iya muwéréngngékka untu' sibawakka pura mpérékka iyaro buwaé, nauwanréi.” Namakkutana Puwang Allataala lao ri makkunraiéro, “Magi mupogau'i iyaro?” Pappébalinna, “Nabengnguwakka ulaé, angkanna uwanré iyaro buwaé.” Purairo makkedani Puwang Allataala lao ri ulaéro, “Maéloko rihukkung nasaba pangkaukemmuro; polé ri sininna olokolo'é banna iko bawang iya harusu'é tanggungngi tanroéwé: Mappammulai makkekkuwangngé lolo'ko matu sibawa babuwamu, sibawa manré awu gangka tuwomu. Iko sibawa makkunraiéro tuli sibenciko matu, wija-wijanna sibawa wija-wijammu tuli simusui matu. Wija-wijanna naancuru'i matu ulummu, na iko muwokkoi matu amputuna mennang.” Nanakkeda Puwangnge lao ri makkunraiéro, “Maélo-Ka tambaiwi peddimu ri wettu mattampu'mu sibawa ri wettu mémmana'mu. Iyakiya namuni makkuwaro, tette mutowi muwélori lakkaimmu, iyakiya tunru'ko matu lao ri aléna.” Nainappa makkeda Puwangnge lao ri worowanéro, “Muwéngkalingai ada-adanna bainému nainappa manréi buwa iya puraé Uwattéyang muwanré. Nasaba pangkaukemmuro, tattanroi tanaé. Harusu'ko majjama marejjing gangka tuwomu kuwammengngi iyaé tanaé weddingngi powassélé genne inanré untu' alému. Alekale sibawa dori napowassélé tanaéwé untu' alému, sibawa tanet-taneng liyaé mancajiwi matu inanrému. Sipposo-posoko majjama matu sibawa mapuse untu' mébbui iyaé tanaé powassélé séuwaé, angkammu lisu ri tanaé, saba' polé ri tanaé ritu riyébbuko. Ripancajiko polé ri tanaé, sibawa lisuko matu ri tanaé.” Nasenni Adam bainéna Hawa, nasaba iyaro makkunraié mancaji indo'nai sininna rupatauwé. Nanaébburenni Puwang Allataala pakéyang polé ri bingkulang olokolo'é untu' Adam sibawa bainéna, nainappa napakkennangeng mennang. Nakkedana Puwang Allataala, “Makkekkuwangngé mancajini tolinoé pada-pada Idi sibawa mappunnai pangissengeng passalenna iya makessingngé sibawa majaé. Jaji parellui ripésangkai manréi buwa aju iya mabbéré atuwong, kuwammengngi aja' natuwo untu' mannennungeng.” Nanarukkani Puwang Allataala tolinoé polé ri Tammeng Edén sibawa suroi jamai tana iya mancajiyé assalennaro. Nainappa, ri seddé alauna tammengngéro ri yolona sumpang muttama'é, nataroni Puwang Allataala kérub-kérub-é, sibawa séuwa peddang malluwa'-luwa' iya maccennéé mattulili, untu' monrowangngi laleng laowé ri aju iya mabbéré atuwonro. Nanallalengiwi dé' muwi séddi tau mulléi muttama sibawa maddeppériwi ajuéro. Nasilurenna Adam sibawa Hawa, bainéna, namattampu'na iyaro makkunraié. Najajiyanna séddi ana' worowané sibawa makkeda, “Nasibawang pattulunna Puwangnge lolongekka séddi ana' worowané.” Nanasenni iyaro ana'é Kain. Nainappa jajiyassi Hawa séddi ana' worowané, asenna Habél. Habél mancaji pakkampi bimbala'i, iyakiya Kain mancaji pataniwi. Siyagangngaré wettu ri munrinna nalani Kain sibagiyang polé ri éngngalanna nainappa nakkasuwiyangeng lao ri Puwangnge. Nainappa Habél malai ana' bimbala iya macowaé polé ri sala séddinna bimbala'na, nagéréi, nainappa nakkasuwiyangeng bagiyang iya kaminang makessingngé lao ri Puwangnge. Masennangngi Puwangnge lao ri Habél sibawa pakkasuwiyanna, iyakiya nasampéyangngi Kain sibawa pakkasuwiyanna. Macai senna'ni Kain, sibawa majjamerru tappana. Namakkedana Puwangnge lao ri Kain, “Magi mumacai? Magi tappamu najjamerru? Rékko mupogau'i makessingngé, pasti cabbéruko; iyakiya rékko mupogau'i majaé, mattajengngi dosaé untu' muttama ri laleng atimmu. Maéloi dosaé kuwasaiwi alému, iyakiya harusu'ko caui.” Nakkeda Kain lao ri Habél, anrinna, “Laono mai talao ri dare'é.” Wettunna mennang lettu kuwaro, naluruini Kain sibawa naunoi Habél anrinna. Nakkutana Puwangnge ri Kain, “Kégai Habél, anrimmu?” Nappébali Kain, “Dé' uwissengngi. Harusu'ka'ga monrowangngi anrikku?” Nanakkeda Puwangnge, “Magi mupogau'i gau' iya mappakatau-tauéro? Mangobbii darana anrimmu polé ri tanaé lao ri Iyya, pada-pada sadda iya goraé méllau pakkabale. Tattanroko angkanna dé' naweddinna muusahakang tanaé. Iyaro tanaé purai naiso darana anrimmu, samanna natimpa'i bawana untu' tarimai darana anrimmuro wettummu mpunoi. Rékko mallaonrumako, dé' napowassélé matu aga-aga tanaé; mancajiko matu tau kalao-lao iya dé'é nappunnai onrong naonroi ri linoé.” Nanakkeda Kain lao ri Puwangnge, “Matane' senna iyaro pahukkungengngé, dé' uwulléi tanggungngi. Murukkaka polé ri tanaéwé, mabéla polé ri ahadérékem-Mu. Mancajika matu tau kalao-lao iya dé'é nappunnai onrong naonroi ri linoé, sibawa riyunoka matu ri nigi-nigi iya runtu'ékka.” Iyakiya makkedai Puwangnge, “Dé'. Rékko riyunoko, selaku pamale'na, pitu tau muttama'ni iya mpunoékkoro riyuno towi matu.” Nainappa Puwangnge taro tanrang ri Kain kuwammengngi nigi-nigi iya siruntu'é aléna dé' naunoi. Nanalaona Kain polé ri yolona Puwangnge nanaonro ri tana iya riyasengngé “Kalao-laongngé” ri seddé alauna Edén. Kain sibawa bainéna lolongengngi ana' worowané, iya nawéréngngé aseng Hénokh. Nainappa patettong Kain séddi kota nanasengngi iyaro kotaé situru asenna ana'naro. Hénokh ambo'na Irad. Irad ambo'na Méhuyaél. Méhuyaél ambo'na Métusaél, na Métusaél iyanaritu ambo'na Lamékh. Lamékh mappunnaiwi duwa tau bainé, Ada sibawa Zila. Ada jajiyangngi Yabal, na wija-wijanna Yabalnaro bangsa iya mappiyara olokolo'é sibawa monro ri laleng kémaé. Anrinna riyaseng Yubal, na wija-wijanna Yubal iyanaritu pacculé musi' kacapi sibawa suling. Zila jajiyangngi Tubal-Kain, na wija-wijanna mébbui sininna rupanna pakkakkasa polé ri tembagaé sibawa bessié. Anrinna Tubal-Kain makkunraié riyasengngi Naama. Nakkedana Lamékh lao ri iya duwa bainéna, “Ada sibawa Zila, éngkalingai! Uwunoi séddi kallolo nasaba puraka naunru. Rékko pitu tau riyuno mpale'i tau mpunoéngngi Kain, pituppulo pitu tau riyuno matu rékko iyya riyuno.” Adam sibawa bainéna lolongessi séddi tau ana' worowané. Adanna Hawa, “Allataala pura mpérékka ana' worowané selaku passulléna Habél, iya puraé nauno Kain.” Rimakkuwannanaro nasenni Hawa iyaro ana'é Sét. Sét mappunnai ana' worowané iya nawéréngngé aseng Enos. Ri wettuénnaro nappammula tauwé teppui asenna Puwangnge rékko massompai. Iyanaé daftarna wija-wijanna Adam. [Wettunna Allataala pancajiwi rupatauwé, ripancajiwi mennang pada-pada aléna Allataala. Ripancajiwi mennang worowané sibawa makkunrai. Ribarakkakiwi mennang sibawa riyasengngi mennang “Tolino”.] Wettunna Adam makkéumuru 130 taung, lolongenni ana' worowané iya maéloé pada sibawa aléna, nainappa nawéréng aseng Sét. Purairo tuwo mupi Adam 800 taung sibawa lolongeng ana'-ana' laingngé. Matéi ri umuru 930 taung. Wettunna Sét makkéumuru 105 taung, lolongenni ana' worowané, asenna Enos. Purairo tuwo mupi Sét 807 taung sibawa lolongeng ana'-ana' laingngé. Matéi ri umuru 912 taung. Wettunna Enos makkéumuru 90 taung, lolongengngi ana' worowané, asenna Kénan. Purairo tuwo mupi Enos 815 taung sibawa lolongeng ana'-ana' laingngé. Matéi ri umuru 905 taung. Wettunna Kénan makkéumuru 70 taung, lolongenni ana' worowané, asenna Mahalaleel. Tuwo mupi Kénan 840 taung sibawa lolongeng ana'-ana' laingngé. Matéi ri umuru 910 taung. Wettunna Mahalaleel makkéumuru 65 taung, lolongengngi ana' worowané, asenna Yaréd. Purairo tuwo mupi Mahalaleel 830 taung sibawa lolongeng ana'-ana' laingngé. Matéi ri umuru 895 taung. Wettunna Yaréd makkéumuru 162 taung, lolongengngi ana' worowané, asenna Hénokh. Purairo tuwo mupi Yaréd 800 taung sibawa lolongeng ana'-ana' laingngé. Matéi ri umuru 962 taung. Wettunna Hénokh makkéumuru 65 taung, lolongenni ana' worowané, asenna Métusalah. Purairo tuwoni Hénokh ri laleng passéddiyanna sibawa Allataala 300 taung ittana. Lolongenni ana'-ana' laingngé sibawa umuru'na narapii 365 taung. Nasaba Hénokh tuli tuwoi maréppé ri Allataala, mallajanni nasaba riyalai ri Allataala. Wettunna Métusalah makkéumuru 187 taung, lolongenni ana' worowané, asenna Lamékh. Purairo tuwo mupi Métusalah 782 taung sibawa lolongeng ana'-ana' laingngé. Matéi ri umuru 969 taung. Wettunna Lamékh makkéumuru 182 taung, lolongenni ana' worowané. Makkedai Lamékh, “Iyaé ana'é mabbéréi matu aringengeng wettutta majjama ladde jamai tana iya natanroiyé Puwangnge.” Rimakkuwannanaro nasenni Lamékh iyaro ana'na Nuh. Purairo tuwo mupi Lamékh 595 taung. Lolongengngi ana'-ana' laingngé, sibawa matéi ri umuru 777 taung. Makkéumuru'nana Nuh 500 taung, lolongenni tellu ana' worowané, iyanaritu Sém, Yafét sibawa Ham. Tattamba maéganana tolinoé sibawa massanra ri sininna linoé, sibawa ana'-ana' makkunraié rijajiyang, naitani mahlu'-mahlu' ilahié makkedaé iyaro ana'-ana'daraé magelloi. Nanakawingini mennang ana'-ana'dara iya napojiyé. Nanakkedana Puwangnge, “Dé' Upalaloi tolinoé tuwo mannennungeng; mennang ritu mahlu' dé'é namannennungeng, harusu'i maté. Mappammulai makkekkuwangngé umuru'na mennang dé' matu nalebbi 120 taung.” Ri wettuénnaro, sibawa rimunrinnato, engka sining tau rassasa ri linoé. Mennang wija-wijanna ana'-ana'dara tolinoé iya kawingngé sibawa mahlu'-mahlu' ilahié. Iyaro sining tau rassasaé iyanaritu sining pahlawang battowa sibawa sining tau tarompo riyolo. Naitani Puwangnge pékkugi jana sining tauwé ri linoé; sininna pikkiranna mennang tuli majai. Massessekaléni pura pancajiwi mennang sibawa taroi mennang ri linoé. Makkuwamani massesse'na, angkanna makkeda, “Maélo-Ka pabbinasai tolinoé iya puraé Upancajiro, sibawa topa manu'-manu'é sibawa olokolo laingngé, saba' massessekalé-Ka pura pancajiwi mennang.” Iyakiya Nuh napésennangiwi atinna Puwangnge. Iyakiya sininna tau laingngé majai ri pakkitanna Allataala, sibawa abeccokengngé engkai kégi-kégi. Natironi Allataala linoéwé nabanna ja bawang naita, saba' sininna tauwé majai atuwonna. Nanakkeda Allataala lao ri Nuh, “Purani upettui untu' paccappui atuwonna sininna mahlu'é. Maéloka paccappui mennang silaong linoé, nasaba pennoni linoé sibawa abeccokenna mennang. Ebburenni alému séddi kappala' polé ri aju iya masse'é; ébburengngi bili'-bili' ri lalenna, sibawa lapiriwi kamalo polé ri laleng sibawa polé ri saliweng. Iyaro kappala'é harusu'i 133 météré lampéna, 22 météré sakkana, sibawa 13 météré tanréna. Ebbuno pabbingeng ri kappala'éro, sibawa ébburengngi pallawangeng 44 sénti polé ri pabbingengngé sibawa renrinna. Ebbui iyaro kappala'é mallangga tellu, sibawa taroiwi séddi sumpang ri benrénna. Maéloka papoléi lémpe'é untu' pabbinasai tungke' mahlu' iya tuwoé ri linoé. Sininna séuwa-séuwaé ri linoé matéi matu, iyakiya nasibawang iko maéloka mébbu assijancing. Uttama'no ri laleng kappala'éro silaong bainému, sibawa ana'-ana'mu enrengngé sining bainéna mennang. Tiwii towi sininna rupanna inanré untu' alému sibawa untu' olokolo'éro.” Napogau'ni Nuh sininna iya napparéntangngé Allataala lao ri aléna. Nanakkedana Puwangnge lao ri Nuh, “Uwitai makkedaé iko alé-aléna tau iya pogau'éngngi élo-Ku. Jaji, uttama'no ri laleng kappala'éro silaong sininna kaluwargamu. Pitungngessopi Upateppai matu bosi iya dé'é matu nasoro patappulo esso patappulo wenni ittana, kuwammengngi nasininna mahlu' tuwoé iya puraé Upancajiro binasai.” Nanapogau'ni Nuh sininna iya napparéntangngé Puwangnge lao ri aléna. Umuru'na Nuh 600 taung wettunna kajajiyang lémpe' rajaé ri linoé. Nuh sibawa bainéna, sibawa ana'-ana'na silaong sining bainéna mennang, muttama'ni ri laleng kappala'éro untu' passalama'i aléna polé ri lémpe'é. Sikaju lai sibawa sikaju komba polé ri tungke' rupanna manu'-manu'é sibawa olokolo laingngé – muwi iya hallala'é iyaré'ga iya harangngé – muttama'ni ri laleng kappala'éro silaong sibawa Nuh, situru sibawa paréntana Allataala. Pitungngesso ri munrinna poléni lémpe'é mappo'i linoé. Wettunna Nuh makkéumuru 600 taung, ri tanggala seppulona pitu uleng duwa, mareppa'ni sininna mata uwai ri yawana linoé. Sininna tange uwai ri langié tattimpa'ni, nateppana bosié patappulo esso patappulo wenni ittana. Iyatoro essoé, Nuh sibawa bainéna muttama'ni ri laleng kappala'éro silaong iya tellu ana'na, iyanaritu Sém, Yafét sibawa Ham enrengngé sining bainéna mennang. Nasibawang mennang muttama' toni tungke' rupanna manu'-manu'é sibawa olokolo laingngé, muwi iya makacuwaé iyaré'ga iya maliyaé, iya battowaé iyaré'ga baiccu'é. Sikaju lai sibawa sikaju komba polé ri tungke' rupanna mahlu' tuwoé muttama'ni ri laleng kappala'éro silaong sibawa Nuh, situru sibawa paréntana Allataala lao ri aléna. Muttama manennana, natongkoni Puwangnge sumpanna kappala'é. Iyaro lémpe'é matterui mangalle patappulo esso ittana, sibawa cuku' tanréna uwai angkanna iyaro kappala'é weddingngi monang. Napédé matanré uwai, nataronakkonanna iyaro kappala'é ri tompo'na uwai. Napédé tattamba tanréna iyaro uwai, angkanna nalle'ni sining bulu iya kaminang matanré. Natteru ménré uwai lettu narapi pitu météré tanréna ri yasé'na coppo-coppo bulué. Iyaro uwai dé' naengka nanonno 150 esso ittana. Allataala dé' nallupaiwi Nuh sibawa sininna olokolo iya engkaé naéwa sibawang ri laleng kappala'éro. Naébbuni Allataala mangiri angingngé, angkanna iyaro uwai mammulani nonno. Sininna mata uwai ri yawana linoé sibawa sininna sumpang uwai ri langié nasuluni. Mappésauni bosié, sibawa pédé nonnoni uwai. Labe'nana 150 esso dé'na namatanré makkuwaro uwai. Ri tanggala seppulo pitu uleng pitu, iyaro kappala'é tasséngkéni ri séddié coppo buluna Ararat. Matteruni nonno uwaina ri tanggala séddinna uleng seppulo, coppo buluna mammulani paita. Labe'nana patappulo esso, natimpa'ni Nuh séuwa tellongenna kappala'é, nanaleppessang sikaju kao-kao. Iyaro manu'-manu'é dé'na nalisu ri kappala'é sangadinna matterui luttu lao lisu angkanna nonno sisenni lémpe'é. Na wettuéro, malleppessanni Nuh sikaju jangang-jangang untu' missengngi mémegga iyaro uwai nonnoni. Iyakiya nasaba natongko mupi uwai sininna pottanangngé, iyaro jangang-jangangngé dé' nalolongeng onrong untu' maccékkéng. Nanalisuna ri kappala'é; naloro'ni Nuh limanna nanatiwii muttama. Mattajessi Nuh pitungngesso, nainappa naleppessassi iyaro jangang-jangangngé. Ri arawéngngé lisuni iyaro manu'-manu'é ri aléna tiwi silampa daung zaitun iya manyilaé ri pappitto'na. Naissenni makkekkuwangngé makkedaé nonnoni uwai. Mattajennana pitungngessopi, naleppessassi iyaro jangang-jangangngé siseppa; naiyaro sisengngé dé'na nalisu iyaro manu'-manu'é ri aléna. Wettunna Nuh makkéumuru 601 taung, ri tanggala séddinna uleng séddi, nonno sisenni uwai. Natimpa'ni Nuh pabbingenna iyaro kappala'é, namakkita mattulili. Naitani makkedaé marakkoni tompo'na tanaé. Ri tanggala duwappulo pitu uleng duwa, marakkoni linoé. Nanakkedana Allataala lao ri Nuh, “Assuno polé ri kappala'éro silaong sibawa bainému, ana'-ana'mu sibawa sining bainéna mennang. Tiwii massu sininna manu'-manu'é sibawa olokolo laingngé, battowa iyaré'ga baiccu, kuwammengngi nawedding mabbija-bija sibawa tassiya ri sininna linoé.” Nanassuna Nuh polé ri kappala'éro silaong sibawa bainéna, ana'-ana'na sibawa sining bainéna mennang. Sininna manu'-manu'é sibawa olokolo pottanangngé massuni polé ri kappala'éro, tungke'-tungke' silaong kalompo sinrupanna. Patettonni Nuh séuwa mézba untu' Puwangnge. Nalani sikaju polé ri tungke' rupanna manu'-manu'é sibawa olokolo laingngé iya hallala'é, nainappa nakkasuwiyangeng selaku akkarobangeng ritunu ri yasé'na mézbaéro. Bau mabauna iyaro akkarobangeng pakkasuwiyangngé pésennangiwi atinna Puwangnge, nanakkeda-Na ri laleng ati, “Dé'na Umaélona tanroiwi linoéwé nasaba pangkaukenna tolinoé; Uwisseng makkedaé mappammulai wettu malolona, iyaro pikkiranna tolinoé majai. Dé'na matu naengkana Upabbinasai sininna mahlu' iya tuwoé pada-pada iya nappaé Upogau'éwé. Gangka engkana mupa iyaé linoé, tuli engka wettu mattaneng sibawa wettu méngngala, wettu makeccé sibawa wettu mapella, wettu timo sibawa wettu bosi, esso sibawa wenni.” Nabarakkakini Allataala Nuh sibawa ana'-ana'na sibawa makkeda, “Akkéana' eppono iya maégaé, kuwammengngi wija-wijammu monroiwi sininna linoé. Sininna manu'-manu'é sibawa balé enrengngé olokolo iya laingngé métaui matu ri iko. Engka manengngi mennang ri laleng akuwasammu. Iya manennaro weddingngi mancaji inanrému, pada-padato tanet-taneng manyilaé; iya manennaro Uwérékko untu' mancaji inanrému. Séddi-séddinna iya dé'é nawedding muwanré iyanaritu juku iya engkaé mupa darana, saba' iyaro nyawaé engkai ri laleng daraé. Tungke' tau sibawa olokolo iya mpunoéngngi tolinoé Uhukkung matéi matu. Ripancajiwi tolinoé pada-pada Iyya; rimakkuwannanaro, nigi-nigi mpunoi tolinoé, riyuno towi ri tolinoé. Ya, harusu'ko makkéana' eppo iya maégaé, kuwammengngi wija-wijammu monroiwi sininna linoé.” Makkedani Allataala lao ri Nuh sibawa ana'-ana'na, “Makkekkuwangngé Uwébbuni assijancik-Ku sibawa iko enrengngé sibawa wija-wijammu, nenniya sibawa sininna mahlu' iya tuwoé, iyanaritu manu'-manu'é sibawa sininna olokolo pottanangngé, sininna iya massué polé ri kappala'éro silaong sibawa iko. Iyanaé assijancik-Ku sibawa iko: Majjanci-Ka makkedaé sininna mahlu' iya tuwoé dé'na matu naripabbinasa sibawa lémpe. Dé'na matu naengkana lémpe iya pabbinasaéngngi linoéwé. Selaku tanrang assijancing mannennungengngé, iya Uwébbué sibawa iko enrengngé sininna mahlu' iya tuwoé, Utaroi tarawuk-Ku ri ellungngé selaku tanrang assijancik-Ku sibawa linoé. Tungke'-tungke', rékko Utongkoi langié sibawa ellung, nainappa paita iyaro tarawué, Uwéngngerangngi matu jancik-Ku lao ri iko sibawa lao risininna mahlu' tuwoé, iyanaritu makkedaé lémpe'é dé'na matu napabbinasai sininna iya tuwoé. Rékko paitai tarawué ri ellungngé, Uwitai matu sibawa méngngerangngi assijancing iya mannennungengngéro antara Iyya sibawa sininna mahlu' iya tuwoé ri linoé. Iyanaro tanranna jancik-Ku iya Uwabbéréyangngé lao ri sininna mahlu' iya tuwoé ri linoé.” Ana'-ana'na Nuh iya massué polé ri kapppala'éro iyanaritu Sém, Yafét sibawa Ham. (Ham iyanaritu ambo'na Kanaan.) Iya telluro ana'na Nuh iyanaritu néné-nénéna sininna tauwé ri linoé. Nuh séddiwi patani, sibawa aléna ritu bunge'-bunge' mébbu dare anggoro. Puranana naénung Nuh anggoro'na, mancaji mabo'ni. Naludunni sininna pakéyanna nainappa matinro mallusu-lusu ri laleng kémana. Wettunna Ham, iyanaritu ambo'na Kanaan, naitai makkedaé mallusu-lusui ambo'na, massuni nanappaissengengngi iyaro gau'éro lao ri iya duwa silessurenna. Nainappa Sém sibawa Yafét mala silampa jumba nanapallebba'i ri lekke'na mennang. Joppa soroni mennang muttamakiwi kémaéro nanaparampakiwi ambo'na mennang sibawa iyaro jumbaé. Makkita libenréngngi kuwammengngi dé' naitai ambo'na mennang iya mallusu-lusuéro. Mainge'nana Nuh polé ri amabokenna sibawa naissenna aga napogau' ana' malolona lao ri aléna, makkedani, “Tattanroi Kanaan! Mancajiwi matu ata matunaé lao ri silessu-silessurenna. Pojiwi Puwangnge, Allataalana Sém! Mancajiwi matu Kanaan atanna Sém. Tennapodo Allataala tambaiwi barakka'é lao ri Yafét sibawa lowangiwi onrong naonroiyé. Tennapodo wija-wijanna monroi silaong sibawa wija-wijanna Sém. Mancajiwi matu Kanaan atanna Yafét.” Puranana lémpe'éro, tuwo mupi Nuh 350 taunna. Matéi ri umuru 950 taung. Iyanaé wija-wijanna ana'-ana'na Nuh, iyanaritu Sém, Yafét sibawa Ham. Puranana lémpe'é, iya tellu lolongenni ana'-ana' worowané. Ana'-ana'na Yafét iyanaritu Gomér, Magog, Madai, Yawan, Tubal, Mésékh sibawa Tiras. Wija-wijanna Gomér iyanaritu pabbanuwana Askénas, Rifat sibawa Togarma. Wija-wijanna Yawan iyanaritu pabbanuwana Elisa, Spanyol, Siprus sibawa Rodés. Mennang toriyolona bangsa-bangsa iya monroé mattuttung wiring tasi'é sibawa pulo-puloé. Iyanaro sininna wija-wijanna Yafét. Tungke' bangsa sibawa suku monroi ri wanuwanna tungke'-tungke', sibawa mappunnaiwi basana muto. Ana'-ana'na Ham iyanaritu Kus, Maséré, Libia sibawa Kanaan. Wija-wijanna Kus iyanaritu pabbanuwana Séba, Hawila, Sabta, Raéma sibawa Sabtékha. Wija-wijanna Raéma iyanaritu pabbanuwana Syéba sibawa Dédan. Kus mappunnaiwi ana' worowané asenna Nimrod iya mancajiyé tau poré mammulangngé ri linoé. Nasaba pattulunna Puwangnge mancajiwi paddengngeng iya maccaé. Rimakkuwannanaro biyasai tauwé makkeda, “Tennapodo Puwangnge pancajiko séddi paddengngeng iya maccaé pada-pada Nimrod.” Bunge'-bunge'na akkarungenna napalaiwi Babél, Erekh sibawa Akad, iya tellunna ri Babilonia. Polé kuwaro laoni ri Asyur, nainappa napatettong kota Niniwé, Réhobot-Ir, Kalah, sibawa Résen iya monroé ri pallawangenna Niniwé sibawa Kalah. Iya manennaro iyanaritu kota-kota battowa. Wija-wijanna Maséré iyanaritu pabbanuwana Lidia, Anamim, Léhabim, Naftuhim, Pétrusim, Kasluhim sibawa Kaftorim. Iyaro bangsa Kasluhingngé toriyolonai bangsa Filistingngé. Ana'-ana'na Kanaan, iyanaritu Sidon, iya macowaé, sibawa Hét. Kanaan toriyolona towi bangsa Yébusié, Amorié, Girgasié, tau Héwié, Arkié, Sinié, Arwadié, Semarié sibawa Hamatié. Iyaro suku-suku bangsa Kanaangngé tassiyai mabéla, angkanna sining pakkasésénna wanuwanna mennang mallebbangngi polé ri Sidon liyattang mattuju ri Gérar, lettu seddéna Gaza, sibawa lilau mattuju ri Sodom, Gomora, Adma sibawa Zéboim, lettu seddéna Lasa. Iya manennaro wija-wijanna Ham. Tungke' bangsa sibawa suku monroi ri wanuwanna tungke'-tungke' sibawa mappunnaiwi basana muto. Sém, kakana Yafét, iyanaritu toriyolona sininna bangsa Ibranié. Ana'-ana'na Sém iyanaritu Elam, Asyur, Arpakhsad, Lud sibawa Aram. Wija-wijanna Aram iyanaritu pabbanuwana Us, Hul, Géter sibawa Mas. Arpakhsad ambo'na Sélah. Na Sélah ambo'na Eber. Eber mappunnaiwi duwa ana' worowané; iya mammulangngé riyasengngi Pélég, nasaba ri wettuénnaro natabbagé-bagé bangsaé ri linoé; iya maduwaé riyasengngi Yoktan. Wija-wijanna Yoktan iyanaritu pabbanuwana Almodad, Séléf, Hazar-Mawét sibawa Yérah, Hadaram, Uzal, Dikla, Obal, Abimaél, Syéba, Ofir, Hawila sibawa Yobab. Iya manennaro wija-wijanna Yoktan. Daéra naonroiyé mennang mallebbangngi polé ri Mésa lao ri Safar, iyanaritu daéra mabbulué ri seddé alau. Iya manennaro wija-wijanna Sém. Tungke' bangsa sibawa suku monroi ri wanuwanna tungke'-tungke' sibawa mappunnaiwi basana muto. Iya manennaro, wija-wijanna Nuh, tassibangsa-tassibangsa, situru jori assossorenna mennang tungke'-tungke'. Mennang ritu panonnoi bangsa-bangsaé ri linoéwé puranana iyaro lémpe rajaé. Pammulanna, bangsa-bangsaé ri sininna linoé banna mappunnaiwi séddi basa sibawa makkégunangngi mennang ada-ada iya padaé. Wettunna mennang solléi lao ri seddé alau, lettu'ni mennang riséddié tanété ri Babilonia, nainappa mattette kuwaro. Makkedani mennang séddié lao ri laingngé, “Ayo taébbu bata sibawa tunui gangkanna matedde.” Makkuwaniro mennang mappunnai bata untu' batu riyébbu bola sibawa kamalo untu' bahang pappije'na. Adanna mennang, “Laono mai tapatettong kota sibawa manara iya coppo'naé lettu ri langié, kuwammengngi tarompoki sibawa dé' tassara-sarang ri sininna linoé.” Nanonnona Puwangnge untu' mitai kota sibawa manara iya napatettongngé tolinoé. Nainappa makkeda, “Mennangngé séddimi bangsa sibawa séddimi basa, na iyaé nappai pammulanna polé ri rancana-rancanana mennang. Dé'na namaitta mennang naulléi matu pogau'i agi-agi iya napuwéloé mennang. Makessingengngi nonnoki sibawa pakacauwi basana mennang kuwammengngi dé' mennang napahangngi séddié lao ri laingngé.” Makkuwaniro Puwangnge passara-sarangngi mennang lao ri sininna linoé. Nanappésauna mennang patettongngi iyaro kotaé. Rimakkuwannanaro iyaro kotaé riyasengngi Babél, nasaba kuwaniro Puwangnge pakacauwi basana sininna bangsaé, sibawa polé kuwaniro mennang ripassara-sarang ri Puwangnge lao ri sininna linoé. Iyanaé wija-wijanna Sém. Duwattaung labe'na lémpe' rajaé, wettunna Sém makkéumuru 100 taung, lolongenni séddi ana' worowané iya riyasengngé Arpakhsad. Purairo tuwo mupi 500 taung, sibawa lolongeng ana'-ana' laingngé. Wettunna Arpakhsad makkéumuru 35 taung, lolongenni ana' worowané, asenna Sélah. Purairo tuwo mupi Arpakhsad 403 taung, sibawa lolongeng ana'-ana' laingngé. Wettunna Sélah makkéumuru 30 taung, lolongenni ana' worowané, asenna Eber. Purairo tuwo mupi Sélah 403 taung, sibawa lolongeng ana'-ana' laingngé. Wettunna Eber makkéumuru 34 taung, lolongenni ana' worowané, asenna Pélég. Purairo tuwo mupi Eber 430 taung, sibawa lolongeng ana'-ana' laingngé. Wettunna Pélég makkéumuru 30 taung, lolongenni ana' worowané, asenna Réhu. Purairo tuwo mupi Pélég 209 taung, sibawa lolongeng ana'-ana' laingngé. Wettunna Réhu makkéumuru 32 taung, lolongenni ana' worowané, asenna Sérug. Purairo tuwo mupi Réhu 207 taung, sibawa lolongeng ana'-ana' laingngé. Wettunna Sérug makkéumuru 30 taung, lolongenni ana' worowané, asenna Nahor. Purairo tuwo mupi Sérug 200 taung, sibawa lolongeng ana'-ana' laingngé. Wettunna Nahor makkéumuru 29 taung, lolongenni ana' worowané, asenna Térah. Purairo tuwo mupi Nahor 119 taung, sibawa lolongeng ana'-ana' laingngé. Makkéumuru'nana Térah 70 taung, lolongenni tellu ana' worowané, iyanaritu Abram, Nahor sibawa Haran. Iyanaé wija-wijanna Térah: Térah ambo'na Abram, Nahor sibawa Haran. Haran mappunnaiwi ana' worowané asenna Lot. Matéi Haran ri kampong ajajiyanna, iyanaritu Ur ri Babilonia, wettunna tuwo mupi ambo'na. Abram kawingngi sibawa Sarai, na Nahor kawingngi sibawa Milka ana' makkunrainna Haran. Mappunnai mupi Haran ana' worowané laingngé asenna Yiska. Na iyaro Sarai manangngi. Nasalaiwi Térah kota Ur ri Babilonia silaong Abram ana'na, Lot eppona, enrengngé Sarai ménéttunna, iyanaritu bainéna Abram. Akkattana maéloi lao ri wanuwa Kanaan. Iyakiya lettu'na ri Haran, mattette'ni mennang kuwaro. Na ri onrongngénnaro matéi Térah ri umuru 205 taung. Nakkeda Puwangnge lao ri Abram, “Salaini wanuwammu, kaluwargamu sibawa bolana ambo'mu, nainappa laoko ri wanuwa iya Ujellokengngékko matu. Maélo-Ka mpérékko wija iya maégaé sibawa mancajiwi matu bangsa iya battowaé. Maélo-Ka barakkakiko sibawa mébbui asemmu tarompo, angkammu mancaji matu barakka. Maélo-Ka barakkakiwi sining tau iya barakkakiyéngngékko sibawa tanroiwi sining tau iya tanroiyéngngékko. Nasaba iko maélo-Ka barakkakiwi sininna bangsaé ri linoé.” najalajja'ni Abram iyaro tanaé narapi lettu ri aju makare'é ri More, iyanaritu onrong assompangngé ri Sikhem. (Iyaro wettué naonroi mupi tau Kanaangngé iyaro tanaé.) Nappaitanni aléna Puwangnge lao ri Abram sibawa makkeda lao ri aléna, “Iyanaé wanuwa iya maéloé Uwabbéréyang lao ri wija-wijammu.” Nainappa patettonni Abram séddi mézba kuwaro untu' Puwang iya puraé mappaitangngi aléna lao ri Abram. Purairo napatteruni joppana liyattang, ri daéra mabbulu-bulué ri seddé alauna kota Bétel, sibawa makkéma ri pallawangenna Bétel sibawa kota Ai; Bétel ri seddé yajang na Ai ri seddé alau. Kuwatoniro patettong mézba sibawa sompai Puwangnge. Nainappa napatterusi joppana polé ri séddié onrong lao ri onrong rappina, mattuju ri bagiyang yattanna tana Kanaan. Iyakiya ri Kanaan mattengngangngi akkadéreng iya masero senna'é, angkanna Abram laowi pédé mabélasi liyattang, ri wanuwa Maséré untu' monro kuwaro lettu labe' iyaro abalaé. Wettunna maélo malléttoiwi pakkaséséngngé sibawa muttama ri wanuwa Maséré, makkedani lao ri Sarai bainéna, “Magelloko, bainéku. Rékko naitako tau Maséré'é, nasengngi matu mennang makkedaé iko bainékuko nainappa pasti naunoka na iko naleppessakko tuwo. Jaji makessingengngi akkeda bawanno makkedaé iko anrikku kuwammengngi naleppessakka tuwo sibawa nagaukeng sibawa makessing nasaba iko.” Na tongenna, nalléttoinnana Abram pakkaséséngngé sibawa lettu ri wanuwa Maséré, naitani tau Maséré'é makkedaé magello senna'i Sarai. Siyagangngaré tau pegawé saorajaé mitai sibawa powadangngi arungngé temmaka gellona makkunraiéro; rimakkuwannanaro ritiwini lao ri saorajana arungngé. Nasaba Sarai, nagaukenni arungngé Abram sibawa makessing enrengngé mpéréngngi ata-ata, bimbala makkonrong sibawa bémbé, saping, kaleddé sibawa unta. Iyakiya nasaba arungngé nalai Sarai, napapoléni Puwangnge sining lasa iya mappakatau-taué ri arungngé sibawa sining tauwé ri laleng saorajana. Nainappa naobbini arungngé Abram sibawa makkutana ri aléna, “Aga iya pura mupogau'éro lao ri iyya'é? Magi dé' muwappaissengengngi makkedaé bainému? Magi mumakkeda makkedaé anrimmu sibawa muleppessakka malai mancaji bainéku? Iyanaé bainému; alai namulao!” Napparéntanni arungngé lao risiyagangngaré pegawénna, nanapassui mennang Abram polé ri wanuwaéro silaong sibawa bainéna enrengngé sininna appunnangenna. Nasalaini Abram Maséré nalao mattuju ri manorang, mattuju ri bagiyang yattanna Kanaan sibawa bainéna enrengngé sininna appunnangenna, naccowé tona Lot. Sugi senna'i Abram; mappunnaiwi bimbala, bémbé, saping, péra'to sibawa ulaweng. Nalaona polé ri séddié onrong lao ri onrong iya laingngé, mattuju ri Bétel. Lettu'ni ri daéra ri pallawangenna Bétel sibawa Ai, ri onrong makare'é nakkémaiyé riyolo sibawa patettong mézba. Kuwaniro sompai Puwangnge. Mappunnai towi Lot kaluwarga sibawa ata-ata enrengngé bimbala, bémbé sibawa saping. Rimakkuwannanaro iyaro tanaé kuwaro dé' nagenne padang wellana untu' naonroi mennang sipadduwa, saba' maéga senna olokolo'na mennang. Nakajajiyanna assasangngé ri yelle'na sining pakkampina Abram sibawa sining pakkampina Lot. (Iyaro wettué tau Kanaangngé sibawa tau Féris-é naonroi mupi iyaro tanaé.) Makkedani Abram lao ri Lot, “Idi'é massilessurekki, dé' namakessing rékko sining taummu sibawa sining taukku pada massasai. Rimakkuwannanaro makessingengngi massarakki. Piléni bagiyang kéga polé ri tanaéwé iya mupojiyé. Rékko laoko kuwaé, maéloka lao ri iya laingngé.” Mattironi Lot mattulili nanaitani makkedaé sininna Lompo Yordan, lettu ri kota Zoar maéga uwaina, pada-pada Tammenna Puwangnge iyaré'ga pada-pada tana Maséré. (Makkuwaniro keadaanna ri wettu dé'napa naancuru'i Puwangnge kota-kota Sodom sibawa Gomora.) Angkanna napiléni Lot sininna Lompo Yordanro, nainappa joppa mattuju lilau. Makkuwaniro iya duwa tauwéro massarang. Abram tette'i monro ri tana Kanaan, naiya Lot makkémai ri kota-kotaé ri lompo'é lettu seddéna Sodom. Iyaro kota Sodom naonroiwi sining tau iya maja senna'é sibawa madosaé lao ri Puwangnge. Laonana Lot, makkedani Puwangnge lao ri Abram, “Polé ri onrong mutettongiéro, akkitano madécéd-décéng mattulili; Maéloka mabbéréyangngi lao ri iko sibawa lao ri wija-wijammu sininna tana iya muwitaéro kuwammengngi namancaji appunnangemmu mannennungeng. Uwérékko matu wija-wija iya maéga senna'é, angkanna dé' muwi séddi tau mulléi bilangngi mennang. Pada-pada dé' naulléi tauwé bilangngi awué ri tanaé, makkuwatoniro wija-wijammu dé' matu nariyullé bilang. Makkekkuwangngé, jalajja'ni sininna tanaéwé, saba' maélo-Ka mpérékko.” Purairo napalétté'ni Abram akkémanna nainappa mattette ri seddéna aju-kajung makarame' onrong assompangngé ri Mamré seddéna Hébron, nakkuwaniro patettong mézba untu' Puwangnge. Eppa arung, iyanaritu: Amrafél polé ri Babilonia, Ariokh polé ri Elasar, Kedorlaomer polé ri Elam, sibawa Tideal polé ri Goyim mammusu méwai lima arung laingngé, iyanaritu: Béra polé ri Sodom, Birsya polé ri Gomora, Syinab polé ri Adma, Semeber polé ri Zéboim, sibawa arung polé ri Béla iya riyasengngétto Zoar. Iya lima arungngéro siyempe'ni sibawa padeppungengngi tentarana mennang ri Lompo Sidim, iya makkekkuwangngé riyaseng Tasi Maté. Seppuloni duwa taung ittana mennang rikuwasai ri Arung Kedorlaomer, iyakiya ri laleng taung maseppuloé tellu, maronta'i mennang méwai. Ri laleng taung maseppuloé eppa, Kedorlaomer sibawa naéwaé siyempe poléi sibawa tentarana mennang nanacaui tau Réfaingngé ri Asyterot-Karnaim, tau Zuzingngé ri Ham, tau Emingngé ri Syawé-Kiryataim, sibawa tau Horié ri buluna Edom, nainappa nalellung mennang sibbéla El-Paran ri wirinna padang kessi'é. Purairo balé'si sining pallellungngé nanalisu ri En-Mispat iya makkekkuwangngé riyaseng Kadés. Nacaui mennang sininna daérana Amalé'é enrengngé nacaui tau Amorié iya monroé ri Hazéon-Tamar. Nainappa sining arung polé ri Sodom, Gomora, Adma, Zéboim sibawa Béla matoro'i barisi tentarana mennang ri Lompo Sidim nainappa mammusu méwai sining arung polé ri Elam, Goyim, Babilonia, sibawa Elasar; jaji, lima arung méwai eppa. Iyaro lompo'é pennoi sibawa bujung kamalo, na wettunna sining arung polé ri Sodom sibawa Gomora makkuraga lari polé ri ammusurengngé, sempé'ni mennang ri laleng sining bujungngéro. Iya tellu arung laingngé naulléi leppe' nanalari lao ri buluna. Iya eppa arung iya pakalaé, narampasa'ni sini-sininnaé ri Sodom sibawa Gomora, muttama'ni bahang inanré, nainappa lao. Lot, anauréna Abram monro towi ri Sodom, rimakkuwannanaro ritiwi towi ri balié silaong sininna waramparanna. Iyakiya séddi tau mulléi leppe' laporo'i sininna kajajiyangngéro lao ri Abram, tau Ibraniéro. Monroi Abram ri seddéna aju-kajung makarame' onrong assompangngé appunnangenna Mamré, séddiwi tau Amori. Mamré sibawa silessu-silessurenna, iyanaritu Eskol sibawa Anér iyanaritu sellao-sellao siyempe'na Abram. Wettunna naéngkalinga Abram makkedaé ritawangngi anauréna, napaddeppungenni sininna tauwé ri laleng akkémanna, iyanaritu iya maccaé mammusu, singngéga 318 tau, nainappa nalellung iya eppa arungngéro lettu ri kota Dan. Kuwaniro nabagé Abram sining taunna ri laleng siyagangngaré kalompo, nainappa nagasa balié ri wennié sibawa nacaui mennang. Nalellungngi mennang lettu ri Hoba ri seddé manoranna kota Damsyik. Naulléni Abram sittaiwi paimeng barab-barang iya puraé narampasa, makkuwatoro Lot sibawa sininna waramparanna, sibawa sining makkunraié sibawa tawanang laingngé. Puranana nacaui Arung Kedorlaomer sibawa sining arung siyempe'na, lisuni Abram. Nainappa arung Sodom lao duppaiwi ri Lompo Syawé iya riyasengngétto Lompo Arung. Malkisédék, arung Salém iya mancajiyé imanna Allataala Iya Pommatanré, tiwi roti sibawa anggoro untu' Abram, nainappa nabarakkaki Abram, adanna, “Tennapodo Allataala Iya Pommatanré, iya puraé pancajiwi langié sibawa linoé, barakkakiwi Abram! Ripojiwi Allataala Iya Pommatanré, iya puraé mpérékko apakalang lao ri balimmu.” Purairo nabbéréyanni Abram lao ri Malkisédék tawaseppulona polé ri sininna barang rampasa iya natiwiénna lisu. Nanakkedana arung Sodom lao ri Abram, “Alani barang rampasa'éro, iyakiya tapalisuni ri iyya sininna taukku.” Nappébalina Abram, “Mattanroka ri yolona Puwangnge, Allataala Iya Pommatanré, Pappancajinna langié sibawa linoé, makkedaé dé' aga-aga maélo uwala polé ri appunnangemmu, mala muwi silampa wennang iyaré'ga sipolo tulu sandala. Nanallalengiro dé' matu mulléi makkeda, ‘Iyya' ritu mébbui Abram mancaji sugi.’ Dé' umaélo mala aga-aga untu' aléku. Iya bawang maélo utarima aga iya puraé napaké sining taukku. Iyakiya leppessanni siya sining sellao uwéwaé siyempe, iyanaritu Anér, Eskol sibawa Mamré, malai tawana mennang.” Purairo, tarimani Abram pappaita sibawa méngkalingai Puwangnge makkeda lao ri aléna, “Aja' mumétau, Abram, maélo-Ka linrungiko polé ri abalaé, sibawa mpérékko saro iya battowaé.” Nainappa naéngkalingani Abram Puwangnge makkedasi lao ri aléna, “Tenniya atammu iya mancajiyé matu ahli warisi'mu, sangadinna ana' worowanému muto.” Natiwini Puwangnge massu Abram nainappa makkeda ri aléna, “Itai langié, sibawa cobani bilangngi sining wéttowingngé; mappunnaiko matu wija-wija singngéga sining wéttowingngéro.” Mateppe'ni Abram ri Puwangnge, narimakkuwannanaro ritarimani ri Puwangnge selaku tau iya pésennangiyéngngi atin-Na. Nainappa makkedasi Puwangnge lao ri aléna, “Iyya'na Puwang, iya puraé pimpikko massu polé ri wanuwa Ur ri Babilonia, untu' mabbéréyangngi tanaéwé lao ri iko mancaji appunnangemmu.” Iyakiya makkutanai Abram, “Oh Puwang Iya Pommatanré, pékkugi uwulléi missengngi makkedaé iyaro tanaé mancajiwi matu appunnangekku?” Nappébali Puwangnge, “Alak-Ka sikaju saping komba, sikaju bémbé komba sibawa sikaju bémbé lai, tungke'-tungke' makkéumuru telluttaung, sibawa sikajuto bekku sibawa sikaju jangang-jangang.” Nanalani Abram iyaro sining olokolo'é untu' Allataala. Saping, bémbé sibawa bimbala'éro napuwé'ni tungke'-tungke' mancaji duwa, naiyaro puwé'-puwé'é napalénne'i siolo-olong ri laleng duwanciji. Iyakiya iyaro sining manu'-manu'é dé' napuwé'i. Iyaro jukué nateppaini manu'-manu' pakkanré bakké, iyakiya narukkai Abram. Mammulanana labu essoé, memme'ni tinrona Abram. Tappa napoléini pappénedding métau iya masero senna'é. Nakkedana Puwangnge lao ri Abram, “Engngeranni, wija-wijammu mancajiwi matu tau laing ri wanuwa laingngé; mancaji atai matu mennang kuwaro sibawa ritenre'i matu eppa datu taung ittana. Iyakiya bangsa iya powataéngngi wija-wijammuro maélo-Ka hukkungngi na wettunna wija-wijammu salaiwi iyaro wanuwaé, tiwii matu mennang maéga waramparang. Iko paimeng malampéi matu umuru'mu; matéko matu sibawa tennang, nainappa rikuburu. Labe'nana eppa assossoreng, lisuni matu ana' eppomu kuwaé, nasaba dé' Urukkai matu tau Amorié ri wettu dé'napa mennang namaja senna angkanna parellui rihukkung.” Wenninnana, tappa momponi séddi dapo iya maddumpué sibawa sulo iya malluwa'é, nainappa lalo ri yelle'na sépa'-sépa' jukuéro. Iyatonaro wettué napakangka Puwangnge assijancing sibawa Abram. Adanna Puwangnge, “Majjanci-Ka maélo mpéréngngi wija-wijammu sininna tanaéwé, mappammulai polé ri pakkasésénna wanuwa Maséré lettu ri Salo Efrat, muttama toni tanana tau Kénié, Kénas-é, Kadmongngé, Hét-é, Féris-é, Réfaingngé, Amorié, Kanaangngé, Girgasié sibawa Yébus-é.” Sarai, bainéna Abram, dé'pa nappunnai ana'. Iyakiya mappunnaiwi séddi ata polé ri Maséré, séddiwi ana'dara riyaseng Hagar. Makkedai Sarai lao ri Abram, “Dé' napakkulléka Puwangnge jajiyang ana'. Rimakkuwannanaro, makessingengngi matinroko sibawa atakkué. Ajakké naulléi jajiyang ana' untu' iko.” Nasitujuini Abram tangngana Sarai. Makkuwaniro Sarai mabbéréyangngi Hagar lao ri Abram untu' napancaji gundi. Iyaro wettué seppuloni taung Abram ri Kanaan. Matinroni Abram sibawa Hagar, namattampu'na iyaro makkunraié. Iyakiya wettunna naisseng Hagar makkedaé mattampu'i, matemponi sibawa pakariyawai Sarai. Nanakkeda Sarai lao ri Abram, “Purani uwabbéréyang Hagar atakku lao ri iko, nasipongenna naisseng makkedaé mattampu'i, napakariyawaka. Asalammu iyaro. Tennapodo Puwangnge pettuiwi iyaé parakaraé ri yelle'ta.” Nappébali Abram, “Makessinni, iyaro atammu sibawa makuwasako ri aléna; gaukenni siélo-élomu.” Nanagaukenni Sarai, Hagar sibawa mabecco senna, angkanna lari. Nariruntu'na Hagar ri malaéka'na Puwangnge ri seddéna mata uwai ri padang kessi'é, ri laleng iya mattujué ri padang kessi Sur. Adanna iyaro malaéka'é, “Hagar, atanna Sarai, polé kégako sibawa maéloko lao kéga?” Nappébali Hagar, “Larika polé ri Sarai, puwakku.” Nakkeda iyaro malaéka'é, “Lisuno lao ri aléna sibawa tumaningiwi.” Nakkedasi paimeng iyaro malaéka'é, “Maélo-Ka mpérékko makkuwamani égana ana' eppo, angkanna dé' muwi séddi tau mulléi bilangngi mennang. Dé'na namaitta namujajiyang matu ana' worowané; asengngi Ismaél, nasaba Puwangnge pura méngkalingai terimmu. Iyakiya iyaro ana'mu tuwoi matu pada-pada kaleddé liyaé; naéwai matu tungke' tauwé, sibawa tungke' tau méwai matu. Tuwoi matu massarang polé ri sininna sumpulolona.” Nakkutana Hagar ri laleng atinna, “Tongegga pura uwita Allataala iya jampangiyékka?” Nanasenni Puwang, iya puraé makkeda-ada lao ri aléna, “Allataala Iya Pajampangiyé”. Iyanaro saba'na nasengngi tauwé bujung ri pallawangenna Kadés sibawa Béréd, “Bujunna Iya Tuwoé Iya Jampangiyék-Ka”. Nanajajiyanna Hagar ana' worowané, na Abram ambo'na, nasenni iyaro ana'é Ismaél. Iyaro wettué umuru'na Abram aruwa pulona enneng taung. Wettunna Abram makkéumuru aséra pulona aséra taung, nappaitanni aléna Puwangnge lao ri aléna sibawa makkeda, “Iyya'na Allataala Iya Pommakuwasaé. Atinuluri-Ka sibawa tuli pogau'ni élo-Ku. Maélo-Ka siyo assijancing sibawa iko enrengngé mpérékko wija-wijan iya maégaé.” Nasuju'na Abram, nainappa makkeda Allataala, Maélo-Ka mpérékko maéga ana' eppo, na ri yelle'na mennang engka matu mancaji arung. Makkuwamani égana matu wija-wijammu, angkanna mancajiwi matu mennang bangsa-bangsa. Maélo-Ka rupaiwi jancik-Ku lao ri iko sibawa lao ri wija-wijammu, massossoreng, na iyaro assijancik-Ku mannennungengngi. Maélo-Ka mancaji Allataalamu sibawa Allataalana wija-wijammu. Maélo-Ka mpérékko sibawa wija-wijammu, iyaé tanaé, iya muwonroiyé makkekkuwangngé selaku tau laing. Sininna tana Kanaan mancajiwi matu appunnangenna ana' eppomu untu' mannennungeng sibawa maélo-Ka mancaji Allataalana mennang.” Makkedasi paimeng Allataala lao ri Abraham, “Harusu tokko matinulu lao ri assijancingngéwé, muwi iko iyaré'ga wija-wijammu massossoreng. Iko sibawa sininna wijammu iya worowané harusu'i risunna. Tungke' tau harusu'i risunna, na iyaro mancaji matu tanrang mallahéreng iya mappaitangngéngngi makkedaé iyaro assijancik-Ku sibawa iko mannennungengngi. Tungke' worowané iya dé'é narisunna dé'na nariyangga' anggota umma'-Ku nasaba dé' nakkatenning ri assijancik-Ku.” Nainappa makkeda Allataala lao ri Abraham, “Aja'na muwobbii bainému Sarai; mappammulai makkekkuwangngé asenna Sara. Maélo-Ka barakkakiwi nanajajiyangngi matu séddi ana' worowané iya maéloé Uwérékko. Ya, maélo-Ka barakkakiwi Sara, namancaji matu indo'na toriyolona bangsa-bangsaé. Ri yelle'na wija-wijanna engka matu arung.” Nasuju'na Abraham, iyakiya macawai wettunna mappikkiri, “Pékkugi wedding séddié worowané iya makkéumuru'énna sératu taung lolongeng ana'? Pékkugi wedding Sara mémmana ri umuru aséra pulona taung?” Nanakkedana lao ri Allataala, “Makessingengngi Ismaélna bawang iya mancajiyé ahli warisi'ku.” Iyakiya makkedai Allataala, “Dé'. Sara bainému jajiyang matu ana' worowané sibawa muwasengngi matu Ishak. Maélo-Ka matinulu lao ri assijancik-Ku sibawa iyaro ana'é enrengngé wija-wijanna untu' mannennungeng. Iyaro assijancingngé mannennungengngi. Iyakiya Utarima towi paréllaummu passalenna Ismaél. Rimakkuwannanaro Ubarakkakiwi matu sibawa Uwéréngngi wija-wija iya maégaé. Mancajiwi matu toriyolona seppulo duwa kapala suku, sibawa wija-wijanna Upancajiwi matu séuwa bangsa iya battowaé. Iyakiya assijancik-Ku Usiyoi matu sibawa Ishak, ana'mu iya najajiyangngé matu Sara, taung mangoloé kira-kira wettu pada-padaéwé.” Puranana makkeda makkuwaro, nasalaini Allataala Abraham. Iyatoro essoé, naturusini Abraham Allataala sibawa nasunna'i Ismaél ana'na, sibawa sininna tau worowané ri lalempolana, muttama'ni sining ata iya jajiyé ri lalempolana iyaré'ga iya naelliyé. Aséra pulona aséra taung umuru'na Abraham wettunna risunna' sibawa Ismaél ana'na, makkéumuru seppulo tellu taung. Risunna'i mennang massamang esso, silaong sininna atanna Abraham. Nappaitanni aléna Puwangnge lao ri Abraham ri seddéna aju-kajung makarame onrong assompangngé ri Mamré. Iyaro wettué mapella senna essoé, namattengngangngi Abraham tudang ri sumpanna kémana. Wettunna naakka ulunna, naitani tellu tau tettong ri yolona. Mapperi-perini Abraham lari maélo duppaiwi mennang. Nasuju'na makkeda, “Bapa'-bapa', aja' taliwengngi kémaku, taléppang riyolo; tapalalona tumaningiwi Bapa'-bapa'. Leppessakka mala uwai untu' bissaiwi ajéna Bapa'-bapa'. Tapassauni tekkota Bapa'-bapa' ri yawana ajuéwé. Maéloka passadiya inanré iya engkaé, kuwammengngi nalolongeng awatangeng baru Bapa'-bapa' untu' patterui joppana. Purani napakalebbika Bapa'-bapa' ri laleng léppanna ri bolana atattaé.” Nappébali mennang, “Tarima kasi akessingemmu. Maéloki léppang.” Mapperi-perini Abraham muttama ri laleng kémaé sibawa makkeda lao ri Sara, “Asitta'no, alano makkekkuwangngé labbu iya kaminang makessingngé, namuwébbu roti mallébu.” Nainappa lari lao ri onrong olokolo'na, piléi ana' saping iya macommo'é sibawa masommo'é jukuna, nainappa nawéréng pattumaninna, iya passadiyaéngngi masitta. Purairo malani Abraham susu, susu mapulu, sibawa juku iya puraé nanasuro, nanapatalangengngi topoléna. Wettunna mennang manré, aléna Abraham tumaningiwi ri yawana ajuéro. Nainappa makkutana mennang, “Kégi Sara, bainému?” Nappébali Abraham, “Kuwaro, ri laleng kémaé.” Sala séddinna mennang makkeda, “Asérapi ulenna naulisu matu paimeng. Na iyaro wettué Sara bainému lolongenni matu ana' worowané.” Iyaro wettué mattengngangngi Sara méngkalingai ri sumpanna kémaé, ri monrinna topoléro. Na iyaro Abraham sibawa Sara macowa senna'ni, sibawa pajani Sara maddara. Rimakkuwannanaro macawani Sara ri laleng atinna sibawa makkeda, “Iyya iya macowaénna sibawa makelle makkuwaéwé, pékkugi makkullé macinna mupi sicampuru sibawa lakkaikku? – Nainappani macowa toni lakkaikku.” Nanakkutana Puwangnge lao ri Abraham, “Magi Sara namacawa sibawa bata-bataiwi aga wedding mupi jajiyang ana' ri wettu macowana? Engkaga iya mustahélé'é untu' Puwangnge? Pada-pada puraé Upowada onna, asérapi Ulenna naulisu paimeng kuwaé. Na iyaro wettué jajiyangngi matu Sara ana' worowané.” Nasaba métaui Sara, massakkani, adanna, “Dé' umacawa.” Iyakiya mappébaliwi Puwangnge, “Mémeng macawako onna.” Purairo joppani iya tellu topoléro riantara ri Abraham. Nanalettu'na mennang riséuwaé onrong polé kégi naulléi mennang tiroi Sodom. Nakkedana Puwangnge ri laleng atinna, “Dé' Umaélo rahasiyakangngi lao ri Abraham aga iya maéloé Upogau'. Dé'ga wija-wijanna mancajiwi matu bangsa iya battowaé sibawa makuwasa? Tenniyaga nasaba aléna, sininna bangsaé ri linoé Ubarakkakiwi? Purani Upilé kuwammengngi naparéntai ana'-ana'na sibawa wija-wijanna untu' turusika sibawa pogau'i aga iya makessingngé sibawa adélé'é. Rékko napogau'i mennang gau'éro, sininna jancik-Ku lao ri Abraham Urupaiwi matu.” Makkedapi paimeng Puwangnge lao ri Abraham, “Engka teppuwang iya matane'é lao ri Sodom sibawa Gomora, na mémeng dosana mennanro maloppo senna'ni. Rimakkuwannanaro maélo-Ka nonno kuwaro untu' paréssai aga sininna teppuwang iya Uwéngkalingaéro tongeng iyaré'ga dé'.” Nainappa duwa ri yelle'na sining topoléro joppani mattuju ri Sodom, iyakiya Puwangnge monro mupi sibawa Abraham. Maddeppéni Abraham ri Puwangnge sibawa makkutana, “Tongengga maéloi Puwangnge pabbinasai tau iya dé'é napasala silaong sining tau iya pasalaé? Ebara'na engka limappulo tau iya dé'é napasala ri laleng kotaéro, aga sininna kotaéro maéloi Puwangnge pabbinasai? Dé'ga namaélo Puwangnge maddampengengngi kuwammengngi na iya limappulo tauwéro salama'i? Aja' nasining tau iya dé'é napasalaro riyunoi silaong iya pasalaé. Aja' Puwang! Saba' rékko tapogau'i Puwang, tau iya dé'é napasala pasti rihukkungngi matu silaong iya pasalaé. Pékkugi makkullé hakinna alangngé tinda' dé' naadélé!” Makkedai Puwangnge, “Ebara'na Ulolongengngi limappulo tau iya dé'é napasala ri Sodom, Uwaddampengengngi matu sininna kotaéro nasaba mennang.” Nakkedasi Abraham, “Addampengenni abaraningekku sambungngi abbicarangngéwé, Puwang. Iyya'é banna tolino, sibawa dé' ha'na untu' powadai séuwaé. Iyakiya naullé banna engka patappulo lima tau iya dé'é napasala, tenniya limappulo. Aga Puwangnge maéloi pabbinasai sininna kotaéro banna nasaba sisala limai tau bawang?” Makkedai Puwangnge, “Iyaro kotaé dé' Upabbinasai matu ébara'na kuwaro engka Ulolongeng patappulo lima tau iya dé'é napasala.” Nakkedasi Abraham, “Pékkugi rékko banna engka patappulo tau?” Mappébaliwi Puwangnge, “Nasaba iyaro patappuloé tau, dé' Upajajiwi niya'-Ku.” Nakkeda Abraham, “Aja' tamacai, Puwang, rékko mabbicarasika'. Pékkugi ébara'na rékko banna engka telluppulo tau bawang?” Makkedai Puwangnge, “Rékko Ulolongengngi telluppulo tau, dé' Upatterui niya'-Ku.” Nakkeda Abraham, “Addampengenni abaraningekku patterui bicaraéwé, Puwang. Ebara'na banna engka duwappulo tau bawang?” Nappébali Puwangnge, “Rékko Ulolongengngi duwappulo tau, iyaro kotaé dé' umaélo pabbinasai.” Angkanna makkeda Abraham, “Aja' tamacai Puwang, banna maéloka mabbicara siseppa. Pékkugi rékko banna rilolongengngi seppulo tau bawang?” Nakkeda Puwangnge, “Rékko engka seppulo tau iya dé'é napasala, dé' umaélo pabbinasai iyaro kotaé.” Puranana mabbicara sibawa Abraham, laoni Puwangnge. Nalisuna Abraham ri bolana. Puranana massurolellang ri Abraham, iya duwa malaéka'éro laoni ri Sodom sibawa lettu kuwaro ri wennié. Mattengngangngi Lot tudang ri pintu gerbanna kotaé, nanaitana mennang, tettonni untu' duppaiwi mennang. Nainappa suju' ri yolona mennang, sibawa makkeda, “Bapa'-bapa', taléppang ri bolaku. Weddingngi Bapa'-bapa' bissaiwi ajéna sibawa mabbenni ri bolaku. Baja rékko maéloki, weddingngi Bapa'-bapa' moto' maélé sibawa patterui joppata.” Iyakiya mappébaliwi mennang, “Tarima kasi, leppessanni mabbenni kuwaé bawang, ri lapanganna kotaé.” Naéllauni Lot sibawa masero, angkanna muttama'ni mennang silaong aléna ri lalempolana. Passadiyani Lot inanré iya malunra'é sibawa mappanggang roti iya genne'é, nananréna mennang. Iyakiya ri wettu dé'napa nalao matinro iyaro sining topolé, sining tau Sodongngé keppungngi iyaro bolaé. Sininna tau worowané ri kotaéro, muwi iya macowaé iyaré'ga maloloé, engka kuwaro. Gorani mennang lao ri Lot, sibawa makkutana, “Kégani sining tau iya polé mabbenni ri bolamu? Abbéréyangngi mennang, kuwammengngi weddikki sicampuru' sibawa mennang!” Massuni Lot polé ri bolana, napurana nasulu tange'é, makkedani lao risining tau Sodongngéro, “Saudara-saudara, uwéllauwi sibawa masero, aja' tapogau'i gau' iya maja makkuwaéro! Coba méngkalingai, mappunnaika duwa ana' perawang. Leppessanni uwabbéréyang mennang lao ri iko na weddikko gaukengngi mennang agi-agi. Iyakiya aja' muwagagai topolékué; saba' waji'ka linrungiwi mennang.” Iyakiya makkedai sining tau Sodongngéro lao ri Lot, “Esu'ko! Iko tau laing maélo matoro'ki? Ayo, ésu'ko! Rékko dé', maéloki majara'ko lebbi matane naiya tauwéro.” Nainappa mennang nasorong Lot nanalluru maélo rumpa'i tange'é. Iyakiya iya duwa topoléro loro'i limanna mennang nanagettengngi Lot muttama ri lalempola, nainappa nasulu sumpangngé. Napabutani mennang sininna tau iya engkaé ri saliwempolaro, angkanna iyaro sining tauwé dé' naulléi lolongengngi tange'énna. Makkedani iya duwa topoléro lao ri Lot, “Rékko mappunnaiko ana' worowané, ana' makkunrai, ménéttu iyaré'ga sumpulolo laingngé iya monroé ri laleng kotaéwé, tiwii mennang massu polé kuwaé, saba' iyaé kotaé maéloki mancuru'i. Purani naéngkalinga Puwangnge sining teppuwang matane'é lao ri pabbanuwaé kuwaé, napuraki risuro untu' paccappui kota Sodom.” Nanalaona Lot méwai sita iya duwa tunanganna iya duwa ana'na, sibawa makkeda, “Asitta'no massu polé ri onrongngéwé, saba' maéloi Puwangnge mancuru'i.” Iyakiya nasemmi Lot mabbonga-bonga bawang. Ri subué, iya duwa malaéka'éro nadessa'ni Lot kuwammengngi namasitta joppa. Makkedani mennang, “Asitta'no. Laono sibawa bainému sibawa iya duwa ana' makkunraimmu polé kuwaé, kuwammengngi aja' mumaté rékko ripaccappui iyaé kotaé.” Bata-batani Lot. Iyakiya messéi Puwangnge lao ri aléna; rimakkuwannanaro iya duwa topoléna rénréngngi Lot sibawa bainéna enrengngé iya duwa ana'na massu ri kotaé. Purairo séddi polé ri malaéka'éro makkeda, “Larino, passalama'i nyawamu! Aja' muwakkita limonri sibawa aja' muwappésau ri lompo'é. Larino lao ri buluna, kuwammengngi aja' mumaté!” Iyakiya mappébaliwi Lot, “Aduh, aja' tasuroki Puwang lari lao ri buluna. Mémeng, purana tatulung senna Puwang sibawa passalama'ka. Iyakiya iyaro bulué makkuwamani bélana; ajakké narapika abalaéro naumaté ri wettu dé'napa nalettu kuwaro. Itai, ri yolo engka kota baiccu iya dé'é namabéla senna. Palaloka lari lao kuwaro kuwammengngi nausalama.” Nappébali iyaro malaéka'é, “Makessinni, iyaro kota baiccu'é dé' matu Upaccappui. Asitta'no lari! Saba' dé' aga-aga wedding upogau' ri wettu dé'napa mulettu kuwaro.” Nasaba nasengngi Lot iyaro kotaé baiccu, nariyaseng iyaro kotaé Zoar. Momponi matanna essoé wettunna Lot lettu ri Zoar. Tappa napateppani Puwangnge bosi balérang iya makkéapié ri yasé'na Sodom sibawa Gomora. Riyancuru'ni iya duwa kotaéro, makkuwatoro sininna lompo sibawa sininna tanet-tanengngé enrengngé sininna pabbanuwaé kuwaro. Iyakiya bainéna Lot gilingngi limonri, natappinrana mancaji alliri pejjé. Pappa bajanana, maéléni Abraham mapperi-peri lao ri onrong natettongiyé ri yolona Puwangnge siesso ri yolona. Makkitani lao ri Sodom sibawa Gomora enrengngé lao risininna lompo'éro, nanaitani rumpué mallaso polé ri tanaéro, pada-pada rumpu polé ri dapureng battowaé. Makkuwaniro, wettunna Allataala pabbinasai kota-kotaéro ri lompo naonroiyé Lot, maréngngerangngi Allataala lao ri Abraham nanatulungngi Lot lari. Nasaba métaui Lot mattette ri Zoar, nalaona ri buluna silaong iya duwa ana'na makkunraié, nanaonro ri laleng séddié gowa. Makkedani ana' makkunrai iya macowaé lao ri anrinna, “Macowani ambo', narisininna wanuwaéwé dé'gaga tau worowané iya weddingngé kawingiki kuwammengngi talolongeng ana'. Laono mai, tapamabo'i ambo', nainappaki matinro sibawa aléna kuwammengngi talolongeng ana'.” Iyaro wennié napainunni mennang ambo'na anggoro, nainappa ana' iya macowaé matinro sibawa ambo'na; iyakiya ambo'na makkuwamani mabo'na angkanna dé' naissengngi aga iya kajajiyangngé. Pappa bajanana, makkedani ana' iya macowaé lao ri anrinna, “Onna wennié purana siatinrong ambo'! Matu kuwenniwi tapamabo'si. Nainappa siatinrokko. Pada lolongenni matu ana'.” Makkuwaniro mennang ri wenniéro pamabo'i Lot, na ana'na iya maduwaé siatinronni. Namabo' senna'si Lot angkanna dé' naissengngi aga iya kajajiyangngé. Namattampu'na iya duwaro ana'na Lot nasaba ambo'na muto mennang. Ana' iya macowaé jajiyangngi ana' worowané iya nasengngé Moab. Mancajiwi toriyolona tau Moab-é iya makkekkuwangngé. Ana' iya maduwaé jajiyangngi ana' worowanéto iya nasengngé Bén-Ami. Mancajiwi toriyolona bangsa Amongngé iya makkekkuwangngé. Létté'i Abraham polé ri Mamré lao ri bagiyang yattanna tana Kanaan, sibawa mattette ri pallawangenna Kadés sibawa Syur. Siyagangngaré wettu ri munrinna, wettunna monroi ri Gerar, napowadai makkedaé Sara bainéna iyanaritu anrinna. Rimakkuwannanaro Arung Abimélékh polé ri Gerar nasuroi surona tiwii Sara ri aléna. Riséuwaé wenni nappaitangngi Allataala aléna lao ri arungngéro ri laleng nippi, sibawa makkeda, “Matéko matu, nasaba purai muwala iyaro makkunraié; saba' purani mallakkai.” Iyakiya Abimélékh dé'pa narapii géssai Sara, nakkeda iyaro arungngé, “Puwang, dé' upasala! Maéloiga Puwangngé pabbinasaka sibawa bangsaku? Aléna muto Abraham powadai makkedaé iyaro makkunraié anrinna, sibawa iyaro makkunraié makkeda makkuwa towiro. Purai upogau' iyaro gau'é sibawa ati mapaccing, jaji dé' upasala.” Nappébali Allataala ri laleng nippiéro, “Mémeng, Uwisseng makkedaé mupogau'i sibawa ati iya mapaccingngé. Rimakkuwannanaro Ulawa-lawaiko pogau' dosa lao ri Iyya, sibawa dé' Uleppessakko géssai iyaro makkunraié. Iyakiya makkekkuwangngé, palisuni lao ri lakkainna. Lakkainna séddiwi nabi, nanassempajangekko matu kuwammengngi dé' mumaté. Iyakiya rékko dé' mupalisui, éngngerangngi, iko sibawa sininna ra'ya'mu matéi matu!” Pappa bajanana, maélé senna'ni Abimélékh mobbii sininna pegawénna sibawa powadangngi mennang sininna kajajiyangngéro. Métau senna'ni mennang. Purairo naobbini Abimélékh Abraham sibawa makkutana, “Aga pura mupogau' lao ri idi? Aga asalakku lao ri iko, angkanna mupapoléi abalaéwé ri yasé'ku sibawa akkarungekku? Dé' siseng nasipato'ko pogau'i pada-padaéro lao ri iyya. Magi mupogau'i makkuwaéro?” Nappébali Abraham, “Uwasengngi, kuwaé dé'gaga tau iya métaué ri Allataala, angkanna riyunoka matu ri tau iya macinnaiyéngngi bainéku. Na mémengngi iyaro anrikku. Manguru ambo'ki, iyakiya laing indo', nainappaki kawing. Na wettunna Allataala suroka salaiwi bolana ambo'ku sibawa sollé ri wanuwa-wanuwa laingngé, makkedaka lao ri bainéku, ‘Pannessani atinuluremmu lao ri iyya sibawa makkeda lao ri tungke' tauwé makkedaé iyya'é kakamu.’ ” Purairo napalisuni Abimélékh Sara lao ri Abraham, na wettuéro nawéréng towi ata-ata, bimbala sibawa saping. Adanna iyaro arungngé lao ri Abraham, “Iyanaé sininna wanuwakku; mattette'no kéga mupoji.” Nainappa makkeda lao ri Sara, “Purani uwéréng kakamu sisebbu dowi péra' selaku butti lao risininna tauwé makkedaé tonget-tongekko dé' mupasala.” Puwangnge barakkakiwi Sara, pada-pada iya puraé najjanciyangngé. Ri wettu iya puraé najjanciyang Allataala, wettunna macowani Abraham, mattampu'ni Sara nanajajiyang séddi ana' worowané. Nasenni Abraham iyaro ana'é Ishak; na wettunna Ishak makkéumuru aruwa essona, nasunna'ni Abraham, situru sibawa paréntana Allataala. Sératu taung umuru'na Abraham wettunna Ishak jaji. Makkedai Sara, “Allataala pura mébbuka macawa nasaba arennuwang. Tungke' tau iya méngkalingaéngngi iyaé gau'é macawai matu marennu silaong iyya.” Nainappa natambai, “Nigana labe'é mulléi makkeda lao ri lakkaikku makkedaé pasusuka matu ana'? Iyakiya purani ujajiyang namuni lakkaikku macowa senna'ni.” Napédé battowana iyaro ana'é, na ri esso pammulanna ripappésau ripasusu, pakangkani Abraham pésta marowa. Riséuwaé esso, Ismaél, ana' Abraham sibawa Hagar makkunrai Maséré'éro, mattengngangngi macculé-culé sibawa Ishak, ana'na Sara. Naitai Sara gau'éro nanakkedana lao ri Abraham, “Paddésu'i ata makkunraiéro silaong ana'na. Dé' nawedding ana'na iyaro makkunraié tarima bagéyang polé ri asugiremmu iya namanaé matu ana'ku Ishak.” Dé' sises-siseng namasennang Abraham sibawa iyaro tangngaé, nasaba Ismaél ana'nato. Iyakiya makkedai Allataala lao ri Abraham, “Aja' mubata-bata passalenna atammu Hagar sibawa ana'naro. Turusiwi élona Sara, nasaba naolai Ishak ritu lolongekko matu wija iya Uwajjanciyangngéro. Makkuwatoro lao ri ana'na Hagar Uwéréngngi matu maéga ana' eppo kuwammengngi namancaji mennang séuwa bangsa. Saba' ana'mu towi.” Pappa bajanana maéléni, Abraham mpéréngngi Hagar inanré sibawa séddi popang bingkulang mallise' uwai untu' bokong ri lalengngé. Napalénne'ni iyaro anana'é ri lekke'na Hagar, nanasuroi iyaro makkunraié lao. Nanajoppana Hagar sibawa sollé ri padang kessi Bersyéba. Wettunna cappu bokong uwaina, napalénne'ni Hagar ana'na ri yawana alekale'é, nainappa tudang kira-kira sératu météré polé ri onrongngéro. Adanna ri laleng ati, “Dé' utahang mitai ana'ku maté.” Nainappa terini. Naéngkalingai Allataala saddanna Ismaél, napolé ri langié mabbicarani malaéka'na Allataala lao ri Hagar, adanna, “Aga musussai, Hagar? Aja' mumétau. Naéngkalingani Allataala saddanna ana'mu. Laono ri ana'mu, akkai namupattennangngi. Maéloka pancajiwi wija-wijanna séuwa bangsa iya battowaé.” Nainappa Allataala mébbui Hagar makkita sibawa manessa, angkanna naita séddi bujung. Nalaona nanalisekiwi iyaro popang bingkulangngé sibawa uwai, nainappa napainung ana'na. Allataala sibawangngi Ismaél. Iyaro ana'é pédé battowai; mattette'i ri padang kessi Paran, sibawa mancaji paddengngeng iya maccaé. Indo'na pakawingngi sibawa séddi makkunrai Maséré. Iyaro wettué Arung Abimélékh sibawa Pikhol, pallima tentarana, polé ri Abraham sibawa makkeda, “Allataala tulukko ri laleng sininna séuwa-séuwaé iya mupogau'é. Rimakkuwannanaro, attanrono kuwaé ri yolona Allataala, makkedaé dé' mumaélo macéko-céko lao ri iyya, iyaré'ga lao ri ana'-ana'ku, iyaré'ga wija-wijakku. Pada-pada puraka makessing ati lao ri iko, kédo makkuwatonoro lao ri iyya sibawa lao ri wanuwa iya muwonroiyéwé.” Nakkeda Abraham, “Mattanroka.” Iyakiya rimunri nasesse'i Abraham, Abimélékh passalenna séddi bujung iya puraé narampasa ata-atanna arungngéro. Makkedani Abimélékh, “Dé' uwissengngi niga pura pogau'i. Dé'pa naengka mupauwi lao ri iyya, na iyanaé pammulanna uwéngkalinga passalenna gau'éro.” Nainappa Abraham mpéréngngi sijumella bimbala sibawa saping lao ri Abimélékh, na iya duwa tauwéro pakangkani assijancing. Napallainni Abraham pitu ana' bimbala polé ri bimbala makkonronna, nanakkutana Abimélékh ri aléna, “Magi mupogau'i iyaro gau'é?” Nappébali Abraham, “Tarimani iya pitu ana' bimbala'éwé selaku tanranna mangakui Bapa' makkedaé iyya ritu pura kaliwi iyaé bujungngé.” Makkuwaniro iyaro onrongngé riyasengngi Bersyéba, nasaba kuwaniro iya duwa tauwéro mattanro. Puranana mennang pakangka assijancing ri Bersyéba, lisuni Abimélékh sibawa Pikhol ri wanuwanna tau Filistingngé. Nanatanenna Abraham sipong aju tamariska ri Bersyéba namappammulai wettuéro iyaro onrongngé napakéi untu' sompai Puwangnge, Allataala iya mannennungengngé. Purairo monroni Abraham maitta-itta ri wanuwanna tau Filistingngé. Siyagangngaré wettu ri munrinna Allataala mojiwi atinulurenna Abraham. Mangobbii Allataala, “Abraham!” Nanappébali Abraham, “Iyyé Puwang.” Adanna Allataala, “Laono ri tana Moria sibawa Ishak, ana' tungke'mu, iya muwamaséi senna'é. Kuwaro, ri séddié bulu iya Ujellokengngékko matu, akkasuwiyangengngi ana'mu selaku akkarobangeng ritunu lao ri Iyya.” Maélé senna'ni pappa bajana essoé, Abraham puwé'-puwé' aju untu' akkarobangeng ritunu nanasiyoi iyaro ajué ri lekke'na kaleddé'na. Joppani silaong Ishak sibawa duwa tau atanna lao ri onrong iya napowadaé Allataala lao ri aléna. Ri esso iya matellué naitani Abraham iyaro onrongngé polé mabéla. Nainappa makkeda lao ri iya duwa atannaro, “Onrono kuwaé silaong kaleddé'éwé. Iyya sibawa ana'ku maéloka lao kuwaro untu' sompai Puwangnge, matu'pi talisu lao ri iko.” Napalénne'ni Abraham iyaro aju untu' akkarobangengngé ri salangkanna Ishak, na aléna tiwii pisoé sibawa bara apié untu' tunui ajué. Wettunna mennang silaong joppa, makkedani Ishak, “Ambo'!” Nappébali Abraham, “Engka aga ana'ku?” Nakkutana Ishak, “Tiwini api sibawa aju, kégani ana' bimbala untu' akkarobangeng ritunuéro?” Nappébali Abraham, “Aléna muto Allataala maélo passadiyai iyaro ana' bimbala'é.” Nainappa joppa matteru iya duwa. Wettunna mennang lettu ri onrong iya napowadaé Allataala lao ri Abraham, patettonni séddi mézba sibawa susungngi aju tunungngéro ri yasé'na. Nainappa nasiyo ana'na nanapaléwui ri yasé'na mézbaé, ri tompo'na aju tunungngéro. Purairo, nalani pisona maélo mpunoi ana'na. Iyakiya mangobbii malaéka'na Puwangnge polé ri langié, “Abraham, Abraham!” Nappébali Abraham, “Iyyé Puwang!” Nakkeda Puwangnge naolai malaéka'éro, “Aja' mupeddiriwi iyaro ana'é iyaré'ga magagai. Uwissenni makkekkuwangngé makkedaé mappakalebbiko sibawa turu lao ri Iyya, nasaba dé' musampéyangngi untu' mabbéréyangngi ana'mu iya tungke''éro lao ri Iyya.” Nainappa makkita Abraham ri seddéna nanaitani sikaju bimbala lai iya tassakkaé tanru'na ri laleng alekale'é. Nalani Abraham iyaro bimbala'é nanakkasuwiyangengngi lao ri Puwangnge selaku akkarobangeng ritunu passulléna ana'na. Nasenni Abraham iyaro onrongngé “ Puwangnge passadiyai iya riyapparelluwangngé”. Nalettu makkekkuwangngé makkedai tauwé “Ri yasé'na buluna Puwangnge passadiyai iya riyapparelluwangngé”. Siseppi mangobbi malaéka'na Puwangnge polé ri langié lao ri Abraham, “Makkedai Puwangnge: Mattanroka ri laleng asek-Ku muto, nasaba purai mupogau' gau'éwé sibawa dé' musampéyangngi untu' mabbéréyangngi ana'mu iya tungke''éro lao ri Iyya, maélo-Ka barakkakiko sibawa maona enrengngé mébbui wija-wijammu singngéga wéttowingngé ri langié sibawa singngéga kessi'é ri wiring tasi'é. Ana' eppomu nacaui matu sining balinna mennang. Sininna bangsaé ri linoé méllauwi matu ri Iyya kuwammengngi Ubarakkakiwi mennang pada-pada purana Ubarakkaki wija-wijammu – nasaba purani muturusi parénta-Ku.” Purairo lisuni Abraham lao ri iya duwa atanna, nainappa silaong mennang lao ri Bersyéba, namattette'na Abraham kuwaro. Mappunnaiwi Abraham kaka iya riyasengngé Nahor. Purana kajajiyangngé ri Bulu Moriaro, naéngkalingani Abraham makkedaé Milka, bainéna Nahor mappunnaini aruwa ana' worowané, iyanaritu: Us, iya macowaé, Bus, anrinna, Kemuél, iya rimunri mancajiyé ambo'na Aram, Késéd, Hazo, Pildas, Yidlaf, sibawa Bétuél, iya rimunri mancajiyé ambo'na Ribka. Iyanaro aruwa ana' najajiyang Milka untu' Nahor, silessurenna Abraham. Nahor mappunnaiwi gundi iya riyasengngé Réuma na iyaro gundi'é najajiyangngi Tébah, Gaham, Tahas sibawa Maakha. Narapinana umuru'na Sara 127 taung, maténi ri Hébron ri tana Kanaan. Messéni Abraham sibawa nawatingini amaténna bainénaro. Purairo nasalaini Abraham ujuna bainénaro nalao risining tau Hét-é, iya monroiyéngngi wanuwaéro. Makkedani, “Iyya'é tau laikka iya monroé ri tengngana Saudara-saudara; palalona melli sipaddarekeng tana kuwammengngi weddikka kuburu'i bainéku.” Nappébali mennang, “Ripakarajai Bapa' selaku pamimping iya mawatangngé ri yelle'ta, jaji kuburu'ni bainéna Bapa' ri laleng kuburu iya kaminang makessingngé iya riyappunnangiyé. Masennang manekki passadiyangengngi kuburu untu' bainéna Bapa'.” Nainappa suju'ni Abraham ri yolona mennang, sibawa makkeda, “Rékko macenningngi atinna Saudara-saudara ukuburu bainéku kuwaé, tulunni méllauwi ri Efron, ana' worowanéna Zohar, kuwammengngi nabalu'i lao ri iyya Gowa Makhpéla iya engkaé ri wiring dare'na. Makessingengngi nabalu iyaro tanaé kuwaé, sibawa nasabbing Saudara-saudara. Ellinna maéloka mpaja manengngi, kuwammengngi iyaro tanaé mancajiwi appunnangekku.” Iyaro wettué aléna Efron mattengngang tudang sibawa sining tau Hét-éro ri onrong addeppu-deppungengngé ri pintu gerbanna kotaé. Nainappa nasabbing sininna tau iya engkaé kuwaro, mappébalini, “Bangsaku muto mancaji sabbi sibawa iyaro dare'é silaong gowana uwabbéréyangngi kuwammengngi weddingngi Bapa' kuburu'i bainéna Bapa'.” Nasuju'na Abraham ri yolona sining tau Hét-éro, sibawa naéngkalinga sininna tauwé, makkedani lao ri Efron, “Uwéllauwi taéngkalingaka. Macinnaka melli manengngi iyaro dare'é. Tarimani dowina, kuwammengngi ukuburu'i bainéku kuwaro.” Nappébali Efron, “Sipaddarekeng tana iya ellinnaé banna 400 dowi péra' aga bettuwanna iyaro lao ri idi sipadduwa? Kuburu'ni bainéna Bapa kuwaro.” Nasitujuini Abraham iyaro ellinna. Nabilanni dowi péra'é singngéga iya nateppué Efron, iyanaritu 400 dowi péra', situru timbangeng iya napaké sining padangkangngé. Nainappa nawajareng Efron, sibawa nasabbing sininna tau Hét-éro. Makkuwaniro dare'na Efron iya monroé ri Makhpéla ri seddé alauna Mamré, mancaji appunnangenna Abraham. Iyaro tanaé iyanaritu dare sibawa gowana enrengngé sininna tanet-tanenna muttama toni tanet-taneng iya engkaé ri pakkasésénna. Sininna tau Hét-é iya engkaé hadéré ri laleng addeppu-deppungengngé ri pintu gerbanna kotaé nangakuini iyaro tanaé selaku appunnangenna Abraham. Purairo nakaburu'ni Abraham Sara bainéna ri laleng Gowa Makhpéla ri tana Kanaan. Makkuwaniro dare'é sibawa gowana iya silalonaé appunnangenna tau Hét-é, mancaji appunnangenna Abraham untu' tana akkuburukeng. Macowa senna'ni Abraham, naribarakkakina ri Puwangnge ri laleng sininna gau'é. Riséuwaé esso makkedani Abraham lao ri atanna kaminang macowaé, iya murusu'éngngi sininna waramparanna, “Palénne'ni limammu ri pallawangenna poppoppakku. Attanrono nasabbing Puwangnge, Allataala iya makuwasaiyéngngi langié sibawa linoé, makkedaé dé' musapparengngi matu bainé untu' Ishak ana'ku polé ri yelle'na sining tauwé ri tana Kanaangngé. Harusu'ko lisu ri wanuwa ajajiyakku untu' sapparengngi bainé untu' aléna polé ri yelle'na sumpulolona.” Nanakkutanana iyaro ataé lao ri aléna, “Rékko iyaro ana'daraé dé' namaélo maccowérika lao ri wanuwaéwé? Harusu'ka'ga tiwii ana'na Bapa' lao ri wanuwa assalenna Bapa'?” Iyakiya mappébaliwi Abraham, “Jagako! Aja' lalo mutiwii iyaro ana'ku lao kuwaro! Puwang, Allataala iya makuwasaiyéngngi langié, pura tiwika polé ri bolana ambo'ku sibawa polé ri wanuwanna sumpuloloku, napurani mattanro lao ri iyya makkedaé maéloi mpérékka iyaé wanuwaé lao ri wija-wijakku. Alénato suroi matu malaéka'-Na untu' tulukko, kuwammengngi mulléi runtu séddi bainé polé kuwaro untu' ana'ku. Iyakiya rékko iyaro ana'daraé dé' namaélo maccowériko, leppe'ko polé ri tanroéwé. Muwi maga, aja' mutiwii iyaro ana'ku lao kuwaro.” Nainappa iyaro ataé napalénne'ni limanna ri pallawangenna poppoppanna Abraham puwanna, sibawa mattanro maélo pogau'i aga iya naéllauwé Abraham. Malani iyaro ataé seppulo kajunna unta enrengngé maddupa-rupang barang mangke'é appunnangenna puwanna nanajoppa lao ri kota naonroiyé Nahor ri wettu tuwona; onronna ri seddé manoranna Mésopotamia. Lettu'nana kuwaro, napaléppanni unta-untanaro kuwammengngi nappésau ri seddéna séuwaé bujung ri saliweng kota. Iyaro wettué, arawénni, naiyanaro wettunna sining makkunraié lao ri bujungngé untu' mala uwai. Namassempajanna iyaro ataé, “ Puwang, Allataalana puwakku Abraham, tulunni, kuwammengngi iya risurowangngékka mallolongengngi iyaé essoé; tamaséini puwakku Abraham. Itani, tettokka ri seddéna bujungngéwé. Dé'na namaitta ana'-ana'daraé polé ri kotaé maélo polé mala uwai. Maéloka makkeda lao risala séddinna polé ri mennang, ‘Tulukka paléssoi busummu sibawa wérékka uwai rinung.’ Rékko mappébaliwi, ‘Enunni', sibawa unta-untanato Bapa' maélo tokka painungngi!’ aléna ritu iya napilé Puwangnge untu' atammu Ishak. Rékko kajajiyangngi iyaro gau'é, uwissenni matu makkedaé Puwangnge mamaséiwi puwakku Abraham.” Nalarina atanna Abraham maddeppériwi sibawa makkeda, “Tulukka Na', wérékka uwai rinung polé ri busummuro.” Nappébali iyaro ana'daraé, “Inunni Pa',” nanapanonnoni masitta busunna polé ri salangkanna, nanakkatenningngi iyaro busué napaénungngi iyaro ataé. Puranana ménung iyaro ataé; makkedani iyaro ana'daraé, “Maélo tokka séro uwai untu' unta-untana Bapa', kuwammengngi nasininna iyaro olokolo'é weddingngi ménung gangka cau.” Namasitta'na tiri'i uwai ri laleng busunnaro muttama ri onrong énungeng untaé, nainappa lari lisu ri bujungngé untu' séro uwai lebbi maégapa narapi sininna iyaro olokolo'é cau ménung. Na iyaro atanna Abraham napénessaini matteru temmakkeada-ada muwi silappa. Macinnai missengngi aga Puwangnge pasiduppangengngi akkattana iyaré'ga dé'. Puranana ménung maneng iyaro untaé gangka cau, nalani atanna Abraham paréwa ulaweng iya mangke'é, nanapakkennai ri inge'na iyaro ana'daraé. Nawérénni sipasang gellang ulaweng ri taiyyana. Nainappa makkeda iyaro ataé, “Coba powadai niga ambo'mu. Engkaga onrong mabbenni ri bolana untu' iyya sibawa sining taukku?” Nappébali iyaro ana'daraé, “Ambo'ku Bétuél, ana'na Nahor sibawa Milka. Ri bolata engka onrong mabbenni untu' Bapa' sibawa maégato daramé enrengngé inanré olokolo.” Nasuju'na iyaro ataé sompai Puwangnge. Adanna, “Ripojiwi Puwangnge, Allataalana puwakku Abraham. Annessana matinului Puwangnge sibawa mamaséi lao ri puwakku Abraham. Napimpikka matteru lao ri sumpulolona.” Nainappa lari iyaro ana'daraé lao ri bolana indo'na nanacuritai sininna iyaro kajajiyangngé. Nainappa makkeda Laban, “Bapa' tau ribarakkaki ri Puwangnge! Aja' taonro ri saliweng kuwaé. Laoni mai ri bolata. Purani passadiya bili' untu' Bapa' sibawa topa onrong untu' unta-untana Bapa'.” Nanaccowéna iyaro ataé sibawa muttama ri lalempola. Napanonnoni Laban tékéna sining untana, sibawa mpéréngngi daramé enrengngé inanré lao risining olokolo'éro. Purairo tiwini uwai pabbissa ajé untu' atanna Abraham sibawa sining taunna. Wettunna ripatala inanré, makkedani iyaro ataé, “Dé' umaélo manré ri wettu dé'napa upalettu'i paseng iya utiwié.” Nakkeda Laban, “Abbicarani.” Nanappammulana mabbicara atanna Abraham, adanna, “Iyya'é atannaka Abraham. Nabarakkaki senna'i Puwangnge iyaro puwakku sibawa napancajiwi sugi senna. Puwangnge pura mpéréngngi bimbala makkonrong, bémbé, saping, unta, kaleddé, sibawa topa péra', ulaweng enrengngé ata worowané sibawa makkunrai. Ri wettu macowana, Sara, bainéna puwakkuro jajiyangngi ana' worowané, napurani puwakku nappammanareng sininna waramparanna lao ri ana'naro. Nasuroka majjanci sibawa mattanro kuwammengngi turusiwi paréntana. Adanna, ‘Aja' mupiléngengngi bainé ana'ku polé ri yelle'na sining ana'daraé ri tana Kanaangngé, sangadinna polé ri yelle'na sumpulolona appanna ambo'ku. Jaji laono kuwaro sibawa masitta.’ Naumakkutana ri aléna, ‘Pékkugi rékko iyaro ana'daraé dé' namaélo maccowérika?’ Nanappébali, ‘ Puwang iya tuli uturusiyé, suroi matu malaéka'-Na untu' mattulung kuwammengngi musiduppa akkattamu. Namulolongeng matu bainé untu' ana'ku polé ri yelle'na appakku muto, iyanaritu polé ri sumpulolona ambo'ku. Banna rékko nasampéyakko mennang, nappako leppe polé ri tanromu.’ Na wettukku lettu onna ri bujungngé, massempajakka ri laleng ati, ‘ Puwang, Allataalana puwakku Abraham, sitinajai Puwang pasiduppai akkattaku. Maéloka tette tettong ri seddéna bujungngéwé. Rékko séddié ana'dara polé untu' mala uwai, maéloka méllauwi ri aléna kuwammengngi napaénukka. Rékko maéloi pogau'i, sibawa mappéddarang towi untu' paénungngi sining untaku, alénana ritu iya napilé Puwangnge mancaji bainéna ana'na puwakkuro.’ Dé'pa upaja massempajang ri laleng ati, poléni Ribka tiwii busu ri salangkanna nanala uwai ri bujungngé. Nainappaka makkeda lao ri aléna, ‘Tulungnga tapainukka.’ Namasitta'na panonnoi iyaro busué polé ri salangkanna sibawa makkeda, ‘Enunni, na unta-untana Bapa' maélo tokka painungngi.’ Nauwénunna, napuranaro napaénung toni iyaro unta-untaku. Purairo makkutanaka, ‘Niga ambo'mu?’ Namappébali, ‘Ambo'ku Bétuél, ana'na Nahor sibawa Milka.’ Nainappa pakkennangengngi paréwa ulaweng ri inge'na sibawa sipasang gellang ri taiyyana. Suju'na sompai sibawa pojiwi Puwangnge, Allataalana puwakku Abraham. Purana' napimping matteru lao kuwaé ri sumpulolona puwakku, angkanna weddingngi ulolongeng iyaé ana'daraé untu' ana'na. Makkekkuwangngé, rékko sadiyako gaukengngi puwakku sibawa makessing sibawa pennoiwi tanggung jawa'mu lao ri aléna selaku silessureng, tapowadanna, iyakiya rékko dé', tapowada toni, kuwammengngi uwissengngi aga harusu upogau'.” Nappébali Laban sibawa Bétuél, “Nasaba aga iya kajajiyangngéwé assalenna poléi ri Puwangnge, dé' tasipato mabbéré apettung. Iyaé Ribka; leppessanni maccowé ri Bapa' sibawa mancaji bainéna ana'na puwanna Bapa', pada-pada iya napowadaé aléna Puwangnge.” Wettunna naéngkalinga iyaro atanna Abraham ada-adanna mennang, suju'ni sompai Puwangnge. Nainappa passu pakéyang, paréwa péra' sibawa ulaweng, nanawéréng manengngiro Ribka. Makkuwatoro kakana sibawa indo'na nawérénni hadiya iya masulié. Purairo manré ménunni atanna Abraham sibawa sining taunna, nainappa mabbenni kuwaro. Moto'nana pappa bajana, makkedani iyaro ataé, “Palaloka lisu ri puwakku.” Iyakiya makkedai kakana sibawa indo'na Ribka, “Leppessanni Ribka monro sibawakki kira-kira siminggu iyaré'ga seppulo essonapa, napurapiro weddinni lao.” Iyakiya makkedai iyaro ataé, “Aja' tatahakka. Puwangnge pasiduppangekka akkattaku; palalona lisu ri puwakku.” Nappébali mennang, “Laono mai taobbii Ribka sibawa tanaiwi pallolongenna.” Nainappa mennang naobbii Ribka sibawa makkutana, “Maélokoga maccowériwi iyaé tauwé?” Nappébali iyaro ana'daraé, “Iyyé, maéloka.” Nainappa sadiya-sadiyani Ribka silaong sining makkunrai maloloé iya mancajiyé atanna, nainappa ménrékiwi untaé sibawa joppa maccowériwi iyaro atanna Abraham. Na wetuéro engkani Ishak polé ri padang kessi'é, lalo ri bujung iya riyasengngé “Aléna Iya Jampangiyékka” sibawa monro ri bagiyang yattanna Kanaan. Riséuwaé arawéng massui ri kémana maélo joppa-joppa ri dare'é, nanaitai engka unta-unta polé. Wettunna Ribka naita Ishak, léssoni polé ri untana, namakkutana ri atanna Abraham, “Niga iyaro tau worowané ri dare'é iya mattujué ri idi?” Nappébali iyaro ataé, “Aléna puwakku.” Nanalani Ribka saléndanna nanatongkoi rupanna. Nainappa iyaro ataé curitai ri Ishak sininna iya puraé napogau'. Purairo natiwini Ishak Ribka muttama ri laleng kémana Sara indo'na, nanapubainéi Ribka. Naélorini Ishak Ribka; natassaléwona atinna Ishak iya masaraé nasaba ateddéngengngi indo'na. Mabbainési paimeng Abraham sibawa séddi makkunrai iya riyasengngé Ketura. Iyaro bainéna jajiyangngi ana'-ana' iya riyasengngé: Zimran, Yoksan, Médan, Midian, Isybak sibawa Suah. Yoksan ambo'na Syéba sibawa Dédan, na wija-wijanna Dédan iyanaritu tau Asyur, tau Létus sibawa tau Léum. Ana'-ana'na Midian iyanaritu: Ela, Efer, Hénokh, Abida sibawa Eldaa. Iya manenna mennang wija-wijanna Ketura. Namuni nappammanarengngi sininna waramparanna Abraham lao ri Ishak, ri wettu tuwona mabbéréi maéga hadiya lao ri ana'-ana'na iya nalolongengngé polé risining bainéna iya laingngé. Nainappa nasuro iyaro ana'-ana'é létté ri daéra seddé alauna Kanaan, kuwammengngi nabélaiwi Ishak ana'na. Rikuburu'i ri ana'-ana'na, iyanaritu Ishak sibawa Ismaél, ri Gowa Makhpéla iya monroé ri dare seddé alauna Mamré. Riyolo iyaro dare'é appunnangenna Efron ana' Zohar, tau Hét, iyakiya purai naelli Abraham polé ri tau Hét-éro. Sara bainéna Abraham, rikuburu towi kuwaro. Maténana Abraham, Allataala barakkakiwi Ishak, ana'na Abraham. Iyaro wettué monroi Ishak ri seddéna bujung iya riyasengngé “Aléna Iya Jampangiyék-Ka”. Ismaél iyanaritu ana'na Abraham sibawa Hagar, makkunrai Maséré, atanna Sara. Umuru'na Ismaél 137 taung wettunna maté. Wija-wijanna monroi ri daéra pallawangenna Hawila sibawa Syur ri seddé alauna Maséré mattuju ri Asyur. Tuwoi mennang mallaing polé ri wija-wijanna Abraham iya laingngé. Iyanaé riwaya'na Ishak, ana'na Abraham. Patappulo taung umuru'na Ishak wettunna napobainé Ribka, anrinna Laban, ana'na Bétuél, séddiwi tau Aram polé ri Mésopotamia. Nasaba Ribka dé' nalolongeng ana', massempajanni Ishak lao ri Puwangnge untu' bainéna. Na Puwangnge tarimai sempajanna Ishak, angkanna mattampu'ni Ribka. Namattampu'na ana' dénru, na ri wettu dé'napa najaji iyaro ana'-ana'é, magguliccii mennang ri laleng parémmananna. Nakkeda Ribka, “Magi iyaé gau'é naharusu kajajiyang ri aléku?” Nainappa méllau panunju ri Puwangnge. Makkedai Puwangnge ri aléna, “Duwa bangsa engka ri laleng parémmanammu; jajiyakko matu duwa bangsa iya simusué anrinna lebbi mawatangngi naiya kakana iya macowaé tumaningiwi iya maloloé.” Narapini wettunna Ribka untu' mémmana, nanajajiyanna duwa ana' worowané dénru. Iya macowaé macella-cella tappana, sibawa olina pada-pada jumba iya mabbulué. Rimakkuwannanaro nariyaseng Esau. Wettunna ana' maduwaé rijajiyang, limanna nakkatenningngi amputuna Esau. Narimakkuwannanaro nariyaseng Yakub. Enneng pulona taung umuru'na Ishak wettunna mennang jaji. Natattamba battowana iya duwa ana'éro. Esau mancajiwi paddengngeng iya maccaé sibawa napoji monro ri padangngé, iyakiya Yakub tennangngi sipa'na sibawa napoji monro ri bolaé. Ishak lebbi naéloriwi Esau, nasaba napoji Ishak manré juku lampa. Iyakiya Ribka lebbi naéloriwi Yakub. Riséuwaé esso wettunna Yakub mannasu buwé cella, poléni Esau ri rengngengenna. Namalupuna. Adanna lao ri Yakub, “Malupu senna'ka. Wérékka céddé buwé cella'éro.” (Iyanaro saba'na nariyaseng Edom.) Nappébali Yakub, “Makessinni, assaleng muwérékka lebbi riyolo ha'mu selaku ana' macowa.” Adanna Esau, “Paduli aga iyaro ha'é untu' aléku. Malupuka sitengnga maté!” Adanna Yakub paimeng, “Attanrono riyolo makkedaé muwérékka ha'mu.” Mattanroni Esau sibawa mpéréngngi ha'na lao ri Yakub. Purairo nabbéréyanni Yakub lao ri aléna roti sibawa sibagiyang polé ri ukkaju buwé cella'éro. Manré ménunni Esau nainappa lao. Makkuwaniro Esau pakariyawai ha'na selaku ana' macowa. Momposi akkadérengngé ri wanuwaéro pada-pada iya puraé kajajiyang ri wettunna Abraham. Mangoloni Ishak ri Abimélékh, arunna tau Filistingngé, ri Gérar sibawa méllau ripalalo untu' monro kuwaro. Napogau'i iyaro gau'é nasaba Puwangnge pura mappaitangngi aléna ri Ishak sibawa makkeda, “Aja' mulao ri Maséré; onrono ri wanuwaéwé, pada-pada iya puraé Uparéntakko. Maélo-Ka linrungiko sibawa barakkakiko. Sininna daéraéwé maéloka mpérékko sibawa wija-wijammu. Maélo-Ka rupaiwi janci iya puraé Uwabbéréyang lao ri Abraham, ambo'mu. Maélo-Ka mpérékko ana' eppo singngéga wéttowingngé ri langié, sibawa sininna daéraéwé maélo-Ka mpéréngngi mennang. Sininna bangsaé ri linoé méllauwi matu ri Iyya kuwammengngi Ubarakkakiwi mennang pada-pada pura Ubarakkakinna wija-wijammu. Maélo-Ka barakkakiko, nasaba purani Abraham turusi-Ka enrengngé napiyarai sininna hukkungngé sibawa parénta-Ku.” Jaji monroni Ishak ri Gérar. Wettunna sining tauwé kuwaro makkutana passalenna Ribka, mappébalini Ishak makkedaé anrinna iyaro, sibawa tenniya bainéna. Métaui Ishak risining tauwéro riyuno ammai matu untu' lolongengngi Ribka iya magello senna'éro. Monronana Ishak kuwaro siyagangngaré ittana, riséuwaé esso Arung Abimélékh makkita polé ri tellongenna, nanaitai Ishak siraga-raga sibawa Ribka. Nanaobbini Ishak sibawa makkeda, “Tenniyaga iyaro makkunraié bainému? Magi muwakkeda makkedaé anrimmu?” Nappébali Ishak, “Upikkiri'i, riyunoka matu rékko makkedaka makkedaé bainéku iyaro.” Nakkeda Abimélékh, “Aga pura mupogau' lao ri idi? Sala séddinna polé ri ra'ya'ku weddissa matinro sibawa bainému, narékko kajajiyangngi iyaro gau'é, iko tanggung jawakiwi iyaro asalatta.” Nainappa Abimélékh paréngngerangiwi sininna ra'ya'na makkuwaéwé, “Nigi-nigi ganggui iyaé tauwé iyaré'ga bainéna, rihukkung matéi matu.” Mamponi biné Ishak untu' mallaonruma ri wanuwaéro, sibawa iyaro taungngé lolongenni wassélé leppi wékkasératu polé ri iya naampoé, nasaba Puwangnge barakkakiwi. Pédé tattambani asugirenna sibawa mancajini sugi senna. Mangémpuruni tau Filistingngé ri aléna nasaba mappunnaiwi maéga ata, bimbala sibawa saping. Nainappa naléwu mennang sibawa tana sininna bujung iya puraé nakali ata-atanna Abraham ri wettu tuwona mupa. Nainappa makkeda Abimélékh lao ri Ishak, “Esu'no polé ri wanuwatta. Lebbi makuwasano naiya idi.” Jaji laoni Ishak nanakkéma ri Lompo Gérar. Monroni kuwaro siyagangngaré ittana. Nakalini paimeng sining bujung iya puraé nakali ri wettunna Abraham sibawa iya puraé naléwu sibawa tana tau Filistingngé maténana Abraham. Iyaro sining bujungngé nawéréngngi aseng iya pada-padaé nawéréngngéngngi ambo'na. Kalini bujung ata-atanna Ishak ri Lompo Gérar sibawa lolongeng uwai maona senna. Iyakiya sining pakkampié ri Gérar massasai sibawa sining pakkampina Ishak. Adanna mennang, “Iyaé uwai appunnangetta.” Rimakkuwannanaro nasenni Ishak iyaro bujungngé “Assasang”. Kalisi bujung laingngé ata-atanna Ishak, namassasasi passalenna iyaro bujungngé. Rimakkuwannanaro, nasenni Ishak iyaro bujungngé “Ammusureng”. Nainappa létté polé kuwaro sibawa kali bujung iya matellué. Iya sisengngéwé dé'na nakajajiyang assasangngé. Rimakkuwannanaro, nasenni Ishak iyaro bujungngé “Alaluwasang”. Adanna, “Makkekkuwangngé Puwangnge mpérékki alaluwasang untu' monro ri wanuwaéwé, sibawa mancajiki matu madécéng kuwaé.” Nainappa joppani Ishak nalettu ri Bersyéba. Iyaro wennié nappaitanni aléna Puwangnge lao ri aléna sibawa makkeda, “Iyya'na Allataalana ambo'mu Abraham. Aja' mumétau; Iyya linrungiko. Maélo-Ka barakkakiko sibawa mpérékko wija-wijanna iya maégaé nasaba jancik-Ku lao ri atak-Ku Abraham.” Nainappa patettonni Ishak mézba sibawa sompai Puwangnge ri onrongngéro. Makkémani kuwaro sibawa ata-atanna kali bujung iya laingngé. Riséuwaé esso engkani Abimélékh polé ri Gérar, sibawa Ahuzat, penaséha'na, enrengngé Pikhol, pallima tentarana, untu' méwai sita Ishak. Nakkutanana Ishak, “Magi muwengka méwaka sita makkekkuwangngé, padahal riyolo mumusuka sibawa mupaddésu'ka polé ri wanuwammu?” Nappébali mennang, “Riissenni makkekkuwangngé makkedaé Puwangnge linrungiko sibawa manuru pallolongetta makessingengngi mébbuki assijancing. Attanrono makkedaé dé' mumaélo péjariki, pada-pada muto idi dé' naengka ripéjariko. Makessingngi kédota lao ri iko enrengngé leppessakko lao sibawa damé. Manessani ri idi makkedaé Puwangnge barakkakiko.” Nainappa Ishak sibawa mennang, manré minung. Pappa bajanana essoé maéléni tungke'-tungke' majjanci iya napaessaé sibawa tanro. Nainappa Ishak passalama'i mennang nassaranna mennang selaku sahaba. Iyatoro essoé napolé ata-atanna Ishak sibawa laporo'i ri aléna passalenna bujung iya puraé nakali mennang. Adanna mennang, “Lolongenni uwai.” Nainappa Ishak masengngi iyaro bujungngé “Tanro”. Iyanaro assalenna kotaéro nariyaseng Bersyéba. Wettunna Esau makkéumuru patappulo taung, kawinni sibawa duwa ana'dara polé ri suku bangsa Hét-é, iyanaritu Yudit ana' Beeri, sibawa Basmat ana' Elon. Iya duwa makkunraiéro nasussaiwi atuwo-tuwonna Ishak sibawa Ribka. Riséuwaé esso, wettunna Ishak macowani sibawa buta toni, naobbini Esau, ana'na iya macowaé, nainappa makkeda lao ri aléna, “Ana'ku!” Nappébali Esau, “Iyyé, Ambo'.” Nakkeda Ishak, “Muwissettu makkedaé macowana sibawa naullé dé'na namaittana tuwo. Jaji alani pana-panamu, laono lellung sikaju olokolo ri padangngé. Nasuni iya malunra'é iya upojiyé, nainappa mutiwi ri iyya. Rékko purai uwanré, maéloka mpérékko barakka'ku ri wettu dé'napa umaté.” Iyaro assipabbicaranna Ishak sibawa Esau naéngkalingai Ribka. Joppanana Esau untu' lao mallellung, makkedani Ribka lao ri Yakub, “Silalona uwéngkalinga makkeda ambo'mu lao ri Esau makkeda makkuwaé, ‘Lellunno sikaju olokolo sibawa nasuni iya malunra'é untu' iyya. Rékko purai uwanré, uwérékko matu barakka'ku ri yolona Puwangnge, ri wettu dé'napa umaté.’ Nah, ana'ku,” adannasi Ribka, “éngkalingai sibawa pogau'i aga iya upowadaéwé. Laono ri onronna bimbala'ta, namupilé duwa ana' bémbé iya macommo'é, kuwammengngi unasui mancaji inanré napojiyé ambo'mu. Nainappa mutiwi ri aléna kuwammengngi naanréi, napurairo nawérékko matu barakka'na ri wettu dé'napa namaté.” Iyakiya makkedai Yakub lao ri indo'na, “Indo', dé'ga nawatakkaléna Esau mabbului, na watakkaléku dé'? Ajakké nakarawai ambo' watakkaléku nanaissengngi makkedaé ubelléi; nadé'na matti nawérékka barakka, mala natanroika.” Nappébali indo'na, “Aja' mubata-bata, Na'. Leppessanni iyya tanggungngi sininna tanrona, pogau' bawanni aga iya upowadaé, laono malai iyaro sining bémbé'é.” Nalaona Yakub malai iyaro sining bémbé'é nanatiwii ri indo'na, nainappa nanasu Ribka inanré napojiyé Ishak. Nainappa nala Ribka pakéyanna Esau iya kaminang makessingngé, iya nataroé ri bolaé, nainappa napappakéi Yakub. Nabbebbekeng towi bingkulang ana' bémbé'é ri taiyyana sibawa ri ellonna Yakub iya dé'é nabbulu-buluro. Nainappa nawéréng Yakub nasu-nasu iya malunra'éro silaong roti iya puraé naébbu. Purairo laoni Yakub ri ambo'na sibawa makkeda, “Ambo'!” Nappébali Ishak, “Iyyé, niga iko, Esau iyaré'ga Yakub?” Nappébali Yakub, “Esau, ana'na ambo' iya macowaé; purani upoga'u pasenna ambo'. Tudanno sibawa anréni juku lampa iya utiwiéwé, kuwammengngi weddingngi ambo' barakkakika.” Nakkeda Ishak, “Masitta senna'ko lolongengngi, Na'.” Nappébali Yakub, “Nasaba Puwang Allataala iya nasompaé ambo pura tulukka.” Nainappa makkeda Ishak lao ri Yakub, “Addeppéno mai kuwammengngi uwulléi karawako. Tongekkoga Esau?” Naddeppérini Yakub ambo'na, na iyaro ambo'na nakarawani sibawa makkeda, “Saddammu pada-padai saddanna Yakub, iyakiya taiyyamu pada-padai taiyyana Esau.” Dé narupani Ishak Yakub nasaba mabbului taiyyana pada-pada taiyyana Esau. Iyakiya wettunna Yakub maélo ribarakkaki, makkutana mupi siseppa, “Tongekkoga Esau?” “Tongeng,” adanna Yakub. Nanakkedana Ishak, “Wérénna iyaro jukué. Rékko purai uwanré uwérékko matu barakka'ku.” Nawérénni Yakub iyaro jukué lao ri aléna sibawato céddé anggoro untu' naénung. Nanakkeda ambo'na ri aléna, “Addeppéno mai lebbi macawé, Na', sibawa bauna.” Wettunna Yakub maddeppé untu' bauwi, naémmauni Ishak bau pakéyanna Esau, nanabarakkakiwi. Adanna Ishak, “Bau mabauna ana'ku pada-pada bau padang iya puraé nabarakkaki Puwangnge. Tennapodo Allataala mpérékko cinoddo polé ri langié, sibawa mébbui sining dare'mu macommo! Tennapodo nawérékko gandong sibawa anggoro maona! Tennapodo bangsa-bangsaé mancaji atammu, sibawa suku-suku bangsaé tunru'i ri iko. Tennapodo mukuwasaiwi sininna sumpulolomu, sibawa wija-wijanna indo'mu suju'i ri yolomu. Tennapodo tattanroi sininna tau iya tanroiyékko sibawa ribarakkakiwi sininna tau iya barakkakiyéngngékko.” Purana muwa nabbéréyang Ishak barakka'na sibawa laona Yakub, Esau, kakana, lisuni polé mallellung. Nasu towi inanré iya malunra'é nainappa natiwi ri ambo'na, adanna, “Tudanni', Ambo', sibawa anréni juku iya utiwié untu' Ambo', kuwammengngi weddingngi Ambo' barakkakika.” Nakkutana Ishak, “Niga iko?” Nappébali, “Esau ana'na Ambo' iya macowaé.” Nappammulana ténré sininna watakkaléna Ishak, nanakkutana, “Rékko makkuwaitu, niga pura lellung olokolo nanatiwii lao iyya onna? Purani uwanré ri wettu dé'napa mulettu. Nainappa purani uwéréng barakka'ku iya paccappurengngé ri aléna, na makkekkuwangngé iyaro barakka'é mancajini appunnangenna mannennungeng.” Purana naéngkalinga Esau iyaro, terini sibawa macenno enrengngé penno apeddireng, nainappa makkeda, “Barakkaki tokka, Ambo'!” Nakkeda Ishak, “Anrimmunatu polé mai sibawa belléka. Purani nala barakka iya sitongennaé maélo uwérékko.” Nakkeda Esau, “Mabbékkaduwannanié nabelléka. Sinnanna riyaseng Yakub. Purani nala ha'ku selaku ana' macowa, na makkekkuwangngé nalasi barakka untu' aléku. Dé'naga ambo' nappunnai barakka laingngé untu' iyya?” Nappébali Ishak, “Purani upancaji puwammu, sibawa sininna sumpulolona upancajiwi atanna. Purani uwéréng gandong sibawa anggoro'é. Makkekkuwangngé dé'na aga-agana iya uwullé pogau' untu' alému, Na'!” Dé' namaélo mappésau Esau méllauwi ri ambo'na, “Aga Ambo' banna mappunnai séddi barakka bawang? Barakkaki tokka, Ambo'!” Nainappa mappammulasi teri. Nainappa makkeda Ishak lao ri aléna, “Dé'gaga matu cinoddo polé ri langié untu' alému, dé'gaga matu dare iya macommo'é untu' alému. Tuwoko matu polé ri peddammu, iyakiya mancaji atannako anrimmu, iyakiya rékko maronta'ko, leppe'ko matu polé ri akuwasanna.” Nanabencini Esau Yakub nasaba ambo'na pura mabbéréyangngi barakka'na lao ri anrinna. Pikkiri'na, “Dé'na namaittana namaté ambo' sibawa leppe'ta mabbarata, maéloka mpunoi Yakub!” Wettunna naéngkalinga Ribka rancanana Esauro, nassuro mobbini Yakub sibawa makkeda, “Engkalingai, kakamu Esau maéloi makkabale sibawa mpunoko. Nah, pogau'ni aga iya upowadaéwé. Laono masitta ri kakaku Laban ri Haran, sibawa onrono silaong aléna untu' siyagangngaré wettu ittana, narapi soro caina kakamu sibawa mallupaiwi aga iya puraé mupogau' lao ri aléna. Nainappa maéloka suroi tauwé tiwiko lisu kumaié. Dé' umaélo ateddéngeng duwa ana'ku ri esso iya padaé.” Nanakkedana Ribka lao ri Ishak, “Cauna mitai sining bainéna Esau polé ri suku bangsa laingngéro. Rékko kawing towi Yakub sibawa ana'dara Hét-é, lebbi kessing muwi matéka bawang.” Nainappa naobbini Ishak Yakub, nanabarakkakiwi sibawa makkeda, “Aja' mukawing sibawa ana'dara Kanaangngé. Laono ri Mésopotamia, ri kaluwargana Bétuél, nénému enrengngé kawinno sibawa sala séddinna ana' makkunrainna amaurému Laban. Tennapodo Allataala Iya Pommakuwasaé barakkakiwi akawingemmu sibawa mpérékko ana' eppo iya maégaé, angkammu mancaji wija-wijanna maéga bangsa! Tennapodo Puwangnge barakkakiko sibawa wija-wijammu pada-pada purana nabarakkaki Abraham, sibawa tennapodo muwappunnaiwi tana iya muwonroiyéwé, iya puraé nabbéréyang Allataala lao ri Abraham!” Makkuwaniro Ishak leppessangngi Yakub lao ri Mésopotamia, ri Laban, ana'na Bétuél tau Arangngéro. Laban iyanaritu kakana Ribka indo'na Yakub sibawa Esau. Naéngkalingana Esau makkedaé purani ribarakkaki Yakub ri Ishak sibawa naleppessanna lao ri Mésopotamia untu' sappa bainé kuwaro. Makkuwatoro makkedaé wettunna Ishak barakkakiwi Yakub, nattéyangngi Yakub mabbainé tau Kanaan. Rilainnaéro naissengngi Esau makkedaé naturusiwi Yakub ada-adanna ambo' sibawa indo'na sibawa joppani lao ri Mésopotamia. Napahanni Esau makkedaé Ishak, ambo'na, dé' napojiwi makkunrai Kanaangngé, rimakkuwannanaro laoni Esau ri Ismaél, ana'na Abraham, nanakawing sibawa ana'na Ismaél iya riyasengngé Mahalat, anrinna Nébayot. Nasalaini Yakub Bersyéba nalao ri Haran. Wettunna labu essoé, lettu'ni riséddié onrong, nanabbenni kuwaro. Léwuni maélo matinro, mangkalungui séddi batu. Nanannippina samanna mita séddi addénéng iya tettongngé ri tanaé na cappa'na narapi langié na malaéka-malaéka'é noté ri addénéngngéro. Na ri seddéna tettongngi Puwangnge sibawa makkeda, “Iyya'na Puwang, Allataala iya nasompaé Abraham sibawa Ishak. Maéloka mabbéréyangngi lao ri iko sibawa lao ri wija-wijammu tana onrommu léwué. Wija-wijammu singngégai matu awué ri tanaé. Nalowangiwi matu daérana mennang lao tulili, nanaolako sibawa wija-wijammu, maélo-Ka barakkakiwi sininna bangsaé ri linoé. Engngerangngi, maélo-Ka tulukko sibawa linrungiko, kégi-kégiko lao, sibawa maélo-Ka tiwiko lisu ri wanuwaéwé. Dé' Umaélo salaiko narapi pura Upogau' sininna aga iya Uwajjanciyangngé lao ri iko.” Nanaoto'na Yakub polé ritinrona sibawa makkeda, “Engkai Puwangnge kuwaé, ri onrongngéwé, iyakiya nappai uwisseng makkekkuwangngé!” Métauni nainappa makkeda, “Temmaka makarame'na iyaé onrongngé! Pastini iyaé bolana Allataala, pintu gerbanna surugaé.” Pappa bajanana maéléni Yakub moto, nainappa nala batu iya napaké selaku angkalungung nanapatettongngi selaku batu papparéngngerang. Natirikini minnya zaitun iyaro batué untu' ripallaing untu' Allataala. Nasenni Bétel iyaro onrongngé. (Riyolo asenna Lus.) Nainappa mattanroni Yakub, “Rékko natulukka sibawa nalinrungika Puwangnge ri allalengengngéwé enrengngé nawérékka inanré sibawa pakéyang angkakku lisu ri bolana ambo'ku sibawa salama, Puwangnge matu mancaji Allataalaku. Sibawa maéloka mabbéréyangngi lao ri Puwangnge tawa seppulona sininna iya nawéréngngékka Puwangnge. Batu papparéngngerang iya upatettongngéwé mancajiwi matu onrong assompang untu' Puwangnge.” Napatteruni joppana Yakub nalao ri wanuwa ri seddé alauna Kanaan. Tappa mitani séddi bujung ri padangngé, na ri seddéna mallekkui tellukkonrong bémbé bimbala iya abiyasannaé ripaénung kuwaro. Iyaro bujungngé tattongkoi batu loppo. Rékko maddeppungeng manenni bémbé'é kuwaro, nagalétténi sining pakkampié iyaro batué libenréng, nainappa ripaénung iyaro bémbé bimbala'é. Purairo natongkoni paimeng pakkampié iyaro bujungngé. Nanakkutana Yakub lao risining pakkampi iya engkaé kuwaro, “Eh sellao, polé kégaki?” Nappébali mennang, “Poléki ri Haran.” Makkutanasi Yakub, “Muwissegga Laban ana' Nahor?” Nappébali mennang, “Riisseng.” Nakkutana Yakub, “Pékkugi keadaanna?” Nappébali mennang, “Madisid-dising muwi. Itani, iyaro ana'na makkunraié iya riyasengngé Rahél. Poléi tiwii bémbé bimbala'na ambo'na.” Nakkeda Yakub, “Macakka mupa essoé nadé'pa narapii wettunna bémbé bimbala'é riputtama ri laleng wakkéé. Magi iyaro sining olokolo'é dé' naripaénung, nainappa muleppessang manré wella paimeng?” Nappébali mennang, “Iyapa naweddikki paénungngi iyaro sining bimbala'é rékko maddeppungeng manenni sininna bimbala'é kuwaé sibawa purani rigalétté batu pattongkona.” Ri wettu mabbicarana mupa Yakub sibawa mennang, poléni Rahél sibawa bémbé bimbala'na. Wettunna naita Yakub Rahél silaong olokolo'naro, laoni Yakub ri bujungngéro, nainappa nagalétté batu pattongkona libenréng sibawa napaénungngi iyaro olokolo'é. Nainappa nabau Rahél, sibawa teri nasaba masé'i. Adanna lao ri Rahél, “Iyya ana'naka Ribka, silessurenna ambo'mu.” Nanalarina Rahél lisu ri bolana untu' curitai gau'éro lao ri ambo'na. Wettunna Laban naéngkalinga karébaé passalenna Yakub, anaurénaro, larini untu' méwai sita. Nakaddaoni Laban Yakub sibawa bauwi, nainappa natiwi muttama ri lalempolana. Puranana nacurita sininna keadaanna lao ri Laban, makkedani Laban, “Mémeng tongeng, kaluwarga macawé mupo ri iyya.” Monroni Yakub ri bolaéro siuleng bujuru. Riséuwaé esso makkedani Laban lao ri Yakub, “Dé' nasipato'ko majjama ri iyya sibawa cuma-cuma, banna nasaba sumpulolokuko. Siyaga saro muwacinnai?” Naiyaro Laban mappunnaiwi duwa ana' makkunrai; iya macowaé riyasengngi Léa, na anrinna riyasengngi Rahél. Léa magello matanna, na Rahél makessingngi watakkaléna sibawa magello tappana. Yakub napojini Rahél, rimakkuwannanaro nappébali lao ri Laban, “Maéloka majjama pituttaung ittana rékko napalaloka Uwwa kawing sibawa Rahél.” Nakkeda Laban, “Lebbi kessing muwi uwérékko naiya lao ri tau laingngé; jaji onrono kuwaé.” Namajjamana Yakub pituttaung ittana untu' lolongengngi Rahél, na untu' aléna iyaro taut-taungngé labe'ni pada-pada siyagangngaré essona bawang, nasaba napojinna iyaro ana'daraé. Purairo makkedani Yakub lao ri Laban, “Labe'ni pituttaung; palalona kawing sibawa ana'na Uwwa.” Nanapakangkana Laban pésta akawingeng sibawa mobbii sininna tauwé ri kotaéro. Iyakiya iyaro wennié, tenniya Rahél, sangadinna Léa iya naantara'é Laban lao ri Yakub, nasilurenna Yakub sibawa aléna. ( Nabbéréyanni Laban atanna makkunraié iya riyasengngé Zilpa lao ri Léa, untu' mancaji atanna.) Pappa baja mani nainappa naisseng Yakub makkedaé Léa iya nakawingiyé. Nanalaona Yakub ri Laban sibawa makkeda, “Magi Uwwa nagaukekka makkuwaé? Dé'ga umajjama untu' lolongengngi Rahél? Magi nabelléka Uwwa?” Nappébali Laban, “Manuru ade'é kuwaé, dé' nawedding kawing anrié lebbi riyolo naiya kakaé. Tajenni narapi leppe pésta akawingeng pitungngessoé, uwéréng topo matti Rahél lao ri iko, assaleng maélo mupo majjama pituttaussi.” Nasitujuini Yakub, nalabe'nana iyaro péstaé, nabbéréyanni Laban lao ri aléna Rahél mancaji bainéna. ( Nabbéréyangngi Laban atanna makkunraié iya riyasengngé Bilha lao ri Rahél, untu' mancaji atanna.) Silureng toni Yakub sibawa Rahél, nalebbi napojiwi Rahél naiya Léa. Nainappa majjamasi pituttaung. Wettunna naita Puwangnge makkedaé dé' naripoji senna Léa pada-pada Rahél, napalaloni Puwangnge Léa jajiyang ana', iyakiya Rahél tette'i dé' nalolongeng ana'. Mattampu'ni Léa nanajajiyang séddi ana' worowané. Adanna, “ Puwangnge pura mitai asussakku, na makkekkuwangngé napojina matu lakkaikku.” Nanasenni iyaro ana'na Rubén. Mattampu'si Léa nanajajiyang séddi ana' worowané. Adanna Léa, “Purana nawéréssi Puwangnge iyaé ana'é nasaba naéngkalingai makkedaé dé' naripojika.” Nanasenni iyaro ana'na Siméon. Mattampu'si Léa nanajajiyang séddi ana' worowané. Adanna, “Makkekkuwangngé lebbi tassiyoni lakkaikku ri iyya nasaba purani ujajiyang tellu ana' worowané.” Nanasenni iyaro ana'na Léwi. Nainappa mattampu'si Léa nanajajiyang séddi ana' worowané. Adanna, “Iyaé sisengngé maéloka pojiwi Puwangnge.” Nanasenni iyaro ana'na Yéhuda. Purairo dé'na naémmana'na Léa. Iyakiya Rahél dé'pa nalolongeng ana'. Rimakkuwannanaro mangémpuruni lao ri kakana, nainappa makkeda lao ri Yakub, “Wérékka ana', rékko dé', matéka matu.” Macaini Yakub lao ri Rahél sibawa makkeda, “Tenniyaka Allataala. Aléna ritu mébbuko dé' mulolongeng ana'.” Nanakkeda Rahél, “Iyaé atakku Bilha; lusérenni kuwammengngi namémmana. Nanallalengiwi weddikka mancaji indo' naolai aléna.” Nanabbéréyanni Bilha lao ri lakkainna, na Yakub nalusérenni iyaro ataé. Mattampu'ni Bilha nanajajiyang séddi ana' worowané. Makkedani Rahél, “Purani mangadélé Allataala untu' apentingekku. Naéngkalingai sempajakku nanawérékka séddi ana' worowané.” Nanasenni iyaro ana'é Dan. Mattampu'si Bilha nanajajiyang séddi ana' worowané. Adanna Rahél, “Purana' mattonget-tongeng méwai kakaku, naupakala,” rimakkuwannanaro nasenni iyaro ana'é Naftali. Wettunna namaingeki Léa makkedaé dé'na naulléi lolongeng ana'na, nabbéréyanni atanna, iyanaritu Zilpa, lao ri Yakub untu' mancaji bainéna. Jajiyanni Zilpa séddi ana' worowané. Nakkeda Léa, “Maupe'na,” nanasenni iyaro ana'é Gad. Jajiyassi Zilpa séddi ana' worowané, nakkeda Léa, “Temmaka sennakku! Makkekkuwangngé sininna makkunraié makkedai matu masennakka.” Rimakkuwannanaro nasenni iyaro ana'é Asyer. Ri wettu éngngalang gandongngé, laoni Rubén ri padangngé nanaruntu'na kuwaro sinrupa tanet-taneng pabbura, nanatiwii lao ri Léa, indo'na. Makkedani Rahél lao ri Léa, “Wérékka céddé polé ri tanet-taneng pabbura iya naruntu'é ana'muro.” Nappébali Léa, “Dé'paga nagenne muwala lakkaikku? Makkekkuwangngé mala mucobasi malai tanet-taneng pabbura iya naruntu'é ana'ku.” Nakkeda Rahél, “Rékko maéloko mabbéréyangngi tanet-taneng pabburana ana'muro lao ri iyya, weddikko matinro sibawa Yakub iya wenniéwé.” Wettunna Yakub lisu ri bolaé polé ri padangngé iyaro arawéngngé, riduppaini ri Léa sibawa makkeda, “Atinrono sibawa iyya iyaé wennié nasaba purani uwaja untu' iyaro sibawa tanet-taneng pabbura polé ri ana'ku.” Nanalusérenni Yakub iyaro wennié. Natarimai Allataala sempajanna Léa, namattampu nanajajiyang ana' iya malimaé. Nakkeda Léa, “Allataala pura mpérékka saro saba' purani uwabbéréyang Zilpa lao ri lakkaikku,” rimakkuwannanaro nasenni iyaro ana'é Isakhar. Mattampu'si Léa nanajajiyangngi ana'na iya maennengngé. Adanna, “Nawérénna' Allataala hadiya iya makessing senna'é. Makkekkuwangngé napakalebbina' matu lakkaikku, saba' purani ujajiyang enneng ana' worowané,” rimakkuwannanaro nasenni iyaro ana'é Zébulon. Purairo jajiyanni Léa séddi ana' makkunrai iya nasengngé Dina. Nariyéngngeranna Rahél ri Allataala; natarimai Allataala sempajanna nanapakkulléi jajiyang ana'. Namattampu'na Rahél nanajajiyang séddi ana' worowané. Nakkeda Rahél, “Napatteddénnni Allataala atunakku. Tennapodo Puwangnge mpérékka ana' worowané séddipa.” Rimakkuwannanaro nasenni iyaro ana'é Yusuf. Puranana Rahél najajiyang Yusuf, makkedani Yakub lao ri Laban, “Palalona lisu ri wanuwakku. Leppessanna lao tiwii iya duwa bainéku sibawa ana'-ana'ku. Ulolongengngi mennang sibawa majjama ri Uwwa. Naisseng Uwwa, purana majjama marejjing senna.” Nakkeda Laban lao ri aléna, “Engkalingai riyolo: Lolongekka pirasa' makkedaé nabarakkakika Puwangnge nasaba iko. Pau bawanni siyaga muwéllau.” Nappébali Yakub, “Aléta Uwwa missengngi purana majjama marejjing senna, natattamba maéga senna olokolo'na Uwwa nasaba pappiyaraku. Ri wettu dé'napa uwengka, waramparang appunnangenna Uwwa dé'pa nasiyaga, iyakiya makkekkuwangngé sugini Uwwa. Puwangnge barakkakiwi Uwwa nasaba iyya. Makkekkuwangngé wettunnana majjamaka untu' kaluwargaku muto.” Nakkeda Laban, “Jaji aga harusu uwérékko?” Nappébali Yakub, “Aja'na Uwwa tabbéréyang aga-aga. Tette'ka maélo piyarai olokolo'na Uwwa, assaleng nasitujuiwi Uwwa tangngakué: Palaloka iya essoéwé joppa ri tengnga-tengngana sining bémbé bimbala'na Uwwa, sibawa malai tungke' ana' bimbala iya mabolongngé, sibawato tungke' bémbé lolo iya bellangngé iyaré'ga betti-betti'é. Iyaro bawang saro uwacinnai. Magampannitu matu naisseng Uwwa rimunri malempuka'ga. Rékko poléi Uwwa untu' paréssai saroku, sibawa mitai engka bémbé iya dé'é nabbetti-betti iyaré'ga bellang, iyaré'ga bimbala iya dé'é namabolong, naissennitu Uwwa makkedaé uwénnauwi iyaro olokolo'é.” Nappébali Laban, “Situju! Tapogau'ni aga iya muwappétangngarengngéro!” Iyakiya iyaro essoé napassaranni Laban sininna bémbé lai iya mabbaloé iyaré'ga bellangngé sibawa sininna bémbé komba iya bellangngé, betti-betti'é, iyaré'ga iya engkaé puté-puténa; napassarang towi sininna bimbala iya mabolongngé. Nainappa nasuro ana'-ana'na parakaiwi iyaro olokolo'é, nanalaona mennang sibawa sining iyaro olokolo'é mabélaiwi Yakub, bélana tellungngesso allalengeng. Lebbinna polé ri bémbé bimbala appunnangenna Laban napiyarani Yakub. Nanalana Yakub takké-takké iya manyilaé polé ri aju hawar-é, aju badangngé sibawa aju bérangngé, nanalopéi saisa olina angkanna mancaji bellab-bellang. Napaléssoni iyaro takké-takké ri yolona sining bémbé'éro, ri laleng onrong énungenna, nasaba iyaro sining olokolo'é napoji mallai wettunna maélo ménung. Jaji rékko iyaro sining bémbé'é mallaiwi ri yolona takké-takkéro, mabbaloi ana'na iyaré'ga bellangngi iyaré'ga mabbetti-betti'i. Nainappa mala Yakub bimbala nanapangoloi risining bémbé iya mabbaloé sibawa mabolongngé. Nasibawang caraéro nalolongengngi olokolo'na aléna sibawa napassarangngi polé ri olokolo'na Laban. Rékko sining olokolo iya mawatangngé mattengngangngi mallai, napalénne'i Yakub takké-takké iya nalopééro ri yolona mennang, ri laleng onrong énungenna. Iyakiya iyaro takké-takké dé' napalénne'i ri yolona olokolo iya malemmaé. Jaji, sininna olokolo iya maputéro malemmai, na iyanaro appunnangenna Laban, nasininna olokolo iya mabolongngé, bellang sibawa mabbetti-betti'éro mawatangngi, na iyanaro appunnangenna Yakub. Nanallalengiro nasugi senna'na Yakub. Mappunnaiwi maéga bémbé bimbala, unta, kaleddé sibawa ata-ata. Naéngkalingani Yakub makkeda makkuwaiyé ana'-ana'na Laban, “Nalani Yakub sininna waramparang appunnangenna ambo'ta. Sininna asugirenna assalenna poléi ri asugirenna ambo'ta.” Naita towi Yakub makkedaé dé'na namabessa Laban pada-pada riyolo lao ri aléna. Nanakkeda Puwangnge lao ri Yakub, “Lisuno ri wanuwanna ambo'mu sibawa siyajimmu. Maélo-Ka linrungiko.” Purairo nasuroni Yakub tauwé powadangngi Rahél sibawa Léa kuwammengngi nasiruntu aléna ri padangngé, ri onronna bémbé bimbala'na. Nainappa makkeda Yakub lao ri mennang, “Uwitani makkedaé dé'na namabessa ambo'mu pada-pada biyasaé lao ri iyya, iyakiya Allataala iya nasompaé ambo'ku linrungika. Muwisseng toni sipadduwa makkedaé purana majjama ri ambo'mu sibawa maggangka ulléku. Namuni makkuwaro purana nabengnguwang sibawa napinrai saroku narapi wékkaseppulo. Iyakiya Allataala dé' naleppessangngi pogau'i majaé lao ri iyya. Wettunna ambo'mu makkeda, ‘Bémbé iya mabbetti-betti'é mancajiwi matu saromu,’ nasininna olokolo'é jajiyangngi ana' iya mabbetti-betti'é. Wettunna makkeda, ‘Bémbé iya bellangngé mancajiwi matu saromu,’ nasininna olokolo'éro jajiyangngi ana' iya bellangngé. Makkuwaniro Allataala pura malai olokolo appunnangenna ambo'mu, nainappa nawérékka. Na ri wettu allaingenna sining olokolo'éro, mannippika uwitai sininna bémbé laié iya mallaiyé, mabbaloi, mabbetti-betti sibawa bellang. Na Allataala sibawa rupa malaéka mabbicara ri iyya ri laleng nippiéro, adanna, ‘Yakub!’ Mappébalina, ‘Iyyé.’ Makkedasi iyaro malaéka'é, ‘Itai, sininna bémbé lai iya mattengngangngé mallairo baloi, mabbetti-betti sibawa bellang. Uwattungka matorokekko nasaba purani uwita sininna iya napogau'é Laban lao ri iko. Iyya'na Allataala iya puraé mappaitang alé ri iko ri Bétel. Kuwaro purako makkasuwiyangeng séddi batu papparéngngerang, sibawa tiri minnya zaitun ri tompo'na. Kuwatonoro pura mattanro lao ri Iyya. Makkekkuwangngé sadiyano sibawa lisuno ri wanuwa ancajingemmu.’ ” Nanappébali Léa sibawa Rahél, “Dé'na gaga tawata polé ri asugirenna ambo'ta iya rimanaé matu. Naangga'mi idi'é selaku tau laing. Purani' nabalu na aga iya puraé natarima untu' iyaro, pura toni napaccappu. Sininna asugireng iya puraé nala Allataala polé ri ambo'ta sitongenna appunnangetta sibawa appunnangenna ana'-ana'ta. Pogau'ni aga iya napparéntangngé Allataala lao ri iko.” Iyaro wettué engkai Laban ri padangngé mattengngang goncingngi bulu-bulunna bimbala'na, na iyaro wettué naénnauwi Rahél dato'-dato' pallinrung kaluwarga appunnangenna ambo'na. Nakkalengini Yakub Laban sibawa dé' napaissengiwi joppanna. Nalai sininna waramparang appunnangenna nalao mapperi-peri. Nalléttoini Salo Efrat nainappa mattuju ri daéra buluna Giléad. Tellungngesso mani rimunrinna nainappa ripaissengi Laban makkedaé larini Yakub. Nanapaddeppungenni Laban sining taunna nasibawana mennang lellungngi Yakub pitungngesso ittana angkanna narapi ri daéra buluna Giléad. Ri wenninnana poléni Allataala ri Laban ri laleng nippi, sibawa makkeda, “Jagako, aja' sises-siseng muwancangngi Yakub namuni silappa ada.” Iyaro wettué purani napasang kémana Yakub ri tompo'na séddié bulu-bulu. Nainappa riséddié bulu-bulu iya laingngé ri daéra éttoro Laban sibawa sining taunna pasangngi kémana. Purairo makkedani Laban lao ri Yakub, “Magi muwakkalengika sibawa mulariyangngi ana'-ana'ku, samanna mennang tawangeng musu? Magi muwakkalengika enrengngé lao sibawa mammekko-mekko, temmassimang? Ebara'na massimakko, pasti uleppessakko lao sibawa masennang nasibawang élokkélong rabana sibawa kacapi! Mala dé' muwérékka kasempatang untu' bauwi ana' eppoku selaku assarangeng. Madonggo senna tindakammu! Cuku' awatangekku untu' péjariko, iyakiya onna wennié Allataala iya nasompaé ambo'mu paréngngerangika kuwammengngi dé' sises-siseng uwancakko. Uwisseng makkedaé joppako nasaba macinna senna'ko lisu. Iyakiya magi muwénnauwi dato'-dato' pallinrung kaluwargaku?” Nappébali Yakub, “Laoka sibawa mammekko-mekko nasaba métauka natahangngi matu Uwwa ana'-ana'na Uwwa. Passalenna iyaro dato'-dato'é, rékko naruntu'i Uwwa engka tau kuwaé ménnauwi, rihukkung matéi matu. Paréssani, engkaga barab-barang appunnangenna Uwwa kuwaé. Rékko engka, talani. Nasining tautta weddingngi nasabbing.” Dé' naissengngi Yakub makkedaé Rahél ritu ménnauwi iyaro dato'-dato'é. Nanalaona Laban ri kémana Yakub sibawa galédai; purairo laoni ri kémana Léa sibawa kémana iya duwa ata makkunraiéro, iyakiya iyaro dato'-dato'é dé' nalolongengngi. Angkanna muttama ri laleng kémana Rahél. Na iyaro wettué purani nala Rahél iyaro dato'-dato'é nanaputtama'i ri laleng kantonna lapi-lapi untaé, na aléna tudangiwi ri yasé'na iyaro lapi-lapi'é. Nagalédani Laban sininna kémana Rahél, iyakiya dé' nalolongengngi iyaro dato'-dato'é. Nainappa makkeda Rahél lao ri ambo'na, “Aja' tamacai Ambo, dé' uwulléi tettong duppaiwi Ambo, saba' maddaraka.” Nasappani Laban madécéd-décéng, iyakiya dé' naruntu'i iyaro dato'-dato'é. Namacaina Yakub, “Ja aga pura upogau'?” pakkutanana macai. “Aga asalakku angkanna talellukka Uwwa? Makkekkuwangngé, puranana rigaléda sininna barakku, nalolongegga Uwwa barang appunnangenna Uwwa? Passuni iyaro barangngé sibawa palénne'i kuwaé, kuwammengngi nasining taukku sibawa sining taunna Uwwa weddingngi naita sibawa pettuiwi niga ri yelle'ta tongeng. Duwappuloni taunna monroka ri Uwwa. Bimbala sibawa bémbé makkonronna Uwwa mabbija-bijani, nadé'pa naengka uwanré muwi sikaju bémbé lai polé ri olokolo'na Uwwa. Iya maté naanré olokolo masekkang dé' naengka utiwii lao ri Uwwa, iyakiya aléku muto sulléiwi. Iya riyénnauwé ri essoé iyaré'ga ri wennié tuli natuntu'i Uwwa kuwammengngi na iyya sulléiwi. Biyasaka nangureng pella ri essoé sibawa mékké nataro keccé ri wennié. Sibawa biyasa tokka dé' nawedding matinro. Makkuwaniro keadaakku wettukku majjama ri Uwwa duwappulo taung bujuru. Seppulo eppa taung ittana majjamaka untu' lolongengngi iya duwaro ana'na Uwwa – sibawa enneng taussi untu' lolongengngi iyaro bémbé bimbala'é. Na ri laleng wettuéro napinrai Uwwa saroku narapi wékkaseppulo. Akkalarapanna dé' nalinrungika Allataalana toriyoloku, iyanaritu Allataala iya nasompaé Abraham sibawa Ishak, pasti purana nasuro Uwwa meddé sibawa lima iya kosongngé. Iyakiya Allataala pura pénessaiwi asussakku sibawa jama-jamang iya puraé upogau', na onna wennié purani nabbéréyang apettun-Na.” Nainappa Laban baliwi Yakub, “Iya duwa makkunraiéro ana'ku, ana'na mennang iyanaritu appunnangekku, sibawa iyaro bimbala'é appunnangekkuto. Sitongenna, sininna iya muwitaé kuwaé iyya ritu punna. Iyakiya dé'gaga uwullé pogau' untu' tahangngi ana' eppoku. Rimakkuwannanaro laono mai taébbu assijancing sibawa susung batu-batu selaku tanrang assijancingngéro.” Nainappa Yakub mala séddi batu nanapatettongngi mancaji batu papparéngngerang. Nainappa nasuro sining taunna mappaddeppungeng batu nanapaggoppoi. Purairo sisamani manré ri seddéna goppo batuéro. Nasenni Laban iyaro goppo batué Yégar-Sahaduta, na Yakub masengngi Galéd. Adanna Laban lao ri Yakub, “Iyaé goppo batué mancajiwi matu papparéngngerang lao ri idi sipadduwa.” Iyanaro saba'na nariyaseng iyaro onrongngé Galéd. Makkeda towi Laban, “Tennapodo Puwangnge jagaiki ri wettu tuwota sibélang.” Rimakkuwannanaro iyaro onrongngé riyaseng towi Mizpa. Makkedasi Laban, “Rékko kédo majako lao ri ana'-ana'ku, iyaré'ga kawingiwi sining makkunrai laingngé, namuni dé'gaga missengngi, éngngerangngi, Allataala jagaiki. Iyanaé batu-batu iya puraé ugoppo, na iyanaé batu papparéngngerang. Muwi iyaé goppoé, muwi iyaro batu papparéngngerangngé naparéngngerangiki makkedaé dé' nawedding uliweng iyaé goppoé untu' musuko, na iko dé'to nawedding liwengngi iyaé goppoé sibawa batu papparéngngerangngéwé untu' musuka. Allataala iya nasompaé Abraham sibawa iya nasompaé ambo'ku Nahor maélo mancaji haking ri yelle'ta.” Nainappa Yakub mattanro nasabbing Allataala iya nasompaé Ishak, ambo'na, untu' rupaiwi jancinna. Géréni sikaju olokolo na nakkasuwiyangengngi ri yasé'na bulu-buluéro. Nainappa naundang sining taunna untu' sisama manré. Puranana manré, mabbennini ri bulu-buluéro. Pappa bajanana éléé, nabauni Laban ana' eppona selaku tanrang assarangeng sibawa barakkakiwi mennang, nainappa lisu ri onrong naonroiyé. Napatteruni joppana Yakub. Nasiyagangngaré malaéka polé méwai sita. Wettunna Yakub mitai mennang, makkedani, “Iyaé akkémanna Allataala,” rimakkuwannanaro nasenni iyaro onrongngé Mahanaim. Purairo nasuroni Yakub siyagangngaré surona labe' liyolo ri wanuwa Edom untu' méwai sita Esau, kakana. Makkedai Yakub lao ri mennang, “Powadanni kakaku Esau, makkuwaé, ‘Iyya Yakub, atammu. Iya pura labe'é monroka ri Laban. Makkekkuwangngé mappunnaika saping, kaleddé, bimbala, bémbé sibawa ata-ata. Kirikka biritta lao ri puwakku, nasibawang paddennuwang masennangngi matu puwakku.’ ” Wettunna sining suroé lisusi ri Yakub, makkedani mennang, “Poléni ri Esau, kakana Bapa' na makkekkuwangngé engkani ri laleng allalengengngé lao mai untu' méwai sita Bapa'. Poléi sibawa eppadatu tau.” Naéngkalinganaro métau senna'ni Yakub sibawa manenneng. Nainappa sining tau iya engkaé sibawangngi nabagéni mancaji duwa kalompo, makkuwatoro bimbala'na, bémbé'na, sapinna sibawa untana. Pikkiri'na, “Rékko poléi Esau nanaluruiwi kalompo iya mammulangngé, kalompo maduwaé weddingngi passalama'i aléna.” Nainappa massempajang Yakub, “Oh Allataala, iya nasompaé nénéku Abraham, sibawa ambo'ku Ishak, éngkalingaka! Puraka tasuro lisu Puwang ri wanuwakku sibawa sumpuloloku. Na Puwangnge pura majjanci maélo matoro manengngi sibawa makessing untu' iyya. Dé' usitinaja tarimai sininna pammasé sibawa atinulureng iya puraé nappaitang Puwangnge lao ri iyya. Wettukku joppa malléttoiwi Salo Yordan, dé' aga-aga utiwi rilainnaé tekkeng. Makkekkuwangngé engkana polé paimeng sibawa duwa kalompo'éwé. Uwéllauwi sibawa masero, passalama'ka polé ri kakaku Esau. Métauka ajakké poléi luruika sibawa paccappu manekki, makkuwatoro makkunraié sibawa ana'-ana'é. Engngerangngi makkedaé purai Puwangnge majjanci maélo matoro'i sininna séuwa-séuwaé sibawa makessing untu' iyya sibawa mpérékka maéga wija-wija. Dé' muwi séddi tau mulléi bilangngi nasaba égana pada-padai kessi'é ri wiring tasi'é.” Nabagé-bagéni iyaro olokolo'é mancaji siyagangngaré konronna nainappa tungke'-tungke' nabbéréyang lao riséddi atanna. Adanna lao ri mennang, “Joppano poddiyoloika, sibawa jagaiwi kuwammengngi engka pallawangenna kalompo iya séddié sibawa kalompo iya rappinaé.” Napparéntanni Yakub lao ri ata iya mammulangngé, “Rékko siruntu'ko kakaku Esau, namakkutana, ‘Niga puwammu? Maéloko lao kéga? Niga punna iyaro sining olokolo iya murimpaé?’ Baliwi, ‘Appunnangenna atammu Yakub. Nakiringngi iyaé selaku pakkasuwiyang lao ri Esau, puwanna. Aléna atammu Yakub maccinrola ri munritta.’ ” Jaji nakirinni lebbi riyolo pakkasuwiyangngéro, na aléna mabbenniwi ri akkémangngé. Iyatoro wennié naoto Yakub nanatiwii iya duwa bainéna, iya duwa gundi'na sibawa iya seppulo séddi ana'na, malléttoiwi Salo Yabok. Puranana napallétto mennang, lisuni nanakiringngi sininna appunnangenna mallétto. Iyakiya monroi alé-aléna. Nanapoléna séddi worowané mallaga sibawa Yakub narapi subu. Wettunna iyaro tauwé marasa makkedaé dé' namakkullé pacau ri laleng allagangngéro, naunruni Yakub ri poncinna, angkanna léssé padduppang buku poppanna. Nanakkeda iyaro tauwé, “Leppessakka; dé'na namaitta naompo essoé.” Nappébali Yakub, “Dé' umaélo malleppessangngi Bapa', sangadinna rékko nabarakkakika Bapa'.” Nakkutana iyaro tauwé, “Niga asemmu?” Nappébali, “Yakub.” Nakkeda iyaro tauwé, “Tenniyana Yakub asemmu. Purano mallaga sibawa Allataala sibawa tolinoé, namupacau; rimakkuwannanaro asemmu mancajiwi Israél.” Nakkeda Yakub, “Powadani asenna Bapa'.” Iyakiya mappébaliwi iyaro tauwé, “Dé' naparelluko makkutana niga asekku!” Nainappa nabarakkaki Yakub. Nainappa makkeda Yakub, “Purana siduppa tappa Allataala, nautuwo mupa.” Rimakkuwannanaro nasenni iyaro onrongngé Pniél. Wettunna mompo essoé, nasalaini Yakub Pniél, naképpanna nasaba lésséi padduppang buku poppanna. Lettu makkekkuwangngé wija-wijanna Israélié dé' naanréi juku iya tongkoéngngi padduppang buku poppanna olokolo'é, nasaba purai nakenna Yakub pakkunru ri poncinna. Naitani Yakub Esau polé sibawa eppa datu taunna. Rimakkuwannanaro nabagéni ana'-ana'na ri Léa, Rahél sibawa iya duwa gundi'na. Nataroni iya duwa gundi'na silaong ana'-ana'na mennang ri yolo, nainappa Léa silaong ana'-ana'na, nainappa Rahél sibawa Yusuf ri munri senna. Joppani Yakub ri munrinna maneng mennang, nanaddeppériwi kakana, nanasuju' narapi wékkapitu. Iyakiya lariwi Esau duppaiwi Yakub, nainappa nakaddao sibawa bauwi. Nasiteri-terinna iya duwa tauwéro. Wettunna naita Esau sininna iyaro makkunraié sibawa ana'-ana'é, makkutanani, “Niga mennang iya engkaé sibawakkoé?” Nappébali Yakub, “Ana'-ana'ku mennang, Allataala pura mabbéréyangngi iyaro ana'-ana'é lao ri iyya.” Purairo malluruni sining gundi'é sibawa ana'-ana'na mennang, nainappa suju'. Nainappa poléni Léa sibawa ana'-ana'na, na iya paccappurengngé maddeppé iyanaritu Yusuf sibawa Rahél nainappa suju' maneng mennang. Nakkutana Esau, “Aga akkattamu sibawa kalompo-kalompo iya uwéwaé siruntu dénré?” Nappébali Yakub, “Untu' pésennangiwi atinna Kaka.” Iyakiya makkedai Esau, “Genne'ni waramparakku, dé' naparelluna muwérékka hadiya.” Nakkeda Yakub, “Aja'! Rékko purana' pésennangiwi atinna Kaka, tarimani pakkasuwiyakkué. Untu' aléku, rékko uwitai rupanna Kaka, padani rékko uwitai rupanna Allataala, nasaba makkumani bessana Kaka lao ri iyya. Uwéllauwi, tarimani pakkasuwiyang iya utiwiéwé. Allataala pura mamaséika sibawa mabbéréyangngi sini-sininnaé iya uwapparelluwangngé.” Matteruni Yakub maddessa angkanna natarima Esau iyaro pabbéréna. Nainappa makkeda Esau, “Laono mai tasadiya-sadiya untu' joppa, maéloka joppa poddiyoloiko.” Nappébali Yakub, “Naisseng Kaka makkedaé iyaé ana'-ana'é malemmai, na iyya harusu'ka matutu lao ri sininna olokolo iya mappasusué. Rékko ririmpai mapperi-peri, namuni banna siesso bawang, matéi matu iyaro sininna olokolo'é. Joppano lebbi riyolo, maccinrolapa sibawa madoddo. Uwakkulléyappi matu joppa masitta sibawa olokolo'ku enrengngé ana'-ana'kué angkanna udapii Kaka ri Edom.” Nakkeda Esau, “Rékko makkuwaitu, makessinni utarongekko siyagangngaré ana' buwaku.” Iyakiya mappébaliwi Yakub, “Aja'na, mumassussa-sussa, maéloma bawang sennangiwi atinna Kaka.” Makkuwaniro iyaro essoé joppani Esau lisu ri Edom. Iyakiya Yakub laowi ri Sukot, nainappa patettong bola untu' aléna sibawa onrong accinaungeng untu' olokolo'na. Iyanaro saba'na nariyaseng iyaro onrongngé Sukot. Ri laleng allalengengngé polé ri Mésopotamia, lettu'ni Yakub sibawa salama ri kota Sikhem ri tana Kanaan, nainappa napatettong kémana riséddié padang ri seddéna kotaé. Iyaro padang onrong akkémanna naelliwi polé ri tau wija-wijanna Hémor, ambo'na Sikhem, ellinna sératu dowi péra'. Nainappa patettong mézba kuwaro sibawa masengngi “El, Allataala Israélié”. Riséuwaé esso, Dina ana' makkunrainna Yakub sibawa Léa, nalokkaiwi siyagangngaré makkunrai Kanaangngé. Wettunna Sikhem, ana'na Hémor tau Héwi iya mancaji arungngé ri wanuwaéro naita Dina, nalariyanni iyaro ana'daraé, nainappa napéjari. Iyakiya tattaré' senna'i ri Dina, angkanna napojiwi sibawa makkuraga towi kuwammengngi iyaro ana'daraé poji towi. Nakkeda Sikhem lao ri ambo'na, “Uwéllauwi ambo' makkuraga lolongengngi iyaro ana'daraé untu' iyya. Macinnaka pubainéwi.” Naéngkalingani Yakub makkedaé purai ripéjari ana'na, iyakiya nasaba ana'-ana'na engkai ri padangngé monrowangngi olokolo'na, dé' naulléi tinda' ri wettu dé'napa nalisu mennang. Hémor, ambo'na Sikhem, laoni ri Yakub maélo barunding sibawa aléna. Nasitujuwangngi iyaro wettué nalisu ana'-ana'na Yakub polé ri padangngé. Naéngkalingana iyaro kajajiyangngé, tassélenni sibawa macai senna. Saba' ri laleng napéjarinna ana'na Yakubro, napakatunai Sikhem sininna tau Israélié. Nakkeda Hémor lao ri Yakub, “Ana'ku Sikhem napojiwi ana'na Saudara; uwéllauwi kuwammengngi Saudara napalaloi ana'ku kawing sibawa aléna. Laono mai taébbu assijancing makkedaé bangsana Saudara sibawa bangsata kawing sicampuru'i. Naweddingngi Saudara-saudara monro silaong idi ri wanuwaéwé; kéga napoji Saudara. Weddingngi Saudara-saudara laluwasa dangkang sibawa mappunnangi waramparang.” Nainappa Sikhem makkeda lao ri ambo'na Dina enrengngé sining kakana, “Rupaini paréllaukkué, nauwérékko agi-agi iya muwéloriyé. Powadani hadiya aga iya muwacinnaiyé, sibawa pattentuni lise' kawinna. Uwérékko matu aga iya muwéllauwé, assaleng mupalalo muka pubainéwi iyaro ana'daraé.” Nasaba purani Sikhem napéjari anrinna mennang iyanaritu Dina, mabbelléni ana'-ana'na Yakub lao ri Sikhem sibawa Hémor ambo'na. Adanna mennang lao ri iya duwa tauwéro, “Masiriki palaloi anritta kawing sibawa tau iya dé'é narisunna. Banna weddikki situjuiwi paréllaummuro sibawa séddi sara', iyanaritu: Harusu'ko pada-pada idi, bettuwanna sininna worowané ri yelle'mu harusu'i risunna. Purapiro narisitujui matu tangngamu passalenna kawing sicampuru'éro. Maéloki tette ri tengnga-tengngamu sibawa mancaji séddi bangsa sibawa iko. Iyakiya rékko dé' mumaélo tarimai sara'-sara'ta, sibawa dé' mumaélo risunna, maéloki malai paimeng iyaro ana'daraé sibawa meddé.” Napérasani Hémor sibawa Sikhem sitinaja iyaro sara'-sara'é, sibawa sadiyana Sikhem masitta rupaiwi iyaro sara'-sara'é nasaba napojiwi Dina. Ri yelle'na sininna sumpulolona, Sikhem ritu kaminang mappangaru. Nanalaona Hémor sibawa Sikhem ri onrong addeppu-deppungengngé ri pintu gerbanna kotaé, sibawa mabbicara lao ri pabbanuwana kotana mennang, makkuwaé, “Iyaro sining tau Israélié sellaota. Jaji leppessanni mennang monro ri wanuwaéwé sibawa idi enrengngé laluwasa lao kéga mennang napoji. Iyaé wanuwaé cuku' lowannato untu' mennang. Weddikki kawing sibawa ana'-ana'darana mennang, enrengngé wedding towi mennang kawing sibawa ana'-ana'darata. Iyakiya iyaro sining tauwé iyapa namaélo monro sibawa idi enrengngé masséddi bangsa sibawa idi nasibawang séddi sara', iyanaritu: sininna worowané ri yelle'ta harusu'i risunna pada-pada mennang. Sininna matti olokolo'na mennang enrengngé sininna waramparanna mennang mancajiwi appunnangetta. Jaji laono mai tasitujuiwi paréllaunna mennang kuwammengngi naonro mennang sibawa idi.” Sininna pabbanuwana kotaé iya maddeppungengngéro nasitujuiwi tangngana Hémor sibawa Sikhem, nainappa sininna worowané battowaé ri kotaéro risunna'ni. Tellungngesso rimunrinna, wettunna mapeddi mupi iyaro sining worowané nasaba risunna'i, duwa ana'na Yakub, iyanaritu kakana Dina iya riyasengngé Siméon sibawa Léwi, malai peddanna mennang, nainappa mammekko-mekko muttama ri laleng kotaé. Nainappa nauno maneng sininna tau worowané iya engkaé kuwaro, muttama toni Hémor sibawa Sikhem. Nainappa nala Dina polé ri bolana Sikhem nalao. Puranana abbunowangngéro, ana'-ana'na Yakub iya laingngé rampo'i iyaro kotaé selaku pamale'na nasaba purai napakasiri anrinna. Nalai mennang bémbé bimbala'é, sapingngé, kaleddé'é sibawa sininna iya engkaé ri kotaé sibawa ri padangngé. Nala manengngi mennang sininna waramparang iya mangke'é, tawang manengngi sininna makkunraié sibawa ana'-ana'é, enrengngé rampasa'i sininna lise' bolaé ri kotaéro. Nakkeda Yakub lao ri Siméon sibawa Léwi, “Musussaika iko. Makkekkuwangngé tau Kanaangngé sibawa tau Féris-é enrengngé sininna pabbanuwana wanuwaéwé nabencika matu. Tautta idi dé' namaéga; rékko masséddi manengngi pabbanuwaéro méwa sibawa luruika, napaccappui matu sininna kaluwargata.” Iyakiya mappébaliwi mennang, “Dé' taulléi leppessangngi anritta rigaukeng selaku cakkuribang.” Riséuwaé esso makkedai Allataala lao ri Yakub, “Iyya'na Allataala iya mappaitangngé alé lao ri iko wettummu lari polé ri kakamu Esau. Laono masitta ri Bétel. Onrono kuwaro sibawa patettongek-Ka séddi mézba.” Nanabbéréyanni mennang lao ri Yakub sininna dato'-dato' déwata laingngé iya engkaé ri mennang sibawato anting-ngantinna mennang. Sininna iyaro barangngé nalemme'i Yakub ri yawana aju battowaé ri seddéna kota Sikhem. Wettunna Yakub sibawa rombongang kaluwargana joppa, Allataala salipuriwi pabbanuwana kota-kotaé ri seddéna sibawa pappénedding métau, angkanna mennang dé' nalellungngi Yakub sibawa rombonganna. Nalettu'na mennang ri tana Kanaan ri kota Bétel iya riyasengngé riyolo Lus. Kuwaniro Yakub patettong mézba sibawa masengngi iyaro onrongngé “El-Bétel”, nasaba Allataala pura mappaitang alé lao ri aléna kuwaro wettunna lari polé ri kakana. Kuwatoniro Débora, indo' pasusunna Ribka, maté sibawa rikuburu ri yawana aju battowaé ri seddé yattanna kotaéro. Iyanaro saba'na iyaro ajué nariyaseng “Aju Teri”. Lisunnana Yakub polé ri Mésopotamia, nappaitassi aléna Allataala lao ri aléna sibawa barakkakiwi. Nakkeda Allataala lao ri aléna, “Dé'na nariyasekko matu Yakub, iyakiya Israél.” Makkuwaniro Allataala masengngi Israél. Nainappa makkedasi Allataala, “Iyya'na Allataala Iya Pommakuwasaé. Sitinajako makkéana' eppo iya maégaé! Namuwabbija-bijangngi matu bangsa-bangsaé sibawa mancaji ambo'na toriyolona sining arungngé. Wanuwa iya puraé Uwabbéréyang lao ri Abraham, sibawa Ishak, Uwérékko matu sibawa wija-wijammu.” Purairo nasalaini Allataala Yakub. Ri onronna Allataala mabbicara lao ri Yakub, napatettonni séddi batu papparéngngerang. Nainappa iyaro batué nakkasuwiyangeng lao ri Allataala ri laleng nabolona anggoro sibawa minnya zaitun ri yasé'na. Iyaro onrongngé nasenni “Bétel”. Purairo Yakub sibawa rombonganna nasalaini Bétel. Wettunna mabéla-béla mupi polé ri Efrata, narapini wettunna Rahél untu' mémmana. Iyakiya mawatangngi jaji ana'na. Wettunna peddi émmanakenna pédé maladde, makkedani bidangngé ri aléna, “Pakaloppoi atimmu, Rahél, worowané ana'mu.” Iyakiya nacawékini Rahél ajjalenna, sibawa wettunna maélo leppu nyawana, nasenni iyaro ana'é Bén-Oni iyakiya ambo'na masengngi Bényamin. Maténana Rahél, rikuburu'ni ri wiring lalengngé iya mattujué ri Efrata, iya riyasengngé makkekkuwangngé Bétléhém. Patettonni Yakub séddi batu papparéngngerang kuwaro, na lettu essoéwé kuburu'na Rahél ritanrangi mupi ri batuéro. Purairo napatteruni joppana Yakub, nainappa napasang kémana riséuwaé onrong laloé ri manara Eder. Wettunna mennang engka ri onrongngéro matinroi Rubén sibawa Bilha, gundi'na ambo'na. Naéngkalingani Yakub gau'éro, namacai senna'na. Mappunnaiwi Yakub seppulo duwa ana' worowané. Ana'-ana'na Léa iyanaritu Rubén (ana' macowana Yakub), Siméon, Léwi, Yéhuda, Isakhar sibawa Zébulon. Ana'-ana'na Rahél iyanaritu Yusuf sibawa Bényamin. Ana'-ana'na Bilha, atanna Rahél iyanaritu Dan sibawa Naftali. Ana'-ana'na Zilpa, atanna Léa iyanaritu Gad sibawa Asyer. Iyaro ana'-ana'é jajiwi ri Mésopotamia. Nalettu'na Yakub ri Ishak ambo'na, ri onrong naonroiyé ri Mamré seddéna Hébron. (Riyolo Abraham nénéna, monro towi kuwaro.) Iyanaé wija-wijanna Esau iya riyasengngétto Edom. Kawingngi Esau sibawa tellu makkunrai Kanaan, iyanaritu: Ada, ana' Elon tau Hét; Oholibama, ana' Ana sibawa eppona Zibéon tau Héwi; Basmat, ana' Ismaél sibawa anrinna Nébayot. Ada jajiyangngi Elifas, Basmat jajiyangngi Réhuél, sibawa Oholibama jajiyangngi Yéus, Yaélam sibawa Korah. Sininna ana'éro jajiwi ri wanuwa Kanaan. Nainappa Esau nasalai Yakub nalao ri wanuwa laingngé tiwii sininna bainéna, ana'na sibawa sininna tau iya engkaé ri bolana, silaong sininna olokolo'na enrengngé waramparanna iya nalolongengngé ri Kanaan. Massarangngi Esau polé ri Yakub nasaba maéga senna waramparanna mennang angkanna dé' naulléi mennang sionrong. Nappani paimeng wanuwa iya naonroiyé mennang dé' nagenne untu' akkinanréng olokolo'na mennang iya maéga senna'éro. Na Esau iya riyasengngétto Edom, mattette'i ri daéra buluna Séir. Iyanaé wija-wijanna Esau, néné-nénéna tau Edongngé. Bainéna Esau iya riyasengngé Oholibama, iyanaritu ana'na Ana sibawa eppona Zibéon, jajiyangngi tellu ana' worowané, iyanaritu: Yéus, Yaélam sibawa Korah. Iyanaé kapalana suku-suku wija-wijanna Esau: Elifas, ana' macowana Esau, iyanaritu toriyolona suku-suku mangoloéwé: Téman, Omar, Zéfo, Kénas, Korah, Gaétam sibawa Amalé'. Iya maneng mennang wija-wijanna Ada, bainéna Esau. Réhuél, ana'na Esau, iyanaritu toriyolona suku-suku mangoloéwé: Nahat, Zérah, Syama sibawa Miza. Iya manenna mennang wija-wijanna Basmat, bainéna Esau. Suku-suku mangoloéwé iyanaritu wija-wijanna Esau polé ri bainéna iya riyasengngé Oholibama ana'na Ana, iyanaritu: Yéus, Yaélam sibawa Korah. Iya manenna sukuéro wija-wijanna Esau. Lotan iyanaritu toriyolona appanna Hori sibawa Héman. (Lotan mappunnaiwi ana'dara, iyanaritu Timna.) Syobal iyanaritu toriyolona appang: Alwan, Manahat, Ebal, Syéfo sibawa Onam. Zibéon mappunnaiwi duwa ana' worowané, iyanaritu Aya sibawa Ana. (Ana iyanaé iya lolongengngéngngi mata-mata uwai pellaé ri padang kessi'é, wettunna nampi kaleddé-kaleddé'na ambo'na.) Ezer toriyolona appang: Bilhan, Zaawan, sibawa Akan. Disyan toriyolona appang: Us sibawa Aran. Mattette'ni Yakub ri wanuwa Kanaan, onrong naonroiyé ambo'na, naiyanaé riwaya'na kaluwargana Yakub: Wettunna Yusuf, ana' Yakub makkéumuru seppulo pitu taung, naurusu'ni bémbé bimbala makkonrongngé silaong sining kakana, iyanaritu ana'-ana'na Bilha sibawa Zilpa, iya duwa gundi'na ambo'na. Nalaporo'ni lao ri ambo'na sining pangkaukeng maja iya napogau'é sining kakana. Yakub lebbi napojiwi Yusuf naiya sininna ana'na iya laingngé, nasaba Yusuf rijajiyangngi wettunna ambo'na macowani. Riséuwaé esso naébbuni untu' Yusuf séddi jumba iya magello senna'é. Naitanana sining kakana Yusuf makkedaé ambo'na mennang lebbi napojiwi Yusuf naiya mennang, nabencini mennang Yusuf, angkanna dé'na namaélo mabbicara sibawa makessing lao ri aléna. Riséuwaé wenni mannippiwi Yusuf, na wettunna nacurita iyaro nippinna lao risining kakana, pédé tattambani abencingenna mennang lao ri aléna. Iyanaé napowada Yusuf lao ri mennang, “Coba méngkalingai! Mannippika engka manekki ri dare'é mabbessé gandong, nanatettong gandokku. Wessé-wessé gandommu mattulilingiwi wessé gandokku nainappa suju' ri aléna.” Nakkeda sining kakana, “Muwasengngi mancaji arukko matu sibawa mukuwasaiki?” Napédé mabbencini mennang lao ri aléna nasaba sining nippinna sibawa nasaba aga iya napowadaé. Nainappa mannippisi Yusuf, nanapowadanni sining kakana, “Mannippisika, uwitai mata essoé, kéteng sibawa seppulo séddi wéttowing suju' lao ri iyya.” Iyaro nippié nacurita towi lao ri ambo'na, nariyamparenna ri ambo'na, adanna, “Nippi aga iyaro? Muwasengngi iyya, indo'mu sibawa sining silessuremmu maélo polé sibawa suju' sompako?” Mangémpuruni sining kakana Yusuf lao ri aléna, iyakiya ambo'na tette'i napikkiri iyaro nippié. Riséuwaé esso wettunna sining kakana Yusuf lao ri Sikhem untu' mampii bémbé bimbala'na ambo'na mennang, makkedani Yakub lao ri Yusuf, “Laono ri Sikhem, ri onronna sining kakamu mampii bémbé bimbala'ta.” Nappébali Yusuf, “Makessinni, Ambo'.” Nakkeda ambo'na, “Itani pékkugi keadaanna sining kakamu sibawa bémbé bimbala'é, nainappa lisuno untu' laporo'i ri iyya.” Nanaleppessanni Yusuf lao salaiwi Lompo Hébron. Dé' namaitta rimunrinna lettu'ni Yusuf ri Sikhem. Wettunna joppa lolisu ri padangngé, siruntu'ni séddi tau worowané iya makkutanaé ri aléna, “Aga musappa?” Nappébali Yusuf, “Kaka-kakaku. Mampii mennang bémbé bimbala, naissegga Bapa' kégai mennang monro?” Nakkeda iyaro tauwé, “Joppani mennang polé kuwaé. Uwéngkalingai mennang makkeda makkedaé maéloi lao ri Dotan.” Nanajoppana Yusuf maccinrolaiwi sining kakana nanalolongenni mennang ri Dotan. Mabéla mupi naitani mennang Yusuf, na wettu dé'napa nalettu ri mennang, masséddini mennang untu' mpunoi. Adanna mennang séddié lao ri laingngé, “Itai, engkani polé tukang nippié. Ayo taunoi nataggenrungengngi ujuna ri laleng bujung iya marakkoé. Nappaki makkeda matti makkedaé naanréi olokolo masekkang. Taitanitu matti pékkugi jajinna nippi-nippinnaro.” Naéngkalingani Rubén rencanana mennanro, namakkuragana untu' passalama'i Yusuf. Adanna, “Aja' muwunoi. Tabuwang bawanni muttama ri laleng bujung ri padang kessi'éwé, iyakiya aja' taunrui iyaré'ga loi.” Napowadai iyaro gau'é nasaba akkattana maéloi passalama'i Yusuf sibawa suroi lisu ri bolaé. Wettunna Yusuf lettu risining kakana, naludunni mennang jumbana Yusuf iya magello senna'éro sibawa makassara. Nainappa nassarénréngeng nanaggenrungengngi muttama ri laleng bujung iya marakkoé. Wettunna mennang mattengngang manré, tappa naitani mennang séuwa kafila tau Ismaél iya mattengngangngé ri laleng allalengengngé polé ri Giléad lao ri Maséré. Unta-untana mennang mattékéi rampa-rampa sibawa damar. Nanakkeda Yéhuda lao ri silessu-silessurenna, “Aga akkégunana mpunoi anritta sibawa harasiyakangngi iyaro abbunowangngé? Laono mai tabalu'i lao ri tau Ismaéliéro. Aja'na tapeddiriwi. Muwi maga anrittato.” Nasitujuini sining silessurenna, na wettunna siyagangngaré padangkang Midian lalo, ripassuni Yusuf ri kaka-kakana polé ri laleng bujungngéro nainappa nabalu lao ri tau Ismaéliéro sibawa duwappulo péra' ellinna. Nainappa ritiwi risining padangkangngéro lao ri Maséré. Wettunna Rubén lisu ri bujungngéro nadé' naruntu'ni Yusuf kuwaro, nasapé'ni pakéyanna nasaba messéi. Lisuni ri silessu-silessurenna sibawa makkeda, “Iyaro ana'é dé'ni gaga kuwaro! Aga harusu upogau' makkekkuwangngé?” Nainappa mennang géré sikaju bémbé nanatellerengngi jumbana Yusuf ri laleng dara bémbé'éro. Nainappa iyaro jumbaé nasuroi mennang tiwii lao ri ambo'na mennang sibawa paseng, “Iyaé jumbaé riruntu'i. Appunnangennaga ana'na Ambo' iyaé?” Narupani Yakub iyaro jumbaé, nanakkeda, “Tongeng, iyaé jumbana ana'ku! Pasti riyanréni ri olokolo masekkangngé. Aduh, ana'ku Yusuf maténi risapé-sapé ri olokolo'éro!” Nasapé'ni pakéyanna Yakub nasaba messéi nanapaké pakéyang karung. Siyagangngaré essona nawatingi ana'naro. Sininna ana'-ana'na, muwi worowané iyaré'ga makkunrai poléni saléworiwi, iyakiya dé' namaélo risaléwori. Adanna, “Gangka maté maéloka tette mpatingiwi ana'ku.” Makkuwaniro matteru mabbarata nasaba Yusuf ana'na. Nawettuéro, ri Maséré, nabalu'ni tau Midiangngé Yusuf lao ri Potifar, séddiwi parawirana arung iya jaba'éngngi kapala pengawalna saorajaé. Kira-kira iyaro wettué nasalaini Yéhuda silessu-silessurenna nanaonro silaong Hira, séddiwi worowané iya assalennaé polé ri kota Adulam. Kuwaniro Yéhuda sisseng sibawa séddi ana'dara Kanaan, ana'na Sua, nainappa mennang kawing. Ana'na mennang mammulangngé worowané, riwéréngngi aseng Er ri ambo'na. Ana'na maduwaé worowanéto, nasengngi Onan. Ana'na matellué worowanéto, nasengngi Syéla. Wettunna Syéla jaji, engkai Yéhuda ri Kézib. Napakawinni Yéhuda Er, ana'na iya macowaé sibawa Tamar. Ampé-ampéna Er maja senna, angkanna macai Puwangnge ri aléna sibawa mpunoi. Nainappa makkeda Yéhuda lao ri Onan anrinna Er, “Laono ri jandana kakamu, namusiyatinrong. Rupaini kewajibammu lao ri aléna, saba' anrinnako lakkainna; nanallalengiwi nawedding kakamu lolongeng wija-wija.” Iyakiya naisseng Onan makkedaé ana'-ana'na matti dé' namancaji appunnangenna. Jaji, sises-siseng naluséreng jandana kakanaro, naleppessangngi manninna tuppa ri saliweng kuwammengngi dé' nalolongeng matu wija-wija kakana. Iyaro pangkaukenna naébbui Puwangnge macai, nariyuno towi ri Puwangnge. Nainappa makkeda Yéhuda lao ri Tamar ménéttunnaro, “Lisuno ri bolana tomatowammu sibawa monro kuwaro selaku janda narapi ana'ku Syéla battowa.” Makkeda makkuwairo nasaba métaui ajakké Syéla riyuno towi matu ri Puwangnge, pada-pada iya duwa kakana. Nanalisuna Tamar ri bolana tomatowanna. Siyagangngaré wettu ri munrinna matéi bainéna Yéhuda. Leppe'nana wettu abbaratanna, naérani Yéhuda Hira, sellaona iya polé ri Adulamro, lao ri Timna, onronna sining bimbala'na nagoncing bulunna. Lolongenni karéba Tamar makkedaé Yéhuda matuwanna maéloi lao ri Timna untu' goncingngi bulunna sining bimbala'na. Nasulléini pakéyang jandana sibawa pakéyang laingngé. Natongkoni rupanna sibawa bowong, nainappa tudang ri pintu gerbanna kota Enaim, iya engkaé ri laleng mattujué ri Timna. Naisseng senna Tamar makkedaé Syéla, ana'na Yéhuda iya maloloé, battowani, iyakiya dé'pa naripasiyala sibawa iyaro kalloloé. Wettunna Yéhuda naita Tamar, nasenni iyaro makkunraié séddi cakkuribang, nasaba tattongkoi rupanna. Nainappa naddeppérini Yéhuda ri wiring lalengngéro, sibawa makkeda, “Siyaga muwéllau?” Dé' naissengngi makkedaé iyaro makkunraié ménéttunna muto. Nappébali Tamar, “Siyagi-siyagi Puwang.” Nakkedasi Yéhuda, “Uwérékko matu sikaju bémbé lolo.” Nappébali Tamar, “Wedding, assaleng engka boro'na, narapi nakiring Puwang iyaro bémbé'é.” Nakkutana Yéhuda, “Aga boro'na?” Nappébali Tamar, “Wérékka stémpélta Puwang sibawa tuluna enrengngé tekkeng iya engkaé ri Puwanro.” Nabbéréyanni Yéhuda iyaro barab-barangngé, nainappa mennang silureng, namattampu'na Tamar. Lisuni Tamar ri bolana sibawa natimpa'ni kaing pattongko rupanna, nainappa napakessingi pakéyang jandana. Siyagangngaré wettu ri munrinna nasuroni Yéhuda Hira, sellaona, untu' tiwii iyaro bémbé'é sibawa méllauwi lisu barab-barang iya puraé nabbéréyang selaku boro', iyakiya dé' naulléi Hira lolongengngi iyaro makkunraié. Makkutani Hira risining tauwé ri Enaim, “Kégani cakkuribang iya biyasaé mattajeng ri wiring lalengngéwé?” Nappébali mennang, “Dé' naengka cakkuribang kuwaé.” Nainappa lisuni Hira ri Yéhuda sibawa makkeda, “Dé' uwulléi lolongengngi iyaro makkunraié. Manuru' sining tauwé kuwaro dé' naengka cakkuribang kuwaro.” Nakkeda Yéhuda, “Leppessanni iyaro barab-barangngé untu' aléna, assaleng aja' muwa tamasiri. Purana' makkuraga untu' mpajai, iyakiya dé' mulléi lolongengngi.” Kira-kira tellumpuleng ri munrinna lolongenni karéba Yéhuda makkedaé Tamar ménéttunna kédo padani cakkuribangngé sibawa mattampu'ni. Nainappa napparéntang Yéhuda, “Alai namutunui gangka maté!” Wettunna Tamar ritiwi massu, kirinni paseng lao ri matuwanna, adanna, “Ripattampukika ri tau iya mappunnaiyéngngi iyaé barab-barangngé. Paréssai niga punna iyaé stémpél-é sibawa tuluna enrengngé tekkengngé.” Narupani Yéhuda iyaro barab-barangngé sibawa makkeda, “Iyaro makkunraié dé' napasala. Iyya dé' urupaiwi kewajibakku lao ri aléna; sitongenna harusu'i upakawing sibawa ana'ku Syéla.” Dé'na naengkana Yéhuda nalusérengngi Tamar. Narapinana wettunna Tamar mémmana, annessana maéloi jajiyang ana' dénru. Wettunna mémmana, sala séddinna ana' dénruéro passui limanna, nainappa iyaro bidangngé makkatenningngi iyaro limaé sibawa nasiyoi wennang cella. Adanna, “Iyaé ana'é jaji riyolo.” Iyakiya iyaro ana'loloé nagettengngi paimeng limanna, sibawa ana'lolo iya séddiéssi jaji lebbi riyolo. Nainappa makkeda bidangngé, “Jaji makkuwaniro caramu dessa'i massu!” Nasenni Pérés iyaro ana'é iya lebbi riyoloé jaji. Purairo nainappa jaji anrinna iya engkaé wennang cella'na limanna. Riwéréngngi aseng Zérah. Ritiwini Yusuf ri Maséré ri tau Ismaélié, sibawa ribalu lao ri Potifar, séddiwi parawirana arungngé iya jaba'éngngi kapala pengawalna saorajaé. Puwangnge sibawangngi Yusuf angkanna tuli mallolongengngi ri laleng jama-jamanna. Naonrona ri bolana puwanna, tau Maséré'éro. Naitani puwanna makkedaé, Puwangnge sibawangngi Yusuf narimakkuwannanaro namallolongeng makessing ri laleng sininna jama-jamang iya najamaé. Namasennanna Potifar lao ri Yusuf sibawa makkai mancaji pattumani paribadinna; nainappa riwéréng jamang Yusuf murusu'i ruma tanggana sibawa sininna appunnangenna. Mappammulai wettuéro, nasaba Yusuf, Puwangnge barakkakiwi ruma tanggana tau Maséré'éro sibawa sininna aga iya nappunnangiyé, muwi iya engkaé ri bolaé iyaré'ga ri dare'é. Sininna iya nappunnangiyé Potifar nappaddettangenni lao ri Yusuf. Nanallalengiwiro dé' sises-sisenna namaélo missengngi passaleng urusang bolana, sangadinna passalenna inanréna. Iyaro Yusuf poréi namagello. Siyagangngaré ittana, iyaro bainéna Potifar naélorini Yusuf, nainappa naéra iyaro kalloloé siatinrong. Iyakiya dé' namaélo Yusuf, nanakkedana lao ri aléna, “Taddampengekka, Bu, pura manenni nappaddettangeng appunnangenna puwakku Potifar lao ri iyya. Dé'na aga-agana parellu napikkiri ri bolaéwé. Akuwasanna kuwaé pada-padai akuwasakku. Dé'gaga muwi séddi iya dé'e nappaddettangengngi lao ri iyya sangadinna Ibu. Pékkugi makkullé upogau' pangkaukeng majaéro sibawa madosa lao ri Allataala?” Namuni bainéna Potifar palécéi Yusuf esso-esso, iyaro kalloloé tette'i dé' namaélo sibawangngi matinro. Engka séuwa esso wettunna Yusuf muttama ri lalempola untu' pogau'i jama-jamanna, dé' muwi séddi tau engka kuwaro. Nagettenni bainéna Potifar Yusuf ri jumbana sibawa makkeda, “Laono mai tasibawa matinro.” Maronta'i Yusuf sibawa naulléi leppe, nanalari massu, iyakiya jumbana monroi ri limanna iyaro makkunraié. Wettunna naita bainéna Potifar makkedaé larini Yusuf namonroi jumbana, naobbini sining pattumaninna sibawa makkeda, “Coba mitai! Tau Ibrani iya natiwié lakkaikku ri bolaéwé, napakatunaka. Muttama'i ri laleng bili'ku sibawa maéloi péjarika, iyakiya gora loppoka. Wettunna naéngkalinga goraka, larini massu nanasalaiwi jumbana.” Nanataroni bainéna Potifar iyaro jumbaé narapi lisu lakkainna. Lisunnana lakkainna, masitta'ni powadangngi iyaro curitaé lao ri aléna, adanna, “Tau Ibrani iya mutiwiéro lao mai, muttama'i ri laleng bili'é untu' pakatunaka. Iyakiya wettukku gora, larini massu nanasalaiwi jumbana.” Macai senna'ni Potifar. Nanapparéntangngi naritikkeng masitta Yusuf nariputtama ri laleng tarungkué, onronna sining tahananna arungngé ritarungku. Iyakiya Puwangnge sibawangngi Yusuf sibawa mamaséiwi matteru, angkanna kapala tarungkué napojiwi. Nappaddettangenni sining tahanang laingngé lao ri Yusuf, sibawa Yusuf ritu riwéréng tanggung jawa' lao ri sininna jama-jamang iya ripogau'é ri laleng tarungkuéro. Iyaro kapala tarungkué dé'na najagaiwi sininna iya nappadettangengngé lao ri Yusuf, nasaba Puwangnge sibawangngi angkanna mallolongengngi ri laleng sininna jama-jamanna. Siyagangngaré wettu ri munrinna, engka duwa pattumaninna arung Maséré, iyanaritu pangurusu énungenna sibawa pangurusu rotinna, pogau' asalang lao ri arungngé. Namacaina arungngé lao ri iya duwa pattumaninnaro, nainappa riputtama mennang ri laleng tarungkué ri bolana kapala pengawal saorajaé, ri onronna Yusuf ritahang. Maittato mennang ri tarungkuéro, na kapala pengawal saorajaé suroi Yusuf untu' tumaningiwi mennang. Riséuwaé wenni iyaro pangurusu énungengngé sibawa pangurusu rotié pada mannippiwi. Iyaro nippinna mennang dé' napada bettuwanna. Wettunna Yusuf lao ri mennang pappa bajana éléna, paitani mennang masussa. Nanakkutana, “Magi Saudara-saudara namasussa makkuwa iya essoéwé?” Nappébali mennang, “Mannippiki onna wennié, nadé'gaga iya missengngéngngi bettuwanna.” Nakkeda Yusuf, “Banna Allataala wedding mébbui tauwé pakatajangngi bettuwanna nippié. Coba curitai iyaro nippié.” Nakkeda iyaro pangurusu énungengngé, “Ri laleng nippiéro uwitai engka pong anggoro ri yoloku. Iyaro pongngé mattakké tellui. Silalona takké-takkéna maddaung, tabbakkani unga-unganna, namatasa'na buwana. Iyaro wettué uwakkatenningngi kaca énungenna arungngé, jaji uwalani iyaro buwa anggoro'é nanaupara'i ri laleng kacana arungngé, nainappa uwéréngngi.” Nakkeda Yusuf, “Iyanaé pappakatajanna: Iyaro tellué takké bettuwanna tellungngesso. Ri laleng tellungngessoéwé arungngé paleppe'ko matu, naddampengekko matu sibawa palisuko lao ri jabatammu riyolo. Mupassadiyai matu kaca énungengngé lao ri arungngé pada-pada riyolo. Iyakiya éngngerakka rékko makessinni keadaammu. Tulukka mupalettukekka persoalakku lao ri arungngé, kuwammengngi ripaleppe'ka polé ri tarungkuéwé. Saba', sitongenna riculi'ka riyolo polé wanuwanna tau Ibranié na muwi kuwaé, ri Maséré'é, dé' naengka upogau' séuwa ja narapi harusu'ka riputtama ri laleng tarungkué.” Naissennana iyaro pangurusu rotié makkedaé makessingngi bettuwanna nippinna iyaro pangurusu énungengngé, makkeda toni lao ri Yusuf, “Mannippi tokka, jujukka tellu baku roti. Ri laleng baku iya kaminang yasé'é engka maddupa-rupang béppa untu' arungngé, iyakiya poléi manu'-manu'é manréi iyaro sining béppaé.” Nappébali Yusuf, “Iyanaé pappakatajanna iyaro nippié: Iyaro tellué baku bettuwanna tellungngesso. Ri laleng tellungngessoéwé nasuroi matu arungngé tauwé rette'i ulummu nanagattungngi ujumu riséddié alliri, na manu'-manu'é manréi matu jukumu.” Tellungngesso ri munrinna iyanaritu esso ajajingenna arungngé, nanapakangka pésta battowa untu' sininna pegawénna. Napparéntanni kuwammengngi pangurusu énungengngé sibawa pangurusu rotié ripassui polé ri tarungkué sibawa ritiwii ri yolona sininna pegawé saorajaé. Pangurusu énungengngé napalisui lao ri jabatanna riyolo. Iyakiya pangurusu rotié rihukkung matéi. Iya manennaro kajajiyangngé situru sibawa aga iya napowadaé Yusuf. Iyakiya iyaro pangurusu énungengngé dé'na naéngngeranni Yusuf. Nallupai sisenni aléna. Labe'nana duwattaung, mannippini arung Maséré, naitai aléna tettong ri wirinna Salo Nil. Tappa engka pitukkaju saping iya macommo'é sibawa nrelli olina, massu polé ri saloéro nainappa mammula manré wella ri wirinna saloéro. Nainappa pitu saping iya laingngngé mompo toni; iyaro sining olokolo'é makojo sibawa buku mani nadoko oli. Iyaro sining saping iya makojoé tettongngi ri benrénna sining saping iya macommo'é, ri wirinna saloé. Nainappa sining saping iya makojoé manréi sining saping iya macommo'é. Purairo péseddinni arungngé polé ri tinrona. Nainappa matinro sibawa mannippisi. Ri laleng nippinnaro naitai pitu lice' gandong iya mallise'é sibawa macuwa taggattung riséddié ulé. Nainappa momposi pitu lice' gandong iya laingngé, iya makapaé sibawa makkapuru nataro anging padang kessi'é. Nainappa lice' gandong iya makapaéro memme'i iya pitu lice' gandong iya malise'é onna. Purairo péseddinni arungngé sibawa namaingekinna makkedaé purai mannippi. Elénana maséssani arungngé, rimakkuwannaro nasuroni mobbii sininna passéhéré'é sibawa tau maccaé ri Maséré. Nainappa nacurita nippinna lao ri mennang, iyakiya dé' muwi séddi tau mulléi pakatajangngi bettuwanna. Nainappa makkeda pangurusu énungengngé lao ri arungngé, “Iyaé essoé harusu'i atatta nangakui asalanna atatta. Riyolo macaii Datué lao ri pangurusu rotié sibawa lao ri atatta, nainappaki riputtama ri laleng tarungkué, ri bolana kapala pengawal saorajaé. Riséuwaé wenni mannippi duwaki, na iyaro nippitta dé' napada bettuwanna. Engka séddi kallolo Ibrani kuwaro sibawakki. Pattumaninnai kapala pengawalna saorajaé. Ricuritangngi nippitta lao ri aléna, nainappa napakatajang bettuwanna iyaro nippié. Annessana kajajiyang manengngi pada-pada iya napowadaé, iyanaritu: Napalisui Datu atanna lao ri jama-jamanna atatta pammulanna, iyakiya nahukkung matéi pangurusu rotiéro.” Nanassurowanni arungngé malai Yusuf, namasitta'na ripassu polé ri tarungkué. Puranana Yusuf maccukkuru sibawa sulléiwi pakéyanna, mangoloni ri arungngé. Nakkeda arungngé ri aléna, “Puraka mannippi, nadé'gaga séddi tau mulléi pakatajangngi bettuwanna. Engka mabbirittangngi ri iyya makkedaé mulléi pakatajangngi nippié.” Nappébali Yusuf, “Tenniya atatta, Puwakku, sangadinna Allataala iya mpéréngngékka matu pappakatajang iya tongengngé.” Nanakkeda arungngé, “Mannippika tettokka ri wirinna Salo Nil. Namassuna polé ri saloéro pitu saping iya macommo'é sibawa nrelli olina, nainappa mappammula makkinanré ri wirinna saloéro. Nainappa momposi paimeng pitu saping iya laingngé, iya makojoé sibawa buku mani nadoko oli. Dé'pa naengka uwita saping makkuwaé mani jana tappana ri sininna Maséré. Iyaro sining saping iya makojoé naanréi gangka cappu iya pitu saping iya macommo'é onna. Iyakiya puranaro iyaro sining saping iya makojoé tette mupi makojo. Nanaupéseddinna polé ri tinroku. Nainappaka matinro sibawa mannippisi, mitaka pitu lice' gandong iya mallise'é sibawa matasa, taggattung riséddié ulé. Nainappa mompoto pitu lice' gandong iya kapaé sibawa makkapuru nataro anging padang kessi'é. Iyaro lice' gandong iya makapaé naemme'i lice' gandong iya mallise'é onna. Purani ucurita iya duwa nippikkuro lao risining passéhéré'é, iyakiya dé' muwi séddi tau mulléi pakatajangngi bettuwanna.” Nanakkeda Yusuf lao ri arungngé, “Iya duwa nippiéro pada-padai bettuwanna; Allataala pura mappaissengengngi lao ri Puwakku aga maélo napogau'. Pitu saping iya macommo'éro iyanaritu pituttaung, sibawa pitu lice'na gandong iya mallise'éro iyanaritu pituttautto; iya duwa padai bettuwanna. Pitu saping iya makojoé, iya mompoé rimunri, enrengngé pitu lice' gandong iya makapaé sibawa makkapuru'é nasaba anging padang kessi'éro iyanaritu wettu akkadéreng pituttaung ittana. Pada-pada pura napowadaé atatta lao ri Puwakku, Allataala pura mappaitangngi lao ri Puwakku aga iya maéloé napogau'. Maéloi matti polé pituttaung wettu adécéngengngé risininna wanuwa Maséré. Nippinna Puwakku kajajiyangngi wékkaduwa, bettuwanna iyaro makkedaé iyaro gau'é purani napattentu Allataala sibawa masitta'na maélo napajoppa Allataala. Rimakkuwannanaro, makessingengngi Puwakku pilé séddi tau iya maccaé nenniya mapanré sibawa wéréngngi akuwasang untu' matoro'i iyaé wanuwaé. Iyaro gandongngé mancajiwi bokong inanré ri wettu akkadérengngé pituttaung ittana iya maéloé polé ri Maséré. Nanallalengiwi dé'na namaté temmanré ra'ya'é.” Nasitujuini arungngé sibawa sining pegawénna iyaro rancanana Yusuf. Nanakkeda arungngé lao ri mennang, “Dé' namakkullé lolongekki tau laing iya lebbi coco'é naiya Yusuf, saba' ripimpingngi ri rohna Allataala.” Namakkeda arungngé lao ri Yusuf, “Allataala pura paissengi manekko iyaé lao ri iko, jaji manessani makkedaé lebbi maccako nenniya mapanré naiya muwi niga. Maéloka makkako mancaji gubernur, nasininna ra'ya'ku naturusiwi matu paréntamu. Banna iyya bawang iya lebbi makuwasaé naiya iko.” Nanawérénni Yusuf karéta akkarungeng maduwaé untu' tonangenna, enrengngé pengawal alebbirenna arungngé joppa ri yolona karétaéro nagora-gorato, “Jagako! Wéréngngi laleng! Wéréngngi laleng!” Makkuwaniro Yusuf riyakka mancaji gubernur sininna Maséré. Nakkeda arungngé lao ri aléna, “Iyya'na arung – na iyya mappallebbangengngi makkedaé dé' muwi séddi tau risininna Maséré wedding pogau' agi-agi rékko dé' mupalaloi.” Ri laleng wettu pituttaungngé bujuru iyaro adécéngengngé, powassélé'i tanaé éngngalang maona. Napaddeppungenni Yusuf iyaro gandongngé nainappa nataro ri kota-kotaé. Ri laleng tungke' kota taroi gandong wassélé sining dare'é ri seddéna kotaéro. Iyaro gandong napaddeppungengngé makkuwamani égana angkanna mappésauni Yusuf mola'i, nasaba égana pada-padai kessi'é ri wiring tasi'é. Ri wettu dé'napa napolé akkadérengngéro, Asnat bainéna Yusuf jajiyanni duwa ana' worowané. Nakkeda Yusuf, “Allataala pura mébbuka mallupaiwi sininna anrasa-rasakku sibawa lao ri kaluwargana ambo'ku.” Rimakkuwannanaro nasenni ana'na iya mammulangngé “Manasyé”. Makkeda towi, “Allataala pura mpérékka ana'-ana' ri laleng wettu asukkarakekku,” nanasenni ana'na iya maduwaé “Efraim”. Pituttaung wettu sukkué adécéngenna iya puraé napéneddingi wanuwa Maséré'ro labe'ni. Napoléna pituttaung wettu akkadérengngé, pada-pada iya puraé napowada Yusuf. Risininna linoé kajajiyangngi akkadérengngé, iyakiya ri sininna Maséré engka bokong inanré. Wettunna ra'ya' Maséré'é mammula makkadéreng, méllauni mennang inanré ri arungngé. Nainappa arungngé suroi mennang lao ri Yusuf sibawa turusiwi sininna aga iya napparéntangngé matu Yusuf lao ri mennang. Wettunna iyaro akkadérengngé pédé masero sibawa massanrani risininna wanuwaé, natimpa'ni Yusuf sininna gudangngé sibawa balu'i gandongngé lao ri tau Maséré'é. Polé risininna linoé pada poléni tauwé ri Maséré untu' melli gandong ri Yusuf, nasaba iyaro akkadérengngé masero tongeng kégi-kégi. Wettunna naéngkalinga Yakub makkedaé engka gandong ri Maséré, makkedani lao ri ana'-ana'na, “Magi mutennang-tennang bawang? Uwéngkalingani engka gandong ri Maséré; laono kuwaro namuwelli gandong kuwammengngi aja' tamaté temmanré.” Nalaona iya seppuloro kakana Yusuf melli gandong ri Maséré. Iyakiya Yakub dé' napalaloi Bényamin, anrinna Yusuf lao silaong mennang, nasaba métaui ajakké nakennai abala iyaro ana'na. Nasaba akkadérengngé ri wanuwa Kanaan, laoni ana'-ana'na Yakub silaong maéga tau laing melli gandong ri Maséré. Iya mabbalu gandongngé lao risining tau polé ri sininna linoé iyanaritu Yusuf, selaku gubernurna Maséré. Rimakkuwannanaro laoni sining kakana Yusuf sibawa suju' ri yolona. Wettunna naita Yusuf sining kakana, narupani mennang, iyakiya najjaiwi temmissengngi. Makkutanani sibawa makassara lao ri mennang, “Tau agako?” Nappébali mennang, “Tau Kanaakki. Poléki untu' melli gandong.” Namuni Yusuf narupai sining kakana, iyakiya mennang dé' narupai. Nanaéngngeranni nippi-nippinna passalenna mennang. Nanakkedana, “Ikoé mata-matako; poléko untu' salidikiwi kégi alemmanna wanuwatta.” Nappébali mennang, “Dé' Puwakku. Idi ata-atannaki Puwang, poléki banna untu' melli gandong. Idi'é massilessurekki, Puwakku. Idi'é tau makessikki, tenniya mata-mata.” Nakkeda Yusuf lao ri mennang, “Belléko! Laoko mai untu' salidikiwi kégi alemmanna iyaé wanuwaé.” Nappébali mennang, “Idi'é seppuloki duwa massilessureng, Puwakku, séddimi ambo'ta engkai ri Kanaan. Séddi polé ri idi maténi na iya maloloé makkekkuwangngé engkai silaong ambo'ta.” Nappébali Yusuf, “Mémeng tongeng pada-pada upowadaé, mata-matako. Maéloka mojiko: Mattanroka ri laleng asenna arungngé makkedaé dé' mumaélo salaiwi wanuwaéwé rékko iyaro anrimmu maloloé dé' nalao mai. Séddi polé ri yelle'mu harusu lisu malai. Iya laingngé harusu'i ritahang narapi pabutti ada-adammu. Rékko dé', ri laleng asenna arungngé, ikoé mata-matanna balié!” Nainappa riputtama mennang ri tarungkué tellungngesso ittana. Ri esso matellué makkedani Yusuf lao ri mennang, “Iyya tau métauka sibawa mapato lao ri Allataala. Maéloka passalama'ko sibawa séddi sara'. Untu' pabuttiwi makkedaé malempuko, séddi polé ri iko ritahang matu ri laleng tarungkué; iya laingngé weddingngi lisu sibawa tiwi gandong iya muwelliyé untu' kaluwargamu iya mattengngangngé manrasa-rasa malupu. Purairo harusu'ko tiwii anrimmu maloloé lao ri iyya. Iyanaro buttinna matti makkedaé tongengngi iyaro ada-adammu, sibawa dé'na uhukkung matéko matu.” Nasitujuini mennang apettunna gubernur-éro. Nanakkedana mennang séddié lao ri laingngé, “Nah, rihukkunni makkekkuwangngé nasaba asalatta lao ri anritta riyolo; méllau tulungngi iyakiya dé' tamaélo paduliwi, namuni riitai makkedaé manrasa-rasa senna'i. Iyanaro saba'na naripéneddingi anrasa-rasangngéwé makkekkuwangngé.” Nakkeda Rubén, “Dé'ga napura upowadai riyolo lao ri iko kuwammengngi iyaro ana'é aja' nariyagaga. Iyakiya dé' mumaélo méngkalingai. Na makkekkuwangngé riyakkabalekenni ri idi amaténna.” Najeppuiwi Yusuf basana mennang, iyakiya dé' naissengngi iyaro gau'é, nasaba mabbicarai mennang sibawa Yusuf naolai séddi jurubasa. Nasalaini Yusuf mennang, nanateri. Wettunna weddinni makkeda-adasi, lisuni ri mennang, nanalai Siméon, nanasuroi siyoi ri yolona sininna silessurenna. Napparéntanni Yusuf kuwammengngi sining karung natiwié kaka-kakana nariliseki gandong, sibawa dowina mennang tungke'-tungke' ripalisui ri laleng sining karungngéro. Makkuwatoro kuwammengngi nariwéréng inanré untu' bokong ri lalengngé. Ripogau'ni iyaro paréntana. Purairo natékéni kaka-kakana Yusuf gandong puraé naelliro ri kaleddé'na, nanajoppa mennang polé kuwaro. Ri onronna mennang mabbenni, séddi polé ri mennang timpai karung gandonna untu' panréi kaleddé'na. Naruntu'ni dowina ri yasé'na gandongngéro. Nagorana lao ri silessu-silessurenna, “Ripalisui dowiku. Itani, engkai ri laleng karukku!” Makeccini atinna mennang, nasibawang tau sisulléni mennang sitanai, “Aga napogau' Allataala lao ri idi?” Wettunna lettu ri Kanaan, nacuritani mennang lao ri ambo'na sininna iya puraé napérasai. Makkedai mennang, “Makassara'i mabbicara gubernur Maséré'é lao ri idi sibawa nateppuki mata-mataiwi wanuwanna. Mappébaliki, ‘Tau makessikki, tenniya mata-mata, tau malempuki. Idi manengngé seppuloki duwa massilessureng, ana' polé riséddi ambo', naséddi tau maténi, na iya maloloé engkai silaong ambo ri Kanaan.’ Makkedai iyaro gubernur-é, ‘Maéloka mojiko untu' missengngi aga tau malempuko: Séddi tau polé ri iko harusu'i monro; iya laingngé weddingngi lisu tiwi gandong lao ri kaluwargamu iya mattengngangngé manrasa-rasa malupu. Lisummuna tiwii anrimmu maloloé, uwissenni matu makkedaé tenniyako mata-mata, sangadinna tau malempu. Na silessuremmu iya utahangngéro upalisui matu lao ri iko sibawa weddikko monro ri wanuwaéwé sibawa laluwasa dangkang.’ ” Nainappa wettunna napakosong sining karunna, pada naruntu'ni mennang tase'-tase'na iya mallise'é dowi; namétau senna'na mennang, makkuwatoro ambo'na. Namakkedana ambo'na, “Iko nassabarika nateddéng maneng ana'-ana'ku. Dé'ni gaga Yusuf; dé' toni gaga Siméon; na makkekkuwangngé maélosiko mala towi Bényamin. Tenniya pato anrasa-rasakku!” Nanakkeda Rubén lao ri ambo'na, “Abbéréyanni Bényamin lao ri iyya, Ambo'; iyya'pa matti tiwii lisu, rékko dé', weddingngi Ambo' nauno iya duwa ana' worowanéku.” Iyakiya makkedai Yakub, “Dé'! Dé' nawedding mutiwi Bényamin; maténi kakana na makkekkuwangngé aléna mani monro. Ajakké lolongengngi abala ri laleng allalengengngéro. Iyya'é macowana, na asarang iya mupapoléngengngékka matu'ro nassabariwi amatékku.” Pédé maseroni akkadérengngé ri Kanaan, napuranana napaccappu kaluwargana Yakub sininna gandong natiwié polé ri Maséré, makkedani Yakub lao ri ana'-ana'na, “Laono paimeng namuwellingekki.” Nakkedana Yéhuda lao ri aléna, “Purani mabbéré papparéngngerang matedde gubernur Maséré makkedaé dé' naweddikki mangolo ri aléna rékko dé' naritiwi iyaro anritta. Rékko napalaloi Ambo' maccowé anritta, maéloki lao kuwaro melli anré. Iyakiya rékko dé' napalaloi Ambo' maccowé Bényamin, dé' tamaélo lao, saba' purai makkeda iyaro gubernur-é makkedaé dé' naweddikki mangolo rékko dé' naccowé anritta.” Nakkeda Yakub, “Magi musussaika ri laleng mupaissenginna iyaro tauwé makkedaé mappunnai mupo anri?” Nappébali mennang, “Iyaro tauwé matteru-terui makkutana passaletta sibawa passalenna kaluwargata, adanna, ‘Tuwo mupiga ambo'mu? Mappunnai mupoga anri worowané laingngé?’ Tarapassaki baliwi sininna pakkutanana. Pékkugiki wedding sadda'i makkedaé maéloi suroki tiwii iyaro anritta?” Nakkeda Yéhuda lao ri ambo'na, “Palaloni iyaro ana'é maccowé, na iyya tanggung jawakiwi aléna. Maéloki joppa masitta kuwammengngi nadé' muwi séddi tau polé ri idi maté alupureng. Iyya ritu boro'na, sibawa weddingngi natuntu ambo polé ri iyya. Rékko dé' utiwii lisu sibawa salama, iyya tanggungngi pahukkungenna gangka tuwoku. Akkalarapanna dé' tamattajeng makkuwaro ittana, pasti makkekkuwangngé lolisuni wékkaduwa.” Nanakkeda ambo'na mennang, “Rékko mémeng harusu'i makkuwaro, tiwini wassélé iya kaminang makessingngé polé ri wanuwaéwé ri laleng sining karummu selaku hadiya untu' iyaro gubernur-é: Kismis, cani, rampa-rampa, buwa pelleng sibawa buwa badam. Tiwi tokko dowi leppi wékkaduwa, nasaba dowi iya riruntu'é ri laleng karummuro harusu'i mupalisu. Naullé iyaro séddiwi atakkalupang. Tiwii iyaro anrimmu, sibawa lisuno masitta. Tennapodo Allataala Iya Pommakuwasaé mébbui iyaro gubernur-é marasa kasiyang lao ri iko, angkanna maéloi palisui Bényamin sibawa Siméon lao ri iko. Passalenna iyya'é, rékko mémekka harusu ateddéngeng ana'-ana'ku, maéloni riyaga.” Nainappa silessu-silessurenna Yusuf natiwini iyaro sining hadiyaé sibawa dowi leppi wékkaduwa, nanajoppa lao ri Maséré silaong Bényamin. Lettu'nana kuwaro, mangoloni mennang ri Yusuf. Wettunna Yusuf naita Bényamin sibawa kaka-kakana, makkedani lao ri pattumaninna iya kapalaiyéngngi ruma tanggana, “Tiwii iyaro sining tauwé ri bolaku. Manréi matu mennang sisama iyya iyaé lakessoé, rimakkuwannanaro géréno sikaju olokolo namupassadiyai iyaro.” Napogau'ni iyaro pattumanié iyaro paréntaé sibawa tiwii silessu-silessurenna Yusuf ri lalempolana gubernur-é. Wettunna mennang ritiwi ri lalempolana Yusuf, métauni sibawa mappikkiri, “Ritiwiki lao kuwaé, nasaba dowi iya riruntu'é ri laleng karutta wettutta lao kumaié riyolo. Maéloni mennang tikkekki sibawa tenrisenna-senna, nainappa nala kaleddé'ta nanapancajiki atanna mennang.” Rimakkuwannanaro, ri seddéna sumpang bolana Yusuf, makkedani mennang lao ri kapala ruma tanggaé, “Taddampengekki Puwang, engkana naengka talao kumaié untu' melli anré. Nakkeda iyaro pattumanié, “Aja' mumétau. Aja' mumanenneng. Allataalamu, iyanaritu Allataala iya nasompaé ambo'mu, aléna ritu puttama'i iyaro dowié ri laleng karummu. Purani utarima pakkamajamu untu' iyaro gandongngé.” Nainappa natiwi Siméon lao ri mennang, nanaantara'i muttama ri lalempola. Nawérénni mennang uwai untu' mabbissa ajé, sibawa inanré untu' kaleddé'na mennang. Purairo napassadiyani mennang hadiyaé untu' nabbéréyang lao ri Yusuf rékko engkai polé ri tangassoé, nasaba purani mennang ripaissengi makkedaé manréi matu mennang sisama aléna. Wettunna Yusuf lettu ri bolaé, nabbéréyanni mennang iyaro hadiya-hadiyaé lao ri Yusuf nanasuju'to lao ri aléna. Makkutanani Yusuf passalenna keadaanna mennang, nanakkeda, “Purani mucuritakka passalenna ambo'mu iya macowaénnaro. Pékkugi keadaanna? Makessik-kessing muwi?” Nappébali mennang, “Atanna Puwang, ambo'ta, makessing muwi keadaanna.” Nainappa mennang suju' lao ri aléna. Wettunna Yusuf naita Bényamin, anrinna, makkedani, “Jaji, iyanagaé anrimmu maloloéro, iya tuli mupauwé lao ri iyya? Tennapodo Allataala barakkakiko, ana'ku.” Mpobbo'ni atinna Yusuf nasaba uddaning nenniya pappojing lao ri anrinna. Céddé'i dé' naulléi makuwasaiwi aléna, rimakkuwannanaro nasalaini iyaro onrongngé tenrisenna-senna nainappa muttama ri bili'na sibawa teri. Purairo majjumatani, nainappa massu paimeng, nanatahanni atinna, nasuroi mappatala inanré. Manréni Yusuf riséddié méjang ripallaingngé, nasining silessurenna ri méjang laingngé. Sining tau Maséré iya engkaé kuwaro manré ri méjang iya laingngéssi, nasaba marasa matunai rékko manréi sisama sibawa tau Ibranié. Silessu-silessurenna Yusuf ritaroi ri méjang iya siyolongngé sibawa Yusuf, situru atturu-turuseng umuru'na, mappammulai iya macowaé lettu ri iya maloloé. Wettunna mennang naita cara atoro'naro, sisulléni mennang siita sibawa héranna. Riwéréngngi mennang inanré polé ri méjanna Yusuf, na Bényamin ritumaningiwi wékkalima lebbi maéga naiya kaka-kakana. Nainappa manré ménunni mennang sisama Yusuf gangka cau. Nanapparéntanni Yusuf lao ri kapala ruma tanggana, “Lisekiwi iyaro sining karungngé sibawa gandong, singngéga iya naullé mennang tiwi, sibawa puttama'i dowina tungke'-tungke' ri laleng karunna, ri tompo'na gandongngéro. Puttama towi énungeng péra'ku ri laleng karunna anrinna mennang iya maloloé, silaong dowi pakkamaja gandonna.” Napogau'ni iyaro pattumanié iyaro paréntaé. Pappa bajanana, maélé senna'ni, Yusuf massaranni sibawa silessu-silessurenna, nanajoppa mennang silaong kaleddé'na mennang. Dé'pa namabéla mennang polé ri kotaéro, wettunna Yusuf makkeda lao ri kapala ruma tanggana, “Asitta'no lellungngi sining tauwéro. Rékko murapini, powadangngi mennang, ‘Magi muwale'i adécéngengngé sibawa ja? Magi muwénnauwi énungeng péra'na puwakku? Iyaro énungengngé napakéi ménung sibawa selaku paréwa untu' mappalakiya. Purani mupogau' ja battowaé!’ ” Wettunna lettu iyaro pattumanié ri silessu-silessurenna Yusuf, napowadani aga iya napparéntangngé Yusuf. Pappébalinna mennang lao ri aléna, “Aga akkattana Bapa'? Mattanroki makkedaé dé' naripogau' makkuwaéro! Aléna Bapa' missengngi makkedaé dowi iya rilolongengngé ri laleng sining karutta ri tompo'na gandongngéro, purani ripalisu lao ri Bapa'. Jaji, dé' nakkullé ménnauki péra' iyaré'ga ulaweng polé ri bolana gubernur-é! Pa', akkalarapanna iyaro barangngé rilolongengngi ri sala séddinna polé ri idi, leppessanni rihukkung maté, na idi mancajiki atanna Bapa'.” Nakkeda iyaro pattumanié, “Makessinni; iyakiya banna iyami riyonroiyé lolongengngi iyaro énungengngé, aléna ritu iya mancajiyé matu atakku; iya laingngé weddinni lao.” Napada masitta'na mennang panonnoi sibawa timpa'i karunna. Iyaro pattumaninna Yusuf naparéssani iyaro sining karungngé sibawa makessing, mappammulai ri karung appunnangenna iya macowaé lettu ri karung appunnangenna iya maloloé, na iyaro énungengngé rilolongenni ri laleng karunna Bényamin. Masara senna'ni kaka-kakana angkanna nasapé-sapé pakéyanna mennang. Napattékérini kaleddé'na mennang nanalisu ri kotaé. Wettunna Yéhuda sibawa silessu-silessurenna lettu ri bolana Yusuf, engka mupi kuwaro, nanasuju'na mennang ri yolona. Namakkedana Yusuf, “Aga iya mupogau'éro? Dé'ga muwissengngi tau iya pada-padaé iyya'é mulléi missengngi pangkaukemmu iya majaé sibawa paddissengeng lennye-lennye'é?” Nappébali Yéhuda, “Aga wedding ripowada, Puwakku? Pékkugiki wedding mabbanta sibawa pattongengngi aléta? Allataala pura mappaitangngi asalatta. Makkekkuwangngé mancaji manenni atanna Puwang, tenniya bawang aléna iya riyonroiyé lolongengngi iyaro énungengngé.” Nakkeda Yusuf, “Dé'! Dé' umaélo pogau'i makkuwaéro! Banna aléna iya riyonroiyé lolongengngi iyaro énungengngé mancaji matu atakku. Iya laingngé weddingngi lisu sibawa laluwasa lao ri ambo'na.” Malluruni Yéhuda maddeppériwi Yusuf sibawa makkeda, “Taddampengekka Puwang, tapalaloni atatta mabbicarapa sibawa Puwakku. Aja' tamacai lao ri atatta; Puwakku pada-padai aléna arung Maséré. Purani makkutana Puwakku lao ri idi'é, ‘Aga mappunnai mupoga ambo' iyaré'ga silessureng iya laingngé?’ Mappébaliki, ‘Ambo'ta macowani sibawa anritta jajiwi wettunna macowani ambo'ta. Kaka naéwaé siindo polé ri anrittaro maténi, jaji makkekkuwangngé aléna mani iya tuwoé mupa polé ri mennang sipadduwa, na ambo' napoji senna'i.’ Puwakku suroki tiwii kumaié, kuwammengngi naulléi Puwakku mitai, nainappaki mappébali makkedaé iyaro ana'é dé' naulléi massarang polé ri ambo'na; rékko massarangngi polé ri ambo'na, matéi matu ambo'. Nainappa makkeda Puwakku, ‘Dé' naweddikko mangolo ri iyya'na rékko dé' mutiwii iyaro anrimmu.’ Wettuttana lisu ri ambo'ta, ripalettukenni ri aléna adanna Puwakkuro. Nainappa nasuroki ambo'ta lao paimeng kumaié untu' melli anré. Mappébaliki, ‘Dé' naweddikki lao kuwaro, saba' dé' naweddikki mangolo ri gubernur-é rékko dé' naccowé anritta maloloé. Banna weddikki lao kuwaro rékko lao towi.’ Nainappa makkeda ambo'ta, ‘Muwisseng makkedaé Rahél, bainéku banna mappunnai duwa ana'. Iya bunge'é nasalaina. Pasti purani riyanré ri olokolo masekkangngé, nasaba lettu makkekkuwangngé dé'na uwitani. Rékko muwalai iyaé ana' maloloéwé polé ri iyya, nakajajiyang agi-agi sibawa aléna, asarang iya mupapoléngengngékka'ro nassabariwi matu amaténgekku, nasaba iyya'é macowana.’ ” Nainappani, purai majjanci atatta lao ri ambo'na atatta makkedaé atatta mancaji boro'na iyaro ana'é. Makkedai atatta lao ri aléna, makkedaé rékko atatta dé' natiwii iyaro ana'é lisu ri aléna, atatta ritu tanggungngi matu pahukkungengngé gangka tuwo. Jaji, naéllauwi atatta, tapalaloni atatta monro kuwaé mancaji atanna Puwakku sulléiwi iyaé anritta; leppessanni lisu silaong sining kaka-kakana. Pékkugiwi atatta wedding lisu lao ri ambo'ta rékko iyaro ana'é dé naccowé? Dé' natahang atatta matti mitai abala iya kennaéngngi matu ambo'taro.” Dé'na naulléi Yusuf tahangngi pappéneddinna ri yolona sining pegawé-pegawénna. Rimakkuwannanaro nasuroni mennang salaiwi iyaro ruwangangngé kuwammengngi naulléi pannessai lao ri silessu-silessurenna niga sitongenna aléna. Nasalai manennana pegawénna ruwangangngé, terini Yusuf maladde-ladde, angkanna sining tau Maséré'é ri saliweng ruwangangngé méngkalingai, sibawa lettu'ni iyaro karébaé ri saorajana arungngé. Makkedani Yusuf lao ri silessu-silessurenna, “Iyya'é Yusuf. Tuwo mupiga ambo'?” Naitanaro métau senna'ni silessu-silessurenna angkanna dé'na naulléi mappébali. Nainappa makkeda Yusuf lao ri mennang, “Laono mai kuwaé.” Maddeppéni mennang, sibawa makkedasi paimeng, “Iyya Yusuf, iya puraé mubalu lao ri Maséré. Aja' mumétau iyaré'ga sesse'i alému nasaba purako balu'ka. Sitongenna Allataala muto tiwika lao kuwaé poddiyoloiko untu' passalama'i maéga tau. Makkekkuwangngé nappai taung maduwaé polé ri wettu akkadérengngé, na limattauppi ittana dé' matu naddakkala tauwé iyaré'ga méngngala. Allataala pura tiwika poddiyoloiko untu' passalama'ko nasibawang cara iya mappahérangngéwé, sibawa untu' tanggungngi asalamakemmu sibawa assisumpungenna wija-wijammu. Jaji, sitongenna tenniya iko nassabariwi uwengka kuwaé, sangadinna Allataala. Aléna pura pancajika pegawé pommatanréna arung Maséré. Riwérékka akuwasang lao risininna ruma tanggana sibawa sininna Maséré. Makkekkuwangngé, lisuno masitta ri ambo' namupowadangngi makkedaé Yusuf, ana'na, makkeda makkuwaiyé, ‘Allataala pura pancajika panguwasa risininna Maséré; laono mai masitta. Weddingngi ambo' monro ri daéra Gosyén, macawé ri iyya – ambo', sibawa ana' eppomu, bimbala, bémbé, saping sibawa sininna appunnangenna ambo'. Rékko engkai ambo' ri Gosyén, weddikka piyarai ambo'. Wettu akkadérengngé limattauppi ittana namaéloka musahakangngi kuwammengngi ambo', kaluwargana sibawa olokolo'na ambo' aja' naakurangeng aga-aga.’ ” Adannapi Yusuf, “Alému mitai makkekkuwangngé, makkuwatoro iko Bényamin, makkedaé iyya tonget-tongeng Yusuf. Powadani lao ri ambo'ta pékkugi loppona akuwasakku kuwaé, ri Maséré, sibawa curitai lao ri aléna sininna iya puraé muwita. Nainappa masitta-sitta'ko tiwii kumaié.” Purairo nakaddaoni Bényamin, anrinnaro, nainappa teri; teri toni Bényamin nanakaddao towi Yusuf. Nainappa, ri wettu terinna mupa, nakaddaoni Yusuf sininna silessurenna sibawa bauwi mennang. Purairo mammulani mabbicara-bicara sibawa aléna. Wettunna ri saorajana arungngé naéngkalinga karébaé makkedaé poléi silessu-silessurenna Yusuf, arungngé sibawa pegawé-pegawénna maccowéni masennang. Nainappa makkedani arungngé lao ri Yusuf, “Suroni iyaro silessu-silessuremmu pattékériwi kaleddé'na mennang sibawa gandong nanalisu ri Kanaan untu' duppaiwi ambo'na sibawa kaluwargana mennang nanalétté lao mai. Maéloka mabbéréyangngi lao ri mennang tana iya kaminang makessingngé ri Maséré, sibawa weddingngi matu mennang tuwo sibawa genne polé ri wassélé tanaéro. Suro towi mennang tiwi polé kuwaé siyagangngaré karéta untu' bainéna sibawa ana'-ana'na mennang iya baiccué mupa, sibawa untu' duppaiwi ambo'na mennang. Dé' naparellu mennang pikkiri'i barab-barang iya tarapassaé nasalai mennang, nasaba iya kaminang makessingngé risininna Maséré mancaji matu appunnangenna mennang.” Napogau'ni ana'-ana'na Yakub iyaro paréntana arungngé. Nabbéréyanni Yusuf lao ri mennang siyagangngaré karéta, situru sibawa paréntana arungngé, sibawa topa bokong untu' allalengengngé. Nawéréng toni mennang tungke'-tungke' sipasang pakéyang baru, iyakiya lao ri Bényamin nawéréngngi tellu ratu dowi péra' sibawa limappasang pakéyang baru. Nakiringenni ambo'na seppulo kajunna kaleddé iya ripattékériyé sibawa barab-barang iya kaminang makessingngé polé ri Maséré, sibawa seppulosi kaleddé ripattékéri sibawa gandong, roti sibawa anré-kanré laing untu' naanré ri laleng allalengenna lao ri Maséré. Nainappa naleppessanni joppa silessu-silessurenna, nanakkedato lao ri mennang, “Aja' muwassasai ri lalengngé.” Nasalaini mennang Maséré nalisu ri Kanaan lao ri Yakub, ambo'na mennang. Nakkeda mennang lao ri aléna, “Tuwo mupi Yusuf! Aléna makuwasa ri sininna Maséré!” Naéngkalingana birittaéro, mammennye'ni Yakub, sibawa dé' namateppe lao ri mennang. Iyakiya puranana mennang nacurita maneng iya napowadaé Yusuf lao ri mennang, sibawa wettunna naita karéta iya nakiringngé Yusuf untu' duppaiwi sibawa tiwii lao ri Maséré, mainge'ni polé ri atakkamennyekenna. Adanna, “Tuwo mupi ana'ku Yusuf! Banna iyaro uwacinnai! Harusu'ka lao sibawa mitai ri wettu dé'napa umaté.” Napassadiyani Yakub sininna appunnangenna nainappa joppa. Lettu'nana ri Bersyéba makkasuwiyangenni akkarobangeng lao ri Allataala iya nasompaé Ishak ambo'na. Ri laleng séuwa pakkitang ri wennié, makkedai Allataala lao ri aléna, “Yakub, Yakub!” “Iyyé Puwang,” pappébalinna. Adanna, “Iyya Allataala, Allataala iya nasompaé ambo'mu. Aja' mumétau untu' lao ri Maséré. Maélo-Ka pancajiwi wija-wijammu bangsa iya battowaé kuwaro. Maélo-Ka sibawakko lao ri Maséré, sibawa tiwii wija-wijammu lisu ri wanuwaéwé. Engkai Yusuf ri seddému rékko narapini ajjalemmu.” Najoppana Yakub polé ri Bersyéba. Ana'-ana'na paénré'i ambo'na mennang enrengngé ana' nenniya bainéna mennang ri karéta iya nakiringngé arung Maséré. Tiwi towi mennang olokolo sibawa sininna waramparanna iya nalolongengngé ri Kanaan, nanajoppa lao ri Maséré. Natiwini Yakub sininna wija-wijanna, iyanaritu sininna ana' eppona worowané sibawa makkunraié. Anggota-anggota kaluwargana Yakub iya maccowéé lao ri Maséré iyanaritu: Rubén, ana' macowa; ana'-ana'na: Hénokh, Palu, Hézron sibawa Karmi. Siméon; ana'-ana'na: Yémuél, Yamin, Ohad, Yakhin, Zohar sibawa Saul, ana' polé ri bainéna tau makkunrai Kanaangngé. Léwi; ana'-ana'na: Gérson, Kéhat sibawa Mérari. Yéhuda; ana'-ana'na: Syéla, Pérés sibawa Zérah, na ana'na Yéhuda iya laingngé, iyanaritu Er sibawa Onan matéi ri Kanaan. Ana'-ana'na Pérés: Hézron sibawa Hamul. Isakhar; ana'-ana'na: Tola, Pua, Ayub sibawa Simron. Zébulon; ana'-ana'na: Séréd, Elon sibawa Yahleel. Iya maneng mennang iyanaritu ana'-ana' iya najajiyangngé Léa untu' Yakub ri Mésopotamia, rilainnaé iyaro ana'nato makkunraié iya riyasengngé Dina. Jaji sininna wijanna Yakub iya polé ri bainéna Léa jumellana telluppulo tellu tau. Gad; ana'-ana'na: Zifyon, Hagi, Syuni, Ezbon, Eri, Arodi sibawa Areli. Asyer; ana'-ana'na: Yimna, Yiswa, Yiswi sibawa Beria enrengngé Sérah, ana' daranna mennang. Ana'-ana'na Beria iyanaritu Héber sibawa Malkiél. Iya seppulo enneng tauwéro iyanaritu wija-wijanna Yakub polé ri Zilpa, iyanaritu ata makkunrainna iya nabbéréyangngé Laban lao ri Léa, ana' makkunrainna. Rahél bainéna Yakub mappunnaiwi duwa ana', iyanaritu Yusuf sibawa Bényamin. Ri Maséré lolongengngi Yusuf duwa ana', iyanaritu Manasyé sibawa Efraim iya najajiyangngé bainéna Asnat, ana'na Potiféra, iya mancaji imangngé ri Héliopolis. Bényamin; ana'-ana'na: Béla, Békher, Asybél, Gera, Naaman, Ehi, Ros, Mupim, Hupim sibawa Aréd. Iya seppulo eppa tauwéro iyanaritu wija-wijanna Yakub polé ri bainéna Rahél. Rappina Dan; ana'na Husim. Naftali; ana'-ana'na: Yahzeel, Guni, Yézer sibawa Syilem. Iya pitu tauwéro iyanaritu wija-wijanna Yakub polé ri Bilha, ata makkunrai iya nabbéréyangngé Laban lao ri Rahél ana'na. Wija-wijanna Yakub iya laowé ri Maséré iya manenna jumellana enneng pulona enneng tau, dé' nauttama ménéttu-ménéttunna. Ana'-ana'na Yusuf iya jajiyé ri Maséré engka duwa tau, angkanna kaluwargana Yakub iya lettu'é ri Maséré iya manenna jumellana pituppulo tau. Nasuroni Yakub Yéhuda joppa poddiyoloiwi untu' mobbii Yusuf kuwammengngi nalao sita ambo'na ri Gosyén. Wettunna mennang lettu ri Gosyén, naénrékini Yusuf karétana untu' sita ambo'na kuwaro. Wettunna mennang siruntu, nakaddaoni Yusuf ambo'na sibawa maitta teri. Nakkeda Yakub lao ri Yusuf, “Makkekkuwangngé rélana maté, saba' purani uwitako sibawa missengngi makkedaé tuwo mupo.” Nanakkeda Yusuf lao ri silessu-silessurenna sibawa sumpulolona laingngé, “Harusu'ka lao sibawa paissengiwi arungngé makkedaé silessu-silessurekku sibawa sininna sumpuloloku iya monroé ri Kanaan engkani polé. Maéloka powadangngi makkedaé sining pakkampi bimbala'ko sibawa saping, sibawa mutiwini olokolo'mu enrengngé sininna appunnangemmu. Rékko naobbiko arungngé sibawa makkutanangngi jama-jamammu, powadangngi makkedaé pappiyara olokolo'ko mappammulai baiccu mupi, pada-pada toriyolomu. Namakkuwannanaro nasuroko matu monro ri daéra Gosyén.” Napowadai Yusuf iyaro gau'é nasaba marasa matunai tau Maséré'é untu' siwollompollong sibawa sining pakkampié. Nakkutana arungngé lao ri mennang, “Aga jama-jamammu?” Nappébali mennang, “Idi'é pakkampiki pada-pada toriyolota. Engkaki polé untu' monro ri wanuwaéwé, nasaba ri tana Kanaan masero senna'i akkadérengngé, angkanna dé'na gagana wella untu' bémbé bimbala makkonrotta. Palaloni monro ri daéra Gosyén.” Nakkedana arungngé lao ri Yusuf, “Makkekkuwangngé ambo sibawa silessu-silessuremmu engkani kuwaé. Angga'ni wanuwa Maséré selaku wanuwammu. Leppessanni mennang mattette ri wanuwa Gosyén, daéra iya kaminang makessingngé ri wanuwaéro. Sibawa suroi tau iya maccaé majjama untu' murusu'i olokolo'ku.” Nappaddissengeng toni Yusuf ambo'na lao ri arungngé. Nabarakkakini Yakub arungngé, namakkeda arungngé lao ri aléna, “Siyaga umuru'na Bapa'?” Nappébali Yakub, “Sératuni telluppulo taunna atatta tuwo selaku passollé. Iyaro atuwonna atatta pennoi asukkarakeng sibawa maponco iyaro rékko ripasibandingngi sibawa umuru'na toriyolona atatta selaku passollé.” Purairo massimanni Yakub sibawa mabbéré barakka assarangeng. Nabantuni Yusuf ambo'na sibawa silessu-silessurenna mattette ri Maséré. Nawéréngngi mennang tana selaku appunnangeng ri bagiyang iya kaminang makessingngé ri wanuwaéro, ri seddéna kota Raamses, situru sibawa paréntana arungngé. Nanapassakke'ni Yusuf apparelluwang anréna ambo'na, silessu-silessurenna, sibawa sininna sumpulolona, lettu ri iya kaminang maloloé. Iyaro akkadérengngé makkumani serona, angkanna kégi-kégi dé'gagana inanré. Malemmani namakapé nataro lupu ra'ya' Maséré'é sibawa ra'ya' Kanaangngé. Sises-siseng mennang melli gandong, napaddeppungenni Yusuf dowi pakkamaja gandongngéro, nainappa nataro ri saorajana arungngé. Cappunana dowié ri Maséré sibawa Kanaan, poléni sining tau Maséré'é ri Yusuf sibawa makkeda, “Wérékki inanré! Aja' taleppessakki maté. Cappuni dowita.” Nappébali Yusuf, “Rékko cappuni dowimu, abbéréyanni olokolo'mu; uwérékko matu inanré.” Nanabbéréyanni mennang olokolo'na lao ri Yusuf, nanawérénni mennang inanré naselaku passulléna anyarang, bimbala, bémbé, saping sibawa kaleddé'na mennang. Iyaro taungngé mabbéréni Yusuf inanré lao ri mennang nanawajai mennang sibawa olokolo. Ri tauppémenna polési mennang lao ri Yusuf sibawa makkeda, “Dé' tamaélo subbungekki Puwang makkedaé cappuni dowita sibawa olokolo'ta mancajini appunnangenna Puwang. Dé'na aga-aga riyappunnai iya weddingngé riwéréngngi Puwang, rilainnaé aléta sibawa tanata. Aja' taleppessakki maté! Aja' taleppessangngi sining dare'ta mancaji makabuttu. Elliki silaong tanata na gandongngé selaku pakkamajana. Idi sibawa tanata mancajiwi appunnangenna arungngé. Wérénni gandong untu' sambungngi atuwotta sibawa topa biné untu' riyampo ri dare'ta!” Nanaellini Yusuf sininna tanaé ri Maséré. Tungke' tau Maséré'é tarapassani balu'i tanana, nasaba iyaro akkadérengngé masero senna'i; nasininna tanaé ri Maséré mancajini appunnangenna arungngé. Sininna ra'ya' Maséré'é ripancaji atani ri Yusuf. Séddi-séddina tana iya dé'é naelliwi iyanaritu tanana sining imangngé. Dé'é naparellu balu'i tanana, nasaba riwéréngngi tunjangan tette ri arungngé untu' apparelluwang atuwonna. Nakkedda Yusuf lao ri ra'ya'éro, “Itani, iko sibawa tanamu purani uwelli untu' arungngé. Iyanaé biné iya weddingngé muwampo ri dare'mu. Ri wettu éngngalangngé, harusu'ko mabbéréyangngi tawa limanna lao ri arungngé. Sésana weddinni mupaké untu' biné sibawa untu' inanrému sibawa kaluwargamu.” Nappébali mennang, “Purani napassalama Puwang namattarima kasi'ki. Macennikki mancaji atanna arungngé.” Nainappa napancaji Yusuf iyaro gau'é undang-undang ri wanuwa Maséré, iyanaritu tawa limanna wassélé éngngalangngé harusu'i mancaji appunnangenna arungngé. Lettu makkekkuwangngé iyaro undang-undangngé napajoppa mupi. Banna tanana sining imangngé dé' namancaji appunnangenna arungngé. Makkuwaniro sining tau Israélié mattette ri Maséré, ri daéra Gosyén. Sugini mennang sibawa makkéana' eppo maéga kuwaro. Tuwo mupi Yakub seppulo pitu taunna ri Maséré angkanna umuru'na mancaji sératu patappulo pitu taung. Macawé'nana wettunna maélo maté, naobbini Yusuf, ana'naro, nanakkeda lao ri aléna, “Palénne'ni limammu ri yelle'na poppoppakku sibawa mattanro makkedaé dé' mumaélo kuburu'ka ri Maséré'é. Maéloka rikuburu ri onronna sining toriyoloku; tiwii ujuku polé ri wanuwaéwé sibawa kuburu'i ri laleng tampunna mennang.” Nanappébali Yusuf, “Maéloka pogau'i aga iya napowadaé Ambo'ro.” Nakkeda Yakub, “Attanrono makkedaé mupogau'i matu.” Mattanroni Yusuf, nasukkuru'na Yakub ri onrong atinronna. Siyagangngaré wettu rimunrinna ribirittaiyanni Yusuf makkedaé masero lasani ambo'na. Jaji laoni silaong iya duwa ana'na, iyanaritu Manasyé sibawa Efraim célléngiwi Yakub. Wettunna naéngkalinga Yakub makkedaé poléi Yusuf, napaddeppungenni sininna awatangenna, nanatudang ri onrong atinrongngé. Nakkeda Yakub lao ri Yusuf, “Allataala Iya Pommakuwasaé pura mappaitang alé lao ri iyya ri Lus, ri tana Kanaan, sibawa pura barakkakika.” Makkedai lao ri iyya, “Uwérékko matu maéga ana' eppo, kuwammengngi wija-wijammu mancajiwi maéga bangsa; maéloka mabbéréyangngi wanuwaéwé lao ri wija-wijammu selaku appunnangenna mennang untu' mannennungeng.” Napatteruni Yakub, “Yusuf, iya duwa ana'mu Efraim sibawa Manasyé iya jajiyé ri Maséré'é ri wettu dé'napa ulettu kuwaé, uwangga'i ana'ku pada-pada muto Rubén sibawa Siméon. Rékko lolongekko ana'-ana'pa, dé' uwangga'i mennang selaku ana'ku sangadinna tette'i ana'mu; manana mennang natarimai matu polé ri Efraim sibawa Manasyé. Upogau'i iyaro untu' Rahél indo'mu. Ri laleng allalengekku lisu polé ri Mésopotamia, matéi indo'mu ri tana Kanaan, dé' namabéla polé ri Efrata, namasara senna'ka. Ukuburu'ni kuwaro, ri wiring laleng laowé ri Efrata.” (Makkekkuwangngé Efrata riissengngi selaku Bétléhém.) Wettunna naita Yakub iyaro ana'-ana'na Yusuf, makkutanani, “Niga iyaé ana'-ana'é?” Nappébali Yusuf, “Iyanaé ana'-ana'ku iya nabbéréyangngé Allataala lao ri iyya kuwaé, ri Maséré.” Nakkeda Yakub, “Paddeppéi mennang ri iyya kuwammengngi ubarakkakiwi.” Dé' naulléi Yakub makkita sibawa macakka nasaba macowani sibawa mawutani matanna. Napaddeppéni Yusuf iyaro ana'-ana'é ri Yakub, nanakaddaowi sibawa nabauwi mennang. Nainappa makkeda Yakub lao ri Yusuf, “Dé' sises-siseng usenna-sennai maélo mupa siruntu'ko, iyakiya makkekkuwangngé mala Allataala palaloka mita towi ana'-ana'mu.” Nainappa nala Yusuf mennang polé ri riwaanna Yakub, nainappa aléna suju' ri yolona ambo'na. Purairo nabarakkakini Yusuf, adanna, “Allataala, Aléna ritu Puwang nasompaé Abraham sibawa Ishak, Aléna ritu pimpikka lettu makkekkuwangngé; Aléna ritu malaéka iya puraé paleppe'ka polé risininna bahayaé. Tennapodo iyaro Allataala barakkakiwi iyaé ana'-ana'é. Tennapodo tuwoi matteru asekku sibawa asenna Abraham nenniya Ishak nasaba iyaé ana'-ana'é! Tennapodo makkéana eppoi mennang, sibawa massossorengngi maéga ri linoé.” Dé' namasennang Yusuf wettunna naita ambo'na palénne'i lima ataunna ri tompo ulunna Efraim; nanakkatenninni limanna ambo'na untu' palétté'i polé ri ulunna Efraim lao ri ulunna Manasyé. Adanna lao ri Ambo'na, “Aja' nappakkuwaro, Ambo'. Iyanaé ana' macowa; palénne'ni lima ataunna Ambo' ri tompo'na ulunna.” Iyakiya massampéyangngi ambo'na, adanna, “Uwisseng, ana'ku, uwisseng. Battowai matu akuwasanna Manasyé sibawa wija-wijanna mancaji towi matu bangsa iya battowaé. Iyakiya anrinna lebbi battowai matu akuwasanna naiya aléna, sibawa wija-wijanna anrinnaro mancajiwi matu bangsa-bangsa iya battowaé.” Nanabarakkakisi iyaro ana'-ana'é ri essoéro, adanna, “Nateppui matu tau Israélié asemmu rékko nabarakkakiwi tauwé. Makkedai matu mennang, ‘Tennapodo Allataala mébbuko pada-pada Efraim sibawa Manasyé.’ ” Rimakkuwannanaro napariyoloi Yakub Efraim naiya Manasyé. Nanakkedana Yakub lao ri Yusuf, “Pada-pada iya muwitaé, macawé'ni ajjalekku, iyakiya Allataala tulukko matu sibawa tiwiko lisu ri wanuwanna toriyolomu. Ri iko ritu, natenniya lao ri silessu-silessuremmu, uwabbéréyangngi Sikhem, daéra iya macommo'éro iya usittaiyé polé ri tau Amorié sibawa peddang enrengngé panaku.” Nainappa naobbi Yakub ana'-ana'na sibawa makkeda, “Addeppungenno kuwaé, ri seddéku. Maéloka paissengiko aga iya mupéneddingiyé matu ri esso mangoloé: Addeppungenno, éh ana'-ana' Yakub. Engkalingai Israél, ambo'mu. Rubén, ana'ku macowaé, iko ritu awatangekku, buwa bunge' abaraningekku. Iko pobbarani sibawa pommawatang ri yelle'na sininna ana'ku. Magampakko taggottang pada-pada uwai, angkanna tenniya iya mapongngé; saba' matinroko sibawa gundi'ku, mucarépaiwi onrong atinronna ambo'mu. Siméon sibawa Léwi massilessureng; senjatana mennang napaké awatangeng. Dé' umaélo maccowé ri laleng assipekkekenna mennang, makkuwatoro ri laleng addeppungenna mennang. Saba' paunoi mennang ri laleng caié, képoi banténgngé untu' asennangeng. Tattanroi caina mennang, nasaba serona. Tattanroi caina mennang, nasaba abeccokenna. Upassara-sarangngi matu mennang, ri sininna Israélié. Uwassiyamporengngi matu mennang ri yelle'na sininna bangsaé. Yéhuda, muwanrekké'i matu cekkonna balimmu; mappojiwi matu silessu-silessuremmu sibawa suju' ri yolomu. Yéhuda pada-padai singa loloé; naunoi anréna, nainappa lisu ri saranna; makkailii nainappa léwu, nadé' séddi tau barani rukkai. Nakkatenningngi matu Yéhuda tekkeng akkarungengngé, mapparéntai matu wija-wijanna mannennungeng. Tiwii matu bangsa-bangsaé pakkasuwiyang, enrengngé suju' sibawa tunru ri yolona. Nassiyorengngi matu ana' kaleddé'na ri ajué, pong anggoro iya kaminang makessingngé. Nabissaiwi pakéyanna sibawa anggoro, anggoro siccella'é daraé. Macella'i matanna nasaba ménungngi anggoro, maputéi isinna nasaba ménungngi dadi. Monroi matu Zébulon ri wiring tasi'é; soréi matu kappala-kappala'é ri wirinna; lettu ri Sidon pakkasésénna daérana. Iyaro Isakhar pada-padai kaleddé mawatangngé iya mallekkué ri yelle'na baka tékéna. Naitani pékkugi kessinna iyaro onrongngé sibawa pékkugi gellona iyaro wanuwaé, nabbukku'na macenning ripattékéri, sibawa ripassa majjama selaku ata. Iko Dan, muwadélékiwi matu bangsamu, mancajiko pada-pada suku laingngé ri Israélié. Pada-padako ulaé ri wiring lalengngé, ula mamosoé ri wiring lorongngé, iya pitto'éngngi amputuna anyarangngé angkanna tallitta pakkinnyaranna. Oh Puwang, asalamakeng iya Muwabbéréyangngé, iyanaro utajet-tajeng. Gad, nagasako matu parampo'é, iyakiya balé'ko matu rampo'i mennang. Asyer, inanrému maona namakessing. Mupassadiyangengngi matu inanré untu' sining arungngé. Naftali, samanna jonga leppe, magello senna ana'-ana'na. Yusuf padai kaleddé loloé, kaleddé liya seddéna mata uwai, lari-lari ri émpeng bulué. Maggasai balié sibawa masero, mallellungngi sibawa pana. Iyakiya tette'i Yusuf masse taiyyana, tette'i masse panana, nasaba akuwasanna Pakkampi Pommawatangngé, Allataalana Yakub, Pallinrunna Israélié. Allataalana ambo'mu tulukko; Iya Pommakuwasaé barakkakiko sibawa bosi polé ri langié enrengngé uwai polé ri yawana tanaé. Sibawa ana' enrengngé saping, gandong sibawa bunga. Barakka'na Allataalana ambo'mu pakacauriwi asugirenna sining bulu iya macowa senna'é. Tennapodo nonnoni sininna barakka'éro ri tompo ulunna Yusuf, ri yasé'na linrona. Aléna ritu dé' padanna ri yelle'na silessu-silessurenna. Bényamin iyanaritu sarigala masekkangngé. Ri éléé natikkengngi anréna. Ri wennié nabagé-bagéi.” Iyanaro iya seppulo duwa sukunna Israélié, sibawa ada-ada iya napowadaé ambo'na mennang wettunna mabbéré selleng assarangeng lao ri tungke'-tungke' mennang. Kuwaniro rikuburu Abraham sibawa Sara, Ishak sibawa Ribka; nakkuwatoro ukuburu Léa. Dare sibawa gowa iya engkaé kuwaro purani naelli polé ri tau Hét-é. Kuburu'ka kuwaro.” Puranana mappaseng Yakub lao ri ana'-ana'na, léwuni, nanamaté. Naparebbani aléna Yusuf ri tubunna ambo'na nanaterito sibawa bauwi rupanna. Nainappa naparéntanni Yusuf tukang parrampa-rampa ujué untu' rampa-rampaiwi ujuna Yakub. Iyaro jama-jamangngé ittana patappulo essona, iyanaritu wettu iya biyasaé riyapparelluwang untu' rampa-rampaiwi ujué. Mabbaratani tau Maséré'é untu' Yakub, pituppulo esso ittana. Leppe'nana wettu abbaratangngé, makkedani Yusuf lao ri pegawé-pegawénna arungngé, “Palettu'i iyaé pasengngé ri arungngé, ‘Wettunna ambo'na atatta macawé'ni ajjalenna, nasuroi atatta majjanci lao ri aléna, makkedaé maéloi atatta kuburu'i ri laleng kuburu iya puraé napassadiya ri tana Kanaan. Rimakkuwannanaro, tapalaloni atatta lao untu' kuburu'i ambo'na atatta. Purapiro nalisu matu atatta.’ ” Nanakkedana arungngé, “Laono kuburu'i ambo'mu pada-pada iya puraé ujancingngékko.” Nanalaona Yusuf untu' kuburu'i ambo'na. Sininna pegawénna arungngé, sining tomacowana saorajaé sibawa sininna tomarajana Maséré, laoni sibawangngi Yusuf. Kaluwargana, silessu-silessurenna, sibawa sumpulolona laingngé laoto. Banna ana'-ana' baiccu'é sibawa olokolo'na mennang nasalai ri daéra Gosyén. Pasukang iya makkarétaé sibawa makkinnyarangngé maccowéto, angkanna allompéngenna iyaro tauwé malampé senna. Wettunna mennang lettu ri onronna tauwé mappeppé gandong ri Gorén-Haatad, ri seddé alauna Salo Yordan, mpatinni mennang sibawa messé enrengngé sadda macenno. Pakangkani Yusuf upacara mabbarata, pitungngesso ittana. Wettunna naita pabbanuwa Kanaan iyaro abbaratangngé ri Gorén-Haatad, makkedani mennang, “Temmaka masé'na upacara abbaratanna tau Maséré'éro!” Iyanaro saba'na nariyaseng iyaro onrongngé Abél-Mizraim. Makkuwaniro ana'-ana'na Yakub pogau'i aga iya nappasengengngé lao ri mennang. Natiwini mennang ujuna lao ri Kanaan sibawa kuburu'i ri laleng Gowa Makhpéla, ri seddé alauna Mamré, ri dare iya puraé naelli Abraham polé ri Efron tau Hét-éro, untu' napancaji akkéburukeng. Puranana nakuburu Yusuf ambo'na, lisuni ri Maséré silaong silessu-silessurenna sibawa sininna tau iya maccowériyéngngi untu' kuburu'i iyaro ambo'na. Maténana ambo'na mennang, makkedani sining kakana Yusuf, “Pékkugi akkalarapanna nabenciki Yusuf sibawa maéloi wale'i jata riyolo?” Rimakkuwannanaro nakirinni mennang pasengngéwé lao ri Yusuf, “Ri wettu dé'napa namaté ambo'ta, nasuroki powadakko makkuwaéwé, ‘Addampengenni asalang iya napogau'é riyolo kaka-kakamu lao ri iko.’ Jaji, selaku ata-atanna Allataala iya nasompaé ambo'ta, riyéllauwi, addampengenni asalang iya puraé ripogau'.” Terini Yusuf wettunna natarima iyaro pasengngé. Nainappa iyaro silessu-silessurenna polé sibawa suju' ri yolona enrengngé makkeda, “Idi'é atammu.” Iyakiya makkedai Yusuf lao ri mennang, “Aja' mumétau; saba' dé' naweddikka tinda selaku Allataala. Purano sipekke untu' kédo maja lao ri iyya, iyakiya Allataala pinrai iyaro jaé mancaji adécéngeng, kuwammengngi nasibawang iyaro kajajiyangngé riyolo maéga tau iya tuwoé makkekkuwangngé weddingngi ripassalama. Aja' mubata-bata. Upaggenne'i matu apparelluwammu sibawa ana'-ana'mu.” Makkuwaniro pattennangngi atinna mennang sibawa ada-ada iya mabessaé, angkanna mennang masé. Tette'i Yusuf monro ri Maséré sibawa sumpulolona; tuwoi narapi makkéumuru sératu seppulo taung. Narapi mupa mitai ana' eppona Efraim. Narapi topa tarana'i ana'-ana'na Makhir, iyanaritu eppona Manasyé, selaku ana'na muto. Adanna lao ri silessu-silessurenna, “Macawé'ni ajjalekku, iyakiya pasti Allataala piyarako sibawa pimpikko massu polé ri wanuwaéwé, lao ri wanuwa iya puraé najjanciyangngé sibawa tanro lao ri Abraham, Ishak sibawa Yakub.” Nainappa Yusuf suroi sininna ana'na silessurenna mattanro, adanna, “Ajjancino lao ri iyya, rékko Allataala pimpikko lao ri wanuwaéro, mutiwii towi ujuku.” Namaténa Yusuf ri Maséré ri umuru sératu seppulo taung. Narampa-rampaini mennang ujuna nanataroi ri laleng donié. Yakub iya riyasengngétto Israél, laowi ri Maséré silaong ana'-ana'na enrengngé kaluwargana mennang tungke'-tungke'. Iyaro ana'-ana'na Yakub iyanaritu: Rubén Siméon Léwi Yéhuda Isakhar Zébulon Bényamin Dan Naftali Gad Asyer Iyaro wija-wijanna Yakub jumellana iya maneng pituppulo tau. Yusuf lebbi riyoloni engka ri Maséré. Siyagangngaré wettu rimunrinna maténi Yusuf sibawa silessu-silessurenna, makkuwatoro sining tau iya naéwaé sippangka. Iyakiya wija-wijanna mennang, iyanaritu sining tau Israélié, makkéana' epponi maéga senna, sibawa jumellana mennang tattambai masitta senna, angkanna pennoni wanuwa Maséré sibawa mennang. Nainappa séddi arung baru iya dé'é naissengngi Yusuf mappammula paréntai Maséré. Makkedani lao ri ra'ya'na, “Iyaro sining tau Israélié mabbahaya senna lao ri idi, nasaba maéga senna'ni mennang sibawa lebbi mawatangngi naiya idi. Ebara'na kajajiyangngi musué, weddissa mennang siyempe balié untu' méwaki, nainappa lari salaiwi iyaé wanuwaé. Harusu'ki sappa laleng kuwammengngi aja' mennang nancaji pédé maéga.” Nanaakkana sining tau Maséré'é jennang untu' sussaiwi atuwonna bangsa Israélié sibawa majjama ladde. Ripassai mennang patettongengngi arung Maséré'é kota Pitom sibawa Raamses untu' pusa'na attarong barangngé. Iyakiya pédé ripanrasa-rasai ri tau Maséré'é, pédé tattambai jumellana tau Israélié, sibawa pédé tassiyai mennang lao risininna wanuwaéro, angkanna métauni tau Maséré'é lao ri mennang. Napédé mabecco'na mennang panrasa-rasai tau Israélié, sibawa mébbui atuwo-tuwonna masussa. Temmapparessé babuwa ripassai mennang majjama ladde ri proyé'-proyé' pembangunangngé sibawa risining dare'é. Nanabbéréna parénta arung Maséré'é lao ri Sifra sibawa Pua, duwa bidang iya tulungngéngngi sining makkunrai Ibranié mémmana. Makkedai arung Maséré'é, “Wettummu tulungngi mémmana makkunrai Ibranié, éngngerangngi iyaé: Rékko ana' iya jajiyéro worowané, unoi! Rékko ana' iya jajiyéro makkunrai, leppessanni tuwo.” Iyakiya iya duwa bidangngéro métaui ri Allataala. Dé' mennang namaélo pogau'i paréntana arungngé sibawa leppessangngi sininna ana'lolo worowané tuwo. Nariyobbina ri arungngé iya duwa bidangngéro sibawa makkutana, “Magi muleppessangngi ana'-ana' worowané tuwo?” Nappébali mennang, “Makkunrai Ibranié dé' napada-pada makkunrai Maséré'é. Magampang senna mennang mémmana. Ri wettu dé'napa napolé bidangngé, jaji mémenni ana'na.” Nanabbéréyanni arungngé iyaé paréntaé lao ri sininna ra'ya'na, “Tungke' ana' worowanéna tau Ibranié iya nappaé jaji harusu'i ribuwang ri laleng Salo Nil, iyakiya sininna ana' makkunraié wedding muwa rileppessang tuwo.” Iyaro wettué engka séddi worowané polé ri suku Léwi, kawing sibawa séddi makkunrai poléto ri sukuéro. Nanajajiyanna iyaro makkunraié séddi ana' worowané. Wettunna naita makkedaé iyaro ana'loloé magello senna, nasubbuni tellumpuleng ittana. Iyakiya iyaro ana'loloé dé' naulléi subbui maitta-itta. Nanalana iyaro indo'na séddi baka polé ri wella arasoé, nanalapiriwi sibawa kamalo kuwammengngi dé' nauttamakiwi uwai. Iyaro ana'loloé nataroni ri laleng bakaéro, nainappa natiwi ri Salo Nil nanataroi ri tengnga-tengngana araso maddapurengngé ri wiring saloéro. Kaka makkunrainna iyaro ana'loloé tettongngi mabéla-béla polé kuwaro untu' mitai aga iya kajajiyangngé matu sibawa anrinna. Napoléna ana' makkunrainna arungngé. Nonnoi ri saloé untu' cemmé nasining pattumaninna joppa-joppai ri wirinna saloé. Tappa naita muni ana' makkunrainna arungngé iyaro bakaé ri tengnga-tengngana araso maddapurengngé, nainappa nasuro séddi ata makkunrainna malai. Wettunna natimpa ana' makkunrainna arungngé iyaro bakaé, naitani engka ana'lolo ri lalenna, naiyaro ana'loloé mattengngangngi teri. Kasiyanni ana' makkunrainna arungngé lao ri aléna sibawa makkeda, “Iyaé ana'na tau Ibranié.” Nanakkutanana iyaro kakana ana'loloé lao ri ana' makkunrainna arungngé, “Maéloiga ana'na arungngé usappareng séddi makkunrai Ibrani untu' pasusui iyaro ana'loloé?” Nappébali ana'na arungngé, “Makessinni.” Nanalaona iyaro ana'daraé mobbii indo'na muto. Nakkeda ana'na arungngé lao ri makkunraiéro, “Tiwini iyaé ana'loloé, namupasusungekka; nawéréppo matu saro indo'ku.” Nanatiwini iyaro ana'loloé sibawa napasusui. Wettunna battowa-battowani iyaro ana'loloé, nabbéréyanni indo'na lao ri ana'na arungngé. Nainappa ana'na arungngé pancajiwi ana' piyarana. Nakkeda ana'na arungngé, “Uwéréngngi aseng Musa, saba' uwalai polé ri uwai.” Wettunna battowani Musa, laoni sita sining tau sibangsana. Naitani pékkugi mennang ripassa jamai jama-jamang matane'é. Naita toni séddi tau Maséré mpunoi séddi tau Ibrani. Gilinni Musa mattulili, na wettunna naita makkedaé dé'gaga pénessaiwi, naunoni iyaro tau Maséré'é nainappa nasubbu ujuna ri laleng kessi'é. Pappa bajana laosi Musa, nanaitani duwa tau Ibrani mattengngang mallaga. Nakkutana Musa lao ri tau iya pasalaéro, “Magi muwunrui silaommu?” Nappébali iyaro tauwé, “Niga makkako mancaji pamimping sibawa hakitta? Maélo tokkoga mpunoka, pada-pada tau Maséré iya muwunoéro?” Namétauna Musa sibawa mappikkiri, “Cilaka! Kaissengenni iyaro pangkaukekku.” Iyakiya siyagangngaré pakkampi paddésu'i iyaro ana'-ana'daraé. Nanapoléna Musa tulungngi mennang sibawa paénungengngi olokolo'na mennang. Wettunna mennang lisu, makkutanani ambo'na, “Magi mumasitta makkuwa lisu iyaé essoé?” Namappébali mennang, “Engka séddi tau Maséré tulukki polé ri pagganggunna sining pakkampi laingngé. Mala nasérokekki uwai, sibawa paénungengngi olokolo'ta.” Nakkutana Yitro lao ri ana'-ana'na, “Kégani palé makkekkuwangngé? Magi musalaiwi iyaro tauwé? Laono muwobbii tasisama manré.” Nasitujuini Musa untu' monro kuwaro. Nainappa Yitro pasiyalai ana'na iya riyasengngé Zipora sibawa Musa. Najajiyanni Zipora séddi ana' worowané. Iyaro ana'é nawérénni aseng Gérsom, nasaba mappikkiri'i Musa, “Séddiki tau laing kuwaé.” Mattaut-taung ri munrinna maténi arung Maséré. Iyakiya bangsa Israélié maddaréké mupi nasaba ripowatai mennang, angkanna gorani mennang méllau tulung. Lettu'ni ri Allataala kelli'na mennang. Nariyéngkalingana mennang ri Allataala, sibawa naéngngeranni assijancin-Na sibawa Abraham, Ishak sibawa Yakub. Naitani sining tau Israélié ripowata, nanapettuini untu' tulungngi mennang. Iyaro wettué nampini Musa sining bimbala'na sibawa bémbé'na Yitro, matuwanna, imang ri tana Midian. Wettunna narimpa olokolo'naro mallétto ri padang kessi'é, lettu'ni ri Bulu Sinai, bulu iya mapaccingngéro. Kuwaniro nappaitang aléna malaéka'na Puwangnge lao ri Musa ri laleng luwa api iya massué polé ri tengnga-tengngana alekale'é. Naitani Musa iyaro alekale'é malluwa, iyakiya dé' naanréi api. Nappikkiri'na, “Dé' padanna. Iyaro alekale'é dé' naanréi api! Makessingngi maddeppéka mitai.” Naitani Puwangnge Musa maddeppériwi iyaro onrongngé, namangobbi-Na polé ri tengnga-tengngana alekale'éro, “Musa! Musa!” Nappébali Musa, “Engkaka kuwaé.” Nanakkeda Allataala, “Aja' mumacawé. Ludungngi sandala'mu, saba' tettokko ri tana iya mapaccingngé. Iyya'é Allataalana néné-nénému, Allataalana Abraham, Ishak sibawa Yakub.” Natongkoni Musa rupanna, saba' métaui mitai Allataala. Nanakkedana Puwangnge, “Uwitani anrasa-rasanna umma'-Ku ri Maséré, sibawa méngkalingai mennang gora méllau ripaleppe polé risining tau iya tenre'éngngi mennang. Sitongenna, uwisseng maneng anrasa-rasanna mennang. Rimakkuwannanaro nonnoka untu' paleppe'i mennang polé ri limanna tau Maséré'é sibawa tiwii mennang massu polé ri wanuwaéro mattuju riséuwaé wanuwa iya malowangngé. Tanana sugi sibawa macommo, namakkekkuwangngé naonroiwi bangsa Kanaangngé, bangsa Hét-é, Amorié, Féris-é, Héwié sibawa Yébus-é. Uwéngkalingani terinna bangsa Israélié, sibawa Uwita toni pékkugi mennang ritenre ri bangsa Maséré'é. Makkekkuwangngé iko Usuro untu' mangolo ri arung Maséré kuwammengngi weddikko pimpingngi bangsa-Ku massu polé ri wanuwaéro.” Iyakiya makkedai Musa lao ri Allataala, “Niga iyya'é, angkanna mulléi mangolo ri arungngé sibawa tiwii tau Israélié massu polé ri Maséré?” Nappébali Allataala, “Utulukko matu. Sibawa rékko purani mupassu iyaro bangsaé polé ri Maséré, massompako matu lao ri Iyya ri buluéwé. Iyanaro buttinna makkedaé Iyya suroko.” Nappébali Musa, “Iyakiya rékko usitangngi sining tau Israélié sibawa makkeda lao ri mennang: ‘Allataalana néné-nénému suroka lao ri iko,’ pasti makkutanai matu mennang, ‘Niga asenna?’ Na agana harusu ubalingengngi mennang?” Nakkeda Allataala, “Iyya iyanaritu Iyya engka. Iyanaé harusu mupowada lao ri bangsa Israélié, Aléna iya riteppué Iyya engka, pura suroka lao ri iko. Abbirittang towi lao ri mennang makkedaé Iyya, Puwang, Allataalana néné-nénéna mennang, Allataalana Abraham, Ishak sibawa Yakub, suroko lao ri mennang. Iyya'na Puwang, iyanaro asek-Ku untu' mannennungeng. Iyanaro teppungek-Ku untu' sininna bangsaé massossoreng. Laono namupaddeppungengngi sininna pamimpinna Israélié. Appallebbangenni lao ri mennang makkedaé Iyya, Puwang, Allataalana néné-nénéna mennang, Allataalana Abraham, Ishak sibawa Yakub, pura mappaitang alé lao ri iko. Paissengiwi mennang makkedaé laona ri mennang sibawa uwitani pékkugi mennang rigaukeng ri bangsa Maséré'é. Sibawa pura upettuini untu' tiwii mennang massu polé ri Maséré, onronna mennang ritenre, sibawa mantara'i mennang lao riséuwaé wanuwa iya sugié namacommo, wanuwanna bangsa Kanaangngé, bangsa Hét-é, Amorié, Féris-é, Héwié sibawa Yébus-é. Naéngkalingai matu umma'-Ku ada-adammu. Nainappako silaong sining pamimpinna Israélié harusu lao mangolo ri arung Maséré sibawa makkeda lao ri aléna: ‘ Puwang, Allataalana tau Ibranié poléni pannessai aléna ri idi. Makkekkuwangngé palaloni lao sibbéla tellungngesso allalengeng ri padang kessi'é untu' makkasuwiyangeng akkarobangeng lao ri Puwangnge, Allataalata.’ ” Nainappa makkedasi Allataala, “Uwisseng dé' naleppessakko matu arung Maséré lao, sangadinna rékko ripassai. Iyakiya Upakéi matu akuwasak-Ku, sibawa hukkungngi Maséré sibawa sining abala maseroé iya Upapolé kuwaro. Purairo, napalalono matu joppa. Uwébbui matu tau Maséré'é masémpo ati lao ri iko, angkanna wettunna umma'-Ku joppa, dé' mulao sibawa lima kosong. Tungke' makkunrai Israélié méllauwi matu polé ri balibolana tau Maséré'é sibawa makkunrai Maséré'é iya naéwaé sibola, pakéyang sibawa paréwa péra' nenniya ulaweng. Mupappakéiwi matu iyaro ri ana'-ana'mu. Nanallalengiwiro murampasa'i matu tau Maséré'é.” Nanappébali Musa lao ri Puwangnge, “Iyakiya pékkugi akkalarapanna rékko sining tau Israélié dé' namaélo mateppe sibawa dé' namaélo bati-batiwi ada-adakku? Aga harusu upogau' akkalarapanna makkedai mennang makkedaé dé' nappaitang alé Puwangnge lao ri iyya?” Nakkutana Puwangnge lao ri Musa, “Aga iyaro ri limammu?” Nappébali Musa, “Tekkeng.” Nakkeda Puwangnge, “Appéyangngi ri tanaé.” Nappéyanni Musa, natappinrana iyaro tekkengngé mancaji ula nalarina Musa mabélaiwi. Nakkeda Puwangnge lao ri Musa, “Addeppériwi iyaro ulaé namuwakkatenningngi ikko'na.” Naddeppérini Musa sibawa tikkengngi iyaro ulaé iya mancaji tekkengngé paimeng masitta ri laleng limanna Musa. Nakkeda Puwangnge, “Pogau'ni makkuwaro kuwammengngi namateppe sining tau Israélié makkedaé Iyya, Puwang, Allataalana néné-nénéna mennang, Allataalana Abraham, Ishak sibawa Yakub, pura mappaitang alé lao ri iko.” Makkedasi paimeng Puwangnge lao ri Musa, “Puttama'i limammu ri laleng wajummu.” Naturusini Musa, na wettunna nagetteng massu limanna, iyaro limaé maputé senna'ni nasaba nakennai lasa oli iya mabbahayaé. Nanakkeda Puwangnge, “Puttama'i paimeng limammu ri laleng wajummu.” Napogau'ni Musa makkuwaro, na wettunna napassusi paimeng, iyaro limaé majjappani. Nakkeda Puwangnge, “Narékko dé' namaélo mennang mateppe ri iko, iyaré'ga dé' namateppe puranana naita anu makalallaing mammulangngé, naiyaé anu makalallaingngé mébbui mennang mateppe. Rékko dé' topa mennang namaélo mateppe lao ri iko namuni purani naita iya duwa anu makalallaingngéwé, sibawa dé' namaélo bati-batiwi ada-adammu, alano céddé uwai polé ri Salo Nil namutiri'i ri tanaé. Iyaro uwai tappinrai matu mancaji dara.” Iyakiya makkedai Musa, “Oh Puwang, tenniyaka tau iya maccaé mabbicara, muwi riyolo iyaré'ga makkekkuwangngé, puranana Puwang mabbicara lao ri iyya. Matane lilaku, matengnge'ka mabbicara sibawa tassakka-sakkana.” Nakkeda Puwangnge lao ri aléna, “Niga mpéréngngi tému tolinoé? Niga mébbui pépé iyaré'ga mataru-taru? Niga mébbui makkita iyaré'ga buta? Tenniyaga Iyya, Puwang? Makkekkuwangngé, laono, utulukko matu mabbicara sibawa pagguruko aga iya harusu'é mupowada.” Iyakiya mappébaliwi Musa, “Uwéllauwi, aja' musuroka, oh Puwang, suroni tau laingngé.” Namacaina Puwangnge lao ri Musa sibawa makkeda, “Dé'ga muwappunnai silessureng iya riyasengngé Harun? Uwisseng maccai mabbicara. Sitongenna, engkai ri laleng allalengengngé lao kuwaé, namasennangngi matu méwako sita. Abbicarano sibawa aléna sibawa paissengiwi aga iya harusu'é napowada. Utulukko matu sipadduwa sibawa pagguruko aga iya harusu'é mupowada sibawa mupogau'. Harusu'i mabbicara ri laleng asemmu ri yolona ra'ya'é. Mancajiwi matu jurubicarammu nanaangga'ko matu pada-pada Allataala iya makkedaé aga harusu mupowada. Tiwini iyaro tekkengngé, mébbuko matu sining anu makalallaing nasibawang iyaro.” Purairo lisuni Musa ri bolana Yitro, matuwanna, sibawa makkeda lao ri aléna, “Palalona lisu ri Maséré untu' célléngiwi silessu-silessurekku sibawa mitai aga tuwo mupi mennang.” Nakkeda Yitro lao ri Musa, “Laono sibawa salama.” Wettunna Musa ri tana Midian mupa, makkedai Puwangnge lao ri aléna, “Lisuno ri Maséré. Sininna tau iya macinnaé mpunoko maténi.” Nanaérani Musa bainéna sibawa ana'-ana'na nanapatonangngi mennang ri kaleddé'é nanajoppa mennang silaong lao ri Maséré. Nasaba paréntana Allataala, natiwi towi Musa tekkenna. Makkedani Puwangnge lao ri Musa, “Purano uwéréng akuwasang untu' mébbu sining anu makalallaingngé. Jaji rékko lisuno ri Maséré matti, pogau'ni sininna anu makalallaingngéro ri yolona arung Maséré. Iyakiya upancajiwi matu matedde ati, angkanna dé' namaélo palaloi iyaro bangsaé lao. Nainappa akkedano lao ri arungngéro makkedaé Iyya, Puwang, mappaseng makkuwaé: ‘Israélié iyanaritu ana'-Ku iya macowaé, napurano Uparéntang untu' palaloi ana'-Kuro lao kuwammengngi naulléi massompa ri Iyya, iyakiya musampéyangngi. Makkekkuwangngé Uwunoi matu ana'mu iya macowaé.’ ” Riséuwaé onrong makkéma ri laleng allalengengngéro, poléni Puwangnge ri Musa sibawa maélo mpunoi. Zipora, bainéna, malani séddi batu tareng nanasunna'i ana'na, nainappa nagéssang ajéna Musa. Nakkeda Zipora, “Lakkai darako lao ri aléku.” Napowadai iyaro gau'é ri laleng assisumpungenna sibawa sunna. Nadé'na najaji Puwangnge mpunoi Musa. Nakkedana Puwangnge lao ri Harun, “Laono ri padang kessi'é untu' méwai sita Musa.” Nalaona Harun, nasiruntu'na anrinna ri bulu mapaccingngé, nanabauwi. Nacuritani Musa lao ri Harun sininna iya napowadaé Puwangnge lao ri aléna wettunna risuro lisu ri Maséré, makkuwatoro passalenna sininna anu makalallaing iya harusu'é naébbu. Nanalaona Musa sibawa Harun ri Maséré sibawa paddeppungengngi sininna pamimping Israélié. Napalettu'ni Harun lao ri mennang sininna iya napowadaé Puwangnge lao ri Musa, nanapogau'ni Musa sininna anu makalallaingngé ri yolona sining tauwéro. Namateppe'na mennang, na wettunna mennang naéngkalinga makkedaé Puwangnge pura jampangiwi bangsa Israélié sibawa mitai sininna anrasa-rasanna mennang, suju'ni mennang massompa. Nanalaona Musa sibawa Harun mangolo ri arung Maséré sibawa makkeda, “Makkuwaiyé paréntana Puwang, Allataalana Israélié, ‘Palaloi bangsa-Ku lao kuwammengngi weddingngi mennang massompa lao ri Iyya ri padang kessi'é.’ ” Nakkutana arungngé, “Niga iyaro Puwangnge? Magi naharusu'ka bati-batiwi sibawa palaloi bangsa Israélié lao? Dé' uwissengngi iyaro Puwangnge, sibawa dé' upalaloi bangsa Israélié lao.” Nakkeda Musa sibawa Harun, “Purani nappaitang aléna Allataalana tau Ibranié lao ri idi. Palaloni lao ri padang kessi'é sibbéla tellungngesso allalengeng untu' makkasuwiyang akkarobangeng lao ri Puwang, Allataalata. Rékko dé' naripogau' iyaro gau'é, naunoki matu sibawa lasa iyaré'ga musu.” Adanna arungngé lao ri Musa sibawa Harun, “Magi muwébbui iyaro sining tauwé mallupaiwi jama-jamanna mennang? Suroi iyaro ata-ataé majjama! Iyaro sining tauwé maéga senna'ni jumellana. Namakkekkuwangngé maéloko kuwammengngi mappésauwi mennang majjama!” Iyatoro essoé sining jennang bangsa Maséré'é sibawa sining mandoro bangsa Israélié lolongeng parénta polé ri arungngé, “Aja'na muwabbéré daramé lao ri bangsaéro untu' mébbu bata. Leppessanni aléna mennang lao sappai. Iyakiya suroi mennang mébbu bata dé' nakurang jumellana pada iya pura labe'é. Maéloi mennang makkuttu-kuttu bawang; iyanaro saba'na natteru mennang mannoko-noko kuwammengngi naripalalo lao untu' makkasuwiyangeng akkarobangeng lao ri Allataalana mennang. Passai iyaro sining tauwé majjama lebbi rejjing, kuwammengngi nasibu' sibawa jama-jamangngé nadé' nappunnai wettu untu' méngkalinga curita-curita bellé.” Massuni sining jennang bangsa Maséré'é sibawa sining mandoro Israélié namakkeda lao risining tau Israélié, “Napparéntangngi arungngé kuwammengngi nadé'na nariwérékko daramé. Iko muto harusu sappai kégi-kégi, iyakiya éngngerangngi, bata iya muwébbué dé' nawedding kurang polé ri pura labe'é.” Nanalaona tau Israélié jalajja'i sininna tana Maséré untu' paddeppungeng daramé. Maddessa'ni matteru sining jennangngé kuwammengngi natungke' esso powassélé'i mennang bata iya padaé égana pada-pada wettunna mennang riwéréng daramé. Iyaro sining jennangngé naunruni sining mandoro Israél iya risuroé jagaiwi jama-jamangngé. Makkutanani mennang, “Magi makkekkuwangngé bangsamu dé'na napowassélé bata iya padaé égana pada-pada riyolo?” Nanalaona mangolo sining mandoro Israélié ri arungngé sibawa maddaréké, “Magi Datu napogau'i makkuwaé lao ri idi? Dé'na nariwérékki daramé, iyakiya ripassaki mébbu bata! Makkekkuwangngé riyunruni padahal pegawé-pegawénna Datu ritu pasala!” Nappébali arungngé, “Mémeng makuttuko sibawa dé' mumaélo majjama. Iyanaro saba'na namuwéllau paramisi ri iyya untu' makkasuwiyangeng akkarobangeng lao ri Puwangnge. Laono majjama paimeng! Dé'na matu nariwérékko daramé, iyakiya tette'ko harusu mébbu bata iya padaé égana.” Napahanni iyaro sining mandoro'é makkedaé engkai mennang ri laleng asukkarakengngé wettunna ripaissengi makkedaé sining tau Israélié harusu'i powassélé bata iya tette'é pada égana pada-pada pura labe'é. Wettunna mennang massu polé ri saorajaé, siruntu'ni mennang Musa sibawa Harun iya mattengngangngé tajengngi mennang. Nakkeda iyaro sining mandoro'é, “Naisseng Puwangnge pangkaukemmu! Nahukkukko matu! Iko ritu nassabariwi naribenciki ri arungngé sibawa sining pegawénna, angkanna maéloi mpunoki.” Namangolosi Musa ri Puwangnge sibawa makkeda, “ Puwang, magi namaja makkuwaro Mugaukengngi bangsa Israélié? Magi Musuroka lao kuwaé? Sipongenna mangoloka ri arungngé sibawa mabbicara ri laleng asem-Mu, mammulani callai iyaé bangsaé. Nadé' aga-aga Mupogau' untu' tulungngi mennang.” Nanakkeda Puwangnge lao ri Musa, “Makkekkuwangngé muwitai matu pékkugi-Ka tinda lao ri arungngé. Upassai matu paleppe'i bangsa-Ku. Sitongenna, upassai matu paddésu'i mennang polé ri wanuwaéwé.” Mabbicarani Allataala lao ri Musa, “Iyya'na Puwang. Mappaitak-Ka alé lao ri Abraham, Ishak sibawa Yakub selaku Allataala Iya Pommakuwasaé, iyakiya dé' Uwappaissengeng alé lao ri mennang sibawa aseng ‘ Puwang ’. Pakangka tok-Ka assijancing sibawa mennang. Majjanci-Ka mabbéréyangngi matu wanuwa Kanaan lao ri mennang, wanuwa onronna mennang riyolo tuwo selaku tau laing. Uwéngkalingani addarékénna tau Israélié iya ripowataé ri bangsa Maséré'é, na-Uwéngngeranni iyaro jancik-Ku. Jaji appallebbangenni lao ri bangsa Israélié makkedaé makkeda-Ka lao ri mennang: Iyya'na Puwang; Upaleppe'ko matu polé ri angatangenna bangsa Maséré'é. Uwappaitangngi matu akuwasak-Ku iya maseroé untu' passalama'ko sibawa pateppaiwi pahukkungeng matane bangsa Maséré'é. Upancajiko matu umma'-Ku, na Iyya mancaji Allataalamu. Namuwissengngi matu makkedaé Iyya'naé Puwang, Allataalamu, iya paleppe'ékko polé ri angatangengngé ri Maséré. Utiwiko matu ri wanuwa iya Uwajjanciyangngé sibawa tanro lao ri Abraham, Ishak sibawa Yakub; iyaro tanaé Uwérékko mancaji appunnangeng ri alému. Iyya'na Puwang.” Iya manennaro pasenna Puwangnge napalettu'i Musa lao ri bangsa Israélié, iyakiya dé' namaélo mennang bati-batiwi Musa, nasaba angatangeng iya mabecco'éro pura mébbui mennang pettu paddennuwang. Nainappa makkeda Puwangnge lao ri Musa, “Laono mangolo ri arung Maséré namupowadai makkedaé harusu'i palaloi bangsa Israélié salaiwi wanuwanna.” Iyakiya mappébaliwi Musa, “Tau Israéliénna bawang dé' namaélo méngkalingaka. Pékkugi makkullé arung Maséré'é méngkalingai tau iya dé'é namacca mabbicara pada-pada iyya?” Makkuwaniro Puwangnge suroi Musa sibawa Harun untu' palettu'i lao ri bangsa Israélié sibawa arung Maséré makkedaé risuroi mennang untu' pimpingngi bangsa Israélié massu polé ri Maséré. Iyanaé assossorenna Musa sibawa Harun: Rubén, ana' macowana Yakub, mappunnaiwi eppa ana' worowané: Hénokh, Palu, Hézron sibawa Karmi. Mennang ritu néné-nénéna polé risining appangngé ri laleng suku Rubén. Siméon sibawa bainéna séddiwi makkunrai Kanaan, mappunnaiwi enneng ana' worowané: Yémuél, Yamin, Ohad, Yakhin, Zohar sibawa Saul. Mennang ritu néné-nénéna polé risining appangngé ri laleng suku Siméon. Léwi mappunnaiwi tellu ana' worowané: Gérson, Kéhat sibawa Mérari; mennang ritu néné-nénéna polé ri appangngé ri laleng suku Léwi. Umuru'na Léwi narapii 137 taung. Gérson mappunnaiwi duwa ana' worowané: Libni sibawa Siméi; mappunnaiwi mennang maéga wija. Kéhat mappunnaiwi eppa ana' worowané: Amram, Yizhar, Hébron sibawa Uziél. Umuru'na Kéhat narapii 133 taung. Mérari mappunnaiwi duwa ana' worowané: Mahli sibawa Musi. Iyanaro sining appangngé ri laleng suku Léwié sibawa wija-wijanna mennang tungke'-tungke'. Amram kawingngi sibawa Yokébéd, anri makkunrainna ambo'na, na ana'-ana'na mennang iyanaritu Harun sibawa Musa. Amram tuwoi 137 taung. Yizhar mappunnaiwi tellu ana' worowané: Korah, Néfég sibawa Zikhri. Uziél mappunnai towi tellu ana' worowané: Misaél, Elsafan sibawa Sitri. Harun kawingngi sibawa Eliséba, ana' makkunrainna Aminadab; massilessureng towi Eliséba sibawa Nahason. Eliséba jajiyangngi Nadab, Abihu, Eléazar sibawa Itamar. Korah mappunnaiwi tellu ana' worowané: Asir, Elkana sibawa Abiasaf. Mennang ritu néné-nénéna polé ri appanna Korah. Eléazar, ana' worowanéna Harun, kawingngi sibawa sala séddinna ana'na Putiél, na ana'na mennang iyanaritu Pinéhas. Iyanaro sininna kapala appanna sibawa kapala kaluwargana ri laleng suku Léwi. Harun sibawa Musa ritu iya riparéntangngé ri Puwangnge untu' tiwii sining tau Israélié massu polé ri Maséré. Sipadduwai mennang mangolo ri arung Maséré kuwammengngi napaleppe'i tau Israélié. Wettunna Puwangnge mabbicara sibawa Musa ri Maséré, Makkedai Puwangnge, “Iyya'na Puwang. Palettukengngi arung Maséré sininna iya puraé Upowadakko.” Iyakiya mappébaliwi Musa, “ Puwang, Muwisseng makkedaé dé' umacca mabbicara. Pékkugi makkullé arungngé maélo méngkalingaka?” Makkedai Puwangnge lao ri Musa, “Maélo-Ka pancajiko pada-pada Allataala ri yolona arungngé, na silessuremmu Harun mabbicarai matu lao ri aléna selaku nabimmu. Palettukengngi Harun sininna iya Uparéntangngékko. Suroi Harun powadangngi arungngé makkedaé harusu'i napalalo tau Israélié salaiwi wanuwa Maséré. Iyakiya maélo-Ka pancajiwi arungngé matedde ati. Dé' nabati-batiko matu, namuni papolé-Ka maéga abala ri Maséré. Rimakkuwannanaro Uhukkungngi matu Maséré sibawa pahukkungeng iya matane'é, nainappa Utiwi sininna bangsa Israélié, umma'-Ku, massu polé ri wanuwaéro. Nanaissenni matu tau Maséré'é makkedaé Iyya'naé Puwang, wettuk-Ku hukkungngi mennang sibawa tiwii Israélié massu polé ri wanuwanna mennang.” Napogau'ni Musa sibawa Harun aga iya napparéntangngé Puwangnge. Umuru'na Musa 80 taung na Harun 83 taung wettunna mennang mangolo ri arung Maséré. Makkedani Puwangnge lao ri Musa sibawa Harun, “Rékko naéllauko arungngé mébbu anu makalallaing selaku butti, suroi Harun malai tekkenna nanappéyangngi ri tanaé ri yolona arungngé. Iyaro tekkengngé tappinrai matu mancaji ula.” Nanalaona Musa sibawa Harun mangolo ri arungngé nanapogau'i mennang aga iya napparéntangngé Allataala. Nappéyanni Harun tekkenna ri tanaé ri yolona arungngé sibawa sining pegawénna, natappinrana iyaro tekkengngé mancaji ula. Rimakkuwannanaro naobbi toni arungngé sining tau maccaé sibawa ahli-ahli passéhéré'na, nanapogau' toni makkuwaéro sibawa pangissengeng mappalennye'-lennye'na mennang. Nappéyanni tekkenna mennang ri tanaé natappinrana iyaro sining tekkengngé mancaji ula. Iyakiya tekkenna Harun naemme'i tekkenna mennang. Namuni makkuwaro, tette'i arungngé matedde ati sibawa dé' namaélo bati-batiwi ada-adanna Musa sibawa Harun, pada-pada iya pura napowadaé Puwangnge. Nainappa makkeda Puwangnge lao ri Musa, “Iyaro arungngé matedde ati senna; dé' namaélo palaloi bangsa Israélié lao. Rimakkuwannanaro laono musitangngi maélé, wettunna nonno ri Salo Nil. Tiwii tekkeng iya weddingngé mancaji ularo sibawa tajengngi apolénna ri wiring saloé. Powadangngi iyaro arungngé: Puwang, Allataalana tau Ibranié, suroka untu' palettu'i ri Puwakku kuwammengngi napalaloi umma'-Na lao untu' massompa ri Aléna ri padang kessi'é. Iyakiya lettu makkekkuwangngé dé' namaélo méngkalingai Puwakku. Rimakkuwannanaro makkeda makkuwaiyé Puwangnge, ‘Polé ri aga iya Upogau'é matti, muwissengngi matu makkedaé Iyya'na Puwang.’ Uwunrui matu uwaina saloé sibawa tekkengngéwé, natappinra matu uwai mancaji dara. Matéi matu sining balé, sibawa iyaé saloé makebbongngi matu, angkanna dé' nawedding naénung uwaina bangsa Maséré'é.” Nakkeda Puwangnge lao ri Musa, “Suroi Harun malai tekkenna nanatanréyangngi ri yasé'na sininna saloé, sépe'-sépe'é sibawa sining kolangngé ri Maséré. Mancaji darai matu uwaina, sibawa ri sininna wanuwaé engka matu dara, mala ri laleng sining tong ajué sibawa sining bémpa batué.” Napogau'ni Musa sibawa Harun aga iya napparéntangngé Puwangnge. Ri yolona arungngé sibawa sining pegawénna, nakkani Harun tekkenna nanaunrui uwaina Salo Nil, natappinrana uwaina mancaji dara. Maténi sining balé ri laleng saloéro, sibawa makebbong senna'ni baunna, angkanna dé' nawedding naénung tau Maséré'é iyaro uwai. Ri sininna tana Maséré engka dara. Iyakiya sininna ahli passéhéré'na Maséré napogau' towi makkuwaéro sibawa pangissengeng mappalennye'-lennye'na mennang, angkanna tette'i arungngé matedde ati. Pada-pada iya puraé napowada Puwangnge, dé' namaélo arungngé méngkalingai Musa sibawa Harun. Mala lisui ri saorajaé tennabati-bati iyaro kajajiyangngé muwi céddé. Kali manenni kalebbong sininna tau Maséré'é ri wiring saloé untu' sappa uwai rinung, nasaba iyaro uwaina saloé dé' nawedding riyénung. Labe'ni pitungngesso purana Puwangnge natanroi Salo Nil. Nanakkeda Puwangnge lao ri Musa, “Laono mangolo ri arungngé namupalettukengngi iyaé pasengngé: ‘Palaloni umma'-Ku lao untu' massompa ri Iyya. Rékko musampéyangngi, iyaé wanuwaé Upennoiwi matu sibawa cuppang selaku pahukkungeng. Pennoi matu Salo Nil sibawa cuppang, angkanna iyaro cuppangngé massui polé ri uwai nauttama ri laleng saorajamu, ri laleng bili' sibawa onrong atinrommu, ri laleng bolana sining pejaba'é sibawa ra'ya'é, mala ri laleng onrong attunung rotié sibawa panci-pancié. Iyaro sining cuppangngé luppe'i matu sibawa mémpériko, sininna pejaba'é sibawa ra'ya'é.’ ” Makkedai Puwangnge lao ri Musa, “Suroi Harun makkajuwangngi tekkenna ri yasé'na sining salo'e, sépe'-sépe'é sibawa sining kolangngé kuwammengngi napada cumpa cuppangngé sibawa pennoiwi tana Maséré.” Nanakkajuwanni Harun tekkenna ri yasé'na sininna uwai, nanacumpana sining cuppangngé pennoiwi sininna wanuwaé. Iyakiya sining tukang passéhéré'é pakéi pangissengeng mappallennye-lennye'na mennang, nanaébbuto sining cuppang makkacumpareng ri wanuwaéro. Nariyobbina Musa sibawa Harun ri arungngé, namakkeda, “Assempajanno lao ri Puwangnge kuwammengngi napallennye'i sining cuppangngéwé, naupalaloi bangsamu lao untu' makkasuwiyangeng akkarobangeng lao ri Puwangnge.” Nappébali Musa, “Masennang atikku maélo massempajang untu' Puwakku. Pattentuni wettunna, nauwassempajangengngi matu Puwakku, sining pejaba'é sibawa ra'ya'é. Naripaleppe matu Puwakku polé risining cuppangngéro, nadé'na gaga matu tassésa, sangadinna ri Salo Nil.” Nappébali iyaro arungngé, “Assempajanno untu' aléku baja.” Nakkeda Musa, “Maéloka pogau'i aga iya naéllauwé Puwakku. Nanaissengngi matu Puwakku makkedaé dé'gaga Allataala laingngé pada-padanna Puwangnge, Allataalata. Napaleppe'i matu Puwakku, sining pejaba'é sibawa ra'ya'é polé risining cuppangngéro. Dé'na matu gaga cuppang risining bolaé, sangadinna ri Salo Nil.” Nainappa nasalai Musa sibawa Harun arungngé. Namassempajanna Musa lao ri Puwangnge kuwammengngi Napallennye'i sining cuppang iya ripapoléngengngéngngi arungngé. Natarimani Puwangnge paréllaunna Musa, nasining cuppang iya engkaé risining bolaé, ri seddé-seddé bolaé sibawa dare'é maté manenni. Napaddeppungenni tau Maséré'é iyaro bakké cuppangngé narapi maggoppo-goppo, angkanna makebbong sininna wanuwaé. Wettunna naita arungngé makkedaé iyaro sining cuppangngé maténi, matedde atini. Napada-pada iya pura napowadaé Puwangnge, dé' namaélo arungngé bati-batiwi ada-adanna Musa sibawa Harun. Makkedai Puwangnge lao ri Musa, “Suroi Harun munrui tanaé sibawa tekkenna, natappinrana matu awué mancaji namo risininna wanuwa Maséré.” Nanaunruni Harun tanaé sibawa tekkenna, nasininna awué ri Maséré tappinrani mancaji namo iya katulungngéngngi tauwé sibawa olokolo'é. Sining ahli passéhéré'na berusahani pakéi pangissengeng mappalennye'-lennye'na mennang untu' pakangkato namo-namo, iyakiya dé' naulléi mennang. Kégi-kégi engka namo, angkanna sining ahli passéhéré'éro makkeda lao ri arungngé, “Iyaé pangkaukenna Allataala.” Iyakiya iyaro arungngé matedde atiwi, napada-pada iya pura napowadaé Puwangnge, iyaro arungngé dé' namaélo bati-batiwi ada-adanna Musa sibawa Harun. Makkedai Puwangnge lao ri Musa, “Laono baja maélé senna sita arungngé wettunna nonno ri saloé, namupalettukengngi adak-Kué: ‘Palaloi umma'-Ku lao massompa ri Iyya. Rékko musampéyangngi, Upapoléi matu lale'é ri iko, risining pejaba'é sibawa ra'ya'é. Sining bolana tau Maséré'é, mala sininna wanuwaé pennoi matu sibawa lale. Iyakiya maélo-Ka passangadiwi daéra Gosyén, onrong naonroiyé umma'-Ku. Kuwaro dé'gaga matu lale, kuwammengngi muwissengngi makkedaé Iyya, Puwang, iya pogau'éngngi iyaro. Maéloka passilaingengngi umma'-Ku sibawa ra'ya'mu. Iyaro anu makalallaingngé kajajiyangngi matu baja.’ ” Papoléni Puwangnge lale iya maéga senna'é ri saorajana arungngé sibawa ri bolana sining pejaba'é. Sininna wanuwa Maséré manrasa-rasa senna'ni nasaba iyaro lale'é. Nariyobbina Musa sibawa Harun ri arungngé namakkeda, “Laono makkasuwiyangeng akkarobangeng lao ri Allataalamu, iyakiya ri wanuwaénnaé bawang.” Nappébali Musa, “Makessingengngi aja', nasaba tassinggungngi matu tau Maséré'é rékko naitai iyaro pakkasuwiyatta, namattentuni nagenrukki matu batu gangka maté. Harusu'ki lao ri padang kessi'é bélana tellungngesso allalengeng untu' makkasuwiyangeng akkarobangeng lao ri Puwang Allataala, pada-pada iya Napparéntangngé lao ri idi.” Nakkeda arungngé, “Makessinni, upalaloko lao ri padang kessi'é untu' makkasuwiyangeng akkarobangeng lao ri Puwang, Allataalamu, assaleng aja' muwa mulao mabéla. Engngerangngi, assempajangekka!” Nappébali Musa, “Labe'kuna, masitta'ka massempajang lao ri Puwangnge kuwammengngi iyaro sining lale'é nasalaiwi Puwakku baja, sining pejaba'é sibawa ra'ya'é. Iyakiya aja'na tabellésiki sibawa aja' talawa-lawaiwi bangsa Israélié lao untu' makkasuwiyangeng akkarobangeng lao ri Puwangnge.” Nasalaini Musa arungngé, namassempajang lao ri Puwangnge, nanatarimani Puwangnge sempajanna Musa. Iyaro sining lale'é makkalutturenni salaiwi arungngé, sining pejaba'é sibawa ra'ya'é. Dé'na muwi séddi monrona. Iyakiya iyaé sisengngé matedde ati mupi arungngé sibawa dé' namaélo palaloi iyaro bangsa Israélié lao. Makkedai Puwangnge lao ri Musa, “Laono mangolo ri arungngé, namupowadangngi makkedaé Puwang, Allataalana tau Ibranié, makkeda: ‘Leppessanni umma'-Ku lao kuwammengngi weddingngi mennang massompa lao ri Iyya. Rékko dé' mumaélo leppessangngi mennang, maélo-Ka papolé sai iya maseroé lao ri sininna olokolo'mu, anyarang, kaleddé, unta, saping, bimbala sibawa bémbé'mu. Upasilaingengngi matu olokolo'na tau Israélié sibawa olokolo'na tau Maséré'é. Polé ri olokolo'na tau Israélié dé' muwi séddi iya maté. Iyya, Puwang, pattentui esso bajaé untu' pogau'i gau'éro.’ ” Pappa bajana essoé napogau'ni Puwangnge pada-pada iya puraé Napowada. Sininna olokolo'na bangsa Maséré'é maténi, iyakiya olokolo'na bangsa Israélié muwi sikaju dé'to gaga maté. Nakkutananni arungngé aga pura kajajiyang, naricuritanna makkedaé olokolo'na tau Israélié dé' muwi sikaju iya maté. Iyakiya matedde atiwi arungngé sibawa dé' namaélo leppessangngi iyaro bangsaé lao. Makkedani Puwangnge lao ri Musa sibawa Harun, “Alano siyagangngaré kemmona awu polé ri onrong attunungngé. Ri yolona arungngé, harusu'i nassiyamporeng Musa iyaro awué ri yelle'é. Natassiyana matu iyaro awué ri sininna tana Maséré. Napaompona matu iyaro awué sining lettang iya mabbettué mancaji lo mannana ri tauwé sibawa olokolo'é.” Nanalana awu Musa sibawa Harun, namangolo ri arungngé. Nassiyamporenni Musa iyaro awué ri yelle'é. Naompona sining lettang iya mabbettué mancaji lo mannana ri tauwé sibawa olokolo'é. Sining ahli passéhéré'é dé'na naulléi mangolo ri Musa nasaba sininna watakkaléna mennang pennoni lettang pada-pada sining tau Maséré laingngé. Iyakiya Puwangnge pancajiwi arungngé matedde ati, sibawa pada-pada iya pura napowadaé Puwangnge, dé' namaélo arungngé bati-batiwi ada-adanna Musa sibawa Harun. Nakkeda Puwangnge lao ri Musa, “Laono baja maélé senna mangolo ri arungngé, namupalettukengngi makkedaé makkedai Puwang, Allataalana tau Ibranié: ‘Leppessanni umma'-Ku kuwammengngi weddingngi mennang lao massompa ri Iyya. Iyaé sisengngé Upapoléi matu abalaé tenniya banna risining pejaba'é sibawa ra'ya'é bawang, iyakiya laoto ri iko, kuwammengngi muwissengngi makkedaé dé'gaga padak-Ku ri sininna linoé. Akkalarapanna maélo-Ka hukkukko silaong ra'ya'mu sibawa lasa, mattentuni cappu manenno. Iyakiya Uleppessakko tuwo kuwammengngi weddik-Ka mappaitangngi akuwasak-Ku lao ri iko, angkanna tarompo asek-Ku ri sininna linoé. Namuni makkuwaro, matanré ati mupo sibawa dé' mumaélo palaloi umma'-Ku lao. Baja éléé, ri wettu iya padaé, maélo-Ka papolé bosi ése iya maseroé, iya dé'éppa naengka nakajajiyang ri Maséré riyolo lettu makkekkuwangngé. Apparéntanni kuwammengngi nasininna olokolo'é sibawa sininna appunnangemmu iya engkaé ri saliweng naritiwi ri onrong iya amangngé. Sininna tauwé sibawa olokolo iya engkaé ri saliweng sibawa dé' nallinrung matéi matu nakenna bosi ése.’ ” Siyagangngaré ri yelle'na sining pejaba'é métau ri ada-adanna Puwangnge. Natiwini mennang ata-atanna sibawa olokolo'na muttama ri lalempola kuwammengngi nallinrung. Iyakiya iya laingngé dé' najampangiwi iyaro papparéngngerangngé nanasalaiwi ata-atanna sibawa olokolo'na ri padangngé. Nanakkeda Puwangnge lao ri Musa, “Akkani limammu liyasé, nanateppa matu bosi ése'é risininna Maséré. Iyaro bosié nakennai matu tauwé, olokolo'é sibawa sininna tanet-tanengngé ri dare'é.” Nakkani tekkenna Musa liyasé, nanapapoléna Puwangnge guttu sibawa bosi ése, sibawa letté kennai linoé. Napapoléni Puwangnge bosi ése iya maseroé nasibawang letté siyanré-anré. Iyanaro bosi ése iya kaminang maseroé ri laleng sejarana Maséré. Ri sininna wanuwaé iyaro bosi ése'é napaccappui sininna séuwa-séuwaé ri dare'é, muttama'ni tauwé sibawa olokolo'é. Sininna tanet-tanengngé ri dare'é masolang sibawa aju-kajungngé naléttung. Banna daéra Gosyén, onrong naonroiyé sining tau Israélié, dé' nakennai bosi ése. Nariyobbina Musa sibawa Harun ri arungngé, sibawa makkeda, “Madosana'. Puwangnge ritu tongeng, iyya sibawa ra'ya'ku pasalani. Assempajanno lao ri Puwangnge; genne'ni anrasa-rasatta nasaba guttu sibawa bosi ése'éwé. Maéloka leppessakko lao. Aja'na muwonrona kuwaé.” Nakkeda Musa lao ri arungngé, “Lettu'ku muwa ri saliweng kota, uwakkai matu limakku untu' massempajang ri Puwangnge. Mappésauwi matu guttué sibawa soroi matu bosi ése'é, kuwammengngi naissengngi Puwakku makkedaé iyaé linoé appunnangenna Puwangnge. Iyakiya uwisseng makkedaé Puwakku sibawa sining pejaba'é dé'topa namétau ri Puwang Allataala.” Namaté manenna ramié sibawa caddukué, nasaba mattengngangngi mpunga ramié, na caddukué mattengngangngi mallise. Iyakiya gandongngé sibawa lise'-lise'é dé' namasolang nasaba tenniyapa wettunna. Nanasalaini Musa arungngé nalao ri saliweng kota; kuwaniro nakka limanna untu' massempajang lao ri Puwangnge. Iyatoro wettué nappésau guttué, bosi ése'é sibawa bosié. Wettunna naita arungngé aga iya kajajiyangngé, madosasi paimeng. Aléna sibawa sining pejaba'na tette'i matedde ati. Pada-pada iya pura napowadaé Puwangnge naolai Musa, dé' namaélo arungngé palaloi tau Israélié lao. Nakkeda Puwangnge lao ri Musa, “Laono mangolo ri arungngé. Purani Upancaji aléna sibawa sining pejaba'na matedde ati, kuwammengngi weddikka pogau'i sining anu makalallaingngé ri tengnga-tengngana mennang, sibawa kuwammengngi weddikko curitai lao ri ana' eppomu pékkugi-Ka macculé-culéiwi bangsa Maséré'é sibawa sining anu makalallaingngéro. Namuwisseng manengngi matu makkedaé Iyya'na ritu Puwang.” Nanalaona Musa sibawa Harun mangolo ri arungngé sibawa makkeda lao ri aléna, “Makkedai Puwang, Allataalana bangsa Ibranié, ‘Gangka kégiko dé' mumaélo tunru lao ri Iyya? Leppessangngi umma'-Ku lao, kuwammengngi weddingngi mennang massompa ri Iyya. Rékko massampéyang mupo, Upapoléi matu baja incalé ri wanuwammu. Sininna tompo'na tanaé ritongko siseng matu ri incalé iya maéga senna'éro. Sininna tanet-taneng nasésaé, mala aju-kajung iya dé'é napaccappui bosi ése, napaccappui matu iyaro incalé. Saorajamu, sining bolana pejaba'é sibawa bolana ra'ya'é pennoi matu incalé. Iyaé abalaé lebbi héba'i naiya puraé napéneddingi néné-nénému.’ ” Nainappa giling Musa nalao. Makkedani sining pejaba'é lao ri arungngé, “Gangka kégi iyaro tauwé harusu sussaiki? Leppessangngi sining tau Israéliéro lao untu' massompa ri Puwang, Allataalana mennang. Itani ancuru'ni wanuwattaé!” Nariyobbina paimeng Musa sibawa Harun mangolo ri arungngé. Adanna arungngé lao ri mennang, “Weddikko lao untu' massompa ri Puwang Allataalamu. Iyakiya nigana ri yelle'mu iya maéloé lao?” Nappébali Musa, “Idi maneng, muwi iya maloloé iyaré'ga macowaé. Maéloki tiwi manengngi ana'ta, sininna sapitta, bimbala'ta, sibawa bémbé'ta, saba' harusu'ki pakangka ramé-ramé battowa untu' pakalebbii Puwangnge.” Nakkeda arungngé, “Dé' namakkullé upalaloko tiwii sining makkunraié sibawa ana'-ana'mu! Iya muwéllauwéro pada muwi maddennuwangika méllauwi ri Puwangnge barakkakiko. Manessani ri aléku makkedaé majai akkattamu. Dé'! Banna sining worowané wedding lao untu' massompa ri Puwangnge, rékko mémeng macinnako massompa bawang!” Nasibawang ada-adaéro Musa sibawa Harun ripaddésu'ni polé ri saorajaé. Nanakkeda Puwangnge lao ri Musa, “Akkani limammu ri yasé'na tana Maséré. Poléi matu sining incalé sibawa manréi sininna tanet-taneng iya monroé mupa puranana bosi ése'é.” Nakkani Musa tekkenna nanapapoléna Puwangnge anging alaué mangiri ri wanuwaéro puppu esso sibawa puppu benni. Denniyarinnana tiwini iyaro angingngé sining incalé iya maéga senna'é, angkanna pennoni sininna wanuwaé. Dé'pa naengka naita tauwé incalé iya makkuwaéro égana, sibawa puranaro gau' makkuwaéro dé'to naengka nakajajiyanna. Sininna tompo'na tanaé natongkoni incalé angkanna malotong paita. Naanréi mennang agi-agi iya dé'é napaccappui iyaro bosi ése'é, muttama'ni buwa-buwaé ri ajué. Ri sininna Maséré dé'na gaga iya manyilaé iya nasésaé ri aju-kajungngé iyaré'ga ri tanet-tanengngé. Masitta'ni arungngé mobbii Musa sibawa Harun nanakkeda, “Madosana' lao ri Puwang Allataalamu sibawa lao ri iko. Addampengenni dosaku iyaé sisengngé, sibawa assempajanno lao ri Puwang Allataalamu, kuwammengngi nalai polé ri iyya pahukkungeng iya paunoéwé.” Nasalaini Musa arungngé sibawa massempajang lao ri Puwangnge. Nanapinrani Puwangnge angirina angingngé mancaji anging yajang iya maraja senna'é. Nairini anging iyaro sining incalé naritiwi ri Tasi Gelaga. Muwi séddi dé'to nasésa risininna tana Maséré. Iyakiya Puwangnge pancajiwi arungngé matedde ati, sibawa dé' naleppessangngi tau Israélié lao. Nakkeda Puwangnge lao ri Musa, “Akkai limammu liyasé, nanakennani matu tana Maséré pettakkape.” Nakkani limanna Musa liyasé, na tellungngesso ittana sininna tana Maséré nakennani pettakkape. Dé' aga-aga naullé mita tau Maséré'é sibawa ri lalenna wettuéro dé' muwi séddi tau lao kégi-kégi. Iyakiya risining bolana tau Israélié tette'i macakka. Nariyobbina Musa ri arungngé sibawa makkeda, “Weddinno lao massompa ri Puwam -mu. Weddinni maccowé sining makkunraié sibawa ana'-ana'é. Iyakiya sapingngé, bimbala'é sibawa bémbé'é dé' nawedding ritiwi.” Nappébali Musa, “Rékko makkuwaitu harusu'i Puwakku mpérékki olokolo untu' pakkasuwiyang sibawa untu' akkarobangeng ritunu lao ri Puwang, Allataalata. Sininna olokolo'ta harusu'i ritiwi; muwi sikaju dé'to narisalai. Polé ri olokolo'éro ripiléi kéga matu riyakkasuwiyangeng lao ri Puwang Allataala. Kuwapiro nappa riisseng matu olokolo kégaénna matu riyakkasuwiyangeng.” Puwangnge pancajiwi arungngé matedde ati angkanna dé' namaélo palaloi bangsa Israélié lao. Nakkeda arungngé lao ri Musa, “Laono polé ri yoloku! Aja' narapii uwitako paimeng! Rékko narapii uwita paimeng tappamu, matéko matu!” Nakkeda Musa, “Pada-pada adanna Puwakku, mattentuni dé'na naitaka matu paimeng Puwakku.” Nakkeda Puwangnge lao ri Musa, “Maéloka patatteppa séddi abalapa ri yasé'na arung Maséré sibawa ra'ya'na. Purapiro, naleppessanno matu lao. Mala iko maneng napaddésu'ko matu polé kuwaé. Rimakkuwannanaro abbicarano sibawa bangsa Israélié; suroi mennang méllauwi paréwa ulawenna sibawa péra'na balibolana.” Puwangnge mébbui tau Maséré'é makacuwa lao ri tau Israélié. Mancajini Musa tau iya ripakalebbi senna'é risining pejaba'é sibawa sininna ra'ya' Maséré. Nakkeda Musa lao ri arungngé, “Mappakkuwaiyé ada-adanna Puwangnge, ‘Kira-kira ri tengnga bennié maéloka jalajja'i tana Maséré. Tungke' ana' worowané iya macowaé ri Maséré matéi matu, mappammulai ana'na arung Maséré lettu ri ana'na ata makkunrai iya mallélu gandongngé. Ana' iya bunge jajiyé polé ri sininna olokolo'é maté towi matu. Ri sininna Maséré riyéngkalingai matu sadda mpating maladde'é, iya dé'éppa naengka nakajajiyang sibawa dé'na matu nakajajiyanna. Iyakiya ri yelle'na Israélié, muwi rupatauwé iayaré'ga olokolo'é dé' nariganggu. Namuwissengngi matu makkedaé Iyya, Puwang, mébbu assilaingeng ri yelle'na tau Maséré'é sibawa tau Israélié.’ ” Angkanna Musa makkeda, “Sininna pejaba'na Puwakku poléi matu sibawa suju' ri yoloku nanaéllauwi kuwammengngi iyya sibawa bangsaku salaiwi iyaé wanuwaé. Purairo laona' matu.” Namacai senna'na Musa salaiwi arungngé. Nakkeda Puwangnge lao ri Musa, “Dé' nabati-batiwi matu arungngé ada-adammu, kuwammengngi weddik-Ka mébbu lebbi maéga anu makalallaing ri sininna Maséré.” Naébbuni Musa sibawa Harun sininna anu makalallaingngéro ri yolona arungngé, iyakiya Puwangnge mébbui matedde ati, angkanna dé' namaélo palaloi tau Israélié salaiwi wanuwanna. Mabbicarani Puwangnge lao ri Musa sibawa Harun ri tana Maséré. Adanna, “Iyaé ulengngé mancajiwi uleng mammulang ri laleng taung attanggalakemmu. Palettu'ni iyaé paréntaé lao ri sininna umma' Israélié: Ri tanggala seppulona iyaé ulengngé, tungke' séddi worowané harusu'i géré sikaju ana' bimbala untu' naanré sisama kaluwargana. Rékko iyaro anggota kaluwargaé céddé senna untu' paccappui sikaju ana' bimbala, iyaro kaluwargaé sibawa balibolana iya kaminang macawé'é weddingngi sisamai manréi iyaro ana' bimbala'é. Iyaro ana' bimbala'é harusu'i nabagé situru jumellana tau iya manrééngngi. Weddikko pilé bimbala iyaré'ga bémbé, iyakiya harusu'i iya laié, umuru'na sitaung, sibawa dé'gaga sala-salanna. Harusu'ko taroi narapi tanggala seppulo eppa. Iyaro essoé, arawénna, sininna umma Israélié harusu'i géréi iyaro bimbala'é. Harusu'i riyassapuwang darana céddé ri iya duwa alliri tange'é sibawa riyasé'na sumpang bola naonroiyé mennang manréi. Iyatoro wennié harusu'i ripanggang jukuna enrengngé riyanré sibawa ukkaju mapai nenniya roti dé' raginna. Iyaro ana' bimbala'é harusu'i ripanggang maneng, sukku sibawa ulunna, ajéna sibawa lise' babuwana. Anréni iyaro juku puraé ripanggang, aja' naengka riyanré mamata iyaré'ga rinasu. Aja' musésai muwi céddé polé ri jukuéro narapi élé; rékko engka sésana, harusu'i ritunu gangka cappu. Wettummu manréi harusu'ko mappaké sukku mémenna untu' allalengeng, sandala ri ajé sibawa tekkeng ri limaé. Harusu'ko manréi mapperi-peri. Iyanaro Ramé-ramé Paskaé untu' pakalebbika Iyya, Puwang. Iyaro wennié maélo-Ka jalajja'i sininna tana Maséré, sibawa mpunoi tungke' ana' worowané macowaé, muwi tolino, iyaré'ga olokolo. Maélo-Ka hukkungngi sininna déwataé ri Maséré, nasaba Iyya'na Puwang. Dara iya engkaé ri sumpang bolamu mancajiwi matu tanrang polé risining bola muwonroiyé. Rékko Uwitai iyaro daraé, Ulaloiko sibawa dé' Uwunoko wettuk-Ku hukkungngi Maséré. Iyaro essoé harusu'i muparéngngerangi selaku esso maraja untu' Puwangnge. Iyaro essoé harusu'i muramé-raméi tungke' taung matteru-teru.” Makkedai Puwangnge, “Pitungngesso ittana dé' naweddikko manré roti iya engkaé raginna. Ri esso mammulangngé sininna ragié harusu'i ripassu polé ri bolamu, saba' rékko ri laleng pitungngessoéro séddié tau manré roti iya engkaé raginna, dé'na nawedding riyangga anggotana umma'-Ku. Ri esso mammulangngé, sibawa ri esso mapitué, harusu'ko maddeppungeng untu' massompa. Iyaro essoé dé' naweddikko mappallaung muwi aga sangadinna iya parellué untu' passadiya inanré. Iyaro essoé sininna bangsamu Utiwii massu polé ri Maséré. Rimakkuwannanaro untu' matteru-teru, tungke' taung, iyaro essoé harusu'i muparéngngerangi selaku esso maraja. Naobbini Musa sininna pamimpinna Israélié sibawa makkeda lao ri mennang, “Laono sibawa alanni kaluwargamu sikaju ana' bimbala untu' Ramé-ramé Paskaé. Alano sisiyo hisop, tellerengngi ri laleng katowang iya mallise'é dara bimbala'ro, nainappa muwassapuwang ri iya duwa alliri tange'mu sibawa ri yasé'na sumpang bolamu. Aja' naengka salaiwi bolaé narapi élé. Wettunna Puwangnge jalajja'i iyaé wanuwaé untu' mpunoi sining tau Maséré'é, naitai matu Puwangnge daraé ri iya duwa alliri tange'mu sibawa ri yasé'na sumpang bolamu; nalalona matu bawang sibawa dé' napalaloi Malaéka' Amaténgngé muttamakiwi bolamu untu' mpunoko. Iko sibawa ana'-ana'mu harusu turusiwi iyaro paréntaé untu' mannennungeng. Rékko muwattamakini wanuwa iya najjanciyangngé Puwangnge lao ri iko, harusu'ko pakangkai iyaé upacaraé. Rékko makkutanai ana'-ana'mu, ‘Aga bettuwanna iyaé upacaraé?’ Harusu'ko baliwi, ‘Iyaé akkarobangeng Paskaé untu' pakalebbii Puwangnge, saba' nalaloiwi bolana sining tau Israélié ri Maséré, wettunna nauno ana' worowané macowana tau Maséré'é, na idi naleppessakki tuwo!’ ” Nanakkaluttuna sining tau Israélié sibawa massompa. Nainappa mennang lao nanapogau'i aga iya riparéntangngéngngi ri Puwangnge lao ri Musa sibawa Harun. Iyaro tengnga bennié naunoni Puwangnge sininna ana' worowané macowana bangsa Maséré'é, mappammulai ana'na arungngé, lettu ri ana'na sining tau tarungkué ri tarungkué. Sininna olokolo iya bunge' jajiyé riyunoto. Iyaro wennié moto'ni arungngé, sining pejaba'na sibawa moto manenna tau Maséré'é. Ri sininna wanuwa Maséré riyéngkalingai sadda mpating iya maladde'é nasaba dé' muwi séddi bola iya dé'é naamaténg séddi ana' worowanéna. Iyatoro wennié, naobbini arungngé Musa sibawa Harun namakkeda, “Laono polé kuwaé, iko maneng! Salaiwi wanuwakku! Laono sompai Allataalamu pada-pada iya muwéllauwé. Tiwini sininna sapimmu, bimbala'mu sibawa bémbé'mu namulao! Ellaungeng tokka barakka!” Naridessa'na tau Israélié ri tau Maséré'é kuwammengngi namasitta-sitta salaiwi iyaro wanuwaé. Adanna mennang, “Maté manekki matu rékko dé' mulao!” Nanalani tau Israélié panci-pancinna iya mallise'é lama roti iya dé'é raginna, nadokoi sibawa kaing, nanaéssangngi. Pura toni napogau' mennang aga iya napowadaé Musa, iyanaritu méllauwi paréwa ulawenna sibawa péra'na enrengngé pakéyanna tau Maséré'é. Puwangnge mébbui tau Maséré'é makacuwa lao ri tau Israélié, angkanna nabbéréyangngi mennang aga iya naéllauwé tau Israélié. Nanallalengiro natiwini tau Israélié asugirenna tau Maséré'é massu polé ri wanuwaéro. Najoppana tau Israélié sibawa mallaleng polé ri kota Raamses lao ri kota Sukot. Jumellana mennang 600.000 tau, dé' naribilang makkunraié sibawa ana'-ana'é. Tiwii mennang maéga saping, bimbala sibawa bémbé. Sijumella battowato tau laing maccowé. Tununi mennang roti dé'é raginna polé ri lama labbu iya natiwié mennang polé ri Maséré. Ripaddésu'ni mennang polé kuwaro sibawa tennasenna-senna, angkanna dé' narapii passadiya bokong. Monroi bangsa Israélié ri Maséré 430 taung ittana. Ri esso paccappurengngé ri taung ma-430-éro, sininna barisi'na umma'na Puwangnge salaiwi tana Maséré. Iyaro wennié matterui majjaga-jaga Puwangnge untu' mantara'i mennang massu polé ri Maséré. Na iyatonaro wennié riyakkasuwiyangengngi untu' Puwangnge selaku wenni papparéngngerang untu' matteru-teru. Ri wenniéro harusu'i majjaga-jaga umma Israélié. Makkedani Puwangnge lao ri Musa sibawa Harun, “Iyanaé peraturanna Ramé-ramé Paskaé. Tau laingngé dé' nawedding manréi juku bimbala iya riyakkasuwiyangengngé ri esso Paskaé. Iyakiya ata iya muwellié wedding maccowé manréi, rékko purani risunna. Tau polé-polé iyaré'ga koli-kolié dé' nawedding maccowé manréi. Sininna juku bimbala'éro harusu'i riyanré ri lalempolaé, sibawa dé' nawedding ritiwi massu. Aja' mupoloi muwi séddi polé ri bukunna. Sininna umma Israélié harusu'i ramé-raméiwi iyaro péstaé. Tau iya dé'é narisunna dé' nawedding manréi iyaro inanré ramé-ramé. Rékko séddié tau laing iya mattette'énna ri iko macinna ramé-raméiwi Paskaé untu' pakalebbi-Ka, Puwang, sininna tau worowané ri laleng kaluwargana harusu'i lebbi riyolo risunna. Purairo riyangga'ni mennang pada-pada tau Israél tuléngngé, sibawa wedding maccowé ri laleng ramé-ramé Paskaé. Peraturang iya padaé takkenna towi untu' tau Israél tuléngngé sibawa tau laing iya mattette'énna ri yelle'mu.” Naturusini sininna tau Israélié sibawa pogau'i sininna iya napparéntangngé Puwangnge lao ri Musa sibawa Harun. Iyaro essoé natiwini Puwangnge sininna umma Israélié massu polé ri Maséré. Makkedai Puwangnge lao ri Musa, “Akkasuwiyangengngi sininna ana' worowané macowaé lao ri Iyya. Tungke' ana' worowané macowana Israélié, sibawa tungke' olokolo lai iya bunge' jajiyé, iyanaritu appunnangek-Ku.” Makkedani Musa lao ri bangsa Israélié, “Iyaé essoé Puwangnge paleppe'ko sibawa akuwasan-Na iya battowaé, angkanna mulléi massu polé ri Maséré, onrommu ripowata. Rimakkuwannanaro, paréngngerangiwi iyaé essoé. Aja'na muwanré roti iya engkaé raginna. Iyaé essoé, tanggala séddi uleng Abib iyaré'ga uleng séddi, musalaiwi wanuwa Maséré. Nasibawang tanro majjanciwi Puwangnge lao ri néné-nénému untu' mabbéréyangngi lao ri iko wanuwanna bangsa Kanaangngé, Hét-é, Amorié, Héwié sibawa Yébus-é. Puramuna natiwi Puwangnge lao ri wanuwa iya sugié sibawa macommo'éro, tungke' taung ri laleng uleng Abib, harusu'ko pakangkai iyaé upacaraé. Pitungngesso ittana harusu'ko manré roti iya dé'é raginna, na ri esso iya mapitué harusu'i ripakangka ramé-ramé untu' pakalebbii Puwangnge. Pitungngesso ittana dé' naweddikko manré roti iya engkaé raginna, sibawa ri sininna wanuwammu dé' nawedding engka ragi iyaré'ga agi-agi iya engkaé raginna. Ri pammulanna ramé-raméro harusu'ko curitai lao ri ana'mu iya worowané makkedaé iya manennaro mupogau'i nasaba sininna iya puraé napogau' Puwangnge untu' alému wettummu salaiwi wanuwa Maséré. Iyaé ramé-ramé mancaji papparéngngerangngi ri alému pada-pada tanrang iya riyassiyorengngé ri limaé iyaré'ga ri linroé. Iyaé ramé-ramé paréngngerangiko untu' matteru powadai sibawa magguruiwi Hukkung-hukkun-Na Puwangnge, saba' Puwangnge passuko polé ri Maséré nasibawang akuwasan-Na iya battowaé. Ramé-raméini iyaé péstaé tungke' taung ri wettu iya ripattentué.” Makkedani Musa lao ri bangsa Israélié, “ Puwangnge mantara'ko matu lao ri wanuwa Kanaan iya Najjanciyangngé sibawa tanro lao ri iko sibawa néné-nénému. Mancajinnana iyaro tanaé appunnangemmu, harusu'ko makkasuwiyangengngi tungke' ana' worowané macowaé sibawa olokolo lai iya bunge' jajiyé. Iya manennaro appunnangenna Puwangnge, iyakiya tungke' kaleddé lai iya bunge' jajiyé harusu'i ricéra' polé ri Puwangnge sibawa makkasuwiyangeng sikaju ana' bimbala selaku passulléna. Rékko dé' mumaélo céra'i iyaro kaleddé'é, harusu'i ripolo ellonna. Tungke' ana'mu worowané iya bunge' jajiyé harusu'i ricéra'. Rékko ri munri makkutanai ana'mu aga bettuwanna iya manennaro, harusu'ko baliwi makkuwaé, ‘Nasibawang akuwasang iya battowaé natiwiki Puwangnge massu polé ri wanuwa Maséré, onrotta ripowata. Wettunna arung Maséré matedde ati sibawa dé' namaélo leppessakki lao, naunoi Puwangnge tungke' ana' worowané macowaé ri Maséré, muwi ana' tau iyaré'ga ana' olokolo. Iyanaro saba'na nariyakkarobangeng lao ri Puwangnge tungke' olokolo lai iya bunge' jajiyé, iyakiya ricéra'i ana'-ana'ta iya macowaé.’ Iyaro abiyasangngé mancaji papparéngngerangngi lao ri idi pada-pada tanrangngé iya riyassiyorengngé ri limaé iyaré'ga ri linrota. Nanallalengiwi tette'ki matu riparéngngerangi makkedaé puraki napassu Puwangnge polé ri Maséré sibawa akuwasang iya battowaé.” Purana naleppessang arung Maséré bangsa Israélié lao, dé' naritiwi mennang ri Allataala molai laleng iya laloé ri wanuwa Filistin, namuni iyaro lalengngé kaminang maponco. Mappikkiri'i Allataala, “Ajakké massessekaléi iyaro sining tauwé rékko naitai makkedaé harusu'i mennang mammusu, nanalisu ri Maséré.” Rimakkuwannanaro ritiwini mennang ri Allataala molai laleng makkalué ri padang kessi'é mattuju ri Tasi Gelaga. Wettunna nasalai Maséré, iyaro sining tau Israélié massenjatai pada-pada maéloé mammusu. Natiwini Musa buku-bukunna Yusuf, saba' ri wettu tuwona, nasuroi Yusuf tau Israélié mattanro untu' pogau'i makkuwaéro. Makkuwaiyé pasenna Yusuf, “Wettunna Allataala paleppe'ko, harusu'i mutiwi ujuku polé ri onrongngéwé.” Nasalaini tau Israélié Sukot namakkéma ri kota Etam, ri wirinna padang kessi'é. Joppai Puwangnge ri yolona mennang ri essoé ri laleng alliri ellung sibawa ri wennié ripoddiyoloiwi mennang ri laleng alliri api untu' mappaitangngi lalengngé. Nanallalengiwi weddingngi mennang joppa esso wenni. Puppu esso engkai alliri ellungngé ri yolona bangsaéro sibawa puppu benni alliri apié sibawangngi mennang. Nainappa makkeda Puwangnge lao ri Musa, “Suroni tau Israélié lisu sibawa makkéma ri yolona kota Pi-Hahirot, pallawangenna kota Migdol sibawa Tasi Gelaga, seddéna kota Baal-Zéfon. Nasengngi matu arung Maséré makkedaé solléni tau Israélié ri wanuwaéwé sibawa pusa ri padang kessi'é. Upancajiwi matu matedde ati angkanna nalellukko. Iyakiya maélo-Ka mappaitangngi aku wasak-Ku ri yasé'na arung Maséré sibawa tentarana, nanaissengngi matu mennang makkedaé Iyya'na Puwang.” Nanapogau'ni tau Israélié pada-pada iya napparéntangngé Puwangnge lao ri mennang. Wettunna naéngkalinga arung Maséré makkedaé larini tau Israélié, massessekaléni silaong sining pejaba'na sibawa makkeda, “Agana ripogau'? Magi taleppessangngi iyaro sining tau Israélié lao angkatta ateddéngeng ata-ata?” Nanapassadiyani arungngé karéta musuna sibawa tentarana. Joppani silaong sininna karétana, muttama'ni enneng ratuna karéta dé' padanna, iya natonangiyé sining parawirana. Mémeng Puwangnge pancajiwi arungngé matedde ati, angkanna nalellungngi tau Israélié iya mattengngangngé ri laleng allalengengngé salaiwi wanuwaéro ri yawa allinrungenna Puwangnge. Rilellungngi tau Israélié ri tentara Maséré'é sibawa sininna anyaranna, karétana enrengngé tonangiyéngngi, nanarapini mennang ri akkémanna ri wiring tasi'é seddéna Pi-Hahirot. Wettunna naita tau Israélié polé arung Maséré sibawa tentarana, métau senna'ni mennang sibawa kelli lao ri Puwangnge méllau pattulung. Nakkeda mennang lao ri Musa, “Dé'ga gaga kuburu ri Maséré, angkanna mutiwiki kuwammengngi tamaté ri onrongngéwé? Itani addimonrinna pangkaukemmuro! Pura ripowadani riyolo ri Maséré makkedaé kajajiyangngi matu iyaé gau'é! Pura maddessa'ki kuwammengngi aja' mugangguki, iyakiya leppessakki tette mancaji ata ri Maséré. Lebbi kessing muwi mancaji ata kuwaro naiya maté ri padang kessi'éwé!” Nappébali Musa, “Aja' mumétau! Attahanno! Muwitai matu aga napogau' Puwangnge untu' passalama'ko. Tau Maséré iya muwitaé makkekkuwangngé, dé'na matu muwitani paimeng. Puwangnge matu méwangekko, na iko dé'na naparellu pogau' aga-aga.” Nakkeda Puwangnge lao ri Musa, “Magi mukelli méllau tulung? Suroi tau Israélié joppa matteru! Akkai tekkemmu namuwajjellokengngi liyasé ri yasé'na tasi'éro. Natabbagé matu iyaro uwai nanaulléi matu tau Israélié malléttoiwi tasi'é sibawa joppa ri borina iya marakkoé. Upancajiwi matu tau Maséré'é matedde ati angkanna matterui matu lellungngi tau Israélié, na-Uwappaitangngi matu akuwasak-Ku lao ri arung Maséré, pasukanna, karéta-karétana sibawa sining tonangiyéngngi. Nanaissengngi matu tau Maséré'é makkedaé Iyya'na Puwang.” Nainappa malaéka'na Allataala iya engkaé ri yolona pasukanna Israélié, létté'ni ri monri. Nalétté tona alliri ellungngé angkanna engka ri pallawangenna pasukang Maséré'é sibawa pasukang Israélié. Iyaro ellungngé paompoi akalemmengeng, angkanna puppu benni iya duwa pasukangngéro dé' naulléi sisullé siyaddeppéri. Nanajjellokenni liyasé tekkenna Musa ri yasé'na tasi'é, nanapapoléna Puwangnge anging alau mangiri sibawa maladde angkanna soro uwaina tasi'é. Puppu benni mangiri iyaro angingngé, sibawa pinrai iyaro tasi'é mancaji tana rakko. Tabbagé duwani uwai, na wettunna nalléttoi tasi'é tau Israélié, joppai mennang ri marakkoé, na uwai ri atau sibawa abéyona sinrupai témbo'é. Tau Maséré'é sibawa sininna anyaranna, karétana sibawa tonangiyéngngi mallellungngi matteru sibawa maccowériwi tau Israélié ri tengnga tasi. Denniyarinnana makkitani Puwangnge polé ri alliri apié sibawa ellungngé lao ri tentara Maséré'é nanapakacauwi. Naébbui padati-padati karétana mennang masolang, angkanna sipanrasa-rasani mennang maju. Makkedani tau Maséré'é, “ Puwangnge mammusu untu' tau Israélié méwaki. Laono mai talari polé kuwaé!” Nakkeda Puwangnge lao ri Musa, “Akkai limammu ménré ri yasé'na tasi'é, nalisu matu paimeng uwai, nanapatallemme'i tau Maséré'é, sining karétana sibawa sining tonangiyéngngi.” Nanaakkani limanna Musa ri yasé'na tasi'é na wettunna masiya' éléé, lisuni paimeng uwai pada-pada pammulanna. Makkuragani tau Maséré'é passalama'i aléna, iyakiya Puwangnge patallemme'i mennang ri laleng tasi'é. Lisuni uwaina tasi'é nanatongkoi sining karétaé, sining tonangiyéngngi, sibawa sininna tentara Maséré iya lellungngéngngi tau Israélié lao ri tengnga tasi'é, angkanna maté maneng. Iyakiya wettunna tau Israélié malléttoiwi tasi'é, joppai mennang ri borina iya marakkoé, na uwai sinrupai témbo'é ri ataunna sibawa abéyona. Iyaro essoé Puwangnge passalama'i bangsa Israélié polé ri paggasana bangsa Maséré'é, sibawa naitai mennang sining ujuna tau Maséré'é rappé ri wiring tasi'é. Wettunna naita tau Israélié pékkugi Puwangnge nasibawang akuwasan-Na iya battowaé caui tau Maséré'é, hérang senna'ni mennang angkanna mateppe ri Aléna sibawa lao ri Musa, atan-Naro. Nainappa Musa sibawa sining tau Israélié napuwélong élongngéwé untu' pojiiwi Puwangnge, “Maéloka makkélong untu' Puwangnge, saba' pakalani sibawa battowa. Sininna anyarangngé sibawa tonangiyéngngi naggenrungengngi ri laleng tasi'é. Puwangnge pangéwaingekku iya mawatangngé; Aléna ritu passalama'ka. Aléna Allataalaku, Allataala nasompaé néné-nénéku, upakarajai Aléna. Puwangnge ritu pejuwang baranié, asen-Na, iyanaritu Puwangnge. Tentara Maséré'é sibawa sininna karétana Naggenrungengngi ri laleng tasi'é. Parawira-parawira iya kaminang poré tallemme'i ri Tasi Gelaga. Riyemme'i mennang ri tasi iya maliyungngé, na pada-padai batué nonno ri borina. Awatangem-Mu mappabengnga senna, oh Puwang, Muwébbui balié cappu tassiya-siya. Nasibawang arajam-Mu iya battowaé Mupaccappui sininna iya méwaék-Ko. Malluwa'i cai-Mu pada-pada apié, sibawa tunui mennang pada-pada daramé. Museppungngi tasi'é, natallulung uwai matanré, tettong pada-pada témbo'é, angkanna weddingngi riyola pabborina tasi'é. Adanna balié, ‘Ulellungngi matu mennang sibawa utikkeng, urampui peddakku, sibawa upaccappui mennang. Nainappa sininna waramparanna urampasa'i, ubagé-bagéi sibawa upéneddingiwi gangka cau.’ Iyakiya sisemmi mannyawa Puwangnge napapoléngengngi Maséré esso iya macilakaé. Tallemme'i mennang pada-pada tumera iya matane'é ri laleng bombanna uwai iya maseroé. Allataala nigana mulléi tandingiko, oh Puwang Iya Pommalebbié sibawa mapaccingngé? Nigana mulléi mébbu anu makalallaing sibawa pangkaukeng battowaé pada-pada Puwangnge? Mupaddeppa-reppai lima ataum-Mu, nalennye balié riyemme ri linoé. Mupimpingngi bangsa iya puraé Mupassalama'é, nasaba matinuluko ri jancim-Mu. Nasibawang awatangeng battowa Mulinrungiwi mennang, sibawa Mupimpingngi lao ri tana-Mu iya mapaccingngé. Naéngkalingai bangsa-bangsaé sibawa ténréi; tassélenni tau Filistingngé sibawa sining pamimpinna Edom. Tau Moab iya baranié mékké, tau Kanaangngé marenni ati. Métau senna'ni mennang, sabbingngi awatangenna Puwangnge. Wettunna labe umma'-Mu, dé' namakuwasa balié mattahang, labe'ni bangsa iya puraé Mupaleppe. Nainappa Muantara Israélié lao ri onrong iya Mupilé untu' appérumam-Mu. Mattette'i mennang ri bulu-bulu-Mu iya mapaccingngé, ri Bola iya Alémuwé patettongngi. Iko ritu Puwang, Arung, iya mapparéntaé mannennungeng.” Wettunna tau Israélié malléttoiwi tasi'é, joppai mennang ri borina iya marakkoé. Iyakiya wettunna sining karétana Maséré sibawa anyaranna enrengngé tonangiyéngngi muttama ri laleng tasi'é, Puwangnge mébbui uwaina massolo paimeng angkanna mennang tallemme. Nainappa Miryam, séddiwi nabi, kakana Harun, malai rabanana, sibawa sininna makkunraié maccowé tetté'i rabanana naséré-séréto. Makkélonni Miryam untu' mennang, “Akkélonno untu' Puwangnge, saba' pakalani sibawa battowa. Sininna anyarangngé sibawa tonangiyéngngi naggenrungengngi ri laleng tasi'é.” Nainappa natiwi Musa bangsa Israélié polé ri Tasi Gelaga mattuju ri padang kessi Syur. Tellungngesso ittana mennang joppa molai padang kessi'é tenna runtu uwai. Nainappa lettu mennang ri onrong iya riyasengngé Mara, iyakiya uwai kuwaro mapai senna, angkanna dé' nawedding riyénung. Iyanaro saba'na nariyaseng iyaro onrongngé Mara, bettuwanna mapai. Namannoko-noko'na iyaro tauwé lao ri Musa sibawa makkutana, “Agana maélo riyénung?” Massempajanni Musa sibawa mattonget-tongeng lao ri Puwangnge, nainappa najjellokeng Puwangnge sipolo aju. Iyaro ajué naggenrungenni Musa ri laleng uwai, namancaji makawana iyaro uwai, angkanna wedding riyénung. Ri onrongngéro mabbéréni Puwangnge peraturang-peraturang lao ri mennang, sibawa kuwatoniro Nacobai mennang. Adanna Puwangnge, “Turusi-Ka mattonget-tongeng, sibawa pogau'i aga iya Muwitaé makessing; accowérini sininna parénta-Ku. Rékko mupogau'i makkuwaéro, dé' Uhukkukko matu sibawa lasa iya Upakennaiyéngngi tau Maséré'é. Iyya'na ritu Puwang iya pajjappaékko.” Purairo lettu'ni mennang ri onrong iya riyasengngé Elim. Kuwaro engka seppulo duwa mata uwai sibawa pituppulo pong karoma. Makkémani mennang ri seddéna uwaiéro. Nainappa joppani sininna umma Israélié polé ri Elim, na ri tanggala seppulo lima uleng maduwaé puranana mennang nasalai Maséré, lettu'ni mennang ri padang kessi Sin, pallawangenna Elim sibawa Bulu Sinai. Ri padang kessi'éro mannoko-noko manenni lao ri Musa sibawa Harun. Makkedani mennang, “Lebbi kessing muwi akkalarapanna purani nauno Puwangnge ri Maséré. Kuwaro wedding muki tudang: manré juku sibawa roti gangka messo. Iyakiya mutiwiki lao kuwaé kuwammengngi tamaté maneng alupureng.” Nakkeda Puwangnge lao ri Musa, “Makkekkuwangngé maélo-Ka panonno inanré iya maonaé pada-padaé bosié untu' iko maneng. Tungke' esso harusu'ko paddeppungengngi iyaro inanré situju genne'é untu' siesso. Nanallalengiro maélo-Ka mojiwi umma'-Ku kuwammengngi Uwissengngi aga mennang naturusiwi parénta-parénta-Ku iyaré'ga dé'. Ri esso iya maennengngé harusu'i mennang paddeppungengngi iyaro inanré leppi wékkaduwa.” Namakkedana Musa sibawa Harun lao risininna tau Israélié, “Iyaé arawéngngé muwissengngi matu makkedaé Puwangnge ritu iya tiwiékko massu polé ri Maséré. Baja éléé muwitai matu cahaya ahadérékenna Puwangnge. Naéngkalingako Puwangnge macai lao ri Aléna; ya, lao ri Puwangnge, saba' idi'é banna ripogau'i aga iya Napparéntangngé. Puwangnge mpérékko matu juku ri arawéngngé, sibawa roti ri éléé gangkammu messo, nasaba naéngkalingani Puwangnge macaiko lao ri Aléna. Sitongenna, rékko macaiko lao ri idi, macaiko lao ri Puwangnge.” Nainappa makkeda Musa lao ri Harun, “Suro manenni mennang polé mangolo ri Puwangnge, saba' Naéngkalingani annoko-nokokenna mennang.” Ri wettu mabbicarana mupa Harun lao ri iya manenna, makkitani mennang lao ri padang kessi'é natappa paitani cahayana Puwangnge ri laleng ellungngé. Adanna Puwangnge lao ri Musa, “Uwéngkalingani annoko-nokokenna tau Israélié. Powadanni mennang makkedaé ri arawéngngé weddingngi manré juku, sibawa ri éléé weddingngi manré roti gangka cau. Nanaissengngi matu mennang makkedaé Iyya'na Puwang, Allataalana.” Ri arawéngngé poléni uroé maéga senna angkanna natongko sininna akkémangngé, sibawa ri éléé turunni cinoddoé ri mattulilinna akkémangngé. Wettunna mallajang iyaro cinoddoé, paitani ri tompo'na padang kessi'éro séuwa iya manipié pada-pada sessi'é sibawa manenné pada-pada cinoddo iya mattékké. Wettunna naita tau Israélié, dé' naissengngi aga iyaro. Namakkutanana séddié lao ri laingngé, “Aga iyaro?” Nanakkeda Musa lao ri mennang, “Iyanaro inanré iya nabbéréyangngé Puwangnge lao ri iko. Napparéntanni Puwangnge kuwammengngi natungke'-tungke' paddeppungeng singngéga iya napparelluwangngé, iyanaritu duwabbang untu' tungke' anggota kaluwarga.” Napogau'ni makkuwaéro tau Israélié; iyakiya engka paddeppungeng lebbi duwabbang untu' séddi tau sibawa engka iya kurangngé. Wettunna mennang naola', annessana makkedaé tau iya paddeppungengngé maéga, dé' naalebbing, sibawa iya paddeppungengngé céddé, dé' naakurangeng. Tungke'-tungke' paddeppungeng singngéga iya napparelluwangngé. Makkedani Musa lao ri mennang, “Muwi niga dé'to nawedding taroi iyaro inanré muwi céddé untu' baja.” Iyakiya siyagangngaré tau ri yelle'na mennang dé' nabati-batiwi ada-adanna Musa. Nataro muwi sibagiyang polé ri inanréro. Bajanana annessana ulekengngi sibawa makebbongngi iyaro inanré; namacaina Musa lao ri mennang. Tungke' élé napaddeppungengngi mennang iyaro inanré singngéga iya napparelluwangngé, sibawa rékko mammulani mapella essoé, maccolo'ni iyaro inanré iya risésaé ri tanaé. Ri esso iya maennengngé napaddeppungenni mennang iyaro inanré leppi wékkaduwa égana, iyanaritu patabbang untu' séddi tau. Polé manenni pamimpinna sibawa powadangngi Musa iyaro gau'é. Adanna Musa lao ri mennang, “Iyanaro paréntana Puwangnge: Baja iyanaritu esso ripallaing untu' mappésau, esso Saba'é, esso iya riyakkasuwiyangengngé lao ri Puwangnge. Aga iya maéloé mupanggang essoéwé, pangganni, sibawa aga iya maéloé muséwong, séwonni. Lebbinna apparelluwammu iyaé essoé, pallaingngi sibawa taroi untu' baja.” Jaji lebbinna iyaro inanré nataroni mennang untu' papa bajanna pada-pada iya napparéntangngé Musa; iyaro inanré dé' namawari sibawa dé' naulekeng. Nakkeda Musa, “Iyanaé inanrému untu' essoéwé, saba' iyaé essoé iyanaritu esso Saba'é, esso appésaungeng untu' pakalebbii Puwangnge, nadé' muruntu'i iyaro inanré muwi céddé ri saliwenna akkémangngé. Enneng esso ittana harusu'ko paddeppungeng inanré, iyakiya esso iya mapitué iyanaritu esso appésaungeng, nadé' gaga inanré iya nonnoé iyaro essoé.” Ri esso iya mapitué siyagangngaré tau Israél maélo paddeppungeng inanré, iyakiya dé' mennang naruntu aga-aga. Nanakkeda Puwangnge lao ri Musa, “Gangka kégako dé' mumaélo turusiwi parénta-parénta-Ku? Engngerangngi makkedaé Uwérékko séddi esso untu' mappésau. Iyanaro saba'na ri esso iya maennengngé Uwérékko inanré iya genne'é untu' duwangngesso. Ri esso iya mapitué tungke' tau harusu'i monro ri bolana, sibawa dé' nawedding massu.” Rimakkuwannanaro ri esso iya mapitué dé' najjama mennang. Iyaro inanré nasengngi manna tau Israélié. Tappana pada-padai lice'-lice' baiccu iya maputé sibawa rasana pada-padai béppa iya riyébbué paké cani. Nakkeda Musa, “ Puwangnge suroki mala manna lebbi kurang duwabbang untu' ritarongengngi wija-wijatta, kuwammengngi weddingngi mennang naita inanré iya nawéréngngékki Puwangnge ri padang kessi'é, wettutta Natiwi massu polé ri Maséré.” Nakkeda Musa lao ri Harun, “Alano séddi oring, puttama'i lebbi kurang duwabbang manna ri lalenna namupalénne'i ri yolona Puwangnge untu' ritarongengngi wija-wijatta.” Nanataroni Harun iyaro oringngé ri yolona Petti Assijancingngé untu' ritaro situru sibawa paréntana Puwangnge lao ri Musa. Iyaro mannaé mancajiwi inanréna tau Israélié patappulo taung ittana mangoloé, narapi lettu ri Kanaan, onronna mennang mattette. ( Ola' iya biyasaé napaké tauwé iyaro wettué, mallise'i duwappulo bang.) Nainappa sininna umma Israélié nasalai padang kessi Sin nakalétté-létté'na polé riséddié onrong lao ri onrong laingngé pada-pada iya napparéntangngé Puwangnge. Riséuwaé wettu makkémai mennang ri Rafidim, iyakiya kuwaro dé' gaga uwai rénung. Namannoko-noko'na mennang lao ri Musa sibawa makkeda, “Wérékki uwai rénung.” Nappébali Musa, “Magi muwannoko-noko sibawa cobaiwi Puwangnge?” Iyakiya iyaro sining tauwé madekka senna'ni namatteruna mennang mannoko-noko lao ri Musa. Adanna mennang, “Magi mutiwiki massu polé ri Maséré? Kuwammengngi idi, ana'-ana'ta sibawa olokolo'ta matéi nataro dekka?” Namangobbina Musa lao ri Puwangnge, adanna, “Aga harusu upogau' lao risining tauwéwé? Itani, maéloi mennang genrukka batu.” Nakkeda Puwangnge lao ri Musa, “Obbini siyagangngaré tau pamimping sibawa joppano silaong mennang poddiyoloiwi iyaro bangsaé. Tiwi towi tekkeng iya mupaké untu' munrui Salo Nil. Maélo-Ka tettong ri yolomu ri yasé'na séddié batu loppo ri Bulu Sinai. Unrui iyaro batué, namassu matu uwai angkanna iyaro sining tauwé weddingngi ménung.” Napogau'ni Musa makkuwaéro nasabbing sining pamimpinna Israélié. Iyaro onrongngé riyasenni Masa nasaba ri onrongngéro tau Israélié cobaiwi Puwangnge wettunna mennang makkutana, “Nasibawakki'ga Puwangnge iyaré'ga dé'?” Riyaseng towi iyaro onrongngé Mériba nasaba ri onrongngéro mannoko-noko'i tau Israélié. Nanapoléna tau Amalé'é sibawa gasai tau Israélié ri Rafidim. Nakkeda Musa lao ri Yosua, “Piléno siyagangngaré tau untu' musui tau Amalé'é. Baja maéloka tettong ri coppo'na bulu-bulué makkatenningngi tekkeng iya nassurowangngé Allataala ritiwi.” Napogau'ni Yosua aga iya napparéntangngé Musa lao ri aléna. Laoni musui tau Amalé'é, na Musa, Harun sibawa Hur tuppuiwi bulu-bulué lettu ri coppo'na. Ri wettu nakkana Musa limanna, pakalai tau Israélié. Iyakiya rékko napanonnoi Musa limanna, tau Amalé'é ritu pakala. Wettunna matekkoni Musa, Harun sibawa Hur mala séddi batu kuwammengngi nawedding tudang Musa; Harun sibawa Hur tettong ri abéyo sibawa ataunna Musa untu' tumpe'i limanna kuwammengngi tette'i tarakka narapi labu essoé. Angkanna ricau tau Amalé'é ri Yosua. Nakkeda Puwangnge lao ri Musa, “Okini passalenna iyaé apakalangngé kuwammengngi tette'i riyéngngerang. Powadangngi Yosua makkedaé Upabbinasai matu tau Amalé'é.” Nanapatettonna Musa séddi mézba sibawa masengngi “ Puwangnge iyanaritu Bandéraku”. Nakkeda Musa, “Akkatenningngi matanré-tanré bandérana Puwangnge! Puwangnge mammusu méwai tau Amalé'é untu' mannennungeng!” Yitro, matuwanna Musa, imang ri Midian, naéngkalingani passalenna sininna séuwa-séuwaé iya napogau'é Allataala untu' Musa sibawa bangsa Israélié, wettunna mennang napimping massu polé ri Maséré. Nalaona Yitro célléngiwi Musa, natiwii Zipora, bainéna Musa iya monroé mupa ri Midian, silaong Gérson sibawa Eliézer, iya duwa ana' worowanéna. Ana' mammulangngé nasengngi Gérsom, nasaba makkedai Musa, “Séddika tau polé-polé ri wanuwa laingngé”; ana' maduwaé nasengngi Eliézer nasaba makkedai Musa, “Allataala nasompaé néné-nénéku pura tulukka sibawa passalama'ka angkanna dé' naunoka arung Maséré.” Poléi Yitro silaong bainéna Musa enrengngé iya duwa ana'na ri padang kessi'é onronna Musa makkéma ri seddéna bulu mapaccingngé. Riwérénni karéba Musa makkedaé poléi mennang, nanassuna duppaiwi. Suju'ni ri yolona Yitro sibawa bauwi. Sisulléni mennang sitanai adisid-disingenna tungke'-tungke', nainappa muttama ri laleng kémana Musa. Nacuritani Musa lao ri matuwanna sininna séuwa-séuwaé iya napogau'é Puwangnge lao ri arungngé sibawa bangsa Maséré'é untu' passalama'i bangsa Israélié. Nacuritangeng toni passalenna sining asukkarakeng iya nangoloiyé bangsa Israélié ri tengnga laleng, sibawa pékkugi Puwangnge passalama'i mennang. Naéngkalingana iya manennaro, marennuni Yitro namakkeda, “Ripojiwi Puwang iya passalama'ékko polé ri limanna arungngé sibawa bangsa Maséré'é! Ripojiwi Puwang iya paleppe'éngngi bangsa Israélié polé ri angatangengngé! Uwissenni makkekkuwangngé makkedaé lebbi battowai Puwangnge naiya sininna déwataé, saba' iya manennaro napogau'i wettunna tau Maséré'é tinda sibawa matempo senna lao ri bangsa Israélié.” Nainappa Yitro tiwii siyagangngaré akkarobangeng ritunu sibawa akkarobangeng rigéré selaku pakkasuwiyang lao ri Allataala. Harun sibawa sininna pamimpinna bangsa Israélié poléni sibawa manré sisama Yitro ri laleng ahadérékenna Allataala. Pappa bajanana nadélékini Musa sining assisalangngé ri yelle'na sining tau Israélié. Iyaro jama-jamangngé mala wettu polé ri éléé narapi wenni. Wettunna naita Yitro sininna iya harusu'é najama Musa, makkutanani, “Aga-agana iya harusu'é mujama untu' bangsaéwé? Harusu'ga iya manennaé mujama alé-alému, angkanna untu' méllauwi bawang pangajamu, iyaro sining tauwé harusu'i tettong kuwaé polé ri éléé narapi wenni?” Nappébali Musa, “Iyaro sining tauwé laowi ri iyya untu' missengngi élona Allataala. Rékko sisalai mennang, mangoloi ri iyya kuwammengngi upettuiwi parakarana, sibawa upalettukengngi mennang sining paréntana nenniya hukkung-hukkunna Allataala.” Nakkeda Yitro, “Dé' namakessing makkuwaéro. Iyaro caraé naposoi alému, sibawa iyatoro sining tauwé. Iyaro jama-jamangngé maéga senna'i untu' séddi tau. Engkalingai pangajaku, na Allataala tulukko matu. Mémeng makessing wakkélékiwi bangsaéwé ri yolona Allataala sibawa tiwii persoalanna ri Aléna. Harusu'ko mappagguruwangngi lao ri mennang sining paréntana Allataala sibawa pakatajangngi cara atuwong iya makessingngé sibawa aga mennang harusu napogau'. Iyakiya ri lainnaéro harusu'ko pilé siyagangngaré tau worowané iya mapanré, sibawa jello'i mennang mancaji pamimpinna ri yasé'na sisebbu tau, sératu tau, limappulo tau, sibawa seppulo tau. Sitinajai mennang sining tau iya métaué sibawa turusiyéngngi Allataala, wedding riyatepperi sibawa dé' namaélo tarima dowi pasoso. Suroi mennang tinda selaku haking-hakinna bangsaéwé, tungke'-tungke' lao ri kalompo'na. Iyaro jamangngé harusu'i napogau' mennang secara taratoro. Parakara-parakara iya pentingngé weddingngi mennang napangolo ri iko, iyakiya assisalang iya baiccu'é naulléi mennang pacceppiwi. Iyaro gau'é naringengiko matu nasaba maccowéi mennang mattanggung jawa'. Rékko mupogau'i makkuwaéro, na iyaro gau'é napparéntangngi Allataala lao ri iko, mulléi matu pogau'i jamammu, sibawa sininna tauwé lisui matu sibawa masennang nasaba masitta'i ripacceppi persoalanna.” Naccowérini Musa pangajana Yitro, sibawa piléi sining tau iya mapanré ri yelle'na bangsa Israélié. Najello'ni mennang mancaji pamimping ri yasé'na sisebbu tau, sératu tau, limappulo tau, sibawa seppulo tau. Napajoppani mennang jamanna selaku haking-haking ri yasé'na bangsa Israélié. Parakara-parakara pentingngé napangoloi mennang ri Musa, naiya assisalang baiccu-baiccu'é napacceppini mennang. Nainappa Musa naleppessang Yitro lao nanalisuna Yitro ri wanuwanna. na Musa tuppuiwi iyaro bulué untu' siruntu sibawa Allataala. Mabbicarani Puwangnge polé ri buluéro sibawa suroi mappallebbangengngi lao ri tau Israélié, wija-wijanna Yakub, “Purani muwita aga Napogau' lao ri tau Maséré'é, sibawa pékkugi-Ka tiwiko lao ri Iyya ri onrongngéwé nasibawang akuwasang battowa, pada-pada kuwajangngé tiwii ana'na ri yasé'na pannina. Makkekkuwangngé rékko muturusi-Ka sibawa matinulu lao ri assijancik-Ku, Upancajiko matu umma riyalé-Ku. Sininna linoé iyanaritu appunnangek-Ku, iyakiya iko mancajiko appunnangeng uwélorik-Ku, mallaing untu' alé-Ku muto, na iko tumaningi-Ka matu selaku imang-ngimang.” Nanonnona Musa sibawa mobbii sining pamimpingngé kuwammengngi naddeppungeng, nainappa nacuritang mennang sininna séuwa-séuwaé iya napparéntangngé Puwangnge lao ri aléna. Makkekkuwangngé sitano sining tauwéro, namusuroi iyaé essoé sibawa baja passadiyai aléna untu' massompa. Harusu'i mennang sessa'i pakéyanna. Harusu'i mennang sadiyana sangadi. Iyaro essoé maélo-Ka nonno ri tompo'na Bulu Sinai, onrong weddingngé naitaka sininna tauwé. Ebbuno tanrang ri mattulilinna buluéwé selaku pakkaséséng iya dé'é nawedding naliweng iyaro bangsaé. Attéyangngi iyaro bangsaé tuppuiwi bulué, mala maddeppériwi. Nigi-nigi léttoi pakkasésénna, rihukkung matéi matu; iyaro tauwé harusu'i rigenrung batu iyaré'ga ripana, sibawa dé' nawedding rigéssa. Iyaé takkennai muwi lao ri tolinoé iyaré'ga untu' olokolo'é; sininna iya liwengngéngngi iyaro pakkaséséngngé harusu'i rihukkung maté. Wettunna muwéngkalinga oni tarompé malampéé, iyaro sining tauwé harusu'i tuppuiwi bulué.” Ri éléna ri esso matellué engka guttu sibawa letté. Momponi ellung iya makkompe'é ri tompo'na bulué sibawa riyéngkalingani oni tarompé iya maladde senna'é. Sininna tauwé ri akkémangngé ténréni nataro tau. Natiwini Musa mennang massu untu' sita sibawa Allataala, nainappa tettong ri ponna buluéro. Natongko manenni rumpu Bulu Sinai, nasaba nonnoi Puwangnge ri tompo'na ri laleng apié. Iyaro rumpué maddumpuni pada-pada rumpu polé ri onrong attunungngé, sibawa taggottanni masero senna sininna bulué. Pédé maladde'i oni tarompé'é. Mabbicarani Musa, na Allataala baliwi sibawa guttu. Nonnoni Puwangnge ri tompo'na Bulu Sinai, sibawa mobbii Musa untu' ménré ri tompo'na buluéro. Nanatuppuna Musa, namakkeda Puwangnge lao ri aléna, “Nonnono namuparéngngerangiwi sining tauwéro makkedaé dé' nawedding mennang liwengngi pakkaséséngngé untu' mita-Ka. Rékko naliwengngi mennang, maéga maté matu ri yelle'na. Mala sining imang iya maéloé maddeppérika, harusu'i pépaccingiwi aléna; rékko dé', Uhukkungngi matu mennang.” Nakkeda Musa lao ri Puwangnge, “Iyaro sining tauwé dé' nawedding ménré, saba' muparéntakki untu' mangga'i iyaé buluéwé selaku onrong iya mapaccingngé sibawa pénessaiwi pakkasésénna ri mattulilinna.” Nappébali Puwangnge, “Nonnono, nainappa lisu kuwaé silaong Harun. Iyakiya sining imang sibawa ra'ya'é dé' nawedding naliweng pakkaséséngngé untu' lao ri Iyya. Rékko naliwengngi, Uhukkungngi matu mennang.” Nananonnona Musa méwai sita bangsaéro sibawa napalettu'ni pasenna Puwangnge lao ri mennang. Nanabbicarana Allataala, na iyanaé ada-adan-Na, “Iyya'na Puwang Allataalamu iya tiwiékko massu polé ri Maséré onrommu ripowata. Aja' musompa déwata-déwata laing. Sompa-Ka bawang. Aja' muwébburengngi alému dato'-dato' iya sinrupaé muwi aga iya engkaé ri langié, ri linoé iyaré'ga ri laleng uwai ri yawana linoé. Aja' musompai dato'-dato' makkuwaéro, nasaba Iyya'na Puwang Allataalamu, na dé' umaélo ripappada-padai sibawa muwi aga. Sining tau iya benciyék-Ku, Uhukkungngi lettu ri wija matellué sibawa maeppaé. Iyakiya Uwappaitangngi pammasé-Ku lao ri massebbu-sebbu assossorenna sining tau iya méloriyékka sibawa turusiwi parénta-Ku. Aja' muteppuwi asek-Ku sibawa sembarangang, saba' Iyya, Puwang Allataalamu, hukkungngi nigi-nigi iya makkégunang salaéngngi asek-Ku. Pakarajai esso Saba'é sibawa pakalebbii iyaro essoé selaku esso iya mapaccingngé. Uwérékko enneng esso untu' majjama, iyakiya esso iya mapitué iyanaritu esso appésaungeng iya ripallaingngé untu' Iyya. Iyaro essoé dé' muwi séddi tau wedding majjama, muwi iko iyaré'ga ana'-ana'mu, ata-atammu, olokolo'mu iyaré'ga tau laing iya monroé ri wanuwammu. Ri laleng wettu enneng essona, Iyya, Puwang, mébbui linoé, langié, tasi'é, sibawa sininna iya engkaé ri lalenna, iyakiya ri esso iya mapitué mappésau-Ka. Iyanaro saba'na Iyya, Puwang, barakkakiwi esso Saba'é sibawa pallaingngi untu' alé-Ku. Pakalebbii ambo' indo'mu, kuwammengngi musaléwangeng sibawa malampé umuru ri wanuwa iya Uwéréngngékko matu. Aja' mupauno. Aja' mumalaweng. Aja' muwénnau. Aja' muwabbéré asabbiyang bellé-bellé ri tau laingngé. Aja' muwacinnaiwi appunnangenna tau laingngé: bolana, bainéna, ata-atanna, olokolo'na, kaleddé'na, iyaré'ga muwi aga iya nappunnangiyé.” Wettunna naéngkalinga sining tauwé guttué sibawa oni tarompé'é, enrengngé mitai billa'é sibawa bulu iya maddumpué, ténréni mennang métau sibawa tettong mabéla-béla. Nakkeda mennang lao ri Musa, “Iko bawanna mabbicara lao ri idi, maéloki méngkalingai; iyakiya aja'na na Allataala mabbicara lao ri idi, matéki matti.” Nappébali Musa, “Aja' mumétau. Poléi Allataala banna untu' cobaiko kuwammengngi mutette turusiwi, sibawa dé' mumadosa.” Iyakiya iyaro sining tauwé tettongngi mabéla-béla, na banna Musa maddeppériwi ellung makalemmengngé ri onrong naengkaiyé Allataala. Puwangnge paréntangngi Musa untu' powadai lao ri bangsa Israélié, “Purani muwita pékkugi Iyya, Puwang, mabbicara lao ri iko polé ri langié. Aja' muwébburengngi alému dato'-dato' péra' iyaré'ga ulaweng untu' musompa rilaik-Ku. Ebburek-Ka séddi mézba polé ri tanaé nainappa Muwakkasuwiyangeng kuwaro bimbala'mu sibawa sapimmu untu' akkarobangeng ritunu sibawa akkarobangeng pappasidamé. Ri tungke' onrong iya Upattentungengngékko selaku onrong untu' massompa lao ri Iyya, maéloka polé sibawa barakkakiko. Rékko muwébburekka séddi mézba polé ri batué, aja' muwébbui polé ri batu ripaé, saba' rékko mupakéi paé untu' puwé'i batué, iyaro mézbaé dé'na nawedding ripaké untu' alé-Ku. Aja' mupatettong mézba iya matanré angkanna harusu'i riyénréki sibawa addénéng, kuwammengngi aja' napaita bagiyang watakkalému iya dé'é nasitinaja riita.” Nainappa makkeda Puwangnge lao ri Musa, “Wéréngngi tau Israélié iyaé peraturang-peraturangngé: Rékko melliko séddi ata bangsamu muto, harusu'i mappallaungekko enneng taung ittana. Ri laleng taung mapitué harusu'i ripaleppe sibawa dé' naparellu tiwi aga-aga. Akkalarapanna dé'pa nakawing wettunna mancaji atammu, dé' nawedding maccowé bainéna wettunna massu. Iyakiya akkalarapanna purani kawing wettunna mancaji atammu, weddingngi maccowé silaong aléna. Rékko puwanna pakawingngi sibawa séddi makkunrai, nainappa lolongeng ana', iyaro bainéna silaong ana'na iyanaritu appunnangenna puwanna, sibawa dé' nawedding maccowé silaong iyaro ataé wettunna ripamaradéka. Iyakiya akkalarapanna iyaro ataé napannessai makkedaé naéloriwi bainéna, ana'-ana'na sibawa puwanna, enrengngé dé' namaélo ripamaradéka, harusu'i puwanna tiwii ri onrong assompangngé. Kuwaro risuroi iyaro ataé tettong sanré ri tange'é iyaré'ga ri alliri tange onrong assompangngé, naharusu'i puwanna teddoi daucculinna iyaro ataé. Namancajina atanna gangka maténa. Rékko séddié makkunrai Ibrani ribalu selaku ata ri ambo'na, iyaro makkunraié dé' naripamaradéka rékko labe'ni enneng taung, jaji silaingeng sibawa ata worowané. Rékko dé' napésennangiwi puwanna iya manniya'é kawingiwi, harusu'i ribalu paimeng lao ri tomatowanna. Iyaro makkunraié dé' nawedding ribalu lao ri tau laingngé saba' purani rigau' dé naadélé ri puwanna iya dé'é narupaiwi jancinna. Rékko séddié tau melli ata makkunrai untu' napasiyalangngi ana'na, iyaro ata makkunraié harusu'i nagaukeng pada-pada ana'na muto. Rékko iyaro ana' worowané kawingngi paimeng, tette'i mappunnai kewajibang untu' mpéréngngi inanré sibawa pakéyang enrengngé sininna ha'é pada-pada biyasaé lao ri bainéna bunge'é. Rékko dé' narupaiwi iyaro kewajibangngé, harusu'i napamaradéka iyaro bainéna tettarima dowi pakkamaja.” “Nigi-nigi munrui tau laingngé gangka maté, harusu'i rihukkung maté. Iyakiya rékko dé' nattungkaiwi munrui sibawa dé' nakkattaiwi mpunoi, weddingngi lari lao riséddié onrong iya Ujellokengngékko matu, na kuwaniro lolongeng allinrungeng. Iyakiya rékko séddié tau ménré'i pellana sibawa nattungka mpunoi tau laingngé, nainappa lari lao ri mézba-Ku untu' lolongeng allinrungeng, iyaro tauwé harusu'i riyala polé ri mézbaé sibawa rihukkung maté. Nigi-nigi munrui ambo'na iyaré'ga indo'na harusu'i rihukkung maté. Nigi-nigi culi'i séddié tau, harusu'i rihukkung maté, aga purani nabalu iyaro tauwé iyaré'ga engka mupi ri bolana. Nigi-nigi tanroiwi ambo'na iyaré'ga indo'na, harusu'i rihukkung maté. Rékko ri laleng séuwaé allagang séddié tau munrui tau laingngé sibawa batu iyaré'ga pajjagguru'na, iyakiya dé' naunoi, dé' nawedding rihukkung. Rékko iyaro tau naunrué harusu'i léwu nasaba pakkunrunaro, iyakiya rimunri naulléi moto' sibawa joppa paimeng sibawa tekkeng, tau iya munruéngngiro harusu'i jampangiwi narapi majjappa sibawa sulléiwi aroginna ri wettu malasana. Nigi-nigi munrui atanna worowané iyaré'ga makkunraié angkanna matteru maté iyaro ataé, harusu'i rihukkung. Iyakiya rékko iyaro ataé dé' namaté ri laleng siessoé iyaré'ga duwangngessoé, iyaro puwanna dé' narihukkung. Aroging iya napéneddingiyé nasaba ateddéngengngi atannaro mancajiwi pahukkungenna. Rékko siyagangngaré tau worowané mattengngang mallaga na sala séddinna ri yelle'na mennang loi séddié makkunrai mattampu angkanna alaungeng, iyakiya dé' namapeddi ri bagiyang laingngé, iyaro tauwé harusu'i makkamaja denda singngéga natuntu'é lakkainna sibawa nasitujuiyé haking-hakingngé. Iyakiya rékko iyaro makkunraié maladde'i lona, pahukkungenna untu' iyaro jaé iyanaritu nyawa risulléi nyawa, mata risulléi mata, isi risulléi isi, lima risulléi lima, ajé risulléi ajé, lo risulléi lo, lo nanré api risulléi lo nanré api, boro risulléi boro. Nigi-nigi munrui matanna atanna angkanna buta, harusu'i napamaradéka iyaro ataé selaku pakkamaja untu' matanna. Rékko séddié tau munrui atanna gangkanna polo isinna, iyaro ataé harusu'i ripamaradéka selaku pakkamaja untu' isinnaro.” “Rékko séddié saping lai tanru'i séddié tau gangka maté, iyaro sapingngé harusu'i riyuno sibawa rigenrung batu, na jukuna dé' nawedding riyanré, iyakiya punnana dé' narihukkung matu. Rékko iyaro saping laié mappunnaiwi abiyasang mattanru, na purani riparéngngerangi puwanna, iyakiya dé' najagaiwi iyaro olokolo'é, nainappa iyaro saping laié natanru'i tauwé gangka maté, iyaro olokolo'é harusu'i riyuno sibawa rigenrung batu sibawa puwanna harusu towi rihukkung maté. Iyakiya rékko iyaro punna sapingngé ripalaloi wajai, harusu'i nawaja siyaga égana iya natuntu'é untu' wajai nyawana. Rékko iyaro naunoé séddiwi ana' worowané iyaré'ga makkunrai, nakenna towi iyaro peraturangngé. Rékko iyaro naunoé séddiwi ata worowané iyaré'ga makkunrai, iyaro puwanna sapingngé harusu'i nawaja telluppulo dowi péra' lao ri puwanna ataéro, sibawa iyaro saping laié harusu'i rigenrung batu gangka maté. Nigi-nigi malaiwi pattongkona séddié bujung, iyaré'ga kali bujung na dé' natongkoi, nasempé séddi saping lai iyaré'ga kaleddé ri lalenna, iyaro punna bujungngé harusu'i makkamaja passullé aroging lao ri punna olokolo'éro, iyakiya weddingngi nala olokolo iya matéénnaro untu' aléna. Rékko saping lainna séddié tau mpunoi saping lainna tau laingngé, iya duwa punnana harusu'i balu'i iyaro olokolo iya tuwoé mupa nainappa nabagé dowina. Harusu towi mennang nabagé jukuna olokolo iya matéénnaro. Iyakiya rékko pura naissenni makkedaé iyaro saping laié mappunnaiwi abiyasang mattanru, na iyaro punnana dé' najagaiwi, harusu'i nasulléi sibawa saping lai iya tuwoé mupa, sibawa weddingngi nala iyaro olokolo matéénna untu' aléna.” “Nigi-nigi ménnau sikaju saping iyaréga bimbala nainappa nagéré iyaré'ga nabalu', harusu'i nasulléi tungke' sikaju saping sibawa limakkaju saping sibawa tungke' sikaju bimbala sibawa patakkaju bimbala. Nigi-nigi malleppessangngi olokolo'na ri dare'na iyaré'ga ri palla anggoro'na, nainappa iyaro olokolo'é mallamparengngi sibawa manréi wassélé dare'na tau laingngé, iyaro punna olokolo'é harusu'i makkamaja passullé aroging sibawa wassélé iya kaminang makessingngé polé ri dare'na iyaré'ga palla anggoro'na muto. Nigi-nigi patuwo api ri dare'na muto nainappa iyaro apié makkalolo'i lao ri dare'na tau laingngé nanaanréi gangka cappu gandong iya tuwoé iyaré'ga wessé-wessé gandong iya nappa naéngngalaé, tau iya palluwa'éngngi iyaro apié harusu'i makkamaja passullé aroging. Ebara'na engka tau iya situjuiyéngngi mappaddettangeng maddupa dowi iyaré'ga barang mangke'é. Iyakiya rimunri riyénnauwi iyaro riyappaddettangengngé ri bolana. Rékko rilolongengngi iya ménnauwéngngi, harusu'i nawaja leppi wékkaduwa. Iyakiya rékko dé' narilolongeng iya ménnauwéngngi, tau iya riyappaddettangiyéro rahusu'i ritiwi ri onrong assompangngé, sibawa harusu'i mattanro kuwaro makkedaé dé' naénnauwi barang iya riyappaddettangengngé ri aléna. Ri laleng tungke' assisalangngé passalenna appunnangengngé, saping iyaré'ga kaleddé, bimbala, pakéyang iyaré'ga agi-agi iya teddéngngé nainappa riruntu paimeng, sining tau iya mangakué selaku punnana harusu'i ritiwi ri onrong assompangngé. Tau iya napannessaé Allataala selaku tau pasala, harusu'i nawaja leppi wékkaduwa lao ri punnana. Ebara'na séddié tau mappiyara kaleddé, saping, bimbala iyaré'ga olokolo laing appunnangenna padanna. Namaté iyaro olokolo'é, malo iyaré'ga narampasa'i balié, padahal dé'gaga sabbinna. Ri laleng gau'éro harusu'i lao ri onrong assompangngé sibawa mattanro ri laleng asenna Puwangnge makkedaé dé' naénnauwi olokolo iya puraé riyappaddettangeng ri aléna. Rékko mémeng dé' naénnauwi, punnana harusu tanggungngi arogingngéro, na tau iya piyaraéngngi dé' naparellu makkamaja passullé aroging. Rékko iyaro olokolo'é naénnauwi tau laingngé, tau iya piyaraéngngi harusu makkamaja passullé aroging lao ri punnana. Rékko iyaro olokolo'é nanréi olokolo masekkang, tau iya piyaraéngngi harusu'i nappaitang sésa buku-bukunna selaku butti lao ri punnana; dé' naparellu makkamaja passullé aroging untu' olokolo'éro. Rékko séddié tau minreng olokolo nainappa iyaro olokolo'é maloi iyaré'ga matéi wettunna punnana dé'i gaga ri onrong kajajiyangngéro, iya minrengngéngngi harusu'i makkamaja passullé aroging. Iyakiya rékko iyaro kajajiyangngi ri wettu engkana punnana kuwaro, iya minrengngéngngi dé' naparellu makkamaja passullé aroging. Rékko iyaro olokolo'é, olokolo riséwa, aroginna risuluriwi ri ongkoso séwana.” “Nigi-nigi iya palécééngngi séddié ana' perawang iya dé'éppa nattunangang untu' siyatinrong harusu'i nawaja sompana sibawa kawingiwi. Iyakiya rékko ambo'na dé' napalaloi iyaro worowané kawing sibawa ana'na, iyaro worowané harusu'i nawaja lao ri ambo'éro dowi singngéga sompana untu' séddié ana' perawang. Tungke' makkunrai iya pogau'éngngi séhéréé harusu'i riyuno. Tau iya mallaiyé sibawa olokolo'é harusu'i riyuno. Nigi-nigi makkasuwiyangeng akkarobangeng lao ri déwata-déwata laingngé sangadinna lao ri Iyya, Puwang, harusu'i rihukkung maté. Aja' mutenre'i iyaré'ga kédo dé' naadélé lao ri tau laingngé; éngngerangngi makkedaé iko riyolo tau laing tokko ri Maséré. Aja' mugaukengngi jandaé iyaré'ga ana' béué sibawa siélo-élo. Rékko mupéjariwi mennang, Iyya, Puwang méngkalingai matu mennang rékko mangobbii méllau tulung lao ri Iyya. Macaika matu sibawa mpunoko ri laleng musué, angkanna mancaji jandai sining bainému, sibawa mancaji béui ana'-ana'mu. Rékko mupainrengiwi dowi séddié tau kasiyasi polé ri yelle'na bangsa-Ku, aja' mukédo pada-pada passinge inreng iya tuntu'é bunga. Rékko muwalai jumbana tau laingngé selaku boro'na inrenna, iyaro jumbaé harusu'i mupalisu ri wettu dé'napa nalabu essoé, saba' iyaro kaingngé iyanaritu appunnangeng alé-aléna untu' pellaiwi watakkaléna. Rékko dé' naripalisu ri aléna, agapi harusu napaké untu' papparampa wettunna matinro? Rékko mangobbii méllau tulung lao ri Iyya, Uwéngkalingai nasaba paressé babuwa-Ka. Aja' mutanroiwi Allataala sibawa aja' mutanroiwi pamimping bangsamu. Ri wettu iya ripattentué, akkasuwiyangengngi ri Iyya si bagiyang polé ri wassélé gandommu, uwai anggoro'mu sibawa minnya zaitummu. Abbéréyangngi lao ri Iyya ana'-ana' worowanému macowaé, makkuwatoro saping sibawa bimbala lai iya bunge' jajiyé. Leppessangngi iyaro olokolo'é monro ri indo'na pitungngesso ittana, nainappa muwabbéréyang lao ri Iyya ri esso maaruwaé. Iko umma'-Ku, rimakkuwannanaro muwi olokolo aga iya nanré olokolo masekkangngé, dé' nawedding muwanré jukuna; wéréngngi iyaro sining asué.” “Aja' mupallebbangngi karéba bellé sibawa aja' mutulungngi tau majaé iya mabbéré asabbing iya dé'é natongeng. Aja' mukacowé-cowé sibawa tau maégaé rékko pogau'i mennang asalang iyaré'ga palaosalai hukkungngé sibawa mabbéré asabbiyang iya dé'é natongeng. Aja' mupasilail-laingengngi tauwé ri laleng pengadilangngé, namuni iyaro riadélékiyé tau kasiyasi. Rékko nasitujuwangngi muwitai sapinna iyaré'ga kaleddé'na balimmu pusa, tiwii paimeng lisu ri punnana. Rékko menrungngi kaleddé'na balimmu nasaba matane'i tékéna, tulungngi patettongngi iyaro kaleddé'é; aja' musalaiwi makkuwaro bawang. Gaukengngi tau kasiyasié sibawa adélé rékko poléi pangoloi parakarana ri pengadilangngé. Pabélaiwi teppuwang bellé sibawa aja' nassabariwi tau iya dé'é napasala rihukkung maté, nasaba dé' Upattongengngi tau iya pogau'éngngi ja makkuwaéro. Aja' mutarima dowi pasoso, saba' dowi pasoso'é mébbui tauwé buta lao ri iya tongengngé sibawa parogiwi sining tau iya dé'é napasala. Aja' mugaukengngi tau laingngé siélo-élo; muwisseng pékkugi pappéneddinna mancaji tau laing, saba' riyolo tau laing tokko ri Maséré.” “Enneng taung ittana weddikko tanengiwi dare'mu sibawa malai aga iya napowassélé'é. Iyakiya ri taung iya mapitué iyaro tanaé harusu'i muleppessang. Ri lalenna iyaro taungngé dé' nawedding mupaddeppungeng aga iya natuwongngé aléna ri dare'mu. Leppessangngi iyaro untu' tau kasiyasié, na sésana untu' olokolo liyaé. Ebbu towi makkuwaro sibawa palla anggoro'mu nenniya sining pong zaitummu. Enneng essona ri laleng si minggué weddikko majjama, iyakiya ri esso mapitué harusu'ko mappésau, kuwammengngi olokolo'mu, ata-atammu sibawa sining tau majjamangengngékko wedding towi mappésau. Puriatiwi sininna iya puraé upowadakko. Aja' musompai déwata-déwata laingngé, muwi teppui asenna dé'to nawedding.” “Tungke' taung harusu'ko pakangka tellu ramé-ramé untu' pakalebbi-Ka. Ri laleng uleng Abib ri wettu iya ripattentué, harusu'ko ramé-raméiwi Pésta Roti Dé'é Raginna sibawa cara-cara iya puraé Uparéntakko, saba' ri laleng ulengngéro musalaiwi Maséré. aja' muwanré roti iya riyébbué paké ragi ri laleng ramé-ramé pitungngessoéro ittana. Assaleng laoko massompa ri Iyya, harusu'ko tiwi pakkasuwiyang. Ramé-raméiwi Pésta Engngalangngé ri wettunna mupammulai wassélé bunge'na dare'mu. Ramé-raméiwi Pésta Kalampang Daud-daungngé ri paccappurenna taungngé wettunna mupaddeppungeng wassélé palla anggoro'é sibawa palla buwa-buwaé. Tungke' taung wettunna ripakangka iya telluro ramé-ramé, sininna tau worowané harusu'i lao massompa ri Iyya, Puwang Allataalamu. Aja' muwakkasuwiyangeng roti iya engkaé raginna ri wettu muwakkarobangenna olokolo'é lao ri Iyya. Lunra olokolo iya riyakkasuwiyangengngé lao ri Iyya ri lalenna ramé-raméro dé' nawedding ritaro narapi bajana éléé. Tungke' taung harusu'ko tiwi ri Bolana Puwang Allataalamu gandong bunge' muwéngngalaé. Juku ana' bimbala'é iyaré'ga ana' bémbé'é dé' nawedding rinasu sibawa uwai susunna indo'na.” “Maéloka suroi malaéka'-Ku poddiyoloiko untu' linrungiko ri laleng allalengengngé sibawa tiwiko ri onrong iya Upassadiyaé. Puriatiwi sibawa turusiwi. Aja' mumaronta lao ri aléna nasaba suro-Kui, sibawa dé' naddampengengngi matu pelanggarammu. Rékko muturusiwi aléna sibawa pogau'i sininna iya Uwapparéntangngé, maélo-Ka mammusu méwai sininna balimmu. Malaéka'-Ku poddiyoloiko matu sibawa tiwiko ri wanuwanna bangsa Amorié, Hét-é, Feris-é, Kanaangngé, Héwié sibawa Yébus-é, sibawa ripaccappui matu mennang. Aja' musompai dato'-dato' pallinrunna mennang sibawa aja' muturui cara-carana mennang massompa. Ancuru'i dato'-dato' pallinrunna mennanro sibawa poloi alliri-alliri batu iya napaké mennang untu' massompa. Rékko musompa-Ka, Puwang Allataalamu, maélo-Ka barakkakiko sibawa inanré enrengngé énungeng, sibawa sininna lasaé maélo-Ka pabélaiwi polé ri iko. Ri wanuwammu dé' matu gaga makkunrai alaungeng iyaré'ga manang. Uwérékko matu umuru malampé. Bangsa-bangsa iya mulokkaiyé Uwébbui matu métau lao ri Iko; Upancajiwi matu mennang kajili-jili; sininna balimmu balé'i matu na lari. Sininna balimmu Upakacauwi matu, na bangsa-bangsa Héwié, Kanaangngé sibawa Hét-é Urukkai polé ri yolomu kuwammengngi mulléi maju. Dé' Upaddésu manengngi matu mennang ri laleng wettu sitaungngé, kuwammengngi iyaro tanaé aja' nakullang, sibawa olokolo masekkangngé aja' nallampareng. Upaddésu'i matu mennang tassibagiyang-tassibagiyang, narapi sining taummu cuku'ni égana untu' tudangiwi tanaéro. Pakkaséséng-pakkasésénna wanuwammu Upattentui matu polé ri Séppang Akaba lettu ri Salo Efrat, sibawa polé ri Tasi Tengngaé lettu ri padang kessi'é. Uwérékko akuwasang ri yasé'na pabbanuwana wanuwaéro, angkanna mulléi paddésu'i mennang wettummu maju sittaiwi tanaéro. Aja' muwébbu assijancing sibawa sining tauwéro iyaré'ga sibawa déwata-déwatana mennang. Aja' muleppessangngi sining tauwéro monro ri wanuwammu, kuwammengngi aja' musompai déwata-déwatana mennang sibawa madosa lao ri Iyya. Rékko musompai déwata-déwatana mennang, sempé'ko ri laleng jebba'na amaténgngé.” Nainappa makkeda Puwangnge lao ri Musa, “Enré'no untu' mangolo ri Iyya, iko silaong Harun, Nadab sibawa Abihu, enrengngé pituppulo pamimpinna bangsaé, namusuju' sompa-Ka polé mabéla. Banna iko bawang wedding maddeppéri-Ka. Iya laingngé dé' nawedding lao maddeppé, sibawa ra'ya'é mala dé' nawedding tuppuiwi iyaé bulué.” Nanalaona Musa mappallebbangengngi lao ri bangsaéro sininna paréntana sibawa peraturanna Puwangnge. Nappébali manenna mennang massama-samang, “Maéloki pogau' manengngi iya napowadaé Puwangnge.” Purairo naokini Musa sininna paréntana Puwangnge. Bajana éléé, patettonni séddi mézba sibawa seppulo duwa tugu ri ponna buluéro; tungke' tugu wakkélékiwi sala séddinna suku Israélié. Nanasuroni Musa siyagangngaré kallolo, sibawa makkasuwiyangenni mennang akkarobangeng ritunu untu' Puwangnge enrengngé géré siyagangngaré saping untu' akkarobangeng pappasidamé. Sibagiyang polé ri dara sapingngéro nalani Musa nanatiri'i ri laleng katowang-katowangngé. Sibagiyassi natiri'i ri yasé'na mézbaé. Nainappa nala kitta' assijancing iya riyarokiriyé parénta-paréntana Puwangnge, nanabacangengngi iyaro bangsaé sibawa sadda macenno. Adanna mennang, “Maéloki turusiwi Puwangnge sibawa pogau'i sininna parénta-Na.” Nainappa nala Musa dara iya engkaé ri laleng katowang-katowangngéro nanabbolorengngi ri yasé'na ra'ya'é. Adanna, “Iyaé daraé pakkasse'i assijancing iya nasiyoé Puwangnge sibawa iko situru parénta-parénta-Na.” Purairo Musa, Harun, Nadab, Abihu sibawa pituppulo pamimpingngéro tuppuiwi bulué, nanaitani mennang Allataalana Israélié tettong ri yasé'na séuwaé pada-pada témbo' polé ri batu nilangngé, sibawa magawu pada-pada langi iya macakkaé. Iyaro sining pamimpinna Israélié naitani Allataala; namuni makkuwaro dé' mennang Naripabbinasa. Purairo manréni sibawa ménunni mennang. Namakkeda Puwangnge lao ri Musa, “Laono ri Iyya ri tompo'na bulué. Kuwaro Uwérékko matu duwa batu iya Uwarokiriyé sibawa sininna hukkuk-Ku. Iya manenna hukkungngéro Uwabbéréyangngi untu' pappagguruwang lao ri bangsaéro.” Nasadiya-sadiyana Musa dibawa Yosua pabbantunna na Musa tuppuiwi bulu onronna Puwang -ngéro. Purani mappaseng Musa lao risining pamimpinna Israélié, “Attajenno ri akkémangngéwé narapi lisuki. Harun sibawa Hur engkai sibawakko kuwaé. Nigi-nigi engka persoalanna, weddingngi mangolo mennang untu' lolongeng apurang.” Natuppuini Musa Bulu Sinai, naritongkona ri sitékké ellung. Natteruna Musa tuppu narapi muttama ri laleng ellungngéro. Patappulo esso patappulo wenni Musa monro kuwaro. Makkedai Puwangnge lao ri Musa, “Suroi tau Israélié tiwi pakkasuwiyangeng lao ri Iyya. Nigi-nigi ripakédo atinna, harusu'i tiwi pakkasuwiyang maddupa: ulaweng, péra' sibawa gessa; kaing lénang alusu, kaing wol gawu, collipao sibawa cella, kaing polé ri bulu bémbé'é, bingkulang bémbé lai iya ripecco cella'é, bingkulang alusu, aju akasia, minnya untu' lampu, rampa-rampa untu' minnya upacara sibawa untu' dupa iya mabaué, maddupa-rupang batu paramata untu' riparamataingengngi éfod-é sibawa pattongko arona Imang Lompoé. Suroi iyaro bangsaé mébburek-Ka séddi kéma, kuwammengngi weddik-Ka monro ri tengngana mennang. Kéma sibawa paréwanna harusu'i mennang naébbu situru rancana iya Ujellokengngéngngi matu.” “Ebbuno séddi petti polé ri aju akasiaé iya lampénaé 110 sénti, sakkana sibawa tanréna tungke'-tungke' 66 sénti. Lapiriwi bagiyang ri lalenna sibawa saliwenna ulaweng tuléng sibawa ébbui pamirinna polé ri ulawengngé. Untu' aju pabbuléna, ébburengngi eppa toling ulaweng sibawa assakkarengngi ri iya eppa ajéna, duwa toling ri tungke' benrénna. Ebbu towi pabbuléna polé ri aju akasiaé namulapiriwi iyaro sibawa ulaweng, nainappa muputtama iyaro aju pabbuléna ri laleng tolinna ri tungke' benrénna iyaro pettié. Iyaro aju pabbuléna harusu'i tette engka ri laleng sining tolinnaro, sibawa dé' nawedding ripassu. Na ri laleng pettiéro harusu'i mutaro iya duwa batué sibawa parénta-parénta iya maéloé Uwérékko. Ebbui iyaro pattongkona pettié polé ri ulawengngé, lampéna 110 sénti sibawa sakkana 66 sénti. Ebbuno duwa kérub polé ri ulaweng rilanroé, séddi ri tungke' cappa pattongkona pettiéro. Iya duwa kérub-éro harusu'i ripasséddi sibawa pattongkona, sibawa riyébbui siyolong panni iya mallebba'é ri tompo'na pettiéro. Taroi iya duwa batué ri laleng pettiéro sibawa pasangngi pattongkona ri tompo'na. Ri onrongngéro maélo-Ka méwako sita, sibawa polé ri yasé'na pattongkona, ri yelle'na iya duwa kérub-éro, Uwérékko matu hukkung-hukkuk-Ku untu' bangsa Israélié.” “Ebburengngi séddi méjang polé ri aju akasiaé iya lampénaé 88 sénti, sakkana 44 sénti, sibawa tanréna 66 sénti. Lapiriwi sibawa ulaweng tuléng enrengngé pasangiwi séddi pamiring ulaweng mattulilingiwi. Ebbui wiring méjanna lebba'na 7,5 sénti sibawa wéréngngi pallacce ulaweng mattulilingiwi iyaro wirinna. Ebburengngi eppa toling polé ri ulawengngé sibawa pasangngi iyaro ri iya eppa sunna ri ajéna, macawé ri wirinna. Iyaro tolingngé untu' tahangngi aju pabbuléna kuwammengngi iyaro méjangngé weddingngi riyulé. Iyaro aju pabbuléé harusu'i riyébbu polé ri aju akasiaé sibawa rilapiriwi ulaweng. Ebbuno penné-penné, cangkiri-cangkiri, kendi-kendi sibawa mangko'-mangko' untu' pakkasuwiyang uwai anggoro. Iya manenna passakke'na méjangngéro harusu'i riyébbu polé ri ulaweng tuléngngé. Iyaro méjangngé harusu'i ritaro ri yolona Petti Assijancingngé, sibawa ri tompo'na méjangngé harusu'i tuli tassadiya patala roti.” “Ebbui ajé lampué polé ri ulaweng tuléngngé. Tudangenna sibawa akkatenningenna harusu'i riyébbu polé ri ulaweng rilanroé; sining bunga bélo-bélona, muttama'ni uce'-uce' unganna sibawa ampélo unganna harusu'i masséddi sibawa tudangenna enrengngé akkatenningenna. Ri akkatenningengngéro harusu'i riyébbureng enneng takké, tellu takké ri tungke' benrénna. Ri tungke' takkéna harusu'i riyébbureng bélo-bélo maddupa tellu bunga badam sibawa uce'-uce' unganna enrengngé ampélo unganna. Ri akkatenningenna harusu'i riyébbureng bélo-bélo maddupa eppa unga badam sibawa uce'-uce' unganna enrengngé ampélo unganna. Ri tungke' pasang takkéro harusu'i riyébbureng séddi uce'-uce' unga. Sininna iyaro ajé lampué sibawa uce'-uce' unganna enrengngé takké-takkéna harusu'i riyébbu polé ri sipolo ulaweng tuléng rilanroé. Ebburengngi pitu lampu ri ajé lampuéro sibawa pasangngi pékkugi carana angkanna tappana liyoloi. Ebburengngi pakkakkasa' untu' pépaccingiwi sumbu lampué sibawa baki'na polé ri ulaweng tuléngngé. Pakéi telluppulo lima kilo ulaweng untu' mébbui iyaro ajé lampué sibawa sininna pappésakke'na. Jagaiwi kuwammengngi ajé lampué riyébbui situru conto iya Ujellokengngékko ri yasé'na buluéro.” “Ebburek-Ka Kéma polé riseppulo lampa lénang alusu, ritennung sibawa kaing wol gawu, collipao sibawa cella. Sulangngi iyaro kaingngé sibawa gambara kérub. Tungke' lampa harusu'i pada-pada ukkuranna, lampéna seppulo duwa météré sibawa sakkana duwa météré. Limallampa kaing harusu'i risambung mancaji séddi ténda, sibawa limallampa laingngé harusu towi riyébbu makkuwaro. Ebburengngi toling polé ri kaing gawu'é ri wirinna iya duwa téndaéro, limappulo toling ri tungke'-tungke' ténda. Ebburengngi limappulo pakkadak-kadang ulaweng untu' pasisambungngi iya duwa téndaéro kuwammengngi naweddingngi ripasséddi. Untu' pabbingenna iyaro Kémaé, ébburengngi seppulo séddi lampana kaing polé ri bulu bémbé'é. Tungke' lampa harusu'i pada ukkuranna, lampéna seppulo tellu météré sibawa sakkana duwa météré. Limallampa harusu'i risambung mancaji séddi ténda, sibawa enneng lampana laingngé harusu towi riyébbu makkuwaro. Sambungenna iya maennengngé harusu'i rileppi duwa untu' tongkoi bagiyang yolona Kémaé. Pasangiwi limappulo pakkadak-kadang ri wirinna ténda mammulangngé sibawa limappulo pakkadak-kadang ri wirinna ténda iya maduwaé. Ebburengngi limappulo pakkadak-kadang polé ri gessaé sibawa akkadangengngi ri tolingngéro kuwammengngi iya duwa téndaéro weddingngi ripasséddi mancaji pabbingenna Kémaé. Sitengnga lampa kaing lebbinna iyanaritu untu' tongkoi bagiyang monrinna Kémaé. Lebbi kaing limappuloé sénti sakkana iya sillampéé Kémaé harusu'i rileppessang tongkoi benrénna iyaro Kémaé. Ebburengngi duwa pattongko untu' bagiyang saliwenna Kémaé, séddi polé ri bingkulang bimbala laié iya ripecco cella'é sibawa iya séddié polé ri bingkulang alusu'é. Ebbui rangka-rangkana Kémaé iya tettongngé polé ri aju akasiaé. Tungke' rangka tanréna eppa météré sibawa sakkana 66 sénti. Ri tungke' rangka engka duwa patto iya ripasangngé, angkanna iyaro rangka-rangkaé weddingngi risambung séddié sibawa laingngé. Untu' bagiyang yattanna Kémaé, ébbui duwappulo rangka, sibawa patappulo pallanggana polé ri péra'é, duwa ri yawana tungke' rangka untu' iya duwa patto'na. Untu' bagiyang manoranna Kémaé, ébbui duwappulo rangka sibawa patappulo pallanggana polé ri péra'é, duwa ri yawana tungke' rangka. Untu' bagiyang monrinna Kémaé ri seddé yajanna, ébbui enneng rangka sibawa duwa rangka untu' sining sunna. Iyaro rangka-rangka sunna ripasisumpungngi ri bagiyang ajéna, matteru lettu ri bagiyang yasé'na. Iya duwa rangka mébbuéngngi sunna harusu'i riyébbu sibawa caraéro. Jaji iya manenna engka aruwa rangka sibawa seppulo enneng pallangga péra'na, duwa ri yawana tungke' rangka. Ebburengngi seppulo lima aju mappolo polé ri aju akasiaé, lima untu' rangka-rangka riséddié benrénna Kémaé, lima untu' benrénna laingngé, sibawa limasi untu' benrénna Kémaé ri bagiyang monri ri seddé yajang. Aju mappolona ri tengngaé harusu'i ripasang sittan're sitengngana rangkaé, polé ri cappa'na lao ri cappa'na Kémaéro. Iyaro rangkana Kémaé sibawa aju-aju mappolona rilapiriwi sibawa ulaweng. Tolit-tolinna untu' tahangngi iyaro sining ajué harusu'i riyébbu polé ri ulawengngé. Patettongngi iyaro Kémaé situru rancana iya Ujellokengngékko ri yasé'na buluéwé. Ebburengngi séddi kaing pallawa tange polé ri lénang alusu'é iya ritennungngé sibawa wol gawu, collipao sibawa macella. Sulangngi iyaro kaingngé sibawa gambara kérub. Gattungngi iyaro kaing pallawa tange'é ri eppa alliri aju akasiaé iya rilapiriyé ulaweng sibawa pakkadak-kadang ulaweng naripasang ri yasé'na eppa pallangga péra'é. Taroi iyaro kaingngé ri yawana atu pakkadak-kadangngé ri pabbingeng Kémaé. Ri monrinna kaingngéro harusu'i ripalénne Petti Assijancingngé iya mallise'é iya duwa batuéro. Iyaro kaingngé lacce'i Bili' Mapaccingngé polé ri Bili' Pommapaccingngé. Palénne'i pattongkona Petti Assijancingngé ri yasé'na pettinna. Méjang akkasuwiyangengngé harusu'i ritaro ri saliwenna Bili' Mapaccingngé ri bagiyang manorang, sibawa ajé lampué ri bagiyang yattang ri laleng Kémaéro. Ebbui kaing pallawa tange'na Kémaé polé ri lénang alusu'é iya ritennungngé sibawa wol gawu, collipao sibawa macella, ribélo-béloi sibawa sulangeng. Untu' kaing pallawaéro harusu'i riyébbureng lima alliri polé ri aju akasiaé iya rilapiriyé sibawa ulaweng enrengngé ripasisumpung sibawa lima pakkadak-kadang ulaweng. Ebbuno lima pallangga polé ri gessaé untu' iyaro alliri-allirié.” “Ebbuno séddi mézba polé ri aju akasiaé. Bentu'na massulapa, lampéna sibawa sakkana tungke'-tungke' 2,2 météré sibawa tanréna 1,3 météré. Ri tungke' sunna ri yasé harusu'i riyébbureng tanru-tanru iya masséddié sibawa mézbaé. Iya manenna harusu'i rilapiri sibawa gessa. Ebbuno pamuttu-pamuttu, kénro, mangko'-mangko', sondo sibawa onrong api. Iya manenna paréwaéro harusu'i riyébbu polé ri gessaé. Ebbuno anengeng kawe polé ri gessaé sibawa pasanno eppa toling untu' aju pabbuléna ri eppa sunna ri yawa. Tanréna iyaro anengeng kawe'é harusu'i sitengngana polé ri tanréna mézbaé. Iyaro anengeng kawe'é harusu'i riyabbebbekeng ri bagiyang yawana mézbaé. Ebbuno duwa aju pabbulé polé ri aju akasiaé iya mallapi gessaé, sibawa puttama'i ri laleng sining tolingngé ri iya duwa benrénna mézbaé wettunna muulé iyaro mézbaé. Ebbui iyaro mézbaé polé ri pépengngé sibawa makkalebbong ri bagiyang lalenna, situru rancana iya Ujellokengngékko ri yasé'na buluéwé.” “Ebburenni Kéma-Ku seddé mattulili iya risappoé sibawa ténda polé ri kaing lénang alusu'é. Ri bagiyang yattanna, lampéna iyaro téndaé 44 météré, ritahangngi polé ri duwappulo alliri gessa, tungke'-tungke' sibawa pallangga gessa, enrengngé pakkadak-kadanna sibawa tolinna poléi ri péra'é. Ebbu towi pada-padaéro ri bagiyang manoranna. Ri seddé yajang, lampéna iyaro téndaé duwappulo duwa météré, sibawa seppulo alliri enrengngé seppulo pallangga. Ri bagiyang alauna, iya engkaé tange'na, lampéna iyaro téndaé duwappulo duwa météré. Untu' tange'na harusu'i ripasangi pallawa sillampé aséra météré polé ri lénang alusu'é iya ritennungngé sibawa wol gawu, collipao sibawa cella, enrengngé ribélo-béloi sibawa sulangeng. Untu' tahangngi iyaro kaing pallawa tange'é harusu'i riyébbureng eppa alliri sibawa eppa pallangga. Sininna alliri iya mattulilingiyéngngi seddénaro harusu'i ripasisumpung séddié lao ri laingngé sibawa toling péra'; pakkadak-kadanna harusu'i polé ri péra'é sibawa pallanggana poléi ri gessaé. Ténda iya mattulilingiyéngngi seddé yolonaro lampéna 44 météré, sakkana 22 météré sibawa tanréna 2,2 météré. Téndana harusu'i riyébbu polé ri kaing lénang alusu'é sibawa pallanggana poléi ri gessaé. Sininna passakke'na iya ripaké ri laleng Kémaé, sininna patto untu' Kémaé sibawa untu' téndana harusu'i riyébbu polé ri gessaé.” “Suroi tau Israélié tiwi minnya zaitun iya tuléngngé sibawa iya kaminang makessingngé untu' lampué ri laleng Kéma-Ku kuwammengngi weddingngi ritunui sibawa malluwa matteru. Harun sibawa ana'-ana'na harusu'i murusu'i iyaro lampué mappammulai arawéng lettu ri éléé ri onrokku hadéré, ri saliwenna kaing iya taggattungngé ri yolona Petti Assijancingngé. Iyaro paréntaé harusu'i napogau' untu' mannennungeng tau Israélié sibawa wija-wijanna.” “Obbii Harun kakamu enrengngé ana'-ana'na Nadab, Abihu, Eléazar sibawa Itamar, namupallaingngi mennang kuwammengngi weddingngi tumaningika selaku imang. Ebbuno pakéyang imang untu' Harun, kuwammengngi napaita malebbi. Obbii sininna tukang pajjai iya puraé Uwéréng amaccang. Suroi mennang mébbui pakéyanna Harun, kuwammengngi weddingngi ripallaing untu' tumaningi-Ka selaku imang. Suro towi mennang mébbu pattongko aro, éfod, jumba, kaméja risulang, passapu sibawa babbang. Iyaro pakéyang imangngé harusu'i naébbu mennang untu' Harun, kakamu sibawa ana'-ana'na kuwammengngi weddingngi natumaningi-Ka selaku imang. Duwa tulu passalémpanna éfod-é harusu'i rijai ri benrénna. Séddi babbang ritennung alusu polé ri bahang iya padaé harusu'i rijai ri éfod-éro kuwammengngi namasséddi. Ri lainnaé iya duwa pamiring ulawengngéro harusu towi riyébbu duwa ranté polé ri ulaweng tuléngngé iya ritulué pada-pada tulué, untu' ripasang ri pamiring ulawengngéro.” “Ebburengngi Imang Lompoé séddi pattongko aro untu' napaké wettunna maélo missengngi élona Allataala. Bahang sibawa sulanna iyaro pattongko aroé harusu'i pada-pada sibawa bahang enrengngé sulangeng éfod-é. Bentu'na massulapa sibawa wedding rileppi duwa, lampé sibawa sakkana tungke'-tungke' 22 sénti. Pasangiwi eppa barisi batu paramata ri pattongko aroéro. Ri barisi mammulangngé batu dalima, topas sibawa baiduri sepah. Ri barisi maduwaé batu zamrud, batu nilang sibawa intang. Ri barisi matellué batu lazuardi, batu aki' sibawa batu kacubung. Ri barisi maeppaé batu pirus, yakut sibawa ratna cempaka. Iya seppulo duwa paramataéro harusu'i risiyo sibawa ulaweng. Tungke' paramata harusu'i riyoki sala séddinna aseng polé riseppulo duwa ana'na Yakub selaku tanrang papparéngngerangeng lao ri suku-suku Israélié. Ebburengngi iyaro pattongko aroé duwa ranté ulaweng tuléng iya ritulué pada-pada tulué. Ebbu towi duwa gellang ulaweng namupasangngi ri iya duwa cappa'na ri yasé'na pattongko aroéro nainappa muputtama iya duwaro ranté ulawengngé ri laleng sining gellangngé onna. Iya duwa cappa laing polé ri rantééro harusu'i riyassiyoreng ri iya duwa pamiringngé, kuwammengngi iyaro pattongko aroé weddingngi ripasisumpung sibawa bagiyang yolona tulu passaléppanna éfod-é. Ebbupo duwa toling ulawessi, nainappa mupasang ri pattongko aroéro ri cappa yawana bagiyang ri lalenna iya nakennaé éfod. Purairo, ébbuno duwa toling ulawessi namupasangngi ri bagiyang yolona iya duwa tulu passaléppang éfod-é ri seddéna sambungeng pajjaina mariyawa céddé, ri seddé yasé'na babbang polé ritennungeng alusu'é. Toling pattongko aroé harusu'i ripasisumpung sibawa tulu gawu'é ri toling éfod-é kuwammengngi iyaro pattongko aroéro tette'i engka ri yasé'na babbangngé sibawa dé' naleppe. Wettunna Harun muttama ri onrong mapaccingngé, harusu'i natiwi aseng-ngasenna suku Israélié iya riyokié ri pattongko arona, kuwammengngi Iyya, Puwang, tuli uwéngngerangngi umma'-Ku. Taroi Urim sibawa Tumim ri laleng pattongko aroé untu' napaké Harun rékko mangoloi ri Iyya. Ri wettu-wettu makkuwaéro harusu'i tuli paké pattongko aro, kuwammengngi naulléi missengngi élo-Ku untu' umma Israélié.” “Jumba iya napaké ri yasé'na éfod-é harusu' manengngi riyébbu polé ri wol gawu'é. Sebbo ellonna ripakkasse'i sibawa pita ritennung kuwammengngi dé' namagampang sapé. Iyaro jumbaé harusu'i napaké Harun rékko majjamai selaku imang. Wettunna lao ri yolo-Ku ri Bili' Mapaccingngé iyaré'ga salaiwi onrongngéro, paéngkalingai matu oni giringkiringngéro, kuwammengngi aja' namaté. Ebbuno séddi bélo-bélo polé ri ulaweng tuléngngé sibawa sobbikengngi ada-ada ‘Ripallaingngi untu' Puwangnge ’. Assiyorengngi iyaro ri passapunna sibawa tulu gawu'. Iyaro bélo-bélo ulawengngé harusu'i napasang Harun ri linrona kuwammengngi Iyya, Puwang, maélo-Ka tarima manengngi pakkasuwiyanna iya natiwié tau Israélié lao ri Iyya, namuni ri laleng natiwina iyaro pakkasuwiyangngé purai pogau' asalang. Kaméjana Harun harusu'i ritennung polé ri lénang alusu'é. Ebbureng towi séddi passapu polé ri lénang alusu'é sibawa babbang iya risulangngé. Ebbuno kaméja, babbang sibawa passapu untu' ana'-ana'na Harun kuwammengngi napaita mennang malebbi. Pasangngi iyaro pakéyangngé ri Harun silessuremmu sibawa ana'-ana'na. Minnyakiwi mennang sibawa minnya zaitun; nasibawang iyaro narilanti mennang sibawa ripallaing untu' tumaningi-Ka selaku imang. Nainappa ébburenni mennang saluwara ponco' polé ri kaing lénangngé, labbunna polé ri babuwaé lettu ri poppangngé untu' tongkoi bagiyang watakkalé iya dé'é nasiratang riita. Iyaro saluwara'é harusu'i tuli napaké mennang wettunna muttama ri laleng Kéma-Ku iyaré'ga maddeppériwi mézbaé untu' pogau'i assompangngé selaku imang ri Bili' Mapaccingngé, kuwammengngi dé' namaté mennang nasaba paitai bagiyang watakkaléna iya tessiratangngé riita. Iyaro peraturangngé tette'i takkenna untu' Harun sibawa wija-wijanna.” “Mappakkuwaniyé carana lanti'i Harun sibawa ana'-ana'na kuwammengngi weddingngi mennang tumaningi-Ka selaku imang. Alano sikaju saping lai iya maloloé sibawa duwakkaju bimbala lai iya dé'é gaga sala-salanna. Polé ri labbu tarigu iya kaminang makessingngé, lamani teppaké ragi. Sibagiyang iyaro lama labbu'é harusu'i riyébbu roti silaong minnya zaitun, sibagiyang teppaké minnya, nasésana riyébbui béppa iya risapuiyé minnya. Taroi ri laleng bakué sibawa akkasuwiyangengngi lao ri Iyya silaong akkarobangeng saping laié sibawa iya duwa bimbala laié. Suroi Harun sibawa ana'-ana'na lao ri sumpang Kéma-Ku sibawa bissaiwi aléna. Pasangngi pakéyang imangngé ri Harun: kaméja, éfod, jumba iya tongkoéngngi éfod-é, pattongko aroé sibawa babbang. Taroi passapué ri ulunna sibawa attoddokengngi ri passapuéro bélo-bélo ulawengngé sibawa sobbi “Ripallaingngé untu' Puwangnge ”. Nainappa muwala minnya upacaraé, tiri'i ri tompo ulunna sibawa minnyakiwi. Purairo, suroi ana'-ana'na polé sibawa papasangiwi kaméja nenniya babbang ri mennang, nainappa mutaro passapué ri ulunna. Makkuwaniro carana lanti'i Harun sibawa ana'-ana'na. Mennang sibawa wija-wijanna harusu'i natumaningi-Ka selaku imang lettu mannennungeng. Nainappa iyaro saping laié harusu'i mutiwi ri yolona Kéma-Ku. Harun sibawa ana'-ana'na harusu'i napalénne limanna ri yasé'na ulunna olokolo'éro. Géréi iyaro saping laié ri yolo-Ku, ri sumpang Kémaé. Alai sibagiyang iyaro dara sapingngé namuwassapuwangngi ri tanru-tanru mézbaé sibawa limammu. Sésana iyaro daraé harusu'i mutiri ri bagiyang yawana mézbaé. Purairo alai sininna lunra'na iya tongkoéngngi lise' babuwana, bagiyang atinna kaminang makessingngé enrengngé iya duwa ginjalna sibawa lunra'na, taro manengngi iyaro ri yasé'na mézbaé sibawa tunui untu' pakkasuwiyang ri Iyya. Jukuna, bingkulanna sibawa paruna iyaro saping laié harusu'i ritunu ri saliwenna akkémangngé. Iyanaro pakkasuwiyang untu' paddampengeng dosana sininna imangngé. Nainappa alai sala sikajunna polé ri bimbala laiéro. Harun sibawa ana'-ana'na harusu'i palénne'i limanna mennang ri yasé'na ulunna olokolo'éro. Nainappa mugéré iyaro olokolo'é, alai darana sibawa abbolorengngi ri iya eppa benrénna mézbaé. Iyaro bimbala laié harusu'i risépa-sépa. Lise' babuwana sibawa poppanna harusu'i ribissai sibawa ritaroi ri yasé'na ulunna enrengngé ri yasé'na sépa-sépa laingngé. Akkasuwiyangeng manengngi iyaro bimbala laié ri yasé'na mézbaé untu' akkarobangeng ritunu. Baunna iyaro akkarobangengngé pésennangiwi atik-Ku. Alai bimbala lai iya sikajuéppa, iyanaritu bimbala lai untu' upacara allantikengngé. Suroi Harun sibawa ana'-ana'na palénne'i limanna ri yasé'na ulunna olokolo'éro. Nainappa mugéré iyaro bimbala laié, alai céddé darana sibawa sapuwangngi daucculing ataunna Harun sibawa ana'-ana'na, ri indo' jari lima ataunna sibawa indo' ajé ataunna. Sésana iyaro daraé harusu'i muwabboloreng ri iya eppa benrénna mézbaé. Alai céddé dara iya engkaé ri yasé'na mézbaé sibawa céddé minnya upacaraé, nainappa muweppikeng Harun sibawa ana'-ana'na enrengngé pakéyanna. Nasibawang caraéro Harun sibawa ana'-ana'na nenniya pakéyanna ripallaingngi untu' alé-Ku. Alai lunra'na iyaro bémbé laié, ikko'na iya mallunra'é, lunra mallapina polé ri lise' babuwana, bagiyang atinna kaminang makessingngé, iya duwa ginjalna silaong lunra'na, enrengngé poppang ataunna. Polé ri baka roti iya puraé riyakkasuwiyangeng ri Iyya, alano séddi roti polé ri tungke' rupanna: séddi iya riyébbué silaong minnya zaitun, séddi dé' napaké minnya, sibawa séddi béppa. Palénne manengngi iyaro inanré ri limanna Harun enrengngé ana'-ana'na sibawa suroi mennang tanréyangngi lao ri Iyya selaku pakkasuwiyang tanréyangeng. Nainappa muwala iyaro rotié polé ri mennang sibawa tunui ri yasé'na mézbaé, ri yasé'na akkarobangeng ritunuéro. Iyaro baunna akkarobangengngé napésennangiwi atik-Ku. Alai dadana iyaro bimbala laié sibawa akkasuwiyangengngi untu' pakkasuwiyang tanréyangeng untu' alé-Ku. Na iyanaro tawamu. Ri laleng upacara allantikenna imangngé, dadana sibawa poppang ataunna bimbala lai iya ripaké ri laleng upacaraéro harusu'i riyakkasuwiyangeng selaku pakkasuwiyang tanréyangeng untu' alé-Ku sibawa ripallaing untu' sining imangngé. Iyanaé apettuk-Ku iya dé'é nawedding ripinra: Wettunna umma'-Ku polé makkasuwiyangengngi akkarobangeng pappasidamé, dadana sibawa poppanna olokolo'éro iyanaritu tawana sining imangngé. Iyanaro pakkasuwiyanna umma'-Ku untu' Iyya. Pakéyang assompanna Harun harusu'i nappammanareng lao ri ana'-ana'na, kuwammengngi weddingngi mennang napaké wettunna rilanti. Ana'na Harun iya mancaji imangngé sulléiwi ambo'na sibawa muttamakiwi Kéma-Ku untu' pogau'i assompangngé ri Bili' Mapaccingngé, harusu'i napaké pakéyangngéro pitungngesso ittana. Alai juku bimbala lai iya napaké ri laleng upacara allantikenna Harun sibawa ana'-ana'na sibawa nasui iyaro jukué ri séddié onrong iya mapaccingngé. Iyaro jukué harusu'i mennang nanré ri sumpanna Kéma-Ku silaong sésa roti iya engkaé ri bakué. Harusu'i mennang nanré iya riyakkasuwiyangengngé ri laleng upacara paddampengeng dosaé wettunna rilanti. Banna imangngé wedding manréi inanré iya puraé ripallaing untu' alé-Kuro. Rékko pappa bajana éléé juku iyaré'ga iyaro rotié engka mupa sésana, iyaro sésana harusu'i ritunu gangka cappu, sibawa dé' nawedding riyanré, nasaba purani ripallaing. Upacara allantikenna Harun sibawa ana'-ana'na harusu'i ripogau' pitungngesso ittana bujuru', pada-pada puraé Uparéntakko. Esso-esso harusu'i riyakkasuwiyangeng sikaju saping lai untu' paddampengeng dosa. Nasibawang iyaro akkarobangengngé ripaccingiwi mézbaé. Nainappa iyaro mézbaé harusu'i muminnyaki sibawa minnya zaitun kuwammengngi naripallaing untu' Iyya. Pogau'i iyaro esso-esso pitungngesso ittana. Namancaji mapaccing maneng mézbaé; agi-agi iya kennaéngngi iyaro mézbaé harusu'i riyabbéréyang lao ri Puwangnge, sibawa nigi-nigi iya géssaéngngi lolongengngi acilakang nasaba awatangeng apaccingenna.” “Tungke' esso untu' mannennungeng ri yasé'na mézbaéro harusu'i riyakkarobangeng duwakkaju bimbala iya umuru sitaungngé. Iya sikajué untu' pakkasuwiyang élé, na laingngé untu' pakkasuwiyang arawéng. Nasibawang ana' bimbala untu' pakkasuwiyang éléé, harusu'i riyakkasuwiyangeng séddi kilo labbu tarigu iya kaminang makessingngé ricampuru sibawa sibang minnya zaitun tuléng. Purairo sibatto uwai anggoro. Ana' bimbala untu' pakkasuwiyang arawéngngé harusu'i riyakkarobangeng sibawa cara iya padaé, nasilaongeng labbu, minnya zaitun sibawa uwai anggoro. Baunna iyaro akkarobangeng ritunué pésennangiwi atik-Ku. Makkuwaniro untu' sininna wettué, iyaro akkarobangeng ritunué harusu'i riyakkarobangeng ri yolo-Ku ri sumpanna Kéma-Ku. Kuwaniro maélo-Ka siruntu sibawa umma'-Ku enrengngé mabbicara lao ri iko. Kuwaro maélo-Ka siruntu sibawa bangsa Israélié, sibawa cahaya ahadérékek-Ku pancajiwi matu iyaro onrongngé mapaccing. Maélo-Ka pancajiwi iyaro Kémaé sibawa mézbaé mapaccing. Harun sibawa ana'-ana'na maélo-Ka pallaingngi polé ri laingngé kuwammengngi Natumaningika selaku imang. Maélo-Ka monro ri tengnga-tengngana bangsa Israélié, sibawa mancaji Allataalana mennang. Naissengngi matu mennang makkedaé Iyya'naé Puwang Allataalana iya tiwiéngngi mennang massu polé ri Maséré, kuwammengngi weddik-Ka monro ri tengnga-tengngana. Iyya'na Puwang Allataalana mennang.” Makkedai Puwangnge lao ri Musa, “Ebbuno polé ri aju akasiaé séddi mézba onrong mattunu dupa. Bentu'na iyaro mézbaé harusu'i massulapa; lampéna sibawa sakkana tungke'-tungke' 45 sénti, sibawa tanréna 90 sénti. Ri iya eppa sunna ébbuno tanru-tanru iya masséddié mézbaéro. Bagiyang yasé'na, muttama'ni iya eppa benrénna sibawa tanru-tanru'na harusu'i rilapiri sibawa ulaweng tuléng enrengngé riwéréng pamiring ulaweng mattulilingiwi. Ebbuno duwa toling ri yawana pamirinna ri iya duwa benrénna untu' tahangngi aju pabbuléna mézbaéro. Iyaro pabbuléé harusu'i riyébbu polé ri aju akasiaé sibawa rilapiri sibawa ulaweng. Taroi iyaro mézbaé ri bagiyang saliwenna kaing iya engkaé ri yolona Petti Assijancingngé, ri onrok-Ku siruntu matu sibawa iko. Tungke' élé wettunna Harun polé untu' passadiyai lampué, harusu'i mattunu dupa bau ri yasé'na mézbaéro. Iyaro gau'é harusu towi napogau' wettunna napalluwa' dupaé ri arawéngngé. Iyaro pakkasuwiyang dupaé harusu'i napogau' matteru-teru sillampé wettué. Aja' muwakkasuwiyangeng ri yasé'na mézbaéro dupa iya riyattéyangngé, akkarobangeng olokolo iyaré'ga akkarobangeng inanré; aja'to mutiri'i akkarobangeng uwai anggoro'é ri yasé'na. Siseng sitaung harusu'i Harun pogau' upacara pappépaccing mézba sibawa cara meppikiwi iya eppa tanru'na sibawa dara olokolo iya riyakkasuwiyangengngé untu' paddampengeng dosaé. Iyaro gau'é harusu'i ripogau' tungke' taung sillampé wettué. Iyaro mézbaé harusu'i mapaccing maneng sibawa ripallaing untu' alé-Ku.” Makkedai Puwangnge lao ri Musa, “Wettunna ribilang bangsa Israélié, tungke' tau worowané harusu'i makkamaja ri Iyya dowi pakkamaja untu' aléna kuwammengngi dé' nakennai abala wettunna ripakangka iyaro abbilangengngé. Tungke' tau iya maccowéé ribilang ri laleng abbilangengngéro harusu'i makkamaja sijumella dowi iya ripattentué manuru ellinna iya takkennaé ri Kéma-Ku selaku sumbangeng untu' Iyya. Tungke' tau iya ribilangngé ri laleng abbilangengngéro, iyanaritu tungke' tau worowané iya makkéumuru'é duwappulo taung iyaré'ga lebbi, harusu'i mabbéré sumbangeng ripallaingngéro. Tau sugié dé' naharusu makkamaja lebbi, sibawa tau kasiyasié dé' nawedding makkamaja kurang wettunna mennang makkamaja dowi pakkamaja untu' alé-Ku. Léléi iyaro dowié polé ri bangsa Israélié, sibawa akkégunangngi untu' assompangngé ri laleng Kéma-Ku. Iya manennaro iyanaritu dowi pakkamaja untu' aléna mennang, sibawa tuli maélo-Ka méngngerangngi untu' linrungiwi mennang.” Makkedai Puwangnge lao ri Musa, “Ebbuno séddi kullang polé ri gessaé sibawa tudangenna poléto ri gessaé. Taroi iyaro kullangngé ri pallawangenna Kémaé sibawa mézbaé, nainappa muliseki sibawa uwai. Iyaro uwai untu' Harun sibawa ana'-ana'na kuwammengngi weddingngi mennang mabbissa lima sibawa ajé Makkedai Puwangnge lao ri Musa, “Alano rampa-rampa iya kaminang makessingngé, enneng kilo mur maccolo'é, tellu kilo aju cenning, tellu kilo tebbu bau, sibawa enneng kilo aju téja. Iya manennaro ritimbangngi situru timbangeng iya ripaké ri Kéma-Ku. Tambaiwi eppa bang minnya zaitun, sibawa ébbuno minnya upacara, iya ricampuru'é pada-pada minnya wangié. Pakéi iyaro campurangngé untu' minnyakiwi Kéma-Ku, Petti Assijancingngé, méjangngé sibawa sininna passakke'na, ajé lampué sibawa passakke'na, mézba onrong mattunu dupaé, mézba untu' akkarobangeng ritunué sibawa sininna passakke'na, sibawa kullang uwai enrengngé tudangenna. Nasibawang caraéro harusu'i mupallaing iyaro barab-barangngé untu' Iyya, kuwammengngi namapaccing maneng. Agi-agi iya kennaéngngi iyaro mézbaé harusu'i riyabbéréyang lao ri Puwangnge, sibawa nigi-nigi géssai lolongengngi matu acilakang nasaba awatangeng apaccingenna. Minnyaki towi Harun sibawa ana'-ana'na kuwammengngi narilanti mennang mancaji imang untu' tumaningi-Ka. Powadangngi bangsa Israélié makkedaé sillampé wettué iyaro minnya upacaraé banna untu' Iyya. Iyaro minnya'é dé' nawedding ritiri ri yasé'na sining tau biyasaé. Aja' muwébbu minnya pada-padaéro sibawa pakéi campurangngéttoro. Iyaro minnya'é mapaccing, sibawa harusu'i riyangga selaku barang mapaccing. Tau iya mébbué minnya pada-padaéro, iyaré'ga pakéi untu' tau iya tenniyaé imang, dé'na nariyangga anggota umma'-Ku.” Makkedai Puwangnge lao ri Musa, “Alano siyagangngaré rupanna rampa-rampa iya padaé égana, iyanaritu dadi dama, oli lokan, dadi rasamala sibawa dupa iya tuléngngé. Paké manengngi iyaro untu' mébbu dupa campurang iya mabaué. Tambaiwi pejjé kuwammengngi iyaro dupaé natette mapaccing sibawa weddingngi ripaké untu' Iyya. Nigi-nigi mébbu wangi-wangiyang pada-padaéro, dé'na nariyangga anggotana umma'-Ku.” Makkedai Puwangnge lao ri Musa, “Purani upilé Bézaleel ana' Uri, eppona Hur polé ri suku Yéhuda, sibawa wéréngngi akuwasak-Ku. Uwéréngngi pappéjeppu, amaccang sibawa amampungeng ri lalenna sininna rupanna ébbu-ébbu makessingngé: untu' mébbu rancana iya mapparelluwangngé apanréng enrengngé jamai polé ri ulawengngé, péra'é sibawa gessaé; untu' masai batu paramata iya maéloé ripasang; untu' sobbi'i ajué sibawa untu' sininna rupanna ébbu-ébbu makessing laingngé. Aholiab, ana'na Ahisamakh polé ri suku Dan, pura toni Upilé untu' duwangngi. Uwéréng towi apanréng iya dé'é padanna lao risining tukang iya maccaé, kuwammengngi naulléi mennang mébbu agi-agi iya Uparéntangngéngngi: Kéma-Ku, Petti Assijancingngé sibawa pattongkona, sininna paréwanna Kémaé, iyanaritu méjang sibawa passakke'na, ajé lampu polé ri ulaweng tuléngngé sibawa passakke'na, mézba onrong mattunu dupa, mézba onrong akkarobangeng ritunu sibawa sininna passakke'na, kullang uwai sibawa tudangenna, pakéyang assompang untu' Harun sibawa ana'-ana'na, iya harusu'é napaké wettunna mennang majjama selaku imang, minnya upacara, sibawa dupa bau untu' Bili' Mapaccingngé. Iya manennaro harusu'i mennang naébbu situru pappaita iya Uwéréngngékko.” Puwangnge paréntangngi Musa, untu' mappallebbangengngi lao ri bangsa Israélié, “Ramé-raméiwi esso Saba'é, esso iya puraé Upattette selaku esso appésaungeng. Untu' mannennungeng mancajiwi iyaro essoé papparéngngerang ri yelle'mu sibawa Iyya, kuwammengngi muwissengngi makkedaé Iyya'na Puwang, sibawa purani Upancajiko bangsa-Ku muto. Harusu'i naramé-raméi bangsa Israélié iyaro essoé massossoreng selaku tanrang polé ri assijancingngé. Iyaro essoé iyanaritu séuwai papparéngngerang iya tette'é ri yelle'na bangsa Israélié sibawa Iyya, nasaba Iyya, Puwang, pura mébbui langié sibawa linoé ri laleng wettu enneng essona, na ri esso mapitué dé' Uwajjama sibawa mappésau.” Puranana mabbicara sibawa Musa ri tompo'na Bulu Sinai, nabbéréyanni Allataala lao ri aléna iya duwa létta batu iya puraé narokiri Allataala sibawa parénta-parénta-Na. Wettunna naita bangsa Israélié makkedaé maitta senna'ni Musa dé'pa nanonno polé ri bulué, iyakiya monro mupi kuwaro, nakatulunni mennang Harun sibawa makkeda lao ri aléna, “Dé'na nirisseng aga iya kajajiyangngé sibawa Musa, tau iya puraé tiwiki massu polé ri Maséré; jaji ébburenni déwata iya pimpingngékki matu.” Nanakkeda Harun lao ri mennang, “Ludunni anting-nganting ulaweng iya napaké sining bainému sibawa ana'-ana'mu, namutiwii ri iyya.” Nanaludunni mennang anting-nganting ulawenna tungke'-tungke' nanatiwii lao ri Harun. Nalani Harun iyaro anting-ngantingngé, nanaancuru'i sibawa nacuwangngi ri laleng séddié accuwangeng nanaébbui séddi dato'-dato' saping. Nakkeda iyaro bangsaé, “Eh Israélié, iyanaé déwatata iya mantara'ékki massu polé ri Maséré!” Nanapatettonna Harun séddi mézba ri yolona saping ulawengngéro sibawa mappallebbangengngi, “Baja engka pésta untu' pakalebbii Puwangnge.” Bajanana maélé senna'ni, sining tau Israélié tiwii siyagangngaré kajunna olokolo untu' akkarobangeng ritunu, sibawa siyagangngaré kajunnasi untu' akkarobangeng pappasidamé. Tudanni mennang manré sibawa ménung, nainappa tokkong untu' massennas-sennang. Namakkeda Puwangnge lao ri Musa, “Nonnona masitta, nasaba bangsamu iya mupimpingngé massu polé ri Maséré napogau'ni majaé. Lésséni mennang polé ri parénta-parénta-Ku. Mébbui mennang dato'-dato' saping polé ri ulaweng ricuwangngé, nainappa sompai sibawa makkasuwiyangeng akkarobangeng lao ri aléna. Adanna mennang, iyanaro déwatana iya tiwiéngngi massu polé ri Maséré. Uwisseng makkedaé iyaro bangsaé matedde ati senna. Aja' mucobai lawa-lawai-Ka. Macai-Ka lao ri mennang sibawa maélo paccappui. Iyakiya iko sibawa wija-wijammu Upancajiwi matu séddi bangsa iya battowaé.” Naéllauni Musa ri Puwang Allataalana, adanna, “ Puwang, magi Muharusu pogau'i makkuwaéro lao ri mennang? Tenniyaga Iko pura passalama'i mennang polé ri Maséré sibawa akuwasang nenniya awatangeng iya battowaé? Rékko Mupaccappui mennang, makkedai matu tau Maséré'é makkedaé Mupimpingngi iyaro bangsaé massu polé ri Maséré untu' mpunoi ri bulué sibawa paccappu sisengngi mennang. Aja' nakkuwaro, oh Puwang, pinrani akkatta-Mu sibawa aja' naricilakai iyaro bangsaé. Engngerangngi ata-atam-Mu Abraham, Ishak sibawa Yakub. Engngerangngi makkedaé majjanci-Ko sibawa tanro untu' mpéréngngi mennang wija singngéga wéttowingngé ri langié, makkuwatoro sininna tana iya Muwajjanciyangngéro mancajiwi matu appunnangenna wija-wijanna mennang untu' mannennungeng.” Nanapinrani niya'na Puwangnge sibawa dé'na najaji pogau'i ancaman-Na untu' pateppaiwi abala iyaro bangsaé. Nonnoni paimeng Musa polé ri buluéro tiwii iya duwa batu iya riyarokiriyé parénta-paréntana Allataala ri iya duwa leppanna. Aléna Allataala pura mébbui iyaro batué sibawa sobbi'i parénta-parénta-Na kuwaro. Ri wettu joppana turung, naéngkalingani Yosua sining tau Israélié gora-gora, nanakkedana lao ri Musa, “Engka arukkang ammusureng ri akkémangngé.” Nakkeda Musa, “Samanna tenniya gora apakalang iyaré'ga kelli ricau; iyaro sadda tau makkélong.” Macawé'nana Musa ri akkémangngéro, naitani iyaro saping ulawengngé sibawa sining tauwé mattengngang séré-séré, namacaina. Kuwatoniro, ri ponna buluéro, naggeppuwang Musa batu iya natiwiéro angkanna ancuru tabburé-buré. Nainappa nala dato'-dato' saping ébbuna sining tau Israéliéro, naancuru'i, natettu'i gangka alusu pada-pada awué, nanacampuru'i sibawa uwai. Nainappa nasuro tau Israélié ménungngi. Makkedani lao ri Harun, “Aga napogau' mennang lao ri iko angkanna muleppessang madosa loppo?” Nappébali Harun, “Aja' mumacai ri iyya; alému missengngi pékkugi abaraningenna iyaé sining tauwé untu' pogau'i majaé. Makkedai mennang ri iyya, ‘Dé'na taissengngi aga kajajiyang sibawa Musa, tau iya puraé tiwiki massu polé ri Maséré; jaji ébburenni déwata iya weddingngé pimpikki.’ Usoroni mennang mabbéréyangngi paréwa ulawenna, nanabbéréyanni mennang lao ri iyya. Iya manenna paréwaéro uputtama'i ri laleng apié, namancajina iyaé sapingngé!” Napahanni Musa makkedaé Harun pura leppessangngi bangsa Israélié pada-pada anyarang leppe'é polé ri wakkéé, angkanna mennang mancaji addicawang lao risining balinna. Natettonna ri yolona pintu gerbanna akkémangngé sibawa gora, “Nigi-nigi maccowé ri Puwangnge harusu'i lao kumaié!” Napoléna suku Léwié mattulilingiwi Musa, namakkeda lao ri mennang, “ Puwang Allataalana Israélié paréntakko tungke'-tungke' untu' rampui peddammu namujoppa molai akkémangngéwé, polé ri gerbangngéwé lettu ri gerbang iya laingngé namuwuno towi saudara-saudaramu, sahaba'-sahaba'mu sibawa balibola-balibolamu.” Napogau'ni suku Léwié iyaro paréntaé na iyaro essoé kira-kira tellussebbu tau maté riyuno. Nakkeda Musa lao ri suku Léwié, “Iyaé essoé purani mupallaing alému mancaji imang iya tumaningiyéngngi Puwangnge ri laleng muwunona ana'-ana'é sibawa saudara-saudaramu, nanawérékko Puwangnge barakka'-Na.” Pappa bajana makkedani Musa lao ri bangsaéro, “Purano pogau' dosa loppo. Iyakiya makkekkuwangngé maélosika tuppuiwi iyaro bulué untu' mangolo ri Puwangnge; memmuwaré lolongekka paddampeng untu' dosamu.” Nanalaosi Musa mangolo ri Puwangnge sibawa makkeda, “Iyaro bangsaé purani pogau' dosa loppo. Mébbui mennang déwata polé ri ulawengngé. Tennapodo taddampengengngi dosana; rékko dé', leddani asekku polé ri kitta'na sining tau tuwoé.” Nappébali Puwangnge, “Banna sining tau iya puraé madosa lao ri Iyya Uledda matu asenna polé ri kittaéro. Laono makkekkuwangngé, namutiwii mennanro ri onrong iya puraé Uteppungekko. Malaéka'-Ku matu pimpikko, iyakiya poléi matu wettunna iyaro sining tauwé Uhukkungngi nasaba dosa-dosana.” Nanapapoléna Puwangnge abala lao risining tauwéro nasaba napassai mennang Harun mébbui iyaro dato'-dato' saping ulawengngé. Nanakkeda Puwangnge lao ri Musa, “Salaini iyaé onrongngéwé namulao silaong bangsa iya mutiwié polé ri Maséré'ro lao ri wanuwa iya Uwajjanciyangngé lao ri Abraham, Ishak sibawa Yakub enrengngé wija-wijanna. Usuroi matu séddi malaéka' untu' pimpikko. Upaddésu'i matu bangsa Kanaangngé, Amorié, Hét-é, Féris-é, Héwié sibawa Yébus-é. Mattujuko ri tana iya sugié namacommo. Iyakiya Iyya dé' Uwaccowé sibawakko, kuwammengngi aja' Upaccappuko ri tengnga laleng, saba' iko iyanaritu bangsa iya matedde atié.” Tungke'-tungke' rékko makkémai bangsa Israélié, nalai Musa Kémaé nanapatettongngi mabéla-béla polé ri akkémanna mennang. Iyaro Kémaé riyasengngi Kémana Puwangnge, nanigi-nigi macinna méllauwi pangajana Puwangnge, laowi kuwaro. Rékko laowi Musa ri Kémaéro, sining tau Israélié tettongngi ri yolona sumpang kémana mennang sibawa pénessaiwi Musa narapi muttama. Muttama'nana Musa, nonnoni alliri ellungngé sibawa mappésau ri sumpanna Kémaé. Polé ri ellungngéro mabbicarai Puwangnge sibawa Musa. Wettunna naita tau Israélié alliri ellungngé ri sumpang Kémana Puwangnge, tokkong manenni mennang nasuju' ri sumpang kémana tungke'-tungke'. Siyolonni Puwangnge mabbicara sibawa Musa, pada-pada tauwé mabbicara sibawa sellaona. Purairo lisuni Musa ri akkémangngé. Iyakiya Yosua ana' Nun, séddiwi kallolo pabbantunna Musa, tette'i monro ri laleng Kémaéro. Riséuwaé esso makkedai Musa lao ri Puwangnge, “ Puwang, Muparéntakka pimpingngi iyaé bangsaé lao ri wanuwa iya Muwajjanciyangngé. Iyakiya dé' Mupowadai niga maélo Musuro untu' tulukka. Puwang, makkeda-Ko makkedaé Muwissekka, sibawa Muwélorika. Rékko makkuwaitu, tappaissengenni aga rancana-Mu, Puwang, kuwammengngi weddikka tumaningi-Ko sibawa tette pésennangiwi atim-Mu. Engngerang towi makkedaé iyaé bangsaé purani Mupilé mancaji appunnangem-Mu.” Nakkeda Puwangnge, “Ulinrungiko matu kuwammengngi mulléi mappunnangiwi tana iya Uwajjanciyangngé.” Nappébali Musa, “Rékko dé' naccowé Puwangnge sibawakki, aja' Musuroki salaiwi iyaé onrongngé. Pékkugi naissengngi matu tauwé makkedaé Muwélorika sibawa bangsaéwé rékko dé' Mutulukki? Ahadérékenna Puwangnge ri tengnga-tengngata pasilaingekki matu polé ri bangsa-bangsa laingngé ri linoé.” Nakkeda Puwangnge lao ri Musa, “Utarimai matu paréllaummu, saba' Uwissekko sibawa Uwéloriko.” Nanaéllauni Musa, “ Puwang, paitakka cahaya ahadérékem-Mu.” Nappébali Puwangnge, “Laloka matu sibawa sininna arajak-Ku ri yolomu, nauteppu towi asek-Ku iya mapaccingngé. Iyya'na Puwang, nauwappaitangngi akacuwak-Ku sibawa paressé babuwa-Ku lao risining tau iya Upilé. Dé' Uwappaitangngi matu tappaku lao ri iko, saba' dé' namakkullé tauwé mita-Ka, natette tuwo. Ri seddé-Kué engka bulu-bulu batu; weddikko tettong kuwaro. Wettunna cahaya ahadérékek-Ku lalo, Uputtama'ko ri laleng séddié sebbo-sebbo ri laleng bulu-bulu batuéro nautongkoi sibawa limak-Ku narapi labe'-Ka. Nainappa Ugetteng limak-Ku kuwammengngi mulléi mita-Ka polé ri monri, iyakiya tappa-Ku dé' muwitai matu.” Nainappa makkeda Puwangnge lao ri Musa, “Pako duwallétta batu pada-pada iya riyoloé. Ri batuéro Maélo-Ka mokii ada-ada iya padaé sibawa iya engkaé ri batu iya puraé mureppa'ro. Sadiya-sadiyano baja éléé untu' tuppuiwi Bulu Sinai sibawa mangolo ri Iyya ri coppo buluéro. Dé' muwi séddi tau wedding maccowé sibawakko iyaré'ga engka muwi ri kéginna bagiyang buluéro. Sining sapingngé sibawa sining bimbala'é aja' muleppessangngi mabbella ri ponna buluéro.” Nanapana Musa duwallétta batusi, na pappana bajaé maélé senna'ni tiwii ménré ri tompo'na Bulu Sinai pada-pada napparéntangngé Puwangnge lao ri aléna. Nananonnona Puwangnge ri laleng séddié ellung; tettonni sibawa Musa ri onrongngéro, nanateppui asen-Na iya mapaccingngé, iyanaritu Puwangnge. Nainappa lalo Puwangnge ri yolona Musa sibawa makkeda, “Iyya Puwang, iyanaritu Allataala iya pennoé akacuwang sibawa paressé babuwa. Tabbollompollong pammasé-Ku, matinulu-Ka sibawa dé' namasitta macai. Tette'-Ka mamaséiwi massebbu-sebbu assossoreng sibawa maddampengengngi asalangngé sibawa dosaé; iyakiya tau pasalaé dé' sises-siseng Upaleppe'i polé ri pahukkungenna, sibawa Uhukkung towi ana'-ana'é sibawa eppo-eppoé lettu ri assossoreng iya matellué sibawa maeppaé nasaba dosana tomatowanna mennang.” Iyatoro wettué nasuju' Musa massompa. Adanna, “Puwang, rékko tonget-tongekko Muwélorika, uwéllauwi, accowéni Puwang silaongekki. Iyaro bangsaé mémeng matedde atiwi, iyakiya addampengengngi jata sibawa dosata namutarimaki selaku umma'-Mu muto.” Nakkeda Puwangnge lao ri Musa, “Makkekkuwangngé mébbu-Ka assijancing sibawa bangsa Israélié. Ri yolona matanna mennang Upogau'i matu sining anu makalallaingngé iya dé'éppa naengka naripogau' ri yelle'na bangsa kégaé ri linoé. Sininna bangsaé naitai matu sining anu makalallaing iya Upogau'é, saba' Iyya, Puwang maélo pogau'i séuwa iya maseroé untu' iko. Turusiwi sining hukkung iya Uwéréngngékko iyaé essoé. Upaddésu'i matu bangsa Amorié, Kanaangngé, Hét-é, Féris-é, Héwié sibawa Yébus-é wettummu maju. Aja' muwébbu assijancing sibawa sining tau ri wanuwa iya mulokkaiyé, saba' iyaro gau'é weddingngi mancaji siyo-siyo iya nassabariyé amaténg untu' alému. Jaji, aja' mupogau'i makkuwaéro, iyakiya ruttungngi mézba-mézbana mennang, ancuru'i tugu-tugu makarame'na mennang sibawa tubbangngi alliri-alliri Asyéraé, barahalana mennang. Aja' muwassompa déwata laing, saba' Iyya Puwang, iyanaritu Allataala iya dé'é namaélo ripappadai sibawa muwi aga. Aja' mupakangka assijancing sibawa bangsana wanuwaéro, saba' wettunna mennang massompa sibawa makkasuwiyangeng akkarobangeng lao ri déwata-déwatana, naérako matu, namuwaccowé matu. Rékko kawingngi ana'-ana'mu sibawa sining makkunrai laingngé, ripalécéi matu risining makkunraiéro untu' salai-Ka nanasompai déwata-déwatana. Aja' muwébbu sibawa sompai déwata-déwata polé ri bessié. Ramé-raméiwi Pésta Roti Dé'é Raginna. Pada-pada puraé Uparéntakko, harusu'ko manré roti dé'é raginna pitungngesso ittana ri laleng uleng Abib, nasaba ri laleng ulengngéro musalaiwi Maséré. Tungke' ana' worowané macowaé sibawa olokolo lai iya bunge' jajiyé iyanaritu appunnangek-Ku, iyakiya harusu'i mucéra ana' kaleddé iya bunge' jajiyé sibawa makkasuwiyangeng sikaju ana' bimbala untu' passulléna. Rékko dé' mumaélo céra'i, harusu'i mupolo ellonna iyaro kaleddé'é. Tungke' ana' worowanému macowaé harusu'i mucéra. Dé' muwi séddi tau lao ri Iyya rékko dé' natiwi pakkasuwiyang. Engka enneng essona untu' majjama; aja' mumajjama ri esso mapitué, namuni iyaro wettu maddakkala iyaré'ga wettu éngngalang. Ramé-raméiwi Pésta Engngalangngé wettummu mappammula méngngalai wassélé bunge' polé ri gandongngé. Ramé-raméi towi Pésta Kalampang Daud-daungngé ri cappa'na taungngé, wettummu maccéppu buwa-buwa. Wékkatellu sitaung sininna tau worowané harusu'i polé massompa ri Iyya, Puwang Allataalana Israélié. Puranana Upaddésu bangsa-bangsaé ri yolomu sibawa Ulowangiwi daéramu, dé' muwi séddi tau barani matu sittaiwi wanuwammu wettummu lao untu' ramé-raméiwi Pésta Roti Dé'é Raginna, Pésta Engngalangngé sibawa Pésta Kalampang Daud-daungngé. Wettummu makkasuwiyangeng olokolo rigéré, aja' muwakkasuwiyangeng aga-aga iya riyébbué paké ragi. Olokolo iya rigéréé untu' akkarobangeng Ramé-ramé Paskaé harusu'i ripaccappu ri wenniéttoro; dé' nawedding engka sésana narapi pappa bajana. Tungke' taung harusu'ko tiwi ri Bolana Puwang Allataalamu wassélé bunge'na tanamu. Juku ana' bimbala iyaré'ga ana' bémbé'é dé' nawedding rinasu silaong uwai susunna indo'na.” Nakkeda Puwangnge lao ri Musa, “Okii iyaro ada-adaé, nasaba nallalengiwi iyaro ada-adaé mébbu-Ka assijancing sibawa iko nenniya bangsa Israélié.” Patappulo esso patappulo wenni Musa monro kuwaro silaong Puwangnge, na ri lalennaro dé' nanré sibawa naénung. Iyaro ada-ada assijancingngé, iyanaritu Seppulo Paréntana Allataala, naokii ri leppang batuéro. Wettunna Musa nonno polé ri Bulu Sinai tiwii iyaro Seppuloé Parénta, mattappai rupanna nasaba purani mabbicara sibawa Puwangnge, iyakiya dé' naissengngi aléna Musa makkedaé mattappai rupanna. Harun sibawa sininna ra'ya'é mitai makkedaé mattappai rupanna Musa, namétauna mennang maddeppériwi. Iyakiya Musa mobbii mennang, naddeppéna Harun sibawa sininna pamimpinna, namabbicarana Musa lao ri mennang. Purairo maddeppungenni sininna ra'ya'é mattulilingiwi, nanapalettu'ni Musa lao ri mennang sininna hukkung iya nabbéréyangngé Puwangnge lao ri aléna ri tompo'na Bulu Sinai. Puranana mabbicara sibawa mennang, natongkoni rupanna Musa sibawa kaing. Tungke' Musa muttama ri laleng Kémana Puwangnge untu' mabbicara sibawa Puwangnge, natimpa'i iyaro kaingngé narapi massu. Puranana napalettu lao ri bangsa Israélié sininna pasenna Puwangnge, naitai mennang rupanna Musa mattappa. Nanatongkoni paimessi rupanna narapi wettunna rékko mabbicarasi paimeng sibawa Puwangnge. Napaddeppungenni Musa sininna bangsa Israélié nainappa makkeda lao ri mennang, “Iyanaé paréntana Puwangnge untu' iko: Engka enneng esso untu' mappallaung, iyakiya esso iya mapitué iyanaritu esso untu' mappésau, esso maraja iya ripallaingngé untu' Puwangnge. Nigi-nigi mappallaung ri esso Saba'é harusu'i rihukkung maté. Iyaro essoé dé' naweddikko palluwa' api ri bolamu.” Makkedai Musa lao ri sininna bangsa Israélié, “Makkuwaniyé paréntana Puwangnge! Tiwino pakkasuwiyang lao ri Puwangnge. Nigi-nigi ripakédo atinna, harusu'i makkasuwiyangeng ulaweng, péra' sibawa gessa; kaing lénang alusu, kaing wol gawu, collipao sibawa cella; kaing polé ri bulu bémbé'é; bingkulang bimbala lai iya ripecco cella'é; bingkulang alusu, aju akasia, minnya untu' lampué; rampa-rampa untu' minnya upacaraé sibawa untu' dupa iya mabaué; paramata dalima sibawa paramata laing untu' ripasang ri waju éfod-é sibawa pattongko arona Imang Lompoé.” “Sininna panré iya maccaé ri yelle'mu harusu'i polé untu' mébbui sininna iya napparéntangngé Puwangnge, iyanaritu: Kéma, pabbingenna sibawa pattongkona, pakkadak-kadanna sibawa rangkana, sining aju maloppona, tau-tau tange'na sibawa pallanggana. Petti Assijancingngé sibawa aju pabbuléna, pattongkona sibawa kaing pattongkona; méjang sibawa aju pabbuléna, sininna passakke'na enrengngé roti ripatalaé; ajé lampué untu' pappakatajang sibawa passakke'na, lampu sibawa minnya'na, mézba onrong mattunu dupa sibawa aju pabbuléna, minnya upacara, dupa iya mabaué, kaing pallawa untu' tange'na Kémaé, mézba untu' akkarobangeng ritunu sibawa tarali-tarali polé ri gessaé, aju pabbulé sibawa sininna passakke'na; kullang onrong mabbissa sibawa pallanggana, ténda-ténda untu' paturungenna, alliri-alliri sibawa pallanggana, kaing paddenring tange' paturungenna, patto-patto sibawa tulu untu' Kémaé sibawa paturungenna; pakéyang assompang untu' sining imangngé wettunna mennang majjama ri Bili' Mapaccingngé sibawa pakéyang ripallaingngé untu' Imang Harun, enrengngé ana'-ana'na.” Nainappa sininna tau Israélié iya maddeppungengngéro tassiya-siyani, nanigi-nigi iya ripakédoé atinna, tiwii pakkasuwiyang lao ri Puwangnge untu' passakke'i Kémana Puwangnge. Natiwi towi mennang sininna iya riyapparelluwangngé untu' assompangngé sibawa bahang untu' pakéyanna imangngé. Nigi-nigi maélo, muwi worowané iyaré'ga makkunrai, polé tiwii pattoddo, anting-nganting, ciccing, ranté sibawa sininna rupanna paréwa ulawengngé untu' riyakkasuwiyangeng lao ri Puwangnge. Tungke' tau iya mappunnaiyé kaing lénang alusu, kaing wol gawu, collipao iyaré'ga macella, kaing polé ri bulu bémbé'é, bingkulang bimbala lai iya ripecco cella'é, iyaré'ga bingkulang alusu, nakkasuwiyangenni barab-barangngéro. Tungke' tau iya weddingngé massumbangeng péra' iyaré'ga gessa, natiwii untu' Puwangnge. Makkuwatoro napogau' sining tau iya mappunnaiyé aju akasia untu' jama-jamangngéro. Sining makkunrai iya maccaé munu tiwii wennang lénang alusu enrengngé wennang wol gawu, collipao sibawa cella iya puraé mennang naébbu. Munu towi mennang wennang polé ri bulu bémbé'é. Sining pamimpingngé tiwii paramata dalima enrengngé paramata-paramata laingngé untu' ripasang ri éfod-é sibawa pattongko aroé. Tiwi towi mennang rampa-rampa sibawa minnya untu' lampué, minnya upacaraé enrengngé dupa iya mabaué. Sininna tau Israélié macenning atinna tiwii pakkasuwiyanna mennang ri Puwangnge untu' jama-jamang iya napparéntangngé Puwangnge naolai Musa. Nainappa makkeda Musa lao ri tau Israélié, “ Puwangnge pura piléi Bézaleel ana' Uri, eppona Hur, polé ri suku Yéhuda enrengngé mpéréngngi sibawa akuwasan-Na. Allataala mpéréngngi pappéjeppu, amaccang sibawa amampungeng ri laleng sininna rupanna ébbu-ébbu makessingngé, untu' mébbu rancangang iya mapparelluwangngé apanréng, jamai polé ri ulawengngé, péra'é sibawa gessaé; untu' masai batu paramata iya maéloé ripakkenna; untu' sobbi'i ajué enrengngé sininna rupanna ébbu-ébbu makessing laingngé. Lao ri Bézaleel sibawa Aholiab, ana'na Ahisamakh polé ri suku Dan, Puwangnge mpéréngngi amaccang untu' mappagguruwangngi apanrénna mennang lao ri tau laingngé. Riwéréngngi mennang amaccang ri laleng sininna rupanna jama-jamang iya napogau'é ahli mappaé, parrancangngé sibawa ahli pattennung lénang alusu'é, wol gawu'é, collipaoé sibawa cella'é, enrengngé kaing laingngé. Mennang iyanaritu parrancang iya maccaé sibawa naullé pogau'i sininna rupanna jama-jamangngé. Bézaleel, Aholiab enrengngé sininna panré iya lolongengngé amaccang sibawa apanréng polé ri Puwangnge, naisseng carana pogau'i sininna iya riyapparelluwangngé untu' mébbui Kémana Puwangnge. Harusu'i mennang mébbui sininnaro pada-pada iya puraé napparéntang Puwangnge.” Naobbini Musa Bézaleel, Aholiab sibawa sininna tau iya lolongengngé apanréng polé ri Puwangnge sibawa iya macenningngé mabbantu, nainappa nasuro mennang pammulaiwi. Riwérénni mennang ri Musa sininna iya nassumbangengngé tau Israélié untu' jama-jamang patettongngi Kémana Puwangnge. Iyakiya bangsa Israélié matteru mupi tiwii pakkasuwiyang lao ri Musa élé-élé. Nainappa sining panré iya mattengngangngé jamai iyaro jamangngé nalaporo'ni ri Musa, “Bahab-bahang iya nassumbangengngé sining tauwéro lebbini naiya riyapparellungngé untu' jama-jamang iya nassurowangngé Puwangnge.” Nappallebbangenni Musa risininna akkémangngé makkedaé genne'ni sumbangengngé untu' patettongngi Kémana Puwangnge, jaji dé'na natiwina aga-aga sining tauwé. Bahab-bahang iya puraénna nassumbangeng mennang lebbini untu' pattépui sininna jama-jamangngéro. Nanainappa iya kaminang ahlié ri yelle'na sining panréro mébbui Kémana Puwangnge. Iyaro Kémaé naébbui mennang polé riseppulo lampana kaing lénang alusu iya ritennungngé sibawa wol gawu, collipao sibawa cella, nainappa risulangi sibawa gambara kérub. Tungke' lampa pada ukkuranna; lampéna seppulo duwa météré, sibawa sakkana duwa météré. Limallampa kaing risambung mancaji séddi ténda, sibawa limallampa iya laingngé riyébbu towi makkuwaro. Ri wirinna iya duwa téndaéro riyébburengngi toling polé ri kaing gawu'é, limappulo toling ri tungke' ténda, angkanna maddupa sipasang. Nainappa riyébbureng limappulo pakkadak-kadang ulaweng untu' passéddiwi iya duwa téndaéro. Puranana mennang naébbu pabbingenna iyaro Kémaé polé riseppulo séddi lampana kaing polé ri bulu bémbé'é. Tungke' lampa pada ukkuranna, lampéna seppulo tellu météré sibawa sakkana duwa météré. Limallampa risambung mancaji séddi ténda, sibawa enneng lampa laingngé riyébbu towi makkuwaro. Limappulo toling ripasang ri wirinna ténda iya mammulangngé sibawa limappulo toling ri wirinna ténda maduwaé. Nainappa riyébbureng limappulo pakkadak-kadang polé ri gessaé untu' passéddiwi iya duwa téndaéro untu' mancaji pabbingeng Kéma. Purairo mébbuni duwa pattongko untu' bagiyang Kémaé, séddi polé ri bingkulang bimbala lai iya ripecco cella'é, na iya laingngé polé ri bingkulang alusu'é. Nainappa naébbu mennang rangka-rangka Kéma iya tettongngé polé ri aju akasiaé. Tungke' rangka tanréna eppa météré sibawa sakkana enneppulona enneng sénti. Ri tungke' rangkaé riyébbui duwa patto iya sipasangngé, angkanna iyaro rangka-rangkaé weddingngi risambung iya séddié sibawa laingngé. Untu' bagiyang yattanna Kémaé riyébbui duwappulo rangka, sibawa patappulo pallanggana polé ri péra'é, duwa ri yawana tungke' rangka untu' iya duwa patto'na. Untu' bagiyang manoranna Kémaé riyébbui duwappulo rangka, sibawa patappulo pallanggana polé ri péra'é, duwa ri yawana tungke' rangka. Untu' monrinna Kémaé ri bagiyang yajang, riyébbui enneng rangka sibawa duwa rangka untu' sunna. Rangka-rangkana iyaro sunna ripasilambungngi ri ajéna matteru lettu ri bagiyang yasé'na. Iya duwa rangka iya mébbuéngngi sunna riyébbui sibawa caraéro. Jaji iya manenna engka aruwa rangka sibawa seppulo enneng pallangga péra', duwa ri yawana tungke' rangka. Nainappa mennang mébbu seppulo aju mappolona polé ri aju akasiaé, lima untu' rangka-rangka riséddié benrénna Kémaé, lima untu' benrénna iya laingngé, sibawa limasi untu' monrinna Kémaé seddé yajang. Aju mappolona ri tengngaé, ripasangngi sittanré sitengnga rangkana, polé ri cappa'na iyaro Kémaé. Rangka Kémaé sibawa aju-aju mappoloéro rilapiriwi sibawa ulaweng, nappa ripasangi gella-gellang ulaweng untu' tahangngi sining ajuéro. Mébbu towi mennang kaing pallawa sumpang polé ri lénang alusu'é iya ritennungngé sibawa wol gawu, collipao sibawa cella, nainappa risulangi sibawa gambara kérub. Untu' gattungngi iyaro kaingngé riyébburengngi eppa alliri polé ri aju akasiaé iya mallapi ulawengngé sibawa pakkadak-kadang ulaweng enrengngé ripasang ri yasé'na cappa pallangga péra'é. Nainappa riyébbu kaing untu' pallawa sumpanna Kémaé polé ri lénang alusu iya ritennungngé sibawa wol gawu, collipao sibawa cella enrengngé ribélo-béloi sibawa sulangeng. Untu' iyaro kaing pallawa sumpangngé riyébburengngi lima alliri iya ripasisumpungngé sibawa pakkadak-kadang. Cappa-cappa'na sibawa sining pallambunna iya lima alliriéro rilapiriwi sibawa ulaweng, na iya lima pallanggana riyébbui polé ri gessaé. Bézaleel mébbui Petti Assijancingngé polé ri aju akasiaé, lampéna 110 sénti, sakkana sibawa tanréna tungke'-tungke' 66 sénti. Bagiyang ri lalenna sibawa ri saliwenna rilapiriwi sibawa ulaweng tuléng, nainappa riyébbureng pamiring ulaweng mattulilingiwi. Nainappa mébbu eppa gellang ulaweng untu' aju pabbuléna nanapasangngi ri iya eppa ajéna pettiéro, duwa toling ri tungke' benrénna. Naébbu towi pabbuléna polé ri aju akasiaé, enrengngé nalapiriwi sibawa ulaweng, nainappa naputtama iyaro aju pabbuléé ri lalenna tolingngé ri tungke' benrénna pettiéro. Nainappa mébbu séddi pattongko polé ri ulaweng tuléngngé, lampéna 110 sénti sibawa sakkana 66 sénti. Naébbu towi duwa kérub polé ri ulaweng ri lanroé, séddi ri tungke' pattongkonaro. Iya duwa kérub-éro ripasséddiwi sibawa pattongkona nariyébbui siyolong, sibawa panni iya mallebba'é sampoi pattongkona iyaro pettié. Bézaleel mébbui méjangngé polé ri aju akasiaé, iya lampénaé 88 sénti, sakkana 44 sénti sibawa tanréna 66 sénti. Iyaro méjangngé nalapirini sibawa ulaweng tuléng enrengngé ripasangi pamiring ulaweng mattulili. Nanaébbui wiring méjangngé sillebba 7,5 sénti. Iyaro wirinna napasangiwi pamiring ulaweng mattulili. Naébburenni eppa toling untu' aju pabbuléna nanapasangngi ri iya eppa sung ajéna méjangngé. Toling pattahanna aju pabbuléna ripasangngi ri seddé wirinna méjangngé. Iyaro pabbuléé riyébbui polé ri aju akasiaé sibawa rilapiriwi ulaweng. Mébbu towi penné-penné, cangkiri-cangkiri, kendi-kendi sibawa mangko'-mangko' untu' pakkasuwiyang uwai anggoro. Sininna passakke'na méjangngéro naébbui polé ri ulaweng tuléngngé. Bézaleel mébbui ajé lampué polé ri ulaweng tuléngngé. Tudangeng sibawa akkatenningenna riyébbui polé ri ulaweng rilanroé. Bunga bélo-bélona, muttama'ni uce'-uce' unganna sibawa ampélona ripasséddiwi sibawa akkatenningenna. Ri akkatenningengngéro riyébburengngi enneng takké, tellu takké ri tungke' benrénna. Ri tungke' takkéna riyébburengngi bélo-bélo sinrupa tellu bunga badam silaong uce'-uce' unganna sibawa ampélona. Ri akkatenningenna riyébburengngi bélo-bélo maddupa eppa bunga badam silaong uce'-uce' unganna sibawa ampélona. Ri yawana tungke' sipasang takkéro riyébburengngi séddi uce'-uce' unga. Sininna ajéna lampuéro silaong uce'-uce'na enrengngé takké-takkéna riyébbui polé ri létta ulaweng rilanroé iya tuléngngé. Ri ajéna lampuéro naébbui pitu lampu silaong pakkakkasa'na untu' paccingiwi sumbunna sibawa baki'na polé ri ulaweng tuléngngé. Untu' mébbui ajé lampué sibawa passakke'na riyapparelluwangngi 35 kilo ulaweng tuléng. Bézaleel mébbui polé ri aju akasiaé séddi mézba untu' onrong mattunu dupa. Iyaro mézbaé massulapa'i; lampé sibawa sakkana tungke'-tungke' 45 sénti sibawa tanréna 90 sénti. Ri iya eppa sunna ri yasé riyébburengngi tanru iya masséddié sibawa mézbaéro. Bagiyang yasé'na, iya eppa benrénna sibawa tanru-tanru'na rilapiriwi sibawa ulaweng tuléng enrengngé riyébburengngi pamiring ulaweng mattulili. Naébbureng towi duwa toling ri yawana pamiring ulawengngé ri iya duwa benrénna untu' tahangngi aju pabbuléna mézbaéro. Iyaro pabbuléé poléi ri aju akasiaé sibawa rilapiriwi ulaweng. Mébbu towi Bézaleel minnya upacara sibawa dupa tuléng iya mabaué, ricampuru pada-pada minnya wangié. Malani Bézaleel aju akasia, nainappa naébbu mézba untu' akkarobangeng ritunué. Iyaro mézbaé massulapa'i, lampéna sibawa sakkana tungke'-tungke' 2,2 météré, sibawa tanréna 1,3 météré. Ri tungke' sunna ri yasé riyébburengngi tanru iya masséddié sibawa mézbaéro. Iya manenna rilapiriwi sibawa gessa. Naébbu towi pamuttu-pamuttué, sikopangngé, mangko'-mangko'é, sondo'-sondo'é sibawa onrong apié. Sininna iyaro paréwaé riyébbui polé ri gessaé. Naébburengngi anengeng kawe polé ri gessaé iya nabbebbekengngé ri mézbaé bagiyang yawana, tanréna sitengngana polé ri tanréna mézbaé. Nainappa naébbureng eppa toling untu' aju pabbuléna polé ri iya eppa sunna ri yawanaro. Iyaro aju pabbuléé naébbui polé ri aju akasiaé iya rilapiriyé sibawa gessa. Nainappa iya duwa aju pabbulééro, riputtama ri laleng tolit-toling ri iya duwa benrénna mézbaéro. Iyaro mézbaé naébbui polé ri pépengngé sibawa bagiyang lalenna makkalebbong. Bézaleel mébbui kullang gessaé sibawa tudangenna poléto ri gessaé. Iyaro gessaé poléi risining camming appunnangenna sining makkunrai iya mattumaniyé ri sumpanna Kémana Puwangnge. Nasapponi Bézaleel seddé yolona Kémana Puwangnge sibawa ténda polé ri kaing lénang alusu'é. Ri bagiyang yattanna, lampéna 44 météré, ritahangngi ri duwappulo alliri gessa, tungke'-tungke' pallangga gessa, sibawa pakkadak-kadang nenniya toling polé ri péra'é. Ri seddé manoranna riyébbureng towi pada-padaéttoro. Ri seddé yajanna ripasangiwi ténda 22 météré lampéna, sibawa seppulo alliri enrengngé seppulo pallangga; pakkadak-kadang sibawa pallambunna riyébbui polé ri péra'e. Ri seddé alauna, iya engkaé tange'na, sakkana téndana 22 météré. Sininna téndaé iya mattulilingiyéngngi téndaéro riyébbui polé ri kaing lénang alusu'é. Pallanggana sining allirinna riyébbui polé ri gessaé, na pakkadak-kadanna, lambunna sibawa coppo allirinna riyébbui polé ri péra'é. Sininna alliri iya mattulilingiyéngngi seddénaro ripasilambungngi séddié sibawa laingngé sibawa pakkadak-kadang péra'. Kaing pallawana pintu gerbang seddénaro riyébbui polé ri lénang alusu'é iya ritennungngé silaong wol gawu, collipao sibawa cella enrengngé ribélo-béloi sibawa sulangeng. Lampéna aséra météré sibawa tanréna duwa météré, pada-pada téndana seddéna. Iyaro kaing pallawa sumpangngé ritahangngi ri eppa alliri sibawa eppa pallangga gessa. Sininna pakkadak-kadangngé, pattongko coppo'na sibawa tolinna riyébbui polé ri péra'é, iyakiya patto-patto untu' Kémaé sibawa untu' sumpanna riyébbui polé ri gessaé. Iyanaé daftarna rupanna bessié iya ripaké ri laleng Kémana Puwangnge, onronna iya duwa batué sibawa Seppulo Paréntana Allataalaro ritaro. Iyaro daftar-é riyébbui nasaba paréntana Musa sibawa nasusungngi sining tau Léwié iya majjamaé ri yawa pappimpinna Itamar, ana'na Imang Harun. Bézaleel ana' Uri, eppona Hur polé ri suku Yéhuda, mébbui sininna iya napparéntangngé Puwangnge. Pabbantunna Aholiab ana' Ahisamakh polé ri suku Dan, iyanaritu séddiwi tau tukang passobbi, parrancang sibawa pattennung kaing lénang alusu, enrengngé wol gawu, collipao sibawa cella. Ulaweng iya riyakkasuwiyangengngé lao ri Puwangnge untu' Kéma Mapaccingngé, iya manenna sisebbu kilo jumellana, ritimbangngi situru timbangeng iya ripaké ri Kémana Puwangnge. Péra' iya rilolongengngé polé ri abbilangenna bangsa Israélié jumellana 3.430 kilo ritimbangngi situru timbangeng iya ripaké ri Kémana Puwangnge. Iyaro jumellaé padai sibawa aga iya nawajaé sininna tauwé iya ridaftar-é ri laleng abbilangengngéro. Tungke' tau wajai ellinna iya puraé ripattentu, ritimbangngi situru timbangeng iya ripaké. Ri laleng abbilangengngéro ridaftar ri 603.550 tau worowané iya makkéumuru'é 20 taung liyasé. Polé ri péra'éro, 3.400 kilo ripaké untu' mébbui iya sératu pallangga alliri Kémana Puwangnge sibawa kaing pallawa sumpangngé. Tungke' pallangga tane'na 34 kilo. Polé risésana péra'éro, 30 égana, naébbui Bézaleel pallambung-lambung sibawa pakkadak-kadang untu' alliri-allirinna, enrengngé pattongko coppo'na iyaro allirié. Gessa iya riyakkasuwiyangengngé lao ri Puwangnge iya manenna jumellana 2.425 kilo. Iyaro gessaé ripakéi untu' mébbui pallangga tange'na Kémana Puwangnge, mézba sibawa anengeng kawe polé ri gessaé, sininna passakke'na mézbaé, pallapi'na téndaé mattulilingiwi seddéna sibawa pintu gerbanna, sininna patto'na Kémaé sibawa seddéna mattulili. Bézaleel sibawa Aholiab mébbui pakéyang assompang polé ri wol gawu'é, collipao sibawa cella untu' sining imangngé wettunna mennang majjama ri Bili' Mapaccingngé. Pakéyang imangngé untu' Harun riyébbui pada-pada iya napparéntangngé Puwangnge lao ri Musa. Efod-é riyébbui polé ri kaing lénang alusu'é, wol gawu'é, collipao sibawa cella, enrengngé wennang ulaweng. Nalanroi mennang létta-létta ulawengngé nainappa narette-rette mancaji wennang marenni, nainappa natennung silaong kaing lénang alusu sibawa wol gawu, collipao sibawa cella. Purairo mébbuni duwa tulu passaléppang éfod iya najaié ri benrénna. Babbang ritennung alusu'é riyébbui polé ri bahang iya padaé sibawa riyajjairengngi ri éfod-éro angkanna mancaji séddi bagiyang pada-pada iya napparéntangngé Puwangnge lao ri Musa. Naasai mennang batu dalimaé nainappa napasang ri laleng pamiring ulawengngé. Nasibawang apanréng nasobbi'i mennang aseng-ngasenna iya seppulo duwa ana'na Yakub ri batu-batuéro. Nainappa iyaro batu-batué ripasang ri tulu passaléppanna éfod-é selaku papparéngngerang lao ri iya seppulo duwa suku Israélié, pada-pada iya napparéntangngé Puwangnge lao ri Musa. Bézaleel sibawa Aholiab mébbu pattongko aro polé ri bahang iya padaé sibawa éfod, enrengngé padato sulangenna. Bentu'na massulapa iya rileppe duwaé, sakkana sibawa lampéna tungke'-tungke' 22 sénti. Ri pattongko aroéro napasangngi mennang eppa barisi batu paramata. Ri barisi mammulangngé batu dalima, topas sibawa baiduri sépah. Ri barisi maduwaé zamrud, batu nilam sibawa intang. Ri barisi matellué batu lazuardi, aki' sibawa batu kacubung. Ri barisi maeppaé batu pirus, yakut sibawa ratna campaka. Iya seppulo duwa paramataéro risiyoi sibawa ulaweng. Ri tungke' paramataé riyokii asenna sala séddinna polé ri iya seppulo duwa ana'na Yakub selaku tanrang papparéngngerang lao ri suku-suku Israélié. Nainappa riyébbureng duwa ranté polé ri ulaweng tuléngngé iya ritulué pada-pada tulué. Riyébbureng towi duwa gellang ulaweng iya ripasangngé ri iya duwa cappa yasé'na pattongko aroé. Nainappa iya duwa ranté ulawengngéro riputtama ri laleng tolit-tolingngéro, sibawa iya duwa cappa'na laingngé riyassiyorengngi ri iya duwa pamirinna, angkanna iyaro pattongko aroé weddingngi ripasisumpung sibawa bagiyang yolona tulu passaléppanna éfod-é. Nainappa riyébbusi duwa toling ulaweng iya ripasangngé ri pattongko aroéro, ri cappa yawana bagiyang lalenna iya nakennaé éfod. Purairo riyébbui duwa toling ulaweng iya ripasangngé ri bagiyang yolona iya duwa tulu passaléppang éfod-é, seddéna sambungeng pajjaina céddé ri yawa, ri yasé'na babbang polé ri tennungeng alusu'é. Situru sibawa paréntana Puwangnge lao ri Musa, tolinna pattongko aroé ripasisumpungngi sibawa tulu gawu'é ri toling éfod-é, angkanna iyaro pattongko aroé tette'i engka ri yasé'na babbangngé sibawa dé' naleppe. Jumba iya ripaké ri yasé'na éfod-é, riyébbu manengngi polé ri wol gawu'é. Sebbo ellonna ripakkasse'i sibawa pita ritennung kuwammengngi dé' namagampang sapé. Mébbui mennang kaméja untu' Harun sibawa ana'-ana'na, passaputo, saluwara' ponco polé ri lénangngé, sibawa babbang polé ri kaing lénang alusu'é, wol gawu'é, collipao sibawa cella'é, ribélo-béloi sibawa sulangeng, pada-pada iya napparéntangngé Puwangnge lao ri Musa. Riyébbureng towi bélo-bélo polé ri ulaweng tuléngngé, tanranna makkedaé purani mennang ripallaing untu' Puwangnge. Ribélo-béloéro riyokii ada-ada “Ripallaing untu' Puwangnge ”. Iyaro bélo-béloé ripasangngi ribagiyang yolona passapué, siturui sibawa paréntana Puwangnge lao ri Musa. Angkanna ripattépuni sininna jama-jamang mébbuéngngi Kémana Puwangnge. Pura manenni napogau' tau Israélié pada-pada iya napparéntangngé Puwangnge lao ri Musa. Natiwini mennang lao ri Musa Kémaé sibawa sininna passakke'na, pakkadak-kadanna, sining aju mappolona, alliri-allirinna sibawa pallanggana, pattongko polé ri bingkulang bémbé lai iya ripecco cella'é, pattongkona polé ri bingkulang alusu'é, kaing bowong. Petti Assijancingngé iya mallise'é duwa batu sibawa aju pabbuléna enrengngé pattongkona, méjang sibawa sininna passakke'na enrengngé roti pakkasuwiyangngé, aju lampu polé ri ulaweng tuléngngé, lampu-lampunna sibawa sininna passake'na, minnya untu' lampué, mézba polé ri ulawengngé, minnya upacara, dupa bau, kaing pallawa sumpanna Kémaé, mézba gessaé sibawa anengeng kawe polé ri gessaé, aju pabbuléna sibawa sininna passakke'na; kullang onrong mabbissa sibawa tudangenna, ténda-ténda untu' seddé Kémaé sibawa alliri-allirinna enrengngé pallanggana, kaing pallawa pintu gerbang untu' seddéna sibawa sining tuluna, patto-patto Kémaé; sininna paréwanna iya ripaké ri laleng Kémaé, sibawa pakéyang assompangngé untu' sining imangngé wettunna mennang majjama ri Bili' Mapaccingngé enrengngé pakéyang untu' Harun sibawa ana'-ana'na. Pura manenni napogau' tau Israélié sininna jama-jamangngéro pada-pada iya napparéntangngé Puwangnge lao ri Musa. Naparéssani Musa sini-sininnaé sibawa naitai makkedaé purani naébbu mennang pada-pada iya napparéntangngé Puwangnge. Nainappa Musa barakkakiwi mennang. Makkedai Puwangnge lao ri Musa, “Patettongngi Kéma-Ku ri tanggala séddi uleng séddi. Puttama'i ri lalenna Petti Assijancingngé iya mallise'é Seppulo Parénta sibawa pasanni kaing pattongkoé ri yolona. Taroi méjangngé sibawa passakke'na. Puttama towi ajé lampué sibawa pasangngi lampunna. Palénne'i mézba ulaweng onrong mattunu dupaé ri yolona Petti Assijancingngé, namugattungngi kaing paddenringngé ri sumpanna Kémaé. Palénne'i mézba untu' akkarobangeng ritunué ri yolona sumpang Kémaé. Taroi kullang uwai ri pallawangenna Kémaé sibawa mézbaéro, nainappa muliseki sibawa uwai. Nainappa mupasang téndaé mattulilingiwi seddéna Kémaé, sibawa gattungngi kaing paddenringngé ri pintu gerbang seddéna. Nainappa Kémaé sibawa sininna passakke'na harusu'i muwakkasuwiyangeng lao ri Iyya sibawa cara minnyakiwi sibawa minnya upacara, na iya manennaro ripallaingngi untu' Iyya. Akkasuwiyangengngi mézbaé sibawa sininna passakke'na sibawa caraéro, kuwammengngi na iya manenna ripallaingngi untu' Iyya. Ebbu towi makkuwaro kullang uwai sibawa pallanggana. Purairo, suroi Harun sibawa ana'-ana'na polé ri sumpang Kémaé sibawa bissaiwi aléna. Pasangngi pakéyang imangngé ri Harun, sibawa minnyakiwi kuwammengngi ripallaingngi untu' tumaningi-Ka selaku imang. Nainappa musuro ana'-ana'na maddeppé, namupapasangiwi kaméja ri mennang. Nainappa muminnyaki mennang pada-pada muminnyakinna ambo'na, kuwammengngi naullé towi mennang tumaningi-Ka selaku imang. Nasibawang upacara minnya'éro, massossorengngi sukunna makkatenningngi jabatang imangngé.” Napogau'ni Musa sininna pada-pada iya napparéntangngé Puwangnge. Na ri tanggala séddi uleng séddi ri laleng taung maduwaé nasalainnana bangsa Israélié Maséré, ripasanni Kémana Puwangnge. Napalénne'ni Musa sining pallanggana, patettongngi sining rangkana, pasangngi sining ajunna mappoloé, sibawa patettongngi sining allirinna. Nainappa napallebba pabbingeng Kémaé sibawa pattongko bagiyang saliwenna ri yasé'na pada-pada iya napparéntangngé Puwangnge. Nainappa naputtama iya duwa batuéro ri laleng Petti Assijancingngé. Nainappa napasang Musa pattongkona Pettiéro sibawa naputtama'i aju pabbuléna ri laleng tolinna. Nainappa nataro iyaro Pettié ri laleng Kémaé sibawa gattungngi kaing passampona ri yolona, pada-pada iya napparéntangngé Puwangnge lao ri aléna. Nainappa nataro Musa méjangngé ri laleng Kémaé, ri bagiyang manoranna ri seddé saliwenna kaingngé, nainappa ripalénne roti ripatalaé ri yasé'na méjangngéro. Ajé lampué ripalénne'i ri laleng Kémaé, ri bagiyang yattang, siyolong sibawa méjangngéro, nainappa ripalluwa iyaro sining lampué ri yolona Puwangnge. Mézba ulawengngé ritaroi ri laleng Kémaé, ri yolona kaingngé, naritunu dupa mabaué pada-pada iya napparéntangngé Puwangnge lao ri Musa. Musa gattungngi kaing pallawa sumpanna Kémaé, na ri yolona sumpangngéro nataroi mézbaé untu' akkarobangeng ritunu. Ri yasé'na mézbaéro riyakkasuwiyangengngi akkarobangeng ritunué sibawa akkarobangeng ripatalaé. Kullang gessaé nataroi ri pallawangenna Kémaé sibawa mézbaé, nanalisekiwi sibawa uwai. Musa, Harun sibawa ana'-ana'na bissaiwi limanna sibawa ajéna kuwaro, sises-siseng mennang muttama ri laleng Kémana Puwangnge iyaré'ga maddeppériwi mézbaé. Ri mattulilinna Kémaé sibawa mézbaéro napasangngi Musa téndaé, nainappa nagattung kaing pallawana pintu gerbang seddé Kémaé. Natépu manenna sininna jama-jamangngéro. Nananonnona ellungngé tongkoi Kémana Puwangnge, sibawa pennoni iyaro Kémaé sibawa cahaya ahadérékenna Puwangnge. Narimakkuwannanaro dé'na naulléi Musa muttama ri laleng Kémaéro. Sises-siseng iyaro ellungngé ménré ri yasé'na Kémana Puwangnge, nabongkara'i bangsa Israélié akkémanna mennang untu' létté ri onrong laingngé. Iyakiya rékko iyaro ellungngé dé' naénré, dé' mennang najoppa polé kuwaro. Ri wettu solléna bangsa Israélié, engkai Puwangnge ri Kémaéro ri laleng rupa ellung ri essoé sibawa ri laleng rupa api ri wennié. Polé ri Kéma-Na, Puwangnge mobbii Musa sibawa mpéréngngi sining peraturang iya harusu'é naturusi tau Israélié. Rékko séddié tau makkasuwiyangeng olokolo untu' akkarobangeng ritunu lao ri Puwangnge, weddingngi makkasuwiyangeng saping, bimbala iyaré'ga bémbé'na. Rékko iya riyakkasuwiyangengngé sikaju saping, iyaro olokolo'é harusu'i iya laié sibawa dé'é gaga sala-salanna. Iyaro sapingngé harusu'i natiwi ri sumpang Kémana Puwangnge, kuwammengngi natarimai Puwangnge iyaro tauwé. Nainappa harusu'i napalénne limanna ri tompo ulunna iyaro olokolo'é, naritarima matu pakkasuwiyanna untu' paddampengeng dosana. Nainappa iyaro sapingngé harusu'i rigéré ri yolona sumpanna Kémaé. Darana harusu'i nakkasuwiyangeng sining imang wijanna Harun lao ri Puwangnge, nainappa nabboloreng ri iya eppa benrénna mézbaé ri yolona sumpanna Kémaé. Nainappa iyaro tauwé harusu'i nalopé bingkulanna sibawa nasépa-sépa iyaro olokolo'é. Sining imangngé harusu'i palluwa api ri yasé'na mézbaé nainappa susung aju tunung ri yasé'na. Sépa-sépa akkarobangngé, muttama'ni ulunna sibawa lunra'na, harusu'i mennang napalénne ri yasé'na apié. Nainappa iyaro tauwé harusu'i nabissai lise babuwana enrengngé poppanna iyaro sapingngé, na imang iya majjamaé harusu'i natunu maneng. Baunna iyaro akkarobangeng ritunué pésennangiwi atinna Puwangnge. Rékko iyaro riyakkasuwiyangengngé sikaju bimbala iyaré'ga bémbé, iyaro olokolo'é harusu'i iya laié sibawa dé'é gaga sala-salanna. Iyaro tauwé harusu'i nagéré iyaro olokolo'é ri seddé manoranna mézbaé, nainappa sining imangngé harusu mabbolorengngi darana ri iya eppa benrénna mézbaé. Puranana risépa-sépa iyaro olokolo'é, sininna sépa-sépa'é, muttama'ni ulunna sibawa lunra'na, harusu'i napalénne imangngé ri yasé'na apié ri mézbaé. Nainappa iyaro tauwé nabissai lise babuwana sibawa poppanna iyaro olokolo'é. Nainappa harusu'i nakkasuwiyangeng maneng imangngé lao ri Puwangnge, sibawa tunui ri yasé'na mézbaé. Baunna iyaro akkarobangeng ritunué pésennangiwi atinna Puwangnge. Rékko iya nakkasuwiyangengngé sikajuwi manu'-manu', harusu'i iyaro manu'-manu'é bekku iyaré'ga jangang-jangang maloloé. Harusu'i imangngé tiwii iyaro manu'-manu'é ri mézbaé, nainappa nalicci ellonna sibawa natunu ulunna ri yasé'na mézbaé. Darana iyaro manu'-manu'é harusu'i ripecca massu ri benrénna mézbaé. Ittellina sibawa sininna lise'na harusu'i ripassu, nainappa ribuwang ri seddé alauna mézbaé ri onrong awué. Nainappa iyaro manu'-manu'é harusu'i ribibbi ri pong pannina, iyakiya dé' nawedding pettu pannina. Nainappa iyaro manu'-manu'é harusu'i ritunu ri yasé'na mézbaé. Iyaro baunna akkarobangeng ritunué pésennangiwi atinna Puwangnge. Rékko séddié tau makkasuwiyangeng akkarobangeng ripatalaé lao ri Puwangnge, iyaro akkarobangngé harusu'i labbu iya kaminang makessingngé iya riboloé minnya zaitun sibawa riwéréng kamennyang ri tompo'na. Harusu'i natiwi risining imang wija-wijanna Harun. Imang iya majjamaé harusu malai sikemmo iyaro labbu'é sibawa minnya zaitunna enrengngé sininna kamennyanna, nainappa natunu ri yasé'na mézbaé selaku tanrang makkedaé purani riyakkasuwiyangeng maneng lao ri Puwangnge. Baunna iyaro akkarobangeng inanré pésennangiwi atinna Puwangnge. Lebbinna akkarobangeng ripatalaé iyanaritu untu' sining imangngé. Iyaro akkarobangngé mapaccing senna nasaba riyalai polé ri inanré iya puraé riyakkasuwiyangeng lao ri Puwangnge. Rékko iyaro riyakkarobangengngé roti iya ritunué ri laleng attunungngé, iyaro rotié harusu'i riyébbu temmakkéragi. Iyaro rotié wedding maompe, riyébbui polé ri lama labbu manenné'é sibawa minnya zaitun, wedding towi béppa iya risapuiyé bawang minnya zaitun. Rékko iyaro riyakkasuwiyangengngé roti iya ripanggangngé ri yasé'na appanggangengngé, iyaro rotié harusu'i riyébbu polé ri labbu manenné'é sibawa minnya zaitun, iyakiya dé' napaké ragi. Roti iya riyakkasuwiyangengngéro harusu'i ripuwé'-puwé', nainappa ritiriki minnya zaitun. Rékko iyaro riyakkasuwiyangengngé roti iya rinasué ri pamuttué, iyaro rotié harusu'i riyébbu polé ri labbu nenné'é sibawa minnya zaitun. Roti iya riyébbué sibawa caraéro harusu'i riyakkasuwiyangeng lao ri Puwangnge sibawa riyabbéréyang lao ri imangngé iya tiwiéngngi lao ri mézbaé. Imangngé malai sibagiyang iyaro rotié nainappa natunu ri yasé'na mézbaé selaku tanrang makkedaé pura manenni riyakaksuwiyangeng lao ri Puwangnge. Baunna pésennangiwi atinna Puwangnge. Lebbinna iyanaritu untu' imangngé. Iyaro rotié mapaccing senna nasaba riyalai polé ri inanré iya puraé riyakkasuwiyangeng lao ri Puwangnge. Akkarobangeng ripatalaé untu' Puwangnge dé' nawedding ricampuru sibawa cani iyaré'ga ragi, nasaba cani'é sibawa ragié dé' nawedding ritunu untu' pakkasuwiyang lao ri Puwangnge. Polé ri wassélé tana iya bunge'é tungke' taung, harusu'i riyakkasuwiyangeng sibagiyang lao ri Puwangnge, iyakiya dé' nawedding ritunu ri yasé'na mézbaé. Tungke' akkarobangeng ripatalaé harusu'i ripejjéi, nasaba pejjé tanrangiwi assijancinna Allataala sibawa iko. Jaji sininna pakkasuwiyangngé harusu'i ripejjéi. Rékko makkasuwiyakko lao ri Puwangnge gandong iya bunge' muwéngngalaé, tiwii gandong barué iya puraé rilabbu nenné iyaré'ga ripanggang. Iyaro gandongngé harusu'i ribolo minnya zaitun sibawa riwéréng kamennyang ri yasé'na. Harusu'i natunu imangngé sibagiyang gandongngé sibawa minnya'éro enrengngé sininna kamennyanna, selaku tanrang makkedaé pura manenni riyakkasuwiyangeng lao ri Puwangnge. Rékko séddié tau makkasuwiyangeng sikaju saping untu' akkarobangeng pappasidamé, iyaro sapingngé wedding lai, wedding komba, iyakiya dé' nawedding engka sala-salanna. Tau iya makkasuwiyangengngéngngi harusu'i napalénne limanna ri tompo ulunna iyaro olokolo'é nainappa nagéré ri yolona sumpanna Kémana Puwangnge. Sining imang wijanna Harun harusu'i mabbolorengngi iyaro dara sapingngé ri iya eppa benrénna mézbaé. Untu' akkarobangeng pappasidamé lao ri Puwangnge, harusu'i imangngé makkasuwiyangengngi sining bagiyangngéwé polé ri olokolo'éro: lunra' iya dokoéngngi lise babuwana, ginjalna sibawa lunra'na enrengngé bagiyang iya kaminang makessingngé polé ri atinna. Iya manennaro, silaong sibawa akkarobangeng ritunu laingngé, harusu'i ritunu ri yasé'na mézbaé. Baunna iyaro akkarobangeng inanré pésennangiwi atinna Puwangnge. Rékko iyaro riyakkasuwiyangengngé untu' akkarobangeng pappasidamé sikajuwi bimbala iyaré'ga bémbé, iyaro olokolo'é weddingngi lai, wedding komba, iyakiya dé' nawedding engka sala-salanna. Rékko séddié tau makkasuwiyangeng sikaju bimbala, harusu'i natiwi lao ri Kémana Puwangnge. Kuwaniro harusu napalénne limanna ri tompo ulunna iyaro bimbala'é nainappa nagéré ri yolona Kémaé. Nainappa imangngé harusu mabbolorengngi iyaro dara bimbala'é ri iya eppa benrénna mézbaé. Untu' akkarobangeng pappasidamé lao ri Puwangnge, harusu'i imangngé makkasuwiyangengngi sining bagiyangngéweé polé ri bimbala'éro: lunra'na, sininna ikko'na iya mallunra'é sibawa rirette'i ri seddéna buku lekke'na, lunra' iya dokoéngngi lise babuwana, ginjalna sibawa lunra'na enrengngé bagiyang kaminang makessingngé polé ri atinna. Imang iya majjamaé harusu'i natunu manenro ri yasé'na mézbaé untu' akkarobangeng inanré lao ri Puwangnge. Rékko iya riyakkasuwiyangengngé sikaju bémbé, tau iya makkasuwiyangengngéngngi harusu'i natiwi ri Kémana Puwangnge. Kuwaniro harusu napalénne limanna ri tompo ulunna bémbé'éro nainappa nagéré ri yolona Kémaé. Harusu'i imangngé mabbolorengngi iyaro dara olokolo'é ri iya eppa benrénna mézbaé. Untu' akkarobangeng inanré ri Puwangnge, harusu'i nakkasuwiyangeng imangngé sining bagiyangngéwé polé ri bémbé'éro: lunra' iya dokoéngngi lise babuwana, ginjalna sibawa lunra'na enrengngé bagiyang kaminang makessingngé polé ri atinna. Imang iya majjamaé harusu tunu manengngi iyaro ri yasé'na mézbaé. Baunna iyaro akkarobangngé pésennangiwi atinna Puwangnge. Sininna lunra'na iyaro olokolo'é untu' Puwangnge. Tau Israélié dé' sises-siseng nawedding manré lunra iyaré'ga dara. Iyaro peraturangngé untu' mannennungeng sibawa harusu'i naturusi tungke' tau Israélié kégi-kégi monro. Puwangnge suroi Musa mappallebbangengngi lao ri bangsa Israélié makkedaé nigi-nigi iya dé'é nattungkaiwi madosa nasaba najjalékkaiwi sala séddinna polé ri parénta-paréntana Puwangnge, harusu'i naccowéri peraturangngéwé. Rékko Imang Lompoé madosa, angkanna maccowé towi bangsa Israélié pasala, harusu'i makkasuwiyangeng sikaju saping lai malolo iya dé'é sala-salanna lao ri Puwangnge kuwammengngi nariyaddampengeng dosana. Iyaro sapingngé harusu'i natiwi ri sumpang Kémana Puwangnge. Harusu'i Imang Lompoé palénne'i limanna ri tompo ulunna iyaro olokolo'é, nainappa nagéré ri yolona Kémaé. Sibagiyang polé ri darana harusu'i natiwi muttama ri laleng Kémaé. Nainappa harusu'i natellereng jarinna ri laleng daraéro nanakkeppikengngi wékkapitu ri yolona paddenring iya lacce'éngngi Bili' Mapaccingngé. Sibagiyang polé ri daraéro harusu'i nassapuwang ri sining tanru'é ri sunna mézba dupa baué ri laleng Kémaé, na lebbinna harusu'i riyabboloreng ri pabborina mézba akkarobangeng ritunué iya engkaé ri yolona sumpanna Kémaé. Harusu'i imangngé mala manengngi lunra'na iyaro saping laié, iyanaritu lunra iya dokoéngngi lise babuwana, ginjalna sibawa lunra bagiyang kaminang makessingngé polé ri atinna. Iya manennaro harusu'i natunu ri yasé'na mézba akkarobangeng ritunué pada-pada ri akkarobangeng pappasidamé. Iyakiya jukuna iyaro sapingngé, bingkulanna, ulunna, ajéna, lise babuwana nasésaé muttama'ni paruna, jaji iya manenna sangadinna bagiyang iya puraé ripallaing, harusu'i ritiwi massu ri akkémangngé. Kuwaniro iyaro sapingngé harusu ritunu ri yasé'na aju tunungngé ri onrong akkabbéyangeng awué, iyanaritu onrong iya ripallaingngé untu' iyaro. Rékko iyaro madosaé sininna umma Israélié, saba' dé' nattungkaiwi majjalékkaiwi sala séddinna paréntana Puwangnge, riissenna muwa iyaro dosaé, harusu'i umma'é tiwi sikaju saping lai lolo ri yolona Kémana Puwangnge. Iyaro olokolo'é harusu'i riyakkasuwiyangeng untu' akkarobangeng paddampengeng dosa. Sining pamimping bangsaé harusu'i palénne'i limanna mennang ri tompo ulunna olokolo'éro, nainappa nagéré ri onrongngéro. Harusu'i natiwi Imang Lompoé sibagiyang darana iyaro olokolo'é muttama ri laleng Kémaé. Kuwaniro harusu natellengeng jarinna ri laleng daraéro nainappa nakkeppikeng wékkapitu ri yolona paddenring iya lacce'éngngi Bili' Mapaccingngé. Sibagiyassi harusu'i riyassapuwang ri tanru-tanru sunna mézba dupaé ri laleng Kémaé, na lebbinna harusu'i riyabboloreng ri pabborina mézba onrong akkarobangeng ritunu iya engkaé ri yolona sumpang Kémaé. Sininna lunra'na iyaro olokolo'é harusu'i riyala nainappa ritunu ri yasé'na mézbaé. Carana pada-pada pakkasuwiyang saping lai untu' akkarobangeng paddampengeng dosaé. Makkuwaniro carana Imang Lompoé makkasuwiyangeng akkarobangeng untu' dosa-dosana umma'é, nanaddampengengngi matu Puwangnge iyaro dosa-dosaé. Nainappa ritiwi massu iyaro saping laié, naritunu risaliwenna akkémangngé, padapada pakkasuwiyang saping lai untu' akkarobangeng paddampengeng dosana Imang Lompoé. Makkuwaniro carana makkasuwiyangeng akkarobangeng paddampengeng dosana umma'na. Rékko iya madosaé séddiwi tau makuwasa nasaba dé' nattungkaiwi majjalékkaiwi sala séddinna paréntana Puwangnge, namaingekinna muwa, harusu'na makkarobangeng sikaju bémbé lai iya dé'é gaga sala-salanna untu' paddampengeng dosa. Harusu'i napalénne limanna ri tompo ulunna iyaro olokolo'é, nainappa nagéré ri seddé manoranna mézba, onrong maggéré olokolo'é untu' akkarobangeng ritunué. Harusu'i natellengeng jarinna imangngé ri laleng dara olokolo'éro nainappa nassapuwang ri tanru-tanru sunna mézbaé, na sésana nabbolorengngi ri pabborina mézbaé. Nainappa sininna lunra'na iyaro olokolo'é harusu'i ritunu ri yasé'na mézbaé, pada-pada ri akkarobangeng pappasidamé. Makkuwaniro carana imangngé makkasuwiyangeng akkarobangeng untu' dosana séddié panguwasa, nariyaddampengeng matu iyaro tauwé ri Puwangnge. Rékko séddié tau polé ri ra'ya' biyasaé pogau' dosa nasaba dé' nattungkai majjalékkaiwi sala séddinna paréntana Puwangnge, namaingekinna muwa, harusu'i makkasuwiyang sikaju bémbé komba iya dé'é gaga sala-salanna. Harusu'i napalénne limanna ri tompo ulunna iyaro olokolo'é, nainappa nagéré ri seddé manoranna mézba onrong maggéré olokolo untu' akkarobangeng ritunué. Harusu'i imangngé tellengengngi jarinna ri laleng dara olokolo'éro, nainappa nassapuwang ri tanru-tanru sunna mézbaé, na sésana nabbolorengngi ri pabborina mézbaé. Sininna lunra'na iyaro olokolo'é harusu'i riyala pada-pada akkarobangeng pappasidamé. Iyaro lunra'é harusu'i natunu imangngé ri yasé'na mézbaé, na baunna pésennangiwi atinna Puwangnge. Makkuwaniro carana imangngé makkasuwiyangeng akkarobangeng untu' dosana séddié tau polé ri ra'ya' biyasaé, nariyaddampengeng iyaro tauwé ri Puwangnge. Rékko séddié tau makkarobangeng sikaju bimbala untu' paddampengeng dosana, iyaro bimbala'é harusu'i komba sibawa dé'é gaga sala-salanna. Harusu'i napalénne limanna ri tompo ulunna iyaro olokolo'é, nainappa nagéré ri seddé manoranna mézbaé, onronna maggéré olokolo untu' akkarobangeng ritunué. Harusu'i imangngé tellengengngi jarinna ri laleng dara olokolo'éro, nainappa nassapuwang ri tanru-tanru sunna mézbaé, na sésana nabbolorengngi ri pabborina mézbaé. Nainappa harusu'i riyala maneng lunra'na iyaro olokolo'é pada-pada ri akkarobangeng pappasidamé. Iyaro lunra'é harusu'i ritunu ri yasé'na mézbaé, silaong akkarobangeng inanré iya riyakkasuwiyangengngé lao ri Puwangnge. Makkuwaniro carana imangngé makkasuwiyangeng akkarobangeng untu' dosana tauwéro, nariyaddampengeng matu ri Puwangnge. Akkarobangeng paddampengeng dosaé parellui riyakakrobangeng: Rékko séddié tau secara résmi riyéllauwi mabbéré asabbiyang ri pengadilangngé, iyakiya dé' nabbéré pappakatajang passalenna aga iya puraé naita iyaré'ga naéngkalinga angkanna harusu'i natanggung addimonrinna. Rékko séddié tau pasala nasaba dé' nattungkaiwi mancaji najisi', saba' géssai séuwa iya najisi'é, ébara'na bakké olokolo, nainappa namaingeki pangkaukenna. Rékko séddié tau pasala nasaba dé' nattungkaiwi géssai barang najisi'é iya polé ri tolinoé, nainappa namaingeki pangkaukenna. Rékko séddié tau pasala nasaba mattanroi sibawa sembarangang untu' pogau'i agi-agi, nainappa namaingeki pangkaukenna. Ri laleng tungke' parakaraéro, tau iya pasalaé harusu'i mangakuiwi asalanna. Sibawa untu' pakkamaja dosana, harusu'i tiwi sikaju bimbala iyaré'ga bémbé lai untu' Puwangnge. Imangngé harusu' makkasuwiyangengngi iyaro akkarobangngé kuwammengngi nariyaddampengeng dosana iyaro tauwé. Iyakiya rékko tau iya pasalaé dé' namampu passadiya bimbala iyaré'ga bémbé untu' mpajai dosana, harusu'i tiwi sipasang bekku iyaré'ga jangang-jangang lolo, sikaju untu' akkarobangeng paddampengeng dosa, sibawa sikaju untu' akkarobangeng ritunu. Iyaro manu'-manu'é harusu'i ritiwi lao ri imangngé. Harusu'i imangngé lebbi riyolo makkasuwiyangengngi manu'-manu' iya ripattentué untu' akkarobangeng paddampengeng dosa. Harusu'i riyalicci ellonna iyaro manu'-manu'é, iyakiya dé' nawedding narapi pettu ulunna. Darana iyaro manu'-manu'é harusu'i riyakkeppikeng ri benrénna mézbaé, na lebbinna harusu'i ripecca massu ri pabborina mézbaé untu' akkarobangeng paddampengeng dosa. Purairo nakkasuwiyangenni imangngé manu'-manu' iya maduwaé untu' akkarobangeng ritunu, situru sibawa peraturangngé. Makkuwaniro carana imangngé makkasuwiyangengngi akkarobangeng untu' dosana iyaro tauwé, nariyaddampengeng matu ri Puwangnge. Rékko tau iya pasalaé dé' namampu passadiya sipasang bekku iyaré'ga jangang-jangang untu' akkarobangeng paddampengeng dosa, harusu'i tiwi sikilo labbu. Iyaro labbu'é dé' nawedding ricampuru minnya zaitun iyaré'ga nasibawang kamennyang, saba' iyaro akkarobangngé iyanaritu akkarobang paddampengeng dosa na tenniya akkarobangeng ripatala. Iyaro labbu'é harusu'i ritiwi ri imangngé. Harusu'i nala imangngé sikemmo polé ri labbu'éro selaku tanrang makkedaé pura manenni riyakkasuwiyangeng lao ri Puwangnge. Iyaro labbu sikemmoé harusu'i ritunu ri yasé'na mézbaé selaku akkarobangeng inanré. Iyanaro akkarobangenna untu' paddampengeng dosaé. Makkuwaniro carana imangngé makkasuwiyangeng akkarobangeng untu' dosana tauwéro, nariyaddampengeng matu ri Puwangnge. Labbu iya nasésaé iyanaritu bagiyanna imangngé, pada-pada ri akkarobangeng gandongngé. Puwangnge mabbéréyangngi lao ri Musa iyaé peraturangngé. Rékko séddié tau dé' nattungkaiwi pogau' dosa nasaba takkalupai ri laleng mabbéréyangngi sining pakkasuwiyanna iya riwajikengngé untu' Puwangnge, iyaro tauwé harusu'i tiwi akkarobangeng passullé aroging. Iyaro akkarobangngé harusu'i sikaju bimbala iyaré'ga bémbé lai iya dé'é gaga sala-salanna, sibawa riyangke situru ellinna iya ripatakkennaé ri Kémana Puwangnge. Iyaro tauwé harusu'i nawaja aga iya nallupaiyé riyolo, ritambai sibawa duwappulo paresséng. Nainappa harusu'i nabbéréyang iyaro olokolo'é lao ri imangngé, na imangngé makkasuwiyangengngi untu' dosana iyaro tauwé, nariyaddampengeng matu ri Puwangnge. Rékko séddié tau dé' nattungkaiwi pogau' dosa nasaba najjalékkaiwi sala séddinna paréntana Puwangnge, iyaro tauwé pasalai sibawa harusu'i natanggung addimonrinna. Untu' akkarobangeng passullé arogingngé harusu'i tiwi sikaju bimbala iyaré'ga bémbé lai iya dé'é gaga sala-salanna sibawa riyangke'i situru ellinna iya ripatakkennaé ri Kémana Puwangnge. Imangngé makkarobangengngi untu' dosana iyaro tauwé, nariyaddampengeng matu ri Puwangnge. Iyanaro akkarobangeng passullé aroging untu' asalang iya ripogau'é lao ri Puwangnge. Puwangnge mpéréngngi Musa iyaé sining peraturangngé. Untu' akkarobangeng passullé aroging iyaro tauwé harusu'i makkasuwiyangeng sikaju bimbala iyaré'ga bémbé lai iya dé'é gaga sala-salanna sibawa riyangke'i situru ellinna iya ripatakkennaé ri Kémana Puwangnge. Imangngé makkarobangengngi untu' dosana iyaro tauwé, nariyaddampengeng matu ri Puwangnge. Puwangnge suroi Musa mpéréngngi Harun sibawa ana'-ana'na iyaé sining peraturangngé passalenna akkarobangeng iya ritunu manengngé. Harusu'i imangngé palénne'i iyaro akkarobangeng ritunué ri yasé'na mézbaé sibawa leppessangngi kuwaro puppu benni, sibawa apinna harusu'i malluwa matteru. Mancaji awunnana iyaro akkarobangngé, massaluwara' ponco'ni imangngé sibawa jumba polé ri kaing lénangngé, harusu'i makkai iyaro awu mallunra'é polé ri yasé'na mézbaé nanataroi ri seddéna mézbaé. Purairo harusu'i nasulléi pakéyanna nanatiwii iyaro awué ri saliwenna akkémangngé, ri onrong iya ripattentué untu' iyaro. Iyanaé peraturang-peraturanna passalenna akkarobangeng ripatalaé untu' Puwangnge. Iyaro akkarobangngé harusu'i ritiwi ri yolona mézbaé riséddié tau polé ri wijanna Harun. Harusu'i mala sikemmo labbu nenné sibawa minnya enrengngé sininna kamennyanna, nainappa natunu ri yasé'na mézbaé selaku tanrang makkedaé sininna iyaro akkarobangngé riyakkasuwiyangengngi lao ri Puwangnge. Baunna iyaro akkarobangngé pésennangiwi atinna Puwangnge. Untu' mannennungeng tungke' worowané wija-wijanna Harun weddingngi manréi iyaro rotié; iyanaro bagiyanna mennang iya tette'é polé ri inanré iya riyakkasuwiyangengngé lao ri Puwangnge. Tau laing iya géssaéngngi inanré iya puraé riyakkarobangenro, lolongengngi matu acilakang nasaba awatangeng apaccingenna. Puwangnge mpéréngngi Musa iyaé peraturangngé passalenna akkarobangngé wettunna rilanti séddié imang wijanna Harun. Ri esso rilanti'na, harusu'i makkasuwiyangeng sikilo labbu gandong lao ri Puwangnge. Sitengngana harusu'i riyakkasuwiyangeng ri éléé na sésana ri arawéngngé. Iyaro labbu'é harusu'i rikoré minnya, naritunu ri yasé'na appanggangengngé, nainappa ripuwé'-puwé' nariyakkasuwiyangeng selaku akkarobangeng inanré. Baunna iyaro akkarobangngé pésennangiwi atinna Puwangnge. Untu' mannennungeng tungke' wijanna Harun iya rilanti'é mancaji Imang Lompo harusu'i makkasuwiyangengngi iyaro akkarobangngé. Iya manenna harusu'i ritunu untu' pakkasuwiyang lao ri Puwangnge. Tungke' akkarobangeng ripatalaé iya nakkasuwiyangengngé imangngé harusu'i ritunu maneng, muwi céddé dé'to nawedding riyanré. Puwangnge suroi Musa mpéréngngi Harun sibawa ana'-ana'na iyaé sining peraturangngé passalenna akkarobangeng paddampeng dosaé. Olokolo untu' akkarobangeng paddampeng dosaé harusu'i rigéré ri onrong maggéré olokolo untu' akkarobangeng ritunué. Iyaro akkarobangngé mapaccing senna. Imang iya makkasuwiyangengngéngngi iyaro akkarobangngé harusu'i nanré ri onrong iya ripallaingngé, iyanaritu seddéna Kémana Puwangnge. Muwi nigi-nigi iyaré'ga agi-agi iya kennaéngngi iyaro juku olokolo'é lolongengngi matu acilakang nasaba awatangeng apaccingenna. Rékko séddié waju nakenna darana iya tabbessi'éro, iyaro wajué harusu'i risessa ri onrong iya ripallaingngé. Oring tana iya ripaké untu' séwongngi iyaro juku akkarobangngé harusu'i rireppa. Rékko iya ripaké oring bessi, iyaro oringngé harusu'i rigoso nainappa ripépaccingi sibawa uwai. Tungke tau worowané ri laleng kaluwargana sining imangngé weddingngi manréi iyaro akkarobangeng iya mapaccing senna'é. Olokolo untu' upacara paddampengeng dosaé iya riyalaé sibagiyang darana untu' ritiwi ri Bili' Mapaccingngé, harusu'i ritunu gangka cappu sibawa dé' nawedding riyanré. Iyanaé peraturanna passalenna akkarobangeng passullé arogingngé. Iyaro akkarobangngé mapaccing senna'i. Olokolo untu' akkarobangngé harusu'i rigéré ri onrong aggéréreng olokolo untu' akkarobangeng ritunué, nainappa darana riyabboloreng ri iya eppa benrénna mézbaé. Iya manennaro harusu'i natunu ri yasé'na mézbaé selaku akkarobangeng inanré untu' Puwangnge. Iyaro akkarobangngé iyanaritu akkarobangeng passullé aroging. Tungke' worowané ri laleng kaluwargana imang-ngimangngé wedding manréi iyaro juku akkarobangngé, iyakiya harusu'i nanré ri onrong iya ripallaingngé, nasaba iyaro akkarobangngé mapaccing senna'i. Untu' akkarobangeng paddampengeng dosaé sibawa akkarobangeng passullé arogingngé pada-padai atorenna, iyanaritu: Juku olokolo iya riyakkasuwiyangengngé iyanaritu bagiyanna imangngé iya makkasuwiyangengngéngngi. Bingkulanna iyaro olokolo'é untu'nato imangngé. Tungke' akkarobangeng ripatalaé iya ritunué ri laleng attunungngé iyaré'ga rinasu ri laleng pamuttué iyaré'ga iya ripanggangngé, mancajiwi bagiyanna imang iya makkasuwiyangengngéngngi. Iyakiya akkarobangeng ripatala iya dé'é narinasu, muwi iya sicampuru'é sibawa minnya muwi iya marakkoé, iya manenna untu' imang-ngimang wija-wijanna Harun, sibawa harusu'i nabagé rata riyelle'na mennang. Iyanaé sining peraturanna passalenna akkarobangeng pappasidamé iya riyakkasuwiyangengngé lao ri Puwangnge. Rékko iyaro akkarobangngé riyakkasuwiyangengngi untu' mattarima kasi, nasibawang iyaro olokolo'é harusu' towi riyakkasuwiyangeng roti iya dé'é napaké ragi. Iyaro rotié wedding iya maompe'é polé ri lama labbu silaongngé minnya zaitun, wedditto roti rakko iya manipié iya risapuiyé sibawa minnya, iyaré'ga béppa labbu iya riyébbué silaong minnya zaitun. Ri lainnaéro harusu'i riyakkasuwiyangetto roti iya riyébbué paké ragi. Polé ri tungke' rupanna rotié, sibagiyang harusu'i riyakkasuwiyangeng lao ri Puwangnge, na iyaro bagiyanna imang iya malaéngngi darana olokolo'éro sibawa mabbolorengngi ri mézbaé untu' akkarobangeng pappasidamé. Harusu'i riyanré jukuna ri esso riyakkasuwiyangenna iyaro olokolo'é, muwi céddé dé'to nawedding ritaro narapi pappa bajana éléé. Rékko séddié tau tiwi akkarobangeng pappasidamé untu' rupaiwi jancinna, dé' naparellu riyanré maneng iyatoro essoé. Bagiyang lebbinna weddingngi riyanré pappa bajana. Rékko ri esso matellué engka mupa sésana, iyaro jukué harusu'i ritunu gangka cappu. Iyakiya rékko ri esso matellué iyaro jukué riyanré mupi, iyaro akkarobangngé dé'na matu naritarima sibawa dé' natiwi barakka ri tauwéro, mala mancaji harangngi. Tau iya manrééngngi pasalai sibawa harusu'i tanggungngi addimonrinna. Juku iya nakennaé agi-agi iya najisi'é harusu'i ritunu gangka cappu sibawa dé' nawedding riyanré. Juku akkarobangeng pappasidamé banna weddingngi nanré tau iya dé'é nanajisi'. Rékko nanréi tauwé iyaro jukué ri wettunna mattengngang najisi', dé'na nariyangga anggota umma'na Allataala. Rékko séddié tau manréi iyaro juku akkarobangngé ri wettu purana géssa anu iya najisi'é, muwi iya polé ri rupa tauwé muwi iya polé ri olokolo'é, dé'tona nariyangga anggota umma'na Allataala. Puwangnge mabbéréyangngi lao ri Musa iyaé sining peraturangngé untu' bangsa Israélié. Lunra sapingngé, bimbala' iyaré'ga bémbé'é dé' nawedding riyanré. Lunra olokolo iya maté riyalé, iyaré'ga nasaba riyunoi ri olokolo masekkangngé, dé' nawedding riyanré iyakiya wedding ripaké untu' apparellung laing. Tau iya manrééngngi lunra olokolo iya weddingngé riyakkasuwiyangeng untu' akkarobangeng inanré untu' Allataala, dé'na nariyangga anggota umma'na Allataala. Tau Israélié, kégi-kégi monro, dé' nawedding manré dara manu'-manu' iyaré'ga dara olokolo laingngé. Nigi-nigi majjalékkaiwi iyaro peraturangngé dé'na nariyangga anggotana umma'na Allataala. Puwangnge mpéréngngi Musa iyaé sining peraturangngé untu' bangsa Israélié. Nigi-nigi tiwii akkarobangeng pappasidamé, harusu'i napallaing sibagiyang untu' pakkasuwiyang ripallaing lao ri Puwangnge. Aléna muto harusu tiwii iyaro akkarobangeng inanré. Lunra' sibawa dadana iyaro olokolo'é harusu'i riyakkasuwiyangeng selaku pakkasuwiyang tanréyangeng lao ri Puwangnge. Harusu'i imangngé tunui lunra'na iyaro olokolo'é ri yasé'na mézbaé, iyakiya dadana iyanaritu bagiyanna sining imangngé. Poppang ataunna harusu'i riyabbéréyang selaku sumbangeng ripallaing lao ri imang iya makkasuwiyangengngéngngi dara sibawa lunra akkarobangeng pappasidaméro. Dadana sibawa poppang ataunna iyanaritu pabbéré ripallaing iya nalaé Puwangnge polé ri pakkasuwiyang tanréyanna bangsa Israélié sibawa riwéréngngi lao ri sining imangngé. Iyanaro subangenna bangsa Israélié untu' sining imangngé lettu mannennungeng. Polé ri inanré iya riyakkasuwiyangengngé lao ri Puwangnge, bagiyangngénnaro riwéréngngi lao ri Harun sibawa ana'-ana'na ri esso rilanti'na mancaji imang. Ri essoéro Puwangnge paréntangngi bangsa Israélié kuwammengngi napolé ri pakkasuwiyanna mennang, iyaro bagiyangngé untu' sining imangngé. Iyaro sining peraturangngé harusu'i naturusi bangsa Israélié lettu mannennungeng. Makkuwaniro sining peraturanna passalenna akkarobangeng ritunué, akkarobangeng inanré, akkarobangeng paddampengeng dosaé, akkarobangeng passullé arogingngé, akkarobangeng allantikengngé sibawa akkarobangeng pappasidamé. Puwangnge mabbéréyangngi sining paréntaéro lao ri Musa ri Bulu Sinai wettunna Nasuro bangsa Israélié makkasuwiyangengngi akkarobangngé ri padang kessi Sinai. Makkedai Puwangnge lao ri Musa, “Obbii Harun sibawa ana'-ana'na enrengngé tiwii pakéyang imangngé, minnya upacaraé, sikaju saping lai malolo untu' akkarobangeng paddampengeng dosa, duwakkaju bimbala lai sibawa sibaku roti iya dé'é raginna. Nainappa suroi sininna umma Israélié maddeppungeng ri yolona sumpang Kéma-Ku.” Napogau'ni aga iya napparéntangngé Puwangnge. Wettunna maddeppungeng manenni umma'é ri onrongngéro, makkedani Musa lao ri mennang, “Iya upogau'é makkekkuwangngé iyanaritu paréntana Puwangnge.” Nainappa nasuro Harun sibawa ana'-ana'na malluru liyolo sibawa bissaiwi aléna. Puranana napappakéi pakéyang imang ri Harun: kaméja, babbang sibawa jumba. Makkuwatoro éfod iya riyassiyorengngé ri babuwana sibawa passiyo polé ri kaing alusu'é. Nainappa napasang pattongko aroé ri Harun, na ri laleng pattongko aroéro namuputtama'i Urim sibawa Tumim. Nainappa nataro passapué ri ulunna Harun, na ri passapuéro riyattoddokengngi bélo-bélo ulawengngé, iya mancaji tanrangngé makkedaé mancajini Harun appunnangenna Puwangnge. Iya manennaro napogau'i Musa situru paréntana Puwangnge lao ri aléna. Nainappa mala Musa minnya upacara nanassapuwangngi ri Kémana Puwangnge enrengngé sininna passakke'na. Nanallalengiro iya manenna ripallaingngi untu' Puwangnge. Céddé polé ri minnya'éro riyakkeppikeng wékkapitu ri yasé'na mézbaé sibawa sininna passakke'na, makkuwatoro ri yasé'na kullangngé sibawa pabborina. Nanallalengiwi iya manenna ripallaingngi untu' Puwangnge. Purairo rilanti'ni Harun ri Musa sibawa tirikiwi céddé minnya upacara ri yasé'na ulunna. Nainappa nasuro ana'-ana'na Harun malluru liyolo. Ripasangini kaméja sibawa babbang. Nainappa napapasangi passappu ulunna mennang pada-pada napparéntangngé Puwangnge lao ri aléna. Puranana malani Musa sikaju saping lai malolo untu' akkarobangeng paddampengeng dosa. Harun sibawa ana'-ana'na palénne'i limanna mennang ri yasé'na ulunna iyaro olokolo'é. Nainappa nagéré Musa sibawa malai sibagiyang darana. Iyaro daraé nassapuwangngi sibawa jarinna ri tanru-tanru mézbaé, kuwammengngi iyaro mézbaé naripallaing untu' Allataala. Dara iya nasésaé riyabbolorengngi ri pabborina mézbaé. Makkuwaniro carana iyaro mézbaé ripépaccingi sibawa ripallaing untu' Puwangnge. Polé ri saping iya silalonaé rigéréro, nalai Musa sininna lunra'na iya dokoéngngi sininna lise babuwana, ginjalna sibawa lunra'na enrengngé bagiyang kaminang makessingngé polé ri atinna. Iya manennaro natunui ri yasé'na mézbaé. Iyakiya jukuna iyaro sapingngé, bingkulanna, lise babuwana nalebbié muttama'ni paruna, jaji sininna iyaro sapingngé sangadinna bagiyang-bagiyang iya puraé ripallaing ritunui ri saliwenna akkémangngé pada-pada iya napparéntangngé Puwangnge. Nainappa Musa mala bimbala lai untu' akkarobangeng ritunu, nainappa Harun sibawa ana'-ana'na palénne'i limanna ri tompo ulunna iyaro bimbala'é. Musa géréi iyaro bimbala'é sibawa mabbolorengngi darana ri iya eppa benrénna mézbaé. Nainappa nala Musa iyaro bimbala lai sikajuéppa untu' akkarobangeng allantikeng imang. Harun sibawa ana'-ana'na palénne'i limanna mennang ri tompo ulunna iyaro bimbala'é, nainappa nagéré Musa. Purairo nalani céddé dara olokolo'éro, nanasapuwangngi daucculing ataunna Harun, indo' jari lima ataunna, sibawa indo' ajé ataunna. Nainappa nasuro ana'-ana'na Harun maddeppé, nanasapui towi céddé dara ri daucculing ataunna mennang, ri indo' jari lima ataunna, sibawa indo' jari ajé ataunna mennang. Dara iya nasésaé nabbolorengngi ri iya eppa benrénna mézbaé. Nalani Musa lunra'na iyaro bimbala'é, ikko'na iya mallunra'é, sininna lunra iya dokoéngngi lise babuwana, bagiyang iya kaminang makessingngé polé ri atinna, ginjalna sibawa lunra'na enrengngé ajé ataunna. Polé ri baku iya mallise'é roti dé'é raginna iya puraé riyakkasuwiyangeng ri Puwangnge, malani Musa séddi roti maumpe iya riyébbué silaong minnya sibawa séddi roti manipi. Iyaro rotié ripaléssoi ri yasé'na lunra'é sibawa poppang ataunna bimbala'é. Nataro manengngi ri limanna Harun sibawa ana'-ana'na, nainappa nakkasuwiyangeng mennang selaku pakkasuwiyang tanréyangeng lao ri Puwangnge. Puranana nala Musa iyaro inanré polé ri mennang sibawa natunu ri yasé'na mézbaé, nasibawang akkarobangeng ritunué untu' akkarobangeng allantikeng. Baunna iyaro akkarobangeng inanré pésennangiwi atinna Puwangnge. Nainappa nala Musa dadana iyaro bimbala'é nanakkasuwiyangengngi selaku pakkasuwiyang tanréyangeng lao ri Puwangnge. Iyanaro bagiyanna Musa polé ri bimbala lai iya riyakkasuwiyangengngé untu' upacara allantikeng imangngé. Iya manenna napogau'i Musa pada-pada iya napparéntangngé Puwangnge lao ri aléna. Purairo malani Musa sibagiyang polé ri minnya upacaraé sibawa sibagiyang polé ri dara iya engkaé ri yasé'na mézbaé, nainappa nakkeppikeng lao ri Harun sibawa ana'-ana'na enrengngé lao ri pakéyanna mennang. Nasibawang caraéro, Musa pallaingngi mennang sibawa pakéyanna lao ri Puwangnge. Nainappa makkeda Musa lao ri Harun sibawa ana'-ana'na, “Nasui iyaro juku akkarobangngé ri yolona sumpang Kémana Puwangnge. Manuru paréntana Puwangnge, harusu'ko manréi kuwaro sibawa roti akkarobangeng allantikeng iya engkaé ri laleng bakué. Juku sibawa roti iya nasésaé harusu'i mutunu gangka cappu. Pitungngesso ittana dé' naweddikko salaiwi Kémana Puwangnge narapi pura upacara allantikengngé. Napparéntangngi Puwangnge kuwammengngi aga iya ripogau'é iyaé essoé ripogau' towi matteru. Nasibawang upacaraéro riyaddampengengngi dosa-dosamu. Pitungngesso ittana, esso wenni, harusu'ko monro ri yolona sumpang Kémaé untu' pogau'i aga iya napparéntangngé Puwangnge. Rékko dé' mupogau'i, matéko matu. Iyanaro napparéntang Puwangnge lao ri iyya.” Nanapogau' manenni Harun sibawa ana'-ana'na iya napparéntangngé Puwangnge naolai Musa. Siesso purana upacara allantikengngéro, ri esso maaruwaé, Musa mobbii Harun sibawa ana'-ana'na enrengngé sining pamimpinna bangsa Israélié. Nakkeda Musa lao ri Harun, “Alano sikaju saping lai malolo sibawa sikaju bimbala lai, iya duwa dé'gaga sala-salanna. Akkasuwiyangengngi iya duwa olokolo'éro lao ri Puwangnge, saping laié untu' akkarobangeng paddampengeng dosa, sibawa bimbala laié untu' akkarobangeng ritunu. Nainappa musuro bangsa Israélié makkasuwiyangeng sikaju bémbé lai untu' akkarobangeng paddampengeng dosa sibawa sikaju ana' saping enrengngé sikaju ana' bimbala iya tungke'-tungke'é makkéumuru sitaung sibawa dé'gaga sala-salanna untu' akkarobangeng ritunu. Suroi mennang makkasuwiyangeng towi sikaju saping lai sibawa sikaju bémbé lai untu' akkarobangeng pappasidamé. Iya manennaro harusu'i mennang nakkasuwiyangeng lao ri Puwangnge silaong akkarobangeng ripatalaé iya riwéréngngé minnya, nasaba ri essoéwé poléi Puwangnge lao ri mennang.” Sininna iya nappasengengngé Musa natiwini mennang ri yolona Kémaé, sibawa sininna umma'é maddeppungengngi kuwaro untu' massompa lao ri Puwangnge. Nainappa makkeda Musa, “ Puwangnge suroko pogau'i iyaé kuwammengngi mulléi mitai cahaya ahadérékenna Puwangnge.” Purananaro makkedani lao ri Harun, “Laono ri mézbaé sibawa passadiyai akkarobangeng paddampengeng dosaé sibawa akkarobangeng ritunué, kuwammengngi dosamu sibawa dosana umma'é naddampengengngi Puwangnge. Pogau'ni iyaro pada-pada iya napparéntangngé Puwangnge.” Nalaona Harun ri mézbaé sibawa géréi saping lai iya maéloé riyakkarobangeng untu' paddampengeng dosana muto. Ana'-ana'na Harun palettu'i darana iyaro olokolo'é lao ri Harun, sibawa majjajjekengngi jarinna ri laleng daraéro, enrengngé massapuwangngi ri tanru'-tanru'é ri iya eppa sunna mézbaéro. Purairo dara iya nasésaé riyabbolorengngi ri pabborina mézbaé. Lunra, ginjal sibawa bagiyang kaminang makessingngé polé ri olokolo'éro ritunui ri yasé'na mézbaé, pada-pada iya napparéntangngé Puwangnge lao ri Musa. Iyakiya juku sibawa bingkulanna iyaro olokolo'é ritunui ri saliwenna akkémangngé. Nainappa Harun maggéré olokolo untu' akkarobangeng ritunué untu' aléna muto. Ana'-ana'na Harun palettu'i darana iyaro olokolo'é lao ri aléna, nainappa nabboloreng ri iya eppa benrénna mézbaé. Purairo nabbéréyanni mennang lao ri aléna ulunna sibawa bagiyang-bagiyang laingngé polé ri olokolo'éro, nanatunui ri yasé'na mézbaé. Nainappa lise babuwana sibawa poppanna iyaro olokolo'é nabissai nanatunui silaong akkarobang ritunué ri yasé'na mézbaé. Purairo makkasuwiyanni bémbé untu' paddampengeng dosana umma'é. Iyaro bémbé'é nagéréi sibawa nakkasuwiyangengngi pada-pada akkarobangeng untu' paddampengeng dosana muto. Nainappa nala towi olokolo untu' akkarobangeng ritunué, sibawa nakkasuwiyangengngi situru peraturangngé. Purairo nakkasuwiyangenni akkarobangeng inanré; malai labbu sikemmo, sibawa natunui ri yasé'na mézbaé. Iyanaro pattambana akkarobangeng ritunu esso-essoé. Nainappa géré towi sikaju saping lai sibawa sikaju bimbala lai untu' akkarobangeng pappasidaména umma'é. Ana'-ana'na Harun palettu'i iyaro dara olokolo'é lao ri aléna, nainappa nabboloreng ri iya eppa benrénna mézbaé. Bagiyang iya engkaé lunra'na polé ri sapingngé sibawa bimbala'éro napalénne'i mennang ri yasé'na dadana iya duwa olokolo'éro, nainappa natunu Harun ri yasé'na mézbaé. Dadana sibawa poppang ataunna iyaro olokolo riyakkasuwiyangengngi selaku pakkasuwiyang tanréyangeng lao ri Puwangnge. Iyanaro bagiyanna sining imangngé, pada-pada iya napparéntangngé Musa. Puranana nakkasuwiyangeng sininna akkarobangngéro, nakkani limanna Harun ri yasé'na umma Israélié sibawa barakkakiwi mennang, nainappa nonno. Nainappa Musa sibawa Harun muttama ri laleng Kémana Puwangnge. Purairo massuni mennang sibawa barakkakiwi umma'é. Nanaitani sininna umma Israélié cahaya ahadérékenna Puwangnge. Tennasenna-sennana napanonnoi Puwangnge api iya tunuéngngi gangka cappu akkarobangeng ritunué sibawa sining bagiyanna iya mallunra'é ri yasé'na mézbaé, wettunna naita umma Israélié, gora-gorani mennang nainappa suju' massompa. Riséuwaé esso Nadab sibawa Abihu, ana'-ana'na Harun, nalai onrong apinna tungke'-tungke' nanalisekiwi sibawa bara. Nainappa nataroi dupa ri laleng apiéro namakkasuwiyang lao ri Puwangnge. Iyakiya iyaro apié dé' nahallala nasaba dé' narisuro mennang makkasuwiyang ri Puwangnge. Napapoléna Puwangnge api iya tunuéngngi mennang angkanna maté ri Kémana Puwangnge. Namakkeda Musa lao ri Harun, “Iyanaro nakkattai Puwangnge wettunna makkeda, ‘Sininna iya tumaningiyékka harusu'i napakalebbi apaccingek-Ku. Maéloka pannessai arajak-Ku lao ri sininna bangsaé!’ ” Iyakiya mammekko bawammi Harun. Nainappa Musa mobbii Misaél sibawa Elsafan, ana'-ana'na Uziél, amuréna Harun. Adanna lao ri mennang, “Laono mai, alai ujuna sapposisemmu polé ri Kémana Puwangnge sibawa palénne'i ri saliweng akkémangngé.” Poléni mennang sibawa tiwii sining uju iya mappakéyangngé muparo massu ri akkémangngé, pada-pada iya napparéntangngé Musa. Nainappa makkeda Musa lao ri Harun sibawa lao ri ana'-ana'na iya laingngé, iyanaritu Eléazar sibawa Itamar, “Aja' muleppessangngi makota gemme'mu, sibawa aja' musapé'i pakéyammu untu' mappaitangngi makkedaé messéko sibawa mabbaratako. Rékko kédo makkuwakoro, matéko matu, nasininna umma Israélié riyacairiwi matu ri Puwangnge. Iyakiya sininna umma Israélié iya laingngé weddingngi mabbarata untu' iya duwa tau maté nasaba api polé ri Puwangnge. Aja' musalaiwi Kémana Puwangnge kuwammengngi aja' mumaté, saba' purano rilanti sibawa minnya upacara untu' tumaningiwi Puwangnge.” Napogau'ni mennang pada-pada iya napowadaé Musa. Makkedai Puwangnge lao ri Harun, “Rékko purako ménung uwai anggoro iyaré'ga énungeng maseri, iko sibawa ana'-ana'mu dé' nawedding muttama ri laleng Kéma-Ku. Rékko muwajjalékkaiwi iyaro peraturangngé, matéko matu. Iyaro paréntaé harusu'i naturusi sininna wija-wijammu. Harusu'ko mulléi pasilaingengngi iya ripallaingngé untu' Allataala sibawa iya dé'é naripallaing ri yelle'na, iya najisi'é sibawa iya dé'é nanajisi'. Sininna hukkung iya uwéréngngékko naolaé Musa, harusu'ko mulléi mappagguruwangngi lao ri bangsa Israélié.” Makkedani Musa lao ri Harun sibawa lao ri iya duwa ana'na, Eléazar sibawa Itamar, “Alano gandong iya nasésaé polé ri inanré iya riyakkasuwiyangengngé lao ri Puwangnge. Polé ri labbu'éro ébbuno roti iya dé'é napaké ragi, nainappa muwanré ri seddéna mézbaé, nasaba iyaro akkarobangngé mapaccing senna'i. Iyaro rotié harusu'i riyanré ri onrong iya mapaccingngé, saba' polé ri inanré iya riyakkasuwiyangengngé lao ri Puwangnge, iyaro rotié mancajiwi tawamu sibawa ana'-ana'mu iya worowané. Iyanaro paréntana Puwangnge lao ri iyya. Iyakiya iko sibawa ana'-ana'mu worowané sibawa makkunraié weddingngi manréi dadana pakkasuwiyang tanréyangngé sibawa poppanna pakkasuwiyang ripallaingngé. Iyanaro tawana sining imangngé polé ri akkarobangeng pappasidaména bangsa Israélié. Weddikko manréi dé' masala onrong iya dé'é nanajisi'. Pakkasuwiyang iya ripallaingngé sibawa dadana pakkasuwiyang tanréyangngéro harusu'i ritiwi silaong lunra'na untu' akkarobangeng ritunué, selaku pakkasuwiyang untu' Puwangnge. Iyaro barab-barangngé mancajiwi appunnangemmu sibawa ana'-ana'mu lettu mannennungeng, pada-pada iya napparéntangngé Puwangnge.” Nainappa makkutana Musa passalenna bémbé untu' akkarobangeng paddampengeng dosaé. Ripaissengini makkedaé iyaro bémbé'é purani ritunu. Iyaro gau'é naébbui Musa macai lao ri Eléazar sibawa Itamar, nanakkedana lao ri mennang, “Magi iyaro akkarobangeng paddampengeng dosaé dé' muwanréi ri onrong iya mapaccingngé? Iyaro akkarobangngé mapaccing senna; Puwangnge mabbéréyangngi lao ri iko, kuwammengngi nariyaddampengeng dosana umma Israélié. Iyaro dara bémbé'é dé' naritiwi ri Kémana Puwangnge, jaji harusu'i iyaro akkarobangngé muwanréi kuwaro pada-pada iya uwapparéntangngé.” Nappébali Harun, “Mémeng iyaé essoé umma Israélié purani makkasuwiyangeng akkarobang paddampeng dosa sibawa akkarobang ritunué lao ri Puwangnge. Namuni makkuwaro, iyaé abalaé nakennana'. Ebara'na iyaé essoé uwanré towi iyaro akkarobang paddampengeng dosaé, masenna'ga matu Puwangnge?” Masennanni Musa sibawa pappébaliéro. Puwangnge mabbéréyangngi lao ri Musa sibawa Harun iyaé sining peraturangngé Aja' muwanré bawi. Iyaro olokolo'é harangngi, nasaba namuni mapuwé'i kanukunna, dé' natuli malléro. Dé' nawedding riyanré jukuna sibawa muwi bakkéna dé'to nawedding rigéssa nasaba iyaro olokolo'é harangngi. Weddikko manréi sininna rupanna balé iya masséréé sibawa massessi'é. Sininna rupanna béré-béré iya makkalolo'é iyanaritu harangngi, sangadinna iya naullé luppe. Jaji incalé, jangkaré'é, incalé manyilaé wedding riyanré. Iyakiya sininna rupanna béré-béré laingngé iya makképannié sibawa iyato makkalolo'é iyanaritu harangngi. Nigi-nigi géssai iyaro olokolo'é iyaré'ga bakkéna mancaji najisi'i narapi labu essoé. Rékko iyaro bakké olokolo'é sempé'i riséddié barang, iyaro barangngé mancaji najisi'i. Iyaro gau'é kajajiyangngi untu' sininna rupanna barang polé ri ajué, kaingngé, bingkulangngé, iyaré'ga kaing karungngé, dé' namancaji soal untu' aga iyaro barangngé ripaké. Iyaro barangngé harusu'i riremmé ri uwai, iyakiya tette'i najisi' narapi labu essoé. Rékko iyaro bakké sempé'i ri laleng oring tanaé, sininna iya engkaé ri lalenna oringngéro mancaji najisi'i, sibawa iyaro oringngé harusu'i rireppa. Anrékanré iya nakennaé uwai polé ri oringngéro mancaji najisi'i, sibawa énungeng iya engkaé ri laleng oringngéro mancaji najisi' towi. Agi-agi iya nageppaé iyaro bakké mancaji najisi'i. Dapo iyaré'ga onrong attunung polé ri tanaé iya nakennaé bakkéro harusu'i rireppa nasaba najisi'i. Sangadinna mata uwai iyaré'ga bujungngé, sininna iya laingngé mancaji najisi'i rékko nakennai bakké. Rékko iyaro bakké sempé'i ri yasé'na biné iya maéloé riyampo, iyaro biné tette'i mapaccing. Iyakiya rékko iyaro biné mattengngangngi riremmé ri laleng uwai nainappa nasempéki iyaro bakké, iyaro biné mancaji najisi'i. Nigi-nigi géssai bakké olokolo iya hallala'é mancaji najisi'i narapi labu essoé. Tau iya tiwiéngngi iyaré'ga manréi iyaro bakké harusu'i nasessa pakéyanna, iyakiya tette'i najisi' narapi labu essoé. Aja' mupanajisi'i alému sibawa manréi olokolo makkuwaéro rupanna. Iyya'na Puwang Allataalamu, rimakkuwannanaro jagako kuwammengngi tette'ko mapaccing, nasaba Iyya mapaccing. Iyya'na Puwang iya tiwiékko massu polé ri Maséré, kuwammengngi weddikka mancaji Allataalamu. Sitinajako mapaccing, nasaba mapaccikka. Iyanaro peraturanna passalenna olokolo'é, muttama'ni manu'-manu'é, olokolo iya tuwoé ri uwai sibawa iya mpekke'é ri tompo'na tanaé. Harusu'ko mulléi pasilaingengngi iya mapaccingngi sibawa iya najisi'é, ri yelle'na olokolo iya weddingngé riyanré sibawa olokolo iya dé'é nawedding riyanré. Puwangnge mabbéréyangngi lao ri Musa sining peraturangngéwé untu' bangsa Israélié. Rékko séddié makkunrai jajiyang ana' worowané, pitungngesso ittana najisi' iyaro makkunraié, pada-pada muto wettunna maddara. Ri esso maaruwaé harusu'i risunna ana'na. Labe'nana telluppulo essona najisi' mupi iyaro makkunraié nasaba maddarai. Dé' nawedding géssai barab-barang iya ripaké untu' massompa sibawa dé' nawedding muttamakiwi Kémana Puwangnge narapi wettu pappépaccinna genne'ni. Rékko séddié makkunrai jajiyang ana' makkunrai, seppulo eppa essona iyaro makkunraié najisi', pada-pada muto ri wettunna maddara. Purairo enneng pulona enneng essosi iyaro makkunraié najisi'i nasaba maddarai. Puranana wettu pappépaccinna, muwi nasaba purai jajiyang ana' worowané iyaré'ga ana' makkunrai, iyaro makkunraié harusu'i tiwii pakkasuwiyang lao ri imangngé ri yolona sumpang Kémana Puwangnge. Iyaro pakkasuwiyangngé iyanaritu sikaju ana' bimbala iya makkéumuru sitaungngé untu' akkarobang ritunu, sibawa sikaju jangang-jangang lolo untu' akkarobang paddampengeng dosa. Imangngé harusu mabéréyangngi pakkasuwiyanna lao ri Puwangnge sibawa pogau'i upacaraé untu' leddai anajisikenna iyaro makkunraié, angkanna mancaji mapaccing. Jaji iyanaro harusu napogau' séddié makkunrai rékko purai mémmana'. Rékko iyaro makkunraié dé' naulléi passadiya sikaju ana' bimbala, harusu'i tiwi duwak-kaju jangang-jangang lolo iyaré'ga bekku lolo: sikaju untu' akkarobang ritunu sibawa sikaju untu' akkarobang paddampengeng dosa. Harusu'i imangngé napogau' upacaraé untu' leddai anajisikenna iyaro makkunraié, namancaji mapaccing. Puwangnge mpéréngngi Musa sibawa Harun sining peraturangngéwé: Rékko séddié tau mappunnai betti-betti, iyaré'ga lettang iyaré'ga betti-betti ri olina iya weddingngé mancaji lasa oli iya mabbahayaé, harusu'i ritiwi ri imang wija-wijanna Harun. Harusu'i imangngé paréssai bagiyang iya mapeddié ri olina tauwéro. Rékko bulu-bulu iya engkaé ri bagiyangngéro maputéi, sibawa bagiyang iya mapeddié paitai lebbi marilaleng naiya olié ri seddéna, iyaro tauwé nakennai lasa oli iya mabbahayaé. Harusu'i imangngé pannessai iyaro tauwé najisi'. Iyakiya rékko bagiyang iya mapeddié maputéi sibawa dé' nalebbi marilaleng polé ri olié ri seddéna, sibawa bulu-bulué ri bagiyangngéro dé'to namancaji maputé, iyaro tauwé harusu'i ripassala pitungngesso ittana. Ri esso iya mapitué, harusu'i imangngé paréssai paimeng. Narékko manuru pallolongenna iyaro peddié pada-pada mupi keadaanna sibawa dé' natattamba, iyaro tauwé harusu'i ripassala pitungngessosi ittana. Ri esso mapitué harusu'i imangngé paréssai paimeng, narékko bagiyang iya mapeddié peddani sibawa dé'na natattamba, harusu'i imangngé pannessai iyaro tauwé mapaccing. Iyaro tenniya lasa oli iya mabbahayaé. Iyaro tauwé harusu'i sessa'i pakéyanna namancaji mapaccing. Iyakiya rékko ripannessani mapaccing ri imangngé, lasana iyaro tauwé tattambai, harusu'i lisu mangolo ri imangngé. Harusu'i imangngé paréssai paimeng, narékko mémeng tattambai lasana, iyaro tauwé harusu'i ripannessa najisi'; nakennai lasa oli iya mabbahayaé. Séddié tau iya nakennaé lasa oli iya mabbahayaé harusu'i ritiwi ri imangngé. Rékko manuru pamaréssanna imangngé ri olina tauwéro engka boro maputé iya mannanaé sibawa bulu-bulunna ri bagiyangngéro maputéi, iyaro tauwé nakennai lasa oli iya mabbahayaé. Harusu'i imangngé pannessai tauwéro najisi'. Dé'é naparellu ripassala, nasaba manessani najisi'i. Rékko naitai imangngé makkedaé iyaro betti-betti maputé massanrani polé ri ulué lettu ri ajé, sibawa manuru pamaréssanna iyaro lasaé massanrani risininna watakkaléna sibawa maputé manenni olina, iyaro tauwé ripannessani mapaccing. Iyakiya rékko mompoi boro mannanaé, harusu'i imangngé paréssai paimeng. Rékko mémeng iyaro boro mannana, iyaro tauwé harusu'i ripannessa najisi', nasaba nakennai lasa oli iya mabbahayaé. Iyakiya rékko iyaro boro mannanaé sauwi sibawa maputé paimeng, iyaro tauwé harusu'i mangolo ri imangngé untu' riparéssa paimeng. Rékko iyaro boro mannanaé mémeng maputéni, imangngé pannessai iyaro tauwé mapaccing. Rékko séddié tau mappunnaiwi lettang iya sauwénna, iyakiya ri baténa mompoi boro maputé iyaré'ga mompoi betti-betti maputé iya macella-cella'é, iyaro tauwé harusu'i mangolo ri imangngé untu' riparéssa. Rékko iyaro betti-betti'é paitai lebbi marilaleng naiya olié ri seddéna sibawa bulu-bulué ri bagiyangngéro maputé toni, harusu'i imangngé pannessai iyaro tauwé najisi'. Iyaro lettangngé pammulannai lasa oli iya mabbahayaé. Iyakiya rékko manuru' pamaréssanna imangngé bulu-bulué ri bagiyangngéro dé' namaputé, sibawa iyaro bagiyangngé dé' nalebbi marilaleng naiya olié ri seddéna, banna lebbi maloloi tappana, iyaro tauwé harusu'i ripassala pitungngesso ittana. Rékko betti-betti maputéro tattale'i, harusu'i imangngé pannessai tauwéro najisi' nasaba nakennai lasa oli iya mabbahayaé. Iyakiya rékko betti-betti maputéro dé' natappinra sibawa dé'to natattale, iyaro banna baté lettang, jaji iyaro tauwé ripannessai mapaccing. Rékko séddié tau nakennai lo anré api, nainappa iyaro lo ri olié maputéi iyaré'ga maputéi macella-cella, harusu'i imangngé paréssai. Rékko bulu-bulué ri bagiyangngéro maputéi, sibawa lona lebbi marilalengngi naiya olié ri seddéna, naléttéini lasa oli iya mabbahayaé iyaro lo anré apié, sibawa harusu'i imangngé pannessai tauwéro najisi'. Iyakiya rékko bulu-bulué ri onrongngéro dé' namaputé sibawa iyaro bagiyangngé dé' nalebbi marilaleng naiya olié ri seddéna, banna lebbi maloloi tappana, iyaro tauwé harusu'i ripassala pitungngesso ittana. Ri esso mapitué harusu'i imangngé paréssai paimeng. Rékko betti-betti maputéro tattale'i, mala iyaro tauwé nakennai lasa oli iya mabbahayaé, sibawa harusu'i ripannessa najisi'i. Iyakiya rékko iyaro betti-betti maputé dé' natappinra sibawa dé'to natattale, banna lebbi maputéi, iyaro tenniya lasa oli iya mabbahayaé. Harusu'i imangngé pannessai iyaro tauwé mapaccing, saba' iyaro paitaé maputé banna baté lo anré api. Rékko séddié worowané iyaré'ga makkunrai nakennai lasa oli ri ulunna iyaré'ga ri sadanna, harusu'i riparéssa ri imangngé. Rékko bagiyang iya mapeddiéro paitai lebbi marilaleng naiya olié ri seddena, enrengngé gemme iyaré'ga janggo ri bagiyangngéro mancaji maridi-ridiwi nainappa maddunu, iyaro tauwé nakennai lasa oli iya mabbahayaé, sibawa harusu'i ripannessa najisi'. Rékko manuru pamaréssanna imangngé bagiyang iya mapeddié dé' napaita lebbi marilaleng naiya olié ri seddéna, iyakiya dé'gaga gemme iyaré'ga janggo iya madisingngé ri bagiyangngéro, iyaro tauwé harusu'i ripassala pitungngesso ittana. Ri esso iya mapitué, harusu'i imangngé paréssai paimeng bagiyang iya mapeddié, narékko iyaro peddié dé' natattale enrengngé dé' gaga gemme iyaré'ga janggo iya maridi-ridié ri bagiyangngéro, sibawa paitai dé' nalebbi marilaleng naiya olié ri seddéna, iyaro tauwé harusu'i maccukkuru gemme iyaré'ga janggo ri mattulilinna iya mapeddié. Nainappa harusu'i ripassala paimeng pitungngesso ittana. Ri esso iya mapitué, harusu'i imangngé paréssai paimeng. Rékko dé' natattale peddina, sibawa iyaro bagiyangngé paitai dé' nalebbi marilaleng naiya olié ri seddéna, iyaro tauwé ripannessai mapaccing sibawa harusu'i nasessa pakéyanna. Iyakiya rékko purani ripannessa mapaccing lasana iya tattale'é, harusu'i imangngé paréssai paimeng. Rékko iyaro lasaé mémeng tattale'i, dé'na naparelluna imangngé paréssai aga gemme iyaré'ga janggo'na iyaro tauwé maridiwi, saba' manessani makkedaé najisi'i. Iyakiya rékko manuru pallolongenna imangngé dé' natattale lasana, sibawa tuwoi gemme'é nenniya janggo iya madisingngé ri onrongngéro, iyaro lasaé majjappani, sibawa harusu'i imangngé pannessai mapaccing. Rékko séddié worowané iyaré'ga makkunrai mappunnai betti-betti maputé ri olina, harusu'i imangngé paréssai iyaro tauwé. Rékko betti-betti maputéro paitai malucca maputé, akkami bawang kennai, naripannessai mapaccing. Iyakiya rékko mompoi boro maputé macella-cella'é ri onrong iya bota'é, nakennani lasa oli iya mabbahayaé. Harusu'i imangngé paréssai iyaro tauwé, narékko mémeng engka boro maputé macella-cella, harusu'i imangngé pannessai najisi' nasaba nakennai lasa oli iya mabbahayaé ri ulunna. Séddié tau iya nakennaé lasa oli iya mabbahayaé, harusu'i paké pakéyang iya sapé-sapé'é sibawa leppessangngi gemme'na makota. Harusu'i natongko rupanna bagiyang yawaé sibawa gora-gora “Najisi'! Najisi'!” Ri wettu nakennana iyaro lasaé najisi'i sibawa harusu'i monro ri saliwenna akkémangngé, mabéla polé risining tau laingngé. Rékko engka atabukeng ri pakéyangngé iyaré'ga kaing wol-é iyaré'ga lénangngé, iyaré'ga bingkulangngé iyaré'ga agi-agi iya riyébbué polé ri bingkulangngé, natappana iyaro matabu'é manyila-nyilai iyaré'ga macella'i, iyaro atabukengngé iyanaritu iya tattale'é, naharusu'i riyappaitang ri imangngé. Harusu'i imangngé paréssai iyaro barangngé, nainappa napassala pitungngesso ittana. Ri esso mapitué harusu'i naparéssa paimeng, narékko iyaro atabukengngé mémeng tattale'i, iyaro barab-barangngé najisi'i. Harusu'i natunu imangngé iyaro barab-barangngé, nasaba iyaro atabukengngé iyanaritu iya tattale'é, jaji harusu'i ripaccappu sibawa api. Iyakiya rékko manuru pamaréssanna imangngé iyaro atabukengngé dé' natattale ri barab-barangngéro, nasuroni kuwammengngi iyaro barab-barangngé ribissai sibawa ripassalai pitungngessosi. Nainappa naparéssa paimeng imangngé. Rékko iyaro atabukengngé dé' natattale, iyakiya tappana tette'i pada, iyaro barab-barangngé najisi' mupi, harusu'i ritunu, namuni iyaro atabukengngé banna engkai ri bagiyang riyolo iyaré'ga ri bagiyang monrinna. Iyakiya rékko manuru pamaréssanna imangngé iyaro atabukengngé mancaji mapeddani, bagiyang iya matabu'é polé ri kaingngé iyaré'ga bingkulangngéro harusu'i risapé. Rékko mompoi paimeng, iyaro atabukengngé tattale'i, harusu'i natunu punnana barab-barangngéro. Rékko purani ribissai nateddéng tappana iyaro atabukengngé ri barangngé, iyaro barangngé harusu'i ribissai paimeng, nainappa riyangga mapaccing. Makkuwaniro peraturanna passalenna atabukeng iya engkaé ri pakéyangngé iyaré'ga kaing polé ri lénangngé iyaré'ga wol-é, iyaré'ga ri agi-agi iya riyebbué polé ri bingkulangngé. Puwangnge mpéréngngi Musa iyaé sining peraturangngé passalenna upacara pappépaccingngé majjappanana polé ri lasa oli iya mabbahayaé. Ri esso maélona ripannessa iyaro tauwé mapaccing, harusu'i ritiwi lao ri imangngé, na imangngé tiwii ri saliwenna akkémangngé. Rékko manuru pamaréssanna majjappani iyaro tauwé, imangngé suroi tiwi duwakkaju manu'-manu' tuwo iya dé'é naharang, silaong silétta aju camara, silaci tulu cella sibawa sitakké hisop. Manu'-manu' iya sikajué harusu'i rigéré ri yasé'na oring tana iya mallise'é uwai mapaccing polé ri mata uwai. Manu'-manu' iya sikajuéssi sibawa aju camaraé, tulu cella sibawa hisop sitakké harusu'i ritellengeng ri laleng dara manu'-manu' iya puraé rigéré. Imangngé makkeppikengngi wékkapitu iyaro dara manu'-manu'é lao ri tau iya majjappaénna, sibawa pannessai mapaccing. Nainappa manu'-manu' iya tuwoé mupa harusu'i rileppessang ri padangngé. Nainappa iyaro tauwé harusu'i nasessa pakéyanna, nacukkuru sininna gemme'na, sibawa cemmé. Namapaccinna, sibawa weddinni muttama ri laleng akkémangngé, iyakiya pitungngessopi ittana dé' nawedding muttama ri laleng kémana muto. Ri esso mapitué harusu'i nacukkuru maneng gemme'na, janggo'nato, enninna nenniya sininna bulu-bulu iya engkaé ri watakkaléna. Nainappa harusu'i nasessa pakéyanna sibawa cemmé. Purapiro nainappa mapaccing. Ri esso iya maaruwaé harusu'i iyaro tauwé tiwi duwa ana' bimbala' lai sibawa sikaju ana' bimbala' komba iya makkéumuru'é sitaung, iya dé'é gaga sala-salanna. Ri lainnaʻro telluto kilo labbu iya puraé ricampuru sibawa minnya zaitun nenniya tawatellubbang minnya zaitun. Nainappa imangngé harusu tiwii silaong pakkasuwiyannaro lao ri yolona sumpang Kémana Puwangnge. Harusu'i imangngé mala ana' bimbala' lai iya sikajué sibawa tawatellubbangngé minnya zaitun untu' akkarobangeng passullé aroging, sibawa makkasuwiyangengngi selaku pakkasuwiyang tanréyangeng lao ri Puwangnge. Iyaro ana' bimbala'é harusu'i rigéré ri onrong iya ripallaingngé untu' maggéré olokolo untu' akkarobangeng paddampeng dosaé sibawa akkarobangeng ritunué. Iyaro bimbala'é harusu'i rigéré kuwaro nasaba akkarobangeng passullé arogingngé sibawa akkarobangeng paddampengeng dosaé iyanaritu mapaccing senna'i sibawa mancajiwi bagiyanna imangngé. Harusu'i imangngé malai céddé dara ana' bimbala'é nainappa nassapuwang ri daucculing ataunna, ri indo' jari lima ataunna sibawa indo' jari ajé ataunna tau maéloé ripannessa mapaccing. Nainappa imangngé mala céddé minnya zaitun nanatiri'i ri pale lima abéyona muto. Puranana natellengeng jari lima ataunna ri laleng minnya'é, nakkeppikenni wékkapitu ri laleng Kémana Puwangnge. Nainappa minnya iya engkaé céddé ri limanna harusu'i nassapuwang ri onrong-ngonrong iya puraé nasapui dara, iyanaritu ri daucculing atau, ri indo' jari lima ataué, sibawa indo' ajé ataunna tau iya maéloé ripannessa mapaccing. Minnya nasésaé harusu'i riyabboloreng ri tompo ulunna tauwéro ri yolona Puwangnge. Nainappa harusu'i imangngé makkasuwiyang akkarobangeng paddampengeng dosa kuwammengngi namapaccing tau iya najisi'éro. Purairo harusu'i géré olokolo untu' akkarobangeng ritunu nanakkasuwiyangengngi silaong akkarobangeng ripatalaé ri yasé'na mézbaé. Nanallalengiwiro napakangka imangngé upacara pappépaccing untu' tauwéro, namancaji mapaccing. Rékko kasiyasiwi iyaro tauwé, sibawa dé' namampu, untu' akkarobang passullé arogingngé weddingngi tiwi sikaju ana' bimbala lai bawang untu' pakkasuwiyang tanréyangeng lao ri Puwangnge. Séddi kilo labbu ricampuru sibawa minnya zaitun, sibawa untu' akkarobangeng ripatalaé, tawatellubbang minnya zaitun. Harusu towi tiwi duwakkaju jangang-jangang lolo iyaré'ga bekku malolo: sikaju untu' akkarobangeng paddampengeng dosa, sibawa sikaju untu' akkarobangeng ritunu. Sininna pakkasuwiyangngéro harusu'i natiwi lao ri imangngé ri yolona tange Kémana Puwangnge ri esso maaruwana upacara pappépaccing aléna. Imangngé malai iyaro ana' bimbala'é sibawa minnya zaitungngé nanakkasuwiyangengngi selaku pakkasuwiyang tanréyangeng lao ri Puwangnge, na iyaro untu' bagiyanna imangngé. Nainappa imangngé harusu géréi iyaro ana' bimbala'é sibawa massapuwangngi céddé darana ri daucculing ataunna, indo' jari lima ataunna sibawa indo' jari ajé ataunna tau iya maéloé ripannessa mapaccing. Harusu'i imangngé tiri céddé minnya ri pale lima abéyona nanakkeppikengngi iyaro minnya'é wekkapitu ri laleng Kémana Puwangnge sibawa jari lima ataunna. Nainappa minnya iya engkaé céddé ri limanna harusu'i nasapuwang onrong-ngonrong iya puraé nasapui dara, iyanaritu daucculing ataunna, indo' jari lima ataunna sibawa indo' jari ajé ataunna tau iya maéloé ripannessa mapaccing. Minnya nasésaé harusu'i riyabboloreng ri tompo ulunna tauwéro untu' upacara pappépaccing aléna ri yolona Puwangnge. Nainappa harusu'i imangngé makkasuwiyangeng sikaju jangang-jangang lolo iyaré'ga bekku lolo untu' akkarobangeng paddampengeng dosa, na sikaju laingngé untu' akkarobangeng ritunu silaong akkarobangeng ripatalana. Nanallalengiwiro napakangkani imangngé upacara pappépaccinna tauwéro ri yolona Puwangnge. Iyanaro peraturanna passalenna upacara pappépaccingngé rékko purai nakenna lasa oli iya mabbahayaé tau iya dé'é namampu. Puwangnge mpéréngngi Musa sibawa Harun sining peraturanna passalenna bola iya nakennaé atabukeng iya tattale'é. Iyaé sining peraturangngé ripatakkennai muttama'nana bangsa Israélié ri Kanaan, wanuwa iya nabbéréyangngé Puwangnge lao ri mennang. Nigi-nigi runtu atabukengngé, ri bolana, harusu'i nalaporo iyaro gau'é lao ri imangngé. Ri wettu dé'napa nalao imangngé paréssai iyaro atabukengngé, harusu'i napparéntang kuwammengngi sininna séuwa-séuwaé ripassui polé ri bolaéro. Rékko dé', agi-agi iya engkaé ri lalempolaéro mancaji najisi'i. Nainappa harusu'i imangngé polé untu' paréssai iyaro atabukengngé. Rékko engka betti-betti manyila-nyila iyaré'ga macella-cella iya paitaé pada-pada iya mattemme'é ri laleng témbo'é, harusu'i imangngé salaiwi iyaro bolaé sibawa leppessangngi taccala pitungngesso ittana. Ri esso iya mapitué harusu'i polé sibawa paréssai paimeng. Rékko tattale'i iyaro atabukengngé, Nainappa batu-batu iya ripassuéro harusu'i risulléi sibawa batu-batu iya barué. Sininna témbo'na bolaéro harusu'i rilapiri sibawa paléstérang iya barué. Rékko mompoi paimeng iyaro atabukengngé, padahal iyaro batu-batunna bolaé purani risulléi sibawa témbo'na purani rikari' sibawa ripaléstér paimeng, harusu'i imangngé polé sibawa paréssai iyaro bolaé paimeng. Rékko iyaro atabukengngé mémeng tattale'i, iyaro bolaé najisi'i sibawa harusu'i ribongkara'. Batu-batunna, sining ajunna sibawa sininna paléstéranna harusu'i ritiwi ri onrong iya najisi'é ri saliweng kota. Ri yolonaro, nigi-nigi muttama ri bolaéro mancaji najisi'i narapi labu essoé. Nigi-nigi matinro iyaré'ga manré ri bolaéro harusu'i nasessa pakéyanna. Iyakiya rékko poléi imangngé sibawa manuru pamaréssanna dé'na naompona atabukengngé puranana ripaléstér paimeng iyaro bolaé, harusu'i napannessa iyaro bolaé mapaccing, nasaba teddéng manenni atabukenna. Untu' apaccingenna bolaé, harusu'i imangngé mala duwakkaju manu'-manu', aju camara, tulu cella sibawa sitakké hisop. Manu'-manu' iya sikajué harusu'i rigéré ri yasé'na oring iya mallise'é uwai makessing polé ri mata uwai. Nainappa aju camaraé, tulu cella'é, hisop-é sibawa manu'-manu' tuwoé mupa harusu'i ritellengeng ri laleng dara manu'-manu' iya pura géréé sibawa ri laleng uwai makessingngé. Puranana, iyaro bolaé harusu'i riyeppiki wékkapitu. Iyanaro sining peraturanna lasa oli mabbahayaé, Iyaro sining peraturangngé akkégunanna untu' pattentui aga iyaro séuwaé mapaccing iyaré'ga najisi'i. Puwangnge mpéréngngi Musa sibawa Harun iyaé sining peraturangngé untu' bangsa Israélié. Rékko séddié worowané passui manning nasaba malasa katawangngi, iyaro manningngé najisi'i, muwi iya massué iyaré'ga iya tattahangngé. Onrong iya natudangiyé iyaré'ga natinroiyé iyaro tauwé mancaji najisi'i. Lapi-lapi iyaré'ga agi-agi iya natudangiyé tau iya passué manning mancaji najisi'i. Nigi-nigi géssai séuwaé iya puraé natudangi tauwéro mancaji najisi'i narapi labu essoé. Tungke' tau iya makkaéngngi iyaro barangngé harusu'i nasessa pakéyanna sibawa cemmé, sibawa najisi'i narapi labu essoé. Rékko tau iya passué manning dé' nabissaiwi limanna lebbi riyolo nanagéssai tau laingngé, tau iya nagéssaéro harusu'i nasessa pakéyanna enrengngé cemmé, sibawa mancaji najisi'i narapi labu essoé. Oring tana iya nagéssaé iyaro tauwé harusu'i rireppa enrengngé pakkakkasa iya nakkatenningngé harusu'i ribissai. Rékko majjappai iyaro tauwé harusu'i mattajeng pitungngesso. Purairo harusu'i sessa'i pakéyanna sibawa cemmé ri mata uwai, namapaccinna. Ri esso iya maaruwaé harusu'i tiwii duwakkaju jangang-jangang lolo iyaré'ga bekku lolo ri yolona sumpanna Kémana Puwangnge nainappa nabbéréyang lao ri imangngé. Harusu'i nakkasuwiyangeng imangngé manu'-manu' iya sikajué untu' akkarobangeng paddampengeng dosa, sibawa iya sikajuéssi untu' akkarobangeng ritunu. Nanallalengiro pakangkani imangngé upacara pappépaccinna iyaro tauwé ri yolona Puwangnge. Rékko séddié worowané passu manning, harusu'i cemmé iyakiya tette'i najisi' narapi labu essoé. Agi-agi polé ri kaingngé iyaré'ga bingkulangngé iya nakennaé manningngéro harusu'i ribissai, iyaro aga-agaé najisi'i narapi labu essoé. Rékko purai siluséreng, muwi worowané iyaré'ga makkunraié harusu'i cemmé, iyakiya tette'i najisi' narapi labu essoé. Séddié makkunrai iya mattengngangngé maddara, najisi'i pitungngesso ittana. Nigi-nigi géssai najisi'i narapi labu essoé. Agi-agi natudangi iyaré'ga natinroi makkunraié ri wettunna maddara mancaji najisi'i. Rékko séddié worowané luséreng makkunrai iya maddaraé, mancaji najisi' towi iyaro worowané pitungngesso ittana, sibawa tungke' onrong atinrong iya natinroiyé mancaji najisi' towi. Rékko séddié makkunrai maddarai siyagangngaré essona risaliwenna wettu maddarana, iyaré'ga iyaro addaranna dé'é nappésau naliwennana wettu maddarana, najisi'i ri wettu addarannaro pada-pada wettunna maddara. Onrong iya natinroiyé iyaré'ga natudangiyé ri lalenna wettuéro mancaji najisi'i. Nigi-nigi géssai iyaro onrongngé mancaji najisi' towi. Harusu'i nasessa pakéyanna enrengngé cemmé, sibawa najisi'i narapi labu essoé. Mappésaunnana iyaro addarangngé, iyaro makkunraiyé harusu'i mattajeng pitungngesso ittanasi. Purapiro nainappa mapaccing. Ri esso maaruwaé harusu'i tiwi duwakkaju jangang-jangang lolo iyaré'ga bekku lolo lao ri imangngé ri yolona sumpanna Kémana Puwangnge. Manu'-manu' iya sikajué harusu'i riyakkasuwiyangeng untu' akkarobangeng paddampengeng dosa, sibawa iya sikajuéssi untu' akkarobangeng ritunu. Nasibawang caraéro napakangkani imangngé upacara pappépaccinna makkunraiéro ri yolona Puwangnge. Puwangnge suroi Musa paréngngerangiwi bangsa Israélié kuwammengngi napuriyatiwi uppanna mennang najisi' sibawa uppanna dé', kuwammengngi mennang dé' napanajisi'i Kémana Puwangnge iya engkaé ri tengnga-tengngana akkémanna mennang. Rékko napanajisi'i mennang iyaro Kémaé, matéi matu. Makkuwaniro peraturang-peraturanna passalenna worowané iya passué manning nasaba malasa katawangngi, iyaré'ga passui manning, passalenna makkunrai iya maddaraé, sibawa passalenna worowané iya silusérengngé sibawa makkunrai iya maddaraé. Maténana iya duwa ana'na Harun wettunna makkasuwiyangeng api iya dé'é naéloriwi Puwangnge, mabbicarani Puwangnge lao ri Musa, adan-Na, “Palettukengngi silessuremmu Harun makkedaé banna ri wettu iya ripattentué weddingngi muttama ri laleng Bili' Pommapaccingngé iya rilacce'é sibawa kaing paddenring, nasaba kuwaniro uwappaitang alé-Ku sibawa ellung ri yasé'na pattongkona Petti Assijancingngé. Rékko najjalékkaiwi Harun iyaro paréntaé, matéi matu. Banna nasibawang cara makkasuwiyangeng saping lai lolo untu' akkarobangeng paddampengeng dosaé sibawa sikaju bimbala lai untu' akkarobangeng ritunu, nawedding Harun muttamakiwi Bili' Pommapaccingngé.” Harusu towi napuriyati Harun iyaé sining peraturangngé. Ri wettu dé'napa nauttamakiwi Bili' Pommapaccingngé, harusu'i cemmé nainappa mappakéyang imang, iyanaritu waju, saluwara ponco, babbang sibawa passapu, iya manenna poléi ri lénangngé. Nainappa harusu'i mabbéréyang umma Israélié lao ri Harun duwakkaju bémbé lai untu' akkarobangeng paddampengeng dosa sibawa sikaju bimbala lai untu' akkarobangeng ritunu. Harusu'i Harun makkasuwiyangeng saping lai untu' akkarobangeng paddampengeng dosa untu' aléna muto sibawa kaluwargana. Iya duwa kajunna bémbé lai polé ri umma Israélié harusu'i natiwi ri yolona sumpanna Kémana Puwangnge. Harusu'i naloteréi kuwaro sibawa makkégunang duwa batu, iya séddié natanrangiwi “untu' Puwangnge ”, na iya laingngé “untu' Azazél”. Bémbé iya napilé untu' Puwangnge harusu'i riyakkasuwiyangeng untu' akkarobangeng paddampengeng dosa. Bémbé iya tappilé untu' Azazél harusu'i ritaro tuwo-tuwo ri yolona Puwangnge nainappa rirukka lao ri padang kessi'é untu' Azazél, kuwammengngi nariledda dosa-dosana umma Israélié. Puranana Harun makkasuwiyang sibawa nagéré saping laié untu' akkarobangeng paddampengeng dosa untu' aléna sibawa untu' kaluwargana, harusu'i mala onrong api polé ri mézbaé nanalisekiwi gangka penno sibawa bara api, sibawa duwakkemmo dupa nenné, nainappa natiwi ri Bili' Pommapaccingngé. Iyaro dupaé harusu'i ritunu ri yolona Petti Assijancingngé, angkanna rumpunna nasalipuriwi pattongkona Pettiéro, nadé' naulléi Harun mitai, saba' rékko naitai matéi matu. Nainappa harusu'i Harun malai céddé dara sapingngé, nanakkeppikengngi sibawa jarinna iyaro daraé lao ri bagiyang yolona pattongkona Petti Assijancingngé sibawa wékkapitu ri yolona Pettié. Purairo harusu'i Harun maggéré bembé untu' akkarobangeng paddampengeng dosana umma Israélié. Iyaro dara bémbé'é harusu'i natiwi ri Bili' Pommapaccingngé, nainappa nakkeppikeng ri bagiyang yolona pattongkona Petti Assijancingngé sibawa ri yolona Pettié, pada-pada iya puraé nagaukengngi dara saping laié. Nasibawang caraéro napaccingiwi Bili' Pommapaccingngé polé ri anajisikenna bangsa Israélié sibawa polé ri sininna dosana mennang. Harusu'i ripaccingi Kémana Puwangnge nasaba engkai ri tengnga-tengngana akkémanna bangsa Israélié nanakennai anajisikenna mennang. Mappammulai nauttamakinna Harun Bili' Pommapaccingngé untu' pogau'i upacara pappépaccingngé narapi massu, muwi séddi tau dé'to nawedding engka ri laleng Kémaéro. Puranana napogau' upacaraé untu' aléna, untu' kaluwargana sibawa untu' sininna bangsa Israélié, harusu'i Harun massu sibawa lao ri mézba akkarobang ritunué untu' paccingiwi iyaro mézbaé. Harusu'i mala céddé dara saping sibawa dara bémbé, nanassapuwangngi ri tanru-tanru sunna mézbaé. Nasibawang jarinna harusu'i makkeppikengngi céddé iyaro wékkapitu ri yasé'na mézbaé. Nasibawang caraéro napaccingiwi mézbaé polé ri anajisikenna bangsa Israélié, kuwammengngi namancaji mapaccing. Puranana napakangka upacara pappépaccinna Bili' Pommapaccingngé sibawa bagiyab-bagiyang laingngé polé ri Kémana Puwangnge enrengngé mézbana, harusu'i Harun makkasuwiyang lao ri Puwangnge bémbé tuwoé iya ripilé untu' Azazél. Harusu'i napalénne iya duwa limanna ri yasé'na ulunna bémbé'éro nanaakuiwi sininna asalanna, dosana sibawa pelanggaranna bangsa Israélié. Nanallalengiwi sininna asalanna bangsa Israélié ripalétté'i ri yasé'na ulunna bémbé'éro. Nainappa séddié tau iya ritugaskangngé harusu'i rukkai iyaro bémbé'é lao ri padang kessi'é. Iyaro bémbé'é natiwi manengngi dosana bangsa Israélié ri daéra makabuttué iya dé'é narionroi sibawa harusu'i rileppessang ri padang kessi'é. Purairo harusu'i Harun muttama ri laleng Kémaé, ludungngi pakéyang imang iya napaké wettunna muttama ri Bili' Pommapaccingngé, sibawa salaiwi iyaro pakéyangngé kuwaro. Nainappa harusu'i cemmé riséuwaé onrong iya ripallaingngé sibawa pakéi pakéyanna muto. Puranana harusu'i massu sibawa makkasuwiyangeng akkarobangeng ritunu untu' paddampengeng dosana muto sibawa dosana bangsa Israélié. Lunra olokolo untu' paddampengeng dosaé harusu'i ritunu ri mézbaé. Tau iya paleppe'éngngi bémbé'é untu' Azazél ri padang kessi'é harusu'i nasessa pakéyanna sibawa cemmé ri wettu dé'napa nalisu ri akkémangngé. Saping lai sibawa bémbé untu' akkarobangeng paddampengeng dosaé, iya daranaé riputtama ri laleng Bili' Pommapaccingngé untu' paddampengeng dosa, harusu'i ritiwi massu ri akkémangngé sibawa ritunu. Bingkulanna, jukuna sibawa lise babuwana iya duwa olokolo'éro harusu'i ritunu maneng. Tau iya tunuéngngi harusu'i sessa'i pakéyanna sibawa cemmé ri wettu dé'napa nalisu ri akkémangngé. Imang Lompo, iya puraé rilanti sibawa ripallaing untu' Allataala untu' sulléiwi ambo'na, harusu pogau'i upacara pappépaccingngéro. Harusu'i paké pakéyang ripattentué, nainappa napogau' upacara pappépaccinna Bili' Pommapaccingngé, bagiyab-bagiyang laingngé ri Kémana Puwangnge, mézbaé, imang-ngimangngé sibawa sininna bangsa Israélié. Iyaro upacaraé harusu'i ripogau' siseng sitaung untu' pépaccingiwi bangsa Israélié polé risininna dosana mennang. Iyanaro sining peraturang iya harusu'é riturusi lettu mannennungeng. Napogau'ni Musa pada-pada iya napparéntangngé Puwangnge lao ri aléna. Puwangnge suroi Musa mabbéréyangngi iyaé sining peraturangngé lao ri Harun, ana'-ana'na sibawa sininna bangsa Israélié. Akkattana iyaro paréntaé kuwammengngi bangsa Israélié natiwii ri Kémana Puwangnge sinininna olokolo pakkasuwiyangngé iya biyasaé nagéré ri dare'é. Waji'i mennang natiwi iyaro pakkasuwiyangngé lao ri imangngé ri yolona sumpanna Kémana Puwangnge sibawa géréi kuwaro untu' akkarobangeng pappasidamé. Harusu'i nabboloreng imangngé iyaro dara olokolo'é risining benrénna mézbaé ri yolona sumpanna Kémana Puwangnge nainappa natunu lunra'na kuwammengngi baunna napésennangiwi atinna Puwangnge. Harusu'i tette matinulu bangsa Israélié ri Puwangnge sibawa dé' sises-siseng nawedding maggéré olokolo ri dare'é untu' pakkasuwiyang lao risining jing majaé. Iyaro peraturangngé harusu'i riturusi lettu mannennungeng. Rékko séddié tau Israélié iyaré'ga tau laing iya monroé mattette ri yelle'na tau Israélié makkasuwiyangeng akkarobangeng ritunu iyaré'ga akkarobangeng laing, lao ri Puwangnge, harusu'i nakkasuwiyangeng ri yolona sumpang Kémana Puwangnge. Rékko makkasuwiyangngi ri onrong laingngé, dé'na nawedding riyangga anggota umma'na Allataala. Rékko séddi tau Israélié iyaré'ga tau laing iya monro tette'é ri yelle'na tau Israélié manré dara, rihukkungngi matu ri Puwangnge, sibawa dé'na nariyangga anggota umma'na. Nyawana tungke'-tungke' anu mannyawaé engkai ri darana. Rimakkuwannanaro napparéntangngi Puwangnge kuwammengngi sininna daraé riyabbolorengngi ri yasé'na mézbaé kuwammengngi nariledda dosa-dosana umma'é. Daraé iyanaritu silaong nyawana, leddai dosaé. Iyanaro saba'na bangsa Israélié iyaré'ga tau laing iya mattette'é ri yelle'na mennang riyattéyangngi manré dara. Rékko séddié tau Israélié iyaré'ga séddié tau laing iya monro tette'é ri yelle'na bangsa Israélié tikkeng manu'-manu' iyaré'ga olokolo laing iya dé'é naharang, harusu'i napassu darana iyaro olokolo'é sibawa témpungiwi tana. Nyawana tungke'-tungke' anu mannyawaé engkai ri darana, rimakkuwannanaro nattéyangngi Puwangnge bangsa Israélié manré dara. Tungke' tau iya pogau'éngngi iyaro pangkaukeng riyattéyangngé dé'na nariyangga anggota umma'na Allataala. Tungke tau Israélié iyaré'ga tau laing iya manré juku olokolo iya maté riyalé, iyaré'ga maté riyuno ri olokolo masekkangngé, harusu'i sessa'i pakéyanna nainappa cemmé sibawa mattajeng narapi labu essoé, nappai mancaji mapaccing. Rékko dé' napogau'i iyaro, harusu'i natanggung addimonrinna. Puwangnge suroi Musa palettu'i ri bangsa Israélié paréntaéwé, “Iyya'na Puwang Allataalamu. Aja' muturui pangkaukenna tauwé ri Maséré, onrong puraé muwonroi, iyaré'ga tauwé ri Kanaan, kégi Utiwiko makkekkuwangngé. Turusiwi hukkung-hukkuk-Ku sibawa pogau'i aga iya Uwapparéntangngé. Iyya'na Puwang Allataalamu. Turusiwi sining peraturangngé sibawa hukkung-hukkung iya Uwéréngngékko. Rékko mupogau'i makkuwaéro, salama'i atuwommu. Iyya'na Puwang.” Puwangnge mabbéréyangngi iyaé sining peraturangngé. Aja' musiluséreng sibawa sala séddinna polé ri ana'na silessuremmu. Aja' musiluséreng sibawa indo'mu, bainéna ambo'mu, saba' ha'na ambo'mu. Aja' mupakatunai ambo'mu ri laleng musiluséreng sibawa sala séddinna bainéna iya laingngé. Aja' musiluséreng sibawa ana'darammu makkunrai iyaré'ga sikaporomu, muwi iya ripawekke'é sibolako iyaré'ga iya ripawekke'é ri bola laingngé. Aja' musiluséreng sibawa eppomu; iyaro napakasirii matu alému. Aja' musiluséreng sibawa ana'darammu makkunrai iya siambo'ékko laing indo' iyaré'ga siindo'é laing ambo', nasaba silessuremmu muto. Aja' musiluséreng sibawa bainéna amurému, nasaba amurému towi. Aja' musiluséreng sibawa ana' ménéttummu iyaré'ga sibawa bainéna kakamu. Aja' musiluséreng sibawa ana'na iyaré'ga eppona séddié makkunrai iya puraé muwéwa siwollompollong. Naullé mennang siyajimmu, na iyaro pangkaukengngé dé' nasipato. Aja mukawingiwi padakkunrainna bainému ri wettu tuwona mupa bainému. Aja' musiluséreng sibawa séddié makkunrai ri wettu maddarana, nasaba ri laleng keadaang najisi'i. Aja' musiluséreng sibawa bainéna tau laingngé; iyaro pangkaukengngé napanajisi'ko. Aja' muwabbéréyangngi sala séddinna ana'mu untu' riyakkarobangeng ri laleng sompai Molokh, nasaba iyaro pangkaukengngé napakatunai Allataala, Puwam -mu. Worowané dé' nawedding musiluséreng sibawa worowané; nabenci Allataala pangkaukeng makkuwaéro. Worowané iyaré'ga makkunraié; dé' sises-siseng nawedding mallai sibawa olokolo'é; pangkaukeng majaéro napanajisi'ko. Aja' mupanajisi'i alému sibawa sining pangkaukengngéro, saba' nasibawang caraéro bangsa-bangsa iya monroé ri Kanaan ri wettu dé'mupa purani napanajisi' aléna mennang. Rimakkuwannanaro rirukkai mennang ri Puwangnge, kuwammengngi mulléi monroiwi wanuwaéro. kuwammengngi aja' Nahukkukko sibawa Narukkako polé ri tanaéro pada-pada sining tau iya dé'é naissengngi Puwangnge, iya monroé kuwaro ri wettu dé'mupa. Muwisseng makkedaé nigi-nigi pogau'i pangkaukeng iya mappakaciddi-ciddi'éro dé'na nariyangga anggota umma'na Allataala. Nakkeda Puwangnge, “Turusiwi sining peraturang iya Uwabbéréyangngé sibawa aja' muturui pangkaukenna sining tau iya monroiyéngngi tana Kanaan ri wettu dé'mupa. Aja' mupanajisi'i alému ri laleng mupogau'na sining pangkaukengngéro. Iyya'na, Puwang Allataalamu.” Puwangnge suroi Musa palettu'i lao ri bangsa Israélié iyaé paréntaé, “Sitinajako mapaccing, nasaba Iyya Puwang Allataalamu iyanaritu mapaccingngi. Tungke' tau harusu'i pakalebbii indo' ambo'na sibawa ramé-raméiwi esso Saba'é pada-pada iya Uwapparéntangngé. Iyya'na Puwang Allataalamu. Aja' musompa barahala. Aja' muwébbu dato'-dato' polé ri bessié sibawa sompai. Iyya'na Puwang Allataalamu. Rékko makkasuwiyakko olokolo untu' akkarobangeng pappasidamé, accowériwi sining peraturang iya Uwabbéréyangngé, kuwammengngi Utarimai iyaro akkarobangngé. Harusu'i riyanré jukuna ri esso rigéréna iyaro olokolo'é, iyaré'ga pappabajana. Juku iya risésaé mupa ri esso matellué, harusu'i ritunu gangka cappu, nasaba harangngi iyaro jukué. Rékko iyaro jukué riyanré towi, iyaro akkarobangngé dé' Utarimai. Nigi-nigi manréi iyaro jukué salai nasaba dé' nangke'i aga iya ripallaingngé untu' Iyya. Iyaro tauwé dé'na Uwangga'i anggota umma'-Ku. Rékko méngngalako, aja' muwéngngalai gandong iya tuwoé ri wiring-wiring dare'mu, sibawa aja' mulisu untu' paddeppungengngi gandong iya musésaé puramuna méngngala. Aja' mulisu ri palla anggoro'mu untu' paddeppungengngi buwa-buwa anggoro iya musésaé puramuna maccéppu mammulangngé. Makkuwatoro buwa-buwana iya sempé'énna aja' muwalai. Leppessangngi iyaro untu' tau kasiyasié sibawa tau laingngé. Iyya'na Puwang Allataalamu. Aja' muwénnau, pabengnguwang iyaré'ga mabbellé. Aja' muwajjanci ri laleng asek-Ku rékko dé' mumakkatta rupaiwi jancié, nasaba iyaro mutuna-tunaiwi asek-Ku. Iyya'na Puwang Allataalamu. Aja' mupara'i pada-padammu iyaré'ga rampasa'i baranna. Sarona séddié tau iya majjamaé ri iko aja' mutahangngi, muwi untu' siwenni bawang. Aja' mutanroiwi tau mataru-tarué sibawa aja' mutaro batu tabbuttureng ri yolona tau butaé. Sitinajako mappakalebbi sibawa métau ri Iyya, saba' Iyya Puwang Allataalamu. Harusu'ko malempu rékko mangadélékiko, aja' mubélai tau kasiyasié sibawa aja' mumétau ri tau sugié. Aja' muwamporeng pappétenna ri yelle'na sining tau sibangsamu, kuwammengngi aja' na iko nassabariwi amaténna pada-padammu rupa tau. Iyya'na Puwang. Aja' mumapeddi ati lao ri nigi-nigi. Puraiwi assisalammu sibawa muwi niga, kuwammengngi dé' mumadosa nasaba tau laingngé. Aja' mumaélo makkabale sibawa aja' mubenciwi tau laingngé, iyakiya éloriwi pada-padammu pada-pada muwélorinna alému. Iyya'na Puwang. Turusiwi sining parénta-Ku. Aja' mupasilaiwi olokolo iya dé'é napada-pada. Aja' mutaneng duwanrupa bibi' ri sikonrongngé tana. Aja' mupakéi pakéyang iya ritennungngé polé ri duwanrupa wennang. Rékko séddié worowané majjanciwi maélo balu'i atanna iya makkunraié lao ri worowané laingngé untu' napancaji gundi'na, na tau iya maéloé melliwi iyaro ataé dé'pa nawajai, nainappa punnana bunge'-bunge'é lusérengngi iyaro ataé, harusu'i rihukkung duwa, iyakiya dé' nawedding rihukkung maté, saba' muwi maga iyaro makkunraié atanna mupi. Iyaro worowané harusu'i tiwi sikaju bimbala lai ri yolona sumpang Kéma-Ku untu' akkarobangeng passullé aroging. Harusu'i imangngé makkarobangngi iyaro bimbala'é ri laleng upacara pappépaccingngé, kuwammengngi nariyaddampengeng dosana iyaro tauwé. Na Iyya, Allataala maélo maddampengengngi. Rékko muttama'no ri wanuwa Kanaan sibawa taneng maddupa-rupang pong buwa-buwa kuwaro, ri laleng telluttaung mammulangngé harusu'i muwangga harang buwa-buwana sibawa dé' nawedding muwanré. Ri laleng taung maeppaé sininna buwana harusu'i riyakkasuwiyangeng untu' pannessai tarima kasi'mu lao ri Iyya, Puwang. Ri laleng taung malimaé nappako wedding manréi buwana. Rékko mupogau' manengngi sininna peraturangngéro, mabbuwai matu lebbi maéga pong buwa-buwamu. Iyya'na Puwang Allataalamu. Aja' muwanré dara. Aja' mupakéi sining paddissengeng mappallajangngé. Aja' mugoncingngi gemme' ri benrénna ulummu iyaré'ga cukkuru'i janggo'mu. Aja' mutoddo-toddo'i olimu untu' mébbu tanra-tanrang, iyaré'ga loi watakkalému selaku tanrang mabbarata nasaba engka tau maté. Iyya'na Puwang. Aja' mupakariyawai angke'na ana'-ana' makkunraimmu sibawa pancajiwi mennang cakkuribang ri bola assompangngé. Ri laleng pogau'i makkuwaéro, mucarépaiwi wanuwammu, sibawa massanrai matu kuwaro sining pangkaukeng iya dé'é nasipato. Ramé-raméiwi esso Saba'é sibawa pakalebbii onrong iya ripallaingngé untu' sompa-Ka. Iyya'na Puwang. Aja' mulao méllau pangaja ri sanro iya pakangkaé assisumpungeng sibawa roh-rohna tau maté. Rékko mupogau'i iyaro mancaji najisi'ko. Iyya'na Puwang Allataalamu. Etauriwi sibawa pakalebbii sining tomatowaé. Sitinajako mappakalebbi sibawa métau lao ri Iyya, saba' Iyya'na Puwang. Aja' mupogau'i majaé lao ri tau laing iya monroé ri wanuwammu. Gaukengngi mennang pada-pada mugaukenna sining tau sibangsamu sibawa éloriwi mennang, pada-pada muwélorinna alému muto. Engngerangngi makkedaé iko paimeng pura tokko tuwo selaku tau laing ri Maséré. Iyya'na Puwang Allataalamu. Aja' mubengnguwangngi tau laingngé sibawa paké ukkurang timbangeng iyaré'ga ola' palsu. Pakéi météré, timbangeng sibawa ola' iya tongengngé. Iyya'na Puwang Allataalamu, na Iyya pura tiwiko massu polé ri Maséré. Turusiwi sininna hukkung sibawa parénta-Ku. Iyya'na Puwang.” Puwangnge suroi Musa powadai gau'éwé lao ri bangsa Israélié, “Tungke' tau ri yelle'mu iyaré'ga tau laing iya mattette'é ri yelle'mu, iya makkarobangngéngngi ana'na lao ri Molokh, harusu'i rigenrung batu gangka maté ri sininna masaraka'é. Tau iya makkarobangngéngngi ana'na lao ri Molokh, napanajisi'i Kéma-Ku sibawa napakatunai asek-Ku iya mapaccingngé. Rihukkungngi matu sibawa dé'na Uwangga'i anggota umma'-Ku. Rékko natongkoi matanna masaraka'é lao ri pangkaukenna tauwéro sibawa dé' napajoppai pahukkungeng maté ri yasé'na, alé-Ku hukkungngi, sininna kaluwargana, enrengngé sininna tau iya silaongengngéngngi salai-Ka sibawa sompai Molokh. Dé'na mennang Uwangga'i anggotana umma'-Ku. Tau iya laowé méllau pangaja ri sanro iya pakangkaé assisumpungeng sibawa roh-rohna tau maté maéloka hukkungngi sibawa dé'na Uwangga'i anggotana umma'-Ku. Jagaiwi kuwammengngi mutette mapaccing, nasaba Iyya Puwang Allataalamu. Turusiwi hukkung-hukkuk-Ku, nasaba Iyya'na Puwang, iya pallaingngékko untu' Iyya.” Puwangnge mabbéréyangngi iyaé sining peraturangngé, “Tau iya tanroiyéngngi ambo'na iyaré'ga indo'na, harusu'i rihukkung maté. Matéi nasaba asalanna muto. Rékko séddié tau Israél malaweng sibawa bainéna tau sibangsana, aléna sibawa makkunraiéro harusu'i rihukkung maté. Séddié worowané iya lusérengngéngngi sibawa sala séddinna bainéna ambo'na, narampasa'i ha'na ambo'na. Iyaro worowané sibawa makkunraié harusu'i rihukkung maté. Malawenni mennang, sibawa matéi nasaba asalanna muto. Rékko séddié worowané lusérengngi ménéttu makkunrainna, iya duwa tauwéro harusu'i rihukkung maté. Malawenni mennang, sibawa matéi nasaba asalanna muto. Rékko séddié worowané lusérengngi séddié worowané laing, napogau'i mennang pangkaukeng iya mariyawaé sibawa matunaé, sibawa harusu'i rihukkung maté duwa. Matéi mennang nasaba asalanna muto. Rékko séddié worowané kawing sibawa séddié makkunrai enrengngé indo'na iyaro makkunraié, iya tellunna harusu'i ritunu gangka maté, nasaba napogau'i mennang pangkaukeng iya dé'é nasipato. Pangkaukeng makkuwaéro dé' nawedding engka ri yelle'mu. Rékko séddié worowané laiwi olokolo'é, iyaro tauwé sibawa olokolo'é harusu'i riyuno. Rékko séddié makkunrai mallai sibawa olokolo'é, iyaro makkunraié sibawa olokolo'é harusu'i riyuno. Matéi mennang nasaba asalanna muto. Rékko séddié worowané lusérengngi ana'daranna iyaré'ga silessurenna iya siambo'é laing indo' iyaré'ga siindo'é laing ambo', dé'na nariyangga matu anggota umma'-Ku. Purani napogau' mennang pangkaukeng iya dé'é nasipato sibawa harusu'i tanggungngi addimonrinna. Rékko séddié worowané lusérengngi séddié makkunrai iya maddaraé, dé'na nariyangga mennang anggota umma'-Ku. Rékko séddié worowané lusérengngi amuréna, iya duwa harusu tanggungngi addimonrinna polé ri pelanggarannaro. Rékko séddié worowané lusérengngi bainéna amuréna, natuna-tunaiwi amuréna. Iyaro worowané sibawa makkunraié harusu'i tanggungngi pahukkungenna. Narapi maté dé' nalolongeng mennang ana'. Rékko séddié worowané rampasa'i bainéna silessurenna, napakatunai silessurenna sibawa pogau' pangkaukeng iya dé'é nasipato. Narapi maté dé' nalolongeng mennang ana'.” Makkedai Puwangnge, “Turusiwi sininna hukkuk-Ku sibawa parénta-Ku, kuwammengngi nadé' naripaddésu'ko polé ri wanuwa Kanaan, kégako Utiwi. Aja' muturui ampé-ampéna bangsa iya monroé kuwaro. Mappakaciddi-ciddi mennang sibawa sining pangkaukeng iya majaé. Iyanaro saba'na Upaddésu'i mennang, kuwammengngi mulléi muttama ri wanuwaéro. Tana iya sugié sibawa macommo'éro purani Ujancingekko, jaji Uwérékko mancaji appunnangemmu. Iyya'na Puwang Allataalamu iya passarangngékko polé ri bangsa-bangsa laingngé. Rimakkuwannanaro harusu'ko pasilaingengngi sibawa tongeng olokolo harangngé polé ri iya dé'é naharang. Aja' muwanréi olokolo iya harangngé. Iyaro olokolo'é Upannessai harang, jaji rékko muwanréi mancaji najisi'ko. Upallaikko polé ri bangsa-bangsa laingngé kuwammengngi mumancaji appunnangek-Ku. Harusu'ko mapaccing nasaba Iyya'na Puwang, namapaccikko. Tungke' worowané iyaré'ga makkunrai iya pakangkaé assisumpungeng dibawa roh-rohna tau maté harusu'i rigenrung batu gangka maté. Iyaro tauwé matéi nasaba asalanna muto.” Puwangnge suroi Musa palettu'i iyaé paréntaé lao risining imang wija-wijanna Harun, “Séddié imang dé' nawedding napanajisi' aléna nasaba maccowéi hadéré ri upacara attampungenna sumpulolona, sangadinna rékko iya matéro iyanaritu indo'na, ambo'na, ana'na, padaorowanéna, iyaré'ga ana' daranna iya dé'éppa nakawing, iya naéwaé sibola. Dé' nawedding napanajisi' aléna sibawa maccowʻriwi upacara attampungenna sumpulolona bainéna. Séddié imang dé' nawedding kellui sibagiyang polé ri ulunna sibawa dé' nawedding nagoncing janggo'na iyaré'ga loi watakkaléna sibawa anu matareng untu' mappaitangngi makkedaé mabbaratai. Appunnangekkui iya ripallaingngé nadé' nawedding carépaiwi asek-Ku. Makkasuwiyangngi akkarobangeng inanré lao ri Iyya, jaji harusu'i mapaccing. Séddié imang dé' nawedding kawing sibawa séddié makkunrai iya cakkuribangngé riyolo iyaré'ga séddié makkunrai iya tenniyaé parawang iyaré'ga iya massarangngénna, nasaba imangngé iyanaritu appunnangek-Ku. Bangsa Israélié harusu'i mangakuiwi imangngé selaku tau iya ripallaingengngékka nasaba makkasuwiyangngi akkarobangeng inanré lao ri Iyya. Iyya'na Puwang; mapaccikka sibawa Upaccingiwi umma'-Ku. Rékko ana' makkunrainna séddié imang mancaji cakkuribangngi, napakatunai ambo'na naharusu'i ritunu gangka maté. Purani rilanti Imang Lompoé sibawa tirikiwi minnya upacara tompo ulunna sibawa papasangiwi pakéyang imang lompoé ri aléna. Rimakkuwannanaro dé' nawedding naleppessang gemme'na makota iyaré'ga sapé'ʻi pakéyanna selaku tanrang mabbarata. Rékko riyajjalékkaiwi iyaro peraturangngé, ana'-ana'na iya harusu'é mapaccing, najisi'i matu. Iyya'na Puwang sibawa purani Upallaing mancaji Imang Lompo.” Puwangnge paréntangngi Musa untu' powadai iyaé lao ri Harun, “Séddié wija-wijammu iya sala-salangngé watakkaléna dé' nawedding makkasuwiyang akkarobangeng inanré lao ri Iyya. Iyaro takkennai untu' mannennungeng. Tau iya makkasuwiyangngé akkarobangeng dé' nawedding sala-salang watakkaléna, iyanaritu tau butaé, iyaré'ga péso'é, tau sala-salangngé rupanna iyaré'ga anggota watakkaléna, iya maté limanna iyaré'ga képpangngé ajéna; iya bukku'é iyaré'ga mapancé'é, iya mapeddi mataé iyaré'ga malasa olié sibawa iya rilase'é. Tungke' wija-wijanna Imang Harun iya sala-salangngé watakkaléna dé' nawedding makkasuwiyang akkarobangeng inanré lao ri Iyya. Iyakiya weddingngi manré inanré iya riyakkasuwiyangngé, muwi akkarobang inanré iya mapaccingngé muwi akkarobangeng inanré iya mapaccing senna'é. Nasaba iyaro tauwé sala-salangngi watakkaléna, dé' nawedding maddeppériwi paddenring iya passarangngéngngi Bili' Mapaccingngé iyaré'ga mézbaé. Dé' nawedding napanajisi' barab-barang iya puraé ripallaing untu' Iyya, nasaba Iyya'na Puwang, sibawa Iyya'na ritu iya pallaingngéngngi iyaro barab-barangngé.” Iyanaro peraturang-peraturang iya napalettu'é Musa lao ri Harun enrengngé ana'-ana'na, sibawa lao risininna bangsa Israélié. Puwangnge suroi Musa palettu'i iyaé paréntaé lao ri Harun sibawa ana'-ana'na, “Gaukengngi sibawa siratang aga iya nakkasuwiyangengngé bangsa Israélié banna untu' Iyya, kuwammengngi dé' mucarépaiwi asek-Ku iya mapaccingngé. Iyya'na Puwang. Rékko séddié tau polé ri wija-wijammu ri laleng keadaang najisi' maddeppériwi sining pakkasuwiyang mapaccingngé iya napallaingngé bangsa Israélié untu' Iyya, dé'na nawedding mattumani ri mézbaé. Iyaro peraturangngé takkennai untu' mannennungeng. Iyya'na Puwang. Séddié wija-wijanna Harun iya nakennaé lasa oli iya mabbahayaé, iyaré'ga iya malasa katawangngé angkanna passu manning, riyattéyang manré pakkasuwiyang mapaccing rékko dé'pa naripannessa mapaccing. Séddié imang mancaji najisi'i rékko géssai séuwaé iya najisi'é nasaba nakennai uju. Najisi' towi rékko massui manninna, iyaré'ga géssa olokolo iyaré'ga tau iya najisi'é. Séddié imang iya najisi'é muwi cara aga, tette'i najisi' narapi labu essoé. Sibawa narapi labu essoé dé'pa nawedding manré inanré iya riyakkasuwiyangengngé lao ri Puwangnge rékko dé'pa nacemmé. Labupi essoé namapaccing sibawa wedding manréi, nasaba iyanaro inanréna. Riyattéyangngi manré juku olokolo iya maté riyalé iyaré'ga riyunoé ri olokolo masekkangngé. Rékko manréi, mancaji najisi'i. Iyya'na Puwang. Sininna imangngé harusu'i naturusi sining peraturang iya Uwabbéréyangngé. Rékko dé', pasalai mennang sibawa matéi matu, nasaba najjalékkaiwi sining peraturang iya mapaccingngéro. Iyya'na Puwang, sibawa Iyya ritu pallaingngi mennang untu' alé-Ku. Pakkasuwiyang iya ripallaingngé untu' alé-Ku banna weddingngi nanré kaluwargana imangngé; tau laingngé dé' nawedding, namuni iyaro tauwé sibolai imangngéro iyaré'ga tau napagajiyé. Iyakiya ata-ata iya naelliyé iyaro imangngé sibawa dowi riyaléna iyaré'ga iya rijajiyangngé ri lalempolana, weddingngi manréi inanré bagiyanna imangngéro. Ana' makkunrainna séddié imang iya kawingngé sibawa séddié tau iya tenniyaé imang, dé' nawedding nanré iyaro pakkasuwiyangngé. Iyakiya ana' makkunrainna imangngé iya jandaénna iyaré'ga iya massarangngénna sibawa dé' nappunnai ana' nainappa lisu ri bolana ambo'na sibawa mancaji tanggungenna, weddingngi nanré inanré bagiyanna ambo'na. Banna kaluwarga imangngé bawang wedding manréi iyaro pakkasuwiyangngé. Rékko séddié tau iya tenniyaé anggota kaluwargana imangngé dé' nattungkaiwi manréi inanré iya riyakkasuwiyangengngé lao ri Puwangnge, harusu'i nabbéréyang passulléna lao ri imangngé ritambai duwappulo paresséng. Dé' nawedding imang-ngimangngé panajisi'i pakkasuwiyang iya ripallaingngé untu' Iyya sibawa malleppessangngi nanré tau iya dé'é nappunnai ha' manréi. Iyaro gau'é napancajiwi iyaro tauwé pasala sibawa papoléngengngi pahukkungeng ri yasé'na. Iyya'na Puwang, sibawa iyya pépaccingiwi iyaro pakkasuwiyangngé.” Puwangnge suroi Musa Aja' muwakkasuwiyangeng olokolo iya engkaé sala-salanna, saba' dé' namaélo Puwangnge tarimai. Rékko séddié tau makkasuwiyang lao ri Puwangnge akkarobangeng pappasidamé untu' paleppe'i tinja'na iyaré'ga akkarobangeng cenning ati, iyaro olokolo'é dé' nawedding engka sala-salanna, kuwammengngi weddingngi ritarima. Aja' muwakkasuwiyangengngi lao ri Puwangnge olokolo iya butaé, iya poloé bukunna iyaré'ga maloé, iya mappunnaiyé lettang mannana, iya malasa olié iyaré'ga cola'é. Olokolo makkuwaéro aja' nariyakkasuwiyangeng untu' akkarobangeng inanré ri yasé'na mézbaé. Untu' akkarobangeng cenning atié weddikko makkasuwiyangeng olokolo iya dé'é nasakke lingé, iyakiya untu' mappaleppe tinja, olokolo makkuwaéro dé' nawedding ritarima. Aja' muwakkasuwiyangeng lao ri Puwangnge olokolo iya masolangngé batu lase'na tassipi, rirette, malo iyaré'ga ribuwang. Iyaro gau'é dé' nawedding kajajiyang ri wanuwammu. Olokolo iya rilolongengngé polé ri tau laingngé dé' nawedding riyakkasuwiyangeng untu' akkarobangeng inanré. Iyaro olokolo'é riyangga sala-salangngi sibawa dé' nawedding ritarima. Aja' muwakkarobangeng indo saping iyaré'ga bimbala iyaré'ga bémbé silaong ana'na massamang esso. Rékko makkarobangekko akkarobangeng sukkuru lao ri Puwangnge, pogau'i iyaro situru peraturangngé, kuwammengngi naritarima akkarobangemmu. Anréi iyaro akkarobangngé iyatoro essoé, sibawa aja' mutaroi muwi céddé untu' pappa bajana. Makkedai Puwangnge, “Turusiwi sining parénta-Ku; Iyya'na Puwang. Aja' mutuna-tunaiwi asek-Ku iya mapaccingngé. Sininna bangsa Israélié, harusu'i sompa-Ka selaku Iya Pommapaccingngé. Iyya'na Puwang sibawa Iyya pancajiko mapaccing. Utiwiko massu polé ri Maséré, kuwammengngi Umancaji Allataalamu. Iyya'na Puwang.” Puwangnge mpéréngngi Musa sining peraturangngé passalenna ramé-ramé agamaé, iya harusu'é riyappallebbangeng selaku esso maraja untu' massompa. Engka enneng essona untu' mappallaung, iyakiya esso mapitué, esso Saba'é, iyanaritu esso appésaungeng iya ripallaingngé untu' Puwangnge. Ri essoéro harusu'ko pakangka addeppu-deppungeng untu' massompa sibawa dé' nawedding mappallaung. Iyanaé esso-esso maraja iya napattette'é Puwangnge sibawa harusu'i riyappallebbangeng ri wettu iya ripattentué. Esso Maraja Paska iya riramé-raméiyé untu' pakalebbii Puwangnge, mappammulai labunna essoé ri tanggala seppulo eppa uleng séddi. Pappa bajana, tanggala seppulo lima, mappammulani Ramé-ramé Roti Dé'é Raginna, na pitungngesso ittana dé' nawedding manré roti iya riyébbué paké ragi. Ri esso labe'nana esso Saba'é, harusu'i imangngé makkasuwiyangengngi iyaro gandongngé selaku pakkasuwiyang tanréyangeng lao ri Puwangnge, kuwammengngi namasennang Puwangnge lao ri iko. Ri esso muwakkasuwiyangenna iyaro gandongngé, harusu tokko makkasuwiyang untu' akkarobangeng ritunu sikaju ana' bimbala lai iya makkéumuru sitaungngé sibawa dé'é sala-salanna. Untu' akkarobangeng inanré, akkasuwiyangengngi duwakkilo labbu ricampuru minnya zaitun. Bau akkarobangengngéro pésennangiwi atinna Puwangnge. Nasibawang iyaro akkasuwiyangeng towi sibang uwai anggoro. Ri wettu dé'napa mutiwii iyaro pakkasuwiyangngé lao ri Puwangnge, dé' naweddikko manré muwi céddé polé ri gandong baruéro, muwi mamata, ripanggang iyaré'ga ritunu mancaji roti. Iyaro peraturangngé harusu'i naturusi sininna wija-wijammu untu' mannennungeng. Mappammulai esso labe'na Saba'é, wettummu makkasuwiyang lao ri Puwangnge wessé gandong mammulangngé, harusu'ko bilangngi pitu aha' bujuru. Ri esso iya malimappuloé, iyanaritu esso purana Saba'é iya mapitué, harusu'ko tiwi akkarobangeng ripatala lao ri Puwangnge. Tungke' kaluwarga harusu'i makkasuwiyangeng duwa roti untu' pakkasuwiyang tanréyangeng lao ri Puwangnge. Tungke' rotié harusu'i riyébbu polé ri duwakkilo labbu nenné iya paké ragi sibawa harusu'i riyabbéréyang lao ri Puwangnge selaku pakkasuwiyang wassélé tana iya mammulangngé. Nasibawang iyaro rotié harusu'i bangsa Israélié makkasuwiyangeng pitukkaju ana' bimbala iya makkéumuru sitaungngé, sikaju saping lai lolo sibawa duwakkaju bémbé. Tungke'-tungke' dé' nawedding engka sala-salanna sibawa harusu'i riyakkasuwiyangeng untu' akkarobangeng ritunu untu' Puwangnge, sibawa akkarobangeng ripatala enrengngé akkarobangeng uwai anggoro. Na iyaro akkarobangengngé napésennangiwi atinna Puwangnge. Akkasuwiyangeng towi sikaju bémbé lai untu' akkarobangeng paddampengeng dosa sibawa duwakkaju bimbala lai iya makkéumuru sitaungngé untu' akkarobangeng pappasidamé. Roti sibawa iya duwa ana' bimbala'éro harusu'i nakkasuwiyangeng imangngé selaku pakkasuwiyang tanréyangeng lao ri Puwangnge, na iyaro untu' bagiyanna imangngé. Iyaro sining pakkasuwiyangngé mapaccingngi. Ri essoéro harusu'ko pakangka addeppu-deppungeng untu' massompa sibawa dé' nawedding pogau' pallaung matane. Iyaro peraturangngé harusu'i naturusi sininna wija-wijammu untu' mannennungeng, kégi-kégi mennang monro. Rékko méngngalako, aja' muwéngngalai gandong iya tuwoé ri wiring-wiring dare'mu sibawa aja' mulisu untu' paddeppungengngi gandong iya nasésae puranana éngngalangnge. Leppessangngi iyaro untu' tau kasiyasié sibawa tau laingngé. Puwangnge iyanaritu Allataalamu. Akkasuwiyangenno akkarobangeng inanré lao ri Puwangnge sibawa aja' mupogau' pallaung matane ri essoéro. Aja' muwappallaung, saba' iyaro essoé iyanaritu Esso Paddampengeng Dosaé, kuwammengngi mulolongeng addampeng ri yolona Puwang Allataalamu. Nigi-nigi manré séuwa ri essoéro, dé'na nariyangga anggota umma'na Allataala. Sibawa nigi-nigi pogau' pallaung ri essoéro, rihukkungngi ri Puwangnge muto sibawa pahukkungeng maté. Iyaro peraturangngé takkennai untu' sininna wijanna kégi-kégi mennang monro. Mappammulai labunna matanna essoé ri tanggala asérana ulengngéro narapi labunna matanna essoé ri tanggala seppulona, harusu'ko ramé-raméiwi pada-pada esso Saba'é, esso iya ripallaingngé untu' mappésau. Puppu essoko harusu mappuwasa. Iyanaro esso-esso maraja agama iya napalettu'é Puwangnge sibawa iya harusu'é muwappallebbangeng. Ri ramé-raméro harusu'ko pakalebbii Puwangnge sibawa pakangka addeppu-deppungeng untu' massompa sibawa makkasuwiyangeng akkarobangeng inanré, akkarobangeng ritunu, akkarobangeng olokolo sibawa akkarobangeng uwai anggoro, singngéga iya riyapparelluwangngé esso-esso. Iyaro ramé-ramé sinrupai pattamba ri esso-esso Saba'é biyasaé, jaji iyaro sining pakkasuwiyangngé iyanaritu pattambana towi pabbérému iya biyasaé, ri akkarobangemmu untu' mappaleppe tinja, iyaré'ga akkarobangeng cenning ati iya muwabbéréyangngé lao ri Puwangnge. Puranana éngngalangngé, mappammulai tanggala seppulo lima uleng pitu, harusu'ko pakangka ramé-ramé pitungngesso ittana. Ri esso iya mammulangngé sibawa iya maaruwaé iyanaritu esso iya ripallaingngé untu' mappésau. Ri esso iya mammulangngé harusu'ko maccéppu buwa-buwa iya kminang makessingngé ri palla'mu, daud-daung pattukuto sibawa takké-takké polé ri ajukajung iya maworongngé, nainappa pammulaini ramé-ramé ariyo-riyongngé untu' pakalebbii Puwang Allataalamu. Iyaro ramé-ramé harusu'i mupatteru pitungngesso ittana. Iyaro peraturangngé harusu'i napogau' wija-wijammu untu' mannennungeng. Pitungngesso ittana sininna bangsa Israélié harusu'i monro ri laleng sining kalampang daud-daungngé, kuwammengngi naissengngi wija-wijammu makkedaé Puwangnge suroi bangsa Israélié monro ri laleng sining kalampang biyasaé, wettunna ritiwi mennang massu polé ri Maséré. Aléna ritu Puwang Allataalamu. Makkuwaniro Musa palettu'i ri bangsa Israélié sining peraturangngé passalenna ramé-ramé untu' pakalebbii Puwangnge. Puwangnge suroi Musa mabbéréyangngi iyaé sining peraturangngé lao ri bangsa Israélié: Tiwino minnya zaitun iya tuléngngé sibawa iya kaminang makessingngé untu' lampué ri laleng Kémana Puwangnge, kuwammengngi nawedding ripasang sibawa malluwa matteru. Harusu'i Harun matoro'i sining lampuéro mappammulai mapettanna narapi élé ri onrong naonroiyé Puwangnge, ri saliwenna kaing paddenring iya tongkoéngngi Petti Assijancingngé ri Bili' Pommapaccingngé. Iyaro paréntaé harusu'i ripogau' untu' mannennungeng. Harusu'i Harun murusu'i sining lampué ri ajé lampué polé ri ulaweng tuléngngé kuwammengngi natette malluwa ri laleng Kémana Puwangnge. Alano seppulo duwa kilo labbu iya kaminang makessingngé sibawa ébbuno seppulo duwa roti lébu, tungke'-tungke' polé risikilo labbu. Palénne'i rotié ri laleng duwassusung, enneng roti tungke' susunna, ri yasé'na méjang mallapi ulaweng tuléng iya engkaé ri laleng Kémana Puwangnge. Taroiwi kamennyang tuléng tungke' susung roti untu' tanrangiwi makkedaé iyaro rotié akkarobangeng inanré untu' Puwangnge. Tungke' esso Saba'é harusu'i engka roti iya ripatalaé ri laleng Kémana Puwangnge. Iyanaro kewajibanna bangsa Israélié untu' mannennungeng. Iyaro rotié untu' Harun sibawa wija-wijanna. Harusu'i mennang nanré ri onrong iya mapaccingngé, nasaba iyaro rotié sinrupai bagiyang iya kaminang mapaccingngé polé ri akkarobangeng inanré iya riyakkasuwiyangengngé lao ri Puwangnge untu' sining imangngé. sibawa tahangngi nanatajeng towi apettunna Puwangnge passalenna aga iya harusu'é mennang napogau' lao ri aléna. Makkedani Puwangnge lao ri Musa, “Tiwii iyaro tauwé massu ri akkémangngé. Tungke' tau iya puraé méngkalingai mattanro, harusu'i palénne'i limanna ri tompo ulunna tauwéro untu' mabbéré asabbing makkedaé pasalai. Nainappa sininna umma'é harusu'i genrungngi batu gangka maté. Purairo appallebbangenni iyaé lao ri Israélié: Nigi-nigi tanroiwi Allataala harusu'i natanggung addimonrinna sibawa rihukkung maté. Nigi-nigi tanroiwi Puwangnge harusu'i rigenrung batu gangka maté risininna jema'é. Iyaro hukkungngé takkennai untu' tau Israélié iyaré'ga untu' tau laing iya mattette'énna ri Israél. Nigi-nigi mpunoi tau laingngé harusu'i rihukkung maté. Nigi-nigi mpunoi olokolo'na tau laingngé harusu'i nasulléi. Tettongenna iyanaritu ‘nyawa risulléi nyawa’. Rékko séddié tau mébbui tau laingngé malo, agi-agi iya puraé napogau', harusu towi rigaukengngi. Rékko napoloi bukué, harusu towi ripolo bukunna. Rékko naébbui tauwé gicco, harusu towi rigicco. Rékko naunrui tau laingngé narapi polo isinna, harusu towi ripolo isinna. Agi-agi iya napogau'é angkanna tau laingngé sala-salang, harusu towi rigaukeng selaku pakkabale. Nigi-nigi mpunoi olokolo'é, harusu'i nasulléi, iyakiya nigi-nigi mpunoi tauwé harusu'i rihukkung maté. Iyaro hukkungngé takkennai untu' iko maneng sibawato untu' tau laing iya mattette'é ri yelle'mu, nasaba Iyya'na Puwang, Allataalamu.” Puranana napalettu Musa iyaro ada-adaé lao ri bangsa Israélié, natiwini mennang massu tau iya puraé tanroiwi Allataalaro ri akkémangngé nainappa nagenrung batu gangka maté. Nasibawang caraéro napogau'ni bangsa Israélié aga iya puraé napparéntang Puwangnge lao ri Musa. Ri tompo'na Bulu Sinai mabbicarai Puwangnge lao ri Musa sibawa suroi palettu'i iyaé sining peraturangngé lao ri bangsa Israélié. Rékko muttama'ko ri wanuwa iya maéloé nawérékko Puwangnge, harusu'ko pakalebbii Puwangnge sibawa caraéwé: Tungke' taung mapitué dé' naweddikko jamai tanaé untu' mallaonruma. Ri lalenna enneng taunna harusu'ko tanengiwi sining dare'mu, sangkiwi sining palla anggoro'mu sibawa paddeppungengngi wassélé tanamu. Iyakiya tungke' taung mapitué ripallaingngi untu' Puwangnge. Jaji bujuru iyaro taungngé harusu'i rileppessang iyaro tanaé sibawa dé' narijama. Aja' naritanengi sining dare'é sibawa aja' mulébongngi anggoro'mu. Mala gandong iya natuwongngé aléna iyaré'ga anggoro polé ri pong anggoro'mu iya dé'é narilébong, dé' nawedding mupaddeppungeng sibawa mutaro, saba' iyaro taungngé iyanaritu taung appésaungeng untu' tanaé. Namuni makkuwaro, iyaro tanaé mabbéré towi matu wassélé untu' mancaji inanrému, ata-atammu, sining tau mupagajiyé, sibawa sining tau laing iya muéwaé sionrong. Makkuwatoro sining olokolo muparakaiyé sibawa sining olokolo liyaé ri wanuwammu. Sininna napowassélé'é iyaro tanaé wedding riyanré. Bilangngi wékkapitu pituttaung, singngéga patappulo aséra taung. Nainappa tanggala seppulo uleng pitu, iyanaritu esso paddampengeng dosa, suroi tauwé paoniwi tarompé'é kégi-kégi risininna wanuwaé. Harusu'ko pallaingngi taung iya malimappuloéro, sibawa mappallebbangengngi amaradékangngé lao ri sininna pabbanuwana wanuwaé. Ri lalenna taungngéro sininna waramparang iya puraé ribalu harusu'i ripalisu ri punnana iya mammulangngé iyaré'ga wija-wijanna. Niga ribalu selaku ata harusu'i ripalisu ri kaluwargana. Aja' mutanengiwi dare'mu. Gandong iya tuwongngéngngi aléna iyaré'ga buwa anggoro'é ri palla anggoro'mu iya dé'é narilébong dé' nawedding ripaddeppungeng sibawa ritaro. Iyaro taungngé sinrupai taung mapaccing ri iko. Banna weddikko manré aga iya natuwongngé aléna ri dare'mu. Ri laleng taungngéro sininna tana iya puraé ribalu harusu'i ripalisu lao ri punnana iya mammulangngé. Jaji rékko mabbalu tanako lao ri pada-padammu tau Israél, iyaré'ga melli tana polé ri aléna, aja' musipabbelling sibawa dé' namalempu. Iyaro ellinna tanaé harusu'i ripattentu situru jumellana taung ittana iyaro tanaé wedding mabbéré wassélé narapi Taung Appalisung iya rappina. Rékko maégai jumella taunna, masuli ellinna iyaro tanaé. Iyakiya rékko céddé jumella taunna, harusu'i masémpo ellinna, nasaba iya ribalu'é iyanaritu jumella éngngalanna. Aja' mubengnguwangngi pada-padammu tau Israél, iyakiya sitinajako métau ri Puwang Allataalamu. Turusiwi sininna hukkunna sibawa paréntana Puwangnge, kuwammengngi mutuwo sibawa amang ri wanuwaéro. Tanana wanuwaéro nabbéréyangngi matu wassélé'na angkanna mappunnaiko inanré iya genne'é enrengngé monro kuwaro sibawa saléwangeng. Iyyakiya naullé engka makkutana agana matu riyanré puppu taung mapitué wettunna dé' naritanengi tanaé sibawa dé' nariitté wassélé'na. Ri laleng taung maennengngé nabarakkakiwi matu Puwangnge tanaé angkanna wassélé'na genne'i untu' tellut-taung. Na wettunna mutanengi dare'mu ri lalenna taung maaruwaé, éngngalammu polé ri taung maennengngé engka mupa untu' muwanré. Mala pappassadiyang inanrému genne'i matu narapi wettunna paddeppungengngi wassélé taungngéro. Dé' nawedding mubalu matteru tanamu, saba' iyaro tanaé tenniya appunnangemmu; sangadinna appunnangennai Allataala. Iko banna pada-padako tau laing iya lolongengngé pappalalo untu' pakéi iyaro tanaé. Rékko sikonrongngé tana ribalu, harusu'i riakui ha'na punnana iya mammulangngé untu' passui iyaro tanaé. Rékko séddié tau Israél mancaji kasiyasiwi angkanna tarapassai nabalu tanana, sumpulolona iya kaminang macawé'é waji'i passui iyaro tanaé. Rékko dé' gaga tau untu' passui, iyakiya rimunri iyaro punnana mampuni sibawa mappunnaini genne dowi untu' passui tanana, harusu'i nawaja lao ri tau iya puraé melliwi tanana singngangke wassélé tanaéro ri lalenna taut-taung rappina lettu ri Taung Appalisung iya mangoloé. Nanallalengiro nanalolongenni paimeng tana appunnangenna. Iyakiya rékko dé' namampu passui tanana, tau iya melliyéngngi tette'i nakuwasai tanaéro narapi Taung Appalisung rappina. Ri laleng taungngéro iyaro tanaé harusu'i ripalisu ri punnana iya mammulangngé. Rékko séddié tau balu'i séddié bola ri laleng kota iya nattulilingiyé témbo', mappunnaiwi ha' passui bolana ri laleng wettu si taungngé ribilangngi polé ri tanggala nabalu'na. Iyakiya rékko iyaro bolaé dé' napassui ri laleng wettu sitaungngé, teddénni ha'na untu' passui. Iyaro bolaé tette'i appunnangenna tau melliyéngngi sibawa wija-wijanna. Ri laleng Taung Appalisungngé, iyaro bolaé dé' naripalisu. Untu' bolaé ri désa iya dé'é nattulingiwi témbo' takkennai peraturang iya padaé pada-pada untu' tanaé: punnana iya mammulangngé mappunnai ha' untu' passui sibawa iyaro bolaé harusu'i ripassu ri laleng Taung Appalisungngé. Iyakiya tau Léwié mappunnai ha' untu' uppa-uppanna namaélo passui waramparanna mennang ri kota-kota iya ripattentué untu' mennang. Rékko séddié tau Léwi balu'i bolana risala séddinna kotaéro, nadé' napassui, iyaro bolaé harusu'i ripalisu ri aléna ri laleng Taung Appalisungngé. Saba' bolana tau Léwié ri kota-kotana mennang iyanaritu appunnangennai mennang iya mattette'é ri yelle'na bangsa Israélié. Iyakiya padang wellaé ri seddéna kota-kotana suku Léwié dé' nawedding ribalu. Iyaro appunnangennai tau Léwié untu' mannennungeng. Rékko tau sibangsamu iya monroé ri yelle'mu mancaji kasiyasiwi sibawa dé' naulléi balancaiwi aléna, harusu'ko sokongngi pada-pada séddié tau laing iyaré'ga tau polé-polé, kuwammengngi naulléi tuwo matteru ri yelle'mu. Iyanaro paréntana Puwang Allataalamu, iya puraé tiwiko massu polé ri Maséré untu' mabbéréyangngi wanuwa Kanaan lao ri iko, kuwammengngi Namancaji Allataalamu. Rékko tau sibangsamu iya monroé ri yelle'mu mancaji kasiyasiwi angkanna nabalu'i aléna selaku ata ri iko, iyaro tauwé dé' nawedding musuro pogau'i pallaunna séddié ata. Harusu'i monro ri iko selaku séddi tau ripagaji sibawa majjamangekko narapi Taung Appalisungngé. Iyaro wettué aléna sibawa ana'-ana'na weddinni nasalai bolamu sibawa lisu ri kaluwargana enrengngé ri tanana néné-nénéna. Tau Israélié iyanaritu ata-atanna Puwangnge; aléna ritu tiwii mennang massu polé ri Maséré, namakkuwannanaro dé' nawedding mennang ribalu selaku ata. Jaji tau Israél iya balu'éngngi aléna riiko dé' nawedding mugaukeng sibawa makassara. Sitinajako métau ri Puwang Allataalamu. Rékko mapparelluwakko ata, weddikko melliwi polé ri bangsa-bangsa iya monroé ri seddému. Wedding tokko melliwi ana'na tau laing iya mattette'é riyelle'mu. Ana'-ana'na tau laing iya jajiyé ri wanuwammu wedding mancaji appunnangemmu sibawa wedding towi muwappammanareng lao ri ana'-ana'mu untu' mancaji atanna mennang gangka maté. Iyakiya pada-padammu tau Israél dé' nawedding mugaukeng sibawa makassara. Rékko séddié tau laing iya monroé ri tengnga-tengngamu mancaji sugii, naengka pada-padammu tau Israél iya mancaji kasiyasié angkanna nabalu'i aléna selaku ata lao ri tau laingngéro iyaréga lao ri kaluwarganna, iyaro tau Israélié tette'i mappunnai ha' untu' passui. Séddi polé ri silessurenna iya worowané, iyaré'ga amauréna, iyaré'ga sapposisenna iyaré'ga séddi tau laing polé ri sumpulolona macawéé, wedding passui. Iyaré'ga narékko ri munri mampui, weddingngi napassu aléna. Iyaro ataé harusu'i barunding sibawa tau iya puraé melliwi. Harusu'i mennang bilangngi jumella taunna sipongenna nabalu aléna selaku ata narapi Taung Appalisung paimenna, nainappa napattentu angke'na pappassuna. Iyaro angke'na harusu'i ripattentu situru arrékéngeng gaji iya riwéréngngéngngi tau ripagajiyé. samanna purani mappallaung selaku tau ripagaji pattaungengngé. Dé' nawedding Puwanna gaukengngi sibawa makassara. Rékko dé' nawedding ripassu sibawa sala séddinna caraéro, aléna sibawa ana'-ana'na harusu ripamaradéka ri Taung Appalisung iya paimengngé. Séddié tau Israél dé' nawedding mancaji ata gangka maté nasaba bangsa Israélié iyanaritu ata-atannai Puwangnge. Puwangnge ritu tiwii mennang massu polé ri Maséré. Aléna ritu Puwang, Allataalana mennang. Makkedai Puwangnge, “Aja' muwébbu barahala iyaré'ga patettong dato'-dato' iyaré'ga alliri batu iya risobbi'é untu' risompa. Iyya'na Puwang Allataalamu. Pakarajai esso-esso Saba'é sibawa esso-esso maraja agama laingngé sibawa pakalebbii onrong iya ripallaingngé untu' sompa-Ka. Iyya'na Puwang. Rékko tuwoko situru sining peraturak-Ku sibawa turusiwi sining parénta-Ku, maélo-Ka pateppai bosié ri wettunna, angkanna mabbéréi wassélé tanaé sibawa mabbuwai ajukajungngé. Maonai matu wassélé tanamu, angkanna rékko narapini wettunna untu' maccéppu buwa anggoro, méngngala mupo gandong. Sibawa rékko narapini wettunna untu' mattaneng gandong, maccéppu mupo buwa anggoro. Mappunnaiko matu inanré iya genne'é sibawa tuwo saléwangeng ri wanuwammu. Maélo-Ka jagaiwi amangenna wanuwammu angkanna weddikko matinro sibawa tennang enrengngé temmétau muwi lao ri niga. Sining olokolo masekkangngé maélo-Ka pallennye'i polé ri wanuwaéro, sibawa dé'na matu gaga musu ri wanuwammu. Mulléi matu caui sining balimmu; na limamo tau namuwulléi caui sératu tau, sibawa sératumo tau namulléi caui seppulo sebbu tau. Maélo-Ka barakkakiko sibawa mpérékko maéga ana' eppo. Aga iya puraé Ujancingekko, pasti Urupaiwi. Maonai matu wassélé tanamu, angkanna genne untu' sitaung. Mala tarapassako passui alebbinna polé ri éngngalang iya labe'é kuwammengngi engka onrong untu' taroi éngngalang iya barué. Maélo-Ka monro ri yelle'mu ri laleng Kéma-Ku, sibawa dé' usampéyakko matu. Maélo-Ka sibawakko; maélo-Ka mancaji Puwang Allataalamu na iko mancaji umma'-Ku. Iyya, Puwang Allataalamu, iya tiwiékko massu polé ri Maséré kuwammengngi dé' mumancaji ata. Akuwasang iya tenre'ékko purani Upolo, na Upancajiko tau maradéka.” Makkedai Puwangnge, “Rékko dé' muwéngkalinga-Ka sibawa dé' mupogau'i parénta-Ku, rékko muwajjalékkaiwi assijancingeng iya Uwébbué sibawa iko enrengngé dé mumaélo turusiwi sining Upattette'é sibawa sining peraturak-Ku, maélo-Ka hukkukko. Maélo-Ka papoléngekko abala ri yasé'mu, lasa sibawa semmeng iya dé'é nawedding ripajjappa, angkanna mancaji butai matanna sibawa tuwo maddékéréké. Mallaonrumako matu iyakiya dé' muwanréi wassélé'na, nasaba poléi matu sining balimmu cauko sibawa paccappui aga iya mutanengngé. Uhukkukko matu, angkammu ricau risining balimmu sibawa rikuwasai risining tau iya benciyékko. Métau senna'ko matu angkammu lari, namuni dé'gaga mallellung. Rékko purani mupéneddingi sininna pahukkungengngéro dé'topa mumapato lao ri Iyya, Utambaiwi matu pahukkungek-Ku leppi wékkapitu. Matempo senna'ko, iyakiya maélo-Ka patunru'ko. Dé' nateppa matu bosié, angkanna mancaji marakkoi tanamu sibawa matedde pada-pada bessié. Sininna résomu dé' gaga gunana, saba' tanamu dé' nabbéré wassélé sibawa tanet-tanemmu dé' nabbuwa matu. Rékko matteru mupo méwa-Ka sibawa dé' mumaélo mapato lao ri Iyya, maélo-Ka tambaiwi pahukkungek-Ku leppi wékkapitu. Maélo-Ka papoléi olokolo masekkangngé ri tengnga-tengngamu. Iyaro sining olokolo'é naluruiwi matu ana'-ana'mu, naunoi olokolo piyaramu sibawa paccapuko, angkanna mancaji céddé senna jumellamu, sibawa sining lalengngé ri wanuwammu mancaji masino-sinoi. Rékko purani mupéneddingi sininna pahukkungengngéro dé'topa muwéngkalingaka, iyakiya matteru mupo méwaka, Maélo-Ka majara'ko sibawa hukkukko wékkapitu lebbi tane naiya pura labe'é. Maélo-Ka paompo musu ri tengnga-tengngamu untu' hukkukko nasaba purai muwajjalékkai assijancingek-Ku sibawa iko. Sibawa rékko maddeppungekko ri kotamu untu' sappa allinrungeng, maélo-Ka papolé lasa iya dé'é nawedding ripajjappa, angkanna manyarako lao ri balimmu. Acappurekko matu inanré, angkanna seppulo makkunrai banna mapparelluwangngi séddi bawang onrong attunung untu' mattunu roti iya engkaé ri mennang. Iyanaro inanré riyoloi matu, napuramuna manréi, malupu mupi pappéneddimmu. Rékko purani mupéneddingi sininna pahukkungengngéro matteru mupo méwa-Ka, sibawa dé' mumaélo mapato lao ri Iyya, nasibawang cai maélo-Ka majara'ko, sibawa hukkukko wékkapitu lebbi tane naiya labe'é. Makkadérekko matu, angkanna muwanréi ana'-ana'mu muto. Maélo-Ka mancuru'i sining onrong assompammu ri tompo'na bulu-bulué, ruttungngi sining mézbamu onrong mattunu dupa, sibawa maggenrungengngi sining bakkému ri yasé'na sining abbarahalammu iya maruttungngénnaro. Nasibawang pappénedding maja Upinrai kota-kotamu mancaji goppo-goppo ruttungeng, sining onrong assompammu Uwancuru'i sibawa dé' Utarimai sining akkarobammu. Maélo-Ka pabbinasa sisengngi wanuwammu, angkanna sining bali iya tudangiyéngngi tasséleng mitai héba'na iyaro ancurukengngé. Maélo-Ka paompo musu ri wanuwammu sibawa passara-sarakko ri wanuwa-wanuwa laingngé. Kaboi matu sining dare'mu, sibawa rileppessangngi kota-kotamu mancaji goppo ruttungeng. Sining taummu iya engkaé ri laleng appalirenna wanuwa laingngé, Uwébbui matu métau senna, angkanna muwi oni daud-daung iya nairié anging palari towi mennang. Lariko matu samanna rilellung ri laleng ammusurengngé, namumenrung namuni dé' gaga bali ri seddému. Lariko matu sibawa tabbuttu séddié lao ri laingngé, namuni dé' gaga mallellung. Sibawa dé' matu mulléi méwai sining balimmu. Matéko matu ri laleng appalirengngé, ripabbinasa ri wanuwanna sining balimmu. Céddé bawang iya polé ri iko iya tuwoé mupa ri wanuwanna balimmu maddarékéi matu nasaba dosamu muto sibawa dosana toriyolomu. Iyakiya nangakuiwi matu wija-wijammu dosana mennang sibawa dosana néné-nénéna iya puraé méwa-Ka sibawa maronta lao ri Iyya, angkak-Ku tinda'ka méwai mennang sibawa rukkai mennang ri laleng appalirengngé ri wanuwanna sining balinna mennang. Accappurenna, rékko tunru'ni wija-wijammu sibawa purana napéneddingi pahukkungengngé nasaba dosa sibawa ronta'na mennang, Maélo-Ka méngngerangngi assijancik-Ku sibawa Yakub, Ishak sibawa Abraham. Maélo-Ka pakabaruiwi jancik-Ku untu' mpéréngngi tanaéro lao ri bangsa-Ku. Iyakiya iyaro tanaé harusu'i lebbi riyolo napakullang pabbanuwana, kuwammengngi tonget-tongengngi weddingngi mappésau. Naharusu'i naola maneng umma'-Ku sininna pahukkungeng iya Upateppaé ri yasé'na mennang nasaba dé'é namaélo turusiwi sining peraturak-Ku sibawa sining parénta-Ku. Iyakiya ri wetu engkana mupa mennang ri wanuwanna balié, dé' Usalaiwi mennang iyaré'ga Upabbinasa sisengngi. Saba' rékko Upabbinasai mennang, bettuwanna Upettuini assijancik-Ku sibawa mennang, padahal Iyya'na Puwang, Allataalana mennang. Maéloka pakabarui assijancing iya Uwébbué sibawa toriyolona mennang, wettukku Uwappaitang akuwasak-Ku lao risininna bangsaé sibawa tiwii umma'-Ku massu polé ri Maséré, kuwammengngi Iyya, Puwang, mancaji Allataalana mennang.” Iyanaro hukkung-hukkung sibawa parénta-parénta iya nabbéréyangngé Puwangnge, ri tompo'na Bulu Sinai lao ri Musa untu' bangsa Israélié. Puwangnge mabbéré lao ri Musa iyaé peraturangngé untu' bangsa Israélié. Rékko séddié tau riyakkasuwiyangeng lao ri Puwangnge untu' mappaleppe séuwa tinja iya dé'é padanna, iyaro tauwé weddingngi ricéra sibawa sijumella dowi. Rékko tau iya mattinja'é kasiyasi senna'i untu' mpajai iya ripattentué, harusu'i natiwi tau iya puraé riyakkasuwiyangeng lao ri Puwang -ngéro lao ri imangngé. Harusu'i imangngé pattentui elli iya lebbi mariyawaé situru amampungenna tauwéro. Iyakiya rékko iyaro tinja'é iyanaritu olokolo harang iya dé'é nawedding ritarima selaku pakkasuwiyang lao ri Puwangnge, tau iya mattinja'é harusu'i natiwi olokolo'é lao ri imangngé. Imangngé pattentui matu ellinna situru keadaanna iyaro olokolo'é. Na elli iya pura ripattentué iyanaritu elli maté. Rékko iyaro tauwé macinnai passui olokolo'na, harusu'i nawaja ellinna ritambai duwappulo paresséng. Rékko séddié tau makkasuwiyangengngi bolana lao ri Puwangnge, imangngé pattentui ellinna manuru keadaanna iyaro bolaé. Elli iya pura ripattentué iyanaritu elli maté. Rékko iyaro tauwé maéloi passui bolana, harusu'i nawaja ellinna ritambai duwappulo paresséng. Rékko séddié tau makkasuwiyang sibagiyang polé ri tanana lao ri Puwangnge, harusu'i ripattentu ellinna situru jumella biné iya riyapparelluwangngé untu' tanengiwi iyaro tanaé. Untu' tungke' duwappulo kilo gandong ellinna seppulo dowi péra'. Rékko iyaro tanaé riyakkasuwiyangengngi mappammulai Taung Appalisungngé, harusu'i riwaja maneng ellinna. Rékko iyaro tanaé riyakkasuwiyangengngi puranana Taung Appalisung, imangngé harusu tasséré'i elli kontanna situru jumella taung iya engkaé mupa narapi Taung Appalisung paimenna, nainappa napattentu elli iya lebbi masémpoé. Rékko tau iya makkasuwiyangngéngngi iyaro dare'é macinnai passui, harusu'i nawaja ellinna ritambai duwappulo paresséng. Rékko nabalu'i iyaro dare'é sibawa dé' nacéra'i lebbi riyolo polé ri Puwangnge, dé'na nappunnai ha' passui iyaro dare'é. Ri laleng Tuang Appalisung paimenna, iyaro dare'é mancaji appunnangennai Puwangnge untu' mannennungeng, sibawa riwéréngngi sining imangngé. Rékko séddié tau makkasuwiyang lao ri Puwangnge sikonrong dare iya puraé naelli, harusu'i imangngé tasséré'i ellinna situru taung iya engkaé mupa narapi Taung Appalisung paimenna. Nainappa iyaro tauwé harusu'i mpajai ellinna ri essoéttoro. Iyaro dowié mancaji appunnangennai Puwangnge. Ri laleng Taung Appalisungngé, iyaro dare'é harusu'i ripalisu lao ri punnana mammulangngé iyaré'ga lao ri, wija-wijanna. Sininna ellié harusu'i ripattentu manuru elli iya takkennaé ri Kémana Puwangnge. Olokolo iya bunge' jajiyé iyanaritu appunnangenna Puwangnge, jaji dé' nawedding riyakkasuwiyangeng untu' akkarobang cenning ati. Ana' saping, ana' bimbala iyaré'ga ana' bémbé iya bunge' jajiyé iyanaritu appunnangenna Puwangnge. Iyakiya olokolo harang iya bunge' jajiyé wedding ricéra' situru angke iya takkennaé ri Kémana Puwangnge, ritambai duwappulo paresséng. Rékko dé' naricéra', iyaro olokolo'é wedding ribalu lao ri tau laingngé situru elli iya takkennaé ri Kémana Puwangnge. Dé' muwi séddi tau wedding balu'i iyaré'ga passui aga iya puraé ripallaing temmakkésara' lao ri Puwangnge, muwi iyaro rupa tau, olokolo iyaré'ga tana. Iyaro appunnangenna Puwangnge untu' mannennungeng. Mala rupa tau iya puraé ripallaing lao ri Puwangnge untu' ripabbinasa dé' nawedding ripassu; harusu'i riyuno. Tawa seppulona polé risininna wassélé tanaé, muwi gandong iyaré'ga buwa-buwa, iyanaritu untu' Puwangnge. Rékko séddié tau maéloi passui sibagiyang polé ri wassélé'éro, harusu'i nawaja ellinna iya puraé ripattentu ritambai duwappulo paresséng. Séddi polé ri tungke' seppulo kajunna olokolo piyaraé iyanaritu appunnangenna Puwangnge. Rékko ribilangngi iyaro olokolo piyaraé, tungke' kajunna olokolo piyara iya maseppuloé mancajiwi appunnangenna Puwangnge. Iyaro punna olokolo'é dé' nawedding napilé-pilé kéga makessing, kéga maja. Dé'to wedding nasélé. Rékko to naséléi, iya duwa olokolo'éro mancajiwi appunnangenna Puwangnge sibawa dé' nawedding ripassu. Iyanaro parénta-parénta iya nabbéréyangngé Puwangnge ri tompo'na Bulu Sinai lao ri Musa untu' bangsa Israélié. Ri tanggala séddinna uleng duwa ri laleng taung maduwaé nasalainna bangsa Israélié Maséré, mabbicarani Puwangnge lao ri Musa ri laleng Kémana Puwangnge ri padang kessi Sinai. Adan-Na, “Iko sibawa Harun harusu pakangka abbilangeng risininna umma Israélié, situru appang sibawa kaluwargana tungke'-tungke'. Ebbuni daftar asenna sininna tau worowané, iya makkéumuru duwappuloé taung liyasé iya weddingngé mancaji tentara. Harusu'i mennang ridaftar situru pasukanna tungke'-tungke'. Polé ri tungke' suku, éllauno séddi pamimping appang untu' duwakko.” Nasibawang bantuwanna iya seppulo duwa tauwéro, Musa sibawa Harun suroi sininna umma'é maddeppungeng ri tanggala séddinna uleng duwa, nainappa risusung assossorenna mennang situru sining appanna iya engkaé ri laleng tungke' sukunna mennang. Asenna sining tau worowané iya makkéumuru'é duwappulo taung liyasé ricata'i sibawa ribilangngi, pada-pada iya napparéntangngé Puwangnge. Iya manennaro napogau'i Musa ri padang kessi Sinai. Sining tau Léwié dé' nariyoki silaong suku-suku laingngé, nasaba purai makkeda Puwangnge lao ri Musa, “Wettummu mokii asenna sining tau iya weddingngé mancaji tentara, aja'na muwokii suku Léwié. Suroi mennang murusu'i Kéma-Ku sibawa sininna paréwanna. Jamanna mennang iyanaritu méssangngi Kéma-Ku sibawa paréwanna enrengngé murusu'i. Harusu'i mennang makkéma mattulilingiwi. Rékko létté'ko, iyaro sining tau Léwié harusu'i nabongkara Kéma-Ku, nainappa napasang paimeng ri tungke' onrong akkémang iya barué. Ri lainnaé mennang, nigi-nigi maddeppériwi iyaro Kémaé harusu'i rihukkung maté. Sining tau Israél laingngé harusu'i patettongngi kémana mennang makkonro-konrong, tungke' tau ri laleng konronna tungke'-tungke' mattulilingiwi bandérana mattungke'-tungke'. Iyakiya sining tau Léwié harusu'i makkéma mattulilingiwi Kéma-Ku. Harusu'i mennang jagaiwi kuwammengngi nadé' tau maddeppériwi, angkanna nassabari-Ka macai sibawa hukkungngi umma Israélié.” Nanapogau'ni tau Israélié sininna iya napparéntangngé Puwangnge lao ri Musa. Makkedai Puwangnge lao ri Musa sibawa Harun: “Wettunna tau Israélié patettong akkémang, tungke' tau harusu'i makkéma mattulilingiwi bandéra passéddiyanna mennang sibawa lambang appanna muto. Sininna akkémangngéro harusu'i ripatettong mattulilingiwi Kéma-Ku, iyakiya mabéla-béla céddé polé ri aléna.” Purairo, ri tengnga-tengngana sininna tentarana Israélié, joppani suku Léwié sibawa mpuléi Kémana Puwangnge. Pada-pada mennang makkéma, makkuwatoro mennang joppa, tungke'-tungke' ri onronna situru sining bandérana mennang. Jumellana tau Israél iya naokié ri laleng passéddiyanna situru pasukanna tungke'-tungke', iyanaritu 603.550 tau. Pada-pada napparéntangngé Puwangnge lao ri Musa, tau Léwié dé' naridaftar silaong sining tau Israél iya laingngé. Napogau'ni tau Israélié sininna iya napparéntangngé Puwangnge lao ri Musa. Tungke'-tungke' makkéma mattulilingiwi bandérana muto, sibawa joppa situru appanna enrengngé kaluwargana. Iyanaé kaluwargana Harun sibawa Musa wettunna Puwangnge mabbicara lao ri Musa ri tompo'na Bulu Sinai. Harun mappunnai eppa ana' worowané: Nadab iya macowaé, nainappa Abihu, Eléazar sibawa Itamar. Rilanti'i mennang mancaji imang sibawa upacara tirikiwi minnya tompo ulunna. Iyakiya Nadab sibawa Abihu matéi ri padang kessi Sinai, wettunna mennang mangolo ri Puwangnge sibawa api iya dé'é naadélé. Iya duwa dé' nappunnai ana'. Jaji ri wettu tuwona mupa Harun, Eléazar sibawa Itamar majjamai selaku imang. Makkedai Puwangnge lao ri Musa, “Suroi suku Léwié polé mangolo, sibawa jello'i mennang mancaji sining pattumaninna Harun. Majjamai mennang ri Kéma-Ku sibawa harusu'i tumaningiwi sining imangngé enrengngé sininna umma'é sibawa jama-jamanna mennang ri Kéma-Kuro. Jamanna mennang iyanaritu murusu'i sininna passakke'na Kéma-Ku sibawa mappallaung ri Kéma-Kuro selaku passulléna sining tau Israélié. Polé ri bangsa Israélié, banna suku Léwié iya Utugaskangngé mancaji pattumani tette untu' Harun sibawa wija-wijanna. Iyakiya Harun sibawa ana'-ana'na harusu'i muwakka untu' pajoppai jamangngé selaku imang; rilainnaé mennang, nigi-nigi cobai pogau'i iyaro jamangngé harusu'i rihukkung maté.” Makkedai Puwangnge lao ri Musa, Ri padang kessi Sinai Puwangnge suroi Musa mébbui daftarna sining tau Léwié situru appang sibawa kaluwargana tungke'-tungke'; tungke' ana'-ana' worowané iya makkéumuru siulengngé liyasé harusu'i riyoki asenna. Nanapogau'ni Musa iyaro paréntana Puwangnge. Appanna Gérson iyanaritu kaluwarga Libni sibawa kaluwarga Siméi. Jumellana tau worowané ri laleng appanna Gérson iya makkéumuru siulengngé liyasé iyanaritu 7.500 tau. Ri laleng murusu'i Kémana Puwangnge, mattanggung jawa'i mennang ri Kémaé sibawa pattongkona, kaing pintu muttama'na, ténda seddéna iya mattulilingiyéngngi Kémaé sibawa mézbaé, enrengngé kaing pallawa sumpang seddé Kémaéro. Mattanggung jawa'i mennang lao ri sininna jama-jamang iya engkaé assisumpungenna sibawa barab-barangngéro. Appanna Kéhat iyanaritu kaluwarga Amram, Yizhar, Hébron sibawa Uziél. Worowané iya makkéumuru'é siuleng liyasé polé ri appangngéro iya manenna jumellana 8.600 tau. Tugasna mennang murusu'i barab-barangngé ri Kémana Puwangnge. Mattanggung jawa'i mennang ri Petti Assijancingngé, méjangngé, ajé lampué, mézba-mézbaé, sining pakkakkasa iya napaké sining imangngé ri Bili' Mapaccingngé, sibawa kaing paddenring iya lawaéngngi Bili' Mapaccingngé. Mattanggung jawa'i mennang risininna jama-jamang iya engkaé assisumpungenna sibawa barab-barangngéro. Kapalana suku Léwié iyanaritu Eléazar, ana' Harun. Najagaiwi sining tau iya majjamaé ri Bili' Mapaccingngé. Appanna Mérari iyanaritu kaluwargana Mahli sibawa kaluwargana Musi. Worowané iya makkéumurué siuleng liyasé polé ri appangngéro iya manenna jumellana 6.200 tau. Zuriél ana' Abihail kapalaiwi iyaro appangngé. Ri laleng akkémangngé, iyaro appangngé malai onrong ri seddé manoranna Kémana Puwangnge. Mattanggung jawa'i mennang ri paréwanna Kémaéro, balo'-balo'na, alliri-allirinna, pallanggana sibawa sininna pakkakkasa'na enrengngé sininna jama-jamang iya engkaé assisumpungenna sibawa barab-barangngéro. Makkuwatoro lao ri alliri-allirié, sining pallanggana, patto-patto'na sibawa sining tulué untu' seddéna ri saliweng. Ri laleng akkémangngé, Musa sibawa Harun nenniya ana'-ana'na harusu'i mala onrong ri yolona Kémana Puwangnge, ri seddé alauna. Mattanggung jawa'i mennang ri upacara assompangngé untu' bangsa Israélié ri Bili' Pommapaccingngé. Ri lainnaé mennang, nigi-nigi cobai pogau'i iyaro jama-jamangngé harusu'i rihukkung maté. Sininna worowané ri laleng suku Léwié iya makkéumuru siulengngé liyasé iya nacata'é Musa situru appanna tungke'-tungke' situru paréntana Puwangnge, iya manenna jumellana 22.000 tau. Napogau'ni Musa aga napparéntang Puwangnge; naokini asenna sininna ana' worowané macowaé iya makkéumuru'é siulengngé liyasé. Iya manenna mennang 22.273 tau jumellana. Nainappa makkeda Puwangnge lao ri Musa, “Pallaingekka sining tau Léwié untu'-Ku selaku passulléna sining ana' worowané macowana Israélié, kuwaéttopa olokolo'na tau Léwié selaku passulléna olokolo'na tau Israélié. Nasaba ana'-ana' worowané macowana Israélié 273 tau lebbi éga polé rijumellana tau Léwié, naiya lebbinnaro harusu'i muwaja. Untu' tungke' ana', harusu'ko wajai lima dowi péra' situru elli iya takkennaé ri Kéma-Ku; abbéréngngi iyaro dowié lao ri Harun sibawa ana'-ana'na.” Napogau'ni Musa iyaro paréntana Puwangnge. Malani 1.365 dowi péra', nanabbéréyangngi lao ri Harun sibawa ana'-ana'na. Puwangnge suroi Musa sibawa Harun bilangngi tau Léwi polé ri appanna Kéhat situru kaluwargana tungke'-tungke', nainappa riyokii asenna sininna tau worowané iya makkéumuru' telluppuloé narapi limappuloé taung, iya mulléngngi pogau'i jamang waji'é ri Kémana Puwangnge. Jamanna mennang iyanaritu murusu'i barab-barang iya pommapaccingngé. Puwangnge mpéréngngi Musa iyaé peraturangngé: Rékko narapini wettunna ribongkara' akkémangngé, Harun sibawa ana'-ana'na harusu'i muttama ri Kémana Puwangnge, panonnoi kaing paddenring ri yolona Petti Assijancingngé, sibawa tongkoi iyaro Pettié sibawa kaingngéro. Puranana, harusu'i mennang tongkoi sibawa silampa bingkulang alusu, nainappa pallebba kaing magawu ri yaséna, nanapasangngi aju pabbuléna iyaro Pettié. Harusu'i mennang pallebba silampa kaing magawu ri yasé'na méjang appatalang roti untu' Puwangnge, na ri yasé'na méjangngéro harusu'i mennang palénne penné loppo, baki onrong dupa, baki onrong pakkasuwiyang, sibawa kendi untu' pakkasuwiyang uwai anggoro. Patala rotié harusu'i tuli engka ri méjangngéro. Harusu'i mennang natongko maneng iyaro sibawa silampa kaing cella, nainappa pallebba silampa bingkulang alusu ri yasé'na, enrengngé pasangngi aju pabbuléna iyaro méjangngé. Harusu'i mennang mala silampa kaing gawu sibawa tongkoi ajé lampué enrengngé lampu-lampunna, pakkakkasa untu' pépaccingiwi sumbu pajjennangengngé sibawa attarimanna, enrengngé sininna onrong minnya zaitungngé. Ajé lampué sibawa sininna pappésukkuna harusu'i nadoko mennang sibawa silampa bingkulang alusu nainappa nataro ri yasé'na onrong abbulérengngé. Purairo harusu'i mennang pallebba silampa kaing gawu ri yasé'na mézba polé ri ulawengngéro, nanatongkoi silampa bingkulang alusu, nainappa napasang aju pabbuléna mézbaéro. Sininna paréwa iya ripaké ri laleng Bili' Mapaccingngé harusu'i mennang naala enrengngé nadoko sibawa silampa kaing gawu. Nainappa harusu'i mennang natongko silampa bingkulang alusu, nanataroi ri yasé'na ulérengngé. Harusu'i mennang pépaccingiwi iyaro mézbaé polé ri awué, nainappa napallebbakeng silampa kaing collipao ri yasé'na. Na ri yasé'naro harusu'i mennang napalénne sininna paréwa iya ripaké ri laleng assompangngé ri mézbaéro: onrong apié, sondo'é, sodé'é sibawa katowangngé. Nainappa harusu'i mennang natongko manenro sibawa silampa bingkulang alusu sibawa pasangngi aju pabbuléna. Puwangnge suroi Musa bilangngi tau Léwi polé ri appanna Gérson situru kaluwargana tungke'-tungke'. Harusu'i naoki Musa sininna tau worowané iya makkéumuru telluppuloé narapi limappulo taung iya mullééngngi pogau' jamang waji'é ri Kémana Puwangnge. Ritugaskangngi mennang untu' makkai barab-barangngé: Kaing téndana Kémaéro sibawa pattongkona bagiyang ri lalengngé nenniya bagiyang saliwengngé polé ri bingkulang alusu'é, kaingngé ri sumpanna Kémaé, ténda-téndana sibawa sining tuluna untu' seddé Kémaé sibawa mézbaé, kaing ri gerbang seddéna, sibawa sininna paréwanna iya ripaké untu' pasangngi sininna barab-barangngéro. Mattanggung jawa'i mennang lao risininna jama-jamang iya engkaé assisumpungenna sibawa barab-barangngéro. Musa sibawa Harun harusu jagaiwi kuwammengngi jama-jamang iya nabbéréyangngé Harun sibawa ana'-ana'na lao risining tau Gérsongngéro napogau'i, sibawa sininna barang iya harusu'é riyakka, kuwammengngi naakkai. Iyanaro tugasna sining tau Gérsongngé ri laleng Kémaé; iyaro sining jamangngé harusu'i napogau' ri yawa pappimpinna Itamar, ana'na Imang Harun. Puwangnge suroi Musa bilangngi tau Léwi polé ri appanna Mérari situru kaluwargana tungke'-tungke'. Musa harusu mokii asenna sininna tau worowané iya makkéumuru telluppuloé narapi limappulo taung iya mullééngngi pogau'i jama-jamang waji'é ri Kémana Puwangnge. Ritugaskangngi mennang untu' makkai paréwa-paréwanna Kémaéro, balo'-balo'na, alliri-allirinna sibawa pallanggana. Makkuwatoro alliri-alliri seddéna iya mattulilingiyéngngi iyaro Kémaé sibawa pallanggana, patto-patto'na sibawa sining tuluna enrengngé sininna pakkakkasa'na iya riyapparelluwangngé untu' patettongngi. Tungke' tau ritugaskangngi tiwii barab-barang mattentué. Iyanaro sining jamanna appang Mérari; sininna jamanna mennang ri Kémana Puwangnge harusu'i napogau' ri yawa pappimpinna Itamar, ana'na Imang Harun. Nasaba paréntana Puwangnge naolai Musa, tungke' tau riyokii sibawa tungke'-tungke' riwéréng tanggung jawa' lao ri aga iya harusu'é natumaningi iyaré'ga iya harusu'é naéssang. Makkedai Puwangnge lao ri Musa, “Abbéréngngi iyaé paréntaé lao ri tau Israélié: Sininna tau iya nakennaé lasa oli iya mabbahayaé, iyaré'ga malasa katawangngé, iyaré'ga iya puraé géssa uju, harusu'i ripassu polé ri akkémanna tau Israélié. Harusu'i mennang risuro lao, kuwammengngi dé' napanajisi'i akkémangngé, iya Uwonroiyé silaong umma'-Ku.” Napogau'i tau Israélié iyaro paréntaé sibawa passui sininna tau iya pada-padaéro polé ri akkémangngé. Nabbéréyangngi Puwangnge lao ri Musa iyaé sining peraturangngé untu' tau Israélié: Rékko séddié tau dé' namatinulu lao ri Puwangnge sibawa mébbui asalang lao ri tau laingngé, iyaro tauwé harusu'i nangakui dosana enrengngé mpajai paccéra'na sibawa sukku, ritambai duwappulo paresséng, lao ri tau iya naparogiyé. Iyakiya rékko tau iya naparogiyéro maténi nadé' nappunnai sumpulolo macawé'é, iyaro paccéra'é harusu'i riwéréng Puwangnge, sibawa mancajiwi bagiyanna imangngé. Iyaro paccéra'é dé' nauttama bimbala laié untu' upacara palledda dosaé lao ri tau iya pasalaéro. Polé ri agi-agi iya nakkasuwiyangengngé tau Israélié lao ri Puwangnge, pakkasuwiyang ripallaingngé mancajiwi bagiyanna imangngé iya tarimaéngngi iyaro pakkasuwiyangngé. Aga iya nakkasuwiyangengngé séddié tau lao ri Puwangnge, mancaji mutowi bagiyanna iyaro tauwé. Banna aga iya nabbéréyangngé lao riséddié imang, mancajiwi bagiyanna iyaro imangngé. Puwangnge suroi Musa Ri laleng iya duwa gau'éro, iyaro lakkaié harusu'i natiwi bainéna lao ri imangngé. Harusu towi tiwi pakkasuwiyang iya riyapparelluwangngé, iyanaritu séddi kilo labbu gandong. Iyaro labbu'é dé' nawedding ribolo minnya zaitun iyaré'ga riguguri dupa, nasaba maddupai pakkasuwiyang abbaratang sibawa akkattana untu' tanrangiwi engkanna abata-abatanna lakkainna lao ri bainéna. Harusu'i imangngé suroi iyaro makkunraié lao ri yolona mézbaé sibawa tettong mangolo ri Puwangnge. Nainappa imangngé harusu mala séddi mangko' tana sibawa tirikiwi céddé uwai mapaccing ri lalenna. Purairo harusu'i mala céddé awu polé ri témbo'na Kémana Puwangnge sibawa naputtama'i ri laleng uwaiéro. Nainappa harusu'i nalara gemme'na iyaro makkunraié, sibawa nataroi labbu pakkasuwiyang abata-batangngé ri laleng limanna, na aléna imangngé makkatenning uwai mapai iya mappapolé abusungeng. Purairo harusu'i imangngé mattanro sibawa méllauwi iyaro makkunraié situjuiwi. Harusu'i imangngé makkeda, “Rékko dé' mumalaweng, dé' nakennako abusungeng iya napapolé iyaé uwaiéwé. Iyakiya rékko purako malaweng, tennapodo Puwangnge mébbui asemmu mancaji tanro abusungeng ri yelle'na bangsamu. Tennapodo naébbui katawammu cakkikki sibawa babuwamu maggempung. Uwai iya mappapolé abusungengngé muttama'i matu ri laleng babuwamu sibawa mébbui maggempung nenniya pacakkikkii katawammu.” Iyaro makkunraiyé harusu'i mappébali, “Usitujui; tennapodo Puwangnge mébbui makkuwaro.” Nainappa iyaro imangngé harusu mokii iyaro tanroé ri karettasa lulungngé nainappa naledda sibawa uwai mapaiéro. Nasuroni imangngé iyaro makkunraié ménungngi uwai mapai iya mappapolé abusungeng. Rékko riyénungngi, iyaro uwai mappapoléi pappénedding mapeddi. Harusu'i imangngé malai iyaro pakkasuwiyang labbu'é, nanappaitangngi ri yolona Puwangnge, nainappa natiwi ri yasé'na mézbaé. Nainappa harusu'i mala sikemmo labbu selaku tanrang makkedaé sininna iyaro labbu'é purani riyakkasuwiyangeng, nainappa natunu ri yasé'na mézbaé. Paccappurenna iyaro uwai ripainungengngi iyaro makkunraié. Akkalarapanna iyaro makkunraié purai malaweng, iyaro uwai nassabariwi namapeddi senna; maggempungngi babuwana sibawa cakkikki katawanna. Mancaji tanro abusungengngi matu asenna ri yelle'na bangsana. Iyakiya akkalarapanna dé' napasala, dé' nakennai abusungeng sibawa naullé mupa mémmana. Iyaro worowané leppe'i polé ri asalangngé, iyakiya bainéna, rékko manessai pasala, harusu'i natanggung addimonrinna. Puwangnge suroi Musa mabbéréyangngi iyaé sining peraturangngé lao ri tau Israélié. Tungke' tau worowané iyaré'ga makkunrai iya mattinja'é untu' tuwo mallaing untu' Puwangnge selaku tau nazir, Ri laleng wettu attinjakenna dé' nawedding narette gemme'na iyaré'ga maccukkuru. Ri lalenna wettuéro gemme sibawa janggo'na harusu'i naleppessang tuwo malampé. Tassiyoi ri tinja'na narapi cappu wettu appallaingenna aléna untu' Puwangnge. Ri wettu tau nazirna mupa, iyanaritu tau ripallaingngi untu' Puwangnge. Rékko gemme'na séddié tau nazir iya puraé ripallaing mancaji najisi'i nasaba engkai ri seddéna tau iya maté sibawa tennasenna-senna, harusu'i mattajeng pitungngesso ittana; purairo harusu'i nacukkuru gemme'na sibawa janggo'na, nappai mancaji mapaccing. Ri esso iya maaruwaé harusu'i tiwi duwakkaju jangang-jangang iyaré'ga bekku lao ri imangngé ri sumpang Kémana Puwangnge. Manu'-manu' iya sikajué harusu'i nakkasuwiyangeng imangngé untu' akkarobang paddampengeng dosa, na iya sikaju éssi untu' akkarobang ritunu untu' pateddéngngi anajisikenna. Iyatoro essoé harusu'i napallaing paimeng gemme'na lao ri Puwangnge sibawa pakabaruiwi abbéréyang aléna selaku tau nazir. Wettu labe'énna dé' naribilanna nasaba mancaji najisi'ni. Selaku akkarobangeng passullé aroging harusu'i makkasuwiyangeng sikaju ana' bimbala iya makkéumuru' sitaungngé. Rékko leppe'ni tinja'na séddié tau nazir, harusu'i napogau' iyaé upacaraé. Iyaro tauwé harusu'i naantara lao ri sumpang Kémana Puwangnge sibawa tiwi lao ri Puwangnge tellukkaju olokolo iya dé'é gaga sala-salanna: sikaju ana' bimbala lai makkéumuru' sitaung untu' akkarobangeng ritunu, sikaju ana' bimbala komba makkéumuru' sitaung untu' akkarobangeng paddampengeng dosa, sibawa sikaju bimbala lai untu' akkarobangeng pappasidamé. Harusu towi makkasuwiyangeng sibaku roti iya riyébbué dé' napaké ragi, iyanaritu roti mallébu iya riyébbué polé ri labbu'é ricampuru sibawa minnya zaitun, sibawa béppa nipi iya risapuiyé minnya zaitun. Rilainnaéro harusu towi makkasuwiyangeng akkarobangeng ripatala sibawa akkarobangeng énungeng. Harusu'i natiwi maneng imangngé iyaro lao ri yolona Puwangnge, nainappa makkasuwiyangeng akkarobangeng paddampengeng dosa sibawa akkarobangeng ritunu. Nasibawang roti sibakuéro, harusu'i nakkasuwiyangeng iyaro bimbala laié lao ri Puwangnge selaku akkarobangeng pappasidamé. Kuwaéttopa akkarobang ripatalaé sibawa akkarobang énungengngéro harusu'i nakkasuwiyangeng lao ri Puwangnge. Iyaro tau nazir-é harusu'i nacukkuru gemme'na ri sumpang Kémana Puwangnge, sibawa maggenrungengngi ri laleng api onrong akkarobangeng pappasidaméro iya mattengngangngé ritunu. Purairo, rékko purani rinasu poppang yolona bimbala laiéro, harusu'i nala imangngé sibawa palénne'i silaong séddi roti lébu sibawa séddi béppa manipi polé ri bakuéro, ri laleng limanna tau nazir-éro. Nainappa imangngé harusu majjellokengngi iyaro inanré selaku pabbéré ripallaing lao ri Puwangnge; iyanaro bagiyang mapaccing iya mancajiyé bagiyanna imangngé, rilainnaé dadana sibawa poppang bimbala lai iya manuru peraturangngé mancajiwi bagiyanna imangngé. Purapiro nappa tau nazir-é wedding ménung uwai anggoro. Iyanaro peraturanna untu' tau nazir-é; iyakiya rékko séddié tau nazir majjanciyangngi akkarobangeng iya pakacauriyéngngi sara'-sara' tinja'na, harusu'i narupai sibawa sicoco aga iya najjanciyangngéro. Puwangnge suroi Musa palettu'i lao ri Harun sibawa ana'-ana'na makkedaé harusu'i mennang powadai iyaé ada-adaé wettunna mennang barakkakiwi bangsa Israélié: Tennapodo Puwangnge barakkakiko sibawa piyarako. Tennapodo Puwangnge makessing atiwi sibawa makacuwai lao ri iko. Tennapodo Puwangnge mamaséiko sibawa mpérékko adaméngeng. Nanakkeda Puwangnge, “Rékko nateppui mennang asekku selaku barakka lao ri bangsa Israélié, maélo-Ka barakkakiwi mennang.” Puranana Musa napatettong Kémana Puwangnge, narésmikanni iyaro Kémaé nenniya sininna paréwanna sibawa sapui manengngi sibawa minnya upacara. Makkuwatoro naébbu ri mézbaé sibawa sininna paréwanna. Nainappa sining tomariyolona Israélié, iyanaritu sining kapala sukué iya mattanggung jawa'é lao ri abbilangengngé, makkasuwiyang ri yolona Puwangnge enneng padati sibawa seppulo duwa kajunna saping; tungke' duwa tomariyolo massumbangeng séddi padati, sibawa tungke'-tungke' sikaju saping. Purana mennang nakkasuwiyangeng, makkedani Puwangnge lao ri Musa, “Tarimani sining pabbéréro untu' makkai Kéma-Ku; abbéréyang manenni iyaro lao ri tau Léwié situru jamanna mennang.” Nainappa iyaro sining padatié sibawa sining sapingngé nabbéréyang Musa lao ri tau Léwié. Duwa padati sibawa eppa kajunna saping riwéréngngi sining tau Gérsongngé, eppa padati sibawa aruwa kajunna saping lao risining tau Mérarié, situru jama-jamanna iya napogau'é mennang ri yawa pappimpinna Itamar, ana'na Imang Harun. Iyakiya sining tau Kéhat dé' natarima padati iyaré'ga saping polé ri Musa, saba' barab-barang iya mapaccingngé iya mancajiyé tanggung jawa'na mennang, harusu'i naéssang mennang ri salangkanna. Sining tomariyoloé tiwi pakkasuwiyang untu' ramé-raméiwi upacara résmikangngi mézbaé. Wettunna sadiyani mennang untu' tiwii pabbéréna mennang ri yolona mézbaé, makkedai Puwangnge lao ri Musa, “Powadangngi mennang makkedaé tungke' esso ri laleng seppulo duwa essona séddié tau ri yelle'na sining pamimpingngéro harusu'i makkasuwiyangengngi akkarobangenna untu' upacara rirésmikanna mézbaé.” Tungke'-tungke' Musa muttama ri Kémana Puwangnge untu' mabbicara sibawa Puwangnge, naéngkalingai saddanna Puwangnge iya makkedaé lao ri aléna polé ri yasé'na pattongkona Petti Assijancingngé ri yelle'na iya duwa dato'-dato' kérub-é. Makkedai Puwangnge lao ri Musa, “Powadangngi Harun makkedaé wettunna natunui iya pitu lampué ri ajé lampuéro, harusu'i napasang pékkugi rupanna angkanna natappai bagiyang yolona ajé lampuéro.” Napogau'ni Harun aga napparéntang Puwangnge. Napasanni sining lampuéro mangolo ri yolona ajé lampuéro. Iyaro onrong lampué, mappammulai ri coppo'na lettu ri ajéna sibawa bunga-bunga bélo-bélona riyébbui polé ri ulaweng rilanroé, situru conto iya nappaitangngé Puwangnge lao ri Musa. Makkedai Puwangnge lao ri Musa, “Pallaingngi sining tau Léwié polé ri tau Israél iya laingngé sibawa pogau'ni upacara pappépaccingngé untu' mennang sibawa caraéwé: eppikiwi mennang sibawa uwai untu' upacara pappépaccingngé sibawa suroi mennang cukkuru manengngi watakkaléna enrengngé sessa'i pakéyanna mennang. Nanallalengiro mapaccinni mennang. Nainappa musuro mennang mala sikaju saping lai lolo sibawa akkarobangeng ripatalaé polé ri labbu'é ricampuru minnya. Nainappa harusu'ko mala sikaju saping lai laingngé untu' akkarobangeng paddampengeng dosa. Nainappa paddeppungengngi sininna umma Israélié namusuroi tau Léwié tettong ri yolona Kéma-Ku. Harusu'i umma'é palénne'i limanna mennang ri yasé'na ulunna sining tau Léwié, nainappa Harun harusu makkasuwiyangengngi sining tau Léwiéro selaku pakkasuwiyang ripallaing polé ri tau Israélié lao ri Iyya, kuwammengngi weddingngi mennang napogau' assompak-Ku. Nainappa harusu'i tau Léwié palénne'i limanna mennang ri tompo ulunna iya duwa saping laiéro; iya sikajué harusu'i riyakkasuwiyangeng untu' akkarobangeng paddampengeng dosa, naiya sikajuéssi untu' akkarobangeng ritunu. Nasibawang upacaraéro ripépaccingiwi tau Léwié. Pallaingngi sining tau Léwié untu' Iyya sibawa suroi mennang tumaningiwi Harun sibawa ana'-ana'na. Nasibawang upacaraéro mupassarangngi sining tau Léwié polé ri tau Israélié iya laingngé, kuwammengngi namancaji appunnangek-Ku. Puranana napogau' upacara mabbéréyangngi sining tau Léwiéro, mappunnaini mennang ha' untu' majjama ri laleng Kéma-Ku. Purani upancaji mennang passulléna sininna ana' worowané macowana Israélié, jaji mennang iyanaritu ripallaing untu' Iyya. Wettuk-Ku mpunoi sining ana' worowané ri Maséré, ana' worowané macowaé polé ri tungke' kaluwarga Israélié sibawa tungke' olokolo iya bunge' jajiyé purani Upancaji appunnangek-Ku iya ripallaingngé. Makkekkuwangngé selaku passulléna sininna ana' macowana Israélié, Uwalai sining tau Léwié, sibawa iyaro sining tau Léwié Uwabbéréyangngi lao ri Harun sibawa ana'-ana'na, kuwammengngi weddingngi majjama untu' tau Israélié ri laleng Kéma-Ku. Makkuwatoro kuwammengngi naéllauwi mennang paddampengek-Ku untu' bangsa Israélié kuwammengngi iyaro bangsaé dé' nakennai abala rékko poléi macawé senna ri onrong iya mapaccingngéro.” Rimakkuwannanaro Musa, Harun sibawa sininna umma Israélié makkasuwiyangengngi tau Léwié lao ri Puwangnge, pada-pada iya napparéntangngé Puwangnge lao ri Musa. Iyaro sining tau Léwié napogau'ni upacara pappépaccing alé sibawa sessa'i pakéyanna mennang, nainappa Harun makkasuwiyangengngi mennang selaku pabbéré iya ripallaingngé lao ri Puwangnge. Napogau' towi upacara pappépaccingngé untu' mennang. Napogau'ni tau Israélié sininna iya napparéntangngé Puwangnge lao ri Musa passalenna tau Léwié. Nanallalengiro lolongenni tau Léwié ha' untu' majjama ri laleng Kémana Puwangnge ri yawa pappimpinna Harun sibawa ana'-ana'na. Makkedai Puwangnge lao ri Musa, “Tungke' tau Léwi iya makkéumuru'é duwappulo lima taung liyasé, harusu'i napogau' tugasna ri laleng Kéma-Ku, sibawa riumuru limappuloé taung ripaleppe'ni polé ri tugasna. Purairo weddinni nabantu tau Léwi laingngé iya majjamaé ri laleng Kéma-Ku, iyakiya dé'na nappunnai tugas mattette. Makkuwaniro carana matoro'i jama-jamanna sining tau Léwié.” Ri uleng maséddié ri laleng taung maduwaé nasalainnana bangsa Israélié Maséré, mabbicarani Puwangnge lao ri Musa ri padang kessi Sinai. Adanna Puwangnge, Nasuroni Musa bangsa Israélié ramé-raméiwi Paskaé. Naramé-raméini mennang ri padang kessi Sinai ri arawéngngé tanggala seppulo eppa uleng séddi. Napogau' manenni pada-pada iya napparéntangngé Puwangnge lao ri Musa. Iyakiya ri yelle'na mennang engka iya najisi'é nasaba géssai uju, angkanna dé' nawedding ramé-raméiwi Paskaé ri essoéro. Laoni mennanro mangolo ri Musa sibawa Harun namakkeda, “Idi'é najisi'ki nasaba puraki géssa uju. Iyakiya magi naharusu'ki ripassangadi angkanna dé' nawedding makkasuwiyang akkarobang lao ri Puwangnge silaong silessu-silessuretta?” Nappébali Musa, “Tajenni riyolo' narapika tarima panunju polé ri Puwangnge.” Puwangnge suroi Musa makkeda lao ri bangsa Israélié, “Rékko ri yelle'mu iyaré'ga wija-wijammu engka najisi' nasaba purai géssa uju iyaré'ga mattengngangngi ri laleng allalengeng mabélaé, harusu towi ramé-raméiwi Paskaé untu' Puwangnge. Iyakiya iyaro ramé-ramé harusu'i ripakangka siuleng rimunrinna, iyanaritu ri wenni tanggala seppulona eppa ri laleng uleng duwa. Ramé-raméiwi iyaro essoé sibawa manré bimbala Paska silaong roti iya dé'é napaké ragi sibawa ukkaju mapai. Aja' naengka musésa polé ri inanréro narapi pappa bajana éléna, sibawa aja' mupoloi muwi séddi bukunna olokolo iya muwakkasuwiyangengngé lao ri Iyya. Ramé-raméiwi iyaro Paskaé situru sibawa sininna peraturanna. Sibalé'na tau iya dé'é nanajisi' sibawa dé'to narilaleng allalengengngé, iyakiya dé' najampangiwi ramé-raméiwi Paskaé, dé'na Uwangga'i séddi tau polé ri umma'-Ku, nasaba dé' nakkasuwiyangeng akkarobangeng lao ri Iyya ri wettu iya ripattentué. Iyaro tauwé harusu'i natanggung addimonrinna dosana. Rékko ri yelle'mu engka séddi tau laing iya maéloé ramé-raméiwi Paskaé, harusu'i naramé-raméi situru sibawa sininna peraturanna sibawa attettekenna Hukkungngéro takkennai untu' tungke' tau, muwi tau Israél iyaré'ga tau laing.” Tungke' ménré iyaro ellungngé, nabongkara'i tau Israélié akkémanna mennang, nainappa joppa. Na kégi-kégi iyaro ellungngé nonno, ri onrongngéro mennang makkémasi. Nasaba paréntana Puwangnge iyaro bangsa Israélié nabongkara'i kémaé sibawa nasaba paréntanato Puwangnge napasangngi mennang paimeng. Ri wettu engkana mupa iyaro ellungngé ri yasé'na Kémana Puwangnge, tette'i mennang monro ri onrongngéro. Rékko iyaro ellungngé maittai monro ri yasé'na iyaro Kémaé, tunru'i mennang lao ri peraturana Puwangnge sibawa dé' najoppa polé ri onrongngéro. Iyakiya biyasato banna siyagangngaré bawang essona iyaro ellungngé monro ri yasé'na Kémaéro. Muwi maga, paréntana Puwangnge ritu pattentui mennang monro riséuwaé onrong iyaré'ga joppai. Biyasa iyaro ellungngé banna monro mappammulai arawéng narapi élé, na wettunna iyaro ellungngé ménré ri éléé, joppani mennang. Uppanna ménré iyaro ellungngé, muwi esso iyaré'ga wenni, joppai mennang. Ri wettu engkana mupa iyaro ellungngé ri yasé'na Kémana Puwangnge, naullé duwangngesso, siuleng, sitaung iyaré'ga lebbi, sikuto wettunna mennang monro ri onrongngéro. Rékko ménré'ni iyaro ellungngé, nappai mennang joppa. Monroi mennang riséuwaé onrong sibawa joppai lao ri onrong laingngé situru paréntana Puwangnge iya nabbéréyangngé Puwangnge naolai Musa. Makkedai Puwangnge lao ri Musa, “Ebbuno duwa tarompé polé ri péra' rilanroé untu' mobbii pabbanuwaé maddeppungeng iyaré'ga untu' suroi mennang joppa. Rékko riseppung malampéi iya duwa, bettuwanna sininna umma'é harusu'i maddeppungeng mattulilingiko ri yolona sumpanna Kéma-Ku. Iyakiya rékko séddi bawang riseppung, bettuwanna banna sining tomariyoloé harusu maddeppungeng mattulilingiko. Rékko riseppungngi maponco'-ponco' tarompé'é, iyaro tanranna sining suku-suku iya makkémaé ri seddé alau harusu'i joppa. Rékko riseppungngi maponco'-ponco' untu' mabbékkaduwanna, suku-sukué ri seddé yattang harusu joppa. Jaji oni iya maponco'-ponco'é makkébettuwangngi harusu'i joppa umma'é, naiya oni iya malampéé makkébettuwangngi harusu'i maddeppungeng umma'é. Iyaro sining tarompé'é harusu'i naseppung sining imangngé, ana'-ana'na Harun. Iyanaro peraturang iya harusu'é muturusi untu' mannennungeng. Sibawa rékko mammusuko ri wanuwammu untu' méwaiwi alému polé ri bali iya mallurué, seppungngi iyaro sining tarompé'é. Na Iyya, Puwang Allataalamu, mattulung matu sibawa passalama'ko polé risining balimmu. Makkuwatoro ri esso-esso marennummu, iyanaritu ri pésta-pésta Uleng Barué sibawa ramé-ramému iya laingngé, iyaro tarompé'é harusu'i riseppung wettummu makkasuwiyangeng akkarobangeng ritunu sibawa akkarobangeng pappasidamé lao ri Iyya. Na Utulukko matu. Iyya'na Puwang Allataalamu.” Ri laleng taung maduwaé nasalainnana bangsa Israélié Maséré, ri tanggala duwappulona uleng duwa, ménré'ni ellungngé ri yasé'na Kémana Puwangnge. Nanajoppana tau Israélié matturu-turuseng salaiwi padang kessi Sinai, nanappésauna iyaro ellungngé wettunna lettu ri padang kessi Paran. Iyanaro pammulanna mennang joppa nasaba paréntana Puwangnge naolai Musa. Kaminang riyolo joppai tentara iya maccinaungngé ri yawa bandéra passéddiyanna Yéhuda, tassipasukang-tassipasukang: Nahason, ana' Aminadab pimpingngi barisi'na suku Yéhuda, Nétaneel ana' Zuar pimpingngi barisi'na suku Isakhar, sibawa Eliab ana' Hélon pimpingngi barisi'na suku Zébulon. Nainappa ribongkara Kémana Puwangnge, najoppana appanna Gérson sibawa Mérari iya méssangngéngngi Kémaéro. Nainappa joppa tentara iya maccinaungngé ri yawa bandéra passéddiyanna Rubén, tassipasukang-tassipasukang: Elizur ana' Syédéur pimpingngi barisi'na suku Rubén, Sélumiél ana' Zurisyadai pimpingngi barisi'na suku Siméon, sibawa Elyasaf ana' Réhuél pimpingngi barisi'na suku Gad. Purairo joppani sining tau Kéhat-é iya méssangngéngngi sining barab-barang mapaccingngé. Rékko lettu'i mennang ri onrong akkémangngé iya rappinaé, purani ripasassi Kémana Puwangnge. Nainappa mancinrola tentara iya maccinaungngé ri yawa bandéra passéddiyanna suku Efraim, tassipasukang-tassipasukang: Elisama ana' Amihud pimpingngi barisi'na suku Efraingngé, Gamaliél ana' Pédazur pimpingngi barisi'na suku Manasyé, sibawa Abidan ana' Gidéoni pimpingngi barisi'na suku Bényamin. Paccappurenna joppani tentara iya maccinaungngé ri yawa bandéra passéddiyanna suku Dan. Mennang iyanaritu pengawal rimunri sininna passéddiyangngé. Joppani mennang tassipasukang-tassipasukang: Ahiézer ana' Amisyadai pimpingngi barisi'na suku Dan. Pagiél ana' Okhran pimpingngi barisi'na suku Asyer, sibawa Ahira ana' Enan pimpingngi barisi'na suku Naftali. Iyanaro atturu-turusenna mabbari si tau Israélié, tassipasukang-tassipasukang, sises-siseng mennang joppa untu' létté. Makkedai Musa lao ri ipana, Hobab ana' Réhuél tau Midiangngé, “Maéloki joppa lao ri onrong iya manuru'é adanna Puwangnge maélo riwérékki. Puwangnge pura majjanciyangngi iya makessingngé lao ri tau Israélié. Jaji accowéno, maéloki pogau' décéng lao ri iko.” Nappébali Hobab, “Tarima kasi, iyakiya macinnaka lisu ri kampong assalekku.” Nakkéda Musa, “Aja' musalaiki, weddikko mancaji panunju laletta, saba' muwisseng kégaki wedding makkéma ri padang kessi'é. Rékko maccowéko, sininna iya makessingngé iya napogau'é Puwangnge lao ri idi, ripogau' towi matu lao ri iko.” Nasalainnana bangsa Israélié Sinai, bulu naonroiyé Puwangnge, joppani mennang tellungngesso ittana. Petti Assijancinna Puwangnge tuli ritiwii poddiyoloiwi mennang untu' sappa onrong makkéma untu' mennang. Rékko joppai mennang polé ri onrong akkémangngé, ellunna Puwangnge engkai ri yasé'na mennang ri essoé. Sises-siseng iyaro Petti Assijancingngé maélo riyakka makkedai Musa, “Oto'ni, oh Puwang, patassiya-siyai balimmu angkanna tau iya benciyékko lariwi.” Sibawa sises-siseng iyaro Petti Assijancingngé lettu ri onrong appésaungngé, makkedai Musa, “Lisuni' oh Puwang, ri massebbu-sebbu kaluwargana Israélié.” Riséuwaé esso mammulani maddaréké iyaro bangsaé lao ri Puwangnge passalenna sining asukkarakenna mennang. Naéngkalingana iyaro sining addarékéngngé, macaini Puwangnge sibawa papolé api ri yasé'na mennang. Iyaro apié makkalolo'i ri yelle'na mennang sibawa mangurengngi sibagiyang polé ri akkémangngé. Iyaro sining tau'we kelli-kelli'ni méllau tulung lao ri Musa. Nanassempajanna Musa lao ri Puwangnge, napeddé iyaro apié. Nasaba kajajiyangngéro, riyasenni Tabéra iyaro onrongngé, nasaba kuwaniro apinna Puwangnge mallalatung ri tengngana mennang. Ri laleng allalengenna sining tau Israéliéro engkato sining tau laing maccowé. Macinna senna'i mennanro manré juku, na tau Israélié mammula toni maddaréké. Adanna mennang, “Ah, coba engka juku untu' idi! Maréngngerakki ri balé iya riyanré sibawa cuma-cuma ri Maséré, ri bonté'é, maléwaé, préié, lasuna cella'é sibawa lasuna puté! Makkekkuwangngé acappurenni awatangeng nasaba dé'gaga inanré rilainnaé manna bawang iya riitaé.” Tappana iyaro mannaé pada-padai lise'-lise' baiccu'é, maputéi maridi-ridi. Naéngkalingani Musa iyaro sining tau Israélié mannoko-noko, natettotto madeppu-deppungeng ri yolona sumpang kémana mennang. Nanaénré'na caina Puwangnge angkanna messé Musa. Namakkedana lao ri Puwangnge, “Magi Musussai makkuwaka'é? Dé'ga Mumasennang lao ri iyya? Magi Muwérékka tanggung jawa' ri yasé'na sininna tauwéro? Iyya'ga mattampu iyaré'ga jajiyangngi mennanro? Magi Musuroka pada-pada séddié tau pattarana iya mépa'é ana' baiccu, angkakku harusu'ka tarana'i mennang matteru-teru puppu laleng lao ri tana iya Muwajjanciyangngé lao ri toriyolona mennang? Itani, matterui mennang madduppélu méllau juku. Na kégini harusu'ka sappa juku untu' iya manenna tauwéwé? Dé' uwullé méssangngi tanggung jawa' maloppo makkuwaéro; matane' senna iyaro tugas-é untu' aléku! Rékko matterui Puwangnge mébbuka makkuwaé, amaséika; lebbi kessing muwi taunona masitta kuwammengngi dé'na utanggungngi iyaé anrasa-rasangngé.” Nanakkedana Puwangnge lao ri Musa, “Paddeppungengngi polé ri yelle'na bangsa Israélié pituppulo tomacowa-cowa iya riyangakuiyé selaku pamimping bangsa. Tiwii mennang ri yolo-Ku ri laleng Kéma-Ku, namusuroi mennang tettong kuwaro ri benrémmu. Maélo-Ka nonno mabbicara sibawa iko ri onrongngéro, na sibagiyang polé ri akuwasang iya Uwéréngngékko, Uwéréngngi matu mennang. Nanaulléni matu mennang duwakko méssangngi tanggung jawa'é ri yasé'na bangsaéwé, nadé'na naparelluko alé-alému méssangngi. Makkekkuwangngé powadani iyaé lao ri bangsaéro: Pépaccingini alému untu' baja; manréko matu juku. Naéngkalino Puwangnge teri sibawa maddaréké makkedaé macinnako manré juku, sibawa makkedaé lebbi makessingngi totomu wettummu ri Maséré. Makkekkuwangngé Puwangnge maélo mpérékko juku, naweddikko manréi. Muwanréi matu tenniya banna siesso iyaré'ga duwangngesso, iyaré'ga limangngesso iyaréga seppulo essona, mala tenniya banna duwappulo essona, iyakiya siuleng bujuru ittana muwanré, angkanna mancaji malasa sibawa talluwa-luwa. Kajajiyangngi iyaro gau'é nasaba purani musampéyang Puwangnge iya engkaé ri tengnga-tengngamu. Kuwaéttopa nasaba purano teri ri yolo-Na sibawa maddaréké makkedaé musalaini tana Maséré.” Nanakkeda Musa lao ri Puwangnge, “Bangsa iya upimpingngé jumellana 600.000 tau. Pékkugi weddikko makkeda makkedaé maélo-Ko mpéréngngi mennang juku genne'é siuleng ittana? Kégani engka saping sibawa bimbala makkuwaro égana iya harusu'é rigéré untu' pésennangiwi mennang? Aga sininna balé ri tasi'é genne untu' mpéréngngi mennang inanré?” Nappébali Puwangnge, “Engkaga paggangkanna akuwasak-Ku? Cinampe'pi muwitai aga iyaro Upowadaé tongeng kajajiyang iyaré'ga dé'!” Nanassuna Musa sibawa palettu'i lao ri bangsaéro aga iya puraé napowada Puwangnge. Napaddeppungenni Musa pituppulo pamimping nanasuroi mennang tettong ri mattulilinna Kémana Puwangnge. Nananonnona Puwangnge ri laleng ellungngé sibawa mabbicara lao ri Musa. Nalani Puwangnge sibagiyang polé ri akuwasang iya puraé nawéréngngi Musa nanawéréngngi iya pituppulo pamimpingngéro. Wettunna nonno iyaro Rohna Puwangnge ri yasé'na mennang, mammulani mennang mangobbi pada-pada nabié, iyakiya dé' namaitta. Duwa ri yelle'na iya pituppulo pamimpingngéro, Eldad sibawa Médad, monroi ri akkémangngé dé' nalao silaong sibawa iya laingngé ri Kémana Puwangnge. Ri akkémangngéro nonnoi Roh-é ri yasé'na mennang, nanammula tona mennang sipadduwa mangobbi-obbi pada-pada nabié. Nanalarina séddi kallolo massu untu' paissengiwi Musa aga iya kajajiyangngé ri Eldad sibawa Médad. Yosua ana' Nun, iya bantuéngngi Musa sipongenna kallolona mupa, makkeda lao ri Musa, “Suroi mennang mappésau Pa'!” Nappébali Musa, “Magi mupikkiri'ka? Mala mamménasaka kuwammengngi nabbéréyangngi Puwangnge Roh-Na lao risininna bangsa-Na, sibawa mébbu manengngi mennang mancaji nabi!” Nanalisuna Musa ri akkémangngé silaong iya pituppulo pamimpinna Israéliéro. Tappa napapoléni Puwangnge anging polé ri tasi'é; iyaro angingngé tiwii uro iya luttué mapancé senna, narapi simétéré ri yasé'na tanaé. Makkalutturengngi mennang ri yasé'na akkémangngéro narapi sibbéla siyagangngaré kilo ri seddéna. Puppu esso, puppu benni sibawa puppu esso rappina, asé'ni sining tauwé tikkeng uro. Tungke' tau tikkeng kaminang céddé'na sisebbu kilo. Iyaro manu'-manu'é natale'i mennang ri mattulilinna akkémangngé kuwammengngi namarakko. Ri wettu maégana mupa juku untu' riyanré, macaini Puwangnge lao ri bangsaéro nanapapolé séuwa sai ri yelle'na mennang. Nariyasenna iyaro onrongngé “Kuburu Abuwajang”, nasaba kuwaniro rikuburu sining tau iya maté nasaba abuwajang. Polé kuwaniro iyaro bangsaé létté lao ri daéra Hazérot, nanakkéma ri onrongngéro. Malani Musa séddi makkunrai Kus mancaji bainéna, na iyanaro napancaji alasang Miryam sibawa Harun untu' cellai Musa. Adanna mennang, “Naolaiga Musa bawang Puwangnge mabbicara? Dé'ga nabbicara naola towi idi?” Naéngkalingani Puwangnge aga iya napowadaé mennang. Musa iyanaritu tau iya mariyawa ati senna'é, napakacauriwi sininna tau iya tuwoé ri linoéwé. Teppa makkedani Puwangnge lao ri Musa, Harun sibawa Miryam, “Iko sipattellu laoko ri Kéma-Ku.” Nanalaona mennang kuwaro nananonnona Puwangnge ri laleng alliri ellungngé. Tettongngi Puwangnge ri sumpang Kéma-Na sibawa mobbii Harun nenniya Miryam. Malluruni iya duwa tauwéro, namakkeda Puwangnge, “Engkalingai iyaé ada-adak-Ku! Rékko engka séddi nabi ri yelle'mu, Uwappaddissengengngi alé-Ku lao ri aléna ri laleng pakkitang-pakkitangngé nenniya mabbicaraka sibawa aléna ri laleng nippi. Iyakiya dé' nakkuwaro sibawa atak-Ku Musa. Aléna ritu tau iya matinulué ri yelle'na umma'-Ku. Enrengngé mabbicaraka sibawa aléna siyolong tappa, sibawa manessa enrengngé dé' nasibawangngi patteppung. Mala muwi rupak-Ku purani naita! Magi mubarani méwai Musa, atak-Kuro?” Macai senna'ni Puwangnge lao ri iya duwa, nalao. Wettunna iyaro ellungngé nasalai Kémana Puwangnge, paitani Miryam nakenna lasa oli iya mabbahayaé; maputé olina pada-pada ape'é. Wettunna Harun giling lao ri Miryam sibawa mitai makkedaé nakennani iyaro lasaé, makkedani lao ri Musa, “Tulungngi, Puwakku, aja' taleppessakki risissa nasaba dosa iya riyébbué ri laleng adonggotta. Aja' taleppessangngi mancaji pada-pada ana' lolo iya matéénna najaji, sibawa sitengnga makebbong jukuna.” Namangobbina Musa lao ri Puwangnge, “Oh Allataala, uwéllauwi, pajjappai!” Nappébali Puwangnge, “Akkalarapanna riyamméccuiwi rupanna ri ambo'na, dé'ga napitungngesso ittana harusu'i masiri? Passalai polé ri akkémangngé pitungngesso ittana, napurapiro naweddinni muttama paimeng.” Naripassuna Miryam polé ri akkémangngé pitungngesso ittana, sibawa iyaro bangsaé dé' nalétté polé kuwaro narapi Miryam ripalalo lisu ri akkémangngé. Nainappa mennang nasalai Hazérot namakkéma ri padang kessi Paran. Nakkeda Puwangnge lao ri Musa, “Polé ri yelle'na sining pamimping seppuloé duwa suku bangsaro, piléi séddi tau polé ritungke' suku. Suroi mennang lao salidikiwi tana Kanaan iya maéloé Uwabbéréyang lao ri tau Israélié, selaku mata-mata.” Iyanaro mata-mata iya nasuroé Musa untu' mitai iyaro wanuwaé. Hoséa ana' Nun risulléi asenna ri Musa mancaji Yosua. Wettunna Musa suroi mennang joppa, mappasengngi lao ri mennang, “Joppana mattuju limanorang, mattuju ri bagiyang yattanna tana Kanaan, nainappa matteru ri daéra mabbulu-bulué. Salidikiwi pékkugi wanuwaéro, maégaga pabbanuwana iyaré'ga céddé, mawatagga mennang iyaré'ga malemma. Paréssai aga iyaro wanuwaé makessing iyaré'ga dé', sibawa aga pabbanuwana monroi ri désa-désaé iyare'ga kota-kota iya mabbénténgngé. Pakkasse'i atimmu. Itai aga macommo tanana sibawa maéga ajukajunna. Aja' muwallupaiwi tiwi lisu céddé buwa-buwa iya tuwoé kuwaro.” Iyaro wettué pammulanna wettu anggoro'é. Nalaona iyaro sining tauwéro mattuju limanorang sibawa salidikiwi wanuwaéro mappammulai ri padang kessi Zin ri seddé yattang lao limanorang lettu ri kota Réhob, seddéna laleng laowé ri Hamat. Bunge'-bunge'na laowi mennang ri bagiyang yattanna wanuwaéro nalettu ri kota Hébron, onrong naonroiyé sining tau Ahimangngé, Sésai sibawa Talmai, wija-wijanna Enak. Hébron ripatettongngi pituttaung riyolona kota Zoan ri Maséré. Nalettu'na mennang ri lompo Eskol. Kuwaniro mennang rette sitakké buwa anggoro iya makkuwaé mani tane'na, angkanna harusu'i naulé duwa tau. Tiwi towi mennang siyagangngaré buwa dalima sibawa buwa ara. Iyaro onrongngé riyasengngi Lompo Eskol nasaba takké buwa anggoro iya narette'é tau Israélié kuwaro. Puranana nasalidiki iyaro wanuwaé patappulo esso ittana, lisuni iyaro mata-mataé sibawa laporo'i lao ri Musa, Harun sibawa sininna umma Israélié iya maddeppungengngé ri Kadés, ri padang kessi Paran. Nacuritani mennang aga iya puraé naita sibawa majjellokengngi buwa-buwa iya natiwié mennang. Adanna mennang lao ri Musa, “Purani risalidiki iyaro wanuwaé sibawa mitai makkedaé sugii namacommo tanana, sibawa iyanaé céddé buwa-buwa polé kuwaro. Iyakiya pabbanuwana iyaro wanuwaé pada mawatang. Kota-kotana mennang battowa sibawa mabbénténg. Nappani, riitai sining tau wijanna rassasaé kuwaro. Tau Amalé'é monroi ri bagiyang yattanna wanuwaéro; tau Hét-é, Yébus-é sibawa Amorié monroi ri daéra mabbulu-bulué; na tau Kanaangngé monroiwi daéra mattuttung wiring tasi'é sibawa mattuttung wiwing Salo Yordan.” Iyakiya Kaléb pattennangngi atinna sining tau iya maddaréké lao ri Musa. Adanna Kaléb, “Iyaro wanuwaé harusu'i rigasa sibawa sittaiwi makkekkuwangngétto, nasaba genne awatangetta untu' caui.” Iyakiya makkedai iyaro sining tau iya lisué silaong Kaléb, “Dé', dé' tasanggu' luruiwi mennang. Pabbanuwana iyaro wanuwaé lebbi mawatangngi naiya idi.” Nainappa mennang pallebbang curita bellé ri yelle'na tau Israélié passalenna wanuwa iya puraé namata-matai mennanro. Adanna mennang, “Iyaro wanuwaé mabbahaya senna, mala untu' pabbanuwana muto. Sining tau iya riitaé kuwaro maloppo senna watakkaléna. Mala mitaki tau iya pada-padaé rassasa, iyanaritu wijanna tau Enak-é. Rékko ribandingngi sibawa mennang, pappénedditta padami incalé, na mattentuni makkuwaro anggapanna mennang lao ri idi.” Puppu benni kelli-kelli umma Israélié sibawa teri. Mannoko-noko'ni mennang lao ri Musa nenniya Harun sibawa makkeda, “Lebbi kessing muwi matéki ri Maséré iyaré'ga ri padang kessi'éwé! Leppessang bawanni matéki! Untu' aga natiwiki Puwangnge ri wanuwaéro? Matéki matti ri laleng ammusurengngé na sining bainéta enrengngé ana'-ana'ta ritawangngi. Dé'ga nalebbi kessing muwi lisuki ri Maséré!” Nanakkedana mennang seddié lao ri laingngé, “Makessingenni piléki séddi pamimping natalisu ri Maséré!” Nanasuju'na Musa sibawa Harun ri yolona sininna ra'ya'é. Yosua ana' Nun sibawa Kaléb ana' Yéfune, duwa ri yelle'na mata-mataéro, sapé'i pakéyanna mennang tanrang asarang. Makkedani mennang lao risininna ra'ya'éro, “Wanuwa iya risalidikiyéro dé' padanna kessinna. Rékko napuwéloi Puwangnge lao ri idi, natiwiki matu lao kuwaro nanawérékki tana iya sugié namacommo'ro. Aja' muéwai Puwangnge, sibawa aja' mumétau lao risining tau iya monroé ri wanuwaéro, saba' magampakki caui matu mennang. Iya linrungiyéngngi mennang nasalaini, na Puwangnge sibawakki. Jaji, aja'na mumétau.” Mangancang maneng ra'ya'é maélo genrungngi mennang sibawa batu gangka maté. Iyakiya tappa naitai iyaro sining tauwé cahaya pawilo-wilona Puwangnge mompo ri yasé'na Kéma-Na. Makkedai Puwangnge lao ri Musa, “Siyagapi ittana iyaé sining tauwé méwaka? Gangka kégi mennang dé' namaélo mateppe ri iyya, namuni puraka mébbu makkuwamani égana anu makalallaing ri yelle'na mennang? Maélo-Ka pabbinasai mennang sibawa papolé lasa létté-létté'é. Iyakiya iko upancajiko matu ambo'na polé riséuwaé bangsa iya lebbi battowaé sibawa lebbi mawatangngé naiya mennang!” Nakkeda Musa lao ri Puwangnge, “Oh, Puwang, naéngkalingai matti tau Maséré'é iyaro gau'é! Padahal nasibawang akuwasam-Mu purani Mutiwiki massu polé ri wanuwaéro, nanacuritai matu mennang lao risining tauwé ri wanuwaéwé, iya puraé méngkalingai makkedaé idi, Puwang, sibawakki. Pura toni naéngkalinga mennang makkedaé mappaitakko alé lao ri idi wettummu joppa ri yolota ri laleng alliri ellungngé ri lakessoé, sibawa ri laleng alliri apié ri wennié. Rékko muwuno manengngi iyaé umma'é, bangsa-bangsa iya puraé méngkalingai passalenna ataromporemmuro makkedai matu makkedaé Muwunoi umma'-Mu ri padang kessi'é nasaba dé' muwulléi tiwii mennang lao ri wanuwa iya puraé Muwajjanciyang. Rimakkuwannanaro, Puwang, uwéllauwi, appaitanni akuwasam-Mu lao ri idi sibawa pogau'ni aga iya puraé riyajjanciyang. Purako makkeda, ‘Iyya, Puwang, dé' namasitta macai. Uwappaitangngi pammasé-Ku nenniya atinulurek-Ku sibawa maona. Uwaddampengengngi tau iya madosaé sibawa iya méwaékka. Namuni makkuwaro, asalanna tomatowaé Uwakkabalekengngi matu lao ri ana'-ana'na nenniya eppo-eppona, lettu ri wija-wijanna matellué sibawa maeppaé.’ Makkekkuwangngé, Puwang, nasaba battowana paressé babuwamu sibawa atinulurem-Mu lao ri jancim-Mu, uwéllauwi, addampengengngi dosa-dosana sining tauwéwé pada-pada purana Muwaddampengeng mennang sipongenna nasalai tana Maséré.” Namappébali Puwangnge, “Makessinni, maélo-Ka maddampengengngi mennang pada-pada iya muwéllauwé. Iyakiya majjancika ri alé-Ku sibawa nasaba Iyya iya tuwoé sibawa makuwasaé ri linoéwé, makkedaé polé risining tauwéwé dé' muwi séddi tau tuwo mupa untu' muttamakiwi wanuwa iya puraé Uwajjanciyang lao ri néné-nénéna mennang. Saba' dé' namaélo mapato ri Iyya, sibawa matteru-teruna cobaika. Padahal purani naita cahaya-Ku iya pawilo-wiloé, sibawa sining anu makalallaing iya Upogau'é ri Maséré sibawa ri padang kessi'é. Dé'! Dé' nauttamakiwi matu mennang wanuwaéro. Polé ri yelle'na mennang iya méwaékka, dé' muwi séddi tau léjja'i matu iyaro wanuwaé. Makkedai Puwangnge lao ri Musa sibawa Harun, “Gangka kégi iyaro sining tau majaé mannoko-noko lao ri Iyya? Sininna addarékénna mennang Uwéngkalingani. Harusu'ko baliwi mennang makkuwaé: Makkedai Puwangnge, ‘Mattanro-Ka ri alé-Ku iya tuwoé makkedaé maélo-Ka gaukekko pada-pada iya mupowadaé ri yolo-Ku. Iyya, Puwang, pura mabbicara. Purano mannoko-noko lao ri Iyya. Rimakkuwannanaro matéko matu, nasining ujumu tassiya-siyai ri padang kessi'éwé. Ri lainnaé Kaléb sibawa Yosua, dé' muwi séddi ri yelle'mu iya makkéumuru'é duwappulo taung liyasé muttamakiwi matu wanuwa iya Uwajjanciyangngé lao ri ikoro. Purako makkeda makkedaé ana'-ana'mu ritawangngi matu. Iyakiya mennang ritu iya Utiwié matu ri wanuwa iya musampéyangngéro, na iyaro wanuwaé mancajiwi matu tana ancajingenna mennang. Na iko matéko matu ri padang kessi'éwé. Patappulo taung ittana ana'-ana'mu sollé matu ri padang kessi'é. Nasaba dé mumatinulu, iyaro ana'-ana'mu manrasa-rasai matu, narapi maté tau iya paccappurengngé ri yelle'mu. Mutanggungngi matu addimonrinna dosamu patappulo taung ittana; sitaung ribilang untu' siesso polé ri tungke' patappulo esso iya mupaké untu' salidikiwi iyaro tanaé. Muwissengngi matu pékkugi rasana rékko Iyya méwako! Mattanroka makkedaé Upogau'i matu lao ri iko, sining tau maja iya sikongkolo'é untu' méwaka. Maté manekko matu ri padang kessi'éwé. Iyya, Puwang, pura mabbicara.’ ” Polé ri iya seppulo duwa mata-mataéro banna Yosua sibawa Kaléb iya tuwoé mupa. Puranana napalettu Musa pasenna Puwangnge lao ri bangsa Israélié, mabbaratani iyaro bangsaé sibawa messé. Pappa bajanana maélé senna'ni, sadiya-sadiyani mennang maélo ménré coppo bulué. Adanna mennang, “Mémeng madosani. Iyakiya makkekkuwangngé sadiyani untu' lao ri onrong iya najjellokengngé Puwangnge.” Iyakiya makkedai Musa, “Magi makkekkuwangngé mumaélo majjalékkaiwi paréntana Puwangnge? Dé' mulléi lolongengngi matu! Aja' mulao! Ricauko matu risining balimmu nasaba dé' nasibawakko Puwangnge. Wettummu siyolong tau Amalé'é sibawa tau Kanaangngéro, matéko matu ri laleng ammusurengngé. Dé' namaélo Puwangnge sibawakko nasaba dé' mumaélo matinulu ri Aléna.” Iyakiya iyaro sining tau Israélié tette muwi mattuju ri coppo buluéro, namuni Musa sibawa Petti Assijancingngé dé' nasalaiwi akkémangngéro. Na tau Amalé'é sibawa tau Kanaangngé iya monroé kuwaro luruiwi sibawa caui sining tau Israélié enrengngé lellungngi mennang lettu ri Horma. Puwangnge mpéréngngi Musa iyaé sining peraturangngé iya harusu'é napogau' bangsa Israélié ri wanuwa iya maéloé nabbéréyang Puwangnge lao ri mennang. Untu' akkarobangeng ritunué iyaré'ga akkarobangeng pappaleppe tinja'é iyaré'ga akkarobangeng cenning atié iyaré'ga akkarobangeng ramé-ramé biyasaé, weddikko makkasuwiyang lao ri Puwangnge: saping lai, bimbala lai, bimbala iyaré'ga bémbé. Baunna iyaro sining akkarobangngé pésennangiwi atinna Puwangnge. Rékko iyaro riyakkarobangngé sikajui bimbala lai, harusu towi riyakkasuwiyangeng duwakkilo labbu ricampuru sibawa séddi sitengnga bang minnya zaitun untu' akkarobangeng ripatalaé, sibawa séddi sitengnga bang uwai anggoro. Baunna iyaro akkarobangngé pésennangiwi atinna Puwangnge. Rékko iyaro riyakkarobangngé sikajui saping lai untu' akkarobangeng ritunu iyaré'ga akkarobangeng pappaleppe tinja iyaré'ga akkarobangeng pappasidamé, harusu towi riyakkasuwiyangeng tellu kilo labbu ricampuru sibawa duwabbang minnya zaitun untu' akkarobangeng ripatalaé, sibawa duwabbang uwai anggoro. Baunna iyaro akkarobangngé pésennangiwi atinna Puwangnge. Iyanaro harusu riyakkarobangeng sibawangngi tungke' kajunna saping laié, bimbala laié, bimbala'é iyaré'ga bémbé'é. Rékko iyaro riyakkasuwiyangngé lebbi sikaju olokolo, pakkasuwiyang labbu'é, minnya'é sibawa uwai anggoro'éro harusu towi ritambai situru assibandingenna. Iyaro gau'é harusu'i napogau' tungke' tau Israélié wettunna makkasuwiyang akkarobang. Iyaro bau akkarobangngé pésennangiwi atinna Puwangnge. Séddié tau laing iya monroé ri yelle'mu, muwi untu' cinampe iyaré'ga untu' mattette, harusu'i naturusi sininna atorengngéro rékko makkasuwiyangngi akkarobangeng ripatalaé iya baunnaé pésennangiwi atinna Puwangnge. Puwangnge mpéréngngi Musa iyaé sining peraturangngé iya harusu'é napogau' bangsa Israélié ri wanuwa iya maéloé nabbéréyang Puwangnge lao ri mennang. Rékko mappammulani muwanré aga napowassélé iyaro wanuwaé, harusu'i mupallaing sibagiyang untu' pakkasuwiyang iya ripallaingngé untu' Puwangnge. Rékko mattunu rotiko polé ri gandong iya bunge' muwéngngalaé, iyaro rotié harusu'i muwakkasuwiyangeng selaku akkarobangeng iya ripallaingngé lao ri Puwangnge. Carana makkasuwiyangengngi padai carana makkasuwiyangengngi gandong iya bunge' rilélué. Untu' mannennungeng tungke' roti iya polé ri gandong iya bunge' riyéngngalaéro harusu'i muwabbéréyang selaku pakkasuwiyang iya ripallaingngé lao ri Puwangnge. Nainappa harusu'i napogau' imangngé upacara paddampengeng dosaé untu' umma'é. Nariyaddampengeng matu mennang nasaba iyaro asalangngé dé' nattungkaiwi pogau'i, sibawa nasaba purani mennang tiwi akkarobangeng paddampengeng dosa nenniya akkarobangeng ritunu lao ri Puwangnge. Sininna umma Israélié sibawa tau laing iya monroé ri yelle'na mennang riyaddampengengngi matu, nasaba iya manenna nakennai asalang iya dé'é nattungkairo. Rékko séddi tau bawang dé' nattungkaiwi madosa, harusu'i makkasuwiyangeng sikaju bémbé komba iya makkéumuru sitaungngé untu' akkarobangeng paddampengeng dosa. Harusu'i imangngé pogau' upacara paddampengeng dosa ri yolona Puwangnge, kuwammengngi nariyaddampengeng dosana iyaro tauwé. Iyaro peraturangngé takkenna towi untu' nigi-nigi iya pogau'é dosa sibawa dé' nattungkaiwi, muwi iyaro tau Israél iyaré'ga tau laing iya mattette'é ri yelle'na mennang. Iyakiya rékko séddi tau Israél iyaré'ga séddi tau laing nattungkaiwi pogau' dosa, naangga énténgngi Puwangnge. Iyaro tauwé harusu'i rihukkung maté, nasaba naéwai Puwangnge sibawa nattungkaiwi majjalékkaiwi paréntana Puwangnge. Iyaro tauwé matéi nasaba asalanna muto. Wettunna tau Israélié engka ri padang kessi'é, engka séddi worowané ripoléi mattengngang paddeppungeng aju tunung ri esso Saba'é. Iyaro tauwé ritiwini mangolo ri Musa, Harun sibawa sininna umma'é, nainappa ritahang nasaba dé'pa namanessa harusu'i riyaga. Nakkeda Puwangnge lao ri Musa, “Iyaro tauwé harusu'i rihukkung maté. Harusu'i ritiwi massu ri akkémangngé nakkuwaniro sininna umma'é harusu'i genrungngi batu gangka maté.” Riyassarénréngenni massu ri sininna umma'é polé ri akkémangngé nanagenrungngi batu gangka maté, pada-pada iya napparéntangngé Puwangnge. Puwangnge suroi Musa makkeda lao ri bangsa Israélié, “Ebburengngi jombé-jombé cappa-cappa pakéyammu sibawa siyoi tulu gawu ri tungke' jombéna. Iyaro harusu'i mupogau' massossoreng. Jombé-jombé iyanaritu untu' papparéngngerang: Sises-siseng muwita, muwéngngerangngi sininna parénta-Ku sibawa turusiwi. Narimakkuwannanaro dé' muwallupaika matu untu' maccowériwi cinnamu sibawa pangéloremmu muto. Iyaro jombé-jombé paréngngerangiko matu untu' turusiwi sininna parénta-Ku, angkammu tonget-tongeng mancaji appunnangek-Ku. Iyya'na Puwang Allataalamu; Iyya tiwiko massu polé ri Maséré kuwammengngi Umancaji Allataalamu. Iyya'na Puwang.” Silaongngi mennang lao mangolo ri Musa sibawa Harun enrengngé makkeda, “Cuku'ni iyaro Musa! Sininna tau Israélié ripallaingngi untu' Puwangnge. Sibawa engkai Puwangnge ri tengnga-tengngata maneng. Iyakiya magi muwangga'i alému lebbi matanré naiya umma'na Puwangnge?” Naéngkalinganaro, suju'ni Musa ri tanaé sibawa massempajang lao ri Puwangnge. Nainappa makkeda lao ri Kora enrengngé sining maccowériyéngngi, “Baja éléé maéloi Puwangnge mappaitangngi lao ri idi niga appunnangen-Na, sibawa niga iya napallaingngé untu' alé-Na. Tau iya Napilé napalaloi matu maddeppériwi. Makkedapi paimeng Musa lao ri Kora, “Engkalingai éh sining tau Léwié! Aga mupikkiri'i iyaé soal baiccu makkedaé Allataalana tau Israélié piléko polé ri yelle'na sining tau Israélié kuwammengngi weddikko maddeppériwi, sibawa majjama ri Kémana, enrengngé majjama untu' umma Israélié sibawa tumaningiwi mennang? Iko, Kora sibawa sininna tau Léwié purani nalolongeng iyaro alebbirengngé polé ri Puwangnge – namakkekkuwangngé mutuntu towi untu' mancaji imang! Rékko iko sibawa sining tau iya maccowériyékko mannoko'-noko'i lao ri Harun, sitongenna muéwai Puwangnge!” Nanassuro mobbini Musa Datan sibawa Abiram, iyakiya makkedai mennang, “Dé' tamaélo polé! Dé'paga nagenne mutiwiki massu polé ri Maséré iya macommo'éro untu' mpunoki ri padang kessi'éwé? Harusu'koga parénta tokki? Sitongenna dé' mutiwiki ri tana iya macommo'é, iyaré'ga mpérékki sining dare nenniya sining palla anggoro mancaji appunnangeng manata! Makkekkuwangngé maéloko bengnguwakki! Dé', dé' tamaélo polé!” Macai senna'ni Musa namakkeda lao ri Puwangnge, “ Puwang, aja' tatarimai pakkasuwiyanna mennang. Dé' naengka uparogiwi muwi séddi tau polé ri mennang; mala muwi sikaju kaleddé dé'to naengka uwalai polé ri mennang.” Na tungke' tau malai onrong apinna, lisekiwi sibawa bara api enrengngé dupa, nainappa tettong ri sumpanna Kémana Puwangnge silaong Musa sibawa Harun. Nanapaddeppungenni Kora sininna umma'é, natettong mennang siyolong Musa sibawa Harun ri sumpanna Kémana Puwangnge. Tappa naitani sininna umma'é cahaya pawilo-wilona Puwangnge. Nainappa makkeda Puwangnge lao ri Musa sibawa Harun, “Sorono polé risining tauwéro; maéloka paccappui mennang makkekkuwangngétto.” Iyakiya Musa sibawa Harun suju'i massompa sibawa makkeda, “Oh Allataala, idi ritu iya mabbéré atuwong lao ri sininna iya tuwoé. Rékko banna séddi bawang iya madosaé, macaiki'ga lao ri sininna umma'é?” Makkedai Puwangnge lao ri Musa, “Suroi sining tauwé manyingkiri polé risining Kémana Kora, Datan sibawa Abiram.” Nainappa Musa sibawa riyaccowéri risining pamimpinna Israélié, lao ri onronna Datan sibawa Abiram. Makkedani Musa lao risining tau Israélié, “Manyingkiri'no polé ri kémana sining tau majaéwé sibawa aja' mugéssai muwi aga polé ri appunnangenna mennang. Rékko dé' muturu', ripaccappu tokko matu silaong mennang nasaba dosa-dosana mennang.” Namanyingkiri'na iyaro sining tau Israélié polé risining kémana Kora, Datan sibawa Abiram. Massuni Datan sibawa Abiram namattengngang tettong ri sumpanna kémana tungke'-tungke' silaong ana'na nenniya bainéna mennang. Namakkeda Musa, “Nasibawang iyaé muwissengngi matu makkedaé Puwangnge suroka untu' pogau' manengngi iyaé sibawa iyaro tenniya élo ri aléku. Rékko matéi iyaro tauwé sibawa cara biyasa, tenniya pahukkungeng polé ri Allataala, iyaro tanranna dé' nasuroka Puwangnge. Iyakiya rékko Puwangnge pogau'i séuwaé iya dé'é naengka muwéngkalingai pura labe'é, sibawa rékko mapuwé'i tanaé untu' memme'i mennang silaong sininna appunnangenna mennang, angkanna muttama'i mennang tuwo-tuwo ri laleng linona tau maté, muwissenni makkedaé iyaro sining tauwé naéwai Puwangnge.” Dé' namaitta purana Musa mabbicara, mapuwé'ni tanaé ri yawana mennang, sibawa memme'i mennang silaong kaluwargana nenniya sininna tau maccowériyéngngi Kora, sibawa sininna waramparanna mennang. Nasempé'na mennang tuwo-tuwo ri laleng linona tau maté sibawa sininna iya nappunnaiyé mennang. Tana iya mapuwé'éro tattutu'ni paimeng nateddénna mennang lennye naemme tanaé. Sininna tau Israél iya engkaé kuwaro larini wettunna naéngkalinga mennang gora, “Lari! Naemme'ki matu tanaé!” Nainappa mappapolé Puwangnge api iya mangurengngéngngi iya 250 tau iya makkasuwiyangngéngngi dupaéro. Nainappa makkeda Puwangnge lao ri Musa, Nalani Imang Eléazar onrong-ngonrong apiéro nanasuroi tauwé lanroi mancaji létta-létta manipi untu' pallapi saliwenna mézbaé. Iyaro mancajiwi papparéngngerang lao ri bangsa Israélié makkedaé ri lainnaé wijanna Harun, dé' muwi séddi tau wedding lao ri mézbaé untu' mattunu dupa lao ri Puwangnge. Tau iya majjalékkaiyéngngi iyaro peraturangngé ripaccappui matu pada-pada Kora nenniya sining tau maccowériyéngngi. Iya manennaro ripajoppai pada-pada iya napparéntangngé Puwangnge lao ri Eléazar naolai Musa. Pappa bajana maccai-cai manenni umma Israélié lao ri Musa sibawa Harun. Makkedai mennang, “Purani muwuno umma'na Puwangnge.” Wettunna mennang maddeppungeng méwai Musa sibawa Harun, gilinni mennang ri Kémana Puwangnge, nanaitani ellungngé tongkoi iyaro Kémaé, nanapaitana cahaya ahadérékenna Puwangnge. Laoni Musa sibawa Harun ri yolona Kémana Puwangnge, namakkedana Puwangnge lao ri Musa, “Soroko polé risining tauwéro. Maéloka paccappui mennang ri onrongngéttoro!” Sipadduwani mennang suju' massompa, nainappa makkeda Musa lao ri Harun, “Alai onrong apimmu, lisekiwi sibawa bara api polé ri mézbaé sibawa taroiwi dupa ri yasé'na. Tiwii masitta ri umma'é sibawa pogau'i upacara paddampengeng dosaé untu' mennang! Malluwa'-luwa'ni caina Puwangnge sibawa mappammulani saié.” Napogau'ni Harun aga napowada Musa. Larini lao ri tengnga-tengngana umma'é iya mattengngangngé maddeppungeng sibawa mappammula nakenna sai. Nanataroini Harun dupa tompo'na bara apié, nanapogau' upacara paddampengeng dosa untu' umma'é. Mappésauni iyaro saié, sibawa engkani Harun ri yelle'na sining tau iya tuwoé mupa sibawa iya matéénna. Iya maté wettuéro engka 14.700 tau, dé' nauttama mennang iya maté wettunna ronta'na Kora. Mappésaunnana iyaro saié, lisuni Harun lao ri Musa ri sumpanna Kémana Puwangnge. Makkedai Puwangnge lao ri Musa, “Suroi tau Israélié mpérékko seppulo duwa tekkeng, tungke' suku séddi tekkeng, iya harusu'é nabbéréyang pamimping sukué. Okii asenna tungke' pamimping sukuéro ri tekkenna, na asenna Harun ri tekkenna suku Léwié. Untu' tungke' pamimping suku harusu engka séddi tekkeng. Tiwii iyaro sining tekkengngé ri Kéma-Ku namupalénne'i ri yolona Petti Assijancingngé, onrok-Ku biyasa siruntu sibawa iko. Tekkenna tau iya Upilé, cura'i matu. Nasibawang caraéro Upajjappai matu addarékénna sining tau iya matteru-terué mannoko-noko lao ri iko.” Iyaro gau'é napalettu'ni Musa lao ri tau Israélié. Nainappa sining pamimpinna mennang mabbéréyangngi lao ri Musa séddi tekkeng untu' tungke' pamimping suku. Iya manenna engka seppulo duwa peppa'na, na tekkenna Harun engkai ri yelle'na. Nanataroni Musa iyaro sining tekkengngé ri laleng Kémana Puwangnge ri yolona Petti Assijancingngé. Pappa bajanana, wettunna Musa muttama ri laleng Kémana Puwangnge, naitani makkedaé tekkenna Harun iyanaritu tekkenna suku Léwié, cura'ni. Iyaro tekkengngé mpuce'ni, mpunga sibawa powassélé buwa atapang iya macowaénna! Nalani Musa sininna tekkengngéro nainappa nappaitang lao ri tau Israélié. Naitani mennang aga iya puraé kajajiyang, nainappa tungke' pamimping malai tekkenna paimeng. Namakkeda Puwangnge lao ri Musa, “Palénne'ni tekekenna Harun paimeng ri yolona Petti Assijancingngé. Iyaro tekkengngé harusu'i ritaro selaku papparéngngerang lao ri tau Israélié iya pojiyéngngi maronta'ro makkedaé matéi matu mennang rékko dé' nappésau mannoko-noko.” Napogau'ni Musa aga napparéntang Puwangnge. Nainappa makkeda tau Israélié lao ri Musa, “Rékko makkuwaitu, cilakani idi'é! Cappuki matu! Rékko tau iya maddeppériyéngngi Kémana Puwangnge harusu'i maté, dé'na gaga amménasang ri idi!” Makkedai Puwangnge lao ri Harun, “Iko, ana'-ana'mu sibawa sining tau Léwié harusu tanggungngi addimonrinna sining asalang iya kajajiyangngé ri laleng Kéma-Ku, iyakiya banna iko sibawa ana'-ana'mu bawang iya harusu'é tanggungngi asalangngé ri laleng jama-jamanna sining imangngé. Sumpulolomu, suku Léwié, harusu'i mupaccowé selaku pabbantu ri laleng napogau'na jamanna sibawa jamanna ana'-ana'mu. Harusu'i napogau' kewajibanna suku Léwié lao ri iko sibawa jamai jamanna mennang ri Kéma-Ku, iyakiya dé' nawedding mennang maddeppériwi mézbaé iyaré'ga géssai barab-barang iya mapaccingngé ri Bili' Mapaccingngé. Rékko najjalékkaiwi paréntaéro, muwi mennang iyaré'ga iko matéko matu. Harusu'i mennang majjama sibawakko enrengngé pogau'i sining jamang iya engkaé assisumpungenna sibawa sininna attumaningngé ri laleng Kéma-Ku, iyakiya iya dé'é nariwéréng ha' untu' iyaro, riyattéyang majjama silaong iko. Banna iko, Harun sibawa ana'-ana'mu ritu iya harusu'é pogau'i jamangngé ri Bili' Mapaccingngé sibawa ri mézbaé, kuwammengngi aja'na Umacaisi lao ri bangsa Israélié. Sitongenna purani Upilé sumpulolomu sining tau Léwié polé ri yelle'na sining tau Israélié selaku pabbéré untu' iko. Purani ripallaing mennang untu' Iyya, untu' mattumani ri Kéma-Ku. Iyakiya banna iko sibawa ana'-ana'mu bawang iya weddingngé pajoppai jamangngé selaku imang, ri laleng sininna jama-jamang iya engkaé assisumpungenna sibawa mézbaé nenniya aga iya engkaé ri Bili' Pommapaccingngé. Iyanaro tanggung jawa'mu, nasaba purano uwéréng tudangeng selaku imang. Tungke' tau iya dé'é nappunnaiwi ha'éro rihukkung matéi matu rékko naddeppériwi iyaro barab-barang mapaccingngé.” Makkedai Puwangnge lao ri Harun, “Engngerangngi! Sininna pakkasuwiyang ripallaingngé iya riwéréngngékka iya dé'é naritunu iyanaritu untu' iko. Iyanaro bagiyammu iya puraé ripattentu untu' mannennungeng. Uwérékko iyaro sibawa wija-wijammu. Polé risining pakkasuwiyang iya kaminang mapaccingngé iya dé'é naritunu ri yasé'na mézbaé, iya mangoloéwé iyanaritu untu' iko: Akkarobangeng ripatalaé, akkarobangeng paddampengeng dosaé sibawa akkarobangeng passullé arogingngé. Iya manennaro pakkasuwiyang mapaccing iya mancajiyé bagiyammu sibawa ana'-ana'mu. Iyaro mapaccingngi untu' alému, jaji harusu'i muwanré ri onrong iya mapaccingngétto. Banna tau worowané wedding manréi. Sininna pakkasuwiyang ripallaing iya laingngé iya nakkasuwiyangengngé tau Israélié lao ri Iyya, iyanaritu untu' ikoto. Uwérékko silaong ana'-ana'mu worowané sibawa makkunraié. Iyaro peraturangngé takkennai untu' mannennungeng. Tungke' anggota kaluwargamu iya dé'é nanajisi' weddingngi manréi. Uwérékko sininna iya kaminang makessingngé polé ri éngngalammu bunge'-bunge'é iya nakkasuwiyangengngé tau Israélié lao ri Iyya tungke' taung, iyanaritu minnya zaitun, uwai anggoro sibawa gandong. Iya manennaro iyanaritu untu' iko. Tungke' anggota kaluwargamu iya dé'é nanajisi' weddingngi nanré. Sininna séuwa-séuwaé ri tana Israélié iya puraénna ripallaing untu' Iyya, iyanaritu untu' iko. Sininna iya bunge' jajiyé ri yelle'na rupa tauwé iyaré'ga olokolo'é iya nakkasuwiyangengngé tau Israélié lao ri Iyya, iyanaritu tawamu. Iyakiya harusu'i mucéra' ana'-ana'mu iya macowaé, makkuwatoro ana' olokolo harang iya bunge' jajiyé. Harusu'i ricéra' ana'-ana'é wettunna mennang makkéumuru siuleng. Paccéra' iya ripattentué untu' iyaro iyanaritu lima dowi péra', situru paccéra' iya takkennaé ri Kéma-Ku. Iyakiya sapingngé, bimbala'é sibawa bémbé iya bunge' jajiyé, dé' nawedding ricéra'. Iyaro olokolo'é harusu'i untu' Iyya sibawa harusu'i riyakkarobangeng. Abbolorengngi darana ri mézbaé sibawa tunui lunra'na selaku akkarobangeng. Baunna pésennangiwi atik-Ku. Jukuna iyanaritu untu' iko, pada-pada muto dadana sibawa poppang ataunna polé ri pakkasuwiyang iya ripaénré'é lao ri Iyya. Untu' mannennungeng, sininna pakkasuwiyang iya ripallaingngé iya natiwié tau Israélié lao ri Iyya, Uwérékko sibawa ana'-ana'mu worowané nenniya makkunraié. Iyaro peraturangngé takkennai untu' mannennungeng sibawa mancajiwi passiyo assijancing iya dé'é nawedding rilura' ri yelle'ta, Iyya sibawa iko sibawa wija-wijammu.” Makkeda towi Puwangnge lao ri Harun, “Iko dé'gaga mana mulolongeng. Ri wanuwa iya Uwajjanciyangngéro dé' gaga muwi sikonrong tana iya mancajiyé appunnangemmu. Iyya, Puwang, iyanaritu bagiyang manamu.” Adana Puwangnge lao ri Harun, “Sininna pakkasuwiyang tawa seppulona tau Israélié uwéréngngi sining tau Léwié. Iyanaro bagiyang manana mennang untu' jama-jamanna mennang ri Kémaku. Sining tau Israél laingngé dé'na nawedding maddeppériwi Kémaéro kuwammengngi dé'na mennang nappapolé dosa sibawa pahukkungeng maté ri yasé'na aléna mennang. Mappammulai makkekkuwangngé banna tau Léwié iya weddingngé murusu'i Kéma-Ku sibawa tanggung jawakiwi jama-jamangngéro. Iyaro peraturangngé takkenna towi untu' wija-wijammu lettu mannennungeng. Tau Léwié dé' nappunnai mana ri Israélié, nasaba untu' manana mennang purani Uwéréng sininna pakkasuwiyang tawaseppuloé iya nakkasuwiyangngé tau Israélié lao ri Iyya selaku pabbéré iya ripallaingngé. Iyanaro saba'na passalenna tau Léwié Upowadai makkedaé dé' matu mennang nalolongeng bagiyang mana ri Israélié.” Puwangnge suroi Musa palettu'i iyaé paréntaé lao ri tau Léwié: Rékko tarimako polé ri tau Israélié pakkasuwiyang tawa seppulo iya nabbéréyangngé Puwangnge lao ri iko untu' tawamu, harusu'ko mabbéréyangngi tawa seppulona lao ri Puwangnge untu' pakkasuwiyang ripallaimmu. Iyaro pakkasuwiyang ripallaingngé riyangga padai sibawa pakkasuwiyang gandong barué sibawa uwai anggoro barué. Nanallalengiro harusu tokko makkasuwiyang untu' pakkasuwiyang ripallaing lao ri Puwangnge sibagiyang polé ri pakkasuwiyang tawa seppulona tau Israélié. Iyaro pakkasuwiyang ripallaingngé harusu'i muwabbéréyang lao ri Imang Harun. Abbéréyangngi bagiyang iya kaminang makessingngé polé ri aga iya mutarimaé. Puranana muwabbéréyang iyaro bagiyangngé, weddinni muwala sésana, pada-pada séddié patani mala towi aga nasésa purana natiwi pakkasuwiyanna. Iya nasésaéro weddingngi muwanré kégi-kégi silaong kaluwargamu, selaku sarona jama-jamammu ri Kémana Puwangnge. Dé' mupasala rékko muwanréi, assaleng bagiyanna iya kaminang makessingngé purani muwakkasuwiyangeng lao ri Puwangnge. Aja' mupanajisi'i pakkasuwiyang mapaccinna tau Israélié ri laleng muwanréna séuwa polé ri pakkasuwiyangngéro ri wettu dé'napa bagiyang iya kaminang makessingngé ripallaing untu' Puwangnge. Rékko muwajjalékkaiwi paréntaéro, matéko matu. Puwangnge paréntangngi Musa sibawa Harun untu' mabbéréyangngi iyaé sining peraturangngé lao ri bangsa Israélié: Alano sikaju saping komba macella'é iya dé'é gaga sala-salanna sibawa iya dé'éppa naengka naripaké mappallaung. Abbéréyangngi iyaro sapingngé lao ri Imang Eléazar. Iyaro olokolo'é harusu'i ritiwi ri saliwenna akkémangngé narigéré ri yolona imangngé. Nainappa Imang Eléazar harusu'i malai céddé darana iyaro olokolo'é nanakkeppikengngi wékkapitu mattuju ri Kémana Puwangnge. Sininna olokolo'éro, muttama'ni bingkulanna, jukuna, darana sibawa lise babuwana, harusu'i ritunu ri yolona imangngé. Nainappa harusu'i imangngé mala céddé aju aras, sitakké hisop sibawa silaci tulu cella, nanaggenrungengngi ri laleng api riyattunuiyé saping cella'ro. Nainappa harusu'i imangngé sessa'i pakéyanna sibawa cemmé. Purairo weddinni muttama ri laleng akkémangngé, iyakiya najisi' mupi narapi labu essoé. Tau iya tunuéngngi sapingngéro harusu towi nasessa pakéyanna sibawa cemmé; najisi' mutopi narapi labu essoé. Nainappa séddié tau iya dé'é nanajisi' harusu'i paddeppungengngi awunna iyaro sapingngé nanataroi ri onrong iya mapaccingngé ri saliwenna akkémangngé. Iyaro awué nataroi kuwaro kuwammengngi weddingngi napaké tau Israélié untu' mébbu uwai upacara pappépaccing untu' palledda dosa. Tau iya paddeppungengngéngngi awunna sapingngéro harusu'i nasessa pakéyanna, iyakiya najisi'i narapi labu essoé. Iyaro peraturangngé takkennai untu' mannennungeng, muwi untu' tau Israélié iyaré'ga untu' tau laing iya monro tette'é ri tengnga-tengngana mennang. Tau iya nakennaé uju mancaji najisi'i pitungngesso ittana. Ri esso matellué sibawa mapitué harusu'i napépaccingi aléna sibawa uwai upacara; nappai mapaccing. Iyakiya rékko ri esso matellué sibawa mapitué dé' napépaccingiwi aléna, tette'i najisi'. Tau iya nakennaé uju nadé' napépaccingiwi aléna iyanaritu najisi'i, nasaba dé'pa naribolo sibawa uwai upacara. Napanajsi'i Kémana Puwangnge, rimakkuwannanaro dé'na nariyangga anggota umma'na Allataala. Rékko séddié tau matéi ri laleng séddié kéma, nigi-nigi engka ri laleng kémaéro iyaré'ga muttama ri lalenna, mancaji najisi'i pitungngesso ittana. Sininna kendié sibawa oring iya dé'é gaga pattongkona mancaji najisi' towi. Tungke' tau iya nakennaé ujuna tau maté riyunoé, iyaré'ga maté riyalé ri dare'é mancaji najisi'i pitungngesso ittana. Makkuwatoro tau géssaé tampung iyaré'ga buku tau maté. Untu' pépaccingiwi tau iya najisi'éro, harusu'i riyala céddé awunna saping komba cella'é iya puraé ritunu untu' palledda dosa. Iyaro awué harusu'i riputtama ri laleng séddié oring, nainappa ritaroi uwai iya riyalaé polé ri uwai massolo'é. Ri laleng passaleng mammulangngé, iyanaritu rékko engka tau maté ri laleng kémaé, tau iya dé'é nanajisi' harusu'i mala sitakké hisop, natellengengngi ri laleng uwaiéro, nainappa meppikiwi iyaro kémaé sibawa sininna séuwa-séuwaé iya engkaé ri lalenna, makkuwatoro sining tau iya engkaé kuwaro. Ri laleng passaleng maduwaé, iyanaritu rékko séddié tau nakenna uju, tampung iyaré'ga buku tau maté, tau iya dé'é nanajisi' harusu'i meppikiwi tau iya najisi'éro sibawa cara iya padaétto. Harusu'i naeppi ri esso matellué sibawa esso mapitué. Ri esso mapituéro tépuni upacara pappépaccinna iyaro tau najisi'é. Iyaro tauwé harusu'i nasessa pakéyanna sibawa cemmé. Mappammulai labunna essoé mapaccinni. Tau iya najisi'é nadé' napakangka upacara pappépaccing alé, tette'i najisi' nasaba dé'pa naribolo uwai upacara. Napanajisi'i Kémana Puwangnge, sibawa dé'na nariyangga anggota umma'na Allataala. Iyaro peraturangngé takkennai untu' mannennungeng. Tau iya mangeppikengngéngngi uwai upacaraéro harusu towi nasessa pakéyanna, sibawa tau iya nakennaé uwaiéro mancaji najisi'i narapi labu essoé. Barab-barang iya nagéssaé iyaro tau najisi'é mancaji najisi'i, sibawa tau laing iya géssaéngngi mancaji najisi' towi narapi labu essoé. Ri laleng uleng séddinna lettu manenni umma Israélié ri padang kessi Zin sibawa mattette ri Kadés. Maténi Miryam sibawa rikuburu kuwaro. Riséuwaé wettu ri onrong akkémanna mennang dé' gaga uwai. Napoléna sining tauwéro katulungngi Musa sibawa Harun namannoko-noko'to, “Lebbi kessing muwi matéki ri yolona Puwangnge silaong silessu-silessuretta! Magi mutiwiki ri padang kessi'éwé? Aga kuwammengngi matéki kuwaé silaong olokolo'ta? Untu' aga mutiwiki massu polé ri Maséré lao ri onrong anrasa-rasangngéwé iya dé'é nawedding ritanengi aga-aga? Kuwaé dé'gaga gandong, dé'gaga pong ara, anggoro, sibawa dalima. Mala muwi uwai rinung dé'to gaga!” Laoni Musa sibawa Harun mabélaiwi sining tauwéro nainappa tettong ri seddéna sumpang Kémana Puwangnge. Suju'ni mennang, nainappa cahaya ahadérékenna Puwangnge tappai mennang. Makkedani Puwangnge lao ri Musa, “Alani tekkeng iya engkaé ri yolona Petti Assijancingngé, nainappa iko sibawa Harun harusu'i paddeppungengngi sininna umma'é. Ri yolona maneng mennang, harusu'ko makkeda lao ri bulu-bulu batu iya engkaé kuwaro kuwammengngi napajompi uwaé. Makkuwaniro mappassuko uwai polé ri bulu-bulu batuéro kuwammengngi weddingngi ménung ra'ya'é sibawa olokolo'na mennang.” Nalaona Musa malai tekkengngéro pada-pada iya napparéntangngé Puwangnge. Napaddeppungenni Musa sibawa Harun sininna umma'é ri yolona bulu-bulu batuéro. Nanakkeda Musa, “Engkalingai, éh iko bangsa pojiyéngngi maronta! Aga harusu'ki passurekko uwai polé ri bulu-bulu batuéwé?” Nanaakkani Musa tekkengngéro nakkunrurengngi ri bulu-bulu batuéro wékkaduwa. Nanajompina uwai sibawa maraja, angkanna sininna tauwé sibawa olokolo'é weddinni ménung. Iyakiya riyamparengngi Musa sibawa Harun ri Puwangnge, adan-Na, “Nasaba makurang teppe'ko ri Iyya untu' pannessai akuwasak-Ku iya mapaccingngé ri yolona bangsa Israélié, dé' matu mupimpingngi mennang muttama ri wanuwa iya Uwajjanciyangngé lao ri mennang.” Iyanaro mata uwai Mériba. Ri onrongngéro mannoko-noko'i sining tau Israélié lao ri Puwangnge, sibawa kuwatoniro Puwangnge nappaitang akuwasan-Na iya mapaccingngé lao ri bangsaéro. Napolé ri Kadés, kirinni Musa sining suro untu' mangolo ri arung Edom. Adanna mennang, “Idi poléki ri suku-suku Israélié iya engkaé mupa assisumpungeng assilessureng sibawa Puwakku. Naullé naisseng Puwakku asussang iya kennaékki. Laowi néné-nénéta ri Maséré sibawa mattette kuwaro mattaut-taung ittana. Toriyolota sibawa idi dé' nagau' makessikki bangsa Maséré'é, natamangobbina méllau tulung ri Puwangnge. Naéngkalingai pangobbita nanakiring séddi malaéka. Iyaro malaéka'é napimpikki massu polé ri tana Maséré. Makkekkuwangngé engkaki ri Kadés, séddi kota ri pakkasésénna daérana Puwakku. Riyéllauwi tennapodo napalaloki Puwakku molai wanuwaéwé. Idi sibawa olokolo'ta dé' tamaélo léssé polé ri lalengngé sibawa dé' tamaélo muttama risining dare'é iyaré'ga sining palla anggoro'é. Dé' tamaélo ménungngi uwai polé risining bujunna Puwakku. Maéloki joppa ri watattanaé bawang narapi massuki ri daérana Puwakku.” Iyakiya mappébaliwi tau Edongngé, “Dé' tamaélo palaloko molai daérata. Rékko baraniko, maéloki gasako!” Nappébali tau Israélié, “Maéloki joppa molai watattanaé, narékko idi iyaré'ga olokolo'ta ménungngi uwaimu, maéloki wajai. Banna maéloki bawang lalo.” Makkedasi tau Edongngé, “Dé' nawedding!” Nainappa mennang massu silaong tentara iya mawatangngé untu' gasai bangsa Israélié. Nagilinna tau Israélié nasappa laleng laing saba' dé' naripalalo ri tau Edongngé molai daérana mennang. Sininna umma Israélié nasalaini Kadés nalettu ri Bulu Hor, ri pakkasésénna Edom. Kuwaniro makkeda Puwangnge lao ri Musa sibawa Harun, “Dé' matu nauttama Harun ri wanuwa iya puraé uwajjanciyang lao ri bangsa Israélié; matéi matu nasaba iko sipadduwa purai muwéwa paréntaku ri seddéna mata uwai Mériba. Tiwii Harun sibawa Eléazar, ana'na, ménré ri Bulu Hor. Ludungngi pakéyanna Harun namupapasangiwi Eléazar. Matéi matu Harun ri onrongngéro.” Napogau'ni Musa aga iya napparéntangngé Puwangnge. Naénrékini Musa, Harun sibawa Eléazar Bulu Hor risabbing ri sininna umma'é. Nainappa naludung Musa pakéyanna Harun nanapapasangiwi Eléazar. Namaténa Harun ri coppo'na buluéro, nainappa Musa sibawa Eléazar nonno paimeng. Naéngkalini sininna umma'é makkedaé maténi Harun, nanabbarata manenna mennang untu' Harun telluppulo esso ittana. Arad iyanaritu séddiwi kota ri bagiyang yattanna wanuwa Kanaan. Wettunna naéngkalinga arunna kotaéro makkedaé poléni tau Israélié lalo ri laleng Atarim, laoni gasai mennang sibawa tawangngi siyagangngaré tau ri yelle'na mennang. Nainappa mattinja tau Israélié makkuwaé lao ri Puwangnge, “Rékko muwérékki apakalang lao ri bangsaéro, maéloki paccappui mennang sibawa kota-kotana.” Natarimani Puwangnge paréllaunna tau Israélié sibawa tulungngi mennang caui tau Kanaangngé. Nanapaccappuni tau Israélié iyaro sining tau Kanaangngé silaong kota-kotana mennang, nainappa naseng iyaro onrongngé Horma. Nainappa nasalai tau Israélié Bulu Hor, nanalalo ri laleng iya mattujué ri Séppang Akaba, untu' mattulilingiwi daéra Edom. Iyakiya ri tengnga laleng, cappuni asabbarakenna iyaro bangsaé, namannoko-noko lao ri Allataala sibawa Musa. Makkedai mennang, “Magi mutiwiki massu polé ri Maséré? Aga untu' mpunoki ri padang kessi'éwé? Kuwaé dé' gaga inanré, sibawa dé'to gaga uwai. Majani pénedditta sibawa inanré iya makawaéwé!” Nanapapoléna Puwangnge sining ula mamosoé ri tengnga-tengngana bangsaéro. Maéga tau Israél maté napitto sining ulaéro. Nanapoléna iyaro bangsaé mangolo ri Musa sibawa makkeda, “Madosani nasaba mannoko'-noko'ki lao ri Puwangnge sibawa iko. Assempajanno lao ri Puwangnge kuwammengngi naripabélai iyaé sining ulaé polé ri idi.” Nanassempajangenni Musa iyaro bangsaé. Nainappa Puwangnge suroi Musa mébbu sikaju ula tembaga nanataroi ri yasé'na séddié alliri. Tungke' tau iya napitto'é ula, majjappai matu rékko naitai ula polé ri tembagaéro. Nanaébbuna Musa ula polé ri tembagaé nanataroi ri yasé'na séddié alliri. Tungke' tau iya napitto'é ula, wedding majjappa rékko makkitai lao ri ulaéro. Joppani tau Israélié, nainappa makkéma ri kota Obot. Nasalainnana iyaro onrongngé, makkémani mennang ri ruttungenna Abarim ri padang kessi'é ri seddé alauna daéra Moab. Nainappa mennang makkéma ri Lompo Zéréd. Polé kuwaro joppasi mennang namakkéma ri liwenna Salo Arnon, ri padang kessi iya mallebba'é ri daérana tau Amorié. Iyaro Salo Arnon mancaji pakkasésénnai daérana tau Moab-é sibawa daérana tau Amorié. Iyanaro saba'na ri laleng ‘Kitta Musuna Puwangnge ’ tarokii: “… Désa Wahéb, ri daéra Sufa sibawa lompo'-lompo'na; Salo Arnon sibawa émpenna lompo'-lompo'na iya mallebba'é lettu ri désa Ar sibawa mattuju ri pakkasésénna daérana tau Moab-é.” Polé kuwaro laoni mennang ri onrong iya riyasengngé Beer, bettuwanna sining bujung. Kuwaniro pura Puwangnge makkeda lao ri Musa, “Suroi umma'é maddeppungeng; maélo-Ka mpéréngngi mennang uwai.” Iyaro wettué napuwélonni bangsa Israélié iyaé élongngé, “Eh sining bujung, abborowanni uwaimu, maéloki duppaiwi sibawa élong. Bujung iya nakaliyé sining tomariyoloé sibawa sining pamimping bangsaé nakaliwi sibawa tekkeng appimpingenna sibawa tekkeng tanrang akuwasanna mennang.” Polé ri padang kessi'é létté'i mennang ri Matana, sibawa polé kuwaro lao ri Nahaliél, nainappa lao ri Bamot, nainappa lao ri lompo'na daérana tau Moab-é, ri yawana coppo'na Bulu Pisga iya mangoloé ri padang kessi'é. Nainappa kiring sining suro bangsa Israélié lao ri Sihon, arunna Amori untu' palettu'i pasengngéwé, “Palaloki molai wanuwanna Puwakku. Idi sibawa olokolo'ta dé' tamaélo léssé polé ri lalengngé sibawa dé' tamaélo muttama risining dare'é iyaré'ga sining palla anggoro'é iyaré'ga ménung uwai polé risining bujungngé. Dé' tamaélo léssé polé ri watattanaé narapi massuki polé ri daérata Puwakku.” Iyakiya Arung Sihon dé' namaélo palaloi sining tau Israélié molai wanuwanna. Napaddeppungengngi pasukanna nainappa lao ri Yahas ri padang kessi'é sibawa gasai tau Israélié kuwaro. Iyakiya ri laleng ammusurengngéro maéga tentarana tau Amorié riyuno ri tau Israélié. Nainappa tau Israélié tudangiwi daérana mennang polé ri Salo Arnon lettu ri Salo Yabok, iyanaritu pakkasésénna daérana tau Amongngé, saba' iyaro pakkaséséngngé mawatang senna attahangenna. Nanallalengiro nasittai manengngi tau Israélié kotana tau Amorié, muttama'ni Hésybon sibawa sininna kota baiccu'é ri seddéna, nainappa mattette'ni mennang kuwaro. Hésybon iyanaritu ibukotana Arung Sihon. Engka naengka nammusu méwai arung Moab sibawa sittaiwi daérana narapi sibbéla Salo Arnon. Iyanaro saba'na nakkeda tau maccaé makkuwaé, “Laono ri Hésybon, ri kotana Arung Sihon. Macinnaki mitai iyaé kotaéwé ripatettong sibawa ripédécéngi paimeng. Engka séuwa wettu polé ri kotaéwé mallurui pasukanna Sihon pada apié. Iya mancuru'éngngi kota Ar ri Moab, sibawa makuwasaiwi bulu-bulué sillampé Arnon. Eh bangsa Moab, macilakako! Passompa Kamos-é, binasako! Naleppessakko déwatamu mancaji tomanyingkiri, makkunraimmu mancaji tawananna arung Amorié. Iyakiya makkekkuwangngé binasani wija-wijanna mennang, puppu laleng polé ri Hésybon lao ri Dibon, polé ri Nasyum lao ri Nofah seddéna Medéba.” Nanallalengiro bangsa Israélié mattette'i ri daérana tau Amorié. Nainappa Musa suroi sining tauwé lao sappa laleng iya kaminang makessingngé untu' gasai kota Yaézer. Nanasittaini tau Israélié iyaro kotaé enrengngé kota-kota baiccu'na ri seddéna sibawa paddésu'i tau Amorié iya monroé kuwaro. Purairo bélo'ni tau Israélié sibawa joppa ri laleng iya mattujué lao ri Basan. Arung Og polé ri Basan malluruni sibawa pasukanna untu' gasai tau Israélié ri kota Edréi. Makkedani Puwangnge lao ri Musa, “Aja' mumétau ri aléna. Maéloka mpérékko apakalang. Mucaui matu, sininna ra'ya'na sibawa wanuwanna. Gaukenni pada-pada pura mugaukengngéngngi Arung Sihon iya mapparéntaé ri Hésybon.” Nacauni tau Israélié Arung Og sibawa naunona, ana'-ana'na sibawa sininna ra'ya'na; dé' gaga monro. Nainappa natudangi mennang wanuwaéro. Joppasi bangsa Israélié namakkéma ri tanéténa Moab, ri daéra liwenna Salo Yordan, seddéna kota Yérikho. Namakkeda tau Moab-é lao risining pamimpinna tau Midiangngé, “Dé'na namaitta iyaro garembolangngé napaccappu manengngi sininna séuwa-séuwaé iya engkaé ri seddéta pada-pada sapingngé paccappui wellaé ri padangngé.” Na Arung Balak kiring suro untu' mobbii Biléam, ana' Béor, iya monroé ri kota Pétor seddéna Salo Efrat ri daéra Amau. Risuroi mennang palettu'i lao ri Biléam iyaé pasengngé polé ri Balak, “Issenni, engka séuwa bangsa polé ri Maséré; sining taunna tattale lao kégi-kégi sibawa sadiyana gasai wanuwatta. Lebbi watangngi mennang naiya idi. Jaji, laoni mai! Tanrongekka mennang. Ajakké riyulléi caui mennang sibawa paddésu'i polé ri wanuwaéwé. Saba' mateppe'ka tau iya mubarakkakiyé lolongengngi matu barakka, sibawa tau iya mutanroiyé lolongengngi matu abusungeng.” Nanalaona iyaro sining pamimpinna tau Moab-é nenniya Midiangngé sibawa tiwi saro untu' Biléam kuwammengngi namaélo tanroiwi tau Israélié. Lettu'nana ri Biléam, napalettu'ni mennang ri Biléam pasenna Arung Balak. Adanna Biléam lao ri mennang, “Abbennino kuwaé. Bajapi ubirittaiyakko matu aga napowadakka Puwangnge.” Nanaonrona iyaro sining pamimpinna Moab ri onronna Biléam. Napoléna Allataala ri Biléam sibawa makkutana, “Niga iyaro sining tauwé iya monroé ri onrommu, Biléam?” Nappébali Biléam, “Surona Arung Balak polé ri Moab untu' mabbirittaiyangngi makkedaé séuwa bangsa iya polé ri Maséré massanrani kégi-kégi. Nasuroka Arung Balak tanroingengngi bangsaéro, kuwammengngi naulléi musui sibawa paddésu'i mennang.” Adanna Allataala lao ri Biléam, “Aja' mulao silaongengngi sining tauwéro, sibawa aja' mutanroiwi bangsaéro, nasaba purani Ubarakkaki.” Pappa bajanana makkedani Biléam lao risining suronaro Balak, “Lisuno. Dé' napalaloka Puwangnge lao sibawakko.” Nalisuna mennang ri Balak sibawa birittaiyangngi makkedaé dé' namaélo polé Biléam silaong mennang. Nanakirinna Balak lebbi éga suro sibawa iya lebbi matanré pangka'na naiya pammulanna. Napalettu'ni mennang ri Biléam paseng polé ri Balak, “Uwéllauwi sibawa masero: poléni', sibawa aja' tasampéyangngi. Maéloka mabbéré saro iya maéga senna'é, sibawa pogau'i agi-agi iya mupowadaé. Poléni', namutanrongekka iyaro bangsaé.” Iyakiya mappébaliwi Biléam, “Namuni iya maneng péra' sibawa ulaweng iya engkaé ri laleng saorajana Arung Balak nawajarekka, dé' nawedding uwajjalékkai paréntana Puwangnge, Allataala iya usompaé. Muwi ri laleng gau' iya baiccu'é dé'to uwulléi méwai. Iyakiya makessingenni mabbenniko kuwaé, pada-pada iya napogau' sining suro iya riyoloé. Macinnaka missengngi aga engka mupa iya maéloé napowada Puwangnge lao ri iyya.” Iyaro wennié poléni Allataala ri Biléam sibawa makkeda, “Iyaro sining tauwé poléi untu' méllauko lao silaong mennang. Jaji sadiya-sadiyano untu' lao. Iyakiya iyana mupogau' iya riparéntangngékko.” Pappa bajanana napatoppokini Biléam lapi-lapi kaleddé'na, nainappa maccowériwi iyaro sining pamimpinna Moab. Iyakiya wettunna Biléam lao, macaini Allataala. Na wettu natonanginna Biléam kaleddé'na, ritinrosi ri duwa pattumaninna, tettongngi malaéka'na Puwangnge ri tengnga laleng untu' lawa-lawaiwi. Naitana iyaro malaéka'é tettong kuwaro sibawa peddang pura rampu, lésséni iyaro kaleddé'é polé ri lalengngé, nabélo' lao ri dare'é. Naunruni Biléam iyaro kaleddé'é nanatiwii paimeng ri lalengngé. Natettong malaéka'na Puwangnge ri bagiyang laleng iya macipié, ri pallawangenna duwa palla anggoro sibawa témbo' batu wali-wali. Wettunna iyaro kaleddé'é naita malaéka'na Puwangnge, mabbirinni angkanna tassipi ajéna Biléam ri témbo'é. Naunrusi Biléam iyaro kaleddé'é. Nainappa létté malaéka'na Puwangnge, natettong ri onrong iya lebbi macipié angkanna dé'gaga laleng laing untu' labe' ri abéyona iyaré'ga ataunna. Naitana malaéka'na Puwangnge, naparebbani aléna iyaro kaleddé'é. Macaini Biléam nanaunrui iyaro kaleddé'é sibawa tekkeng. Nanaébbuni Puwangnge iyaro kaleddé'é wedding mabbicara. Adanna iyaoro kaleddé'é lao ri Biléam, “Aga upogau' lao ri Puwang angkanna naunruka Puwakku narapi wékkatellu?” Nappébali Biléam, “Muwacculé-culéika! Akkalarapanna engka peddakku, pastini uwunoko!” Nappébali iyaro kaleddé'é, “Tenniyaka'ga iyya'é kaleddé'na Puwang iya maittaénna natonangika Puwang? Engkaga naengka uwéwa lao ri Puwang?” Nappébali Biléam, “Dé'.” Nainappa Puwangnge mébbui Biléam naullé mitai malaéka'na Puwangnge tettong kuwaro sibawa peddang pura rampu. Masitta'ni Biléam suju' ri tanaé sibawa massompa. Nakkutana malaéka'na Puwangnge, “Magi muwunrui kaleddé'mu narapi wékkatellu? Poléka untu' lawa-lawaiko, saba' manuru pallolongekku, dé' namakessing laoko. Wettunna naitaka kaleddé'mu, lésséi narapi wékkatellu. Rékko dé', pasti purano uwuno, iyakiya iyaro kaleddé'é upassalama'i.” Nappébali Biléam, “Madosaka. Dé' uwissengngi makkedaé tettongngi Puwang ri tengnga laleng untu' lawa-lawaika. Iyakiya makkekkuwangngé, rékko manuru pallolongenna Puwang dé' namakessing upatteru allalengengngéwé, maéloka lisu.” Iyakiya makkedai malaéka'na Puwangnge, “Accowé bawanno risining tauwéro. Iyakiya banna weddikko powadai aga iya uwassurowangngé powadai.” Nanapatteruni Biléam joppana sibawa iyaro sining surona Balak. Wettunna naéngkalinga Balak makkedaé maéloi polé Biléam, laoni duppaiwi ri kota Moab, iya monroé ri wirinna Salo Arnon, ri pakkasésénna daéra Moab. Adanna Balak lao ri Biléam, “Magi dé' mupolé wettu bunge' uwobbimu? Aga muwasengngi dé' uwulléi wajai saromu?” Nappébali Biléam, “Nah, poléna makkekkuwangngé. Iyakiya dé' gaga ha'ku powadai muwi aga sangadinna iya nassurowangngé Allataala upowada.” Nanalaona Biléam sibawa Balak ri kota Huzot. Kuwaniro Balak makkasuwiyangeng siyagangngaré kajunna saping sibawa bimbala. Sibagiyang polé ri jukuéro nawéréngngi Biléam sibawa sining pamimping iya naéwaé silaong. Pappa bajana ritiwini Biléam ri Balak ménrékiwi bulu-bulu Bamot Baal. Polé kuwaro naulléi Biléam mitai sibagiyang polé ri bangsa Israélié. Adanna Biléam lao ri Balak, “Patettongekka ri onrongngéwé pitu mézba, sibawa passadiyai kuwaé pitu kajunna saping lai sibawa pitu kajunna bimbala lai.” Napogau'ni Balak pada-pada iya napowadaé Biléam lao ri aléna. Ri yasé'na tungke' mézbaéro nakkasuwiyangenni mennang sikaju saping lai sibawa sikaju bimbala lai. Nainappa makkeda Biléam lao ri Balak, “Tettonno ri seddéna akkarobangeng ritununna Puwakku. Naulao mitai aga maéloiga Puwangnge méwaka sita iyaré'ga dé'. Upowadappi matti sininna iya napowadangngékka Puwangnge.” Nalaona Biléam alé-aléna ri coppo'na séddié bulu-bulu, nakkuwaniro Allataala polé ri aléna. Nakkeda Biléam lao ri Allataala, “Purana patettong pitu mézba sibawa makkasuwiyangeng sikaju saping lai sibawa sikaju bimbala lai ri yasé'na tungke'-tungke' mézbaé.” Nanappaissengenni Puwangnge lao ri Biléam aga iya harusu'é napowadangngi, nanasuroi lisu lao ri Balak untu' palettu'i pasenna Puwangnge lao ri Balak. Lisuni Biléam nanapoléini Balak tettong mupi ri seddéna akkarobangeng ritununna, silaong sininna pamimpinna Moab. Nanapowadani Biléam iyaé botoé, “Polé ri Aram, bulué ri alau kuwaro, Balak, arung Moab mobbika, adanna, ‘Laono mai, abbicarangekka. Tanroiwi bangsa Israéliéro!’ Weddigga patanroika, rékko Allataala dé' napatanroi? Weddigga pahukkukka, rékko Allataala dé' napahukkung? Polé ri coppo'na sining bulué uwitai mennang; polé risining bulu-bulué utiroi mennang. Itai, séddi bangsa mallaingngé dé' nauttama ri golonganna bangsa-bangsa laingngé. Wija-wijanna Yakub pada-padai awué tenribilang; égana bangsa Israélié dé' padanna. Tennapodo matéka selaku tau malempu memmuwaré ajjalekku pada-padai ajjalenna sining tauwéro.” Nanakkeda Balak lao ri Biléam, “Aga mupogau' lao ri iyya? Utiwiko kumaiyé untu' tanroiwi sining balikku. Iyakiya mala mubarakkakiwi mennang.” Nappébali Biléam, “Iyami bawang wedding upowada aga iya nassurowangngé Puwangnge upowada.” Namakkeda Balak lao ri Biléam, “Laono mai tasilaong lao ri onrong laingngé; polé kuwaro banna mulléi mitai sibagiyang polé ri bangsa Israélié. Tanroini mennang polé kuwaro.” Naritiwina Biléam ri Balak lao ri padang Zofim, ri coppo'na Bulu Pisga. Patettong toni kuwaro pitu mézba sibawa makkasuwiyang sikaju saping lai sibawa sikaju bimbala lai ri yasé'na tungke'-tungke' mézbaéro. Nakkeda Biléam lao ri Balak, “Onrono kuwaé, ri seddéna akkarobangeng ritununna Puwakku, naulao méwai sita Puwangnge kuwaro.” Naéwani Puwangnge sita Biléam sibawa paissengiwi aga iya harusu'é napowadangngi, nainappa nasuro lisu lao ri Balak untu' palettu'i pasenna Puwang -ngéro. Nanalisuna Biléam nanapoléi Balak tettong mupi ri seddéna akkarobangeng ritununna, silaong sibawa sining pamimpinna Moab. Nakkutananni Balak aga iya puraé napowada Puwangnge, nanapowadani Biléam iyaé botoé, “Eh Balak, ana' Zipor, poléno mai, éngkalingai aga maélo upowada. Allataala dé' napada-pada tolinoé iya magampangngé massesse kalé sibawa napoji mabbellé. Rékko majjanciwi Allataala, pasti Narupai! Rékko mabbicarai, tentu kajajiyangngi! Risuroka mabbarakkaki; narékko Allataala mabbarakkaki, dé' uwulléi gettengngi paimeng. Ri Yakub dé' napaita jaé; ri Israélié dé' napaita asukkarakengngé. Puwangnge, Allataalana mennang, sibawangngi. Gorai mennang: Aléna ritu Arung! Allataala tiwii mennang massu polé ri Maséré; pada-pada banténg liyaé mammusurengngi. Dé' gaga pajjappi iya mamosoé lao ri Yakub dé' gaga paddissengeng iya paullé lao ri Israélié. Passalenna iyaro bangsaé makkedai matu tauwé, ‘Itani anu makalallaing iya Naébbué Allataala!’ Tokkongngi iyaro bangsaé pada-pada singa komba'é, sibawa tettong pada-pada singa laié. Dé' naléwu ri wettu dé'napa naemme'i inanréna sibawa naénung darana anré iya natikkengngé.” Nanakkeda Balak lao ri Biléam, “Sikuna, rékko dé' mumaélo tanroiwi bangsa Israélié; iyakiya aja' sises-siseng mubarakkakiwi mennang!” Nappébali Biléam, “Dé'ga napura upowada ri Puwakku makkedaé maéloka powadai sininna iya napparéntangngé Puwangnge?” Nakkeda Balak, “Laono mai talao ri onrong laingngé. Nigana missengngi naleppessakko Allataala tanroingekka Israélié ri onrongngéro.” Naritiwini Biléam ri coppo'na Bulu Péor iya mangoloé ri padang kessi'é. Adanna Biléam lao ri Balak, “Patettonno pitu mézba ri onrongngéwé sibawa passadiyani kuwaé pitu saping lai sibawa pitu bimbala lai.” Napogau'ni Balak pada-pada iya napowadaé Biléam. Makkarobangenni sikaju saping lai sibawa sikaju bimbala lai ri yasé'na tungke' mézbaéro. Naissenni Biléam makkekkuwangngé makkedaé napuwéloi Allataala barakkakiwi bangsa Israélié. Rimakkuwannanaro dé' nalao sappa tanra-tanrang pada-pada iya napogau'é ri yolonaé. Makkitai Biléam mattuju ri padang kessi'é, sibawa mitai bangsa Israélié iya mattengngangngé makkéma makkonro-konrong situru suku-suku bangsana. Narikuwasaina Biléam ri Rohna Allataala, nanapowadai iyaé botoé, “Iyanaé pasenna Biléam ana' Béor, ada-adanna séddié tau pakkita-kita iya puraé méngkalingai ada-adanna Allataala sibawa mitai pappaitana polé ri Iya Pommakuwasaé, rebbai, iyakiya sibawa mata tattimpa. Temmaka kessinna sining kémamu éh Yakub, sibawa sining onrong muwonroiyé, éh Israélié! Pada-pada lompo malowang iya mallebba'é, iyaré'ga tammeng ri wiring saloé; pada-pada pong gaharu iya natanengngé Puwangnge, iyaré'ga pong aras ri wiring saloé. Lolongengngi mennang uwai bosi iya maonaé, lolongengngi uwai maéga pallengnge'é. Kalabbai matu arunna, nacau Agag, sibawa akkarungenna ripakarajai matu. Allatalala tiwii mennang massu polé ri Maséré, pada-pada banténg liyaé mammusurengngi mennang. Bangsa-banga balié cappu matu naemme, Naancuru'i buku-bukunna mennang, sibawa Napoloi pana-panana mennang. Iyaro bangsaé pada-padai singa laié sibawa singa komba'é, iya makkanroppangngé sibawa léwu. Nigana barani teddui? Tennapodo tau iya barakkakiyéngngékko ribarakkakiwi, sibawa tau iya tanroiyéngngékko ritanroiwi.” Namacaina Balak pamare'i pajjagguru'na namakkeda lao ri Biléam, “Uwobbiko untu' tanroiwi sining balikku, iyakiya mala mubarakkakiwi mennang narapi wékkatellu. Makkekkuwangngé weddinno lao, lisu ri bolamu! Ujancingekko saro, iyakiya dé' napalaloko Puwangnge tarimai iyaro saroé.” Nappébali Biléam, “Dé'ga napura upowada lao risining surona Puwakku makkedaé namuni nawéréng manekka Puwakku sininna péra'é sibawa ulaweng iya engkaé ri saorajana Puwakku, dé' naweddikka majjalékkaiwi paréntana Puwangnge sibawa pogau'i séuwaé siélo-élo atikku? Banna weddikka powadai aga iya nassurowangngé Puwangnge upowada.” Nakkeda Biléam lao ri Balak, “Maélona lisu makkekkuwangngé ri bangsaku. Iyakiya ri wettu dé'napa ulao, makessinni upaissengiwi Puwakku passalenna aga iya napogau'é matu bangsa Israélié lao ri bangsana Puwakku ri munri.” Nanapowadani Biléam iyaé botoé, “Iyanaé pasenna Biléam, ana' Béor; ada-adanna séddié tau pakkita-kita iya puraé méngkalingai ada-adanna Allataala, sibawa wedding missengngi Iya Pommatanré; iya mitaéngngi pappaitana polé ri Iya Pommakuwasaé rebbai iyakiya sibawa mata tattimpa. Uwitai, iyakiya tenniya makkekkuwangngé; utiroi, iyakiya polé mabéla. Séddiwi arung polé ri Israélié assalenna, poléi matu pada-pada wéttowing mattappaé. Sining pamimpinna Moab naancuru'i matu naancuru'i matu bangsa Sét. Tanana Edom natudangiwi matu balinna, Iyakiya Israélié pogau'i pangkaukeng baranié. Polé ri Yakub mompoi matu séddi tau panguwasa, iya pabbinasaéngngi sining balinna.” Nainappa ri laleng pappaitaéro naitai Biléam sining tau Amalé'é. Nanapowadani iyaé botoé, “Polé risininna bangsaé ri linoé, Amalé' kaminang makuwasa. Iyakiya iyaro bangsaé paccappurenna, lennye towi matu untu' mannennungeng.” Ri laleng pappaitaéro naitai Biléam wija-wijanna Kain, nanapowadani iyaé botoé, “Onrong muwonroiyé mémeng masse'i, pada-pada sarangngé ri tompo'na bulu-bulu batué. Iyakiya iko tau Kénié, ripabbinasako matu, dé'na namaitta naakkako Asyur selaku tawanang.” Nainappa napowadato Biléam iyaé botoé, “Cilaka! Niga tuwo, rékko Allataala pogau'i gau'éro? Iyakiya polé ri Siprus poléi matu sipasukang kappala, nacaui matu mennang Asyur sibawa Héber, nainappa binasato matu iyaro pasukang kappala'é.” Nainappa sadiya-sadiya Biléam maélo lisu ri onrong naonroiyé, na Balak loa toni. Wettunna bangsa Israélié monro ri Lompo Sitim, sining tau worowanéna mennang mammulani malaweng sibawa sining makkunrai Moab iya engkaé kuwaro. Iyaro sining makkunraié naérai mennang lao ri pésta-pésta akkarobangngé untu' pakalebbii déwatana mennang. Maccowé toni tau Israélié manréi iyaro akkarobangngé sibawa sompai déwatana tau Moab-é. Nasaba nasompai Baal tau Israélié ri Péor, macaini Puwangnge lao ri mennang sibawa makkeda lao ri Musa, “Tikkengngi sininna tau iya kapalaiyéngngi bangsaéro sibawa unoi mennang ri yolona tau maégaé selaku mupajoppana parénta-Ku, kuwammengngi dé'na umacai lao ri bangsaéro.” Nanakkedana Musa lao risining hakinna Israélié, “Iko tungke'-tungke' harusu mpunoi sininna tauwé ri laleng sukummu iya puraé sompai Baal ri Péor.” Wettunna Musa sibawa sininna umma'é mattengngang mpating ri sumpang Kémana Puwangnge, naitani mennang séddi tau Israél tiwi séddi makkunrai Midian muttama ri laleng kémana. Wettunna Pinéhas, ana'na Eléazar, eppona Imang Harun mitai gau'éro, tokkonni nanasalaiwi addeppu-deppungengngéro. Malani séddi bessi nanalellungngi iyaro worowané sibawa makkunraié muttama ri laleng kémaéro. Nagajanni iya duwa tauwéro sibawa bessiéro namappésauna abala iya mattengngangngé majjallo ri Israéliéro. Iyakiya iya matéénna engkana 24.000 tau. Namakkeda Puwangnge lao ri Musa, “Pinéhas ana' Eléazar, eppona Imang Harun, mapatoi méwaiwi alebbirek-Ku ri tengnga-tengngana tau Israélié, angkanna nonno cai-Ku sibawa dé'na Ujaji pabbinasai bangsaéro. Jaji powadanni Pinéhas makkedaé mébbuka séuwa assijancing sibawa aléna. Aléna sibawa wija-wijanna Upattette selaku imang untu' mannennungeng, nasaba makkuwamani patona pura méwai-Ka, Allataalana, sibawa pura pakangka pappasidamé untu' dosana tau Israélié.” Tau Israél iya riyunoé silaong makkunrai Midiangngéro asenna Zimri, ana' Salu, kapalanai séuwa kaluwarga polé ri suku Siméon. Iyaro makkunraié riyasengngi Kozbi; ana'nai Zur, séddiwi kapala appang ri Midian. Puwangnge mabbéréyangngi iyaé paréntaé lao ri Musa, “Ewai tau Midiangngé, sibawa paccappui mennang nasaba ja iya puraé narancana mennang lao ri iko ri Péor, sibawa nasaba Kozbi ana'nai séddi kapala appang ri Midian. Iyaro Kozbi makkunrai iya maté riyuno wettunna kajajiyang abalaé nasaba kajajiyangngé ri Péor.” Pajanana abalaéro, makkedani Puwangnge lao ri Musa sibawa Eléazar, ana'na Imang Harun, “Harusu'ko bilang manengngi umma Israélié situru kaluwargana tungke'-tungke'. Sininna worowané iya makkéumuru'é duwappulo taung liyasé iya mullééngngi mancaji tentara, harusu'i riyoki.” Polé ri suku Rubén, ana' macowana Yakub: appanna Hénokh, Palu, Hézron sibawa Karmi. Tau worowané ri laleng sining appangngéro jumellana 43.730 tau. Ana'na Palu iyanaritu Eliab, na ana'-ana'na Eliab iyanaritu Némuél, Datan sibawa Abiram. Iyaro Datan sibawa Abiram purani ripilé ri umma'é, iyakiya masséddiwi sibawa sining tau maccowériyéngngi Kora untu' méwai Musa sibawa Harun nenniya méwai Puwangnge. Namapuwé' tanaé sibawa memme'i mennang angkanna maté silaong Kora nenniya sining tau maccowériyéngngi wettunna apié paccappui 250 tau worowané. Iyaro gau'é mancaji papparéngngerangngi ri tau Israélié. Iyakiya ana'-ana'na Kora dé' naccowé riyuno. Polé ri suku Siméon: Appanna Némuél, Yamin, Yakhin, Zérah sibawa Saul. Tau worowané ri laleng sining appangngéro jumellana 22.200 tau. Polé ri suku Gad: Appanna Zéfon, Hagi, Syuni, Ozni, Eri, Arod sibawa Aréli. Tau worowané ri laleng sining appangngéro jumellana 40.500 tau. Tau worowané ri laleng sining appangngéro jumellana 76.500 tau. Polé ri suku Isakhar: Appanna Tola, Pua, Yasub sibawa Simron. Tau worowané ri laleng sining appangngéro jumellana 64.300 tau. Polé ri suku Zébulon: Appanna Séréd, Elon sibawa Yahleel. Tau worowané ri laleng sining appangngéro jumellana 60.500 tau. Polé ri wija-wija Yusuf, iya mappunnaiyé duwa ana' worowané: suku Manasyé sibawa suku Efraim. Polé ri suku Manasyé: Makhir, ana' Manasyé, iyanaritu ambo'na Giléad; na sining appang iya mangoloéwé iyanaritu wijanna Giléad: Appang Iézer, Hélék, Asriél, Sékhem, Sémida sibawa Héfer. Zélaféhad ana' Héfer dé' nappunnai ana' worowané, banna ana' makkunarai. Ana'na mennang iyanaritu Mahla, Noa, Hogla, Milka sibawa Tirza. Tau worowané ri laleng sining appangngéro jumellana 52.700 tau. Polé ri suku Efraim: Appanna Sutéla, Békher sibawa Tahan. Appanna Eran iyanaritu wija-wija Sutéla. Tau worowané ri laleng sining appangngéro jumellana 32.500 tau. Iyanaro sining appang wija-wija Yusuf. Polé ri suku Bényamin: Appanna Béla, Asybél, Ahiram, Séfufam sibawa Hufam. Appanna Aréd sibawa Naaman iyanaritu wija-wija Béla. Tau worowané ri laleng sining appangngéro jumellana 45.600 tau. Polé ri suku Dan: Appanna Suham. Tau worowané ri laleng appangngéro jumellana 64.400 tau. Polé ri suku Asyer: Appanna Yimna, Yiswi sibawa Beria. Appanna Héber sibawa Malkiél iyanaritu wijanna Beria. Asyer mappunaiwi séddi ana' makkunrai iya riyasengngé Séra. Tau worowané ri laleng sining appangngéro jumellana 53.400 tau. Polé ri suku Naftali: Appanna Yahzeel, Guni, Yézer sibawa Syilem. Tau worowané ri laleng sining appangngéro jumellana 45.400 tau. Sininna tau worowané Israélié jumellana 601.730 tau. Makkedani Puwangnge lao ri Musa, “Bagéngengngi iyaro tanaé lao ri suku-suku bangsa Israélié situru égana tungke'-tungke' suku. Suku Léwié poléi ri appanna Gérson, Kéhat sibawa Mérari. Ri laleng wija-wijanna mennang muttama'ni appanna Libni, Hébron, Mahli, Musi sibawa Kora. Kéhat iyanaritu ambo'na Amram. Amram kawingngi sibawa Yokhébéd, ana' Léwi. Iyaro Yokébéd jajiwi ri Maséré. Amram sibawa Yokhébéd mappunnaiwi duwa ana' worowané: Harun sibawa Musa, enrengngé séddi ana' makkunrai, Miryam. Harun mappunnaiwi eppa ana' worowané: Nadab, Abihu, Eléazar sibawa Itamar. Nadab sibawa Abihu matéi wettunna mennang makkasuwiyangengngi api iya dé'é napuwéloi Allataala. Tau worowané polé ri suku Léwi iya makkéumuru'é siuleng liyasé jumellana 23.000 tau. Ricata'i mennang mallaing polé risining tau sibangsana, nasaba dé' nalolongeng mennang tana mana ri Israélié. Iyanaro daftar iya naébbué Musa sibawa Imang Eléazar passalenna sining appangngé ri Israélié wettunna mennang mabbilang ri tanéténa Moab ri liwenna Salo Yordan seddéna kota Yérikho. Polé risining tau iya naokié riyolo Musa sibawa Harun ri padang kessi Sinai, dé'na gaga muwi séddi tau iya tuwoé mupa. Puwangnge pura powadai makkedaé maté manengngi matu mennang ri padang kessi'é. Na mémeng maté manengngi mennang, sangadinna Kaléb ana' Yéfune sibawa Yosua ana' Nun. Zélaféhad mappunnaiwi lima ana' makkunrai, iyanaritu Mahla, Noa, Hogla, Milka sibawa Tirza. Ambo'na Zélaféhad iyanaritu Héfer, ambo'na Héfer iyanaritu Giléad. Ambo'na Giléad iyanaritu Makhir, ambo'na Makhir iyanaritu Manasyé, sibawa ambo'na Manasyé iyanaritu Yusuf. Iya limaro ana'na Zélaféhad laowi mangolo ri Musa sibawa Imang Eléazar nenniya sining pamimpingngé enrengngé sininna umma iya mattengngangngé maddeppungeng ri seddéna sumpanna Kémana Puwangnge. Adanna mennang, “Maténi ambo'ta ri padang kessi'é nadé' nappunnai ana' worowané. Tenniyai ana' gurunna Kora iya maronta'é lao ri Puwangnge. Iyaro ambo'ta matéi nasaba dosana muto. Iyakiya magi naharusu teddéng asenna polé ri bangsa Israélié banna nasaba dé' nappunnai wija-wija worowané? Wérékki tana ammanareng silaong sumpulolona ambo'ta.” Nanapalettu'ni Musa parakarana mennanro ri Puwangnge, namakkedani Puwangnge lao ri Musa, “Aga napowada iyaro ana'-ana'na Zélaféhad mémeng sitinaja. Jaji wérénni mennang tana ammanareng silaong sumpulolona ambo'na mennang. Iyaro manana Zélaféhad harusu'i ripanonno ri ana'-ana'na makkunraié. Powadani lao ri bangsa Israélié makkedaé rékko séddié worowané maté nadé' nappunnai ana' worowané, tana manana harusu'i nappammanareng lao ri ana'na makkunraié. Rékko dé' nappunnai ana' makkunrai, iyaro tana manana nappammanarengngi lao ri silessurenna worowané. Rékko dé' nappunnai silessureng worowané, iyaro tanana untu' silessurenna ambo'na iya worowané. Rékko dé' nappunnai silessureng worowané, sibawa dé'to gaga silessureng worowanéna ambo'na, iyaro tanana mancajiwi appunnangenna sellaona iya kaminang maréppé'é ri appanna.” Iyaro attentuwangngé harusu'i napatoi tau Israélié selaku peraturang hukkung iya napparéntangngé Puwangnge naolai Musa. Nakkeda Puwangnge lao ri Musa, “Enré'no ri Bulu Abarim, napolé kuwaro tironi wanuwa iya maéloé Uwéréngngi tau Israélié. Rékko purani mutiro, matéko matu pada-pada kakamu Harun, saba' ri padang kessi Zin iko sipadduwa pura méwai parénta-Ku. Wettunna ri Mériba sininna ra'ya'é mannoko-noko lao ri Iyya, dé' mumaélo pannessai akuwasak-Ku ri yolona mennang nasaba uwaiéro.” (Iyaro kajajiyangngé kajajiyangngi ri mata uwai Mériba ri Kadés, ri padang kessi Zin.) Namassempajanna Musa, “Oh, Puwang Allataala, iya mabbéré atuwong lao risininna iya tuwoé, uwéllauwi, jello'i séddi tau iya mullééngngi pimpingngi iyaé bangsaé; séddi tau iya mullééngngi mancaji pallima wettunna mennang mammusu. Aja' muleppessangngi iyaé umma'-Mu pada-pada bimbala makkonrong iya dé'é nappunnai pakkampi.” Nakkeda Puwangnge lao ri Musa, “Obbii Yosua, ana' Nun. Séddiwi tau iya maccaé. Palénne'i limammu ri tompo ulunna. Suroi tettong ri yolona Imang Eléazar sibawa sininna umma'é. Ri yolona maneng mennang harusu'ko mappallebbangengngi makkedaé Yosua iyanaritu passullému. Abbéréyanni lao ri aléna sibagiyang polé ri akuwasammu, kuwammengngi umma Israélié turusiwi. Harusu'i Yosua méllau tangnga polé ri Imang Eléazar, na Eléazar harusu makkutanangngi élo-Ku sibawa pakéi Urim sibawa Tumim. Nasibawang caraéro Eléazar pimpingngi Yosua sibawa sininna bangsa Israélié ri laleng sininna parakaraé iya naoloiyé.” Napogau'ni Musa pada-pada iya riparéntangngéngngi ri Puwangnge. Nasuroni Yosua tettong ri yolona Imang Eléazar sibawa sininna umma'é. Nanapalénne'ni limanna ri tompo ulunna Yosua sibawa mappallebbangengngi makkedaé Yosua iyanaritu passulléna, pada-pada iya ripowadangngéngngi ri Puwangnge. Puwangnge suroi Musa palettu'i ri bangsa Israélié makkedaé harusu'i mennang puriyatiwi sibawa malitutu kuwammengngi na ri wettu-wettu iya mattentué, riyakkasuwiyangengngi sining akkarobangeng maddupa inanré iya pésennangiyéngngi atinna Puwangnge. Iyanaé akkarobangeng iya harusu'é riyakkasuwiyangeng lao ri Puwangnge: Untu' akkarobangeng esso-essoé, duwakkaju ana' bimbala lai iya dé'é gaga sala-salanna, iya sikajué untu' pakkasuwiyang élé, sibawa iya sikajuéssi untu' pakkasuwiyang arawéng. Nasibawang iyaro ana' bimbala'é harusu'i riyakkasuwiyangeng sikilo labbu ricampuru sibawa sibang minnya zaitun iya kaminang magelloé. Iyanaro akarobangeng ritunu iya tette'é untu' bunge' mammulangngé riyakkasuwiyangeng ri Bulu Sinai. Baunna pésennangiwi atinna Puwangnge. Nasibawang iyaro ana' bimbala'é harusu towi riyakkasuwiyangeng sibang uwai anggoro iya riyabbolorengngé ri yasé'na mézbaé. Ana' bimbala untu' akkarobangeng arawéngngé harusu'i riyakkarobangeng sibawa cara iya padaé pada-pada pakkasuwiyang éléé, nasibawang uwai anggoro. Baunna akkarobangeng ritunuéro pésennangiwi atinna Puwangnge. Ri esso Saba'é harusu'i riyakkarobangeng duwakkaju ana' bimbala makkéumuru'é sitaung iya dé'é gaga sala-salanna, duwakkilo labbu ricampuru minnya zaitun untu' akkarobangeng ripatala sibawa akkarobangeng uwai anggoro. Iyaro akkarobangeng ritunué harusu'i riyakkasuwiyangeng tungke' esso Saba'é selaku pattamba ri akkarobangeng esso-essoé silaong akkarobangeng uwai anggoro'na. Ri pammulanna tungke' uleng harusu'i riyakkasuwiyangeng lao ri Puwangnge akkarobangeng ritunué maddupa duwakkaju saping lai lolo, sikaju bimbala lai, pitukkaju ana' bimbala lai makkéumuru sitaung, tungke'-tungke' iya dé'é gaga sala-salanna. Selaku akkarobangeng ripatala harusu'i riyakkasuwiyangeng labbu iya ricampuru'é minnya zaitun; tellukkilo labbu untu' tungke' kajunna saping laié; duwakkilo labbu untu' bimbala laié, sibawa sikilo labbu untu' tungke' kajunna ana' bimbala laié. Iyaro akkarobangeng ritunué sinrupai akkarobangeng inanré, na baunna pésennangiwi atinna Puwangnge. Nasibawang iyaro akkarobangeng ritunué harusu towi makkarobangeng uwai anggoro, duwabbang égana tungke' sikaju saping lai, séddi sitengnga bang untu' bimbala laié, sibawa sibang untu' tungke' kajunna ana' bimbala'é. Iyanaro peraturanna passalenna akkarobangeng ritunué iya harusu'é riyakkasuwiyangeng ri tanggala séddinna tungke' uleng sillampé taungngé. Selaku pattamba ri akkarobangeng ritunu esso-essoé sibawa akkarobangeng uwai anggoro'é, harusu towi muwakkasuwiyangeng sikaju bémbé lai untu' akkarobangeng paddampengeng dosa. Ri tanggala seppulona eppa uleng séddi, iyanaritu esso Paska untu' Puwangnge. Esso rappina, tanggala seppulo lima, mappammulai Ramé-ramé Roti dé'é Raginna, na pitungngesso ittana dé' naweddikko manré roti iya riyébbué paké ragi. Ri esso iya mammulangngé iyaro ramé-ramé harusu'ko pakangka addeppu-deppungeng untu' massompa, sibawa dé' naweddikko pogau' jama-jamang matane. Akkasuwiyangengngi lao ri Puwangnge akkarobangeng ritunué maddupa duwakkaju saping lai lolo, sikaju bimbala lai, sibawa pitukkaju ana' bimbala lai makkéumuru sitaung, tungke'-tungke' iya dé'é gaga sala-salanna. Akkasuwiyanno akkarobangeng ripatala iya riwajikengngé, maddupa labbu ricampuru minnya zaitun: tellukkilo labbu untu' tungke' kajunna saping laié, duwakkilo untu' bimbala laié, sibawa sikilo untu' tungke' kajunna ana' bimbala laié. Akkasuwiyangeng tokko sikaju bémbé lai untu' akkarobangeng paddampengeng dosa. Nanallalengiro mupogau'i upacara palledda dosana umma'é. Sininna akkarobangengngéro sinrupai pattamba ri akkarobangeng ritunu éléé iya biyasaé. Nanallalengi towi caraéro harusu'ko makkasuwiyangeng lao ri Puwangnge akkarobangeng ritunu pitungngesso ittana. Iyaro akkarobangengngé sinrupai pattamba ri akkarobangeng ritunu esso-essoé sibawa akkarobangeng uwai anggoro'na. Baunna iyaro akkarobangengngé pésennangiwi atinna Puwangnge. Ri esso iya mapitué harusu'ko pakangka addeppu-deppungeng untu' massompa sibawa dé' nawedding pogau' pallaung matane. Ri esso mammulangngé ri Pésta Engngalangngé, esso maraja leppe pitu aha', wettunna makkasuwiyangeng gandong baru ri Puwangnge, harusu'ko pakangka addeppu-deppungeng untu' massompa, sibawa dé' nawedding pogau' pallaung matane. Akkasuwiyangenno lao ri Puwangnge akkarobangeng ritunu maddupa duwakkaju saping lai, sikaju bimbala lai lolo sibawa pitukkaju ana' bimbala lai makkéumuru sitaung, tungke'-tungke' iya dé'é gaga sala-salanna. Baunna iyaro akkarobangengngé pésennangiwi atinna Puwangnge. Akkasuwiyanno akkarobangeng ripatala iya riwajikengngé, maddupa labbu ricampuru minnya zaitun: tellu kilo untu' tungke' kajunna saping laié, duwakkilo untu' bimbala laié, sibawa sikilo untu' tungke' ana' bimbala'é. Akkasuwiyangeng tokko sikaju bémbé lai untu' akkarobangeng paddampengeng dosa. Nasibawang caraéro mupogau'i upacara palledda dosana umma'é. Iyaro sining akkarobangengngé silaong akkarobangeng anggoro'na sinrupai pattamba ri akkarobangeng ritunu esso-essoé sibawa akkarobangeng ripatalaé. Ri tanggala séddinna uleng pitu harusu'ko pakangka addeppu-deppungeng untu' massompa, sibawa dé' nawedding pogau' pallaung iya matane'é. Ri essoéro sining tarompé'é harusu'i ripaoni. Akkasuwiyangenno lao ri Puwangnge akkarobang ritunu maddupa sikaju saping lai lolo, sikaju bimbala lai, sibawa pitukkaju ana' bimbala lai makkéumuru sitaung, tungke'-tungke' iya dé'é gaga sala-salanna. Baunna iyaro akkarobangngé pésennangiwi atinna Puwangnge. Akkasuwiyangeng tokko akkarobangeng ripatala iya riwajikengngé, maddupa labbu ricampuru minnya zaitun: tellukkilo untu' saping laié, duwakkilo untu' bimbala laié, sibawa sikilo untu' tungke' ana' bimbala'é. Akkasuwiyangeng tokko sikaju bémbé lai untu' akkarobangeng paddampengeng dosa. Nasibawang caraéro mupogau'i upacara palledda dosana umma'é. Iyaro sining akkarobangengngé sinrupai pattamba ri akkarobangeng ritunué iya riyakkasuwiyangengngé silaong akkarobangeng ripatalana, ri tanggala séddinna tungke' uleng. Sinrupa towi pattamba ri akkarobangeng ritunu esso-essoé iya riyakkasuwiyangngé silaong sibawa akkarobangeng ripatalaé sibawa akkarobangeng uwai anggoro'na. Baunna iyaro akkarobangeng ritunué pésennangiwi atinna Puwangnge. Ri tanggala seppulona uleng pitu harusu'ko pakangka addeppu-deppungeng untu' massompa. Iyaro essoé harusu'ko mappuwasa sibawa dé' nawedding mappallaung. Akkasuwiyanno lao ri Puwangnge akkarobangeng ritunu maddupa sikaju saping lai lolo, sikaju bimbala lai sibawa pitukkaju ana' bimbala lai makkéumuru sitaung, tungke'-tungke' dé' gaga sala-salanna. Baunna iyaro akkarobangengngé pésennangiwi atinna Puwangnge. Akkasuwiyanno akkarobangeng ripatala iya riwajikengngé, maddupa labbu ricampuru minnya zaitun: tellukkilo untu' saping lai, duwakkilo untu' bimbala lai, sibawa sikilo untu' tungke' kajunna ana' bimbala'é. Akkasuwiyangeng tokko sikaju bémbé lai untu' upacara paddampengeng dosana umma'é, rilainnaé akkarobangeng paddampengeng dosaé sibawa akkarobangeng ritunu esso-essoé silaong akkarobangeng ripatalaé sibawa akkarobangeng uwai anggoro iya riyakkasuwiyangngé iyaro essoé. Ri tanggala seppulona lima uleng pitu harusu'ko pakangka addeppu-deppungeng untu' massompa, sibawa dé' nawedding pogau' jama-jamang iya matane'é. Pitungngesso ittana harusu'ko pakangka ramé-ramé untu' pakalebbii Puwangnge. Ri esso mammulangngé akkasuwiyanno lao ri Puwangnge akkarobangeng ritunu maddupa seppulo tellu kajunna saping lai lolo, duwakkaju bimbala lai lolo, sibawa seppulo eppa kajunna ana' bimbala lai makkéumuru sitaung, tungke'-tungke' iya dé'é gaga sala-salanna. Baunna iyaro akkarobangengngé pésennangiwi atinna Puwangnge. Akkasuwiyangeng tokko akkarobangeng ripatala iya riwajikengngé maddupa labbu ricampuru minnya zaitun: tellu kilo untu' tungke' saping laié, duwakkilo untu' tungke' kajunna ana' bimbala laié, sibawa sikilo untu' tungke' kajunna ana' bimbala'é. Nasibawang iyaro akkarobangeng ripatalaé harusu towi riyakkasuwiyangeng akkarobangeng uwai anggoro iya riyapparelluwangngé. Ri lainnaéro akkasuwiyangeng tono sikaju bémbé lai untu' akkarobangeng paddampengeng dosa. Iyaro akkarobangengngé selaku pattamba ri akkarobangeng ritunu esso-essoé silaong akkarobangeng ripatalaé sibawa akkarobangeng uwai anggoro'na. Ri esso maduwaé akkasuwiyanno seppulo duwa kajunna saping lai lolo, duwakkaju bimbala lai, sibawa seppulo eppa kajunna ana' bimbala lai makkéumuru sitaung, tungke'-tungke' iya dé'é gaga sala-salanna. Ri esso iya matellué akkasuwiyanno seppulo séddi kajunna saping lai lolo, duwakkaju bimbala lai, sibawa seppulo eppa kajunna ana' bimbala lai makkéumuru sitaung, tungke'-tungke' iya dé'é gaga sala-salanna. Ri esso iya maeppaé akkasuwiyanno seppulo kajunna saping lai lolo, duwakkaju bimbala lai, sibawa seppulo eppa kajunna ana' bimbala lai makkéumuru sitaung, tungketungke iya dé'é gaga sala-salanna. Ri esso iya malimaé akkasuwiyanno aséra kajunna saping lai lolo, duwakkaju bimbala lai, sibawa seppulo eppa kajunna ana' bimbala lai iya makkéumuru sitaungngé, tungke'-tungke' iya dé'é gaga sala-salanna. Ri esso iya maennengngé akkasuwiyanno aruwa kajunna saping lai lolo, duwakkaju bimbala lai, seppulo eppa kajunna ana' bimbala lai makkéumuru sitaung, tungke'-tungke' iya dé'é gaga sala-salanna. Ri esso iya mapitué akkasuwiyanno pitukkaju saping lai lolo, duwakkaju bimbala lai, seppulo eppa kajunna ana' bimbala lai makkéumuru sitaung, tungke'-tungke' iya dé'é gaga sala-salanna. Ri esso iya maaruwaé harusu'ko pakangka addeppu-deppungeng untu' massompa sibawa dé' nawedding pogau' jama-jamang matane. Akkasuwiyanno lao ri Puwangnge akkarobangeng ritunu maddupa sikaju saping lai lolo, sikaju bimbala lai, sibawa pitukkaju ana' bimbala lai makkéumuru sitaung, tungke'-tungke' iya dé'é gaga sala-salanna. Baunna iyaro akkarobangengngé pésennangiwi atinna Puwangnge. Iyanaro sining peraturanna passalenna akkarobangeng ritunué, akkarobangeng ripatalaé, akkarobangeng uwai anggoro'é, enrengngé akkarobangeng pappasidamé iya harusu'é muwakkasuwiyangeng lao ri Puwangnge ri ramé-ramému iya puraé ripattentu. Iyaro sinina akkarobangengngé selaku pattamba ri sining akkarobangeng iya muwakkasuwiyangengngé untu' mappaleppe tinja iyaré'ga akkarobangeng cenning ati. Napalettu'ni Musa lao ri bangsa Israélié sininna séuwa-séuwaé iya napparéntangngé Puwangnge lao ri aléna. Nabbéréyanni Musa iyaé sining peraturangngé lao risining pamimpinna suku-sukunna bangsa Israélié. Rékko séddié tau worowané mattinja iyaré'ga majjanci sibawa mattanro ri yolona Puwangnge, angkanna nasiyoi aléna riséuwaé janci, harusu'i napogau' aga iya najjanciyangngéro, sibawa dé' nawedding massakkarengngi ada-adanna. Iyakiya rékko wettunna naéngkalinga gau'éro mappotane'i ambo'na, iyaro ana' daraé dé' natassiyo ri tinja'na sibawa jancinna. Puwangnge matu maddampengengngi, nasaba riyattéyangngi ri ambo'na. Iyakiya rékko wettuna naéngkalinga riyattéyangngi ri lakkainna, dé'na natassiyo ri tinja sibawa jancinna. Puwangnge maddampengengngi matu. Rékko séddié janda iyaré'ga makkunrai iya ritelle'énna mattinja iyaré'ga majjanci iya siyoéngngi aléna, tassiyoi ritinja'na iyaré'ga janciéro sibawa harusu'i narupai. Rékko séddié makkunrai iya kawingngénna mattinja'i iyaré'ga majjanciwi iya siyoéngngi aléna, harusu'i narupai sininna iya najjanciyangngéro, assaleng dé' nappotane lakkainna wettunna naéngkalinga gau'éro. Iyakiya rékko wettunna naéngkalinga iyaro gau'é riyattéyangngi ri lakkainna, iyaro makkunraié dé'na natassiyo ri tinja'na iyaré'ga jancinna. Puwangnge maddampengengngi matu, nasaba riyattéyangngi ri lakkainna. Mappunnaiwi ha' lakkaié untu' situjuiwi iyaré'ga sampéyangngi tungke' tinja iyaré'ga janci iya naébbué bainéna. Iyakiya rékko wettunna naéngkalinga iyaro gau'é dé' nappotane lakkainna, iyaro makkunraié harusu'i narupai sininna tinja'na iyaré'ga jancinna. Nasitujuiwi lakkainna iyaro tinja'é iyaré'ga jancié nasaba dé' nappotane wettunna naéngkalinga. Rékko ri munri iyaro lakkainna dé' nasitujuiwi tinja'na iyaré'ga jancinna bainéna, lakkainna ritu harusu tanggungngi addimonrinna passampéyannaro. Iyanaro sining peraturang iya nabbéréyangngé Puwangnge lao ri Musa passalenna tinja'é sibawa jancié iya naébbué séddié ana' dara iya monroé ri bolana ambo'na, iyaré'ga séddié makkunrai iya kawingngénna. Makkedai Puwangnge lao ri Musa, “Akkabale'ko lao ri tau Midiangngé nasaba aga iya puraé napogau' lao ri bangsa Israélié. Purairo matéko matu.” Nakkeda Musa lao ri bangsa Israélié, “Sadiya-sadiyano untu' mammusu; harusu'ko luruiwi tau Midiangngé untu' pogau'i pahukkungenna Puwangnge lao ri mennang. Polé ri tungke' suku bangsa Israélié, harusu'ko passadiya sisebbu tau prajuri untu' maju mammusu.” Naripiléna sisebbu tau polé ri tungke' suku bangsa Israélié, iya manenna jumellana seppulo duwa sebbu tau iya sadiyaé mammusu. Musa suroi mennang mammusu silaong Pinéhas ana'na Imang Eléazar. Tiwii Pinéhas barab-barang mapaccing sibawa tarompé-tarompé untu' mabbéré tanra-tanrang. Situru paréntana Puwangnge lao ri Musa, tau Israélié luruiwi tau Midiangngé sibawa mpunoi sininna tau worowané, muttama'ni lima arung Midian, iyanaritu Ewi, Rékem, Zur, Hur sibawa Réba. Biléam ana' Béor riyunoto. Natawanni sining tau Israélié sining makkunraié sibawa ana'-ana' Midiangngé, sibawa rampasa'i sininna olokolo'é sibawa sininna asugirenna mennang. Kota-kotana sibawa sining akkémanna mennang ritunuto. Purairo nalani sining tau Israélié sininna wassélé rappana mennanro, muttama'ni sininna tawanangngé sibawa olokolo'é, nainappa natiwi lao ri Musa sibawa Imang Eléazar nenniya lao ri sininna umma Israélié. Iyaro wettué mattengngangngi mennang makkéma ri tanéténa Moab, ri wirinna Salo Yordan, seddéna kota Yérikho. Musa, Imang Eléazar sibawa sininna pamimping laingngé polé ri umma Israélié massuni polé ri akkémangngé untu' duppaiwi tentara Israélié. Nacairini Musa sining parawiraé, sining kapala pasukangngé sibawa kapala tentaraé iya nappaé lisu polé ri ammusurengngé. Adanna lao ri mennang, “Magi muleppessangngi sining makkunraiéro tuwo? Tenniyaga iyaro sining makkunraié iya turusiyéngngi pangajana Biléam, angkanna napalécé umma Israélié ri Péor untu' salaiwi Puwangnge? Na iyanaro papolé abala ri yasé'na umma'na Puwangnge! Nah, unoi makkekkuwangngé tungke' tungke' ana' worowané sibawa tungke' makkunrai iya dé'énna naparawanna. Iyakiya sininna makkunrai iya parawangngé mupa weddingngi muwala untu' alému. Na iko maneng iya puraé mpuno tau iyaré'ga géssa uju harusu'no monro ri saliwenna akkémangngé pitungngesso ittana. Ri esso matellué sibawa mapitué iko sibawa sininna makkunrai iya mutawangngéro harusu pogau' upacara pappépaccing alé. Tungke' pakéyang sibawa agi-agi polé ri bingkulangngé, bulu bémbé'é iyaré'ga ajué, harusu towi ripépaccingi.” Nainappa makkeda Imang Eléazar lao risining tau iya nappaé polé ri ammusurengngéro, “Iyanaé sining peraturanna iya nabbéréyangngé Puwangnge lao ri Musa. Ri esso iya mapitué harusu'ko sessa'i pakéyammu, nappano dé'na munajisi'na, sibawa weddinno muttama ri laleng akkémangngé.” Makkedai Puwangnge lao ri Musa, “Iko sibawa Imang Eléazar, silaong sibawa sining pamimping laing polé ri umma Israélié, harusu bilangngi sininna wassélé rappaé, muttama'ni sining tawanangngé sibawa olokolo'é. Iyaro wassélé rappaé harusu'i mubagé duwa iya pada-padaé égana; sibagiyang untu' sining prajuri iya polé mammusu, sibawa sibagiyassi untu' umma'é lebbinna. Untu' pabbéré ri pallaingngé lao ri Iyya, Puwang, polé ri bagiyanna sining prajuri'éro harusu'i muwala séddi polé ri tungke' lima ratuna – muwi polé risining tau tawanangngé, iyaré'ga polé ri sapingngé, kaleddé'é, bimbala'é sibawa bémbé'é. Abbéréyangngi iyaro lao ri Imang Eléazar selaku pakkasuwiyang ripallaing untu' Iyya, Puwang. Polé ri bagiyang iya riwéréngngéngngi umma Israélié, harusu'i muwala séddi polé ri tungke' limappulona, muwi polé risining tau tawanangngé, iyaré'ga sapingngé, kaleddé'é, bimbala'é sibawa bémbé'é. Abbéréyangngi iya manennaro lao ri tau Léwié iya murusu'éngngi Kéma-Ku.” Napogau'ni Musa sibawa Eléazar pada-pada iya napparéntangngé Puwangnge. Nainappa Musa mabbéréyangngi pabbéré ripallaingngéro lao ri Imang Eléazar untu' pakkasuwiyang lao ri Puwangnge, pada-pada iya napparéntangngé Puwangnge. Pada-pada iya napparéntangngé Puwangnge, malani Musa séddi polé ri tungke' limappulo tau tawanang sibawa olokolo, nainappa nabbéréyang lao risining tau Léwié iya majjamaé ri Kémana Puwangnge. Nainappa sining parawira iya puraé pimpingngi tentara Israélié, mangolo ri Musa sibawa laporo'i, “Puwang, purani ribilang sining prajuri ana' buwata. Manessani jumellana mennang sukku muwi, muwi séddi dé'to teddéng. Rimakkuwannanaro tiwiki paréwa-paréwa ulaweng, potto, gellang, ciccing, anting-nganting sibawa ranté iya puraé nala tungke'-tungke'. Iya manennaé riyabbéréyangngi lao ri Puwangnge selaku pakkasuwiyatta, kuwammengngi natette linrungiki.” Nainappa Musa sibawa Imang Eléazar tarimai iyaro ulawengngé, iya manenna ri laleng bentu paréwa ulaweng. Pakkasuwiyanna sining parawiraéro tane'na nawéki duwa ratu kilo. Iyakiya iyaro sining prajuri'é tungke'-tungke' purani nala wassélé rappaéro untu' aléna mennang. Na Musa sibawa Imang Eléazar tiwii iyaro ulawengngé ri Kémana Puwangnge kuwammengngi Puwangnge linrungiwi bangsa Israélié. Suku-suku Rubén sibawa Gad mappunnaiwi maéga senna olokolo. Wettunna mennang naita temmaka kessinna tanana Yaézer sibawa tana Giléad untu' appiyarang olokolo, laoni mennang mangolo ri Musa, Imang Eléazar sibawa sining pamimping laingngé polé ri Israélié. Adanna mennang, riyéllauwi kuwammengngi iyaé tanaé riwérékki mancaji appunnangetta. Aja' tasuroki létté ri liwenna Salo Yordan.” Nappébali Musa, “Masa' maéloko monro kuwaé, nasining sibangsamu lao mammusu? Magi mumaélo mébbui bangsa Israélié métau untu' malléttoiwi Salo Yordan sibawa muttama ri wanuwa iya nabbéréyangngé Puwangnge lao ri mennang? Sining ambo'mu pogau' towi makkuwaéro, wettukku suroi mennang polé ri Kadés-Barnéa untu' jalajja'i wanuwaéro. Lettu'ni mennang ri Lompo Eskol sibawa naita toni iyaro tanaé. Iyakiya wettunna mennang lisu, naébbui mennang bangsa Israélié métau untu' muttama ri tana iya nabbéréyangngé Puwangnge lao ri mennang. Sininna tauwé nakennai iyaro pahukkungengngé sangadinna Kaléb ana' Yéfune, tau Kénas-é, sibawa Yosua ana' Nun, nasaba mennang sipadduwa tette'i matinulu ri Puwangnge. Macai Puwangnge lao ri bangsa Israélié angkanna naleppessangngi mennang sollé ri padang kessi'é patappulo taung ittana narapi sininna sippangka'na iya puraé maronta lao ri aléna maté maneng. Na makkekkuwangngé, maronta'ko pada-pada sining ambo'mu! Mémekko sikalompo tau madosa iya mébbuéngngi caina Puwangnge malluwa-luwa'si lao ri bangsa Israélié! Rékko balé'ko mabbokoriwi Puwangnge, sininna bangsaéwé naleppessangngi matu lebbi maittapasi ri padang kessi'é, na ikona ritu nassabariwi abinasanna mennang!” Nainappa iyaro sining tau Rubéngngé sibawa sining tau Gad-é maddeppériwi Musa sibawa makkeda, “Makessingengngi riyolo patettokki wakké iya ritémbo'é untu' bimbala-bimbala'ta sibawa kota-kota mabbénténg untu' ana'ta sibawa bainéta. Maéloki sadiya-sadiya untu' masitta maju mammusu silaong saudara-saudarata. Idi maélo pimpingngi musuéro sibawa tiwii mennang muttama ri wanuwa iya mancajiyé appunnangenna mennang. Na ana'ta sibawa bainéta monroni kuwaé, ri kota-kota mabbénténgngé, amang polé ri paggasana pabbanuwana wanuwaéwé. Dé' tamaélo lisu ri bolata ri wettu dé'napa nasininna tau Israélié mappunnai tana untu' appunnangeng manana. Dé' tamaélo tarimai muwi céddé polé ri tanana mennang ri liwenna Salo Yordan, nasaba purani ritarima bagiyatta kuwaé, ri seddé alauna Salo Yordan.” Nappébali Musa, “Rékko tonget-tongekko maélo sadiya-sadiya mammusu untu' Puwangnge, sibawa sininna ri yelle'mu iya mullééngngi mammusu malléttoiwi Salo Yordan sibawa ri yawa pappimpinna Puwangnge gasai sining balié narapi Puwangnge lellungngi mennang, angkanna iyaro wanuwaé tunru' ri Aléna, weddinno lisu, sibawa leppe'no polé ri kewajibammu lao ri Puwangnge sibawa lao ri saudara-saudaramu, na Puwangnge mabbéréyangngi matu tanaé ri seddé alauéwé mancaji appunnangemmu. Iyakiya éngngerangngi, rékko dé' murupaiwi jancimmu, madosako lao ri Puwangnge sibawa rihukkung matu nasaba dosamuro. Laono patettongngi kota-kotamu sibawa wakké-wakké bimbala'mu, naaja' muwallupaiwi rupaiwi aga iya puraé muwajjanciyanro!” Nanakkeda sining tau Gad-é sibawa sining tau Rubéngngé, “Puwang, maéloki pogau'i aga iya napparéntangngé Puwang. Ana'ta sibawa bainéta nenniya olokolo sapitta sibawa bimbala'ta monroi matu kuwaé, ri kota-kotana Giléad. Iyakiya idi'é sadiyaki untu' lao mammusu ri yawa pappimpinna Puwangnge. Maéloki malléttoiwi Salo Yordan sibawa mammusu pada-pada iya puraé napowada Puwang.” Nabbéréyanni Musa paréntaéwé lao ri Imang Eléazar, Yosua sibawa sining pamimpinna Israélié, “Rékko sining tau Gad-é sibawa sining tau Rubéngngé maccowériwi paréntana Puwangnge sibawa malléttoiwi Salo Yordan untu' mammusu, sibawa rékko bantuwanna mennang namuwulléi sittaiwi wanuwaéro, harusu'i muwéréng mennang tana Giléad mancaji appunnangenna mennang. Iyakiya rékko dé' mennang nalléttoiwi Salo Yordan untu' mammusu sibawakko, harusu'i mennang tarima bagiyang tana mana ri wanuwa Kanaan, pada-pada iko.” Nappébali sining tau Gad-é sibawa sining tau Rubéngngé, “Puwang, maéloki pogau'i aga napparéntang Puwangnge. Ri yawa pappimpinna Puwangnge maéloki mallétto ri wanuwa Kanaan sibawa maju mammusu, iyakiya sitinajai tana seddé alaunaé Salo Yordan tette'i mancaji appunnangetta.” Nanabbéréyanni Musa lao ri suku-suku Gad sibawa Rubén nenniya lao ri sitengngana suku Manasyé sininna daéra Sihon, arunna Amori, sibawa daérana Og, arunna Basan muttama'ni kota-kotana sibawa tanaé ri seddéna. Napatettonni paimeng suku Gad kota Dibon, Atarot, Aroér, Atarot-Sofan, Yaézer, Yogbéha, Bét-Nimra, sibawa Bét-Haran selaku kota-kota mabbénténg sibawa selaku onrong wakké-wakké bimbala. Napatettonni paimeng suku Rubén kota-kota Hésybon, Eléalé, Kiryataim, Nébo, Baal-Méon, sibawa Sébam. Kota-kota iya napatettongngé mennang paimeng nasulléiwi asenna. Appanna Makhir, ana' Manasyé, gasai tana Giléad, nainappa nasittai sibawa paddésu'i sining tau Amorié iya engkaé kuwaro. Rimakkuwannanaro nabbéréyanni Musa iyaro tana Giléad lao ri appanna Makhir, sibawa mattette'ni mennang kuwaro. Yair, polé ri suku Manasyé, gasai sibawa sittaiwi siyagangngaré désa, nainappa naseng “Désa-désa Yair”. Nobah gasai sibawa sittaiwi Kénat silaong sining kampongngé ri seddéna, nainappa naseng Nobah, situru asenna muto. Nasalainnana bangsa Israélié Maséré, ri laleng barisi siturué suku bangsana tungke'-tungke' ri yawa pappimpinna Musa sibawa Harun, léppangngi mennang ri siyagangngaré onrong. Puwangnge paréntangngi Musa untu' mokii asenna tungke onrong iya naléppangiyé mennang. Nasalaiwi bangsa Israélié Maséré tanggala seppulona lima uleng séddi, siesso purana Paska mammulangngé. Ri yawa pallinrungenna Puwangnge nasalaiwi mennang kota Rameses, risabbing ri bangsa Maséré'é, iya mattengngangngé kuburu'i ana'-ana' macowana mennang iya puraé nauno Puwangnge. Nasibawang pangkaukengngéro, napabuttiwi Puwangnge makkedaé lebbi watangngi naiya déwata-déwata Maséré'é. Nasalainnana bangsa Israélié Rameses, makkémani mennang ri Sukot. Nainappa mennang joppasi sibawa makkéma ri Etam, ri wirinna padang kessi'é. Polé kuwaro lisuni mennang ri Pi-Hahirot, ri seddé alauna Baal-Zéfon, nainappa makkéma ri seddéna Migdol. Nainappa mennang nasalai Pi-Hahirot, malléttoiwi tasi'é sibawa muttama ri padang kessi Etam; labe'nana tellungngesso mallaleng, makkémani mennang ri Mara. Polé kuwaro matteruni mennang sibawa makkéma ri Elim; kuwaro engka seppulo duwa mata uwai sibawa pituppulo pong karoma. Nainappa mennang nasalai Elim sibawa makkéma ri seddéna Séppang Suéz. Iyaro wettué arunna wanuwa Arad, ri Tana Négéb, Kanaan Yattang, lolongenni karéba makkedaé umma Israélié mattengnganni mattuju ri wanuwanna. Ri tanéténa Moabro, ri wirinna Salo Yordan, seddéna kota Yérikho, Puwangnge mpéréngngi Musa iyaé parénta-paréntaé untu' bangsa Israélié, “Rékko muwalléttoiwi Salo Yordan untu' muttama ri wanuwa Kanaan, harusu'ko paddésu'i sininna pabbanuwana wanuwaéro. Paccappu manengngi barahalana mennang iya polé ri batué sibawa bessié enrengngé onrong-ngonrong assompanna mennang. Iyaro tanaé harusu'i musittai sibawa mutudangi, nasaba Uwabbéréyanni lao ri iko. Nainappa harusu'ko bagéngengngi mancaji appunnangeng manana sining appammu sibawa loteréiwi. Lao ri appang iya battowaé harusu'i muwéréng bagiyang iya battowaé, sibawa appang iya baiccu'é, bagiyang iya baiccu'é. Iyakiya rékko pabbanuwana iyaro wanuwaé dé' mupaddésu'i, sining tau iya monroé kuwaro nasussaiko matu pada-pada kessi'é ri matammu iyaré'ga dorié ri ajému. Mennang ritu matti musuriko. Rékko dé' mupaddésu'i mennang, maéloka paccappuko pada-pada iya Urancanaé lao ri mennang.” Puwangnge mpéréngngi Musa iyaé parénta-paréntaé untu' bangsa Israélié, “Dé'na namaitta mumattamakiwi wanuwa Kanaan, wanuwa iya Uwéréngngékko selaku tana mana. Iyanaé sining pakkasésénna wanuwammuro. Ri yattang, iyaro pakkaséséngngé mappammulai ri padang kessi Zin tuttungngi Edom. Ri alau iyaro pakkaséséngngé mappammulai ri cappa yattanna Tasi Maté, bélo' liyattang mattuju ri Laleng Akrabim sibawa matteru ri Zin lettu ri Kadés-Barnéa ri yattang. Polé kuwaro bélo' liyajang ri tasi'é lettu ri Hazar-Adar, sibawa matteru ri Azmon. Kuwaro bélo' lao ri lompo'é ri pakkasésénna Maséré sibawa maccappa ri Tasi Tengngaé. Tasi Tengngaé selaku pakkaséséng wanuwammu ri tibang yajang. Ri manorang, iyaro pakkaséséngngé mappammulai ri Tasi Tengngaé mattuju ri Bulu Hor napolé kuwaro lao ri Laleng Hamat, nainappa matteru lao ri Zédad sibawa lao ri Zifron sibawa maccappa'i ri Hazar-Enan. Ri alau, iyaro pakkaséséngngé mappammulai ri Hazar-Enan lao ri Séfam. Polé kuwaro nonno ri Ribla ri seddé alauna Ain, nainappa matteru lao ri bulu-bulué ri wiring alauna Tappareng Galiléa, nainappa liyattang sillampé Salo Yordan lettu ri Tasi Maté. Iyanaro wanuwammu situru sining pakkasésénna iya mattulilingiyéngngi.” Makkedai Musa lao ri bangsa Israélié, “Iyanaro tana iya maéloé mutarima sibawa muloteréi, tana iya manuru'é paréntana Puwangnge harusu'i ribagé lao ri aséra sitengnga suku bangsa Israélié. Suku-suku Rubén sibawa Gad nenniya sibagiyang polé ri suku Manasyé purani natarima bagiyanna mennang, sibawa iyaro tanaé pura toni ritawangeng kaluwarga-kaluwargana mennang. Iyaro tana manana mennang ri seddé alaunai Salo Yordan, ri seddéna kota Yérikho.” Makkedai Puwangnge lao ri Musa, “Iya harusu'é bagéi iyaro tanaé ri yelle'mu iyanaritu Imang Eléazar sibawa Yosua ana' Nun. Jello tokko séddi pamimping polé ri tungke' suku untu' bantui Eléazar sibawa Yosua bagéi iyaro tanaé.” Iyanaro sining tau iya naparéntangngé Puwangnge untu' bagéi tana manaé lao ri bangsa Israélié ri wanuwa Kanaan. Ri tanéténa Moab, ri wirinna Salo Yordan, seddéna kota Yérikho, makkedai Puwangnge lao ri Musa, “Palettu'i lao ri bangsa Israélié makkedaé polé ri tana manana iya maéloé natarima mennanro, siyagangngaré kotana sibawa padang wellaé ri seddéna harusu'i mennang nabbéréyang lao ri tau Léwié kuwammengngi weddingngi mennang monro kuwaro. Iyaro kota-kotaé mancajiwi appunnangenna tau Léwié untu' onronna mennang. Padang wellaé ri seddéna iyanaritu untu' sininna olokolo'na mennang. Iyaro padang wellaé lowanna 450 météré lao ri sininna sulapa'é, riukkuru'i polé ri témbo' kotaé. Jaji daérana tau Léwié massulapa eppai, iya ukkurannaé 900 météré tungke' sulapa'na, sibawa kotana ri tengnga-tengngana. Lao ri tau Léwié harusu'i muwéréng enneng kota allinrungeng selaku onrong allarinna untu' sining tau iya dé'é nattungkaiwi mpunoi tau laingngé. Ri lainnaéro harusu towi riwéréng tau Léwié patappulo duwa kota laingngé sibawa padang wellana. Jaji iya manenna engka patappulo aruwa kota untu' tau Léwié. Jumellana kota-kota Léwié ri laleng daérana tungke'-tungke' suku Israélié harusu'i ripattentu situru égana kota sibawa loppona daéraéro.” Puwangnge suroi Musa palettu'i ri bangsa Israélié ada-adaéwé, “Purana muwalléttoi Salo Yordan sibawa muttama ri wanuwa Kanaan, harusu'ko pattentu kota-kota allinrungeng, kuwammengngi sining tau iya dé'é nattungkaiwi mpunoi tau laingngé, weddingngi lari lao kuwaro. Ri kota-kotaéro iyaro tauwé amangngi matu polé ri sumpulolona iya naunoé iya maéloé makkabale. Saba' tau iya riteppué mpunoi tau laingngé, dé' nawedding riyuno rékko dé'pa nariparéssa parakarana ri pengadilangngé. Pattentui enneng kota allinrungeng, tellu ri seddé alauna Salo Yordan sibawa tellu ri tana Kanaan. Iya enneng kotaéro mancajiwi kota allinrungeng untu' iko, tau Israélié, sibawa tau laing polé-polé iyaré'ga iya monro tette'é ri tengnga-tengngamu. Nigi-nigi pura mpunoi tau laingngé sibawa dé' nattungkaiwi, weddingngi lari lao ri sala séddinna kotaéro. Sumpulolona iya maréppé'é polé ri tau iya riyunoéro wedding pogau'i iyaro pahukkungeng maté. Rékko naruntu'ni paunoéro, weddinni nauno. Rékko séddié tau nabenciwi tau laingngé, nainappa nauno sibawa mabbantingengngi iyaré'ga genrungngi sibawa agi-agi lao ri aléna, iyaré'ga jagguru'i, iyaro tauwé iyanaritu pabbunoi; pasalai sibawa harusu'i rihukkung maté. Sumpulolona iya maréppé'é polé ri tau iya riyunoéro wedding pogau'i iyaro pahukkungeng maté. Rékko naruntu'i iyaro paunoé, weddingngi nauno. Iyakiya weddissa jaji séddié tau dé' nattungkai mpunoi tau laingngé iya dé'é nabenciwi, nabbantingengngiga iyaro tauwé iyaré'ga nagenrungngi agi-agi. Iyaré'ga weddissa jaji séddié tau tennaitai, pasempé'i séddié batu iya nassabariyéngngi amaténna tau laingngé iya tenniyaé balinna, sibawa dé'to namakkatta cilakaiwi iyaro tauwé. Ri laleng parakara-parakara makkuwaéro rapa'na umma'é harusu madélékiwi tau iya puraé pauno sibawa iya maéloé wale'i amaténna tau iya riyunoé. Iyaro sining peraturangngé takkennai untu' iko sibawa untu' wija-wijammu, kégi-kégiko monro. Ri laleng parakara abbunowangngé, tau iya riteppué selaku pauno, banna weddingngi ripannessa pasala sibawa rihukkung maté rékko iyaro pangkaukengngé naulléi pabuttiwi duwa tau sabbi iyaré'ga lebbi. Séddi tau sabbi dé' nagenne untu' pabuttiwi makkedaé iyaro natteppuwangngé tongengngi. Séddié tau pabbuno harusu'i rihukkung maté. Dé' nawedding nawaja iyaro pahukkungengngé sibawa dowi. Rékko séddié tau lari ri sala séddinna kota allinrungeng, aja' naripalalo mabbéré dowi kuwammengngi naripalalo lisu ri bolana ri wettu dé'napa namaté Imang Lompoé. Rékko mupogau'i makkuwaéro, mucarépaiwi tana iya muwonroiyé. Abbunowangngé carépaiwi wanuwaé; jaji dé' gaga cara laing untu' pépaccingiwi wanuwaéro ri lainnaé reddu'i nyawana pabbunoé. Aja' mucarépaiwi tana iya muwonroiyé, nasaba Iyya'na Puwang, na Iyya monro ri tengnga-tengngana bangsa Israélié.” Sining kapala kaluwargaé ri laleng appanna Giléad, ana' Makhir, iyanaritu eppona Manasyé, ana' Yusuf, lao mangolo ri Musa sibawa sining pamimping laingngé. Adanna mennang, “ Puwangnge suroko bagéi iyaro tanaé lao ri tau Israélié sibawa loteréiwi. Nasuro tokko mabbéréyangngi tana ammanarenna saudarata Zélaféhad lao ri ana'-ana'na makkunraié. Iyakiya parellu riyéngngerang makkedaé rékko kawingngi mennanro sibawa worowané polé ri suku laingngé, sempé'i tanana mennang ri limanna sukuéro. Nanallalengiro tana iya ripattentué selaku daérata akurangengngi matu. Ri laleng Taung Appalisungngé, wettunna sininna waramparang iya puraé ribalu ripalisu ri punnana iya mammulangngé, iyaro tanana ana'-ana' makkunrainna Zélaféhad tette'i matu mancaji appunnangenna sining lakkainna mennang, angkanna ateddéngengngi sukutta iyaro tanaé.” Nanapalettu'ni Musa lao ri bangsa Israélié iyaé parénta polé ri Puwangnge, “Aga napowada iyaro sining tau wijanna Yusuf tongeng, rimakkuwannanaro makkedai Puwangnge makkedaé ana'-ana' makkunrainna Zélaféhad laluwasai kawing sibawa nigi-nigi iya napojiyé, assaleng iya padaé sukunna sibawa mennang. Tana manana tungke' tau Israélié tette'i matu tassiyo ri sukunna. Tungke' makkunrai iya mammanariyéngngi tana manaé ri laleng sala séddinna suku bangsa Israélié, harusu towi kawing sibawa tau polé ri sukuéro. Nanallalengiro tungke' tau Israélié nammanariwi matu tana manana néné-nénéna, angkanna iyaro tana manaé dé'na nakalélé-lélé polé riséddié suku lao ri suku laingngé. Tungke' suku bangsa Israélié tette'i matu mappunnaiwi tana manana muto.” Kawingngi mennang sibawa sining tau polé ri risining appangngé ri laleng suku bangsa Manasyé, ana'na Yusuf. Nanallalengiro tana manana mennang tette'i mancaji appunnangenna suku bangsa ambo'na mennang. Iyanaro sining peraturang sibawa sining attettekeng iya nabbéréyangngé Puwangnge lao ri bangsa Israélié naolai Musa, wettunna engka bangsa Israélié ri tanéténa Moab ri wirinna Salo Yordan, seddéna kota Yérikho. Iyaé kitta'é mallise'i ada-ada iya napalettu'é Musa lao ri bangsa Israélié wettunna mennang engka ri padang kessi'é ri Lompo Yordan. Iyaro lompo'é engkai ri seddé alauna Salo Yordan, seddéna kota Suf, pallawangenna kota Paran riséddié tibang, sibawa kota-kota Tofel, Laban, Hazerot sibawa Di-Zahab ri tibang laingngé. ( Polé ri Bulu Sinai lettu ri Kadés-Barnéa naolai daéra buluna Edom, riyapparelluwangngi seppulo séddi essona mallaleng.) Ri tanggala séddinna uleng seppulo séddi ri laleng taung mapatappuloé nasalainnana mennang Maséré, napalettu'ni Musa ri bangsaéro sininna iya napparéntangngé Puwangnge untu' ripowadangngi mennang. Iyaro kajajiyangngi purana Musa nacau Sihon, arunna tau Amorié, iya mapparéntaé ri kota Hésybon, sibawa Og, arunna Basan, iya mapparéntaé ri kota-kota Asytarot sibawa Edréi. Jaji ri seddé alauna Yordan ri daéra Moab, untu' bunge'-bunge'na Musa pakatajangngi hukkung-hukkungngé sibawa parénta-paréntana Puwangnge. Adanna Musa, “Wettutta engka ri Bulu Sinai, makkedai Puwang Allataalata, ‘Genne'ni ittana monroko ri buluéwé. Makkekkuwangngé bongkara'ni akkémammu namulao ri daéra buluna tau Amorié sibawa risininna daéra ri seddéna, iyanaritu Lompo Yordan, daéra mabbulu-bulué sibawa tanété mariyawaé, daéra ri seddé yattang sibawa wirinna Tasi Tengngaé. Laono mutudangiwi tana Kanaan sibawa Buluna Libanon lettu ri salo battowaé Efrat. Iyya, Puwang, pura majjanciyangngi sininna daéraéro lao ri toriyolomu Abraham, Ishak sibawa Yakub enrengngé wija-wijanna mennang. Jaji laono tudangiwi tanaéro.’ ” Makkedai Musa lao ri bangsaéro, “Wettutta engka ri Bulu Sinai, makkedaka lao ri iko: Tanggung jawa untu' pimpikko matane senna lao ri iyya. Dé' uwulléi alé-aléku pogau'i, saba' Puwang Allataalamu pura mébbui tattamba jumellana singngéga sining wéttowingngé ri langié. Tennapodo Puwang, Allataalana néné-nénému matterui tambaiwi jumellamu narapi leppi wékkasisebbu, sibawa pancajiko bangsa iya madécéngngé pada-pada iya puraé Najjanciyang! Iyakiya pékkugi makkullé alé-aléku mulléi méssangngi tanggung jawa iya matane'é untu' pacceppiwi sininna persoalammu? Piléni polé ri tungke' suku siyagangngaré tau worowané iya mapanré, maégaé pengalamanna sibawa pennoé pappahang, kuwammengngi uwakkai mennang untu' pimpikko. Iyaro tangngaé mutarimai sibawa makessing. Rimakkuwannanaro ri yelle'na sining pamimping iya mupilé, siyagangngaré tau iya mapanré sibawa maégaé pengalamanna uwalai sibawa uwakkai untu' kapalaiko. Siyagangngaré ripancaji pamimping sisebbu tau, iya laingngé sératu tau, limappulo tau sibawa seppulo tau. Makka towi pamimping-pamimping laing untu' murusu'i suku-sukummu. Iyaro wettué utugaskangngi mennang makkuwaé: Pénessaiwi sining assisalangngé iya mompoé ri yelle'na bangsamu. Wéréngngi apettung iya adélé'é, muwi ri laleng parakara iya kennaéngngi tau si bangsamu iyaré'ga kennaéngngi tau laing iya monroé ri yelle'mu. Aja' namatane siwali apettummu; tungke' tau harusu'i madélékiwi sibawa cara iya padaé, temmappasilaingeng niga iyaro tauwé. Aja' mumétau muwi lao ri niga, saba' apettung iya muwalaé poléi ri Allataala. Rékko séddié parakara mawatang senna untu' alému, tiwii lao ri iyya, kuwammengngi iyya pettuiwi. Iyaro wettué mabbéré tokka panunju-panunju lao ri iko passalenna sininna passaleng laingngé iya harusu'é mupogau'.” “Nainappa situru sibawa paréntana Puwang Allataala, risalaini Bulu Sinai natajoppa molai padang kessi iya malowangngé sibawa maseroé mattuju ri daéra buluna tau Amorié. Wettutta lettu ri Kadés-Barnéa, Iyakiya laoko ri iyya sibawa makkeda, ‘Lebbi kessing muwi suroi siyagangngaré tau untu' poddiyoloiki untu' salidikiwi iyaro wanuwaé kuwammengngi weddingngi napowada mennang lao ri idi kéga laleng iya harusu'é riyola sibawa pékkugiwi kota-kota iya maéloé rilaowi.’ Usitujuiwi iyaro tangngaé, iyanaro saba'na upiléi seppulo duwa tau, séddi tau polé ri tungke' suku. Nauttamakiwi mennang iyaro daéra buluna sibbéla Lompo Eskol, nainappa najalajja. Nainappa lisu mennang ri idi tiwi buwa-buwa iya nalolongengngé mennang kuwaro sibawa laporo'i makkedaé wanuwa iya maéloé nabbéréyang Puwang Allataalataro macommo senna. Iyakiya muéwai paréntana Puwang Allataalamu, sibawa dé' mumaélo muttamakiwi wanuwaéro. Mannoko'-noko'ko makkuwaé, ‘Nabenciki Puwangnge. Mala natiwiki massu polé ri Maséré untu' mabbéréyakki ri laleng limanna tau Amorié kuwammengngi naunoki. Jaji untu' aga laoki kuwaro? Sining tau iya risuroé lao kuwaro mébbuki métau ri laleng nalaporo'na makkedaé iyaro bangsaé lebbi watangngi sibawa lebbi poréi naiya idi, sibawa monroi mennang ri kota-kota iya sittanré langié témbo'na. Mitai mennang rassasa kuwaro!’ Iyakiya makkedaka: Aja' mumétau lao risining tauwéro. Puwang Allataalamu pimpikko matu sibawa mammusurekko pada-pada pura musabbingngé ri Maséré sibawa ri padang kessi'é. Muwitai pékkugi Puwang Allataalamu tiwiko sibawa salama puppu lalengngéro lettu ri onrongngéwé, dé' assilaingenna séddié ambo' mépa'i ana'na. Iyakiya namuni puraka makkeda makkuwaro, dé' topa mumaélo mateppe ri Puwang Allataalamu, iya joppaé ri yolomu untu' sapparekko onrong makkéma. Najellorekko laleng ri wennié sibawa alliri api, sibawa ri essoé ri laleng alliri ellung.” “Naéngkalingai Puwangnge addarékémmu namacaina. Mattanroi, ‘Dé' muwi séddi tau polé ri sippangka majaéwé muttamakiwi matu wanuwa macommo'é iya Uwajjanciyangngé lao ri néné-nénému. Banna Kaléb, ana' Yéfune muttamakiwi matu, nasaba tette'i matinulu ri Iyya. Lao ri Kaléb sibawa wija-wijanna maélo-Ka wéréngngi wanuwa iya puraé najalajja'ro.’ Muwassabari towi Puwangnge namacai lao ri iyya sibawa makkeda, ‘Musa, muwi iko dé'to mumattamakiwi matu wanuwaéro. Iyakiya pakkasse'i atinna pabbantummu, Yosua ana' Nun. Aléna ritu pimpingngi matu Israélié sittaiwi tanaéro.’ Namakkeda Puwangnge lao ri idi maneng, ‘Ana'-ana'mu iya baiccu senna'é mupa untu' pasilaingengngi iya makessingngé sibawa iya majaé, ana'-ana' iya muwasengngé maélo rirampasa risining balimmu, lao ri mennang ritu Uwéréngngi matu iyaro tanaé, sibawa natudangiwi matu mennang. Iyakiya iko lisuno ri padang kessi'é lalo ri laleng iya mattujué ri Séppang Akaba.’ Mappébalino, ‘Musa, madosaki lao ri Puwangnge. Iyakiya makkekkuwangngé maéloki malluru mammusu pada-pada iya napparéntangngé Puwangnge, Allataalata.’ Nainappa tungke'-tungke' ri yelle'mu sadiyasadiya untu' mammusu, sibawa mangga'i makkedaé gasai iyaro daéra bulué soal gampang. Iyakiya makkedai Puwangnge lao ri iyya, ‘Aja' muleppessangngi mennang mammusu, nasaba dé' umaélo sibawangngi mennang, ricaui matu ri balinna.’ Upalettukekko aga napowada Puwangnge, iyakiya dé' mupaduliwi. Muéwai paréntana Puwangnge, sibawa nasibawang atempong laoko ri daéra buluéro. Nainappa tau Amori iya monroiyéngngi iyaro daéra bulué massu méwako. Jumellana mennang maéga senna, pada-pada wani makkonrongngé. Nalellukko mennang sibbéla Horma, nainappa nacauko ri daéra buluna Edom. Nainappako lisu sibawa mangobbi lao ri Puwangnge méllau tulung, iyakiya dé' namaélo méngkalingako iyaré'ga jampangiko.” “Purairo monroki ri Kadés maitta senna. Angkanna lisuki ri padang kessi'é lalo ri laleng mattujué ri Séppang Akaba, pada-pada iya napparéntangngé Puwangnge. Maittaki sollé ri daéra buluna Edom. Namakkeda Puwangnge lao ri iyya makkedaé genne'ni ittana sollé ri daéraéro. Jaji harusu'ki lao ri manorang. Nainappa nasuroka Puwangnge mabbéréyangngi iyaé sining panunju'é lao ri iko, ‘Dé'na mumaitta mumattama matu ri wanuwa Edom, daérana saudara-saudaramu, wija-wijanna Esau. Métaui matu mennang ri iko, iyakiya dé' naweddikko gasai mennang, saba' polé ri tanana mennang muwi céddé dé'to umaélo mpérékko, nasaba daéra Edom purani uwéréng wija-wijanna Esau. Weddikko melli inanré sibawa énungeng polé ri mennang.’ Engngerangngi pékkugi Puwang Allataalamu pura barakkakiko ri laleng sininna iya mupogau'é. Napiyaroko ri wettu sollému ri padang kessi iya malowangngéwé. Nalinrungiko patappulo taung ittana sibawa nawérékko sininna iya muwapparelluwangngé. Nainappa joppaki matteru, salaiwi laleng iya lalowé ri kota-kota Elat sibawa Ezion-Géber mattuju ri Tasi Maté, nainappa bélo' lilau manorang mattuju ri padang kessi Moab. Makkedai Puwangnge lao ri iyya, ‘Tau Moab-é, wijanna Lot, dé' nawedding muganggu. Aja'to muwagagai mennang. Wanuwa Ar purani Uwéréngngi mennang sibawa polé ri tanana mennang muwi céddé dé'to Uwérékko.’ ” ( Riyolo Ar naonroiwi tau Emingngé. Battowa watakkaléna mennang, pada-pada tau Enak-é, bangsa rassasato. Pada-pada tau Enak-é, riteppu towi mennang tau Réfaim iyakiya tau Moab-é masengngi mennang tau Emim. Riyolo tau Horié monroi ri Edom, iyakiya ripaddésu'i sibawa ripaccappui ri wija-wijanna Esau, iya rimonri tudangiwi tanana mennang; makkuwatoro bangsa Israélié rimunri paddésu'i sining balinna polé ri tana iya nabbéréyangngé Puwangnge lao ri mennang.) “Nainappaki malléttoiwi Salo Zéréd pada-pada iya napparéntangngé Puwangnge lao ri idi. Iyaro kajajiyangngi telluppulo aruwa taung risalainnana Kadés-Barnéa. Sininna prajuri sippangka'éro maténi pada-pada iya napowadaé Puwangnge. Matteru-terui Puwangnge méwai mennang angkanna binasa maneng. Maté manennana mennang, makkedai Puwangnge lao ri idi, ‘Iyaé essoé muwolai daéra Moab, lalo ri wanuwa Ar. Namulettu ri seddéna tanana tau Amongngé, wija-wijanna Lot. Aja' muganggui iyaré'ga gasai mennang, saba' polé ri tana iya puraé Uwéréngngi mennang, muwi céddé dé'to gaga iya maéloé Uwérékko.’ ” ( Iyaro daéraé tarompo towi selaku wanuwa Refaim, asenna bangsa iya monroé riyolo kuwaro; tau Amongngé nasengngi mennang tau Zamzumim. Pada-pada tau Enak-é, battowato mennang watakkaléna. Mawatang senna mennang, sibawa maéga jumellana. Iyakiya Puwangnge paccappui mennang, angkanna tau Amongngé sittaiwi tanaéro, nainappa monro kuwaro. Makkuwatoro napogau' Puwangnge untu' tau Edongngé, wija-wijanna Esau, iya monroiyéngngi daéra buluna Edom. Puwangnge paccappui tau Horié, angkanna tau Edongngé sittaiwi iyaro tanaé sibawa tudangiwi nainappa mattette kuwaro lettu makkekkuwangngé. Tana mattuttung wiring Tasi Tengngaé natudangiwi sining tau polé ri pulo Kréta. Napaccappui mennang tau Awié, pabbanuwa tulénna tanaéro, nainappa tudangiwi daéraéro lettu ri yattang sibbéla kota Gaza.) “Ri liwenna daéra Moab, makkedai Puwangnge lao ri idi, ‘Laono makkekkuwangngé malléttoiwi Salo Arnon. Maéloka mabbéréyangngi lao ri iko Sihon, arunna Amorié iya mapparéntaé ri Hésybon, silaong sibawa wanuwanna. Gasai, nainappa, tudangiwi tanana. Mappammulai essoéwé maélo-Ka mébbuko riyétauri ri bangsa-bangsaé kégi-kégi. Tungke' tau ténréi matu nataro tau rékko naéngkalingai passalemmu!’ ” “Nainappa kirikka siyagangngaré suro polé ri padang kessi Kedémot lao ri Arung Sihon polé ri Hésybon untu' palettu tangnga assidaméngengngéwé: ‘Palaloki molai wanuwanna Puwakku. Maéloki lalo matteru sibawa dé' taléssé polé ri watattanaé. Maéloki wajai inanré iya riyanré sibawa uwai iya riyénungngé. Banna parelluki molai wanuwaéwé, narapiki malléttoiwi Salo Yordan untu' muttama ri wanuwa iya nabbéréyangngé Puwang Allataalata lao ri idi. Wija-wijanna Esau iya monroé ri Edom sibawa tau Moab iya monroé ri Ar pura toni napalaloki molai daérana mennang.’ Iyakiya Arung Sihon dé' napalaloki molai wanuwannaro. Puwang Allataalamu mébbui matedde ati sibawa maccuwa-cuwaiwi abalaé kuwammengngi riyulléi caui. Daérana ritudangi mupi lettu makkekkuwangngé. Nainappa makkeda Puwangnge lao ri iyya, ‘Arung Sihon sibawa wanuwanna Uwabbéréyangngi lao ri iko; alani sibawa tudangiwi wanuwaéro.’ Napoléna Sihon sibawa sininna pasukanna untu' musuki ri seddéna kota Yahas. Iyakiya nabbéréyangngi Puwang Allataalata lao ri idi, naricauna silaong ana'-ana'na enrengngé sininna tentarana. Iyatoro wettué narisittai sibawa riancuru tungke' kotana, sibawa mpunoi sininna pabbanuwana, worowané, makkunrai sibawa ana'-ana'. Dé' gaga rileppessang tuwo. Riyalai olokolo'na mennang sibawa rirampasa'i kota-kotana. Nasibawang pattulunna Puwang Allataalata, riyulléi sittai manengngi kota-kotaéro, mappammulai ri Aroér, ri cappa'na Lompo Arnon, sibawa kotaé ri tengngana lompo'éro, lettu ri daéra Giléad. Dé' gaga kota iya mawatangngé témbo'na lao ri idi. Iyakiya dé' taddeppériwi daérana tau Amongngé iyaré'ga wirinna Salo Yabok iyaré'ga kota-kotaé ri daéra bulué iyaré'ga kégi-kégi onrong laingngé iya nattéyangngé Puwang Allataalata.” “Nainappaki kédo lao ri manorang mattuju ri daéra Basan. Og, arung Basan malluru sibawa sininna tentarana untu' musuki ri seddéna kota Edréi. Iyakiya makkedai Puwangnge lao ri iyya, ‘Aja' mumétau ri aléna, Musa. Maélo-Ka mabbéréyangngi, tentarana sibawa sininna daérana lao ri iko. Gaukenni pada-pada puraé mugaukengngi Sihon, arung Amori iya mapparéntaé ri Hésybon.’ Jaji nabbéréyang toni Puwang Allataalata Arung Og sibawa ra'ya'na lao ri idi, sibawa ricau manengngi mennang. Iyaro wettué risittai manenni kotana, dé' muwi séddi iya monroé. Iya manenna engka enneng pulona kota iya risittaiyé risininna daéra Argob, iya naparéntaé Arung Og polé ri Basan. Iya manenna kotaéro ripakkasse'i sibawa témbo'-témbo' iya matanré, pintu-pintu gerbang sibawa paccala-paccala tange untu' tongkoi iyaro pintu-pintu gerbangngé. Ri lainnaéro engka maéga kota laing iya dé'é naritémbo'. Iya manenna kotaéro riyancuru'i, sibawa sininna tau worowané, makkunraié sibawa ana'-ana'na mennang riyunoi, pada-pada iya ripogau'é sibawa kota-kotana Arung Sihon polé ri Hésybon. Riyalai olokolo'na mennang sibawa rirampasa'i kota-kotaéro. Iyaro wettué riyalai polé ri iya duwa arunna Amoriéro daéraé ri seddé alauna Salo Yordan sibawa Salo Arnon lettu ri Bulu Hérmon. ( Bulu Hérmon riyasengngi Siryon ri tau Sidongngé, sibawa Senir ri tau Amorié.) Riyala manengngi daérana Arung Og polé ri Basan: kota-kotana ri tanété tanré, daéra Giléad sibawa Basan, matteru lilau sibbéla kota Salka sibawa Edréi.” ( Arung Og iyanaritu tau Réfaim iya paccappurengngé. Doninna riyébbui polé ri batué, lampéna eppa météré sibawa sakkana nawéki duwa météré situru ukkurang iya ripattette'é. Lettu makkekkuwangngé wedding mupa riita ri Raba, kotana tau Amongngé.) “Mancajinnana iyaro tanaé appunnangetta, uwérénni suku Rubéngngé sibawa suku Gad-é daéra seddé manoranna kota Aroér macawé'é ri Salo Arnon, sibawa sibagiyang polé ri daéra buluna Giléad, muttama'ni kota-kotana. Lao ri sitengnga suku Manasyé uwérénni sésana daéra Giléad, makkuwatoro daéra Basan iya najajaé Og riyolo, iyanaritu sininna daéra Argob.” (Kalabbai Basan selaku wanuwanna tau Réfaingngé. Yair polé ri suku Manasyé malai sininna daéra Argob, iyanaritu polé ri Basan lettu ri pakkasésénna Gésur sibawa Maakha. Nasengngi iyaro désa-désaé situru asenna aléna, na lettu makkekkuwangngé tarompo mupi selaku désa-désana Yair.) “Daéra Giléad uwéréngngi appanna Makhir polé ri suku Manasyé. Sibawa lao ri suku-suku Rubén sibawa Gad uwéréngngi daéra pallawangenna Giléad sibawa Salo Arnon. Tengngana iyaro saloé mancaji pakkasésénna mennang ri seddé yattang, na ri manorang makkaséséngngi mennang sibawa Salo Yabok, iya sibagiyangngé mancajiwi pakkasésénna wanuwanna tau Amongngé. Ri seddé yajang, mallebba'i daérana mennang lettu ri Salo Yordan, polé ri Tappareng Galiléa ri manorang lettu ri Tasi Maté ri yattang, matteru lettu ri ponna Bulu Pisga ri seddé alau. Iyaro wettué, uwéréngngi mennang paréntaéwé: Nawérékko Puwang Allataalamu daéra seddé alauna Salo Yordan untu' onrong muwonroi. Iyakiya prajuri'-prajuri'mu harusu'i massenjata sibawa malléttoiwi Salo Yordan poddiyoloiwi suku-suku Israél iya laingngé. Banna ana'mu sibawa bainému nenniya olokolo'mu iya maégaé wedding monro ri kota-kota iya puraé uwérékko. Bantui sining tau sibangsamu narapi mennang natudangi tana iya maéloé nabbéréyang Puwang Allataalamu lao ri mennang ri seddé yajanna Salo Yordan, sibawa narapi Puwangnge palaloi mennang tuwo sibawa amang kuwaro, pada-pada iya Napogau'é lao ri iko kuwaé. Purapiro weddinno lisu ri tana appunnangemmu iya puraé uwérékko. Nainappaka makkeda lao ri Yosua: Purani muwita sininna iya napogau'é Puwang Allataalamu lao ri Sihon sibawa Og, iya duwa arungngéro. Makkuwatoniro maélo Nagaukengngi tungke' arung iya musittaiyé tanana. Aja' mumétau ri mennang, nasaba Puwang Allataalamu maélo méwaingekko.” “Iyaro wettué uwéllauwi ri Puwangnge: Oh, Puwang Iya Pommatanré, uwisseng makkedaé iya Mujellokengngékkaé nappai maddupa pammulang polé ri pangkaukeng-pangkaukem-Mu iya battowaé sibawa makalallaingngé. Dé' gaga déwata laing ri langié muwi ri linoé iya pada-padaé Iko mullééngngi pogau'i gau'-gau' iya maseroé. Palalona malléttoi Salo Yordan, oh Puwang, untu' mitai wanuwa iya macomo'é ri liweng, daéra bulu iya magelloé sibawa Buluna Libanon. Iyakiya purai muwébbu Puwangnge macai lao ri iyya angkanna dé' Namaélo tarimai paréllaukku. Sibalé'na makkedai Puwangnge, ‘Cuku'ni, Musa, aja'na muteppui iyaro gau'é! Laono ri coppo'na Bulu Pisga namuwakkita lao manorang sibawa yattang, lilau sibawa liyajang. Pénessai madécéd-décéng aga muwitaro, saba' dé' muwalléttoiwi matu Salo Yordan. Wéréngngi panunju-panunju lao ri Yosua. Pakkasse'i atinna, saba' aléna ritu matu pimpingngi bangsaéro lao ri liweng untu' tudangiwi wanuwa iya muwitaéro.’ Na monroni idi ri lompo'é ri liwenna kota Bét-Péor.” Namakkeda Musa lao ri bangsaéro, “Apatoiwi sininna hukkung iya upagguruwangngékko, kuwammengngi weddikko tuwo narapi muwonroi tana iya maéloé nabbéréyang Puwangnge, Allataalana toriyolomu, lao ri iko. Aga uwapparéntang, aja' naritamba iyaré'ga narikurangi muwi céddé. Apatoiwi parénta-paréntana Puwang Allataalamu iya uwéréngngékko. Alému mitai aga napogau' Puwang Allataalamu ri Bulu Péor. Tungke' tau iya sompaéngngi Baal Napabbinasai ri onrongngéro, na iko iya tette'é matinulu lao ri Puwang Allataalamu tuwo mupi lettu makkekkuwangngé. Iya manennaro hukkungngé upagguruwakko pada-pada iya napparéntangngé Puwang Allataalaku. Apatoi manengngiro ri wanuwa iya maéloé muwattamaki sibawa monroiro. Pogau'i iyaro sibawa matinulu. Rékko mupogau'i makkuwa, mannessai apanrémmu ri bangsa-bangsa laingngé. Rékko naéngkalingai mennang passalenna hukkung-hukkungngéro, makkedai matu, ‘Temmaka panréna sibawa accana bangsa iya battowaéro!’ Bangsa battowa nigana mappunnai déwata iya makkuwaémmani cawé'na rékko riyapparelluwangngi pada-pada Puwang Allataalata macawé lao ri idi? Mappébaliwi uppa-uppanna tamangobbi méllau tulung ri Aléna. Sibawa bangsa battowa nigana iya mappunnaiyé hukkung-hukkung iya makkuwaémmani adélé'na pada-pada hukkung-hukkung iya upagguruwangngékko essoéwé? Pénessaiwi sibawa éngngerangngi madécéd-décéng, kuwammengngi sillampé umuru'mu dé' muwallupaiwi aga pura alému sabbingngi. Curitangngi lao ri ana'-eppomu passalenna essoéwé, wettummu tettong ri yolona Puwang Allataalamu ri Bulu Sinai. Iyaro wettué Aléna makkeda lao ri iko, ‘Paddeppungengngi bangsaéro. Macinna-Ka mennang méngkalingai aga maélo Upalettu, kuwammengngi nagguru mennang mapato lao ri Iyya sillampe umuru'na, sibawa kuwammengngi mennang napaggurui ana'-ana'na untu' mapato lao ri Iyya.’ Curitangngi lao ri ana'-ana'mu pékkugiko polé sibawa tettong ri ponna bulu iya nasalipuriyé rumpu mapettang pada-pada ellung makkumpe'é sibawa apinna malluwa lettu ri langié. Nappa Puwangnge mabbicara lao ri iko polé ri api sibawa muwéngkalinga saddan-Na, iyakiya dé' muwitai Aléna muwi ri laleng bentu' aga. Kuwaniro Nappallebbangngeng lao ri iko aga harusu mupogau' untu' rupaiwi assijancing iya Naébbué sibawa iko. Seppulo parénta iya puraé Naoki ri iya duwa pépeng batuéro harusu'i mupogau' Puwangnge suroka mappagguruwangngi lao ri iko sininna hukkung iya harusu'é muwapatoi ri wanuwa iya muwattamakiyé matti sibawa monroiro.” “Engngerangngi madécéd-décéng! Wettunna mabbicara Puwangnge lao ri iko polé ri laleng apié ri Bulu Sinai, dé' aga-aga muwita. Jaji jagaiwi kuwammengngi aja' narapiko madosa nasaba muwébburengngi alému dato'-dato' untu' risompa ri laleng rupa muwi aga, worowané iyaré'ga makkunrai, Aja' mumadosa nasaba musompai sibawa mattumani lao ri aga iya muwitaé ri langié: mata essoé, kétengngé sibawa wéttowing-wéttowingngé. Naleppessangngi Puwang Allataalamu bangsa-bangsa laingngé sompai iyaro aga-agaé. Iyakiya iko iyanaritu bangsa iya ripassalama'é polé ri Maséré, onrommu manrasa-rasa sibawa masero. Natiwiko massu polé ri wanuwaéro, kuwammengngi mancajiwi bangsana muto pada-pada keadaammu makkekkuwangngéwé. Iyakiya macayii Puwang Allataalamu lao ri iyya nasaba iko, namattanroi makkedaé dé' uwalléttoiwi matu Salo Yordan untu' muttama ri tana iya macommo'é iya maéloé nawérékko. Dé'na namaitta namuwallétto sibawa tudangiwi matu tana iya macommo'éro; iyakiya iyya dé' uwaccowé, saba' matéka matu kuwaé. Engngerangngi madécéd-décéng! Aja' muwallupaiwi assijancing iya naébbué Puwang Allataalamu sibawa iko. Turusiwi paréntana; aja' sises-siseng muwébburengngi alému dato'-dato' muwi ri laleng tappa aga untu' risompa, saba' Puwang Allataalamu pada-padai api iya paangurengngé. Dé' namaélo ripappada-padai sibawa muwi aga. Makkuwatoro rékko matti maittano monro ri wanuwaéro sibawa makkéana' eppo, aja' mumadosa nasaba muwébburengngi alému dato'-dato' ri laleng muwi tappa aga. Iyaro pangkaukengngé séuwai ja ri matanna Puwang Allataalamu sibawa naébbui matu macai. Memmuwaré langié sibawa linoé iyaé essoé mancaji sabbi makkedaé rékko dé' muturusika, lennye'ko matu masitta polé ri tana iya muwonroiyé ri liwenna Salo Yordanro. Dé' matu mumaitta monro kuwaro; ripaccappu sisekko matu. Napassara-sarakko matu Puwangnge ri yelle'na bangsa-bangsa laingngé na banna céddé bawang matu ri yelle'mu iya tette'é tuwo. Kuwanoro matu massompa lao ri déwata-déwata iya naébbué lima tolino, déwata-déwata polé ri ajué sibawa batué iya dé'é naulléi makkita iyaré'ga maréngkalinga, dé' naulléi manré iyaré'ga marémmau. Namusappai matu Puwang Allataalamu, narékko musappai sibawa sukku atimmu, muruntu'i matu. Rékko nakennako sininna abalaéro namuengka ri laleng asukkarakengngé, lisuko matu paimeng ri Puwang Allataalamu sibawa mapato ri aléna. Puwang Allataalamu iyanaritu Allataala iya mamasé senna'é. Dé' matu nasalaiko iyaré'ga pabbinasako, iyaré'ga mallupaiwi assijancing iya naébbué sibawa toriyolomu. Salidikiwi wettu labe'é, mabéla ri wettu dé'napa mujaji, mappammulai polé ri esso wettunna Allataala pancajiwi tolinoé ri linoéwé. Sappai ri sininna tompo'na linoé. Engkaga naengka nakajajiyang gau' masero makkuwaéwé ri yolona? Engkaga tau pura méngkalingai passalenna kajajiyang makkuwaéwé? Engkaga naengka bangsa iya tette'é tuwo purana naéngkalinga séuwa déwata mabbicara lao ri mennang polé ri apié, pada-pada iya mupéneddingiyé? Engkaga naengka séuwa déwata iya baraniyé malai séddié bangsa polé ri bangsa-bangsa iya engkaé nainappa napancaji mennang umma ri aléna, pada-pada iya napogau'é Puwang Allataalamu untu' iko ri Maséré? Alému mitai pékkugi Allataala sibawa awatangeng iya battowaé papolé abala sibawa musu, pogau'i sining anu makalallaingngé sibawa pogau'i gau'-gau' iya maseroé. Iya manennaro najellokekko Puwangnge untu' pabuttiwi makkedaé banna iyaro Puwangnge Allataala, sibawa dé'gaga laingngé. Polé ri langié napparéngkalingangngi saddanna lao ri iko untu' pagguruko; ri linoéwé purani nappaitang lao ri iko apinna iya maseroé, sibawa polé ri apiéro mabbicarai lao ri iko. Nasaba napojiwi toriyolomu, napurako napilé; nasibawang akuwasanna iya battowaé purano natiwi massu polé ri Maséré. Bangsa-bangsa iya lebbi battowaé sibawa lebbi watangngé napaddésu'i polé ri yolomu, untu' mantara'ko lao ri wanuwanna mennang iya nawéréngngékko, wanuwa iya makkekkuwangngé mancaji appunnangemmu. Rimakkuwannanaro amaingekini iyaé essoé sibawa aja' muwallupaiwi: Puwangnge alé-aléna Allataala ri langié sibawa ri linoé; dé'gaga laingngé. Turusiwi sininna hukkung iya uwéréngngékko iyaé essoé, na iko sibawa wija-wijammu saléwangengngi matu sibawa matteru tuwo ri wanuwa iya nabbéréyangngé Puwang Allataalamu mancaji appunnangemmu untu' mannennungeng.” Nainappa Musa jello tellu kota ri seddé alauna Salo Yordan mancaji kota allinrungeng, onronna tauwé naulléi passalama'i aléna rékko dé' nattungkaiwi mpunoi tau iya tenniyaé balinna. Weddingngi lari lao ri salaséddinna kotaéro kuwammengngi dé' nariyunoto. Untu' suku Rubén ripassadiyangengngi kota Bézer ri tanété tanréna padang kessi'é; untu' suku Gad kota Ramot ri daéra Giléad, sibawa untu' tau Manasyé kota Golan ri daéra buluna Basan. Nainappa Musa mabbéréyangngi hukkung-hukkunna sibawa peraturang-peraturanna Allataala lao ri bangsa Israélié. Natudangini mennang iyaro tanana Arung Sihon, makkuwatoro tanana Arung Og polé ri Basan, séddiwi arung Amori laing iya monroé ri seddé alauna Salo Yordan. Iyaro tanaé mallebba'i polé ri kota Aroér ri wirinna Salo Arnon, matteru limanorang lettu ri Bulu Siryon, iyanaritu Bulu Hérmon, sibawa sininna daéraé ri seddé alauna Salo Yordan liyattang narapi Tasi Maté ri ponna Bulu Pisga. Napaddeppungenni Musa sininna bangsa Israélié, nainappa makkeda lao ri mennang, “Saudara-saudara, éngkalingai hukkung-hukkung iya uwéréngngékko essoéwé. Agguruiwi iyaro hukkung-hukkungngé, enrengngé turusiwi sibawa matinulu. Ri Bulu Sinai Puwang Allataalata mébbu séuwa assijancing, tenniya bawang sibawa toriyolota, iyakiya sibawa idi maneng kuwaé. Polé ri apié ri yasé'na buluéro Puwangnge maélo mabbicara sibawa iko. Iyakiya nasaba métauko lao ri apié sibawa dé' mubarani tuppuiwi bulué, nautettong iyaro wettué ri pallawangemmu sibawa Puwangnge untu' palettukekko ada-adanna Puwangnge. Puwangnge mappallebbangengngi, ‘Iyya'na Puwang Allataalamu iya tiwiékko massu polé ri Maséré, onrommu ripowata. Aja' mumassompa déwata-déwata laing. Iyya'na bawang musompa. Aja' muwébburengngi alému dato-dato iya pappadaiyéngngi agi-agi iya engkaé ri langié, ri linoé iyaré'ga ri laleng uwai ri yawana linoé. Aja' musompai dato'-dato' makkuwaéro, nasaba Iyya Puwang Allataalamu na dé' umaélo ripappadai sibawa muwi aga. Sining tau iya benciyékka Uhukkungngi narapi ri wija-wijanna iya matellué sibawa maeppaé. Iyakiya Uwappaitangngi pammasé-Ku lao ri massebbu-sebbu assossoreng polé risining tau iya pojiyékka sibawa turusiwi parénta-Ku. Aja' muteppui asek-Ku sibawa sembarangang, saba' Iyya, Puwang Allataalamu, hukkungngi nigi-nigi iya makkégunang salaéngngi asek-Ku. Pakarajai esso Saba'é sibawa pakalebbii selaku esso iya mapaccingngé, saba' Iyya'na Puwang Allataalamu iya mapparéntangngéngngi lao ri iko. Uwérékko enneng esso untu' mappallaung, iyakiya esso mapitué iyanaritu esso appésaungeng iya ripallaingngé untu' Iyya, Puwang Allataalamu. Iyaro essoé dé' muwi séddi tau wedding mappallaung, muwi iko, ana'-ana'mu, ata-atammu, olokolo'mu iyaré'ga tau laing iya monroé ri wanuwammu. Harusu'i mappésau ata-atammu pada-pada muto alému. Engngerangngi, makkedaé iko riyolo ripowatato ri Maséré, nainappa ripamaradéka ri Puwang Allataalamu sibawa awatangeng iya battowaé. Rimakkuwannanaro Uparéntakko untu' pakarajai esso Saba'é. Pakalebbii sibawa piyarai ambo' sibawa indo'mu; iyanaro paréntaku, Puwang Allataalamu, kuwammengngi musaléwangeng sibawa malampé umuru ri wanuwa iya Uwéréngngékko matu. Aja' muwabbuno. Aja' mumalaweng. Aja' muwénnau. Aja' muwabbéré asabbing bellé-bellé lao ri tau laingngé. Aja' muwacinnaiwi appunnangenna tau laingngé: bolana, tanana, bainéna, ata-atanna, olokolo'na, kaleddé'na iyaré'ga agi-agi iya nappunnaiyé.’ Iyanaro parénta-parénta iya nabbéréyangngé Puwangnge lao ri iko wettummu maddeppungeng ri bulué. Wettunna mabbicara sibawa sadda maddalenrungngé polé ri apié sibawa ellung makkompe'é, nabbéréyangngi sining paréntaéro, sibawa tenniya laingngé. Nainappa naoki ri iya duwa pépeng batué nanawérékka.” “Wettunna malluwa maneng bulué sibawa méngkalingako sadda polé ri pettangngé, sininna pamimping sukummu sibawa tomariyolona masyaraka'é laoni ri iyya. Makkedai mennang, ‘ Puwang Allataalata pura mappaitangngi arajan-Na sibawa alebbiren-Na wettunna riyéngkalingai mabbicara polé ri apié. Iyaé essoé purani risabbing makkedaé mémeng makkulléi rupatauwé tette'i tuwo, namuni purai Allataala mabbicara lao ri aléna. Iyakiya magi naharusu'ki mappésonangngi nyawatasi? Iyaro api maseroé napaccappuki matu! Mateppe'ki makkedaé matéki matu rékko riyéngkalingai Puwang Allataala mabbicarasi. Engkaga naengka tolinoé tette tuwo purana naéngkalinga Allataala iya tuwoé mabbicara polé ri apié. Rimakkuwannanaro obbii Musa, éngkalingai sininna iya napowadaé Puwang Allataalata, nainappa palettukekki aga iya Napowadaé lao ri alému. Maéloki méngkalingai sibawa turusiwi.’ Naéngkalinganaro, makkedani Puwangnge lao ri iyya, ‘Purani uwéngkalinga aga iya napowadaé bangsaéro, sibawa tongengngi adanna mennang. Coba rékko mennang tuli mappérasa makkuwairo! Coba rékko mennang tuli napakalebbika sibawa turusiwi sininna parénta-Ku, angkanna mennang sibawa wija-wijanna saléwangengngi untu' mannennungeng! Laono makkekkuwangngé sibawa suroi bangsaéro lisu ri kémana tungke'-tungke'. Iyakiya iko, Musa, lisuno sibawa onrono kuwaé silaong Iyya. Maélo-Ka mpérékko sininna hukkuk-Ku sibawa parénta-Ku. Pagguruwangngi mennang, kuwammengngi naturusiwi ri wanuwa iya Uwéréngngéngngi mennang.’ Saudara-saudara, turusiwi sibawa matinulu sininna iya napparéntangngé Puwang Allataalamu lao ri iko. Aja' muwajjalékkaiwi muwi séddi polé ri parénta-paréntaéro. Pogau'ni sininna napparéntangngé Puwang Allataalamu lao ri iko kuwammengngi musaléwangeng sibawa mulléi mattette ri wanuwa iya maéloé muwonroi.” “Nasuroka Puwang Allataalamu mappagguruwangngi sininna hukkungngéwé lao ri iko kuwammengngi mupogau'i ri wanuwa iya dé'énna namaitta namuwonroiwi. Sitinajai iko sibawa wija-wijammu gangka tuwona pakalebbii Puwang Allataalamu sibawa turusiwi sininna hukkun-Na iya upalettukengngékko, kuwammengngi mumalampé sunge ri wanuwaéro. Rimakkuwannanaro éngkalingai saudara-saudara, pogau'i iyaro sibawa matinulu, kuwammengngi musaléwangeng sibawa mancaji bangsa iya battowaé ri wanuwa iya sugié namacommo, pada-pada najjanciyangngé Puwang Allataalana toriyolota. Saudara-saudara, éngngerangngi! Banna Puwangnge, sibawa Puwangnge bawang Allataalata! Amaseiwi Puwang Allataalamu sibawa sukku atimmu: Appaitangngi iyaro ri laleng cara atuwommu sibawa ri laleng pangkaukemmu. Aja' sises-siseng muwallupaiwi parénta-parénta iya uwéréngngékko essoéwé. Appagguruwangngi lao ri ana'-ana'mu. Sitinajako bicarai ri lalempola sibawa ri saliwempola, wettu mappésau sibawa wettu mappallaung. Assiyorengngi ri taiyyamu sibawa pasangngi ri linromu untu' riyéngngerang. Okii ri alliri tange'na bolamu sibawa ri pintu gerbammu.” “Majjanciwi Puwang Allataalamu lao ri néné-nénému Abraham, Ishak sibawa Yakub makkedaé maéloi mabbéréyangngi iyaro wanuwaé lao ri iko. Battowa kota-kotana sibawa macommo, natenniya iko patettongngi. Penno sining bolana sibawa barab-barang iya makessingngé, natenniya iko lisekiwi. Runtu'ko matu sining bujung, natenniya iko kaliwi. Lolongekko matu palla-palla anggoro sibawa zaitun, natenniya iko tanengngi. Rékko natiwiko Puwangnge lao ri wanuwaéro, sibawa muwappunnaiwi sininna iya muwacinnaiyé untu' riyanré, jagaiwi madécéd-décéng kuwammengngi aja' muwallupaiwi Puwang iya puraé paleppe'ko polé ri Maséré, onrommu ripowata. Pakalebbii Puwang, Allataalamu, sibawa massompa ri Aléna bawang, narékko mattanroko, pogau'i ri laleng asen-Na bawang. Aja' mumassompa déwata-déwata laing iya nasompaé bangsa-bangsa iya monroé ri seddému. Rékko sompako déwata-déwata laing, nakennako matu caina Puwang Allataalamu sibawa ripaccappu siseng, saba' Puwang Allataalamu iya engkaé ri tengnga-tengngamu dé' namaélo ripappadai muwi aga. Aja' mucobaiwi Puwang Allataalamu pada-pada iya mupogau'é ri Masa. Turusiwi sininna hukkung iya nawéréngngékko Puwang Allataalamu. Pogau'i aga iya manuru'é Puwangnge makessing sibawa adélé, namusaléwangeng matu. Tana commo iya najjanciyangngé Puwangnge lao ri néné-nénému, mancajiwi matu appunnangemmu, namupaddésu'i matu sining balimmu pada-pada iya najjanciyangngé Puwangnge. Ri munri makkutanai matu ana'-ana'mu ri iko, ‘Magi nasuroki Puwang Allataalata turusiwi sininna paréntaéro?’ Harusu'ko baliwi makkuwaé, ‘Riyolo mancaji atannaki arung Maséré, nainappa napaleppe'ki Puwangnge sibawa awatangeng battowaé. Aléta sabbingngi Puwangnge pogau'i sining anu makalallaingngé sibawa gau'-gau' iya mappakatau-taué lao ri tau Maséré'é sibawa arunna mennang nenniya sininna pajaba'na. Napaleppe'ki polé ri Maséré untu' tiwiki lao kuwaé, sibawa iyaé tanaé Nawérékki pada-pada iya Najanciyangngéngngi néné-nénéta. Puwang Allataalata suroki pogau'i sininna paréntaéro sibawa pakalebbii. Rékko tapogau'i makkuwaéro, tuli napiyarai matu bangsata kuwammengngi natette tuwo saléwangeng. Narékko matinuluki turusiwi sininna iya napparéntangngé Puwang Allataalata lao ri idi, Naéloriki matu.’ ” “ Puwang Allataalamu tiwiko matu ri wanuwa iya maéloé muwonroi, sibawa maéga bangsa ripaddésu matu polé kuwaro. Ri yolona matammu Napaddésu'i matu pitu bangsa iya lebbi battowaé sibawa lebbi mawatangngé naiya iko, iyanaritu sining tau Hét-é, Girgasié, Amorié, Kanaangngé, Féris-é, Héwié sibawa Yébus-é. Rékko nabbéréyangngi Puwang Allataalamu iyaro bangsa-bangsaé ri laleng akuwasammu sibawa mucaui mennang, uno manengngi mennang. Aja' muwamaséiwi mennang iyaré'ga mébbu assijancing sibawa mennang. Dé' naweddikko kawing sibawa mennang, sibawa aja' mupalaloi ana'-ana'mu kawing sibawa mennang, kuwammengngi dé' mennang napabélaiwi ana'-ana'mu polé ri Puwangnge untu' massompa déwata-déwata laing, macayii Puwangnge Nanapaccappuko matu masitta. Rimakkuwannanaro, ruttungngi sining mézbana iyaro bangsa-bangsaé, ancuru'i alliri-alliri batu iya naangga'é mennang makare', léttungngi lambang-lambang Asyéra, sibawa tunui dato'-dato' barahala iya nasompaé mennang. Pogau'i iya manennaro nasaba appunnangennako Puwang Allataalamu. Polé risininna bangsaé ri tompo'na linoé iko ritu napilé Puwang Allataalamu untu' mancaji umma'na iya dé'é padanna. Napojiko sibawa napiléko Puwangnge, tenniya nasaba lebbi battowako naiya bangsa-bangsa laingngé; sitongenna iko iyanaritu bangsa iya kaminang baiccu'é ri tompo'na linoé. Iyakiya Puwangnge piléko nasaba namaséiko sibawa macinnai rupaiwi janci iya Naébbué sibawa néné-nénému. Iyanaro saba'na purako Napassalama sibawa akuwasang iya battowaé sibawa paleppe'ko polé ri angatangenna arung Maséré. Engngerangngi makkedaé Puwang Allataalamu iyanaritu séddi-séddinna Allataala, na Aléna Allataala iya matinulué. Puwangnge pennoiwi jancin-Na sibawa mappaitangngi pammasé-Na iya tette'é narapi sisebbu assossoreng lao ri tau iya pojiyéngngi sibawa turusiwi parénta-parénta-Na. Iyakiya dé' nabata-bata hukkungngi mennang iya benciyéngngi. Jaji, turusini sininna hukkung iya upalettukengngékko essoéwé.” “Rékko mupuriyatiwi iyaro parénta-paréntaé, sibawa pogau'i sibawa matinulu, matinulu towi matu Puwang Allataalamu lao ri assijancing iya Naébbué sibawa iko. Nappaitangngi matu pammasé-Na iya tette'é ri iko, pada-pada iya Najjanciyangngé lao ri toriyolomu. Maéloi mamaséiko sibawa barakkakiko, angkanna maéga ana'mu sibawa tattamba-tamba jumellamu. Maéloi barakkakiwi sining dare'mu, angkanna powassélé gandong, anggoro sibawa minnya zaitun. Maéloi barakkakiko angkanna maéga saping sibawa bémbé bimbala'mu. Sininna barakka'éro mutarimai matu ri wanuwa iya nawéréngngékko Puwangnge, situru sibawa jancin-Na lao ri néné-nénému. Polé risininna bangsaé ri linoé, dé' muwi séddi lolongeng barakka makkuwamani tabbollompollonna pada-pada iko. Polé ri iko maneng sibawa polé ri olokolo'mu dé' muwi séddi manang. Nalinrungiko matu Puwangnge polé ri sininna lasaé sibawa ripabélai polé ri sininna abalaé iya musabbingngé ri Maséré, iyakiya iyaro sining abalaé Napatakkennai matu lao risining balimmu. Tungke' bangsa iya nabbéréyangngé Puwang Allataalamu ri laleng akuwasammu harusu'i mupabbinasa; aja' muwappaitang paressé babuwa lao ri mennang. Aja' musompai déwata-déwatana mennang, nasaba iyaro pangkaukengngé mappapoléi acilakang lao ri iko. Naullé mappikkiri'ko iyaro bangsa-bangsaé lebbi battowai jumellana angkanna dé' mulléi paddésu'i mennang. Iyakiya aja' mumétau lao ri mennang; éngngerangngi aga napogau' Puwang Allataalamu lao ri arung Maséré sibawa sininna ra'ya'na. Engngerangngi sining abala maseroé iya alémué sabbingngi, sining anu makalallaingngé, sibawa awatangeng battowaé iya nakkégunangngé Puwang Allataalamu untu' paleppe'ko. Makkuwatoro Puwang Allataalamu tinda matu lao ri sininna bangsaé iya muwétauriyé. Mala Puwang Allataalamu paompo matu alippung ri yelle'na mennang, angkanna sining tau iya mullééngngi lari sibawa mallekke'é cappu towi matu. Jaji aja' mumétau lao ri bangsa-bangsaéro. Puwang Allataalamu linrungiko. Aléna iyanaritu Allataala iya marajaé sibawa maseroé. Iyaro bangsa-bangsaé Napaddésu'i taccéddé-céddé ri yolomu. Dé' nawedding mupaccappu mennang masitta, kuwammengngi aja' natattamba olokolo masekkangngé namancaji ancamang lao ri alému. Makkuwaniro Puwang Allataalamu mabbéréyangngi matu sining balimmu lao ri iko. Napakacaui matu mennang angkanna binasa. Nabbéréyangngi matu sining arunna mennang lao ri iko. Muwunoi matu mennang, nariyallupai matu asenna mennang. Dé' muwi séddi tau mulléi tahang moloiko; mupaccappu manengngi matu. Tunui dato'-dato' barahala iya nasompaé mennang. Aja' muwacinnaiwi péra' iyaré'ga ulaweng iya maddeppéé ri aléna sibawa aja' muwalai untu' alému. Rékko muwajjalékkaiwi iyaro paréntaé matéko matu, saba' Puwang Allataalamu nabenci assompang dato'-dato' barahalaé. Aja' mutaro séuwa dato'-dato' barahala ri lalempolamu, kuwammengngi tanro iya kennaéngngi aja' nakenna tokko. Iyaro gau'é harusu'i mubenci sibawa muwita mariyawa, nasaba natanroi Puwangnge.” “Sininna hukkung iya uwéréngngékko essoéwé harusu'i mupogau' sibawa matinulu, kuwammengngi mutette tuwo, tattamba maéga sibawa monroiwi tana iya najjanciyangngé Puwangnge lao ri néné-nénému. Engngerangngi! Patappulo taung ittana Puwang Allataalamu pimpikko ri laleng allalengeng mabélaé molai padang kessi'é. Iyaro allalengengngé nakkattaiwi Puwangnge untu' cobaiko, kuwammengngi Naulléi mitai aga tattampu ri laleng atimmu sibawa aga muturusiwi matu parénta-parénta-Na. Naleppessakko alupureng, nainappa Nawérékko manna untu' inanré. Iko sibawa toriyolomu dé' naengka nanréi iyaro inanré ri yolona. Napogau'i Puwangnge makkuwaéro untu' pagguruko makkedaé tolinoé dé' natuwo polé ri inanré bawang, sangadinna poléi risininna iya napowadaé Puwangnge. Ri lalenna patappuloé taung dé' nabali' pakéyammu sibawa dé' naboro ajému. Engngerangngi makkedaé Puwang Allataalamu pagguruko pada-pada séddié ambo' paggurui ana'-ana'na. Jaji, pogau'ni sininna séuwa-séuwaé iya napparéntangngé Puwang Allataalamu. Tuwono situru hukkung-hukkunna sibawa pakalebbii. Puwang Allataalamu tiwiko ri wanuwa iya macommo'é; wanuwa iya maégaé salona sibawa mata uwaina, nenniya solo' uwai ri lalenna tanaé iya cumpaé ri lompo'-lompo'é sibawa bulu-bulué. Iyaro wanuwaé powassélé'i madduparupang gandong, anggoro, buwa ara, buwa dalima, pong zaitun sibawa cani. Dé' mualupureng matu kuwaro iyaré'ga akurangeng. Batu karanna tampu'i bessi, sibawa polé ri bulu-buluna weddikko kali tembaga. Manréko matu gangka caumu, sibawa sukkuru lao ri Puwang Allataalamu untu' tana commo iya Nawéréngngékko.” “Jagaiwi madécéd-décéng aja' narapii muwallupai Puwang Allataalamu; aja' mulalloi muwi séddi polé ri sininna hukkun-Na iya uwéréngngékko essoéwé. Rékko purano manré gangka cau sibawa purano patettong bola-bola iya makessingngé untu' onrong muwonroi, sibawa rékko tattambani saping sibawa bémbé bimbala'mu, péra' sibawa ulawemmu enrengngé sininna waramparang appunnangemmu iya laingngé, jagaiwi madécéd-décéng kuwammengngi aja' mumancaji matempo sibawa mallupaiwi Puwang Allataalamu iya paleppe'ékko polé ri Maséré, onrommu ripowata. Puwangnge pimpikko molai padang kessi iya malowangngé sibawa maseroé, iya maégaé ula mamosona nenniya dokkénna. Ri tana iya marakkoé temmakké uwai Naébbui uwai massolo polé ri batué, kuwammengngi weddikko ménung gangka cau. Ri padang kessi'é Nawérékko manna untu' inanrému, inanré iya dé'é naissengngi néné-nénému. Napogau'i Puwangnge iyaro untu' cobaiko sibawa pakariyawai atimmu, kuwammengngi paccappurenna weddingngi Napogau' madécéngngé lao ri iko. Jaji, aja' sises-siseng muwappikkiri makkedaé nasibawang usaha sibawa awatangeng alému namumancaji sugi. Engngerangngi makkedaé Puwang Allataalamu iya mpéréngngékko iyaro asugirengngé. Napogau'i gau'éro nasaba lettu essoéwé matinulu mupi lao ri assijancing iya Naébbué sibawa néné-nénému. Aja' muwallupaiwi Puwang Allataalamu sibawa aja' mugiling lao ri déwata-déwata laingngé untu' sompai sibawa mattumani lao ri mennang. Iyaé essoé uparéngngerangiko makkedaé rékko mupogau' mupi, pasti napaccappuko Puwangnge. Rékko dé' mumatinulu lao ri Puwang Allataalamu, Napaccappu tokko matu, pada-pada bangsa-bangsa iya Napaccappué ri yolona matammu.” “Engkalingai Saudara-saudara! Iyaé essoé muwalléttoiwi Salo Yordan untu' tudangiwi daérana bangsa-bangsa iya lebbi battowaé sibawa lebbi mawatangngé naiya iko. Kota-kotana mennang battowai sibawa témbo'-témbo' iya maccaloli'é sittanré langié. Sining taunna battowai namawatang pakkalénna; rassasai ritu mennang, napurani muwéngkalinga makkedaé dé' muwi séddi tau mulléi méwai mennang. Iyakiya makkekkuwangngé, alému matu sabbingngi pékkugi Puwang Allataalamu joppa ri yolomu pada-pada api iya paangurengngé. Nacaui matu mennang ri yolona matammu, angkanna mulléi paddésu'i sibawa paccappui mennang sibawa masitta pada-pada iya najjanciyangngé Puwangnge. Ateppe'no makkedaé dé' nabbéréyangngi Puwang Allataalamu iyaro tana commo'é lao ri iko nasaba sitinajako tarimai. Dé'! Ikoé bangsa iya matedde atié. Engngerangngi pékkugiwi Puwang Allataalamu macai ri padang kessi'é. Sipongenna musalai Maséré narapi lettu'ko kuwaé, muéwai Puwangnge. Mala ri Bulu Sinai muwébbui Puwangnge macai senna, angkanna maéloi paccappuko. Utuppuiwi iyaro bulué untu' tarimai batu assijancing iya naébbué Puwangnge sibawa iko. Patappulo esso patappulo wenni ittana monroka ri tompo'na buluéro temmanré iyaré'ga ménung. Nainappa nawérékka Puwangnge iya duwa batu puraé narokiri Allataala. Ri batuéro tarokii ada-ada iya Napowadaé polé ri tengnga-tengngana apié lao ri iko, wettummu maddeppungeng ri ponna bulué. Ya, labe'nana patappulo esso sibawa patappulo wenni, nawérénna Puwangnge iya duwa batu assijancingngéro. Nainappa makkeda Puwangnge lao ri iyya, ‘Nonnono masitta, nasaba bangsamu iya mutiwié massu polé ri Maséré napogau'ni majaé. Lésséni mennang polé ri parénta-parénta-Ku, sibawa mébbu dato'-dato' untu' risompa.’ Makkeda towi Puwangnge lao ri iyya, ‘Uwisseng iyaro bangsaé matedde ati senna. Aja' mucobai lawa-lawaika. Maéloka paccappui mennang angkanna dé'na nariyéngngeranna. Iyakiya iko Upancajiko matu ambo'na polé riséuwaé bangsa iya lebbi battowaé sibawa lebbi mawatangngé naiya mennang.’ Nainappaka giling, nautiwi towi iya duwa batu assijancingngé sibawa duwa lima, unonnoriwi bulu iya mattengngangngé malluwa-luwa. Uwitani makkedaé muwajjalékkaini paréntana Puwang Allataalamu. Madosano lao ri Puwangnge nasaba muwébburengngi alému séuwa dato'-dato' saping polé ri bessié. Na ri yolona matammu uwaggeppuwangngi iya duwa batu assijancingngéro angkanna ancuru tassiya-siya. Nainappa sisessika suju' ri yolona Puwangnge ri tompo'na bulué patappulo esso patappulo wenni ittana, temmanré iyaré'ga ménung. Upogau'i iyaro nasaba madosano lao ri Puwangnge ri laleng mupogau'na aga iya naangga'é maja, angkanna macai. Métauna' lao ri caina Puwangnge iya malluwa'-luwa'é lao ri iko angkanna maéloi paccappuko, iyakiya iyaé sisengngé naéngkalinga tokka. Macai senna towi Puwangnge lao ri Harun angkan-Na maéloi mpunoi, nauwassempajatto untu' aléna. Dato'-dato' saping bessi ébbumu, uwaggenrungengngi muttama ri laleng apié. Nainappa uwancuru sibawa utettu narapi alusu pada-pada awué, na iyaro awué uwaggenrungengngi ri lalenna ana' saloé iya massolo'é polé ri buluéro. Makkuwatoro ri Tabéra, Masa sibawa Kibrot-Taawa, muwébbui Puwangnge macai. Nainappa wettummu nasuro Puwangnge salaiwi Kadés-Barnéa untu' maju sibawa tudangiwi tana iya maéloé Nawérékko, muéwai paréntana Puwang Allataalamu; dé' mumaélo mateppe iyaré'ga mapato ri Aléna. Sipongenna uwissekko, tuli muéwai Puwangnge. Uwissengngi mattonget-tongengngi Puwangnge maélo paccappuko. Na patappulo esso sibawa patappulo wenni ittana suju'ka ri yolona Puwangnge sibawa massempajang makkuwaé: Oh Puwang Iya Pommatanré, aja' Mupaccappui umma appunnangem-Mué, bangsa iya Mupaleppe'é sibawa Muwantara massu polé ri Maséré nasibawang awatangeng sibawa akuwasam-Mu iya battowaé. Engngerangngi ata-atam-Mu Abraham, Ishak sibawa Yakub, sibawa aja' Mujampangiwi sipa' matedde atinna, jana sibawa dosana bangsaéwé. Rékko to Mupaccappui umma'-Mu, makkedai matu tau Maséré'é makkedaé dé' Muwulléi tiwii bangsa-Mu ri wanuwa iya Mujanciyangngéngngi mennang, sibawa Mutiwii mennang ri padang kessi'é untu' mpunoi mennang, nasaba Mubenciwi mennang. Iyakiya éngngerangngi, Puwang, makkedaé mennangngé bangsa iya Mupilé mancaji umma'-Mu, sibawa Mutiwii polé ri Maséré nasibawang awatangeng sibawa akuwasam-Mu iya battowaé.” “Nainappa makkeda Puwangnge lao ri iyya, ‘Musa, pano duwallétta batu pada-pada mammulangngé, sibawa ébbu tokko séddi petti aju untu' onronna, nainappa laono ri onrokku ri tompo'na bulué. Ri batu-batuéro maéloka mokii ada-ada iya padaé pada-pada ri batu iya puraé mureppa; nainappa iyaro batu-batué harusu'i muputtama ri laleng pettiéro.’ Nauwébbuna petti polé ri aju akasiaé sibawa pa duwa batu pada-pada riyoloé sibawa tiwii ri tompo'na bulué. Ri batuéro naokini Puwangnge Seppulo Parénta pada-pada iya mammulangngé, iyanaritu parénta-parénta iya Nawéréngngékko, wettun-Na mabbicara polé ri tengnga-tengngana apié ri esso maddeppungemmu ri ponna bulué. Purairo Nawérénna Puwangnge pépeng batuéro naulisu nonnoriwi bulué. Nasituru sibawa paréntana Puwangnge, iya duwa batuéro uputtama'ni ri laleng petti iya puraé uwébbu – namappammulai wettuéro lettu makkekkuwangngé iya duwa pépeng batuéro engka mupi kuwaro.” ( Nainappa joppa tau Israélié polé risining bujunna tau Yaakangngé, sibawa lao ri Moséra. Kuwaniro Harun maté sibawa ritampung. Eléazar ana'na sulléiwi selaku imang. Polé kuwaro laoni mennang ri Gudgod, nainappa matteru ri Yotbata, daéra iya maégaé uwaina. Ri buluéro napallainni Puwangnge suku Léwié untu' murusu'i Petti Assijancingngé sibawa tumaningiwi Puwangnge, enrengngé powadai barakka'é ri laleng asen-Na. Iyanaro jamanna lettu makkekkuwangngé. Iyanaro saba'na tau Léwié dé' natarima tana mana pada-pada suku laingngé, saba' Puwangnge ritu bagiyang manana mennang, pada-pada iya napowadaé Puwang Allataalamu lao ri mennang.) “Patappulo esso sibawa patappulo wenni monroka ri tompo'na bulué pada-pada iya upogau'é bunge'-bunge'na. Siseppi naéngkalingaka Puwangnge, sibawa nasitujuiwi dé' napaccappuko. Nainappa Nasuroka lao untu' pimpikko kuwammengngi muwulléi mappunnaiwi tana iya Najjanciyangngé lao ri néné-nénému.” “Makkekkuwangngé, Saudara-saudara, puriyatini aga iya natuntu'é Puwang Allataalamu polé ri iko: Pakalebbii Puwang Allataalamu sibawa pogau'ni sininna parénta-Na. Eloriwi sibawa assompano ri Aléna sibawa sininna tubu nyawamu. Turusini sininna paréntana Puwangnge iya upalettukengngékko essoéwé untu' adécéngeng ri alému. Puwang Allataalamu mappunnaiwi langi kaminang matanré; muwi linoé appunnangennato lollong sininna iya engkaé ri tompo'na. Iyakiya pammaséna Puwangnge lao ri toriyolomu makkuwamani rajanna, angkanna polé risininna bangsaé iko ritu Napilé, na muwi lettu makkekkuwangngé iko umma'-Na iya napilé. Jaji mappammulai makkekkuwangngé harusu'ko mapato ri Puwangnge sibawa aja'na mumatedde atisi. Puwang Allataalamu engkai ri yasé'na sininna déwataé sibawa nasau manengngi sininna akuwasangngé. Aléna Allataala iya marajaé sibawa makuwasa iya harusu'é riturusi. Dé' napojiwi kacowé-cowé sibawa dé'to natarima pasoso. Nabélai ha'na ana' béué sibawa jandaé kuwammengngi narigaukeng mennang sibawa adélé; namaséiwi tau laingngé iya tuwoé silaong bangsata sibawa mpéréngngi mennang inanré sibawa pakéyang. Na harusu tokko mappaitangngi pammasému lao risining tau laingngéro, saba' riyolo tau laing tokko ri Maséré. Pakalebbii Puwang Allataalamu sibawa massompa ri Aléna bawang. Sitinajako tette matinulu lao ri Aléna sibawa mattanro ri laleng asen-Na bawang. Pojiwi nasaba Aléna Allataalamu. Mata ulummu pura mitai pangkaukeng-pangkaukeng héba'é sibawa maseroé iya napogaukengngékko. Wettunna néné-nénému lao ri Maséré, jumellana mennang banna pituppulo tau. Iyakiya Puwang Allataalamu pura mébbui jumellamu singngéga wéttowing-wéttowingngé ri langié.” “Eloriwi Puwang Allataalamu, sibawa tuli turusiwi sininna parénta-Na. Engngerangngi makkekkuwangngé aga iya muwissengngé passalenna Puwangnge polé ri pengalamammu. Ana'-ana'mu dé' nappunnaiwi iyaro pengalamangngé. Iko ritu pura sabbingngi arajanna Puwang Allataalamu, awatangen-Na, akuwasan-Na sibawa sining anu makalallaing iya Napogau'é. Alému mitai aga iya Napogau'é lao ri arung Maséré sibawa sininna wanuwanna. Muwitai pékkugi Puwangnge paccappui tentara Maséré'é silaong sininna anyaranna sibawa karéta musuna. Ripatallemme manengngi mennang ri Tasi Gelaga wettunna mennang lellukko. Muwisseng aga iya napogau'é Puwangnge lao ri iko ri padang kessi'é ri wettu dé'napa mulettu kuwaé. Muwéngngerang towi aga napogau' Puwangnge lao ri Datan sibawa Abiram, ana'-ana'na Eliab polé ri suku Rubén. Ri yolona iko maneng, mapuwé'i tanaé nainappa naemme mennang silaong kaluwargana, kémana, sininna atanna sibawa olokolo'na mennang. Ya, iko ritu sibawa mata ulummu pura mitai sininna anu makalallaingngé iya napogau'é Puwangnge.” “Turusiwi sininna hukkung iya upalettu'é lao ri iko essoéwé, namuwulléi malléttoiwi saloé sibawa muttama ri wanuwa iya dé'énna namaitta muwonroiwi. Namutuwo matu maitta ri wanuwa iya sugié namacommo, iya najjanciyangngé Puwangnge lao ri néné-nénému sibawa lao ri wija-wijanna mennang. Wanuwa iya muwonroiyé matti dé' napada-pada tana Maséré, onrommu riyolo monro. Kuwaro harusu'ko marejjing mappallaung untu' palleriwi sining dare'é ri wettu mampona biné. Iyakiya wanuwa iya maéloé muwattamaki mabbului sibawa mallompo-lompo'i; tanana ripalleriwi ri bosié. Puwang Allataalamu piyarai iyaro wanuwaé sibawa jagaiwi sillampé taungngé. Jaji turusiwi parénta-parénta iya upalettukengngékko essoéwé; éloriwi Puwang Allataalamu sibawa massompa ri Aléna sibawa sukku tubu nyawamu. Rékko mupogau'i makkuwaéro, napateppai matu Puwangnge bosié ri yasé'na tanamu ri wettunna, puramuna méngngala, sibawa wettummu mappammula mattaneng. Namuwappunnai matu genne gandong, anggoro sibawa minnya zaitun, enrengngé wella untu' olokolo'mu. Sininna inanré iya muwapparelluwangngé tassadiyai matu untu' alému. Aja' mumaélo ripabélai polé ri Puwangnge untu' massompa sibawa mattumani ri déwata-déwata laingngé. Rékko muwajjalékkaiwi iyaro paréntaé, macayii matu Puwangnge ri iko. Dé' matu napateppa bosi; mancaji makarossai tanamu angkanna dé' nabbéré wassélé tanet-tanengngé. Na ri laleng wettu iya dé'é namaitta matéko ri tana commo iya nawéréngngékko Puwangnge. Engngerangngi sibawa puriyatiwi parénta-paréntaéro. Assiyorengngi ri taiyyamu sibawa pasangngi ri linromu untu' riyéngngerang. Appagguruwangngi lao ri ana'-ana'mu. Bicarai ri lalempola sibawa ri saliwempola, wettu mappésau sibawa wettu mappallaung. Okii ri alliri tange bolamu sibawa ri pintu gerbammu. Namumalampé sunge matu sibawa ana'-ana'mu ri wanuwa iya najjanciyangngé Puwang Allataalamu lao ri néné-nénému. Ri wettu engkana mupa langié ri yasé'na tanaé, sikutoro ittana monroko matu ri tanaéro. Turusiwi sibawa matinulu sininna hukkung iya upalettukengngékko: Eloriwi Puwang Allataalamu, pogau'i sininna iya Naparéntangngékko, sibawa sitinajako tette matinulu lao ri Aléna. Nanapaddésu'i matu Puwangnge sininna bangsaéro polé ri yolomu, sibawa muwonroiwi matu tana appunnangenna bangsa-bangsa iya lebbi battowaé sibawa lebbi mawatangngé naiya iko. Tungke' daéra iya muléjja'é mancajiwi matu appunnangemmu. Mallebba'i daéramu polé ri padang kessi'é ri yattang lettu ri Buluna Libanon ri manorang, sibawa polé ri Salo Efrat ri alau lettu ri Tasi Tengngaé ri yajang. Ri sininna wanuwaéro naébbui matu Puwang Allataalamu sining tauwé métau lao ri iko pada-pada iya Najjanciyangngé, angkanna dé' muwi séddi tau mulléi lawa-lawaiko. Iyaé essoé weddikko piléi ri yelle'na barakka'é sibawa tanroé. Ribarakkakiko matu rékko mapatoko lao ri parénta-paréntana Puwang Allataalamu, iya upalettukengngékko iyaé essoé. Iyakiya ritanroiko matu rékko dé' muturusiwi parénta-parénatana Puwang Allataalamu, sangadinna gilikko untu' massompa déwata-déwata laing iya dé'é naengka musompai. Puramuna natiwi Puwang Allataalamu muttama ri wanuwa iya muwonroiyé matti, iyaro barakka'é harusu'i mupowada polé ri Bulu Gerizim sibawa iyaro tanroé polé ri Bulu Ebal. ( Iya duwa buluéro monroi ri seddé yajanna Salo Yordan ri daérana tau Kanaangngé iya monroé ri Lompo Yordan, mangolo ri yajang, dé' namabéla polé ri ajukajung onrong assompangngé ri More seddéna kota Gilgal.) Dé'na namaitta namuwalléttoiwi Salo Yordan sibawa tudangiwi tana iya Nawéréngngékko Puwang Allataalamu. Puranana musittai tanaéro sibawa monro kuwaro, harusu'ko turusiwi sininna hukkung iya upalettukengngékko essoéwé.” “Iyanaé hukkung-hukkung iya harusu'é muturusi sillampé umuru'mu ri wanuwa iya Nawéréngngékko Puwangnge, Allataalana néné-nénému. Muttama'muna ri wanuwaéro harusu'ko mancuru'i onrong-ngonrong assompangngé ri tompo'na sining bulu matanré, ri bulu-bulué sibawa ri yawana ajukajung maworongngé, onronna bangsa iya monroé kuwaro sompai déwata-déwatana mennang. Ruttungngi mézba-mézbana mennang sibawa ropo'i alliri-alliri batu iya naangga'é mennang makarame'. Tunui lambang-lambang Asyéraé, sibawa ancuru'i dato'-dato' barahalana mennang, angkanna iyaro déwata-déwataé dé'na narisompa matu paimeng ri onrong-ngonrongngéro. Wettummu sompai Puwang Allataalamu, aja' muturusiwi carana sining tauwéro sompai déwata-déwatana mennang. Polé risininna daérana suku-suku Israélié, Puwang Allataalamu pilé matu séddi onrong kuwammengngi iyaro bangsata weddingngi lao ri yolo-Na sibawa sompai Aléna. Ri onrongngénnaro harusu'i mutiwi sining akkarobangeng ritunummu enrengngé sining akkarobangeng laingngé, pakkasuwiyang tawa seppulomu sibawa kappasuwiyang laingngé, akkarobangeng pappaleppe tinja'mu, akkarobangeng cenning atimmu sibawa ana' sapimmu nenniya bémbé bimbala'mu iya bunge' jajiyé. Kuwatoniro, ri yolona Puwang Allataalamu, iko silaong kaluwargamu harusu manréi sibawa marennu nasaba usaha-usahamu iya papolé wassélé nasaba nabarakkakiwi Puwang Allataalamu. Rékko poléni iyaro wettué, aja'na mupogau'i pada-pada makkekkuwangngé. Narapi makkekkuwangngé massompako siélo-élo atimmu, nasaba dé'pa mumattama ri wanuwa iya nabbéréyangngé Puwang Allataalamu lao ri iko, onrommu wedding mattette sibawa amang. Puramuna malléttoiwi Salo Yordan, Puwang Allataalamu tulukko matu tudangiwi sibawa monroiwi tana ri liweng saloéro. Nalinrungiko matu polé ri sininna balié, nenniya tuwoko matu sibawa amang enrengngé tennang. Nainappa piléi matu Puwang Allataalamu séddi onrong kégi wedding risompa. Kuwaniro harusu lao tiwii sininna iya puraé Uwapparéntang, iyanaritu akkarobangeng ritunué sibawa akkarobangeng-akkarobangeng laingngé, pakkasuwiyang tawaseppulomu sibawa pakkasuwiyang ripallaing iya muwajjanciyangngé lao ri Puwangnge. Arennuno ri yolona Puwang Allataalamu, silaong ana'-ana'mu, ata-atammu sibawa sining tau Léwié iya monroé ri kota-kotamu, nasaba tau Léwié dé' nalolongeng bagiyang tana ri wanuwammu. Dé' nawedding muwakkasuwiyangeng akkarobammu ri sembarangang onrong iya mupilé riyalé, iyakiya banna ri onrong iya napilé Puwangnge ri sala' séddinna sukummu. Kuwaro bawang harusu'ko makkasuwiyangeng akkarobangeng ritunu sibawa pogau'i gau' laing iya uparéntangngékko. Iyakiya laluwasako géréi olokolo'mu sibawa manréi jukuna kégi-kégiko monro. Weddikko manréi singngéga iya nawéréngngékko Puwang Allataalamu. Tungke' tau, muwi iya mapaccingngé iyaré'ga najisi'é, weddingngi nanré iyaro jukué, pada-pada weddikko manré juku jonga. Banna darana dé' nawedding riyanré, iyakiya harusu'i ritiri ri tanaé pada-pada uwai. Ri onrong muwonroiyé dé' naweddikko manré pakkasuwiyang tawaseppulona gandommu, anggoro'mu, minnya zaitummu, sapimmu iyaré'ga bémbé bimbala'mu iya bunge' jajiyé, akkarobangeng pappaleppe tinja'mu, akkarobangeng cenning atimmu iyaré'ga pakkasuwiyang laingngé. Iko sibawa ana'-ana'mu, silaong ata-atammu enrengngé sining tau Léwié iya monroé ri kotamu, harusu'i manréi pakkasuwiyangngéro ri yolona Puwang Allataalamu, ri onrong iya napilé Puwang Allataalamu. Na ri onrongngéro harusu'ko marennu nasaba sininna usahamu. Jagaiwi aja' narapii muleppessangngi appang Léwié kariyariya ri wettu tuwomu mupa ri wanuwaéro. Puranana nalowangi Puwang Allataalamu pakkasésénna wanuwammu pada-pada iya Najjanciyangngé, weddikko manré juku siélo-élona atimmu. Rékko onrong iya napilé Puwang Allataalamu mabéla senna polé ri onrommu, weddikko géré sikaju saping, bimbala iyaré'ga bémbé iya nawéréngngékko Puwangnge, sibawa manréi jukuna ri onrommu siélo-élo atimmu, pada-pada iya puraé upowadakko. Tungke' tau, muwi iya mapaccingngé iyaré'ga najisi'é, wedding manréi iyaro jukué, pada-pada weddikko manréi juku jongaé. Iyakiya juku iya engkaé mupa darana dé' nawedding riyanré, nasaba nyawaé engkai ri laleng daraé, nadé' naweddikko manré nyawa silaong jukuna. Dé' sises-siseng nawedding riyanré daraé, iyakiya harusu'i ritiri ri tanaé pada-pada uwai. Rékko muturusiwi iyaro paréntaé, masennangngi matu Puwangnge, na iko sibawa wija-wijammu saléwangengngi matu. Sininna akkarobangngé sibawa pakkasuwiyangngé iya puraé muwajjanciyang lao ri Puwangnge, harusu'i mutiwi ri onrong iya napilé Puwangnge. Akkarobangeng ritunué sibawa akkarobangeng iya riyanré jukuna harusu'i riyakkasuwiyangeng ri yasé'na mézbana Puwang Allataalamu sibawa darana ritiri'i ri yasé'na mézbaéro. Pénessaiwi madécéd-décéng sininna iya puraé uparéntakko, namupogau'i iya makessingngé sibawa naéloriyé Puwang Allataalamu, angkanna iko sibawa wija-wijammu salama'i sibawa saléwangengngi untu' mannennungeng.” “ Puwang Allataalamu paccappui matu bangsa-bangsa iya monroé ri wanuwaéro, angkanna muwulléi tudangiwi sibawa monroiwi. Puranana ripaccappu bangsa-bangsaéro, atike'ko aja' narapii muturu mennang sompa déwata-déwata laing, saba' iyaro pangkaukengngé papoléi abala. Carana iyaro bangsa-bangsaé sompai déwata-déwatana mennang, aja' muturui untu' sompai Puwang Allataalamu, saba' massompai mennang sibawa pogau'i pangkaukeng-pangkaukeng majaé iya nabenciyé Puwangnge. Mala ana'-ana'na muto mennang natunu ri yasé'na mézbaé selaku akkarobangeng untu' déwata-déwatana mennang. Pogau'ni sininna iya uparéntangngékko; aja' naritambai iyaré'ga narikurangi. Rékko séddié nabi iyaré'ga tukang nippi majjanciyangngi séuwaé iya makalallaingngé iyaré'ga dé'é padanna sibawa akkatta kuwammengngi mumassompa sibawa mattumani lao ri déwata-déwata iya dé'é naengka muwissengngi, muwi aga iya najjanciyangngéro tonget-tongengngi kajajiyang, aja' mupuriyatiwi. Puwang Allataalamu pakéi iyaro tauwé untu' cobaiko, untu' mitai aga tonget-tongekko pojiwi Puwangnge sibawa sukku iyaré'ga dé'. aja' muwéngkalingai sibawa aja' muleppessangngi alému ripalécé ri aléna. Aja'to muwamaséiwi iyaré'ga linrungiwi tauwéro. Na sininna bangsa Israélié naéngkalingai matu passalenna abbunowangngéro namétauna, angkanna dé' muwi séddi tau pogau'i maja makkuwaéro. Rékko matti monroko ri kota-kota iya nawéréngngékko Puwang Allataalamu, naullé tassiyai karébaé makkedaé siyagangngaré tau maja polé ri bangsamu pura papusai pabbanuwana kotaé untu' massompa déwata-déwata iya dé'é muwissengngi. Rékko riyéngkalingai karéba-karéba makkuwaéro, salidikiwi sibawa madécéd-décéng. Rékko iyaro jaé tonget-tongengngi pura kajajiyang, sininna pabbanuwana kotaéro silaong olokolo'na harusu'i riyuno. Iyaro kotaé harusu'i riyancuru siseng. Sininna waramparanna pabbanuwana kotaéro harusu'i ripaddeppungeng sibawa rigoppo ri tana lapangngé, nainappa kotaé sibawa sininna waramparanna harusu'i ritunu selaku akkarobangeng lao ri Puwang Allataalamu. Pura manennanaro harusu'i risalai mancaji ruttungeng sibawa dé' nawedding ripatettong paimeng. Iyaro barab-barang tattanroé dé' nawedding ritaro untu' alému, iyakiya harusu'i riyancuru siseng. Nasoro matu caina Puwangnge nanappaitangngi paressé babuwana lao ri iko. Makacuwai matu lao ri iko sibawa pancajiko bangsa iya battowaé pada-pada iya Najjanciyangngé lao ri toriyolomu, assaleng muturusiwi sininna parénta-Na iya upalettukengngékko essoéwé, sibawa pogau'i sininna iya Napuwéloé.” “Iko iyanaritu umma'na Puwang Allataalamu. Jaji wettummu mabbarata untu' tau maté, aja' muloi alému iyaré'ga cukkuru'i bagiyang yolona ulummu pada-pada iya napogau'é bangsa-bangsa laingngé. Iko iyanaritu appunnangenna Puwang Allataalamu; polé ri sininna bangsa-bangsaé ri yasé'na linoé, iko iyanaritu iya napilé Allataala untu' mancaji umma'-Na.” “Aja' muwanréi olokolo iya napaharangngé Puwangnge. Wedding muwanré iyaé olokolo'é: saping, bimbala, bémbé, jonga, bimbala ale', bémbé ale', sibawa sininna olokolo iya dé'é namapuwé kanukunna sibawa dé' namalléro. Dé' nawedding manréko olokolo iya dé'é namapuwé kanukunna sibawa dé'é namalléro. Aja' muwanré unta, kalinci iyaré'ga marmot. Iyaro olokolo'é harang, nasaba namuni malléroi, dé' namapuwé kanukunna. Aja' muwanré bawi. Iyaro olokolo'é harang nasaba namuni mapuwé'i kanukunna, dé' namalléro. Dé' nawedding riyanré jukuna, dé' nawedding rigéssa bakkéna. Weddikko manréi sininna rupanna balé iya masséréé sibawa massessi'é. Olokolo iya tuwoé ri laleng uwai iyakiya dé' namasséré sibawa dé' namassessi iyanaritu harangngi, jaji dé' nawedding riyanré. Weddikko manréi sininna rupanna manu'-manu' iya dé'é naharang. Sininna serangga makképannié iyanaritu harangngi, jaji dé' nawedding riyanré. Olokolo makképannié iya dé'é naharang wedding riyanré. Olokolo iya maté riyalé dé' nawedding muwanré, iyakiya wedding nanré tau laing iya monroé ri yelle'mu, iyaré'ga ribalu lao ri bangsa laingngé. Iko iyanaritu umma iya ripallaingngé untu' Puwang Allataalamu. Juku ana' bimbala iyaré'ga ana' bémbé'é dé' nawedding rinasu silaong uwai susunna indo'na.” “Tungke' taung harusu'i mupallaing tawaseppulona polé ri wassélé tanamu. Ri yolona Puwang Allataalamu, ri onrong iya Napilé, untu' onrong massompa, harusu'ko manréi pakkasuwiyang tawaseppulomu polé ri gandongngé, uwai anggoro'é, minnya zaitungngé enrengngé ana' sapingngé sibawa bémbé bimbala'mu iya bunge' jajiyé. Pogau'i iyaro gau'é kuwammengngi untu' mannennungeng magguruko pakalebbii Puwang Allataalamu. Rékko onrong iya napilé Puwang Allataalamu, mabéla senna'i polé ri bolamu, angkanna tawaseppulona polé ri wassélé tanamu iya nawéréngngékko Puwang Allataalamu, dé' mulléi tiwii kuwaro, na balu'i iyaro bagiyang wassélé tanamu, namutiwii ellinna ri onrong iya napilé Puwang Allataalamu. Balancai iyaro dowié untu' agi-agi iya muwacinnaiyé – saping iyaré'ga bémbé bimbala, uwai anggoro iyaré'ga énungeng maseri – nainappa ri onrongngéro, ri yolona Puwang Allataalamu, iko sibawa kaluwargamu harusu'i sisama manréi sibawa massennas-sennang. Aja' muleppessangngi kariyariya tau Léwié iya monroé ri kota-kotamu; éngngerangngi makkedaé mennang ritu dé' nappunnai tana riyalé. Ri tungke' cappa taung matellué, harusu'ko tiwii tawaseppulona bagiyang polé ri wassélé tanamu sibawa paddeppungengngi ri kota-kotamu. Iyaro inanré untu' tau Léwié, nasaba dé' nappunnai mennang tana, na untu' taung laingngé, ana' béué sibawa sining jandaé iya tuwoé ri kota-kotamu. Weddingngi mennang polé sibawa malai sininna iya napparelluwangngé mennang. Rékko mupogau'i makkuwaéro, Puwang Allataalamu barakkakiwi sininna usahamu.” “Tungke' cappa taung mapitué harusu'ko pakangka alleddangeng inreng. Makkuwaiyé carana. Tungke' tau Israél iya mappainrengengngéngngi dowina lao ri tau sibangsana, harusu'i naledda iyaro inrengngé, nasaba manuru apettunna muto Puwangnge iyaro inrengngé purani riledda, jaji dé'na nawedding risinge'na. Weddikko singe'i dowi iya muwappainrengengngé lao ri tau laingngé, iyakiya dé' nawedding musinge'na dowi iya muwappainrengengngé lao ri tau sibangsamu. Puwang Allataalamu barakkakiko matu ri wanuwa iya Nawéréngngékko. Na ri yelle'na bangsamu dé'na matu tau kasiyasi, assaleng matinuluko lao ri Puwang Allataalamu, sibawa mupogau'na tonget-tongeng sininna iya uwapparéntangngé lao ri iko iya essoéwé. Puwang Allataalamu barakkakiko matu pada-pada iya Najjanciyangngé. Mappainrekko matu dowi lao ri maéga bangsa, iyakiya iko dé' muwinreng; mukuwasaiwi matu maéga bangsa, iyakiya mennang dé' nakuwasaiko matu. Rékko matti monrono ri wanuwa iya nabbéréyangngé Puwang Allataalamu lao ri iko, nainappa ri sala séddinna kotamu engka tau sibangsamu iya akurangengngé, aja' mupentingkangngi alému bawang sibawa dé' mumaélo bantui. Sibalé'na, harusu'ko makacuwa sibawa painrengiwi iyaro tauwé singngéga iya napparelluwangngé. Aja' musampéyangngi untu' painrengiwi sibawa alasang makkedaé taung pappaledda inrengngé macawé'ni. Aja' muleppessangngi nawa-nawa maja makkuwaéro muttama ri laleng atimmu. Rékko dé' mumaélo mappainreng, iyaro tauwé mangobbii matu lao ri Puwangnge untu' mappissengekko, naripannessako matu pasala. Wéréngngi sibawa masennang ati enrengngé macenning, na Puwang Allataalamu barakkakiwi matu sininna usahamu. Ri yelle'na tau Israélié tuli engka siyagangngaré tau iya kasiyasié sibawa akurangengngé. Rimakkuwannanaro uparéntakko untu' makacuwa lao ri mennang.” “Rékko séddié tau worowané iyaré'ga makkunrai pole ri bangsamu balu'i aléna mancaji atammu, harusu'i majjamangekko enneng taung ittana. Ri laleng taung mapitué, harusu'i ripamaradéka. Iyaro ata ripamaradékaé dé' nawedding rileppessang lao sibawa kosong limanna. Wéréngngi sibawa malabo polé ri aga iya nawéréngngékko Puwang Allataalamu iyanaritu bémbé bimbala, gandong sibawa anggoro. Engngerangngi makkedaé iko riyolo ata ri Maséré nainappa ripamaradéka ri Puwang Allataalamu; iyanaro saba'na uwérékko paréntaéwé. Iyakiya rékko iyaro ataé dé' namaélo lao nasaba napojiko sibawa kaluwargamu enrengngé masennangngi monro sibawakko, tiwii ri sumpang bolamu sibawa teddoi daucculinna, namancajina matu atammu gangka tuwona. Makkuwatoro harusu'ko gaukengngi atammu iya makkunraié. Rékko mupamaradékai séddié ata, aja' mumarasa massesse kalé, saba' enneng taung ittana purani mappallaungekko sibawa sitengnga gaji séddié pattumani. Pogau'i paréntaé, nanabarakkakiko matu Puwang Allataalamu ri sininna usahamu.” “Ana' saping sibawa bémbé bimbala lai iya bunge' jajiyé harusu'i riyakkasuwiyangeng lao ri Puwang Allataalamu. Iyaro sapingngé dé' nawedding ripaké untu' maddakkala, sibawa iyaro bimbala'é dé' nawedding ricukkuru. Tungke' taung harusu'ko sikaluwarga manréi jukuna ri yolona Puwang Allataalamu, ri onrong iya napilé Puwangnge. Iyakiya rékko sala-salangngi iyaro olokolo'é, ébara'na képpangngi iyaré'ga buta iyaré'ga sala-salang maladde laingngé, dé' nawedding muwakkasuwiyangeng lao ri Puwang Allataalamu. Tungke' tau, muwi mapaccingngé iyaré'ga najisi'é, weddingngi nanré ri bolaé, pada-pada manré juku jonga. Dé' nawedding riyanré darana, iyakiya harusu'i ritiri ri tanaé pada-pada uwai.” “Ramé-raméiwi Paskaé ri laleng uleng Abib untu' pakalebbii Puwang Allataalamu, saba' ri laleng ulengngéro, ri wennié, Napaleppe'ko polé ri Maséré. Laono ri onrong iya napilé Puwangnge untu' géréi sikaju polé ri bémbé bimbala'mu iyaré'ga sapimmu selaku pakkasuwiyang Paska untu' pakalebbii Puwang Allataalamu. Iyaro pakkasuwiyang Paskaé harusu'i riyanré sibawa roti iya dé'é raginna. Pitungngesso ittana harusu'ko manréi roti iya dé'é raginna, pada-pada wettunna musalai tana Maséré sibawa mapperi-peri. Anréi iyaro rotié, roti iya riteppué roti anrasa-rasang, kuwammengngi gangka tuwomu muwéngngerangngi matu esso musalainna Maséré, onrommu manrasa-rasa. Pitungngesso ittana risininna wanuwammu dé' muwi séddi tau taro ragi ri bolana. Juku olokolo iya nagéréé ri wenni mammulangngé harusu'i riyanré gangka cappu ri wenniéttoro. Séwongngi iyaro jukué sibawa anréi ri onrong iya napilé Puwang Allataalamu, nainappa lisuno ri bolamu pappa bajana éléé. Enneng esso rappina harusu'ko manré roti dé'é raginna. Ri esso mapitué harusu'ko maddeppungeng untu' sompai Puwang Allataalamu. Aja' muwappallaung ri essoéro.” “Bilangngi pitu aha' mappammulai ri esso pammulanna méngngalako gandong, nainappa ramé-raméiwi Pésta Engngalangngé untu' pakalebbii Puwang Allataalamu. Iyaro essoé tiwii pakkasuwiyang cenning atié lao ri aléna situru égana dallé iya puraé nawérékko. Ri yolona Puwang Allataalamu, ri onrong iya Napilé, harusu'ko marennu silaong ana'-ana'mu, ata-atammu sibawa tau Léwié, tau laingngé, ana' béué sibawa sining janda iya monroé ri kota-kotamu. Turusiwi sininna parénta-Na sibawa matinulu, sibawa aja' muwallupaiwi makkedaé atako riyolo ri Maséré.” “Puranana ripaddunu maneng gandommu sibawa puranana ripara' maneng buwa anggoro'mu, harusu'ko ramé-raméiwi Pésta Kalampang Daud-daungngé pitungngesso ittana. Assennas-sennanno sibawa ana'-ana'mu, ata-atammu, tau Léwié, tau laingngé, ana' béué sibawa sining jandaé iya monroé ri kota-kotamu. Pitungngesso ittana harusu'ko ramé-raméiwi iyaro péstaé untu' pakalebbii Puwang Allataalamu ri onrong assompang iya napilé Puwangnge. Arennuno, nasaba Puwang Allataalamu pura barakkaki wassélé tanamu sibawa pallaummu. Sininna worowané Israélié harusu'i polé sompai Puwang Allataalamu ri onrong iya Napilé wékkatellu sitaung, iyanaritu ri Esso Maraja Paskaé, ri Pésta Engngalangngé sibawa Pésta Kalampang Daud-daungngé. Tungke' tau harusu'i tiwi pakkasuwiyang situru amampungenna, situru égana dallé iya riwéréngngékko ri Puwang Allataalamu.” “Ri tungke' kota iya nawéréngngékko Puwang Allataalamu, harusu'ko makka haking-haking sibawa pajjama-jama laing untu' madélékiwi ra'ya'é sibawa adélé. Ri laleng mala apettung, dé' nawedding mennang tinda' siélo-élona iyaré'ga matane siwali. Dé'to nawedding mennang tarima pasoso, nasaba iyaro pasoso'é dé' naébbui tauwé mapanré sibawa malempu, angkanna mala apettung iya dé'e naadélé. Harusu'ko tuli adélé, kuwammengngi mulléi mattette sibawa tuwo saléwangeng ri tana nawéréngngékko Puwang Allataalamu. Rékko mébbuko mézba untu' Puwang Allataalamu, aja' mutaroiwi dato-dato barahala aju iya pulambangngéngngi Asyéra ri seddéna, sibawa aja' mupatettong alliri untu' massompa barahala, nasaba nabenci Puwang Allataalamu pangkaukengngéro. Aja' muwakkasuwiyangeng saping iyaré'ga bimbala iya sala-salangngé lao ri Puwang Allataalamu, nasaba nacéccéi. Rékko muwéngkalingai makkedaé risala séddinna kotamu engka tau madosa lao ri Puwang Allataalamu nasaba najjalékkaiwi assijancingngé sibawa parénta-Na ri laleng massompana nenniya mattumaninna lao ri déwata-déwata laingngé iyaré'ga lao ri mata essoé, kétengngé iyaré'ga sining wéttowingngé, harusu'ko salidikiwi tonget-tongeng. Rékko iyaro jaé tonget-tongengngi kajajiyang ri Israélié, tau iya pasalaé harusu'i ritiwi ri saliweng kota sibawa rigenrung batu gangka maté. Iyakiya banna weddingngi rihukkung maté rékko engka duwa tau sabbi iyaré'ga lebbi; séddié tau dé' nawedding rihukkung maté rékko pappakatajang séddi tau sabbi bawang. Sining sabbié harusu'i maggenrungengngi batu mammulangngé lao ri tauwéro, naccowériwi sininna ra'ya'é. Nanallalengiro mupallennye'i iyaro jaé. Rékko engka parakara iya dé'é naulléi pettuiwi haking-hakingngé riséuwaé onrong nasaba mawatang senna, ébara'na parakara abbunowang iya nattungkaiyé iyaré'ga dé'é nattungkaiwi, assisalang passalenna waramparang iyaré'ga silo-lo watakkalé, harusu'ko lao ri onrong iya napilé Puwang Allataalamu. Pangoloi iyaro parakaraé lao ri imang-ngimang Léwié sibawa lao ri haking iya nakennaé jamang, nainappa muleppessang mennang pettuiwi. Mennang ritu mabbéré apettung, sibawa iko harusu pajoppai sibawa matutu aga iya napowadaé mennang lao ri iko. Tarimai apettunna mennang sibawa pogau'i aga napattette mennang lettu ri passaleng iya baiccu'é. Nigi-nigi barani méwai hakingngé iyaré'ga imang iya nakennaé jamang, harusu'i rihukkung maté; nanallalengiwiro mupallennye'i jaé ri Israélié. Naéngkalingai matu sininna tauwé passalenna iyaro kajajiyangngé namancaji métau, angkanna dé'na gaga iya baranié pogau'i makkuwaéro.” “Rékko tana iya nawéréngngékko Puwang Allataalamu mancajini appunnangemmu, sibawa monrono kuwaro, naullé muwacinnaini séddi arung pada-pada bangsa-bangsa iya monroé ri mattulilimmu. Pénessaiwi madécéd-décéng kuwammengngi tau iya muakkaé mancaji arummu iyanaritu tau iya napilé Puwang Allataalamu. Harusu'i séddi tau polé ri bangsamu muto; aja' muwakkai séddié tau laing mancaji arummu. Dé' nawedding arungngé mappunnai maéga anyarang untu' tentarana sibawa dé' nawedding nasuro bangsaéwé lisu ri Maséré untu' melli anyarang, nasaba purai makkeda Puwangnge makkedaé dé' nawedding lisu umma'-Na ri wanuwaéro. Dé' nawedding arungngé mappunnai maéga bainé, kuwammengngi aja' nabbokoriwi Puwangnge. Dé'to nawedding passugii aléna sibawa péra' enrengngé ulaweng. Rékko séddié tau rilanti mancaji arung, harusu'i riwéréng séddi kitta iya mallise'é hukkung-hukkunna Allataala iya rilémbaé polé ri kitta asellinna iya nataroé imang-ngimang Léwié. Iyaro kitta'é harusu'i tuli engka ri seddéna, gangka tuwona harusu'i nabaca kuwammengngi nagguru pakalebbii Puwang Allataalana sibawa matinulu turusiwi sininna parénta iya tarokié ri lalenna. Rékko nabacai sibawa mattunru-tunru, dé' matu naangga'i aléna lebbi makessing naiya sining tau sibangsana, sibawa dé' namaélo majjalékkaiwi paréntana Puwangnge sibawa cara muwi maga. Nainappa aléna sibawa wija-wijanna naparéntai matu bangsana narapi massossoreng.” “Sininna suku Léwié riwéréng tugas imang, rimakkuwannanaro dé' nawedding tarima attawang tana ri Israélié. Harusu'i mennang tuwo polé risining pakkasuwiyangngé sibawa sining akkarobangeng laingngé iya riyabbéréyangngé lao ri Puwangnge. Dé' nawedding mennang mappunnai tana pada-pada suku-suku laingngé, saba' Puwangnge ritu attawang manana mennang, pada-pada iya najjanciyangngé Puwangnge lao ri mennang. Rékko séddié tau makkasuwiyangeng akkarobangeng saping iyaré'ga bimbala, limanna, banginna sibawa lise' babuwana iyaro olokolo'é harusu'i riyabbéréyang lao ri imang-ngimangngé untu' tawana mennang. Wassélé mammulangngé polé ri gandongngé, uwai anggoro'é, minnya zaitungngé sibawa bulu bimbala'é, untu' attawannato mennang. Polé risininna suku Israélié, Puwang Allataalamu pura piléi suku Léwié mancaji imang untu' mannennungeng. Rékko séddié tau Léwi iya assalennaé muwi polé ri kota kégi ri Israélié lao ri onrong iya napilé Puwangnge namaéloi monro kuwaro, weddingngi natumaningi Puwang Allataalamu selaku imang pada-pada sining tau Léwi laingngé iya majjamaé ri onrongngéro. Harusu'i tarima inanré iya padaé égana pada-pada imang-ngimang laingngé; aga iya nalolongengngé polé ri kaluwargana, makkuwatoro untu' aléna.” “Rékko muttama'no ri wanuwa iya nawéréngngékko Puwang Allataalamu, aja' muturui ja iya napogau'é bangsa-bangsa iya engkaé kuwaro. Ri yelle'mu aja' naengka makkasuwiyangengngi ana'-ana'na selaku akkarobangeng ritunu. Sibawa aja' namuwi séddi tau mancaji pattiro-tiro, sappa tanra-tanrang, paké baca-baca iyaré'ga paddissengeng, iyaré'ga sisumpung sibawa waliyalana tau maté. Tau iya pogau'éngngi sining pangkaukeng majaéro ribenciwi ri Puwang Allataalamu, na iyanaro saba'na iyaro bangsa-bangsaé ripaddésu'i polé ri yolomu. Jaji sitinajako mattumani lao ri Puwang Allataalamu sibawa sukku atimmu.” Nainappa makkeda Musa, “Bangsa-bangsa ri wanuwa iya maéloé muwonroiro naccowériwi pangajana pattiro-tiroé sibawa sappaé tanra-tanrang. Iyakiya Puwang Allataalamu dé' napalaloko pogau'i gau'éro. Sibalé'na polé ri bangsata muto maéloi suro lao ri iko séddi nabi pada-pada iyya'é, na harusu'ko mapato lao ri aléna. Ri esso maddeppungemmu ri Bulu Sinai, muwéllauwi kuwammengngi aja'na muwéngkalingai Puwang Allataalamu mabbicara sibawa aja'na muwitai ahadéréken-Na ri laleng api iya malluwa-luwa'é, nasaba métauko maté. Rimakkuwannanaro makkedai Puwangnge lao ri iyya, ‘Paréllaunna mennanro mapanréi. Polé ri bangsana muto mennang maélo-Ka suro lao ri mennang séddi nabi pada-pada iko. Maélo-Ka powadangngi aga iya harusu'é napowada, nainappa napalettu matu lao ri bangsaéro sininna iya Uwapparéntangngé. Mabbicarai matu ri laleng asek-Ku, na-Uhukkungngi matu nigi-nigi iya dé'é namaélo méngkalingai. Iyakiya rékko séddié nabi barani palettu séuwa paseng ri laleng asek-Ku padahal dé' Usuroi pogau'i makkuwaéro, harusu'i maté; makkuwatoro tungke' nabi iya mabbicaraé ri laleng asenna déwata-déwata laingngé harusu'i maté.’ Naullé makkutanako ri laleng ati, ‘Pékkugiki missengngi aga pasenna iyaro séddié nabi assalenna poléi ri Puwangnge iyaré'ga dé'?’ Rékko séddié nabi mabbicarai ri laleng asenna Puwangnge, iyakiya aga iya napowadaéro dé' nakajajiyang, iyaro botoé dé' napolé ri Puwangnge. Iyaro nabié mabbicarai ri laleng asenna muto nadé' naweddikko métau ri aléna.” “Puranana napaccappu Puwang Allataalamu iyaro bangsa-bangsaé sibawa nawérénno wanuwanna, sibawa puranana muwala kota-kotana nenniya sining bolana mennang enrengngé monro kuwaro, Rékko séddié tau dé' nattungkaiwi mpunoi tau laingngé iya tenniyaé balinna, weddingngi lari lao risala séddinna kotaéro sibawa weddingngi monro kuwaro. Rimakkuwannanaro uparéntakko untu' passadiya tellu kota. Rékko purani nalowangi Puwang Allataalamu daéramu pada-pada iya Najjanciyangngé lao ri toriyolomu, sibawa purani riwérékko sininna wanuwaéro, harusu'siko pilé tellu kota allinrungeng. (Iyaro wanuwaé maéloka mpérékko rékko mupogau'i sininna séuwa-séuwaé iya uparéntangngékko iya essoé, sibawa rékko mupojiwi Puwang Allataalamu sibawa tuwo situru pappagguruwan-Na.) Pogau'i iyaro kuwammengngi aja' mumadosa nasaba muleppessangngi tau iya dé'é napasala riyunoi ri wanuwa iya nawéréngngékko Puwang Allataalamu.” “Iyakiya laittosi rékko séddié tau tajengngi balinna sibawa nattungkaiwi nenniya perasaang benci mpunoi, nainappa lari lao risala séddinna kota allinrungengngé untu' lolongeng allinrungeng. Ri laleng gau'éro sining pamimping kotana harusu'i mobbii iyaro tauwé nainappa mabbéréyangngi lao ri anggota kaluwargana iya mattanggung jawa'é untu' mpale'i abbunowangngéro, kuwammengngi weddingngi riyuno. Aja' muwamaséiwi. Paleppe'i Israélié polé ri pabbunoéro, kuwammengngi musaléwangeng.” “Rékko lettu'no ri wanuwa iya nawéréngngékko Puwang Allataalamu, aja' mupaésa'i pakkaséséng tanana bali bolamu iya ripattentué ri wettu riyolo.” “Séddi tau sabbi bawang dé' nagenne untu' pannessai séddié tau riteppu pasalai; kaminang kuranna duwa tau sabbi riyapparelluwang untu' gauéro. Rékko séddié tau maélo solangiwi tau laingngé sibawa teppuwang salana ri pengadilangngé, na iya duwanna harusu'i lao ri onrong assompang iya napattentué Puwangnge kuwammengngi nariadéléki risining imangngé sibawa haking iya nakennaé jamang. Sining hakingngé harusu'i salidikiwi parakaraéro sibawa tonget-tongeng, narékko manessai iyaro tauwé purai napétenna pada-padanna tau Israél, harusu'i tanggungngi pahukkungeng iya riyakkattaiyé untu' balinnaro. Nanallalengiro mupallennye'i iyaro jaé. Naéngkalingai matu sininna tauwé passalenna gau'éro sibawa métauni, angkanna dé'na gaga iya pogau'éngngi maja makkuwaéro. Aja' mukasiyang ri laleng parakara-parakara makkuwaéro rupanna. Pahukkungenna padaénna: Nyawa risulléi nyawa, mata risulléi mata, isi risulléi isi, lima risulléi lima sibawa ajé risulléi ajé.” “Rékko laoko mammusu méwai sining balimmu, aja' mumétau mitai karéta musuna sibawa anyaranna mennang iya maégaé enrengngé tentarana mennang iya jumellanaé lebbi égai naiya jumellamu. Puwang Allataalamu paleppe'ko polé ri Maséré, makkuwatoro tulukko matu. Ri wettu dé'napa muwammusu, harusu'i malluru séddié imang sibawa mabbicara ri iko makkuwaé, ‘Saudara-saudara, éngkalingai! Iyaé essoé majuko mammusu. Aja' mumétau iyaré'ga marenni ati iyaré'ga malippu. Puwang Allataalamu maccowé matu untu' tulukko, sibawa Aléna matu mpérékko apakalang.’ Nainappa sining parawiraé harusu'i palettu'i ada-adaéwé lao ri iko, ‘Engkaga ri yelle'mu iya nappaé patettong bola, iyakiya dé'pa napakangka upacara ménrékiwi? Rékko engka, weddingngi lisu. Saba' rékko riyunoi ri laleng musué, tau laingngé monroiwi matu bolana. Engkaga ri yelle'mu tau iya nappaé tanengiwi palla anggoro'na sibawa dé'pa napura nacéppu buwa-buwa anggoro'na? Rékko engka, weddingngi lisu. Saba' rékko riyunoi ri laleng musué, tau laingngé matu péneddingiwi buwa anggoro'na. Engkaga ri yelle'mu tau mattunangang sibawa maélo botting? Rékko engka, weddingngi lisu. Saba' rékko riyunoi ri laleng musué, tau laingngé matu botting sibawa tunanganna.’ Harusu towi napowada sining parawiraé iyaé lao ri iko, ‘Engkaga ri yelle'mu tau iya ténré nataro tau iyaré'ga pellorengngé? Rékko engka, weddingngi lisu, kuwammengngi aja' nasolangiwi sumange'na tau laingngé.’ Puranana sining parawiraé mabbicara lao ri tentaraé, harusu'i rijello pamimping-pamimpinna tengke passéddiyangngé. Rékko laoko untu' gasai séddié kota, wéréngngi riyolo kasempatang pabbanuwana untu' manyara. Rékko natimpa'i mennang pintu-pintu gerbanna sibawa manyarai, harusu manengngi mennang mancaji atammu sibawa pogau' jamang passaé untu' iko. Iyakiya rékko pabbanuwana iyaro kotaé dé' namaélo manyara sibawa lebbi napojiwi mammusu, harusu'ko keppungngi iyaro kotaé. Nainappa, rékko Puwang Allataalamu pakkulléko sittaiwi iyaro kotaé, harusu'ko mpuno manengngi sininna pabbanuwana iya worowané. Iyakiya weddikko malai makkunraié, ana'-ana'é, olokolo'é sibawa agi-agi iya engkaé ri kotaéro. Sininna waramparanna sining balimmuro weddingngi mupaké. Puwang Allataalamu mabbéréyangngi lao ri iko. Makkuwaniro harusu'i mugaukengngi kota-kota iya mabélaé polé ri wanuwa muwonroiyé. Iyakiya rékko iyaro kotaé engkai ri laleng daéra iya nabbéréyangngé Puwang Allataalamu lao ri iko, sininna pabbanuwana harusu'i riyuno. Pada-pada iya napparéntangngé Puwang Allataalamu, harusu'ko paccappui sining tau Hét-é, Amorié, Kanaangngé, Féris-é, Héwié sibawa Yébus-é. Unoi mennang, kuwammengngi dé' naébbuko madosa lao ri Puwang Allaataalamu ri laleng napaggurummu pogau'i gau'-gau' mappakaciddi'-ciddi'é lao ri déwata-déwatana mennang. Rékko mumusui séddié kota sibawa keppungngi untu' wettu iya maittaé, aja' mutubbangngi ajukajungngé kuwaro. Anréi buwa-buwana, iyakiya aja' musolangiwi ponna, saba' iyaro ajukajungngé tenniya balimmu. Ajukajung laingngé weddingngi mutubbang untu' ripancaji sappo akkeppungeng narapi sempé iyaro kotaé.” “Rékko ri wanuwa iya nawéréngngékko Puwang Allataalamu engka tau rilolongeng maté riyuno ri dare'é sibawa dé' narisseng niga mpunoi, pamimping sibawa hakimmu harusu'i lao suke'i pallawangenna polé ri onronna iyaro ujué rilolongeng lao ri tungke'-tungke' kota iya macawé'é. Nainappa sining tomariyolona kota iya kaminang macawé'é harusu'i pilé sikaju saping lolo iya dé'éppa naengka naripaké mappallaung. Iyaro sapingngé harusu'i natiwi mennang riséddié onrong ri seddéna salo iya dé'é naengka namarakko sibawa iya dé'éppa naengka narirakkala tanana iyaré'ga ritanengi. Harusu'i mennang napolo ellonna iyaro olokolo'é kuwaro. Sining imang Léwié harusu towi lao kuwaro, nasaba harusu'i mennang mabbéré apettung ri laleng tungke' parakara tindakang ateddekengngé. Ripiléi mennang ri Puwang Allataalamu untu' massompa ri Aléna sibawa teppui barakka'é ri laleng asen-Na. Nainappa sining tomariyolo polé ri kota iya kaminang macawé'é harusu'i nabissai limanna mennang ri yasé'na iyaro sapingngé sibawa powadai, ‘Tenniya idi mpunoi iyaro tauwé, sibawa dé' taissengngi niga pogau'i. Puwang, addampengengngi Israélié umma'-Mu iya Mupaleppe'é polé ri Maséré. Addampengekki sibawa aja' muwangga'ki mattanggung jawa ri abbunowanna tau iya dé'é napasala.’ Na ri laleng pogau'i aga iya natuntu'é Puwangnge, dé'na nariyangga'ko mattanggung jawa ri abbunowangngéro.” “Rékko mammusuko, nanawérékko Puwang Allataalamu apakalang, namuwala tawangeng musu, naullé ri yelle'na mennang engka séddi makkunrai magello iya mupojiyé sibawa macinnako pubainéi. Tiwii iyaro makkunraié ri bolamu. Harusu'i goncingngi gemme'na kuwaro, tobba'i kanukunna, sibawa mappasullé pakéyang. Harusu'i monro ri bolamu sibawa mabbarata nasaba amaténna tomatowanna siuleng ittana. Purairo weddinno kawing sibawa aléna. Rékko rimunri dé'na muwacinnaini, weddikko suroi lao sibawa laluwasa. Dé' nawedding mugaukeng selaku ata iyaré'ga mubalu, nasaba purai mupassa siatinrokko.” “Ebara'na séddié tau mappunnaiwi duwa bainé, na jajiyang duwai ana' worowané, iyakiya ana' iya jajiyé lebbi riyolo tenniya ana' polé ri bainé iya naéloriyé. Rékko iyaro tauwé maéloi pattentui pékkugiwi maélo tawai asugirenna lao ri ana'-ana'na, dé' nawedding mappasilaingeng polé ri ana' bainéna iya naéloriyé sibawa mpéréngngi iyaro ana'é tawa iya mancajiyé ha'na ana' macowaé. Harusu'i nawéréng tawa leppi wékkaduwa polé ri waramparanna lao ri ana' worowané macowaé, namuni iyaro ana'é tenniya ana' polé ri bainé iya naéloriyé. Ha'na ana' macowaé harusu'i nangakui ambo'na, sibawa lao ri ana'éro harusu'i riwéréng mana iya mancajiyé ha'na situru hukkungngé.” “Ebara'na engka ana' iya matedde atié, napoji maronta sibawa dé' namaélo tunru' lao ri tomatowanna namuni purani mennang nahukkung. Harusu'i tomatowanna natiwi lao risining tomariyolona kotaé onronna mennang monro sibawa méllauwi kuwammengngi iyaro ana'é riadélékiwi. Harusu'i mennang makkeda lao risining tomariyolona kotaéro, ‘Iyaé ana'ta matedde atiwi, napoji maronta sibawa dé' namaélo tunru' lao ri idi; nallabowangngi dowié sibawa napoji mabo'.’ Nainappa sining tau worowané polé ri kotaéro harusu'i genrungngi iyaro ana'é sibawa batu narapi maté. Nanallalengiro mupallennye'i iyaro jaé. Sininna tau Israélié méngkalingai matu passalenna kajajiyangngéro namancaji métau.” “Rékko séddié tau purani rihukkung maté nasaba séuwa ja, sibawa ujuna rigattung ri allirié, iyaro ujué dé' nawedding rileppessang kuwaro puppu benni, iyakiya harusu'i rikuburu ri essoéttoro. Uju iya taggattungngé ri allirié napapoléi pahukkungenna Allataala ri wanuwaé. Jaji, kuburu'i iyaro ujué kuwammengngi dé' mucarépaiwi wanuwa iya nawéréngngékko Puwang Allataalamu. Rékko saping iyaré'ga bimbala appunnangenna tau sibangsamu pusa namuwitai iyaro olokolo'é, aja' muwajjaiwi temmissengngi, iyakiya tiwii iyaro olokolo'é lisu ri punnana. Rékko mabélai bolana punnana, iyaré'ga dé' muwissengngi niga punnana, tiwii iyaro olokolo'é ri bolamu. Rékko poléi punnana sappai, wérénni. Pakkuwatowiro rékko runtu'ko sikaju kaleddé, silampa pakéyang iyaré'ga agi-agi appunnangenna sibangsamu. Rékko sikaju kaleddé iyaré'ga saping appunnangenna tau sibangsamu menrung ri lalengngé, aja' muwajjaiwi temmissengngi, iyakiya tulungngi paoto'i iyaro olokolo'é paimeng. Tau makkunraié dé' nawedding mappakéyang pada-pada worowané sibawa worowané dé' nawedding mappakéyang pada-pada makkunraié, saba' tau iya pogau'éngngi makkuwaéro nacéccé Puwang Allataalamu. Rékko runtu'ko sarang manu'-manu' ri pongngajué iyaré'ga ri tanaé sibawa indo' manu'-manu'é mattengngang maddongkong ri yasé'na tellona iyaré'ga silaong ana'-ana'na, aja' muwalai indo'na iyaro manu'-manu'é. Weddikko malai ana'-ana'na iyaro manu'-manu'é, iyakiya leppessangngi indo'na luttu, kuwammengngi mumalampé sunge sibawa tuwo madécéng. Rékko patettokko bola, harusu'ko sappoi mattulili wiring pabbingenna. Dé' matu mutanggung jawa'i rékko engka tau sempé polé ri pabbingengngéro namaté. Aja' mutaneng tanet-taneng laing ri palla anggoro'mu sangadinna pong anggoro. Rékko taneng tokko, dé' naweddikko malai wassélé'na iyaro dare'é, muwi polé ri anggoro'é iyaré'ga polé ri tanet-taneng laingngé. Aja' mupasibaliwi sapingngé sibawa kaleddé'é riséddié rakkala. Aja' mupakéi pakéyang iya riyébbué polé ri wol-é sibawa lénang iya ritennungngé massibawa. Ebburengngi jombé-jombé ri iya eppa cappa pakéyammu.” “Ebara'na séddié worowané kawing sibawa séddié ana' dara, narimunri dé'na nacinnaiwi. Nainappa mébbu teppuwang bellé-bellé makkedaé dé'na naparawang bainéna wettunna mennang kawing. Ri laleng gau'éro tomatowanna iyaro makkunraié harusu'i nala kaing bottinna iya engkaé baté darana, iya pabuttiyéngngi makkedaé ana'na mennang iyaro wettué perawang mupi. Iyaro kaingngé harusu'i mennang nappaitang lao risining tomariyolona kotaé ri pengadilangngé. Ambo'na iyaro ana'daraé harusu'i makkeda lao ri mennang, ‘Purani uwabbéréyang ana'ku lao ri tauwéwé mancaji bainéna, iyakiya makkekkuwangngé dé'na nacinnaini. Mébbui teppuwang bellé-bellé sibawa makkeda makkedaé bainéna tenniyana perawang wettunna mennang kawing. Iyakiya iyaé buttinna makkedaé ana'ku wettuéro perawang mupi. Pénessaiwi baté daraé ri kaing bottinnaé!’ Sining tomariyolona kotaé harusu'i mobbii iyaro tau worowané sibawa barasa'i. Harusu towi mennang dendai sératu dowi péra' sibawa mabbéréyangngi iyaro dowié lao ri matuwanna, nasaba purai nasolangi alebbirenna séddié makkunrai Israél. Nainappa iyaro makkunraié harusu'i tette mancaji bainéna, sibawa dé' nawedding ripassarang gangka tuwona. Iyakiya ébara'na iyaro teppuwanna tongengngi sibawa dé' gaga buttinna makkedaé iyaro bainéna perawang mupi wettunna kawing, iyaro makkunraié harusu'i ritiwi ri sumpang bolana tomatowanna. Ri onrongngéro sining tau worowané polé ri kotaéro harusu'i genrungngi sibawa batu gangka maté. Iyaro makkunraié purani napogau' séuwa iya pakasiriéngngi bangsata nasaba kédosalai ri wettu dé'napa nakawing ri wettu monrona mupa ri bolana ambo'na. Ri laleng rihukkunna mupallennye'i iyaro jaé. Rékko séddié worowané ripoléi kédo sala sibawa bainéna tau laingngé, harusu'i rihukkung maté iya duwa. Nanallalengiro mupallennye'i iyaro jaé. Ebara'na ri laleng kota séddié tau worowané ripoléi kédo sala sibawa séddié ana'dara iya mattunangangngénna sibawa tau laingngé. Ri laleng gau'éro harusu'i mennang ritiwi ri saliweng kota narigenrung batu gangka maté. Iyaro ana'daraé harusu'i riyuno nasaba dé' nagora méllau tulung, na iyaro gau'é kajajiyangngi ri laleng kota, iya weddingngé riyéngkalinga gorana. Sibawa iyaro tau worowané harusu'i riyuno nasaba nakédosalaiwi ana'dara iya mattunangangngénna. Ri laleng hukkungngi iya duwa, mupallennye'i iyaro jaé. Iyakiya laing gau'na rékko ri dare'é séddi tau worowané kédosalaiwi séddié ana'dara iya mattunangangngénna sibawa tau laingngé. Ri laleng gau'éro banna worowané harusu'i rihukkung maté. Iyaro ana'daraé dé' nawedding riyagaga nasaba dé' napogau' séuwa iya siratangngé rihukkung maté. Iyaro parakaraé pada-padai parakara séddié tau iya luruiyéngngi tau laingngé sibawa mpunoi. Iyaro akédongeng salaé kajajiyangngi ri dare'é, sibawa muni iyaro ana'daraé gorai méllau tulung, iyakiya dé' gaga polé tulungngi. Ebara'na séddié tau worowané ripoléiwi kédosalaiwi séddié ana'dara iya dé'éppa namattunangang. Ri laleng gau'éro harusu'i nawaja lao ri ambo'na iyaro ana' daraé lise kawing angke'na limappulo dowi péra'. Iyaro ana' daraé harusu'i mancaji bainéna nasaba ripassai kédosala, sibawa gangka tuwona dé' nawedding natelle. Dé' séddi tau wedding cella-cellai ambo'na sibawa lusérengngi sala séddinna bainéna ambo'na.” “Tau iya puraé rilase' iyaré'ga iya rirette katawanna dé' nawedding mancaji anggota umma'na Puwangnge. Tau iya jajiyé ri saliwenna annikkangngé sibawa sininna wija-wijanna lettu iya maseppuloé, dé' nawedding mancaji anggota umma'na Puwangnge. Tau Amongngé sibawa Moab-é nenniya wija-wijanna mennang lettu iya maseppuloé dé' nawedding mancaji anggota umma'na Puwangnge, nasaba dé' namaélo mennang mpérékko inanré sibawa uwai wettummu ri laleng allalengengngé massu polé ri Maséré. Mala mennang napéssaroiwi Biléam, ana' Béor polé ri kota Pétor ri Mésopotamia, untu' tanroiko. Iyakiya dé' namaélo Puwang Allataalamu méngkalingai Biléam. Sibalé'na napinrai iyaro tanroé mancaji barakka, nasaba Namaséiko. Gangka tuwomu sibawa lettu mannennungeng, aja' mutulungngi iyaro bangsa-bangsaé iyaré'ga mébbui mennang madécéng. Aja' muwita mariyawai tau Edongngé nasaba silessuremmu mennanro. Aja'to muwita mariyawai tau Maséré'é, nasaba purako monro ri wanuwanna mennang. Mappammulai ri assossoreng matellué sibawa matteru ri wija-wijanna mennang weddingngi mancaji anggota umma'na Puwangnge.” “Wettummu mattengngang mammusu, harusu'ko niniriwi sininna séuwa-séuwaé iya pancajiyékko najisi'. Rékko séddié tau mancaji najisi'i nasaba passui manning ri wettu matinrona, harusu'i nasalai akkémangngé sibawa monro ri saliweng. Muttama'nana arawéngngé harusu'i cemmé sibawa wettunna labu essoé weddinni lisu ri akkémangngé. Harusu'ko passadiya onrong ri saliwenna akkémangngé untu' majjambang. Rékko maéloko lao kuwaro, tiwiko ri lainnaé muwapparelluwangngé makkuwatoro sipolo aju untu' kali kalebbong onrong majjambang sibawa untu' tébungngi. Puwang Allataalamu sibawakko ri laleng akkémammu untu' linrungiko sibawa mpérékko apakalang lao risining balimmu. Rimakkuwannanaro jagaiwi kuwammengngi natette mapaccing akkémammu. Aja' narapii engka séuwa iya dé'é nasipato ri yelle'mu, kuwammengngi dé' nasalaiko Puwangnge.” “Rékko séddié ata lari polé ri puwanna nainappa lao ri iko méllau allinrungeng, aja' musuroi lisu. Weddingngi monro risala séddinna kotamu situru iya napilé, sibawa dé' nawedding mugaukeng sibawa matedde. Séddié tau Israél, muwi worowané iyaré'ga makkunrai, dé' nawedding mancaji cakkuribang ri bola-bola assompangngé. Makkuwatoro dowi iya nalolongengngé selaku wassélé accakkuribangenna dé' nawedding ritiwi ri Bolana Puwang Allataalamu untu' makkamaja tinja, saba' nabenci Puwang Allataalamu cakkuribangngé ri bola-bola assompangngé sibawa saro accakkuribangengngé. Rékko muwajjanciyangngi séuwaé lao ri Puwang Allataalamu, aja' mupasoro-soroi untu' rupaiwi iyaro jancié, nasaba tette'i natuntu Puwang Allataalamu, namadorakako rékko dé' murupaiwi. Dé' mumadosa rékko dé' muwébbu janci lao ri Puwangnge. Iyakiya rékko macenning atiko mébbu janci lao ri Puwang Allataalamu, waji'ko rupaiwi. Rékko mattengngakko mallaleng molai palla anggoro'na tau laingngé, weddikko manré buwa anggoro singngéga iya muwacinnaiyé, iyakiya dé' nawedding mupaddeppungeng ri laleng bakaé. Rékko mattengngakko joppa molai dare gandonna tau laingngé, weddikko manré gandong iya mukabettié sibawa limammu, iyakiya dé' nawedding murette sibawa kandao.” “Ebara'na séddi worowané kawing sibawa séddi ana' dara, nainappa dé'na nacinnaini nasaba nalolongengngi séuwa iya mappakasiri-sirié ri aléna. Nainappa iyaro worowané mpéréngngi sure' telle sibawa paddésu'i polé ri bolana. Nainappa iyaro makkunraié kawing sibawa séddi worowané laing. Iyakiya labe'na siyagangngaré wettunna iyaro worowané dé'na napojisi, nainappa nawéréng sure' telle sibawa paddésu'i. Iyaré'ga naullé iyaro lakkainna maduwaé matéi. Ri laleng iya duwanna gau'é lakkai mammulangngé dé' nawedding kawingini iyaro makkunraié; harusu'i naita selaku makkunrai iya puraé ricarépai. Rékko to nakawingiwi, iyaro pangkaukengngé mancajiwi pappakatuna lao ri Puwang Allataalamu. Dé' naweddikko pogau' dosa maja makkuwaéro ri wanuwa iya nawéréngngékko Puwangnge.” “Séddié tau worowané iya nappaé kawing dé' nawedding risuro muttama tentara sibawa lao mammusu iyaré'ga pogau' tugas sama laingngé. Harusu'i ripaleppe polé ri tugas-é sitaung ittana untu' murusu'i lalempolana sibawa pésennangiwi atinna bainéna. Rékko mappainrekko agi-agi lao ri tau laingngé, aja' muwalai selaku boro' batu iya napaké tauwéro lélui gandonna. Ri laleng muwalana iyaro batué, murampasa'i pakkakkasa iya napaké kaluwargana untu' pasisumpungngi atuwotuwonna. Tau iya culi'éngngi tau sibangsana, nainappa nagaukeng selaku ata iyaré'ga balu'i, harusu'i rihukkung maté. Nanallalengiwiro mupallennye'i iyaro jaé. Rékko engka lasa oli iya mabbahayaé, pogau'i sibawa tonget-tongeng aga iya napparéntangngé imang Léwié lao ri iko; accowériwi panunju-panunju iya uwéréngngéngngi mennang. Engngerangngi aga iya napogau'é Puwang Allataalamu lao ri Miryam ri laleng allalengemmu massu polé ri Maséré. Rékko mappainrekko agi-agi lao ri padammu, aja' mumattama ri lalempolana untu' malai wajunna iya napancajiyé boro'. Tajengngi ri saliweng sibawa leppessangngi aléna tiwirekko. Rékko iyaro tauwé kasiyasiwi, iyaro wajué dé' nawedding mutahang puppu benni, iyakiya harusu'i ripalisungeng tungke' wenni, kuwammengngi weddingngi napaké untu' matinro. Namattarima kasi matu sibawa Puwang Allataalamu méloriko matu. Aja' mupara'i tau ripéssaroiyé iya kasiyasié sibawa akurangengngé, muwi tau sibangsamu, iyaré'ga tau laing iya monroé risala séddinna kotamu. Tungke' esso ri wettu dé'napa nalabu essoé harusu'ko wajai sarona untu' jamanna iyaro essoé; namménasaiwi iyaro dowié nasaba napparelluwangngi. Rékko dé' muwajai sarona, mangobbii matu ri Puwangnge untu' méllau tulung lao ri iko, naripannessako madosa. Aja' muhukkung matéi tomatowaé nasaba ja iya napogau'é ana'na, sibawa aja' narihukkung maté ana'é nasaba ja iya napogau'é tomatowanna. Tungke' tau banna weddingngi rihukkung maté nasaba ja iya napogau'é. Aja' murampasa'i ha'na tau laingngé sibawa ana' béué, sibawa aja' muwalai pakéyanna séddié janda untu' boro'. Engngerangngi makkedaé pura tokko mancaji ata ri Maséré naripaleppe ri Puwang Allataalamu; iyanaro saba'na uwérékko iyaé peraturangngé. Rékko mupaddeppungengngi wassélé tanamu, aja' mulisu untu' malai wessé gandong iya musalaiyé. Iyaro gandongngé harusu'i rileppessang untu' tau laingngé, ana' béué sibawa sining jandaé, kuwammengngi naribarakkakiko ri Puwang Allataalamu ri laleng sininna usahamu. Engngerangngi makkedaé iko pura tokko mancaji ata ri Maséré; iyanaro saba'na uwérékko iyaé peraturangngé. Ebara'na duwa tau Israél lao ri pengadilangngé untu' mapparakara, nainappa iya séddié ripannessani dé' napasala, na laingngé pasala. Rékko iya pasalaé ripateppaiwi pahukkungeng pabbabba, harusu'i hakingngé suroi makkanroppang. Egana pabbabba taggattungngi polé ri ja iya puraé napogau', iyakiya dé' nawedding naliweng wékkapatappulo. Rékko naliwengngi, bettuwanna iyaro tauwé ripakatunai ri yolona tau maégaé. Aja' mungongngi pannyoro'na saping iya maddése gandongngé.” “Rékko sining tau iya massilessurengngé sionrongngi, nasala séddinna polé ri mennang maté tessalai séddi ana' worowané, jandana dé' nawedding kawing sibawa tau laingnge ri saliwenna kaluwargana lakkainna. Silessurenna tau iya matéro waji' kawingiwi iyaro jandaé. Ana' worowané macowana mennang harusu'i riyangga ana'na silessurenna iya matéro, kuwammengngi nappunnai wija ri yelle'na bangsa Israélié. Rékko iyaro tauwé dé' namaélo kawingiwi bainéna silessurenna, iyaro makkunraié harusu'i lao mangolo ri tomariyolona kotaé sibawa makkeda, ‘Ipaku dé' namaélo pogau'i kewajibanna mpéréngngi silessurenna séddi wija ri yelle'na bangsa Israélié.’ Nainappa sining tomariyolona kotaé harusu mobbii iyaro tauwé namabbicara sibawa aléna. Rékko tette'i dé' namaélo, harusu'i bainéna silessurenna maddeppériwi ri yolona sining tomariyolona kotaé, reddui sandala'na iyaro tauwé, mamméccuiwi rupanna sibawa makkeda, ‘Makkuwaiyé harusu rigaukengngi tau iya dé'é namaélo mpéréngngi wija silessurenna.’ Kaluwargana iyaro tauwé riissengngi matu ri Israélié selaku ‘Kaluwarga tau iya rireddu'é sandala'na.’ ” “Rékko duwa worowané mattengngang mallaga, na bainéna iya séddié makkuragai duwangngi lakkainna sibawa rekko'i katawanna balinna lakkainna, rette'i limanna iyaro makkunraié sibawa aja' mukasiyangiwi. Pakéi timabangeng sibawa ola' iya tongengngé kuwammengngi mumalampé sunge ri wanuwa iya nawéréngngékko Puwang Allataalamu. Nacéccé Puwang Allataalamu tau iya pojiyéngngi pabengnguwang.” “Engngerangngi pékkugi tau Amalé'é gaukekko wettummu ri laleng allalengengngé massu polé ri Maséré. Dé' namétau mennang ri Allataala sibawa gasako polé ri munri wettummu mattengngang poso sibawa acappureng pakkulléng, nainappa nauno sininna taummu iya sipanrasa-rasaé joppa ri munri. Rimakkuwannanaro, rékko purano nawéréng Puwang Allataalamu iyaro wanuwaé sibawa amanno polé risininna balié iya monroé mattulilingiko, sininna tau Amalé'éro harusu'i muwuno angkanna mennang dé' nariyéngngeranna. Aja' muwallupaiwi!” “Rékko muttama'no ri wanuwa iya nawéréngngékko Puwang Allataalamu sibawa monrono kuwaro, wassélé bunge'na polé risininna iya mupaddeppungengngé polé ri tanamu harusu'i muputtama riséddié baku, namutiwii ri onrong iya napilé Puwang Allataalamu. Laono ri imang iya tugas-é wettuéro namupowadangngi, ‘Upannessai lao ri Puwang Allataalamu makkedaé muttama'ka ri wanuwa iya Najjanciyangngé lao ri néné-nénéta untu' nawérékki.’ Natarimai matu imangngé iyaro bakué polé ri limammu nanapalénne'i ri yolona mézbana Puwang Allataalamu. Nainappa ri yolona Puwang Allataalamu, harusu'ko powadai ada-adaéwé: ‘Oh Puwang, néné-nénéku séddiwi tau Aram iya solléé. Natiwii kaluwargana ri Maséré untu' monro kuwaro selaku pangungsi. Wettunna lao kuwaro jumellana mennang céddé bawang, iyakiya mancajiwi bangsa iya battowaé sibawa mawatang. Nagaukekki tau Maséré'é sibawa majapperu nenniya passaki mappallaung selaku ata. Nainappaki mangobbi méllau tulung ri iko, Puwang, Allataalana néné-nénéta. Muwéngkalingai pangobbita sibawa mitai apeddiretta, asussatta nenniya anrasa-rasatta. Nasibawang akuwasang nenniya awatangeng iya battowaé Mupaleppe'ki polé ri Maséré. Mupogau'i anu makalallaingngé sibawa mappahérang-hérangngé nenniya paompo kajajiyang-kajajiyang iya patassélengngéngngi balié. Nainappa Mutiwiki lao kuwaé sibawa mpérékki tana iya sugié sibawa macommo'éwé. Rimakkuwannanaro, oh Puwang, uwakkasuwiyangengngi kuwaé wassélé bunge' polé ri tana iya Muwéréngngékka.’ Nainappa mupalénne iyaro bakué ri yolona Puwang Allataalamu, namusompai ri Aléna. Sukkuru'no untu' sininna dallé iya puraé nawérékko Puwang Allataalamu sibawa kaluwargamu. Erai tau Léwié sibawa tau laing iya monroé ri yelle'mu maccowé ri laleng ramé-raméro. Tungke' taung matellué harusu'ko mabbéré pakkasuwiyang tawaseppulo, iyanaritu tawaseppulona polé ri wassélé tanamu lao ri imang Léwié, tau laingngé, ana' béué sibawa jandaé, angkanna ri laleng tungke' kotamu lolongengngi mennang inanré iya napparelluwangngé mennang. Rékko purani, makkedano lao ri Puwang Allataalamu, ‘Polé ri tawaseppulona wassélé tana iya harusu'é riyakkasuwiyangeng lao ri Iko, Puwang, dé' muwi céddé monro ri bolaku; pura manenni uwéréng tau Léwié, tau laingngé, ana' béué sibawa jandaé, pada-pada iya napparéntangngé Puwang Allataalaku lao ri iyya. Polé ri paréntana Puwangnge passalenna pakkasuwiyang tawaseppuloé dé'gaga iya uwajjalékkaiyé. Polé ri pakkasuwiyangngéro dé' muwi céddé iya uwanré wettukku mabbarata, iyaré'ga utiwi ri saliwempola wettukku najisi', iyaré'ga uwabbéréyang selaku ripatala lao ri tau maté. Mapatona lao ri Iko, oh Puwang; sininna iya Muwapparéntangngé purani upogau'. Polé ri onrom-Mu iya mapaccingngé ri surugaé tattiro-Na sibawa barakkakiwi umma'-Mu Israélié; barakkaki towi wanuwa sugi namacommo'é iya puraé Muwérékki situru sibawa jancim-Mu lao ri néné-nénéta.’ ” “Iyaé essoé naparéntakko Puwang Allataalamu untu' pogau'i sininna paréntaéro; pogau' manengngi sibawa matinulu nenniya sininna tubu nyawamu. Iyaé essoé muwangakuiwi Puwangnge selaku Allataalamu. Majjanciko untu' mapato ri Aléna sibawa pogau'i sininna hukkung enrengngé parénta-Na. Iyaé essoé natarimako Puwangnge selaku umma ri Aléna, pada-pada iya Najanciyangngékko, sibawa Naparéntakko untu' pogau'i sininna parénta-Na. Naébbuko matu Puwangnge lebbi battowa polé ri sininna bangsa laing iya puraé Napancaji, ripojiko matu sibawa ripakalebbi. Mancajiko umma'na Puwang Allataalamu pada-pada iya Najjanciyangngé.” Nainappa silaong sininna pamimpinna Israélié, napalettu'ni Musa iyaé pasengngé lao ri bangsaéro, “Turusiwi sininna parénta iya uwéréngngékko essoéwé. Ri esso muwalléttoinna Salo Yordan untu' muttama ri wanuwa iya nawéréngngékko Puwang Allataalamu, harusu'ko patettong siyagangngaré batu loppo nainappa mupuwaléi. Okii ri batu-batuéro tungke' ada polé ri hukkung-hukkungngéwé. Rékko muttama'no ri wanuwa iya sugié namacommo iya najjanciyangngé Puwangnge, Allataalana néné-nénému lao ri iko, sibawa engkano ri liwenna Salo Yordan, harusu'ko lao ri Bulu Ebal. Harusu'ko patettongngi sibawa puwaléiwi iyaro batu-batué kuwaro pada-pada iya uparéntangngékko essoéwé. Harusu tokko patettong ri onrongngéro untu' Puwang Allataalamu séuwa mézba polé ri batu-batu iya dé'éppa naengka narijama sibawa paréwa bessi, saba' tungke' mézba iya ripatettongngé untu' Puwang Allataalamu, harusu'i riyébbu polé ri batu iya sekke'é. Ri yasé'na mézbaéro harusu'ko makkasuwiyangeng akkarobangeng-akkarobangeng ritunu. Akkasuwiyangeng towi akkarobangeng pappasidamému sibawa anréno kuwaro enrengngé ariyo-riyono ri yolona Puwang Allataalamu. Ri yasé'na batu-batu iya ripuwaléiyéro harusu'ko mokii sibawa manessa tungke'-tungke' ada-ada polé ri hukkung-hukkunna Allataala.” Nainappa silaong sining imang Léwié, makkedai Musa lao risininna bangsa Israélié, “Saudara-saudara, pénessaiwi sibawa éngkalingai! Iyaé essoé mancajino umma'na Puwang Allataalamu. Rimakkuwannanaro turusiwi Puwang Allataalamu sibawa pogau'i sininna parénta-Na iya nawéréngngékko essoéwé.” Nainappa makkeda Musa lao ri bangsa Israélié, “Puranana muwalléttoi Salo Yordan, suku Siméon, Léwi, Yéhuda, Isakhar, Yusuf sibawa Bényamin harusu'i tettong ri tompo'na Bulu Gerizim ri wettunna ripowada barakka'é ri yasé'na bangsaéwé. Wettunna napowada tanroé, suku Rubén, Gad, Asyer, Zébulon, Dan sibawa Naftali harusu'i tettong ri tompo'na Bulu Ebal. Sining tau Léwié harusu'i powadai ada-ada mangoloéwé sibawa sadda macenno na tau Israélié harusu'i mappébali, ‘Aming’! Sining tau Léwié: ‘Tattanroi tau iya mébbué dato'-dato' polé ri batué, ajué iyaré'ga bessié, nanasompai sibawa subbu-subbu; nabenci Puwangnge assompang barahalaé!’ Sininna ra'ya'é: ‘Aming!’ ‘Tattanroi tau iya dé'é napakalebbii tomatowanna sibawa naleppessangngi mennang kariya-riya.’ ‘Aming!’ ‘Tattanroi tau iya paésa'éngngi pakkaséséng tanana balibolana.’ ‘Aming!’ ‘Tattanroi tau iya papusaéngngi tau butaé.’ ‘Aming!’ ‘Tattanroi tau iya rampasa'éngngi ha'na tau laingngé, ana'-ana' béué sibawa jandaé.’ ‘Aming!’ ‘Tattanroi tau iya celle-cellaéngngi ambo'na nasaba nalusérengngi sala séddinna bainéna ambo'na.’ ‘Aming!’ ‘Tattanroi tau iya laiyéngngi olokolo'é.’ ‘Aming!’ ‘Tattanroi tau iya lusérengngéngngi ana' daranna, iyaré'ga silessurenna iya séddié ambo' iyaré'ga séddié indo'.’ ‘Aming!’ ‘Tattanroi tau iya lusérengngéngngi matuwa makkunrainna.’ ‘Aming!’ ‘Tattanroi tau iya paunoé sibawa subbu-subbu.’ ‘Aming!’ ‘Tattanroi tau iya tarimaé pasoso untu' mpunoi tau iya dé'é napasala.’ ‘Aming!’ ‘Tattanroi tau iya dé'é narupaiwi hukkung sibawa pappagguruwanna Allataala sibawa pangkaukeng.’ ‘Aming!’ ” “Rékko muturusiwi Puwang Allataalamu sibawa matinulu pogau'i sininna parénta iya uwéréngngékko iyaé essoé, napancajiko matu bangsa iya tarompoé ri linoé. Turusiwi Puwang Allataalamu, nariwérékko matu sininna barakka'éwé: Ribarakkakiwi kota-kotamu sibawa sining dare'mu. Ribarakkakiko, angkanna maéga ana'mu, wassélé tanamu maonai sibawa saping nenniya bémbé bimbala'mu maégai. Ribarakkakiwi éngngalang gandommu nenniya inanré iya muwébbué polé ri gandongngéro. Ribarakkakiwi sininna usahamu. Rékko rigasako, Puwangnge matu caui balimmu. Nagasako matu mennang secara taratoro', iyakiya lariwi sibawa tassiya-siya. Puwang Allataalamu matu barakkakiwi usahamu sibawa lisekiwi sining lappomu sibawa gandong. Nabarakkakiko matu ri wanuwa iya Nawéréngngékko. Rékko muturusiwi Puwang Allataalamu sibawa pogau'i sininna parénta-Na, napancajiko matu umma'-Na, pada-pada iya Najjanciyangngé. Nasininna bangsaé ri linoé naitai matu makkedaé iko bangsa napiléna Puwangnge, sibawa naétauriko matu mennang. Riwérékko matu maéga ana'. Maégai matu olokolo'mu sibawa wassélé tanamu maonai ri wanuwa iya Najjanciyangngé Puwangnge lao ri néné-nénému untu' Nawérékko. Napateppai matu Puwangnge bosié ri wettunna polé ri onrong attaronna iya maonaé ri langié. Nabarakkakiwi matu sininna usahamu, angkanna weddikko mappainreng lao ri maéga bangsa, iyakiya iko dé' naparelluko minreng. Puwang Allataalamu pancajiko matu pamimping ri yelle'na bangsa-bangsaé, tenniya ana' guru. Rékko matinuluko turusiwi sininna paréntana Puwangnge iya nawéréngngékko iya essoéwé, pédé madécékko matu sibawa dé' naengka musoro. Iyakiya aja' sises-siseng muwallupaiwi iyaro parénta-paréntaé sibawa muwi cara maga. Aja'to mumassompa sibawa mattumani lao ri déwata-déwata laingngé.” “Iyakiya rékko dé' muturusiwi Puwang Allataalamu, sibawa dé' mumatinulu pogau'i sininna paréntana sibawa hukkun-Na iya uwéréngngékko essoéwé, sininna iyaé tanroé nakennako matu: Tattanroi kota-kotamu sibawa sining dare'mu. Tattanroi éngngalang gandommu sibawa inanré iya muwébbué polé ri gandongngéro. Tattanroko, angkanna banna céddé bawang ana'mu, wassélé tanamu nenniya saping sibawa bémbé bimbala'mu. Tattanroi sininna usahamu. Rékko mupogau'i iya majaé sibawa sampéyangngi Puwangnge, papoléi matu abala, akacaungeng sibawa asukkarakeng ri laleng sininna iya mupogau'é, angkanna ri laleng wettu maponco'é bawang ripaccappu sisekko. Sisullé-sullé lasaé kennako matu, angkanna paccappurenna dé' muwi séddi tau polé ri iko monro mupa ri wanuwa iya mutudangiyéro. Puwangnge hukkukko matu sibawa sining lasa lélé-lélé, boro-boro sibawa semmeng. Papoléi matu timo sibawa anging iya paangurengngé angkanna masolang éngngalammu. Iyaro sining abalaé nakennaro matteru gangkammu binasa. Dé' nateppa matu bosié sibawa matedde'i matu tanamu pada-pada bessié. Dé' napateppai matu Puwangnge bosi uwai, sangadinna bosi awu sibawa kessi angkanna cappuko binasa. Rékko dé' muturusiwi Puwang Allataalamu, Naébbuko matu ricau risining balimmu. Maggasako matu secara taratoro', iyakiya lariwi sibawa tassiya-siya. Sininna bangsaé ri linoé métaui matu mitai acilakammu. Rékko matéko, mancajiwi ujumu inanréna sining manu'-manu'é sibawa olokolo masekkangngé, nadé'gaga rukkai iyaro olokolo'é. Nahukkukko matu Puwangnge sibawa sining lettang pada-pada iya Napogau'é lao ri tau Maséré'é. Pennoi matu watakkalému sibawa lo mannana nenniya puru-puru iya makate'é, iyakiya dé'é gaga pabburana. Naébbuko matu Puwangnge jangeng, buta sibawa malippu. Makkapése'ko matu ri lakessoé pada-pada tau butaé, iyakiya dé' nalolongeng laleng. Sininna usahamu dé' wassélé'na matu. Matteru-teruko ritenre sibawa rirampo, nadé'gaga mattulung. Rékko dé' muturusiwi Puwang Allataalamu, iyaé gau'é nakennai matu alému: Mattunangakko matu, iyakiya tau laingngé kawingiwi tunangammu. Patettokko matu bola, iyakiya dé' muwonroiwi. Mutanengiwi matu palla anggoro'é iyakiya dé' muwanréi buwa-buwana. Rigéréi matu sapimmu ri yolona matammu, iyakiya dé' muwanréi jukuna. Muwitai matu sining kaleddé'mu ririmpa lao sibawa dé'na naripalisu matu. Riyabbéréyangngi matu sining bimbala'mu lao risining balimmu nadé'gaga mattulung. Riyabbéréyangngi matu ana'-ana'mu selaku ata lao ri tau laingngé ri yolona matammu. Esso-esso mapessé matammu sappai ana'-ana'mu, iyakiya siya-siya bawang, saba' dé' nalisuna matu mennang. Bangsa laingngé matu malai sininna wassélé tana iya mulolongengngé sibawa majjama ladde, iyakiya alému dé' agaga mulolongeng ri lainnaé ritenre matteru-teru sibawa riyabeccoki. Jangekko matu nasaba aga iya mupéneddingiyé. Puwangnge matu mébbui ajému penno sibawa lo mannana iya mapeddié sibawa dé' nawedding majjappa; polé ri ajé lettu ri ulué pennoko matu sining lettang. Iko sibawa arummu natiwiko matu Puwangnge ri wanuwa laing iya dé'é muwissengngi sibawa dé'to naissengngi néné-nénému. Mattumaniko matu kuwaro lao ri déwata-déwata iya riyébbué polé ri ajué sibawa batué. Ri wanuwa-wanuwa onrommu napassara-sarang Puwangnge, masélengngi matu sining tauwé mitako; naéllé-kéllé'ko matu sibawa nacawa-cawaiko mennang. Maéga biné muwampo, iyakiya céddé wassélé mulolongeng, nasaba tanet-tanemmu cappui nanré incalé. Mutanengiwi matu sining palla anggoro'é sibawa mupiyarana, iyakiya dé' mucéppu buwa anggoro iyaré'ga ménungngi uwai anggoro'na, nasaba iyaro sining pong anggoro'é cappui nanré ule. Ri sininna wanuwammu tuwoi pong zaitungngé, iyakiya madduttungngi matu sining buwana, angkanna dé'na mulolongengngi minnya'na. Lolongekko matu ana'-ana' worowané sibawa makkunrai, iyakiya riyalai mennang selaku tawangeng musu, angkanna ateddéngekko mennang. Sininna ajukajummu sibawa tanet-tanemmu cappui matu nanré béré-béré. Tau laing iya monroé ri wanuwammu pédé makuwasai matu, na akuwasammu pédé kurangngi. Mappunnaiwi mennang dowi untu' napainrengiko, iyakiya dé' muwappunnai agaga untu' riyappainrengeng lao ri mennang. Na angkanna nakuwasaiko mennang. Sininna iyaro abalaé nakennako matu sibawa matterui gangguko angkammu binasa, nasaba dé' muturu' lao ri Puwang Allataalamu sibawa dé' mupogau'i hukkung-hukkung iya Nawéréngngékko. Iyaro sining abalaé selaku butti polé ri pahukkungenna Puwangnge lao ri iko sibawa wija-wijammu untu' mannennungeng. Purano ribarakkaki ri Puwang Allataalamu ri laleng sininna gau'éro, iyakiya dé' mumaélo mattumani ri Aléna sibawa ati iya masagénaé sibawa marennu. Rimakkuwannanaro harusu'ko mattumani lao risining balimmu iya nasuroé Puwangnge untu' méwako. Makkadérekko matu, madekka sibawa mallusu-lusu nenniya akurangeng ri laleng sininna gau'éro. Puwangnge matu tenre'ko sibawa mabecco narapiko binasa. Séuwa bangsa iya dé'é mupahangngi basana maélo napapolé Puwangnge polé ri cappa linoé untu' méwako. Pada-pada kuwajangngé naséro'ko matu mennang. Mabecco mennang sibawa dé' namamasé lao ri tau macowaé iyaré'ga ana'-ana'é. Napaccappui matu mennang olokolo'é sibawa wassélé tanamu, sibawa dé' natarongekko gandong, uwai anggoro, minnya zaitung iyaré'ga saping sibawa bémbé bimbala'mu narapi matéko alupureng. Naluruiwi matu mennang tungke' kotaé ri wanuwa iya nawéréngngékko Puwang Allataalamu angkanna maruttung témbo'-témbo'na iya matanré sibawa ripakkasse'é iya muwattuwangngéro. Ri wettunna sining balimmu keppungngi kota-kotamu, pettu paddennuwakko matu nasaba makkadéreng, angkanna muwanréi ana'-ana'mu, ana'-ana' iya nawéréngngékko Puwang Allataalamu. Rékko dé' mumatinulu turusiwi sininna hukkunna Puwang Allataalamu iya tarokié ri laleng kittaéwé sibawa dé' mupakalebii Allataalamu iya marajaé sibawa mappahérangngé, Puwangnge matu papoléi ri yasé'mu sibawa wija-wijammu sining lasa iya dé'é nawedding ripajjappa sibawa sining sai iya dé'é nariyullé pappajai. Sining lasa mappakatau-taué iya musabbingngé ri Maséré kennako matu, nadé' mulléi majjappa. Papolé towi matu Puwangnge maddupa-rupang lasa sibawa sai iya dé'é nariteppu ri laleng kitta'éwé, kitta Hukkunna Puwangnge. Nainappako ripabbinasa matu. Namuni jumellamu singngégani wéttowingngé ri langié, banna céddé bawang ri yelle'mu iya tuwoé mupa, nasaba dé' mumatinulu lao ri Puwang Allataalamu. Pada-pada masennanna Puwangnge mabbéré adécéngeng lao ri iko sibawa tambaiwi jumellamu, masennangngi matu pabbinasai sibawa paccappuko. Ribébbuko matu polé ri wanuwa iya dé'énna namaittana mutudangiwi. Puwangnge passara-sarakko matu ri yelle'na bangsa-bangsaé ri sininna linoé. Kuwaro sompako matu déwata-déwata iya riyébbué polé ri ajué sibawa batué, déwata-déwata iya dé'e muwissengngi sibawa dé'to naissengngi néné-nénému. Ri yelle'na bangsa-bangsaéro dé' mulolongeng matu atennangeng, sibawa dé'to gaga onrong iya weddingngé muteppu appunnangemmu; Puwangnge mébbuko matu bata-bata senna sibawa pettu paddennuwang. Tuli naancangngi bahaya atuwommu. Esso wenni masélekko sibawa métau maté. Wettummu mita agi-agi maddumba'i aromu nasaba métau. Ri élékéléé muwaddennuwangiwi wennié, sibawa ri wennié muwaddennuwangiwi éléé. Puwangnge kirikko matu lisu ri Maséré sibawa kappala, namuni purai napowada makkedaé dé'na mulisu matu kuwaro. Makkuragako matu kuwaro balu'i alému selaku ata lao ri balimmu iyakiya dé' muwi séddi tau maélo melliko.” Iyanaé ada-ada assijancing iya nasaba paréntana Puwangnge naébbui Musa sibawa bangsa Israélié wettunna mennang engka ri tana Moab. Iyaro assijancingngé sinrupai pattamba polé ri assijancing iya naébbué Puwangnge sibawa mennang ri Bulu Sinai. Nasuroni Musa sininna tau Israélié maddeppungeng, nainappa makkeda lao ri mennang, “Alému pura mitai aga iya napogau'é Puwangnge lao ri arung Maséré, sining pajaba'na sibawa sininna wanuwanna. Pura toni muwita sining abala iya maseroé, sining mujiza'é sibawa sining makalallaingngé iya napogau'é Puwangnge. Iyakiya narapi essoéwé, dé'pa napakkulléko pahang manengngi iya mupéneddingiyéro. Patappulo taung ittana Puwangnge pimpikko molai padang kessi'é, namuni pakéyammu sibawa sandala'mu dé' namancaji malusa. Dé' muwappunnai roti untu' inanré, uwai anggoro iyaré'ga énungeng maseri untu' riyénung, iyakiya Puwangnge mabbéréyangngi sininna iya muwapparelluwangngé kuwammengngi muwissengngi makkedaé Aléna ritu Puwang Allataalamu. Na wettutta lettu ri onrongngéwé, Arung Sihon polé ri Hésybon sibawa Arung Og polé ri Basan polé musuriki. Iyakiya ricaui mennang. Risittaiwi mennang tanana naritawaingengngi suku Rubén, Gad sibawa sibagiyang suku Manasyé. Nasitinajako matinulu turusiwi sininna assijancingngéwé, kuwammengngi mupapolé wassélé ri laleng sininna usahamu. Iyaé essoé tettong manekko ri yolona Puwang Allataalamu, sininna kapala sukué, tomariyoloé, parawiraé, sininna worowané, makkunraié, ana'-ana'é sibawa sininna tau laing iya monroé ri yelle'mu sibawa bantuko mappolo aju nenniya mallémpa uwai. Puwang Allataalamu mébbu assijancing sibawa iko, sibawa maddeppungeng manekko kuwaé untu' siyoi iyaro assijancingngé enrengngé tarimai kewajibang-kewajibanna. Nasibawang assijancingngéro Puwangnge pakkasse'ko iyaé essoé mancaji bangsa-Na, sibawa mancajiwi Allataalamu pada-pada iya Najjanciyangngé lao ri iko sibawa lao ri néné-nénému Abraham, Ishak sibawa Yakub. Iyaro assijancingngé silaong sininna kewajibanna naébbui Puwangnge tenniya sibawa iko bawang, iyakiya sibawa tungke' tau iya essoéwé tettong kuwaé, ri yolona Puwang Allataalata, sibawato wija-wijatta ri wettu mangoloé.” “Muwéngngerang mupi pékkugi totota ri Maséré sibawa pékkuguki mallaleng molai wanuwanna bangsa-bangsa laingngé. Purani muwita dato'-dato' barahalana mennang iya mappakaciddi-ciddi'é polé ri ajué, batué, péra'é sibawa ulawengngé. Jaji jagaiwi aja' narapii muwi séddi tau ri yelle'mu, worowané iyaré'ga makkunrai, kaluwarga iyaré'ga suku iya tettongngé kuwaé, balé'i polé ri Puwang Allataalata untu' massompa ri déwata-déwatana bangsa laingngé. Iyaro pangkaukenngé pada-padai ure' iya tuwoé mancaji tanet-taneng mapai sibawa makkéracungngé. Ri yelle'mu iya méngkalingayéngngi tuntutang iya matedde'éro aja' naengka mappikkiri makkedaé tette'i matu makessing totona, namuni matedde atiwi maccowériwi élona muto. Iyaro gau'é napabbinasa manekko matu, sining tau iya majaé iyaré'ga iya makessingngé. Dé' naddampengengngi matu Puwangnge tau makkuwaéro. Sibalé'na nakennai matu caina Puwangnge iya malluwa-luwa'é, sibawa sininna abala iya tarokié ri laleng kitta'éwé kennai matu, narapi ripabbinasa ri Puwangnge. Puwangnge pancajiwi matu séddi conto untu' sininna suku Israélié, enrengngé hukkungngi sibawa tanro iya riteppué ri laleng assijancing iya tarokié ri laleng kitta'éwé, kitta Hukkunna Puwangnge. Ri esso ri munri wija-wijammu sibawa tau laingngé ri wanuwa mabélaé mitai matu sining abalaé sibawa anrasa-rasang iya napapolé Puwangnge ri yasé'na wanuwammu. Sining dare'mu mancajiwi matu padang makabuttué tattongko balérang sibawa pejjé. Dé' nawedding ritanengi tanana sibawa wellaé dé' namaélo tuwo kuwaro. Wanuwammu sinrupai matu kota-kota Sodom sibawa Gomora, Adma sibawa Zéboim iya napaccappué Puwangnge wettunna malluwa-luwa cai-Na. Nakkutana matu sininna linoé, ‘Magi napogau'i Puwangnge makkuwaéro sibawa wanuwanna mennang? Aga saba'na Namacai masero makkuwaro?’ Na pappébalinna iyanaritu, ‘Nasaba nassakkarengngi mennang assijancinna Puwangnge, Allataalana néné-nénéna mennang, assijancing iya naébbué sibawa mennang wettunna natiwi massu polé ri Maséré. Mattumaniwi mennang lao ri déwata-déwata laing iya dé'é naissengngi, padahal nattéyang Puwangnge mennang sompai déwata-déwataéro. Iyanaro saba'na namacai Puwangnge lao ri umma'-Na sibawa papoléngengngi wanuwanna mennang sininna abala iya tarokié ri laleng kitta'éwé. Mabbettui caina Puwangnge sibawa masero, na ri laleng cai-Na iya battowaé Nabébbui bangsa Israélié polé ri tanana mennang sibawa maggenrungengngi mennang lao ri wanuwa laingngé angkanna mennang engka kuwaro.’ Engka siyagangngaré passaleng iya narahasiyakangngé Puwang Allataalata; iyakiya hukkun-Na purani Napannessa lao ri idi, na idi sibawa wija-wijatta harusu'i turusiwi untu' mannennungeng.” “Makkekkuwangngé weddikko piléi ri yelle'na barakka'é sibawa tanroé pada-pada iya upakatajangengngékko. Rékko purani mupéneddingi sininna anrasa-rasangngéro sibawa tuwo ri yelle'na bangsa-bangsa laing onrommu ripassara-sarang ri Puwang Allataalamu, muwéngngeranni matu lao ri appiléng iya uwéréngngékko. Rékko iko sibawa wija-wijammu maélo lisu ri Puwang Allataalamu, sibawa sukku atimmu turusiwi sining parénta-Na iya uwéréngngékko essoéwé, Puwang Allataalamu mamaséiko matu. Natiwiko matu lisu polé ri bangsa-bangsa kégiko ripapassara-sarang, sibawa ripancaji madécéng paimeng. Namuni massara-sarakko lao kégi-kégi risininna linoé, Puwang Allataalamu paddeppungekko matu sibawa tiwiko lisu. Namuwappunnaiwi matu paimeng tana naonroiyé riyolo néné-nénému. Sibawa ripancajiko lebbi madécéng, sibawa jumellamu mabéla lebbi battowa naiya toriyolomu. Iko sibawa wija-wijammu riwéréng matu ati iya mapatoé, angkanna muéloriwi Puwang Allataalamu sibawa sukku atimmu namulléi matteru monro ri wanuwaéro. Sininna tanroéro Napatakkennai matu ri yasé'na sining balimmu iya benciyéngngékko sibawa tenre'ko. Lisuko matu turusiwi Puwangnge sibawa pajoppai sininna parénta-Na iya uwéréngngékko essoéwé. Puwang Allataalamu mébbui matu sininna usahamu papolé wassélé; mappunnaiko matu maéga ana' sibawa maéga olokolo; sining dare'mu mabbéréi matu wassélé maonaé. Masennangngi atinna Puwangnge pancajiko madécéng, pada-padato masennangngi mpéréngngi adécéngeng néné-nénému. Iyakiya harusu'ko mapato lao ri Puwang Allataalamu sibawa turusiwi sininna hukkun-Na iya tarokié ri laleng kitta'éwé, kitta Hukkunna Puwangnge. Harusu'ko lisu ri Aléna sibawa sukku atimmu. Parénta iya uwéréngngékko dé' namawatang senna sibawa dé'to namabéla. Onronna tenniya ri langié, angkammu makkeda, ‘Nigana maélo ménré kuwaro untu' malangekki, kuwammengngi riyulléi méngkalingai sibawa turusiwi?’ Onronna tenniyato ri liweng tasi, angkammu makkutana, ‘Niga maélo lao ri liweng tasi untu' malangekki, kuwammengngi riyulléi méngkalingai sibawa turusiwi?’ Aja' mumakkutana makkuwaro, nasaba iyaro paréntaé macawé senna ri iko. Muwissenni sibawa muwullé mapala'i, jaji mupogau' mani bawang. Iyaé essoé weddingngi mupilé ri yelle'na makessingngé sibawa majaé, atuwongngé sibawa amaténgngé. Iyaé essoé uparéntakko untu' méloriwi Puwang Allataalamu sibawa mapato ri Aléna nenniya pogau'i sininna hukkung sibawa parénta-Na kuwammengngi mumadécéng sibawa mancaji bangsa iya battowaé. Puwang Allataalamu barakkakiko matu ri wanuwa iya dé'énna namaitta mutudangiwi. Iyakiya rékko dé' mumapato sibawa dé' mumaélo méngkalingai, sibawa leppessangngi alému ripapusa untu' massompa déwata-déwata laing, pasti ripaccappuko, sibawa umuru'mu dé' namalampé matu ri wanuwa iya dé'énna namaitta mutudangiwi. Engngerangngi! Iyaro gau'é purano upaissengi essoéwé. Makkekkuwangngé weddingngi mupilé ri yelle'na atuwongngé sibawa amaténgngé, barakka'na Puwangnge sibawa tanro-Na. Langié sibawa tanaé uwobbi mancaji sabbi ri apettummu. Piléi atuwongngé. Eloriwi Puwang Allataalamu, apatoiwi, sibawa atinuluno ri aléna. Na iko sibawa wija-wijammu tuwoi matu sibawa malampé sunge ri wanuwa najjanciyangngé Puwangnge lao ri néné-nénému, Abraham, Ishak sibawa Yakub.” Mabbicarasi Musa lao ri bangsa Israélié, adanna, “Makkekkuwangngé umuru'ku seratuni duwappulo taung nadé'na uwulléi mancaji pamimpimmu. Ri lainnaéro Puwangnge pura powadai makkedaé dé' naweddikka malléttoiwi Salo Yordan. Aléna Puwang Allataalamu joppa matu ri yolomu sibawa paccappui bangsa-bangsa iya monroé kuwaro, angkanna muwulléi tudangiwi wanuwanna mennang. Yosua matu mancaji pamimpimmu, pada-pada napowadaé Puwangnge. Puwangnge maélo paccappui iyaro bangsa-bangsaé, pada-pada Nacauna Sihon sibawa Og, arunna tau Amorié, nenniya mancuru'i wanuwanna mennang. Puwangnge mpérékko matu apakalang lao ri mennang, naharusu'ko gaukengngi pada-pada iya upowadangngékko. Sitinajako pakkasse'i atimmu sibawa barani! Aja' mumétau lao ri mennang, saba' Aléna Puwang Allataalamu maélo tulukko. Dé' Namaélo pakacéléko iyaré'ga salaiko.” Nainappa Musa mobbii Yosua, na ri yolona sininna bangsa Israélié makkedani ri Yosua, “Sitinajako pakkasse'i atimmu sibawa barani, Yosua! Iko ritu pimpingngi matu iyaé bangsaé untu' tudangiwi wanuwa iya najjanciyangngé Puwangnge lao ri néné-nénéna mennang. Aléna Puwangnge pimpikko sibawa tulukko. Dé' napakacéléko iyaré'ga nasalaiko. Rimakkuwannanaro aja' mumétau iyaré'ga manenneng.” Nanaokirenni Musa hukkunna Puwang Allataala nanawéréngngi imang-ngimang Léwié iya risuroé murusu'i Petti Assijancingngé, sibawa lao risining pamimpinna Israélié. Naparéntanni mennang, “Ri cappa'na tungke' pitu taung, ri laleng taung pappaledda inrengngé ri pésta Kalampang Daud-daungngé, harusu'ko bacai iyaé sining hukkungngé sibawa sadda macenno untu' sining tau Israél iya polé sompai Puwang Allataalamu ri onrong iya Napilé. Suroi sininna tau worowané, makkunraié sibawa ana'-ana'é nenniya tau laing iya monroé ri kota-kotamu maddeppungeng untu' méngkalingai iyaro abbacangengngé, kuwammengngi nagguru untu' pakalebbii Puwang Allataalamu sibawa matinulu turusiwi sining parénta-Na. Nasibawang caraéro ana'-ana'mu iya dé'éppa naengka naéngkalingai passalenna hukkunna Puwang Allataalamu weddingngi naéngkalinga sibawa magguru pakalebbii Puwangnge ri wettu tuwona mennang ri wanuwa iya dé'énna namaitta mutudangiwi ri liwenna Salo Yordan.” Nainappa makkeda Puwangnge lao ri Musa, “Dé'na namaittana atuwommu. Jaji, obbini Yosua namutiwii ri Kéma-Ku, kuwammengngi weddik-Ka mpéréngngi panunju-panunju.” Nanalaona Musa sibawa Yosua ri Kémana Puwangnge, nanappaitanni Aléna Puwangnge lao ri mennang ri laleng alliri ellungngé seddéna sumpanna Kémaé. Adanna Puwangnge lao ri Musa, “Macawé'ni ajjalemmu. Matémuna, bangsa Israélié dé' namatinuluna ri Iyya sibawa massakkarengngi assijancing iya Uwébbué sibawa mennang. Nasalaika matu untu' massompa ri déwata-déwataé iya risompaé ri wanuwa iya dé'énna namaitta nauttamakiwi mennang. Rékko kajajiyangngi iyaro, ménré'i matu cai-Ku lao ri mennang. Usalaiwi matu mennang sibawa Upaccappui. Maéga abala masero kennai matu, nainappa mainge matu mennang makkedaé iya manennaro kajajiyangngi nasaba Iyya, Allataalana mennang, dé'na sibawangngi mennang. Iyaro wettué dé'na Umaélo tulungngi, nasaba purani mennang nasompa déwata-déwata laingngé sibawa pogau'i majaé. Makkekkuwangngé okini iyaé élongngé na mupagguruwangngi bangsa Israélié selaku asabbiyang lao ri mennang. Maéloka tiwii mennang ri wanuwa iya sugié namacommo, pada-pada iya Uwajjanciyangngé ri néné-nénéna. Kuwaro tuwoi matu sibawa masennang nenniya lolongengngi sininna inanré iya napparelluwangngé. Iyakiya ri munri balé'i matu sibawa massompa déwata-déwata laing. Nasampéyakka matu mennang sibawa massakkarengngi assijancik-Ku, sibawa maéga abala masero kennai matu mennang. Iyakiya iyaé élongngé tette'i ripuwélong nenniya ripaké selaku asabbiyang lao ri mennang. Mala makkekkuwangngé, ri wettu dé'napa Utiwii mennang ri wanuwa iya Uwajjanciyangngé, Uwisseng pikkiranna mennang.” Iyatoro essoé naokii Musa iyaro élongngé, nainappa nappagguruwang lao ri bangsa Israélié. Nanabbicara Puwangnge lao ri Yosua, ana' Nun, adan-Na, “Sitinajako pakkasse'i atimmu sibawa barani, Yosua! Mupimpingngi matu bangsa Israélié muttamakiwi wanuwa iya Uwajjanciyangngé lao ri mennang, na maélo-Ka tulukko.” Nanaokini Musa hukkunna Allataala ri laleng séddié kitta. Naokii sibawa matutu polé ri pammulanna lettu ri paccappurenna. Wettunna tépuni, makkedani lao risining imang Léwié iya risuroé murusu'i Petti Assijancingngé, “Allani iyaé kitta Hukkunna Allataala, namutaroi ri seddéna Petti Assijancinna Puwang Allataalamu, kuwammengngi tette'i engka kuwaro selaku asabbiyang lao ri bangsaéro. Uwisseng mennang matedde ati senna sibawa napoji maronta. Ri wettu tuwoku mupa maronta'i mennang lao ri Puwangnge; apalagi matti, rékko maténa! Makkekkuwangngé suroi sininna pamimping bangsaé sibawa sining parawiraé maddeppungeng ri yoloku, kuwammengngi weddikka palettukengngi gau'-gau'éwé lao ri mennang. Langié sibawa tanaé uwobbi selaku sabbi lao ri mennang. Uwisseng makkedaé matékuna, iyaro sining tauwé mancaji majai sibawa sampéyangngi aga iya puraé uwappagguruwang lao ri mennang. Nanakennai matti abala, nasaba naébbui Puwangnge macai ri laleng napogau'na aga iya Nattéyangngé.” Nanapowadani Musa iyaé élongngé gangka cappu na sininna bangsa Israélié méngkalingai. “Engkalingai éh langi, macinnaka mabbicara; éh lino, pasangngi daucculimmu! Tennapodo pappagguruwakku nonnoi pada-pada bosié, sibawa ada-adakku tetti pada-pada cinoddoé, samanna bosi canecci ri tompo'na wella-wellaé, pada-pada bosi rajaé ri yasé'na tanet-tanengngé. Maélo-Ka pojiwi asenna Puwangnge. Abbirittangngi arajanna Allataalata! Puwangnge Pangéwangemmu iya baranié, sukku winru-Na, sibawa adélé sininna lalen-Na. Matinulu Allataalaku, dé'gaga acéko-cékong ri Aléna, Napogau'i iya makessingngé sibawa tongengngé. Iyakiya iko iyanaritu bangsa iya dé'é namatinulu, sibawa dé' nasitinajana mancaji umma'-Na, bangsa iya pennoé acéko-cékong sibawa dosa. Makkuwakoga wale'i akessingenna Puwangnge, éh sining tau madonggoé sibawa dé'é akkalenna? Tenniyaga Ambo'mu, Pappancajimmu, iya pancajiyékko séddi bangsa? Engngerangngi wettu riyolo, pénessaiwi wettunna sippangka-sippangka iya labe'é. Akkutanangngi ri tomatowammu, kuwammengngi napaissengiko mennang. Wettunna Iya Pommatanré mattawangngi tanaé, tungke' bangsa ripattentuwangngi daérana sibawa séuwa déwata selaku panguwasana. Iyakiya wija-wijanna Yakub ripiléi ri Puwangnge untu' Aléna muto. Nalolongengngi mennang mattengngang sollé ri onrong iya masino-sinoé ri padang makabuttué. Nainappa nalinrungi sibawa napiyara sibawa jagaiwi mennang pada-pada appunnangen-Na. Pada-pada bokangngé iya pagguruéngngi ana'na luttu tikkengngi ri pannina iya mallebba'é sibawa soppoi ri yasé'na panni-pannina, makkuwaniro aléna Puwangnge pimpingngi umma'-Na, dé'gaga déwata laing sibawangngi Aléna. Naébbui mennang makuwasaiwi sining bulué; nanréi mennang wassélé'na sining dare'é sibawa ménung cani liya polé ri bulu-bulu batué. Lolongengngi mennang minnya polé ri pong zaitungngé iya tuwoé ri tana mabbatué. Saping sibawa bémbé bimbala'na mennang powassélé maéga susu; olokolo'na mennang kaminang makessing, gandong sibawa uwai anggoro'na mennang kaminang magello. Mancaji sugii umma'na Puwangnge, iyakiya napoji maronta, macommo-commo mennang, messo inanré. Nainappa mennang nasalai Allataala, Pappancajinna sibawa nasampéyang Pappassalama'na iya poré. Massompai mennang barahala, angkanna mangémpuru Puwangnge, ménré'i cai-Na nasaba jaéro. Makkasuwiyangngi mennang akkarobangeng lao ri roh-roh majaé iya tenniyaé Allataala, lao ri déwata-déwata iya dé'é mennang naissengngi, déwata-déwata baru iya dé'é naétauriwi toriyolona mennang. Dé' najampangiwi mennang Pappassalama'na iya poré, nallupaiwi mennang Allataalana iya mabbéré atuwong. Naitana gau'éro, macaini Puwangnge, sibawa sampéyangngi ana'-ana'-Na. Adan-Na, ‘Dé'na Umaélo tulunni mennang; muwi Uwita pékkugi accappurenna mennang. Saba' iyaro bangsaé matedde ati sibawa dé' sises-siseng namatinulu. Naébbu-Ka mennang mangémpuru lao ri tenniyaé Allataala, sibawa macai ri dato'-dato' barahalana mennang. Na-Uwébbui umma'-Ku mangémpuru lao ri iya tenniyaé bangsa, sibawa macai lao ri bangsa iya madongo'é. Malluwa-luwa'i matu cai-Ku pada-pada apié iya makkanré lettu ri linona tau maté. Iyaro apié nanréi linoé sibawa sininna wassélé'na, sibawa sining bulué lettu ri ure-ure'na. Matteru-teru Upapolé abalaé, Uwattémbakeng sininna pana-Ku lao ri mennang. Matéi matu mennang nasaba semmeng sibawa alupureng, sibawa nasaba lasa iya mappakatau-taué. Uleppessangngi mennang rilurui ri olokolo masekkangngé, sibawa ripitto ri ula mamosoé. Musué tiwi amaténg ri laleng-lalengngé; nakennai sining tauwé ri bolaé appakatau-taurengngé. Kalloloé sibawa ana' daraé ripaccappui matu, makkuwatoro ana' loloé sibawa tomacuwaé. Macinnaka pallennye sisengngi mennang, kuwammengngi dé'na Nariyéngngeranna mennang. Iyakiya dé' Umaélo matempo balinna Israélié; ajakké mennang kacéléi sibawa makkeda makkedaé nacaui mennang umma'-Ku,’ padahal iyya ritu pogau'i. Israélié séddiwi bangsa iya dé'é nappunnai attimbangeng; pappéjeppu dé'gaga ri mennang. Ebara'na mennang mapanréi, najeppuiwi matu mennang, sibawa pikkiri'i accappurenna mennang. Pékkugi séddi tau naullé lellungngi sisebbu tau, sibawa duwa tau palariwi seppulo sebbu tau? Puwangnge, Allataalana mennang, pura balu'i mennang; risalaini mennang ri Allataala iya poré. Naisseng balinna Israélié makkedaé pallinrunna mennang dé' napada-pada Allataala pallinrunna Israélié. Saba' majai mennang pada-pada Sodom sibawa Gomora, pada-pada pong anggoro iya mapaié sibawa paracung buwana. Uwai anggoro'na mennang iyanaritu racung ula mamosoé. Naéngngerang Puwangnge pangkaukenna balinna umma'-Na sibawa hukkungngi matu mennang ri wettunna. Puwangnge mpale'i matu sibawa hukkungngi mennang, dé'na namaitta nabinasa mennang; wettu ancurukenna mennang dé'na namaitta napolé. Puwangnge passalama'i matu umma'-Na sibawa mamaséiwi ata-atan-Na, rékko naitai teppaullé sibawa acappureng awatangeng. Namakkutana matu Puwangnge ri umma'-Na, ‘Kégani déwata-déwata mawatang iya muwattuwangngé?’ Nanréi mennang lunra iya muwakkasuwiyangengngé, sibawa ménung uwai anggoro iya muwakkarobangengngé. Suroi mennang polé tulukko, leppessangngi mennang mancaji pallinrummu. Itani, Iyya Allataala Iya Séuwaé, dé'gaga Allataala sangadinna Iyya. Paunoka sibawa mappatuwo, loi sibawa mappajjappa. Rékko tinda'ka, dé' muwi séddi tau mulléi méwa. Nasaba alé-Ku, Allataala iya tuwoé, Uwakkai limak-Ku sibawa mattanro: Maéloka masai peddak-Ku iya lala-lala'é, sibawa pajoppai pahukkungengngé. Uwale'i sininna balik-Ku sibawa Uhukkungngi sininna iya benciyékka. Pana-pana-Ku ripennoiwi matu ri darana mennang; sininna iya méwaékka Uwunoi sibawa peddak-Ku. Dé' Uleppessangngi muwi niga méwa-Ka; tau ritahangngé sibawa iya maloé harusu'i matéto. Eh bangsa-bangsa, pojiwi umma'na Puwangnge, saba' Puwangnge hukkungngi sininna iya mpunoéngngi mennang. Makkabale'i lao ri balin-Na iyakiya maddampengengngi dosana umma'-Na.” Musa sibawa Yosua ana' Nun powadai iyaro élongngé, angkanna sininna bangsa Israélié naulléi méngkalingai. Puranana napalettu sining pappagguruwanna Puwangnge lao ri bangsa Israélié, makkedani Musa, “Puriyatini sininna parénta iya uwéréngngékko essoéwé. Pagguruwangngi ana'-ana'mu, kuwammengngi namatinulu pogau'i sininna hukkunna Puwangnge. Iyaro pappagguruwangngé tenniya ada-ada kosong, sangadinna atuwommu. Turusiwi sininna paréntaéro, kuwammengngi mumalampé sunge ri wanuwa iya dé'énna namaitta mutudangiwi ri liwenna Salo Yordan.” Iyatoro essoé nakkeda Puwangnge lao ri Musa, “Laono ri Buluna Abarim ri wanuwa Moab ri liwenna kota Yérikho. Nainappa ménré ri Bulu Nébo namutiroi tana Kanaan iya dé'énna namaitta Uwabbéréyangngi lao ri bangsa Israélié. Matéko matu ri tompo'na buluéro, pada-pada Harun silessuremmu maté ri Bulu Hor. Iko sipadduwa dé' mumatinulu ri Iyya sibawa dé' mupakalebbika ri yolona bangsa Israélié wettummu engka ri mata uwai Mériba, seddéna kota Kadés, ri padang kessi Zin. Rimakkuwannanaro dé' naweddikko muttama ri wanuwa iya Uwabbéréyangngé lao ri bangsa Israélié; banna weddikko mitai polé mabéla.” Ri wettu dé'napa namaté, Musa, surona Allataala, barakkakiwi bangsa Israélié sibawa ada-adaéwé: “Polé ri Bulu Sinaiwi Puwangnge; mompoi ri yasé'na Edom pada-pada mata essoé sibawa polé ri Bulu Paran tappai umma'-Na. Risibawangngi ri seppulo sebbu malaéka'; malluwa apié ri seddé ataunna. Tongeng, namaséiwi Puwangnge bangsa-Na nalinrungiwi sininna tau iya mancajiyé appunnangen-Na. Laono mai tasuju' ri yolona ajé-Na sibawa turusiwi parénta-parénta-Na. Hukkung iya nabbéréyangngé Musa taturusiwi, appunnangenna bangsaéwé kaminang mangke'é. Wettunna Israélié maddeppungeng sibawa sining pamimpinna, Puwangnge mancaji Arung ri yasé'na umma'-Na.” Passalenna suku Rubén, makkedai Musa, “Tennapodo suku Rubén dé' naengka nabinasa, namuni taunna céddé bawang.” Passalenna suku Yéhuda makkedai: “ Puwang éngkalingai pangobbina Yéhuda; passéddiwi mennang paimeng sibawa bangsana. Ammusurengngi mennang, oh Puwang, tulungngi mennang lao ri balinna.” Passalenna suku Léwi makkedai: “Nasibawang Urim sibawa Tumim Mupannessai élomu, naolai tau Léwié, atam-Mu iya matinulué. Purai mucobai mennang ri Masa, sibawa sibbanta mennang ri mata uwai Mériba. Matinului mennang lao ri Iko pakacauriwi sini-sininnaé, napakacauri tomatowaé sibawa sumpuloloé. Parénta-parénta-Mu naturusiwi mennang, assijancim-Mu narupaiwi mennang. Napaggurui mennang umma'-Mu turusiwi sininna parénta-Mu sibawa makkasuwiyangengngi akkarobangengngé ri yasé'na mézba-Mu. Puwang, tulungngi iyaé sukué kuwammengngi namawatang, tennapodo Muwéloriwi jama-jamanna mennang. Paccappui sininna balinna mennang angkanna dé'na naulléi tokkonna.” Passalenna suku Bényamin makkedai: “Iyanaé suku iya namaséiyé Puwangnge. Nalinrungiwi mennang esso wenni sibawa monro ri yelle'na mennang.” Passalenna wija-wijanna Yusuf makkedai: “Tennapodo tanana mennang ribarakkakiwi ri Puwangnge sibawa bosi, sibawa uwai polé ri yawana tanaé. Tennapodo tungke' wettu maonai sibawa buwa-buwa buwa-buwa kaminang makessingngé iya matasa'é ri ponna. Tennapodo sining bulu-buluna polé ri wettu riyolo pennoi sibawa wassélé tana iya dé'é padanna. Tennapodo tanana ripennoiwi sibawa sininna iya kaminang makessingngé, sibawa ribarakkaki ri akessingenna Puwangnge iya mabbicaraé polé ri alekale malluwa'é. Tennapodo iyaro barakka'é nonnoi ri yasé'na wija-wijanna Yusuf, saba' aléna ritu pamimping ri yelle'na silessu-silessurenna. Mappunnaiwi Yusuf awatangeng sikaju banténg, sibawa tanru saping lai ale iyanaro massebbu Manasyé sibawa mappulo sebbu Efraim. Natanru'i bangsa-bangsaé sibawa nadessa'i lettu ri cappa-cappa linoé.” Passalenna suku-suku Zébulon sibawa Isakhar makkedai: “Tennapodo Zébulon madécéng nasaba allalengeng-allalengenna, sibawa Isakhar saléwangeng ri kéma-kémana. Naundangngi mennang bangsa-bangsaé lao ri buluna mennang sibawa makkasuwiyang akkarobangeng iya tongengngé kuwaro. Lolongengngi mennang asugireng polé ri tasi'é, sibawa polé ri tasi'é sillampé wirinna.” Passalenna suku Gad makkedai: “Ripojiwi Allataala iya lowangiyéngngi daérana Gad. Mattajengngi Gad pada-pada sikajué singa maélo sapé'i taiyyaé iyaré'ga oli ulué. Tana iya kaminang makessingngé nalai untu' aléna bagiyang appimpingengngé riwéréngngi mennang. Napogau'i mennang sininna parénta-Na sibawa hukkunna Puwangnge wettunna maddeppungeng massibawa sining pamimpinna Israélié.” Passalenna suku Dan makkedai: “Sibawa pada-pada sikaju singa lolo iya luppe'é massu polé ri Basan.” Passalenna suku Naftali makkedai: “Ripateppaiwi Naftali barakka sibawa pammaséna Puwangnge; daérana poléi ri Tappareng Galiléa lettu ri yattang,” Passalenna suku Asyer makkedai: “Ribarakkakiwi Asyer napakacauri suku-suku laingngé; tennapodo mancajiwi risayang ri silessu-silessurenna, sibawa pong zaitungngé tuwoi macommo ri tanana. Tennapodo rilinrungiwi kota-kotana sibawa pintu-pintu gerbang tembaga sibawa bessi kuwammengngi natuli amang sibawa masennang atuwonna.” “Eh Israél! Dé' gaga déwata pada-pada Allataalamu; nalléttoiwi langié sibawa maraja sibawa bettui ellungngé untu' tulukko. Allataala tuli mancaji pallinrummu, taiyya-Na iya mannennungengngé tumpe'ko. Napaddésu'i balié polé ri yolomu, sibawa suroko paccappui mennang. Natuwo matu wija-wijanna Yakub sibawa masennang ri wanuwa iya maonaé gandong sibawa uwai anggorona, sibawa ripalleri cinoddo polé ri langié. Masennakko, éh Israélié! Dé' gaga bangsa iya pada-padaé iko ripassalama ri Puwangnge. Puwangnge pada-padai peddangngé sibawa kaliyawoé lao ri iko; untu' méwaiko sibawa mpérékko apakalang. Sining balimmu poléi matu méllau paressé babuwa, namuléjja-léjja'i matu mennang.” Nanasalaini Musa tanéténa Moab nanatuppuiwi Bulu Nébo, lao ri coppo'na Pisga ri seddé alauna Yérikho. Kuwaniro Puwangnge mappaitangngi ri aléna sininna wanuwaéro, iyanaritu: Daérana Giléad limanorang sibbéla kota Dan; sininna daérana Naftali; daérana Efraim sibawa Manasyé, daérana Yéhuda liyajang sibbéla Tasi Tengngaé; bagiyang yattanna Yéhuda sibawa tanété iya mallebbangngé polé ri Zoar lao ri Yérikho, kota iya pennoé pong karoma. Nainappa makkeda Puwangnge lao ri Musa, “Iyanaro wanuwa Uwajjanciyangngé lao ri Abraham, Ishak sibawa Yakub untu' riyabbéréyang lao ri wijanna mennang. Upaitakko, Musa, iyakiya dé' upalaloko lao kuwaro.” Namaténa Musa atanna Puwangnge ri tana Moab, pada-pada napowadaé Puwangnge riyolona. Puwangnge kuburu'i riséuwaé lompo ri Moab ri liwenna kota Bét-Péor, iyakiya lettu essoéwé dé' muwi séddi tau missengngi sibawa persis kégi tampunna. Matéi Musa ri umuru sératu duwappulo taung. Dé' natappinra awatangenna sibawa pakkitanna macakka mupa. Nateringini bangsa Israélié Musa ri tanéténa Moab sibawa mabbarata telluppulo esso ittana. Puwangnge pateppaiwi Yosua ana' Nun apanréng nasaba purani najello Musa mancaji passulléna. Mapatoi bangsa Israélié ri Yosua sibawa pajoppai sining parénta iya riwéréngngéngngi ri Puwangnge naolai Musa. Ri Israélié dé'na gaga nabi pada-pada Musa iya mabbicaraé siyolong tappa Puwangnge. Dé' gaga pogau' sining mujiza'é sibawa sining makalallaingngé padanna iya napogau'é Musa lao ri wanuwa Maséré, arunna sibawa sining pejaba'na situru sibawa paréntana Puwangnge. Dé' gaga pogau' sining pangkaukeng héba'é sibawa maseroé pada-pada iya napogau'é Musa ri yolona sininna bangsa Israélié. Maténana Musa, atanna Puwang -ngéro, mabbicarani Puwangnge lao ri wakkélé'na Musa, iyanaritu Yosua ana' Nun. Makkedai Puwangnge, “Maténi atak-Ku Musa. Makkekkuwangngé makessingenni iko sibawa sininna umma Israélié sadiya-sadiya untu' malléttoiwi Salo Yordan, sibawa muttamakiwi wanuwa iya Uwabbéréyangngé lao ri mennang. Purani Upowadang Musa makkedaé tungke daéra iya muléjja'é purani Uwérékko, Yosua, sibawa lao ri sininna umma'-Ku. Mallebbangngi matu daéramu polé ri padang kessi'é ri yattang lettu ri Buluna Libanon ri manorang sibawa Salo Efrat iya maloppoéro ri alau matteru mattemmuiwi wanuwanna bangsa Hét-é lettu ri Tasi Tengngaé ri yajang. Dé' muwi séddi tau mulléi cauko matu Yosua, gangka tuwomu. Saba' maélo-Ka tuli ranrekko pada-pada riyolo Uranrengngi Musa. Dé' Umaélo salaiko. Sitinajako mateppe sibawa barani, saba' mupimpingngi matu iyaé bangsaé wettunna mennang tudangiwi wanuwa iya Uwajjanciyangngé lao ri néné-nénéna mennang. Banna, sitinajako tonget-tongeng mateppe sibawa barani. Harusu'ko jagaiwi kuwammengngi muturusiwi sininna hukkung iya nabbéréyangngé Musa atakkuro lao ri iko, aja' mutettangngi muwi céddé, namulolongengngi matu akkattamu. Iyaro kitta hukkungngé harusu'ko tuli bacai lao ri umma'-Ku. Agguruiwi iyaro kitta'é esso sibawa wenni, kuwammengngi natuli mupogau'i sininna iya tarokié ri lalenna. Rékko mupogau'i sininnaro, madécéngngi matu atuwommu sibawa papolé wassélé. Engngerangngi, purano Uparéntang kuwammengngi mumattonget-tongeng mateppe sibawa barani! Aja' mumétau iyaré'ga kurang masumange, saba' Iyya Puwang Allataalamu ranrekko kégi-kégiko lao.” Nanaparéntanni Yosua sining pamimpinna umma Israélié kuwammengngi namattulili ri sininna akkémanna umma Israélié sibawa mpéréngngi paréntaéwé, “Passadiyai bokongngé, nasaba tellungngessopi naharusu'ko malléttoiwi Salo Yordan untu' tudangiwi wanuwa iya nawéréngngékko Puwang Allataalamu.” Lao ri suku Rubén, suku Gad, sibawa sitengngana suku Manasyé, makkedai Yosua, “Engngerangngi! Musa atanna Puwang -ngéro pura powadakko makkedaé tana ri seddé alauna Salo Yordangngé nawérékko Puwang Allataalamu untu' mancaji wanuwammu. Sininna ana' bainému sibawa olokolo'mu wedding monro kuwaé, iyakiya sining pejuwammu harusu'i sadiya mammusu sibawa poddiyoloiwi sining tau Israél laingngé malléttoiwi Salo Yordan. Harusu'ko tulungngi mennang narapi mennang natudangi tana ri seddé yajanna Salo Yordangngé iya nabbéréyangngé Puwang Allataalamu lao ri mennang. Puranana nabbéréyang Puwangnge atennangengngé lao ri sininna bangsa Israélié, nappako wedding lisu ri tanamu ri seddé alauna Yordangngé, iya nawéréngngékko Musa atanna Puwang -ngéro.” Namappébalina suku Rubén, Gad, sibawa sitengngana suku Manasyé, “Agi-agi muparéntakki, maéloki pogau'i, sibawa kégi-kégi musuroki lao, maéloki lao. Maéloki mapato ri iko, pada-padato tuli mapatota lao ri Musa. Tennapodo Puwang Allataalamu ranrekko pada-pada Naranrenna Musa! Tungke tau iya dé'é namaélo tunru lao ri akuwasammu, iyaré'ga dé' naturusiwi paréntamu, rihukkung matéi matu. Sitinajako mateppe sibawa barani!” Nainappa polé ri akkémangngé ri Sitim, suroni Yosua duwa tau mata-mata lao ri Kanaan. Iya duwa tauwéro riparéntang untu' salidikiwi wanuwa Kanaan sibawa massubbu-subbu, lebbi-lebbipi kota Yérikho. Nalaona mennang ri kotaéro, sibawa mappéruma ri bolana séddié makkunrai cakkuribang, riyaseng Rahab. Naéngkalingani arunna kota Yérikho makkedaé iyaro wennié engka tau Israél polé mata-mataiwi daéra Yérikho. Nanasurona arungngé tau lao ri Rahab untu' palettu'i paréntaéwé, “Passui sining tau iya mappérumaé ri bola-bolaéro. Mata-mata mennang iyanaritu iya polé untu' salidikiwi sininna daéra Yérikho!” Nanajoppana sining surona arungngéro salaiwi kotaé. Engkanana mennang ri saliweng, risuluni gerbanna kotaé. Nasappani mennang iya duwa tau mata-mataéro lettu ri onrong alléttongngé ri Salo Yordan. Iyaro wennié ri wettu dé'napa namatinro iya duwa tau mata-mata Israéliéro, laoni Rahab ri rakkiyangngé, sibawa makkeda lao ri mennang, “Uwisseng Puwangnge pura mabbéréyangngi wanuwaéwé lao ri iko. Sininna tauwé kuwaé métau lao ri iko. Purani riyéngkalinga karéba passalenna pékkugi Puwangnge pamettiwi Tasi Gelaga ri yolomu, wettummu salaiwi Maséré. Pura toni riyéngkalinga pékkugiko mpunoi Sihon sibawa Og, iya duwa arung bangsa Amoriéro ri seddé alauna Salo Yordan. Riyéngkalingana iyaro curita-curitaé, métau senna'ni. Sininna tautta teddénni abaraningenna nasaba iko. Puwang Allataalamu tongengngi Allataala Iya Pommakuwasaé ri langié sibawa ri tanaé. Namappébali iya duwa tauwéro, “Majjanciki makkedaé rékko nawérékki Puwangnge iyaé wanuwaé, maéloki gaukekko sibawa makessing, assaleng dé' mucuritai lao ri nigi-nigi passaletta. Leppessanni Puwangnge tanroiki rékko dé' tarupaiwi iyaro jancié.” Nasaba bolana Rahab ripatettongngi ri témbo'na kotaé, nanapanonnoni Rahab iya duwa tauwéro sibawa tulu lalo ri tellongengngé. Nakkeda Rahab lao ri mennang, “Laono ri daéra bulué, kuwammengngi sining tau iya nasuroé arungngé dé' naulléi tikkekko. Allekke'no kuwaro tellungngesso ittana narapi mennang lisu, nappako wedding patterui joppamu.” Nakkeda iya duwa mata-mataéro lao ri Rahab, “Makessinni, maéloki rupaiwi janci iya puraé muwéllau ri idi. Banna iyaé harusu mupogau'. Rékko rigasai wanuwammu matti, sitinajai tulu cella'éwé muwassiyoreng ri tellongengngéwé onronna mupanonnoki. Ambo' indo'mu, silessu-silessuremmu, sininna kaluwargana ambo'mu sitinajai mupaddeppungeng ri bolamué. Rékko sala séddinna polé ri mennang massu polé ri bolaéwé namaté riyuno, amaténna iyanaritu asalanna muto; dé'na tamattanggung jawa ri gau'éro. Iyakiya rékko engka iya lolongengngé acilakang ri laleng bolaéwé, idi ritu mattanggung jawa. Sibalé'na, rékko muwappaissengekki lao riséddié tau, dé'na tatassiyo lao ri janci iya puraé muwéllau polé ri idi.” Nasitujuini Rahab gau'éro nanaleppessangngi mennang lao. Nainappa nassiyoreng iyaro tulu cella'é ri tellongenna. Nanalaona iya duwa tau mata-mataéro ri daéra bulué sibawa massubbu kuwaro. Tellungngesso ittana sining surona arungngé sappai mennang kégi-kégi risininna daéraéro, iyakiya dé' nalolongengngi mennang. Angkanna lisu iyaro sining suroé ri Yérikho. Nainappa iya duwa tau mata-mata Israéliéro nonno polé ri bulué nanalléttoiwi saloé, nainappa lisu lao ri Yosua. Sininna pangalamanna mennang, nalaporo'ni mennang lao ri aléna. Nainappa makkeda, “Pasti nabbéréyang Puwangnge sininna tanaéro lao ri idi; sininna tauwé kuwaro métau lao ri idi.” Pappa bajanana, Yosua sibawa sininna umma Israélié maélé senna'ni moto, nanasalaiwi onrong akkémanna mennang ri Sitim, nanalao ri Salo Yordan. Kuwaniro mennang makkéma nanatajeng towi wettunna untu' mallétto. Labe'nana tellungngesso, mattulilini sining pamimpingngéro risininna akkémangngé, sibawa mabbéréyangngi paréntaéwé lao ri umma Israélié, “Rékko muwitani sining imangngé mpuléi Petti Assijancinna Puwang Allataalamu, sitinajako joppa tona salaiwi onrong akkémangngéwé. Accowériwi Pettiéro, iyakiya aja' mujoppa macawé senna ri Pettiéro; accowéri polé ri munri pallawangenna séddi kilo. Nanallalengi muwissenni matu laleng iya harusu'é muwola, saba' dé'pa naengka mulao ri daéraéwé.” Nakkeda Yosua lao ri umma Israélié, “Sitinajako paccingiwi alému, saba' baja maéloi Puwangnge pakangka anu makalallaing ri tengnga-tengngamu.” Nainappa Yosua paréntangngi sining imangngé kuwammengngi naakkai Petti Assijancingngéro nanajoppa poddiyoloiwi umma Israélié. Napogau'ni mennang paréntana Yosua. Nakkeda Puwangnge lao ri Yosua, “Mappammulai essoéwé maéloka pancajiko tau battowa angkanna sininna umma Israélié pakalebbiko sibawa napahanna makkedaé Iyya ranrekko pada-pada Uranrenna Musa. Makkekkuwangngé paréntanni sining imangngé iya mpulééngngi Petti Assijancingngéro kuwammengngi lettu'na mennang ri saloé, muttama'i mennang ri laleng uwaina saloéro sibawa tettong ri seddéna wirinna.” Nainappa naobbi Yosua sining tau Israélié, sibawa makkeda, “Laono mai méngkalingai aga naparéntakko Puwang Allataalamu. Makkekkuwangngé sitinajako pilé seppulo duwa tau – séddi tau polé ri tungke suku bangsa Israélié. Matti rékko sining imang iya mpulééngngi Petti Assijancinna Puwangnge makkellarengngi ajéna ri laleng uwaina Salo Yordanro, pettui matu uwaina massolo; uwai iya massolo'é polé riyulu tattéppo'i matu riséuwaé onrong.” Lettu manennana iyaro bangsaé ri liweng, makkedani Puwangnge lao ri Yosua, “Piléno seppulo duwa tau, séddi tau polé ri tungke suku. Paréntangngi mennang untu' mala seppulo duwa batu polé ri tengnga-tengngana Salo Yordan, persis ri onronna tettong sining imangngé. Suroi mennang méssangngi iyaro batu-batué lettu ri onrong muwakkémaiyé ri wennié matti.” Nanaobbini Yosua iya seppulo duwa tau iya ripiléro, nainappa makkeda, “Laono ri tengngana Salo Yordan, ri yolona Petti Assijancinna Puwang Allataalamu. Tungke-tungke harusu'i makka séddi batu polé kuwaro – jumellana seppulo duwa batu situru sibawa jumellana suku-sukué ri laleng bangsa Israélié. Iyaro batu-batué naparéngngerangiwi matu bangsaéwé lao ri aga iya puraé napogau' Puwangnge. Ri munri rékko makkutanai ana'-ana'mu aga bettuwanna iyaé batu-batué untu' alému, sitinajako paissengiwi mennang makkedaé uwaina Salo Yordan pettui wettunna Petti Assijancinna Puwangnge ritiwi malléttoiwi saloéro. Iyaro batu-batué tuli naparéngngerangiwi matu bangsa Israélié lao ri aga iya kajajiyangngé kuwaé.” Napogau'ni iya seppulo duwa tauwéro paréntana Yosua. Situru sibawa panunju'na Puwangnge lao ri Yosua, malani mennang seppulo duwa batu polé ri tengnga-tengngana Yordan – jumellana situru sibawa jumellana suku-sukué ri laleng bangsa Israélié – nainappa natiwi ri onrong akkémanna mennang. Ri tengnga-tengnganato Yordanro, lappo toni Yosua seppulo duwa batu persis ri onrong natettongiyé sining imang iya mpulééngngi Petti Assijancingngéro. (Iyaro batu-batué engka mupi kuwaro lettu makkekkuwangngé.) Sining imangngé tette'i tettong ri tengnga-tengngana Yordan narapi iyaro sining tauwé pura napogau' sininna iya riparéntangngéngngi ri Puwangnge naolai Yosua. Iyaro siturui panunju-panunju polé ri Musa lao ri Yosua. Masitta'i umma Israélié malléttoiwi Salo Yordan. Lettu manennana ri liweng, sining imang iya mpulééngngi Petti Assijancingngéro joppani ri yolona mennang. Situru sibawa iya napparéntangngé Musa, sining pejuwang polé ri suku Rubén, Gad sibawa sitengngana suku Manasyé, lebbi riyoloni malléttoiwi saloé. Iya manenna 40.000 tau worowané iya massenjataé sibawa sadiya untu' mammusu. Ri yolona Puwangnge, malléttoi mennang mattuju ri tanété mariyawaé ri seddéna Yérikho. Iyaro essoé napogau'i Puwangnge gau'-gau' iya mébbuéngngi bangsa Israélié pakalebbii Yosua selaku tau maraja. Gangka tuwona napakalebbii mennang pada-pada napakalebbina Musa. Nainappa Puwangnge suroi Yosua paréntangngi sining imang iya mpulééngngi Petti Assijancingngéro kuwammengngi namassu polé ri Yordan. Napogau'ni Yosua aga iya riparéntangngéngngi ri Puwangnge. Lettu'na muwa iyaro sining imangngé ri wirinna saloé, iyaro uwaina saloé mammulani massolo paimeng sibawa sapu pada-pada pammulanna. Lettu'ni umma Israélié ri liwenna Yordan sibawa ri tanggala seppulona uleng mammulangngé, sibawa makkémai mennang ri Gilgal seddé alauna Yérikho. Kuwaniro nalappo Yosua iya seppulo duwa batu iya nalaé polé ri laleng Yordan. Nainappa makkeda Yosua lao ri umma Israélié, “Ri munri rékko ana'-ana'mu nakkutanangngi bettuwanna iyaé batu-batué, powadangngi mennang makkedaé nalléttoiwi umma Israélié iyaé Salo Yordan ri yasé'na tana iya marakkoé. Curitangngi mennang makkedaé Puwang Allataalamu rakkoingekko uwaina iyaro Salo Yordan narapi lettu manekko ri liweng, pada-pada narakkoingetta Tasi Gelaga, kuwammengngi naissengngi sininna tauwé ri linoé pékkugi rajanna akuwasanna Puwangnge. Nanallalengiwi mupakalebbii matu Puwang Allataalamu untu' mannennungeng.” Sininna arunna Amori ri seddé yajanna Salo Yordan, sibawa sininna arunna Kanaan ri wiring Tasi Tengngaé naéngkalingani makkedaé purani narakkoi Puwangnge Salo Yordan ri wettu nalléttoinna umma Israélié iyaro saloé. Namétauna mennang sibawa takkini-kini nasaba tau Israélié. Iyaro wettué makkedani Puwangnge lao ri Yosua, “Ebbuno piso polé ri batué, nainappa pakangkasiko upacara assunnakeng untu' sining tau Israélié.” Napogau'ni Yosua paréntana Puwangnge, nanasunna'i sining tau Israélié ri onrong iya riyasengngé Bulu-bulu Assunnakeng. Iyanaro saba'na nasininna ana' worowanéna mennang dé'pa narisunna. Assossoreng baruénnaé nasunna Yosua. Pura manennana risunna mennang, monroni ri akkémangngé narapi sau lona mennang. Makkedai Puwangnge lao ri Yosua, “Iyaé essoé atunammu selaku ata-ata ri Maséré Ripallennye'ni.” Iyanaro saba'na nariyaseng Gilgal iyaro onrongngé lettu wettuéwé. Ri wettu makkémana ri Gilgal ri tanété seddéna Yérikho, naramé-raméini umma Israélié Paskaé ri arawénna tanggala seppulo eppa ulengngéro. Pappa bajana, untu' pammulanna mennang manré inanré wassélé'na wanuwa Kanaan, iyanaritu: roti temmarragi sibawa gandong ripanggang. Iyatoro essoé nadé'na nasempé mannaé polé ri langié, sibawa mappésauni tau Israélié manré manna. Mappammulai wettuéro manréni mennang wassélé tanana Kanaan. Riséuwaé wettu engkai Yosua ri seddéna Yérikho. Tennasenna-sennana naitai séddi tau worowané tettong ri yolona sibawa peddang pura rampu. Naddeppérini Yosua iyaro tauwé, namakkeda, “Rangekkoga, iyaré'ga bali?” Nappébali iyaro tauwé, “Tenniya rangeng, sibawa tenniyato bali. Laoka kuwaé selaku pallima tentarana Puwangnge.” Naéngkalinganaro masitta'ni Yosua suju' sompai iyaro tauwé. Makkedani Yosua, “Iyya'é atanna Puwang. Aga iya weddingngé upogau' untu' Puwang?” Nappébali iyaro pallima tentarana Puwangnge, “Luudungngi sapatummu; tana muwonroiyéro tettong iyanaritu tana mapaccing.” Nanaludunni Yosua sapatunna. Ri kota Yérikho rijagai senna'ni pintu-pintu gerbanna sibawa ritongko rape-rape kuwammengngi dé' naulléi muttama tau Israélié. Dé' muwi séddi ripalalo muttama iyaré'ga massu ri kotaéro. Makkedai Puwangnge lao ri Yosua, “Makkekkuwangngé Uwérékko Yérikho sibawa arunna nenniya sininna tentarana iya barani-baraniéro. Iko sibawa tentaramu harusu'ko mabbarisi mattulilingiwi kotaéro siseng siesso ri laleng enneng esso ittana. Pitu tau imang, tungke-tungke tiwi tarompé, harusu joppa ri yolona Petti Assijancingngé. Ri esso mapitué, iko sibawa tentaramu harusu mattulilingiwi kotaéro wékkapitu nasining imangngé seppungngi tarompé'na. Nainappa iyaro imang-ngimangngé harusu'i seppungngi tarompé'na sibawa oni iya malampéé. Muwéngkalingana oni iya malampééro, sininna tentaraé harusu'i marukka sibawa gora, namaruttung matu iyaro témbo'na kotaé. Nainappa iko maneng harusu matteru muttamakiwi kotaéro.” Nanaobbini Yosua sining imangngé, sibawa makkeda, “Akkani iyaro Petti Assijancingngé; pitu tau polé ri yelle'mu harusu joppa ri yolona natiwito tarompé.” Nainappa nasuro Yosua tentarana mabbarisi mattulilingiwi kotaéro, ripoddiyoloi ri barisi pengawal ri yoloé iya joppaé poddiyoloi Petti Assijancinna Puwangnge. Sininna tentaraé pura riparéntanni dé' nagora sibawa dé' namakkeda-ada muwi silappa rékko dé'pa nabbéré Yosua tanra-tanrang. Makkuwaniro Yosua suroi tentarana tiwii Petti Assijancingngé mattulilingiwi kotaéro wékkasiseng, nainappa lisu ri akkémangngé, sibawa mabbenni kuwaro. Ri esso maduwaéro nattulilingini mennang kotaé wékkasiseng nainappa lisu ri akkémangngé. Makkuwaniro mennang napogau' esso-esso ittana enneng essona. Ri esso mapitué maélé senna'ni mennang moto ri wettu nappa mompona essoé, nainappa mabbarisi wékkapitu mattulilingiwi iyaro kota Yérikho sibawa cara iya padaé. Banna ri esso iya mapituéro bawang, nattulilingiwi mennang iyaro kotaé wékkapitu. Mabbékkapitunnana, naseppunna muwa sining imangngé tarompé'na, mabbéréni Yosua tanra-tanrang lao ri sininna pasukangngé untu' gora. Makkedai Yosua, “ Puwangnge pura mabbéréyangngi iyaé lao ri iko! Sininna kotaé sibawa sininna lise'na harusu'i ripaccappu siseng selaku pakkasuwiyang untu' Puwangnge. Banna Rahab, makkunrai cakkuribangngéro sibawa kaluwargana wedding rileppessang tuwo, nasaba purai natulung mata-matata. Dé' nawedding mala muwi aga polé ri sininna iya harusu'é ripaccappu. Rékko muwalai, nakennai matu abala akkémanna Israélié. Sininna barang péra'é, ulawengngé, tembagaé sibawa bessié harusu'i ripallaing untu' Puwangnge, sibawa ritaroi ri laleng onrong attarong waramparang appunnangenna Puwangnge.” Nainappa naseppung tarompé'na sining imangngé. Na naéngkalingana muwa sining tau Israélié oni tarompé'éro, gorani mennang siullé-ulléna, namaruttung témbo'na kota Yérikho. Matteruni ménré sininna tentaraé, nauttamakiwi kotaéro nanasittaiwi. Sininna ri laleng kotaéro, macuwa malolo, worowané makkunrai, riyunoi sibawa peddang. Sininna olokolo sapingngé, bimbala'é sibawa kaleddé'é riyunoto. Lao ri iya duwa tau iya puraé mancaji mata-mata, makkedani Yosua, “Laono ri bolana makkunrai cakkuribangngéro, namutiwii massu silaong kaluwargana pada-pada iya puraé mujancingngi.” Nanalaona iya duwa mata-mataéro, nanatiwii massu Rahab silaong ambo' indo'na, silessu-silessurenna, sibawa kaluwargana iya laingngé. Sininna kaluwargana Rahab sibawa ata-atanna ritiwini massu ri onrong iya amangngé ri seddéna akkémanna Israélié. Nainappa natunu gangka cappu tentara Israélié sininna kotaéro sibawa sininna iya engkaé ri lalenna, sangadinna barab-barang ulawengngé, péra'é, tembagaé sibawa bessié. Iyaro barab-barangngé nalai mennang nanatiwii ri onrong attaronna waramparang appunnangenna Puwangnge. Iyakiya Rahab makkunrai cakkuribangngéro sibawa sininna kaluwargana rileppessangngi tuwo ri Yosua, nasaba purai natulung iya duwa mata-mata iya nasuroé Yosua lao ri Yérikho. (Lettu essoéwé wija-wijanna Rahab engka mupa ri Israélié.) Iyaro wettué napassui Yosua iyaé pappésangkaé, “Nigi-nigi makkuraga patettongngi paimeng iyaé kota Yérikho, nakennai matu tanrona Puwangnge. Nigi-nigi pasangngi pandamenna teddéngngi matu ana' macowana; sibawa nigi-nigi pasangngi pintu-pintu gerbanna ateddéngengngi matu ana' malolona.” Puwangnge sibawangngi Yosua, natarompona asenna Yosua ri sininna wanuwaéro. Puwangnge pura mapparéntangngi lao ri umma Israélié makkedaé polé risininna séuwa-séuwaé ri kota Yérikho harusu'i ripaccappu, muwi séddi dé'to wedding riyala. Iyakiya iyaro paréntaé dé' naturusiwi. Séddi tau worowané riyaseng Akhan majjalékkaiwi iyaro paréntaé, angkanna macai senna Puwangnge lao ri umma Israélié. (Ambo'na Akhan riyasengngi Karmi sibawa nénéna riyasengngi Zabdi polé ri appang Zéra ri laleng suku Yéhuda.) Iyaro wettué suroni Yosua siyagangngaré tau polé ri Yérikho lao ri Ai, iyanaritu séddi kota ri seddé alauna Bétel, seddéna Bét-Awen. Iyaro sining tauwé risuroi untu' lao salidikiwi daéraéro. Puranana mennang napogau' iyaro risurowangngéngngi, lisuni sibawa laporo'i ri Yosua. Makkedai mennang, “Dé'é naparelluki lao maneng gasai Ai. Suroni bawang kira-kira duwa iyaré'ga tellussebbu tau. Aja' musuro manengngi tentaraé lao kuwaro untu' mammusu, nasaba iyaro kotaé baiccu'mi.” Jaji iya laowé gasai iyaro kotaé banna tellussebbu tau, iyakiya ripasoroi mennang. Sining tau Aié lellungngi mennang polé ri pintu gerbanna kota Ai lettu ri daéra attambangengngé, nainappa nauno kira-kira telluppulo enneng tau polé ri yelle'na mennang ri émpenna bulu-bulué. Nabata-batana sibawa métauni sining tau Israélié. Messé senna'ni Yosua sibawa sining pamimpinna bangsa Israélié angkanna nasapé-sapé mennang pakéyanna, sibawa puppu esso narapi wenni suju'i mennang ri yolona Petti Assijancinna Puwangnge sibawa taroiwi awu ulunna mennang selaku tanrang messé babuwa. Makkedani Yosua lao ri Puwangnge, “Oh Allataala, Puwak -ku! Untu' aga Mutiwiki lettu ri liwenna Salo Yordan? Aga untu' mabbéréyakki lao risining tau Amorié? Kuwammengngi tamaté? Lebbi kessing muwi monroki bawang kuwaro, ri liwenna Yordan! Oh Puwang! Ripasoroni sining tau Israélié ri balié. Aga harusu upowada makkekkuwangngé? Naéngkalingai matu tau Kanaangngé sibawa sininna tau laingngé ri daéraéwé passalenna gau'éro. Nakeppukki matu mennang sibawa nauno manekki! Na agana harusu Upogau' matu untu' mattahangengngi alebbirem-Mu?” Nabalini Puwangnge Yosua, “Oto'no! Dé'gaga gunana suju'ko pada-padaéro ri tanaé! Purai pogau' dosa tau Israélié. Purai Uwapparéntang kuwammengngi naturusiwi mennang assijancinna sibawa Iyya, iyakiya najjalékkaiwi mennang! Barab-barang iya harusu'é riyancuru naalai mennang. Ménnauwi mennang sibawa nasubbui ri yelle'na barab-baranna mennang kuwammengngi dé' nakaissengeng. Iyanaro saba'na dé' naulléi mennang mattahang moloiwi balié. Ripasoroi mennang ri balié nasaba aléna mennang pura ripateppai pahukkungeng untu' ripaccappu. Dé'na umaélo ranrekko, rékko barab-barang iya dé'é nawedding riyalaro dé'pa nariyancuru. Oto'no makkekkuwangngé, Yosua! Paccingiwi umma Israélié sibawa suroi mennang sadiya untu' mangolo ri Iyya. Paréntangngi mennang untu' sadiya-sadiya baja, saba' Iyya Puwang Allataalana Israélié maélo powadai iyaé lao ri mennang: ‘Eh sining tau Israélié! Barab-barang iya puraé Uparéntakko untu' riyancuru, engkai sibagiyang ri iko. Ri wettu dé'napa muwabbéyangngi iyaro barab-barangngé, dé' mulléi matu mattahang méwai balié!’ Rimakkuwannanaro, Yosua, paissengiwi mennang makkedaé baja éléé maéloi riparéssa sininna sukué. Rékko Ujello'i séddié suku, sininna appangngé ri laleng sukuéro harusu'i malluru tassiappang-tassiappang. Sibawa rékko Ujello'i séddié appang, sininna kaluwargaé ri laleng appangngéro harusu'i malluru tassikaluwarga-tassikaluwarga. Nainappa rékko Ujello'i séddi kaluwarga, tungke tau ri laleng kaluwargaéro harusu'i malluru tasséddi-séddi. Nainappa tau iya rijello'é sibawa taroéngngi barab-barang iya riyattéyangngéro harusu'i ritunu gangka cappu silaong sibawa kaluwargana enrengngé sininna séuwa-séuwa iya nappunnangiyé; nasaba aléna majjalékkaiwi assijancingngé sibawa pogau'i ja battowaé ri tengnga-tengngana umma Israélié.” Bajanana, maélé senna'ni Yosua suroi umma Israélié malluru liyolo, tassisuku-tassisuku, na sukunna Yéhuda nakenna. Nainappana nasuro Yosua suku Yéhuda malluru liyolo, tassiappang-tassiappang, na appanna Zéra nakenna. Nainappa appanna Zéra risuro malluru liyolo, tassikaluwarga-tassikaluwarga, na kaluwargana Zabdi nakenna. Purairo nasuroni Yosua kaluwargana Zabdi malluru liyolo, tasséddi-séddi; na Akhan, ana' Karmi, eppona Zabdi nakenna. Nakkeda Yosua lao ri Akhan, “Ana'ku, akuini sibawa powadani terus terang kuwaé ri yolona Puwangnge, Allataalana Israélié, aga pura mupogau'. Paissengika, aja' musubbui.” Nakkeda Akhan, “Tongeng, puraka pogau' dosa lao ri Puwangnge, Allataalana Israélié. Iyanaé iya upogau'é: Ri yelle'na barab-barang iya tasittaiyé, uwitai silampa jumba iya makessing senna'é, ébbu Babilonia, makkuwatoro péra' kira-kira duwa kilo, sibawa sibatang ulaweng sitengnga kilo lebbi. Uwacinnai senna'i iyaro barab-barangngé, nauwalani sibawa usubbui ri laleng tanaé ri kémaku; péra'na engkai mariyawa senna.” Nainappa Yosua kiring tau mapperi-peri lao ri kémana Akhan. Nalolongenni iyaro barab-barang riyattéyangngé engka manengngi kuwaro, nasubbu ri laleng tanaé, sibawa péra'na nataroi mariyawa senna. Nalani mennang iyaro barab-barangngé nanatiwii lao ri Yosua sibawa sininna tau Israélié. Nainappa iyaro barab-barangngé napalénne ri yolona Puwangnge. Nainappa Yosua sibawa sininna umma Israélié tikkengngi Akhan, nanatiwii ri Lompo Asussangngé silaong iya maneng ana'na, olokolo sapinna, kaleddé'na, bimbala'na, kémana, sibawa sininna séuwa-séuwaé iya nappunnangiyé nenniya péra', jumba sibawa ulaweng iya naénnauwéro. Nainappa makkeda Yosua lao ri Akhan, “Magi mupapoléngekki asussang? Makkekkuwangngé Puwangnge maélo papoléngekko asussang!” Narigenrunna batu Akhan silaong kaluwargana gangka maté ri sininna tau Israélié. Sininna waramparang appunnangenna sibawa topa barab-barang naénnauwé ritunui gangka cappu. Purairo natémpunni mennang iyaro onrongngé sibawa maéga senna batu iya lettu'é essoéwé engka mupi kuwaro. Iyanaro saba'na nariyaseng mupi iyaro onrongngé Lompo Asussang. Nasorona caina Puwangnge. Makkedai Puwangnge lao ri Yosua, “Paddeppungenni sininna tentaramu, namulao sibawa mennang ri Ai. Aja' mumanenneng sibawa métau! Maélo-Ka mpérékko apakalang lao ri arung Ai. Ra'ya'na, kotana sibawa wanuwanna musittaiwi matu. Ai sibawa arunna harusu'i mugaukeng pada-pada mugaukengngéngngi Yérikho sibawa arunna riyolo. Iyakiya iya sisengngé barab-baranna sibawa olokolo'na weddingngi muwala mancaji appunnangemmu. Sadiya-sadiyano untu' luruiwi kotaéro tappa polé ri monri.” Nasadiya-sadiyana Yosua untu' lao ri Ai silaong sininna tentarana. Piléni 30.000 tau pejuwang iya kaminang makessingngé, nainappa nasuro mennang ri wennié, sibawa mpéréngngi mennang iyaé paréntaé, “Allekke'ko ri seddé kuwannaro kotaé, iyakiya aja' mumabéla senna; sibawa sadiyano untu' maggasa. Iyya sibwa ana' buwaku maélo maddeppériwi kotaéro. Rékko massui sining tau Aié untu' méwaki, maéloki balé sibawa lari pada-pada riyolo. Nalellukki matu mennang matteru narapi mabéla polé ri kotaéro, nanasengngi makkedaé lariki pada-pada riyolo. Ri wettuénnaro harusu'ko massu polé ri onrong allekkekemmu, sibawa sittaiwi kotaéro. Puwang Allataalamu mabbéréyangngi matu lao ri iko. Puranana musittai, tunui iyaro kotaé, situru iya napparéntangngé Puwangnge. Iyanaro tugasmu.” Nainappa Yosua suroi mennang, nalaona mennang mallekke ri seddé yajanna Ai pallawangenna Ai sibawa Bétel, nainappa mattajeng kuwaro. Iyakiya Yosua mabbenniwi ri akkémanna umma Israélié. Maélé senna'ni Yosua moto sibawa paréntangngi pasukanna kuwammengngi naddeppungeng. Nainappa aléna sibawa sining pamimping umma Israélié tiwii iyaro pasukangngé lao ri Ai. Iyaro pasukangngé silaonni Yosua joppa mattuju ri pintu gerbang utamana kota Ai, nainappa makkéma ri seddé manorang, naonroiyé séddi lompo ri pallawangenna mennang sibawa kotaéro. Lebbi kurang 5.000 tau égana pura nasuro massubbu ri seddé yajanna kotaéro, pallawangenna Ai sibawa Bétel. Jaji, susunanna pasukang musuéro riyatoro'i makkuwaéwé: markas utamaé ritaroi ri seddé manoranna kotaéro sibawa pasukang iya laingngé ri seddé yajang, na Yosua laowi ri lompo'é ri wenniéro. Naitana arung Ai ana' buwana Yosua, tinda'ni masitta. Aléna sibawa sininna taunna massuni mattuju ri Lompo Yordan untu' gasai tau Israélié ri onrongngé riyolo. Dé' naissengngi makkedaé dé' namaittana narigasa polé ri monri. Yosua sibawa ana' buwana najjaini mennang soro; larini mennang mattuju ri daéra padang makabuttué. Sininna tau worowané ri kota Ai ripangarani untu' lellungngi Yosua sibawa pasukannaro. Iyakiya pédé nalellungngi mennang Yosua, pédé mabélai polé ri kotaéro. Sininna tauwé ri Ai massuni untu' lellungngi tau Israélié, angkanna iyaro kotaé naleppessang tattimpa makkuwaro bawang, tenrijaga. Nainappa makkeda Puwangnge lao ri Yosua, “Akkai bessimmu sibawa pattujui lao ri Ai; iyaro kotaé Uwabbéréyangngi lao ri iko.” Napogau'ni Yosua paréntana Puwang -ngéro. Natanréyanna muwa limanna Yosua, pasukang iya mallekke'éro mapperi-perini tokkong sibawa gasai kotaéro, nainappa nasittai. Matteru mennang natunu iyaro kotaé. sangadinna arung Ai. Ritikkenni nainappa ritiwi mangolo ri Yosua. Puranana pasukang Israélié nauno gangka cappu tentara balié iya lellungngéngngi mennang ri padang makabuttué, lisuni mennang ri Ai, sibawa mpunoi sininna tauwé kuwaro. Olokolo sibawa barab-barang iya nasittaiyé ri kota Airo, nalani sining tau Israélié mancaji appunnangenna mennang, situru iya napowadaé Puwangnge lao ri Yosua. Natununi Yosua Ai, sibawa naleppessangngi mancaji ruttungeng lettu makkekkuwangngé. Nagattunni arunna kotaéro ri patto'é, nanaleppessangngi kuwaro narapi arawéng. Wettunna labu essoé, nasuroni Yosua tauwé malai ujuéro nanabuwangngi ri yolona pintu gerbanna kotaé. Nainappa iyaro onrongngé natébung maéga senna batu. Iyaro batu-batué engka mupi kuwaro lettu makkekkuwangngé. Nainappa patettong Yosua séddi mézba ri Bulu Ebal untu' Puwangnge, Allataalana Israélié. Iyaro mézbaé naébbui situru panunju-panunju ri laleng Kitta'na Musa, atanna Puwang -ngéro, lao risining tau Israélié: “Séddi mézba polé ri batu-batu iya dé'éppa naengka rijama sibawa paréwa bessi.” Ri yasé'na iyaro mézbaé makkasuwiyanni tau Israélié lao ri Puwangnge: akkarobangeng ritunu sibawato akkarobangeng pappasidaména mennang. Kuwaro, nasabbing sining tau Israélié, naokii Yosua ri batu-batu mézbaéro lémbana hukkung-hukkunna Puwangnge iya engkaé ri laleng Kitta'na Musa. Sining tau Israélié, silaong sining pamimpingngé, parawira-parawiraé, haking-hakingngé, sibawato sining tau laing iya monroé ri yelle'na mennang, tettongngi ri benrénna wali-wali Petti Assijancinna Puwangnge mangolo risining imang Léwié iya mpulééngngi Petti Assijancingngéro. Sitengngana polé risining tauwéro mangolo ri Bulu Gerizim, sibawa sitengngana laingngé mangolo ri Bulu Ebal. Musa, atanna Puwang -ngéro, pura mapparéntangngi kuwammengngi napogau'i mennang gau'éro rékko narapini wettunna untu' tarimai mennang barakka iya najjanciyangngé Puwangnge. Nainappa nabaca Yosua maladde-ladde sininna hukkungngé situru sibawa iya tarokié ri laleng Kitta Hukkungngé, muttama'ni barakka'-barakka'é sibawa sining tanroé. Tungke paréntana Musa nabacai Yosua lao ri sininna umma Israélié iya maddeppungengngé kuwaro, muttama'ni makkunraié, ana'-ana'é, sibawa sining tau laing iya monroé ri yelle'na mennang. Karéba passalenna sining apakalanna Israélié tassiyani risininna arungngé ri seddé yajanna Salo Yordan – ri bulué, ri ponna bulué, sibawa ritanété mattuttung wiring Tasi Tengngaé lettu sibbéla Bulu Libanon ri seddé manorang; iyanaritu sining arung Hét, Amori, Kanaan, Féris, Héwi sibawa Yébus. Sininna arungngéro sipekke'ni nenniya siyempe untu' musui Yosua sibawa umma Israélié. Iyakiya sining tau Gibéon polé ri bangsa Héwié purani naéngkalinga passalenna aga iya napogau'é Yosua lao ri Yérikho sibawa Ai. Nanapettuini mennang untu' bengnguwangngi Yosua ri laleng pattékériwi kaleddé'na mennang: karung-karung malaung, sibawa popang-popang anggoro iya majaénna riyébbué polé ri bingkulangngé. Na selaku bokong, napassadiyani mennang banna roti iya marakkoénna sibawa keddi-keddingngé. Pakéi mennang pakéyang iya sapé-sapé'é nenniya sapatu iya malaungngénna sibawa ritéppang-teppang. Ri laleng keadaang makkuwaéro laoni mennang méwai sita Yosua ri akkémangngé ri Gilgal nainappa makkeda lao ri Yosua sibawa tau Israélié, “Poléki ri wanuwa iya mabélaé maélo mébbu assijancing sibawa Bapa'-bapa'.” Iyakiya makkedai sining tau Israélié, “Untu' aga mébbuki assijancing sibawa iko? Naullé onrommu macawé'mi bawang kuwaé?” Makkedani mennang, “Macennikki pogau'i agi-agi iya tapparéntangngé Pa'.” Nakkutana Yosua lao ri mennang, “Nigako? Sibawa polé ri wanuwa niga?” Nappébali mennang, “Poléki ri wanuwa iya mabéla senna'é, Pa', nasaba riyéngkalingai passalenna Puwang Allataala iya nasompaé Bapa'-bapa'. Riyéngkalingai sininna iya Napogau'é ri Maséré, sibawa passalenna aga iya Napogau'é lao ri iya duwa arung Amorié ri seddé alauna Yordan, iyanaritu Sihon arung Hésybon sibawa Og arung Basan iya monroé ri Asytarot. Sining pamimpingngé sibawa sininna pabbanuwana wanuwatta suroki passadiya bokong untu' joppa lao mai méwai sita Bapa'-bapa', sibawa powadai makkedaé tunru'ki lao ri Bapa'-bapa'. Rimakkuwannanaro, riyéllauwi asémpoatinna Bapa'-bapa' mébbu assijancing sibawa idi. Coba Bapa'-bapa' mitai, roti bokottaé. Wettutta joppa, iyaé rotié mapella mupa. Iyakiya makkekkuwangngé, itani! Marakkoni sibawa keddi-keddinni. Sibawa iyaé sining popang anggoro'é mabaru mupa wettutta lisekiwi; iyakiya makkekkuwangngé, itani! Sapé'-sapé'ni. Muwi pakéyatta sibawa sapatutta masolang toni nasaba allalengeng iya mabélaéwé.” Nanatarimani céddé sining tau Israélié inanréna sining tau Gibéongngéro, sibawa temmakkutana ri Puwangnge passalenna gau'éro. Mébbuni Yosua assijancing assisellaong sibawa sining tau Gibéongngéro, sibawa majjanci untu' dé' naunoi mennang. Mattanro toni sining pamimpinna umma Israélié untu' rupaiwi iyaro assijancingngé. Iyakiya tau Israélié dé' nawedding mpunoi mennang, saba' sining pamimpinna Israélié pura mattanroni lao ri mennang ri laleng asenna Puwang Allataalana Israélié. Mannoko-noko'ni sininna umma Israélié passalenna gau'éro lao risining pamimpinna mennang. Iyakiya mappébaliwi iyaro sining pamimpingngé, “Aga maélo ripogau'! Purani majjanci lao ri mennang sibawa mattanro ri laleng asenna Puwang Allataalana Israélié. Makkekkuwangngé dé'na weddikki pogau'i majaé lao ri mennang. Dé' naweddiki mpunoi mennang saba' purani majjanci; narékko riyassakkarengngi iyaro jancié nahukkukki matu Allataala. Jaji, leppessanni mennang tuwo, iyakiya idi manengngé pancajiwi mennang pappuwé aju sibawa pallémpa uwaita.” Makkuwaniro nappétangngareng iyaro sining pamimpingngé. Nainappa riyobbi sining tau Gibéongngé mangolo ri Yosua. Makkedai Yosua, “Magi mubelléki sibawa makkeda makkedaé mabéla senna wanuwammu, padahal kuwaé bawang? Nasaba kédo makkuwakoro, Allataala hukkukko. Tuli mancaji atai matu bangsamu, pappuwé aju sibawa pallémpa uwai untu' Bolana Allataalaku.” Nappébali mennang, “Kédo makkuwaki'ro nasaba riyéngkalingai makkedaé Puwang Allataala iya nasompaé Bapa' pura nasuroi Musa, atan-Naro, mpéréngngi Bapa' sininna wanuwaéwé enrengngé mpunoi sininna pabbanuwana ri wettunna Bapa' malai iyaro tanaé. Métau senna'ki rékko riyunoki, iyanaro saba'na tapogau'i iya manennaé. Makkekkuwangngé ri lalekki akuwasanna Bapa'. Gaukenni situru iya naitaé Bapa' makessing.” Na iyanaé napogau' Yosua: nalinrungiwi sining tauwéro sibawa dé' napalaloi tau Israélié mpunoi mennang. Iyakiya ripancajiwi mennang ata – iyanaritu pappuwé aju sibawa pallémpa uwai untu' tau Israélié sibawa untu' mézbana Puwangnge. Lettu makkekkuwangngé napogau' mupi mennang iyaro pallaungngé ri onrong iya napilé Puwangnge mancaji onrong assompanna. Naéngkalingani Adoni-Zédék, arunna Yérusalém makkedaé nasittaini sibawa nancuru sisenni Yosua kota Ai, enrengngé mpunoi arunna pada-pada iya puraé nagaukengngi lao ri Yérikho sibawa arunna. Naéngkalinga toni makkedaé purani tau Gibéongngé mébbu assijancing assisellaongeng sibawa sining tau Israélié sibawa monroi ri tengnga-tengngana mennang. Métau senna'ni pabbanuwana Yérusalém, saba' Gibéon iyanaritu kota iya battowaé; silloppo kota-kota iya mappunnaiyé arung, mala lebbi battowai naiya Ai. Sining taunna pejuwang towi iya maccaé mammusu. Rimakkuwannanaro nasuroni Adoni-Zédék tauwé lao ri Arung Hoham ri Hébron, Arung Piréam ri Yarmut, Arung Yafia ri Lakhis, nenniya Arung Debir ri Eglon, sibawa tiwii pasengngéwé, “Laono mai bantuka gasai Gibéon, saba' sining taunna purani mébbu assijancing assisellaongeng sibawa Yosua nenniya tau Israélié.” Na iya lima arung Amoriéro, iyanaritu, arung Yérusalém, Hébron, Yarmut, Lakhis sibawa Eglon siyempe'ni, nainappa nasibawang sininna tentarana, nakeppunni mennang sibawa nagasana Gibéon. Nakirinni sining tau Gibéongngé iyaé karébaé lao ri Yosua ri akkémangngé ri Gilgal, “Aja' muleppessakki alé-alé, Pa'! Laoni mai masitta tulukki, saba' tentara polé ri sininna arung Amorié ri daéra bulué siyempe'ni méwaki!” Nainappa Yosua sibawa sininna tentarana, muttama'ni sining pasukanna iya kaminang makessingngé, joppa polé ri Gilgal untu' mammusu. Makkedai Puwangnge lao ri Yosua, “Aja' mumétau lao ri mennang. Pura Uwérénno apakalangngé, rimakkuwannanaro dé' muwi séddi tau polé ri mennang mulléi tahang méwako.” Puppu benni Yosua sibawa pasukanna joppa polé ri Gilgal lao ri Gibéon, nainappa nagasa sining tau Amorié tenna-sennai. Puwangnge mébbui sining tau Amorié dé' naissengengngi aléna wettunna naita tentara Israélié. Maéga tau Amori riyuno ri Gibéon, naiya tuwoé mupa rilellunni turungiwi émpenna bulué ri Bét-Horon narapi sibbéla Azéka sibawa Makéda ri seddé yattang. Wettunna sining tau Amorié mattengngang turungiwi émpeng bulué nasaba lariwi polé ri tentara Israélié, Puwangnge pateppa bosi ése iya maloppoé polé ri langié ri yasé'na mennang puppu laleng lettu ri Azéka. Iya maté nageppa bosi ése'éro mabéla lebbi maégana naiya naunoé tau Israélié. Iyaro essoé wettunna Puwangnge mpéréngngi apakalang tau Israélié polé ri tau Amorié, mabbicarani Yosua lao ri Puwangnge sibawa ri yolona tau Israélié, makkedai Yosua, “Eh Mata esso! Appésauno ri yasé'na Gibéon. Sibawa iko kéteng! Aja' mulétté polé ri yasé'na Lompo Ayalon.” Nappésauna mata essoé sibawa dé'na nalétté kétengngé narapi tau Israélié pura nacau sining balinna. Iyaé kajajiyangngé riyokii ri laleng Kitta Yasar. Puppu esso mappésau mata essoé ri tengnga-tengngana langié, sibawa maitta senna nainappa labu. Dé' naengka nakajajiyang sibawa dé'tona nakajajiyang matu séuwa esso pada-pada essoéro, makkedaé Puwangnge maccowériwi élona tolinoé. Puwangnge mammusu sibawangngi Israélié! Puranana musuéro, lisuni Yosua silaong sining tentarana ri akkémangngé ri Gilgal. Iyakiya iya lima arung Amoriéro leppe'i sibawa massubbui ri laleng séddié gowa ri Makéda. Riitai mennang ri tauwé, nariyappaissengenna onrong assubbuwanna mennang lao ri Yosua, nakkeda Yosua, “Galéttérengngi batu-batu loppo lao ri sumpanna gowaéro, namutaro pengawal kuwaro, iyakiya aja' muwappésau kuwaro. Lellungngi matteru, sibawa gasai mennang polé ri munri; aja' muleppessangngi mennang muttama ri kota-kotana mennang! Puwang Allataalamu pura mpérékko apakalang lao ri mennang.” Naunoni Yosua sibawa tau Israélié sining tau Amoriéro, iyakiya engkato ri yelle'na mennang iya larié lao ri kotana mennang sappa allinrungeng, angkanna dé' nariyuno. Nainappa sininna tentarana Yosua lisu sibawa salama ri Yosua ri akkémangngé ri Makéda. Dé' muwi séddi tau ri wanuwaéro barani powadai agi-agi méwai tau Israélié. Purairo makkedani Yosua, “Makkekkuwangngé timpa'ni sumpanna gowaéro namutiwii mai iya lima arungngéro.” Ritimpa'ni iyaro gowaé, nariyassarénréngeng massu sining arunna Yérusalém, Hébron, Yarmut, Lakhis sibawa Eglon, naritiwi lao ri Yosua. Nainappa naobbi Yosua sininna tau Israélié maddeppungeng, nanapparéntangngi kuwammengngi sining parawira iya maccowéé mammusu sibawa aléna poléi malléjja'i. Napoléna sining parawiraéro sibawa lejja'-lejja'i ellonna sining arungngéro. Purairo, makkedani Yosua lao risining parawiraéro, “Aja' mumanenneng sibawa métau. Sitinajako mateppe sibawa barani, saba' makkuwaniyé carana Puwangnge maélo gaukengngi sininna balimmu.” Nainappa nauno Yosua sining arungngéro sibawa gattungngi mennang ri lima patto. Ujuna mennang rileppessangngi kuwaro narapi arawéng. Wettunna labuni essoé, nasaba paréntana Yosua, ripanonnoni iyaro sining ujué nainappa riyaggenrungeng ri laleng gowaé iya napaké onna sining arungngéro untu' massubbu. Nainappa ritaroi batu loppo sumpanna gowaéro. Lettu makkekkuwangngé iyaro batu-batué engka mupi kuwaro. Iyaro essoé nagasani Yosua Makéda, sibawa caui kotaéro silaong arunna. Naunoi sininna pabbanuwana iyaro kotaé; dé' muwi séddi naleppessang tuwo. Nagaukenni Yosua arunna Makéda pada-pada iya nagaukengngéngngi arung Yérikho. Purairo, joppani matteru Yosua sibawa tentarana polé ri Makéda lao ri Libna sibawa gasai Libna. Puwangnge mpéréng towi apakalang tau Israélié lao ri kotaéwé sibawa arunna. Dé' muwi séddi tau naleppessang tuwo; sininna tauwé ri laleng kotaéro naunoi. Nagaukenni Yosua arunna kotaéro pada-pada iya nagaukengngéngngi arung Yérikho. Nainappa Yosua sibawa tentarana maju polé ri Libna lao ri Lakhis. Nakeppunni mennang kotaéro nainappa nagasa. Puwangnge mpéréngngi apakalang tau Israélié lao ri Lakhis ri laleng ammusurengngé ri esso maduwaé. Aga iya napogau'é ri Libna, napogau' towi ri Lakhis; dé' muwi séddi tau naleppessang tuwo, nauno maneng. Horam, arunna Gézer polé bantui Lakhis, iyakiya Yosua caui sibawa tentarana; dé' muwi séddi tau iya nasésaé, maté maneng. Rappina, Yosua sibawa tentarana majuni polé ri Lakhis lao ri Eglon nainappa nakeppung sibawa nagasa kotaéro. Iyatoro essoé nasittaiwi mennang Eglon, sibawa mpunoi sininna tauwé kuwaro pada-pada iya napogau'é mennang ri Lakhis. Polé ri Eglon, Yosua sibawa tentarana tuppuiwi bulué sibawa lao ri kota Hébron, nainappa nagasa sibawa nasittai kotaéro. Arunna sibawa tungke tau ri kotaéro sibawa ri kota-kota laingngé ri seddéna kuwaro, nauno maneng. Nancuru sisengngi Yosua iyaro kotaé pada-pada iya napogau'é lao ri kota Eglon. Dé' muwi séddi tau iya rileppessangngé tuwo kuwaro. Purairo, lisuni Yosua sibawa tentarana sibawa nagasai Debir. Iyaro kotaé silaong arunna nenniya sininna kota laingngé ri seddéna nasittai manenni Yosua. Sininna tauwé kuwaro naunoi. Nagaukenni Yosua Debir sibawa arunna pada-pada iya nagaukengngéngngi Hébron sibawa Libna silaong arunna. Napatunru'ni Yosua sininna wanuwaéro. Nacauni sining arungngé ri daéra bulué, ri émpeng-ngémpeng bulué ri seddé alau, ri pong bulué ri yajang, sibawa ri padangngé ri yattang. Dé' muwi séddi tau iya rileppessangngé tuwo; riyuno maneng. Iyaro siturui sibawa parénta polé ri Puwangnge, Allataalana Israélié. Nacauni Yosua daéra-daéraé polé ri Kadés-Barnéa ri yattang lettu ri Gaza ri seddéna wiring tasi'é, muttama'ni sininna daéra Gosyén, matteru lettu ri Gibéon ri manorang. Ri laleng siseng bawang mammusu, nacauni Yosua sining arungngéro sibawa sittaiwi sininna daéra akuwasanna mennang, nasaba Puwangnge, Allataalana Israélié, mammusurengngi Israélié. Purairo, lisuni Yosua sibawa tentarana ri akkémangngé ri Gilgal. Wettunna naéngkalinga Arung Yabin polé ri Hazor passalenna sining apakalanna Israélié, suroni tau lao ri Arung Yobab polé ri kota Madon, lao risining arunna kota Simron sibawa Akhsaf, lao risining arungngé ri bulué bagiyang manorang, ri Lompo Yordan seddé yattanna Galiléa, ri daéra pong bulué, sibawa ri daéra wiring tasi'é ri seddéna Dor. Suro towi tau lao ri tau Kanaangngé ri bagiyang yajang sibawa alauna Yordan, ri tau Amorié, Hét-é, Féris-é, sibawa tau Yébus-é, ri daéra bulué, enrengngé tau Héwié ri pong Bulu Hérmon ri daéra Mizpa. Napoléna iyaro sining arungngé sibawa sininna tentarana mennang iya maéga senna'é pada-pada kessi'é ri wiring tasi'é. Anyarang sibawa karéta musuna mennang maéga senna'to. Sininna arungngéro siyempe'i sibawa silaongngi polé patettong markas ri seddéna ana' Salo Mérom untu' gasai Israélié. Nakkeda Puwangnge lao ri Yosua, “Aja' mumétau lao ri mennang. Ri wettu pada-padaéwé baja, pura manenni mennang Uwuno untu' Israélié. Harusu'i mupaccappu anyaranna mennang, sibawa karéta-karéta musuna mennang harusu'i mutunu.” Naluruini Yosua sibawa sininna tentarana iyaro balié tennasenna-sennai ri seddéna ana' Salo Mérom. Na Puwangnge mébbui umma Israélié caui mennang. Tau Israélié gasai sibawa lellungngi mennang lettu sibbéla Misréfot-Maim sibawa Sidon ri manorang, sibawa sibbéla Lompo Mizpa ri alau. Matteruni musué angkanna dé' muwi séddi tau polé ri balié iya nasésaé – maté maneng. Napogau'ni Yosua lao ri mennang situru sibawa aga iya puraé napparéntang Puwangnge: napaccappuni anyaranna, sibawa natunui karéta-karéta musuna mennang. Nainappa nasittai Yosua iyaro kota-kotaé, nanatikkengngi sining arunna sibawa nauno situru paréntana Musa, atanna Puwang -ngéro. Iyakiya kota-kota iya napatettongngé ri yasé'na bulu-bulu ruttungengngé, dé' muwi séddi iya natunué tau Israélié, sangadinna Hazor iya natunué Yosua. Sininna pabbanuwana iyaro kota-kotaé naunoi; dé' muwi séddi tau naleppessang tuwo. Iyakiya sininna barab-baranna iya mangke'é sibawa olokolo'na nalai tau Israélié mancaji appunnangenna mennang. Sininna iya napparéntangngé Puwangnge lao ri Musa, atan-Na, purani napalettu Musa lao ri Yosua, sibawa napogau'na Yosua; dé' muwi séddi iya dé'é napogau'i. Nasittaini Yosua sininna wanuwaéro – daéra buluna, daéra pong bulué, muwi ri manorang iyaré'ga ri yattang; makkuwatoro sininna daérana Gosyén sibawa daéra padang makabuttué ri bagiyang yattanna Gosyén, nenniya Lompo Yordan. Polé risininna kota-kotaé risininna daéraéro dé' muwi séddi kota iya mébbué assijancing assisellaongeng sibawa Israélié, sangadinna Gibéon, kotana bangsa Héwié. Sininna kota iya laingngé nacauni ri laleng ammusurengngé. Puwangnge mébbui mennang matedde ati untu' mammusu sibawa tau Israélié, kuwammengngi naripaccappu mennang, sibawa riyuno maneng temmaddampeng situru paréntana Puwangnge lao ri Musa. Ri wettuéttonaro nalao Yosua paccappui bangsa Enak-é, iyanaritu bangsa rassasa iya monroé ri daéra bulué – ri Hébron, Débir, Anab, sibawa sininna daéra buluna Yéhuda nenniya Israélié. Riyuno maneng ri Yosua, sibawa kota-kotana mennang ripaccappu. Dé' muwi séddi tau polé ri bangsa Enak-éro iya nasésaé ri daéra Israélié, banna ri Gaza, Gat sibawa Asdod engka mupa. Sininna wanuwaéro nasittaiwi Yosua situru paréntana Puwangnge lao ri Musa, nainappa nawéréng bangsa Israélié mancaji appunnangenna mennang. Iyaro wanuwaé natawa-tawai, tungke suku lolongeng séddi bagiyang. Mappésau toni bangsa Israélié mammusu sibawa amanni wanuwanna. Daéra seddé alauna Yordan, polé ri Lompo Salo Arnon matteru ménré ri Lompo Yordan lettu sibbéla Bulu Hérmon ri bagiyang manorang, purani nasittai sibawa natudangi tau Israélié. Engka duwa arung nacau mennang. Iya séddié riyaseng Sihon, arunna Amori iya malaé tudangeng ri Hésybon. Daéra akuwasanna nassanraiwi sitengngana daéra Giléad: iyanaritu polé ri Aroér (ri wirinna Lompo Arnon) sibawa kota iya ri tengnga-tengngana lompo'éro narapi sibbéla Salo Yabok ri pakkasésénna daérana bangsa Amon; makkuwatoro nassanraiwi daérana Lompo Yordan bagiyang alau, polé ri Tasi Galiléa lao ri yattang lettu ri Bét-Yésimot (seddé alauna Tasi Maté), matteru lao ri pong Bulu Pisga. Arung laing iya nacaué tau Israélié iyanaritu Arung Og polé ri wanuwa Basan, iya malaé tudangeng ri Asytarot sibawa Edréi. Sala séddinna tau risésa polé ri bangsa Réfaim. Daéra akuwasanna nassanraiwi Bulu Hérmon, Salkha, sibawa sininna Basan narapi sibbéla daéra Gésur sibawa Maakha; makkuwatoro nassanraiwi sitengngana daéra Giléad lettu sibbéla daéra akuwasanna Arung Sihon ri kota Hésybon. Iyanaro duwa arung iya nacaué Musa silaong bangsa Israélié. Tanana iyaro sining arungngé nabbéréyanni Musa, atanna Puwangnge, lao ri suku Rubén, Gad sibawa sitengngana suku Manasyé, untu' mancaji tana appunnangenna mennang. Arung-ngarung iya nacaué Yosua silaong bangsa Israélié iyanaritu sininna arungngé ri daéra seddé yajanna Salo Yordan, polé ri Baal-Gad ri Lompo Libanon matteru lettu ri Bulu Makellué ri bagiyang yattang seddéna Edom. Iyaro daéraé nabagé-bagéi Yosua lao ri suku-suku bangsa Israélié untu' mancaji tana appunnangenna mennang. Iyaro daéraé nassanraiwi daéra bulué, daéra pong bulu-bulué ri bagiyang yajang, Lompo Yordan sibawa daéra pong bulu-buluna, daéra émpeng-ngémpengngé ri bagiyang alau, sibawa daéra padang kessi'é ri bagiyang yattang. Iyaro daéra-daéraé iyanaritu daéra onronna riyolo tau Hét-é, Amorié, Kanaangngé, Féris-é, Héwié sibawa Yébus-é. Makkekkuwangngé macowa senna'ni Yosua. Makkedai Puwangnge lao ri Yosua, “Macowano, Yosua! Iyakiya maéga mupa daéra iya harusu'é musittai: sininna daéra Filistin sibawa Gésur, sibawa sininna daéra Awi liyattang. (Daéra polé ri Salo Sikhor ri pakkasésénna Maséré lettu ri pakkasésénna Ekron ri seddé manorang, iya manennaro muttama'i ri daérana bangsa Kanaangngé; sibawa sining arung Filistingngé monroi ri Gaza, Asdod, Askélon, Gat sibawa Ekron.) Makkuwatoro harusu'i nasittai: sininna daéra Kanaan sibawa Méara (appunnangenna bangsa Sidon), lettu ri Afék ri pakkasésénna daérana bangsa Amorié; nainappa daérana bangsa Gébal, sibawa sininna daéra Libanon lilau, polé ri Baal-Gad ri bagiyang yattanna Bulu Hérmon, matteru lettu ri laleng iya mattujué ri Hamat. Muttama toni sininna daérana tau Sidongngé, iya monroé ri daéra bulué ri yelle'na sining bulu Libanon sibawa Misréfot-Maim.” Nakkeda Puwangnge patterui lao ri Yosua, “Sininna bangsa-bangsaéro Upaddésu'i matti, wettunna umma Israélié musui mennang. Iyaro tanaé harusu'i mubagé-bagé lao ri umma Israélié untu' mancaji tana appunnangenna mennang, pada-pada iya puraé Uparéntakko. Jaji, bagé-bagéngenni makkekkuwangngé iyaro tanaé lao ri aséra suku ri laleng bangsa Israélié, sibawa lao risitengngana polé ri suku Manasyé, kuwammengngi iyaro namancaji tana appunnangenna mennang.” Suku Rubén sibawa Gad nenniya sitengngana suku Manasyé pura tarimani bagiyang tana polé ri Musa, atanna Puwang -ngéro; iyanaritu tana ri seddé alauna Salo Yordan. Daérana mennang nassanraiwi Aroér (ri wirinna Lompo Salo Arnon), sibawa kota ri tengnga-tengngana lompo'éro. Makkuwatoro sininna daéra tanété tanré polé ri Médéba lettu ri Dibon sibawa lettu ri pakkasésénna daéra Amon, muttama'ni sininna kota iya puraé nakuwasaiyé Sihon, arunna Amori, iya malaé tudangeng ri Hésybon. Muttama toni daéra Giléad, daéra seddéna Gésur sibawa Maakha, enrengngé sininna Bulu Hérmon, sibawa sininna daéra Basan lettu ri Salkha. Daérana mennang nassanrai towi daéra akuwasanna Arung Og, tau Réfaim paccappurengngé iya mapparéntaé ri Asytarot sibawa Edréi. Purani nacau Musa iyaro bangsa-bangsaé sibawa rukkai mennang massu polé ri daérana. Iyakiya pabbanuwana Gésur sibawa Maakha dé' narirukka ri tau Israélié; monro mupi mennang ri Israélié. Suku Léwi dé' natarima bagiyang tana polé ri Musa, saba' Puwangnge pura powadangngi Musa makkedaé bagéyanna suku Léwi iyanaritu poléi ri akkarobangeng-akkarobangeng iya ritunué ri mézbaé untu' Puwang Allataalana Israélié. Sibagiyang polé ri tana iya najjanciyangngé Puwangnge lao ri umma Israéliéro pura nabbéréyanni Musa lao ri kaluwarga-kaluwargaé ri laleng suku Rubén, untu' mancaji tana appunnangenna. Daérana mennang nassanraiwi Aroér (ri wirinna Lompo Salo Arnon) sibawa kota ri tengnga-tengngana lompo'éro lettu risininna tanété tanré ri seddéna Médéba; makkuwatoro Hésybon sibawa sininna kotaé ri tanété tanréro, iyanaritu: Dibon, Bamot-Baal, Bét-Baal-Méon, Yahas, Kédémot, Méfaat, Kiryataim, Sibma, Zérét-Hasahar iya monroé ri tompo'na bulu-bulué ri lompo'éro, Bét-Péor, émpeng-ngémpenna Bulu Pisga, sibawa Bét-Yésimot. Muttama toni sininna kota ri tanété tanréro, sibawa sininna daéra akuwasanna Sihon, arunna bangsa Amorié, iya malaé tudangeng ri Hésybon. Aléna sibawa panguwasa-panguwasa Midiangngé, iyanaritu: Ewi, Rékém, Zur, Hur sibawa Réba, purani ricau ri Musa. Sininna panguwasaéro purai naparénta wanuwaéro untu' Arung Sihon. Ri yelle'na sining tau iya naunoé bangsa Israélié engka towi Biléam ana' Béor, si pabotoé. Salo Yordan mancaji pakkaséséng bagiyang yajanna daéra suku Rubén. Iyanaro kota-kota sibawa désa-désa iya riyabbéréyangngé lao ri kaluwarga-kaluwargaé ri laleng suku Rubén untu' mancaji tana appunnangenna mennang. Sibagiyang polé ri tana iya najjanciyangngé Puwangnge lao ri umma Israéliéro pura toni nabbéréyang Musa lao ri kaluwarga-kaluwargaé ri laleng suku Gad, untu' mancaji appunnangenna mennang. Daérana nassanraiwi Yaézer sibawa sininna kotaé ri Giléad enrengngé sitengngana polé ri daérana bangsa Amongngé narapi sibbéla Aroér ri seddé alauna Raba; daérana Hésybon lettu ri Ramat-Mizpa sibawa Batonim, enrengngé daérana Mahanaim lettu ri pakkasésénna Lodébar, iya manennaro muttama towi daéra untu' suku Gad. Ri Lompo Yordan, daérana suku Gadro nassanraiwi Bét-Haram, Bét-Nimra, Sukot, sibawa Zafon, iyanaritu sésana daéra akuwasanna Arung Sihon ri Hésybon. Pakkaséséng bagiyang yajanna daérana suku Gadro iyanaritu Salo Yordan lettu sibbéla Tappareng Galiléa ri seddé manorang. Iyanaro kota-kota sibawa désa-désa iya riyabbéréyangngé lao ri kaluwarga-kaluwargaé ri laleng suku Gad untu' mancaji tana appunnangenna mennang. Sibagiyang polé ri tana iya najjanciyangngé Puwangnge lao ri umma Israéliéro pura toni nabbéréyang Musa lao ri kaluwarga-kaluwargaé ri laleng sitengngana polé ri suku Manasyé untu' mancaji appunnangenna mennang. Pakkasésénna daérana mennang lettu ri Mahanaim, muttama'ni sininna Basan – iyanaritu sininna daéra akuwasanna Og, arung Basan, sibawa iya ennetto pulona kampong-kampong Yair ri Basan. Muttama toni sitengngana daéra Giléad, enrengngé Asytarot sibawa Edréi, iyanaritu iya duwa ibukota daéra akuwasanna Arung Og ri Basan. Sininna daéraéro nabbéréyangngi lao ri sitengngana polé ri kaluwarga-kaluwarga wijanna Makhir, ana' Manasyé. Makkuwaniro Musa bagéi tanaé ri seddé alauna Yérikho ri liwenna Salo Yordan, wettunna engkai ri tanété mariyawana Moab. Iyakiya suku Léwié dé' nalolongeng tana muwi céddé polé ri Musa. Makkedai Musa lao ri mennang makkedaé bagiyang iya nabbéréyangngé lao ri mennang iyanaritu polé ri akkarobangeng-akkarobangeng iya riyakkasuwiyangengngé lao ri Puwang Allataalana Israélié. Iyaé mangoloé iyanaritu curitana passalenna pékkugi wanuwa Kanaan seddé yajanna Salo Yordan riyabbagé-bagéyang ri yelle'na umma Israélié. Iya bagé-bagééngngi iyaro tanaé lao ri umma Israélié iyanaritu Imang Eléazar, Yosua ana' Nun, sibawa kapala-kapala kaluwargaé ri laleng suku-suku bangsa Israélié. Pada-pada iya pura napparéntangngé Puwangnge lao ri Musa, daéra-daéra seddé yajanna Salo Yordan iya ripattentué untu' aséra sitengnga suku bangsa Israélié, harusu'i ribagé-bagé naolai loteréi. Makkuwaniro umma Israélié bagé-bagéi iyaro tanaé situru sibawa iya puraé napparéntang Puwangnge lao ri Musa. Riséuwaé esso sining tau polé ri suku Yéhuda poléi méwai sita Yosua ri Gilgal. Sala séddinna polé ri mennang iyanaritu Kaléb ana' Yéfune, tau Kénas, makkedai, “Yosua! Muwisseng aga iya napowadaé Puwangnge lao ri Musa, surona Allataalaro, ri Kadés-Barnéa passalenna iko sibawa iyya. Umuru'ku patappulo taung wettunna Musa, atanna Puwang -ngéro, suroka polé ri Kadés-Barnéa selaku mata-mata untu' salidikiwi wanuwaéwé. Sibawa lisuka ri aléna tiwi laporang iya tongengngé. Sining tau iya uwéwaé silaong lao, naébbui tau Israélié métau. Iyakiya iyya tette'ka matinulu turusiwi Puwang Allataalaku. Narimakkuwannanaro, najjanciyangngi Musa makkedaé tana iya ujalajja'é iyanaritu pasti riwérékka matu sibawa ana'-ana'ku mancaji appunnangetta untu' mannennungeng. Makkekkuwangngé patappuloni lima taunna sipongenna napowada Puwangnge gau'éro lao ri Musa. Iyaro kajajiyangngi wettunna bangsa Israélié mattengngang sollé ri padang kessi'é. Napada-pada iya puraé najjanciyang Puwangnge, Puwang -ngétto pura linrungika angkakku tette tuwo lettu makkekkuwangngé. Itai, makkekkuwangngé aruwani pulona lima taung umuru'ku, iyakiya mawatang mupa pada-pada wettunna Musa suroka. Mappunnai mupa cuku' awatangeng untu' mammusu iyaré'ga untu' pogau'i agi-agi. Rimakkuwannanaro, abbéréyanni makkekkuwangngé daéra bulué iya najjanciyangngé Puwangnge lao ri iyya wettunna iyya sibawa sining tau iya uwéwaé silaong lisu tiwi laporang. Iyaro wettué alému muto méngkalingai, makkedaé kuwaro engka bangsa-bangsa rassasa iya riyasengngé bangsa Enak. Monroi mennang ri laleng kota-kota battowa iya mattémbo'é. Naullé Puwangnge tulukka matu, angkakku uwulléi paddésu'i mennang, pada-pada iya napowadaé Puwangnge.” Nasitujuini Yosua Kaléb ana' Yéfune, nanawérénni kota Hébron mancaji tana appunnangenna. Lettu makkekkuwangngé iyaro kotaé mancaji mupi appunnangeng manana wija-wija Kaléb ana' Yéfune, tau Kénas éro, nasaba matinului sibawa naturusiwi Puwangnge, Allataalana Israélié. Riyolo Hébron riyasengngi kota Arba. (Arba iyanaritu tau iya kaminang battowaé polé ri yelle'na bangsa Enak-é.) Na amanna sibawa damé iyaro wanuwaé nasaba dé' narigangguna ri balié. Kaluwarga-kaluwarga suku Yéhuda tarimai bagiyang tana iya pakkasésénnaé iyanaritu: Ri seddé yattanna, iyaro daéraé mallebba'i narapi cappa kaminang yattang daéra padang kessi Zin ri pakkasésénna Edom; mappammulai ri cappa yattanna Tasi Maté, matteru liyattang molai émpeng bulué ri Akrabim lettu ri Zin. Nainappa molai yattanna Kadés-Barnéa, matteru molai Hézron, ménré ri Adar, nainappa bélo' mattuju ri Karka. Polé kuwaro matterusi lao ri Azmon, nainappa natuttung ana' saloé ri pakkasésénna Maséré, namaccappa ri Tasi Tengngaé. Makkuwaniro jori pakkaséséng seddé yattanna daéra untu' suku Yéhuda. Sibawa iyaro jori pakkaséséng seddé yattanna sininna wanuwanna Israélié. Ri seddé alau, pakkasésénna iyanaritu Tasi Maté, matteru limanorang lettu ti toddanna Salo Yordan. Ri seddé manorang, pakkasésénna mappammulai ri toddanna Salo Yordanro, ménré ri Bét-Hogla, nainappa matteru lao ri pakkasésénna Lompo Yordan. Polé kuwaro iyaro pakkaséséng manoranna lettu'i ri Batu Bohan (Bohan iyanaritu ana'na Rubén), nainappa matteru ri Lompo Asussangngé lettu ri Débir, nainappa bélo'si limanorang ri Gilgal ri onrong iya siyolongngé sibawa émpeng bulué ri Adumim seddé yattanna lompo'éro. Polé kuwaro matterusi lao ri mata uwai En-Sémes, nainappa lao ri En-Rogel, nainappa ménré lalo ri Lompo Hinom lao ri seddé yattanna bulu-bulué, naonroiyé Yérusalém, kotana tau Yébus-é. Polé kuwaro iyaro jori pakkaséséngngé mattujui ri tompo bulu-bulué ri seddé yajanna Lompo Hinom, ri cappa manoranna Lompo Réfaim, nainappa matteru ri mata uwai Mé-Néftoah, lettu ri kota-kota seddéna Bulu Efron. Polé kuwaro jori pakkasésénna iyaro daéraé bélo'i mattuju ri Baala (iyanaritu Kiryat-Yéarim), sibawa mattulilingiwi bagiyang yajanna Baala mattuju ri buluna Edom, nainappa matteru lao ri bagiyang manoranna Bulu Yéarim (iyanaritu Bulu Késalon), sibawa nonno ri Bét-Sémes, nainappa matteru ri Timna. Polé ri Timna, iyaro jori pakkaséséngngé mattujui ri seddé manoranna Bulu Ekron, nainappa bélo' ri Sikron, lalo ri Bulu Baala, matteru ri Yabneel, sibawa maccappa ri Tasi Tengnga, iya mancajiyé jori pakkaséséng seddé yajanna daéra suku Yéhuda. Ri lalenna daéraéro monroi sining tau polé ri kaluwarga-kaluwarga ri laleng suku Yéhuda. Situru paréntana Puwangnge lao ri Yosua, sibagiyang daéra Yéhuda riwéréngngi Kaléb ana' Yéfune polé ri suku Yéhuda. Riwéréngngi Hébron, iyanaritu kota appunnangenna Arba, ambo'na Enak. Wija-wijanna Enak iyanaritu tau Sésai, Ahiman sibawa Talmai. Napaddésu manengngi mennang Kaléb polé ri Hébron. Polé kuwaro laowi gasai sining tau iya monroé ri Débir. (Iyaro kotaé tarompoi riyolo selaku Kiryat-Séfer.) Adanna Kaléb, “Nigi-nigi mulléi sittaiwi Kiryat-Séfer, weddingngi kawing sibawa ana' makkunraikku, Akhsa.” Otniél, ana'na silessurenna Kaléb iya riyasengngé Kénas, sittaiwi kotaéro; nanabbéréyanni Kaléb Akhsa, ana'na, mancaji bainéna Otniél. Ri esso akawingenna mennang, Otniél dessa'i Akhsa kuwammengngi naéllau sikonrong tana polé ri ambo'na. Naléssona Akhsa polé ri kaleddé'na, nanakkutananni Kaléb ri aléna aga iya nacinnaiyé. Nappébali Akhsa, “Macinnaka siyagangngaré mata uwai, saba' tana iya nawéréngngékka ambo'ro monroi ri tana iya marakkoé.” Nariwérénna ri Kaléb mata uwai ri bagiyang ulunna sibawa mata uwai ri bagiyang toddanna. Iyaé mangoloé iyanaritu tana iya riyabbéréyangngé lao ri kaluwarga-kaluwargaé ri laleng suku Yéhuda untu' mancaji appunnangenna. Makkuwatoro Ekron sibawa kota-kota baiccu'na enrengngé désa-désana, enrengngé sininna kotaé sibawa désaé ri seddéna Asdod, polé ri Ekron lettu ri Tasi Tengngaé. Makkuwatoro Asdod nenniya Gaza enrengngé kota-kota baiccu'na sibawa désa-désana iya tattale'é lettu ri seddéna ana' saloé ri pakkasésénna Maséré sibawa wirinna Tasi Tengngaé. Makkuwatoro iya duwa kota mangoloéwé silaong désa-désaé ri seddéna: Kota Kiryat-Baal (iyanaritu Kiryat-Yéarim) sibawa Kota Raba. Kota Yérusalém muttama toni appunnangenna Yéhuda, iyakiya tau Yéhudaé dé' naulléi paddésu'i tau Yébus-é iya monroé kuwaro. Lettu makkekkuwangngé tau Yébus-é monro mupi silaong tau Yéhudaé ri kotaéro. Jori-jori pakkasésénna tana iya rijello'é untu' wija-wijanna Yusuf, mappammulai ri Salo Yordan seddéna Yérikho, seddé alauna mata-mata uwaina Yérikho lettu ri padang kessi'é. Polé ri Yérikho, iyaro jorié ménré'i lettu ri Bétel ri daéra bulué. Polé ri Bétel, iyaro jorié mattujui ri Lus, lalo Atarot, iyanaritu onronna tau Arkié. Polé kuwaro iyaro jorié mattujui lao ri yajang daérana appanna Yaflét, lettu ri Bét-Horon-Toddang, matteru ri Gézer, nainappa maccappa ri Tasi Tengngaé. Iyanaro daéra iya riwéréngngéngngi suku Manasyé sibawa Efraim, wija-wijanna Yusuf, untu' mancaji tana appunnangenna mennang. Mangoloéwé iyanaritu pakkasésénna tana iya riyabbéréyangngé lao ri kaluwarga-kaluwargaé ri laleng suku Efraim. Ri seddé alauna, jori pakkaséséng tanana mennang mappammulai ri Atarot-Adar lettu ri Bét-Horon-Yulu, nainappa matteru ri Tasi Tengngaé. Mikhmétat engkai ri seddé manoranna. Ri seddé alauna, iyaro jori pakkaséséngngé bélo'i mattuju ri Taanat-Silo, nainappa nalaloi polé ri seddé alau mattuju ri Yanoah. Polé kuwaro iyaro jorié nonno ri Atarot sibawa Naharat, nainappa matteru natuttung Yérikho sibawa maccappa ri Salo Yordan. Ri seddé yajang, jori pakkasésénna iyaro Efraim mappammulai ri Tapuah lettu ri ana' Salo Kana, nainappa maccappa ri Tasi Tengngaé. Iyanaro tana iya riwéréngngéngngi kaluwarga-kaluwarga polé ri suku Efraim, untu' mancaji appunnangenna mennang, muttama'ni siyagangngaré kota-kota baiccu sibawa désa iya monroé ri laleng daérana Manasyé. Iyakiya suku Efraim dé' napaddésu'i tau Kanaangngé polé ri daéra Gézer. Iyanaro saba'na lettu makkekkuwangngé monro mupi tau Kanaangngé ri Gézer silaong tau Efraingngé, iyakiya ripassai mennang majjama selaku ata untu' tau Efraingngé. Sibagiyang daéraé ri seddé yajanna Salo Yordan riyabbéréngngi lao ri sibagiyang kaluwarga-kaluwarga wijanna Manasyé, ana' macowana Yusuf. Makhir, ambo'na Giléad, iyanaritu ana' macowana Manasyé. Nasaba séddiwi pejuwang, na daéra Giléad sibawa Basan iya engkaé ri seddé alauna Salo Yordan riyabbéréyangngi lao ri aléna. Daéra seddé yajanna Salo Yordan riyabbéréyangngi lao ri kaluwarga-kaluwarga laingngé polé ri wija-wijanna Manasyé, iyanaritu kaluwarga: Abiézer, Hélék, Asriél, Sékhem, Héfer sibawa Sémida; iya manennaro wija-wija worowanéna polé ri Manasyé ana'na Yusuf. Mennang iyanaritu kapala-kapala kaluwarga. Zélaféhad, ana' Héfer, eppona Giléad (Giléad iyanaritu ana'na Makhir, eppona Manasyé), dé' nappunnai ana' worowané, banna ana' makkunrai, iyanaritu: Makhla, Noa, Hogla, Milka sibawa Tirza. Laowi mennang ri Imang Eléazar, Yosua ana' Nun, nenniya sining pamimpingngé sibawa makkeda, “ Puwangnge makkeda lao ri Musa makkedaé idi harusu tokki pada mallolongeng tana pada-pada silessu-silessuretta iya worowané.” Rimakkuwannanaro, situru sibawa paréntana Puwangnge, iyaro ana'-ana' makkunrainna Zélaféhad riwérénni tana silaong sibawa silessu-silessurenna mennang iya worowané. Jori-jori pakkasésénna daérana suku Manasyé mappammulai polé ri Asyer lao ri Mikhmétat ri seddé alauna Sikhem. Polé kuwaro iyaro jorié nonnoi liyattang lettu ri daéra appanna En-Tapuah. Daéra Tapuah iyanaritu appunnangenna suku Manasyé, iyakiya kota Tapuah ri pakkaséséngngé, iyanaritu appunnangenna wija-wijanna Efraim. Nainappa iyaro jori pakkasésénna daérana Manasyé nonnoi lettu ri ana' Salo Kana. Kota-kotaé ri seddé yattanna ana' saloéro iyanaritu appunnangenna Efraim, namuni engkai ri laleng daérana Manasyé. Jori pakkasésénna iyaro daérana Manasyé naccowériwi lalengngé ri seddé manoranna ana' saloéro, nainappa maccappa ri Tasi Tengngaé. Makkuwaniro Efraim engkai ri seddé yattang, na Manasyé ri seddé manorang, sibawa Tasi Tengngaé iyanaritu pakkasésénna mennang ri seddé yajang. Ri seddé yajang manoranna, daérana suku Manasyéro makkaséséngngi sibawa daérana Asyer, sibawa ri seddé alau manorang, makkaséséngngi sibawa daérana Isakhar. Ri laleng daérana Isakhar sibawa Asyer engka tana-tana appunnangenna Manasyé, iyanaritu: Bét-Séan nenniya Yibléam sibawa désa-désaé ri seddéna. Makkuwatoro: Dor (kota iya monroé ri wiring tasi'é), En-Dor, Taanakh, Mégido sibawa désa-désaé ri seddéna. Iyakiya suku Manasyé dé' naulléi paddésu'i pabbanuwana kota-kotaéro; iyanaro saba'na tau Kanaangngé tette mupi monro kuwaro. Mala ri munri lebbi mawatannana tau Israélié, dé' mennang napaddésu manengngi tau Kanaangngé; banna mennang napassai sining tauwéro majjama untu' mennang. Makkedai wija-wijanna Yusuf lao ri Yosua, “Magi nabanna séddi bagiyang bawang tana riwérékki, padahal maéga senna'ki idi, nasaba Puwangnge pura barakkakiki?” Nappébali Yosua, “Nasaba maéga senna'ko, na daéra buluna Efraim macipi senna untu' iko, laono ri daérana tau Féris-é sibawa Réfaingngé. Bukkano onrong-ngonrong mabarué ri alekale'na mennanro.” Nappébali wija-wijanna Yusuf, “Iyaro daéra bulué dé' nagenne lowanna untu' idi, na bangsa Kanaangngé iya monroé ri tanété-tanété mariyawaé mappunnai karéta-karéta musu polé ri bessié muwi mennang iya monroé ri Bét-Séan sibawa désa-désaé ri seddéna, muwi mennang iya monroé ri Lompo Yizreel.” Nakkeda Yosua lao ri suku Efraim sibawa Manasyé yajangngéro, “Tongeng, maéga senna'ko enrengngé mawatang, sibawa sitinaja riwéréng lebbi naiya séddi bagiyang tana. Alani daéra bulué, saba' namuni iyaro daéraé ale' mupi, muwulléi bukkai iyaro daéraé sibawa mappunnai manengngi. Na passalenna sining tau Kanaangngéro, mulléi paddésu'i mennang, namuni mawatangngi mennang sibawa mappunnai karéta-karéta polé ri bessié.” Nacaunana wanuwa iya najjanciyangngé Puwangnge, maddeppungeng manenni umma Israélié ri Silo, nainappa patettong mennang Kéma Ahadérékenna Puwangnge. Engka mupa pitu suku bangsa Israél iya dé'é natarima tawa tana. Jaji, makkedani Yosua lao ri umma Israélié, “Maélokoga mattajeng gangka kégi, nappa lao tudangiwi daéra iya nabbéréyangngé Puwangnge, Allataalana toriyolomu, lao ri iko? Piléno tellu tau polé ri tungke-tungke suku. Maéloka suroi mennang tiroi sininna wanuwaéwé untu' mokii sining pakkasésénna daéra iya nacinnaiyé mennang nappunnai. Purairo, harusu'i mennang lisu ri iyya. Iyaro tanaé harusu'i natawa mancaji pitu bagiyang. Yéhuda tette'i matu ri daérana ri bagiyang yattang, sibawa Yusuf ri daérana ri manorang. Gambara'na pakkasésénna iya pitu bagiyanna tanaéro harusu'i riyébbu, sibawa riyabbéréyang lao ri iyya. Uloteréipi matti untu' missengngi aga iya napattentungengngékko Allataala. Banna suku Léwié dé' natarima matu bagiyang tana silaong iko, nasaba bagiyanna mennang iyanaritu mancajiwi imang-ngimang untu' tumaningiwi Puwangnge. Napassalenna suku Gad, Rubén sibawa sibagiyang suku Manasyé mémeng pura natarimani bagiyanna ri seddé alauna Salo Yordan. Musa, atanna Puwangnge, pura mpéréngngi tanaéro lao ri mennang.” Nanabbéréyanni Yosua panunju-panunju mangoloéwé lao risining tauwéro, “Laono tiroi sininna wanuwaéwé sibawa ébburenni gambara sining pakkasésénna; nainappa lao paimeng ri iyya. Uloteréipi matti kuwaé ri Silo untu' missengngi aga iya napattentungengngékko Puwangnge.” Puranana natarima sining panunju'éro polé ri Yosua, laoni mennang tiroi iyaro tanaé. Najalajja'ni mennang sininna wanuwaéro, nanaokii sining pakkasésénna iya pitu bagiyang tanaéro enrengngé nadaftar towi kota-kota iya engkaé ri lalenna. Nainappa mennang lisu lao ri Yosua ri akkémangngé ri Silo. Nainappa naloteréi Yosua untu' missengngi aga iya napattentué Puwangnge untu' mennang. Puranaro nabbéréyanni Yosua bagiyang tanaé lao ri tungke suku bangsa Israélié iya dé'eppa nakabagéyang tana. Attawangeng mammulangngé iyanaritu tana untu' kaluwarga-kaluwarga ri laleng suku Bényamin. Tawana mennanro monroi ri yelle'na tanana suku Yéhuda sibawa tanana suku wija-wijanna Yusuf. Ri seddé manoranna, pakkaséséng-pakkaséséng tanana mennang mappammulai ri Salo Yordan, nainappa ménré ri émpeng seddé manoranna Yérikho, nainappa liyajang laloiwi daéra bulué lettu sibbéla daéra padang kessi Bét-Awén. Iyaro jori pakkaséséngngé matterui towi lao ri émpeng seddé yattanna Lus (iya lebbi riissengngé selaku Bétel), nainappa nonno ri Atarot-Adar ri bulu seddé yattanna Bét-Horon-Toddang. Polé ri seddé yajanna buluéro, iyaro jori pakkasésénna tanaé bélo'i liyattang mattuju ri Kiryat-Baal (iyanaritu Kiryat-Yéarim). Kiryat-Baal iyanaritu appunnangenna suku Yéhuda. Iyanaro jori pakkasésénna tanaéro ri seddé yajang. Pakkaséséng-pakkasésénna ri seddé yattang mappammulai ri wirinna Kiryat-Yéarim matteru lao ri mata-mata uwai Mé-Néftoah, nainappa nonno ri pong bulué iya siyolongngé sibawa Lompo Hinom ri cappa manoranna Lompo Réfaim. Purairo iyaro jori pakkaséséngngé liyattangngi lalo ri Lompo Hinom seddé yattanna émpeng-ngémpeng bulué ri wanuwa Yébus, matteru mattuju ri En-Rogel, bélo'i limanorang ri En-Sémes, nainappa lao ri Gelilot ri liwenna Tuppung Adumim. Purairo iyaro jori pakkaséséngngé nonnoi ri Batu Bohan (Bohan iyanaritu ana'na Rubén), nainappa lalo ri seddé manoranna émpeng-ngémpeng bulué iya siyolongngé sibawa Lompo Yordan, nainappa nonno ri lompo'éro, lalo ri manoranna émpeng-ngémpenna bulu Bét-Hogla, sibawa maccappa ri bagiyang manoranna Tasi Maté ri onronna Salo Yordan mattoddang. Iyanaro pakkaséséng bagiyang yattanna. Salo Yordan mancaji pakkaséséng seddé alauna. Makkuwaniro sining pakkasésénna tana iya riyabbéréyangngé lao ri kaluwarga-kaluwargaé ri laleng suku Bényamin untu' mancaji appunnangenna mennang. Attawangeng maduwaé iyanaritu untu' kaluwarga-kaluwargaé ri laleng suku Siméon. Pakkaséséng tanana mennang muttama'i lettu ri laleng pakkaséséng tana appunnangenna suku Yéhuda. Makkuwatoro eppa kota mangoloéwé sibawa désa-désaé ri seddéna: Ain, Rimon, Eter sibawa Asan. Muttama toni sininna désa mattulilinna kota-kotaéro lettu sibbéla Baalat-Beer (iyanaritu Rama) ri tana seddé yattang. Iyanaro tana iya riyabbéréyangngé lao ri kaluwarga-kaluwarga polé ri suku Siméon untu' mancaji appunnangenna mennang. Nasaba tana untu' suku Yéhuda malowang senna, sibagiyang polé ri tanaéro riyabbéréyangngi lao ri suku Siméon. Attawangeng matellué iyanaritu untu' kaluwarga-kaluwargaé ri laleng suku Zébulon. Pakkasésénna tana iya riyabbéréyangngé lao ri mennang lettu ri Sarid. Polé ri Sarid, jori pakkaséséng seddé yajanna mattujui ri Marala, nainappa nagéssa Dabését sibawa ana' saloé ri seddé alauna Yoknéam. Jori pakkasésénna seddé alau mappammulai ri Sarid mattuju ri pakkasésénna Khislot-Tabor, matteru ri Dobrat, nainappa ménré ri Yafia. Polé kuwaro iyaro jori pakkaséséngngé matterui lilau ri Gat-Héfer sibawa Et-Kazin, nainappa bélo' lao ri Néa mattuju ri Rimon. Ri seddé manorang, pakkasésénna iyaro tanaé bélo'i lao ri Hanaton sibawa maccappa ri Lompo Yiftah-El. Ri laleng daérana iyaro suku Zébulon muttama towi: Katat, Nahalal, Simron, Yidala sibawa Bétléhém. Daérana mennanro nassanraiwi seppulo duwa kota sibawa désa-désaé ri seddéna. Kota-kota sibawa désa-désanaro engkai ri laleng daéra iya riyabbéréyangngé lao ri kaluwarga-kaluwargaé ri laleng suku Zébulon untu' mancaji tana appunnangenna mennang. Attawangeng maeppaé iyanaritu tana untu' kaluwarga-kaluwargaé ri laleng suku Isakhar. Ri laleng daérana mennang muttama'ni: Yizreel, Khésulot, Sunem, Hafaraim, Sion, Anaharat, Rabit, Kisyon, Ebes, Rémét, En-Ganim, En-Hada sibawa Bét-Pazes. Pakkaséséng tanana mennang nagéssai Tabor, Sahazima, Bét-Sémes, nainappa maccappa ri Salo Yordan. Daérana mennanro nassanraiwi seppulo enneng kota sibawa désa-désaé ri seddéna. Iyaro kota-kotaé sibawa désa-désana engkai ri laleng daéra iya riyabbéréyangngé lao ri kaluwarga-kaluwargaé ri laleng suku Isakhar untu' mancaji tana appunnangenna mennang. Attawangeng malimaé iyanaritu tana untu' kaluwarga-kaluwargaé ri laleng suku Asyer. Daérana mennang nassanraiwi: Hélkat, Hali, Béten, Akhsaf, Alamélékh, Amad, sibawa Misal. Pakkaséséng tanana mennang ri seddé yajang nagéssai Bulu Karmél sibawa Salo Libnat. Polé kuwaro jori pakkasésénna mennanro bélo'i lilau lao ri Bét-Dagon nainappa nagéssa pakkasésénna Zébulon sibawa Yiftah-El mattuju limanorang ri Bét-Emék sibawa Néhiél. Nainappa iyaro jori pakkaséséngngé matterui mattuju limanorang ri Kabul, Ebron, Réhob, Hamon, sibawa Kana, lettu sibbéla Sidon. Polé kuwaro iyaro jori pakkaséséngngé bélo'i lao ri Rama matteru lettu ri kota Tirus, iyanaritu séddi kota iya mabbénténgngé; nainappa iyaro jori pakkaséséngngé bélo'i lao ri Hosa nainappa maccappa ri Tasi Tengngaé. Ri laleng pakkaséséng-pakkaséséngngéro muttama'ni Mahalab, Akhzib, Uma, Afék, sibawa Réhob. Sininna daérana mennang nassanraiwi duwappulo duwa kota sibawa désa-désaé ri seddéna. Iyaro kota-kotaé sibawa désa-désana engkai ri laleng daéra iya riyabbéréyangngé lao ri kaluwarga-kaluwargaé ri laleng suku Asyer untu' mancaji tana appunnangenna mennang. Attawang maennengngé iyanaritu tana untu' kaluwarga-kaluwargaé ri laleng suku Naftali. Pakkaséséng tanana mennang mappammulai polé ri Héléf, lettu ri pong ék ri Zaanaim, matteru ri Adami-Nékeb, nainappa lao ri Yabneel, lettu ri Lakum, namaccappa ri Salo Yordan. Polé kuwaro jori pakkasésénna iyaro tanaé bélo'i liyajang ri Aznot-Tabor, sibawa polé kuwaro lao ri Hukok. Ri seddé yattang, iyaé daéraé makkaséséngngi sibawa daéra Zébulon, ri seddé yajang sibawa Asyer, enrengngé ri seddé alau sibawa Salo Yordan. Kota-kota iya mabbénténgngé iyanaritu: Zidim, Zér, Hamat, Rakat, Kinérét, Adama, Rama, Hazor, Kédés, Edréi, En-Hazor, Yiron, Migdal-El, Horém, Bét-Anat, sibawa Bét-Sémes. Sininna daérana mennang engka seppulo aséra kota sibawa désa-désa ri seddéna. Iyaro kota-kotaé sibawa désa-désana engkai ri laleng daéra iya riyabbéréyangngé lao ri kaluwarga-kaluwargaé ri laleng suku Naftali untu' mancaji tana appunnangenna mennang. Attawang mapitué iyanaritu tana untu' kaluwarga-kaluwargaé ri laleng suku Dan. Daérana mennang nassanraiwi Zora, Esytaol, Ir-Sémes, Saalabin, Ayalon, Yitla, Elon, Timna, Ekron, Eltéké, Gibeton, Baalat, Yéhud, Benébérak, Gat-Rimon, Mé-Yarkon, Rakon sibawa daéraé ri seddéna Yopé. Sining tau suku Dan ateddéngengngi sibagiyang polé ri daérana mennang, jaji laowi mennang ri Lésem sibawa gasai iyaro kotaé. Nasittaini mennang, naunoi pabbanuwana, sibawa natudangiwi kotaéro. Naonrona mennang kuwaro sibawa palétté'i asenna kota Lésem mancaji kota Dan, situru asenna toriyolona mennang. Iyaro kota-kotaé sibawa désa-désana engkai ri laleng daéra iya riyabbéréyangngé lao ri kaluwarga-kaluwargaé ri laleng suku Dan untu' mancaji appunnangenna mennang. Purana natawa-tawa umma Israélié tanaé ri wanuwaéro, nawérénni mennang Yosua ana' Nun sibawagiyang tana untu' mancaji tana appunnangenna mennang. Pada-pada iya pura napparéntangngé Puwangnge, nabbéréyangngi mennang lao ri aléna kota iya naéllauwé, iyanaritu Timnat-Sérah ri buluna Efraim. Napatettonni paimeng Yosua iyaro kotaé, nainappa monro kuwaro. Makkuwaniro Imang Eléazar, Yosua ana' Nun sibawa sining kapala kaluwargaé ri laleng suku-suku bangsa Israélié tawa-tawai tanaé ri wanuwaéro sibawa loteréiwi untu' méllau panunju polé ri Puwangnge. Napogau'i mennang iyaro ri Silo ri yolona sumpang Kémana Puwangnge. Purani attawangeng tanaéro. Narisurona Yosua ri Puwangnge makkeda makkuwaé lao ri tau Israélié, “Purai Uparéntang Musa kuwammengngi napaissengiko passalenna kota-kota allinrungengngé, iyanaritu kota-kota iya weddingngé nalaringi tauwé untu' lolongeng allinrungeng. Makkekkuwangngé piléni kota-kotaéro. Tau iya mpunoéngngi tau laingngé sibawa dé' nattungkaiwi, weddingngi lari lao ri kotaéro untu' leppe polé ri tau iya maéloé makkabale ri aléna. Weddingngi lari lao ri sala séddinna polé ri kota-kotaéro, sibawa lao ri onrong angadélékengngé ri pintu gerbanna kotaéro, nainappa napakatajang lao risining pamimpingngé kuwaro aga iya puraé kajajiyang. Iyaro sining pamimpingngé palaloi matu muttamakiwi kotaéro, sibawa mpéréngngi onrong untu' monro. Rékko tau iya maéloéro makkabale lellungngi lettu kuwaro, pabbanuwana iyaro kotaé dé' nawedding mabbéréyangngi lao ri tauwéro. Harusu'i mennang linrungiwi, saba' naunoi tauwé dé' nattungkaiwi, sibawa tenniya nasaba nabenciwi. Weddingngi monro ri kotaéro narapi pura riadéléki ri yolona tau maégaé, sibawa narapi tau iya mancajiyé Imang Lompo wettuéro maté. Purapiro nappa iyaro tauwé wedding lisu ri kampong assalenna polé kégiwi lari.” Napattentuni umma Israélié ri daéra seddé yajanna Salo Yordan kota-kota mangoloéwé selaku kota allinrungeng: Kédés ri buluna Naftali ri Galiléa, Sikhem ri buluna Efraim, sibawa Hébron ri buluna Yéhuda. Ri daéra alauna Salo Yordan ri tanété tanré ri padang kessi'é seddé alauna Yérikho, napattentuni mennang kota-kota mangoloéwé selaku kota-kota allinrungeng: kota Bézer ri daérana Rubén, kota Ramot ri Giléad ri daérana Gad, sibawa kota Golan ri Basan, daérana Manasyé. Iya manennaro kota-kota allinrungeng iya ripattentué untu' sininna umma Israélié sibawa untu' tungke tau laing iya monroé ri tengnga-tengngana mennang. Tungke tau iya mpunoéngngi tau laingngé sibawa dé' nattungkaiwi, weddingngi lolongeng allinrungeng ri kota-kotaéro polé ri allellungenna tau maéloé makkabale ri aléna; dé' nawedding riyuno rékko dé'pa nariadéléki ri yolona tau maégaé. Naccowérini tau Israélié paréntana Puwangnge. Polé ri tana appunnangeng aléna mennang, nawérénni tau Léwié kota-kota mattentué sibawa tana-tana padanna. Iya bunge-bunge'é tarimai kota-kotana iyanaritu kaluwarga-kaluwarga polé ri appanna Kéhat ri laleng suku Léwi. Kaluwarga-kaluwarga wija-wijanna Imang Harun riwéréngngi seppulo tellu kota polé ri daérana suku Yéhuda, Siméon sibawa Bényamin. Kaluwarga-kaluwarga laingngé polé ri appanna Kéhat riwéréngngi seppulo kota polé ri daérana suku Efraim, suku Dan sibawa suku Manasyé ri seddé yajanna Salo Yordan. Appanna Gérson lolongengngi seppulo tellu kota polé ri daérana suku Isakhar, Asyer, Naftali sibawa suku Manasyé iya ri seddé alaunaé Salo Yordan. Kaluwarga-kaluwarga polé ri appanna Mérari lolongengngi seppulo duwa kota polé ri daérana Rubén, Gad sibawa Zébulon. Makkuwaniro bangsa Israélié tawa-tawai kota-kotaéro sibawa tana-tana padanna naolai loteréi lao ri tau Léwié, pada-pada iya napparéntangngé Puwangnge lao ri Musa. Makkuwaniro Puwangnge mabbéréyangngi lao ri umma Israélié sininna tana iya puraé Najjanciyang sibawa tanro lao ri néné-nénéna mennang. Puranana natudangi wanuwaéro mattette'ni umma Israélié kuwaro. Nasituru sibawa aga iya najjanciyangngé Puwangnge lao ri néné-nénéna mennang, iyaro wanuwaé amangngi nasaba nalinrungiwi Puwangnge. Sining balinna mennang dé' muwi séddi mulléi méwai mennang, saba' Puwangnge mpéréngngi apakalang lao ri tau Israélié polé ri sininna balinna. Narupaiwi Puwangnge tungke jancin-Na lao ri umma Israélié; dé' muwi séddi iya dé'é Narupaiwi. Nanaobbini Yosua sining tau polé ri suku Rubén, Gad sibawa sibagiyang suku Manasyé iya ri seddé alauna Salo Yordan, nainappa makkeda lao ri mennang, “Purani mupogau' sininna séuwa-séuwaé iya riparéntangngékko polé ri Musa, atanna Puwang -ngéro. Sibawa pura toni muturusi sininna paréntaku. Lettu makkekkuwangngé dé'pa naengka muleppessangngi saudara-saudaramu, tau Israél laingngé, mamusu alé-alé. Purani muturusi parénta-paréntana Puwang Allataalamu sibawa mattonget-tongeng. Nasituru sibawa jancin-Na, Puwang Allataalamu pura mabbéréyang atennangeng lao ri saudara-saudaramu, tau Israél laingngé. Jaji, makkekkuwangngé lisuno ri daéramu ri seddé alauna Salo Yordanro iya nawéréngngékko Musa riyolo. Sibawa jagaiwi kuwammengngi muturusiwi hukkung iya napparéntangngé Musa lao ri iko, iyanaritu: Amaséiwi Puwang Allataalamu, accowériwi élo-Na, turusiwi sining parénta-Na, atinuluno ri Aléna sibawa attumanino ri Aléna sibawa sissukku atimmu sibawa sukku nyawamu.” Wettunna suku Rubén, Gad sibawa suku Manasyé ri alaunaé Yordanro lettu ri Gelilot – ri seddé yajanna mupi Salo Yordan – patettongngi mennang séddi mézba iya battowaé sibawa magelloé ri seddéna saloé. Nainappa Pinéhas, ana'na Imang Eléazar, risuro ri umma Israélié lao ri suku Rubén, Gad sibawa suku Manasyé ri daéra Giléad ri alauna Yordan. Nasibawang Pinéhas lao towi seppulo tomariyolona bangsa Israélié, – séddi tau polé ri tungke suku ri seddé yajanna Salo Yordan, tungke-tungke iyanaritu kapala kaluwargaé ri laleng appanna mennang. Nalettu'na mennang ri onronna suku Rubén, Gad sibawa suku Manasyé ri daéra Giléad. Nainappa ri laleng asenna sininna umma'na Puwangnge, makkedai mennang lao risining tau polé ri suku Rubén, Gad sibawa suku Manasyéro, “Magi mupogau'i gau' iya majaéwé lao ri Allataalana Israélié? Sibawa patettongngi mézbamu muto, muéwai Puwangnge! Dé'na muturusiwi parénta-parénta-Na! Dé'ga muwéngngerangngi dosata ri Péor? Iyaro wettué nahukkukki Puwangnge sibawa séuwa sai, namuni idi'é umma'-Na muto! Lettu makkekkuwangngé tatanggung mupi addimonrinna. Aga iyaro dé'topa nagenne? Na makkekkuwangngé, aga maélosikoga mabbokoriwi Puwangnge? Rékko iyaé essoé muéwai Puwangnge, macayii matu baja lao risininna umma Israélié. Rékko najisi'i iyaro daéramu sibawa dé' nasipato untu' ripancaji onrong assompang lao ri Puwangnge, létté bawanno mai ri daérana Puwangnge, kégi engka Kémana Puwangnge. Ellauni sibagiyang daérata, iyakiya aja' muéwai Puwangnge iyaré'ga muéwaki ri laleng mutambainna séddi mézba laing, na engkana mézbana Puwang Allataalata. Engngerangngi, Akhan ana' Zérah dé' namaélo turusiwi paréntana Puwangnge passalenna barab-barang iya harusu'é riancuru, na agana addimonrinna? Sininna umma Israélié rihukkung! Iya madosaé banna Akhan, iyakiya iya maté tenniya aléna bawang!” Nainappa sining tau suku Rubén, Gad sibawa Manasyé ri seddé alauro mappébali, “Iya Pommakuwasaé iyanaritu Puwangnge! Iya Pommakuwasaé iyanaritu Puwangnge! Naisseng magi tapogau'i gau'éwé, namaéloki kuwammengngi muwisseng towi! Akkalarapanna tapogau'i gau'éro sibawa akkatta méwai Puwangnge iyaré'ga nasaba dé'na tamateppe ri Aléna, leppessakki maté makkekkuwangngétto! Aléna Puwangnge hukkukki, rékko makkattaki méwai Puwangnge sibawa patettongngi mézbata untu' makkasuwiyangengngi akkarobangeng ritunué iyaré'ga akkarobangeng gandongngé iyaré'ga akkarobangeng assisellaongengngé ri yasé'na. Tenniya iyaro akkattata, Saudara-saudara! Ripatettongngi iyaro mézbaé, nasaba bata-bataki matti rimunri makkedai matu wija-wijammu lao ri wija-wijatta, ‘Iko dé' aga-aga muwappunnai assisumpungeng sibawa Puwangnge, Allataalana Israélié! Itai, Nataroi iyaé Salo Yordan ri tengnga-tengngata mala untu' sawakki sibawa iko sining tau Rubéngngé sibawa Gad-é. Tongeng iko dé' muwappunnai assisumpungeng aga-aga sibawa Puwangnge.’ Na agana kajajiyang matti? Tentuni wija-wijammu naébbui matu wija-wijatta mappésau massompa lao ri Puwangnge. Jaji, patettokki mézba, tenniya untu' akkarobangeng ritunu iyaré'ga untu' sining pakkasuwiyatta, iyakiya untu' mancaji tanrang ri idi duwa sibawa wija-wijatta rimunri, makkedaé tongeng idi'é massompaki lao ri Puwangnge ri Kéma Ahadéréken-Na sibawa tiwi akkarobangeng ritunu, pakkasuwiyang-pakkasuwiyang sibawa akkarobangeng assisellaongeng. Nanallalengiro dé' nakkeda matu wija-wijammu makkedaé wija-wijatta dé' nappunnai assisumpungeng sibawa Puwangnge. Jaji, akkattata iyanaritu: akkalarapanna wija-wijammu makkeda makkuwairo, wija-wijatta weddingngi makkeda, ‘Itani mézbaéro! Néné-nénéta patettongngi séddi mézba iya pada-padaé sibawa mézbana Puwangnge, tenniya untu' akkarobangeng ritunu iyaré'ga untu' pakkasuwiyang, iyakiya untu' mancaji tanrang ri idi, sipadduwa.’ Ateppe'no, dé' tamaélo méwai Puwangnge iyaré'ga mappésau mattumani ri Aléna sibawa tambaiwi mézba laingngé untu' akkarobangeng ritunu iyaré'ga akkarobangeng gandong iyaré'ga untu' pakkasuwiyang, na mézbana Puwang Allataalata engkana ri yolona Kéma Ahadérékenna Puwangnge.” Sininna iya napakatajangngé sining tau polé ri suku Rubén, Gad sibawa suku Manasyé ri seddé alauro naéngkalingani Imang Pinéhas silaong iya seppulo tomariyolona masaraka Israél polé ri yajanna Salo Yordan. Namasennanna sibawa pappakatajangngéro. Nanakkeda Pinéhas, ana'na Imang Eléazar, lao risining tau suku Rubén, Gad sibawa Manasyé Alaué, “Riissenni makkekkuwangngé Puwangnge sibawakki, nasaba dé' muéwai Aléna. Purani mupassalama umma Israélié polé ri pahukkungenna Puwangnge.” Purairo joppani Pinéhas sibawa sining tomariyolona Israéliéro. Nasalaini mennang sining tau Rubéngngé sibawa Gad-éro ri Giléad, nanalisu ri Kanaan, nanalaporo'i parakaraéro lao ri umma Israélié. Namasennang tona umma Israélié sibawa gau'éro, angkanna mennang napoji-poji Allataala. Dé'na mennang nabbicara passalenna niya'na untu' musui sining tau Rubéngngé sibawa Gad-é, sibawa untu' mancuru'i wanuwanna. Angkanna makkeda iyaro suku Rubén sibawa Gad, “Iyaé mézbaé mancajiwi sabbi untu' idi maneng makkedaé Puwangnge iyanaritu Allataala.” Nanasenni mennang iyaro mézbaé “Sabbi”. Maitta purana Puwangnge mpéréngngi atennangeng umma Israélié; dé'na mennang nariganggu ri ancamanna balié. Iyaro wettué macowa senna'ni Yosua. Nanaobbini sininna umma Israélié, makkuwatoro sining tomariyoloé, sining pamimpingngé, sining hakingngé, sibawa sining parawiraé, nanakkeda, “Makkekkuwangngé macowana. Purani muwita sininna séuwa-séuwaé iya napogau'é Puwang Allataalamu lao ri sininna bangsaé kuwaé untu' iko. Iya mammusurengngékko iyanaritu Puwang Allataalamu muto. Tanana bangsa-bangsaé iya monroé mupa, makkuwatoro tanana sininna bangsa iya ucauénna, iyanaritu tana iya mallebbangngé polé ri seddé alauna Salo Yordan matteru liyajang lettu ri Tasi Tengngaé, iya manennaro purani ubagéngeng untu' mancaji appunnangemmu. Puwang Allataalamu mébbui matu bangsa-bangsaéro soro, sibawa lari polé ri iko rékko laoko musui mennang. Muwappunnaiwi matu wanuwanna mennang, pada-pada iya pura najjanciyangngé Puwang Allataalamu lao ri iko. Rimakkuwannanaro, jagaiwi kuwammengngi muturusiwi sibawa pajoppai sininna iya tarokié ri laleng Kitta Hukkunna Musa. Aja' muwajjalékkaiwi muwi séddi polé ri hukkung-hukkungngéro. Nanallalengiwi dé'na matu musicampuru sibawa bangsa-bangsa iya monroé mupa ri yelle'mu. Dé' mumaélo teppui matu asenna déwata-déwatana iyaré'ga mattanro ri laleng asengngéro. Makkuwatoro dé' mumassompa iyaré'ga suju' lao ri déwata-déwataéro. Mala harusu'ko tette matinulu lao ri Puwangnge, pada-pada iya puraé mupogau' lettu makkekkuwangngé. Bangsa-bangsa iya battowaé sibawa iya mawatangngé purani napaddésukekko Puwangnge; dé' muwi séddi polé ri mennang iya mullééngngi tahang méwako. Tungke tau ri yelle'mu naulléi caui massebbu tau, nasaba Puwang Allataalamu iya mammusurengngékko, pada-pada iya pura Najjanciyangngé. Rimakkuwannanaro, éngngerangngi untu' mamaséiwi Puwang Allataalamu. Rékko dé' mumatinulu sibawa sicampuru'ko sibawa bangsa-bangsa iya monroé mupa ri yelle'mu, enrengngé kawikko sibawa mennang, éngngerangngi, pasti Puwang Allataalamu dé' namaélo paddésukenno iyaro bangsaé. Sibalé'na, mabbahaya senna'i matu untu' iko, saba' mancajiwi matu mennang pada-pada siyo-siyoé iyaré'ga jebba'é untu' iko. Naébbu tokko matu mennang mapeddi senna; saba' mancajiwi matu mennang pada-pada pabbabbaé ri lekke'mu iyaré'ga pada-pada dorié ri laleng matammu. Mapeddiko matu matteru-teru narapi dé' muwi séddi tau ri yelle'mu iya monroé ri wanuwa iya makessingngéwé iya nawéréngngékko Puwang Allataalamu. Makkekkuwangngé narapini wettunna matéka. Iko maneng, tungke-tungke missengngi makkedaé Puwang Allataalamu pura mpérékko sininna iya makessingngé iya Najjanciyangngé. Tungke jancin-Na purani Narupai, dé' muwi séddi iya dé'é. Iyakiya pékkugiwi rupaiwi tungke jancin-Na lao ri iko, makkuwatoro pasti Napogau'i tungke ancaman-Na lao ri iko. Rékko muwajjalékkaiwi assijancing iya puraé naparéntakko Puwang Allataalamu kuwammengngi nariturusi, na mulao massompa ri déwata-déwata laingngé enrengngé sompai déwata-déwataéro, macayii matu Puwangnge, sibawa hukkukko. Ri laleng wettu iya dé'é namaitta lennye manekko matu polé ri wanuwa iya makessingngéwé, iya nawéréngngékko Puwangnge.” Napaddeppungenni Yosua sininna suku bangsa Israélié ri Sikhem, nainappa nasuro sining tomariyoloé, pamimpingngé, hakingngé sibawa sining parawiraé polé mangolo. Napoléna mennang mangolo ri Allataala. Nainappa makkeda Yosua lao ri mennang maneng, “Engkalingai aga iya napowadaé Puwangnge, Allataalana Israélié lao ri iko, ‘Riyolo néné-nénému monroi ri liwenna Salo Efrat, sibawa massompa déwata-déwata. Sala séddinna polé ri mennang iyanaritu Téra, ambo'na Abraham sibawa Nahor. Nainappa Uwala Abraham, ambo'na toriyolomuro, polé ri wanuwa ri liwenna Efratro, sibawa suroi jalajja'i sininna wanuwa Kanaan. Uwéréngngi maéga wija. Bunge-bunge'na Uwéréngngi Ishak, nainappa Ishak Uwéréng duwa tau ana', iyanaritu Yakub sibawa Esau. Uwéréngngi Esau buluna Edom mancaji tana appunnangenna, iyakiya Yakub, ambo'na toriyolomuro, létté'i ri Maséré, silaong ana'-ana'na. Nainappa Usuro Musa sibawa Harun, sibawa pakennai abala battowa ri yasé'na Maséré, nainappa Upassuko polé kuwaro. Utiwii néné-nénémuro massu polé ri Maséré, nainappa tau Maséré'é lellungngi mennang sibawa karéta musu nenniya tentara makkinnyarang. Na wettunna néné-nénémuro lettu ri Tasi Gelaga, mangobbii mennang ri Iyya méllau tulung. Naupancajini mapettang pallawangenna mennang sibawa sining tau Maséré'éro, sibawa utongkoi sining tau Maséré'éro sibawa uwai tasi' angkanna tallemme maneng mennang. Muwisseng manenni sininna aga iya Upogau'é lao ri Maséré. Maitta senna'ko monro ri padang kessi'é. Nainappa Utiwiko lao ri wanuwanna tau Amorié iya monroé ri seddé alauna Salo Yordan. Namusuko mennang, iyakiya Uwébbuko pakala lao ri mennang. Musittaiwi wanuwanna mennang, sibawa Upaccappui mennang. Nainappa arung Moab, iyanaritu Balak ana' Zipor, méwako. Suroi tau lao ri Biléam ana' Béor sibawa méllauwi kuwammengngi Biléam tanroiko. Iyakiya dé' Uturusiwi élona Biléam, nanabarakkakiko. Makkuwaniro Upassalama'ko polé ri Balak. Nainappa muwalléttoi Salo Yordan, sibawa lettu ri Yérikho. Namusuko sining tau Yérikhoé, makkuwatoro tau Amorié, tau Féris-é, Kanaangngé, Hét-é, Girgasié, Héwié sibawa tau Yébus-é. Iyakiya Uwérékko apakalang lao ri sininna mennang. Wettummu malluru gasai mennang, Uwébbui mennang mancaji malippu sibawa métau, angkanna iya duwa arunna tau Amoriéro lariwi polé ri iko. Tenniya peddammu sibawa tenniyato panamu iya mébbuékko pakala. Tana iya Uwéréngngékko, mutarimai temmassussa-sussa. Sibawa kota-kota iya Uwéréngngékko tenniya iko patettongngi. Iyakiya makkekkuwangngé iko ritu monro kuwaro, sibawa ikoto ritu péneddingiwi buwa anggoro'na nenniya buwa zaitunna, padahal tenniya iko tanengngi.’ ” Nakkeda Yosua patterui, “Jaji, makkekkuwangngé, pakalebbini Puwangnge. Attumanino ri Aléna tonget-tongeng sibawa matinulu. Paddésu'ni déwata-déwata laing iya nasompaé néné-nénému riyolo ri Mésopotamia sibawa ri Maséré. Attumanino banna lao ri Puwangnge. Akkalarapanna dé' mumaélo mattumani lao ri Puwangnge, alano apettung iyato essoé ri kégiko maélo mattumani: lao ri déwata-déwata laing iya nasompaé néné-nénému ri Mésopotamia riyolo iyaré'ga lao ri déwata-déwatana tau Amorié iya muwonroiyé wanuwanna makkekkuwangngé. Iyakiya idi – iyya sibawa kaluwargaku – maélo mattumani banna lao ri Puwangnge.” Namappébali umma Israélié, “Dé' sises-siseng tamaélo salaiwi Puwangnge untu' mattumani lao ri déwata-déwata laingngé! Puwang Allataalata ritu iya paleppe'éngngi sining toriyolota sibawa idi paimeng polé angatangengngé ri Maséré. Purani taita sining anu makalallaingngé iya naébbué Puwangnge. Tuli nalinrungiki Puwangnge ri laleng sininna allalengetta, laloiwi wanuwa-wanuwa laingngé. Na wettutta muttamakiwi wanuwaéwé, Puwangnge paddésu manengngi sining tau Amorié iya monroé kuwaé. Jaji, maéloki mattumani lao ri Puwangnge, saba' Aléna ritu Allataalata.” Nametté sining tau Israéliéro, “Dé'! Dé' tamaélo mattumani lao ri déwata-déwata laingngé. Maéloki mattumani banna lao ri Puwangnge!” Nanakkeda Yosua, “Nah, alému ritu sabbinna makkedaé iko pura pettuiwi untu' mattumani banna lao ri Puwangnge.” Nametté mennang, “Tongeng, aléta ritu sabbinna.” Nakkeda Yosua, “Rékko makkuwaitu, paddésu'ni déwata-déwatana bangsa-bangsa laing iya engkaé ri alémuro, namuwajjanci makkedaé maéloko matinulu lao ri Puwangnge, Allataalana Israélié.” Nanakkeda sining tau Israéliéro lao ri Yosua, “Maéloki mattumani banna lao ri Puwangnge, Allataalata. Maéloki turusiwi parénta-parénta-Na.” Na iyaro essoé ri Sikhem pakangkani Yosua assijancing sibawa umma Israélié; sibawa kuwaniro nawéréng mennang hukkung-hukkung sibawa peraturang-peraturang iya harusu'é naturusi mennang. Sininna hukkung sibawa peraturangngéro naokii ri laleng kitta Hukkunna Allataala. Nainappa mala batu iya maloppoé, nanapatettongngi ri yawana aju iya battowaé ri onrong iya ripallaingngé untu' Puwangnge. Purairo makkedani Yosua lao risininna tauwéro, “Iyaé batué mancaji sabbiwi ri idi. Sininna ada-ada iya napowadaé Puwangnge lao ri idi, purani ripowada ri yolona batuéwé. Jaji, iyanaé batué mancaji sabbi matu lao ri iko, untu' paréngngerangiko kuwammengngi dé' muéwai Allataalamu.” Paccappurenna nasuroni Yosua sining tauwéro lisu; nanalisu manenna mennang ri tanana mattungke-tungke. Nainappa Yosua ana' Nun atanna Puwang -ngéro, matéi ri umuru sératu seppulo taung. Ri tampunni ri tana appunnangenna ri Timnat-Sérah ri buluna Efraim seddé manoranna Bulu Gaas. Ri wettu tuwona mupa Yosua, mattumaniwi umma Israélié lao ri Puwangnge. Na muwi maténana tette towi mennang mattumani lao ri Puwangnge ri wettu engkana mupa pamimping-pamimping ri yelle'na iya alénaé pura sabbingngi sininna séuwa-séuwaé iya napogau'é Puwangnge untu' umma Israélié. Ujuna Yusuf iya natiwié umma Israélié polé ri Maséré, ritampungngi ri Sikhem ri tana iya puraé naelli Yakub sératu dowi péra' ellinna polé ri ana'-ana'na Hémor, ambo'na Sikhem. Iyaro tanaé nappammanarengngi lao ri wijanna Yusuf. Nainappa Eléazar ana' Harun maté toni, naritampung ri Gibéa, iyanaritu kota iya engkaé ri daéra buluna Efraim. Iyaro kotaé purani riyabbéréyang lao ri Pinéhas, ana'na Eléazar. 1 1 Maténana Yosua, makkutanani umma Israélié lao ri Puwangnge, “ Puwang, suku kégaénna polé ri idi harusu bunge-bunge lao gasai tau Kanaangngé?” Nappébali Puwangnge, “Suku Yéhuda. Purani Uwéréng mennang akuwasang untu' sittaiwi wanuwaéro.” Nanakkeda suku Yéhuda lao ri suku Siméon, “Bantuki musui tau Kanaangngé sibawa sittaiwi daéra iya napattentué Puwangnge untu' idi. Ribantu topo matu sittaiwi daéra iya napattentué Puwangnge untu' iko.” Na suku Siméon sibawa Yéhuda laoni mammusu massibawa. Na Puwangnge mpéréngngi mennang apakalang lao ri tau Kanaangngé sibawa tau Féris-é. Seppulo sebbu tentarana balié maté ri Bézék. Naruntu'ni mennang Adoni-Bézék, arunna wanuwaéro, nanagasai. Larini, iyakiya mallellungngi mennang sibawa tikkengngi nainappa narette indo' jari limanna sibawa jari ijéna. Adanna Adoni-Bézék, “Riyolo pituppulo arung pura urette indo' jari limanna sibawa ajéna, nainappa uleppessang manré sésa-sésa inanré iya sempé'é polé ri méjakku. Makkekkuwangngé Allataala gaukekka pada-pada pura ugaukengngéngngi mennang.” Naritiwina Adoni-Bézék, ritiwi ri Yérusalém, nakkuwaniro maté. Naluruini tau Yéhudaé Yérusalém, nanasittai sibawa natunui iyaro kotaé nenniya naunoi pabbanuwana. Purairo laosi mennang gasai tau Kanaan iya monroé ri daéra bulué, sibawa ri émpeng-ngémpeng bulu-bulué; makkuwatoro iya monroé ri daéra marakkoé ri seddé yattang, sibawa ri kota Hébron, iyanaritu kota iya riyasengngé riyolo Kiryat-Arba. Kuwaniro tau Yéhudaé caui appanna Sésai, Ahiman sibawa Talmai. Polé ri Hébron, laoni tau Yéhudaé gasai kota Débir, iya wettuéro riyasengngi Kiryat-Séfer. Sala séddinna polé ri suku Yéhudaro, iya riyasengngé Kaléb, makkeda, “Nigi-nigi mulléi sittaiwi Kiryat-Séfer, weddingngi kawing sibawa ana' makkunraikku Akhsa.” Otniél, ana'na anrinna Kaléb iya riyasengngé Kénas, sittaiwi kotaéro. Nanabbéréyanni Kaléb Akhsa ana'na, mancaji bainéna Otniél. Ri esso akawingenna mennang, Otniél dessa'i Akhsa kuwammengngi méllauwi sikonrong tana polé ri ambo'na. Nananonnona Akhsa polé ri kaleddé'na, namakkutana Kaléb ri aléna aga nacinnai. Nappébali Akhsa, “Macinnaka siyagangngaré mata uwai, saba' tana iya nawéréngngékka ambo'ro engkai ri tana iya marakkoé.” Nanariwérénna ri Kaléb mata uwai ri bagiyang yulunna sibawa mata uwai ri bagiyang toddanna. Wija-wijanna matuwanna Musa, iyanaritu sining tau Kénié, maccowériwi tau Yéhudaé massu polé ri Yérikho, kota karomaé, nalao ri daéra iya makarossaé ri seddé yattanna Arad ri Yéhuda. Kuwaniro mennang mattette ri tengnga-tengngana bangsa Amalé'. Nainappa silaong suku Siméon, iyaro suku Yéhuda laowi gasai sibawa caui tau Kanaangngé iya monroé ri kota Zéfat. Nanatanroiwi mennang kotaéro, nainappa nancuru nanasengngi Horma. Pada-pada iya puraé napparéntang Musa, riyabbéréyangngi Hébron lao ri Kaléb, saba' tellu golongang appang wijanna Enak pura napaddésu Kaléb polé ri kotaéro. Suku Bényamin dé' naulléi paddésu'i tau Yébus-é massu polé ri kota Yérusalém. Iyanaro saba'na naonro mupa tau Yébus-é kuwaro silaong tau Bényamingngé. siruntu'i mennang séddi tau worowané iya polé ri kotaé. Adanna mennang lao ri aléna, “Rékko maéloko tulukki kuwammengngi nariyullé muttama ri laleng kotaéwé, maéloki gaukekko sibawa makessing.” Na iyaro tauwé najellokenni mennang laleng muttama'é ri kotaéro. Nainappa sining tau Efraingngé sibawa Manasyé muttamakiwi kotaéro enrengngé mpunoi sininna pabbanuwana, sangadinna tauwéro sibawa sumpulolona. Nainappa létté ri wanuwanna tau Hét-é, nanapatettong séddi kota kuwaro sibawa masengngi Lus. Iyaro kotaé tette mupi riyaseng makkuwaro. Suku Manasyé dé' napaddésu'i pabbanuwana kota Bét-Séan, Taanakh, Dor, Yibléam sibawa Mégido silaong sining kampongngé ri seddéna. Jaji tau Kanaangngé tette'i monro kuwaro. Mémeng tattambanana awatangenna tau Israélié, napassai mennang tau Kanaangngé mappallaungengngi mennang, iyakiya dé'to mennang napaddésu sisengngi sining tau Kanaangngéro polé kuwaro. Ri kota Gézer, suku Efraim dé' napaddésu'i tau Kanaangngé, pabbanuwana kotaéro. Jaji, tette'i tau Kanaangngé monro kuwaro silaong mennang. Pabbanuwana kota Kitron sibawa Nahalol dé'to napaddésu'i suku Zébulon. Iyanaro saba'na bangsa Kanaangngé tette mupi monro kuwaro silaong mennang, iyakiya iyaro sining tau Kanaangngé ripassai majjama untu' mennang. Pabbanuwana kota Ako, Sidon, Ahlab, Akhzib, Hélba, Afék sibawa Réhob dé'to naripaddésu ri suku Asyer. Iyanaro saba'na tau Kanaangngé, pabbanuwa tulénna wanuwaéro monro mupi kuwaro silaong tau Asyer-é. Pabbanuwana kota Bét-Sémes sibawa Bét-Anat dé'to napaddésu'i suku Naftali. Iyanaro saba'na tau Kanaangngé, pabbanuwa tulénna wanuwaéro monro mupi kuwaro silaong tau Naftalié. Iyakiya, ripassai mennang mappallaungengngi tau Naftalié. Ri seddé manoranna Séla, pakkasésénna daérana sining tau Amorié naliwengngi Tuppung Akrabim. Laoni malaéka'na Puwangnge ri Bokim polé ri Gilgal sibawa makkeda lao risining tau Israélié, “Purani Upassuko polé ri Maséré, sibawa tiwiko ri wanuwa iya puraé Ujanciyangngi néné-nénému. Pura Upowada towi, ‘Assitarong janci ri yelle'ta Iyya sibawa iko dé' Umaélo pettuiwi. Rimakkuwannanaro dé' naweddikko mébbu séuwa assitarong sibawa pabbanuwana wanuwaéwé. Sining mézbana mennang harusu'i muruttung.’ Iyakiya iko dé' mupogau'i aga iya puraé Uwapparéntanro. Mala purani mupogau' sibalé'na! Jaji, makkekkuwangngé éngkalingai! Dé' Umaélo paddésu'i sining taunna wanuwaéwé rékko mammusuko sibawa mennang. Mancajiwi matu mennang sining balimmu, nanapalaiko matu siyo-siyo, angkammu maccowé sompai déwata-déwatana mennang.” Puranana napalettu iyaro malaéka'é iyaro karébaé, teri manenni bangsa Israélié sibawa maladde. Iyanaro saba'na nariyaseng iyaro onrongngé Bokhim. Nainappa ri onrongngéro makkasuwiyanni sining tau Israélié akkarobangeng lao ri Puwangnge. Puranana naleppessang Yosua sining tau Israélié lao, joppani mennang untu' tudangiwi tana iya mancajiyé bagiyanna mennang tungke-tungke. Gangka tuwona Yosua, mattumaniwi bangsa Israélié lao ri Puwangnge. Muwi maténana Yosua tette towi mennang mattumani lao ri Puwangnge ri wettu ripimpinna mupa mennang risining tau iya alénaé pura mitai sininna anu makalallaing iya napogau'é Puwangnge untu' bangsa Israélié. Yosua ana' Nun – atanna Puwang -ngéro – matéi ri umuru sératu seppulo taung. Ritampungngi ri tana appunnangenna muto, iyanaritu ri Timnat-Sérah ri daéra buluna Efraim ri seddé manoranna Bulu Gaas. Nainappa sininna sippangka'éro maté toni. Na sippangka rappina dé'na naissengngi Puwangnge, nasaba dé' mennang napéneddingiwi aga pura napogau' Puwangnge untu' bangsa Israélié. Sises-siseng mennang lao mammusu, Puwangnge méwai mennang, pada-pada iya pura Napparéngngerangengngé lao ri mennang. Nanapéneddingini mennang asukkarakeng iya battowa senna'é. Makkolik-koling Puwangnge mpéréngngi mennang pamimping iya mammusué untu' paleppe'i mennang polé ri garembolang parampo'é. Iyakiya dé' mennang nabati-batiwi iyaro sining pamimpingngé. Massompai mennang déwata-déwata laing, sibawa dé' namatinulu lao ri Puwangnge. Dé' mennang naccowériwi contona néné-nénéna iya mapatoé risining paréntana Puwangnge. Rékko mabbéréi Puwangnge séddi tau pamimping lao ri bangsa Israélié, Puwangnge tuli tulungngi iyaro pamimpingngé. Na ri wettu tuwona mupa iyaro pamimpingngé, Puwangnge tuli paleppe'i mennang polé risining balinna. Messéi lao ri mennang rékko Naéngkalingai mennang maddaréké nasaba ripanrasa-rasai sibawa ritenre. Iyakiya rékko iyaro pamimpingngé maténi, iyaro bangsaé lebbi majai ampé-ampéna naiya sippangka'na riyoloé. Mattumaniwi mennang lao ri déwata-déwata laingngé sibawa nasompai iyaro déwata-déwataé. Lisui mennang ri abiyasang-abiyasanna iya majaé sibawa dé' namaélo pinrai ampé-ampéna. Rimakkuwannanaro macai senna'ni Puwangnge lao ri umma Israélié, sibawa makkeda, “Purani Uparéntang néné-nénéna bangsaéwé kuwammengngi nakkatenningngi assijancingngé ri yelle'ta Iyya sibawa mennang. Iyakiya iyaé bangsaé napettuiwi passiyo janciéro; najjalékkaiwi mennang parénta-Ku. Makkekkuwangngé dé'na Umaélo paddésu'i muwi bangsa niga iya engkaé mupa ri wanuwaéwé wettunna maté Yosua. Maélo-Ka pakéi iyaro bangsa-bangsaé untu' mojiwi bangsa Israélié, kuwammengngi Uwissengngi aga maéloiga umma Israélié maccowériwi parénta-parénta-Ku pada-pada néné-nénéna, iyaré'ga dé'.” Iyanaro saba'na dé' nabbéré Puwangnge apakalang ri Yosua lao ri bangsa-bangsaéro. Sibalé'na naleppessangngi Puwangnge mennang monro ri wanuwaéro, sibawa dé' napaddésu'i mennang masitta. Untu' mojiwi sining tau Israél iya dé'é naengka napéneddingiwi musué ri Kanaan, naleppessangngi Puwangnge siyagangngaré bangsa monro ri wanuwaéro. Napogau'i Puwangnge iyaro banna sibawa akkatta paggurui tungke assossoreng Israélié mammusu, lebbi-lebbi mennang iya dé'é naengka naccowé mammusu. Bangsa-bangsa iya monroé mupa ri wanuwaéro iyanaritu: bangsa iya monroé ri laleng iya lima kota Filistin, sininna bangsa Kanaan, bangsa Sidon sibawa bangsa Héwi iya monroé ri buluna Libanon, mappammulai polé ri Bulu Baal-Hérmon lettu ri laleng iya mattujué ri Hamat. Engkai mennang kuwaro untu' mancaji batu ojiyang lao ri bangsa Israélié. Nanallalengiwiro weddingngi riisseng aga bangsa Israélié naturusiwiga parénta-parénta iya puraé nabbéréyang Puwangnge lao ri néné-nénéna mennang naolai Musa. Iyanaro saba'na sining tau Kanaangngé, Hét-é, Amorié, Féris-é, Héwié, sibawa Yébus-é tette'i monro ri wanuwaéro silaong umma Israélié. Kawing sicampuru'ni umma Israélié sibawa bangsa-bangsaéro, sibawa maccowé sompai déwata-déwatana. Madosani umma Israélié lao ri Puwangnge, Allataalana mennang. Takkalupani mennang lao ri aléna, angkanna mennang massompai lao ri barahala-barahala Baal sibawa Asyéra. Namacaina Puwangnge lao ri umma Israélié, sibawa leppessangngi mennang ricau ri Arung Kusyan-Risyataim polé ri Mésopotamia. Aruwa taung ittana iyaro arungngé makuwasaiwi mennang. Namangobbina umma Israélié méllau tulung lao ri Puwangnge, na Puwangnge mpéréngngi Otniél untu' paleppe'i mennang. (Otniél iyanaritu ana'na Kénas, anrinna Kaléb.) Rikuwasaini Otniél ri Rohna Puwangnge angkanna mancaji pamimpinna umma Israélié. Laoni mammusu, nariwérénna ri Puwangnge apakalang lao ri arung Mésopotamia. Na amanna iyaro wanuwaé patappulo taung ittana. Nainappa maté Otniél. Madosasi tau Israélié lao ri Puwangnge, angkanna Puwangnge mébbui Eglon, arung Moab, mancaji lebbi mawatang naiya Israélié. Masséddini Arung Eglon sibawa bangsa Amongngé nenniya bangsa Amalé'é, nanacaui tau Israélié, nanasittaiwi Yérikho, kota karomaéro. Seppulo aruwa taung ittana umma Israélié rijaja ri Eglon. Iyakiya wettunna umma Israélié mangobbi méllau tulung ri Puwangnge, Nabbéréyanni Ehud untu' paleppe'i mennang. Ehud séddiwi tau kabiyo-biyo; ana'na Géra polé ri suku Bényamin, sibawa aléna iyanaritu biyasa tiwirengngi Arung Eglon pakkasuwiyang iya harusu'é nawaja umma Israélié. Riséuwaé esso mébbui Ehud sipeppa peddang iya mammata wali-walié iya lampénaé nawéki sitengnga météré. Natappini iyaro peddangngé ri benréng ataunna ri laleng wajunna, nainappa lao mabbéréyangngi pakkasuwiyanna umma Israélié ri Arung Eglon. Iyaro arungngé macommo senna. Purana nabbéréyang iyaro pakkasuwiyangngé, nasuroni Ehud sining tau méssangngéngngi dowi ulawengngéro lisu. nainappa massu sibawa goncingngi tange'na bili'éro, nainappa lao. Wettunna polé sining atanna arungngé sibawa napoléiwi iyaro sining tange'na bili'é taggoncing, nasenni mennang engka mupi arungngé ri laleng sibawa mattengngangngi limonri. Maittanana mattajeng nadé'pa natimpa'i arungngé tange'é, malippuni mennang nainappa mala goncing sibawa timpa'i iyaro tange'é. Napoléini arunna mennang maté lénne ri salimaé. Wettunna mennang mattajeng mupi, larini Ehud lao ri Séira lalo ri batu-batu massobbi'é. Lettu'na muwa ri daéra buluna Efraim, naseppunni tarompé'na untu' mobbii tau Israélié mammusu. Poléni mennang nanapimpingngi nonno polé ri daéra buluéro. Adanna lao ri mennang, “Accowéko ri iyya, purani nacaurekko Puwangnge sining tau Moab-é, balimmuro.” Na ri yawa pappimpinna Ehud, nonnoni sining tau Israéliéro polé ri bulué. Nasittaini mennang onrong alléttonna tau Moab-é ri Salo Yordan. Dé' muwi séddi tau polé ri baliéro naleppessang mallétto sibawa salama. Ri laleng ammusurengngéro naunoi mennang kira-kira 10.000 prajuri Moab iya kaminang makessingngé; dé'gaga leppe. Iyaro essoé cauni Moab polé ri Israélié, na amanna iyaro wanuwaé aruwa pulona taung ittana. Pamimping rappina iyanaritu Samgar ana' Anat. Méwa towi sibawa paleppe'i tau Israélié. Nasibawang tekkeng paddimpa sapinna, naunoi, mpunoi 600 tau Filistin. Maténana Ehud, madosasi bangsa Israélié lao ri Puwangnge. Narileppessanna mennang ricau ri Yabin, arung Kanaan iya malaé tudangeng ri kota Hazor. Pallima tentarana iyanaritu Siséra iya monroé ri Harosét-Hagoyim. Mappunnaiwi Yabin 900 karéta musu polé ri bessié. Duwappulo taung ittana najaja tau Israélié sibawa mabecco. Nainappa mennang mangobbi méllau tulung lao ri Puwangnge. Iyaro wettué iya pimpingngéngngi umma Israélié iyanaritu séddiwi nabi makkunrai riyaseng Débora, bainéna Lapidot. Débora biyasai tudang ri yawana pong karomaé, ri pallawangenna Rama sibawa Bétel, ri daéra buluna Efraim. Na kuwaniro lao sining tau Israélié untu' méllau pangaja ri aléna. Ri séuwaé esso nasuroi tauwé mobbii Barak, ana' Abinoam, polé ri kota Kédes ri daérana Naftali. Nanakkeda lao ri Barak, “Iyaé paréntana Puwangnge, Allataalana Israélié, lao ri iko: ‘Paddeppungengngi 10.000 tau worowané polé ri suku Naftali sibawa Zébulon, namutiwii mennang ri Bulu Tabor. Iyya'pa mébbui matu Siséra, pallima tentarana Yabin, laowiko ri Salo Kison silaong tentarana sibawa karéta-karéta musuna untu' musuko. Iyakiya Iyya mpérékko matu apakalang ri laleng ammusurengngéro.’ ” Nakkeda Barak lao ri Débora, “Rékko maccowéko, maéloka lao. Iyakiya rékko dé', dé'to umaélo lao.” Nametté Débora, “Makessinni, maéloka maccowé! Iyakiya éngngerangngi, tenniya iko matti lolongeng alebbireng. Naolai séddi makkunrai ritu Puwangnge matu caui Siséra.” Najoppana Débora silaong Barak lao ri Kédes. Nanapangarani Barak suku Zébulon sibawa Naftali lao ri Kédes. Iya maccowériyéngngi Barak sibawa Débora iyaro wettué engka 10.000 tau. Iyaro wettué Héber, séddiwi tau Kéni, napallainni aléna polé ri bangsana. (Bangsa Kénié iyanaritu wija-wijanna Hobab, ipana Musa.) Pura napasanni Héber kéma-kémana ri seddéna aju-kajung terpentingngé ri Zaanaim, dé' namabéla polé ri Kédes. Naéngkalina muwa Siséra makkedaé laoni Barak ri Bulu Tabor, napaddeppungenni iya aséra ratuna karéta musuna iya polé ri bessiéro, silaong sibawa sininna pasukanna nainappa natiwi mennang polé ri Harosét-Hagoyim lao ri Salo Kison. Nanakkeda Débora lao ri Barak, “Ayo, maju! Puwangnge ritu pimpikko. Iyaé essoé Nawérékko apakalang lao ri Siséra.” Nananonnona Barak polé ri Bulu Tabor silaong sibawa iya seppulo sebbu taunna, nanagasai Siséra. Na Puwangnge pakacaui sininna tentarana Siséra sibawa karéta-karéta musuna, angkanna nonno Siséra polé ri karétana, nanalari. Nalellunni Barak karéta-karéta musué sibawa pasukanna baliéro lettu ri Harosét-Hagoyim nanaunoi sininna pasukanna Siséraro; dé' muwi séddi naleppessang tuwo. Na wettuéro larini Siséra lao ri kémana Yaél, bainéna Héber, tau Kéniéro. Saba', Arung Yabin polé ri Hazor massellaowi sibawa kaluwargana Héber. Wettunna polé Siséra, Yaél duppaiwi sibawa makkeda, “Laoni mai Puwang, uttama bawanni ri laleng kémaku; aja' tamétau.” Nanauttama'na Siséra ri laleng kémaéro nainappa natongko Yaél sibawa kaing paddenring kuwammengngi natassubbu. Nakkeda Siséra lao ri Yaél, “Tulukka tawérékka céddé uwai rinung; madekkaka.” Nanatimpa'ni Yaél popang kolina, onrong nattaroiyé susu, nanapainungngi Siséra, nainappa natongko paimeng sibawa kaing paddenring. Nanakkeda Siséra lao ri Yaél, “Laono tettong ri yolona sumpang kémaé. Rékko poléi tauwé sibawa makkutana ri iko aga engka tau kuwaé, powadangngi dé'gaga.” Makkuwamani tekkona Siséra angkanna cakkaruddu namatinro sibawa memme. Malani Yaél séddi palu-palu sibawa sipasang patto untu' kémaé, nainappa coco-coco maddeppériwi Siséra. Nainappa napaddince iyaro patto'é ri laleng palippina narapi bettu ri tanaé. Makkuwaniro Yaél mpunoi Siséra. Wettunna polé Barak sappai Siséra, riduppaini Barak ri Yaél sibawa makkeda, “Laono mai, maéloka paitakko tau iya musappaéro.” Muttama'ni Barak silaong Yaél, nanaitai Siséra maténi, lénne ri tanaé sibawa patto kéma maddince ri laleng palippina. Iyaro essoé Puwangnge mpéréngngi apakalang tau Israélié lao ri Yabin, arung Kanaan. Iyaro arungngé pédé maitta pédé ritenre ri tau Israélié angkanna paccappurenna binasa. Iyaro essoé makkélonni Débora sibawa Barak ana' Abinoam. Makkuwaiyé adanna: Pojiwi Puwangnge, saba' sining pahlawanna Israélié mattedde'ni untu' méwa, sibawa ra'ya'é rélai lao mammusu. Engkalingai éh sining arungngé sibawa ana' pattolaé, makkélokka untu' Allataalana Israél, iyanaritu Puwangnge. Wettum-Mu joppa polé ri Séir, oh Puwang, sibawa Musalai daérana Edom, ténré tanaé, tattimpa towi sépe-sépe'na langié, sibawa sining ellungngé tiri'i uwaina. Taggoccang sining bulué ri yolona panguwasana Sinai, ri yolona Puwangnge, Allataalana Israél. Ri wettunna Samgar, ana' Anat, sibawa ri wettunnato Yaél, dé'gaga kafila ri wanuwaé, dé'gaga passollé ri watattanaé. Kota-kotana Israélié dé'gaga monroiwi, masino-sino narapi poléko, Débora; poléko pada-pada indo' iya ripojiyé. Wettunna Israél mammula massompa déwata, poléni musué ri wanuwanna mennang; ri yelle'na 40.000 pahlawang bangsa, dé' muwi séddi tau makka senjata. Wettunna nattawareng aléna sining pallimana Israélié sibawa cenning ati, upalettu'i pappakalebbiku iya marilalengngé. Pojiwi Puwangnge! Eh iko iya tonangiyé kaleddé puté, iko tudangngé ri yasé'na paramadanié, sibawa iko maneng iya joppaé, abbirittanni curita apakalangngéwé! Ri seddéna sining bujungngé riyéngkalingai tauwé makkélong marowa, curitai apakalanna Puwangnge makkolik-koling, apakalanna Israélié, umma'na Puwangnge. Nabbarisi'na mennang mattuju ri gerbanna kotaé. Tokkonni Débora, sibawa akkano élong. Moto'ni Barak, assarénréngenni sining tahanangngé! Pabbarani iya nasésaé laoni ri pamimpinna, poléi mennang, sibawa sadiya untu' mammusurengngi. Joppani mennang polé ri Efraim lao ri lompo'é, maccowériwi pasukanna Bényamin iya mabbarisi'é ri yolona mennang. Polé ri Makhir poléni sining pallimaé, sibawa polé ri Zébulon tokkonni sining parawiraé. Sining tomariyolona Isakhar poléni silaong Débora, ya, poléni Isakhar, naccowéto Barak; maccowéi mennang turungiwi lompo'é. Iyakiya suku Rubén dé' naulléi pattentui pallolongenna saba' ri yelle'na mennang dé'gaga asséddingeng adaé. Magi mennang naonro ri yelle'na bimbala-bimbala'é? Aga untu' méngkalingai pakkampié mobbii olokolo'na? Mémeng suku Rubén dé' naulléi pattentui pallolongenna saba' ri yelle'na mennang dé' narilolongeng asséddingeng adaé. Ri Taanakh, seddéna saloé ri Megido, mammusui sining arungngé, méwai sining arung Kanaan, iyakiya péra'é dé'gaga natiwi mennang selaku rirappa. Sining wéttowingngé maccowéto méwai Siséra, polé ri onrong accennérenna ri bitaraé. Sapu Salo Kison malirengngi balié. Maju, majuno sibawa barani, éh nyawaku! Metta-ketta garigi anyarangngé nataro gatti iya ribabbaé ri tonangiyéngngi. “Tanroiwi Méros, sibawa monroiyéngngi,” adanna Malaéka'na Puwangnge “saba' dé' napolé mennang mabbéré bantuwang selaku pahlawang iya méwaé untu' Puwangnge.” Maupe'i Yaél, bainéna Héber tau Kénié; polé ri sininna iya monroé ri kémaé, aléna ritu kaminang ribarakkaki. Méllauwi uwai Siséra, iyakiya nawéréngngi susu, nawéréngngi susu ri laleng mangko iya sitinajaé untu' arung-ngarungngé. Nasibawang patto nenniya palu-palu ri limanna naunrui Yaél Siséra gangka ancuru ulunna. Rebbani ri ajéna Yaél temmakkényawa lénne ri tanaé lolongengngi ajjalenna. Polé ri sebbo-sebbo tellongengngé makkitai indo'na Siséra, sibawa makkeda, “Magi karétana, nateppudu-pudu lettu, magi nadé' nariyéngkalinga oni ajé anyaranna?” Iya kaminang mapanré ri yelle'na pattumaninna mabbéré pappébali iya nalolongengngé ri atinna: “Mattengngangngi mennang bagé-bagéi barang narappaé, untu' tungke prajuri, séddi iyaré'ga duwa perawang. Untu' Siséra, abbajung kaminang mangke'é, untu' ratué, saléndang risulang maddupa-rupangngé.” Tennapodo sining balim-Mu, oh Puwang, matéi pada-pada Siséra, iyakiya sininna sahaba'-Mu mattappai pada-pada mata essoé ri bitaraé! Purairo, amanni wanuwaéro patappulo taung ittana. Siseppi umma Israélié madosa lao ri Puwangnge, angkanna naleppessang bangsa Midiangngé kuwasaiwi mennang pituttaung ittana. Makkuwamani tauna tau Israélié lao ri tau Midiangngé, angkanna mennang massubbu ri gowa-gowaé sibawa onrong-ngonrong laing iya amangngé risining bulué. Ri lainnaé paimeng sises-siseng patani Israélié mattanet-taneng, poléi tau Midiangngé silaong tau Amalé'é sibawa sining tau laing polé ri padang kessi'é gasai tau Israélié. Makkémai mennang ri daéra Israélié sibawa solangiwi sininna tanet-tanengngé kuwaro lettu ri daéra mattulilinna Gaza seddé ri yattang. Makkuwatoro olokolo bimbala'é, sapingngé sibawa kaleddé'na umma Israélié natiwii lari. Dé'gaga muwi séddi nataro angkanna umma Israélié dé' siseng nappunnai anré. Iyaro sining tauwé poléi mallompéngeng silaong olokolo'na sibawa kémana mennang ri laleng jumella iya battowa senna'é. Maéga senna mennang sibawa unta-untana untu' wedding ribilang. Poléi mennang solangiwi wanuwaéro, na umma Israélié dé' agaga naullé pogau' lao ri mennang. Namangobbi umma Israélié méllauwi ri Puwangnge tulungngi mennang méwai tau Midiangngé. Nasuroni Puwangnge séddi nabi lao ri mennang. Makkedai iyaro nabié, “Makkuwaiyé adanna Puwangnge, Allataalana Israélié: ‘Purano Upaleppe polé ri angatangengngé ri Maséré. Purano Upassalama polé ri tau Maséré'é sibawa sining tauwé ri wanuwaéwé iya musuékko. Purani mennang Upaddésu polé ri wanuwaéwé wettummu gasai mennang, nauwérékko tanana mennang. Pura Upowadanno makkedaé Iyya'na Puwang Allataalamu, sibawa makkedaé dé' naweddikko sompai déwata-déwatana bangsa Amorié iya wanuwannaé muwonroi makkekkuwangngéwé. Iyakiya dé' muturusiwi parénta-Ku.’ ” Riséuwaé esso poléi malaéka'na Puwangnge ri kota Ofra, nanatudang ri yawana aju terpentingngé, appunnangenna Yoas, séddiwi polé ri golongang Appang Abiézer. Ana'na iya riyasengngé Gidéon, mattengngang maddése gandong ri onrong apparakeng anggoro'é. Napogau'i iyaro sibawa massubbu-subbu kuwammengngi aja' nariita ri tau Midiangngé. Iyaro malaéka'na Puwangnge mappaitangngi alé lao ri aléna sibawa makkeda, “Eh kallolo iya poré! Puwangnge sibawakko!” Nametté Gidéon, “Taddampengekka, puwang! Rékko tongengngi nasibawakki Puwangnge, magi nasininna gau'éwé nakennaki? Kégani sininna anu makalallaing iya puraé napogau' Puwangnge riyolo sibawa iya nacuritangengngéngngi néné-nénéta passalenna pékkugi Puwangnge passui mennang polé ri Maséré? Makkekkuwangngé nasalaini Puwangnge sibawa leppessakki rikuwasai risining tau Midiangngé.” Nainappa nabbéréyang Puwangnge paréntaéwé lao ri Gidéon, “Nasibawang sininna awatangemmu laono leppessangngi tau Israélié polé ri akuwasanna tau Midiangngé. Iyya ritu suroko.” Nappébali Gidéon, “Magi na iyya, Puwang? Pekkugi weddikka leppessangngi umma Israélié polé ri akuwasanna tau Midiangngé. Ri laleng sukunna Manasyé, appakku ritu kaminang malemma. Sibawa muwi ri laleng kaluwargaku iyya'to ritu kaminang dé' bettuwanna.” Nakkeda Puwangnge, “Pasti weddikko, saba' Iyya ritu bantuko. Mulléi mancuru'i sining tau Midiangngé sibawa magampang, samanna moloiko banna séddi tau bawang.” Nappébali Gidéon, “Rékko tonget-tongekka napoji Puwangnge, cobani mpérékka séuwa tanrang makkedaé mémeng Puwangnge ritu mpérékka paréntaéro. Uwéllauwi tatajekka Puwang riyolo kuwaé narapi upatalangekki inanré Puwang.” Nappébali Puwangnge, “Makessinni, Utajekko matu narapi lisu.” Nanalisuna Gidéon nanasu sikaju bémbé iya maloloé, sibawa mala seppulo kilo labbu, nanaébbu roti iya temmarragié. Purairo nataroni iyaro jukué ri laleng bakaé, sibawa durona ri laleng oringngé, nainappa natiwi manenro nanapatalangengngi malaéka'na Puwangnge iya mattengngangngé mattajeng ri yawana aju terpentingngéro. Nakkeda iyaro malaéka'na Puwangnge, “Palénne'i iyaro jukué sibawa rotié ri yasé'na batuéwé nainappa mutiri duro jukuéro ri yasé'na.” Napogau'ni Gidéon aga riparéntangngéngngi. Nainappa iyaro malaéka'na Puwangnge naloro limanna nanasibawang cappa aju iya nakkatenningngé nagéssai iyaro jukué sibawa rotié. Malluwa'ni iyaro batué nanacappu nanré iyaro jukué sibawa rotié. Nainappa lennye'ni iyaro malaéka'é. Mainge'ni Gidéon makkedaé iya polé ri alénaro iyanaritu aléna malaéka'na Puwangnge. Nanasibawang tau makkedani Gidéon, “Cilakana iyya, oh Puwang Iya Pommatanré! Saba' purana siyolong tappa sibawa malaéka'-Mu!” Iyakiya makkedai Puwangnge ri aléna, “Tennanno! Aja' mumétau. Dé' mumaté matu.” Nanapatettonni Gidéon séddi mézba kuwaro sibawa masengngi “ Puwangnge Assalenna Asaléwangengngé”. Iyaro mézbaé engka mupi ri Ofra, iyanaritu kotana tau Abiézer. Iyaro wennié nabbéréyanni Puwangnge paréntaéwé lao ri Gidéon, “Alai saping lainna ambo'mu, iyanaritu saping iya kaminang makessingngé iya makkéumuru pituttaungngé. Bongkara'i mézba iya napatettongngé ambo'mu untu' Baal, nainappa mupaléwu alliri pulambangngéngngi Déwi Asyéra ri seddéna mézbaéro. Patettongngi ri yasé'na goppoéro séddi mézba iya puraé murancang sibawa makessing. Nainappa sininna iyaro saping laié, harusu'i mutunu makkalépu selaku akkarobangeng untu' Puwangnge. Pakéi alliri pulambangngéngngi Déwi Asyéra iya puraé mupaléwuro selaku aju tununna.” Nanapiléni Gidéon seppulo atanna nainappa lao pogau'i aga riparéntangngi ri Puwangnge. Iyakiya nasaba métau senna'i lao ri kaluwargana sibawa lao risining tauwé ri désanaro, dé' nabarani pogau'i gau'éro ri essoé. Jaji napogau'i ri wennié. Wettunna moto pabbanuwana kotaéro bajana éléna, naitani mennang mézba untu' Baal sibawa alliri pulambangngéngngi Déwi Asyéra léwuni. Naita toni mennang makkedaé ri onrongngéro purani ripatettong séddi mézba sibawa pura toni ritunu saping laié selaku akkarobangeng. Makkutanani mennang séddié lao ri laingngé, “Pangkaukeng nigana iyaé?” Puranana risalidiki, nalolongenni mennang makkedaé Gidéon ana' Yoas ritu pogau'i. Nakkeda mennang lao ri Yoas, “Ana'mu pura bongkara'i mezba Baal sibawa paléwui alliri pulambangngéngngi Déwi Asyéra ri seddéna mézbaéro. Rimakkuwannanaro, tiwii ana'muro massu kuwaé. Harusu'i maté!” Iyakiya mappébaliwi Yoas lao ri sininna méwaéngngiro, “Aga maccowékoga ri Baal sibawa maélo méwaiwi? Nigi-nigi maccowé ri aléna, maéloi riyuno iyaé essoé! Rékko mémengngi Baal Allataala, leppessanni aléna muto méwaiwi aléna, saba' iyaro ribongkara'é iyanaritu mézbana.” Nasaba makkedai Yoas, “Leppessanni aléna Baal méwai Gidéon, saba' purai nabongkara mézbana,” namappammulai wettuéro nasenni tauwé Gidéon “Yérubaal”. Iyaro wettué sininna tau Midiangngé, Amalé'é sibawa suku-suku bangsa laingngé ri padang kessi seddé alauna Yordan maddeppungenni. Nalléttoiwi mennang Salo Yordan, sibawa makkéma ri Lompo Yizreel. Iyakiya Gidéon rikuwasaiwi ri Rohna Puwangnge, angkanna masseppung tarompé untu' mobbii sining tau appang Abiézer kuwammengngi napolé masséddi sibawa aléna. Kiring towi suro lao ri suku Asyer, Zébulon, Naftali sibawa suku Manasyé – muwi ri seddé alaué iyaré'ga ri seddé yajanna Salo Yordan, untu' méllauwi mennang masséddi sibawa aléna. Napolé manenna mennang untu' bantui Gidéon. Namakkeda Gidéon lao ri Allataala, “ Puwang, purai Mupowada makkedaé maélo-Ko pakéka untu' paleppe'i umma Israélié. Rékko mémeng makkuwairo, ri yasé'na iyaé tanaé, onrotta biyasanna maddése gandong purani upalénne bulu bimbala pura goncingngé. Rekko baja banna iyaé bulu bimbala'éwé bawang narica cinoddo, na tanana dé', iyanaro buttinna makkedaé maélo-Ko pakéka untu' paleppe'i umma Israélié.” Nakajajiyanna makkuwaro: Wettunna Gidéon moto bajana éléé sibawa para'i iyaro bulu bimbala'é, lolongenni uwai cinoddo simangko. Nainappa makkeda lao ri Allataala, “ Puwang, aja' tamacai rékko mabbicarapa siseng. Palaloka mébbu séddipa percobaang sibawa bulu bimbala pura goncingngéwé. Iyakiya iyaé sisengngé sitinajai iyaé bulu bimbala'é tette'i marakko, na tanana marica'i.” Iyaro wennié napogau'ni Allataala aga naéllau Gidéonro, angkanna pappa bajana éléé iyaro bulu bimbala'é annessana marakkoi, iyakiya tanana marica'i nasaba cinoddo. Riséuwaé esso Gidéon silaong sininna ana' buwana moto'ni maélé senna. Laoni mennang namakkéma ri seddéna mata uwai Harod. Akkémanna tau Midiangngé engkai ri seddé manoranna mennang, ri lompo seddéna Bulu-bulu More. Makkedai Puwangnge lao ri Gidéon, “Maéga senna ana' buwamu. Dé' umaélo mpéréngngi apakalang mennang lao ri tau Midiangngé, saba' napikkiri'i matti mennang pakalai nasaba awatangeng rialéna, angkanna dé' napojika. Jaji, appallebbangenni lao ri ana' buwamu, ‘Niga marasa métau, harusu'i mapperi-peri salaiwi iyaé Bulu Giléad nanalisu ri bolana.’ ” Na engka 22.000 tau lisu; na banna 10.000 monro. Nanakkedasi Puwangnge lao ri Gidéon, “Maéga senna mupa ana' buwamu. Tiwii mennang ri saloé. Kuwaro maélo-Ka sisérekko. Rékko makkeda-Ka lao ri iko, ‘Iyaé tauwé harusu'i lao sibawakko,’ harusu'i lao. Iyakiya rékko makkeda-Ka, ‘Iyaé tauwé dé' nawedding lao sibawakko,’ dé' nawedding lao.” Nanatiwini Gidéon iyaro sining tauwé ri saloé, namakkeda Puwangnge lao ri Gidéon, “Tau iya lépe'éngngi uwai pada-pada asué, harusu'i mupallaing polé ri tau iya makkaluttué untu' ménung.” Na engka 300 tau iya lépe'éngngi uwai polé ri limanna; sininna laingngé makkaluttu untu' ménung. Namakkeda Puwangnge lao ri Gidéon, “Nasibawang iya telluratu tau lépe'éngngi uwaiéro, maélo-Ka paleppe'ko sibawa mpérékko apakalang lao ri tau Midiangngé. Suroni laingngé lisu.” Rimakkuwannanaro nasuroni Gidéon sininna tau Israél laingngé lisu sangadinna iya tellu ratuéro. Sininna bokongngé sibawa tarompé'é nalani polé risining tau iya lisuéro. Tau Midiangngé engkai ri lompo'é ri yawana tau Israélié makkéma. Iyaro wennié makkedai Puwangnge lao ri Gidéon, “Oto'no, Gidéon! Laono gasai akkémanna tau Midiangngé. Uwérékko apakalang lao ri mennang. Iyakiya rékko métauko, érai Pura, atammuro lao massibawa ri akkémanna balié. Muwéngkalingai matti aga nabicara balié, na iyaro passalengngé pancajiko matu barani gasai.” Nanalaona Gidéon silaong Pura, ri pakkasésénna akkémanna balié. Tau Midiangngé, Amalé'é sibawa sining tau laingngé polé ri padang kessi'é, mallebbanni kégi-kégi ri lompo'éro. Paitai pada-pada incalé makkatulung. Maéga senna untana pada-pada kessi'é ri wiring tasi'é. Wettunna lettu Gidéon kuwaro, naéngkalingani séddi tau mattengngang curitai nippinna ri silaonna. Iyaro tauwé makkeda makkuwaiyé, “Mannippika engka sibatu roti maggalétté muttama ri akkématta nanalélui séddi kéma. Iyaro kémaé maropo narapi mancaji sillappa tanaé.” Nappébali silaonna, “Wah, pasti iyaro peddanna Gidéon ana' Yoas, tau Israéliéro! Bettuwanna Allataala pura mpéréngngi apakalang lao ri tau Midiangngé sibawa sininna tentarata!” Wettunna naéngkalinga Gidéon passalenna nippinna tauwéro sibawa bettuwanna, suju'ni sompai Allataala. Nainappa lisu ri akkémanna Israélié sibawa makkeda, “Sadiya-sadiyano! Puwangnge mpérékko apakalang lao ri tentarana Midian!” Nanabagéni Gidéon iya tellu ratu ana' buwana mancaji tellu regu. Tungke tau riwéréng séddi tarompé sibawa séddi kendi iya mallise'é sulo. Adanna Gidéon lao ri mennang, “Rékko lettu'ka ri pakkaséséng akkémanna tau Midiangngé, pénessaika madécéd-décéng, sibawa pogau'i aga iya upogau'é. Rékko iyya sibawa regukku masseppung tarompé, harusu tokko seppungngi tarompé'mu. Nainappa harusu'ko gora ri mattulilinna akkémangngéro, ‘Untu' Puwangnge sibawa untu' Gidéon!’ ” Mawé'nana tengnga benni, lettu'ni Gidéon sibawa sining taunna ri pakkaséséng akkémanna balié. Iyaro wettué tau iya jagaiyéngngi akkémangngéro, silalona sisullé jaga. Nanaseppunni Gidéon sibawa regunna tarompé'na sibawa reppa'i kendi-kendinna mennang. Iya duwa regu laingngé pogau' towi makkuwaro. Nainappa nakka maneng sulona mennang sibawa lima abiyo, sibawa seppungngi tarompé iya engkaé ri lima ataunna. Gorani mennang, “Peddang untu' Puwangnge sibawa untu' Gidéon!” Tette manengngi mennang tettong tungke-tungke ri onronna ri mattulilinna akkémangngéro. Nalarina kajelli-jelli sininna tentara baliéro nakelli-kelli'to. Wettunna Gidéon sibawa sining taunna mappaoni tarompé, Puwangnge mébbui tentarana balié sisullé sigasa séddié na laingngé sibawa peddang. Larini mennang mattuju ri Zéréra lettu sibbéla Bét-Sita sibawa kota Abél-Méhola seddéna Tabat. Na suku Naftali, Asyer, sibawa suku Manasyé muwi ri seddé alaué iyaré'ga ri seddé yajannaé Salo Yordan riyobbito. Nanalellungngi mennang tentara Midiangngé. Makkuwatoro lao ri sininna daéra buluna Efraim, nakiringngi Gidéon karéba pangobbiéwé, “Turunno mai musui tau Midiangngé. Attahangengngi Salo Yordan sibawa sininna ana' saloé lettu sibbéla Bét-Bara. Aja' muleppessangngi tau Midiangngé mallétto polé kuwaro.” Naripangarana sining tau Efraingngé, nanattahangenni Salo Yordan sibawa sininna ana' saloé lettu sibbéla Bét-Bara. Duwa ponggawana bangsa Midian ritikkeng ri mennang, iyanaritu Oréb sibawa Zeeb. Oréb riyunoi ri Batu Oréb na Zeeb riyunoi ri onrong apparakeng anggoro Zeeb. Iyaro sining tau Efraingngé matterui lellungngi tau Midiangngé, nanatiwii ulunna Oréb sibawa Zeeb ri Gidéon ri liwenna Yordan bagiyang alau. Makkedani tau Efraingngé lao ri Gidéon, “Magi nadé' nariyéraki wettummu joppa untu' musui tau Midiangngé? Aga saba'na mugaukekki makkuwaro?” Makkuwaniro mennang mannoko-noko lao ri Gidéon. Iyakiya mappébaliwi Gidéon, “Aga iya upogau'é dé' nasiyaga angke'na rékko ripasibandingngi sibawa aga iya puraé mupogau'. Namuni iya mupogau'é céddé bawang, iyakiya iyaro céddé'é lebbi mangke'i naiya sininna iya puraé napogau' sininna tentarana appakku. Iko ritu lolongeng akuwasang polé ri Allataala angkanna mulléi mpunoi Oréb sibawa Zeeb, iya duwa ponggawana Midianro! Ripasibandingngi sibawa iyaro, aga appalakku?” Purana Gidéon makkeda makkuwaro, dé'na namacaina mennang. Iyatoro wettué lettu'ni Gidéon silaong iya telluratu ana' buwana ri liwenna Salo Yordan. Poso senna'ni iyakiya matteru mupi lellungngi balié. Nanalettu mennang ri Sukot. Kuwaniro Gidéon makkeda lao ri pabbanuwana kotaéro, “Tulungngi ana' buwaku tawéréngngi céddé inanré. Poso senna'i mennang na rilellung mupi Zébah sibawa Salmuna, arung-ngarunna Midianro.” Iyakiya mappébaliwi sining pamimpingngé ri Sukot, “Ah, dé'pa mutikkengngi Zébah sibawa Salmuna, méllauno inanré! Untu' aga nariwéréng inanré ana' buwamu?” Nakkeda Gidéon, “Makessinni! Matti rékko purana nawéréng Puwangnge apakalang lao ri Zébah sibawa Salmuna, maéloka barasa'ko sibawa dori polé ri padang kessi'é!” Nanapatteruni joppana Gidéon nanalettu ri Pnuél. Méllau towi inanré kuwaro untu' ana' buwana. Iyakiya pappébalinna tau Pnuél-é padai pappébalinna tau Sukot-é. Rimakkuwannanaro makkedani Gidéon lao ri mennang, “Lisupa matti sibawa salama. Na ri wettuéro maéloka ruttungngi menarana kotaéwé!” Na wettuéro Zébah sibawa Salmuna silaong sininna pasukanna engkani ri Karkor. Polé risininna pasukang tau padang kessi'é, banna engka kira-kira 15.000 tau bawang iya nasésaé; maténi 120.000 tentarana. Natuttunni Gidéon pakkaséséng padang kessi seddé alauna Nobah sibawa Yogbélha nainappa nagasa balié tennasenna-senna. Zébah sibawa Salmuna, iya duwa arung Midiangngéro larini, iyakiya Gidéon lellungngi sibawa tikkengngi mennang, angkanna sininna tentarana mennang mancaji dé' naissengengngi aléna. Na ri laleng allalengeng lisunna polé ri ammusurengngé, laloi Gidéon ri laleng laloé ri tuppung Héres. Kuwaniro tikkeng séddi kallolo polé ri Sukot, nanatanaini iyaro tauwé passalenna aseng-ngasenna sining tomariyoloé ri Sukot. Na iyaro tauwé naokini aseng-ngasengngéro untu' Gidéon – iya manenna engka 77 tau. Purairo laoni Gidéon méwai sita sining tomariyoloé ri kotaéro namakkeda, “Pasti muwéngngerang mupa makkedaé purako massampéyang untu' tulukka, nasaba dé'pa utikkengngi Zébah sibawa Salmuna. Dé' mumaélo mpéréngngi inanré ana' buwaku; padahal posoi mennang wettuéro. Itai, iyanaé Zébah sibawa Salmuna.” Purairo malani Gidéon dori polé ri padang kessi'é, nanaajara'i sining tomariyolona kota Sukotro. Ri Pnuél naruttung towi menaraé sibawa mpunoi sininna tau worowané ri kotaéro. Purairo makkutanani Gidéon ri Zébah sibawa Salmuna, “Pékkugi tappana sining tau iya muwunoé ri Taborro?” Nappébali Zébah sibawa Salmuna, “Sininna mennang maéloko pada, pada-pada wija-wijanna arungngé.” Nakkeda Gidéon, “Iyaro silessu-silessurekku – ana'-ana'na indo'ku. Akkalarapanna dé' muwunoi mennang, pasti dé'to uwunoko matu.” Nanakkeda Gidéon lao ri Yéter, ana' macowana, “Unoi mennang!” Iyakiya malolo mupi Yéter. Jaji, métaui angkanna dé' narampui peddanna untu' mabbuno. Adanna Zébah sibawa Salmuna lao ri Gidéon, “Ayo, rékko worowanéko, unoni sibawa limammu!” Nanaunoni Gidéon mennang nainappa nala sininna bélo-bélo ulaweng iya engkaé ri ellong untana. Namakkeda umma Israélié lao ri Gidéon, “Purani mupaleppe'ki polé ri akuwasanna tau Midiangngé. Rimakkuwannanaro sitinajako mancaji pamimpitta – iko sibawa wija-wijammu.” Nametté Gidéon, “Dé'. Dé' umaélo mancaji pamimpimmu; muwi ana'ku dé'to. Puwangnge ritu pamimpimmu.” Iyakiya rimunri makkedasi Gidéon, “Banna séddi paréllaukku; anting-nganting iya murampasa'é polé ri balié, sitinajai muwéréng manekka.” (Abiyasanna tau Midiangngé pakéi anting-nganting ulaweng; pada muto tau laing iya monroé ri padang kessi'é.) Nappébali mennang, “Makessinni, masennang atitta maélo mpérékko.” Nanapallebba'na silampa kaing, nainappa tungke tau polé sibawa palénne'i kuwaro anting-nganting iya puraé narampasa polé ri balié. Sininna anting-nganting ulaweng iya riwéréngngéngngi Gidéon wettuéro tane'na nawéki duwappulo kilo, dé'pa nauttama bélo-béloé, ranté, kaing lango-lango iya napaké arung-ngarung Midiangngé, sibawa ranté iya engkaé ri ellonna unta-untana. Polé ri ulawengngéro, mébbuni Gidéon séddi dato-dato barahala, nainappa nataro ri désana, iyanaritu ri Ofra. Sininna tau Israélié laoni kuwaro untu' sompai dato-dato barahalaéro, angkanna mennang dé'na najampangiwi Allataala. Na iyaro gau'é mancajiwi pada-pada siyo-siyoé lao ri Gidéon sibawa kaluwargana. Dé'na naulléi méwana tau Midiangngé; ricauni mennang ri tau Israélié. Na amanna iyaro wanuwaé patappulo taung ittana ri wettu tuwona mupa Gidéon. Labe'na ammusurengngéro, lisuni Gidéon ri kampong assalenna sibawa monro kuwaro. Mappunnaiwi pituppulo tau ana' worowané, saba' maéga bainéna. Engkato gundi'na ri Sikhem; polé ri gundi'naé lolongengngi séddi ana' worowané iya nasengngé Abimélékh. Macowa senna mani Gidéon ana' Yoasro nappa maté. Ritampungngi ri kuburu'na Yoas, ambo'na. Iyaro kuburu'é engkai ri Ofra, iyanaritu kotana appang Abiézer. Maténana Gidéon, dé'na namatinuluna tau Israélié lao ri Allataala. Massompai mennang déwata-déwata Baal sibawa pancajiwi Baal-Berit déwatana mennang. Dé'na mennang nassompana lao ri Allataala, Puwan -na, iya puraé paleppe'i mennang polé ri akuwasanna sininna balié ri mattulilinna. Dé'to mennang nawale'i ampé-ampé makessinna lao ri kaluwargana Gidéon, nasaba sininna jasana Gidéon lao ri umma Israélié. Riséuwaé esso Abimélékh ana' Gidéon laowi ri kota Sikhem onronna kaluwargana indo'na. Kuwaniro mabbicara sibawa mennang, adanna, “Cobai makkutanangngi risininna pabbanuwana Sikhem, kéga lebbi makessing: Riparénta ri pituppulo ana'na Gidéon, iyaré'ga ri séddi tau bawang? Paréngngerangi towi mennang makkedaé iyya engka mupa assisumpungeng dara sibawa mennang.” Nalaona iyaro kaluwargana indo'na Abimélékh risining tau Sikhengngé sibawa palettu'i pasenna Abimélékh lao ri mennang. Nainappa iyaro pabbanuwana Sikhem napettuini untu' maccowé ri Abimélékh, saba' manuru mennang mémeng engka mupa assimpungeng darana sibawa mennang. Nainappa mennang mpéréngngi pituppulo dowi péra' iya riyalaé polé ri bola assompanna Baal-Bérit. Nasibawang dowiéro napéssaroini Abimélékh sigarembolang tau kurang ajara'é untu' masséddi sibawa aléna, nanalao ri kampong assalenna ambo'na ri Ofra. Kuwaniro nauno iya pituppulo silessurennaro ri tompo'na séddié batu. Iyakiya Yotam, ana' malolona Gidéon dé' naccowé riyuno nasaba massubbui. Namaddeppungenna sininna pabbanuwana Sikhem sibawa Bét-Milo, nainappa lao ri pong terpenting makarame'é ri Sikhem. Kuwaniro nalanti Abimélékh mancaji arung. Naéngkalingana Yotam passalenna gau'éro, laoni tettong ri tompo Bulu Gerizim, nagora lao risining tauwéro, “Engkalingaka, éh sining tau Sikhengngé, kuwammengngi naéngkalinga tokko Allataala! Séuwa wettu maddeppungengngi aju-kajungngé maélo pilé arung untu' mennang. Namakkedana mennang lao ri pong zaitungngé, ‘Ancajino arutta.’ Nappébali pong zaitungngé, ‘Ah, dé' umaélo. Saba' rékko iyya mancaji arummu, harusu'ka mappésau powassélé minnya zaitun iya ripaké untu' pakalebbii déwata-déwataé sibawa tolinoé.’ Nanakkeda aju-kajungngé lao ri pong araé, ‘Iko bawanna mancaji arutta.’ Iyakiya mappébaliwi pong araé, ‘Dé' umaélo, saba' untu' mancaji arummu harusu'ka mappésau powassélé buwa ara iya macenningngé.’ Purairo makkedani aju-kajungngé lao ri pong anggoro'é, ‘Nah, ikona mancaji arutta.’ Iyakiya mappébaliwi pong anggoro'é, ‘Masa' harusu'ka mappésau powassélé anggoro iya pésennangiyéngngi atinna déwata-déwataé sibawa tolinoé, banna untu' mancaji arummu!’ Rimakkuwannanaro makkedani sininna ajué lao ri alekale dorié, ‘Iko bawanna mancaji arutta.’ Nappébali alekale dorié, ‘Rékko tonget-tongekko maélo pancajika arummu, laono mai mallinrung ri yawana accinaungekku. Rékko dé' mumaélo, polé ri takké-takkéku iya maddoriéwé massui matu api iya tunuéngngi gangka cappu sining pong aras-é ri Libanon.’ ” Nakkeda Yotam patterui, “Nah, aga ri laleng lanti'i Abimélékh mancaji arung, purano tinda sibawa malempu nenniya macenning? Puraniga mupogau' iya sipato'é lao ri Gidéon, ambo'ku, sibawa kaluwargana? Puraniga muwale appalanna ambo'ku iya puraé mammusurekko? Engngerangngi, purai nappésonang nyawana untu' paleppe'ko polé ri akuwasanna sining tau Midiangngé. Iyakiya makkekkuwangngé mubali'bellariwi kaluwargana ambo'ku. Pura manenni muwuno ana'-ana'na – musisengiwi pituppuloé tau ri tompo'na séddié batu. Abimélékh iyanaritu ana'na ambo'ku polé ri atanna. Iyakiya mulanti'i mancaji arunna Sikhem, banna nasaba engka assisumpungeng daramu. Rékko tindakammu iyaé essoé lao ri ambo'ku sibawa kaluwargana malempui sibawa macenning, tassennas-sennanna sibawa Abimélékh, sibawa leppessangngi aléna massennas-sennang sibawa iko. Iyakiya rékko dé' nappakkuwaro, tennapodo polé ri Abimélékh massui apié iya tunuéngngi gangka cappu pabbanuwana Sikhem enrengngé Bét-Milo. Sibawa tennapodo polé ri pabbanuwana Sikhem enrengngé Bét-Milo massu towi apié iya tunuéngngi Abimélékh gangka cappu.” Purairo larini Yotam nanaonro ri Beer, nasaba métaui lao ri Abimélékh, silessurennaro. Telluttaung ittana Abimélékh paréntai Israélié. Nainappa Puwangnge paompo assimusureng ri yelle'na Abimélékh sibawa sining tau Sikhengngé angkanna mennang méwai aléna. Iyaé gau'é kajajiyangngi kuwammengngi nariwale jana Abimélékh sibawa sining tau Sikhengngé iya pakiri-kiriyéngngi untu' mpunoi iya pituppulo ana'-ana'na Gidéon. Iyaro sining tau Sikhengngé taroi tau pangadang-ngadang ri tompo-tompo bulué untu' tikkengngi Abimélékh. Tungke tau iya laloé kuwaro narampo'i iyaro tau pangadang-ngadangngé. Na iyaro gau'é ripowadanni Abimélékh. Iyaro wettué Gaal ana' Ebéd poléni silaong silessu-silessurenna untu' monro ri Sikhem; na sining tau Sikhengngé mateppe'i ri aléna. Laoni mennang maccéppu anggoro risining dare anggoro'é, nainappa mébbu énungeng anggoro, napakangka pésta. Manré ménunni mennang ri onrong assompang déwatana mennang nanatanro-tanroi towi Abimélékh. Nakkeda Gaal, “Niga idi'é na harusu'ki tunru lao ri Abimélékh? Niga sitongenna alénaro? Tenniyaga ana' Gidéon iya nasibawangngé Zébul wakkélé'naro pura mancaji atanna Hémor, ambo'na Sikhem, toriyolota!” “Akkalarapanna iyya pimpingngi iyaé sining tau Sikhengngé, pasti cappuni curitana Abimélékhro! Maéloka powadangngi, ‘Ayo maju! Pangarai tentaramu sibawa assuno mai mammusu!’ ” Zébul, panguwasana kota Sikhem, macaini wettunna naéngkalinga iyaro bicaranna Gaal. Kirinni suro lao ri Abimélékh ri Aruma untu' palettu'i pasengngéwé, “Gaal ana'na Ebéd silaong silessu-silessurenna poléni ri Sikhem sibawa pakiri-kiriwi pabbanuwana kuwammengngi naéwako. Rimakkuwannanaro sitinajako sibawa sining taummu lao massubbu ri dare'é ri wennié. Baja éléé rékko mompoi essoé, gasai kotaéro sibawa tennassenna-senna. Sibawa rékko massui Gaal silaong sining taunna méwako, iyanaro kasempatammu untu' gasai!” Na Abimélékh sibawa sininna ana' buwana kédoni ri wennié. Tassiyani mennang mancaji eppa pasukang nainappa lao massubbu ri mattulilinna kota Sikhem. Naitana muwa Abimélékh silaong sining taunna massu Gaal sibawa tettong ri pintu gerbanna kotaé, massu manenni mennang polé ri onrong assubbuwanna. Naitani Gaal mennang, namakkeda lao ri Zébul, “Itai! Engka tau nonno lao mai polé ri tompo-tompo bulué.” Nametté Zébul, “Ah tenniya tau iyaro, iyaro banna wajo-wajo ri bulué.” Nainappasi makkeda Gaal, “Tongeng! Engka tau nonno polé ri émpeng bulu-bulué, sibawa séddi kalompo'si mattengngang mattuju lao mai polé ri pong terpenting makarame'é!” Makkedani Zébul lao ri Gaal, “Nah, kégani makkekkuwangngé bawa loppomuro? Riyolo adammu untu' aga taharusu tunru' lao ri Abimélékh? Iyanaé sining tau iya mucellaéro. Ayo majuno makkekkuwangngé luruiwi mennang!” Nanatiwini Gaal sining tau Sikhengngé naéwai Abimélékh. Iyakiya Abimélékh gasai angkanna lari. Makkamaté-maténni lettu ri yolona pintu gerbanna kotaé. Angkanna lisuni Abimélékh ri Aruma, sibawa mattette kuwaro. Ripaddésu'ni Gaal ri Zébul silaong silessu-silessurenna massu polé ri Sikhem, angkanna mennang dé' naulléi monrona kuwaro. Pappa bajana mammulani sining tau Sikhengngé salaiwi kotaé, maélo lao ri dare'é na iyaro gau'é nalaporo'i lao ri Abimélékh. Nanapaddeppungenni Abimélékh sining taunna, sibawa bagéi mennang mancaji tellu pasukang nainappa lao mallekke ri dare'é. Wettunna naita pabbanuwana kotaéro mattuju lao ri dare'é, massuni polé ri allekkekenna nainappa mpunoi mennang. Wettunna Abimélékh sibawa pasukanna mapperi-peri maju gasai pintu gerbanna kotaé, iya duwa pasukanna laingngé mallellung sibawa mpunoi sining tau iya lariyé lao ri dare'é. Mammusuni matteru Abimélékh puppu esso sibawa tudangiwi kotaéro; naunoi pabbanuwana, nanaancuru'i kotana nainappa nampori pejjé. Wettunna sining tau iya engkaé ri laleng bénténg Sikhem méngkalingai passalenna gau'éro, muttama'ni mennang ri laleng kalebbongngé ri yawana bola déwata El-Berit untu' mallinrung. Naripaissengina Abimélékh ri tauwé makkedaé sining tauwé ri bénténg Sikhemro maddeppungenni kuwaro. Rimakkuwannanaro Abimélékh sibawa sining taunna laoni ri Bulu Zalmon. Kuwaniro toto takké-takké aju sibawa wasé, nainappa naéssang iyaro takké-takké ajué ri salangkana, nainappa nasuroto sining taunna mapperi-peri pogau'i pada-pada iya puraé napogau'. Na tungke-tungke mennang totoni takké-takké aju, nainappa joppa maccowériwi Abimélékh. Sininna takké ajuéro nagoppoi mennang ri sumpanna kalebbong bola déwataéro, nainappa natunu, na sining tau Sikhengngéro engka mupi ri lalenna. Rimakkuwannanaro maté manenni sininna pabbanuwana Sikhem, kira-kira sisebbu tau worowané sibawa makkunrai. Purairo laoni Abimélékh ri Tébes. Nakeppungngi iyaro kotaé nainappa natudangi. Ri tengnga-tengngana kotaéro engka séddi menara iya masse'é. Na sininna pabbanuwana kotaéro larini lao kuwaro. Muttama'ni mennang ri laleng menaraéro nanagoncingngi tange'na, nainappa ménré ri yasé. Napoléna Abimélékh kuwaro untu' gasai menaraéro. Wettunna lettu ri sumpanna menaraéro sibawa maélo tunui, séddi makkunrai pasempé séddi batu allélureng ri tompo ulunna angkanna mallesse kaddaro ulunnaro. Mapperi-perini Abimélékh mobbii kallolo iya méssangngéngngi senjatana sibawa makkeda, “Rampui peddammu namuwunoka; dé' umaélo napau-pau tauwé makkedaé riyunoka ri makkunraié.” Narigajanna ri kalloloéro gangka maté. Wettunna naita sining tau Israélié makkedaé maténi Abimélékh, lisu manenni mennang. Mappakkuwaniro carana Allataala mpale'i Abimélékh polé ri ja iya napogau'é lao ri ambo'na, wettunna nauno iya pituppulo silessurenna. Na Puwangnge hukkung towi sining tau Sikhengngé nasaba jana mennang. Iyaro gau'é sicoco'i napowadaé Yotam ana'na Gidéon passalenna mennang wettunna natanroi. Maténana Abimélékh, Tola ana' Pua, mancaji pamimping untu' paleppe'i tau Israélié. Epponai Dodo, polé ri suku Isakhar. Monroi ri Samir ri daéra buluna Efraim. Duwappulo tellu taung ittana pimpingngi umma Israélié, nainappa maté narikuburu ri Samir. Maténana Tola, Israélié ripimpingngi ri Yair duwappulo duwa taung ittana. Assalenna Yair poléi ri Giléad. Ana'na iya worowané engka telluppulo tau. Mappunnaiwi mennang telluppulo kajunna kaleddé tonangeng sibawa telluppulo désa ri daéra Giléad. Iyaro désa-désaé riyaseng mupi désa-désa Yair. Maténi Yair, sibawa ritampungngi ri Kamon. Madosasi paimeng umma Israélié lao ri Puwangnge. Dé' mennang najampangiwi Puwangnge sibawa dé'tona nasompani Aléna. Nasompai mennang déwata-déwata Baal sibawa Asytorét, nenniya déwata-déwatana bangsa Siria, Sidon, Moab, Amon sibawa Filistin. Rimakkuwannanaro macayii Puwangnge lao ri umma Israélié, angkanna naleppessang bangsa Filistingngé kuwasaiwi mennang. Seppulo aruwa taung ittana iya duwa bangsaéro tenre'i sininna tau Israélié iya monroé ri Giléad, iyanaritu daérana tau Amorié seddé alauna Salo Yordan. Nagaukengngi tau Israélié sibawa mabecco. Mala tau Amongngé nalléttoiwi Salo Yordan untu' lao musui suku Yéhuda, Bényamin, sibawa Efraim angkanna umma Israélié manrasa-rasa senna. Namangobbi umma Israélié lao Puwangnge, adanna, “Madosaki lao ri Iko, nasaba dé' narijampangi-Ko, oh Allataala. Massompaki déwata-déwata Baal.” Namuni makkuwaro, mala muwabbokori mupa, nainappa lao massompa ri déwata-déwataé. Makkekkuwangngé dé'na Umaélona paleppe'ko. Lao bawanno ri déwata-déwata iya mupiléro. Angobbino lao ri mennang! Leppessanni mennang mattulung ri wettummu ri laleng asukkarakengngé.” Iyakiya makkedai umma Israélié lao ri Puwangnge, “Madosaki Puwang. Pogau'ni agi-agi iya Mupuwéloé, assaleng Mutulung muki iyaé essoé.” Nanabuwanni mennang sininna dato-dato barahalaé, nanasompai Allataala. Namesséna atinna Allataala mitai mennang ri laleng asukkarakengngé. Iyaro wettué sadiya-sadiyani tentarana Amon maélo mammusu. Makkémai mennang ri Giléad. Umma Israélié maddeppungeng toni sibawa makkéma ri Giléad. Kuwaniro ra'ya'é silaong sining pamimping polé ri suku-suku Israélié sisullé sitanai engkaga ri yelle'na mennang iya baranié makka senjata méwai bangsa Amongngé. Iyaro tauwé ripancajiwi matu pamimpinna sininna pabbanuwana Giléad. Yéfta iyanaritu séddi tau prajuri iya baranié naporé. Monroi ri Giléad. Ambo'na riyasengngi Giléad iyakiya indo'na séddiwi cakkuribang. Iyaro ambo'na mappunnai towi ana'-ana' worowané laingngé iya polé ri bainéna iya essaé. Battowanana iyaro ana'-ana'é, ripaddésu'ni Yéfta ri mennang polé ri bolaé. Makkedai mennang lao ri aléna, “Iko dé' aga-aga mana mulolongeng matu polé ri ambo'ta, saba' ana' poléko ri makkunrai laingngé.” Rimakkuwannanaro massaranni Yéfta polé ri silessu-silessurenna nainappa lao nanaonro ri daéra Tob. Kuwaniro masséddi sibawa sigarembolang tau maja nainappa lao mennang maddampo. Siyagangngaré wettu ri munrinna riluruini tau Israélié ri tau Amongngé. Wettunna kajajiyang gau'éro, sining tomariyolona Israélié ri Giléad laoni sibawa mérai Yéfta salaiwi daéra Tob. Makkedai mennang, “Pimpikki méwai tau Amongngé.” Iyakiya mappébaliwi Yéfta, “Tenniyaga iko benci senna'ka? Puraka mupaddésu polé ri bolana ambo'ku. Magi makkekkuwangngé wettummu ri laleng asukkarakengngé, laoko ri iyya?” Nappébali mennang, “Poléki nasaba macinnaki kuwammengngi mupimpingngi sininna pabbanuwana Giléad untu' musui bangsa Amongngé makkekkuwangngétto.” Nametté Yéfta, “Rékko muwéraka lisu ri Giléad untu' musui bangsa Amongngé, nanawérékki apakalang Puwangnge, iyya ritu mancaji panguwasa ri yasé'mu.” Nappébali mennang, “Situjuki. Puwangnge ritu sabbinna.” Najoppana Yéfta silaong sining pamimpinna Giléad. Nainappa pabbanuwana Giléad makkai mancaji panguwasa sibawa pamimping. Na ri yolona Puwangnge ri Mizpa, napangoloni Yéfta sining tuntutanna lao ri pabbanuwana Giléad. Purairo suroni Yéfta tau lao ri arung Among untu' powadai makkuwaé, “Aga asalatta angkanna mumusui wanuwatta?” Nabalini arunna bangsa Amongngé iyaro sining suroé, “Wettunna umma Israélié polé ri Maséré, nalai mennang tanata, mappammulai ri Salo Arnon lettu ri Salo Yabok sibawa Salo Yordan. Makkekkuwangngé palisuni iyaro secara damé.” Nainappa surosi Yéfta tau lao ri arung Among untu' baliwi makkuwaé, “Dé' sises-siseng umma Israélié narampasa'i tanana tau Moab-é iyaré'ga tanana tau Amongngé. Wettunna nasalai tau Israélié Maséré, mattujui mennang ri Séppang Akaba lalo ri padang kessi'é nanalettu ri Kadés. Nainappa suro tau lao ri arung Edom untu' méllau paramisi molai wanuwanna. Iyakiya dé' napalaloi mennang. Nainappa méllauwi mennang gau' padaé ri arung Moab, iyakiya dé'to napalaloi mennang molai daérana. Rimakkuwannanaro monroni tau Israélié ri Kadés. Nainappa napatteru mennang joppana molai padang kessi'é, iyakiya dé' nalaloiwi daérana Edom sibawa Moab, sangadinna molai laleng mattulilié angkanna lettu ri seddé alauna Moab, ri liwenna Salo Arnon. Makkémani mennang kuwaro, iyakiya dé' nalléttoiwi iyaro saloé, nasaba iyaro daéraé muttama'i daérana Moab. Purairo suroni umma Israélié tau lao ri Sihon, arunna Amorié ri Hésybon untu' méllau paramisi molai daérana Amori, nasaba maéloi lao ri daérana muto. Iyakiya Sihon dé' napalaloi mennang saba' dé' namateppe makkedaé maélomi bawang lalo. Mala napangarai sininna tentarana nainappa mébbu markas ri Yahas nanaluruiwi Israélié. Iyakiya Puwangnge, Allataalana Israélié, mpéréngngi umma Israélié apakalang lao ri Sihon silaong tentarana. Nakkuwaniro umma Israélié lolongengngi sininna tanana tau Amorié iya monroé ri wanuwaéro. Iyaro daérana Amorié natudangiwi mennang mappammulai polé ri Arnon ri seddé yattang, lettu ri seddé manoranna Salo Yabok, sibawa polé ri padang kessi'é ri seddé alau, lettu ri Salo Yordan ri seddé yajang. Jaji Puwangnge, Allataalana Israélié, iyanaritu paddésu'i sining tau Amorié untu' apentingenna umma'na Puwangnge. Na makkekkuwangngé maélokoga malai lisu? Tana iya nabbéréyangngé Kamos, déwatamuro, lao ri iko naweddingngi tette muwappunnangi. Iyakiya aga iya puraé nabbéréyang Puwangnge, Allataalata lao ri idi, maéloki mattahangengngi. Muwasengngi lebbi kessikko naiya Balak ana' Zipor, arung Moab? Dé' naengka naéwa Balak iyaré'ga mammusu sibawa idi. Tellu ratu taung ittana Israélié tudangiwi Hésybon sibawa Aroér nenniya désa-désaé ri seddéna, sibawa sininna kota-kotaé ri wirinna Salo Arnon. Namagi ri wettuéro dé' muwalai lisu? Dé', dé' tapasala lao ri iko. Iko ritu pasala nasaba muluruiki. Puwangnge ritu haking iya essoéwé pettuiwi parakaraéwé ri yelle'na bangsa Israélié sibawa bangsa Amongngé.” Iyakiya arung Among dé' nabati-batiwi iyaro pasenna Yéfta. Narikuwasaina Yéfta ri Rohna Puwangnge. Nalaona Yéfta célléngiwi daéra Giléad sibawa Manasyé nainappa lisu ri Mizpa ri Giléad. Polé kuwaro napatteruni joppana ri daérana bangsa Amongngé. Najjanciyanni Yéfta iyaé lao ri Puwangnge, “Rékko napalaloka Puwangnge caui tau Amongngé, enrengngé lisu sibawa salama, nigi-nigi bunge massu polé ri bolaku untu' duppaika, maéloka makkasuwiyangengngi selaku akkarobangeng ritunu lao ri Puwangnge.” Nainappa nalléttoi Yéfta Salo Yordan untu' musui tau Amongngé, na Puwangnge mpéréngngi apakalang aléna. Nagasani Yéfta mennang matteru polé ri Aroér lettu ri daéra seddéna Minit – iya manenna duwappulo kota – sibawa lettu sibbéla Abél-Keramim. Maéga senna tau Amon iya maté, angkanna cauni mennang polé ri tau Israélié. Wettunna lisu Yéfta polé ri Mizpa, poléni ana' makkunrainna duppaiwi sibawa séré-séré nanatetté towi rabanaé. Iyanaro ana'na séddi-séddié. Naitana muwa Yéfta, messé senna'ni Yéfta angkanna nasapé-sapé pakéyanna, nakkedato, “Aduh ana'ku, ancuru'ni atikku! Magi na iko harusu paesséiwi atikku? Puraka mattanro lao ri Puwangnge, nadé'na nawedding ugetteng lisu paimeng!” Nanakkeda iyaro ana'daraé lao ri Yéfta, “Purai Ambo' mattanro lao ri Puwangnge, na Puwangnge pura palaloi Ambo' wale'i jana sining tau Amongngé, balinna Ambo'ro. Jaji aga iya puraé najjanciyang Ambo', sitinajai napajoppa ambo'.” “Banna”, adanna iyaro ana'daraé matteru, “Uwéllauwi séddi passaleng: Wérékka wettu duwampuleng untu' joppa-joppa ri bulué silaong sellao-sellaoku. Kuwaniro maéloka teringiwi totoku, saba' maéloka maté ri wettu parawakku mupa.” Ripalaloni ri ambo'na, nainappa naleppessang lao. Iyaro ana'daraé laoni silaong sellao-sellaona ri bulué untu' messé babuwa kuwaro, nasaba maéloi maté sangadi dé'napa nakawing sibawa mappunnai ana'. Labe'nana duwampuleng, lisuni ri ambo'na, nainappa ambo'na pogau'i aga iya puraé najjanciyang lao ri Puwangnge. Namaténa iyaro ana'daraé ri wettu parawanna mupa. Iyanaro assalenna magi na ri yelle'na tau Israélié, biyasanna laowi ana'-ana'daraé patangngesso tungke taung untu' messé babuwa méngngerangngi ana'na Yéfta ri Giléad. Iyaro wettué sadiya-sadiyani suku Efraim untu' mammusu, nainappa lao malléttoiwi Salo Yordan mattuju ri Zafon, makkedai mennang lao ri Yéfta, “Magi mulao musui bangsa Amongngé nadé' muwéraki? Makkekkuwangngé maéloki tunuko sibawa silise bolamu.” Nakkedana Yéfta, “Ri yelle'na tau Amongngé sibawa idi tau Giléad-é engka assisalang iya maseroé. Purano uwobbi untu' bantuka paleppe'ka polé risining tau Amongngéro, iyakiya dé' mupolé. Jaji, mateppe'kuna makkedaé dé' mumaélo polé bantuka, baranina lao musui sining tau Amongngéro, namuni harusu'ka maté. Nanawérékka Puwangnge apakalang lao ri mennang. Magi makkekkuwangngé mupolé luruika?” Nanapaddeppungenni Yéfta sininna tau Giléad-é, nainappa namusu sibawa nacau tau Efraingngé. (Tau Giléad iya monroé ri Efraim sibawa Manasyé purani riteppu ri tau Efraingngé makkedaé napallainni aléna polé ri Efraim, sukunna.) Iyaro sining tau Giléad iya mammusué, natudangini onrong-ngonrong alléttongngé ri Salo Yordan, kuwammengngi naulléi tékke'i sining tau Efraim iya maéloé lari. Ri wettunna séddié tau Efraim, iya maéloé lari, méllau paramisi untu' mallétto, makkutanani tau Giléad-é ri aléna, “Tau Efraikkoga?” Rékko mappébaliwi, “Tenniya,” risuroni ri mennang powadai ada “Syibolét”. Makkedai matu “Sibolét” nasaba dé' naulléi teppui adaéro sibawa teppa. Nainappa natikkeng mennang nanaunoi ri sala séddinna onrong alléttongngéro. Nariyunona wettuéro 42.000 tau Efraim. Enneng taung ittana Yéfta pimpingngi tau Israélié. Nainappa maté naritampung ri kampong assalenna iyanaritu kota Mizpa ri Giléad. Labe'nana Yéfta, umma Israélié ripimpingngi ri Ebzan polé ri Bétléhém. Ebzan mappunnaiwi telluppulo ana' worowané sibawa telluppulo ana' makkunrai. Ana'-ana'na iya makkunraiéro napasiyalai sibawa sining tau polé ri suku laingngé, sibawa malai telluppulo ana'dara polé ri suku laingngé untu' ana'-ana'na worowané. Pituttaung ittana Ebzan pimpingngi umma Israélié, nainappa maté sibawa ritampung ri Bétléhém. Labe'nana Ebzan, umma Israélié ripimpingngi ri Elon polé ri suku Zébulon seppulo taung ittana. Nainappa maté naritampung ri Ayalon ri daérana Zébulon. Labe'nana Elon, umma Israélié ripimpingngi ri Abdon ana' Hilel polé ri Piraton. Ana'na iya worowané engka patappulo tau, sibawa eppo-eppona iya worowané engka telluppulo tau. Tungke-tungke mennang mappunnaiwi sikaju kaleddé tonangeng. Aruwa taung ittana umma Israélié ripimping ri Abdon. Nainappa maté naritampung ri Piraton ri daérana Efraim ri buluna tau Amalé'é. Madosasi tau Israélié lao ri Puwangnge, nainappa Puwangnge leppessangngi tau Filistingngé kuwasaiwi mennang patappulo taung ittana. Ri wettuéro engka séddi tau worowané ri kota Zora. Asenna Manoah, polé ri suku Dan. Bainéna manangngi. Iyakiya riséuwaé esso nappaitangngi aléna malaéka'na Puwangnge lao ri aléna sibawa makkeda, “Ri wettu labe'é dé' muwulléi mappunnai ana', iyakiya dé'na namaittana namuwattampu matu, sibawa lolongeng séddi ana' worowané. Rimakkuwannanaro jagaiwi alému madécéd-décéng. Aja' muwénung anggoro iyaré'ga énungeng maseri, iyaré'ga manré séuwa iya harangngé. Jajinna iyaro ana'mu, aja' sises-siseng murette'i gemme'na, saba' mappammulai ri laleng parémmanang pura ripattentuni untu' mancaji tau nazir. Aléna ritu matu méwa untu' paleppe'i bangsa Israélié polé ri akuwasanna tau Filistingngé.” Purairo laoni bainéna Manoah ri lakkainna sibawa makkeda, “Daéng, engka surona Allataala lao ri iyya; tappana pada-pada malaéka'na Allataala, angkakku métau. Dé' uwakkutanangngi polé kégi, na aléna dé'to nappaissengengngi asenna lao ri iyya. Iyakiya makkedai makkedaé mattampu'ka matu sibawa lolongeng séddi ana' worowané. Makkeda towi makkedaé dé' naweddikka ménung anggoro iyaré'ga énungeng maseri, iyaré'ga manré séuwa iya harangngé, saba' iyaro ana'é harusu'i riyabbéréyang lao ri Allataala untu' mancaji séddi tau nazir gangka tuwona.” Naéngkalinganaro, massempajanni Manoah lao ri Puwangnge, makkuwaé, “ Puwang, Tasuroi paimeng atammuro lao ri idi untu' mappaissengengngi aga iya harusu'é ripogau' sibawa ana'éro rékko jajini.” Naéngkalingai Allataala paréllaunna Manoah. Poléni paimeng iyaro malaéka'na Puwangnge wettunna bainéna Manoah tudat-tudang ri dare'é. Iyaro wettué dé'i gaga lakkainna kuwaro. Jaji larini paissengiwi gau'éro, “Daéng, itani, tau iya polé riyolo ri iyya'ro, polési!” Masittani Manoah maccowériwi bainéna. Naddeppérini iyaro tauwé sibawa makkutana, “Puwagga tiwi karéba ri bainéku?” “Tongeng,” pappébalinna. Namakkutana Manoah, “Rékko aga iyaro napowadaé Puwang kajajiyanni matti, aga harusu napogau' iyaro anana'é? Pékkugi atuwonna matti?” Nanakkeda Manoah lao ri Aléna, “Tatajenni cinampe Puwang. Maéloki mannasu bémbé lolo riyolo untu' Puwang.” Nakkutana iyaro malaéka'na Puwangnge, “Aga saba'na mumacinna missengngi asekku? Iyaro asekku aseng iya makalallaingngé.” Nanaalana Manoah sikaju bémbé lolo sibawa céddé gandong, nanataroi ri yasé'na batué nanakkasuwiyangengngi lao ri Puwangnge, iyanaritu Puwang iya pogau'éngngi gau'-gau' iya makalallaingngé. Nanakkeda Manoah lao ri bainéna, “Pasti matéki matu saba' puraki mitai Allataala!” Nappébali bainéna, “Rékko mémeng maéloi Puwangnge mpunoki, pasti dé' Namaélo tarimai akkarobangeng iya riyakkasuwiyangengngé lao ri Alénaro; sibawa dé'to Namaélo mappaitang manengngi iyaé lao ri idi iyaré'ga mappaissengengngi gau'-gau' iya puraé Napowada lao ri idi.” Siyagangngaré uleng ri munrinna iyaro bainéna Manoah jajiyanni séddi ana' worowané nanawéréngngi aseng Simson. Iyaro ana'é mancaji battowani enrengngé ribarakkaki ri Puwangnge; na wettunna engkai ri akkémanna suku Dan, iya engkaé ri pallawangenna Zora sibawa Esytaol, mammulani Rohna Puwangnge mpéréngngi awatangeng. Riséuwaé esso laowi Simson ri Timna, nanaita séddi ana'dara Filistin kuwaro. Nainappa lisu sibawa makkeda ri tomatowanna, “Tattaré'ka lao riséddié ana'dara Filistin ri Timna. Uwéllauwi ambo' sibawa indo' lao lettukiwi.” Iyakiya makkedai tomatowanna, “Magi naharusu lao ri tau Filistingngé untu' lolongeng bainé, nadé' nauttama mennang umma'na Puwangnge? Aga ri laleng appatta iyaré'ga ri yelle'na sininna bangsata dé'gaga séddi ana'dara iya coco'é?” Nappébali Simson lao ri ambo'na, “Iyakiya ana'dara Filistingngé ritu upoji. Naupoménasai ambo' maélo letturiwi untu' iyya.” Dé' naissengngi tomatowanna Simson makkedaé Puwangnge ritu mébbui Simson pogau'i gau'éro. Saba', Puwangnge sappa kasempatang untu' musui tau Filistingngé. Iyaro wettué tau Filistingngé kuwasaiwi tau Israélié. Nanalaona Simson ri Timna silaong sibawa tomatowanna. Wettunna mennang lalo riséddié dare anggoro, siruntu'i Simson sibawa sikaju singa lolo. Mangngaungngi iyaro singaé, natennasenna-sennana Simson mancaji mawatang polé ri akuwasanna Puwangnge. Nainappa nasapé-sapé iyaro singaé sibawa limanna, samanna iyaro olokolo'é banna sikaju bémbé. Iyaro gau'é dé' nacuritangngi tomatowanna. Nainappa lao Simson ri ana'daraéro sibawa sipabbicara-bicara, nanapojini Simson. Labe'nana siyagangngaré wettu ittana, laosi Simson untu' kawing sibawa ana'daraéro. Ri laleng allalengengngé, lésséi untu' mitai bakké singa iya puraé naunoro. Wettunna lettu kuwaro naitani maéga senna arinaung ri laleng bakkéro, sibawa engkato cani. Nakarao'ni iyaro cani'é ri laleng limanna, nanajoppa matteru nananré towi iyaro cani'é. Nainappa lao ri tomatowanna nanawéréng towi mennang sibagiyang iyaro cani'é, nananréni mennang. Iyakiya dé' nappaissengengngi Simson makkedaé iyaro cani'é nalai polé ri bakké singaé. Laonana ambo'na Simson ri bolana ana'daraéro, pakangkani Simson pésta kuwaro, nasaba makkuwaniro abiyasanna kallolo-kalloloé. Wettunna naita tau Filistingngé, piléni mennang telluppulo kallolo untu' silaongengngi. Nanakkeda Simson lao ri mennang, “Mappunnaika patteppung. Rékko muwulléi teppui, uwérékko matu tungke-tungke silampa kaing lénang alusu sibawa sipasang pakéyang iya makessingngé. Uwérékko wettu pitungngesso singngétta pésta akawingengngéwé, untu' teppui. Iyakiya rékko dé' muwulléi teppui, iko ritu tungke-tungke harusu mpérékka kaing lénang alusu sibawa sipasang pakéyang iya makessingngé.” Nanakkeda iyaro sining tau Filistingngé, “Jajini! Powadani makkekkuwangngé iyaro patteppungngé.” Nakkeda Simson, “Polé ri iya manré, massui iya riyanré; polé ri iya mawatangngé, massui iya macenningngé.” Labe'ni tellungngesso nadé'pa mennang naullé teppui iyaro patteppungngé. Jaji, ri esso iya maeppaé makkedani mennang ri bainéna Simson, “Harusu'ko palécéi lakkaimmu kuwammengngi namaélo paissengiki bettuwanna iyaro patteppungngé. Rékko dé', maéloki tunuko silaong silise bolana ambo'mu. Samanna muundakki untu' paccappui waramparatta!” Rimakkuwannanaro, laoni bainéna Simson ri Simson nanaterito, nanakkeda, “Uwisseng dé' mupojika. Magi muwéréngngi patteppung sellao-sellaoku, iyakiya dé' mupaissengika bettuwanna? Tentu mucéccéka!” Nakkeda Simson, “Tajengngi riyolo! Muwi lao ri tomatowakku dé'to upaissengiwi, magi naharusu'ko ripaissengi?” Ri lalenna pitungngessoé péstaéro bainéna Simson terimi matteru. Nasaba matteru-terui majjabé, na ri esso iya mapitué, ripaissengini ri Simson bettuwanna iyaro patteppungngé. Nainappa iyaro bainéna Simson paissengiwi sining tau Filistingngé. Jaji, ri esso iya mapitué ri wettu dé'napa nalabu essoé, makkedani iyaro sining tauwé lao ri Simson, “Aga iya lebbi macenningngé naiya cani'é? Sibawa aga topa iya lebbi mawatangngé naiya singaé?” Nappébali Simson, “Rékko dé' mupakéi bainéku, dé' muwulléi teppui iyaro patteppungngé!” Tappa mawatanni Simson polé ri akuwasanna Puwangnge, nainappa lao ri Askélon. Kuwaniro mpuno telluppulo tau worowané iya mappaké magelloé. Nalai pakéyanna mennanro nanawéréngngi iya telluppulo tau iya puraé teppui iyaro patteppunna. Purairo, lisuni ri bolana sibawa ati iya masumpe'é. Nainappa matuwa worowanéna mabbéréyangngi iyaro bainéna Simson lao ri tau iya mancajiyé passeppina Simson ri wettu akawingenna. Siyagangngaré wettu ri munrinna, wettunna éngngalang gandongngé, laoni Simson célléngiwi bainéna. Tiwii sikaju bémbé lolo untu' bainénaro. Makkedani Simson lao ri matuwa worowanéna, “Macinnaka lao ri bili'é sita sibawa bainéku.” Iyakiya matuwa worowanéna dé' napalaloi. Adanna lao ri Simson, “Uwasengngi tonget-tongengngi mucéccé, jaji, purani uwabbéréyang lao ri sellaomu. Iyakiya weddikko malai anrinna. Lebbi magelloi.” Makkedani Simson, “Aga iya upogau'é matu lao ri tau Filistingngé iya sisengngéwé, tenniya asalakku!” Nainappa lao tikkeng telluratu serigala. Ikko'na iyaro sining serigalaé nasiyoi tadduwa-duwa. Ri sumpunnaro nataroiwi séddi sulo. Purairo napalluwa'ni iyaro sining suloé nainappa naleppessang iyaro sining serigalaé ri laleng sining dare gandonna tau Filistingngé. Nanréni api sininna gandong iya puraé riyéngngala kuwaro. Mala gandong ritanengngé sibawa palla-palla anggoro'é maccowéto nanré. Laoni sining tau Filistingngé salidikiwi gau'éro. Naripaissengina mennang ri tauwé makkedaé Simson ritu pogau'i, nasaba matuwa worowanéna ri Timna pura mabbéréyangngi bainéna Simson lao ri séddié silaonna Simson. Rimakkuwannanaro natununi sining tau Filistingngé iyaro makkunraié enrengngé silise bolana ambo'na gangka cappu. Nanakkeda Simson lao risining tau Filistingngéro, “Mappakuwaigatu carana tinda'ko? Mattanroka dé' umaélo mammekko rékko dé'pa uwale'i gau'éwé lao ri iko!” Nainappa nalurui mennang sibawa mabecco sibawa mpunoi maéga polé ri yelle'na mennang. Purairo, laoni nanaonro ri laleng gowaé riséddié bulu batu ri Etam. Nalaona tau Filistingngé ri daéra Yéhuda namakkéma kuwaro, nainappa nagasa kota Léhi. Makkutanani tau Yéhudaé ri tau Filistingngé, “Magi mugasaki?” Nappébali mennang, “Poléki untu' tikkengngi Simson kuwammengngi weddikki gaukengngi pada-pada nagaukengngékki.” Naéngkalinganaro, laoni 3.000 tau Yéhuda ri gowaé ri bulu batué ri Etam. Kuwaniro mennang makkeda, “Simson, dé'ga muwissengngi makkedaé nakuwasaiki tau Filistingngé? Aga iyaé pura mugaukekki!” Nametté Simson, “Banna uwale'i aga iya napoga'é mennang lao ri iyya.” Nakkeda mennang, “Poléki untu' siyoko sibawa mabbéréyakko lao ri tau Filistingngé.” Nakkeda Simson, “Ajjancino riyolo makkedaé dé' mumaélo mpunoka.” Nakkeda mennang, “Makessinni, mémeng banna maéloki siyoko sibawa mabbéréyakko lao ri tau Filistingngé. Dé' tamaélo mpunoko.” Nainappa mennang siyoi sibawa duwa tulu iya barué mupa, nanatiwii lao polé ri gowaéro. Wettunna Simson ritiwi lettu ri Léhi, larini sining tau Filistingngé lokkaiwi nanagora-gorai towi. Tennasenna-sennana namancaji mawatang polé ri akuwasanna Puwangnge. Tulu iya siyoéngngi limannaro napettui makkuwamiro bawang samanna iyaro tulué, tulu mangu. Nainappa lolongenni séddi buku bangi iya barué mupa polé risikajué kaleddé. Naitténi iyaro bukué, nainappa napaké untu' munrui 1.000 tau gangka maté. Namakkélonna Simson, “Nasibawang bangi kaleddé, uwajara'i sisebbu tau; nasibawang bangi kaleddé, ugoppoi sining ujuna mennang.” Purairo, nabbéyanni iyaro buku bangié. Iyanaro saba'na nariyaseng iyaro onrongngé Ramat-Léhi. Namadekka senna'ni Simson, angkanna mangobbi lao ri Puwangnge. Makkedai, “ Puwang, silalona Muwérékka apakalang iya battowaéwé. Makkekkuwangngé harusu'ka'ga maté nataro dekka, angkanna ritikkeng risining tau Filistingngéwé iya dé'é naissek-Ko?” Nanatimpa'ni Allataala kalebbongngé ri bulu batué ri Léhiro, namassuna uwai polé kuwaro. Ménunni Simson, namatakkana pappéneddinna paimeng. Iyanaro saba'na iyaro mata uwai nariyaseng Mata Uwai Hakor. Iyaé mata uwai engka mupi ri Léhi. Duwappulo taung ittana Simson pimpingngi umma Israélié wettunna mennang rikuwasai ri tau Filistingngé. Riséuwaé esso laowi Simson ri Gaza. Kuwaniro siruntu sibawa séddi cakkuribang nanalao matinro sibawa makkunraiéro. Nanaéngkalingani pabbanuwana Gaza makkedaé engkai Simson kuwaro. Jaji, nakeppunni onrongngéro sibawa natajengngi puppu benni ri gerbanna kotaé. Iyakiya dé' aga-aga napogau' iyaro wennié nasaba mappikkiri'i mennang, “Mompopi matti matanna essoé, nappaki mpunoi.” Iyakiya dé' namatinro Simson kuwaro narapi élé. Tengnga benninna moto'i nanalao ri pintu gerbanna kotaé. Nareddu'i iyaro pintué iya manenna silaong allirinna sibawa paccala'na. Nainappa naakka iyaro pintué ri salakangkanna, nanatiwii ri tompo'na bulu-bulué ri liwenna Hébron. Purairo napojisi Simson séddi makkunrai polé ri Lompo Sorék. Asenna iyaro makkunraié Délila. Napoléna lima tau panguwasana Filistingngé ri makkunraiéro sibawa makkeda, “Palécéi Simson kuwammengngi namaélo paissengiko aga rahasiyana awatangenna, sibawa pékkugi carana untu' patteddéngngi awatangennaro. Nanallalengiwiro weddikki polé sibawa siyoi untu' caui. Na tungke-tungkeki matti maélo mpérékko sisebbu sératu dowi péra'.” Nakkeda Délila lao ri Simson, “Simson, aga saba'na mumawatang makkuwa? Nasibawang aga harusu'ko risiyo kuwammengngi nateddéng awatangemmuro? Coba mappaissengengngi rahasiyana!” Nappébali Simson, “Rékko risiyoka sibawa pitu tulu pana baru iya dé'éppa namarakko senna, malemmaka matu sibawa mancaji pada-pada tau biyasaé.” Nanakkeda Délila lao ri Simson, “Ah, mabbelléko! Muwacculé-culéika bawang. Ayo curitakka aga wedding risiyorekko!” Nametté Simson, “Rékko risiyoka sibawa tulu baru iya dé'éppa naengka naripaké, malemmaka matu sibawa mancaji pada-pada tau biyasaé.” Na tau Filistingngé mattajengngi ri bili' laingngé, malani Délila siyagangngaré tulu iya barué, nanasiyosi Simson. Nainappa gora, “Simson! Poléi tau Filistingngé!” Iyakiya napettuiwi Simson iyaro sining tulué polé ri limanna pada-pada tau pettuiyé wennang. Nanakkeda Délila lao ri Simson, “Ah, muwacculé-culéisika. Mabbelléko. Ayo curitakka aga wedding risiyorekko!” Nappébali Simson, “Rékko iya pituppesse'é gemme'ku riyanengngi ri wennangngé ri paréwa tennungngé, nainappa riyassiyoreng ri aju paréwa tennungngéro, malemmaka matu sibawa mancaji pada-pada tau biyasaé.” Naripatinrona Simson ri Délila nainappa naaneng iya pituppesse gemme'na Simson ri wennangngé ri paréwa tennungngé. Purairo nassiyorenni ri aju paréwa tennungngéro nainappa gora, “Simson! Poléi tau Filistingngé!” Moto'ni Simson nanagettengngi gemme'na angkanna leppe polé ri paréwa tennungngéro. Nainappa makkeda Délila, “Makkedako mupojika padahal atimmu mabélai polé ri iyya! Wékkatelluni muwacculé-culéika, narapi makkekkuwangngé dé' mumaélo mappaissengengngi magi mumawatang makkuwaro.” Esso-esso Délila matteru-teru bawang majjabé sibawa maddessa, angkanna mangingngini Simson méngkalingai. Angkanna nacurita Simson rahasiyana, nakkeda Simson, “Dé'pa naengka narirette gemme'ku. Puraka riyabbéréyang lao ri Allataala mancaji appunnangenna iya ripallaingngé. Sipongekku jaji mancajika séddi tau Nazir. Rékko rirette'i gemme'ku; teddéngngi matu awatangekku; malemmaka matu sibawa mancaji pada-pada tau biyasaé.” Napérasani Délila makkedaé purani nappaissengeng Simson rahasia atinna. Rimakkuwannanaro nakirinni iyaé birittaéwé lao risining tomakuwasana Filistingngé, “Polésiko iyanaé sisengngé bawang. Purani nacurita Simson rahasiyana ri iyya.” Poléni mennang sibawa tiwi dowi untu' Délila. Purairo ricapu-capuni Simson ri Délila gangkanna matinro ri wakkanna, nainappa mobbi tau nanasuroi rette'i pituppesse gemme'na Simson. Nainappa nasissa Simson, nasaba teddénni awatangenna Simson. Nainappa gora, “Simson! Poléi tau Filistingngé!” Moto'ni Simson sibawa nasenna leppe pada-pada wettu-wettu iya labe'é. Dé' naissengngi makkedaé risalaini ri Puwangnge. Naritikkenna risining tau Filistingngé sibawa nacukkéi lise matanna. Natiwini mennang ri Gaza nanasiyoi sibawa duwa ranté tembaga, nainappa naputtama ri laleng tarungkué. Kuwaniro risuro mappallaung maddése. Iyakiya iyaro wettué mammulasi tuwo paimeng gemme'na. Riséuwaé esso maddeppungenni sining panguwasana Filistingngé maélo mappésta sibawa makkasuwiyangeng akkarobangeng marowa senna untu' Dagon, déwatana mennang. Makkélonni mennang, “Purani' nawéréng déwatata apakalang lao ri Simson, balitta!” Nakkeda Simson lao ri anana' worowané iya rénréngngéngngi, “Leppessangngi limakku kuwammengngi weddikka makkatenningngi alliri-alliri iya tula'éngngi iyaé gedungngé, nasaba macinnaka sanré kuwaro.” Iyaro gedungngé buce sibawa tau. Iya lima panguwasana Filistingngé engka towi kuwaro. Na ri langga yasé'na iyaro gedungngé engka kira-kira 3.000 tau. Makkita-ita manengngi mennang sibawa méllé-kéllé'i Simson. Iyaro wettué massempajangngi Simson; makkedai, “Oh Puwang Iya Pommatanré, tennapodo taéngngerakka. Wéréssika awatangeng iyaé sisengngé bawang, oh Allataala, kuwammengngi nasibawangngi iyaé tindakangngé weddikka wale'i tau Filistingngé iya puraé cukkéi iya duwa lise matakku.” Purairo nakkatenninni Simson iya duwa alliri tengnga iya tula'éngngi iyaro gedungngé. Nainappa mattulekkeng sibawa lima abéyona ri alliri séddié na lima ataunna ri alliri iya laingngé, gorani, “Leppessakka maté silaong sining tau Filistingngéwé!” Nanapassangkani awatangenna sorongngi iyaro alliri-allirié gangkanna léwu sibawa geppai iya lima panguwasa Filistingngé silaong sininna tau laing iya engkaé kuwaro. Maté toni Simson. Iyakiya, ri wettu amaténnaro naunoi tauwé lebbi maéga naiya wettunna tuwo. Nanapoléna sumpulolona sibawa sininna kaluwargana untu' malai ujuna. Natiwini mennang iyaro ujuna lisu, nanatampungngi ri laleng kuburu'na Manoah, ambo'na. Iyaro kuburu'é engkai ri pallawangenna Zora sibawa Esytaol. Mancajiwi Simson pamimpinna Israélié duwappulo taung ittana. Engka séddi tau worowané riyaseng Mikha. Monroi ri daéra bulué ri daérana Efraim. Riséuwaé esso makkedai lao ri indo'na, “Indo', wettunna indo' ateddéngeng sisebbu sératu dowi péra', uwéngkalingai indo' tanroiwi pangana. Engkaniyé, indo' dowina! Iyya ritu ménnauwi.” Nappébali indo'na, “Tennapodo Puwangnge barakkakiko, na'!” Napalisuni Mikha iyaro dowié ri indo'na, namakkedana indo'na, “Kuwammengngi iko ana', leppe'ko polé ri tanro iya puraé upowadaro, uwakkasuwiyangengngi iyaé péra'é lao ri Puwangnge untu' ripaké mébbu dato'-dato' aju iya rilapiriyé péra'. Jaji iyaro dowié upalisui lao ri iko.” Purana napalisu Mikha iyaro dowié ri indo'na, iyaro indo'na nalani duwa ratu batunna polé ri dowiéro, nanabbéréyangngi lao riséddié panré péra'. Nainappa nasuro iyaro panré mébbu séddi dato'-dato' aju iya rilapiriyé sibawa péra'. Nainappa iyaro dato'-dato'é nataro ri bolana Mikha. Mémeng mappunnaini Mikha séddi onrong assompang. Mébbuni siyagangngaré dato'-dato' barahala sibawa silampa éfod nainappa nakkka sala séddinna ana'na worowané mancaji imang. Iyaro wettué dé' nappunnai arung bangsa Israélié; tungke tau pogau'i aga iya nangga'é tongeng. Iyatoro wettué engka séddi tau kallolo polé ri suku Léwi. Riyolo monroi ri Bétléhém ri daérana Yéhuda. Iyakiya makkekkuwangngé nasalaini iyaro kotaé sibawa mattengngang joppa sappa onrong iya laingngé. Ri laleng allalengennaro lettu'ni ri bolana Mikha ri daéra buluna Efraim. Makkutanani Mikha ri aléna, “Tau aga saudara?” Nappébali iyaro tauwé, “Iyya tau Léwika polé ri Bétléhém ri Yéhuda. Sappaka onrong maddibola.” Nakkeda Mikha, “Onrono silaong iyya kuwaé, kuwammengngi mumancaji pappangajata sibawa imatta. Uwéréppo matu seppulo dowi péra' tungke taung, kuwaéttopa pakéyang nenniya inanré.” Nakkeda Mikha, “Nah, makkekkuwangngé mateppe'na Puwangnge pogau'i matu makessingngé lao ri iyya saba' engkana séddi tau Léwi iya mancaji imangngé untu' iyya.” Iyaro wettué ri Israélié dé'gaga arung. Suku Dan sappa-sappa mupi daéra untu' mancaji daérana mennang, saba' dé'topa mennang nalolongeng tana silaong suku-suku laingngé ri laleng bangsa Israélié. Rimakkuwannanaro, piléni mennang lima tau iya poré polé ri yelle'na sininna appangngé ri laleng sukunna mennang iya monroé ri Zora sibawa Esytaol, nainappa nawéréng jamang iya lima tauwéro untu' salidikiwi wanuwaéro. Najoppana sining tauwéro, nalettu'na ri daéra buluna Efraim. Kuwaniro mennang mappéruma ri bolana Mikha. Wettunna maélo muttamakiwi iyaro bolaé naéngkalingani mennang iyaro kallolo Léwié mabbicara, nanarupaiwi lagunna. Jaji, nalokkaini sibawa makkutana, “Magako kuwaé? Aga urusammu? Niga tiwiko?” Nappébali iyaro tau kalloloé, “Engkaka kuwaé nasaba Mikha. Aléna ritu makkaka mancaji imanna, sibawa mpérékka gaji.” Namakkeda mennang lao ri aléna, “Rékko makkuwaitu, tulung akkutanangngi ri Allataala aga iyaé allalengetta papolé matu wassélé iyaré'ga dé'.” Nappébali iyaro imangngé, “Aja' mubata-bata. Puwangnge pura barakkakiwi allalengemmu.” Purairo joppani iya lima tauwéro nanalao ri Lais. Kuwaniro napénessai pabbanuwana. Manessani makkedaé cara atuwo-tuwonna iyaro pabbanuwana Lais pada-pada cara atuwonna bangsa Sidongngé. Namuni mennang massala, sibawa mabéla polé ri bangsa Sidongngé, tuwoi mennang amang sibawa damé, dé' nappunnai bali, macommo, enrengngé dé' naakurangeng muwi séuwa aga. Wettunna iya lima tauwéro lisu lao risining sukunna ri Zora sibawa Esytaol, riyéllauni mennang mabbéré laporang. Rimakkuwannanaro, joppani polé ri Zora sibawa Esytaol 600 tau suku Dan. Sibawa senjata sukku, laoni mennang ri bagiyang yajanna Kiryat-Yéarim ri daérana Yéhuda nainappa makkéma kuwaro. Iyanaro saba'na nariyaseng mupi iyaro onrongngé Akkémanna Dan. Polé kuwaro joppani mennang matteru ri daéra buluna Efraim lettu ri bolana Mikha. Makkedani iya lima tau mata-mata risuroé riyoloro lao ri sellao-sellaona, “Muwissegga makkedaé risala séddinna bolaéwé engka dato'-dato' mallapi péra'? Engkato dato'-dato' laing sibawa éfod. Coba pikkiri'i aga harusu tapogau'.” Nainappa mennang lao ri bolana Mikha, onronna kallolo Léwiéro monro, sibawa makkutanangngi keadaanna. Iyaro wettué iya enneng ratuna prajuri suku Dan, iya massenjata sukkuéro, mattengngangngi tettong ri yolona pintu gerbangngé. Iya lima mata-mataéro matteruni muttama ri lalempola, nanalai dato'-dato' aju iya mallapi péra'éro silaong dato'-dato' laingngé sibawa éfod. Iyaro kallolo Léwié mattengngangngi tettong silaong iya enneng ratuna prajuri'éro ri pintu gerbangngé. Wettunna iya lima tauwéro muttama ri bolana Mikha sibawa malai éfod-é silaong dato'-dato' barahalaéro, makkutanani iyaro kallolo Léwié, “Aga iyaé mupogau'?” Nappébali mennang, “Ammekkoko! Aja' muwakkutana. Accowé bawanno ri idi, mancajipo matu imatta sibawa pappangajata. Lebbi kessing muwi mancaji imang untu' séddi suku naiya mancaji imangngé untu' séddi kaluwarga bawang!” Masennanni iyaro kallolo Léwié sibawa tangngaéro. Jaji, nalani éfod-é sibawa dato'-dato' barahalaéro nainappa maccowé silaong mennang. Nainappa napatteru mennang joppana iyaro rombangangngé, ripoddiyoloi ri ana'-ana'é, olokolo'é sibawa barab-baranna mennang. Wettunna mennang mabélani, naobbini Mikha bali-bali bolana nainappa silaong lellungngi iyaro sining tau suku Dangngé. Macawé'nana ri mennang, gora-gorani Mikha sibawa sining taunna lao ri mennang. Iyaro sining tau suku Dangngé gilinni sibawa makkutana lao ri Mikha, “Engka aga? Magi mupolé sibawa maéga makkuwaro tau?” Nappébali Mikha, “Mulariyangngi dato'-dato'ku sibawa imanna, angkanna dé'na uwappunnai aga-agana, nainappako makkeda, ‘Engka aga!’ ” Nakkeda iyaro sining tau suku Dangngé, “Lebbi kessing muwi mututu témummu; aja' narapii iyaé sining tauwé macayii nanaluruiko. Mumaté matti silaong sininna kaluwargamu.” Purana makkeda makkuwaro, iyaro sining tau suku Dangngé napatteruni joppana mennang. Naitani Mikha makkedaé mabélai lebbi watanna mennang, rimakkuwannanaro balé'ni nanalisu. Asenna iyaro kotaé nasulléiwi mennang mancaji Dan, situru asenna toriyolona, iyanaritu Dan, ana'na Yakub. Dato'-dato' barahala iya natiwié mennanro, napatettonni ri kotaéro nainappa nakka Yonatan, ana' Gérsom, eppona Musa, mancaji imanna. Iyaé wijanna Gérsom tette'i mancaji imanna suku Dan narapi wettunna umma Israélié ripali ri wanuwa-wanuwa laingngé. Iyaro dato'-dato' barahala ébbuna Mikha tette'i ri Lais ri wettu engkana mupa Kémana Puwangnge ri Silo. Wettunna tau Israélié dé'pa nappunnai arung, engka séddi tau Léwi monro ri désa-désaé, ri daéra buluna Efraim. Malai séddi makkunrai polé ri Bétléhém Yéhuda mancaji gundi'na. Iyakiya ri munri macayii iyaro makkunraié lao ri aléna, angkanna lisu ri bolana ambo'na ri Bétléhém. Monronana iyaro makkunraié kuwaro eppa uleng ittana, iyaro tau Léwié laoni molaiwi untu' palécéi nalisu ri aléna. Laowi sibawa tiwi séddi ata enrengngé duwakkaju kaleddé. Lettu'nana kuwaro, ritiwini ri makkunraiéro lao ri ambo'na. Wettunna naita ambo'na makkunraiéro, naduppaini sibawa masennang, sibawa nadessa'na kuwammengngi aja' nalisu. Rimakkuwannanaro, monroni tellungngesso ittana sibawa manré ménung enrengngé mabbenni kuwaro silaong gundi'naro. Ri esso maeppaé, moto'ni mennang maélé senna nasadiya-sadiya maélo joppa. Iyakiya makkedai ambo'na iyaro makkunraié lao ri tau Léwiéro, “Anréno riyolo kuwammengngi mumawatang. Weddikko joppa matu.” Ri esso malimaé, maélé senna'ni, wettunna maélo joppa, makkedasi ambo'na iyaro makkunraié, “Ayo, anréno riyolo; cinampe'pi mujoppa.” Nasisamana mennang manré sipadduwa sibawa maccana-cana narapi labu essoé. Nainappa wettunna iyaro tau Léwié maélo joppa silaong gundi'na sibawa atanna, makkedani iyaro ambo'é, “Mawé'ni mawenni, dé'na namaitta namapettang. Lebbi kessing muwi mabbenniyé kuwaé sibawa massennang-sennang. Baja weddikko moto maélé untu' joppa lisu.” Rimakkuwannanaro joppani mennang matteru sibawa dé' nappésau ri Yébus. Labuni essoé wettunna mennang lettu ri Gibéa ri daérana suku Bényamin. Léppanni mennang kuwaro untu' mabbenni, nainappa muttama ri kotaé sibawa lao tudang ri tana lapangngé. Iyakiya dé' muwi séddi tau iya mobbiéngngi mennang lao ri bolana untu' mabbenni. Wettunna mennang tudang ri tana lapanna kotaé, poléni séddi tomatowa iya nappaé lisu polé ri pallaunna ri dare'é. Sitongenna assalenna poléi ri daéra buluna Efraim iyakiya makkekkuwangngé monroi ri Gibéa. (Pabbanuwa laingngé ri Gibéa iyanaritu tau Bényamin.) Wettunna naita iyaro tomatowaé tau Léwié ri tana lapangngé, makkutanani, “Polé kégi saudara, sibawa maéloi lao kégi?” Nappébali iyaro tau Léwié, “Silalota polé ri Bétléhém ri Yéhuda, na mattengngakki ri laleng allalengengngé lisu ri bolaé ri désa-désa buluna Efraim. Polé kuwaro assalekku. Dé' muwi séddi tau polé ri pabbanuwana kotaéwé maélo tarimaki ri bolana untu' mabbenni. Dé' aga-aga iya riyapparelluwangngé iya laingngé, genne bokotta. Engka daramé sibawa anré untu' kaleddé'ta; engka roti sibawa anggoro untu' iyya sibawa bainékué enrengngé atakku.” Nanakkeda iyaro tomatowaé, “Aja' mubata-bata, utuluppo matu. Aja'na muwabbenni ri tana lapangngéwé.” Nanatiwini mennang ri bolana nanawéréngngi inanré kaleddé'-kaleddé'na mennang. Sibawa puranana iyaro sining topoléna nabissani ajéna, manréni mennang. Wettunna mennang massennas-sennang, tennasenna-sennana rikeppung iyaro bolaé risining tau benna'é ri kotaéro. Nagetto'ni mennang tange'é sibawa makkeda lao ri tomatowaéro, “Abbéréyangngi lao ri idi worowané iya mutiwié ri bolamu. Maéloki pakéi!” Massuni iyaro tomatowaé sibawa makkeda lao ri mennang, “Aja', saudara-saudara! Uwéllauwi, aja' mupogau'i gau' iya majaé sibawa dé' nasipato pada-padaéro, saba' topolékui. Uwéréppo matu gundi'na sibawa ana'ku iya ana'daraé. Weddikko pésennangiwi alému sibawa mennang. Iyakiya, aja' mugaukengngi aga-aga iya majaé lao ri topolékuro!” Iyakiya nasaba iyaro sining tau benna'é tette'i mattedde, iyaro tau Léwié nasoronni gundi'na massu untu' mennang. Nainappa mennang nakédo salai iyaro makkunraié dé' nappésau narapi élé. Subunnana lisuni iyaro makkunraié, iyakiya ri yolona tange'na iyaro tomatowaé, onronna lakkainna mabbenni, marenne'ni. Mompona essoé engka mupi kuwaro. Iyaro éléé, wettunna moto lakkainna sibawa timpa'i tange'é untu' joppa, napoléini gundi'na lénne ri yolona bolaéro sibawa limanna makkatenning ri tange'é. Adanna, “Oto'no, laono mai tajoppa.” Iyakiya iyaro makkunraié dé' nappébali nasaba maténi. Nainappa nakka iyaro makkunraié nanapaénré'i ri kaleddé'é, nanajoppa lao ri bolana. Lettu'nana ri bolaé, muttama'ni sibawa mala piso nainappa nalétta-létta ujuna gundi'naro mancaji seppulo duwa létta'na. Purairo, nakirinni iyaro létta'-létta'é lao ri iya seppulo duwa suku bangsa Israélié, tungke-tungke silétta. Sininna tau iya mitaéngngi iyaro makkeda, “Dé'pa naengka gau' pada-padaéwé kajajiyang, sipongenna umma Israélié massu polé ri Maséré lettu essoéwé. Dé' naweddikki monro mammekko. Harusu'ki barunding untu' tinda'!” Napoléna sininna umma Israélié polé ri Dan ri manorang lettu ri Bérsyéba ri yattang, sibawa Giléad ri alau, untu' pennoiwi pangobbiéro. Maddeppungenni mennang sibawa masséddi ri Mizpa ri yolona Puwangnge. Iya manenna engka 400.000 prajuri polé ri pasukang mallalengngé. Pamimping-pamimpinna tungke suku bangsa engka towi kuwaro. Napolé sining tau Gibéaé ri wennié untu' sappaka. Nakeppungngi bola iya uwonroiyé mabbenni sibawa akkatta untu' mpunoka, iyakiya rimunri nakédo salaiwi gundi'ku gangka maté. Nauwalani ujuna nainappa ulétta-létta, nainappa kiringngi lao ri iya seppulo duwa sukué ri laleng bangsata tungke-tungke silétta. Upogau'i iyaro gau'é nasaba iyaro sining tau Gibéaé purai napogau' séuwaé iya majaé sibawa mappakasiri-sirié ri yelle'na umma Israélié. Iko maneng iya engkaé kuwaé iyanaritu tau Israél. Jaji makkekkuwangngé uwéllauwi timbangetta!” Nassama-samang sining tau iya maddeppungengngé ri onrongngéro tettong sibawa makkeda, “Idi manengngé dé'gaga iya maéloé lisu ri kémaé iyaré'ga ri bolaé. Iyanaé maélo tapogau': Taundiwi untu' pattentui sining tau iya harusu'é gasai Gibéa. Tawa seppulona polé risininna tau worowané Israélié harusu passadiya inanré untu' ménnang iya mammusué. Iya laingngé laowi gasai Gibéa untu' hukkungngi mennang nasaba jana iya puraé napogau' ri yelle'na umma Israélié.” Makkuwaniro umma Israélié masséddi untu' gasai Gibéa. Purairo nasuroni umma Israélié sining tauwé lao ri sininna daérana suku Bényamin untu' palettu'i karébaéwé: “Ja aga iya kajajiyangngé ri iko? Abbéréyangngi iyaro sining tau benna'é polé ri Gibéa lao ri idi kuwammengngi taunoi mennang nanallalengiwiro ripallennye'i iyaro jaé polé ri tengnga-tengngana Israélié.” Iyakiya dé' nabati-batiwi tau Bényamingngé ada-adanna tau Israélié iya laingngéro. Mala polé risininna kotaé ri daérana Bényaminro poléni sining tau Bényamingngé ri Gibéa untu' musui sining tau Israél laingngé. Na risining tau Israél laingngé maddeppungenni 400.000 égana prajuri tallatié. Iyaro tentarana umma Israélié laoni ri Bétel, sibawa makkutana ri Allataala, “Oh Puwang, suku kégaénna polé ri yelle'ta iya harusu'é bunge lao luruiwi tau Bényamingngé?” Nappébali Puwangnge, “Suku Yéhuda.” Pappa bajana éléé joppani mennang sibawa makkéma ri seddéna kota Gibéa. Naatoro'ni mennang barisi musuna siyolong sibawa kotaéro, nainappa malluru. Nassuna tentarana Bényamin maggasato sibawa mpunoi 22.000 tentara Israélié iyaro essoé. Untu' mabbékkaduwanna mennang lao gasai iyaro tentarana Bényamin. Na untu' mabbékkaduwannato sining tau Bényamingngé massu maggasa. Iyaé sisengngé naunoi 18.000 prajuri tallatinna tentara Israélié. Nalaosi umma Israélié ri Bétel sibawa teri lao ri Puwangnge. Mappuwasani mennang kuwaro narapi wenni sibawa makkasuwiyangeng akkarobangeng ritunu lao ri Puwangnge. Naéngkalingana pappébalinna Puwang -ngéro, naatoro'ni sining tau Israélié tentarana ri onrong-ngonrong tassubbué ri seddéna Gibéa. Nainappa ri esso matellué nagasani mennang tentarana Bényamin sibawa susunang tentara mangoloé ri Gibéa pada-pada iya puraé napogau' ri esso-esso riyolona. Maggasa toni sining tau Bényamingngé, sibawa tattaré untu' massu polé ri kotaé. Pada-pada iya pura labe'é, mappammulani mennang mpunoi sining tau Israélié ri daéra-daéra ri saliweng kota ri laleng iya mattujué ri Bétel sibawa ri laleng iya mattujué ri Gibéa. Telluppulo tau Israél nauno. Rimakkuwannanaro nasenni sining tau Bényamingngé nacausi sining tau Israéliéro pada-pada pammulanna. Iyakiya tentara Israélié pura narancanani untu' soro kuwammengngi natattaré tentara Bényamingngéro lao ri watattanaé, mabéla polé ri kotaé. Wettunna soro pasukang utamana Israélié, sibawa matoro'i barisi'na paimeng ri Baal-Tamar, sining taunna mennang iya nataroé ri seddéna Gibéa, masitta'ni massu polé ri onrong-ngonrong allekkekenna ri saliweng kota. Iyaro mennang sining tau tappilé polé risininna Israélié; jumellana 10.000 tau. Marowani musué wettunna seppulo sebbu tauwéro gasai Gibéa. Dé' sises-siseng nasenna-sennai sining tau Bényamingngé makkedaé dé'na namaittana nacau. Puwangnge mpéréngngi apakalang tau Israélié lao ri tau Bényamingngé, angkanna iyaro essoé naunoi tau Israélié 25.100 tau tentara Bényamingngé. Nappai namaingeki tau Bényamingngé makkedaé cauni mennang. Pasukang utamana Israélié nattungka lari polé risining tau Bényamingngé nasaba nattuwangngi ana' buwana mennang ri onrong-ngonrong allekkekenna ri seddéna Gibéa. Iyaro sining tau mallekke'é mapperi-perini massu gasai Gibéa; tattale'ni mennang lao tulili ri laleng kotaé sibawa mpunoi sininna tauwé kuwaro. Iyakiya pura mémenni sipekke lebbi riyolo makkedaé rékko engka rumpu makkompe liyasé polé ri tengnga-tengngana kotaé, pasukang utama iya soroé harusu'i giling sibawa gasai balié. Iyaro wettué sining tau Bényamingngé purani nauno 30 tentara Israélié sibawa nasenni mennang nacausi sining tau Israélié pada-pada riyolo. Iyakiya tennasenna-sennana mammulani maddumpu rumpué liyasé polé ri tengnga-tengngana kota Gibéa. Tassélenni sining tau Bényamingngé wettunna mennang giling sibawa naitai sininna kotaé nanré api. Na iyatoro wettué nagiling maggasa pasukang utamana Israélié, angkanna iyaro tentara Bényamingngé mancaji kacau nasaba namaingekini makkedaé pastini caui matu. Jaji, larini polé risining tau Israélié mattuju ri daéra padang kessi'é, iyakiya dé' naulléi mennang leppe. Takkeppunni mennang ri yelle'na pasukang utamana Israélié sibawa pasukang iya wettuéro polé ri kotaé. Ricauni tau Bényamingngé masero senna. Sining tau Israélié keppungngi sibawa lellungngi mennang matteru-teru lettu riséuwaé onrong ri seddé Gibéa. Mallellungngi nanauno towi mennang seppulo aruwa sebbu prajuri tallatinna polé ri tentarana Bényamin. Tentara Bényamin laingngé balé'ni nainappa lari molai daéra padang kessi'é mattuju ri bulu-bulu batué ri Rimon. Limassebbu tau ri yelle'na mennang riyuno ri tengnga laleng. Iya laingngé rilellungngi matteru lettu ri Gidéom. Polé risining tauwéro engka 2.000 riyuno. Jaji, tentara Bényamin iya riyunoé essoéro engka 25.000 tau – iya manenna prajuri iya poré. Iyakiya polé ri yelle'na mennang iya lariyé molai daéra padang kessi'é mattuju ri bulu-bulu batué ri Rimon engka 600 tau iya leppe'é. Monroi mennang ri Rimon eppa uleng ittana. Nanalisuna tau Israélié nainappa nalurui sibawa nauno maneng sésa-sésana tau Bényamingngé – worowané, makkunrai, ana'-ana' sibawa olokolo'nato. Sininna kotaé ri daéraéro natununi mennang. Wettunna maddeppungeng tau Israélié ri Mizpa, purai mennang majjanci ri Puwangnge makkedaé dé' muwi séddi polé ri mennang iya maéloé palaloi ana' makkunrainna mennang mancaji bainéna tau Bényamingngé. Makkekkuwangngé laoni mennang ri Bétel sibawa tudang messé babuwa narapi wenni ri yolona Puwangnge. Terini mennang sibawa mangobbi, “Oh Puwang, Allataalana Israélié, magi naharusu kajajiyang iya manennaé? Suku Bényamin, sala séddinna suku bangsata mawé'ni lennye!” Pappa bajanana, maélé senna'ni umma Israélié patettong séddi mézba kuwaro, nainappa makkasuwiyang lao ri Puwangnge akkarobangeng ritunu sibawa akkarobangeng pappasidamé. Nainappa nasalidiki mennang ri yelle'na suku-suku bangsa Israélié aga engka iya dé'é nalao maddeppungeng mangolo ri Puwangnge ri Mizpa riyolo. (Iyaro wettué purani mennang mattanro makkedaé tau iya dé'é napennoiwi pangobbié lao ri Mizpa harusu'i rihukkung maté.) Kasiyanni umma Israélié lao ri saudara-saudarana mennang suku Bényamingngé; makkedani mennang, “Iyaé essoé ateddéngenni Israélié sala séddinna sukunna. Aga harusu tapogau' kuwammengngi tau Bényamin iya nasésaéwé weddingngi mappunnai bainé, nasaba purani mattanro lao ri Puwangnge makkedaé dé' tamaélo palaloi ana'-ana' makkunraitta mancaji bainéna tau Bényamingngé?” Nanasalidikini mennang aga engka séddi golongang polé ri bangsa Israélié iya dé'é nalao maddeppungeng ri Mizpa. Nanalolongenni mennang makkedaé polé risining tau Yabés-é ri Giléad, dé' muwi séddi tau iya laowé ri Mizpa. Nasaba, wettunna riwéréng daftar hadéré'é, manessani dé' narilolongeng kuwaro muwi séddi tau polé ri Yabés. Rimakkuwannanaro, iyaro sining tau iya maddeppungengngé ri Bétel kirinni 12.000 tau iya kaminang baranié ri yelle'na mennang untu' mpunoi tungke tauwé ri Yabés, muttama'ni makkunraié sibawa ana'-ana'é. Riparéntanni mennang untu' mpunoi sininna tau worowané, sibawa tungke makkunrai iya dé'énna naparawanna. Na ri yelle'na sining tau iya monroé ri Yabésro, nalolongenni mennang 400 ana'dara iya perawangngé mupa. Natiwini mennang ana'-ana'daraéro ri akkémangngé ri Silo iya engkaé ri wanuwa Kanaan. Nainappa kiring suro sininna umma Israélié lao risining tau Bényamin iya engkaé ri bulu-bulu batué ri Rimon untu' mappéddarangngi assidaméngngé. Rimakkuwannanaro lisuni iyaro sining tau Bényamingngé, nainappa nabbéréyang tau Israélié lao ri mennang ana'-ana'dara polé ri Yabés iya dé'é nariyuno. Iyakiya jumellana iyaro ana'-ana'daraé dé' nagenne untu' sining tau Bényamingngéro. Kasiyanni umma Israélié lao ri tau Bényamingngé, nasaba Puwangnge pura reppa'i asséddiyanna suku-suku bangsa Israélié. Adanna mennang, “Makkuwaié, engka séddi laleng massuna, iyanaritu wettunna ramé-ramé pattaungengngé untu' Puwangnge ri Silo.” (Ri seddé yattanna Siloé engka kota Bétel, sibawa ri seddé yajanna engka watattanana Bétel lao ri Sikhem, na ri seddé manoranna engka kota Lébona.) Nakkeda ponggawa-ponggawa iya maddeppungengngé ri Bételro lao risining tau Bényamin iya nasésaéro, “Laono massubbu ri palla-palla anggoro'é ri Silo, sibawa jaga-jagano kuwaro. Matti rékko ana'-ana'daraé ri Silo massui untu' séré-séré pattaungeng untu' Puwangnge, harusu'ko massu polé ri palla-palla anggoro'éro. Nainappa tungke-tungke harusu tikkengngi séddi ana'dara polé ri yelle'na mennang sibawa lariyangngi lao ri daéra Bényamin untu' mupancaji bainé. Rékko ambo' iyaré'ga ana' buranéna poléi sibawa tuntu'i, weddikko makkeda, ‘Riyéllauwi, leppessanni mennang ri idi. Dé' tarampasa'i mennang ri laleng musué. Sibawa nasaba dé' muwérékki mennang, dé' muwajjalékkai janci, jaji dé' mupasala.’ ” Napogau'ni iyaro sining tau Bényamingngé aga iya ripowadaé lao ri mennang. Nalariyanni mennang tungke-tungke séddi ana' dara polé ri yelle'na ana'-ana' dara iya séré-séré ri Silo. Nainappa mennang lisu ri daérana sibawa patettongngi paimeng kota-kotana nainappa mattette kuwaro. Iyaro sining tau Israél laingngé joppa toni. Lisuni mennang ri tana appunnangenna ri laleng daérana tungke-tungke, situru appang sibawa suku-sukunna. Iyaro wettué dé'pa gaga arung ri Israélié. Tungke tau napogau'i aga iya nangga'é tongeng. 1 1 matéi Elimélékh. Nanaonrona Naomi silaong iya duwa ana'na. Iya duwa ana'-ana'naro kawingngi sibawa ana'-ana' dara Moab, iya riyasengngé Orpa sibawa Rut. Seppulo taung ri munrinna, iya duwa ana' worowanéna Naomiro, maté towi, angkanna ateddéngeng Naomi lakkainna sibawa iya duwa ana'na. Siyagangngaré wettu rimunrinna naéngkalingani Naomi makkedaé nabarakkakini Puwangnge umma Israélié sibawa wassélé éngngalang iya makessingngé. Rimakkuwannanaro Naomi sibawa iya duwa ménéttunna mangujuni untu' salaiwi Moab. Joppani mennang massibawa lisu ri Yéhuda. Ri tengnga laleng makkedani Naomi lao ri iya duwa ménéttunnaro, “Lisu bawanno ri bolana indo'mu. Tennapodo Puwangnge makessingngi lao ri iko pada-pada makessimmu lao ri iyya sibawa lao ri mennang iya matéénnaro. Tennapodo napuwéloi Puwangnge mpérékko oki kuwammengngi muwallaibinéngeng paimeng.” Purana napowada makkuwaro, massimanni Naomi lao ri mennang sibawa bauwi. Iyakiya Orpa sibawa Rut teriwi maladde, sibawa makkeda lao ri Naomi, “Dé', Indo'! Maccowéki silaong Indo' lao ri bangsana Indo'.” Nappébali Naomi, “Aja' ana'! Lebbi kessing muwi lisuko. Untu' aga muwaccowérika? Dé'na naweddikka jajiyang ana' untu' mancaji lakkaimmu? Lisuno na', saba' macowa senna'na untu' kawissi. Na akkalarapanna engka mupa amménasakku untu' kawing iyato wenniéwé sibawa lolongeng ana' worowané, aga maélokoga mattajeng narapi mennang battowa? Masa nasaba gau'éro nadé' mukawing sibawa tau laingngé? Dé', ana'ku, aja' muwappakkuwaro! Messéka lao ri aga iya harusu'é mupéneddingi nasaba pahukkungenna Puwangnge lao ri iyya.” Terisi maladde-ladde Rut sibawa Orpa nainappa massimang Orpa nanabau towi matuwanna nainappa lisu. Iyakiya Rut dé' namaélo massarang polé matuwannaro. Makkedani Naomi lao ri aléna, “Rut, itani! Lisuni lagomu ri bangsana sibawa ri déwata-déwatana. Lao tono, na', accowériwi lisu!” Iyakiya mappébaliwi Rut, “Indo', aja' tasuroka Indo' lisu sibawa salaiwi Indo'! Maéloka maccowé silaong Indo'. Kégi-kégi Indo' lao, kuwatokka'ro lao. Kégi-kégi Indo' monro, kuwatokka'ro maélo monro. Bangsana Indo', iyanaritu bangsaku. Allataala iya nasompaé Indo', maéloto usompa. Kégi-kégi Indo' maté, kuwatoro maéloka maté sibawa rikuburu. Tennapodo nahukkukka Puwangnge sitane-tane'na, rékko maéloka massarang polé ri Indo', sangadinna amaténg passarakki!” Naitani Naomi makkedaé mattedde'i Rut untu' maccowé, jaji, dé'na nakkeda aga-agana. Nanapatteruni mennang joppana lettu ri Bétléhém. Lettu'na muwa kuwaro, héranni sininna pabbanuwana kotaéro. Pada makkedani sining makkunraié kuwaro, “Tongegga iyaro Naomi?” Nakkeda Naomi, “Aja'na muwobbika Naomi, obbi bawanna Mara, saba' Allataala Iya Pommakuwasaé pura leppessakka tuwo penno sibawa apaireng. Wettukku lao polé kuwaé engkaka ri laleng agennekengngé, iyakiya makkekkuwangngé natiwika lisu Puwangnge sibawa lima kosong. Rimakkuwannanaro aja'na muteppuka Naomi, nasaba Puwang Iya Pommakuwasaé pura hukkukka sibawa maéga anrasa-rasang!” Makkuwaniro curitana pékkugi Naomi lisu polé ri Moab silaong Rut ménéttunna iya tau Moab-éro. Lettu'ni mennang ri Bétléhém ri pammulanna wettu éngngalang gandongngé. Mappunnaiwi Naomi séddi anggota kaluwarga polé ri lakkainna iya matéénna, Elimélékh. Iyaro tauwé sugi sibawa riyakkitangi. Asenna Boas. Riséuwaé esso makkedai Rut lao ri Naomi, “Indo', mapparamisika maélo lao ri dare'é untu' mitté gandong iya sempé'é polé ri limanna sining paréngngalaé. Upérasai tentu engka tau iya leppessangngékka matu pogau'i gau'éro.” Nappébali Naomi, “Makessinni na', laono!” Nalaona Rut ri dare'é sibawa mitté gandong maccowériwi sining paréngngalaé. Nasitujuwangngi laowi ri dare appunnangenna Boas. Dé' namaitta rimunrinna engkani Boas polé ri Bétléhém sibawa mabbéré selleng lao risining paréngngalaé, adanna, “Tennapodo Puwangnge sibawakko.” Nappébali sining paréngngalaé, “Tennapodo Puwangnge barakkakiwi Bapa'.” Nanakkutana Boas ri mandoro'na, “Niga iyaro makkunraié?” Nappébali iyaro mandoro'é, “Makkunrai bangsa Moab iya nappa polé silaong Naomi polé ri wanuwa Moab. Méllau paramisiwi ri iyya kuwammenngi naripalalo maccowé ri munrinna sining paréngngalaé untu' mitté gandong iya sempé-sempé'é. Sipongenna élé najjama matteru, na makkekkuwangngé mappésau untu' passauwi tekkona cinampe ri kalampangngé.” Naéngkalinganaro, suju'ni Rut ri yolona Boas sibawa makkeda, “Pa', dé' usitinaja tarima aggaukeng iya makessing makkuwaéro polé ri Bapa'. Iyya'é tau laikka sibawa dé' nasitinaja lolongeng pajjampana Bapa'!” Nappébali Boas, “Purani uwéngkalinga passalenna sininna séuwa-séuwaé iya mupogau'é lao ri matuwammu sipongenna maté lakkaimmu. Uwisseng makkedaé musalaini tomatowammu sibawa kampong assalemmu untu' lao sibawa monro kuwaé silaong sining tau iya dé'éppa muwissengngi. Tennapodo Puwangnge wale'i sininna akessingemmu. Tennapodo mutarimai aga iya sitinajaé nawérékko Puwangnge, Allataalana Israélié, nasaba poléno untu' mallinrung ri Aléna!” Nappébali Rut, “Makessing senna Bapa' lao ri iyya, namuni iyya dé' upada-pada sibawa pajjamana Bapa'. Abessangenna Bapa' nasaléwori senna'i atikku.” Narapinana wettunna untu' manré, makkedani Boas lao ri Rut, “Laono mai taanré. Iyaé pakkanriyanna.” Namanréna Rut silaong sining paréngngalaé. Mabbéré towi Boas gandong ripanggang, namanréna Rut gangka messo. Puranana manré, engka mupa sésana. Matteru bawanni Rut mangitté gandong ri dare'é narapi arawéng. Puranana nakkunrureng daramé-daramé gandongngéro untu' paddunui lise'na polé ri batanna, annessana napaddeppungenni kira-kira seppulo kilo. Nainappa lisu ri kotaé sibawa tiwi wassélé itténaro nanappaitangngi lao ri matuwannaro siyaga égana pura naitté. Sibawa nawéréng toni iyaro matuwanna inanré iya dé'é naulléi paccappui wettunna manré. Namakkedana Naomi lao ri aléna, “Kégako lolongeng iya manennaé? Ridare'na nigako majjama iya essoéwé? Tennapodo Allataala barakkakiwi tau iya kédo makessingngé lao ri ikoro!” Nanacuritani Rut lao ri Naomi makkedaé dare onronna mangitté gandonro iyanaritu appunnangenna séddi worowané riyaseng Boas. Nakkeda Naomi, “Iyaro tauwé kaluwarga macawé'ta. Aléna ritu harusu mattanggung jawa lao ri idi. Tennapodo Puwangnge barakkakiwi. Tuli narupaiwi Puwangnge jancin-Na, muwi lao ri tau iya tuwoé mupa iyaré'ga lao ri mennang iya matéénna.” Nainappa makkedasi Rut, “Indo', iyaro tauwé makkeda towi makkedaé weddikka matteru mangitté gandong silaong sining pajjamana narapi pura maneng riyéngngala sininna wassélé dare'na.” Nappébali Naomi lao ri Rut, “Ya, na', mémeng lebbi kessikko majjama silaong sining pajjama makkunraié ri dare'na Boas. Saba', rékko laoko ri dare'na tau laingngé, weddikko naganggu tauwé kuwaro!” Rimakkuwannanaro, tette'ni Rut maccowériwi sining pajjama makkunraié ri dare'na Boas. Mangitté gandonni kuwaro narapi pura maneng éngngalangngé – muwi éngngalang mammulangngé iyaré'ga éngngalang paccappurengngé. Na ri lalennaro monroi Rut silaong matuwa makkunrainna. Siyagangngaré wettu ri munrinna, makkedani Naomi lao ri Rut, “Harusu'ka makkuraga kuwammengngi naweddikko mallaibinéngeng paimeng sibawa masennang. Dé'ga muwajjama silaong sining pajjama makkunraié ri dare'na Boas? Nah, iyaro Boas kaluwargata. Jaji, éngkalingai! Iyaé wennié maéloi lao maddése gandong ri dare'na. Cemméno makkekkuwangngé, pakéno wangi-wangiyang sibawa pakéi pakéyammu iya kaminang makessingngé. Nainappa laoko ri onrong naonroiyé Boas majjama paddunui gandongngé polé ri uléna. Tajengngi kuwaro narapi pura manré ménung, iyakiya aja' narapii naisseng engkako kuwaro. Pénessaiwi kégawi lao matinro. Rékko matinroni, laono kuwaro timpa'i parampa'na, nainappa matinro ri seddéna ajéna. Napowadakkotu matu matti aga harusu mupogau'.” Nappébali Rut, “Makessinni, Indo', maéloka pogau' manengngi iya napowadaé Indo'.” Nalaona Rut ri onronna tauwé majjama paddunui gandongngé polé ri uléna. Kuwaniro napogau' sininna iya risurowangngéngngi ri matuwanna. Puranana Boas manré sibawa ménung, messoni sibawa masennanni atinna. Nainappa lao matinro ri seddéna goppo gandongngé. Nacoco'-coco'na Rut lao timpa'i parampa'na Boas, nainappa léwu ri seddéna ajéna. Ri tengnga bennié tappa moto'ni Boas sibawa maélo giling. Tassélenni mitai engka séddi makkunrai matinro ri seddéna ajéna. Nakkutana, “Nigako?” Nappébali Rut, “Iyya Rut, Pa'! Bapa' iyanaritu kaluwargata iya macawé'é iya harusu'é mattanggung jawa lao ri atuwotta. Talaka Pa' mancaji bainéna Bapa'.” Nakkeda Boas, “Tennapodo Puwangnge barakkakiko, ana'ku. Ripasibandingngi sibawa aga iya puraé mupogau' lao ri matuwammu, pangkaukemmu makkekkuwangngéwé mappaitangngi pappoji iya lebbi battowaéppasi. Weddissa sappako lakkai iya maloloé ri yelle'na tau sugié iyaré'ga tau kasiyasi-yasi, iyakiya dé' mupogau'i iyaro. Rimakkuwannanaro, aja' mubata-bata, Rut. Sininna iya muwéllauwéro maéloka pogau'i; saba' sininna tauwé ri kotaéwé naissenni makkedaé iko iyanaritu séddiwi makkunrai iya makessing atié. Mémeng tongeng, harusu'ka mattanggung jawa lao ri atuwommu, saba' iyya iyanaritu kaluwargamu iya macawé'é. Iyakiya engka mupa tau laing iya harusu'é mattanggung jawa lao ri atuwommu. Na aléna iyanaritu kaluwarga iya lebbi macawé'é naiya iyya. Iyaé wennié onrono riyolo kuwaé. Baja éléé uwakkutanappi matu aga maéloi pogau'i tanggung jawa'naro lao ri iko iyaré'ga dé'. Rékko maéloi, makessinni; iyakiya rékko dé' namaélo, majjancika nasabbing Allataala iya tuwoé, maéloka pogau'i iyaro tanggung jawa'é. Atinrono makkekkuwangngé kuwaé narapi élé.” Namatinrona Rut kuwaro ri seddéna ajéna Boas. Bajana maélé mupa, naoto'na Rut kuwammengngi dé' nariita ri tauwé. Saba' dé' namaélo Boas muwi séddi tau missengngi makkedaé poléi Rut ri onrongngéro. Makkedani Boas lao ri Rut, “Leppessangngi saléndammu namupallebba'i kuwaé.” Naleppessanni saléndanna Rut sibawa pallebba'i. Natiri'ni Boas ri laleng saléndangngéro kira-kira duwappulo kilo gandong. Nainappa nakka ri yasé'na salangkanna Rut. Purairo laoni Boas ri kotaé. Lettu'nana Rut ri bolaé, makkutanani matuwanna, “Pékkugi ajajinna, na'?” Nanacuritani Rut sininna iya napogau'é Boas lao ri aléna. Adanna Rut patterui, “Mala aléna ritu iya mpéréngngékka sininna gandongngéwé, saba' adanna dé' naweddikka lisu ri Indo' sibawa lima kosong.” Nanakkeda Naomi, “Tajeng bawanni, na', narapi muwita pékkugi gau'éwé maccappa matti. Dé' matu nammekko Boas ri wettu dé'napa napacceppiwi parakaraéwé iyato essoéwé.” Laoni Boas ri anrong addeppungengngé ri pintu gerbanna kotaé. Tudannana kuwaro laloni tau worowané iya manuru'é Boas iyanaritu kaluwargana Elimélékh iya macawé'é. Nariyobbina ri Boas, “Saudaraku, laono mai tudang kuwaé!” Poléni iyaro tauwé, nanatudang. Nainappa naéra Boas seppulo tomariyolona masaraka'na kotaéro untu' tudatto massibawa kuwaro. Tudannana mennang, makkedani Boas lao ri tau iya massiyajingngé mupa alénaro, “Lisuni Naomi polé ri Moab. Makkekkuwangngé maéloi balu'i tana appunnangenna Elimélékh, kaluwargata. Nauwasengngi harusu'ko missengngi passalenna gau'éro. Rékko maéloko melliwi, powadani ri yolona sining tauwé iya tudangngé kuwaé. Rékko dé', powadani terus terang, saba banna idi sipadduwa iya mappunnaiyé ha' ri passalengngéro; iko pammulang, nappa iyya.” Nappébali iyaro tauwé, “Ya, maéloka melliwi.” Namakkeda Boas, “Makessinni rékko makkuwaitu. Iyakiya, rékko muwelliwi iyaro tanaé polé ri Naomi, harusu tokko malai Rut, makkunrai Moab-é, jandana ana'na Naomi. Saba', iyaro tanaé harusu'i tette mancaji appunnangenna wija-wijanna tau iya matéénnaro.” Nappébali iyaro tauwé, “Rékko makkuwaitu, dé' usanggu. Makessinni makkekkuwangngé uleppessang ha'ku selaku tau mammulang iya waji'é melliwi tanaéro. Dé'gaga gunana uwelli saba' iyaro tanaé tentu dé' nawedding mancaji appunnangenna wija-wijakku. Lebbi kessing muwi iko melliwi.” Iyaro wettué rékko mabbalu'i tauwé iyaré'ga massélérengngi séuwaé appunnangenna, untu' paessai iyaro gau'é biyasanna pabbalu'é naleppessangngi sandala'na, nanabbéréyangngi lao ri pangellié. Makkuwaniro carana sining tau Israélié paessai séuwaé parakara mabbalu iyaré'ga mangelli tana. Rimakkuwannanaro, wettunna iyaro tauwé makkeda lao ri Boas, “Iko bawanna melliwi,” naleppessanni sandala'na nanabbéréyangngi lao ri Boas. Nanakkeda Boas lao ri tomariyolona masaraka'é sibawa lao risininna tau laing iya engkaé kuwaro, “Iyaé essoé iko maneng mancaji sabbi makkedaé purani uwelli polé ri Naomi sininna iya nappunnaiyé Elimélékh sibawa ana'-ana'na, iyanaritu Kilyon sibawa Mahlon. Ri lainnaéro uwala towi Rut, makkunrai Moab-é, jandana Mahlonro mancaji bainéku. Nanallalengiwi iyaro tanaé tette'i mancaji appunnangenna kaluwargana tau iya matéénnaro. Na wija-wijanna tette towi engka ri yelle'na sumpulolona sibawa ri kotana. Engngerangngi Saudara-saudara, iyaé essoé iko maneng mancaji sabbinna.” Sining tomariyolona masaraka'é sibawa tau laing iya engkaé kuwaro makkedani, “Ya, idi sabbinna. Tennapodo Puwangnge pancajiwi bainémuro pada-pada Rahél sibawa Léa iya jajiyangngé maéga ana' untu' Yakub. Tennapodo madécékko ri yelle'na sining tau polé ri appanna Efrata sibawa tennapodo kalabbako ri Bétléhém. Tennapodo ana'-ana' iya nawéréngngékko matu Puwangnge naolai makkunrai maloloéwé pancajiwi matu kaluwargamu pada-pada Pérés, ana'na Yéhuda sibawa Tamar.” Nanalani Boas Rut mancaji bainéna. Puwangnge barakkakiwi Rut angkanna mattampu nanajajiyang séddi ana' worowané. Makkedani sining makkunraié lao ri Naomi, “Ripojiwi Puwangnge! Purani nawérékko séddi eppo worowané ri essoéwé untu' piyarako. Tennapodo iyaro ana'é mancaji tassebbo'i ri Israélié! Iyaro ménéttummu napoji senna'ko. Purano nawéréng lebbi naiya aga iya naullé mabbéréyang pitu ana' worowané. Makkekkuwangngé pura tono nawéréng séddi tau eppo worowané, iya mpéréngngékko matu sumange baru, sibawa piyarako ri wettu macowamu.” Nalani Naomi iyaro ana'é nanapiyarai sibawa penno pammaséna. Sining makkunrai bali-bali bolana mennang masengngi iyaro ana'é Obéd. Lao ri tungke tau makkedai, “Mappunnaini Naomi séddi ana' worowané!” Obéd iyanaé rimunri mancaji ambo'na Isai, na Isai iyanaritu ambo'na Daud. Engka séddi tau worowané, asenna Elkana, polé ri suku Efraim. Monroi ri kota Rama, ri daéra buluna Efraim. Elkana iyanaritu ana'na Yéroham sibawa eppona Elihu. Muttama'i kaluwargana Tohu, takkéna polé ri appanna Zuf. Elkana mappunnai duwa bainé, Hana sibawa Pénina. Pénina mappunnai ana', iyakiya Hana dé'. Tungke' taung laowi Elkana polé ri Rama untu' massompa ri Silo sibawa makkasuwiyangeng akkarobangeng ri Puwang Iya Pommakuwasaé. Iya mancajiyé imanna Puwangnge ri Silo iyanaritu Hofni sibawa Pinéhas, ana'-ana'na Eli. Tungke'-tungke' rékko Elkana makkasuwiyang akkarobangeng, Pénina sibawa ana'-ana'na nawéréngngi tungke'-tungke' sibagiyang polé ri juku akkarobangengngéro. Iyakiya Hana nawéréngngi sibagiyang bawang saba' Puwangnge dé' nawéréngngi ana'. Namuni makkuwaro Elkana napoji senna'i Hana. Tuli ripeddiriwi atinna Hana sibawa ripakatuna ri Pénina, amaurénaro, nasaba Puwangnge dé' nawéréngngi ana'. Iyaro gau'é kajajiyangngi polé ri taungngé lao ri taungngé; rékko laowi mennang ri Bolana Puwangnge, tuli ripeddiriwi atinna ri Pénina. Biyasai Hana teri sibawa dé' namaélo manré nasaba ripakatunai. Nasisetto Elkana, lakkainna, makkutana, “Magi muteri Hana? Magi nadé' mumaélo manré sibawa matteru masara bawang? Dé'ga ulebbi mangke ri alému naiya seppulo ana' worowané?” Nainappa majjanci Hana, adanna, “ Puwang Iya Pommakuwasaé, pénessaiwi atam-Muwé! Itai asussanna atam-Muwé. Engngerangngi atatta sibawa aja' tallupaiwi atatta! Rékko tawéréngngi atatta séddi ana' worowané, majjanciwi atatta maélo mabbéréngngi lao ri Iko gangka tuwona. Majjanci towi atatta makkedaé gemme'na dé' naengka narirette matu.” Maitta senna Hana massempajang, nanapénessaiwi Eli témunna iyaro makkunraié. Massempajangngi Hana ri laleng ati, jaji banna témunna kédo-kédo, iyakiya saddanna dé' nariyéngkalinga. Rimakkuwannanaro nasengngi Eli mabo'. Namakkedana Eli lao ri aléna, “Masa mabo'ko kuwaé! Aja' muwénunna uwai anggoro!” Iyakiya mappébaliwi Hana, “Dé' umabo', Pa', dé' sises-siseng uwénung uwai anggoro! Pettu paddennuwakka, sibawa mattengngang massempajang curitai sininna apeddirekku lao ri Puwangnge. Aja' nariyangga'ka makkunrai lampa. Massempajakka pada-pada iyaé nasaba masara senna'ka.” Nanakkeda Eli, “Rékko makkuwaitu lisuno sibawa salama. Tennapodo Allataalana Israélié tarimai paréllaummu.” Nappébali Hana, “Tennapodo lolongekka barakka'na Bapa'.” Nainappa lao, nanaanré; sibawa dé'na namasarana. Pappa bajanana maéléni Elkana sibawa kaluwargana moto, napuranana massompa ri Puwangnge, lisuni mennang ri Rama. Nanasilurenna Elkana sibawa Hana, bainénaro, na Puwangnge tarimai sempajanna Hana. Mattampu'ni iyaro makkunraié sibawa jajiyang ana' worowané. Nasenni Samuél, adanna, “Purani uwéllau polé ri Puwangnge.” Narapi wettunna Elkana sibawa kaluwargana laosi ri Silo untu' makkasuwiyang akkarobangeng pattaungeng lao ri Puwangnge. Rilainnaéro purai Elkana majjanci untu' makkasuwiyangeng akkarobangeng iya ripallaingngé. Iyakiya iyaé sisengngé dé' naccowé Hana. Adanna lao ri lakkainna, “Leppe susupi, nauwantara'i matu Samuél lao ri Bolana Puwangnge, nanaonro matu kuwaro gangka tuwona.” Nappébali Elkana, “Makessinni, pogau'ni aga iya muwitaé makessing; onrono ri bolaé narapi lettu wettunna musalla susu ana'ta. Na tennapodo Puwangnge mébbui jancimmu mancaji maddupa.” Jaji, monroni Hana ri bolaé narapi lettu wettunna nasalla susu ana'na. Risalla'nana susu Samuél, riantara'ni ri indo'na lao ri Bolana Puwangnge ri Silo. Iyaro wettué baiccu senna mupi. Tiwi towi Hana sikaju saping lai iya makkéumuru telluttaungngé, gandong seppulo kilo, sibawa séddi popang bingkulang iya pennoé mallise anggoro. Iyaro sapingngé nagéréi, nainappa naantara Samuél lao ri Eli. Nakkeda Hana lao ri Eli, “Taddampengekka, Pa'. Naéngngerang mupa'ga Bapa'? Iyya'é makkunrai iya puraé naita Bapa' tettong kuwaé, massempajang lao ri Puwangnge. Ana'énnaé uwéllau polé ri Puwangnge. Natarimani sempajakku, narimakkuwannanaro uwabbéréyangngi iyaé ana'é untu' mancaji appunnangenna Puwangnge gangka tuwona.” Purairo mennang massompani ri Puwangnge. Namassempajanna Hana, adanna, “Napérennuiwi atikku Puwangnge; pangkaukenna Napésennangiwi nyawaku. Nasibawang ariyo-riyong uwéllékéllé'i balikku, saba' tonget-tongengngi Allataala pura tulukka. Dé' gaga iya mapaccingngé pada-pada Puwangnge! Banna aléna iya mullé mabbéré allinrungeng. Pappésauni abborommu iya kosongngé! Pappésauni bicara matempoé! Saba' iyaro Puwangnge Allataala Iya Pommajeppué; iya madélékiyéngngi sinininna pangkaukenna tauwé. Poloni panana pahlawangngé, iyakiya pédé mawatangngi tau malemmaé. Tau iya messoé riyolo nasaba maonai anré, mancaji pajjama ripéssaroiyé banna untu' lolongeng inanré. Tau iya alupurengngé riyolo, makkekkuwangngé messoni, genne inaré. Bainé manangngé, matemponi makkekkuwangngé, pituni ana' najajiyang! Iyakiya indo' iya maégaé ana'na, risalai, rileppessang maddokoroko. Mappamaté Puwangnge, mappatuwo towi. Napanonnoi tolinoé ri linona tau maté. Na Alénato makkai polé kuwaro. Engka tau iya Naébbué kasiyasi, engkato Naébbu sugi. Engka tau Napakariyawa, engkato Napakatanré. Polé ri apeddirengngé Naakkai tau dé'é angke'na, polé ri anrasa-rasangngé Napaleppe'i tau iya matunaé. Ripancajiwi mennang sellaona sining arungngé, sibawa riwéréng jabatang malebbi. Pallanggana linoé nappunnaiwi Puwangnge, ri yasé'na Napatettongngi linoé. Tau matinulué tuli amangngi ri laleng allinrungenna Puwangnge. Iyakiya iya majaé ancuru'i binasa ri laleng kalemmengngé sibawa pettak-kape'é. Awatangeng ri alé dé' nawedding riyattuwang, awatangenna tolinoé dé' nabbéré apakalang. Sining balinna Puwangnge ancuru'i maccabbu, métaui mennang; polé ri langié Aléna magguttu. Puwangnge maélo madéléki sininna linoéwé, sibawa mabbéré akuwasang iya malebbié lao ri arung iya Napilé.” Nanalisuna Elkana sibawa kaluwargana ri Rama, iyakiya Samuél, ana'éro, monroi ri Silo sibawa tumaningiwi Puwangnge ri yawa pajjagana Imang Eli. Maja senna ana'-ana'na Eli. Dé' mennang nabati-batiwi Puwangnge sibawa selaku imang maggau' siélo-élonai mennang lao ri bangsa Israélié. Rékko ébara'na engka tau makkasuwiyangeng akkarobangeng, poléi pabbantu imangngé tiwi sondo tellué isinna. Ri wettu rinasunna mupa iyaro jukué, iyaro sondo'é nattoddokengngi ri laleng panci onronna jukuéro rinasu, nainappa agi-agi nagetteng massu sibawa sondo'éro mancajiwi appunnangenna imangngé. Sininna tau Israél iya laowé ri Silo untu' makkasuwiyangeng akkarobangeng nagaukengngi pada-padaro. Mala biyasai iyaro pabbantué poléi ri wettu dé'napa naripallaing lunra'na untu' ritunu, nainappa makkeda lao ri tau iya makkasuwiyangengngéngngi iyaro akkarobangengngé, “Wéréngngi imangngé juku iya mamataé muparo kuwammengngi napanggangngi; dé' namaélo tarima juku rinasu.” Rékko mappébaliwi iyaro tauwé, “Madécéngengngi taturusi peraturangngé, sibawa tunui iyaro lunra'é riyolo; purairo weddinni muwala siélo-élomu,” namakkeda iyaro pabbantué, “Dé', makkekkuwangngétto harusu'i muwabbéréyang, rékko dé', uwalai matu sibawa passa.” Makkuwaniro iya duwa ana'na Eliro madosa battowa ri pakkitanna Puwangnge, nasaba napakatunai pakkasuwiyang akkarobangeng untu' Puwangnge. Na wettuéro, Samuél iya anana'é muparo matterui tumaningiwi Puwangnge. Pakéi waju ripallaing polé ri kaing lénangngé, pada-pada waju assompanna sining imangngé. Tungke' taung indo'na mébbu jumba baiccu nanawéréngngi Samuél rékko iyaro makkunraié silaongngi lakkainna poléi makkasuwiyangeng akkarobangeng pattaungeng. Nanabarakkakini Eli Elkana sibawa bainéna, sibawa makkedai lao ri Elkana, “Tennapodo Puwangnge mpéréssiko ana'-ana' polé ri bainémué, untu' sulléiwi ana' iya puraé muwabbéréng lao ri Puwangnge.” Purairo lisuni mennang ri Rama. Ribarakkakini Hana ri Allataala, angkanna jajiyassi tellu ana' worowané sibawa duwa ana' makkunrai. Napédé battowa tona Samuél ri laleng natumaninginna Allataala. Macowa senna'ni Eli. Naéngkalingai matteru-teru appissengengngé passalenna kédo-kédona ana'-ana'na lao ri tau Israélié. Naisseng towi Eli makkedaé iyaro ana'-ana'na matinroi silaong sining makkunrai iya mangonrowangngé ri yolona sumpang Kéma Ahadérékenna Puwangnge. Rimakkuwannanaro makkedani lao ri ana'-ana'na, “Purana tarima laporang polé risininna umma'e passalenna kédo-kédomu iya majaé. Magi mupogau'i iyaro? Aja'na mupogau'i makkuwaéro paimeng, ana'ku. Maja senna aga nacurita umma'na Puwangnge passalemmu! Rékko pasalai tauwé lao ri tolinoé, naulléi Allataala méwaiwi; iyakiya rékko madosai tauwé lao ri Puwangnge, nigana mulléi tulungngi?” Iyakiya dé' mennang nabati-batiwi pangajana Eli ambo'na, saba' purani napettui Puwangnge untu' mpunoi mennang. Sibalé'na Samuél, ana'éro, pédé battowai sibawa pédé ripoji, muwi Puwangnge, iyaré'ga sininna tauwé. Riséuwaé esso poléni séddi nabi ri Eli sibawa palettu'i paseng polé ri Puwangnge ri aléna, adan-Na, “Wettunna toriyolomu Harun sibawa kaluwargana mancaji atanna arung Maséré, purani Uwappaddisengeng alé-Ku lao ri Harun. Polé risininna suku Israélié purani Upilé kaluwargana mancaji imak-Ku, untu' mattumani ri mézbaé, mattunu dupa, sibawa pakéi waju éfod rékko mabbicarai sibawa Iyya. Sibawa lao ri mennang sibawa wija-wijanna purani Uwéréng ha' untu' malai sibagiyang polé ri akkarobangeng pakkasuwiyang iya ritunué ri mézbaé. Jaji, magi mumangowa mupa mitai sining akkarobangeng iya siturué sibawa parénta-Ku, nakkasuwiyangeng bangsa-Ku lao ri Iyya? Magi iko Eli, lebbi mupakalebbii ana'-ana'mu naiya pakalebbi-Ka, sibawa leppessangngi mennang pakacommokiwi aléna sibawa bagiyang iya kaminang makessingngé polé ri tungke' pakkasuwiyanna bangsa-Ku lao ri Iyya? Iyya, Puwang Allataalana Israélié, pura majjanci riyolo, makkedaé kaluwargamu sibawa appammu tumaningika matu selaku imang untu' mannennungeng. Iyakiya makkekkuwangngé dé' Upuwéloi gau'éro! Saba' iya pakalebbiék-Ka, Upakalebbii matu iyakiya iya pakatunaék-Ka, Upakatunai matu. Engkalingai, poléi matu wettunna Uwunoi sininna kalloloé ri laleng kaluwargamu sibawa appammu, angkanna dé' muwi séddi worowané ri laleng kaluwargamu rapii matu umuru macowa. Messéko matu sibawa mangémpuru mitai sininna barakka iya uwabbéréyangngé matu lao risining tau laingngé ri Israélié, na ri laleng kaluwargamu maté malolo manengngi matu. Iyakiya, séddi tau polé ri wija-wijammu, Uleppessang matu tuwo sibawa tumaningi-Ka selaku imang. Iyakiya aléna mancaji butai matu nenniya tuwo sibawa pettu paddennuwang. Sininna wija-wijammu iya laingngé matéi matu. Selaku butti makkedaé sininna iya Upowadaéro tongengngi kajajiyang matu, Hofni sibawa Pinéhas matéi matu ri laleng siessoé. Nainappa piléka matu imang iya matinulué ri Iyya sibawa iya pogau'éngngi aga iya Uparéntangngéngngi. Uwéréngngi matu wija-wijanna iya tuli majjamaé matu selaku imang ri yolona arung-ngarung iya Upilé. Tungke' wijammu iya tuwoé mupa, laowi matu ri imangngéro untu' méllau dowi sibawa inanré. Naéllauwi matu, Palaloka bantui sining imangngé, kuwammengngi weddikka manré namuni banna sitémpu bawang.” Wettuéro, Samuél iya ana'-ana'é muparo tumaningiwi Puwangnge ri yawa anganrowangenna Eli. Iyaro wettué majarang senna engka paseng sibawa pakkitang polé ri Puwangnge. Riséuwaé wenni, Eli iya macowa senna'énna sibawa mawé'ni butaro, mattengngang matinro ri bili'na, na Samuél matinroi ri seddéna Petti Assijancinna Puwangnge, ri laleng Kéma Mapaccingngé. Wettunna dé'pa naompo essoé sibawa malluwa mupa lampué, Puwangnge mobbii Samuél, namappébali Samuél, “Iyyé, Pa'!” Nainappa lari lao sita Eli sibawa makkeda, “Engka aga Pa'? Magi nariyobbika?” Iyakiya mappébaliwi Eli, “Dé' uwobbiko, atinrono paimeng.” Nainappa lao matinro paimeng Samuél. Untu' mabbékkatellunna Puwangnge mobbii Samuél; nanaoto'na Samuél nalao sita Eli sibawa makkeda, “Engka aga Pa'? Magi namangobbi Bapa'?” Iyatoro wettué namaingekiwi Eli makkedaé Puwangnge ritu mobbii iyaro ana'é. Rimakkuwannanaro makkedani lao ri Samuél, “Atinrono paimeng, narékko riyobbiko paimeng akkedano, ‘Abbicarani, Puwang, maréngkalingai atam-Mu.’ ” Nanalaona Samuél ri onrong atinronna paimeng. Nanapoléna Puwangnge, sibawa tettong ri onrongngéro namangobbi paimeng, “Samuél, Samuél!” Namappébali Samuél, “Abbicarani, Puwang, maréngkalingai atam-Mu.” Namakkedana Puwangnge lao ri aléna, “Maélo-Ka pogau'i séuwaé iya maseroé lao ri tau Israélié, angkanna tungke' tau iya méngkalingaéngngi malippui matu. Iyaro essoé maélo-Ka pogau'i sininna iya puraé Uwangancangeng lao ri kaluwargana Eli polé ri pammulanna lettu ri paccappurenna. Purani Upaissengi aléna makkedaé Uhukkungngi matu kaluwargana untu' mannennungeng nasaba ana'-ana'na purai napakatuna-Ka. Naisseng Eli dosa-dosana mennanro, iyakiya dé' mennang nacairiwi. Rimakkuwannanaro mattanroka passalenna kaluwargana Eli, makkedaé dosana mennang iya battowa senna'éro dé' nawedding riledda sibawa muwi akkarobangeng iyaré'ga pakkasuwiyang aga untu' mannennungeng.” Purairo matinroni paimeng Samuél, na ri élénana moto'ni sibawa timpa'i sining tange'na Bolana Puwangnge. Métauni paissengiwi Eli iyaro pakkitangngé, iyakiya riyobbii ri Eli, adanna, “Samuél, ana'ku.” Nappébali Samuél, “Iyyé Pa'.” Nakkutana Eli, “Aga napowadakko Puwangnge? Curitangeng manekka. Rékko engka séuwa iya murahasiyakangngé, pasti nahukkukko Allataala.” Nainappa Samuél paissengi manengngi iyaro Eli. Dé' gaga muwi séddi iya narahasiyakangngé. Nainappa makkedani Eli, “Aléna Puwang, leppessanni Napogau' aga iya Naangga'é makessing.” Tattamba battowani Samuél. Puwangnge sibawangngi sibawa mébbui sininna iya napowadaé Samuél kajajiyang tongeng. Iyaro wettué napangarani tau Filistingngé sininna tentarana untu' gasai Israélié; rimakkuwannanaro majuni tentara Israélié ri ammusurengngé; makkémani mennang ri seddéna Ebén Haézer, na tentara Filistingngé makkémai ri Afék. Mammulani maggasa tentara Filistingngé, napuranana ammusureng maseroé, cauni tentara Israélié sibawa kira-kira patassebbu maté ri ammusurengngéro. Wettunna lisu sésana tentara iya cauéro ri akkémangngé, makkedani sining pamimping Israélié, “Magi naleppessakki Puwangnge ricau ri tau Filistingngé essoéwé? Laono mai taalai Petti Assijancinna Puwangnge polé ri Silo, natatiwii kumaiyé, kuwammengngi namaélo Puwangnge tulukki sibawa passalama'ki polé ri balié.” Nainappa mennang suroi tauwé lao ri Silo untu' malai Petti Assijancinna Puwangnge iya mancajiyé kadéra arajanna Puwang Iya Pommakuwasaé. Iya duwa ana'na Eli, Hofni sibawa Pinéhas, tinrosiwi Petti Assijancingngéro. Lettu'nana iyaro Petti Assijancingngé ri akkémangngé, gora-gorani umma Israélié sibawa makkuwamani cennona, angkanna mpéwang tanaé. Naéngkalinga towi tau Filistingngé iyaro oni gora-goraé nainappa mennang makkeda, “Magi nagora-gora iyaro tau Ibranié?” Iyakiya wettunna mennang naisseng makkedaé lettu'ni Petti Assijancinna Puwangnge ri akkémanna Ibranié, métauni mennang, namakkeda, “Engka déwata polé ri akkémanna mennang! Cilakani idi'é! Dé'pa taengka tapéneddingiwi gau' pada-padaéwé! Cilaka tongenni! Nigana mulléi passalama'ki polé ri déwata-déwata iya mawatangngéro? Dé'ga na déwata-déwataéttoro pura mpunoi tau Maséré'é ri padang kessi'é riyolo? Pabbaraniwi atimmu, éh tau Filistingngé! Ammusuno pada-pada worowané, rékko dé', mancajiko matu atanna sining tau Ibraniéro, pada-pada mennang riyolo mancaji atammu. Rimakkuwannanaro ammusuno sibawa barani!” Nainappa mammusuni tau Filistingngé sibawa masero nanacaui tentara Israélié. Larini tau Israélié lao ri kémana tungke'-tungke'. Battowa senna akalannaro: 30.000 prajuri'na Israélié maté. Petti Assijancinna Allataala nasittaiwi balinna Israélié, sibawa iya duwa ana'na Eli, Hofni sibawa Pinéhas, matéi. Séddi tau polé ri suku Bényamin lari polé ri ammusurengngé lao ri Silo, nalettu kuwaro ri essoéttoro. Selaku tanrang asarang, purani nasapé-sapé pakéyanna sibawa nataroi tana ulunna. Eli, iya manenneng senna'é pikkiri'i asalamakenna Petti Assijancinna Puwangnge, tudat-tudangngi ri kadéraé ri wiring lalengngé, nannawa-nawato. Wettunna iyaro tauwé nabbirittang akalanna Israélié, sininna pabbanuwana kotaé mpatinni sibawa macenno. Naéngkalingai Eli iyaro mpatingngé, namakkutana, “Arukkang aga iyaro?” Na iyaro tauwé onna larini lao ri Eli; wettunna lettu, napaissengini karéba majaéro. Na iya Eli asérani pulona aruwa taung umuru'na sibawa mawé'ni buta. Makkedani iyaro tauwé ri Eli, “Larika polé ri ammusurengngé iyaé essoé na silalona lettu'ka.” Nakkutana Eli ri aléna, “Pékkugi karébanna, ana'ku?” Nappébali iyaro pattiwi karébaé, “Lariwi Israélié polé ri tau Filistingngé. Nakennaki akalang iya battowa senna'é. Maéga tau maté, makkuwatoro iya duwa ana'na Bapa', Hofni sibawa Pinéhas. Sibawa Petti Assijancinna Allataala nasittaiwi balié!” Wettunna iyaro tauwé paissengiwi passalenna Petti Assijancingngéro, mabuwang léngenni Eli polé ri kadérana ri seddéna pintu gerbangngé. Makkuwamani cowana sibawa macommo angkanna wettunna mabuwang poloi ellonna, namaté. Purani napimping Israélié patappulo taung ittana. Iyaro wettué, ménéttunna Eli, iyanaritu bainéna Pinéhas, macowani tampu'na, sibawa wettunna mémmana macawé'ni. Wettunna naéngkalinga makkedaé risittaini Petti Assijancinna Allataala, sibawa maténi matuwanna sibawa lakkainna, tappa napéneddingini mapeddi maélo mémmana, nainappa mémmana dé' namaitta ri munrinna. Wettunna maéloni maté, makkedani sining makkunrai iya tulungngéngngi, “Pakkasse'i! Worowané ana'mu!” Iyakiya dé' nappébali iyaré'ga bati-batiwi mennang. Nasittainnana tau Filistingngé Petti Assijancinna Allataala, natiwini mennang polé ri Eben-Haézer lao ri kotana mennang, Asdod. Kuwaniro natiwi iyaro Pettié muttama ri bola déwatana mennang, Dagon, sibawa napalénne ri seddéna dato'-dato' déwataéro. Wettunna pabbanuwana Asdod pappa bajana éléé lao ri bola déwataéro, naitani mennang makkedaé dato'-dato' Dagon mabuwang moppanni ri tanaé, ri yolona Petti Assijancinna Puwangnge! Nakkani mennang iyaro dato'-dato'é nanapalisui ri onronna. Iyakiya pappa bajana éléé, naitani mennang makkedaé iyaro dato'-dato'é sempé'si ri yolona Petti Assijancingngéro. Iyaé sisengngé ulunna iyaro dato'-dato'é sibawa iya duwa taiyyana malétta'i sibawa lénne ri sumpangngé; banna watakkaléna iyaro dato'-dato'é iya makkalépué mupa. ( Iyanaro saba'na, lettu essoéwé sining imanna déwata Dagon sibawa sininna tau sompaéngngi ri Asdod majjalékkaiwi sumpanna iyaro bolana Dagon sibawa dé' nalléjja'i.) Nainappa nahukkung Puwangnge pabbanuwana Asdod nenniya daéra seddéna sibawa boro-boro ri tubunna mennang. Wettunna mennang naita aga iya mattengngangngé kajajiyang ri mennanro, makkedani mennang, “Allataalana Israélié hukkukki silaong déwatata Dagon. Dé' nawedding rileppessang Petti Assijancingngé monro kuwaé lebbi maittapa.” Rimakkuwannanaro naobbini iya lima arung Filistingngé kuwammengngi naddeppungeng, nainappa makkutana, “Iyaro Petti Assijancinna Puwang Allataalana Israélié harusu'i riyaga?” Nappébali iyaro sining arungngé, “Palétté'i ri kota Gat.” Jaji, napalétté'ni iyaro pettié lao ri kota Gat, séddi kota Filistin iya laingngé. Iyakiya lettu'nana iyaro Pettié kuwaro, Puwangnge hukkung towi iyaro kotaé sibawa paompo alippuwang iya battowa senna'é. Iyaro pabbanuwana kotaé, muwi maloloé iyaré'ga macowaé rihukkungngi sibawa sining lettang iya tuwoé ri tubunna mennang. Nainappa iyaro Petti Assijancingngé ritiwi ri Ekron, kota Filistin iya laingngéssi. Lettu'na iyaro Pettié kuwaro, gorani pabbanuwana, makkeda, “Iyaro Petti Assijancinna Allataalana Israélié ritiwii kumaiyé untu' mpuno manekki.” Rimakkuwannanaro naobbini mennang sininna arung Filistingngé kuwammengngi naddeppungeng, nainappa makkeda, “Palisuni iyaro Petti Assijancinna Allataalana Israélié ri onronna mammulangngé kuwammengngi aja' naunoki sibawa kaluwargata.” Ri sininna kotaé kajajiyanni alippuwangngé nasaba Allataala hukkungngi pabbanuwana sibawa matane senna. Sining tau iya dé'é namaté, nakennai lasa lettal-lettangngé, angkanna pabbanuwana iyaro kotaé gorani lao ri déwata-déwatana mennang, méllau tulung. Monronana Petti Assijancinna Puwangnge ri Filistin pitumpuleng ittana, naobbini tau Filistingngé sining imangngé sibawa sining passéhéré'é nainappa makkutana, “Harusu'i riyaga iyaro Petti Assijancinna Puwangnge? Rékko ripalisui ri onronna, pékkugi carana?” Nappébali mennang, “Iyaro Petti Assijancinna Allataalana Israélié aja' mupalisui makkuwaro bawang, iyakiya harusu'i nasibawang hadiya untu' pakkamaja dosamu. Nanallalengiwiro naripajjapako matu, sibawa muwissengngi matu magi iyaro Allataalana Israélié natteru-teru hukkukko.” Nakkutana iyaro sining tauwé, “Pakkamaja agana harusu tawéréngngi?” Nappébali iyaro sining imangngé, “Lima boro ulaweng sibawa lima balawo ulaweng, situru jumellana arung Filistingngé. Dé'ga na abalaé iyanaritu boro-boro sibawa balawoto iya puraé kenna manekko, muwi ra'ya'é iyaré'ga arungngé? Jaji, harusu'ko mébbu pada-padanna polé ri lettal-lettangngé sibawa balawo iya majjallo'é ri wanuwammu. Nanallalengiwiro mupakallebbii Allataalana Israélié. Naullé mappésauwi matu hukkukko, silaong déwata-déwatamu enrengngé tanamu. Aga gunana matedde atiko pada-pada arungngé sibawa tau Maséré'é riyolo? Aja' muwallupai pékkugi Allataala macculé-culéiwi mennang, angkanna mennang toba nanaleppengngi iyaro tau Israélié salaiwi Maséré. Rimakkuwannanaro, passadiyano séddi padati iya barué sibawa duwakkaju saping iya mappasusué mupa, sibawa iya dé'éppa naengka naripaké untu' maggetteng padati. Pasangngi iya duwa sapingngéro ri padatié, sibawa rimpai iyaro ana'-ana' sapingngé lisu ri laleng wakké. Nainappa alai Petti Assijancinna Puwangnge, paénré'i ri padatié, sibawa palénne'i ri seddéna petti-petti iya mallise'é barab-barang ulaweng iya harusu'é muwakkasuwiyangeng lao ri Aléna selaku pakkamaja dosamu. Leppessangngi iyaro padatié sibawa sapingngé joppa alé-aléna. Pénessaiwi lalenna; rékko iyaro Petti Assijancingngé natiwii mattuju ri wanuwanna muto, iyanaritu kota Bét-Sémes, iyaro bettuwanna makkedaé Allataalana tau Israélié ritu pura papolé acilakang iya maseroéro lao ri idi. Iyakiya rékko iyaro padatié dé' nattuju kuwaro, taissenni matu makkedaé tenniya polé ri Allataalana Israélié, sangadinna nasitujuwammi bawang.” Turuni iyaro sining tauwé; malani mennang duwakkaju saping iya mappasusué mupa, nainappa napasang ri padatié, ana'-ana'na iyaro sapingngé naurungngi ri laleng wakkéé. Nainappa iyaro Petti Assijancingngé napaénré ri padatié, makkuwatoro petti-petti iya mallise'é balawo ulaweng sibawa lettal-lettang rapangngéro. Iyaro sapingngé joppani matteru mattuju ri Bét-Sémes; iyaro olokolo'é mangnguwa'ni najoppato matteru, telléssé ri abéyo iyaré'ga ri atau polé ri watattanaé. Iya lima arung Filistingngéro matteruni maccowéri lettu ri pakkasésénna Bét-Sémes. Iyaro wettué pabbanuwana Bét-Sémes mattengngangngi méngngala gandong ri lompo'é. Wettunna mennang naita iyaro Petti Assijancingngé, marennuni mennang duppaiwi. Iyaro padatié mappésauwi ri seddéna séddié batu loppo ri daérana Yosua, séddiwi tau pabbanuwana Bét-Sémes. Pabbanuwana iyaro kotaé napuwé-puwé'ni iyaro ajunna padatié nainappa nagéré iya duwa kajunna sapingngéro untu' akkarobangeng ritunu lao ri Puwangnge. Nainappa sining tau Léwié panonnoi Petti Assijancinna Puwangnge sibawa petti-petti iya mallise'é barab-barang ulawengngéro, nainappa napalénne ri yasé'na batu loppoéro. Purairo makkasuwiyanni pabbanuwana Bét-Sémes akkarobangeng ritunu sibawa akkarobangeng-akkarobangeng laingngé lao ri Puwangnge. Wettunna iya limaro arung Filistingngé mitai iya manennaro lisuni mennang ri Ekron iyatoro essoé. Iyakiya nasaba iyaro sining tau Bét-Sémes-é célléngngi muttama ri laleng Petti Assijancinna Puwangnge, pituppulo tau ri yelle'na mennang riyuno ri Puwangnge. Nanabbarata ra'ya'é nasaba Puwangnge pateppaiwi mennang abala iya makkuwaéro loppona. Namakkeda pabbanuwana Bét-Sémes, “Nigana wedding tahang ri yolona Puwangnge, Allataala Iya Mapaccingngéro? Kégani iyaro Pettié harusu riyantara kuwammengngi namabéla polé ri idi?” Nanakiring mennang suro lao ri Kiryat-Yéarim sibawa paseng makkuwaéwé, “Napalisuni tau Filistingngé Petti Assijancinna Puwangnge. Laono mai namutiwii iyaro pettié lao ri onrommu.” Nanalani pabbanuwana Kiryat-Yéarim iyaro Petti Assijancinna Puwangnge nanatiwii ri lalempolana tau iya riyasengngé Abinadab; iyaro bolaé engkai ri tompo'na bulu-bulué. Nainappa mennang nalanti Eléazar ana' Abinadab, untu' monrowangngi iyaro Petti Assijancingngé. Maittato iyaro Petti Assijancinna Puwangnge monro ri Kiryat-Yéarim, kira-kira duwappulo taung. Ri lalenna wettuéro sininna umma Israélié mangobbii lao ri Puwangnge méllau tulung. Namakkedana Samuél lao ri umma Israélié, “Rékko maéloko lisu ri Puwangnge nenniya sompai Aléna sibawa sukku atimmu, harusu'ko mabbéyangngi sininna déwata laingngé sibawa dato'-dato'na Déwi Asytorét. Abbéréyang sisengngi alému lao ri Puwangnge sibawa massompa ri Aléna bawang, nanapaleppe'ko matu polé ri tau Filistingngé.” Jaji nabbéyanni tau Israélié dato'-dato'na Déwa Baal sibawa dato'-dato'na Déwi Asytorét, namattumani banna ri Puwangnge bawang. Purairo makkedani Samuél, “Paddeppungenni sininna bangsa Israélié ri Mizpa, namaéloka massempajangekko lao ri Puwangnge.” Namaddeppungeng manenna mennang ri Mizpa. Séro'ni mennang uwai nainappa natiri selaku pakkasuwiyang lao ri Puwangnge, nainappa mennang mappuwasa puppu essoéro. Nakkedana mennang, “Madosani lao ri Puwangnge.” (Ri Mizpa ritu Samuél mappammula pettuiwi parakara-parakara assisalanna tau Israélié.) Wettunna naéngkalinga tau Filistingngé makkedaé maddeppungenni tau Israélié ri Mizpa, joppani iya lima arung Filistingngé lao kuwaro silaong tentarana mennang untu' gasai tau Israélié. Naéngkalingani tau Israélié gau'éro namancaji métauna. Nakkeda mennang lao ri Samuél, “Aja' muwappésau massempajang lao ri Puwang Allataalata kuwammengngi Napassalama'ki polé ri tau Filistingngé.” Rimakkuwannanaro géréni Samuél sikaju ana' bimbala lolo, nanakkasuwiyangengngi selaku akkarobangeng ritunu lao ri Puwangnge. Purairo massempajanni kuwammengngi Puwangnge tulungngi tau Israélié, naritarima iyaro sempajanna. Wettunna Samuél mattengngang makkasuwiyang akkarobangeng ritunuéro, mammulani maggasa tau Filistingngé; iyakiya nasitujuwangngi iyaro wettué magguttui Puwangnge polé ri langié ri yasé'na mennang. Nakacauna mennang angkanna lari alippuwang. Massuni tentara Israélié polé ri Mizpa nanalellungngi iyaro tau Filistingngé nawéki sibbéla Bét-Kar, sibawa mancuru'i mennang. Purairo patettonni Samuél séddi batu, ri pakkasésénna Mizpa sibawa Sén. Makkedai, “Sukku Puwangnge pura tulukki.” – nainappa naseng iyaro batué “Batu Pattulung”. Makkuwaniro tau Filistingngé ricau. Dé' naripalalo mennang ri Puwangnge muttamakiwi daérana Israélié paimeng, gangka tuwona mupa Samuél. Sininna kota Israél iya puraé nacau tau Filistingngé, mappammulai ri Ekron lettu ri Gat, napalisuni lao ri Israélié. Jaji nalolongenni paimeng Israélié sininna daérana. Tau Israélié sibawa tau Kanaangngé tuwoni sibawa damé. Naparéntani Samuél Israélié gangka maténa. Tungke' taung joppai mattulili lao ri Bétel, Gilgal, sibawa Mizpa. Na ri onrong-ngonrongngéro napettuiwi parakara-parakara assisalangngé. Purairo lisuni ri bolana ri Rama. Kuwaniro mancaji hakinna tau Israélié sibawa patettong towi séddi mézba untu' Puwangnge. Macowanana Samuél, naakkani ana'-ana'na mancaji haking ri Israél. Ana'na iya macowaé riyasengngi Yoél na iya maduwaé Abia. Mancaji hakingngi mennang ri Bérsyéba. Iyakiya dé' naccowériwi mennang ampé-ampéna ambo'na, sangadinna banna lellungngi asarong aléna bawang. Tarimai mennang dowi pasoso sibawa madélékiwi ra'ya'é dé' naadélé. Rimakkuwannanaro maddeppungenni sininna pamimping Israélié, nainappa mangolo ri Samuél ri Rama, sibawa makkeda lao ri aléna, “Engkalingai Pa', macowani Bapa' na ana'-ana'na Bapa' dé' naccowériwi ampé-ampéna Bapa'. Jaji makessingengngi Bapa' makka séddi arung kuwammengngi tappunnai arung pada-pada bangsa-bangsa laingngé.” Iyakiya dé' namasennang Samuél sibawa tangngana mennanro. Namassempajang lao ri Puwangnge, namakkeda Puwangnge, “Palaloni sininna paréllaunna iyaro bangsaé lao ri iko. Saba' tenniya iko nasampéyang mennang, sangadinna Iyya. Dé'na mennang napuwélo-Ka selaku arunna mennang. Sipongenna mennang Utiwi massu polé ri Maséré, nabbokori-Ka mennang namassompa déwata-déwata, sibawa aga iya nagaukengngékko mennang makkekkuwangngé, iyanaro napogau' mennang lao ri Iyya. Rimakkuwannanaro tarimani paréllaunna mennang; iyakiya paréngngerangiwi mennang sibawa tonget-tongeng, sibawa paissengiwi pékkugi mennang matti rigaukeng ri arungngé.” Sininna iyaro ada-adanna Puwangnge napalettu'ni Samuél lao risining tau iya méllauwé séddi arung ri aléna, adanna, “Mappakkuwiyé matti arummu gaukekko,” mappakkuwaniro Samuél pakatajangngi. “Napassai matu ana'-ana'mu muttama tentara; sibagiyang polé ri mennang selaku pasukang makkaréta, sibagiyang selaku pasukang makkinnyarang, na laingngé selaku pasukang mallaleng. Sibagiyang nakka mancaji parawira sisebbué tau, na sibagiyang laingngé limassebbué tau. Iyaro arungngé napassai matu ana'-ana'mu rakkalai dare'na, paddeppungengngi wassélé éngngalanna, mébbui senjata-senjatana sibawa pakkakkasa karéta musuna. Ana'-ana'mu iya makkunraié nasuroi matu mébbu minnya wangi untu' aléna sibawa mappallaung selaku pannasunna sibawa pakkébbu rotinna. Nalai matu dare'mu, palla anggoro'mu, sibawa palla zaitummu iya kaminang makessingngé nanawéréngngi sining pegawénna. Dare sibawa palla anggoro'mu napakennai matu sima tawaseppulona polé ri wassélé'na, nainappa nawéréng matu sining parawirana sibawa sining pegawénna. Nalai matu atammu, olokolo'mu iya kaminang makessingngé sibawa kaleddé'mu nanapakéi untu' jama-jamanna. Tawaseppulona polé ri bémbé bimbala makkonrommu nalai matu. Sibawa iko paimeng mancaji matu atanna. Rékko narapini matu iyaro wettué, maddarékéno matu nasaba arung iya mupiléro, iyakiya dé' namaélo Puwangnge méngkalingai addarékémmu.” Iyakiya iyaro bangsaé dé' namaélo bati-batiwi ada-adanna Samuél, mala makkedai mennang, “Leppessanni! Muwi maga riyélori towi arungngé. Macinnaki sippada sibawa bangsa-bangsa laingngé, harusu'ki naparénta arutta sibawa pimpikki ri laleng ammusurengngé.” Purana naéngkalinga Samuél sininna ada-adanna mennanro, napalettu'ni lao ri Puwangnge. Nappébali Puwangnge, “Accowéri bawanni mennang sibawa akkarenni mennang séddi arung.” Nainapa nasuro Samuél sining tauwéro lisu ri bolana tungke'-tungke'. Engka séddi tau sugi sibawa riyakkitangi polé ri suku Bényamin, asenna Kish. Anggota kaluwargana Békhorat, takké polé ri appang Afiah. Ambo'na Abiél sibawa nénéna Zéror. Kish mappunai ana' worowané, asenna Saul, séddiwi kallolo iya magelloé sibawa mawatang. Dé' muwi séddi tau ri sininna Israélié iya lebbi magelloé naiya aléna. Watakkaléna lebbi matanré towi; rata-rata tanréna tau Israélié banna gangka ri salangkanna. Riséuwaé esso siyagangngaré kaleddé appunnangenna Kish teddéng. Rimakkuwannanaro makkedani Kish lao ri Saul, “Tiwini sala séddinna pattumanié, namusappai iyaro sining kaleddé'é.” Nanajalajja'ni Saul silaong pattumaninna daéra buluna Efraim sibawa tana Salisa, iyakiya dé' naruntu'i iyaro sining olokolo'é. Nainappa mennang joppa matteru lao ri tana Sahalim, iyakiya iyaro sining kaleddé'é dé' towi gaga kuwaro. Nasappa towi ri daérana Bényamin, iyakiya siya-siya bawang. Wettunna mennang lettu ri tana Zuf, makkedani Saul lao ri pattumaninna, “Laono mai talisu bawang, ajakké lebbi manennengngi ambo' pikkiri'ki naiya sining kaleddé'éro.” Nappébali iyaro pattumanié, “Tajengngi riyolo! Ri kotaéwé engka séddi tau atanna Allataala. Ripakalebbi senna ri tauwé nasaba aga iya napauwé tuli tonget-tongengngi kajajiyang. Laono mai talao ri aléna, ajakké naulléi paissengiki kégai iyaro sining kaleddé'é.” Nakkeda Saul, “Rékko laoki méwai sita, agana riwéréngngi matu? Bokong iya ritiwié cappuni, nadé' tappunnai aga-aga untu' riwéréngngi iyaro atanna Allataala?” Nappébali iyaro pattumanié, “Nasitujuwangngi engka mupa ri iyya séddi dowi péra'. Uwéréppi matu iyaro atanna Allataala kuwammengngi namaélo paissengiki kégai iyaro sining kaleddé'é.” Jaji joppani Saul sibawa pattumaninna lao ri kotaé, na wettunna mennang muttama ri pintu gerbangngé, siduppani mennang Samuél iya mattengngangngé joppa mattuju ri onrong assompangngé ri bulu-bulué. Siesso riyolonaro mappasengngi Puwangnge ri Samuél makkuwaé, “Baja éléé kira-kira wettu makkuwaéwé, maélo-Ka suro séddi tau polé ri suku Bényamin méwako sita. Lanti'i sibawa upacara amminnyakeng untu' mancaji arung ri umma'-Ku Israélié. Napassalama'i matu umma'-Ku polé ri tau Filistingngé. Uwitani anrasa-rasanna umma'-Ku sibawa méngkalingai terinna mennang méllau tulung.” Wettunna Samuél naita Saul, makkedani Puwangnge lao ri aléna, “Iyanaé tau iya Uwasengengngékkoro. Naparéntai matu umma'-Ku.” Na wettuéro Saul maddeppériwi Samuél ri seddéna pintu gerbangngé, sibawa makkutana, “Taddampengekka, Pa', kégi bolana iyaro pakkita-kitaé?” Nappébali Samuél, “Iyya'na iyaro pakkita-kitaé. Laono poddiyoloika ri onrong assompangngé ri bulu-bulué, nasaba iyaé essoé manréko matu sisama iyya. Bajapi éléé ubaliwi matu sininna pakkutanamu, purairo weddinno lisu. Passalenna sining kaleddé'mu iya teddéngngé tellungngesso labe'éro, aja' mubata-bata, nasaba rilolongenni. Nappani, iya kaminang mangke'é ri sininna Israélié maéloi riwérékko sibawa kaluwargana ambo'mu.” Nappébali Saul, “Iyya'é poléka ri suku Bényamin, suku iya kaminang baiccu'é ri Israélié, nainappani kaluwargaku kaminang dé'gaga bettuwana ri laleng sukuéro. Jaji magi Bapa' nakkeda makkuwaro lao ri iyya?” Nainappa Samuél naéra Saul silaong pattumaninna muttama ri laleng bili' battowaé, nanawéréngngi mennang onrong iya makessingngé ri yolona sining undangengngé iya jumellanaé kira-kira telluppulo tau. Nainappa makkeda Samuél lao ri pannasué, “Patalani juku iya upalalowangiyékko onna'ro.” Nanalani iyaro pannansué bagiyang ripilé polé ri juku poppanna, nanapatalai ri yolona Saul. Nakkeda Samuél, “Iyanaé bagiyang iya upallaingengngékko kuwammengngi weddingngi muwanré makkekkuwangngé sisama sining topolé laingngé. Tanréni.” Nananréna Saul. Jaji iyaro essoé manréni Saul sisama Samuél. Purairo nonnoni mennang polé ri onrong assompangngéro namuttama ri kotaé. Riwérénni Saul onrong atinrong ri ri yasé' bolaé, namatinrona. Wettunna mompo essoé, riyobbini Saul ri Samuél iya engkaé ri pabbingengngéro, adanna, “Oto'no, laono mai uwantara'ko lao.” Moto'ni Saul, nanajoppa silaong Samuél. Wettunna mennang lettu ri wiring kotaé, makkedani Samuél lao ri Saul, “Suroi iyaro pattumanié joppa poddiyoloiki.” Nanalaona iyaro pattumanié, namakkedasi Samuél, “Léppakko cinampe kuwaé, maéloka paissengiko pasenna Allataala.” Nainappa nala Samuél kendi mallise'é minnya zaitun, nanatiri'i iyaro minnya'é ri tompo ulunna Saul, sibawa bauwi Saul nakkedato, “ Puwangnge pura lanti'ko mancaji arunna Israélié umma'-Na. Muparéntai matu umma'-Na sibawa linrungiwi mennang polé risining balinna. Iyanaé tanranna lao ri iko makkedaé Puwangnge pura piléko mancaji arunna umma'-Na: Musalaikku essoéwé, siruntu'ko matu sibawa duwa tau worowané ri seddéna kuburu'na Rahél ri Zélzah ri daérana Bényamin. Makkedai matu mennang ri iko, makkuwaé, Riruntu'ni sining kaleddé iya musappaéro. Makkekkuwangngé dé'na namanenneng ambo'mu passalenna iyaro olokoloé, iyakiya matteru-terui makkutana aga harusu napogau' untu' lolongekko.” Makkedasi Samuél, “Polé kuwaro joppako matteru lettu ri aju onrong assompangngé ri Tabor. Kuwaro siruntu'ko matu tellu tau worowané iya mattengngangngé mattuju ri Bétel untu' makkasuwiyangeng akkarobangeng ri Allataala. Séddi tau rénréng tellu kajunna ana' bémbé, séddiéssi tiwii tellubbatu roti, na séddiéssi tiwii popang bingkulang mallise anggoro. Mabbéré sellengngi matu ri iko sibawa nawérékko matu duwabbatu roti iya harusu'é mutarima. Purairo harusu'ko lao ri bulu-buluna Allataala ri Gibéa, onrong akkémanna tau Filistingngé. Ri sumpang muttama'é ri kotaé, siduppako matu sibawa sirombongang nabi iya nonnoé polé ri bulu-bulu akkarobangengngé. Séré-séréi mennang sibawa gora-gora, maggambusu, marrebana, massuling sibawa makkacapi. Iyatoro wettué nakuwasaiko matu Rohna Puwangnge namuwaccowériwi matu séré-séréna sibawa gora-gorana mennanro, nainappa riwéréng sipa baru angkanna mancaji tau laing. Rékko kajajiyang manenniro, pogau'ni agi-agi iya mupérasaé makessing, nasaba Allataala sibawakko. Purairo harusu'ko lao ri Gilgal sibawa mattajeng kuwaro pitungngesso. Polépa matti untu' makkasuwiyangeng akkarobangeng ritunu sibawa akkarobangeng pappasidamé, enrengngé powadakko aga harusu mupogau'.” Nasalainna muwa Saul Samuél, tarimani Saul sipa baru polé ri Allataala. Sibawa sininna passalengngé iya ripaissengengngéngngi ri Samuél kajajiyanni iyatoro essoé. Wettunna Saul sibawa pattumaninna lettu ri Gibéa, siruntu'ni sibawa sirombongang nabi. Iyatoro wettué narikuwasai Saul ri Rohna Allataala, nanaccowériwi séré-séréna sibawa gora-gorana nabi-nabiéro. Sining tau iya missengngéngngi riyolopa, mitai kédo-kédonaro, namakkutana séddié lao ri laingngé, “Agana pura kennai ana'na Kishro? Mancaji nabi towiga Saul?” Nanakkutana séddi tau iya monroé kuwaro, “Pékkugi sibawa nabi-nabi iya laingngéro – manuru iko niga ambo'na mennang?” Iyanaro assalenna warékkadaéwé, “Aga Saul mancaji nabi towi?” Puranana Saul séré-séré sibawa gora-gora, laoni ri mézbaé ri tompo'na bulu-bulué. Riitani Saul sibawa pattumaninna ri amuréna, namakkutana ri mennang, “Polé kégiko?” namappébali Saul, “Sappai kaleddé iya teddéngngéro, na wettunna dé' taruntu'i, laoki méwai sita Samuél.” Nakkutana amuréna, “Na aga napowadakko?” Nappébali Saul, “Napaissengiki makkedaé riruntu'ni iyaro olokolo'é.” Iyakiya dé' nacuritai Saul lao ri amuréna makkedaé purani rilanti mancaji arung ri Samuél. Nanaobbini Samuél ra'ya' Israélié kuwammengngi naddeppungeng ri Mizpa, namakkeda lao ri mennang, “Iyanaé napowada Puwangnge, Allataalana Israélié, ‘Purano utiwi massu polé ri Maséré sibawa paleppe'ko polé ri akuwasanna tau Maséré'é sibawa sininna bangsa laing iya tenre'ékko. Purano upaleppe polé ri sininna anrasa-rasangngé sibawa peddié, iyakiya makkekkuwangngé musampéyak-Ka, Allataalamu, nasaba muwéllauwi kuwammengngi Ujellokekko séddi tau arung. Nah, makessinni, addeppungenno ri yolo-Ku, Puwam -mu, situru suku sibawa appammu.’ ” Nanasuroni Samuél sininna sukué malluru liyolo na suku Bényamin nakenna appiléng. Wettunna kaluwarga-kaluwargaé ri laleng suku Bényaminro risuro malluru liyolo, na kaluwargana Matri nakenna appiléng. Paccappurenna malluruni sining worowané ri laleng kaluwargana Matri, na Saul ana' Kish nakenna appiléng. Nanasappani mennang Saul, iyakiya dé'i gaga. Rimakkuwannanaro makkutanani sining tauwé ri Puwangnge, “Oh Puwang, engkaniga iyaro tauwé kuwaé?” Nappébali Puwangnge, “Massubbui Saul ri munrinna barab-barang perlengkapangngé.” Namasitta'na mennang lao duppaiwi Saul polé kuwaro, nanatiwié ri tengnga-tengngana ra'ya'é. Natettonna Saul ri yelle'na mennang na aléna ritu kaminang matanré; tau laingngé banna gangka ri salangkanna. Nainappa makkeda Samuél lao ri ra'ya'é, “Iyanaé tau iya napilé Puwangnge, dé' gaga pada-padanna ri yelle'ta maneng.” Gorani sininna bangsaéro, “Tuwoni arungngé!” Nainappa napakatajang Samuél lao ri bangsaéro passalenna ha'na sibawa kewajibanna arungngé, nainappa naoki ri laleng kitta iya nataroé ri onrong iya mapaccingngé. Purairo nasuroni Samuél sininna bangsaéro lisu ri bolana tungke'-tungke'. Lisu toni Saul ri bolana ri Gibéa, risilaongeng risiyagangngaré tau iya baranié sibawa iya ripakédoé atinna ri Puwangnge. Iyakiya siyagangngaré tomaja makkeda, “Pékkugi wedding iyaé tauwé makkéguna matu ri idi?” Napakariyawai Saul sibawa dé' nawéréngngi hadiya. Iyakiya najjaiwi temmissengngi. Nainappa Nahas, arung Amon, pangarai tentarana nanakeppungngi kota Yabésh ri daérana Giléad. Iyaro pabbanuwana Yabésh pangoloni tangnga lao ri Nahas makkuwaé, “Ebbuno assijancing sibawa idi, natatunru lao ri iko.” Nappébali Nahas, “Nasibawang sara'éwé bawang maéloka mébbu assijancing, ‘Ucukkéi matu mata ataummu tungke'-tungke' selaku pappakatuna lao ri sininna Israélié!’ ” Namappélai sining pamimpinna kota Yabésh, “Méllauki wettu pitungngesso ittana kuwammengngi weddikki kiring suro lao risininna tanana Israélié. Rékko dé'gaga iya maéloé tulukki, manyaraki matu lao ri iko.” Makkuwaniro iyaro sining suroé lettu ri Gibéa, onrong naonroiyé Saul. Wettunna mennang napalettu iyaro karébaé, terini ra'ya'é nasaba pettu paddennuwangngi. Iyaro wettué silalona Saul polé ri dare'na sibawa tiwii sapinna. Makkutanani, “Engka aga? Magi nateri maneng tauwé?” Naripaissengina karéba iya natiwié suro polé ri Yabéshro. Naéngkalinganaro, rikuwasaini Saul ri Rohna Allataala. Namacai senna'na mala duwakkaju saping nainappa nalétta-létta mancaji maéga létta'na. Nainappa iyaro létta-létta'é nakiringngi lao risininna tanana Israélié sibawa paréntaéwé, “Nigi-nigi iya dé'é namaélo malluru mammusu maccowériwi Saul sibawa Samuél, rilétta-létta makkuwa towiyé matu sapinna!” Métauni bangsa Israélié lao ri aga iya naullé napogau' Puwangnge, na sininna tauwé, tenripassangadi, sadiyani maju mammusu massibawa. Ripaddeppungenni mennang sibawa ribilang ri Bézék: Engka 300.000 tau Israél, sibawa 30.000 tau Yéhuda. Purairo ripaissengini suro polé ri Yabésh makkuwaé, “Powadanni pabbanuwana Yabésh, makkedaé baja éléé ri wettu dé'napa natangasso, lolongengngi matu mennang pattulung.” Wettunna natarima pabbanuwana Yabésh iyaro pasengngé, masennang senna'ni mennang. Nakkeda mennang lao ri Nahas, “Baja tamaélo manyara, sibawa weddinni mugaukeng siélo atimmu.” Bajanana, éléé, nabagéni Saul sining taunna ri laleng tellu pasukang. Na wettunna mompo essoé maggasani mennang ri tengnga-tengngana akkémanna iyaro tau Amongngé sibawa luruiwi mennang. Ri wettu dé'napa natangasso, nacauni tentarana Saul balié. Sining tau Amon iya naullé leppe, tassiya-siyani angkanna dé'gaga duwa tau iya mullééngngi lari massibawa. Nainappa makkutana bangsa Israélié ri Samuél, “Kégani sining tau iya baranié onna makkeda makkedaé dé' nasitinaja Saul mancaji arutta? Sitinajai Bapa' mabbéréyangngi lao ri idi, kuwammengngi taunoi.” Iyakiya makkedai Saul, “Dé' muwi séddi tau wedding riyuno iyaé essoé, nasaba iyaé essoé purani napassalama Puwangnge Israélié.” Namakkedana Samuél lao ri mennang, “Lao manenno mai talao ri Gilgal sibawa résmikangngi Saul selaku arutta.” Makkuwaniro mennang lao maneng ri Gilgal, na ri onrong assompangngéro rirésmikang Saul selaku arung. Makkasuwiyangenni mennang akkarobangeng pappasidamé, na Saul sibawa sininna bangsa Israélié ramé-raméiwi iyaro kajajiyangngé. Namakkedana Samuél lao ri sininna bangsa Israélié, “Purani upennoi sininna paréllaummu sibawa makkarekko séddi arung. Mappammulai makkekkuwangngé aléna ritu pimpikko matu. Itani, iyya'é macowana sibawa maubenni. Maitta senna'na pimpikko – mappammulai maloloku lettu makkekkuwangngé. Buttinna iyanaritu ana'-ana'ku iya battowaénnaéro. Makkekkuwangngenna ritu utettong ri yolomu! Rékko puraka pogau' asalang, teppuna ri yolona Puwangnge sibawa ri yolona arungngé iya Napilé. Engkaga naengka uwala saping iyaré'ga kaleddé'na tau laingngé? Engkaga naengka upabengnguwang iyaré'ga mattenre iyaré'ga tarima dowi pasoso? Powadani, kuwammengngi agi-agi iya uwalaé weddingngi upalisu.” Nappébali iyaro sining tauwé, “Dé', dé' naengka Bapa' napabengnguwang iyaré'ga natenre'ki; dé' naengka nalai Bapa' aga-aga appunnangenna muwi niga?” Namakkedana Samuél, “Ri essoéwé Puwangnge sibawa arung iya Napilé mancaji sabbi makkedaé annessana dé' upasala muwi céddé.” Nappébali mennang, “Iyyé tongeng, Puwangnge mancaji sabbitta.” Nakkedapa paimeng Samuél, “ Puwangnge ritu piléi Musa sibawa Harun, sibawa iya tiwiéngngi toriyolomu massu polé ri Maséré. Makkekkuwangngé aja' mulao riyolo. Maéloka tenre'ko ri yolona Puwangnge. Engngerangngi sininna akacuwanna Puwangnge iya puraé Nappaitang lao ri iko sibawa lao ri toriyolomu. Wettunna Yakub sibawa kaluwargana lao ri Maséré, na ritenre ri tau Maséré'é, méllauwi pattulung toriyolomu ri Puwangnge, nanasuroi Puwangnge Musa sibawa Harun. Iya duwa tauwéro tiwii toriyolomu massu polé ri Maséré sibawa tulungngi mennang mattette ri wanuwaéwé. Iyakiya ri munri nallupaiwi mennang Puwangnge, Allataalana mennang, rimakkuwannanaro naleppessangngi mennang rigasa sibawa ricau ri Siséra, pallima tentaraé ri Hazor, sibawa tau Filistingngé enrengngé arung Moab. Nainappa mennang massempajang lao ri Puwangnge sibawa mangakuiwi dosana; adanna mennang, ‘Madosani nasaba mabbokori-Ko, oh Puwang, sibawa massompa dato-dato Déwa Baal sibawa Asytorét. Iyakiya makkekkuwangngé, passalama'ki polé ri balitta, natamattumani lao ri Iko!’ Nainappa Puwangnge suroi Gidéon, nainappa Barak, purairo Yéfta, na paccappurenna iyya. Tungke'-tungke'ki pura paleppe'ko polé ri balimmu, angkammu weddikko tuwo sibawa amang. Iyakiya wettunna muwita makkedaé maéloko rigasa ri Nahas arung Amon, musampéyangngi Puwangnge selaku arummu sibawa makkeda lao ri iyya, ‘Macinnaki riparénta riséddié arung.’ Makkekkuwangngé, itani, iyanaé, arung iya mupiléro. Purani muwéllau, napurano nawéréng Puwangnge. Ariyo-riyono rékko mupakalebbii Puwangnge, sibawa mattumani ri Aléna, enrengngé méngkalingai sibawa turusiwi parénta-Na, apalagi rékko iko sibawa arummuro tette'i matinulu ri Puwang Allataalamu. Sibalé'na, rékko dé' muwéngkalingai Puwangnge, mala muwéwai parénta-Na, pasti iko sibawa arummu naéwai matu Puwangnge. Makkekkuwangngé, éngkalingasi! Pénessaiwi anu makalallaing battowaé iya napogau'é matu Puwangnge ri yolona matammu. Maéloka mangobbi lao ri Puwangnge, sibawa namuni makkekkuwangngé wettu timo, panonnoi matu Puwangnge guttu sibawa bosi selaku pappébalinna sempajakku. Iyaro wettué, mainge'ko matu pékkugi loppona dosamu lao ri Puwangnge nasaba méllauwi séddi arung.” Namassempajanna Samuél, na iyatoro essoé napanonno Puwangnge guttu sibawa bosi. Sininna bangsaéro métauni lao ri Puwangnge sibawa lao ri Samuél. Namakkedana mennang lao ri Samuél, “Tulunni, Bapa', assempajangekki ri Puwang Allataalamu, kuwammengngi aja' tamaté. Mainge'ni makkekkuwangngé makkedaé ri lainnaé dosata riyolo, madosasiki nasaba méllauwi séddi arung.” Nappébalina Samuél, “Aja' mumétau, namuni purai mupogau' iyaro jaé, aja' muwabboko polé ri Puwangnge, sangadinna tette'no mattumani ri Aléna sibawa sukku atimmu. Aja' muwaccowériwi déwata-déwata iya dé'é naulléi mattulung sibawa passalama'ko, nasaba sitongenna mennang dé'gaga. Purai mattanro Puwangnge, makkedaé dé' namaélo salaiko nasaba purai Napettui untu' pancajiko umma'-Na. Passalenna aléku, tennapodo aja' narapika madosa lao ri Puwangnge nasaba dé' uwassempajangekko. Sibalé'na matteru tokka matu pagguruwakko gau'-gau' iya makessingngé sibawa tongengngé. Pakalebbii Puwangnge sibawa attumanino ri Aléna sibawa matinulu nenniya sukku atimmu. Engngerangngi matu sining pangkaukeng battowa iya puraé Upogaukekko. Iyakiya rékko matteru muko pogau' dosa, iko sibawa arummu binasai matu.” Riséuwaé esso, wettunna Saul mancaji arunni, piléni 3.000 tau Israél; polé ri yelle'na 2.000 monro sibawa aléna ri Mikhmas sibawa ri daéra buluna Bétel, na iya 1.000 laowi silaong Yonatan ana' worowanéna ri Gibéa ri daérana suku Bényamin. Lebbinna iyaro ra'ya'é ripalaloni lisu ri bolana tungke'-tungke'. Nainappa Yonatan nauno pallima Filistingngé ri Gibéa, nanaéngkalingani bangsa Filistingngé passalenna gau'éro. Nainappa Saul massuro paoniwi tarompé'é ri sininna wanuwaé untu' mobbii tau Ibranié kuwammengngi namalluru mammusu. Ripaissengi manenni bangsa Israélié makkedaé purani nauno Saul pallima Filistingngéro sibawa nabenci senna'ni tau Filistingngé tau Israélié. Rimakkuwannanaro napatoini ra'ya'é pangobbié untu' masséddi sibawa Saul ri Gilgal. Na wettuéro maddeppungeng toni tau Filistingngé untu' gasai tau Israélié; mappunnaiwi mennang 30.000 karéta musu, 6.000 tau makkinnyarang, sibawa prajuri singngéga kessi'é ri wiring tasi'é. Makkémani mennang ri Mikhmas ri seddé alauna Bét-Awen. Nainappa mennang maggasa sibawa masero lao ri tau Israélié, angkanna tau Israélié engka ri laleng keadaang bahaya. Sijumella polé risining tau Israélié massubbuni ri laleng gowaé sibawa liyang bulué iyaré'ga ri laleng selle-selle batu karangngé, iyaré'ga rilaleng bujungngé sibawa kalebbongngé ri tanaé, engkato iya malléttoiyéngngi Salo Yordan sibawa muttama ri daérana Gad sibawa Giléad. Ri Gilgal mupi Saul, na ra'ya' iya maccowériyéngngi ténréni métau. Ritajenni Samuél ri Saul pitungngesso ittana, situru sibawa pasenna Samuél ri aléna, iyakiya dé' topa nalettu Samuél ri Gilgal, na Saul mammulani risalai ri ra'ya'na. Rimakkuwannanaro makkedani lao ri mennang, “Tiwii mai akkarobangeng ritunué sibawa akkarobangeng pappasidaméro.” Nainappa aléna makkasuwiyangengngi iyaro akkarobangeng ritunué. Iyakiya silalona pura napogau', poléni Samuél. Riduppaini ri Saul maélo béré sellengiwi, iyakiya makkutanai Samuél, “Aga pura napogau' Datu?” Nappébali Saul, “Uwitai makkedaé mammulani ra'ya'é salaika, na Bapa' dé' napolé situru wettu iya napattentué Bapa'. Nainappani, maddeppungenni tau Filistingngé ri Mikhmas. Na pikkiri'ku, ajakké tentara Filistingngé tappa nagasaka kuwaé ri Gilgal, padahal dé'pa uwéllauwi paressé babuwana Puwangnge. Rimakkuwannanaro malaka apettung untu' makkasuwiyangengngi akkarobangengngéro.” Naéngkalinganaro makkedani Samuél lao ri Saul, “Iyaro tindakanna Datu madonggo senna. Akkalarapanna Datu naturusiwi paréntana Puwang Allataala lao ri Datu, pastini Puwangnge napattette'i matu Datu sibawa wija-wijanna Datu mancaji arung ri Israél untu' mannennungeng. Iyakiya makkekkuwangngé dé'na matu nattahang apparéntanna Datu. Nasaba dé' Datu naturusiwi paréntana Puwangnge, purani napilé Puwangnge tau laing iya Napuwéloé untu' riyakka mancaji arung ri umma'-Na.” Nainappa nasalai Samuél Gilgal nanapatterui joppana lao ri Gibéa ri daérana Bényamin. Na Saul naparéssani pasukanna, jumellana kira-kira 600 tau. Makkuwaniro Saul sibawa Yonatan ana' worowanéna, sibawa ana' buwana mennang makkéma ri Géba ri daérana Bényamin; na tau Filistingngé makkémai ri Mikhmas. Iyatoro wettué engka tellu rombongang parampo Filistin joppa polé ri akkémang Filistingngé untu' maddampo; rombongang iya séddié laowi mattuju ri Ofra ri daéra Syual, rombongang maduwaé mattujui ri Bét-Horon, na rombongang iya séddiéssi mattujui ri pakkaséséng iya mangoloé ri Lompo Zéboim sibawa padang kessi'é. Ri sininna Israélié dé' gaga panré bessi, nasaba tau Filistingngé dé' napalaloi tau Ibranié mébbu peddang sibawa bessi. Jaji harusu'i lao tau Israélié ri tau Filistingngé rékko maéloi masai mata rakkalana, béngkunna, waséna sibawa kandaona; sarona iyanaritu séddi dowi baiccu untu' masai wasé sibawa untu' pédécéngiwi pakkakkasa babba sapinna, sibawa duwa dowi baiccu untu' masai mata rakkalaé iyaré'ga béngkungngé. Iyanaro saba'na, ri esso ammusurengngé ri Mikhmasro, dé' muwi séddi polé ri tau Israélié mappunnai peddang iyaré'ga bessi, sangadinna Saul sibawa Yonatan ana' worowanéna. Taroi tau Filistingngé séddi pos jagang untu' mattahangengngi séddi pallawangeng bulu ri Mikhmas. Riséuwaé wettu makkedai Yonatan lao ri kallolo pattiwi senjatana, “Ayo, talao ri pos Filistin ri liweng kuwaro!” Iyakiya dé' naéllau paramisi ri ambo'na. Iyaro wettué engkai Saul ri yawana pong dalimaé ri Migron, dé' namabéla polé ri Gibéa. Ra'ya' iya maccowériyéngngi kira-kira 600 tau égana. (Imang iya tiwiéngngi éfod-é iyanaritu Ahiya ana' Ahitub, iyanaritu silessurenna Ikabod ana' Pinéhas, na Pinéhas ana'na Eli, imanna Puwangnge ri Silo.) Dé'to naissengngi ra'ya'é makkedaé laoni Yonatan polé kuwaro. Untu' rapii iyaro pos Filistingngé, harusu'i naola séddié balorang iya naseppié duwa batu karang iya maggarigié, iya tungke'-tungke'é riyaseng Bozes sibawa Séné. Batu karang iya seddé manorangngé mangoloi ri Mikhmas, na iya seddé yattangngé mangoloi ri Géba. Namakkedana Yonatan lao ri kalloloéro, “Laono mai talao ri posna tau Filistin kapéré'éro. Ajakké maéloi Puwangnge tulukki. Saba' naullé Puwangnge mabbéré apakalang, muwi sibawa maéga tau iyaré'ga céddé tau.” Nappébali iyaro kalloloé, “Agi-agi iya maélo napogau' Puwang, nasitujui atatta.” Nakkeda Yonatan, “Makessinni. Ri wettunna mallétto, tappaitangngi matu aléta risining tau Filistingngéro. Rékko nasuroki mappésau sibawa tajengngi narapi mennang lao ri idi, tette'ki matu monro kuwaro bawang sibawa aja'na tallétto. Iyakiya rékko nasuroki lao ri mennang, laoki matu kuwaro, nasaba iyanaro tanranna purani riyabbéréyang mennang ri Puwangnge lao ri idi.” Wettunna mennang nappaitang aléna ri tau Filistingngé ri pos jagangngéro, makkedani sining tau Filistingngéro, “Itani, engka tau Ibrani iya massué polé ri sebbo-sebbo onronna mennang massubbu!” Nainappa mennang gora lao ri Yonatan sibawa atanna, “Enré'no mai kuwammengngi naripaitakko séuwaé ri iko!” Namakkedana Yonatan lao ri kalloloéro, “Accowérina, nasaba pura riyabbéréyanni mennang ri Puwangnge lao ri Israélié.” Namakkalolo'na Yonatan ménré riyaccowéri ri kalloloéro. Wettunna cumpa Yonatan, makkalénnekenni tau Filistingngé riyunru ri aléna, na ri munrinna, iyaro kalloloé mpunoi mennang. Ri laleng serangang mammulangngéro, Yonatan sibawa kalloloéro mpunoi kira-kira duwappulo tau ri daéra sillowang siparape hétto. Iyaro kajajiyangngé pawéwangngi tau Filistingngé ri akkémangngé sibawa risining padangngé. Sininna ra'ya' Filistingngé sibawa pos-pos jagangngé enrengngé rombongang-rombongang parampo'é métauni; mala mpéwang tanaé, sibawa kajajiyanni arukkang iya maseroé. Na wettuéro tentarana Saul iya manganrowangngé ri Gibéa ri daérana Bényamin, naitani tau Filistingngé lari riyanrini sibawa temmaka lippunna. Namakkedana Saul lao ri ana' buwana, “Bilangngi sininna prajuri'é sibawa paréssai niga iya dé'é gaga.” Napogau'ni mennang iyaro paréntaé nakaissengenna makkedaé Yonatan sibawa kallolo pattiwi senjatana dé'gaga. Nakkeda Saul lao ri Imang Ahia, “Tiwii mai iyaro éfod-é.” (Iyaro essoé natiwii Ahia éfod-é ri yolona tau Israélié.) Wettunna Saul mabbicara sibawa iyaro imangngé, awéwangengngé ri laleng akkémanna tau Filistingngé pédé tattambai, angkanna makkeda Saul lao ri imangngéro, “Dé'na wettutta untu' méllau panunju polé ri Puwangnge!” Nainappa Saul sibawa sining taunna massamang malluru ri onrong ammusurengngé. Naitani mennang kuwaro engka akacaungeng ri yelle'na tau Filistingngé; sigasai mennang sibawa siyuno. Sining tau Ibrani iya monroé ri daérana tau Filistingngé, sibawa iya maccowéénna ri tentarana mennang, balé'i gilinni namasséddi sibawa Saul nenniya Yonatan. Makkuwatoro sining tau Israél iya massubbué ri bulu-buluna Efraim, iya méngkalingaéngngi makkedaé larini tau Filistingngé, maccowéni masséddi sibawa gasai iyaro tau Filistingngé. Mammusui mennang puppu laleng lettu ri Bét-Awen. Puwangnge passalama'i Israélié iyaro essoé. Iyaro essoé malemmani sining tau Israélié nasaba malupui, saba' purai Saul mattanro makkuwaé, “Tattanroi tau iya manré muwi aga iya essoé ri wettu dé'napa uwakkabale lao ri balikku.” Rimakkuwannanaro dé' muwi séddi iya manré puppu essoéro. Nanalettu manenna mennang riséddié ale sibawa runtu maéga senna cani, iyakiya dé' muwi séddi iya manré séuwa polé ri cani'éro, nasaba métaui nakenna tanro iya napowadaé Saul. Iyakiya Yonatan dé' naissengngi makkedaé purai ambo'na mancangngi ra'ya'é sibawa tanroéro; rimakkuwannanaro naloro'ni tekkeng natiwié, nanattodokengngi ri laleng sarang cani'é, nainappa nala iyaro cani'é nanaanréi. Tappa matakkani sibawa tattamba mawatang. Nainappa séddi polé ri prajuri'éro makkeda ri aléna, “Dé' manenna pakkullétta nasaba alupureng. Iyakiya ambo'na Puwang pura mancakki sibawa tanro, adanna, ‘Tattanroi tau iya manré essoéwé.’ ” Nappébali Yonatan, “Talliwe' senna tindakanna ambo'kuro lao ri bangsata! Itai, keadakku makkekkuwangngé mabéla lebbi makessinna puraku manré céddé cani. Akkalarapanna ra'ya'é iyaé essoé ripalaloi manré inanré iya puraé narampasa wettunna nacau balié, pasti lebbi maégai tau Filistin iya riyullé mpuno!” Iyaro essoé ricaui tau Filistingngé ri tau Israélié puranana mammusu puppu laleng polé ri Mikhmas lettu ri Ayalon. Iyakiya purairo makkuwamani posona mennang, angkanna makkabéttang mennang mala barang rirappa iya nalolongengngé polé ri balié; malani mennang bimbala sibawa saping nanagéréi ri onrongngéttoro, namatteru nanré jukuna iya engkaé mupa darana. Nainappa ripaiisengi ri Saul makkuwaé, “Datu, madosani ra'ya'é lao ri Puwangnge nasaba manréi juku sibawa darana.” Naggera' Saul, “Bali'bellako! Galéttéi séddi batu loppo laono mai.” Nainappa adanna paimeng lao risining tau iya tiwiéngngi iyaro birittaé, “Tassiya-siyano ri yelle'na ra'ya'é sibawa suroi mennang tiwi saping sibawa bimbala'na lao mai, kuwammengngi narigéré ri tompo'na batuéwé sibawa riyanré kuwaé; narimakkuwannanaro dé'na mennang nanréi jukué sibawa darana nadé'na namadosana lao ri Puwangnge.” Iyatoro wennié sininna ra'ya'é tiwii olokolo narampasa'é nanagéréi kuwaro. Napatettonna Saul mézba untu' Puwangnge; iyanaro mézba mammulang iya napatettongngé. Nainappa makkeda Saul lao ri ana' buwana, “Laono mai tagasai tau Filistingngé ri wenniéwé natarampo'i mennang narapi élé sibawa mpuno manengngi mennang.” Nappébali mennang, “Madécéngenni napogau' Datu aga naita makessing Datu.” Iyakiya makkedai imangngé, “Laono mai lebbi riyolo taéllau panunju polé ri Allataala.” Namakkutanana Saul ri Allataala, “Weddikka'ga gasai tau Filistingngé? Muwabbéréyagga matu lao ri limanna Israélié?” Iyakiya iyaro essoé dé' naribali ri Allataala. Rimakkuwannanaro makkedani Saul lao risining pamimpinna ra'ya'é, “Lao manenno mai sibawa paréssai dosa agana pura ripogau' essoéwé. Majjancika nasabbing Puwang iya tuwoé, iya puraé mpéréngngi apakalang Israélié, makkedaé tau iya pasalaé rihukkung matéi matu, namuni iyanaritu Yonatan ana'ku.” Iyakiya dé' muwi séddi tau barani baliwi. Namakkedana Saul lao ri sininna ra'ya' Israélié, “Iko maneng tettokko kuwaé.” Nappébali mennang, “Sitinajai napogau' Datu aga iya naitaé Datu makessing.” Nainappa massempajang Saul, “ Puwang, Allataalana Israélié, magi nadé' Mubalika essoéwé? Puwang, balika naolai batu-batu mapaccingngéwé. Rékko iyaro asalangngé engkai ri aléku iyaré'ga Yonatan, balini sibawa batu Urim, iyakiya rékko iyaro asalangngé engkai ri umma'-Mu Israélié, baliwi sibawa batu Tumim.” Na pappébalinna Puwangnge majjello'i lao ri Yonatan sibawa Saul; namakkuwannanaro ra'ya'é ripannessai dé' napasala. Namakkedana Saul, “Oh Puwang, pattentuni ri yelle'ku sibawa Yonatan.” Na Yonatan ritu iya ripannessaé pasala. Namakkeda Saul lao ri Yonatan, “Aga pura mupogau'?” Nappébali Yonatan, “Purai uwanré céddé cani iya uwalaé sibawa cappa tekkekku; sadiyaka untu' maté.” Nakkeda Saul lao ri aléna, “Tennapodo nahukkukka Allataala rékko dé' narihukkung matéko, Yonatan!” Iyakiya makkedai ra'ya'é lao ri Saul, “Harusu'iga Yonatan rihukkung maté? Padahal aléna ritu tiwii apakalang battowaéwé? Dé'! Majjanciki nasabbing Puwang iya tuwoé, makkedaé dé' nawedding Yonatan ateddéngeng muwi silampa gemme'na polé ri ulunna. Nasaba pattulunna Puwangnge ritu, nalolongeng apakalang essoéwé.” Makkuwaniro Yonatan ripassalama polé ri pahukkungeng maté ri ra'ya'é. Purairo lisuni tau Filistingngé ri daérana nasaba Saul dé' nalellungngi mennang. Mancajinnana Saul arunna Israélié, mammusuni kégi-kégi méwai sining balinna Israélié, iyanaritu tau Moab, tau Amon, sibawa tau Edom, arunna tau Amongngé, sibawa tau Edongngé, arung-ngarunna wanuwa Zoba, sibawa tau Filistingngé. Kégi-kégi mammusu, tuli pakalai. Mammusui sibawa barani namasegge nanacaui tau Amalé'é, enrengngé napaleppe'i Israélié polé ri akuwasanna parampo'é. Ana'-ana' worowanéna Saul iyanaritu Yonatan, Yiswi, sibawa Malkisua. Ana' makkunrainna macowaé riyaseng Mérab, namaduwaé riyaseng Mikhal. Bainéna riyaseng Ahinoam, ana'na Ahimaas; pallima tentarana iyanaritu Abnér ana' Nér, iyanaritu amuréna Saul. Kish ambo'na Saul, sibawa Nér ambo'na Abnér, iyanaritu ana'-ana'na Abiél. Gangka tuwona tuli mammusui Saul sibawa masero méwai tau Filistingngé. Rimakkuwannanaro, rékko mitai Saul tau mawatang iyaré'ga barani, masitta'i napancaji anggota tentarana. Riséwaé esso makkedai Samuél lao ri Saul, “ Puwangnge ritu suroka lanti'i Datu mancaji arunna Israélié umma'-Na. Rimakkuwannanaro, sitinajai Datu méngkalingai paréntana Puwang Iya Pommakuwasaé. Aléna matu hukkungngi tau Amalé'é, nasaba toriyolona mennang naéwai tau Israélié wettunna tau Israélié poléi ri Maséré. Jaji, laono sibawa gasai tau Amalé'é sibawa mancuru'i sininna appunnangenna. Aja' mutaroi muwi séuwa aga; unoi sininna tau worowané, makkunraié, ana'-ana'é sibawa ana'loloé; makkuwatoro sapingngé, bimbala'é, untaé sibawa kaleddé'é.” Nanapassadiyani Saul tentarana sibawa bilangngi ri Telaim; engka 200.000 tau prajuri polé ri Israélié sibawa 10.000 tau polé ri Yéhuda. Purairo laoni Saul silaong ana' buwana ri kota Amalé'é sibawa madangngi balié ri salo marakkoé. Kiring towi paseng papparéngngerang lao ri tau Kénié adanna, “Laono sibawa salaiwi tau Amalé'é, kuwammengngi aja' muwaccowéto upaccappu silaong mennang, saba' riyolo toriyolomu purani nappaitang assisellaongengngé lao ri tau Israélié wettunna tau Israélié poléi ri Maséré.” Nalaona tau Kénié polé kuwaro. Purairo mammusuni Saul sibawa tau Amalé'é, sibawa caui mennang puppu laleng polé ri Hawila lettu ri Syur ri seddé alauna Maséré. Namakkedana Puwangnge ri Samuél, “Massesse kalé-Ka pura makkai Saul mancaji arung, saba' mabbokoni polé ri Iyya, sibawa dé' napogau'i parénta-Ku.” Messéni Samuél, na puppu benni madaréké lao ri Puwangnge. Pappa bajanana, maéléni, joppa Samuél maélo sita Saul. Ripaissengiwi makkedaé laoni Saul ri kota Karmél untu' patettong batu papparéngngerang untu' aléna kuwaro, nainappa matteru lao ri Gilgal. Wettunna Samuél siruntu Saul, makkedani Saul ri aléna, “Tennapodo Puwangnge barakkakiwi Bapa'! Purani upogau' paréntana Puwangnge.” Iyakiya makkutanai Samuél, “Rékko makkuwaitu, magi uwéngkalingai sapingngé mangnguwa' sibawa bimbala'é mabbémbé?” Nappébali Saul, “Iyaro olokolo'é rirampasa'i polé ri tau Amalé'é. Bimbala sibawa saping iya kaminang makessingngé nalai ra'ya'é untu' riyakkasuwiyangeng selaku akkarobangeng lao ri Puwang Allataalamu. Iyakiya lebbinna purani ripaccappu siseng.” Naéngkalinganaro makkedani Samuél, “Tajengngi riyolo, maéloka paissengiko aga napowadakka Allataala onna wennié.” Nakkeda Saul, “Powadani.” Nakkeda Samuél, “Dé'ga napura Datu mancaji pamimping ri suku-suku Israélié, namuni Datu naangga'i aléna dé' napenting? Purai Datu ripilé ri Puwangnge mancaji arung ri Israélié, nainappani risuroi Datu ri Puwangnge paccappui tau Amalé'é iya majaéro. Risuroi Datu mammusu méwai mennang narapi cappu maneng. Magi Datu dé' naturusiwi paréntana Puwangnge? Magi Datu naramé-ramé mala barang rampo'é, nanallalengiro naébbui Datu massesse ati Puwangnge?” Nappébali Saul, “Purani uturusi paréntana Puwangnge, sibawa lao mammusu situru sibawa Nassurowangngé ri iyya; utawanni Agag arunna Amalé'é sibawa sininna tau Amalé'é purani uwuno. Iyakiya ana' buwaku dé' nauno manengngi sininna olokolo'é; purai napilé bimbala sibawa saping iya kaminang makessingngé polé ri wassélé rappanaro untu' makkasuwiyangengngi ri Gilgal selaku akkarobangeng ri Puwang Allataalamu.” Iyakiya makkedai Samuél, “Kéga lebbi napoji Puwangnge, apatongngé iyaré'ga akkarobangeng pakkasuwiyang? Apatongngé lao ri Puwangnge lebbi kessingngi naiya makkasuwiyangengngé akkarobangeng. Lebbi kessingngi apatongngé naiya lunra bimbala'é. Saba' ateddereng atié lao ri Puwangnge padai jana pogau'é séhéré, sibawa ati matempoé padai jana massompa déwata. Nasaba purai Datu naéwa paréntana Puwangnge, nadé' tona nangakui Puwangnge Datu selaku arung.” Naéngkalinganaro mangakuni Saul lao ri Samuél, adanna, “Mémeng madosaka. Uwajjalékkaiwi paréntana Puwangnge sibawa mallupaiwi panunju'na Bapa'. Métauka ri ana' buwaku nautarimai paréllaunna mennang. Iyakiya makkekkuwangngé, uwéllauwi ri Bapa', addampengenni dosaku namulisu sibawakka lao ri Gilgal, kuwammengngi weddikka massompa ri Puwangnge.” Iyakiya mappébaliwi Samuél, “Dé' umaélo lisu silaong Datu. Purani Datu naéwa paréntana Puwangnge, na makkekkuwangngé dé' nangakui Datu selaku arunna Israélié.” Nainappa mabboko Samuél maélo lao, iyakiya ritahangngi ri Saul sibawa makkatenningngi jumbana, angkanna sapé iyaro jumbaé. Namakkedana Samuél lao ri aléna, “Iyaé essoé purani nasapé Puwangnge akkarungenna Israélié polé ri Datu, sibawa mabbéréyangngi lao ri tau laing iya lebbi makessingngé naiya Datu. Iya Malebbié Allataalana Israélié dé' nabbellé sibawa dé'to napinrai attangen-Na, nasaba Aléna tenniyai tolino.” Nappébali Saul, “Madosana. Iyakiya tulungnga Pa', lisuno sibawakka kuwammengngi weddikka massompa lao ri Puwang Allataalana Bapa'. Nanallalengiwi napakalebbika Bapa' ri yolona sining pamimpinna bangsaku sibawa ri yolona sininna Israélié.” Nanalisuna Samuél silaong aléna ri Gilgal, sibawa massompani Saul lao ri Puwangnge. Nainappa napparéntang Samuél, “Tiwii mai Arung Agag,” poléni Agag sibawa penno paddennuwang nasaba mappikkiri'i, “Labe'ni bahaya amaténgngé.” Namakkedana Samuél, “Pada-pada peddammu mébbui maéga indo' ateddéngeng ana'na, makkuwatoniro indo'mu ateddéngeng matu ana'na.” Nainappa Samuél natetta Agag ri yolona mézbaé ri Gilgal. Purairo laoni Samuél ri Rama, na Arung Saul lisuni ri bolana ri Gibéa. Narapi paccappureng atuwonna, dé'na Samuél nasiruntu Saul. Iyakiya messéi Samuél nasaba massesse kaléi Puwangnge pura makkai Saul mancaji arunna Israélié. Siyagangngaré wettu rimunrinna makkedani Puwangnge lao ri Samuél, “Siyagapi ittana messé atiko nasaba Saul? Dé'ga na aléna tenriyangakuini selaku arunna Israélié? Makkekkuwangngé, alano minnya zaitun namulao ri Bétléhém, riséddié tau riyasengngé Isai, nasaba sala séddinna polé ri ana'-ana'na purani Upilé mancaji arung.” Iyakiya makkutanai Samuél, “Pékkugika harusu pogau'i? Rékko naéngkalingai Saul gau'éro, pastini naunoka!” Nappébali Puwangnge, “Tiwino sikaju saping lolo, sibawa powadangngi ra'ya'é makkedaé laoko kuwaro untu' makkasuwiyangeng akkarobangeng lao ri Puwangnge. Nainappa muwobbi Isai lao ri upacara akkarobangengngéro. Upowadappo matu aga harusu mupogau'. Tau iya Ujellokengngékko, harusu mulanti mancaji arung.” Napogau'ni Samuél pada-pada iya napowadaé Puwangnge. Wettunna lettu ri Bétléhém, sining pamimping kotaé duppaiwi sibawa maséleng nenniya makkutana, “Aga apolénna Bapa' tiwii asalamakeng?” Nappébali Samuél, “Ya, tongeng. Poléka untu' makksuwiyangeng akkarobangeng lao ri Puwangnge. Pépaccingini alému kuwammengngi weddingngi muwaccowéri upacara akkarobangengngéro.” Isai sibawa ana'-ana'na nasuro toni pépaccingiwi aléna tungke'-tungke', nanaundangngi lao ri upacaraéro. Wettunna maddeppungenni sibawa naitani Samuél Eliab ana'na Isai, pikkiri'na, “Pastini iyaé napilé matu Puwangnge.” Iyakiya makkedai Puwangnge lao ri Samuél, “Aja' mutattaré ri tappana iya magelloé sibawa matanré watakkaléna; tenniya aléna Uwélori. Dé' uwangangke pada-pada tolinoé mangangke. Tolinoé mitai tappa, iyakiya Iyya mitaka ati.” Nainappa Isai mobbii Abinadab, ana'na, nanasuroi mangolo ri Samuél. Iyakiya makkedai Samuél, “Dé'to naripilé ri Puwangnge.” Nainappa Syama risuro malluru ri Isai, iyakiya makkedai Samuél, “Dé'to naripilé ri Puwangnge.” Makkuwaniro Isai suroi iya pitu ana'na matturu-turuseng mangolo ri Samuél, iyakiya makkedai Samuél ri aléna, “Dé' mennang naripilé ri Puwangnge.” Namakkutanana Samuél ri aléna, “Banna iya manengngéga ana' worowanému?” Nappébali Isai, “Engka mupa séddi taupa, iya maloloé, iyakiya mattengngangngi mampi bimbala.” Nakkeda Samuél, “Suroi mobbii, nasaba dé' tanré matu ri wettu dé'napa napolé.” Nanassuro mobbini Isai iyaro ana'é. Annessana séddiwi kallolo iya magelloé sibawa madising, sibawa magello matanna. Namakkedana Puwangnge lao ri Samuél, “Iyanaé; lanti'ni!” Masitta'ni Samuél malai minnya zaitungngéro nanalanti'i Daud sibawa upacara amminnyakeng ri yolona kaka-kakana. Iyatoro wettué narikuwasai Daud ri Rohna Puwangnge. Mappammulai essoéro sibawa matteru risibawanni ri Rohna Puwangnge. Nainappa lisuni Samuél ri Rama. Naiya Saul risalaini ri Rohna Puwangnge, na makkekkuwangngé risissani ri roh maja iya nasuroé Puwangnge. Rimakkuwannanaro makkedani ata-atanna Saul, “Riisseng makkedaé roh maja iya nasuroé Puwangnge nasissai Datu. Rékko nasitujuiwi Datu, sadiyaki sappa séddi tau iya maccaé makkacapi. Narékko risissai Datu ri roh majaé, iyaro tauwé weddingngi nacculéyang kacapinna, namanyameng paimeng matu Datu.” Nanapparéntanni Saul lao ri mennang, “Sappano séddi tau iya maccaé macculé musi', namutiwii lao mai.” Naéngkalinganaro makkedani séddi atanna, “Isai pabbanuwana Bétléhém mappunnai séddi ana' worowané iya maccaé macculé musi'. Pabbaraniwi sibawa séddiwi prajuri iya makessingngé. Nainappani poréi sibawa macca mabbicara, na Puwangnge tuli tulungngi.” Nanakirinna suro Saul lao ri Isai tiwii pasengngéwé, “Suroni ana'mu Daud, iya monrowangngéngngi bimbala'-bimbala'muro mangolo ri iyya.” Nanapassadiyana Isai sikaju kaleddé, nanapattékériwi sibawa sikaju ana' bémbé, roti sibawa popang bimkulang mallise penno anggoro. Iya manennaro nawéréngngi Daud untu' riyakkasuwiyangeng lao ri Saul. Makkuwaniro Daud lao ri Saul sibawa mancaji pattumaninna. Ripoji senna'i ri Saul sibawa riyakka mancaji pattiwi senjatana. Nainappa kiring paseng Saul lao ri Isai, “Upojiwi Daud. Palaloni tette monro kuwaé sibawa tumaningika.” Mappammulairo, tungke'-tungke' ripoléi Saul ri roh majaéro, nalani Daud kacapinna nanacculéyangngi. Namarasa tennanna Saul sibawa manyamessi, nasaba risalaiwi ri roh majaéro. Riséuwaé wettu napangarai tau Filistingngé tentarana untu' maju mammusu. Naatoro'i mennang barisi'na ri kota Sokho, ri laleng daérana Yéhuda sibawa pasangngi akkémanna ri pallawangenna Sokho sibawa Azéka, seddéna Efes-Damim. Saul sibawa sining tau Israélié maddeppungeng toni sibawa makkéma ri Lompo Ela; sadiya-sadiyani mennang mangoloiwi paggasana tau Filistingngé. Makkuwaniro barisi'na tau Filistingngé tettong ri seddéna bulu-bulué na barisi'na tau Israélié ri bulu-bulu laingngé, na ri pallawangenna engka séddi lompo. Na séddi tau jago mallaga iya riyasengngé Goliat, polé ri kota Gat, massu polé ri akkémang Filistingngé untu' méwai tau Israélié. Tanréna kira-kira tellu météré, sibawa pakéi palo-palo tembaga sibawa waju musu tembaga iya tane'naé kira-kira limappulo pitu kilo. Ajéna nalinrungiwi sibawa pallinrung ajé polé ri tembagaé, sibawa ri salangkanna méssangngi bessi tembaga. Torongempessinna silloppo aju paréwa tennungngé, sibawa mata bessinna kira-kira pitu kilo tane'na. Séddi prajuri joppa ri yolona sibawa tiwii kaliyawona. Mappésauni Goliat nainappa mangobbi lao ri tentara Israélié, “Aga mupogau' kuwatu? Maélokoga mammusu? Iyya séddi tau Filistin, éh ata-atanna Saul! Piléni séddi tau ri yelle'mu iya baranié nonno méwaka mammusu. Rékko ri laleng musu attandingengngéro, riyunoka, macennikki mancaji atammu, iyakiya rékko iyya pakala sibawa mpunoi, iko ritu mancaji matu atatta. Makkekkuwangngénna, uwéwai tentara Israélié; piléni séddi tau untu' mattanding méwaka!” Wettunna naéngkalinga Saul sibawa sining taunna angéwangengngéro, masélenni mennang sibawa métau senna'na. Daud iyanaritu ana'na Isai tau Efrataé, polé ri Bétléhém ri Yéhuda. Isai mappunnai aruwa ana' worowané, na ri wettu apparéntanna Saul, macowa senna'ni Isai. Iya tellu ana'na Isai iya pommacowaé laoni mammusu maccowériwi Saul. Iya macowaé riyasengngi Eliab, iya maduwaé Abinadab, sibawa iya matellué Syama. Daud ana' malolo. Wettunna iya tellu kakana iya macowaéro mammusu maccowériwi Saul, biyasai Daud salaiwi Saul nalisu ri Bétléhém untu' mampii bimbala'na ambo'na. Ri lalenna patappuloé essona, élé arawéng, Goliat maddeppériwi barisi'na tau Israélié sibawa mérai mennang. Riséwaé esso makkedai Isai lao ri Daud, “Alano seppulo kilo barellé tunu sibawa seppulo rotiéwé, namutiwii lao ri kaka-kakamu ri akkémang tentaraé. Tiwi towi seppulo batunna kéjuéwé untu' komandang pasukangngé. Akkutangngi pékkugi keadaanna kaka-kakamu, sibawa tiwirekka butti makkedaé purano siruntu mennang ri laleng keadaang salama. Engkai mennang ri Lompo Ela silaong Arung Saul, sibawa sininna tau Israélié mattengngang mammusu méwai tau Filistingngé.” Pappa bajanana, maéléni, Daud moto namanguju. Nappaddettangenni bimbala'na riséddié pajaga, nainappa nala tiwina nanajoppa, situru sibawa paréntana ambo'na. Lettu'i ri akkémangngé wettunna tau Israélié joppa lao ri ammusurengngé nanakellikeng towi gora-gora musué. Siyolo-olonni tentara Filistingngé sibawa tentara Israélié sibawa sadiya-sadiya untu' mammusu. Nainappa nappaddettangeng Daud tiwinaro ri panganrowang perlengkapang tentaraé, nanalari lao ri ammusurengngé untu' sita sibawa kaka-kakana. Iyakiya wettunna mabbicara sibawa mennang, majui Goliat liyolo sibawa méwai tau Israélié, pada-pada iya biyasaé napogau'. Naéngkalinga toni Daud ada-ada angéwangennaro. Naitana muwa tau Israélié Goliat, larini mennang métau. Makkedai mennang ri padanna, “Itaini! Engkalingani ada-ada angéwangenna! Saul arutta purani majjanci makkedaé nigi-nigi mpunoi Goliat, riwéréngngi matu hadiya battowaé. Napasiyala towi matu arungngé iyaro tauwé sibawa ana'na. Sibawa kaluwargana iyaro tauwé matu ripapéréi polé ri simaé.” Namakkeda Daud, “Barani tongeng tau Filisting kapéré'éro méwai tentarana Allataala iya tuwoé!” Nainappa makkutana ri sala séddié prajuri, “Aga riwéréngngi matu tau iya weddingngé mpunoi tau Filistingngéro sibawa leddai appakatunangngé polé ri Israélié?” Ripaissengini ri ra'ya'é aga iya puraé najjanciyang arungngé. Eliab kakana Daud iya macowaé naéngkalingani Daud mabbicara sibawa prajuriprajuri'é. Macaini lao ri Daud sibawa makkeda, “Magi mulao mai? Nigana pura musuro murusu'i bimbala-bimbala'mu iya siyagangngaré'é kajunnaro ri padang kessi'é? Uwisseng, mallaga' baraniko; laoko mai banna untu' mitai ammusurengngé?” Nappébali Daud, “Aga asalakku? Makkutanama bawang!” Nainappa lao sibawa makkutanangngi gau' padaé ri prajuri-prajuri laingngé; nanalolongenna pappébali makkuwaéttoro. Iyakiya siyagangngaré tau iya méngkalingaéngngi ada-adanna Daud, palettu'i ri Saul, jaji riyobbini Daud mangolo. Nakkeda Daud lao ri Saul, “Datu, dé' taparellu métau ri tau Filistingngéro! Sadiyai atatta méwai.” Nappébali Saul, “Aja'. Pékkugi weddikko mattanding sibawa aléna? Iko malolo senna mupo, na aléna biyasani mammusu sipongenna malolo mupa.” Iyakiya makkedai Daud, “Datu, biyasai atatta mampii bimbala'na ambo'na atatta. Narékko engka singa iyaré'ga beruang polé luruiwi bimbala'é, iyaro olokolo masekkangngé nalellungngi atatta sibawa nahantangngi, nainappa napassalama atatta iyaro bimbala'é. Sibawa rékko iyaro singaé iyaré'ga beruangngé naéwai atatta, nakkatenningngi atatta ellonna, nainappa naunru atatta gangka maté. Purani atatta mpuno singa sibawa beruang, na tau Filistin kapéré'éro pada-pada towi matu olokolo'éro, nasaba baraniwi pakatunawi tentara polé ri Allataala iya tuwoé. Puwangnge pura passalama'i atatta polé ri singaé sibawa beruangngé, Alénato passalama'i matu atatta polé ri tau Filistingngéro.” Namakkeda Saul lao ri aléna, “Makessinni, tennapodo Puwangnge tulukko.” Nabbéréyanni Saul pakéyang musuna, iyanaritu séddi waju bessi lao ri Daud nanapakéni Daud. Nainappa Saul pappakéiwi Daud palo-palo tembaga. Paccappurenna natappini Daud peddanna Saul ri waju bessiéro nainappa nacoba joppa, iyakiya dé' naulléi, nasaba dé' nabiyasa Daud paké pakéyang musu. Nakkeda lao ri Saul, “Dé' naulléi atatta joppa sibawa pakéyangngéwé. Dé' nabiyasa atatta pakéi.” Nanaludunni sininna pakéyang musuéro. Nainappa nala tekkeng pakkampina, nanapilé lima batu iya malébué polé ri saloé, nanaputtama'i ri laleng kantonna. Nasibawang pallobang sadiyaé ri limanna, laoni siruntu Goliat. Siyagangngaré wettu rimunrinna Goliat iya ripoddiyoloiyé ri pattiwi kaliyawona, mappammula maddeppériwi Daud. Iyakiya wettunna naita Daud sibawa pénessaiwi, macawani Goliat mangéllé nasaba malolo senna mupi Daud sibawa magellona. Makkedai Goliat lao ri Daud, “Untu' aga tekkengngéro? Aga muwangga'ka'ga iyya'é asu?” Nainappa natanroi Daud nasabbing sining déwatana. Nainappani naéwai Daud, adanna, “Ayo, maju! uwéréngngi matu tubummu manu'-manu'é sibawa olokolo'é kuwammengngi naanréi.” Iyakiya mappébaliwi Daud, “Poléko méwaka sibawa peddang, bessi sibawa bessi lebba, iyakiya iyya poléka sibawa asenna Puwang Iya Pommakuwasaé, Allataalana tentara Israél iya mupakatunaéro. Iyato essoéwé nabbéréyakko matu Puwangnge lao ri iyya; ucauko matu sibawa urette'i matu ulummu. Tubummu sibawa tubunna prajuri-prajuri Filistingngé uwéréngngi matu manu'-manu'é sibawa olokolo'é kuwammengngi naanréi. Nanaissengngi matu sininna linoé makkedaé idi bangsa Israélié mappunnaiwi Allataala iya risompaé, na sininna tauwé kuwaé naitai matu makkedaé Puwangnge dé' napparelluwang peddang iyaré'ga bessi untu' passalama'i umma'-Na. Aléna ritu pattentui joppana ammusurengngéwé sibawa Aléna mabbéréyakko matu ri laleng limatta.” Mammulani Goliat maju maddeppériwi Daud, namasitta'na Daud lari mattuju ri barisi'na tau Filistingngé untu' moloiwi. Nakoti'ni Daud kantonna, mala séddi batu nanalobangngi Goliat. Iyaro batué tallemme'i ri linrona Goliat angkanna mareppa kaddarona, namabuwang moppang ri tanaé. Gora-gorani tau Israélié nenniya Yéhudaé sibawa lellungngi tau Filistingngé lettu ri Gat sibawa pintu gerbang Ekron. Sining tau Filistin iya maloé makkalénnereng puppu laleng lao ri Saaraimro! Purairo lisuni tau Israélié polé lellungngi tau Filsitingngé, nainappa narampasa lise akkémanna mennang. Nalani Daud ulunna Goliat, nanatiwii lao ri Yérusalém, iyakiya senjata-senjatana Goliat nataroi ri laleng kémana muto. Wettunna Saul naita Daud lao méwai Goliat, makkutanani ri Abnér pallima tentarana, “Abnér, ana' niga iyaro?” Nappébali Abnér, “Dé' naissengngi atatta, Datu.” Namapparénta Saul, “Laono muwakkutanangngi gau'éro.” Jaji wettunna lisu Daud ri akkémangngé purana nauno Goliat, ritiwini ri Abnér mangolo ri Saul. Nawiccang mupi Daud ulunna Goliat. Namakkutanana Saul, “Eh kallolo! ana'na nigako?” Nappébali Daud, “Atattaé ana'na Isai polé ri Bétléhém.” Rimakkuwannanaro mattanroni Yonatan maélo massellao sibawa Daud mannennungeng. Naludunni Yonatan jumbana nanawéréngngi Daud, makkuwatoro pakéyang musuna enrengngé peddanna, panana sibawa babbanna. Napogau'ni Daud sininna tugasna sibawa makessing iya riwéréngngéngngi ri Saul. Rimakkuwannanaro riyakkani ri Saul mancaji parawira ri laleng tentarana, naripojina Daud ri sininna prajuri'é nenniya risining atanna Saul. Wettunna Daud lisu puranana nacau Goliat tau Filistingngéro, sibawa sining prajuri'é mabbarisi muttama ri laleng kota, massuni sining makkunraié polé ri sininna kotaé ri Israél untu' duppaiwi Arung Saul. Makkélonni mennang élokkélong marennu, nenniya séré-séré sibawa macculéyang rabana sibawa kacapi. Ri laleng séré-séréna makkélongngi sining makkunraié makkuwaé, “Naunoi Saul massebbu-sebbu balié, iyakiya Daud mappulo-pulo sebbu.” Naéngkalinganaro, macai senna'ni Saul. Saba' pikkiri'na, “Riyangga'ni Daud pura mpunoi mappulo-pulo sebbu, na iyya banna massebbu-sebbu bawang. Dé'na namaitta tentu aléna ripancaji arung ri mennang!” Mappammulai wettuéro mangémpuruni lao ri Daud. Pappa bajanana engkai Saul ri lalempolana makkatenningngi bessinna na tappa ripoléini ri roh maja iya nasuroé Allataala, angkanna majjallo pada-pada tau jangengngé. Iyaro wettué makkacapiwi Daud pada-pada biyasaé. Nappikkiri Saul, “Uwaddincekengngi iyaé bessié lao ri Daud gangka maddince ri renringngé!”, nainappa naddawukeng iyaro bessié narapi wékkaduwa lao ri Daud, iyakiya naulléi Daud léssé. Namaingekini Saul makkedaé rilinrungiwi Daud ri Puwangnge na aléna risalaini ri Puwangnge. Rimakkuwannanaro métauni lao ri Daud. Nanapalétté'ni Daud polé ri saorajaé, sibawa makkai mancaji komandang sisebbué tau prajuri. Nanallalengiwi Daud pimpingngi pasukangngé ri laleng tungke' ammusureng. Naulléi pogau'i sininna tugasna, saba' Puwangnge tulungngi. Wettunna naita Saul makkedaé tuli mallolongengngi Daud, pédé métauni. Iyakiya sininna Israél sibawa Yéhuda napojiwi Daud nasaba aléna pamimping iya maégaé appalanna. Narancanani Saul kuwammengngi nariyuno Daud ri tau Filistingngé ri laleng ammusurengngé kuwammengngi natenniya aléna mpunoi. Jaji riséuwaé esso makkedai Saul lao ri Daud, “Mérab ana' makkunraikku macowaé, upasiyalako matu, assaleng muwappaitangngi abaraningemmu ri laleng mammusu untu' Puwangnge.” Nappébali Daud, “Niga atattaé, sibawa aga bettuwanna kaluwargana atatta ri Israélié, angkanna atatta mancaji ménéttunna Arungngé?” Iyakiya narapina wettunna Mérab maélo ripasiyala sibawa Daud, padahal iyaro ana' daraé napakawingngi sibawa Adriél polé ri Méhola. Mikhal ana' makkunrainna Saul iya laingngé, napojiwi Daud. Wettunna naéngkalinga Saul gau'éro, nasitujui towi. Pikkiranna, “Makessingengngi uwappéddarang Mikhal ri Daud, kuwammengngi natajjebba Daud sibawa weddingngi riyunu ri tau Filistingngé.” Jaji untu' mabbékkaduwanna makkedani Saul lao ri Daud, “Makkekkuwangngé weddikko mancaji ménéttukku.” Nainappa nasuro sininna pegawénna kuwammengngi napowadangngi Daud sibawa mammekko-mekko, makkuwaé, “Naéloriko Datu sibawa makkuwatoro sininna pegawénna; jaji makkekkuwangngénna wettu teppa'é untu' pubainéwi ana'na.” Iyakiya wettunna mennang palettu'i iyaro tangngaé ri Daud, mappébaliwi, “Muwasengngiga magampang untu' mancaji ménéttunna arungngé? Na iyya'é tau kasiyasika sibawa dé' bettuwanna!” Iyaro sining pegawé napaissengini Saul pappébalinna Daudro, nanasuroni Saul mennang powadangngi Daud, makkuwaé, “Iya napowéloriyé datu selaku sompana banna 100 assunnarenna tau Filistingngé, selaku pakkabale lao ri balinna Datu.” (Iyanaé narancana Saul untu' mpunoi Daud naolai tau Filistingngé.) Makkuwaniro Saul maingekiwi makkedaé rilinrungiwi Daud ri Puwangnge sibawa ripoji towi ri Mikhal ana'na. Napédé métauna ri Daud sibawa nabencinna gangka tuwona. Sises-siseng rékko poléi tentara Filistingngé maggasa, lebbi mallolongengngi Daud paccappui mennang naiya sining parawirana Saul iya laingngé. Napédé kalabbana Daud. Makkedani Saul lao ri Yonatan ana' worowanéna, sibawa lao ri sininna pegawénna makkedaé maéloi mpunoi Daud. Iyakiya Yonatan napoji senna'i Daud, rimakkuwannanaro makkedani lao ri Daud, “Makkuragai ambo'ku mpunoko; jaji atutuko! Assubbuko baja éléé riséuwaé onrong rahasiya, sibawa onrono kuwaro. Maéloka lao ri padangngé silaong ambo'ku sibawa tettong ri seddéna onrong muwassubbuiyéro. Nainappaka mabbicara matu sibawa ambo'ku passalenna akkattana lao ri iko, na wassélé'na iyaro assipabbicarangngé upaissengipo matu.” Nainappa napau madécénni Yonatan passalenna Daud lao ri Saul, adanna, “Ambo', aja' Ambo' tacilakaiwi atammu Daud. Saba' dé' aga-aga asalang napogau' lao ri Ambo'; mala sibalé'na, masero appalanna lao ri Ambo'. Purani nappésonang nyawana wettunna nauno Goliat, sibawa Puwangnge pura mpéréngngi apakalang battowa lao ri Israélié naolai aléna. Aléna Ambo' pura mitai kajajiyangngéro, sibawa marennu Ambo' wettuéro. Jaji magi makkekkuwangngé namaélo Ambo' callai tau iya dé'é napasala sibawa maélo mpunoi Daud temmakkéalasang?” Mainge'ni Saul polé ri ada-adanna Yonatan, namattanrona ri laleng asenna Puwangnge makkedaé dé' namaélo mpunoi Daud. Purairo riyobbini Daud ri Yonatan, sibawa curitangngi sininna assipabbicarangngé onna. Nainappa natiwi Daud lao ri Saul, na Daud natumaningini pada-pada riyolo. Nainappa kajajiyassi musué sibawa tau Filistingngé. Nagasani Daud sibawa nacau sisengngi mennang, angkanna lari mennang. Riséuwaé esso tudat-tudangngi Saul ri bolana sibawa bessi ri limanna natappa napoléisi Saul roh maja iya nasuroé Puwangnge. Iyaro wettué mattengngangngi Daud macculéyangngi kacapinna. Namakkuragana Saul paddince'i bessinna ri Daud iya engkaé ri seddéna renringngé. Iyakiya lésséi Daud, angkanna iyaro bessié maddince ri renringngé. Larini Daud untu' passalama'i aléna. Iyatoro wennié nakiring Saul siyagangngaré taunna lao ri bolana Daud untu' mata-mataiwi Daud sibawa mpunoi ri éléna. Iyakiya Mikhal bainéna makkedai lao ri Daud, “Rékko dé' mulari iyaé wennié, baja éléé pasti riyunoko.” Nainappa Mikhal panonnoi Daud polé ri tellongengngé, nanalarina Daud angkanna leppe. Purairo nalani Mikhal dato'-dato' ruma tanggana nanapalénne'i ri onrong atinronna Daud. Nainappa ri bagiyang ulunna nataroi angkalungung polé ri bulu bémbé'é, nainappa naparampaki iyaro dato'-dato'é sibawa parampa. Wettunna polé sining surona Saul untu' tikkengngi Daud, makkedani Mikhal, “Malasai Daud.” Iyakiya risuroi paimeng ri Saul lao kuwaro untu' mitai Daud sibawa mata ri aléna mennang. Paréntana, “Tiwii lao mai sibawa onrong atinronna, kuwammengngi uwunoi.” Nauttama'na iyaro suroé ri laleng bili'é na annessana dato'-dato' ritu lénne ri onrong atinrongngé sibawa angkalungung bulu bémbé ri bagiyang ulunna. Makkedani Saul lao ri Mikhal, “Melle nyawamu belléka makkuwaé! Mutulungngi balikku lari!” Nappébali Mikhal, “Naancakka maélo mpunoka rékko dé' umaélo bantui lari.” Leppe'nana Daud, laoni ri bolana Samuél ri Rama, nanapaissengi manengngi sininna iya napogau'é Saul lao ri aléna. Nainappa silaonni Daud sibawa Samuél lao ri Nayot nanaonro kuwaro. Iyakiya ripaissengiwi Saul makkedaé engkai Daud ri Nayot seddéna Rama. Rimakkuwannanaro kirinni Saul siyagangngaré suro untu' tikkengngi Daud. Iyakiya napoléiwi mennang sikonrong nabi iya mattengngangngé séré-séré sibawa gora-gora massama-samang, ripimping ri Samuél. Nainappa iyaro sining surona Saul rikuwasai ri Rohna Allataala angkanna mammula toni mennang séré-séré sibawa gora-gora. Wettunna lettu iyaro karébaé ri Saul, kirinni sining suro laingngé nammula tona mennang séré-séré sibawa gora-gora. Untu' mabbékkatellunna Saul kiring sining suro nakajajiyang tona makkuwaéro ri mennang. Rimakkuwannanaro joppani Saul lao ri Rama. Lettu'nana ri bujung lompoé ri Sékhu, makkutanani kégawi Samuél sibawa Daud, naripaissengina ri tauwé kuwaro makkedaé engkai ri Nayot. Jaji matteruni lao kuwaro, iyakiya rikuwasai towi ri Rohna Allataala, angkanna séré-séré sibawa gora-gora puppu laleng laowé ri Nayot. Lettu'nana kuwaro, naludunni pakéyanna naséré-séré sibawa gora-gora ri yolona Samuél, nainappa léwu ri tanaé mallusu-lusu puppu esso sibawa puppu benni. (Iyanaé assalenna warékkada makkedaé, “Mancaji nabi towiga Saul?”) Nalarina Daud polé ri Nayot seddéna Rama nalao méwai sita Yonatan, namakkutana, “Aga asalakku? Ja aga pura upogau' sibawa aga dosaku lao ri ambo'mu angkanna maéloi mpunoka?” Nappébali Yonatan, “Aja' muwakkeda makkuwaro! Nasabbing Puwangnge, dé' nariyunoko matu. Tuli napowadakka ambo'ku sininna rancanana, muwi iya pentingngé, iyare'ga dé'é. Jaji dé' nakkullé narahasiyakang iyaro akkattana lao ri iyya. Rimakkuwannanaro, aga iya mupowadaéro dé' natongeng!” Nappébali Daud, “Naisseng madécéng ambo'mu makkedaé mupojika. Jaji pasti dé' namaélo paissengiko gau'éro kuwammengngi dé' mumessé. Muwi pékkugi, nasabbing Puwang iya tuwoé, sitongenna atuwokku pada-padai ittelloé ri cappa tanru'é!” Namakkedana Yonatan, “Agi-agi muwéllau maéloka pogau'i.” Nappébali Daud, “Makkuwaiyé, baja iyanaritu Pésta Uleng Baru, na harusu'ka manré sisama datu. Iyakiya rékko musitujuiwi, maéloka lao sibawa massubbu ri padangngé narapi sangadi ri wennié. Rékko nakkutangngi ambo'mu magi udé', powdangngi makkedaé puraka méllau paramisi ri iko untu' lisu masitta ri Bétléhém, nasaba ripakangkai kuwaro upacara akkarobangeng pattaungeng untu' sininna kaluwargaku. Rékko makkedai arungngé, ‘Madécénni,’ amanna matu, iyakiya rékko macayii, issenni makkedaé purani mala apettung untu' cilakaika. Uwéllauwi pattulummu, nasaba puraki siyo assijancing ri yolona Puwangnge. Iyakiya rékko pasalaka, unoka, iyakiya aja' muwabbéréyakka lao ri ambo'mu.” Nappébali Yonatan, “Aja' mubata-bata! Rékko uwissengngi sibawa pasti makkedaé mattedde'ni ambo'ku untu' cilakaiko, mattentuni upaissengiko matu.” Nainappa makkutana Daud, “Nigana maélo paissengika akkalarapanna nabaliko ambo'mu sibawa macai?” Nakkeda Yonatan, “Laono mai talao ri padangngé.” Nasilaonna mennang lao ri padangngé. Nanakkeda Yonatan lao ri Daud, “Tennapodo Puwangnge, Allataalana Israélié mancaji sabbitta! Baja éléé iyaré'ga sangadi kira-kira ri wettu pada-padaé makkekkuwangngéwé, maéloka makkuraga missengngi lise atinna ambo'ku. Rékko kédo makessing muwi lao ri iko, kirikka matu karéba lao ri iko. Rékko manniya'i cilakaiko, pasti upaissengi tokkko matu kuwammengngi mulléi passalama'i alému. Tennapodo naunoka Puwangnge rékko dé' upogau'i gau'éro. Tennapodo Puwangnge tulukko pada-pada purana ritulutto! Narékko tuwo mupa, éngngerangngi assijancitta ri yolona Puwangnge sibawa atinuluno ri iyya; iyakiya rékko dé'na gaga, appaitanni atinuluremmu lao ri wija-wijakku untu' mannennungeng. Sibawa rékko napaccappui Puwangnge sininna balikku, aja' napettu assijancitta sipadduwa. Rékko pettui, Puwangnge ritu hukkukko.” Jaji untu' mabbékkaduwanna Yonatan suroi Daud majjanci maélo mamaséiwi, saba' namaséiwi Daud pada-pada aléna muto. Nainappa makkeda Yonatan lao ri aléna, “Baja Pésta Uleng Baru. Pasti kaissengeng matu makkedaé dé'ko gaga, saba' lobbangngi onrommu ri méjang anréngngé; apalagi sangadi! Rimakkuwannanaro, laono ri onrong allekkekemmu riyoloro, nomuwattajeng ri munrinna goppo batué kuwaro. Maéloka leppessang tellu ana' pana sangadi mattuju ri batuéro, samanna mannémba séuwaé akkatta. Nausuroi matu atakku mittéi iyaro pana-panaé, narékko makkedaka lao ri aléna, ‘Ai, lebbi macawé'mi iyaro panaé kumaiyé; alani,’ iyaro bettuwanna makkedaé amakko sibawa weddikko massu. Mattanroka nasabbing Puwangnge iya tuwoé makkedaé dé'ko ri laleng bahayaé. Iyakiya rékko makkedaka lao ri atakku, ‘Ai, iyaro panaé lebbi mabélapi lao kuwaro,’ iyaro bettuwanna Puwangnge suroko lao; jaji laono. Tennapodo Puwangnge jagaiki kuwammengngi natuli takkatenningngi assijancitta sipadduwa.” Namallekke'na Daud ri padangngé. Ri Pésta Uleng Baru, laoni Arung Saul ri anréngngé. Pada-pada biyasanna tudangngi ri seddéna renringngé; Yonatan mala onrong ri yolona, Abnér ri seddéna Saul, iyakiya kadérana Daud tette'i lobbang. Iyakiya dé' nasinggungngi Saul iyaro keadaangngé ri essoéro, saba' pikkiri'na, “Naullé kapang engka kennai, angkanna dé' namapaccing situru agamaé.” Ri esso rappina, iyanaritu esso maduwaé Uleng Barué, kadérana Daud lobbang mupi, namakkutana Saul ri Yonatan, “Magi wenni sibawa essoéwé dé'i gaga Daud ri anréngngé?” Nappébali Yonatan, “Purai méllau paramisi ri iyya untu' lao ri Bétléhém. Adanna, ‘Palaloka lao, nasaba kaluwargaku naramé-raméiwi pésta akkarobangengngé ri Bétléhém, nanasuroka kakaku polé. Rimakkuwannanaro, rékko mupalaloka, leppessanna lao untu' sita sibawa sumpuloloku.’ Iyanaro saba'na nadé'i gaga ri anréngngéwé, Ambo'.” Naéngkalinganaro macai senna'ni Saul lao ri Yonatan sibawa makkeda ri aléna, “Ana' harang! Uwissenni makkekkuwangngé makkedaé maccowéko ri Daud sibawa pakasirii alému sibawa indo'mu! Dé'ga mumainge makkedaé sipongenna tuwo mupi Daud dé' namakkulléko matu mancaji arung ri wanuwaéwé? Suroni makkekkuwangngé tauwé sappai sibawa tiwii lao mai, saba' harusu'i maté!” Namappébali Yonatan, “Magi naharusu maté? Aga dosana?” Naéngkalinganaro naddawukenni bessinna Saul lao ri Yonatan maélo mpunoi. Nanaissenni Yonatan makkedaé mémeng ambo'na tonget-tongengngi manniya maélo mpunoi Daud. Namacai senna'na Yonatan salaiwi méjang anréngngé sibawa dé' aga-aga nanré ri esso maduwanna Pésta Uleng Baruéro. Messé senna'ni pikkiri'i Daud iya puraé ripakatuna ri Saul ambo'na. Pappa bajanana laoni Yonatan ri padangngé untu' siruntu Daud pada-pada iya puraé mennang narancana massibawa. Tiwii séddi ana' worowané, atanna, namakkeda ri aléna, “Ayo, ittéi pana-pana iya uwappanangngé matu.” Wettunna lari iyaro ana'é, nappanangenni Yonatan séddi ana' pana liwengngi iyaro ana'é. Wettunna iyaro ana'é lettu ri onrong nateppaiyé iyaro panaé, gorani Yonatan lao ri aléna, “Ai, iyaro panaé lebbi mabéla mupi lao kuwaro! Agattiko céddé, aja' mujampaléllé!” Iyaro ana'é naitténi iyaro panaé nanalisu ri puwanna. Dé' sises-siseng napahangngi akkattana ada-adanna Yonatanro, banna Yonatan sibawa Daud ritu pahangngi. Nainappa nabbéréyang Yonatan pakkakkasa appananna lao ri ana'éro nanasuroi lisu ri kotaé. Laonana iyaro ana'é, massuni Daud polé ri munrinna goppo batuéro, nanasuju' wékkatellu. Muwi aléna iyaré'ga Yonatan, teri duwani wettunna sibau mennang. Amessénna Daud lebbi battowai naiya amessénna Yonatan. Nainappa makkeda Yonatan lao ri Daud, “Tennapodo Allataala tulukko. Puwangnge tanggungngi matu makkedaé idi sibawa wija-wijatta tuli makkatenningngi assijancitta sipadduwa ri yolona Allataala.” Purairo laoni Daud, nalisu tona Yonatan ri kotaé. Nalaona Daud ri Imang Ahimélékh ri Nob. Namasélenna Ahimélékh massu méwai sita Daud sibawa makkutana ri aléna, “Magi mulao mai alé-alému bawang?” Nappébali Daud, “Riwérékka séuwa jamang ri datu nanattéyangngi riyappaissengeng lao ri muwi séddi tau passalenna jamangngéro. Rimakkuwannanaro ana' buwaku usuroi mattajeng riséuwaé onrong. Taddampengekka, makkekkuwangngé macinnaka makkutana, inanré aga iya engkaé ri Bapa'? Wérékka limabbatu roti iyaré'ga agi-agi iya engkaé kuwaé.” Namakkeda iyaro imangngé, “Dé' uwappunnai roti biyasa, banna roti pakkasuwiyang iya engkaé; weddikko malai, assaleng ana' buwamu dé' nalluséreng nappa-nappaéwé.” Nappébali Daud, “Tentu mennang dé' napogau'i. Rékko tuli tugaski, najagai ana' buwaku kuwammengngi namapaccing mennang situru agamaé, padahal abiyasanna iyaro banna untu' tugas-tugas biyasaé; apalagi tugas iya dé'é pada-padanna makkekkuwangngéwé!” Nanabbéréyanni iyaro imangngé lao ri Daud roti pakkasuwiyangngéro, saba' iya engkaé ri aléna banna roti iya riyakkasuwiyangengngé lao ri Allataala, sibawa purani riyakka polé ri mézbaé untu' risulléi sibawa roti baru. ( Nasitujuwangngi, Doég tau Edongngé, kapala pakkampi olokolo'na Saul engkai kuwaro ri essoéro untu' rupaiwi séuwa kewajibang agama.) Nanakkutanana Daud lao ri Ahimélékh, “Aga Bapa' taro bessi iyaré'ga peddang iya weddingngé upaké? Iyaro paréntana datu masitta senna angkanna joppaka mapperi-peri senna nadé'na urapini mala peddang iyaré'ga sanjata iya laingngé.” Nappébali Ahimélékh, “Iyya taroi peddanna Goliat, tau Filistin iya muwunoé ri Lompo Elaro; iyaro peddangngé engkai ri munrinna éfod-é, ridoko ri laleng kaingngé. Rékko maéloko, ala bawanni, saba' banna iyaro sanjata iya engkaé kuwaé.” Nakkeda Daud, “Iyaro peddangngé, peddang kaminang makessing ri sininna wanuwaé, wérékka iyaro!” Iyatoro essoé nalari Daud polé ri Saul, nanalettu'na ri Akhis, arunna kota Gat. Ripaissengini Akhis risining pegawénna makkuwaé, “Tenniyaga iyaé Daud, arung ri wanuwanna? Sibawa tenniyaga untu' aléna sining makkunraié wettuéro séré-séré sibawa makkélong towi makkuwaé, ‘Saul mpunoi massebbu-sebbu bali, iyakiya Daud mappulo-pulo sebbu?’ ” Iyaro ada-adaé naganggui pikkiranna Daud, namétau senna'na lao ri Arung Akhis. Rimakkuwannanaro, najjaini Daud jangeng ri yolona tau maégaé. Wettunna mennang nacoba tahangngi, samannai tau maoja-oja'; nakarebbéi pintu gerbanna kotaé sibawa naleppessangngi bébbé élona ri janggo'na. Nanakkeda Akhis lao risining pegawénna, “Dé'ga muwitai makkedaé iyaro tauwé jangengngi? Magi mutiwii kumaiyé? Makurang mupaga tau maoja-oja' ri seddéku, angkanna mutiwirekka séddi tau jangessi ri bolakué?” Nanasalaini Daud kota Gat namassubbu ri gowa seddéna kota Adulam. Wettunna kaka-kakana sibawa sininna kaluwargana naéngkalinga makkedaé engkai kuwaro, laoni mennang ri Daud. Makkuwatoro sining tau ritenre'é, iya mappunnaiyé inreng, sibawa iya marasa dé'é namasennang, iya manenna masséddini sibawa Daud, na Daud mancaji pamimpinna mennang. Jumellana tau maccowériyéngngi Daud engka kira-kira 400 tau. Polé ri gowaéro laoni Daud ri Mizpa ri Moab sibawa makkeda lao ri arunna wanuwa Moab, “Palaloni ambo' sibawa indo'na atatta monro ri Puwakku, narapi naisseng atatta aga akkattana Allataala lao ri atatta.” Nanatiwini iyaro tomatowanna ri arunna wanuwa Moab, namattette'na mennang kuwaro ri wettu massubbunna Daud ri gowaéro. Riséuwaé esso engka séddi nabi riyaseng Gad lao ri Daud sibawa makkeda, “Aja' muwonro ri gowaéwé, laono masitta ri tana Yéhuda.” Nalaona Daud sibawa muttama ri ale' Kérét. Riséuwaé esso tudangngi Saul ri yawana aju tamariskaé ri tompo'na bulu-bulué ri Gibéa; nakkatenningngi bessinna nasininna parawirana tettongngi mattulilingiwi. Wettunna naéngkalinga makkedaé onronna Daud sibawa ana' buwana naissenni, makkedani lao ri sininna parawiranaro, “Engkalingai, éh sining tau Bényamingngé! Aga iyaro Daud maéloi mpérékko dare sibawa palla anggoro? Aga nakka manekko matu mancaji parawira ri laleng tentarana? Iyanaro saba'na namasséddi méwaka nadé' muwi séddi tau paissengika makkedaé ana'ku paimeng maccowé toni ri Daud? Dé' muwi séddi tau polé ri iko pikkiri'i aléna iyaré'ga paissengika makkedaé Daud, ana' buwakuto, makkekkuwangngé mattajengngi kasempatang untu' mpunoka, na ana'ku Yonatan pura mpéréngngi dorongang lao ri aléna!” Doég kapala pakkampi olokolo'na Saul, engka towi kuwaro silaong sining parawirana Saul, nanakkeda Doég, “Atatta pura mitai Daud lokkaiwi Ahimélékh ana' Ahitub ri Nob. Méllauni Ahimélékh panunju ri Puwangnge passalenna aga iya harusu'é napogau' Daud. Rilainnaéro ripabokongi towi Daud inanré enrengngé peddanna Goliat, tau Filistingngéro.” Nanassurowanni arungngé mobbii Imang Ahimélékh sibawa sininna sumpulolona iya mancaji imangngé ri Nob; namangolona mennang ri aléna. Nakkeda Saul lao ri Ahimélékh, “Engkalingai, éh ana' Ahitub!” Pappébalinna, “Iyyé, Datu.” Nakkutana Saul ri aléna, “Magi musipekke Daud méwaka? Magi mupabokongiwi roti sibawa muwéréngngi peddang enrengngé muwéllaungengngi panunju polé ri Allataala? Jaji makkekkuwangngé naéwaka sibawa mattajenni kasempatang untu' mpunoka.” Nanappébali Ahimélékh, “Tenniyaga Daud parawirana Datu iya kaminang matinulué? Ménéttunna topa Datu, kapala pengawalna Datu, sibawa ripakalebbi senna'i ri sininna tauwé ri laleng saorajana Datu. Mémeng, purai atatta méllaungengngi panunju polé ri Allataala untu' aléna, iyakiya tenniya untu' mammulanna atatta pogau'i iyaro. Passalenna assipekkekengngé méwai Datu, aja' Datu nateppui atatta iyaré'ga muwi séddi tau ri laleng kaluwargana atatta. Dé' gaga naisseng atatta passalenna gau'éro!” Iyakiya makkedai arungngé, “Ahimélékh! Iko sibawa sininna kaluwargamu harusu'i maté.” Nainappa napparéntang lao risining pengawal iya tettongngé ri seddéna, “Ayo, unoi iyaro sining imanna Puwangnge! Sikongkolo'ni mennang sibawa Daud. Naisseng mennang makkedaé lariwi Daud, iyakiya dé' namaélo paissengika.” Iyakiya iyaro sining pengawal-é dé' namaélo mpunoi iyaro imang-ngimanna Puwangnge. Rimakkuwannanaro makkedani Saul lao ri Doég, “Ayo, asitta'no! Iko bawanna mpunoi mennang!” Nanalluruna Doég nanaunoi iyaro imang-ngimangngé. Iyaro essoé naunoni aruwa pulona lima tau imang iya mappunnaiyé ha' paké waju éfod. Napparéntang towi Saul mpunoi sininna pabbanuwana Nob, kota imangngéro; worowané, makkunrai, ana'-ana' sibawa ana'lolo, makkuwatoro sapingngé, kaleddé'é sibawa bimbala'é, iya manenna napaccappui nyawana. Banna Abyatar, séddiwi polé ri ana'-ana'na Ahimélékh mulléi leppe. Lariwi lao ri Daud, nainappa napowadang makkedaé purani nauno Saul sining imanna Puwangnge. Nakkedana Daud lao ri aléna, “Wettunna uwita Doég kuwaro iyaro essoé, uwissenni sibawa mattentu makkedaé mappissengngi matu ri Saul. Jaji iyya ritu mattanggung jawa' ri amaténna sininna sumpulolomu. Onrono silaongekka sibawa aja' mumétau. Macinnai Saul mpunoko, iyakiya macinna towi mpunoka. Jaji, amakko matu ri onrokku.” Riséuwaé esso ripaissengini Daud makkedaé nagasai tau Filistingngé kota Kéhila sibawa narampasa'i gandong iya nappaé naéngngala. Namakkutanana ri Puwangnge, “Harusu'ka'ga lao gasai tau Filistingngé?” Nappébali Puwangnge, “Ya, gasai mennang sibawa passalama'i pabbanuwana Kéhila.” Iyakiya makkedai ana' buwana Daud lao ri aléna, “Sedangkang kuwaé, ri Yéhuda, métau senna'ki; apalagi rékko harusu'ki lao gasai tentara Filistingngé ri Kéhila.” Rimakkuwannanaro siseppi Daud méllau panunju polé ri Puwangnge, namappébali Puwangnge, “Aja' mubata-bata. Gasai kota Kéhila, nasaba iyaro tentara Filistingngé uwabbéréngngi matu lao ri iko.” Nanalaona Daud sibawa ana' buwana ri Kéhila nanagasai enrengngé naunoi maéga tau Filistin, sibawa narampasa'i olokolo'na mennang. Makkuwaniro Daud paleppe'i pabbanuwana kotaéro. Wettunna Abyatar ana' Ahimélékh lari lao ri Daud, enrengngé silaongengngi Daud lao ri Kéhila, natiwi towi éfod-é. Wettunna ripaissengiwi Saul makkedaé engkai Daud ri Kéhila, pikkiranna Saul, “Nabbéréyanni Allataala Daud lao ri aléku. Nalani jebba nasaba muttama'ni ri laleng kota iya mattémbo'é sibawa mappintu gerbangngé.” Nanapangarani Saul tentarana sibawa joppa lao ri Kéhila untu' keppungngi Daud silaong sininna ana' buwana. Iyakiya naissengngi Daud makkedaé manniya' majai Saul lao ri aléna. Rimakkuwannanaro makkedani lao ri Imang Abyatar, “Tiwii mai iyaro éfod-é.” Namassempajanna Daud, “ Puwang, Allataalana Israélié, uwéngkalingai makkedaé manniya'i Saul untu' lao ri Kéhila sibawa mancuru'i kotaéro nasaba iyya, atammu. Namasitta'na Daud silaong ana' buwana kira-kira 600 tau, salaiwi Kéhila nasollé polé riséddié onrong lao ri onrong laingngé. Wettunna naéngkalinga Saul makkedaé laoni Daud polé ri Kéhila, dé'na najaji rancanana gasai. Purairo monroni Daud ri gowa-gowaé ri bulué ri padang kessi Zif. Tuli rilellungngi ri Saul, iyakiya Puwangnge dé' nabbéréyangngi lao ri arungngéro. Namuni makkuwaro métau mutowi Daud, nasaba manniya'i Saul maélo mpunoi. Riséuwaé wettu engkai Daud ri Horés, ri padang kessi Zif. Laoni Yonatan méwai sita kuwaro untu' pakkasse'i atepperenna makkedaé rilinrungiwi matu ri Allataala. Adanna Yonatan lao ri Daud, “Aja' mumétau, dé' musempé matu ri limanna ambo'ku. Naisseng madécéng aléna makkedaé iko ritu matu mancaji arunna Israélié sibawa lolongekka matu tudangeng ri yawamu.” Nainappa Daud sibawa Yonatan siyo assijancing assisellaongeng ri yolona Puwangnge. Purairo lisuni Yonatan ri bolana, na Daud tette'i monro ri Horés. Nasiyagangngaré tau polé ri Zif mangolo ri Saul ri Gibéa sibawa makkeda, “Massubbui Daud ri daérata ri laleng gowa-gowaé ri seddéna Horés, ri yasé'na Bulu-bulu Hakhila seddé yattanna padang kessi Yéhuda. Taisseng makkedaé macinna senna'i Datu tikkengngi; rimakkuwannanaro, laoni ri daérata. Ritanggung makkedaé pasti naullé Datu tikkengngi.” Nappébali Saul, “Tennapodo ribarakkakiko ri Puwangnge nasaba kédo madécékko lao ri iyya! Laono sibawa pénessaiwi paimeng; paréssai tonget-tongeng kégi Daud monro sibawa niga pura mitai kuwaro. Uwéngkalingai makkedaé macca senna'i. Jaji paréssai madécét-décéng gowa-gowa iya puraé mancaji onrong assubbuwanna, namulisu kumaiyé untu' laporo'i ri iyya. Nainappa maéloka lao sibawa iko, narékko engka mupi ri daéraéro, pasti usappai matu, namuni harusu'i upatassiya-siya sininna Yéhuda!” Najoppana lisu iyaro sining tauwé ri Zif poddiyoloiwi Saul. Iyaro wettué Daud sibawa ana' buwana engkai ri padang kessi Maon, ri lompo iya masino-sinoé ri daéra yattanna padang kessi'na Yéhuda. Poléni Saul sibawa tentarana maélo sappai Daud, iyakiya ripaissengiwi Daud ri tauwé iyaro gau'é, angkanna laoni ri bulu batué ri padang kessi Maon sibawa monro kuwaro. Naissennana Saul iyaro gau'é, masitta'ni lellungngi Daud. Joppani Saul sibawa tentarana ri wiring bulué tibang kumaiyé na Daud sibawa ana' buwana ri wiring tibang kuwaro. Mappéri-perini Daud paleppe'i aléna polé ri Saul iya mammulaénna makkeppung maélo tikkengngi mennang. Iyakiya tappa polé muni séddi suro mangolo ri Saul sibawa makkeda, “Sitinajai Datu masitta lisu! Nagasai wanuwatta tau Filistingngé!” Napappésauni Saul lellungngi Daud, nanalao untu' mammusu méwai tau Filistingngé. Iyanaro saba'na nariyaseng iyaro onrongngé Bulu Assarangeng. Polé kuwaro laoni Daud ri daéra En-Gedi, sibawa massubbu ri gowa-gowaé. Wettunna Saul silalona lisu polé ri ammusurengngé méwai tau Filsitingngé, tarimani karéba makkedaé engkai Daud ri padang kessi seddéna En-Gedi. Masitta'ni Saul pilé tellussebbu prajuri makessingngé polé risininna Israélié, nainappa joppa sappai Daud sibawa ana' buwana ri seddé alauna Bulu Batu Bémbé Ale'é. Nalettu'na daud ri seddéna siyagangngaré wakké bimbala ri wiring lalengngé. Kuwaro engkato séddi gowa, namuttama'i Saul untu' majjambang. Nasitujuwang towi Daud sibawa ana' buwana massubbu towi ri gowaéro, lebbi marilaleppi. Namakkedana ana' buwana Daud lao ri aléna, “Iyanaé kasempatang lao ri Bapa'! Dé'ga napura makkeda Puwangnge lao ri Bapa' makkuwaé, ‘Uwabbéréyangngi matu balimmu lao ri iko, pogau'ni siyélomu lao ri aléna!’ ” Nainappa coco'-coco' Daud lao ri onronna Saul sibawa mammekko-mekko rette'i céddé wiring jumba Saul. Iyakiya purairo, marasa pasalani Daud nasaba purai napogau' gauéro. Makkedani lao ri ana' buwana, “Tennapodo Puwangnge jagaiwi aja' narapika pogau'i majaé lao ri arukku iya puraé napilé Puwangnge. Muwi céddé dé'to naweddikka peddiriwi, nasaba arung napilénai Puwangnge!” Makkuwaniro Daud pattennangngi ana' buwana, sibawa dé' napalaloi mennang gasai Saul. Tettonni Saul nanasalaiwi iyaro gowaé, nanapatterui joppana. Massu toni Daud polé ri gowaéro nanagora ri munrinna Saul, “Datu!” Nagilinna Saul limonri nasuju' Daud sibawa mappakalebbi nainappa makkeda, “Magi Datu naéngkalingai bicaranna tau iya powadaéngngi makkedaé maéloi atatta cilakaiwi Datu? Makkekkuwangngé aléna Datu mitai makkedaé ri laleng gowaé onna, Puwangnge pura mabbéréyangngi Datu lao ri atatta. Purana ripalécé riséddié tau untu' mpunoi Datu, iyakiya dé' namaélo atatta. Mappébaliwi atatta makkedaé dé' namaélo peddiriwi arunna atatta iya napilé Puwangnge. Itani, ambo'ku! Itani addettekeng jumba Datu iya nakkatenningngé atattaé! Sitongenna naullé atatta mpunoi Datu, iyakiya atatta banna narette'i céddé wiring jumba Datu. Jaji, manessani makkedaé atatta dé' namakkatta maja iyaré'ga madoraka. Nalellungngi Datu atatta untu' mpunoi atatta, namuni atatta dé' napasala muwi céddé lao ri Datu. Tennapodo Puwangnge ritu pettuiwi niga ri yelle'ta iya pasalaé! Tennapodo Puwangnge ritu mpale'i pangkaukenna Datu lao ri atatta, namuni muwi céddé dé' namaélo atatta peddiriwi Datu. Naisseng Datu iyaé warékkada riyoloé, ‘Jaé banna napogau'i tau iya majaé.’ Rimakkuwannanaro dé' namaélo atatta peddiriwi Datu. Pénessaini atattaé iya maéloé riyuno ri arunna Israélié! Itani atattaé iya tuli rilellungngé! Atatta banna sikaju asu maté, séddimi utu bawang. Puwangnge matu mancaji haking ri yelle'na Datu sibawa atatta. Tennapodo naparéssai iyaé parakaraé, sibawa méwaiwi atatta nenniya passalama'i atatta polé ri Datu.” Puranana napowada Daud iyaro ada-adaé, makkedani Saul, “Ikogaro, éh Daud, ana'ku?” Naterina. Nakkeda lao ri Daud, “Iko tongeng, na iyya ritu sala. Jaku lao ri iko muwale'ni sibawa akessingeng. Ri essoéwé purani muwappaitang makkedaé makkatta makessikko lao ri iyya, saba' dé' muwunoka, namuni purani nabbéréyakka Puwangnge lao ri iko. Majarang senna tau siruntu balinna iyakiya naleppessangngi iyaro balinna tuwo! Jaji, tennapodo Puwangnge barakkakiko nasaba pangkaukemmu iya makessingngé lao ri iyya essoéwé! Mateppe'na makkekkuwangngé makkedaé mancaji arukko matu ri Israél sibawa tette'i matu akkarungenna Israélié masse ri yawa apparéntammu. Makkekkuwangngé ajjancino ri iyya nasabbing Puwangnge, makkedaé dé' mumaélo mpunoi wija-wijakku, sibawa dé'to mumaélo leddai asenna kaluwargaku!” Namattanrona Daud maélo pogau'i iyaro gau'é. Nainappa lisuni Saul ri bolana, na Daud sibawa ana' buwana lisu toni paimeng ri onrong assubbuwanna. Dé' namaitta rimunrinna maténi Samuél. Maddeppungeng manenni Israélié untu' maccowériwi upacara abbaratangngé. Nainappa rikuburu ri bolana ri Rama. Purairo laoni Daud ri padang kessi Paran. Wettunna Daud iya engkaé ri padang kessi'é, naéngkalinga gau'éro, suroni seppulo kallolo lao ri Karmél, méwai sita Nabal untu' palettu'i sellenna Daud ri aléna. Nasuroi mennang makkeda makkuwaé lao ri Nabal, “Salama sibawa saléwangekko silaong kaluwargamu nenniya sininna appunnangemmu. Uwéngkalingai makkedaé mattengngakko goncingngi bulu bimbala'mu. Issengngi makkedaé pakkampi-pakkampimu iya engkaé ri daérata, dé' naengka riganggui, sibawa dé'topa naengka naateddéngeng mennang muwi aga sipongenna engkaki ri Karmél. Coba tanai bawanni mennang, pasti napattongeng gau'éro. Rimakkuwannanaro, mamménasaka kuwammengngi ana' buwaku ritarimai sibawa madécéng ri bolamu, nasaba poléki ri esso marajaéwé. Wéréng towi ata-atammué sibawa iyya, Daud, sellao makessimmu, agi-agi manuru cenning atimmu.” Lettu'na ri Karmél, napalettu'ni ana' buwana Daud iyaro pasengngé ri Nabal ri laleng asenna Daud, nainappa mennang mattajeng. Iyakiya mappébaliwi Nabal, “Daud? Niga iyaro? Niga iyaro ana' Isai? Dé'pa naengka uwéngkalingai passalenna aléna! Iyaé céddé-céddé'é maéga ata iya lariyé polé ri puwanna ri wanuwaéwé! Masa' wedding uwala roti sibawa uwai rinukku, enrengngé juku iya puraé upassadiya untu' sining paggoncikku, nainappa uwabbéréyang manenro lao ri tau iya dé'é namanessa assalenna!” Nalisuna ana' buwana Daud lao ri Daud sibawa paissengiwi iyaro ada-adanna Nabal. Napparéntana Daud, “Tappii peddammu tungke'-tungke'!” Masitta'ni ana' buwana turusiwi paréntaéro. Natappi toni peddanna Daud nanajoppa silaong kira-kira 400 tau, na 200 tau monro untu' monrowangngi barab-barangngé. Na iyaro wettué Abigail bainéna Nabal, purani ripaissengi riséddié pattumaninna Nabal, makkuwaé, “Puraniga naéngkalinga Ibu? Purai nasuro Daud siyagangngaré suro polé ri padang kessi'é untu' mabbéré selleng ri puwatta, iyakiya narodda-roddaiwi mennang. Padahal makessing senna'i mennang lao ri idi. Dé' naengka nagangguki, sibawa dé'topa naengka naateddéngekki muwi aga wettutta massellao sibawa mennang ri padang kessi'é. Esso wenni mennang linrungiki ri wettutta makkampi bémbé bimbala ri seddéna. Rimakkuwannanaro, timbanni gauéwé, sibawa pettuini aga wedding napogau' Ibu. Saba' pasti poléi matu pakkabale'na lao ri puwatta sibawa sininna kaluwargana. Matedde ati senna puwatta angkanna dé' nawedding riyéra mabbicara.” Masitta'ni Abigail mala duwa ratu roti, sibawa popang bingkulang mallise uwai anggoro, lima bimbala panggang, seppulo pitu kilo betté gandong, sératu réppung buwa anggoro marakko sibawa duwa ratu béppa ara. Iya manennaro napaénré'i ri yasé'na kaleddé'na. Namakkedana lao ri pattumani-pattumaninna, “Joppano poddiyoloika; maéloka maccowériko.” Iyakiya dé' napowadai aga-aga lao ri lakkainna. Natonangini Abigail kaleddé'na, na wettunna lettu riséuwaé bélokeng ri wirinna bulué, siduppani sibawa Daud nenniya ana' buwana iya mattengngangngé turung mattuju ri aléna. Iyaro wettué mappikkiri'ni Daud, “Percuma bawang ujagai appunnangenna iyaro tauwé ri padang kessi'é! Dé' muwi céddé iya teddéngngé polé ri appunnangenna; na makkekkuwangngé nawale'i sibawa ja! Tennapodo Allataala mpunoka rékko dé' uwunoi sininna tau worowané iya engkaé kuwaro ri wettu dé'napa naompo essoé!” Wettunna Abigail naita Daud, masitta'ni nonno polé ri kaleddé'na nainappa suju' ri ajéna Daud, sibawa makkeda lao ri aléna, “Puwakku, tennapodo taéngkalingai! Leppessanni iyaro asalangngé atatta tanggungngi! Aja' Puwakku napikkiri'i Nabal, tau temmakkégunaéro! Tau donggoi – pada-pada bettuwanna asenna. Dé' naitai atatta sining suro iya nasuroé Puwakku. Allataala pura pésangkaiwi Puwakku makkabale sibawa mpunoi sining balinna Puwang. Na makkekkuwangngé Puwakku, nasabbing Puwang iya tuwoé, mattanroi atatta, tennapodo totona sininna balinna Puwakku sibawa tungke' tau iya maéloé cilakaiwi Puwakku pada-padai totona Nabal. Tatarimani pabbéré iya natiwié atatta untu' Puwakku, sibawa ana' buwana Puwakku. Taddampengengngi atakkalupanna atatta. Pasti Puwangnge pancajiwi matu Puwakku enrengngé wija-wijanna Puwakku arung ri Israélié, saba' mammusui Puwakku untu' Puwangnge, sibawa dé' namaélo Puwakku pogau'i majaé gangka tuwona. Ebara'na séddié tau luruiwi Puwakku sibawa cobai mpunoi Puwakku, pasti rilinrungiwi matu Puwakku ri Puwang Allataala pada-pada waramparang iya najagaiyé punnana. Iyakiya balinna Puwakku riyaggenrungengngi matu mabéla ri Puwangnge, riyaggenrungeng ri pallobangngé. Napogau'i matu Puwangnge sininna makessingngé iya najjanciyangngé lao ri Puwakku, sibawa dé'na namaittana naripancaji Puwakku arung ri Israélié. Iyaro wettué naéngngerangngi matu Puwakku makkedaé dé' nabbuno Puwakku temmakkéalasang iyaré'ga mancaji haking ri alé angkanna dé'na naparellu Puwakku messé iyaré'ga massesse kalé. Narékko Puwangnge pura barakkakiwi Puwakku, aja' tallupaiwi atanna Puwakkué.” Nanakkedana Daud lao ri aléna, “Ripojiwi Puwangnge, Allataalana Israélié, iya suroékko méwaka sita essoéwé! Ripojiwi apanrémmu sibawa ripoji tokko nasaba puraka mutahang pogau'i abbunowangngé nenniya mancaji haking. Puwangnge pura tahakka kédo maja lao ri iko. Nasabbing Puwangnge, Allataalana Israélié iya tuwoé, ébara'na dé' mumasitta méwaka sita, pastini sininna ana' buwana Nabal maténi wettunna mompo essoé!” Purairo natarimani Daud aga iya natiwié Abigail untu' aléna, nainappa makkeda lao ri aléna, “Lisuno ri bolamu sibawa aja' mubata-bata. Utarimani paréllaummu.” Wettunna Abigail lisu ri Nabal, napoléini engka pésta marowa ri bolana, pada-pada pésta arungngé. Nasaba mabo'i Nabal sibawa mariyo-riyoi, dé'na naripaissengi muwi aga ri bainéna narapi pappa bajana. Elénana, dé'nana namabo' Nabal, ripowadanni ri bainéna passalenna sininna jaéro. Nakennani Nabal serangang jantung naképona sininna watakkaléna. Kira-kira seppulo esso rimunrinna lolongessi Nabal serangang jantung polé ri Puwangnge angkanna maté. Wettunna naéngkalinga Daud makkedaé maténi Nabal, makkedani, “Ripojiwi Puwangnge! Nawale'ni pappakatuna iya napaogau'é Nabal lao ri iyya, sibawa napésangkainna atan-Na pogau'i majaé. Puwangnge hukkungngi Nabal nasaba jana.” Nainappa kiring Daud suro lao ri Abigail untu' lettukiwi mancaji bainéna. Nalettu'na surona Daud lao ri makkunraiéro ri Karmél sibawa makkeda ri aléna, “Risuroki ri Daud mangolo ri Ibu, saba' macinnai lettukiwi Ibu mancaji bainéna.” Natokkonna Abigail sibawa suju' enrengngé makkeda, “Iyya'é atanna Daud, sadiyaka bissaiwi ajéna sining atanna.” Namangujuna masitta. Natonangini kaleddé'na sibawa ritinrosi ri lima pattumani makkunrainna, joppani maccowériwi surona Daud, namancajina bainéna Daud. Ri yolonaro purani Daud kawing sibawa Ahinoam polé ri Yizreel, na makkekkuwangngé mancaji toni Abigail bainéna. Na iyaro wettué purani Saul napasiyala Mikhal ana'na, iyanaritu bainéna Daud, sibawa Palti, ana'na Lais polé ri kota Galim. Riséuwaé esso sining tau polé ri Zif laoni ri Saul ri Gibéa sibawa paissengiwi makkedaé Daud mattengngang massubbu ri Bulu Hakhila ri wiring padang kessi Yéhuda. Namapperi-perina Saul joppa ritinrosi ri tellussebbu prajuri iya pommakessingngé ri Israélié, mattuju ri padang kessi Zif untu' sappai Daud. Makkémai Saul ri wiring lalengngé seddéna Bulu Hakhilaro. Daud iya engkaé ri padang kessi'é, naéngkalingani makkedaé riyaccowériwi ri Saul lettu ri padang kessi'é. Nanakirinna mata-mata, sibawa mattentuni naissenni makkedaé engkai Saul kuwaro. Masitta'ni Daud lao ri akkémanna Saul nanaruntu'ni kéma naonroiyé Saul matinro ri seddéna Abnér ana' Nér. Iyaro kémana Saul engkai ri tengnga-tengnga, na tentarana makkémai ri mattulilinna. Namakkutana Daud ri Ahimélékh tau Hét-éro, sibawa ri Abisai silessurenna Yoab (Indo'na mennang iyanaritu Zéruya), “Niga barani muttama silaongekka ri laleng akkémanna Saul?” Nappébali Abisai, “Iyya!” Na iyaro wennié coco'ni Daud sibawa Abisai muttama ri akkémangngéro nanaitai Saul matinro ri tengnga-tengngana akkémangngé, bessinna maddince ri tanaé ri seddéna ulunna. Abnér sibawa pasukanna ri mattulilinna Saul. Namakkeda Abisai ri Daud, “Allataala pura mabbéréyangngi balimmu lao ri iko iyaé wennié. Palaloka paddince'i bessinna ri watakkaléna bettu lettu ri tanaé, uwunoi sibawa siseng paggajang, dé' naparellu narapi wékkaduwa!” Iyakiya makkedai Daud, “Aja' muwagagai! Pasti nahukkung Puwangnge tau iya pogau'éngngi majaé lao ri arung iya Napilé. Nasabbing Puwang iya tuwoé, uwisseng makkedaé aléna Puwangnge matti mpunoi matu Saul, narékko narapini ajjalenna, iyaré'ga rékko matéi ri laleng ammusurengngé. Tennapodo Puwangnge pésangkaika mpunoi arung iya Napilé! Alani bawang bessinna sibawa kendinna, natalao!” Nanalani Daud bessi sibawa kendinna Saulro polé ri seddé ulunna Saul, nanalao. Dé' muwi séddi tau mitai gau'éro iyaré'ga missengngi aga pura kajajiyang, iyaré'ga pésedding, saba' Puwangnge mébbu manengngi mennang matinro sibawa memme. Nainappa mallétto Daud ri wiring lompo iya laingngé lettu ri tompo bulué, angkanna mabéla polé ri akkémanna Saul. Nainappa gora Daud lao ri Abnér sibawa tentarana Saul adanna, “Abnér! Muwéngkalingaga saddakku?” Gora toni Abnér, “Niga iko iya gora-goraéro?” Nappébali Daud, “Abnér, tenniyakoga tau iya kaminang héba'é ri Israélié? Magi nadé' mujagaiwi puwammu, datu arungngé? Silalona engka tau muttamakiwi akkémammu untu' mpunoi puwammu. Dé' muwulléi pajoppai tugasmu, Abnér! Nasabbing Puwang iya tuwoé, sitinaja manekko maté, nasaba dé' mujagaiwi puwammu, arung napilé Puwangnge. Coba mitai! Kégani bessinna arungngé? Kégani kendi iya engkaé ri seddé ulunna onna?” Naisseng Saul saddanna Daud namakkutana, “Daud, ikoga iyaro, Ana'ku?” Nappébali Daud, “Iyyé, Datu.” Nanakkeda paimeng, “Magi Datu natuli lellung mupi atatta? Aga asalanna atatta? Datu, éngkalingai assompanna atattaé. Ebara'na Puwangnge suroi Datu kuwammengngi naéwai atatta, séuwa pakkasuwiyang akkarobangeng wedding pasoroi matu cai-Na lao ri atatta. Iyakiya ébara'na iya suroéngngi Daturo iyanaritu tolino, tennapodo ritanroiwi ri Puwangnge! Nasaba addimonrinna polé ri pangkaukenna mennanro, ripaddésu'ni atatta polé ri tana appunnangenna Puwangnge sibawa tarapassa harusu lao ri wanuwa laingngé kégi atatta harusu massompa lao ri déwata-déwata laingngé. Aja' taleppessangngi atatta maté ri tana laingngé, mabéla polé ri Puwangnge. Aga akkégunana arung Israélié polé untu' mpunoi séddi utu pada-pada atattaé? Aga akkégunana nalellung atatta pada-pada tau lellungngé manukale?” Namappébali Saul, “Pasalaka. Lisuno Daud, Ana'ku! Dé'na umaélo pogau'ni majaé lao ri iko nasaba purani muleppessakka tuwo onna wennié. Madonggo senna kédo-kédoku. Kaliru tongenna!” Iyakiya mappébaliwi Daud, “Iyanaé bessinna Datu, suroi séddi prajuri'na Datu lao mai untu' malai. Puwangnge barakkakiwi matu tungke' tau iya matinulué sibawa malempu. Saba' namuni iyaé essoé nabbéréyangngi Puwangnge Puwakku lao ri atatta, iyakiya dé' namaélo atatta pogau'i majaé lao ri Datu, arung napiléna Puwangnge. Jaji, pada-pada Datu purani rileppessang ri atatta tuwo ri essoéwé, makkuwatoniro tennapodo atatta rilinrungi ri Puwangnge sibawa rileppessang polé ri sininna bahayaé!” Namakkedana Saul lao ri Daud, “ Puwangnge barakkakiko, Ana'ku! Mallolongekko matu ri laleng sininna jama-jamammu!” Nainappa napatteru Daud joppana, nalisu tona Saul ri bolana. Mappikkiri'ni Daud ri laleng atinna, “Muwi maga séuwa esso naunoka matu Saul. Jaji, dé'na gaga laleng laing ri aléku, sangadinna lari lao ri daéra Filistin. Nanallalengiro dé'na nasappaka matu Saul ri Israélié, sibawa amang tona matu.” Namasitta'na Daud silaong iya enneng ratuna ana' buwana lao ri Akhis ana' Moah, arunna kota Gat. Namattette'na kuwaro silaong ana' buwana ri Gat, tungke'-tungke' sibawa kaluwargana mennang. Natiwi duwai Daud bainéna, iyanaritu Ahinoam makkunrai polé ri Yizreel sibawa Abigail, jandana Nabal makkunrai Karmél. Wettunna naéngkalinga Saul makkedaé larini Daud lao ri Gat, dé'na nakkuraga tikkengngi. Nanappétangngarenni Daud lao ri Akhis, “Rékko masennangngi Datu sibawa atatta, wérénni atatta séddi kota baiccu ri désa-désaé untu' riyonroi, angkanna atanna Datué dé' nappéruma ri Datu ri ibukotaéwé.” Nariwérénna ri Akhis kota Ziklag lao ri Daud, na iyanaro saba'na namancaji kota Ziklag appunnangenna arung-ngarung Yéhudaé lettu makkekkuwangngé. Monroni Daud ri wanuwanna Filistingngé sitaung patampuleng ittana. Mappammulai wettuéro Daud sibawa ana' buwana biyasai gasai tau Gésur-é, tau Girzié, sibawa tau Amalé'é, iyaro bangsa-bangsaé maittani monro ri daéraéro. Maggasai lao ri tanaéro sibbéla Sur, sibawa matteru lao ri Maséré. Naunoi sining tau worowané sibawa makkunraié enrengngé narampasa'i bimbala'é, sapingngé, kaleddé'é, untaé, mala pakéyangngétto. Nainappa lisu namangolo ri Akhis. Rékko makkutanai Akhis ri aléna, “Kégako lao maggasa iyaé sisengngé?” Namakkeda Daud lao ri aléna makkedaé laowi ri bagiyang yattanna Yéhuda iyaré'ga lao ri daérana tau Yérahmeel iyaré'ga lao ri daéra onronna tau Kénié. Dé' muwi séddi tau ri daéra-daéra iya nagasaéro naleppessang tuwo, kuwammengngi aja' naengka tau polé ri daéra-daéraéro iya weddingngé lao ri Gat untu' laporo'i aga sitongenna pura napogau' Daud sibawa ana' buwana. Makkuwaniro tindakanna Daud wettunna monro ri wanuwa Filistin. Iyakiya Akhis natepperiwi Daud sibawa mappikkiri'i ri laleng atinna, “Makkuwa mani ribencinna ri bangsana muto, angkanna tarapassa mancaji atakku gangka tuwona.” Siyagangngaré wettu rimunrinna napangarani tau Filistingngé tentarana untu' gasai Israélié, namakkeda Akhis lao ri Daud, “Tentu mupahang makkedaé iko sibawa ana' buwamu harusu mammusu sibawakka.” Nappébali Daud, “Tentuni, naitapi matti Datu aga wedding napogau' atanna Daturo.” Nanakkeda Akhis, “Makessinni! Uwakkako mancaji pengawalku iya tette'é.” Maténi Samuél sibawa riwatingi ri sininna Israélié enrengngé ritampung ri Rama, kotana muto. Siyagangngaré wettu iya labe'é purani ripaddésu ri Saul polé ri Israélié sininna pappalakiyaé sibawa pangobbi waliyalaé. Na wettunna maddeppungeng tentara Filistingngé sibawa makkéma ri seddéna kota Sunem, napaddeppungeng toni Saul tau Israélié, sibawa makkéma mennang ri Bulu Gilboa. Wettunna naita Saul tentara Filistingngéro, métau senna'ni. Nainappa méllau panunju ri Puwangnge, iyakiya dé' naribali ri Puwangnge, muwi sibawa nippi iyaré'ga sibawa makkégunang Urim sibawa Tumim iyaré'ga naolai sining nabié. Rimakkuwannanaro makkedani Saul lao ri sining pegawénna, “Sappano séddi sanro makkunrai pangobbi waliyala, maéloka lao ri aléna untu' méllau panunju.” Mappébalini mennang, “Ri En-Dor engka sanro pada-padaéro.” Nanallarikkodona Saul kuwammengngi dé' nariisseng ri tauwé. Ritinrosi duwa tau worowané, joppani nanalettu ri bolana sanroéro ri wennié. Nanakkeda Saul, “Obbini waliyalana tau iya maéloé uteppu asenna, sibawa éllauni kuwammengngi nabotoi aga iya kajajiyangngé matu.” Nappébali iyaro makkunraié, “Tentu naisseng toni Puwang makkedaé Arung Saul pura paddésu' manengngi polé ri Israélié pangobbi waliyalaé sininna pappalakiyaé sibawa sanro pangobbi waliyalaé. Magi Puwang nacobai cilakaika angkakku riyuno?” Namattanro Saul, adanna, “Nasabbing Puwang iya tuwoé, majjancika makkedaé dé' narihukkukko matu nasaba mupogau'i gauéwé.” Nakkutana iyaro makkunraié, “Waliyalana niga harusu uwobbi untu' Puwang?” Nappébali Saul, “Waliyalana Samuél.” Wettunna iyaro makkunraié naita Samuél, gorani sibawa makkeda lao ri Saul, “Magi Puwang nabelléi atatta? Puwakku ritu palé Arung Saul!” Nappébali arungngé, “Aja' mumétau! Powada bawanni aga muwita!” Nappébali iyaro makkunraié, “Naitai atatta engka roh mompo polé ri tanaé.” Nakkutana Saul, “Pékkugi tappana?” Nappébali, “Séddi tau worowané iya macowaé. Mompoi mappaké jumba.” Nanaissenni Saul makkedaé iyanaro Samuél, nanasuju' pakalebbii. Purairo makkedani Samuél lao ri Saul, “Magi mugangguka? Magi muwobbika lisu?” Nappébali Saul, “Malippu senna'ka nasaba rigasaka ri tau Filistingngé, nanasalaina Allataala. Dé'na nabalika, muwi naolai sining nabié, iyaré'ga nasibawang nippi. Rimakkuwannanaro uwéllauwi ri Bapa', kuwammengngi nappaissengengngi Bapa' aga iya harusu'é upogau'.” Nanakkeda Samuél, “Aga akkégunana muwobbika nanasalaino Puwangnge sibawa mancajini balimmu? Napogau'ni Puwangnge lao ri iko pada-pada iya puraé Napowada naolai iyya. Nalani Puwangnge akkarungeng Israélié polé ri iko nanawéréngngi Daud. Purai muéwa paréntana Puwangnge sibawa dé' mumaélo paccappui tau Amalé'é enrengngé sininna appunnangenna mennang. Iyanaro saba'na makkekkuwangngé narigaukeng makkuwaéko ri Puwangnge. Iko sibawa sining tau Israélié riyabbéréyakko matu ri tau Filistingngé. Baja iko sibawa ana'-ana' worowanému maddeddungenno sibawa iyya; mala sininna tentara Israélié nabbéréyang towi matu Puwangnge lao ri tau Filistingngé.” Iyatoro wettué, narebba lénne Saul ri tanaé pada-pada nakennaé letté, saba' tasséleng senna'i méngkalingai ada-adanna Samuélro. Nainappani malemma senna'i, saba' siessoni siwenni dé' aga-aga nanré. Naddeppérini Saul iyaro sanroé sibawa naitani makkumani tauna; rimakkuwannanaro makkedani iyaro makkunraié lao ri aléna, “Puwakku, purani atatta mappésona untu' pogau'i aga naéllauwé Puwang. Jaji, sitinajai Puwakku naéngkalinga towi paréllaunna atatta; anréni céddé inanré iya maéloé napatala atatta kuwammengngi naulléi Puwang patterui joppana Puwang.” Massampéyangngi Saul sibawa makkeda makkedaé dé' namaélo manré. Iyakiya wettunna pegawé-pegawénnato dessa'i, turuni. Tettonni polé ri tanaé nanatudang ri panrung-panrungngé. Masitta'ni iyaro makkunraié géréi ana' sapinna iya macommo'é nanala labbu nanalamai, nainappa naébbu mancaji roti iya dé'é narragi. Purairo napatalani iyaro inanré lao ri Saul sibawa pegawé-pegawénna, nainappa mennang manré. Purairo laoni mennang iyatoro wennié. Napaddeppungenni tau Filistingngé sininna tentarana ri Afék, na tau Israélié makkémai ri seddéna mata uwai ri Lompo Yizreel. Iya lima arung Filistingngé majuni mabbarisi sibawa passéddiyang-passéddiyang iya tungke'-tungke'é polé risératu sibawa sisebbu tau; Daud sibawa ana' buwana mabbarisi ri monri silaong arung Akhis. Sining pallimana tau Filistingngé mitai mennang nainappa makkutana, “Iyaro sining tau Ibranié untu' aga kuwaé?” Nappébali Akhis, “Iyanaé Daud, pegawénna riyolo Arung Saul polé ri Israélié. Maitta-ittani monro ri iyya. Sipongenna lao ri iyya lettu essoéwé, dé'pa ulolongengngi pasala.” Iyakiya iyaro sining pallima Filistingngé macayii lao ri Akhis sibawa makkéda ri aléna, “Suroi iyaro tauwé lisu ri kota iya puraé muwéréngngi. Dé' nawedding mammusu silaong idi; ajakké nabali'bellariki matti ri tengnga-tengngana ammusurengngé. Tenniyaga iyaé kasempang iya kaminang makessingngé ri aléna untu' malai atinna arunna sibawa mpunoi ana' buwata? Uwaseng aléna Daud? Untu' aléna ritu naséré-séré riyolo sining makkunraié namakkélotto makkuwaé, ‘Purani nauno Saul massebbu-sebbu balié, iyakiya Daud mappulo-pulo sebbu.’ ” Nariyobbina Daud ri Akhis sibawa makkeda, “Mateppe'ka nasabbing Puwang iya tuwoé, makkedaé matinuluko ri iyya. Masennakka rékko weddikko ranrekka ri laleng ammusurengngéwé. Saba' sipongemmu engka ri iyya narapi wettuéwé, dé' ulolongengngi asalammu. Iyakiya iyaro sining arung laingngé dé' napojiko. Rimakkuwannanaro lisuno sibawa salama, sibawa aja' mupogau'i agi-agi iya mappaompoé cai ri mennang.” Nappébali Daud, “Asalang aga pura napogau' atatta, Datu? Rékko pada-pada adanna Datu, dé' nalolongeng Datu asalang muwi aga ri atatta sipongenna atatta mappammula tumaningiwi Datu lettu makkekkuwangngéwé, magi atatta dé' naripalalo mammusu méwai balinna Datu.” Nappébali Akhis, “Muwisseng makkedaé uwangga'ko matinulu pada-pada malaéka'na Allataala. Iyakiya iyaro sining pallimaé purani napettui makkedaé dé' naweddikko maccowé mammusu silaong idi. Rimakkuwannanaro Daud, baja iko maneng iya puraé salaiwi Saul namulao ri iyya, harusu'no moto maélé sibawa joppa masitta mompona muwa essoé.” Rimakkuwannanaro pappa bajana éléé, joppani Daud sibawa ana' buwana lisu ri wanuwa Filistin, na iyaro tentara Filistingngé joppani lao ri Yizreel. Masussa senna'ni ana' buwana Daud nasaba ateddéngenni ana'-ana'na sibawa bainéna mennang. Rimakkuwannanaro maéloni mennang genrungngi Daud sibawa batu. Jaji engkani Daud ri laleng asukkarakeng battowaé, iyakiya atinna ripéwatangiwi ri Puwang Allataala. Nakkeda Daud lao ri Imang Abyatar ana'na Ahimélékh, “Tiwii mai éfod-é!” Natiwini Abyatar iyaro éfod-é ri aléna. Nainappa makkutanani Daud ri Puwangnge, “Harusu'ka'ga lellungngi garembolang paggasaéro? Uwulléga rapii mennang?” Nappébali Puwangnge, “Ya, lellungngi; murapii matu mennang sibawa paleppe'i sininna tawanangngé.” Ri laleng allalengengngéro siruntu'i ana' buwana Daud sibawa séddi tau ana' worowané Maséré ri padangngé, naritiwina ri Daud. Riwérénni inanré sibawa ripaénung, makkuwatoro béppa buwa ara, sibawa duwattakké anggoro rakko. Purana manré, lisuni awatangenna paimeng; kaissengenni tellungngessoni dé' naanré sibawa dé' naénung! Nainappa makkutana Daud lao ri aléna, “Niga puwammu, sibawa polé kégako?” Nappebali iyaro ana'é, “Tau Maséré'ka, atanna séddié tau Amalé'. Nasalaika puwakku tellungngesso labe'é saba' malasaka. Puraki gasai daérana tau Krétié ri bagiyang yattanna Yéhuda sibawa daérana appanna Kaléb, sibawa puraki tunui gangka cappu kota Ziklag.” Nanakkutana Daud, “Maélokoga mantara'ka lao ri onronna garembolangngéro?” Nappébali, “Maéloka, assaleng majjanciwi Puwang ri iyya ri laleng asenna Allataala, makkedaé dé' taunoka Puwang iyaré'ga tabbéréyakka lao ri Puwakku.” Nariyantara'na mennang lao ri onronna garembolangngéro. Iyaro wettué, iyaro garembolangngé tassiya-siyani ri sininna onrongngéro, nanréto, ménung sibawa mappésta nasaba maégana barang rappa iya natiwié mennang polé ri wanuwa Filistingngé sibawa Yéhuda. Wettunna mompo essoé pappa bajana, riluruini mennang ri Daud, nammusuna narapi wenni. Rilaénnaé eppa datu kallolo iya lariyé sibawa tonangi unta, dé' muwi séddi bali iya mullééngngi leppe. Naulléni Daud paleppe'i sininna iya puraé narampasa tau Amalé'é, muttama'ni iya duwa bainéna; dé' muwi séuwa iya teddéngngé. Sininna ana' worowané sibawa makkunraié enrengngé sininna barang iya narampasa'é tau Amalé'é, nalani paimeng Daud. Ri lainnaéro narampasa towi Daud sininna bimbala'é sibawa olokolo'é. Iyaro sining olokolo'é narimpani ana' buwana Daud riyolo, massarang polé ri sininna barang rampasa iya laingngé, namakkeda mennang, “Iyaé attawangenna Daud!” Purairo lisuni Daud ri iya duwa ratu tau iya poso senna'é untu' maccowériwi, sibawa iya puraé nasalai ri wiring Salo Bésor. Naduppaini mennang Daud enrengngé ana' buwana, nariyaddeppérina ri Daud sibawa ribérésellengi mennang. Iyakiya ri yelle'na ana' buwana Daud iya silaongngé maccowériwi, engka maja sibawa mangowa. Makkedai mennang, “Iyaé sining tauwé dé' naccowé; jaji dé' nappunnai ha' lolongeng aga-aga polé ri barang rampasa'éro. Banna weddingngi mennang malai ana'na sibawa bainéna, nalao.” Iyakiya mappébaliwi Daud, “Saudara-saudaraku, aja' mukédo makkuwaro sibawa aga iya puraé nabbéréyang Puwangnge lao ri idi! Dé'ga napuraki nalinrungi sibawa nawéréng apakalang lao ri garembolang paddampo'éro? Jaji dé' muwi séddi tau wedding situjuiwi iyaro tangngaé! Harusu manengngi lolongeng bagiyang iya pada-padaé égana: tau iya monroé untu' jagaiwi barab-barangngé harusu'i lolongeng bagiyang iya padaé pada-pada tau iya majué mammusu.” Nainappa iyaro gau'é naébbuni Daud mancaji séddi peraturang, sibawa riturusi ri Israélié lettu makkekkuwangngé. Wettunna Daud lisu ri Ziklag, nakirinni sibagiyang polé ri barab-barang rampasa'éro lao risining pamimping kota-kotana Yéhuda iya puraé duwangngi, adanna, “Iyanaé hadiya untu' iko polé ri barang rampasa iya riyalaé polé ri balinna Puwangnge.” Na wettuéro mammusuni tau Filistingngé méwai tau Israélié ri Bulu Gilboa. Maéga tau Israél maté kuwaro, na iya laingngé, muttama'ni Saul sibawa ana'-ana' worowanéna larini. Iyakiya riyolaiwi ri tau Filistingngé na tellu tau polé ri ana'-ana' worowanéna Saulro maténi riyuno; iyanaritu Yonatan, Abinadab, sibawa Malkisua. Masero senna'ni ammusurengngé ri seddéna Saul, na aléna paimeng nakennani pana-panana balié angkanna masero lona. Namakkeda Saul lao ri kallolo iya tiwiéngngi senjatana, “Rampui peddammu namugajakka, kuwammengngi aja' nariyacculé-culéika sibawa riyunu risining tau iya temmissengngéngngi Puwang -ngéro.” Iyakiya iyaro kalloloé dé' namaélo gajangngi, nasaba napakalebbi senna'i. Rimakkuwannanaro nalani Saul peddanna nanaparebbai aléna ri yasé'na mata peddannaro. Wettunna naita iyaro kalloloé makkedaé maténi Saul, naparebba toni aléna ri yasé'na mata peddanna namaté ri benrénna Saul. Makkuwaniro Saul silaong iya tellu ana' worowanéna, sibawa sininna ana' buwana enrengngé kalloloéro maté riséddié essoro. Wettunna sining tau Israél iya monroé ri liwenna Lompo Yizreel sibawa seddé alauna Salo Yordan naéngkalinga makkedaé larini tentara Israélié, sibawa Saul enrengngé ana'-ana' worowanéna maténi, larini mennang salaiwi kota-kotana. Nainappa tau Filistingngé tudangiwi kota-kotaéro. Bajana wettunna polé tau Filistingngé untu' rampo'i sining ujué, naruntu'ni mennang Saul sibawa iya tellu ana' worowanéna maténi ri Bulu Gilboa. Narette'ni mennang ulunna Saul sibawa nalai waju musuna, nainappa kiring suro tau Filistingngé lao ri sininna wanuwa Filistingngé untu' palettu'i karéba madécéngngéro ri ra'ya'na sibawa déwatana. Nainappa iyaro waju musuna Saul nataroi ri laleng bola déwi Asytorét, na watakkaléna nappakuwangngi ri témbo'na kota Bét-Séan. Iyakiya pabbanuwana Yabésh ri Giléad naéngkalingai aga iya puraé napogau' tau Filistingngé lao ri Saul, nainappa sining tau iya kaminang baranié joppani polé kuwaro namallaleng puppu benni lao ri Bét-Séan. Napanonnoni mennang ujuna Saul sibawa ujuna ana'-ana' worowanéna polé ri témbo kotaéro nainappa natiwi ri Yabésh, nanatampungngi. Sininna buku-bukunna napaddeppungengngi sibawa natampungngi ri yawana aju tamariskaé ri kotaéro, nainappa mappuwasani mennang pitungngesso ittana. Maténana Saul, lisuni Daud polé ri ammusurengngé caui tau Amalé'é, nanaonro ri Ziklag duwangngeso ittana. Pappa bajanana, poléni séddi kallolo polé ri akkémanna Saul. Selaku tanrang mabbarata nasapé'ni pakéyanna sibawa taro tana ri ulunna. Laoni ri Daud sibawa suju' ri yolona. Makkutanani Daud, “Polé kégako?” Pappébalinna, “Leppe'i atatta polé ri akkémanna tau Israélié.” Nakkutana Daud, “Curitai aga pura kajajiyang!” Nappébali iyaro kalloloé, “Lariwi tentarata polé ri ammusurengngé, namaéga maté, muttama'ni Saul sibawa Yonatan.” Namakkutana Daud, “Pékkugi muwissengngi?” Pappébalinna, “Nasitujuwangngi engkaka ri Bulu Gilboa, nanasanré Saul ri bessinna, na karéta-karéta sibawa tentara makkinnyaranna balié, maddeppéni maélo keppungngi. Gilinni Saul limonri, nanaitai atatta, nanaobbii atatta, namappébali atatta, ‘Iyyé Puwakku.’ Makkutanani niga atatta, nanappaissengenni atatta makkedaé atattaé tau Amalé'. Namakkeda lao ri atatta, ‘Laono mai, namuwunoka! Malo ladde'ka, sibawa mawé'na maté.’ Nanaddeppérini atatta, nanaunoi atatta, saba' naissengngi atatta makkedaé rékko sempé'i nasaba dé'na naulléi tettonna, pasti maté mutowi. Nainappa nala atatta passigera polé ri ulunna sibawa potto ri taiyyana, nanatiwii mai atatta lao ri Puwakku.” Naéngkalinganaro nasapé'ni Daud pakéyanna nasaba masarai, na sininna ana' buwana pogau' towi makkuwaéro. Mpatinni mennang sibawa mabbarata nenniya mappuwasa narapi wenni untu' Saul sibawa Yonatan, sibawa untu' ra'ya' Israélié, umma'na Puwangnge, saba' maéga senna iya maté ri laleng ammusurengngéro. Nainappa makkutana Daud ri kallolo iya tiwiéngngi karébaéro, “Polé kégi assalemmu?” Pappébalinna, “Atattaé tau Amalé', séddiwi topolé-polé ri wanuwanna Puwakku.” Nakkeda Daud, “Barani senna'ko mpunoi arung napiléna Puwangnge!” Nainappa naobbi sala séddinna polé ri ana' buwana nanaparéntangngi, “Unoiro!” Iyaro tauwé nawettani iyaro kallolo Amalé'é gangka maté. Nakkeda Daud lao ri kallolo Amalé'éro, “Iko muto patakkennai pahukkungeng matéwé ri alému sibawa mangakuiwi makkedaé purai muwuno arung iya napilé Puwangnge!” Purairo napuwélonni Daud iyaé mpatingengngé untu' Saul sibawa Yonatan, sibawa mapparéntangngi kuwammengngi iyaéro élongngé riyappagguruwangngi lao ri suku Yéhuda. (Iyaéro élongngé tarokii ri laleng Kitta Yasar.) “Israél, ri bulu-bulumu, kuwaro maténi pahlawangngé, sining ana'na wanuwaé, maruttunni mennang selaku bungana bangsaé. Tennapodo sining tau Gat-é dé' naéngkalingai iyaro karébaé. Tennapodo lorong-loronna Askélon dé' nalolongeng karéba passalennaro. Aja' narapii makkunrai Filistingngé gora-gora aja' narapii makkunrai kapéré'é kelli-kelli marowa. Eh bulu-bulu Gilboa, éngkalingai pangobbiku: Aja' narapii cinoddoé sibawa bosié rica'ko! Leppessanni marakko sibawa makabuttu dare sibawa padammu. Saba' kuwaniro rappé kaliyawona pabbaranié. Nataiseng tona kaliyawona Saul tenriminnyaki. Panana Yonatan mamoso, pauno. Peddanna Saul dé' naissengngi maddampeng mpunoi musué, paccappui balié. Saul sibawa Yonatan, makkuwamani bessana sibawa riyamaséi; tuli masséddiwi ri laleng atuwongngé sibawa amaténgngé; lebbi masitta'i mennang naiya kuwajangngé, lebbi mawatangngi naiya singa loloé. Eh, makkunrai Israélié, watingini Saul, arungngé! Iya pappakéiyékko waju cella iya masulié, sibawa bélo-béloiko sibawa ulaweng paramata iya magelloé. Maténi sining pahlawangngé, sempé ri ammusurengngé sibawa ri bulu-bulu masino-sinoé Yonatan lenro, matojo. Yonatan, éh saudaraku, messé atikku, saba' mangke senna'ko ri aléku. Malebbi senna pammasému lao ri iyya, mala nacau pammaséna makkunraié. Maténi sining pahlawang bangsaé. Siya-siyani senjatana mennang!” Purairo makkutanani Daud lao ri Puwangnge, “Napuwéloga Puwangnge laoka makuwasaiwi sala séddinna kotaé ri Yéhuda?” Nappébali Puwangnge, “Ya.” Nakkutana Daud, “Kota kéga?” Nappébali Puwangnge, “Hébron.” Nalaona Daud ri Hébron silaong iya duwa bainéna: Ahinoam makkunrai Yizreel sibawa Abigail jandana Nabal iyanaritu makkunrai Karmél. Makkuwatoro ana' buwana sibawa kaluwargana tungke'-tungke' maccowéni ri Daud, namattette'na mennang ri Hébron sibawa seddéna. Nanalaona sining tau Yéhudaé ri Hébron sibawa lanti'i Daud mancaji arung ri Yéhuda. Wettunna naéngkalinga Daud makkedaé sining tau Yabésh-é ri Giléad purani nakuburu ujuna Saul, kirinni suro lao kuwaro sibawa palettu paseng, “Tennapodo Puwangnge barakkakiko, nasaba purani muwappaitang atinuluremmu lao ri arummu sibawa tampungngi ujuna. Rimakkuwannanaro, tennapodo Puwangnge mappaitangngi pammaséna sibawa atinuluren-Na lao ri iko. Maélo tokka gaurekko sibawa makessing nasaba pangkaukemmuro. Pakkasse'ni atimmu sibawa tinda'no selaku pahlawang! Saul, arummu mémeng maténi, iyakiya purani nalanti'ka sining tau Yéhudaé mancaji arunna mennang.” Pallima tentarana Saul, iyanaritu Abnér ana' Nér, larini silaong Isybosét ana' Saul, lao ri Mahanaim ri liwenna Salo Yordan. Kuwaniro Abnér nakka Isybosét mancaji arung ri daéra-daéra Giléad, Asyuri, Yizreel, Efraim sibawa Bényamin, mala ri sininna Israélié. Patappulo taung umuru'na Isybosét wettunna ripancaji arung ri Israélié, namapparéntai duwattaung ittana. Iyakiya suku Yéhudaé tette'i matinulu lao ri Daud, na Daud mapparéntai ri Hébron ri Yéhuda pituttaung sitengnga ittana. Riséuwaé esso laowi Abnér polé ri Mahanaim lao ri kota Gibéon, risilaongeng ri ana' buwana Isybosét. Makkuwatoro Yoab (indo'na riyaseng Zéruya), silaong ana' buwana Daud mattuju ri kotaéro. Iya duwa regu siyéwaéro siyolongngi ri kullang Gibéon; Abnér sibawa ana' buwana tudang ri liweng kumaiyé, Yoab sibawa ana' buwana ri liweng kuwaro. Nakkedana Abnér lao ri Yoab, “Ayo, tasuroi ana' buwata mattanding!” Nappébali Yoab, “Makessinni.” Namajuna seppulo duwa tau polé ri suku Bényamin iya wakkélékiyéngngi Isybosét, sibawa seppulo duwa polé ri ana' buwana Daud. Tungke'-tungke' mennang sisullé sittikkeng gemme sisullé sigajang babuwana balinna, angkanna pada maténi mennang. Iyanaro saba'na iyaro onrongngé ri Gibéon nariyaseng “Dare Peddang”. Purananaro kajajiyanni musu maseroé, na Abnér sibawa tentara Israélié ricauni ri ana' buwana Daud. Iya tellu ana'na Zéruya engkai kuwaro, iyanaritu Yoab, Abisai sibawa Asaél. Larinna Asaél magatti pada-pada jongaé, nanalellunni Abnér matteru-teru. Nagiling Abnér limonri sibawa makkutana, “Ikoga Asaél?” Nappébali, “Iyyé.” Nakkeda Abnér, “Aja' mulellukka. Cobani tikkengngi sala séddinna tau polé risining prajuri'éro namuwalai sanjatana!” Iyakiya matteru mupi Asaél lellungngi. Siseppi Abnér makkeda ri aléna, “Aja' mulellukka! Tarapassaka matu mpunoko. Jaji, pékkugi weddikka mitai tappana Yoab kakamuro?” Wettunna tette'i Asaél dé' namaélo mappésau, mabbessini Abnér limonri, nanakennai babuwana Asaél gangka bettu iyaro bessié ri lekke'na. Namabuwanna Asaél sibawa maté ri onrongngéttoro. Sininna tau iya laowé ri onrong nalénnekiyéro, mappésauni kuwaro. Iyakiya Yoab sibawa Abisai napatterui lellungngi Abnér. Wettunna labu essoé, lettu'ni mennang ri Bulu-bulu Ama, iya engkaé ri seddé alauna Giah, mattujué ri padang kessi Gibéon. Kuwaniro sining tau polé ri suku Bényamin masséddi sibawa Abnér, nainappa naatoro barisi'na mennang ri tompo'na séddié bulu-bulu. Polé kuwaro gorani Abnér lao ri Yoab, “Harusu'ki'ga tuli mammusu? Dé'ga mumainge makkedaé iyaé musué banna tiwii apaireng? Idi'é saudara sibangsamu. Siyagapi ittana maéloko mattajeng ri wettu dé'napa muparéntangngi ana' buwamu kuwammengngi nappésau lellukki?” Nappébali Yoab, “Nasabbing Allataala iya tuwoé, ébara'na dé' mupammulaiwi mabbicara, pasti ana' buwaku matterui lellukko narapi baja éléé.” Nainappa naseppung Yoab tarompé'é selaku tanrang lao ri ana' buwana kuwammengngi nappésau lellungngi tau Israélié, nappésauna ammusurengngéro. Abnér sibawa ana' buwana puppu benni mabbarisi molai Lompo Yordan, nainappa malléttoiwi Salo Yordan, najoppanana puppu esso bajana, lettu'ni mennang ri Mahanaim. Mappésaunnana Yoab lellungngi Abnér, napaddeppungenni sininna ana' buwana. Ri lainnaé Asaél annessana engka seppulo aséra polé ri mennang teddéng. Ana' buwana Daud purani nauno 360 tau pasukanna Abnér polé ri suku Bényamin. Purairo nakkani Yoab silaong ana' buwana ujuna Asaél nanakuburu'i ri laleng kuburu kaluwargana ri Bétléhém. Nainappa mennang joppa puppu benni nalettu ri Hébron ri subué. Ammusurengngé ri yelle'na iya sokongngéngngi kaluwargana Saul sibawa iya sokongngéngngi Daud matterui kajajiyang. Pédé mawatangngi Daud, na balinna pédé malemmai. Ana'-ana' worowanéna Daud iya najajiyangngé ri Hébron iyanaritu mangoloéwé situru ajajiyanna: Amnon. Indo'na iyanaritu Ahinoam polé ri Yizreel. Kiléab. Indo'na iyanaritu Abigail, jandana Nabal polé ri Karmél. Absalom. Indo'na iyanaritu Maakha, ana'na Arung Talmai polé ri Gésur. Adonia. Indo'na iyanaritu Hagit. Séfaca. Indo'na iyanaritu Abital. Yitram. Indo'na iyanaritu Egla. Iya enneng ana' worowanéro rijajiyangngi ri Hébron. Ri wettu matteruna mupa musué ri yelle'na iya sokongngéngngi Daud sibawa iya sokongngéngngi kaluwargana Saul, makkuragani Abnér kuwammengngi napangarunna pédé battowa ri yelle'na sining iya sokongngéngngi Saul. Riséuwaé esso Isybosét, ana' worowanéna Saul, teppui Abnér lusérengngi séddi gundi'na Saul iya riyasengngé Rizpa ana' Aya. Namacai senna'na Abnér namakkeda, “Naseggi Puwakku iyya'é ubali'bellariwi Saul sibawa maccowé ri Yéhuda? Pammulanna mupa umatinulu lao ri Saul ambo'na Puwang, sibawa lao ri sumpulolona enrengngé sellao-sellaona. Purani utulung Puwakku angkanna dé' naricau ri Daud. Namuni makkuwaro napakatunaka Puwakku banna nasaba persoalang makkunrai! Dé' nappébali Isybosét muwi silappa ada, nasaba métaui ri Abnér. Nanakirinna Abnér suro lao ri Daud iya engkaé ri Hébron wettuéro, sibawa tiwi paseng, “Niga matu makuwasaiwi tanaéwé? Ebbuno assijancing sibawa iyya, naubantui matu Puwakku kuwammengngi sininna bangsa Israélié maccowéi ri Puwakku!” Nappébali Daud, “Makessinni! Palettukengngi pasengngéwé lao ri Abnér: Maéloka mébbu assijancing sibawa iko, iyakiya sibawa séddi sara': Mikhal, ana'na Saul, harusu'i mutiwi lao ri iyya rékko poléko mangolo ri iyya.” Purairo kiring toni Daud suro lao mangolo ri Isybosét, sibawa tiwi paseng, “Sitinajai Puwang palisui Mikhal, bainéku, lao ri iyya. Purani uwelli sibawa sératu oli assunnakenna tau Filistingngé.” Nanasuroni Isybosét surona malai Mikhal polé ri lakkainna, iyanaritu Paltiél ana' Lais. Iyakiya Paltiél matterui maccowériwi Mikhal naterito. Wettunna mennang lettu ri kota Bahurim, makkedani Abnér lao ri aléna, “Sikuna, lisu bawanno!” Nanalisuna Paltiél. Naiyaro wettué barundinni sibawa sining tomariyolona Israélié sibawa makkeda, “Maittani muwélorinna Daud mancaji arummu. Nah, iyanaé kasempatammu. Engngerangngi, pura majjanciwi Puwangnge lao ri Daud, makkedaé Maéloi pakéi Daud untu' passalama'i umma'-Na Israélié polé ri tau Filistingngé sibawa polé ri sininna balinna iya laingngé.” Barunding toni Abnér sibawa sining tau Bényamingngé, nainappa lao toni ri Hébron untu' paissengiwi Daud aga iya puraé nasitujui tau Bényamingngé sibawa tau Israéliéro. Wettunna Abnér silaong duwappulo ana' buwana mangolo ri Daud ri Hébron, pakangkani Daud pésta untu' mennang. Purairo massimanni Abnér sibawa makkeda, “Palalona lao untu' pakédoi sininna Israélié kuwammengngi nasséddi sibawa Puwakku. Maéloi mennang tarimai Puwakku selaku arung, nanallalengiwiro mapparéntai matu Puwakku ri sininna wanuwaé, situru élona Puwakku.” Naripalalona Abnér lao ri Daud enrengngé ritanggung asalamakenna. Laonana Abnér, Yoab silaong ana' buwana Daud iya laingngé lisuni polé ri ammusurengngé sibawa tiwi maéga barang rirampasa. Ripaissengini Yoab makkedaé poléni Abnér mangolo ri Arung Daud sibawa ripalaloi lao sibawa ritanggungngi asalamakenna. Namangolona Yoab ri arungngé sibawa makkeda, “Pékkugi tindakanna Daturo? Poléni Abnér mangolo ri Datu. Magi Datu napalaloi lao makkuwaro bawang? Pasti naisseng Datu makkedaé iyaro apolénna Abnér banna untu' belléi Datu, sibawa untu' missengngi keadaangngé nenniya sininna rancanana Datu.” Nasalainnana Daud, kirinni Yoab suro untu' mobbii Abnér. Naolaini mennang Abnér lettu ri seddéna bujung Sira, nainappa natiwi mennang lisu. Iya manennaro kajajiyangngi tennaisseng Daud. Lettu'na muwa Abnér ri Hébron, riérani ri Yoab libenréng, ri seddéna pintu gerbangngé, samanna maéloi mabbicara séuwa iya rahasiyaé. Tappa nagajang muni Yoab babuwana Abnér gangka maté. Makkuwaniro Abnér maté riyuno ri Yoab untu' mpale'i abbunowanna lao ri Asaél anrinna. Wettunna naéngkalinga Daud iyaro gau'é, makkedani, “Naisseng Puwangnge makkedaé iyya sibawa ra'ya'ku dé' sises-siseng napasala ri laleng abbunowangngé lao ri Abnér. Leppessanni Yoab sibawa sininna kaluwargana rihukkung nasaba pangkaukengngéro. Tennapodo ri laleng kaluwargana Yoab massossoreng tuli engka tau iya nakennaé lasa oli iya mappakatau-taué, iyaré'ga worowané iya dé'é pakkullénna, iyaré'ga maté ri laleng ammusurengngé iyaré'ga iya akurangengngé anré!” Makkuwaniro Yoab sibawa Abisai anrinna, makkabale lao ri Abnér nasaba Abnér pura mpunoi Asaél anrinna ri laleng ammusurengngé ri Gibéon. Nariparéntanna Yoab ri Daud sibawa ana' buwana kuwammengngi nasapé'i pakéyanna mennang, sibawa paké pakéyang mabbarata nenniya watingiwi Abnér. Na wettunna naantara ujuna, aléna Arung Daud joppa ri munrinna petti ujué. Rikuburu'ni Abnér ri Hébron, na arungngé nenniya sininna ra'ya'é teringiwi sibawa macenno ri yolona kuburu'éro. Purairo mpatinni Daud untu' Abnér, adanna, “Harusu'ga Abnér maté selaku tau donggo: dé' natassiyo limanna, sibawa ajéna dé' naribalenggu? Matéi rigajang ri tau majaé sibawa mabecco'é.” Nainappa sininna ra'ya'é teringiwi Abnér pédé maloppo. Puppu esso tauwé makkuraga palécéi Daud kuwammengngi nanré céddé, iyakiya mattanroi, “Memmuwaré Allataala mpunoka, rékko manréka ri wettu dé'napa nalabu essoé!” Naéngkalinganaro masennanni ra'ya'é. Mémeng, agi-agi iya napogau'é Arung Daud, mébbui atinna mennang masennang. Iyaro essoé sininna ra'ya'na Daud sibawa sininna bangsa Israélié napahanni, makkedaé dé' napuwéloi arungngé iyaro abbunowangngé lao ri Abnér. Nakkeda arungngé lao risining pattinrona, “Dé'ga muwissengngi makkedaé iyaé essoé séddi pamimping battowa ri Israél maténi? Namuni iyya arukka iya napilé Allataala, iyakiya makkekkuwangngé marasa malemmaka. Iyaro ana'-ana'na Zéruya mabecco senna. Dé' uwulléi kuwasaiwi mennang. Tennapodo Puwangnge hukkungngi sining tau majaéro, situru sibawa pangkaukenna mennang!” Iya duwa tau parawiraéro, iyanaritu Rékhab sibawa Baana joppani lao ri bolana Isybosét nalettu kuwaro ti tangassoé, wettunna matinro esso Isybosét. Makkunrai panganrowang bolaé cakkaruddui wettunna pépaccingiwi gandongngé, namatinro. Rimakkuwannanaro Rékhab sibawa Baana naulléi muttama. Matteruni mennang muttama ri bili' atinrong iya naonroiyé Isybosét matinro memme, nanagajangngi gangka maté. Narette'ni mennang ulunna nanatiwii lao. Puppu benni mennang joppa molai Lompo Yordan. Nainappa mennang nabbéréyang ulunna Isybosét lao ri Daud ri Hébron nakkedato, “Iyanaé ulunna Isybosét ana'na Saul, balinna Datu iya makkuragaé maélo mpunoi Datu. Iyaé essoé Puwangnge pura mpale'i pangkaukenna Saul sibawa wija-wijanna lao ri Datu.” Iyakiya mappébaliwi Daud, “ Puwang iya tuwoé, iya puraé passalama'ka polé ri sininna abalaé, naisseng makkedaé iya maéloéwé upowada tongeng. Wettunna ri Ziklag engka tau powadakka passalenna amaténna Saul, nasengngi aléna tiwii karéba madécéng. Iyakiya utikkengngi sibawa uwunoi. Iyanaro saro uwéréngngi selaku pamale'na lao ri karéba iya natiwié. Temmaka lebbi tane'na pasi pahukkungeng iya maéloé upakennaiwi tau maja iya puraé mpunoi tau iya dé'é napasala sibawa iya matinroé ri bolana muto! Makkekkuwangngé utuntu'i pamale'na ri iko nasaba abbunowangngéro, enrengngé pallennye'ko polé ri yasé'na linoéwé!” Purairo napparéntanni Daud ri ana' buwana untu' mpunoi Rékhab sibawa Baana. Puranana riyuno, rirette'ni limanna sibawa ajéna mennang narigattung ri seddé kolangngé. Iyakiya ulunna Isybosét riyalani narikuburu ri kotaéro ri laleng kuburu'na Abnér. Purairo poléni sininna pamimpinna suku-suku Israélié ri Daud ri Hébron sibawa makkeda, “Idi'é siyajinna mupa Datu. Riyolopa nariyolo, mala wettunna mupa Saul paréntaki, Datuto pimpingngi tentara Israélié tungke' mennang maju mammusu, nainappani pura majjanciwi Puwangnge lao ri Datu makkedaé Datu ritu iya pimpingngéngngi matu umma'na sibawa mancaji arunna mennang.” Mébbuni Daud assijancing sibawa sining pamimping Israéliéro, nainappa nalanti mancaji arunna Israélié. Telluppulo taung umuru'na Daud wettunna mancaji arung, namapparéntai patappulo taung ittana. Ri Hébron naparéntai Yéhuda pituttaung sitengnga ittana, sibawa ri Yérusalém naparéntai sininna Israélié sibawa Yéhuda telluppulo tellu taung ittana. Riséuwaé esso Arung Daud sibawa ana' buwana joppani maélo gasai Yérusalém. Tau Yébus-é pabbanuwana kotaéro, nasengngi makkedaé dé' naulléi matu Daud caui Yérusalém. Rimakkuwannanaro makkedani mennang ri aléna, “Dé' muwulléi matu muttama kumaiyé; muwi sining tau buta sibawa sining tau képpang naulléto paddésu'ko.” Pédé maitta Daud pédé mawatang, nasaba Puwang, Allataala Iya Pommakuwasaé tulungngi. Arung Hiram polé ri wanuwa Tarsus kiringngi duta-dutana lao ri Daud, makkuwatoro aju camara Libanon sibawa sining tukang kajué enrengngé sining tukang batué untu' patettong saoraja. Rimakkuwannanaro mateppe'ni Daud makkedaé Puwangnge pura pakkasse'i selaku arunna Israélié, sibawa pakkasse'i akkarungenna untu' apentingenna umma'na Puwangnge. Létté'nana Daud polé ri Hébron lao ri Yérusalém, napubainési siyagangngaré makkunrai untu' gundi'na; nanatattambana ana'-ana' worowanéna sibawa makkunrainna. Ana'-ana' worowanéna iya rijajiyangngé ri Yérusalém iyanaritu: Syamua, Sobab, Natan, Salomo, Yibhar, Elisua, Néfég, Yafia, Elisama, Elyada sibawa Elifélét. Wettunna naéngkalinga tau Filistingngé makkedaé mancajini Daud arunna Israélié, poléni mennang maélo tikkengngi. Iyakiya naéngkalingai Daud gau'éro nalao ri bénténgngé. Lettu'ni tau Filistingngé ri Lompo Réfaim sibawa tudangiwi. Makkutanani Daud ri Puwangnge, “Harusu'ka'ga gasai tau Filistingngéro? Aga Muwérékka matu apakalang?” Nappébali Puwangnge, “Gasani! Uwérékko matu apakalang!” Nanalaona Daud ri Baal-Pérasim nakkuwaniro nacau pasukang Filistingngéro. Namakkeda, “ Puwangnge pura leppoi attahangenna balikku, pada-pada lémpe'é ruttungngi séuwa-séuwaé ri laleng sikédé.” Iyanaro saba'na nariyaseng iyaro onrongngé Baal-Pérasim. Larini pasukang Filistingngé tennarapini tiwii dato'-dato' barahalana. Iyaro dato'-dato'é nalani Daud sibawa ana' buwana. Dé' namaitta rimunrinna polési tau Filistingngé tudangiwi Lompo Réfaim. Siseppi Daud méllau panunju ri Puwangnge. Nappébali Puwangnge, “Aja' mugasai mennang polé kuwaé, iyakiya joppano maccenné namugasai polé ri munri, ri seddéna ajukajung murbéié. Rékko muwéngkalingani oni pada-padaé akka ajé tau mabbarisi'é ri coppo'na ajukajungngéro, majuno, saba' maélo-Ka joppa ri yolomu untu' caui tentara Filistingngé.” Napogau'ni Daud aga iya napparéntangngé Puwangnge, nanaulléni pasoroi tau Filistingngé polé ri Géba lettu ri Gézer. Nainappa naobbisi Daud prajuri-prajuri iya pommakessingngé ri Israélié kuwammengngi naddeppungeng, jumellana 30.000 tau. Napimpinni mennang mattuju ri Baalé-Yéhuda, untu' malai polé kuwaro Petti Assijancingngé iya riteppué sibawa asenna Puwang Pommakuwasaé iya makkarungngé ri yasé'na kérub-kérub-é. Iyaro Petti Assijancingngé nalai polé ri bolana Abinadab ri tompo bulu-bulué nanapaénré'i ri laleng padati barué. Nainappa Uza sibawa Ahio, ana'-ana'na Aminadab tinrosiwi iyaro padatié; Uza joppa ri bénrénna, sibawa Ahio joppa ri yolona. Daud sibawa sininna bangsa Israélié joppa ri yolona Pettiéro naséré-séréto siullé-ulléna sibawa makkélok-kélong untu' pakalebbii Puwangnge. Macculé kacapiwi mennang, gambusu, rabana, kelentingan sibawa simbal. Wettunna mennang lettu ri onrong addésekeng gandong appunnangenna Nakhon, saping iya gettengngéngngi iyaro padatié tabbuttui, nanaloro'ni Uza limanna nanakkatenningngi iyaro Petti Assijancingngé kuwammengngi aja nasempé. Iyatoro wettué namacai Puwang Allataala lao ri Uza, nasaba iyaro pangkaukenna sinrupai pappakatuna lao ri Puwangnge. Naunoi Uza ri onrongngéro, ri seddéna Petti Assijancingngé. Nappammula wettuéro nariyaseng iyaro onrongngé Pérés-Uza. Macaini Daud nasaba Puwangnge mpunoi Uza. Iyakiya métau towi Daud ri Puwangnge sibawa makkeda, “Makkekkuwangngé pékkugini Petti Assijancingngéro weddingngi utiwi?” Rimakkuwannanaro dé'na namaélo tiwii Petti Assijancingngéro ri Yérusalém, sangadinna nataroi ri bolana Obéd-Edom tau Gat. Iyaro Petti Assijancingngé monroi kuwaro tellumpuleng ittana, na Puwangnge barakkakiwi Obéd-Edom sibawa kaluwargana. Naéngkalingani Arung Daud makkedaé Puwangnge barakkakiwi kaluwargana Obéd-Edom sibawa sininna appunnangenna nasaba Petti Assijancingngéro. Nanalaona ri bolana Obéd-Edom, malai Pettié untu' palétté'i lao ri Yérusalém sibawa ramé-ramé battowa. Wettunna sining tau iya makkaéngngi iyaro Petti Assijancingngé joppani enneng jongkana, nasuroi Daud mennang mappésau. Nainappa makkasuwiyangeng akkarobangeng lao ri Puwangnge, iyanaritu saping lai sibawa ana' saping iya ripakacommo'é. Nainappa Daud séré-séré sibawa penno sumange untu' pakalebbii Puwangnge. Iyaro wettué banna pakéi lipa lénang mapodang iya risiyoé ri babuwaé. Makkuwaniro Daud sibawa sininna ra'ya' Israélié palétté'i Petti Assijancingngéro lao ri Yérusalém, riyaccowéri gora-gora sibawa oni tarompé. Wettunna iyaro Pettié ritiwi muttama ri laleng kota, Mikhal ana'na Saul célléng polé ri tellongengngé nanaitai Arung Daud luppe-luppe sibawa séré-séré untu' pakalebbii Puwangnge, namajana péneddinna Mikhal mitai Daud. Iyaro Petti Assijancingngé napalénne'i ri onronna ri laleng kéma iya puraé napasang Daud untu' Pettiéro. Nainappa makkasuwiyang Daud akkarobangeng ritunu sibawa akkarobangeng pappasidamé lao ri Puwangnge. Nainappa nabarakkaki ra'ya' Israélié sibawa asenna Puwang Iya Pommakuwasaé. Nainappa mattawa-tawangngi inanré lao ri iya maneng mennang. Tungke' tau iya engkaé kuwaro muwi worowané iyaré'ga makkunrai nawéréngngi sikare' juku panggang, roti sibawa béppa kismis. Purairo lisu manenni mennang ri bolana tungke'-tungke'. Wettunna Daud lisu ri saorajaé untu' bérésellengiwi kaluwargana, massuni Mikhal duppaiwi Daud sibawa makkeda, “Iyaé essoé arunna Israélié tonget-tongengngi naébbu aléna malebbi! Purani mallusu-lusu pada-pada tau dongo'é iya dé'é naissengngi masirié ri yolona ata-ata makkunrai appunnangenna sining pegawénna saorajaé!” Nappébali Daud, “Séré-séréka untu' pakalebbii Puwangnge, iya puraé sampéyangngi ambo'mu nenniya kaluwargana, nainappa napiléka mancaji pamimpinna Israélié, umma'-Na. Rimakkuwannanaro maéloka matteru séré-séré untu' pakalebbii Puwangnge. Mala sadiyaka ripakatuna lebbi naiyaro onna. Weddikko muwita mariyawaka, iyakiya ata-ata iya muteppué onna, pakalebbika matu!” Mikhal, ana'na Saulro dé' naémmana gangka tuwona. Puwangnge linrungiwi Arung Daud polé ri sininna gangguwang balinna, angkanna weddingngi mattette ri laleng saorajana. Namakkedana arungngé lao ri Nabi Natan, “Itani, iyya'é monroka ri saoraja iya riyébbué polé ri aju camara Libanon, padahal Petti Assijancinna Allataala banna ritaroi ri laleng kémaé bawang!” Nappébali Natan, “Pogau'ni sininna niya'na Datu, saba' Puwangnge tulungngi Datu.” Iyakiya iyaro wennié makkedai Puwangnge lao ri Natan, “Laono namupalettukengngi atak-Ku Daud pasek-Kué, ‘Masa Iko patettongek-Ka bola. Sipongenna Upaleppe bangsa Israélié polé ri Maséré lettu makkekkuwangngé, dé'pa naéngka Uwonro ri laleng séddié bola, sangadinna tuli sollé sibawa monro riséddié kéma. Ri laleng sollérekkuro silaong bangsa Israélié, dé'pa naengka Uwakkutana lao risining pamimping iya puraé Upilé, aga saba'na mennang dé' napatettongek-Ka bola polé ri aju camara Libanongngé.’ Rimakkuwannanaro, Natan, paissengiwi atak-Ku Daud, makkedaé Iyya, Puwang Iya Pommakuwasaé, makkeda lao ri aléna, ‘Purano Uwala polé ri jama-jamammu makkampi bimbala ri padangngé sibawa Uwakka mancaji arung ri umma'-Ku Israélié. Purano Usibawang kégi-kégiko lao, sibawa sininna balimmu purani Upaccappu ri wettummu mammusu. Uwébbuko matu tarompo pada-pada sining pamimping iya kaminang battowaé ri linoé. Mancajika matu ambo'na, na aléna mancaji matu ana'-Ku. Rékko pasalai, Uhukkungngi matu pada-pada séddié ambo' hukkungngi ana'na. Iyakiya Iyya tette'ka matu pogau'i makessingngé lao ri aléna situru sibawa jancik-Ku. Jancik-Ku lao ri aléna tette'i Uwakkatenning, dé' napada iya Upogau'é lao ri Saul iya puraé Upaésa polé ri tudangenna kuwammengngi weddikko mancaji arung. Tuli mappunnaiko matu wija-wijanna, sibawa Uwébbui matu akkarungemmu mattahang mannennungeng. Untu' mannennungeng séddi polé ri wija-wija, mapparéntai matu selaku arung.’ ” Nainappa Natan paissengiwi Daud sininna iya puraé ripannessangengngi ri Allataala. Namuttama'na Daud ri laleng Kémana Puwangnge. Tudanni namassempajang, “Oh Puwang Iya Pommatanré, iyya sibawa kaluwargaku dé' nasitinaja tarimai sininna akessingeng iya Muwappaitangngé lao ri iyya labe'éwé. Mala Mupogau'i lebbi na iyaro, oh Puwang Iya Pommatanré; pura-Ko mébbu assijancing passalenna wija-wijakku untu' wettu mangoloé. Namuwappaitangngi gau'éro lao ri iyya, namuni iyya banna tolino, oh Puwang Iya Pommakuwasaé! Agapi wedding upowada lao ri Iko? Muwisseng manengngi passalenna atam-Muwé. Nasaba jancim-Mu sibawa nasaba élomu muto mupogau'i pangkaukeng-pangkaukeng battowaéro untu' paggurui atammué. Battowa tongekko, oh Puwang Allataala! Banna Iko ritu Allataala, dé'gaga iya padaé sibawa Iko. Riissengngi gau'éro saba' purani riyappaissengeng riyolopa nariyolo. Ri sininna linoé dé' gaga bangsa pada-padanna Israélié. Israélié alé-aléna bangsa iya puraé Mupaleppe polé ri angatangengngé untu' mancaji umma'-Mu. Sininna pangkaukeng battowaé sibawa makalallaing iya Mupogau'é untu' mennang, mébbui asem-Mu kalabba ri sininna linoé. Bangsa-bangsa laingngé silaong déwata-déwatana purani Mupaddésu wettunna umma'-Mu maju mammusu. Purani Mupancaji bangsa Israélié umma'-Mu untu' mannennungeng, sibawa Iko oh Puwang, mancaji Allataalana mennang. Na makkekkuwangngé, oh Puwang Allataala, tapakkasse'ni untu' mannennungeng janci iya Mupowadaé passalenna aléku sibawa wija-wijakku. Tapogau'ni aga iya puraé Muwajjanciyanro. Kégi-kégi tuli napakarajai matu tauwé asem-Mu sibawa makkeda, ‘ Puwang Iya Pommakuwasaé iyanaritu Allataala ri Israél.’ Na untu' mannennungeng séddi polé ri wija-wijakku mapparéntai matu selaku arung ri bangsaéwé. Puwang Iya Pommakuwasaé! Uwabbaraniyangngi aléku paénré'i iyaé sempajangngéwé ri Iko, saba' alé-Mu muto pura paissengika makkedaé ana' eppoku massossoreng Mupancajiwi arung ri bangsaéwé. Oh Puwang Iya Pommatanré, Iko ritu Allataala; sininna jancim-Mu Murupaiwi, na gau' iya magelloéro purani Mujanciyakka. Rimakkuwannanaro, uwéllauwi, tabarakkakini wija-wijakku kuwammengngi mannennungengngi mennang tette napéneddingi pammasé-Mu. Oh Puwang Iya Pommatanré, iya manennaro purani Muwajjanciyang, na wija-wijakku tette'i matu Mubarakkaki untu' mannennungeng.” Siyagangngaré wettu ri monrinna nagasani Arung Daud tau Filistingngéssi. Nacauni mennang sibawa nasittaiwi tanana mennang. Nacau towi Daud tau Moab-é. Nasuroi mennang léwu ri tanaé, nainappa nauno duwa tau ri yelle'na tellu tau. Jaji, tunru'ni tau Moab-é lao ri Daud sibawa makkamaja pakkasuwiyang lao ri aléna. Nacau towi Daud Arung Hadadézer ana' Réhob iya mapparéntaé ri Zoba, iyanaritu séuwa akkarungeng ri seddéna Damsyik. Iyaro wettué mattengngangngi Hadadézer ri laleng allalengengngé maélo palisui akuwasanna ri daéra seddéna ulunna Salo Efrat. Natawanni Daud 1.700 tau tentara makkinnyaranna sibawa 20.000 tau tentara mallalenna. Naképoni sininna anyarangngé, sangadinna sibagiyang, genne untu' seratu karéta musu. Kirinni tentara tau Siriaé polé ri Damsyik untu' duwangngi Arung Hadadézer. Iyakiya Daud caui mennang sibawa mpunoi 22.000 tau polé ri mennang. Nainappa Daud patettong akkémang-akkémang tentara ri laleng daérana mennang, natunru'na mennang sibawa makkamaja pakkasuwiyang lao ri aléna. Puwangnge mpéréngngi apakalang Daud kégi-kégi mammusu. Kaliyawo-kaliyawo ulaweng iya napaké Hadadézer narampasa'ni Daud sibawa natiwii ri Yérusalém. Ri lainnaéro mala towi Daud gessa maéga senna polé ri Bétah sibawa Bérotai, kota-kota iya nakuwasaiyé riyolo Hadadézer. Naéngkalingani Arung Tou polé ri Hamat makkedaé nacauni Daud sininna tentarana Hadadézer. Nanasuroni Yoram ana' worowanéna untu' palettu selleng ri Arung Daud sibawa passalama'i nasaba apakalannaro, saba' biyasai Hadadézer mammusu sibawa Tou. Laoni Yoram ri Daud sibawa tiwi maéga hadiya polé ri ulawengngé, péra'é sibawa gessaé. Lebbi tarompoi asenna Daud wettunna lisu puranana nauno 18.000 tau Edom ri Lompo Pejjé. Patettonni akkémang-akkémang tentara risininna Edom, sibawa iyaro sining tau Edongngé tunru'ni ri aléna. Puwangnge mpéréngngi apakalang Daud kégi-kégi mammusu. Makkuwaniro Daud paréntai sininna Israélié sibawa jagaiwi kuwammengngi ra'ya'na tuli rigaukengngi adélé enrengngé makessing. Kapala pengawal paribadinna arungngé: Bénaya ana' Yoyada; Imang-ngimang ri saorajaé: ana'-ana' worowanéna Daud. Riséuwaé esso makkutanai Daud, “Engka mupaga tau iya tuwoé polé ri kaluwargana Saul? Rékko engka, macinnaka pogau'i makessingngé lao ri aléna nasaba Yonatan.” Kaluwargana Saul mappunnai ata iya riyasengngé Ziba, narisuro mangolo ri Arung Daud. Makkutanani arungngé, “Ikoga Ziba?” Nappébali, “Iyyé, Datu.” Nainappa makkutana arungngé, “Engka mupaga tau iya tuwoé polé ri kaluwargana Saul? Macinnaka pogau'i makessingngé lao ri aléna, pada-pada iya puraé uwajjanciyang ri Allataala.” Nappébali Ziba, “Engka mupa séddi tau ana' worowanéna Yonatan. Képpangngi.” Nakkutana arungngé, “Kégani?” Nappébali Ziba, “Ri Lodebar, ri bolana Makhir ana' Amiél.” Nanassurowanni Arung Daud mobbii ana' worowanéna Yonatanro. Iyaro ana' worowanéna Yonatan riyasengngi Méfibosét. Wettunna polé, suju'ni pakalebbii Daud. Nariwérékkadaina ri Daud, adanna, “Méfibosét,” namappébali, “Iyyé, Datu.” Nakkutana Daud, “Aja' mumétau. Maéloka masémpo ati lao ri iko nasaba Yonatan ambo'mu. Sininna tanana nénému Saul, maéloka palisungekko sibawa untu' mannennungeng weddikko manré ri saorajaé.” Nasuju' si Méfibosét sibawa makkeda, “Aga bettuwanna atattaé! Magi Datu namakessing makkuwaro lao ri atatta?” Nainappa riyobbi Ziba atanna Saulro ri arungngé, sibawa makkeda, “Sininna waramparang nasalaiyé Saul sibawa kaluwargana uwéréngngi eppona puwammué. Iko sibawa ana'-ana'mu enrengngé pabbantummu harusu jamai tanaéro untu' kaluwargana puwammu Saul, namuwéréngngi wassélé tanaéro lao ri mennang untu' paggenne'i apparelluwanna. Iyakiya Méfibosét weddingngi manré ri saorajaé mannennungeng.” (Ziba mappunnai 15 ana' worowané sibawa 20 ata.) Nappébali Ziba lao ri arungngé, “Sininna paréntana Datu maéloi atatta pogau'i.” Jaji sisamani manré Méfibosét sibawa arungngé, pada-pada ana'na Arung Daud. Méfibosét mappunnai ana' worowané iya riyasengngé Mikha. Sininna anggota kaluwargana Ziba mancajini ata-atanna Méfibosét. Makkuwaniro Méfibosét iya sala-salangngé ri iya duwa ajénaro monroi ri Yérusalém sibawa tuli manré ri saorajaé. Siyagangngaré wettu rimunrinna maténi Nahas arung Amon, na Hanun ana' worowanéna mancaji arung. Namakkedana Arung Daud, “Nahas iyanaritu sahaba'ku iya matinulué. Jaji harusu tokka massahaba sibawa Hanun ana'na.” Rimakkuwannanaro kirinni Daud suro lao ri wanuwa Amon untu' saléworiwi Hanun nasaba amaténna ambo'na. Wettunna mennang lettu ri Amon, makkedani sining pamimpinna wanuwaéro lao ri Arung Hanun, “Aja' nappikkiri Datu nakiringngi Daud suronaro nasaba maéloi pakalebbii ambo'na Datu! Nakiringngi iyaro sining tauwé lao mai selaku mata-mata untu' salidikiwi kotaéwé, kuwammengngi naulléi sittaiwi.” Nainappa natikkeng Hanun sining surona Daudro, nacukkuru'i janggo'na siwali, narette'i pakéyanna mennang gangka poncing, nanasuroi mennang lao. Iyakiya masirii mennang untu' lisu ri wanuwanna. Wettunna gau'éro ripaissengi Daud, kirinni paseng kuwammengngi iyaro sining suroé monroi ri Yérikho narapi tuwo paimeng janggo'na. Nainappa namaingeki tau Amongngé makkedaé pangkaukenna mennang nassabariwi Daud musui mennang. Rimakkuwannanaro séwani mennang 20.000 tau prajuri Siria iya monroé ri Bét-Réhob sibawa Zoba, makkuwatoro 12.000 tau prajuri polé ri Tob, enrengngé arunna wanuwa Maakha sibawa 1.000 tau ana' buwana. Wettunna Daud naéngkalinga gau'éro, nasuroni Yoab sibawa sininna tentarana maju méwai balié. Massuni tau Amongngé nanaatoro'i barisi'na ri yolona pintu gerbang Raba ibukotana mennang, na tau Siriaé, tau Tob-é sibawa Maakhaé matoro'i barisi'na ri padangngé. Naitani Yoab makkedaé tassipii ri pasukang balié ri yolo sibawa ri munri. Rimakkuwannanaro piléni tentara Israél iya pommakessingngé sibawa taroi mennang siyolo-olong sibawa tentara Siriaé. Lebbinna polé ri tentara Israélié nabbéréyangngi lao ri Abisai anrinna, iya matoro'éngngi barisi'na siyolo-olong sibawa tentara Amongngé. Makkedani Yoab lao ri anrinnaro, “Rékko dé'na uwulléni mattahang lao ri tentara Siriaé, asitta'no tulukka; sibalé'na, rékko dé'na mulléni mattahang lao ri tentara Amongngé, polépa matu tulukko. Attahanno! Laono mai tammusu sibawa barani untu' bangsata sibawa untu' kota-kotana Allataalata. Tennapodo napogau'i Puwangnge aga iya Napuwéloé.” Majuni maggasa Yoab sibawa pasukanna, angkanna lari tentara Siriaé. Wettunna naita tau Amongngé lari tentara Siriaé, lari toni mennang polé ri Abisai sibawa soro muttama ri laleng kotaé. Puranana namusu tau Amongngé, lisuni Yoab ri Yérusalém. Namaingekini tau Siriaé makkedaé ricauni mennang ri tau Israélié, rimakkuwannanaro naobbini sininna pasukanna kuwammengngi naddeppungeng paimessi. Nainappa Arung Hadadezér massuro mobbii tau Siriaé iya engkaé ri seddé alauna Salo Efrat, napoléna mennang ri Hélam napimping Sobakh, pallima tentarana Arung Hadadézer polé ri Zoba. Naéngkalingana gau'éro, napaddeppungenni Daud masitta sininna pasukang Israélié, nainappa malléttoiwi Salo Yordan, namaju lao ri Hélam. Kuwaniro tau Siriaé matoro'i barisi'na nainappa gasai pasukanna Daud. Iyakiya tau Israélié pasoroi tentara Siriaé. Daud sibawa pasukanna mpunoi 700 tau pappalari karétana balié, sibawa 40.000 tentara makkinnyarang; ri lainnaéro Sobakh pallimana tentara balié masero lona angkanna maté ri ammusurengngé. Wettunna sining arung iya nakuwasaiyé Hadadézer naita makkedaé ricauni mennang ri tentarana Israélié, naéllauni mennang sidamé nainappa tunru lao ri tau Israélié. Sipongennaro dé'na nabaranina tau Siriaé bantui tau Amongngé. Biyasanna majui mammusu arung-ngarungngé ri wettu lemmaé. Na ri wettu lemmaé ri taungngéro risuroni Yoab ri Daud maju mammusu silaong sining parawirana sibawa sininna tentara Israélié; nanacauni mennang tau Amongngé sibawa keppungngi kota Raba. Iyakiya Daud monroi ri Yérusalém. Riséuwaé arawéng, moto'nana Daud, joppa-joppai ri pabbingenna saorajaé iya malappaéro. Polé kuwaniro naitai séddi makkunrai mattengngang cemmé, na iyaro makkunraié magello senna. Nainappa nassurowang Daud makkutanangngi niga iyaro makkunraié, naripaissengina makkedaé iyaro makkunraié asenna Batsyéba; ambo'na riyaseng Eliam sibawa lakkainna iyanaritu Uria tau Hét. Nassurowanni Daud mobbii iyaro makkunraié, napolénana ri saorajaé, siatinronni sibawa Daud. (Silalona Batsyéba pura pogau'i upacara pappépaccing pajanana maddara.) Purairo lisuni ri bolana. Siyagangngaré wettu rimunrinna mammulani Batsyéba mattampu, nanakiring karéba passalenna gau'éro lao ri Daud. Masitta'ni Daud kiring parénta lao ri Yoab, adanna, “Suroi Uria tau Hét éro lao ri iyya.” Narisurona Uria ri Yoab méwai sita Daud. Wettunna Uria mangolo ri Arung Daud, nakkutananni Daud pékkugi keadaanna Yoab sibawa pasukanna Israélié, sibawa makkuwatoro pékkugi joppana ammusurengngé. Nainappa makkeda Daud lao ri Uria, “Lisuno ri bolamu namuwappésau cinampe.” Nasalainnana Uria saorajaé, kirinni Daud hadiya lao ri bolana Uria. Iyakiya dé' nalisu Uria sangadinna matinroi ri yolona pintu gerbanna saorajaé silaong sining pengawalna arungngé. Ripaissengini Daud gau'éro. Namakkutanana ri Uria, “Silalomu lisu polé ri allalengeng mabélaé, magi nadé' mulisu ri bolamu?” Nappébali Uria, “Tentara Israélié sibawa Yéhuda mattengngang mammusu na Petti Assijancinna Puwangnge sibawangngi mennang; Yoab pallimata sibawa sining parawirana makkémai ri padangngé. Masa atattaé lisu ri bolaé, sibawa manré ménung enrengngé matinro sibawa bainéna atattaé? Nasabbing nyawana Datu sibawa nyawana atatta, dé' namaélo atatta pogau'i iyaro!” Namakkeda Daud, “Sikuna, appésauno paimeng kuwaé iyaé essoé na baja éléé upalaloko matu lao.” Jaji monroni Uria ri Yérusalém ri essoéro. Ri esso rappina riyobbini manré ri Daud. Namanréna sibawa riwérénni maéga énungeng angkanna mabo'. Iyakiya muwi iyaro wennié dé'to nalisu Uria ri bolana, sangadinna matinroi mappéi parampa'na ri laleng bili' pengawalna saorajaé. Pappa bajanana mokini sure' Daud lao ri Yoab, nanakiringngi naolai Uria. Okina, “Taroi Uria ri jori mariyoloé, kégi kaminang masero musué, nainappa soroko tennaissengngi kuwammengngi namaté.” Na wettunna Yoab keppungngi iyaro kotaé, nasuroni Uria lao ri onrong iya naissengngé najagai senna balié. Wettunna massu tentara balié polé ri kotaé sibawa gasai pasukanna Yoab, siyagangngaré tau parawirana Daud riyuno, muttama'ni Uria. Nainappa kiring Yoab suro lao ri Daud untu' paissengiwi joppana iyaro ammusurengngé. Paréntana Yoab lao ri suroéro, “Naéngkalingana datu laporammu passalenna joppana ammusurengngéwé, nauéllé macayii sibawa makkutana ri iko, ‘Magi muwaddeppé makkuwa ri kotaéro? Dé'ga muwissengngi makkedaé pasti balié mappanai matu polé ri yasé'na témbo'-témbo'na? Muwallupainiga pékkugi Abimélékh ana' Gidéonro riyuno ri Tébes? Dé'ga namaté nasaba séddi makkunrai maggenrungeng batu allélureng labbu polé ri yasé'na témbo'é lao ri aléna? Jaji, mangi muwaddéppé makkuwa ri témbo'éro?’ Rékko makkutana makkuwairo Datu, powadanni, ‘Uria parawirana Datu, maté towi!’ ” Nanalaona iyaro suroé mangolo ri Daud sibawa paissengiwi aga riparéntangngi ri Yoab. Makkedani iyaro suroé, “Balitta lebbi mawatangngi sibawa massui mennang polé ri kotaé gasaki ri padangngé. Iyakiya gegge'ki dessa'i mennang lisu narapi pintu gerbanna kotaé. Nainappa polé ri yasé'na témbo'é napanaki mennang, nasiyagangngaré polé ri parawirana Datu muttama'ni Uria maténi.” Namakkeda Daud lao ri suroéro, “Pakkasse'i atinna Yoab sibawa powadangngi kuwammengngi aja' mumarenni ati, saba' dé' nariyullé botoi niga maté matu ri laleng ammusurengngé. Powadangngi kuwammengngi namaggasa lebbi maseropasi lao ri kotaéro narapi manyara iyaro kotaé.” Wettunna naéngkalinga Batsyéba makkedaé maténi lakkainna, mabbaratani. Nainappa leppe'nana wettu abbaratanna, nassuro mobbini Daud iyaro makkunraié lao ri saorajaé sibawa mancajini bainéna. Siyagangngaré uleng rimunrinna jajiyanni séddi ana' worowané. Iyakiya dé' namasennang Puwangnge sibawa pangkaukenna Daudro. Purairo nasuroni Puwangnge Nabi Natan méwai sita Daud. Laoni Natan ri aléna sibawa makkeda, “Engka duwa tau iya monroé ri laleng séddi kota; iya séddié sugii sibawa iya séddiéssi kasiyasi. Si sugié mappunnaiwi maéga olokolo sibawa bimbala, na si kasiyasié banna mappunnai sikaju ana' bimbala, iya naelliyé. Iyaro ana' bimbala'é napiyarai narapi mancaji battowa ri lalempolana silaong sibawa ana'-ana'na. Iyaro ana' bimbala'é napanréi polé ri inanréna iyaro tauwé, sibawa matinroi ri laleng wakkanna; riponcoki adaé, nagaukengngi pada-pada ana' makkunrainna. Riséuwaé esso engka topoléna tau sugié. Si sugié dé' namaélo géréi bimbala'na iyaré'ga sapinna kuwammengngi nanasui untu' topoléna. Iyakiya nalai ana' bimbala'na si kasiyasiéro, nanasui untu' topoléna.” Nakkeda Natan lao ri Daud, “Datu ritu iyaro tauwé! Na iyanaé napowada Puwangnge, Allataalana Israélié, ‘Purano Uwakka mancaji arung ri Israélié sibawa Upassalama polé ri Saul. Akkarungenna Saul sibawa sining bainéna purani Uwérékko, mala Uwakkako mancaji arung ri Israélié sibawa Yéhuda. Akkalarapanna iyaro dé'pa nagenne, pasti Uwérékko matu paimeng singngégaéro. Magi nadé' mubati-batiwi parénta-parénta-Ku? Magi mupogau'i iyaro jaé? Muwassurompunoi Uria ri laleng ammusurengngé; muleppessangngi riyuno ri tau Amongngé, namuwalai bainéna! Nasaba dé' muturusi-Ka sibawa muwalai bainéna Uria, na ri laleng tungke' wija-wijammu massossorengngi engka maté riyuno. Mattanro-Ka maélo patakkennai abalaé lao ri iko iya polé ri kaluwargamu muto. Uwalai matu sining bainému ri yolona matammu nauwéréngngi tau laingngé iya matinroé matu silaong mennang ri lakessoé. Purano pogau' dosa mammekko-mekko, sibalé'na Upabuttiwi matu ancamak-Ku sibawa mannessa-nessa ri yolona sininna Israélié.’ ” Nanakkeda Daud lao ri Natan, “Madosana lao ri Puwangnge.” Nappébali Natan, “ Puwangnge pura maddampengengngi Datu; jaji dé' namaté matu Datu. Iyakiya nasaba purani Datu napakatuna Puwangnge sibawa pangkaukengngéro, iyaro ana' worowanéna Datu nappa jajiyé matéi matu.” Purairo lisuni Natan ri bolana. Ana' worowanéna Daud iya najajiyangngé Batsyéba jandana Uria, nakennani lasa sibawa élona Puwangnge. Namassempajanna Daud lao ri Puwangnge kuwammengngi namajjappa iyaro ana'é. Mappuwasani sibawa tungke' wenni léwui puppu benni ri témbo'na bili'na. Nanalaona sining tomarajana saorajaé palécéi kuwammengngi naoto, iyakiya nasampéyangngi sibawa dé' namaélo manré sisama mennang. Siminggu rimunrinna maténi iyaro ana'é, namétauna ata-atanna Daud untu' paissengiwi. Adanna mennang, “Wettunna iyaro ana'é tuwo mupi, dé' namaélo arungngé méngkalingai rékko mabbicaraki lao ri aléna. Apalagi makkekkuwangngé maténana ana' worowanéna! Ajakké maélo tongengngi matu peddiriwi aléna!” Wettunna naita Daud mabbici-bici ata-atanna, mainge'ni makkedaé maténi iyaro ana'é. Namakkutana lao ri mennang, “Maténiga iyaro ana'é?” Nappébali mennang, “Maténi, Datu.” Natokkonna Daud polé ri témbo'é, nanacemmé sibawa jakkaiwi gemme'na, nenniya mappasullé pakéyang. Nainappa lao massompa ri Bolana Puwangnge. Purairo lisuni ri saorajaé, nanaéllauwi ripatalangeng inanré, nainappa manré. Naitanaro, makkedani sining atanna, “Dé' tapahangngi, Datu. Wettunna tuwo mupi iyaro ana'é, mappuwasai Datu sibawa teringiwi, iyakiya maténana, tokkonni Datu nananré!” Nappébali Daud, “Ya, mémeng mappuwasaka sibawa teri wettunna tuwo mupi iyaro ana'é saba' mappikkiri'ka: Naullé Puwangnge namesséika matu nanapuwéloi tuwo iyaro ana'é. Iyakiya makkekkuwangngé, maténana, aga akkégunana matteruka mappuwasa? Uwulléga patuwoi paimeng? Matti lao tokka matu ri onrong naonroiyé, iyakiya makkekkuwangngé dé' nalisu matu ri iyya.” Nanasaléworini Daud atinna Batsyéba bainéna, nainappa siléwureng. Jajiyanni Batsyéba séddi ana' worowané iya riyasengngé Salomo ri Daud. Puwangnge mamaséiwi iyaro ana'é sibawa suroi Nabi Natan masengngi iyaro ana'é Yédija, nasaba Puwangnge mamaséiwi. Iyaro wettué mammusu mupi Yoab méwai Raba ibukotana wanuwa Amon, sibawa mawé'ni nasittai. Nainappa kiring suro lao ri Daud sibawa laporo'i, “Purani ugasa Raba, sibawa sittaiwi appassadiyang uwaina. Makkekkuwangngé, paddeppungenni Datu sésa tentarata, nainappa napimping serangangngé untu' caui kotaéro. Nanallalengiwi matti dé' namakkeda tauwé makkedaé iyya sittaiwi kotaéro.” Nanapaddeppungenni Daud sininna tentarana, nanaserangngi Raba, nagasai sibawa nacauna. Nalani Daud passigera polé ri ulunna arunna mennang nanapakéi ri ulunna. Iyaro passigera'é tane'na kira-kira 35 kilo sibawa riparamataiwi paramata magello. Tiwi towi Daud maéga senna barang rampasa polé ri kotaéro. Rilainnaéro narimpai pabbanuwana, nanasuroi tiwi garagaji, béngkung bessi, sibawa wasé bessi nanapajjamai mennang ri onrong akkébbureng bataé. Napogau' towi gau'éro lao ri pabbanuwana kota-kotana Amon laingngé. Purairo lisuni Daud sibawa sininna tentarana ri Yérusalém. Absalom ana' worowanéna Daud mappunnai séddi anri makkunrai iya magelloé, asenna Tamar. Amnon ana' worowanéna Daud polé ri bainéna laingngé, napojiwi Tamar sibawa macinnai méwai siatinrong. Iyakiya iyaro mustahélé ri aléna nasaba dé'pa nakawing Tamar sibawa dé' nawedding siwollompollong sibawa worowané. Napikkiri'ni matteru-teru Amnon iyaro gaué angkanna malasa. Amnon mappunnai séddi sellao iya macca senna'é, asenna Yonadab ana'na Siméa kakana Daud. Makkedai Yonadab lao ri Amnon, “Andi, magi na esso-esso paitako masara makkuwaro? Engka aga?” Nappébali Amnon, “Upojiwi Tamar, anrinna Absalom silessurekkuro.” Nanakkeda Yonadab lao ri aléna, “Magampang muwa iyatu! Léwuno ri onrong atinrongngé, sibawa pogau'i samanna mattengngang malasa. Rékko poléi ambo'mu mitako, powadangngi, ‘Ambo, palaloi Tamar polé kuwammengngi nawérékka inanré. Rékko uwulléi mitai nasui iyaro inanré kuwaé, weddikka manré.’ ” Nanaléwuna Amnon ri onrong atinrongngé, samanna malasa. Wettunna polé Arung Daud mitai, makkedani Amnon ri aléna, “Ambo', palaloi Tamar untu' mannasu béppa ri yoloku kuwaé; maéloka matti manréi.” Nanakirinna paseng Daud lao ri Tamar ri saorajaé, adanna, “Laono mai ri bolana kakamu Amnon, sibawa ébbuno anrékanré untu' aléna.” Nalaona Tamar kuwaro nanapoléini Amnon léwu ri onrong atinrongngé. Malani Tamar céddé lama labbu, nainappa ri yolona Amnon napassadiyani béppaé untu' ritunu. Purairo napassuni iyaro béppaé polé ri pancié nanapatalai. Iyakiya dé' namaélo manré Amnon. Makkedai, “Suro manengngi massu polé kuwaé!” Massu manennana tauwé polé ri bili'éro, makkedani Amnon lao ri Tamar, “Tiwini mai iyaro sining béppaé ri onrong atinrokku, namutémpuka!” Naturuna Tamar. Iyakiya wettunna najjulluwang Tamar iyaro béppaé lao ri aléna, nakkatenninni Amnon iyaro ana'daraé nakkedato, “Anri, laono mai sibawakka matinro!” Nappébali iyaro ana'daraé, “Ah, aja' kaka! Aja' mupassaka pogau'i iya matuna makkuwaéro! Gau' pada-padaéro dé' naengka naripogau' ri Israélié. Rékko kajajiyangngi makkuwaéro, kégani harusu usubbu rupakku? Nainappani, ripakatuna tokko matu ri tauwé ri Israéliéwé. Madécéngengngi mabbicarako sibawa arungngé, pasti nasitujui matu arungngé mancajika bainému.” Iyakiya dé' namaélo Amnon tunru, sibawa nasaba lebbi mawatangngi, napassani iyaro anrinna sibawa ateddekeng, nainappa nakédo salai. Iyakiya purairo ribenci senna'ni Tamar ri Amnon sibawa iyaro paccéccéna lebbi battowai naiya pappojinna bunge'na. Nainappa makkeda lao ri anrinnaro, “Assuno!” Nappébali Tamar, “Ah, magi napakkuwaka'ro kaka? Rékko mupaddésu'ka, iyaro jaé lebbi battowai naiya gau' iya mupogau'é onna!” Iyakiya dé' namaélo Amnon méngkalingai. Naobbini pattumani paribadinna nainappa makkeda, “Tiwii iyaé makkunraié massu, sibawa cala'i tange'é!” Iyaro pattumanié napogau'ni iyaro paréntana. Pakéyanna Tamar iyanaritu jumba labbu iya malampéé limanna. Iyaro wettué ana'-ana'dara iya dé'éppa nakawing biyasanna pakéi pakéyang pada-padaéro. Nanataroini awu ulunna Tamar, nasapé'i jumbana, sibawa lao nanatongko towi rupanna sibawa iya duwa limanna enrengngé teri mapeddi. Wettunna naita Absalom, makkutanani, “Aga Amnon onna majjalékkaiwi alebbiremmu? Sikuna anrikku, aja'na mupikkiri'ni. Uwaseng kakamu, jaji aja'na mupowada-adai iyaro gau'é lao ri nigi-nigi.” Nainappa massalani Tamar ri bolana Absalom, namasara senna'na enrengngé masino-sino. Naéngkalingana Daud passalenna kajajiyangngéro, macai senna'ni. Macai senna'ni Absalom lao ri Amnon sibawa dé'na namaélo mabbicara sibawa aléna nasaba purai nakédo salai Tamar anrinna. Duwattaung rimunrinna pakangkani Absalom pésta aggoncingeng bulu bimbala ri Baal-Hazor, seddéna kota Efraim, nanaundanni sininna ana' worowanéna arungngé. Mangoloni ri Arung Daud sibawa makkeda, “Ambo', pakangkaka pésta aggoncingeng bulu bimbala. Talaoto Ambo' ri péstaéro silaong sining tomarajana saorajaé.” Iyakiya mappébaliwi arungngé, “Aja', Ana'ku, saba' rékko lao manekki nasussaiko matu.” Natteruna Absalom maddessa, iyakiya tette'i ambo'na dé' namaélo lao. Banna nawéréngngi barakka'na. Namakkedana Absalom, “Rékko makkuwaitu, palaloni silessurekku Amnon maccowériki.” Nakkeda arungngé, “Aja'na naccowé.” Iyakiya nasaba matterui maddessa, angkanna Daud palaloi Amnon sibawa sininna ana' worowanéna iya laingngé maccowériwi Absalom. [Nanapatalana Absalom inanré iya makessing senna'é.] Napparéntanni lao ri ata-atanna, “Pénessaiwi madécéd-décéng, rékko mabo'ni Amnon nasaba énungeng anggoro, uwérékko matu tanra-tanrang, naunoni. Aja' mumétau. Iyya tanggungiwi iyaro gau'é. Tinda'no sibawa barani, aja' mubata-bata!” Napogau'ni iyaro ata-ataé paréntana Absalom, nanaunoi Amnon. Naitanaro ana'-ana' worowanéna Daud laingngé natonangini bagalna tungke'-tungke' nanalari. Wettunna mennang mattengnga laleng mupi lisu, ripowadanni Daud ri tauwé, “Purani nauno maneng Absalom ana' worowanéna Datu – dé' muwi séddi tau iya tuwoé!” Tokkonni arungngé, nanasapé'i pakéyanna nasaba masarai, sibawa léwu ri témbo'é. Maccowéni sininna pengawalna sapé'i pakéyanna. Iyakiya makkedai Yonadab ana' Siméa kakana Daud, “Datu, aja' mumanenneng sibawa aja' mupikkiri'i makkedaé maté manenni ana' worowanéna Datu. Banna Amnon maté, saba' manessani makkedaé iyaro naélori Absalom sipongenna Tamar anrinna rikédo salai ri Amnon. Jaji aja' mumateppe makkedaé maté manenni ana' worowanéna Datu; saba' iya maté banna Amnon bawang.” Iyaro wettué larini Absalom. Naitani panganrowang saorajana Daud maéga tau polé turungiwi bulué polé ri Horonaim. Nalaona ri arungngé laporo'i gau'éro. Namakkeda Yonadab lao ri Daud, “Iyanaro ana'-ana' worowanéna Datu! Tongeng pada-pada iya napowadaé atatta onna.” Silalona paja mabbicara, muttama'ni ana'-ana' worowanéna Daud ri laleng saorajaé. Mammulani mennang teri, teri toni Daud nenniya ata-atanna sibawa messé. iyakiya dé'nana namessé ati Daud, nauddaningi senna'ni Absalom. Naisseng Yoab makkedaé muddani senna'ni Arung Daud lao ri Absalom, rimakkuwannanaro nassuro mobbini séddi makkunrai macca iya monroé ri Tékoa. Wettunna lettu iyaro makkunraié, makkedani Yoab lao ri aléna, “Harusu'i Ibu majjaiwi mabbarata; pakéno pakéyang mabbarata, sibawa aja' mupaké minnya wangi. Pogau'ni pada-pada makkunrai iya maittaénna teringiwi amaténna tau iya napojiyé. Nainappa lao ri arungngé, powadangngi makkuwaé.” Nainappa Yoab powadangngi aga iya harusu'é napowada. Nanalaona mangolo iyaro makkunraié ri arungngé, nasuju' massompa sibawa makkeda, “Puwakku Iya Malebbié, tulungngi atatatta!” Nakkutana arungngé ri aléna, “Engka aga?” Nappébali iyaro makkunraié, “Atattaé séddiwi janda iya kasiyasié. Maténi lakkainna atatta. Mappunnaiwi atatta duwa ana' worowané, na riséuwaé esso massasai mennang ri padangngé. Nasaba dé'gaga tau pallalangngi, séddi ri yelle'na matéi riyuno. Na makkekuwangngé, sininna kaluwargana atatta musui atatta sibawa natuntu'na kuwammengngi nabbéréyangngi ana'na atatta iya paunoéro lao ri mennang, kuwammengngi nahukkungngi sibawa pahukkungeng maté. Saba' purai nauno silessurenna. Rékko nabbéréyangngi atatta iyaro ana'é, monroni atatta alé-aléna. Maéloi mennang mancuru'i amménasang séddi-séddinna atatta sibawa dé' natarongengngi séddi ana' worowané lao ri lakkainna atatta untu' patterui wija-wijanna.” Nappébali arungngé, “Lisuno, uwurusu'i matu iyaro parakaraé.” Nakkeda iyaro makkunraié, “Puwakku Iya Malebbié, muwi aga maélo napogau' Puwakku, atatta sibawa kaluwargana atatta ritu tanggungngi matu addimonrinna; Puwakku sibawa kaluwargana Puwakku dé' napasala.” Nappébali arungngé, “Rékko engka tau mancakko, tiwii lao ri iyya, pasti dé'na namaélo mancakko paimeng.” Nakkeda iyaro makkunraié, “Tennapodo massempajangngi Puwakku lao ri Puwang Allataalana Puwakku, kuwammengngi tau iya maéloé mpale'i amaténna ana'na atattaro aja' narapii napogau' ja iya lebbi battowaéppasi ri laleng naunona ana'na atatta iya séddiéssi.” Nappébali Daud, “Nasabbing Puwang iya tuwoé, iyaro ana'mu dé' nariyagaga matu muwi céddé.” Nakkedana iyaro makkunraié, “Puwakku Iya Malebbié, palaloni atatta mabbicara muwi céddé.” Nappébali arungngé, “Madécénni.” Nakkeda iyaro makkunraié, “Ri laleng adanna Puwakkuro, mangakui Puwakku makkedaé aléna Puwakku pasala nasaba dé' napalaloi ana' worowanéna Puwakku lisu polé ri appalirengngé. Magi Puwakku napogau'i asalang pada-padaéro lao ri umma'na Allataala? Maté manekki matu; idi'é pada-padaki uwai iya tuppa'é ri tanaé nadé'na nawedding ripaddeppungeng paimeng. Muwi Allataala dé'tona napatuwoi matu paimeng tau iya matéénna; rimakkuwannanaro sitinajai Puwakku makkuraga kuwammengngi tau ripalié weddingngi lisu paimeng. Mangoloi atatta ri Puwakku nasaba riyancangngi atatta ri tauwé. Nanappikkiri atatta madécéngengngi atatta mabbicarai sibawa Puwakku nasibawang amménasang natarimai matu Puwakku iyaé parellunna atatta. Napikkiri'i atatta naéngkalingai matu Puwakku sibawa passalama'i atatta polé ri tau iya makkuragaé maélo mpunoi atatta sibawa ana'na atatta. Makkattai mennang paddésu'ki polé ri tana iya nabbéréyangngé Allataala lao ri umma'-Na. Mateppe'i atatta makkedaé iyaro jancinna Puwakku tanggungngi matu asalamakenna atatta saba' Puwakku iyanaritu pada-padai malaéka'na Allataala, iya mullééngngi pasilaingengngi aga iya makessingngé sibawa aga majaé. Tennapodo Puwang Allataalana Puwakku sibawangngi Puwakku!” Nappébali arungngé, “Maéloka makkutana séuwa lao ri iko, baliwi sibawa malempu.” Nappébali iyaro makkunraié, “Tabbicarana Puwang.” Adanna arungngé, “Yoabga suroko?” Nappébali iyaro makkunraié, “Nasabbing nyawana Puwakku, dé' namakkullé atatta léssé polé ri pakkutanana Puwakku. Mémeng tongeng Puwakku, Yoab pura paissengiwi atatta aga harusu napogau' atatta sibawa napowada atatta. Iyakiya napogau'i makkuwaéro untu' pacceppiwi parakaraéro sibawa madécéng. Mapanréi iyanaritu Puwakku pada-pada malaéka'na Allataala angkanna naisseng sininna iya kajajiyangngé.” Purairo riyobbini Yoab ri arungngé sibawa makkeda, “Iyaro pangéloremmu maéloka paddupai. Laono muduppaiwi Absalom sibawa tiwii kumaié.” Suju'ni Yoab ri yolona Daud, nanakkeda, “Tennapodo Allataala barakkakiwi Datu! Naissenni atatta makkekkuwangngé makkedaé napojiwi Datu atatta nasaba natarimai Datu parellaunna atatta.” Najoppana Yoab lao ri Gésur untu' duppaiwi Absalom lisu ri Yérusalém. Iyakiya dé' napalaloi arungngé Absalom monro ri saorajaé. Makkedai arungngé, “Dé' umaélo mitai.” Jaji matteruni Absalom lisu ri bolana, sibawa dé' namangolo ri arungngé. Ripojiwi Absalom selaku tau iya kaminang magelloé risininna Israélié. Dé' gaga tau lebbi gello naiya aléna. Polé ri palakajéna lettu ri cappa gemme'na dé' gaga sala-salanna. Maworong senna gemme'na, na harusu'i narette siseng sitaung saba' napéneddingiwi matane senna. Gemme iya narette'éro tane'na lebbi duwa kilo situru timbangenna arungngé. Absalom mappunnai tellu ana' worowané sibawa séddi ana' makkunrai iya magello senna'é, asenna Tamar. Duwattaunni Absalom monro ri Yérusalém, iyakiya dé'pa nasiruntu arungngé. Nariséuwaé esso naobbini Yoab, untu' suroi mangolo ri arungngé, iyakiya dé' namaélo Yoab polé. Siseppi Absalom mobbii, iyakiya dé'pa namaélo polé Yoab. Namakkedana Absalom lao ri ata-atanna, “Muwisseng dare'na Yoab ri seddéna dare'ku iya natanengiyé cadduku? Tunui iyaro dare'é?” Laoni mennang tunui. Nalaona Yoab ri bolana Absalom sibawa makkutana, “Magi ata-atammu natunui dare'ku?” Nappébali Absalom, “Saba' dé' mumaélo polé wettummu uwobbi. Maéloka suroko mangolo ri arungngé sibawa palettu'i pakkutanakué, ‘Aga gunana usalai Gésur sibawa lisu kumaiyé? Lebbi kessing muwi monroka bawang kuwaro.’ ” Nakkedasi Absalom, “Usahakangngi kuwammengngi weddikka mangolo ri arungngé, narékko riyangga mupa pasala, sadiyaka rihukkung maté.” Nanalaona Yoab mangolo ri Arung Daud sibawa palettu'i paréllaunna Absalom. Nanaobbini arungngé Absalom, napoléna Absalom suju' ri yolona arungngé. Nariduppaina ri arungngé sibawa pabbau. Purairo napassadiyangenni aléna Absalom séddi karéta musu sibawa anyaranna enrengngé limappulo tau pattinro. Esso-esso Absalom maélé moto nanatettong ri wiring lalengngé ri seddéna pintu gerbanna saorajaé. Tungke' tau iya maéloé mapparapekengngi parakarana lao ri arungngé, naobbii sibawa natanai Absalom, adanna, “Polé ri suku kégako?” Narékko mappébaliwi iyaro tauwé, “Polé ri suku iyaé iyaré'ga iyaro,” namakkedana Absalom, “Manuru hukkungngé, tongekko, iyakiya iyagani dé' gaga wakkélé'na arungngé iya maéloé méngkalingai apparapekemmuro.” Nainappa adannasi, “Coba, ébara'na iyya mancaji haking, tungke' tau iya mappunnaiyé assisalang iyaré'ga tuntutang weddingngi polé ri iyya naugaukengngi matu sibawa adélé.” Rékko engka tau iya maddeppériyéngngi Absalom untu' suju' sompai, naloro'i limanna Absalom, nainappa nakaddao iyaro tauwé sibawa nabau. Makkuwaniro kédona Absalom lao ri tungke' tau Israélié iya maéloé mapparapekengngi parakarana lao ri arungngé, nanallalengiwi nalani Absalom atinna tau Israélié. Labe'nana patattaung, makkedani Absalom lao ri Arung Daud, “Ambo, palalona lao ri Hébron untu' pennoiwi jancikku lao ri Puwangnge. Saba' wettukku monro mupa ri Gésur wanuwa Siria, majjancika maélo lao massompa ri Puwangnge ri Hébron rékko Napalaloka lisu ri Yérusalém.” Nappébali arungngé, “Laono sibawa salama.” Nanajoppana Absalom lao ri Hébron. Iyakiya ri yolonaro pura mémenni kiring sining suro lao ri sininna suku Israélié sibawa tiwi paseng, “Rékko muwéngkalingai oni tarompé'é, gorano, ‘Mancaji arunni Absalom ri Hébron!’ ” Polé ri Yérusalém engka duwa ratu tau tinrosiwi Absalom lao ri Hébron. Dé' aga-aga naisseng passalenna assikongkolokengngéro sibawa turu manengngi mennang lao tennabata-batai. Na wettunna Absalom makkasuwiyangeng akkarobangeng, kiring towi suro lao ri kota Gilo untu' mobbii Ahitofel, iyanaritu sala séddinna pappangajana Arung Daud. Makkuwaniro assikongkolokeng méwaéngngi arungngéro pédé mawatang, sibawa pédé maégani tau maccowériwi Absalom. Nainappa séddi parennung laporo'i ri Daud, “Sining tau Israélié maccowéni ri Absalom.” Nanakkedana Daud lao ri sininna pegawénna iya engkaé ri Yérusalém, “Laono mai tamanyingkiri. Iyaé bawang laleng kuwammengngi taleppe polé ri Absalom. Dé'na namaitta napolé. Asitta'no, aja' narapii lellukki sibawa nacauki, angkanna sininna pabbanuwana kotaé naunoi!” Nappébali mennang, “Makessinni, Datu. Sadiyaki pogau'i muwi aga napuwélo Datu.” Nanajoppana arungngé ritinrosi ri sininna kaluwargana sibawa pegawénna, sangadinna seppulo tau gundi'na iya nataroé untu' monrowangngi saorajaé. Wettunna arungngé sibawa sininna pattinrona joppa salaiwi kotaé, léppanni mennang ri seddéna bola paccappurengngé. Tettong maneng pegawénna arungngé ri seddéna wettunna pasukang pengawalna arungngé mabbarisi laloiwi. Makkuwatoro enneng ratuna prajuri iya puraé maccowériwi polé ri Gat, mabbarisi ri yolona. Naitanaro makkedani arungngé lao ri Itai pamimpinna iya enneng ratuna tau prajuri'éro, “Magi muwaccowéto sibawa idi? Lebbi kessing muwi lisuko sibawa silaong arung iya barué. Dé'ga namutau laing, tau manyingkiri iya mabélaé polé ri wanuwammu? Dé'pa mumaitta monro kuwaé, masa usuroko maccowé sollé silaong iyya? Aléku paimeng dé' uwissengngi kégaka maélo lao. Lisuno namutiwi towi sellao-sellaomu sibangsaé, tennapodo Puwangnge mamaséiko sibawa matinulu ri iko.” Iyakiya mappébaliwi Itai, “Iya Malebbié, nasabbing Puwang iya tuwoé sibawa nasabbing nyawana Puwakku, kégi-kégi Puwakku lao, maélo towi atatta maccowé, namuni moloiwi amaténg.” Nappébali Daud, “Makessinni! Majuno matteru!” Nanajoppana Itai silaong sibawa sininna pasukanna sibawa kaluwargana mennang. Teri maneng ra'ya'é sibawa macenno wettunna sining pasukanna Daud salaiwi kotaé. Nainappa nalléttoi arungngé ana' Salo Kidron riyaccowéri ri sininna pasukanna, nanajoppana mennang mattuju ri padang kessi'é. Imang Zadok sibawa Imang Abyatar engka kuwaro silaong sininna tau Léwi iya tiwiéngngi Petti Assijancinna Puwangnge. Iyaro Petti Assijancingngé ripalénne, nadé' nariyakka ri wettu dé'napa nasalaiwi sininna ra'ya'é kotaéro. Namakkedana arungngé ri Zadok, “Palisuni iyaro Petti Assijancingngé ri kotaé. Rékko napojika Puwangnge, tentuni Napalaloka matu lisu sibawa mitai Petti Assijancingngéro paimeng silaong onrong naonroiyé. Iyakiya rékko dé' napojika Puwangnge, Aléna mani bawang aga Napuwélo ri aléku!” Nakkeda paimeng arungngé lao ri Zadok, “Erai Ahimaas ana'mu sibawa Yonatan ana' Abyatar; lisuno ri kotaé sibawa tennang. Maéloka mattajeng ri seddéna onrong-ngonrong alléttong saloé ri padang kessi'é narapi tarimaka karéba polé ri iko.” Nainappa Zadok sibawa Abyatar natiwii iyaro Petti Assijancingngé lisu ri Yérusalém nanaonro mennang kuwaro. Purairo naludunni Daud sapatunna. Silaonni sininna tau maccowériyéngngi tuppuiwi Bulu-bulu Zaitun nanaterito sibawa nabombo ulunna tanrang mabbarata. Wettunna ripaissengngi lao ri Daud makkedaé maccowé towi Ahitofel silaong assikongkolokenna Absalom, massempajanni Daud makkuwaé, “Oh Puwang, tennapodo aja' muleppessangngi ritarima pangajana Ahitofel!” Wettunna Daud lettu ri tompo bulu-bulué ri onrong biyasanna tauwé massompa lao ri Puwangnge, riduppaini ri sellaona iya matinulué, iyanaritu Husai tau Arkié. Sapé pakéyanna Husai sibawa ulunna naguguriwi awu. Makkedani Daud ri aléna, “Rékko maccowéko silaongekka, mancaji réppamo ri aléku. Iyakiya weddikko tulukka, rékko lisuko ri kotaé sibawa makkeda lao ri Absalom, makkedaé makkekkuwangngé maéloko tumaningiwi sibawa matinulu, pada-pada purana mutumaningi ambo'na riyolo. Nasibawang caraéro mulléi teppajajiwi sininna pangajana Ahitofel. Imang Zadok sibawa Abyatar engka towi kuwaro. Paissengiwi mennang sininna séuwa-séuwaé iya muwéngkalingaé ri saorajaé. Ahimaas ana' Zadok sibawa Yonatan ana' Abyatar naccowéri toni ambo'na, jaji engka toni kuwaro mennang. Ana'-ana'énnaro musuro lao ri iyya untu' palettu'i sininna karéba iya mullé méngkalingai.” Nanalisuna Husai sellaona Daudro ri Yérusalém, nasitujuwangngi lettu'na Absalom kuwaro. Wettunna Daud silalona labe ri tompo bulu-bulué, tappa poléni Ziba atanna Méfibosét, sitangngi sibawa tiwi sipasang kaleddé iya mattékéé duwa ratu batunna roti, sératu réppung buwa anggoro rakko, sératu siyo buwa-buwa anggoro silalona riyala sibawa sipopang uwai anggoro. Makkutanani Arung Daud lao ri aléna, “Untu' aga iya manennaé?” Nappébali Ziba, “Iyaé sining kaleddé'é untu' olokolo akkinnyarangeng untu' kaluwargana Datu, roti sibawa buwa-buwaéwé untu' sining pattumaninna Datu, sibawa uwai anggoro'éwé untu' mennang iya madekkaé ri padang kessi'é.” Namakkutana arungngé lao ri aléna, “Kégani Méfibosét eppona puwammu Saul?” Nappébali Ziba, “Tette mupi ri Yérusalém, saba' mateppe'i makkedaé makkekkuwangngénna napalisuni matu tau Israélié akkarungenna nénéna Saul lao ri aléna.” Namakkedana arungngé lao ri Ziba, “Mappammulai makkekkuwangngé sininna appunnangenna Méfibosét mancajiwi appunnangemmu.” Nappébali Ziba, “Tarima kasi Datu. Tennapodo Datu tuli masennangngi lao ri atatta!” Wettunna Daud lettu ri Bahurim, poléni séddi tau polé ri onrongngéro, nanaddeppériwi rombonganna arungngé, natanroiwi Daud. Iyaro tauwé asenna Siméi ana' Géra, polé ri sumpulolona Saul. Siméi genrungngi Daud nenniya pegawé-pegawénna sibawa batu, namuni Daud riyattulilingiwi ri ana' buwana sibawa sining pengawalna. Ritanroini ri Siméi sibawa ada-ada, “Laono! Laono! Pabbuno! Tau maja! Purani murampasa akkarungenna Saul! Makkekkuwangngé nahukkunno Puwangnge nasaba muwunoi maéga senna sumpulolona Saul. Puwangnge pura mabbéréyangngi akkarungemmu lao ri ana'mu Absalom. Makkekkuwangngé maténo, éh pabbuno!” Abisai anrinna Yoab ana' Zéruya, makkedai lao ri arungngé, “Magi Datu naleppessangngi pangacauéro tanroiwi Datu? Palaloi atatta géréi ellonna!” Iyakiya makkedai arungngé lao ri Abisai sibawa Yoab kakana, “Aja' mubati-batiwi. Leppessangngi siya natanroika. Saba' rékko Puwangnge suroi, nigana punna ha' makkutanangngi magi nakédo makkuwaro?” Namakkeda paimeng Daud lao ri Abisai sibawa lao ri sininna atanna, “Ana' riyaléku paimeng makkuraga maélo mpunoka; magi muhérang mitai kédona tau Bényamingngéwé? Puwangnge ritu suroi tanroika; rimakkuwannanaro aja' muwagagai sibawa leppessangi siya patanroi. Naullé naitai matu Puwangnge iyaé anrasa-rasangngé nanabarakkakika selaku passulléna tanroéro.” Nainappa Daud sibawa sining pattinrona patterui joppana, na Siméi magattini joppa maccowériwi mennang ri émpeng bulué nanatanroi towi sibawa maggenrungeng batu nenniya tana. Poso senna'ni arungngé sibawa sininna ana' buwana wettunna lettu ri Salo Yordan, nainappa mennang mappésau kuwaro. Wettuéro Absalom sibawa sininna tau Israélié iya tinrosiyéngngi muttama'ni ri kota Yérusalém, na Ahitofel maccowé toni. Wettunna Husai sellaona Daud iya matinuluéro siruntu Absalom, gorani Husai, “Tuwoi arungngé! Tuwoi arungngé!” Iyakiya makkutanai Absalom ri aléna, “Kégani atinuluremmu lao ri sahaba'mu Daud? Magi dé' muwaccowériwi?” Nappébali Husai, “Pékkugi wedding! Maccowéka lao ri tau iya ripilé ri Puwangnge, risining tauwéwé, sibawa ri sininna tau Israélié. Tauwé ritu uwaccowéri matu. Nainappani, nigatona utumaningi matu? Tenniyaga ana' worowanéna Puwakku? Pada-pada pura utumaninginna ambo'na Petta, makkuwatoro utumaninginna matu Petta makkekkuwangngé.” Nainappa makkeda Absalom lao ri Ahitofel, “Powadani aga iya harusu'é tapogau'.” Nappébali Ahitofel, “Laono ri gundi-gundi'na ambo'na Puwakku iya nasalaiyé untu' monrowangngi saorajaé, naatinrono silaong mennang. Naisseng manennitu matu Israélié makkedaé nasibawang pangkaukenna Puwakkuro, riyangga balini Puwakku ri ambo'na Puwakku. Na sininna tomaccowériyéngngi Puwakku tattamba baraniwi matu.” Jaji, riyébburenni kéma Absalom ri tompo'na pabbingeng saorajaé iya malappaéro. Nainappa naita sininna tauwé muttama'ni Absalom ri laleng kémaéro namatinro silaong sining gundi'na ambo'na. Iyaro wettué tungke' pangajana Ahitofel ritarimai samanna iyaro adanna Allataala; muwi Daud iyaré'ga Absalom turusiwi sining pangajana. Dé' namaitta puranaro, makkedasi Ahitofel lao ri Absalom, “Palaloka pilé 12.000 tau. Matu wennié maéloka joppa lellungngi Daud. Maéloka gasai wettunna poso sibawa koddo sumange'na. Maéloka patassélengngi, angkanna sininna ana' buwana lari. Banna Arung Daud bawang maélo uwuno. Iyakiya sininna ana' buwana maéloka palisui lao ri Puwakku pada-pada botting makkunraié lisu lao ri lakkainna. Dé'ga Puwakku banna macinnaiwi nyawana séddi tau bawang? Iya laingngé dé' nariyagaga matu.” Iyaro pangajaé naita makessinni Absalom sibawa sininna pamimping Israélié. Namuni makkuwaro makkedai Absalom, “Obbii makkekkuwangngé Husai; laono mai taéngkalingai pékkugi pallolongenna.” Wettunna polé Husai mangolo, ripowadanni ri Absalom rancanana Ahitofel, nainappa makkeda, “Maéloki'ga turusiwi pangajaéro? Rékko dé', abbéréno tangnga laingngé.” Nappébali Husai, “Pangajana Ahitofel iya sisengngé dé' namakessing. Pasti naisseng Petta makkedaé Daud sibawa ana' buwanaro iyanaritu pajuwang iya poré. Sissekkang mennang beruwang komba iya teddéngngé ana'é. Nainappani Daud iyanaritu prajuri mappangalamang iya dé'é naengka nabbenni silaong ana' buwana. Naullé makkekkuwangngé massubbuni ri laleng séddié gowa iyaré'ga onrong laingngé. Jaji, ébara'na ana' buwana Petta riserangngi ri Daud, naengka maté, na nigi-nigi méngkalingai gau'éro makkedai matu makkedaé ricauni ana' buwana Absalom. Na muwi sining tau iya kaminang baranié sibawa poré pada-pada singaé pasti métauto matu. Saba' sininna tau Israélié naisseng iyaro ambo'na Petta iyanaritu pahlawangngi, sibawa ana' buwana iyanaritu pajuwang-pajuwang iya baranié. Rimakkuwannanaro, pangajaku makkuwaiyé: Paddeppungengngi sininna tau Israélié polé ri sininna wanuwaé, angkanna jumellana singngégai kessi'é ri wiring tasi'é. Nainappa aléna Petta ritu pimpingngi mennang maju mammusu. Taruntu'i matu Daud muwi kégi monro, nanatagasai ri wettu dé'napa namaingekiwi aga kajajiyang. Dé' gaga matu iya leppe'é, muwi aléna iyaré'ga ana' buwana. Rékko lariwi ri laleng séddié kota, sininna ra'ya'ta malai matu tulu nanassarénréngengngi iyaro kotaé nainappa napasempé ri laleng lompo iya macawé'é. Muwi séddi batu dé'to matu monro ri tompo'na bulu-buluéro.” Naéngkalinganaro makkedani Abasalom sibawa sininna tau Israélié, “Lebbi kessing muwi pangajana Husai naiya pangajana Ahitofel.” Mémeng, Puwangnge pura pattentui untu' pasisalai pangajana Ahitofel iya makessingngéro, kuwammengngi nakennai Absalom abala. Purairo nalaporo'ni Husai lao ri Imang Zadok sibawa Imang Abyatar passalenna pangajana Ahitofel sibawa pangajanato lao ri Absalom sibawa sining pamimpinna Israélié. Nakkeda Husai, “Asitta'ko! Paissengiwi Daud kuwammengngi aja' nabbenni ri onrong alléttong saloé ri padang kessi'é. Harusu'i masitta malléttoiwi Salo Yordan. Rékko dé', aléna sibawa sininna pasukanna riyancuru'i matu.” Wettuéro Yonatan ana' Abyatar sibawa Ahimaas ana' Zadok mattengngang mattajeng ri seddéna mata uwai En-Rogel, ri wirinna kota Yérusalém. Dé' mennang nabarani muttama ri kotaé saba' métaui riita ri tauwé. Pada-pada biyasanna, séddi ata makkunrai palettukengngi mennang karéba iya harusu'é nalaporo lao ri Arung Daud. Iyakiya iyaé sisengngé séddi ana' worowané nasitujuwangngi mitai mennang, nanapaissengiwi Absalom. Jaji mapperi-perini lao namassubbu ri bolana séddié pabbanuwana désa Bahurim. Ri seddé bolana engka bujung namuttama'ni mennang ri lalenna. Bainéna punna bolaéro pallebba silampa kaing ri yasé'na kalebbong bujungngéro nanatale gandong ri yasé'na, angkanna dé' napaita iyaro bujungngé. Poléni sining surona Absalom ri bolaéro sibawa makkutana ri makkunraié onna, “Kégani Ahimaas sibawa Yonatan?” Nappébali, “Silalona mennang malléttoiwi saloé.” Nasappani mennang iya duwa kalloloéro, iyakiya dé' naruntu'i, nanalisuna mennang ri Yérusalém. Massuni Ahimaas sibawa Yonatan polé ri bujungngéro, nainappa mapperi-peri lao sita Arung Daud sibawa laporo manengngi. Adanna mennang, “Mabbéréi Ahitofel pangaja untu' gasai Datu. Jaji joppani' makkekkuwangngétto malléttoiwi saloéwé.” Nainappa Daud sibawa ana' buwana malléttoiwi Salo Yordan, nalettu ri liweng wettu subué. Wettunna napahang Ahitofel makkedaé dé' nariturusi pangajana, napatoppo'ni lapi-lapi kaleddé'na nanalisu ri kotana muto. Purana napacceppi sininna urusanna nagattunni aléna, nainappa rikuburu ri laleng kuburu'na kaluwargana. Lettu'ni Daud ri kota Mahanaim wettunna Absalom malléttoiwi Salo Yordan, ritinrosi risining tau Israélié. ( Purani riyakka Amasa ri Absalom mancaji kapala pasukang sulléiwi Yoab. Amasa ana' Yitra tau Ismaél; indo'na riyaseng Abigail ana' Nahas, iyanaritu padakkunrainna Zéruya indo'na Yoab.) Makkémani Absalom sibawa ana' buwana ri tana Giléad. Wettunna Daud lettu ri Mahanaim, riduppaini ri Sobi ana' Nahas polé ri kota Raba ri Amon, sibawa Makhir ana' Amiél polé ri Lodebar, sibawa Barzilai polé ri Rogelim ri Giléad. Napaddeppungenni Arung Daud sininna ana' buwana, nainappa nabagé mancaji passéddiyang-passéddiyang tassisebbué sibawa tassératué tau. Nainappa makka parawira-parawira untu' kapalaiwi passéddiyang-passéddiyangngéro. Purairo naleppessanni maju mammusu ri laleng tellu kalompo, tungke'-tungke' ripimping ri Yoab, Abisai anrinna Yoab sibawa Itai polé ri Gat. Makkedani arungngé lao ri ana' buwana, “Maccowé tokka sibawakko.” Iyakiya mappébaliwi sining tauwéro, “Aja' Datu. Saba' rékko tarapassaki lari, iyaré'ga muwi sitengngata maté, dé'pa namasennang balié, saba' Datu ritu nasappa mennang. Angke'na Datu pada-pada seppulo sebbu tau polé ri idi. Nainappani lebbi kessing muwi Datu kiring bantuwang bawang lao ri idi polé ri laleng kota.” Namakkeda arungngé, “Makessinni, iko bawang.” Nainappa tettong ri benrénna pintu gerbang kotaé, na sitengngana pasukangngé mabbarisi'ni massu ri laleng passéddiyang-passéddiyang sisebbué sibawa sératué tau. Nainappa napparéntang arungngé lao ri Yoab, Abisai sibawa Itai, adanna, “Aja' muloi Absalom kalloloéro nasaba iyya.” Sininna pasukangngé naéngkalingai paréntana Daudro. Nanajoppana pasukanna Daud musui pasukang Israélié, namammusu mennang ri ale Efraim. Ricauni pasukang Israélié ri ana' buwana Daud; iyaro akalangngé battowa senna, 20.000 tau maté ri essoéro. Mallebbanni ammusurengngé ri sininna daéraéro, na lebbi égai tau iya maté tajjebba'é ri ale'é naiya maté ri ammusurengngé. Wettunna Absalom tonangiwi bagalna, tennasenna-sennani siruntu ana' buwana Daud. Iyaro bagal-é laloi ri yawana aju battowaé namapancé, natassakkana ulunna Absalom riséddié takkéna. Larini matteru bagalna na Absalom risalaini sibawa taggattung kuwaro. Séddi polé ri ana' buwana Daud mitai nanalaporo'i lao ri Yoab, “Puwang, uwitai onna Absalom taggattung riséddié aju battowa!” Nappébali Yoab, “Aga? Muwitai? Magi nadé' muwunoi masitta? Pastini uwérékko seppulo dowi péra' sibawa séddi babbang.” Iyakiya mappébaliwi iyaro tauwé, “Namuni riwérékka 1.000 dowi péra', dé'to umaélo peddiriwi ana'na arungngé. Riyéngkalinga maneng aga napparéntang arungngé lao ri Puwang sibawa ri Abisai enrengngé Itai, kuwammengngi aja' narilo Absalom kalloloéro nasaba arungngé. Na ébara'na uwunoi Absalom onna, pasti naisseng arungngé, saba' tentu naéngkalinga arungngé passalenna sininna séuwa-séuwaé – sibawa pasti Puwang dé'to namaélo méwaika.” Nakkeda Yoab, “Sikuna! Cappu wettué banna sitanai sibali sibawa iko.” Nanalana Yoab tellu peppa'na bessi nanaggajangengngi ri arona Absalom iya tuwoé mupa wettuéro sibawa taggattung ri ajué. Nainappa seppulo ana' buwana Yoab borongngi nanaunoi. Napaonini Yoab tarompé'é angkanna mappésauni ana' buwana lellungngi pasukang Israélié. Nainappa nakka ujuna Absalom nanaggenrungengngi ri laleng bujung iya maliyungngé ri ale'é. Iyaro bujungngé natébunni sibawa batu gangka matanré. Sininna pasukang Israélié larini tungke'-tungke' lao ri bolana. Ri wettu tuwona mupa Absalom purai napatettongeng aléna séddi tugu ri Lompo Arungngé, saba' dé' nappunnai ana' worowané untu' patterui assossorenna. Iyaro tugué nasenggni situru asenna muto, nalettu essoéwé iyaé tugué riissengngi selaku Tugu Absalom. Nainappa makkeda Ahimaas ana' Zadok lao ri Yoab, “Palaloka lari méwai sita arungngé sibawa tiwi karéba marennu makkedaé Puwangnge pura passalama'i Datu polé ri balinna.” Nakkeda Yoab, “Aja', laing wettupi. Iyaé essoé dé' naweddikko tiwi karéba, saba' maténi ana'na arungngé.” Nainappa makkeda Yoab lao ri atanna séddié tau Sudan, “Laono paissengiwi arungngé aga iya puraé muwita.” Suju'ni iyaro ataé massompa nainappa lao sibawa lari. Iyakiya maddessa'i Ahimaas ri Yoab, “Muwi aga kajajiyang, palalo tokka tiwi karéba.” Nakkutana Yoab, “Magi mumatedde makkuwa maéloto lao, ana'ku? Dé' mutarima matu saro untu' iyaro.” Nakkeda Ahimaas, “Dé' namagaga, maéloka lao.” Nakkeda Yoab, “Rékko makkuwaitu, laono.” Nanalarina Ahimaas tuttungngi laleng iya laloé ri Lompo Yordan, nadé' namaitta rimunrinna naulléi béttani ata Sudangngé onna. Mattengngangngi Daud tudang ri bili' pallawangenna pintu gerbang ri lalengngé sibawa pintu gerbang saliwenna kotaéro. Ménré'ni ri yasé témbo'é pajagaé sibawa tettong ri pabbingeng pintu gerbangngéro. Wettunna mattiro, naitani engka séddi tau polé lari. Gorani iyaro pajagaé liyawa paissengiwi gau'éro arungngé, na makkedana arungngé, “Rékko alé-alénami, pastini karéba madécéng natiwié.” Wettunna iyaro tauwé mawé'ni lettu, mitasi iyaro pajagaé engka tau polé larito. Jaji gorani, “Itai! Engka tau laissi iya lariyé lao mai alé-aléna.” Nappébali arungngé, “Pasti tiwii karéba iya madécéngngétto.” Makkedani iyaro pajagaé, “Tau iya mammulangngéro Ahimaas. Naisseng atatta carana lari.” Nakkeda arungngé, “Tau makessing iyatu, tentuni tiwii karéba madécéng.” Nagorana Ahimaas mabbéré selleng kao ri arungngé, nanasuju' sibawa makkeda, “Ripojiwi Puwang Allataalana Datu, iya puraé mabbéréyangngi lao ri Datu sining tau maronta'é lao ri Puwakku!” Nakkutana arungngé, “Aga Absalom kalloloéro salama'i?” Nappébali Ahimaas, “Datu, onna wettunna atatta risuro ri Yoab, naitai atatta arukkang battowaé, iyakiya dé' naissengngi atatta aga kajajiyang.” Nakkeda arungngé, “Tettonno kuwaro,” nalaona Ahimaas ri benréng natettong kuwaro. Nainappa lettu'ni atanna Yoabro, sibawa makkeda lao ri arungngé, “Tiwii atatta karéba madécéng untu' Datu! Iyaé essoé Puwangnge mpéréngngi Datu apakalang lao ri sininna tau maronta'é.” Nakkutana arungngé, “Aga Absalom kalloloéro salama'i?” Namappébali iyaro ataé, “Tennapodo sininna balinna Datu, sininna tau iya maronta'é lao ri Datu nakennai toto pada-padaé kalloloéro.” Naéngkalinganaro messé senna'ni arungngé, nainappa ménré ri bili' yasé'na pintu gerbangngé nawating naterito, “Oh ana'ku! Ana'ku Absalom! Absalom, ana'ku! Lebbi kessing muwi iyya'na bawang maté sulléiko, ana'ku! Absalom, ana'ku!” Ripaissengini Yoab makkedaé teriwi Arung Daud sibawa mabbarata untu' Absalom. Natappinrana apakalangngé iyaro essoé mancaji sara lao risininna tentarana Daud nasaba naéngkalingai mennang makkedaé nateringiwi arungngé ana' worowanéna. Mammekko-mekkoni mennang lisu ri kotaé, pada-pada tentara iya masirié nasaba lariwi polé ri ammusurengngé. Nasamponi arungngé rupanna nanawating sibawa macenno, “Oh ana'ku! Ana'ku Absalom! Absalom, ana'ku!” Laoni Yoab mangolo ri arungngé sibawa makkeda, “Iyaé essoé napakasirii Datu ana' buwana Datu, padahal mennang ritu pura passalama'i nyawana Datu, nyawana ana'-ana' worowanéna sibawa makkunrainna Datu, bainéna sibawa gundi'na Datu. Namaséiwi Datu sining tau iya benciyéngngi Datu, iyakiya nabenciwi Datu sining tau iya mamaséiyéngngi Datu! Manessai nappaitang Datu makkedaé sining parawirana sibawa prajuri'na Datu dé' sises-siseng bettuwanna lao ri Datu. Mala samanna masennang senna'i Datu ébara'na tuwo mupi Absalom essoéwé na idi manengngé maté! Sitinajanna moto'i Datu nalao tettong ri saliweng untu' pattennangngi atinna ana' buwana Datu. Mattanroi atatta nasabbing Puwangnge, rékko dé' namassu Datu sitangngi mennang, iyato wennié dé'gaga matu muwi séddi tau iya maéloé sibawangngi Datu. Na iyaro sinrupai matu abala kaminang battowaé iya napéneddingiyé matu Datu gangka tuwona.” Nanaoto'na arungngé nanalao massu, natudang ri seddéna pintu gerbangngé. Naéngkalingani ana' buwana makkedaé engkai kuwaro, napolé manenna mangolo. Na wettuéro sininna pasukanna Israélié larini, nalisu ri bolana tungke'-tungke'. Ri yelle'na sininna suku Israélié momponi assisalangngé. Adanna mennang, “Purani' napassalama Arung Daud polé ri tau Filistingngé sibawa paleppe'ki polé risining bali laingngé, iyakiya makkekkuwangngé larini polé ri Absalom nanasalaiwi wanuwaéwé. Talanti'i Absalom mancaji arung, iyakiya makkekkuwangngé maténi ri laleng ammusurengngé. Magi nadé' gaga muwi séddi tau makkuraga untu' tiwii Arung Daud lisu?” Iyaro ada-adaé lettu towi ri Arung Daud. Rimakkuwannanaro nasuroni Imang Zadok sibawa Imang Abyatar makkutangngi risining pamimpinna Yéhuda makkuwaé, “Magi namumancaji iya paccappurengngé untu' duppaiwi sibawa tinrosiwi arungngé lisu ri saorajana? Tenniyaga iko sumpulolona sibawa siyajinna? Masa iko paccappureng méllauwi kuwammengngi ulisu?” Risuro towi mennang ri Daud powadangngi Amasa makkuwaé, “Tenniyakoga siyajikku? Mappammulai makkekkuwangngé uwakkako mancaji pallima tentaraku sulléiwi Yoab. Tennapodo naunoka Allataala rékko dé' upogau'i gau'éro!” Makkuwaniro Daud naulléni malai atinna sininna tau Yéhudaé angkanna kiring mennang paseng lao ri arungngé kuwammengngi nalisu ri saorajaé silaong sibawa sininna pegawénna. Nanajoppana arungngé sibawa lettu ri Salo Yordan, na sining tau Yéhudaé lettu'ni ri Gilgal untu' duppaiwi arungngé sibawa silaongengngi malléttoiwi saloéro. Nabantuni mennang kaluwargana arungngé mallétto enrengngé pogau'i sininna iya nassurowangngé arungngé lao ri mennang. Wettunna arungngé maélo malléttoi saloé, suju'ni Siméi ri yolona sibawa makkeda, “Naéllauwi atanna, tennapodo Datu dé' naangga'i atatta tette pasala. Tennapodo maéloi Datu mallupaiwi aga iya napogau'é atatta ri esso nasalainna Datu Yérusalém. Mainge'ni atatta, makkedaé purani pogau' dosa atatta, narimakkuwannanaro, ri yelle'na suku-suku iya monroé ri daéra manorang atatta ritu bunge'-bunge' polé untu' duppaiwi Datu essoéwé.” Naéngkalinganaro makkedani Abisai ana' Zéruya, “Sitinajani Siméi rihukkung maté nasaba purai natanroi arung iya napilé Puwangnge.” Iyakiya makkedai Daud lao ri Abisai sibawa Yoab kakana, “Aja' muwaccowé campuru'i. Magi musussaika? Iyaé essoé mancaji arussika ri Israélié, nadé' nawedding engka tau Israél iya rihukkung maté.” Nainappa mattanroni arungngé lao ri Siméi, “Utanggungngi makkedaé dé' narihukkung matéko matu.” Makkuwatoro Méfibosét eppona Saul, poléni untu' duppaiwi arungngé. Dé' nabissaiwi ajéna, dé' narette'i janggo'na, sibawa dé' nasessa'i pakéyanna sipongenna Arung Daud salaiwi Yérusalém narapi lisu sibawa salama. Wettunna lettu Méfibosét polé ri Yérusalém untu' duppaiwi arungngé, makkedani arungngé lao ri aléna, “Méfibosét, magi dé' muwaccowérika wettuéro?” Nappébali, “Iya Malebbié, naisseng Datu képpangngi atattaé. Nasuroi atatta pattumaninna atatta passadiya kaleddé iya weddingngé natonangi atatta untu' maccowériwi Datu. Iyakiya ribali'bellariwi atatta ri pattumaniéro. Mala ripétenna'i atatta lao ri Datu. Iyakiya Datu pada-padai malaéka'na Allataala. Rimakkuwannanaro pogau'ni aga iya nasengngé Puwakku makessing. Sininna siyajinna ambo'na atatta sitinajai rihukkung maté ri Datu, iyakiya atattaé purani napalalo Datu maccowé manré ri saorajaé. Makkekkuwangngé dé'na nabaranina atatta méllau agi-agi polé ri Datu.” Nappébali arungngé, “Dé' naparelluko powadai aga-agana. Purani upettui untu' mabbéréyangngi sininna waramparanna Saul lao ri iko sibawa lao ri Ziba.” Namappébali Méfibosét, “Leppessanni nala maneng Ziba. Masennanni atatta nasaba lisuni Datu sibawa salama.” Makkuwatoro Barzilai tau Giléad-éro engkani polé ri Rogelim untu' tinrosi arungngé malléttoiwi Salo Yordan. Macowa senna'ni Barzilai, aruwani pulona taung umuru'na. Sugi senna'i sibawa wettunna arungngé monro ri Mahanaim riyolo, Barzilai passadiya inanré untu' arungngé. Makkedai arungngé ri aléna, “Accowérina lao ri Yérusalém, uwéréppo matu matti sininna apparelluwammu kuwaro.” Iyakiya mappébaliwi Barzilai, “Dé'na namaittana atatta tuwo. Jaji aga akkégunana atatta maccowé ri Datu lao ri Yérusalém? Umuru'na atatta aruwani pulona taung, sibawa dé'na gaga iya weddingngé mabbéré asennangeng lao ri atatta. Dé'na naulléi atatta peneddingiwi aga nanré atatta iyaré'ga naénungngé, sibawa dé'na naulléi méngkalingai saddanna tauwé makkélong. Banna mancaji réppami bawang atatta lao ri Datu. Dé' nasitinaja atatta tarima appalang battowaéro. Banna macinnai atatta tinrosiwi Datu siyagangngaré bawang jongkana polé ri liwenna Salo Yordan. Purairo, leppessanni atatta lisu ri bolaé sibawa maté ri seddéna kuburu'na tomatowanna atatta, iyakiya iyanaé ana'na atatta Kimham. Palaloni tinrosiwi Datu sibawa pogau'ni lao ri aléna aga iya naitaé Datu makessing.” Nappébali arungngé, “Utiwii matu Kimham sibawa uwurusu'i matu pada-pada muwacinnaiyé, sibawa sininna iya muwéllauwé ri iyya upennoiwi matu.” Nainappa Daud sibawa sininna ana' buwana malléttoiwi Salo Yordan. Nainappa Daud bauwi Barzilai sibawa siassimangeng sibawa aléna. Purairo lisuni Barzilai ri bolana. Sininna pasukanna Yéhuda sibawa sitengnga pasukanna Israélié tinrosiwi arungngé malléttoiwi saloé. Purairo matteruni arungngé lao ri Gilgal, namaccowéna Kimham ri aléna. Nainappa poléni sininna tau Israélié mangolo ri arungngé sibawa makkeda, “Datu, magi silessuretta sining tau Yéhudaéro masengngi makkedaé mennang ritu mappunnai ha' untu' duppaiwi sibawa jagaiwi Datu silaong sininna kaluwargana nenniya ana' buwana Datu malléttoiwi Salo Yordan?” Namappébali tau Yéhudaé, “Tentuni, nasaba arungngé iyanaritu sumpulolona. Magi mumacai? Aga apparelluwatta natanggungngi arungngé, iyaré'ga purani nawérékki hadiya?” Nappébali tau Israélié, “Ha'ta lao ri arungngé wékkaseppulo lebbi battowa naiya ha'mu, namuni arungngé iyanaritu sumpulolomu. Magi mupandang éntékki? Aja' muwallupaiwi makkedaé idi ritu bunge'-bunge' senna méllauwi untu' tiwii lisu arungngé!” Iyakiya lebbi tedde'i tau Yéhudaé naiya tau Israélié sibawa dé' namaélo cau. Ri kota Gilgal engka séddi tau pangacau asenna Séba. Ana'nai Bikri, polé ri suku Bényamin. Wettunna attinro-tinrosenna Daud polé, naseppunni Séba tarompé'é sibawa gora, “Idi dé' gaga assimpungetta sibawa Daud. Untu' aga tamaccowé ri aléna? Eh tau Israélié, ayo talisu!” Nanalaona sining tau Israélié salaiwi Daud nanaccowériwi Séba. Iyakiya sining tau Yéhudaé tette'i matinulu sibawa tinrosi Daud polé ri Salo Yordan lettu ri Yérusalém. Lettu'nana Daud ri saorajana ri Yérusalém, iya seppulo gundi'na iya nasalaiyé untu' monrowangngi sarajaé, nataroni ri lalempola iya najagaiyé pengawal. Apparelluwanna mennang ripassadiya situju genne'é, iyakiya dé'na naengka Daud nasiyatinrong mennang. Jaji ripangkunni mennanro sibawa atuwonna mennang pada-padani jandaé narapi maté. Napparéntanni arungngé lao ri Amasa, “Paddeppungengngi tau Yéhudaé sibawa laono kumaiyé silaong mennang ri laleng témpo tellungngesso.” Nanalaona Amasa untu' paddeppungengngi mennang, iyakiya dé' nalisu ri wettu iya napattentué arungngé. Nanakkeda arungngé lao ri Abisai, “Iyaro Séba lebbi nasussaika matu naiya Absalom. Rimakkuwannanaro tiwii ana' buwaku namulellungngi, kuwammengngi aja' narapii natudangiwi kota-kota mabbénténgngé, nanaulléi lari polé ri idi.” Na ri yawa pappimpinna Abisai, pasukang Yoab sibawa pasukang pengawal paribadinna arungngé enrengngé sininna prajuri iya laingngé joppani polé ri Yérusalém untu' lellungngi Séba. Wettunna mennang lettu ri batu loppoé ri Gibéon, poléni Amasa méwai sita mennang. Iyaro Yoab wettué mappakéyang pammusui sibawa peddang tattappi ri benrénna. Wettunna joppa malluru iyaro wanuwa peddangngé leppe'i angkanna peddanna léssé ri lima abéyona. Makkedani Yoab lao ri Amasa, “Aga karéba sellao?” Nanakkatenning towi janggo'na Amasa sibawa lima ataunna samanna maéloi bauwi. Dé' naitai Amasa engka peddang ri lima abéyona Yoab. Tappa naggajangeng muni Yoab iyaro peddangngé ri babuwana Amasa, angkanna tassiya lise babuwana ri tanaé. Maténi iyatoro wettué, angkanna dé'na naparellu Yoab gajangngi paimeng. Nainappa Yoab sibawa Abisai anrinna, matteru lellungngi Séba. Engka séddi prajuri'na Yoab tettong ri seddéna ujuna Amasa sibawa gora, “Nigi-nigi maccowé ri Yoab sibawa Daud, accowérini Yoab!” Ujuna Amasa iya cemmé dararo lénne'ni ri tengnga lalengngé. Iyaro prajuri'na Yoab onna naitani makkedaé sininna tau iya laloé léppanni kuwaro. Rimakkuwannanaro nassarénréngenni iyaro ujué lao ri dare'é nanatongkoi papparampa. Puranana napassala iyaro ujué polé ri lalengngé, napatteruni joppana sininna tauwé maccowériwi Yoab untu' lellungngi Séba. Purani najoppai Séba sininna daérana Israélié, nanalettu ri kota Abél-Bét-Maakha riyaccowéri ri sininna anggota appanna Bikri. Naéngkalingani ana' buwana Yoab makkedaé engkai Séba kuwaro, nanakeppunni iyaro kotaé. Natémpungini tana mattulili témbo'é ri saliweng namammula kaliwi tanaé ri yawana témbo'éro untu' ruttungngi. Ri kotaéro engka séddi makkunrai iya mapanré, tettonni ri tompo'na témbo'é nainappa gora, “Engkalingai! Engkalingai! Ellauwi kuwammengngi nalao mai Yoab; macinnaka sipabbicara aléna.” Napoléna Yoab sibawa makkutanani iyaro makkunraié, “Puwagga Yoab?” Nappébali, “Iyyé.” Nakkeda iyaro makkunraié, “Engkalingai iyaé adakku, Puwang.” Nappébali Yoab, “Makessinni, uwéngkalingai.” Nakkeda iyaro makkunraié, “Riyolo biyasanna makkedai tauwé makkuwaé, ‘Rekko parelluko panunju, laono ri kota Abél’ – na iyanaro napogau' mennang. Iyaé kotata Abél battowa, sala séddinna kota iya kaminang tennangngé sibawa matinulué ri tana Israélié. Magi Puwang namakkuraga mancuru'i? Macinnaiga Puwang solangiwi tana appunnangenna Puwangnge?” Nappébali Yoab, “Dé' sises-siseng, dé' sises-siseng umakkatta solangiwi iyaré'ga mancuru'i kotamu! Tenniya iyaro rancanata. Iyakiya séddi tau riyaseng Séba ana' Bikri, iya assalennaé polé ri daéra buluna Efraim, maronta'i lao ri Arung Daud. Abbéréyanni, naulao matu polé ri kotaéwé.” Nakkeda iyaro makkunraié, “Ulunna iyaro tauwé maélo riyaggenrungeng lao ri Puwang polé ri témbo'éwé.” Nainappa lao nanasibawang sibawa apanrénna napalettu'ni akkattana lao ri pabbanuwana kotaéro. Purairo narette'ni ulunna Séba nanaggenrungengngi lao ri Yoab. Nainappa naseppunni Yoab tarompé'é nanasalaiwi ana' buwana iyaro kotaé nalisu ri bolana tungke'-tungke'. Lisu toni Yoab ri Yérusalém mangolo ri arungngé. Iyanaé pajaba-pajaba tanré iya nakkaé Daud: Pallimana sininna tentara Israélié: Yoab. Kapala pasukang pengawal paribadinna Daud: Bénaya ana' Yoyada. Kapalana pajjama passaé: Adoram. Bendaharana wanuwaé: Yosafat ana' Ahilud. Jurutulisi'na wanuwaé: Séya. Imang: Zadok sibawa Abyatar. Imang ri saorajaé: Ira polé ri kota Yair. Wettunna mapparénta Daud, kajajiyanni akkadéreng masero senna'é iya ittanaé telluttaung bujuru. Nanaéllau Daud panunju'na Puwangnge passalenna gau'éro, namakkeda Puwangnge, “Iyaro akkadérengngé iyanaritu nasaba asalanna Saul sibawa kaluwargana, purai mennang nauno sining tau Gibéongngé.” (Sining tau Gibéongngé tenniya tau Israél; muttama'i mennang sikalompo baiccu ri tau Amorié. Purai majjanci sining tau Israélié maélo linrungiwi mennang, iyakiya purai nausahakang Saul paccappui mennang nasaba napikkiri'i apentingenna tau Israélié sibawa Yéhudaé.) Nanaobbini Daud iyaro sining tau Gibéongngé, namakkutana lao ri mennang, “Aga wedding upogaukekko? Macinnaka mpajai asalang iya puraé ripogau' lao ri iko, kuwammengngi mubarakkakiwi umma'na Puwangnge.” Nappébali mennang, “Parakarata sibawa Saul enrengngé kaluwargana dé' nawedding ripurai sibawa péra' nenniya ulaeng, iyakiya dé'to tamacinna mpunoi muwi séddi tau polé ri bangsa Israélié.” Namakkeda Daud, “Rékko makkuwaitu, aga muwacinnai upogau'?” Nappébali mennang, “Saul arung napilé Puwangnge macinnai paccappu manekki angkanna lennye'ki polé ri sininna Israélié. Rimakkuwannanaro, abbéréyanni pitu tau polé ri wija-wijanna iya worowané, kuwammengngi tagattungngi ri yolona Puwangnge ri Gibéa, kotana muto Arung Saul.” Nappébali arungngé, “Madécénni, uwabbéréyappi matu mennang.” Iyakiya nasaba Daud sibawa Yonatan pada purani mattanro séddié sibawa laingngé, dé' nabbéréyangngi Daud Méfibosét ana'na Yonatan. Iya nalaé Daud iyanaritu Armoni sibawa Méfibosét, iyanaritu iya duwa ana' worowanéna Saul iya najajiyangngé Rizpa ana' Aya; sibawa iya lima ana' worowanéna Mérab ana' makkunrainna Saul, iyaro ana'-ana'é jajiwi polé ri allaibinénna Mérab sibawa Adriél ana'na Barzilai, tau Méholaéro. Riyabbéréyangngi mennang lao risining tau Gibéongngé, nainappa iya pitu tauwéro matéi massamang mennang rigattung ri tompo'na bulu-bulué ri yolona Puwangnge. Iyaro pahukkungeng maté napogau'i ri cappa'na wettu lemmaé, wettunna caddukué mammula riyéngngala. Nainappa Rizpa gundi'na Saul, pallebbarengngi aléna kaing karung ri tompo'na batu naonroiyé iyaro sining ujué makkalénnereng. Dé' nasalaiwi Rizpa iyaro mappammulai ri pammulanna wettu éngngalangngé narapi teppana bosié ri wettu addunurengngé. Dé' naleppessangngi iyaro sining ujué riganggu ri manu'-manu'é ri essoé iyaré'ga ri olokolo masekkangngé ri wennié. Wettunna ripowadang Daud aga iya napogau'é Rizpa, laoni malai buku-bukunna Saul sibawa Yonatan polé ri pabbanuwana kota Yabés ri Giléad. (Iyaro sining tauwé purai naénnau iyaro buku-bukué ri tana lapanna kota Bét-San, onronna tau Filistingngé gattungngi iyaro sining ujué nacaunana Saul ri Bulu-bulu Gilboa.) Iyaro buku-bukunna Saul sibawa Yonatan natiwini polé kuwaro, nainappa napaddeppungeng towi buku-bukunna iya pitu tau rigattungngéro. Nainappa buku-bukunna Saul sibawa Yonatan enrengngé buku-bukunna iya pitu tauwéro nakuburu'ni ri laleng kuburu'na Kish ambo'na Saul ri Zéla ri daérana Bényamin. Pura manennana napogau' situru paréntana arungngé, natarimani Allataala sempajanna mennang untu' wanuwaéro. Mammususi tau Filistingngé sibawa tau Israélié. Daud sibawa ana' buwana laoni mammusu méwai tau Filistingngé. Ri laleng musuéro posoi Daud. Poléni séddi tau rassasa asenna Yisbi-Bénob. Bessinni riyébbui polé ri gessaé tane'na kira-kira tellu sitengnga kilo. Tappi towi peddang iya mabarué, sibawa mateppe'na naulléi mpunoi Daud. Iyakiya Abisai ana' Zéruya poléi tulungngi Daud. Naluruiwi iyaro rassasaé sibawa naunoi. Purairo naéllauni ana' buwana Daud kuwammengngi najjanci Daud dé'na namaélona maccowé ri laleng musué. Makkedai mennang, “Datu iyanaritu amménasanna Israélié, aja' narapiki ateddéngeng Datu,” Kajajiyassi musué méwai tau Filistingngé ri Gob. Ri laleng musuéro Sibkhai tau Husaé mpunoi séddi rassasa riyasengngé Saf. Ri laleng musu laingngé sibawa tau Filistingngé ri Gob, Elhanan ana' Yair polé ri Bétléhém mpunoi Goliat polé ri Gat. Torongeng mpessinna iyaro Goliat silloppo aju paréwa tennungngé. Kajajiyassi musué méwai tau Filistingngé ri Gat. Kuwaro engka séddi rassasa iya poji senna'éngngi mammusu. Mappunnaiwi enneng jari ri tungke' limanna sibawa enneng jari ri tungke' ajéna. Naéllékéllé'ni tau Israélié, iyanaro saba'na nariyuno ri Yonatan ana' Siméa, kakana Daud. Iya eppa tau iya naunoé Daud sibawa pasukannaro, iyanaritu wija-wijanna rassasaé ri Gat. Puranana napassalama Puwangnge Daud polé ri Saul sibawa polé ri sininna balinna iya laingngé, napuwélonni Daud iyaé élongngé untu' Puwangnge: [ Upoji-Ko, oh Puwang, Iko ritu awatangekku.] Puwangnge pada-padai bénténg iya mawatangngé onrokku mallinrung. Allataalaku pada-padai bulu batué, onrokku maccinaung. Pada-pada kaliyawoé tongkoka, sibawa jagaika kuwammengngi natuli amakka. Mangobbika lao ri Puwang iya sipato'é ripoji, napaleppe'ka polé risining balikku. Riyattulilingika ri abala amaténgngé sibawa riyalle ri lémpe abinasangngé. Riyattulilingika ri abala amaténgngé, siyo-siyo amaténgngé engkai ri yoloku. Ri laleng aposongekku mangobbika lao ri Puwangnge, goraka lao ri Allataalaku méllau pattulung. Polé ri Bolana Naéngkalingai saddakku sibawa jampangiwi pangobbiku. Nanataggottang tanaé sibawa ténré, goyanni akkatettongenna bulué sibawa tatténréng nasaba caina Allataala! Mapporo rumpué polé ri sebbo inge'-Na, api sibawa bara massu polé ri bawa-Na. Napuwé'i langié, nananonno-Na, nasibawang ellung mapettang ri yawana ajé-Na. Luttui sibawa tonangi kérub; sajéi ri yasé'na panni angingngé. Nakalémoriwi Aléna sibawa apettangeng; ellung malilling iya makkompe'é mattulilingiwi. Polé ri billa'é ri yolo-Na, massuni ellungngé, bosi ése'é sibawa apié. Namagguttu Puwangnge polé ri bétaraé, Iya Pommatanré mapparéngkalingangngi saddan-Na. Nattémbakengngi sining pana-Na, nanapatassiya-siyai balié. Napaccenné-cennéi billa'é makkolik-koling sibawa mébbui mennang lari. Tattimpa borina tasi'é sibawa tabbukka pallanggana linoé Wettunna Puwangnge nagera' balin-Na sibawa macai. Polé ri yasé naloro'i liman-Na Puwangnge; Nakkatennikka sibawa Nagettekka polé ri uwai iya maliyungngé. Napassalama'ka polé ri bali iya poré sibawa polé risining tau iya benciyékka nasaba mawatang senna'i mennang untu' aléku. Nagasaka mennang wettukku nakenna abala iyakiya Puwangnge mancaji pattulukku. Napaleppe'ka polé ri abalaé sibawa passalama'ka nasaba Naélorika. Nawale'i Puwangnge pangkaukekku iya tongengngé; Nabarakkakika saba' dé' upasala. Uturusiwi paréntana Puwangnge, sibawa dé' uwabboko polé ri Allataalaku. Sininna hukkun-Na upuriyatiwi, parénta-parénta-Na dé' utettangngi. Naisseng makkedaé dé' cellaku sibawa pabélaiwi alé polé ri asalangngé. Nanawale'i Puwangnge pangkaukekku iya tongengngé saba' Naissengngi dé' upasala. Puwang, matinulu-Ko lao ri tau iya matinulué sibawa makessingngi lao ri tau makessingngé. Lao ri tau mapaccingngé mupannessai alému mapaccing, iyakiya tau majaé mumusui. Tau iya mariyawa atié mupassalama'i; iyakiya tau iya matempoé mupatunru'i. Mupalluwa'i pajjennangekku; Puwang Allataalaku tajangiwi apettangekku. Mupéwatangika untu' paccappui balikku; nasibawang bantuwanna Allataalaku uleppoi attahangenna mennang. Pangkaukenna Allataala sukkui, jancinna Puwangnge weddingngi riyatepperi! Pada-padai kaliyawoé lao ri sininna iya mallinrungngé ri Aléna. Saba' banna Puwangnge ritu Allataala; Allataalata bawang pangéwaingetta. Aléna ritu Allataala iya péwatangiyékka sibawa mébbui asekku amang. Napéwatangiwi ajéku pada-pada ajé jongaé, sibawa jagaiwi asalamakekku ri bulué. Napagguruka untu' mammusu, angkanna weddikka paggettengngi pana iya kaminang mawatangngé. Puwang, Iko linrungika sibawa passalama'ka, nenniya tumpe'ka sibawa akuwasam-Mu mancajika riyattuwang nasaba tindakam-Mu. Mujagaika kuwammengngi dé' naritawakka sibawa dé' naengka namabuwang. Ulellungngi balikku sibawa ucaui mennang, sibawa pémmali soro narapi mennang cappu. Uwabbantingeng mennang narapi dé' naulléi tokkonna, rebbai mennang ri yolona ajéku dé' pakkullénna. Muwérékka awatangeng untu' mammusu, sibawa apakalang lao risining balikku. Muwébbui balikku lari polé ri iyya; upaccappui sining tau iya benciyékka. Gorai mennang, iyakiya dé'gaga mattulung, mangobbii mennang lao ri Puwangnge, iyakiya dé' Nappébali. Uwancuru'i mennang pada-pada awu iya mattarumpué, sibawa usering pada-pada bungkaé ri lalengngé. Mupaleppe'ka polé ri appang iya madorakaé, sibawa pancajiko panguwasana bangsa-bangsaé; bangsa iya dé'é uwissengngi mancaji atakku. Tunru ri iyya sining tau laingngé, sibawa mapato rékko naéngkalingai paréntaku. Teddénni abaraningenna mennang; ténré mennang sibawa massu polé ri bénténna. Tuwoi Puwangnge! Ripojiwi pangéwaingekku! Pakarajai arajanna Allataala, pappassalama'ku! Nawérékka apakalang lao ri balikku, Napatunru'i bangsa-bangsaé ri yoloku, Napassalama'ka polé risining balikku. Puwang, Muwérékka apakalang lao ri balikku, Mulinrungika polé risining tau mabecco'é. Naupakaraja-Ko ri yelle'na bangsa-bangsaé, sibawa upuwélongek-Ko pappoji-pojiyang. Allataala mabbéré apakalang battowa lao ri arun-Na, tette'i namaséi tau napilé-Na, iyanaritu Daud sibawa wija-wijanna untu' mannennungeng. Daud ana' Isai ripiléi mancaji arung sibawa riyébbui mancaji tau maraja ri Allataalana Yakub. Alénato ritu karangngi élokkélongngé untu' Israélié. Iyanaé ada-adanna Daud paccappurengngé: Rohna Puwangnge pura makkeda naolaka; paseng sibawa pangaja-Na engkai ri témukku. Allataalana Yakub pura mabbicara; lao ri aléku pallinrunna Israélié makkeda: “Arung iya paréntaéngngi ra'ya'é sibawa adélé iya mappimpingngé sibawa apatong ri Puwangnge. Pada-padai tappa élé masiya'é pada éléé ri wettu macorana langié. Pada-pada cahaya mata essoé purana bosi mébbui wella manyilaé magello carillakkillang.” Makkuwatoniro wija-wijakku ribarakkaki ri Allataala, assijancin-Na ri iyya, dé' natappinra, iyaro jancin-Na mannennungengngi, taratoro ri laleng sini-sininnaé. Natanggungngi Allataala apakalakku sibawa tarimai sininna cinna atikku. Iyakiya tau iya dé'é naturusiwi Puwangnge pada-padai dori iya riyabbéyangngé. Dé' naulléi limanna tauwé makkatenningngi; dé muwi séddi tau maélo géssai teppaké paréwa polé ri ajué iyaré'ga bessié. Iyaro sining tauwé cappui matu nanré api. Iyanaé asenna sining parawirana Daud iya tarompoé: Iya mammulangngé iyanaritu Ishbaal, tau Hakhmoni, pamimpinna “Kalompo Tellué” (Triwira). Engka naengka ri laleng séuwaé ammusureng naéwai aruwa ratuna tau nanauno manengngi mennang sibawa bessinna. Tau maduwaé ri laleng Kalompo Tellué iyanaritu Eléazar ana' Dodo polé ri appanna Ahohi. Natinrosiwi Daud wettunna mennang moloiwi tau Filistingngé iya maddeppungengngénna untu' mammusu. Na wettunna soro pasukang Israélié, matterui Eléazar méwa mpunoi tau Filistingngé narapi poso senna. Sojo'ni limanna angkanna dé' naulléi leppessangngi peddanna. Iyaro essoé Puwangnge mpéréngngi apakalang iya battowaé lao ri Israélié. Pasukang Israél iya soroé onna lisuni ri onronna Eléazar mammusu, nanaludungngi waju musué polé risining ujué kuwaro. Tau matellaué ri laleng Kalompo Telluéro iyanaritu Sama ana' Age polé ri Harari. Engka naengka naddeppungeng tau Filistingngé ri Léhi, riséddié dare iya pennoé buwé cella, lariwi pasukang Israélié polé ri tau Filistingngé. Iyakiya Sama tette'i mammusu, mabbuno sibawa caui tau Filistingngé, angkanna naulléi mattahangengngi iyaro dare'é. Makkuwaniro Puwangnge mpéréngngi apakalang iya battowaé. Muddanini Daud ri kampong assalennaro namakkeda, “Ah, ébara'na ripaénukka uwai polé ri bujung seddéna pintu gerbangngé ri Bétléhém!” Naéngkalinganaro iya tellu tau parawiraéro nabettuni akkémanna tau Filistingngé, nanaséro uwai polé ri bujungngéro, nainappa natiwi lao ri Daud. Iyakiya dé' namaélo Daud ménungngi, mala natiri'i selaku pakkasuwiyang lao ri Puwangnge. Makkedai, “Oh Puwang, dé' uwulléi ménungngi iyaé uwai! Rékko uwénungngi samanna uwénungngi darana sining tau iya puraé mappésonangngi nyawana mennang!” Jaji dé' sises-siseng namaélo Daud ménungngi iyaro uwai. Iyaro jasa-jasana iya tellu tau pajuwang iya baraniéro. Séddi tau parawira iya tarompoé laingngé iyanaritu Bénaya ana' Yoyada tau Kabzeel. Barani senna'i. Duwa pahlawang battowa polé ri Moab pura nauno. Engka naengka riséuwaé esso massalju, muttama'i ri laleng séddié kalebbong, nanaunoi séddié singa kuwaro. Engkato naengka naunoi séddié tau Maséré, iya poré sibawa mabbessi. Naoloiwi Bénaya sibawa banna tekkeng. Bessi iya engkaé ri limanna tau Maséré'éro nasittaiwi nainappa napaké untu' mpunoi iyaro tauwé. Iyanaro jasa-jasana Bénaya, séddiwi tau polé ri “Kalompo Telluppuloé”. Ri laleng kalompo'éro Bénaya iya pommariyoloé, iyakiya dé' napada-pada héba'na “Kalompo Tellué”. Daud makkai mancaji kapala pengawal paribadinna. Macaisi Puwangnge lao ri Israélié, nanapalécéi Daud sibawa akkatta papoléngengngi asukkarakeng bangsaéro. Adanna Puwangnge lao ri Daud, “Pakangkano abbilangeng ri Israél sibawa Yéhuda.” Namakkedana Daud lao ri Yoab pallima tentarana, “Laono silaong prawira-parawiramu lao ri sininna suku Israélié ri sininna wanuwaé untu' pakangka abbilangeng. Macinnaka missengngi jumellana mennang.” Iyakiya makkedai Yoab lao ri arungngé, “Tennapodo Puwang Allataalana Datu palleppi-leppiwi ra'ya' Israélié narapi wékkasératu polé ri jumellana mennang makkekkuwangngé, sibawa tennapodo Datu tuwo mupi kuwammengngi naulléi mitai. Iyakiya untu' aga Datu puwéloi iyaé abbilangengngé?” Iyakiya tette'i arungngé makkatenning ri paréntanaro. Jaji Yoab silaong sining parawirana laoni untu' bilangngi bangsa Israélié. Nalléttoinnana Salo Yordan, Yoab sibawa ana' buwana makkémani ri seddé yattanna Aroér, séddiwi kota ri tengnga-tengngana lompo'é ri daéra Gad. Polé kuwaro laoni mennang ri manorang, ri Yaézer, nainappa matteru lao ri Giléad sibawa Kadés ri daérana tau Hét-é. Nainappa mennang lao ri Dan, nainappa polé ri Dan bélo' liyajang, lao ri Sidon. Polé kuwaro laoni mennang ri yattang ri Tirus kota iya mabbénténgngéro. Purairo laoni mennang ri sininna kotana tau Héwié sibawa tau Kanaangngé, na paccappurenna lao ri Bersyéba, ri bagiyang yattanna Yéhuda. Najalajja'ni sininna wanuwaé ri laleng wettu aséra uleng sibawa duwappulo essona. Purairo lisuni mennang ri Yérusalém nanalaporo'i ri arungngé wassélé'na abbilangengngéro. Jumellana worowané iya pennoiyéngngi sara' untu' mancaji tentara engka 800.000 tau ri Israél sibawa 500.000 tau ri Yéhuda. Iyakiya puranana nabilang Daud iyaro bangsaé, makkénedding pasalani, namakkeda lao ri Puwangnge, “Oh Puwang, madosa senna'ka! Addampengekka, saba' iyaro tindakakku madonggo senna.” poléni Gad mangolo sibawa paissengiwi paréntana Puwang -ngéro, adanna, “Kéga napilé Datu: Iyaé wanuwaé nakennai abala akkadéreng telluttaung ittana, iyaré'ga lariwi Datu rilellung ri balié tellumpuleng ittana, iyaré'ga iyaé wanuwaé nakennai sai tellungngesso ittana? Pettuini makkekkuwangngé aga harusu upalettu lao ri Puwangnge.” Mappébalini Daud, “Aduh! Cilakana! Iyakiya lebbi kessing manekki nahukkung Puwangnge, naiya nahukkung tolinoé, saba' battowai paressé babuwa-Na.” Napapoléna Puwangnge sai lao ri tau Israélié mappammulai éléna essoéro narapi wettu iya puraé Napattentu. Ri sininna Israélié 70.000 tau maté. Malaéka'na Puwangnge iya tiwié amaténro lettu'ni ri onrong addésekeng gandong appunnangenna Arauna, tau Yébus-é. Wettunna naita Puwangnge makkedaé iyaro malaéka'é sadiyani untu' paccappui Yérusalém, napinrani Puwangnge apettun-Na, Namappésau hukkungngi iyaro bangsaé. Adan-Na lao ri malaéka'éro, “Genne'ni! Appésauno!” Naitani Daud malaéka' iya mattengngangngé mpunoi iyaro ra'ya'é, namakkedana lao ri Puwangnge, “Iyya ritu madosa saba' iyya mébbui iyaro asalangngé. Iyakiya aga asalanna bangsa iya macilakaéro? Hukkunna iyya sibawa kaluwargaku!” Iyatoro essoé napolé Gad mangolo ri Daud sibawa makkeda ri aléna, “Sitinajai Datu ménré ri onrong addésekeng gandong appunnangenna Arauna, sibawa patettongengngi mézba Puwangnge.” Najoppana Daud situru sibawa paréntana Puwangnge iya ripalettukengngéngngi naolai Gad. Nasitujuwangngi Arauna mattengngang cuku' liyawa, nanaitai arungngé enrengngé sining pattinrona lao ri aléna. Suju'ni Arauna ri yolona Daud, sibawa makkeda, “Aga akkatta apolénna Datu?” Nappébali Daud, “Untu' melliwi onrong addésekeng gandongngéwé, maéloka patettongengngi mézba Puwangnge kuwaé, kuwammengngi namappésau iyaé saié.” Nakkeda Arauna, “Ala bawanni Datu, sibawa akkasuwiyangenni lao ri Puwangnge aga iya napérasaé Datu makessing. Iyanaé sining sapinna untu' akkarobangeng ritunu sibawa untu' aju tununna weddingngi napaké Datu watang rakkalaé sibawa sining pépeng addésekengngé.” Nabbéréyang manengngi iyaro Arauna lao ri arungngé, sibawa makkeda, “Tennapodo Puwang Allataalana Datué tarimai pakkasuwiyanna Datué.” Iyakiya mappébaliwi arungngé, “Aja'! Maéloka melliwi. Dé' umaélo makkasuwiyangeng lao ri Puwang Allataalaku séuwaé iya ulolongengngé sibawa cuma-cuma.” Nainappa naelli Daud onrong addésekeng gandongngé sibawa sining sapingngéro sibawa limappulo dowi péra' ellinna. Nainappa patettong Daud mézba kuwaro untu' Puwangnge sibawa makkasuwiyangeng akkarobangeng ritunu enrengngé akkarobangeng pappasidamé. Natarimai Puwangnge sempajanna Daud, napajana iyaro saié ri Israél. Makkekkuwangngé macowa senna'ni Arung Daud. Namuni risalimoriwi sibawa kaing maumpe, tette'i makeccé. Rimakkuwannanaro makkedani sining pegawénna, “Iya Malebbi'e, makessingengngi sappaki séddi ana'dara untu' monro sibawa Datu nenniya jampangiwi Datu. Matinroi matu silaong Datu kuwammengngi namapella Datu.” Nainappa lao barunding sibawa Yoab nenniya Imang Abyatar. Indo'na Yoab riyaseng Zéruya. Yoab sibawa Imang Abyatar nasitujui untu' sokongngi usahana Adonia. Iyakiya Imang Zadok, Bénaya ana' Yoyada, Nabi Natan, Siméi, Réi sibawa pengawal paribadinna Arung Daud dé' naccowé lao ri Adonia. Riséuwaé esso ri onrong iya riyasengngé Batu Ula seddéna mata uwai En-Rogel, Adonia makkasuwiyangeng akkarobangeng bimbala, saping lai sibawa ana' saping iya macommo'é. Naundangngi ana'-ana' worowanéna Arung Daud iya laingngé, sibawa pegawé-pegawé saorajaé polé ri suku Yéhuda lao ri pésta akkarobangengngéro. Iyakiya Salomo anrinna, sibawa Nabi Natan enrengngé Bénaya sibawa pengawal paribadinna Arung Daud dé' naundangngi. Nalaona Nabi Natan sitangngi Batsyéba, indo'na Salomo, namakkeda lao ri aléna, “Dé'paga naéngkalingai Ratu makkedaé Adonia, ana' worowanéna Hagit, pura makkai aléna mancaji arung, na Arung Daud dé' aga-aga naisseng passalenna gau'éro? Macinnaiga Ratu kuwammengngi Salomo sibawa Ratu nasalama aléna, upangajariki kuwammengngi angoloni masitta ri Arung Daud, sibawa powadangngi makkuwaé: ‘Dé'ga napura mattanro Datu ri iyya makkedaé ana' worowanéku Salomo mancaji arung matu sulléiwi Datu? Makkekkuwangngé, magi na Adonia mancaji arung?’ ” Nakkeda Natan patterui, “Matti, ri wettu mabbicarana mupa Ratu sibawa arungngé, muttama'ka matu untu' pakkasse'i aga iya puraé napowada Ratu.” Nalaona Batsyéba mangolo ri arungngé ri laleng bili'na. Iyaro wettué macowa senna'ni arungngé, na Abisag, ana' dara polé ri Sunemro, jampangiwi. Suju'ni Batsyéba ri yolona arungngé, namakkutanana arungngé, “Aga muwacinnai?” Nappébali Batsyéba, “Petta Iya Malebbié, purai mattanro Datu ri iyya nasabbing asenna Puwangnge, Allataalana Datu, makkedaé ana' worowanéku Salomo mancaji arung matu sulléiwi Datu. Iyakiya makkekkuwangngé tennaisseng Datu, mancaji arunni Adonia. Purani makkasuwiyangeng maéga bimbala, saping lai sibawa ana' saping iya macommo'é. Pura toni naundang lao ri péstaéro ana'-ana' worowanéna Datu sibawa Imang Abyatar enrengngé Yoab, pallima tentarana Datu. Iyakiya, dé' naundangngi Salomo. Petta Iya Malebbié, sininna ra'ya' Israélié makkekkuwangngé mattajeng apettung polé ri Datu passalenna niga sulléiwi matu Datu mancaji arung. Rékko dé' nabbéréyangngi Datu iyaro apettungngé, pasti maténa muwa Datu, iyya sibawa ana' worowanéku rigaukengngi matu selaku tobali'bella.” Ri wettu mabbicarana mupa Batsyéba, lettu'ni Nabi Natan ri saorajaé. Naripaissengina arungngé passalenna apolénna Natan. Massuni Batsyéba, nauttama Natan, nanasuju' ri yolona arungngé. Makkedai Natan, “Petta Iya Malebbié, puraniga nappallebbangeng Datu makkedaé Adonia sulléiwi matu Datu mancaji arung? Iyato essoé napura makkasuwiyangeng maéga bimbala, saping lai sibawa ana' saping iya macommo'é. Sininna ana' worowanéna Datu purani naundang. Makkuwatoro sining pallima tentarana Datu, sibawa Imam Abyatar. Mappéstani mennang makkekkuwangngé silaong aléna sibawa gora-gora, ‘Tuwoi Arung Adonia!’ Iyakiya, dé' naundakka. Imang Zadok sibawa Bénaya enrengngé muwi Salomo dé'to naundangngi. Aga Datu suroi pogau'i iya manennaé, teppaissengiwi sining pegawénna Datu niga sulléiwi matu Datu?” Nakkeda Arung Daud, “Obbii Batsyéba.” Namassuna Nabi Natan nalisu Batsyéba mangolo ri arungngé. Nasuju'na Batsyéba nakkedato, “Tuwoi Petta Arungngé untu' mannennungeng!” Nainappa Arung Daud massuro mobbii Zadok, Natan sibawa Bénaya. Polénana mennang, makkedani arungngé lao ri mennang, “Obbini sining parawiraku namulao sibawa mennang ri Salomo ana' worowanéku. Paénré'i ri bagalku, namutiwii ri mata uwai Gihon. Kuwaniro Zadok sibawa Natan harusu lanti'i mancaji arunna Israélié. Purairo harusu'ko paoniwi tarompé'é sibawa gora, ‘Tuwoi Arung Salomo!’ Nainappa mutinrosi lisu kuwaé untu' tudangiwi kadéra akkarungekku, nasaba aléna ritu pura upilé mancaji arung sulléika untu' paréntai Israélié sibawa Yéhuda.” Nametté Bénaya, “Makessinni, Iya Malebbié, tennapodo Puwangnge, Allataalana Datu, pakkasse'i paréntana Daturo. Pékkugi Puwangnge pura sibawangngi Datu, tennapodo nasibawang towi Salomo. Tennapodo Puwangnge mébbui apparéntanna lebbi marajai naiya apparéntanna Datu.” Na Zadok, Natan, Bénaya sibawa pangawal paribadinna arungngé napaénré'ni Salomo ri bagalna arungngé, nainappa natinrosi mennang lao ri mata uwaié ri Gihon. Nainappa nala Zadok onrong minnya zaitunna iya natiwié polé ri Kémana Puwangnge, nanalanti'i Salomo sibawa pakéi iyaro minnya'é. Napaoni toni tarompé'é sibawa sininna iya engkaé hadéré kuwaro gorani, “Tuwoi Arung Salomo!” Nainappa iya manenna mennang tinrosiwi lisu nagora-gorato sibawa paoniwi sulingngé, angkanna samanna maélo mapuwé tanaé nasaba rowanaro. Adonia sibawa sininna topoléna silalona paja mappésta. Wettunna naéngkalinga Yoab oni tarompé'é, makkutanani, “Aga kajajiyang ri kotaé angkanna marowa senna?” Dé'pa napaja Yoab mabbicara, tappa engkani Yonatan, ana'na Imang Abyatar, “Uttama'no mai.” makkedai Adonia. “Iko tau makessing, pasti iya mutiwie, kareba makessitto.” Nappébali Yonatan, “Taddampengekka, tenniya karéba makessing. Purani nakka Arung Daud Salomo mancaji arung! Zadok, Natan, Bénaya sibawa pangawal paribadinna arungngé purani risuro tinrosiwi Salomo. Purani napaénré mennang ri bagalna arungngé, sibawa Zadok enrengngé Natan pura lanti'i ri mata uwai Gihon. Makkekkuwangngé lisuni mennang ri kotaé nagora-gorato sibawa marowa, na sininna kotaé tasséleng. Iyanaro ramé-ramé iya muwéngkalingaé onna. Mancaji arunni Salomo makkekkuwangngé. Mala sininna parawirana arungngé poléni passalama'i Arung Daud. Makkedai mennang, ‘Tennapodo Allataalana Datu pancajiwi Salomo lebbi kalabba naiya Datu; tennapodo apparéntanna Salomo lebbi marajai naiya apparéntanna Datu.’ Nainappa ri onrong atinronna, suju'ni Arung Daud sompai Allataala, sibawa massempajang, ‘Ripojiko, oh Puwang, Allataala iya nasompaé umma Israélié. Iyaé essoé séddi polé ri wija-wijakku uwakkani mancaji arung sulléika. Sibawa purana Mupalalo tuwo untu' sabbingngi!’ ” Métauni sining topoléna Adonia, angkanna tettong maneng mennang nanalao, tungke'-tungke' lao situru élona. Namétau senna'na Adonia lao ri Salomo, angkanna lari lao ri Kémana Puwangnge sibawa makkatenningngi cappa-cappa'na mézbaé kuwaro. Ripaissengini Arung Salomo ri tauwé gau'éro. Nappaissengenni mennang makkedaé nasaba métau senna'i Adonia lao ri Salomo, nanalaona ri mézbaé sibawa makkatenningngi cappa-cappa mézbaéro sibawa makkeda, “Dé' umaélo lao polé kuwaé ri wettu dé'napa namattanro Salomo lao ri iyya makkedaé dé' namaélo mpunoka.” Nappébali Salomo, “Rékko makessingngi kédona, dé' narihukkungngi matu muwi céddé; iyakiya rékko kédo majai, harusu'i riyuno.” Nainappa nasuro arungngé tauwé lao malai Adonia polé ri mézbaéro. Napoléna Adonia mangolo ri arungngé, nasuju' ri yolona. Namakkedana arungngé, “Weddikko lisu!” Wettunna macawé'ni ajjalenna, naobbini Daud Salomo, ana' worowanéna, sibawa mabbéréyangngi pasenna iya paccappurengngé. Makkedani Daud, “Narapini wettunnana matéka. Sitinajako mateppe sibawa barani. Pogau'ni aga iya naparéntangngékko Puwang Allataalamu. Turusiwi sininna hukkung-hukkung sibawa parénta-parénta-Na iya tarokié ri laleng Kitta'na Musa, kuwammengngi kégi-kégiko lao mallolongekko matu ri laleng usahamu. Rékko mapatoko lao ri Puwang, narupaiwi matu jancin-Na makkedaé wija-wijakku paréntai matu Israélié, assaleng sukkui atinna mennang sibawa sukku nyawana tuli matinulu turusi parénta-parénta-Na. Engka mupa séddi passaleng! Pasti muwéngngerang aga pura napogau' Yoab lao ri iyya sibawa mpunoi iya duwa parawirana Israélié, iyanaritu Abnér ana' Nér sibawa Amasa ana' Yéter. Naunoi mennang ri wettu damé untu' mpale'i abbunowang iya napogau'é mennang ri wettu musué. Naunoi tau iya dé'é napasala iyakiya makkekkuwangngé iyya ritu harusu tanggungngi pangkaukenna sibawa iyya'na ritu manrasa-rasa. Nah, ana'ku, harusu'ko tinda lao ri aléna situru aga iya muwangga makessingngé; banna aja' muleppessangngi maté madécéng. Iyakiya lao ri ana'-ana' worowanéna Barzilai polé ri Giléad sitinajako kédo makessing. Harusu'ko tanggungngi apparelluwang esso-essona mennang, saba' purai mennang kédo makessing lao ri iyya wettukku lari polé ri kakamu, Absalom. Passalenna Siméi ana' Géra polé ri kota Bahurim ri daérana Bényamin, engkato pasekku ri iko. Ri laleng allalengekku lao ri Mahanaim, iyaro Siméi natanroika riyolo sibawa mapéddara. Iyakiya rimunri, wettunna poléi duppaika ri Salo Yordan, mattanroka ri aléna nasabbing Puwangnge makkedaé dé' umaélo mpunoi. Iyakiya iyanaé pasekku ri iko: aja' muleppessangngi leppe polé ri pahukkungengngé. Uwisseng mapanréko; jaji, namuni macowani, usahakangngi kuwammengngi narihukkung maté.” Nainappa maténi Daud naritampung ri Kota Daud. Mancaji arunnai Isaraélié patappulo taung ittana: pituttaung taro tudang ri Hébron, sibawa telluppulo tellu taung ri Yérusalém. Nainappa Salomo mancaji arung sulléiwi Daud, ambo'na. Akuwasanna Salomo selaku arung masse senna. Riséuwaé esso, laowi Adonia ri Batsyéba. Makkutanani Batsyéba lao ri Adonia, “Aga apolémmué sibawa akkatta makessing?” Nappébali Adonia, “Iyyé.” Nainappa natambai, “Engka séuwa iya macinnaé uwéllau ri indo'.” Nakkutana Batsyéba, “Aga?” Nappébali Adonia, “Naisseng Indo' makkedaé iyya ritu sitongenna mancaji arung; iyaro namménasaiwi sininna Israélié. Iyakiya iya kajajiyangngé sibalé'na; anrikku mancaji arung, nasaba Puwangnge puwéloi makkuwaro. Makkekkuwangngé engka séddi paréllaukku, tennapodo aja' nasampéyangngi Indo'.” Nakkutana Batsyéba, “Aga paréllaummu?” Nappébali Adonia, “Uwéllauwi Indo' maélo méllauwi ri Arung Salomo untu' palaloka kawingiwi Abisag, ana'dara polé ri Sunemro. Mateppe'ka dé' matu nasampéyangngi Salomo paréllaunna Indo'.” Nappébali Batsyéba, “Ya, makessinni. Ubicarangeppi matu arungngé iyaro gau'é untu' iko.” Nalaona Batsyéba ri arungngé sibawa akkatta bicarai gau'éro untu' Adonia. Tettonni arungngé duppaiwi Indo'na sibawa suju' lao ri aléna, nainappa tudang paimeng ri yasé kadéra akkarungenna. Nainappa nasuro tauwé passadiya kadéra ri seddé ataunna untu' indo'na. Tudannana, makkedani Batsyéba, “Macinnai indo' méllau séuwa iya baiccu'é bawang polé ri iko. Mamménasai Indo' dé' musampéyangngi matu.” Nakkutana Salomo, “Aga iyaro, indo'? Dé' usampéyangngi matu.” Nappébali Batsyéba, “Palaloi Adonia, kakamuro kawingiwi Abisag.” Nakkutana Salomo, “Magi naéllauwi indo' gau'éro ri iyya? Pada muwi iyaro méllauwi kuwammengngi uwabbéréyangngi iyaé kadéra akkarungengngé lao ri aléna. Tenniyaga kakakui? Nainappani Imang Abyatar sibawa Yoab maccowéi ri aléna!” Purana makkeda makkuwaro mattanroni Salomo nasabbing Puwangnge, “Leppessanna nakenna tanrona Puwangnge, rékko dé' uhukkung matéi Adonia nasaba paréllaunnaro! Puwangnge pura pakkasse'i tudangekku ri akkarungenna ambo'ku, Daud. Purani narupai Puwangnge jancinna sibawa purana nawéréng iyaé akkarungengngé sibawa wijakku. Mattanroka nasabbing Puwangnge iya tuwoé makkedaé matéi matu Adonia iyato essoéwé!” Namabbéréna parénta Arung Salomo lao ri Bénaya, nanalao Bénaya mpunoi Adonia. Nainappa makkedani Arung Salomo lao ri Imang Abyatar, “Laono ri kampong assalemmu ri Anatot. Sipato'ko rihukkung maté, iyakiya iyaé essoé dé' umaélo mpunoko, nasaba wettummu sibawa mupa ambo'ku, maccowéko péneddingiwi sininna anrasa-rasangngé. Sibawa ikoto murusu'i Petti Assijancinna Puwangnge.” Naripaléssona Abyatar ri Salomo selaku imang. Nasibawang pangkaukenna Salomoro aga iya puraé napowada Puwangnge ri Silo passalenna wija-wijanna Imang Eli mannessani. Naéngkalingani Yoab passalenna iya manenna puraé kajajiyanro. Métauni nasaba maccowéi ri Adonia. Iyakiya, riyolo dé' naccowé ri Absalom. Nanalarina lao ri Kémana Puwangnge nanakkatenning ri cappa-cappa mézbaé. Iyaé karébaé ripalettukenni Arung salomo. Narisurona Bénaya ri arungngé mpunoi Yoab. Laoni Bénaya ri Kémana Puwangnge sibawa makkeda ri Yoab, “Nasuroko arungngé massu polé kuwatu!” Nappébali Yoab, “Dé'. Maéloka maté kuwaé.” Lisuni Bénaya nanalaporo'i ri arungngé gau'éro. Naéngkalinganaro makkedani arungngé, “Laono namupogau'i aga iya napowadaéro. Unoi namukuburu'i, kuwammengngi iyya sibawa sininna wija-wijanna ambo'ku dé' natanggungngi abbunowang iya napogau'é Yoab lao ri tau dé'é napasala. Puwangnge hukkungngi matu nasaba abbunowang iya puraé napogau' tennaisseng ambo'ku. Abnér parawira Israélié, sibawa Amasa parawirana Yéhuda, iya duwanna dé' napasala. Lebbi kessingngi mennang naiya Yoab, iyakiya naunoi mennang. Pahukkungengngé nasaba amaténna iya duwa parawiraéro natanggungngi matu Yoab sibawa wija-wijanna untu' mannennungeng. Iyakiya sininna wija-wijanna ambo'ku iya mancaji arungngé, tuli ribarakkakiwi ri Puwangnge – maupe'i matu mennang.” Nalaona Bénaya ri Kémana Puwangnge nanaunoi Yoab kuwaro. Nainappa rikuburu Yoab ri bolana ri saliweng kota. Nainappa riyakka Bénaya ri arugngngé mancaji pallima tentara sulléiwi Yoab, sibawa Zadok riyakka mancaji imang sulléiwi Abyatar. Purairo riyobbini Siméi ri arungngé namakkeda, “Ebburenni bola alému ri Yérusalém. Onrono kuwaro sibawa aja' muwassu polé ri kotaé. Rékko baraniko massu sibawa lao liwengngi ana' Salo Kidron, harusu'ko maté; na iko muto tanggungngi asalangngéro.” Nappébali Siméi, “Makessinni, Petta Iya Malebbié. Maéloka turusiwi paréntana Datu.” Naonrona Siméi ri Yérusalém siyagangngaré wettu ittana. Labe'nana telluttaung kajajiyanni gau'éwé: Duwa tau atanna Siméi lari lao ri Gat, lao ri Arung Akhis ana'na Maakha. Wettunna ripaissengi Siméi passalenna gau'éro, napasangini lapi-lapi kaleddé'na nanalao ri Arung Akhis ri Gat untu' sappai iya duwa atannaro. Nalolongenni mennang nainappa natiwi lisu. Wettunna naéngkalinga Salomo aga iya puraé napogau' Siméi, nasuroni mobbii Siméi namakkeda, “Purano uwébbu majjanci nasabbing Puwangnge makkedaé dé' mumaélo salaiwi Yérusalém. Sibawa pura tono uparéngngerangi makkedaé rékko massuko polé ri Yérusalém, harusu'ko maté. Nah, purano majjanci sibawa musitujui untu' turusiwi iyaro paréntakuto? Iyakiya makkekkuwangngé magi muwassakkarengngi iyaro jancimmu sibawa muwajjalékkaiwi paréntaku? Muwisseng madécéng sininna jamu lao ri ambo'ku. Untu' iyaro Puwangnge hukkukko matu, iyakiya iyya ribarakkaki-Na matu sibawa akkarungenna ambo'ku napakkasse'i matu lettu mannennungeng.” Purana makkeda makkuwaro, mabbéréni parénta arungngé lao ri Bénaya nanalaona Bénaya mpunoi Siméi. Namakuwasa pennona Salomo ri laleng akkarungenna. Napancajini Salomo Maséré sellaona sibawa pubainéwi ana' makkunrainna arung Maséré. Iyaro ana' makkunraié natiwii Salomo ri kota Daud untu' monro kuwaro narapi saorajana arungngé sibawa Bolana Puwangnge enrengngé bénténg mattulilingiyéngngi Yérusalém tépu ripatettong. Nasaba dé'pa naripatettong Bolana Puwangnge wettuéro, makkarobang mupi ra'ya'é akkarobangeng ri maddupa-rupang onrong. Namaséiwi Salomo Puwangnge sibawa maccowériwi panunju'-panunju' polé ri ambo'na, iyakiya maggéré mupi sibawa makkasuwiyangeng olokolo ri maddupa-rupang onrong. Iyakiya assompang iya kaminang kalabbaé engkai ri Gibéon. Biyasai Salomo makkasuwiyangeng akkarobangeng kuwaro. Riséuwaé esso, pada-pada biyasaé, laosi Salomo kuwaro. Iyaro wennié nappaitangngi aléna Puwangnge ri aléna ri laleng nippi sibawa makkeda, “Salomo, éllauni aga muwacinnai, iyaro uwérékko matu!” Nappébali Salomo, “ Puwang, purani Muwappaitang makkedaé muwamaséi senna'i ambo'ku Daud, atammuro. Makessingngi, malempui sibawa matinului ri Iko. Naselaku boro' makkedaé untu' matteru tette'-Ko mamaséiwi, muwéréngngi séddi tau ana' worowané iya mapparéntaé makkekkuwangngé sulléiwi. Oh Puwang, Allataalaku, Muwakkaka mancaji arung sulléiwi ambo'ku, namuni malolo senna mupa sibawa dé' naissengngi carana mapparénta. Engkaka ri tengnga-tengngana bangsa iya puraé Mupilé mancaji umma'-Mu. Mennang séuwa bangsa iya battowaé iya tenribilangngé jumellana. Rimakkuwannanaro, Puwang, tennapodo wérénna apanréng iya uwapparelluwangngé untu' paréntai umma'-Mué sibawa adélé nenniya untu' pasilaingengngi kéga makessing sibawa kéga maja. Rékko dé' nappakkuwaro, pékkugi weddikka paréntai umma'-Mu iya battowaé?” Masennanni Puwangnge sibawa paréllaunna Salomoro sibawa makkeda lao ri aléna, “Saba' méllauko apanréng untu' mapparénta sibawa adélé, natenniya umuru malampé iyaré'ga asugireng untu' alému iyaré'ga amaténna sining balimmu, Upennoiwi matu iyaro paréllaummu. Maélo-Ka pancajiko lebbi mapanré sibawa lebbi macca naiya muwi niga, muwi wettu labe'é iyaré'ga wettu mangoloé. Mala muwi iya dé'é muwéllauwi Uwéréng tokko matu: gangka tuwomu sugiko matu sibawa ripakalebbi nacau muwi arung laing niga. Sibawa narékko iko, pada-padako ambo'mu Daud, turusi-Ka enrengngé maccowériwi hukkung-hukkuk-Ku, Uwérékko matu umuru malampé.” Moto'nana, mainge'ni Salomo makkedaé purani Allataala mabbicara lao ri aléna ri laleng nippi. Nanalisuna ri Yérusalém natettong ri yolona Petti Assijancinna Puwangnge sibawa makkasuwiyangeng akkarobangeng ritunu sibawa akkarobangeng pappasidamé. Nainappa pakangka pésta untu' sininna pegawénna. Riséuwaé esso, duwa tau makkunrai cakkuribang polé mangolo ri Arung Salomo. Riséuwaé wenni wettutta matinro, iyaé makkunraié dé' nattungkaiwi tenre'i ana'lolona angkanna maté. Ri tengnga bennié wettukku matinro, moto'ni nanalai ana' loloku polé ri seddéku. Iyaro ana'loloku nataroi ri onrong atinronna, na ana'lolona iya matéénnaro nataroi ri onrong atinrokku. Bajana éléé, wettukku pésedding maélo pasusui ana'lolokuro, upoléini maté. Puranana uparéssa madécéd-décéng, manessani tenniya ana'loloku.” Nakkeda iyaro makkunrai laingngé, “Mabbélléi! Iya tuwoéwé ana'loloku, iya matéro ana'lolomu!” Nappébali iyaro makkunrai mammulangngé, “Dé'! Iya matéwé ana'lolomu, iya tuwoéro ana'loloku!” Makkuwaniro mennang massasa ri yolona arungngé. Namakkeda Arung Salomo, “Pada mangakuko makkedaé ana'lolo iya tuwoéwé ana'mu na tenniya iyaro maté.” Purana makkeda makkuwaro nasuroni arungngé tauwé mala peddang. Nainappa napparéntang arungngé, “Poloi ana'lolo iya tuwoéro mancaji duwa namuwéréngngi tassipolona tungke'-tungke' iyaro makkunraié.” Naéngkalingana paréntaéro, makkedani indo' tongenna ana' éro, “Taddampengekka, Datu, aja' taunoi ana'éro. Wéréng bawanni.” Iyaro indo'é makkeda makkuwairo nasaba napoji senna'i ana'na. Iyakiya iyaro makkunrai laingngé makkedai, “Ya, polo bawanni, leppessanni dé'gaga séddi tau polé ri idi lolongengngi!” Namakkedana Salomo, “Aja' muwunoi iyaro ana'loloé! Abbéréyangngi lao ri makkunrai mammulangngéro – aléna ritu indo'na.” Wettunna naéngkalinga bangsa Israélié passalenna apettunna Salomo ri laleng parakaraéro, bengngani mennang sibawa pakalebbii. Saba' manessani makkedaé Allataala pura mpéréngngi pangissengeng untu' kédo adélé. Mancaji arunni Salomo ri sininna wanuwa Israélié. Makkai Salomo seppulo duwa bupati ri sininna wanuwa Israélié. Jamanna mennang iyanaritu paddeppungengngi polé ri daérana mennang bahang inanré untu' arungngé sibawa silise saorajana. Tungke' bupatié makkaléléng mattanggung jawa' ri gau'éro siuleng ittana tungke' taung. Ra'ya' Yéhuda sibawa Israélié égana padai kessi'é ri wiring tasi'é. Mappunnaiwi mennang genne inanré sibawa énungeng enrengngé tuwoi sibawa masennang. Mappunnaiwi Salomo 12.000 tentara makkinnyarang sibawa 40.000 wakké untu' anyarang iya gettengngéngngi karéta-karétana. Malléléng siuleng ittana, tungke' bupatié mabbéré bahang inanré untu' Arung Salomo sibawa untu' sininna tau iya lolongengngé inanré polé ri saorajaé, angkanna dé' naakurangeng mennang muwi aga. Tungke' iyaro bupatié mabbéré towi gandong sibawa daramé untu' sininna anyaranna Salomo, muwi anyarang tonangeng iyaré'ga anyarang karéta. Inanréna iyaro olokolo'é ritiwii risining wakké anyarangngé singngéga iya napparelluwangngé. Allataala mpéréngngi Salomo pappéjeppu sibawa pangissengeng iya dé'é padanna, enrengngé pappahang iya malamung senna'é. Ri wanuwa-wanuwa alau sibawa Maséré dé'gaga tau iya lebbi accaé naiya aléna. Tonget-tongengngi kaminang macca polé ri sininna tauwé. Nacaui Etan tau Ezrahié, Héman, Kalkol sibawa Darda ana'-ana' Mahol. Tarompo asenna Salomo kégi-kégi ri wanuwa-wanuwa mattulilingiyéngngi akkarungenna. Engka tellussebbu warékkada sibawa lebbi sisebbu élong iya naébbué. Naulléi mabbicara passalenna ajukajungngé sibawa tanet-tanengngé – polé ri aju camara Libanongngé lettu ri wella hisop iya tuwoé ri pepping-pepping batué. Mabbicara towi passalenna olokolo'é, padaénna akkalarapanna manu'-manu'é, olokolo makkalolo'é sibawa balé. Naéngkalinga sining arungngé ri sininna linoé passalenna amaccanna Salomo angkanna mennang kiring tau lao ri aléna untu' méngkalingai. Hiram, arung Tirus, tuli massellaowi sibawa Arung Daud. Wettunna naéngkalinga Hiram makkedaé mancaji arunni Salomo sulléiwi Daud, ambo'na, kirinni suro lao ri Salomo. Nanakiring tona Salomo pasengngéwé lao ri Hiram, “Arung Hiram Iya Malebbié! Tentu naisseng Puwang makkedaé ambo'ku Daud tuli tarapassai mammusu nasaba rigasai ri balié polé ri wanuwa-wanuwa ri seddéta. Sibawa nasaba dé'pa nabbéré Puwangnge apakalang lao ri aléna polé ri sininna balinna, dé'na narapii patettong bola untu' onrong massompa lao ri Puwang Allataalana. Iyakiya makkekkuwangngé Puwang Allataalaku pura mabbéré atennangeng ri sininna daéra akuwasakku. Dé' uwappunnai bali, sibawa dé'to gaga abala kennai wanuwakku. Puwangnge pura majjanci makkuwaé lao ri ambo'ku Daud, ‘Ana' worowanému iya uwakkaé matu mancaji arung sulléiko patettong matu bola onrong assompang lao ri iyya.’ Rimakkuwannanaro, Puwang Hiram Iya Malebbié, iyya, Salomo, pura pettuiwi patettongngi iyaro bolaé. Napahang Puwang makkedaé ri yelle'na ra'ya'ku dé'gaga macca tubbang aju pada-pada ra'ya'na Puwang. Rimakkuwannanaro, uwéllauwi ri Puwang tasuroi sining taunna Puwang natubangekka aju-aju camara Libanon. Usuropi matu ra'ya'ku duwangngi mennang, na siyagi-siyagi saro napattentu Puwang untu' sining taunna Puwanro, uwajapi matu.” Masennang senna'ni Hiram tarimai karébaéro. Makkedani, “Pojiwi Puwangnge essoéwé, nasaba nawéréngngi Daud séddi ana' worowané iya mapanré senna'é untu' mancaji arung ri bangsa iya battowaéro.” Nanakirinna Hiram iyaé pappébalié lao ri Salomo, “Utarimani karéba paréllaunna Puwang, nasadiyaka pennoiwi paréllaunna Puwang. Maéloka passadiya aju camara Libanon sibawa aju camara biyasa situru paréllaunna Puwang. Sining taukku tiwii matu iyaro ajué nonno polé ri Libanon lao ri tasi'é. Kuwaniro nasiyo matu iyaro sining ajué mancaji rai nanaalirengngi matu mennang mattuttung wiring tasi lao ri onrong iya napattentué Puwang. Kuwaniro iyaro sining raié ribongkara matu nariyabbéréyang lao risining taunna Puwang untu' naurusu matteru. Polé ri Puwang, uwéllauwi kuwammengngi napassadiya Puwang inanré untu' sining tauwé silise saorajaku.” Nanabbéréyanni Hiram lao ri Salomo sininna aju camara Libanongngé sibawa aju camara biyasaé iya napparelluwangngé. Na untu' mpéréngngi inanré sining tau silise saorajana Hiramro, tungke' taung nabbéréyangngi Salomo lao ri Hiram 322.500 kilo gandong sibawa 4.400 bang minnya zaitun asli. Narupaini Puwangnge jancinna sibawa mpéréngngi pangissengeng Salomo. Ri yelle'na Hiram sibawa Salomo engka assisumpungeng iya makessingngé, sibawa purani mennang sipadduwa mébbu assijancing. Napangarani Salomo 30.000 tau worowané polé ri sininna Israél untu' majjama passa, sibawa makkai Adoniram mancaji mandoro'na mennang. Nabagéni Salomo mennang ri laleng tellu kalompo, tungke'-tungke' seppulo sebbu tau. Iya tellu kalompo'éro makkaléléng monro siuleng ri Libanon sibawa duwampuleng ri bolaé. Pangara towi Salomo 80.000 tau untu mappa batu polé ri bulué sibawa 70.000 tau untu' méssangngi iyaro batu-batué. Makkai 3.300 mandoro untu' jagaiwi jama-jamangngéro. Nasaba paréntanato pai mennang batu-batu loppo iya makessingngé untu' pandaménna Bolana Puwangnge. Makkuwaniro sining pajjamana Salomo sibawa sining pajjamana Hiram enrengngé sining tau polé ri kota Gebal passadiyai batué sibawa ajué untu' appatettongenna Bolana Puwang -ngéro. Napammulaiwi Salomo patettongngi Bolana Puwangnge ri uleng Ziw, iyanaritu uleng maduwaé, ri laleng taung maeppaé apparéntanna, 480 tahun nasalainnana bangsa Israélié Maséré. Ukkuranna Bolana Puwangnge, bagiyang ri lalenna iyanaritu makkuwaié: lampéna 27 météré, sakkana 9 météré, sibawa tanréna 13,5 météré. Ri bagiyang yolona Bolana Puwang -ngéro engka baruga iya lampénaé 4,5 météré sibawa sakkana 9 météré, sissakkato iyaro bolaé. Ri témbo'na bolaéro engka sebbo-sebbo tellongeng iya masakka ri lalengngé. Ri mattulilinna bagiyang ri munrinna bolaéro, ri témbo' saliwenna ripatettongngi bili'-bili' massusungngé. Engka tellussusung, tungke'-tungke' sittanré 2,2 météré. Ri langga mammulangngé, sakkana tungke' bili'na 2,2 météré, ri langga maduwaé 2,7 météré sibawa ri langga matellué 3,1 météré. Témbo' langga ri yawaé lebbi maompe'i naiya témbo' langga ri yasé'na, angkanna balo-balo bili' pattambanaro weddingngi ripasisumpung sibawa témbo'na Bolana Puwang -ngéro tenrisebbo témbo'éro. Namakkedana Puwangnge lao ri Salomo, “Rékko muturusiwi sininna hukkung sibawa paréntaku, upogaukekko matu aga iya puraé ujanciyangngi ambo'mu Daud. Maélo-Ka monro ri laleng bola iya mupatettongngéwé ri tengnga-tengngana umma'-Ku Israélié. Dé' Usalaiwi matu mennang.” Mappakkuwaniyé Salomo pattépui appatettongenna Bolana Puwang -ngéro: Sininna témbo' bagiyang ri lalenna nalapiriwi sibawa aju camara Libanon, mappammulai ri témbo'na lettu ri sampe'na. Témbo'na riyébbui polé ri aju camara biyasaé. Ri laleng bolaéro, ri munri riyébburengngi bili' sibawa pasang renring pallacce polé ri aju camaraé, mappammulai ri témbo'na lettu ri sampe'na. Iyaro bili'é riyasengngi Bili' Pommapaccingngé; lampéna aséra météré. Bili' ri yolona Bili' Pommapaccingngéro riyasengngi Bili' Battowaé, na lampéna 18 météré. Témbo' bagiyang ri lalenna sininna bolaéro rilapiriwi sibawa aju camara Libanon, angkanna batu-batu témbo'na dé' siseng napaita. Iyaro pallapina ribélo-béloiwi sibawa sobbi buwa lawo sibawa bunga-bunga tabbakka. Bili' Pommapaccingngé iya riyébbué ri laleng Bolana Puwang -ngéro ripassadiyai untu' Petti Assijancinna Puwangnge. Ri laleng Bili' Pommapaccingngéro ritaro towi duwa dato-dato kérub iya riyébbué polé ri aju zaitungngé. Iya duwa dato-dato'éro tungke'-tungke' tanréna 4,4 météré; Iya duwa dato-dato'éro ritaroi makkadambang ri laleng Bili' Pommapaccingngé angkanna panni séddié polé ri tungke' dato-dato'éro nagéssai renringngé, na panni iya laingngé sigéssai ri tengnga-tengngana bili'éro. Iya duwa dato-dato kérub-éro rilapiriwi sibawa ulaweng. Sininna renrinna bagiyang ri lalenna Bolana Puwangnge ribélo-béloiwi sibawa sobbi kérub-kérub, pong pattuku, sibawa bunga-bunga tabbakka. Témbo'na ri laleng Bolana Puwang -ngéro iya manenna rilapiriwi sibawa ulaweng. Ri sumpang muttama'é ri laleng Bili' Pommapaccingngéro ripasangiwi duwa tange polé ri aju zaitungngé. Tau-tau tange'na ri yasé'é majjékkoi iya maccéru'é ri tengnga-tengngana. Iya duwa tange'naro ribélo-béloiwi sibawa sobbi kérub, pong pattuku sibawa bunga-bunga tabbakka. Tange'é, dato-dato kérub-é sibawa sobbi pong pattukué, iya manenna rilapiri sibawa ulaweng. Ri tange muttama'é ri laleng bili' yoloé, iyanaritu bili' battowaé, ripasangiwi pamiring tange polé ri aju zaitungngé, massulapa eppa mallampé. Makkuwatoro riyébui duwa tange polé ri aju camara biyasaé, iya tungke'-tungke'é wedding rileppi. Iyaro sining tange'é ribélo-béloiwi sibawa sobbi kérub, pong pattuku sibawa bunga tabbakka. Sininna sobbi'éro rilapiriwi ulaweng. Ri yolona Bolana Puwang -ngéro riyébburengngi seddé ri laleng. Iyaro seddé riyattulilingiwi témbo' iya mallapi-lapié: ri yasé'na tungke' tellullapi batu, engka silapi aju camara Libanon. Pandaménna iyaro Bolana Puwangnge ripasangngi ri uleng Ziw, iyanaritu uleng maduwaé, ri laleng taung maeppaé apparéntanna Salomo. Na ri uleng Bul, iyanaritu uleng maaruwaé, ri laleng taung maseppuloé séddi apparéntanna, tépuni iyaro Bolana Puwangnge napatettong Salomo, sicoco pada-pada iya puraé narancana. Appatettongenna iyaro bolaé manréi wettu pituttaung. Patettong towi Salomo saoraja untu' aléna. Ittana napatettong iyaro saorajaé seppulo tellu taung. Patettong towi Salomo “Baruga Pilar”. Lampéna iyaro barugaé 22 météré sibawa sakkana 13,5 météré. Ri yolona iyaro barugaé engka légo-légo iya mappilar-é sibawa makkéaddénéng. Baruga iya laingngé iyanaritu “Baruga Akkarungengngé” iya riyasengngétto Baruga Angadélékengngé. Iyaé barugaé mappammulai témbo'na lettu ri kaso-kasona rilapiriwi sibawa aju camara Libanon. Ri barugaénnaé Salomo pettuiwi parakara-parakara angadélékengngé. Onrong naonroiyé Salomo riyébbui pada-pada sining bola laingngé sibawa engkai ri seddé lainna ri monrinna Baruga Angadélékengngé. Untu' bainéna, iyanaritu ana'na arung Maséré, patettong towi Salomo bola iya sinrupaé. Sininna iyaro bolaé, muttama'ni seddéna malowangngé, polé ri pandaménna lettu ri pabbingenna, riyébbui polé ri batu iya makessingngé. Iyaro batu-batué ripassadiyai ri onrong akkaling batué, sibawa rirette situru ukkuranna; bagiyang ri lalenna sibawa saliwenna riparatai sibawa garagaji. Pandaménna sining bolaéro riyébbui polé ri batu-batu loppoé iya mangke'é. Iyaro batu-batué engka iya 3,5 météré lampéna, engkato iya eppaé météré. Ri yasé'na ripasangngi batu-batu laing iya mangke'é sibawa rette'i situru ukkuranna, nainappa ritongko sibawa aju camara Libanon. Témbo'na seddé saorajaé sibawa témbo'na seddé ri lalenna Bolana Puwangnge enrengngé témbo'na barugaé ri seddé yolona Bolana Puwangnge, tungke'-tungke' poléi riséddié lapi aju camara Libanon ri yasé'na tungke' tellullapi batu. Mébbui Huram duwa alliri gessa tungke'-tungke' 8 météré tanréna, lébuna 5,3 météré, sibawa ompe'na gessana 7,4 sénti. Iyaro alliri-allirié sebbo ri lalenna. Untu' iyaro alliri-allirié mébbui duwa ulu alliri polé ri gessaé, tungke'-tungke' tanréna 2,2 météré Nainappa Huram mébbu séddi kullang gessa iya mallébué, sibawa ukkuranna makkuwaiyé: liyunna 2,2 météré, sakkana tengngana 4,4 météré sibawa lébuna 13,2 météré. Ri mattulilinna wiring saliwenna ribélo-béloiwi sibawa duwajjiji buwa lawo, iya nacuwangngé silaong kullangngéro. Iyaro kullangngé napalénne'i ri yasé'na lekke'na seppulo duwa saping gessa – tellu mangolo ri manorang, tellu ri yattang, tellu ri yajang sibawa tellu ri alau. Ompe'na iyaro kullangngé 75 milli. Wirinna sinrupai wiring cangkiri iya mabbéngko'é massu maélo pada bunga bakung iya tabbakkaé. Iyaro kullangngé naullé mala uwaé kira-kira 40.000 bang. Mébbu towi Huram seppulo karéta gessa, tungke'-tungke' lampéna 1,8 météré, sakkana 1,8 météré, tanréna 1,3 météré. Iyaro karéta-karétaé poléi ri pépeng-pépeng massulapa'é iya ripasangngé ri laleng pamiringngé. Iyaro pépeng-pépengngé ribélo-béloiwi sibawa sobbi singa, saping sibawa kérub. Ri pamiring-pamirinna – ri yasé'na sibawa ri yawana gambara-gambara singaé sibawa sapingngéro – taggattungngi sobbi bunga maddéppungngé. Tungke' iyaro karétaé mappunnaiwi eppa padati gessa sibawa pattoddo padatinna polé towi ri gessaé. Ri iya eppa sunna iyaro karétaé engka alliri pattahang katowang polé ri gessaé sibawa bélo-bélo bunga maddéppung ri seddé saliwenna. Bagiyang yasé'na iya eppa alliri pattahangngéro ripasisumpungngi riséddié pamiring mallébu untu' pattahang katowanna. Iyaro alliri-alliri pattahangngé malliwengngi 44 sénti tanréna ri yasé'na pépeng massulapa'éro, sibawa 22 sénti ri yawana. Ri témunna pamiringngéro engka sobbi. Tanréna padati-padatinna 66 sénti; onronna ri yawana pépeng-pépengngé. Pattoddo padatinna sibawa karétaé sinrupai séddi bagiyang. Iyaro padati-padatinna pada-padai karéta musué; lébu padatié, tarali-taralinna, pattoddo'na sibawa posina tarali-taralinna padatié iya manenna riyébbui polé ri gessaé. Engka eppa alliri pattahang ri tungke' sung bagiyang yawana karétaéro. Iyaro alliri-allirié sinrupai séddi bagiyang sibawa karétana. Ri mattulilinna bagiyang yasé'na iyaro karétaé engka pamiring lebba'na 22 sénti. Alliri pattahanna sibawa pépeng-pépenna iya manenna sinrupai séddi bagiyang sibawa karétana. Alliri-alliri pattahangngé sibawa pépeng-pépengngéro ribélo-béloiwi sibawa gambara kérub, singa, sibawa pong pattuku kégi-kégi engka onrong iya lobbangngé untu' iyaro, nasibawang bunga maddéppung mattulilinna. Makkuwaniro carana riyébbu iyaro karéta-karétaé. Iya manenna pada-pada – bentu'na sibawa ukkuranna. Mébbu towi Huram seppulo katowang loppo, séddi untu' tungke' karéta. Tungke' katowangngéro mappunnaiwi sakka 1,8 météré sibawa naullé mala uwai 800 bang. Nataroi Huram lima karéta ri seddé yattanna Bolana Puwangnge, sibawa lima ri seddé manorang. Kullang gessaé nataroi ri sung alau yattang. Arungngé massuro mébbui iyaro barab-barangngé ri accuwangeng bessié ri pallawangenna Sukot sibawa Sartan ri Lompo Yordan. Dé' nassuro timbangngi Salomo iyaro barab-barang gessaé, saba' maéga senna jumellana. Jaji tane'na iyaro barab-barangngé dé' nariisseng. Puranana napatettong Arung Salomo Bolana Puwangnge, nataroni ri laleng gudanna bolaéro sininna péra'é, ulawengngé sibawa barab-barang laing iya puraé nakkasuwiyangeng Daud ambo'na lao ri Puwangnge. Purairo nasuroni Arung Salomo sininna pamimping sukué sibawa appangngé polé ri bangsa Israélié lao ri aléna ri Yérusalém untu' palétté'i Petti Assijancinna Puwangnge polé ri Sion, Kota Daud, lao ri Bolana Puwangnge. Napolé manenna mennang ri Esso Maraja Kalampang Daud-daungngé ri laleng uleng Etanim. Maddeppungeng manennana pamimpingngé, nakkani sining imangngé iyaro Petti Assijancingngé, nanatiwii ri Bolana Puwangnge. Kémana Puwangnge enrengngé sininna passakke'na ripalétté toni lao ri Bolana Puwangnge risining imangngé sibawa tau Léwié. Maddeppungenni Arung Salomo silaong sininna ra'ya' Israélié ri yolona Petti Assijancingngéro nainappa makkasuwiyang lao ri Puwangnge bimbala sibawa saping iya tenribilangngé égana. Purairo natiwini sining imangngé iyaro Petti Assijancingngé muttama ri Bolana Puwangnge nanapalénne'i ri yawana dato-dato kérub-é ri laleng Bili' Pommapaccingngé. Pannina iyaro dato-dato'é mallebba'i tongkoi iyaro pettié sibawa aju-aju pabbuléna. Iyaro aju pabbuléé malampé senna, angkanna paita cappa'-cappa'na polé ri yolona Bili' Pommapaccingngé. (Lettu essoéwé iyaro aju-ajué engka mupi kuwaro.) Ri lalenna Petti Assijancingngéro dé' gaga muwi aga ri lainnaé duwa batu. Iyaro batu-batué naputtama'i Musa kuwaro ri Bulu Sinai, wettunna Puwangnge mébbu assijancing sibawa bangsa Israélié wettunna mennang ri laleng allalengengngé polé ri Maséré lao ri wanuwa Kanaan. Wettunna sining imangngé massu polé ri Bolana Puwang -ngéro tappa napennoini ellung iyaro bolaé. Iyaro ellungngé pawilo-wilo nasaba araja ahadérékenna Puwangnge angkanna iyaro sining imangngé dé'na naulléi muttama paimeng untu' pogau'i tugasna. Namassempajanna Salomo, adanna, “Iko ritu taroi mata essoé ri langié, oh Puwang. Iyakiya lebbi Mupojiwi monro ri laleng apettangeng ellungngé. Makkekkuwangngé upatettongenno bola iya magelloé, untu' onrong Muwonroi mannennungeng.” Purana massempajang, gilinni Arung Salomo lao ri sininna ra'ya' iya tettongngé kuwaro, nainappa naéllaungeng mennang barakka'na Allataala. Nakkeda Salomo patterui adanna, “Ambo'ku Daud pura rancanai untu' patettong bola onrong assompang lao ri Puwang Allataalana Israélié. Iyakiya makkedai Puwangnge ri aléna, ‘Iyaro akkattamu makessing. Iyakiya, tenniya iko, sangadinna ana'mu ritu iya patettongngéngngi matu iyaro bola-Ku.’ Makkekkuwangngé narupaini Puwangnge jancin-Na. Mancaji arunnana Israélié sulléiwi ambo'ku, sibawa purana patettong bola untu' onrong assompang lao ri Puwangnge, Allataalana Israélié. Ri laleng Bolana Puwang -ngéro purana passadiya onrong untu' Petti Assijancingngé iya mallise'é batu assijancinna Puwangnge sibawa toriyolota wettunna ritiwi mennang massu polé ri Maséré.” Purairo, ri yolona ra'ya' iya engkaé, tettonni Salomo mangolo ri mézbaé nanakkai iya duwa limanna namassempajang, “ Puwang, Allataalana Israélié! Ri langié iyaré'ga ri linoé dé'gaga iya pada-padangngék-Ko! Murupaiwi jancim-Mu sibawa mappaitangngi pammasé-Mu lao ri umma'-Mu iya matinulué sibawa mapatoé sukku atinna lao ri Iko. Purani murupai jancim-Mu lao ri ambo'ku Daud. Aga iya Muwajjanciyangngéro purani Mupogau' iyaé essoé. Iyakiya, oh Allataala, maélo tongekkoga monro ri linoéwé? Namuwi sininna langié dé'to nagenne lowanna untu' alé-Mu, apalagi bola assompang iya upatettongngéwé! Oh Puwang, Allataalaku, iyya atam-Mu! Iyakiya tennapodo éngkalingai sempajakku, sibawa tarimai paréllaukku iyaé essoé. Rékko séddié tau ritenre pasala lao ri tau laingngé sibawa ritiwi lao ri mézba-Mu ri laleng bola assompangngéwé untu' mattanro makkedaé dé' napasala, oh Puwang, sitinaja-Ko méngkalingai ri surugaé sibawa pettuiwi parakarana ata-atam-Mué. Hukkungngi iya pasalaé situru pangkaukenna sibawa paleppe'i iya dé'é napasala. Rékko umma'-Mu Israélié ricaui risining balinna nasaba madosai mennang, nanalisu ri Iko sibawa pakalebbi-Ko selaku Puwang, nanapolé ri bola assompangngéwé massempajang méllau addampeng ri Iko, tennapodo Muwéngkalingai mennang ri surugaé. Tennapodo Muwaddampengengngi dosana umma'-Mué, sibawa tiwii mennang lisu ri wanuwa iya puraé Muwéréngngi toriyolona. Rékko madosai umma'-Mu lao ri Iko namuhukkungngi sibawa dé' Mupateppai bosié nanatoba mennang polé ri dosana sibawa pakalebbi-Ko selaku Puwang, nainappa mangolo ri bola assompangngéwé enrengngé massempajang ri Iko, tennapodo polé ri surugaé Muwéngkalingai mennang. Sibawa addampengengngi dosana umma'-Mu Israélié nenniya arunna. Paggurui mennang pogau'i aga iya tongengngé. Purairo, oh Puwang, pateppai bosié ri wanuwam-Mué, wanuwa iya Muwéréngngéngngi umma'-Mu untu' mancaji appunnangenna mennennungeng. Rékko nakennai akkadéreng iyaé wanuwaéwé iyaré'ga sai, sibawa tanet-tanengngé nasolangiwi anging pella, ule iyaré'ga incalé, iyaré'ga rékko umma'-Mu rigasai ri balié, iyaré'ga nakennai lasa, tennapodo Muwéngkalingai sempajanna mennang. Rékko polé ri yelle'na umma'-Mu Israélié engka iya nasibawangngé amesséng babuwa massempajang lao ri Iko nanapappale towi limanna mattuju ri bola assompangngéwé, tennapodo Iko ri laleng onrom-Mu ri surugaé méngkalingai sibawa maddampengengngi nenniya tulungngi mennang. Banna Iko ritu iya missengngéngngi lise atinna tolinoé. Rimakkuwannanaro gaukenni tungke' tau situru pangkaukeng-pangkaukenna, kuwammengngi natuli mapato umma'-Mu lao ri Iko ri wettu monrona mupa ri wanuwa iya Muwéréngngéngngi lao ri toriyolota. tennapodo polé ri onrom-Mu ri surugaé Muwéngkalingai sempajanna sibawa tarimai paréllaunna. Nanallalengiwi sininna bangsaé ri sininna linoé naissek-Ko sibawa mapatoi lao ri Iko pada-pada umma'-Mu Israélié. Naissengngi matu mennang makkedaé bola iya upatettongngéwé iyanaritu onrong untu' massompa lao ri Iko. Rékko Muparéntangngi umma'-Mu untu' lao mammusu méwai balié, namangolo mennang ri kota Mupiléwé iya puraé upatettongek-Ko, tennapodo ri surugaé Muwéngkalingai sempajanna mennanro, sibawa mpéréngngi apakalang lao ri mennang. Rékko madosai umma'-Mu lao ri Iko – sitongenna dé' muwi séddi tau iya dé'e namadosa – nainappa nasaba cai-Mu Muleppessangngi mennang ricau ri balié, sibawa ritiwi selaku tawangeng ri séddié wanuwa iya mabélaé iyaré'ga macawé'é, tennapodo Muwéngkalingai sempajanna mennang. Rékko ri wanuwaéro nasalaiwi dosa-dosana, sibawa massempajang lao ri Iko nanangakui towi makkedaé madosani mennang sibawa pogau'i majaé, éngkalingai sempajanna, oh Puwang. Rékko ri wanuwaéro macenningngi sibawa mattonget-tongengngi mennang salaiwi dosa-dosana, namassempajang lao ri Iko namangoloto ri wanuwaéwé iya Muwéréngngéngngi toriyolota, mattuju ri kota Mupilé sibawa bola assompang iya puraé upatettongek-Koé, na polé ri onrom-Mu ri surugaé sitinaja-Ko méngkalingai sempajanna sibawa mamaséiwi mennang. Addampengengngi sininna dosana sibawa adorakanna lao ri Iko, sibawa ébbui sining balinna gaukengngi mennang sibawa makessing. Mennang iyanaritu umma'-Mu riyalé iya puraé Mutiwi massu polé ri Maséré kégi mennang risissa. Tennapodo Iko, oh Puwang Allataala, tuli jampangiwi umma'-Mu Israélié silaong arunna. Sibawa tennapodo Muwéngkalingai sempajanna sises-siseng mennang mangobbi méllau tulung ri Iko. Iko, oh Puwang Allataala, pura piléi mennang polé ri yelle'na sininna bangsaé untu' mancaji umma'-Mu, pada-pada iya puraé Mupowada lao ri mennang naolai atam-Mu Musa, wettum-Mu dulungngi toriyolota massu polé ri Maséré.” Makkuwaniro Salomo massempajang namakkaluttuto ri yolona mézbaé sibawa lima mappale liyasé. Purairo tettonni nanasibawang sadda battowa méllauwi barakka'na Allataala untu' sininna tau iya maddeppungengngé kuwaro, adanna, “Ripojiwi Puwang iya puraé mabbéré atennangeng lao ri umma'-Na pada-pada iya Najjanciyangngé naolai Musa atan-Na. Sininna iya makessingngé iya Najjanciyangngé purani Narupai. Tennapodo Puwang Allataalata sibawakki pada-pada nasibawanna toriyolota. Tennapodo dé' Nasalaiki. Tennapodo Napancajiki sining tau iya matinulué lao ri aléna kuwammengngi natatuli tuwo situru élo-Na sibawa mapato lao ri sisinin-Na hukkung nenniya parénta iya puraé Nabbéréyang lao ri toriyolota. Tennapodo Puwang, Allataalata, tuli méngngerangngi matu sempajang sibawa paréllaung iya puraé upalettu'é lao ri Aléna. Tennapodo tuli Nappaitangngi akacuwan-Na lao ri umma Israélié nenniya arunna sibawa mabbéré lao ri mennang aga napparelluwang mennang esso-esso. Nanallalengiwi sininna bangsaé ri linoé naissengngi matu makkedaé banna Puwangnge alé-aléna Allataala, dé'gaga laingngé. Sitinajako, umma'-Na tuli matinulu lao ri Puwangnge, Allataalata sibawa mapato lao ri hukkung-hukkung sibawa parénta-parénta-Na pada-pada iya mupogau'é essoéwé.” Purairo Arung Salomo sibawa sininna tau iya maddeppungengngé kuwaro makkasuwiyangeng akkarobangeng lao ri Puwangnge. Untu' akkarobangeng pappasidamé makkasuwiyangngi Salomo 22.000 saping sibawa 120.000 bimbala. Makkuwaniro arungngé sibawa sininna ra'ya'é pakangka upacara rirésmikanna Bolana Puwangnge. Iyatoro essoé narésmikangngi Salomo bagiyang tengngana seddé ri yolona Bolana Puwang -ngéro. Nainappa ri seddénaro makkasuwiyangengngi akkarobangeng ritunu, akkarobangeng gandong, sibawa lunra olokolo untu' akkarobangeng pappasidamé. Iya manennaro nakkasuwiyangengngi kuwaro nasaba baiccu senna mézba gessaé untu' sininna pakkasuwiyangngéro. Ri Bolana Puwang -ngéro Salomo sibawa sininna umma Israélié pakangkai ramé-ramé Kalampang Daud-daungngé pitungngesso ittana. Maéga senna jumellana tau iya maddeppungengngé kuwaro. Poléi mennang ri daéra sibbéla Laleng Hamat ri manorang lettu ri pakkasésénna Maséré ri yattang. Ri esso maaruwaé nasuroni Salomo lisu sining tauwéro. Iya manenna mennang pojiwi nainappa lisu ri bolana sibawa ati marennu, nasaba sininna barakka iya puraé nabbéréyang Puwangnge lao ri atan-Na Daud sibawa lao ri bangsa Israélié umma'-Na. Puranana napattépu Salomo Bolana Puwangnge sibawa saorajana arungngé enrengngé sininna iya narancanaé, nappaitassi aléna Puwangnge lao ri aléna pada-pada iya kajajiyangngé ri Gibéon. Makkedai Puwangnge lao ri aléna, “Uwéngkalingani sempajammu, nanasibawang iyaé bola iya puraé mupatettongngéwé upannessai mancaji onrong ripallaing untu' massompa lao ri Iyya mannennungeng. Tuli ujampangiwi matu jagaiwi onrongngéwé. Rékko mattumaniko ri Iyya sibawa macenning atimmu nenniya malempu pada-pada ambo'mu Daud, sibawa muturusiwi hukkung-hukkung nenniya parénta-parénta-Ku, Urupaiwi matu jancik-Ku lao ri ambo'mu Daud makkedaé ana' eppomu massossoreng tuli naparéntai matu Israélié. Iyakiya rékko iko iyaré'ga wija-wijammu mabbokorika sibawa dé' namapato lao ri hukkung-hukkuk-Ku sibawa parénta-parénta-Ku enrengngé massompako déwata-déwata laing, Upaddésu'i matu umma'-Ku Israélié polé ri wanuwa iya puraé Uwéréngngi mennang. Usalai towi matu iyaé bolaé iya puraé Upattette mancaji onrong assompang lao ri Iyya. Kégi-kégi ripakatunai matu tau Israélié sibawa ricawa-cawai. Iyaé bola assompangngé mancajiwi matu séuwa goppo ruttungeng angkanna tungke' tau iya lalowé kuwaro tasséleng matu sibawa métau. Makkedai matu mennang, ‘Magi Puwangnge napogau'i makkuwaéro lao ri wanuwa sibawa bolaéwé?’ Namappébali matu tauwé, ‘Nasaba nasalaiwi mennang Puwangnge, Allataalana, iya puraé mantara'i toriyolona massu polé ri Maséré. Massompai mennang déwata-déwata. Iyanaro saba'na napapoléi Puwangnge abalaéwé ri yasé'na.’ ” Napatettongngi Salomo Bolana Puwangnge sibawa saorajana arungngé ri laleng wettu duwappulo taung. Sininna aju camara Libanongngé sibawa aju camara biyasaé enrengngé sininna ulaweng iya napparelluwangngé Salomo untu' appatettongengngéro riwéréngngi ri Arung Hiram. Tépunnana iyaro jama-jamangngé, nabbéréyanni Salomo lao ri Hiram duwappulo kota ri daérana Galiléa. Nalaona Hiram mitai, iyakiya dé' namasennang sibawa iyaro pabbéré. Makkedai lao ri Salomo, “Saudaraku, mappakkugaé rupanna kota-kota iya muwéréngngékka?” Iyanaro saba'na iyaro daéraé riyaseng mupi Kabul. Lebbi patassebbu kilo ulaweng pura nakkiringeng Hiram lao ri Salomo. Napakéi Salomo cara majjama tarapassaé untu' patettongngi Bolana Puwangnge, saorajana arungngé, témbo'na Yérusalém sibawa untu' tébungiwi tana seddé yattanna Bolana Puwangnge. Napakéi cara iya padaé untu' patettongngi paimeng kota Hazor, Megido sibawa Gézer. ( Kota Gézer iyanaritu kota iya nagasaé riyolo sibawa nacaué arung Maséré, nainappa naunoi pabbanuwana sibawa natunui kotana. Rimunri iyaro kotaé nabbéréyangngi arung Maséré lao ri ana' makkunrainna selaku hadiya ri esso abottingenna sibawa Salomo. Na Salomo patettongngi paimeng iyaro kotaé.) Sibawa majjama passato, napatettongngi paimeng Salomo Bét-Horon-Toddang, Baalat, Tamar ri padang kessi Yéhuda, kota-kota bokong, enrengngé kota untu' pangkalang karéta musu sibawa anyaranna. Sininna rancana pembangunangngé ri Yérusalém, Libanon sibawa ri sininna daéra akuwasanna purani napogau'. Tau Israélié dé' naripancaji ata ri Salomo; ripancaji prajuri'i, parawira, pallima, komandang karéta musu, sibawa tentara pasukang pakkinnyarang. Lima ratu limappulo pegawé riwéréng tanggung jawa lao risining tau iya majjama passaé ri laleng maddupa-rupang proyé' pembangunanna Salomo. Tana ri seddé yattanna Bolana Puwangnge natébungngi Salomo, wettunna létté'ni bainéna, iyanaritu ana'na arung Maséré, polé ri Kota Daud lao ri saorajana iya ripatettongengngéngngi ri Salomo. Wékkatellu sitaung Salomo makkasuwiyangeng akkarobangeng situru sibawa akkarobangeng pappasidamé ri yasé'na mézba iya napatettongngé untu' Puwangnge. Tunu towi dupa untu' Puwangnge. Makkuwaniro Salomo patterui Bolana Puwangnge. Untu' tentarana ri tasi'é, mébbui Arung Salomo kappala-kappala ri Ezion-Géber, seddéna Elot ri wirinna Séppang Akaba, daérana Edom. Arung Hiram kiringngi ana'-ana' kappala'na iya maégaé pangalamanna untu' sompe massibawa ana'-ana' kappala'na Salomo. Engka naengka sompe'i mennang lao ri wanuwa Ofir untu' mala 14.000 kilo ulaweng nanatiwii lao ri Salomo. Naéngkalingani ratu wanuwa Syéba passalenna ataromporenna Salomo. Napoléna ri Yérusalém untu' mojiwi Salomo sibawa pakkutana iya mawatangngé. Poléi risilaongeng risijumella battowa pattinro sibawa unta iya sara'é tékéna rampa-rampa, batu paramata, sibawa maéga senna ulaweng. Wettunna siruntu Salomo, iyaro ratué pangoloni sininna rupanna pakkutana iya naullé pikkiri. Sininna pakkutanaéro naulléi Salomo baliwi, dé' muwi séddi iya mawatang senna'é ri aléna. Aléna iyaro ratué sabbingngi pékkugi panréna Salomo. Naitai saoraja iya napatettongngé Salomo, cara majjamana pegawé-pegawé saorajana, enrengngé pakéyang pada-padanna nenniya bolana mennang. Naitai inanré sibawa énungeng iya napatalaé, carana sining pattumanié tumaningiwi péstaé, sibawa sining akkarobangeng iya nakkasuwiyangengngé Salomo ri Bolana Puwangnge. Iya manennaro mébbui ratu wanuwa Syéba bengnga sibawa takkamennyé. Namakkedana lao ri Arung Salomo, “Sininna iya uwéngkalingaé ri tana assalekku passalenna Puwang sibawa apanrénna Puwang, mémeng tongeng. Riyolo dé' umateppe, iyakiya polékuna sibawa sabbing manengngi sibawa mata ulukku, nappaka mateppe. Sitongenna sininna iya uwéngkalingaéro dé'pa nasitengngana polé ri iya uwitaé makkekkuwangngé. Annessana apanrénna sibawa asugirenna Puwang mabélai lebbi battowa naiya ripaissengiyékka. Temmaka sarona sining bainéna Puwang! Sibawa temmaka upe'na sining pegawé iya tuli majjamaé untu' Puwang angkanna naulléi méngkalingai polé ri Puwang sininna pappagguruwang iya mapanré! Ripojiwi Puwangnge, Allataalana Puwang! Ri laleng naakkana Puwang mancaji arunna Israélié, nappaitangngi Puwangnge pékkugi sennanna lao ri Puwang. Dé' pura-purana mamaséiwi bangsa Israélié; iyanaro saba'na naakkai Puwang mancaji arunna mennang, kuwammengngi weddingngi Puwang patettongngi hukkungngé sibawa adélékengngé.” Nainappa nabbéréyang iyaro ratu wanuwa Syéba lao ri Salomo hadiya-hadiya iya natiwié, iyanaritu lebbi 4.000 kilo ulaweng sibawa maéga batu paramata enrengngé rampa-rampa. Dé'na naéngka natarimana Salomo rampa-rampa iya maéga makkuwaéro pada-pada iya nabbéréyangngé ratu wanuwa Syébaro lao ri aléna. ( Kappala-kappala'na Hiram iya tiwié ulaweng polé ri Ofir untu' Salomo, tiwi towi maéga batu paramata sibawa aju cénrana. Iyaro ajué napakéi Salomo untu' mébbu tarali-tarali ri Bolana Puwangnge sibawa saorajana arungngé; makkuwatoro untu' mébbu kacapi sibawa gambusu untu' sining pakkélongngé. Iyaro sining ajué iyanaritu aju cénrana iya kaminang makessingngé iya puraé ripapolé lao ri Israélié; dé'na naengkana naita tauwé aju sikkessingngéro.) Ri lainnaé hadiya-hadiya iya biyasaé nabbéréyang Salomo, nabbéréyang towi lao ri ratu polé ri wanuwa Syébaro sininna iya naéllauwé. Nainappa lisuni iyaro ratué ri wanuwanna silaong sininna pattinrona. Tungke' taung tarimai Arung Salomo nawéki 23.000 kilo ulaweng, dé'pa naribilang sarona polé ri dangkangenna, sibawa sima polé risining padangkangngé, sining arung Arab-é enrengngé sining gubernur Israélié. Mébbui Salomo 200 kaliyawo battowa polé ri ulaweng rilanroé. Ulaweng iya ripaké untu' tungke' kaliyawo lebbi kurangngi pitu kilo. Mébbu towi 300 kaliyawo ulaweng iya lebbi baiccu'é. Ulaweng iya napaké untu' tungke' kaliyawo baiccu'éro engka lebbi kurang duwa kilo, iya manenna ulaweng rilanroé. Sininna iyaro kaliyawoé nataroi ri baruga iya riyasengngé Baruga Ale Libanon. Mébbu towi séddi kadéra akkarungeng iya battowaé iya rilapiriyé sibawa gading enrengngé ribélo-béloi sibawa ulaweng tuléng. Iyaro kadéraé engka taiyyana, sibawa wali-walinna engka dato-dato singa. Ri munrinna iyaro kadéraé engka dato-dato ulu saping. Iyaro kadéraé mappunnai towi enneng ana' addénéng. Ri cappa abéyona sibawa cappa ataunna tungke' ana' addénéngngé engka dato-dato singa – iya manenna seppulo duwa. Dé' naengka kadéra akkarungeng pada-padaéro muwi ri akkarungeng niga. Sininna paréwa énungenna Salomo riyébbui polé ri ulawengngé, sibawa sininna paréwaé ri Baruga Ale Libanon riyébbu towi polé ri ulaweng tuléngngé. Dé'gaga riyébbu polé ri péra'é, saba' ri wettunna Salomo dé' nangga makkégunai tauwé péra'é. Mappunnaiwi Salomo maéga kappala battowa iya sompe'é silaong kappala-kappala'na Arung Hiram. Wékkasiseng na telluttaung iyaro kappala-kappala'é lisui tiwi ulaweng, péra', gading, lancéng sibawa manu'-manu' mera'. Lebbi sugii sibawa lebbi panréi Arung Salomo naiya muwi arung niga ri linoé. Sininna tauwé ri sininna linoé makkuragai méwai sita Salomo untu' méngkalingai pappagguruwang apanréng iya nabbéréyangngé Allataala lao ri aléna. Poléi mennang tungke'-tungke' sibawa tiwi hadiya untu' Salomo. Mabbéréi mennang barab-barang péra', ulaweng, pakéyang, sanjata, rampa-rampa, anyarang sibawa bagal. Makkuwaniro polé ri taungngé lao ri taungngé. Bentu'i Salomo tentara iya polé ri 1.400 karéta musu sibawa 12.000 tentara makkinnyarang. Nataroi si bagiyang ri Yérusalém na lebbinna ri kota-kota laingngé. Ri laleng wettu apparéntanna Salomo, riyangga biyasami ri Yérusalém péra'é pada-pada batué, sibawa aju camara Libanongngé maona senna pada-pada aju ara biyasaé. Naolai pangusaha-pangusahana arungngé, ripapoléi anyarangngé polé ri Maséré sibawa Kilikia, sibawa karéta-karéta musué ripakangkai polé ri Maséré. Ellinna séddi anyarangngé 150 dowi péra', sibawa ellinna karéta musué 600 dowi péra'. Nainappa naola towi sining pangusahaéro iyaro sining anyarangngé sibawa karéta musué nabalu'i paimeng lao ri arung-ngarung Hét-é sibawa arung-ngarung Siriaé. Maéga makkunrai laing napoji Salomo. Ri lainnaé ana'na arung Maséré, kawing towi Salomo sibawa makkunrai-makkunrai Hét-é, Moab-é, Amongngé, Edongngé sibawa Sidongngé. Puwangnge pura mapparéntangngi makkedaé dé' nawedding tau Israélié kawing campurang sibawa bangsa-bangsaéro, saba' mennang ritu nassabariwi matu tau Israélié nassompa déwata-déwata laing. Namuni makkuwaro, nakawingi muwi Salomo makkunrai-makkunrai laingngé. Engka 700 ana' arung iya nakawingiyé Salomo, sibawa engkato 300 gundi'na. Iyanaro sining bainéna nassabariwi Salomo nasalaiwi Allataala, angkanna wettunna macowani naulléi mennang palécéi sompai déwata-déwata laingngé. Daud, ambo'na Salomo, matinului lao ri Puwangnge, Allataalana, iyakiya Salomo dé' napada ambo'na. Nasompai Salomo Asytorét, déwinna bangsa Sidongngé, sibawato Molokh déwa iya péjariyéngngi péneddingngé iya nasompaé bangsa Amongngé. Makkuwaniro Salomo madosa lao ri Puwangnge. Daud, ambo'na Salomo naccowériwi Puwangnge sibawa sukku atinna, iyakiya Salomo dé' napada-pada iyaro. Ri tompo bulu seddé alauna Yérusalém, patettongngi onrong assompang untu' Kamos, déwatana tau Moab-é, sibawa untu' Molokh, déwatana tau Amongngé – iya duwanna déwata iya mappakaciddi-ciddi'é. Patettong towi Salomo onrong-ngonrong naonroiyé sining bainéna iya bangsa laingngéro wedding mattunu dupa, sibawa makkasuwiyang akkarobangeng untu' déwata-déwatana muto mennang. Makkedai Puwangnge, “Nasaba mainge'ko majjalékkaiwi assijancimmu sibawa Iyya nadé' muturusiwi parénta-parénta-Ku, maélo-Ka sitta'i iyaro akkarungengngé polé ri iko, sibawa mabbéréyangngi lao riséddié pegawémmu. Namuni makkuwaro, nasaba ambo'mu Daud, dé' Upogau'i gau'éro ri wettu tuwomu. Ri wettu apparéntanna ana' worowanému, nappai Upogau'. Iyakiya dé' naiya maneng akkarungengngéro Usitta matu polé ri aléna. Nasaba atak-Ku Daud, sibawa nasaba Yérusalém iya puraé Upancaji kotakuro, maélo-Ka sésai séddi suku untu' ana' worowanému.” Puwangnge mébbui Hadad, séddiwi wijanna arung Edom, musui Arung Salomo. Iyakiya, Hadad iya maloloé mupa wettuéro, lariwi lao ri Maséré silaong siyagangngaré tau Edom, pattumani-pattumaninna ambo'na. Joppani mennang polé ri Midian, nainappa lao ri Paran. Kuwaro siyagangngaré tau masséddi sibawa mennang, nainappa silaong mennang lao ri Maséré méwai sita arung Maséré. Iyaro arungngé nawéréngngi Hadad bola sibawa tana untu' naonroi enrengngé nakkatuwo-katuwoi. Namancajina Hadad sellao makessinna arungngé, angkanna nabbéréyang ipana arungngé, iyanaritu anrinna Tahpenes bainéna arungngé, lao ri Hadad untu' mancaji bainéna. Nainappa iyaro bainéna Hadad jajiyangngi séddi ana' worowané iya nawéréngngé aseng Genubat. Iyaé ana'é ripawekke'i ri indo'na muto sibawa monroi ri saorajaé silaong ana'-ana' worowanéna arungngé. Wettunna Hadad tarima karéba makkedaé maténi Arung Daud, sibawa Yoab, pallima tentarana Israélié maté toni, makkedani Hadad lao ri arung Maséré, “Palalona lisu ri tana assalekku.” Nakkutana arungngé, “Magi? Akurangekkoga kuwaé, angkanna maéloko lisu ri tana assalemmu?” Nametté Hadad, “Dé' uwakurangeng aga-aga, iyakiya leppessakka lao.” Nalisuna ri tana assalenna. Naébbu towi Allataala Rézon, ana'na Elyada, musui Salomo. Rézon iyanaritu ata iya lariyé polé ri puwanna iyanaritu Arung Hadadézer polé ri Zoba. Engka naengka nacaui Arung Daud iyaé Hadadézer sibawa mpunoi sellao-sellaona Hadadézer polé ri Siria. Iyaro wettué lariwi Rézon polé ri Hadadézer sibawa paddeppungengngi sining tauwé nainappa mancaji kapala garembolang. Laoni aléna sibawa ana' buwana ri Damsyik nainappa monro ri kotaéro. Kuwaniro ana' buwana makkai mancaji arung Siria. Pada-pada Hadad, Arung Rézon namusu towi Israélié ri wettu tuwona mupa Salomo, sibawa kacaui iyaro wanuwaé. Tau laing iya maronta'é méwai Salomo iyanaritu sala séddinna pegawénna iya riyasengngé Yérobéam. Ana'nai Nébat polé ri Zeréda ri Efraim. Jandani indo'na, asenna Zerua. Iyanaé curitana passalenna ronta'na Yérobéam. Wettunna tanaé ri seddé yattanna Bolana Puwangnge riléwu, sibawa témbo'na kotaé ripédécéngi, majjama towi Yérobéam kuwaro. Wettunna naita Salomo makkedaé maccai sibawa mapatoi Yérobéam, nawérénni tanggung jawa' jennangiwi jamang passaé ri daérana suku Manasyé sibawa Efraim. Riséuwaé esso massui Yérobéam polé ri Yérusalém. Ri tengnga laleng ri padangngé rilokkaiwi ri Nabi Ahia polé ri Silo iya wettuéro pakéi jumba baru. Nanaludunni Ahia jumbana, sibawa nasapé-sapé'i mancaji seppulo duwa kenné'na. Nainappa makkeda lao ri Yérobéam, “Alani seppulo kenné untu' alému, saba' Puwangnge, Allataalana Israélié, makkeda makkuwaiyé lao ri iko, ‘Maéloka sitta'i akkarungengngéwé polé ri Salomo, nauwérékko seppulo suku. Séddi suku tette'i matu ri Salomo, nasaba atak-Ku Daud, sibawa nasaba Yérusalém, iya puraé Upilé polé ri sininna wanuwanna Israélié mancaji kota-Ku. Maélo-Ka pogau'i gau'éro nasaba nasalai-Ka Salomo sibawa massompai déwata-déwata, iyanaritu Asytorét, déwinna bangsa Sidongngé, Kamos, déwatana bangsa Moab; sibawa Milkom, déwatana bangsa Amongngé, dé' naccowériwi élo-Ku Salomo. Dé' napada-pada ambo'na Daud iya matinulué lao ri Iyya sibawa pogau'i parénta-parénta-Ku. Namuni makkuwaro dé' Uwala manengngi matu iyaro akkarungengngé polé ri aléna. Uleppessangngi matu makuwasa gangka tuwona. Upogau'i iyaro gau'é untu' atak-Ku Daud, iya puraé Upilé sibawa iya turusiyéngngi hukkung-hukkuk-Ku sibawa parénta-parénta-Ku. Iyaé akkarungengngé maélo-Ka malai polé ri ana' worowanéna Salomo na seppulo suku maélo Uwérékko. Iyakiya séddi suku Uleppessang matu ri aléna, kuwammengngi natuli engka séddi tau polé ri wija-wijanna atak-Ku Daud iya mapparéntaé untu' Iyya ri Yérusalém, kota iya puraé Upilé selaku onrong assompang lao ri Iyya. Na iko, Yérobéam, Upancajiko matu arunna Israélié sibawa Upalaloko paréntai sininna daéra iya muwéloriyé. Rékko iko, pada-pada atak-Ku Daud, sukku matinulu lao ri Iyya enrengngé tuwo manuru hukkung-hukkuk-Ku, sibawa pésennangiwi atik-Ku ri laleng pogau'i sininna iya Uwapparéntangngé lao ri iko, tuli Usibawakko matu. Maélo-Ka pancajiko arung ri Israélié. Utanggung matu makkedaé wija-wijammu mancajiwi matu arunna Israélié sulléiko, pada-pada iya puraé Upogau' sibawa Daud. Nasaba madosai Salomo, maélo-Ka hukkungngi wija-wijanna Daud, iyakiya dé' na untu' mannennungeng.’ ” Wettunna lettu iyaro birittaé ri Salomo; makkuragani mpunoi Yérobéam. Iyakiya lariwi Yérobéam lao ri Arung Sisak ri Maséré, sibawa monro kuwaro narapi maté Salomo. Curita laingngé passalenna Salomo, passalenna sininna iya puraé napogau' sibawa passalenna pangissengenna, purani riyoki ri laleng Riwaya' Atuwo-tuwonna Salomo. Patappulo taung ittana Salomo mapparénta ri Yérusalém untu' sininna Israélié. Nainappa maté sibawa ritampung ri Kota Daud. Nainappa Réhabéam ana' worowanéna mancaji arung sulléiwi. Laowi Réhabéam ri Sikhem, nasaba sininna ra'ya' Israélié bagiyang manorang maddeppungenni kuwaro untu' lanti'i mancaji arung. Iyaro wettué Yérobéam ana' Nébat engka mupi ri Maséré nasaba lariwi polé ri Arung Salomo. Wettunna naéngkalinga passalenna Réhabéam, lisuni ri Israél. Riundanni Yérobéam ri ra'ya'é bagiyang manorang, nainappa silaong mennang lao mangolo ri Réhabéam. Adanna mennang, “Salomo ambo'na Datu pura mpérékki tiwi iya matane'é lao ri idi. Makkekkuwangngé rékko naringengiwi Datu tiwita sibawa nakurangiwi anrasa-rasatta, mattumaniki matu lao ri Datu.” Nametté Réhabéam, “Harusu'ka mappikkiri riyolo. Lisuno paimeng tellungngessopi.” Nalisuna iyaro sining tauwé. Nainappa méllau pangaja Réhabéam lao risining tomatowaé iya puraé mancaji pappangajana Salomo, ambo'na Réhabéam. Nakkutana Réhabéam, “Pékkugi harusu'ka baliwi sining tauwéro? Aga pangajamu?” Nappébali mennang, “Rékko tonget-tongengngi Datu macinna mattumani ri ra'ya'é, tarimai paréllaunna, namattumani matu mennang lao ri Datu mannennungeng.” Iyakiya iyaro pangajana sining tomatowaéro dé' nabati-batiwi Réhabéam. Sibalé'na, laowi risining kalloloé iya sippangka'é aléna sibawa iya bantuéngngi makkekkuwangngé. Makkutanani lao ri mennang, “Aga pangajamu ri iyya untu' baliwi ra'ya' iya méllauéngngi kuwammengngi uringengiwi tiwina mennang?” Nappébali mennang, “Mappakkuwaiyé sitinajanna Datu powadangngi mennang, ‘Sillemma-lemmaku, lebbi mawatang mupa naiya ambo'ku!’ Nawérékko ambo'ku tiwi iya matane'é, iyakiya maéloka mpérékko iya lebbi matane'éppa. Napetti'ko sibawa babba, iyakiya iyya ubabbako matu sibawa babba iya maddori bessié!” Tellungngesso rimunrinna Yérobéam sibawa sininna tauwéro lisuni mangolo ri Arung Réhabéam, pada-pada iya puraé napparéntang. Sibalé'na sibawa pangajana sining tauwéro, ra'ya' iya laowé ri alénaro naéwai ada sibawa makassara. Situru sibawa pangajana sining kalloloé, makkedani, “Nawérékko ambo'ku tiwi iya matane'é, iyakiya iyya maéloka mébbui iyaro tiwié lebbi matane'pa. Napetti'ko sibawa babba, iyakiya iyya maéloka babbako sibawa babba maddori bessié!” Dé' nabati-batiwi paréllaunna ra'ya'é. Iyakiya mémeng iyaro élona Puwangnge. Aga napowada Puwangnge naolai Nabi Ahia polé ri Silo passalenna Yérobéam ana' Nébat harusu'i kajajiyang. Wettunna ra'ya'é naita makkedaé dé' namaélo arungngé méngkalingai mennang, gorani mennang, “Paduli aga sibawa Daud nenniya wija-wijanna! Dé' aga-aga pura napogau' untu' idi. Ra'ya' Israél, laono mai talisu! Leppessangngi Réhabéam murusu'i aléna!” Nanalisuna ra'ya' Israélié, sibawa mancaji arunni Réhabéam banna ri daérana Yéhuda. Namuni makkuwaro risuro mupi Adoniram ri Arung Réhabéam, séddiwi kapalana pajjama passaé, pattennangngi ra'ya'é. Iyakiya rigenrungngi ri mennang batu gangka maté. Naitana gau'éro mapperi-perini Réhabéam ménré ri karétana, nanalari lao ri Yérusalém. Mappammulai wettuéro ra'ya'é ri bagiyang manoranna akkarungeng Israélié tuli maronta'i lao ri arung-ngarung wija-wijanna Daud. Wettunna naéngkalinga sininna ra'ya' Israélié makkedaé lisuni Yérobéam polé ri Maséré, naundanni mennang lao riséuwaé addeppungeng nainappa naakka mancaji arunna Israélié. Banna ra'ya' suku Yéhuda bawang iya tette'é matinulu lao ri wija-wijanna Daud. Wettunna lettu Arung Réhabéam ri Yérusalém, napaddeppungenni 180.000 prajuri'na iya pommakessingngé polé ri suku Yéhuda sibawa Bényamin untu' musui tau Israélié sibawa palisui akuwasanna ri yasé'na suku-sukué ri bagiyang manorang Israél. Iyakiya Allataala suroi Nabi Sémaya palettu'i iyaé birittaé lao ri Réhabéam, sibawa lao risininna suku Yéhuda sibawa Bényamin, “Aja' mumusui saudara-saudaramu tau Israélié. Lisuno! Aga iya puraé kajajiyang iyanaritu élo-Ku.” Nanaturusi manenni mennang paréntana Puwangnge, nanalisu ri bolana tungke'-tungke'. Mancaji arunnana Israélié, napakkasse'ni Yérobéam kota Sikhem ri daéra buluna Efraim, nainappa monro kuwaro untu' cinampe. Nainappa laosi polé kuwaro nanapakkasse'i kota Pnuél. Purana natimbang gau'éro, mébbuni duwa dato-dato saping ulaweng nainappa makkeda lao ri ra'ya'é, “Bangsa Israélié! Cuku'ni ittana laoko ri Yérusalém untu' massompa. Makkekkuwangngé, iyanaé déwata-déwatamu iya puraé tiwiko massu polé ri Maséré!” Nanataroni Yérobéam séddi polé ri saping ulawengngéro ri Bétel na iya laingngé ri Dan. Namadosana ra'ya'é, nasaba laowi ri Bétel sibawa Dan untu' massompa. Patettong towi Yérobéam onrong-ngonrong assompang laing ri tompo-tompo bulué, sibawa makkai imang-ngimang polé ri yelle'na kaluwarga-kaluwarga iya tenniyaé suku Léwi. Iyaro wettué engka séddi nabi ri Yéhuda. Risuroi ri Puwangnge untu' lao ri Bétel. Iyaro nabié lettu'i kuwaro wettunna Yérobéam mattengngang tettong ri yolona mézbaé untu' makkasuwiyangeng akkarobangeng. Nasaba paréntana Puwangnge mangobbini iyaro nabié lao ri mézbaéro, “Eh mézba, éh mézba! Makkuwaiyé adanna Puwangnge, ‘Séddi ana' iya riyasengngé matu Yosia jajiwi matu ri laleng kaluwargana Daud. Ri yasé'mu, éh mézba, naunoi matu imang-ngimang iya majjamaé ri onrong-ngonrong assompang laowé ri déwataé, sibawa iya puraé tona makkasuwiyangeng akkarobangeng ri yasé'mu. Sibawa ri yasé'muto ritunui matu buku-buku tolinoé.’ ” Adanna iyaro nabié patterui, “Maruttungngi matu iyaé mézbaé, natuppa matu awu engkaé ri yasé'na. Iyanaro buttinna makkedaé risuroka ri Puwangnge.” Wettunna naéngkalinga Yérobéam iyaro ada-adaé, majjello'ni lao ri nabiéro nainappa gora, “Tikkengngi iyaro tauwé!” Iyakiya matterui sojo taiyyana Yérobéam angkanna dé' naulléi gettengngi lisu. Tappa maruttunni iyaro mézbaé sibawa awu iya engkaé ri yasé'na tuppa'ni ri tanaé, pada-pada iya puraé napowada iyaro nabié nasaba paréntana Puwangnge. Namakkedana Arung Yérobéam lao ri nabiéro, “Tulunna muwassempajangekka ri Puwang Allataalamu. Ellauni paressé babuwa-Na untu' pajjappai taiyyaku!” Namassempajanna iyaro nabié lao ri Puwangnge, namajjappana taiyyana arungngé. Nainappa makkeda arungngé lao ri nabiéro, “Laono mai manré ri bolaku. Maéloka mpérékko hadiya.” Nappébali iyaro nabié, “Namuni nawérékka Datu sitengngana asugirenna Datu, dé'to uwaccowé untu' manré iyaré'ga ménung sibawa Datu. Lolongekka parénta polé ri Puwangnge untu' dé' uwanré iyaré'ga ménung, nenniya dé' ulisu molai laleng wettukku polé.” Makkuwaniro iyaro nabié lao molai laleng laingngé. Iyaro wettué engka séddi nabi cowa iya monroé ri Bétel. Ripowadangngi ri ana'-ana'na passalenna nabi polé ri Yéhudaro. Nacuritai mennang passalenna aga iya napogau'é ri Bétel iyaro essoé, sibawa aga iya napowadaé lao ri Arung Yérobéam. Namakkutanana iyaro nabi cowaé, “Kéga naola iyaro nabi polé ri Yéhuda wettunna lisu?” Najjellokenni mennang iyaro lalengngé lao ri aléna. Nanasuroni mennang pasangiwi lapi-lapi kaleddé'na. Puranaro natonangini kaleddé'na nalao lellungngi iyaro nabi polé ri Yéhuda. Naruntu'ni iyaro nabié mattengngang tudang ri yawana séddié aju battowa. Nakkutana iyaro nabi cowaé, “Idi'ga nabi polé ri Yéhudaro?” Nappébali iyaro tauwé, “Tongeng.” Nakkeda iyaro nabi cowaé, “Laono mai manré ri bolaku.” Iyakiya mappébaliwi iyaro nabi polé ri Yéhuda, “Taddampengekka! Dé' naweddikka tarimai undangenna Bapa' untu' maccowé lao ri bolana Bapa'. Dé'to umaélo manré iyaré'ga ménung kuwaé silaong Bapa'. Puwangnge pura paréntakka untu' dé' uwanré iyaré'ga ménung sibawa dé' ulisu molai laleng iya padaé wettukku polé.” Nabbelléna iyaro nabi cowa polé ri bétel lao ri aléna, sibawa makkeda, “Iyya nabi muto pada-pada Saudara. Nasaba paréntanato Puwangnge, engka séddi malaéka pura suroka mobbiko sibawa panréko ri bolaku.” Namaccowéna iyaro nabi polé ri Yéhuda lao ri bolana nabi cowaéro sibawa sisama manré. Wettunna mennang tudang manré, mabbicarani Puwangnge lao ri nabi cowaéro, angkanna nampareng nabi polé ri Yéhudaro adanna, “Makkedai Puwangnge makkedaé dé' namapato Saudara lao ri Aléna. Dé' napogau'i Saudara iya riparéntangngéngngi Saudara. Lisuwi Saudara sibawa manré ménung, padahal riyattéyangngi Saudara untu' pogau'i gau'éro. Rimakkuwannanaro riyunoi matu Saudara, na ujuna Saudara dé' matu narikuburu ri kuburu kaluwargana Saudara.” Pajana mennang manré, iyaro nabi cowaé patoppokengngi lapi-lapi kaleddé'na iyaro nabi polé ri Yéhuda, nanajoppana iyaro nabié. Ri tengnga laleng riluruini ri sikaju singa, namaténa riyokko. Nalenrona ujuna ri lalengngé, sibawa kaleddé'na tettong ri seddéna. Iyaro singaé tettong towi kuwaro. Sining tau laloé, naitani iyaro ujué sibawa singaé kuwaro. Nainappa mennang lao ri Bétel sibawa paissengiwi aga iya naitaé mennang. Wettunna naéngkalinga iyaro nabi cowaé passalenna gau'éro, makkedani, “Pasti iyaro nabi iya dé'é namapato ri paréntana Puwangnge! Iyanaro saba'na nakiringngi Puwangnge iyaro singaé untu' luruiwi sibawa mpunoi pada-pada iya napowadaé Puwangnge ri yolona.” Namakkedana iyaro nabi cowaé lao ri ana'-ana'na, “Patoppokiwi lapi-lapi kaleddé'ku.” Natonanginnana kaleddé'na, joppana. Naruntu'ni ujuna iyaro nabi polé ri Yéhuda lénne mupi ri lalengngé sibawa kaleddé'é nenniya singaé ri seddéna. Iyaro singaé dé' naluruiwi kaleddé'é, sibawa dé'to nanréi iyaro ujué. Nakkani iyaro ujué nanataroi ri yasé'na kaleddé'na, nanatiwii lisu ri Bétel untu' nawatingi sibawa nakuburu. Aléna iyaro nabi cowaé kuburu'i iyaro ujué ri kuburu kaluwargana, nainappa aléna sibawa ana'-ana'na watingiwi iyaro ujué. Makkedai mennang, “Kasiyakko, saudaraku, kasiyang!” Nainappa makkeda iyaro nabi cowaé ri ana'-ana'na, “Rékko matéka, kuburu'ka ri kuburu'éwé ri seddéna iyaro nabié. Aga iya puraé napowada nasaba paréntana Puwangnge lao ri mézbaé ri Bételro sibawa lao ri sininna onrong assompangngé ri kota-kota Samaria pasti kajajiyangngi.” Tette'i Arung Yérobéam dé' namaélo salaiwi pangkaukenna iya majaé. Untu' murusu'i onrong-ngonrong assompang iya puraé napatettonro, matterui pilé imang polé ri kaluwarga-kaluwarga biyasaé. Nigi-nigi maélo, nakkai mancaji imang. Pangkaukenna iya majaéro nassabariwi wija-wijanna macilaka sibawa ancuru siseng. Iyaro wettué ana' worowanéna Yérobéam iya riyasengngé Abia nakennai lasa. Makkedai Yérobéam lao ri bainéna, “Sadiya-sadiyano untu' lao ri Silo ri bolana Nabi Ahia iya powadaéngngi riyolo makkedaé iyya matu mancaji arunna Israélié. Iyakiya allarikkodoko kuwammengngi dé' naissekko tauwé niga iko. Tiwirengngi seppulo roti, céddé béppa sibawa cani sibotolo. Tanaiwi aga matu kajajiyang sibawa Abia, ana'ta. Napowadakkotu matu iyaro nabié.” Nalaona bainéna Yérobéam ri bolana Nabi Ahia ri Silo. Iyaro nabié dé'na naulléi makkitana nasaba macowa senna'ni. Iyakiya Puwangnge powadangngi aléna makkedaé poléi bainéna Yérobéam untu' makkutanangngi ana'na iya malasaé. Ripaissengi toni Nabi Ahia ri Puwangnge aga iya harusu'é napowada matti. Wettunna lettu bainéna Yérobéam kuwaro, kédoni samanna tau laing. Iyakiya wettunna naéngkalinga Nabi Ahia oni akka ajéna ri sumpangngé, makkedani, “Uttama'ki, uwissekki bainéna Yérobéam. Aja'na muwajjaiwi. Engka karéba maja untu' alému. Lisuno namupowadangngi Yérobéam makkedaé iyanaé napowada Puwangnge, Allataalana Israélié, ‘Purano Upilé ri yelle'na ra'ya'é sibawa Upancaji panguwasa ri umma'-Ku Israélié. Purano Uwéréng akkarungeng iya Usitta'é polé ri wijanna Daud. Iyakiya dé' mupada-pada atak-Ku Daud. Matinulu senna'i ri Iyya sibawa naturusiwi parénta-Ku. Iya napogau'é banna iya Usitujuiyé. Iyakiya mupogau'i ja iya lebbi battowaé naiya napogau'é mennang iya mapparéntaé riyolomu. Musalaika sibawa paompoi cai-Ku ri laleng mébbumu barahala enrengngé dato-dato polé ri bessié untu' risompa. Rimakkuwannanaro maélo-Ka papolé abala ri yasé'na kaluwargamu. Sininna wija-wijammu iya worowané, muwi aga pangka'na, riyunoi matu. Maélo-Ka pallennye'i kaluwargamu, pada-pada tau seringngéngngi warowoé. Anggota kaluwargamu iya maté ri kotaé nanréi matu asu, sibawa iya maté ri saliweng kota nanréi matu manu'-manu'. Engngerangngi, Iyya'na Puwang iya mabbicaraé!’ ” Napatterui Nabi Ahia makkeda lao ri bainéna Yérobéam, “Nah, lisuno makkekkuwangngé! Wettummu muttamakiwi kotaé, iyaro ana'mu matéi matu. Mabbaratai matu sininna ra'ya'na Israélié sibawa kuburu'i. Alé-aléna bawang anggota kaluwargana Yérobéam iya rikuburu'é matu sibawa malebbi, saba' banna aléna iya nasitujuiyé Puwangnge, Allataalana Israélié. Puwangnge maélo mpéréngngi Israélié séddi arung iya paccappuéngngi tudangenna Yérobéam selaku arung. Narapini essona! Mappammulai makkekkuwangngé Puwangnge maélo hukkungngi Israélié angkanna raté-raté pada-pada arasoé ri laleng uwaié. Maéloi Puwangnge bébbui ra'ya' Israélié polé ri wanuwa iya makessingngéwé iya riyabbéréyangngé lao ri toriyolona mennang. Maéloi patassiya-siyai mennang ri liwenna Salo Efrat, nasaba purai mennang napaénré cai-Na ri laleng naébbuna dato-dato'na déwi Asyéra. Puwangnge maélo salaiwi Israélié nasaba madosani Yérobéam sibawa nassabariwi tau Israélié madosato.” Purairo joppani bainéna Yérobéam lao ri Tirza. Muttama'na muwa ri bolana, maténa ana'na. Mabbaratani ra'ya' Israélié nainappa nakuburu pada-pada iya puraé napowada Puwangnge naolai Nabi Ahia, atan-Na. Curita laingngé passalenna Arung Yérobéam, iyanaritu apparéntanna sibawa musu iya napimpingngé, pura riyokini ri laleng kitta Sejarana Arung-ngarunna Israélié. Duwappulo duwa taung ittana mapparénta Yérobéam selaku arung, nainappa maté sibawa rikuburu. Ana'na iya riyasengngé Nadab sulléiwi selaku arung. Wettunna Réhabéam, ana'na Salomo, mancaji arunna Yéhuda, umuru'na patappulo séddi taung. Mapparéntai seppulo pitu taung ittana ri Yérusalém. Polé ri sininna Israélié pura napallainni Puwangnge iyaro kotaé selaku onrong assompang ri Aléna. Indo'na Réhabéam iyanaritu Naama polé ri bangsa Amongngé. Napogau'ni bangsa Yéhudaé iya majaé ri pakkitanna Puwangnge. Pangkaukenna mennang lebbi napaénré'i caina Puwangnge naiya sininna pangkaukenna toriyolona. Ri tompo'na bulu-bulué sibawa ri yawana ajukajung battowaé, patettongngi mennang onrong-ngonrong assompang barahala, sibawa patettongngi tugu-tugu nenniya dato-dato'na déwi Asyéra untu' nasompa. Ri onrong-ngonrongngéro pakangkai mennang accakkuribangeng selaku assompang lao ri déwataé. Mala muwi worowané mancaji towi selaku cakkuribang. Napogau' towi tau Yéhudaé sininna pangkaukeng majaé iya napogau'é bangsa-bangsa iya puraé napaddésu Puwangnge wettunna tau Israélié muttamakiwi wanuwaéro. Ri taung malimaé apparéntanna Réhabéam, Sisak, arung Maséré gasai Yérusalém. Narampasa'i sininna barab-barang mangke'é iya engkaé ri Bolana Puwangnge sibawa ri saorajana arungngé, makkuwatoro kaliyawo-kaliyawo ulaweng iya naébbué Salomo. Selaku passulléna mébbui Arung Réhabéam kaliyawo-kaliyawo gessa, sibawa mappaddettangengngi lao ri parawira-parawira iya mattanggung jawa'é untu' jagaiwi sining sumpanna saorajaé. Tungke'-tungke' muttama arungngé ri Bolana Puwangnge, iyaro pengawal-pengawal-é natiwii kaliyawo-kaliyawoé, nainappa napalisu mennang ri bili' jagangngé. Curita laingngé passalenna Arung Réhabéam pura riyokini ri laleng kitta Sejarana Arung-ngarung Yéhudaé. Ri laleng apparéntanna Réhabéam tuli engka musu ri yelle'na Réhabéam sibawa Yérobéam. Namaténa Réhabéam sibawa rikuburu ri tampung arung-ngarungngé ri Kota Daud. Abiam, ana' worowanéna, sulléiwi selaku arung. Ri taung maseppuloé aruwa apparéntanna Arung Yérobéam ri Israélié, Abiam mancaji arung ri Yéhuda sibawa mapparéntai telluttaung ittana ri Yérusalém. Indo'na iyanaritu Maakha, ana'na Abisalom. Pogau'i dosa-dosa Abiam pada-pada ambo'na. Dé' nasukku atinna matinulu lao ri Puwang Allataalana, silaingeng sibawa Daud, nénéna ambo'na. Iyakiya nasaba Arung Daud, na Puwangnge, Allataalana iya nasompaé Daud, pura mpéréngngi Abiam séddi ana' untu' sulléiwi mapparénta ri Yérusalém sibawa mattahangengngi kotaéro. Napogau'i Puwangnge gau'éro saba' Daud pura pésennangiwi atin-Na. Dé' naengka Daud nallupaiwi parénta-paréntana Puwangnge, sangadinna ri laleng parakara Uria tau Hét-éro. Musué ri yelle'na Réhabéam sibawa Yérobéam iya mappammulaé ri wettunna Réhabéam matteru mupi ri laleng apparéntanna Abiam. Curita laingngé passalenna Abiam purani riyoki ri laleng kitta Sejarana Arung-ngarung Yéhudaé. Maténi Abiam sibawa ritampung ri Kota Daud. Asa ana'na mancaji arung sulléiwi. Ri taung maduwappuloé apparéntanna Arung Yérobéam ri Israélié, mancaji arunni Asa ri Yéhuda. Mapparéntai patappulo séddi taung ittana ri Yérusalém. Nénéna iyanaritu Maakha, ana'na Abisalom. Pada-pada Daud, néné-nénéna, napésennangiwi Asa atinna Puwangnge. Sininna cakkuribang iya majjamaé ri onrong-ngonrong assompang déwataé napaddésu'i, sibawa sininna barahalaé iya napatettongngé arung-ngarung iya mapparéntaé ri yolona napallennye'i polé ri sininna wanuwaé. Nénéna, Maakha, napaléssoi polé ri tudangenna selaku Indo' arung, saba' purai mébbu dato-dato barahala iya mappangaddié untu' Asyéra, déwi acommokengngé. Naruttungngi Asa iyaro barahalaé sibawa natunui ri Lompo Kidron. Namuni dé' naancuru manengngi Asa onrong assompang barahalaé, iyakiya tette'i matinulu lao ri Puwangnge gangka maténa. Sininna ulaweng sibawa péra' iya puraé nakkasuwiyangeng ambo'na lao ri Puwangnge, natiwii lao ri Bolana Puwangnge, makkuwatoro ulaweng sibawa péra' pakkasuwiyanna aléna. Ri wettu apparéntanna Arung Asa polé ri Yéhuda sibawa Arung Baésa polé ri Israélié tuli engka musu ri yelle'na iya duwa arungngéro. Nagasani Baésa Yéhuda sibawa pakkasse'i kota Rama untu' tongkoi laleng massu muttama'é ri Yéhuda. Rimakkuwannanaro nalani Arung Asa sininna ulawengngé sibawa péra' iya engkaé mupa ri Bolana Puwangnge sibawa saorajana arungngé nanakiringngi lao ri Damsyik ri Bénhadad arung Siria, ana'na Tabrimon, iyanaritu eppona Hézion. Iyaro barab-barangngé nakiringngi naolai siyagangngaré pajaba'na saorajaé, nasibawang pasengngéwé, “Laono mai tasiyo assisellaongeng pada-pada iya puraé napogau' tomatowatta. Nasibawang iyaé kirikka ulaweng sibawa péra' selaku hadiya, sibawa mérai Puwang pettuiwi assisumpungenna sibawa Baésa arunna Israélié, kuwammengngi nagettengngi paimeng pasukanna polé ri daéraku.” Nasitujuini Bénhadad iyaro pattawaé nanasuroi parawira-parawirana silaong pasukanna mennang gasai kota-kotana Israélié. Nacauni mennang Iyon, Dan, Abél-Bét-Maakha sibawa Kinérot ri seddéna Tappareng Galiléa enrengngé ri sininna daérana Naftali. Wettunna naéngkalinga Baésa gau'éro, mappésauni pakkasse'i Rama. Laoni ri Tirza na untu' cinampe dé' nammusu. Purairo, sininna tauwé ri sininna Yéhuda dé' ripassangadi riparéntanni ri Arung Asa untu' makkai batu sibawa aju iya napaké Baésa ri Rama untu' pakkasse'i kotaéro. Iyaro barab-barangngé napakéi Asa untu' pakkasse'i kota Mizpa sibawa Géba, séddiwi kota ri daérana Bényamin. Curita laingngé passalenna Arung Asa, iyanaritu abaraningenna sibawa kota-kota iya napakkasse'é, pura riyokini ri laleng kitta Sejarana Arung-ngarung Yéhuda. Ri wettu macowanana Asa nakennai lasa iya duwa ajéna. Matéi sibawa rikuburu'i ri tampunna sining arungngé ri Kota Daud. Yosafat, ana' worowanéna mancaji arung sulléiwi. Ri taung maduwaé apparéntanna Arung Asa ri Yéhuda, Nadab ana' Yérobéam mancaji arung ri Israél sibawa mapparéntai duwattaung ittana. Pada-pada ambo'na iya mapparéntaé ri yolona, napogau' towi majaé ri pakkitanna Puwangnge angkanna nassabariwi tau Israélié pogau' dosa. Baésa, ana' Ahia polé ri suku Isakhar siyempe méwai Nadab, nainappa nauno. Iyaro wettué Nadab sibawa pasukanna mattengngang keppungngi kota Gibeton ri daéra Filistin. Kajajiyangngi iyaro ri laleng taung matellué ri laleng apparéntanna Arung Asa ri Yéhuda. Makkuwaniro Baésa mancaji arunna Israélié sulléiwi Nadab. Mancaji arunna muwa Baésa, naunoni sininna kaluwargana Yérobéam. Situru sibawa aga iya puraé napowada Puwangnge naolai atanna, Nabi Ahia polé ri Silo, na sininna kaluwargana Yérobéam riyunoni, dé' muwi séddi leppe. Madosai Yérobéam sibawa nassabariwi tau Israélié madosato. Nanallalengiwiro napaénré'i Yérobéam caina Puwangnge, Allataala iya nasompaé tau Israélié. Curita laingngé passalenna Nadab pura riyokini ri laleng kitta Sejarana Arung-ngarung Israélié. Ri laleng apparéntanna Arung Baésa polé ri Israél, tuli kajajiyangngi musué ri yelle'na Baésa sibawa Arung Asa polé ri Yéhuda. Ri taung matellué apparéntanna Arung Asa ri Yéhuda, Baésa ana' Ahia mancaji arung ri sininna Israélié. Mapparéntai ri Tirza duwappulo eppa taung ittana. Pada-pada muto Yérobéam iya mapparéntaé ri yolona, madosa towi Baésa lao ri Puwangnge sibawa nassabariwi tau Israélié pogau' towi dosa. Nabbicarana Puwangnge lao ri Nabi Yéhu ana' Hanani, adan-Na, “Palettukengngi Baésa pasek-Kué, ‘Riyolo tenniyako aga-aga, iyakiya purano Uwakka mancaji pamimping ri umma'-Ku Israélié. Makkekkuwangngé madosako pada-pada Yérobéam, sibawa nassabariwi umma'-Ku Israélié madosa, angkanna napaénré cai-Ku. Rimakkuwannanaro maélo-Ka pallennye'ko silaong kaluwargamu pada-pada iya puraé upogau' lao ri Yérobéam. Anggota kaluwargamu iya maté ri kotaé nanréi matu asu, sibawa iya maté ri saliweng kota nanréi matu manu'-manu'.’ ” Ri taung maduwappuloé enneng apparéntanna Arung Asa ri Yéhuda, Ela ana' Baésa mancaji arung ri Israélié. Mapparéntai ri Tirza duwattaung ittana. Zimri, séddiwi parawira iya kapalaiyéngngi sitengngana pasukang makkarétaé, sikongkolo méwai Ela. Riséuwaé esso ri Tirza, ménum-ménungngi Ela gangka mabo' ri bolana Arza, kapala ruma tanggana saorajana arungngé. Nanauttama Zimri sibawa mpunoi Ela, nainappa mancaji arung sulléiwi. Kajajiyangngi iyaro ri taung maduwappuloé pitu apparéntanna Arung Asa ri Yéhuda. Mancaji arunna muwa Zimri, nauno manenni kaluwargana Arung Baésa. Mala sininna sumpulolona Baésa iya worowané sibawa sellao-sellaona kaluwargana dé' gaga leppe. Situru aga iya napowadaé Puwangnge lao ri Baésa naolai Nabi Yéhu, sininna kaluwargana Baésa riyunoi. Baésa sibawa Ela, ana'na, massompai déwata-déwata sibawa nassabariwi tau Israélié pogau' dosa. Rimakkuwannanaro, napaénré'i mennang caina Puwangnge, Allataala iya harusu'é nasompa tau Israélié. Curita laingngé passalenna Ela purani riyoki ri laleng kitta Sejarana Arung-ngarung Israélié. Ri taung maduwappuloé pitu apparéntanna Arung Asa ri Yéhuda, Zimri mancaji arunna Israélié sibawa mapparéntai ri Tirza pitungngesso ittana. Iyaro wettué tentara Israélié mattengngangngi keppungngi Gibeton, kotana tau Filistingngé. Wettunna mennang naéngkalinga makkedaé sikongkolo'i Zimri méwai arungngé sibawa purani nauno, iyatoro essoé ri akkémanna mennanro, iya maneng mennang makkai Omri, pallimana mennang, selaku arunna Israélié. Nainappa Omri sibawa pasukanna salaiwi Gibeton nanalao keppungngi Tirza. Wettunna naita Zimri makkedaé risittaini kotaé, muttama'ni ri laleng saorajaé nanatunui iyaro saorajaé silaong aléna, namaténa. Kajajiyangngi iyaro nasaba napogau'i iya majaé ri pakkitanna Puwangnge. Pada-pada muto Arung Yérobéam, madosa towi Zimri lao ri Puwangnge sibawa nassabariwi umma Israélié madosato. Curita laingngé passalenna Zimri, muttama'ni assikongkolokeng bali'bellana iya narancanaé, purani riyoki ri laleng kitta Sejarana Arung-ngarung Israélié. Kajajiyanni assisalangngé ri laleng bangsa Israélié nasaba engka macinna kuwammengngi Tibni ana' Ginat mancaji arung, iyakiya engkato macinnaiwi Omri mancaji arung. Angkanna iya maccowéé ri Omri pakala. Matéi Tibni na Omri mancaji arung. Kajajiyangngi iyaro ri taung matelluppuloé séddi apparéntanna Arung Asa ri Yéhuda. Mapparéntai Omri selaku arung ri Israélié seppulo duwa taung ittana. Ri laleng enneng taung mammulangngé mapparéntai ri Tirza. Iyakiya ri munri melliwi séddi bulu ellinna 6.000 dowi péra' polé riséddié tau riyasengngé Semér. Nainappa patettong séddi kota ri buluéro sibawa masengngi Samaria, situru asenna Semér, punnana riyolo iyaro bulué. Napogau'i Omri dosa-dosa iya lebbi battowaé naiya napogau'é sining arung iya mapparéntaé ri yolona. Pada-pada Yérobéam, madosai Omri sibawa nassabariwi tau Israélié madosato sibawa massompa déwata. Rimakkuwannanaro napaénré'i caina Puwangnge, Allataala iya harusu'é nasompa tau Israélié. Curita laingngé passalenna Arung Omri, sibawa sininna iya puraé napogau' purani riyoki ri laleng kitta Sejarana Arung-ngarung Israélié. Maténana Omri sibawa ritampung ri Samaria, Ahab ana'na mancaji arung sulléiwi. Ri taung matelluppuloé aruwa apparéntanna Arung Asa ri Yéhuda, Ahab ana' Omri mancaji arung ri Israél sibawa mapparéntai ri Samaria duwappulo duwa taung ittana. Pogau'i dosa iya lebbi battowaé ri pakkitanna Puwangnge naiya sining arungngé ri yolona. Dé'topa nagenne ri aléna tuwo madosa pada-pada Arung Yérobéam, mala napubainéi Izebél ana'na Arung Etbaal polé ri Sidon, sibawa massompai lao ri Baal. Patettongngi bola assompang ri Samaria untu' Baal, na ri laleng bola assompangngéro mébbui séddi mézba untu' déwataéro. Mébbu towi dato-dato Déwi Asyéra. Pogau'i lebbi maéga dosa naiya napogau'é sininna arung Israél iya mapparéntaé ri yolona. Rimakkuwannanaro napaénré'i caina Puwangnge, Allataala iya harusu'é nasompa tau Israélié. Ri laleng wettu apparéntanna Ahab, ripatettongngi paimeng kota Yérikho ri Hiél tau Bétel-é. Iyakiya iya puraé napowada Puwangnge riyolo naolai Yosua ana' Nun, ateddéngengngi Hiél iya duwa ana'na: Abiram iya macowaé matéi wettunna Hiél palénne'i pallapi'na kotaé, sibawa Ségub iya maloloé matéi wettunna Hiél pakkennai pintu-pintu gerbanna kotaéro. Engka séddi nabi riyaseng Elia. Assalenna poléi ri Tisbe, séddiwi kota polé ri daéra Giléad. Riséuwaé esso laowi ri Arung Ahab sibawa makkeda, “Nasabbing Puwang iya tuwoé, Allataala iya nasompaé tau Israélié sibawa iya utumaningiyé, upaissengiwi Puwang makkedaé ri lalenna duwa iyaré'ga telluttaung mangoloéwé dé'e gaga matu cinoddo iyaré'ga bosi muwi céddé, sangadinna rékko iyya powadai.” Purairo makkedani Puwangnge lao ri Elia, “Salaini onrongngéwé. laono ri alau ri liwenna Salo Yordan sibawa assubbuno kuwaro ri seddéna ana' Salo Kérit. Weddikko ménung polé ri ana' saloéro, na kao-kaoé Usuro matu tiwirekko inanré.” Naturusini Elia paréntana Puwang -ngéro, nanalao ri ana' Salo Kérit nanaonro kuwaro. Ménunni polé ri ana' saloéro, sibawa manré roti nenniya juku iya natiwié kao-kao tungke' élé sibawa arawéng. Labe'nana siyagangngaré wettu ittana, marakko toni iyaro ana' saloé nasaba dé'gaga bosi. Nainappa makkeda Puwangnge lao ri Elia, “Makkekkuwangngé harusu'ko lao ri kota Sarfat, seddéna Sidon sibawa monro kuwaro. Purani usuro séddié janda kuwaro kuwammengngi nawérékko inanré.” Nanalaona Elia ri Sarfat. Wettunna lettu ri sumpanna kotaéro, naitani séddié janda paddeppungeng aju tunung. Namakkeda Elia lao ri jandaéro, “Ibu, tulukka alangnga céddé uwai rinung.” Wettunna iyaro jandaé joppa untu' malai uwaiéro, makkedani Elia, “Ibu, tiwireng tokka céddé roti.” Nappébali iyaro jandaé, “Nasabbing Puwang iya tuwoé, Allataala iya nasompaé Bapa', mattanroka makkedaé dé' uwappunnai roti. Banna mappunnaika sikemmo labbu tarigu ri laleng mangko'é, sibawa céddé minnya zaitun ri laleng botolo'é. Paddeppungekka aju tunung untu' nasui iyaro bahang céddé'é, kuwammengngi weddikka manré silaong ana'ku. Iyanaro inanréta paccappurengngé; purairo ritajeng mani bawang amatétta.” Namakkeda Elia, “Aja' mubata-bata, Ibu! Taébbuna inanré untu' Ibu sibawa ana'na Ibu. Iyakiya riyolonaro ébbuno riyolo séddi roti baiccu polé ri labbu'éro sibawa minnya'éro, namutiwii mai. Saba' Puwangnge, Allataala iya nasompaé tau Israélié, powadai makkedaé iyaro mangko'é tuli mallise'i matu labbu, sibawa iyaro botolo'é tuli mallise'i matu minnya narapi wettunna Puwangnge kiring bosi lao ri linoé.” Nanalaona iyaro jandaé pogau'i aga iya napowadaé Elia. Nanappunnai telluna appassadiyangeng inanré iya genne'é untu' siyagangngaré esso ittana. Na pada-pada iya puraé napowada Puwangnge naolai Elia, iyaro mangko'é tuli mallise'i labbu, sibawa iyaro botolo'é tuli mallise towi minnya. Siyagangngaré wettu ri munrinna iyaro ana'na jandaé nakennai lasa. Pédé maitta pédé maladde lasana angkanna maté. Namakkeda iyaro jandaé lao ri Elia, “Atanna Allataala, magi napogau'i Bapa' gau'éwé lao ri iyya? Poléiga Bapa' untu' nassabariwi Allataala naéngngerangngi dosaku, angkanna harusu'i maté ana'ku?” Nappébali Elia, “Tiwii iyaro ana'é lao mai.” Nainappa nala Elia iyaro ana' worowané polé ri indo'na, nanatiwii ri bili' langga yasé'é, ri bili' iya naonroiyé Elia. Napaléwuni Elia iyaro ana'é ri yasé'na onrong atinrongngé. Nainappa massempajang sibawa sadda maloppo, “Oh Puwang, Allataalaku, magi Mupapoléi acilakangngéwé ri yasé'na jandaéwé? Purana napappéruma na makkekkuwangngé Muwunoi ana'na!” Purairo wékkatellu Elia naoppangi iyaro ana'é, nanassempajatto, “Oh Puwang, Allataalaku, tennapodo patuwoi iyaé ana'é!” Naéngkalingani Puwangnge sempajanna Elia; iyaro ana'é mammulani mannyawa sibawa tuwo paimeng. Nainappa nonno Elia polé ri bili'na nanatiwi towi iyaro ana'é lao ri indo'na sibawa makkeda, “Bu, engkaniyé ana'na Ibu! Tuwoni paimeng!” Nappébali iyaro jandaé, “Uwissenni makkekkuwangngé Bapa' iyanaritu atanna Allataala sibawa ada-adanna Bapa' mémeng tongeng poléi ri Puwangnge!” Labe'nana siyagangngaré wettu ittana, ri taung matellué wettu timoéro, makkedani Puwangnge lao ri Elia, “Laono mangolo ri Arung Ahab, dé'na namaittana Upateppai bosié.” Najoppana Elia. Iyaro wettué abala akkadérengngé masero senna'ni ri Samaria. Rimakkuwannanaro riyobbini Obaja ri Ahab untu' lao mangolo. (Obaja iyanaritu kapala ruma tanggana saorajaé. Séddiwi tau iya tonget-tongengngé massompa lao ri Puwangnge. Wettunna Izebél mpunoi nabi-nabinna Puwangnge, iyaé Obaja natulungngi 100 tau nabi sibawa subbui mennang ri laleng gowa-gowaé – 50 tau ri laleng séddi gowa – enrengngé panréi mennang nenniya paénungngi.) Nakkeda Ahab lao ri Obaja, “Laono mai tajalajja'i sininna wanuwaéwé sibawa sappa mata uwai iyaré'ga salo. Naullé lolongekki matu wella untu' passalama'i anyaratta sibawa bagalta, kuwammengngi nadé'na naparelluki mpunoi muwi sikaju polé ri olokolo'ta.” Puranana nabagé daéra iya maéloé najalajja'ro, joppani mennang. Ahab lao riséddié tibang na Obaja ri tibang laingngé. Ri tengnga laleng siruntu'i Obaja sibawa Elia. Narupana Elia, suju'ni Obaja pakalebbii nainappa makkutana, “Tongegga iyaé Bapa' Elia?” Nappébali Elia, “Tongeng, iyya Elia. Laono makkekkuwangngé mupaissengiwi arummu makkedaé engkaka kuwaé.” Nappébali Obaja, “Aga asalakku angkanna maéloi Bapa' mabbéréyakka lao ri Ahab untu' riyuno? Nasabbing Puwang iya tuwoé, Allataala iya nasompaé Bapa', upannessai makkedaé puraka nasuro arungngé sappai Bapa' kégi-kégi. Rékko riséuwaé wanuwaé makkedai panguwasana makkedaé dé'i Bapa' kuwaro, natuntu'i Ahab kuwammengngi namattanro iyaro panguwasana wanuwaé makkedaé Bapa' mémeng dé' nariruntu kuwaro. Na makkekkuwangngé maéloi Bapa' kuwammengngi laoka ri aléna sibawa makkeda makkedaé engkai Bapa' kuwaé? Rékko usalaini kuwaé, naullé Rohna Puwangnge tiwii matu Bapa' ri onrong iya dé'é uwissengngi! Narékko upaissengiwi Ahab makkedaé engkai Bapa' kuwaé, narimunri dé' naruntu'i Bapa', tentuni naunoka matu. Issenni Pa', iyya'é tonget-tongekka massompa lao ri Puwangnge mappammulai baiccu'ku! Dé'paga naéngkalingai Bapa' makkedaé wettunna Izebél nauno nabi-nabinna Puwangnge, usubbui 100 polé ri mennang ri laleng gowaé – 50 tau ri laleng séddié gowa – sibawa mpéréngngi mennang inanré sibawa énungeng? Makkekkuwangngé, magi Bapa' nasuroka lao paissengiwi arungngé makkedaé engkai Bapa' kuwaé? Pasti naunoka matu!” Nappébali Elia, “Nasabbing Puwang Iya Pommakuwasaé iya utumaningiyé, majjancika aléku maélo lao mangolo ri arungngé iyato essoé.” Nalaona Obaja laporo'i ri arungngé, nanajoppa tona Ahab lao méwai sita Elia. Wettunna Ahab naita Elia, gorani Ahab, “Iyanaé pangacau ri Israélié!” Nametté Elia, “Tenniyaka pangacau,” iyakiya aléna Datu. Datu sibawa kaluwargana Datu ritu pangacau. Ri laleng massompana barahala-barahala Baal, najjalékkaiwi Datu parénta-paréntana Puwangnge. Makkekkuwangngé paréntangngi sininna ra'ya Israélié untu' méwaka sita ri Bulu Karmél. Tiwi towi iya eppa datu limappulo nabinna Baal sibawa iya eppa datu nabinna Déwi Asyéraro iya nabalancaiyé permaisuri Izébél. Nanapangarani Ahab sininna ra'ya'na sibawa nabi-nabi Baal-éro lao ri Bulu Karmél. Nainappa naddeppérini ra'ya'éro sibawa makkeda, “Gangka kégiko maélo tette padduwai atimmu? Rékko Puwang -ngéro Allataala, sompai Puwangnge! Rékko iyaro Baal Allataala, sompai Baal!” Ra'ya iya maddeppungengngé kuwaro mammekko bawammi. Nainappa makkeda Elia, “Ri yelle'na nabi-nabinna Puwangnge banna iyya bawang monro, padahal kuwaé engka 450 nabi Baal. Makkekkuwangngé tiwini mai duwakkaju saping lai. Suroi iyaro nabi-nabi Baal-é malai sikaju nanagéréi, nainappa nasépa-sépa nanapalénne'i ri yasé'na aju tunungngé. Iyakiya dé' nawedding palluwa api kuwaro. Saping iya sikajuéppa maélo tokka passadiyai makkuwaro. Maéloka géréi sibawa sépa-sépa'i enrengngé palénne'i ri yasé'na aju tunungngé. Iyakiya iyya dé'to matu upalluwa api kuwaro. Leppessanni iyaro nabi-nabi Baal-é massempajang lao ri déwana mennang, na iyya massempajang tokka lao ri Puwangnge. Iya mappébaliyé sibawa kiring api, Aléna ritu Allataala.” Metté manenni ra'ya'é sibawa sadda maloppo, “Situju!” Nanakkeda Elia lao ri nabi-nabi Baal-éro, “Nasaba iko maégako, ikona riyolo piléi sapinna sibawa passadiyai, iyakiya aja' mupalluwa'i apié ri ajunna. Purairo assempajanno lao ri déwatamu.” Nanapiléna mennang sikaju saping sibawa passadiyai. Purairo massempajanni lao ri Baal mappammulai éléé narapi tangassoé nanagora-gorato, “Baliki, Baal!” Napogau'i mennang makkuwaéro nanaséré-séréto matteru ri mattulilinna mézbana. Iyakiya dé' siseng gaga pappébali. Ri tangassonana mappammulani Elia méllékéllé'i mennang. “Assempajakko lebbi maloppo! Dewataito? Naullé mattengngangngi takkamennye, iyaré'ga laowi majjambang. Wedditto jaji engka nalaowi! Iyaré'ga naulléi matinroi, naharusu'ko teddui!” Iyaro nabi-nabié massempajanni lebbi battowasi. Napada-pada iya biyasaé napogau' mennang, nagori-gorini watakkaléna sibawa peddang nenniya bessi angkanna majjaréjé daraé. Makkuwaniro mennang matteru-teru narapi arawéng pada-pada tau atama-tamangngé. Iyakiya dé' gaga mappébali, dé' gaga jampangiwi. Nanakkeda Elia lao ri sininna ra'ya'éro, “Addeppéno mai!” Maddeppungeng manenni nattulilingiwi, nainappa napammulai pédécéngiwi mézbana Puwangnge iya maruttungngénna. Malani seppulo duwa batu, tungke' batu wakkélékiwi sala séddinna polé ri seppulo duwa suku wija-wijanna Yakub, iyanaritu tau iya puraé riwéréng aseng Israél ri Puwangnge. Nasibawang sining batuéro napatettonni paimeng Elia mézba onrong massompa lao ri Puwangnge. Ri mattulilinna mézbaéro kalini sépe iya battowaé angkanna naullé mala uwai lebbi kurang seppulo lima bang. Susunni aju tunung ri yasé'na mézbaé, nainappa saping iya sikajuéro nasépa-sépa'ni nanataroi ri yasé'na aju tunungngéro. Nainappa makkeda, “Lisekiwi eppa bémpa uwai gangka penno, nainappa tiri'i iyaro uwai ri yasé'na pakkasuwiyang akkarobangengngé sibawa ajunna.” Puranana mennang napogau' gau'éro, makkedani, “Siseppi,” napogau'ni mennang. “Siseppi,” adanna Elia, nanapogau'si mennang. Namassolo'na uwai ri mattulilinna mézbaéro angkanna sépe'na penno uwai. Wettunna narapini wettu makkasuwiyangeng akkarobangeng arawéng, naddepperini Elia iyaro mézbaé nainappa massempajang, “Oh Puwang, Allataala iya nasompaé Abraham, Ishak sibawa Yakub, pannessani makkekkuwangngéwé makkedaé Iko ritu Allataala ri Israél, na iyya atam-Mu. Pannessa towi makkedaé sininna iya upogau'éwé iyanaritu parénta-Mu. Balini, Puwang! Balika kuwammengngi naissengngi iyaé ra'ya'é makkedaé Iko, oh Puwang, iyanaritu Allataala, sibawa Iko ritu mébbui mennang lisu ri Alému.” Nanakirinna Puwangnge api polé ri langié nanatunui gangka mangu akkarobangngéro silaong aju tununna, sining batunna sibawa tanana enrengngé lépe'i gangka cappu uwai iya engkaé ri laleng sépe'éro. Wettuna naita ra'ya'é gau'éro makkaluttuni ri tanaé namakkeda, “ Puwang -ngéro Allataala! Tongeng Puwang -ngéro Allataala!” Namakkedana Elia, “Tikkengngi nabi-nabi Baal-éro! Aja' muleppessangngi muwi séddi tau leppe!” Nanatikkenni sining tauwé nabi-nabi Baal-éro, nainappa Elia tiwii mennang ri Salo Kison nakkuwaniro nauno maneng mennang. Purairo makkedani Elia lao ri Arung Ahab, “Madécéngenni makkekkuwangngé Datu lao manré! Dé'na namaittana nabosi, saba' riyéngkalingani oninna.” Nalaona Ahab manré, na Elia ménré'i ri tompo'na Bulu Karmél. Kuwaniro suju' ri tanaé ri yelle'na iya duwa uttuna. Makkedani lao ri pattumaninna, “Enré'no ri tompo'na namuwakkita lao ri tasi'é.” Ménré'ni iyaro ataé, nainappa lisu sibawa makkeda, “Dé' aga-aga uwita.” Narapi wékkapitu Elia suroi atanna noté untu' mitai. Ri mabbékkapitunnana lisuni iyaro ataé sibawa makkeda, “Mitaka ellung sibbéccu pale limaé polé ri tasi'é.” Namakkeda Elia lao ri atanna, “Laono ri Arung Ahab suroi ménré ri karétana sibawa lisu ri wettu dé'napa narilawa ri bosié.” Ri laleng sikédé bawang namalillinna langié, sibawa miri anging rajaé enrengngé mammulani teppa bosi rajaé. Ménré'ni Ahab ri karétana nanalisu ri Yizreel. Iyaro wettué lolongenni awatangeng Elia polé ri Puwangnge. Nalulunni jumbana ménré nanasiyoi ri babuwana nainappa lari poddiyoloiwi Ahab puppu laleng lettu ri pintu gerbanna kota Yizreel. Nacuritani Arung Ahab lao ri Izebél bainéna, sininna iya puraé napogau' Elia, makkuwatoro pékkugi Elia mpunoi sininna nabi Baal. Nanakirinni Izebél iyaé karébaé lao ri Elia, “Tennapodo pahukkungngi sining déwataé, mala naunoka, rékko baja wettu pada-padaéwé dé' ugaurekko pada-pada mugaurengngéngngi nabi-nabi Baal-éro.” Métauni Elia, nainappa lari kuwammengngi dé' nariyuno. Laoni silaong pattumaninna ri Bersyéba ri Yéhuda. Kuwaniro nasalai pattumaninnaro, nainappa mallaleng lao ri padang kessi'é siesso ittana sibawa mappésau ri yawana séddié aju iya maworongngé. Kuwaniro tudang sibawa macinna kuwammengngi namaté bawang. Adanna lao ri Puwangnge, “Dé'na utahanna, Puwang. Ala bawanni nyawaku. Dé' ulebbi makessing naiya toriyoloku!” Nainappa léwu ri yawana ajuéro namatinro. Tennasenna-sennana séddi malaéka' géssai sibawa makkeda, “Oto'no Elia, anréno!” Makkitani Elia mattulili, napaitana ri seddéna ulunna sipolo roti tunu sibawa kendi mallise uwai. Manréni sibawa ménung, nainappa léwu paimeng. Untu' mabbékkaduwanna poléi malaéka'na Puwangnge géssai sibawa makkeda, “Oto'no, Elia, anréno, kuwammengngi muwulléi tahang mallaleng mabéla.” Moto'ni Elia, nainappa manré sibawa ménung. Namawatanna sibawa naulléna joppa patappulo esso ittana lao ri Bulu Sinai, onronna Allataala mappaitangngi aléna. Kuwaniro Elia mabbenni ri laleng gowaé. Namakkedana Puwangnge lao ri aléna, “Elia, mangako kuwaé?” Nappébali Elia, “Oh Puwang, Allataala Iya Pommakuwasaé, tuli majjamaka banna untu' Alému bawang. Iyakiya umma Israélié najjalékkaiwi assijancinna mennang sibawa Iko. Nabongkara'i mennang sining mézba-Mu sibawa naunoi nabi-nabim-Mu. Banna iyya ritu bawang iya monroé, na makkekkuwangngé maéloi mpunoka!” Nakkeda Puwangnge lao ri aléna, “Assuno polé ri gowaéro, sibawa tettonno mangolo ri Iyya ri tompo'na bulué.” Nalalona Puwangnge kuwaro, ripoddiyoloi ri anging iya mirié makencang senna angkanna mapuwé bulu-bulué sibawa mareppa bulu batué. Iyakiya Puwangnge dé' nappaitangngi aléna ri laleng angingngéro. Maononana iyaro angingngé, tatténrénni tanaé, iyakiya muwi ri laleng tatténréng tanaéro dé'to nappaitangngi aléna Puwangnge. Nainappa poléni apié, iyakiya dé' towi Puwangnge ri laleng apiéro. Purairo masino-sinoni, nainappa naéngkalinga séuwa sadda iya marenni'é. Wettunna naéngkalinga Elia iyaro saddaé, natongkoni rupanna sibawa jumbana, nainappa massu sibawa tettong ri sumpanna gowaéro. Napaéngkalingana sadda iya makkedaé, “Elia, mangako kuwaé?” Nappébali Elia, “Oh Puwang, Allataala Iya Pommakuwasaé, tuli majjamaka banna untu' Alému bawang. Iyakiya umma Israélié najjalékkaiwi assijancinna mennang sibawa Iko. Nabongkara'i mennang mézba-mézba-Mu sibawa mpunoi nabi-nabim-Mu. Banna iyya alé-aléku iya monroé, na makkekkuwangngé maéloi mpunoka!” Nakkeda Puwangnge, “Lisuno ri padang kessi'é seddéna Damsyik! Nainappa laoko ri kotaé sibawa tirikiwi minnya ulunna Hazaél selaku tanrang riyakkana mancaji arung Siria. Pogau' towi makkuwaéro lao ri Yéhu ana' Nimsi, kuwammengngi namancaji arunna Israélié, sibawa lao ri Elisa ana' Safat polé ri Abél-Méhola, kuwammengngi namancaji nabi sulléiko. Nigi-nigi iya dé'é nariyuno ri Hazaél, riyunoi matu ri Yéhu, sibawa mennang iya leppe'é polé ri Yéhu riyunoi matu ri Elisa. Iyakiya 7.000 tau ri Israélié Upassalama matu, iyanaritu sining tau iya tette'é matinulu ri Iyya sibawa dé' naengka nasuju' sompai dato-dato Baal iyaré'ga bauwi.” Nanajoppana Elia méwai sita Elisa iya mattengngangngé maddakkala. Engka seppulo duwa pasang saping ri yolona na aléna Elisa maddakkala sibawa pasangeng saping paccappurengngé. Wettunna Elia lalo ri seddéna Elisa, naleppessani Elia jumbana nanaparampa'i ri salangkanna Elisa. Nanasalaini Elisa sining sapinna nanalari lellungngi Elia, enrengngé makkeda, “Palaloka massimang riyolo ri tomatowakku, nainappaka maccowériwi matu Bapa'.” Nametté Elia, “Laono. Dé' uwattéyakko.” Lisuni Elisa ri dare'na nainappa nagéré sining sapinna. Watanrakkalana napaké selaku aju tunung untu' nasui jukuna sining sapingngéro. Nainappa natawa-tawa iyaro jukué lao ri ana' buwana nananréi mennang. Purairo laoni Elisa maccowériwi Elia sibawa mancaji pabbantunna. Riséuwaé esso, Bénhadad, arunna Siria, napaddeppungengngi sininna tentarana, nasilaong 32 arung laing sibawa karéta musu, enrengngé anyaranna, nakeppungngi sibawa nagasai kota Samaria. Nainappa suro tau lao ri Ahab, arunna Israélié, ri kotaéro sibawa pasengngéwé, “Natuntu'i Arung Bénhadad kuwammengngi muwabbéréyang lao ri aléna ulaweng, péra', sining bainému sibawa ana'-ana'mu iya mawatangngé.” Nappébali Ahab, “Powadangngi datu Arung Bénhadad makkedaé usitujuiwi. Weddikka nappunnai sibawa sininna appunnangekku.” Nainappa iyaro sining suroé lisusi paimeng ri Ahab untu' palettu'i tuntutanna laingngé polé ri Bénhadad. Mappakkuiyé oninna tuntutannaro, “Riyolo natuntu'i arutta kuwammengngi muwéréngngi ulaweng sibawa péra' nennaiya sining bainému enrengngé ana'-ana'mu. Iyakiya makkekkuwangngé maéloi suroi sining parawiraé untu' galédai saorajamu sibawa bolana sining pegawémmu, enrengngé malai agi-agi iya naangga'é mangke. Maéloi polé mennang baja kuwaé pada-pada wettuéwé.” Nanaobbini Arung Ahab sininna pamimpinna Israélié sibawa makkeda, “Alému sabbingngi makkedaé iyaé tauwé maéloi cilakaiki. Natuntu'i kuwammengngi uwabbéréyangngi sining bainéku sibawa ana'-ana'ku enrengngé ulaweng nenniya péra'ku, nadé' usampéyangngi iyaro tuntutanna.” Nakkeda sining pamimpingngé sibawa ra'ya'é, “Aja' tabati-batiwi, Datu! Aja' taturusiwi élona.” Rimakkuwannanaro nabalini Ahab iyaro sining surona Bénhadad makkuwaé, “Powadangngi Datu, arummuro, makkedaé nasitujuiwi tuntutanna mammulangngé, iyakiya tuntutanna iya maduwaéwé dé' uwulléi situjuiwi.” Nalaona iyaro sining suroé, nainappa lisu paimeng ri Ahab sibawa makkeda, “Maéloi arutta kiring makkuwamani égana tentara untu' mancuru'i kotamu, angkanna awunna polé ri sésa-sésa kotamuro naulléi mennang makka manengngi banna sibawa limanna mennang. Mattanroi kuwammengngi napahukkung sining déwataé, mala mpunoi, rékko dé' napogau'i gau'éro!” Nappébali Arung Ahab, “Powadangngi Arung Bénhadad: Prajuri iya tuléngngé marasa mabangka'i rékko purai mammusu, tenniya dé'napa.” Iyaro pappébalinna Ahab napalettu'ni ri Bénhadad wettunna silaong sining arung laing iya naéwaé sikongkolo iya mattengngangngé ménung-ménung ri laleng akkémanna mennang. Naéngkalinganaro napparéntanni Bénhadad sining parawirana untu' sadiya-sadiya gasai kota Samaria. Nasadiya-sadiyana mennang. Iyaro wettué, engka séddi nabi lao ri Arung Ahab sibawa makkeda, “Makkedai Puwangnge: ‘Muwitaga tentara iya maégaéro? Maélo-Ka mpérékko apakalang lao ri mennang iya essoé. Muwissengngi matu makkedaé Iyya'na Puwang.’ ” Nakkutana Ahab, “Niga harusu maggasa lebbi riyolo?” Nappébali iyaro nabié, “Prajuri-prajuri kalloloé, pattinrona sining kapala daéraé. Makkuwaniro adanna Puwangnge.” Nakkutanasi arungngé, “Nanigana harusu pimpingngi iyaro aggasarengngé?” Nappébali iyaro nabié, “Aléna Datu.” Nanapangarani arungngé prajuri-prajuri kallolo pattinrona sining kapala daéraé. Iya manenna engka 232 prajuri. Nainappa napogau' iya padaé lao ri tentara Israélié. Iya manenna engka 7.000 tau. Napammulaini aggasarengngé ri lakessoé wettunna Bénhadad sibawa iya telluppulo duwa arung iya mancajiyé sikongkolo'naro mattengngang ménung-ménung gangka mabo' ri laleng akkémannna mennang. Iya bunge' majué iyanaritu prajuri-prajuri kalloloéro. Sining tau iya nasuroé Bénhadad untu' mata-mataiwi balié, nalaporo'ni ri Bénhadad makkedaé sikalompo tentara mattengngang laowi mennang polé ri Samaria. Napparéntanni Bénhadad kuwammengngi natikkeng tuwo-tuwoi iyaro tentara balié, tenripaduliwi poléiga mennang untu' mammusu iyaré'ga untu' sidamé. Iyaro prajuri-prajuri kalloloé iya napangaraé Arung Ahab mammulani kédo polé ri kota Samaria, riyaccowéri ri tentara Israélié. Tungke'-tungke' mennang mpunoi balié iya naoloiyé. Larini tau Siriaé, rilellung ri tau Israélié. Iyakiya leppe'i Bénhadad. Lariwi sibawa anyarang risilaongeng risiyagangngaré tentara makkinnyaranna. Muttama toni Arung Ahab ri ammusurengngé nanaancuru'i karéta-karéta musué sibawa mpunoi sining anyaranna. Iyaro essoé battowa ricaurengngi tau Siriaé. Nainappa iyaro nabié laoni ri Ahab sibawa makkeda, “Makkekkuwangngé makessingengngi lisuni Petta sibawa péwatangiwi aléna enrengngé mébbu rancana iya matasa'é, nasaba maéloi polé arung Siria maggasasi ri wettu lemma iya mangoloé.” Makkedani parawira-parawirana Arung Bénhadad lao ri Bénhadad, “Allataala-allataala iya nasompaé tau Israélié makuwasai ri bulué, iyanaro saba'na naulléi cauki iyaro bangsaé. Iyakiya pasti riyulléi caui mennang rékko mammusuki ri tanété mariyawaé. Makessingengngi makkekkuwangngé Datu sulléiwi iya telluppulo duwa arungngéro sibawa parawira-parawirana muto Datu. Nainappa sitinajai Datu pangara pasukang singngéga pasukanna Datu iya puraé ricauro, nasibawang anyarang nennaiya karéta musu singngégato riyolo. Maéloki musui bangsa Israéliéro ri tanété, na iyaé sisengngé pasti pacauki.” Nasitujuini Arung Bénhadad, nanaccowériwi pangajana parawira-parawiraéro. Ri wettu lemma paimennana napangarani tentarana, sibawa kédo lao ri kota Afék untu' gasai tau Israélié. Napassakke toni tau Israélié tentarana sibawa pangarai mennang. Nainappa tentara Israélié maju ri laleng duwa pasukang sibawa makkéma siyolong sibawa sining tau Siriaéro. Rékko ripasibandingngi tentara Siriaé iya tassiyaé malowang pennoiwi daéraéro, pasukanna Israélié paitai pada-pada duwakkonrong bémbé bawang. Nanapoléna séddi nabi ri Arung Ahab sibawa makkeda, “Iyanaé napowada Puwangnge: ‘Nasaba nasengngi sining tau Siriaé makkedaé banna makuwasa-Ka ri bulué nadé' ri tanété, maélo-Ka mpérékko apakalang lao ri tentarana mennang iya maéga senna'éro. Iko sibawa ra'ya'mu muwissengngi matu makkedaé Iyya'na Puwang.’ ” Pitungngesso ittana tau Siriaé sibawa tau Israélié tette'i ri laleng akkémanna mennang, siyolo-olong. Ri esso mapitué mammulani mennang sigasa. Ri laleng musuéro naunoi tau Israélié 100.000 tau Siriaé. Sining tau iya leppe'é, larini lao ri kota Afék, iyakiya maruttungngi témbo'na kotaéro nanageppai 27.000 tau ri yelle'na mennang. Lari toni Bénhadad lao ri kotaéro sibawa mallekke riséddié bola ri bili' bagiyang ri lalengngé. Poléni sining parawirana ri aléna sibawa makkeda, “Adanna tauwé, arung-ngarunna Israélié iyanaritu arung-ngarung iya maressé babuwaé. Rimakkuwannanaro, palaloni' mangolo ri arunna Israélié sibawa paké kaing karung selaku tanrang assessekaléng sibawa tulu ri ellongngé selaku tanrang tunru. Memmuwaré dé' naunoi Datu.” Napakéni mennang kaing karungngé sibawa tulu ri ellonna, nainappa lao mangolo ri Ahab sibawa makkeda, “Bénhadad iyanaritu atanna Datu. Naéllauwi kuwammengngi aja' Datu naunoi.” Nappébali Ahab, “Tuwo mupiga, saudarakuro?” Mémeng iyaro sining parawirana Bénhadad tajengngi tanrang iya makessingngé polé ri Ahab. Jaji, wettunna Ahab makkeda “saudara”, matteruni mennang mappébali, “Tongeng, Bénhadad iyanaritu saudarana Datu.” Nakkeda Ahab, “Antara'i lao kumaiyé!” Wettunna lettu Bénhadad, riyérani ri Ahab ménré ri karétaé. Nakkeda Bénhadad lao ri aléna, “Maéloka palisui ri Puwang kota-kota iya puraé nasittai ambo'ku polé ri ambo'na Puwang. Wedding towi Puwang patettong dangkangeng ri kota Damsyik pada-pada iya napogau'é ambo'ku ri Samaria.” Nametté Ahab, “Nasaba jancinna Puwanro, maéloka paleppe'i Puwang.” Purairo mébbuni Ahab assijancing sibawa Bénhadad nainappa napaleppe. Nasaba paréntana Puwangnge, séddi nabi polé ri yelle'na sikalompo nabi suroi sellaona munrui. Iyakiya iyaro sellaona sé' namaélo. Namakkeda iyaro nabié, “Nasaba dé' muturusiwi paréntana Puwangnge, naluruiko matu singa lisummu muwa polé kuwaé.” Tongeng. Laona muwa polé kuwaro, riluruini ri sikaju singa. Nainappa iyaro nabié lao ri tau laingngé sibawa makkeda, “Unruka!” Naiyaro tauwé naunruni sibawa maladde senna angkanna malo. Purairo nabebbe'ni rupanna iyaro nabié sibawa kaing, kuwammengngi dé' nirisseng ri tauwé, nainappa lao tettong ri wiring lalengngé untu' tajengngi arunna Israélié lalo. Wettunna lalo arungngé, gorani iyaro nabié lao ri aléna, “Petta Iya Malebbié, wettukku mammusu ri ammusurengngé, engka séddi prajuri tiwi lao ri iyya séddi tau bali iya ritikkengngé. Makkedai iyaro prajuri'é, ‘Jagaiwi iyaé tauwé madécéd-décéng. Rékko lariwi, harusu'ko riyuno sulléiwi, iyaré'ga mpajai 3.000 dowi péra'.’ Iyakiya rimunri wettukku malippu, iyaro tauwé lariwi.” Nappébali arungngé, “Iko muto pateppaiwi pahukkungeng alému. Harusu'ko tanggungngi.” Iyaro nabié nalukkani pabbebbe ulunna, nanaissenni arungngé selaku séddi nabi. Nanakkeda iyaro nabié lao ri arungngé, “Iyanaé napowada Puwangnge, ‘Tau iya Uparéntangngé kuwammengngi nariyuno purani muleppessang leppe. Rimakkuwannanaro iko harusu maté selaku passulléna. Ancuru'i matu tentaramu nasaba purai muleppessang tentara balié lari.’ ” Lisuni arungngé ri Samaria sibawa ati iya massesse'é sibawa macai. Ri seddé saorajana Arung Ahab ri Yizreel engka sikonrong palla anggoro appunnangenna tau iya riyasengngé Nabot. Riséuwaé esso makkedai Ahab lao ri Nabot, “Wérékka iyaro dare anggoro'mu, saba' iyaro dare anggoro'é macawé'i ri saorajaku. Macinnaka mattaneng ukka-ukkaju kuwaro. Lolongekko matu palla anggoro iya lebbi makessingngé selaku passulléna, iyaré'ga rékko maéloko, uwelliwi matu sibawa elli iya sitinajaé.” Nappébali Nabot, “Iyaé palla anggoro'é manana néné-nénéku. Nasabbing Allataala, dé' naweddikka mabbéréyangngi lao ri Puwang!” Nasibawang ati iya massesse'é sibawa macai nasaba méngkalingai aga iya napowadaé Nabot lao ri aléna, nalisuna Ahab nanaléwu ri onrong atinronna sibawa mabboko enrengngé dé' namaélo manré. Laoni Izebél bainéna ri aléna sibawa makkutana, “Magi mumassesse? Magi dé' mumaélo manré?” Nappébali Ahab, “Dé' umasennang sibawa Nabot. Uwéllauwi ri aléna kuwammengngi nabalu'i palla anggoro'na lao ri iyya, iyaré'ga uséléi sibawa palla anggoro iya laingngé, rékko iyaro naélori, iyakiya dé' namaélo!” Nametté Izebél, “Na ikotu arunna Israélié! Oto'no makkekkuwangngé sibawa manréno. Pésennangini atimmu, saba' iyya maélo mpérékko iyaro palla anggoro'na Nabot!” Naokina sure' Izebél ri laleng asenna Ahab sibawa nataroiwi ségélé'na arungngé ri sure'éro. Iyaro sure'é nakirinni lao ri pamimping-pamimpingngé sibawa tomariyolona masaraka'é ri Yizreel. Iyanaé lise'na iyaro sure'é, “Appallebbangengngi kuwammengngi nappuwasa ra'ya'é sibawa suroi mennang maddeppungeng! Ri laleng addeppungengngéro wéréngngi Nabot onrong tudangeng iya malebbi'é. Suroi duwa tau maja tudang mangolo ri aléna sibawa tenre'i makkedaé purani natanroi Allataala sibawa arungngé. Nainappa mutiwi massu ri saliweng kota, namugenrungngi sibawa batu gangka maté!” Iyaro paréntana Izebél napogau'ni sining pamimpingngé sibawa tomariyolona masaraka Yizreel. Nappallebbangenni mennang kuwammengngi nappuwasa ra'ya'é. Nainappa nasuro tauwé maddeppungeng sibawa Nabot riwéréng onrong iya malebbié. Duwa tomaja tudang siyolong sibawa Nabot, na ri yolona tau maégaé natenre'ni mennang makkedaé purai natanroi Allataala sibawa arungngé. Rimakkuwannanaro naritiwina ri saliweng kota nainappa rigenrung batu gangka maté. Karéba passalenna riyunona Narot ripalettukenni Izebél. Natarimana muwa Izebél iyaro karébaé makkedani lao ri Ahab, “Maténi Nabot. Laono makkekkuwangngé malai palla anggoro'éro iya dé'é namaélo balu'i lao ri iko.” Masitta'ni Ahab lao sibawa malai iyaro palla anggoro'é mancaji appunnangenna. Namakkeda Puwangnge lao ri Elia, nabi polé ri Tisbero, “Ahab, arung Samariaéro makkekkuwangngé engkai ri palla anggoro'na Nabot maélo malai iyaro palla anggoro'é mancaji appunnangenna. Jaji laono kuwaro, namupalettukengngi makkedaé Iyya, Puwang, makkeda makkuwaé, ‘Purani pauno, marrampasa'si! Rimakkuwannanaro nalépe'i matu asu daramu ri onronna sining asué lépe'i darana Nabot!’ ” Wettunna Ahab naita Elia, makkedani, “Eh bali, angkanna mulolongekka!” Nametté Elia, “Tongeng. Nasaba baraniwi Puwang pogau'i majaé ri pakkitanna Puwangnge, na iyanaé napowada Puwangnge lao ri Puwang, ‘Maéloka pateppa abala ri yasé'mu. Upaddésu'ko matu, na tungke' worowané ri laleng kaluwargamu, macowa sibawa malolo, upallennye'i matu. Mancajiwi matu kaluwargamu pada-pada kaluwargana Arung Yérobéam ana' Nébat sibawa pada-pada kaluwargana Arung Baésa ana' Ahia, nasaba iko pura nassabariwi tau Israélié napogau' dosa angkanna napaompo cai-Ku.’ Na passalenna Izebél, makkedai Puwangnge makkedaé nanréi matu asu watakkaléna ri laleng kota Yizreel. Nigi-nigi polé ri anggota kaluwargamu iya maté ri kotaé nanréi matu asu, sibawa iya maté ri saliweng kota nanréi matu manu'-manu'.” Dé' naengka tau iya mabbaranié pogau'i majaé ri pakkitanna Puwangnge pada-pada iya napogau'é Ahab. Sininna jaéro napogau'i nasaba doronganna Izebél, bainéna. Napogau'i Ahab dosa-dosa iya matuna senna'é: massompai barahala pada-pada iya napogau'é tau Amorié, iyanaritu sining tau iya puraé napaddésu Puwangnge massu polé ri wanuwa Kanaan wettunna tau Israélié muttamakiwi wanuwaéro. Puranana Elia mabbicara, nasapé'ni Ahab pakéyanna nanapaké kaing karung selaku tanrang assessekeng, nainappa mappuwasa. Muwi ri wettunna matinro paké towi kaing karung, sibawa rékko joppai, tuli masara tappana. Namakkeda Puwangnge lao ri Nabi Elia, “Puraniga muwita pékkugi Ahab pakariyawai aléna ri yolo-Ku? Rimakkuwannanaro, dé' Umaélo papoléi abalaé ri wettu tuwona mupa. Wettunnapa ana'na nainappa Upapolé iyaro abalaé ri yasé'na kaluwargana.” Ri lalenna duwattaungngé lebbi dé'gaga musu ri yelle'na Israélié sibawa Siria. Iyakiya ri taung matellué, Yosafat arunna Yéhuda lao méwai sita Ahab arunna Israélié. Ri yolonaro purai Ahab makkeda lao risining parawirana, “Muwisseng makkedaé iyaro kota Ramot ri Giléad appunnangetta! Magi nadé' narisittai paimeng polé ri arung Siria?” Na wettunna Yosafat polé, makkutanani Ahab, “Maéloiga Saudara lao sibawakka gasai Ramot?” Nappébali Yosafat, “Makessinni! Talao massibawa. Tentara sibawa pasukang makkinnyarakku masséddiwi matu sibawa tentara nenniya pasukang makkinnyaranna Saudara. Iyakiya makessingengngi makkutanaki riyolo lao ri Puwangnge.” Nanapaddeppungenni Ahab kira-kira 400 nabi palsu namakkutana lao ri mennang, “Weddikka'ga lao gasai Ramot iyaré'ga dé'?” Nappébali mennang, “Wedding. Puwangnge matu mabbéréyangngi iyaro kotaé lao ri Datu.” Iyakiya makkutanai paimeng Yosafat, “Dé'ga gaga kuwaé nabi laing iya weddingngé makkutanangekki ri Puwangnge?” Nappébali Ahab, “Engka mupa séddi, Mikha ana' Yimla. Iyakiya ubenciwi, nasaba dé' naengka nabotoi séuwa iya makessingngé untu' iyya; tuli iya dé'é namakessing.” Nametté Yosafat, “Ah, aja' muwakkeda makkuwatu!” Nanaobbini Ahab séddi pegawénna saorajaé nanasuroi masitta lao duppaiwi Mikha. Iyaro wettué Ahab sibawa Yosafat, tudangngi ri kadéra akkarungengngé sibawa pakéyang arajang ri onrong addésekeng gandongngé ri yolona pintu gerbanna Samaria, na sining nabié poléni mangolo sibawa palettu'i botona. Sala séddinna polé ri nabi-nabiéro, iya riyasengngé Zédékia ana' Kenaana, mébbu tanru-tanru bessi nainappa makkeda lao ri Ahab, “Iyanaé napowada Puwangnge, ‘Nasibawang tanru-tanru pada-padaéwé nahantangngi matu Datu Siria sibawa mancuru'i mennang.’ ” Sininna nabi laingngé nasitujuini sibawa makkeda, “Gasani Ramot, pakalai matu Datu. Puwangnge mpéréngngi matu apakalang Datu.” Na wettuéro suro iya duppaiyéngngi Mikha, makkedani lao ri Mikha, “Sininna nabi iya laingngé botoi apakalang untu' arungngé. Tennapodo Bapa' boto towi iya makessingngé pada-pada mennang.” Iyakiya mappébaliwi Mikha, “Nasabbing Puwang iya tuwoé, banna maéloka powadai aga napowada Puwangnge lao ri iyya!” Lettu'nana Mikha ri yolona Arung Ahab, makkutanani arungngé, “Weddikka'ga iyya sibawa Arung Yosafat lao gasai Ramot, iyaré'ga dé'?” Nametté Mikha, “Gasani! Tentu pacaui matu Datu. Puwangnge mpéréngngi matu apakalang Datu.” Nappébali Ahab, “Rékko mabbicarako lao ri iyya nasabbing asenna Puwangnge, powadai iya tongengngé. Wékkasiyagako harusu uparéngngerangi passalenna gau'éro?” Nappébali Mikha, “Uwitai tentara Israélié tassiya-siya ri bulu-bulué. Pada-padai mennang bimbala dé'é pakkampina, namakkeda Puwangnge passalenna mennang, ‘Iyaé sining tauwé dé' nappunnai pamimping. Leppessanni mennang lisu sibawa salama.’ ” Namakkeda Ahab lao ri Yosafat, “Tongetto adakku? Dé' naengka nabotongekka iya makessingngé! Tuli iya majaé bawang!” Makkedai Mikha paimeng, “Makkekkuwangngé éngkalingai aga iya napowadaé Puwangnge! Uwitai Puwangnge tudang ri kadéra arajan-Na ri surugaé, sibawa sininna malaéka'-Na tettong ri seddé-Na. Makkutanai Puwangnge, ‘Nigana maélo palécéi Ahab kuwammengngi namaélo lao mammusu namaté ri Ramot ri Giléad?’ Pappébalinna iyaro sining malaéka'é maddupa-rupang. Paccappurenna malluruni séuwa roh. Naddeppérini Puwangnge sibawa makkeda, ‘Iyya ritu maélo palécéi.’ Nakkutana Puwangnge, ‘Pékkugi carana?’ Nappébali iyaro roh-é, ‘Maéloka lao mébbui sininna nabinna Ahab mabbellé.’ Nakkeda Puwangnge, ‘Makessinni, pogau'ni iyaro, muwulléi matu palécéi.’ ” Napatteruni Mikha adanna, “Nah, iyanaro kajajiyang! Puwangnge pura mébbui nabi-nabinna Datu mabbellé lao ri Datu saba' Puwangnge pura pattentui untu' pateppaiwi abala Datu!” Namalluruna Nabi Zédékia maddeppériwi Mikha nanaleppa'i rupanna sibawa makkeda, “Pékkugi makkullé nasalaika Rohna Puwangnge sibawa mabbicara lao ri iko?” Nappébali Mikha, “Muwitai matu buttinna wettummu muttama riséddié bili' untu' massubbu.” Napparénta Arung Ahab, “Tikkengngi! namutiwii lao ri Amon, wali kotaé, sibawa lao ri ana' Pattolaé Yoas. Suroi mennang puttama'i ri laleng attarungkungngé, sibawa mpéréngngi inanré sibawa uwai rinung céddé'na bawang narapi lisuka sibawa salama.” Nakkeda Mikha, “Rékko lisui Datu sibawa salama, bettuwanna dé' nabbicara Puwangnge naolaka! Sininna iya hadéré'é kuwaé mancaji sabbi.” Nainappa Ahab arung Israél, sibawa Yosafat arung Yéhuda lao gasai kota Ramot ri Giléad. Makkedani Ahab lao ri Yosafat, “Maéloka mallarikkodo sibawa maccowé mammusu, iyakiya Saudara sitinajai pakéi pakéyang arajammu.” Makkuwaniro arung Israélié mallarikkodo wettunna lao mammusu. Iyaro wettué iya telluppulo duwa pallima pasukang karéta musuna Siria pura riparéntanni ri arunna untu' gasai banna arung Israélié bawang. Jaji, wettunna mennang naita Arung Yosafat, naseng manenni mennang aléna arung Israélié. Rimakkuwannanaro nagasani mennang. Iyakiya gorai Yosafat, nanamaingekini mennang makkedaé tenniyai arunna Israélié. Nanappésauna gasai. Nasitujuwangngi séddi prajuri Siria malleppessangngi ana' panana, teppatujui ri akkatta mattentué. Iyakiya iyaro ana' panaé nakennai Ahab sibawa bettui waju musuna ri bagiyang padduppanna. Nagorana Ahab lao ri pappalari karétana, “Nakennaka! Balé'ko namutiwika massu polé ri ammusurengngé!” Iyakiya nasaba marowa mupi musué, tette'i Arung Ahab tettong ritula ri laleng karétana mangolo ri tentara Siriaé. Darana massolo'i polé ri lona, mappenna ri salima karétaé. Arawénnana maténi. Maélonana labu essoé sininna pasukang Israélié riparéntanni untu' lisu ri kotaé sibawa daérana tungke'-tungke', nasaba maténi arungngé. Nanalisuna mennang sibawa kuburu'i ujuna Ahab ri Samaria. Wettunna ripaccingi karétana ri kolang Samaria, sining makkunrai cakkuribangngé cemméi kuwaro, sibawa asué mallépe dara ri karétaéro, pada-pada iya puraé napowada Puwangnge kuwaro. Curita laingngé passalenna Arung Ahab, passalenna saoraja gadinna sibawa sininna kota iya napatettongngé, pura riyokini ri laleng kitta Sejarana Arung-ngarung Israélié. Maténana Ahab, Ahazia ana'na mancaji arung sulléiwi. Ri taung maeppaé apparéntanna Ahab arung Israél, Yosafat ana' Asa mancaji arunna Yéhuda. Iyaro wettué umuru'na telluppulo lima taung. Mapparéntai ri Yérusalém duwappulo lima taung ittana. Indo'na iyanaritu Azuba ana' Silhi. Ri taung maseppuloé pitu apparéntanna Arung Yosafat polé ri Yéhuda, Ahazia ana' Ahab mancaji arunna Israélié nanaparéntai Israélié duwattaung ittana. Madosai ri Puwangnge ri laleng naturusinna baténa ambo'na sibawa indo'na enrengngé baténa Arung Yérobéam iya nassabariyéngngi tau Israélié napogau' dosa. Nasompai Baal sibawa mattumaniwi ri aléna. Na pada-pada ambo'na iya mapparéntaé ri yolona, napaénré towi caina Puwangnge, Allataala iya nasompaé tau Israélié. Maténana Ahab arung Israél, maronta'ni wanuwa Moab lao ri Israél. Riséuwaé esso Arung Ahazia polé ri Israél menrungngi polé ri légo-légo langga yasé'na saorajana ri Samaria, namalo ladde'na. Nanasuroni tauwé untu' makkutangngi ri Baal-Zébub, déwatana kota Ekron ri Filistin, majjappa muwiga matu iyaré'ga dé'. Iyakiya malaéka'na Puwangnge suroi Elia, nabi polé ri Tisbe, lao méwai sita iyaro sining surona Arung Ahazia untu' makkeda, “Dé'ga gaga Allataala ri Israél angkanna maéloko lao méllau panunju ri Baal-Zébub, déwatana kota Ekronro? Powadangngi arungngé makkedaé, makkeda makkuwaiyé Puwangnge, ‘Dé' muwajjappa matu, matéko matu!’ ” Purana napogau' Elia iyaro paréntana Puwangnge, lisuni iyaro sining suroé ri arungngé, namakkutanana arungngé, “Magi mulisu?” Nappébali mennang, “Engka séddi worowané polé méwaki sita, sibawa suroki lisu untu' powadai lao ri Datu makkedaé makkeda makkuwaiyé Puwangnge lao ri Datu, ‘Dé'ga gaga Allataala ri Israélié, namusuroi méllau panunju ri Baal-Zébub, déwatana kota Ekron? Dé' muwajjappa matu, matéko matu!’ ” Nakkutana arungngé, “Pékkugi tappana iyaro tauwé?” Nappébali mennang, “Jumba sibawa babbanna poléi ri bingkulangngé.” Nakkeda arungngé, “Oh, Elia iyaro!” Nanasurona séddi parawira silaong limappulo tau ana' buwana lao tikkengngi Elia. Laoni iyaro parawiraé nanaruntu'ni Elia mattengngang tudang riséddié bulu-bulu. Nakkeda iyaro parawiraé, “Eh atanna Allataala, naparéntakko arungngé nonno!” Nappébali Elia, “Rékko mémekka atanna Allataala, sitinajai nonno apié polé ri langié sibawa tunuko enrengngé sininna ana' buwamu!” Iyatoro wettué nananonno apié sibawa tunui iyaro parawiraé silaong iya limappulo ana' buwana. Nainappa suro arungngé parawira laingngé silaong limappuloto tau ana' buwana. Laoni mennang sibawa makkeda lao ri Elia, “Eh atanna Allataala, naparéntakko arungngé nonno iyato makkekkuwangngéwé!” Nappébali Elia, “Rékko atannaka Allataala, sitinajai nonno apié polé ri langié sibawa tunuko gangka cappu silaong sininna ana' buwamu!” Iyatoro wettué nanonno apié polé ri Allataala sibawa tunui iyaro parawiraé gangka cappu sibawa iya limappulo ana' buwana. Siseppi arungngé suro séddi parawira silaong limappulo tau ana' buwana. Iyaro parawiraé ménré'ni ri bulu-bulué na lettunana ri yolona Elia makkaluttuni sibawa makkeda, “Addampengekki, éh atanna Allataala! Amaséika silaong sininna iyaé ana' buwaku. Aja' taunoki! Duwa parawira iya laingngé silaong ana' buwana mennang maténi nanré api polé ri langié, iyakiya uwéllauwi, amaséika!” Iyatoro wettué nakkeda malaéka'na Puwangnge lao ri Elia, “Aja' mumétau! Accowéno nonno polé ri buluéwé.” Rimakkuwannanaro laoni Elia silaong parawiraéro ri arungngé. Nakkeda Elia ri arungngé, “Makkedai Puwangnge, ‘Musuroi tauwé méllau panunju ri Baal-Zébub déwatana kota Ekron samanna ri Israélié dé'gaga Allataala iya weddingngé ritanai. Rimakkuwannanaro dé' muwajjappa matu, matéko matu!’ ” Namaténa Ahazia pada-pada iya napowadaé Puwangnge naolai Elia. Nasaba Ahazia dé' nappunnai ana' worowané, Yoram silessurenna mancaji arung sulléiwi. Iyaro kajajiyangngi ri taung maduwaé apparéntanna Yéhoram ana'na Yosafat, arunna Yéhuda. Curita laingngé passalenna aga iya napogau'é Arung Ahazia riyokii ri laleng kitta Sejarana Arung-ngarunna Israélié. Narapini wettunna Puwangnge maélo makkai Elia ménré ri surugaé naolai anging talippurué. Iyaro wettué Elia sibawa Elisa joppani polé ri Gilgal, na ri tengnga laleng makkedai Elia lao ri Elisa, “Onrono kuwaé. Nasuroka Puwangnge lao ri Bétel.” Iyakiya mappébaliwi Elisa, “Nasabbing Puwang iya tuwoé sibawa nasabbing nyawana Bapa', dé' umaélo salaiwi Bapa'.” Jaji silaonni mennang patterui joppana lettu ri Bétel. Sikalompo nabi iya monroé kuwaro lao méwai sita Elisa sibawa makkutana, “Muwissegga makkedaé iyaé essoé maéloi puwammu salaiko nasaba riyakkai ri Puwangnge?” Nappébali Elisa, “Ya, uwisseng. Iyakiya sikuna, aja'na tabicarai gau'éro.” Nainappa makkedani Elia lao ri Elisa, “Onrono kuwaé, nasuroka Puwangnge lao ri Yérikho.” Iyakiya mappébaliwi Elisa, “Nasabbing Puwang iya tuwoé sibawa nasabbing nyawana Bapa', dé' umaélo salaiwi Bapa'.” Jaji sipadduwani mennang patterui joppana lettu ri Yérikho. Sikalompo nabi iya monroé kuwaro lao méwai sita Elisa sibawa makkutana, “Muwissegga makkedaé iyaé essoé riyakkai matu puwammu ri Allataala nanasalaiko?” Nappébali Elisa, “Ya, uwisseng. Iyakiya sikuna, aja'na tabicarai gau'éro.” Nainappa makkeda Elia lao ri Elisa, “Onrono kuwaé. Nasuroka Puwangnge lao ri Salo Yordan.” Iyakiya mappébaliwi Elisa, “Nasabbing Puwang iya tuwoé sibawa nasabbing nyawana Bapa', dé' umaélo salaiwi Bapa'.” Nanapatteruni mennang joppana lettu ri Salo Yordan, na 50 nabi maccowériwi mennang. Namappésauna Elia sibawa Elisa ri wiring saloéro, na iya limappulo nabiéro tettongngi dé' nasiyaga bélana polé kuwaro. Naludunni Elia jumbana, nainappa nalulung nanakkunrurengngi ri tompo'na uwai saloéro. Natabbagé duwana uwaina saloéro, angkanna naulléi aléna silaong Elisa joppa ri borina iya marakkoé. Lettu'nana ri liweng, makkedani Elia lao ri Elisa, “Ellauni aga iya muwacinnaiyé polé ri iyya ri wettu dé'napa nakkaka Puwangnge salaiko!” Nappébali Elisa, “Pammanarika akuwasanna Bapa', kuwammengngi weddikka mancaji passulléna Bapa'.” Nametté Elia, “Wah, mawatang senna iyaro. Iyakiya rékko muwitaka wettukku nakka Puwangnge, ritarimai matu paréllaummu. Rékko dé' muwitai, risampéyangngi matu paréllaummu.” Mabbicarani mennang sipadduwa, nanajoppato. Tennasenna-sennana séddi karéta makkéapi iya nagettengngé anyarang makkéapi polé passarangngi mennang sipadduwa nainappa riyakka Elia ménré ri surugaé ri anging talippurué. Naitani Elisa nainappa gora, “Elia, Ambo'ku! Ambo'ku! Pallinrunna Israélié iya baranié! Dé'ni gaga Bapa'!” Nanateddénna Elia polé ri pakkitanna Elisa. Namasarana Elisa sapé'i jumbana mancaji duwa, nainappa naitté jumbana Elia iya sempé'é. Purairo lisuni nanatettong ri wirinna Salo Yordan, nanakkunrurengngi jumbana Eliaro ri tompo'na uwaié sibawa makkeda, “Kégani Puwangnge, Allataalana Eliaro?” Puranana nakkunrureng iyaro jumbaé ri uwai saloéro, tabbagé duwani iyaro uwaié nanajoppa mallétto. Iya limappuloro nabié ri Yérikho mitai, namakkeda, “Létté'ni akuwasanna Elia lao ri Elisa!” Nalokkaini mennang nainappa suju' ri yolona sibawa makkeda, “Engkaki 50 tau, mawatang maneng. Rimakkuwannanaro, laono mai talao sappai Elia puwammu. Naullé Rohna Puwangnge tiwii ri bulué iyaré'ga ri lompo'é, nainappa nasalai kuwaro.” Nappébali Elisa, “Aja'na!” Iyakiya maddessa'i mennang matteru angkanna nasitujui. Nanalaona iya limappuloro nabié sappai Elia tellungngesso ittana, iyakiya dé' naruntu'i mennang. Nainappa mennang lisu ri Elisa iya mattajengngé ri Yérikho. Nakkeda Elisa lao ri mennang, “Dé'ga napura upowadai makkedaé aja'na mulao?” Siyagangngaré tau Yérikho lao ri Elisa sibawa makkeda, “Pa', pada-pada iya alénaé Bapa mitai, iyaé kotaé makessing, iyakiya uwaiéna dé' namakessing nanassabariwi makkunrai iya mattampu'é alaungeng.” Nakkeda Elisa, “Alakka mangko iya barué mupa, namutaroiwi pejjé ri lalenna.” Nanatiwini mennang ri aléna iya naéllauwéro. Nanalaona Elisa ri mata uwai nainappa naggenrungeng iyaro pejjé muttama ri laleng uwaié sibawa makkeda, “Iyanaé iya napowadaé Puwangnge: ‘Upaccingiwi iyaé uwaié kuwammengngi dé'na nassabariwi amaténgngé iyaré'ga alaungengngé!’ ” Sipongennaro mapaccinni iyaro uwaié situru sibawa ada-adanna Elisa. Purairo laoni Elisa polé ri Yérikho lao ri Bétel. Ri tengnga laleng sikalompo ana'-ana' massu polé ri kotaé sibawa méllé-kéllé'i. Gorai mennang, “Eh bota', laoko polé kuwaé!” Gilinni Elisa sibawa mitai mennang nainappa natanroi ri laleng asenna Puwangnge. Iyatoro wettué namassu polé ri ale'é duwa beruang sibawa sapé-sapé'i patappulo duwa ana' polé ri yelle'na ana'-ana'éro. Napatteruni Elisa joppana lao ri Bulu Karmél, nainappa lisu ri Samaria. Ri taung maseppuloé aruwa apparéntanna Yosafat arung Yéhuda, Yoram ana' Ahab mancaji arunna Israélié sibawa mapparéntai ri Samaria seppulo duwa taung ittana. Napogau'i iya majaé ri pakkitanna Puwangnge, iyakiya dé' napada-pada jana Ahab sibawa Izebél, tomatowanna. Dato-dato iya naébbué ambo'na untu' sompai Baal purani naruttung. Iyakiya, pada-pada Arung Yérobéam ana' Nébat iya mapparéntaé ri yolona, alénato nassabariwi namadosa tau Israélié sibawa dé' nappésau pogau'i gau'éro. Arung Mésa polé ri Moab mappunnaiwi appiyarang bimbala. Selaku simana lao ri arung Israélié, tungke' taung mabbéréi 100.000 ana' bimbala sibawa topa bulu-bulu bimbala polé ri 100.000 bimbala laié. Iyakiya maténana Arung Ahab, maronta'i Mésa lao ri Israélié. Rimakkuwannanaro masitta'ni Yoram salaiwi Samaria nalao passadiyai sininna tentarana. Nakirinni iyaé pasengngé lao ri Arung Yosafat polé ri Yéhuda, “Maronta'ni arung Moab lao ri iyya, maéloiga Saudara duwakka mammusu méwai?” Nappébali Arung Yosafat, “Makessinni. Iyya sibawa ana' buwaku enrengngé tentara makkinnyarakku maccowéi matu silaongengngi Saudara. Laleng kégana taola gasai matu?” Nappébali Yoram, “Laleng iya laloé ri padang kessi Edom.” Najoppana Arung Yoram silaong arung Yéhuda sibawa arung Edom. Mallalennana pitungngesso ittana, acappurenni uwai, angkanna pasukanna enrengngé olokolo pattéké baranna dé'na naénung. Nagorana Arung Yoram, “Cilakani! Purani narancana Puwangnge untu' mabbéréyakki sipattellu lao ri arung Moab!” Nakkutana Arung Yosafat, “Dé'ga gaga kuwaé nabi iya weddingngé makkutanangekki ri Puwangnge?” Sala séddinna parawirana Arung Yoram mappébali, “Engka Elisa ana' Safat! Pabbantunnai riyolo Elia.” Nakkéda Arung Yosafat, “Tongeng! Mémeng mabbicarai Puwangnge naolai aléna.” Nalaona iya tellu arungngéro ri Elisa. Nakkeda Elisa lao ri arunna Israélié, “Magi muwéllau tulung ri iyya? Lao bawanni ri nabi-nabinna tomatowammu!” Nametté Yoram, “Dé'! Saba' Puwangnge ritu rancanai untu' mabbéréyang telluki lao ri arung Moab!” Nappébali Elisa, “Nasabbing Puwang iya tuwoé, iya utumaningiyé, upowadai sitongenna makkedaé rékko tenniya nasaba Arung Yosafat iya upakalebbié, dé' umaélo mappunnai urusang sibawa iko. Tiwii mai makkekkuwangngé séddi pakkacapi!” Wettunna iyaro tauwé makkacapi, rikuwasaini Elisa ri Rohna Puwangnge, angkanna makkeda, “Iyanaé napowada Puwangnge; ‘Ebbuno sépe-sépe ri wadi. Namuni dé' muwita bosi teppa iyaré'ga anging mangiri, iyakiya pennoi matu uwai iyaé salo rakkoé. Iko silaong olokolo'é enrengngé olokolo pattéké barammu lolongengngi matu uwai iya genne'é untu' riyénung gangka cau.’ ” Nainappa makkeda Elisa patterui, “Iyakiya iyaro banna parakara baiccu lao ri Puwangnge. Maélo towi mpérékko apakalang lao risining tau Moab-é. Sininna kotana mennang iya mabbénténgngé sibawa iya makessingngé muruttungngi matu; sininna pong buwa-buwana mutubbangngi, sininna mata uwaina muléwui sibawa sininna dare'na mennang iya macommo'é mugenrungngi matu batu angkanna masolang siseng.” Bajana, wettunna makkasuwiyangeng akkarobangeng élé, massolo'ni uwaié polé ri Edom angkanna pennoiwi iyaro salo rakkoé. Wettunna naéngkalinga tau Moab-é makkedaé iya tellu arungngéro poléni maggasa, sininna tauwé – polé ri pommacowaé lettu ri pommaloloé – iya mulléngngi méssang senjata, ripangarani sibawa ritaro ri pakkaséséngngé. Bajana, wettunna mennang moto ri éléé, natappani mata esso tompo'na uwaié angkanna macella pada-pada daraé. Gorani mennang, “Dara! Pasti prajuri-prajuri polé ri iya tellu pasukanna balié pura mallaga sibawa sisullé siyuno! Laono mai talao rampo'i akkémanna mennang!” Iyakiya wettunna iyaro sining tau Moab-é lettu ri akkémangngéro, ripasoroni mennang ri tau Israélié iya matterué maju mallellung nanauno towi mennang sibawa ruttungngi kota-kotana. Tungke' dare iya macommo'é iya naolaé, nagenrungiwi batu. Naléwu towi sining tau Israélié sininna mata uwaié enrengngé natubbangngi sininna pong buwa-buwaé. Iya monroé banna kota Kir-Harését, ibukotana Moab. Paccappurenna iyaro kotaé rikeppung towi sibawa rigenrung batu risining pallobangngé. Namaingekinna makkedaé dé'na naulléi mattahanna, natiwini arung Moab pitu ratu prajuri iya maccaé paké peddang, nainappa makkuraga bettui attahangenna arung Edom, iyakiya dé' naulléi. Rimakkuwannanaro nalani ana' pattolana, nainappa nakkasuwiyangeng ri tompo'na témbo'na kotaé selaku akkarobangeng untu' déwata Moab. Namétauna sining tau Israélié, angkanna napasoro mennang pasukanna polé ri kotaéro nalisu ri wanuwanna. Riséuwaé esso jandana séddié nabi laowi ri Elisa sibawa makkeda, “Bapa', maténi lakkaikku! Nanaisseng Bapa' makkedaé séddi towi tau iya métaué ri Allataala, iyakiya makkinrengngi riséddié tau. Makkekkuwangngé iyaro tauwé poléni untu' malai iya duwa ana'ku nanapancajiwi ata, selaku pakkamaja inrenna lakkaikku iya matéénna.” Nakkutana Elisa, “Pékkugika wedding tulungngi Ibu? Aga nappunnai Ibu ri bolaé?” Nappébali iyaro makkunraié, “Dé' agaga uwappunnai, sangadinna minnya zaitun sibotolo baiccu.” Nakkeda Elisa, “Laono muwinreng botolo kosong maéga polé ri bali-bali bolana Ibu. Purairo sitinajai Ibu sibawa ana'-ana'na Ibu muttama ri lalempola sibawa sului tange'é. Tiri'i iyaro minnya sibotolo baiccu'é ri laleng botolo-botolo'éro, sibawa pallaingngi iya pennoénna.” Nalisuna iyaro makkunraié ri bolana. Muttama'nana silaong ana'-ana'na sibawa sului tange'na bolaé, nalani botolo baiccu iya mallise'é minnya zaitunro, nainappa natiri iyaro minnya'é ri laleng botolo-botolo iya riwéréngngéngngi ri ana'-ana'na. Penno manennana iyaro sining botolo'é, méllaupi séddi botolo. Nappébali séddi polé ri ana'-ana'na, “Cappuni.” Nadé'na nassolo'na iyaro minnya'é. Nainappa iyaro Indo'é laosi paimeng ri Nabi Elisa, nanakkeda Elisa, “Balu'i iyaro minnya'é untu' mpajai sininna inrenna Ibu, na lebbinna cuku' untu' matuwoiwi Ibu silaong ana'-ana'na Ibu.” Ri Sunem monroi séddi makkunrai sugi. Riséuwaé esso wettunna Elisa lao ri Sunem, iyaro makkunraié naobbii manré. Sipongennaro sises-siseng Elisa léppang ri Sunem manréi ri bolana makkunraiéro. Nainappa makkedani iyaro makkunraié ri lakkainna, “Mateppe'ka Bapa' iya biyasaé léppang kuwaé tonget-tongengngi iyaro séddiwi atanna Allataala. Makessingengngi mébbuki séddi bili' iya baiccu'é ri langga yasé'na bolata, sibawa passakke'i sibawa onrong atinrong, méjang, kadéra, sibawa lampu kuwammengngi weddingngi mappéruma kuwaro sises-siseng nalokkaiki.” Riséuwaé esso laosi paimeng Elisa ri Sunem. Ménré'nana ri bili'na untu' mappésau, nasuroni Géhazi, pattumaninna, lao mobbii iyaro makkunraié. Engkanana polé iyaro makkunraié, makkedani Elisa lao ri Géhazi, “Tanaiwi pékkugika wedding mpale'i résona untu' idi. Ajakké macinnai laoka ri arungngé iyaré'ga ri pallima tentaraé sibawa mabbicara untu' apentingenna.” Nappébali iyaro makkunraié, “Monroka ri yelle'na sumpuloloku sibawa dé'gaga akurangekku.” Namakkutanana Elisa lao ri Géhazi, “Rékko makkuwaitu, agana wedding upogau' untu' aléna?” Nappébali Géhazi, “Dé' nappunnai ana', Pa', na lakkainna macowani.” Nakkeda Elisa, “Obbii iyaro makkunraié.” Poléni iyaro makkunraié sibawa tettong ri sumpangngé. Namakkeda Elisa lao ri aléna, “Taung mangoloé, ri wettu pada-padaéwé, mépa'ni Ibu séddi ana'lolo worowané.” Nakkeda iyaro makkunraié, “Pa' aja' tabbellé! Uwaseng atannaki Allataala!” Iyakiya tongenni aga iya napowadaé Elisa. Taung pémennana, kira-kira ri wettu iya padaé iyaro makkunraié jajiyanni séddi ana' worowané. Battowanana iyaro ana'é, riséuwaé esso ri wettu éngngalangngé, iyaro ana'é laowi ri ambo'na iya engkaé ri dare'é silaong sining paréngngalaé. Tennasenna-sennana iyaro ana'é gora lao ri ambo'na, “Aduh! Mapeddi ulukku!” Nakkedana ambo'na lao riséddié pattumani, “Tiwii iyaé ana'é lao ri indo'na.” Ritiwini iyaro ana'é ri indo'na, nainappa indo'na riwai. Ri arawénnana maténi iyaro ana'é. Ritiwini ri indo'na ménré ri yasé, ri bili'na Elisa, sibawa paléwui ri onrong atinrongngé. Purairo massuni sibawa sului tange'é, nainappa lao mobbii lakkainna. Makkedai, “Suroi séddi pattumani lao mai silaong sikaju kaleddé. Harusu'ka mapperi-peri lao ri Nabi Elisa, sibawa maéloka lisu masitta.” Nakkutana lakkainna, “Magi naharusu lao makkekkuwangngé. Iyaé essoé tenniya esso Saba' sibawa tenniya esso maraja Uleng Baru.” Nappébali, “Dé' namaga.” Purana napasang lapi-lapi'é ri kaleddé'éro, makkedani lao ri pattumaninna, “Palariwi iyaé kaleddé'é kuwammengngi nalari siggatti-gattina; aja' mukurangiwi gattina rékko dé' uwassurowangngi.” Nanajoppana iyaro makkunraié lao ri Bulu Karmél ri onronna Elisa. Mabéla mupi naitani Elisa iyaro makkunraié polé. Makkedani Elisa lao ri Géhazi, “Itai. Ibu polé ri Sunemro engkai polé! Asitta'ko lao méwai sita sibawa tanaiwi pékkugi keadaanna sikaluwarga.” Nakkeda iyaro makkunraié lao ri Géhazi, “Makessing maneng muwa.” Iyakiya wettunna lettu ri yolona Elisa, suju'ni sibawa kaddaowi ajéna Elisa. Maéloni Géhazi paddésu'i polé kuwaro, iyakiya makkedai Elisa, “Leppessangngi siya! Samanna masara senna'i. Iyakiya dé' aga-aga napowadakka Puwangnge!” Nakkeda iyaro makkunraié, “Pa', dé' uwéllau ana' ri Bapa'. Pura upowada towi lao ri Bapa' kuwammengngi aja' tawérékka amménasang kosong.” Nagiling Elisa lao ri Géhazi nanakkeda, “Asitta'ko! Alai tekkekku namumatteru lao ri bolana Ibuéwé. Aja' muwappésau untu' mabbéré selleng lao ri muwi niga iya muéwaé siruntu ri lalengngé. Rékko nawéré sellengiko tauwé, aja' muwabbéyang wettu untu' baliwi sellenna. Lettu'mu muwa, taroi tekkekku ri tubunna iyaro ana'é.” Nakkeda iyaro makkunraié, “Bapa' Elisa! Nasabbing Puwang iya tuwoé sibawa nasabbing nyawana Bapa', dé' umaélo salaiwi Bapa'!” Rimakkuwannanaro joppani Elisa silaong iyaro makkunraié lao ri bolana. Pura ripoddiyoloini mennang ri Géhazi untu' taroi tekkenna Elisa ri tubunna iyaro ana'é, iyakiya dé'gaga oni iyaré'ga tanra-tanrang laing makkedaé iyaro ana'é tuwoi. Nalaona Géhazi méwai sita Elisa sibawa makkeda, “Iyaro ana'é dé' naoto.” Lettu'nana ri bolana makkunraiéro, muttama'ni Elisa alé-aléna ri laleng bili'na sibawa naitani ujuna iyaro ana'é léwu ri onrong atinrongngé. Nasuluni Elisa tange'é nainappa massempajang lao ri Puwangnge. Purairo naoppangini iyaro ana'é sibawa parape'i témunna, matanna sibawa limanna ri témunna, matanna sibawa limanna iyaro ana'é. Nasaba napogau'i makkuwaéro, namapellana tubunna iyaro ana'é. Tokkonni Elisa sibawa joppa mattulili ri laleng bili'éro, nainappa naoppangisi tubunna ana'éro. Angkanna tarassi iyaro ana'é wékkapitu, sibawa timpa'i matanna. Risuroni Géhazi ri Elisa mobbii indo'na iyaro ana'é, namuttama'nana iyaro indo'é, makkedani Elisa lao ri aléna, “Engkaniyé ana'na Ibu.” Suju'ni iyaro indo'é ri yolona Elisa nainappa natiwi ana'na massu. Engka séuwa wettu nakajajiyang abala akkadérengngé ri sininna wanuwaé. Nalisuna Elisa ri Gilgal. Wettunna napagguru sikalompo nabi, nasuroni pattumaninna mala oring iya battowaé nanasungengngi mennang inanré. Sala séddinna polé ri nabi-nabiéro massu lao ri dare'é untu' sappa ukkaju, nanaruntu'na sirupa tanet-taneng lawo liya. Nacéppuni buwana iyaro tanet-tanengngé maéga senna, nanatiwii lisu. Dé' naissengngi buwa aga iyaro, nalétta-létta'ni nanaputtama'i ri laleng oringngéro. Manasunnana, nabagé-bagéni lao ri nabi-nabiéro. Iyakiya nappai natémpu iyaro inanré, gorani mennang lao ri Elisa, “Pa', iyaé racung!” Dé' namaélo mennang manréi. Nanassurowanna Elisa mala céddé labbu, nanaggugurengngi ri laleng oringngéro. Purairo makkedani, “Abbagéyanni paimeng iyaro inanré.” Annessana iyaro inanré dé'na nabbahayana. Riséuwaé wettu iya laingngé, engka séddi worowané polé ri Baal-Salisa. Natiwirengngi Elisa gandong iya nappa riyéngngalaé sibawato duwappulo roti iya riyébbué polé ri gandong wassélé éngngalang mammulangngé ri taungngéro. Nasuroni Elisa pattumaninna bagé-bagéi iyaro rotié lao ri nabi-nabiéro, iyakiya makkedai iyaro pattumanié, “Dé' nakkullé genne untu' sératu tau!” Nappébali Elisa, “Bagéngeng bawanni kuwammengngi nanréi mennang, saba' makkedai Puwangnge makkedaé manréi matu mennang napuranana nanré engka mupa sésana.” Iyaro pattumanié nabbagéyanni iyaro inanré lao ri mennang, nanré manenna. Puranana manré engka mupa sésana pada-pada iya napowadaé Puwangnge. Naaman iyanaritu pallima tentarana Siria iya ripoji senna'é sibawa riyangke ri arung Siria. Saba' naolai Naaman, mabbéréi Puwangnge apakalang lao ri tentara Siriaé. Naaman iyanaritu séddiwi pallima iya poré, iyakiya malasa olii iya mappakatau-taué. Riséuwaé wettu tau Siriaé gasai wanuwa Israélié. Ri laleng aggasarengngéro séddi ana' makkunrai Israél ritikkeng sibawa ritiwi selaku tawangeng, nainappa mancaji pattumaninna bainéna Naaman. Riséuwaé esso makkedani iyaro pattumanié lao ri ponggawana, “Nyonya, akkalarapanna laowi puwang méwai sita nabi iya monroé ri Samaria, pastini iyaro nabié napajjappai matu puwang.” Wettunna naéngkalinga Naaman gau'éro, laoni ri arungngé sibawa curitai aga iya napowadaé iyaro ana' makkunraié. Makkedani arungngé, “Makessinni, laono ri arunna Israélié. Maéloka moki sure' lao ri aléna.” Nanajoppana Naaman sibawa tiwi 30.000 dowi péra', 6.000 dowi ulaweng, sibawa 10 pasang pakéyang iya makessingngé. Sure' iya natiwiéro oninna makkuwaiyé: “Naolai iyaé sure'é uwappaddissengengngi parawiraku, Naaman, lao ri Puwang kuwammengngi Puwang pajjappai polé ri lasana.” Wettunna nabaca arung Israélié iyaro sure'é, nasapé-sapé'ni pakéyanna nasaba manennengngi, nanakkedato, “Cilakani, aga saba'na iyaro arung Siriaé naéllauka pajjappai iyaé tauwé? Tenniyaka Allataala iya mappunnaiyé akuwasang untu' patuwoi iyaré'ga pamatéi tauwé! Pasti iyaro arung Siriaé banna sappai bawang écco sibawa iyya!” Naéngkalingani Nabi Elisa passalenna gau'éro, nanakiringngi pasengngéwé lao ri arung Israél, “Magi mumanenneng? Suroi iyaro tauwé lao ri iyya kuwammengngi naissengngi makkedaé ri Israéliéwé engka séddi nabi!” Rimakkuwannanaro joppani Naaman sibawa karéta anyaranna lao ri bolana Elisa, sibawa léppang ri yolona sumpangngé. Suroni Elisa séddi pattumani untu' makkeda makkuwaé lao ri Naaman, “Laoki Puwang cemmé wékkapitu ri Salo Yordan, namajjappa siseng matti Puwang.” Naéngkalinganaro, macaini Naaman sibawa makkeda, “Uwasengngi aléna matu massu méwaka sita, namassempajang lao ri Puwangnge, Allataalana, enrengngé pakédoi limanna ri yasé'na watakkaléku iya malasaéwé naumajjappa. Salo Abana sibawa Parpar ri Damsyik lebbi makessingngi naiya muwi salo niga ri Israél! Weddikka cemmé kuwaro sibawa majjappa!” Iyakiya sining pattumaninna maddeppériwi sibawa makkeda, “Puwang, akkalarapanna risuroi Puwang pogau'i séuwaé iya mawatangngé, pasti maéloi Puwang pogau'i. Apalagi banna nasuroi Puwang cemmé kuwammengngi najjappa!” Rimakkuwannanaro laoni Naaman ri Salo Yordan, nanauttama sibawa patallemme'i aléna ri laleng saloéro wékkapitu pada-pada iya nassurowangngé Elisa. Nanajjappana Naaman. Madisinni watakkaléna paimeng pada-pada watakkaléna kalloloé. Nainappa aléna silaong sininna pattinrona lisu lao ri Elisa. Nakkeda Naaman lao ri Elisa, “Uwissenni makkekkuwangngé, makkédaé risininna linoé banna engka séddi Allataala, iyanaritu Allataala iya nasompaé tau Israélié. Rimakkuwannanaro, tatarimani Puwang pabbérékué.” Nappébali Elisa, “Nasabbing Puwang iya tuwoé, iya utumaningiyé, dé' umaélo tarimai muwi pabbéré aga.” Maddessa'i Naaman kuwammengngi namaélo Elisa tarimai pabbéréna, iyakiya tette'i Elisa massampéyang. Namakkeda Naaman, “Rékko dé'to namaélo Puwang tarimai pabbéréku, palalona tiwii lisu tana singngéga iya naullé tiwi sipasang bagal. Saba', mappammulai makkekkuwangngé maéloka makkasuwiyangeng akkarobangeng banna untu' Puwangnge, natenniya untu' déwata laingngé. Narékko matti harusu'ka ranrengngi arukku lao massempajang ri bolana Rimon déwatana Siria, tennapodo Puwangnge maddampengekka.” Nakkeda Elisa, “Laono sibawa salama.” Nanalaona Naaman. Dé' namaitta labe'na Naaman, Géhazi pattumaninna Elisa, mappikkiri'i, “Magi naleppessangngi lao temmakkamaja? Mestinna natarimai puwakku pabbéréna tau Siriaéro! Nasabbing Puwang iya tuwoé, harusu'ka lellungngi sibawa lolongeng séuwa polé ri aléna!” Nanalellunni Géhazi Naaman. Wettunna naita Naaman engka tau polé, nonnoni polé ri karétana sibawa makkutana, “Engka aga?” Nappébali Géhazi, “Taddampengekka Puwang, risuroka powadangngi Puwang makkedaé silalona engka polé duwa nabi kallolo polé ri buluna Efraim. Méllauwi Puwakku kuwammengngi Puwang mpéréngngi 3.000 dowi péra' sibawa duwappasang pakéyang iya makessingngé untu' iya duwa nabiéro.” Nakkeda Naaman, “Tentuni!” sibawa nadessa'na Géhazi kuwammengngi natiwi 6.000 dowi péra'. Nadokoni Naaman iyaro dowié ri laleng duwa sépu, sibawa mala duwappasang pakéyang iya makessingngé. Iya manennaro nawéréngngi lao ri duwa pattumaninna, iya joppaé poddiyoloiwi Géhazi. Lettu'nana ri bulu-bulu onrong naonroiyé Elisa, nalani Géhazi dowié sibawa pakéyangngéro polé ri pattumani-pattumaninna Naaman, nainappa nataro ri lalempolaé. Nasuroni lisu iyaro pattumani-pattumanié, nainappa muttama paimeng ri lalempola. Makkutanani Elisa, “Polé kégako?” Nappébali, “Dé' ukalao-lao Puwang!” Iyakiya makkedai Elisa, “Engkai atikku kuwaro wettunna Naaman nonno polé ri karétana untu' méwako sita. Tenniya wettunna iyaé untu' lolongeng dowi sibawa melli palla zaitun, palla anggoro, bimbala sibawa saping enrengngé ata-ata! Nasaba mutarimai iyaro pabbéré, mutarima towi matu lasana Naaman. Mala untu' mannennungeng muwi wija-wijammu lolongeng towi matu iyaro lasaé!” Wettunna massu Géhazi polé kuwaro, lolongenni lasa oli – mancaji maputé senna'ni olina. Riséuwaé esso nabi-nabi iya napaggurué Elisa, maddarékéi ri aléna. Makkedai mennang, “Macipi senna onrotta! Palaloni lao mattubbang aju ri seddéna Salo Yordan, sibawa patettong onrong riyonroi kuwaro.” Nappébali Elisa, “Makessinni.” Sala séddinna polé ri yelle'na mennang maddessa kuwammengngi Elisa naccowé silaong mennang. Nasitujuini Elisa, nanajoppana massibawa. Lettu'nana ri wirinna Salo Yordan, mappammulani mennang mattubbang aju. Tennasenna-sennana séddi tau polé ri yelle'na mennang sempé mata waséna ri laleng uwaié. Nagorana lao ri Elisa, “Aduh Pa'! Wasé riinreng iyaro!” Nakkutana Elisa, “Kégi sempé?” Najjellokenni iyaro tauwé onronna, nainappa rette Elisa silétta aju nanaggenrungengngi lao ri onrongngéro. Naompona iyaro mata wasé ri tompo'na uwaié. Nakkeda Elisa, “Alani!” Naloro'ni limanna iyaro tauwé nanalai iyaro wasé. Riséuwaé wettu mammusui Siria sibawa Israél. Puranana barunding silaong sining parawirana, napattentuni arung Siria kégi mennang harusu makkéma. Iyakiya kiringngi Elisa karéba lao ri arung Israélié untu' paréngngerangiwi kuwammengngi aja' nalao ri onrongngéro, nasaba abiyasanna sining tau Siriaé laloi kuwaro. Jaji naparéngngerangini arung Israélié sining taunna iya monroé ri macawé'é kuwaro kuwammengngi nasadiya-sadiya. Makkuwaniro Elisa paréngngerangiwi arungngé makkolik-koling. Iyaro gaué napakérék-kéréngngi arung Siria, angkanna naobbi sining parawirana sibawa makkutana, “Pasti ri yelle'ta engka bali'bella. Niga taunna? Ayo appaissengengngi!” Séddi polé risining parawiraéro mappébali, “Dé' gaga muwi séddi tau, Datu. Nabi Elisa ritu nassabari! Aléna ritu palettu'i ri arung Israél aga iya napowadaé Datu, namuni iyaro ripowadai ri bili' atinrongngé.” Napparénta arungngé, “Salidikiwi kégi monro, kuwammengngi weddikka tikkengngi.” Ripaissengini ri tauwé makkedaé engkai Elisa ri Dotan. Nanakirinna arung Siria lao kuwaro séuwa pasukang iya battowaé nasibawang anyarang sibawa karéta musu. Lettu'ni mennang ri kotaéro ri wennié nanakeppungngi. Pappa bajana, maélé senna'ni wettunna pattumaninna Elisa moto sibawa massu, naitani tentara Siriaé keppungngi kotaéro sukku sibawa anyarang nenniya karéta musuna mennang. Jaji, lisuni lao ri Elisa sibawa makkeda, “Cilakaki, Puwang! Aga harusu tapogau'?” Nappébali Elisa, “Aja' mumétau. Iya engkaé ri idi lebbi maégai naiya engkaé ri mennang.” Namassempajanna Elisa, “ Puwang tennapodo Mutimpa'i matanna pattumanikku kuwammengngi naitai!” Natarimani Puwangnge sempajanna Elisa angkanna wettunna makkita iyaro pattumaninna, naitani iyaro bulué penno sibawa anyarang nenniya karéta makkéapi mattulilingiwi Elisa. Wettunna iyaro sining tau Siriaé maggasa, massempajanni Elisa, “ Puwang, tennapodo pabutai iyaé sining tauwé!” Natarimani Puwangnge sempajanna Elisa, namancaji buta manenna mennang. Rilokkaini mennang ri Elisa sibawa makkeda, “Pusako. Tenniya iyaé kota iya musappaé. Laono mai maccowérika, uwantara'po matti lao ri tau iya musappaé.” Nanaantara'ni Elisa lao ri Samaria. Wettunna mennang nauttamaki kotaéro, massempajanni Elisa, “ Puwang, tennapodo timpa'i matanna mennang kuwammengngi nakkita mennang.” Natarimani Puwangnge sempajanna Elisa; natimpa'ni matanna sining tauwéro angkanna hérang mitai makkedaé engkai mennang ri kota Samaria. Wettunna naita arung Israélié sining tau Siriaéro, makkutanani, “Elisa, harusu'ka'ga mpunoi sining tauwéwé?” Nappébali Elisa, “Aja'. Sedangkang tentara iya natikkengngé Datu ri laleng ammusurengngé dé' naunoi Datu, apalagi iyaé. Panréi sibawa painungngi mennang, nainappa muleppessang lisu ri arunna.” Napakangkana arung Israélié pésta battowa untu' mennang. Puranana mennang manré sibawa ménung, nasuroni mennang lisu ri arung Siria. Sipongennaro mappésauni sining tau Siriaé gasai wanuwa Israélié. Siyagangngaré wettu ri munrinna Bénhadad arung Siria tiwii sininna tentarana untu' gasai Israélié. Nakeppungngi mennang kota Samaria, sibawa nassabariwi akkadéreng iya maseroé ri laleng kota, angkanna séddi ulu kaleddé ellinna aruwa pulona dowi péra', sibawa duwa ong tai jangang-jangang lima dowi péra'. Riséuwaé wettu, wettunna arungngé joppa ri tompo'na témbo' kotaé, séddi makkunrai gora, “Datu, tulungngi!” Nappébali arungngé, “Rékko Puwangnge dé' natulukko, pékkugi makkullé weddikka mattulung? Dé' uwappunnai gandong iyaré'ga uwai anggoro! Aga asukkarakemmu?” Nappébali iyaro makkunraié, “Iyaé sellaoku puraka naéra kuwammengngi riyanréi ana'ku riyolo, nainappa bajana riyanréi ana'na. Rimakkuwannanaro rinasuni ana'ku nariyanré. Pappaobajana wettukku méllauwi kuwammengngi rinasui ana'na, nasubbui!” Naéngkalinganaro, nakapé'ni pakéyanna arungngé nasaba messéi. Sining tau iya tettongngé ri seddéna témbo'éro naullé mitai makkedaé waju lalenna iyanaritu kaing karung. Gorani arungngé, “Iyato essoéwé harusu'i maté Elisa. Leppessanni Allataala hukkukka sittane-tane'na rékko dé' uwunoi Elisa!” Nainappa arungngé suroi séddié tau poddiyoloiwi lao ri bolana Elisa. Iyaro wettué engkai Elisa ri bolaé, sibawa siyagangngaré tomariyolona masaraka'é massurolellang kuwaro. Ri wettu dé'napa nalettu iyaro surona arungngé, makkedai Elisa lao ri tomariyolona masaraka'éro, “Pénessaiwi! Iyaro pabbunoé suroi tau untu' mpunoka. Rékko lettu'i matti iyaro tauwé, sului tange'é sibawa aja' muleppessangngi muttama. Ri munrinna poléi matu aléna arungngé.” Dé'pa napaja Elisa mabbicara, lettu'ni arungngé kuwaro sibawa makkeda, “Iyaé asussangngé, Puwangnge patakkennai lao ri idi! Jaji agapi akkégunana uwaddennuwangi pattulun-Na?” Nappébali Elisa, “Engkalingai aga napowada Puwangnge! Baja, kira-kira wettu pada-padaéwé, nasibawang séddi dowi péra' bawang naulléi tauwé melli tellu kilo gandong iya kaminang makessingngé iyaré'ga enneng kilo gandong iya laingngé.” Nappébali ajudang paribadinna arungngé, “Pékkugi wedding! Mustahélé iyaé, namuni iyaro wettué napateppai Puwangnge bosi raja polé ri langié!” Nappébali Elisa, “Muwitai matti iyaro gaué kajajiyang, iyakiya dé' mupéneddingiwi iyaro inanré muwi céddé.” Iyaro essoé eppa tau malasa oli iya mappakatau-taué engkai ri saliwenna pintu gerbanna Samaria. Makkedai séddié lao ri laingngé, “Aga akkégunanna tudat-tudakki kuwaé tajengngi amatétta? Rékko muttama'ki ri kotaé, matéki matu alupureng, sibawa rékko monroki bawang kuwaé, maté tokki matu. Madécéngengngi laoki ri akkémanna tau Siriaé. Paling-paling naunoki mennang. Iyakiya makkulléto dé' naunoki.” Mammulanana makalemmeng laoni mennang ri akkémanna tau Siriaé, iyakiya dé' naitai mennang muwi séddi tau kuwaro. Saba' Puwangnge pura mébbui tau Siriaé méngkalingai oni pada-padaé paggasana séuwaé pasukang battowa iya makkinnyarangngé sibawa makkaréta. Iyaro sining tau Siriaé nasengngi arung Israélié purani naséwa arung Hét sibawa Maséré silaong tentarana untu' gasai mennang. Rimakkuwannanaro iyatoro wennié nalari passalama'i aléna, sibawa salaiwi kémana, anyaranna, enrengngé kaleddé'na mennang makkuwaro bawang ri akkémangngé. Iya eppa tau malasa oliéro lettu'ni ri wirinna akkémangngéro, sibawa muttamakiwi séddi kéma. Manré ménunni kuwaro sibawa mala ulaweng, péra', enrengngé pakéyang-pakéyang nainappa lao subbui. Purairo lisuni paimeng nanauttamakiwi kéma iya laingngé, nainappa napogau' gau' iya padaé. Makkedani séddié lao ri laingngé, “Iyaé pangkauketta dé' namakessing. Iyaé karébaé karéba makessing sibawa harusu'i riyappaissengeng! Rékko ritajengngi narapi baja, pasti rihukkukki. Madécéngengngi talaporo'i iyaé ri saorajaé.” Rimakkuwannanaro lisuni mennang ri Samaria sibawa gora lao ri pengawalna gerbang kotaé, “Poléni' ri akkémanna tau Siriaé, na annessana dé' gaga tau kuwaro. Anyaranna sibawa kaleddé'na mennang ripoléiwi tassiyo mupi ri onronna, sibawa kéma-kémana nasalai bawammi makkuwaro.” Nagoranni sining pengawal-é iyaro karébaé, angkanna napalettu tauwé ri saorajaé. Iyaro wettué wenni mupi, iyakiya massu muwi arungngé polé ri bili' atinronna sibawa makkeda lao risining pegawénna, “Engkalingai! Uwisseng rancanana sining tau Siriaéro! Naisseng mennang makkedaé alupurekki, rimakkuwannanaro nasalaiwi mennang akkémanna nanalao massubbu ri padangngé untu' palaiki siyo-siyo massu sappa inanré. Purairo naluruiki matu sibawa tudangiwi kotaé.” Engka séddi pegawénna arungngé makkeda, “Datu, idi iya engkaé mupa ri laleng kotaéwé totota pada muwi sibawa mennang iya matéénna. Rimakkuwannanaro madécéngengngi suroki siyagangngaré tau tonangi limakkaju anyarang polé ri yelle'na sining anyarang iya engkaé mupa, nanalao kuwaro untu' mitai aga pura kajajiyang.” Nanapiléna mennang siyagangngaré tau, nainappa arungngé suroi sining tauwéro tonangi duwa karéta musu nanalao salidikiwi aga iya puraé kajajiyang ri tentara Siriaé. Laoni mennang lettu ri Salo Yordan. Puppu laleng naitani mennang pakéyangngé sibawa paréwa-paréwaé tattale-tale. Iya manennaro naggenrungeng bawammi tau Siriaé wettunna mennang lari. Iyaro sining suroé lisuni sibawa laporo'i ri arungngé. Nalarina massu polé ri kotaé pabbanuwana Samaria nanarappai akkémanna tau Siriaé. Situru sibawa aga iya napowadaé Puwangnge, kajajiyanni makkedaé tellu kilo gandong iya kaminang makessingngé iyaré'ga enneng kilo gandong iya laingngé, ellinna banna séddi dowi péra'. Nasitujuwangngi iyaro wettué ajudang paribadinna arungngé monrowangngi pintu gerbanna kotaé. Maténi kuwaro naléjja-léjja ra'ya'é. Kajajiyangngi iyaro gau'é situru iya napowadaé Elisa lao ri arungngé wettunna arungngé lao ri aléna. Purani napowada Elisa makkedaé kira-kira pada-pada wettuéro baja essona, tellu kilo gandong iya kaminang makessingngé iyaré'ga enneng kilo gandong iya laingngé ribalu'i matu ri Samaria sibawa séddi dowi péra' ellinna. Na iyatoro wettué ajudang paribadinna arungngéro pura makkeda, “Pékkugi wedding! Mustahélé iyaro, namuni iyato wettué napateppa bosi raja Puwangnge polé ri langié!” Naribali ri Elisa, “Muwitai matti iyaro gau'éro kajajiyang, iyakiya dé' matu mupéneddingiwi iyaro inanré muwi céddé.” Makkuwaniro kajajiyang ri tauwéro – matéi riléjja-léjja ri ra'ya'é ri pintu gerbangngé. Riséuwaé wettu papoléni Puwangnge abala akkadéreng ri wanuwa Israél pituttaung ittana. Ri yolonaro pura mémenni nappaissengeng Elisa iyaro gau'é lao ri makkunrai polé ri Sunem iya puraé napatuwo paimeng ana'na. Nasuro towi Elisa létté ri wanuwa laingngé silaong kaluwargana. Napogau'ni iyaro makkunraié aga napowada Elisa, nanalao ri wanuwa Filistin untu' monro kuwaro. Labe'nana wettu pituttaungngéro lisuni ri Israél. Nainappa lao sibawa ana'na ri arungngé untu' méllauwi kuwammengngi bola sibawa dare'na ripalisui ri aléna. Iyaro wettué Géhazi pattumaninna Elisa purani riyéllau ri arungngé untu' curitai passalenna sining anu makalallaing iya napogau'é Elisa. Nasitujuwangngi wettunna iyaro makkunrai polé ri Sunem mangoloi ri arungngé untu' palettu'i paréllaunna, nacuritani Géhazi passalenna pékkugi Elisa patuwoi paimeng séddi ana' iya matéénna. Nakkeda Géhazi, “Petta Iya Malebbié, iyanaé makkunraiéro, sibawa iyanaé ana'na iya napatuwoé paimeng Elisa!” Nainappa makkutana arungngé na iyaro makkunraié nacuritani passalenna ana'éro. Purairo naobbini arungngé pegawénna sibawa paréntangngi kuwammengngi sininna appunnangenna iyaro makkunraié ripalisui ri aléna, muttama'ni ellinna sininna wassélé dare'na wettunna monro ri saliwempanuwa pituttaung ittana. Riséuwaé wettu laowi Elisa ri Damsyik. Nasitujuwangngi malasai Arung Bénhadad. Wettunna naéngkalinga arungngé makkedaé engkai Elisa ri Damsyik, makkedani lao ri Hazaél, séddiwi pegawénna, “Tiwino hadiya lao ri nabiéro, sibawa éllauni kuwammengngi nakkutanangngi lao ri Puwangnge aga majjappamuwaga matu iyaré'ga dé'.” Malani Hazaél 40 unta sibawa pattékériwi sibawa sininna rupanna wassélé'na kota Damsyik, nainappa lao ri Elisa. Wettunna lettu ri onronna Elisa, makkedani Hazaél, “Atammu Arung Bénhadad, suroka untu' makkutanangngi majjappamuwiga matu iyaré'ga dé'.” Nappébali Elisa, “Makkedai Puwangnge lao ri iyya makkedaé matéi matu. Iyakiya powadang bawanni makkedaé majjappai matu.” Nainappa Elisa mitai Hazaél sibawa pakkita iya mattette'é angkanna mancaji mausé Hazaél. Tennasenna-senna Elisa teri. Nakkutana Hazaél, “Magi Puwang nateri?” Nakkeda Elisa, “Nasaba uwisseng ja iya maéloé mupogau' matu lao ri tau Israélié. Mutunui matu sining kotana iya mabbénténgngé, mpunoi sining kallolona iya kaminang makessingngé, sibawa manrekké'i ana'-ana'loloé enrengngé puwé'i babuwana sining makkunrai iya mattampu'é.” Nappébali Hazaél, “Iyya'é tau dé'gaga bettuwanna, pékkugi makkullé mappunnaika akuwasang masero makkuwaéro!” Nappébali Elisa, “ Puwangnge pura jellokekka makkedaé mancaji arunnako matu Siria.” Wettunna Hazaél lisu ri saorajaé, makkutanani Bénhadad, “Aga adanna Elisa?” Nappébali Hazaél, “Makkedai makkedaé pasti majjappai matu Datu.” Iyakiya pappa bajanana malani Hazaél silampa parampa, nanatellengengngi ri laleng uwaié nainappa natenrekeng rupanna arungngé angkanna maté. Namancajina Hazaél arunna Siria sulléiwi Bénhadad. Yéhoram ana' Yosafat mancaji arunnai Yéhuda wettunna Arung Yoram ana' Ahab limattaung naparénta Israélié. Iyaro wettué umuru'na Yéhoram telluppulo duwa taung, namapparéntai ri Yérusalém aruwa taung ittana. Kawingngi sibawa ana'na Ahab, na pada-pada iya napogau'é kaluwargana Ahab, madosa towi lao ri Puwangnge pada-pada sining arung-ngarung Israélié. Iyakiya dé' namaélo Puwangnge pabbinasai Yéhuda nasaba purai majjanci lao ri Daud atan-Na, makkedaé tette'i matu wija-wijanna mancaji arung. Ri laleng apparéntanna Yéhoram, maronta'i Edom lao ri Yéhuda sibawa patettongngi akkarungeng ri alé. Rimakkuwannanaro, massuni Yéhoram sibawa sininna karéta musuna mattuju ri Zair. Kuwaniro rikeppung ri pasukanna Edom, iyakiya wenninnana aléna sibawa sining pallima pasukang makkarétaé bettui akkeppungenna balié, nanalarina sining prajuri'na mennang lisu ri bolana tungke'-tungke'. Sipongennaro dé'na natunru'na Edom lao ri Yéhuda. Iyatonaro wettué namaronta kota Libna. Curita laingngé passalenna Yéhoram riyokii ri laleng kitta Sejarana Arung-ngarunna Yéhuda. Matéi sibawa rikuburu ri akkuburukeng arung-ngarungngé ri Kota Daud. Ahazia ana'na mancaji arung sulléiwi. Ahazia ana' Yéhoram mancaji arunnai Yéhuda wettunna Arung Yoram ana' Ahab seppuloni duwa taunna paréntai Israélié. Iyaro wettué umuru'na Ahazia duwappulo duwa taung, namapparéntai ri Yérusalém sitaung ittana. Asenna indo'na Atalya, ana'na Arung Ahab sibawa eppona Omri arunna Israélié. Nasaba akawingenna, mappunnaiwi Ahazia assisumpungeng kaluwarga sibawa kaluwargana Arung Ahab. Madosai Ahazia lao ri Puwangnge pada-pada iya napogau'é kaluwargana Ahab. Maccowéi Arung Ahazia mammusu silaong Yoram arung Israél méwai Hazaél arung Siria. Mammusui mennang ri Ramot, ri daéra Giléad. Maloi Yoram ri laleng musuéro, nainappa lisu ri kota Yizreel untu' riyurai, nanalao Ahazia mitai kuwaro. Iyaro wettué naobbini Nabi Elisa sala séddinna polé ri yelle'na sining nabi iya napaggurué sibawa makkeda, “Sadiya-sadiyano untu' lao ri Ramot ri Giléad, sibawa tiwii iyaé botolo mallise'é minnya zaitun. Lettu'mu kuwaro sappai Yéhu ana' Yosafat sibawa eppona Nimsi. Erai alé-aléna lao riséddié bili', namutiri'i iyaé minnya'é ri tompo ulunna, nainappa makkeda, ‘Makkedai Puwangnge makkedaé nakkako mancaji arunna Israélié.’ Purana mupogau' iyaro gau'é, salaiwi iyaro onrongngé masitta-sitta.” Joppani iyaro nabi kalloloé lao ri Ramot, nanapoléini Yéhu sibawa pallima laingngé mattengngang maddeppungeng kuwaro. Makkedani iyaro nabié, “Pa', tiwika karéba untu' Puwang.” Nappébali Yéhu, “Untu' niga?” Nametté iyaro nabié, “Untu' aléna Puwang.” Nainappa sipadduwa mennang muttama ri lalempola, nanatiri'ni iyaro nabi kalloloé minnya zaitungngéro ri tompo ulunna Yéhu nainappa makkeda, “Makkedai Puwang Allataalana Israélié, ‘Ulanti'ko mancaji arung ri yasé'na umma'-Ku Israélié. Mupaccappui matu kaluwargana puwammu Ahab. Nanallalengiwiro Uhukkungngi Izebél iya puraé mpunoi nabi-nabik-Ku sibawa ata-atak-Ku iya laingngé. Sininna kaluwargana sibawa ana' eppona Ahab harusu'i maté. Tungke' tau worowané muwi macowa iyaré'ga malolo Upaccappui matu. Ugaukengngi matu kaluwargana pada-pada Ugaukengngéngngi kaluwargana Yérobéam sibawa kaluwargana Baésa, arung-ngarunna Israélié. Dé' narikuburu matu Izebél. Nanréi matu asu ujuna ri daéra Yizreel.’ ” Purana napowada manenro, massuni nabi kalloloéro nanalari. Lisuni Yéhu ri sellao-sellaona, namakkutana mennang, “Engka karéba aga? Maéloi maga iyaro tau jangengngé sibawa iko?” Nappébali Yéhu, “Ah, muwissenni.” Nappébali mennang, “Dé', dé' taissengngi! Ayo paissengiki!” Nappébali Yéhu, “Napalettu'i pasenna Puwangnge makkedaé nakkaka Puwangnge mancaji arunna Israélié.” Masitta'ni sellao-sellaona Yéhu ludungngi jumbana mennang nanapallebba'i ri addénéngngé ri yolona Yéhu. Nainappa mennang seppung tarompé sibawa gora, “Arunni Yéhu!” Purairo naénrékini karéta musuna, nanajoppa lao ri Yizreel. Iyaro wettué dé'pa najjappa Yoram, na Ahazia arunna Yéhuda engkai kuwaro célléngiwi. Wettunna pengawalna manara kota Yizreel naita Yéhu sibawa sining taunna polé, gorani, “Engka sirombongang tau mattuju lao mai!” Nappébali Yoram, “Suroi séddi prajuri makkinnyarang lao salidikiwi rangegga mennang iyaré'ga bali.” Laoni iyaro prajuri'é sibawa makkinnyarang méwai sita Yéhu sibawa makkeda, “Macinnai arungngé missengngi poléiga Puwang selaku rangeng.” Nappébali Yéhu, “Tenniya urusammu iyaro! Ayo accowéno ri iyya.” Iyaro pengawal manaraé naitai iyaro prajuri'é lettu ri rombongangngéro, iyakiya dé' nalisu. Nalaporo'ni gau'éro, nainappa nasuro prajuri laingngé. Iyaé prajuri'é makkutana towi makkuwaro lao ri Yéhu, namappébalisi Yéhu, “Tenniya urusammu iyaro! Ayo accowéno ri iyya!” Nalaporo'si iyaro pengawal manaraé makkedaé iyaro suroé lettu'ni ri rombongangngéro iyakiya dé' nalisu. Nainappa natambai, “Naullé pamimpinna iyaro rombongangngé iyanaritu Yéhu, saba' natonangiwi karéta musuna pada-pada tau jangengngé.” Napparénta Arung Yoram, “Passadiyangekka karétaku.” Ripassadiyani karétaé, nainappa Yoram sibawa Arung Ahazia joppa lao méwai sita Yéhu, tungke'-tungke' ri laleng karétana muto. Siruntu'ni mennang sibawa Yéhu ri dare' appunnangenna riyolo Nabot. Nakkutana Yoram lao ri Yéhu, “Polékoga selaku rangeng?” Nappébali Yéhu, “Pékkugi wedding selaku rangeng, rékko maéga mupa kuwaé sanro, sibawa engka mupa assompang barahala iya napammulaiyé Izebél indo'muro?” “Iyaé abali'bellareng, Ahazia!” gorana Yoram nanapabélo'i karétana nanalari. Nagettenni panana Yéhu maggangka ullé panai Yoram ri lekke'na bettui jantunna. Narebbana Yoram, sibawa maté ri laleng karétana. Naitani Ahazia aga iya puraé kajajiyang, nanalariyanni karétana mattuju ri kota Bét-Hagan. Rilellunni ri Yéhu sibawa gora lao ri ana' buwana, “Uno towi!” Ripanani ri mennang sibawa loi ri laleng iya mattujué ri Gur, seddéna kota Yibléam. Iyakiya naulléi lari lettu ri Megido, nakkuwaniro maté. Sining pegawénna malai ujuna nanatiwii sibawa karéta lisu ri Yérusalém, nanakuburu'i ri laleng kuburu'na arung-ngarungngé ri Kota Daud. Mancaji arungngi Ahazia ri Yéhuda wettunna Arung Yoram ana' Ahab seppuloni séddi taunna paréntai Israél. Lettu'ni Yéhu ri Yizreel. Naéngkalinganana Izebél passalenna aga pura kajajiyang, napakessingini gemme'na sibawa maccilla, nainappa cuku' makkita polé ri tellongenna saorajaé. Wettunna Yéhu muttama lalo ri pintu gerbangngé, gorani Izebél, “Eh Zimri, pabbuno! Maéloko maga mulao kuwaé?” Congani Yéhu makkita ri tellongengngé, namakkeda, “Niga maccowé ri iyya?” Naéngkalingana iyaro, duwa tellu tau pegawénna saorajaé cuku' liyawa. Nakkeda Yéhu lao ri mennang, “Aggenrungengngi liyawa!” Nanaggenrungenni Izebél liyawa narilélu ri karétaé angkanna tapporo darana lao ri témbo'é sibawa risining anyaranna karétaéro. Nainappa muttama Yéhu ri saorajaé sibawa manré. Namakkeda, “Iyaro makkunraié mabusungngi. Namuni makkuwaro, kuburu'i ujuna saba' ana' arungngi.” Iyakiya wettunna lao sining tauwé malai ujuna untu' rikuburu, banna kaddaro ulunna mennang napoléi sibawa buku-buku taiyyana sibawa ajéna. Rilaporo'nana iyaro gaué ri Yéhu, makkedani, “Purani naboto Puwangnge iyaé, wettunna makkeda makkuwaé naolai Elia atan-Na: ‘Ujuna Izebél nanréi matu asu ri daéra Yizreel, sibawa sésa-sésa ujuna tassiya-siyai matu pada-pada tai olokolo'é angkanna dé' muwi séddi tau mulléi missengngi ujuna niga iyaro.’ ” Arung Ahab mappunnaiwi pituppulo ana' eppo ri kota Samaria. Rimakkuwannanaro kirinni sure' Yéhu lao ri Samaria, lao ri sininna walinna ana' eppona Ahab sibawa lao risining panguwasaé enrengngé sining tomariyolona masaraka'é ri kotaéro. Oninna iyaro sure'é makkuwaiyé, “Ana' eppona Ahab engkai ri laleng anganrowangemmu, namappunnaiko karéta musu, anyarang, senjata sibawa kota mabbénténg. Rimakkuwannanaro, mutarimana iyaé sure'é, piléi iya kaminang makessingngé polé ri yelle'na iyaro ana' eppona Ahab namuwakkai mancaji arung, nainappa éwano méwaiwi.” Métauni sining panguwasana Samaria. Makkedani mennang, “Muwi Arung Yoram sibawa Arung Ahazia dé'to naulléi méwai Yéhu, apalagi idi!” Rimakkuwannanaro kapalana saorajaé sibawa walikotaé silaong sining tomariyolona masaraka'é nenniya sining walinna iyaro ana' eppona Ahab nakirinni iyaé karébaé lao ri Yéhu, “Tunru'ki lao ri Puwang sibawa sadiyaki pogau'i agi-agi iya napparéntangngé Puwang lao ri idi. Dé' tamaélo makkai muwi niga mancaji arung. Pogau'ni aga makessingngé situru pakkitanna Puwang.” Nanakirissi sure' Yéhu lao ri mennang, oninna, “Rékko muwaccowérika, nenniya sadiya turusiwi sining paréntaku, unoi iyaro ana' eppona Ahab, na baja ri wettu pada-padaéwé tiwii sining ulunna mennang lao ri iyya ri Yizreel.” Iya pituppuloro ana' eppona Arung Ahab monroi ri sining tomariyolona masaraka'é ri kota Samaria, sibawa ripiyara ri mennang. Natarimanana sure'na Yéhu, iyaro sining tomariyolona masaraka'na kota Samaria naunoni iya pituppuloro ana' eppona Ahab nainappa naputtama ulunna mennang ri laleng bakaé nanakiringngi lao ri Yéhu ri Yizreel. Purana ripaissengi Yéhu gau'éro, napparéntanni kuwammengngi narisusung iyaro sining ulué mancaji duwaggoppo ri gerbang kotaé, sibawa rileppessang kuwaro narapi élé. Maéléni massu Yéhu ri pintu gerbangngé, nainappa makkeda lao risining tau iya maddeppungengngé kuwaro, “Iyya'na iya sikongkolo'é méwai Arung Yoram sibawa mpunoi; dé' mupasala ri laleng gau'éro. Iyakiya sininna tauwéwé tenniya iyya mpunoi. Iyanaé buttinna makkedaé sininna iya napowadaé Puwangnge passalenna ana' eppona Ahab kajajiyangngi matu. Puwangnge pura pogau'i aga iya Napowadaé naolai Elia atan-Na.” Nainappa Yéhu mpunoi sininna sumpulolona Ahab iya laingngé iya monroé ri Yizreel, sibawa sininna pegawénna, sellao-sellao maréppé'na, sibawa imang-ngimanna, dé' muwi séddi tau naleppessang tuwo. Nasalaini Yéhu Yizreel nanalao ri Samaria. Ri tengnga laleng, ri onrong iya riyasengngé “Akkampongeng Pakkampi”, siruntu'ni sibawa siyagangngaré sumpulolona Ahazia arunna Yéhuda. Makkutanani, “Niga iko?” Nappébali mennang, “Sumpulolonaki Ahazia. Maéloki lao ri Yizreel untu' célléngiwi sininna kaluwargana arungngé sibawa ana' eppona Ratu Izebél.” Napparénta Yéhu lao ri ana' buwana, “Tikkengngi mennang tuwo-tuwo!” Naritikkenna iyaro sining tauwé, nariyuno ri seddéna bujung iya marakkoé, iya manenna patappulo duwa tau. Dé' muwi séddi tau naleppessang tuwo. Napatteruni joppana Yéhu. Ri tengnga laleng, riduppaini ri Yonadab ana' Rékhab. Mabbéré sellenni Yéhu ri aléna sibawa makkeda, “Dé'ga tasséddi ati? Maélokoga sokokka?” Nappébali Yonadab, “Iyyé.” Nametté Yéhu, “Rékko makkuwaitu, laono mai tajjama'.” Majjama'ni mennang, sibawa ritulunni Yonadab ri Yéhu ménré ri karétana, nakkedato, “Accowéno mai sibawa alému sabbingngi pékkugi patoku untu' Puwangnge.” Nainappa silaong mennang makkaréta lao ri Samaria. Lettu'na kuwaro naunoni Yéhu sininna sumpulolona Ahab, dé' muwi séddi tau iya monroé. Kajajiyangngi iyaro gau'é situru iya napowadaé Puwangnge lao ri Elia. Nasuroni Yéhu pabbanuwana Samaria maddeppungeng nainappa makkeda, “Dé' namapato Arung Ahab massompa lao ri Baal; maéloka lebbi mapato naiya aléna. Rimakkuwannanaro paddeppungengngi sininna nabi Baal sibawa passompana nenniya imang-ngimanna; muwi séddi tau aja'to mupassangadiwi. Maéloka makkasuwiyang akkarobangeng iya battowaé untu' Baal. Niga dé' nahadéré rihukkung matéi matu.” Iyakiya iyaro banna séuwa siyasa' polé ri Yéhu untu' mpunoi sininna passompa Baal-é. Nabbéréyanni Yéhu sining paréntaéwé: “Pattentuni séddi esso untu' sompai Baal!” Nanapattentuni tauwé essoéro nanappallebbangenni Yéhu risininna Israélié. Iyaro essoé poléni sininna passompa Baal-é, dé' muwi séddi iya monroé. Muttama'ni mennang ri bolana Baal sibawa pennoiwi bolaéro polé ri yolo lettu ri munri. Napparéntanni Yéhu kuwammengngi iyaro pangurusu sining pakéyang assompangngé ri bolana Baal nabbéréyangngi iyaro sining pakéyangngé lao risining tau iya polé untu' massompa ri Baal. Puranana napogau' iyaro paréntaé, nauttamakini Yéhu iyaro bolana Baal silaong Yonadab ana' Rékhab, namakkeda lao risining tauwé kuwaro, “Paréssai madécéd-décéng aga sininna iya engkaé hadéré kuwaé banna passompa Baal. Ajakké engka kuwaé tau iya sompaéngngi Puwangnge.” Nainappa Yéhu sibawa Yonadab makkasuwiyang akkarobangeng lao ri Baal. Ri saliwenna bolaéro, purani naatoro Yéhu aruwa pulona pengawal sibawa parawira. Pura towi nabbéréyang iyaé paréntaé lao ri mennang, “Harusu'ko mpunoi sininna tauwéro. Niga malleppessangngi séddi polé ri mennang lari, riyunoi matu!” Purana muwa Yéhu makkasuwiyang akkarobangeng, massuni namakkeda lao risining pengawal-é sibawa sining parawiraéro, “Uttama'no sibawa uno manengngi mennang. Aja' muleppessangngi muwi séddi leppe!” Nauttama'na mennang sibawa peddang pura rampu, nanaunoi sininna tauwé kuwaro, nainappa nassarénréngeng iyaro sining ujué massu. Nainappa muttama mennang ri bagiyang lalenna bolaé, nanapassuni dato-dato'na Baal nanatunui. Iyaro dato-dato'é naancuru'ni silaong bolana nainappa iyaro onrongngé napancaji ajjambangeng lettu essoéwé. Makkuwniro Yéhu paccappui assompanna Baal ri Israélié. Iyaro wettué mammulani Puwangnge cikkekiwi daérana Israélié. Hazaél arung Siria sittaiwi sininna daérana Israélié ri seddé alauna Salo Yordan lettu ri yattang sibbéla kota Aroér seddéna Salo Arnon, muttama'ni daéra seddéna Giléad sibawa Basan, onronna suku Gad, Rubén sibawa Manasyé alau. Curita laingngé passalenna Yéhu, muttama'ni jasa-jasa abaraningenna, riyokii ri laleng kitta Sejarana Arung-ngarunna Israélié. Wettunna naisseng Atalya makkedaé Arung Ahazia, ana'na, maténi, napparéntanni kuwammengngi nariyuno sininna kaluwargana Ahazia. Yoas ana'na Ahazia céddé towi riyuno silaong ana'-ana' arung iya laingngé, iyakiya leppe'i nasaba ripassalama'i ri Yoséba ri amuréna. Yoas sibawa indo' pasusunna ritiwii risubbu riséddié bili' atinrong ri Bolana Puwangnge. Enneng taung ittana Yoséba piyarai iyaro ana'é ri laleng Bolana Puwangnge wettunna Atalya mapparénta selaku arung. Ri taung mapitué, sining parawira pengawal paribadinna ratué sibawa sining pengawalna saorajaé riyobbini ri Imang Yoyada untu' sita sibawa aléna ri Bolana Puwangnge. Kuwaniro nasuro mennang mattanro untu' pogau'i rancanana. Nappaitanni Yoas, ana' worowanéna Arung Ahazia, lao ri mennang, sibawa mabbéréyangngi paréntaéwé, “Rékko nakennako jamang ri esso Saba'é, tawa tellummu polé ri iko harusu jaga ri saorajaé, tawa tellummusi ri pintu Gerbang Sur, na lebbinna ri pintu gerbang ri munrinna sining pengawal iya laingngé. Iyaro sining parawiraé naturusini paréntana Yoyada sibawa tiwii lao ri aléna ana' buwana mennang iya harusu'é jaga sibawa iya leppe jagangngé ri esso Saba'éro. Nabbéréyanni Yoyada lao risining parawiraéro sining bessié sibawa kaliyawona Arung Daud iya ritaroé ri Bolana Puwangnge. Nainappa sining pengawal-é, tungke'-tungke' sibawa peddang pura rampu, malani mennang onrong ri yolona Bolana Puwangnge mattulili untu' linrungiwi arungngé. Purairo natiwini Yoyada massu Yoas, nainappa napatoppo passigera'é ri ulunna, sibawa mabbéréyangngi lao ri aléna kitta Hukkunna Allataala. Rilanti'ni Yoas selaku arung sibawa riyappallebbangenni iyaro gau'é lao ri ra'ya'é. Mappaleppa manenni sibawa gora, “Tuwoi Arungngé!” Naéngkalingani Ratu Atalya gora-gorana sining pengawal-é sibawa ra'ya'é. Mapperi-perini lao ri Bolana Puwangnge, kégi makkatulung tau maégaé. Naitani arung iyaro barué tettong ri sumpang muttama'é ri Bolana Puwangnge kégi rilanti, riyattulilingi risining parawiraé sibawa passeppung tarompé'é. Sininna ra'ya'é gorani marennu nanapaoni towi tarompé'na. Namanennenna Atalya sapé'i pakéyanna, sibawa gora, “Bali'bella! Bali'bella!” Dé' napalaloi Yoyada riyuno Atalya ri seddéna Bolana Puwangnge, jaji makkedani lao risining parawiraé, “Tiwii massu lalo ri barisi pengawal é sibawa unoi nigi-nigi makkuraga passalama'i.” Natikkenni mennang, nanatiwii lao ri saorajaé. Kuwaniro riyuno ri yolona pintu Gerbang Anyarangngé. Risuroni Imang Yoyada ri Arung Yoas sibawa ra'ya'é mébbu assijancing sibawa Puwangnge makkedaé maéloi mennang mancaji umma'na Puwangnge. Nasuro towi arungngé mébbu assijancing sibawa ra'ya'é. Purairo malluruni ra'ya'é sibawa ruttungngi bola-bolana Baal. Naancuru'i mézbana sibawa dato-dato'na, enrengngé Matan, imanna Baal naunoi ri yolona sining mézbaéro. Nasuroni Yoyada pengawal-é untu' jagaiwi Bolana Puwangnge, nainapa silaong sining parawiraé, sining pengawal paribadinna arungngé nenniya sining pengawalna saorajaé kuwaéttopa sininna ra'ya'é mpuléi Arung Yoas polé ri Bolana Puwangnge lao ri saorajaé. Muttama'ni Yoas lalo ri Gerbang Pengawal-é, nanatudang ri kadéra arajangngé. Marennuni sininna ra'ya'é, tennang toni kotaé sibawa purani riyuno Atalya. Pituttaung umuru'na Yoas wettunna mancaji arunna Yéhuda. Ri taung mapitué apparéntanna Yéhu ri Israél, Yoas mancaji arunna Yéhuda. Mapparéntai ri Yérusalém patappulo taung ittana. Indo'na riyasengngi Zibya polé ri kota Bersyéba. Barakka didikanna Imang Yoyada, sillampé umuru'na Yoas napogau'i iya pésennangiyéngngi atinna Puwangnge. Iyakiya sayangngi, onrong assompanna déwataé dé' naancuru'i, angkanna makkasuwiyangeng mupi ra'ya'é akkarobangeng sibawa mattunu kamennyang kuwaro. Riséuwaé esso naobbini Yoas sining imangngé nanasuroi mennang taroi dowi iya nalolongengngé polé risining pakkasuwiyangngé ri Bolana Puwangnge, muwi dowi pakkamaja akkarobangeng, iyaré'ga dowi pabbéré cenning ati. Tungke' imangngé harusu'i mattanggung jawa' lao ri dowi iya nakkasuwiyangengngé sining tau iya natumaningiyé. Iyaro dowié maéloi ripaké untu' pédécéngiwi sining asolangenna Bolana Puwangnge. Narapi taung maduwappuloé tellu apparéntanna Yoas, sining imangngé dé'topa napédécéngiwi asolangenna Bolana Puwangnge. Rimakkuwannanaro naobbini Yoas Imang Yoyada silaong imang-ngimang laingngé, namakkeda, “Magi nadé'pa mupédécéngiwi Bolana Puwangnge? Mappammulai essoéwé dé'na naripalaloko taroi dowi iya mutarimaé. Harusu'i muwabbéréyang maneng untu' pédécéngiwi Bolana Puwangnge.” Nasitujuini imang-ngimangngé untu' dé' nappaddeppungeng dowi polé ri ra'ya'é sibawa dé'to natanggung jawa'i ri appédécéngenna Bolana Puwangnge. Nanalana Yoyada séddi petti-petti sibawa mébbu sebbo ri pattongkona nanataroi ri seddéna mézbaé ri seddé ataunna sumpang muttama'é ri Bolana Puwangnge. Sininna dowi iya riyakkasuwiyangengngé ri Bolana Puwangnge riputtama'i ri laleng petti-pettiéro ri imang-ngimang iya jagaé ri sumpang muttama'é. Tungke'-tungke' rékko maégani dowi ri laleng petti-pettiéro, poléni jurutulisi'na arungngé silaong Imang Lompoé nanabilangngi iyaro dowié, nainappa nadoko. Puranana riyoki jumellana, riyabbéréyanni iyaro dowié lao risining mandoro'na jama-jamang appédécéngengngé ri Bolana Puwangnge. Nainappa iyaro sining mandoro'é mpajai sining panré ajué, tukang bangunangngé, tukang batué nenniya pappa batué. Iyatoro sining mandoro'é melli aju sibawa batu, enrengngé matoro'i sininna dowi massué untu' iyaro appédécéngengngé. Iyakiya iyaro dowié muwi céddé dé'to naripaké untu' mébbu cangkiri-cangkiri péra', mangko, tarompé, paréwa-paréwa pajjennangeng iyaré'ga pakkakkasa laingngé polé ri ulawengngé iyaré'ga péra'é. Iya manenna riwéréngngi sining tukangngé sibawa riyélliyangngi bahang-bahang bangunang iya riyapparelluwangngé. Iyaro sining mandoro'na jama-jamangngé malempu senna'i, jaji dé' naparellu riyéllau laporang dowi polé ri mennang. Dowi polé ri akkarobangeng passullé arogingngé sibawa polé ri akkarobangeng paddampengeng dosaé dé' nariputtama ri laleng petti-pettiéro. Iyaro dowié riwéréngngi imang-ngimangngé. Iyaro wettué Hazaél arung Siria nagasai sibawa natudangiwi kota Gat. Namanniya' towi gasai Yérusalém. Nanakirinna Yoas dowi pakkamaja. Iyaro dowié nalolongengngi polé risininna pakkasuwiyang iya puraé nabbéréyang riyolo lao ri Puwangnge polé ri Yoas muto, sibawa polé ri Yosafat, Yoram sibawa Ahazia, iyanaritu sining arung iya mapparéntaé ri yolona. Makkuwatoro sininna ulawengngé ri laleng kasna Bolana Puwangnge sibawa saorajana arungngé. Na dé'na najaji Hazaél gasai Yérusalém. Ri taung maduwappuloé tellu apparéntanna Yoas ana' Amazia ri Yéhuda, Yoahas ana' Yéhu mancaji arunna Israélié, sibawa mapparéntai ri Samaria seppulo pitu taung ittana. Pada-pada Arung Yérobéam iya mapparéntaé ri yolona, madosai Yoahas lao ri Puwangnge nanassabariwi tau Israélié madosato. Dé' naengka nasalaiwi sining pangkaukenna iya majaé. Rimakkuwannanaro macayii Puwangnge lao ri Israélié angkanna Naleppessang Hazaél arung Siria sibawa Bénhadad ana'na, makkolik-koling caui Israél. Namassempajanna Yoahas lao ri Puwangnge, nanaéngkalingani Puwangnge sempajannaro, nasaba naitai Puwangnge pékkugi péddarana arung Siria tenre'i tau Israélié. Puwangnge mpéréngngi tau Israélié séddi pamimping iya paleppe'éngngi mennang polé ri akuwasanna Siria angkanna mennang tuwo amassi pada-pada pammulanna. Namuni makkuwaro dé' nappésau tau Israélié pogau' dosa-dosa iya napammulaiyé Arung Yérobéam. Matterui mennang pogau'i iyaro dosa-dosaé, sibawa leppessangngi dato-dato'na Déwi Asyéra tette engka ri Samaria. Purani ripaccappu tentarana Israélié ri arung Siria angkanna Arung Yoahas banna mappunnai limappulo tentara makkinnyarang, seppulo karéta musu, sibawa seppulo sebbu prajuri. Curita laingngé passalenna Arung Yoahas sibawa sininna jasa-jasa abaraningenna riyokii ri laleng kitta Sejarana Arung-ngarunna Israélié. Matéi sibawa rikuburu ri Samaria. Yoas ana'na mancaji arung sulléiwi. Ri taung matelluppuloé pitu apparéntanna Arung Yoas ri Yéhuda, Yoas ana' Yoahas mancaji arunna Israélié sibawa mapparéntai ri Samaria 16 taung ittana. Madosa towi lao ri Puwangnge nasaba naturusiwi jana Arung Yérobéam iya puraé nassabariwi tau Israélié pogau' dosa. Curita laingngé passalenna Arung Yoas, muttama'ni abaraningenna ri laleng musué méwai Amazia arunna Yéhuda, riyokii ri laleng kitta Sejarana Arung-ngarunna Israélié. Matéi Yoahas sibawa rikuburu ri kuburu'na arung-ngarungngé ri Samaria. Yérobéam Maduwaé ana'na mancaji arung sullléiwi. Riséuwaé wettu masero lasai Nabi Elisa, napoléna Arung Yoas célléngiwi. Wettunna naita Elisa mawé'ni maté, terini iyaro arungngé sibawa makkeda, “Ambo'ku, Ambo'ku, pangéwainna Israél iya battowaé!” Napparénta Elisa lao ri aléna, “Alano pana!” Malani Yoas, nainappa Elisa suroi sadiya-sadiya untu' mappana. Nasadiyana arungngé, nanapalénne'ni limanna Elisa ri limanna arungngé. Nainappa situru sibawa paréntana iyaro nabié, natimpa'ni arungngé tellongeng iya mangoloé ri Siria. “Leppessanni panamu!” paréntana Elisa. Naleppessanna muwa arungngé iyaro panaé, gorani iyaro nabié, “Ikona panana Puwangnge. Nasibawang iyaro panaé Puwangnge caui matu Siria. Mammusuko matu méwai tau Siriaé ri Afék narapi mucau mennang.” Nasuroni Elisa Arung Yoas malai pana-panana iya laingngé sibawa makkunrurengngi ri tanaé. Naunruni arungngé tanaé wékkatellu, nainappa mappésau. Macaini Elisa, sibawa makkeda, “Harusu'i muwunru narapi wékkalima iyaré'ga wékkaenneng, namuwulléi mancuru'i bangsa Siriaé. Iyakiya makkekkuwangngé wékkatellu bawang mucau matu.” Dé' namaitta ri munrinna maténi Elisa sibawa rikuburu. Iyaro garembolang-garembolanna Moab biyasanna nagasai wanuwa Israélié siseng sitaung. Riséuwaé esso wettunna siyagangngaré tau makkuburu tau maté, tappa naitai mennang garembolang Moab-é polé. Matteruni mennang naggenrungeng bawang iyaro ujué ri laleng kuburu'na Elisa nainappa lari. Taggéssana muwa iyaro ujué ri buku-bukunna Elisa, tuwona paimeng iyaro ujué nanatettong. Sillampé apparéntanna Yoas, Hazaél arung Siria tenre'i tau Israélié. Iyakiya mamaséi Puwangnge ri umma'-Na sibawa maddampengengngi mennang. Dé' namaélo leppessangngi mennang ripaccappu sangadinna tulungngi mennang, nasaba assijancingen-Na sibawa Abraham, Ishak sibawa Yakub. Lettu makkekkuwangngé dé' naengka nallupaiwi umma'-Na. Nanamaté Hazaél arung Siria, na Bénhadad ana'na mancaji arung. Nainappa Yoas arung Israél caui Bénhadad wékkatellu sibawa malai paimeng kota-kota iya puraé nasittai Bénhadad ri wettu apparéntanna Arung Yoahas ambo'na Yoas. Ri taung maduwaé apparéntanna Yoas ana' Yoahas ri Israél, Amazia ana' Yoas mancaji arung ri Yéhuda. Iyaro wettué umuru'na duwappulo lima taung, namapparéntai ri Yérusalém duwappulo aséra taung ittana. Indo'na iyanaritu Yoadan polé ri Yérusalém. Napogau'i Amazia iya pésennangiyéngngi atinna Puwangnge, iyakiya dé' napada-pada Daud, toriyolona. Pada-pada ambo'na, dé'to naruttungngi onrong-ngonrong assompang déwataé, angkanna matteru bawangngi ra'ya'é makkasuwiyangeng akkarobangeng sibawa mattunu dupa kuwaro. Mawatanna muwa tudangenna, nahukkung maténi Amazia pegawé-pegawé iya mpunoéngngi ambo'na. Iyakiya ana'-ana'na iyaro pegawé dé' naunoi, nasaba naturusiwi paréntana Puwangnge ri laleng Kitta'na Musa iya makkedaé, “Aja' muhukkung matéi tomatowaé nasaba ja iya napogau'é ana'-ana'na mennang, sibawa aja' muhukkung matéi ana'-ana'é nasaba ja iya napogau'é tomatowanna mennang. Tungke' tau banna weddingngi rihukkung maté nasaba ja iya napogau'é muto.” Ri laleng séuwaé ammusureng, naunoi Amazia 10.000 prajuri Edom ri Lompo Pejjé, sibawa nasittaiwi kota Séla. Iyaro kotaé nasengngi Yokteel. Nainappa Amazia kiring suro lao ri Yoas arunna Israél untu' méwai mammusu. Iyakiya nakiringngi Arung Yoas iyaé pappébalié, “Séuwa wettu alekale' maddorié ri Buluna Libanon kiringngi iyaé birittaé lao ri pong camaraé, ‘Eh pong camara, abbéréyangngi ana'daramu lao ri ana'ku untu' mancaji bainému!’ Iyakiya ri munri laloi kuwaro sikaju olokolo ale iya léjja-léjja'éngngi alekale' maddoriéro. Iko, Amazia, matempono, nasaba purani mucau tau Edongngé. Dé'ga na iyaro apakalangngé genne'ni? Makessingenni onrono bawang ri bolaé! Untu' aga sappa persoalang iya bannaé cilakaiwi matu alému sibawa ra'ya'mu?” Iyakiya Amazia arunna Yéhuda dé' nabati-batiwi ada-adanna Yoas arunna Israélié. Rimakkuwannanaro, Arung Yoas silaong ana' buwana joppani lao ri Bét-Sémes ri Yéhuda namammusu sibawa Amazia kuwaro. Ricauni tentarana Yéhuda sibawa sininna prajuri'na larini lisu ri bolana tungke'-tungke'. Natikkenni Yoas Amazia, nainappa lao ri Yérusalém sibawa ruttungngi témbo'na kotaéro lampéna lebbi kurang duwa ratu météré, mappammulai ri Pintu Gerbang Efraim lettu ri Pintu Gerbang Sunna. Sininna ulawengngé sibawa péra'é enrengngé sininna pakkakkasa iya naruntu'é ri Bolana Puwangnge, makkuwatoro waramparanna saorajaé, silaong siyagangngaré tau tawangeng natiwini Yoas ri Samaria. Curita laingngé passalenna Arung Yoas, muttama'ni abaraningenna méwai Amazia arung Yéhura riyokii ri laleng kitta Sejarana Arung-ngarunna Israélié. Maténi Yoas sibawa rikuburu'i ri kuburu arung-ngarungngé ri Samaria. Yérobéam Maduwaé ana'na mancaji arung sulléiwi. Maténana Yoas arunna Israélié, Amazia arung Yéhuda, tuwo mupi 15 taung. Maténana ambo'na, nasittaini paimeng Uzia kota Elat sibawa patettongngi paimeng. Ri taung maseppuloé lima apparéntanna Amazia ana' Yoas ri Yéhuda, Yérobéam Maduwaé ana' Yoas mancaji arunna Israélié, sibawa mapparéntai ri Samaria 41 taung ittana. Madosai lao ri Puwangnge, nasaba naccowériwi jana Arung Yérobéam Mammulangngé iya puraé mébbui tau Israélié madosa. Yérobéam Maduwaénna ritu sittaiwi paimeng sininna daérana Israélié, polé ri laleng laowé ri Hamat ri manorang lettu ri Tasi Maté ri yattang. Iyaro siturui jancinna Puwangnge, Allataalana Israél, naolai atan-Na, Nabi Yunus ana' Amitai tau Gat-Héfer. Naitani Puwangnge pékkugi anrasa-rasanna tau Israélié, nadé' muwi séddi tau tulungngi mennang. Dé' namakkatta Puwangnge mancuru'i Israélié untu' mannennungeng, rimakkuwannanaro Natulungngi mennang naolai Arung Yérobéam Maduwaé. Curita laingngé passalenna Yérobéam Maduwaé, passalenna abaraningenna ri laleng sining ammusurengngé sibawa pékkugi sittaiwi paimeng Damsyik sibawa Hamat polé ri Yéhuda untu' Israélié, riyokii ri laleng kitta Sejarana Arung-ngarunna Israélié. Maténi Yérobéam Maduwaé sibawa rikuburu ri kuburu'na arung-ngarungngé. Zakharia ana' worowanéna mancaji arung sulléiwi. Ri taung maduwappuloé pitu apparéntanna Arung Yérobéam Maduwaé ri Israél, Uzia ana' Amazia mancaji arunna Yéhuda. Iyaro wettué umuru'na 16 taung namapparéntai ri Yérusalém 52 taung ittana. Indo'na riyasengngi Yékholya, makkunrai Yérusalém. Pada-pada ambo'na, napogau' towi Uzia iya sennangiyéngngi atinna Puwangnge. Iyakiya sayangngi, dé' naancuru'i onrong-ngonrong assompang déwataé, angkanna tette'i ra'ya'é makkasuwiyangeng akkarobangeng sibawa mattunu dupa kuwaro. Puwangnge mébbui nakenna lasa oli iya mappakatau-taué, nanarapi maté, iyaro lasana dé' najjappa. Ripassalai riséddié bola sibawa ripaleppe polé ri jama-jamanna. Yotam ana' worowanéna paréntai ra'ya'é selaku wakkélé'na. Curita laingngé passalenna Arung Uzia riyokii ri laleng kitta Sejarana Arung-ngarunna Yéhuda. Maténi Uzia sibawa rikuburu'i ri kuburu'na arung-ngarungngé ri Kota Daud. Yotam ana' worowanéna mancaji arung sulléiwi. Ri taung matelluppuloé aruwa apparéntanna Arung Uzia ri Yéhuda, Zakharia ana' Yérobéam Maduwaé mancaji arunna Israél sibawa mapparéntai ri Samaria enneng uleng ittana. Pada-pada muto arung-ngarung iya mapparéntaé ri yolona, madosa towi lao ri Puwangnge. Naccowériwi jana Arung Yérobéam Mammulangngé, iya puraé mébbui Israélié madosa. Salum ana' Yabés sikongkolo méwai Arung Zakharia, nanaunoi ri Yibléam, nainappa mancaji arung sulléiwi. Ri taung matelluppuloé aséra apparéntanna Arung Uzia ri Yéhuda, Salum ana'na Yabés mancaji arunna Israélié. Mapparéntai ri Samaria banna siuleng nasaba Menahém ana' Gadi laowi ri Samaria polé ri Tirza, nanaunoi Salum, namancaji arung sulléiwi. Ri taung matelluppuloé aséra apparéntanna Arung Uzia ri Yéhuda, Menahém ana' Gadi mancaji arunna Israélié, sibawa mapparéntai ri Samaria 10 taung ittana. Sillampé umuru'na madosai lao ri Puwangnge nasaba naturusiwi jana Arung Yérobéam Mammulangngé, iya mébbuéngngi tau Israélié madosa. Wettunna Pul arung Asyur gasai Israélié, Menahém mpéréngngi 34.000 kilo péra' kuwammengngi nabantui pakkasse'i akuwasanna Menahém ri Israélié. Carana Menahén lolongengngi iyaro dowié iyanaritu passai sining tau sugié ri Israél mabbéré limappulo dowi péra' tungke' tau. Rimakkuwannanaro nasalaini Pul iyaro wanuwaé sibawa lisu ri wanuwanna muto. Curita laingngé passalenna Arung Menahém riyokii ri laleng kitta Sejarana Arung-ngarunna Israélié. Matéi sibawa rikuburu, nainappa Pékahya ana'na mancaji arung sulléiwi. Ri taung malimappuloé apparéntanna Arung Uzia ri Yéhuda, Pékahya ana' Menahém mancaji arunna Israélié sibawa mapparéntai ri Samaria duwattaung ittana. Madosai lao ri Puwangnge nasaba naccowériwi jana Arung Yérobéam Mammulangngé, iya mébbuéngngi tau Israélié madosa. Sala séddinna polé risining parawirana, iyanaritu Pékah ana' Rémalya, sikongkolo'i sibawa 50 tau polé ri Giléad. Na ri laleng séddié bénténg ri saorajaé ri Samaria naunoi mennang Pékahya silaong duwa tau laing iya riyasengngé Argob sibawa Aryé. Nainappa Pékah mancaji arung sulléiwi Pékahya. Curita laingngé passalenna Arung Pékahya riyokii ri laleng kitta Sejarana Arung-ngarunna Israélié. Ri taung malippuloé duwa apparéntanna Arung Uzia ri Yéhuda, Pékah ana' Rémalya mancaji arunna Israélié. Mapparéntai ri Samaria 20 taung ittana. Madosai lao ri Puwangnge nasaba naccowériwi jana Arung Yérobéam Mammulangngé iya mébbuéngngi Israélié madosa. Ri wettu apparéntanna Pékah, Tiglat-Piléser arung Asyur sittaiwi kota Iyon, Abél-Bét-Maakha, Yanoah, Kédés, Hazor, daérana Giléad, Galiléa sibawa Naftali. Natiwi towi pabbanuwana selaku tawangeng lao ri Asyur. Ri taung maduwappuloé apparéntanna Arung Yotam ana' Uzia ri Yéhuda, Hoséa ana' Ela massikongkolo méwai Arung Pékah sibawa mpunoi, nainappa mancaji arung sulléiwi. Curita laingngé passalenna Arung Pékah riyokii ri laleng kitta Sejarana Arung-ngarunna Israélié. Ri taung maduwaé apparéntanna Arung Pékah ana' Rémalya ri Israélié, Yotam ana' Uzia mancaji arunna Yéhuda. Iyaro wettué makkéumuru'i 25 taung sibawa mapparéntai ri Yérusalém 16 taung ittana. Indo'na iyanaritu Yérusa ana' Zadok. Napogau'i Yotam iya sennangiyéngngi atinna Puwangnge, pada-pada Uzia ambo'na. Iyakiya sayangngi, onrong-ngonrong assompang déwataé dé' naancuru'i angkanna matterui ra'ya'é makkasuwiyangeng akkarobangeng sibawa mattunu dupa kuwaro. Yotam ritu patettongngi Pintu Gerbang Manorangngé ri Bolana Puwangnge. Matéi sibawa rikuburu ri kuburu'na arung-ngarungngé ri Kota Daud. Ahas ana'na mancaji arung sulléiwi. Ri taung maseppuloé pitu apparéntanna Arung Pékah ana' Rémalya ri Israélié, Ahas ana' Yotam mancaji arunna Yéhuda. Iyaro wettué umuru'na 20 taung sibawa mapparéntai ri Yérusalém 16 taung ittana. Dé' naccowériwi contoh iya makessingngé polé ri Arung Daud, toriyolona, sangadinna napogau'i iya dé'é napésennangiwi atinna Puwangnge, Allataalana. Tuwoi pada-pada arung-ngarung Israélié, mala nakkasuwiyangengngi ana' worowanéna selaku akkarobangeng lao ri déwataé, situru abiyasang majana sining tau iya puraé napaddésu Puwangnge polé ri wanuwa Kanaan wettunna tau Israélié muttamakiwi iyaro wanuwaé. Makkasuwiyangngi Ahas akkarobangeng sibawa mattunu dupa ri onrong-ngonrong assompang déwataé ri bulu-bulué sibawa ri ajukajung iya maworongngé. Kirinni Ahas suro lao ri Tiglat-Piléser arung Asyur sibawa pasengngéwé, “Iyya atammu iya matinulué; rimakkuwannanaro, uwéllauwi, poléni' sibawa passalama'ka polé ri arung Siria sibawa arung Israélié iya mattengngangngé gasaka.” Mala towi Ahas ulaweng sibawa péra' polé ri Bolana Puwangnge, enrengngé waramparanna saorajaé, nanakiringngi selaku hadiya lao ri arung Asyur-éro. Natarimani Tiglat-Piléser paréllaunna Ahas, nanagasai sibawa nasittaiwi Damsyik. Natiwini pabbanuwana selaku tawangeng lao ri Kir silaong arunna, iyanaritu Arung Rézin, naunoi. Wettunna Arung Ahas lao ri Damsyik untu' méwai sita Tiglat-Piléser, naitani mézbaé ri kotaéro. Nainappa nakiring contona iyaro mézbaé lao ri Imang Uria ri Yérusalém sibawa ukkuranna iya teppa'é nenniya manessa. Nanapatettonna Uria séddi mézba situru sibawa conto enrengngé ukkurang iya natarimaéro, sibawa napattépunna sangadi dé'napa nalisu Ahas. Lettu'nana polé ri Damsyik, naitani Ahas makkedaé tépuni iyaro mézbaé. Namakkasuwiyanna akkarobangeng olokolo sibawa akkarobangeng gandong ri yasé'na iyaro mézbaé. Tiri' towi akkarobangeng anggoro sibawa darana akkarobangeng pappasidamé ri yasé'na mézbaéro. Naitani Ahas makkedaé mézba gessaé iya ripallaingngé untu' Puwangnge monroi ri pallawangenna Bolana Puwangnge sibawa mézbana iya barué. Rimakkuwannanaro napalétté'ni iyaro mézba gessaé polé ri yolona Bolana Puwangnge lao ri seddé manoranna mézbana iya baruéro. Puranaro makkedani lao ri Uria, “Pakéni mézbaku iya maloppoéwé untu' mattunu akkarobangeng élé sibawa akkarobangeng wenni iya nakkasuwiyangengngé arungngé sibawa ra'ya'é, sibawa abbolorengngi kuwaro akkarobangeng anggoro'é polé ri ra'ya'é. Abboloreng towi ri yasé'na mézbaéro darana sininna olokolo iya riyakkasuwiyangengngé. Na mézba gessa iya malaungngéro leppessanni iyya pakéi untu' méllau panunju polé ri roh-roh-é.” Napogau'ni Uria paréntana arungngé. Nainappa nabongkara Ahas karéta-karéta gessa iya ripaké ri Bolana Puwangnge, sibawa leggai bémpa-bémpa polé ri karéta-karétaéro. Kullang gessa battowaé iya engkaé ri lekke'na seppuloé duwa saping gessaéro nala towi nanapalénne'i ri tompo'na pallangga batué. Na untu' malai atinna arung Asyur, nabongkara'ni Ahas baruga arungngé ri Bolana Puwangnge, sibawa tongkoi sumpang iya ripallaingngé untu' arungngé. Curita laingngé passalenna Arung Ahas riyokii ri laleng kitta Sejarana Arung-ngarunna Yéhuda. Matéi Ahas sibawa rikuburu ri kuburu arung-ngarungngé ri Kota Daud. Hizkia ana'na mancaji arung sulléiwi. Ri taung maseppuloé duwa apparéntanna Arung Ahas ri Yéhuda, Hoséa ana' Ela mancaji arunna Israélié, sibawa mapparéntai ri Samaria aséra taung ittana. Madosai lao ri Puwangnge, iyakiya dosana dé' nasingngéga dosana arung-ngarung Israél iya mapparéntaé ri yolona. Rimusui sibawa ricaui ri Salmanéser arung Asyur, angkanna tungke' taung harusu'i makkamaja pakkasuwiyang lao ri aléna. Iyakiya riséuwaé wettu, kiringngi Hoséa suro lao ri So arung Maséré untu' méllauwi bantuwanna. Nainappa mappésau Hoséa makkamaja pakkasuwiyang pattaungeng lao ri Asyur. Wettunna naisseng Salmanéser passalenna pangkaukenna Hoséaro, natikkenni Hoséa naputtama'i ri laleng attarungkungngé. Nainappa Salmanéser arung Asyur gasai Israél sibawa keppungngi Samaria. Ri taung matellué polé ri akkeppungengngéro, – iyanaritu taung maaséraé apparéntanna Hoséa – nasittaini Salmanéser Samaria. Nainappa natiwi tau Israélié selaku tawangeng lao ri Asyur. Sibagiyang polé ri mennang nataroi ri kota Halah, sibagiyang ri seddéna Salo Habor ri daérana Gozan, sibawa sibagiyassi ri kota-kotaé ri wanuwa Madai. Sempé'i Samaria nasaba madosai tau Israélié lao ri Puwangnge, Allataalana mennang, iya puraé passalama'i polé ri arung Maséré, sibawa tiwii mennang massu polé ri wanuwaéro. Massompai mennang déwata-déwata laing sibawa maccowériwi abiyasanna bangsa-bangsa iya puraé napaddésu Puwangnge wettunna bangsa Israélié malluru musui bangsa-bangsaéro. Naturusiwi bangsa Israélié ade abiyasang iya napattentué arung-ngarung Israélié, sibawa pogau'i gau'-gau' iya dé'é napuwéloi Puwangnge, Allataalana. Patettongngi mennang onrong-ngonrong assompang déwata ri sininna kotana, muwi ri kota baiccu'é iyaré'ga ri kota battowaé. Ri tompo'na tungke, bulu-bulué, sibawa ri yawana tungke' aju iya maworongngé, patettongngi mennang tugu-tugu sibawa dato-dato'na Déwi Asyéra. Nakiringngi Puwangnge sining surona sibawa nabi-nabin-Na lao ri umma Israélié sibawa Yéhuda untu' palettu'i papparéngngerangngéwé: “Appésauno pogau'i majaé sibawa turusiwi sininna paréntaé sibawa hukkung iya Uwéréngngéngngi toriyolomu sibawa lao ri iko naolai sining nabié, ata-atak-Kuro.” Iyakiya Israél sibawa Yéhuda, dé' namaélo méngkalingai. Matedde atiwi mennang pada-pada toriyolona iya dé'é namateppe ri Puwangnge, Allataalana. Dé' namaélo Israél sibawa Yéhuda turusiwi parénta-paréntana Puwangnge sibawa dé' namatinulu lao ri assijancing iya puraé naébbu sibawa toriyolona. Dé' nabati-batiwi mennang sining pakkamparenna, sangadinna massompai lao ri barahala-barahala iya dé'é nakkéguna, angkanna muwi aléna mennang dé'tona nakkéguna. Naccowériwi mennang baténa bangsa-bangsaé ri mattulilinna, namuni pura nattéyang Puwangnge. Najjalékkaiwi mennang sininna hukkunna Puwangnge, Allataalana, sibawa mébbu duwa saping polé ri bessié untu' nasompa. Mébbui mennang dato-dato Déwi Asyéra, massompai wéttowing sibawa massompai lao ri Déwata Baal. Nakkasuwiyangengngi ana'-ana'na selaku akkarobangeng ritunu lao ri déwataé. Makkégunangngi mennang paddissengeng mappalennye'é sibawa méllauwi panunju polé ri sanro-sanro iya mullééngngi sisumpung sibawa sining roh-é. Makkuwamani patona mennang pogau'i gau'-gau' iya dé'é napésennangiwi atinna Puwangnge angkanna macai senna lao ri mennang sibawa dé'na najampangini mennang. Nabbéyanni mennang polé ri tana iya riwéréngngéngngi mennang; iya monroé banna akkarungeng Yéhuda. Muwi sining tau Yéhudaé dé'to naturusiwi hukkung-hukkunna Puwangnge, Allataalana. Naccowériwi mennang sining abiyasanna tau Israélié, nadé'na nangakuiwi Puwangnge sininna umma Israélié. Nahukkungngi sibawa mabbéréyangngi mennang lao risining balinna iya mapéddaraé. Dé'na najampangiwi mennang, sangadinna nabbéyangngi mennang polé ri tana iya riwéréngngéngngi mennang. Puranana napassarang Puwangnge Israél polé ri Yéhuda, naakkani Puwangnge Yérobéam ana' Nébat mancaji arunna. Nainappa Yérobéam mébbui mennang salaiwi Puwangnge sibawa pogau' dosa-dosa iya battowaé. Naccowériwi mennang baténa Yérobéam sibawa tette'i napogau' sininna dosa iya napogau'é, angkanna Puwangnge dé'na najampangiwi mennang, sangadinna mabbéyangngi mennang polé ri tana iya Nawéréngngéngngi mennang. Kajajiyangngi iyaro situru sibawa papparéngngerang iya nabbéréyangngé Puwangnge lao ri mennang naolai ata-atan-Na, sining nabié. Makkuwaniro tau Israélié ritiwi ri appalirengngé ri Asyur, nakkuwanaro mennang monro lettu essoéwé. Selaku passulléna tau Israél iya puraé ritiwi lao ri appalirengngéro, nataroi arung Asyur ri kota-kotaé ri Samaria, sining tau polé ri Babél, Kuta, Awa, Hamat, sibawa Séfarwaim. Iyaro sining tauwé natudangiwi sining kota-kotaéro sibawa mattette kuwaro. Wettunna mennang bunge'-bunge' monro kuwaro dé' mennang napakalebbii Puwangnge; iyanaro saba'na napapolé Puwangnge singa-singa untu' luruiwi sibagiyang polé ri mennang. Nainappa ripaissengini arung Asyur ri tauwé makkedaé sining tau iya nataroé ri kota-kotaé ri Samaria dé' naissengngi hukkung-hukkung déwatana wanuwaéro. Iyanaro saba'na napapolé singa iyaro déwataé untu' luruiwi mennang. Rimakkuwannanaro napparéntanni arung Asyur kuwammengngi séddi imang polé ri yelle'na sining tawanang iya puraé napali lao ri Asyur, rikiring lisu ri Samaria. Makkedai arungngé, “Suroi lisu sibawa monro kuwaro kuwammengngi weddingngi napagguru sining tauwéro passalenna hukkung-hukkunna déwataé ri wanuwaéro.” Na séddi imang polé ri Israél, iya puraé ritiwi polé ri Samaria lao ri Asyur, lisuni sibawa monro ri Bétel. Kuwaniro napagguru ra'ya'é pékkugi sitongenna sompai Puwangnge. Iyakiya sining tau iya monroé ri Samariaro tette'i mébbui barahalana nanataroi ri laleng bola-bola déwatana iya napatettongngé tau Israél iya monroé riyolo ri kotaéro. Tungke' golongang mébbui barahalana muto ri kota iya naonroiyé mennang: Tau Babél-é mébbui dato-dato Déwata Sukot-Bénot, tau Kutaé mébbui dato-dato Nérgal, tau Hamat-é dato-dato Asima, tau Awaé dato-dato Nibhas sibawa Tartak, sibawa tau Séfarwaingngé makkasuwiyangengngi ana'-ana'na selaku akkarobangeng ritunu lao ri Déwata Adramélékh sibawa Anamélékh. Ri lainnaé sompai déwata-déwataéro, nasompa towi mennang Puwangnge. Piléi mennang polé ri yelle'na maddupa-rupang tau untu majjama selaku imang sibawa untu' makkasuwiyangeng akkarobangeng ri bola-bola barahalaé. Jaji, nasompai mennang Puwangnge, iyakiya nasompa towi déwata-déwatana muto mennang, situru ade abiyasanna wanuwa assalenna. Lettu essoéwé napajoppa mupi mennang ade abiyasanna. Dé' nassompa mennang lao ri Puwangnge sibawa dé'to naturusiwi hukung-hukkung sibawa parénta-parénta-Na iya Nabbéréyangngé lao ri wija-wijanna Yakub, iya Nasengngétto Israél. Purani naébbu Puwangnge assijancing mangoloéwé sibawa umma Israélié, “Aja' mumassompa lao ri déwata-déwata laingngé; aja' musuju' sompai mennang iyaré'ga tumaningiwi mennang, iyaré'ga makkasuwiyangeng akkarobangeng lao ri mennang. Pakalebbi-Ka, Puwang, iya puraé tiwiko massu polé ri Maséré sibawa akuwasang iya battowaé; sompa-Ka sibawa akkasuwiyangenno akkarobangeng lao ri Iyya. Tuli turusiwi hukkung-hukkung sibawa parénta-parénta iya puraé Uwokirekko. Aja' mumassompa lao ri déwata-déwata laingngé, sibawa aja' muwallupaiwi assijancitta Iyya sibawa iko, Turusi-Ka, Puwang Allataalamu, Nauleppessakko matu polé risining balimmu.” Iyakiya iyaro pabbanuwana Samaria dé' namaélo méngkalingai; tette'i mennang makkatenning ri ade abiyasanna. Jaji, nasompai mennang Puwangnge, iyakiya nasompa towi mennang barahala-barahalana. Lettu essoéwé napogau' mupi wija-wijanna gau'éro. Ri taung matellué apparéntanna Arung Hoséa ana' Ela ri Israél, Hizkia ana' Ahas mancaji arunna Yéhuda. Iyaro wettué makkéumuru'i 25 taung namapparéntai ri Yérusalém 29 taung ittana. Indo'na riyasengngi Abia ana' Zakharia. Napogau'i Hizkia iya pésennangiyéngngi atinna Puwangnge pada-pada Arung Daud toriyolona. Naancuru'i onrong-ngonrong assompang déwataé, sibawa ruttungngi tugu-tugunna nenniya solangiwi dato-datona Déwi Asyéra. Naancuru towi ula gessa naébbué Musa iya riyasengngé Néhustan. Saba', lettu ri essoéro mattunu dupa mupi tau Israélié untu' pakalebbii ula gessaéro. Ri yelle'na sininna arung Yéhuda, muwi ri yolona iyaré'ga ri munrinna Hizkia, dé'gaga pada-pada aléna. Mateppe'i lao ri Puwangnge, Allataalana Israélié, sibawa matinuluna ri Aléna. Dé' naengka naéwai Puwangnge. Sininna paréntana Puwangnge iya nabbéréyangngé naolai Musa, naturusiwi Hizkia sibawa tonget-tongeng. Iyanaro saba'na natette Puwangnge tulungngi angkanna mallolongengngi ri laleng sininna usahana. Maronta'i lao ri arung Asyur, sibawa dé' namaélo tunru' lao ri aléna. Nacaui tau Filistingngé, sibawa rampo'i onrong naonroiyé mennang, polé ri désa iya kaminang baiccu'é lettu ri kota iya kaminang battowaé, muttama'ni Gaza sibawa daéraé ri mattulilinna. Ri taung maeppaé apparéntanna Hizkia, iyanaritu taung mapitué apparéntanna Arung Hoséa ri Israélié, Salmanéser arung Asyur gasai Israél sibawa keppungngi Samaria. Rikeppunnana telluttaung ittana, sempé'ni Samaria. Iyaro kajajiyangngi ri taung maennengngé apparéntanna Hizkia, sibawa taung maaséraé apparéntanna Hoséa. Nainappa arung Asyur natiwi tau Israélié selaku tawangeng lao ri Asyur; sibagiyang polé ri mennang nataroi ri kota Halah, sibagiyang ri seddéna Salo Habor ri daéra Gozan, sibawa sibagiyassi ri kota-kotaé ri wanuwa Madai. Sempé'i Samaria nasaba tau Israélié dé' namatinulu lao ri Puwangnge, Allataalana mennang. Nassakkarengngi mennang assijancing iya naébbué Puwangnge sibawa mennang, nenniya najjalékkaiwi sininna paréntana Musa, atan-Na. Dé' namaélo mennang maréngkalinga sibawa turu. Ri laleng taung maseppuloé eppa apparéntanna Hizkia arunna Yéhuda, kota-kotana Yéhuda iya mabbénténgngé nagasai sibawa nacaui Sanhérib, arung Asyur. Na lao ri Sanhérib iya engkaé ri Lakhis, nakiringngi Hizkia iyaé birittaé, “Pasalana. Rimakkuwannanaro, uwéllauwi tennapodo maéloi Puwang pappésauwi aggasarennaro lao ri idi. Sininna natuntu'é Puwang maéloka pennoiwi.” Namappébali Sanhérib makkedaé harusu'i Hizkia kiring lao ri aléna 10.000 kilo péra', sibawa 1.000 kilo ulaweng. Rimakkuwannanaro, sininna péra' iya engkaé ri laleng Bolana Puwangnge sibawa ri laleng kasna saorajaé nakirinni Hizkia lao ri Sanhérib. Ulawengngé ri sisining tange'na Bolana Puwangnge sibawa iya puraé napakkenna Hizkia ri appang-ngappang sumpangngé, naalani sibawa nakiring towi lao ri Sanhérib. Iyakiya iyaro arung Asyur kiringngi polé ri Lakhis séddi pasukang battowa untu' gasai Yérusalém. Iyaro pasukangngé napimpingngi tellu parawira tanré iyanaritu séddi pallima, séddi juru énungeng, sibawa séddi kapala pengawalna arungngé. Lettu'nana ri kotaéro malani mennang onrong ri dare'é, iya riyasengngé Dare Ménatu seddéna sépe iya massolokengngéngngi uwaié polé ri kullang bagiyang yasé'é. Nainappa mennang gora mobbii Arung Hizkia. Na tellu tau pengawalna Hizkia massu méwai mennang sita. Iya tellu pegawéro iyanaritu Elyakim ana' Hilkia kapala ruma tanggana saorajaé, Sébna jurutulisi'na wanuwaé, sibawa Yoah ana' Asaf jurutulisi'na saorajaé. Sala séddinna parawirana Asyurro makkeda lao ri mennang, “Palettukengngi Hizkia iyaé ada-adanna arung Asyur: ‘Magi muwasengngi alému mawatang? Muwasengngiga ada-adaé bawang mulléi sulléiwi siyasa'é sibawa awatangeng tentaraé? Niga muwattuwang, angkanna baraniko méwai Asyur? Mémeng murennuwangngi bantuwanna Maséré, iyakiya iyaro padamuwi pakéi ariyaé untu' tekkeng; mapoloi matti iyaro tekkengngé nanasoppa'i limammu. Makkuwaniro arung Maséré lao ri sininna tau iya maddennuwangngé ri aléna.’ ” Makkedai paimeng iyaro parawira Asyur-é, “Iyaré'ga naullé makkedako makkedaé maddennuwakko ri Puwangnge, Allataalamu? Wettunna Hizkia mapparéntangngi kuwammengngi na tau Yéhudaé sibawa Yérusalém banna massompai ri yolona mézbaé ri Yérusalém, tenniyaga iya naancuru'éro mézba sibawa onrong-ngonrong assompangngé lao ri Puwangnge muto? Makkekkuwangngé ri laleng asenna arung Asyur baranika siyéwa makkedaé rékko riwérékko 2.000 kajunna anyarang, pasti dé' muwappunnai tau singngégaéro untu' tonangiwi! Muwi untu' méwai parawirata iya kaminang mariyawaé, tenniya tokko tandingenna. Iyakiya muwaddénnuwangi muwi Maséré kiring bantuwang karéta musu sibawa pasukang makkinnyarang! Muwasengngi maggasaki sibawa caui wanuwammu tenribantu ri Puwangnge? Puwangnge muto ritu suroki gasai sibawa mancuru'i!” Namakkeda Elyakim, Sébna, sibawa Yoah lao ri parawiraéro, “Puwang, abbicarani sibawa idi ri laleng basa Aram bawang, ripahang muwa. Aja' mupakéi basa Ibranié, napahangngi matti ra'ya'é ri tompo'na témbo'éro.” Nametté iyaro parawiraé, “Ri ikoga bawang sibawa arummu risuroka ri arung Asyur untu' palettu'i iya manennaé? Dé'! Mabbicara tokka lao ri ra'ya' iya tudangngé ri tembo'éro, iya muéwaé sibawang manréi matu tainna sibawa ménungngi matu téména.” Nainappa tettong iyaro parawiraé sibawa gora ri laleng basa Ibrani, “Engkalingai aga iya napowadaé arung Asyur: ‘Aja' mumaélo ribellé ri Hizkia; dé' naulléi passalama'ko. Aja' muwéngkalingai pappalécéna untu' maddennuwang ri Puwangnge. Ajakké muwasengngi maéloi Puwangnge passalama'ko iyaré'ga lawa-lawaiwi tentara Asyur sittaiwi kotamu. Aja' muwéngkalingai Hizkia. Iyya, arung Asyur mappétangngarengngi kuwammengngi massuko polé ri kotaé sibawa manyara. Weddikko matti manré buwa anggoro polé ri palla'mu muto, sibawa péneddingi buwa ara polé ri pommu muto, enrengngé ménung uwaié polé ri bujummu muto, narapi upalétté'ko riséuwaé wanuwa iya maéloé pada sibawa wanuwammu muto. Kuwaro engka palla anggoro iya powassélékengngékko anggoro, sibawa dare gandong iya powassélé'é labbu untu' inanrému. Ri wanuwaéro engka maéga pong zaitun, minnya zaitun sibawa cani. Rékko muturusiwi aga iya upétangngarengngékko, tuwoko matu, dé' mumaté. Aja' muwéngkalingai Hizkia! Banna nabelléko ri laleng makkedanna makkedaé Puwangnge passalama'ko matu. Engkaga naengka déwatana bangsa laingngé passalama'i wanuwanna polé ri akuwasakku? Kégani déwata-déwatana wanuwa Hamat sibawa Arpad? Kégani déwata-déwatana Séfarwaim, Héna, sibawa Iwa? Engkaga polé passalama'i Samaria? Déwata kégana pura paleppe'i wanuwanna polé ri akuwasakku? Pékkugi wedding Puwangnge passalama'i Yérusalém?’ ” Naéngkalinganaro, dé' nappébali pabbanuwana Yérusalém, saba' purani napparéntang Arung Hizkia kuwammengngi namammekko bawang. Nasapé'ni Elyakim, Sébna, sibawa Yoah pakéyanna tanrang masara, nainappa lao laporo'i ri arungngé aga iya puraé napowada parawirana Asyurro. Wettunna naéngkalinga Arung Hizkia laporanna polé ri iya tellu tauwéro, nasapé'ni pakéyanna nanapaké kaing karung tanrang messé, nainappa lao ri Bolana Puwangnge. Nainappa nasuro Elyakim, kapalana saorajaé, Sébna jurutulisi'na wanuwaé, sibawa sining imang iya macowaénna, untu' méwai sita Nabi Yésaya ana' Amos. Paké towi mennang kaing karung. Iyanaé pasenna Hizkia iya napalettu'é mennang lao ri Yésaya, “Iyaé essoé, esso masara; rihukkukki sibawa ripakatuna. Pada-padaki makkunrai iya maéloénna mémmana iyakiya acappurenni awatangeng. Purani nasuro arung Asyur séddi parawira tanréna untu' pakatunai Allataala iya tuwoé. Niga missengngi Puwang Allataalamu méngkalingai pappakatunaéro, sibawa hukkungngi matu iya powadaéngngi! Rimakkuwannanaro assempajanno lao ri Allataala untu' sining tautta iya tuwoé mupa.” Natarimanana paseng polé ri Arung Hizkiaro, nasuroni Yésaya sining suroéro palettu'i pappébaliéwé, “Makkedai Puwangnge, aja'na namétau Datu méngkalingai ada-adanna ata-atanna arung Asyurro makkedaé dé' nawedding naleppessakki Puwangnge. Puwangnge mébbui matu arung Asyur bati-batiwi séuwaé karéba dé'é natongeng angkanna lisu ri wanuwanna muto, nariyuno matu kuwaro.” Lolongenni karéba iyaro parawira Asyur-é makkedaé nasalaini arunna Lakhis sibawa mattengngang mammusu méwai kota Libna, dé' namabéla polé kuwaro. Nalaona iyaro parawiraé kuwaro untu' méwai sita arunnaro. Tarimani karéba arung Asyur makkedaé pasukang Maséré'é iya napimpingngé Tirhaka arung Sudan poléi untu' gasai mennang. Rimakkuwannanaro, kirinni sure' arung Asyur lao ri Hizkia arung Yéhuda. Makkuwaiyé oninna iyaro sure'é, “Aja' muribengnguwang ri jancinna Allataalamu iya muwattuwangngéro makkedaé dé' musempé matu ri laleng limakku. Purani muwéngkalinga makkedaé tungke' wanuwa iya nagasaé arung-ngarung Asyur, naancuru sisengngi. Aja' muwasengngi muwulléi leppe! Wettunna toriyoloku mancuru'i kota Gozan, Haran, sibawa Réséf, enrengngé mpunoi tau Edéngngé iya monroé ri Télasar, dé' muwi séddi polé ri déwata-déwatana mulléi passalama'i mennang. Kégani arung-ngarunna kota Hamat, Arpad, Séfarwaim, Héna sibawa Iwa?” Natarimani Hizkia iyaro sure'é polé risining suroé, nanabacai. Nainappa lao ri Bolana Puwangnge, sibawa pallebba'i iyaro sure'é ri yolona Puwangnge, nainappa massempajang, adanna, “ Puwang, Allataalana Israélié, iya monroé ri yasé'na kérub-é, Iko alé-aléna Allataala iya makuwasaiyéngngi sininna akkarungengngé ri tompo'na linoé. Iko ritu pancajiwi langié sibawa linoé. Puwang, tennapodo tapénessaiwi aga iya kajajiyangngé sibawa idi. Engkalingai sininna pappakatunana Sanhérib lao ri Iko, Allataala iya tuwoé! Riisseng maneng idi, Puwang, makkedaé arung-ngarung Asyur purani napaccappu maéga bangsa sibawa mancuru'i sining wanuwanna mennang. Natunu towi déwata-déwatana mennang sibawa naancuru'i, saba' iyaro déwata-déwataé dé' sises-siseng namakuwasa. Banna mennang dato-dato polé ri ajué sibawa batué ébbu tolinoé. Oh Puwang, Allataalata, leppessakki polé risining tau Asyur-éro, kuwammengngi naissengngi sininna bangsaé ri linoé makkedaé banna Iko alé-aléna Allataala.” Nainappa kiring paseng Yésaya lao ri Arung Hizkia makkedaé selaku pappébalinna sempajanna arungngé, makkedai Puwangnge, “Nacawa-cawaiko sibawa naéllé-kéllé'ko kota Yérusalém, Sanhérib. Muwissegga niga iya mucella-cellaé sibawa mupakatunaro? Iyya, Allataalana Israélié, Allataala iya mapaccingngé! Matempo senna kédomu lao ri Iyya. Kirikko suro untu' mabboro makkedaé nasibawang égana karéta musumu mupatunru'ni sining bulu kaminang matanré ri Libanon. Muwattempowangngi makkedaé mutubbangngi sining aju camara iya kaminang matanré sibawa kaminang magelloé enrengngé bettui sining ale'na iya kaminang marajaé. Muwattempowang towi makkedaé kaliko bujung sibawa ménung uwai ri wanuwa-wanuwa laingngé, sibawa sining prajuri'mu pucca-pucca'i Salo Nil narapi marakko. Dé'paga naengka muwéngkalingai makkedaé iya manennaro pura Urancanani riyolopa nariyolo? Na makkekkuwangngé Upogau'ni. Iyya ritu mpérékko akuwasang untu' mancuru'i kota-kota mabbénténgngé mancaji ruttungeng. Sining tau iya monroé kuwaro dé' pakkullénna; masélengngi mennang sibawa métau. Pada-padai mennang wellaé ri padangngé iyaré'ga wella iya tuwoé ri pabbingeng bolaé, iya marakkoé rékko riseppungngi anging alau iya mapellaé. Iyakiya Uwisseng maneng passalenna alému. Uwisseng aga iya mupogau'é sibawa kégako lao. Uwisseng makkedaé macai senna'ko lao ri Iyya, na purani Uwéngkalinga passalenna atempommuro. Makkekkuwangngé upasangini patteddo ri inge'mu sibawa galang ri bawamu, kuwammengngi ugettengngi lisu lalo ri laleng iya muwolaé wettummu polé.” Nakiring towi Yésaya iyaé pasengngé lao ri Hizkia, “Iyanaé mancaji tanrang matu ri alému. Iyaé taungngé sibawa taung mangoloéwé manréi matu tauwé gandong iya natuwongngé aléna. Iyakiya purairo weddinni mennang mattaneng gandong sibawa anggoro nenniya péneddingiwi wassélé'na. Tau Yéhuda iya tuwoé mupa macommo'i matu pada-pada tanet-taneng iya malamung senna'é ure'na sibawa powassélé buwa. Ri Yérusalém sibawa ri tompo'na Bulu Sion engka matu tau iya salama'é, nasaba purani napattentu Puwangnge makkedaé kajajiyangngi matu iyaro gaué. Iyanaé napowada Puwangnge passalenna arung Asyur: ‘Dé' nauttamakiwi matu Yérusalém iyaré'ga mattémbakeng pana lao ri kotaéro. Prajuri-prajuri iya makkaliyawoé dé' gaga matu iya maddeppériyéngngi iyaro kotaé, sibawa ri mattulilinna dé' naripatettong pétawu akkeppungengngé. Lisui matu arung Asyur lalo ri laleng iya naolaé wettunna polé, temmuttamakiwi kotaéro. Iyya Puwang, pura mabbicara. Uwéwaiwi kota Yérusalém sibawa Ulinrungiwi nasaba alebbirek-Ku muto sibawa nasaba assijancik-Ku sibawa atak-Ku Daud.’ ” Iyatoro wennié napolé Malaéka'na Puwangnge ri akkémanna tau Asyur-é, sibawa mpunoi 185.000 tau prajuri'na. Pappa bajana maéléni tattale sining ujuna mennang. Nasorona Sanhérib arung Asyur nanalisu ri Niniwé. Riséuwaé esso, wettunna mattengngang massompa ri laleng bolana Déwata Nisrokh, riyunoi sibawa peddang ri Adramélékh sibawa Sarézer, ana'-ana' worowanéna. Purairo larini mennang lao ri wanuwa Ararat. Na Esarhadon, ana' worowanéna iya laingngé, mancaji arung sulléiwi. Wettuéro malettangngi Arung Hizkia iya maladde senna'é angkanna céddé'i maté. Naricélléngina ri Nabi Yésaya ana' Amos sibawa makkeda, “Mappasengngi Puwangnge kuwammengngi napappurai sininna urusanna Datu, saba' dé'na najjappa matu Datu. Dé'na namaitta namaté Datu.” Namangolona Hizkia ri témbo'é nainappa massempajang, “ Puwang, éngngerangngi makkedaé iyya'é purana mattumani ri Iko sibawa matinulu enrengngé malempu atikku. Tuli makkuragaka turusiwi élo-Mu.” Nainappa teri Hizkia sibawa masussa. Nasalaini Yésaya Hizkia, iyakiya sangadi dé'napa nassu polé ri seddé tengngana saorajaé, risuroi ri Puwangnge lisu ri Hizkia, arunna umma'na Puwangnge, sibawa palettu'i pasengngéwé, “Iyya, Puwang, Allataala iya nasompaé Daud toriyolomu, pura méngkalingai sempajammu sibawa mitai uwai matammu. Maéloka pajjappako; sangadi laono matu ri Bola-Ku. Maélo-Ka tambaiwi umuru'mu sibawa 15 taung. Iko sibawa kota Yérusalém Upaleppe'ko matu polé ri arung Asyur. Iyaé kotaé maélo-Ka linrungiwi nasaba alebbirek-Ku nenniya nasaba assijancik-Ku sibawa atak-Ku Daud.” Nainappa nasuro tauwé Yésaya peppé buwa ara nanasapuwangngi lettanna arungngé kuwammengngi najjappa. Makkutanani Arung Hizkia, “Aga tanranna makkedaé Puwangnge maélo pajjappaka sibawa makkedaé sangadi laona matu ri Bolanasi Puwangnge?” Nappébali Yésaya, “ Puwangnge mpéréngngi matu tanrang Datu makkedaé narupaiwi jancinna. Makkekkuwangngé, kéga nacinnai Datu: Wajo-wajo ri panunju jang mata esso ébbuna Arung Ahas mallurui 10 jori iyaré'ga soroi 10 jori?” Nakkeda Hizkia, “Untu' mébbui iyaro wajo-wajoé malluru 10 jori, magampang. Rimakkuwannanaro ébbui soro 10 jori.” Massempajanni Yésaya lao ri Puwangnge, nanaébbui Puwangnge soro iyaro wajo-wajoé 10 jori ri panunju jang mata essoéro. Wettuéro arung Babél, iyanaritu Mérodakh-Baladan ana'na Baladan, naéngkalingani makkedaé silalona majjappa Arung Hizkia polé ri lasaé. Nanasurona tauwé tiwi sure' sibawa hadiya lao ri Hizkia. Natarimani Hizkia iyaro sining suroé sibawa nappaitanna lao ri mennang sininna asugirenna, iyanaritu ulaweng sibawa péra'é, rampa-rampa sibawa minnya wangié, enrengngé sininna paréwa tentarana. Dé' muwi séuwa ri saorajaé iyaré'ga ri sinina akkarungenna iya dé'é nappaitangngi lao ri mennang. Namangolo Nabi Yésaya ri Arung Hizkia sibawa makkutana, “Polé kégi iyaro sining tauwé? Aga napowada mennang?” Nappébali Hizkia, “Poléi mennang ri Babél, wanuwa iya mabélaé.” Nakkutanasi Yésaya, “Aga naita mennang ri saorajaé?” Nappébali Hizkia, “Sini-sininnaé! Dé' muwi séddi ri laleng onrong waramparanna saorajaé iya dé'é uwappaitangngi lao ri mennang.” Nanakkeda Yésaya lao ri arungngé, “Makkedai Puwangnge makkedaé narapi matu wettunna sininna asugiremmu ri laleng saorajamu sibawa iya puraé napaddeppungeng toriyolomu lettu essoéwé, ritiwii lao ri Babél. Dé' gaga matu monro. Polé ri ana' eppomu engka riyala matu sibawa ripancaji pegawé saoraja untu' tumaningiwi arung Babél.” Nappébali Arung Hizkia, “Makessitto pasenna Puwangnge iya mupalettukengngékka'ro.” Mappébali makkuwairo nasaba mappikkiri'i: “Assaleng tette muwi amang sibawa damé akkarungekku ri wettu tuwoku.” Curita laingngé passalenna Arung Hizkia, passalenna jasa-jasa abaraningenna, sibawa pékkugi mébbui kullangngé sibawa sépe'é untu' passolo'i uwaié lao ri kotaé, iya manenna riyokii ri laleng kitta Sejarana Arung-ngarunna Yéhuda. Matéi Hizkia, na Manasyé ana'na mancaji arung sulléiwi. Seppulo duwa taung umuru'na Manasyé wettunna mancaji arunna Yéhuda, sibawa mapparéntai ri Yérusalém 55 taung ittana. Asenna indo'na Héfzibah. Madosai Manasyé lao ri Puwangnge, nasaba naccowériwi abiyasang-abiyasang majana bangsa-bangsa iya napaddésu'é Puwangnge polé ri Kanaan wettunna tau Israélié muttamakiwi wanuwaéro. Onrong-ngonrong assompang déwata iya puraé naancuru Hizkia ambo'na napatettongngi paimeng. Patettongngi mézba-mézba untu' massompa lao ri Baal, sibawa mébbu dato-dato Déwi Asyéra, pada-pada iya napogau'é Ahab arunna Israélié. Nasompa towi Manasyé sining wéttowingngé. Puwangnge pura powadai makkedaé Yérusalém iyanaritu onrong ahadéréken-Na sibawa onrong massompa lao ri Aléna, iyakiya kuwaro ri Bolana Puwangnge, purani napatettong Manasyé mézba-mézbaé untu' déwata-déwataé. Ri iya duwa seddéna Bolana Puwang -ngéro patettongngi mézba-mézba untu' assompang lao risining wéttowingngé. Nakkasuwiyangengngi ana'na selaku akkarobangeng ritunu. Napogau' towi Manasyé assanro-sanrongngé, appalakiyangngé, pangissengeng mappalennye-lennye'é, sibawa méllau panunju lao ri roh-roh-é. Madosa senna'i lao ri Puwangnge angkanna napaompoi cai-Na. Lambanna Déwi Asyéra nataroi ri laleng Bolana Puwangnge, padahal passalenna onrongngéro purai makkeda Puwangnge lao ri Daud sibawa Salomo ana' worowanéna, “Bola-Ku sibawa iyaé kota Yérusalém, iya puraé Upilé polé ri yelle'na daérana iya seppulo duwa suku Israélié, iyanaritu onrong iya Upattentué selaku onrong assompang lao ri alé-Ku. Sibawa rékko umma'-Ku Israélié mapatoiwi parénta-Ku sibawa turusiwi hukkung-hukkung iya nabbéréyangngé Musa atak-Ku lao ri mennang, dé' Uleppessangngi matu mennang rirukka polé ri wanuwa iya puraé Uwéréngngi toriyolona mennang.” Iyakiya tau Yéhudaé dé' namatinulu lao ri Puwangnge, mala Manasyé nassabariwi mennang pogau' dosa-dosa iya lebbi majaé naiya dosa iya napogau'é bangsa-bangsa iya napaddésu'é Puwangnge polé ri Kanaan wettunna umma Israélié muttamakiwi wanuwaéro. Rimakkuwannanaro naolai sining nabié, ata-atanna Puwangnge, makkedai Puwangnge, “Maja senna'i Arung Manasyé. Lebbi majai pangkaukenna naiya pangkaukenna tau Kanaangngé. Nasibawang barahala-barahala iya naébbué, nassabariwi namadosa tau Yéhudaé. Rimakkuwannanaro, Iyya, Puwang Allataala iya nasompaé umma Israélié, maélo papolé abala iya battowa senna'é ri yasé'na Yérusalém sibawa Yéhuda angkanna tungke' tau iya méngkalingaéngngi passalenna gauéro tassélengngi matu. Maélo-Ka hukkungngi Yérusalém pada-pada Uhukkunna Samaria sibawa Ahab arunna Israélié enrengngé wija-wijanna. Maélo-Ka pépaccingiwi Yérusalém pada-pada penné iya puraé ribissai sibawa ripaoppang. Pabbanuwana iya monroé mupa Uleppessangngi matu mancaji inanréna sining balinna, iya pabbélampélangngéngngi matu mennang sibawa rappai wanuwanna. Iya manennaro Upogau'i matu lao ri umma'-Ku nasaba madosai mennang lao ri Iyya sibawa paompoi cai-Ku mappammulai toriyolona massu polé ri Maséré lettu essoéwé.” Ri lainnaé mébbui tau Yéhudaé madosa lao ri Puwangnge ri laleng massompana barahala, nauno towi Manasyé maéga senna tau iya dé'é napasala angkanna massolo'i daraé kégi-kégi ri Yérusalém. Curita laingngé passalenna Arung Manasyé sibawa passalenna dosa-dosa iya napogau'é, riyokii ri laleng kitta Sejarana Arung-ngarunna Yéhuda. Matéi Manasyé sibawa rikuburu ri tammenna saorajaé, iyanaritu Tammeng Uza. Amon ana' worowanéna mancaji arung sulléiwi. Duwappulo duwa taung umuru'na Amon wettunna mancaji arunna Yéhuda sibawa mapparéntai ri Yérusalém duwattaung ittana. Indo'na riyasengngi Mésulémét ana'na Harus, tau Yotba. Pada-pada ambo'na, madosa towi lao ri Puwangnge. Naturusiwi sining pangkaukenna ambo'na, sibawa massompa barahala-barahala iya nasompaé ambo'na. Dé' natuwo situru élona Puwangnge, mala nasalaiwi Puwangnge, Allataala iya nasompaé toriyolona. Sikongkolo'i pegawé-pegawénna Arung Amon méwai sibawa mpunoi ri saorajaé. Iyakiya ra'ya' Yéhuda mpunoi sining pabbunona iyaro Arung Amon, nainappa naakka Yosia ana'na mancaji arung. Curita laingngé passalenna Amon riyokii ri laleng kitta Sejarana Arung-ngarunna Yéhuda. Rikuburu'i Amon ri kuburu Tammeng Uza. Yosia ana'na mancaji arung sulléiwi. Aruwa taung umuru'na Yosia wettunna mancaji arunna Yéhuda, namapparéntai ri Yérusalém 31 taung ittana. Indo'na riyasengngi Yédida ana' Adaya, polé ri Bozkat. Napogau'i Yosia iya pésennangiyéngngi atinna Puwangnge. Naccowériwi baténa Arung Daud toriyolona, sibawa turusiwi sininna hukkunna Allataala sibawa sukku. Suroi mabbéréyangngi iyaro sining dowié lao risining panganrowang jama-jamang appédécéngengngé ri Bolana Puwangnge. Hasuru'i mennang nakkégunang iyaro dowié untu' mpajai sarona sining panré ajué, tukang bolaé, sibawa tukang batué, enrengngé melli aju sibawa batu iya riyapparelluwangngé. Iyaro sining panganrowang jama-jamangngé malempu senna, jaji dé' naparellu riyéllauwi laporang dowi polé ri mennang.” Napalettu'ni Safan paréntana arungngé lao ri Hilkia, nainappa Hilkia curitangengngi Safan makkedaé naruntu'ni kitta hukkung-hukkunna Puwangnge ri Bolana Puwangnge. Nabbéréyanni Hilkia iyaro kitta'é lao ri Safan, nanabacai Safan. Purairo lisuni Safan lao ri arungngé nanalaporo'i makkedaé dowi iya ritaroé ri Bolana Puwangnge purani nala sibawa nabbéréyang sining atanna arungngé lao risining panganrowang jama-jamang appédécéngengngé ri Bolana Puwangnge. Nainappa makkeda Safan, “Hilkia mpérékka iyaé kitta'é.” Nainappa nabacangeng Safan arungngé iyaro kitta'é. Naéngkalingana lise'na iyaro kitta'é, nasapé-sapé'ni arungngé pakéyanna nasaba messéi. Nainappa nabbéréyang arungngé iyaé paréntaé lao ri Imang Hilkia, Ahikam ana' Safan, Akhbor ana' Mikha, Safan jurutulisi'na wanuwaé, sibawa Asaya ajudanna arungngé: “Laono muwakkutanangekka silaong sininna ra'ya' Yéhuda ri Puwangnge passalenna lise'na kitta'éwé. Macayii Puwangnge lao ri idi nasaba toriyolota dé' napajoppai sining parénta iya tarokié ri lalenna.” Nalaona Hilkia, Ahikam, Akhbor, Safan sibawa Asaya méllauwi séddi makkunrai riyaseng Hulda. Séddiwi nabi iya monroé ri akkampongeng mabarué ri Yérusalém. Lakkainna riyaseng Salum ana' Tikwa, eppona Harhas; pangurusu pakéyang assompangngé ri Bolana Puwangnge. Puranana naéngkalinga Hulda pappakatajanna mennang, nasuroni mennang lisu ri arungngé sibawa palettu'i ada-adanna Puwang -ngéwé: “Maélo-Ka hukkungngi Yérusalém sibawa sininna pabbanuwana pada-pada iya tarokié ri laleng kitta iya nappaé nabaca arungngé. Nasalaina' mennang sibawa makkasuwiyangeng akkarobangeng lao ri déwata-déwata laingngé. Sininna iya napogau'é mennang napaompoi cai-Ku. Macai-Ka lao ri Yérusalém, na cai-Ku dé' nawedding ripasoro. Iyakiya passalenna Arung Yosia, iyanaé pasek-Ku, Puwang Allataalana Israélié, ‘Puranana muwéngkalinga aga iya tarokié ri laleng kitta'éro, massesse kaléko sibawa pakariyawai alému ri yolo-Ku. Purani uwancang untu' hukkungngi Yérusalém sibawa pabbanuwana. Maélo-Ka pancajiwi iyaro kotaé séddi pakkitang iya mappakatau-taué, sibawa asenna Yérusalém Upancajiwi matu aseng abusungeng. Iyakiya wettunna muwéngkalinga passalenna ancamak-Kuro teriko sibawa sapé'i pakéyammu tanrang masara. Purani Uwéngkalinga sempajammu, rimakkuwannanaro pahukkungengngé ri yasé'na Yérusalém dé' matu Upatakkennai ri wettu tuwomu mupa. Matéko matu sibawa damé.’ ” Nalisuna iyaro sining suroé lao ri arungngé sibawa palettu'i pasengngéro. Naobbini Arung Yosia sininna pamimpinna Yéhuda sibawa Yérusalém. Purairo napparéntanni arungngé lao ri Imang Lompo Hilkia, sining imang pabbantué sibawa sining pengawal iya jagaé ri sumpang Bolana Puwangnge, kuwammengngi napassui polé ri Bolaéro sininna pakkakkasa iya ripaké untu' sompai Baal, Déwi Asyéra, sibawa sining wéttowingngé. Sininna barangngéro natununi Arung Yosia ri saliweng kota seddéna Lompo Kidron, nainappa awunna ritiwi ri Bétel. Napaléssoni sining imang iya puraé naakka arung-ngarung Yéhuda untu' majjama ri onrong assompang déwataé ri kota-kota Yéhuda sibawa seddéna Yérusalém; makkuwatoro sining imang iya makkasuwiyangengngé akkarobangeng lao ri Baal, mata essoé, kétengngé, plani'é sibawa sining wéttowingngé. Napassuni dato-dato'na Déwi Asyéra polé ri Bolana Puwangnge, naritiwi ri saliweng kota ri Lompo Kidron. Kuwaniro ritunu iyaro dato-dato'é, nainappa ritettu osinna gangka manenné, na awunna riyassiyamporengngi ri yasé'na akkuburukeng samaé. Bili'-bili'é ri laleng Bolana Puwangnge iya napaké sining cakkuribang bola-bola déwataé untu' pogau'i accakkuribangengngé selaku assompang lao ri déwataé, naancuru'i. (Ri bili'-bili'éro sining makkunraié tennungngi kaing untu' napaké ri laleng assompangngé lao ri Déwi Asyéra.) Tofét, iyanaritu onrong assompang déwataé ri Lompo Hinom, ripanajisi'ni. Nanallalengiwi dé'na gagana tau iya weddingngé makkasuwiyangengngi ana'na selaku akkarobangeng ritunu untu' Déwa Molokh. Sininna anyarang iya napallaingngé sining arung Yéhuda untu' assompangngé lao ri mata essoé riyabbéyanni, sibawa karéta-karéta iya ripaké ri laleng assompangngéro ritununi. (Iyaro karéta-karétaé engkai ri seddéna Bolana Puwangnge – seddéna pintu gerbangngé – dé' namabéla polé ri bili'-bili' onrong naonroiyé Natan Mélékh, séddiwi pegawé tanré.) Mézba-mézba iya napatettongngé arung-ngarunna Yéhuda ri pabbingengngé ri yasé'na bili'-bili'na Arung Ahas, riyancuru'ni. Makkuwatoro mézba-mézba iya napatettongngé Arung Manasyé ri iya duwa seddéna Bolana Puwangnge, nacabbu'i Yosia, nainappa nabbéyang ri Lompo Kidron. Makkuwatoro mézba-mézbaé ri bagiyang alauna Yérusalém, seddé yattanna Bulu-bulu Majaé ripanajisi'ni. Iyaro mézba-mézbaé napatettongngi Arung Salomo untu' sompai déwata-déwata iya mappakaciddi-ciddi'é – iyanaritu Asytorét déwinna bangsa Sidongngé, Kamos déwatana bangsa Moab-é, sibawa Milkom déwatana bangsa Amongngé. Tugu-tugu déwataé sibawa dato-dato'na Déwi Asyéra naruttunni, nainappa tana kégi ripatettong tugu-tugué sibawa dato-dato'éro, natébunni Yosia sibawa buku-buku tau. Nasolangi towi onrong assompangngé ri Bétel iya napatettongngé Arung Yérobéam ana' Nébat – arung iya puraé nassabariwi namadosa tau Israélié. Nainappa nareppa Yosia mézbaé ri onrong assompangngéro, sibawa tunui silaong dato-dato'na Déwi Asyéra iya engkaé kuwaro. Nainappa giling Yosia, nanaitai siyagangngaré tampung ri tompo'na bulué. Nanasuroni tauwé tunui tampungngéro, sibawa passui buku-bukunna nanatunui ri mézba iya mattengngangngé ritunuro. Mappakkuwaniro carana panasiji'i iyaro mézbaé. Nakajajiyanna aga iya nabotoé riyolo nabinna Puwangnge wettunna Arung Yérobéam tettong ri seddéna mézbaéro riséuwaé ramé-ramé. Purairo naitani Arung Yosia séddi tampung laissi. Namakkutana, “Tampunna niga iyaé?” Nappébali sining tau Bétel-é, “Iyaro tampunna séddi nabinna Puwangnge iya puraé lao kuwaé polé ri Yéhuda, sibawa botoi gau'-gau' iya silalonaé napogau' Datu lao ri mézbaéwé.” Napparénta arungngé, “Aja' nariyagaga iyaro tampungngé. Leppessangngi buku-bukunna kuwaro, aja' naripalétté!” Na buku-bukunna nabi polé ri Yéhudaro dé' nariyagaga; makkuwatoro buku-bukunna nabi polé ri Samaria iya ritampungngé kuwaro. Ri tungke' kota ri Israél, naruttungngi Arung Yosia sininna onrong assompang déwata iya napatettongngé arung-ngarung Israélié, sibawa iya puraé nassabariwi Puwangnge namacai. Aga pura napogau' Arung Yosia ri Bétel, napogau' towi iyaro lao ri mézba-mézbaé ri sininna Israélié. Sininna imang iya majjamaé ri onrong-ngonrong assompang déwataé naunoi ri yasé'na mézba-mézba kégi mennang majjama. Sibawa ri tungke' mézbaéro natunui Yosia buku-bukunna tauwé. Purairo lisuni ri Yérusalém. Nainappa napparéntang Arung Yosia lao ri ra'ya'é untu' ramé-raméiwi Paskaé pada-pada iya tarokié ri laleng kitta Assijancingngé Sibawa Puwangnge. Nanallalengiwi napakalebbii mennang Puwangnge, Allataalana. Mappammulai wettunna bangsa Israélié riparénta ri pabbarani-pabbaranié dé'pa naengka tau arung Israél iyaré'ga arung Yéhuda iya ramé-raméiyéngngi Paskaé pada-padaro. Banna ri taung maseppuloé aruwa apparéntanna Yosiaro nappai riramé-raméi Paskaéssi ri Yérusalém untu' pakalebbii Puwangnge. Untu' pogau'i hukkung-hukkung iya tarokié ri laleng kitta iya naruntu'é Imang Lompo Hilkia ri Bolana Puwangnge, sininna pangobbi waliyalaé sibawa pappalakiyaé ripaddésu'ni ri Arung Yosia polé ri Yérusalém sibawa polé ri sininna Yéhuda, nainappa nabbéyang sininna déwata ruma tanggaé, barahalaé sibawa barab-barang iya napaké untu' assompang déwata-déwata. Dé'pa naengka arung pada-pada Arung Yosia iya mattumanié ri Puwangnge sibawa sukku atinna, sibawa mappaitangngi iyaro ri laleng atuwo-tuwonna sibawa pangkaukenna, situru sibawa sininna hukkung iya engkaé ri laleng Kitta'na Musa. Muwi labe'na Arung Yosia, dé'na gaga arung iya pada-padaé aléna. Iyakiya pangkaukenna Arung Manasyé pura paompoi cai-Na Puwangnge lao ri Yéhuda; na iyaro cai-Na dé'pa nasoro. Makkedai Puwangnge, “Aga iya puraé Upogau' lao ri Israélié, Upogau' towi matu lao ri Yéhuda. Upalii matu tau Yéhudaé polé ri wanuwa iya Uwéréngngéngngi mennang. Usampéyangngi matu Yérusalém, kota Upilé, makkuwatoro Bola-Kué, iya siturué adak-Ku mancajiwi matu onrong assompang lao ri Iyya.” Umuru'na Yoahas wettunna mancaji arunna Yéhuda 23 taung, namapparéntai ri Yérusalém tellumpuleng ittana. Indo'na riyasengngi Hamutal ana' Yérémia polé ri kota Libna. Madosai Yoahas lao ri Puwangnge pada-pada toriyolona. Maccappa'i apparéntanna Yoahas wettunna Nékho arung Maséré tawangngi ri Ribla, ri daéra Hamat, sibawa passai Yéhuda makkamaja pakkasuwiyang lao ri aléna singngéga 3.400 kilo péra' sibawa 34 kilo ulaweng. Nainappa Arung Nékho makkai ana' worowanéna Yosia iya riyasengngé Elyakim mancaji arunna Yéhuda, sibawa sulléiwi asenna Elyakim mancaji Yoyakim. Yoahas natiwii ri Maséré nakkuwaniro maté. Untu' mpajai pakkasuwiyang iya natuntu'é Nékho arung Maséré, léléi sima Arung Yoyakim polé ri ra'ya'é situru amampungenna mennang tungke'-tungke'. Umuru'na Yoyakim wettunna mancaji arunna Yéhuda 25 taung, namapparéntai ri Yérusalém 11 taung ittana. Indo'na riyasengngi Zébuda, ana'na Pédaya polé ri kota Ruma. Madosai Yoyakim lao ri Puwangnge pada-pada toriyolona. Ri wettu apparéntanna Arung Yoyakim, Nébukadnézar arung Babél gasai sibawa caui Yéhuda. Telluttaung ittana Yoyakim tunru lao ri Nébukadnézar, iyakiya ri munri maronta'i. Nakiringngi Puwangnge garembolang-garembolang massenjataé polé ri bangsa Babél-é, Siriaé, Moab-é sibawa Amongngé untu' méwai Yoyakim sibawa paccappui Yéhuda, situru sibawa aga iya puraé Napowada naolai sining nabié, ata-atan-Na. Mémeng gau'éro harusu'i kajajiyang, nasaba purai napowada Puwangnge makkedaé bangsa Yéhudaé ripalii matu polé ri wanuwa iya riwéréngngéngngi ri Puwangnge. Ripalii mennang nasaba sininna dosa iya napogau'é Arung Manasyé; utamana nasaba sininna abbunowang iya napogau'é lao risining tau iya dé'é napasala. Dé' namaélo Puwangnge maddampengengngi Manasyé nasaba sining pangkaukennaro. Umuru'na Yoyakhin wettunna mancaji arunna Yéhuda 18 taung, namapparéntai ri Yérusalém tellumpuleng ittana. Indo'na riyasengngi Néhusta ana'na Elnatan, polé ri Yérusalém. Pada-pada ambo'na, madosa towi Yoyakhin lao ri Puwangnge. Ri laleng wettu apparéntanna Yoyakhin, pasukang Babél iya napimpingngé parawira-parawirana Nébukadnézar, malluru gasai Yérusalém, sibawa keppungngi kotaéro. Wettunna rikeppung kotaéro, aléna Nébukadnézar lao ri Yérusalém, nainappa Arung Yoyakhin silaong indo'na, ana'-ana'na, parawira-parawirana enrengngé sining pegawé saorajaé manyarani lao ri Nébukadnézar. Nainappa ritawanni Yoyakhin. Kajajiyangngi gau'éro ri taung maaruwaé apparéntanna Nébukadnézar. Sininna pakkakkasa ulaweng iya naébbué Salomo untu' Bolana Puwangnge, nasolangini Nébukadnézar. Nainappa sininna barang mangke'é iya engkaé ri Bolaéro sibawa saorajaé natiwii ri Babél. Iya manennaro kajajiyangngi situru sibawa aga iya puraé napowada Puwangnge ri yolona. Nainappa Nébukadnézar nakka Matanya, amuréna Yoyakhin, mancaji arunna Yéhuda, sibawa sulléiwi asenna mancaji Zédékia. Umuru'na Zédékia wettunna mancaji arunna Yéhuda 21 taung. Mapparéntai ri Yérusalém 11 taung ittana. Indo'na riyasengngi Hamutal, ana' Yérémia polé ri kota Libna. Pada-pada Arung Yoyakhin, madosa towi Arung Zédékia lao ri Puwangnge. Macai senna'i Puwangnge lao ri pabbanuwana Yérusalém sibawa tau Yéhudaé angkanna dé'na Najampangiwi mennang. Nainappa maronta Zédékia lao ri Nébukadnézar arung Babél. Rimakkuwannanaro poléni Nébukadnézar sibawa sininna tentarana nagasai Yérusalém ri tanggala seppulona uleng seppulo ri laleng taung maaséraé apparéntanna Zédékia. Patettonni mennang markas ri saliweng kota, patettong témbo' akkeppungeng, sibawa matteru keppungngi kotaéro narapi taung maseppuloé séddi apparéntanna Zédékia. Ri tanggala maasérana uleng eppa taungngéttoro wettunna akkadérengngé masero senna angkanna dé' sisenna nappunnai anré ra'ya'é, nalepponi balié témbo'na kotaé. Iyaro wennié, namuni tau Babél-é mattengngang keppungngi kotaéro, sininna tentara Yéhudaé lariwi mattuju ri Lompo Yordan. Laloi mennang ri laleng tammeng saorajaé, nainappa massu lalo ri pintu gerbang iya pasisumpungngéngngi iya duwa témbo'é ri onrongngéro. Iyakiya tentara Babél nalellungngi Arung Zédékia, sibawa tikkengngi ri tanéténa Yérikho. Sininna ana' buwana larini salaiwi. Nainappa ritiwi Arung Zédékia ri Arung Nébukadnézar ri kota Ribla, naripateppai pahukkungeng maté. Riyunoi ana'-ana'na ri yolona matanna. Purairo ricukkéni matanna Zédékia, naribalenggu naritiwi ri Babél. Ri tanggala pitunna uleng lima ri laleng taung maseppuloé aséra apparéntanna Nébukadnézar arung Babél, laoni ri Yérusalém séddi tau iya riyasengngé Nébuzaradan. Pappangajanai sibawa pallima tentarana Nébukadnézar. Natununi Nébuzaradan Bolana Puwangnge, saorajana arungngé, sibawa bolana sininna tomariyoloé ri Yérusalém. Nainappa sininna ana' buwana ruttungngi témbo'-témbo'na kotaéro. Nainappa ra'ya' iya engkaé mupa ri kotaé, iyanaritu sining pajjama-jama maccaé iya nasésaé, sining tau kasiyasié sibawa sining tau iya lariénna maccowé ri tau Babél-é, iya manenna natiwii Nébuzaradan ri Babél. Iyakiya sibagiyang ra'ya' iya kaminang kasiyasié sibawa dé'é nappunnai waramparang nasalaiwi ri Yéhuda sibawa nasuroi jamai palla anggoro'é sibawa sining dare'é. Alliri-alliri gessaé sibawa karéta-karétaé ri Bolana Puwangnge silaong kullang gessaé nareppa'i tau Babél-é, nainappa natiwi maneng gessana lao ri wanuwanna mennang. Natiwi towi mennang barab-barangngéwé: kénro, onrong awunna mézbaé, pakkakkasa pajjennangengngé, mangko-mangko untu' pattarimai dara olokolo iya rigéréé untu' akkarobangeng, mangko-mangko untu' mattunu dupa, sibawa sininna barang gessa laingngé iya ripaké untu' upacara assompang. Barab-barang ulawengngé sibawa péra'é, muttama'ni mangko-mangko baiccu'é sibawa penné-penné untu' baraé aléna Nébuzaradan malai. Barab-barang gessa iya naébbué Arung Salomo untu' Bolana Puwangnge, iyanaritu iya duwa allirié, karéta-karétaé sibawa kullang battowaé, iya manennaro makkuwamani tane'na angkanna dé' naritimbang. Iya duwa alliri gessaéro pada; tungke'-tungke' tanréna 8 météré sibawa séddi ulu alliri polé ri gessaé tanréna 1,3 météré. Ri mattulilinna tungke' ulu alliriéro engka anengeng sibawa bélo-bélo buwa dalima polé ri gessaé. Iya manenna tauwéro natiwii lao ri Arung Nébukadnézar ri kota Ribla, ri daérana Hamat. Kuwaniro mennang risissa nainappa riyuno. Makkuwaniro sining tau Yéhudaé ritiwi polé ri wanuwanna mennang lao ri appalirengngé. Purairo riyakkani Gedaliya ana' Ahikam sibawa eppona Safan, ri Nébukadnézar mancaji gubernur ri Yéhuda untu' paréntai sininna tau iya monroé mupa kuwaro. Wettunna sining parawira sibawa prajuri'na Yéhuda iya dé'é namanyara lao ri Babél naéngkalinga passalenna angakkarengngéro, lao manenni ri Gedalya ri Mizpa. Iyaro sining parawiraé iyanaritu Ismaél ana' Nétanya, Yohanan ana' Karéah, Séraya ana' Tanhumét polé ri kota Nétofa, sibawa Yazanya polé ri kota Maakha. Makkedani Gedalya lao ri iya maneng mennang, “Dé' muparellu métau ri pajaba-pajaba pamaréntana Babél. Onro bawanno ri wanuwattaé sibawa mancaji atanna arung Babél. Utanggung salama'ko matu.” Iyakiya ri uleng mapitué taungngéro Ismaél ana' Nétanya sibawa eppona Elisama iya wija-wijanna arungngé mupa, laowi silaong 10 tau ri Mizpa. Nagasai mennang sibawa naunoi Gedalya silaong tau Yéhudaé sibawa tau Babél iya engkaé silaong Gedalya kuwaro. Na sininna ra'ya' Yéhuda, sugi iyaré'ga kasiyasi, silaong sibawa sining parawiraé larini lao ri Maséré nasaba métaui lao ri tau Babél-é. Ri tanggala duwappulona pitu uleng seppulo duwa ri laleng taung matelluppuloé pitu purana ritiwi Yoyakhin ri appalirengngé, Ewil-Mérodakh mancaji arunna Babél. Ri taungngéttoro nappaitangngi paressé babuwana lao ri Yoyakhin, naleppessangngi polé ri tarungkué, nenniya gaukengngi sibawa makessing. Nawérénni tudangeng Yoyakhin iya lebbi matanré naiya arung-ngarung laing iya ripaliétto ri Babél. Ana'-ana' worowanéna Yafét iyanaritu Gomer, Magog, Madai, Yawan, Tubal, Mésékh sibawa Tiras. Mennang iyanaritu toriyolona bangsa-bangsa iya riteppué situru asenna mennang. Wija-wijanna Gomer iyanaritu tau Askénas, Rifat sibawa Togarma. Wija-wijanna Yawan iyanaritu tau Elisa, Spanyol, Siprus sibawa Rodes. Ana'-ana' worowanéna Ham iyanaritu Kus, Maséré, Libia sibawa Kanaan. Mennang iyanaritu toriyolona bangsa-bangsa iya riteppué situru asenna mennang. Wija-wijanna Kus iyanaritu tau Séba, Hawila, Sabta, Raéma sibawa Sabtékha. Wija-wijanna Raéna iyanaritu tau Syéba sibawa Dédan. ( Kus mappunnai séddi ana' worowané riyaseng Nimrod, iya mancaji arung poré iya mammulangngé ri linoé.) Wija-wijanna Maséré iyanaritu tau Lidia, Anamim, Léhabim, Naftuhim, Patrusim, Kasluhim sibawa Kréta. Mennang iyanaritu toriyolona tau Filistingngé. Ana'-ana' worowanéna Kanaan iyanaritu Sidon, iya macowaé sibawa Hét. Mennang iyanaritu toriyolona bangsa-bangsa iya riteppué situru asenna mennang. Kanaan iyanaritu toriyolona towi tau Yébusié, Amorié, Girgasié, Héwi, Arki, Sini, Arwadi, Semari sibawa Hamati. Ana'-ana' worowanéna Sém iyanaritu Elam, Asyur, Arpakhsad, Lud, Aram, Us, Hul, Géter sibawa Mésékh. Mennang iyanaritu toriyolona bangsa-bangsa iya riteppué situru asenna mennang. Arpakhsad iyanaritu ambo'na Sélah, na Sélah ambo'na Eber. Eber mappunnai duwa ana' worowané; iya mammulangngé riyasengngi Pélég nasaba ri wettunnai natabbagé-bagé bangsa-bangsaé ri linoé; iya maduwaé riyasengngi Yoktan. Wija-wijanna Yoktan iyanaritu tau Almodad, Séléf, Hazar-Mawét, Yérah, Hadoram, Uzal, Dikla, Ebal, Abimaél, Syéba, Ofir, Hawila sibawa Yobab. Abraham mappunnai duwa ana' worowané, iyanaritu Ishak sibawa Ismaél. Iyanaé ana'-ana'na Ismaél: Nébayot, iya macowaé, nainappa Kédar, Adbeel, Mibsam, Misma, Duma, Masa, Hadad, Téma, Yétur, Nafis sibawa Kédma. Abraham mappunnai gundi asenna Ketura. Polé ri gundi'naro lolongengngi ana'-ana' worowané iya riyasengngé Zimran, Yoksan, Médan, Midian, Isybak sibawa Suah. Yoksan mappunnai ana'-ana' worowané iya riyasengngé: Syéba sibawa Dédan. Midian mappunnai ana'-ana' worowané iya riyasengngé: Efa, Efer, Hanokh, Abida sibawa Eldaa. Ishak ana' Abraham mappunnai duwa ana' worowané, iyanaritu Esau sibawa Yakub (iya riissengngétto selaku Israél). Ana'-ana' worowanéna Esau iyanaritu Elifas, Réhuél, Yéus, Yaélam sibawa Korah. Elifas iyanaritu toriyolona suku Téman, Omar, Zéfi, Gaétam, Kénas, Timna sibawa Amalék. Réhuél iyanaritu toriyolona suku Nahat, Zérah, Syama sibawa Miza. Bangsa Edongngé poléi ri suku Timna, Alya, Yétét, Ohalibama, Ela, Pinon, Kénas, Téman, Mibzar, Magdiél sibawa Iram, tungke'-tungke' situru aseng kapala sukunna. Ana' worowanéna Yakub engka seppulo duwa tau: Rubén, Siméon, Léwi, Yéhuda, Isakhar, Zébulon, Dan, Yusuf, Bényamin, Naftali, Gad, Asyer. Pérés mappunnai duwa ana' worowané, iyanaritu Hézron sibawa Hamul. Zérah mappunnai lima ana' worowané: Zimri, Etan, Héman, Kalkol sibawa Dara. Akhan ana' Karmi wija-wijanna Zérah, papoléi abala ri umma Israélié nasaba malai barang rappa ammusureng iya ripallaingngé untu' Allataala. Ana' worowanéna Etan iyanaritu Azarya. Hézron mappunnai tellu ana' worowané: Yérahmeel, Ram sibawa Kaléb. Jori assossorenna polé ri Ram lettu ri Isai iyanaritu makkuwaiyé: Ram Aminadab Nahason (séddiwi tau ponggawana suku Yéhuda) Salmon Boas Obéd Isai. Ana' worowanéna Isai engka pitu. Iyanaé aseng-ngasenna mennang situru rappi umuru'na: Eliab, Abinadab, Siméa, Nétaneel, Radai, Ozem, Daud. Mappunnai towi Isai duwa ana' makkunrai: Zéruya sibawa Abigail. Zéruya mappunnai tellu tau ana': Abisai, Yoab sibawa Asaél. Abigail kawingngi sibawa Yéter wijanna Ismaél. Mappunnai mennang séddi ana' worowané riyaseng Amasa. Kaléb ana' Hézron kawingngi sibawa Azuba nanalolongeng séddi ana' makkunrai riyaseng Yériot. Iyaé Yériot mappunnaiwi tellu ana' worowané: Yézer, Sobab, sibawa Ardon. Maténana Azuba, kawingngi Kaléb sibawa Efrat nanalolongeng séddi ana' worowané riyaseng Hur. Ana' worowanéna Hur riysengngi Uri sibawa eppona riyasengngi Bézaleel. Wettunna Hézron makkéumuru 60 taung kawingngi sibawa ana'daranna Giléad, ana' Makhir. Lolongengngi mennang séddi ana' worowané riyaseng Ségub, na Ségub lolongengngi séddi ana' worowané riyaseng Yair, iya mappunnaiyé 23 désa ri daérana Giléad. Iyakiya akkarungeng Gésur sibawa Aram caui 60 désa ri daéraéro muttama'ni désa-désana tau Yair-é, désa Kénat, enrengngé désa-désa baiccu'é ri seddéna. Sininna tau iya monroé kuwaro iyanaritu wija-wijanna Makhir ambo'na Giléad. Maténana Hézron, Kaléb ana'na kawingngi sibawa Efrat jandana ambo'na. Ana'na mennang iya worowané riyasengngi Asyur; aléna ritu patettongngi kota Tékoa. Yérahmeel ana' macowana Hézron mappunnai lima ana' worowané: Ram iya macowaé, nainappa Buna, Oren, Ozem sibawa Ahia. Ana' worowanéna Onam engka duwa tau: Samai sibawa Yada. Samai mappunnai towi duwa ana' worowané, iyanaritu Nadab sibawa Abisur. Abisur kawingngi sibawa Abihail nalolongeng mennang duwa ana' worowané: Ahban sibawa Molid. Nadab kakana Abisur mappunnai towi duwa ana' worowané iya riyasengngé Séléd sibawa Apaim, iyakiya matéi Séléd temmappunnai ana' worowané. Apaim iyanaritu ambo'na Yiséi, Yiséi ambo'na Sésan, na Sésan ambo'na Ahlai. Yada padaorowanéna Samai mappunnai duwa ana' worowané riyaseng Yéter sibawa Yonatan. Iyakiya Yéter matéi temmappunnai ana' worowané. Yonatan mappunnai duwa ana' worowané, iyanaritu Pélét sibawa Zaza. Iya maneng mennang iyanaritu wijanna Yérahmeel. Sésan dé' nappunnai ana' worowané, banna ana' makkunrai. Atanna, séddiwi tau Maséré riyaseng Yarha, napasiyalai sibawa sala séddinna ana'na. Lolongengngi mennang ana' worowané iya riyasengngé Atai. Kaléb padaorowanéna Yérahmeel mappunnai séddi ana' worowané riyaseng Mésa. Ana' macowai. Mésa iyanaritu ambo'na Zif, Zif ambo'na Marésa. Marésa ambo'na Hébron. Hébron mappunnai eppa ana' worowané: Korah, Tapuah, Rékém sibawa Séma. Séma iyanaritu ambo'na Raham. Eppona Séma riyasengngi Yorkéam. Rékém kakana Séma iyanaritu ambo'na Samai; Samai ambo'na Maon, na Maon ambo'na Bét-Zur. Kaléb mappunnaiwi gundi riyaseng Efa. Lolongengngi mennang tellu ana' worowané riyaseng Haran, Moza aibawa Gazes. Mappunnai towi Haran ana' iya riyasengngé Gazes. ( Séddi tau riyaseng Yohdai iya mappunnaiyé enneng ana' worowané: Régém, Yotam, Gésan, Pélét, Efa sibawa Saaf.) Kaléb mappunnai gundi laing riyaseng Maakha. Nasibawang aléna lolongengngi Kaléb duwa ana' worowané riyaseng: Séber sibawa Tirhana; nainappa lolongeng mennang duwa ana' worowanési riyaseng: Saaf sibawa Séwa. Saaf iyanaritu patettongngi kota Madmana, sibawa Séwa patettongngi kota Makhbéna sibawa Gibéa. Mappunnai towi Kaléb séddi ana' makkunrai riyaseng Akhsa. Iyaé mangoloé iyanaritu wijannato Kaléb: Hur iyanaritu ana' macowana polé ri Kaléb sibawa bainéna iya riyasengngé Efrat. Syobal ana' Hur iyanaritu patettongngi kota Kiryat-Yéarim. Salma ana'na iya maduwaé iyanaritu patettongngi kota Bétléhém; sibawa Haréf ana'na iya matellué patettongngi kota Bét-Gader. Syobal patettongngi kota Kiryat-Yéarim iyanaritu toriyolona tau Haroé, toriyolona sitengnga pabbanuwana Ménuhot, sibawa toriyolona appang-ngappang iya monroé ri Kiryat-Yéarim, iyanaritu appang Yétri, Puti, Sumati sibawa Misrai. (Pabbanuwana kota Zora sibawa Esytaol iyanaritu sining tau iya assalennaé polé ri appang-ngappangngéro.) Salma pappatettonna kota Bétléhém iyanaritu toriyolona tau Nétofaé, tau Atarot-Bét-Yoab-é, sibawa tau Zorié, iyanaritu sala séddinna polé ri iya duwa appang iya monroé ri Manahti. Polé ri appanna Tirati, Simati sibawa Sukati iya monroé ri kota Yabés engka sining tau iya maccaé ri laleng passaleng marokié sibawa mallémbaé sure'-sure' penting. Mennang iyanaritu tau Kéni iya kawingngé sibawa tau Rékab. Iya enneng ana' worowanéna Daudro jajiwi ri Hébron onronna Daud mapparénta pituttaung sitengnga ittana. Ri Yérusalém, mapparéntai Daud 33 taung ittana, na maéga ana' worowanéna jaji kuwaro. Nasibawang bainéna iya riyasengngé Batsyéba ana' Amiél, lolongengngi Daud eppa ana' worowané iya jajiyé ri Yérusalém: Siméa, Sobab, Natan sibawa Salomo. Engkato aséra ana' worowanéna iya laingngé: Yibhar, Elisua, Elifélét, Nogah, Néfég, Yafia, Elisama, Elyada sibawa Elifélét. Ri lainnaé mennanro engka mupa ana'-ana' worowanéna Daud polé ri gundi-gundi'na. Mappunnai towi séddi ana' makkunrai iya riyasengngé Tamar. Yosia mappunnai eppa ana' worowané: Yohanan, Yoyakim, Zédékia sibawa Yoahas. Yoyakim mappunnai duwa ana' worowané iya riyasengngé Yoyakhin sibawa Zédékia. Iyanaé wija-wijanna Yoyakhin, arung iya natawangngé tau Babél-é. Ana' worowanéna engka 7 tau: Séaltiél, Malkhiram, Pédaya, Syénazar, Yékamya, Hosama sibawa Nédabya. Pédaya mappunnai duwa ana' worowané: Zérubabél sibawa Siméi. Zérubabél mappunnai duwa ana' worowané riyaseng Mésulam sibawa Hananya, sibawa séddi ana' makkunrai riyaseng Sélomit. Engka topa lima ana' worowanéna, iyanaritu Hasuba, Ohél, Bérékhya, Hasaja sibawa Yusab-Héséd. Hananya mappunnai duwa ana' worowané: Pélaca sibawa Yésaya. Yésaya iyanaritu ambo'na Réfaya, Réfaya ambo'na Arnan, Arnan ambo'na Obaja, na Obaja ambo'na Sékanya. Sékanya mappunnai séddi ana' worowané riyaseng Sémaya, na Sémaya mappunnai lima ana' worowané riyaseng Hatus, Yigal, Bariah, Néarya sibawa Safat. Ana' worowanéna Néarya engka tellu tau: Elyoénai, Hizkia sibawa Azrikam. Elyoénai mappunnai pitu ana' worowané: Hodawya, Elyasib, Pélaya, Akub, Yohanan, Délaya sibawa Anani. Mangoloéwé iyanaritu sibagiyang wija-wijanna Yéhuda: Pérés, Hézron, Karmi, Hur sibawa Syobal. Syobal iyanaritu ambo'na Réaya, Réaya ambo'na Yahat. Yahat mappunnai duwa ana' worowané: Ahumai sibawa Lahad. Mennang ritu toriyolona pabbanuwana kota Zora. Asyhur pappatettonna kota Tékoa mappunnai duwa bainé, iyanaritu Héla sibawa Naara. Nasibawang Naara lolongengngi eppa ana' worowané: Ahuzam, Héfer, Teméni sibawa Ahastari. Nasibawang Héla, lolongengngi Asyhur tellu ana' worowané, iyanaritu, Zérét, Yézohar sibawa Etnan. Anub sibawa Hazobéba iyanaritu ana'-ana' worowanéna Kos toriyolona appang wija-wijanna Aharhél ana' Harum. Engka séddi worowané riyaseng Yabés lebbi ripakalebbii naiya silessu-silessurenna. Riwéréngngi aseng Yabés ri indo'na, nasaba manrasa-rasa senna'i indo'na wettunna najajiyang. Iyakiya massempajangngi Yabés lao ri Allataala iya nasompaé tau Israélié, adanna, “Oh Allataala, barakkakika, sibawa tennapodo lowangiwi daéraku. Linrungika sibawa pabélaiwi abalaé kuwammengngi dé' umanrasa-rasa.” Nanatarimai Allataala paréllaunna. Kelub silessurenna Suha mappunnai ana' worowané riyaseng Méhir. Ana'na Méhir iyanaritu Eston, na Eston mappunnai tellu ana' worowané, iyanaritu Bét-Rafa, Paséah sibawa Tehina, iya patettongngéngngi kota Nahas. Wija-wijanna iyaro sining tauwé monroi ri kota Réka. Kénas mappunnai duwa ana' worowané riyaseng Otniél sibawa Séraya. Otniél mappunnai towi duwa ana' worowané, iyanaritu Hatat sibawa Méonotai. Ana'na Méonotai iyanaritu Ofra. Ana'na Zéraya iyanaritu Yoab pappatettonna Lompo Pattukangngé. Sininna pabbanuwaé ri lompo'éro iyanaritu maccai mébbu ébbu-ébbu lima. Kaléb ana' Yéfune mappunnai tellu ana' worowané: Iru, Ela sibawa Naam. Ana' Ela iyanaritu Kénas. Yéhaléleel mappunnai eppa ana' worowané: Zif, Zifa, Tiréya sibawa Asareel. Hodia kawingngi sibawa ana'daranna Naham. Wija-wijanna mennang iyanaritu toriyolona appang Garmi sibawa appang Maakha. Appang Garmi monroi ri kota Kéhila, na appang Maakha monroi ri kota Estemoa. Simon mappunnai eppa ana' worowané: Amnon, Rina, Bénhanan sibawa Tilon. Yiséi mappunnai duwa ana' worowané: Zohét sibawa Bén-Zohét. Iya manenna mennang pakkébbu kendi sibawa bémpa untu' arungngé enrengngé monroi ri kota Nétaim sibawa Gedéra. Siméon mappunnai lima ana' worowané: Némuél, Yamin, Yarib, Zérah sibawa Saul. Siméi mappunnai 22 ana': 16 worowané sibawa 6 makkunrai. Iyakiya sumpulolona Siméi céddé bawang ana'na. Wija-wijanna Siméon dé' nasingngéga wija-wijanna Yéhuda. Lettu ri wettunna Arung Daud, wija-wijanna Siméon monroi ri kota-kota mangoloéwé: Bérsyéba, Molada, Hazar-Sual, Bilha, Ezem, Tolad, Bétuél, Horma, Ziklag, Bét-Markabot, Hazar-Susim, Bét-Biri sibawa Saaraim. Monro towi mennang ri lima onrong iya laingngé, iyanaritu Etam, Ain, Rimon, Tokhen, Asan, sibawa ri kampong-kampong seddéna onrong-ngonrongngéro lettu sibbéla kota Baal ri bagiyang yajangmanorang. Makkuwaniro catatang iya engkaé ri wija-wijanna Siméon passalenna Assossorenna sibawa onrong-ngonrong naonroiyé mennang. Wettunna Hizkia arung Yéhuda wijanna Siméonro nagasai Gedor. Naancuru'i mennang kéma-kémana pabbanuwana kotaéro sibawa tau Méuningngé, nainappa narukka pabbanuwana. Nainappa mennang mattette kuwaro nasaba maéga padanna untu' olokolo'na. Ri yawa pappimpinna ana'-ana' Yiséi, iyanaritu Pélaca, Néarya, Réfaya sibawa Uziél, 500 anggota iya laingngé polé ri suku Siméon létté ri Edom ri alau. Naunoi mennang sésa-sésana tau Amalé'é, nainappa mattette kuwaro mappammulai wettuéro. Rubén ana' macowana Yakub, mappunnai eppa ana' worowané: Hénokh, Palu, Hézron sibawa Karmi. Ri laleng assossorengngé taroki towi kapala-kapala appang iya mangoloéwé ri laleng suku Rubén: Yéiél, Zakharia, sibawa Béla ana' Azas, eppona Séma polé ri appang Yoél. Suku Rubén monroi ri Aroér sibawa ri daéra iya mappammulaé polé ri Aroér lao ri manorang lettu ri Nébo sibawa Baal-Méon. Mappunnaiwi mennang maéga senna olokolo ri daéra Giléad. Rimakkuwannanaro, naonroiwi mennang daéra seddé alauna lettu ri padang kessi iya mallebba'é sibbéla Salo Efrat. Wettunna Arung Saul, nagasai suku Rubén sibawa nacaui tau Hagrié ri seddé alauna Giléad, nainappa natudangi wanuwaéro. Ri seddé manoranna daérana suku Rubén monroi suku Gad ri tana Basan lettu sibbéla Salkha ri seddé alau. Polé ri suku Gad-éro Yoél iyanaritu toriyolona appang iya mariyoloé, na Safam iyanaritu toriyolona appang nomoro duwaé. Yaénai sibawa Safat iyanaritu toriyolona appang-ngappang laingngé ri Basan. Sining tau laingngé ri laleng suku Gad muttama'i ri laleng pitu appang iya mangoloéwé: Mikhaél, Mésulam, Syéba, Yorai, Yakan, Ziya sibawa Eber. Mennang wija-wijanna Abihail ana' Huri. Atturuseng assossorenna mennang polé ri yawa liyasé iyanaritu makkuwaiyé: Abihail, Huri, Yaroah, Giléad, Mikhaél, Yésisai, Yahdo, Bus. Kapalana iyaro appang-ngappangngé iyanaritu Ahi ana' Abdiél, eppona Guni. Monroi mennang ri daéra Basan sibawa Giléad, sibawa kota-kota ri daéraéro enrengngé ri sininna padangngé ri Saron. Iyaé assossorengngé riyébbui ri wettunna Yotam arung Yéhuda, sibawa Yérobéam arung Israélié. Ri laleng suku Rubén, Gad sibawa suku Manasyé ri seddé alauna Yordan engka 44.760 prajuri'na iya tallatié sibawa mappangalamangngé ri laleng makkégunang kaliyawo, peddang sibawa pana. Mammusui mennang méwai suku Yétur, Nafis sibawa Nodab, iyanaritu suku-suku ri laleng bangsa Hagri. Iyaro prajuri-prajuri'é mateppe'i ri Allataala sibawa méllau tulung ri Aléna, naritarimana paréllaunna mennang ri Allataala sibawa mpéréngngi mennang apakalang lao risining tau Hagriéro sibawa naéwaé sikongkolo mennang. Sibagiyang suku Manasyé monroi ri daéra Basan lettu ri manorang sibbéla Baal-Hérmon, Senir sibawa Bulu Hérmon. Pédé maitta mennang pédé maéga. Iyanaé kapala-kapala appanna mennang: Héfer, Yiséi, Eliél, Azriél, Yérémia, Hodawya sibawa Yahdiél. Iya manenna mennang iyanaritu prajuri-prajuri iya poré. Dé' namatinulu tau Israélié lao ri Allataala iya nasompaé toriyolona. Nasalaiwi mennang nanassompa lao ri déwata-déwatana bangsa iya puraé napaddésu Allataala polé ri wanuwa Kanaan. Rimakkuwannanaro Allataala pakédoi atinna Pul arung Asyur, nanalaona gasai wanuwaéro. Riisseng towi Pul selaku Tiglat-Piléser. Nainappa suku Rubén, Gad sibawa suku Manasyé ri seddé alauna Yordan natiwii selaku tawangeng sibawa ripali lao ri Halah, Habor, Hara sibawa séddié onrong iya macawé'é ri Salo Gozan. Kuwaniro mennang monro sibawa mattette lettu essoéwé. Léwi mappunnai tellu ana' worowané: Gérson, Kéhat sibawa Mérari. Kéhat mappunnai eppa ana' worowané: Amram, Yizhar, Hébron sibawa Uziél. Amram mappunnai duwa ana' worowané, iyanaritu Harun sibawa Musa, nenniya séddi ana' makkunrai, iyanaritu Miryam. Harun mappunnai eppa ana' worowané: Nadab, Abihu, Eléazar sibawa Itamar. Atturu-turusenna assossorenna Eléazar iyanaritu makkuwaiyé: Pinéhas, Abisua, Buki, Uzi, Zérahya, Mérayot, Amarya, Ahitub, Zadok, Ahimaas, Azarya, Yohanan, Azarya (mattumaniwi ri Bolana Puwangnge iya napatettongngé Arung Salomo ri Yérusalém), Amarya, Ahitub, Zadok, Salum, Hilkia, Azarya, Séraya, Yozadak. Iyaé Yozadak maccowéi ritiwi silaong tau Yéhudaé sibawa pabbanuwana Yérusalém laingngé wettunna Puwangnge palii mennang ri wanuwa laingngé naolai Nébukadnézar. Léwi mappunnai tellu ana' worowané, iyanaritu Gérson, Kéhat sibawa Mérari. Tungke'-tungke' mennang mappunnai ana'. Libni sibawa Siméi iyanaritu ana'-ana'na Gérson; Amram, Yizhar, Hébron sibawa Uziél iyanaritu ana'-ana'na Kéhat. Mahli sibawa Musi iyanaritu ana'-ana'na Mérari. Jori wija-wijanna Gérson iyanaritu: Libni, Yahat, Zima, Yoah, Ido, Zérah, Yéatrai. Jori wija-wijanna Kéhat iyanaritu: Aminadab, Korah, Asir, Elkana, Ebyasaf, Asir, Tahat, Uriél, Uzia, Saul. Elkana mappunnai duwa ana' worowané: Amasai sibawa Ahimot. Jori wija-wijanna Ahimot iyanaritu: Elkana, Zofai, Nahat, Eliab, Yéroham, Elkana. Samuél mappunnai duwa ana' worowané: Yoél iya macowaé, na Abia iya maloloé. Jori wija-wijanna Mérari iyanaritu: Mahli, Libni, Siméi, Uza, Siméa, Hagia, Asaya. Sipongenna ripalétté Petti Assijancingngé ri onrong assompangngé ri Yérusalém, piléi Arung Daud sining tau iya mattanggung jawa'é ri élong poji-pojiyangngé ri Bolana Puwangnge. Tugasna mennang secara makkaléléngngi ri Kémana Puwangnge sangadi dé'napa napatettongngi Arung Salomo Bolana Puwangnge. Jori assossorenna sining tau iya riwéréngngé jamanro iyanaritu makkuwaiyé: Polé ri appang Kéhat: Héman ana' Yoél. Pamimping kalompo'nai pakkélong mammulangngé. Jori assossorenna polé ri yawa liyasé lettu ri Yakub iyanaritu: Héman, Yoél, Samuél, Elkana, Yéroham, Eliél, Toah, Zuf, Elkana, Mahat, Amasai, Elkana, Yoél, Azarya, Zéfanya, Tahat, Asir, Ebyasaf, Korah, Yizhar, Kéhat, Léwi, Yakub. Asaf iyanaritu pamimping kalompo pakkélong iya maduwaé. Jori assossorenna polé ri yawa liyasé lettu ri Léwi iyanaritu: Asaf, Bérékhya, Siméa, Mikhaél, Baaséya, Malkia, Etai, Zérah, Adaya, Etan, Zima, Siméi, Yahat, Gérson, Léwi. Etan iyanaritu pamimping kalompo pakkélong iya matellué; poléi ri appang Mérari. Jori assossorenna polé ri yawa liyasé lettu ri Léwi iyanaritu: Etan, Kisi, Abdi, Malukh, Hasabya, Amazia, Hilkia, Amzi, Bani, Semér, Mahli, Musi, Mérari, Léwi. Jama-jamang laingngé ri bola assompangngé riyabbéréyangngi lao ri sellao-sellaona mennang tau Léwiétto. Harun sibawa wija-wijanna jamanna mattunu dupai, makkasuwiyangengngi akkarobangeng ritunu ri yasé'na mézbaé, pogau'i sininna rupanna upacaraé ri Bili' Pommapaccingngé, sibawa makkasuwiyangengngi akkarobangeng pappaledda dosana umma Israélié. Iya manennaro napogau'i mennang situru panunju-panunju iya nabbéréyangngé Musa atanna Allataala. Iyanaé jori wija-wijanna Harun: Eléazar, Pinéhas, Abisua, Buki, Uzi, Zérahya, Mérayot, Amarya, Ahitub, Zadok, Ahimaas. Iyanaé daéra onrong naonroiyé iya riwéréngngéngngi appang Kéhat wija-wijanna Harun. Natarimai mennang bagiyang mammulangngé polé ri tana iya ripattentué untu' tau Léwié. Tanana mennang nassanraiwi Hébron ri daéra Yéhuda, sibawa sining padangngé ri seddéna. Iyakiya sining dare' sibawa désa-désaé ri daéra seddéna kotaéro riwéréngngi Kaléb ana' Yéfune. Ri daéra suku Bényamin lolongengngi mennang désa-désa mangoloéwé silaong sining padanna: Géba, Alémét sibawa Anatot. Iya manenna engka 13 désa untu' onrong naonroiyé kaluwarga-kaluwargana mennang. Seppulo désa suku Manasyé ri seddé yajanna Salo Yordan riwéréngngi naolai loteréi lao ri kaluwarga-kaluwargaé ri laleng appang Kéhat iya dé'éppa nalolongeng tana. Kaluwarga-kaluwargaé ri laleng appanna Gérson lolongengngi 13 désa ri daérana suku Isakhar, Asyer, Naftali sibawa Manasyé iya engkaé ri Basan seddé alauna Salo Yordan. Naola towi loteréi, kaluwarga-kaluwargaé ri laleng appang Mérari lolongengngi 12 désa ri daéra suku Rubén, Gad sibawa Zébulon. Makkuwaniro carana bangsa Israélié bagéi lao ri suku Léwié désa-désaé silaong sining padanna untu' onrong naonroiyé mennang. Désa-désaé ri daérana suku Yéhuda, Siméon sibawa Bényamin iya puraé riteppuro, ribagé towi naolai loteréi. Ri daérana suku Efraim, sibagiyang polé ri kaluwarga-kaluwarga appang Kéhat tarimai désa-désa mangoloéwé silaong padanna ri seddéna: Sikhem, kota allinrungeng ri buluna daéraéro, Gézer, Yokméam, Bét-Horon, Ayalon sibawa Gat-Rimon. Ri daérana suku Manasyé iya ri seddé yajanna Salo Yordan natarimai mennang désa Anér sibawa Biléam silaong padanna ri seddéna. Kaluwarga-kaluwarga appanna Gérson lolongengngi désa-désa mangoloéwé sibawa sining padangngé ri seddéna: Ri daérana suku Manasyé, seddé alauna Salo Yordan: Golan ri Basan sibawa Asytarot. Ri daérana suku Isakhar: Kédes, Dabérat, Ramot sibawa Anem. Ri daérana suku Asyer: Masal, Abdon, Hukok sibawa Réhob. Ri daérana suku Naftali: Kédes ri Galiléa, Hamon sibawa Kiryataim. Wija-wijanna Mérari iya dé'éppa nalolongeng tana, lolongengngi désa-désa mangoloéwé silaong sining padangngé ri seddéna: Ri daérana suku Zébulon: Rimono sibawa Tabor. Ri daérana suku Rubén, seddé alauna Salo Yordan ri seddéna Yérikho: Bézer ri tanété tanré, Yahas, Kédemot sibawa Méfaat. Ri daérana suku Gad: Ramot ri Giléad, Mahanaim, Hésybon sibawa Yaézer. Isakhar mappunnai 4 ana' worowané: Tola, Pua, Yasub sibawa Simron. Tola mappunnai 6 ana' worowané: Uzi, Réfaya, Yériél, Yahmai, Yibsam sibawa Samuél. Mennang iyanaritu kapala kaluwarga ri laleng appanna Tola sibawa tarompoi selaku prajuri-prajuri poré. Wettunna Arung Daud, wija-wijanna mennang jumellana 22.600 tau. Uzi mappunnai séddi ana' worowané riyaseng Yizrahya. Yizrahya sibawa iya eppa ana'na iya worowané, iyanaritu Mikhaél, Obaja, Yoél sibawa Yisia iyanaritu kapala appang. Sining bainéna sibawa ana'-ana'na makkuwamani égana angkanna wija-wijanna naulléi passadiya 36.000 tau worowané untu' mancaji tentara. Manuru' daftar résmié, polé risininna kaluwargaé ri laleng suku Isakhar engka 87.000 tau worowané iya pennoiyéngngi sara'-sara'é untu' mancaji tentara. Bényamin mappunnai tellu ana' worowané: Béla, Békher sibawa Yédiaél. Béla mappunnai lima ana' worowané: Ezbon, Uzi, Uziél, Yérimot sibawa Iri. Mennang iyanaritu kapala kaluwarga ri laleng appanna sibawa tassebbo'i selaku prajuri-prajuri poré. Ri laleng daftar wija-wijanna mennang tarokii 22.034 tau worowané iya pennoiyéngngi sara'-sara'é untu' mancaji tentara. Békher mappunnai 9 ana' worowané: Zemira, Yoas, Eliézer, Elyoénai, Omri, Yérémot, Abia, Anatot sibawa Alémét. Mennang iyanaritu kapala kaluwarga ri laleng appanna. Manuru daftar résmié, polé ri sininna kaluwargaé ri laleng wija-wijanna mennang engka 20.200 tau worowané iya pennoiyéngngi sara'-sara'é untu' mancaji tentara. Yédiaél mappunnai séddi ana' worowané riyaseng Bilhan. Bilhan mappunnai 7 ana' worowané: Yéus, Bényamin, Ehud, Kénaana, Zétan, Tarsis sibawa Ahisahar. Mennang iyanaritu kapala kaluwarga ri laleng appanna sibawa tarompoi selaku prajuri-prajuri baranié. Ri laleng daftar wija-wijanna mennang tarokii 17.200 tau worowané iya pennoiyéngngi sara'-sara'é untu' mancaji tentara. Supim sibawa Hupim iyanaritu wija-wijanna Ir. Husim iyanaritu ana'na Dan. Naftali mappunnai 4 ana' worowané: Yahziél, Guni, Yézer sibawa Salum. Mennang iyanaritu eppona Bilha. Manasyé silaong gundi'na, séddiwi makkunrai Aram, mappunnai duwa ana' worowané: Asriél sibawa Makhir. Ana'na Makhir iyanaritu Giléad. Makhir sapparengngi bainé Hupim sibawa Supim. Asenna bainéna Makhir iyanaritu Maakha. Ana'na Makhir iya maduwaé iyanaritu Zélaféad. Zélaféad dé' nappunnai ana' worowané, banna ana' makkunrai. Maakha bainéna Makhir jajiyangngi duwa ana' worowané iya riyasengngé Pérés sibawa Sérés; Pérés mappunnai duwa ana' worowané riyaseng Ulam sibawa Rékem. Ulam mappunnai séddi ana' worowané riyaseng Bédan. Iyanaro wija-wijanna Giléad ana' Makhir, eppona Manasyé. Ana'daranna Giléad iya riyasengngé Molékhét mappunnai tellu ana' worowané: Isyhod, Abiézer sibawa Mahla. Sémida mappunnai 4 ana' worowané: Ahyan, Sékhem, Likhi sibawa Aniam. Mabbaratai ambo'na siyagangngaré esso itana angkanna poléi silessu-silessurenna untu' saléworiwi. Nainappa siatinrossi Efraim sibawa bainéna, namattampu'na iyaro makkunraié sibawa jajiyang séddi ana' worowané. Nasenni Efraim ana'naro Béria, nasaba abala iya puraé napéneddingiro mennang. Efraim mappunnai ana' makkunrai iya riyasengngé Seera. Aléna ritu patettongngi kota-kota Bét-Horon Toddang sibawa Bét-Horon Yasé', enrengngé kota Uza sibawa Seera. Engkatopa séddi ana' worowanéna Efraim, asenna Réfah. Iyanaé jori wija-wijanna Réfah: Réséf, Télah, Tahan, Ladan, Amihud, Elisama, Nun sibawa Yosua. Daéra iya riyabbéréyangngé untu' mancaji onrong naonroiyé mennang iyanaritu polé ri Bétel lettu sibbéla Naaran ri seddé alau, sibawa Gézer ri seddé yajang enrengngé désa-désaé ri seddéna kota-kotaéro. Ri laleng daéraéro muttama toni kota Sikhem sibawa Aya, enrengngé désa-désaé ri mattulilinna. Wija-wijanna Manasyé makuwasaiwi kota Bét-Séan, Taanakh, Megido, Dor sibawa désa-désaé ri mattulilinna. Iyanaro sininna daéra onrong naonroiyé wija-wijanna Yusuf ana' Yakub. Mangoloéwé iyanaritu wija-wijanna Asyer. Mappunnai 4 ana' worowané: Yimna, Yiswa, Yiswi, Béria sibawa séddi ana' makkunrai, riyaseng Sérah. Béria mappunnai duwa ana' worowané, iyanaritu Héber sibawa Malkiél pappatettonna kota Birzait. Héber mappunnai tellu ana' worowané: Yaflét, Somer, Hotam sibawa séddi ana' makkunrai, riyaseng Sua. Yaflét mappunnai towi tellu ana' worowané: Pasakh, Bimhab sibawa Asywat. Somer silessurenna Yaflét mappunnai eppa ana' worowané: Ahi, Rohga, Yéhuba sibawa Aram. Hotam, silessurenna Yaflét iya séddiéssi, mappunnai 4 ana' worowané: Zofah, Yimna, Séles sibawa Amal. Wija-wijanna Sofah iyanaritu Suah, Harnéfer, Syual, Béri, Yimra, Bézer, Hod, Sama, Silsa, Yitran sibawa Beera. Wija-wijanna Yéter iyanaritu Yéfune, Pispa sibawa Ara. Wija-wijanna Ula iyanaritu Arah, Haniél sibawa Rizya. Iyanaro wija-wijanna Asyer. Kapala kaluwarga maneng mennang sibawa tarompo selaku pahlawang-pahlawang iya poré sibawa pamimping-pamimping iya battowaé. Ri laleng daftar wija-wijanna Asyer tarokii 26.000 tau worowané iya pennoiyéngngi sara'-sara'é untu' mancaji tentara. Bényamin mappunnai lima ana' worowané. Situru atturu-turuseng umuru'na, mennang iyanaritu: Béla, Asybel, Ahrah, Noha sibawa Rafa. Wija-wijanna Béla iyanaritu Adar, Géra, Abihud, Abisua, Naaman, Ahoah, Géra, Séfufan sibawa Huram. Yéus, Sakhya sibawa Mirma. Iya manenna kapala kaluwarga. Nasibawang bainéna iya riyasengngé Husim mappunnai towi duwa ana' worowané: Abitub sibawa Elpaal. Ana' worowanéna Elpaal engka tellu tau: Eber, Misam sibawa Séméd. Séméd iyanaé iya patettongngéngngi kota Ono sibawa Lod enrengngé désa-désaé ri seddéna. Béria sibawa Séma iyanaritu kapala kaluwarga iya monroé ri kota Ayalon sibawa rukkai pabbanuwana kota Gat. Wija-wijanna Elpaal iyanaritu Zébaja, Mésulam, Hizki, Héber, Yismérai, Yizia sibawa Yobab. Wija-wijanna Siméi iyanaritu Yakim, Zikhri, Zabdi, Elyoénai, Ziletai, Eliél, Adaya, Béraya sibawa Simrat. Wija-wijanna Sasak iyanaritu Yispan, Eber, Eliél, Abdon, Zikhri, Hanan, Hananya, Elam, Antotia, Yifdéya sibawa Pnuél. Wija-wijanna Yéhoram iyanaritu Samsérai, Séharya, Atalya, Yaarésya, Elia sibawa Zikhri. Iyanaro kapala-kapala kaluwargaé sibawa pamimping-pamimping iya tarokié ri laleng assossorenna. Monroi mennang ri Yérusalém. Yéiél patettongngi kota Gibéon, nainappa monro kuwaro. Bainéna riyasengngi Maakha, namappunnaiwi mennang 10 ana' worowané: Abdon, iya macowaé, nainappa Zur, Kis, Baal, Nér, Nadab, Gedor, Ahyo, Zakharia, sibawa Miklot, ambo'na Siméa. Wija-wijanna mennang monroi ri Yérusalém silaong kaluwarga-kaluwarga laing iya siappangngé mennang. Ambo'na Arung Saul riyasengngi Kish sibawa nénéna worowané riyasengngi Nér. Saul mappunnai 4 ana' worowané: Yonatan, Malkisua, Abinadab sibawa Esybaal. Yonatan mappunnai ana' worowané riyaseng Méribaal, ambo'na Mikha. Mikha mappunnai 4 ana' worowané: Piton, Mélékh, Tahréa sibawa Ahas. Ana'na Ahas riyasengngi Yoada iya mappunnaiyé 3 ana' worowané: Alémét, Azmawét sibawa Zimri. Jori assossorenna Zimri iyanaritu Moza, Bina, Rafa, Elasa sibawa Azel. Azel mappunnai 6 ana' worowané: Azrikam, Bokhru, Ismaél, Séarya, Obaja sibawa Hanan. Esek, padaorowanéna Azel, mappunnai 3 ana' worowané: Ulam iya macowaé, nainappa Yéus sibawa Elifélét. Ana'-ana'na Ulam iya manenna prajuri-prajuri poré sibawa pappana iya maccaé. Ana' eppona iya worowané iya manenna engka 150 tau. Iya manenna mennang iyanaritu anggota suku Bényamin. Sininna tau Israélié ridaftar-i situru kaluwargana tungke'-tungke'. Iyaro daftar-é tarokii ri laleng kitta Arung-ngarunna Israélié. Selaku pahukkungenna dosa-dosana mennang, ritiwii ra'ya' Yéhudaé ri appalirengngé. Polé ri yelle'na mennang iya bunge'-bunge'é lisu ri tana appunnangenna ri kota-kotaé iyanaritu tau biyasaé, imangngé, tau Léwié sibawa pajjama-jamana Bolana Puwangnge. Si bagiyang polé ri suku Yéhuda, Bényamin, Efraim sibawa Manasyé lisuni sibawa monro ri Yérusalém. Sining imang iya mancajiyé kapala kaluwarga, iya manenna engka 1.760 tau. Maccai mennang pogau'i sininna rupanna jama-jamangngé ri Bolana Puwangnge. Pengawal-pengawalna Bolana Puwangnge iya monroé ri Yérusalém silaong kaluwargana iyanaritu: Akub, Talmon, Ahiman, sibawa Salum kapala pengawal. Lettu essoéwé sining tau polé ri appanna mennang risuroi monrowangngi Pintu Gerbang Arungngé ri alau. Riyolo sining tau polé ri appanna risuroi monrowangngi pintu-pintu gerbang mattujué ri akkémanna tau Léwié. Iya risuroé monrowangngi sumpang muttama'é ri Kémana Puwangnge iyanaritu Salum silaong sining tau iya siappangngé sibawa aléna, iyanaritu appang Korah. (Salum iyanaritu ana' Koré eppona Ebyasaf.) Riyolo toriyolona pogau' towi jamangngéro wettunna mennang mattumani ri akkémanna Puwangnge. Pinéhas ana'na Eléazar – tennapodo Puwangnge linrungiwi! – engka naengka nakapalaiwi mennang. Zakharia ana' Mésélémya iyanaritu pengawalna towi pintu gerbang Kémana Puwangnge. Sininna iya napilé untu' monrowangngi pintu-pintu gerbangngé engka 212 tau. Ridaftar i mennang situru désa-désa onrong naonroiyé mennang. Toriyolona mennang riwéréngngi jabatang-jabatangngéro ri Arung Daud sibawa Nabi Samuél. Sipongennaro mennang sibawa wija-wijanna tette'i mancaji panganrowanna pintu gerbanna Bolana Puwangnge. Engka 4 sumpang: séddi ri manorang, séddi ri yattang, séddi ri alau sibawa séddi ri yajang. Ri tungke' sumpangngéro, ritaroi séddi tau Léwi iya mancajiyé kapala panganrowang. Sumpulolona mennang iya monroé ri désa-désaé, bantui mennang secara makkaléléng – sises-siseng siminggu ittana. Iyakiya iya eppa kapala panganrowangngéro majjamai secara tette. Mattanggung jawa'i mennang ri bili'-bili'é ri Bolana Puwangnge sibawa barab-barang iya ritaroé kuwaro. Monroi mennang ri seddéna Bolana Puwangnge, saba' harusu'i monrowangngi iyaro bolaé sibawa timpa'i pintu-pintu gerbangngé élé-élé. Sibagiyang tau Léwi iya laingngé mattanggung jawa'i lao risining pakkakkasa untu' assompangngé. Mennang ritu bilangngi wettunna ripassu sibawa wettunna ripalisu. Sibagiyassi mattanggung jawa'i lao ri paréwa-paréwa assompangngé sibawa lao ri labbu'é, anggoro'é, minnya zaitungngé, kamennyangngé sibawa rampa-rampaé. Iyakiya iya mattanggung jawa'é campuru'i rampa-rampaéro iyanaritu imang-ngimangngé. Iya mattanggung jawa'é mébbu pakkasuwiyang iya ripanggangngé iyanaritu séddi tau Léwi riyaseng Matica, ana' macowana Salum polé ri appang Korah. Sining tau polé ri appang Kéhat mattanggung jawa'i untu' passadiyai patala rotié untu' Puwangnge tungke' esso Saba'. Sibagiyang tau Léwi iya laingngé mancaji pakkélongngi ri Bolana Puwangnge. Kapala-kapala kaluwargana mennang iya monroé risiyagangngaré bili' ri Bolana Puwangnge. Dé' nariwéréng mennang jamang laing, nasaba majjamai esso wenni. Sining tau iya riteppué onna iyanaritu kapala-kapala kaluwarga Léwi situru jori assossorenna. Mennang iyanaritu sining pamimping iya monroé ri Yérusalém. Yéiél patettongngi kota Gibéon, nainappa monro kuwaro. Bainéna riyasengngi Maakha, sibawa ana'na worowané, iya macowaé riyasengngi Abdon; iya laingngé riyasengngi Zur, Kish, Baal, Nér, Nadab, Gedor, Ahyo, Zakharia sibawa Miklot, ambo'na Siméa. Wija-wijanna mennang monroi ri Yérusalém silaong kaluwarga-kaluwarga laingngé iya siappangngé sibawa mennang. Ambo'na Arung Saul riyasengngi Kish sibawa nénéna riyasengngi Nér. Saul mappunnai 4 ana' worowané: Yonatan, Malkisua, Abinadab sibawa Esybaal. Yonatan mappunnai ana' worowané riyaseng Méribaal, ambo'na Mikha. Mikha mappunnai 4 ana' worowané: Piton, Mélékh, Tahréa sibawa Ahas. Ana'na Ahas riyasengngi Yoada mappunnai 3 ana' worowané: Alémét, Asmawét sibawa Zimri. Jori assossorenna Zimri iyanaritu Moza, Bina, Rafa, Elasa sibawa Azel. Azel mappunnai 6 ana' worowané; Azrikan, Bokhru, Ismaél, Séarya, Obaja sibawa Hanan. Mammusuni tau Filistingngé sibawa tau Israélié. Mammusui mennang ri Bulu Gilboa. Maéga tau Israél maté kuwaro, na lebbinna muttamani Arung Saul sibawa ana'-ana' worowanéna larini. Iyakiya riyaccinrolaiwi mennang ri tau Filistingngé sibawa tellu tau polé ri yelle'na ana'-ana' worowanéna Saul riyunoni, iyanaritu Yonatan, Abinadab sibawa Malkisua. Masero senna'ni ammusurengngé ri seddéna Saul, na aléna paimeng nakennani pana-panana balié angkanna malo. Nakkeda Saul lao ri kallolo iya tiwiéngngi senjatana, “Rampui peddammu namugajakka kuwammengngi aja' nacculé-culéika tau Filistin dé'é naissengngi Puwang -ngéro.” Iyakiya iyaro kalloloé dé' namaélo gajangngi Saul nasaba métau senna'i. Rimakkuwannanaro nalani Saul peddanna nanaparebbai aléna ri peddangngéro. Wettunna naita iyaro kalloloé makkedaé maténi Saul, naparebba toni aléna ri peddanna, namaté. Namaténa Saul silaong iya tellu ana' worowanéna, nanallalengiwi naccappa tona assossorenna. Wettunna naéngkalinga sininna tau Israél iya monroé ri lompo Yizreel makkedaé larini tentara Israélié, sibawa Saul nenniya ana'-ana' worowanéna maténi, larini mennang salaiwi kota-kotana. Nanatudangini tau Filistingngé kota-kotanaro. Bajana wettunna tau Filistingngé polé untu' rampo'i sining ujué, naruntu'ni mennang Saul sibawa iya tellu ana' worowanéna maté ri Bulu Gilboa. Naludunni waju musuna Saul, natéppe'i ulunna, nanatiwii lao. Nainappa kiring mennang suro ri sininna wanuwa Filistingngé untu' palettu'i karéba madécéngngéro lao ri bangsana sibawa déwatana mennang. Iyaro waju musuna Saul nataroi ri laleng séddié bola déwatana, na ulunna nagattungngi ri laleng bolana Dagon, déwatana. Wettunna pabbanuwana Yabés ri Giléad méngkalingai aga pura napogau' tau Filistingngé lao ri Saul, laoni sining tau iya kaminang baranié polé ri yelle'na mennang malai ujuna Saul sibawa ana'-ana' worowanéna, nanatiwii lao ri Yabés. Nakuburu'ni mennang ri yawana séddié pong battowa, nainappa mappuwasa pitungngesso ittana. Laoni sininna pamimping bangsa Israélié ri Daud ri Hébron sibawa makkeda, “Idi'é sellaonaki Datu. Riyolopa nariyolo, mala wettunna mupa Saul paréntaki, Datu ritu pimpingngi tentara Israélié sises-siseng mennang maju mammusu. Nainappa Puwang Allataalana Datu pura majjanci makkedaé Datu ritu iya maéloé pimpingngi umma'-Na sibawa mancaji arunna mennang.” Nanaébbuna Daud assijancing sibawa sining pamimping Israéliéro. Nainappa nalanti mancaji arunna Israélié pada-pada iya puraé najjanciyang Puwangnge naolai Samuél. Séuwa wettu Arung Daud sibawa sininna tentara Israélié laowi musui kota Yérusalém. Iyaro wettué, iyaro kotaé riyasengngi Yébus, sibawa naonroiwi tau Yébus-é, pabbanuwa tulénna kotaéro. Napatettonni Daud paimeng kotaéro mappammulai ri onrong iya ripakatanré sibawa tana ri seddé alauna bulu-bulué; nainappa iyaro appatettongengngé napatterui Yoab gangka tépu. Pédé maitta pédé mawatang Daud, nasaba Puwangnge Pommakuwasa tulungngi. Iyanaé aseng-ngasenna sining parawirana Daud iya tarompoé. Silaong sininna ra'ya' Israélié, purani mennang méwa kuwammengngi Daud namancaji arung pada-pada iya puraé najjanciyang Puwangnge. Sibawa matterui mennang sokongngi apparéntanna. Parawira mammulangngé iyanaritu Yasobam tau Hakhmoni, pamimpinnai “Triwira”. Engka naengka na ri laleng séuwaé ammusureng naéwai 300 tau nanauno manengngi mennang sibawa bessinna. Tau maduwaé ri laleng Kalompo Telluéro iyanaritu Eléazar ana' Dodo polé ri appanna Ahohi. Muddanini Daud ri kampong assalennaro sibawa makkeda, “Ah, ébara'na ripainukka uwai polé ri bujung seddéna pintu gerbangngé ri Bétléhém.” Naéngkalinganaro, iya tellu parawiraéro bettui akkémanna tau Filistingngé nanaséro uwai polé ri bujungngéro, nainappa natiwi lao ri Daud. Iyakiya dé' namaélo Daud ménungngi, mala natiri'i selaku pakkasuwiyang lao ri Puwangnge. Makkedai, “Nasabbing Allataala, dé' nawedding uwénung iyaé uwaié! Rékko uwénungngi, samanna uwénungngi darana tau iya puraé mappésonangngi nyawana!” Jaji dé' sises-siseng Daud namaélo ménungngi uwaiéro. Iyanaro jasa-jasana iya tellu pajuwang iya poréro. Séddi parawira laing iya tarompoé iyanaritu Bénaya ana' Yoyada, tau Kabzeel. Barani senna'i. Duwa pahlawang battowa polé ri Moab pura nauno. Engka séuwa esso massaljué muttama'i ri laleng séddié kalebbong sibawa mpunoi séddi singa kuwaro. Engkato naengka naunoi séddié tau Maséré iya battowaé watakkaléna; tanréna lebbi duwa météré. Iyaro tauwé massenjatai bessi iya battowa senna'é, iyakiya Bénaya moloiwi banna sibawa tarasulu. Bessi iya engkaé ri limanna tau Maséré'éro nasittaiwi nainappa napaké untu' mpunoi tauwéro. Iyanaro jasa-jasana Bénaya, séddiwi polé ri Kalompo Telluppuloé. Ri laleng kalompo'éro, Bénaya kaminang mariyolo, iyakiya dé' napada-pada héba'na Kalompo Tellué. Daud makkai mancaji kapala pengawal paribadinna. Wettunna Daud lari polé ri Arung Saul, massalai ri Ziklag. Maéga pajuwang iya matinulué sibawa mappangalamangngé polé masséddi sibawa Daud. Poléi mennang ri suku Bényamin pada-pada Saul. Maccai mennang mappana sibawa mallobang – muwi lima ataunna iyaréga lima abéyona. Wettunna Daud engka ri onrong mabbénténgngé ri padang kessi'é, maéga pajuwang tassebbo sibawa mappangalamang polé ri suku Gad lao masséddi sibawa aléna. Mennang iyanaritu sining pajuwang iya macca senna'é paké kaliyawo sibawa bessi; paitai mennang barani-barani pada-pada singaé sibawa kédona mennang mapecci pada-pada jongaé. Sibagiyang polé risining tau Gad-éro iyanaritu sining parawira tanré iya kapalaiyéngngi 1.000 tau; sibagiyassi iyanaritu parawira-parawira iya kapalaiyéngngi 100 tau. Engka naengka nakajajiyang ri uleng séddinna, wettunna Salo Yordan mattengngang lémpe iyaro parawira-parawiraé nalléttoiwi iyaro saloé sibawa rukkai pabbanuwana lompo-lompo'é muwi ri seddé alau iyaré'ga ri seddé yajanna saloéro. Engka séuwa wettu sikalompo tau polé ri suku Bényamin sibawa Yéhuda lao ri bénténg naonroiyé Daud. Daud méwai mennang sita sibawa makkeda, “Rékko poléko selaku sellao untu' tulukka, asséddino sibawa idi. Ritarimako sibawa masennang ati. Iyakiya rékko makkattako bali'bellarika lao ri balié, namuni dé' upogau'i majaé lao ri iko, Allataala iya nasompaé toriyolota missengngi, nahukkukko matu.” Sala séddinna polé ri mennang, iyanaritu Amasai, iya rimunri mancaji pamimping kalompo iya riteppué “Kalompo Telluppuloé”, rikuwasaiwi ri Rohna Allataala nainappa makkeda, “Daud, ana' Isai! Idi sokokko! Tennapodo iko sibawa mennang iya duwangngékko mallolongengngi. Engkai Allataala rangengekko!” Nanatarimani Daud mennang sibawa nakkai mennang mancaji parawira ri laleng tentarana. Wettunna Daud silaong tau Filistingngé musui Arung Saul, sibagiyang polé ri prajuri suku Manasyé mallétto ri Daud. Sitongenna Daud dé' nabantui sining tau Filistingngéro. Sining pamimping Filistingngé suroi lisu ri Ziklag nasaba métaui mennang malléttoi matu ri Arung Saul sibawa bali'bellariwi mennang. Iyanaé aseng-ngasenna sining pajuwang polé ri suku Manasyé iya malléttoé ri Daud wettunna ri laleng allalengengngé lao ri Ziklag: Adnah, Yozabad, Yédiaél, Mikhaél, Yozabad, Elihu sibawa Ziletai. Tungke'-tungke' kapalaiwi 1.000 prajuri. Mennang pajuwang iya poré sibawa bantui Daud méwai garembolangngé. Rimunri mancajiwi mennang parawira-parawira ri laleng tentarana Israélié. Mawé' esso-esso engka tau baru iya masséddié sibawa Daud, angkanna dé' namaitta rimunrinna battowa senna'ni pasukanna Daud. Iya manenna pajuwangngéro laowi ri Hébron ri laleng keadaang sadiya mammusu sibawa sadiya untu' makkai Daud mancaji arunna sininna Israélié. Sibawa sininna tau Israél laingngé massiati toni untu' pogau'i gau'éro. Tellungngesso ittana iyaro sining pajuwangngé monro kuwaro sibawa Daud namappéstato sibawa péneddingiwi inanré sibawa énungeng iya ripassadiyaé untu' mennang risining tau Israél laingngé. Polé ri suku-suku manorang iya mabélaétto iyanaritu polé ri suku Isakhar, Zébulon sibawa Naftali, makkapoléngngi tauwé sibawa kaleddé, unta, bagal, sibawa saping iya pennoé sibawa tiwi bokong inanré: labbu, buwa ara, kismis, anggoro sibawa minnya zaitun. Tiwi towi mennang saping sibawa bimbala untu' rigéré sibawa naanré. Iya manennaro mappaitangngi pékkugi sennanna ra'ya'é ri sininna Israélié. Barundinni Arung Daud sibawa sininna parawirana iya pimpingngéngngi sining passéddiyang 1.000 tau sibawa sining passéddiyang 100 tau. Nainappa makkeda lao ri sininna tauwéro, “Rékko nasitujuiwi saudara-saudara, sibawa napuwéloi Puwangnge, Allataalata, madécéngengngi kirikki suro lao risining imangngé sibawa sining tau Léwié ri désa-désana mennang, enrengngé sininna bangsata iya laingngé untu' suroi mennang polé maddeppungeng sibawa idi kuwaé. Nainappaki lao malai Petti Assijancinna Allataala, iya puraé naleppessang kariya-riya ri wettu apparéntanna Arung Saul.” Sininna tau Israél iya maddeppungengngéro masennanni sibawa tangngaéro enrengngé situjuiwi. Nanapaddeppungenni Daud ra'ya' Israélié ri sininna wanuwaé, polé ri pakkasésénna Maséré ri yattang lettu ri Laleng Hamat ri manorang, untu' malai Petti Assijancingngéro polé ri Kiryat-Yéarim sibawa tiwii lao ri Yérusalém. Nanalaona Daud silaong mennang ri kota Baala, iyanaritu Kiryat-Yéarim, ri daérana suku Yéhuda untu' malai Petti Assijancinna Allataala. Iyaro Pettié riyasengngi “ Puwang iya makkarungngé ri yasé'na kérub-é.” Lettu'nana ri Baala, nalani mennang iyaro Petti Assijancingngé polé ri bolana Abinadab, nanapaénré'i ri yasé'na séddié padati iya barué. Uza sibawa Ahyo tinrosiwi iyaro padatié, na Daud sibawa sininna bangsa Israélié séré-séréni enrengngé makkélong sibawa masumangé, untu' pakalebbii Allataala naccowéri kacapi, rebana, simbal sibawa tarompé. Wettunna mennang lettu ri onrong addésekeng gandong appunnangenna Kidon, iyaro sining saping iya gettengngéngngi iyaro padatié tabbuttui, nanaloro'ni limanna Uza sibawa makkatenningngi Petti Assijancingngéro kuwammengngi aja' namabuwang. Iyakiya métau towi Daud ri Allataala sibawa makkeda, “Makkekkuwangngé pékkugini iyaro Petti Assijancingngé weddingngi utiwi?” Rimakkuwannanaro dé'na najaji Daud tiwii iyaro Pettié ri Yérusalém, sangadinna nataroi ri bolana Obéd-Edom, tau Gat-é. Iyaro Pettié monroi kuwaro tellu uleng ittana nanabarakkakini Puwangnge kaluwargana Obéd-Edom nenniya sininna iya nappunnangiyé. Nakirinni Arung Hiram polé ri wanuwa Tirus duta-dutana lao ri Daud, sibawato aju camara Libanon enrengngé panré-panré aju sibawa tukang batu untu' patettong saoraja. Rimakkuwannanaro mateppe'ni Daud, Puwangnge pura pakkasse'i aléna selaku arunna Israélié sibawa péwatangiwi akkarungenna untu' apentingenna umma'na Puwangnge. Ri Yérusalém malasi Daud siyagangngaré bainé sibawa lolongeng ana'-ana'si. Ana'-ana' worowanéna iya jajiyé ri Yérusalém iyanaritu: Syamua, Sobab, Natan, Salomo, Yibhar, Elisua, Elpélét, Nogah, Néfég, Yafia, Elisama, Beelyada sibawa Elifélét. Wettunna naéngkalinga tau Filistingngé makkedaé riyakkani Daud mancaji arunna sininna Israélié, poléni mennang maélo tikkengngi. Rimakkuwannanaro massuni Daud untu' mammusu méwai mennang. Na iyaro wettué lettu'ni tau Filistingngé ri Lompo Réfaim sibawa rampo'i lompo'éro. Naéngkalingana iyaro makkutanani Daud lao ri Allataala, “ Puwang, harusu'ka'ga gasai tau Filistingngéro? Maéloki'ga Puwang mpérékka apakalang?” Nappébali Puwangnge, “Ya, gasani! Maélo-Ka mpérékko apakalang!” Nanagasani Daud silaong sining pasukanna iyaro sining tau Filistingngé ri Baal-Pérasim sibawa caui mennang. Makkedani Daud, “Allataala pura pakéka untu' leppoi attahangenna balié pada-pada lémpe'é ruttungngi sini-sininnaé ri laleng sikédé.” Iyanaro saba'na iyaro onrongngé nariyaseng Baal-Pérasim. Wettunna lari tau Filistingngé, dé'na narapii tiwii dato-dato barahalana. Napparéntanni Daud kuwammengngi naritunu iyaro dato-dato'é. Dé' namaitta rimunrinna poléni tau Filistingngé sibawa rampokisi Lompo Réfaim. Siseppi Daud méllau panunju polé ri Allataala, namappébali Allataala, “Aja' muluruiwi mennang polé kuwaé, iyakiya joppano malléko sibawa gasai polé ri liweng, seddéna aju-kajung murbéié. Rékko muwéngkalingani oni pada-padaé akka ajé tau mabbarisi ri coppo'na aju-kajungngéro, majuno, saba' maélo-Ka joppa ri yolomu untu' caui tentara Filistingngé.” Napogau'ni Daud aga napparéntang Allataala lao ri aléna. Aléna sibawa pasukanna napasoroni tentara Filistingngé mappammulai polé ri Gibéon lettu ri Gézer. Nakalabbana asenna Daud kégi-kégi, sibawa Puwangnge mébbui sininna bangsaé métau lao ri Daud. Patettonni Daud bola-bola untu' aléna ri Kota Daud, sibawa passadiya onrong untu' Petti Assijancinna Allataala nainappa pasang kéma untu' Pettiéro. Makkedai Daud, “Banna tau Léwié wedding makkai Petti Assijancinna Puwangnge, saba' mennang ritu napilé Puwangnge untu' mpuléi iyaro Pettié sibawa mattumani ri Aléna untu' mannennungeng.” Nanaobbini Daud sininna tau Israélié lao ri Yérusalém untu' palétté'i Petti Assijancinna Puwangnge lao ri onrong iya puraé napassadiya. Nainappa nasuro Daud wija-wijanna Harun sibawa tau Léwié maddeppungeng. Napolé ri appang Kéhat, suku Léwi, malluruni Uriél iya pimpingngéngngi 120 anggota appanna. Polé ri appang Mérari malluruni Asaya iya pimpingngéngngi 220 tau. Polé ri appang Gérson mallurini Yoél iya pimpingngéngngi 130 tau. Polé ri appang Elsafan malluruni Sémaya iya pimpingngéngngi 200 tau. Polé ri appang Hébron malluruni Eliél iya pimpingngéngngi 80 tau. Sibawa polé ri appang Uziél malluruni Aminadab iya pimpingngéngngi 112 tau. Nainappa naobbi Daud Imang Zadok sibawa Imang Abyatar enrengngé iya enneng tau Léwiéro, iyanaritu: Uriél, Asaya, Yoél, Sémaya, Eliél sibawa Aminadab. Adanna Daud lao ri mennang, “Ikonaritu pamimping appang ri laleng suku Léwi. Rimakkuwannanaro, sitinajako sibawa sining tau suku Léwi laingngé mappépaccing alé kuwammengngi mulléi palétté'i Petti Assijancinna Puwangnge, Allataalana Israélié, ri onrong iya puraé upassadiya. Wettunna iyaro Pettié untu' bunge'-bunge'na ripalétté, dé'ko gaga kuwaro untu' tiwii. Rimakkuwannanaro Puwangnge, Allataalata, hukkukki saba' tasompai dé' nasituru élo-Na.” Jaji sining imangngé sibawa tau Léwié mappépaccing aléni kuwammengngi weddingngi napalétté Petti Assijancinna Puwangnge, Allataalana Israélié. Na wettunna iyaro Pettié ripalétté, nauléni mennang sibawa aju pabbulé, situru atoreng iya nabbéréyangngé Puwangnge naolai Musa. Nasuro towi Daud iyaro sining pamimping tau Léwié kuwammengngi nasuroi siyagangngaré tau polé ri sukunna mennang untu' makkélong sibawa macculéyangngi élokkélong mariyo-riyoé ri kacapié sibawa simbal-é. Kénanya ripilé untu' kapalaiwi pacculé-culé musi' polé ri suku Léwiéro, saba' ahli musi'i. Nanalaona Arung Daud silaong sining pamimpinna Israélié sibawa sining parawiraé ri bolana Obéd-Edom untu' malai Petti Assijancingngéro sibawa ramé-ramé battowa. Pitu saping lai sibawa pitu bimbala riyakkasuwiyangeng lao ri Allataala nasaba purai Natulung tau Léwié iya makkaéngngi Petti Assijancingngéro. Iyaro wettué Daud mappaké jumba polé ri kaing lénang alusu'é, makkuwatoro sining pacculé musi'é na Kénanya pimpingngi mennang enrengngé sining tau Léwi iya makkaéngngi Petti Assijancingngéro. Paké towi Daud waju Efod. Sininna umma Israélié laowi tinrosiwi Petti Assijancingngé lettu ri Yérusalém sibawa gora-gora marennu, oni tarompé, napiri, simbal sibawa kacapi. Wettunna iyaro Pettié mattengngang ritiwi muttama ri laleng kota, Mikhal ana' makkunrainna Saul célléng polé ri tellongengngé sibawa mitai Arung Daud séré enrengngé mariyo-riyo. Namajana pappéneddinna Mikhal mitai Daud. Iyaro Petti Assijancingngé napalénne'i ri laleng kéma iya puraé napassadiya Daud untu' Pettiéro. Nainappa makkasuwiyang mennang lao ri Allataala akkarobangeng ritunu sibawa akkarobangeng pappasidamé. Puranana nakkasuwiyangeng Daud iyaro sining akkarobangengngé, nabarakkakini ra'ya'é ri laleng asenna Puwangnge, nainappa nabagé-bagé inanré lao ri mennang maneng. Tungke' tau iya engkaé kuwaro muwi worowané iyaré'ga makkunrai lolongeng sikare' juku panggang, roti sibawa béppa kismis. Makkani Daud siyagangngaré tau Léwi untu' pimpingngi upacara assompangngé lao ri Puwangnge, Allataalana Israélié, ri yolona Petti Assijancingngéro, nasibawang élong nenniya pappoji-pojiyang. Asaf ripilé selaku pamimping utama sibawa Zakharia wakkélé'na. Yéiél, Semiramot, Yéhiél, Matica, Eliab, Bénaya, Obéd-Edom sibawa Yéiél risuro untu' macculéyang kacapi. Asaf risuro macculéyang simbal, sibawa duwa tau imang, iyanaritu Bénaya sibawa Yahaziél, risuro untu' tette masseppung tarompé ri yolona Petti Assijancingngéro. Iyanaro bunge'-bunge'na Daud suroi Asaf sibawa sellao-sellaona untu' makkélong pappoji-pojiyang lao ri Puwangnge. Sukkuru'no lao ri Puwangnge, abbirittangngi arajan-Na, curitai pangkauken-Na ri yelle'na bangsa-bangsaé. Puwélonni pappojiyangngé untu' Puwangnge, abbirittanni sininna winru-Na iya mappabengngaé. Aléna ritu Puwang Iya Séuwaé; ariyo-riyono, saba' appunnangennaki; sininna iya sompaéngngi Aléna sitinajai marennu. Ellauno awatangeng polé ri Aléna, tuli sompani. Puwangnge iyanaritu Allataalata, apettun-Na takkennai ri sininna linoé. Tuli naéngngerangngi assijancin-Na matu, jancin-Na takkennai mannennungeng. Iyaro assijancingngé Naébbui sibawa Abraham, nainappa sibawa Ishak, nainappa napakkasse sibawa Yakub mancaji assijancing iya mannennungengngé lao ri umma Israélié. Adan-Na, “Uwabbéréyangngi matu Tana Kanaan lao ri iko mancaji appunnangeng manamu.” Riyolo umma'na Puwangnge tuwoi selaku tau laing kuwaro jumellana mennang céddé bawang. Solléi mennang polé ri bangsaé lao ri bangsaé, létté polé riséddié wanuwa lao ri wanuwa laingngé. Iyakiya dé' naleppessangngi muwi niga tenre'i mennang; nasaba mennang, Naparéngngerangiwi arung-ngarungngé, “Aja' muganggui sining tau tappilé-Ku, aja' mupogau'i majaé lao ri nabi-nabik-Ku.” Akkélonno untu' Puwangnge, éh sininna linoé, patassiyani esso-esso karéba marennué makkedaé purani Napassalama'ki. Curitai arajan-Na lao ri bangsa-bangsaé, sibawa sining pangkaukenna iya baranié lao ri rupatauwé. Saba' battowai Puwangnge sibawa maseroi ripoji; harusu'i riyétauri lebbi nasininna déwataé. Déwata-déwatana bangsa laingngé banna dato-dato bawang iyakiya Puwangnge iyanaritu pancajiwi bitara marajaé. Risalipuriwi arajang sibawa alebbireng, bola-Na pennoi akuwasang sibawa ariyo-riyong. Pojiwi Puwangnge, éh rupatauwé! Pojiwi araja-awatangenna. Pojiwi asen-Na iya malebbié, sibawa tiwino akkarobangeng ri lalempola-Na. Sompani Puwangnge sibawa mappakéyang assompang! Ténréno ri yolo-Na, éh sininna linoé! Masse linoé dé' nagoyang. Eh langi sibawa linoé arennuno! Abbirittangngi lao ri bangsa-bangsaé makkedaé iyaro Puwangnge Arung! Memmu'no éh tasi' sibawa sininna lise'na! Ariyo-riyono éh padang sibawa sininna tanet-tanenna! Ajukajung ri ale'é gora-gorai matu saba' poléni Puwangnge untu' mapparénta ri linoé. Sukkuru'no ri Puwangnge, saba' makessingngi; mannennungengngi pammasé-Na. Powadani, “Oh Allataala, Pappassalama'ta, passalama'ni polé ri akuwasanna bangsa-bangsaé sibawa paddeppungenni paimeng, kuwammengngi weddikki sukkuru sibawa pojiwi asenna iya mapaccingngé!” Pojini Puwangnge, Allataalana Israélié, makkekkuwangngé sibawa mannennungeng! Nainappa makkeda umma Israélié, “Aming”, nanapojiwi mennang Puwangnge. Nainappa Arung Daud suroi Asaf sibawa sining tau Léwi laingngé untu' tette murusu'i gau'-gau' iya engkaé assisumpungenna sibawa assompangngé ri onrong kégi Petti Assijancinna Puwangnge ritaro. Esso-esso harusu majjama kuwaro, ribantu ri Obéd-Edom ana' Yédutun, enrengngé 68 tau laing iya siappangngé sibawa aléna. Obéd-Edom sibawa Hosa iyanaritu pengawalna pintu-pintu gerbangngé. Iyakiya Zadok sibawa imang-ngimang laingngé risuroi untu' tette murusu'i assompangngé ri onrong assompangngé ri Gibéon. Tungke' élé sibawa arawéng harusu'i mennang makkasuwiyang akkarobangeng ritunu ri yasé'na mézbaé situru sibawa hukkung-hukkung nabbéréyangngé Puwangnge lao ri tau Israélié. Imang Zadok sibawa imang-ngimangngéro ribantui ri Héman sibawa Yédutun nenniya sining tau laing iya bannaé ripilé untu' makkélong pappojiyang lao ri Puwangnge nasaba pammasé-Na iya mannennungengngé. Héman sibawa Yédutun tugas towi ri tarompé'é, simbal-é sibawa paréwa musi' laing iya riyacculéyangngé untu' maccowériwi élok-kélong pappojiyangngé. Sining anggotana appang Yédutun risuroi untu' jagaiwi pintu-pintu gerbangngé. Nainappa lisuni sininna tauwé ri bolana tungke'-tungke'. Makkuwatoro Daud lisuni untu' mitai kaluwargana. Mattette'nana Daud ri saorajana, riséuwaé esso naobbini Nabi Natan namakkeda, “Itai, iyya'é monroka ri saoraja iya riyébbué polé ri aju camara Libanongngé, na Petti Assijancinna Puwangnge banna ri laleng kémaé!” Nappébali Natan, “Pogau'ni sininna niya'na Datu saba' Allataala tulungngi Datu.” Iyakiya iyaro wennié makkedai Allataala lao ri Natan, “Laono sibawa palettukengngi atak-Ku Daud pasengngéwé, ‘Tenniya iko patettongek-Ka matu bolaé. Sipongenna Upaleppe bangsa Israélié polé ri Maséré lettu makkekkuwangngé, dé'pa naengka Uwonro ri laleng séddié bola. Tuli sollé-Ka sibawa monro riséddié kéma. Sipongek-Ku sollé silaong bangsa Israélié dé'pa naengka Umakkutana ri pamimping-pamimping iya puraé Upilé, aga saba'na nadé' mennang napatettongek-Ka séddi bola polé ri aju camara Libanongngé.’ Rimakkuwannanaro, Natan, powadanni atak-Ku Daud makkedaé Iyya, Puwang Iya Pommakuwasaé, makkeda lao ri aléna, ‘Purano uwala polé ri jama-jamammu makkampi bimbala'é ri padangngé, sibawa Upancaji arung ri umma'-Ku Israélié. Purano utulung kégi-kégiko lao, sibawa sininna balimmu Upaccappui wettummu mammusu. Uwébbuko matu tarompo pada-pada sining pamimping iya kaminang battowaé ri linoé. Maélo-Ka mancaji ambo'na na aléna mancajiwi matu ana' worowané-Ku. Maélo-Ka tette pogau'i makessingngé lao ri aléna situru sibawa jancik-Ku. Jancik-Ku ri aléna tette'i Uwakkatenning, dé' napada iya Upogau'é lao ri Saul iya puraé Upaésa polé ri tudangenna kuwammengngi weddikko mancaji arung. Ana' worowanému iya Upiléro upancajiwi matu arung ri umma'-Ku sibawa akkarungek-Ku untu' mannennungeng, sibawa ana' eppona massossoreng mapparéntai matu selaku arung.’ ” Natan paissengiwi Daud sininna iya puraé napannessa Allataala ri aléna. Nanauttama'na Arung Daud ri Kémana Puwangnge. Tudanni sibawa massempajang, “Oh Puwang Allataala, iyya sibawa kaluwargaku, dé' nasitinaja tarimai sininna akessingeng iya Muwajjellokengngé ri iyya iya labe'éwé. Mala Mupogau'i lebbi naiyaro; purano mébbu janci passalenna wija-wijakku untu' wettu mangoloé. Mala Mugaukekka selaku séddi tau maraja. Agapi wedding upowada lao ri iko, oh Puwang Allataala? Muwisseng manengngi passalenna atam-Mué, namuni mabbéréko pappakalebbi lao ri iyya. Nasaba élo-Mu muto sibawa untu' apentingekku Mupogau'i sininna pangkaukeng battowaéwé sibawa mannessa-nessa. Banna Iko bawang Allataala, dé' gaga iya padaé sibawa Iko. Riissengngi gau'éro saba' pura riyappaissengengngi riyolopa nariyolo. Ri sininna linoé dé' gaga bangsa pada-pada Israél. Israél iyanaritu alé-aléna bangsa iya Mupaleppe'é polé ri angatangengngé untu' mancaji umma'-Mu muto. Sininna pangkaukeng battowaé namakalallaing iya Mupogau'é lao ri mennang mébbui asem-Mu tarompo ri sininna linoé. Mupaleppe'i umma'-Mu polé ri Maséré, sibawa panyingkiri'i bangsa-bangsa laingngé wettunna maju umma'-Mu mammusu. Purani Mupancaji bangsa Israélié umma muto untu' mannennungeng. Na Iko, oh Puwang, mancaji Allataalana mennang. Makkekkuwangngé oh Puwang Allataala, tapakkasse'ni untu' mannennungeng janci iya Mupowadaé passalenna aléku sibawa wija-wijakku. Tapogau'ni aga iya puraé Muwajjanciyanro. Kégi-kégi tuli napakarajai matu tauwé asem-Mu sibawa makkeda, ‘ Puwang Iya Pommakuwasaé iyanaritu Allataala ri Israélié.’ Untu' mannennungeng séddi polé ri wija-wijakku mapparéntai matu selaku arung. Baranika paénré'i iyaé sempajangngé lao ri Idi, oh Allataala, saba' Idi muto pura mappaissengengngi lao ri iyya makkedaé ana' eppoku massossoreng Mupancajiwi matu arung ri bangsaéwé. Idi, Puwang, iyanaritu Allataala, na gau' iya magelloéro puraka Mujanciyang. Rimakkuwannanaro, uwéllauwi, tabarakkakini wija-wijakku kuwammengngi namannennungeng tette'i narasa pammasému. Saba' Idi pura barakkakiwi umma'-Mu, oh Puwang, natette matu mennang ribarakkaki untu' mannennungeng.” Siyagangngaré wettu ri munrinna Arung Daud gasai sibawa caui tau Filistingngé enrengngé sittaiwi kota Gad silaong désa-désaé ri seddéna. Nacau towi Daud tau Moab-é angkanna mennang tunru'i sibawa makkamaja pakkasuwiyang ri aléna. Nainappa Daud caui Hadadézer, arungngé ri Zoba seddéna daéra Hamat ri wanuwa Siria. Iyaro wettué Hadadézer mattengngangngi ri laleng allalengengngé untu' makuwasaiwi daéra seddéna ulunna Salo Efrat. Nasittaiwi Daud 1.000 karéta musu, sibawa tawangngi 7.000 tau tentara makkinnyarang enrengngé 20.000 tau tentara mallaleng. Naképoi sininna anyarangngé, sangadinna sibagiyang, genne untu' 100 karéta musu. Kirinni tentara tau Siriaé polé ri Damsyik untu' tulungngi Arung Hadadézer, iyakiya Daud caui mennang sibawa mpunoi 22.000 tau. Nainappa patettong akkémang-akkémang tentara ri laleng daérana mennang sibawa tunru'i mennang enrengngé makkamaja pakkasuwiyang lao ri aléna. Puwangnge mpéréngngi apakalang lao ri Daud kégi-kégiwi mammusu. Giringkiring ulaweng iya napaké tentarana Hadadézer narampasa'i Daud nanatiwii lao ri Yérusalém. Ri lainnaéro mala towi Daud maéga senna gessa polé ri Tibhat sibawa Kun, kota-kota iya nakuwasaiyé riyolo Hadadézer. (Rimunri iyaro gessaé napakéi Salomo untu' mébbu kullang nenniya alliri-alliri sibawa paréwa assompang ri Bolana Puwangnge.) Naéngkalingani Arung Tou polé ri Hamat makkedaé purani nacau Daud sininna tentarana Hadadézer. Nanasuroni Yoram ana' worowané macowana untu' palettu selleng ri Arung Daud sibawa passalama'i nasaba apakalannaro, saba' Hadadézer biyasai mammusu sibawa Tou. Laoni Yoram ri Daud sibawa tiwi maéga hadiya ulaweng, péra' sibawa gessa. Nakkasuwiyangenni Arung Daud sininna hadiyaéro lao ri Puwangnge untu' nakkégunang ri laleng upacara assompangngé. Makkuwatoro napogau' sibawa barab-barang ulawengngé nenniya péra' iya puraé narampasa' polé ri Hadadézer enrengngé bangsa-bangsa iya nacaué, iyanaritu bangsa Edom, Moab, Amon, Filistin sibawa Amalék. Abisai (indo'na riyasengngi Zéruya) caui sibawa mpunoi 18.000 tau Edom ri Lompo Pejjé nainappa patettong akkémang-akkémang tentarana ri sininna Edom. Nanatunru'na sining tau Edongngé lao ri Arung Daud. Puwangnge mpéréngngi apakalang lao ri Daud kégi-kégi mammusu. Makkuwaniro Daud paréntai sininna Israélié sibawa jagaiwi kuwammengngi na ra'ya'na tuli rigaukengngi sibawa adélé enrengngé makessing. Siyagangngaré wettu rimunrinna matéi Nahas arung Amon, na Hanun ana' worowanéna mancaji arung. Nanakkedana Arung Daud, “Nahas iyanaritu sellaoku iya matinulué, jaji harusu tokka makkuwaro lao ri Hanun, ana'na.” Rimakkuwannanaro kirinni Daud suro lao ri wanuwa Amon untu' saléworiwi nasaba amaténna ambo'na. Wettunna mennang lettu ri Amon, makkedani sining pamimpinna wanuwaéro lao ri Arung Hanun, “Aja' nappikkiri Datu makkedaé nakiringngi Daud suronaro nasaba maéloi pakalebbii ambo'na Datu! Nakiringngi sining tauwéro lao mai selaku mata-mata untu' salidikiwi wanuwatta, kuwammengngi naulléi sittaiwi!” Natikkengngi Arung Hanun iyaro sining surona Daud, nacukkuru'i janggo'na, narette'i pakéyanna gangka poncinna, nanasuroi mennang lao. Iyakiya masirii mennang lisu, jaji laoni ri Yérikho. Wettunna ripaissengi Daud iyaro gau'éro, kirinni paseng kuwammengngi iyaro sining suroé naonro ri Yérikho narapi tuwo paimeng janggo'na. Wettunna naéngkalinga Daud gau'éro, nasuroni Yoab silaong sininna tentarana maju méwai balié. Massuni tau Amongngé nanaatoro'i barisi'na mennang ri yolona pintu gerbang Raba, ibukotana, na arung-ngarunna iya poléénna untu' duwangngi mennang, matoro'i barisi'na ri padangngé. Naitani Yoab makkedaé tassipii ri pasukanna balié ri yolo sibawa ri munri. Rimakkuwannanaro napiléni tentara Israél iya kaminang makessingngé nanataroi mennang siyolo-olong sibawa tentara Siriaé. Lebbinna polé ri tentara Israélié nabbéréyanni lao ri Abisai anrinna, iya matoro'éngngi barisi'na mennang siyolo-olong sibawa tentara Amongngé. Makkedani Yoab lao ri anrinnaro, “Rékko dé'na uwulléni mattahang lao ri tentara Siriaé, asitta'no polé duwakka. Sibalé'na, rékko dé'na mulléi mattahanna lao ri tentara Amongngé, polépa matu duwakko. Pakkasse'i atimmu! Laono mai taéwa sibawa barani untu' bangsata sibawa untu' kota-kotana Allataalata. Tennapodo Puwangnge pogau'i aga iya Naéloriyé.” Majuni Yoab sibawa pasukanna maggasa, angkanna lari tentara Siriaé. Wettunna naita tau Amongngé lari tentara Siriaé, lari toni mennang polé ri Abisai sibawa soro ri laleng kota. Puranana musui tau Amongngé, lisuni Yoab ri Yérusalém. Namaingekini tau Siriaé makkedaé ricaui ri tau Israélié. Nanaobbini tentarana iya polé ri daéra seddé alauna Salo Efrat nanasuroi iyaro tentarana mammusu ri yawa pappimpinna Sobakh pallima tentarana Hadadézer arung Zoba. Naéngkalingana gau'éro, napaddeppungenni Daud sininna pasukang Israélié, nanalléttoiwi Salo Yordan nanaatoro'i barisi'na siyolong sibawa tau Siriaé. Nanammusuna mennang, naripasorona tentara Siriaé ri tentara Israélié. Daud sibawa pasukanna mpunoi 7.000 tau pappalari karéta musu sibawa 40.000 tau tentara mallaleng. Nauno towi Sobakh pallimana Siriaro. Wettunna arung-ngarung iya nakuwasaiyé Hadadézer naita makkedaé ricauni ri tentara Israélié, naéllauni sidamé sibawa Daud, nenniya tunru ri aléna. Purairo dé'na namaélona tau Siriaé bantui tau Amongngé. Wettunna lemma paimenna, wettunna arung-ngarungngé biyasanna lao mammusu, napangarani Yoab tentarana sibawa sittaiwi wanuwa Amon. Iyaro wettué Arung Daud tette'i ri Yérusalém, sibawa dé' naccowé. Yoab sibawa tentarana keppungngi kota Raba, nainappa nagasa sibawa naancuru'i iyaro kotaé. Purairo poléni Daud sibawa mala maéga senna barang rampasa polé ri kotaéro. Ri yelle'na barab-barangngéro engkai passigera'na arung Among. Iyaro passigera'é tane'na kira-kira 34 kilo sibawa riparamatai séddi paramata. Nalani Daud iyaro paramataé nanapasangngi ri passigera'na. Nainappa nakka Daud iyaro pabbanuwana kota Raba sibawa napassai mennang majjama sibawa paké garagaji, béngkung sibawa wasé. Iyaro gau'é napogau' towi lao ri kota-kota Amon iya laingngé. Purairo lisuni Daud sibawa sininna tentarana ri Yérusalém. Siyagangngaré wettu puranaro mammususi méwai tau Filistingngé ri Gézer. Ri laleng sala séddinna ammusurengngéro Sibkhai tau Husaé mpunoi séddi rassasa riyaseng Sipai. Nacauna tau Filistingngé. Ri laleng ammusureng laingngé méwai tau Filistingngé, Elhanan ana' Yair mpunoi Lahmi silessurenna Goliat tau Gat. Pasorompessinna Lahmi silloppo aju paréwa tennungngé. Ri laleng ammusureng laingngéssi ri Gat engka séddi tau rassasa iya mappunnaiyé enneng jari ri tungke' limanna sibawa tungke' ajéna. Wija-wijannai rassasaé wettu riyolo. Naéllékéllé'i tau Israélié, narimakkuwannanaro riyunoi ri Yonatan, ana' Siméa kakana Daud. Iya tellu tau iya naunoé Daud sibawa pasukannaro iyanaritu wija-wijanna rassasaé ri Gat. Macinnai Ibillisi' cilakaiwi tau Israélié; rimakkuwannanaro napalécéi Daud kuwammengngi napakangka abbilangeng. Nakkedana Daud lao ri Yoab sibawa sining parawira tentarana, “Pakangkano abbilangeng ri sininna Israélié lettu ri désa-désaé, nasaba macinnaka missengngi siyaga égana ra'ya' Israélié.” Nappébali Yoab, “Tennapodo Puwangnge palleppi-leppiwi ra'ya'na Israélié narapi wékkasératu polé ri jumellana makkekkuwangngéwé. Iya Malebbié, dé'ga namanessana makkedaé tunru'ni mennang ri Datu? Magi naharusu pakangka abbilangeng? Matti, nasaba asalangngéro, sininna bangsaé tanggungngi addimonrinna!” Iyakiya tette'i makkatenning arungngé ri paréntanaro, jaji laoni Yoab ri sininna Israélié, lettu ri désa-désana, nainappa lisu ri Yérusalém, sibawa laporo'i lao ri Arung Daud wassélé abbilangengngéro. Jumellana worowané iya pennoiyéngngi sara' untu' mancaji tentara engka 1.100.000 tau Israél sibawa 470.000 tau ri Yéhuda. Iyakiya suku Léwi sibawa suku Bényamin dé' nauttama ri jumellaéro. Dé' napakangka Yoab abbilangeng ri yelle'na mennang saba' dé' napojiwi pajoppai iyaro paréntana arungngé. Dé' namasennang Allataala sibawa abbilangengngéro nanahukkungngi tau Israélié. Nanassempajanna Daud lao ri Allataala, “Oh Allataala, madosa senna'ka! Addampengekka, saba' iyaro tindakakku madonggo senna.” Nakkeda Puwangnge lao ri Nabi Gad, iya mancajiyé pappasisumpunna Daud sibawa Puwangnge, “Laono sibawa powadangngi Daud makkedaé uwéréngngi tellu appiléng. Agi-agi iya napilé maélo-Ka pogau'i.” Nanalaona Gad ri Daud sibawa palettu'i pasenna Puwang -ngéro, adanna, “Kéga napilé Datu: Iyaé wanuwaé nakennai abala akkadéreng telluttaung ittana, iyaré'ga lariwi Datu rilellung ri balié tellumpuleng, iyaré'ga sininna wanuwaéwé rigasa ri Puwangnge tellungngesso ittana sibawa peddan-Na maddupa sai, sibawa malaéka'-Na tiwi amaténg kégi-kégi. Pettuini makkekkuwangngé aga iya harusu'é upalettu ri Puwangnge.” Nappébali Daud, “Aduh, cilakana! Iyakiya lebbi kessing muwi nahukkukka Puwangnge, saba' battowai paressé babuwa-Na naiya nahukkungngé rupa tauwé.” Napapoléna Puwangnge sai lao ri tau Israélié angkanna 70.000 tau ri yelle'na mennang maté. Nainappa kiring Puwangnge séddi malaéka' untu' paccappui Yérusalém. Iyakiya wettunna lettu iyaro malaéka'é ri seddéna addésekeng gandong appunnangenna Arauna tau Yébus-é, napinrai Puwangnge apettun-Na untu' hukkungngi bangsaéro. Makkedani lao ri malaéka'éro, “Genne'ni! Appésauno!” Naitai Daud iyaro malaéka'é sajang ri pallawangenna langié sibawa linoé. Nasibawang peddang ri limanna, iyaro malaéka'é sadiyani untu' paccappui Yérusalém. Na Daud sibawa sining pamimpinna ra'ya'é, iya wettuéro mattengngang mappakéyang karung tanrang massesse kalé, suju' ri tanaé. Nassempajanna Daud, adanna, “Oh Allataala, iyya ritu pasala. Iyya ritu massurowangngi pakangkai iyaro abbilangengngé. Iyaé bangsaé dé' sises-siseng napasala! Oh Puwang, Allataalaku, hukkukka sibawa kaluwargaku, iyakiya pabélaiwi iyaé abalaé polé ri umma'-Mu.” Nainappa malaéka'na Puwangnge suroi Gad lao ri Daud powadangngi kuwammengngi naénré ri onrong addésekeng gandong appunnangenna Arauna sibawa patettong mézba untu' Puwangnge kuwaro. Najoppana Daud situru paréntana Puwangnge iya ripalettu'é ri aléna naolai Gad. Ri onrong addésekeng gandongngéro Arauna sibawa iya eppa ana' worowanéna mattengngang maddése gandong. Naitana malaéka'éro, iya epparo ana'na Arauna larini massubbu. Wettunna naita Arauna Arung Daud polé, naduppaini Daud sibawa suju' ri yolona. Nakkeda Daud ri aléna, “Maéloka patettong mézba ri onrongngéwé untu' Puwangnge, kuwammengngi nappésau iyaé saiyé. Rimakkuwannanaro balu'ni iyaé tanaé lao ri iyya. Powadani siyaga ellinna, maéloka mpajai.” Nappébali Arauna, “Ah, ala bawanni, Datu, sibawa pogau'ni agi-agi naseng Datu makessing. Iyaé sining sapingngé untu' akkarobangeng ritunu, sibawa untu' aju tununna weddingngi napaké Datu sining pépeng addésekengngéwé. Talato gandong untu' pakkasuwiyang. Uwabbéréyang manengngiro, dé' naparellu nawaja Puwakku.” Iyakiya mappébaliwi arungngé, “Aja'! Maéloka melliwi sibawa sukku ellinna. Dé' umaélo makkasuwiyangengngi lao ri Puwangnge aga iya muwappunnaiyé iyaré'ga séuwa iya ulolongengngé sibawa cuma-cuma.” Nanawajani Daud lao ri Arauna 600 dowi ulaweng untu' onrongngéro. Nainappa patettong Daud séddi mézba kuwaro untu' Puwangnge, sibawa makkasuwiyangeng akkarobangeng ritunu nenniya akkarobangeng pappasidamé. Nainappa massempajang na Puwangnge baliwi sempajannaro sibawa panonno api polé ri langié iya tunuéngngi sining akkarobangengngéro ri yasé'na mézbaéro. Nanasuroni Puwangnge iyaro malaéka'é pariwanuwai paimeng peddanna, na iyaro malaéka'é naturusini paréntana Puwang -ngéro. Wettunna naita Daud makkedaé Puwangnge baliwi sempajanna nasaba pakkasuwiyannaro, makkasuwiyassi paimeng akkarobangeng ri mézbaéro. Iyaro wettué Kémana Puwangnge iya naébbué Musa ri padang kessi'é, sibawa mézba untu' akkarobangeng ritunué engka mupi ri onrong assompangngé ri Gibéon. Iyakiya dé' nabarani Daud lao kuwaro untu' mabbicara sibawa Allataala, saba' métaui ri peddanna malaéka'na Puwangnge. Nanakkeda Daud, “Ri onrongngénnaé harusu ripatettong Bolana Puwang Allataala. Sibawa ri mézbaénnaé tau Israélié harusu makkasuwiyangeng akkarobangeng ritununna lao ri Puwangnge.” Nassurowanni Arung Daud paddeppungengngi sininna tau laing iya monroé ri wanuwa Israélié, nanapajjamai mennang. Sibagiyang polé ri mennang mappa batu untu' patettongngi Bolana Puwangnge. Untu' mébbu paku sibawa sélé untu' pintu-pintu gerbanna Bolana Puwang -ngéro, paddeppungengngi Daud maéga senna bessi. Paddeppungeng towi makkuwamani égana gessa, angkanna dé' nariyullé timbang. Polé ri tau Tirus-é sibawa Sidongngé mappasenni sijumella battowa aju camara Libanon. Napogau'i Daud iya manennaro nasaba mappikkiri'i makkuwaé: “Harusu'ka passadiyai aga napparelluwangngé untu' patettongngi Bolana Puwangnge. Saba' Salomo ana' worowanéna malolo mupi sibawa makurang pangalamangngi, na Bolana Puwangnge iya maéloé napatettonro harusu'i magello senna sibawa kalabba ri sininna linoé.” Na ri wettu dé'napa namaté Daud, passadiyani maéga senna bahang bangunan. Naobbini Daud ana' worowanéna, Salomo, nanaparéntangngi untu' patettongengngi bola Puwang Allataala iya nasompaé umma Israélié. Nakkeda Daud lao ri Salomo, “Ana'ku, maittani uwanniya' patettong séddi bola untu' pakalebbii Puwang Allataalaku. Iyakiya makkedai Puwangnge maléwe senna'ka mammusu sibawa mpunoi maéga tau. Rimakkuwannanaro dé' napalaloka patettongengngi bola Aléna. Namuni makkuwaro, pura-Ka nawéréng janciéwé: ‘Lolongekko matu séddi ana' worowané iya mapparéntaé matu sibawa amang, saba' maélo-Ka tulungngi angkanna dé'gaga bali iya musuéngngi. Riyasengngi matu Salomo, saba' sipongenna mapparénta, maélo-Ka mpéréngngi atennangeng sibawa amang ri sininna Israélié. Ana' worowanému ritu patettongek-Ka matu bola. Mancajiwi matu ana'-Ku na Iyya mancaji ambo'na. Kadéra akkarungenna Israélié tette'i ri wija-wijanna lettu mannennungeng.’ ” Nakkedapasi Daud, “Makkekkuwangngé, ana'ku, tennapodo Puwang Allataalamu tuli tulukko. Na tennapodo mulléi patettongengngi bola Puwangnge pada-pada iya puraé Najjanciyang. Na memmuwaré Puwang Allataalamu mpérékko apanréng sibawa pappahang untu' paréntai Israélié situru sibawa hukkung-hukkun-Na. Rékko muturusiwi sininna hukkung nabbéréyangngé Puwangnge lao ri Musa untu' bangsa Israélié, papoléko matu wassélé. Harusu'ko mateppe sibawa barani. Aja' mumétau moloiwi muwi aga. Passalenna Bolana Puwang -ngéro purana makkuraga tonget-tongeng untu' paddeppungeng 3.400 tong ulaweng sibawa lebbi 34.000 tong péra'. Rilainnaé engka gessa sibawa bessi iya dé'é naribilang égana. Muwi ajué sibawa batué purani upassadiya, iyakiya harusu'ko tambaipi. Mappunnaiko maéga pajjama. Engka iya mullééngngi majjama ri akkaling batué, engka tukang kaju, tukang batu sibawa maéga senna panré iya maccaé jamai ulawengngé, péra'é, gessaé sibawa bessié. Nah, pammulaini masitta! Tennapodo Puwangnge tulukko.” Nainappa nasuro Daud sininna pamimping Israélié bantui Salomo. Adanna, “ Puwang Allataalamu pura tulukko, enrengngé mabbéré adaméngeng nenniya atennangeng ri sininna wanuwaé. Purani napakkulléka caui sininna bangsa iya monroé riyolo ri wanuwaéwé. Makkekkuwangngé tunru'ni mennang ri alému sibawa lao ri Puwangnge. Jaji sitinajako mattumani ri Puwang Allataalamu sibawa sukku tubu nyawamu. Pammulaini patettongngi bolana Puwangnge, kuwammengngi Petti Assijancin-Na sibawa sininna paréwa laing iya bannaé ripaké untu' assompangngé weddingngi ritaro kuwaro.” Wettunna macowa senna'ni Daud nakkani Salomo mancaji arunna Israélié. Napaddeppungenni Arung Daud sininna pamimpinna Israélié, imang-ngimangngé sibawa tau Léwié, nainappa nabilang sininna tau worowané ri suku Léwi iya makkéumuru'é telluppulo taung liyasé. Iya mmanenna engka 38.000 tau. Nainappa 24.000 tau ri yelle'na nasuroi untu' jamai jamang ri Bolana Puwangnge, 6.000 untu' murusu'i administrasinna sibawa parakara-parakara angadélékengngé, Patassebbu untu' jamang pengawal-é, sibawa patassebbu laingngé untu' pojiwi Puwangnge sibawa paréwa-paréwa musi' iya puraé ripassadiya. Nabagéni Daud sining tau Léwiéro ri laleng tellu kalompo situru appanna mennang, iyanaritu appang Gérson, Kéhat sibawa Mérari. Gérson mappunnai duwa ana' worowané: Ladan sibawa Siméi. Ana'-ana' worowanéna Ladan engka tellu tau: Yéhiél, Zétam sibawa Yoél. Mennang iyanaritu kapala appang wija-wijanna Ladan. (Sélomit, Haziél sibawa Haran iyanaritu ana'-ana' worowanéna Siméi.) Kéhat mappunnai eppa ana' worowané: Amran, Yizhar, Hébron sibawa Uziél. Amran iyanaritu ambo'na Harun sibawa Musa. (Harun sibawa wija-wijanna untu' mannennungeng purani ripallaing untu' murusu'i paréwa-paréwa assompangngé, mattunu dupa untu' Puwangnge, tumaningiwi Puwangnge sibawa barakkakiwi ra'ya'é ri laleng asenna Puwangnge. Ana'-ana' worowanéna Musa atanna Allataalaro ripasigolongengngi ri laleng suku Léwi.) Musa mappunnai duwa ana' worowané, iyanaritu Gérsom sibawa Eliézer. Iya mancajiyé pamimpinna ana'-ana'na Gérsom iyanaritu Sébuél. Eliézer banna mappunnai séddi ana' worowané, asenna Réhabia. Iyakiya Réhabia mappunnai maéga senna ana'. Yizhar, ana' Kéhat iya maduwaé, mappunnai ana' worowané riyaseng Sélomit; iyanaritu kapala appang. Hébron, ana' Kéhat iya matellué, mappunnai eppa ana' worowané: Yéria iya macowaé, rappina Amarya, Yahaziél sibawa Yékaméam. Uziél, ana' Kéhat iya maeppaé, mappunnai duwa ana' worowané: Mikha iya macowaé sibawa Yisia. Mérari mappunnai duwa ana' worowané riyaseng Mahli sibawa Musi. Mahli mappunnai duwa ana' worowané, iyanaritu Eléazar sibawa Kish, iyakiya matéi Eléazar temmappunnai ana' worowané; banna ana'-ana' makkunrai iya kawingngé sibawa sining sappusisenna, iyanaritu ana'-ana'na Kish. Musi, ana' Mérari iya maduwaé, mappunnai tellu ana' worowané: Mahli, Eder sibawa Yérémot. Iyanaro aseng-ngasenna wija-wijanna Léwi iya riyokié situru asenna kapala appangngé sibawa kaluwargana tungke'-tungke'. Umuru'na mennang duwappulo taung liyasé sibawa lolongeng jamang ri Bolana Puwangnge. Nakkeda Daud, “ Puwang Allataalana Israélié pura mpéréngngi atennangeng lao ri umma'-Na, na Aléna monroi ri Yérusalém untu' mannennungeng. Rimakkuwannanaro, Kémana Puwangnge sibawa sininna paréwa iya ripaké untu' assompangngé dé'na naparelluna riyulé ri tau Léwié.” Situru parénta-paréntana Daud paccappurengngé, sininna tau Léwié, rékko makkéumuru'ni 20 taung, harusu'i ridaftar untu' majjama. Harusu'i mennang bantui imang-ngimang wija-wijanna Harun ri laleng pajoppai upacara assompangngé ri Bolana Puwangnge, piyarai seddéna sibawa sining bili'é ri Bolana Puwang -ngéro, enrengngé jagaiwi kuwammengngi sininna séuwa-séuwa iya puraé ripallaing untu' Puwangnge dé' namancaji najisi'. Mattanggung jawa' towi lao ri iya mangoloéwé: roti iya riyakkasuwiyangengngé lao ri Allataala, labbu iya ripaké untu' pakkasuwiyang lao ri Puwangnge, béppa nipi iya riyébbué temmakkéragi, akkarobangeng ripanggang, sibawa labbu iya ricampuru'é minnya zaitun. Harusu towi mennang timbangngi sibawa mola'i sining pakkasuwiyang iya ritiwié ri Bolana Puwangnge. Ri lainnaéro harusu'i mennang makkélong untu' pojiwi Puwangnge tungke' élé sibawa tungke' wenni; makkuwatoro tungke' wettu rékko engka akkarobangeng iya ritunué untu' Puwangnge ri esso Saba'é, ri ramé-ramé Uleng Barué, sibawa ri ramé-ramé laingngé. Passalenna jumellana tau Léwi iya harusu'é majjama tungke' wettu, pura toni riyébbu peraturanna. Untu' mannennungeng harusu'i napajoppa tau Léwié iyaro jamangngé. Riwéréng towi mennang tanggung jawa' untu' piyarai Kémana Puwangnge enrengngé Bolana Puwangnge sibawa untu' bantui saudara-saudarana mennang, iyanaritu sining imangngé wijanna Harun, ri laleng pajoppai assompangngé ri onrongngéro. Wija-wijanna Itamar ribagéi mancaji aruwa kalompo, na wija-wijanna Eléazar mancaji seppulo enneng kalompo, saba' ri laleng wija-wijanna Eléazar engka maéga senna worowané kapala kaluwarga. Nasaba muwi ri laleng wija-wijanna Eléazar iyaré'ga ri laleng wija-wijanna Itamar engka pajaba-pajaba Bolana Puwangnge sibawa pamimping-pamimping agama, attawang jamangngé ripogau'i sibawa lotteréiwi. Wija-wijanna Eléazar sibawa wija-wijanna Itamar sisullé gettengngi loteréié, nainappa riyoki aseng-ngasenna riséddié juru tulisi iya riyasengngé Sémaya ana'na Nataneel tau Léwi. Iya manennaro napogau'i riyolona arungngé silaong pegawé-pegawénna, Imang Zadok, Ahimélékh ana' Abyatar enrengngé kapala-kapala kaluwarga golongang imangngé sibawa kapala-kapala kaluwarga golongang Léwié. Asenna sining tauwéro riyokii situru lélénna mennang untu' muttamakiwi Bolana Puwangnge sibawa pogau'i jamang assompangngé iya puraé napattentu Harun, toriyolona, situru sibawa paréntana Puwangnge, Allataalana Israélié. Yaazia mappunnai tellu ana' worowané: Syoham, Zakur sibawa Hibri. Ana' worowanéna Musi engka tellu tau: Mahli, Eder sibawa Yérimot. Iyanaro kaluwarga-kaluwargaé ri laleng suku Léwi. Untu' léléng jamanna mennang, tungke' kapala kaluwarga silaong séddi anrinna iya worowané gettengngi loteréié pada-pada iya napogau'é sumpulolona mennang, iyanaritu sining imang wija-wijanna Harun. Iyaro aggettengeng lotteréié nasabbingngi Arung Daud silaong Zadok, Ahimélékh enrengngé kapala-kapala kaluwarga polé ri golongang imang-ngimangngé sibawa polé ri golongang tau Léwié. Untu' pimpingngi upacara-upacara assompangngé, Arung Daud sibawa sining pamimpinna tau Léwié napiléi appang-ngappang Léwi iya mangoloéwé: Asaf, Héman sibawa Yédutun. Risuroi mennang untu' palettu'i paseng polé ri Allataala nasibawang kacapi, gambusu sibawa simbal. Untu' pimpingngi assompangngé sibawa upacarana tungke'-tungke', ripiléi regu-regu mangoloéwé: Iya eppa ana' worowanéna Asaf: Zakur, Yusuf, Nétanya sibawa Asaréla. Pamimpinna mennang iyanaritu Asaf, iya palettu'éngngi paseng polé ri Allataala, réko risuroi ri arungngé. Iya enneng ana' worowanéna Yédutun: Gedalya, Zéri, Yésaya, Siméi, Hasabya sibawa Matica. Ri yawa pappimpinna ambo'na, napalettu'i mennang paseng polé ri Allataala naccowéri kacapi, sibawa makkélongngi mennang élong pappojiyang enrengngé sukkuru lao ri Puwangnge. Iya seppulo eppa ana' worowanéna Héman: Bukia, Matanya, Uziél, Sébuél, Yérimot, Hananya, Hanani, Eliata, Gidalti, Romamti-Ezer, Yosbékasa, Maloti, Hotir sibawa Mahaziot. Héman iyanaritu nabi paribadinna arungngé. Puwangnge mpéréngngi iya seppulo eppa ana' worowanéro enrengngé tellu ana' makkunrai lao ri Héman nasaba Puwangnge pura majjanci untu' mpéréngngi tudangeng malebbi ri aléna. Iya manenna ana'na Hémanro macculéyang musi' simbal, kacapi sibawa gambusu ri yawa pappimpinna ambo'na untu' maccowériwi upacara assompangngé ri Bolana Puwangnge. Asaf, Yédutun sibawa Héman lolongeng jamang situru panunju polé ri arungngé. Iya duwappulo eppa ana' worowanéna mennanro sibawa sumpulolona iyanaritu ahli-ahli musi'i iya tallatié. Iya manenna engka 288 tau. Untu' pattentui léléng jamanna, getteng manengngi loteréi – muwi iya maloloé iyaré'ga iya macowaé, muwi iya mappangalamangngé iyaré'ga iya nappa mammulaé magguru. Iyanaé abbagéngeng jamanna untu' sining tau Léwi pengawalna Bolana Puwangnge. Polé ri appanna Korah najello'i Mésélémiya ana' Koré polé ri kaluwarga Ebyasaf. Mappunnaiwi 7 ana' worowané iya ridaftar-é situru atturuseng umuru'na: Zakharia, Yédiaél, Zébaja, Yatniél, Elam, Yohanan, Elyoénai. Rappina rijello'i Obéd-Edom. Ribarakkakiwi ri Allataala sibawa 8 ana' worowané iya ridaftar-é situru atturu-turuseng umuru'na: Sémaya, Yozabad, Yoah, Sakhar, Nétaneel, Amiél, Isakhar sibawa Péuletai. Untu' jama-jamang pengawal-éro, appanna Obéd-Edom mabbéréyangngi 62 tau worowané iya poré. Appanna Mésélémya mabbéréyangngi 18 tau poré. Polé ri appang Mérari rijello'i Hosa. Mappunnai eppa ana' worowané: Simri (tenniyai ana' macowa, iyakiya riyakkai mancaji pamimping ri ambo'na), Hilkia, Tebalya sibawa Zakharia. Iya manenna engka 13 anggota kaluwarga Hosa iya mancajiyé pengawal Bolana Puwangnge. Sining pengawalna Bolana Puwangnge ribagéi ri laleng kalompo-kalompo situru appanna. Riwéréng towi jamang ri laleng Bolana Puwangnge pada-pada tau Léwi laingngé. Tungke' appang muwi appang iya battowaé iyaré'ga appang iya baiccu'é, gettengngi loteréi untu' missengngi ri pintu gerbang kégi mennang harusu majjama. Sélémya lolongengngi pintu gerbang seddé alau, Zakharia ana'na, iya tuli mabbéré pangaja iya makessingngé, lolongengngi pintu gerbang seddé manorang. Obéd-Edom lolongengngi pintu gerbang seddé yattang sibawa ana'-ana'na lolongengngi jamang jagaiwi sining gudang paréwaé. Supim sibawa Hosa lolongengngi pintu gerbang seddé yajang sibawa pintu gerbang Syalékhét iya engkaé ri laleng tuppungngé. Jamang makkawal-é riyatoro'i makkuwaro rupanna angkanna tuli engka iya jagaé ri pintu gerbangngé. Tungke' esso ri seddé alau engka 6 pengawal, ri seddé manorang 4 sibawa seddé yattang 4. Sining gudang paréwaé rikawal towi 4 tau: 2 untu' tungke' gudang. Ri papiliyunna seddé yajang ritaroi 4 pengawal ri lalengngé sibawa 2 pengawal ri papiliyungngé. Makkuwaniro abbagéngeng jamang akkawalakengngé lao ri appang Korah sibawa appang Mérari. Sining tau laingngé ri laleng suku Léwi riwéréngngi tanggung jawa' lao ri waramparanna Bolana Puwangnge sibawa gudang onrong taroi pabbéré-pabbéré untu' Allataala. Ladan iyanaritu séddiwi ana' worowanéna Gérson; panonnoi siyagangngaré kalompo appang, muttama'ni appang Yéhiél ana'na. Ana'-ana'na Yéhiél, iyanaritu Zétam sibawa Yoél, riwéréngngi tanggung jawa' lao risining gudangngé sibawa dowina Bolana Puwangnge. Wija-wijanna Amram, Yizhar, Hébron sibawa Uziél lolongeng towi bagéyang jamang. Sébuél polé ri appang Gérsom, ana' Musa, iyanaritu panganrowanna waramparanna Bolana Puwangnge. Mappunnaiwi assisumpungeng kaluwarga sibawa Sélomit naolai Eliézer silessurenna Gérsom. Jori assossorenna Eliézer lettu ri Sélomit iyanaritu makkuwaiyé: Eliézer, Réhabya, Yésaya, Yoram, Zikhri sibawa Sélomit. Sélomit sibawa sumpulolona mattanggung jawa'i lao ri sininna pabbéré iya nakkasuwiyangengngé Arung Daud, kapala-kapala kaluwargaé, sining pamimping appangngé sibawa sining parawira tanré. Iyaro sining pabbéré iyanaritu sibagiyang barang rappa iya nalolongengngé mennang ri laleng ammusurengngé sibawa iya nakkasuwiyangengngé mennang untu' napaké banna ri laleng Bolana Puwangnge. Rippe'na, Sélomit sibawa kaluwargana mattanggung jawa'i lao ri sininna séuwa-séuwaé iya puraé riyabbéréyang untu' ripaké banna ri laleng Bolana Puwangnge, muttama'ni sining pakkasuwiyang iya naolaé Nabi Samuél iya puraé nabbéréyang Arung Saul, Abnér ana' Nér, sibawa Yoab ana' Zéruya. Wija-wijanna Yizhar, iyanaritu Kénanya enrengngé ana'-ana'na, riwéréngngi jamang administrasinna wanuwaé sibawa jama-jamang angadélékengngé ri Israélié. Sininna urusang agamaé sibawa urusang apparéntangngé ri Israél seddé yajanna Salo Yordan riyabbéréyangngi lao ri Hasabya, sibawa lao ri 1.700 sumpulolona: iya manenna tomariyolo wijanna Hébron. Pamimping wija-wijanna Hébron iyanaritu Yéria. Ri taung mapatappuloé apparéntanna Arung Daud risalidikiwi wija-wijanna Hébron. Ri laleng assalidikengngéro annessana ri yelle'na mennang engka prajuri-prajuri poré iya monroé ri Yazer ri laleng daérana Giléad. Sininna urusang agamaé sibawa apparéntangngé ri Israél seddé alauna Salo Yordan – iyanaritu daérana suku Rubén, Gad sibawa sibagiyang suku Manasyé – riyabbéréyangngi lao ri 2.700 kapala kaluwarga Yéria, iya manenna tomariyolo iya napilé Arung Daud. Dé' nabilangngi Arung Daud sining tau iya makkéumuru'é ri yawana 20 taung, saba' Puwangnge pura majjanci maélo mébbui tau Israélié singngéga wéttowingngé ri langié. Mappammulani Yoab ana' Zéruya mabbilang, iyakiya dé' napappuraiwi, saba' Allataala hukkungngi tau Israélié, nasaba iyaro abbilangengngé. Iyanaro saba'na jumellana mennang dé' nataroki ri laleng kitta'na Arung Daud. Amuréna Arung Daud iya riyasengngé Yonatan, iyanaritu séddiwi pappangaja iya maccaé sibawa matanré aggurunna. Aléna sibawa Yéhiél ana' Hakmoni riwéréng tanggung jawa' lao ri pendidikanna ana'-ana' worowanéna arungngé. Ahitofel iyanaritu pappangaja arungngé sibawa Husai tau Arkié, iyanaritu pappangaja sibawa sellao maréppé'na arungngé. Maténana Ahitofel, risulléiwi ri Abyatar sibawa Yoyada ana' Bénaya. Pallima tentarana akkarungengngé iyanaritu Yoab. Napparéntanni Arung Daud kuwammengngi naddeppungeng sininna pamimpinna Israélié ri Yérusalém. Jaji sining kapala sukué, sining pajaba urusang apparéntangngé, sining kapala appangngé, sining panganrowang waramparangngé sibawa olokolo'na arungngé enrengngé ana'-ana' worowanéna – rippe'na sining tomarajana saorajaé, parawiraé sibawa tau pentingngé, maddeppungeng manenni ri Yérusalém. Tettonni Daud ri yolona mennang sibawa makkeda, “Saudara-saudara sibangsa, éngkalingai! Maittana manniya patettong séddi bola mattette untu' Petti Assijancingngé, attuppuwang ajéna Puwang Allataalata. Purana' mébbu pappassadiyang untu' patettong séddi bola onrong sompai Aléna. Iyakiya Puwangnge mattéyakka pogau'i gau'éro nasaba iyya séddika prajuri iya maégaé patabbollong dara. Puwang, Allataala iya nasompaé Israélié, pura piléka sibawa wija-wijakku untu' paréntai Israélié mannennungeng. Untu' passadiyai séddi pamimping Napiléi suku Yéhuda, napolé ri sukuéro Napiléi kaluwargana ambo'ku. Sibawa polé ri sininna kaluwargana ambo'kuro Nasitujuiwi piléka sibawa pancajika arung ri sininna Israélié. Nawérékka maéga ana' na polé ri sininna ana'kuro napiléi Salomo untu' paréntai Israélié, akkarungenna Puwangnge. Makkeda makkuwaiyé Puwangnge lao ri iyya, ‘Salomo ana'mu patettongek-Ka matu bola. Purani Upilé mancaji ana'-Ku, sibawa Iyya mancaji ambo'na. Rékko mattonget-tongengngi matteru turusiwi sininna hukkung sibawa parénta-Ku pada-pada iya napogau'é makkekkuwangngéwé, maélo-Ka pakkasse'i akkarungenna untu' mannennungeng.’ ” Nainappa makkeda Daud patterui, “Jaji makkekkuwangngé, éh ra'ya'ku, ri yolona Allataalata sibawa ri yolona addeppungenna sininna Israélié, umma'na Puwang -ngéwé, uwéllauko sibawa tonget-tongeng maccowériwi sininna paréntana Puwang Allataalata. Nanallalengiwiro mulléi tette mappunnangiwi wanuwa iya makessingngéwé sibawa mappammanarengngi lao ri wija-wijammu untu' mannennungeng.” Nainappa lao ri Salomo, makkedai Daud, “Ana'ku, sitinajai Allataala iya nasompaé ambo'mu, muwakuiwi selaku Allataalamu. Harusu'ko mattumani lao ri Aléna sibawa matinulu nenniya macenning ati. Saba' Naisseng manengngi pikkirangngé sibawa cinnana atitta. Rékko musappai, muruntu'i matu, iyakiya rékko musalaiwi, Nasampéyakko matu lettu mannennungeng. Engngerangngi madécéd-décéng makkedaé Puwangnge pura piléko untu' patettong bola iya ripallaingngé untu' Aléna. Nah, makkekkuwangngé jamani iyaro sibawa pangéloreng iya matedde'é.” Purairo nabbéréyanni Daud lao ri Salomo rancana bangunang untu' Bolana Puwangnge, sining gudanna, sininna kamara'na, sibawa Bili' Pommapaccingngé, onrong paddampengeng dosaé. Nabbéréyang towi Daud sininna rancana iya puraé napikkiri untu' seddéna sibawa sining bili' ri mattulilinna, sibawa untu' sining gudang paréwanna Bolana Puwang -ngéro enrengngé sining gudang onrong mattaro pabbéré-pabbéré untu' Puwangnge. Nabbéréyang towi rancana passalenna akkalompokennna imang-ngimangngé sibawa tau Léwié, passalenna jama-jamang iya harusu'é napogau' mennang, iyanaritu jamanna mennang ri Bolana Puwangnge sibawa parakaiwi sininna paréwa assompangngé. Mabbéréi panunju-panunju passalenna carana jamai ulawengngé sibawa péra'é untu' mébbu pakkakkasa-pakkakkasa, untu' tungke' pajjennangeng sibawa ajé pajjennangeng, untu' sining méjang polé ri péra'é, sibawa untu' tungke' méjang ulaweng onrong roti ripatalaé untu' Allataala. Makkuwatoro panunju-panunju passalenna jumellana ulaweng tuléngngé iya harusu'é ripaké untu' mébbu sondo, mangko sibawa boli-boli, passalenna égana péra' sibawa ulaweng untu' mébbu penné-penné, passalenna égana ulaweng tuléng untu' mébbu mézba onrong attunung dupa sibawa untu' mébbu karéta untu' dato-dato kérub sibawa panni mallebba ri yasé'na Petti Assijancinna Puwangnge. Nainappa makkeda Arung Daud, “Iya manennaro tarokii ri laleng rancana iya puraé naoki situru sibawa panunju iya nabbéréyangngé aléna Puwangnge lao ri iyya untu' ripogau'.” Nainappasi makkeda Arung Daud lao ri Salomo ana' worowanéna, “Harusu'ko mateppe sibawa barani. Pammulaini jama-jamangngéro sibawa aja' mumétau lao ri muwi aga. Puwang Allataala iya usompaé tulukko matu. Dé' nasalaiko matu. Naranrekko matu narapi tépu maneng iyaro jama-jamangngé. Attawang jamangngé ri laleng Bolana Puwangnge pura ripattentuni ri yelle'na sining imangngé sibawa tau Léwié. Pajjama-jama iya ahlié ri laleng jamanna tungke'-tungke' tulukko matu sibawa masennang ati, enrengngé sining pamimpingngé silaong sininna ra'ya'é turusiwi matu paréntamu.” Nainappa makkeda Arung Daud lao ri sininna tau iya maddeppungengngé kuwaro, “Polé ri sininna ana' worowanéku, Salomo ritu napilé Allataala. Iyakiya malolo senna mupi sibawa makurang pangalamanna, na iyaé jama-jamangngé battowa senna. Nainappani iya maéloé ripatettonro tenniya saoraja untu' tolino, sangadinna bola untu' Puwang Allataala. Paréwanna untu' bolaéro silaong parabo'na purani upassadiya sibawa sininna pakkullékku. Purana' passadiya ulaweng, péra', gessa, bessi, aju, batu-batu mangke'é sibawa batu-batu paramata, batu-batu maddupa-rupangngé tappana untu' bélo-bélo sibawa maéga senna batu puwalam. Mala nasaba upojinna Bolana Puwang Allataalakuro pura tona mabbéré péra' sibawa ulaweng polé ri waramparang appunnangekku: Nasining kapala appangngé, kapala sukué, sining parawiraé sibawa iya tanggung jawakiyéngngi waramparanna arungngé pannessai makkedaé macinna towi mennang massumbang. Nanabbéréyang towi mennang iya mangoloéwé untu' patettongngi Bolana Puwang -ngéro: ulaweng 170 tong lebbi, péra' 340 tong lebbi, gessa nawéki 620 tong, sibawa bessi 3.400 tong lebbi. Sining tau iya mappunnaiyé batu-batu paramata nabbéréyangngi lao ri Yéhiél untu' riputtama ri laleng kasna Bolana Puwangnge. (Yéhiél iyanaritu séddiwi tau Léwi polé ri appang Gérson.) Mabbéréni ra'ya'é sibawa macenning ati lao ri Puwangnge sibawa marennu mennang nasaba maégani iya nakkasuwiyangengngé mennang. Marennu senna toni Arung Daud. Napoji-pojini Arung Daud Puwangnge ri yolona tau maégaéro. Makkedai, “Oh Puwang Allataala iya nasompaé Yakub toriyolota, ripojiko untu' mannennungeng! Battowa tongekko sibawa makuwasa. Malebbiko, tarompo sibawa maraja. Sininna séuwa-séuwaé ri langié sibawa ri linoé iyanaritu appunnangem-Mu. Iko arung maraja, iya makuwasaiyéngngi sini-sininnaé. Sininna asugirengngé sibawa acommokengngé assalenna poléi ri iko; sininna séuwa-séuwaé mukuwasaiwi sibawa awatangem-Mu enrengngé akuwasam-Mu; makuwasako mébbui nigi-nigi mancaji tau battowa sibawa mawatang. Makkekkuwangngé, oh Puwang Allataalata, sukkuru'ki ri Iko, sibawa mappojiki ri asem-Mu iya marajaé. Iyya sibawa ra'ya'kué sitongenna dé' aga-aga naullé mabbéréyang lao ri Iko, nasaba iya manenna iyanaritu pabbéré-Mu na aga iya riyabbéréyangngéwé iyanaritu appunnangem-Mu towi. Muwisseng, oh Puwang, makkedaé pada-pada sining toriyolota, rijoppai towi atuwongngéwé selaku tau polé-polé sibawa tau laing. Atuwotta pada-padai wajo-wajo iya labe'é, dé' naweddikki leppe polé ri amaténgngé. Oh Puwang, Allataalata, sininna barang mangke'éwé upaddeppungengngi kuwaé untu' patettong séddi bola untu' alé-Mu kuwammengngi weddikki pakalebbii asem-Mu iya mapaccingngé. Iyakiya iya manennaro ritarimai polé ri Iko muto sibawa appunnangem-Mu towi ritu. Uwisseng Muojiwi atinna tungke' tauwé sibawa Mupojiwi tau iya mapaccingngé atinna. Matinulu sibawa masennang ati uwakkasuwiyangeng manengngi iyaé lao ri Iko. Purani usabbing pékkugi umma'-Mu iya maddeppungengngé kuwaé tiwii pakkasuwiyanna lao ri Iko sibawa masennang ati. Oh Puwang Allataala, iya nasompaé Abraham, Ishak sibawa Yakub, toriyolota, tennapodo iko manganrowang kuwammengngi natette umma'-Mu pojiko pada-pada makkekkuwangngéwé sibawa attulunno kuwammengngi natuli matinulu mennang lao ri Iko. Wérénni Salomo ana' worowanéku, pangéloreng iya mattonget-tongengngé untu' turusiwi sininna parénta-Mu sibawa untu' patettong bola assompangngéro iya puraénna upassadiya.” Purana massempajang makkuwaro, makkedani Daud lao ri tau maégaé iya maddeppungengngé kuwaro, “Pojiwi Puwang Allataalamu!” Nasininna tauwéro poji-pojiwi Puwangnge, Allataala iya nasompaé toriyolona. Nainappa mennang suju' untu' pakalebbii Puwangnge sibawa arungngé. Esso rappina géréni mennang olokolo untu' riyakkasuwiyangeng selaku akkarobangeng lao ri Puwangnge, nainappa nabbagéyang lao ri sininna ra'ya'é. Ri lainnaéro engka 1.000 saping lai, 1.000 bimbala lai sibawa 1.000 bimbala lolo iya rigéréé sibawa ritunu makkalépu ri yasé'na mézbaé. Makkasuwiyangeng towi mennang anggoro iya riwaji'kangngé untu' akkarobangeng-akkarobangengngéro. Iyaro essoé manré ménunni mennang sibawa marennu ri yolona Puwangnge. Nainappa untu' mabbékkaduwanna nappallebbangenni mennang Salomo selaku arung. Ri laleng asenna Puwangnge, narésmikanni mennang mancaji arunna sibawa Zadok mancaji imang. Selaku passulléna Daud ambo'na, ménré akkarungenni Salomo iya puraé napattette Puwangnge. Aléna arung iya mallolongengngé sibawa riyakkitangi ri sininna bangsa Israélié. Sininna pajaba apparéntangngé sibawa tentaraé lettu ri ana'-ana' worowanéna Daud iya laingngé mangakui towi akuwasanna Salomo selaku arung. Puwangnge mébbui sininna ra'ya'é bengngariwi Arung Salomo sibawa pancajiwi arung iya lebbi héba'é naiya muwi arung niga iya puraé paréntai Israélié. Daud ana' Isai paréntai sininna Israélié patappulo taung ittana. Ri Hébron mapparéntai 7 taung ittana sibawa ri Yérusalém 33 taung ittana. Sugii sibawa malebbi enrengngé matéi ri umuru macowaé. Salomo ana' worowanéna mancaji arung sulléiwi. Riwaya'na Arung Daud polé ri pammulanna lettu ri paccappurenna purani riyoki ri laleng kitta'na Nabi Samuél, Nabi Natan sibawa Nabi Gad. Ri laleng kitta'éro ricuritai passalenna apparéntanna, akuwasanna sibawa sininna iya kajajiyangngé ri aléna, ri Israél sibawa sining akkarungengngé ri seddéna Israél. Salomo ana' worowanéna Arung Daud mancaji arunni iya masse'é tudangenna ri laleng akkarungenna Israélié. Puwang Allataalana barakkakiwi sibawa pancajiwi makuwasa senna. Sininna kapala pasukang sisebbué sibawa pasukang sératué, sininna pajaba pamaréntaé, sibawa sininna kapala kaluwarga Israélié riparéntang ri Arung Salomo untu' lao sibawa aléna ri onrong assompangngé ri Gibéon. Laoni mennang kuwaro, nasaba kuwaniro engka Kémana Puwangnge iya naébbué Musa atanna Puwangnge wettunna ri padang kessi'é. ( Iyakiya Petti Assijancinna Puwangnge engkai ri Yérusalém ri laleng kéma iya napasangngé Arung Daud untu' Pettiéro wettunna napalétté polé ri Kiryat-Yéarim.) Mézba gessaé iya naébbué Bézaleel ana' Uri, eppona Hur, engka towi ri Gibéon ri yolona Kémana Puwangnge. Arung Salomo sibawa sininna ra'ya'é massompai lao ri Puwangnge kuwaro. Ri yolona Kémaéro nakkasuwiyangenni arungngé ri yasé'na mézba gessaé sisebbu olokolo selaku akkarobangeng ritunu untu' Puwangnge. Iyaro wennié nappaitanni aléna Allataala lao ri Salomo sibawa makkeda, “Salomo, éllauni aga iya muwacinnaiyé, Uwérékko matu iyaro!” Nappébali Salomo, “Oh Allataala, purani Muwappaitang makkedaé Muwamaséi senna'i ambo'ku Daud, sibawa purani Muwakkaka mancaji arung sulléiwi. Makkekkuwangngé oh Puwang Allataala, tennapodo Murupaiwi jancim-Mu ri ambo'ku. Purani Muwakkaka mancaji arung ri bangsa battowaéwé iya dé'é naribilang jumellana. Rimakkuwannanaro wérénna' apanréng sibawa pangissengeng iya uwapparelluwangngé untu' pimpingngi mennang. Rékko dé' nakkuwaro, pékkugi makkulléka paréntai umma'-Mu iya battowaéwé?” Nappébali Allataala lao ri Salomo, “Iyaro paréllaummu makessing. Dé' muwéllau asugireng iyaré'ga ataromporeng iyaré'ga amaténna sining balimmu iyaré'ga umuru malampé untu' alému, sangaddinna apanréng sibawa pangissengeng untu' paréntai umma'-Ku iya Uwappaddettangengngé ri iko. Rimakkuwannanaro Uwérékko matu apanréng sibawa pangissengeng. Ri lainnaéro Upancajiko matu lebbi madécéng, lebbi sugi sibawa lebbi tarompo naiya muwi arung niga ri wettu labe'é iyaré'ga wettu mangoloé.” Nainappa nasalai Salomo onrong assompangngé ri Gibéon iya naonroiyé Kémana Puwangnge, nanalisu ri Yérusalém. Polé kuwaniro pajoppai apparéntangngé ri Israélié. Napassakke'i tentarana sibawa 1.400 karéta musu nenniya 12.000 anyarang pammusu. Sibagiyang nataro ri Yérusalém, na lebbinna ri siyagangngaré kota laing. Ri laleng apparéntanna Salomo, ulawengngé sibawa péra'é sinrupai barang biyasaé ri Yérusalém, pada-pada batué; sibawa aju camara Libanongngé maéga senna pada-pada aju ara biasaé. Naolai padangkang-padangkang iya bantuéngngi arungngé, ripapoléi anyarangngé polé ri Maséré sibawa Kéwé, sibawa karéta-karéta musué ripapoléi polé ri Maséré, nainappa ribalu'si lao risining arung Hét-é enrengngé sining arung Siriaé sibawa ellinna 150 dowi péra' untu' sikaju anyarang, sibawa 600 dowi péra' untu' séddi karéta musu. Purani napettui Arung Salomo untu' patettongngi Bolana Puwangnge, sibawa séddi saoraja untu' aléna. Untu' iyaro napangarai 70.000 tau untu' makka bahang bangunang, 80.000 tau untu' mappa batu ri bulué sibawa 3.600 mandoro untu' jagaiwi jama-jamangngéro. Nakirinni Salomo iyaé karébaé lao ri Hiram arung Tirus, “Sitinajai Puwang pakangka assisumpungeng dangkangeng sibawa iyya pada-pada sibawa Daud ambo'ku. Purani nabalu' puwang lao ri aléna aju camara Libanongngé untu' appatettongenna saorajana. Makkekkuwangngé maéloka patettong séddi bola assompang iya ripallaingngé untu' pakalebbii Puwang Allataalaku. Ri bolaéro iyya sibawa ra'ya'ku maélo massompa ri Aléna sibawa mattunu dupa mawangié, enrengngé makkasuwiyangeng roti ripatala untu' Aléna secara tette. Ri bolaéttoro maéloki makkasuwiyangeng akkarobangeng ritunu tungke élé sibawa wenni, tungke Esso Saba', Esso Maraja Uleng Baru sibawa esso-esso ri pallaing laingngé untu' pakalebbii Puwang Allataalata. Saba' purani Napparéntang kuwammengngi iyaro gau'éro napogau'i untu' mannennungeng tau Israélié. Macinnaka kuwammengngi Bolana Puwangnge iya maéloé ripatettonro sinrupai bola iya marajaé, saba' lebbi marajai Allataala naiya muwi déwata aga. Iyakiya sitongenna dé' muwi séddi tau mulléi patettong bola untu' Allataala, saba' sininna bétara malowangngé dé' nagenne loppona untu' mancaji onron-Na. Jaji, Bolana Puwang iya uwullé patettonro naullé banna onrong untu' mattunu dupa lao ri Allataala! Rimakkuwannanaro, sitinajai Puwang kiring lao ri idi séddi tau iya maccaé massobbi sibawa mulléi jamai ulawengngé, péra'é, bessié, makkuwatoro iya maccaé jamai kaing gawu'é, collipao sibawa cella. Majjamai matu silaong sining panré ri Yéhuda sibawa Yérusalém iya puraé napilé ambo'ku Daud. Uwisseng sining pattubbang ajué ri wanuwanna Puwang macca mattubbang aju, rimakkuwannanaro sitinajai Puwang kiringngi lao ri iyya maddupa-rupang aju camara sibawa aju cénrana polé ri Libanon. Maéloka pangarai sining taukku untu' duwangngi sining taunna Puwang, kuwammengngi napassadiyai mennang sijumella égana aju. Saba' Bola Puwang iya maéloé upatettonro harusu'i battowa sibawa héba'. Untu' bokonna sining tauwéro maéloka kiring lao ri puwang duwanrupa gandong, tungke-tungke 2.000 tong, anggoro 400.000 bang égana sibawa minnya zaitun 400.000 bang.” Selaku pappébalinna iyaro sure'na Arung Salomo, kirinni sure' Arung Hiram iya makkuwaé oninna, “Nasaba Puwangnge mamaséiwi umma'-Na, purani nakka Puwang mancaji arunna mennang. Ripojiwi Puwang Allataalana Israélié, Pappancajinna langié sibawa linoé! Nawéréngngi Daud séddi ana' worowané iya mapanré senna'é namacca, sibawa engka pangissengenna, iya makkuragaé makkekkuwangngé patettong séddi bola untu' Puwangnge sibawa séddi saoraja untu' aléna. Nasibawang iyaé ukiringngi lao ri Puwang séddi tau ahli iya maccaé namapanré, asenna Huram. Indo'na poléi ri suku Dan, ambo'na tau Tirus. Maccai mébbu barab-barang polé ri ulawengngé, péra'é, gessaé, bessié, batué sibawa ajué. Naulléi jamai kaing gawu'é, collipaoé, cella'é sibawa kaing lénangngétto. Sininna rupanna jama-jamang sobbi'é naulléi mébbui situru modélé aga iya riyéllauwé. Makessingngi risuro untu' majjama silaong sining tukanna Puwang, sibawa silaong sining tau iya puraé majjama untu' Arung Daud ambo'na Puwang. Mattajekki rikiringeng iya duwa rupanna gandongngé, anggoro sibawa minnya zaitun iyaro najjanciyangngé Puwang. Maéloki tubbang aju camara polé ri buluna Libanon singngéga iya napparelluwangngé Puwang, nainappa siyoi mancaji rai, nariyalireng lalo ri tasi'é lettu ri Yopé. Polé kuwaro weddingngi nakka Puwang lao ri Yérusalém.” Pakangkani Arung Salomo abbilangeng lao ri sininna tau laing iya monroé ri Israélié, pada-pada iya puraé napogau' Arung Daud ambo'na. Annessana engka 153.600 tau laing. Pituppulo sebbu polé ri mennang risuro untu' makkai bahab-bahang bangunangngé, 80.000 untu' mappa batu ri bulué, sibawa 3.600 untu' jagaiwi sibawa mattanggung jawa' ri jama-jamangngéro. Pura napattentu'ni Arung Daud makkedaé harusu'i ripatettong Bolana Puwangnge ri Yérusalém ri Bulu Moria ri onrong addesekeng gandong appunnangenna Arauna tau Yébus-é. Appatettongenna iyaro Bolana Puwangnge napammulaiwi Arung Salomo ri uleng maduwaé taung maeppaé apparéntanna. Lampéna iyaro bolaé 27 météré sibawa sakkana 9 météré. Lampéna bili' yoloé pada-pada sakkana Bolaéro, iyanaritu 9 météré. Tanréna 54 météré. Bagiyang lalenna iyaro bolaé rilapiriwi sibawa ulaweng tuléng. Bili' mapongngé ripépengiwi sibawa aju camara iya kaminang makessingngé enrengngé rilapiriwi sibawa ulaweng cowa. Ri lapina iyaro ulawengngé engka sobbi gambara pong pattuku sibawa gambara ranté. Nabélo-béloiwi arungngé iyaro bolaé sibawa batu paramata iya makessingngé sibawa ulaweng iya ripapolé ri wanuwa Parwaim. Napaké towi iyaro ulawengngé untu' lapiriwi témbo'-témbo'na iyaro Bolana Puwangnge, balo'-balo'na, tau-tau tange'na sibawa tange'na. Témbo'-témbo'na risobbi'i sibawa gambara kérub. Bili' lalengngé iya riyasengngé Bili' Pommapaccingngé lampéna 9 météré sibawa sakkana 9 météré, pada-pada sakkana Bolana Puwang -ngéro. Duwappulo tong ulaweng ripaké untu' lapiriwi témbo'-témbo'na Bili' Pommapaccingngéro sibawa 570 gerang ulaweng untu' mébbu paku. Témbo'na bili'-bili' langga' yasé'na rilapiri towi ulaweng. Untu' Bili' Pommapaccingngéro riyébbureng towi kaing pallawa polé ri lénangngé sibawa kaing laing iya magawu'é, collipao sibawa cella. Iyaro kaing pallawaé ribélo-béloiwi sibawa gambara-gambara kérub. Mébbui arungngé duwa alliri iya tungke'-tungke'é 15,5 météré tanréna, nainappa nataro ri yolona Bolana Puwangnge. Tungke' alliriéro mappunnaiwi ulu alliri 2,2 météré tanréna. Bagiyang yasé'na iyaro alliri-allirié ripagelloriwi sibawa bélo-bélo polé ri gessaé, maddupa anengeng ranté sibawa 100 buwa dalima. Iyaro sining allirié ripatettongngi ri seddé abéyo sibawa ataunna sumpang muttama'é ri Bolana Puwangnge; iya seddé yattangngé riyasengngi Yakhin, sibawa iya seddé manorangngé riyasengngi Boas. Nassurowanni Arung Salomo mébbu séddi mézba gessa, iya lampénaé sibawa lebba'na tungke-tungke 9 météré, sibawa tanréna 4,5 météré. Mébbu towi séddi kullang gessa iya mallébué, sibawa ukkurang makkuwaé: liyunna 2,2 météré, sakkana bawana 4,4 météré, sibawa lébuna 13,2 météré. Wiring saliwenna mattulili ribélo-béloiwi sibawa duwabbarisi gambara saping, iya ricuwangngé silaong kullangngéro. Iyaro kullangngé ritaroi ri yasé'na lekke'na 12 saping gessa – tellu mangolo ri manorang, tellu ri yattang, tellu ri yajang, sibawa tellu ri alau. Umpe'na iyaro kullangngé 75 milli. Wirinna sinrupai wiring cangkiri iya mattékkoé massu maélo pada bunga bakung iya tabbakkaé. Iyaro kullangngé naullé mala kira-kira 60.000 bang. Mébbu towi Arung Salomo 10 katowang loppo, lima untu' ritaro ri seddé yattanna Bolana Puwangnge, sibawa lima untu' ri seddé manoranna. Akkégunanna iyaro sining katowangngé untu' bissaiwi sépa'-sépa' olokolo iya maéloé ritunu selaku akkarobangeng. Uwai ri laleng kullang battowaéro ripassadiyangengngi sining imangngé untu' bissaiwi aléna. Mébbu towi Arung Salomo séddi seddé ri laleng untu' sining imangngé sibawa séddi seddé ri saliweng. Tange'na sining gerbangngé ri yelle'na iya duwa seddéro rilapiriwi sibawa gessa. Kullangngé ritaroi ri seddé sung alau yattanna Bolana Puwangnge. Arungngé suroi mébbui iyaro barab-barangngé ri accuwangeng bessié ri pallawangenna Sukot sibawa Zeréda ri Lompo Yordan. Iyaro barab-barangngé makkuwamani égana, angkanna dé' muwi séddi tau iya missengngéngngi siyaga kilo gessa ripaké. Puranana napatettong Arung Salomo iyaro Bolana Puwangnge, nataroni ri laleng sining gudanna bolaéro sininna péra'é, ulawengngé, sibawa barab-barang laing iya puraé nakkasuwiyangeng Daud ambo'na lao ri Puwangnge. Purairo nasuroni Arung Salomo sininna pamimping suku sibawa appang polé ri bangsa Israélié maddeppungeng ri Yérusalém untu' palétté'i Petti Assijancinna Puwangnge polé ri Sion, Kota Daud lao ri Bolana Puwangnge. Na polé manenna mennang ri Esso Maraja Kalampang Daud-daungngé. Maddeppungeng manennana iyaro pamimpingngé, nakkani sining tau Léwié iyaro Petti Assijancingngé, nanatiwii ri Bolana Puwangnge. Kémana Puwangnge sibawa sininna passakke-sakke'na napalétté toni ri Bolana Puwangnge sining imangngé sibawa tau Léwié. Maddeppungennni Arung Salomo sibawa sininna ra'ya'é ri yolona Petti Assijancingngéro nainappa makkasuwiyang lao ri Puwangnge bimbala sibawa saping iya tenribilangngé égana. Purairo naputtama'ni sining imangngé iyaro Petti Assijancingngé ri laleng Bolana Puwangnge sibawa palénne'i ri yawana dato'-dato' kérub-é ri laleng Bili' Pommapaccingngé. Pannina iyaro dato'-dato'é mallebba'i tongkoi iyaro pettié sibawa aju-aju pabbuléna. Iyaro aju pabbuléna malampé senna, angkanna cappa-cappa'na paita polé ri yolona Bili' Pommapaccingngé, iyakiya dé' napaita polé ri saliweng. (Lettu essoéwé iyaro sining ajué engka mupi kuwaro.) Ri laleng Petti Assijancingngéro dé'gaga muwi séuwa sangadinna duwallétta batu. Iyaro batué naputtama'i Musa kuwaro ri Bulu Sinai, wettunna Puwangnge mébbu assijancing sibawa bangsa Israélié wettunna mennang ri laleng allalengengngé polé ri Maséré lao ri wanuwa Kanaan. Massempajanni Arung Salomo, “Oh Puwang, lebbi Mupojiwi monro ri laleng apettangenna ellungngé. Upatettongenno makkekkuwangngé Bola iya magelloé, untu' onrong Muwonroi mannennungeng.” Puranana massempajang, gilinni arungngé lao ri sininna ra'ya' iya mattengngangngé tettong kuwaro, nainappa méllauwi barakka'na Allataala untu' mennang. Namakkeda paimeng Salomo, “Ambo'ku Daud pura rancanai untu' patettong bola onrong assompang lao ri Puwang Allataalana Israélié. Iyakiya makkedai Puwangnge lao ri aléna, ‘Iyaro akkattamu makessing. Iyakiya tenniya iko, sangadinna ana'mu ritu patettongngi matu iyaro Bola-Ku!’ Makkekkuwangngé purani narupai Puwangnge jancin-Na. Mancajina' arunna Israélié sulléiwi ambo'ku, napura tona patettongngi bolaé untu' assompang lao ri Puwangnge, Allataalana Israélié. Purani upassadiyangeng onrong ri laleng Bolana Puwang -ngéro untu' Petti Assijancingngé iya mallise'é batu assijancing ri yelle'na Puwangnge sibawa umma'na Israélié.” “ Puwang Allataalana Israélié! Ri langié iyaré'ga ri linoé dé'gaga pada-padam-Mu! Murupaiwi jancim-Mu sibawa mappaitangngi pammasému lao ri umma'-Mu iya matinulué nenniya mapatoé sibawa sukku atinna lao ri Iko. Purani murupai jancim-Mu lao ri ambo'ku Daud. Aga iya Muwajjanciyangngéro purani Mupogau' iyaé essoé. Iyakiya, oh Allataala, tongekkoga Maélo monro ri linoéwé ri yelle'na tolinoé? Muwi sininna langié dé'to nagenne lowanna untu' alé-Mu, apalagi bola assompang iya upatettongngéwé! Oh Puwang, Allataala, iyya atam-Mu! Iyakiya tennapodo éngkalingai sempajakku, sibawa tarimai paréllaukku. Rékko séddié tau ritenre pasala lao ri tau laingngé naritiwi ri mézba-Mu ri laleng Bola-Mué untu' mattanro makkedaé dé' napasala, oh Puwang, sitinajako méngkalingai ri surugaé sibawa pettuiwi parakarana ata-atam-Mué. Hukkungngi iya pasalaé sibawa paleppe'i iya dé'é napasala. Rékko umma'-Mu Israélié ricaui risining balinna nasaba madosai mennang, nainappa massesse kalé sibawa pakalebbisi-Ko selaku Puwang, nanapolé ri Bola-Mué enrengngé massempajang méllau addampeng ri Iko, tennapodo Muwéngkalingai mennang ri surugaé. Tennapodo Muwaddampengengngi dosana umma'-Mué, sibawa tiwii mennang lisu ri wanuwa iya puraé Muwabbéréyang lao ri mennang sibawa lao ri toriyolona. Rékko madosai umma'-Mu ri iko namuhukkungngi mennang sibawa dé' mupateppai bosié, nanatoba' mennang polé ri dosana sibawa pakalebbi-Ko selaku Puwang, namangolo ri Bola-Mué enrengngé massempajang ri Iko, oh Puwang, ri surugaé, éngkalingai mennang. Sibawa addampengengngi dosana ata-atam-Mu umma Israélié. Paggurui mennang pogau'i aga iya tongengngé. Purairo, oh Puwang, pateppai bosié ri wanuwam-Mué, wanuwa iya Muwabbéréyangngé lao ri umma'-Mu untu' mancaji appunnangenna mannennungeng. Rékko nakennai akkadéreng iyaré'ga sai iyaé wanuwaé, iyaré'ga tanet-tanengngé nasolangiwi anging pella, ule' iyaré'ga incalé, iyaré'ga rékko umma'-Mu rigasai ri balié, iyaré'ga nakennai lasa, tennapodo Muwéngkalingai sempajanna mennang. Rékko polé ri yelle'na umma'-Mu Israélié iya massempajangngé sibawa masussa atinna lao ri Iko nanapappale' towi limanna mattuju ri Bola-Mué, tennapodo Iko ri laleng onrom-Mu ri surugaé méngkalingai enrengngé maddampengengngi mennang. Banna Iko missengngi lise' atinna tolinoé. Rimakkuwannanaro gaukenni tungke tauwé situru sining pangkaukenna, kuwammengngi natuli métau sibawa matinulu umma'-Mu lao ri Iko ri wettu monrona mennang ri wanuwa iya Muwabbéréyangngé lao ri toriyolota. Rékko séddié tau laing ri wanuwa iya mabélaé méngkalingai passalenna arajam-Mu sibawa awatangem-Mu, Namutuli sadiya untu' mattulung, nanalao ri Bola-Mué untu' massempajang ri Iko, tennapodo polé ri onrom-Mu ri surugaé Muwéngkalingai sempajanna sibawa tarimai paréllaunna. Nanallalengiwi sininna bangsaé ri sininna linoé missek-Ko sibawa mapatoi-Ko pada-pada umma'-Mu Israélié. Naissengngi matu makkedaé bola iya upatettongngé ritu onrong untu' massompa ri Iko. Rékko Muparéntangngi umma'-Mu untu' lao mammusu méwai balié, nainappa muwi kégi mennang monro, namangolo mennang ri kota Mupiléwé sibawa massempajang mattuju ri bolaéwé iya puraé upatettongek-Ko, tennapodo ri surugaé Muwéngkalingai sempajanna mennanro, sibawa mpéréngngi apakalang. Rékko madosai umma'-Mu lao ri Iko – sitongenna dé' gaga séddi tau iya dé'é namadosa – nainappa nasaba cai-Mu, Muleppessangngi mennang ricau ri balié sibawa ritiwi selaku tawangeng lao ri séuwaé wanuwa iya mabélaé iyaré'ga macawé'é, tennapodo Muwéngkalingai sempajanna mennang. Rékko ri wanuwaéro nasalaiwi mennang dosa-dosana, namassempajang lao ri Iko sibawa mangakui towi makkedaé madosani sibawa pogau'i majaé, éngkalingai sempajanna mennang, oh Puwang. Rékko ri wanuwaéro malempui mennang sibawa mattonget-tongengngi salaiwi dosa-dosana, sibawa massempajang lao ri Iko namangoloto ri wanuwaéwé iya Muwabbéréyangngé lao ri toriyolota, mattuju ri kota Mupilé sibawa bola assompang iya puraé upatettongek-Koé, na polé ri onrom-Mu ri surugaé sitinaja-Ko méngkalingai sempajanna sibawa mamaséiwi mennang. Addampengenni sininna dosana umma'mu. Makkekkuwangngé, oh Allataala, jampangiki sibawa éngkalingai sempajang iya ripalettu'é lao ri Iko polé ri onrongngéwé. Oto'no makkekkuwangngé, oh Puwang Allataala! Nasibawang Petti Assijancingngé iya pulambangngéngngi akuwasam-Muro sitinajako Muttamakiwi Bola-Mué sibawa monro kuwaé untu' mannennungeng. Barakkakiwi sininna jama-jamanna imangngé, sibawa tennapodo sininna umma'-Mu mariyo-riyoi nasaba makessik-Ko lao ri mennang. Puwang Allataala, aja' Musampéyangngi arung iya puraé Mupilé. Engngerangngi pammasé-Mu lao ri Daud atam-Mu.” Pajanana Arung Salomo massempajang, nonnoni apié polé ri langié manréi sining akkarobangeng iya riyakkasuwiyangengngé lao ri Puwangnge. Nainappa cahaya ahadérékenna Puwangnge pennoiwi iyaro Bolana Puwangnge, angkanna dé' naulléi sining imangngé muttamakiwi. Wettunna naita ra'ya' Israélié apié nonno polé ri langié sibawa cahaya ahadérékenna Puwangnge pennoiwi Bolana Puwangnge, suju'ni ri témbo'é namassompa enrengngé pojiwi Allataala, nasaba makessingngi sibawa mannennungengngi pammasé-Na. Purairo makkasuwiyanni akkarobangeng Arung Salomo sibawa sininna tau iya maddeppungengngé kuwaro lao ri Puwangnge. Untu' akkarobangeng pappasidamé nakkasuwiyangengngi Salomo 22.000 saping sibawa 120.000 bimbala. Makkuwaniro arungngé sibawa sininna ra'ya'é pakangka upacara mabbéréyangngi iyaro bola assompangngé lao ri Puwangnge. Tettonni sining imangngé ri onrong iya ripattentungengngéngngi mennang; siyolong sibawa tau Léwi iya pojiyéngngi Puwangnge sibawa paréwa-paréwa musi' iya naébbué Arung Daud, nanakkélotto élong “Pammasé-Na Mannennungengngi!” situru sibawa tangngana Daud. Masseppung tarompé'ni sining imangngé sibawa tettong maneng ra'ya'é. Nainappa nabbéréyang Salomo bagiyang pattengnganna seddé yolona bola assompangngéro lao ri Puwangnge. Nainappa nakkasuwiyangeng kuwaro akkarobangeng ritunué, akkarobangeng gandongngé sibawa lunra olokolo untu' akkarobangeng pappasidamé. Iya manennaro nakkasuwiyangengngi kuwaro nasaba mézba gessa iya puraé naébbu baiccu senna untu' iya manenna pakkasuwiyangngéro. Pakangkani Salomo sibawa sininna umma Israélié Ramé-ramé Kalampang Daud-daung pitungngesso ittana. Maéga senna jumellana tau iya maddeppungengngé untu' ramé-raméro. Poléi mennang ri daéra sibbélaé Laleng Hamat ri manorang lettu ri pakkasésénna Maséré ri yattang. Pitungngesso ittana mennang maddeppungeng untu' upacara rirésmikanna mézbana Puwangnge, nainappa pitungngessosi untu' Ramé-ramé Kalampang Daud-daungngé. Ri esso paccappurengngé ripakangkani ramé-ramé pattutu'na, na pappa bajana, ri tanggala 23 uleng pitu, nasuroni Salomo sining tauwéro lisu. Marennuni mennang nasaba sininna makessingngé iya napogau'é Puwangnge lao ri bangsa Israélié umma'-Na, lao ri Daud sibawa lao ri Salomo. Puranana napattépu Salomo appatettongenna Bolana Puwangnge sibawa saorajana arungngé situru sibawa rancanana, nappaitanni paimeng aléna Puwangnge lao ri Salomo ri wennié. Makkedai Puwangnge lao ri Salomo, “Uwéngkalingani sempajammu sibawa utarimani iyaé bolaé selaku onrong iya ripallaingngé untu' makkasuwiyangeng akkarobangeng untu' aléku. Rékko dé' upateppa bosi iyaré'ga kirikka incalé untu' paccappui wassélé tanaé iyaré'ga papolé sai ri yasé'na umma'-Ku, nainappa umma'-Ku iya pakééngngi asek-Kuro pakariyawai aléna, namassempajang sibawa lao ri Iyya enrengngé nasalaiwi pangkaukenna mennang iya majaé, na polé ri surugaé Uwéngkalingai matu sempajanna mennang. Uwaddampengengngi matu dosa-dosana sibawa pancajiwi wanuwanna macommo paimeng. Maéloka jampangiwi matteru Bola-Kué sibawa sadiya méngkalingai sininna sempajang iya ripaénré'é polé ri onrongngéwé. Iya manennaro Upogau'i matu nasaba iyaé onrongngé purani Upilé sibawa Upallaing mancaji onrong assompang lao ri alé-Ku untu' mannennungeng. Maélo-Ka jampangiwi sibawa linrungiwi sillampé wettué. Rékko iko, pada-pada Daud ambo'mu, tuwo situru élo-Ku sibawa mapato lao ri hukkung-hukkuk-Ku enrengngé pogau'i sininna iya Uwapparéntangngé lao ri iko, Urupaiwi matu jancik-Ku lao ri ambo'mu Daud makkedaé tuli engka matu séddi tau polé ri wija-wijanna iya mancaji arungngé ri Israélié. Iyakiya rékko iko sibawa ra'ya'mu majjalékkaiwi hukkung-hukkuk-Ku sibawa parénta-parénta-Ku, enrengngé massompa déwata-déwata laing, Upassuko matu polé ri wanuwa iya puraé Uwabbéréyang lao ri iko. Usalai towi matu bolaéwé iya puraé Upattette mancaji onrong assompang lao ri Iyya. Kégi-kégi iyaé bolaé ripakatunai matu sibawa ricawa-cawaiwi. Iyaé bola assompangngé ripakalebbi senna'i makkekkuwangngé, iyakiya iyaro wettué tungke tau iya laloé kuwaro hérangngi matu mitai. Makkedai matu mennang, ‘Magi Puwangnge napogau'i makkuwaéro lao ri wanuwaéwé sibawa bolaéwé?’ Nappébali matu tauwé, ‘Nasaba nasalaiwi mennang Puwangnge, Allataalana, iya puraé mantara'i toriyolona massu polé ri Maséré. Massompai mennang sibawa majjanci matinulu lao ri déwata-déwata laingngé. Iyanaro saba'na napapoléi Puwangnge abalaéwé ri yasé'na mennang.’ ” Napatettongngi Salomo Bolana Puwangnge sibawa saorajana arungngé ri laleng wettu 20 taung. Kota-kota iya nabbéréyangngé Arung Hiram lao ri aléna, napatettongngi paimeng, nainappa nasuro tau Israélié monro kuwaro. Nasittaiwi daéra Hamat sibawa Zoba enrengngé pakkasse'i kota Tadmor ri padang kessi'é, nainappa napatettong paimeng pusa'na bokongngé ri Hamat. Napatettongngi paimeng kota Bét-Horon-Yasé sibawa Bét-Horon-Yawa mancaji kota mabbénténg sibawa gerbang iya taccala'é tange'na. Napatettong towi paimeng kota Baalat, sibawa sininna kota bokongngé, enrengngé kota-kota pangkalanna karétaé sibawa anyaranna. Sininna rancana appatettongenna ri Yérusalém, Libanon sibawa ri sininna daéra akuwasanna purani napogau'. Tau Israélié dé' narisuro majjama passa; jamanna mennang iyanaritu selaku prajuri, parawira, komandang karéta musu, sibawa tentara pasukang makkinnyarang. Duwa ratu limappulo pegawé riwéréng tanggung jawa' lao ri sining tau iya pogau'é jamang passa ri laleng maddupa-rupang proyé' pembangunang. Napalétté'ni Salomo bainéna, iyanaritu ana'na arung Maséré, polé ri Kota Daud lao ri bola iya napatettongengéngngi. Saba' mappikkiri'i Salomo, “Dé' nawedding monro bainéku ri saorajana Daud, arunna Israélié, nasaba sininna onrong puraé naonroi ripalénne Petti Assijancingngé iyanaritu onrong mapaccingngi.” Makkasuwiyanni Salomo akkarobangeng ritunu lao ri Puwangnge ri yasé'na mézba iya napatettongngé ri yolona Bolana Puwangnge. Iyaro sining akkarobangengngé nakkasuwiyangengngi situru Hukkunna Musa untu' tungke esso maraja: Esso Saba', Esso Maraja Uleng Baru, sibawa iya tellu esso maraja pattaungengngé, iyanaritu Esso Maraja Roti Dé'é Raginna, Esso Maraja Engngalang sibawa Esso Maraja Kalampang Daud-daung. Situru sibawa sining peraturanna Daud ambo'na, naatoro'i Salomo jama-jamang esso-essoé untu' sining imangngé sibawa untu' tau Léwié iya harusu'é makkélong poji-pojiyang lao ri Puwangnge sibawa bantui sining imangngé ri laleng pogau'i upacara-upacara assompangngé. Makkuwatoro sining pengawalna Bolana Puwangnge nabagéi ri laleng regu-regu untu' tungke pintu gerbang, situru panunju'na Daud atanna Allataala. Sininna panunju'na Daud lao risining imangngé sibawa tau Léwié passalenna sining gudangngé sibawa gau'-gau' laingngé, naccowériwi sibawa matutu. Natépuni proyé' pembangunang iya narancanaé Salomo. Sininna jama-jamangngé, mappammulai ripasanna pondasinna lettu tépunna Bolana Puwangnge, purani napogau' sibawa makessing. Purairo laoni Salomo ri Ezion-Géber sibawa Elot, kota-kota pelabuhang ri wirinna Séppang Akaba ri wanuwa Edom. Kirinni Arung Hiram lao ri aléna kappala-kappala iya napajoppaé ana' buwana muto Hiram silaong ana' kappala iya mappangalamangngé. Sompe'ni mennang lao ri wanuwa Ofir silaong ana' buwana Salomo sibawa mala polé kuwaro 15.000 kilo ulaweng nanatiwii lao ri Salomo. Naéngkalingani ratu wanuwa Syéba passalenna ataromporenna Salomo. Nalaona ri Yérusalém untu' mojiwi Salomo sibawa pakkutana iya mawatangngé. Poléi nasibawang maéga pattinro sibawa unta iya sara'é mattéké rampa-rampa, batu paramata, sibawa maéga senna ulaweng. Wettunna siruntu Salomo, makkutanani iyaro ratué sakkerupa pakkutana iya naullé pikkiri. Sininna pakkutanaéro naulléi Salomo baliwi, dé muwi séddi iya mawatang senna'é ri aléna. Aléna iyaro ratué sabbingngi pékkugi panréna Solomo. Naitai saoraja iya napatettongngé Salomo, cara-cara majjamana pegawé-pegawé saorajana, sibawa pakéyang pegawénna enrengngé bolana mennang. Naitani inanré iya napatalaé, sibawa pakéyanna sining pattumaninna iya mattumaniyé ri péstaé; naita towi sining akkarobangeng iya nakkasuwiyangengngé Salomo ri Bolana Puwangnge. Iya manennaro mébbui ratu wanuwa Syéba bengnga sibawa takkamennyé. Namakkedana lao ri Arung Salomo, “Sininna iya uwéngkalingaé ri tana assaleku passalenna Puwang sibawa apanrénna Puwang mémeng tongeng! Riyolo dé' umateppe iyakiya polékuna enrengngé sabbing manengngi sibawa mata ulukku, nappaka mateppe. Sitongenna iya uwéngkalingaéro dé'pa nasitengnga polé ri iya uwitaé makkekkuwangngé. Annessana apanrénna sibawa asugirenna Puwang mabéla lebbi battowa naiya ribirittaiyangngékka. Temmaka upe'na pegawé-pegawé iya tumaningiyéngngi Puwang sibawa tuli majjamaé untu' Puwang angkanna weddingngi naéngkalinga polé ri Puwang sininna pappagguruwang iya mapanré! Ripojiwi Puwangnge, Allataalana Puwang! Ri laleng nakkana Puwang mancaji arung untu' mapparénta ri laleng asen-Na, nappaitangngi pékkugi sennanna lao ri Puwang. Nasaba namaséiwi umma Israélié sibawa napuwéloi kuwammengngi natette mennang engka, nanakkai Puwang mancaji arunna, kuwammengngi naulléi Puwang patettongngi hukkungngé sibawa adélékengngé.” Nainappa iyaro ratu wanuwa Syéba nabbéréyang lao ri Salomo hadiya-hadiya iya natiwié, iyanaritu lebbi 4.000 kilo ulaweng sibawa sijumella égana batu paramata enrengngé rampa-rampa. Dé'na naéngka natarimana Salomo rampa-rampa iya makkuwaéro kessinna pada-pada iya nabbéréyangngé iyaro ratu wanuwa Syéba lao ri aléna. ( Ana' buwana Arung Hiram sibawa ana' buwana Arung Salomo iya tiwié ulaweng polé ri Ofir untu' Salomo, tiwi towi batu paramata sibawa aju cénrana. Iyaro ajué napakéi Salomo untu' mébbu addénéng ri Bolana Puwangnge sibawa ri saorajana, kuwaéttopa untu' mébbu kacapi sibawa gambusu untu' sining pakkélongngé. Dé'pa naengka iya pada-padaéro ri wanuwa Yéhuda.) Ri lainnaé hadiya-hadiya pamale iya biyasaé nabbéréyang Salomo, nabbéréyang towi Arung Salomo lao ri ratu polé ri wanuwa Syébaro sininna iya naéllauwé. Nainappa lisu iyaro ratué ri wanuwanna silaong sining pattinrona. Tungke taung tarimai Arung Salomo nacawéki 23.000 kilo ulaweng, dé'pa naribilang simana sining padangkangngé. Arung-ngarung Arab-é enrengngé sining gubernur Israélié mabbéréto ulaweng sibawa péra' lao ri aléna. Mébbui Salomo 200 kaliyawo battowa polé ri ulaweng rilanroé. Ulaweng iya ripaké untu' tungke kaliyaworo engka lebbi kurang 7 kilo. Mébbu towi 300 kaliyawo ulaweng iya lebbi baiccu'é. Ulaweng iya ripaké untu' tungke kaliyawo baiccu'éro engka lebbi kurang 3 kilo, iya manenna poléi ri ulaweng rilanroé. Iyaro kaliyawo-kaliyawoé nataroi ri baruga iya riyasengngé Baruga Ale' Libanon. Mébbu towi arungngé séddi kadéra akkarungeng battowa iya rilapiriyé sibawa gading nenniya ribélo-béloi sibawa ulaweng tuléng. Iyaro kadéraé engka taiyyana sibawa ri benrénna wali-wali engka dato'-dato' singa. Iyaro kadéraé mappunnai towi enneng ana' addénéng, sibawa séddi akkellareng ajé iya rilapiriyé sibawa ulaweng. Iyaro akkellareng ajé ripasséddiwi sibawa kadérana. Ri cappa abéyona sibawa cappa ataunna tungke ana' addénénna kadéraéro engka dato'-dato' singa – iya manenna seppulo duwa batunna. Dé' naengka kadéra pada-padannaro muwi ri akkarungeng niga? Sininna paréwa énungenna Salomo riyébbui polé ri ulawengngé, sibawa sininna pakkakkasa'é ri Baruga Ale' Libanon riyébbu towi polé ri ulaweng tuléngngé. Ri wettunna Salomo, dé' nariyangga mangke péra'é. Mappunnaiwi Salomo maéga kappala battowa iya sompe'é ri tasi' malowangngé silaong kappala-kappala'na Arung Hiram. Wékkasiseng na telluttaung iyaro sining kappala'é lisui tiwi ulaweng, péra', gading, lancéng sibawa manu'-manu' mera'. Lebbi sugii Arung Salomo sibawa lebbi panréi naiya muwi arung niga ri linoé. Sininna arungngé makkuragai méwai sita Salomo untu' méngkalingai pappagguruwang apanrénna iya nabbéréyangngé Allataala lao ri aléna. Tungke-tungke mennang poléi sibawa tiwi hadiya untu' Salomo. Mabbéréi mennang barab-barang péra, ulaweng, pakéyang, senjata, rampa-rampa, anyarang sibawa bagal. Makkuwaniro polé ri taungngé lao ri taungngé. Mappunnai towi Salomo 4.000 wakké untu' anyaranna sibawa karétana. Anyarang pammusuna engka 12.000 kajunna. Sibagiyang nataro ri Yérusalém, na lebbinna ri maddupa-rupang kota pangkalang untu' sining karéta musuna. Nakuwasaiwi sininna arungngé ri daéra iya mallebba'é polé ri Salo Efrat lettu ri wanuwa Filistin sibawa pakkasésénna Maséré. Ri laleng wettu apparéntanna Salomo, péra'é pada-padai barang biyasaé ri Yérusalém, pada-pada batué, sibawa aju camara Libanongngé maéga senna pada-pada aju ara biyasaé. Papoléi Salomo anyarang polé ri Maséré sibawa polé ri tungke wanuwa laing. Curita laingngé passalenna Salomo polé ri pammulanna lettu ri paccappurenna purani riyoki ri laleng kitta Riwaya'na Nabi Natan sibawa ri laleng kitta Botona Ahia tau Siloé, sibawa ri laleng kitta Wahyunna Nabi Ido, iya curitaé towi apparéntanna Yérobéam arunna Israélié. Patappulo taung ittana Salomo mapparénta ri Yérusalém risininna Israélié. Nainappa maté sibawa ritampung ri Kota Daud. Na Réhabéam ana' worowanéna mancaji arung sulléiwi. Laoni Réhabéam ri Sikhem nasaba sininna ra'ya' Israélié bagiyang manorang maddeppungenni kuwaro untu' lanti'i mancaji arung. Iyaro wettué Yérobéam ana' Nébat engka mupi ri Maséré nasaba lariwi polé ri Arung Salomo. Wettunna naéngkalinga passalenna Réhabéam, lisuni ri Israél. Riundanni Yérobéam ri ra'ya' bagiyang manorangngé, nainappa silaong mennang lao mangolo ri Réhabéam. Adanna mennang, “Salomo ambo'na Datu pura mpérékki tiwi iya matane'é. Rékko naringengiwi Datu tiwita enrengngé kurangiwi anrasa-rasatta, maéloki tunru lao ri Datu.” Nametté Réhabéam, “Harusu'ka mappikkiri riyolo. Lisuno paimeng tellungngessopi.” Nalisuna sining tauwéro. Nanaéllauna Réhabéam pangaja lao risining tau macowaé iya puraé mancaji pappangajana Salomo ambo'na Réhabéam. Nanakkutana Réhabéam, “Pékkugika harusu baliwi sining tauwéro? Aga pangajamu?” Nappébali mennang, “Rékko maéloi Datu pogau'i makessingngé lao ri ra'ya'é, sibawa pésennangiwi atinna wérénni pappébali iya makessingngé lao ri mennang, namatinulu matu mennang lao ri Datu mannennungeng.” Iyakiya pangajana iyaro sining tau macowaé dé' nabati-batiwi Réhabéam. Sibalé'na, laowi risining tau maloloé iya naéwaé sippangka' sibawa iya bantuéngngi makkekkuwangngé. Makkutanani lao ri mennang, “Aga pangajamu lao ri iyya untu' baliwi ra'ya'é iya méllauéngngi kuwammengngi uringengiwi tiwina?” Nappébali mennang, “Makkuwaiyé sitinajanna Datu makkeda lao ri mennang, ‘Silemma-lemmaku, lebbi watang mupa naiya ambo'ku. Nawérékko tiwi ambo'ku iya matane'é, iyakiya iyya maéloka mpérékko iya lebbi matane'éppa. Naunruko sibawa babba, iyakiya iyya maéloka munruko sibawa babba maddori bessié!’ ” Tellungngesso ri munrinna lisuni Yérobéam sibawa sining tauwéro mangolo ri Arung Réhabéam, pada-pada iya puraé napparéntang. Sibalé'na sibawa pangajana sining tau macowaé, ra'ya' iya laowé ri alénaro naéwai ada sibawa makassara'. Situru sibawa pangajana sining tau maloloé, makkedai, “Nawérékko ambo'ku tiwi iya matane'é, iyakiya uwébbui matu iyaro lebbi matane'pa. Naunruko sibawa babba, iyakiya iyya uwunruko sibawa babba iya maddori bessié!” Dé' najampangiwi paréllaunna ra'ya'é. Iyakiya mémeng iyaro élona Puwang Allataala. Aga iya napowadaé Puwangnge naolai Nabi Ahia polé ri Silo passalenna Yérobéam ana' Nébat harusu'i kajajiyang. Wettunna naita ra'ya' Israélié makkedaé dé' namaélo arungngé méngkalingai mennang, gorani mennang, “Magi naripaduli Daud sibawa wija-wijanna! Dé' naengka mennang napogau' aga-aga untu' idi. Ra'ya' Israélié, laono mai talisu! Leppessanni iyaro Réhabéam murusu'i aléna muto!” Nalisuna ra'ya' Islaélié, na Réhabéam mancaji arunni banna ri daérana Yéhuda. Namuni makkuwaro Arung Réhabéam nasuro mupi Adoniram, séddiwi kapala pajjama passaé, untu' pattennangngi ra'ya'é. Iyakiya rigenrungngi ri mennang sibawa batu gangka maté. Naulléi leppe Réhabéam nalari masitta ménré ri karétana, nalari lao ri Yérusalém. Mappammulai wettuéro ra'ya'é ri bagiyang manorang akkarungenna Israélié tuli maronta'i lao ri arung-ngarung wija-wijanna Daud. Wettunna lettu Arung Réhabéam ri Yérusalém, napaddeppungenni 180.000 prajuri'na iya kaminang makessingngé polé ri Yéhuda sibawa Bényamin untu' musu'i tau Israélié sibawa palisui akuwasanna lao ri suku-suku bagiyang manoranna Israélié. Iyakiya risuroi Nabi Sémaya ri Puwangnge palettu'i iyaé pasengngé lao ri Réhabéam sibawa lao ri sininna tauwé ri laleng suku Yéhuda nenniya Bényamin, “Aja' mumusui saudara-saudaramu tau Israélié. Lisuno! Aga iya puraé kajajiyang iyanaritu élo-Ku.” Nanaturusi manenni mennang paréntana Puwangnge sibawa dé' najaji lao musui Yérobéam. Monroi Réhabéam ri Yérusalém sibawa nasuroi tauwé mébbu bénténg untu' kota-kotaé ri daéra Yéhuda sibawa Bényamin, iyanaritu: kota Bétléhém, Etam, Tékoa, Bét-Zur, Sokho, Adulam, Gat, Mares, Zif, Adoraim, Lakhis, Azéka, Zora, Ayalon sibawa Hébron. Napéwatangiwi kota-kota mabbénténgngéro sibawa taro séddi tau komandang pasukang ri tungke kotaéro. Tungke-tungke kotaéro ripassakke'i sibawa bokong inanré, minnya zaitun sibawa anggoro enrengngé kaliyawo sibawa bessi. Nanallalengiwi daérana Yéhuda sibawa Bényamin tette'i ri laleng akuwasanna. Laoni sining imangngé sibawa tau Léwié polé ri sininna daérana Israélié masséddi sibawa Réhabéam. Iyaro sining tau Léwié nasalaini sining padang wellaé sibawa tanana mennang namattette ri Yéhuda sibawa Yérusalém, saba' Yérobéam sibawa arung-ngarung iya sulléiyéngngi dé' napalaloi mennang majjama selaku imanna Puwangnge. Nakkai Yérobéam imang-ngimanna muto untu' mattumani ri onrong-ngonrong assompang barahalaé sibawa sompai sining jingngé enrengngé dato'-dato' saping iya aléna muto mébbui. Sining tau polé ri sininna suku Israélié iya tonget-tongengngé macinna sompai Puwangnge, Allataalana Israélié, létté'i ri Yérusalém, maccowériwi iyaro sining tau Léwié kuwammengngi weddingngi makkasuwiyangeng akkarobangeng lao ri Puwangnge, Allatatala iya nasompaé toriyolona mennang. Nanallalengiwi namancaji akkarungeng Yéhuda lebbi mawatang. Telluttaung ittana mennang sokongngi apparéntanna Réhabéam ana' worowanéna Salomo, sibawa tuwo pada-pada wettunna Arung Daud sibawa Arung Salomo. Kawingngi Réhabéam sibawa Mahalat; ambo'na Mahalat iyanaritu Yérimot ana' worowanéna Daud, sibawa indo'na iyanaritu Abihail ana' Eliab, eppona Isai. Mappunnai mennang tellu ana' worowané: Yéus, Sémarya sibawa Zaham. Nainappa Réhabéam kawing sibawa Maakha ana'na Absalom. Lolongengngi mennang eppa ana' worowané: Abia, Atai, Ziza sibawa Sélomit. Réhabéam mappunnai 18 bainé sibawa 60 gundi, 28 ana' worowané sibawa 60 ana' makkunrai. Polé ri sininna bainéna sibawa gundi'naro, iya kaminang napojiyé iyanaritu Maakha. Iyanaro saba'na Abia ana' Maakha lebbi napojiwi naiya sininna ana'na iya laingngé, angkanna Abia tona ritu iya napilé untu' sulléiwi mancaji arung. Nasibawang apanréng nawéréngngi Réhabéam jama-jamang ana'-ana' worowanéna sibawa nataroi mennang ri kota-kota mabbénténgngé ri sininna daéra Yéhuda sibawa Bényamin. Nawéréngngi mennang inanré maona, sibawa passadiyangengngi maéga bainé untu' mennang. Masse'nana tudangenna Réhabéam selaku arung, aléna sibawa sininna ra'ya'na dé'na najampangiwi hukkunna Puwangnge, sibawa dé' namatinulu lao ri Puwangnge. Rimakkuwannanaro rihukkunni mennang ri Puwangnge. Ri taung malimaé apparéntanna Réhabéam, Sisak arung Maséré gasai Yérusalém sibawa 1.200 karéta musu, 60.000 tentara makkinnyarang, sibawa sijumella prajuri iya dé'é naribilang égana, muttama'ni pasukang Libia, Suki sibawa Sudan. Nasittaiwi kota-kota mabbénténgngé ri Yéhuda nainappa maju lettu ri Yérusalém. Iyaro wettué Arung Réhabéam sibawa pamimpinna Yéhuda maddeppungenni ri Yérusalém nasaba lariwi polé ri Sisak. Poléni Nabi Sémaya ri mennang sibawa makkeda, “Makkuwaiyé adanna Puwangnge, ‘Musalai-Ka iko, jaji makkekkuwangngé Usalai tokko angkammu rikuwasai ri Sisak.’ ” Mangakuni arungngé sibawa sining pamimpingngé makkedaé madosani mennang. Makkedai mennang, “Aga napogau' iyaro Puwangnge adélé'i.” Wettunna naita Puwangnge makkedaé napakariyawani mennang Aléna, mabbicarasi lao ri Sémaya, adanna, “Nasaba nangakuiwi mennang dosana, dé'na upabbinasai matu mennang. Maélo-Ka paleppe'i mennang masitta; dé' naancuru matu Yérusalém. Namuni makkuwaro, Sisak, makuwasaiwi matu mennang, kuwammengngi naissengngi assilaingenna massompaé lao ri Iyya sibawa massompaé lao risining panguwasa linoé.” Napoléna Arung Sisak gasai kota Yérusalém sibawa rampasa'i barab-barang mangke'é iya engkaé ri Bolana Puwangnge sibawa ri saorajana arungngé, makkuwatoro kaliyawo-kaliyawo ulaweng iya naébbué Arung Salomo. Selaku passulléna mébbui Réhabéam kaliyawo-kaliyawo gessa, nanappaddettangengngi lao risining parawira iya monrowangngéngngi pintu gerbanna saorajaé. Tungke-tungke lao arungngé ri Bolana Puwangnge, natiwii sining pengawal-é iyaro kaliyawo-kaliyawoé, nainappa napalisu ri bili' jagangngé. Nasaba napakariyawai aléna arungngé ri yolona Puwangnge, kuwaéttopa nasaba engka mupa gau'-gau' iya makessingngé ri Yéhuda, nasorona caina Puwangnge lao ri Réhabéam sibawa dé' napabbinasa sisengngi. Mapparéntai Réhabéam ri Yérusalém sibawa pédé battowai akuwasanna. Umuru'na wettunna mancaji arung 41 taung, namapparéntai 17 taung ittana ri Yérusalém, kota iya napilé Puwangnge polé ri sininna daérana Israélié untu' mancaji onrong assompang lao ri Aléna. Indo'na Réhabéam iyanaritu Naama polé ri wanuwa Amon. Napogau'i Réhabéam majaé nasaba dé' nakkuraga pogau'i élona Puwangnge. Curita passalenna Réhabéam polé ri pammulanna lettu ri paccappurenna sibawa assossorenna riyokii ri laleng kitta Sejarana Nabi Sémaya sibawa ri laleng kitta Sejarana Nabi Ido. Ri yelle'na Réhabéam sibawa Yérobéam tuli kajajiyangngi musué. Matéi Réhabéam sibawa rikuburu ritampung arung-ngarungngé ri Kota Daud. Abia ana' worowanéna mancaji arung sulléiwi. Ri taung maseppuloé aruwa apparéntanna Arung Yérobéam ri Israélié, Abia mancaji arung ri Yéhuda, namapparéntai telluttaung ittana ri Yérusalém. Indo'na iyanaritu Mikhaya ana' Uriél polé ri Gibéa. Nainappa kajajiyanni musué ri yelle'na Abia sibawa Yérobéam. Pangarai Abia 400.000 prajuri', na Yérobéam 800.000 prajuri'. Siyolo-olonni iya duwaro pasukangngé ri daéra buluna Efraim. Ménré'ni Abia ri tompo'na Bulu Zémaraim nainappa gora lao ri Yérobéam sibawa tau Israélié, “Engkalingai! Muwisseng makkedaé Puwangnge, Allataalana Israélié, pura siyo assijancing sibawa Daud makkedaé aléna sibawa wija-wijanna naparéntai matu Israélié untu' mannennungeng. Iyaro jancié dé' nawedding risampéyang. Namuni makkuwaro, iyaro Yérobéam ana' Nébat maronta'i lao ri Salomo, arunna. Napaddeppungenni sigarembolang tau kurang ajara'é sibawa mappassangngi élona mennang lao ri Réhabéam ana' worowanéna Salomo, iya malolo senna'é mupa wettuéro sibawa dé' pangalamanna untu' méwa. Makkekkuwangngé muwasenni mulléi méwai akuwasang iya nabbéréyangngé Puwangnge lao ri wija-wijanna Daud, nasaba battowai pasukammu sibawa mappunnaiko saping ulaweng iya napancajiyé Yérobéam déwatamu. Tenniyaga imang-ngimanna Puwangnge wija-wijanna Harun sibawa sining tau Léwié purani mupaddesu maneng? Selaku passulléna nigi-nigi iya macinnaé mancaji imang, assaleng tiwii sikaju saping iyaré'ga pitukkaju bimbala, mupancajiwi imang untu' iya tenniyaé Allataala, nasaba mémeng makkuwairo carana bangsa-bangsa laingngé makkai imanna mennang. Iyakiya idi dé' tapogau'i makkuwaéro. Tette'ki idi massompa lao ri Puwang Allataalata sibawa dé' narisalai. Imang-ngimatta tette'i wija-wijanna Harun, sibawa sining tau Léwié tette'i bantui mennang. Tungke élé sibawa arawéng mattunu dupai mennang sibawa makkasuwiyangeng akkarobangeng ritunu untu' Puwangnge, enrengngé passadiyai roti ripatalaé. Tungke wenni palluwa'i mennang pajjennangeng ri ajé pajjennangeng ulawengngé. Tette'ki turusiwi parénta-paréntana Puwangnge, iyakiya iko musalaini. Pamimpitta iyanaritu Aléna Allataala sibawa sining iman-Na engkai kuwaé. Sadiyani mennang untu' seppung tarompé selaku tanrang lao ri idi untu' luruiko. Eh tau Israélié, aja' muéwai Puwangnge, Allataalana toriyolomu! Dé' namakkullé pakalako!” Iyaro wettué nakirinni Yérobéam sibagiyang polé ri pasukanna untu' madangngi pasukanna Yéhuda polé ri munri, na sibagiyassi moloiwi mennang polé ri yolo. Wettunna naita pasukanna Yéhuda makkedaé rikeppungngi, gorani mennang méllau tulung ri Puwangnge. Naseppunni tarompé'é sining imangngé, nainappa nagorang pasukanna Yéhuda kelli musué namalluru maggasa, ripimping ri Abia. Ri wettu gorana mennang, Allataala caui Yérobéam sibawa pasukanna Israélié angkanna lari mennang. Allataala mébbui tau Yéhudaé caui mennang. Battowa akalanna tau Israélié iya ripapoléngengngéngngi ri Abia sibawa pasukanna; 500.000 prajuri'na mennang iya pommakessingngé maté. Pakalai tau Yéhudaé, nasaba nattuwangngi Puwangnge, Allataalana toriyolona. Wettunna Abia lellungngi pasukanna Yérobéam, nasittaini siyagangngaré kota sibawa désa ri seddéna. Iyaro kota-kotaé iyanaritu Bétel, Yésana sibawa Efron. Ri wettu apparéntanna Abia, dé' naulléi Yérobéam palisui akuwasanna. Angkanna riyunoi ri Puwangnge. Sibalé'na, pédé makuwasai Abia. Mappunnaiwi 14 bainé, 22 ana' worowané sibawa 16 ana' makkunrai. Curita laingngé passalenna Abia, sibawa passalenna sininna ada-adanna nenniya pangkaukenna purani riyoki ri laleng kitta Sejarana Nabi Ido. Maténana Arung Abia sibawa rikuburu ri tampung arung-ngarungngé ri Kota Daud, Asa ana' worowanéna mancaji arung sulléiwi. Ri yawa apparéntanna Asa, amangngi wanuwa Israélié seppulo taung ittana. Napésennangiwi Asa atinna Puwang Allataala ri laleng napogau'na iya adélé'é sibawa makessingngé. Napaddésu'i mézba-mézbana bangsa laingngé sibawa onrong-ngonrong assompang barahalaé. Naancuru'i tugu-tugu déwataé, sibawa naléttungngi alliri-alliri dato-dato'na Déwi Asyéra. Nasuroi ra'ya' Yéhudaé tuwo situru élona Puwangnge, Allataalana toriyolona, sibawa turusiwi sining pappagguruwanna nenniya sining parénta-Na. Sininna onrong assompang barahalaé sibawa onrong mattunu dupaé napaddésu'i polé ri kota-kotana Yéhuda. Na tennanna iyaro akkarungengngé ri yawa apparéntanna, angkanna naulléi patettong sining bénténg untu' kota-kotana Yéhuda. Siyagangngaré taung ittana dé' nakajajiyang musué nasaba Puwangnge mpéréngngi kéadaang damé lao ri mennang. Nakkeda Asa lao ri ra'ya'na Yéhuda, “Makessingengngi péwatangiwi kota-kotaé sibawa patettong témbo' ri mattulilinna nenniya manara-manara enrengngé pintu gerbang silaong paccala-cala'na. Takuwasaini iyaé wanuwaé nasaba purani riturusi élona Puwang Allataalata. Napiyaraki sibawa najagaiwi amanna sininna wanuwatta.” Nappammulana mennang mappatettong sibawa pattépui jama-jamangngéro sibawa makessing. Tentarana Arung Asa engka 300.000 tau Yéhuda iya massenjata kaliyawoé sibawa bessi, sibawa 280.000 tau Bényamin iya massenjata kaliyawoé, nenniya pana. Iya manenna prajuri-prajuri iya baranié sibawa tallatié. Riséuwaé wettu séddi tau Sudan riyaseng Zérah gasai Yéhuda sibawa pasukang 1.000.000 prajuri sibawa 300 karéta musu. Majui sibbéla Marésa. Nassuna Asa moloiwi Zérah, nanaatoro'ni iya duwa barisi'na tungke-tungke ri Lompo Zéfata seddéna Marésa. Nanassempajang Asa lao ri Puwang Allataalana, “ Puwang, banna Iko mulléi duwangngi iya malemmaé polé ri iya mawatangngé. Tulukki makkekkuwangngé, oh Puwang Allataalata! Ri alé-Muki sanré sibawa ri laleng asem-Muki massu mammusu méwai pasukang iya battowa senna'éwé. Puwang, Iko ritu Allataalata. Aja' Muleppessangngi alé-Mu ricau riséddié tolino.” Nainappa Asa silaong tentara Yéhuda gasai tentara Sudangngé. Puwangnge caui tentara Sudangngé angkanna mennang lari. Nagasa towi mennang akkémanna sining papparaka olokolo'é, sibawa mala maéga bimbala nenniya unta. Purairo lisuni mennang ri Yérusalém. Rikuwasaini Nabi Azarya ana' Odéd ri Rohna Allataala, angkanna lao méwai sita Arung Asa, sibawa makkeda, “Eh Arung Asa, silaong sininna pabbanuwana Yéhuda nenniya Bényamin! Engkalingai! Macawé'i Puwangnge ri iko rékko macawé'ko ri Aléna. Rékko muwéllauwi panunju'na Puwangnge, Nawérékko matu. Iyakiya rékko dé' mubati-batiwi, dé'to nabati-batiko. Maitta senna'ni Israélié dé' nassompa ri Allataala iya tongengngé, dé' nappunnai hukkung-hukkung iya harusu'é riturusi, sibawa dé' nappunnai imang-ngimang iya pagguruéngngi mennang. Iyakiya wettunna ri laleng asukkarakengngé, méllau tulungngi mennang ri Puwangnge, Allataalana Israélié. Naéllauwi mennang panunju'-Na sibawa mabbéréyangngi. Iyaro wettué dé' naulléi tauwé lao sibawa amang, saba' ri tungke wanuwa engka ronta battowa. Bangsa séddié tenre'i bangsa laingngé, sibawa kota séddié tenre'i kota laingngé, nasaba Allataala papoléngengngi ronta battowa ri yasé'na mennang. Iyakiya harusu'ko sabbara sibawa barani. Papoléi wassélé matu usahamu.” Wettunna naéngkalinga Asa ada-adanna Azarya ana' Odédro, ménré'ni sumange'na. Napaddésu'ni sininna barahalaé ri wanuwa Yéhuda sibawa Bényamin, sibawa kota-kota iya puraé nacau ri buluna Efraim nainappa napédécéngi mézbana Puwangnge iya engkaé ri seddé Bolana Puwangnge. Maéga tau Efraim, Manasyé sibawa Siméon masséddi silaong Asa, nanaonro ri daéra akkarungenna, nasaba naitai mennang makkedaé Puwangnge tulungngi. Nasuroni Asa sininna tauwéro silaong ra'ya' Yéhuda sibawa Bényamin maddeppungeng ri Yérusalém. Namaddeppungenna mennang ri uleng matellué ri laleng taung maseppuloé lima apparéntanna Asa. Iyaro essoé makkasuwiyanni mennang lao ri Puwangnge 700 saping sibawa 7.000 bimbala, wassélé rappana iya natiwié mennang lisu polé ri ammusurengngé. Majjanciwi mennang lao ri Puwangnge makkedaé sukkui atinna sibawa nyawana maélo tuwo situru élona Puwangnge, Allataalana toriyolona. Macowa iyaré'ga malolo, worowané iyaré'ga makkunrai, iya dé'é natuwo situru élona Puwangnge pasti rihukkung matéi. Nasibawang sadda iya maloppoé mattanroi mennang lao ri Puwangnge makkedaé maéloi mennang makkatenningngi iyaro jancié. Nainappa mennang gora-gora sibawa seppung tarompé. Marennu sininna ra'ya'na Yéhuda nasaba purani mennang mattanro sibawa sukku atinna. Masennangngi mennang massompa lao ri Puwangnge, sibawa maélona Puwangnge tarimai mennang. Nabbéréyanni lao ri mennang keadaang amangngé ri daérana. Nainappa Arung Asa paléssoi Maakha, nénéna, polé ri tudangenna selaku Indo'na Arungngé saba' purai mébbu dato'-dato' barahala iya mabbélampélangngé untu' Asyéra, déwinna acommokengngé. Naruttungngi Asa sibawa naancuru'i iyaro dato'-dato'é nainappa natunu ri Lompo Kidron. Namuni dé' naancuru manengngi Asa onrong assompang barahalaé ri wanuwaéro, iyakiya tette'i matinulu lao ri Puwangnge gangka maténa. Sininna ulawengngé sibawa péra'é enrengngé barab-barang laingngé wassélé rappa musué appunnangenna ambo'na sibawa alénato napalénne'i ri Bolana Puwangnge untu' mancaji appunnangenna Puwangnge. Lettu ri taung matelluppuloé lima apparéntanna Asa dé' naengka naompo musué paimeng ri wanuwaéro. Ri taung matelluppuloé enneng apparéntanna Arung Asa ri Yéhuda, Baésa arunna Israélié gasai Yéhuda sibawa pakkasse'i kota Rama untu' lape'i laleng massu muttama'é ri Yéhuda. Nanalani Arung Asa ulaweng sibawa péra' polé ri waramparanna Bolana Puwangnge sibawa saorajana arungngé, nanakiringngi lao ri Damsyik ri Bénhadad arung Siria sibawa pasengngéwé, “Laono mai tasiyo assisellaongeng pada-pada iya puraé napogau' tomatowatta. Nasibawang iyaé kirikka ulaweng sibawa péra' selaku hadiya, sibawa mérai Puwang pettuiwi assisumpungenna sibawa Baésa arunna Israélié, kuwammengngi nagettengngi lisu pasukanna polé ri daéraku.” Nasitujuini Bénhadad iyaro nattawarengngé nanasuroi parawira-parawirana silaong pasukanna gasai kota-kotana Israélié. Nacauni mennang Iyon, Dan, Abél-Bét-Maakha sibawa sininna kota-kota bokongngé ri Naftali. Wettunna naéngkalinga Arung Baésa gau'éro, mappésauni pakkasse'i Rama sibawa salaiwi kotaéro. Nainappa napangara Arung Asa sining tau polé ri sininna Yéhuda untu' makkai batu sibawa aju iya napaké Baésa ri Rama untu' pakkasse'i kotaéro. Iyaro bahab-bahangngé napakéi Asa untu' pakkasse'i kota Géba sibawa Mizpa. Iyaro wettué laoni Nabi Hanani ri Arung Asa sibawa makkeda, “Nasaba sanréko ri arung Siria, na tenniya ri Puwang Allataala, teddénni kasempatammu untu' caui tentarana arung Israélié. Dé'ga Sudan sibawa Libia mappunnai tentara iya battowaé sibawa maéga karéta musu enrengngé tentara makkinnyarang? Namuni makkuwaro Puwangnge mpérékko apakalang lao ri mennang, nasaba sanréko lao ri Aléna. Puwangnge jagaiwi sininna linoé untu' mabbéréyangngi awatangen-Na lao risining tau iya matinulué ri Aléna. Purano tinda' madonggo, rimakkuwannanaro mappammulai makkekkuwangngé tuli péneddingiko matu musu.” Iyaro ada-adanna Nabi Hanani mébbui Asa makkuwamani caina angkanna naputtama iyaro nabié ri laleng tarungkué. Iyatoro wettué napanrasa-rasai Asa siyagangngaré tau polé ri ra'ya'na. Sininna kajajiyangngé ri laleng apparéntanna Asa polé ri pammulanna lettu ri paccappurenna purani riyoki ri laleng kitta Sejarana Arung-ngarunna Yéhuda sibawa Israélié. Ri taung matelluppuloé aséra apparéntanna Asa nakennai lasa iya maseroé ri iya duwa ajéna. Namuni makkuwaro dé' nasappa pattulung ri Puwangnge, sangadinna ri do'toro'é. Duwattaung ri munrinna matéi. Rirampa-rampaiwi ujuna iya riyébbué polé ri rampa-rampaé sibawa wangi-wangiyangngé, nainappa ritampung ri tampung arung-ngarungngé ri Kota Daud. Na untu' pakalebbii palluwa'i ra'ya'é api iya battowa senna'é. Yosafat mancaji arunna Yéhuda sulléiwi Asa ambo'na, sibawa péwatangiwi aléna untu' méwai Israélié. Taroi tentara risininna kota mabbénténgngé ri Yéhuda, sibawa ri daéra saliwenna kotaé ri Yéhuda, enrengngé ri kota-kota iya puraé nasittai ambo'na ri daérana Efraim. Puwangnge barakkakiwi Yosafat nasaba naccowériwi baténa ambo'na; dé' nassompa Baal, sangadinna massompai ri Allataala. Mapatoi ri parénta-paréntana Allataala, sibawa atuwo-tuwonna dé' napada-pada arung-ngarunna Israélié. Puwangnge mpéréngngi Yosafat tudangeng iya masse'é selaku arunna Yéhuda. Sininna ra'ya'é mpéréngngi hadiya-hadiya lao ri aléna namancaji sugi enrengngé ripakalebbi senna. Nasibawang pangéloreng matedde'é naturusiwi paréntana Puwangnge sibawa mancuru'i sininna onrong assompang barahalaé enrengngé dato-dato'na Déwi Asyéra ri Yéhuda. Ri taung matellué apparéntanna nasuroi pejaba-pejaba tanréna untu' mappagguruwangngi hukkung-hukkunna Puwangnge ri kota-kotana Yéhuda. Iyanaritu: Bénhail, Obaja, Zakharia, Nétaneel sibawa Mikha. Risilaongengngi mennang ri aséra tau Léwi sibawa duwa imang. Iyaro sining tau Léwié iyanaritu Sémaya, Nétanya, Zébaja, Asaél, Sémiramot, Yonatan, Adonia, Tobia sibawa Tob-Adonia. Iya duwa imangngéro iyanaritu Elisama sibawa Yoram. Laowi mennang kégi-kégi sibawa tiwii kitta Hukkung-hukkunna Puwangnge ri sininna kotana Yéhuda sibawa paggurui ra'ya'é kuwaro. Puwangnge mébbui sininna akkarungengngé ri seddéna Yéhuda métau mammusu méwai Arung Yosafat. Polé ri tau Filistingngé tarimai maéga péra' sibawa hadiya-hadiya laing, sibawa polé ri tau Arab-é tarimai 7.700 bimbala sibawa 7.700 bémbé. Makkuwaniro Yosafat pédé maitta pédé makuwasa. Ri sininna Yéhuda patettongngi bénténg sibawa kota-kota bokong. Goppoi bokong iya maégaé ri kota-kotaéro. Ri Yérusalém nataroi parawira-parawira iya poré, tungke-tungke sibawa passéddiyanna situru appanna. Adna iyanaritu pallimana passéddiyang polé risining appanna Yéhuda. Pimpingngi 300.000 prajuri. Tau maduwaé iyanaritu Yohanan; nakapalaiwi 280.000 prajuri. Tau matellué iyanaritu Amasia ana' Zikhri; nakapalaiwi 200.000 prajuri. (Amasia iyanaritu séddiwi sukarélawan iya massompaé ri Puwangnge.) Pallima passéddiyanna polé risining appangngé ri laleng sukunna Bényamin iyanaritu Elyada, séddiwi pajuwang iya poré. Pimpingngi 200.000 prajuri sakke sibawa pana enrengngé kaliyawo. Tau maduwaé ri laleng passéddingngéwé iyanaritu Yosabad; pimpingngi 180.000 prajuri' sakke sibawa senjatana mennang. Tugasna mennang iyanaritu ri Yérusalém. Ri lainnaéro, taro towi arungngé passéddiyang-passéddiyang laing risining bénténgngé ri daérana Yéhuda. Wettunna sugini sibawa taromponi Yosafat arunna Yéhuda, napasiyalani séddi anggota kaluwargana sibawa séddi anggota kaluwargana Ahab arunna Israélié. Siyagangngaré taung ri munrinna laoni Yosafat célléngiwi Ahab ri kota Samaria. Untu' pakalebbii Yosafat silaong rombonganna, pakangkani Ahab pésta sibawa massuro géré maéga bimbala sibawa saping. Ri laleng kasempatangngéro naérai Yosafat untu' gasai kota Ramot ri Giléad. Makkutanani, “Maéloiga Saudara lao sibawakka gasai Ramot?” Nappébali Yosafat, “Madécénni, masséddipi matu tentaraku sibawa tentarana Saudara. Silaokki mammusu. Iyakiya makessingngi makkutanaki riyolo ri Puwangnge.” Napaddeppungenni Ahab kira-kira 400 nabi nainappa makkutana ri mennang, “Weddikka'ga lao gasai Ramot iyaré'ga dé'?” Nappébali mennang, “Wedding! Allataala maélo mabbéréyangngi kotaéro lao ri Datu.” Iyakiya makkutanai paimeng Yosafat, “Dé'ga gaga kuwaé nabi laing iya weddingngé makkutanangekki lao ri Puwangnge?” Nappébali Ahab, “Engka mupa séddi, Mikha ana' Yimla. Iyakiya ubenciwi, saba' dé' naengka nabotongekka iya makessingngé; tuli iya dé'é namakessing.” Nametté Yosafat, “Ah, aja' muwakkeda makkuwatu!” Nanaobbina Ahab séddi pegawé saoraja nainappa nasuro mapperi-peri lao mobbii Mikha. Iyaro wettué Ahab sibawa Yosafat tudangngi ri kadéra akkarungengngé sibawa pakéyang arajang ri onrong addésekeng gandongngé ri yolona pintu gerbanna Samaria, nanapolé nabié mangolo sibawa palettu'i botona mennang. Sala séddinna polé ri nabi-nabiéro, iya riyasengngé Zédékia ana' Kanaana, mébbu tanru-tanru bessi nainappa makkeda lao ri Ahab, “Iyanaé napowada Puwangnge, ‘Nasibawang tanru-tanru pada-padaéwé nahantangngi matu Datu Siria sibawa mancuru'i mennang.’ ” Sininna nabi laingngé nasitujuini sibawa makkeda, “Gasai Ramot, pakalai matu Datu. Puwangnge mpéréngngi matu apakalang Datu.” Iyaro wettué suro iya mobbiéngngi Mikha makkedani lao ri Mikha, “Sininna nabi laingngé botoi apakalang untu' arungngé. Tennapodo Bapa' boto towi iya makessingngé pada-pada mennang.” Nappébali Mikha, “Nasabbing Puwang iya tuwoé, banna maéloka powadai aga iya napowadaé Allataala lao ri iyya!” Lettu'nana Mikha ri yolona Arung Ahab, makkutanani arungngé, “Weddikka'ga silaong Arung Yosafat lao gasai Ramot iyaré'ga dé'?” Nametté Mikha, “Gasani! Tentu pakalai matu Datu. Puwangnge mpéréngngi matu apakalang Datu.” Nappébali Ahab, “Rékko mabbicarako lao ri iyya nasabbing asenna Puwangnge, powadai iya tongengngé. Wékkasiyagapi harusu'ko uparéngngerangi passalenna gau'éro?” Nakkeda Mikha, “Uwitai tentara Israélié tassiya-siya ri bulu-bulué. Pada-pada mennang bimbala dé'é pakkampina, namakkedai Puwangnge passalenna mennang, ‘Iyaé sining tauwé dé' nappunnai pamimping. Leppessanni mennang lisu sibawa salama.’ ” Nakkeda Ahab lao ri Yosafat, “Tongeng adakkuto? Dé' naengka nabotongekka iya makessingngé! Tuli iya majaé bawang!” Makkedasi Mikha, “Makkekkuwangngé éngkalingai aga iya napowadaé Puwangnge! Uwitai Puwangnge tudang ri yasé'na kadéra arajan-Na ri surugaé, silaong sininna malaéka'-Na tettong ri seddé-Na. Makkutanai Puwangnge, ‘Niga maélo palécéi Ahab kuwammengngi namaélo lao mammusu namaté ri Ramot ri Giléad?’ Pappébalinna iyaro sining malaéka'é maddupa-rupang. Angkanna malluruni séddi roh. Naddeppériwi Puwangnge sibawa makkeda, ‘Iyya ritu maélo palécéi.’ Nakkutana Puwangnge, ‘Pékkugi carana?’. Nappébali iyaro roh-é, ‘Maéloka lao sibawa mébbui sininna nabinna Ahab mabbellé.’ Nakkeda Puwangnge, ‘Madécénni, pogau'ni iyaro, mulléi matu palécéi.’ ” Makkedapi paimeng Mikha, “Nah, iyanaro kajajiyang! Puwangnge pura mébbui nabi-nabinna Datu mabbellé lao ri Datu saba' pura napattentui Puwangnge untu' pakennaiwi abala Datu!” Namalluruna Nabi Zédékia maddeppériwi Mikha nanaleppa'i rupanna sibawa makkeda, “Pékkugi wedding nasalaika Rohna Puwangnge sibawa mabbicara lao ri iko?” Nappébali Mikha, “Muwitai matti buttinna wettummu muttama riséddié bili' untu' massubbu!” Napparénta Arung Ahab, “Tikkengngi! Namutiwii lao ri Amon, walikotaé, sibawa ana' Pattolaé Yoas. Suroi mennang puttama'i ri laleng tarungkué, sibawa mpéréngngi inanré sibawa uwai rinung céddé'na bawang narapi lisuka sibawa salama.” Nakkeda Mikha, “Rékko lisui Datu sibawa salama, bettuwanna dé' nabbicara Puwangnge naolaka. Sininna iya engkaé hadéré kuwaé mancaji sabbi.” Nainappa Ahab arunna Israélié, sibawa Yosafat arunna Yéhuda lao gasai kota Ramot ri Giléad. Makkedai Ahab lao ri Yosafat, “Maéloka mallarikkodo sibawa maccowé mammusu, iyakiya Saudara sitinajako pakéi pakéyang arajammu.” Makkuwaniro arunna Israélié mallarikkodo wettunna lao mammusu. Iyaro wettué sining pallima pasukang karéta musuna Siria purani riparéntang ri arunna untu' luruiwi banna arunna Israélié. Jaji, wettunna naita Arung Yosafat, naseng manenni mennang arunna Israélié. Rimakkuwannanaro naluruini mennang. Iyakiya gorai Yosafat, naritulung ri Puwang Allataala, nanapabélo'ni iyaro serangangngé lao ri tibang laingngé. Wettunna namaingeki sining pallima pasukang karéta musuna Siria makkedaé iyaro tenniya arunna Israélié, mappésauni gasai. Nasitujuwangngi séddi prajuri Siria malleppessangngi ana' panana temmappattuju ri akkatta mattentué. Iyakiya iyaro ana' panaé nakennai Ahab sibawa nabettui waju musuna ri padduppanna. Namangobbi Ahab ri pappalari karétana, “Nakennaka! Balé'i namutiwika massu polé ri ammusurengngé!” Iyakiya nasaba marowa mupi musué, tette'i Arung Ahab tettong sibawa ritula ri laleng karétana mangolo ri tentara Siriaé. Wettunna labu essoé maténi. Lisunnana Yosafat arung Yéhuda sibawa salama ri saorajana ri Yérusalém, engka séddi nabi riyaseng Yéhu ana' Hanani polé mangolo ri arungngé. Adanna iyaro nabié lao ri aléna, “Sipato'ga Datu bantui tau majaé sibawa maccowé ri tau iya benciyéngngi Puwangnge? Iyaro pangkaukenna Datu nassabariwi Puwangnge macai lao ri Datu. Namuni makkuwaro engka mutopa iya makessingngé ri Datu. Purani napaddésu Datu sininna dato'-dato' Déwi Asyéra iya nasompaé ra'ya'é sibawa pura toni Datu makkuraga untu' tuwo situru élona Allataala.” Arung Yosafat monroi ri Yérusalém. Iyakiya biyasai célléngiwi ra'ya'é risininna wanuwaé untu' mérai mennang lisu lao ri Puwangnge, Allataalana toriyolona. Ri tungke kota mabbénténgngé ri Yéhuda makkai haking-haking, sibawa mpéréngngi iyaé paréntaé lao ri mennang, “Tinda'no sibawa mapanré, nasaba mangadélékiko tenniya ri laleng asenna tolinoé, sangadinna ri laleng asenna Puwangnge. Najagaiko wettummu pettuiwi parakaraé. Harusu'ko métau lao ri Puwangnge, sibawa tinda' matutu, saba' Puwang Allataalata nabenci tau iya kédo macéko-cékoé, iya pogau'éngngi matane siwalié iyaré'ga iya tarimaé pasoso.” Makkuwatoro ri Yérusalém, makkai Yosafat haking-haking polé ri yelle'na sining tau Léwié, imang-ngimangngé sibawa ponggawana ra'ya'é. Harusu'i mennang pettuiwi parakara-parakara iya engkaé assisumpungenna sibawa ajjalékkanna Hukkunna Puwangnge sibawa parakara-parakara laingngé. Nabbéréyangngi Yosafat lao ri haking-hakingngéro iyaé paréntaé, “Pajoppani tugasmu sibawa mateppe ri Puwangnge. Turusiwi parénta-Na ri laleng sininna séuwa-séuwa iya mupogau'é. Rékko sellao-sellaomu polé ri kota laingngé pangolo ri iko séddi parakara abbunowang, ajjalékkang hukkungngé iyaré'ga ajjalékkang undang-undangngé, sitinajako mpéréngngi mennang panunju. Nanallalengiwiro dé'na mennang napasala lao ri Puwangnge sibawa dé'na matu namacai Puwangnge lao ri iko iyaré'ga lao ri mennang. Pogau'ni parénta'ewé, na dé'na mupasala matu. Imang Lompo Amarya uwéréng akuwasang pommatanré ri sininna parakara iya engkaé assisumpungenna sibawa hukkung-hukkung agamaé. Zébaja ana' Ismaél, iyanaritu gubernurna Yéhuda, uwéréng akuwasang pommatanré ri sininna parakara laingngé. Sining tau Léwié matanggung jawa'i jagaiwi kuwammengngi sining apettunna pengadilangngé napogau'i. Accowériwi iyaé panunju'-panunju'é nenniya tinda'no sibawa tegas. Tennapodo Puwangnge ranrengngi tau iya kédo adélé'é!” Siyagangngaré wettu ri munrinna tentara Moab sibawa Amon, silaong sibawa siyempe'na Méunim, gasai Yéhuda. Napoléna tauwé tiwii karébaéwé ri Arung Yosafat, “Maéga senna tentara Edom polé ri liwenna Tasi Maté untu' gasai Datu. Purani mennang nasittai Hazézon-Tamar.” Namétauna Yosafat nainappa massempajang méllau panunju polé ri Puwangnge. Nainappa napparéntang kuwammengngi nappuwasa sininna ra'ya'é. Polé ri tungke kota ri Yéhuda laoni tauwé ri Yérusalém untu' méllau tulung ri Puwangnge. Silaongngi mennang sibawa pabbanuwana Yérusalém maddeppungeng ri seddé Bolana Puwangnge iya barué. Tettonni Arung Yosafat ri yolona mennang, namassempajang sibawa sadda battowa, “Oh Puwang, Allataalana toriyolota! Iko Allataala ri surugaé sibawa mapparénta ri yasé'na sininna bangsaé ri linoé. Makuwasako sibawa mawatang; dé' muwi séddi tau mulléi méwa-Ko. Iko ritu Allataalata. Wettunna umma'-Mu, bangsa Israélié, lao ri wanuwaéwé, Mupaddésu'i sining tau iya monroé kuwaé wettuéro. Nainappa Muwéréng wanuwaéwé lao ri wija-wijanna Abraham, sellao-Mu, untu' mancaji tana appunnangenna mannennungeng. Monroni mennang kuwaé sibawa patettong séddi bola onrong sompa-Ko. Naisseng mennang makkedaé rékko lolongengngi mennang pahukkungeng nasaba dosa-dosana, sibawa nakennai mennang musu, sai, iyaré'ga akkadéreng, weddingngi mennang lao ri Iko sibawa tettong ri yolona bola assompangngéwé. Ri laleng asukkarakenna mennang, weddingngi mennang massempajang lao ri Iko, namuwéngkalingai matu sibawa tulungngi mennang. Makkekkuwangngé nagasaki bangsa Amon, Moab sibawa Edom. Wettunna toriyolota polé ri Maséré, dé' Mupalaloi mennang tudangiwi wanuwanna bangsa-bangsaéro. Nalalona toriyolota ri laleng mattulilié sibawa dé' naancuru'i bangsa Amongngé, Moab-é sibawa Edongngéro. Makkekkuwangngé, makkuwaniyé tindakanna bangsa-bangsaéro lao ri idi. Maéloi mennang rukkaki polé ri wanuwa iya Muwéréngngékki. Iko ritu Allataalata! Hukkungngi mennang, nasaba idi'é dé' pakkullétta moloiwi tentara iya maégaéro, iya maéloé gasaki. Dé' taissengngi aga harusu ripogau', rimakkuwannanaro laoki ri Iko méllau tulung.” Iyaro wettué sininna tau worowanéna Yéhuda silaong bainéna sibawa ana'-ana'na tettongngi ri Bolana Puwangnge. Ri tengnga-tengngana tau maégaéro engka séddi tau Léwi riyaseng Yahaziél. Ana'nai Zakharia polé ri appang Asaf ri laleng jori wija-wijanna Bénaya, Yéiél sibawa Matanya. Iyaro wettué rikuwasaiwi Yahaziél ri Rohna Puwangnge, namakkeda, “Petta Iya Malebbié enrengngé saudara-saudara maneng. Makkedai Puwangnge makkedaé dé' naweddikko pettu paddennuwang iyaré'ga métau moloiwi tentara iya maégaéro. Saba' iya mammusué tenniya iko, sangadinna Allataala. Baja wettunna mennang ménré molai laleng tuppué ri Zis, gasai mennang. Siyolokko matu sibawa mennang ri cappa lompo'é ri yolona padang kessi seddéna Yéruél. Dé' muparellu mammusu ri laleng ammusurengngéwé. Laono ri onrong iya puraé ripattentungekko sibawa tajengngi kuwaro. Muwitai matu Puwangnge mpérékko apakalang. Eh pabbanuwana Yéhuda sibawa Yérusalém, aja' mumanenneng iyaré'ga métau. Uttamaki bawanni ammusurengngé, Puwangnge tulukko matu!” Nasuju'na Arung Yosafat. Maccowé toni sininna ra'ya'é sibawa aléna suju' sompai Puwangnge. Nainappa sining tau Léwi polé ri appang Kéhat sibawa Korah tettong, nagora pojiwi Puwangnge, Allataalana Israélié. Pappa bajana maélé senna'ni massu, ra'ya'é nalao ri daéra padang kessi seddéna Tékoa. Wettunna mennang maélo joppa, nabbéréyanni Yosafat iyaé pasengngé lao ri mennang, “Ra'ya' Yéhuda sibawa Yérusalém! Ateppe'no ri Puwang Allataalamu, namuwulléi matu mattahang. Tarimani pangajana nabi-nabimmu, namulolongeng wassélé matu!” Purana barunding sibawa ra'ya'é, nasuroni arungngé pakkélongngé pakéi pakéyang pada-padaé iya biyasaé napaké ri upacara-upacara mattentué ri laleng agamaé. Iyaro pakkélongngé harusu'i mabbarisi sibawa magello ri yolona barisi'na tentaraé namakkélotto, “Pojiwi Puwangnge! Mannennungengngi pammasé-Na!” Wettunna iyaro pakkélongngé mappammula gora-gora makkélong, pakangkani Puwangnge akacaungeng ri tengnga-tengngana tentara balié iya mattengngangngé maggasa. Tentara Amongngé sibawa Moab-é gasai tentara Edongngé sibawa mancuru' sisengngi. Nainappa mennang balé sigasa séddié lao ri laingngé sibawa masero. Wettunna lettu tentara Yéhudaé ri manara jagangngé ri padang kessi'é sibawa pénessaiwi onronna balié, naitani mennang sining ujuna balié tassiya-siya ri tanaé. Dé' muwi séddi polé ri tentara baliéro tuwo. Nanalaona Yosafat silaong ana' buwana rampasa'i barab-baranna balié. Nalolongenni mennang maéga olokolo, pakkakkasa, pakéyang sibawa barab-barang mangke laingngé. Puranana napaddeppungeng iyaro barab-barangngé tellungngesso ittana, maéga mupa barab-barang laing, angkanna tarapassa nasalai. Ri esso maeppaé maddeppungeng manenni mennang ri Lompo Pappojingngé sibawa pojiwi Puwangnge nasaba sininna iya puraé Napogau'. Iyanaro saba'na nariyaseng iyaro lompo'é “Pappojing”. Nainappa napimping Yosafat sininna pasukangngé lisu ri Yérusalém sibawa mariyo-riyo nasaba Puwangnge pura caui balinna. Wettunna lettu ri kotaé, mabbarisi'ni mennang lao ri Bolana Puwangnge naccowéri kacapi sibawa tarompé. Métau manenni wanuwa laingngé wettunna naéngkalinga pékkugi Puwangnge caui sininna balinna Israélié. Iyanaro saba'na napparénta Yosafat sibawa amang, sibawa Puwangnge mpéréngngi adaméngeng ri sininna wanuwaé. Yosafat mancaji arunna Yéhuda riumuru 35 taung, namapparéntai ri Yérusalém 25 taung ittana. Indo'na iyanaritu Azuba ana' Silhi. Pada-pada Asa ambo'na, napogau'i Yosafat iya makessingngé ri pakkitanna Puwangnge. Iyakiya onrong-ngonrong assompang barahalaé dé' naancuru'i. Dé' topa ra'ya'é nassompa sissukku atinna lao ri Allataalana toriyolona. Curita laingngé passalenna Yosafat, polé ri pammulanna lettu ri paccappureng apparéntanna, riyokii ri laleng Riwaya'na Yéhu Ana' Hanani, iya tarokié ri laleng kitta Sejarana Arung-ngarunna Israélié. Riséuwaé wettu Yosafat arunna Yéhuda pakangkai assisumpungeng assisellaongeng sibawa Ahazia arunna Israélié, iya pogau'é maéga ja. Ri pelabuhang Ezion-Géber mébbui mennang kappala-kappala untu' sompe lao ri Tarsis. Iyakiya Nabi Eliézer ana' Dodawa polé ri kota Marésa paréngngerangiwi Yosafat, adanna, “Nasaba pakangkai Datu assisumpungeng assisellaongeng sibawa Ahazia, maéloi Puwangnge mancuru'i jama-jamanna Datu.” Nanaancuru'ni kappala-kappala iya puraé naébbu angkanna dé' sisenna naulléi sompe. Matéi Yosafat sibawa ritampung ri tampung arung-ngarungngé ri Kota Daud. Yéhoram ana' worowanéna mancaji arung sulléiwi. Yéhoram ana' worowanéna Yosafat, arung Yéhuda, mappunnai 6 silessureng worowané: Azarya, Yéhiél, Zakharia, Azariahu, Mikhail sibawa Séfaca. Lolongengngi mennang maéga ulaweng, péra' sibawa barab-barang mangke laingngé polé ri ambo'na, sibawa tungke-tungke riwéréng towi séddi kota mabbénténg ri Yéhuda. Iyakiya nasaba Yéhoram ana' worowanéna macowaé, aléna ritu iya ripattentué ri Yosafat untu' mancaji arung. Wettunna napérasa Yéhoram masse'ni tudangenna selaku arung, nassuro mpunoni sininna silessu-silessurenna, kuwaéttopa siyagangngaré pejaba' tanré. Mancaji arungngi Yéhoram ri umuru 32 taung sibawa mapparéntai ri Yérusalém 8 taung ittana. Naccowériwi atuwo-tuwonna Arung Ahab sibawa arung-ngarung Israél laingngé, nasaba kawingngi sibawa sala séddinna ana' makkunrainna Ahab. Madosai lao ri Puwangnge, iyakiya dé' namaélo Puwangnge pabbinasai arungngé polé ri wija-wijanna Daud nasaba purai majjanci makkedaé wija-wijanna Daud tette'i matu mapparénta. Ri laleng apparéntanna Yéhoram, maronta'i Edom lao ri Yéhuda sibawa patettong akkarungeng ri alé. Rimakkuwannanaro Yéhoram sibawa sining pallimana massui sibawa karéta-karéta musuna nainappa nagasa Edom. Rikeppungngi ri pasukang Edom, iyakiya wenninna nabettui mennang akkeppungenna balié nanalari. Mappammulai wettuéro dé'na natunru Edom lao ri Yéhuda. Iyatoro wettué namaronta'to kota Libna. Iya manennaro kajajiyangngi nasaba nasalaini Yéhoram Puwangnge, Allataala iya nasompaé toriyolona. Mala patettongngi onrong-ngonrong assompang barahala ri daéra buluna Yéhuda, sibawa nassabariwi ra'ya' Yéhuda sibawa Yérusalém madosa lao ri Puwangnge. Nanalolongenna Yéhoram silampa sure' iya naokié Nabi Elia wettunna tuwo mupi. Makkuwaiyé oninna iyaro sure'é, “ Puwang, Allataala iya nasompaé Daud, hukkungngi Datu saba' dé' naccowériwi Datu baténa ambo'na sibawa nénéna worowané Datu. Sibalé'na, tuwoi Datu pada-pada arung-ngarung Israélié, sibawa nassabariwi ra'ya' Yéhuda sibawa Yérusalém dé' namatinulu lao ri Allataala. Napogau'i Datu pada-padaé Arung Ahab sibawa sining passulléna. Mala naunoi Datu silessu-silessurenna Datu, padahal lebbi kessingngi naiya Datu. Pahukkungeng iya matane'é polé ri Puwangnge kennai matu ra'ya'é, ana'-ana'na sibawa sining bainéna Datu, enrengngé paccappui sininna waramparanna Datu. Muwi aléna Datu nakennato matu lasa paru iya pédé laowé essoé pédé maladde!” Iyaro wettué engka tau Filistin sibawa tau Arab monro ri seddéna akkampongenna tau Sudangngé ri daéra wiring tasi'é. Puwangnge pakédoi atinna sining tauwéro untu' musui Yéhoram. Nagasai mennang Yéhuda, narappai saorajana arungngé, nainappa natiwi lao sininna ana' bainéna Yéhoram selaku tawangeng, sangadinna Ahazia ana' worowanéna iya maloloé. Puranana sininna kajajiyangngéro, nahukkunni Puwangnge Yéhoram sibawa lasa paru iya dé'é nawedding majjappa. Nawéki duwattaung iyaro lasaé pédé maladde'i angkanna maté nasaibawang anrasa-rasang maseroé. Ra'ya'na dé' napalluwa api unggung selaku tanrang mabbarata pada-pada iya napogau'é mennang untu' néné-nénéna. Dé' muwi séddi tau sesse'i amaténna. Rikuburu'i ri Kota Daud, iyakiya dé' na ri laleng tampung arung-ngarungngé. Wettunna mancaji arung, umuru'na Yéhoram 32 taung, namapparéntai ri Yérusalém 8 taung ittana. Ri laleng séuwaé aggasarenna sikalompo garembolang tau Arab, sininna ana' worowanéna Yéhoram, sangadinna Ahazia iya maloloé dé' nariyuno. Rimakkuwannanaro pabbanuwana Yérusalém makkai Ahazia mancaji arung sulléi ambo'na. Madosai Ahazia lao ri Puwangnge pada-pada kaluwargana Ahab, nasaba mennang ritu iya mancajiyé pappangajana maténana ambo'na. Pappangaja-pappangajaénnaro cilakaiwi. Nasaba pangajana mennang, masséddiwi sibawa Yoram arunna Israél untu' mammusu méwai Hazaél arung Siria. Mammusui mennang ri Ramot, daéra Giléad. Maloi Yoram ri laleng ammusurengngéro, nainappa lisu ri kota Yizreel untu' riyurai, nanalao Ahazia célléngiwi kuwaro. Allataala pura pattentui makkedaé narapii matu ajjalenna Ahazia wettunna célléngiwi Yoram. Ri laleng accélléngengngéro Ahazia sibawa Yoram riyéwai riséddié worowané riyaseng Yéhu ana' Nimsi, iya puraé napilé Puwangnge untu' pabbinasai kaluwargana Arung Ahab. Wettunna napajoppa Yéhu pahukkungenna Puwangnge ri kaluwargaéro, siruntu'i sibawa sirombongang tomarajana Yéhuda sibawa sining anauréna Ahazia iya maccowéé ri laleng accélléngengngéro. Nanaunoni Yéhu iya manenna mennang. Nainappa nasuro tauwé sappai Ahazia iya massubbué wettuéro ri Samaria. Rilolongennana Ahazia, ritiwini ri Yéhu nariyuno. Namuni makkuwaro rikuburu towi ri mennang nasaba napakalebbii Arung Yosafat, nénéna iya massompaé ri Puwangnge sibawa sissukku ati. Polé ri kaluwargana Ahazia dé'gaga mulléi malai apparéntangngé. Wettunna naisseng Atalya makkedaé maténi Arung Ahazia ana'na, napparéntanni kuwammengngi sininna kaluwargana arungngé ri Yéhuda nariyuno. Ahazia mappunnai séddi silessureng makkunrai riyaseng Yoséba iya kawingngé sibawa séddi imang riyaseng Yoyada. Nammekko-mekko Yoséba malai séddi ana' worowanéna Ahazia iya riyasengngé Yoas polé ri yelle'na ana'-ana' arungngé iya maéloé nauno Atalya. Iyaro ana'é silaong sibawa pattarana'na nasubbui ri laleng séddié bili' ri Bolana Puwangnge. Makkuwaniro Yoséba passalama'i iyaro ana'é angkanna dé' nariyuno ri Atalya. Enneng taung ittana risubbu Yoas ri Bolana Puwangnge na ri lalennaro mapparéntai Atalya selaku arung. Ri taung mapitué napettuini Imang Yoyada untu' tinda'. Masséddini sibawa lima parawira, iyanaritu Azarya ana' Yéroham, Ismail ana' Yohanan, Azarya ana' Obéd, Maaséya ana' Adaya, sibawa Elisafat ana' Zikhri. Laoni mennang ri sininna kotaé ri Yéhuda sibawa paddeppungengngi sining tau Léwié enrengngé sininna kapala appangngé, nanatiwii ri Yérusalém. Maddeppungenni mennang ri Bolana Puwangnge, sibawa mébbu assijancing sibawa Yoas, ana' worowanéna arungngéro. Makkedani Yoyada lao ri mennang, “Iyanaé ana' worowanéna Arung Ahazia! Harusu'i makkekkuwangngé mancaji arung, saba' purai majjanci Puwangnge makkedaé tette'i matu mapparénta wija-wijanna Daud. Iyanaé harusu tapogau': Rékko sining imangngé sibawa tau Léwié purani majjama ri esso Saba'é, dé' nawedding mennang lisu. Tawa tellunna polé ri mennang harusu maccowé jagaiwi pintu-pintu gerbanna Bolana Puwangnge, tawa tellunnasi ri saorajana arungngé, na lebbinna ri Pintu Gerbang Dasar. Sininna ra'ya'é harusu'i maddeppungeng ri seddéna Bolana Puwangnge. Dé' muwi séddi tau wedding muttamakiwi Bolana Puwangnge sangadinna sining imangngé sibawa tau Léwi iya mattengngangngé tugas. Weddingngi mennang muttama saba' purani mennang ripallaing untu' Puwangnge. Sining tau laingngé harusu'i turusiwi peraturanna Puwangnge sibawa monro ri saliweng. Sining tau Léwié harusu'i tettong mattulilingiwi arungngé sibawa peddang pura rampu, sibawa jagaiwi muwi kégi lao. Nigi-nigi makkuraga muttamakiwi Bolana Puwangnge, harusu'i riyuno.” Napajoppani sining tau Léwié sibawa ra'ya' Yéhuda iyaro paréntana Yoyada. Sining tau iya leppe jamangngé ri esso Saba'é dé' naripalalo lisu. Jaji sining parawiraé weddingngi napangara madécéd-décéng sining tau iya leppe jamangngé silaong iya nappaé polé untu' majjama. Lao risining parawiraéro nabagéi Yoyada bessié sibawa kaliyawo appunnangenna Arung Daud iya ritaroé ri Bolana Puwangnge. Nataro towi Yoyada sining tauwé sibawa peddang pura rampu ri seddé yolona Bolana Puwangnge untu' linrungiwi arungngé. Purairo ritiwini Yoas ri Yoyada massu, nainappa napasangi passigera ulunna, nanawéréngngi kitta Hukkunna Allataala. Makkuwaniro Yoas riyakka mancaji arung. Nainappa Imang Yoyada sibawa ana'-ana'na boloi minnya upacara allantikenna Yoas, nainappa gora sininna tauwé, “Tuwoi arungngé!” Naéngkalingani Atalya gora-gora ra'ya'é duppaiwi arungngé. Mapperi-perini lao ri Bolana Puwangnge kégi maéga tau sipulung. Naitani arung iya baruéro tettong ri pintu gerbang muttama'é ri Bolana Puwangnge, naonroiyé rilanti, riyattulilingi ri parawira-parawiraé sibawa passeppung tarompé'é. Sininna ra'ya'é gora-gorani marennu nanapaoni towi tarompé'na, sibawa sining pacculé musi'é ri Bolana Puwangnge rowariwi iyaro ramé-ramé sibawa sining paréwa musi'na mennang. Nasibawang abata-batang nasapé'ni Atalya pakéyanna sibawa gora, “Bali'bella! Bali'bella!” Dé' napalaloi Yoyada riyuno Atalya ri seddéna Bolana Puwangnge, jaji makkedani lao risining parawiraé, “Tiwii massu lalo ri barisi pengawal-é, sibawa unoi nigi-nigi makkuraga passalama'i.” Natikkenni mennang, nanatiwii ri saorajaé. Kuwaniro riyuno ri pintu Gerbang Anyarangngé. Naérani Imang Yoyada Arung Yoas sibawa ra'ya'é silaong aléna mébbu assijancing makkedaé mancajiwi matu mennang umma'na Puwangnge. Purairo malluru manenni mennang sibawa ruttungngi bolana Baal. Mézba silaong dato-dato'na naancuru'i, nanaunoi Matan, Imanna Baal ri yolona mézba-mézbaéro. Nainappa nasuro Yoyada sining imangngé sibawa tau Léwié untu' murusu'i jama-jamangngé ri Bolana Puwangnge situru abbagéngeng jama-jamang iya puraé napattentu Arung Daud. Harusu'i mennang makkasuwiyangeng akkarobangeng ritunu lao ri Puwangnge – situru sibawa hukkung-hukkunna Musa – sibawa ramé-ramé nenniya élokkélong pada-pada iya puraé naatoro Daud. Ri pintu-pintu gerbang Bolana Puwangnge, taroi Yoyada pengawal untu' jaga kuwammengngi tau iya dé'é nasitinaja sompai Puwangnge dé' nauttama. Sining parawiraé, sining ponggawa masaraka'é, sining pejaba'na pamaréntaé, sibawa sininna ra'ya'é maccowériwi Yoyada tinrosiwi Arung Yoas polé ri Bolana Puwangnge lao ri saorajaé. Muttama'i mennang polé ri pintu gerbang utamaé nainappa tudang arungngé ri kadéra arajangngé. Marennu sininna ra'ya'é, tennang toni kotaé sibawa purani riyuno Atalya. Pituttaung umuru'na Yoas wettunna mancaji arunna Yéhuda, mapparéntai ri Yérusalém 40 taung ittana. Indo'na riyaseng Zibya polé ri kota Bersyéba. Ri wettu tuwona mupa Imang Yoyada, napogau'i Yoas gau'-gau' iya pésennangiyéngngi atinna Puwangnge. Napiléi Yoyada duwa makkunrai untu' bainéna Yoas, napolé ri mennang lolongengngi Yoas ana'-ana' worowané sibawa makkunrai. Mapparéntanana siyagangngaré wettu ittana, napettuini Yoas untu' pédécéngiwi Bolana Puwangnge. Sining imangngé sibawa tau Léwié riparéntangngi lao ri pabbanuwana kota-kotaé ri Yéhuda sibawa paddeppungeng dowi polé ri sininna ra'ya'é untu' pédécéngiwi Bolana Puwangnge tungke taung. Nasuroi mennang masitta pajoppai iyaro jamangngé, iyakiya sining tau Léwié maccana-canai. Rimakkuwannanaro riyobbini Imang Yoyada, pamimpinna mennang, nanakkeda, “Tenniyaga Musa atanna Puwangnge pura suroi ra'ya'é makkamaja sima untu' mongkosokiwi Kémana Puwangnge? Makkekkuwangngé, magi sining tau Léwiéro dé' nadessa'i Bapa' untu' paddeppungeng sima polé ri ra'ya'é ri Yéhuda sibawa Yérusalém?” ( Sining tau maccowériyéngngi Atalya, makkunrai majaéro, pura solangiwi Bolana Puwangnge, sibawa maéga polé ri barab-barang iya ripallaingngé untu' Allataala purani napaké mennang untu' massompa Baal.) Napparéntanni arungngé kuwammengngi na tau Léwié mébbu séddi petti-petti dowi nanataroi ri yolona pintu gerbang Bolana Puwangnge. Ri sininna Yérusalém sibawa Yéhuda riyappallebangenni makkedaé sininna tauwé harusu'i tiwi sima untu' Puwangnge, pada-pada iya nawaji'kangngé Musa. Iyaro pappallebbangengngé napésennangiwi atinna ra'ya'é sibawa sining pamimpinna mennang. Ramé-raméni mennang puttama dowi simana ri laleng pettiéro. Esso-esso iyaro petti-pettié natiwi sining tau Léwié lao ri pegawénna arungngé untu' naparéssa. Rékko pennoni iyaro petti-pettié napassuni dowina jurutulisi'na wanuwaé sibawa wakkélé'na Imang Lompoé nainappa napalisu iyaro petti-pettié ri onronna mammulangngé. Makkuwaniro napogau' mennang esso-esso, namaéga senna dowi maddeppungeng. Nainappa nabbéréyang arungngé sibawa Yoyada iyaro dowié lao risining tau iya kapalaiyéngngi appédécéngenna Bolana Puwang -ngéro. Nainappa iyaro sining tauwé pagaji tukang batu, panré aju sibawa panré bessi untu' jamai iyaro jamangngé. Nappammulana iyaro sining tukangngé pédécéngiwi iyaro Bolana Puwangnge. Majjama manenni mennang makkuwaro angkanna paccappurenna iyaro Bolaé mancaji masse toni sibawa makessing pada-pada pammulanna. Tépunnana iyaro jama-jamangngé, ulaweng sibawa péra' iya nasésaé nabbéréyanni lao ri arungngé sibawa Yoyada. Nainappa iyaro ulawengngé sibawa péra'é napakéi untu' mébbu pakkakkasa-pakkakkasa untu' Bolana Puwangnge, padaénna: paréwa-paréwa untu' upacara assompangngé, untu' akkarobangeng ritunué, penné-penné untu' dupa sibawa mangko-mangko'na. Ri wettu tuwona mupa Imang Yoyada, akkarobangeng ritunué tette'i riyakkasuwiyangeng ri Bolana Puwangnge. Umuru'na Yoyada narapii macowa senna sibawa matéi wettunna makkéumuru 130 taung. Rikuburu'i ri tampung arung-ngarungngé ri Kota Daud untu' mangke'i jasa-jasana lao ri Allataala, lao ri Bolana Puwangnge sibawa lao ri umma Israélié. Maténana Yoyada, ripalécéni Yoas sibawa ripangarui risining pamimpinna Yéhuda angkanna dé'na nabati-batiwi pappagguruwanna Yoyada. Nadé'na nassompa ra'ya'é ri Bolana Puwangnge, Allataalana toriyolona, iyakiya massompai barahala sibawa dato'-dato'na Déwi Asyéra. Iyaro dosana mennang nassabariwi macai Puwangnge lao ri Yéhuda sibawa Yérusalém. Nasuroni Puwangnge nabi-nabié mamparengngi mennang kuwammengngi nalisu massompa ri Puwangnge, iyakiya dé' namaélo ra'ya'é méngkalingai. Narikuwasaina Zakharia ana'na Imang Yoyada ri Rohna Puwangnge. Malluruni Zakharia ri yolona ra'ya'é, nainappa gora, “Makkedai Puwang Allataala, ‘Magi nadé' muturusi parénta-parénta-Ku sibawa cilakaiwi alému. Dé' mupaduli-Ka, nadé'to Upaduliko!’ ” Iyatoro taungngé, ri atassulléng wettué, tentara Siria gasai Yéhuda sibawa Yérusalém. Naunoi mennang sininna pamimpingngé sibawa tiwi maéga barang rappa lao ri Damsyik. Céddé'mi bawang jumellana tentara Siriaé, iyakiya Puwangnge malleppessangngi mennang caui tentara Yéhuda iya mabélaé lebbi battowa, nasaba tau Yéhudaé dé' nabati-batiwi Puwang Allataalana toriyolona. Nasibawang caraéro Puwangnge hukkungngi Arung Yoas. Maseroni lona Yoas. Laonana tentara balié, sikongkolo'ni duwa tau pegawénna. Riyunoni ri onrong atinronna selaku pamale'na lao ri abbunowanna ana'na Imang Yoyada. Rikuburu'ni Arung Yoas ri Kota Daud, iyakiya dé' na ri tampung arung-ngarungngé. ( Tau iya sikongkolo'é méwai iyanaritu Zabad ana' Siméat makkunrai Amon, sibawa Yozabad ana' Zimrit makkunrai Moab.) Curita passalenna ana'-ana'na Yoas, passalenna sining boto iya dé'é namakessing passalenna aléna, sibawa passalenna pékkugi pédécéngiwi Bolana Puwangnge, iya manenna tarokii ri laleng kitta Pappakatajanna Kitta Arung-ngarungngé. Amazia, ana' worowanéna Yoas, mancaji arung sulléiwi ambo'na. Mancaji arungngi Amazia wettunna makkéumuru 25 taung, sibawa mapparéntai ri Yérusalém 29 taung ittana. Indo'na iyanaritu Yoadan polé ri Yérusalém. Napogau'i Amazia iya pésennangiyéngngi atinna Puwangnge, iyakiya sitengnga atimi. Masse'na muwa tudangenna, nahukkung matéi pegawé-pegawénna iya mpunoéngngi ambo'na. Iyakiya ana'-ana'na iyaro pegawé dé' naunoi nasaba naturusiwi paréntana Puwangnge ri laleng Kitta'na Musa iya makkedaé, “Aja' muhukkung matéi tomatowaé nasaba ja iya napogau'é ana'-ana'na, sibawa aja' muhukkung matéi ana'-ana'é nasaba ja iya napogau'é tomatowanna. Tungke tau banna weddingngi rihukkung maté nasaba ja iya napogau'é.” Napaddeppungenni Arung Amazia sininna tau suku Yéhuda sibawa Bényamin nainappa nasuro tettong situru appanna tungke-tungke, ripimping ri komandang pasukang sisebbué sibawa komandang pasukang sératué. Nainappa napilé tau iya makkéumuru'é 20 taung liyasé iya mullééngngi mammusu sibawa macca makkégunang bessi sibawa kaliyawo. Jumellana mennang engka 300.000 tau. Rilainnaéro séwai 100.000 prajuri polé ri Israél sibawa wajana kira-kira 3.400 kilo péra'. Iyakiya engka séddi nabi lao ri arungngé sibawa makkeda, “Aja' mupakéi iyaro sining prajuri'é, nasaba dé' natulungngi Puwangnge umma Israél iya polé ri Akkarungeng Manoranro. Iyakiya rékko napaké muwi Datu mennang, Allataala leppessangngi matu Datu ricau ri balié namuni mawatangngi tentarana Datu sibawa baraniwi. Saba' banna Allataala bawang makuwasa mabbéré apakalang iyaré'ga ricau.” Nakkutana Amazia, “Iyakiya pékkugiwi sibawa sininna péra' iya puraé Uwéréngngi mennang?” Nappébali iyaro nabié, “Naullé Puwangnge palisui lao ri Datu lebbi naiyaro!” Rimakkuwannanaro naleppessanni Amazia sining prajuri riséwaéro nanasuroi mennang lisu ri wanuwanna. Lisuni mennang, iyakiya macai senna'i. Nabbaraniyanni aléna Amazia sibawa tiwii tentarana ri Lompo Pejjé. Kuwaniro mennang mammusu nanaunoi 10.000 prajuri'na Edom. Seppulo sebbu iya laingngé natawanni. Natiwini mennang ri tompo bulué ri kota Séla nainappa riyaggenrungeng no angkanna maté. Naiyaro wettué sining prajuri Israél iya puraé risuro lisu ri Amazia, sibawa dé' naripalalo maccowé mammusu, nagasani kota-kotana Yéhuda pallawangenna Samaria sibawa Bét-Horon. Mpunoi mennang 3.000 tau nenniya rampasa'i maéga barang. Nacaunana tentara Edom, lisuni Amazia tiwii dato'-dato' barahalana tau Edongngé nanataroi ri Yéhuda. Nainappa mattunu dupa untu' dato'-dato'éro sibawa sompai. Iyaro pangkaukenna naébbui Puwangnge macai. Suroni séddi nabi lao ri Amazia. Makkedai iyaro nabié, “Magi Datu nassompa déwata bangsa laing iya dé'é naulléi passalama'i bangsana muto polé ri akuwasanna Datu?” Nakkeda Amazia, “Ammekkoko, rékko dé' riyunoko! Dé' naengka nariyakkako mancaji pappangajana arungngé!” Nammekkona iyaro nabié, iyakiya ri yolona narapii makkeda, “Makkekkuwangngé uwissenni makkedaé Allataala pura pettui untu' pabbinasai Datu nasaba pangkaukenna Daturo, sibawa nasaba dé' nabati-batiwi Datu pangajaku.” Amazia arung Yéhuda silaong sining pappangajana sikongkolo'ni méwai Israél. Kirinni suro lao ri Yoas arung Israél, ana' Yoahas, eppona Yéhu, untu' méwai mammusu. Iyakiya nakiringngi Arung Yoas iyaé pappébalié, “Séuwa wettu alekale maddorié ri buluna Libanon nakiringngi iyaé tuntutangngé lao ri pong camaraé, ‘Eh pong camara, abbéréyangngi ana'daramu lao ri ana'ku untu' macaji bainéna.’ Iyakiya ri munri lalowi kuwaro sikaju olokolo ale iya léjja-léjja'éngngi iyaro alekale maddorié. Iko, Amazia, mabboro makkedaé purani mucau tau Edongngé, iyakiya lebbi kessing muwi monroko bawang ri bolaé. Untu' aga sappa assisalang iya bannaé cilakaiwi matu alému sibawa ra'ya'mu?” Iyakiya Amazia, arunna Yéhuda dé' nabati-batiwi ada-adanna Yoas, arunna Israélié. Na mémeng napuwéloi Allataala kuwammengngi naricau Amazia nasaba purani nasompa dato'-dato' barahalana tau Edongngé. Rimakkuwannanaro joppani Yoas sibawa ana' buwana lao ri Bét-Sémes namammusu sibawa Amazia kuwaro. Ricauni tentara Yéhuda sibawa sininna prajuri'na larini lisu ri bolana tungke-tungke. Ritikkenni Amazia ri Yoas nanatiwii lao ri Yérusalém, nainappa naruttung témbo'na kotaéro sillampé lebbi kurang 200 météré, mappammulai ri Pintu Gerbang Efraim lettu ri Pintu Gerbang Sunna. Sininna ulawengngé sibawa péra'é nenniya sininna paréwa iya naruntu'é ri Bolana Puwangnge sibawa iya engkaé ri yawa akuwasanna Obéd-Edom, makkuwatoro sininna waramparanna saorajaé, silaong siyagangngaré tau natawang natiwini Yoas lao ri Samaria. Maténana Yoas arung Israél, Amazia arung Yéhuda tuwo mupi 15 taunnapa. Pada-pada ambo'na, napogau' towi Uzia iya pésennangiyéngngi atinna Puwangnge. Zakharia iyanaritu pappangaja rohaninna. Ri wettu tuwona mupa Zakharia, matinului Uzia massompa ri Puwangnge angkanna Puwangnge barakkakiwi. Mammusui Uzia méwai tau Filistingngé. Naruttungngi témbo'-témbo'na kota Gad, Yabné sibawa Asdod, nainappa patettong kota-kota mabbénténg ri seddéna Asdod sibawa daéra laingngé ri Filistin. Allataala tulungngi sibawa caui tau Filistingngé, sibawa tau Arab-é iya monroé ri Gur-Baal enrengngé tau Méuningngé. Makkamajai pakkasuwiyang tau Amongngé lao ri Uzia. Pédé makuwasai angkanna tassebbo asenna lettu ri Maséré. Untu' pakkasse'i kota Yérusalém, patettongngi Uzia manara ri Pintu Gerbang Sunna, ri Pintu Gerbang Lompo'é sibawa lékoreng témbo'é. Patettong towi manara-manara mabbénténg ri daéra padangngé, sibawa kali maéga bujung nasaba maéga senna olokolo'na, muwi ri tanété tanré iyaré'ga ri tanété mariyawaé ri seddé yajang. Nasaba napuriyatiwi allaong rumaé, nanapajjamai maéga tau untu' bukka palla-palla anggoro ri daéra bulué, sibawa untu' jamai tanaé ri daéra-daéra iya macommo'é. Uzia mappunnai tentara battowa iya tuli sadiyaé untu' mammusu. Poléi mennang risining passéddiyang iya jumellanaé riyoki ri iya duwa jurutulisi'na arungngé, iyanaritu Yéiél sibawa Maaséya riyawa pimpinanna Hananya, sala séddinna anggota stafna arungngé. Napassakke'i Uzia iyaro tentarana sibawa kaliyawo, bessi, palo-palo baja, waju bessi, pana enrengngé batu pallobang. Ri Yérusalém sining ahli senjatana purani mébbu paréwa iya mullééngngi mannémbakengngi ana' panaé sibawa batu-batu loppoé polé ri laleng manaraé sibawa sining sunna témbo' kotaé. Tarompoi Uzia kégi-kégi, sibawa makuwasa senna'i nasaba Allataala masero tulungngi. Mawatannana Arung Uzia, mancaji matemponi, na iyaro gau'é nassabariwi ancurukenna. Najjalékkaiwi paréntana Puwang Allataalana nasaba nauttamakiwi Bolana Puwangnge untu' mattunu dupa ri yasé'na mézba dupaé. Iyakiya Imang Azarya silaong 80 imang laingngé iya mawatangngé sibawa baranié maccowériwi untu' méwai pangkaukennaro. Makkedai mennang, “Petta Iya Malebbié! Dé'gaga ha'na Datu mattunu dupa untu' Puwangnge. Iyaro jamanna imang-ngimang wijanna Harun, saba' mennang ritu ripallaing untu' iyaro. Sitinajai nasalai Datu onrong iya mapaccingngéwé! Purani naéwa Datu Puwang Allataala, sibawa dé'na nalolongeng barakka'-Na.” Iyaro wettué mattengngangngi Uzia tettong ri seddéna mézba dupaé ri Bolana Puwangnge sibawa paréwa pattunu dupa ri limanna. Namacaina lao ri imang-ngimangngéro, natappa mompona lasa oli iya mappakatau-taué ri linrona. Makkitani Azarya sibawa imang-ngimang laingngé lao ri aléna sibawa masero séleng, nanadessa'ni kuwammengngi nasalaiwi Bolana Puwangnge. Mapperi-perini massu nasaba Puwangnge hukkungngi. Narapi maté Arung Uzia iyaro lasana dé' najjappa. Ripassalai riséddié bola sibawa dé'na naripalalo muttama ri Bolana Puwangnge. Ripaleppe'i polé ri jama-jamanna, na Yotam ana'na paréntai ra'ya'é selaku wakkélé'na. Curita laing passalenna apparéntanna Arung Uzia, pura naokii Nabi Yésaya ana' Amos. Wettunna maté, rikuburu'i Uzia ri tana seddéna tampung arung-ngarungngé, iyakiya dé' na ri tampungngéro, nasaba malasa olii iya mappakatau-taué. Yotam ana' worowanéna mancaji arung sulléiwi. Mancaji arungngi Yotam ri umuru 25 taung, sibawa mapparéntai ri Yérusalém 16 taung ittana. Indo'na iyanaritu Yérusa ana' Zadok. Napésennangiwi Yotam atinna Puwangnge, pada-pada Uzia ambo'na. Banna dé' nattunu dupa ri Bolana Puwangnge, pada-pada iya napogau'é ambo'na. Namuni makkuwaro, matteru muwi ra'ya'é pogau' dosa. Yotam ritu patettongngi Pintu Gerbang Manorang ri Bolana Puwangnge, sibawa pakkasse'i témbo'na Yérusalém ri daéra iya riyasengngé Ofel. Patettongngi kota-kota ri buluna Yéhuda sibawa sining bénténg enrengngé manara-manara risining ale'é. Namusui sibawa nacaui arung Amon silaong tentarana, nainappa napassa tau Amongngé makkamaja pakkasuwiyang. Tungke taung matturu-turuseng telluttaung ittana harusu'i mennang wajai 3.400 kilo péra', duwanrupa gandong, tungke-tungke 1.000 tong. Pédé makuwasani Yotam nasaba matinului sibawa mapatoi ri Puwang Allataala. Kajajiyang-kajajiyang laingngé ri laleng apparéntanna Yotam, sining musu sibawa siyasa'-siyasa'na, iya manenna purani riyoki ri laleng kitta Sejarana Arung-ngarunna Israélié sibawa Yéhuda. Umuru'na Yotam wettunna mancaji arung 25 taung, mapparéntai ri Yérusalém 16 taung ittana. Matéi sibawa rikuburu ri Kota Daud, nainappa Ahas ana' worowanéna mancaji arung sulléiwi. Ahas mancaji arung ri umuru 20 taung, mapparéntai ri Yérusalém 16 taung ittana. Dé' naccowériwi conto iya makessingngé polé ri Arung Daud, toriyolona, sangadinna napogau'i iya dé'é napésennangiwi atinna Puwangnge. Tuwoi pada-pada arung-ngarung Israélié sibawa suroi tauwé mébbu dato'-dato' Baal polé ri bessié, enrengngé mattunu dupa ri Lompo Hinom. Mala ana' worowanéna muto nakkasuwiyangeng selaku akkarobangeng lao ri barahalaé, situru abiyasang majana sining tau iya puraé napaddésu Puwangnge polé ri wanuwa Kanaan wettunna tau Israélié muttamakiwi wanuwaéro. Makkasuwiyangngi Ahas akkarobangeng sibawa mattunu dupa ri onrong-ngonrong assompang déwataé risining bulu-bulué sibawa ri yawana ajukajung iya maworongngé. Ana' worowanéna Ahas, iya riyasengngé Maaséya riyunoi ri Zikhri séddiwi parawirana Israélié. Nauno towi Zikhri Azrikam pangurusu' saorajana arungngé, sibawa Elkana, lima ataunna arungngé. Namuni sining tau Yéhudaé iyanaritu pada-padanna bangsa Israél, iyakiya tentara Israélié tawangngi 200.000 makkunrai sibawa ana'-ana', nainappa natiwi mennang ri Samaria silaong maéga senna barang rappa. Engka séddi nabinna Puwangnge riyaseng Odéd monro ri kota Samaria. Wettunna tentara Israélié lisu tiwi tawangeng polé ri Yéhuda, naéwai Odéd sita mennang wettunna maélo muttamakiwi kotaé. Makkedani, “Purani mucau tau Yéhudaé nasaba Puwang Allataalana toriyolomu macayii lao ri mennang. Iyakiya naéngkalingai Puwangnge pékkugi becco'mu mpunoi iyaro tentarana Yéhuda. Na makkekkuwangngé maéloko pancaji ata-atai sining tau Yérusaléngngé sibawa Yéhudaé! Dé'ga muwissengngi makkedaé madosa tokko lao ri Puwang Allataalamu? Engkalingai! Iyaé sining tawangengngé iyanaritu saudara-saudaramu. Jaji suroni mennang lisu. Rékko dé', macayii matu Puwangnge nanahukkukko.” Eppa ponggawa polé ri Israél, iyanaritu Azarya ana' Yohanan, Bérékhya ana' Mésilémot, Yéhizkia ana' Salum, sibawa Amasa ana' Hadlai, naéwa towi tindakanna tentara iya lisuéro. Makkedai mennang, “Aja' mutiwii sining tawangengngéro lao mai! Madosaki lao ri Puwangnge, na dosa-dosata genne'ni égana untu' rihukkung. Makkekkuwangngé maéloko mébbu séuwa iya bannaé tambaiwi matu asalatta.” Na iyaro sining prajuri'é nabbéréyanni sining tawangengngé sibawa barab-barang rampasangngéro lao ri ra'ya'é sibawa sining pamimpinna mennang. Nanatokkong iya eppa ponggawaéro untu' murusu'i iyaro sining tawangengngé. Nabagéni mennang pakéyang polé ri barang rampasa'éro lao risining tawangeng iya mapparelluwangngéngngi. Nabbagéyang towi mennang sapatué, inanré sibawa énungengngé. Sining tawangeng iya maloé nauraiwi sibawa minnya zaitun. Iya malemma senna'é untu' joppa, napatonangngi ri kaleddé'é, nainappa natiwi sininna tawangengngéro ri Yérikho, kota pong karomaé, kuwammengngi naulléi lisu ri kampong assalenna mennang ri Yéhuda. Purairo lisuni tau Israélié ri Samaria. Iyatoro wettué nagasai sining tau Filistingngé kota-kotaé ri pong bulué ri seddé yajang, sibawa daéra seddé yattanna Yéhuda. Nasittaiwi mennang kota Bét-Sémes, Ayalon, Gedérot sibawa kota Sokho, Timna sibawa Gomzo enrengngé désa-désa ri seddéna iya tellu kotaéro, nainappa mattette kuwaro. Nasaba Ahas arung Yéhuda nasalaini Puwangnge sibawa dé' naparéntai ra'ya'na pékkugi mestinna, nanapapolé Puwangnge asussang ri Yéhuda. Iyaro arung Asyur poléi tenniya untu' bantui Ahas, sangadinna untu' sussaiwi. Tarapassani nala Ahas ulaweng polé ri Bolana Puwangnge, ri saorajaé sibawa polé risining bolana pamimping ra'ya'é, nainappa nabbéréyang lao ri arung Asyur. Iyakiya iyaro dé'to nakkéguna ri aléna. Ri laleng keadaang iya mawatang senna'éro, mala Ahas pédé madosai lao ri Puwangnge. Nacilakaiwi aléna sibawa ra'ya'na nasaba makkasuwiyangngi akkarobangeng lao ri déwata-déwatana tau Siriaé iya puraé caui. Mappikkiri'i, “Déwata-déwatana Siria pura bantui arung-ngarung Siria, jaji rékko makkasuwiyakka akkarobangeng lao ri mennang, naullé natulung tokka matu.” Nainappa nala maneng pakkakkasa'na Bolana Puwangnge nanaancuru'i. Nainappa natutu Bolana Puwangnge, napatettong mézba-mézba ri sininna Yérusalém. Ri tungke kota sibawa désa ri Yéhuda patettongngi onrong-ngonrong assompang barahala untu' mattunu dupa lao ri déwata-déwatana bangsa laingngé. Nanallalengiwi naébbui Puwangnge, Allataalana sining toriyolona macai lao ri aléna. Curita laingngé passalenna apparéntanna sibawa sininna pangkaukenna polé ri pammulanna lettu ri paccappurenna riyokii ri laleng kitta Sejarana Arung-ngarunna Yéhuda sibawa Israél. Matéi Ahas; narikuburu ri Yérusalém, iyakiya dé' na ri tampunna arung-ngarungngé. Hizkia ana' worowanéna mancaji arung sulléiwi. Hizkia mancaji arunna Yéhuda ri umuru 25 taung, namapparéntai ri Yérusalém 29 taung ittana. Indo'na riyasengngi Abia ana'na Zakharia. Napogau'i Hizkia iya pésennangiyéngngi atinna Puwangnge pada-pada Arung Daud toriyolona. Ri uleng séddié ri laleng taung mammulangngé apparéntanna, natimpa'ni Hizkia sining tange'na Bolana Puwangnge nanasuroi tauwé pédécéngiwi. Nasuroi maddeppungeng sining imangngé sibawa tau Léwié ri seddé alauna Bolana Puwangnge, namabbicara sibawa mennang kuwaro. Makkedai, “Iko, sining tau Léwié, harusu'i mupallaing alému untu' Puwangnge, sibawa pépaccingiwi Bolana Puwangnge, Allataalana toriyolomu. Sininna iya pénajisi'éngngi iyaro bolaé harusu'i ripaddésu. Toriyolota dé' namatinulu lao ri Puwang Allataalata sibawa napogau'i mennang iya dé'é napésennangiwi atin-Na. Dé' mennang nabati-batiwi Aléna sibawa dé' napaduliwi onrong Naonroiyé. Natutu'i mennang sining sumpanna Bolana Puwangnge sibawa peddéiwi sining pajjennangenna. Dé' mennang nattunu dupa ri Bolana Puwangnge, sibawa dé' nakkasuwiyangeng akkarobangeng ritunu lao ri Allataala iya nasompaé tau Israélié. Na ri laleng caina Puwangnge nahukkungngi tau Yéhudaé sibawa Yérusalém. Namuwisseng maneng pékkugi tindakanna Puwang -ngéro pura mébbui sininna tauwé maséleng sibawa métau. Matéi bapa'-bapa'ta ri laleng ammusurengngé, sibawa ana' nenniya bainéta ritiwii selaku tawangeng. Makkekkuwangngé maéloka mébbu assijancing sibawa Puwangnge, Allataalana Israélié, kuwammengngi dé' namacaina lao ri idi. Ana'-ana'ku, aja'na muwaccana-canana, nasaba iko ritu napilé Puwangnge untu' massompa sibawa mattumani ri Aléna enrengngé mattunu dupa sibawa pimpingngi ra'ya'é untu' massompa.” Iyaro jama-jamangngé napammulaiwi ri tanggala séddinna uleng séddi. Ri tanggala aruwana purani mennang napépaccingi sininna seddéna Bolana Puwangnge lettu ri seddé yolona. Nainappa aruwasi esso ittana napépaccingiwi mennang iyaro bolaé lettu pura maneng ri tanggala 16 ulengngéro. Nainappa nalaporo iyaro sining tau Léwié lao ri Arung Hizkia, “Purani ripépaccingi maneng Bolana Puwangnge, muttama'ni mézba akkarobangeng ritunué, méjang untu' roti ripatalaé sibawa sininna pakkakkasa'na. Pura toni riyala paimeng sining pakkakkasa iya napaddésu'é Arung Ahas wettunna dé' nabati-batiwi Puwangnge ri laleng wettu apparéntanna. Iya manenna pakkakkasa'éro purani ripallaissi untu' Puwangnge, na makkekkuwangngé engkani ri yolona mézbaé.” Dé' nattajeng maitta napaddeppungenni Arung Hizkia sining tomariyolona masaraka'é, nasilaong mennang lao ri Bolana Puwangnge. Untu' akkarobangeng paddampengeng dosa untu' kaluwargana arungngé sibawa ra'ya' Yéhuda, nenniya pépaccingiwi Bolana Puwangnge, tiwii mennang 7 saping lai, 7 bimbala lai, 7 ana' bimbala sibawa 7 bémbé lai. Nasuroni arungngé sining imang wijanna Harun makkasuwiyangengngi iyaro olokolo'é ri yasé'na mézbaé selaku akkarobangeng ritunu. Iyaro sining sapingngé nagéréni nainappa nabboloreng darana sining imangngé ri mézbaé. Nainappa napogau'to mennang makkuwaéro sibawa iya pituro bimbala'é sibawa iya pitu ana' bimbala'é. Paccapurenna nalani mennang iyaro sining bémbé'é nanatiwii lao ri arungngé sibawa ra'ya' iya mattengngangngé massompa kuwaro, nanapalénne manengngi limanna mennang ri yasé'na sining bémbé'éro. Purairo nagéréni sining imangngé iyaro sining bémbé'é sibawa natiri'i darana ri mézbaé selaku akkarobangeng paddampengeng dosana sininna ra'ya'é. Napogau'i mennang gau'éro nasaba arungngé pura mapparéntangngi kuwammengngi napakangka akkarobangeng ritunu sibawa akkarobangeng paddampengeng dosa untu' sininna ra'ya' Israélié. Situru sibawa panunju-panunju iya nabbéréyangngé Puwangnge lao ri Daud naolai Nabi Gad, iya majjamaé untu' arungngé sibawa naolai Nabi Natan, arungngé taroi sining tau Léwié ri Bolana Puwangnge macculé kacapi sibawa gambusu, pada-pada iya napaké Daud. Makkuwatoro sining imang iya nataroé kuwaro sibawa tarompé. Hizkia mabbéré tanrang kuwammengngi naripammulai upacara pakkasuwiyangeng akkarobangengngé. Ri wettu riyakkasuwiyangenna akkarobangengngé, sining tauwé mappammulani makkélong pappojiyang lao ri Puwangnge, sibawa sining pacculé musi'é paoni tarompé nenniya paréwa musi' laingngé. Arungngé sibawa sining tomariyolona masaraka'é suroi sining tau Léwié makkélong untu' Puwangnge pappoji-pojiyang iya nakarangngé Daud sibawa Nabi Asaf. Makkélonni sininna tauwé sibawa marennu senna namakkaluttuto sompai Allataala. Purairo makkedani Hizkia, “Nasaba makkekkuwangngé purano ripallaing untu' Puwangnge, na selaku pakkasuwiyang sukkuru'mu, harusu'ko tiwi akkarobangeng ri Bolana Puwangnge.” Nainappa sininna tauwé iya hadéré'é kuwaro tiwii iyaro sining pakkasuwiyanna, mala engkato iya nasibawangngé cenning ati tiwi olokolo untu' riyakkasuwiyangeng selaku akkarobangeng ritunu. Tiwii mennang 70 saping lai, 100 bimbala, sibawa 200 ana' bimbala nanakkasuwiyangengngi untu' akkarobangeng ritunu lao ri Puwangnge. Tiwi towi mennang 600 saping lai sibawa 3.000 bimbala untu' riyakkasuwiyangeng sibawa riyanré massibawa ri iya maneng hadéré'é. Sining imang iya puraé pépaccingiwi aléna céddé senna jumellana untu' lopéi bingkulanna sininna olokolo'éro. Rimakkuwannanaro riduwanni mennang risining tau Léwié, nasaba tau Léwié lebbi matinului ri peraturang pappépaccingngé. Tette'i mennang mabbantu narapi engka genne imang iya puraé pépaccingiwi aléna. Ri lainnaé akkarobangeng ritunué, sining imangngé makkasuwiyangeng towi lunra polé ri akkarobangeng sukkuru'é iya nanré ra'ya'é. Makkasuwiyangeng towi mennang anggoro iya ritiri'é silaong akkarobangeng ritunuéro. Makkuwaniro assompangngé ri Bolana Puwangnge ripakangkasi. Namasennanna atinna Arung Hizkia sibawa ra'ya'na nasaba ri laleng wettu dé'é namaitta Allataala pura bantui mennang pogau' manengngi iyaro. Nasaba paréntana arungngé sibawa sining pegawénna rikirinni sining suroé lao ri sininna Yéhuda sibawa Israél untu' tiwii sining sure'éro iya oninnaé makkuwaé, “Ra'ya' Israélié! Leppe'no polé ri akuwasanna tau Asyur-é. Makkekkuwangngé sitinajano lisu mattumani ri Puwangnge, Allataala iya nasompaé Abraham, Ishak sibawa Yakub, kuwammengngi nalisuto tulukko. Aja' mupada-pada toriyolomu sibawa sining tau Israél iya laingngé iya dé'é namatinulu lao ri Puwang Allataalana mennang. Alému pura mitai pékkugi tane'na pura nahukkung mennang. Aja' mumatedde ati pada-pada mennang, iyakiya turusiwi Puwangnge. Laono ri Yérusalém, ri Bolana Puwangnge iya puraé napallaing Puwang Allataalamu untu' Aléna lettu mannennungeng. Laono mai massompa ri Aléna kuwammengngi nasoro cai-Na lao ri iko. Rékko lisuko massompa ri Puwangnge, sining tau iya tiwiéngngi sumpulolomu selaku tawangeng, messé babuwai matu nanapalaloi mennang lisu. Puwang Allataalamu iyanaritu Allataala iya makessingngé sibawa paressé babuwai; Natarimako matu rékko lisuko ri Aléna.” Wettunna lao iyaro sining suroé polé ri kotaé lao ri kotaé ri daérana suku Efraim sibawa Manasyé lettu ri manorang sibbéla daérana suku Zébulon, ricawa-cawaini mennang sibawa ripakatuna. Iyakiya engkato sining tau polé ri suku Asyer, Manasyé sibawa Zébulon iya maéloé lao ri Yérusalém. Muwi ri Yéhuda majjama towi Allataala sibawa passéddiwi atinna ra'ya'é untu' mattonget-tongeng turusiwi élona Allataala sibawa turusiwi paréntana arungngé sibawa sining pegawénna. Ri uleng duwa sijumella battowa ra'ya' maddeppungeng ri Yérusalém untu' ramé-raméiwi Esso Maraja Roti Dé'é Raginna. Sining mézbaé ri Yérusalém iya napaké makkasuwiyangeng akkarobangeng sibawa mattunu dupa lao risining déwataé, nala manenni nanabbéyangngi ri laleng Lompo Kidron. Ri tanggala 14 ulengngéro géréni mennang sining bimbala untu' riyakkarobangeng selaku akkarobangeng Paska. Sining imangngé sibawa sining tau Léwi iya najisi'é mupa, masiri senna'ni. Napépaccingini mennang aléna angkanna weddinni mennang makkasuwiyangeng akkarobangeng ritunu ri Bolana Puwangnge. Pada malani mennang onrong ri Bolana Puwangnge situru atoreng iya tarokié ri laleng kitta Hukkung-hukkunna Musa. Darana iyaro sining akkarobangengngé nabbéréyangngi tau Léwié lao risining imangngé, nainappa nabboloreng mennang ri mézbaé. Maéga polé ri yelle'na tau iya hadéré'é kuwaro dé'pa napépaccingiwi aléna, jaji dé' nawedding mennang maggéré bimbala untu' akkarobangeng Paskaé. Rimakkuwannanaro sining tau Léwié ritu pogau'i gau'éro untu' mennang sibawa makkasuwiyangengngi lao ri Puwangnge. Ri lainnaéro, ri yelle'na sining tau Efraim, Manasyé, Isakhar sibawa Zébulon, maéga polé teppépaccingi lebbi riyolo aléna. Jaji naramé-raméiwi mennang iyaro Paskaé sibawa dé' napennoiwi sara'é. Rimakkuwannanaro massempajanni Arung Hizkia untu' mennang, adanna, “ Puwang, Allataala, nasompaé toriyolota, tennapodo polé ri akessingeng atim-Mu Muwaddampengengngi mennang iya mattengngangngé massompa lao ri Iko sibawa sukku ati, namuni mennang dé'pa napépaccingiwi aléna.” Naéngkalingani Puwangnge sempajanna Hizkia. Naddampengenni sining tauwéro, sibawa dé' nahukkungngi mennang. Pitungngesso ittana, namarennu senna'na iyaro sining tau maddeppungengngé ri Yérusalém pakangka Ramé-ramé Roti Dé'é Raginna. Esso-esso sining tau Léwié sibawa sining imangngé poji-pojiwi Puwangnge sibawa mattonget-tongeng. Iyaro sining tau Léwié makkuwamani accana pimpingngi assompangngé lao ri Puwangnge, angkanna Hizkia pojiwi mennang. Labe'nana 7 esso ittana mennang péneddingiwi inanré polé ri ramé-raméro sibawa makkasuwiyangeng akkarobangeng untu' mattarima kasi lao ri Puwangnge, Allataalana toriyolona, napettui manenni mennang untu' patterui iyaro ramé-ramé 7 essosi. Nainappa naramé-raméisi mennang sibawa mariyo-riyo. Massumbanni Arung Hizkia 1.000 saping lai sibawa 7.000 bimbala. Sining pegawénna Hizkia massumbang 1.000 saping lai sibawa 10.000 bimbala. Iya manenna olokolo'éro nabbéréyangngi lao ri ra'ya'é untu' rigéré sibawa riyanré. Maéga senna imang pépaccingiwi aléna. Ra'ya' Yéhuda, sining imangngé, sining tau Léwié, sibawa sining tau polé ri manorang, nenniya sining tau laing iya mattette'énna ri Israél sibawa ri Yéhuda, masennang manenni. Marowa senna kota Yérusalém nasaba mappammulai wettunna Salomo ana' worowanéna Daud, dé'pa naengka nakajajiyang gau' pada-padaéro. Sining imangngé sibawa tau Léwié méllauwi barakka'na Puwangnge untu' ra'ya'é, sibawa polé ri onrong Naonroiyé ri surugaé Allataala méngkalingai sempajanna enrengngé tarimai paréllaunna mennang. Puranana ramé-ramé, sininna ra'ya'é laoni ritungke kotaé ri Yéhuda, nainappa naancuru tugu-tugu barahalaé, léttungngi dato-dato iya ripatettongngé untu' Déwi Asyéra, sibawa paccappui sining mézbaé enrengngé sining onrong assompang barahalaé. Napogau' towi mennang makkuwaéro risining onrong laingngé ri Yéhuda, enrengngé ri daéra Bényamin, Efraim sibawa Manasyé. Purairo lisu manenni mennang ri onronna tungke-tungke. Napattette'ni paimeng Arung Hizkia regu-regu sining imangngé sibawa tau Léwié situru abbagéngeng jamanna mennang. Iyaro jama-jamangngé muttama'ni gau'-gau' mangoloéwé: makkasuwiyangeng akkarobangeng ritunu sibawa akkarobangeng pappasidamé, tumaningiwi upacara assompangngé ri Bolana Puwangnge, sibawa pojiwi enrengngé mattarima kasi lao ri Puwangnge ri maddupa-rupang onrong ri laleng Bolana Puwangnge. Polé ri olokolo'na muto nassumbangenni arungngé olokolo iya riyapparelluwangngé untu' akkarobangeng ritunué tungke élé sibawa tungke arawéng, sibawa untu' akkarobangeng iya riyakkasuwiyangengngé ri esso Saba'é, ri Ramé-ramé Uleng Baru, sibawa ri ramé-ramé laingngé pada-pada iya ripattentué ri laleng hukkung-hukkunna Puwangnge. Ri lainnaéro nasuroi arungngé pabbanuwana Yérusalém tiwi pakkasuwiyang iya ripattentué untu' sining imangngé sibawa tau Léwié, kuwammengngi naulléi mennang pattujui sininna perhatiyanna mennang lao ri attumaningngé ri Bolana Puwangnge pada-pada iya tarokié ri laleng hukkung-hukkunna Puwangnge. Puranana riyappallebbangeng iyaro paréntaé, natiwini tau Israélié lao ri Bolana Puwangnge sining pabbéré polé ri wassélé tanana iya bunge'é, iyanaritu tarigu, anggoro, minnya zaitun, cani sibawa wassélé tana laingngé. Tiwi towi mennang tawaseppulona polé ri appunnangenna. Sininna tau iya monroé ri kota-kotana Yéhuda natiwii tawaseppulona polé ri olokolo sapinna sibawa bimbala'na, kuwaéttopa sijumella battowa pabbéré laing, nainappa nakkasuwiyangeng manenro lao ri Puwang Allataalana. Iyaro sining pabbéré mammulani makkapolé-poléng ri uleng tellué, namatteru massolo narapi uleng pitu. Naitana sumbangeng iya maégaéro, napakalebbini Puwangnge Arung Hizkia sibawa sining pegawénna enrengngé pojiwi ra'ya' Israélié, umma'-Na. Wettunna arungngé mabbicara sibawa sining imangngé nenniya sining tau Léwié passalenna sining pabbéréro, makkedani Imang Lompo Azarya wijanna Zadok, “Sipongenna naantara ra'ya'é sining pakkasuwiyanna lao ri Bolana Puwangnge, dé' taakurangeng inanré, mala alebbing, angkanna maéga mupa pappassadiyang inanréta. Iya manennaro ritarimai nasaba Puwangnge pura barakkakiwi umma'-Na.” Nasaba paréntana arungngé, passadiyani mennang sining gudang ri seddéna Bolana Puwangnge, nainappa nataro maneng iyaro pabbéré sibawa tawaseppulona ri laleng sining gudangngéro. Engka séddi tau Léwi riyaseng Konanya, risuro mancaji jennang, sibawa Siméi anrinna ripancaji pabbantunna. Ri yawa pappimpinna mennang engka 10 tau Léwi laing risuro, iyanaritu: Yéhiél, Azazya, Nahat, Asaél. Yérimot, Yozabad, Eliél, Yismakhya, Mahat, sibawa Bénanya. Iya manenna gau'éro ripattette'i nasaba panunju'na Arung Hizkia sibawa Imang Lompo Azarya. Koré ana' Yimna, séddiwi tau Léwi mancaji kapalana pengawal-é ri Pintu Gerbang Alau ri Bolana Puwangnge, riwéréng tanggung jawa' untu' tarimai sining pabbéré iya riyakkasuwiyangengngé lao ri Puwangnge, nainappa nabagé-bagé. Ri kota-kota laingngé ri onronna sining imangngé, ribantui Koré risining tau Léwi laingngé iyanaritu: Eden, Minyamin, Yésua, Sémaya, Amarya sibawa Sekhanya. Iyaro sining bahang inanré nabagéi sama rata ri yelle'na pada-padanna suku Léwi muwi iya maloloé iyaré'ga iya macowaé situru jamanna mennang. Sininna tau worowané iya makkéumuru'é telluppulo taung liyasé, iya lolongengngé léléng jamang tungke esso ri Bolana Puwangnge, riweréng towi bagiyanna tungke-tungke situru jamanna sibawa situru regunna. Sining imangngé ridaftari situru appanna, sibawa tau Léwi iya makkéumuru'é 20 taung liyasé situru jamanna sibawa regunna. Ridaftar manengngi mennang massibawa silaong ana'na sibawa bainéna, nenniya anggota-anggota laingngé ri lalempolana, saba' harusu'i mennang sadiya tungke wettu untu' pajoppai jama-jamanna iya ripallaingngé untu' Puwangnge. Ri yelle'na sining imang iya monroé ri kota-kota iya ripattentué untu' wija-wijanna Harun, iyaré'ga risining padangngé ri seddéna kota-kotaéro, rijello'i sining petugas-é untu' bagé-bagéi bahang inanré lao ri sininna tau worowané ri laleng kaluwarga imangngé, sibawa lao ri tungke tau iya ridaftar-é ri laleng suku Léwi. Ri sininna Yéhuda, napajoppai Arung Hizkia adélékengngé, alemmpurengngé sibawa pésennangiwi atinna Puwang Allataala. Lolongengngi wassélé, nasaba sininna iya naébbué untu' Bolana Puwangnge iyaré'ga untu' turusiwi hukkung-hukkunna Puwangnge, napajoppai sibawa sukku atinna enrengngé pappoji lao ri Puwang Allataalana. Puranana napogau' Arung Hizkia gau'-gau' iya mappaitangngéngngi atinulurenna lao ri Puwangnge, Sanhérib arung Asyur gasai Yéhuda. Nakeppungngi kota-kota mabbénténgngé sibawa paréntangngi pasukanna kuwammengngi nasittaiwi. Wettunna naisseng Hizkia makkedaé manniya'i Sanhérib gasai Yérusalém, Nainappa napakkasse arungngé attahangenna kotaé sibawa pédécéngiwi témbo'na, patettongngi manara-manara ri yasé'na sibawa patettong témbo' laing ri saliweng. Ri lainnaéro napédécéngiwi bénténg iya ripatettongngé ri yasé'na goppo tanaé ri seddé alauna kota Yérusalém cowaé. Massuro towi mébbu maéga senna bessi sibawa kaliyawo. Makkai parawira-parawira untu' kapalaiwi sininna tau worowané ri laleng kotaé, nanasuroi mennang maddeppungeng ri lapangang seddé yolona pintu gerbanna kotaé. Nainappa makkeda lao ri mennang, “Sabbara'no sibawa mateppe'no; aja' mumétau lao ri arung Asyur iyaré'ga lao ri pasukanna. Awatangeta lebbi battowai naiya aléna. Mappunnaiwi awatangeng tolino, iyakiya idi mappunnaiki Puwang Allataala untu' mabbantu sibawa mammusurekki.” Naéngkalingana ada-adanna arunna mennanro, baranini ra'ya'é. Siyagangngaré wettu ri munrinna wettunna Sanhérib silaong pasukanna ri Lakhis mupi, kirinni suro lao ri Hizkia sibawa ra'ya' Yéhuda ri Yérusalém untu' palettu'i pasengngéwé, “Iyya Sanhérib arung Asyur, macinna makkutana aga saba'na mubarani makkuwa untu' tette monro ri Yérusalém iya mattengngangngé rikeppunro. Makkedaiga Hizkia makkedaé Puwang Allataalamu leppessakko matu polé ri akuwasatta? Aja' mumateppe, saba nabelléko bawang. Naleppessakko bawang maté alupureng sibawa adekkang. Aléna ritu mancuru'i sining onrong assompangngé sibawa mézba-mézba untu' Puwangnge, nainappa nasuro tau Yéhudaé sibawa Yérusaléngngé massompa enrengngé mattunu dupa riséddié mézba bawang. Dé'ga muwissengngi aga iya puraé upogau' sibawa toriyoloku lao ri bangsa-bangsa laingngé? Dé'pa naengka déwata-déwatana bangsa laingngé paleppe'i bangsana polé ri akuwasanna arung Asyur! Niga polé ri mennang pura pogau'i gau'éro? Dé' namakkullé déwatamu mulléi passalama'ko! Aja' muleppessangngi iyaro arummu belléko sibawa paddonggo-donggoko! Aja' mumateppe ri aléna! Saba' dé' naengka muwi déwatana bangsa niga mulléi malleppessangngi bangsana polé ri akuwasanna bangsa Asyur. Pastini iyaro déwatamu dé'to naulléi matu paleppe'ko!” Maéga mupa ada-ada laing iya napowadaé iyaro sining surona Asyur untu' cellai Puwang Allataala sibawa Hizkia, atanna Puwang -ngéro. Moki towi sure' arung Asyur iya méwaéngngi Puwangnge, Allataala iya nasompaé tau Israélié. Mappakkuwaié oninna iyaro sure'é, “Déwata-déwatana bangsa laingngé dé' naulléi paleppe'i bangsana polé ri akuwasakku, makkuwatoro déwatana Hizkia dé' naulléi paleppe'i bangsana polé ri akuwasakku.” Iyaro sining surona Asyur nagora-gorang manengngi iyaro ri laleng basa Ibrani untu' péttauriwi sibawa lemmaiwi sumange'na sining tau Yérusaléngngé iya engkaé ri yasé'na témbo'na kotaé, kuwammengngi naulléi mennang sittaiwi iyaro kotaé sibawa magampang. Mabbicarai mennang passalenna Allataala iya nasompaé ri Yérusalém pada-pada muto passalenna déwata-déwatana bangsa laingngé, iyanaritu dato'-dato' ébbu tolino. Nassempajanna Arung Hizkia sibawa Nabi Yésaya ana' Amos. Mangobbii mennang méllau pattulung lao ri Allataala. Nanakirinna Puwangnge séddi malaéka' iya mpunoéngngi iyaro sining prajuri'na sibawa sining parawirana Asyur. Namasiri senna'na nalisu arung Asyur ri wanuwanna. Riséuwaé esso wettunna mattengngang ri laleng bola déwatana, siyagangngaré polé ri ana'-ana'na muto polé mpunoi sibawa peddang. Makkuwaniro carana Puwangnge paleppe'i Arung Hizkia sibawa pabbanuwana Yérusalém polé ri akuwasanna Sanhérib arung Asyur, sibawa sining balinna iya laingngé. Puwangnge mpéréngngi mennang atuwong iya amangngé tenriganggu polé ri wanuwa-wanuwa seddéna. Maéga tau lao ri Yérusalém tiwi pakkasuwiyang untu' Puwangnge sibawa hadiya-hadiya untu' Hizkia, angkanna sipongennaro ripakalebbii ri sininna bangsaé. Iyaro wettué malasai Arung Hizkia. Iyaro lasana makkuwamani serona angkanna céddé maté. Massempajanni, na Puwangnge mpéréngngi tanrang makkedaé majjappai matu. Iyakiya nasaba matempoi, dé' namattarima kasi ri ajjappang iya riwéréngngéngngi ri Puwangnge. Rimakkuwannanaro macaini Puwangnge lao ri Yéhuda sibawa Yérusalém. Iyakiya paccappurenna Hizkia sibawa sining tau Yérusaléngngé pakariyawai aléna, na sipongenna tuwo mupi Hizkia iyaro pahukkungengngé dé'pa napajoppai. Mancaji sugi senna'ni Hizkia, sibawa ripakalebbi ri sininna tauwé. Mébbui sining bili' untu' taroi waramparanna iyanaritu: ulaweng, péra', batu-batu paramata, rampa-rampa, kaliyawo sibawa barab-barang mangke laingngé. Mappunnaiwi gudang untu' waramparang wassélé tanana padaénna: gandong, anggoro sibawa minnya zaitun; wakké-wakkéto untu' sining sapinna sibawa bimbala'na iya maéga senna'é. Ri lainnaéro patettong towi maéga kota. Asugireng iya riwéréngngéngngi ri Allataala maona senna. Arung Hizkia ritu téppo'i mata uwaina Gihon, nanapassolo'i uwaina lalo ri sépe'é ri laleng tanaé muttama ri kota Yérusalém. Sininna iya napogau'é Hizkia papoléi wassélé. Na wettunna sining suro polé ri Babél polé untu' makkutanangngi ri aléna passalenna ajjappanna iya makalallaingngé, Puwangnge leppessangngi Hizkia tinda' riyalé, kuwammengngi naulléi mojiwi atinna. Curita laingngé passalenna Arung Hizkia, sibawa passalenna pappojinna lao ri Puwangnge riyokii ri laleng kitta Wahyu polé ri Allataala Lao ri Nabi Yésaya Ana' Amos, sibawa ri laleng kitta Sejarana Arung-ngarunna Yéhuda sibawa Israél. Matéi Hizkia, naritampung ri bagiyang tuppungngé ri tana akkuburukeng arung-ngarungngé. Sininna ra'ya' Yéhuda sibawa Yérusalém mpéréngngi pappakaraja iya battowaé lao ri aléna wettunna maté. Manasyé ana' worowanéna mancaji arung sulléiwi. Seppulo duwa taung umuru'na Manasyé wettunna mancaji arunna Yéhuda namapparéntai ri Yérusalém 55 taung ittana. Madosai lao ri Puwangnge, nasaba naccowériwi abiyasang-abiyasang majana bangsa-bangsa iya napaddésu'é Puwangnge polé ri Kanaan wettunna tau Israélié muttamakiwi wanuwaéro. Onrong-ngonrong assompang barahala iya puraé naancuru Hizkia, ambo'na, napatettongngi paimeng. Patettongngi mézba-mézba untu' massompa lao ri Baal sibawa mébbui dato'-dato' Déwi Asyéra, nenniya sompai sining wéttowingngé. Purai makkeda Puwangnge makkedaé untu' mannennungeng Yérusalém iyanaritu onrong untu' massompa ri Aléna, iyakiya kuwaro ri Bolana Puwangnge, purani Manasyé patettong mézba-mézba untu' déwata-déwataé. Ri iya duwa seddéna Bolana Puwangnge patettongngi mézba-mézba untu' assompang lao risining wéttowingngé. Nakkasuwiyangengngi ana'-ana'na selaku akkarobangeng ritunu ri Lompo Hinom. Napogau' towi paratté-paratté assanrongngé, appalakiyangengngé, paddissengengngé sibawa méllauwi panunju risining roh-é. Madosa senna'i lao ri Puwangnge angkanna napaompo caina Puwangnge. Nataroi dato'-dato' barahalaé ri Bolana Puwangnge, padahal passalenna onrongngéro purai makkeda Allataala lao ri Daud sibawa Salomo ana' worowanéna, “Bola-Ku ri Yérusaléngéwé, iya puraé Upilé polé ri yelle'na iya seppulo duwa daérana suku Israélié, iyanaritu onrong iya puraé Upattentu selaku onrong assompang lao ri Aléku untu' mannennungeng. Rékko naturusiwi umma Israélié sininna parénta-Ku sibawa turusiwi hukkung-hukkung iya nabbéréyangngé Musa atak-Ku lao ri mennang, dé' Uleppessangngi matu mennang ripaddésu polé ri wanuwa iya puraé Uwéréngngi toriyolona.” Manasyé nassabariwi ra'ya' Yéhuda pogau' dosa-dosa iya lebbi majaé polé ri dosa iya napogau'é bangsa-bangsa iya napaddésué Puwangnge polé ri Kanaan wettunna umma'na Puwangnge muttamakiwi wanuwaéro. Puwangnge mamparengngi Manasyé sibawa ra'ya'na, iyakiya dé' namaélo mennang maréngkalinga. Rimakkuwannanaro napapoléi Puwangnge sining pallima tentarana Asyur untu' gasai Yéhuda. Ritikkenni Manasyé sibawa pakkadak-kadang, nainappa ribalenggu naritiwi ri Babél. Ri laleng anrasa-rasannaro napakariyawai aléna lao ri Puwang Allataalana, sibawa massempajang méllauwi pattulun-Na. Natarimani Allataala sempajanna Manasyé nanapalisui ri Yérusalém untu' mapparéntasi. Nasaba kajajiyangngéro mateppe'ni Manasyé makkedaé Puwangnge iyanaritu Allataala. Nainappa napakatanré Manasyé témbo' saliwengngé ri bagiyang alauna Kota Daud. Mappammulai polé ri séddié onrong ri lompo seddéna mata uwai Gihon nainappa matteru limanorang lettu ri Pintu Gerbang Balé sibawa bagiyang kota iya riyasengngé Ofel. Ri tungke kota mabbénténgngé ri Yéhuda, taro towi séddi pallima. Napaddésu'i dato'-dato' déwata bangsa laingngé enrengngé sining barahala iya puraé nataro ri Bolana Puwangnge. Nabongkara'i mézba-mézba barahala iya engkaé ri bulu-bulu Bolana Puwangnge, sibawa risining onrong laingngé ri Yérusalém. Iya manennaro natiwii ri saliweng kota nainappa nabuwang. Nainappa napédécéngi mézba onrong assompangngé ri Puwangnge, nanakkasuwiyangeng kuwaro akkarobangeng pappasidamé sibawa akkarobangeng sukkuru. Nasuro manengngi tau Yéhudaé massompa lao ri Puwang Allataalana Israélié. Ra'ya'é makkasuwiyangeng mupi akkarobangeng risining onrong assompang laingngé, iyakiya iyaro assompangngé iyanaritu untu' Puwangnge. Curita laingngé passalenna Manasyé, sibawa passalenna sempajanna lao ri Allataala, enrengngé sining pasenna Allataala iya ripalettu'é ri aléna naolai nabi-nabié ri laleng asenna Puwangnge, Allataalana Isaraélié, iya manenna purani riyoki ri laleng kitta Sejarana Arung-ngarunna Israélié. Ri laleng kitta Sejarana Nabi-nabié pura toni riyoki sempajanna Manasyé sibawa pappébalinna Allataala lao ri sempajannaro, enrengngé curita passalenna dosa-dosana ri wettu dé'napa natoba', sining onrong assompang barahalaé sibawa dato'-dato'na Déwi Asyéra iya naébbué, nenniya sining barahala iya nasompaé. Matéi Manasyé sibawa ritampung ri saorajaé. Amon ana' worowanéna mancaji arung sulléiwi. Umuru'na Amon wettunna mancaji arunna Yéhuda 22 taung, namapparéntai ri Yérusalém duwattaung ittana. Pada-pada ambo'na madosa towi lao ri Puwangnge. Nasompai sining barahala iya nasompaé ambo'na sibawa makkasuwiyangngi akkarobangeng lao risining barahalaéro. Iyakiya silaingengngi sibawa ambo'na, Amon dé' napakariyawai aléna sibawa dé' nalisu lao ri Puwangnge; mala lebbi madosai naiya ambo'na. Sining pegawénna Arung Amon sikongkolo'i méwai sibawa mpunoi ri saorajaé. Iyakiya ra'ya'na Yéhuda mpunoi sining iya mpunoéngngiro Arung Amon, nainappa makkai Yosia ana'na mancaji arung. Umuru'na Yosia wettunna mancaji arunna Yéhuda 8 taunna, namapparéntai ri Yérusalém 31 taung ittana. Napogau'i iya pésennangiyéngngi atinna Puwangnge; naccowériwi baténa Arung Daud toriyolona, sibawa naturusiwi sininna hukkunna Allataala sibawa sukku. Genne'nana 8 taung mancaji arung, ri umuru iya malolo senna'é, mappammulani Yosia massompa ri Allataala iya nasompaé Arung Daud toriyolona. Patattaung rimunrinna mappammulani mancuru'i sining onrong assompang barahalaé, dato'-dato'na Déwi Asyéra, sibawa sining barahala laingngé. Iyaro dato'-dato'é sibawa sining barhalaé naancuru'i ana' buwana Yosia nainappa nampo mennang barubbuna ri yasé'na kuburu'na sining tau iya makkasuwiyangengngéngngi akkarobangeng laowé risining barahalaéro. Mézba-mézba Baal sibawa mézba-mézba dupa iya engkaé kuwaro naruttungngi mennang. Nainappa natunu Yosia ri yasé'na mézbaéro buku-bukunna sining imang iya tumaningiyéngngi iyaro sining barahalaé. Nanallalengiwiro naébbui Yéhuda sibawa Yérusalém sitinajai massompa lao ri Puwangnge. Gau' iya padaé napogau' towi ri kota-kotaé sibawa ri daéra-daéra iya ancuru'énna ri daéra Manasyé, Efraim sibawa Siméon, lettu ri Naftali ri manorang. Naruttungngi Yosia mézba-mézbaé sibawa dato'-dato' Asyéra ri sininna Akkarungeng Manorang, nanaancuru'i dato'-dato'é sibawa sininna mézba dupaé. Nainappa lisu Yosia ri Yérusalém. Ri taung maseppuloé aruwa apparéntanna Yosia, puranana napépaccingi assompang barahalaé polé ri Bolana Puwangnge sibawa sininna wanuwaé, kirinni 3 tau untu' pédécéngiwi Bolana Puwang Allataala. Iya tellu tauwéro iyanaritu Safan ana' Azalya, Maaséya gubernurna Yérusalém, sibawa Yoah ana' Yoahas, séddiwi pegawé tanré. Sining tau Léwi iya monrowangngéngngi Sumpang Bolana Puwangnge, mabbéréni lao ri Imang Lompoé Hilkia, dowi iya puraé napaddeppungeng mennang. Iyaro dowié poléi ri tau Efraingngé sibawa Manasyé, sibawa polé ri ra'ya' laingngé ri Akkarungeng Manorang, enrengngé polé ri ra'ya' Yéhuda, Bényamin sibawa Yérusalém. Nainappa iyaro dowié nabbéréyang Imang Lompo Hilkia lao ri iya tellu tau iya nasuroé jagaiwi appédécéngenna Bolana Puwang -ngéro. Na mennang mabbéréyangngi iyaro dowié lao risining panré ajué sibawa panré bolaé iya harusu'é melli batu sibawa aju untu' pédécéngiwi sining bola iya puraé naleppessang masolang sining arung Yéhudaé. Sining tau iya pogau'éngngi iyaro appédécéngengngé tonget-tongengngi malempu. Rikapalaiwi mennang ri 4 tau Léwi: Yahat sibawa Obaja polé ri appanna Mérari, enrengngé Zakharia sibawa Mésulam polé ri appanna Kéhat. Sining tau Léwi iya macca manengngé macculé kacapi, riwéréngngi jamang jagaiwi arakkareng bahab-bahangngé, kapalaiwi pajjamaé ri maddupa-rupang jamang, jamai administrasié sibawa monrowangngi tange'é. Wettunna ripassu iyaro dowi sumbangengngé polé ri onrong attaronna, naruntu'ni Hilkia kitta Hukkunna Puwangnge iyanaritu hukkung-hukkung iya nabbéréyangngé Allataala lao ri Musa. Makkedani Hilkia lao ri Safan, “Uruntu'i kitta Hukkunna Puwangnge ri Bolana Puwangnge,” nainappa nabbéréyang iyaro kitta'é lao ri Safan. Natarimani Safan iyaro kitta'é, nainappa lao ri arungngé sibawa makkeda, “Sininna iya napparéntangngé Datu purani ripogau'. Purani riyala dowi iya ritaroé ri Bolana Puwangnge sibawa mabbéréyangngi lao risining pajjamaé sibawa sining jennanna.” Nainappa natambai, “Nawérékka Hilkia iyaé kitta'é.” Nainappa nabacangeng Safan arungngé iyaro kitta'é. Naéngkalingana lise'na kitta'éro, nasapé-sapé'ni pakéyanna arungngé nasaba messéi. Nainappa nabbéréyang arungngé iyaé paréntaé lao ri Hilkia, Ahikam ana' Safan, Abdon ana' Mikha, Safan jurutulisi'na wanuwaé, sibawa Asaya ajudanna arungngé, “Laono makkutanangekka ri Puwangnge sibawa untu' sining tau iya engkaé mupa ri Israél sibawa Yéhuda passalenna lise'na kitta'éwé. Macayii Puwangnge lao ri idi nasaba dé' napajoppai toriyolota sining parénta iya tarokié ri lalenna.” Nalaona Hilkia, Ahikam, Abdon, Safan sibawa Asaya méllau panunju riséddié tau makkunrai riyaseng Hulda. Séddiwi nabi iya monroé ri akkampongeng barué ri Yérusalém. Lakkainna riyasengngi Salum ana' Tikwa, eppona Harhas. Pangurusu'nai pakéyang assompangngé ri Bolana Puwangnge. Puranana naéngkalinga Hulda pappakatajanna mennang, nasuroni mennang lisu ri arungngé sibawa palettu'i iyaé pasengngé, “Makkedai Puwangnge, Allataala iya nasompaé tau Israélié, ‘Maélo-Ka hukkungngi Yérusalém sibawa sininna pabbanuwana sibawa tanro iya tarokié ri laleng kittaéro iya ribacangengngéngngi arungngé. Nasalai-Ka mennang sibawa makkasuwiyangeng akkarobangeng lao ri déwata-déwata laingngé. Sininna iya napogau'é mennang napaénré'i cai-Ku. Macai-Ka lao ri Yérusalém, nadé'na nawedding ripasoro cai-Ku. Iyakiya passalenna Arung Yosia, iyanaé pasek-Ku, Puwang Allataalana Israélié: Purana muwéngkalinga aga iya tarokié ri laleng kitta'éro, massesse kaléko sibawa pakariyawai alému riyolo-Ku. Pura-Ka mangancang untu' hukkungngi Yérusalém sibawa pabbanuwana, iyakiya wettunna muwéngkalinga passalenna angancangek-Kuro teriko sibawa sapé'i pakéyammu tanrang masara. Uwéngkalingani sempajammu, rimakkuwannanaro pahukkungenna Yérusalém dé' Upateppai matu ri wettu tuwomu mupa. Upalaloko maté sibawa damé.’ ” Nalisuna iyaro sining suroé ri arungngé nanapalettu'i iyaro pasengngé. Naobbini Arung Yosia sininna pamimpinna Yéhuda sibawa Yérusalém, Sininna tau Bényamingngé sibawa sininna tau laing iya engkaé ri Yérusalém nasuroni majjanci untu' turusiwi assijancingngéro. Nanaturusini sining taunna Yérusalém peraturang-peraturangngé ri laleng assijancingngéro, iyanaritu assijancinna mennang sibawa Allataalana toriyolona. Sining barahala iya mappakaciddi-ciddi'é, iya engkaé risining onrong iya muttama'é ri daérana tau Israélié, naancuru maneng Arung Yosia. Nainappa naharuskang ra'ya'na massompa lao ri Puwangnge, Allataalana toriyolona. Na ri wettu tuwona mupa Yosia, tette'i ra'ya'é matinulu lao ri Puwangnge. Nanaramé-raméini Yosia Paskaé ri Yérusalém untu' pakalebbii Puwangnge. Bimbala untu' ramé-raméro rigéréi ri tanggala 14 uleng séddi. Yosia bagé-bagéi lao risining imangngé jamang-jamang iya harusu'é mennang napogau' ri Bolana Puwangnge, sibawa mappéddarangngi kuwammengngi napogau'i mennang sibawa makessing. Sining tau Léwi iya puraé ripallaing untu' Puwangnge, sibawa iya mancajiyé guru-gurunna Israélié lolongengngi paréntaéwé polé ri Yosia, “Taroi Petti Assijancinna Puwangnge iya mapaccingngéro ri laleng Bolana Puwang iya napatettongngé Arung Salomo ana' worowanéna Daud. Aja'na mupalétté-létté'i. Tumaningiwi Puwang Allataalamu sibawa bangsa Israélié umma'-Na. Sadiyano ri Bolana Puwangnge situru regu-regummu, situru sibawa abbagéng jamang iya napattettekengngékko Arung Daud sibawa Arung Salomo ana' worowanéna. Atoro'i iyaro regu-regummu makkuwaro angkanna tuli engka polé ri iko iya mullééngngi tulungngi tungke kalompo tau Israélié ri Bolana Puwangnge. Harusu'ko géré bimbala untu' Ramé-ramé Paskaé. Rimakkuwannanaro passadiyai alému kuwammengngi nasitinaja sompai Puwangnge; sibawa passadiya towi sining akkarobangeng iya harusu'é riyakkasuwiyangeng lao ri Puwangnge, kuwammengngi nanallalengiwi sining tau Israél laingngé weddingngi pajoppai aga iya napparéntangngé Puwangnge naolai Musa.” Kuwammengngi nasining tau iya engkaé ri Ramé-ramé Paskaéro weddingngi makkasuwiyangeng akkarobangeng Paska, massumbanni Arung Yosia polé ri olokolo'na muto 30.000 kajunna bimbala, ana' bimbala sibawa bémbé lolo, enrengngé 3.000 kajunna saping lai. Muwi sining pegawénna Yosia mabbéréto sumbangeng untu' sining imangngé, sibawa tau Léwié polé ri sininna ra'ya'é. Sining pegawé iya riwéréngngé tanggung jawa' untu' Bolana Puwangnge, iyanaritu Imang Lompo Hilkia, sibawa Zakharia enrengngé Yéhiél, iya tellunna mabbéréi lao risining imangngé 2.600 kajunna ana' bimbala sibawa bémbé lolo enrengngé 300 kajunna saping lai untu' pakkasuwiyang ri laleng ramé-raméro. Sining pamimpinna tau Léwié, iyanaritu: Konanya, Sémaya sibawa Nétaneel silessurenna, Hasabya, Yéiél sibawa Yozabad, mabbéréi lao ri tau Léwié 5.000 kajunna ana' bimbala sibawa bémbé lolo enrengngé 500 kajunna saping lai untu' pakkasuwiyang ri laleng ramé-raméro. Sadiya manennana untu' Ramé-ramé Paskaé, sining imangngé sibawa regu-regunna tau Léwié pada malani onronna tungke-tungke pada-pada iya napparéntangngé arungngé. Nainappa mennang nagéré olokolo untu' Ramé-ramé Paskaé; tau Léwié lopéi bingkulanna sibawa sining imangngé makkeppikengngi darana iyaro olokolo'é ri yasé'na mézbaé. Tungke kalompo kaluwarga iya engkaé kuwaro lolongeng sikaju polé ri olokolo iya maéloé riyakkasuwiyangeng selaku akkarobangeng ritunu. Nanallalengiwi weddingngi mennang makkasuwiyangeng akkarobangeng situru peraturang iya tarokié ri laleng kitta Hukkunna Musa. Nainappa napanggang sining tau Léwié iyaro akkarobangeng Paskaé ri yasé'na apié, situru sibawa peraturangngé, sibawa séwongngi sining akkarobangeng ripallaingngé ri pamuttué, oringngé sibawa lowaé, nainappa nabagé masitta-sitta jukuna lao risining tauwé. Purairo nappai napassadiya sining tau Léwié untu' bagiyanna mennang sibawa untu' sining imang wija-wijanna Harun. Saba' narapi wenni iyaro sining imangngé mappallaungngi matteru makkasuwiyang olokolo selaku akkarobangeng ritunu, sibawa tunui lunra polé risining akkarobangengngéro. Sining ahli musi' polé ri appanna Asaf ri laleng sukunna Léwi engkai ri laleng onrong jamanna iya pura napattentué Arung Daud untu' mennang. Iyanaé aseng-ngasenna mennang: Asaf, Héman sibawa Yédutun, séddiwi nabi iya majjamaé untu' arungngé. Sining pengawalna pintu-pintu gerbangngé dé' naparellu salaiwi posna mennang, nasaba weddingngi mennang ramé-raméiwi Paskaé ri onrong jamanna nasibawang bantuwanna sining tau Léwi laingngé. Iyaro essoé napogau'i mennang sininna séuwa-séuwaé iya napparéntangngé Arung Yosia untu' Ramé-ramé Paskaé, muttama'ni sining pakkasuwiyang ri mézbaé. Pitungngesso ittana sininna ra'ya' Israélié iya engkaé kuwaro ramé-raméiwi Paskaé sibawa Pésta Roti Dé'é Raginna. Paska pada-padaéro dé'pa naengka nariramé-raméi sipongenna Nabi Samuél. Dé' muwi séddi polé risining arungngé ri yolona pura ramé-raméiwi pada-pada Paska iya naramé-raméiyé ri laleng taung maseppuloé aruwa apparéntanna Yosiaro, aléna arungngé silaong sining imangngé, tau Léwié, tau Yéhudaé sibawa Israélié, enrengngé pabbanuwana Yérusalém. Puranana napogau' maneng Arung Yosia iya manennaro untu' Bolana Puwangnge; Nékho arunna Maséré pimpingngi pasukanna untu' mammusu ri Karkemis seddéna Salo Efrat. Makkuragai Yosia lawa-lawaiwi, iyakiya nakiringngi Nékho iyaé birittaé lao ri Yosia, “Iyaé musué dé' assisumpungemmu, arung Yéhuda! Poléka tenniya untu' méwako sangadinna untu' méwai sining balikku, na Allataala suroka tinda' masitta. Engkai Allataala ri piha'ku, rimakkuwannanaro aja' mulawa-lawaiwi Aléna, naancuru'ko matti.” Iyakiya mattedde'i Yosia untu' méwa, sibawa dé' namaélo turusiwi aga iya napowadaé Allataala naolai Arung Nékho. Nallarikkodona Yosia nanauttamakiwi ammusurengngé ri tanété mariyawana Megido. Ri laleng ammusurengngéro nakennai pana Arung Yosia. Nanaparéntanni ata-atanna kuwammengngi natiwii massu polé ri ammusurengngé nasaba masero lona. Nakkani mennang polé ri karétana nanapalétté'i ri karéta laing iya engkaé kuwaro, nanatiwii ri Yérusalém. Kuwaniro maté sibawa rikuburu ri tampung arung-ngarungngé. Sininna ra'ya' Yéhuda sibawa Yérusalém mabbaratani nasaba amaténna. Karanni Nabi Yérémia séddi élong mpating untu' Arung Yosia. Lettu makkekkuwangngé iyaro élongngé napakéi sining pakkélongngé ri Israél muwi worowané iyaré'ga makkunarai, ri laleng apparéngngerangeng abbaratangngé untu' Yosia. Iyaro élongngé purani riputtama ri laleng addeppungenna sining élong mpatingngé. Curita laingngé passalenna Yosia, passalenna pappojinna lao ri Puwangnge, sibawa atinulurenna lao ri hukkung-hukkunna Puwangnge, rippe'na passalenna sininna riwaya' atuwo-tuwonna polé ri pammulanna lettu ri paccapurenna, pura riyokini ri laleng kitta Sejarana Arung-ngarunna Israélié sibawa Yéhuda. Napiléni sibawa nakkani ra'ya' Yéhuda Yoahas mancaji arung ri Yérusalém sulléiwi Yosia, ambo'na. Umuru'na Yoahas wettunna mancaji arunna Yéhuda 23 taung, mapparéntai ri Yérusalém 3 uleng ittana. Umuru'na Yoyakim wettunna mancaji arunna Yéhuda 25 taung, namapparéntai ri Yérusalém 11 taung ittana. Madosai lao ri Puwang Allataalana. Wettunna Nébukadnézar arung Babél sittaiwi Yéhuda, natikkengngi Yoyakim, nanatiwii tabbalenggu lao ri Babél. Sibagiyang barab-barang mangke'é ri Bolana Puwangnge natiwii Nébukadnézar nanataroi ri laleng saorajana ri Babél. Curita laingngé passalenna Yoyakim, muttama'ni sining pangkaukenna iya majaé sibawa sining jana, pura riyokini ri laleng kitta Sejarana Arung-ngarunna Israélié sibawa Yéhuda. Yoyakhin ana' worowanéna mancaji arung sulléiwi. Umuru'na Yoyakhin wettunna mancaji arunna Yéhuda 18 taung, namapparéntai ri Yérusalém 3 uleng 10 esso ittana. Madosa towi lao ri Puwangnge. Ri assiléléng taungngé, Arung Nébukadnézar tiwii Yoyakhin ri Babél selaku tawangeng, sibawa barab-barang mangke'é ri Bolana Puwangnge natiwi towi. Nainappa Nébukadnézar makkai Zédékia, amauréna Yoyakhin, mancaji arunna Yéhuda sibawa Yérusalém. Umuru'na Zédékia wettunna mancaji arunna Yéhuda 21 taung. Mapparéntai ri Yérusalém 11 taung ittana. Madosa towi lao ri Puwang Allataalana. Dé' namaélo pakariyawai aléna sibawa dé' naturusiwi Nabi Yérémia iya palettu'éngngi paseng polé ri Puwangnge lao ri aléna. Pura ripassai Zédékia ri Arung Nébukadnézar untu' mattanro nasabbing Allataala makkedaé matinului matu lao ri Nébukadnézar. Iyakiya rimunri maronta'i Zédékia lao ri Nébukadnézar. Matedde atiwi Zédékia lao ri Puwangnge, Allataalana Israélié. Dé' namaélo salaiwi dosa-dosana sibawa dé' namaélo lisu ri Puwangnge. Rilainnaéro, Bolana Puwangnge iya puraé napallaing untu' Aléna muto, napanajisi'i sining pamimpinna Yéhuda, sining imangngé sibawa ra'ya'é, nasaba maccowéi massompa barahala sibawa maccowériwi cara atuwo-tuwong iya madosaé polé ri bangsa-bangsaé ri seddéna mennang. Puwang, Allataalana toriyolona, makkolik-kolinni pura nasuro sining suro-Na untu' paréngngerangiwi umma'-Na, nasaba Naéloriwi mennang sibawa Bolana. Iyakiya nacculé-culéiwi mennang iyaro sining surona Allataala, sibawa cawa-cawaiwi nabi-nabin-Na enrengngé dé' nabati-batiwi ada-adan-Na. Paccappurenna makkuwamani caina Puwangnge lao ri mennang angkanna dé'na laleng massu untu' mennang naleppe polé ri pahukkungenna. Puwangnge pakédoi atinna arung Babél kuwammengngi nagasai mennang. Iyaro arungngé naunoi tau Yéhuda maloloé, muttama'ni mennang iya engkaé ri laleng Bolana Puwangnge. Dé' namaséiwi muwi séddi tau, macowa iyaré'ga malolo, worowané sibawa makkunrai, malasa iyaré'ga saléwangeng. Riyabbéréyang manengngi mennang ri Allataala lao ri arung Babél. Pakkakkasa-pakkakkasa Bolana Puwangnge, sibawa barab-baranna iya mangke'é, makkuwatoro waramparanna arungngé sibawa sining pegawénna, iya manenna narampasa'i iyaro arung Babél nainappa natiwi ri Babél. Naruttungngi témbo'na kota Yérusalém, sibawa natunui iyaro kotaé, muttama'ni Bolana Puwangnge sibawa sininna saorajaé silaong barab-barang mangke'é iya engkaé mupa ri laleng sining saorajaéro. Ra'ya' iya nasésaé natiwii ri Babél. Kuwaniro mennang mancaji atanna sibawa ata wija-wijanna narapi wettunna akkarungeng Persia makuwasa. Makkuwaniro kajajiyang aga iya napowadaé Puwangnge naolai Yérémia makkedaé iyaro wanuwaé makabuttui matu 70 taung ittana selaku passulléna taut-taung Saba' iya dé'é nabati-batiwi. Ri taung mammulangngé apparéntanna Korésy, arung Persia, napogau'i Puwangnge aga iya puraé Napowada naolai Nabi Yérémia. Puwangnge pakédoi atinna Korésy untu' passu séddi parénta iya nabacaé ri sininna akkarungenna. Oninna makkuwaiyé: “Iyanaé paréntana Korésy, arung Persia! Puwangnge, Allataala panguwasa ri surugaé pura pancajika arung ri sininna linoé, sibawa suroka untu' patettongengngi bola untu' Aléna ri Yérusalém ri daéra Yéhuda. Jaji iko maneng iya mancajiyé umma'na Allataala harusu'i lisu kuwaro! Tennapodo Puwang Allataalamu linrungiko.” Ri taung mammulangngé apparéntanna Korésy, arung Persia, napogau'ni Puwangnge aga iya puraé Napowada naolai Nabi Yérémia. Puwangnge dorongngi atinna Korésy untu' passu séuwa parénta iya ribacaé ri sininna akkarungenna. Makkuwaiyé oninna: “Iyanaé paréntana Korésy, arung Persia. Puwangnge, Allataala makuwasa ri surugaé pura pancajika arung ri sininna linoé, sibawa suroka untu' patettongengngi bola ri Yérusalém ri daéra Yéhuda. Tennapodo Allataala linrungi manekko iya mancajiyé umma'-Na. Harusu'ko lisu ri Yérusalém sibawa patettongngi paimeng Bolana Puwangnge, Allataalana Israélié, Allataala iya monroé ri Yérusalém. Rékko engka séddi tau polé ri umma'-Naé iya mapparelluwangngé bantuwang untu' mulléi lisu, na bali-balibolana harusu wéréngngi bantuwangngéro. Harusu'i mennang mpéréngngi péra' iyaré'ga ulaweng, bokong untu' ri lalengngé nenniya olokolo pattéké, makkuwatoro sining pakkasuwiyang untu' Bolana Puwangnge ri Yérusalém.” Nainappa sining kapala appang polé ri suku Yéhuda sibawa Bényamin, sining imangngé sibawa sining tau Léwié, sibawa tungke' tau iya ripakédoé atinna ri Allataala, mangujuni untu' lisu ri Yérusalém sibawa patettongngi paimeng Bolana Puwangnge. Sininna balibolana mennang maccowé bantui ri laleng nawérénna barab-barang, padaénna pakkakkasa-pakkakkasa péra' sibawa ulaweng, bokong untu' ri lalengngé, olokolo pattéké, waramparang laingngé sibawa sining pakkasuwiyang untu' Bolana Puwangnge. Napassuni Korésy mangko-mangko'é sibawa sining énungeng iya ripaké riyolo ri laleng Bolana Puwangnge ri Yérusalém. Iyaro barab-barangngé natiwii Arung Nébukadnézar nanataroi ri laleng bola déwata-déwatana. Nabbéréyanni Korésy urusanna barab-barangngéro lao ri Mitrédat, kapalana waramparanna akkarungengngé. Nainappa Mitrédat mabbéréyangngi daftar barab-barangngéro untu' Sésbazar, gubernurna Yéhuda. Jumellana iya maneng 5.400 mangko ulaweng sibawa péra' nenniya barab-barang laing. Iya manennaro natiwii Sésbazar wettunna aléna silaong sining tau ripali laingngé joppa polé ri Babél mattuju ri Yérusalém. Maéga ri yelle'na sining tau ripalié salaiwi daéra Babél nanalisu ri Yérusalém sibawa Yéhuda, tungke'-tungke' lao ri kotana muto. Purani mennang tuwo ri appalirengngé ri Babél sipongenna ritiwi kuwaro ri Arung Nébukadnézar. Pamimping-pamimpinna mennang iyanaritu Zérubabél, Yésua, Néhémia, Séraya, Reelaya, Mordékhai, Bilsan, Mispar, Bigwai, Réhum sibawa Baana. Iyanaé daftarna appang kaluwarga Israélié, sibawa jumellana tau polé ri tungke' appang iya lisué polé ri appalirengngé: Appang kaluwargana sining pajjama-jamaé ri Bolana Puwangnge sibawa sining pattumaninna Salomo iya lisué polé ri appalirengngé jumellana 392 tau. Gubernurna daéra Yéhuda mattéyangngi mennang manréi inanré iya riyakkasuwiyangengngé lao ri Allataala, narapi engka séddi imang iya mullééngngi méllau panunju sibawa paké Urim sibawa Tumim. Wettunna lettu sining tau ripalié ri Bolana Puwangnge ri Yérusalém, siyagangngaré pamimping appang mabbéré pakkasuwiyang cenning ati untu' patettongngi paimeng Bolana Puwangnge. Mabbéréi mennang sumbangeng situru amampungenna tungke'-tungke' na wassélé'na iyanaritu 500 kilo ulaweng, 2.800 kilo péra', sibawa 100 jumba untu' sining imangngé. Sining imangngé, sining tau Léwié sibawa sibagiyang ra'ya'é mattette'ni ri Yérusalém sibawa ri kota-kotaé ri seddéna. Sining pakkélongngé, sining panganrowang gerbanna Bolana Puwangnge sibawa sining pajjama-jamaé ri Bolana Puwangnge enrengngé sining tau Israél lebbinna mattette'ni ri kota-kota onrong naonroiyé toriyolona riyolo. Ri uleng mapitué, mattette'ni sining tau Israélié ri kotana tungke'-tungke'. Ri tanggala séddinna ulengngéro maddeppungenni mennang ri Yérusalém, nainappa Yésua ana' Yozadak enrengngé sellao-sellaona sining imangngé sibawa Zérubabél ana' Séaltiél nenniya sumpulolona, patettongngi paimeng mézbana Allataalana Israélié. Nanallalengiwi weddinni mennang mattunu akkarobangeng ri yasé'na, situru sibawa panunju-panunju iya tarokié ri laleng kitta Hukkunna Musa, atanna Allataala. Namuni métaui mennang ri pabbanuwana wanuwaéro, iyakiya napatettong muwi mézbaéro ri onronna mammulangngé. Nainappa mappammulani mennang makkasuwiyangeng paimeng akkarobangeng ritunu, ri éléé sibawa arawéngngé. Naramé-raméi towi Esso Maraja Kalampang Daud-daungngé, situru sibawa paraturangngé; na tungke' esso makkasuwiyangeng akkarobangeng iya puraé ripattentu untu' essoéro. Ri lainnaéro secara taratoro'i mennang makkasuwiyangeng akkarobangeng ritunu enrengngé akkarobangeng ri Esso Maraja Uleng Baru, sibawa ri sininna esso maraja laing iya ripakangkaé untu' sompai Puwangnge. Makkasuwiyangeng towi mennang pakkasuwiyang cenning ati lao ri Puwangnge. Namuni dé'pa nappammula ripatettong paimeng Bolana Puwangnge, iyakiya ri tanggala séddinna uleng pitu mammulani ra'ya'é mattunu akkarobangeng untu' Puwangnge. Massumbanni dowi ra'ya'é untu' pagajiwi tukang batué sibawa tukang kajué. Kiring towi mennang inanré, énungeng sibawa minnya zaitun lao ri kota-kota Tirus sibawa Sidon untu' risélé sibawa aju camara Libanon polé ri kota-kotaéro. Iyaro ajué ritiwii lao ri Yafo lalo ri tasi'é. Sininnaro najamai ra'ya'é sibawa pappalalona Korésy, arung Persia. Na ri uleng maduwaé, ri laleng taung maduwaé lisunnana tau Israélié ri Yérusalém, mammulani mennang patettongngi paimeng Bolana Puwangnge. Zérubabél, Yésua sibawa sellao-sellaona sibangsaé, sining imangngé, tau Léwié, riponcoki adaé, sininna tau puraé ripali, maccowé majjama. Sining tau Léwi iya makkéumuru'é 20 taung liyasé rijello untu' monrowangngi jama-jamang appatettongenna Bolana Puwang -ngéro. Na Yésua, tau Léwiéro, sibawa ana'-ana'na nenniya silessu-silessurenna kuwaéttopa Kadmiél sibawa ana'-ana'na (appang Hodawya) silaong monrowangngi jama-jamang appatettongenna Bolana Puwang -ngéro. Ribantui mennang ri tau Léwi polé ri appang Hénadad. Wettunna pajjama-jama bangunangngé mappammula pasangngi pandaménna Bolana Puwangnge, sining imangngé mappaké jumba sibawa makkatenning tarompé mala onrong tungke'-tungke'. Sining tau Léwi polé ri appang Asaf tettong toni kuwaro sibawa makkatenning gong baiccu. Napoji-pojini mennang Puwangnge situru sibawa peraturang iya puraé ripattette sipongenna Arung Daud. Napuwélonni ra'ya'é pappoji-pojiyangngé untu' Puwangnge, nanapakkolik-koling towi bagiyang paccappurenna, makkuwaiyé oninna, “Makessingngi iyaro Puwangnge; sibawa mannennungengngi pammaséna lao ri Israélié.” Maccowé maneng ra'ya'é gora sibawa pojiwi Puwangnge, saba' purani ripasang pandaménna Bolana Puwangnge. Maéga ri yelle'na sining imangngé, sining tau Léwié sibawa kapala-kapala appang iya macowaénna iya puraé mitai Bolana Puwangnge riyolo. Wettunna mennang nasabbing ripasang pandaménna Bolana Puwangnge iyaé, terini mennang maladde-ladde. Iyakiya sining tau laing iya hadéré'é kuwaro gora-gora marennu, angkanna dé' nariyullé pasilaingenna gora-gora marennué sibawa terié. Oninna makkuwamani cennona, angkanna riyéngkalinga narapi mabéla. Karéba makkedaé iyaro sining tau puraé ripali mattengngangngi patettongngi Bolana Puwangnge, Allataalana Israélié, naéngkalingani balinna tau Yéhudaé sibawa Bényamingngé. Rimakkuwannanaro naéwani mennang sita Zérubabél sibawa sining kapala appangngé, nainappa nappétangngareng, “Palaloki maccowé patettongngi Bolana Puwang -ngéro, saba' massompa tokki lao ri Allataalana saudara-saudara, pada-pada saudara maneng. Tuli makkasuwiyangekki akkarobangeng lao ri aléna sipongenna Esar-Hadon, arung Asyur tiwiki lao kumaiyé.” Iyakiya mappébaliwi Zérubabél, Yésua sibawa sining kapala appangngéro, “Dé' tapparelluwangngi bantuwammu untu' patettongengngi Bola Puwang Allataalata. Aléta muto maélo patettongngi situru sibawa paréntana Korésy, arung Persia, lao ri idi.” Nainappa pabbanuwa iya maittaénna monro ri wanuwaéro mappammulani palemmai sumange'na tau Yahudié enrengngé péttauriwi mennang kuwammengngi napappésauwi iyaro appatettongengngé. Nasogo'i mennang pajaba-pajaba pamarénta Persia kuwammengngi dé' napajajiwi rancanana tau Yahudiéro. Iyaro gau'é matterui kajajiyang ri wettu apparéntanna Arung Korésy narapi apparéntanna Arung Darius. Ri pammulang apparéntanna Arung Ahaswéros, sining balinna pabbanuwana Yérusalém sibawa Yéhuda mokini sure' dé' nasitujuiwi. Makkuwatoro ri laleng apparéntanna Artahsasta, arung Persia, makkolingngi iyaro kajajiyangngé: Bislam, Mitrédat, Tabeel sibawa sellao-sellaona menang mokii sure' lao ri arungngé. Iyaro sure'é naokii ri laleng basa Aram, sibawa harusu'i rilémba wettunna ribacangeng. makkuwatoro bangsa-bangsa laing iya puraé natiwi Asnapar Iya Marajaé sibawa risuro mattette ri kota Samaria sibawa ri kota-kota laingngé ri laleng propinsinna Efrat Yajang. Makkuwaiyé oninna iyaro sure'é, “Lettu ri yolona Arung Artahsasta, polé risining atanna Datu iya monroé ri Efrat Yajang. Salama. Tennapodo napahangngi Datu, makkedaé sining tau Yahudi iya salaiyénni daéra-daéra laingngé ri laleng akkarungenna Datu, makkekkuwangngé mattette'ni ri Yérusalém sibawa mattengngang patettongngi paimeng kota iya majaé sibawa pojiwiyéngngi maronta'ro. Mammulani mennang patettossi témbo-témbo'na sibawa dé'na namaittana natépu matu iyaro jama-jamangngé. Rékko naulléi patettongngi paimeng iyaro kotaé sibawa témbo-témbo'na purani napatettong, pabbanuwana dé'na namaélona makkamaja sima, naakurangenna matu pallolongenna akkarungengngé. Makkinreng nyawa-nyawaki lao ri Datu na dé' tamacinna mitai Datu riparogi. Rimakkuwannanaro riyappétangngarengngi, kuwammengngi nassurowangngi Datu paréssai sure'-sure' nataroé sining toriyolona Datu. Polé ri lise'na naissengngi matu Datu makkedaé kota Yérusalém mémeng napojiwi maronta sibawa riyolopa nariyolo tuli naparogiwi sining arungngé sibawa panguwasa propinsié. Tuli mawatangngi ripimping pabbanuwana. Iyanaro saba'na napura riyancuru kotaéro. Jaji, mateppe'ki, rékko iyaro kotaé ripatettongngi paimeng sibawa témbo-témbo'na ripatettongngi, dé'na naulléni Datu makuwasaiwi iyaé propinsi Efrat Yajangngé.” Nanakirinni arungngé pappébalinnaé, “Nalettu ri Gubernur Réhum sibawa Simsai jurutulisi'na propinsié, enrengngé sellao-sellaona iya monroé ri Samaria sibawa ri kota-kota laingngé ri propinsi Efrat Yajang. Salama. Sure' iya nakiringngé Saudara-saudara purani rilémba sibawa ribacangekka. Nainappa nasaba paréntaku purani risalidiki, na mémeng pabuttiwi makkedaé riyolopa nariyolo tuli naéwai Yérusalém akuwasana arung-ngarungngé sibawa maéga ri yelle'na pabbanuwana iyanaritu pojiwi maronta sibawa pakkacau. Engka naengka napparénta arung-ngarung iya poré kuwaro sibawa makuwasaiwi sininna propinsi Efrat Yajang enrengngé pajoppai sima sibawa pakkasuwiyang. Rimakkuwannanaro, passuno parénta untu' pappésauwi jama-jamanna sining tauwéro, kuwammengngi aja' naripatettong paimeng iyaro kotaé narapika mabbéré parénta laing. Pajoppai iyaro paréntaku sibawa masitta kuwammengngi aja' natattamba battowa arogingekku!” Purana muwa ribaca iyaro sure'na Artahsasta lao ri Réhum, Simsai sibawa sellao-sellaona, joppani mennang lao ri Yérusalém sibawa passai tau Yahudié pappésauwi jama-jamang appatettongenna paimeng kotaéro. Ripappésauni rijama Bolana Puwangnge sibawa dé' naripatteru narapi taung maduwaé apparéntanna Darius, arung Persia. Iyaro wettué engka duwa tau nabi, iyanaritu Hagai sibawa Zakharia ana' Ido, mappammula mabbicara ri laleng asenna Allataalana Israélié lao ri tau Yahudié iya monroé ri Yéhuda sibawa ri Yérusalém. Naéngkalingana pasenna iya duwa nabiéro, napammulaini masitta Zérubabél ana' Séaltiél sibawa Yésua ana' Yozadak appatettongenna paimeng Bolana Puwangnge ri Yérusalém, ribantu ri iya duwa nabiéro. Iyakiya Tatnai, gubernurna propinsi Efrat Yajang, silaong Syétar-Boznai sibawa sellao-sellaona laoni masitta ri Yérusalém sibawa makkutana risining tau Yahudié, “Niga suroko patettongngi sibawa passukkui iyaé Bola Assompangngé?” Nakkutanang towi asenna sininna tau iya bantuéngngi patettongngi Bolana Puwang -ngéro. Iyakiya Allataala jagaiwi sibawa linrungiwi sining pamimping Yahudiéro, angkanna sining pajaba'na Persia pettuiwi untu' dé' nala tindakang ri wettu dé'napa nakiring sure' lao ri Darius sibawa tarimai pappébalinna. Iyanaé laporang iya nakiringngé mennang lao ri Arungngé, “Lettu natarimai Arung Darius. Tennapodo mapparéntai Datu sibawa saléwangeng! Memmuwaré napahangngi Datu, makkedaé poléni ri propinsi Yéhuda sibawa mitai makkedaé Bolana Puwangnge, Allataala Iya Battowaé, mattengngangngi ripatettong paimeng sibawa batu-batu loppo sibawa témbo-témbo iya rilapiriyé aju. Iyaro jama-jamangngé napogau'i sibawa matutu senna enrengngé joppana sibawa masitta. Nainappa ritanai sining pamimpinna bangsaéro, niga pura mpéréngngi pappalalo mennang untu' patettongngi paimeng Bola Assompangngéro sibawa passukkui. Riyakkutanang towi aseng-ngasenna mennang kuwammengngi nalaporo'i lao ri Datu niga-nigana iya kapalaiyéngngi jama-jamangngéro. Mappébaliwi mennang, ‘Idi'é atannaki Allataala makuwasaiyéngngi sininna alangngé. Ripatettongngi paimeng Bolana Puwangnge iya napatettongngé sibawa napassukkué mappulo-pulo taung labe'é séddi arunna Israélié iya marajaé. Iyakiya nasaba sining toriyolota purai napaompo caina Allataala makuwasaé ri surugaé, nanabbéréyangngi mennang lao ri akuwasanna Nébukadnézar, arung Babél polé ri wija-wijanna Kasdim. Naancuru'i iyaro Bolaé sibawa tiwii bangsata lao ri Babél. Nainappa Korésy mancaji arung Babél na ri taung mammulangngé apparéntanna, passuni parénta untu' patettongngi paimeng Bolana Puwang -ngéro. Mala napalisu towi pakkakkasa-pakkakkasa ulawengngé sibawa péra'é iya napaké ri laleng Bolana Puwangnge sibawa iya nalaé Nébukadnézar polé ri Yérusalém nanaputtama'i ri laleng bola déwataé ri Babél. Iyaro pakkakkasa-pakkakkasa'é nabbéréyangngi Arung Korésy lao ri tau riyasengngé Sésbazar, iya puraé nakka mancaji gubernurna Yéhuda. Risuroni ri arungngé malai iyaro pakkakkasa-pakkakkasa'é nanapalisui ri Bolana Puwangnge ri Yérusalém, enrengngé patettongngi paimeng iyaro Bolaé. Nanalaona Sésbazar ri Yérusalém nanapasangngi pandaménna iyaro Bolana Puwangnge. Mappammulai wettuéro lettu makkekkuwangngé iyaro appatettongengngé joppai matteru, iyakiya dé'pa natépu.’ Rékko napalaloi Datu, riyappétangngarengngi kuwammengngi narisalidiki ri laleng arsip akkarungengngé ri Babél. Nanallalengiwi weddingngi riisseng aga tongeng engka paréntana Arung Korés untu' patettongngi paimeng Bolana Puwangnge ri Yérusaléngngé. Nainappa méllauki karéba passalenna apettunna Datu lao-laona parakaraéro.” Purairo nasaba paréntana Arung Darius, risalidikini ri laleng onrong sure'-sure' akkarungeng iya ritaroé ri Babél. Iyakiya catatanna passalenna gau'éro riruntu'i tenniya ri Babél, sangadinna ri kota Ahméta ri daéra Média. Iyayo catatangngé riyokii riséddié karettasa rilulung sibawa oninna makkuwaiyé, “Ri taung mammulangngé apparéntanna Arung Korésy, passui parénta kuwammengngi naripatettong paimeng Bolana Puwangnge ri Yérusalém selaku onronna tauwé mattiwi pakkasuwiyang sibawa mattunu akkarobangeng. Tanréna iyaro Bolaé harusu'i 27 météré sibawa sakkana 27 météré. Renrinna harusu'i riyébbu pada-padaéwé: ri yasé'na tungke' tellullapi batu harusu'i ripasangi silapi aju. Ongkoso'na natanggungngi matu kasna akkarungengngé. Makkuwatoro pakkakkasa ulaweng sibawa péra' iya ripaké ri Bolana Puwangnge, napurai riyala polé ri Yérusalém ri Arung Nébukadnézar enrengngé ritiwi ri Babél, harusu'i ripalisu ri onronna mammulangngé.” Nainappa nakkiringeng Darius pappébali mangoloéwé: “Nalettu ri Tatnai, gubernurna propinsi Efrat Yajang, sibawa Syétar-Boznai, nenniya sining pajaba'é ri Efrat Yajang. Aja' muganggui sining tau Yahudiéro, sibawa aja' mulawa-lawaiwi appatettongenna Bola Assompanna mennang. Leppessangngi gubernur Yéhuda sibawa sining pamimping Yahudié patettongngi paimeng Bolaéro. Nasibawang iyaé uparéntangngi Saudara-saudara untu' bantui mennang ri laleng jama-jamang appatettongengngéro sibawa caraéwé: Sininna ongkoso appatettongengngé harusu'i riyala polé ri wassélé simana wanuwaé ri propinsi Efrat Yajang sibawa harusu'i riwajarengngi sining tauwéro tenripasoro-soro. Ri lainnaéro agi-agi napparelluwang situru sibawa sining imangngé ri Yérusalém, padaénna saping lai lolo, bimbala lai sibawa ana' bimbala untu' akkarobangeng pakkasuwiyang lao ri Allataala makuwasaé ri surugaé, makkuwatoro gandong, pejjé, anggoro sibawa minnya zaitun, harusu'i riwéréng mennang esso-esso temmallupaiwi. Pogau' manengngi iyaro kuwammengngi naulléi mennang makkasuwiyangeng akkarobangeng iya pésennangiyéngngi Allataala makuwasaé ri surugaé, sibawa kuwammengngi naéllaungekka barakka sibawa sining ana' worowanéku. Uwapparéntangngi kuwammengngi tau iya majjalékkaiyéngngi paréntaéwé ribébbui séddi alliri bolana, naricéru cappa'na, nainappa ritoddokeng watakkaléna tauwéro gangka bettu. Harusu'i ribongkara bolana sibawa ripancaji onrong warowo. Tennapodo Allataala iya puraé piléi Yérusalém selaku onronna risompa, pabbinasai tungke' arung iyaré'ga bangsa iya baranié majjalékkaiwi paréntaéwé sibawa cobai mancuru'i iyaro Bolana Puwangnge ri Yérusalém. Iyya, Darius, pura mabbéréyangngi iyaé paréntaé. Pogau'ni sibawa makessing.” Iyaro paréntana Arung Darius napogau'ni sibawa makessing Tatnai, gubernurna Efrat Yajang, sibawa Syétar-Boznai enrengngé sellao-sellaona mennang. Risokong ri nabi-nabi Hagai sibawa Zakharia, napatteruni sining pamimping Yahudié appatettongenna Bolana Puwang -ngéro. Napattépui masitta appatettongengngéro situru paréntana Allataalana Israélié sibawa paréntana Korésy, Darius sibawa Artahsasta, arung-ngarunna Persiaro. Iyaro Bolana Puwangnge tépuni ri tanggala tellunna uleng Adar ri taung maennengngé apparéntanna Arung Darius. Namasennanna sining tau Israélié, sining imangngé, sining tau Léwié sibawa sininna tau puraé ripali résmikangngi Bolana Puwang -ngéro. Ri kajajiyangngéro makkasuwiyangngi mennang lao ri Puwangnge 100 kajunna saping lai, 200 kajunna bimbala lai sibawa 400 kajunna ana' bimbala. Untu' akkarobangeng paddampengeng dosa, makkasuwiyangngi seppulo duwa kajunna bémbé lai, sikaju tungke' suku Israél. Nainappa untu' attumaninna ri laleng Bolana Puwangnge nasusungngi mennang akkalompokenna sining imangngé enrengngé sining tau Léwié situru peraturang iya tarokié ri laleng kitta'na Musa. Ri tanggala seppulona eppa uleng séddi taung rappina, sining tau iya lisuénna polé ri appalirengngé, naramé-raméini Paskaé. Sininna imangngé sibawa tau Léwié purani napogau' upacara pappépaccing alé angkanna riyangga mapaccing. Nainappa sining tau Léwiéro géréi olokolo untu' akkarobangeng Paskaé untu' sining imangngé, untu' aléna mennang sibawa sininna tau puraé ripali laingngé. Iyaro sining akkarobangengngé nanréi sining tau Israél iya lisuénna polé ri appalirengngé sibawa pabbanuwana wanuwaéro iya salaiyénni atuwo-tuwong madosaé sibawa polé untu' massompa ri Puwangnge, Allataalana Israélié. Pitungngesso ittana mennang mariyo-riyo ramé-raméiwi Pésta Roti Dé'é Raginna. Masennang senna'ni mennang saba' Puwangnge pura mébbui arung Asyur masémpo ati lao ri mennang angkanna nabantu mennang ri laleng jama-jamang patettongngi paimeng Bolana Puwangnge, Allataalana Israélié. Mattaut-taung ri munrinna, wettunna Artahsasta mapparénta selaku arung Persia, engka séddi worowané riyaseng Ezra, polé ri wija-wijanna Imang Lompo Harun. Jori assossorenna polé ri yawa liyasé iyanaritu selaku mangoloéwé: Ezra Séraya Azarya Hilkia Salum Zadok Ahitub Amarya Azarya Mérayot Zérahya Uzi Buki Abisua Pinéhas Eléazar Imang Lompo Harun Napattujuni Ezra sininna perhatiyanna lao ri Hukkunna Puwangnge, untu' pogau'i enrengngé mappagguruwangngi sininna katentuwangngé sibawa peraturangngé lao ri bangsa Israélié. Iyanaé sure'-sure' iya nabbéréyangngé Arung Artahsasta lao ri Ezra, séddiwi imang sibawa ahli Hukkung. “Polé ri Arung Artahsasta lao ri Imang Ezra, ahli Hukkunna Allataala makuwasaé ri surugaé. Uwapparéntangngi makkedaé sininna imangngé, tau Léwié sibawa tau Israél laingngé ri sininna akkarungekku, iya macinnaé lao ri Yérusalém, ripalaloi lao sibawa Saudara. Saba' iyya sibawa iya pitu pappangajaku suroi Saudara lao ri Yérusalém sibawa Yéhuda untu' salidikiwi keadaanna sibawa mitai aga Hukkunna Allataala iya riyappaddettangengngé lao ri Saudara, tonget-tongengngi riturusi. Iyya sibawa sining pappangajaku maélo makkasuwiyangeng ulaweng sibawa péra' lao ri Allataalana Israélié, Allataala iya monroé ri Yérusalém. Tiwii iyaro pakkasuwitta. Tiwi towi sininna ulaweng sibawa péra' iya napaddeppungengngé Saudara ri sininna Babél sibawa sininna sumbangenna bangsa Israélié enrengngé imang-ngimanna untu' Bolana Puwang Allataalana ri Yérusalém. Pakéi iyaro dowié sibawa matutu untu' melli saping lai, bimbala lai, ana' bimbala, gandong sibawa anggoro. Akkasuwiyangeng manengngi iyaro ri yasé'na mézbana Bolana Puwangnge ri Yérusalém. Péra' sibawa ulaweng iya nasésaé mupa weddingngi napaké Saudara untu' apparelluwanna Saudara sibawa sellao-sellaomu, situru sibawa élona Allataalana Saudara. Abbéréyangngi lao ri Allataalaé ri Yérusalém sininna pakkakkasa iya riyabbéréyangngé lao ri Saudara untu' assompangngé ri Bolana Allataala. Na sininna apparelluwang laingngé untu' Bolana Puwangnge, weddingngi naéllau Saudara polé ri kasna akkarungengngé. Lao ri sininna pangurusu kasna akkarungengngé ri propinsi Efrat Yajang uparéntangngi kuwammengngi agi-agi naéllau Imang Ezra, ahli Hukkunna Allataala makuwasaé ri surugaé, riwéréngngi sibawa masitta, narapi singngéga jumellaéwé: péra' narapi 3.400 kilo, gandong narapi 10.000 kilo, anggoro narapi 2.000 litéré, minnya zaitun narapi 2.000 litéré, sibawa pejjé singngéga iya napparelluwangngé. Tinda'no sibawa matutu ri laleng passadiyai sininna séuwa-séuwaé iya naéllauwé Allataala panguwasaé ri surugaé untu' Bolana, kuwammengngi aja' Namacai lao ri iyya iyaré'ga lao risining tau iya mapparéntaé ri munrikku. Dé' naweddikko lélé sima polé risining imangngé, tau Léwié, pakkélongngé, panganrowang pintu gerbangngé, pajjamaé, iyaré'ga nigi-nigi iya engkaé assisumpungenna sibawa Bolana Puwangnge. Saudara Ezra, pakéi pangissengeng iya puraé nabbéréyang Allataala lao ri Saudara, namuwakka sining pamimping sibawa haking-haking untu' paréntai sininna tauwé ri propinsi Efrat Yajang iya tuwoé situru Hukkunna Allataalana Saudara. Sitinajai nappagguruwang Saudara iyaro Hukkungngé lao risininna tau iya dé'éppa naissengngi. Tungke' tau iya dé'é naturusiwi hukkung-hukkunna Allataalana Saudara, iyaré'ga hukkung-hukkunna akkarungengngé, harusu'i rihukkung maté masitta, iyaré'ga ripali, iyaré'ga rirappa waramparanna, iyaré'ga ritarungku.” Nanakkeda Ezra, “Pojiwi Puwang Allataala iya nasompaé néné-nénéta! Purani napakédo atinna arungngé angkanna maéloi jampangiwi Bolana Puwangnge ri Yérusalém. Nasaba pattulunna Allataala napojika arungngé, sining pappangajana sibawa sining pajaba'na iya makuwasaéro; Puwang Allataalaku pura mpérékka sumange, angkakku uwulléi mérai maéga kapala appang Israél untu' lisu ri Yérusalém.” Iyanaé daftarna sining kapala appang iya puraé ripali ri Babél sibawa lisué silaong iyya, Ezra, ri Yérusalém wettunna Artahsasta mapparénta selaku arung: Sininna kalompo'éro maddeppungenni ri wiring salo iya massolo'é lao ri kota Ahawa, nainappaki makkéma kuwaro tellungngesso ittana. Purana uparéssa, annessana engka siyagangngaré imang ri yelle'na mennang, iyakiya dé' muwi séddi polé ri suku Léwié. Nainappa uwobbi aséra tau ri yelle'na sining pamimpingngé, iyanaritu: Eliézer, Ariél, Sémaya, Elnatan, Yarib, Elnatan, Natan, Zakharia, Mésulam sibawato duwa guru, iyanaritu Yoyarib sibawa Elnatan. Nainappa usuro mennang méwai sita Ido, kapalana masaraka'é ri Kasifya, sibawa paréllaung kuwammengngi Ido sibawa sellao-sellaona sining pajjamaé ri Bolana Puwangnge, kiringngi lao ri idi sining tau untu' mattumani ri Bolana Puwangnge. Nasaba akessingeng atinna Allataala, nakirinni lao ri idi Sérébya, séddi tau Léwi iya maccaé polé ri appang Mahli. Nasibawang aléna polé towi ana'-ana'na sibawa silessu-silessurenna, jumellana 18 tau. Hasabya sibawa Yésaya polé ri appang Mérari, sibawa duwappulo tau sumpulolona mennang, rikiring towi lao ri idi. Ri lainnaéro engkato 220 tau pajjama Bolana Puwangnge iya ridaftar-é asenna. Toriyolona mennang riyolopa naripattette ri Arung Daud sibawa sining tomaraja akkarungengngé untu' bantui tau Léwié. Na ri wirinna Salo Ahawaro uwappallebbangenni makkedaé harusu manengngi mappuwasa sibawa pakariyawai aléna ri yolona Allataala. Massempajakki kuwammengngi napimpikki Allataala ri laleng allalengengngéro, nenniya nalinrungiki, ana'-ana'ta sibawa sininna appunnangetta. Maware'ka méllau tentara makkinnyarang ri arungngé untu' linrungiki polé ri balié ri allalengengngé. Saba' purani upowadang, makkedaé Allataalata barakkakiwi tungke' tau iya massompaé ri Aléna sibawa céccéi nenniya hukkungngi tungke' tau iya dé'é namatinulu ri Aléna. Namappuwasani sibawa massempajang ri Allataala méllau allinrungen na Natarimani paréllautta. Ri yelle'na sining imang iya mariyoloé upiléni 12 tau: Sérébya, Hasabya sibawa 10 taupa. Nainappa utimbangeng mennang péra', ulaweng sibawa pakkakkasa-pakkakkasa iya puraé nassumbangeng arungngé, sining pappangajaé nenniya tomarajaé sibawa sininna tau Israélié, untu' ripaké ri laleng Bolana Puwangnge. Iya manennaro uwabbéréyangngi lao ri imangngéro. Makkedadaka lao risining imangngéro, “Ripallaikko untu' Puwangnge, Allataala iya nasompaé néné-nénéta, makkuwatoro sininna pakkakkasa péra' sibawa ulaweng iya riyassumbangengngé lao ri Puwangnge iyanaritu ripallaingngi untu' Puwangnge. Jagaiwi madécéd-décéng iyaro barab-barangngé narapi lettu'ko ri Bolana Puwangnge. Lettu'mu kuwaro, harusu'ko timbangngi barab-barangngéro, sibawa mabbéréyangngi lao risining imang kapalaé sibawa sining pamimpinna tau Léwié, enrengngé sining pamimpinna tau Israélié ri Yérusalém.” Nainappa sining imangngé sibawa tau Léwiéro natarimani péra'é, ulawengngé sibawa pakkakkasa-pakkakkasa'éro untu' ritiwi ri Bolana Puwangnge ri Yérusalém. Ri tanggala seppulona duwa uleng mammulangngé risalaini Salo Ahawa natajoppa lao ri Yérusalém. Ri laleng allalengengngéro nalinrungiki Allataalata polé riseranganna sibawa pangadanganna balié. Wettutta lettu ri Yérusalém, mappésauni tellungngesso ittana. Nainappa ri esso maeppaé laoni ri Bolana Puwangnge, nainappa timbangngi péra'é, ulawengngé sibawa pakkakkasa-pakkakkasa'éro. Purairo riyabbéréyanni lao ri Imang Mérémot ana' Uria sibawa risabbing ri Eléazar ana' Pinéhas sibawa duwa tau Léwi, iyanaritu Yozabad ana' Yésua sibawa Noaja ana' Binui. Sininna barab-barangngéro ribilangngi sibawa ritimbang, nainappa riyoki sibawa sukku. Iyatoro essoé sininna tau iya lisuénna polé ri appalirengngéro, makkasuwiyanni akkarobangeng ritunu lao ri Allataalana Israélié. Makkasuwiyanni mennang 12 kajunna saping lai untu' sininna Israélié, 96 kajunna bimbala lai sibawa 77 kajunna ana' bimbala; ri lainnaéttoro 12 kajunna bémbé untu' akkarobangeng paddampengeng dosa untu' aléna mennang. Sininna olokolo'éro ritunui selaku akkarobangeng untu' Puwangnge. Nainappa sure'-sure' iya riwéréngngéngngi mennang ri arungngé, napalettu'ni ri gubernur-é sibawa pajaba propinsinna Efrat Yajang. Na iyaro pajaba-pajaba'é nawérénni bantuwang ra'ya'é kuwammengngi naulléi mennang tette massompa ri Bolana Puwangnge. Purana napogau' maneng iyaro, laoni siyagangngaré tomariyolona tau Israélié ri iyya. Nappaissengengngi mennang makkedaé ra'ya' Israélié, sibawa sining tau Léwié dé' napallaingngi aléna polé ri bangsa-bangsa iya monroé ri seddénaro, iyanaritu bangsa Amon, Moab, Maséré, Kanaan, Hét, Féris, Yébus sibawa Amori. Mala sining imangngé sibawa muwi sining tau Léwié pogau' towi makkuwaéro. Napogau' manengngi mennang pangkaukeng-pangkaukeng maja iya napogau'é bangsa-bangsaéro. Tau worowané Yahudié kawingngi sibawa makkunrai bangsa laingngé, angkanna umma ripallaing appunnangenna Puwangnge dé'na natulénna. Mala iya kaminang riyoloé pogau'i iyaro iyanaritu sining tomariyoloé sibawa pajaba'na Israélié. Naéngkalingana gau'éro, massesse kalé senna'na angkanna sapé'i pakéyakku sibawa bébbui gemme sibawa janggo'ku, nainappa tudang sibawa ati iya ancuru'é. Matteruka bawang tudang makkuwaro narapi wettu akkasuwiyangeng arawéngngé. Nainappa polé sining tauwé mattulilingika. Métauni mennang méngngerangngi ancamanna Allataalana Israélié lao ri dosana sining tau iya lisuénna polé ri appalirengngéro. Wettunna akkarobangeng arawéngngé mappammula riyakkasuwiyangeng, tettonna polé ri onrokku messéro sibawa nasibawang pakéyang iya sapé'é, suju'ka sibawa tanréyangngi limakku lao ri Puwang Allataalaku. Makkedaka, “Oh Allataalaku, masirika makkai ulukku ri yolo-Mu. Maggopponi dosata ri tompo ulutta angkanna nagéssa langié. Mappammulai toriyolota lettu makkekkuwangngé, idi umma'-Mu madosaki lao ri Iko. Iyanaro saba'na idi, sining arungngé enrengngé sining imatta ricaui risining arung laingngé. Riyunoki, rirampo sibawa ritiwi selaku tawangeng. Purani' ripakatuna temmappettu, pada-pada keadaanna essoéwé. Iyakiya makkekkuwangngé, oh Puwang Allataalata, silalona-Ko masémpo ati lao ri idi. Mupaleppe'i siyagangngaré tau ri yelle'ta polé ri angatangengngé untu' tuwo sibawa saléwangeng ri onrong iya ripallaingngéwé. Muwérékki atuwong mabaru. Wettutta engka mupa ri laleng angatangengngé, dé' Musalaiki. Muwébbuki riyélori ri arung-ngarung Persia sibawa ripalalo tuwo enrengngé patettongngi paimeng Bola-Mu iya goppo ruttungengngénna mani monroro. Muwérékki allinrungeng kuwaé, ri Yéhuda sibawa ri Yérusalém. Iyakiya makkekkuwangngé, oh Puwang Allataala, purana sininna kajajiyangngéro, aga wedding ripowada? Purani riyallupaisi parénta-parénta-Mu, iya muwéréngngékki naolai sininna nabié, ata-atammu. Napaissengiki mennang makkedaé tana iya maéloé riyonroiro dé' namapaccing nasaba sininna pabbanuwana polé ri cappa'na lao ri cappa'na napogau'i macarépaé sibawa majaé. Iyaro nabi-nabié nattéyakki kawing campurang sibawa sining tauwéro, iyaré'ga bantui mennang mancaji madécéng sibawa saléwangeng. Rékko matinuluki, mancajiki matu mawatang sibawa péneddingiwi wassélé tanaéro sibawa mappammanarengngi lao ri wija-wijatta lettu mannennungeng. Madosani sibawa riyajjalékkai hukkum-Mu, sibawa purani' Muhukkung. Iyakiya riissengngi, oh Allataala, makkedaé pahukkungeng iya Muwabbéréyangngéro dé' nasittane iya sipato'é ritarima, mala Mupassalama mupi. Jaji, pékkugi makkulléki mallupaiwi sining parénta-Mu sibawa kawing campurang sibawa sining tau majaéro? Rékko ripogau'i, pastini makkuwamani cai-Mu angkanna muancuru sisekki sibawa dé' muleppessangngi muwi séddi tau tuwo. Puwang, Allataalana Israélié, adélé'-Ko, namuni makkuwaro muleppessakki tuwo. Riyangakuiwi asalatta ri Iko; dé'gaga ha'ta untu' mangolo ri yolomu.” Wettunna Ezra massempajang naterito sibawa mangaku dosa ri yolona Bolana Puwangnge, maéga senna tau Israél polé maddeppungeng, muwi worowané, iyaré'ga makkunrai sibawa ana'-ana'. Nattulilingiwi mennang naterito maladde. Nainappa Sékhanya ana' Yéhiél polé ri appang Elam, makkeda lao ri Ezra, “Madosaki lao ri Puwangnge nasaba purai rikawingi makkunrai bangsa laingngé. Namuni makkuwaro engka mupa amménasang untu' Israélié. Laono mai tamattanro lao ri Allataala, makkedaé maéloki paddésu'i sininna makkunraiéro silaong ana'-ana'na mennang. Maéloki maccowériwi sininna pangajamu nenniya pangajana sining tau laing iya pakalebbiéngngi paréntana Allataala. Maéloki turusiwi Hukkunna Allataala. Iko ritu harusu tinda. Maéloki bantuko sibawa sukku. Tinda'no sibawa tegas gangka cappu.” Nappammulana Ezra tinda. Nasuroni imang-ngimang kapalaé, sining tau Léwié sibawa sining tau Israél laingngé mattanro makkedaé maéloi mennang pogau'i tangngana Sékhanyaro. Puranana mennang mattanro, laoni Ezra polé ri yolona Bolana Puwangnge nanauttama ri onrong naonroiyé Yohanan ana' Elyasib nanabbenni kuwaro. Dé' namaélo manré iyaré'ga ménung nasaba messéi pikkiri'i pangkaukenna sining tau ripaliéro. Nainappa riyappallebbangeng séuwa pappallebbang ri sininna Yérusalém sibawa Yéhuda lao risininna tau iya lisuénna polé ri appalirengngé, kuwammengngi naddeppungeng ri Yérusalém. Nigi-nigi dé' napolé ri laleng tellung-ngessoé, rirappai matu sininna waramparanna sibawa dé'na nariyangga'na anggotana masaraka'é. Iyaro pappallebbangngé natékéngngi sining pamimpinna ra'ya'é. Labe'nana tellung-ngessoé, ri tanggala duwappulo uleng aséra, sininna tau worowané iya monroé ri daéra Yéhuda sibawa Bényamin laoni ri Yérusalém sibawa maddeppungeng ri seddéna Bolana Puwangnge. Iyaro wettué teppai bosié sibawa rajana. Ténré maneng tauwé nasaba keccé'na hawaé sibawa nasaba pentinnato addeppungengngéro. Nainappa Ezra tettong sibawa mabbicara lao ri mennang. Makkedai, “Madosano sibawa tambaiwi asalanna Israélié nasaba mukawingiwi makkunrai bangsa laingngé. Rimakkuwannanaro, angakuini dosamu lao ri Puwangnge, Allataala iya nasompaé néné-nénéta, sibawa pogau'ni aga iya pésennangiyéngngi atin-Na. Abélaiwi tau laing iya monroé ri wanuwatta sibawa paddésu'ni sining bainému polé ri bangsa laingngéro.” Mappébalini sining tauwéro sibawa macenno, “Maéloki maccowériwi pangajamu.” Nakkedapa mennang, “Iyakiya iya engkaé hadéré kuwaé maéga senna na bosié makkuwamani rajana. Dé' tatahang tettong makkuwaé ri saliweng. Nainappani iyaé tenniya parakara iya weddingngé ripappura ri laleng siesso duwangngesso, saba' maéga senna polé ri idi iya pogau'éngngi dosaéro. Palaloni sining pamimpitta monro ri Yérusalém sibawa murusu'i passalengngéro. Nainappa tungke' tau ri kota-kotata, iya mappunnaiyé bainé polé ri bangsa laingngé, harusu'i polé ri wettu iya ripattentué, silaong sining pamimpingngé sibawa sining haking kotana tungke'-tungke'. Nanallalengiwi dé'na namacaina Allataala lao ri idi nasaba parakaraéro.” Dé' muwi séddi tau mappotane lao ri rancanaéro, sangadinna Yonatan ana' Asaél sibawa Yahzéya ana' Tikwa, risokong ri duwa tau Léwi, iyanaritu Mésulam sibawa Sabetai. Sining tau ripali iya lisuénnaro tette'i maélo pajoppai rancanaéro, rimakkuwannanaro mappilé Imang Ezra siyagangngaré tau ri yelle'na kapala-kapala appangngé, nainappa naoki asenna mennang. Ri tanggala séddinna uleng seppulo mappammulani mennang rapa' untu' salidikiwi parakaraéro. Ri laleng tellu uleng rappina naulléni mennang pappurai apparéssangngé lao ri sininna worowané iya puraé kawingiwi makkunrai polé ri bangsa laingngé. Iyanaé daftarna sining tau iya mappunnaiyé bainé polé ri bangsa laingngé: Sining imangngé, ridaftar i sibawa appanna: Appang Yésua sibawa silessu-silessurenna, ana'-ana'na Yozadak: Maaséya, Eliézer, Yarib sibawa Gedalya. Majjanciwi mennang maélo telle'i bainéna mennang, nainappa makkasuwiyangeng bimbala lai untu' akkarobangeng paddampengeng dosana mennang. Appang Imer: Hanani sibawa Zébaja. Appang Harim: Maaséya, Elia, Sémaya, Yéhiél sibawa Uzia. Appang Pasyhur: Elyoénai, Maaséya, Ismaél, Nétaneel, Yozabad, sibawa Elasa. Sining tau Léwié: Yozabad, Siméi, Kelaya (riyaseng towi Kelita), Petahya, Yuda sibawa Eliézer. Sining pakkélongngé: Elyasib Sining panganrowang pintu gerbanna Bolana Puwangnge Salum, Télem sibawa Uri. Sining tau Israél laingngé: Appang Paros: Ramya, Yézia, Malkia, Miyamin, Eléazar, Malkia sibawa Bénaya. Appang Elam: Matanya, Zakharia, Yéhiél, Abdi, Yérémot sibawa Elia. Appang Zatu: Elyoénai, Elyasib, Matanya, Yérémot, Zabad sibawa Aziza. Appang Bébai: Yohanan, Hananya, Zabai sibawa Atlai. Appang Bani: Mésulam, Malukh, Adaya, Yasub, Séal sibawa Yéramot. Appang Pahat-Moab: Adna, Kelal, Bénaya, Maaséya, Matanya, Bézaleel, Binui sibawa Manasyé. Appang Hasum: Matnai, Matata, Zabad, Elifélét, Yérémai, Manasyé sibawa Siméi. Appang Nébo: Yéiél, Matica, Zabad, Zébina, Yadai, Yoél sibawa Bénaya. Iya manenna tauwéro purani nakawingiwi makkunrai polé ri bangsa laingngé. Nanatelle'ni iyaro sining bainéna nanapaddésu'i silaong ana'-ana'na mennang. Iyanaé laporanna Néhémia ana' Hakhalya passalenna jama-jamanna. Ri laleng uleng Kisléw ri taung maduwappuloé apparéntanna Artahsasta selaku arung ri Persia, iyya, Néhémia, engkaka ri Susan, ibukotana akkarungengngé. Iyaro wettué, silessurekku Hanani, engkai polé ri Yéhuda silaong siyagangngaré tau. Nainappa utanai mennang passalenna keadaangngé ri Yérusalém sibawa sining tau Yahudié iya lisuénna polé ri appalirengngé ri Babél. Nacuritani mennang makkedaé sining tau puraé ripali iya lisuénna ri tana assalennaro, tuwoni makkekkuwangngé manrasa-rasa sibawa ripakatuna ri bangsa-bangsa laingngé iya engkaé ri seddéna. Nainappani, témbo-témbo'na kota Yérusalém ancuru mupi tassiya-siya sibawa pintu-pintu gerbanna dé'pa naripédécéngi sipongenna ritunu ri wettu labe'é. Uwéngkalingana karébaéro, tudanna sibawa teri. Siyagangngaré esso ittana masussa atikku. Matteruka mappuwasa umassempajatto lao ri Allataala, “Oh Puwang Allataala makuwasaé ri surugaé. Idi Allataala Iya Marajaé namangoloki ri idi sibawa penno tau. Tette'ki matinulu sibawa makkatenningngi jancim-Mu lao ri tau iya méloriyék-Ko sibawa turusiyéngngi parénta-Mu. Itaka oh Puwang, sibawa éngkalingai sempajang iya upaénré'é ri yolo-Mu esso sibawa wenni untu' umma Israél, ata-atam-Muro. Uwangakuiwi makkedaé idi, umma Israélié, madosani; iyya sibawa toriyoloku madosa toni. Purani madoraka lao ri Iko sibawa majjalékkaiwi sining parénta-Mu. Dé' tapatoiwi hukkung-hukkung iya puraé Muwérékki naolai Musa, atam-Muro. Oh Puwang, éngngerangngi ada-adam-Mu iya napowadaé Musa nasaba parénta-Mu, makkedaé rékko idi, umma Israélié, dé' namatinulu lao ri Iko, maélo-Ko passara-sarakki ri yelle'na bangsa-bangsa laingngé. Iyakiya rékko lisuki paimeng ri Iko sibawa turusiwi sining parénta-Mu, idi iya tassiya-siyaénnaro Mupaddeppungekki matu paimeng, namuni engkaki ri cappa-cappa linoé. Nainappa Mupalisuki matu ri onrong iya puraé Mupilé untu' mancaji onrong massompa lao ri Iko. Puwang, idi'é ata-atam-Mu, umma ri alé-Mu iya puraé Mupassalama sibawa akuwasang nenniya awatangem-Mu iya maseroé. Engkalingai sempajakku sibawa sempajanna sininna atam-Mu iya laingngé, iya maéloé pakalebbi-Ko. Abbéréyanni pattulum-Mu kuwammengngi na ri essoéwé iyaé atam-Mu naulléi lolongeng paressé babuwa polé ri arungngé.” Iyaro wettué pangurusu énungennaka arungngé. Riséuwaé esso, eppa uleng rimunrinna, iyanaritu ri uleng Nisan, wettunna Arung Artahsasta mattengngang manré, patalana anggoro ri yolona sibawa tappa iya masussaé. Dé'pa naengka napaita masussa ri yolona pada-pada essoéro. Rimakkuwannanaro makkutanani, “Magi mupaita makkuwamani saramu padahal dé' mumalasa? Pasti engka séuwa iya dé'é musennangiwi?” Tassélenna, nainappa mappébali, “Tuwoi Datu untu' mannennungeng! Pékkugi atatta temmasara, rékko kota onrong kuburu'na néné-nénéna atatta makkekkuwangngé goppo ruttungeng mani monro sibawa pintu-pintu gerbanna ancuru'ni nanré api.” Nakkutana arungngé, “Jaji, aga muwacinnai?” Ri laleng ati massempajakka lao ri Allataala makuwasaé ri surugaé, nanauwakkeda lao ri arungngé, “Rékko napuwé loi Datué sibawa maéloi tarimai paréllaunna atatta, suroi atatta lao ri tana Yéhuda untu' patettongngi paimeng kota onrong kuburu'na néné-nénéna atatta.” Nainappa arungngé iya mattengngangngé tudang riseppi ri bainéna, natarimani paréllaukku. Makkutanani siyaga ittana maéloka monro kuwaro sibawa uppanna lisu, naupaissengini tanggala iya puraé upattentu. Nainappaka méllau sure' untu' sining gubernur-é ri Propinsi Efrat Yajang, kuwammengngi nalomoiwi joppaku lettu ri Yéhuda. Ri lainnaéro, méllau tokka sure' untu' Asaf, panganrowanna ale akkarungengngé, kuwammengngi napassadiya aju untu' pintu gerbanna bénténgngé ri seddé Bolana Puwangnge, sibawa untu' témbo'na kotaé enrengngé bola iya uwonroiyé matu. Napennoini arungngé sininna paréllaukkuro, nasaba Allataala tulukka. Nasibawang siyagangngaré parawira sibawa tentara makkinnyarang, iya sibawangngékka nasaba paréntana arungngé, joppana lao ri Efrat Yajang. Kuwaniro upalettu sure'na arungngé lao risining gubernur-é. Iyakiya wettunna Sanbalat, tau Bét-Horon, sibawa Tobia, séddiwi pajaba polé ri Amon, naéngkalinga makkedaé poléka untu' apentingenna bangsa Israélié, massessekalé senna'ni mennang. Lettu'ku ri Yérusalém, mappésauna tellungngesso. Ri laleng wettuéro dé' uwappaissengengngi muwi lao ri nigi-nigi makkedaé Allataala mpérékka wéré untu' patettongngi paimeng kota Yérusalém. Pappa bajana moto'na ri wennié nainappa mérai siyagangngaré sellaoku massu joppa-joppa ri saliweng kota. Ri lainnaé kaleddé iya utonangiyé, dé' tatiwi olokolo tonangeng laingngé. Makalemmeng mupi wettunna risalai kotaé lalo ri Pintu Gerbang Lompo'é ri seddé yajang. Mattujuki ri seddé yattang, ri Pintu Gerbang Warowoé, lalo ri Mata Uwai Naga. Ri laleng allalengengngéro uparéssai sining asolangenna témbo'na kotaé sibawa uwita towi pintu-pintu gerbang iya cappuénna nanré api. Nainappa polé ri alauna kotaé matteruki limanorang, ri Pintu Gerbang Uwai Jompié sibawa Kullang Arungngé. Iyakiya kuwaro dé'égaga laleng untu' kaleddé iya utonangiyéro, nasaba maéga senna ruttungeng. Jaji, nonnoni ri Lompo Kidron sibawa patterui joppaé ri wenniéro, nariparéssato témbo kotaé. Purairo bélo'ni talisu ri kotaé molai Pintu Gerbang Lompo'é. Dé' muwi séddi polé ri tomariyolona ra'ya'é missengngi kégika lao, sibawa aga iya urancanaé. Saba' lettu wettuéro dé'pa aga-aga upowada lao risining tau sibangsaku, muwi lao risining imangngé iyaré'ga lao risining tomariyoloé, iyaré'ga lao risining pegawé, sibawa nigi-nigi iya maéloé maccowé patettongngi kota Yérusalém. Iyakiya rimunri makkedaka lao ri mennang, “Itani keadaatta iya manrasa-rasaéwé! Sésa-sésana mani Yérusalém monro sibawa pintu-pintu gerbanna cappuni nanré api. Laono mai tapatettongngi paimeng témbo-témbo kotana Yérusalém kuwammengngi dé'na naripakatunaki paimeng.” Ucuritangenni mennang pékkugi Allataala tulukka sibawa aga iya puraé napowada arungngé lao ri iyya. Mappébalini mennang, “Laono mai tapammulaiwi mappatettong!” Nasadiya-sadiyana mennang untu' mappammula majjama. Wettunna iyaro rancanata naisseng Sanbalat, Tobia sibawa Gésyem, séddiwi tau Arab, nacawa-cawaini sibawa méllé-kéllé'ki. Makkedai mennang, “Aga maélo mupogau'? Maélokoga maronta lao ri arungngé?” Umappébali, “Allataala makuwasaé ri surugaé mébbui matu jama-jamatta jaji. Idi'é ata-atannaki sibawa maéloki pammulaini mappatettong. Iyakiya iko dé' muwappunnai ha' iyaré'ga muwi appunnangeng aga ri Yérusalém. Mala rékko mabbicarai tauwé passalenna Yérusalém, dé' nariteppu matu asemmu.” Iyanaé laporanna pékkugi témbo'na kota Yérusalém ripédécéngi. Imang Lompo Elyasib sibawa sellao-sellaona patettongngi paimeng Pintu Gerbang Bimbala'é, pasangngi sining tange'na sibawa pallaingngi untu' Puwangnge. Napédécéngiwi mennang sibawa pallaingngi témbo'é lettu ri Manara Sératu sibawa Manara Hananeel. Wettunna naéngkalinga Sanbalat makkedaé idi tau Yahudié mattengngangngi pédécéngiwi témbo'na kotaé, macai senna'ni sibawa mappammulani méllé-kéllé'ki. Ri yolona sellao-sellaona sibawa tentarana Samaria, makkedani, “Aga mattengngang najama tau Yahudi cilaka iya dé'é naulléi aga-agaro? Aga maéloi mennang patettongngi paimeng kotaéwé? Nasengngi mennang iyaro jama-jamangngé weddingngi tépu ri laleng siessoé, banna makkasuwiyangeng akkarobangeng? Aga goppo warowo iya manguénnaro weddingngi mennang napancaji batu-batu témbo?” Nainappa Tobia iya tettongngé ri seddéna makkeda toni, “Itai témbo iya napatettongngé mennang! Muwi asu ale naulléto ruttungngi!” Naumassempajang, “Oh Allataala, éngkalingai pékkugiki ripakatuna! Pateppai iyaro appakatunangngé ri tompo ulunna muto mennang. Leppessangngi sininna appunnangenna rirampo sibawa aléna paimeng ritiwi selaku tawangeng lao ri wanuwa laingngé. Aja' muwaddampengengngi jana sibawa aja' muwallupaiwi dosana, saba' purani napakatuna mennang iya mattengngangngé mappatettong.” Na iyaro wettué matteruki pédécéngiwi iyaro témbo'é, na dé' namaitta puranaro tépuni sininna témbo'éro ripédécéngi gangka sitengnga tanré, saba' majjamai ra'ya'é sibawa penno sumange. Wettunna Sanbalat, Tobia sibawa sining tau polé ri Amon sibawa Asdod enrengngé sining tau Arab-é méngkalingai makkedaé appédécéngenna témbo Yérusalémro pédé majui sibawa sining sebbo'na témbo'é mammulani rilape', macai senna'ni mennang. Masséddini mennang maélo gasai Yérusalém untu' paompo akacaungeng. Rimakkuwannanaro massempajanni lao ri Allataala sibawa jagaiwi iyaro kotaé esso wenni. Iyakiya tau Yéhudaé mammulani puwélongngi élong darékéwé: “Cappuni awatangetta untu' mattiwi, na maéga senna mupa warowo mallappo. Pappénedditta dé' naulléi mappallaung makkuwaé patettongngi témbo kotaéwé.” Narancanani wettuéro balitta untu' gasai tenrisenna-senna, nainappa naunoki angkanna mappésau jama-jamatta. Iyakiya tau Yahudi iya monroé ri seddéna mennang, makkolik-kolingngi lao ri idi untu' paissengiki rancanana baliéro. Rimakkuwannanaro ubagé-bagéngenni ra'ya'é peddang, bessi sibawa pana, nainappa utaro mennang situru appanna tungke'-tungke' ri munrinna témbo'é, ri onrong-ngonrong iya dé'éppa napura ripédécéngi. Wettunna uwita makkedaé métaui ra'ya'é, makkedana lao ri sibawa lao risining tomariyoloé enrengngé sining pamimpingngé, “Aja' mumétau lao ri balié! Aréngngerakko lao ri Puwang iya mawatangngé namasero, sibawa éwano untu' saudara-saudaramu, ana'-ana'mu, bainému sibawa bolamu!” Naéngkalingani sining balitta makkedaé rancanana mennang riisenni. Namainge'na mennang makkedaé Allataala rusa'i rancanana mennanro. Nainappaki lisu maneng majjama pédécéngiwi iyaro témbo'é. Iyakiya mappammulai essoéro banna sitengnga polé ri ana' buwaku iya mappallaungngé, na iya sitengngaéssi jaga-jagai sibawa mappaké waju musu sibawa massenjata bessi, kaliyawo sibawa pana. Sining pamimping ra'ya'é mpéréngngi sokongang iya sukkué lao ri ra'ya' iya mattengngangngé pédécéngiwi témbo'éro. Sining pangéssang bahang bangunangngé napogau'ni jama-jamangngéro sibawa séddi lima, na lima iya laingngé makkatenning senjata. Sining tukang batué majjamai sibawa peddang tattappi ri benréngngé. Passeppung tarompé tanrang bahayaé, matterui engka ri seddéku. Nainappaka makkeda lao ri ra'ya'é, sining tomariyoloé sibawa sining pamimpingngé, “Iyaé jama-jamangngé mallebbanni lettu mabéla, angkatta tassiya-siya sillampé témbo'éwé, séddié tau mabélai polé ri laingngé. Jaji, rékko méngkalingako oni tarompé, addeppungekko masitta ri mattulilitta kuwaé. Allataalata mammusurekki matu.” Mappakkuwaniro majjamaki mappammulai subu narapi paita wéttowingngé ri langié. Sitengngana ra'ya'é pédécéngiwi témbo'é, na laingngé jaga-jagai sibawa bessi ri limanna. Ri lalenna wettuéro sininna pajjamaé sibawa pabbantunna mennang, usuroi mabbenni ri Yérusalém. Narimakkuwannanaro ri wennié weddikki jagaiwi kotaé na essona patettongngi témbo'na. Aléku paimeng, sellao-sellaoku, ana' buwaku sibawa sining pengawalku tuli mappaké pajjamai, muwi esso iyaré'ga wenni. Matteru-teruki ri laleng keadaang sadiya, sibawa senjata ri limaé. Siyagangngaré wettu ri munrinna maéga tau Yahudi, muwi worowané iyaré'ga makkunrai, mappammulani maddaréké passalenna sining tau sibangsana. Engka makkeda, “Maéga ana'ku. Parelluki gandong untu' tuwo.” Engkato makkeda, “Tarapassaka pasanrai dare'é, palla anggoro'é sibawa bolata untu' melli gandong kuwammengngi aja' tamaté alupureng.” Engkato makkeda, “Purani minreng dowi untu' waja manengngi simata iya napattentué arungngé untu' dare'ta sibawa palla anggoro'ta. Tenniyaki'ga tau Yahudito? Dé'ga ana'ta napada-pada ana'-ana' Yahudi laingngé? Namuni makkuwaro tarapassaki leppessangngi ana'-ana'ta mancaji ata. Mala engka ana' makkunraitta iya puraé ribalu mancaji ata. Dé' pakkullétta nasaba dare sibawa palla anggoro'ta purani ripasanra.” Naéngkalingana addarékénna mennanro, macai senna'na sibawa pettuiwi untu' tinda. Nauwamparenni sining tomariyoloé sibawa pamimping ra'ya'é. Adakku, “Mutenre'i saudara-saudaramu muto!” Nainappa pakangkaka addeppungeng untu' bicarai passalengngéro, sibawa makkeda, “Maggangka ulléki pura paleppe'i saudara-saudarata tau Yahudi iya tarapassaé balu'i aléna lao ri bangsa laingngé. Iyakiya makkekkuwangngé mala iko passai mennang balu'i aléna lao ri iko, padahal iko tau Yahudito!” Iyaro sining pamimpingngé dé' naulléi mappébali muwi silappa ada. Nainappa makkeda paimeng, “Iyaro pangkaukemmu dé' namakessing! Sitongenna harusu'ko tuwo sibawa métau ri Allataala. Nanallalengiwi iyaro balitta dé'é nakképuwang dé' muwéréngngi kasempatang untu' pakatunaki. Iyya paimeng, saudara-saudaraku sibawa sellao-sellaoku pura mappainreng dowi sibawa gandong lao ri ra'ya'é. Dé' tamaélo méllauwi lisu. Sitinaja tokko leddai sining inrenna ra'ya'éro ri iko, muwi iya maddupa dowié iyaré'ga gandong, muwi anggoro iyaré'ga minnya zaitun. Palisuni masitta dare'na, palla anggoro'na, palla zaitunna sibawa bolana mennang!” Nappébali iyaro sining pamimpingngé, “Maéloki turusiwi iyaro pangajaé. Maéloki palisu manengngi sibawa dé' tamaélo tuntu pakkamaja polé ri mennang.” Nauwobbini sining imangngé sibawa suroi sining pamimpingngé onna mattanro ri yolona imang-ngimangngéro, makkedaé aga iya puraé napowadaro, tonget-tongengngi napogau'i matu mennang. Nainappa ulukka pabbekkekku nauleppessangngi umakkedato, “Makkuwaiyé sitinajanna Allataala paleppe'i tungke' tau iya dé'é narupaiwi jancinna. Iyaro tauwé mancaji kasiyasiwi matu, bola sibawa sininna waramparanna riyalai matu ri Allataala!” Nappébali sininna jema'é, “Aming!” nainappa napoji Puwangnge. Narupaini jancinna mennang sining pamimpingngéro. Seppuloka duwa taung ittana mancaji gubernurna Yéhuda, iyanaritu mappammulai taung maduwappuloé lettu ri taung matelluppuloé duwa apparéntanna Arung Artahsasta. Ri lalenna wettuéro iyya sibawa saudara-saudaraku dé' naengka nalai tunjangekku selaku gubernur. Gubernur-gubernur ri yoloku, mancaji répomi lao ri ra'ya'é saba' natuntu'i 40 dowi péra' siesso untu' inanré sibawa anggoro. Mala sining pegawénna tenre towi ra'ya'é. Iyakiya iyya dé' umaélo pogau'i makkuwaéro nasaba métauka lao ri Allataala. Uwabbéréyangngi sininna pakkullékku lao ri appatettongenna témbo'é sibawa dé' ulolongeng tana muwi céddé selaku saro, namuni maccowé maneng sininna pabbantukku majjama ri appatettongengngéro. Sératu limappulo tau Yahudi sibawa sining tomariyolona mennang iya biyasaé upanré ri bolaku, tenribilang sining topolé polé ri bansa-bangsa sideppéta. Esso-esso upassadiya sikaju saping polé ri ongkoso ri aléku, enneng kajunna bimbala iya macommo'é sibawa maéga manu'. Ri lainnaéro, tungke' seppulo esso upassukkui pappassadiyang anggoro'ku. Namuni makkuwaro dé' umaélo tuntu tunjangang jabatang gubernur, nasaba uwisseng makkedaé genne'ni tane'na tiwina ra'yaé. Uwéllauwi oh Allataala, éngngerangngi sininna iya puraé upogau' untu' bangsaéwé sibawa barakkakika. Sanbalat, Tobia, Gésyem sibawa sining balitta iya laingngé naéngkalingani makkedaé purani' pédécéngiwi témbo'é, sibawa sininna sebbo'na purani rilape', namuni iyaro wettué dé'pa tapasangngi tange'na ri pintu-pintu gerbanna kotaé. Nakiring undangang Sanbalat sibawa Gésyem lao ri iyya kuwammengngi upolé méwai sita mennang ri sala séddinna désaé ri Lompo Ono. Iyakiya uwissengngi makkedaé maéloi cilakaika. Rimakkuwannanaro ukiringngi pappébalié lao ri mennang, “Dé' urapii lao nasaba mattengngakka pogau' jamang penting. Iyaro jama-jamangngé dé' natteru matu rékko usalaiwi untu' méwako sita.” Narapi wékkaeppa mennang kiring undangang iya padaé lao ri iyya, na tungke'-tungke'to ubali iya padaé. Ri mabbékkalimanana séddi ana' buwana Sanbalat polé sibawa mabbéré sure' tattimpa iya lise'naé makkuwaé: “Napattongengngi Gésyem engkanna karéba-karéba ri yelle'na bangsa-bangsa ri seddé kuwaé, iya powadaéngngi makkedaé Saudara sibawa sininna tau Yahudié narancanai maronta, na iyanaro saba'na napédécéngiwi Saudara témbo kotaé. Napowada towi makkedaé maéloi Saudara makkai aléna mancaji arunna Yéhuda, napurano jello siyagangngaré nabi untu' lanti'i Saudara ri Yérusalém. Iyaro karéba-karébaé pasti lettu matu ri arungngé. Rimakkuwannanaro, poléno untu' bicarai gau'éro.” Iyakiya ukiringengngi pappébaliéwé, “Sininna iya napowadaé Saudararo dé' natongeng sibawa karéba bellé polé ri Saudara muto.” Nacobani mennang péttauriki kuwammengngi naripappésau jama-jamangngéro. Massempajakka, “Oh Allataala, péwatangika!” Iyatoro wettué, ulao ri bolana Sémaya ana' Délaya sibawa eppona Méhétabeel, nasaba engka halanganna lao ri iyya. Adanna lao ri iyya, “Laono mai tasipadduwa lao massubbu ri Bolana Puwangnge. Tacala'i sininna tange'na, saba' engka tau maélo mpunoko. Naullé iyaé wennié riyunoko matu.” Iyakiya mappébalika, “Iyya'é tenniya tau iya pojiyéngngi lari. Selaku tau biyasa dé' naweddikka muttamakiwi Bolana Puwangnge, matéka matu. Dé', dé' umaélo!” Purana utimbat-timbang gau'éro, mainge'na makkedaé angérangenna Sémayaro tenniya polé ri Allataala, sangadinna polé ri Tobia sibawa Sanbalat. Purani mennang nasogo Sémaya untu' palettu'i iyaro botoé lao ri iyya. Akkattana mennang iyanaritu kuwammengngi umétau nauwaccowériwi tangngana angkanna pogau' dosa. Nanallalengiwi lolongengngi mennang kasempatang péjariwi asekku angkakku mancaji buwa témunna tauwé. Massempajakka, “Oh Allataala, éngngerangngi aga iya napogau'é Tobia sibawa Sanbalatro. Hukkungngi mennang! Makkuwatoro nabi iya riyasengngé Noaja sibawa nabi-nabi laing iya maéloé péttaurika.” Appédécéngenna témbo'éro manréi wettu 52 esso, natépuni ri tanggala duwappulo lima uleng Elul. Wettunna naéngkalinga sining balitta ri yelle'na bangsa-bangsaé ri seddétaro, métauni mennang sibawa masiri, saba' naisseng maneng tauwé makkedaé iyaro jama-jamangngé ripogau'i sibawa pattulunna Allataala. Na wettuéro sining pamimpinna Yahudié sikiring-kiringeng mupi sure' sibawa Tobia. Maéga tau Yahudi massellao sibawa Tobia, nasaba ménéttunnai Sékhanya ana' Arah. Nainappani Yohanan, ana' Tobia, kawingngi sibawa ana' makkunrainna Mésulam ana' Bérékhya. Namuni Tobia matteru-terui moki sure' lao ri iyya untu' péttaurika, iyakiya sining pamimpinna Yahudiéro nateppu-teppui ri yoloku akessingenna Tobia. Ri lainnaéro sininna iya upogau'é, nalaporo'i lao ri aléna. Tépunnana iyaro témbo'é ripatettong, uwassurowanni kuwammengngi naripasang tange'na. Nainappa sining panganrowang pintu gerbangngé, sining pakkélongngé sibawa sining tau Léwié usuroi pogau'i jamanna tungke'-tungke'. Apparéntanna kota Yérusalém uwabbéréyangngi lao ri silessurekku Hanani sibawa lao ri Hananya, pallimana bénténgngé, nasaba lebbiwi naiya tau laingngé, métaui lao ri Allataala sibawa weddingngi riyatepperi. Upowadangngi mennang, “Pintu gerbanna Yérusalém nappai wedding ritimpa rékko matajanni essoé sibawa harusu'i ritongkona nenniya ripasang paccala'na ri wettu dé'napa naleppe jamang arawéng sining panganrowangngé. Ri lainnaéro harusu'i rijello panganrowangngé polé ri yelle'na pabbanuwana Yérusalém, sibagiyang untu' pos-pos anganrowangengngé na sibagiyassi untu' mappataroli ri daéra mattulilinna bolana mennang.” Yérusalém kota iya malowwangngé iyakiya céddé'mi pabbanuwana, sibawa dé'pa namaéga bola ripatettong. Rimakkuwannanaro napakédoi atikku Allataala untu' paddeppungengngi ra'ya'é sibawa sining pamimpingngé enrengngé tomariyolona, kuwammengngi uwulléi bilangngi mennang situru daftar assossorenna mennang. Ri wettuénnaro uruntu'i catatanna passalenna sining tau iya bunge'-bunge' lisué polé ri appalirengngé. Mangoloéwé iyanaritu pappakatajanna iya ulolongengngé polé ri catatangngéro: Maéga ri yelle'na sining tau ripalié salaiwi propinsi Babél nalisu ri Yérusalém sibawa Yéhuda, tungke'-tungke' ri kotana muto. Maittani mennang tuwo ri appalirengngé ri Babél, sipongenna mennang ritiwi kuwaro selaku tawangeng ri Arung Nébukadnézar. Sining pamimpinna mennang iyanaritu Zérubabél, Yésua, Néhémia, Azarya, Raamya, Nahamani, Mordékhai, Bilsan, Mispérét, Bigwai, Néhum sibawa Baana. Sininna wija-wijanna sining pajjamaé ri Bolana Puwangnge sibawa sining pattumaninna Salomo iya lisué polé ri appalirengngé jumellana 392 tau. Nattéyang mennang ri gubernurna daéra Yéhuda manré inanré iya riyakkasuwiyangengngé lao ri Allataala, narapi engka séddi imang iya mullééngngi méllau panunju sibawa paké Urim sibawa Tumim. Sining imangngé, sining tau Léwié, sining panganrowang gerbanna Bolana Puwangnge, sining pakkélongngé, maéga polé ri ra'ya' biyasaé, sining pajjamaé ri Bolana Puwangnge, riponcoki adaé sininna ra'ya' Israélié, mattette'ni ri kota-kotana sibawa désa-désana Yéhuda. Ri uleng mapitué mattette'ni tau Israélié ri kotana tungke'-tungke'. Ri tanggala séddinna ulengngéro maddeppungeng manenni mennang ri Yérusalém, ri seddéna ri yolona Pintu Gerbang Uwaié. Naéllauni mennang kuwammengngi nalai Ezra Kitta Hukkungngé, séddiwi tau acca ri laleng Hukkung iya nabbéréyangngé Puwangnge lao ri Israélié naolai Musa. Nanatiwini Ezra iyaro kitta'é ri yolona jema'é, worowané, makkunrai sibawa ana'-ana' iya balléré'énna untu' mappahang. Nainappa, polé ri élé lettu lakesso, nabacani Ezra iyaro Hukkungngé lao ri mennang. Naéngkalinga manenni mennang sibawa puriyatiwi. Tettonni Ezra ri mimbara ajué iya puraé riyébbu untu' apparelluwanna addéppungengngéro. Ri seddé ataunna tettongngi sining tauwéwé: Matica, Séma, Anaya, Uria, Hilkia sibawa Maaséya; na ri seddé abéyona tettongngi: Pédaya, Misaél, Malkia, Hasum, Hasbadana, Zakharia sibawa Mésulam. Panggung naonroiyé Ezra tettonro lebbi tanré naiya sining tauwéro, angkanna naullé manengngi mennang mitai. Natimpa'na muwa kitta'éro, tettong manenni mennang. Makkedani Ezra, “Pojiwi Puwangnge, Allataala iya battowaé!” Nakkani limanna ra'ya'é matanré-tanré sibawa mappébali, “Aming, aming!” Nainappa mennang suju' sompai Allataala. Purairo tokkonni mennang sibawa tettong ri onronna tungke'-tungke', na siyagangngaré tau Léwi pakatajangngi Hukkungngéro lao ri mennang. Iyaro sining tau Léwié iyanaritu: Yésua, Bani, Sérébya, Yamin, Akub, Sabetai, Hodia, Maaséya, Kélita, Azarya, Yozabad, Hanan sibawa Pélaya. Nalémbani mennang Hukkunna Allataalaro tassibagiyang-tassibagiyang enrengngé pakatajangngi angkanna naulléni pahangngi ra'ya'é iyaro ribacaé. Naéngkalingana abbacangenna Hukkungngéro, messé senna'ni ra'ya'é, nainappa teri. Na gubernur Néhémia sibawa Imang Ezra ahli Hukkungngéro, enrengngé sining tau Léwi iya pakatajangngéngngi Hukkungngéro, powadai lao ri sininna ra'ya'é makkuwaé, “Iyaé essoé, esso ripallaing untu' Puwang Allataalamu, jaji aja' mumasara iyaré'ga teri. Lisuno makkekkuwangngé; anréno sibawa énunno sibawa masennang. Abbéréyangngi sibagiyang polé ri inanrému sibawa anggoro'mu lao ri mennang iya akurangengngé. Iyaé essoé, esso ripallaing untu' Puwatta, jaji aja' mumasussa. Asennangeng nawéréngngékko Puwangnge péwatangiko matu.” Makkuwatoro sining tau Léwié pattennangngi ra'ya'é sibawa makkeda makkolik-koling, “Aja' mumessé ri esso iya ripallaingngéwé.” Nanalisuna sininna ra'ya'é untu' manré sibawa ménung enrengngé bagé-bagéi inanréna lao risining tau laingngé. Masennanni mennang nasaba napahanni bettuwanna ribacaé iya naéngkalingaéro mennang. Pappa bajana maddeppungenni sininna kapala appangngé, sining imangngé sibawa sining tau Léwié, nainappa lao ri Ezra untu' magguruiwi sining pappagguruwang Hukkunna Puwangnge. Nalolongenni mennang makkedaé ri laleng Hukkung iya nabbéréyangngé Puwangnge naolai Musa, Puwangnge suroi umma Israélié monro ri laleng kalampang-kalampangngé wettunna Pésta Kalampang Daud-daungngé. Rimakkuwannanaro ri sininna Yérusalém ri kota-kotaé sibawa ri désa-désaé, nappallebbangengngi paréntaéwé, “Laono ri bulué sibawa mala takké-takké aju camara, zaitun, aju minnya, pattuku sibawa aju-kajung laingngé untu' mébbu kalampang situru sibawa peraturangngé ri laleng Kitta Hukkungngé.” Nanalaona ra'ya'é malai takké-takkéro. Mébbu manenni mennang kalampang-kalampang risining pabbingeng iya malappaé ri tompo bolana mennang, ri seddé bolana, ri seddé yolona Bolana Puwangnge, ri lapangang seddéna Pintu Gerbang Uwai sibawa ri lapangang seddéna Pintu Gerbang Efraim. Sininna ra'ya' iya lisuénna polé ri appalirengngéro naébbuni kalampang-kalampangngéro, nainappa monro kuwaro. Iyanaé bunge' pammulanna ripogau' gau'éro sipongenna Yosua ana' Nun, namasennang manenna sibawa mariyo-riyo. Pitungngesso ittana mennang mappésta. Esso-esso nabaca Ezra bagiyab-bagiyanna kitta Hukkunna Allataala. Ri esso maaruwaé ripakangkani upacara pattutu'na, situru sibawa peraturang Hukkungngé. Kira-kira tellu jang ittana, kitta Hukkunna Puwangnge, Allataalana mennang, ribacangeng mennang sibawa tellu jang rappina mangakuiwi dosa-dosana. Purairo suju'ni mennang sibawa sompai Puwangnge, Allataalana. Kuwaro engka mimbara untu' sining tau Léwié na ri yasé'na tettonni Yésua, Bani, Kadmiél, Sébanya, Buni, Sérébya, Bani sibawa Kénani. Nasibawang sadda macenno massempajanni mennang lao ri Puwang Allataalana. Assompangngé iyaro essoé napammulaiwi sining tau Léwi mangoloéwé: Yésua, Kadmiél, Bani, Hasabnéya, Sérébya, Hodia, Sébanya sibawa Pétahya. Makkedai mennang, “Tettonno sibawa pojini Puwang Allataalata! Wéréngngi pappojiyang Aléna mannennungeng! Ripojiwi asen-Na iya pennoé alebbireng, aseng iya maseroé, napakacauriwi sininna pappojiyangngé!” Nainappa massempajang umma Israélié makkuwaé, “Ikonaritu Puwang, Ikonaritu Iya Posséuwaé; Mupancajiwi wéttowingngé sibawa sininna bitaraé, makkuwatoro tasi'é sibawa linoé enrengngé sininna lise'na, nainappa Muwéréng atuwong sibawa Mupiyarai. Ri Alému sininna akuwasangngé ri langié suju'i massompa; tunru'i mennang ri Iko sibawa manyara. Iko ritu Allataala, Puwang Séuwaé. Mupiléi Abram polé ri tengnga-tengngana bangsana. Nasalaini Ur ri Babél, nasaba Iko muto pimpingngi. Nainappa Muwéréng aseng iya barué: Abraham, iyanaro teppunna mappammulai wettuéro. Ulolongengngi matinulu lao ri Iko sibawa mapato. Nainappa mébbu-Ko assijancing sibawa aléna iya masse'é. Tana Kanaan, Hét sibawa Amori, tana Féris, Yébus sibawa Girgasi, iya manennaro maéloka mpérék-Ko; selaku onrong naonroi sininna wija-wijanna. Nainappa Murupai iyaro jancié lao ri aléna, saba' adélé'-Ko sibawa matinulu. Muwitai anrasa-rasanna toriyolota ri wettu labe'é; Muwéngkalingai terinna ri Maséré sibawa ri Tasi Tébérau. Lao ri arung Maséré Mupogau'i gau'-gau' iya dé'é padanna, makkuwatoro lao ri pegawé nenniya ra'ya' wanuwanna, saba' Muwissengngi pékkugi umma'-Mu ripeddiri ri mennang. Nakalabbani asem-Mu lettu essoéwé. Untu' mébburengngi laleng umma'-Mu, Mupuwé'i tasi'é; Mupalliwengngi mennang lalo ri borina tasi iya dé'é namarica. Sining pallellunna tallemme'i ri laleng uwai iya maliyungngé, pada-pada batu tallemme'é ri laleng tasi makarame'é. Nasibawang séddi ellung Mupimpingngi mennang ri essoé. Na ri wennié Mutajangiwi lalenna sibawa alliri makkéapié. Polé ri langié nonno-Ko ri tompo'na Bulu Sinai, nainappa-Ko mabbicara sibawa umma'-Mu muto. Muwéréngngi hukkung, atoreng sibawa parénta iya adélé'é, tongeng sibawa makkéguna. Esso Saba' iya mapaccingngé harusu'i naramé-raméi mennang, sibawa naolai Musa Muwabbéréyangngi hukkum-Mu. Wettunna mennang malupu sibawa akurangeng inanré, Mupanonnoi roti polé ri langié. Sibawa polé ri batu iya malise'é, masse sibawa matedde Mupassolo'i uwaié marajaé pappaleppe dekkaé. Musuroi mennang tudangiwi tana iya Mujanciyangngéngngi sibawa tanro. Iyakiya toriyolota matempoi sibawa matedde ati; dé' naturusiwi sining parénta-Mu. Dé' namapato mennang, sininna akessingem-Mu nallupaiwi, sibawa sininna pangkaukem-Mu makalallaingngé teddéngngi polé ri paréngngeranna. Nasibawang atempong piléi mennang séddi ketua, untu' tiwii mennang ri Maséré, lisui mancaji ata. Iyakiya Iko Allataala iya pojiyéngngi maddampeng, malampé asabbarakeng, masémpo ati sibawa penno pammasé. Pammasé-Mu dé' padanna; dé' Musalaiwi mennang. Mébbui mennang barahala pada-padaé saping. Nainappa mennang makkeda, ‘Iyanaé Allataalamu, iya tiwiékko polé ri Maséré, polé ri angatangengngé.’ Oh Allataala, Alému muto napakatuna mennang! Namuni ri padang kessi'éro dé' Musalaiwi mennang, nasaba penno-Ko paressé babuwa. Alliri ellungngé sibawa apié dé' Mureddu'i paimeng, panunju lalenna mennang ri essoé sibawa wennié. Nasibawang akuwasam-Mu iya makessingngé Mupaggurui mennang. Manréi mennang manna sibawa ménungngi uwaié situju genne'é. Patappulo taung ittana ri padang kessi'é, Mupaggenne'i sininna apparelluwanna mennang. Pakéyanna mennang dé' naengka namasolang, ajéna mennang dé' namapeddi iyaré'ga naboro. Muwéréngngi mennang apakalang lao ri maéga akkarungeng sibawa bangsa ri pakkaséséng tanana mennang. Hésybon wanuwanna Arung Sihon, natudangiwi mennang; Basan wanuwanna Arung Og, naonroiwi mennang. Mupancajiwi wija-wijanna mennang singngéga wéttowingngé ri bitaraé. Muwéréngngi mennang tana untu' naonroi, tana iya puraé Mujanciyangngi néné-nénéna. Wija-wijanna mennang caui tana Kanaan; pabbanuwana kuwaro Mupatunru'i. Muwéréngngi akuwasang umma'-Mu tinda siélo-élona lao ri bangsa-bangsa Kanaangngé sibawa arung-ngarunna. Nasittaiwi umma'-Mu sining bénténg attahangengngé, tana iya macommo'é sibawa bola pennoé asugireng. Sining bujunna sibawa mata uwaina mennang nasittaiwi, palla anggoro, pong zaitun sibawa buwa-buwa laingngé. Macommo'i mennang nasaba manréi siélo ati. Sininna pabbéré-Mu iya makessingngé napéneddingiwi mennang. Iyakiya maronta'i umma'-Mu sibawa dé' naturusiwi, mallupaiwi hukkungngé sibawa peraturam-Mu, mpunoi nabi-nabi iya paréngngerangiyéngngi mennang, sibawa iya suroéngngi mennang lisu ri Iko, Allataalana. Oh Puwang, tungke' siseng towi napakatuna-Ko mennang, na-Muwabbéréyangngi mennang lao ri balinna iya nasibawangngé apéddarang makuwasaiwi sibawa tenre'i. Iyakiya ri laleng asussang iya patenre'é, mangobbii mennang lao ri Iko méllau bantuwang. Polé ri surugaé Muwéngkalingai; nasibawang pammasé Mubaliwi. Kirik-Ko pamimping sibawa pabbarani iya paleppe'éngngi mennang polé ri balié. Iyakiya wettunna amassi wanuwanna, masitta'i mennang madosa paimeng. Na-Muwabbéréyangngi mennang paimeng lao ri bali iya tenre'éngngi. Iyakiya wettunna mennang mainge sibawa penno sessekalé, mangobbii mennang lao ri Iko méllauwi ripassalama. Na polé ri surugaé Muwéngkalingai, sibawa Mutulungngi makkolik-koling, saba' messé babuwa-Ko lao ri mennang sibawa masero pappoji. Muwamparengngi mennang kuwammengngi napatoiwi pappagguruwam-Mu, iyakiya nasampéyangngi hukkum-Mu sibawa matanré ati. Padahal rékko napogau'i hukkum-Mu, pastini ritanggungngi atuwonna. Kapala batui mennang sibawa matedde ati, dé' namaélo maréngkalinga, dé' namaélo turusiwi. Polé ri taungngé lao ri taungngé sabbara'-Ko paréngngerangiwi; naolai sining nabié, makkedaadai Roh-Mu lao ri mennang. Iyakiya iyaro umma'-Mu nalape'i daucculinna, nainappa Muwabbéréyang lao ri bangsa-bangsaé ri sininna wanuwaé. Iyakiya nasaba battowai pammasé-Mu dé' padanna, dé' Musalaiwi iyaré'ga Muancuru'i mennang. Mémeng, Ikonaritu Allataala iya dé'é bandinganna; battowai pammasé pappojim-Mu, pennoi paressé babuwa! Oh Allataala, Allataalata iya mawatangngé! Allataala iya battowaé namasero! Matinulu-Ko makkatenningngi sininna assijancingngé; janci-jancim-Mu Murupaiwi sibawa Mupogau'i. Sipongenna arung Asyur tenre'ki lettu makkekkuwangngé, maéga anrasa-rasang ripéneddingi. Sining arutta, imangngé, nabié sibawa sining tomariyoloé, makkuwatoro sining toriyoloé sibawa ra'ya'é, pura manenni manrasa-rasa. Aja' Muwallupaiwi sininna anrasa-rasangngéro! Aja' Muwallupaiwi polé ri paréngngeram-Mu! Adélé'i tindakam-Mu, Muhukkukki iya madosaé; tette'-Ko matinulu namuni pennoki akurangeng. Toriyolota, arungngé, imangngé sibawa sining tomariyoloé, majjalékkaiwi hukkum-Mu enrengngé dé' najampangiwi. Sininna parénta sibawa pakkampareng iya Muwabbéréngngé, dé' nabati-batiwi, dé'to naéngkalingai. Mubarakkakiwi sining arung iya paréntaéngngi umma'-Mu, wettunna mennang monro ri tana pabbéré-Mu iya malowangngé namacommo. Iyakiya dé' nasalaiwi mennang atuwong iya majaé, dé' namaélo mattumani sibawa massompa ri Iko. Na makkekkuwangngé mancaji ataki ri tana iya Muwabbéréyangngé selaku mana. Iyaro tanaé macommo, penno wassélé, iya harusu'é ripéneddingi. Sininna wassélé'na tanaéwé harusu'i riwéréng arung-ngarung wanuwaé. Sining panguwasaéro Muwakkai ri yasé'na umma'-Mu, selaku pahukkungenna dosata lao ri iko. Mapparéntai mennang siyélo-élo atinna ri aléta sibawa olokolo appunnangetta. Rimakkuwannanaro manrasa-rasaki makkekkuwangngé. penno acipireng sibawa asussang!” Nasaba sininna kajajiyangngéro, mébbuni idi ra'ya' Israélié assijancing iya masse'é sibawa taroki, sibawa riwéréng cap risining pamimpitta, sining tau Léwié sibawa sining imatta. Tau bunge' tékéngngéngngi iyanaritu Gubernur Néhémia ana' Hakhalya. Nainappa maccinrola Zédékia. Purairo sining tau mangoloéwé tékéng towi: Idi, ra'ya' Israélié, sining imang tau Léwié, sining panganrowang gerbang Bolana Puwangnge, sining pacculé musi'é sibawa sining pajjamaé ri Bolana Puwangnge, makkuwatoro bainéta sibawa ana'-ana'ta iya battowaénna untu' majeppuiwi nenniya sininna tau iya turusiyéngngi hukkunna Allataala sibawa pura pallaingngi aléna polé ri tau laing iya monroé ri wanuwatta. Yaggabungeng manengngi aléta silaong sining pamimpitta sibawa mattanro untu' tuwo situru hukkunna Allataala iya puraé Nabbéréyang naolai Musa, atan-Na. Tennapodo natanroiki Allataala rékko dé' tarupaiwi iyaé assijancingngéwé. Mattanroki maélo mapatoiwi sininna paréntaé, hukkungngé sibawa peraturanna Puwangnge, Allataalata. Mattanroki untu' dé' takawing sicampuru sibawa bangsa-bangsa laing iya monroé ri wanuwatta. Rékko engka bangsa laing maélo mabbalu gandong iyaré'ga muwi barang aga lao ri idi ri esso Saba'é iyaré'ga ri esso mapaccing laingngé, dé' tamaélo melliwi. Ri tungke' taung mapitué, dé' tamaélo jamai dare'é sibawa massinge inreng. Tungke' taung massumbakki matu tungke'-tungke' lima gerang péra' untu' balancana Bolana Puwangnge. Maéloki passadiyangengngi sining apparelluwang assompangngé ri Bolana Puwangnge, iyanaritu: roti ripatala, pakkasuwiyang gandong esso-essoé, olokolo untu' akkarobangeng ritunu esso-essoé, pakkasuwiyang mapaccing laingngé, akkarobangeng-akkarobangeng paddampengeng dosana Israélié, sibawa sininna aga riyapparelluwangngé untu' Bolana Puwangnge. Idi, ra'ya'é, sining imangngé sibawa sining tau Léwié, mundiwi matu tungke' taung untu' pattentui appang niga iya harusu'é passadiya aju tunung untu' sining akkarobangeng pakkasuwiyangngé lao ri Puwang Allataalata, situru peraturang Hukkungngé. Tungke' taung ritiwii matu ri Bolana Puwangnge wassélé gandotta pammulangngé sibawa buwa-buwata iya bunge'-bunge' matasa'é risining ajukajutta. Ritiwii matu ana'-ana' worowanéta iya macowaé lao risining imangngé ri Bolana Puwangnge untu' mabbéréyangngi lao ri Allataala, situru sibawa peraturang Hukkungngé. Mabbéré tokki matu ana' saping, ana' bimbala iyaré'ga ana' bémbé'ta iya bunge' jajiyé. Ritiwii matu lao risining imangngé ri Bolana Puwangnge lama labbu polé ri gandongngé iya bunge' riyéngngalaé tungke' taung, makkuwatoro sining pakkasuwiyang laing maddupa anggoro'é, minnya zaitun sibawa sininna rupanna buwa-buwaé. Pakkasuwiyang tawa seppulo polé ri dare'ta ritiwii matu risining tau Léwi iya lélééngngi sining pakkasuwiyang tawa seppuloé ri kota-kota allaonrumangngé. Iyakiya séddié imang wija Harun harusu'i ranrengngi sining tau Léwiéro rékko naléléi mennang sining pakkasuwiyangngéro. Sibawa tawaseppulona polé risininna pakkasuwiyangngéro harusu'i natiwi sining tau Léwiéro risining bili' bokongngé ri Bolana Puwangnge. Ra'ya' Israélié sibawa sining tau Léwié harusu'i tiwi sumbangeng mattette maddupa gandong, anggoro sibawa minnya zaitun risining bili' bokongngé onronna taroi paréwa-paréwanna Bolana Puwangnge. Kuwatoniro onronna sining imang iya mattengngangngé majjama, sining panganrowang gerbang Bolana Puwangnge sibawa sining pakkélongngé. Dé' tajampaléllériwi matu parakaiwi Bolana Puwat -ta. Sining pamimpingngé mattette'i ri Yérusalém sibawa naundiwi ra'ya'é untu' pilé séddi kaluwarga polé ri tungke' seppulo kaluwarga iya harusu'é monro ri kota mapaccingngé Yérusalém. Iya dé'é natappilé weddingngi monro ri kota-kota laingngé. Ri yelle'na mennang engka iya macenningngé mattette ri Yérusalém sibawa ripojiwi mennang ri ra'ya'é. Ri kota-kota laingngé, ra'ya' Israélié, sining imangngé, sining tau Léwié, sining pajjama-jama Bolana Puwangnge, sibawa wija-wijanna sining pattumaninna Salomo monroi ri tana appunnangenna sibawa ri kota-kotana muto mennang. Yoél ana' Zikhri sibawa wakkélé'na, Yéhuda ana' Hasenua. Iya manenna engka 822 imang iya majjamaé ri Bolana Puwangnge. Adaya ana' Yéroham sibawa eppona Pélalya. Siyagangngaré ri yelle'na néné-nénéna iyanaritu: Amzi, Zakharia, Pasyhur sibawa Malkia. Kapala-kapala kaluwarga ri laleng appangngéro jumellana 242 tau. Amasai ana' Asareel sibawa eppona Ahzai. Néné-nénéna iyanaritu padaénna: Mésilémot sibawa Imer. Polé ri appangngéwé engka 128 tau pabbarani iya poré. Pamimpinna mennang iyanaritu Zabdiél, ana' Gédolim. Sining panganrowang pintu gerbangngé: Akub, Talmon sibawa sellao-sellaona mennang. Jumellana iya maneng 172 tau. Ra'ya' Israél, sining imangngé sibawa sining tau Léwi iya lebbinnaé, monroi ri tanana ri maddupa-rupang kota ri Yéhuda. Sining pajjamaé ri Bolana Puwangnge monroi ri bagiyang kotana Yérusalém iya riyasengngé Ofel, majjamai mennang ri yawa pappimpinna Ziha sibawa Gispa. Panganrowanna sining tau Léwi iya monroé ri Yérusalém iyanaritu Uzi ana' Bani sibawa eppona Hasabya. Néné-nénéna iyanaritu padaénna Matanya sibawa Mikha. Muttama'i appanna Asaf, iya murusu'éngngi musi'é ri assompangngé ri Bolana Puwangnge. Lélénna tungke' appang untu' murusu'i musi'é ri Bolana Puwangnge tungke' esso ripattentui situru peraturanna arungngé. Pétahya ana' Mésezabeel polé ri appang Zéra sibawa suku Yéhuda, mancaji wakkélé'na bangsa Israélié ri saorajana Persia. Siyagangngaré tau polé ri suku Bényamin monroi ri Géba, Mikhmas, Ai, Bétel sibawa désa-désaé ri seddéna, ri Anatot, Nob, Ananya, Hazor, Rama, Gitaim, Hadid, Zéboim, Nébalat, Lod, Ono sibawa ri Lompo Tukat-tukangngé. Siyagangngaré rombongang tau Léwi iya riyolonaé monro ri daéra Yéhuda risuroi monro silaong sining tau Bényamingngé. Iyanaé sining imangngé sibawa sining tau Léwi iya lisué polé ri appalirengngé silaong sibawa Zérubabél ana' Séaltiél silaong Imang Lompo Yésua: Sining tau Léwié: Pamimpinna élong sukkuru'é: Yésua, Binui, Kadmiél, Sérébya, Yéhuda sibawa Matanya. Anggotana pakkélong iya makkélongngé élong pappébali: Bakbuya, Uni sibawa sellao-sellaona siappang. Iyanaé jori wijanna Imang Lompo Yésua: Yésua, Yoyakim, Elyasib, Yoyada, Yonatan, Yadua. Daftarna passalenna kapala-kapala kaluwargana tau Léwié sibawa kaluwarga imangngé purani riyoki ri wettunna sining Imang Lompo mangoloéwé: Elyasib, Yoyada, Yohanan sibawa Yadua. Iyaro catatangngé tépuni wettunna mapparénta Darius selaku arung Persia. Iyakiya passalenna kaluwarga-kaluwarga appang Léwié banna riyokii lettu ri wettunna Yonatan eppona Elyasib. Ri yawa pappimpinna Hasabya, Sérébya, Yésua, Binui sibawa Kadmiél, sining tau Léwié ribagéi ri laleng kalompo-kalompo. Sises-siseng engka duwa kalompo iya majjamaé pojiwi Puwangnge sibawa sukkuru lao ri Aléna secara sibali-bali, situru sibawa peraturanna Arung Daud, atanna Allataalaro. Sining panganrowang pintu gerbang Bolana Puwangnge iya risuroé jagaiwi bili'-bili' bokongngé ri seddéna pintu gerbang Bolana Puwangnge iyanaritu: Matanya, Bakbukya, Obaja, Mésulam, Talmon sibawa Akub. Iyaro mennang tuwoi ri wettunna Yoyakim ana' Yésua sibawa eppona Yozadak sibawa ri wettunna Gubernur Néhémia sibawa Imang Ezra, ahli Hukkungngéro. Wettunna rirésmikang témbo'na kota Yérusalém, riyobbini sininna tau Léwié polé risininna onrong naonroiyé mennang, kuwammengngi naccowé ramé-raméiwi kajajiyangngéro sibawa élok-kélong sukkuru, sibawa nasibawang musi' gambusu sibawa kacapi. Namaddeppungenna sining pakkélongngé polé risining kaluwarga-kaluwarga Léwiéro, muwi polé ri daéra onrong naonroiyé ri seddéna Yérusalém, iyaé'ga polé ri kota-kota ri seddéna Nétofa, polé ri Bét-Gilgal, Géba sibawa Asmawét. Sining imangngé sibawa sining tau Léwiéro pogau'i upacara pappépaccingngé untu' aléna mennang nainappa untu' ra'ya'é, untu' pintu-pintu gerbangngé sibawa témbo kotaé. Uwéllauwi sining pamimping Yéhudaé ménré ri tompo'na témbo'é untu' matoro'i duwa kalompo battowa iya mabbarisi'é matu mattulilingiwi kotaé nanakkélotto pappojiyang sukkuru lao ri Allataala. Kalompo mammulangngé mabbarisi'i ri tompo'na témbo'é, mattuju ri atau, ri Gerbang Warowoé. Joppai Hosaya ri munrinna sining pakkélongngé, naccowéri sibagiyang polé risining pamimpinna tau Yéhudaé. Ri munrinna joppai anggota-anggota polé ri appanna, iyanaritu: Sémaya, Azareel, Milalai, Gilalai, Maai, Nétaneel, Yéhuda sibawa Hanani. Tiwi manengngi mennang paréwa musi', pada-pada sibawa iya nacculéyangngé Arung Daud, atanna Allataalaro. Imang Ezra, ahli Hukkunna Allataalaro, joppai ri ulunna barisi'éro. Lettu'na ri Pintu Gerbang Uwaié Jompié bélo'ni mennang sibawa tuppuiwi addénénna Kota Daud, naolai saorajana Daud, nainappa lisu ri témbo'é ri Pintu Gerbang Uwaié ri seddé alauna kotaé. Kalompo pakkélong iya séddiéssi mabbarisi'i ri tompo'na témbo'é mattuju ri abéyo, na iyya maccowériwi silaong sibagiyang polé ri ra'ya'é. Mabbarisi'ki molai Manara Addellangengngé lettu ri Témbo Masakkaé. Nainappaki molai Pintu Gerbang Efraim, Pintu Gerbang Malaungngé, Pintu Gerbang Balé, Manara Hananeel sibawa Manara Méa lettu ri Pintu Gerbang Bimbala'é. Barisi'ta mappésauwi ri seddéna Pintu Gerbang Anganrowangengngé ri seddéna Bolana Puwangnge. Nanalettu'na iya duwa kalompo pakkélongngéro ri seddéna Bolana Puwangnge. Ri lainnaé sining pamimpingngé ri laleng kalompo'ku, maccowé towi sining imang iya masseppung tarompé'é. Mennang iyanaritu: Elyakim, Maaséya, Minyamin, Mikha, Elyoénai, Zakharia sibawa Hananya; ri munrinna mennang joppai Maaséya, Sémaya, Eléazar, Uzi, Yohanan, Malkia, Elam sibawa Ezer. Sining pakkélongngé makkélongngi ri yawa pappimpinna Yizrahya. Iyaro essoé maéga akkarobangeng riyakkasuwiyangeng lao ri Puwangnge. Mariyo-riyoni ra'ya'é nasaba Allataala pura mébbui mennang masennang. Sining makkunraié sibawa ana'-ana'é maccowé towi mappésta, na saddanna mennang iya marennué riyéngkalingai lettu mabéla. Iyaro wettué siyagangngaré tau risuro jagaiwi bili'-bili' bokong onrong attarong sining sumbangengngé untu' Bolana Puwangnge, muttama'ni pakkasuwiyang tawa seppuloé sibawa wassélé mammulangngé tungke' taung. Iyaro sining pajagaé waji'i paddeppungengngi sining sumbangengngéro polé risining dare'é ri seddéna kotaé. Iyaro sining sumbangengngé nabbéréyangngi lao risining imangngé sibawa sining tau Léwié, situru sibawa peraturang Hukkungngé. Sining tau Yéhudaé pakarajai sining imangngé sibawa sining tau Léwiéro, nasaba mennang ritu pogau'i upacara pappépaccingngé sibawa upacara-upacara laing iya puraé napparéntang Allataala. Sining pacculé musi'é sibawa panganrowang pintu gerbang Bolana Puwangnge napogau' towi jama-jamanna mennang, situru sibawa peraturanna Arung Daud sibawa Salomo, ana' worowanéna. Sipongenna Arung Daud sibawa ahli musi' Asaf, sining pakkélongngé purani napuwélong élok-kélong pappojiyang sukkuru'é untu' Allataala. Ri wettunna Zérubabél sibawa wettunnato Néhémia, sininna ra'ya' Israélié mabbéréi pakkasuwiyang untu' paggenne'i apparelluwang esso-essona sining pakkélongngé sibawa panganrowang gerbang Bolana Puwangnge. Mabbéréi ra'ya'é pakkasuwiyang ripallaing lao risining tau Léwié na sining tau Léwié nawéréng towi sining imangngé bagiyang puraé ripattentu. Wettunna ribacangeng hukkunna Musa lao ri ra'ya'é, rilolongenni pappakatajangngéwé: ‘Tau Amongngé sibawa Moab-é dé' sises-siseng nawedding masséddi sibawa umma'na Allataala; saba' wettunna umma Israélié ri laleng allalengengngé massu polé ri Maséré, iya duwa bangsaéro dé' nabbéré inanré sibawa uwai lao ri bangsaéro. Mala mennang purai naséwa Biléam untu' tanroiwi bangsa Israélié, iyakiya Allataalata pura pinrai iyaro tanroé mancaji barakka.’ Wettunna naéngkalinga bangsa Israélié iyaro, napallainni sininna tau laingngé polé ri masaraka Israélié. Ri yolonaro Imang Elyasib, iya risuroé jagaiwi bili'-bili' bokongngé ri Bolana Puwangnge, mappunnaiwi assisumpungeng makessing sibawa Tobia. Elyasib mpéréngngi Tobia séddi bili' battowa iya sitongennaé ripassadiyai banna untu' taroi pakkasuwiyang gandongngé, kamennyangngé, paréwa-paréwa iya ripaké ri Bolana Puwangnge, pakkasuwiyang untu' sining imangngé, tawa seppulona gandongngé, anggoro'é, sibawa minnya zaitungngé, iya maéloé ribagé-bagé lao risining tau Léwié, sining pacculé musi'é sibawa panganrowang gerbanna Bolana Puwangnge. Wettunna kajajiyang gau'éro, dé'ka gaga ri Yérusalém, saba' ri taung matellupuloé duwa apparéntanna Artahsasta, arung Babél, laoka ri Babél untu' laporo'i ri arungngé. Siyagangngaré wettu ri munrinna nappai ripalaloka untu' lisu ri Yérusalém. Lettu'ku kuwaé, tassélenna missengngi makkedaé Elyasib pura mpéréngngi Tobia séddi bili' ri Bolana Puwangnge. Macai senna'na sibawa maggenrungengngi massu sininna baranna Tobia. Nainappa uwassurowang kuwammengngi naripakangka upacara pappépaccingngé untu' bili'-bili'éro. Purairo upalisuni kuwaro sininna pakkasuwiyang gandongngé sibawa kamennyangngé enrengngé paréwa-paréwanna Bolana Puwangnge. Ri lainnaéro, ulolongengngi makkedaé sining pacculé musi'é sibawa sining tau Léwié nasalaini Yérusalém nalisu risining dare'na tungke'-tungke', nasaba dé' napaggenne'i ra'ya'é apparelluwanna. Nauwamparenni sining tomariyoloé nasaba naleppessangngi mennang Bolana Puwangnge kariya-riya. Nainappa uwobbi lisu sining tau Léwié nausuroi majjama paimeng. Nainappa sininna ra'ya' Israélié mappammula paimeng mabbéré tawa seppulona gandongngé, anggoro'é, sibawa minnya zaitugngé, nanatiwii ri bili'-bili' bokongngé. Usuroi sining tau mangoloéwé untu' jagaiwi bili-bili bokongngéro: Imang Sélémya, Zadok séddiwi ahli Hukkung sibawa Pédaya séddiwi tau Léwi. Hanan ana' Zakur sibawa eppona Matanya usuro bantui mennang. Uwisseng makkedaé iyaro sining tauwé weddingngi riyatepperi sibawa maéloi murusu'i abbagéngeng sining bahangngéro lao ri sellao-sellao siyajjamanna sibawa malempu. Oh Allataalaku, éngngerangngi sininna iya puraé upogau' untu' Bolamué sibawa attumaningenna. Iyaro wettué uwitai makkedaé ri esso Saba'é siyagangngaré tau Yéhuda mappara anggoro. Engkato tau mattéké gandong, anggoro, buwa anggoro, buwa ara sibawa barab-barang laing ri kaleddé'na nanatiwii lao ri Yérusalém. Uwattéyangngi mennang mabbalu ri Yérusalém. Siyagangngaré tau polé ri Tirus iya monroé ri Yérusalém tiwi balé sibawa maddupa-rupang barang dangkangeng lao ri Yérusalém ri esso Saba'é, untu' nabalu lao ri tau Yahudié. Uwamparenni sining pamimpinna Yéhuda sibawa makkedaka, “Dé'ga mumainge makkedaé purano pogau' ja nasaba mucarépaiwi esso Saba'é? Mala nasaba dosa makkuwaé ritu nanahukkungngi Allataala néné-nénéta sibawa mancuru'i kotaéwé. Aga makkekkuwangngé maéloko tambaiwi caina Allataala lao ri Israélié sibawa carépaiwi esso Saba'é?” Rimakkuwannanaro uwapparéntangngi kuwammengngi na ri pammulanna tungke' esso Saba', iyanaritu Jumana wennié, mapettanna muwa masitta'i ritongko pintu-pintu gerbanna kotaé, nadé' nawedding ritimpa ri wettu dé'napa nalabe esso Saba'é, ri esso Sattunna wennié. Utaroi siyagangngaré ana' buwaku ri pintu-pintu gerbangngéro untu' jagaiwi kuwammengngi ri esso Saba'é dé' gaga barang dangkangeng iya ritiwié muttama ri laleng kota. Iyakiya biyasato siyagangngaré padangkang sibawa pabbalu barab-barang mabbenni ri saliweng témbo ri esso Jumana wennié. Makkedaka lao ri mennang, “Percumako mattajeng narapi élé kuwatu. Jagako, rékko mupogau'i iyaro siseppa, maéloka mala tindakang matedde!” Sipongennaro dé'na mennang naengka napoléna ri esso Saba'é. Nainappa usuro sining tau Léwié pogau' upacara pappépaccing alé sibawa monrowangngi pintu-pintu gerbangngé untu' jagaiwi kuwammengngi sining tauwé napakarajai esso Saba'é. Massempajakka, “Oh Allataala, éngngerakka nasaba gau'éttoro, sibawa amaséika situru sibawa pammasé-Mu iya battowaé.” Iyaro wettué uwita towi makkedaé maéga tau Yahudi pura kawing sibawa sining makkunrai polé ri bangsa Asdod, Amon sibawa Moab. Sibagiyang polé ri ana'-ana'na dé' napahangngi basa Yahudié, sangadinna basa Asdod iyaré'ga basa laingngé. Uwamparengngi sibawa utanroi mennang. Engka ubarasa sibawa upute gemme'na. Nainappa usuro mennang mattanro ri laleng asenna Allataala makkedaé mennang sibawa ana'-ana'na dé'na namaélo kawing sicampuru'na. Adakku, “Tenniyaga iyato dosaéwé napogau' Arung Salomo? Dé'gaga arung ri linoéwé iya lebbi battowaé naiya aléna. Riyamaséiwi ri Allataala sibawa pancajiwi arung ri sininna Israélié. Namuni makkuwaro purani ripalécé risining makkunrai bangsa laingngé untu' pogau' dosa. Maja senna pangkaukemmu! Baraniko méwai Allataala ri laleng kawingiwi sining makkunrai polé ri bangsa laingngé!” Yoyada iyanaritu ana'na Imang Lompo Elyasib, iyakiya séddi polé ri ana'na Yoyada mancaji ménéttunna Sanbalat polé ri kota Bét-Horon. Rimakkuwannanaro urukkai Yoyada polé ri Yérusalém. Massempajakka, “Oh Allataalaku, éngngerangngi pékkugi sining tauwéro carépaiwi jabatang imangngé nenniya assijancim-Mu sibawa sining imangngé nenniya sining tau Léwié!” Makkuwaniro upépaccingi bangsa Israélié polé ri sininna séuwa-séuwaé iya laingngé. Upattette'i atoreng-atorengngé untu' sining imangngé sibawa sining tau Léwié, angkanna tungke'-tungke' mennang mappunnaiwi jamanna muto. Uwatoro' towi kuwammengngi na ri wettu-wettu mattentué, aju tunung untu' pakkasuwiyangeng akkarobangengngé weddingngi ripassadiya sibawa weddingngi ra'ya'é tiwi pakaksuwiyang wassélé bunge' mammulangngé. Paccappurenna massempajakka, “Allataalaku, éngngerangngi iya manennaé sibawa barakkakika.” Ri taung matellué apparéntanna, pakangkai Arung Ahasywéros pésta marowa untu' sininna tomarajana sibawa pegawénna. Sining pallima Persiaé sibawa Média engka towi ri péstaéro, makkuwatoro sining gubernur-é sibawa pajaba tanréna propinsié. Enneng uleng ittana nappaitang arungngé asugirenna saorajana sibawa akessingenna enrengngé arajanna akkarungenna. Purairo pakangkasi arungngé pésta untu' sininna ra'ya'é ri Susan, muwi sugié iyaré'ga kasiyasié. Iyaro péstaé siminggu bujuru sibawa ripakangkai ri tammeng saorajana arungngé. Ribélo-béloiwi seddéna saorajaé sibawa kaing paddenring polé ri kaing lénang magawu'é sibawa puté, risiyo sibawa tulu lénang alusu sibawa riyassakkareng ri tolit-toling péra' iya ripasangngé ri alliri-alliri puwalangngé. Ri yawana ritaroi lamming-lamming ulawengngé sibawa péra'é ri tompo'na témbo iya ribélo-béloiyé puwalang maputé, hablur cella, oli mutiyara iya lala'é sibawa batu pirus gawu. Passadiyai arungngé anggoro maona iya ripatalaé ri laleng énungeng-énungeng ulaweng maddupa-rupangngé. Dé' nariyattekeng anggoro'na sining topolé iyaré'ga ripassa ménung. Purani mapparénta arungngé lao risining pattumaninna saorajaé, kuwammengngi tungke' topolé ritumaningiwi situru élona tungke'-tungke'. Na iyaro wettué Wasti, bainéna arungngé, pakangka towi pésta untu' sining makkunraié ri laleng saorajaé. Ri esso iya mapitué, ménum-ménunni arungngé angkanna masennang senna nasedding. Rimakkuwannanaro naobbini iya pitu pajaba napallainna iya mancajiyé pattumani paribadinna; mennang iyanaritu Méhuman, Bizta, Harbona, Bigta, Abagta, Zétar sibawa Karkas. Nasuroi mennang tiwii ri yolona Ratu Wasti sibawa passigera akkarungengngé ri tompo ulunna. Magello senna ratué, namaéloi arungngé mappaitangngi agellorenna lao risining tomarajaé sibawa sining topoléna. Iyakiya wettunna iyaro sining pattumanié palettu'i paréntana arungngé lao ri Ratu Wasti, dé' namaélo polé ratué, angkanna macai senna arungngé. Mappunnaiwi abiyasang arungngé untu' méllauwi pallolongenna sining tau accaé passalenna persoalang hukkungngé sibawa ade'é. Rimakkuwannanaro naobbini sining pappangajana iya missengngéngngi aga harusu napogau' ri laleng parakara makkuwaéro. Sining pappangaja iya kaminang biyasaé naobbi arungngé iyanaritu: Karséna, Sétar, Admata, Tarsis, Mérés, Marséna sibawa Mémukan. Mennang iyanaritu pajaba-pajaba Persia sibawa Média iya mappunnaiyé tudangeng kaminang matanré ri akkarungengngé. Nakkeda arungngé lao ri iya pitu tauwéro, “Purani usuro sining pattumanikku lao ri Ratu Wasti untu' suroi lao ri iyya. Iyakiya dé' namaélo. Manuru hukkungngé, tindakang agana harusu riyala lao ri aléna?” Namakkedana Mémukan lao ri arungngé sibawa sining tomarajana, “Nasibawang pangkaukengngéro, tenniya Datu bawang iya napakatunaé Ratu Wasti, sangadinna sininna pegawénna Datu, mala tungke' worowané ri akkarungengngéwé! Saba' iyaro pangkaukenna ratué naissengngi matu sininna makkunraié, nadé' najampangiwi matu lakkainna tungke'-tungke'. Makkedai matu mennang makkedaé Datu pura paréntangngi Ratu Wasti untu' mangolo, iyakiya dé' namaélo polé ratué. Jaji, rékko naéngkalingai sining bainéna sining tomarajaé ri Persia sibawa Média gau'éro, pasti nappaissengengngi matu masitta lao ri lakkainna tungke'-tungke'. Addimonrinna iyanaritu, naéwai matu bainé paréntana lakkainna na lakkaié nacairiwi matu bainéna. Rimakkuwannanaro, riyéllauwi kuwammengngi nala apettung Datu makkedaé dé'na naweddinna Ratu Wasti mangolo ri Datu. Iyaro apettungngé harusu'i ripancaji undang-undang Persia sibawa Média, kuwammengngi dé' nawedding ribébbu paimeng. Purairo, wérénni tudangenna Ratu Wasti lao ri makkunrai laingngé iya lebbi makessingngé naiya aléna. Rékko mallebbanni iyaro apettunna Datu ri sininna akkarungeng iya malowangngéwé, tungke' bainé napakalebbinitu matu lakkainna, muwi sugi iyaré'ga kasiyasi.” Iyaro tangngana Mémukan nasitujuini arungngé sibawa sining tomarajaé, nanapajoppani arungngé masitta. Kirinni sure' parénta lao ri sininna propinsinna akkarungengngé, ri laleng basa sibawa okina propinsiéro tungke'-tungke'. Oninna iyaro paréntaé makkedaé ri laleng tungke' ruma tangga, lakkaié ritu harusu mancaji kapala, sibawa sipato mala sininna apettungngé. Siyagangngaré wettu ri monrinna, namuni dé'na namacaina arungngé, matteru mupi pikkiri'i pangkaukenna Ratu Wasti sibawa tindakang iya puraé riyala lao ri aléna. Rimakkuwannanaro pappangaja-pappangaja iya maréppé'é sibawa arungngé mabbéréni tangnga makkuwaé, “Makessingengngi risappareng ana'-ana'dara iya magelloé untu' Datu. Sitinajai Datu makka pegawé-pegawé ri sininna propinsinna akkarungengngéwé untu' sappa ana'-ana'dara iya magelloé nainappa tiwi manengngi mennang ri saoraja makkunraié ri Susan. Hégai, pajaba ripallaing iya mancajiyé kapala ruma tanggana saoraja makkunraié, murusu'i matu mennang sibawa mpéréngngi mennang pajjampa agelloreng. Purairo, sitinajai Datu pilé ana'dara iya kaminang napojiyé Datu, sibawa pancajiwi ratu selaku passulléna Ratu Wasti.” Nasitujuini arungngé pangajaéro sibawa pajoppai. Ri kota Susanro engka séddi tau Yahudi riyaseng Mordékhai ana' Yair. Wijannai Kis sibawa Siméi polé ri suku Bényamin. Ritawangngi Mordékhai wettunna Yérusalém ricau ri Nébukadnézar, arung Babél. Ripalii Mordékhai lao ri Babél silaong Yoyakin, arunna Yéhuda, sibawa maéga tawangeng iya laingngé. Mappunnaiwi sappusiseng, séddi ana'dara iya magelloé tappana sibawa makessing pakkalénna, asenna Ester, na aseng Ibraninna iyanaritu Hadasa. Maténi tomatowanna Ester nariyakka ri Mordékhai mancaji ana' piyara sibawa piyarai selaku ana' riyaléna. Riyappallebbangennana paréntana arungngé, maéga ana'dara ripaddeppungeng ri Susan naengkato Ester ri yelle'na mennang. Ritiwi towi ri saorajana arungngé sibawa riyappaddettangeng lao ri Hégai kapala ruma tanggana saoraja makkunraié. Bengnga Hégai mitai Ester sibawa napojinna. Masitta'ni najampangi agellorenna iyaro ana'daraé sibawa nawéréng inanré iya ripallaingngé. Ripalétté'ni Ester ri bagiyang iya kaminang makessingngé ri saoraja makkunraiéro sibawa pitu ana'dara iya kaminang mapecci'é kédo ri saorajana arungngé risuro untu' tumaningiwi. Nasaba pangajana Mordékhai, dé' nappaissengengngi Ester makkedaé séddiwi tau Yahudi. Esso-esso Mordékhai joppa-joppa ri seddé yolona saoraja makkunraiéro untu' makkutangngi keadaanna Ester sibawa aga kajajiyang matu sibawa aléna. Manuru peraturangngé, sining makkunraié rijampangiwi agellorenna sitaung ittana: enneng uleng sibawa minnya ricampuru kamennyang, sibawa enneng uleng rappina sibawa minnya ricampuru wangi-wangiyang iya laingngé. Purairo tungke' ana'dara lolongeng léléng untu' mangolo ri Arung Ahasywéros. Wettunna séddi ana'dara mangolo ri arungngé, weddingngi napaké agi-agi situru napojiyé. Ritiwii ri saorajana arungngé ri wennié, na pappa bajana ritiwii ri saoraja laingngé, nariurusu ri Saasgas, séddiwi pajaba ripallaing iya murusu'éngngi sining gundi'na arungngé. Iyaro ana' daraé dé'na namangolo ri arungngé, sangadinna rékko arungngé puwéloi sibawa teppui asenna. Narapini lélénna Ester untu' mangolo ri arungngé. – Ester iyanaritu ana'na Abihail sibawa sappusisenna Mordékhai iya puraé makkai selaku ana' riyaléna; ribengngariwi Ester ri tungke' tau iya mitaéngngi. Wettunna lao mangolo ri arungngé, mappakéi Ester situru panunju pangajana Hégai, kapalana saoraja makkunraié. Makkuwaniro, ri taung mapitué apparéntanna Ahasywéros ri uleng maseppuloé, iyanaritu uleng Tébét, ritiwini Ester mangolo ri Arung Ahasywéros ri saorajana arungngé. Napésennangiwi sibawa napérennuiwi arungngé lebbi naiya ana'-ana'dara laingngé. Rimakkuwannanaro aléna kaminang ripoji ri arungngé. Napasanni arungngé passigera akkarungengngé ri ulunna Ester sibawa pancajiwi ratu sulléiwi Ratu Wasti. Purairo, pakangkani arungngé pésta selaku pappakalebbi lao ri Ester sibawa mundangngi sininna pegawé enrengngé tomarajana. Nappallebbangenni esso appésaungengngé ri sininna akkarungengngé sibawa bagé-bagé hadiya sibawa maona. Iyaro wettué riyakkani Mordékhai ri arungngé mancaji pegawé pamarénta. Dé'pa nappaissengengngi Ester makkedaé séddiwi tau Yahudi, saba' riyattéyangngi ri Mordékhai. Turui Ester ri Mordékhai pada-pada wettunna baiccu mupa sibawa ripiyara ri sappusisennaro. Riséuwaé esso, wettunna Mordékhai tugas ri saorajaé, engka duwa tau pajaba ripallainna arungngé, iyanaritu Bigtan sibawa Térés, sikongkolo'i maélo mpunoi Arung Ahasywéros, nasaba nacéccé senna'i mennang. Iyaro rancanaé naissengngi Mordékhai namasitta'na paissengiwi Ester. Temmattajeng maitta, nacuritani Ester lao ri arungngé aga naisseng Mordékhairo. Risalidikini iyaro parakaraé, namanessani makkedaé iyaro laporangngé tongengngi. Iya duwa tauwéro rihukkung gattunni. Situru sibawa paréntana arungngé, iyaro kajajiyangngé riyokini ri laleng kitta sejarana akkarungengngé. Siyagangngaré wettu ri munrinna naakkani Arung Ahasywéros séddi tau riyasengngé Haman mancaji perdana menteri. Haman iyanaritu ana'na Hamédata polé ri wija-wijanna Agag. Napparéntanni arungngé lao ri sininna pegawénna kuwammengngi napakarajai Haman sibawa suju' ri yolona. Naturusi manenni iyaro paréntaé, sangadinna Mordékhai. Makkutanani pegawé-pegawé laingngé ri saorajaé magi najjalékkaiwi paréntana arungngé, na esso-esso mennang dessa'i kuwammengngi naturu bawang, iyakiya dé' namaélo méngkalingai. Adanna, “Iyya tau Yahudika; dé' naweddikka suju' lao ri tolinoé.” Nainappa nalaporo gau'éro lao ri Haman nasaba macinnai missengngi tindakang aga nala matu lao ri Mordékhai. Macai senna'ni Haman wettunna naisseng makkedaé dé' namaélo Mordékhai suju' lao ri aléna. Na wettunna naisseng makkedaé Mordékhai séddiwi tau Yahudi, malani apettung untu' hukkungngi Mordékhai sibawa tenniya aléna bawang, sangadinna maélo towi paccappui sininna bangsa Yahudié ri akkarungeng Persia. Ri taung maseppuloé duwa apparéntanna Arung Ahasywéros, ri uleng séddinna, iyanaritu uleng Nisan, nasuroni Haman mundiwi iya riyasengngé “purim” untu' missengngi esso sibawa uleng kégaénna coco untu' pajoppai niya'na iya majaéro. Na ripattette'na tanggala seppulo tellu uleng seppulo duwa, iyanaritu uleng Adar. Namakkeda Haman lao ri arungngé, “Datu, engka séddi bangsa makalallaing iya tattale'é ri tungke' propinsi akkarungengngéwé. Ade abiyasanna silaingeng senna sibawa bangsa-bangsa laingngé. Dé' mennang naturusiwi hukkung-hukkunna akkarungengngé. Jaji, makessingengngi Datu aja' naleppessangngi mennang pogau'i siélo-élo atinna. Rékko dé' nappotane Datu, sitinajai ripassu sure' paréntaé untu' paccappui mennang. Narékko maéloi Datu tarimai tangngana atatta, pasti naulléi matu atatta puttama 340.000 kilo péra' ri laleng kasna Datu.” Naéngkalinganaro, naludunni arungngé ciccing iya napaké ri jarinna untu' ca'i sining pappallebbangeng résmié, nainappa nawéréng Haman, bali loppona bangsa Yahudié. Nakkeda arungngé lao ri aléna, “Iyaro bangsaé sibawa topa dowina uwérékko. Pogau'ni aga iya muwitaé makessing lao ri mennang.” Iyaro paréntaé harusu'i riyappallebbangeng ri tungke' propinsié kuwammengngi na tungke' tauwé sadiyani ri esso iya puraé ripattenturo. Masitta'ni joppa sining torisuroé mantara'i iyaro sure'-sure'é lao ri sininna akkarungengngé. Nasaba surona arungngé, riyappallebbangeng toni iyaro paréntaé ri Susan, ibukotana Persia. Purairo tudat-tudanni arungngé sibawa Haman ménung anggoro, iyakiya kota Susan tassélenni nasaba karébaéro. Wettunna naéngkalinga Mordékhai aga pura kajajiyang, nasapé'ni pakéyanna napaké kaing karung selaku tanrang masussa. Nagugurini awu ulunna, najoppa ri kotaé naterito sibawa macenno nenniya masé. Mappésauni ri yolona pintu gerbanna saorajaé, saba' tau iya mappaké karungngé riyattéyang muttama. Makkuwatoro ri sininna propinsié, mpatinni sining tau Yahudié purana riyappallebbangeng paréntana arungngé. Mappuwasani mennang, teri sibawa maddararing, na maéga ri yelle'na mennang pakéi kaing karungngé sibawa léwu ri tompo'na awué. Wettunna ana'-ana'daraé sibawa sining pajaba ripallaingngé iya tumaningiyéngngi Ratu Ester laporo'i ri aléna aga mattengngang napogau' Mordékhai, messé senna'ni Ester. Kirinni pakéyang lao ri Mordékhai selaku passulléna kaing karunna, iyakiya dé' namaélo Mordékhai tarimai. Nainappa riyobbini Hatah ri Ester, sala séddinna pajaba ripallaing iya risuroé ri arungngé untu' tumaningiwi Ester. Risuroni Hatah makkutanangngi ri Mordékhai aga mattengngang kajajiyang sibawa magi nakédo pada-padaro. Nalaona Hatah ri Mordékhai ri lapangang kotaé ri yolona pintu gerbang saorajaé. Nacuritani Mordékhai ri aléna aga pura kajajiyang sibawa siyaga dowi péra' iya najjanciyangngé Haman untu' naputtama ri laleng kasna arungngé, puranana napaccappu sininna tau Yahudié. Nabbéréyang towi Mordékhai lao ri Hatah lémbana sure'na arungngé iya puraé napassu ri Susan sibawa iya mallise'é parénta untu' paccappui tau Yahudié. Nasuroni Hatah mpéréngngi Ester iyaro sure'é sibawa pakatajangngi iyaro parakaraé lao ri aléna, makkuwatoro untu' méllauwi kuwammengngi namangolo Ester ri arungngé méllauwi paressé babuwana untu' bangsana. Nanalaona Hatah ri Ester napalettu'i pasenna Mordékhai ri aléna. Iyakiya risuroi ri Ester lisu ri Mordékhai sibawa pasengngéwé, “Tungke' tau, muwi worowané iyaré'ga makkunrai, iya tenriyobbié, mangoloi ri arungngé ri seddé lalenna saorajaé, harusu'i rihukkung maté. Iyaro iyanaritu undang-undang na sininna tauwé mappammulai ri pappangajana arungngé lettu ri ra'ya'é ri propinsi-propinsié, naisseng gau'éro. Banna engka séddi laleng untu' leppe polé ri undang-undangngéro, iyanaritu rékko natanréyangngi arungngé tekkeng ulawenna lao ri tauwéro. Rékko kajajiyangngi iyaro, salama'i matu. Iyakiya siulennié dé' naobbika arungngé.” Nanapalettu'ni Hatah iyaro pasenna Ester lao ri Mordékhai. Nanakirinni Mordékhai iyaé papparéngngerangngé lao ri Ester, “Aja' muwasengngi lebbi amakko matu naiya tau Yahudi laingngé, banna nasaba monroko ri saorajaé! Pasti tau Yahudié lolongengngi matu pattulung muwi cara aga angkanna salama'i. Iyakiya rékko tette'ko bawang mammekko ri laleng keadaang makkuwaéwé, alému paimeng matéto matu sibawa cappui matu curitana kaluwargana ambo'mu. Niga missengngi, ajakké nasaba untu' wettu-wettu pada-padaéwé napurano ripilé mancaji ratu!” Nanakirinni Ester iyaé karébaé lao ri Mordékhai, “Paddeppungengngi sininna tau Yahudi iya engkaé ri Susan untu' masempajangekka. Aja' naanré sibawa ménung tellungngesso tellumpenni ittana. Aléku paimeng sibawa sining ana'dara pattumanikku mappuwasa towi matu. Purairo mangoloka matu ri arungngé, namuni iyaro majjalékkai undang-undang. Rékko harusu'ka maté nasaba iyaro, leppessakka maté!” Nanalaona Mordékhai sibawa pogau'i sininna iya nappasengengngé Ester lao ri aléna. Ri esso matellué appuwasanna, napakéni Ester pakéyang ratunna, nainappa lao ri seddé lalenna saorajaé sibawa tettong ri yolona sumpang barugaé. Mattengngangngi arungngé tudang ri yasé'na kadéra arajanna iya mangoloé ri sumpangngéro. Wettunna naita Ratu Ester ri saliweng, momponi pappojinna lao ri aléna nanatanréyangngi tekkeng ulawenna lao ri aléna. Namalluruna Ester, nagéssai cappa'na tekkengngéro. Nainappa makkutana arungngé, “Engka aga, Bainéku? Aga muwacinnai? Powadani! Namuni muwéllauwi sitengngana polé ri akkarungekku, uwéréng tokko.” Nappébali Ester, “Rékko napuwéloi Datu, sitinajai iyaé wennié Datu sibawa Haman poléi rianréng iya napassadiyaé atatta untu' Datu.” Risuroni Haman ri arungngé masitta polé, kuwammengngi naulléi mennang rupaiwi undanganna Ester. Nalaona mennang ri perjamuwang iya napakangkaé Esterro. Wettunna ménung anggoro, makkutanani arungngé, “Makkekkuwangngé powadani aga muwacinnai. Muwi aga muwéllau uwérékko matu, namuni sitengngana polé ri akkarungekku!” Nappébali Ester, “Rékko napuwéloi Datu tarimai paréllaunna atatta, sitinajai Datu sibawa Haman polé paimeng ri perjamuwang iya napakangkaé atatta wenni paimeng. Ri perjamuwangngépparo matti napangoloi matu atatta paréllaunna atatta ri Datu.” Lisuni Haman polé ri perjamuwanna Ratu Ester sibawa ati iya masennangngé. Iyakiya wettunna ri pintu gerbanna saorajaé naitai Mordékhai iya dé'é natokkong untu' pakarajai aléna, macai senna'ni. Iyakiya natahangngi aléna sibawa lisu ri bolana. Lettu'na kuwaro nasuroni sellao-sellaona polé sibawa méllauwi Zéres, bainéna, untu' tudat-tudang silaong mennang. Nainappa mabboro Haman lao ri mennang sibawa mattempowangngi asugirenna, égana ana'-ana' worowanéna, tudangeng penting iya natarimaé polé ri arungngé, sibawa pangka'na iya lebbi tanré naiya pegawé-pegawé laingngé. Adanna paimeng, “Mala muwi Ratu Ester banna iyya naundang sibawa arungngé lao ri perjamuwang iya napakangkaé untu' idi, na wenni paimeng naundassiki. Iyakiya iya manennaro dé'gaga bettuwanna, ri wettu uwitana mupa Mordékhai, tau Yahudiéro, tudang ri pintu gerbanna saorajaé.” Naéngkalinganaro bainéna sibawa sininna sellao-sellaona nappétangngarenni makkuwaé, “Suro bawanni mébbu alliri aggattungeng sittanré duwappulo duwa météré. Nainappa pappa bajana, maéléno méllau palalo ri arungngé untu' gattungngi Mordékhai ri alliriéro. Nanallalengiwi weddikko lao ri perjamuwangngéro sibawa ati iya tennangngé.” Iyaro tangngaé makessing senna manuru pallolongenna Haman, rimakkuwannanaro nassurowanni masitta mébbui alliri aggattungengngéro. Iyatoro wennié dé' naulléi matinro arungngé. Rimakkuwannanaro naéllauni riyalang kitta catatang sejarana akkarungengngé sibawa suroi tauwé bacangengngi. Nalolongenni ri lalenna catatanna makkedaé Mordékhai pura laporo'i usaha abbunowangngé lao ri arungngé iya narancanaé Bigtan sibawa Térés, iya duwanna pajaba ripallaing iya monrowangngéngngi bili'na arungngé. Makkutanani arungngé, “Pappakaraja sibawa pamale' agana pura riwéréngngi iyaro Mordékhai?” Nappébali sining pattumanié, “Dé' agaga natarima.” Namakkeda arungngé, “Niga polé ri pegawéku iya engkaé makkekkuwangngé?” Nasitujuwangngi Haman silalona muttama ri seddéna saorajaé; maéloi méllau palalo ri arungngé untu' gattungngi Mordékhai ri alliri aggattungeng iya puraé napatettonro. Nappébali iyaro sining pattumanié lao ri arungngé, “Haman engka ri saorajaé sibawa macinnai mangolo ri Datu.” Nakkeda arungngé, “Suroi muttama.” Muttama'nana Haman, makkedani arungngé lao ri Haman, “Engka tau iya maéloé uwéréng pappakaraja battowa. Agana upogau' matu untu' aléna?” Pikkiri'na Haman, “Nigasi iya maéloé riwéréng pappakaraja makkuwaro battowana ri arungngé? Pasti iyya!” Séddié tomarajana wanuwaé polé ri arungngé harusu pasangengngi iyaro pakéyangngé lao ri tau iya maéloé Datu napakarajaro, nainappa natinrosi iyaro tauwé sibawa tonangiwi anyaranna Datu molai lapangang kotaé. Iyaro tomarajaé joppai matu ri yolona nagora-gorato, ‘Mappakkuwaniyé arungngé mpéréngngi pappakalebbi lao ri tau iya napakarajaé!’ ” Nainappa makkeda arungngé lao ri Haman, “Asitta'no, alani pakéyangngé sibawa anyarangngéro namuwéréngngi sininna pappakarajaéro lao ri Mordékhai, tau Yahudiéro. Pogau'ni pada-pada iya mupowadaé onna, tekkurangiwi muwi séddi. Weddingngi muruntu mattengngang tudang ri yolona pintu gerbanna saorajaé.” Nanalani Haman iyaro pakéyangngé nanapasangiwi Mordékhai iyaro pakéyangngé. Natonanginnana Mordékhai iyaro anyarangngé, narénrénni Haman lalo ri lapangang kotaé, nagora-gorato, “Itai, mappakkuwaniyé arungngé mpéréngngi pappakalebbi lao ri tau iya napakarajaé!” Purairo lisuni Mordékhai ri pintu gerbanna saorajaé. Iyakiya Haman mapperi-perini lisu. Dé' namaélo riita ri tauwé nasaba masiri senna'i, nanasamponi rupanna. Lao ri bainéna sibawa sininna sellaona nacuritani aga iya puraé napéneddingi. Nainappa bainéna sibawa sellao-sellaona iya mapanréro makkeda lao ri aléna, “Mappammulano ricau watang ri Mordékhai. Tau Yahudiwi nadé' muwulléi méwai. Pasti naulléi cauko matu.” Wettunna mennang mabbicara mupa sibawa Haman, poléni sining pajaba'na saorajaé sibawa mapperi-peri maélo mantara'i Haman lao ri perjamuwang iya napakangkaé Ester. Na untu' mabbékkaduwanna arungngé sibawa Haman manré ménung sisama Ester. Makkutanani paimeng arungngé lao ri Ester, nanaénutto anggoro, “Nah, Bainéku, aga muwacinnai? Pasti uwabbéréyangngi matu namuni muwéllauwi sitengngana polé ri akkarungekku.” Nappébali Ratu Ester, “Rékko napuwéloi Datu, naéllauwi atatta kuwammengngi atatta sibawa bangsana atatta weddingngi tuwo. Saba' atatta sibawa bangsana atatta purani ribalu untu' riyuno. Akkalarapanna idi banna ribalu'ki untu' ripancaji ata, mammekko bawammi matu atatta sibawa dé' naganggui Datu. Iyakiya makkekkuwangngé maéloni ripaccappu sibawa ripallennye!” Namakkutanana Arung Ahasywéros lao ri Ratu Ester, “Niga barani pogau'i makkuwaéro? Kégani taunna?” Nappébali Ester, “Haman iya majaéwé iyanaritu bali sibawa panrasa-rasaki!” Namétau senna'na Haman mitai arungngé sibawa ratué. Macai senna'ni arungngé, nainappa tettong salaiwi méjangngé namatteru massu, ri tammenna saorajaé. Naissenni Haman makkedaé purani mala apettung arungngé untu' hukkungngi, rimakkuwannanaro tette'i monro silaong Ratu Ester untu' méllauwi kuwammengngi naripassalama. Nasibawang apettung paddennuwang nabuwanni aléna Haman ri lamminna Ester untu' méllau addampeng, nasitujuwang towi iyatoro wettué nalisu arungngé polé ri tammeng saorajaé. Naitana Haman makkuwaro, gorani arungngé, “Aga? Barani mupi gau' majariwi ratué kuwaé, ri yoloku sibawa ri saorajaku topa?” Purana muwa napowada arungngé iyaro ada-adaé, poléni sining pejaba'é nabombo'i ulunna Haman. Nainappa makkeda Harbona, séddiwi polé ri pajaba-pajaba'éro, “Datu, ri seddé bolana Haman engka alliri aggattungeng sittanré duwappulo duwa météré. Purai napatettong Haman untu' gattungngi Mordékhai, tau iya puraé passalama'i nyawana Datu.” Napparénta arungngé, “Gattunni Haman ri alliriéro!” Makkuwaniro Haman rigattung ri alliri iya puraé napatettong untu' Mordékhai. Puramaniro nappai soro caina arungngé. Iyatoro essoé nabbéréyangngi Arung Ahasywéros sininna waramparanna Haman lao ri Ratu Ester, bali loppona bangsa Yahudiéro. Nappaissengenni Ester lao ri arungngé makkedaé Mordékhai sappusisenna, na sipongennaro riwérénni ha' untu' mangolo ri arungngé tenriyobbi lebbi riyolo. Naludunni arungngé ciccinna iya nalaé paimeng polé ri Haman nanawéréngngi Mordékhai. Sibawa riyakkani Mordékhai ri Ester mancaji panguwasana waramparanna Haman. Purairo mangolosi Ester ri arungngé. Suju'ni naterito sibawa méllauwi kuwammengngi napaddéi arungngé rancana maja iya naébbué Haman lao ri tau Yahudié. Natanréyanni tekkeng ulawenna arungngé lao ri Ester, nainappa tettonni Ester sibawa makkeda, “Rékko napuwéloi Datu sibawa napojiwi atatta, sitinajai Datu passu sure' parénta untu' bébbui sure'-sure'na Haman iya mallise'é parénta paccappui sininna tau Yahudié ri akkarungengngéwé. Pékkugi makkullé atatta mitai bangsana sibawa sumpulolona atatta cappu riyuno?” Namakkeda Arung Ahasywéros lao ri Ratu Ester sibawa Mordékhai, “Mémeng, purani ugattung Haman nasaba maéloi paccappui tau Yahudié, sibawa waramparanna purani uwéréngngi Ester. Iyakiya sure' iya puraé riyoki ri laleng asenna arungngé sibawa riwéréng ca'na arungngé, dé' nawedding ribébbu paimeng. Iyakiya, upalaloko moki sure' passalenna bangsa Yahudié, agi-agi iya muwasengngé makessing. Okii iyaro sure'é ri laleng asekku sibawa ritaroi ca'na akkarungengngé.” Iyatoro essoé, iyanaritu tanggala 23 uleng tellu, uleng Siwan, naobbini Mordékhai sining jurutulisi'na arungngé nanaparéntangngi mennang moki sure' lao risining gubernur-é ri iya 127 propinsié, polé ri India lettu ri Sudan. Iyaro sure'-sure'é riyokii ri laleng basa sibawa oki propinsi-propinsiéro tungke'-tungke'. Nakiring towi iyaro sure'é lao ri tau Yahudié ri laleng basa sibawa oki Yahudi. Iyaro sining sure'é natékéngngi Mordékhai ri laleng asenna Arung Ahasywéros sibawa ritaroi ca'na akkarungengngé. Nainappa nasuro Mordékhai sining suroé tiwii iyaro sining sure'é lao ri propinsi-propinsi akkarungengngé sibawa tonangi sining anyarang magattié appunnangenna arungngé. Iyaro sining sure'é pannessai makkedaé ripalaloi tau Yahudié ri arungngé ri tungke' kota untu' masséddi sibawa méwaiwi aléna. Rékko rigasai mennang risining tau massenjata polé ri bangsa nenniya propinsi muwi kégi, weddingngi mennang méwa sibawa mpunoi sining paggasaéro silaong bainéna sibawa ana'-ana'na; weddingngi mennang nauno sining balinnaro gangka cappu enrengngé rampasa'i waramparanna. Iyaro paréntaé harusu'i ripajoppa ri sininna akkarungenna Persia ri esso iya puraé napattette Haman untu' mpunoi sining tau Yahudié, ri tanggala seppulona tellu uleng seppulo duwa, uleng Adar. Iyaro sure' paréntaé harusu'i ripassu selaku undang-undang sibawa riyappallebbangeng lao ri sininna tauwé ri sininna propinsié kuwammengngi nasadiya-sadiya bangsa Yahudié méwai balinna rékko narapini iyaro essoé. Najoppana iyaro sining tau risuroé sibawa tonangi anyarang appunnangenna arungngé. Makkuwatoro Susan ibukotana wanuwaé, iyaro paréntaé ribacani. Purairo nasalaini Mordékhai saorajaé sibawa paké pakéyang arajang magawu sibawa puté, jumba collipao polé ri lénang alusu'é sibawa passigera ulaweng iya magello senna'é. Gora-gora kota Susan nasaba rennunna. Massauni nasedding tau Yahudié sibawa masennang, mariyo-riyo sibawa mabangka. Makkuwatoro ri tungke' kota sibawa propinsié, kégi-kégi sure' paréntana arungngé ribaca, marennuni sining tau Yahudié, massennas-sennang sibawa mappésta. Mala maéga polé ri pabbanuwaé iya mancajiyé warga bangsa Yahudi, nasaba métaui mennang lao ri bangsaéro. Angkanna narapini tanggala seppulo tellu uleng Adar, iyanaritu esso iya ripattette'é untu' pajoppai paréntana arungngé lao ri tau Yahudié. Iyaro essoé pura natajenni sining balinna bangsa Yahudié untu' makuwasaiwi iyaro bangsaé. Iyakiya annessana tau Yahudié ritu caui mennang. Ri tungke' kota, maddeppungengngi sining tau Yahudié sibawa masséddi untu' luruiwi sining tau iya manniya' majaé lao ri mennang. Kégi-kégi bangsa-bangsaé mancaji métau lao ri mennang angkanna dé' muwi séddi barani moloiwi mennang. Mala sininna tomarajana propinsié, sining gubernur-é, bupatié sibawa pajaba akkarungengngé sokongngi tau Yahudié nasaba métau manengngi lao ri Mordékhai. Ri sininna akkarungengngé naisseng tauwé makkedaé mappangaru senna'i Mordékhai ri saorajaé sibawa pédé makuwasa towi. Makkuwaniro bangsa Yahudié weddingngi napogau' siélo-élona lao ri balinna, naluruiwi mennang sibawa peddang nainappa nauno. Ri Susan, ibukotana wanuwaé, naunoi tau Yahudié lima ratu tau. Iyatoro essoé nalaporo'i tauwé lao ri arungngé jumellana sining tau iya riyunoé ri Susan. Nakkeda Datué lao ri Ratu Ester, “Ri Susan bawang purani nauno tau Yahudié 500 tau, muttama'ni iya seppulo ana'na Haman. Apalagi ri propinsi-propinsié! Agangngaré'na napogau' mennang kuwaro! Nah, agapi muwéllau makkekkuwangngé? Powada bawanni, pasti mulolongengngi matu!” Nappébali Ester, “Rékko napuwéloi Datu, sitinajai tau Yahudi iya monroé ri Susan baja éléé ripalaloi pakkolingngi paimeng aga pura napogau' ri essoéwé. Nainappani, sitinajai ujuna ana'-ana'na Hamanro rigattung ri alliri aggattungengngé.” Nanabbéréna parénta arungngé untu' pajoppai paréntana Ester; ripassuni sure' paréntaé untu' kota Susan sibawa ujuna iya seppulo ana'na Haman rigattunni. Jaji ri tanggala seppulona eppa uleng Adar, sining tau Yahudié ri Susan maddeppungenni paimeng sibawa mpunoi 300 tausi ri kotaéro. Na iyaé sisengngé dé'to mennang naddampo. Sining tau Yahudi iya monroé ri propinsi-propinsié maddeppungeng toni sibawa méwaiwi aléna. Nacauni mennang balinna 75.000 tau iya céccééngngi mennang. Iyakiya dé' mennang naddampo. Iyaro gau'é kajajiyangngi ri tanggala seppulona tellu uleng Adar. Esso rappina, ri tanggala seppulona eppa, dé' mennang naunoi muwi niga, sangadinna naramé-raméiwi iyaro essoé sibawa marennu. Iyakiya tau Yahudi iya engkaé ri Susan naramé-raméiwi tanggala seppulona lima selaku esso maraja, saba' purani mennang nauno balinna ri tanggala seppulona tellu sibawa seppulona eppa, namappésauna ri tanggala seppulona lima. Iyanaro saba'na tau Yahudi iya monroé ri kota-kota baiccu'é paréngngerangiwi tanggala seppulo eppa uleng Adar selaku esso iya marennué, esso untu' mappésta sibawa sisullé mabbéré hadiya maddupa inanré. Purairo naokini Mordékhai sininna kajajiyangngéro sibawa kiring sure' lao ri sininna tau Yahudié ri sininna akkarungeng Persia, muwi mabélaé iyaré'ga macawé'é. Lise'na paréntaéro iyanaritu untu' ramé-raméiwi tanggala seppulo eppa sibawa tanggala seppulo lima uleng Adar tungke' taung. Saba' ri esso-essoénnaro purai mennang nacau sining balinna, angkanna amessénna sibawa apessénna tappinrai mancaji arennung sibawa ariyo-riyong. Rimakkuwannanaro harusu'i mennang naramé-raméi iyaro esso-essoé sibawa pésta manré nenniya sisullé mabbéré inanré sibawa mabbéré sidekka lao ri tau kasiyasié. Naturusini tau Yahudié iyaro paréntana Mordékhai na makkuwaniro iyaro ramé-ramé mancaji ade abiyasang tungke' taung. Haman ana' Hamédata, wija-wijanna Agag, bali loppona tau Yahudié, pura mundiwi iya riyasengngétto “purim” untu' pattette'i esso untu' mpunoi tau Yahudié; purani narancana untu' pallennye'i mennang. Iyakiya mangoloi Ester ri arungngé, namabbéré arungngé parénta taroki iya nassabariyéngngi rancana ja iya naébbué Haman nakennai aléna muto, angkanna aléna sibawa ana'-ana'na rigattung ri alliri aggattungengngé. Rimakkuwannanaro iyaro esso-esso marajaé riyasengngi Purim. Sure'na Mordékhai sibawa sininna iya puraé napéneddingi tau Yahudié, nassabariwi mennang mébbu séuwa peraturang untu' aléna, untu' wijanna mennang sibawa untu' sininna tau iya maéloé mancaji wargana bangsa Yahudié. Manuru peraturangngéro tungke' taung waji'i mennang ramé-raméiwi iya duwa esso puraé napattette Mordékhai. Ripattette towi makkedaé untu' mannennungeng iyaro esso-esso Puringngé harusu'i riyéngngerang sibawa naramé-raméi tungke' kaluwarga Yahudié polé ri sininna assossorengngé ri laleng tungke' propinsi sibawa tungke' kota. Ri lainnaéro, nasibawang sure'na Mordékhai, Ratu Ester ana' Abihail mokii sure' maduwaé, iya pakkasse'éngngi lise'na sure'na Mordékhai passalenna Puringngéro. Iyaro sure'é nakiringngi lao risininna tau Yahudié, sibawa lémba-lémbana rikiringngi lao ri 127 propinsi akkarungenna Persia. Iyaro sure'é nasiawangngi sempajang kuwammengngi bangsa Yahudié tuli saléwangengngi sibawa amangngi. Iyaro sure'é nappétangngareng towi kuwammengngi mennang sibawa wija-wijanna naparéngngerangiwi esso-esso Puringngé ri wettu iya teppa'é, pékkugi mennang paréngngerangiwi wettu appuwasangngé sibawa wettu abbaratangngé. Iyanaro lise'na sure'na Mordékhai sibawa Ratu Ester. Paréntana Ester iya pattette'éngngi peraturang-peraturanna Puringngé, riyokii ri laleng kitta'é. Pakangkai Arung Ahasywéros jamang passa, tenniya bawang ri ra'ya'é ri daéra-daéra wiring tasi'é ri laleng akkarungenna, iyakiya ri daéra-daéra padalamangngétto. Sininna pangkaukenna iya battowaé nenniya maseroé, sibawa topa curita sukkuna passalenna pékkugiwi makkai Mordékhai mancaji pejaba tanré, riyokii ri laleng kitta sejarana arung-ngarung Persia sibawa Média. Mordékhai tau Yahudiéro tette'i tudangiwi jabatang kaminang matanré ri yawana Arung Ahasywéros. Ripakarajai Mordékhai sibawa ripoji risining tauwé sibangsana. Méwai untu' asalamakenna sibawa asaléwangenna bangsana enrengngé sininna wija-wijanna. Ri tana Us monroi séddi tau worowané riyasengngé Ayub. Nasompai Allataala sibawa matinulu na lao ri Aléna. Séddiwi tau iya makessing atié sibawa dé' napogau' ja muwi céddé. Mappunnaiwi pitu ana' worowané sibawa tellu ana' makkunrai. Ri lainnaéro mappunnaiwi maéga ata, 7.000 kajunna bimbala, 3.000 kajunna unta, 1.000 kajunna saping, sibawa 500 kajunna kaleddé. Riponcoki adaé, aléna iyanaritu tau kaminang sugi ri yelle'na pabbanuwaé ri daéra Alau. Iya pitu ana' worowanéna Ayub mappunnai abiyasang untu' pakangka pésta ri bolona tungke'-tungke' secara makkaléléng. Ri péstaéro iya tellu ana' makkunrainna Ayub riundang towi, nainappa mennang manré ménung maneng sisama. Purana tungke' pésta, tuli moto'i Ayub maélé nanakkasuwiyangeng akkarobangeng untu' tungke'-tungke' ana'na kuwammengngi nariyaddampengeng ri Puwangnge. Saba' mappikkiri'i Ayub, weddissa jaji ana'-ana'naro madosani sibawa napakatunai Allataala tennattungkai. Riséuwaé esso mangoloni mahlu'-mahlu' surugaé ri Puwangnge, na Ibillisi' engka towi ri yelle'na mennang. Makkutanani Puwangnge ri aléna, “Polé kégako?” Nappébali Ibillisi', “Silalona atatta sollé lao tulili sibawa jalajja'i sininna linoé.” Namakkutana Puwangnge, “Puraniga mupénessai atak-Ku Ayub? Ri sininna linoé dé'gaga tau iya makkuwaé matinuluna sibawa makessing atinna pada-pada aléna. Nasompa-Ka sibawa dé' sises-siseng napogau'i majaé.” Iyakiya mappébaliwi Ibillisi', “Tentuni nasompa-Ko Ayub nasaba tarimai pamale. Tuli Mulinrungiwi aléna, kaluwargana sibawa sininna asugirenna. Mubarakkakiwi jama-jamanna sibawa Muwéréngngi maéga olokolo, genne untu' pennoiwi sininna wanuwaé. Iyakiya akkalarapanna sininna asugirennaro Muwalai, pasti matterui tanroi-Ko!” Namakkeda Puwangnge lao ri Ibillisi', “Makessinni, pogau'ni agi-agi lao ri sininna asugirenna Ayub, assaleng aja' mupeddiriwi!” Nalaona Ibillisi' polé ri yolona Puwangnge. Siyagangngaré wettu ri munrinna mattengngangngi ana'-ana'na Ayub mappésta ri bolana kakana iya macowaé. Wettunna mabbicara mupa, poléni ata maduwaé makkeda, “Sining bimbala'na Puwang sibawa sining pakkampié nakennai letté angkanna maté maneng. Banna atatta bawang leppe angkanna weddingngi laporo'i ri Puwang.” Dé'pa napaja mabbicara, wettunna ata matellué polé mabbirittangngi, “Tellu pasukang parrampo Kasdim pura rampasa'i sining untana Puwang sibawa mpunoi ata-atanna Puwang. Banna atatta bawang leppe angkanna weddingngi laporo'i ri Puwang.” Wettunna mabbicara mupi, poléni ata laingngé tiwi karéba, “Ana'-ana'na Puwang mattengngangngi mappésta ribolana ana'na Puwang macowaé. Tappa polé muni anginrajaé mangiri polé ri padang kessi'é nanakennai bolaéro angkanna maruttung sibawa mpuno manengngi ana'na Puwang. Banna atatta ritu leppe angkanna weddingngi laporo'i ri Puwang.” Natettonna Ayub nanasapé'i pakéyanna tanrang masara. Nacukkuru'ni gemme'na, nainappa suju' sibawa makkeda, “Rijajiyakka temmappunnai agi-agi, na matéka matti temmappunnaito agi-agi. Puwangnge pura mabbéréyangngi na Puwangnge muto pura malai. Ripojiwi asen-Na!” Jaji, namuni nakenna Ayub sininna abalaéro, dé' napogau' dosa sibawa dé' napassalai Allataala. Lisusi mangolo mahlu'-mahlu' surugaé ri Puwangnge, na Ibillisi' engka towi ri yelle'na mennang. Namakkutana Puwangnge ri aléna, “Polé kégako?” Nappébali Ibillisi', “Poléka sollé lao tulili sibawa jalajja'i linoé.” Makkutanani Puwangnge, “Aga purani mupénessai atak-Ku Ayub? Ri sininna linoé dé'gaga tau makkuwaé matinuluna sibawa makessing atinna pada-pada aléna. Nasompa-Ka sibawa dé' sises-siseng napogau'i majaé. Tette mupi matinulu ri Iyya, namuni pura-Ka mupalécé cilakaiwi temmakkéalasang.” Iyakiya mappébaliwi Ibillisi', “Nyawaé sibawa adisid-disingengngé lebbi mangke'i naiya waramparangngé. Macenningngi tolinoé makkarobangengngi sininna appunnangenna assaleng wedding muwi tette tuwo. Akkalarapanna Mupeddiriwi watakkaléna, mattentuni matterui natanroi-Ko matu.” Namakkedana Puwangnge lao ri Ibillisi', “Makessinni, pogau'ni agi-agi lao ri aléna, assaleng aja' muwunoi.” Nalaona Ibillisi' polé ri yolona Puwangnge, sibawa paompo lettang ri sininna tubunna Ayub polé ri palakajéna lettu ri bottoulunna. Natudanna Ayub ri seddéna goppo warowoé, sibawa mala reppa pinceng untu' kakkangngi watakkaléna. Makkedani bainéna lao ri aléna, “Pékkugi wedding tette mupo matinulu ri Allataala? Ayo, tanroini, namumaté!” Nappébali Ayub, “Mabbicarako pada-pada tau madonggoé! Masa iyami bawang makessingngé maélo ritarima polé ri Allataala, na iya dé'é namakessing risampéyangngi?” Jaji, namuni napéneddingiwi Ayub sininna abalaéro, dé' napowadai ada-ada iya méwaéngngi Allataala. Abala iya kennaéngngi Ayub naéngkalingani iya tellu sellaona, iyanaritu Elifas polé ri kota Téman, Bildad tau Suah sibawa Zofar tau Naamah. Masséddini mennang maélo célléngiwi sibawa saléworiwi. Iyakiya wettunna polé mabéla mupi naitai mennang, céddé'i dé' narupani. Terini mennang sibawa macenno sibawa sapé'i pakéyanna enrengngé massiyamporeng awu ri yelle'é sibawa ri ulunna. Pitungngesso pitumpenni mennang tudang ri tanaé, ri seddéna Ayub, temmakkeda-ada muwi silappa, nasaba naitai mennang pékkugi tane'na anrasa-rasanna. Nainappa mappammula Ayub mabbicara sibawa tanroiwi esso ajajiyanna, adanna, Oh Allataala, pancajiwi iyaro essoé mapettang, leddai polé ri paréngngeram-Mu angkanna lennye; aja' Muleppessangngi paimeng natappa cahaya macakka. Pancajiwi iyaro essoé malotong keppu, mapettang kape, massalawu mabbajampajang; sampoi sibawa ellung nenniya saliwu, cinaungiwi polé ri tappa mata essoé. Sitinajai iyaro wennié ripatteddéng polé ri abbilangeng taungngé sibawa ulengngé; aja'na narisénge paimeng, aja' tona naribilang. Leppessangngi iyaro wennié penno apettangeng dé'gaga assipammasé-maséng, dé'gaga arennung. Eh sanroé sibawa paturuéngngi Léwiatan, pakennaini iyaro essoé sibawa tanro nenniya pahukkungeng; aja' narapii mattappa wéttowing alaué, aja' muleppessangngi tappa éléé masiya'! Leppessangngi iyaro wennié siya-siya mattajeng apolénna essoé sibawa paddennuwang iya barué. Tattanroi wenni cilakaé wettukku rijajiyang ri indo, sibawa rileppessang tanggungngi anrasa-rasangngé. Magi dé' umaté ri laleng parémmananna indo', iyaré'ga leppu nyawaku wettukku rijajiyang? Magi narikaddaoka ri indo'ku sibawa nariwa, enrengngé napasusu ri susunna? Akkalarapanna iyaro wettué ulisu, matinrona nenniya mappésau sibawa tennang, pada-pada sining arungngé sibawa panguwasaé ri wettu riyolo, iya patettongngé paimeng saoraja ri wettu riyolo senna. Matinroka pada-pada ana' arungngé, iya lisekiyéngngi bolana sibawa péra' ulaweng. Magi dé' ujaji temmakkényawa kuwammengngi namemme tinroku sibawa takkalupa? Kuwaro, ri laleng kuburu'é, tau majaé dé' napogau'i majaé, sibawa koli iya cappuénna awatangenna weddingngi naleppessang aposonna. Makkuwatoro tawangengngé massauni pappéneddinna, leppe polé ri paggera'na sining pajagaé. Kuwaro sininna tauwé pada: iya tarompoé sibawa dé'é. Sibawa sining ataé leppe'i paccappurenna. Magi narileppessang tolinoé matteru tuwo manrasa-rasa? Magi tajangngé nariyabbéréyang lao ri iya masussaé? Lebbi napojiwi mennang kuburu'é naiya waramparangngé, tajengngi amaténgngé, iyakiya teppudu-pudu lettu. Nappai wedding ripéneddingi asennangengngé rékko matéi mennang sibawa rikuburu. Wettu mangolona mennang risalipuriwi ri Allataala, rikeppungngi mennang polé tulili. Passullé manré maddarékéka, dé' appésaunna maddararing. Sininna iya ubata-bataiyé kennaka, sininna iya uwétauriyé mappo'ka. Untu' aléku dé'gaga atennangekku manrasa-rasaka temmakképaggangkang.” Maégani tau pura mupangajari, sibawa mennang iya malemmaé purani mupéwatangi. Ada-adammu iya mabbéré sumange, paoto'i tau iya tabbuttué, malemma sibawa matekko. Iyakiya makkekkuwangngé alémuna nakenna sussa; tassélekko, sibawa pettu paddennuwang. Dé'ga mumatinulu lao ri Allataala; dé'ga na atuwommu dé'gaga ricéccéyangngi? Rékko makkuwaitu, sitinajai mateppe'ko sibawa dé' mupettu paddennuwang. Pikkiri'i, engkaga naengka tau iya dé'é napasala nakennai acilakang sibawa abala? Uwisseng polé ri pakkitangngé makkedaé tau iya rakkalaé dare maja, sibawa mampo biné abala selaku biné tanengeng, méngngalai matu acilakang sibawa asussang! Pada-pada anginrajaé, makkuwaniro caina Allataala paccappui mennang angkanna lennye! Marangngi sibawa gora-gorai tau majaé, pada-pada singaé mennang marang-marang. Iyakiya Allataala pammekkoi mennang enrengngé polo-poloi isinna. Matéi mennang pada-pada singaé akurangeng inanré, angkanna massara-sarang ana'-ana'na tessiyomporeng. Engka naengka nalettu ri iyya séuwa biritta, pada-pada bici-bici alusu'é ri laleng daucculikku. Tagganggui tinroku sibawa ripaddésu ri aléna, pada-pada mannippi majaé ri wenni makalemmengngé. Tasséleng tona sibawa ténré nataro tau; sininna tubukku taggottang, ténré-ténré. Nakennai anging alusu rupakku, natettonna bulu-bulukku. Séuwa tettong ri yoloku; utangngai, iyakiya makalallaing ri aléku. Nauwéngkalinga oni sadda reppa'i asino-sinongngé, ‘Weddigga tolinoé teppasala ri yolona Allataala? Weddigga dé' cellana ri mataé Pabbinruna? Mala ata-atanna Allataala ri surugaé, dé' Natepperiwi. Mala ri malaéka-malaéka'-Na Nalolongengngi asalangngé sibawa acellangngé. Apalagi mahlu' polé ri tana litaé, mahlu' awu iya weddingngé ripecca pada-pada cecco'é! Iyaro mahlu'é tuwoi ri éléé, namatéi kariya-riya ri arawéngngé, na untu' mannennungeng dé'na nariyéngngeranna. Nateddénna sininna iya nappunnangiyé; maténi temmallolongeng akkaleng.’ Angobbino, éh Ayub, engkaga pappébali? Malaéka nigana muwéllauwi bantuwang? Banna tau madonggoé bawang iya maté nasaba mapeddi atiwi. Engka naengka uwitai tau madonggoé; atuwonna paitai masse senna. Iyakiya tennassenna-senna bawang utanroiwi onrong naonroiyé. Na ana'-ana'na dé' naengka nalolongeng allinrungeng; dé' gaga maélo méwaiwi mennang ri pengadilangngé. Aga naéngngala mennang ri dare'na, cappu naanré tau iya lobbangngé babuwana. Mala gandong ri tengnga alekale'é, cappu naanré tau malupué. Appunnangenna sibawa asugirenna mennang mancaji incénai tau iya madekkaé ri waramparangngé. Dé' naompo polé ri linoé jaé; dé' naompo polé ri tanaé asussangngé. Dé'! Sangadinna aléna muto tolinoé iya papoléngengngéngngi acilakang aléna, pada-pada api tabbessi'é mompoi polé ri apié muto. Rékko iyya ri laleng keadaammu, ri Allataalaka maélo mangobbi. Ri Alénaka maélo mappisseng, enrengngé mabbéréyangngi parakaraku. Dé' padanna winru-winruna Allataala; dé' taulléi pahangngi. Sining anu makalallaing iya Naébbué, tenribilang sibawa dé'gaga cappuna. Napanonnoi bosié ri yasé'na tanaé, angkanna dare'é sibawa padangngé marica nabolo. Aléna Allataala iya pakatanrééngngi tau mariyawaé, sibawa pésennangiwi tau masussaé. Ri essoé nakennai mennang pettang, maggarambang pada-pada ri wennié. Iyakiya Allataala passalama'i: tau kasiyasié polé ri amaténgngé, tau mariyawaé polé ri tenre'éngngi. Engkana amménasang makkekkuwangngé lao ri tau iya dé'é nappunnai. Na tau majaé mammekkoi sisebbu basa, nasaba Allataala pura pammekkoi témunna. Maupe'ko rékko naéwako ada Allataala! Aja' mukacélé rékko nacellako. Saba' Allataala papeddiri, alénato paurai. Sibawa liman-Na iya paunrué, iya muto mappajjappa paimeng. Rékko mangancangngi bahayaé, tuli napassalama'ko. Rékko poléi akkadérengngé, dé' mumaté matu alupureng. Rékko majjallo'i musué, amakko polé ri amaténgngé. Rijagaiko polé ri pétenna'é sibawa mappakiri-kirié; muwoloi abalaé temmétau. Rékko takkennai apéddarangngé sibawa alupurengngé, sabbara'ko matu sibawa mala macawa. Dé' namétau pappéneddimmu sibawa bata-bata, moloiwi olokolo masekkangngé sibawa mabecco'é. Dare iya murakkalaé dé' nakkébatu matu; olokolo liyaé dé' naluruiko matu. Amakko matu monro ri kémamu; sibawa rékko muparéssai sining bimbala'mu, salama manengngi, dé'gaga akurangenna. Ana' eppomu tenribilang matu, singngégai mennang wellaé ri padangngé. Pada-pada gandong maridié, riyéngngalai ri wettunna, tuwo tokko matu madising narapi macowa. Ayub, iya manennaro purani riparéssa. Iyaro ada-adaé tongeng, jaji tarima bawanni.” pasti lebbi tane'i naiya kessi'é ri tasi'é. Jaji, aja' muhérang rékko ada-adakku kurang ati-atiwi sibawa mapperi-perinna. Panana Iya Pommakuwasaé bettui tubukku; massanrai racunna ri sininna nyawa tubukku. Aseronna Allataala mappakatau-tau senna, sibawa gasaka pada-pada pasukang balié. Masennangngi matu kaleddé'é rékko riwéréngngi wella lolo, makkuwatoro sapingngé rékko riwéréngngi inanréna. Iyakiya inanré makawaé, niga pojiwi? Pékkugi wedding puté ittelloé engka rasana? Dé' umacinna géssai; maja péneddikku rékko manréi. Magi nabata-bata Allataala méngkalingai sempajakku? Magi dé' Napénessaiwi pangobbiku? Tennapodo napuwéloi Allataala reppo'ka! Tennapodo tinda'i sibawa mpunoka! Untu' aléku iyaro gau'é sinrupai matu passaléwo; maélo séré-séré ri tengngana anrasa-rasangngé. Sininna paréntana Allataala Iya Pommapaccingngé, purani uturusi sibawa upénessai matteru. Aga awatangekku angkakku engka mupa? Aga amménasakku untu' macinna tuwo lebbi maitta? Padaga batué watanna watakkalékué? Poléga ri tembagaé tubukkué? Cappuni awatangekku sappa bantuwang; untu' aléku dé'na gaga pattulung. Ri laleng anrasa-rasang pada-padaéwé, uwaddennuwangiwi sahaba tuléngngé. Naulléga tette mupa matinulu iyaré'ga mallupaiwi Iya Pommakuwasaé. Iyakiya iko, éh sellao-sellao, dé' nawedding riyatepperi sibawa riyattuwang. Padako salo iya cappuénna uwaina, ri wettu teppoléna bosié. Padako salo iya mammekkoé sibawa matojoé, nasaba natongkoi salju sibawa uwai mattékké. Lettu'na muwa wettu pellaé, teddénna saljué sibawa temmabbaténa ése'é. Makarossani orina saloé, dé' nakkuwaé sibawa marakko mattedde. Pusa kapila-kapilaé wettunna sappa uwai; solléi mennang sibawa maté ri padang kessi'é. Kapila polé ri Syéba sibawa polé ri Téma sappai iyaro uwai sibawa maddennuwangiwi. Iyakiya addennuwangenna mennang siya-siyai ri wiring salo iya dé'é uwaina. Padako ritu saloé, sellaoku; soroko sibawa métau mitai anrasa-rasakku. Magi? Engkaga uwéllau polé ri iko? Iyaré'ga suroko sogo'i tauwé untu' apentingekku? Uwéllauwiga ripassalama sibawa ripaleppe polé ri bali iya dé'é paressé babuwana? Nah, pagguruka, appaitanni asalakku! Maéloka mammekko sibawa méngkalingai ada-adammu. Ada-ada iya malempué sibawa keccékiwi atié, iyakiya kosong bicarammu, dé'gaga bettuwanna! Sininna ada-adakku muwangga angimmi bawang; siya-siya bawang mubalika iya pettu paddennuwangngénna. Mala ana' béué muundiwi totona, sellao maréppé'mu mucéko-cékoiwi untu' mancaji sugi. Coba, pénessaika; masa mabbelléka lao ri iko? Aja' mutinda dé' naadélé, mainge'no! Aja' mucellaka, dé' tongeng upasala. Aga muwasengngi mabélaka, dé' mulléi pasilaingengngi makessingngé sibawa ricellaé? Iyaro tolinoé pada-padai ripassaé méwa; matane atuwonna pada-pada atuwonna tau ripéssaroiyé; padai ata iya muddaniyé ri accinaungengngé; padai koli iya tajengngé saro. Polé ri ulengngé lao ri ulengngé atuwokku temmakkatta; polé ri wennié lao ri wennié atikku pennoi amesséng. Rékko laoko matinro, maggettengngi malampé wennié; uwuddaningiwi éléé, dé' uwulléi tennang léwu. Pennoi lati tubukku sibawa dara maddekké; malo oliku sibawa massu nana. Atuwokku iya temmaddennuwangngéro tajjolloi mattuju ri paccappurenna, lebbi masitta'i naiya pattennung massulurengngéngngi taroponna. Engngerangngi oh Allataala, atuwokku banna seppung nappase; teddéngngi asennangekku, dé' nataro baté. Makkekkuwangngé Muwitaka – iyakiya iyaro dé' namaitta. Rékko matti Musappaka, dé'ni gaga. Rimakkuwannanaro dé' uwulléi monro mammekko! Pappénedding mapesséku sibawa mapaiku dé' uwulléi lemmungngi. Harusu'ka timpa'i témukku, sibawa passui lise atikku. Magi mujagaika matteru sibawa Muwonrowakka? Aga naga tasi'ka'ga iya mabbahayaé? Léwuka sibawa cobai paleppe'i tekkoé; sappaka aringengeng untu' atikku iya masussaé. Iyakiya Mupéttaurika sibawa nippi; Mupapoléi nippi majaé sibawa nawa-nawangngé. Angkanna lebbi upojiwi riyanrekké'é namaté naiya tuwoé ri laleng tubu pennoé anrasa-rasangngéwé. Posoka sibawa cauna tuwo; macinnaka maté! Leppessakka, saba' dé' bettuwanna atuwokku. Magi naparellu makkuwaro tolinoé? Magi natuli Mujampangiwi tindakanna? Musalidikiwi tungke' élé, sibawa tungke' wettu Muojiwi. Uppanna Mugiling polé ri aléku, angkanna engka wettukku memme'i éloku? Eh Panganrowakku, rogi-Koga nasaba dosaku? Magi Mupakéka selaku attujungeng pana-Mu? Makkuwamaniga tane'na upatiwiri alé-Mu? Dé'ga Muwulléi maddampengengngi dosaku? Dé'ga namakkullé-Ko leddai asalakku? Dé'na namaitta uléwu ri laleng kuburu'é, sibawa rékko Musappaka, dé' matu Mulolongengngi.” Dé' naengka napabbéngko'i Allataala adélékengngé; dé' naengka nacau patettongngi atongengengngé. Naullé ana'-ana'mu madosai lao ri Aléna, nasitinajanna mennang rihukkung ri Aléna. Iyakiya rékko ri Alénako maccinaung, méllau paressé babuwa sibawa méllau addampeng, rékko malempui atimmu, temmakkécella, masitta'i matu Allataala tulukko, na selaku pamale'na, ripalisui matu ruma tanggamu. Asugiremmu iya teddéngngéro dé' bettuwanna ripasibandingngi sibawa aga iya mulolongengngé matti. Tau mapanré ri wettu riyolo sitinajai mujampangi, sibawa munennun-nennung pangalamanna néné-nénému. Maponco atuwotta, dé' agaga riisseng; esso-essota padai wajo-wajoé bawang. Engkalingai ada-adanna tau mapanréro riyolo, nabbéréyangngi mennang pappagguruwangngéwé lao ri iko. ‘Ri onrong makkuwaié bawang tuwo arasoé; pandangngé banna engkai ri tana makkuwaié. Rékko marakkoi uwaina, maddéké-rékéi iyaro arasoé, lebbi gattii naiya tanet-taneng laingngé. Padahal matakka mupa sibawa tenniyapa wettunna, ritubbang sibawa riyala akkégunanna. Makkuwaniro tau iya dé'é nakképuwang, Takkalupai ri Allataala, nateddénna amménasanna. Silaci wennang iya masomé'é mancaji attuwangenna; sarang lawa-lawaé mancaji atepperenna. Masse'ga iyaro sarangngé rékko ripancajiwi sanréreng? Tahagga iyaro wennangngé rékko riyalai akkatenningeng?’ Pada-pada ariyaé, matakkai tau iya dé'é nakképuwang; rékko natappai esso, tuwoi macommo sibawa pennoiwi tammengngé. Ure'na nabebbe'i batu-batué ri tanaé; mabbebbe masse, dé' namagampang goyang. Iyakiya cobai, bébbui makkekkuwangngé iyaro ariyaé, na samanna dé' naengka naonro kuwaro. Ya, asennangenna tau majaé banna iyaro bawang; poléi tau laingngé sibawa sulléiwi. Iyakiya Allataala dé' naengka nasalaiwi tau matinulué, sibawa dé'to naengka natulungngi tau madorakaé. Naébbui matu macawa témummu, gora-gorai matu marennu iwému. Tau céccéékko masirii matu sibawa marasa mariyawa, sibawa bolana tau majaé risolangiwi matu gangka ancuru.” Polé ri sisebbu pakkutana iya napangoloé Allataala, muwi séddi dé'to gaga naullé bali tolinoé. Mapanré senna Allataala sibawa makuwasa; niga mulléi tahang méwai Aléna? Napalétté Allataala bulué tennaisseng tauwé, nainappa nabaliccuwa sibawa cai. Napatatténréngngi Allataala angkanna taggottang linoé, sibawa taggoyang-goyang alliri pattula'na linoé. Naullé Allataala mattéyangngi mata essoé mompo ri éléé, sibawa lawa-lawaiwi wéttowingngé mattappa ri wennié. Napallebba'i bitaraé tenribantu; Naléjja-léjja'i lekke'na naga tasi'é. Napakkennai atuna wéttowing yattangngé ri bitaraé, makkuwatoro wéttowing Bidu'é, wéttowing Belantik sibawa wéttowing Kartika. Dé' taulléi pahangngi sininna winru-Na, dé' taulléi bilangngi sining anu makalallain-Na. Laloi ri yoloku, iyakiya dé' uwitai; laloi ri benrékku, iyakiya dé' namanessa ri aléku. Rékko marrampasa'i, niga barani mattéyangngi? iyaré'ga barani makkutana ri Aléna, ‘Eh, maga-Ko?’ Dé' natahangngi Allataala cai-Na sibawa pella atin-Na; muwi sining pabbantunna Rahab tunru'to ri aléna. Jaji, pékkugi weddikka bantai? Nasibawang ada-ada aga ubaliwi matu? Namuni dé' upasala, aga ulléku, sangadinna méllau pammasé polé ri Allataala hakikku? Akkalarapanna mappébaliwi rékko mangobbika, bata-bataka, tongengngiga maélo méngkalingai saddakku? Nareppo'ka ri laleng anginrajaé, sibawa tambaiwi anrasa-rasakku temmakkéalasang. Dé' Naleppessakka mannyawa muwi céddé; mala Nabolloika sibawa apaireng iya maseroé. Harusu'ka'ga mappasiéwa awatangeng sibawa Aléna? Iyakiya itai, temmaka héba'na awatangen-Na! Akkalarapanna lao ri Aléna pangoloka pappotane, niga barani mobbii Allataala lao ri pengadilangngé? Matinuluka sibawa dé' upogau' dosa, iyakiya témukku samanna makkedai sibalé'na; tungke' ada iya naébbué iwéku, samanna napassalai aléku. Rékko tau iya dé'é napasala matéi tennasenna-senna, macawa bawammi Allataala. Nabbéréyangngi Allataala lao ri tau madorakaé, sibawa sining hakingngé Naébbui buta maneng. Allataala pogau' manengngi iyaé, rékko tenniya Aléna, nigapi? Labe'i esso-essoku sibawa makencang, nainappa teddéng temmasennang. Pada-pada lopi tajolloé, laloi atuwokku sibawa masitta, siggatti bokangngé tajjollo, séro'i anréna. Nah, rékko makkuwaitu, paduli agaka? Dé'gaga sabung iya mullééngngi patteddéngngi dosaku! Napattongekka Allataala ri laleng acarépangngé, angkanna muwi pakéyakku mangga' tokko mappakaciddi-ciddi. Akkalarapanna iyaro Allataala tolinoi, uwulléi matu baliwi Allataala; nainappaki mangolo matu ri pengadilangngé untu' puraiwi sininna assasangngé. Iyakiya ri yelle'ta dé'gaga jassa iya weddingngé madélékiki sipadduwa. Tennapodo mappésauwi Allataala hukkukka sibawa pabélaiwi aseron-Na polé ri aléku! Dé' umétau ri Aléna sibawa maélo mabbicara makkekkuwangngé, saba' uwissengngi atikku muto. Cauna sibawa maciddi'na sibawa atuwokku, nautiri'i apairenna nyawaku. Oh Allataala, aja' Mupassalaka; pakatajanni magi Muéwaka. Aga sarona Mutenre makkuwaiyé, sibawa mabbéréyangngi wassélé ébbu-Mu muto? Aga sarona rékko Musokongngi pallolongenna sibawa rancanana sining tau majaé? Pakkitam-Mu dé' napada pakkitanna tolinoé sibawa umuru'-Mu dé' nasipponco umuru'na. Rékko makkuwaitu, magi Mucuccungngi sininna dosaku? magi Mulellungngi tungke' asalakku? Sitongenna Muwisseng sibawa maingé, makkédaé dé' upasala, iyakiya tongeng. Muwisseng makkedaé muwi séddi tau dé'to namampu passalama'ka polé ri limam-Mu. Iyya'é riwinruka ri limam-Mu, masa makkekkuwangngé maélo-Ko paccappuka? Engngerangngi makkedaé polé ri tana litaé Mupancajika! Masa Muwébbuka lisu mancaji awu? Mupakkulléi ambo'ku pancajika sibawa Mupawekke'ka ri laleng parémmananna indo'. Mubentu'i tubukku sibawa buku-buku nenniya ure; Muwéréngngi juku bukukku sibawa oli pabbebbe. Muwérékka atuwong; Muwamaséika, Mujagaiwi nyawaku sibawa pappiyara-Mu. Iyakiya makkekkuwangngé uwisseng makkedaé sikuwaéro ittana, mammekko-mekko-Ko pura rancanai acilakakku. Mujagaika rékko pogau'ka asalang kuwammengngi weddingngi Musampéyang mabbéré paddampeng. Rékko pogau'ka dosa, macilaka tongeng totoku! Iyakiya rékko dé' cellana pangkaukekku, tette'ka riyangga pogau' dosa! Dé' ubarani makkai ulukku, saba' marasa messé sibawa ripakatuna. Rékko lolongekka wassélé, namuni dé' nasiyaga, Mulellukka pada-pada singaé. Sibawa Muwappaitangngi paimeng akuwasam-Mu, banna untu' péttaurika. Tuli pangolo-Ko sabbi méwaka; sibawa pédé battowai cai-Mu lao ri iyya. Mupangarai pasukang-pasukang barué untu' gasaka sibawa musuka. Magi Muleppessakka jaji ri linoé? Lebbi kessingngi bawang matéka bawang ri wettu dé'na naitai tolinoé! Na samanna dé' naengkaka rijajiyang, saba' polé ri parémmanangngé matteru rikuburu. Ah, dé'na namaittana umaté matu, naleppessanni alé-aléku, kuwammengngi uwulléi péneddingiwi wettukku iya monroé mupaé. Dé'na namaittana ulao sibawa dé' nalisu, mattuju ri wanuwa iya mapettangngé sibawa makalemmeng senna'é, wanuwa iya mapettangngé, penno wajo-wajo sibawa akacaungeng, kégi cakkaé sinrupai sibawa pettangngé.” Ayub, muwasengngi dé' nariyullé baliko? Muwasengngi mammekkoki nasaba pangéllé'mu? Manuru pallolongemmu iyaro ada-adammu dé' nasala. Manuru pallolongemmu mapaccikko ri yolona Allataala. Iyakiya tennapodo aléna Allataala mabbicara! Sibawa tennapodo napaissengi-Ko, makkedaé iyaro pangissengengngé maéga sulapa'na, sibawa dé' naulléi pahangngi tolinoé. Namumainge makkedaé anrasa-rasammu dé' nasiyaga, ripasibanding sibawa pahukkungeng iya sitinajaé mutarima. Masa mullé mpellungiwi esse'na Allataala? Masa mullé pahangngi akuwasan-Na? Akuwasan-Na lebbi tanréi naiya bitaraé; dé' mulléi rapii sibawa malai. Akuwasan-Na lebbi maliyungngi naiya linona tau maté, dé' sises-siseng mulléi pahangngi. Akuwasanna Allataala lebbi malowangngi naiya linoé, sibawa lebbi sakkai naiya tasi malowangngé. Rékko Natikkekko sibawa natiwiko ri mahkama-Na, nanigana barani lawa-lawaiwi tindakan-Na? Naisseng Allataala tau pojiyéngngi mabbellé; jana mennang dé' naleppe polé ri matan-Na. Rékko indo kaleddé liyaé jajiyangngi kaleddé makacuwa, nappai tau madonggoé mancaji mapanré. Ayub, pépaccingiwi atimmu, assessekaléno! Assempajanno lao ri Allataala! Patteddénni dosaé polé ri atimmu sibawa pabélaiwi jaé polé ri bolamu! Naweddikka moloiwi atuwongngé sibawa sabbara nenniya barani; masse'ko matu tettong sibawa dé' naparellu marasa mausé, mala apeddiremmu dé'na musénge'i; padai lémpe nonnoé, nallupai tauwé. Lebbi matajangngi matu atuwommu naiya essoé, sibawa wettu-wettu mapettangngé ri laleng atuwommu siccakka tappa éléé. Masse'ko matu sibawa penno paddennuwang; nalinrungiko Allataala angkanna amakko. Dé' mumétau matu lao ri balié; maéga tau méllau tulung matu ri iko. Iyakiya tau majaé makkitai matu sibawa malippu, saba' untu' mennang dé' gaga pattulung. Séddi-séddinna amménasanna mennang iyanaritu kuwammengngi naleppu masitta ajjalenna.” Iyya tolinoto iya engkaé akkalenna; sininna iya mupowadaéro upahanni. Nainappani, niga dé' naisseng manengngi iyaro? Jaji, aja' muwasengngi mupacaurika! Ricawa-cawaika ri sellaoé sibawa sahaba'é, padahal iyya'é tongeng sibawa dé' sala-salanna. Riyolo nabaliwi Allataala sempajakku, rékko mangobbika méllau ribantu. Mupakatunai tau macilakaé, na atuwommu amangngi; tau iya mawé'é sempé muunrui. Iyakiya atuwonna parampo'é dé' nariyancang; tau iya baraniyé méwai Allataala, tuwoi amang. Padahal déwata iya nattuwangngé mennang, banna awatangeng riyalé bawang. Akkutanano lao ri manu'-manu'é sibawa olokolo laingngé nanawérékko matu mennang pappagguruwang. Ellauno pappakatajang ri mahlu'é ri linoé sibawa ri tasi'é, namutarima matu pappakatajang. Niga ri yelle'na manenro dé' namaingekiwi, makkedaé pappancajinna mennang iyanaritu aléna Allataala? Naatoro'i atuwonna sininna mahlu' iya engkaé; makuwasai lao ri nyawana tungke' tolinoé. Pada-pada lilaku napoji kanyaméi inanré iya manyamengngé, makkuwaniro daucculikku napoji méngkalinga ada-ada. Aga Nabongkara dé' naulléi patettongngi paimeng niga Natawang dé' naulléi leppe paimeng. Natéppo'i uwai, namarakko sibawa makabuttu maneng; Naleppessangngi massolo, napaappo lémpe'é! Iyaro Allataala mawatangngi, masse sibawa tassebbo! Topabengnguwangngé sibawa ribengnguwangngé engkai ri yawa akuwasan-Na. Nareddu'i pangissengenna sining panguwasa pamaréntaé, sibawa sining pamimpingngé Napancajiwi addicawang. Napasempé'i arungngé sibawa Natawangngi mennang; Napakariyawai imang-ngimangngé sibawa sining tomariyoloé. Napammekkoi tau iya maccaé mabbicara, Nareddu'i pangissengenna sining tomatowaé. Napakasirii tau iya mariyoloé; Naalai akuwasanna mennang iya makuwasaé. Natajangiwi onrong-ngonrong iya mapettangngé; Natappai wajo-wajo malotong-lotongngé. Naébbui bangsa-bangsaé mabbija-bija sibawa madécéng, nainappa Napaccappu mennang gangka ancuru. Napancajiwi sining pamimpingngé alippuwang, angkanna sollé mennang temmakkéakkatta. Maggarambangngi mennang ri laleng pettangngé, sibawa tassulus-sulung samanna tau mabo' énungeng. Iya manennaro pura uwita sibawa aléku méngkalingai, nenniya tonget-tongeng upahang. Aga muwisseng, uwisseng towi; aja' muwasengngi cauka polé ri iko. Iyakiya maéloka mabbicara sibawa Iya Pommakuwasaé; macinnaka méwaiwi parakaraku ri yolona Allataala. Saba' mutongkoi adonggommu sibawa bellé, dé' assilaingenna sibawa sanro-sanro bellé. Akkalarapanna dé' mumabbicara, naullé riyangga'ko mapanré. Naéngkalingani pabbantaku; pénessaini pangéwaingekku. Weddigga nasaba Allataala, mumabbellé? Weddikkoga mabbellé untu' apentingen-Na? Weddikkoga maccowé ri Allataala, sibawa méwaiwi selaku pangacara? Rékko naparéssako Allataala, makessigga matu wassélé'na? Mulléga bengnguwangngi, pada-pada bengnguwangngi tolinoé? Rékko maccowéko, namuni sibawa mammekko-mekko, nahukkukko matu Allataala sibawa mabecco. Dé'ga napatassélengngi nyawamu arajanna Allataala? Dé'ga nakeccingiwi atimmu aseronna? Sininna pangajamu padai awu iya dé'é nakkéguna; pangéwaimmu padai tana lita iya magampangngé mareppa. Rimakkuwannanaro ammekkono, leppessakka mabbicara! Dé' upaduliwi muwi maga addimonrinna! Sadiyaka mappésonang nyawa! Baranika saba' pettu paddennuwanna! Rékko maéloi Allataala mpunoka, uwabbéréyang bawang, iyakiya uwéwaiwi matu kédo-kédoku ri yolo-Na. Naullé nasaba abaraningekkuro usalama, saba' tau majaé dé' nabarani matu mangolo ri Allataala! Makkekkuwangngé éngkalingai madécéd-décéng ada-adakku; pénessaiwi pappakatajakku. Sadiyani upangolo parakaraku; mateppe'ka, dé' naweddikka ripassala! Puwang, rékko polé-Ko sibawa teppuka, maéloka mammekko sibawa tajengngi ajjalekku. Iyakiya tarimai iya duwaé paréllaukku, kuwammengngi ubarani moloi-Ko paimeng: appésauno sissaka, sibawa aja' Mugeppaka sibawa aserom-Mu! Abbicarani, umappébali matu. Iyaré'ga leppessakka mabbicara, nainappa mubali! Siyaga égana asalang sibawa dosa iya upogau'é? Sininna pelanggarakku sitinajai Muteppu! Magi Muléssé sibawa massala polé ri aléku? Aga saba'na Muwangga'ka balim-Mu? Bannaka daud-daung iya madduttungngé nakenna anging lalo, masa Mupéttaurika! Bannaka daramé rakko sibawa makelle, pékkugi wedding Mulellukka! Mupattentungekka toto mapaié; Muwale'i asalakku ri wettu maloloku. Musiyoi ajéku sibawa ranté bessi; sininna kédo-kédoku Mujagaiwi. Mala palakajéku, dé' naleppe polé ri pakkitam-Mu. Namancaji marapona pada-pada aju bonnyo'é; pada-pada kaing nanré cecco mancajika matabu. Sipongeng jajinna iyaro tolinoé malemmai, dé' pakkullénna; maponco atuwonna enrengngé pennoi anrasa-rasang. Mallengnge'i sibawa makelle pada-pada bungaé; lennye'i pada-pada wajo-wajoé, matteru teddéng. Oh Allataala, masa maélo-Ko mitaka, sibawa pangoloka ri pengadilam-Mu! Naulléga tolino iya madosaé mappapolé gau iya sukkué? Pura Mupattentuni jumellana umuru'na tolinoé; jumella ulenna purani Mupastikang. Mupattette towi pakkaséséng atuwonna; dé' namakkullé najjalékkai. Leppessangngi mappésau aja' muganggui; kuwammengngi naulléi péneddingiwi atuwonna narapi cappu tugasna. Engka mupa addennuwang lao ri aju iya ritubbangngé; cura'i matu paimeng, nainappa mattakké. Namuni matabu'ni ure'na ri laleng tanaé, sibawa maténi tona nasaba bonnyo'ni, iyakiya rékko nagéssai uwai, tuwoi paimeng; pada-pada tanet-taneng maloloé, mompoi cura-cura'na paimeng. Iyakiya rékko matéi tolinoé, cappui curitana; matéi, nainappa kégani lao? Pada-pada uwai mallajangngé polé ri laleng tapparengngé, pada-pada salo nonnoé uwaina gangka cappu, makkuwatoro tolinoé iya matéénna: dé' naulléi matu tokkong paimeng. Dé' matu napésedding ri wettu engkana mupa langié, dé'na naengkana naoto polé ri tinrona. Subbuka ri laleng linona tau maté; linrungika narapi dé'na Mumacaina. Iyakiya pattentuni wettué untu' méngngerangngi aléku. Saba', rékko matéi tolinoé, naulléga tuwo paimeng? Polé ri essoé lao ri essoé mattajekka narapi labe iyaé wettu apairekku. Namuwobbika matu, nauwabbéréto matu pappébali; Mucarinnaika matu paimeng, mahlu' iya Mupancajiyé. Nainappa Mujagaiwi matu tungke' jongkaku, iyakiya dé'na Mujampangiwi dosaku. Muwaddampengengngi matu dosaku sibawa Mupassalai; asalakku wettu riyolo Muleddai. Matti maruttungngi matu sining bulué sibawa tassiya-siya, sibawa bulu batu iya masse'é léssé polé ri onronna. Risossoi matu sining batué ri uwai iya massolo'é maraja; riyalirengngi matu tanaé ri bosi rajaé. Makkuwaniro Muancuru amménasanna tolinoé. Mucaui untu' mannennungeng; Musuroi lao sibawa Mupinrai tappana. Mancaji tau malebbii ana'-ana'na, iyakiya dé' naissengngi. Narékko mancaji matunai mennang, dé'gaga paissengiwi aléna. Banna angéttukeng tubunna napéneddingi; banna sussa atinna iya nanrasa-rasaiyé.” Akkalarapanna iyaro ada-adammu riturusiwi, dé' muwi séddi tau métau iyaré'ga massempajanna lao ri Allataala. Ada-adammu pabuttiwi makkedaé pasalako, iyakiya mutongkoi jamu sibawa lécco-lécco ada. Dé' naparellu uteppuko sibawa upassala, saba' polé ri ada-adammu muto nariyappissengekko. Muwasengngi iko tolino mammulang iya rijajiyangngé? Engkakoga wettunna ripancaji sining bulué? Muwéngkalingaga Allataala mébbui rancana-Na? Aga ikoga bawang mappunnai pangissengeng tolino? Sininna iya muwissengngé, muwi idi riisseng towi; sininna iya mupahangngé, manessa towi ri idi. Iyaé pangissengengngé ritarimai polé ri tau iya maubengngé; engka mémenni mennang ri wettu dé'napa narijajiyang ambo'mu! Magi mutarimai passaléwona Allataala? Mabbicaraki sibawa sabbara nenniya malemma ri laleng asen-Na. Iyakiya ménré'i pellamu, makkaca-kaca matammu; macaiko lao ri Allataala sibawa bantai. Naulléga tolinoé dé' sises-siseng napasala? Weddigga ripattongeng ri yolona Allataala? Mala muwi lao ri malaéka'é dé'to natepperiwi Allataala; dé' mennang namapaccing ri pakkitan-Na. Apalagi tolinoé iya majaé sibawa marota'é, iya memme'éngngi jaé pada-pada uwai bawang. Engkalingai Ayub, upakatajangekko matu séuwa, iya nappagguruwangngé tau mapanré lao ri iyya. Iyaro pappagguruwangngé natarimai polé ri toriyolona, nanapatterui sibawa sukku lao ri wija-wijanna. Iyaro wettué dé' gaga tau laing ri wanuwanna mennang; dé' gaga papusai mennang polé ri Allataala. Tau maja iya tenre'éngngi pada-padanna, manennengngi matu sillampé atuwonna. Oni-oni maseroé licco'i dauccilinna; ri wettu amangngé poléi parampo'é gasai. Dé'gaga addénnuwangeng ri aléna léssériwi pettangngé, saba' peddanna paunoé lellungngi ri tungke' wettu. Manu'-manu' nasar-é tajengngi wettu amaténna, maéloi mennang memme'i ujuna. Namainge'na makkedaé massalawuni esso mangolona. Abalaé padai arung poré, sadiyani maélo tikkengngi. Makkuwaniro totona tau iya méwaéngngi Allataala, sibawa barani méwai Iya Pommakuwasaé. Mattette'i ri kota-kota iya tassiya-siyaé, risining bola iya dé'é gaga monroiwi. Iyaro kota-kotaé purani ripattentu untu' tette mancaji ruttungeng. Asugirenna iyaro tauwé teddéngngi matu temmabbaté; waramparanna cappu sisengngi matu. Dé' naleppe matu polé ri pettang kape'é; nangurengngi matu api cura'-cura'na. Ancuru'i matu nasaba warungeng bawana Allataala. Rékko mateppe'i lao ri iya dé'é nakkéguna, ribengnguwanni matu; sibawa pamale iya natarimaé matu, dé' tona akkégunana. Ri wettu dé'napa narapii wettunna, matéi matu, pada-pada takké makelle iya dé'énna naulléi manyilana. Pada-padai pong anggoro iya madduttungngénna buwana, pada-pada pong zaitung iya maddunué unganna. Tau majaé dé' matu nabbija; cappui nanré api bola iya ripatettongngé polé ri wassélé pasoso'na. Iyanaro mennang iya rancanaéngngi jaé sibawa pogau'i, tuli tattampu'i bellé ri laleng atinna.” Uppannapa iyaro omong kosongngé mupappésau? Aga pakérék-kérékko untu' mappébali? Akkalarapanna ikoé iyya, na iyya iko, wedding tokka mabbicara pada-pada iyaro. Ulémpekiko sibawa ada-ada; upaccilic-cilingngi matu ulukku. Upakkasse'i matu atimmu sibawa maddupa-rupang tangnga; ada-adakku mabbéréi matu passaléwo. Rékko mabbicaraka, dé' nasoro anrasa-rasakku; rékko mammekkoka, aga tona akkégunana? Allataala, mébbuka poso; sininna kaluwargaku purani napaccappu. Naéwaka sibawa natikkekka. Makkekkuwangngé makojo marakkoni tubukku, na lao ri maéga tau iyanaro buttinna makkedaé puraka madosa. Najjamerru Allataala sapé'-sapé'i tubukku; naitaka sibawa nabenci senna. Naéllé'ka sining tauwé sibawa bawa tattimpa malowang; nakatulukka sibawa naleppa'i rupakku. Nabbéyakka Allataala lao ri tau madorakaé; Napasempé'ka ri limanna tau madorakaé. Atuwokku ri yolona amang sibawa saléwangeng, iyakiya nagasaka Allataala sibawa tennasenna-senna. Natikkengngi cekkokku sibawa Naggenrungekka; Napancajika acculé-culénna untu' mallati. Temmarasa messé matterui napanaka, angkanna tassiya lise babuwaku. Maggasai pada-pada séddié pejuwang, sibawa loka makkolik-koling. Pakéka karung tanrang amesséng, sibawa tudang ri laleng awué nasaba ricauka. Macella rupakku nasaba terika; boro amporo matakku sibawa magawu. Iyakiya dé' upogau' ateddekeng; manessani malemmpu sempajakku lao ri Puwangnge. Eh lino, aja' musubbui jaé lao ri aléku; aja' mupammekkoi kelli'ku méllau adélékeng. Uwisseng makkedaé Pangéwangekku engkai ri surugai; mabbéréi asabbiyang makkedaé dé' umadosa. Naéllékéllé'ka sellao-sellaoku sibawa nacawa-cawai; mangoloka ri Allataala méllau bantuwang uterito. Tennapodo aléna Allataala méwaika ri yolo-Na, pada-pada séddié tau iya macenningngé méwaiwi sahaba'na. Taut-taukku iya monroé dé'na namaégana; dé'na namaittana ulao nadé'na ulisu matu paimeng. Macawé'ni ajjalekku, mawé'ni pettu nappase'ku; banna kuburu iya monroé untu' aléku. Napancajika tauwé akkéllé-kéllékeng; uwitai pékkugi mennang massindiri. Iyya'é malempuka, oh Allaataala. Ateppe'no ri iyya! nigapi mulléi sokongngi ada-adakku? Mutongkoi atinna mennang angkanna dé' napahangngi; aja' narapii mennang patunru'ka. Manuru warékkadaé, niga mappissengengngi sellaona untu' asaronna, ana'-ana'na muto tarimai matu pamale'é. Risindiri'na makkekkuwangngé sibawa warékkadaéro; poléi mennang untu' mamméccuiwi rupakku. Massalawu matakku nasaba asarang; sininna tubukku makojo maddékéréké. Tasséleng sibawa hérang tau malempué; tau dé'é napasala, naangga'ka dé' nakképuwang. Tau iya makessingngé sibawa iya dé'é napasala, pédé mateppe'i ri cara atuwonna naéloriwi Allataala. Iyakiya akkalarapanna lao manekko mai, dé' muwi séddi tau mapanré upoléi matu. Labe'ni esso-essoku, dé'na najaji sininna rancanaku; teddéng toni sininna nawa-nawa atikku. Iyakiya makkedai sahaba-sahaba'ku, ‘Iyaro wennié lakesso sibawa tajangngé mawé'ni lettu.’ Iyakiya uwisseng ri laleng atikku makkedaé tette'i mapettang keadaakku. Banna linona tau maté ritu uwamménasai, kuwana'ro matinro matu ri laleng pettangngé. Kuburu'ku Uwasengngi “Ambo'ku”, sibawa sining lati manrééngngi tubukku uteppu “Indo'” sibawa “Ana'darakku”. Kégani paddennuwakku; niga mitai engkana asennangeng ri aléku? Rékko nonnoka ri linona tau maté, dé'na uwappunnaina paddennuwang.” Magi muwasekki madonggo, sibawa mupappadaki sapingngé? Caimu banna napeddiriwi alému. Harusu'ga untu' apentingemmu ateddéngengngi linoé pabbanuwana, sibawa ripalétté'i sining bulué polé ri onronna? Pajjennangenna tau majaé pasti ripeddéi; dé'na naengka matu naripalluwa apinna. Tajangngé ri laleng kémana mancaji massalawuni; pajjennangeng pappécakkana dé'na nattappa. Jongkana iya mattinettoé mancajiwi tassulus-sulung; rancanganna muto nassabariwi tabbuttu. Joppai muttama ri laleng siyoé, natassakka ajéna. Nalani siyo amputuna, angkanna ritikkeng. Ri tanaé, tassubbui tulu siyoé; ri lalengngé, tappasangngi jebba'é sibawa panganraé. Tau iya ripatassélengngé ri aserong polé tulilié; riyaccowériwi ri taué tassijongka-tassijongka. Riyolo mawatangngi, makkekkuwangngé maddékérékéni; risilaongengngi ri abalaé kégi-kégi. Olina riyanréi ri lasa maladde'é; taiyya sibawa ajéna makebbong mannana. Risitta'i polé ri kémana, onronna marasa amang, nainappa riyassarénréngeng untu' mangolo ri amaténgngé. Makkekkuwangngé nigi-nigi weddingngi monro ri laleng kémana, sibawa kuwaniro riguguri balérang, pappépaccing lasana. Marakko sining ure'na sibawa makkapuru; takké-takkéna marakko sibawa cakkikki. Dé'na nariisseng ri laleng iyaré'ga ri saliweng kota; dé'na muwi séddi tau iya méngngerangngé mupi asenna. Polé ri tajangngé rirukkai lao ri laleng pettangngé; polé ri linona tau tuwoé ripaddésu'i. Dé' nappunnai ana' sibawa wija-wijanna; ri kampong assalenna dé' muwi séddi tau monro. Naéngkalingana totona tassélenni pabbanuwaé ri yajang, na pabbanuwaé ri alau ténréi nataro tau. Makkuwaniro totona tau madorakaé, mennang iya dé'é nabati-batiwi Allataala.” Makkolik-kolinni mupakatunaka, sibawa temmasirimu mupanrasa-rasaka. Akkalarapanna salai pangkaukekku, iyaro dé' naparogiko. Mupikkiri'i alému lebbi kessingngi naiya iyya; muwasengngi asussakku buttinna asalakku. Issenni makkedaé mattengngakka nasissa Allataala, sibawa ritikkeng ri laleng jebba'-Na. Maronta'ka nasaba Abeccokengngéro, iyakiya dé' muwi séddi tau jampangika. Goraka, “Kégani adélékengngé,” iyakiya dé' gaga iya méngkalingaka. Natongkoi Allataala lalekku, dé' uwulléi labe, sining lorokku Naébbui mapettang kape. Narampasa manengngi waramparakku, sibawa Nasolangiwi aseng makessikku. Nagasaka polé tulili, pada-pada tau bébbuéngngi ure polé ri tanet-tanengngé, nainappa Naleppessang maddékéréké sibawa makelle, makkuwaniro Nasitta sininna paddennuwakku. Malluwa-luwa'i caina Allataala lao ri iyya; Naangga'ka selaku balin-Na. Maggasai pasukan-Na tenriyullé téppo'i; nalawai lalekku, sibawa nakeppungngi kémaku. Napabélaiwi sumpuloloku polé ri iyya; mancajika tau laing lao ri sininna sissekku. Napabélai maneng aléna sininna sellao-sellaoku; dé'na naéngngerakka sahaba-sahaba'ku. Nallupaini ata makkunraikku niga iyya, puwanna mennang; naangga'ka tau iya dé'éppa naissengngi. Uwobbii atakku, iyakiya dé' nappébali, namuni upalécéi sibawa malemma. Maja péneddinna bainéku bauwi nappase'ku, dé' namaélo maddeppérika silessurekku. Nacella-cellaka ana'-ana'é ri lalengngé; rékko tettokka, nacawa-cawaika. Tasséleng sellao maréppé'ku mitaka; nasalaika mennang iya uwamaséiyé. Buku mani nadoko oli tubukku; céddé bawanna maté sibawa mallajang nyawaku. Eh sellao-sellaoku, amaséika, saba' limanna Allataala munruka. Matterui Allataala tenre'ka; magi muturui Aléna? Dé'paga mucau sissaka? Paccappurenna riokii ada-adakku, angkanna tuli riyéngngerangngi matu; memmuwaré nasibawang bessié riyapparengngi ri batué, kuwammengngi nattahang sillampé wettué. Uwisseng makkedaé ri surugaé engka Méwaika; angkanna poléi matu tulukka. Namuni oliku malo sibawa mallesse-lesse, iyakiya ri wettu mattubukku mupa, uwitai matu Allataala. Nasibawang matakku muto muwitai Aléna, sibawa untu' aléku mancajiwi sahaba. Ancuru atikku saba' makkedako, ‘Pékkugi caranaki teppui?’ Sappako alasang untu' mébbu parakara. Iyakiya, makkekkuwangngé étauno ri peddangngé! Saba' macayii Allataala sibawa hukkungngi tau madosaé; namuwissengngi, makkedaé engka Allataala iya mangadélékiyéngngi tolinoé.” Iyaro ada-adammu mappakatuna tongeng, iyakiya uwisseng pékkugi baliwi. Dé'ga muwissengngi makkedaé polé ri wettu riyolo, mappammulai ritarona tolino bunge'-bunge'é ri linoé, arennunna tomajaé banna cinampe bawang, sibawa asennangenna tau madorakaé sikédé mata? Namuni arajanna lettu'i ri bitaraé, angkanna ulunna nagéssai ellungngé, iyakiya lennye'i matu mannennungeng, teddéngngi polé ri linoé sibawa cara iya matunaé. Sining tau iya puraé missengngi, makkutanai matu, ‘Eh, kégi laona?’ Teddéngngi matu pada-pada wajo-wajona nippié, lennye pada-pada pakkitangngé ri wennié. Dé'na napaita ri mataé; dé'ni gagana ri onrong naonroiyé. Iya naénnauwé riyolo polé ri tau iya dé'é nappunnai harusu'i nasulléi ana'-ana'na. Namuni maloloi sibawa poréi, iyakiya dé' namaittana namancaji awu bawang. Iyakiya iyaro inanré tappinrai ri laleng babuwaé, mancajiwi racung mapai pattiwi amaténg. Waramparang riyénnau iya naemme'é, tarapassai naluwa; napassui Allataala polé ri laleng paruna. Tomajaé ménungngi matu racung pattiwi abalaé, nassabariwi matu maté pada-pada naokkoé ula mamoso. Dé' napéneddingiwi matu minnya zaitun iya maonaé, iyaré'ga susu sibawa cani tattuppa-tuppa'é. Sininna asaronna harusu'i napalisu; wassélé usahana dé' matu napéneddingiwi. Saba' natenre'i sibawa dé' najampangiwi tau iya dé'é nappunnai; narampasa'i sining bola iya dé'é napatettongngi. Nasaba angowanna dé' naissengngi paggangkanna, nadé'na matu nacau. Rékko manréi napaccappu maneng, rimakkuwannanaro adécéngenna dé' nattahang. Wettunna maccoppo adécéngenna, anrasa-rasangngé sibawa saraé poléi geppai. Wettunna marépo lisekiwi babuwana, macai senna'i Allataala sibawa hukkungngi. Rékko lariwi massala polé ri peddang baja'é, riloi matu ri pana tembagaé. Nakennai pana, angkanna malo; cappa pana iya lala'é bettui tubunna, nanasalipurini tau atinna. Ancuru'ni sininna waramparang natarona; aléna silaong sininna kaluwargana nanréi api iya dé'é napalluwa'i tolinoé. Langié timpa'i jana; tokkongngi linoé méwai. Sininna asugirenna cappui matu, nasaba tuppa caina Allataala. Iyanaro totona tau iya madorakaé, toto iya napattentué Allataala untu' aléna.” Palaloka massullé mabbicara, purairo weddissiko mappakatuna! Tenniya nasibawang tolinoé massasaka, jaji dé' namaga rékko makurang sabbara'ka. Itaka, namuhérang matu, takkamennye'ko sibawa mammekko bawamu. Rékko upikkiri'i keadaakkué ténréka nasaba mappakatau-tauna. Magi nariwéréng umuru malampé tau majaé ri Allataala, sibawa waramparanna mennang matteru tattamba? Tuwoi mennang cuku' ittana angkanna naitai ana' eppona mennang mancaji battowa. Ruma tanggana mennang amangngi nasaléwangeng; dé' napapoléi Allataala abalaé ri yasé'na. Mabbija-bijai olokolo'na mennang, sibawa dé' asukkarakenna, mémmana. Ana'-ana'na tau majaé makkaluppekengngi sibawa marennu, pada-pada bimbala lolo iya mariyo-riyoé. Naccowéri oni rabana, suling sibawa kacapi, marowa mennang makkélong sibawa séré-séré. Esso-essona napaccappui mennang ri laleng asennangengngé, sibawa matéi mennang penno adaméngeng. Padahal purai mennang makkeda lao ri Allataala, ‘Abélaiki sibawa laono! Dé' tapaduliwi sibawa dé' tamacinna pahangngi akkatta sibawa élomu untu' atuwotta.’ Pikkiri'na mennang, ‘Tumaningiwi Allataala dé' gaga akkégunana, sibawa massempajang lao ri Aléna dé' gaga appalanna. Tenniyaga nasaba awatangetta bawang, siduppai sininna akkattata?’ Iyakiya dé' sises-siseng usitujuiwi nasibawang laleng pikkirang sibawa pallolongeng makkuwaéro. Engkaga naengka naripeddéi pajjennangenna tau majaé, nanakennai mennang abala sibawa acilakang? Engkaga naengka namacai Allataala lao ri mennang, angkanna Nahukkungngi mennang? Engkaga naengka mennang pada-pada daramé sibawa awué iya nairié anginraja sibawa anging labe? Makkedako, ‘Nahukkungngi Allataala ana'é nasaba dosa ambo'na.’ Iyakiya adakku: Tau madosaé ritu iya harusu'é nahukkung Allataala, kuwammengngi namainge makkedaé nasaba dosana mennang, nanakkiringengngi Allataala pahukkungen-Na. Leppessangngi tau madosaé tanggungngi dosana muto, leppessangngi napéneddingi caina Allataala Iya Pommatanré. Rékko cappuni wettunna tolinoé ri linoé, napaduli mupaga naullé masennang kaluwargana ri linoé? Naulléga tolinoé paggurui Allataala, na aléna Allataala madélékiwi mahlu'é ri surugaé? Iyakiya engkato iya maté penno apaireng, dé' naengka napéneddingiwi asennangengngé. Iyakiya ri kuburu'é, pada-padai mennang léwu; rikatulung ri ule'é sibawa latié. Mémeng uwisseng aga iya mupikkiri'é sibawa sininna ja iya murancangngé. Pakkutanamu, ‘Kégai bolana panguwasaé iya pogau'é pangkaukeng madoraka?’ Dé'paga mutanaiwi tau iya maléwe'é lao? Dé'ga mumateppe ri karéba iya nalaporo'é mennang? Adanna mennang, ‘Ri esso mabbéréna Allataala pahukkungeng, sining tomajaé ripassalama'i matu.’ Dé' gaga iya méwaéngngi kédo-kédona; dé' gaga iya wale'éngngi jana. Ritiwii ri kuburu'é, sibawa riputtama ri kalebbongngé; rijagai tampunna sibawa rijampangi. Massebbu tauwé tinrosiwi ujuna; masommo towi tanaé témpungiwi. Jaji, iyaro passaléwomu kosong sibawa sininna pappébalimmu bellé!” Engkaga akkéguna untu' Allataala, rékko mupogau'i élo-Na? Engkaga saro ri Aléna, rékko sukkui atuwommu? Tenniya nasaba taumu lao ri Allataala, nariteppuko sibawa riyangga pasala, sangadinna nasaba maéga senna dosamu, sibawa maja senna'na tindakammu sibawa kédo-kédomu. Rékko dé' naulléi silessuremmu mpajai inrenna, murampasa'i sininna pakéyanna. Tau iya posoé dé' mupaénungngi, iya malupué dé' mupéddarai inanré. Mupakéi jabatangngé sibawa akuwasangngé untu' sittaiwi sininna tanaé. Tenniya bawang dé' mutulungngi sining jandaé, iyakiya ana' béué mutenre towi. Rimakkuwannanaro ri seddému makkekkuwangngé pennoni jebba, sibawa tennasenna-senna atimmu nasalipuriwi tau. Pédé mapettang essoé, dé' mulléi makkita; tallemme'ko nappo lémpe iya maseroé. Tenniyaga Allataala monroiwi langi iya kaminang matanré, sibawa makkita liyawa, risining wéttowing iya matanré senna'é? Iyakiya makkutanako, ‘Aga naisseng Aléna? Engkai ri munrinna ellungngé na dé' naulléi madélékiki.’ Muwasengngi makkedaé pakkitan-Na ritongkoi ri ellungngé sibawa makkedaé banna joppai ri pakkasésénna langié sibawa linoé? Tette'koga maélo lalo ri laleng iya napilé sining tau majaé? Risitta'i mennang ri wettu dé'napa nalettu wettu amaténna, sibawa riyalireng ri lémpe iya paappo'é. Mennanna ritu iya baranié sampéyangngi Iya Pommakuwasaé, sibawa masengngi dé' Naulléi pogau' agi-agi lao ri mennang. Padahal Allataala pura pancajiwi mennang sugi! Dé' tongeng upahangngi pikkiranna tau madorakaé! Tau iya makessingngé, macawai penno arennung, rékko naitai tau majaé lolongeng pahukkungeng. Sininna appunnangenna tau majaé ancuru sisenni, sibawa nanréi api gangka cappu aga iya monroé mupa. Nah, Ayub, sidaméno sibawa Puwangnge, kuwammengngi mulolongeng atennangeng. Rékko mupogau'i iyaro, pasti lolongekko asarong. Tarimani aga napagguruwakko Puwangnge; taro manengngi iyaro ri laleng atimmu. Lisuno ri Puwangnge sibawa ati mariyawa jaé ri bolana sitinajani mupappésau. Buwanni ulawemmu iya kaminang tuléngngé; aggenrungenni lao ri borina salo iya dé'é nakkuwaéna. Leppessanni Iya Pommakuwasaé mancaji ulawemmu, sibawa péra'mu iya mangke senna'é. Naweddikko tuli mateppe lao ri Allataala, sibawa missengngi makkedaé Aléna assalenna asennangemmu. Rékko massempajakko, Nabaliko matu, naweddingngi murupai sininna jancimmu. Tuli mallolongengngi matu usahamu, sibawa tajangngé tappai matu atuwommu. Tau iya matempoé ripakariyawai ri Puwangnge, iyakiya iya mariyawa atié ripassalama'i. Natulukko matu Allataala rékko dé' mupasala, sibawa rékko mupogau'i élo-Na.” Ebara'na uwissengngi kékai onrong Naonroiyé, kuwammengngi weddikka lao sibawa siruntu Aléna. Na ri Aléna upangolo iyaé parakaraku, polé ri témukku tassiyai ada-ada pangéwaé. Macinnaka missengngi aga Napowada matu, sibawa pékkugiwi mabbéré pappébali. Aga napalancara'iga matu akuwasan-Na lao ri iyya? Dé'! Pasti dé' naéngkalingai matu ada-adakku. Dé' upasala sibawa mulléi méwaiwi aléku ri yolo-Na, naripannesaka matu leppe untu' mannennungeng. Iyakiya Naissengngi sininna lalekku makkuwatoro tungke' jongkaku. Rékko riojika pada-pada ulawengngé, pabuttiwi matu makkedaé mapaccingngi atikku. Mapatoka lao ri Aléna sibawa matinulu, dé' naengka uléssé polé ri laleng iya Napattentué. Sining paréntana Allataala tuli uturusiwi, élo-Na uwaccowéri, sibawa tenniya cinnaku muto. Iyaro Allataala dé' natappinra; dé'gaga iya mullééngngi méwai. Napogau'i aga iya Naéloriyé. Napajoppai matu rancana-Na untu' aléku, sibawa maéga mupa rancana-Na ri lainnaéro. Nasaba métaui ri Aléna, ténréka; pédé upikkiri manengngiro, pédé métauka. Magi Allataala dé' napattette'i esso angadélékengngé, kuwammengngi sining tau iya missengngéngngi lolongengngi adélékeng? Engka sining tau iya paésa'éngngi tanrang pakkaséséngngé, kuwammengngi namancaji malowang tanana. Ménnauwi mennang bimbala makkonrong, sibawa pariwakkéi ri wakké bimbala'na. Kaleddé appunnangenna ana' béué, nalariyangngi mennang; sapinna séddié janda, nasittaiwi mennang selaku boro'. Nalawa-lawaiwi mennang tau kasiyasié lolongengngi ha'na, natarapassa massubbu tau iya kasiyasié. Jaji, iyaro kasiyasié pada-padai kaleddé liyaé iya sappaé inanré ri padang makkale-kale'é; banna ri onrong-ngonrongngéro bawang engka inanré untu' ana'-ana'na. Tarapassai najama dare'na tau laingngé; buwa anggoro'na tau majaé harusu napaddeppungeng. Dé' nappunnai parampa sibawa pakéyang pappella tubu ri wennié. Marica'i nasaba bosi rajaé ri bulué, nainappa maddeppé ri bulu batué untu' mallinrung. Tau majaé napowatai ana' dé'é nappunnai indo ambo, sibawa malai ana'lolona tau kasiyasié iya makkinrengngé ri aléna. Laowi tau kasiyasié temmappakéyang; malupui ri wettu méngngalana gandong ri dare'é. Polé ri zaitungngé mébbui minnya sibawa polé ri buwa anggoro'é, énungeng, iyakiya aléna madekka senna'i. Ri kota-kotaé riyéngkalingai addarékénna tau madangngé, sining tau maloé mangobbii méllauwi rijampangi, iyakiya dé' naéngkalingai Allataala sempajanna mennang; dé' Namaélo bati-batiwi. Engka sining tau iya sampéyangngéngngi tajangngé sibawa musui, dé' mennang naissengngi sibawa dé' naccowériwi lalenna. Ri subué moto'i pabbunoé polé ri atinronna, nainappa massu mpunoi tau iya kasiyasié, na ri wettu dé'napa na élé, coco-coco'i pada-pada pangaé. Paggau' malawengngé tajengngi apolénna denniyarié; napakéi passampo rupaé kuwammengngi dé' nariisseng ri tauwé. Nabongkara'i pangaé bolaé ri wennié; ri essoé naniniriwi tajangngé sibawa massubbui. Untu' aléna, mappakatau-tau senna éléé, iyakiya pettang iya maseroé mappésennang.” Namakkeda Zofar, “Malii tau majaé nasaba lémpe rajaé. tana appunnangenna ritanroiwi ri Allataala; masino-sinoni dare anggoro'na makkekkuwangngé; dé'na gaga iya majjamaé kuwaro. Pada-pada saljué lennye nakenna timo sibawa mata esso, makkuwaniro tau madosaé riyemme ri laleng linona tau maté. Riyallupaiwi ri indo'na muto, sibawa sining latié manréi tubunna. Asenna dé'na narisénge'na matu; ripaccappui pada aju iya maléttungngé. Iya manennaro kajajiyangngi nasaba natenre'i sining jandaé, sibawa mapéddarai lao ri indo' iya dé'é nappunnai ana' worowané. Iyakiya Allataala, nasibawang akuwasan-Na, nalellungngi tau poré. Tinda'i Allataala, namaténa tau madorakaé. Allataala mpéréngngi atuwong manyamengngé, iyakiya jagaiwi dé' temmappettu. Banna cinampe tuwoi sibawa masennang, iyakiya ri munri laowi untu' mannennungeng. Makelle'i pada-pada wella iya dé'é nakkéguna; pada-pada ulé asé iya rirette'é polé ri batanna. Nigana mulléi massakkarengngi gau'éro, iyaré'ga méwai atongengenna ada-adakku?” Weddigga ribilang malaéka iya tumaningiyéngngi? Engkaga onrong iya dé'é natappai tajan-Na? Makkulléga mapaccing tolinoé ri yolona Allataala? Makkulléga mapaccing ri pakkitan-Na? Untu' Allataala, mala muwi kétengngé dé'to namacakka, sibawa wéttowingngé naangga'i massalawu. Apalagi tolinoé, latié, béré-béré! Ri matanna Allataala, dé' tongeng angke'na.” Temmakka kessinna iyaro pangajaé sibawa pappagguruwangngé iya puraé muwabbéréyang lao ri iyya, tau madonggoé! Lao rinigai iyaro ada-adammu tattuju? Niga mpérékko wéré untu' mabbicara pada-padaéro?” Nappébali Bildad, “Ténréi sining tauwé ri linona amaténgngé; uwai sibawa iya monroiyéngngi ténréi. Ri yolona Allataala, tattimpa'i linona tau maté, dé' natattongko angkanna paitai ri Aléna. Allataala pallebba'i langié ri yasé'na tasi'é, sibawa gattungngi linoé ri onrong lobbangngé. Nalisekiwi ellungngé sibawa uwai tarébek-kébeng, iyakiya iyaro ellungngé dé' nasapé nasaba tane'na. Nasubbui tappa-Na ri kéteng tépué ri munrinna ellung iya puraé Napallebba. Nagambara'i lébuna ri tompo'na tasi'é untu' passarangngi tajangngé polé ri pettangngé. Rékko maggera'i sibawa sadda maddaremmeng, ténré alliri-alliri pattula'na langié. Napatunru tasi'é nasaba akuwasan-Na sibawa naajara' towi Rahab nasaba amaccan-Na. Naseringngi langié sibawa nappase'-Na angkanna macakka senna; liman-Na mpunoi naga iya céddé'énna lari. Iyakiya iya manennaro banna tanrang akuwasan-Na; banna bici-bici iya lettu'é ri daucculitta. Temmaka céddé'na pappahatta passalenna Allataala sibawa aseronna akuwasan-Na!” mattanroka: Ri wettu nawérékku mupa Allataala nappase, ri wettu engkana mupa nyawa ri laleng watakkaléku, dé' nateppui témukku ada bellé, dé' napowadai lilaku abbengnguwangngé. Jaji, dé' umaélo powadai makkedaé tongekko; muwi gangka maté mattahang tokka makkedaé dé' umacarépa. Tette'ka makkatenning lao ri apatongekku, sibawa ati macinnokku tuli mapaccing towi. Tennapodo rihukkungngi balikku selaku tomadoraka, sibawa balikku riajara' selaku tau madoraka. Engkaga amménasang untu' tau majaé wettunna Allataala tuntu'i nyawana? Naéngkalingaga matu Allataala terinna rékko nakennai asukkarakeng? Harusu'i nauddangi asennangeng polé ri Allataala, sibawa massempajang lao ri Aléna temmarasa poso. Upagguruko matu passalenna loppona akuwasanna Allataala, upaissengiko rancanana Iya Pommakuwasaé. Iyakiya, alému maneng pura mitai. Jaji, magi muwéréngngi pangaja iya dé'é bettuwanna?” Namakkedana Zofar, “Mappakkuwaniyé carana Allataala Iya Pommakuwasaé hukkungngi tau iya mabecco'é sibawa madorakaé. Rékko maégai ana'na, matéi matu mennang ri laleng musué na ana' eppona tuwoi matu akurangeng. Siyajinna iya engkaé mupa, matéi nasaba sai, na janda-jandana dé' nateringiwi mennang. Weddissa mallappo péra'na sibawa massusung pakéyanna, iyakiya iya manenro péra'é sibawa pakéyangngé mancajiwi matu appunnangenna tau iya malempué atinna. Bolana tau majaé marapoi pada-pada sarang lawa-lawaé, banna bola cinampe pada-pada kalampanna tau panganrowangngé. Napaléwui aléna selaku tau sugi, iyakiya dé' naulléi pakkolingngi, wettunna moto polé ri tinrona, teddénni sibawa lennye asugirenna. Nakennai aserong pada-pada lémpe polé tennasenna-senna. Anginrajaé ri wennié seppungngi sibawa massarénréngengngi lao. Anging alaué makkai, sibawa saringngi polé ri bolana. Riyappo'i tenrikasiyangi, sibawa tarapassa lari sappa allinrungeng. Abuwangenna naduppaiwi tauwé sibawa mappaleppa; kégi-kégi lolongengngi pappakatuna.” Engka onrong akkalingeng kégi riruntu péra'é; engka onrong kégi ripatuléng ulawengngé. Rikaliwi bessié polé ri laleng tanaé; ripaccolo'i tembagaé polé ri batué. Pettang kape'é nabettui, onrong iya kaminang maliyungngé nasalidikiwi. Kuwaniro, ri laleng apettangengngé, sappai tauwé batu-batu. Mabéla polé ri onrong iya dé'é gaga monroiwi, iya dé'éppa naengka nariléjja sibawa nariyola, majjamai tauwé sibawa makkaduwé ri tulué ri laleng goriyang iya masino-sinoé. Powassélé'i anré tanaé untu' tolinoé, iyakiya ri yawanato iyaro tanaé, ribaliccuwa manengngi angkanna tassiya-siya lise'na linoé. Batué ri laleng tanaé tampu'i batu nilam, na awunna mallise'i ulaweng tuléng. Dé' naissengngi bokangngé laleng laowé kuwaro, sibawa manu'-manu' nasar-é dé' naengka naluttu ri yasé'na. Dé'pa naengka singaé iyaré'ga olokolo laingngé molai laleng masino-sino iya mattujué kuwaro. Makkaliwi tauwé ri laleng batué muwi maga tedde'na, nabongkara'i bulué lettu ri ure'na. Wettunna mébbu sebbo ri laleng bulu batué, nalolongenni paramata iya mangke senna'é. Lettu ri assalenna sining saloé nakkaliwi nainappa natimpa aga iya tassubbué. Iyakiya kégani pangissengengngé wedding risappa? Kégani wedding magguru kuwammengngi naripahang? Dé'i gaga pangissengengngé ri tengnga-tengngana tolinoé; dé' gaga missengngi angke'na iya tongengngé. Makkedai borina tasi'é sibawa dolangengngé makkedaé dé' gaga pangissengengngé ri aléna. Dé' nawedding risélé pangissengengngé muwi sibawa ulaweng tuléng, sibawa muwi nasibawang péra' dé'to nawedding riyelli. Ulawengngé sibawa paramata iya kaminang mangke'é dé naulléi padaiwi angke'na. Ulawengngé iyaré'ga kaca manenné'é dé' nawedding ripappadangngi, dé' nawedding riwaja sibawa onrong bunga ulaweng. Mabélai lebbi tanré angke'na pangissengengngé naiya mani'-mani'é, kacaé, iyaré'ga mutiyaraé. Batu topas iya aslié sibawa ulaweng iya tuléngngé, makurang angke'na naiya akkalengngé. Kégai assalenna apanréngngé? Kégaki lolongeng pappahang? Dé'gaga mahlu' tuwo iya puraé mitai, mala manu'-manu'é ri bitaraé dé' naitai. Muwi amaténgngé sibawa abinasangngé makkeda towi, banna mennang méngkalingai karéba-karébanna bawang. Banna Allataala missengngi onrong naonroiyé pangissengengngé, banna Aléna missengngi laleng laowé kuwaro, nasaba Naitai cappa-cappa'na linoé; sinininna séuwa-séuwaé ri yawana langié Nasalidikiwi. Wettunna Nawéréng awatangeng angingngé, sibawa Napattentu pakkasésénna tasi'é; wettunna Napattentu onronna teppa bosié, sibawa laleng iya naolaé billa'é sibawa guttué; ri wettuénnaro Naitai pangissengengngé, Naojiwi angke'na, nainappa Nabbéréyang barakka'-Na. Makkedai Allataala lao ri tolinoé, “Untu' lolongeng pangissengeng, harusu'i mupakalebbi Allataala. Untu' mulléi pahangngi, harusu'ko mabélaiwi jaé.” Napatteruni Ayub pappakatajanna, adanna, “Tennapodo atuwokku weddingngi paimeng pada-pada riyolo, wettunna Allataala linrungika. Tuli Nawérékka pattulung, Nacakkariwi wettunna joppa ri laleng pettangngé. Iyanaro esso-esso ataromporekku, wettunna aréppékenna Allataala cinaungiwi bolaku. Iyaro wettué, Iya Pommakuwasaé naranreng mupa, sibawa ana'-ana'ku engkai ri mattulilikku. Olokolo'ku powassélé'i maéga senna susu. Maéga minnya napowassélé sining pong zaitukku, namuni ritaneng ri tana mabbatué. Rékko sining tomacowa-cowana kotaé tudakka massibawa, sibawa uwalai onrokku ri yelle'na mennang, lésséni sining kalloloé, uwitana muwa mennang. Makkuwatoro sining tomatowaé tokkongngi sibawa pangissengeng; untu' mabbéré pappakalebbi. Mala sining tomarajaé mappésauwi makkeda-ada, sibawa dé' tona nabbicara tau pentingngé. Muwi niga bengngato rékko naéngkalingai passalekku; niga mitaka, napojiwi jasa-jasaku. Saba', utulungngi tau kasiyasi iya méllauwé bantuwang; usokongngi ana' béué iya dé'é nappunnai pattumpe. Napojika tau iya masussa senna'é, utulungngi sining jandaé angkanna amang mennang. Tindakakku malempu temmakkécella; tuli upatettongngi adélékengngé. Untu' tau butaé, mancaji mataka; untu' tau péso'é, iyya iyanaritu ajéna. Untu' tau kasiyasié, iyya mancaji ambo; untu' tau laingngé, iyya mancaji pangéwainna. Iyakiya akuwasanna tau mabecco'é, upoloi, sibawa upassalama'i napanrasa-rasaé mennang. Amménasakku iyanaritu rapii umuru malampéé, nenniya maté sibawa tennang ri bolaku muto. Pada-padaka aju macommo'é tuwona, genne uwai ri ure'na sibawa cinoddo rica'i takkéna. Tuli napojika sininna tauwé, sibawa dé' naengka nakurang awatangekku. Pada mammekko sining tauwé, rékko mabbéréka pangaja; sininna ada-adakku naéngkalingai sibawa tongeng. Puraku mabbicara, dé'na gagana parellu ritambaingengngi; mattemme ada-adaé pada-pada tetti uwai bosié. Sininna tauwé naduppaiwi ada-adakku sibawa marennu, pada-pada patanié duppaiwi bosié ri wettu bungaé. Cabbéruka lao ri mennang wettunna pettu paddennuwang; cahaya tappaku iya masennangngé tambaiwi sumange'na mennang. Iyya ritu makkatenning pappimping, sibawa malai sininna apettungngé. Upimpingngi mennang pada-pada arungngé ri tengngana pasukanna, sibawa usaléworiwi mennang ri laleng asussanna. Iyakiya makkekkuwangngé riyéllé'ka ri tau iya lebbi maloloé. Riyolo uwitai ambo'na mennang matuna senna untu' monrowangngi bimbala'ku silaong asu pakkampié. Untu' aléku dé' nakkéguna mennang nasaba acappurenni awatangeng. Malupui mennang sibawa manrasa-rasa senna, angkanna manré ure marakko ri padang kessi iya masino-sinoé. Bébbui mennang alekale ri padang kessié nainappa nanré muwi daunna iyaré'ga ure'na. Rirukkai mennang sibawa kelli pada-pada tau rukkaé panga. Monroi mennang ri laleng gowa-gowaé; kalebbong-kalebbong ri pepping bulué mancaji bolana. Mowam-mowangngi mennang ri ale'é pada-pada olokolo'é, makkonrong ri yawana alekale'é ri ale'é. Dé' mennang nakkéaseng sibawa dé' nakkéangke, sining tau iya puraé rilellung polé ri wanuwanna. Makkekkuwangngé poléni mennang sibawa nacawa-cawaika; untu' mennang, iyya'é banna addicawakka. Naita matunaka mennang sibawa maja, mala namméccui mennang rupakku. Nasaba naébbuka Allataala malemma dé' pakkullénna, napallessui mennang ajjallokenna. Nagasaka iyaro garembolangngé polé ri yolo, sibawa narancanai mennang asempékekku. Napoloi mennang lalekku untu' paccappuka; dé'gaga séddi palawa-lawaiwi wettunna maggasa. Pada-pada lémpe'é naleppoi mennang témbo attahanangekku; ramé-raméi mennang polé tenre'i tubukku. Nasalipuriwi aléku aserongngé; padai iri angingngé, labe angke'na aléku; padai ellung laloé, teddéngngi asennangekku. Makkekkuwangngé mawé'na maté; dé'gaga aringengeng untu' anrasa-rasakku. Mangéttu maneng bukukku ri wennié; peddi iya tattoddo-toddo'é dé' namaélo mappésau. Nacekké'ka Allataala ri ellong wajukku angkanna pakaiyakku tallombéng-lombéng ri tubukku. Naggeppuwakka ri laleng bungkaé, mancajika pada-pada warowoé bawang! Mangobbika lao ri Iko, oh Allataala, dé' Mumappébali; rékko madosaka, dé' Mupajampangi. Kédo mabecco'-Ko lao ri iyya, Mutenre'ka sibawa sininna awatangem-Mu. Muleppessangngi angingngé lutturekka; ri laleng anginrajaé Mupakaléwa-lewa'i aléku. Uwisseng, Mutiwika ri laleng linona amaténgngé, onronna sininna iya tuwoé ripaddeppungeng. Magi Muluruiwi tau iya macilakaé, iya dé'é naulléi pogau'i muwi aga sangadinna méllau rikasiyangi? Dé'ga uteri silaong tau iya asussangngé, sibawa mamaséiwi tau iya akurangengngé? Uwamménasaiwi asennangengngé sibawa tajangngé, iyakiya asukkarakengngé sibawa apettangengngé polé. Risapé'ka ri saraé sibawa amesséngngé; polé ri essoé lao ri essoé pédé maéga uwanrasa-rasai. Ri laleng pettangngé, temmaccahaya, mallamparekka; tettokka ri yolona tau maégaé, méllau pattulung. Messé saddakku penno kasiyang pada-pada terinna asu ale'é sibawa manu'-manu' untaé. Mancaji malotongngi oliku; mangu tubukku nasaba semmeng. Riyolo uwéngkalingai musi' marennué, makkekkuwangngé banna mpating simata. Nasibawang tanro puraka majjanci ana'daraé dé' uwitai matu sibawa macinna. Aga napogau' Allataala lao ri idi? Pékkugi nawale pangkaukenna tolinoé? Pasti napapoléi acilakangngé sibawa abalaé lao ri tau iya pogau'é ja! Pasti naisseng Allataala sininna pangkaukekku; Naitai sininna jongkaku. Mattanroka makkedaé dé'pa naengka umacéko-céko; dé' topa naengka ubelléi tauwé. Leppessanni natimbakka Allataala ri yasé'na dacing iya tongengngé, nanaissengngi matu makkedaé dé' upasala. Ebara'na puraka léssé polé ri laleng iya tongengngé, iyaré'ga tattaré'i atikku ri gau' iya macarépaé, rékko rirotakiwi limakku ri dosaé, leppessanni tau laingngé manréi aga iya uwampoé, sibawa ancuru sininna wassélé tanaku. Ebara'na engka naengka utattaré lao ri bainéna balibolaku, sibawa massubbu-subbuka, mitai ri munrinna tange'é, leppessanni bainéku nannasungeng tau laingngé; leppessanni ri ranjanna worowané laingngé léwu. Rékko mémengngi upogau' dosa majaéro, sipato'ka tarima pahukkungeng. Iyaro dosaé mappaccappui pada-pada api ranakaé, sininna iya uwappunnaiyé cappui natunu. Wettunna maddaréké atakku nasaba upasalai ha'na, uwéngkalingai sibawa ugaukengngi sibawa malempu ati. Rékko dé', pékkugi harusu uwoloi Allataalaku? Aga pappébalikku wettunna polé madélékika? Tenniyaga Allataala pancajika, pancaji towi iyaro ata-atakku? Dé'pa naengka nadé' umaélo tulungngi tau kasiyasié, iyaré'ga leppessangngi sining jandaé tuwo pettu paddennuwang. Dé'pa naengka uleppessangngi ana' béué alupureng, na iyya genne inanré. Mappammulai baiccu'na upiyarai mennang; sillampé atuwokku upimpingngi mennang. Rékko uwitai tau iya akurangengngé, kasiyasi senna untu' melli pakéyang, upellaiwi sibawa kaing wol polé ri bimbala'ku muto, nanapojika matu sibawa sissukku ati. Akkalarapanna engka naengka utenre'i ana' béué, saba' mateppe'ka pakalai matu parakaraku, leppessanni polo iya duwa taiyyaku angkanna massarang polé ri tubukku. Dé' umaélo pogau'i makkuwaéro, saba' pahukkungenna Allataala napakecciwi atikku. Dé' naengka uwattuwangngi waramparakku, iyaré'ga mattempowangngi asugirekku. Dé' naengka usompai mata esso iya mattappaé macakka iyaré'ga kéteng iya mattappaé magello. Dé' naengka utattaré ri aléna, iyaré'ga bauwi limakku untu' pakalebbii. Dosa makkuwaéro sipato'i lolongeng pahukkungeng maté; nasaba Allataala Iya Pommakuwasaé nassakkarenni. Dé'pa naengka umasennang nasaba manrasa-rasai balikku, iyaré'ga mariyo-riyo nasaba lolongengngi acilakang. Dé' uwassempajang untu' amaténna balikku; dé' naengka upogau' dosa makkuwaéro. Naisseng sining tau iya majjamaé ri iyya, makkedaé dé' masala upanré ri bolaku. Tattimpa'i bolaku lao ri tau iya laowé; dé' naengka uleppessangngi mabbenni ri lalengngé. Tau laingngé nasubbui dosana, iyakiya iyya dé' nengka upogau'i pada-padaé mennang. Pallolongenna tau maégaé dé' uwétauriwi, sibawa pappakatunana tauwé, dé' upaduliwi. Dé' naengka uwonro ri bolaé iyaré'ga mammekko bawang, banna nasaba métauka ripakatuna matu. Dé'ga gaga tau maélo méngkalingai ada-adakku? Mattanroka makkedaé tongeng manengngiro. Tennapodo Iya Pommakuwasaé balika. Ebara'na teppunna balié lao ri iyya riyoki manengngi angkanna uwita, mabangka'ka matu pasangngi ri salangkakku, sibawa selaku passigera upatoppo'i ri ulukku. Uwabbéréyangngi matu lao ri Allataala sininna iya uwébbué; uwoloiwi Aléna matu sibawa mabangka nenniya tarakka ulué. Ebara'na tana iya urakkalaé uwénnauwi, sibawa urampasa'i polé ri punnana tongengngé, ébara'na cappui wassélé'na uwanré, sibawa patani iya tanengngéngngi uleppessangngi alupureng, leppessanni tenniya cadduku sibawa gandong iya tuwoé ri dare'é, sangadinna alekale maddori sibawa ariya.” Sikumiro ada-adanna Ayub. Nasaba mateppe senna'i Ayub ri atongengenna aléna, na iya tellu sahaba'naro dé'na namaélona baliwi. Iyakiya kuwaro engka séddi tau riyaseng Elihu ana' Barakheel, séddiwi wijanna Bus polé ri appang Ram. Dé' naulléi tahangngi caina, nasaba napattongengngi Ayub aléna sibawa passalai Allataala. Macai towi lao ri iya telluro sahaba'na Ayub nasaba dé' naulléi mennang bantai ada-adanna Ayub, namuni mennang napassalai. Elihu tau iya kaminang maloloé ri yelle'na mennang, rimakkuwannanaro mattajengngi narapi pura maneng mabbicara. Naitanana makkedaé iya tellu tauwéro dé' naulléi mappébali, macaini, sibawa makkeda makkuwaé, “Malolo mupa, na iko macowano, rimakkuwannanaro métauka sibawa bataka pangoloi pallolongekku. Pikkiri'ku, iko ritu harusu mabbicara, iya lebbi macowaé harusu mabbagéyangngi pangissengenna. Iyakiya iya mabbéré pangissengeng lao ri tolinoé, banna Rohna Allataala Iya Pommakuwasaé. Mancaji mapanréi tauwé, tenniya nasaba macowai; napahangngi tauwé tongengngé, tenniya nasaba malampéi umuru'na. Rimakkuwannanaro, éngkalingaka; palaloka powadai pallolongekku. Sabbara'ka méngkalingai wettummu mabbicara, sibawa mattajeng wettummu sappa ada-ada iya mapanré. Upénessaiwi sibawa madécéd-décéng, uwéngkalingako lolongeng asukkarakeng. Asalangngé ri laleng ada-adanna Ayub dé' mulléi pabuttiwi. Pékkugi wedding mupowada makkedaé muruntu'ni pangissengengngé? Nasaba tarapassako manyara. Iya weddingngé baliwi Ayub banna Allataala. Lao ri iko ritu Ayub mabbicara, sibawa tenniya ri aléku, iyakiya dé' uwabbéré matu pappébali pada-pada iko. Ayub, malippui mennang sibawa dé' naulléi mappébali; dé' gaga naullé mennang powada. Tettong bawammi mennang, dé'na naulléi mabbicarana. Harusu'ka'ga mattajeng namuni mammekkoi mennang? Dé', makkekkuwangngé maéloka mpéréngngi pappébali; upalettu'i matu pallolongekku. Dé'na usabbara mattajeng. Dé'na uwulléni tahangngi ada-adakku. Rékko mammekkoka bawang, mareppa'ka matu, pada-pada popangngé iya pennoé sibawa anggoro baru. Harusu'ka mabbicara, kuwammengngi natennang atikku; harusu'ka timpa'i témukku sibawa mabbéré pappébali. Dé' umaélo méwaiwi muwi niga ri laleng assasangngéwé sibawa dé' muwi séddi tau upoji-poji matu. Muwi cara maggantiyé dé'to uwissengngi, na ébara'na upogau'i iyaro, nahukkukka matu Allataala masitta. Makkekkuwangngé, éh Ayub, éngkalingai madécéd-décéng ada-ada iya maéloé upalettu'é. Sadiya-sadiyaka maélo makkeda-ada. Nasibawang ati malempu mabbicaraka; iya upowadaé iyanaritu iya sitongennaé. Rohna Allataala pura pancajika sibawa mpéréngngi atuwong aléku. Jaji, rékko mulléi, balika. Passadiyani pangéwangemmu. Untu' Allataala, iko sibawa iyya dé' nasilaingeng polé ri tana litaé Natappaki. Jaji, aja'na mumétau lao ri iyya; dé' umakkatta cauko. Nah, purani uwéngkalinga aga mupowada, sibawa upahanni aga iya muwakkattaiyé. Makkedako, ‘Mapaccikka, dé' mupogau' pelanggarang. Dé' umaccella sibawa dé' upogau' asalang. Iyakiya sappai Allataala alasang méwaka, sibawa Nagaukekka selaku bali. Napakkennaiwi ranté ajéku; sibawa jagaiwi sininna kédo-kédoku.’ Eh Ayub, salai pallolongemmu! Saba' lebbi battowai Allataala naiya tolinoé. Magi muteppui Alltaala makkedaé dé' najampangiwi addarékénna tolinoé? Mabbicarai Allataala sibawa madduparupang cara, iyakiya dé' muwi séddi tau puriyatiwi ada-adan-Na. Sedangkang tau memme'é tinrona ri wennié, ri laleng nippi sibawa pakkitang, mabbicarai Allataala. Risuroi mennang ri Allataala maréngkalinga; ripatassélengngi mennang sibawa pakkampareng-pakkampareng. Akkata-Na kuwammengngi nappésau mennang madosa sibawa salaiwi atemponna. Dé' Naleppessangngi mennang péneddingi ancurukengngé; Nalinrungiwi mennang polé ri amaténgngé. Namparengngi Allataala tauwé sibawa mappapolé lasa angkanna sininna tubunna penno pappénedding mapeddi. Ateddéngengngi napessu manré tomalasaé, muwi inanré iya kaminang malunra'é péjari towi péneddinna. Tubunna mancaji makojoi maddékéréké, paita maneng buku-bukunna. Mawé'ni lisu ri lino mannennungengngé linona tau maté macawé'ni ri aléna. Naullé séddi ri yelle'na sisebbu malaéka'na Allataala iya paréngngerangiyéngngi tolinoé lao ri tugasna, poléi matu tulungngi. Nasibawang amesséng makkedai matu iyaro malaéka'é, ‘Leppessangngi aléna, dé' nawedding nonno ri linona tau maté. Iyanaé dowi pakkamaja, kuwammengngi naleppe paimeng.’ Mancajiwi matu tubunna mawatang naporé matakka pada-pada kalloloé. Rékko massempajangngi, riyamaséiwi matu ri Allataala, nanapojiwi matu Allataala sibawa marennu nanapalisuwi matu Allataala keadaanna. Na ri yolona tau maégaé makkedai matu, ‘Iya majaé uwangga'i makessing, battowai dosaku, iyakiya Allataala dé' nahukkukka.’ Allataala pésangkaika lao ri linona tau maté, angkanna tuwo mupa makkekkuwangngé. Sibawa makkolik-koling, pura manenni napogau' Allataala iyaé, kuwammengngi Naulléi passalama'i tolinoé sibawa mabbéréi asennangeng ri laleng atuwonna. Naéngkalingani Ayub, pasanni daucculimmu ammekkono, makkekkuwangngé iyya ritu mabbicara. Iyakiya rékko engka iya maéloé mupowada, abbicarani; narékko tongekko, rélaka matu mangakuiwi. Iyakiya rékko dé', ammekkono sibawa éngkalingaka, maéloka mappagguruwang pangissengeng lao ri iko. Naisseng tauwé inanré malunra'é rékko nakanyaméi, sibawa ada-ada mapanré rékko naéngkalingai. Iyaé persoalangngé harusu'i taparéssa nainappaki massibawa puraiwi. Nakkeda Ayub, ‘Dé' gaga asalang ri aléku, iyakiya dé' namaélo Allataala mabbéré aga iya adélé'é lao ri iyya. Naangga'ka mabbellé, nasaba powadai dé' umadosa. Maladde loku makkekkuwangngé, namuni dé' upasala.’ Engkaga naengka muwita tau pada-pada Ayub? Napakatunai Allataala makkolik-koling. Napoji massilaong sibawa sining tau madorakaé enrengngé siwollompollong sibawa sining tau madorakaé. Makkedai, siya-siya bawang rékko makkuragai pogau'i élona Allataala. Eh sining tau iya makessingngé, éngkalingai! Masa Allataala Iya Pommakuwasaé pogau'i salaé? Nawale'i tolinoé situru pangkaukenna, nagaukengngi situru kédo-kédona. Allataala Iya Pommakuwasaé dé' napogau' ja; sininna tauwé Nawéréngngi adélékeng. Polé rinigai Allataala tarimai akuwasan-Na? Niga mappaddettangengngi iyaé linoé lao ri Aléna? Ebara'na Allataala reddu'i nyawana tolinoé, sibawa malai paimeng nappase atuwonna, maté manengngi anu makkényawaé, sibawa mancaji awui tolinoé pada-pada pammulanna. Nah, rékko mapanréko, pénessaini, pasanni daucculimmu sibawa éngkalingai. Aga Allataala iya adélé'é sibawa poréro mupassalai? Aga muwasengngi Allataala nacéccéi adélé'é? Nahukkungngi Allataala arungngé sibawa panguwasaé rékko majai mennang sibawa madorakai. Dé' naccowé lao risining arungngé, iyaré'ga lebbirengngi tau sugié naiya tau kasiyasié. Nasaba iya manenna mennang iyanaritu winru-Na. Ri tengnga bennié, weddingngi mennang maté tennasenna-senna. Nahukkungngi Allataala panguwasaé nabinasa tona mennang; magampang Nauno tau poré. Najagaiwi atuwonna tolinoé, Naitai sininna jongkana. Dé'gaga apettangeng, muwi pékkugi kape'na, iya weddingngé subbui tau madosaé. Dé' naparellu Allataala pattentui wettunna, tolinoé polé untu' riadéléki ri Aléna. Tennasalidiki sibawa naparéssa napaléssoi panguwasaé sibawa makkai passulléna. Saba', Naissengngi aga iya Napogau'é; Nanagaléttéi sibawa Naancuru'i mennang ri wennié. Naleppa'i mennang nasaba dosana, ri yolona tau maégaé nahukkungngi mennang. Saba', dé' naturusiwi mennang élo-Na sibawa dé' najampangiwi sininna parénta-Na. Mennang nassabariwi namaddaréké tau kasiyasié naéngkalingai Allataala terinna mennang. Rékko napettuiwi Allataala untu' mammekko bawang, dé' muwi séddi tau barani matu cellai. Rékko nasubbui rupan-Na, dé' muwi séddi tau mulléi runtu'i. Nadé'na pakkullénna bangsa-bangsaé untu' lawa-lawaiwi patenre majaé makuwasa. Ayub, muwakuiniga dosamu ri Allataala? puranoga majjanci dé' mumaélo madosana? Puraniga muwéllau kuwammengngi Narijellorekko dosamu? Puranoga mattanro pappésauwi pangkaukemmuro? Masa natarimai matu Allataala aga iya muwacinnaiyé, dé'nana musitujuiwi pangkaukenna Allataala? Makkekkuwangngé, iko harusu pettuiwi, tenniya iyya. Powadani aga pallolongemmu! Pasti nasitujui matu sininna tau mapanré; tau mapanré iya méngkalingaékka makkedai matu makkedaé mabbicarai Ayub tennapahang, sibawa pangkaukenna dé' nappunnai bettuwang. Rékko ritangngai tonget-tongeng ada-adanna Ayub, manessai matu makkedaé bicaranna pada-padai tau majaé. Asalanna natambaiwi paimeng sibawa séuwa dosa; maronta'i lao ri Allataala, sibawa pakatu-Nai ri yolota. Tappasalako rékko makkutanako, aga pangarunna dosamu lao ri aléna; sibawa asarong aga mutarima rékko dé' mupogau' dosa. Iyya ritu mabbéré matu pappébali lao ri iko sibawa lao ri silao-silaommuro. Akkitano ri langié sibawa pénessaiwi pékkugi tanréna ellungngé. Rékko madosako, dé' narogi matu Allataala. Rékko maégai asalammu, dé' Natappangaru. Ri laleng pogau'i makessingngé, dé' mubantui Allataala. Tongeng, dé' aga-aga Napparelluwang polé ri iko. Banna pada-padammu iya naparogiyé dosa-dosamu. Alénato makkésaro polé ri akessingemmu. Sining tau ritenre'é, kelli'i matu; gorai mennang méllau pattulung. Iyakiya tenniya lao ri Allataala, Pappancajinna iya mabbéré paddennuwang ri wettunna mennang masara, sibawa iya mpéréngngéngngi tolinoé akkaleng napakacauriwi manu'-manu'é sibawa olokolo'é ri linoé. Iyaro sining tau ritenre'é mangobbii, iyakiya mammekkoi Allataala nasaba majai mennang sibawa pennoi atempong. Siya-siyai mennang gora maggangka ulléna; Iya Pommakuwasaé dé' naitai iyaré'ga naéngkalingai mennang. Ayub, lebbi-lebbipi rékko makkedako makkedaé dé' muwitai Aléna, makkedaé ada-adammu engkani ri yolo-Na sibawa mutajengngi Aléna! Muwasengngi Allataala dé' nabbéré pahukkungeng sibawa dé' najampangiwi pelanggarangngé. Siya-siyai mupatteru abbicarammu; manessani, dé' muwissengngi aga iya mupogau'é. Malowang pangissengekku; uwakkégunagngi matu iyaro untu' pabuttiwi makkedaé adélé'i Pappancajikku. Dé'gaga ada-adakku iya palsué; tau iya mapanré tongengngé engkai ri yolomu. Iyaro Allataala poréi! Napahangngi sininna séuwa-séuwaé. Dé' muwi séddi tau Naita matuna. Tau madosaé dé' Naleppessangngi tuwo maitta, nawéréngngi adélékeng tau iya manrasa-rasaé. Napénessaiwi sining tau malempué, Naébbui mennang makuwasa pada arung-ngarungngé, angkanna ripakalebbii mannennungeng. Iyakiya rékko ribalenggui tauwé sibawa ranté bessi, manrasa-rasai nasaba pangkaukenna muto, dosa sibawa atemponna mennang natimpa'i matu Allataala. Nasuroi mennang méngkalingai papparéngngeran-Na sibawa salaiwi jana mennang. Rékko natuntu'i mennang lao ri Allataala sibawa massompa ri aléna, daméi atuwonna mennang sibawa madécéng lettu ri paccappureng atuwonna. Iyakiya rékko dé' naéngkalingai mennang, matéi matu mennang ri laleng adonggongngé. Tau iya dé'é nakképuwang taroi cai; muwi rihukkung ri Puwangnge, dé' namaélo mennang méllau bantuwang. Maté madodongngi mennang ri wettu malolona, nasaba pennoi atunang atuwonna. Napaggurui Allataala tolinoé naolai anrasa-rasang, Napakéi asussangngé untu' pamaingekiwi. Purano napaleppe Allataala polé ri asukkarakengngé, angkanna mulléi péneddingiwi atennangengngé, sibawa pennoi inanré méjang appatalammu. Iyakiya makkekkuwangngé situru sibawa jamu, mutarimai pahukkumammu. Jagako, aja' muribengnguwang ri dowi pasoso'é; aja' muripapusa nasaba asugirengngé. Siya-siya bawang gorako méllau ribantu, paracuma sininna pakkullémmu sibawa awatangemmu. Aja' muuddaningiwi wenni mapettangngé, wettunna bangsa-bangsaé ancuru sibawa lennye. Atutuno, aja' mugiling lao ri adorakangngé. Akkattana anrasa-rasammu kuwammengngi musalaiwi jaé. Engngerangngi, iyaro Allataala battowa tongeng akuwasan-Na. Engkaga guru pada-pada héba'-Na? Nigana mulléi pattentungengngi laleng Aléna iyaré'ga barani tenre'i pogau'i asalang? Tuli ripojiwi nasaba winru-Na, sibawa sipato'ko pakarajai. Naita maneng tauwé pangkauken-Na; iyakiya dé' muwi séddi tau tonget-tongeng pahangngi. Malebbi tongeng Allataala, dé' nariyullé mpellungngiwi iyaré'ga bilangngi jumellana taun-Na. Allataala gettengngi uwai polé ri linoé mancaji ellung nainappa napinra mancaji tetti-tetti uwai bosi. Natiri'i uwai polé ri ellungngé; Nabbolorengngi ri yasé'na rupa tauwé. Dé' muwi séddi tau pahangngi kédona sining ellungngé enrengngé oni guttu ri langié onrong naonroiyé Allataala. Natajangiwi sininna langié sibawa billa, iyakiya borina tasi'é tette'i mapettang kape. Iyanaro carana patuwoi bangsa-bangsaé sibawa mpéréngngi inanré iya mabbusassaé. Natikkengngi billa'é sibawa liman-Na sibawa nasuroi sarampa'i nakkattaiyé. Oni guttué tanrangiwi makkedaé maéloi paappo anginrajaé, muwi olokolo'é naisseng towi dé'na namaitta nalettu anginrajaé. Naébbui métau atikku anginrajaé sibawa aroku maddumba-dumba. Engkalingai saddanna Allataala, éh iko maneng; éngkalingai guttué iya massué polé ri bawa-Na. Lao ri sininna langié naleppessangngi billa'-Na; Nakiringngi letté-Na lao ri cappa-cappa linoé. Nainappa naéngkalinga saddan-Na memmu, oni maddaremmenna guttué sibawa létté; sibawa ri tengngana sadda iya maggalenrungngé, siyanré-yanré letté mallala. Nasaba paréntana Allataala, nakajajiyanna anu makalallaingngé, gau'-gau' makalallaing iya dé'é taulléi pahangngi. Sempé'i saljué ri tanaé nasaba parénta-Na; teppai bosi rajaé nasaba passurowan-Na. Napappésauwi jama-jamanna tolinoé, kuwammengngi naissengngi makkedaé mattengngangngi majjama. Makkuwatoro olokolo maliyaé muttama'i ri laleng kalebbongngé sibawa gowaé, sibawa mallinrung ri laleng saranna. Polé ri yattang massui anginrajaé sibawa polé ri manorang hawa makeccé iya paanrekké'é. Napattékkéi nappase'na Allataala tompo'no uwai iya malowangngé, napinrai mancaji ése iya matedde'é. Napatiwiriwi uwai ellungngé, sibawa ellung maccahayaé natajangiwi letté. Sajé-sajéi ellungngé lao ri sininna linoé, nasaba paréntana Allataala kédoi mennang lao kégi-kégi. Nabbéréyangngi Allataala bosié untu' rica'i tanaé, iyaré'ga untu' hukkung towi rupa tauwé; naulléto untu' mappaitangngi lao ri mennang, pékkugi battowana pammasé-Na iya tette'é untu' mannennungeng. Ammekkono cinampe, éh Ayub, sibawa éngkalingai; pénessaiwi sining anu makalallainna Allataala. Muwissegga pékkugi Allataala mabbéré tanra-tanrang, angkanna mattappa billa'é polé ri ellungngé? Muwissegga pékkugi sining ellungngé sajé wassélé amaccanna Allataala iya mappabengngaé? Dé', banna mulléi maddaréké apellang rékko nappo'i linoé anging polé ri yattang. Mulléga pada-pada Allataala pallebba'i langié sibawa pateddekiwi pada-pada bessi ricuwangngé iyaré'ga kacaé? Ajara'ki aga harusu tapowada lao ri Allataala; dé'gaga iya riyullé pakatajang, lobbang pikkiratta. Dé' umaélo méllau mabbicara lao ri Allataala ajakké lolongengngi alasang mébbuka macilaka. Makkekkuwangngé macakka senna'ni cahaya langié angkanna nawilo-wilo mataé; napépaccingiwi angingngé hawaé sibawa irina. Tappa maridié mompoi ri manorang, sibawa alebbirenna Allataala napabengngai atitta. Battowa tongeng akuwasanna Allataalata; dé' taulléi maddeppériwi, malempui sibawa tuli adélé'i; dé' naengka Natenre'i tolinoé. Iyanaro saba'na Nasipato ripakalebbi ri nigi-nigi, sibawa tau iya mangakué mapanré, dé' Najampangiwi.” Nainappa polé ri laleng anginrajaé mabbicarani Puwangnge lao ri Ayub, makkuwaé: “Nigako, angkanna baraniko bata-bataiwi pangissengek-Ku sibawa ada-adammu iya madonggoé nenniya kosongngéro? Makkekkuwangngé, oloi-Ka selaku worowané, sibawa baliwi sining pakkutanakué. Engka mémennoga wettunna Upancaji linoé? Rékko mémengngi malowangngi pangissengemmu, appaissengenni! Niga pattentui lowanna linoé? Niga paggettengngi tulu pangukkuru'na? Muwissegga pappébalinna? Pekkugiwi alliri-alliri pattula'na linoé tettong masse? Niga palénne'i batu passunna linoé sibawa masse, wettunna sining wéttowing éléé makkélong massibawa sibawa mahlu'-mahlu' surugaé gora-gora marennu. Nigana sului sumpangngé untu' téppo'i dolangengngé wettunna polé ri parémmananna linoé tabbollongngi massu uwaina? Iyya ritu cinaungiwi tasi'é sibawa ellung nenniya dokoi sibawa pettang. Iyya pattentui pakkaséséngngé untu' dolangengngé nenniya nasibawang tange taccala'é Utéppo'i. Adak-Ku lao ri aléna, ‘Iyanaé pakkasésénna. Aja' muliwengngi! Kuwanié sining bombammu iya mawatangngé harusu mappésau.’ Eh Ayub, engkaga naengka muwi siseng, suroi polé denniyarié? Engkaga naengka musuroi éléé makkatenningngi linoé sibawa makkeppikengngi tau majaé polé ri onronna mennang massubbu? Tajang essoé mappaitangngi sibawa manessa bulué sibawa lompo'é pada-pada cap-é ri tana litaé sibawa leppinna riséddié jumba. Tajanna essoé macakka senna'i untu' tau dé'é nakképuwang, sibawa tahangngi mennang pogau' ateddekeng. Engkaga naengka munonno ri assalenna tasi'é, mabéla ri borina? Engkaga naengka mujoppa-joppa ri borina dolangeng malowangngé? Engkaga naengka napaitakko tauwé pintu gerbang ri yolona linona amaténgngé iya mapettang senna'é? Mulléga kira-kirai lowanna linoé? Balini rékko muwissengngi. Muwissegga polé kégi tajangngé, sibawa kégi sitongenna assalenna pettangngé? Mulléga pattentui pakkasésénna pettangngé sibawa tajangngé? iyaré'ga suroi mennang lisu ri wettu polénana? Tentu muwullé, nasaba macowano, sibawa wettunna ripancaji linoé, engka mémenno iko! Engkaga naengka mulao mitai sining gudak-Ku onronna saljué sibawa bosi batué, iya Utaroé untu' wettu asukkarakengngé, untu' wettu musué sibawa esso-esso ammusurengngé? Muwissegga onrong apolénna mata essoé? iyaré'ga polé kégi assalenna anging alaué? Niga kalingengngi sépe bosi rajaé sibawa mpéréngngi laleng guttué sibawa billa'é? Niga pateppai bosié ri padang kessi'é, sibawa ri tana iya dé'é naonroiwi tolinoé? Niga boloi lino iya marakkoé sibawa makkanrodongngé angkanna cura maneng wellaé? Mappunnaiga ambo' bosié? Niga ambo'na tetti-tetti cinoddoé? Mappunnaiga indo' uwai ése'é? Niga jajiyangngi cinoddo mattékké? Niga pinrai uwai mancaji batu, sibawa pancajiwi tompo'na tasi'é matojo? Mulléga wesséi passiyona wéttowing Kartika? Iyaré'ga leppessangngi pabbalenggunna wéttowing Belantik? Mulléga dulungngi sining wéttowingngé tungke' wettunna, sibawa pattentui lalenna wéttowing Biduk battowaé sibawa baiccu'é? Muwissegga hukkung-hukkungngé ri bitaraé? Sibawa muwulléga patakkennai ri linoé? Mulléga gorangngi paréntaé lao ri ellungngé, sibawa suroi lémpekiko sibawa bosi? Sibawa rékko musuroi letté siyanré tette, aga poléi mennang sibawa makkeda, “Iyyé, Puwang!”? Polé kégi naissengngi manu'-manu' ibis-é uppanna Salo Nil mangalle matu? Niga paissengiwi manu' laié makkedaé maéloi polé bosié? Nigana genne apanrénna untu' bilangngi ellungngé sibawa balé'i angkanna teppa bosié, bosié pattedde'i awué mancaji mattékké sibawa tanaé mancaji sijéppé-jéppé? Mulléga lellungengngi anré sining singaé sibawa pamessoriwi babuwana ana'-ana'na, rékko mallinrungngi mennang ri laleng gowaé iyaré'ga radde'i ri laleng saranna? Niga bantui kao-kao iya alupurengngé sibawa mallampareng lao tulili sappa anré? Niga topa tulungngi rékko gorai ana'-ana'na lao ri iyya méllau inanré? Muwissegga uppanna bémbé bulué rijajiyang ri indo'na? Engkaga naengka mupénessaiwi jonga liyaé jajiyangngi ana'na? Muwissegga siyaga ittana mennang mattampu? Mulléga bilangngi wettu mémmana'na? Muwissegga uppanna mennang mallekku, nainappa najajiyang ana'-ana'na? Tattamba battowai ana'-ana'na sibawa mawatang ri padang kessi'é; laowi mennang sibawa dé'na nalisu ri indo'na. Niga malleppessang kaleddé liya ri ale'é? Niga lukkai tuluna sibawa malleppessangngi mallampareng? Uwabbéréyangngi lao ri aléna padang kessi'é selaku bolana sibawa sining padang pejjé untu' onrong naonroi. Nabélaiwi kota-kotaé sibawa arowarenna, dé' gaga mulléi pakacuwai sibawa pakkarésoi. Padang wellaé ri bulué onrong inanréna, nasappai tanet-taneng manyilaé kuwaro. Maéloga makkarésongekko saping liyaé? Maéloga mabbenni ri laleng wakkému? Mulléga siyoi sibawa passai maddakkalangekko? Mulléga suroi salagai dare'mu? Mulléga mattuwangngi awatangenna iya magala'é, sibawa mabbéréyangngi pallaummu iya matane'é? Muwatepperiga paddeppungekko éngngalammu, sibawa tiwii lao ri onrong addésekemmu? Temmaka gattina kampa pannina manu'-manu' untaé! Iyakiya luttuna coko'é dé' naulléi pada-padangngi. Manu'-manu' untaé mattelloi ri tanaé, nainappa nasalai; na kessi'é ritu pellaiwi matu tellona. Dé' namaingekiwi makkedaé naullé nalléjja tauwé sibawa olokolo liyaé léjja'i. Kédoi samanna ana'na tenniya appunnangenna; dé' napaduliwi rékko siya-siyai bawang usahana. Iyya ritu mébbui madonggo sibawa matumpeng, dé' Uwéréngngi pangissengeng sibawa akkaleng. Iyakiya rékko mappammulani lari kencang, nacau anyarangngé nenniya tonangiyéngngi. Eh Ayub, ikoga mpéréngngi awatangeng anyarangngé sibawa bosang iya tappapi-papié ri cekkonna? Ikoga suroi luppe pada-pada incalé, iya péttauriyéngngi tauwé nasibawang angessu-essunna? Nakaéi tanaé ri lompo'é sibawa marennu, mallurui ri ammusurengngé sibawa penno sumange. Dé' naissengngi bettuwanna pellorengngé sibawa métaué; dé' gaga peddang iya mébbuéngngi soro. Senjata iya nasaléppangngé tonangiyéngngi maggaréncang sibawa millakkillang nakenna cahaya. Nasibawang sumange malluwa-luwa'é lariwi iyaro anyarangngé; rékko moniwi tarompé'é dé' naulléi tahangngi aléna. Mangessu-essui tungke' ripaoni tarompé'é naémmauwi bau ammusurengngé polé mabéla. Naéngkalingai gorana sining parawiraé wettunna mennang mabbéré tanra-tanrang. Mupagguruga luttu bokangngé rékko mattujui ri yattang sibawa panni mallebba? Paréntamuga naccowéri kuwajangngé ri wettu dé'napa naébbui saranna ri bulu iya matanré? Ri coppo'na bulu batué napatettongngi bolana; cappa'na batu-batu macéru'é mancaji bénténna. Polé kuwaro najagaiwi sininna sulapa'é mattiroi matanna sappa anré. Kégi engka maté, kuwanitu aléna, nanaénungngi ana'-ana'na iyaro darana anréna. Maéga senna'ni upowada.” Nainappa, polé ri laleng anginrajaé mabbicarasi Puwangnge lao ri Ayub. Nainappa makkeda Puwangnge lao ri Ayub, “Oloika selaku worowané, sibawa baliwi sininna pakkutanakué. Maélokoga massakkarengngi adélékek-Ku, sibawa pattongengngi alému sibawa passala-Ka? Mawatakkoga pada-pada Iyya? Naulléga saddammu magguttu pada-pada saddak-Ku? Pabellorini alému sibawa alebbireng nenniya arajang, pakéni arajangngé sibawa alempurengngé. Itani mennang iya matanré atié; pallessuni caimu sibawa pakariyawai mennang. Itani tau matempoé, patunru'ni! Reppo'ni tau majaé ri onronna. Kuburu'ni mennang ri laleng awué; urungngi mennang ri linona tau maté. Na Upojiko matu nasaba pakalako sibawa awatangeng riyalé. Pénessaiwi Béhémot, olokolo battowaé; pada-pada iko, winru-Ku towi aléna. Wella-wellaé mancaji inanréna, pada-pada sapingngé. Iyakiya paréssai awatangeng engkaé ri laleng watakkaléna sibawa awatangengngé ri ure'-ure'na! Napatettongngi ikko'na pada-pada aju aras-é, ure'-ure' poppanna masse'i namatedde. Mawatangngi buku-bukunna pada-pada tembagaé, matto ajéna pada-pada alliri-alliri baja'é. Ri yelle'na sininna mahlu'-Ku aléna kaminang mappahérang; banna ri Pappancajinna bawang weddingngi ripatunru! Ri bulu-bulué onronna olokolo maliyaé macculé-culé marennu, tuwoni wellaé iya mancajiyé inanréna. Léwui ri yawana alekale maddorié, ri yelle'na arasoé ri rawa-rawaé massubbu. Alekale maddorié cinaungiwi sibawa wajo-wajona. Aju gandarusaé ri wiring saloé pakkeccé'i. Dé' namétau namuwi Salo Yordan masolo senna, tette'i tennang namuni nappo'i uwai rupanna. Nigana barani pabutai matanna, nainappa natikkeng sibawa tadoi pannyoro'na? Mulléga tikkengngi buwaja Léwiatan, banna sibawa séddi méng balé? Mulléga massiyorengngi lilana sibawa tulu passiyo? Mulléga pasang tulu ri inge'na iyaré'ga sakka bessi ri langona? Naulléga méllauwi ri iko untu' ripaleppe? iyaré'ga barunding sibawa iko, méllauwi paressé babuwamu? Weddigga mébbu assituruseng sibawa iko, sibawa majjanci tuli maélo tumaningiko? Mulléga siyoi pada-pada manu'-manu' ripiyaraé, iya pésennangiyéngngi ata-ata makkunraié? Weddigga ridangkangeng risining pakkajaé sibawa riyabbagé-bagéyang ri yelle'na sining padangkangngé? Mulléga toddo'i bingkulanna sibawa bessi tellué matanna iyaré'ga rawu'i sibawa bessi iya bettuéngngi ulunna? Géssai siseng bawang, sibawa dé'na mumaélo pakkolingngi; iyaro allagangngé dé' muwallupaiwi matu mannennungeng. Tungke' tau iya mitaéngngi Léwiatan, mancaji malemmai matu nainappa mabuwang marenne. Masekkangngi rékko ripaoto'i polé ri tinrona; dé' muwi séddi tau barani tettong ri yolona. Niga barani luruiwi tennakenna lo? Ri linoéwé dé' gaga mulléi pogau'i. Laono mai Ucuritakko passalenna watakkaléna Léwiatan, passalenna awatangenna sibawa bentu'na magelloé. Dé' muwi séddi tau mulléi sapé'i waju saliwenna iyaré'ga bettui waju musu iya napaké. Niga mulléi timpa'i pannyoro'na iya mawatangngé, mallise isi-isi iya mappakatau-taué? Pada-pada séré massusungngé, lekke'na maddeppé mare, pada-pada batué tedde'na. Sitenre-tenre tassiyo mare, angkanna muwi angingngé dé'to naulléi muttama maccelle. Iyaro séréé makkuwamani asse'na siyanré angkanna temmakkullé ripassarang Rékko tarassiwi Léwiatan, tabbessi cahayaé; mallala matanna samanna ompona mata essoé. Tassiyampo luwa apié polé ri bawana; tassiyamporeng bunga apié lao tulili. Maddumpu rumpué polé ri laleng inge'na, pada-pada rumpu aju tunungngé ri yawana oringngé. Napalluwa baraé nappase'na; massu luwa apié polé ri bawana. Cekkonna makkuwamani watanna, angkanna métau maneng ri yolona. Dé'gaga onrong malemma ri bingkulanna; dé' namakkullé mareppa nasaba sittedde baja'é. Atinna sittedde batué, dé' naissengngi kaléwa-léwa'é masse sibawa matedde pada-pada batu allélurengngé. Rékko tokkongngi, muwi tau kaminang mawatangngé ateddéngeng towi abaraningenna, naébbui dé' pakkullénna nasaba métau senna'i. Dé'gaga peddang mulléi loi; bessi, pana iyaré'ga duru' dé' naulléi peddiriwi. Nasemmi bessié pada-pada alusu'na wellaé sibawa tembagaé pada-pada péca'na aju keddi-keddingngé. Dé' gaga pana mulléi paddésu'i; batu iya rigenrungengngéngngi samanna daramémi bawang. Godangngé naangga padami silampaé wella rakko; macawami rékko rirawu'i bessi ri tauwé. Sessi'é ri babuwana pada-padai reppa pinceng iya macacaé cappa'na. Padai pakkakkasa paddése nakaéi bungkaé sibawa napuwé'i. Nagarui tasi'é angkanna sinrupa uwai rédé; pada-pada panci attanakeng minnya iya mabbusa-busaé. Salaiwi batéla ajé iya maccahayaé, napinrai tasi'é mancaji busa iya maputé tappana. Ri yasé'na linoé dé' gaga tandinganna; mahlu' iya dé'é naissengngi métau, alénana ritu! Muwi olokolo iya kaminang magelloé naitato matuna; ri yelle'na sining olokolo masekkangngé, aléna ritu arung.” Makkutana-Ko magi ubarani bata-bataiwi pangissengemmu padahal aléku temmissengngi. Mabbicaraka passalenna gau'-gau' iya dé'é upahangngi, passalenna gau'-gau' iya makalallaing senna'é untu' alékué. Musuroka maréngkalinga wettummu mabbicara, sibawa mabbéré pappébali wettum-Mu makkutana. Riyolo, pangissengekku passalem-Mu banna uwéngkalingai polé ri tauwé bawang, iyakiya makkekkuwangngé uwissek-Ko sibawa siyolong tappa. Rimakkuwannanaro masirika méngngerangngi sininna ada-adakku nanasibawang sessekalé tudakka ri laleng awué.” Puranana mabbicara lao ri Ayub, makkedani Puwangnge lao ri Elifas, “Macaika lao ri iko sibawa lao ri iya duwa sellaomu, nasaba dé' mupowadai iya sitongennaé passalenna alé-Ku. Iyakiya atak-Ku Ayub dé' nappakkuwaro. Nah, alano makkekkuwangngé pitukkaju saping lai sibawa pitukkaju bimbala lai, namulao ri Ayub. Nainappa muwakkasuwiyangeng manenro selaku akkarobangeng ritunu untu' alému. Massempajangngi matu Ayub untu' alému na iyaro sempajanna Utarimai matu. Dé' Upakasiriko matu, namuni sipato'ko tarima pahukkungeng. Dé' mupowadai iya sitongennaé passalenna alé-Ku, na Ayub napowadai.” Napogau'ni Elifas, Bildad sibawa Zofar aga nassurowang Puwangnge, nanatarimani Puwangnge sempajanna Ayub. Nainappa, puranana massempajang Ayub untu' iya tellu sellaona, ripassugini paimeng ri Puwangnge sibawa mpéréngngi leppi wékkaduwa polé ri sininna appunnangenna riyolo. Sininna kakana sibawa ana'daranna Ayub, nenniya sininna sissenna riyolo, poléni célléngiwi namappésta massibawa ri bolana. Napannessani mennang maccowé masara nasaba sininna asussang iya puraé napapolé Puwangnge ri aléna, sibawa saléworiwi. Tungke'-tungke' ri yelle'na mennang mabbéréi sijumella dowi sibawa séddi ciccing ulaweng lao ri Ayub. Ribarakkakiwi Ayub ri Puwangnge sibawa lebbi tabbollompollong ri laleng atuwonna, naiya ri wettu dé'napa nakennai abala. Mappunnai Ayub 14.000 kajunna bémbé bimbala, 6.000 kajunna unta, 2.000 kajunna saping, sibawa 1.000 kajunna kaleddé. Lolongengngi pitu ana' worowané sibawa tellu ana' makkunrai. Ana' makkunrainna mammulangngé nasengngi Yémima, iya maduwaé Kézia, sibawa iya maloloé Kérénhapukh. Ri sininna wanuwaé dé' gaga ana'dara pada-padanna gellona iya tellu ana' makkunrainna Ayub. Riwéréngngi mennang bagiyang ri laleng manana ambo'na, pada-pada sibawa silessu-silessurenna mennang worowané. Purairo tuwo mupi Ayub sératu patappulo taung ittana, angkanna narapi mupa mitai eppo-eppona enrengngé ana'-ana'na mennang. Nainappa maté Ayub ri umuru iya macowa senna'é. Masennangngi tau iya dé'é naccowériwi pangajana tau majaé, dé' nacontoi tau madosaé nenniya dé' nasiwollompollong sibawa tau iya pakatunaéngngi Allataala, iyakiya napojiwi pogau'i Paréntana Puwangnge sibawa nennun-nennungngi esso wenni. Iyaro tauwé naduppai sininna usahana; pada-padai ajué ri wiring saloé iya mabbuwaé ri wettunna sibawa dé' naengka namakelle daunna. Sibalé'na tau majaé: pada-padai awang towa iya napatassiyaé anging. Tau majaé rihukkungngi matu ri Allataala, hakinna sibawa ripassarang polé ri umma'-Na. Saba' tau mapatoé ripimpingngi sibawa rilinrungiwi ri Puwangnge, iyakiya tau majaé mattujui lao ri abinasangngé. Magi bangsa-bangsaé naébbu akacaungeng sibawa suku-suku bangsaé narancanai iya siya-siyaé? Massamangngi tokkong sining arung linoé sibawa sining panguwasaé masséddiwi méwai Puwangnge sibawa arung Napilé. Makkedai sining panguwasaéro, “Laono mai tapoloi akuwasanna mennang sibawa sittaiwi amaradékatta!” Macawai Puwangnge polé ri kadéra arajan-Na ri surugaé sibawa méllékéllé'i rancanana mennang. Nainappa rigera' mennang sibawa macai, nenniya ripatasséleng sibawa cai-Na. Adan-Na, “Ri Sion bulu-bulu-Ku iya mapaccingngé purani Ulanti arung upilé-Ku.” Adanna arungngé, “Maéloka mappallebbangengngi aga iya puraé napattette Puwangnge. Adan-Na lao ri iyya, ‘Iko ana' worowané-Ku, iyaé essoé Umancaji Ambo'mu. Ellauni, nasininna bangsaé Uwérékko, sibawa sininna linoé Upancajiwi appunnangemmu. Mupoloi matu mennang sibawa tekkeng bessi sibawa mureppa'i pada-pada oring tanaé.’ ” Jaji pénessaini, éh sining arungngé, éngngerangngi, éh sining panguwasa linoé! Assompano lao ri Puwangnge sibawa métau, suju'no ri yolo-Na sibawa ténré, aja' narapii mancaji macai Puwangnge naripaccappuko silalona, saba' malluwa'i cai-Na tennasenna-senna. Masennangngi tau iya mallinrungngé ri Puwangnge! Mazmurna Daud, wettunna lari polé ri Absalom, ana'na. Oh Puwang, temmaka égana balikku, maéga senna gasaka! Engka maéga iya powadaéngngi makkedaé dé' namaélo Allataala tulukka. Iyakiya Iko, oh Puwang, iyanaritu kaliyawo iya linrungiyékka. Muwérékka apakalang, sibawa Mupakaloppoi atikku. Mangobbika lao ri Puwangnge; polé ri bulu-bulu-Na iya mapaccingngé Nabalika. Léwuka nenniya matinro sibawa amang, sibawa moto paimeng, saba' Puwangnge sanréka. Dé' umétau lao ri massebbu balié iya keppungngékka polé ri sininna sulapa'é. Passalama'ka, oh Puwang Allataalaku, hukkungngi sibawa képoi sininna balikku. Polé ri iko ritu apolénna pattulungngé, oh Puwang, memmuwaré barakkakiwi umma'mu. Untu' pamimping kor. Nasibawang kacapi. Mazmurna Daud. Oh Allataala, Iko ritu pangéwaingekku; balini rékko mangobbika. Wettukku masussa, Mutulukka; makkekkuwangngé amaséika sibawa éngkalingai sempajakku. Eh sining tauwé, siyagapi ittana mupakatunai Allataalaku? Gangka kégi mupojiwi iya siya-siyaé sibawa lellungngi iya dé'é natongeng? Issengngi, purani napilé Puwangnge untu' Aléna séddi tau iya Namaséiyé. Naéngkalingai Puwangnge rékko mangobbika lao ri Aléna. Ténréni métau sibawa aja' namadosasi. Nennun-nennungngi namumammekkoto, wettu léwumu ri onrong atinrongngé. Akkasuwiyangengngi akkarobangeng iya tongengngé sibawa ateppe'no lao ri Puwangnge. Maéga tau makkutana, “Niga maélo barakkakiki?” Tennapodo Muwéloriki, oh Puwang. Muwébbui atikku lebbi marennu naiya tau iya maonaé éngngalanna. Nauléwu nenniya matinro sibawa amang, saba' banna Iko, Puwang, mébbui atuwokku amang! Untu' pamimping kor. Nasibawang suling. Mazmurna Daud. Oh Puwang, éngkalingai ada-adakku, pénessaiwi addarékékku. Jampangiwi pangobbiku sibawa tulukka, oh Arukku sibawa Allataalaku. Saba' ri Iko massempajakka, oh Puwang, éngkalingai pangobbiku ri éléé. Maélé utiwi pakkasuwiyakku sibawa utajeng pappébalim-Mu, oh Puwang. Iko Allataala iya dé'é napojiwi jaé; tau majaé dé' nawedding massurolellang ri Iko. Dé' mutahang mitai tau matempoé, Mubenciwi tau iya pogau'éngngi majaé. Mupaccappui sining tau iya pojiyéngngi mabbellé, Muwita mariyawai pabbelléngngé sibawa pabbunoé. Iyakiya nasaba pammasé-Mu iya battowaé, weddikka muttama ri laleng Bola-Mu. Suju'ka mattuju ri Bola-Mu iya mapaccingngé, nenniya usompa-Ko sibawa mappakalebbi. Oh Puwang, maéga senna balikku! Pimpikka untu' pogau'i élo-Mu, sibawa jello'i lalem-Mu iya harusu'é uwola. Saba' ada-adanna balikku dé' nawedding riyatepperi; atinna mennang pennoi rancana maja. Ada-adanna mennang macenning pataré, iyakiya baténna mennang pennoi akebbongeng. Hukkungngi mennang, oh Allataala, leppessangngi mennang macilaka nasaba rancanana muto. Rukkai mennang nasaba maégani ritu dosana, saba' maronta'ni mennang lao ri Iko. Tennapodo sininna tau iya mallinrungngé ri Iko marennui sibawa gora-gora mannennungeng. Linrungiwi sining tau iya méloriyék-Ko, kuwammengngi namariyo-riyo nasaba Iko. Saba' Mubarakkakiwi tau iya matinulué ri Iko, Mulinrungiwi mennang sibawa pammasé-Mu. Untu' pamimping kor. Nasibawang kacapi. Situru lagunna maaruwaé. Mazmurna Daud. Puwang, aja' muajara'ka ri laleng cai-Mu, aja' Muhukkukka ri laleng cai-Mu. Amaséika oh Puwang, saba' acappurekka awatangeng, péwatangika saba' posoka. Malippu senna'i atikku; gangka kégi Musalaika, oh Puwang? Lisuni', Puwang, sibawa paleppe'ka, passalama'ka nasaba pammasé-Mu. Saba' ri laleng amaténgngé dé'na nariyéngngerak-Ko; dé' gaga iya pojiyék-Ko ri linona tau maté. Matekkoka nasaba maddaréké; wenni-wenni massolo uwai matakku rica'i onrong atinrokku. Mawuta matakku nasaba messéi, sibawa massalawu nasaba sining balikku. Esu'no, éh sining tau majaé, saba' purani naéngkalinga Puwangnge terikku. Naéngkalingai Puwangnge paréllaukku sibawa tarimai sempajakku. Tassélengngi matu sininna balikku sibawa masiri nenniya soroi masitta sibawa masiri senna. Watinna Daud, iya napuwélongngé untu' Puwangnge nasaba Kus, tau Bényamingngéro. Oh Puwang Allataalaku, mallinrukka ri Iko; passalama'ka sibawa leppessakka polé ri sininna tau iya lellungngékka. Aja' narileppessang mennang pada-pada singaé luruika sibawa massarénréngekka na dé' gaga pattulukku. leppessanna rilellung sibawa ritikkeng ri balié, nainappa riyuno sibawa risalai ri tanaé. Tokkonni ri laleng cai-Mu, oh Puwang, éwani ajjallokenna sining balikku. Tokkonni untu' tulukka, saba' Mutuntu'i adélé'é. Paddeppungenni bangsa-bangsaé ri mattulilim-Mu, sibawa akuwasaini mennang polé ri kadéra arajam-Mu ri surugaé. Muadélékiwi rupa tauwé; wérékka adélékeng, oh Puwang, saba' dé' upasala. Pappajani jana tau madorakaé sibawa pakkasse'i atinna tau makessingngé, saba' Iko Allataala iya adélé'é, iya mpellungiyéngngi atinna sibawa pikkiranna tolinoé. Pallinrukku iyanaritu Allataala iya passalama'éngngi tau iya malempu atié. Allataala iyanaritu Allataala iya adélé'é, iya hukkungngéngngi tungke wettu tau majaé. Itai, tau majaé narancanai majaé; mébbui rancana maja sibawa pogau'i pabengnguwangngé. Kaliwi kalebbong untu' tau laingngé, iyakiya aléna muto sempé ri lalenna. Jaji rihukkungngi ri jana muto, sibawa risissai ri ateddekenna muto. Sukkuru'ka lao ri Puwangnge nasaba adélé'i, upuwélongengngi pappojiyang untu' Puwangnge, Iya Pommatanré. Untu' pamimping kor. Situru lagunna Gitit. Mazmurna Daud. Oh Puwang, Allataalata, tassebbo'i akuwasam-Mu ri sininna linoé! Arajam-Mu iya mariyasékiyéngngi langié napuwélongngi ana'-ana'é sibawa ana'loloé. Apparéntam-Mu masse tenrigoyang untu' pammekkoi musué sibawa balié. Rékko uwitai langi iya Mupancajiyé, kéteng sibawa sining wéttowing iya Mupakkennaé, aga iyaro tolinoé, angkanna Muwéngngerangngi, niga aléna, angkanna Mupiyarai? Iyakiya Muwakkai céddé pada sibawa Allataala, Mupassigera'i sibawa arajang nenniya alebbireng. Muwéréngngi akuwasang ri yasé'na alangngé, sininna Mupancajiyé Mupatunru'i ri aléna: bimbala, saping sibawa sininna olokolo'é, makkuwatoro olokolo'é ri padang makkale'-kale'é; manu'-manu'é sibawa sining balé, sininna mahlu'é ri laleng tasi'é. Oh Puwang, Puwatta, tassebbo'i arajam-Mu ri sininna linoé! Untu' pamimping kor. Situru lagunna Mut-Laben. Mazmurna Daud. Nasibawang ati sukku maéloka sukkuru lao ri Iko, Puwang, sibawa mabbirittangngi winru-Mu iya mappabengngaé. Maéloka marennu sibawa mariyo-riyo nasaba Iko sibawa pojiwi asem-Mu, Puwang Iya Pommatanré. Ri yolo-Mu balé'i balikku nanalari; menrungngi mennang tabbuttu sibawa maté. Saba' mapparénta-Ko selaku haking iya adélé'é; purani Mubéla parakaraku. Purani Muhukkung bangsa-bangsaé sibawa paccappui sining tau majaé; riyallupaini mennang untu' mannennungeng. Cappuni balitta ripallennye, kota-kotana mennang Muancuru'i; dé'na gaga iya méngngerangngéngngi. Mapparéntai Puwangnge untu' mannennungeng; Napatettongngi akkarungen-Na untu' madélékiwi linoé. Naparéntai bangsa-bangsaé sibawa adélé nenniya madélékiwi mennang sibawa malempu. Iyaro Puwangnge onrong mallinrung untu' tau ritenre'é, onrong maccinaung ri wettu aperisengngé. Tau iya missengngék-Ko mamménasai ri Iko, oh Puwang, tau iya sompaék-Ko dé' Musalaiwi. Pojiwi Puwang iya mapparéntaé ri Sion! Curitanni pangkauken-Na lao ri bangsa-bangsaé! Saba' maréngngerangngi lao ri tau iya manrasa-rasaé sibawa dé' nallupaiwi kelli'na mennang; Nahukkungngi tau iya pogau'é ateddekeng. Itani, napanrasa-rasaka balié; amaséika, oh Puwang, paleppe'ka polé ri amaténgngé, kuwammengngi upoji-Ko ri yolona pabbanuwana Yérusalém. Gora-goraka matu marennu nasaba Mupassalama'ka. Bangsa-bangsa iya dé'é naissek-Ko sempé'i ri laleng kalebbong iya aléna muto kaliwi; tassiyoi mennang ri laleng siyona muto. Purani nappannessang Aléna Puwangnge nasaba apettun-Na iya adélé'é. Tappasollai tau majaé ri pangkaukenna muto. Amaténgngé iyanaritu paccappurenna sining tau majaé, bangsa-bangsa iya dé'é nabati-batiwi Allataala. Dé' na untu' mannennungeng riyallupai tau kasiyasié; dé' na untu' matteru manrasa-rasai tauwé temmaddennuwang. Tokkonni, Puwang, adélékini bangsa-bangsaé, aja' Muleppessangngi bangsa-bangsaé mattempowangngi aléna. Leppessangngi mennang mancaji métau, oh Puwang, sibawa maingekiwi makkedaé mennang bannai tolino. Magi Mumabéla, oh Puwang sibawa massubbu wettutta aperiseng? Nasibawang atempong tau majaé tenre'i tau kasiyasié; leppessangngi mennang tassiyo ri siyona muto. Mabboroi tau majaé passalena cinnana iya majaé. tau mangowaé natanroiwi sibawa nasampéyangngi Puwangnge. Tau madosaé dé' napaduliwi Puwangnge matu, nasaba tempona mappikkiri'i dé'gaga Allataala. Mallolongengngi tau majaé ri laleng sininna usahana; dé' naissengngi iyaré'ga napahangngi hukkunna Puwangnge sibawa pakatunai sininna balinna. Adanna ri laleng ati, “Dé' matu utemmallolongeng, sibawa massossoreng pada-pada tau iya dé'é natuwo maja.” Matterui patanroi, mangancang sibawa pabengnguwang, ada-adanna pennoi paccéccé sibawa ja. Mabbukku'i, sadiya maélo palupperi; nabuwangngi tauwé sibawa ateddekeng. Pikkiri'na, “Nallupaini Allataala sibawa dé' najampangiwi; untu' matteruna dé'na Naitaka!” Tokkonni, Puwang, hukkungngi tau majaé! Engngerangngi tau iya ritenre'é! Magi tau majaé matterui napakatuna Allataala sibawa mappikkiri dé' narihukkung matu ri Allataala? Iyakiya Muwitai; Mupénessaiwi asussangngé sibawa anrasa-rasangngé, sibawa tuli sadiyai untu' mattulung. Tau iya dé'é pakkullénna nabbéréyangngi aléna lao ri Iko, tuli Mutulungngi tau iya kasiyasié. Poloi akuwasanna tau majaé sibawa madorakaé; hukkungngi mennang nasaba pangkaukenna narapi mennang toba'. Mapparéntai Puwangnge untu' mannennungeng; bangsa-bangsa iya dé'é Naissengngi lennye'i matu polé ri tana-Na. Puwang, Muwéngkalingai sempajanna tau matunaé sibawa péwatangiwi atinna mennang. Ana' béué sibawa tau ritenre'é Mubélai parakarana, kuwammengngi na dé'gaga tau iya péttauriyéngngi mennang. Untu' pamimping kor. Mazmurna Daud. Mallinrukka ri Puwangnge; dé'gaga akkégunana makkeda lao ri iyya, “Passalama'i alému pada-pada manu'-manu' iya luttué lao ri bulué. Saba' napaggettengngi panana tau majaé sibawa pasangngi ana' panana untu' mannembakengngi ri onrong iya mapettangngé lao ri tau malempué. Rékko dé' nattentu atorenna masaraka'é, dé' pakkullénna tau makessingngé.” Engkai Puwangnge ri Bola-Na iya mapaccingngé, kadéra akkarungen-Na engkai ri surugaé. Najagaiwi rupa tauwé sibawa missengngi sininna pangkaukenna mennang. Naojiwi Puwangnge tau makessingngé sibawa tau majaé, Nacéccéi tau iya pojiyéngngi ateddekengngé. Nahukkungngi tau majaé sibawa abala, nasibawang api, belérang sibawa anging iya paangurengngé. Saba' makessingngi Puwangnge sibawa adélé, Namaséiwi tau iya pogau'éngngi makessingngé; naitai matu tau malempué sibawa naissengngi Puwangnge. Untu' pamimping kor. Situru lagu iya maaruwaé. Mazmurna Daud. Tulukki, oh Puwang, saba' dé' gagana tau iya makessingngé, tau iya matinulué ri Iko lennye'ni. Sisullé manengngi mennang sibellé, sisulléi sibengnguwang sibawa ada-ada iya macenningngé. Pappajani ada-ada iya mappalécéro, Puwang, pammekkoi sining tau iya maloppoé bawana, iya makkedaé, “Makuwasaki sibawa lilata! Agi-agi riyulléi powadai, na dé'gaga iya weddingngé lawa-lawaiwi!” Adanna Puwangnge, “Ritenre'i tau kasiyasié sibawa tau manrasa-rasaé maddarékéi. Na makkekkuwangngénna Upolé mabbéré atennangeng iya nauddaningiyé mennang.” Jancinna Puwangnge masse sibawa wedding riyattuwang, pada-pada péra' tuléng iya riojiyé ri laleng apié. Untu' pamimping kor. Mazmurna Daud. Gangka kégi Muwallupaika oh Puwang? Gangka kégi mallekke'-Ko polé ri aléku? Gangka kégi harusu'ka tanggungngi asussangngé, sibawa messé ati puppu esso? Gangka kégika rikuwasai ri balié? Itaka, oh Puwang Allataalaku, balini sempajakku. Palisuni awatangekku, sibawa aja' taleppessakka maté. Aja' taleppessangngi balikku makkeda makkedaé pura nacauka mennang. Aja' taleppessangngi mennang gora-goraika. Saba' uwattuwangngi pammasé-Mu, na umariyo-riyo matu nasaba Mupassalama'ka. Maéloka makkélong untu' Puwangnge, saba' purai Napogau' makessingngé lao ri iyya! Untu' pamimping kor. Mazmurna Daud. Makkedai tau madonggoé ri laleng ati, “Dé' gaga Allataala.” Pangkaukenna mennang maja sibawa matuna dé' gaga pogau'i makessingngé. Polé ri surugaé naitai Puwangnge rupa tauwé untu' sappai tau mapanré iya sompaéngngi Aléna. Iyakiya sininna tauwé lésséni sibawa maja sipa, dé'na gaga muwi séddi tau iya pogau'éngngi makessingngé. Adanna Puwangnge, “Dé' namainge'ga sining tau majaéro? Tuwoi mennang sibawa rampasa'i umma'-Ku sibawa dé' naengka nassempajang lao ri Iyya.” Métau senna'i matu tau majaé, saba' nalinrungiwi Allataala tau iya matinulué ri Aléna. Tau majaé nalawa-lawaiwi tau kasiyasié, iyakiya Puwangnge mancaji pallinruna. Tennapodo polé ri Sion poléi asalamakengngé untu' Israélié! Namariyo-riyo matu wija-wijanna Yakub rékko napalisui Puwangnge keadaanna umma'-Na. Mazmurna Daud. Puwang, niga wedding mappéruma ri Kéma-Mu sibawa monro ri bulu-bulumu iya mapaccingngé. Tau iya tuwoé temmakkécella sibawa pogau'i iya makessingngé, nasibawang alempureng napowadai tongengngé; iya dé'é napétenna'i pada-padanna, dé' napogau'i majaé lao ri silaonna, sibawa dé' napau majai asenna balibolana; iya mangga mariyawaéngngi tau iya risampéyangngé ri Allataala, iyakiya pakalebbii tau mateppe'é; iya rupaiyéngngi jancinna, namuni rogi sibawa mappainrengeng dowi temmabbunga; iya dé'é namaélo tarima dowi pasoso untu' parogiwi tau iya dé'é napasala. Tau iya pogau'éngngi makkuwaéro, tuli tennangngi matu. Jagaika, oh Allataala, saba' ri Iko ritu mallinrukka. Makkedaka, “Iko ritu Puwak -ku, ariyo-riyokku, dé'gaga iya lebbiyé naiya Iko!” Upakalebbii sining tau mapaccingngé ri wanuwaéwé; asennangekku iyanaritu monro silaong mennang. Leppessangngi tau iya massompaé déwata-déwata tattamba-tamba amessénna. Dé' umaélo makkarobangeng lao ri déwata-déwataé, mala dé' umaélo teppui asenna mennang. Puwang, Iko bawang uwappunnangi; Muwabbéréyangngi sininna iya uwapparelluwangngé, totoku engkai ri limam-Mu. Makessing tongeng pabbéré-Mu untu' aléku, napésennangi senna'i atikku! Upojiwi Puwang iya pangajariyékka; muwi ri wennié napangajarika sadda atikku. Tuli uwéngngerangngi Puwangnge; engkai ri benrékku, na dé'na ugoyang. Rimakkuwannanaro marennui atikku sibawa gora-gorai nyawaku, nenniya mappésauwi tubukku sibawa tennang. Saba' dé' Muleppessakka maté; tau iya Muwamaséiyé dé' Muleppessangngi maté. Mujellokekka laleng mattujué ri atuwongngé; ri alé-Muka lolongeng arennung maonaé sibawa ariyo-riyong untu' mannennungengngé. Sempajanna Daud. Engkalingai pangobbiku méllau adélékeng, pénessaiwi sempajakku iya tongengngé, oh Puwang. Tabélani parakaraku saba' Muwisseng aga tongengngé. Rékko Muojiwi atikku sibawa polé salidikika ri wennié, Mupoléiwi matu makkedaé mattonget-tongekka; ada-adakku siturui sibawa pikkirakku. Upogau'i aga iya Muwapparéntangngé sibawa dé' muwolai laleng ateddekengngé. Tuli tuwoka situru panunju'-Mu sibawa dé' naléssé polé ri alé-Na. Mangobbika ri Iko, oh Allataala, saba' Mubalika; jampangika sibawa éngkalingai ada-adakku. Ajjellokenni pammasé-Mu iya mappabengngaé saba' Mupassalama'i tau iya mallinrungngé ri alé-Mu, ri seddému amangngi mennang polé ri paggasana balié. Piyaraka pada-pada lise matammu, subbuka ri laleng accinaungenna pannimu polé ri paggasana tau majaé. Rikeppukka ri bali iya maéloé mpunoka; dé' naisseng mennang mamasé nenniya mabbicara sibawa matempo. Mallurui mennang méwaka sibawa katulukka, sappai kasempatang untu' mabbantingekka. Pada-padai mennang singa maéloé lupperiwi anréna, singa lolo iya mangadangngé ri onrong massubbué. Tokkonni, oh Puwang, éwani balikku sibawa cauni mennang. Passalama'ka sibawa peddam-Mu polé ri paggasana tau majaé. Leppessakka polé risining tau iya goppoé waramparang ri linoé. Hukkungngi mennang sibawa abala iya puraé Mupassadiyangengngi mennang. Leppessangngi ana' eppona rihukkung towi. Iyakiya iyya uwita-Ko matu, saba' dé' upasala. Ri wettukku moto, ahadérékem-Mu mébbui atikku marennu. Untu' pamimping kor. Mazmurna Daud, atanna Puwangnge. Napuwélongengngi Puwangnge wettunna Daud rileppessang polé ri Saul sibawa polé risining balinna. Upojiki, oh Puwang, Iko ritu awatangekku. Padai Puwangnge bénténg mawatangngé onrokku mallinrung. Padai Allataalaku bulu batué onrokku maccinaung. Padai kaliyawoé tongkoka, sibawa jagaika kuwammengngi utuli amang. Mangobbika lao ri Puwang iya sipato'é ripoji, iya paleppe'ékka polé risining balikku. Riyattulilingika ri bahaya amaténgngé sibawa nalle lémpe abinasangngé. Nattulilingika bahaya amaténgngé, jebba amaténgngé engkai ri yoloku. Ri laleng aperisekku mangobbika lao ri Puwangnge, Goraka lao ri Allataalaku méllau pattulung. Polé ri Bola-Na Naéngkalingai saddakku sibawa jampangiwi pangobbiku. Nainappa taggoccang linoé sibawa ténré, goyang sining pabborina bulué sibawa ténré nasaba caina Allataala. Mapporo' rumpué polé ri sebbo inge'-Na, api sibawa bara massu polé ri bawa-Na. Napuwé'i langié, nainappa nonno sibawa ellung mapettang ri yawana ajé-Na. Luttui sibawa tonangi kérub; sajéi ri yasé'-Na pannina angingngé. Natongkoi Aléna sibawa pettang; ellung malilling iya makkompe'é mattulilingiwi Aléna. Polé ri billa'é ri yolo-Na, massui ellungngé, bosi ése'é sibawa apié. Nainappa magguttu Puwangnge polé ri bitaraé; napparéngkalingangngi saddan-Na Iya Pommatanré. Nattémbakengngi sining pana-Na sibawa patassiya-siyai balié; Nassarampakengngi billa'é makkolik-koling, naébbui mennang lari. Tattimpa borina tasi'é sibawa tabbukka pallanggana linoé wettunna Puwangnge nagera' balin-Na sibawa macai. Polé ri yasé naloro'i liman-Na Puwangnge; Nakkatennikka sibawa Nagettekka polé ri uwai iya maliyungngé. Napassalama'ka polé ri bali iya poré sibawa polé risining tau iya céccéékka, nasaba mawatang senna'i mennang untu' aléku. Nagasaka mennang wettukku nakenna abala, iyakiya Puwangnge mancaji pattulukku. Naleppessakka polé ri bahayaé nanapassalama'ka nasaba Naélorika. Nawale'i Puwangnge pangkaukekku iya tongengngé; Nabarakkakika nasaba dé' upasala. Uturusiwi paréntana Puwangnge sibawa dé' ugiling polé ri Allataalaku. Sininna hukkun-Na upuriyatiwi, parénta-parénta-Na dé' uwallupaiwi. Naisseng makkedaé dé' cellaku sibawa pabélaiwi alé polé ri asalangngé. Nanawale'i Puwangnge pangkaukekku iya tongengngé saba' naissengngi dé' upasala. Puwang, matinulu-Ko lao ri tau iya matinulué sibawa makessingngi lao ri tau iya makessingngé. Lao ri tau iya mapaccingngé Mupannessai Alému mapaccing, iyakiya tau iya majaé Mumusui. Mupassalama'i tau iya mariyawa atié, iyakiya tau iya matempoé Napatunru'i. Mupalluwa'i pajjennangekku; natajangiwi Puwang Allataalaku pettakku. Mupéwatangika untu' paccappui balié; nasibawang bantuwanna Allataalaku uleppoi attahanangenna mennang. Sukku pangkaukenna Allataala weddingngi riyatepperi jancinna Puwangnge. Pada-padai kaliyawoé lao ri sininna iya mallinrungngé ri Aléna. Saba' banna Puwangnge ritu Allataala; Allataala bawang pangéwaingetta. Aléna ritu Allataala iya péwatangiyékka sibawa mébbui lalekku amang. Napéwatangiwi ajéku pada-pada ajé jongaé, sibawa jagaiwi asalamakekku ri bulué. Nalatika untu' mammusu, angkanna uwulléi paggettengngi pana iya kaminang mawatangngé. Puwang, Mulinrungika sibawa passalama'ka, nenniya tula'ka sibawa akuwasam-Mu; mancajika tassebbo nasaba tindakam-Mu. Muwonrowakka kuwammengngi dé' naritawakka, sibawa dé' naengka umabuwang. Ulellungngi balikku sibawa ucaui mennang, nenniya pémmali soro narapi mennang cappu. Uwabbantingeng mennang angkanna dé'na naulléi moto'na, rebbai mennang dé' pakkullénna ri yolona ajéku. Muwérékka awatangeng untu' mammusu, sibawa apakalang lao risining balikku. Muwébbui balikku lari polé ri iyya; sining tau iya céccéékka upaccappui. Gorai mennang, iyakiya dé'gaga mattulung, mangobbii mennang lao ri Puwangnge, iyakiya dé' Nappébali. Ureppo'i mennang pada-pada awu iya tassiyampoé, sibawa useringngi pada-pada bungkaé ri lalengngé. Mupaleppe'ka polé ri appang iya madorakaé, Namupancajika panguwasana bangsa-bangsaé; bangsa iya dé'é uwissengngi mancajiwi atakku. Sining tau laingngé tunru'i lao ri iyya sibawa mapato rékko naéngkalingai paréntaku. Teddénni abaraningenna mennang; ténréi mennang sibawa massu polé ri bénténna. Tuwoi Puwangnge! Ripojiwi pangéwaingekku! Pakarajai aloppongenna Allataala pappassalama'ku! Nawérékka apakalang lao ri balikku; Napatunru'i bangsa-bangsaé ri yoloku, Napassalama'ka polé risining balikku. Puwang, Muwérékka apakalang lao ri balikku, Mulinrungika polé risining tau mabecco'é. Naupakaraja-Ko ri yelle'na bangsa-bangsaé, sibawa upuwélongek-Ko pappoji-pojiyang. Allataala mpéréngngi apakalang battowa lao ri arun-Na, tette'i namaséi tau napilé-Na, iyanaritu Daud sibawa wija-wijanna untu' mannennungeng. Untu' pamimping kor. Mazmurna Daud. Langié pannessai arajanna Allataala, sibawa bitaraé mabbirittangngi winru-Na. Esso séddié palettu'i lao ri esso rappina; wenni séddié curitai lao ri wenni ri munrinna. Dé'gaga mabbicara iyaré'ga makkeda-ada, dé'gaga sadda riyéngkalinga. Iyakiya pangobbina massammengngi ri sininna linoé, iyaro pasengngé lettu'i ri cappa-cappa linoé. Mébbui Puwangnge bola ri langié untu' mata essoé, maéléi masiya' pada-pada botting mpurané massu polé ri bili'na, pada-pada pabbarani iya marennué pammulaiwi allalengenna. Natuttungngi langié polé ri cappa'na lao ri cappa'na; dé'gaga leppe polé ri pellana. Iyaro Hukkunna Puwangnge sukkui, napétakkari nyawaé. Wedding riyatepperi paréntana Puwangnge, nawéréngngi pangissengeng tau biyasaé. Coco'i peraturanna Puwangnge, napésennangiwi atié. Tuléngngi iyaro attettekenna Puwangnge, naébbui tauwé pahangngi. Massompa lao ri Puwangnge makessing iyaro, matteru mannennungeng. Iyaro Hukkunna Puwangnge tongengngi sibawa adélé maneng. Lebbi mangke'i Hukkunna Puwangnge naiya ulaweng tuléngngé, lebbi macenningngi naiya cani aslié. Riparéngngerangiwi atam-Mu ri sininnaro; tassadiyai saro battowaé lao ri tau iya turusiyéngngi. Dé'gaga mulléi maingekiwi apusanna; Puwang, paleppe'ka polé ri asalang tassubbué. Pabélaika polé ri dosa iya riyattungkaiyé, aja' taleppessakka rikuwasai ri aléna. Naumancaji dé' cellana, sibawa leppe polé ri pelanggarang matane'é. Tennapodo ada-ada sibawa pikkirakku Muéloriwi, oh Puwang, pallinrung sibawa pappassalama'ku! Untu' pamimping kor. Mazmurna Daud. Tennapodo nabaliko Puwangnge ri wettu aperisengngé, tennapodo akuwasanna Allataalana Yakub linrungiko! Tennapodo kiringngi bantuwang polé ri Bola-Na, sibawa mabbéréi pattulung polé ri Bulu Sion. Tennapodo Aléna méngngerangngi sininna pakkasuwiyammu, nenniya masennang sibawa sininna akkarobangeng ritunummu. Tennapodo Aléna mabbéréyangngi sininna iya muwacinnaiyé, sibawa mébbui sininna rancanamu papolé wassélé. Natagora-gora marennu nasaba apakalammu, sibawa makkai bandéraé untu' pojiwi Allataalata. Tennapodo natarimai Puwangnge sininna paréllaummu. Uwissenni makkekkuwangngé makkedaé Puwangnge mabbéré apakalang lao ri arung napilé-Na. Puwangnge baliwi polé ri suruga-Na iya mapaccingngé; nasaba akuwasanna Puwangnge lolongengngi apakalang battowa. Engka tau mattuwangngi karéta musuna, engkato mattuwangngi anyaranna. Iyakiya idi mattuwangngi akuwasanna Puwangnge, Allataalata. Tabbuttui matu mennang sibawa mabuwang, iyakiya tokkokki matu sibawa tettong masse. Oh Puwang, wéréngngi apakalang arungngé, baliki wettutta mangobbi. Untu' pamimping kor. Mazmurna Daud. Oh Puwang, marennui arungngé nasaba purai Mupéwatangi; mariyo-riyoi nasaba apakalang iya Muwéréngngéngngi! Purani Mupennoi cinnana atinna, sibawa mpéréngngi aga iya naéllauwé. Lao-Ko ri aléna sibawa barakka maona, sibawa pasang passigera ulaweng ri tompo ulunna. Méllauwi atuwong, namuwéréngngi, mala umuru malampé untu' mannennungeng. Nasaba pattulum-Mu mancajiwi malebbi senna, Mupancajiwi tarompo sibawa mattappa. Mubarakkakiwi untu' matteru; ahadérékem-Mu mébbui penno ariyo-riyong. Mamménasai arungngé lao ri Puwang Iya Pommatanré, tuli amangngi saba' tette'i riyamaséi ri Puwangnge. Natawangngi matu sininna balinna, sibawa tikkengngi sininna tau iya céccééngngi Aléna. Poléi pada-pada api iya malluwa'-luwa'é untu' paccappui mennang. Ripaccappui matu mennang ri caina Puwangnge, sibawa api iya paangurengngé. Polé ri wija-wijanna mennang dé'na gaga nasésa, ripaccappu manengngi matu mennang ri arungngé. Rékko mébbui mennang rancana méwai arungngé, belléna mennang dé' nawwassélé matu. Nannémbakengngi matu pana-Na, angkanna mennang balé sibawa lari. Idi poji-Ko Puwang, saba' battowai akuwasam-Mu, makkélokki pojiwi aporéngem-Mu. Untu' pamimping kor. Situru lagunna: Jonga ri éléé. Mazmurna Daud. Allataalaku, oh Allataalaku, magi Musalaika? Mangobbika, iyakiya tette'-Ko mabéla sibawa dé' natulukka. Oh Allataalaku, mangobbika ri lakessoé, iyakiya tette'-Ko mammekko. Massempajakka ri wennié, dé'to natennang atikku. Iyakiya Iko Arung Iya Pommapaccingngé, iya napoji-pojiyé Israélié. Mamménasai néné-nénéta ri Iko, mamménasai mennang, sibawa Mupassalama'i mennang. Mangobbii mennang ri Iko sibawa ripaleppe; mamménasai mennang sibawa dé' naripakacélé. Iyakiya iyya'é lati, tenniya tolino, ricella-cella sibawa ripakatuna ri tau maégaé. Sininna iya mitaékka méllékéllé'ka, mabbuwé sibawa paccilic-cilingngi ulunna. Adanna mennang, “Leppessangngi mattuwangngi Puwangnge, kuwammengngi Puwangnge passalama'i, rékko masennangngi Puwangnge lao ri aléna!” Iko ritu passuka polé ri parémmanangngé, sibawa mébbuka amang ri wakkanna indo'ku. Sipongekku jaji, engkai totoku ri laleng limam-Mu, sipongenna ri laleng parémmanang, Iko ritu Allataalaku. Aja' Mumabéla, saba' macawé'ni bahayaé, na dé'gaga mattulung. Pada-pada banténg makkonrongngé, nakatulukka balié, pada-pada banténg liya polé ri Basan nakeppukka mennang. Naoloika sibawa bawa mangnganga, pada-pada singa iya mangngaungngé sibawa palupperi. Cappui awatangekku pada-pada uwai tuppa'é, leppe' manengngi buku-bukukku polé ri padduppanna, maccolo'i atikku pada-pada lilingngé. Marakko tigero'ku pada-pada reppa pincengngé, maddeppé lilaku ri ellak-kellakku. Puwang, Musalaika ri tompo'na awué pada-pada tau iya matéénna. Nakeppukka garembolanna tau majaé; pada-pada asu makkonrongngé katulukka mennang, toddo'i limakku sibawa ajéku. Sininna bukukku uwullé bilangngi, naitaka balié selaku akkaita-itang. Nabagé-bagéi mennang pakéyakku, sibawa mundiwi jumbaku. Iyakiya Iko, aja' tamabéla, oh Puwang, poléni masitta tulukka, saba Iko ritu awatangekku. Paleppe'i nyawaku polé ri peddangngé, passalama'ka polé ri pakkokkona asué. Dé' pakkullékku, paleppe'ka polé ri tanru'na banténgngé sibawa polé ri pannyoro'na singaé. Ucuritai matu pangkaukem-Mu lao ri silessu-silessurekku; ri laleng assiruntukenna umma'-Mu upoji-poji-Ko. Pojiwi Aléna, éh sining tau mateppe'é! Pakarajai Aléna, sininna wija-wijanna Yakub! Suju'no ri Aléna, sininna wija-wijanna Israélié! Saba' dé' Naita matunai tau ritenre'é, sibawa dé' naangga énténgngi anrasa-rasanna. Dé' Nagiling polé ri tauwéro, iyakiya maréngkalingai rékko méllau tulungngi ri Aléna. Ri tengngana addeppungenna umma'é upoji-Ko, nasaba sininna iya puraé Mupogau'. Ri yolona umma iya mateppe'é uwakkasuwiyangengngi akkarobangeng iya uwajjanciyangngé. Manréi matu tau kasiyasié gangka messo; tau iya laowé ri Puwangnge pojiwi matu. Tennapodo saléwangekko mannennungeng! Sininna bangsaé naéngngerangngi matu Puwangnge sibawa lisui ri Aléna, sininna suku bangsaé suju'i matu sompai Aléna. Saba' Puwangnge ritu makuwasa, Naparéntai bangsa-bangsaé. Sininna tau battowaé suju'i matu ri yolo-Na, sininna tolinoé suju'i matu sompai Aléna. Abbatireng-abbatireng rappina massompai matu ri Puwangnge, riyabbirittangngi matu massossoreng. Lao ri bangsa iya jajiyé ri munrinna ribirittaiyangngi matu makkedaé purani napassalama Puwangnge umma'-Na. Mazmurna Daud. Padai séddié pakkampi Puwangnge lao ri aléku, dé' uwakurangeng. Napaléwuka ri padang wella iya manyilaé. Napimpikka mattuju ri uwai iya tennangngé. Nawérékka awatangeng mabaru, sibawa nadulukka ri laleng iya tongengngé, situru sibawa jancin-Na. Namuni uwolai lompo iya mapettangngé, dé' umétau ri bahayaé, saba' Musilaongekka. Mulinrungika pada-pada séddié pakkampi linrungiwi bimbala'na sibawa tekkeng nenniya tarasulu. Mupassadiyangekka pésta ri yolona matanna balikku. Muduppaika selaku topolé malebbié. Mupatalangekka énungeng makessing maona. Uwisseng makessik-Ko lao ri iyya, sibawa tuli mamaséika. Na weddikka monro ri Bola-Mu, gangka tuwoku. Mazmurna Daud. Appunnangenna Puwangnge linoé lollong lise'na, linoé sibawa sininna iya monroiyéngngi. Napalénne'i pabborina ri tompo'na tasi'é, sibawa patettongngi ri tompo'na uwai maliyungngé. Nigana wedding ménré ri Bulu-buluna Puwangnge, sibawa muttama ri laleng Bola-Na? Tau iya dé'é namakkécella pikkiranna sibawa pangkaukenna, iya dé'é nattanro bellé-bellé sibawa dé' nassompa barahala. Aléna ritu ribarakkaki matu sibawa ripassalama ri Puwangnge, sibawa ripannessa dé' napasala ri Allataala. Makkuwaniro tau iya polé mangolo ri Allataala, iya polé sompai Allataalana Yakub. Timpa'i malowang gerbang cowaé, kuwammengngi nauttama Arung iya malebbié. Niga Arung iya malebbié? Aléna ritu Puwang iya baranié; Puwang pennoé akuwasang, iya tassebbo'é ri laleng ammusurengngé. Timpa'i malowang gerbang cowaé, kuwammengngi nauttama Arung malebbié. Niga Arung iya malebbié? Puwang Iya Pommakuwasaé, Aléna ritu Arung iya malebbié! Mazmurna Daud. Ri Iko oh Puwang, upaénré sempajakku, oh Allataalaku, mateppe'ka lao ri Iko! Aja' taleppessakka ripakasiri, sibawa rigora-gorai risining balikku. Tau iya bali'bellaé ri Iko ripakasirii matu, iyakiya iya mateppe'é ri Iko dé' naripakacélé. Ajjellokenni élo-Mu lao ri iyya, oh Puwang, pannessani aga harusu upogau'. Pagguruka sibawa pimpikka untu' tuwo situru élo-Mu, saba' Iko ritu Allataala iya passalama'ékku, tuli mamménasaka lao ri Iko. Engngerangngi sininna akessingemmu sibawa pammasé-Mu, oh Puwang, iya Muwajjellokengngé ri pammulanna mupa. Addampengenni dosa sibawa asalang wettu kalloloku, éngngerakka situru sibawa pammasé-Mu nenniya akessingem-Mu. Saba' makessingngi Puwangnge sibawa adélé'i, Najjellokengngi lalengngé lao ri tau iya pusaé. Puwangnge pimpingngi tau iya mariyawa atié, sibawa paggurui mennang élo-Na. Tau iya mapatoé ri assijancin-Na sibawa hukkun-Na, Nagaukengngi sibawa mamasé nenniya matinulu. Puwang, addampengekka situru jancim-Mu, saba' battowai asalakku. Puwangnge mappagguruwangngi lao ri tau mateppe'é laleng iya harusu'é naola mennang. Tette'i matu mennang tuwo madécéng, ana' eppona mennang manai matu tana manana. Puwangnge iyanaritu sellaona tau mateppe'é, napannessai akkatta-Na lao ri mennang. Tette'i matakku mattuju lao ri Puwangnge, saba' Napassalama'ka polé ri bahayaé. Itaka, sibawa amaséika, saba' napassalama'ka polé ri bahayaé. Pédé tattambai asussanna atikku paleppe'ka polé ri aperisekku. Pénessaini anrasa-rasakku sibawa asukkarakekku, sibawa addampengenni sininna dosaku. Itani pékkugi égana balikku; nacéccé senna'ka mennang. Jagaika sibawa passalama'ka, kuwammengngi dé' umasiri, saba' mallinrukka ri alé-Mu. Tennapodo akessingengngé sibawa alempurengngé silaongekka, saba' mamménasaka ri Iko. Oh Allataala, paleppe'ni umma'-Mu polé risininna aperisenna. Wérékka adélékeng, oh Puwang, saba' tuwoka sibawa malempu ati. Mamménasaka lao ri Puwangnge, sibawa tebbata-bata muwi céddé. Salidikika, oh Puwang, sibawa ojika, paréssai cinnaku sibawa pikkirakku. Tuli uwéngngerangngi matu pammasé-Mu, sibawa tette matinulu lao ri Iko. Dé' umaélo maddeppungeng silaong pabbelléngngé, iyaré'ga siwollompollong sibawa tau munapé'é. Ucéccé addeppungenna tau iya pogau'éngngi majaé, uniniriwi bangsa majaé. Ubissaiwi limakku tanrang teppasala, sibawa joppa mattulilingiwi mézba-Mu, oh Puwang, napuwélong towi élong sukkuru'é, sibawa mabbirittangngi pangkaukem-Mu iya mappabengngaé. Upojiwi Bola-Mu, oh Puwang, onrom-Mu monro sibawa penno arajang. Aja' taunoka silaong tau madosaé, iyaré'ga reddu'i nyawaku silaong tau pappassu daraé. Matteru-terui mennang pogau'i majaé, sibawa tuli sadiyai tarima pasoso. Iyakiya tuwoka sibawa ati matinulu, amaséika sibawa paleppe'ka. Na amakka polé ri sininna bahayaé, upojiwi matu Puwangnge ri laleng addeppungenna umma'-Na. Mazmurna Daud. Puwangnge iyanaritu cahayaku sibawa asalamakekku, dé'gaga iya uwétauriyé. Puwangnge iyanaritu bénténg allinrungekku, dé' matu umétau. Rékko nagasaka tomajaé iya maéloé mpunoka, mennang ritu tabbuttu sibawa mabuwang. Namuni rikeppukka ri pasukang iya battowaé, dé' umétau matu. Namuni poléi musué méwaka, tette'ka mamménasa. Banna séddi uwéllau ri Puwangnge, banna iyaé uwacinnai: monro ri Bolana Puwangnge sillampé atuwokku, untu' péneddingiwi akessingenna Puwangnge sibawa méllauwi pappimpin-Na. Nalinrungika Puwangnge ri wettu aperisengngé; Nasubbuka ri laleng Bola-Na, sibawa naakkaka ri tompo'na bulu batué. Makkekkuwangngé pakalana lao ri balié ri mattulilikku; nasibawang gora-gora marennu uwakkasuwiyangengngi akkarobangeng sukkuru'é ri Bola-Mu; maéloka makkélong sibawa pojiwi Puwangnge. Oh Puwang, éngkalingai rékko mangobbika ri Iko, amaséika sibawa balika! Makkeda-Ko, “Poléno sompa-Ka.” Ubaliwi, “Masitta'ka polé, oh Puwang; aja' tamassubbu polé ri aléku.” Aja' tamacai sibawa sampéyangngi atam-Mu, saba' Iko ritu pura tulukka. Aja' tabuwakka iyaré'ga salaika, oh Allataala, pappassalama'ku. Namuni nasalaika ambo' sibawa indo', Allataala piyaraka matu. Jellokekka élo-Mu, oh Puwang, pimpikka ri laleng iya malempué, saba' maéga senna balikku. Aja' tabbéréyakka lao ri napessunna balikku, iya gasaékka sibawa bellé nenniya pangancang. Mateppe'ka upéneddingiwi matu akessingenna Puwangnge ri laleng atuwokku ri linoéwé. Amménasano lao ri Puwangnge, péwatangini sibawa pakkasse'ni atimmu; ya, amménasano lao ri Puwangnge! Mazmurna Daud. Oh Puwang, ri alé-Mu mangobbika, Iko pangéwaingekku, éngkalingai pangobbiku. Rékko mammekko-Ko lao ri iyya, pada-padaka tau iya nonnoé ri kalebbong kuburu'é. Engkalingai paréllaukku rékko goraka méllau tulung, sibawa makkai limakku mattuju ri Bola-Mu iya mapaccingngé. Aja' mupaccappuka silaong tau madorakaé, silaong tau iya pogau'é ja. Mabbicarai mennang sibawa mabessa, iyakiya atinna mennang pennoi akebbongeng. Hukkungngi mennang nasaba pangkaukenna, nasaba ja iya napogau'é mennang. Hukkungngi mennang situru sibawa pangkaukenna; wéréngngi mennang pahukkungeng iya sicoco'é. Dé' mennang nabati-batiwi pangkaukenna Puwangnge, iyaré'ga aga iya Najamaé. Narihukkung matu mennang, sibawa paccappui mennang untu' mannennungeng. Ripojiwi Puwangnge, saba' purani Naéngkalinga paréllaukku. Puwangnge pallinrukku sibawa pangéwaingekku, mateppe'ka ri Aléna. Mattulungngi sibawa pérennuiwi atikku, upojiwi Aléna sibawa élong sukkuru. Puwangnge mabbéré awatangeng lao ri umma'-Na, Naéwaiwi sibawa Napassalama'i arung napilé-Na. Passalama'i umma'-Mu, oh Puwang, barakkakiwi sining tau appunnangem-Mu. Ancajino pada-pada séddié tau pakkampi untu' mennang, sibawa onrowangngi mennang untu' mannennungeng. Mazmurna Daud. Pojiwi Puwangnge, éh mahlu'-mahlu' surugaé, pojiwi arajanna sibawa akuwasan-Na. Pojiwi asenna Puwang iya malebbié sompai Aléna sibawa paké pakéyang assompang. Allataala iya marajaé magguttui ri tompo'na tasi'é, maddaremmengngi saddan-Na ri tompo'na dolangengngé. Riyéngkalingai saddanna Puwangnge, pennoi akuwasang sibawa agaggang. Naléttung aju-kajungngé saddanna Puwangnge, napolo aju camara Libanongngé. Napaluppe'i Bulu Libanon pada-pada ana' sapingngé. Luppe'-luppu'i Bulu Siryon pada-pada ana' banténgngé. Saddanna Puwangnge naébbui billa'é siyanré-anré. Saddanna Puwangnge gottangngi padang kessi'é, Puwangnge gottangngi padang kessi Kadés. Nagottangngi aju-kajung berangangngé saddanna Puwangnge, sibawa padduttungngi daud-daungngé ri ale'é; na umma'é ri Bolana Puwangnge mangobbii, “Pojiwi Puwangnge!” Makuwasai Puwangnge ri lémpe rajaé, makuwasai selaku Arung untu' mannennungeng. Tennapodo Puwangnge mabbéré awatangeng lao ri umma'-Na, sibawa mébbui mennang saléwangeng. Mazmurna Daud. Elong untu' résmikangngi Bolana Allataala. Upoji-Ki, Oh Puwang, saba' puraka Mupassalama sibawa dé' Muleppessangngi balikku gora-goraika. Puwang Allataalaku, mangobbika ri iko méllau tulung, sibawa Mupajjappaka. Mupaleppe'ka polé ri linona amaténgngé, sibawa patuwoka polé ri yelle'na sining tau maté. Puwélonni pappoji-pojiyangngé untu' Puwangnge, éh umma'-Na iya matinulué, sibawa sukkuru'no lao ri Iya Pommapaccingngé. Saba' cinampe'mi macai Puwangnge, akessingen-Na matterui sillampé atuwongngé. Terika ri wennié, iyakiya éléé tiwii arennung. Wettunna marasa amang, makkedaka, “Dé' naricauka matu!” Saba' mekessing ati-Ko lao ri iyya, oh Puwang, Mupancajika pada-pada bulu masse'é. Iyakiya rimunri massubbu-Ko polé ri iyya, naumancaji métau. Ri Iko, oh Puwang, mangobbika, lao ri Puwangnge maréllauka, “Aga akkégunana ri alé-Mu rékko matéka sibawa nonno ri kalebbong kuburu'é? Weddigga tau maté poji-Ko sibawa mabbirittangngi atinulurem-Mu? Engkalingai, oh Puwang, sibawa amaséika. Puwang tulukka!” Purani upinra mpatikku mancai séré-séré marennu, Muwalai amessékku na-Mupennoika sibawa ariyo-riyong. Na dé' umaélo pammekkorengngi alé; upuwélongengngi pappojiyang alé-Mu, oh Puwang Allataalaku, sibawa sukkuru lao ri Iko untu' mannennungeng! Untu' pamimping kor. Mazmurna Daud. Ri alé-Muka mallinrung oh Puwang, aja' taleppessakka ripakacélé. Passalama'ka nasaba adélékem-Mu éngkalingaka sibawa paleppe'ka masitta. Ancajini lao ri iyya pada-pada bulu batué onrokku mallinrung, pada-pada bénténg iya mawatangngé, kégaka salama. Ya, pada-pada-Ko bulu batué sibawa bénténg iya masse'é untu' aléku! Pimpikka situru sibawa jancim-Mu. Leppessakka polé ri siyo iya ripasangengngékka, saba' Iko ritu onrokku mallinrung. Ri laleng limam-Mu uwabbéréyang aléku; Iko paleppe'ka, oh Puwang, Allataala iya matinulué. Mucéccéi tau iya massompaé barahala; iyakiya mateppe'ka lao ri Puwangnge. Marennuka matu sibawa mariyo-riyo saba' tette'-Ko mamaséika. Muwitai anrasa-rasakku sibawa mujampangiwi asussakku. Dé' muleppessakka ritawang ri balié, iyakiya pakkulléka joppa sibawa laluwasa. Amaséika, oh Puwang, saba' ri laleng asussakka; mapessé matakku nasaba teri, tubu nyawaku maddoko-roko. Cappui atuwokku ri laleng anrasa-rasang, labe'i taut-taukku ri laleng addarékéng. Koddoi awatangekku nasaba jaku, mala buku-bukukku mancaji marapo. Mancajika tawangeng untu' sininna balikku, mala untu' sining balibolaku. Tasséleng maneng sissekku rékko naitaka, lariwi mennang rékko siruntu'ka ri lalengngé. Riyallupaika pada-pada tau maté, sibawa mancaji pada-pada barang riyabbéyangngé. Kégi-kégi engka mappakatau-taué; uwéngkalingai karéba-karébanna balikku. Sikongkolo'i mennang méwaka, sibawa mébbu rancana untu' mpunoka. Iyakiya maddennuwakka ri Iko, oh Puwang, saba' Iko ritu Allataalaku. Tuli Mupiyaraka; passalama'ka polé risining balikku, sibawa polé risining tau iya lellungngékka. Tennapodo Muwéloriwi atam-Mu; passalama'ka nasaba pammasé-Mu. Aja' taleppessakka masiri, oh Puwang, saba' mangobbika lao ri Iko. Leppessanni tau majaé ripakasiri, sibawa mammekko-mekko nonno ri linona tau maté. Sessangngi bawana sining pabbellé iya nasibawangngé atempong méllé'-kéllé'i tau malempué. Temmaka onana akessingem-Mu iya Mupassadiyaé untu' tau mateppe'é! Tungke tau mitaéngngi akessingeng iya Mupogau'é, untu' mennang iya mallinrungngé ri alé-Mu. Musubbui mennang ri laleng accinaungem-Mu polé ri siyasa'na tau majaé; Muwonrowangngi mennang ri laleng allinrungem-Mu polé ri pattenre'na balié. Ripojiwi Puwangnge! Mappabengnga senna pammasé-Na ri aléku, wettukku rikeppung sibawa rigasa. Ri laleng alippukku uwasengngi purana nabbéyang Puwangnge polé ri yolo-Na. Iyakiya purani Naéngkalinga paréllaukku wettukku mangobbi ri Aléna. Eloriwi Puwangnge, éh sininna umma'-Na, nalinrungiwi Puwangnge tau iya matinulué. Iyakiya Nahukkungngi tau matempoé sibawa dé' nacarinnaiwi. Péwatangiwi sibawa pakkasse'i atimmu, iko maneng iya mamménasaé ri Puwangnge! Mazmurna Daud. Elong pappagguruwang. Masennangngi tau iya riyaddampengengngé dosana, sibawa riyaddampengengngé asalanna. Masennangngi tau iya dé'é naribilang jana ri Puwangnge, sibawa iya dé'é napojiwi mabbellé. Sipongeng dé'napa uwangakuiwi dosaku, maddoko-rokoka nasaba maddaréké puppu esso. Esso wenni Iko natenre'ka, Puwang, cappu awatangekku pada-pada nattemmekiyé tire mata esso. Nainappa uwangakui dosaku lao ri Iko, dé'gaga usubbu asalakku. Upettuini untu' mangakuiwi lao ri Iko, sibawa Muwaddampengengngi sininna dosaku. Rimakkuwannanaro tungke tau matinulué sitinajai massempajang wettunna péneddingi aperiseng, angkanna rékko poléi lémpe asussangngé, dé' nappo'i. Iko ritu onrong assubbungekku, Mupaleppe'ka polé ri asukkarakengngé. Naugora-gora marennu, saba' puraka Mupassalama. Adanna Puwangnge, “Ujellokekko matu laleng iya harusu'é uwola, Upimpikko matu sibawa Upangajari. Aja' mupada anyarang iya dé'é akkalenna, iya harusu'é ripaturu sibawa galang nenniya tulu kuwammengngi naturu.” Tau madosaé nakennai maéga anrasa-rasang; iyakiya tau iya mamménasaé lao ri Puwangnge tette'i rilinrungi ri pammasé-Na. Eh sining tau malempué, arennuno sibawa mariyo-riyo nasaba aga iya puraé napogau' Puwangnge. Gorano marennu, éh sininna tau iya malempu atié! Eh sining tau malempué, gorano marennu nasaba aga iya puraé napogau' Puwangnge; sipato'i tau malempué mappoji-poji. Sukkuru'no lao ri Puwangnge sibawa kacapi, akkélongenni Aléna sibawa naccowéri musi'. Akkélongenni élong baru untu' Puwangnge, acculéyangngi kacapié makessik-kessing nenniya gorano sibawa marennu! Sininna ada-adanna Puwangnge wedding riyatepperi; matinului ri laleng sininna pangkauken-Na. Naéloriwi alempurengngé sibawa adélékengngé; sininna linoé pennoi sibawa pammasé-Na. Mabbéréi parénta Puwangnge, nancaji langié; mata essoé, kétengngé sibawa wéttowingngé ripancajiwi ri ada-adan-Na. Napaddeppungengngi sininna uwaina tasi'é riséddié onrong, dolangeng malowangngé Natahangngi ri laleng téppo'é. Leppessanni sininna linoé métau lao ri Puwangnge sibawa pabbanuwana linoé pakalebbii Aléna. Saba' makkeda-adai, Naripancaji maneng; Namabbéréi parénta, naengka maneng. Puwangnge teppasipoléngengngi rancanana bangsa-bangsaé, Napaddéi niya'na mennang. Iyakiya rancanana Puwangnge tette'i mattahang, masse'i rancangan-Na sillampé wettué. Masennangngi bangsa iya mangakuiyéngngi Puwangnge selaku Allataalana, masennangngi umma iya Napilé mancaji appunnangen-Na! Polé ri surugaé makkitai Puwangnge liyawa, nanaitai sininna rupatauwé. Polé ri kadéra arajanna natangngai Puwangnge sininna iya monroiyéngngi linoé. Aléna ritu mébbui atinna mennang, sibawa missengngi sininna pangkaukenna mennang. Dé' napakala arungngé nasaba battowana tentarana, dé' nasalama prajuri'é nasaba awatangenna. Dé' nawedding riyattuwang anyarangngé untu' pakala, awatangenna iya battowaé dé' naulléi mappassalama. Puwangnge jagaiwi sining tau iya mateppe'é iya maddennuwangngéngngi pammaséna. Napassalama'i mennang polé ri amaténgngé, sibawa patuwoi mennang ri wettu akkadérengngé. Natamaddennuwang lao ri Puwangnge, aléna ritu pattulung sibawa pangéwaingetta. Mariyo-riyoki nasaba Aléna sibawa mateppe lao ri asenna iya mapaccingngé. Tennapodo tette'ki muwamaséi, oh Puwang, saba' mamménasaki lao ri iko. Mazmurna Daud, wettunna najjai maoja'-oja' ri yolona Ahimélékh, angkanna ripaddésu nalao. Maéloka sukkuru lao ri Puwangnge tungke wettu, sibawa mallanréseng pojiwi. Maéloka sukkuru nasaba pangkaukenna Puwangnge; tennapodo tau ritenre'é naéngkalingai sibawa marennu. Sibawakka pakarajai Puwangnge, laono mai tasibawa pakalebbii asen-Na. Massempajakka lao ri Puwangnge, Namappébali, sibawa paleppe'ka polé ri sininna tauwé. Tau ritenre'é maddennuwangngi ri Aléna sibawa marennu, dé' mennang nappunnai alasang untu' mancaji masiri. Mangobbii tau macilakaé naribali ri Puwangnge, ripaleppe'i polé ri sininna aperisengngé. Malaéka'na Puwangnge jagaiwi tau iya mateppe'é, sibawa paleppe'i mennang polé ri bahayaé. Pérasai kalému pékkugi kessinna Puwangnge, masennangngi tau iya mallinrungngé ri Aléna. Pakalebbii Puwangnge, éh iko umma'-Na, saba' tau mateppe'é dé' naakurangeng matu. Muwi sining singaé maluputo nasaba makurangngi anréna; iyakiya tau iya sompaéngngi Puwangnge dé' naakurangeng. Engkalingai, éh ana'-ana', upagguruko pakalebbii Puwangnge. Macinnakoga malampé sunge sibawa péneddingiwi iya makessingngé? Aja' mupassu ada-ada maja, sibawa aja' mupojiwi bellé. Abélaiwi majaé, pogau'i iya makessingngé, usahakangngi assidaméngengngé sibawa maggangka ullé. Najampangiwi Puwangnge tau malempué, maréngkalingai rékko kelli'i mennang méllau tulung. Iyakiya tau iya pogau'éngngi majaé Naéwai; rékko matéi mennang, masitta'i mennang riyallupai. Rékko mangobbii tau malempué, naéngkalingai Puwangnge, sibawa passalama'i mennang polé ri sininna aperisengngé. Macawé Puwangnge ri tau iya marenni atié; Napassalama'i tau iya teddéngngé sumange'na. Maéga anrasa-rasanna tau makessingngé, iyakiya Puwangnge paleppe'i polé ri iya manenna. Tette'i tubunna rijagai ri Puwangnge, polé ri bukunna dé' muwi séddi ripolo. Tau majaé matéi nasaba jana, tau iya céccééngngi tau malempué rihukkungngi matu. Napassalama'i Puwangnge ata-atan-Na; iya mallinrungngé ri Aléna dé' narihukkung matu. Mazmurna Daud. Puwang, éwai tau iya méwaékka, musui tau iya musuékka. Alani kaliyawo-Mu, namutokkong tulukka. Akkai bessimmu sibawa duru'-Mu untu' méwai tau iya lellungngékka. Powadani lao ri iyya makkedaé Iko pappassalama'ku. Leppessangngi tau iya maéloé mpunoka ricau sibawa ripakasiri. Leppessanni tau iya sikongkolo'é méwaka soro sibawa malippu. Leppessangngi mennang rilellung ri malaéka'na Puwangnge, pada-pada awang towa nassiyamporengngé anging. Leppessangngi mennang rilellung ri malaéka'na Puwangnge ri laleng iya makalemmengngé sibawa malengngo. Paracuma mennang napasangika siyo iyaré'ga kali kalebbong untu' tikkekka. Leppessangngi mennang nakenna abinasang sibawa tennasenna-senna. Leppessangngi mennang riyala ri siyona muto nanasempé sibawa binasa. Naugora-gora nasaba Puwangnge, marennui atikku saba' Napassalama'ka. Nasibawang ati sukku makkedaka, “ Puwang, dé'gaga bandingem-Mu! Mupaleppe'i malemmaé polé ri mawatangngé, iya kasiyasié sibawa manrasa-rasaé polé ri tenreéngngi.” Sabbi-sabbi majaé tokkongngi méwaka, sibawa tenre'ka pogau'i gau'-gau' iya dé'é uwissengngi. Akessingekku nawale'i mennang sibawa ja; tallemme'ka ri laleng apettupaddenuwangengngé. Wettunna mennang malasa, messéka sibawa temmanré; massempajakka sibawa pacannunnui ulué, pada-pada massempajangengngi séddié silessureng iyaré'ga séddié sahaba maréppé. Tunru'ka teringiwi mennang, samanna mabbarataka untu' indo'ku muto. Iyakiya wettukku masussa, masennangngi mennang, sibawa makkatulung méwaka. Joppai mennang takképpak-képpang untu' pakatunaka. Matterui mennang méllékéllé'i séddié tau péso, enrengngé mitaka sibawa paccéccé. Gangka kégi, oh Puwang, gangka kégi banna makkitako bawang? Passalama'ka polé ri paggasana mennang, paleppe'i nyawaku polé ri singa-singaéro. Nausukkuru matu lao ri Iko ri tengngana umma'-Mu, sibawa pojiwi asem-Mu di laleng addeppungenna mennang. Aja' taleppessakka riyacculé-culéi ri tau iya musuékka temmakkésaba'. Aja' muleppessakka rigora-gorai ri tau iya céccéékka temmakkéalasang. Bicaranna mennang dé' namabessa; narancanai mennang pabengnguwangngé lao ri tau iya tuwoé sipammasé-masé. Gora-gorai mennang lao ri iyya sibawa makkeda, makkedaé purani mennang naita pangkaukekku. Iyakiya Iko, Puwang, purani muwita; aja' Muwammekko, oh Puwang, aja' tamabéla polé ri aléku. Tokkonni méwaiwi parakaraku, oh Allataala sibawa Puwak -ku, tulukka! Ewaika, saba' adélé'-Ko, oh Puwang Allataalaku, aja' taleppessangngi balié gora-goraika. Aja' taleppessangngi mennang makkeda ri laleng ati, “Sukkuru'ki, purani ripaccappu nyawana. Ritarimani paréllautta!” Leppessangngi tau iya masennangngé mitai anrasa-rasakku mancaji malippu sibawa masiri. Leppessangngi tau iya mattempowangngéngngi aléna lao ri iyya ripakatuna sibawa ripakasiri. Tennapodo tau iya macinnaé mitaka ripattongengngi gora-gora sibawa marennu. Tennapodo mennang makkolik-kolingngi makkeda, “Maraja tongeng Puwangnge! Nacinnaiwi asalamakenna atan-Na!” Nauwabbirittangngi matu adélékem-Mu, sibawa poji-Ko puppu esso. Untu' pamimping kor. Polé ri Daud, atanna Puwangnge. Mabbicarai dosaé ri laleng ati marilalenna tau majaé, dé' sises-siseng namétau lao ri Allataala. Nangga'i aléna héba' senna, angkanna dé' namaingekiwi asalanna, sibawa dé' nacéccéi. Maja ada-adanna sibawa penno bellé, dé'na napogau'i iya makessingngé sibawa mapanré. Narancanai majaé ri onrong atinrongngé; dé'gaga makessing pangkaukenna, dé' nasampéyangngi majaé. Puwang, sittanré langié pammasé-Mu, sibawa atinulurem-Mu lettu ri ellungngé. Akessingem-Mu maccaloli sittanré bulué, sibawa adélékem-Mu pada liyunna dolangengngé; Mupiyarai tolinoé sibawa olokolo'é, oh Puwang. Temmaka angke'na pammasé-Mu, oh Allataala, mallinrungngi tolinoé ri laleng accinaungenna panni-Mu. Messoi sibawa inanré maonaé ri Bola-Mu, sibawa énungeng polé ri salo-Mu iya patakkariyé. Iko ritu assalenna atuwonna sininna mahlu'é, ri laleng tajam-Mu mitaki tajang. Tennapodo tette'-Ko mamaséiwi tau iya missengngék-Ko, sibawa pogau'i makessingngé lao ri tau iya malempu atié. Aja' taleppessakka rigasa ri tau matempoé, iyaré'ga ripaddésu ri tau majaé. Itani, tau iya pogau'é ja mabélani, tallittai mennang sibawa dé'na naulléni moto'na. Polé ri Daud. Aja' mumausé nasaba tau majaé. Aja' mumangémpuru ati lao ri tau iya pogau'é asalang. Saba' masitta'i mennang teddéng pada-pada wellaé, sibawa makelle pada-pada tanet-taneng manyilaé. Ateppe'no lao ri Puwangnge sibawa pogau'ni iya makessingngé, onrono ri wanuwaéro enrengngé kédono sibawa matinulu. Sappani asennangemmu ri Puwangnge, Nanasennangiwi matu cinnana atimmu. Abbéréyangngi atuwommu lao ri Puwangnge, amménasano ri Aléna, Nanatulukko matu. Napannessai matu atinuluremmu pada-pada tajangngé, sibawa atinuluremmu pada-pada lakessoé. Tajenni Puwangnge sibawa ati tennang, tajenni sibawa sabbara narapi tinda'. Aja' mumausé nasaba iya maupe'é atuwonna, iyaré'ga iya pogau'é bellé. Aja' tamacai sibawa tamapella ati, iyaro banna tiwii acilakang. Saba' tau iya pogau'éngngi majaé ripallennye'i matu, iyakiya iya mamménasaé lao ri Puwangnge namanai matu iyaro tanaé. Lennye'i matu tau majaé sibawa masitta, rékko risappai, dé'ni gaga. Tau iya mariyawa atié nappunnangiwi matu iyaro tanaé, sibawa péneddingiwi acommokang iya maonaé. Tau majaé narancanai majaé lao ri tau makessingngé, nenniya mitai sibawa paccéccé. Iyakiya Puwangnge cawa-cawaiwi tau majaé, saba' Naissenni macawé'ni accappurenna iyaro tauwé. Narampui peddanna tau majaé sibawa mannémbakeng pana untu' mpunoi tau kasiyasié sibawa manrasa-rasaé, untu' mpunoi tau iya tuwoé makessing. Iyakiya tau majaé rigajangngi matu ri peddanna muto, ripoloi matu matana. Céddé barang nappunnangi tau makessingngé lebbi mangke'i naiya amaonarenna tau majaé. Saba' akuwasanna tau majaé napoloi matu Puwangnge, iyakiya tau makessingngé Nalinrungiwi. Najagaiwi Puwangnge atuwonna tau malempué, appunnangeng manana mennang tette'i untu' mannennungeng. Ri wettu aperisengngé dé' matu mennang nanrasa-rasa, ri wettu akkadérengngé dé' matu naakurangeng. Iyakiya tau majaé binasai matu, teddéngngi matu balinna Puwangnge pada-pada bungaé ri padangngé, lennye'i matu ri laleng rumpué. Minrengngi tau majaé nadé' napalisui, iyakiya tau makessingngé mabbéréi sibawa makacuwa. Tau iya ribarakkakiyé ri Puwangnge namanai matu iyaro tanaé, iyakiya tau iya Natanroiyé napaddésu'i matu. Napimpingngi Puwangnge tauwé ri laleng iya harusu'é naola, Napakkasse'i tau iya atuwonnaé Naéloriwi. Rékko menrungngi, dé' namalo maladde, saba' Puwangnge makkatenningngi limanna. Mappammulai maloloku lettu macowa, dé' naengka uwitai tau makessingngé nasalai Puwangnge, iyaré'ga ana' eppona mancaji paréllau sidekka. Tuli mappainrengngi sibawa mabbéré, sibawa ana'-ana'na mancaji barakka'i lao ri aléna. Salaiwi majaé, pogau'i makessingngé, na untu' mannennungeng naonroiwi wija-wijammu iyaro tanaé. Saba' naéloriwi Puwangnge pangkaukeng makessingngé sibawa adélé'é, tau iya matinulué ri Aléna dé' Narileppessang kariya-riya. Nalinrungiwi mennang lettu mannennungeng, iyakiya wija-wijanna tau majaé riyunoi matu. Tau malempué namanai matu iyaro tanaé, sibawa monroiwi untu' mannennungeng. Tau makessingngé mabbicarai sibawa mapanré, tuli malempui ri laleng warékkadanna. Hukkunna Allataalana nataroi ri laleng atinna, dé' naléssé polé ri aléna. Tau makessingngé riinti'i ri tau majaé iya sappaé kasempatang untu' mpunoi. Iyakiya Puwangnge dé' naleppessangngi sempé ri limanna balié, iyaré'ga rihukkung ri wettunna riadéléki. Amménasano lao ri Puwangnge sibawa turusiwi parénta-Na, Nanaakkako untu' manai iyaro tanaé; muwitai matu ripallennye tau majaé. Engka naengka uwita séddi tau maja iya pojiyéngngi mabboro; pada-padai aju iya matakkaé sibawa makkure maliyung. Wettukku lalo, dé'ni gagana, usappai, iyakiya dé'ni ulolongeng. Pénessaiwi tau iya makessingngé sibawa malempu atié; tau iya pojiyéngngi assidaméngengngé mappunnaiwi amménasang ri wettu mangoloé. Iyakiya tau madosaé ripaccappui matu; wija-wijanna mennang ripallennye'i matu. Napassalama'i Puwangnge tau malempué, sibawa linrungiwi mennang ri wettu aperisengngé. Natulungngi sibawa napassalama'i mennang, sibawa paleppe'i mennang polé risining tau majaé, saba' mallinrungngi mennang ri Aléna. Mazmurna Daud wettunna makkasuwiyangeng akkorobangeng papparéngngerang. Puwang, aja' tahukkukka ri laleng cai-Mu, aja' tasissaka ri laleng cai-Mu. Pana-Mu nabettui loi tubukku, limam-Mu matane tenre'ka. Masero lasaku nasaba cai-Mu; dé'gaga madising ri tubukku nasaba dosaku. Tallemme'ka ri laleng lémpe asalakku, tiwi dosaku matane senna untu' aléku. Mannana sining loku sibawa mabbau makebbong, nasaba puraka kédo madonggo. Cannunnuka sibawa mabbukku, puppu esso masara sibawa messé. Natunui semmeng tubukku, dé'gaga madising ri watakkaléku. Ancuru'ka sibawa acappureng pakkulléng, maddarékéka nasaba mausé atikku. Puwang, Muwisseng sininna cinnaku, addarékékku dé' natassubbu ri alé-Mu. Maddumba-dumba aroku, teddéng pakkullékku, mancaji mautani matakku. Massala sellao-sellaoku nasaba lasaku, mala sahaba'ku mabélaika. Tau iya macinnaé mpunoka natangika siyo; iya macinnaé cilakaika mangancangngi maélo mpunoka. Iyakiya pada-padaka tau mataru-tarué iya dé'é namaréngkalinga, pada-pada tau pépé iya dé'é nabbicara. Tongeng, pada-padaka tau iya dé'é namaréngkalinga, namakkuwannanaro dé' nabbanta. Iyakiya mamménasaka ri Iko, oh Puwang, na Iko, Puwang Allataalaku, balika. Aja' muleppessangngi balikku masennang mitai asussakku, aja' taleppessangngi mennang mabboro rékko goyakka. Céddé'ka sempé, matteru-teruka mapeddi. Uwangakuiwi dosa-dosaku; manenneng atikku pikkiri'i asalakku. Tau iya musuékka maéga sibawa mawatang, nacéccé mennang cara atuwokku. Tau iya wale'éngngi décéngngé sibawa ja musuka nasaba upogau'i iya makessingngé. Oh Puwang, aja' tasalaika, aja' mumabéla polé ri aléku, oh Allataala. Poléni masitta tulukka, oh Puwang pappassalama'ku. Untu' pamimping kor. Mazmurna Daud. Untu' Yédutun. Pikkiri'ku, “Maéloka jagaiwi alé kuwammengngi dé' umadosa sibawa lilaku. Dé' umaélo mabbicara ri wettu macawé'na mupa tau majaé.” Mammekkoka sisebbu basa, angkanna naparogiwi aléku muto. Na anrasa-rasakku pédé matane'i rasana; naekké'ka abata-batang iya maseroé. Pédé ripikkiri, pédé masussa atikku; angkanna makkedaka, “ Puwang, paissengika uppanna ajjalekku kuwammengngi uwissengngi makkuwamani ponco'na atuwokku.” Temmaka ponco'na Mupattentu umuru'ku! Untu' alé-Mu wettu atuwokku dé' bettuwanna. Tongeng, tolinoé padai seppung nappase'é bawang, labe'i atuwonna pada-pada wajo-wajoé. Sininna alippungenna siya-siyai bawang; nagoppoi waramparangngé, iyakiya dé' naissengngi niga pakéi matu. Makkekkuwangngé aga utajeng, oh Puwang? Ri Iko ritu amménasakku. Paleppe'ka polé ri sininna dosaku, aja' taleppessakka mancaji akkéllé-kéllékenna tau madonggoé. Mammekkoka sibawa dé' natattimpa bawaku, saba' Iko ritu majara'ka. Alani pahukkungem-Mu polé ri aléku, saba' céddé'ka maté nasaba pakkunru-Mu. Tolinoé nasaba asalanna; Muhukkungngi sibawa Muajara' pada-pada cecco'é Muancuru'i aga iya mangke'é ri aléna. Tongeng, tolinoé padai seppung nappase'é bawang. Engkalingai sempajakku oh Puwang, pénessai paréllaukku; aja' Muwonro mammekko rékko terika. Pada-pada sininna néné-nénéku, cinampe bawang mappérumaka ri alé-Mu. Aja' mugangguka, kuwammengngi umasennang céddé, ri wettu dé'napa ulao nadé'na gagana. Untu' pamimping kor. Mazmurna Daud. Nasibawang asabbarakeng utajengngi bantuwanna Puwangnge; nainappa napénessaika sibawa méngkalingai pangobbiku. Nagettekka polé ri kalebbong iya mabbahayaé, polé ri bungka rawa-rawaé. Nataroka ri tompo'na bulu-bulu batué, angkanna mattinetto jongkaku. Napagguruka makkélong élong baru, élong pappojiyang untu' Allataalata. Maéga tau mitai sibawa mancaji métau, namateppe lao ri Puwangnge. Masennangngi tau iya mateppe'é lao ri Puwangnge, iya dé'é naccowé massompa déwata-déwata, iyaré'ga méllau tulung lao ri tau matempoé. Puwang, pékkugi égana winru-Mu untu' aléta, oh Puwang, Allataalaku, dé'gaga padam-Mu! Maéga rancana-Mu iya mappabengngaé untu' idi, dé' namakkullé ricurita maneng. Pakkasuwiyang sibawa akkarobangeng ripatala dé' Mupojiwi, akkarobangeng ritunu sibawa akkarobangeng pappaledda dosa dé' Mutuntu'i. Iyakiya puraka Muwéréng daucculing iya mullééngngi méngkalingai saddam-Mu. Naumakkeda, “Iyya'naé, ri laleng kitta lulungngé tarokii untu' aléku: Masennakka pogau'i élo-Mu, oh Allataala, utaroi hukkum-Mu ri laleng ati.” Ri laleng addeppungenna umma'-Mu uwabbirittangngi karéba marennué makkedaé pura-Ko passalama'ki. Na dé'gaga appésaunna uwappallebbangeng iyaro gau'é, Muwisseng maneng iyaro, oh Puwang. Iyaro karéba asalamakengngé dé' utaroi ri laleng ati, pattulung sibawa atinulurem-Mu tuli uwabbirittangngi. Ri yolona addeppu-deppungenna umma'-Mu dé' uwammekko, iyakiya uwappallebbangengngi pammasé sibawa atinulurem-Mu. Puwang, aja' Muwappésau mamaséika; tuli linrungika sibawa pammasému nenniya atinulurem-Mu. Nakeppukka abala iya maégaé, dé' nariyullé bilang jumellana. Nalellukka dosa-dosaku angkakku dé' naulléi makkita. Jumellana napakacauri gemme'é ri ulukku, mébbuka pettu paddennuwang. Oh Puwang, passalama'ka, Apperi-perini Puwang tulukka! Leppessangngi tau iya macinnaé mpunoka ricau sibawa lari alippuwang. Leppessangngi tau iya gora-goraiyéngngi acilakakku ripasoro sibawa ripakatuna. Leppessangngi tau iya cawa-cawaiyékka mancaji tasséleng sibawa masiri. Tennapodo sininna tau iya sompaék-Ko mariyo-riyo sibawa marennu, sibawa sininna iya méloriyéngngi asalamakeng polé ri Iko matterui makkeda, “Maraja tongengngi Puwangnge!” Iyya'é kasiyasika sibawa malemma, iyakiya Puwangnge pénessaika. Iko ritu pattulung sibawa pappassalama'ku, aja' mumatengnge, oh Allataalaku! Untu' pamimping kor. Mazmurna Daud. Masennangngi tau iya jampangiyéngngi tau iya malemmaé; Puwangnge tulungngi matu ri wettu aperisengngé. Puwangnge linrungiwi matu sibawa piyarai, Nasennangiwi matu ri linoé, sibawa dé' nabbéréyangngi lao ri balinna. Dé' natulungngi matu Puwangnge ri wettunna malasa, sibawa palisui adisingenna. Adakku, “Modosaka lao ri Iko, oh Puwang, amaséika sibawa pajjappaka.” Napowadai balikku iya majaé passalekku, macinnai mennang kuwammengngi umaté sibawa riyallupai. Sining tau iya célléngiyékka dé' namalempu. Napaddeppungengngi mennang karéba majaé passalekku, nainappa napatassiya lao kégi-kégi. Sininna iya céccéékka mabbici-bici; napowadai mennang iya kaminang majaé passalekku. Adanna mennang, “Maladde senna lasana, dé' nakkullé moto'na.” Mala sellao maréppé'na iya kaminang uwatepperiyé, tau iya sisamaékka manré, pura pakatunaka. Amaséika oh Puwang, pajjappaka, kuwammengngi uwulléi mpale'i jana sining balikku. Rékko dé' naricauka ri balikku, uwissenni makkedaé Muwélorika. Mutulukka nasaba alempurekku, sibawa mébbuka tuwo sibawak-Ko untu' mannennungeng. Pojiwi Puwangnge, Allataalana Israél! Pojiwi Aléna makkekkuwangngé sibawa mannennungeng! Jajini makkuwaro. Amin! Untu' pamimping kor. Elong pappagguruwang appanna Korah. Pada-pada jongaé muddaningiwi uwai saloé, makkuwaniro nyawaku muddaningi-Ko, oh Allataala. Uwuddaningiwi Allataala iya tuwoé, uppanna weddikka lao massompa ri Bola-Na? Esso wenni terika, banna uwai mata inanréku. Puppu esso makkutana balikku, “Kégai Allataalamu?” Messé atikku rékko méngngerangngi wettu riyolo, wettukku mattuju ri Bolana Puwangnge silaong tau maégaé iya pakangkaé ramé-ramé. Joppaka ri yolona barisi'é nasibawang gora-gora nenniya élong pappojiyang. Magi namessé atikku sibawa mausé? Mamménasaka lao ri Allataala. Nausukkuru matu paimeng lao ri Aléna, lao ri Allataalaku sibawa pappassalama'ku. Tennapodo najjellokengngi Puwangnge pammasé-Na ri lakessoé, kuwammengngi ri wennié weddikka makkélong, sibawa massempajang lao ri Allataala assalenna atuwokku. Makkedaka lao ri Allataala, pangéwaingekku, “Magi Muwallupaika? Magi naharusu'ka matteru manrasa-rasa, nasaba ritenre risining balikku?” Ancuru atikku nasaba pangéllé'na balié. Matterui mennang makkutana, “Kégai Allataalamu?” Magi namessé atikku sibawa mausé? Mamménasaka lao ri Allataala. Nausukkuru matu paimeng lao ri Aléna, lao ri Allataalaku sibawa pappassalama'ku. Wérékka adélékeng, oh Allataala. Ewaiwi ha'ku lao ri bangsa iya madorakaé. Paleppe'ka polé ri tomajaé sibawa pabbellé. Iko ritu Allataala, pallinrukku; magi Musalaika? Magi naharusu'ka matteru-teru manrasa-rasa nasaba ritenre'ka risining balikku? Pannessani atinulurem-Mu untu' tappaka sibawa pimpikka, kuwammengngi ulisu ri Sion, bulu-bulu-Mu iya mapaccingngé sibawa lao ri Bola Appérumam-Mu. Nauwattuju matu ri mézbana Allataala, mangolo ri Allataala assalenna asennangekku. Makkélokka matu sibawa makkacapi, untu' poji-Ko, oh Allataala, Allataalaku. Magi namessé atikku sibawa mausé? Mamménasaka lao ri Allataala, nausukkuru matu paimeng lao ri Aléna, nasaba Allataalaku sibawa pappassalama'ku. Mazmurna appang Korah. Elong pappagguruwang. Untu' pamimping kor. Oh Allataala, aléta muto pura méngkalingai curita iya nacuritaé toriyolota passalenna winru masero iya Mupogau'é ri wettu riyolo. Iko muto paddésu'i bangsa-bangsaé kuwammengngi nattette umma'-Mu ri wanuwanna mennang. Mucilakaiwi bangsa-bangsa laingngé, iyakiya umma'-Mu Muleppessangngi mabbija-bija. Iyaro tanaé dé' nasittaiwi sibawa peddang; dé' nasibawangngi awatangeng riyaléna napakala mennang, iyakiya nasibawang akuwasang sibawa cahaya ahadérékem-Mu, saba' Muwéloriwi umma'-Mu. Iko ritu Arukku sibawa Allataalaku, iya mabbéré apakalang lao ri umma'-Mu. Nasibawang akuwasam-Mu ricaui balitta, sibawa patunru'i sining tau iya gasaékki. Saba' dé' uwattuwangngi panaku, muwi peddakku dé'to napassalama'ka matu. Iyakiya Iko ritu passalama'ki polé ri balié, sibawa caui sining tau iya céccéékki. Na idi matu tuli pakaraja-Ko, sibawa matteru-teru sukkuru lao ri Iko. Iyakiya makkekkuwangngé Musalaiki sibawa leppessakki ricau. Dé'na Mumalluru silaong barisatta. Muleppessakki lari polé ri balitta, sibawa rampasa'i mennang waramparatta. Muleppessakki rigérési pada-pada bimbala'é, sibawa Mupassara-sarakki ri yelle'na bangsa-bangsaé. Mubalu'i umma'-Mu sibawa dé' nasiyaga ellinna, sibawa dé' aga-aga saro nalolongeng. Mupancajiki akkéllé-kéllékenna sining balibolaé naéllé'-kéllé'ki mennang sibawa nacawa-cawaiki. Mupancajiki bahang assindirikenna bangsa-bangsaé; napaccilic-ciling mennang ulunna nanapakatuna tokki. Puppu esso ricellaka, tanggungngi sirié sibawa ateddéngeng tappa, nasaba méngkalinga pangéllé sibawa pappakatuna polé ri témunna balié sibawa tau maéloé makkabale. Iya manennaro purani nakenna namuni idi dé' tallupaiko iyaré'ga bali'bellariwi assijancimmu sibawa idi. Atitta dé' nassakkarekko; paréntamu dé' tajampaléllériwi. Iyakiya Musalaiki ri laleng pettangngé; dé' pakkullétta ri yelle'na olokolo masekkangngé. Akkalarapanna dé'na tasompai Allataala, sangadinna massempajang lao ri déwata laingngé, pasti naisseng matu Allataala, nasaba Nawellungiwi rahasiana atitta. Nasaba Iko matteruki riyancang ri amaténgngé, sibawa rigaukeng pada-pada bimbala aggérésengngé. Oto'ni, oh Puwang! Magi Mumatinro? Tokkonni! Aja' tasampéyakki untu' mannennungeng. Magi Mumassubbu, sibawa mallupaiwi anrasa-rasatta enrengngé asussatta? Ancuru'ki mabuwang ri tanaé, léwu ri laleng awué nasaba cauki. Tokkonni sibawa poléni tulukki, passalama'ki nasaba pammasé-Mu. Mazmurna appang Korah. Elong pammasé. Untu' pamimping kor. Situru lagunna: Bunga bakungngé. Mpobbo'i ada-ada magelloé polé ri atikku, uwakkasuwiyangengngi élokku lao ri arungngé. Samanna pénana séddié tau macca, sadiyani lilaku powadai warékkadaé. Iko kaminang magello ri yelle'na tolinoé, ada-adammu pennoi akessingeng, rimakkuwannanaro ribarakkakiko ri Allataala untu' mannennungeng. Tappii peddammu, éh arung baranié, maraja senna'ko sibawa mattappa! Alluruno sibawa barani mattuju ri ataromporengngé méwaiwi atongengengngé sibawa adélékeng iya malemmaé; nasibawang awatangemmu sittaiwi apakalang iya battowaé! Panamu iya macéru'é bettui jantunna balimmu, menrungngi bangsa-bangsaé ri yolomu. Allataala mpérékko akuwasang untu' mapparénta, mattahangngi akuwasammu untu' mannennungeng; muparéntai sibawa adélé ra'ya'mu. Muwéloriwi iya tongengngé sibawa mucéccéi majaé; rimakkuwannanaro, Allataala, Allataalamu pura piléko, sibawa pésennangiko napakacauri arung-ngarung laingngé. Pakéyammu mabbau mur, gaharu sibawa cénrana; pacculé musi'é ri saoraja gadingngé mébbuko marennu. Ri yelle'na sining pattumani saorajaé engkai ana'-ana' makkunrainna arungngé. Ri ataunna kadéra arajangngé tettongngi bainéna sibawa bélo-bélo ulaweng tuléng. Eh Putri, éngkalingai ada-adakku, allupaini bangsamu sibawa sellaomu. Agelloremmu taré'i atinna arungngé, puwammui, tunru'no ri aléna. Pabbanuwana Tirus tiwi pakkasuwiyang untu' alému; makkuragai tau sugié malai atimmu. Muttama'i Putri arungngé sibawa penno agelloreng, wajunna risulang ulaweng. Nasibawang pakéyang madduparupang pecco'na ritinrosiwi lao ri arungngé, riyaccowéri risining parawangngé, silao-silaonna, makkuwatoro mennang untu' arungngé. Gora-gorai mennang sibawa marennu wettunna riantara muttama ri laleng saorajana arungngé! Iko, arukku, lolongengngi matu maéga ana' worowané untu' tudangiwi kadéra arajanna néné-nénému. Mupancajiwi matu mennang panguwasa ri tompo'na linoé. Nasibawang iyaé lagué upakalabbako massossoreng napojiko matu bangsa-bangsaé mannennungeng. Mazmurna appang Korah. Untu' pamimping kor. Nasibawang lagunna Alamot. Allataala iyanaritu allinrungeng sibawa awatangetta; tuli sadiyai sibawa paulléi mattulung ri laleng aperisengngé. Nadé' tamétau, namuni taggottangngi linoé, sibawa sining bulué tallemme ri borina tasi'é; muwi majjallo tasi'é sibawa mabbombang, sibawa ténré sining bulu-bulué nasaba pakkunruna. Engka assolokeng uwai iya parennuiyéngngi Kotana Allataala, onrong naonroiyé Allataala Iya Pommatanré. Monroi Allataala kuwaro, nadé' naancuru iyaro kotaé; Natulungngi matu wettunna masiya' éléé. Magguttui Allataala, naancuru tassiya-siya linoé; méma'i bangsa-bangsaé, maruttung sining akkarungengngé. Puwang Iya Pommakuwasaé sibawakki, Allataalana Yakub linrungiki. Laono mai, itani aga iya napogau'é Puwangnge; temmaka mappahéranna winru-Na ri linoé! Napappajai musué ri sininna linoé, Naancuru'i panaé sibawa bessié, Natunui sining kaliyawo malébué. Adan-Na, “Appésauno mammusu; issenni, Iyya'naé Allataala, maraja-Ka ri yellle'na bangsa-bangsaé, maraja-Ka ri sininna linoé.” Puwang Iya Pommakuwasaé sibawakki, Allataalana Yakub sibawakki. Mazmurna appang Korah. Untu' pamimping kor. Appaleppa'no sibawa marennu, éh sininna bangsaé! Pojiwi Allataala sibawa gora-gora! Saba' Puwang Iya Pommatanré iyanaritu maseroi, Arung Maraja iya makuwasaiyéngngi sininna linoé. Nawérékki apakalang lao ri bangsa-bangsaé, napancajiki panguwasa ri yasé'na suku-suku bangsaé. Napiléngekki tana manata, abangkakenna bangsa iya Namaséiyé. Naénrékini Allataala kadéra arajan-Na, naccowéri gora-gora sibawa oni sangkakala. Puwélonni pappojiyangngé untu' Allataala, puwélonni pappojiyang untu' Arutta! Allataala iyanaritu Arung ri sininna linoé, pojini Aléna sibawa élong penno agelloreng! Tudangngi Allataala ri yasé'na kadéra arajan-Na iya mapaccingngé; Naparéntai bangsa-bangsaé. Siyempe'i sining pamimpinna bangsa-bangsaé selaku umma'na Allataala nasompaé Abraham. Saba' Allataala iyanaritu Arunna sininna arungngé, maraja senna'i sibawa malebbi. Mazmurna appang Korah. Maraja tongeng Puwangnge sibawa ripoji senna ri Kotana Allataalata, ri bulu-bulu iya mapaccingngé. Sion, Bulu Allataala maccaloli'i magello kotana Arung Marajaé perennuiwi sininna linoé. Monroi Allataala ri laleng sining bénténna, annessana Aléna muto pallinrun-Na. Itai, sining arung-ngarungngé maddeppungeng; poléi mennang maélo maggasa. Iyakiya naitana iyaro bulu-bulué, tassélenni mennang; méma'ni mennang sibawa lari malippu. Kuwaniro mennang ténré métau sibawa mapeddi, pada-pada makkunrai iya maéloé mémmana, pada-pada kappala iya ancuru'é ri laleng anginrajaé. Pada-pada iya riyéngkalingaé, taitani makkekkuwangngé, ri Kotana Puwang Iya Pommakuwasaé. Iyaro kotaé iyanaritu Kotana Allataalata, naéwaiwi untu' mannennungeng. Ri laleng Bola-Mu rinennun-nennungngi pammasé-Mu, oh Allataala. Tassebbo'i asem-Mu sibawa ripoji ri sininna linoé, mapparénta-Ko sibawa adélé. Leppessanni ra'ya' Sion sibawa Yéhuda gora marennu, nasaba Muhukkungngi balinna mennang. Attulilingiwi Sion, accennériwi, sibawa bilangngi manarana. Pénessaiwi témbo'na, paréssai bénténna, kuwammengngi muwulléi curitai lao ri wija-wijammu: “Aléna ritu Allataala, Allataalata untu' mannennungeng, Napimpingngi matu lettu mannennungeng.” Mazmurna appang Korah. Untu' pamimping kor. Engkalingai, éh sininna bangsaé, pattujui daucculimmu, éh pabbanuwana linoé, muwi tau biyasaé, iyaré'ga tau mariyoloé, muwi tau kasiyasié, iyaré'ga tau sugié. Maéloka powadai ada-ada mapanré, malamung senna buwa nawa-nawakku. Maéloka puriyatiwi warékkadaé, sibawa pakatajangngi bettuwanna nanaggetti kacapito. Dé' umétau ri wettu aperisengngé, wettukku rikeppung ri bali iya majaé. Nattuwangngi mennanro asugirenna, sibawa mattempowangngi waramparanna. Sitongenna dé' muwi séddi tau mulléi passalama'i silessurenna, iyaré'ga paleppe'i paccéra'na lao ri Allataala. Muwi aga nabbéréyang dé'to nagenne matu; masuli senna ellinna paccéra nyawana, kuwammengngi naleppe polé ri amaténgngé sibawa naulléi tuwo mannennungeng. Dé', naitai matu makkedaé muwi tau mapanré matéto. Tau madongoé sibawa madonggoé pada-padai binasa, nanasalaiwi waramparanna untu' tau laingngé. Monroi matu mennang ri kuburu'é mannennungeng; iyanaro onronna mennang untu' matteru, namuni riyolo mappunnai mennang maéga tana. Tolinoé dé' naulléi tuwo matteru ri laleng asugirengngé; pada-pada olokolo'é, binasa towi matu. Makkuwaniro totona tau iya mattuwangngéngngi aléna, sibawa wettu mangolona tau iya masennangngénna sibawa ada-adanna. Pada-pada bimbala'é, ripattentui mennang untu' maté; mancajiwi matu amaténgngé pakkampina mennang. Maélé mennang ricau ri tau malempué; makebbongngi matu masitta tubunna mennang ri linona tau maté, mabéla polé ri onrong iya makessingngé. Iyakiya Allataala paleppe'ka matu, Napaleppe'ka matu polé ri akuwasanna amaténgngé. Aja' mumétau rékko séddié tau mancaji sugii, sibawa waramparanna tattamba maéga. Saba' wettunna maté dé' aga-aga naullé tiwi, dé' matu nanonno waramparanna ri kuburu'é silaong aléna. Mala rékko séddié tau maupe'i ri laleng atuwonna, sibawa ripoji-poji nasaba pallolongenna, naccinrolaiwi towi matu néné-nénéna ri onrong iya mapettangngé untu' mannennungeng. Dé' naulléi tolinoé tuwo matteru ri laleng asugirengngé, pada-padai, binasa towi matu. Mazmurna Asaf. Puwang, Allataala Iya Pommakuwasaé mabbicara; mangobbii lao ri sininna linoé polé ri alau lettu ri yajang. Polé ri Sion, kota iya kaminang magelloé. Mallurui Allataala sibawa maccahaya. Poléi Allataalata sibawa dé' naonro mammekko, ripoddiyoloi ri api iya mallépe-lépe'é, sibawa riyattulilingi ri anginraja iya maseroé. Naobbii langié sibawa linoé untu' sabbingngi Aléna madélékiwi umma'-Na. Adan-Na, “Paddeppungengngi sininna umma'-Ku iya puraé siyo assijancing sibawa Iyya, nenniya pakkasse'i sibawa akkarobangeng rigéré.” Nabbirittangngi langié makkedaé Allataala madélékiwi umma'-Na, sibawa Alénato hakinna. “Engkalingai, umma'-Ku, maélo-Ka mabbicara, Israél, maélo-Ka mabbéré asabbing lao ri iko; Iyya'naé Allataala, Allataalamu. Tenniya nasaba akkarobangemmu na-Uteppuko; akkarobangeng ritunummu tuli engkai ri yolo-Ku. Dé' Uwapparelluwang saping polé ri wakkému, iyaré'ga bémbé polé ri olokolo makkonrommu; saba' sininna olokolo ri ale'é iyanaritu appunnangek-Ku, sibawa olokolo ri massebbué bulu. Sininna manu'-manu'é ri bulué appunnangek-Ku towi, sibawa sininna mahlu'é ri padang makkale'-ale'é. Rékko malupu-Ka, dé' naparellu Upowadakko, saba' linoé lollong lise'na iyanaritu appunnangek-Ku. Dé' uwanré juku saping lai, dé'to uwénung dara bémbé lai. Akkasuwiyangenni akkarobangeng sukkuru lao ri Allataala, rupaini jancimmu lao ri Iya Pommatanré. Angobbino ri Iyya ri wettu aperisengngé, Upaleppe'ko matu, namupoji-Ka matu.” Iyakiya lao ri tau majaé makkedai Puwangnge, “Dé' muwappunnai ha' powadai hukkuk-Ku, sibawa mabbicara passalenna assijancik-Ku. Saba' dé' mumaélo tarimai pakkamparek-Ku, sibawa sampéyangngi sining parénta-Ku. Rékko mitako séddi panga, muwaccowériwi, nenniya siwollompollokko sibawa sining tau iya pojiyéngngi malaweng. Tuli mupowadai iya majaé, nenniya tuli sadiyako sibawa bellé. Matteruko pétenna'i silessuremmu, sibawa makkeda-kedaiwi silessuremmu. Iyanaro mupogau', iyakiya mammekko-Ka bawang, jaji mupikkiri'-Ka pada-pada iko. Iyakiya makkekkuwangngé Ucellako, sibawa sininnaro Upancajiwi manessa ri alému. Pénessaini, iko mallupaiyéngngi Allataala; jagaiwi aja' narapiko Upabbinasa, na dé'gaga mappassalama. Tau iya makkasuwiyangengngé sukkuru selaku akkarobangenna, aléna ritu pakalebbi-Ka; sibawa lao ri tau passadiyaé laleng Ujellokengngi matu asalamakeng polé ri Iyya.” Untu' pamimping kor. Mazmur nakarangngé Daud purana riyampareng ri Nabi Natan nasaba malawengngi sibawa Batsyéba. Amaséika oh Allataala, nasaba tette'-Ko mamasé, leddani dosaku nasaba paressé babuwa-Mu iya battowaé. Bissaini sininna jaku; pépaccingika polé ri dosaku. Saba' uwangakuiwi sining asalakku, tuli uwéngngerangngi dosaku. Lao ri Iko, lao ri Iko bawang madosaka, sibawa upogau'i aga iya Muwangga'é maja. Nasipato Muhukkukka, adélé'i apettum-Mu. Sitongenna, majaka sipongenna rijajiyang, sibawa nakenna dosa sipongenna ri parémmanangngé. Mutuntu'i alempureng atié; pennoiwi atikku sibawa Pangissengeng. Pépaccingika, naumapaccing matu; bissaika, naulebbi maputé matu naiya ape'é. Leppessakka méngkalingai karéba mariyo-riyoé, kuwammengngi ati iya Mureppo'éwé gora-gorai paimeng. Pagilinni tappa-Mu polé ri dosa-dosaku, sibawa leddani sininna asalakku. Pakangkangekka ati iya mapaccingngé ri aléku, oh Allataala, pakabarui batékku sibawa sumange iya sabbara'é. Aja' tabbéyakka polé ri yolo-Mu, sibawa aja' muwalai roh-Mu iya mapaccingngé polé ri aléku. Ebbuka marennu paimeng nasaba asalamakeng polé ri alé-Mu, wérékka ati iya macenningngé untu' matinulu ri Iko. Nauwappagguruwangngi matu parénta-Mu lao ri tau madosaé, kuwammengngi nalisu mennang ri Iko. Paleppe'ka polé ri amaténgngé, oh Allataala pappassalama'ku, nanasibawang arennuwang uwabbirittangngi matu adélékem-Mu. Oh Puwang, tulukka mabbicara, naupoji-poji-Ko matu. Dé' muwéloriwi akkarobangeng rigéréé; ébara'na makkasuwiyakka akkarobangeng ritunu, dé' Mupojiwi. Akkarobangeng untu' Allataala iyanaritu ati iya ancuru'é, ati iya tunru'é sibawa toba'é dé' Musampéyangngi. Oh Allataala, ajjellokengngi akessingem-Mu lao ri Sion, patettongngi paimeng témbo'-témbo'na Yérusalém. Na-Muwéloriwi matu tarimai akkarobangeng iya sitinajaé, akkarobangeng ritunu sibawa akkarobangeng iya makkalépué saping lai riyakkasuwiyangeng matu ri yasé'na mézba-Mu. Untu' pamimping kor. Elong pappagguruwanna Daud, wettunna Doég, tau Edongngé, polé paissengiwi Saul makkedaé lettu'ni Daud ri bolana Abimélékh. Eh tau mawatang, magi muwattempaowangngi jamu lao ri tau iya riyamaséiyé ri Allataala? Puppu esso mabbelléko sibawa rancanai majaé; padai piso cukkuru matarengngé lilamu. Lebbi muwéloriwi jaé naiya makessingngé, lebbi mupojiwi mabbellé naiya makkeda tongengngé. Nasibawang ada-adammu mabbelléko sibawa peddiriwi atinna tauwé! Iyakiya ripabbinasako matu ri Allataala untu' mannennungeng; ritikkekko sibawa riyassarénréngeng polé ri bolamu, sibawa ripallennye polé ri linona tau tuwoé. Naitanaro, métaui matu tau tongengngé, nainappa nacawa-cawaiko sibawa makkeda, “Iyanaro taunna iya dé'é nallinrung ri Allataala, iyakiya mamménasangngi asugirenna maonaé sibawa sappa atennangeng ri barang rappana.” Iyakiya iyya pada-padaka aju zaitun manyilaé ri laleng Bolana Allataala. Mateppe'ka makkedaé tette'i Allataala mamasé untu' mannennungeng. Tuli maéloka sukkuru lao ri alé-Mu ri yolona umma'-Mu uwabbirittangngi akessingem-Mu. Untu' pamimping kor. Situru lagunna: Mahalat. Elong pappagguruwanna Daud. Makkedai tau madongo'é ri laleng ati, “Dé' gaga Allataala.” Pangkaukenna mennang maja sibawa marota; dé' gaga pogau'i makessingngé. Polé ri surugaé naitai Puwangnge rupatauwé, untu' sappai tau mapanré iya sompaéngngi Aléna. Iyakiya sininna tauwé lao salani sibawa maja ampé dé'gaga muwi séddi tau pogau'i makessingngé. Adanna Puwangnge, “Dé'ga namainge sining tau majaéro? Tuwoi mennang sibawa rampasa'i umma'-Ku, sibawa dé' naengka nassempajang lao ri Iyya.” Métau senna'i matu tau majaé, padahal dé'gaga papéttauri, saba' Allataala patassiyai buku-bukunna tau iya keppungngékko; risampéyanni mennang ri Allataala, namucaui matu mennang. Polé ri Bulu-bulu Sion tennapodo poléi asalamakengngé untu' Israélié. Namariyo-riyo matu wija-wijanna Yakub rékko napalisui Puwangnge keadaanna umma'-Na. Untu' pamimping kor. Naccowéri kacapi. Elong pappagguruwanna Daud, wettunna tau Zifié polé powadangngi Saul, “Massubbui Daud ri idi.” Oh Allataala, passalama'ka nasaba akuwasam-Mu, wérékka adélékeng nasaba awatangem-Mu. Engkalingai paréllaukku, oh Allataala, tajampangini ada-adakku. Saba' tokkongngi tau laingngé gasaka, macinnai tau matempoé mpunoka, dé' mennang napaduliwi Allataala. Iyakiya Allataala iyanaritu pattulukku; Puwangnge iyanaritu pangéwaingekku. Nahukkungngi matu balikku sibawa jana muto mennang, sibawa paccappui mennang nasaba Aléna matinului lao ri iyya. Nasibawang cenning ati makkasuwiyakka akkarobangeng untu' alé-Mu, sibawa sukkuru lao ri Iko nasaba makessik-Ko, oh Puwang. Puraka Mupaleppe polé ri sininna asukkarakengngé, sibawa uwitai ricau balikku. Untu' pamimping kor. Nasibawang kacapi. Elong pappagguruwanna Daud. Oh Allataala, éngkalingai sempajakku, aja' tagiling polé ri paréllaukku. Jampangika sibawa balika, ancuru'ka nasaba asussakku. Mausé atikku nasaba ancamanna balié sibawa pattenre'na tau majaé. Saba' nasussaiwi mennang atuwokku, erengngé nasibawang cai namusuka. Mausé senna atikku, aseronna amaténgngé wajo-wajoiwi aléku. Nasalipurika apelloreng sibawa amétaureng, riyanrekké ri pappénedding makarame'é. Ebara'na makképannika pada-pada jangang-jangangngé, maéloka luttu sappa onrong iya tennangngé. Maéloka luttu mabéla senna, sibawa monro ri padang kessi'é. Maéloka mapperi-peri sappa onrong mallinrung lao ri anginrajaé. Oh Puwang, pamalingngi sining balikku, pakacaui assipabbicaranna mennang, saba' uwitai ri kotaé ateddekengngé sibawa allagangngé. Esso wenni mennang mattulili, pogau' ja sibawa paompo akacaungeng. Kégi-kégi engka ancurukeng appanrasa-rasangngé sibawa pabengnguwangngé kalalla ri pasaé. Ebara'na bali iya cellaékka, wedding mupa tahang. Ebara'na bali iya pakatunaékka, wedding mupa massubbu polé ri aléna. Iyakiya mala iko, sellaoku, sahaba'ku, silaong macawé'ku iya bali'bellariyékka. Riyolo siwollompollokki sibawa mabessa, sibawa biyasa silaong massompa ri Bolana Puwangnge. Leppessanni balikku maté tennasenna-senna sibawa nonno ri linona tau maté tuwo-tuwo, saba' jaé engkai ri bolana mennang, ri tengnga-tengngana mennang. Iyakiya mangobbika lao ri Allataala, Puwangnge passalama'ka matu. Esso wenni maddarékéka sibawa teri, Nanaéngkalingai saddakku. Napassalama'ka polé ri paggasana balié, iya mallompéngengngé méwaka. Allataala iya mapparéntaé polé ri mannennungeng méngkalingaka matu sibawa caui mennang. Saba' dé' namaélo mennang toba, sibawa dé'to namétau lao ri Allataala. Silaokku riyolo gasai sellao-sellaona, nassakkarengngi jancinna. Ada-adanna alusu mappalécé, iyakiya ri laleng atinna engka paccéccé. Bicaranna malemma, iyakiya mattoddo pada-pada peddang iya macéru'é. Abbéréyanni abata-batammu lao ri Puwangnge, nanatumpe'ko matu; saba' dé' Naleppessangngi ricau tau malempué. Iyakiya Iko, oh Allataala, pasempé'i matu mennang ri laleng kalebbong iya kaminang maliyungngé. Sining pabbelléngngé sibawa pappassu daraé dé' matu narapii sitengnga umuru'na mennang. Iyakiya iyya mateppe'ka lao ri Iko. Untu' pamimping kor. Situru lagunna: Jangang-jangang iya mammekkoé, polé ri daéra iya mabélaé. Mazmurna Daud wettunna tau Filistingngé tikkengngi ri Gat. Amaséika, oh Allataala, saba' rigasaka, matteru-teruka ritenre risining balikku. Puppu esso riléjja'-léjja'ka ri balikku. Maéga musuka, oh Allataala Iya Pommatanré. Wettukku métau, mamménasaka ri alé-Mu. Upojiwi Allataala nasaba aga iya Najjanciyangngé; mateppe'ka ri Aléna, nadé' umétau, dé' pakkullénna tolinoé lao ri iyya. Puppu esso balié kacauwi parakaraku, matteru-terui mennang makkuraga cilakaika. Maddeppu-deppungengngi mennang ri onrong massubbué, jaga-jagaiwi sininna iya upogau'é, sibawa sappa kasempatang untu' mpunoka. Engkaga asalamakeng untu' jana mennang? Paccappui mennang ri laleng cai-Mu, oh Allataala! Mubilangngi esso-esso solléku, sibawa muwisseng jumellana uwai matakku; dé'ga Mubilangngi? Ri esso uwangobbirengngé lao ri Iko, ripasoroi matu balié, saba' uwissengngi Allataala rangengekka. Upojiwi Puwang Allataala, nasaba aga iya Najjanciyangngé. Mateppe'ka ri Aléna, nadé' umétau, dé' pakkullénna tolinoé lao ri iyya. Maéloka rupaiwi jancikku lao ri Iko, oh Allataala, sibawa makkasuwiyangeng akkarobangeng sukkuru lao ri Iko. Saba' Mupaleppe'ka polé ri amaténgngé, Mujagaika kuwammengngi aja' umenrung. Naweddikka tuwo ri laleng allinrungenna Allataala, ri laleng cahaya iya tajangiyéngngi sininna iya tuwoé. Untu' pamimping kor. Situru lagunna: Aja' tapaccappui. Mazmur polé ri Daud, wettunna lari muttama ri laleng gowaé untu' massalaiwi Saul. Amaséika, oh Allataala, amaséika, saba' ri alé-Muka mallinrung. Ri laleng accinaungen-Na pannimuka massubbu, narapi mappésau anginraja iya majjallo'é. Mangobbika lao ri Allataala Iya Pommatanré, lao ri Allataala iya tinda'é untu' aléku. Polé ri surugaé mappébaliwi sibawa passalama'ka; Nacaui sining tau iya tenre'ékka. Najjellokengngi matu Allataala makkedaé matinului lao ri iyya, sibawa tuli mamaséika. Rikeppukka ri balié, pada-padai mennang singa pakkanré tauwé. Isinna mennang pada-padai bessié sibawa panaé, lilana mennang pada-padai peddang iya matarengngé. Oh Allataala, ajjellokengngi arajam-Mu ri langié, sibawa alebbirem-Mu ri sininna linoé. Napasangika siyo balikku, sibawa poloi sumange'ku. Kaliwi mennang kalebbong ri lalekku, iyakiya aléna muto sempé ri lalenna. Mateppe'ka mattinetto, oh Allataala, mateppe'ka mattinetto, maéloka makkélong sibawa pojiko. Eh péseddinno, nyawaku! Eh tokkonno, gambusu'é sibawa kacapié! Maéloka teddui éléé. Puwang, maéloka sukkuru lao ri Iko ri yelle'na bangsa-bangsaé. Macinnaka makkélongek-Ko pappojiyang ri yelle'na rupa tauwé. Saba' battowa pammasé-Mu lettu ri langié, sibawa atinulurem-Mu lettu ri ellungngé. Oh Allataala, ajjellokengngi arajam-Mu ri langié, sibawa alebbirem-Mu ri sininna linoé. Untu' pamimping kor. Situru lagunna: Aja' tapaccappui. Mazmur polé ri Daud. Eh sining panguwasaé, adélé'ga apettummu? Malempukoga wettummu madélékiwi tolinoé? Dé', murancanai iya majaé, sibawa pogau'i ateddekengngé ri wanuwaéwé. Pusani tau majaé sipongenna ri parémmanangngé pabengnguwanni mennang sipongenna rijajiyang. Marracungngi mennang pada-pada ula mamosoé, sibawa lape'i daucculinna pada-pada sikaju kobra mataru-tarué iya dé'é naéngkalingai saddanna sanro iya maccaé, iyaré'ga sadda pattiwi pajjappi iya maccaé. Oh Allataala, poloi isi-isinna mennang, reddu'i suwana singa-singa maloloéro, Puwang. Leppessangngi mennang lennye pada-pada uwai massauwé, pada-pada ana' pana iya mapungkungngénna. Leppessanni mennang pada-pada bojo iya bébbéé mancaji jaléngo, pada-pada ana'lolo iya maté ri wettu dé'napa naita tajang. Ri wettu dé'napa namaingekiwi, cappuni mennang, pada-pada alekale iya manyilaé mupa sibawa dé'pa nabattowa cappu naluttureng anging, samanna iyaro tanet-taneng marakko. Mitai tau majaé rihukkung, marennui tau malempué, sibawa bissaiwi ajéna ri laleng darana tau madorakaé. Makkedai matu tauwé, “Mémeng tau makessingngé lolongengngi appalang, tongeng, engka Allataala iya mangadélé'é ri linoé.” Untu' pamimping kor. Situru lagunna: Aja' tapaccappui. Mazmur polé ri Daud, wettunna Saul suroi tauwé jagaiwi bolana untu' mpunoi. Oh Allataalaku, passalama'ka polé risining balikku, linrungika polé ri tau iya gasaékka. Paleppe'ka polé ri tau iya pogau'éngngi majaé, paleppe'ka polé risining pabbunoé. Itai, mangadangngi mennang maélo mpunoka, siyempe'i sining tau mabecco'é méwaka; padahal tenniya nasaba puraka pogau' dosa iyaré'ga pogau' pelanggarang, oh Puwang. Tenniyato nasaba asalakku, mapperi-periwi mennang sibawa sadiya-sadiya. Tokkonni, Allataala Iya Pommatanré, tulukka. Oh Allataalana Israélié, aléta sabbingngi. Péseddinni sibawa hukkungngi bangsa-bangsaé, aja' tamaséiwi tau maja iya bali'bellaé. Ri arawéngngé lisui mennang, mowang pada-pada asué nanattulilingi towi kotaé. Matterui mennang massindiri sibawa mappakatuna; ada-adanna mennang matareng pada-pada peddangngé, nasengngi mennang dé'gaga maréngkalinga. Iyakiya Mucawa-cawaiwi mennang, oh Puwang, sininna bangsaéro Muéllé'i. Iko ritu awatangekku, mamménasaka ri alé-Mu, Iko onrong allaringekku, oh Allataala. Nasaba akessingen-Na laowi Allataalaku ri iyya, Naleppessangngi uwita balikku ricau. Aja' nariyuno mennang, oh Puwang, kuwammengngi aja' nariyallupai bangsaku. Passara-sarangngi nenniya caui mennang sibawa akuwasam-Mu, oh Puwang pallinrutta. Saba' madosai mennang sibawa ada-adanna; leppessangngi mennang nala siyo ri laleng atempongenna, nasaba napojiwi mennang patanroi sibawa mabbellé. Paccappui mennang ri laleng cai-Mu, oh Allataala, pabbinasai mennang gangka cappu. Nanaissengngi tungke tauwé makkedaé Allataala paréntai Israélié, namallebbangngi apparéntan-Na ri sininna linoé. Ri arawéngngé lisui mennang, mowang pada-pada asué nanattulilingi towi kotaé. Solléi mennang sappa inanré, sibawa mabbokka rékko dé' namesso. Iyakiya makkélokka passalenna awatangem-Mu; tungke élé makkélokka sibawa macenno passalenna pammasé sibawa atinulurem-Mu. Saba' Iko ritu onrong allaringekku, onrokku mallinrung ri wettu sussaé. Oh Allataala, awatangekku, upuwélongekki pappoji-pojiyang Untu'-Mu, saba Iko ritu onrokku mallinrung, oh Allataala, pammaséku. Untu' pamimping kor. Situru lagunna: Bunga bakung assabbiyangngé. Mazmur pappagguruwang polé ri Daud, wettunna namusu tau Aram-Mésopotamiaé sibawa tau Aram-Zobaé, sibawa wettunna lisu Yoab caui 12.000 tau Edongngé ri Lompo Pejjé. Musampéyakki, oh Allataala, sibawa leppessakki ricau. Macai-Ko lao ri idi; makkekkuwangngé passauki. Mugottangngi linoé angkanna mallesse; pédécéngiwi iya reppa'-reppa'é saba' goyangngi linoé. Muleppessangngi umma'-Mu péneddingiwi anrasa-rasang matane'é; tassulus-sulukki pada-pada tau mabo'é. Muwéréngngi papparéngngerang sining tau mateppe'é, kuwammengngi naleppe mennang polé ri pahukkungengngé. Passalama'ki nasaba akuwasam-Mu, baliwi sempajatta, kuwammengngi Naripassalama sining tau iya Muwamaséiyé. Polé ri appéruman-Na iya mapaccingngé makkedai Allataala, “Maélo-Ka gora-gora sibawa tawa-tawai tana Sikhem; Uloteréiwi matu Lompo Sukot. Giléad sibawa Manasyé iyanaritu appunnangek-Ku, Efraim palo-palo baja'-Ku, sibawa Yéhuda tekkeng akkarungek-Ku. Iyakiya Moab iyanaritu onrong abbissang ajé-Ku; gora-gora pacau-Ka lao ri Filistéa. Lao ri Edom Uwaggenrungeng lapikajé-Ku selaku tanrang makkedaé appunnangek-Kui.” Niga maélo tiwika lao ri Edom? Niga dulukka lao ri kota mabbénténgngéro? Oh Allataala, dé'ga Muwaccowé sibawakki? Dé'ga Mumalluru silaongengngi tentarata? Tulukki polé ri balié, saba' bantuwanna tolinoé dé' nakkéguna. Silaong Allataala, baraniki taporé matu, Aléna ritu caui balitta. Untu' pamimping kor. Nasibawang kacapi. Polé ri Daud. Engkalingai pangobbiku, oh Allataala, pénessaiwi sempajakku. Mabéla polé ri bolaé mangobbika lao ri Iko, nasaba pettu paddennuwakka. Muantara'ka matu lao ri onrong allaringeng iya amangngé, onrong iya matanré senna'é untu' aléku; saba' Iko ritu pallinrukku, attahangeng iya mawatangngé lao ri balikku. Leppessakka gangka tuwoku mappéruma ri kéma-Mu, kuwammengngi naamang ri laleng accinaungenna panni-Mu. Saba' purani Muwéngkalinga jancikku, oh Allataala, sibawa mpérékka appunnangeng manana tau mateppe'é. Tennapodo malampé sunge'i arungngé, angkanna tuwoi massossoreng. Tennapodo mapparéntai untu' mannennungeng selaku arung mupilé-Mu, oh Allataala, linrungiwi sibawa pammasé nenniya atinulurem-Mu. Natuli upuwélongekko matu pappojiyang untu'-Mu, naurupai towi jancikku polé ri essoé lao ri essoé. Untu' pamimping kor. Situru: Yédutun. Mazmurna Daud. Nasibawang atennangeng nyawaku tajengngi Allataala, polé ri Aléna bawang asalamakekku. Banna Aléna linrungika sibawa passalama'ka, Aléna pangéwaingekku, dé' matu ugoyang. Gangka kégi manekko maélo gasai séddié tau iya pada-padaénna renring iya miringngénna sibawa témbo' iya mawé'énna maruttung? Banna manniya'ko pasempé'i polé ri tudangenna iya matanré. Mupoji mabbellé; nasibawang témummu mabbarakka'ko, iyakiya ri laleng ati patanroiko. Nasibawang atennangeng nyawaku tajengngi Allataala, polé ri Aléna bawang asalamakekku. Banna Aléna linrungika sibawa passalama'ka; Aléna pangéwaingekku, dé' matu ugoyang. Aléna ritu Allataala iya mpéréngngékka asalamakeng sibawa alebbireng, Aléna ritu pallinrukku sibawa pangéwaingekku iya mawatangngé. Eh bangsaku, amménasako ri Allataala tungke wettu; loloni lise atimmu ri Aléna, saba' Aléna onrotta mallinrung. Tolinoé banna siseppung nappase, baiccu battowa pada-padai dé' angke'na. Rékko ritimbangngi, annessana mennang maringengngi, lebbi ringengngi naiya siseppungngé nappase. Aja' muwaddennuwangiwi wassélé appassangngé, sibawa aja' muwattuwangngi barang rirappaé. Mala rékko tattambai asugiremmu, aja' naddeppé atimmu ri aléna. Wékkasiyagani uwéngkalinga Allataala makkeda makkedaé akuwasangngé assalennai poléi ri Aléna, sibawa makkedaé tette'i mamasé. Iko, oh Puwang, mpale'i tungke tau situru pangkaukenna. Mazmurna Daud, wettunna engkai ri padang kessi Yéhuda. Oh Allataala, Iko ritu Allataalaku, usappa sibawa uwuddaningi-Ko. Pada-pada tana makabbuttué madekkaiwi uwai, makkuwana'ro madekka lao ri Iko. Leppessakka mita-Ko ri Bola-Mu, sibawa mitai awatanengem-Mu sibawa arajam-Mu. Lebbi mangke'i pammasé-Mu naiya atuwongngé, rimakkuwannaro upoji-Ko. Gangka tuwoku sukkuru'ka lao ri Iko; uwakkai limakku lao ri Iko umassempajatto. Upoji-Ko sibawa gora-gora marennu, saba' Mupamessoriwi nyawaku pada-pada sibawa inanré malunra'é. Uwéngngerak-Ko wettu léwuku ri onrong atinrongngé; puppu benni unennun-nennuk-Ko, saba' Iko ritu pura tulukka; ri laleng accinaungeng panni-Mu makkélokka marennu. Uwakkatenning mare'-Ko, limam-Mu tula'ka. Iyakiya sining tau iya maéloé mpunoka nonnoi matu ri linona tau maté. Matéi matu ri laleng ammusurengngé, sibawa mancaji inanréna olokolo masekkangngé. Marennui matu arungngé nasaba pattulunna Allataala; tau iya mattanroé nasabbing Allataala mabangka'i matu, iyakiya bawana pabbelléngngé risessangngi matu. Untu' pamimping kor. Mazmurna Daud. Oh Allataala, éngkalingai sempajakku ri wettukku masussa, passalama'i nyawaku polé ri bali iya mappakatau-taué. Linrungika polé ri assikongkolokenna tau madorakaé, polé ri rancana majana sining tau majaé. Naébbui lilana mennang sittareng peddangngé, sibawa passu ada-ada mapéddara pada-pada panaé. Polé ri assubbuwanna patassiyai mennang curita bellé, temmétau napétenna'i mennang tau teppasalaé. Makkatenning masse'i mennang ri niya'na majaé, sibawa barunding maélo pasang siyo-siyo; nasengngi mennang dé' gaga mitai. Narancanai mennang jaé, sibawa makkeda, “Mébbuki rancana iya macéko-céko senna'é.” Ati sibawa akkalenna tolinoé malamung senna, dé' riyulléi mpellungiwi. Iyakiya Allataala mattémbakengngi pana-Na lao ri mennang, natennasenna-sennai maloi mennang. Binasai mennang nasaba ada-adanna muto; sininna iya mitaéngngi mappaccilic-ciling ulu. Nainappa sininna tauwé métau matu; napikkiri'i mennang pangkaukenna Allataala sibawa mabbirittangngi aga iya puraé napogau'. Nasininna tau makessingngé marennui matu nasaba aga iya napogau'é Puwangnge. Mallinrungngi matu mennang ri aléna; sininna tau malempué mabangka'i matu. Untu' pamimping kor. Mazmurna Daud. Elong. Sipato'ki poji-Ko ri Sion, oh Allataala, sibawa rupaiwi jancitta ri Iko. Saba' Iko ritu tarimai sempajangngé; sininna tauwé poléi ri Iko nasaba madosani. Matane senna'i dosa-dosaku untu' alému, iyakiya Muwaddampengiwi. Masennangngi tau iya Mupilé, sibawa iya Muwobbié untu' monro ri Bola-Mu. Ripasipoléngekki matu sibawa sininna iya makessingngé ri Bola-Mu, onrom-Mu iya mapaccingngé. Mubaliki sibawa mpérékki apakalang, Mupogau'i gau'-gau' makalallaingngé untu' passalama'ki! Iko ritu paddennuwanna sininna bangsaé lettu ri tasi iya mabélaé. Nasibawang awatangem-Mu Mupatettongngi sining bulué, untu' majjellokengngi akuwasam-Mu iya poré. Mupasoroi memmu'na tasi'é sibawa ajjallo'na bombangngé, sibawa Mupattennangngi arukkanna bangsa-bangsaé. Sininna pabbanuwana linoé métau sibawa mappakalebbi mitai sining pangkaukem-Mu iya maseroé. Sininna linoé polé ricappa'na lao ri cappa'na Muwébbui gora-gora marennu. Iyaro tanaé Mupiyarai sibawa Muwéréngngi bosi, Mupancajiwi macommo angkanna maona wassélé'na. Sining saloé Mulisekiwi uwai gangka penno, Mupassadiyangengngi mennang gandong, mappakkuwaniro Mupassadiyangengngi. Mupakkuwaiwi alo rakkalana sibawa Muricakiwi tékké-tékké tanana. Musommokiwi sibawa bosi, sibawa Mutanggungngi tuwo macommo cura'-cura'na. Nasaba akessingem-Mu, tungke taung Mupassadiyai éngngalangngé; kégi-Ko lao, engka amaonareng. Padang kessi'é pennoi bémbé bimbala, sininna bulu-buluna marennu. Sining padang wellaé mapparampa'i bimbala, sining lompo'é pennoi sibawa gandong. Gora maneng nenniya makkélong sibawa marennu. Untu' pamimping kor. Séuwa élong. Gora-gorano untu' Allataala, éh sininna linoé! Akkélonno sibawa pakarajai asen-Na, pakalebbii Aléna sibawa pappoji-pojiyang. Powadani lao ri Allataala, “Mappabengnga tongeng pangkaukem-Mu! Tunru'i balié ri Iko penno amétaureng, saba' battowa senna akuwasam-Mu. Sininna linoé suju' sompa-Ko, makkélongngi mennang pojiwi asem-Mu.” Poléni sibawa itani pangkaukenna Allataala, mappabengnga tongeng sining winru-Na ri yelle'na tolinoé! Napinrai tasi'é mancaji tana rakko, nalléttoiwi toriyolota sibawa mallaleng. Natamarennu nasaba pangkauken-Na. Mapparéntai sibawa barani untu' mannennungeng. Najagaiwi bangsa-bangsaé, kuwammengngi dé' naulléi matempo tau maronta'é lao ri Aléna. Pojiwi Allataalata, éh bangsa-bangsa, gorangngi pappojiyammu lao ri Aléna! Purani najagai kuwammengngi tette'ki tuwo, sibawa dé' naleppessakki sempé. Oh Allataala, Iko pura mojiki pada-pada tau patuléngngéngngi péra'é ri laleng apié. Muleppessakki sempé ri laleng siyo-siyoé, sibawa Muwéréngngi tiwi iya matane senna'é. Muleppessakki riléjja'-léjja' ri balié; malléttoiki lémpe sibawa api. Iyakiya makkekkuwangngé purani Mutiwi ri onrong iya macommo'é. Tiwika matu akkarobangeng ritunu ri Bola-Mu sibawa rupaiwi jancikku lao ri Iko, janci iya upowadaé wettukku ri laleng asussang. Uwakkasuwiyangengngi ri Iko akkarobangeng ritunué polé ri olokolo ripilé, bémbé bimbala sibawa saping lai, rumpunna mallaso ménré ri langié. Poléni sibawa éngkalingai, éh sininna tau mateppe'é, ucuritai matu aga napogau' Allataala ri aléku. Purana gora méllau tulung ri Aléna; makkekkuwangngé upuwélongengngi pappoji-pojiyang untu' Aléna. Ebara'na masennakka pikkiri'i majaé, pasti dé' namaélo Puwangnge méngkalingai. Iyakiya Allataala pura méngkalingaka, najampangiwi paréllaukku. Upojiwi Allataala saba' dé' Nasampéyangngi sempajakku, sibawa dé' nappésau mamaséika. Untu' pamimping kor. Nasibawang kacapi. Mazmur. Tennapodo Allataala mamaséiki sibawa barakkakiki, tennapodo naitaki sibawa masémpo ati. Oh Allataala, tennapodo élomu riissengngi risininna linoé, sibawa asalamakemmu ripannessai ri yelle'na sininna bangsaé. Tennapodo bangsa-bangsaé pojiko, oh Allataala, tennapodo sininna bangsaé sukkuru'i lao ri iko. Tennapodo sininna bangsaé gora-gorai marennu, nenniya makkélong sibawa mariyo-riyo. Saba' mapparéntako sibawa adélé sibawa pimpingngi tungke bangsaé ri linoé. Tennapodo bangsa-bangsaé poji-Ko, oh Puwang tennapodo sininna bangsaé sukkuru'i lao ri Iko. Purani nabbéréyang wassélé'na tanaé, Allataala, Allataalata pura barakkakiki. Purani nabarakkakiki Allataala; tennapodo Aléna ripakalebbii ri sininna linoé! Untu' pamimping kor. Mazmurna Daud. Tokkongngi Allataala patassiyasiyai balin-Na, tau iya céccééngngi Aléna lariwi polé ri yolo-Na. Allataala paddésu'i mennang lao, pada-pada rumpu iya riseppungngé nateddéng. Pada-pada lilingngé maccolo ri laleng apié, makkuwaniro tau majaé lennye polé ri yolona Allataala. Iyakiya tau malempué mariyo-riyoi sibawa marennu, gora-gorai mennang mariyo-riyo ri yolona Allataala. Akkélonno lao ri Allataala, pojiwi asen-Na, passadiyangengngi watattana untu' aléna iya tonangiyé ellung. Asenna Puwang – assennang-sennanno ri yolona! Allataala iya monroé ri Bola-Na iya mapaccingngé iyanaritu ambo'na ana' béué sibawa méwaiyéngngi sining jandaé. Allataala mpéréngngi onrong naonroi tau iya masino-sinoé; napaleppe'i tau ritahangngé angkanna mennang masennang. Iyakiya sining tau iya méwaéngngi Puwangnge harusu'i monro ri tana iya makarossaé. Oh Allataala, wettunna Mupimping umma'-Mu joppa molai padang iya marakkoé, ténré linoé, tattiri bosié ri yolo-Mu, nasaba apolénna Allataalana Sinai, Allataalana Israélié. Mupateppai bosié sibawa maona, sibawa palisui tana-Mu iya makarossaé. Nainappa umma'-Mu monro kuwaro; ri laleng akessingem-Mu, oh Allataala, Mupiyarai tau kasiyasié. Puwangnge mabbéré apettung, nainappa sining makkunraié tiwi karéba: Wettunna Iya Pommakuwasaé patassiya-siyai arung-ngarungngé kuwaro, nonnoni saljué polé ri Bulu Salmon. Bulu Basan iyanaritu bulu iya maseroé, bulu iya maccoppo'é maéga. Magi napolé ri coppo'mu iya maégaéro makkitako sibawa mangémpuru lao ri Bulu Sion iya napilé Allataala untu' onron-Na? Monroi matu Puwangnge kuwaro untu' mannennungeng. Nasibawang mappulo sebbu karéta mawatang mallurui Allataala ri yelle'na mennang ri laleng arajan-Na. Ménré'i Puwangnge ri onrong iya matanré; maéga tawangeng natiwi maccowé. Tarimai pakkasuwiyang polé ri yelle'na tolinoé mala polé ri yelle'na bangsa maronta'é; kuwammengngi naonro silaong Puwang Allataala. Pojiwi Puwangnge, saba' Aléna Allataala iya passalamaékki; polé ri essoé lao ri essoé Naéssangngi tiwita. Allataala iyanaritu Puwang iya mappassalama'é, Napaleppe'ki polé ri amaténgngé. Pasti Allataala reppo'i matu ulunna balin-Na, sining tau iya matterué tuwo ri laleng dosaé. Adanna Puwangnge, “Eh umma'-Ku, Utiwii balimmu polé ri Basan Utiwii mennang lisu polé ri borina tasi'é, kuwammengngi mubissaiwi ajému sibawa darana mennang, nasining asummu lépe'i gangka cau.” Naita manengngi barisi apakalam-Mu, oh Allataala, Allataalaku, Arukku, riyulé lao ri onrong Naonroiyé. Ri yolo joppai sining pakkélongngé, ri munri sining pakkacapié; ri tengnga sining ana'dara pattetté rabanaé; makkuwaiyé élonna mennang: “Pojiwi Allataala ri tengngana addeppungenna umma'-Na, pojiwi Puwangnge, éh sininna wija-wijanna Yakub!” Bényamin, suku kaminang baiccu'é, joppa ri yolo, nainappa mattinro-tinroseng sining tomariyolona Yéhuda ri munrinna sining tomariyolona Zébulon sibawa Naftali. Natuntu'i Allataalamu awatangemmu; oh Allataala, pakkasse'i aga iya puraé Mupogau' untu' idi. Sining arungngé tiwii pakkasuwiyang lao ri Iko ri Bola-Mu ri Yérusalém. Gera'i Maséré, iyaro olokolo masekkangngé ri tengngana arasoé. Amparengngi bangsa-bangsaé, iyaro banténg makkonrongngé silaong ana'-ana'na, iya sisullé siléjja' untu' lolongeng péra'. Allataala passara-sarangngi bangsa-bangsa iya pojiyéngngi mammusu. Sining tomarajana Maséré poléi tiwi tembaga; mapperi-periwi tau Sudangngé tiwi pakkasuwiyang ri Allataala. Akkélongenni Allataala, éh sininng akkarungengngé, puwélonni pappoji-pojiyangngé untu' Puwangnge, untu' aléna iya malléttoiyéngngi bitara mariyoloé. Engkalingai! Mabbicarai Puwangnge, maddaremmengngi saddan-Na sibawa masero. Angakuiwi akuwasan-Na Allataala iya makuwasaiyéngngi Israélié, lettu ri langié akuwasan-Na. Mappabengnga tongeng Allataalata wettunna massu polé ri onrong Naonroiyé. Mabbéréi akuwasang Allataalana Israélié sibawa awatangeng lao ri umma'-Na. Ripojiwi Allataala! Untu' pamimping kor. Situru lagunna: Bunga Bakungngé. Polé ri Daud. Passalama'ka, oh Allataala, saba' ménré'ni uwai lettu ri ellokku. Tassollaka ri rawa iya maliyungngé, dé'na gaga onrong mattuppu. Tallemme'ka ri uwai iya maliyungngé, rialireng ri bombang pasangngé. Gora-goraka gangka poso sibawa marakko tigoro'ku. Mapéssé matakku tajengngi bantuwanna Allataalaku. Tau iya céccéékka temmakkéalasang, lebbi maégai naiya gemme'é ri ulukku. Sining tau mawatangngé maéloi paccappuka; nagasaka mennang sibawa pappétenna. Ripassaka palisui waramparang iya dé' urampasa'i. Oh Allataala, Muwisseng sining asalakku dé' natassubbu dosaku ri alé-Mu. Aja' taleppessakka mappapolé siri ri yasé'na sining tau iya mamménasaé ri Iko, oh Puwang, Allataala Iya Pommakuwasaé. Aja' taleppessakka papolé paccella ri yasé'na sining tau iya sompaék-Ko, oh Allataalana Israélié! Saba' Iko ritu naripakatunaka, nasaba Iko ritu naricellaka. Mancajika pada-pada tau laingngé lao ri siyajikku, pada-pada tau saliwengngé lao ri kakaku sibawa anrikku. Malluwa'i sumange'ku nasaba pangéloreng lao ri Bola-Mu, pangéllé'-éllé'na tau iya pakatunaék-Ko kennai aléku. Terika sibawa mappuwasa iyakiya napakatunaka mennang. Pakéka kaing karung tanrang masara, iyakiya nasindiri'ka mennang. Mancajika buwa tému ri onronna tau maddeppungengngé, sibawa élonna pammabo-pammabo'é iyanaritu passalenna iyya. Iyakiya massempajakka lao ri Iko, oh Puwang, oh Allataala, balika ri wettu iya makessingngé. Tulukka nasaba pammasému iya battowaé sibawa nasaba atinuluremmu. Aja' taleppessakka tallemme ri laleng rawaé, passalama'ka polé risining tau iya benciyékka sibawa polé ri uwai iya maliyungngé. Aja' taleppessakka riyalireng ri bombang pasangngé, sibawa tallemme ri borina tasi'é iyaré'ga rikuburu ri laleng kalebbongngé. Balika, oh Puwang, saba' makessik-Ko sibawa tette'i mamasé. Gilinno lao ri iyya saba' battowai paressé babuwa-Mu. Aja' tamassubbu polé ri atam-Mué, saba' masussakka, apperi-perini tulukka. Poléni passalama'ka, paleppe'ka polé risining balikku. Muwisseng pékkugika ricella, ripakatuna sibawa riéllé, Muwitai sininna balikku. Appakatunangngé mébbuka makeccé ati, sibawa pettu paddennuwakka. Usappai paressé babuwaé, iyakiya siya-siyai, usappai passaléwoé, iyakiya dé' ulolongengngi. Mala riwérékka racung untu' inanré; wettu madekka, riwérékka cukka untu' énungeng. Leppessangngi perjamuwanna mennang papoléi acilakang, sibawa mancaji siyo-siyo untu' sining topoléna. Leppessangngi matanna mennang mancaji buta sibawa lekke'na tuli malemmai. Tuppa'i cai-Mu ri yasé'na mennang, leppessangngi mennang nageppa cai-Mu iya malluwa'-luwa'é. Leppessangngi akkémanna masino-sino, sibawa kéma-kémana tenriyonroi. Saba' nacallai mennang tau iya Muhukkungngé, sibawa bicarai sining tau iya Musissaé. Leppessanni asalanna tattamba maéga; aja' naripattongeng mennang. Leppessangngi asenna riledda polé ri kitta'na tau tuwoé; sibawa tenriyoki ri daftarna tau malempué. Iyakiya ritenre'ka sibawa mapeddi, akkaka oh Allataala, sibawa passalama'ka. Naupojiwi matu Allataala sibawa élong, pakarajai Aléna sibawa élong sukkuru. Lebbi naéloriwi Puwangnge iyaro naiya akkarobangeng sapingngé, akkarobangeng saping lai iya battowaé. Naitanaro, marennuni tau ritenre'é, tau iya sompaéngngi Allataala maloppoi atinna. Saba' Puwangnge méngkalingai tau iya kasiyasié; dé' Najampaléllériwi umma'-Na ri laleng tarungkué. Pojiwi Allataala, éh langi sibawa linoé, tasi'é sibawa sininna mahlu'é ri lalenna. Napassalama'i matu Yérusalém sibawa patettongngi paimeng kota-kotana Yéhuda. Monroi matu umma'na Puwangnge kuwaro; iyaro tanaé mancajiwi appunnangenna mennang. Namanai matu ana' eppona; sining tau iya méloriyéngngi Puwangnge naonroiwi matu. Untu' pamimping kor. Polé ri Daud, ri wettunna makkasuwiyangeng akkarobangeng papparéngngerang. Oh Allataala, passalama'ka, Puwang, asitta'ni tulukka! Leppessangngi tau iya macinnaé mpunoka ricau sibawa lari alippuwang. Leppessangngi tau iya gora-goraiyéngngi acilakakku ripasoro sibawa ripakatuna. Leppessangngi tau iya cawa-cawaiyékka mancaji tasséleng sibawa masiri. Tennapodo sininna tau iya sompaékko mariyo-riyo sibawa marennu; sibawa sininna iya méloriyéngngi asalamakeng polé ri Iko matterui makkeda, “Maraja tongeng ritu Puwangnge!” Iyya'é kasiyasika sibawa malemma; poléni masitta, oh Allataala. Iko ritu pattulung sibawa pappassalama'ku, aja' tamatengnge, oh Puwang. Ri alé-Muka mallinrung, oh Puwang, aja' taleppessakka ripakasiri. Paleppe'ka, saba' adélé'-Ko, éngkalingai sibawa passalama'ka. Ancajino ri aléku pada-pada bulu batué onrokku monro, iya magampangngé tuli urapi. Saba' purani Mupettui untu' passalama'ka, Iko ritu onrokku mallinrung sibawa maccinaung. Oh Allataalaku, paleppe'ka polé ri tau majaé, polé ri akuwasanna sining tau mabecco'é sibawa mapéddaraé. Saba' Iko ritu addennuwangekku, oh Puwang, Puwang, mateppe'ka ri Iko sipongeng maloloku. Sipongeng tuwoku sanréka ri Iko; Mulinrungika sipongekku jaji natuli upoji-Ko. Atuwokku mancaji contoi lao ri tau maégaé, saba' Iko ritu pallinrukku iya mawatangngé. Tuli upoji-Ko, puppu esso uwabbirittang arajam-Mu. Aja' Mubuwakka ri wettu macowaku aja' tasalaika rékko cappuni awatangekku, saba' sining balikku nabicaraka, sining tau iya maéloé mpunoka sikongkolo'i. Adanna mennang, “Risalaini ri Allataala; laono mai talellungngi sibawa tatikkengngi, saba' dé'gaga passalama'i.” Aja' Mumabéla polé ri iyya, oh Allataala, Allataalaku, tulukka masitta. Leppessangngi tau iya gasaékka ripakasiri sibawa ripallennye. Leppessangngi tau iya maéloé cilakaika alippuwang sibawa risalipuri atunang. Iyakiya iyya tuli mamménasaka ri Iko, sibawa pédé maéga poji-Ko. Puppu esso ucuritai matu sining pangkaukem-Mu iya adélé'é, sibawa asalamkeng polé ri Iko iya tenribilangngé. Upojiwi pangkaukem-Mu iya barani, oh Puwang Allataala, upakalabbai adélékem-Mu, adélékem-Mu bawang. Oh Allataala, Mupagguruka sipongeng maloloku, lettu makkekkuwangngé ucuritai winru-Mu iya mappabengngaé. Oh Allataala, aja' tasalaika, lettu macowaka sibawa maubeng, kuwammengngi uwabbirittangngi akuwasammu sibawa abaraningem-Mu lao ri sininna assossoreng mangoloé. Oh Allataala, sittanré langié adélékem-Mu; battowai sining pangkaukem-Mu; nigana mulléi pada-padai-Ko? Muwérékka maéga anrasa-rasang iya matane'é, iyakiya Mupalisui matu awatangekku sibawa paoto'ka polé ri kuburu'é. Muwébbuka matu lebbi malebbi, sibawa saléworisika. Maéloka poji-Ko sibawa gambusu, saba' matinulu-Ko, oh Allataalaku. Maéloka makkélongek-Ko pappojiyang sibawa kacapi. Oh Allataalana Israél iya mapaccingngé. Gora-goraka sibawa penno ariyo-riyong, nanakkélongeng tok-Ko pappojiyang. Tubu nyawaku makkélongngi sibawa marennu, saba' puraka Mupassalama. Puppu esso uwabbirittangngi matu adélékem-Mu, saba' sining tau iya maéloé cilakaika ricauni sibawa ripakasirini. Polé ri Salomo. Oh Allataala, appagguruwangngi hukkum-Mu lao ri arungngé, wéréngngi adélékem-Mu lao ri ana' worowanéna arungngé. Tennapodo naadélékiwi umma'-Mu situru hukkungngé, sibawa gaukengngi tau ritenre'é sibawa adélé. Memmuwaré wanuwatta macommo'i sibawa saléwangeng, sibawa engka adélékeng untu' sininna bangsaé. Tennapodo arungngé nabélai ha'na ra'ya' mariyawaé, tulungngi sining tau kasiyasié sibawa paccappui sining tenre'éngngi mennang. Tennapodo tette'i mattahang massossoreng ri wettu engkana mupa mata esso sibawa kéteng. Tennapodo padai bosi iya teppaé ri padangngé, pada-pada bosi raja iya malle'éngngi sining dare'é. Tennapodo mallebbangngi adélékengngé mannennungeng, sibawa maonai adécéngengngé ri wettu engkana mupa kéteng. Malowangngi matu akkarungenna polé ri tasi'é lao ri tasi'é, mallebbangngi polé ri alau lettu ri yajang. Tunru'i matu ri aléna pabbanuwana padang kessi'é sibawa suju'i balié ri yolona ajéna. Arung-ngarunna Tarsis sibawa pulo-puloé tiwii matu pakkasuwiyang ri aléna. Arung-ngarung Arab-é sibawa Etiopia poléi tiwi pakkasuwiyang. Sininna arungngé suju'i matu ri yolona, sininna bangsaé mancajiwi ata-atanna. Saba' naleppessangngi tau dé'é pakkullénna ritenre, sibawa tau kasiyasi iya mangobbié ri aléna. Namaséiwi tau kasiyasié sibawa ra'ya' mariyawaé, sibawa passalama'i atuwonna tau iya maperi senna'é. Napaleppe'i mennang polé ri patenre'é sibawa ateddekengngé, saba' atuwonna mennang mangke senna'i ri aléna. Tuwoi datu arungngé! Tennapodo lao ri aléna riyakkasuwiyangengngi ulaweng polé ri Arab. Tennapodo riyassempajangengngi tungke wettu sibawa tuli ribarakkakiwi. Tennapodo maonai gandongngé ri sininna wanuwaé, sibawa sining bulu-buluna pennoi wassélé. Tennapodo macommo'i tanana pada-pada Buluna Libanon, sibawa pabbanuwana kotana tattambai pada-pada wellaé ri padangngé. Tennapodo asenna arungngé risénge'i mannennungeng, sibawa ataromporenna tattambai ri wettu engkana mupa mata esso. Tennapodo bangsa-bangsaé méllauwi ribarakkaki pada-pada aléna, sibawa sininna tauwé teppui masennang. Ripojiwi Puwangnge, Allataalana Israélié! Banna Aléna pogau'i gau'-gau' iya mappabengngaé. Ripojiwi asen-Na iya marajaé mannennungeng; tennapodo sininna linoé pennoi sibawa alebbirem-Mu! Jajini makkuwaro. Aming! Sikumiro sempajanna Daud, ana' Isai. Mazmurna Asaf. Makessing tongengngi Allataala lao ri umma'-Na, lao ri tau iya mapaccingngé atinna. Iyakiya iyya bata-batana, céddé'ni teddéng atepperekku, saba' mangémpuruka lao ri tau matempoé, wettunna uwita amaupekenna tau majaé. Saba' dé' mennang namanrasa-rasa mapeddi, watakkaléna mennang mawatangngi namadising. Dé' mennang natanggung asussang, dé' nakennai abala pada-pada tau laingngé. Rimakkuwannanaro kédo matempoi mennang, sibawa tuli tinda'i sibawa ateddekeng. Polé ri atinna mennang tattuppa'i jaé; malippui mennang sibawa rancana-rancana maja. Mangéllé'i mennang sibawa makkeda-kedai, nanasibawang atempong mangancangngi maélo patenre. Nacurupiyangiwi mennang Allataala ri surugaé, sibawa mabboro lao risining tauwé ri linoé, angkanna muwi umma'na Allataala balé' towi lao ri mennang, sibawa mateppe lao ri bicaranna mennang. Adanna mennang, “Dé' naissengngi Allataala, Iya Pommatanré dé' najeppuiwi.” Makkuwaniro keadaanna tau majaé; tuwono sibawa tennang, tattambai matteru waramparanna. Paracuma bawang ujagai mapaccing atikku; dé'na gaga akkégunaku mabélaiwi dosaé. Saba' puppu esso nakennaka abala; tungke élé risissaka. Akkalarapanna makkeda makkuwaka'ro, ubali'bellariwi assossorenna ana'-ana'mu. Iyakiya wettukku makkuraga untu' majeppuiwi, iyaro gau'é mawatang senna untu' aléku. Angkanna muttama'ka ri Bolana Puwangnge, nainappa uwajeppui accappurenna tau majaé. Mutaroi mennang ri laleng iya malengngoé, sibawa Muleppesangngi mennang menrung binasa. Ri laleng sikédé mata ancuru'i mennang, masero senna accappurenna. Pada-pada nippi iya teddéngngé ri éléé; wettum-Mu tokkong, oh Puwang, lennye toni mennang. Wettukku massessekalé sibawa atikku pada-pada ritoddo'é, madonggoka sibawa dé' uwajeppuiwi, pada-padaka olokolo'é ri yolo-Mu. Iyakiya tette'ka ri seddé-Mu, Muwakkatenningngi lima ataukku. Mupimpikka sibawa pangaja, sibawa Mutarimaka matti sibawa alebbireng. Niga uwappunnai ri surugaé sangadinna Iko? Ri lainnaé Iko dé'na gaga iya uwacinnaiyé ri linoé. Namuni tubu nyawaku mancaji malemmai, Iko ritu awatangekku, oh Allataala; Iko ritu sininna iya uwappunnaiyé untu' mannennungeng. Tau iya salaiyék-Ko macilakai matu, Mupabbinasai tau iya dé'é namatinulu lao ri Iko. Iyakiya untu' aléku makessing tongeng engka ri seddéna Allataala, Puwang Allataala upancaji onrong allinrungekku, kuwammengngi uwulléi mabbirittangngi sininna pangkauken-Na. Elong pappagguruwanna Asaf. Oh Allataala, untu' mannennungegga Musalaiki? Magi Mumatteru macai lao ri umma'-Mu muto? Engngerangngi umma'-Mu iya Mupilé sipongenna riyolo, bangsa iya Mupaleppe'é kuwammengngi nancaji appunnangem-Mu. Engngerangngi matu Bulu Sion, iya Mupancajiyé onrong Muwonroiyé. Jalajja'ni onrong iya mancajiyénna ruttungeng; sininna engkaé ri Bola-Mu purani naancuru balié. Gora-gorai sining balim-Mu ri Bola-Mu, sibawa patettongngi bandéra apakalanna kuwaro. Padai mennang pattubbang aju iya mabbettangngéngngi waséna, untu' tubbangngi aju-kajungngé ri ale'é. Sininna sobbi ajué naancuru'i mennang sibawa waséna nenniya palu-palunna. Natunui mennang Bola-Mu gangka cappu; sibawa panajisi'i onrom-Mu risompa. Maéloi mennang patunru sisekki, sibawa tunui gangka cappu sininna onrong assompangngé ri wanuwaéwé. Nabi-nabié sibawa tanra-tanrang makalallaingngé dé' napaitana, sibawa dé' muwi séddi tau missengngi gangka kégi matteru makkuwaé. Gangka kégi oh Allataala, naéllé'-Ko balié balié? Lettu mannennungegga napakatunai mennang asem-Mu? Magi nadé'na Mutulukki? Magi mupaleppe'i limam-Mu polé ri idi? Ri pammulanna mupa Iko ritu arukku, oh Allataala, Iko ritu passalama'ki. Nasibawang awatangeng iya maseroé Mupuwé'i tasi'é, sibawa reppa'i ulunna naga tasi'é. Mureppo'i sining ulunna Léwiatan sibawa pancajiwi inanréna monroiyéngngi padang kessi'é. Mupassolo'i mata uwai sibawa saloé; salo iya battowaé Mupancajiwi marakko. Iko ritu pancajiwi essoé sibawa wennié, enrengngé pattentui onronna mata essoé sibawa kétengngé. Mupattette'i pakkasésénna linoé, mébbui wettu timoé sibawa wettu bosié. Engngerangngi pékkugi balié pakatuna-Ko, oh Puwang, bangsa iya dé'é naissek-Ko curupiyangiwi asem-Mu. Aja' Muwabbéréyangngi umma'-Mu iya dé'é pakkullénna lao ri limanna bali iya mabecco'é. Aja' na untu' mannennungeng mallupaiwi totona umma'-Mu iya macilakaé. Engngerangngi assijancingeng iya Muwébbué sibawa idi, saba' napogau'i tauwé ateddekengngé ri tungke onrong makalemmengngé ri wanuwaéwé. Aja' muleppessangngi tau ritenre'é ripakasiri, tennapodo tau manrasa-rasaé sibawa kasiyasié poji-Ko. Tokkonni oh Allataala, éwaini parakara-Mu! Saba' puppu esso ripakatuna-Ko risining tau iya dé'é natepperi-Ko. Aja' Muwallupaiwi kelli'na sining balim-Mu, arukkanna sining balim-Mu iya pédé maladde'é! Untu' pamimping kor. Manuru lagunna: Aja' tapaccappui. Mazmurna Asaf. Elong. Idi sompa-Ko, oh Allataala, sukkuru'ki lao ri Iko sibawa mabbirittangngi winru-Mu iya mappabengngaé. Makkedai Allataala, “Ri wettu iya Upattentué, Maélo-Ka madélékiwi sibawa adélé. Rékko taggottangngi linoé sibawa sininna pabbnuwana Iyya ritu pakkasse'i alliri-allirinna.” Lao ri tau iya pojiyéngngi mabboro, makkeda-Ka, kuwammengngi aja'na nabboro. Sibawa lao ri tau majaé, kuwammengngi aja'na nakédo matempo. Aja' napojiwi aléna iyaré'ga nabbicara sibawa matempo. Saba' angadélékengngé dé' napolé ri alau iyaré'ga yajang dé'to napolé ri manorang iyaré'ga yattang. Iyakiya Allataala muto ritu mangadéléki, Napakariyawai séddié sibawa napakatanréi iya laingngé. Caina Puwangnge pada-padai kacaé ri liman-Na, iyaro kacaé mallise'i uwai anggoro iya maserié. Natiri'i Allataala lise'na, sininna tomajaé ri linoé harusu'i ménungngi gangka cappu. Iyakiya tette'ka matu mabbirittangngi Allataalana Yakub, makkélongengngi pappoji-pojiyang untu' Aléna. Napoloi matu awatangenna tau majaé, na tau makessingngé tattamba mawatangngi. Untu' pamimping kor. Nasibawang kacapi. Mazmurna Asaf. Elong. Tarompoi Allataala ri Yéhuda; kalabbai asen-Na ri Israél. Yérusalém iyanaritu onrong Naonroiyé; Bulu Sion onrong Naonroiyé. Kuwaro Naancuru'i sininna paréwa musué, sininna pana lala'-lala'é, kaliyawoé sibawa peddangngé. Maraja tongek-Ko, sibawa mattappa, napakacauri sining bulué riyolo. Sining tau baranié purani narampasa; matinroi mennang sibawa dé'na matu naoto'na. Prajuri-prajuri iya poré teddénni awatangenna. Sininna anyaranna sibawa tonangiyéngngi sempé'ni maté nasaba paggera'-Mu, oh Allataalana Yakub! Masero tongek-Ko! Rékko macai-Ko, niga mulléi mattahang? Polé ri langié Mupannessai apettum-Mu; métau linoé sibawa mammek-Ko. Wettum-Mu tokkong maélo mangadéléki untu' passalama'i tau ritenre'é ri linoé. Muwi sining tau kaminang masekkangngé poji tok-Ko, sibawa iya macaié mupa pakéi kaing karung tanrang mabbarata. Rupaiwi jancimmu lao ri Puwang Allataalamu. Sitinajai sininna bangsa iya monroé macawé tiwii pakkasuwiyang untu' Allataala iya naétauriyé. Napoloi sumange'na sining panguwasaé; métaui arung-ngarungngé lao ri Aléna. Untu' pamimping kor. Situru: Yédutun. Mazmurna Asaf. Mangobbika sibawa macenno lao ri Allataala; mangobbika sibawa macenno, nanaéngkalingaka. Ri wettu aperisengngé massempajakka lao ri Puwangnge; puppu benni uwakkai limakku lao ri Aléna dé' ucau, iyakiya atikku dé' namaélo risaléwori. Rékko uwéngngerangngi Allataala, maddarékéka, rékko unennungngi, pédé malemmai atikku. Naébbuka Puwangnge dé' naweddikka matinro ri wennié, mauséka angkakku dé' uwulléi mabbicara. Upikkiri'i esso-esso iya labe'é, uwéngngerangngi sibawa unennungngi taut-taung iya labe'é. Ri wennié upikkiri'-pikkiri'i, sibawa makkutana ri laleng ati, “Untu' mannennungegga Puwangnge massampéyang sibawa dé' namaélona? Mappésauniga mamaséiki? Dé'ga Narupaiwi jancin-Na paimeng? Nallupainiga Allataala untu' mamasé? Macayiiga, angkanna dé' namaressé babuwana?” Naumakkeda, “Iyanaé peddiriwi atikku, makkedaé Iya Pommatanré dé'na namakuwasana.” Maéloka méngngerangngi sining pangkaukem-Mu Puwang, makkatenningngi sining anu makalallaim-Mu wettu riyolo. Maéloka nennungngi sininna iya Mupogau'é, sibawa pikkiri'i sining winru-Mu iya maseroé. Oh Allataala, mapaccing maneng pangkaukem-Mu, nigana silloppo Allataalata? Iko ritu Allataala iya pogau'é anu makalallaing, purani Mupannessa akuwasam-Mu ri yelle'na bangsa-bangsaé. Nasibawang awatangem-Mu Mupaleppe'i umma'-Mu, wija-wijanna Yakub sibawa Yusuf. Naita-Mu, oh Allataala, métaui uwai, ténré towi borina tasi'é. Tiri'i bosi ellungngé, maddalenrung guttué; siyanré-anré letté ri sininna sulapa'é. Maddalenrung guttué, reppe billa'é, taggottang linoé sibawa ténré. Joppa-Ko molai bombangngé, léttoi tasi'é, iyakiya dé' napaita batéla-Mu. Pada-pada-Ko pakkampié dulungngi umma'-Mu, naolai Musa sibawa Harun. Elong pappagguruwanna Asaf. Nasibawang pappagguruwakku, éh bangsaku, pénessaiwi ada-adakku. Maéloka powada warékkada sibawa pakkalarapangeng, sibawa pakatajangngi patteppungngé wettu riyolo, gau'-gau' iya riyéngkalingaé sibawa ritarimaé, iya nacuritaé néné-nénéta. Dé' tamaélo rahasiyakangngi lao ri ana'-ana'ta; maéloki mabbirittangngi lao ri abbatireng ri monrié passalenna akuwasanna Puwangnge sibawa sining winru-Na iya battowaé, enrengngé sining pangkauken-Na iya makalallaingngé. Lao ri bangsa Israélié Nabbéréyangngi hukkun-Na, sibawa lao ri wija-wijanna Yakub parénta-Na. Nasuroi néné-nénéta mappagguruwangngi lao ri ana'-ana'na mennang, kuwammengngi abbatireng rappina naissengngi, nainappa patterui lao ri ana'-ana'na mennang. Nanallalengi towi mennang nataroi matu paddennuwanna ri Allataala, sibawa dé' nallupaiwi pangkauken-Na, iyakiya tuli tunru'i ri parénta-Na, kuwammengngi mennang dé' napada néné-nénéna iya pojiyéngngi maronta sibawa madoraka; abbatireng iya kaléwa'-léwa'é teppe'na, sibawa dé' namatinulu lao ri Allataala. Suku Efraim iya massenjataé pana, lariwi ri wettunna mammusu. Najjalékkaiwi mennang assijancin-Na sibawa Allataala, sibawa dé' namaélo tunru lao ri hukkun-Na. Nallupaiwi mennang sining pangkauken-Na, sibawa sining anu makalallaing iya Nappaitangngé lao ri mennang. Ri yolona toriyolona, mébbui Allataala anu makalallaing ri wanuwa Maséré, ri tanéténa Zoan. Napuwé'i tasi'é, nainappa mallétto mennang; Napatettongngi uwai pada-pada téppo'é. Nadulungngi mennang sibawa ellung ri essoé enrengngé nasibawang tajanna apié puppu benni. Napuwé'i bulu batué ri padang kessi'é, nenniya paénungngi mennang sibawa maona. Nasuroi passu uwai bulu-bulu batué, namassolo'na uwai pada-pada saloé. Iyakiya matterui mennang madosa lao ri Allataala, maronta'i mennang ri padang kessi'é lao ri Iya Pommatanré. Nattungkai mennang cobaiwi Allataala, ri laleng tuntu'i inanré iya nacinnaiyé mennang. Naéwai mennang Allataala sibawa makkeda, “Naulléga Allataala mpérékki inanré ri padang kessi'é? Mémeng Naunrui bulu batu iya matedde'é, angkanna massolo uwai sibawa maraja. Iyakiya Naullétoga passadiya roti sibawa mabbéré juku lao ri umma'-Na?” Naéngkalinganaro, macaini Allataala nanagasai umma'-Na sibawa api; cai-Na lao ri mennang pédé mancajiwi, saba' dé' mennang namateppe lao ri Allataala, ri akuwasan-Na iya mullééngngi passalama'i mennang. Namuni makkuwaro Naparéntangngi langié untu' timpa'i sining tange'na. Napanonnoi gandongngé polé ri surugaé, manna untu' inanréna mennang. Nawéréngngi mennang inanré maona; manréi mennang roti malaéka'. Nasuro towi anging alaué mangiri; nasaba akuwasan-Na namangiri anging yattangngé. Napanonnoi manu'-manu'é untu' umma'-Na, jumellana padai kessi'é tenribilang. Napasempéi iyaro sining manu'-manu'é ri akkémangngé ri mattulilinna onrong naonroiyé mennang. Namanréna mennang gangka messo, saba' Allataala pura mpéréngngi mennang aga iya nacinnaiyé. Iyakiya napessunna mennang dé'topa nacau; jaji wettunna mennang manré mupi, macaini Allataala Nanaéwai mennang; Naunoi sining tau Israél iya maloloé sibawa baranié. Namuni makkuwaro tette'i umma'-Na madosa, sining anu makalallain-Na dé' naébbui mennang mateppe. Nanapaccappa'ni Allataala atuwonna mennang pada-pada nappase'é, cappui taut-taunna mennang ri laleng taué. Sises-siseng nauno Allataala siyagangngaré ri yelle'na mennang, iya laingngé massessekaléi sibawa lisu ri Aléna. Naéngngerangngi mennang makkedaé Allataala pallinrunna mennang, sibawa Iya Pommatanré pappassalama'na mennang. Iyakiya ribelléi Aléna ri mennang, ada-adanna mennang bellé simata. Dé' mennang namatinulu lao ri Aléna sibawa dé' nakkatenning ri assijancin-Na. Iyakiya Allataala mamaséiwi sibawa maddampengengngi umma'-Na, sibawa dé' napaccappui mennang. Makkolik-kolinni natahang cai-Na, sibawa dé' napallessui cai-Na. Engngerangngi makkedaé mennang banna mahlu' iya dé'é namannennungeng, pada-pada anging labe'é nadé'na nalisu. Temmaka léwe'nana mennang maronta lao ri Aléna, sibawa peddiriwi atin-Na wettunna ri padang kessi'é. Makkolik-kolinni mennang cobaiwi Allataala, sussaiwi Iya Mapaccingngé, Allataalana Israélié. Dé' mennang naéngngerangngi matu akuwasan-Na, ri esso Napaleppe'na mennang polé ri balié, wettunna mébbu sining anu dé'é padanna ri Maséré, sibawa sining anu makalallaingngé ri padang Zoan. Napinrai sining salona mennang mancaji dara, angkanna dé' naulléi mennang ménungngi uwaina. Nasissai mennang sibawa lale iya maégaé, sibawa leppessangngi tanana mennang risolangi ri cuppangngé. Papoléi ule sibawa incalé, iya paccappuéngngi éngngalangngé sibawa wassélé dare'é. Nasolangiwi pong anggoro'na mennang sibawa bosi batu, nenniya sining pong arana mennang sibawa cinoddo mattékké. Naleppessangngi bosi ése'é kennai olokolo'na mennang, sibawa letté kennai olokolo'na mennang. Napallessui cai-Na iya malluwa'-luwa'é ri laleng nasurona sipasukang malaéka' amaténgngé iya mébbuéngngi mennang pettu paddennuwang. Dé' natahangngi cai-Na iyaré'ga nacarinnaiwi atuwonna mennang, iyakiya napaccappui mennang sibawa sai. Naunoi ana' worowané macowaé ri laleng tungke kaluwargana tau Maséré'é. Nainappa napimping umma'-Na pada-pada bimbala makkonrongngé, sibawa dulungngi mennang molai padang kessi'é. Ri laleng pappimpin-Na amangngi mennang sibawa dé' namétau, na balinna mennang tallemme'i ri laleng tasi'é. Nainappa natiwi umma'-Na ri tana-Na iya mapaccingngé, ri bulué iya Aléna muto sittaiwi. Ri yolona umma'-Na Napaddésu'i pabbanuwaé kuwaro Nainappa nattawa-tawang iyaro wanuwaé lao ri sininna suku bangsa Israélié, umma'-Na, angkanna naulléi mennang monroiwi kéma-kémana balié. Iyakiya maronta'i mennang sibawa mojiwi Allataala Iya Pommatanré, parénta-parénta-Na dé' mennang naturusiwi. Bali'bellai mennang pada-pada toriyolona, sibawa dé' nawedding riyatepperi pada-pada uso mabbéngko'é. Naéwai mennang Allataala sibawa onrong assompang barahalana mennang, nenniya mébbui mennang mangémpuru sibawa dato'-dato'na mennang. Naitanaro, macai senna'ni Allataala, sibawa sampéyangngi mennang. Nasalaiwi kéma-Na mennang ri Silo, onrong Naonroiyé ri yelle'na tolinoé. Naleppessangngi Petti Assijancin-Na ritawang; lambang alebbiren-Na nasittaiwi balié. Macayii lao ri umma'-Na, appunnangeng mana-Na, sibawa leppessangngi mennang riyuno sibawa peddang. Kallolo-kallolona mennang nanréi api; dé'na gaga kawingiwi ana'-ana'darana mennang. Imang-ngimanna mennang riyunoi sibawa peddang, janda-jandana mennang dé' naulléi mpating. Moto'i Puwangnge pada-pada tau péseddingngé, pada-pada tau mawatangngé purana ménung anggoro. Napasoroi balin-Na, sibawa caui mennang untu' mannennungeng. Iyakiya Nasampéyangngi wija-wijanna Yusuf sibawa dé' napiléi suku Efraim. Iya Napilé iyanaritu suku Yéhuda, sibawa Bulu Sion iya Napojiyé. Napatettongngi Bola-Na pada-pada Naonroiyé ri surugaé, sibawa pada-pada linoé, masse untu' mannennungeng. Napiléi Daud atan-Na, sibawa malai polé ri olokolo makkonronna, polé ri onron-Na mappiyara indo' bimbala, untu' mampii Israélié umma'-Na. Daud piyarai mennang sibawa macenning atinna, nenniya pimpingngi mennang sibawa macca. Mazmurna Asaf. Oh Allataala, bangsa iya dé'é naissek-Ko natudangini tana mana-Mu. Napanajisii mennang Bola-Mu, napancajiwi Yérusalém ruttungeng. Nasalaiwi mennang ujuna ata-atam-Mu mancaji inanréna manu'-manu'é ri yelle'é. Ujuna sining Muwamaséiyé naleppessangngi mennang mancaji inanréna olokolo liyaé. Ri sininna kota Yérusalém tattuppa'i darana mennang pada-pada uwai; dé'gaga kuburu'i mennang. Mancajiki akkéllé-kéllékenna bangsa-bangsa sideppéta, nacawa-cawaiki mennang sibawa nabuwé'ki. Oh Puwang, untu' mannennungegga macai-Ko, sibawa angémpurum-Mu malluwa pada-pada apié? Tuppa'i cai-Mu ri yasé'na bangsa-bangsaé iya dé'é naissek-Ko, sibawa ri yasé'na akkarungeng-akkarungengngé iya dé'é nassompa lao ri Iko. Saba' purani mennang napaccappu umma'-Mu, sibawa mancuru'i onrong naonroiyé mennang. Aja' tahukkukki nasaba dosana toriyolota. Amaséini masitta, saba' pettu paddennuwanni. Tulukki oh Allataala, Pappassalama'ta, addampengengngi dosa-dosata sibawa paleppe'ki nasaba alebbirem-Mu muto. Aja' taleppessangngi bangsa laingngé makkutana passaletta, “Kégai Allataalana mennang?” Leppessakki mitai pakkabale'é lao ri bangsa-bangsa iya mpunoéngngi ata-atam-Mu. Engkalingai addarékénna sining tahanangngé; tennapodo sining tau iya ripattentué untu' maté rileppessang tuwo nasaba akuwasam-Mu. Oh Puwang, wale'i bangsa-bangsaéro leppi wékkapitu nasaba sininna pappakatunana mennang lao ri Iko. Na idi umma'-Mu, bimbala Muampié, sukkuru matu lao ri Iko untu' mannennungeng, sibawa poji-Ko massossoreng. Untu' pamimping kor. Situru lagunna: Bunga Bakungngé. Mazmur asabbiyanna Asaf. Oh Pakkampina Israélié, éngkalingai, Iko pimpingngéngngi wija-wijanna Yusuf selaku makkonrongeng. Iko iya makkarungngé ri yasé'na kérub-é, alluruno sibawa mattappa ri yolona Efraim, Bényamin sibawa Manasyé. Ajjellokenni akuwasam-Mu lao ri idi, sibawa poléno passalama'ki. Oh Allataala, pajjappaki; itaki sibawa ati masémpo, natasalama matu. Oh Puwang Allataala Iya Pommakuwasaé, gangka kégi-Ko macai, namuni madosai umma'-Mu? Muwérékki teri untu' inanré, uwai mata maona untu' énungeng. Muleppessangngi bangsa-bangsa sideppéta, massasa passalenna tanata macawai masennang sining balitta. Oh Allataala Iya Pommakuwasaé, palisuki; itaki sibawa masémpo ati, natasalama. Umma'-Mu padai pong anggoro'é iya Mupalétté'é polé ri Maséré. Mupaddésu'i bangsa-bangsa laingngé, nainappa Mutaneng iyaro ajué ri wanuwanna mennang. Mupassadiyangengngi tana aléna; namakkure maliyung sibawa mallebbang ri sininna wanuwaé. Nacinaungiwi sining bulu-bulué, enrengngé nasibawang takké-takkéna natongkoi ajukajung aras battowaé. Lorong takkéna lettu ri Tasi Tengngaé, colli'-colli'na lettu ri Salo Efrat. Oh Allataala magi Muruttungngi sappona, angkanna tungke tau laloé naulléi céppui buwana? Nakanyumpéi bawi ale'é angkanna masolang, sibawa olokolo ri padangngé manréi. Oh Allataala Iya Pommakuwasaé, poléni paimeng, itani polé ri surugaé sibawa jampangiwi umma'-Mu. Passalama'i umma iya padaé pong anggoro alé-Mu pura tanengngi, sibawa cura' anggoro iya Mupancajiyé mawatang. Balié pura tubbangngi sibawa tunui; leppessanni mennang ripaccappu ri cai-Mu. Linrungiwi tau iya puraé Mupilé, ana'na tolinoé iya Mupéwatangiyé untu' alé-Mu. Nadé'na taléssé polé ri alé-Mu; jagaiwi atuwotta, natapoji-Ko matu. Oh Puwang Allataala Iya Pommakuwasaé, pajjappaki, itaki sibawa masémpo ati, kuwammengngi natasalama. Untu' pamimping kor. Situru lagunna: Gitit. Polé ri Asaf. Puwélonni pappoji-pojiyangngé untu' Allataala, awatangetta, gorano sibawa marennu untu' Allataalana Yakub. Paonini rabanaé, akkani élongngé, getti'i gambusu'é nenniya kacapié sibawa macenno. Seppungngi tarompé'é ri esso marajata, ri pésta uleng barué sibawa uleng léburengngé. Saba' iyaro gau'é séuwai peraturang ri Israélié, séuwai parénta polé ri Allataalana Yakub. Napancajiwi séuwa attettekeng untu' bangsa Israélié, wettunna malluru méwai Maséré. Uwéngkalingai basa iya dé'é uwissengngi, “Purani uwakka tiwi polé ri salangkammu, sibawa leppessangngi baka lémparengngé polé ri limammu. Ri laleng asussammu mangobbiko, Naupassalama'ko. Ubaliko polé ri guttu onrok-Ku massubbu, Upojiko ri mata uwai Mériba. Engkalingai papparéngngerak-Ku, éh umma'-Ku, Israél, akkalarapanna maéloko méngkalinga-Ka! Aja' naengka déwata laing ri yelle'mu, aja' musompa déwata laing. Iyya ritu Puwang Allataalamu, iya dulungngékko massu polé ri Maséré. Wettummu malupu riwérékko inanré. Iyakiya umma'-Ku dé' namaélo méngkalinga-Ka, dé' namaélo mapato Israélié lao ri Iyya. Rimakkuwannanaro Uleppessangngi mennang matedde ati; leppessangngi mennang naccowéri élona muto. Ah, akkalarapanna umma'-Ku maéloi méngkalinga-Ka, akkalarapanna maéloi mapato lao ri Iyya, masitta'-Ka patunru'i balinna mennang, sibawa caui sininna balinna mennang. Tau iya céccéék-Ka Upatunru'i matu, rihukkungngi matu mennang untu' mannennungeng. Iyakiya umma'-Ku Upanréi matu gandong ripilé, sibawa Upamessori sibawa cani ale.” Mazmurna Asaf. Allataala pimpingngi pengadilang ilahié ri surugaé, nainappa nabbéréyang apettun-Na: “Aja'na tamangadélé sibawa macéko-céko, sibawa aja' muwaccowé lao ri tau majaé. Ewaiwi ana' béué sibawa tau malemmaé, wéréngngi adélékeng tau kasiyasié sibawa manrasa-rasaé. Paleppe'i tau iya malemmaé sibawa dé'é pakkullénna, paleppe'i mennang polé ri limanna tau majaé. Dé' aga-aga muwisseng, madonggo sibawa pusa, nasaba iko, natassiya-siya atorenna masaraka'é. Upowadai makkedaé ilahiko iko maneng ana'-ana'na Allataala Iya Pommatanré. Iyakiya matéko matu pada-pada tolinoé, pada-pada tungke tomarajaé, maté tokko matu.” Poléni oh Allataala, adélékini linoé, saba' sininna bangsaé iyanaritu appunnangem-Mu. Mazmurna Asaf: séuwa élong. Oh Allataala, aja' Muwammekko, aja' tappalo-palo cikku sibawa monro mammekko. Itani, balim-Mu maroca, maronta'i sining tau iya benciyék-Ko. Mébbui mennang rancana maja untu' méwai umma'-Mu; sibawa barunding méwai sining tau iya Mulinrungiyé. Adanna mennang, “Laono mai taancuru'i bangsa Israélié, kuwammengngi dé' nariyéngngeranna asenna mennang.” Purani siyempe bangsa-bangsaé, sibawa masséddi méwa-Ko: bangsa Edom sibawa Ismaél, sining tau Moab-é sibawa Hagar; bangsa Gébal, Amon sibawa Amalé', bangsa Filistéa enrengngé pabbanuwana Tirus. Makkuwatoro Asyur masséddini sibawa mennang, mancaji ana' buwana wija-wijanna Lot. Gaukengngi mennang pada-pada tau Midiangngé, pada-pada Siséra sibawa Yabin ri Salo Kisyon, iya puraé ripaccappu ri Endor, sibawa mancaji pappakacommo untu' tanaé. Gaukengngi pamimpinna mennang pada-pada Oréb sibawa Zeeb, patunru'i pangakuwasana mennang pada-pada Zébah sibawa Salmuna, nasaba purai mennang makkeda, “Laono mai tatudangiwi tana naonroiyé Allataala.” Oh Allataala, assiyamporengngi mennang pada-pada awué, pada-pada daramé iya nairié anging. Pada-pada api iya tunuéngngi ale'é, luwa api iya mangurengngéngngi sining bulué. Lellungngi mennang sibawa anginraja-Mu, sélengiwi mennang sibawa talippuru-Mu. Oh Puwang, leppessangngi mennang ripakatuna, kuwammengngi nangakuiwi mennang akuwasam-Mu. Leppessangngi mennang tuli ripakasiri sibawa métau, leppessangngi mennang maté ri laleng atunangngé. Tennapodo naissengngi mennang banna Iko ritu Iya Pommatanré, Puwang, iya makuwasaéngngi sininna linoé. Untu' pamimping kor. Situru lagunna: Gitit. Mazmurna appang Korah. Temmaka pasennanginna onrong Muwonroiyé, oh Allataala Iya Pommakuwasaé! Nauddaningi senna'i atikku Bola-Mu, tubu nyawaku gora-gorai untu' Allataala iya tuwoé. Mala dongié lolongeng bola sibawa lajang-lajangngé séddi bola, onronna mennang taroi ana'na ri seddéna mézba-Mu, oh Puwang Iya Pommakuwasaé, Arukku sibawa Allataalaku. Masennang tongeng tau iya monroé ri Bola-Mu, sibawa tuli makkélong pappojiyang untu' alé-Mu. Masennangngi tau iya lolongengngé awatangeng polé ri Iko, sibawa iya macinnaé massiyara ri Bulu Sion. Namattengngang mennang joppa molai lompo Baka, iyaro onrongngé napinrai mennang macaji mata uwai, bosi mammulangngé tabbollongngi sibawa barakka. Awatangenna mennang pédé tattambai, wettunna joppa lao ri Sion, lao ri onronna Allataalana sininna déwataé mappaitangngi alé. Engkalingai sempajakku, oh Puwang Allataala Iya Pommakuwasaé, éngkalingai, oh Allataalana Yakub. Barakkakiwi arutta, oh Allataala, linrungiwi tau iya puraé Mupilé. Lebbi kessing muwi siesso ri Bola-Mu naiya sisebbu esso ri onrong laingngé. Upiléi mancaji panganrowang sumpang ri Bolana Allataalaku naiya monro ri bolana tau majaé. Saba' Puwang Allataala pallinrutta sibawa arung iya marajaé, iya mpéréngngékki pammasé sibawa alebbireng. Dé' naengka nasampéyangngi muwi aga iya makessingngé lao ri tau iya atuwonnaé dé' cellana. Oh Puwang Iya Pommakuwasaé, masennangngi tau iya mateppe'é ri Aléna. Untu' pamimping kor. Mazmurna appang Korah. Muwéloriwi tana-Mu, oh Puwang, keadaanna Israélié purani Mupalisu. Purani Muwaddampengeng dosa-dosana umma'-Mu; Muwaddampengenni sininna asalanna. Dé'na Muwacairi mennang; cai-Mu iya maseroé Mugettengngi lisu. Pajjappaki, oh Allataala pappassalama'ta, aja' Mumacai paimeng lao ri idi. Untu' mannennungegga Muwacairiki, sibawa tette macai massossoreng? Péwatangiki paimeng kuwammengngi tamarennu idi umma'-Mu nasaba pattulum-Mu. Ajjellokenni makkedaé tette'-Ko mamasé, oh Puwang, wérékki asalamakeng polé ri alé-Mu. Maéloka méngkalingai ada-adanna Puwang Allataala; Najjanciyangngi asaléwangengngé lao ri idi, umma'-Na, assaleng dé' talisu pogau' dosa. Tongeng, sadiyai passalama'i tau iya mateppe'é, Allataala iya marajaé monroi matu ri wanuwatta. Pammasé sibawa atinulureng siruntu'i matu, adélékeng sibawa adaméngengngé sikaddao-kaddaowi matu. Atinulurenna tolinoé tuwoi matu polé ri linoé, sibawa adélékenna Allataala célléngngi polé ri langié. Puwangnge mabbéréyangngi iya makessingngé, na tanata mabbéréi matu wassélé. Adélékengngé poddiyoloiwi matu Puwangnge, sibawa passadiyai lalengngé untu' Aléna. Sempajanna Daud. Engkalingai sempajakku, oh Puwang, sibawa balika, saba' kasiyasika sibawa malemma. Jagaiwi atuwokku, saba' Muwamaséika, passalama'i atam-Mu iya mateppe'é lao ri Iko. Iko ritu Allataalaku, amaséika oh Puwang, saba' puppu essoka massempajang lao ri Iko. Puwang, pérennuiwi atinna atam-Mu, saba' lao ri Iko upattuju atikku. Makessikko, oh Puwang, sibawa mupoji maddampeng, tau iya massempajangngé lao ri Iko tette'i Muwamaséi sibawa pammasé iya maonaé. Jampangiwi sempajakku, oh Puwang, éngkalingai pangobbiku méllau pattulung. Ri wettu aperisengngé massempajakka lao ri Iko, saba' Mubalika. Oh Puwang, dé'gaga puwang pada-padam-Mu, dé'gaga pogau'i aga iya Mupogau'é. Sininna bangsa iya Mupancajiyé poléi matu, oh Puwang, untu' sompa-Ko sibawa pojiwi arajam-Mu. Saba' poré-Ko sibawa pogau'i sining anu makalallaingngé, banna Iko ritu Allataala. Appagguruwanni élo-Mu lao ri iyya, oh Puwang, kuwammengngi uwaccowériwi sibawa matinulu; pancajika mateppe sibawa ati mallébu. Sukkuru'ka lao ri Iko sibawa sukku atikku, oh Puwang Allataalaku; maéloka pojiwi abattowangem-Mu mannennungeng. Saba' tette'-Ko mamaséika sibawa pammasé iya battowaé; purani Mupaleppe nyawaku polé ri kalebbonna kuburu'é. Oh Allataala, tokkongngi tau matempoé gasaka, sigarembolang tau mabecco maélo mpunoka; dé' mennang napaduli-Ko. Iyakiya Iko, oh Puwang, Allataala mamasé sibawa pasayangngé, sabbara, penno pammasé sibawa matinulu. Jampangika sibawa amaséika, péwatangika sibawa passalama'ka, saba' pada-pada indo'ku, massompa tokka lao ri Iko. Wérékka tanrang akessingem-Mu, oh Puwang, kuwammengngi tau iya céccéékka namasiri, rékko naita-Ko mennang mattulung sibawa saléworika. Mazmurna appang Korah, séuwa élong. Napatettongngi Puwangnge kota-Na ri tompo'-Na bulu-buluna iya mapaccingngé. Polé risininna kotana Israélié, Yérusalém kaminang Namaséi. Engkalingai, éh kotana Allataala, gau'-gau' iya mappabengngaé Napowadai passalenna iko: “Maséré sibawa Babél Uputtama'i matu ri laleng daftarna bangsa-bangsa iya mapatoé lao ri Iyya. Mala Filistéa, Tirus sibawa Sudan muttama'i ribilang pabbanuwana Yérusalém.” Lao ri Sion makkedai matu tauwé, makkedaé sininna bangsaé muttama'ni wargana, sibawa Iya Pommatanré pakkasse'i matu. Naputtama'i matu Puwangnge bangsa-bangsaé ri laleng daftarna pabbanuwana Yérusalém. Séré-séréi matu mennang sibawa makkélong, “Sion iyanaritu onrong assalekku!” Elong. Mazmurna appang Korah. Untu' pamimping kor. Situru lagunna: Mahalat Léanot. Elong pappagguruwanna Héman, tau Ezrahié. Oh Puwang, Allataala iya passalama'ékka, ri essoé mangobbika lao ri Iko, ri wennié mangoloka ri Iko. Tennapodo sempajakku lettu'i ri Iko, éngkalingai pangobbiku. Nakennaka maéga asussang; engkani amaténgngé ri sumpangngé. Pada-padaka tau iya maéloé nonno ri kalebbong amaténgngé, tau iya acappurengngé awatangeng. Risalaika ri yelle'na tau maté, pada-pada tau riyunoé, léwu ri laleng kuburu'é, pada-pada tau iya Muwallupai sisengngénna, tau iya dé'énna Mutulungngi paimeng. Muwaggenrungekka ri kalebbong iya maliyungngé, ri kalebbong kuburu iya maliyungngé sibawa mapettangngé. Natenre'ka cai-Mu sibawa matane, ancuru'ka ritenre ri cai-Mu. Mupabélaiwi sining sissekku polé ri aléku, sibawa Muwébbuka mappakaciddi-ciddi lao ri mennang. Riurukka nadé'na wedding massu, mappido-pido matakku nasaba anrasa-rasang. Esso-essoka mangobbi lao ri Iko, Puwang, nenniya massempajang sibawa lima ritanréyang. Mébbu-Koga anu makalallaing untu' tau maté? Moto'ga mennang sibawa poji-Ko? Riyabbirittagga pammasé-Mu ri laleng kuburu'é, sibawa atinulurem-Mu ri onrong abinasangngé? Engkaga missengngi anu makalallaim-Mu ri laleng pettangngé, iyaré'ga akessingem-Mu ri wanuwa onronna tau riyallupaiyé? Iyakiya uwéllauwi pattulum-Mu, oh Puwang, tungke élé mappaénré'ka sempajang ri Iko. Oh Puwang, magi Musampéyakka? Magi Mupagilingngi rupam-Mu polé ri aléku? Mappammulai baiccu'ku manrasa-rasaka sibawa naincé amaténg, posoka tanggungngi pahukkungem-Mu. Cai-Mu iya maseroé mancuru'ka; paggasa-Mu iya maseroé pabbinasaka. Puppu esso cai-Mu pada-padai lémpe'é mattulilingika, keppukka polé ri sininna sulapa'é. Sellao-sellaoku iya maréppé'é Mupabélaiwi polé ri aléku, pettangngé monro silaongekka. Elong pappagguruwanna Etan, tau Ezrahié. Paressé babuwa-Mu, Puwang, maélo upuwélong mannennungeng, atinulurem-Mu uwabbirittang matu massossoreng. Saba' uwisseng pammasé-Mu mannennungengngi, atinulurem-Mu mattinettoi pada-pada langié. Makkedako, “Purana mébbu assijancing sibawa tau ripilé-Ku; pura-Ka mattanro lao ri Daud, atak-Ku: ‘Uwattahangengngi kadéra arajam-Mu untu' mannennungeng, massossorengngi natudangi matu ana' eppomu.’ ” Addeppungeng surugaé pojiwi sining pangkaukem-Mu iya makalallaingngé, sibawa makkélongengngi atinulurem-Mu, Puwang. Ri langié dé' gaga pappadai-Ko, oh Puwang, dé' gaga mahlu' suruga iya pappadaiyék-Ko. Ripakalebbi-Ko ri yelle'na sining mapaccingngé, riyétauri lebbi naiya sininna ri mattulilim-Mu. Puwang, Allataala Iya Pommakuwasaé, nigana pada-pada watam-Mu? Matinuluko ri laleng sini-sininnaé oh Puwang. Mukuwasaiwi tasi iya mabbombangngé, sibawa pasoroi bombanna iya maseroé. Rahab, naga tasi'é, Mureppo'i sibawa Muwunoi, nasibawang lima mawatangngé Mucaui sining balim-Mu. Langi sibawa linoé iyanaritu appunnangem-Mu, linoé sibawa sininna lise'na winru-Mu. Iko ritu pancajiwi manorang sibawa yattang, Bulu Tabor sibawa Bulu Hérmon gora-gorai untu' alé-Mu. Temmaka battowana akuwasam-Mu, sibawa pékkugi serona awatangem-Mu! Adélékengngé sibawa hukkungngé iyanaritu tettongenna akkarungem-Mu, pammasé sibawa atinuluremmu manessai ri laleng sininna tindakam-Mu. Masennangngi bangsa iya massompaé sibawa marennu, iya tuwoé ri laleng cahaya ahadérékem-Mu, Puwang. Puppu esso mariyo-riyo mennang sibawa tette masse, nasaba akessingemmu. Muwérékki apakalang iya makessing senna'é, nasaba akessingem-Mu ritu natapakala. Saba' pallinrutta iyanaritu tau Mupilé, oh Puwang; arutta iyanaritu appunnangenna Allataalana Israél Iya Mapaccingngé. Riyolo ri laleng séuwa pakkitang, makkeda-Ko lao ri atam-Mu iya matinulué, “Purani utulung séddié pabbarani, séddi tau iya Upilé polé ri ra'ya'é purani Upakatanré. Purani Ulolongeng Daud, atak-Ku, sibawa Ulanti sibawa minnya upacara. Awatangek-Ku tuli linrungiwi matu, akuwasak-Ku péwatangiwi matu. Dé' naricau matu ri balié, sibawa dé' naritenre ri tau majaé. Sininna balinna Upaccappui matu, Uwunoi niga-niga céccééngngi. Tette'ka matu mamaséiwi sibawa matinulu lao ri aléna, sibawa mébbui pédé makuwasa. Ulowangiwi matu akkarungenna, polé ri Tasi Tengngaé lettu ri Salo Efrat. Makkedai matu lao ri Iyya, ‘Iko ritu Ambo'ku, Allataalaku, pallinrukku sibawa pappassalama'ku.’ Upancajiwi matu ana' worowané-Ku macowaé, iya kaminang marajaé riyelle'na sininna arungngé. Tette'i matu Uwamaséi lettu mannennungeng, assijancik-Ku sibawa aléna tette'i masse. Kadéra akkarungenna Uwattahangengngi ri wettu engkana mupa langié ri yasé'na linoé, massossorengngi natudangi matu ana' eppona. Iyakiya rékko wija-wijanna najjalékkaiwi hukkuk-Ku, sibawa dé' natuwo situru parénta-Ku, rékko mennang dé' nabati-batiwi Upattette'é sibawa dé' najampangiwi peraturak-Ku, Uhukkungngi mennang sibawa cambu nasaba pelanggaranna, sibawa Upateppai abalaé nasaba dosa-dosana. Iyakiya tette'-Ka matu mamaséiwi Daud, sibawa dé' matu Uwassakkarengngi atinulurek-Ku. Assijancik-Ku sibawa aléna dé' matu tek-Kupajajiwi, polé ri jancik-Ku dé' muwi séddi Ugetteng paimeng. Siseng untu' mannennungeng mattanro-Ka nasaba asek-Ku iya mapaccingngé; dé' matu Uwabbellé lao ri Daud. Mattahangngi matu kadéra akkarungenna ri wettu engkana mupa mata esso, massossorengngi ana' eppona tudangiwi matu. Akkarungenna tette'i engka pada-pada kétengngé, sabbi matinulué ri ellungngé.” Iyakiya makkekkuwangngé macai-Ko lao ri arungngé, Muwabbéyangngi sibawa sampéyangngi tau Mupilé. Dé' Mupajajiwi assijancim-Mu sibawa atam-Mu, Muwaggenrungengngi passigera'na ri laleng bungkaé. Muruttungngi témbo'-témbo' kotana, sining bénténna Mupancajiwi ruttungeng. Sininna tau iya laloé narampasa'i appunnangenna, mancajiwi akkéllékéllékeng lao ri balibolana. Muwéréngngi apakalang risining balinna, sibawa mébbui sininna balinna marennu. Mala senjatana Mupancajiwi dé' nakkéguna, dé' Mutulungngi ri laleng musué. Mupaccappa'i akuwasanna iya malebbié, kadéra akkarungenna Muwaggeppuwangngi ri tanaé. Muponcokiwi wettu malolona, enrengngé tongkoi sibawa siri. Gangka kégi-Ko massubbu, oh Puwang? Gangka kégi cai-Mu malluwa pada-pada apié? Engngerakka temmaka ponco'na atuwokkué, Mupancajiwi tolinoé selaku mahlu' dé'é namannennungeng. Nigana mulléi tuwo matteru sibawa dé' namaté? Nigana mulléi leppe polé ri kuburu'é? Oh Puwang, kégani tanrang pammasé-Mu iya mammulangngé, iya Muwajjanciyangngé lao ri Daud nasaba atinulurem-Mu? Engngerangngi oh Puwang, pékkugi atam-Mué ricella, utanggungngi pappakatunana maéga bangsa. Sining balim-Mu napakatunai arung Mupilé, oh Puwang, méllé-kéllé'i kégi-kégi lao. Pojiwi Puwangnge untu' mannennungeng. Jajini makkuwaro! Aming! Sempajanna Musa, atanna Allataala. Oh Puwang, Iko ritu onrotta mallinrung massossoreng. Ri wettu dé'napa naripancaji sining bulué, ri wettu dé'napa Mutappai linoé, Iko ritu Allataala iya mannennungengngé, dé' pammulanna sibawa dé' paccappurenna. Musuroi tolinoé lisu ri assalenna, mancaji awu pada-pada pammulanna. Untu' alému sisebbu taung padai siessoé, esso iwenni iya labe'énna; pada-pada léléng jagangngé ri wennié. Muwalirekki; pada-padaki nippié, pada-pada wella iya cura'é; ri éléé tuwoi sibawa mabbunga, iyakiya makelle'i ri arawéngngé. Tassélekki nasaba cai-Mu, sibawa cappu binasa nasaba cai-Mu. Mutaroi asalatta ri yolo-Mu, dosata iya tassubbué Muwitai. Maponco'i atuwotta nasaba cai-Mu, cappui taut-tautta pada-pada seppung nappase'é. Wettu atuwotta banna pituppulo taung, rékko mawatakki, aruwa pulona taung. Iyakiya banna asukkarakeng sibawa anrasa-rasang iya talolongengngé; purana atuwong iya maponco'é, lennye'ni. Nigana missengngi aseronna cai-Mu, iyaré'ga maingekiwi matu addimonrinna cai-Mu? Pamaingekiki matu ponco'na atuwottaé kuwammengngi tamancaji tau iya engkaé akkalenna. Oh Puwang, gangka kégi-Ko macai? Lisuno sibawa amaséiwi ata-atam-Mu. Patabbolloi pammasé-Mu lao ri idi tungke élé, kuwammengngi tamarennu sibawa makkélong gangka tuwota. Wérékki asennangeng sittimbang sibawa anrasa-rasangngé iya ritanggungngé ri laleng taut-taung anrasa-rasangngé. Ajjellokengngi winru-Mu lao ri ata-atam-Mu, sibawa akuwasam-Mu iya battowaé lao ri wijatta. Oh Puwang Allataalata, barakkakiki, kuwammengngi nasininna jama-jamatta mawwassélé'i. Tau iya mallinrungngé ri Iya Pommatanré, sibawa monro ri laleng accinaungenna Iya Pommakuwasaé, wedding makkeda lao ri Puwangnge, “Iko ritu pangéwaingekku sibawa pallinrukku, Allataalaku, ri alé-Mu ritu mateppe'ka.” Napaleppe'ko matu polé ri abala tassubbué, sibawa polé ri lasa tiwié amaténg. Nacinaungiko matu sibawa panni-Na, angkammu amang ri laleng accinaungen-Na; atinuluren-Na padai kaliyawo iya linrungiyékko. Dé' naparelluko métau lao ri bahayaé ri wennié, iyaré'ga paggasa tennasenna-sennaé ri essoé; lao ri abala iya polé ri wettu mapettangngé, iyaré'ga ancurukeng iya pageppaé ri tangassoé. Muwi sisebbu tau maté ri seddému, sibawa seppulo sebbu ri seddé ataummu, iyakiya alému dé' namalo matu. Rékko makkitako ri mattulilimmu, muwitai tau majaé nakenna pamale. Saba' mupancajiwi Puwangnge pangéwaimmu, Iya Pommatanré mupancaji pallinrummu. Nadé' nakennako matu abala, bolamu dé' matu nakennai abala. Allataala suroi malaéka'-Na jagaiko, untu' linrungiko kégi-kégiko lao. Naakkako matu ri pale' liman-Na, kuwammengngi aja' natabbuttu ajému ri batué. Muwajjalékkaiwi matu ulaé sibawa singaé, muléjja'i singa loloé sibawa ula mamosoé. Adanna Puwangnge, “Tau iya pojiyékko Upassalama'i matu, iya mangakuiyék-Ka Ulinrungiwi matu. Rékko mangobbii lao ri Iyya, Ubaliwi matu. Ri wettu aperisengngé, Utulungngi matu; Upaleppe'i matu sibawa Uwéréng alebbireng. Upésennangiwi matu sibawa umuru malampé, sibawa Upassamala'i.” Elong untu' esso Saba'é. Makessing tongeng sukkuru lao ri alé-Mu, oh Puwang, sibawa poji-Ko, Allataala Iya Pommatanré; mabbirittangngi pammasé-Mu ri éléé, sibawa atinulure-Mu ri wennié, nanagetti towi gitar seppuloé tuluna, naccowéri gambusu sibawa kacapi. Saba' pangkaukem-Mu pésennangiwi atikku, makkélokka marennu nasaba winru-Mu. Temmaka loppona sining pangkaukem-Mu, oh Puwang, temmaka lamunna nawa-nawam-Mu! Dé' naulléi majeppuiwi tau madonggoé, dé' nawedding napahang tau madongo'é. Weddissa jaji tau madorakaé tuwo macommo pada wellaé, sibawa tau majaé tattamba sugi sibawa madécéng; iyakiya ripaccappu sisengngi matu mennang, saba' Iko, Puwang, makuwasa mannennungeng. Taissengngi ripaccappui matu balim-Mu, oh Puwang, sininna tau majaé ripassara-sarangngi matu. Muwébbuka pada watanna banténg liyaé, nenniya barakkakika sibawa asennangeng. Uwitai akalanna sining balikku, sining tau iya tokkongngénna méwaka, uwéngkalingani rancana-rancana majana mennang. Tau malempué cura'i pada-pada pong karomaé, sibawa tuwo macommo pada-pada pong camaraé ri Libanon. Padai mennang aju iya ritanengngé ri Bolana Puwangnge, sibawa mabbija ri Bolana Allataalata, aju iya mabbuwaé mupa ri wettu macowana, tette'i manyila matakka. Iyanaro buttinna makkedaé adélé'i Puwangnge; aléna pangéwaingek-Ku, dé'gaga acéko-cékong ri Aléna. Puwangnge iyanaritu Arung; mappaké arajangngi sibawa awatangeng. Tettong masse'i linoé dé' naulléi kédo. Ri pammulanna mupa namasse kadéra akkarungem-Mu, engka-Ko polé ri mannennung. Napakatanréi saddanna bori tasi'é, oh Puwang, napakatanréi memmu'na bombang dolangengngé. Iyakiya Puwang iya makuwasaé ri surugaé, lebbi maseroi naiya bombanna dolangengngé, lebbi mawatangngi naiya ajjallo'na bombangngé. Puwang, mannennungengngi hukkum-Mu, mapaccingngi Bola-Mu sillampé wettué. Oh Allataala, Iko ritu Allataala iya makkabale'é, ajjellokenni pakkabale'-Mu, oh Puwang. Tokkonni, oh Hakinna sininna linoé, hukkungngi tau matempoé situru pangkaukenna mennang. Oh Puwang, gangka kégi tau majaé marennu? Gangka kégi, oh Puwang? Passui mennang ada-ada iya makassara'é, sibawa mattempowangngi jana mennang. Natenre'i mennang umma'-Mu, oh Puwang, sibawa reppo'i sining tau Mupilé. Naunoi mennang jandaé sibawa ana' béué enrengngé tau laing iya monroé ri wanuwaéwé. Adanna mennang, “Dé' narita ri Puwangnge, dé' narijampangi ri Allataalana Yakub.” Eh bangsa, aja' mumadonggo makkuwaro, agguruno pakéi akkalemmu! Allataala mébbui daucculingngé, dé'ga Namaréngkalinga? Aléna mébbu mata, dé'ga Namakkita? Aléna paggurui bangsa-bangsaé, dé'ga Napahukkung? Aléna mancaji gurunna sininna tauwé, dé'ga Nappunnai pangissengeng? Nawellungi Puwangnge pikkiranna tolinoé, naisseng manengngi siya-siyai simata. Masennangngi tau iya Mupaggurué, oh Puwang, tau iya Mupaggurué hukkung-hukkum-Mu. Mupattennangngi ri esso-esso abalaé, angkanna rikali kalebbongngé untu' tikkengngi tau majaé. Saba' dé' nasalaiwi Puwangnge umma'-Na; dé' najampaléllériwi matu appunnangeng mana-Na. Naripatettong matu paimeng hukkungngé ri pengadilangngé, sininna tau malempué nasokongngi matu. Niga méwaika lao ri tau madorakaé? Niga maccowérika méwai tau iya pogau'éngngi majaé? Ebara'na Puwangnge dé' natulukka, céddé'ka lélé ri linona tau maté. Wettukku mappikkiri makkedaé sempé'ka matu, pammasé-Mu, Puwang, mébbuka tettong masse. Rékko manennengngi atikku sibawa mausé, massaléwoko sibawa pasennangika. Dé' musiyempe sibawa haking-haking majaé, iya rancangngéngngi jaé situru hukkungngé. Sikongkolo'i mennang méwai tau malempué, sibawa hukkung matéi tau iya dé'é napasala. Iyakiya Puwangnge iyanaritu pangéwaingekku, Allataalaku mancaji pallinrukku. Nahukkungngi tau majaé situru jana, sibawa mammekkoi mennang nasaba dosana. Puwang Allataalata pammekkoi matu mennang. Laono mai tamakkélong untu' Puwangnge, gora-gora untu' pappassalama'ta! Laono mai tamangolo ri Aléna sibawa élong sukkuru, gora-gora untu' Aléna sibawa élong pappojiyang. Saba' Puwangnge iyanaritu Allataala iya marajaé. Arung poré iya cauéngngi sininna déwataé. Nakuwasaiwi bagiyab-bagiyang kaminang maliyung polé ri linoé, muwi coppo-coppo bulué appunnangennato. Nakuwasaiwi tasi'é, saba' Aléna mébbuéi, muwi pottanangngé ébbu liman-Nato. Laono mai tasuju' sompai Aléna, makkaluttu ri yolona Puwangnge, pappancajitta. Saba' Aléna Allataalata, idi umma iya Napiyaraé, pada-pada bimbala Naampié. Iyaé essoé éngkalingai saddan-Na: “Aja' tamatedde ati pada-pada toriyolomu ri Mériba, pada-pada wettunna mennang ri Masa, ri padang kessi'é. Kuwaniro mennang cobai-Ka, namuni purani naita pangkaukek-Ku. Patappulo taung ittana maja péneddik-Ku mitai mennang; adak-Ku: Tongeng, iyaro bangsaé dé' namatinulu! Dé' mennang najampangiwi parénta-parénta-Ku. Namattanro-Ka ri laleng cai-Ku, dé' mennang nauttama matu ri wanuwaéro untu' lolongeng appésaungeng silaong Iyya.” Puwélonno élong baru untu' Puwangnge! Akkélonno untu' Puwangnge, éh sininna linoé! Akkélonno untu' Puwangnge sibawa pojiwi Aléna; abbirittanni esso-esso karéba marennué makkedaé puraki napassalama. Curitai arajan-Na lao ri bangsa-bangsaé, sibawa sining pangkauken-Na iya poré lao ri rupa tauwé. Saba' battowai Puwangnge, sibawa ripoji senna, harusu'i riyétauri lebbi naiya seninna déwataé. Déwata-déwatana bangsa laingngé banna dato'-dato' barahala, iyakiya Puwangnge iyanaritu pancajiwi bitara malowangngé. Risalipuriwi ri arajan-Na sibawa alebbiren-Na, Bola-Na pennoi akuwasang sibawa agelloreng. Pojiwi Puwangnge, éh rupa tauwé, pojiwi arajan-Na sibawa awatangen-Na! Pojiwi asen-Na iya malebbié, sibawa tiwino akkarobangeng ri laleng Bola-Na. Sompai Puwangnge sibawa mappaké pakéyang assompang! Ténréno ri yolo-Na, éh sininna linoé! Abbirittangngi lao ri bangsa-bangsaé, “ Puwangnge ritu Arung! Masse'i linoé tenrigoyang; Naadélékiwi matu bangsa-bangsaé sibawa adélé.” Akkérennuno, éh langi sibawa linoé! Memmu'no éh tasi sibawa sininna lise'na! Ariyo-riyono, éh dato'-dato' sibawa sininna tanet-tanenna! Ajukajung ri ale'é gora-gorai matu. Saba' poléi Puwangnge mapparénta ri linoé, Naadélékiwi matu bangsa-bangsaé sibawa adélé nenniya malempu. Puwangnge iyanaritu Arung! Sitinajai marennu linoé, sibawa pulo-puloé mariyo-riyo. Riyattulilingiwi ellung sibawa pettang; adélékengngé sibawa hukkungngé iyanaritu tettongenna apparéntan-Na. Makkalolo apié ri yolo-Na, mangurengngi balié ri mattulilin-Na. Billa'na tajangiwi linoé, ténré linoé mitai. Maccolo sining bulué pada-pada lilingngé ri yolona Puwangnge, ri yolona Puwangnge, makuwasaéngngi sininna linoé. Nabbirittangngi langié adéléken-Na, sibawa sininna bangsaé mitai alebbiren-Na. Sininna tau iya sompaéngngi barahalaé ripakasirii matu, iya mabbangkakengngéngngi barab-barang dé'é nakkéguna; sinininna déwataé suju'i matu ri yolona Puwangnge. Masennangngi pabbanuwana Sion sibawa kota-kotana Yéhuda wettunna naéngkalinga apettunna Puwangnge. Saba' Iko, oh Puwang, panguwasana sininna linoé; maraja-Ko nacau sininna déwataé. Eh iko iya pojiyéngngi Puwangnge, céccéi jaé! Saba' Puwangnge linrungiwi atuwonna umma'-Na, Napaleppe'i mennang polé ri akuwasan-Na tau madorakaé. Momponi tajangngé untu' tau iya malempué atinna, sibawa ariyo-riyong untu' tau iya malempué. Akkérennuno, éh sining tau iya malempu atié nasaba aga iya puraé napogau' Puwangnge, sibawa sukkuru'no lao ri Allataala iya mapaccingngé. Mazmur. Elongengngi élong baru Puwangnge, nasaba sining pangkaukenna iya mappabengngaé! Nasibawang akuwasang sibawa awatangenna muto purani lolongeng apakalang. Puwangnge mabbirittangngi apakalan-Na; Napannessai adéléken-Na lao ri bangsa-bangsaé. Naéngngerangngi pammasé sibawa atinuluren-Na lao ri Israélié, umma'-Na. Sininna bangsaé ri sininna linoé purani naita apakalanna Allataala. Gora-gorano untu' Puwangnge, éh sininna linoé! Pojiwi Puwangnge sibawa élong nenniya gora-gora marennu. Puwélonno pappojiyang untu' Puwangnge, sibawa maggetti kacapi. Seppunni tarompé'é sibawa sangkakalaé, gora-gorano untu' Puwangnge, Arutta. Memmu'no éh tasi sibawa sininna lise'na linoé sibawa sininna iya monroiyéngngi. Leppessangngi sining saloé mappaleppa, sibawa sining bulu-bulué gora-gora ri yolona Puwangnge. Saba' poléi untu' madélékiwi linoé; Naadélékiwi matu bangsa-bangsaé sibawa adélé enrengngé tongeng. Puwangnge iyanaritu Arung; ténréi bangsa-bangsaé. Makkarungngi ri yasé'na kérub-é, taggottang linoé. Makuwasa senna'i Puwangnge ri Sion; marajai ri yasé'na sininna bangsaé. Leppessanni mennang pojiwi asen-Na iya malempué namalebbi. Mapaccingngi Aléna! Untu' alé-Mu akuwasangngé, Arung iya pojiyéngngi hukkungngé; purani Mupatettong atongengengngé; Mupajoppai hukkungngé sibawa adélékengngé ri Israél. Pakalebbii Puwang Allataalata, suju'no ri yolona kadéra arajan-Na, Mapaccingngi Aléna! Musa sibawa Harun muttama'ni imang-ngiman-Na, Samuél sala séddinna iya massempajangngé ri Aléna. Mangobbii mennang lao ri Puwangnge, sibawa mabbéréi pappébali. Polé ri alliri ellungngé mabbicarai lao ri mennang, mapatoi mennang lao ri sininna hukkun-Na sibawa parénta-Na. Oh Puwang Allataalata, Mubaliwi umma'-Mu; untu' mennang Iko Allataala iya pojiyéngngi maddampeng, namuni Muhukkungngi mennang nasaba asalanna. Pakalebbii Puwang Allataalata, sibawa sompai Aléna ri Bulu-buluna iya mapaccingngé, saba' mapaccingngi Puwang Allataalata. Mazmur untu' akkarobangeng sukkuru. Gora-gorano untu' Puwangnge, éh sininna linoé! Assompano lao ri Puwangnge sibawa marennu, poléno ri yolona sibawa élok-kélong marennu! Engngerangngi makkedaé Puwangnge ritu Allataala. Aléna pancajiki sibawa appunnangenna-Ki; idi umma'-Na, bangsa iya napiyaraé. Uttama'no lalo ri gerban-Na sibawa élong sukkuru, ri laleng seddé bola-Na sibawa pappoji-pojiyang. Sukkuru'no lao ri Aléna sibawa pojiwi Aléna! Saba' makessingngi Puwangnge; pammasé-Na untu' mannennungengngi, sibawa atinuluren-Na massossorengngi. Mazmurna Daud. Maéloka makkélong passalenna atinulurengngé sibawa adélékengngé, untu' alé-Mu, oh Puwang, élong pappojiyakku! Maéloka puriatiwi atuwo-tuwong iya dé'é cellana. Uppanna polé-Ko ri iyya? Maéloka tuwo mapaccing ri bolaku, dé' matu uleppessangngi jaé. Ucéccé pangkaukenna tau massakkaé, sibawa dé' umaélo makkéurusang sibawa mennang. Dé' umaélo kédo macéko-céko sibawa dé' umaccowé ri laleng jaé. Tau mappétenna'é sibawa mammekko-mekko upabbinasai matu. Tau matempoé sibawa matanré atié dé' matu uleppessangngi. Upoji tau iya matinulué lao ri Allataala; weddingngi mennang monro ri bolaku. Tau iya tuwoé temmakkécella wedding tumanika. Topabbengnguwangngé dé' nawedding monro ri bolaku; pabbelléngngé dé' matu natahang ri yoloku. Polé ri essoé lao ri essoé maéloka paccappui sining tau majaé ri wanuwaéwé. Sininna tau iya pogau'é ja upallennye'i matu ri Kotana Puwangnge. Sempajanna tau manrasa-rasaé iya engkaé ri laleng keadaang malemmaé maddarékéi lao ri Puwangnge. Oh Puwang, éngkalingai sempajakku, leppessanni pangobbiku lettu ri iko. Aja' tagiling polé ri iyya rékko ri laleng asussakka. Engkalingai rékko mangobbika, sibawa balika masitta. Teddengngi atuwokku pada-pada rumpué; mabbara buku-bukukku pada-pada apié. Malemmaka pada-pada wella rakkoé, sibawa ateddéngeng napessu manré. Maddarékéka sibawa macenno; watakkaléku oli mani nadoko buku. Pada-padaka manu'-manu' undangngé ri padang kessi'é, pada-pada kacoci'é ri bola taja masino-sinoé. Dé' naweddikka matinro, pada-pada manu'-manu' masino-sinoé ri pabbingeng bolaé. Puppu esso napakatunaka balié; napancaji tanroi asekku tau iya macaié lao ri iyya. Manréka awu pada-pada rotié, énungekku sicampuru'i uwai mata, saba' purani Muwakkaka sibawa maggenrungekka ri laleng cai-Mu iya malluwa'-luwa'é. Labe'i atuwokku pada-pada wajo-wajoé ri arawéngngé; makelle'ka pada-pada wellaé. Iyakiya Iko, oh Puwang, Arung untu' mannennungeng, tette'i riyéngngerang massossoreng. Tokkok-Ko matu sibawa mamaséiwi Sion, narapini wettunna untu' mamasé lao ri aléna. Saba' ata-atam-Mu napojiwi, namuni mancajini ruttungeng. Marasa kasiyangngi mennang lao ri aléna, namuni mancaji awuni. Naétauriwi matu bangsa-bangsaé akuwasanna Puwangnge; sibawa arajan-Na naétauri sininna arungngé, rékko napatettongngi Puwangnge Sion paimeng, sibawa malluru ri laleng arajan-Na. Naéngkalingai matu sempajanna umma'-Na iya kasiyasié, sibawa dé' nasampéyangngi paréllaunna mennang. Okii sininna pangkaukenna Puwangnge untu' abbatireng iya mangoloé, kuwammengngi bangsa iya dé'éppa narijajiyang naulléi pojiwi Aléna. Makkitai Puwangnge polé ri onron-Na iya matanré, polé ri surugaé makkitai lao ri linoé untu' méngkalingai addarékénna tau ritahangngé sibawa paleppe'i tau iya rihukkung maté. Nariyabbirittang asen-Na ri Sion, Naripoji-pojiwi matu ri Yérusalém, wettunna maddeppungeng bangsa-bangsaé sibawa sining akkarungengngé untu' massompa lao ri Puwangnge. Napoloi Puwangnge awatangekku ri wettu malolo-Ku mupa, sibawa naponcokiwi umuru'ku. Nainappa makkedaka, “Oh Allataala aja' talai nyawaku ri pattengngang atuwokku.” Puwang, tuwo-Ko mannennungeng, riyolo Mupancajiwi linoé; muwi langié winru limam-Muto. Iya manennaro lennye'i matu, iyakiya Iko tette'i engka; iya manennaro malaungngi matu pada-pada pakéyangngé. Muwabbéyangngi matu pada-pada waju cowaé, naancuru maneng matu. Iyakiya Iko tette'ko pada, dé' naccappa matu atuwom-Mu. Tuwoi matu ana' eppota sibawa tennang, sibawa tuli amang ri laleng allinrungem-Mu. Polé ri Daud. Pojiwi Puwangnge, éh nyawaku, sininna batékku, pojiwi asen-Na iya mapaccingngé. Pojiwi Puwangnge, éh nyawaku, aja' muwallupaiwi sininna akessingen-Na! Aléna iya maddampengengngéngngi sininna dosamu, iya pajjappaéngngi sininna lasamu. Aléna iya paleppe'éngngi nyawamu polé ri kuburu'é, iya bolloiyékko sibawa pammasé nenniya paressé babuwa. Aléna iya sennangiyéngngi atuwommu sibawa iya makessingngé, angkanna tette'ko malolo pada-pada kuwajangngé. Puwangnge pajoppai hukkungngé sibawa adélékengngé untu' sininna tau iya ritenre'é. Napannessai rancana-Na lao ri Musa sibawa sining pangkauken-Na lao ri bangsa Israélié. Saba' mamaséi Puwangnge sibawa makacuwai, malampé sabbara'i sibawa tabbolloi pammasé-Na. Dé' namatteru-teru maggera', sibawa dé' namacai untu' mannennungeng. Dé' nahukkukki situru dosata, iyaré'ga nawale'ki situru asalatta. Iyakiya sittanré langié polé ri linoé, silloppo iyaro pammasé-Na untu' tau mateppe'é. Sibbéla alau polé ri yajang, sibbéla iyaro Nabbéyangngi dosa-dosata. Pada-pada séddié ambo' mamaséiwi ana'-ana'na, makkuwaniro Puwangnge mamaséiwi tau iya mateppe'é. Saba' naisseng Puwangnge riyébbuki polé ri agaé, Naéngngerakki banna awumi. Atuwonna tolinoé maponco'mi pada wellaé; tabbakkai pada-pada bungaé ri dare'é; rékko nairii anging, lennye'ni, mala onronna dé'na nirissenna paimeng. Iyakiya Puwangnge tette'i namaséi tau mateppe'é, akessingen-Na matterui massossoreng lao ri tau iya makkatenningngé ri assijancin-Na, sibawa matinulué pogau'i parénta-Na. Mapparéntai Puwangnge ri surugaé, Aléna arung iya makuwasaé ri yasé'na sini-sininnaé. Pojiwi Puwangnge, éh sining malaéka'-Na iya poré, iya méngkalingaéngngi sibawa pogau'i parénta-Na. Pojiwi Puwangnge, éh sininna mahlu'é ri surugaé, sininna atan-Na iya pogau'éngngi élo-Na. Pojiwi Puwangnge, éh sininna ripancajiyé ri sininna daéra akuwasan-Na. Pojiwi Puwangnge, éh nyawaku! Pojiwi Puwangnge, éh nyawaku! Temmaka raja-Mu, oh Puwang Allataaku! Mappakéko agelloreng sibawa alebbireng, sibawa tassampo cahaya. Mupallebba'i langié pada-pada kémaé, sibawa patettongngi bolamu ri tompo'na uwai ri langié. Ellungngé Mupancaji karéta-Mu, Mutonangiwi pannina angingngé. Angingngé Mupancaji suro-Mu, sibawa billa'é pattumanim-Mu. Masse'i linoé mupasang ri pallanggana, angkanna dé' nakédo untu' mannennungeng. Musampoi sibawa dolangeng malowangngé, uwaina nalle'i coppo-coppo bulué. Wettunna Mugera', massolo'i iyaro uwai, massolo'i sibawa masolo' nasaba memmu'i saddam-Mu. Massolo'i naolai sining bulué lao ri laleng lompo'é, lao ri onrong iya Mupassadiyangengngéngngi. Mupattentungengngi sining pakkaséséng iya dé'é nawedding naola, kuwammengngi aja' nalisu malle'i linoé. Mupacumpai mata uwai risining lompo'é, massolo'i ana' saloé ri yelle'na sining bulu-bulué, untu' painungngi sininna olokolo'é ri dare'é, sibawa passauwi dekkana sining kaleddé ale'é. Ri seddéna mébbui sarang manu'-manu'é; moniwi mennang ri yelle'na daud-daungngé. Mupateppai bosié ri bulué polé ri langié, pennoi linoé sibawa wassélé ébbu-Mu. Mupatuwoi wellaé untu' olokolo'é, sibawa untu' tolinoé sakke rupa tanet-taneng. Naweddingngi mallaonruma, sibawa powassélé uwai anggoro iya pasennangiyé. Makkuwatoro minnya zaitun iya mébbuéngngi rupanna maccahaya, sibawa inanré iya mpéréngngéngngi awatangeng. Ajukajunna Puwangnge lolongengngi bosi maona aju camara Libanon iya Alénaé tanengngi. Kuwaro massaranni manu'-manu'é, massarangngi coko'é ri coppo'na. Sining bulu matanré mancajiwi onronna bémbé ale'é; palando'é massubbui ri batu karangngé. Muwébbui kétengngé mancaji pattanrang wettu, naisseng mata essoé wettu labuna. Rékko Mupateppai pettangngé, mancaji wennini essoé, namallamparenna sininna olokolo ale'é. Mangngaungngi singa-singa loloé sappa inanré, méllau inanré iya napassadiyaé Allataala. Rékko mompoi mata essoé, massalai mennang sibawa léwu ri onrong assubbuwanna. Nainappa massu tolinoé untu' jamai jamanna, sibawa matteru mappallaung narapi arawéng. Temmaka égana winru-Mu, Puwang, iya manenna Mupancajiwi sibawa mapanré; pennoi linoé sibawa iya Mupancajiyé. Itai tasi'é iya malowangngé mallebbang, silaong mahlu' baiccu battowaé tenribilang. Kuwaniro sompe sining kappala'é, sibawa Léwiatan, naga tasi Mupancajiyé, macculé-culé. Iya manenna mennang mamménasai-Ko, untu' lolongeng inanré ri wettunna. Mabbéré-Ko, na mennang paddeppungengngi, Mupassadiyai, na mennang manréi gangka cau. Rékko gilik-Ko, métaui mennang; rékko Muwalai nappase'na, cappuni mennang, sibawa lisu mancaji awu pada-pada pammulanna. Iyakiya rékko Muwéréngngi mennang nappase, ripancajiwi mennang; Muwéréngngi atuwong mabaru linoé. Tennapodo arajan-Na Puwangnge tette'i mannennungeng! Tennapodo marennui sibawa sininna Napancajiyé! Naitai linoé sibawa naébbui ténré, Nagéssai sining bulué Namassu rumpunna. Maéloka makkélong untu' Puwangnge gangka tuwoku, makkélong pappojiyang untu' Allataalaku ri wettu engkaku mupa. Tennapodo Natarimai élokku, saba' Aléna mébbui atikku marennu. Leppessanni lennye tau madosaé ri tompo'na linoé, leppessanni tau majaé cappu binasa. Pojiwi Puwangnge, éh nyawaku! Pojiwi Puwangnge! Sukkuru'no lao ri Puwangnge, abbirittangngi arajan-Na, curitai pangkauken-Na lao ri bangsa-bangsaé. Puwélonni pappojiyangngé untu' Puwangnge, abbirittanni sininna ébbuno iya mappabengngaé. Aléna Puwang Iya Pommakuwasaé; ariyo-riyono saba' appunnangennaki, sininna iya massompaé sitinajai marennu. Ellauno awatangeng polé ri Aléna, tuli sompai Aléna. Puwangnge iyanaritu Allataalata, apettun-Na takkennai ri sininna linoé. Tuli naéngngerangngi matu assijancin-Na, mannennungeng jancin-Na. Iyaro assijancingngé Naébbui sibawa Abraham, nainappa sibawa Ishak; nainappa napakkasse sibawa Yakub, mancaji assijancing iya mannennungengngé untu' umma Israélié. Adanna, “Uwabbéréyangngi matu tana Kanaan lao ri iko, mancaji appunnangeng manamu.” Riyolo tuwoi umma'na Allataala selaku tau laing kuwaro jumellana mennang céddé bawang. Solléi mennang polé ri bangsaé lao ri bangsaé, létté polé ri wanuwaé lao ri wanuwa laingngé. Iyakiya dé' naleppessangngi Puwangnge muwi niga tenre'i mennang; nasaba mennang, Naparéngngerangiwi arung-ngarungngé, “Aja' muganggui sining tau Upilé, aja' mupogau'i majaé lao ri nabi-nabik-Ku!” Napapoléi Puwangnge akkadérengngé ri wanuwaéro, sibawa malai sininna pappassadiyaang inanréna. Iyakiya Nasuroi séddié tau poddiyoloi mennang, Yusuf, iya puraé ribalu selaku ata. Risiyoi ajéna sibawa pabbalenggu, ripaggénoiwi ellonna ranté bessi. Angkanna kajajiyanni iya nabotoé, ripattongengngi ri ada-adanna Puwangnge. Nainappa arung Maséré, panguwasana bangsa-bangsaé, paleppe'i polé ri tarungkué. Riwéréngngi jamang murusu'i saorajaé, sibawa riwéréng akuwasang ri yasé'na sininna waramparanna; makkuwatoro akuwasang untu' matoro'i sining pegawénna arungngé, sibawa pimpingngi sining tomacowa-cowaé. Nainappa lao Yakub ri Maséré sibawa mattette kuwaro selaku tau laing. Puwangnge mébbui umma'-Na tattamba maéga, angkanna lebbi mawatang mennang naiya balinna. Napinrai atinna tau Maséré'é angkanna nacéccé umma'-Na sibawa gaukengngi ata-atan-Na sibawa macéko-céko. Nainappa nasuro Musa atan-Na sibawa Harun tau Napiléna. Ri Maséré napogau'i anu makalallaingngé, pangkaukeng-pangkaukeng battowa polé ri Puwangnge, namapato mennang lao ri parénta-Na. Nainappa napancaji Puwangnge iyaro wanuwaé mapettang kape. Napinrai salona mennang mancaji dara, angkanna cappu sininna baléna. Makkaluppe-lupperengngi cuppangngé ri wanuwanna mennang, mala muttama ri laleng saorajana arungngé. Nasaba paréntana Allataala poléni sining lale'é, sibawa sining namo'é makkatulung ri sininna wanuwaé. Natiri'i ése'é passulléna bosié, sibawa papolé billa siyanré-anré, Naléttungngi pong anggoro'é sibawa pong araé, sibawa natubbang manengngi sininna ajukajunna mennang. Nasaba parénta-Na napoléna incalé, maéga senna jumellana, tenribilang. Naanré manengngi sininna tanet-tanengngé ri dare'é, sibawa manréi gangka cappu sininna wassélé tanaé. Nainappa Nauno ana' worowané macowaé ri laleng tungke kaluwarga tau Maséré'é. Nainappa Naantara bangsa Israélié massu, tiwii mennang ulaweng sibawa péra'; iya manenna madisingngi sibawa mawatang. Nakennani tau Maséré'é pappénedding métau sibawa mappakatau-tau, jaji masennanni mennang wettunna lao tau Israélié. Ripallebbakengngi ellung ri Allataala untu' cinaungiwi umma'-Na, sibawa api untu' tajangiwi ri wennié. Méllauwi mennang, naripapoléngen-Na uro, Nariwérénni mennang roti polé ri surugaé gangka messo. Napuwé'i bulu batué, nacumpana uwai iya massolo'é pada-pada saloé ri padang kessi'é. Saba' naéngngerangngi Puwangnge jancin-Na lao ri Abraham, atan-Na. Nanaantara'ni atan-Na sibawa marennu, sining tau napilé-Na sibawa gora-gora. Nabbéréyangngi lao ri mennang tanana bangsa-bangsaé, sining dare'na mennang napancajiwi appunnangenna umma'-Na, kuwammengngi namapato umma'-Na lao ri hukkung-hukkun-Na sibawa turusiwi parénta-parénta-Na. Pojiwi Puwangnge! Pojiwi Puwangnge! Sukkuru'no lao ri Puwangnge, nasaba makessingngi; mannennungengngi pammasé-Na. Niga mulléi mabbirittangngi aporénna Puwangnge, sibawa mabbéré pappojiyang iya sitinajaé untu' Aléna? Masennangngi tau iya turusiyéngngi sining parénta-Na, sibawa tuli tongeng ri laleng tindakanna. Engngerakka, oh Puwang, untu' akessingem-Mu lao ri umma'-Mu, tulung tokka rékko Mupassalama'i mennang. Tennapodo uwitai adécéngenna sining tau Mupilé sibawa mariyo-riyo silaong umma'-Mu. Tennapodo mabangka'ka sibawa marennu silaong sining tau iya mancajiyé appunnangem-Mu. Purani madosa pada-pada toriyolota; purani pogau'i majaé sibawa madoraka. Wettunna ri Maséré dé' napahangngi néné-nénéta; winru-Mu iya mappabengngaé dé' mennang napahangngi. Nallupaiwi matu mennang pammasé-Mu iya maonaé, sibawa ri seddéna Tasi Gelagah maronta'i mennang lao ri Iya Pommatanré. Iyakiya Puwangnge passalama'i mennang nasaba Aléna muto, kuwammengngi namanessa aporén-Na. Nasaba parénta-Na namancaji marakko Tasi Gelagah, Natiwii umma'-Na mallaleng molai tasi'é, pada-pada molai padang kessi'é. Nanallalengiwi Naripassalama'i mennang polé ri limanna balié, Naripaleppe'i mennang polé ri akuwasanna balié. Iyakiya balinna mennang ripatallemme'i ri uwai; dé' muwi séddi tau nasésé. Nainappa umma'-Na mateppe lao ri jancin-Na sibawa makkélong pappojiyang untu' Aléna. Iyakiya masitta'i mallupaiwi pangkaukenna Puwangnge sibawa tinda temméllauwi pangaja-Na. Ri padang kessi'é ménré'i napessunna mennang, nanacobai Allataala. Riwéréngngi aga naéllau mennang, iyakiya lasa saito iya kennaéngngi mennang. Ri padang kessi'éro mangémpurui mennang lao ri Musa sibawa lao ri Harun atan-Na iya mapaccingngé. Namapuwé tanaé memme'i Datan, tongkoi Abiram sibawa kaluwargana. Nonnoi apié manréi kalompo'na mennang, mangureng manengngi iya puraé madoraka. Ri Bulu Sinai mébbui mennang ana' saping ulaweng, sibawa sompai dato'-dato' ricuwangngéro. Naséléi mennang Allataala iya marajaé sibawa dato'-dato' saping pakkanré wella. Nallupaiwi mennang Allataala pappassalama'na iya puraé pogau' gau'-gau' iya battowaé ri Maséré. Masero tongeng sining pangkauken-Na ri wanuwaéro, mappabengnga tindakan-Na ri Tasi Gelagah. Namanniya'na Allataala paccappui mennang, iyakiya ripésangkaiwi ri Musa, tau napilé-Na. Mancajini Musa pappallalanna mennang, angkanna soro cai-Na Allataala. Nainappa mennang nasampéyang wanuwa iya magelloéro nasaba dé' namateppe lao ri jancinna Allataala. Mannoko'-noko'ni mennang ri laleng kémana sibawa dé' namaélo méngkalingai saddanna Puwangnge. Namajjanci-Na sibawa mattanro maélo mpunoi mennang ri padang kessi'é. Nabbéyangngi matu wija-wijanna mennang ri yelle'na bangsa-bangsaé sibawa passara-sarangngi ri wanuwa-wanuwa laingngé. Nainappa ri Péor nasompai mennang Baal, sibawa nanréi pakkasuwiyang untu' déwata-déwataé. Iyaro pangkaukengngé napaompoi caina Puwangnge, angkanna rigasa mennang ri sai iya mappakatau-taué. Iyakiya tokkongngi Pinéhas hukkungngi iya pasalaé, namappésauna iyaro saié. Iyaro pangkaukengngé naangga'i selaku jasana, sibawa risénge untu' mannennungeng. Ri sining bujungngé ri Mériba naébbui mennang macai Puwangnge, sibawa sussaiwi Musa sibawa pangkaukenna mennang. Naébbui mennang massesse ati, angkanna mabbicara tennapikkiri. Bangsa-bangsa laingngé dé' mennang napaccappui, pada-pada iya napparéntangngé Puwangnge. Mala mennang sikoréi sibawa bangsa-bangsaéro, sibawa turui cara-carana tau iya dé'é naissenggni Allataala. Nainappa mennang massompa barahala-barahala, na iyanaro mancaji saba' aruttungenna mennang. Nakkarobangengngi mennang ana'-ana'na lao ri barahala-barahala Kanaan. Napassui mennang darana tau dé'é napasala, darana ana'-ana'na muto mennang, untu' nakkarobangeng lao ri barahala-barahalaé; angkanna iyaro wanuwaé nacarépai mennang. Nasaba sining pangkaukengngéro namancaji najisi'na mennang, sibawa dé' namatinulu lao ri Allataala. Namalluwa'na caina Puwangnge lao ri mennang, maciddi'ni sibawa appunnangeng riyaléna. Nanabbéréyanni mennang lao ri bangsa-bangsaé, Naleppessangngi mennang rikuwasai ri balié. Naritenre'na mennang risining balinna, sibawa ripatunru ri yawa akuwasanna mennang. Makkolik-koling Puwangnge paleppe'i mennang, iyakiya lebbi napojiwi mennang maronta, angkanna mennang binasa ri laleng dosa-dosana. Iyakiya naéngkalingai Puwangnge gorana mennang, Najampangiwi asussanna mennang. Nasaba mennang Naéngngerangngi matu assijancin-Na sibawa napojiwi mennang nasaba pammasé-Na iya battowaé. Naébbui mennang riyamaséi ri sininna tau iya tawangngéngngi mennang. Passalama'ki, oh Puwang Allataalata, paddeppungekki polé ri yelle'na bangsa-bangsaé, kuwammengngi weddikki sukkuru sibawa pojiwi asem-Mu iya mapaccingngé. Pojiwi Puwangnge, Allataalana Israélié, makkekkuwangngé sibawa mannennungeng. Leppessanni sininna tauwé makkeda, “Aming!” Pojiwi Puwangnge! “Sukkuru'no lao ri Puwangnge saba' makessingngi, pammasé-Na mannennungengngi.” Powadani iyaro makkolik-koling, éh iko iya puraé ripassalama polé ri asussangngé. Purano ripaddeppungeng polé ri wanuwa-wanuwa laingngé, polé ri alau sibawa yajang, manorang sibawa yattang. Engka sollé ri padang makkale-ale'é, sibawa dé' naissengngi laleng laowé ri onrong riyonroiyé ri kotaé. Alupurengngi mennang sibawa adekkang sibawa ateddéngeng sininna amménasanna. Ri laleng asussang mangobbii mennang lao ri Puwangnge, sibawa paleppe'i mennang polé ri aperisengngé. Napimpingngi mennang molai laleng malempué lao ri onrong riyonroiyé ri kotaé. Sitinajai mennang sukkuru lao ri Puwangnge nasaba pammasé-Na, nasaba sining ébbu-Na iya mappabengngaé untu' tolinoé. Saba' Napassauwi tau iya madekkaé, sibawa bolloiwi tau malupué sibawa sininna iya makessingngé. Engka tappangkung ri laleng pettangngé, tau ritahang iya manrasa-rasaé ri laleng balenggu bessié, saba' purai mennang maronta lao ri Allataala sibawa dé' najampangiwi paréntana Iya Pommatanré. Nareppo'i atinna mennang sibawa jamang marejjing; sempé'i mennang na dé'gaga mattulung. Ri laleng asussang mangobbii mennang lao ri Puwangnge, sibawa paleppe'i mennang polé ri aperisengngé. Natiwii mennang massu polé ri pettangngé, sibawa poloi balenggunna mennang. Sitinajai mennang sukkuru lao ri Puwangnge nasaba pammasé-Na, nasaba sining ébbu-Na iya mappabengngaé untu' tolinoé. Saba' Naruttungngi sining tange tembagaé, sibawa reppo'i sining paccala bessié. Engka madongo sibawa manrasa-rasa nasaba dosa-dosana mennang, enrengngé risissa nasaba asalanna mennang. Maciddi'i mennang lao ri sininna inanré, macawé'ni ajjalenna mennang. Ri laleng asussang mangobbii mennang lao ri Puwangnge, nanapaleppe'i mennang polé ri aperisengngé. Napajjappai mennang sibawa parénta-Na, sibawa paleppe'i mennang polé ri kalebbonna kuburu'é. Sitinajai mennang sukkuru lao ri Puwangnge nasaba pammasé-Na, nasaba sining ébbu-Na iya mappabengngaé untu' tolinoé. Leppessanni mennang sukkuru sibawa tiwi pakkasuwiyang, sibawa mabbirittangngi pangkauken-Na sibawa élok-kélong marennu. Engkato sompekiwi tasi'é sibawa kappala, untu' sappa dallé ri tasi malowangngé. Naitai mennang sining pangkaukenna Puwangnge, winru-Na iya makalallaingngé ri tasi'é. Nasaba parénta-Na mangirii anginrajaé sibawa pasiyappo'-appo'éngngi bombangngé. Tarakka matanré sining kappala'é ri yelle'é, nainappa naggeppuwang ri borina dolangengngé. Teddéng abaraningenna sining tauwé moloiwi abala maloppo makkuwaéro. Malingngi mennang sibawa tassulus-sulung pada-pada tau mabo'é sibawa ateddéngeng akkaleng. Ri laleng asussang mangobbii mennang lao ri Puwangnge, sibawa paleppe'i mennang polé ri aperisengngé. Anginraja iya majjallo'é Nasuroi mammekko, mancaji tennang toni sining bombangngé. Masennanni mennang saba' labe'ni anginrajaé; Natiwini mennang ri pelabuhang iya nattujuiyé. Sitinajai mennang sukkuru lao ri Puwangnge nasaba pammasé-Na, nasaba sining ébbu-Na iya mappabengngaé untu' tolinoé. Napakalabbai mennang arajanna Puwangnge ri tengngana umma'-Na, sibawa pojiwi Aléna ri laleng addeppu-deppungenna tomacowa-cowaé. Napinrai sining saloé mancaji padang kessi mancajiwi mata uwai tana iya makarossaé. Tana commo'é Napancajiwi padang pejjé, nasaba jana sining tau iya monroiyéngngi. Padang kessi'é Napinrai mancaji kullang uwai, tana rakkoé mancaji mata uwai. Nataroi sining tau malupué kuwaro; patettongngi mennang kota untu' naonroi mennang. Naamporiwi mennang sining dare'na sibawa mattaneng anggoro, nainappa paddeppungeng wassélé iya maonaé. Puwangnge mpéréngngi mennang maéga ana', sibawa matterui mabbija-bija olokolo'na. Iyakiya ricaui mennang nacéddé mani monro nasaba anrasa-rasang sibawa attenrekeng iya mabecco'é. Puwangnge pakariyawai sining panguwasana, sibawa suroi mennang sollé ri padang makkale-ale iya dé'é gaga lalenna. Iyakiya tau kasiyasié Napaleppe'i polé ri asussanna mennang, tattambai kaluwargana pada-pada bimbala makkonrongngé. Riitai ri tau malempué sibawa marennu, iyakiya tau majaé ri pammekkoi. Tennapodo tau mapanré pikkiri'i sininna gau'éro sibawa mangakuiwi makkedaé tette'i Puwangnge mamaséiwi. Elong. Mazmurna Daud. Masse'ka mateppe, oh Allataala, maéloka makkélong sibawa pojiko. Eh tokkonno, nyawaku! Eh tokkonno, gambusu sibawa kacapi! Maéloka teddui éléé. Puwang, maéloka sukkuru lao ri Iko ri yelle'na bangsa-bangsaé. Macinnaka makkélong pappojiyang untu' alé-Mu ri yelle'na rupa tauwé. Saba' maloppoi pammasé-Mu lettu ri langié sibawa atinulurem-Mu lettu'i ri ellungngé. Oh Allataala, ajjellokengngi arajam-Mu ri langié, sibawa alebbirem-Mu ri sininna linoé. Passalama'ki sibawa akuwasam-Mu, baliwi sempajatta, kuwammengngi naripassalama sining tau iya Muwamaséiyé. Polé ri onron-Na iya mapaccingngé makkedai Allataala, “Maéloka gora-gora sibawa tawa-tawai tana Sikhem, Lompo Sukot Uloteréiwi matu. Giléad sibawa Manasyé iyanaritu appunnangek-Ku, Efraim palo-palo baja'-Ku, sibawa Yéhuda tekkeng akkarungek-Ku. Iyakiya Moab iyanaritu onrong abbissang ajé-Ku; gora-gora pacau-Ka lao ri Filistéa. Lao ri Edom Uwaggenrungengngi lapikajé-Ku, selaku tanrang makkedaé appunnangek-Kui.” Niga tiwika matu ri Edom? Niga dulukka lao ri kota mabbénténgngéro? Oh Allataala, dé'ga Muwaccowé silaongekki? Dé'ga Mumaju silaong tentarata? Tulukki polé ri balié, saba' bantuwanna tolinoé dé' nakkéguna. Silaong Allataala, baraniki taporé matu; Aléna ritu caui balitta. Untu' pamimping kor. Mazmurna Daud. Oh Allataala iya tuli upojiyé, aja' tamammekko. Saba' nagasaka tomajaé sibawa topabengnguwangngé iya massiyamporengngé curita-curita bellé passalekku. Nagasaka mennang sibawa ada-ada penno paccéccé, sibawa musuka temmakkéalasang. Nateppuka mennang, namuni uwamaséiwi mennang, sibawa pura massempajangengngi mennang. Nawale'i mennang akessingekku sibawa ja, nenniya pammaséku sibawa paccéccé. Akkano séddi tau maja untu' madélékiwi, leppessanni ritenre ri balinna. Leppessanni riadéléki sibawa ripannessa sala, sibawa leppessanni sempajanna riangga dosa. Leppessangngi atuwonna masitta maccappa, sibawa jabatanna nalai tau laingngé. Leppessanni ana'-ana'na mancaji béu, sibawa bainéna mancaji janda. Leppessanni ana'-ana'na mancaji paréllau-éllau iya solléé, sibawa rirukka polé ri ruttungeng bolana. Leppessanni sininna appunnangenna ribésella ri passinge inrengngé, sibawa wassélé turuppuse'na narampasa tauwé. Aja' naengka makessing ati lao ri aléna, iyaré'ga carinnaiwi ana'-ana' iya nasalaiyé. Leppessangngi sininna wija-wijanna ripaccappu, sibawa asenna riyallupai ri abbatireng ri munrié. Leppessangngi jana toriyolona tette naéngngerang Puwangnge, sibawa dosana indo'na dé' nariledda. Leppessanni dosana mennang tuli naéngngerang Puwangnge, sibawa dé'gaga méngngerangngi mennang ri linoé. Saba' iyaro tauwé dé' naengka naéngngerangngi untu' mappaitang paressé babuwa. Nacallai tau kasiyasié sibawa manrasa-rasaé, sibawa naunoi tau iya malemmaé. Napojiwi patanroi; leppessanni aléna nakenna tanro! Dé' napojiwi mabbéré barakka, leppessanni dé'gaga barakka untu' aléna! Untu' aléna iyaro patanroié pangkaukeng biyasa, pada-pada muwa pasangngi pakéyanna. Leppessanni iyaro tanroé mabbarébé pada-pada uwai ri watakkaléna, sibawa pada-pada minnya'é ri laleng buku-bukunna. Leppessangngi iyaro tanroé tongkoi pada-pada pakéyangngé, sibawa tuli malilii pada-pada babbangngé. Puwang, pateppai pahukkungengngéro ri yasé'na teppuékka, ri yasé'na tau iya mabbicara majaé passalekku. Iyakiya tulukka situru sibawa jancim-Mu, oh Puwang Allataalaku, passalama'ka nasaba akessingemmu sibawa pammasé-Mu. Saba' kasiyasika sibawa manrasa-rasa, sibawa maloi atikku lettu marilaleng. Céddé'ka teddéng pada-pada wajo-wajoé ri arawéngngé, riyaggeppuwakka pada-pada incalé. Ténré uttuku nasaba mappuwasa, watakkaléku mancaji marakkoi namakojo. Sining tau iya mitaékka napakatunaka nanapaccilic-ciling towi ulunna. Tulukka, oh Puwang Allataalaku, passalama'ka situru sibawa pammasé-Mu. Nanaissengngi matu balikku makkedaé iyaro pangkaukem-Mu, makkedaé Iko Puwang, iya pogau'éngngi. Namuni mennang natanroika, tennapodo Iko barakkakika. Muwi tokkongngi mennang, ripakasirii matu mennang; iyakiya tennapodo iyya, atam-Mu, ripakarennui. Leppessangngi sining tau iya tenre'ékka ripennoi atunang, sibawa pappénedding masiri tongkoi mennang pada-pada jumbaé. Maéloka pojiwi Puwangnge sibawa sadda macenno, pakalabbai Aléna ri tengngana addeppungenna umma'é. Saba' Aléna méwaiwi sibawa passalama'i tau kasiyasié polé ri mennang iya pateppaéngngi pahukkung maté ri yasé'na. Mazmurna Daud. Makkedai Puwangnge lao ri puwakku, “Tudanno ri seddé atauk-Ku, narapi sining balimmu Upatunrukekko.” Polé ri Sion nalowangiwi matu Puwangnge akkarungemmu; akuwasaini sining balimmu! Ri esso apolémmu sibawa akuwasang, ri bulu-bulu iya mapaccingngé, mallurui ra'ya'mu sibawa cenning ati. Pada-pada cinoddoé ri éléé, sining kalloloé poléi ri iko. Purai majjanci Puwangnge sibawa tanro, dé' nagettengngi matu paimeng, “Iko ritu imang untu' mannennungeng, pada-pada Malkisédék.” Engkai Puwangnge ri seddé ataummu, rékko macayii, Nacaui sining arungngé. Nahukkungngi matu bangsa-bangsaé, angkanna tassiya-siya sining ujué. Napaccappui matu sining panguwasaé ri sininna linoé. Ménungngi matu arungngé polé ri saloé ri wiring lalengngé, puranana ricau, pacaui matu. Pojiwi Puwangnge! Sukkuru'ka lao ri Puwangnge sibawa sukku atikku ri tengngana addeppungenna umma'-Na. Makalallaing tongeng sining pangkaukenna Puwangnge, sitinajai risalidiki risining tau iya pojiyéngngi. Jama-jamanna Puwangnge marajai sibawa ripojiwi, adéléken-Na mannennungengngi. Iyaro Puwangnge mamaséi sibawa pacarinnai, Napogau'i sining pangkaukeng iya mappabengngaé, kuwammengngi natette'ki méngngerangngi. Nawéréngngi dallé tau iya mateppe'é, sibawa tuli naéngngerangngi matu assijancin-Na. Purani nappaitang akuwasan-Na lao ri umma'-Na, ri laleng nawérén-Na mennang tana manana bangsa-bangsaé. Adélé'i Puwangnge sibawa matinului ri laleng sininna tindakan-Na, sininna parénta-Na weddingngi riyattuwang. Mattahangngi hukkun-Na sillampé wettué, nabbéréyangngi ri laleng atongengeng sibawa adélékeng. Napaleppe'i umma'-Na, sibawa pakangka assijancing mannennungengngé sibawa mennang. Aléna ritu Puwang iya mapaccingngé sibawa poré! Nigi-nigi macinna mancaji mapanré harusu'i pakalebbii Puwangnge, mabbéréi pappahang lao ri sininna tau iya mapatoé. Ripojiwi Puwangnge sillampé wettué! Pojiwi Puwangnge! Masennangngi tau mateppe'é, iya pojiyéngngi sining paréntana Puwangnge. Makuwasai matu ana'-ana'na ri wanuwaéwé, ribarakkakiwi matu wijanna tau makessingngé. Sugii matu kaluwargana sibawa madécéng, sibawa saléwangengngi matu mannennungeng. Mattappai matu tajangngé ri laleng pettangngé untu' tau malempué, untu' tau adélé'é, mamaséi sibawa pacarinnai. Masennangngi tau iya makacuwaé sibawa napoji mappainreng enrengngé malempu risininna urusangngé. Dé' namakkullé natemmallolongeng tau makessingngé; riyéngngerangngi matu mannennungeng. Dé' namétau tarima karéba maja, masse'i atinna nasaba mateppe'i lao ri Puwangnge. Dé' namanenneng iyaré'ga métau, nasaba mateppe'i ricaui matu balinna. Natawa-tawai waramparanna, sibawa mabbéréi sidekka lao ri tau kasiyasié; tuli napogau'i iya makessingngé, rimakkuwannanaro makuwasai sibawa ripakalebbi. Riitai ri tau majaé namancaji macaina; naggarettakengngi mennang isinna nasaba nacéccéi. Nainappa binasa mennang; teddénni amménasanna mennang untu' mannennungeng. Pojiwi Puwangnge! Eh ata-atanna Puwangnge, pojiwi asenna Puwangnge! Ripakalabbai matu asen-Na, makkekkuwangngé sibawa sillampé wettué. Polé ri alau lettu ri yajang harusu'i ripoji asenna Puwangnge. Makuwasai Puwangnge ri sininna bangsaé, arajan-Na naliwengngi langié. Nigana pada Puwang Allataalata? makkarungngi Aléna ri onrong iya matanré. Iyakiya napabbukku'i Aléna untu' mitai langié sibawa linoé. Naakkai tau kasiyasié polé ri awué, sibawa tau maperi senna'é polé ri awué. Napatudangngi mennang silaong sining panguwasaé, silaong sining arung polé ri umma'-Na. Mabbéréi ana'-ana' lao ri bainé iya manangngé, pancajiwi indo' iya masennangngé sibawa malebbi ri bolana. Pojiwi Puwangnge! Wettunna bangsa Israélié massu polé ri Maséré, wettunna wija-wijanna Yakub salaiwi wanuwa laingngé, napancajiwi Puwangnge Yéhuda onrong mapaccin-Na, Israél napancaji daéra akuwasan-Na. Naitani Tasi Gelagah nainappa lari, Salo Yordan mappésau massolo. Luppe-luppe sining bulué pada-pada bémbé'é, kanja-kanja sining bulu-bulué pada-pada ana' bimbala'é. Engka aga, éh tasi, angkammu lari, sibawa Salo Yordan mappésau massolo? Aga saba'na muluppe-luppe éh sining bulu, sibawa kanja-kanjako éh sining bulu-bulu? Eh linoé, ténréno ri yolona Puwangnge, ri yolona Allataalana Yakub, iya pinraéngngi batu karangngé mancaji kolang uwai, sibawa bulu batué mancaji mata uwai. Tenniya idi, oh Puwang, tenniya idi, iyakiya Iko bawang harusu ripoji, saba' matinulu-Ko sibawa tette mamasé. Magi bangsa-bangsaé naharusu makkeda, “Kégani Allataalana mennang?” Allataalata engkai ri surugaé, napogau'i aga iya Naéloriyé. Barahalana mennang poléi ri ulawengngé sibawa péra'é, ébbu lima tolino. Mappunnaiwi mennang tému, iyakiya dé' naulléi mabbicara, mappunnaiwi mata, iyakiya dé' naulléi makkita. Mappunnaiwi mennang daucculing, iyakiya dé' naulléi mennang maréngkalinga, mappunnaiwi inge, iyakiya dé' naulléi marémmau. Mappunnaiwi mennang lima, iyakiya dé' naulléi makkarawa, mappunnaiwi ajé, iyakiya dé' naulléi joppa, sibawa dé'gaga sadda massu polé ri tigero'na. Tennapodo makkuwairo totona sining tau iya mébbuéngngi, sibawa sininna tau iya mateppe'é lao ri aléna. Eh Israélié, amménasano lao ri Puwangnge, Aléna ritu mattulung sibawa linrungiko. Eh sining imangngé, amménasano lao ri Puwangnge, Aléna ritu mattulung sibawa linrungiko. Eh sininna tau mateppe'é, amménasano lao ri Puwangnge, Aléna ritu mattulung sibawa linrungiko. Naéngngerakki Puwangnge sibawa nabarakkakiki matu, Nabarakkakiwi matu umma Israélié sibawa sininna imang wija-wijanna Harun. Nabarakkakiwi matu sining tau mateppe'é, muwi baiccu'é iyaré'ga battowaé. Tennapodo nawérékko Puwangnge maéga ana', lao ri iko sibawa wija-wijammu. Tennapodo nabarakkakiko Puwangnge, pancajiyéngngi langié sibawa linoé! Langié iyanaritu appunnangenna Puwangnge bawang, iyakiya linoé Nawéréngngi tolinoé. Dé' naripoji Puwangnge ri tau maté, tau iya nonnoénna ri onrong iya masino-sinoé. Iyakiya idi iya tuwoé sukkuru'ki lao ri Aléna, makkekkuwangngé sibawa lettu mannennungeng. Pojiwi Puwangnge! Uwéloriwi Puwangnge, saba' Naéngkalingaka sibawa jampangiwi paréllaukku. Naéngkalingaka, sises-siseng mangobbika lao ri Aléna. Naancakka bahaya amaténg; appakatau-taurenna amaténgngé luruika, naébbuka mausé sibawa métau. Naumangobbi lao ri Puwangnge, “Oh Puwang, uwéllauwi, passalama'ka!” Iyaro Puwangnge mamaséi sibawa adélé'i; Allataalata pennoi paressé babuwa. Napiyarai Puwangnge sining tau biyasaé; wettukku teppaullé napassalama'ka. Upattennangngi atikku, saba' makessingngi Puwangnge lao ri iyya. Puraka napaleppe Puwangnge polé ri amaténgngé; Nasaléworika sibawa dé' Naleppessakka sempé. Naweddikka péneddingiwi atuwongngé ri linoéwé, ri laleng allinrungenna Puwangnge. Tette'ka mateppe, namuni makkedaka, “Ritenre senna'ka.” Ri laleng amalingekku makkedaka, “Dé' muwi séddi tau wedding riyatepperi.” Aga uwabbéréyang matu lao ri Puwangnge untu' mpale'i akessingen-Na lao ri aléku? Tiwika matu pakkasuwiyang anggoro untu' Puwangnge untu' sukkurukiwi pattulun-Na. Upennoiwi matu jancikku lao ri Aléna ri yolona sininna umma'-Na. Naénnajai senna'i Puwangnge amaténna séddié tau iya Namaséiyé. Iyya'é atam-Mu, oh Puwang, pada-pada indo'ku, massompa tokka lao ri Iko puraka Mupaleppe polé ri tahanangngé. Tiwika matu akkarobangeng sukkuru lao ri Iko, naupaénré towi sempajakku lao ri Iko. Upennoiwi matu jancikku lao ri Puwangnge, ri yolona sininna umma'-Na iya maddeppungengngé ri seddé Bolana Puwangnge, ri tengngana kota Yérusalém! Pojiwi Puwangnge! Pojiwi Puwangnge, éh sininna bangsaé, pakarajai Aléna, éh sininna suku bangsaé! Saba' battowai pammaséna Puwangnge lao ri idi atinuluren-Na tette'i mannennungeng. Pojiwi Puwangnge! Sukkuru'no lao ri Puwangnge saba' makessingngi, mannennungengngi pammasé-Na. Sitinajai makkeda tau Israélié, “Mannennungengngi pammasé-Na.” Sitinajai makkeda sining imangngé, “Mannennungengngi pammasé-Na.” Sitinajai makkeda sining tau mateppe'é, “Mannennungengngi pammasé-Na.” Ri laleng aperisekku mangobbika lao ri Puwangnge; namappébali sibawa paleppe'ka. Dé' umétau saba' nasibawakka Puwangnge, dé' pakkullénna tolinoé lao ri iyya. Nasibawakka Puwangnge untu' tulukka, uwitai matu balikku ricau. Lebbi kessing muwi mallinrung ri Puwangnge, naiya mattuwangngi tolinoé. Lebbi kessing muwi mallinrung ri Puwangnge, naiya maddennuwangiyéngngi bangsa-bangsaé. Maéga bali mattulilingika; nasibawang akuwasanna Puwangnge, ucaui mennang. Nakeppukka polé ri sininna sulapa'é; nasibawang akuwasanna Puwangnge, ucaui mennang. Nakatulukka mennang pada-pada wanié; nasibawang akuwasanna Puwangnge, ucaui mennang. Ri laleng sikédé ripeddéiwi mennang pada-pada api iya tunuéngngi ale-kale maddorié. Rigasaka sibawa masero nacéddé'ka sempé, iyakiya Puwangnge tulukka. Puwangnge iyanaritu awatangekku sibawa usompaé, puraka napassalama. Engkalingai gora-gora apakalangngé ri akkéma-kémanna umma'-Na, “Napogau'i Puwangnge pangkaukeng poré! Akuwasanna Puwangnge mpérékki apakalang! Napogau'i Puwangnge pangkaukeng poré.” Dé' umaté matu, iyakiya tette tuwo untu' mabbirittangngi ébbuna Puwangnge. Puraka nasissa Puwangnge sibawa maladde, iyakiya dé' nabbéréyakka lao ri amaténgngé. Timpakekka pintu gerbang Bolana Puwangnge, kuwammengngi umuttama sibawa sukkuru lao ri Aléna. Iyanaé pintu gerbang Puwangnge, banna tau malempué wedding molai. Upoji-Ko, saba' Mutarimai sempajakku; puraka Muwéréng apakalang. Batu iya nabuwangngé panré bolaé, mancajini batu passunna. Iyanaro pangkaukenna Puwangnge, napabengnga tongekki. Iyanaé esso iya napattentué Puwangnge; laono mai taramé-raméiwi sibawa marennu. Méllauki, Puwang, passalama'ki, oh Puwang, wérékki apakalang! Ribarakkakiwi iya polé ri laleng asenna Puwangnge. Ribarakkakiko polé ri Bolana Puwangnge. Puwangnge iyanaritu Allataala, makacuwai lao ri idi. Alluruno mabbarisi sibawa takké-takké ri limaé, sibawa attulilingiwi mézbana Puwangnge. Iko Allataalaku, sukkuru'ka lao ri Iko, Allataalaku, upakaraja-Ko. Sukkuru'no lao ri Puwangnge saba' makessingngi, mannennungengngi pammasé-Na. Masennangngi tau iya atuwonnaé dé' cellana sibawa turusiwi hukkung-hukkunna Puwangnge. Masennangngi tau iya maccowériyéngngi parénta-Na, sibawa sukkui atinna makkuraga missengngi Puwangnge. Masennangngi tau iya tuwoé situru élona Puwangnge, sibawa dé' napogau'i jaé. Muwérékki hukkum-Mu, oh Puwang, kuwammengngi naripogau' sibawa matinulu. Tennapodoka nasibawang ati mattinetto maccowériwi sining peraturam-Mu. Rékko upuriyatiwi sininna parénta-Mu, dé' naripakasirika matu. Rékko uwagguruiwi apettum-Mu iya adélé'é, upoji-Ko sibawa macenning atikku. Maéloka turusiwi hukkum-Mu, aja' sises-siseng tasalaika. Naulléi kalloloé jagaiwi atuwonna temmakkécella rékko tuwoi situru parénta-Mu. Sukku atikku makkuraga missek-Ko, aja' taleppessakka léssé polé ri parénta-Mu. Pappagguruwam-Mu utaroi ri laleng atikku, kuwammengngi aja' umadosa lao ri Iko. Upoji-Ko, oh Puwang, pagguruka attettekem-Mu. Uwappallebbangengngi sibawa macenno sininna hukkung iya Muwabbéréyangngé. Marénnuka maccowériwi sining parénta-Mu, pada-pada mappunnaiwi sininna rupanna waramparangngé. Maéloka magguruiwi sining apettum-Mu, sibawa puriyatiwi sining panunju'-Mu. Naébbuka masennang attettekem-Mu; dé' uwallupaiwi matu pappagguruwam-Mu. Tennapodo makacuwa-Ko lao ri atammué, kuwammengngi utette tuwo sibawa turusiwi pappagguruwam-Mu. Timpa'i matakku kuwammengngi uwitai pappagguruwang iya mappabengngaé ri laleng hukkum-Mu. Untu' cinampe bawang monroka ri linoé, aja' tasubbui hukkum-Mu polé ri aléku. Mapeddi atikku nataro uddani, macinnaka missengngi hukkum-Mu tungke wettu. Muwamparengngi tau iya matempoé, sibawa tanroiwi tau iya lésséé polé ri parénta-Mu. Paleppe'ka polé ri pappakatunana sibawa paccellana mennang, saba' upogau'i peraturam-Mu. Namuni siyempe'i sining panguwasaé méwaka, nanennungngi matu atam-Mué Mupattentué. Sining peraturam-Mu mancajiwi pappangajaku iya pésennangiyéngngi atikku. Léwuka ri laleng awué; palisuni atuwokku situru jancim-Mu. Uwangakuiwi pangkaukekku, na-Mubalika; pagguruka attettekem-Mu. Tulukka pahangngi hukkung-hukkum-Mu, unennungngi matu pappagguruwam-Mu iya mappabengngaé. Ancuru'i nyawaku nakenna asussang, péwatangika situru sibawa jancim-Mu. Pabélaika polé ri laleng pusaé, nasaba akessingem-Mu, pagguruka hukkum-Mu. Purani upilé untu' mapato, tuli uwéngngerangngi parénta-Mu. Purani uwaccowéri sining peraturam-Mu, oh Puwang, aja' taleppessakka masiri. Maéloka mapatoiwi parénta-Mu sibawa masennang, saba' Muwébbuka lebbi pahangngi. Puwang, pagguruka bettuwanna sining attettekem-Mu, kuwammengngi uwaccowériwi lettu paccappurenna. Ebbuka pahangngi hukkum-Mu kuwammengngi uturusiwi, sibawa upogau'i sibawa sukku ati. Tennapodo makkatenning masse'ka ri parénta-Mu, nasaba iyanaro upojiyé. Wérékka pangéloreng untu' turusiwi peraturam-Mu, pakacauriwi cinnaé mancaji sugi. Jagaika kuwammengngi aja' ulellungngi iya siya-siyaé, wérékka atuwong situru élo-Mu. Pakkasse'ni jancim-Mu lao ri atam-Mué, iya Muwéréngngéngngi tau iya mapatoé lao ri Iko. Pabélaiwi pappakatuna iya uwétauriyé, nasaba makessing tongeng hukkum-Mu. Wérékka atuwong mabaru, saba' adélé'-Ko, mamménasaka turusiwi sining apettum-Mu. Oh Puwang, appaitanni pékkugi-Ko mamaséika, passalama'ka situru sibawa jancim-Mu. Naweddikka baliwi tau iya pakatunaékka, saba' uwattuwangngi ada-adam-Mu. Tulukka untu' tuli powadai iya tongengngé, saba' mamménasaka ri apettum-Mu. Maéloka makkatenning ri hukkum-Mu, untu' mannennungeng. Nautuwo matu sibawa laluwasa, nasaba makkuragaka mapatoiwi pappagguruwam-Mu. Uwabbirittangngi matu peraturam-Mu lao risining arungngé, nadé' matu umasiri. Asennangekku iyanaritu pogau'i parénta-Mu, saba' upojiko. Upakalebbii sibawa upojiwi paréntamu, unennungngi matu attettekemmu. Engngerangngi jancim-Mu lao ri atam-Mué, janci iya mabbéré paddennuwang lao ri iyya. Iyanaé saléworika ri laleng anrasa-rasakku, makkedaé iyaro jancim-Mu nawérékka atuwong. Napakatuna senna'ka tau matempoé, iyakiya dé' uléssé polé ri hukkum-Mu. Maréngngerakka lao ri hukkum-Mu iya engkaé riyolopa nariyolo, natassaléwona atikku, oh Puwang. Macai senna'ka lao ri tau majaé, nasaba nasalaiwi hukkum-Mu. Ri laleng atuwokku iya cina'é ri linoé, attettekem-Mu upancajiwi élok-kélong pappojiyang. Ri wennié uwéngngerak-Ko, oh Puwang, tette'i uwakkatenning hukkum-Mu. Lolongekka asennangeng ri laleng turusiwi sining parénta-Mu. Iko bawang uwacinnai, oh Puwang, majjancika maélo pogau'i pappagguruwam-Mu. Uwéllauwi sibawa sukku atikku paressé babuwa-Mu, amaséika situru sibawa jancim-Mu. Purani upikkiri ampé-ampéku, sibawa majjanci maélo turusiwi peraturam-Mu. Mapperi-perika sibawa dé' umattajeng untu' pajoppai parénta-Mu. Natangika siyo tau majaé, iyakiya dé' uwallupaiwi hukkum-Mu. Moto'ka ri tengnga bennié maélo poji-Ko, nasaba sining apettum-Mu iya adélé'é. Massellaoka sibawa sininna tau mateppe'é, sininna tau iya pogau'éngngi parénta-Mu. Pennoi linoé sibawa pammasé-Mu, oh Puwang, pagguruka sining attettekem-Mu. Purani mupennoi jancim-Mu, oh Puwang, sibawa pogau'i makessingngé lao ri atam-Mu. Wérékka apanréng sibawa pangissengeng, saba' mateppe'ka lao ri parénta-parénta-Mu. Ri wettu dé'napa narihukkung, lésséka, makkekkuwangngé makkatennikka ri parénta-Mu. Saba' makessik-Ko sibawa pogau'i makessingngé, pagguruka sining attettekem-Mu. Napétenna'ka tau matempoé, iyakiya uturusiwi apettum-Mu sibawa sukku ati. Iyaro sining tauwé dé' napahangngi, iyakiya untu' aléku hukkum-Mu napésennangiwi atié. Mémeng makessingngi Muhukkukka, kuwammengngi uwissengngi sining attettekem-Mu. Untu' aléku hukkum-Mu lebbi mangke'i naiya sininna ulawengngé sibawa péra'é ri linoé. Iko ritu pancajika sibawa tappaka, wérékka pappahang untu' magguruiwi sining parénta-Mu. Masennangngi tau mateppe'é rékko naitaka, saba' maddennuwakka ri jancim-Mu. Uwisseng makkedaé adélé'i apettum-Mu oh Puwang, puraka Muhukkung nasaba atinulurem-Mu. Tennapodo pammasé-Mu mancajiwi passaléwoku, situru sibawa jancim-Mu lao ri atam-Mu. Amaséika, nautette tuwo, nasaba hukkum-Mu napésennangiwi atikku. Leppessangngi tau matempoé mancaji masiri nasaba purai napétenna'ka, iyakiya unennun-nennungngi matu sining parénta-Mu. Tennapodo tau mateppe'é laowi ri iyya, sininna iya missengngéngngi sining peraturam-Mu. Tennapodo atikku dé' naléssé polé ri attettekem-Mu, kuwammengngi dé' umasiri. Muddani senna'i atikku lao ri asalamakeng polé ri alé-Mu; uwamménasaiwi jancim-Mu. Matekko matakku tajek-Ko rupaiwi jancim-Mu, makkedaka, “Uppannapa Musaléworika matu?” Makkapuru oliku pada-pada popang anggoro iya malaungngé, iyakiya attettekem-Mu dé' uwallupaiwi. Gangka kégi atam-Mu harusu sabbara? Uppannapa Muhukkungngi sining tau iya lellungngékka? Tau iya dé'é naturusiwi hukkum-Mu, purani kali kalebbong untu' palaika. Sininna hukkum-Mu weddingngi riyattuwang, tulukka, saba' rilellukka temmakkéalasang. Céddé'i mennang naulléi mpunoka, iyakiya dé' utettangngi parénta-Mu. Passalama'ka saba' tette'-Ko mamasé, kuwammengngi uwulléi turusiwi hukkum-Mu. Puwang, masse'i ada-adam-Mu mannennungeng, mannennungengngi ri surugaé. Atinulurem-Mu mattahangngi sillampé wettué, Mupatettongngi linoé angkanna tette engka. Sininna iya engkaé makkekkuwangngé, engkai nasaba parénta-Mu, saba' ata-atam-Mu maneng mennang. Akkalarapanna hukkum-Mu tenniya assalenna arennukku, pasti maténa ri laleng anrasa-rasakku. Tuli dé' matu utettangngi parénta-Mu, saba' nasibawang iyaro Mupatuwoka. Passalama'ka, saba' iyya'é appunnangem-Mu, purana makkuraga turusiwi apettum-Mu. Mattajengngi tau majaé maélo mpunoka, iyakiya maéloka puriyatiwi hukkum-Mu. Uwitai makkedaé muwi iya sukkué engkato paggangkanna, banna parénta-Mu iya sukkué. Temmaka upojinna hukkum-Mu; unennungngi puppu esso. Tuli uwéngngerangngi parénta-Mu, iya mébbuékka lebbi mapanré naiya sining balikku. Pappahakku napakacauriwi pappahanna sining gurukku, nasaba unennun-nennungngi sining parénta-Mu. Lebbi upahangngi naiya sining tomatowaé, saba' uwakkatenningngi sining apettum-Mu. Uniniriwi sininna kédo-kédo majaé, kuwammengngi uturusiwi pappagguruwam-Mu. Dé' utettangngi hukkum-Mu, saba' Iko ritu pagguruka. Temmaka cenninna ada-adam-Mu, lebbi macenningngi rasana naiya cani'é! Nawérékka pappahang hukkung-hukkum-Mu, angkanna ucéccé kédo-kédo iya macéko-cékoé. Ada-adam-Mu iyanaritu pajjennangeng untu' jongkaku, cahaya untu' tajangiwi lalekku. Iya uwajjanciyangngé sibawa tanro urupaiwi matu, untu' makkatenning ri apettum-Mu iya adélé'é. Manrasa-rasa senna'ka, oh Puwang, jagaiwi atuwokku situru sibawa jancim-Mu. Tarimai sempajang sukkuru'ku, oh Puwang, sibawa pagguruwanna hukkung-hukkum-Mu. Tuli uwappésonangngi nyawaku, iyakiya iyya dé' uwallupaiwi hukkum-Mu. Napasangika siyo tau majaé, iyakiya dé' uléssé polé ri apettum-Mu. Parénta-Mu iyanaritu manaku untu' mannennungeng, iya mébbuéngngi atikku marennu. Mamménasaka turusiwi attettekem-Mu lettu ri cappa'na atuwokku. Upojiwi hukkung-hukkum-Mu, ucéccé tau iya dé'é nasukku matinulu lao ri Iko. Iko ritu pangéwaingekku sibawa pallinrukku, mamménasaka ri jancim-Mu. Eh tau majaé, abélano polé ri iyya! Maéloka turusiwi paréntana Allataalaku. Péwatangika situru sibawa jancim-Mu kuwammengngi utuwo, aja' taleppessakka ripakacélé ri laleng amménasakku. Tumpe'ka kuwammengngi usalama, sibawa tuli puriyatiwi parénta-Mu. Musampéyangngi tau iya lésséé polé ri attettekem-Mu, siya-siya bawang belléna mennang. Sininna tau majaé Muwangga'i selaku warowo, rimakkuwannanaro upojiwi sining peraturam-Mu. Ténréka nasaba métauka lao ri Iko, métau atikku lao ri apettum-Mu. Purani upogau' iya adélé'é sibawa tongengngé, aja' tabbéréyakka lao ri limanna balié. Ajjancino makkedaé maélo-Ko tulukka, aja' taleppessakka ritenre risining tau matempoé. Mapessé matakku tajengngi bantuwam-Mu iya mappassalama'é, utajengngi pappaleppe iya Muwajjanciyangngé. Gaukekka situru sibawa pammasé-Mu, sibawa pagguruka attettekem-Mu. Iyya atam-Mu, ébbuka majeppuiwi, kuwammengngi upahangngi parénta-Mu. Puwang, narapini wettunna tinda'-Ko, saba' najjalékkaini sining tauwé hukkum-Mu. Uwéloriwi sining parénta-Mu lebbi naiya ulawengngé, naiya ulaweng tuléngngé. Rimakkuwannanaro tuwoka situru sibawa sininna panunju'-Mu; ucéccé kédo-kédo iya majaé. Mappabengnga tongeng sining peraturam-Mu, nauturusiwi sibawa sukku ati. Rékko ripakanessai, mabbéréi tajang pappagguruwam-Mu, mabbéréi pappéjeppu lao ri tau biyasaé. Tapposo-poso nappase'ku, nasaba muddaningiwi parénta-Mu. Gilinno lao ri iyya sibawa amaséika, pada-pada Muwamaséinna tau iya pojiyék-Ko. Pakkasse'i jongkaku situru sibawa jancim-Mu, aja' taleppessakka nakuwasai jaé. Paleppe'ka polé risining tau iya tenre'ékka, kuwammengngi uwulléi turusiwi peraturam-Mu. Barakkakika sibawa ahadérékem-Mu, sibawa pagguruka attettekem-Mu. Massolo'i uwai matakku pada-pada saloé, nasaba dé' nariturusi hukkum-Mu. Adélé'-Ko, oh Puwang, coco'i sininna hukkum-Mu. Parénta-parénta iya Muwabbéréyangngé adélé'i sibawa wedding riyattuwang. Mabbarai caiku ri laleng aléku nasaba balikku nallupaiwi pappagguruwam-Mu. Masse'i jancim-Mu sibawa wedding riyatepperi, upoji senna'i. Iyya'é baiccu'ka sibawa matuna, iyakiya dé' utettangngi pappagguruwam-Mu. Mattahangngi mannennungeng adélékem-Mu, sibawa hukkum-Mu tuli tongengngi. Nakennaka aperiseng sibawa asussang, iyakiya iya Mupattette'é napérennuiwi atikku. Tuli adélé'i peraturam-Mu; wérékka pappéjeppu kuwammengngi utuwo. Mangobbika sibawa sukku atikku lao ri Iko; balika oh Puwang, maéloka turusiwi parénta-Mu. Mangobbika lao ri Iko; passalama'ka, maéloka makkatenning ri peraturam-Mu. Maéléka moto sibawa mangobbi méllau tulung; mamménasaka lao ri jancim-Mu. Puppu bennika maddoja, untu' nennungngi pappagguruwam-Mu. Engkalingaka nasaba pammasé-Mu, oh Puwang, jagaiwi atuwokku nasaba adélékem-Mu. Tau iya lellungngékka macawé'ni, makkatta majai mennang sibawa dé' najampangiwi hukkum-Mu. Iyakiya macawé'-Ko, oh Puwang, sininna parénta-Mu tongengngi. Riyolopa nauwissengngi polé ri pappagguruwam-Mu, makkedaé Mupattentui untu' mannennungeng. Itai anrasa-rasakku sibawa passalama'ka, saba' dé' utettangngi hukkum-Mu. Ewaiwi parakaraku sibawa paleppe'ka; passalama'ka situru sibawa jancim-Mu. Dé' naripassalama matu tau majaé, nasaba dé' naturusiwi attettekem-Mu. Battowa tongeng paressé babuwa-Mu, oh Puwang, passalama'ka situru sibawa adélé'-Mu. Maéga tau musuka sibawa lellukka, iyakiya dé' utettangngi peraturam-Mu. Ucéccé mitai iyaro sining tobali'bellaé, saba' dé' mennang naccowériwi pappagguruwam-Mu. Itani temmaka upojinna parénta-Mu, oh Puwang, passalama'ka nasaba pammasé-Mu. Tongeng maneng ada-adam-Mu, sininna hukkum-Mu iya adélé'é tette'i mannennungeng. Nalellukka sining tau makuwasaé temmakkéalasang, iyakiya banna hukkum-Mu iya uwétauriyé. Naébbuka marennu jancim-Mu, pada-pada séddié tau iya runtu'é waramparang. Ucéccé maneng bellé, iyakiya hukkum-Mu upojiwi. Matteru-teruka sukkuru lao ri iko, nasaba hukkum-Mu iya adélé'é. Tau iya pojiyéngngi hukkum-Mu amangngi sibawa tennang, dé'gaga mulléi lawa-lawaiwi mennang. Mattajekka asalamakeng polé ri Iko, Puwang, upogau'i sining parénta-Mu. Uturusiwi sining peraturam-Mu, nenniya pojiwi sibawa sukku ati. Upatoiwi paréntamu sibawa panunju'-Mu, saba' Muwitai sininna pangkaukekku. Tennapodo pangobbiku lettu'i ri Iko, oh Puwang, wérékka pappéjeppu, situru sibawa jancim-Mu. Leppessanni paréllaukku lettu ri Iko, passalama'ka situru sibawa jancim-Mu. Tuli maéloka poji-Ko, saba' Mupagguruka Mupattette'é. Macinnaka makkélong passalenna jancim-Mu, saba' sininna parénta-Mu adélé'i. Tennapodo tuli macennik-Ko tulukka, saba' upiléi untu' maccowériwi peraturam-Mu. Nauddaningiwi atikku asalamakeng polé ri Iko, napérennui atikku hukkum-Mu. Leppessakka tuwo, kuwammengngi upoji-Ko, tennapodo sining attettekem-Mu natulukka. Pusaka pada-pada bimbala iya teddéngngé, poléni, sibawa sappai atam-Mué, saba' dé' utettangngi sining parénta-Mu. Elong ziyara. Ri laleng asussakku mangobbika lao ri Puwangnge, na-Nabalika. Oh Puwang, passalama'ka, polé ri pabbelléngngé sibawa pabengnguwangngé. Eh pabengnguwang, aga napogau' matu Allataala lao ri iko? Nasibawang aga Nahukkukko matu? Nasibawang pana macéru'na séddié pajuwang, nasibawang bara iya malluwa-luwa'é! Cilakaka nasaba harusu'ka tuwo sibawakko; dé'gaga sisalana monroé ri Mésékh, iyaré'ga ri yelle'na tau Kédar-é. Genne'ni ittana monroka silaong sining tau iya dé'é napojiwi damé. Rékko mabbicaraka passalenna adaméngengngé, nacinnaiwi mennang musué. Elong ziyara. Makkitaka lao risining bulué, polé kégi pattulungngé untu' aléku? Pattulukku poléi ri Puwangnge iya pancajiyéngngi langié sibawa linoé. Dé' naleppessakko matu menrung, tuli jagai pallinrummu. Sitongenna, pallinrunna iyaro Israélié dé' naengka nacakkaruddu iyaré'ga matinro. Puwangnge jagaiko matu, engkai ri benrémmu untu' linrungiko. Dé' Mumalasa matu nasaba mata essoé ri essoé, iyaré'ga nasaba kétengngé ri wennié. Nalinrungiko matu Puwangnge polé ri abalaé, Najagaiko kuwammengngi nasalama atuwommu. Nalinrungiko wettummu polé sibawa lao, makkekkuwangngé sibawa mannennungeng. Elong ziyarana Daud. Marennuka wettunna makkeda tauwé lao ri iyya, “Laono mai talao ri Bolana Puwangnge!” Lettu'ni makkekkuwangngé ri gerbanna kota Yérusalém. Yérusalém iya ripatettongngé selaku kota tassusung mareppi sibawa magello. Kuwaniyé lao sining suku bangsaé, suku-suku bangsa napilé Puwangnge, untu' sukkuru lao ri Aléna situru sibawa paréntana. Kuwaniyé lao sining arung wijanna Daud madélékiwi ra'ya'na. Assempajanno untu' asaléwangenna Yérusalém: “Tennapodo sininna tau iya pojiyékko saléwangengngi. Tennapodo engka adaméngeng ri daéramu, sibawa atennangeng ri laleng sining béntémmu.” Nasaba sellao sibawa sahaba'ku makkedaka, “Tennapodo saléwangekko!” Nasaba Bolana Puwangnge, Allataalata, massempajakka kuwammengngi mumasennang. Elong ziyara. Congaka lao ri Iko oh Puwang iya mapparéntaé ri surugaé. Pada-pada séddié ata taggattung lao ri puwanna, sibawa séddié ata makkunrai lao ri puwanna makkunraié, makkuwaniro idi tajek-Ko, oh Puwang, Allataalata, narapi Muwamaséiki. Amaséiki, oh Puwang, amaséiki, saba' maléwe' senna'ni ripakatuna. Genne'ni riyéllé-kéllé ri tau sugié, sibawa ribuwé' risining tau iya matempoé. Elong ziyarana Daud. Pékkugi akkalarapanna Puwangnge dé' naccowériki? Eh Israélié, baliwi makkuwaéwé: “Akkalarapanna Puwangnge dé' nasibawakki wettutta nagasa balié, purani naemme tuwo-tuwo, nasaba caina mennang iya maseroé. Purani naalireng lémpe, sibawa nalle uwai; namaténi tallemme ri laleng sulilina uwai makarame'é.” Laono mai tasukkuru lao ri Puwangnge, saba' dé' naleppessakki ripaccappu ri balié. Pada-padaki manu'-manu' iya leppe'é polé ri siyona paddengngengngé, pettuni iyaro siyoé, na idi leppe toni! Pattulutta poléi ri Puwangnge iya pancajiyéngngi langié sibawa linoé. Elong ziyara. Tau iya mateppe'é lao ri Puwangnge, iyanaritu pada-padai Bulu Sion iya masse'é tenripakédo, sibawa mattahang mannennungeng. Pada-pada sining bulué linrungiwi Yérusalém, makkuwaniro Puwangnge linrungiwi umma'-Na makkekkuwangngé sibawa mannennungeng. Tau majaé dé' namatteru makuwasa ri tana manana tau malempué, kuwammengngi tau makessingngé dé' naccowé pogau'i majaé. Oh Puwang, pogau'ni makessingngé lao ri tau makessingngé, lao ri tau iya malempu atié. Iyakiya tau iya pogau'é macéko-céko memmuwaré rihukkungngi ri Puwangnge silaong tau majaé. Tennapodo saléwangengngi umma'-Mu! Elong ziyara. Wettunna Puwangnge napalisui keadaanna Yérusalém, pada-padaki mannippié! Matteruki macawa sibawa makkélong marennu angkanna bangsa-bangsa laingngé makkeda, “ Puwangnge pura pogau' gau'-gau' iya maseroé untu' mennang!” Mémeng Puwangnge pura pogau' gau'-gau' iya maseroé untu' idi! Rimakkuwannanaro tamariyo-riyo! Oh Puwang, palisui keadaatta, pada-pada salo rakkoé makkuwai paimeng ri wettu bosié. Tennapodo tau iya mampoé naterito, méngngalai sibawa gora-gora. Laowi tauwé mampo biné ri dare'na, namabbarébé towi uwai matanna. Lisui sibawa makkélong marennu tiwii wessé-wessé éngngalanna. Elonna Salomo. Rékko tenniya Puwangnge patettongngi bolaé, siya-siyai majjama sining tukanna. Rékko tenniya Puwangnge linrungiki, siya-siyai sining pengawal-é jaga. Paracuma bawang marejjing majjama sappa dallé, maélé moto sibawa matinro malalempenni; saba' napassadiyai Puwangnge untu' mennang iya Namaséiyé, wettunna mennang matinro. Ana'-ana'é iyanaritu pabbéréna Allataala, sitongenna, pabbéréi mennang ritu. Ana'-ana' worowané iya rilolongengngé ri wettu malolo padai ana' pana ri limanna pabbaranié. Masennangngi tau iya mappunnaiyé pappassadiyaang pana-pana iya makkuwaéro! Dé' matu naricau, wettunna moloi bali ri pengadilangngé. Elong ziyara. Masennangngi tau iya mateppe'é sibawa tuwo situru paréntana Allataala. Muwanréi matu wassélé jama-jamammu, tuwo madécéng sibawa saléwangeng. Bainému padai pong anggoro iya macommo'é ri laleng bolamu. Ana'-ana'mu padai cura' pong zaitungngé ri mattulilinna méjammu. Makkuwaniro Puwangnge barakkakiwi tau iya mateppe'é. Tennapodo polé ri Sion nabarakkakiko Puwangnge. Tennapodo muwitai adécéngenna Yérusalém sillampé atuwommu! Tennapodo malampé sunge'ko, sibawa mitai ana' eppomu! Tennapodo saléwangengngi umma'-Mu! Elong ziyara. Israélié, powadani pékkugiko ricalla ri balié mappammulai wettu malolomu. “Nacallaka balié mappammulai wettu maloloku, iyakiya dé' naulléi mennang cauka; mébbui mennang sining lo maliyung ri lekke'ku, pada-pada paddakkalaé mébbu alo-alo malampé ri dare'é. Iyakiya Puwang iya adélé'é pura paleppe'ka polé ri angatangengngé.” Leppessanni tungke tau iya céccééngngi Sion ricau sibawa ripasoro. Leppessanni mennang pada-pada wellaé ri pabbingengngé iya marakkoé ri wettu dé'napa naulléi tuwo; dé'gaga sangkiwi, iyaré'ga siyoi ri laleng kalonjéngngé. Dé' nakkeda matu sining tau laloé, “Tennapodo ribarakkakiko ri Puwangnge, idi barakkakiko ri laleng asenna Puwangnge.” Elong ziyara. Polé ri pepping asussangngé mangobbika lao ri Iko, oh Puwang. Puwang, éngkalingai pangobbiku, pénessaiwi paréllaukku. Rékko matteru-Ko méngngerangngi dosata, oh Puwang, nigana mulléi tahang? Iyakiya Mupoji maddampeng, kuwammengngi namancaji mateppe tauwé. Utajengngi bantuwanna Puwangnge, uwamménasaiwi jancin-Na. Uwuddaningiwi Puwangnge, lebbi naiya séddié paronda muddaningiwi éléé. Addennuwakko lao ri Puwangnge, éh umma'-Na, saba' tette'i mamasé, sibawa tuli sadiya mappassalama. Napaleppe'ki matu polé ri sininna asussatta. Elong ziyarana Daud. Puwang, dé' umabangka, sibawa dé' umatempo. Dé' ulellungngi gau'-gau' iya battowa senna'é iyaré'ga iya mawatang senna'é untu' aléku. Sitongenna, tennang sibawa amang atikku; pada-pada ana'lolo puraé susu, léwu tennang ri wakkanna indo'na. Addennuwanno lao ri Puwangnge, éh umma'-Na, makkekkuwangngé sibawa mannennungeng. Elong ziyara. Oh Puwang, aréngngerakki lao ri Daud, sibawa sininna anrasa-rasanna. Aja' tallupaiwi assompanna lao ri Iko Puwang, jancinna lao ri Iko Iya Pommawatangngé, Allataalana Yakub. ri wettu dé'na upassadiya bola untu' Allataalana Yakub, onrong naonroi untu' Puwang Iya Pommawatangngé.” Ri Bétléhém taéngkalingai passalenna Petti Assijancingngé, nainappa riruntu ri padang Yaar. Laono mai talao ri onrong naonroiyé Puwangnge, sibawa sompai ri yolo-Na kadéra akkarungen-Na. Poléni sibawa monro ri Bola-Mu, oh Puwang, silaong Petti Assijancingngé, lambanna akuwasam-Mu. Tennapodo umma'-Mu gora marennu, sibawa sining imam-Mu tuli tuwoi situru élo-Mu. Nasaba Daud, atam-Mu, aja' tasampéyangngi arung Mupilé. Purai mattanro Puwangnge lao ri Daud; dé' namaélo massakkarengngi jancin-Na. Adan-Na, “Séddi ana'mu Upancaji matu arung untu' mapparénta sulléiko. Rékko matinului ana'-ana'mu lao ri assijancik-Ku, sibawa turusiwi parénta-parénta-Ku, na untu' mannennungeng wijanna mennang sulléiko selaku arung.” Saba' purai napilé Puwangnge Sion; nacinnaiwi untu' mancaji onrong Naonroiyé. Adan-Na, “Kuwanié onrok-Ku untu' mannennungeng, macinnaka mapparénta ri onrongngéwé. Sininna apparelluwanna Upennoiwi matu sibawa maona, sining taunna iya kasiyasié Uwéréngngi inanré gangka messo. Imang-ngimanna nappaitangngi asalamakeng polé ri Iyya; makkélongngi matu umma'na sibawa gora marennu. Kuwaé séddi wijanna Daud Upancaji arung; apparéntanna Upakkasse'i matu. Akkarungenna tuli saléwangengngi matu, iyakiya sining balinna ripakasirii matu.” Elong ziyarana Daud. Temmaka kessinna sibawa sennanna, rékko umma'-Na Allataala tuwoi sipammasé-masé! Iyaro padai minnya wangi mangke'é iya ritiri'é ri tompo ulunna Harun, nainappa nonno ri ellong wajunna. Iyaré'ga padai cinoddoé ri Bulu Hérmon, iya nonnoé ri Bulu Sion. Kuwaniro napanonno Puwangnge barakka'-Na, atuwong untu' mannennungeng. Elong ziyara. Laono mai, pojiwi Puwangnge, éh sininna atanna Puwangnge, sininna iya massompaé ri Bola-Na ri wennié. Akkai limammu lao ri onrong mapaccingngé, sibawa pojiwi Puwangnge! Tennapodo polé ri Sion ribarakkakiko ri Puwangnge, Pancajiyéngngi langié sibawa linoé! Pojiwi Puwangnge! Pojiwi asenna Puwangnge, éh iko ata-atan-Na iya massompaé ri Bolana Puwangnge ri onronna Allataalata. Pojiwi Puwangnge, saba' makessingngi, pojiwi asen-Na, masémpo atiwi. saba' makacuwai. Napiléi Yakub untu' Aléna, umma Israélié napancajiwi appunnangen-Na. Saba' uwissengngi battowa tongengngi Puwangnge, marajai napakacauriwi sininna déwataé. Napogau'i aga iya Naéloriyé, ri langié sibawa ri linoé, ri tasi'é sibawa ri dolangeng iya maliyungngé. Polé ri cappa linoé papoléi ellung, Naébbui billa'é untu' bosié. Nainappa Naparéntang angingngé kuwammengngi nassu polé ri onrong attaron-Na. Ri Maséré Naunoi sininna ana' macowaé polé ri tolinoé iyaré'ga olokolo'é. Naébbui kuwaro maéga anu makalallaing sibawa tanrang untu' hukkungngi arungngé sibawa sininna pegawénna. Napaccappui maéga bangsa, sibawa mpunoi arung-ngarung poré: Sihon arunna Amori sibawa Og arunna Basan, enrengngé sininna arungngé ri Kanaan. Nainappa Nabbéréyang wanuwanna mennang mancaji appunnangenna Israélié, umma'-Na. Oh Puwang, tette'-Ko matu riyabbirittang, sibawa asem-Mu riyéngngerangngi ri sininna assossorengngé, saba' mabbéré-Ko adélékeng lao ri umma'-Mu, sibawa mamaséiwi ata-atam-Mu. Barahalana mennang poléi ri ulawengngé sibawa péra'é, ébbu lima tolino. Mappunnaiwi mennang bawa, iyakiya dé' naulléi mabbicara, mappunnaiwi mata, iyakiya dé' naulléi makkita. Mappunnaiwi mennang daucculing, iyakiya dé' naulléi maréngkalinga, polé ri bawana dé' nassu nappase'é. Tennapodo makkuwairo totona sining tau iya mébbuéngngi, sibawa mateppe'é lao ri aléna. Pojiwi Puwangnge, éh umma Israélié, pojiwi Aléna, éh imang-ngimanna Allataala! Pojiwi Puwangnge, éh sining tau Léwié, pojiwi Aléna, iko maneng iya mateppe'é. Pojiwi Puwangnge ri Sion, ri Yérusalém onrong Naonroiyé. Pojiwi Puwangnge! Sukkuru'no lao ri Puwangnge nasaba makessingngi; mannennungengngi pammasé-Na. Sukkuru'no lao ri Allataala Iya Posséuwaé; mannennungengngi pammaséna. Sukkuru'no lao ri Puwang Iya Pommatanré; mannennungengngi pammasé-Na. Aléna bawang mébbu sining anu makalallaing battowaé; mannennungengngi pammasé-Na. Nasibawang apanrén-Na Napancajiwi langié; mannennungengngi pammasé-Na. Napallebba'i linoé ri tompo'na uwai; mannennungengngi pammasé-Na. Mébbui anu patajangiyé ri langié; mannennungengngi pammasé-Na; mata essoé untu' makuwasaiwi essoé; mannennungengngi pammasé-Na; kéteng sibawa wéttowing untu' makuwasaiwi wennié; mannennungengngi pammasé-Na. Naunoi ana'-ana' macowaé ri Maséré; mannennungengngi pammasé-Na. Nasilaongengngi Israélié massu polé ri Maséré; mannennungengngi pammasé-Na; nasibawang lima mawatang sibawa poré; mannennungengngi pammasé-Na. Napuwé'i Tasi Gelagah; mannennungengngi pammasé-Na; Natiwii umma Israélié ri liweng; mannennungengngi pammasé-Na. Iyakiya arung Maséré sibawa tentarana Napatallemme'i; mannennungengngi pammasé-Na. Napimpingngi umma'-Na lalo ri padang kessi'é; mannennungengngi pammasé-Na. Nacaui sining arung poré; mannennungengngi pammasé-Na; naunoi sining arung tarompoé; mannennungengngi pammasé-Na; Sihon, arunna Amori; mannennungengngi pammasé-Na; sibawa Og, arung Basan; mannennungengngi pammasé-Na. Nabbéréyangngi wanuwanna mennang lao ri umma'-Na; mannennungengngi pammasé-Na; mancaji appunnangenna Israélié atan-Na; mannennungengngi pammasé-Na. Dé' nallupaiki wettutta ricau; mannennungengngi pammasé-Na. Napaleppe'ki polé ri limanna balié; mannennungengngi pammasé-Na. Tungke anu tuwoé Nawéréngngi inanré; mannennungengngi pammasé-Na. Sukkuru'no lao ri Allataala panguwasana langié; mannennungengngi pammasé-Na. Ri wirinna salo-salo Babél tudakki sibawa teri rékko riyéngngerangngi Sion. Ri pop-pong gandarusaé ri wanuwaéro rigattungngi kacapitta. Sining tau iya tawangngékki suroki makkélong untu' mennang. Sining tau iya tenre'ékki suroki puwélongngi élok-kélong marennué, “Elongekki élok-kélong polé ri Sion!” Weddigga ri wanuwa laingngé makkélokki untu' Puwangnge? Leppessakka dé' naweddinna makkélong rékko uwallupaiko, Yérusalém! Leppessakka dé' naweddinna makkélong rékko uwallupaiko sibawa dé' upancajiko upojiyé! Oh Puwang, éngngerangngi pangkaukenna tau Edongngé wettunna riyancuru Yérusalém. Makkedai mennang, “Ruttungngi, ruttungngi lettu ri pallangga-pallanggana!” Eh Babél, ripaccappuko matu! Masennangngi tau iya wale'ékko ja iya mupogau'é lao ri idi. Masennangngi tau iya malaéngngi ana'-ana'lolomu nanaggeppuwangngi ri bulu-bulu batué! Polé ri Daud. Oh Puwang, maéloka sukkuru lao ri Iko, sibawa sukku atikku. Ri yolona sininna déwataé upuwélongngi pappojiyangngé untu' alé-Mu. Suju'ka mattuju ri Bola-Mu iya mapaccingngé naupoji towi asem-Mu, saba' matinulu-Ko sibawa tuli mamasé. Lebbi Mupentingkangngi jancim-Mu naiya pallolongenna tauwé passalenna alé-Mu. Wettukku mangobbi lao ri Iko, mappébali-Ko, Mupéwatangiwi atikku angkakku mancaji barani. Sininna arungngé ri linoé napoji-Ko matu, oh Puwang, saba' purani mennang naéngkalinga jancim-Mu. Makkélongngi matu mennang passalenna pangkaukem-Mu sibawa passalenna arajam-Mu iya battowaé. Malempu senna'-Ko, iyakiya Mujampangi towi iya matunaé, dé' naulléi massubbu tau matempoé polé ri Iko. Wettukku nakenna asussang, Muwattahangengngi atuwokku. Muéwai balikku iya mattengngangngé majjallo sibawa passalama'ka sibawa akuwasam-Mu. Mupennoiwi matu jancim-Mu lao ri iyya; aja' muwappésau tinda untu' umma'-Mu. Untu' pamimping kor. Mazmurna Daud. Oh Puwang, Muwellungika sibawa missekka. Muwisseng sininna pangkaukekku; Mupahangngi pikkirakku polé mabéla. Muwitaka, muwi mappallaukka iyaré'ga mappésau, Muwissengngi sininna iya upogau'é. Mala ri wettu dé'napa umabbicara, Muwisseng aga iya maéloé upowada. Muwattulilingika polé ri sininna sulapa'é, nenniya Mulinrungika sibawa akuwasam-Mu. Iyaro pangissengem-Mu malamung senna untu' aléku, dé' narapii pikkirakku. Kégaka wedding lao kuwammengngi leppe'i polé ri akuwasam-Mu? Kégaka wedding lari mabéla polé ri yolo-Mu? Rékko ménré'ka ri langié, engka-Ko kuwaro, rékko matinroka ri linona amaténgngé, engka tokko kuwaro. Rékko luttuka lalo ri pong bétaraé ri alau iyaré'ga monro ri cappa yajang iya kaminang mabélaé, kuwatoro Mutulukka; kuwatoro Napimpikka limam-Mu. Rékko uwéllauwi kuwammengngi nasalipurika pettangngé, sibawa tajangngé ri mattulilikku mancaji wenniwi, na iyaro pettangngé dé'to namapettang untu' alé-Mu; iyaro wennié matajangngi pada-pada essoé, sibawa iyaro pettangngé pada-padai tajangngé. Mupancajiwi tungke bagiyanna watakkaléku, sibawa tappaka ri laleng parémmananna indo'ku. Upoji-Ko saba' dé'gaga padakku! Sininna pangkaukem-Mu makalallaingngi sibawa mappabengnga, tonget-tongengngi umaingeki. Wettunna buku-bukukku ripancaji, sibawa ripasisambus-sambung sibawa matutu ri laleng parémmananna indo'ku, nautuwo kuwaro secara rahasiya, dé' utassubbu ri alé-Mu. Muwitaka wettukku ri laleng parémmanang; taroki manengngi ri laleng kitta'-Mu; pura ripattentuni esso-essona ri wettu dé'napa muwi séddi ripammulai. Temmaka watanna pikkiram-Mu untu' aléku, oh Allataala, sibawa temmaka égana jumellana! Rékko ubilangngi, lebbi maégai naiya kessi'é; rékko moto'ka, Iko mupa upikkiri. Tennapodo Mupaccappui tau majaé, oh Allataala, pabélaiwi sining pappassu daraé polé ri iyya! Napowadai mennang majaé passalenna Iko, sibawa mattanro bellé-belléi nasabbing kota-kota-Mu. Oh Puwang, ucéccé tau iya céccéék-Ko, massesse atikku lao ri tau iya méwaék-Ko! Ucéccé senna mennang, sibawa uwangga selaku bali. Salidikika oh Allataala, wellungiwi atikku, ojika sibawa issengngi pikkirakku. Itai ajakké engka ja ri laleng aléku, sibawa pimpikka ri laleng iya mannennungengngé. Untu' pamimping kor. Mazmurna Daud. Paleppe'ka polé ri tau majaé, oh Puwang, jagaika polé ri tau iya pogau'é ateddekeng. Narancanai mennang jaé ri laleng ati, sibawa esso-esso paompo assasang. Lilana mennang padai ula mamosoé, ada-adanna mennang padai racunna ula séndo'é. Oh Puwang, linrungika polé ri akuwasanna tau majaé, jagaika polé ri tau iya pogau'é ateddekeng iya makkattaé untu' pasempé'ka. Mammekko-mekkoi tau matempoé tangika siyo, sibawa pallebba jala untu' tikkekka. Puppu laleng mennang mattang jebba untu' jebba'ka. Oh Puwang, makkedaka: Iko ritu Allataalaku, jampangiwi sempajang paréllaukku. Puwang, Allataalaku, pappassalama'ku iya mawatangngé, puraka Mulinrungi ri laleng ammusureng. Aja' Mutarimai paréllaunna tau majaé, oh Puwang, aja' taleppessangngi papolé wassélé rancanana mennang. Aja' taleppessangngi balikku pacau; leppessanni ada-ada maja iya napowadaé mennang kennai aléna mennang iya pétenna'ékka. Leppessanni mennang nabosingi bara api, sibawa ribuwang ri laleng kalebbonna amaténgngé, angkanna dé'na naulléi massuna. Leppessanni tau iya pogau'é ateddekeng nakenna abala, aja' taleppessangngi pappétenna'é monroiwi linoé. Uwisseng Muwéréngngi adélékeng tau ri tenre'é, sibawa méwaiwi parakarana tau kasiyasié. Napoji-Ko matu tau malempué; monroi matu mennang silaongek-Ko. Mazmurna Daud. Mangobbika lao ri Iko, oh Puwang, tulukka masitta! Engkalingaka rékko mangobbika lao ri Iko. Tarimai sempajakku selaku pakkasuwiyang dupa, sibawa limakku iya maddeppa-reppaé selaku akkarobangeng wenni. Oh Puwang, jagaiwi témukku sibawa jagaiwi iwéku. Pabélaika polé ri pangéloreng pogau'éngngi majaé. Aja' taleppessakka masséddi sibawa tau madorakaé sibawa maccowé manré ri laleng péstana mennang. Rékko séddié tau makessing mamparekka, nenniya naajara'ka sibawa malempu, iyaro pada-padai minnya iya kaminang makessingngé untu' aléku. Tennapodo dé' usampéyangngi, saba' matteruka massempajang méwai jana mennang. Rékko sining panguwasana mennang ribuwangngi polé ri peppip-pepping batué, nangakuiwi matu mennang makkedaé tongengngi ada-adakku. Nassiyamporengngi matu buku-bukutta ri wirinna kuburu'é pada-pada séddié batu riyancuru ri tanaé. Iyakiya tette'ka maddennuwang lao ri Iko, oh Puwang Allataalaku, aja' taleppessakka maté, saba' mallinrukka ri Iko. Linrungika polé ri siyo iya ritangiyékka, polé ri jebba'na sining tomajaéro. Leppessangngi mennang sempé ri laleng siyona muto, iyakiya iyya tennapodo salama'ka. Elong pappagguruwanna Daud, wettunna engkai ri laleng gowaé. Mangobbika lao ri Puwangnge sibawa macenno; sibawa sadda maloppo uwéllauwi bantuwan-Na. Maddarékéka ri yolo-Na; upaissengiwi sininna asussak-Ku. Wettukku céddé pettu paddennuwang, Muwisseng aga harusu upogau'. Ri laleng iya harusu'é uwola, mammekko-mekkoi balié tangika siyo. Wettukku makkita libenréng, uwitai dé'gaga bantuwang untu' aléku. Dé'gaga linrungika, iyaré'ga jampangiyéngngi aléku. Mangobbika lao ri Iko, oh Puwang, Iko ritu onrong allinrungekku, Iko bawang uwapparelluwang ri laleng atuwongngéwé. Pénessaiwi pangobbiku, saba' manrasa-rasa senna'ka. Passalama'ka polé risining balikku, saba' mawatang senna'i mennang untu' aléku. Paleppe'ka polé ri tarungkué, na ri tengngana addeppungenna umma'-Mu upojiwi matu asem-Mu, saba' purani Mupogau' makessingngé lao ri aléku. Mazmurna Daud. Oh Puwang, éngkalingai sempajakku, pénessaiwi paréllaukku. Balika nasaba atinulurem-Mu, tarimai sempajakku nasaba adélékem-Mu. Iyya'é atam-Mu, aja' taadélékika, saba' dé'gaga tau temmakkésalang ri yolo-Mu. Purana nalellung balikku sibawa nacauka, sibawa naputtama'ka ri laleng tarungku iya makalemmengngé; mancajika pada-pada tau iya maittaénna maté. Poloni sumange'ku, malippu senna'ni atikku. Uwéngngerangngi esso-esso iya labe'é; upikkiri'i sininna pangkaukem-Mu, unennungngi sininna winru-Mu. Massempajakka lao ri Iko sibawa lima mappale; pada-pada tana marakkoé, nauddaningi-Ko nyawaku. Balika masitta, oh Puwang, saba' pettu paddennuwakka. Aja' tamassubbu polé ri aléku, kuwammengngi aja' upada-pada tau iya nonnoénna ri linona amaténgngé. Paréngngerangika élé-élé pammasé-Mu, saba' ri alé-Muka mamménasa. Jellokekka laleng iya harusu'é uwola, saba' ri alé-Muka massempajang. Poléka maélo mallinrung ri alé-Mu, oh Puwang, paleppe'ka polé risining balikku. Pagguruka pogau'i élo-Mu, saba' Iko ritu Allataalaku. Makessing ati-Ko, sibawa mupimpikka matu ri laleng iya malappaé. Passalama'ka situru sibawa jancim-Mu, oh Puwang, nasaba akessingem-Mu, paleppe'ka polé ri aperisengngé. Nasaba pammasé-Mu paccappui sininna balikku, paccappui sininna tenre'ékka, saba' iyya atam-Mu. Polé ri Daud. Pojiwi Puwangnge pallinrukku! Nalatika mammusu, sibawa pagguruka mammusu. Aléna pattulung sibawa pangéwaingekku, pappassalama'ku onrokku maccinaung. Aléna pallinrukku, onrokku manyingkiri, Napatunru'i bangsa-bangsaé lao ri iyya. Puwang, aga tolinoé angkanna Mujampangiwi? Niga aléna angkanna Mubati-batiwi? Iyaro tolinoé padai siseppungngé anging, pada-pada wajo-wajo labe'é, makkuwaniro atuwonna. Oh Puwang, timpa'i langi-Mu namupanonnoi, géssai sining bulué kuwammengngi namaddumpu. Aggenrungengngi billa'-Mu kuwammengngi naripassara-sarang balié, leppessangngi pana-Mu kuwammengngi namétau mennang. Loro'i limam-Mu polé ri surugaé, sibawa paleppe'ka polé ri lémpe'é. Passalama'ka polé ri akuwasanna tau laingngé iya pojiyéngngi mabbellé sibawa pabengnguwang, sibawa mattanro bellé-bellé. Uwakkélongek-Ko matu élong baru, oh Allataala, sibawa getti kacapi namakkélotto. Muwéréngngi apakalang arung-ngarungngé, sibawa paleppe'i Daud atam-Mu. Paleppe'ka polé ri peddanna tau mabecco'é; passalama'ka polé ri akuwasanna tau laingngé iya pojiyéngngi mabbellé sibawa pabengnguwang, sibawa mattanro bellé-bellé. Tennapodo ana'-ana' worowanéta ri wettu malolona pada-pada tanet-taneng iya mancaji battowaé. Tennapodo ana'-ana' makkunraitta padai alliri magelloé, iya bélo-béloiyéngngi sining sunna saorajaé. Tennapodo sining gudatta pennoi lise sibawa sininna rupanna wasséléna tanaé. Tennapodo sining bimbala'ta risining padatta makkéana'i narapi mappulo sebbu égana. Tennapodo sining sapitta mabbija-bijai sibawa dé'gaga teddéng iyaré'ga alaungeng. Tennapodo dé' nariyéngkalinga kelli anrasa-rasangngé risining lalenna kotata. Masennangngi bangsa makkuwaéro, masennangngi umma iya Allataalanaé Puwang! Pappojiyang polé ri Daud. Maéloka pakaraja-Ko, oh Allataalaku sibawa Arukku, sibawa poji-Ko mannennungeng. Esso-essoka maélo sukkuru lao ri Iko, sibawa pakalebbi-Ko mannennungeng. Saba' marajai Puwangnge sibawa masero ripoji, aloppongen-Na dé' nariwellungi. Massossorengngi napojiwi matu tauwé pangkaukem-Mu sibawa mabbirittangngi aporéngem-Mu. Nabbirittangngi matu mennang arajam-Mu sibawa alebbirem-Mu, unennungngi matu winru-Mu iya mappabengngaé. Nabbirittangngi matu mennang sining pangkaukem-Mu iya maseroé, arajam-Mu uwappallebbangengngi matu. Nacuritai matu tauwé sininna akessingem-Mu sibawa makkélong passalenna adélékem-Mu. Iyaro Puwangnge mamaséi sibawa makacuwa, matengnge macai sibawa tuli mamaséi. Makacuwai lao ri tungke tau, sibawa mamaséiwi sininna Napancajiyé. Sininna Mupancajiyé napoji-Ko matu, oh Puwang, sininna umma'-Mu sukkuru'i matu lao ri Iko. Napakarajai matu mennang akuwasam-Mu selaku Arung, sibawa curitai aporéngem-Mu, kuwammengngi sininna tauwé naissengngi pangkaukem-Mu iya battowaé, enrengngé akkarungem-Mu iya malebbié sibawa mattappaé. Apparéntam-Mu tette'i sillampé wettué, akuwasam-Mu mattahangngi massossoreng. Matinului Puwangnge lao ri sininna jancin-Na, pennoi pammasé ri laleng sininna pangkauken-Na. Natulungngi Puwangnge tau iya engkaé ri laleng asussang, Napatettongngi tau iya cuku'é. Sininna mahlu' tuwoé naddennuwangi-Ko; Muwéréngngi inanré ri wettunna. Mupennoiwi sininna apparelluwanna, angkanna dé' mennang naakurangeng. adélé'i Puwangnge ri laleng sininna tindakan-Na sibawa pennoi pammasé ri laleng sininna pangkauken-Na. Macawé'i lao ri tau iya mangobbié lao ri Aléna, sibawa méllauwi ri Aléna sibawa malempu atinna. Napésennangiwi atinna sining tau iya mateppe'é; Naéngkalingai pangobbina sibawa passalama'i mennang. Nalinrungiwi tungke tau iya pojiyéngngi Aléna, iyakiya tau majaé Napaccappui. Tuli maéloka pojiwi Puwangnge, tennapodo sininna mahlu'-Na napojiwi asenna Puwangnge untu' mannennungeng. Pojiwi Puwangnge! Eh nyawaku, pojiwi Puwangnge! Maéloka pojiwi Puwangnge gangka tuwoku sibawa makkélong untu' Allataalaku ri wettu engkaku mupa. Aja' Mumaddennuwang lao ri panguwasaé, lao ri tolinoé iya dé'é naulléi mappassalama. Rékko matéi mennang, lisui mennang ri tanaé; iyatoro essoé nalennye maneng rancanana. Masennangngi tau iya mattuwangngéngngi Puwang Allataalana, sibawa mappunnaiwi Allataalana Yakub selaku pattulunna. Aléna ritu pancajiwi langié sibawa linoé, tasi'é sibawa sininna lise'na; tette'i matinulu mannennungeng. Naéwaiwi ha'na sining tau ritenre'é, sibawa nawéréngngi inanré tau malupué. Napaleppe'i Puwangnge sining tahanangngé, sibawa naébbui tau butaé naulléi makkita. Napatokkongngi tau mabuwangngé, sibawa mamaséiwi tau iya malempué. Nalinrungiwi sining tau laingngé; Natulungngi sining jandaé sibawa ana' béué, iyakiya dé' napajajiwi rancanana tau majaé. Iyaro Puwangnge Arungngi untu' mannennungeng. Eh Sion, makuwasai Allataalamu lettu mannennungeng. Pojiwi Puwangnge! Pojiwi Puwangnge! Saba' makessingngi pojiwi Aléna, sibawa mappésennang untu' Aléna makkélongengngi pappojiyang! Napalisui matu Puwangnge Yérusalém; Napalisui matu sining tau ripalié. Napajjappai tau iya pettu paddennuwangngé, sibawa bebbe'i sining lona mennang. Napattentui jumellana wéttowingngé ri bitaraé, sibawa tungke-tungke Nawéréngngi aseng. Battowa tongeng sibawa masero Puwat -ta, dé' naribilang apanrén-Na. Napatokkongngi tau iya ritenre'é, iyakiya tau majaé Naggeppuwangngi ri tanaé. Puwélongenni pappoji-pojiyang Puwangnge, acculéngenni kacapi Allataalata. Aléna pallebba ellung ri langié; Napassadiyangengngi bosi linoé, sibawa naébbui tuwo wellaé ri bulu-bulué. Nawéréngngi inanré olokolo'é, sibawa ana' kao-kaoé iya mangobbi-obbié. Iya napojiyé Puwangnge tenniya anyarang iya mawatangngé; tenniyato pajuwang iya baranié. Masennangngi Puwangnge lao ri tau iya mateppe'é, lao ri tau iya tette'é maddennuwangiwi pammasé-Na. Pojiwi Puwangnge, éh Yérusalém! Pojiwi Allataalamu, éh Sion! Saba' Napakkasse'i pintu-pintu gerbammu, sibawa barakkakiwi pabbanuwamu. Najagaiwi daéramu kuwammengngi natette amang, sibawa pamessoriko sibawa gandong iya kaminang makessingngé. Nawéréngngi parénta linoé, sibawa masitta'i ripogau' ada-adan-Na. Napateppai saljué pada-pada ape'é, sibawa massiyamporeng cinoddo mattékké pada-pada awué. Napateppai bosi ése'é pada-pada batu-batué; dé'gaga tahang moloiwi keccé'na. Nainappa nasaba parénta-Na maccolo'i iyaro ése'é; Nasseppungengngi angingngé, namassolo tona uwai. Napalettu'i pasen-Na lao ri umma'-Na, attettekenna sibawa hukkun-Na lao ri umma napilé-Na. Dé' napogau'i makkuwaéro lao ri bangsa-bangsa laingngé, dé' naissengngi mennang hukkung-hukkun-Na. Pojiwi Puwangnge! Pojiwi Puwangnge! Pojiwi Puwangnge, éh silise surugaé! Sininna iya monroé ri onrong matanré, pojiwi Aléna! Pojiwi Aléna, éh sininna malaéka'na. pojiwi Aléna, éh sininna tentarana surugaé! Pojiwi Aléna, éh mata essoé sibawa kétengngé, pojiwi Aléna, éh sining wéttowing iya mappidé-pidé! Pojiwi Aléna, éh langi iya kaminang matanré, pojiwi Aléna, éh uwai ri yasé'na langié! Makessingeng manengngi mennang pojiwi asenna Puwangnge, saba' ripancaji manengngi nasaba parénta-Na. Napattentui onronna tungke-tungke, attetteken-Na takkennai untu' mannennungeng. Pojiwi Puwangnge, éh silise linoé, éh naga-naga tasi sibawa sininna dolangeng malowangngé; éh billa sibawa bosi ése, salju sibawa ellung, anginraja iya turusiyéngngi paréntana Puwangnge! Pojiwi Aléna, éh bulu-bulu sibawa sining bulu, pong buwa-buwaé sibawa sininna ale'é; sininna olokolo ripiyaraé sibawa olokolo maliyaé, sininna olokolo makkalolo'é sibawa manu'-manu'é! Pojiwi Aléna, éh arung-ngarungngé sibawa sininna bangsaé, sining arungngé sibawa sininna panguwasaé; sininna kalloloé sibawa ana'daraé, tomatowaé sibawa tau maloloé. Makessingeng manengngi mennang pojiwi asenna Puwangnge, saba' lebbi marajai asen-Na naiya sininna asengngé; arajan-Na naliwengngi langié sibawa linoé. Purani napéwatangi bangsa-Na, angkanna ripoji-poji ri umma'-Na, Israélié, umma Napojiyé. Pojiwi Puwangnge! Pojiwi Puwangnge! Puwélongenni élong baru Puwangnge, pojiwi Aléna ri laleng assipulungenna umma'-Na! Ariyo-riyono, éh Israélié nasaba Pappancajimmui; arennuno, éh pabbanuwana Sion nasaba Arummui! Pojiwi asen-Na sibawa séré-séré, pojiwi Aléna sibawa kacapi nenniya rebana! Naéloriwi Puwangnge umma'-Na; Nawéréngngi apakalang tau iya mariyawa atié. Leppessanni umma'na Allataala mariyo-riyo nasaba ataromporen-Na, sibawa makkélong marennu puppu benni. Leppessanni mennang pojiwi Allataala sibawa sadda maloppo, nanakkatenning towi peddang pura asaé, untu' mpale'i bangsa-bangsaé, sibawa hukkungngi suku-suku bangsaé; untu' balenggui arung-ngarungngé, sibawa rantéi sining panguwasana mennang; untu' hukkungngi bangsa-bangsaé nasaba paréntana Allataala. Iyanaro apakalanna umma iya Namaséiyé. Pojiwi Puwangnge! Pojiwi Puwangnge! Pojiwi Allataala ri laleng Bola-Na! Pojiwi awatangen-Na ri bitaraé! Pojiwi Aléna nasaba pangkauken-Na iya baranié. Pojiwi Aléna nasaba arajan-Na iya battowaé. Pojiwi Aléna sibawa oni tarompé, pojiwi Aléna sibawa gambusu sibawa kacapi! Pojiwi Aléna sibawa rebana nenniya séré-séré, pojiwi Aléna sibawa kacapi nenniya suling. Pojiwi Aléna sibawa ceracap iya mencingngé, pojiwi Aléna sibawa canang iya mencingngé. Sitinajai sininna mahlu' tuwoé pojiwi Puwangnge. Pojiwi Puwangnge! 1 1 1 Iyanaé pangaja-pangaja polé ri Salomo ana' worowanéna Daud, arunna Israélié. Akkattana iyanaritu untu' tulungngi tauwé pékkugi missengngi mancaji mapanré, sibawa missengngi atorenna atuwongngé enrengngé mulléi pahangngi warékkada-warékkada iya tampu'é bettuwang iya malamungngé. Iyaé sining pangajaé nappagguruwangngi pékkugi tauwé naulléi tuwo sibawa mapanré, malempu, adélé sibawa tongeng. Tau iya dé'é namappangalamang napaggurui angkanna mappunnai pikkirang iya matarengngé, sibawa tau maloloé napaggurui mancaji tau iya maccaé sibawa naulléi mappikkiri secara tau battowa. Nasibawang iyaé sining pangajaé tattamba toni matu pangissengenna tau mapanré, sibawa tau iya engkaénna aggurunna lolongengngi matu pappimping. Nanallalengiwi naulléi mennang wellungiwi bettuwanna iya tassubbué ri laleng pasengngé sibawa pahangngi ada-adanna tau mapanré enrengngé parakara-parakara iya napangoloé mennang. Untu' lolongengngi pangissengeng tongengngé, lebbi riyolo harusu'i tauwé mappunnai perasaang mappakalebbi sibawa métau lao ri Puwangnge. Tau madonggoé dé' naangke'i pangissengengngé sibawa dé' namaélo ripagguru. Puriyatiwi aga iya napowadaé ambo' indo'mu lao ri iko, ana'ku, saba' sining pappagguruwanna mennang natambaiwi akkaleng makessimmu pada-pada bélo-bélo ulué sibawa ranté pagelloriyéngngi tappamu. Rékko napalécéko tau madosaé, ana'ku, aja' muwaccowériwi pappalécéna mennang. Ebara'na makkedai mennang, “Ayo, laono mai tasappa tau sibawa taborongngi. Untu' assennas-sennangeng, laono mai tagasai tau iya dé'é napasala. Tuwoi mennang makkekkuwangngé masennang sibawa madising, iyakiya matti mancajiwi matu pada-pada tau iya sitengnga maté. Taalai barab-baranna mennang iya mangke'é, kuwammengngi napenno bolata sibawa barang rampasa. Accowéno mai! Ritawa ratapi wassélé énnaunna!” Aja' muwaccowé sibawa sining tau makkuwaéro, ana'ku! Abélaiwi mennang. Dé' naulléi mennang monro mammekko rékko dé'pa napogau'i majaé. Macinnai mennang mapperi-peri pauno. Sedangkang muwi manu'-manu'é dé' namaélo muttama ri laleng jala iya ripallebba'é ri yolona matanna, iyakiya iyaro sining tau majaé mala pasangngi siyo untu' aléna muto – siyo iya cilakaéngngi matu mennang. Mémeng, tau iya sappaé dallé sibawa makkégunang ateddekeng nawajai matu sibawa nyawana muto. Engkalingai! Mangobbii pangissengengngé risining lalengngé sibawa gora-gora risining lapangangngé! Mangobbii ri pintu-pintu gerbangngé sibawa ri onrong-ngonrong iya marowaé: “Eh sining tau donggoé! Gangka kégiko maélo tette makkuwaro? Uppanna narapi wettunna mappésauko pakariyawai pangissengengngé sibawa sampéyangngi pappagguruwangngé? Engkalingaka rékko uwamparekko, naupannessangekko matu lise atimmu sibawa upagguruwakko pangissengekku. Purano uwobbi, iyakiya massampéyakko sibawa dé' mumaélo bati-batiwi. Sininna pangajaku dé' mubati-batiwi sibawa pakkamparekku musampéyangngi. Rimakkuwannanaro, rékko macilakako, ucawa-cawaiko matu. Rékko métauko, uwéllé-kéllé'ko matu. Ya, uwéllé-kéllé'ko matu rékko manennekko sibawa manrasa-rasa nasaba nageppako abala iya polé pada-pada anginrajaé. Iyaro wettué muwobbika matu, iyakiya dé' matu umetté. Musappaka matu kégi-kégi iyakiya dé' matu muruntu'ka. Pada-padako tau iya dé'é naengka napojiwi lolongeng pangissengeng, sibawa bata-bata turusiwi Puwangnge. Dé' naengka mumaélo tarimai pangaja-pangajaku iyaré'ga puriyatiwi pakkampareng-pakkamparekku. Rimakkuwannanaro, mupéneddingiwi matu addimonrinna sining pangkaukemmu sibawa sining rancanamu iya majaé. Tau dé'é namappangalamang matéi matu nasaba dé' najampangika, sibawa tau donggoé ancuru'i matu nasaba dé' nabati-batika. Iyakiya tau iya méngkalingaékka ripiyarai matu. Tuwoi sibawa amang enrengngé dé' naparellu métau.” Tarimani sining pappagguruwakku, ana'ku, sibawa tuli éngngerangngi sining pangajaku lao ri iko. Puriyatiwi aga iya mapanré sibawa akkuragano pahangngi. Oh ana'ku, akkuragano untu' mappunnai pikkirang iya matarengngé sibawa éllauno pappéjeppu. Sappai iyaro pada-pada sappaé ulaweng, sibawa lellungngi iyaro pada-pada lellungngé waramparang iya tallemme'é. Nanallalengiwi muwissengngi matu aga bettuwanna métau lao ri Puwangnge sibawa lolongekko matu pangissengeng passalenna Allataala. Puwangnge ritu mabbéré pangissengeng; polé ri Alénai ritu tolinoé lolongeng pangissengeng sibawa pappéjeppu. Lao ri tau iya malempué sibawa dé'é cellana, riwéréngngi pattulung sibawa allinrungeng. Najagaiwi Puwangnge sining tau iya adélé'é, sibawa linrungiwi mennang iya pojiyéngngi Aléna. Rékko muturusika, ana'ku, muwissengngi matu aga iya adélé'é, malempu sibawa makessing. Muwisseng towi matu pékkugi carana harusu tuwo. Mancaji mapanréko matu, sibawa pangissengemmu napésennangi matu atimmu. Pappéjeppu sibawa amaccammu linrungiko matu, sibawa lawa-lawaiko maccowériwi cara atuwong iya dé'é namakessing, sibawa pabélai towi alému polé risining tau iya mattému majaé. Dé' mennang namaélo maccowériwi cara atuwong iya makessingngé; laloi mennang ri laleng iya mapettangngé sibawa penno dosa. Lolongengngi mennang asennangeng polé ri pangkaukenna iya majaé. Macéko-cékoi mennang sibawa cara atuwonna sérongngi. Iko, ana'ku, weddikko sampéyangngi pappalécéna makkunrai mabettaé iya makkuragaé taré'ko sibawa ada-adanna iya macenningngé. Iyaro makkunraié dé' namatinulu lao ri lakkainna sibawa nallupaini jancinna lao ri Allataala. Rékko laoko ri bolana bettuwanna mattujuko ri amaténgngé. Lao kuwaro pada muwi lao ri linona tau maté. Tau iya laowé ri aléna dé' naengka iya lisué ri laleng iya mattujué ri atuwongngé. Rimakkuwannanaro, ana'ku, accowériwi baténa tau makessingngé, sibawa tuwo situru élona Allataala. Saba' tau iya tuwoé situru élona Allataala, iyanaritu tau iya malempué atinna, mennang ritu iya monroé matu ri wanuwa iya najjanciyangngé Puwangnge. Iyakiya tau majaé sibawa madosaé riyaggenrungengngi matu massu ri Allataala polé ri wanuwaéro, pada-pada wellaé ribébbu polé ri tanaé. Aja' muwallupaiwi aga iya puraé uwappagguruwang lao ri iko, ana'ku. Tuli éngngerangngi paréntaku, kuwammengngi namalampé umuru'mu sibawa saléwangeng atuwommu. Sitinajako tette mateppe sibawa matinulu lao ri Allataala sibawa pada-padammu. Engngerangngi iyaro sibawa taroi ri laleng atimmu, kuwammengngi naripojiko sibawa riyangke ri Allataala sibawa tolinoé. Ateppe'no lao ri Puwangnge sibawa sukku atimmu, sibawa aja' muwattuwangngi pappéjeppummu muto. Aréngngerakko ri Puwangnge ri laleng sininna iya mupogau'é, nanajellokekko matu cara atuwong iya makessingngé. Aja' muwasengngi alému lebbi macca naiya sitongennaé; turusiwi Puwangnge sibawa abélaiwi majaé. Iyaro pangkaukemmu mancajiwi matu pada-pada pabburaé ri alému iya pajjappaéngngi watakkalému sibawa pétakkariwi batémmu. Pakalebbii Puwangnge sibawa makkasuwiyangeng lao ri Aléna iya kaminang makessingngé polé ri sininna waramparammu sibawa wassélé tanamu, napenno matu gandong sining lappomu, sibawa maonai matu uwai anggoro'mu angkanna dé' nagenne onrongngé untu' taroi. Rékko naajara'ko Puwangnge, ana'ku, tarimai iyaro selaku séuwa papparéngngerang, sibawa aja' namasumpe atimmu lao ri pappaggurwan-Naro. Naajara' Puwangnge tau iya napojiyé, pada-pada séddié ambo' majara'i ana' iya naéloriyé. Maupe'i tau iya mapanré sibawa lolongeng pappéjeppu. Amaupekenna lebbi battowai naiya nalolongengngé polé ri péra'é, sibawa lebbi mangke'i naiya ulawengngé. Lebbi mangke'i pangissengengngé naiya batu paramataé; sininna iya munawa-nawaiyé dé' naulléi padangngi. Nawérékko pangissengengngé umuru malampé, asugireng sibawa alebbireng. Naébbui masennang atuwommu pangissengengngé sibawa saléwangeng. Tau iya makkatenning masse'é ri pangissengengngé péneddingiwi matu atuwong iya tongengngé sibawa masennang. Nasibawang pangissengengngé, napancajiwi Puwangnge linoé; nasibawang akkalen-Na Napallebba'i langié ri onron-Na. Nasibawang pangissengen-Na Naébbui mata-mata uwai ri laleng tanaé mareppa sibawa passolo'i uwaina enrenggné ellungngé ri langié tiri'i uwaina ri linoé. Rimakkuwannanaro, akkatenninno ri pangissengengngé sibawa ri attimbangeng makessingngé, ana'ku! Aja' sises-siseng muleppessangngi, naripiyara matu atuwommu – magello sibawa mappésennang. Joppako matu sibawa amang, sibawa dé' mutabbuttu matu. Laoko matu matinro temmappénedding métau, sibawa memme'ko matinro puppu benni. Dé' naparelluko métau lao ri abala iya polé tenrisenna-senna pada-pada anginrajaé, sibawa mappo'i sining tau majaé. Najagaiko matu Puwangnge. Dé' matu Naleppessakko tappasolla ri laleng kalebbongngé. Rékko mappunnaiko amampung untu' pogau'i makessingngé lao ri tau iya mapparelluwangngéngngi akessingemmu, aja' musampéyangngi untu' pogau'i gau'éro. Aja' musuroi pada-padammu mattajeng narapi baja, rékko iyato wettuéwé mulléi tulungngi. Aja' murancanai séuwa iya parogiyéngngi pada-padammu iya monroé ri seddému sibawa matepperiko. Aja' muwassasa temmakkésaba' sibawa séddié tau iya dé'é naengka napogau'i majaé lao ri iko. Aja' mumangémpuru lao ri tau iya makkégunangngé ateddekeng, sibawa aja' muturu'i ampé-ampéna mennang. Saba', nacéccé Puwangnge tau iya pogau'éngngi majaé, iyakiya maréppé'i sibawa tau iya malempué atuwonna. Natanroi Puwangnge bolana tau majaé, iyakiya nabarakkakiwi bolana tau iya matinulué ri Aléna. Nacéccé Puwangnge tau iya matanré atié, iyakiya nabarakkakiwi tau iya mariyawa atié. Tattamba mabaui matu asenna tau mapanré, na tau madonggoé pédé ricellai. Eh ana'-ana', éngkalingai pangajana ambo'mu! Puriyatiwi iyaro, namumancaji matu mapanré. Iya upagguruwangngékkoé makessing, rimakkuwannanaro aja' muwangga énténgngi. Wettukku baiccu mupa, ana' tungke'na tomatowakku, ripagguruka ri ambo'ku. Makkedai, “Engngerangngi sining pangajaku, aja' sises-siseng muwallupaiwi. Pajoppai sining panunju'ku, kuwammengngi namasennang atuwommu. Ancajino mapanré sibawa macca! Tuli éngngerangngi sining pangajaku sibawa aja' mubuwangngi.” Angke'i pangissengengngé, nanalinrungiko matu pangissengengngé; éloriwi nanajagaiko matu kuwammengngi mutette amang. Passaleng kaminang pentingngé iya harusu'é lebbi riyolo mupogau' iyanaritu makkuragako mancaji mapanré. Muwi aga mulellung, iya kaminang mapongngé iyanaritu akkuragano untu' lolongeng pappéjeppu. Pakalebbii pangissengengngé, nanapakatanréko matu. Kaddaowi, nanapapoléngekko matu alebbireng. Nawérékko matu bunga-bunga iya magelloé untu' mancaji passigera'mu. Engkalingaka, ana'ku! Puriyatiwi madécéd-décéng sining pangajaku, namalampé matu umuru'mu. Purano upagguruwang pangissengengngé sibawa mappaitangngi cara atuwong iya tongengngé. Rékko tuwoko makkuwaro, dé' matu mutassangkalangeng wettummu joppa, sibawa dé' matu mutabbuttu wettummu lari. Tuli éngngerangngi pappagguruwang iya puraé mutarima polé ri iyya. Jagaiwi iyaro madécéd-décéng, saba' nasibawang iyaro pappagguruwangngé mallolongengngi matu atuwommu. Aja' muwaccowériwi cara atuwonna tau majaé, sibawa aja' muturui pangkaukenna mennang. Aja' mupuriyatiwi mennang. Abélaiwi mennang sibawa joppano matteru! Tau majaé dé' naulléi matinro ri wettu dé'napa napogau'i iya dé'é namakessing. Dé' nacakkaruddu mennang ri wettu dé'napa nacilakaiwi tau laingngé. Jaé sibawa abeccokengngé iyanaritu pada-padai inanré sibawa énungengngé lao ri mennang. Puriyatiwi ada-adakku, ana'ku! Engkalingai sining pangajaku. Aja' mubuwangngi, sangadinna tuli taroi ri laleng atimmu. Tau iya pahangngéngngi tuwoi matu sibawa mancaji madising. Jagaiwi atimmu madécéd-décéng, saba' atimmu pattentué lalenna atuwommu. Aja' sises-siseng mupowadai séuwaé iya dé'é natongeng. Abélaiwi ada-ada bellé sibawa ada-ada iya makkattaé untu' papusai tauwé. Sitinajai rupammu mattapparengngi alempurenna atimmu; dé' naparelluko samanna engka buwa nalinrungi daung. Pikkiri'i madécéd-décéng ri wettu dé'napa mupogau'i, namumallolongeng matu ri laleng sininna usahamu. Abélaiwi majaé, nenniya tuwono sibawa malempu. Aja' sises-siseng muléssé polé ri laleng iya tongengngé. Ana'ku, éngkalingaka! Puriyatiwi apanrékku sibawa pappéjeppu iya upagguruwangngékko, kuwammengngi muwissengngi pékkugiko harusu tiwii alému sibawa mabbicara selaku tau iya engkaé pangissengenna. Makkunrai bettaé, siccenning témunna cani'é sibawa ada-adanna nataré' atié, iyakiya rékko labe manenni, iya monroé banna apaireng sibawa anrasa-rasang. Nassarénréngekko nonno ri linona tau maté; laleng iya naolaé mattujui ri amaténgngé. Dé' natette ri laleng iya mattujué ri atuwongngé; tennaissengngi lésséni polé ri lalengngéro. Rimakkuwannanaro, ana'-ana', éngkalingai ada-adakku sibawa aja' mujampaléllériwi. Abélaiwi makkunrai iya makkuwaéro! Mala aja' muwaddeppériwi bolana. Rékko siwollompollokko sibawa makkunrai makkuwaéro, ateddéngekko matu alebbiremmu sibawa risitta'i matu nyawamu ri wettu malolomu ri tau iya dé'é naissengngi paressé babuwaé. Cappui matu asugiremmu nanré tau laingngé, sibawa wassélé turuppuse'mu mancajiwi appunnangenna tau iya dé'é muwissengngi. Paccappurenna maddarékéko matu, rékko cappuni watakkalému nanré lasa. Nainappako makkeda matu, “Ah, magi ucéccéi pangajaé? Magi nadé' umaélo riyampareng? Dé' umaélo méngkalingai guru-gurukku sibawa dé' umaélo turusiwi mennang. Padahal sempé'na ri matanna masaraka'é.” Rimakkuwannanaro, atinuluno lao ri bainému muto sibawa wéréngngi pappojimmu lao ri aléna bawang. Dé'gaga akkégunana untu' alému sappa anyamengeng ri tau iya tenniyaé bainému. Iyaro anyamengengngé banna untu' iko sibawa bainému, tenniya sibawa tau laingngé. Rimakkuwannanaro, sitinajako masennang sibawa bainému muto; sappano asennangeng ri ana'dara iya puraé mupéneddingi – ana'dara gello namapecci pada-pada jongaé. Leppessanni agelloreng tubunna tuli mébbuko jangej-jangeng sibawa pappojinna pamabo'ko. Aga akkégunanna mannapessu lao ri makkunrai laingngé, ana'ku? Untu' aga lusérengngi makkunrai mabettaé? Naitai Puwangnge sini-sininnaé iya napogau'é tolinoé. Kégi-kégi lao tolinoé Puwangnge jagaiwi. Dosana tau majaé padai siyo-siyo iya siyoéngngi aléna tauwéro. Matéi nasaba dé' natarima pangaja. Adonggonna tiwii lao ri ancurukengngé. Ana'ku, naullé engka naengka muwajjanci lao riséddié tau untu' tanggungngi inrenna. Naweddissa jaji nala siyo polé ri ada-adanna sibawa tajjebba polé ri jancimmu muto. Rékko tongengngi makkuwaro, ana'ku, engkano ri laleng akuwasanna tauwéro. Iyakiya iyanaé carana mulléi leppe: asitta'no lao ri tauwéro; éllauwi sibawa masero kuwammengngi namaélo paleppe'ko. Aja' mulao matinro riyolo, sibawa aja' muwappésau. Paleppe'i alému polé ri siyo-siyoéro pada-pada manu'-manu'é iyaré'ga jongaé paleppe'i aléna polé ri paddengngengngé. Tau iya makuttué harusu'i pénessaiwi cara atuwonna béré-béré sibawa magguru polé ri aléna. Iya manenna dé' nappunnai pamimping, dé' nappunnai panguwasa iyaré'ga panganrowang, iyakiya ri wettu éngngalanna mupa paddeppungengngi mennang bokong untu' wettu aperisengngé. Gangka kégi iyaro tau kuttué maélo matinro? Uppannapa namaélo moto? Tudangngi malleppe lima untu' mappésau, sibawa makkedai, “Ah, matinroka cinampe, cakkarudduka.” Iyakiya ri wettu matinrona, nakennai akurangeng sibawa akasiyasing iya polé pada-pada parampo massenjataé. Tau majaé sibawa makurang ajara'é mabbelléi kégi-kégi. Macculé matai sibawa mébbu kodé untu' pabengnguwang. Pikkiranna iya makebbongngé pennoi sibawa rancana maja sibawa paompo assasang kégi-kégi. Iya manennaro nassabariwi matu nakennai acilakang aléna tennasenna-senna, naancuru sisenna. Ana'ku, pogau'i aga napparéntang ambo'mu, sibawa aja' muwallupaiwi pangaja-pangajana indo'mu. Tuli éngngerangngi ada-adanna mennang sibawa taroi iyaro ri laleng atimmu. Sining pappagguruwanna mennang napimpikko matu ri laleng allalengengngé, najagaiko ri wennié, sibawa mabbéréi panunju ri iko wettummu moto. Panunju-panunju'na tomatowammu padai lampu iya macakkaé; pakkamparenna mennang najellokekko cara atuwong iya makessingngé. Nanallalengiwi ripabélaiko polé risining makkunrai bettaé, sibawa polé ri pappalécé-pappalécé mamosona bainéna tau laingngé. Aja' murigoda ri agellorenna mennang, aja' mutattaré ri matanna mennang iya mappalécé. Cakkuribangngé weddingngi riséwa singngangke sipenné inanré, iyakiya malaweng sibawa bainéna tau laingngé harusu'i riwaja sibawa nyawa. Naulléga tauwé riwa api tennanréi wajunna? Naulléga tauwé léjja'i bara apié tennanréi ajéna? Iyaro pada-padai bahayana lusérengngi bainéna tau laingngé. Niga pogau'i dé' matu naleppe polé ri pahukkungengngé. Rékko ménnauwi tauwé inanré, namuni nasaba malupui, ripakatunai matu. Sibawa rékko ritikkengngi harusu'i nawaja paimeng leppi wékkapitu; untu' iyaro harusu'i ateddéngeng sininna waramparanna. Iyakiya pékkugiwi sibawa worowané iya malawengngé? Nasolangiwi aléna muto! Madonggo senna'i! Risissai matu sibawa riyéllé-kéllé. Majai matu asenna untu' mannennungeng. Saba', nasibawang pangkaukengngéro lakkainna iyaro makkunraié mancaji mangémpurui, angkanna malluwa-luwa caina. Narékko makkabale'i, dé' matu nappunnai paressé babuwa. Dé' nawedding ripalécé sibawa dowi; muwi hadiya singngéga aga dé'to naulléi pasoroi caina. Engngerangngi ada-adakku, ana'ku, sibawa aja' muwallupaiwi aga uparéntakko. Accowériwi sining pangajaku kuwammengngi mutuwo masennang. Accowériwi sining pappagguruwakku madécéd-décéng pada-pada mujagainna lise matammu. Tuli éngngerangngi iyaro sining pappagguruwakku, sibawa taroi ri laleng atimmu. Angga'i pangissengengngé selaku saudaramu sibawa pangissengengngé selaku sahaba maréppé'mu. Napabélaiko matu pangissengengngé polé ri makkunrai bettaé, sibawa makkunrai iya pataré'é sibawa ada-ada iya macenningngé. Séuwa esso makkitaka polé ri tellongeng bolaku. Nauwitai maéga kallolo iya manyilaé mupa; iyakiya banna upénessai séddi tau iya madonggoé ri yelle'na. Nakaddaowi iyaro kalloloé sibawa nabaui. Temmasiri makkeda, “Iyaé essoé harusu'ka mpajai niya'ku, na untu' iyaro purana makkasuwiyangeng akkarobangeng. Iyanaro saba'na umassu untu' sappako, kuwammengngi muwanré ri bolaku. Makkekkuwangngé uruntu'ko! Onrong atinrokku purani utongko sibawa sepréi maddupa-rupang balona polé ri Maséré, sibawa purani upabauri sibawa wangi-wangiyang mur, cénrana sibawa aju cenning. Makkekkuwangngé, laono mai tasiraga-raga sibawa péneddingiwi accinta-cintangngé puppu benni. Dé'i gaga lakkaikku ri bolaé, mattengngangngi lao mabéla. Tiwii maéga dowi, sibawa dé' matu nalisu ri laleng duwa minggu.” Makkuwaniro iyaro makkunraié palécéi iyaro kalloloé sibawa pappalécé-pappalécé iya pataré'é angkanna rigoda. Tennappikkiri naccowérini iyaro makkunraié pada-pada sapingngé rirénréng lao ri aggérékengngé sibawa pada-pada tau ritahangngé iya ritiwié untu' tarimai pahukkungeng iya ripassadiyaé untu' tau donggoé; dé'na namaitta nabettui matu ana' pana atinna. Pada-pada manu'-manu' luttué mattuju ri siyoé, makkuwaniro iyaro kalloloé dé' namaingekiwi makkedaé riyancangngi nyawana. Rimakkuwannanaro, ana'-ana', éngkalingaka. Puriyatiwi sining pangajaku. Aja' muleppessangngi makkunrai pada-padaéro taré'i atimmu; aja' mulao sappai, saba' purani naancuru atuwonna maéga worowané. Tenribilang égana iya binasaé nasaba aléna. Lao ri bolana bettuwanna mala laleng maponco mattuju ri amaténgngé. Engkalingai! Mangobbi-obbii apanréngngé, naakkai saddanna pangissengengngé. Tettongngi ri bulu-bulué ri wiring laleng, sibawa ri pékka-pékkana. Ri pintu gerbangngé, ri laleng muttama'é ri kotaé, kuwaniro riyéngkalinga saddanna. “Eh, rupa tauwé, lao ri iko mangobbika; tungke tuwoé ri linoé, puriyatiwi paréllaukku! Iko dé'éppa pangalamammu, agguruko mappunnai pikkirang iya matarengngé; iko iya madonggoé, agguruno mancaji mainge. Puriyatiwi ada-adakku, nasaba coco'i sibawa mangke. Iya upowadaé, tongeng maneng, saba' ucéccé bellé. Ada-adakku malempu maneng, dé' muwi séddi malléko-léko iyaré'ga sala. Untu' tau maccaé, tongengngi ada-adakku, untu' tau mapanré, coco'i ada-adakku. Angke'i pangajaku pakacauriwi péra' tuléngngé, pentingkangngi pangissengengngé pakacauriwi ulaweng tuléngngé. Iyya'na ritu pangissengengngé, lebbi mangke'i naiya intangngé; dé' nawedding ripasibanding sibawa muwi aga iya munawa-nawaiyé. Iyya'na ritu pangissengengngé; ri aléku engka pappéjeppu, apanréng sibawa pangissengeng. Pakalebbii Puwangnge bettuwanna céccéi jaé; dé' upojiwi atempongngé sibawa abangkakengngé. Ucéccé kédo-kédo majaé sibawa ada-ada bellé. Iyya'na ritu mabbéré wéré. Sibawa iyya'to ritu pakajajiyangngi. Maccaka sibawa mawatatto. Ubantuwi sining arungngé pajoppai apparéntangngé, utulungngi sining panguwasaé patettongngi adélé'é. Nasaba appalakku, sining tomarajaé sibawa sining arungngé mapparéntai sibawa pajoppai adélékengngé. Uwamaséiwi mennang iya pojiyékka; iya sappaékka, naruntu'ka matu. Ri aléku tassadiya asugireng makkuwatoro alebbireng sibawa adécéngeng. Iya mulolongengngé polé ri iyya napakacauri ulaweng tuléngngé; lebbi mangke'i naiya péra' tuléngngé. Uwaccowériwi laleng adélékengngé, majjongkaka ri laleng alempurengngé. Tau iya mamaséiyékka, upancajiwi sugi; upennoiwi bolana sibawa waramparang. Napancajika Puwangnge selaku iya mammulangngé, iyya'na ritu wassélé ébbu-Na iya bunge'é ri wettu riyolo senna. Ritappaka sipongenna pammulang wettué, ri pammulanna, ri wettu dé'napa Naripancaji linoé. Jajika ri wettu dé'napa Naripancaji dolangeng malowangngé, ri wettu dé'napa naompo mata-mata uwai. Jajika ri wettu dé'napa naripatettong sining bulué, ri wettu dé'napa Naripatettong bulu-bulué, ri wettu dé'napa Napancajiwi Puwangnge linoé sibawa sining padanna, mala ri wettu dé'napa napancajiwi tékké tana mammulangngé. Usabbing wettunna ripallebba langié, sibawa bitaraé ri paggetteng ri yasé'na tasi'é, wettunna nataro Puwangnge ellungngé ri langié, sibawa timpa'i bubbu-bubbuna dolangengngé, wettunna Naparéntang uwai tasi'é kuwammengngi aja' naliwengngi pakkaséséng-pakkasésénna. Engka tokka hadéré kuwaro wettunna Napalénne pallanggana linoé. Engkaka ri benrén-Na selaku ana' napojin-Na, esso-esso iyya ritu asennangen-Na; tuli macculé-culéka ri yolo-Na. Massennas-sennangngi ri tompo'na lino-Na, sibawa marasa masennang ri yelle'na tolinoé. Rimakkuwannanaro, éngkalingaka, éh kallolo! Turusiwi panunju'ku, namumasennang matu. Tarimai pasengngé sibawa ancajino mapanré, aja' muwangga énténgngi. Masennangngi tau iya méngkalingaékka iya tungke esso-essoé tudang mattajeng ri sumpang bolaku, sibawa majjaga-jaga ri gerbang onronna. Niga lolongekka, lolongengngi atuwong, ri alénai naélori Puwangnge. Niga dé' nalolongekka, naparogiwi aléna; tau iya céccéékka, napojiwi amaténgngé.” Purani napatettong bolana pangissengengngé, sibawa patettongngi iya pitu allirinna. Purani maggéré olokolo untu' pésta, mébbu uwai anggoro sibawa passadiya inanré. Nasuroni pattumani-pattumaninna makkunraié untu' lao mangobbi polé ri onrong-ngonrong matanré ri kotaé, “Niga dé' pangalamanna, laono mai!” Lao ri iya dé'é akkalenna, makkedai pangissengengngé, “Laono mai péneddingiwi inanréku sibawa kanyaméi anggoro iya puraé uwébbu. Salaiwi adonggongngé, kuwammengngi mutuwo masennang. Accowériwi lalenna tau mapanré.” Rékko tau iya dé'é namaélo ripagguru mujellokengngi asalanna, nacawa-cawaiko matu. Rékko muwacairiwi tau majaé, narodda-roddaiko matu. Aja' mucellai tau iya dé'é namaélo ripagguru, nacéccéko matu. Iyakiya rékko tau mapanré mujellokengngi asalanna, naangke'ko matu. Rékko mupangajariwi tau mapanré, mancajiwi matu lebbi mapanré. Sibawa rékko tau iya mapatoé lao ri Allataala mupaggurui, tattambai matu pangissengenna. Untu' mancaji mapanré, bunge-bunge'na harusu'i tauwé mappunnai perasaang mappakalebbi sibawa métau lao ri Puwangnge. Rékko muwissengngi Iya Pommapaccingngé, lolongekko matu pappéjeppu. Nawérékko matu pangissengengngé umuru malampé. Rékko muwappunnaiwi pangissengengngé, iko muto maupe. Iyakiya rékko musampéyangngi pangissengengngé, iko muto naparogi. Adonggongngé iyanaritu pada-padai makkunrai macapilaé iya dé'é pangalamanna sibawa dé' naissengngi masiri. Onronna iyanaritu ri sumpang bolana iyaré'ga ri pintu gerbanna kotaé. Polé kuwaro mangobbii lao ri tau iya laloé. Tau iya malempu atié napalécéi, “Léppakki, éh iko iya dé'éppa nappangalamang!” Sibawa lao ri tau iya dé'é akkalenna makkedai, “Uwai riyénnauwé macenning rasana, sibawa lebbi malunra'i manré massubbu-subbu.” Mennang iya mancajiyé anréna dé' naissengngi makkedaé tau iya célléngiyéngngi nalolongengngi ajjalenna kuwaro; sibawa mennang iya muttama'énna ri laleng bolana, makkekkuwangngé engkani ri laleng linona tau maté. Iyanaé sining pasenna Salomo: Ana' iya mapanré iyanaritu riyabbangkakengngi ri ambo'na; ana' iya madonggoé nasussai atinna indo'na. Asugireng iya rilolongengngé sibawa macéko-céko dé' nabbéré saro; sibalé'na, alempurengngé mappassalama'i matu. Dé' naleppessangngi Puwangnge tau makessingngé alupureng; iyakiya Nalawa-lawaiwi tau majaé kuwammengngi iyaro tauwé dé' nalolongengngi iya nacinnaiyé. Tau makuttué mancaji kasiyasiwi matu; tau iya mapatoé mancaji sugii matu. Tau iya mapanré paddeppungengngi éngngalanna ri wettunna, iyakiya tau iya matinroé bawang ri wettu éngngalang, papoléi asirireng ri aléna. Tau makessingngé lolongengngi barakka. Tassubbui apéddarangngé ri munrinna ada-adanna tau majaé. Passénge lao ri tau makessingngé maddupai barakka, iyakiya tau majaé masitta'i riyallupai. Tau iya maccaé, napoji tarima pangaja; tau iya madonggoé bicaranna pusai matu. Tau malempué, amangngi atuwonna; tau iya pabengnguwangngé kaissengengngi matu. Niga subbui atongengengngé, paompoi asussang; niga cellai sibawa mannessa-nessa, makkuragai asaléwangeng. Warékkadanna tau makessingngé naébbui atuwongngé masennang, iyakiya ri munrinna ada-adanna tau majaé tassubbui ati iya majaé. Paccéccé paompoi assasang; pappoji pammasé naddampengengngi sininna asalangngé. Tau iya matarengngé pikkiranna napowadai ada-ada mapanré; tau madonggoé parellui riyunru. Tau mapanré paddeppungengngi pangissengeng; rékko mabbicarai tau madonggoé, naméngngi acilakangngé. Asugirengngé nalinrungiwi tosugié, akasiyasingngé naancuru'i tau kasiyasié. Rékko pogau'i makessingngé, sarona iyanaritu tuwo masennang; rékko pogau'i dosa, addimonrinna lebbi maéga dosa. Niga turusiwi pakkamparengngé tuwoi matu saléwangeng, niga bata-bata mangakuiwi asalanna engkai ri laleng bahayaé. Tau iya subbué paccéccé iyanaritu pabbelléng. Tau iya passanraé pétenna iyanaritu madongo'i. Pédé maéga bicara, pédé maégato akkulléna madosa; tau iya mullééngngi makuwasaiwi lilana iyanaritu mapanréi. Ada-adanna tau iya makessingngé padai péra' tuléngngé; buwa pikkiranna tau majaé dé' bettuwanna. Ada-adanna tau iya makessingngé, sinrupai barakka'é untu' maéga tau; adonggonna tau madonggoé naunoi aléna. Nasaba barakka'na Puwangnge bawang namancaji sugi tauwé; majjama marejjingngé dé' naulléi tambaiwi waramparangngé. Tau madonggoé napoji pogau' asalang; tau mapanré napoji sappa pangissengeng. Tau malempué nalolongengngi aga iya nacinnaiyé; tau majaé nalolongengngi aga iya kaminang naétauriyé. Rékko nappo'i anginraja, lennye'ni tau majaé; iyakiya tau malempué tette'i masse matteru. Aja' musuroi tau makuttué, banna mappakérék-kéréng bawang, pada-pada cukkaé napangilui isié iyaré'ga rumpué napesséi mataé. Pakalebbii Puwangnge, namutuwo matu maitta; tau majaé matéi ri wettu dé'napa narapii wettunna. Paddennuwanna tau makessingngé pancajiwi masennang; paddennuwanna tau majaé kosong simata. Nalinrungi Puwangnge tau malempué, iyakiya napabbinasai tau iya pogau'éngngi majaé. Tau malempué tuwoi matu amang nasaléwangeng; tau majaé dé' naonro matu ri tana manaé. Tau malempué napowadai ada-ada mapanré; tau majaé ripammekkoi matu témunna. Ada-adanna tau malempué pésennangiwi atié; ada-adanna tau majaé tuli papeddiriwi. Nacéccé Puwangnge tau iya paké timbangeng iya macéko-cékoé iyakiya masennangngi sibawa tau iya paké timbangeng iya teppa'é. Tau matempoé ripakatunai matu; tau iya pakariyawaéngngi atinna iyanaritu mapanréi. Tau makessingngé rirénréngngi ri alempurenna; tau iya pojiyéngngi mabbellé riancuru'i ri belléna. Rékko moloiwi amaténg, dé' bettuwanna waramparangngé; salama'i atuwommu rékko malempu atiko. Laleng atuwonna tau makessingngé riparatai ri alempurenna, iyakiya tau majaé natiwii aléna lao ri ancurukengngé. Tau malempué salama'i nasaba alempurenna atinna; tau iya dé'é nawedding riyatepperi, tappasollai ri angowanna. Rékko matéi tau majaé, maté towi paddennuwanna; maddennuwang ri awatangeng ri alé dé' bettuwanna. Tau mateppe'é leppe'i polé ri asukkarakengngé; tau majaé lolongengngi sangkalangeng. Bicaranna tau majaé mappabbinasai; pangissengenna tau makessingngé mappassalama'i. Mattappai kotaé rékko tau malempué lolongeng dallé; gora-gorai ra'ya'é rékko matéi tau majaé. Barakka'na tau malempué pagelloriwi kotaé; ada-adanna tau majaé solangiwi. Pakatunai tau laingngé iyanaritu pangkaukeng iya madongo'é; tau iya engkaé akkalenna, dé' napowadai muwi séuwa. Tau patassiyaéngngi karéba bellé dé' naulléi makkatenning rahasia, iyakiya tau weddingngé riyatepperi weddingngi rahasiyakangngi parakaraé. Ancuru'i bangsaé rékko dé'gaga pamimping; pédé maéga pappangaja, pédé ritanggung asalamakengngé. Majjanci mpajai inrenna tau laingngé bettuwanna papolé acilakang; lebbi kessing muwi dé' tamaccowé ri laleng gau'éro kuwammengngi amakki. Makkunrai iya makessing akkalengngé lolongengngi alebbireng; tau mapéddaraé paddeppungengngi asugireng. Tau iya makessing atié napasaroi aléna; tau iya mapéddaraé naparogiwi aléna. Asaronna tau majaé iyanaritu asarong bellé-bellé, asaronna tau iya pogau'éngngi makessingngé iyanaritu asarong iya tongengngé. Niga mattinetto pogau'i makessingngé, tuwoi matu masennang; niga mattedde untu' pogau'i majaé mattujui ri amaténgngé. Nacéccé Puwangnge tau iya maja atié, iyakiya Namaséiwi tau iya tuwoé temmakkécella. Tau majaé pasti lolongeng pahukkungeng; tau makessingngé salama'i. Agellorenna makkunrai iya dé'é akkalenna sinrupai ciccing ulawengngé ri inge'na bawié. Cinnana tau makessingngé tuli mallolongengngi iya makessingngé, iyakiya iya weddingngé naddennuwangi tau majaé banna caina. Engka tau napoji mabbéré, iyakiya tattamba sugii, engka iya pojiyéngngi maddiki-diki, iyakiya tattamba kasiyasiwi. Tau iya maégaé mabbéré maonai matu, tau iya pojiyéngngi mattulung ritulung towi matu. Niga mattanggung ritanroiwi matu ri tauwé, iyakiya iya balu'éngngi lolongengngi pappojiyang. Niga mapato pogau'i makessingngé risennangiwi matu ri tauwé; niga sappa ja, nageppai matu asukkarakeng. Niga mattuwangngi waramparanna sempé'i matu pada-pada daud-daung macowaé; tau mateppe'é mabbijai matu pada-pada cura' maloloé. Tau iya sussaéngngi ruma tanggana, ateddéngengngi matu sini-sininnaé. Tau madonggoé natumaningiwi matu tau iya mapanré. Tau mateppe'é ritanggungngi matu atuwonna; tau iya mapanré tattambai tau maccowériyéngngi. Rékko ri linoéwé tau makessingngé tarimai matu pamale, mattentuni tau majaé sibawa madosaé lolongeng matu pahukkungeng. Tau iya pojiyéngngi pangissengengngé masennangngi lolongeng pakkampareng; iyakiya tau iya dé'é napojiwi riyampareng iyanaritu tau madongo. Tau makessingngé risennangiwi ri Puwangnge, iyakiya tau iya rancangngéngngi jaé tarimai matu pahukkungeng. Dé' muwi séddi tau iya mullééngngi tette héba' nasaba ja; iyakiya tau iya malempué tette'i mattinetto, dé' naripagoyang. Bainé iya makessingngé iyanaritu abangkakenna sibawa asennangenna lakkainna, bainé iya mébbuéngngi lakkainna masiri iyanaritu padai lasa buku iya makkokkoé. Tau malempué napikkiri'i gau'-gau' iya makessingngé; tau majaé narancanai bellé. Ada-adanna tau majaé pauno; ada-adanna tau malempué mappassalama. Tau majaé sempé'i matu temmabbaté; iyakiya tau makessingngé tette'i matu masse massossoreng. Ripojiwi tauwé situru sibawa apanrénna; ripakatunai tauwé situru sibawa adongokenna. Lebbi kessing muwi mancaji ra'ya' baiccu iya mappunnaiyé jama-jamang, naiya maggaretta'é tau battowa padahal akurangeng inanré. Tau makessingngé najampangi olokolo'na; iyakiya tau majaé nasissai. Patani iya marejjingngé mappallaung mappunnai maéga inanré, iyakiya tau iya paccappuéngngi wettunna untu' gau' iya dé'é nakkéguna iyanaritu tau madonggo. Tau majaé macinnai lolongeng asarong polé ri tau madorakaé; tau makessingngé padai aju iya mabbuwaé. Tau majaé tassiyoi ri ada-ada maja iya napowadaé; tau makessingngé leppe'i polé ri asukkarakengngé. Tungke tau lolongengngi pahukkungeng situru sibawa ada-ada nenniya pangkaukenna; tungke-tungke riwéréng saro iya sipato'é. Tau madongo'é nasengngi aléna dé' naengka napasala, iyakiya tau mapanré napoji méngkalinga pangaja. Rékko tassinggungngi tau madonggoé, iyatoro wettué napallessui peddi atinna; iyakiya tau mapanré dé' napaduliwi rékko ricellai. Ri laleng ripowadana iya tongengngé, napatettongngi tauwé adélékengngé; rékko mabbelléi, papoléi tauwé dé'é naadélé. Bicara iya dé'é namasala weddingngi nalo atié pada-pada natoddo peddang; ada-ada mapanré padai pabbura iya mappajjappaé. Ribongkara'i matu bellé ri laleng sikédé mata, iyakiya ada-ada tongengngé tette'i matu sillampé wettué. Tau iya rancanaéngngi jaé napoji dé'é naadélé; tau iya mangusahakangngéngngi akessingengngé masennangngi matu. Tau makessingngé dé' nakennai abala; tau majaé tuli nakennai matu asussang. Nacéccé Puwangnge bellé; iyakiya Nasennangngi tau iya malempué. Tau mapanré dé' nattempowangngi pangissengenna; tau madonggoé nallabowangngi adonggonna. Marejjingngé mappallaung mébbui tauwé makuwasa; akuttungngé passai tauwé mancaji ata. Abata-batangngé pasoroi sumange'é, iyakiya ada-ada mabessaé pakaloppoi atié. Tau makessingngé maupe'i naiya balibolana; tau majaé pusai nasaba jana. Ri laleng makkuttu-kuttu dé' namakkullé rilolongeng iya rinawa-nawaiyé; nasibawang majjama ladde lolongengngi tauwé asugireng. Tau iya maccowériyéngngi laleng iya tongengngé tuwoi matu masennang; tau iya maccowériyéngngi laleng iya majaé mattujui lao ri amaténgngé. Ana' iya mapanré napuriyatiwi rékko mabbéréi ambo'na pangaja; tau matempoé dé' namaélo tarima pakkampareng. Ada-adanna tau makessingngé papoléi asarong; tau iya dé'é namalempu napojiwi ateddekengngé. Tau iya matutué ri laleng ada-adanna amangngi matu atuwonna; tau iya mabbicaraé sembarangang nakennai matu abala. Tokuttué maéga cinnana iyakiya dé' muwi séddi iya naduppaé; tau iya majjama marejjingngé nalolongengngi sininna iya nacinnaiyé. Tau malempué nacéccé bellé, kédo-kédona tau majaé mappakasiri-siri sibawa ricella. Alempurengngé nalinrungiwi tau iya tuwoé malempu; jaé naancuru'i tau madosaé. Engka iya majjaiyéngngi sugi, padahal dé' angke'na; engka iya majjaiyéngngi kasiyasi, padahal sugi senna. Tau sugié harusu'i passu dowi kuwammengngi naamang atuwonna; tau kasiyasié leppe'i polé ri ancamangngé. Tau mateppe'é sinrupai cahaya macakkaé; tau majaé sinrupai lampu peddé. Atempongngé banna powassélé'i assasang; tau iya mapanré maéloi tarima pappagguruwang. Asugireng iya rilolongengngé sibawa magampang masitta towi matu akurangeng; iyakiya waramparang iya ripaddeppungengngé taccéddé-céddé pédé tattambai. Rékko paddennuwangngé dé' naripennoi, maddéké-rékéi baténgngé; rékko ritarimai cinnaé, masennangngi atié. Tau iya pakariyawaéngngi pappagguruwanna Puwangnge, nacilakaiwi aléna; tau iya matinulué lao ri hukkunna Allataala nalolongengngi matu sarona. Pappagguruwanna tau mapanré sinrupai assalenna asennangengngé; rékko engka ancamang, iyaro pappagguruwangngé mappassalama'i. Tau makessingngé ampéna ripojiwi matu; tau iya dé'é nawedding riyatepperi masussai matu atuwonna. Tau mapanré mappikkiri'i riyolo ri wettu dé'napa natinda; tau madonggoé nallabowangngi adonggonna. Suro iya dé'é namacca papoléi acilakang; suro iya weddingngé riyatepperi natanggung mallolongeng. Tau iya dé'é namaélo ripagguru mancaji kasiyasiwi sibawa matuna; tau iya méngkalingaé pangaja ripakalebbii matu. Temmakka kessinna lolongengngi aga iya riyacinnaiyé! Tau madonggoé dé' namaélo salaiwi jaé. Tau iya siwollompollongngé sibawa tau mapanré, mancaji mapanréi matu; tau iya siwollompollongngé sibawa tau madonggoé, macilakai matu. Tau madosaé tuli rilellungngi ri abalaé tau makessingngé tuli tarimai asennangeng. Tau makessingngé mappammanarengngi asugireng lao ri ana' eppona; asugirenna tau madosaé nataroi untu' tau iya malempué atuwonna. Tana kullangngé naullé powassélé maéga inanré untu' tau kasiyasié; iyakiya dé'é naadélé nassabariwi iyaro tanaé dé' narijama. Temmunrui ana'é, bettuwanna dé' naripoji; rékko ripojiwi, harusu'ki barani munrui. Tau iya makessingngé tuli agennerengngi, iyakiya tau majaé tuli akurangengngi. Ruma tanggaé ripatettongngi riapanrénna makkunraié, iyakiya riruttungngi ri adonggonna. Tau iya malempué métau sibawa mappakalebbi lao ri Puwang Allataala; tau iya atuwonnaé dé' namalempu napakatunai Allataala. Nasaba tempona, tau madonggoé napoji pakarajai aléna; tau mapanré rilinrungiwi matu ri ada-adanna muto. Rékko dé' saping, dé'gaga wassélé dare; nasibawang awatangenna sapingngé, maonai matu éngngalangngé. Sabbi iya malempué tuli napowadai iya tongengngé; sabbi iya dé'é nawedding riyatepperi tuli mabbelléi. Tau matempoé dé' matu namancaji mapanré, iyakiya tau maccaé maggurui sibawa magampang. Aja' muwassellao sibawa tau madongo'é; dé'gaga iya weddingngé nappagguruwang lao ri iko. Tau mapanré naisseng pékkugiwi harusu tinda, tau madonggoé ribengnguwangngi ri adonggonna. Tau madonggoé dé' napaduliwi aga riyaddampengengngiga dosana iyaré'ga dé'; tau makessingngé macinnai riyaddampengeng dosana. Sennang iyaré'ga sara ritaroi ri laleng atié; tau laingngé dé' naulléi maccowé péneddingiwi. Bolana tau makessingngé tette'i masse; bolana tau majaé maruttungngi matu. Engka laleng iya paitaé malempu, iyakiya angkanna iyaro lalengngé mattujui ri amaténgngé. Ri munrinna cawaé naullé engka teri; arennungngé weddingngi maccappa sibawa asarang. Tau majaé nacéppui matu buwa jana, tau makessingngé nacéppui matu buwa akessingenna. Tau madonggoé mateppe'i lao ri tungke ada-adaé, tau mapanré tinda'i sibawa matutu. Tau engkaé akkalenna tuli matike'i sibawa mabélaiwi majaé, tau madonggoé macayii, nainappa marasa amang. Tau iya pojiyéngngi macai tinda'i sibawa madonggo; tau mapanré kédoi sibawa sabbara. Tau dé'é pangalamanna mancaji madonggoi matu; tau mapanré tattambai matu pangissengenna. Tau majaé tunru'i matu lao ri tau iya malempu atié, untu' méllauwi kuwammengngi nariyamaséi. Tau kasiyasié dé' narisennangi mala ri sellao-sellaona; iyakiya tau sugié maéga sahaba'na. Niga pakatunai tau laingngé, pogau'i dosa; niga makessing ati lao ri tau kasiyasié, masennangngi matu. Niga mangusahakangngi iya makessingngé, riyatepperiwi matu sibawa lolongeng pappakalebbi; niga rancanai majaé engkai ri laleng iya pusaé. Ri laleng tungke usaha engka asaronna; curita iya kosongngé mébbui tauwé kasiyasi. Tau mapanré ripojiwi nasaba apanrénna; tau madonggoé tassebbo'i nasaba adonggonna. Rékko séddié sabbi makkeda tongengngi, napassalama'i nyawaé; rékko mabbelléi, nabali'bellariwi pada-padanna. Tau iya métaué ri Puwangnge mancaji amangngi, sibawa kaluwargana mappunnai allinrungeng. Amétaureng lao ri Puwangnge iyanaritu poko'na asennangengngé; sibawa laleng untu' niniriwi amaténgngé. Arajanna arungngé engkai ri jumellana ra'ya'na; rékko dé' ra'ya' dé' naulléi makuwasa. Tau mapanré dé' namasitta macai; tau madonggoé dé' naulléi tahangngi aléna. Ati iya tennangngé napadisingi watakkalé; pangémpurungngé padai lasa iya paunoé. Niga pogau'i makessingngé lao ri tau kasiyasié, napakalebbii Allataala; niga tenre'i tau malemmaé, napakatunai Pappancajinna. Tau majaé binasai nasaba jana, tau makessingngé rilinrungiwi nasaba alempurenna. Pangissengengngé tuli engkai ri laleng pikkiranna tau engkaé akkalenna; iyakiya ritenre ri laleng pikkiranna tau madonggoé. Adélékengngé sibawa akessingengngé naakkai angke'na bangsaé, iyakiya dosaé naébbui bangsaé mancaji matuna. Masennangngi arungngé lao ri pegawé iya maccaé; iyakiya macayii lao ri pegawé iya dé'é naulléi jamai jamanna. Nasibawang pappébali iya mabessaé, soroi caié; pappébali iya mapessé paénré'i caié. Ada-adanna tau mapanré mébbui pangissengengngé taré'i atié; ada-adanna tau madonggoé banna mallise'i adonggong. Naita maneng Puwangnge iya kajajiyangngé ri sininna onrongngé; Najampangi maneng iya makessingngé sibawa majaé. Ada-ada iya makessingngé natambaiwi sumange'é, ada-ada iya papeddiriyé napalemmai cinnaé. Tau madonggoé dé' nabati-batiwi pangajana ambo'na, tau mapanré nabati-batiwi pakkamparengngé. Ri bolana tau makessingngé engka maéga waramparang; asugirenna tau majaé lennye'i nasaba abala. Ada-adanna tau mapanré pennoi sibawa pangissengeng, iyakiya pikkiranna tau madonggoé dé' nappakkuwaro. Natarimai Puwangnge sempajanna tau makessingngé, iyakiya nacéccéi pakkasuwiyanna tau majaé. Nacéccé Puwangnge cara atuwonna tau madorakaé, iyakiya Namaséiwi tau iya makkuragaé pogau'i élo-Na. Tau iya pogau'éngngi majaé risissai matu; tau iya dé'é namaélo riyampareng matéi matu. Naisseng Puwangnge linona tau maté sibawa lao-laona; pékkugi wedding pikkiranna tolinoé risubbu polé ri Aléna? Tau iya pojiyéngngi mappakatuna dé' napojiwi riyampareng; bata-batai méllau pangaja polé ri tau iya mapanré. Ati iya marennué mébbui tappaé maccahaya; ati iya messé poloi sumange'é. Tau mapanré sappai pangissengeng; tau madonggoé malippui sibawa adonggongngé. Tau masaraé harusu'i méwa matteru ri laleng atuwonna, iyakiya tau iya marennué tuli masennangngi. Lebbi kessing muwi céddé waramparang iyakiya nasibawangngi tau lao ri Puwangnge, naiya maéga waramparang iyakiya nasibawangngi abata-batang. Lebbi kessing muwi manré ukkaju nasibawang pappoji pammasé, naiya manré juku malunra iyakiya nasibawangngi paccéccé. Tau iya masitta'é macai paompoi assasang, tau iya sabbara'é tiwii adaméngeng. Tau makuttué tuli péneddingiwi asukkarakeng; tau malempué dé' nalolongeng asukkarakeng. Ana' iya mapanré, nasennangiwi atinna ambo'na; ana' iya madonggoé dé' napakalebbii indo'na. Adonggongngé iyanaritu asennangenna tau madongo'é, tau mapanré tuwoi malempu. Dé' namallolongeng rancanaé, rékko dé' nasibawangngi attimbangeng; mallolongengngi rancanaé, rékko maéga iya mabbéré pangaja. Ada-ada iya ripowadaé ri wettunna, papoléi ariyo-riyong. Tau mapanré maccowériwi laleng tuppué iya mattujué ri atuwongngé; tenniya laleng turungngé iya mattujué ri amaténgngé. Naruttungngi matu Puwangnge bolana tau iya matanré atié, iyakiya tana appunnangenna séddié janda Nalinrungiwi. Nacéccé Puwangnge rancana iya majaé; iyakiya ada-ada iya makessingngé napésennangiwi atinna. Niga sappa asarong iya dé'é nahallala, naancuru'i kaluwargana muto. Niga céccéi dowi pasoso'é, tuwoi matu masennang. Tau makessingngé natimbang ada-adanna; tau majaé napowadai gau'-gau' iya matunaé. Naéngkalinga Puwangnge rékko massempajangngi tau makessingngé, iyakiya dé' Nabati-batiwi tau iya madorakaé. Tappa marennué napésennangiwi atié, biritta iya makessingngé napétakkariwi nyawaé. Tau iya méngkalingaé pakkampareng muttama'i tau iya mapanré. Tau iya dé'é namaélo ripangajari, dé' naangke'i aléna; tau iya maéloé tarima pakkampareng, mappunnaiwi akkaleng. Métau lao ri Puwangnge iyanaritu tettongenna pappagguruwang iya makessingngé; alebbirengngé ripoddiyoloiwi ri ariyawang atié. Weddingngi tolinoé mébbu rancana, iyakiya Allataala mabbéré apettung. Tungke pangkaukenna tauwé naullé makessing ri laleng pakkitanna muto, iyakiya Puwangnge ritu tasséré'i akkattana atinna. Appaddettangenni lao ri Puwangnge sininna rancanamu, namumallolongeng matu pogau'i. Sininna séuwa-séuwaé iya napogau'é Puwangnge engka akkattana; naakkattana untu' tau majaé iyanaritu abinasangeng. Sininna tau matempoé nacéccé Puwangnge; dé' Naleppessangngi mennang leppe polé ri pahukkungengngé. Tau iya matinulué lao ri Allataala lolongengngi matu paddampeng. Tau iya mateppe'é leppe'i polé ri sininna majaé. Rékko mupésennangiwi atinna Puwangnge, sining balimmu napancajiwi silaong. Lebbi kessing muwi céddé pallolongeng nasibawang alempureng, naiya maéga pallolongeng nasibawang dé'é naadélé. Naullé mébbu rancana tolinoé, iyakiya Allataala pattentui laleng atuwonna. Tarimai akuwasang arungngé polé ri Allataala, jaji, dé' napasala ri laleng apettunna. Puwangnge puwéloi tauwé pogau'i malempué ri laleng dangkangengngé, makkuwatoro ri laleng pakéi ukkurangngé sibawa timbangengngé. Untu' panguwasaé, pogau'i majaé iyanaritu ariyawang, saba' masse'i apparéntanna nasaba adélékeng. Pappakatajang iya tongengngé pésennangiwi panguwasaé, namaséiwi tau iya mabbicaraé sibawa malempu. Caina arungngé iyanaritu sinrupai biritta pahukkungeng maté; tau iya mapanré makkuragai matu pasoroi! Akessingeng atinna arungngé papoléi atuwong saléwangeng, pada-pada ellung pateppaé bosi ri wettu tikkaé. Lolongeng pangissengeng mabéla lebbi kessing naiya lolongengngé ulaweng; lolongeng pangissengeng lebbi mangke'i naiya lolongengngé péra'. Tau makessingngé nabélai majaé; tau iya jampangiyéngngi cara atuwonna, nalinrungiwi aléna. Atempongngé nassabariwi ancurukeng; abangkakengngé nassabariwi aruttungeng. Lebbi kessing muwi mariyawa atié sibawa dé' nakéwaramparang, naiya maccowéé ri tau matempoé sibawa péneddingiwi waramparang rampasa'na mennang. Puriyatiwi aga ripagguruwakko, namulolongengngi matu aga iya makessingngé. Ateppe'no lao ri Puwangnge, namumasennang matu. Tau mapanré riissengngi polé ri pikkiranna iya matarengngé; cara mabbicarana iya pataré'é, mébbui ada-adanna pédé patepperi. Apanréngngé iyanaritu assalenna atuwong masennanna tau mapanré; tau madonggoé risissai ri adonggonna muto. Pikkiranna tau engkaé akkalenna mébbui ada-adanna mapanré, sibawa pappagguruwanna pédé patepperiwi. Ada-ada mabessaé sinrupai cani'é; macenning rasana sibawa napadisingi tubué. Engka laleng iya paitaé malempu, iyakiya paccappurenna iyaro lalengngé mattujui ri amaténgngé. Cinnaé untu' manré dorongngi tauwé untu' mangusaha; nasaba babuwana, natarapassa mappallaung. Tau majaé makkuragai cilakaiwi pada-padanna; ada-adanna maja pada-pada api mabbaraé. Tau macéko-cékoé paompoi assisalang; tau mappétenna'é passarangngi sahaba iya maréppé'é. Tau mabecco'é nabengnguwangngi silao-silaonna, sibawa tiwii mennang ri laleng bahayaé. Jaga-jagako lao ri tau iya cabbérué sibawa macculé mata, mattengngangngi rancana ja ri laleng atinna. Tau malempué riwéréngngi matu umuru malampé; ubenna sinrupai passigera iya mattappaé. Lebbi kessing muwi dé'é namasitta macai naiya mappunnaiyé akuwasang; lebbi kessing muwi makuwasaiwi alé naiya patunru'i kotaé. Untu' missengngi totoé, naundiwi tolinoé, iyakiya iya pattentuéngngi pappébalinna banna Puwangnge bawang. Lebbi kessing muwi sitémpu inanré nasibawangngi atennangeng, naiya inanré malunra'é maona nasibawangngi assasang. Ata iya maccaé nakuwasaiwi matu ana' iya mappakasirié; sibawa tarimai matu mana silaong silessu-silessurenna iyaro ana'é. Ulaweng sibawa péra'é riojiwi ri apié, iyakiya atinna tauwé riojiwi ri Puwangnge. Tau majaé naccowériwi sining tangnga iya majaé, pabbelléngngé napoji méngkalingai ada-ada pétenna'é. Niga méllé-kéllé'i tau kasiyasié, napakatunai Allataala sibawa pappancajinna. Niga marennu lao ri acilakanna tauwé, pasti lolongeng pahukkungeng. Abangkakenna tau iya macowaénna iyanaritu ana' eppona; abangkakenna ana'-ana'é iyanaritu tomatowanna. Tau malebbié dé' nasipato powadai ada-ada bellé; tau madonggoé dé' nasitinaja powadai ada-ada mangke'é. Engka masengngi dowi pasoso'é naullé mébbu anu makalallaing; nasibawang dowi pasoso sini-sininna weddingngi ripogau'. Rékko macinnako ripoji ri tauwé, addampengengngi asalang iya napogau'é mennang. Sappa-sappai asalangngé banna pettuiwi assisellaongngé. Séddi pakkampareng lebbi makkébettuwangngi untu' tau engkaé akkalenna naiya sératu pabbabba ri tau iya madonggoé. Tau majaé tuli paompoi arotakeng, iyakiya poléi amaténgngé ri aléna selaku suro iya mabecco'é. Lebbi kessing muwi siruntu indo' beruwangngé iya teddéngngé ana'na, naiya tau madonggoé iya malippué sibawa adonggonna. Niga mpale'i akessingengngé sibawa ja, dé'to matu naulléi passui jaé polé ri bolana. Pammulaiwi assasangngé iyanaritu pada-padai timpa'i laleng uwai; rimakkuwannanaro sorono ri wettu dé'napa naripammulai assasangngé. Nacéccé Puwangnge tau iya pattongengngéngngi tau madorakaé, sibawa iya passalaéngngi tau iya dé'é napasala. Paracuma tau madonggoé paccappu dowi sappa pangissengeng, saba' dé' nappunnai pikkirang iya madisingngé. Séddié sahaba tuli matinului lao ri silaonna, iyakiya séddié silessureng maccowéi tanggungngi asussangngé. Tau iya majjanciyé untu' mancaji tanggungngi inrenna pada-padanna iyanaritu tau madonggo. Tau iya pojiyéngngi dosaé, napoji massasa. Tau iya malowangngé bawana, sappai ancurukeng. Séddié tau pabengnguwang dé' namasennang matu, tau mappakka lilaé lolongengngi matu acilakang. Lolongeng ana' madongo'é bettuwanna lolongeng amesséng; mancaji ambo'na ana' madonggoé dé' nabbéré arennung. Ati iya marennué napadisingiwi watakkalé; ati iya masaraé napoloi sumange'é. Haking iya macéko-cékoé, tarimai dowi pasoso secara rahasiya sibawa dé' napajoppai adélékengngé. Akkattana tau iya mappéjeppué iyanaritu untu' lolongeng pangissengeng, iyakiya akkattana tau madonggoé dé' nattentu. Ana' iya madonggoé nasussai ambo'na, sibawa napamesséi atinna indo'na. Dé' nasipato ripakennai denda tau iya dé'é napasala; dé' nasipato tenre'i tau iya malempu atié. Tau iya matarengngé pikkiranna, dé' namaéga bicara. Tau iya mapanré, tuli tennangngi. Muwi séddi tau madonggo riyaseng towi matu macca sibawa mapanré rékko mammekkoi sibawa natutu'i témunna. Tau iya pallaingngéngngi aléna polé ri tau laingngé bettuwanna jampangiwi aléna bawang; tungke pallolongenna tau laingngé nabantai. Tau madonggoé dé' napojiwi riwéréng pappéjeppu; banna macinnai passui lise atinna. Dosaé sibawa atunangngé silaongngi joppa; rékko ricellani, pasti toni riyéllé. Ada-adanna tauwé weddingngi mancaji assalenna apanréngngé maliyung pada-pada dolangengngé, matakka pada-pada uwai massolo'é. Dé' namakessing maccowé ri tau madorakaé sibawa tenre'i tau iya dé'é napasala. Rékko mabbicarai tau madonggoé, paompoi assasang sibawa méllau riajara'. Adanna tau madonggoé naancuru'i aléna; nalai siyo polé ri ada-adanna. Iyaro pétenna'é manyameng rasana; napoji tauwé memme'i. Tau iya mallupaiyéngngi jamanna padai jana sibawa tau iya pojiyéngngi makkasolang. Iyaro Puwangnge pada-padai manara iya masse'é; kuwaniro lao tau malempué sibawa lolongeng onrong iya amangngé. Iyakiya tau sugié nasengngi waramparanna ritu linrungiwi pada-pada témbo matanré sibawa masse'é ri mattulilinna kotaé. Tau iya matempoé sempé'i matu, tau iya mariyawa atié ripakalebbii matu. Mappébali ri wettu dé'napa naéngkalingai iyanaritu pangkaukeng madonggo sibawa ricella. Nasaba pangéloreng untu' tuwo, naulléi tauwé tanggungngi anrasa-rasangngé; ateddéngeng pangélorengngéro, teddéng towi sininna addennuwangngé. Tau engkaé akkalenna tuli madekkai ri pangissengengngé; tau mapanré tuli macinnai lolongeng pappagguruwang. Hadiyaé natimpa'i lalengngé sibawa mantara'i tauwé lao ri sining tau battowaé. Pabbicara bunge'é ri laleng pengadilangngé tuli paitai tongeng, iyakiya pappakanessana mammulai rioji narékko poléni balinna. Nasibawang loteréi, weddingngi ripurai assisalangngé, mala muwi assisalangngé ri yelle'na tau makuwasaé naulléi purai. Silessureng iya puraé ripeddiri atinna lebbi mawatangngi riyaddeppéri naiya kota iya mawatangngé; assasangngé sinrupai paccala gerbang kota iya mabbénténgngé. Ada-ada iya ripowadaé engka addimonrinna iya harusu'é ripérasai. Lilaé mappunnaiwi akuwasang untu' passalama'i atuwongngé iyaré'ga solangiwi; harusu'i natanggung tauwé addimonrinna adanna. Tau iya lolongengngé bainé, lolongeng saro; bainé iyanaritu pabbéré polé ri Puwangnge. Tau kasiyasié méllauwi sibawa mappakalebbi; tau sugié mappébaliwi sibawa maggera'. Engka sahaba iya dé'é namatinulu, engkato iya lebbi maréppé'é naiya silessurengngé. Lebbi kessing muwi tau kasiyasi iya malempué atuwonna, naiya tau madonggo iya pojiyéngngi mabbellé. Apatongngé tennasibawang pangissengeng, dé' namakessing; tau iya mapperi-periyé mébbui matu asalang. Naparogiwi aléna tolinoé nasaba adonggonna, nainappa napassala Puwangnge nasaba gau'éro. Tau sugié, tuli tattambai silaonna; tau kasiyasié mala risalaiwi ri silaonna. Tau iya mabbellé ri pengadilangngé, dé' matu naleppe polé ri pahukkungengngé. Tungke tau makkuragai malai atinna tau pentingngé; sininna tauwé maéloi massellao sibawa tau malaboé. Tau kasiyasié ri pakariyawai ri silessurenna, apalagi ri silaonna. Namuni makkuragai, naulléi taré'i mennang. Niga lellungngi pangissengengngé, namaséiwi aléna; sibawa niga méngngerangngi aga iya nagguruiyé, masennangngi matu. Tau iya mabbellé ri pengadilangngé pasti rihukkungngi matu sibawa ripabbinasa. Dé' nasitinaja tau madonggoé tuwo maona, sibawa dé'to nasipato ataé paréntai panguwasaé. Tau mapanré naulléi tahangngi caina. Ripojiwi nasaba dé' nabati-batiwi asalanna tauwé lao ri aléna. Caina arungngé pada-padai angngaunna singaé; akessingenna arungngé pada-padai cinoddo iya rica'éngngi tanet-tanengngé. Ana' iya madonggoé weddingngi naancuru ambo'na. Bainé iya pojiyéngngi mannoko-noko sinrupai uwai tetti dé'é nappésau. Bola sibawa waramparangngé weddingngi rilolongeng polé ri tomatowaé, iyakiya bainé iya mapanré iyanaritu pabbéré polé ri Puwangnge. Makkuttu-kuttué mébbui tauwé memme matinro, na angkanna tokuttué alupureng matu. Tau iya turusiyéngngi parénta-paréntana Allataala salama'i matu, tau iya dé'é naangke'i matéi matu. Tulungngi tau kasiyasié pada muwi mappainreng lao ri Puwangnge; Puwangnge matti mpale'i matu. Atoro'i ana'mu ri wettu engkana mupa amménasang; rékko dé', bettuwanna muwacinnaiwi ancurukenna. Leppessangngi tau iya masitta'é macai péneddingiwi addimonrinna. Rékko mutulungngi, banna mutambaiwi caina. Rékko mupojiwi magguru sibawa méngkalinga pangaja, mancajiko matti tau iya mappangissengengngé. Tolinoé mappunnaiwi maéga rancana, iyakiya banna apettunna Puwangnge iya kajajiyangngé. Sipa' iya riyamménasaiyé polé riséddié tau iyanaritu atinulurenna. Lebbi muwi kasiyasié naiya mancaji pabbelléngngé. Pakalebbii Puwangnge, namasennang atuwommu; masennakko matu sibawa leppe polé ri acilakangngé. Engka tau iya makuttué dé' padanna; muwi témpui inanré muttama ri bawana bata-batato. Rékko rihukkungngi tau matempoé, tau iya dé'é pangalamanna lolongengngi pappagguruwang. Rékko tau engkaé akkalenna riyampareng tattamba mapanréi matu. Ana' iya callaéngngi sibawa paddésu'i tomatowanna, iyanaritu ana' iya mappakasiri-sirié sibawa ricella. Ana'ku, rékko dé'na mumaélo magguruna, muwallupaiwi matu aga iya puraé muwaggurui. Mabbéré asabbing bellé-bellé, bettuwanna pakariyawai hukkungngé; cilakaiwi tauwé, magello napérasai tau majaé. Tau madonggo iya matanré atié pasti ribabbai matu. Enungeng maserié naébbui tauwé kurang ajara' sibawa marukka. Madonggoi tau iya ménungngé gangka mabo'. Caina arungngé padai angngaunna singaé; tau iya paénré'éngngi caina bettuwanna nacilakaiwi aléna. Banna tau madonggoé ritu pojiwi massasa; kédo iya makessingngé iyanaritu mabélaiwi assasangngé. Patani iya makuttué dé' najamai dare'na ri wettunna; angkanna ri wettu éngngalang dé' aga-aga napowassélé tanana. Lise atinna tauwé ébra'nai uwai bujung iya maliyungngé; iyakiya weddingngi naséro tau iya mappunnaiyé pappéjeppu. Maéga tau mangakui aléna iyanaritu rangeng, iyakiya iya tonget-tongengngé matinulu, mawatang riruntu. Maupe'i ana'-ana'é rékko mappunnaiwi ambo' iya makessingngé sibawa tuwo malempu. Rékko tudangngi arungngé ri kadéra pengadilangngé, naulléi mitai sininna iya majaé. Engkaga tau iya weddingngé makkeda, “Mapaccingngi atikku, leppe'na polé ri dosaé?” Timbangeng sibawa ukkurang iya macéko-cékoé dé' nasennangiwi Puwangnge. Polé ri pangkaukenna ana'é weddingngi riisseng aga ampé-ampéna makessingngi sibawa malempui. Daucculingngé untu' maréngkalinga sibawa mataé untu' makkita, iya duwanna Puwangnge pancajiwi. Tau iya pojiyéngngi matinro kasiyasiwi matu. Tau iya mapatoé mappallaung mappunnaiwi maéga inanré. Tuli maddarékéi pangellié passalenna sulina ellinna. Iyakiya purana naelli, mabangka'i nasaba elli iya nalolongengngé. Ada-ada iya tampu'é pangissengeng, lebbi mangke'i naiya ulawengngé sibawa intangngé. Niga maélo tanggungngi inrenna tau laingngé, sitinajai riyala appunnangenna selaku boro'na jancinna. Waramparang wassélé bellé, bunge-bunge'na malunra rasana, iyakiya ri munri rasana pada-padai batu-batué simata. Mallolongengngi rancanaé nasaba attimbangeng; rimakkuwannanaro, aja' muéwa temmébbu rancana iya manasué. Tau iya masennangngé bicarai tau laingngé, dé' naulléi taro rahasiya; aja' musiwollompollong tau iya maéga bicara senna'é. Tau iya tanroiyéngngi tomatowanna, lennye'i matu atuwonna pada-pada lampu iya peddé ri wenni iya makalemmengngé. Waramparang iya bunge-bunge rilolongengngé sibawa masitta, paccappurenna annessana tenniya barakka. Aja' muwale'i jaé sibawa ja; ateppe'no lao ri Puwangnge, Aléna ritu mattulung matu. Dacing sibawa ana' timbangeng iya macéko-cékoé dé' nasennangiwi Puwangnge. Pura napattentuni Puwangnge laleng atuwonna tolinoé ri linoéwé; iyanaro saba'na dé' naulléi tolinoé majeppuiwi laleng atuwonna. Pikkiri'i madécéd-décéng ri wettu dé'napa majjanciyang akkarobangeng lao ri Puwangnge. Weddissa jaji massessekaléko matu ri munri. Arung iya mapanré naisseng niga tau iya majaé; nahukkungngi matu mennang temmaddampeng. Ati marilalenna tolinoé sinrupai tajang polé ri Puwangnge, iya tappaéngngi sininna baténgngé. Rékko mapparéntai arungngé sibawa pammasé, malempu sibawa adélé, tette'i matu makuwasa. Tau maloloé ribengngariwi nasaba awatangenna, sibawa tomatowaé ripakalebbii nasaba ubenna. Biyasai pangalamang mapaié leddai jaé, sibawa pépaccingiwi atinna tolinoé. Pada-pada Puwangnge matoro'i uwai saloé kuwammengngi namassolo, situru élo-Na, makkuwatoro Napimpingngi pikkiranna arungngé. Tungke pangkaukenna tauwé naullé makessingngi ri laleng pakkitanna aléna, iyakiya Puwangnge ritu tasséré'i akkatta atinna. Pangkaukeng iya adélé'é sibawa tongengngé lebbi napésennangiwi Puwangnge naiya sininna pakkasuwiyangngé. Iyaro tau majaé madosai, nasaba rikuwasaiwi ri abangkakengngé sibawa atempongngé. Rancanana tau mapatoé tiwii amaonareng; tindakang mapperi-perié nassabariwi akurangeng. Asugireng iya rilolongengngé sibawa dé' namalempu masitta'i teddéng sibawa tiwii tauwé ri kalebbonna kuburu'é. Tau majaé dé' namaélo maccowériwi hukkungngé; risissai ri abeccokenna muto. Tau iya pasalaé, malléko-léko lalenna; tau iya makessingngé tuli malempui atuwonna. Monro ri sunna rakkiyangngé lebbi pasennangiwi naiya monroé sibola sibawa bainé iya pojiyéngngi massasa. Tau majaé tuli napojiwi pogau'i majaé; muwi lao ri niga dé'to nappunnai paressé babuwa. Pahukkungenna untu' pangéllé'é mancaji pappagguruwangngi untu' tau iya dé'é pangalamanna. Rékko riyamparengngi tau maccaé, tattambai matu apanrénna. Allataala Iya Pongngadélé'é naisseng aga kajajiyang ri laleng bolana tau madorakaé. Napatassollai matu mennang angkanna binasa mennang. Niga dé' namaélo méngkalinga addarékéna tau iya akurangengngé dé' matu narijampangi rékko aléna méllau pattulung. Untu' pasoroi caié sibawa tamussu'é, wéréngngi hadiya mammekko-mekko. Rékko ripajoppai adélékengngé, masennangngi tau makessingngé, iyakiya tau majaé marasa riyancangngi. Tau iya dé'é naccowériwi cara atuwong iya engkaé akkalenna, pasti lettu matu ri linona tau maté. Tau iya pojiyéngngi massennas-sennang tette'i matu akurangeng; tau iya pojiyéngngi massennas-sennang dé' matu namancaji sugi. Rékko rihukkungngi masaraka'é ri Puwangnge, tenniya tau makessingngé, sangadinna tau majaé lolongeng asussang. Lebbi kessing muwi monro ri padang makkale-ale'é, naiya monroé sibawa bainé iya pojiyéngngi mannoko-noko sibawa macai. Tau iya mapanré tette'i madécéng sibawa sugi; iyakiya tau madonggoé nallabowangngi waramparanna. Niga makkuraga kuwammengngi adélékengngé sibawa pappoji pammasé ripogau'i, lolongengngi matu asaléwangeng, alebbireng sibawa umuru malampé. Tau iya maccaé naullé sittaiwi kota iya nanrowangngé tentara iya barani; naruttungngi sining bénténg iya nattuwangngé. Untu' niniriwi asukkarakengngé, sitinajai matutu sibawa ada-adaé. Tau matempoé sibawa matanré atié napoji maccella sibawa kurang ajara'. Tokuttu iya dé'é namaélo mappallaung; naunoi aléna sibawa cinnana. Puppu esso banna napikkiri'i passalenna aga iya nacinnaiyé. Sibalé'na tau iya malempué atuwonna naullé mabbéré sibawa maona. Dé' namasennang Puwangnge sibawa pakkasuwiyanna tau madorakaé, lebbi-lebbiwi rékko riyakkasuwiyangengngi sibawa akkatta iya majaé. Asabbinna pabbelléngngé dé' nariyatepperi matu; iyakiya ada-adanna tau iya missengngéngngi lao-laona parakaraé, ritarimai matu. Tau malempué natepperiwi matu aléna; tau majaé maumpe'i rupanna. Dé'gaga amaccang iyaré'ga apanréng iya mullééngngi tahang ri yolona Puwangnge. Namuni ammusurengngé ripassukkui sibawa anyarang pammusu, iya pattentuéngngi apakalangngé iyanaritu Puwangnge. Aseng makessingngé lebbi mangke'i naiya waramparang iya maégaé; riyamaséi ri tauwé lebbi kessingngi naiya riwéréngngé péra' sibawa ulaweng. Tau sugié sibawa tau kasiyasié mappunnaiwi séddi gau' iya padaé: Puwangnge ritu pancaji manengngi mennang. Tau mapanré léssé rékko mitai bahaya; tau madonggoé joppai matteru nainappa nakenna abala. Tau iya métaué ri Puwangnge sibawa pakariyawai aléna, masennang matu, madécéng sibawa ripakalebbi. Siyo-siyo sibawa jebba'é engkai ri lalenna tau macéko-cékoé; abélaiwi iya manennaro rékko macinnako salama. Paggurui séddié ana' cara atuwong iya sipato'é ri aléna, nalettu ri wettu macowana tuwoi matu makkuwaro. Tau kasiyasié rikuwasaiwi ri tau sugié; tau iya minrengngé rikuwasaiwi ri tau iya mappainrengngé. Tau iya mampoé acéko-cékong méngngalai matu abala; angkanna akuwasanna untu' tinda siélo-élona lennye'i matu. Tau iya makessing atié ribarakkakiwi ri Puwangnge, nasaba natawai dallé'na sibawa tau iya akurangengngé. Paddésu'i tau iya pojiyéngngi mappakatuna, namappésauna assisalangngé, assimusurengngé sibawa sicella-cellaé. Tau iya pojiyéngngi alempurengngé sibawa iya macenningngé bicaranna, mancajiwi matu sahaba'na arungngé. Ri laleng ribongkara'na bellénna tau iya macéko-cékoé, najagaiwi Puwangnge kuwammengngi pangissengeng iya tongengngé tette'i ripiyara. Tokuttué napoji monro ri bolaé; makkedai, “Engka singa ri saliweng, weddikka nalurui ri tengnga laleng.” Pappalécéna makkunrai cakkuribangngé sinrupai jebba'é; tau iya riyacairiyé ri Puwangnge tappasollai ri lalenna. Mémeng sitinajanna ana'-ana'é pogau'i gau'-gau' iya madonggoé, iyakiya naullé raukangngé paggurui mennang pinrai kédo-kédona. Niga maélo mancaji sugi sibawa tenre'i tau kasiyasié sibawa mpéréngngi hadiya tau masagénaé paccappurenna kasiyasiwi matu. Engkalingai, maéloka mappagguruwangngi ri iko pangajana tau maccaé! Puriyatiwi pappagguruwakku. Masennakko matu rékko iyaro pappagguruwakku mutaroi ri laleng atimmu. Nasaba nallalengiwi sadiyano rékko maéloko pakéi. Upagguruwakko makkekkuwangngé nasaba macinnaka mateppe'ko lao ri Puwangnge. Telluppulo pangaja pura uwokirekko – pangaja-pangaja iya tampu'é pangissengeng sibawa pangaja iya makessingngé; sibawa iya mappagguruwangngéngngi matu lao ri iko aga iya tonget-tongengngé tongeng. Matti, rékko ritanaiko, weddikko mabbéré pappébali iya teppa'é. Aja' muparogiwi tau kasiyasié, banna nasaba malemmai; sibawa ri sidang pengadilangngé aja' mukuwasaiwi ha'na tau iya dé'é pakkullénna. Saba', naéwaiwi matu Puwangnge parakarana mennang sibawa reddu'i nyawana tau iya tenre'éngngi mennang. Aja' musiwollompollong sibawa tau iya pojiyéngngi macai sibawa masitta ménré darana. Muturui matti nadé'na mulléi patteddéngngi iyaro abiyasangngé. Aja' muwajjanci untu' tanggungngi inrenna tau laingngé. Matti rékko dé' mulléi mpaja manengngi, muwi onrong atinrommu ribésellato matu. Aja' sises-siseng mupalétté'i pakkaséséng tana iya puraé napattette néné-nénému. Engkaga naengka muwitai tau iya maccaé pogau'i jama-jamanna? Iyaro tauwé ripajjamai matu ri saorajana arung-ngarungngé, tenniya ri bolana tau biyasaé. Rékko tudakko manré sibawa séddié tomaraja, éngngerangngi niga aléna. Rékko mappunnaiko napessu manré iya battowaé, tahangngi iyaro cinnamu. Aja' mumabuwaja ri inanré malunra iya napatalaé, naullé maéloi cobako. Aja' muwassussa-sussa untu' mancaji sugi. Aja' mupajajiwi iyaro niya'mu. Saba', ri laleng sikédé bawang weddingngi lennye waramparammu, samanna makképannii sibawa luttu ri bitaraé pada-pada kuwajangngé. Aja' musisama manré tau masékké'é. Aja'to muwacinnaiwi inanréna iya malunra'é. Saba', makkedai matu, “Laoni mai manré; tatambaipi,” padahal akkattana tenniya makkuwaro. Macenningngi témunna, iyakiya atinna laingngi. Matti aga iya puraé muwemme muluwai paimeng, sibawa sininna ada-adammu iya macenningngé lao ri aléna dé'gaga akkégunana. Aja' mupangajariwi tau madonggoé; dé' naangke'i matu iyaro pangajamu. Aja' sises-siseng mupalétté'i pakkaséséng tana manaé iyaré'ga malai tana appunnangenna ana' béué. Saba', Puwangnge iyanaritu pappangéwa iya mawatangngé, Aléna ritu méwaiwi matu mennang méwako. Puriyatiwi pappagguruwanna gurummu sibawa agguruno singngéga-égana. Aja' mubata-bata paggurui ana'mu. Rékko muwunrui sibawa raukang, dé' namakkullé maté, mala salama'i matu. Ana'ku, masennang senna'ka rékko mapanréko. Mabangka'ka rékko uwéngkalingako powadai ada-ada iya teppa'é. Aja' mumangémpuru lao ri tau madosaé. Tuli mapatoko lao ri Allataala kuwammengngi na wettu mangolomu tattanggungngi, sibawa amménasammu dé' nateddéng. Engkalingai, ana'ku! Ancajino mapanré. Pénessaiwi mattonget-tongeng cara atuwommu. Aja' musiwollompollong sibawa tau mabo'é iyaré'ga tau mabuwajaé, saba' mancaji kasiyasiwi matu. Rékko matinroko bawang, dé' namaittana mumappaké sapé-sapé matu. Turusiwi ambo'mu; saba', rékko dé'i dé'tokko gaga. Rékko macowani indo'mu, jellokengngi makkedaé mupakalebbii. Pappagguruwang iya tongengngé, pangissengeng, pappagguruwang sibawa pappéjeppué – iya manennaro sipato'i riyelli, iyakiya mangke senna'i untu' ribalu. Séddié ambo' marennui matu rékko mappunnaiwi ana'na ampé-ampé iya makessingngé; mabangka'i matu rékko mapanréi ana'na. Tennapodo ambo' indo'mu mabangka'i lao ri iko; tennapodo masennangngi makkunrai iya jajiyangngékko. Pénessaiwi madécéd-décéng sibawa contoiwi atuwokku, ana'ku! Makkunrai betta iya maccakkuribangngé iyanaritu siyo-siyo mabbahayaé. Mangadangngi mennang pada-pada parampo'é sibawa mébbui maéga worowané malaweng. Aja' muleppessangngi anggoro'é godako, namuni tappana pataré senna'i sibawa paitai millak-killang ri laleng kacaé enrengngé massolo muttama sibawa manyameng ri laleng tigero'é. Pappa bajana éléé mupéneddingiwi pada-pada puraé ripitto ri ula mamosoé. Reppe-reppe matammu, kacau pikkirammu sibawa maccalépe témummu. Mupéneddingiwi pada-pada engkaé ri cappa alliri kappala'é ri tengnga tasi; mapeddi ulummu sibawa tassulus-sulukko. Namumakkeda matu, “Samanna naunruka sibawa naleppa tauwé, iyakiya dé' uwulléi méngngerangngi aga iya puraé kajajiyang. Aduh, cakkaruddu senna'ka! Parelluka ménussi!” Aja' mumangémpuru lao ri tau majaé, sibawa aja' mumacinna massilaong mennang. Banna abeccokengngé napikkiri mennang sibawa banna aga iya pacilakaié nabicara. Ruma tanggaé ripatettongngi sibawa pangissengeng nenniya pappéjeppu. Narékko engka pangissengeng, mallise'i matu sibawa sukku sining bili'na sibawa barab-barang mangke'é nenniya magelloé. Tau mapanré lebbi riyakkitangiwi naiya tau mawatangngé; lebbi pentingngi pangissengengngé naiya awatangengngé. Saba' ri wettu dé'napa nammusu harusu engka rancana iya manusué riyolo, sibawa pédé maéga pappangaja, pédé battowa akkulléna pakala matu. Tau madonggoé dé' naulléi péneddingiwi pangissengengngé. Dé' aga-aga naullé pogau' rékko mattengngangngi tauwé bicarai gau'-gau' iya pentingngé. Tau iya tuli rancanaé ja, riyasengngi matu paddoca. Tungke siyasa'na tau madonggoé iyanaritu dosa. Tau iya tuli cellaéngngi tau laingngé, dé' narisennangiwi muwi ri niga. Rékko pettu paddennuwakko ri laleng keadaang bahayaé, tau malemmako. Aja' mubata-bata paleppe'i tau iya puraé ripateppai pahukkungeng maté; passalama'i tau iya mattengngangngé rirénréng lao ri onrong aggattungengngé. Weddissa makkedako, “Iyaro tenniya urusakku.” Iyakiya Allataala jagaiko. Naisseng sibawa naadélékiwi pikkirammu. Nawale'i tolinoé situru pangkaukenna. Ana'ku, anréko cani, saba' makessing iyaro. Pékkugi cani'é poléi ri sarang wanié, macenning untu' riyanré, makkuwatoniro pangissengengngé makessing untu' nyawamu. Rékko mapanréko, macakkai wettu mangolomu. Aja' mupada-pada tau majaé iya sipekke'é rampo'i tau malempué sibawa rampasa'i bolana. Saba', namuni makkolik-kolingngi tau malempué sempé, tuli tokkongngi matu paimeng. Iyakiya sibalé'na, tau majaé ancuru'i matu nasaba abala. Aja' mumasennang rékko macilakai balimmu, sibawa aja' mumarennu rékko sempé'i. Saba', pasti naita Puwangnge pangkaukemmuro sibawa mangke'i maja, nainappa dé'na nahukkungngi iyaro balimmu. Aja' mukérék-kéréng iyaré'ga mangémpuru lao ri tau majaé. Tau majaé dé' nappunnai wettu mangolo sibawa dé' nappunnai amménasang. Ana'ku, étauko ri Puwangnge, sibawa pakarajai arungngé. Aja' mukacowé-cowé sibawa tau iya méwaéngngi mennang. Tau makkuwaéro weddingngi ancuru ri laleng sikédé, nasaba abala iya napaompoé Allataala iyaré'ga arungngé tenniya parakara baiccu. Sining tau maccaé purai makkeda makkuwaé: Dé' nawedding matane siwali hakingngé. Rékko tau pasalaé napannessai dé' napasala, iyaro hakingngé natanroiwi matu sibawa ripau maja ri sininna tauwé. Iyakiya haking iya hukkungngéngngi tau pasalaé masennangngi matu sibawa ripakalebbi. Pappébali iya teppa'é iyanaritu tanrang assisellaong tuléngngé. Aja' mupatettong ruma tangga ri wettu dé'napa mupassadiyai dare'mu sibawa mappunnai assappa-sappareng. Aja' mumancaji sabbi lao ri tau laingngé temmappunnai alasang iya sipato'é; aja'to mumabbellé passalenna aléna. Aja' mumakkeda, “Maéloka mpale'i ri aléna aga iya puraé nagaurekka!” Engka naengka ulaloi dare sibawa palla anggoro'na séddié tau kuttu iya madonggoé. Iya uwitaé kuwaro banna tanet-taneng maddori sibawa ariya. Maruttung toni sappo témbo'na. Purana upénessai sibawa unennun-nennung gau'éro, ulolongenni pappagguruwangngéwé: Nasibawang acakkaruddureng nenniya matinro cina, nasibawang tudangngé malleppe lima nenniya mappésau cinampe, akurangengngé sibawa akasiyasingngé poléi maggasa pada-pada parampo massenjataé. Mangoloéwé engka siyagangngaré pangaja laing polé ri Salomo iya nalémbaé pegawé-pegawénna ri saorajana Hizkia, arunna Yéhuda. Ripakarajai Allataala nasaba aga iya Narahasiyakangngé; ripakalebbii arungngé nasaba aga iya naullé pakatajang. Pada-pada dolangeng iya maliyungngé sibawa langi iya matanré, makkuwaniro pikkiranna arungngé dé' nariyullé mpellungiwi. Pépaccingiwi riyolo péra'é polé ri tai-tainna, nainappa iya magelloé wedding ritappa ri limanna panré. Paddésu'i sining pappangaja majaé polé ri saorajaé, nainappa masse apparéntangngé nasaba adélékengngé. Rékko mangoloko ri arungngé sitinajai pakariyawai atié, aja' muwallaga' tau iya matanré tudangenna. Lebbi kessing muwi riyobbi ménré ri onrong iya lebbi malebbié naiya risuro mabbéréyangngi onrommu lao ri tau iya lebbi mappangka'é. Aja' muwapperi-peri tiwii parakaramu ri pengadilangngé; saba', rékko ri munri pabuttiwi salako agapi wedding mupogau'? Sala pahang sibawa silaommu, puraiwi banna sibawa aléna, iyakiya rahasiyana tau laingngé aja' mubukkai. Saba', rica'ko matti tau iya macapilaé namarota'i asemmu sillampé atuwommu. Pallolongeng iya ripangoloé sibawa teppa ri wettunna pada-padai buwa ulawengngé ri penné péra'é. Pakkamparenna tau maccaé lao ri tau iya maéloé méngkalingai, pada-padai ciccing ulawengngé iyaré'ga paréwa ulawengngé. Suro iya matinulué, mébbui masennang tau suroéngngi, pada-pada uwai keccé'é untu' paréngngalaé ri dare'é. Janci-janci iya dé'é narirupai, padai ellung sibawa anging iya dé'é napateppa bosi. Asabbarakeng iya nasibawangngé ada-ada iya mabessaé naulléi patepperiwi tau iya makuwasaé, sibawa mancuru'i sininna appangéwangengngé. Aja' muwanré maéga cani; ca'galéggéko matu. Aja' mumaléwe' senna lao ri bolana balibolamu, caui matti nanacéccéko. Teppuwang salaé weddingngi pauno, pada-pada peddangngé, palu-palu iyaré'ga pana iya matarengngé. Matepperi tau bali'bellaé ri wettu asussangngé iyanaritu pada-padai maggareppu'é sibawa isi léda'é iyaré'ga joppa sibawa ajé iya képpangngé. Makkélong untu' tau iya masaraé pada-padai pallusu-lusui ri laleng akeccékenna hawaé pada-padai tirikiwi cukka lona. Rékko malupui balimmu, panréi; sibawa rékko madekkai, paénungngi. Nanallalengiwi muwébbui masiri nanabarakkakiko matu Puwangnge. Anging polé manorangngé pasti papoléi bosi; makkuwatoro sara'dasié pasti paompo cai. Lebbi masennangngi monroé ri sunna rakkiyangngé naiya monroé sibola sibawa bainé iya pojiyéngngi assasangngé. Tarima karéba iya makessingngé polé ri wanuwa iya mabélaé pada-padai ménungngé uwai keccé ri wettu madekkaé. Tau makessing iya caué lao ri tau madorakaé pada-padai mata uwai malucca'é iyaré'ga bujung iya macarépaé. Dé' namakessing manré cani talliwe'-liwe', makkuwatoro dé' namakessing powadai maéga pappojiyang. Tau iya dé'é naullé makuwasaiwi aléna pada-padai kota iya maruttungngénna attahangenna. Pada-pada bosié ri wettu tikkaé, sibawa saljué ri wettu pellaé, makkuwatoro pappojiyé lao ri tau madonggoé dé' nasitinaja. Pada-pada manu'-manu'é luttu sibawa sajé-sajé ri yelle'é, makkuwatoro tanroé dé' nawedding nakenna tau iya dé'é napasala. Kaleddé'é harusu'i ripakkennai galang, anyarangngé harusu'i ricambu, makkuwatoro tau madonggoé harusu'i riyunru. Tau iya baliyéngngi pakkutanana tau madongo'é, padai donggona sibawa tauwéro. Pakkutana iya madonggoé harusu'i ribali sibawa pappébali iya madonggoétto, kuwammengngi tau makkutanaé namaingekiwi makkedaé dé' namacca pada-pada iya nasengngé. Suroi séddi tau madonggo untu' kiring karéba, padai poloi ajéna muto sibawa sappa abala. Pada-pada tau péso'é makkégunangngi ajéna, makkuwaniro tau madonggoé iya powadaé pangaja. Pojiwi tau iya dé'é pangissengenna, pada-padai siyoé batu mare ri pappé'é. Pada-pada pammabo'é passui dorié polé ri limanna, makkuwaniro tau madonggoé iya powadaé pangaja. Niga pajjamai tau madonggoé iyaré'ga dé' masala tau naparogiwi matu maéga tau. Pada-pada asué lisu paimeng ri luwana, makkuwaniro tau madonggoé iya pakkolingngéngngi adonggonna. Tau iya madonggo senna'é lebbi makessing mupi naiya tau iya masengngéngngi aléna macca. Tokuttué napoji monro ri bolaé; makkedai “Engka singa ri saliweng, weddikka nalurui ri tengnga laleng.” Pada-pada tange'é maccenné ri sélé'na, makkuwatoniro tokuttué balé-balé'i watakkaléna ri onrong atinrongngé. Tau iya makuttué dé' padanna; muwi témpui inanré ri bawana bata-batato. Tokuttué masengngi aléna lebbi maccai naiya pitu tau iya mabbéré pappébali iya teppa'é. Tau iya maccowéé campuru'i ri laleng assasang iya tenniyaé urusanna padai tau iya tikkengngéngngi asu liyaé ri daucculinna. Rékko cappuni ajué, peddéi apié; rékko dé'ni maccalépe'é témunna, mappésau toni assasangngé. Pada-pada osing sibawa ajué mébbui apié tette malluwa; makkuwaniro tau iya pojiyéngngi massasa pellaiwi keadaangngé. Iyaro pétenna'é malunra rasana; napoji tauwé memme'i. Padai oring tanaé riseppu sibawa péra', makkuwaniro tau iya macenningngé ri témunna, iyakiya maja atinna. Tau pacéccé macenning ada-adanna iyakiya atinna pennoi bellé. Namuni mabessai, aja' mumateppe; nasaba paccéccé makuwasaiwi atinna. Namuni nasubbui paccéccéna, sininna tauwé naitai matu jana. Niga kali kalebbong untu' tau laingngé, tassopoi matu ri lalenna. Niga galétté batu kuwammengngi nakennai tau laingngé, nageppai matu aléna iyaro batué. Belléi tauwé pada muwi sibawa céccéi. Tému macenningngé papoléi abala. Aja' muwabboro passalenna esso bajaé, nasaba dé' muwissengngi aga maélo kajajiyang matti. Aja' mupojiwi alému; leppessangngi tau laingngé pogau'i gau'éro, mala tau iya dé'é muwissengngi. Iyaro batué sibawa kessi'é maringeng mupi, rékko ripasibandingngi sibawa peddi ati iya napaompoé tau madonggoé. Iyaro caié mapéddara sibawa paancuru, iyakiya moloiwi pangémpurué niga tahang? Lebbi kessingngi pakkampareng iya dé'é narisubbu naiya pammasé iya dé'é naripallessu. Makkunrui silaongngé sibawa pappoji, iyakiya balié pakaddaowi sibawa moso. Rékko messoi, muwi cani'é risampéyang towi; rékko malupui, muwi iya mapaié malunra'to rasana. Tau iya salaiyéngngi bolana, padai manu'-manu' iya salaiyéngngi saranna. Pada-pada minnya mabaué sibawa wangi-wangié pésennangiwi atié, makkuwatoniro akessingenna silaongngé pétangngariwi nyawaé. Aja' muwallupaiwi silaommu iyaré'ga silaonna ambo'mu. Ri laleng asukkarakengngé aja' muwéllauwi bantuwanna silessuremmu; lebbi makkégunai balibola iya macawé'é naiya silessureng iya mabélaé. Ana'ku, sitinajako mapanré, kuwammengngi umasennang sibawa mulléi mappébali rékko ricellaki. Tau mapanré lésséi rékko mitai bahaya; tau madonggoé joppai matteru narikenna ri abalaé. Niga maélo tanggungngi inrenna tau laingngé, sitinajai appunnangenna riyala selaku boro'na jancinna. Niga maélé mabbéré selleng lao ri silaonna sibawa sadda iya maloppoé, riyangga'i powadai pangéllé. Bainé iya pojiyéngngi assasangngé padai oninna bosi iya teppaé siesso. Dé' namakkullé risuro mammekko, pada-pada angingngé dé' namakkullé ritahang sibawa minnya'é dé' namakkullé ripatallemme. Pada-pada baja'é masai baja'é, makkuwatoniro tolinoé magguru polé ri pada-padanna. Niga piyara aju, nanréi matu buwana. Riyangke'i matu pattumanié rékko napannyameng-nyamengngi puwanna. Pada-pada uwai pattappai rupammu, makkuwatoniro atimmu mappaitangngi alému. Ri linona tau maté, tuli engka onrong; makkuwatoniro cinnana tolinoé dé'gaga paggangkanna. Ulaweng sibawa péra'é riojiwi ri laleng apié; riissengngi tauwé polé ri kédona lao ri pappojiyangngé. Namuni riyunrui tau madonggoé maladde senna, dé'to nalennye adonggonna. Piyarai olokolo'mu madécéd-décéng, nasaba asugirengngé dé' namannennungeng matu, mala akuwasang untu' mapparénta dé'to matu natette mannennungeng. Sangkiwi sibawa paddeppungengngi wellaé ri dare'é sibawa ri bulué untu' olokolo'muro, iyakiya ri wettuéro tuwoi wella iya barué. Polé ri bulu-bulu bimbala'mu lolongekko pakéyang, sibawa polé ri dowi abbalukeng sibagiyang bémbé-bémbé'mu mulléi melli tana iya barué. Polé ri bémbé-bémbé'mu iya laingngé lolongekko susu untu' alému sibawa kaluwargamu enrengngé pattumani-pattumanimmu. Lariwi tau majaé nadé'gaga lellungngi, iyakiya tau malempué, baraniwi pada-pada singaé. Rékko madosai bangsaé, sisullé-sulléi panguwasana; rékko mapanréi pamimpingngé, mattahangngi matu bangsaé sibawa tette battowa. Panguwasa iya tenre'éngngi tau kasiyasié, pada-padai bosi raja iya solangiyéngngi éngngalangngé. Niga tettangngi hukkungngé, naccowériwi tau majaé; niga turusiwi hukkungngé naéwai tau majaé. Adélékengngé dé' napahangngi tau madorakaé, iyakiya tau iya sompaéngngi Puwangnge, tonget-tongengngi napahang. Lebbi kessing muwi tau kasiyasi iya malempué atinna naiya tau sugi iya macéko-cékoé. Kallolo iya turusiyéngngi hukkungngé iyanaritu tau mapanré. Iyakiya tau iya siwollompollongngé sibawa tau pakkojak-kojangngé napakasiririwi ambo'na. Niga mancaji sugi nasaba malai rénté sibawa saro maéga senna, sempé'i matu asugirenna lao ri tau iya maressé babuwaé lao ri tau kasiyasié. Rékko dé' muturusiwi hukkunna Allataala. Maja towi matu péneddinna Allataala lao ri sempajammu. Niga palécéi tau malempué kuwammengngi napogau'i majaé, aléna muto sempé ri laleng siyo-siyoé. Tau iya mapaccingngé atinna ribarakkakiwi matu angkanna masennang. Tau sugié tuli mapanréi nasedding aléna, iyakiya tau kasiyasi iya engkaé akkalenna naisseng niga aléna sitongenna. Rékko tau makessingngé makuwasa, masennang maneng tauwé, rékko tau majaé mapparénta, massubbu ra'ya'é. Niga subbui dosana dé' nasaro matu. Niga mangakuiwi sibawa salaiwi, riyamaséiwi matu ri Puwangnge. Tuli pakalebbii Puwangnge, namumasennang matu. Rékko muéwai Aléna, lolongekko matu acilakang. Tau maja iya makuwasaéngngi tau iya akurangengngé, pada-padai singa iya mangngaungngé iyaré'ga beruang iya paluruiyé. Panguwasa iya tenre'éngngi tau laingngé, dé' nappunnai akkaleng iya madisingngé; panguwasa iya céccééngngi acéko-cékongngé mapparéntai matu mattaut-taung. Séddié tau pauno marasai matu rilellung matteru gangka ajjalenna; dé' muwi séddi tau mulléi tahangngi. Tau iya tuwoé temmakkécella salama'i matu. Tau iya malléko-lékoé atuwonna, sempé'i matu. Patani iya majjama ladde'é genne'i matu inanréna; tau iya maccana-canaé akurangengngi matu. Tau malempué ribarakkakiwi matu ri Puwangnge, iyakiya tau iya macinnaé masitta sugi, dé' naleppe polé ri pahukkungengngé. Dé' namakessing pasilail-laingengngi tauwé; iyakiya engkato haking iya maéloé maggau' macéko-céko banna untu' lolongeng céddé dowi. Tau iya mangowaé macinnai masitta sugi; dé' namaingekiwi makkedaé akasiyasingngé masitta kennai aléna. Tau iya mabbéré pakkampareng paccappurenna lebbi riyangke'i naiya tau iya cabbérué. Niga ménnauwi polé ri tomatowanna sibawa masengngi iyaro tenniya dosa, padai sibawa sining panga laingngé. Pentingkangngi alé paompoi assasang; lebbi maupe'ko rékko mateppe'ko lao ri Puwangnge. Niga mattuwangngi pallolongenna, dé' nappunnai akkaleng iya madisingngé. Niga maccowériwi pappagguruwanna tau mapanré salama'i matu. Niga mabbéré lao ri tau kasiyasié dé' naakurangeng matu. Niga tutu'i matanna lao ri apparelluwanna tau kasiyasié, nakennai matu abusungeng. Rékko makuwasai tau majaé, massubbui ra'ya'é; rékko binasai tau majaé, tau adélé'é mappimping matu sibawa laluwasa. Niga matteru dé' namaélo turusiwi rékko ripangajariwi, séuwa wettu ancuru'i matu sibawa dé'na nawedding ripédécéngina. Rékko mapparéntai tau adélé'é, marennui ra'ya'é. Iyakiya rékko makuwasai tau majaé, manrasa-rasai ra'ya'é. Niga pojiwi pangissengengngé, napésennangiwi atinna ambo'na. Niga siwollompollong sibawa cakkuribangngé nakkojak-kojangengngi dowina. Rékko najampangiwi panguwasaé adélékengngé, masse'i matu wanuwanna. Iyakiya rékko napentingkangngi dowié, maruttungngi matu wanuwanna. Niga poji-pojiwi pada-padanna, natangiwi siyo-siyo aléna. Nalai siyo-siyo tau majaé nasaba dosana, masennangngi tau malempué. Tau makessingngé naissengngi ha'na tau malemmaé, iyakiya tau majaé dé' napahangngi. Tau iya pojiyéngngi maccella naullé pakacauwi kotaé, iyakiya tau mapanré napattennangngi keadaangngé. Rékko tau mapanré sibawa tau madonggoé mapparakarai, iyaro tau madonggoé banna majjallo'i sibawa macawa angkanna paompo arukkang. Tau iya malempu atié ricéccéi ri tau iya madekkaé ri daraé, iyakiya rilinrungiwi ri tau iya makessingngé. Tau madonggoé napannessa-nessai macai, iyakiya tau mapanré sabbara'i sibawa natahangngi caina. Rékko najampangiwi panguwasaé karéba bellé, mancaji maja manengngi matu pegawénna. Séddié tau kasiyasi sibawa pattenre'na mappunnaiwi assipadang; lao ri iya duwanna Puwangnge mpéréngngi mata untu' mitai cahaya atuwongngé. Rékko naéwaiwi arungngé ha'na tau malemmaé, mattaut-taungngi mapparénta matu. Pappaggurué sibawa pakkamparengngé pancajiwi tauwé mapanré. Ana' iya tuli riturusiyé élona napakasirii matu indo'na. Rékko makuwasai tau majaé, ménré'i pelanggarangngé. Iyakiya tau malempué narapii mitai ancurukenna tau majaé. Paggurui ana'mu, nanawérékko matu atennangeng, sibawa mancaji passaléwo ri alému. Bangsa iya dé'é nalolongeng pappimping polé ri Puwangnge mancajiwi bangsa iya pennoé akacaungeng. Masennangngi tau iya mapatoé lao ri hukkunna Puwangnge. Séddié ata dé' nawedding ripagguru banna sibawa ada-ada. Najeppui, iyakiya dé' napuriyatiwi matu. Lebbi maégai amménasang untu' tau madongo'é, naiya tau iya mabbicaraé tennapikkiri riyolo. Ata iya ripajjabé mappammulai malolona, paccappurenna mancajiwi matu matedde ulu. Tau iya masitta'é macai mébbui maéga tau massasa sibawa madosa. Tau matempoé ripakariyawai matu; tau iya mariyawa atié ripojiwi matu. Tau iya sikongkolo'é pangaé, bettuwanna nacéccéi aléna. Rékko matterui napannessa ri pengadilangngé, ripakennai matu pahukkungeng. Iyakiya rékko mammekkoi bawang, nakennai matu tanrona Allataala. Métau ri pallolongenna tauwé, addimonrinna asussang. Ateppe'no ri Puwangnge, namuamang matu. Maéga tau pojiwi malai atinna panguwasaé, iyakiya iya mabbéré adélékeng banna Puwangnge bawang. Tau makessingngé dé' namasennang sibawa tau majaé; tau majaé nacéccé tau makessingngé. Iyanaé ada-ada iya napowadaé Agur ana' Yaké polé ri Masa: “Matekkoka, oh Allataala, matekkoka! Cappuni awatangekku! Madonggoka pada-pada olokolo'é; temmappunnai pappéjeppu. Dé' naengka uwagguruiwi pangissengengngé, muwi céddé dé'to uwissengngi passalenna Allataala. Tolino kégana pura noté ri surugaé? Engkaga naengka nakemmo anging ri laleng limanna, sibawa doko uwai ri laleng wajunna, iyaré'ga pattette'i pakkaséséng-pakkasésénna linoé? Niga aléna, sibawa niga ana'na? Pasti muwisseng! Narupai Allataala tungke jancin-Na. Padai kaliyawoé untu' sininna iya laowé mallinrung ri Aléna. Rékko mutambaiwi aga iya Napowadaé, naamparekko matu sibawa Napabuttiwi makkedaé pabbellékko.” “Oh Allataala, uwéllauwi ri wettu dé'napa umaté, wérékka iyaé duwaé passaleng. Aja' narapii upowada ada-ada macéko-cékoé sibawa bellé, sibawa aja' taleppessakka kasiyasi iyaré'ga sugi. Wérékka banna aga iya uwapparelluwangngé. Saba', rékko sugika, naullé makkedaka matu makkedaé dé' uwapparelluwakko. Sibawa rékko kasiyasika, naullé ménnauka matu angkanna ucarépai asemmu.” Aja' mupétenna'i séddié ata ri puwanna, ritanroiko matti sibawa riyangga pasala. Engka tau iya tanroiyéngngi ambo'na sibawa dé' naangke'i indo'na. Engka tau iya mangga'éngngi aléna mapaccing padahal macarépa senna'i. Engka tau marasa makessing senna aléna – tenniya pato kessinna! Engka tau sappa dallé sibawa cara iya mapéddaraé; mabecco'i mennang sibawa para'i tau kasiyasié nenniya tau malemmaé. Alitta pottanangngé mappunnaiwi duwa ana'; iya duwanna riyasengngi “Untu' iyya!” Engka eppa passaleng iya dé'é naengka nacau: linona tau maté, makkunrai iya dé'é naengka naémmana, tana rakko iya madekkaé ri bosié, sibawa api iya mallépe'é lao tulili. Tau iya pakatunaéngngi ambo'na iyaré'ga indo'na iya macowaénna, sitinajai riyappéyang massu kuwammengngi naripitto matanna ri kao-kaoé sibawa ujuna riyanréi ri bokangngé. Engka eppa passaleng iya mawatang senna'é ri aléku untu' riyajeppui: bokang iya luttué ri yelle'é, ula iya lolo'é ri tompo'na batu karangngé, kappala iya sompe'é ri tengnga tasi'é, sibawa sipasang kallolo na ana'dara iya mattengngangngé sipoji. Iyanaé siyasa'na séddié makkunrai iya dé'é namatinulu lao ri lakkainna: Purana malaweng, manréi nainappa nasussu témunna, nainappa makkeda, “Dé' aga-aga upogau'!” Engka eppa passaleng iya mawatangngé ritarima ri sininna linoé: séddié ata iya mancaji arungngé, séddié tau madonggo iya lolongengngéngngi sininna iya nacinnaiyé, séddié makkunrai iya bottingngé padahal dé' naripoji ri tauwé, séddié ata makkunrai iya sittaiyéngngi tudangenna puwang makkunrainna. Ri linoéwé engka eppa rupanna olokolo iya baiccu'é iyakiya macca senna, iyanaritu: béré-béré, olokolo iya dé'é namawatang, iyakiya passadiyai inanréna ri wettu pellaé. Palando'é, olokolo iya malemmaé, iyakiya mébbui bolana ri bulu batué. Incalé, olokolo iya dé'é nappunnai arung, iyakiya mabbarisi'i sibawa taratoro. Cicca'é, olokolo iya weddingngé ritikkeng jari, iyakiya engka ri saorajana arungngé. Engka eppa passaleng iya mappasénge'é rékko ripénessaiwi carana joppa, iyanaritu: Singaé, olokolo kaminang mawatangngé ri yelle'na sininna olokolo'é sibawa dé' namétau muwi lao ri agi-agi; bémbé laié, manu' lai iya joppa tettongngé, arungngé ri yolona ra'ya'na. Rékko nasaba adonggommu nasibawang atempong murancanai parakara-parakara majaé, jagako! Saba' rékko garuko susu, powassélé'ko mantéga. Rékko muwunrui inge'na tauwé, massui ritu daraé. Rékko mupaompoi caié, muttama'ko ri laleng assasangngé. Iyanaé ada-ada iya napowadaé indo'na Lémuél, arunna Masa lao ri ana'na. “Ana'ku, buwa atikku, iya ujajiyangngé selaku pappébalinna sempajakku. Agana upowada matu lao ri iko? Aja' muwallabowangngi awatangemmu iyaré'ga massiyamporengngi awatangemmu lao ri makkunraié. Maégani arung iya ancuru'é nasaba makkunrai. Engngerangngi, Lémuél! Ménung anggoro sibawa acandung énungeng maseri, dé' nasitinaja untu' panguwasaé. Saba, rékko ménungngi arungngé énungeng maseri, nallupaiwi hukkungngé sibawa dé' najampangiwi ha'na tau malemmaé. Enungeng maserié iyanaritu untu' mennang iya maddoko-rokoé sibawa messé atié. Ménungngi mennang untu' mallupaiwi akasiyasinna sibawa asussanna mennang. Ewaiwi mennang iya dé'é naulléi méwaiwi aléna. Linrungiwi ha'na sininna tau iya dé'é pakkullénna. Ewano untu' mennang, sibawa ancajino haking iya adélé'é. Linrungiwi ha'na tau kasiyasié sibawa tau ritenre'é.” Bainé iya maccaé mawatang rilolongeng; lebbi mangke'i naiya intangngé. Dé' naakurangeng matu aga-aga lakkainna, nasaba natepperiwi. Dé' naengka napogau'i majaé lao ri lakkainna; sillampé umuru'na napogau'i makessingngé lao ri aléna. Mapatoi paddeppungeng daramé sibawa bulu bimbala nainappa natennung. Polé mabéla napapoléi inanré, pada-pada iya napogau'é kappala-kappala padangkangngé. Subu-subu mupa naoto untu' passadiya inanré untu' kaluwargana, sibawa untu' tawa-tawai jamangngé lao ri pattumani-pattumaninna. Sappai sikonrong tana, nainappa naelli; nausahakangngi sikonrong palla anggoro polé ri pallolongenna. Napassadiyai aléna untu' majjama maggangka awatangenna. Naisseng makkedaé sininna iya napogau'é, saroi; mappallaungngi narapi malaleng wennié. Munui wennang sibawa tennungngi kaing. Dé' namasékké lao ri iya akurangengngé; makessing atiwi lao ri iya mapparelluwangngé pattulung. Dé' nabata-bata rékko poléni wettu keccé'é, nasaba tassadiyani waju pellaé untu' kaluwargana. Aléna muto mébbui paramadaninna; pakéyanna poléi ri kaing lénang collipao iya magelloé. Lakkainna iyanaritu tau iya kalabbaé – sala séddinna polé ri yelle'na sining pamimping kotaé. Mébbui pakéyang sibawa babbang nainappa nabalu lao ri padangkangngé. Riyakkitangiwi sibawa ripakalebbi; dé' namanenneng lao ri esso mangoloé. Mabbicarai sibawa malemma; ada-adanna mapanréi. Tuli mapatoi mappallaung sibawa jampangiwi urusang ruma tanggana. Riyangke'i ri ana'-ana'na, sibawa ri lakkainna. “Engka maéga makkunrai iya makessingngé,” adanna lakkainna, “iyakiya iko kaminang makessing polé ri iya manenna mennang.” Tappa iya magelloé dé' nawedding riyatepperi, sibawa akessingengngé teddéngngi matu; iyakiya makkunrai iya matinulué lao ri Puwangnge sitinajai lolongeng pappojiyang. Wale'i sininna akessingenna; aléna makkunrai iya sipato'é ripakalebbi kégi-kégi! 80 Ada-adaé ri laleng kitta'éwé assalenna poléi ri Pappikkiri'é, ana' worowanéna Daud, iya sulléiyéngngi Daud mancaji arung ri Yérusalém. Makkedai Pappikkiri'é: Iya manenna siya-siyai sibawa dé' nakkéguna! Iyaro atuwongngé paracuma, iya manenna dé'gaga bettuwanna. Majjamaki sillampé umuru'ta, maggangka ullé. Iyakiya, kégani wassélé'na iya weddingngé riyabbangkakeng? Mompoi assossoreng iya séddié sibawa assossoreng iya laingngé lennye'i, iyakiya linoé tette muwi pada. Mompo mupi mata essoé sibawa labu mutopi. Nasibawang atekkoreng lisui ri onronna mammulangngé, nainappa mompo paimeng. Mirii angingngé liyattang, nainappa mangiri limanorang; maccenné-cennéi, nainappa lisu paimeng. Sininna saloé massolo'i lao ri tasi'é, iyakiya dé' naengka napenno tasi'é. Lisui uwaina ri ulunna saloé, nainappa mappammula massolo paimeng. Iya manenna pajinna na iyaro apajinnangngé tenripowada. Dé' naengka namesso mataé makkita; daucculingngé dé' naengka nacau maréngkalinga. Aga pura kajajiyang, kajajiyangngi matu paimeng. Aga pura ripogau', ripogau'i matu paimeng. Dé'gaga séuwa iya barué ri linoéwé. Engka tau makkeda, “Itani, baru iyaé!” Iyakiya, iyaro engkani ri wettu dé'napa tajaji. Dé' naéngngerangngi tauwé kajajiyang ri wettu labe'é. Makkuwatoro kajajiyang makkekkuwangngé sibawa matti, dé' nasénge'i matu tauwé ri wettu mangoloé. Iyya, Pappikkiri'é, mapparénta ri Yérusalém selaku arunna Israélié. Makkattaka untu' salidikiwi sibawa magguruiwi sibawa mapanré sininna iya kajajiyangngé ri linoéwé. Toto iya napassadiyangengngékki Allataalata mappamessé tongeng. Purani uwita sininna pangkaukenna tauwé ri linoéwé. Ateppe'no, iya manennaro siya-siyai, pada-padai usaha lellungngéngngi angingngé. Iya majjékkoé dé' nariyullé pallempu, sibawa iya dé'é gaga dé' nariyullé bilang. Pikkiri'ku, “Iyya'é mancajina tau penting sibawa mapanré, mabéla lebbi mapanréna naiya sininna tauwé iya mapparéntaé ri Yérusalém ri yoloku. Paddeppungekka maéga pangisseng.” Namakkattaka untu' missengngi assilaingenna pangissengengngé sibawa adonggongngé, apanréngngé sibawa adongokengngé. Iyakiya annessana pada-padaka lellungngé anging bawang. Saba' pédé maégai pangissengetta, pédé maéga towi amaccatta. Pédé maégai pangissengetta, pédé maéga towi asussatta. Upettuini untu' sennangiwi alé bawang untu' missengngi aga asennangengngé. Iyakiya annessana muwi iyaro siya-siyato. Mancaji mainge'na makkedaé cawaé iyanaritu adonggong sibawa asennangengngé dé'gaga gunana. Nasaba cinnaku untu' mancaji mapanré, makkattana untu' massennas-sennang sibawa ménung anggoro sibawa mappésta-pésta. Uwasengngi iyanaro cara iya kaminang makessingngé untu' tolinoé péneddingiwi atuwonna iya maponco'é ri linoéwé. Kalika sining kullang untu' mallekiwi iyaro sining tammengngé sibawa palla-palla'é. Mappunnaika maéga ata muwi iya uwelliyé, iyaré'ga iya jajiyé ri bolaku. Olokolo'ku mabélai lebbi égana naiya olokolo'na muwi niga iya puraé monro ri Yérusalém. Paddeppungekka péra' sibawa ulaweng wassélé pakkasuwiyang polé risining arungngé ri wanuwa-wanuwa ujajaé. Pakkélong worowané sibawa makkunraié sennangiwi atikku sibawa élok-kélonna mennang. Mappunnai tokka gundi singngéga iya uwacinnaiyé. Lebbi battowa tongekka naiya muwi niga iya puraé monro ri Yérusalém, sibawa amaccakku tette towi ri yasé. Sininna cinnaku, upennoi. Dé' naengka utahangngi aléku untu' péneddingiwi muwi asennangeng aga. Mabangka'ka ri sininna wassélé turuppuse'ku, na iyanaro saroku. Iyakiya ri munri uparéssai sininna ébbuku, sibawa sininna turuppuse'ku untu' pattépui sining ébbu-ébbukuro; umaingekini makkedaé iya manenna dé'gaga bettuwanna. Iyaro usahaku siya-siyai pada-padai lellungngé anging bawang. Muwi maga séddié arung banna naulléi pogau'i aga iya puraé napogau' arung-ngarung riyolonaé. Naumappammula pikkiri'i: Aga bettuwanna mancaji mapanré iyaré'ga madonggo? Mémeng, uwisseng, “Lebbi makessingngi pangissengengngé naiya adonggongngé, pada-padato tajangngé lebbiwi naiya apettangengngé. Tau mapanré naulléi mitai iya nattujuiyé; tau madonggoé samanna joppai maggarambang.” Iyakiya uwisseng towi makkedaé toto iya padaé kenna manengngi matu mennang. Naupikkiri'i, ‘Toto iya kennaéngngi tau madonggoé’ upéneddingi towi matu. Jaji aga gunana sininna amaccangekku? Nainappa malaka rippe'na makkedaé iyaro amaccangngé mémeng dé' sises-siseng akkégunana. Tau iya madonggoé masitta'i riyallupai, iyakiya tau iya mappunnaiyé amaccang dé'to narisénge matu. Angkanna teddéng manekki matu polé ri paréngngerangngé. Harusu manekki maté, muwi tau iya mapanré iyaré'ga tau iya madonggoé. Rimakkuwannanaro iyaro atuwongngé dé'gaga bettuwannana ri aléku, laingngé dé'. Iya manenna siya-siyai: anging bawang pura ulellung. Sininna wassélé jama-jamakku sibawa pallolongekku dé'gaga matu akkégunana ri aléku, saba' harusu'ka tarongengngi passulléku. Na nigana missengngi aga mapanréi iyaré'ga madonggoi? Iyakiya muwi maga mancajiwi matu iya mappunnaiyéngngi wassélé usahaku ri linoéwé barakka turuppuse'ku sibawa pangissengekku. Jaji muwi iyaro siya-siyato. Makkekkuwangngé massessekaléna pura majjama ladde. Saba' majjama ladde'i tolinoé sibawa pakéi sininna pangissengengngé, amaccangngé sibawa apanréngngé untu' lolongengngi séuwaé. Iyakiya paccappurenna harusu'i nasalai sininna wassélé turuppuse'na lao ri tau iya dé' sises-sisengngé napassui puse'na untu' iyaro. Jaji iyaro siya-siyato, nainappani dé'to naadélé! Gangka tuwona tolinoé majjama ladde'i sibawa massussa-sussa; na kégani wassélé turuppuse'na iya weddingngé nabbangkakeng? Agi-agi napogau' ri wettu tuwona, tiwii anrasa-rasang sibawa peddi ati ri aléna. Muwi ri wennié maséssato atinna. Jaji, iya manennaro siya-siyato simata. Dé'gaga iya lebbi makessingngé untu' tolinoé naiya manré, ménungngé sibawa péneddingiwi wassélé jama-jamanna. Mainge'ka makkedaé muwi iyaro pabbérénato Allataala. Niga mulléi manré sibawa massennas-sennang tennasibawang Allataala? Allataala mabbéréyangngi pangissengengngé, sibawa apanréngngé lao ri tau iya pésennangiyéngngi atin-Na. Iyakiya tau madosaé Nasuroi mappallaung sappa anré sibawa paggoppoi wassélé'na untu' nabbéréyang lao ri tau iya pésennangiyéngngi atinna Allataala. Jaji, iya manennaro siya-siyai pada-padai usaha lellungngéngngi angingngé. Sininna séuwa-séuwaé ri linoéwé kajajiyangngi ri wettu iya napattentué Allataala Allataala pattentui untu' mémmana sibawa wettu untu' maté, wetu untu' mattaneng sibawa wettu untu' mabbébbu, wettu untu' mabbuno sibawa wettu untu' pajjappai, wettu untu' solangiwi sibawa wettu mappatettong. Allataala pattentui wettu untu' teri sibawa wettu untu' macawa, wettu untu' mpating sibawa wettu untu' séré-séré, wettu untu' siluséreng sibawa wettu untu' pémmali siluséreng, wettu untu' kaddaowi sibawa wettu untu' tahangngi alé. Allataala pattentui wettu untu' runtu'i sibawa wettu untu' ateddéngeng, wettu untu' tabungngi sibawa wettu untu' mallabowangngi, wettu untu' sapé'i sibawa wettu untu' jayii, wettu untu' mammekko sibawa wettu untu' mabbicara. Allataala pattentui wettu untu' mamaséiwi sibawa wettu untu' céccéi, wettu untu' mammusu sibawa wettu untu' damé. Agana wassélé'na sininna turuppuse'ta? Uwisseng makkedaé mabbéréi Allataala tiwi iya matane'é lao ri idi. Napattentui wettu iya teppa'é untu' sininna séuwa-séuwaé. Nawérékki cinna untu' missengngi esso mangoloé, iyakiya dé' taulléi majeppuiwi pangkaukenna Allataala polé ri pammulanna lettu ri paccappurenna. Uwisseng makkedaé untu' idi dé'gaga iya lebbi makessingngé naiya marennué sibawa péneddingiwi atuwongngé gangka tuwota. Makessingeng manekki manré sibawa ménung enrengngé péneddingiwi wassélé jama-jamatta. Iyaro iyanaritu pabbéréna Allataala. Uwisseng makkedaé sininna ébbuna Allataala tette'i matu engka mannennungeng. Dé' naulléi tolinoé tambaiwi iyaré'ga kurangiwi. Na tinda'i Allataala makkuwaro kuwammengngi natamétau ri Aléna. Iya kajajiyangngé makkekkuwangngé, purani kajajiyang ri yolona. Iya maélo engka, maittana naengka. Napattentui Allataala kuwammengngi iya puraé kajajiyang, kajajiyangngi paimeng. Engka topa iya uwitaé ri linoéwé: kégi harusu engka adélékeng sibawa akessingeng, kuwaro engka ja. Pikkiri'ku, naadélékiwi matu Allataala tau iya makessingngé iyaré'ga tau iya majaé, saba' tungke' passaleng sibawa tungke' tindakang kajajiyangngi matu ri wettu iya napattentué Allataala. Pallolongekku iyanaritu: Naojiki Allataala untu' mappaitangngi makkedaé totota dé' nasilaingeng totona olokolo'é. Muwi maga, totona tolinoé sibawa olokolo'é iyanaritu padai. Iya séddié matéi matu, makkuwatoro iya laingngé. Iya duwanna pada-padai mahlu'. Jaji, tolinoé dé' nalebbi maupe naiya olokolo'é, saba' untu' iya duwanna iyaro atuwongngé siya-siyai. Mattujui mennang ri onrong iya padaé. Assalenna mennang poléi ri awué sibawa lisui matu ri awué. Dé' taissengngi, aga rohna tolinoé ménré'i ri yasé sibawa rohna olokolo'é nonnoi ri laleng tanaé. Rimakkuwannanaro umaingekiwi makkedaé dé'gaga iya lebbi makessingngé naiya péneddingiwi wassélé jama-jamanna. Ri lainnaéro dé'gaga naullé pogau'. Dé' namakkullé naisseng aga kajajiyang matu rékko maténi. Nainappa upénessaisi sininna dé'é naadélé iya kajajiyangngé ri linoéwé. Sining tau iya ritenre'é teriwi sibawa dé'gaga iya maéloé tulungngi mennang. Dé' muwi séddi tau maélo mabbantu, nasaba sining pattenre'éro mappunnaiwi akuwasang iya battowaé. Mangémpuruka méngngerangngi sining tau iya maittaénna maté nasaba lebbi masennangngi mennang naiya sining tau iya tuwoé mupa. Iyakiya iya lebbi masennangngéppa iyanaritu sining tau iya dé'éppa najaji, saba' dé'pa mennang naitai ja iya ripogau'é ri linoéwé. Uwisseng towi makkedaé mappallaung ladde'i tolinoé, banna nasaba mangémpurui mitai wassélé usahana balibolana. Iya manennaro siya-siyai simata pada-pada usaha lellungngé anging. Karébanna, banna tau madonggoé bawang iya tudangngé malleppe lima sibawa leppessangngi aléna maté alupureng. Naullé iyaro tongeng, iyakiya lebbi kessing muwi céddé waramparang nasibawangngi atennangeng naiya majjama ladde'é makkégunangngi iya duwa limaé sibawa lellung anging. Engka mupa iya siya-siyaé ri laleng atuwongngéwé. Engka tau tuwo alé-aléna temmappunnai ana', iyaré'ga silessureng. Namuni makkuwaro, majjama ladde'i matteru-teru sibawa atinna dé' naengka nacau sibawa waramparanna. Untu' niga napara'i puse'na sibawa sampéyangngi sininna asennangengngé? Iyaro siya-siyato, sibawa séuwa cara atuwong iya manrasa-rasaé. Sipadduwa lebbi makessing naiya alé-alé. Rékko mappallaungngi mennang, lebbi makessingngi wassélé'na. Rékko sempé'i iya séddié iya laingngé weddingngi tulungngi. Iyakiya rékko séddié tau sempé, padahal alé-alénami, macilakani aléna, nasaba dé'gaga iya mullééngngi tulungngi. Ri wenni iya macekké'é, duwa tau iya matinroé makkadambang weddingngi sisullé sipellai, iyakiya pékkugi tauwé wedding mancaji mapella rékko alé-alénami? Duwa tau iya silaongngé lao naulléi pasalai paggasaé, iyakiya tau iya alé-alé magampang ricau. Tellu tulu iya ripasiyempe'é mancaji séddi, mawatang ripettui. Upikkiri'i sininna tolinoé ri linoéwé, naumaingekiwi makkedaé ri yelle'na mennang pasti engka séddi kallolo iya sullééngngi matu arungngé. Ra'ya' iya napimpingngé weddissa jaji tenribilang jumellana, iyakiya laonana, dé'gaga iya mattarima kasi'é méngngerangngi jasa-jasana. Mémeng, iya manenna siya-siya pada-pada usahaé lellung anging. Matutuko rékko maéloko lao ri Bolana Puwangnge. Lebbi kessing muwi lao kuwaro untu' magguru naiya untu' makkasuwiyangeng akkarobangeng, pada-pada iya napogau'é sining tau madonggoé. Dé' naulléi mennang pasilaingengngi kéga tongeng sibawa sala. Pikkiri'i ri wettu dé'napa mumabbicara, sibawa aja' mumasitta senna majjanci lao ri Allataala. Engkai ri surugaé na iko engkako ri linoé jaji addiki-dikino sibawa ada-adammu. Pédé manenneng, pédé battowa akkulléna lolongeng nippi maja. Pédé maéga bicara pédé battowa akkulléna passu ada-ada madonggo. Jaji, rékko majjanciko lao ri Allataala, rupaiwi masitta. Dé' napojiwi tau iya kédo madonggoé. Rimakkuwannaro, rupaiwi jancimmu. Lebbi kessing muwi temmajjanciyé naiya majjanciyé iyakiya dé' narirupai. Aja' naébbuko ada-adammu madosa, angkanna tarapassako powadai lao ri imang iya tumaniyéngngi Puwangnge, makkedaé tappasalako powada janci. Untu' aga mébbui Allataala macai lao ri iko angkanna Naancuru wassélé jama-jamammu? Pada-pada maéga nippi dé'gaga bettuwanna, makkuwatoro maéga bicara dé'gaga akkégunana. Iyakiya étauno lao ri Puwangnge. Aja' muhérang rékko iyaro panguwasaé natenre'i tau kasiyasié, narampasa'i ha'na mennang sibawa dé' nawéréngngi mennang adélékeng. Tungke' pegawé rilinrungiwi ri tomariyasé'na sibawa iya duwanna rilinrungiwi ri pajaba iya lebbi matanré pangka'na. Mala muwi atuwonna arungngé taggattungngi ri wassélé éngngalangngé. Tau mammata dowié, dé' naengka nagenne dowina; tau iya jangeng waramparangngé, dé' naengka nacau sibawa asarongngé. Iya manenna siya-siya. Pédé maéga asugirenna séddié tau pédé maéga tau laing iya harusu'é nawéréng inanré. Dé'gaga asarong untu' punnana, banna naissengngi makkedaé sugii. Séddié pappallaung weddissa jaji dé' nappunnai genne inanré, iyakiya weddingngi memme matinro. Sibalé'na, séddié tau sugi makkuwamani égana waramparanna, angkanna dé' nawedding matinro nasaba manennengngi. Uwitai ri linoéwé séuwa iya mappamessé: Séddié tau goppo waramparang untu' wettu akurangengngé. Iyakiya iyaro waramparangngé teddéngngi nasaba séuwa abala, angkanna dé'gaga wedding nappammanareng lao ri ana'-ana'na. Jajiki sibawa mallusu-lusu; makkuwatokki'ro salaiwi linoéwé, tettiwi aga-aga polé risininna turuppuse'ta. Mappamessé tongeng iyaro! Laoki pada-pada wettutta makkekkuwangngé polé. Sipposo-posoki untu' lellung anging, naagana wassélé'na? Gangka tuwo, maggarambakki ri laleng pettangngé, massussa-sussaki, manenneng, kérék-kéréng sibawa mapeddi ati. Nauwajeppuini makkedaé iya kaminang makessingngé untu' idi iyanaritu manré, ménung sibawa péneddingiwi wassélé jama-jamatta ri wettu atuwong maponco iya nabbéréyangngé Allataala lao ri idi; iyanaro totota. Rékko séddié tau tarima asugireng sibawa waramparang polé ri Allataala, naripalalo péneddingiwi asugirengngéro, harusu'i marasa sukkuru sibawa péneddingiwi sininna wassélé jama-jamanna. Iyaro pabbérénato Allataala. Allataala pennoiwi atinna iyaro tauwé sibawa arennung, na dé'na namanenneng pikkiri'i passalenna ponco'na iyaé atuwongngé. Uwitasi atengngadélékengngé iya tenre senna'éngngi tolinoé ri linoéwé. Biyasato Allataala mabbéré asugireng, alebbireng sibawa waramparang lao ri séddié tau, angkanna dé' gagana iya nacinnaiyé. Iyakiya Allataala dé' napalaloi péneddingiwi sininna iyaro pabbéré. Sibalé'na, tau iya dé'é Naissengngi napéneddingiwi matu iyaro asugirengngé. Jaji, iya manennaro siya-siyai sibawa mappamessé. Namuni séddié tau mappunnai sératu ana' sibawa tuwo maitta senna angkanna macowa senna, iyakiya rékko dé' namarasa masennang sibawa dé'to nalolongeng attampungeng iya sitinajaé, manuru pallolongekku, ana'lolo iya maté najaji lebbi makessingngi totona naiya tauwéro. Saba' untu' iyaro ana'loloé dé' namancaji soal aga rijajiyangngi iyaré'ga dé'; laowi ri laleng pettangngé, namasitta'na riyallupai. Dé'pa naengka naita tappa mata esso, sibawa dé'topa najeppuiwi aga iyaé atuwongngé, angkanna weddingngi léwu sibawa tennang. Na iyaro lebbi makessingngi naiya tau iya tuwoé duwa ratu taung, iyakiya dé' naengka namasennang. Dé'ga naduwa-duwanna laowi ri onrong iya padaétto? Mappallaungngi tolinoé banna untu' manré, iyakiya dé' naengka namarasa cau. Jaji, aga sarona tau mapanré ripasibandingngi sibawa tau madonggoé? Aga tona akkégunana rékko tau kasiyasié kédo makessingngi ri tengnga-tengngana masaraka'é? Iya manennaro siya-siyai pada-pada usaha lellungngéngngi angingngé. Lebbi kessing muwi masennakki sibawa aga iya engka ri idi naiya tuli macinnaiyéngngi lebbi maégaé pasi. Sininna séuwa-séuwa iya engkaé, engka mémenni ri wettu riyolopa. Taisseng makkedaé dé' naulléi tolinoé bantai tau iya lebbi mawatangngé naiya aléna. Pédé maittai mabbanta, pédé dé' bettuwanna ada-adanna, mala dé' aga-aga saro nalolongeng. Pékkugiwi naulléi tauwé missengngi aga iya kaminang makessingngé ri aléna ri laleng atuwonna iya maponco'é sibawa dé' nakkéguna, sibawa iya labe'é pada-pada wajo-wajo? Pékkugi séddié tau naullé majeppuiwi aga kajajiyang matu ri linoéwé rékko dé'ni gaga? Aseng mabaué lebbi kessingngi naiya minnya wangi matanré angke'na; sibawa esso amaténgngé lebbi kessingngi naiya esso ajajiyangngé. Lebbi kessing muwi lao ri bola amaténgngé naiya ri onrong péstaé. Saba' tuli harusu'ki sénge'i makkedaé amaténgngé tajengngi tungke' tau. Amesséngngé lebbi kessingngi naiya cawaé. Leppessangngi masara tappana, assaleng masennang muwi atinna. Tau madonggoé matterui lellung asennangeng; tau mapanré tuli napikkiri'i amaténgngé. Lebbi kessing muwi riyampareng ri tau iya engkaé akkalenna, naiya ripojiyé ri tau iya mawatangngé makkéjeppu. Cawana tau madonggoé dé' bettuwanna, pada-padai oninna dorié nanré api. Rékko pabengnguwangngi tau maccaé, madonggoi ritu tindakanna; rékko tarimai tauwé dowi pasoso, masolanni aléna. Lebbi makessing muwi paccappurenna séddié parakara naiya pammulanna; lebbi kessing muwi sabbara'é naiya mabangka senna'é. Aja' mumasitta ménré pellamu; banna tau madonggoé taroi pakkabale'na. Aja' mumakkutana, ‘Magi wettu riyolo nalebbi kessing naiya wettu makkekkuwangngé?’ Banna tau madongo'é iya makkutanaé makkuwaro. Tau tuwoé harusu'i macca; angke'na amaccangngé padai manaé; pada towi sibawa dowi pabbéré rasa amangngé. Apalagi pangissengengngé passalenna amaccangngé! Niga mappunnaiwi salama'i matu. Pénessaiwi jama-jamanna Allataala. Saba' nigana mulléi pallempui aga iya napajjékkoé Allataala? Jaji, akkérennuno rékko mattengngakko maupe. Iyakiya rékko nakennako abala, aja' muwallupaiwi makkedaé Allataala mabbéréyang duwai. Dé' taissengngi aga kajajiyang puranaro. Atuwokku dé'gaga gunana, iyakiya sipongeng tuwokuro uwitai iyaé mangoloé: Biyasato tau iya makessingngé binasai, namuni malempui. Biyasato tau iya majaé malampé sunge, namuni matterui madosa. Aja' mumakessing senna sibawa aja'to mumapanré senna. Aga akkégunana mpunoi alé? Aja'to mumaja senna iyaré'ga madongo senna. Untu' aga maté ri wettu dé'napa narapii wettunna? Niniriwi iya duwannaro onna. Rékko métauki ri Allataala, pastini mallolongekki makessingngé. Amaccangngé mébbui iya mappunnaiyéngngi lebbi barani naiya seppuloé panguwasa ri séddié kota. Ri linoéwé dé'gaga tau sukku; dé'gaga iya tuli pogau'éngngi makessingngé sibawa dé' naengka namadosa. Aja' mupojiwi méngkalingai bicara-bicaraé, nigana missengngi mattengngakko ritanroi ri séddié pattumani. Alému paimeng maingekiwi makkedaé tau laingngé pura towi mutanroi. Iya manennaro uwojiwi sibawa amaccakku. Iyakiya pédé usappai iyaro amaccangngé, pédé mabélai polé ri aléku. Niga mulléi lolongengngi bettuwanna iyaé atuwongngé? Malamung senna untu' riyajeppui! Iyakiya mattinettoka magguru sibawa sappai pangissengengngé, kuwammengngi ulolongeng amaccang sibawa pappébalinna sininna pakkutanaé. Ucobai majeppuiwi makkedaé iyaro dosaé adonggong, sibawa jaé iyanaritu abaraning. Ulolongengngi makkedaé makkunraié lebbi mapayii naiya amaténgngé. Pappojinna makkunraié pada-padai jalaé sibawa siyo-siyoé iya sadiyaé tikkengngi anréna. Pakkaddaona pada-padai balenggu iya pasiyoé mare. Tau iya pogau'éngngi élona Allataala leppe'i polé ri siyo-siyona, iyakiya tau madosaé pasti natawangngi matu. Itai, adanna Pappikkiri'é: Iya manennaro uruntu'i, wettunna usappa tassilappa-tassilappa pappébalinna. Sappa mupa pappébali-pappébali laing, iyakiya dé' ulolongengngi. Ri yelle'na sisebbué tau, upoléiwi séddi worowané iya upakalebbié. Iyakiya ri yelle'na mennang dé'gaga makkunrai iya weddingngé uwangke. Banna iyanaé ulolongeng: Naébbuki Allataala dé' natalliwe-liwe sibawa biyasa. Iyakiya idi muto mébbui aléta mawatang sibawa malléko-léko. Temmaka sennanna tau mapanré. Naissengngi pappébalinna sininna parakaraé. Amaccangngé mébbui cabbéru marennu, angkanna tuli maccahayai tappana. Apatono rékko mabbéréi parénta arungngé, sibawa aja' muwébbu janci mapperi-peri lao ri Allataala. Weddingngi arungngé tinda siélona, rékko dé' napuwéloi, lebbi kessing muwi mabélaiwi. Tinda'i arungngé sibawa akuwasang; dé'gaga barani bantai! Tau iya turué lao ri aléna, amangngi matu sibawa saléwangeng; tau maccaé naisseng uppanna sibawa pékkugiwi turusiwi arungngé. Untu' sininna séuwa-séuwaé engka wettunna sibawa carana muto, iyakiya céddé senna iya ripahangngé! Dé' muwi séddi tau missengngi toto aga mattajengngé, sibawa dé'to gaga mulléi makkeda aga matu kajajiyang. Dé' muwi séddi tau mulléi tahangngi iyaré'ga pasoroi amaténna. Iyaro angéwangeng iya dé'é naulléi léssériwi, dé' naulléi leppe polé ri aléna, namuni nasibawang bellé sibawa pabengnguwang. Iya manennaé uwitai wettunna upénessai sininna kajajiyangngé ri linoé. Biyasa towi tolinoé pakéi akuwasanna untu' cilakaiwi pada-padanna. Engka naengka uwitai tau majaé maté sibawa rikuburu. Iyakiya wettunna lisu sining tauwé polé ri akkuburukenna, napojiwi mennang ri kota onronna pogau' ja. Jaji, siya-siya towi iyaro. Magi namagampang makkuwaro tauwé pogau' ja? Nasaba dé' namasitta riwéréng pahukkungeng. Namuni sératu ja napogau' séddié tau madosa, tette'i tuwo mala malampé sunge'i. Karébanna, niga mapato ri Allataala, pasti pada magampangngi atuwonna. Sibalé'na, tau majaé lolongengngi maéga asukkarakeng. Masitta'i lalo atuwonna pada-pada wajo-wajoé. Matéi matu ri umuru maloloé nasaba dé' namapato lao ri Allataala. Iyakiya iya manennaro bellé simata. Ita bawanni aga kajajiyang ri linoé: Engka tau malempu rihukkung samanna tomadoraka, engka tomaja rihukkung samanna tau malempu. Jaji, iyaro siya-siyato. Kesimpulakku iyanaritu makkedaé harusu'i tauwé marennu. Nasaba ri laleng atuwonna ri linoé dé'gaga asennangeng laing ri aléna sangadinna manré, ménung sibawa mariyo-riyo. Iyaro bawang wedding napéneddingi ri tengngana turuppuse'na, sipongeng riwérénna atuwong ri Allataala. Wettukku makkuraga lolongengngi amaccangngé, sibawa upénessaiwi sininna kajajiyangngé ri linoéwé, namainge'na makkedaé namuni massussa-sussaki esso wenni temmappésau, dé' taulléi majeppuiwi tindakanna Allataala. Muwi magaki makkuraga, dé'to namakkulléki pahangngi. Mangakui tau maccaé makkedaé naissengngi, iyakiya sitongenna dé' naissengngi. Iya manennaro upikkiri'i sibawa matutu. Allataala matoro'i atuwonna tau iya makessingngé sibawa mapanré, mala rékko iyaro tauwé maccéccéi iyaré'ga mappojiwi. Dé'gaga missengngi aga kajajiyang matu ri esso ri munri. Mémeng, toto iya padaé kennai tungke' tau: Tau malempué iyaré'ga tau benna'é, tau makessingngé iyaré'ga tau majaé, tau iya mapaccingngé iyaré'ga tau najisi'é, tau iya makkasuwiyangengngé akkarobangeng iyaré'ga dé'é. Tau makessingngé dé' nalebbi maupe naiya tau madosaé, tau iya mattanroé pada muwi sibawa tau iya dé'é namaélo mattanro. Jaji, toto iya padaé kenna maneng towi mennang. Na iyaro séuwa passaleng iya mappamessé pada-padato sininna kajajiyangngé ri linoé. Gangka tuwona atinna tolinoé pennoi ja, sibawa pikkiranna penno towi adonggong. Nainappa tennasenna-senna leppu nyawana. Iyakiya ri wettu engkana mupa atuwongngé ri laleng watakkalé, ri wettuéttoro engka amménasang. Tenniyaga asu iya tuwoé lebbi masennangngi naiya singa iya dé'é nakkényawa? Kaminang déna, tolinoé naissengngi makkedaé ritajengngi ri ajjalengngé, na tau maté dé' aga-aga naisseng. Untu' aléna dé'gaga saro iyaré'ga pamale', sibawa riyallupaini asenna. Rasa mappoji, maccéccé enrengngé napessunna, maté manengngi silaong aléna. Dé'na aga-aga bagiyang nala ri laleng sininna kajajiyangngé ri linoé. Ayo, anréno bawang sibawa marennu, énunni anggoro'mu sibawa mariyo-riyo. Dé' nappotane Allataala, mala Napuwéloi. Leppessanni rupammu mattappa sibawa maccahaya. Péneddingini atuwongngé sibawa bainé iya muwamaséiyé ri wettu atuwommu iya siya-siyaé, iya nawéréngngékko Allataala ri linoé. Péneddingiwi tungke' esso namuni dé' nakkéguna. Saba' sarona turuppuse'mu banna iyaro bawang. Jamai sininna tugasmu sibawa maggangka ullé. Saba' matti dé'na gaga pikkirang iyaré'ga jama-jamang. Dé'gaga pangissengeng iyaréga amaccang ri linona tau maté. Na kuwaniro laoko matu. Ri linoéwé engka mupa uwita: akkalaringngé dé' natuli pakala tau iya magattié, ammusurengngé dé' natuli pacau tau iya mawatangngé. Tau mapanré dé' natuli lolongeng assappa-sappareng. Sibawa tau iya maccaé dé' natuli mallolongeng asugireng. Makkuwatoro sining ahlié dé' natuli tarompo. Saba dé' masala weddingngi nakenna acilakang. Dé' naissengngi tolinoé uppanna narapi wettunna. Pada-padai manu'-manu' nalaé siyo sibawa balé nalaé jala, makkuwatoniro tolinoé nakenna abala ri wettu iya tenrisenna-sennaé. Mangoloéwé iyanaritu séuwa conto coco'é pékkugi tauwé mangke'i amaccangngé: Engka séddi kota baiccu iya céddé'é pabbanuwana. Riséuwaé esso séddi arung battowa polé gasai iyaro kotaé. Nakeppungngi sibawa sadiya-sadiya leppoi témbo'na. Ri kotaéro engka séddi tau kasiyasi iya mapanré. Naulléi passalama'i kotaéro. Iyakiya nasaba kasiyasiwi, masitta'i riyallupai jasana sibawa dé' muwi séddi tau méngngerangngi. Jaji, tongenni pallolongekku makkedaé amaccangngé napakacauri awatangengngé. Namuni makkuwaro, amaccanna tau kasiyasié dé' naribati-bati. Ada-adanna dé'gaga iya ripénessaiyé. Lebbi kessing muwi méngkalinga ada-ada tennanna séddié tau macca naiya gorana séddié panguwasa ri laleng addeppu-deppungenna sining tau madongo'é. Lebbi makkégunai amaccangngé naiya senjataé, iyakiya nyila sitetti'é nasolangiwi susu sioringngé. Lale' maté nakebbongiwi sibotolo minnya wangi, céddé adonggong napatteddéngngi amaccang iya matanré. Sitinajai rékko tau maccaé pogau'i akessingeng, sibawa tau madonggoé pogau'i ja. Paitai adonggonna risininna kédo-kédona. Sibawa lao ri sininna tauwé nappaitangngi adongokenna. Rékko riyacairiko ri panguwasaé, aja' muwéllauwi mappésau majjama. Namuni battowai asalammu, riyaddampengekko rékko tennakko sibawa sabbara. Engka ja laing uwita ri linoé, iyanaritu acéko-cékonna sining panguwasaé. Tau madonggoé riwéréngngi tudangeng iya matanré, na tau mariyoloé dé' aga-aga nalolongeng. Engka naengka uwitai ata-ataé makkinnyarang na arungngé mallalengngi pada-pada ataé. Niga kali kalebbong, sempé'i matu ri lalenna; niga leppoi témbo'é naokkoi matu ula mamoso. Niga majjama ri akkaling batué, tattetté'i matu sibawa malo. Niga mappuwé aju, wedding senna'sa lolongeng lo. Rékko makunrui bangkummu nadé' muwasai, harusu'ko majjama lebbi massussa-sussa. Pakéi akkaleng makessimmu, sibawa ébbuno rancana lebbi riyolo. Rékko makkokkoi ulaé ri wettu dé'napa naripakacuwai sibawa pajjappi, sanro ulaé dé' gagana akkégunana. Ada-adanna tau maccaé mébbui ripakalebbi, iyakiya tau madonggoé binasai nasaba ada-adanna muto. Napammulaiwi sibawa bellé biyasaé, iyakiya paccappurenna bicaranna pada-padai tau jangengngé. Mémeng, tau madonggoé maéga bicaranna. Esso mangoloé tassubbui untu' idi maneng. Dé'gaga mulléi botoi kajajiyangngé rékko dé'ni gaga. Banna tau madonggoé dé' naissengngi lalengngé lao ri bolana, majjama ladde'i sibawa dé' appésaunna. Cilakani wanuwa iya arunnaé malolo mupa, sibawa sining tomarajana puppu benni mappésta marowa. Maupe'i wanuwa iya arunnaé riyakkitangi, iya manré tomarajana ri wettunna, dé' napojiwi mabo' sibawa macca tahangngi aléna. Sebbo'i matu pabbingeng bolaé rékko dé' naripédécéngi, na angkanna matabu'i matu iyaro bolaé nasaba akuttung. Péstaé mébbui macawa, sibawa anggoro'é mébbui marennu. Iyakiya parellu engka dowi untu' mpajai. Aja' mucellai arungngé, muwi ri laleng ati. Aja mupau-pau majai tau sugié, muwi ri bili atinrong paribadié. Naullé sikaju manu'-manu' méngkalingai aga iya mupauwéro, nanapalettu'i lao ri iya nakennaé. Tanengngi dowimu ri laleng usahaé ri saliwempanuwa. Pasti lolongekko saro ri munri. Tanengngi modala'mu ri maddupa-rupang dangkangeng; sappano usaha singngéga-égana. Saba' parellui tauwé jaga-jaga, ri wettu dé'napa napakenna abalaé. Muwi lao kégi iyaro ajué maléttung, tette'i matu léwu ri onrong iya nasempékiyé. Rékko tampu'i uwai ellungngé angkanna buce, nonno toni bosié ri linoé sibawa maraja. Niga mattajeng narapi angingngé sibawa hawaé sukku, dé' matu namattaneng sibawa dé'to nalolongeng wassélé. Allataala mébbui sini-sininnaé, na tolinoé dé' naulléi pahangngi tindakan-Na; makkuwatoro dé' najeppuiwi tuwona atuwong mabarué ri laleng tampu'na séddié indo'. Ampoi binému ri éléé sibawa aja' muwappésau ri wennié. Saba' dé' taissengngi ampo kégaénna makessing tuwona. Naulléto tuwo duwai sibawa sukku. Tappa mata essoé mébbui masennang; temmaka sennanna rékko naulléi péneddingiwi. Sitinajako sukkuru rékko tattambai umuru'é. Iyakiya éngngerangngi, muwi maittako tuwo ri linoé, wettummu ri linona amaténgngé lebbi maitta mupi. Jaji, aga maélo riyamménasaipa? Iya manenna paracuma sibawa siya-siya. Péneddingini wettu malolomu, éh kallolo! Arennuno ri wettu malolomu mupa. Pennoiwi sininna cinnana nyawamu, pogau'ni sininna niya' atimmu. Iyakiya éngngerangngi, Allataala iya engkaé ri surugaé, naadélékiwi matti sininna tindakammu. Paddésu'i abata-batangngé sibawa sussaé polé ri atimmu, nasaba wettu malolomu masitta'i labe. Engngerangngi Pappancajimmu ri wettu malolomu mupa, ri wettu dé'napa nalettu taut-taung pennoé anrasa-rasang. Ri wettuéro makkedako matu, “Dé' namasennang atuwokku.” Rékko lettu'ni iyaro wettué dé'na namacakka matammu, angkanna massalawuni tappa mata essoé, kétengngé sibawa wéttowingngé. Ellung maliling pattiwi bosié, tette'i sibawakko selaku pangancang. Ténré taiyyamu sibawa dé'na namabbéré pallinrung. Ajému iya masse'é goyangngi temmappunnai awatangeng. Isimmu dé'na nasukku untu' gareppu'i inanré. Massalawu matammu angkanna pettangiwi pakkitaé. Arowasengngé ri lalengngé lettu'i ri daucculimmu sibawa dé' namanessa. Oni musi'é sibawa allélurengngé céddé'i dé' nariyéngkalinga. Dé' muwulléi memme matinro. Muwi oni manu'-manu'é mébbu tokko pésedding. Métauko tuppuiwi onrong iya matanré sibawa harusu joppa sibawa matutu. Maubenni gemme'mu sibawa muwassarénréngeng ajému wettummu joppa. Nateddénna sininna pangéloremmu sibawa cinnamu. Mattujuki ri onrotta iya paccappurengngé, mabbaratai sining tauwé sibawa mpating puppu laleng. Pettui matu ranté péra'é sibawa massara-sarang; sempé'i lampu ulawengngé sibawa mareppa; pettui tulu séro'é sibawa masolang; ancuru'i kendié sibawa tassiya-siya. Lisui matu paimeng tubutta, mancaji awu ri linoé. Nappase atuwotta lisui matu ri Allataala. Aléna ritu mabbéréyangngi selaku pammasé. Adakku, mémeng iya manennaro siya-siya, iya manenna paracuma, dé'gaga bettuwanna. Iyaro Pappikkiri'é naisseng sibawa mapanréi. Rimakkuwannanaro napagguruwangngi umma'é sininna pangissengengngé. Maéga pakkalarapang naggurui nainappa naoji atongengenna. Makkuragai runtu'i ada-ada passaléwoé, na ada-ada iya naokié iyanaritu malempui. Ada-adanna iyaro tau maccaé pada-padai tekkeng macéru'na séddié pakkampi, tekkeng iya napaké untu' linrungiwi bimbala'na. Addeppungeng pakkalarapang sibawa pangaja, pada-pada paku iya masse'é maddince. Iya manennaro pabbérénato Allataala, pakkampita iya séddi-séddié. Ana'ku, harusu'ko matike lao riséddié passaleng. Arokireng kitta'é dé'gaga paccappurenna, sibawa maéga senna magguru natekkoriwi nyawaé sibawa tubué. Pura manenna utimbang, iyanaé rippe'na iya ulolongengngé. Etauno ri Allataala sibawa turusiwi parénta-Na, saba' banna untu' iyaro Naripancaji tolinoé. Naadélékiwi matu Allataala sininna pangkauketta; iya makessingngé sibawa majaé, mala iya tassubbuétto. Elong Maraja nawinrué Salomo. Bauka sibawa témummu; lebbi manyamengngi cintamu naiya anggoro'é! Lellakko mabau, asemmu pada-padai minnya wangi iya tuppa'é; iyanaro saba'na nacintako sining ana'daraé! Tamapperi-perina, oh arukku, tiwika lao ri laleng bili'mu. Nasaba iko natamariyo-riyo maneng, sibawa pojiwi cintamu napakacauri anggoro'é; sinnanna ana'-ana'daraé nacintaiko! Namuni mabolokka, magelloka, éh sining ana'dara Yérusalém; mabolong pada-pada kéma-kémana Kédar, iyakiya magello pada-pada kaing pallawaé ri saorajana Salomo! Aja' mujampangiwi oliku iya mabolongngé, saba' nanréka pellakesso. Macayii sining kakaku lao ri iyya, sibawa suroka majjama ri palla anggoro'é; dé'gaga wettukku murusu'i aléku. Powadani, éh canrikku, kégako mampi bimbala-bimbala, kégai mupaléwu mennang ri wennié? Masa pada-padaka passolléé ri yelle'na bimbala makkonronna silao-silaommu. Masa dé' muwissengngi onronna, éh iya magelloé ri yelle'na makkunraié? Accowéri bawanni batélana bimbala makkonrongngé, sibawa ampii sining bémbé'mu ri seddéna akkémanna sining pakkampié. Canrikku, samannako anyarang komba iya gettengngéngngi karétana arung Maséré. Magello rupammu ri tengngana bélo-béloé, makessing ellommu nasibawang ranté mapparamata. Kiyébburekko paréwa ulaweng, nasibawang mani-mani péra'. Mattengngangngi arukku ri léwurenna, lellang mawangi narwastué. Canrikku pada-padai mur-é bauna, wettunna léwu ri aroku. Canrikku samannai sidapureng bunga pacci ri palla-palla anggoro En-Gedi. Magelloko mumakessing, macennikku, magello tongekko! Matammu padai jangang-jangangngé. Magelloko, sayang, magello tongekko! Atinrotta ri wella manyilaé. Pong aras-é mancaji alliri bolata, sibawa pong camaraé sampe'na. Bannaka bunga mawar polé ri Saron, bunga bakung ri lompo-lompo'é. Pada-pada bunga bakungngé ri tengngana alekale maddorié, makkuwaniro canrikku ri yelle'na sining ana'daraé. Pada-pada pong apél-é ri tengngana ajukajungngé ri ale'é, makkuwaniro canrikku ri yelle'na worowané. Masennakka maccinaung ri yawana, sining buwana macenning rasana. Natiwika ri bili péstaé, pakkitanna lao ri iyya pennoi pappoji. Péwatangika sibawa buwa anggoro macenningngé, pétakkarika sibawa buwa apel, saba' malasa cintaka. Lima abéyona tula'i ulukku, lima ataunna kaddaoka. Akkélonno, éh ana'-ana'dara Yérusalém, nasaba sining jonga ri padangngé, makkedaé dé' mumaélo ganggui cintaé, gangka cau. Engkalingai, mabbicarai canrikku lao ri iyya. Laono mai macennikku, laono mai magelloku! Itai, labe'ni wettu keccé'é, labe'ni wettu bosié. Ri dare'é tabbakka bunga-bungaé; narapini wettu allébongengngé; riyéngkalingani oni bekkué ri tanata. Mammulani mabbuwa pong araé, lellang baunna bunga pong anggoro'é. Laono mai macennikku, laono mai magelloku. Oh jangang-jangakku ri yelle-elle batué, ri assubbuwanna ri émpeng-ngémpeng iya mappeppingngé, leppessanni uwita tappamu, sibawa méngkalingai saddammu, saba' magelloi tappamu, macennoi saddammu. Tikkengngi iyaro sining asu ale'é, asu-asu ale baiccu'é iya solangiyéngngi palla anggoro'é, saba' mattengngangngi mabbunga palla anggoro'ta. Appunnangekkui canrikku, sibawa iyya appunnangennai; naampii sining bimbala'na ri yelle'na bunga-bunga bakungngé narapi mangiri anging éléé iya paleppe'éngngi anging wennié. Lisuno, canrikku, pada-pada jongaé, pada-pada ana' jongaé ri buluna Béter. Wenni-wenni ri ranjakku, ri laleng nippié usappai canriku; usappai, iyakiya siya-siyai. Maéloka moto sibawa mattulilingiwi kotaé, jalajja'i sininna lalengngé sibawa loronna. Maéloka sappai canriku; usappai, iyakiya siya-siyai. Naéwaka sita paronda kotaé, sibawa utanaiwi, “Muwitaga canrikku?” Silalona usalai mennang, uwéwani sita canrikku. Uwakkatenninni, sibawa dé' uleppessangngi narapi utiwi ri bolana indo'ku, ri bili'na tau iya jajiyangngékka. Ajjancino, éh ana'-ana'darana Yérusalém, nasaba sining jongaé ri padangngé, makkedaé dé' mumaélo ganggui cintaé, narapi ripésennangi. Agaro polé ri padang kessi'é, sinrupa rumpu mattékké? Wanginna pada-pada mur-é sibawa kamennyangngé, sibawa bedda-bedda mabauna padangkangngé. Itai, iyaro ulérenna Salomo, riyattulilingi ri enneng pulona tau barani, sining tau baraninna Israélié, iya mappangalamangngé ri laleng musué. Tiwi manengngi mennang peddang ri benrénna sadiya moloiwi paggasaé ri wennié. Naébburengngi aléna Salomo séddi uléreng, polé ri aju iya kaminang makessingngé. Allirinna riyébbui polé ri péra'é, sibawa sanrésenna poléi ri ulawengngé. Tudangenna malango-langoi tappana, nasulangngi sibawa ati masennang sining ana'darana Yérusalém. Assuno, éh ana'-ana'darana Sion, itai Arung Salomo nasibawang passigera iya napasangngé indo'na, ri esso abottingenna, ri esso nariyo-riyoiyé. Mageloko mumakessing, macennikku, tongeng, magelloko mumakessing. Matammu ri saliwenna bowommu samanna jangang-jangang; gemme'mu pada-padai bémbé makkonrongngé iya turungiyéngngi bulu-bulu Giléad. Isimmu maputé pada-pada bimbala makkonrongngé iya silalonaé ricukkuru sibawa ricemmé; mappasangeng pada-pada ana'-ana' bimbala dénrué, muwi séddi dé'to gaga teddéng. Iwému samanna silaci pita cella, sibawa magello ritu témummu. Rupammu pada-pada buwa dalima sipuwé'é, massubbu ri lalenna bowommu. Ellommu samanna manarana Daud, iya ripatettongngé untu' mattaroiwi senjata. Rantému sinrupai sisebbu kaliyawo, tarasuluna sining pabbaranié iya maneng. Susummu samanna duwa ana' jonga, ana' jonga dénru iya mattengngangngé mabbella ri yelle'na bunga-bunga bakungngé. Macinnaka lao ri bulu mur-é, ri bulu-bulu kamennyangngé, narapi mangiri anging éléé, iya pallennye'éngngi apettangenna wennié. Magello senna'ko, macennikku, dé'gaga sala-salammu. Laono mai tanonno polé ri Libanon, bottikku, laono mai tanonno polé ri Libanon. Nonnono polé ri tompo Amana, polé tompo Senir sibawa Hérmon, onrong naonroiyé macang tutul-é sibawa singaé. Mutawangngi atikku, anri, bottikku, mutawangngi atikku sibawa pakkitammu, nasibawang paramata gello ri rantému. Temmaka nyamenna cintamu, anri, bottikku, mabéla lebbi nyamenna naiya anggoro'é. Minnya'mu lellang mabau, napakacauri sininna rupanna rampa-rampaé. Macenning ada-adammu, bottikku, pada-pada cani tuléngngé sibawa dadi'é. Pakéyammu sibbau Bulu Libanon. Canrikku iyanaritu palla mattémbo', palla mattémbo', mata uwai taggoncing. Kuwaro tuwo sining pong dalimaé, sibawa buwa-buwana iya kaminang malunra'é. Unga pacci sibawa narwastu, narwastu, onnyi, aju cenning sibawa tebbu, sibawa madduparupang pong kamennyang. Mur sibawa gaharu, sibawa madduparupang rampa-rampa ripilé. Mata uwai ri palla'ku passui uwai tuwo iya massolo'é polé ri Libanon! Péseddinno, éh anging manorang, poléno, éh anging yattang! Angirino ri palla'ku, leppessangngi lellang baummu. Tennapodo canrikku laowi ri palla'na, sibawa manré buwa-buwana iya malunra'é. Laoka ri palla'ku, anri, bottikku, upaddeppungengngi murku sibawa rampa-rampaku; uwanréi sarang wanikku sibawa cani'ku, uwénungngi dadi'ku sibawa uwai anggoro'ku. Manré ménunno, sellao-sellao, énunno gangka mabo' assicintang. Matinroka, iyakiya péseddingngi atikku. Engkalingai, canrikku maggetto tange. Timpakengngi tange, anri, canrikku, jangang-jangakku, pappojinna atikku; marica ulukku nasaba cinoddo, penno gemme'ku tetti-tetti cinoddo wenni. Purani uludung wajukku; upakéiga paimessi? Purani ubissai ajéku, ucarépaiga paimessi? Maddumba-dumba atikku nasaba nakkatenningngi canrikku akkatenningeng tange'é. Naumoto'na maélo timpa'i tange'é untu' canrikku. Tetti mur-é polé ri limakku sibawa jari-jarikku, rica'i akkatenningeng pattutu tange'é. Utimpakenni tange canrikku, iyakiya balé'ni sibawa lao. Uwuddaningi senna'i saddanna; usappai, iyakiya siya-siyai. Uwobbii asenna, iyakiya dé' nametté. Naéwana sita sining paronda kotaé; naunruka mennang sibawa loka, nalai mennang saléndakku sibawa passa. Ajjancino, éh ana'-ana'darana Yérusalém, rékko muruntu'i canrikku, birittaiyangngi lao ri aléna, makkedaé malasa cintaka. Aga canrimmu napakacauri sining canring laingngé, éh ana'dara iya kaminang magelloé? Aga canrimmu napakacauri sining canring laingngé, angkanna musuroki majjanci? Canrikku barani sibawa magello, dé' padanna ri yelle'na seppulo sebbu tau. Ulunna pada-padai ulawengngé, ulaweng tuléngngé, gemme'na mabbombang sibawa malotong, sillotong kao-kaoé. Matanna samanna jangang-jangang ri mata uwai, jangang-jangang cemmé susu, tudang ri wiring kullangngé. Rupanna pada-pada palla rampa-rampa iya mawangié, iwéna bunga bakung iya patetti'éngngi mur aslié. Magello limanna, macciccing ulaweng sibawa mapparamata, tubunna samanna gading riparamatai batu nilang. Ajéna pada-padai alliri-alliri marmer puté, sibawa pallanggana ulaweng tuléng. Pakkalénna siggagga sining bulué ri Libanon, sibawa siggello pong aras-é. Macenning senna warékkadanna, sininna séuwa-séuwaé ri aléna pataré. Makkuwaniro canrikku sibawa sahaba'ku, éh ana'-ana'dara Yérusalém! Kégi lao canrimmu, éh ana'dara iya kaminang magelloé? Kégai lao canrimmu, kuwammengngi tamaccowé sappai? Laowi canrikku ri palla'na, ri palla rampa-rampaé untu' mampii sining bimbala'na ri palla'é, sibawa céppu bunga-bunga bakung. Appunnangennaka canrikku, sibawa aléna appunnangekku, mampi bimbala-bimbala ri tengngana bunga-bunga bakungngé. Makessikko, macennikku, sikkessikko kota Yérusalém, siggello kota Tirza. Mappabengnga senna'ko, pada-pada pasukang tentaraé sibawa bandéra-bandérana. Pagilinni tappamu polé ri iyya, saba' pakkitammu nalippuika. Gemme'mu pada-padai bémbé makkonrongngé iya turungiyéngngi bulu-bulu Giléad. Maputé isimmu pada-pada bimbala makkonrongngé iya silalonaé ricukkuru sibawa ricemméi; mappasangeng pada-pada ana'-ana' bimbala dénrué, dé' muwi séddi iya teddéngngé. Rupammu pada-padai buwa dalima sipuwé'é, massubbu ri lalenna bowommu. Namuni engka enneng pulona permaisuri, sibawa aruwa pulona gundi, enrengngé maéga senna ana'dara, iyakiya banna séddi jangang-jangakku, usénge'é, ana' tungke' napojiyé indo'na. Naitai ana'-ana'daraé sibawa pojiwi, sining permaisurié sibawa gundi'é bengngariwi. Niga iya polé samanna élé masiya'é, siggello kéteng tépué, siccakka mata essoé? Mappamennye senna, pada-pada pasukang tentaraé sibawa bandéra-bandérana. Laoka ri palla kenarié, mitai bunga-bunga dé'éppa natabbakka ri lompo'é; naullé pong anggoro'é engkana uce'na, sibawa pong dalimaé engkana unganna. Uwuddaningi senna'i cintamu, pada-pada uwuddaninginna ménré'é karéta musu silaong sining arungngé. Séré-séréno, éh ana'dara Sulam, accenné-cennéno, kuwammengngi bengngaki. Magi mumacinna mitaka, naséré-séréka ri tengngana barisi'na pakkita-itaé? Oh ana'dara iya magelloé, makessing tongeng ajému sibawa sandala'éro. Tékko poppammu pada-padai bélo-béloé, ébbuna séddié panré. Posimu pada-padai énungeng mallébué iya dé'é naengka naakurangeng anggoro ricampuru. Babuwamu samanna lappo gandong, riyattulilingi ri bunga-bunga bakungngé. Susummu samannai duwa ana' jonga, jonga dénru duwaé. Ellommu pada-padai manara gadingngé. Matammu padai kullang-kullangngé ri Hésybon, seddéna pintu gerbang Batrabim. Inge'mu pada-padai manaraé ri Bulu Libanon, iya mangoloé ri kota Damsyik. Ulummu padai bulu-bulu Karmél; gemme'mu iya ricacingngé pada-padai wélarengngé, mappamennye mala séddié arung. Magello tongekko mumakessing, iya ripojiyé ri yelle'na iya risennangngiyé. Tubummu siggello pong karomaé, susummu buwana maddéppungngé. Macinnaka mémpéi iyaro pong karomaé, sibawa lolongengngi buwa-buwana. Tennapodo susummu pada-padai buwa anggoro maddéppungngé, nappase'mu sibbau buwa apel-é, témummu siccenning uwai anggoro'é! Leppessanni iyaro anggoro'é massolo lao ri canrikku, sibawa dé' appettunna; sibawa paénré'i cinta pappojiyé, mala risining tau iya mattengngangngé matinro. Appunnangennaka canrikku, nacinnaika. Laono mai talao ri padangngé, canrikku, sibawa mabbenni ri dare'é ri tengnga-tengngana bunga paccié. Laono mai tamaélé lao ri palla'é, sibawa mitai aga mpuce'niga pong anggoro'é, sibawa tabbakkani unganna; mpunganiga pong dalimaé. Kuwaro uwéréng matu cintaku lao ri iko. Lellang mabau baunna pong ara'é, ri seddéna sumpatta engka buwa-buwa malunra, iya maittaénna naricéppu sibawa iya silalonaé; iyaro utarongekko, canrikku. Ah, ébara'na iko silessurekku, iya puraé susu ri indo'ku, pasti ubauko rékko uruntu'ko ri lalengngé, dé'gaga matu pakatunaka. Utiwiko matu ri bolana indo'ku, kuwammengngi mulléi pagguruka. Upainukko matu anggoro mabau, sibawa uwai buwa dalima. Lima abéyomu tula'ka, lima ataummu kaddaoka. Ajjancino, éh ana'-ana'dara Yérusalém, makkedaé dé' mumaélo ganggui cintaé, narapi ripésennangi. Niga iyaro polé ri padang kessi'é, sanré ri canrinna? Utedduko ri yawana pong apel-é, onrommu ritampu sibawa rijajiyang. Pancajika buwa atimmu, aja' mukaddaowi muwi niga ri lainnaé iyya; nasaba iyaro cintaé padai watanna amaténgngé, sibawa makuwasai napessué pada-pada amaténgngé. Luwa'na pada-padai luwa apié iya mallalatungngé sibawa masero. Uwai iya maégaé dé' naulléi peddéiwi cintaé, sibawa lémpe'é dé' naulléi malirengngi. Rékko séddié tau mabbéréyangngi sininna waramparanna untu' melliwi cinta, pasti banna pappakatuna iya nalolongengngé. Mappunnaiki séddi anri makkunrai iya baiccu'é mupa susunna. Aga harusu' tapogau' untu' aléna rékko engka polé lettukiwi? Ebara'na séddiwi témbo', patettokki matu manara péra' ri tompo'na. Ebara'na séddiwi pintu gerbang, maéloki cala'i sibawa aju camara. Iyya'é séddika témbo', sibawa susukku manarana. Naisseng canrikku makkedaé ri aléna masennakka. Mappunnaiwi Salomo palla anggoro ri Baal-Hamon; iyaro palla'é nabbéréyanni lao risining panganrowangngé. Tungke'-tungke' mpajai sisebbu dowi péra' untu' wassélé'na, sibawa lolongeng duwaratu untu' turuppuse'na. Leppessanni iyaro dowié untu' alému, Salomo, sibawa untu' sining panganrowang palla'mu. Iyakiya palla anggoro'ku, appunnangeng ri aléku, engkai ri yoloku. Eh, monroiyéngngi palla'é, macinnai silao-silaongngé méngkalingai saddammu; paréngkalinganni iyaro ri aléku! Canrikku, poléno pada-pada jongaé, pada-pada ana' jongaé ri buluna Béter. Iyaé kitta'é mallise'i paseng passalenna Yéhuda sibawa Yérusalém iya nappaitangngé Allataala lao ri Yésaya, ana' Amos, wettunna Uzia, Yotam, Ahas sibawa Hizkia mapparénta ri Yéhuda. Engkalingai éh langi, pénessaiwi éh lino! Makkedai Puwangnge, “Ana'-ana' iya puraé Upiyara maronta'i lao ri Iyya. Sapingngé naisseng puwanna, kaleddé'é naisseng onrong inanré iya napassadiyaé puwanna. Iyakiya umma'-Ku Israélié dé'; dé' mennang napahangngi.” Macilakano iko bangsa iya madosaé, sining tau iya dé'é namakessing sipa'na sibawa majaé! Ripapusano ri dosa-dosamu. Purani musampéyang Puwangnge sibawa mabbokoriwi Allataala Pommapaccingngé iya harusu'é musompa. Magi mumatteru bawang mabbanta? Maélokoga rihukkung lebbi tane'pa? Pennoni ulummu sibawa sining lettang mannanaé, ati sibawa pikkirammu mapeddini. Polé ri ulué lettu ri palakajé dé'gaga madising ri watakkalému. Pennoko boro-boro, mabbalippeng-balippeng sibawa sining malo. Iyaro sining lomu dé'pa naripépaccingi iyaré'ga ribebbe, dé'to nariurai sibawa minnya. Purani ripabbinasa wanuwammu; kota-kotamu ritunui gangka cappu. Ri yolona matammu nalai tau laingngé tanamu sibawa mancuru'i sini-sininnaé. Banna Yérusalém monro, iyakiya selaku kota takkeppung sibawa dé' pakkullénna, pada-padai kalampangngé ri palla anggoro'é iyaré'ga bola-bolaé ri palla mentimungngé. Akkalarapanna Puwang Iya Pommakuwasaé dé' napaleppe'i siyagangngaré tau untu' idi, binasa sisenni, pada-pada Sodom sibawa Gomora. Yérusalém, sining pamimpingngé sibawa bangsamu mancajini pada-pada tau Sodongngé sibawa Gomoraé. Engkalingai aga napowada Puwangnge lao ri iko; puriyatini aga nappagguruwang Allataalata. Makkedai Puwangnge, “Muwasengngi Upojiwi sininna akkarobangeng iya matteru-terué muwakkasuwiyangeng lao ri Iyya? Nagélléna sibawa sining bimbala akkarobangeng ritunummu sibawa lunra ana' sapimmu. Dara saping laié, bimbala'é sibawa bémbé'é dé' Upojiwi. Niga suroko tiwii sininna pakkasuwiyangngéro wettummu lao massompa ri Iyya? Niga suroko mallampareng ri Bola Mapaccik-Ku? Rékko muwakkai limammu untu' massempajang, dé' Umaélo jampangiwi. Dé' Upaduliwi siyaga égana sempajammu, dé' Umaélo méngkalingai, saba' nasibawang limammuro purano mabbuno maéga. Bissaini alému gangka mapaccing. Pappésauwi sininna ja iya mupogau'éro. Ya, aja'na mupogau'i majaé, agguruno pogau'i makessingngé. Patettongngi adélékengngé sibawa paccappui patenre'é; wéréngngi ana' béué ha'na mennang sibawa éwaiwi parakarana jandaé.” Makkedai Puwangnge, “Laono mai tapuraiwi iyaé parakaraé. Namuni malango-langoko nasaba dosa-dosamu, Ubissaiko matu mancaji maputé mapaccing pada-pada ape'é. Namuni maégai dosa-dosamu sibawa matane, Uwaddampengekko matu sibawa sukku. Rékko mapatoko lao ri Iyya, mupéneddingiwi matu sininna iya makessingngé iya napowassélé'é wanuwammu. Iyakiya rékko muéwa-Ka, matéko matu ri laleng musué. Iyya, Puwang, pura mabbicara.” Kota iya matinulué riyolo, makkekkuwangngé pada-padani séddié cakkuribang! Riyolo sininna pabbanuwana adélé sibawa malempu, iyakiya makkekkuwangngé naonroiwi pabbuno-pabbunoé. Yérusalém, riyolo pada-padako péra'é, iyakiya makkekkuwangngé dé'na angke'na. Riyolo pada-padako anggoro iya malunra'é, iyakiya makkekkuwangngé banna uwai simata. Maronta'i sining pamimpimmu sibawa ripakéi ri pangaé; napoji mennang tarima hadiya sibawa dowi pasoso. Dé' namaélo mennang méwaiwi ana' béué ri pengadilangngé; dé' namaélo méngkalingai papparape'na janda-jandaé. Rimakkuwannanaro Puwang Iya Pommakuwasaé, Allataalana Israélié makkedai: “Eh, sining balik-Ku, maélo-Ka makkabale lao ri iko, angkanna dé'na musussai-Ka paimeng. Maélo-Ka tinda lao ri iko. Pada-pada tauwé patuléngngi bessié, maélo-Ka patulékko; sininna iya macarépaé Upaddésu'i matu polé ri alému. Uwéréssiko matu haking-haking sibawa pappangaja pada-pada riyolo. Na Yérusalém riyasengngi matu kota iya adélé'é sibawa matinulué.” Adélé'i Puwangnge, na-Napassalama'i matu Yérusalém sibawa sining taunna iya massessekalé. Iyakiya sining tau madosa iya maronta'é lao ri Aléna ripaccappui matu, sibawa sininna iya salaiyéngngi Aléna riancuru'i matu. Masirii matu mennang nasaba massompai ajukajung sibawa pallaingngi sining palla untu' déwata-déwataé. Mancajiwi matu pada-pada aju battowa iya makelle'é daunna, sibawa pada-pada palla iya dé'é naripalleki. Pada-padai daramé nanré api polé ri tabbessi'na bunga apié, makkuwatoniro sining tau makuwasaé ripabbinasa matu risining pangkaukeng majana mennang, na dé'gaga mulléi pappésauwi ancurukengngéro. Iyanaé pasenna Allataala passalenna Yéhuda sibawa Yérusalém iya natarimaé Yésaya ana' Amos: Ri esso-esso mangoloé bulu-bulu onronna Bolana Puwangnge maccaloli'i matanré sibawa tettong lempu ri tompo'na sining bulué sibawa sining bulu-bulué. Sininna bangsaé mattinro-tinrosengngi lao kuwaro, makkeda manengngi mennang, “Laono mai taénré ri Bulu-buluna Puwangnge, ri bolana Allataalana Israélié. Nappagguruwangngi matu lao ri idi aga iya harusu'é tapogau'. Taccowériwi matu lalen-Na, saba' pappagguruwanna Puwangnge poléi ri Yérusalém, mabbicarai polé ri Sion.” Mangadélé'i matu ri yelle'na bangsa-bangsaé, sibawa pettuiwi parakaraé ri yelle'na suku-suku bangsaé. Rilanroi matu peddangngé mancaji rakkala, sibawa bessié ripancaji mendo. Dé'na nasisullé sigasa bangsa-bangsaé, dé'to nasadiya-sadiya maélo mammusu. Eh, wija-wijanna Yakub, laono mai tajoppa ri laleng tajanna Puwangnge! Oh Allataala, Musalaini umma'-Mu, wija-wijanna Yakub! Rimakkuwannanaro kégi-kégi ri wanuwaéwé pakéi tauwé paddisengeng mappalennye-lennye iya assalennaé poléi ri alau sibawa polé ri Filistin. Sining tauwé naturui ade abiyasang laingngé. Wanuwanna pennoi péra' sibawa ulaweng, sibawa waramparanna dé' paggangkanna. Maéga senna anyaranna, sibawa tenribilang jumellana karétana. Kégi-kégi engka barahala, sibawa massompai mennang dato-dato ébbuna muto mennang. Tungke tau ripakatunai matu sibawa ripakariyawa. Aja' muwaddampengengngi mennang oh Puwang! Muttama'i matu mennang ri laleng gowa-gowaé ri bulu-bulu karangngé, iyaré'ga kali kalebbong ri laleng tanaé kuwammengngi naleppe polé ri caina Puwangnge sibawa polé ri akuwasan-Na iya malebbié. Tau matempoé ripakariyawai matu sibawa tau maboroé ripatunru'i. Banna Puwangnge bawang ripakaraja. Iyaro essoé Puwang Iya Pommakuwasaé napakariyawa manengngi matu iya pakatanrééngngi aléna sibawa hukkung manengngi iya maboroé. Sining aju camara iya matanré ri Libanon sibawa sininna aju battowaé ri Basan ripaccappui matu. Sining bulué sibawa bulu-bulu iya magelloé riparatai matu. Sining manara iya matanré sibawa témbo-témbo bénténna riruttungngi matu. Sining kappala iya kaminang maloppoé sibawa kaminang magelloé ripatallemme'i matu. Tau matempoé ripakariyawai matu, sibawa tau maboroé ripatunru'i. Banna Aléna Puwangnge iya ripakarajaé. Teddéng sisengngi matu sining barahalaé. Jaji, aja' mumamménasa ri tolino iya dé'é namannennungeng, saba' dé' angke'na. Sitongenna Puwang Iya Pommakuwasaé malai matu polé ri Yérusalém sibawa Yéhuda sininna passadiyaang inanré sibawa énungengngé. Makkuwatoro sininna tau iya nattuwangngé: sining pabbaranié sibawa parajuri'é, hakingngé, nabié, tukang pabotoé sibawa pappangajaé, parawiraé, tau mariyoloé sibawa pamaréntaé, passéhéré'é sibawa pappalakiyaé. Nakkai matu Puwangnge ana'-ana' maloloé mancaji pamimpinna ra'ya'é, sibawa mapparéntai matu sibawa siélo-élona. Sisulléi matu sitenre sining tauwé. Tau maloloé naangga énténgngi tomatowaé, sibawa tau baiccu'é naangga énténgngi tau battowaé. Iyaro wettué najello'i matu séddi sumpulolona sibawa makkeda lao ri aléna, “Banna iko iya mappunnaiyé pakéyang iya sitinajaé; rimakkuwannanaro ancajino pamimpitta ri wettu iya pennoé asussangngéwé.” Iyakiya mappébaliwi matu, “Tenniyaka sanro! Dé'to uwappunnai inanré sibawa pakéyang. Aja' tasuroka mancaji pamimpinna bangsaé!” Tongeng, sempé'ni Yérusalém! Maruttunni Yéhuda! Saba' sininna ada-adanna sibawa pangkaukenna mennang naéwai Puwangnge sibawa naéwai akuwasan-Na. Kédona mennang iya matempoé mappaitangngi jana mennang. Mannessa-nessai mennang madosa pada-pada tau Sodongngé riyolo. Cilakani mennang! Napapoléngengngi mennang acilakang aléna. Makkedai Puwangnge, “Palettukengngi tau iya mapatoé lao ri iyya makkedaé masennangngi matu sibawa salama'i. Napéneddingiwi matu mennang wassélé turuppuse'na. Iyakiya macilakani tau majaé! Rigaukengngi matu mennang pada-pada mennang pura gaukengngi tau laingngé. Ritenre'i matu umma'-Ku ri pabbunga dowié sibawa ripara' ri pattangkula'é. Ripapusai matu umma'ku risining pamimpinna angkanna dé'na naissenni laleng iya harusu'é mennang naola.” Sadiyani Puwangnge untu' guga'i sibawa madélékiwi umma'-Na. Tinda'i Puwangnge selaku haking lao risining pamimpinna umma'-Na. Iyanaé nattenrekeng Puwangnge lao ri mennang: “Iko ritu rampo'i wassélé palla-palla anggoro'é; pennoi barang bolamu iya murampasa'é polé ri tau kasiyasié. Magi mutenre'i umma'ku sibawa para'i tau kasiyasié? Iyya, Puwang Iya Pommatanré sibawa Pommakuwasaé pura mabbicara.” Makkedai Puwangnge, “Matempo tongeng makkunrai-makkunrai Yérusaléngngé! Betta mennang, napoji macculé mata enrengngé joppa sibawa matempo. Naébbu-ébbu jongkana, sibawa maggaréncang oninna sining gellang ajéna. Iyakiya maélo-Ka hukkungngi mennang; pennoi matu puru-puru ulunna sibawa nakellui.” Narapii matu wettunna nalai Puwangnge sininna bélo-bélona mennang iya nabbangkakengngé sining makkunrai Yérusaléngngé: passiyo ulu, gellang ajé, ranté, gellang lima, bombo, bowong, sima'-sima' ri taiyyaé sibawa babuwaé, ciccing sibawa anting-nganting inge', pakéyang pésta iya magelloé, waju labbu, tase', waju nipi, pakéyang lénang, passiyo ellong sibawa bowong malampéé. Makkekkuwangngé pakéi mennang wangi-wangiyang, mabbau makebbongngi matu. Babbanna mennang iya alusu'é risulléiwi matu sibawa tulu iya makasara'é. Ulunna mennang iya maggemme magelloé rikellui matu. Pakéyanna mennang iya makessingngé risulléiwi matu sibawa iya sapé-sapé'é. Magelloni makkekkuwangngé; matti majai tappana mennang nasaba rica'i. Tau worowané, makkuwatoro iya mawatangngé, matéi matu ri laleng musué. Ri gerbang-gerbanna kotaé mabbaratai matu tauwé sibawa mpating, sibawa iyaro kotaé pada-padai matu makkunrai ripallusu-lusuiyé iya tudangngé ri tanaé. Iyaro wettué pitu makkunrai makkatenning séddi worowané sibawa makkeda, “Palaloki mangakuiko selaku lakkai, kuwammengngi aja' tamasiri nasaba dé' takawing. Inanré sibawa pakéyang riyullé muto tanggungngi.” Narapii matu wettunna naébbui Puwangnge tungke tanet-tanengngé sibawa ajué tuwo mancaji battowa sibawa magello ri wanuwaéwé. Iyaro essoé tau Israél iya salama'é marennui matu sibawa mabangka'i nasaba wassélé éngngalangngé. Tungke tau iya risalaiyé ri Yérusalém, sining tau iya napilé Allataala untu' ripassalama, riteppui matu mapaccing. Nasibawang akuwasan-Na naadélékiwi matu Puwangnge sibawa napépaccingiwi umma'-Na. Napépaccingiwi matu Yérusalém polé ri darana sining tau iya riyunoé ri kotaéro. Nainappa ri tompo'na Bulu Sion sibawa sininna tau iya maddeppungengngé kuwaro napancajini Puwangnge ellungngé ri lakessoé, enrengngé rumpu sibawa luwa api matajang ri wennié. Aléna Allataala nasibawang akuwasan-Na cinaungiwi matu sibawa linrungiwi sininna kotaéro. Nacinaungiwi matu polé ri pella matire'é ri lakessoé, sibawa pancajiwi onrong maccinaung polé ri bosi rajaé sibawa anginrajaé. Engkalingai élokku passalenna palla anggoro'na sahaba'ku. Mappunnaiwi palla anggoro sahaba'ku ri émpeng bulu-bulu iya macommo'é. Nabéngkungngi tanana sibawa nabbéyangngi batu-batunna. Natanengngi anggoro ripilé patettongngi manara anganrowangeng. Kaliwi séddi kalebbong onrong para'i anggoro'na, nainappa natajeng matasa buwana, iyakiya wassélé'na buwa anggoro iya makeccié. Jaji makkekkuwangngé makkedai sahaba'-Ku, “Iko maneng, pabbanuwana Yérusalém sibawa Yéhuda, adélékiwi palla anggoro'-Ku sibawa Iyya. Agapi harusu Uwébbu, iyakiya dé'pa Upogau'i untu' palla anggoro'-Kuro? Magi na buwa makecci napowassélé, sibawa tenniya buwa makessing pada-pada iya Uwamménasaiyé? Mappakkuwaiyé Ugaukengngi matu iyaro palla anggoro'-Ku: Ubébbui matu sappo iya mattulilingiyéngngi, témbo iya linrungiyéngngi Uruttungngi matu, nainappa Uleppessang olokolo masekkangngé solangiwi sibawa léjja-léjja'i. Uleppessangngi matu natuwoi tanet-taneng liya. Pong anggoro'na dé' matu Ulébongngi, sibawa dé' matu Ubajaiwi. Mala Uleppessangngi natongko alekale maddori sibawa wella, mala Uwattéyang ellungngé pateppai bosié ri yasé'na.” Saba' palla anggoro'na Puwang Iya Pommakuwasaé iyanaritu umma Israélié, sibawa sining tau Yéhudaé iyanaritu pong anggoro iya Natanengngé. Polé ri mennang Naddennuwangiwi adélékengngé, iyakiya banna abeccokeng engka. Naddennuwangiwi mennang napatettong atongengengngé, iyakiya banna kelli méllau adélékeng engka. Cilakako iya melli bola-bola sibawa sittaiyé sining dare untu' tambaiwi appunnangemmu! Dé'na namaittana nacappu onrong untu' tau laingngé na banna iko ritu iya monroé ri wanuwaéro. Uwéngkalingai Puwang Iya Pommakuwasaé mattanro, “Sining bola iya battowaé sibawa makessingngéwé lobbang manengngi matu tenriyonroi. Salai matu wassélé tanaé, palla anggoro iya lowannaé seppulo hétto banna powassélé'i seppulo bang uwai anggoro. Sératu bang biné banna powassélé'i seppulo bang gandong.” Cilakano iko! Polé ri élé narapi wenni pallaummu banna ménung énungeng maseri sibawa mammabo-mabo'. Ri pésta-péstamu engka oni kacapi, gambusu, rabana nenniya suling sibawa énungeng anggoro. Iyakiya dé' mupaduliwi winruna Puwangnge sibawa aga iya Napogau'é. Rimakkuwannanaro umma'-Ku iya dé'é aga-aga naisseng ririmpai matu lao selaku tawangeng. Sining pamimpingngé sibawa ra'ya'é matéi matu alupureng sibawa adekkang. Mangngangai matu malowang pannyoro'na amaténgngé untu' memme'i sining tau mariyoloé ri Yérusalém silaong ra'ya' iya ramé-ramé mappésta. Ripakasirii matu tungke tauwé, sibawa iya matempoé ripakariyawai. Iyakiya Puwang Iya Pommakuwasaé nappaitangngi arajan-Na ri laleng napogau'na aga iya tongengngé. Nappaitangngi matu apaccingen-Na ri laleng nadélékin-Na bangsa-Na. Ri ruttungeng kotaé ana' bémbé'é sibawa bimbala'é mabbellai matu sibawa dé' naakurangeng inanré. Cilakano iko iya madosaé matteru-teru! Adammu, “Leppessanni Puwang Allataala mapaccinna Israélié masitta tinda! Leppessanni Napogau' rancana-Na, kuwammengngi taitai sibawa taissengngi.” Cilakano iko iya pasibalékengngéngngi makessingngé sibawa majaé, iya makalemmengngé sibawa matajangngé, iya mapaié sibawa macenningngé! Cilakano iko iya masengngéngngi alému mapanré sibawa macca senna! Cilakano iko iya jago ménungngé anggoro! Pabbaraniko sibawa héba' rékko harusu'ko campuru'i énungeng maserié! Iyakiya banna untu' lolongeng dowi pasoso, mupaleppe'i tau pasalaé, sibawa pésangkaiwi tau dé'é napasala lolongeng adélékeng. Purani musampéyang pappagguruwanna Puwang Iya Pommakuwasaé, sibawa pakatunai paréntana Allataala mapaccinna Israélié. Rimakkuwannanaro, pada-pada daramé sibawa wella rakkoé cappu ritunu ri laleng apié, makkuwatoro ure-ure'mu mancaji makebbongngi matu, unga-ungammu mancaji marakkoi sibawa cappu nairi anging. Macayii Puwangnge lao ri bangsa-Na. Sadiyani untu' hukkungngi mennang. Taggottangngi matu sining bulué; tabbusassai matu ujué pada-pada warowoé ri lalengngé. Iyakiya macai mupi Puwangnge sibawa tette maélo pahukkung. Naobbii matu Puwangnge bangsa iya mabélaé sibawa poléi matu mennang sibawa masitta! Tuli sadiyai mennang mammusu sibawa dé' naissengngi poso. Dé' naengka mennang namatinro iyaré'ga cakkaruddu. Macéru ana' panana sibawa usona tuli sadiyai mattémba. Garigi anyaranna sittedde bacu apié, sibawa padati karétana maccennéi pada-pada talippurué. Sining prajuri'na mangngaung pada-pada singa iya silalonaé patikkeng, nanatiwii lari, na dé'gaga mulléi paleppe'i. Iyaro essoé ri sininna Israélié riyéngkalingai kelli musué pada memmu'na tasi'é. Itani, mapettang sininna wanuwaéro sibawa penno aperiseng. Mancaji pettang kape'ni tajangngé. Ri laleng taung namatéiyé Arung Uzia, uwitai Puwangnge. Tudangngi ri yasé'na kadéra arajan-Na iya matanré sibawa malebbié. Jumba-Na natongkoi sininna Bolana Puwangnge. Ri mattulilin-Na tettongngi mahlu'-mahlu' iya malluwa'é pada-pada apié, tungke-tungke mappunnaiwi enneng panni. Duwa panni tongkoi rupanna, duwa tongkoi watakkaléna, sibawa duwa pannipa napakéi untu' luttu. Mangobbii mennang séddié lao ri laingngé: “Mapaccing, mapaccing, mapaccing. Mapaccingngi Puwang Iya Pommakuwasaé. Pennoi linoé ahadéréken-Na iya malebbié.” Saddanna mennang mébbui pallanggana Bolana Puwangnge ténré, sibawa iyaro Bolana Puwangnge pennoi rumpu. Nainappa makkedaka, “Cilaka! Dé'na amménasanna ri aléku, saba' macarépai témukku nasaba dosa, namonroka ri yelle'na bangsa iya makkuwaéttoro. Namuni makkuwaro, nasibawang mata ulukku purani uwita Arungngé, Puwang Iya Pommakuwasaé!” Nainappa sala séddinna iyaro mahlu'é luttu lao ri iyya tiwi bara iya natiwié sibawa passipi-sipi polé ri mézbaé. Nagéssai iwéku sibawa iyaro baraé namakkeda, “Iyaé baraé purani nagéssa iwému. Rileddani makkekkuwangngé asalammu sibawa dosamu purani naddampengeng Puwangnge.” Nainappa uwéngkalinga saddanna Puwangnge makkeda, “Niga Usuro matu? Niga matu mancaji pattiwi birittatta?” Umappébali, “Iyya'na. Suroka!” Nainappa Nasuroka lao tiwii iyaé pasengngé lao ri umma'é: “Matteruko matu méngkalingai, iyakiya dé' najeppuiwi. Matteruko matu pénessaiwi, iyakiya dé' muwissengngi aga iya kajajiyangngé.” Namakkeda-Na lao ri iyya, “Kunruiwi pikkiranna sining tauwéro, pataru-taruiwi daucculinna sibawa pabutai matanna, kuwammengngi aja' nakkita, maréngkalinga iyaré'ga majeppuiwi, nagiling ri Iyya sibawa majjappa.” Makkutanaka, “Siyaga ittana iyaé keadaangngé matteru, Puwang?” Pappébalin-Na, “Narapi kota-kotaé mancaji ruttungeng dé'gaga monroiwi, sining bolaé dé' nariyonroina, sibawa tanaé mancaji kullang sibawa makabuttu, iyaro pabbanuwana kota-kotaé Urukkai matu lao ri onrong iya mabélaé, angkanna sininna tanaé mancaji masino-sinoi. Mala rékko ri yelle'na seppulo tau engka mupa iya monroé ri wanuwaéro, ripaccappu towi matu. Iyakiya pada-pada aju cikare'é rékko ritubbangngi engka mupa tona, makkuwatoro engka mupa matu nasésa polé ri bangsaéro iya mancajiyé pammulanna umma iya mapaccingngé.” Arung Ahas iyanaritu ana' worowanéna Yotam sibawa eppona Uzia. Wettunna naparénta Yéhuda, kajajiyanni musué. Rézin arung Siria, sibawa Pékah ana' worowanéna Rémalya arunna Israélié, lao gasai Yérusalém. Iyakiya dé' naulléi sittaiwi kotaéro. Wettunna naéngkalinga arung Yéhuda makkedaé muttama'ni pasukanna Siria ri daérana Israélié selaku sellao, métau senna'ni sibawa bangsana, angkanna ténré mennang pada-pada aju iya nagottangngé anging. Makkedai Puwangnge lao ri Yésaya, “Tiwii ana'mu Syéar Yasyub namulao méwai sita Arung Ahas. Mupoléiwi matu ri cappa sépe-sépe kolang bagiyang yasé'é, onronna sining tukang ménatué majjama. Powadangngi arungngé makkedaé harusu'i sadiya-sadiya iyakiya tette'i tennang. Dé' naparellu métau iyaré'ga malippu. Caina Arung Pékah sibawa Arung Rézin silaong tentarana sining tau Siriaéro dé' nalebbi mabbahaya polé ri duwa appulu aju api iya maddumpué. Sikongkolo'ni Siria sibawa Israélié nenniya arunna. Maéloi mennang gasai Yéhuda sibawa péttau-péttauriwi pabbanuwana kuwammengngi naccowé ri mennang, nainappa naakka ana' worowanéna Tabeel mancaji arung. Iyakiya Iyya, Puwang, pannessai makkedaé iyaro gau'é dé' nakajajiyang, nasaba Siria dé' nalebbi watang naiya Damsyik ibukotana, sibawa Damsyik dé' nalebbi watang naiya Arung Rézin. Na ri laleng enneng pulona lima taung, tassiya-siyai matu Israélié angkanna dé' naulléi mattahang selaku bangsa. Dé' nalebbi watang Israélié naiya Samaria, ibukotana, na Samaria dé' nalebbi watang naiya Arung Pékah. Rékko dé' mutonget-tongeng mateppe ri alé-Ku, pasti dé' mulléi tahang.” Palettu'i Puwangnge paseng laing lao ri Ahas: “Ellauno kuwammengngi nabbéré Puwang Allataalamu séuwa tanrang ri alému, poléga ri linona tau maté ri yawa iyaré'ga polé ri langié ri yasé.” Nappébali Ahas, “Dé' umaélo méllau tanrang. Dé' umaélo cobaiwi Puwangnge.” Namakkeda Nabi Yésaya, “Rékko makkuwaitu, éngkalingai éh wijanna Arung Daud! Dé'ga nagenne muwoji asabbarakenna tolinoé, angkanna muwoji towi asabbarakenna Puwang Allataala? Makkekkuwangngé, Aléna Puwangnge mabbéré matu tanrang lao ri iko: Séddi ana'dara iya mattampu'é jajiyangngi matu séddi ana' worowané iya nasengngé Imanuél. Wettunna cuku'ni loppona untu' wedding mala apettung ri alé, iyaro wanuwaé madécéngngi matu. Saba' ri wettu dé'napa narapii iyaro wettué, iya duwa manuwa iya naparéntaé arung-ngarung iya muwétauriyéro risalaiwi matu lobbang. Napapoléi matu Puwangnge arung Asyur, nainappa iko sibawa sininna kaluwargamu enrengngé ra'ya'mu napéneddingiwi matu esso-esso pennoé aperiseng iya lebbi maseroé naiya aga iya puraé mupéneddingi sipongenna tabbagé akkarungeng Israélié sibawa Yéhuda. Naséwai matu Puwangnge arung Asyur untu' gaukengngi Israélié pada-pada séddié tukang cukkuru iya cukkuru manengngéngngi gemme'é sibawa bulu-bulué ri watakkalé. Iyaro wettué, rékko séddié tau mappiyara sikaju saping lolo sibawa duwakkaju bémbé bawang, dadi iya napowassélé'é iyaro olokolo'é lebbi polé ri apparelluwanna untu' sining tau iya nasésaé ri wanuwaéro. Tongeng, ménungngi matu mennang dadi sibawa cani. Iyaro wettué sining palla anggoro iya ritanengiyé tungke-tungke sisebbu pong anggoro sibawa iya ellinnaé sisebbu dowi péra', natuwoiwi matu alekale maddori. Tau iya laowé kuwaro harusu'i tiwi uso sibawa pana, saba' sininna wanuwaéro pennoi alekale maddori. Sibawa daéra buluna iya biyasaé rijama sibawa ritanengi, penno towi alekale maddori, angkanna dé' nabarani tauwé lao kuwaro. Iyaro tanaé banna makkégunai selaku onrong mabbella untu' sapingngé sibawa bimbala'é.” Makkedai Puwangnge lao ri iyya, “Alako séddi pépeng batu loppo, nainappa muwoki sibawa hurupu-hurupu iya manessaé: ‘Arrampasakeng iya Mapecci'é, Arrampokeng iya Masitta'é.’ Obbii duwa tau sabbi iya weddingngé riyatepperi, iyanaritu Imang Uria sibawa Zakharia, ana' Yébérékhya.” Siyagangngaré wettu ri munrinna mattampu'ni bainéku. Wettunna jaji ana'ta, makkedai Puwangnge lao ri iyya, “Asengngi ‘Arrappangeng iya Mapecci'é, Arrampokeng iya Masitta'é.’ Saba' ri wettu dé'napa nagenne loppona iyaro ana'é untu' makkeda ‘Ambo'’ sibawa ‘Indo'’, sininna asugirenna Damsyik sibawa sininna barang rappana Samaria ritiwii matu lao ri arung Asyur.” Mabbicarai Puwangnge lao ri iyya, adan-Na, “Iyaé bangsaé nasampéyangngi uwai iya tennangngé polé ri ana' Salo Syiloah, sibawa masennangngi sibawa Arung Rézin sibawa Arung Pékah. Rimakkuwannanaro Iyya, Puwang, papoléi matu arung Asyur sibawa sininna tentarana untu' gasai Yéhuda. Mallurui matu pada-pada Salo Efrat iya sapué sibawa malle'i sining peppinna. Nappo'i matu mennang Yéhuda pada-pada lémpe gangka ellongngé tanréna sibawa malle'i sini-sininnaé.” Allataala sibawakki! Panni-Na iya mallebba'é linrungiwi wanuwatta. Addeppungenno sibawa métau, éh sininna bangsaé! Engkalingai éh cappa-cappa linoé! Sadiyano untu' mammusu, iyakiya sibawa ati iya métaué! Ya, sadiya-sadiyano, iyakiya sibawa pappénedding métau! Ebbuno rancana, iyakiya iya manenna dé'gaga kajajiyang matu. Alano apettung, iyakiya dé'gaga akkégunana, saba' Allataala sibawakki. Rikuwasaina ri Puwangnge sibawa riparéngngerangi kuwammengngi aja' uwaccowériwi laleng iya naolaé bangsaéro. Adan-Na, “Aja' muwangga'i assikongkolokeng aga iya naangga'é mennang assikongkolokeng, sibawa aja' mumétau ri gau'-gau' iya naétauriyé mennang. Engngerangngi makkedaé Iyya, Puwang Iya Pommakuwasaé iyanaritu mapaccingngi. Banna Iyya ritu harusu muwétauri. Nasaba mapaccing senna'-Ka, mancaji batu tabbutturek-Ka untu' ra'ya' Yéhudaé sibawa Israélié, sibawa siyo-siyo iya malaéngngi pabbanuwana Yérusalém. Maéga tau menrung matu tabbuttu sibawa malo. Tappasollai matu mennang ri laleng siyo-siyoéro.” Iko, ana'-ana' gurukku harusu'ko taroi sibawa piyarai sining paseng iya nabbéréyangngé Allataala lao ri iyya. Purani nasubbu Aléna Puwangnge polé ri wija-wijanna Yakub, umma'-Na, iyakiya mateppe'ka sibawa mamménasa lao ri Aléna. Iyya'naé sibawa ana'-ana' iya nawéréngngékka Puwangnge. Puwang Iya Pommakuwasaé iya mapparéntaé ri Bulu Sion, suroki mancaji tanrang untu' umma Israélié. Iyakiya sining tauwé nasuroko matu méllau panunju polé ri sanro-sanroé iya mabbici-bici'é sibawa mamek-kamengngé témunna. Iyaro sining tauwé makkedai matu, “Dé'ga tasipato méllau panunju polé ri waliyala-waliyalaé nasaba apentingenna tau tuwoé?” Baliwi makkuwaé, “Engkalingai pappagguruwanna Puwangnge! Tau iya dé'é nabbicara situru sibawa pappagguruwangngéro, dé' nappunnai amménasang.” Sining tau iya macilakaé sibawa malupué mallamparengngi matu ri wanuwaéro. Nasaba akkadérengngé, maccai-cayii mennang angkanna natanroi arunna sibawa Allatalana. Muwi kégi mennang makkita, ri yasé iyaré'ga ri yawa, dé' aga-aga naita matu ri lainnaé aperiseng sibawa apettangeng enrengngé akalemmengeng iya mappakatau-taué. Ribuwangngi matu lao ri onrong iya mapettangngéro. Iyakiya dé' na untu' mannennungeng iyaro wanuwaé péneddingiwi aperisengngé. Daéra iya naonroiyé suku-suku Zébulon sibawa Naftali engka naengka nariyangga mariyawa ri Puwangnge. Iyakiya ri wettu iya mangoloé, Nawéréngngi matu alebbireng lao ri sininna daéraé polé ri Tasi Tengngaé lao ri alau lettu ri liwenna Salo Yordan, mala lettu ri Galiléa iya naonroiyé tau laingngé. Bangsa iya tuwoé ri laleng pettangngé mitai tajang macakka. Iya monroé ri laleng wajo-wajona amaténgngé ritappai cahaya matajang. Puwang, Muwéréngngi mennang ariyo-riyong battowaé, Muwébbui mennang gora-gora. Marennui mennang nasaba akessingem-Mu, pada-pada tau iya mariyo-riyoé wettunna mappaddeppungeng éngngalang, iyaré'ga mattawa barang rappa. Purani muwala tiwina iya matane'é sibawa aju pallémpana polé ri salangkanna. Mucaui bangsa patenre'éro iya para'éngngi umma'-Mu. Pada-pada muto ri wettu iya labe'é wettunna mucau tentara Midiangngé. Sapatu tentara iya metta-ketta'é sibawa wajunna iya pennoé dara, cappui matu nanré api. Séddi ana' jajini untu' idi; riwérékki séddi ana' worowané. Mancajiwi matu pamimpitta. Riyasengngi: “Pappangaja Mapanré”, “Allataala Baranié”, “Ambo' Mannennungengngé”, “Arung Damé”. Mapparéntai selaku arung wija-wijanna Daud, akuwasanna battowa senna. Wanuwanna tuli daméi nasaléwangeng; apparéntanna napatettongngi ri yaséna hukkungngé sibawa adélékengngé makkekkuwangngé sibawa mannennungeng. Puwang Iya Pommakuwasaé pasti napogau'i. Puwangnge pura pateppai pahukkungengngé ri yasé'na akkarungenna Israélié. Sininna bangsa Israélié sibawa pabbanuwana Samaria naissengngi matu makkedaé Puwangnge ritu pogau'i. Makkekkuwangngé matempoi mennang sibawa matanré ati. Adanna mennang, “Naruttunni sining bola polé ri batu bataé, iyakiya maéloki mébbu sining bola baru polé ri batué. Purani ritubbang sining pong araé, iyakiya maéloki sulléiwi sibawa aju camara Libanon iya kaminang makessingngé.” Puwangnge pura pakédoi balinna mennang untu' méwai mennang. Bangsa Siriaé ri alau sibawa bangsa Filistingngé ri yajang malai Israélié. Iyakiya macai mupi Puwangnge sibawa tette pahukkung. Dé'topa namassessekalé bangsa Israélié, namuni purani rihukkung ri Puwang Iya Pommakuwasaé; dé'topa mennang natoba lao ri Aléna. Rimakkuwannanaro ri laleng si esso bawang nahukkungngi Puwangnge sining pamimpinna Israélié sibawa ra'ya'na. Natéppe'i sibawa nabbéyangngi ulunna nenniya ikko'na. Ulunna iyanaritu sining tau macowa-cowaé sibawa tau malebbié, ikko'na iyanaritu sining nabi iya mabbéré sining pappagguruwang iya mappapusaé. Iyaro sining pamimpinna bangsaé purani napapusa sibawa napakacau ra'ya'é. Iyaro bangsaé nasalaini agamaé sibawa maja sipa'ni enrengngé sininna ada-adanna mennang majai. Rimakkuwannanaro ri yelle'na sining kalloloé dé' muwi séddi ripaleppe ri Puwangnge. Dé' namaséiwi sining jandaé sibawa ana' béué. Iyakiya macai mupi Puwangnge sibawa tette pahukkung. Jana iyaro bangsaé patunu pada-pada api iya paccappuéngngi alekale maddorié. Luwa'na pada-padai ale ritunu iya maggalimpuwaé rumpunna. Macai senna'i Puwang Iya Pommakuwasaé, sibawa pahukkungen-Na pada-padai api iya mallalatungngé na iyaro bangsaé iyanaritu aju-aju tununna iya ripaccappué. Dé' muwi séddi tau mamaséiwi silessurenna. Ri sininna wanuwaéro pasittaiwi tauwé sibawa manréi agi-agi iya weddingngé riyanré, iyakiya dé' namesso nasedding. Mala nanréi mennang sellao-sellaona muto! Tau Manasyé sibawa tau Efraingngé sisulléi sigasa, nainappa silaong méwai Yéhuda. Iyakiya macai mupi Puwangnge sibawa tette pahukkung. Cilakano iko iya mébbué hukkung-hukkung iya dé'é naadélé untu' tenre'i bangsa-Ku. Nasibawang caraéro mupésangkaiwi tau kasiyasié lolongeng ha' sibawa adélékeng, sibawa rampasa'i appunnangenna sining jandaé sibawa ana' béué. Aga matu muwébbu ri esso nahukkummu Allataala? Aga awatangemmu ri wettu napapolé-Na abala polé ri wanuwa iya mabélaé? Kégiko lao méllau tulung matu? Kégiko matu subbui iyaro asugiremmu? Totomu banna riyuno ri laleng musué iyaré'ga ririmpa selaku tawangeng. Iyakiya tette mupi Puwangnge macai sibawa tette pahukkung. Makkedai Puwangnge, “Cilakano Asyur! Asyur ripaké selaku cambu sibawa tarasulu untu' munrui sining tau iya nakennaé cai-Ku. Ukiringngi Asyur untu' gasai bangsa-Ku iya salaiyéngngi agamana sibawa iya mébbuék-Ka macai. Usuroi Asyur untu' maddampo sibawa ménnau enrengngé léjja-léjja'i bangsa-Ku pada-pada awué ri lalengngé.” Iyakiya arung Asyur mappunnaiwi rancanana muto. Manniya'i untu' pakéi ateddekengngé sibawa paccappui maéga bangsa. Nattempowangngi aléna, adanna, “Sininna pallimaku sining arung! Usittaiwi kota-kota Kalno sibawa Karkemis, Hamat sibawa Arpad. Usittai towi kota-kota Samaria sibawa Damsyik. Ucaui sining akkarungeng iya massompaé barahala-barahala iya lebbi makuwasaé naiya engkaé ri Yérusalém sibawa Samaria. Samaria sibawa sininna barahalana purani upaccappu. Maéloka pogau'i iya padaé lao ri Yérusalém silaong sininna barahala iya nasompaé kuwaro.” Iyakiya makkedai Puwangnge, “Rékko iyaro maéloé Upogau' ri Bulu Sion sibawa ri Yérusalém purani, maélo-Ka hukkungngi arung Asyur nasaba atemponna sibawa abangkakenna.” Mabboroi arung Asyur, adanna, “Iya manennaro upogau'i sibawa akuwasakku muto. Mapanréka sibawa macca. Uleddai sining pakkaséséng ri yelle'na bangsa-bangsaé, sibawa urampasa'i passadiyanna mennang. Pada-pada banténgngé uléjja-léjja'i sining tau iya mapparéntaé. Bangsa-bangsaé ri linoé pada-padai sarang manu'-manu'é; sibawa magampangngi uwala waramparanna mennang, pada-pada tau karao'é ittello iya nasalaiyé ri saranna. Dé'gaga panni iya rapaé, dé'gaga iya pangngangaéngngi pappitto'na iyaré'ga ciya'-ciya'.” Iyakiya makkedai Puwangnge, “Naulléga wasé mabbangkakengngi aléna lao ri tau iya pakééngngi? Aga lebbi pentingngiga garagajié naiya tau iya makkégunangngéngngi? Tenniya tarasulué makkai tauwé, sangadinna tauwé ritu makkai tarasulué.” Nasaba purai nattempowang aléna tau Asyur-é, Puwang Iya Pommakuwasaé papoléi matu lasa sai untu' hukkungngi sining parawira-parawira iya poré. Nakennai matu mennang semmeng masero pellaé pada-pada api iya patunué matteru-teru. Allataala iya mapaccingngé, Cahayana Israélié, mancajiwi matu pada-pada luwa api iya ri laleng siessoé tunui gangka cappu sininna séuwa-séuwaé, mala alekale maddorié. Sining ale'karajaé sibawa sining dare' macommoé ri wanuwa Asyur ripaccappu sisengngi matu, pada-pada tau malasa iya maddéké-réké narapi maté. Céddé bawang matu monro ajukajungngé, angkanna muwi ana' baiccu'é naulléto bilangngi. Narapii matu wettunna sésana bangsa iya leppe'é dé'na nagattungngi totona lao ri bangsa makuwasa iya mawé'é paccappui mennang, sangadinna lao ri Puwangnge, Allataala mapaccinna Israélié. Sésana bangsa Israél iya céddé'é toba'i matu lao ri Allataala iya baranié. Namuni makkekkuwangngé bangsa Israélié singngégai sibawa kessi'é ri tasi'é, céddé bawang matu lisu. Macawé'ni pahukkungenna Puwangnge, na mémeng sitinaja sibawa adélé ripaccappu iyaro bangsaé. Ya, sininna wanuwaé riancuru'i matu ri Puwang Iya Pommakuwasaé; iyanaro apettunna Puwangnge, nadé nawedding ripinrana. Makkedai Puwang Iya Pommakuwasaé lao ri umma'-Na iya monroé ri Sion, “Aja' mumétau lao ri tau Asyur-é, namuni mennang natenre'ko sibawa nacallako pada-pada iya napogau'é tau Maséré'é riyolo. Ri laleng wettu macawé'é mappésauwi cai-Ku lao ri iko, nainappa Upaccappu matu mennang. Iyya Puwang Iya Pommakuwasaé, cambu'i matu sibawa babba, pada-pada Uwajara' tau Midiangngé ri bulu batu Oréb. Uhukkungngi matu Asyur, pada-pada Uhukkung Maséré. Iyaro wettué Upaleppe'ko matu polé ri attenrekenna Asyur, sibawa dé'na mennang namakuwasa ri yasému.” Nasittaini tentara Asyur-é kota Ayat. Naliwenni mennang Migron! Nasalaiwi mennang bokonna ri Mikhmas! Naliwenni mennang alléttongngé sibawa mabbenni ri Géba! Ténréni pabbanuwana kota Rama, sibawa pabbanuwana Gibéa, kotana Arung Saul, larini. Kelli'no, éh pabbanuwana Galim! Engkalingai, pabbanuwana Laisya! Baliwi, pabbanuwana Anatot! Pabbanuwana Madména sibawa Gébim larini massala. Iyaé essoé engkani balié ri kota Nob, na kuwaniro mennang napattuju pajjagguru'na lao ri Bulu Sion, lao ri kota Yérusalém. Puwang Iya Pommakuwasaé ruttungngi matu mennang pada-pada takké ritotoé polé ri batanna. Iya kaminang magelloé sibawa matanré ri yelle'na rirette'i matu sibawa riruttung. Puwangnge tubbangngi matu mennang pada-pada ajué ri tengnga ale ritubbang sibawa wasé. Namuni mennang mawatangngi pada-pada aju iya héba'é ri Libanon, maruttung towi matu mennang! Akkarungenna Arung Daud pada-padai aju iya puraénna ritubbang. Iyakiya pékkugi polé ri tona tuwoi cura' baru, makkuwatoro polé ri wija-wijanna Daud mompoi matu séddi arung. Akuwasanna Puwangnge pimpingngi matu, pancajiwi engka akkalenna sibawa mapanré, macca mala apettung sibawa pogau'i; missengngi élona Allataala sibawa métau ri Aléna. Asennangenna iyanaritu mapato lao ri Puwangnge. Dé' namangadélé sikédé mata iyaré'ga situru adanna tauwé. Naadélékiwi tau kasiyasié sibawa adélé, tau iya dé'é pakkullénna naadélékiwi sibawa malempu; tau pasalaé nahukkungngi nasaba paréntana, napaccappui tau majaé. Tinda'i sibawa adélé nenniya matinulu ri laleng sini-sininnaé. Asu ale'é monroi matu silaong bimbala'é, macang tutul-é léwui ri seddéna bémbé'é. Mabbellai matu ana' sapingngé silaong ana' singaé, sibawa ana' baiccu'é tinrosiwi mennang. Manréi matu wella sapingngé silaong beruwangngé, léwui ana'-ana'na massibawa. Manréi daramé singaé pada-pada sapingngé. Mala séddié ana'lolo dé' namalo rékko macculéi ri seddéna ula mamosoé. Ri Sion, Bulu-bulu Mapaccinna Allataala, dé'gaga maja iyaré'ga pasolangi. Pennoi matu wanuwaé pangissengeng passalenna Allataala, pada-pada uwai pennoiwi tasi'é. Narapii matu wettunna séddi arung wija-wijanna Daud mancaji poko' perhatiyanna bangsa-bangsaé. Poléi matu mennang ri aléna, sibawa onrong naonroiyé ripoji-pojiwi matu. Ri essoéro siseppi napakéi matu akuwasanna Puwangnge sibawa tiwii lisu umma'-Na iya nasésaé ri Asyur sibawa Maséré, ri wanuwa-wanuwa Patros, Sudan sibawa Elam, ri Babél, Hamat sibawa pulo-pulo iya mabélaé. Maéloi paénré Puwangnge séddi bandéra untu' bangsa-bangsaé. Iyanaro tanranna Napaddeppungengngi paimeng bangsa Israélié sibawa Yéhuda iya tassiya-siyaé ri sininna sulapa'na linoé sibawa tiwii mennang lisu. Dé'na namangémpuru akkarungeng Israélié lao ri Yéhuda, sibawa Yéhuda dé'na namusui Israélié. Silaongngi matu mennang gasai tau Filistingngé ri yajang sibawa rampo'i bangsa-bangsaé ri alau. Napatunru'i matu bangsa Edom nenniya Moab, sibawa tunru'i matu bangsa Amongngé lao ri mennang. Napamettiwi matu Puwangnge Séppang Suéz. Naébbui anging pellaé mangiri angkanna Salo Efrat mancaji pitu salo iya macéné'é, sibawa tungke tauwé naulléi malléttoiwi sibawa mallapikajé. Untu' umma'-Na iya nasésaé engka matu watattana untu' massu polé ri Asyur, pada-pada wettunna Israélié massu polé ri Maséré. Narapii matu wettunna makkélokko: “ Puwang, sukkuru'ka lao ri alému, nasaba Musaléworika. Riyolo macai-Ko lao ri iyya, iyakiya makkekkuwangngé soroni cai-Mu. Tongeng, iyaro Allataala Pappassalama'ku, mateppe'ka lao ri Aléna. Dé' umétau, saba' Napéwatangika. Pappassalama'ku iyanaritu Allataala, untu' Aléna umakkélong. Pada-pada uwai keccé'é pérennuiwi tau madekkaé, makkuwaniro mariyo-riyoko matu, nasaba ripassalama'ko ri Allataala.” Narapii matu wettunna makkedako, “Sukkuru'no lao ri Puwangnge, sibawa sompai Aléna. Abbirittangngi lao ri bangsa-bangsaé arajanna sibawa sininna pangkauken-Na. Akkélonno untu' Puwangnge, saba' mébbui maéga anu makalallaing. Leppessanni sininna linoé méngkalingai passalenna pangkauken-Na. Gora-gorano éh pabbanuwana Sion, akkélonno sibawa marennu. Allataala mapaccinna Israélié malebbi tongeng, monroi ri tengnga-tengngamu.” Iyanaé pasenna Allataala, iya natarimaé Yésaya ana' Amos passalenna Babél: Pallebba'i bandéra musué ri tompo'na bulu-bulu iya makellué! Gorano lao risining prajuri'é, sibawa paénré'i limammu kuwammengngi nagasai mennang pintu-pintu gerbanna kota iya matempoéro. Purani naobbi Puwangnge pejuwang-pejuwang Napiléna. Baraniwi mennang, natepperi aléna sibawa wedding riyattuwang. Puwangnge suroi mennang untu' hukkungngi sining tau iya nakennaé cai-Na. Engkalingai oni marukkaé ri bulué, pada-pada oni addeppungenna tau iya maéga senna'é. Engkalingai arukkanna sining akkarungengngé sibawa bangsa-bangsa iya mattengngangngé maddeppungeng. Puwang Iya Pommakuwasaé paréssai pasukang musué. Poléi mennang ri wanuwa-wanuwa iya mabélaé ri cappa-cappa linoé. Ri laleng caina Puwangnge napakéi mennang untu' paccappui sininna linoé. Mpatinno nasaba essona Puwangnge macawé'ni, iyanaritu esso abinasang iya napapolé Puwang Iya Pommakuwasaé. Tungke tau napéneddingiwi kapé limanna sibawa ateddéngeng abaraningenna. Nakenna manengngi matu mennang tau iya maseroé, sibawa maggulicci mapeddi pada-pada makkunrai iya mattengngangngé mémmana. Sisulléi matu mennang siita sibawa manenneng, macella rupanna nasaba masirii. Poléi matu essona Puwangnge, na ri essoéro napallessui caina Puwangnge sibawa cai-Na iya maseroé. Mancaji padang makabuttui matu linoé, sibawa tungke tau madosaé binasai matu. Tungke wéttowingngé sibawa atu wéttowingngé mappésauwi matu mattappa; mapettangngi matu mata essoé ri wettunna mompo, sibawa kétengngé dé' naccahayana matu. Makkedai Puwangnge, “Maélo-Ka hukkungngi linoé nasaba jana, sibawa sining tau majaé nasaba dosa-dosana mennang. Tungke tau matempoé Upakariyawai matu, tau maboroé sibawa mabecco'é Uhukkungngi matu. Tau iya ripassalama'é céddé senna, lebbi jarangngi mennang naiya ulaweng tuléngngé. Uwébbui matu ténré langié sibawa taggottang linoé polé ri onronna ri esso Uwappaitanna cai-Ku, Puwang Iya Pommakuwasaé. Tau laing iya monroé ri Babél massara-sarangngi matu sibawa lari lao ri wanuwanna tungke-tungke. Pada-padai mennang jonga iya lariyé polé ri paddengngengngé, iyaré'ga bimbala makkonrong iya dé'é nappunnai pakkampi. Nigi-nigi ritikkeng rigajangngi matu gangka maté. Nasabbingngi matu mennang ana'-ana'lolona rireppo, rirampo sining bolana sibawa rigau' maja sining bainéna.” Makkedai Puwangnge, “Upakédoi matu bangsa Madaié untu' gasai Babél. Dé' nawedding mennang risogo sibawa péra' iyaré'ga ulaweng. Nasibawang usona sibawa panana naunoi matu mennang sining tau maloloé. Dé' mennang nasayangngi ana'loloé sibawa dé' namaséiwi anana'é. Polé ri sininna akkarungengngé, iyaro Babél kaminang magello sibawa mancajiwi abangkakennai pabbanuwana. Iyakiya Iyya, Puwang, mancuru'i matu, pada-pada puraé Upogau' lao ri Sodom sibawa Gomora. Dé' muwi séddi tau monrona matu kuwaro. Dé'gaga tau Arab passollé iya pasangngéngngi kémana ri onrongngéro, sibawa dé'gaga pakkampi iya tiwié matu bémbé bimbala'na untu' mabbella kuwaro. Iyaro onrongngé naonroiwi matu olokolo maliyaé. Massarangngi matu kacoci'é risining bolana mennang, sibawa manu'-manu' untaé monroi matu kuwaro. Kanja-kanjai matu bémbé-bémbé liyaé ri yelle ruttungenna. Bokkana asu ale'é sibawa sarigalaé maddalenrungngi matu polé risining bénténgngé sibawa sining saorajana Babél. Wettu ancurukenna mawé'ni narapi sibawa wettunna dé' naripasorona.” Puwangnge mamaséiwi matu Israélié umma'-Na, sibawa piléi mennang paimeng mancaji appunnangen-Na. Nataroi matu mennang paimeng ri wanuwanna muto. Poléi matu tau laingngé sibawa masséddi sibawa mennang. Maéga bangsa tulungngi matu bangsa Israélié untu' lisu ri wanuwa iya nabbéréyangngé Puwangnge lao ri mennang, sibawa kuwaro mancaji atai matu bangsa-bangsaé lao ri Israélié. Natawangngi matu Israélié sining tau iya puraé tawangngi sibawa paréntai sining tau iya puraé tenre'i. Puwangnge paleppe'i matu bangsa Israélié polé ri apeddirenna sibawa anrasa-rasanna, nenniya polé ri jamang matane iya ripassangengngéngngi. Rékko napogau'i Puwangnge iyaro, naéllé'i matu mennang arung Babél makkuwaé, “Sempé'ni arung iya mabecco'é! Dé' naulléni patenre'na. Napaccappa'ni Puwangnge apparéntanna panguwasa-panguwasa majaé iya nasibawangngé cai tenre'i bangsa-bangsaé sibawa matteru-terui callai mennang. Angkanna amangngi sibawa daméi matu sininna linoé, sibawa tungke tauwé makkélongngi marennu. Aju érué sibawa aju camara Libanongngé marennui nasaba arung iya mabecco'éro sempé'ni, nalaonana, dé'gaga suroi tubbangngi mennang! Ramé-raméni linona tau maté duppaiwi iyaro arung Babél. Napéseddinna waliyalana sining tau iya makuwasaé riyolo ri linoé, sibawa waliyalana sining arungngé moto'ni polé ri kadéra arajanna mennang. Gora manenni mennang lao ri aléna, ‘Hai! Makkekkuwangngé pada-padano idi, malemma temmawatang! Riyolo ripakalebbiko sibawa kacapi, iyakiya makkekkuwangngé engkano ri asino-sinonna linona tau maté. Ule'é mancaji ranjammu sibawa latié mancaji parampa'mu.’ Eh arung Babél, riyolo wéttowing éléko iya mattappaé, iyakiya makkekkuwangngé sempé'ni polé ri langié! Riyolo mucaui bangsa-bangsaé, iyakiya makkekkuwangngé riyappéyanni ri tanaé. Manniya'ko ménré ri langié sibawa taroi kadéra akkarungemmu ri yasé'na wéttowing iya kaminang matanré! Muwasengngi muwulléi tudang selaku arung ri tompo'na bulué seddé manorang, onronna déwata-déwataé maddeppungeng. Makkedako, makkedaé ménré'ko matu ri yasé'na ellungngé sibawa mancaji pada-pada Iya Pommatanré. Padahal risorokko lao ri bagiyang iya kaminang maliyungngé polé ri linona tau maté. Mennang iya engkaé kuwaro naitai matu sibawa natangngako. Makkutanai matu mennang, ‘Iyanaéga taunna iya péttauriyéngngi linoé sibawa pawéwangngi sining akkarungengngé? Alénaga mancuru'i kota-kotaé sibawa pinrai linoé mancaji padang kessi? Iyanagaé iya dé'é naleppessangngi sining tawangenna iyaré'ga leppessangngi mennang lisu?’ Sininna puraé mancaji arunna bangsa-bangsaé ritampungngi sibawa marowa ri tampunna tungke-tungke, iyakiya iko dé' muwappunnai kuburu; ujumu riyabbéyangngi pada-pada lokko iya risampéyangngé, ritébung sining ujuna pejuwang-pejuwang iya maté ri laleng musué, sibawa riyaggenrungeng silaong mennang ri liyang batué, pada-pada bakké iya riléjja-léjja'é. Purani mupabbinasa wanuwammu sibawa mpunoi bangsamu muto. Rimakkuwannanaro dé' narikuburu'ko matu pada-pada arung-ngarung laingngé. Dé' muwi séddi polé ri kaluwargamu iya majaéro ripassalama matu. Abbunowangngé masitta'i ripammulai! Matéi matu ana'-ana' worowanému sibawa makkunraié nasaba dosana toriyolona mennang. Dé' muwi séddi tau polé ri mennang mapparénta matu ri linoé iyaré'ga patettong kota-kota.” Makkedai Puwang Iya Pommakuwasaé, “Ugasai matu Babél sibawa pallennye'i. Dé' muwi séddi tau Upassalama, mala ana'-ana'é dé' Uleppessangngi tuwo. Iyya, Puwang, pura mabbicara. Upancajiwi matu Babél rawa-rawa iya naonroiyé kacoci. Usaringngi matu Babél gangka mapaccing. Iyya, Puwang Iya Pommakuwasaé, pura mabbicara.” Mattanroi Puwang Iya Pommakuwasaé: “Iya puraé Urancanaro pasti kajajiyangngi matu. Upaccappui matu tau Asyur-é ri Israél wanuwak-Ku, sibawa iya engkaé risining bulu-Ku uléjja-léjja'i matu. Upaleppe'i matu bangsa-Ku polé ri patenre'é sibawa polé ri tiwi iya ripassangengngéngngi mennang ri tau Asyur-é. Iyanaé rancanaé untu' linoé; maddeppa-reppani limak-Ku untu' hukkungngi bangsa-bangsaé.” Purani napettui Puwang Iya Pommakuwasaé untu' pogau'i makkuwaro. Napaddeppa-reppai limanna untu' pahukkung, nadé' muwi séddi tau mulléi pésangkaiwi. Iyanaé paseng iya riyappallebbangengngé ri laleng taung namatéiyé Arung Ahas. Eh bangsa Filistin, tarasulu iya ripaké untu' tetté'ko mapoloni. Iyakiya aja' mumarennu, saba' rékko matéi sikajué ula, ula iya lebbi majaé polé sulléiwi, sibawa tello ulaé maddepparengngi naga makképannié. Nakennako matu akkadéreng maseroé, sibawa sininna tau iya nasésaé riyunoi matu. Sibalé'na, tau iya kaminang kasiyasié polé ri umma'na Puwangnge lolongengngi matu inanré, sibawa sining tau iya dé'é pakkullénna tuwoi matu sibawa amang nasaléwangeng. Mpatinno, sibawa gorano méllau tulung, éh kota-kotana Filistin! Sitinaja manekko métau! Maggalimpuwa ellung awué polé ri manorang tanrangiwi apolénna pasukang balié; dé'gaga bali'bella ri yelle'na mennang. Pappébali aga riwéréngngi matu sining suro iya polé ri bangsa Filistingngé? Tapowadangngi matu mennang makkedaé purani napatettong Puwangnge Sion, sibawa umma'-Na iya manrasa-rasaé lolongengngi matu allinrungeng kuwaro. Iyaé pasenna Puwangnge passalenna Moab. Kota Ar sibawa Kir ripaccappui ri laleng siwenni, sibawa masino-sinoni wanuwa Moab. Natuppuini bulu-bulué pabbanuwana Dibon untu' teri ri onrong assompang déwata-déwataé. Nasibawang amesséng nawatingini pabbanuwana Moab kota Nébo sibawa Médéba. Nacukkuru'ni mennang ulunna sibawa janggo'na selaku tanrang masara. Sining tauwé ri lalengngé mappaké kaing karungngi tanrang mabbarata; mpatingngi tauwé sibawa teri ri tana lapangngé sibawa ri pabbingeng bolaé. Tau Hésybongngé sibawa Eléalé mowang-mowanni, sibawa saddanna mennang riyéngkalinga lettu ri Yahas. Mala ténré sining prajuri'é; ateddéngenni mennang abaraningeng. Messéka lao ri Moab! Mangunsini pabbanuwana lao ri kota Zoar sibawa lao ri Eglat-Selisia. Engka iya tuppuiyéngngi lalengngé lao ri Luhit naterito; engka lari lao ri Horonaim nakelli-kelli'to nasaba nakennai abala. Marakkoni uwaina Salo Nimrim sibawa wella iya tuwoé ri wirinna, dé' gagana tanet-taneng iya manyilaé. Nalléttoini sining tauwé ana' salo Haarabim sibawa makkuraga passalama'i sininna waramparanna mennang. Kégi-kégi ri pakkasésénna Moab riyéngkalingai kelli'é. Iyaro watingngé riyéngkalingai ri Eglaim sibawa Beer-Elim. Ri Dibon macella uwaina saloé nasaba sicampuru'i sibawa dara. Napapoléi matu Allataala gau'-gau' iya lebbi maseroéppa ri yasé'na sining tauwé kuwaro. Pabbuno iya nakiringngé naunoi matu sininna tau Moab iya tuwoé mupa. Polé ri kota Séla ri padang kessi'é, kiringngi bangsa Moab-é ana' bimbala untu' nahadiyakang lao ri panguwasaé ri Yérusalém. Mattajengngi sining tau Moab-é ri wirinna Salo Arnon najoppa-joppato malippu pada-pada manu'-manu' iya rirukkaé polé ri saranna. Makkedai mennang lao ri bangsa Yéhudaé, “Powadanni aga iya harusu'é tapogau'. Ancajino untu' idi accinaungeng iya makeccé'é ri tire lakessoé, sibawa leppessanni monro ri laleng accinaungemmu. Pangungsiki idi'é; subbuki sibawa aja' tabali'bellariki. Palaloni mappéruma ri wanuwammu. Linrungiki lao risining tau iya maéloé paccappuki.” (Attenrekengngé sibawa appabbinasangngé maccappa'i matu, sibawa sining tau iya paancuru'é nenniya tenre'éngngi wanuwa Israélié lennye'i matu. Nainappa séddi polé ri wija-wijanna Daud mancaji arung matu, nanaparéntai matu bangsana sibawa mamasé nenniya matinulu. Napatettongngi matu adélékengngé sibawa masitta tinda untu' pogau'i iya tongengngé.) Makkedai bangsa Yéhudaé, “Purani riyéngkalinga passalenna atemponna bangsa Moab-é. Riisseng makkedaé matempoi mennang sibawa macongka'i. Bicaranna mennang banna abborong iya dé'é lise'na.” Rimakkuwannanaro leppessangngi bangsa Moab-é sisullé siwatingi. Leppessangngi mennang teri rékko naéngngerangngi inanré malunra iya biyasaé nanré mennang ri kota Kir-Harését. Leppessangngi mennang pettu paddennuwang sibawa maddaréké. Sining dare'é seddéna Hésybon sibawa sining palla anggoro'na Sibma purani ripaccappu, sining palla iya biyasaé powassélé anggoro iya kaminang magelloé untu' sining panguwasana bangsaé sibawa mébbui mennang mabo'. Riyolo iyaro sining palla anggoro'é malowangngi lettu ri kota Yaézer; sibawa lilau lettu ri padang kessi'é, sibawa ri seddé yajang lettu ri liwenna Tasi Maté. Makkekkuwangngé uteringini pong anggoro'na Sibma pada-pada uteringinna Yaézer. Mabbarébé uwai matakku untu' Hésybon sibawa Eléalé, nasaba wassélé tanana cappui nanré balié. Dé' muwi séddi tau marennu risining palla macommo'éro. Dé'gaga kelli marennu sibawa makkélong ri palla anggoro'é. Dé'gaga mappara anggoro untu' mébbu uwai anggoro. Purani upappaja gora marennunna mennang. Kelli atikku sibawa ancuru mitai keadaanna Moab sibawa Kir-Héres. Massussa-sussai tau Moab-é tuppuiwi bulu-bulu akkarobangengngé lao ri onrong assompanna mennang untu' massempajang, iyakiya dé'gaga wassélé'na. Iyanaro paseng riyolo nabbéréyang Puwangnge passalenna Moab. Na makkekkuwangngé makkedai Puwangnge: “Telluttauppi, sininna asugireng iya nabbangkakengngé Moab lennye'i matu. Ra'ya'na iya maégaé mancaji céddé'i bawang matu sibawa malemma.” Makkedai Puwangnge, “Dé'na namaddupa kotana Damsyik, iyakiya banna goppo ruttungeng. Kota-kotaé ri Siria risalaiwi matu untu' mannennungeng sibawa mancajiwi onronna olokolo makkonrongngé; dé' muwi séddi tau lellungngi mennang. Ateddéngengngi matu Israélié allinrungenna sibawa Damsyik ateddéngengngi amaradékanna. Tau Siria iya nasésaé mupa tuwoi matu ri laleng atunangngé pada-pada tau Israélié. Iyya, Puwang Iya Pommakuwasaé, pura mabbicara.” Makkedai Puwangnge, “Narapii matu wettunna maccappa'i arajanna Israélié, sibawa adécéngenna lennye'i. Pada-padai matu Israélié dare'é ri Réfaim iya cappué riyéngngala gandonna, sibawa banna céddé nasésa. Pada-pada pong zaitun iya puraénna ricéppu buwana, sibawa siyagangngaré mani bawang monro ri cappa-cappa takkéna, makkuwatoro ri Israélié céddé bawang tau iya salama'é matu. Iyya, Puwang, Allataalana Israélié, pura mabbicara.” Ri essoéro lisui matu tauwé méllau tulung lao ri Pappancajinna, Allataala mapaccinna Israélié. Dé' matu namménasaiwi mennang wassélé polé ri ébbu limanna mennang, iyanaritu mézba-mézba onrong mattunu dupa, sibawa dato-dato Déwi Asyéra. Ri essoéro, kota-kotana Israélié iya mawatangngé attahangenna mancajiwi matu ruttungeng sibawa masino-sino, pada-pada kota-kota iya nasalaiyé tau Héwié sibawa Amorié wettunna mennang lari polé ri tau Israélié. Israél, muwallupaini Allataala iya mappassalama'é sibawa linrungiko pada-pada bulu batu iya masse'é. Sibalé'na, purani mutanengi sining palla'é untu' déwata-déwataé. Iyakiya namuni iyaro tanengengngé matterui lokko sibawa mabbunga ri esso mutanenna, iyakiya dé'gaga matu wassélé'na. Iya engkaé banna asussang sibawa pappénedding mapeddi iya dé'é naulléi teddéng. Bangsa-bangsa mawatangngé mattengngangngi marukka; memmu oninna pada-pada memmu'na bombang tasi iya maseroé. Mallurui mennang pada-pada lémpe iya maseroé. Iyakiya Allataala mancangngi mennang, nainappa lari mennang gangka mabéla. Rilellungngi mennang pada-pada awangngé naluttureng anging ri émpeng bulué, iyaré'ga awué nairi anginraja. Ri wettu arawéngngé papoléi mennang amétaureng iya maseroé, iyakiya mawé'nana élé teddénni mennang. Iyanaro totona tungke tau iya rampasaékki. Polé ri séddié wanuwa ri liwenna salo-salo Sudan riyéngkalingai oni padaé wani memmu'é. Polé ri wanuwaéro poléni duta-dutaé malléttoiwi Salo Nil ri laleng lopi-lopi pandangngé. Eh, sining suro iya mapecci'é, lisuno masitta ri wanuwammu iya malléttoiyéngngi sining saloéro. Tiwino séuwa paseng untu' bangsamu iya mawatangngé sibawa baranié, sining taummu iya matanré sibawa makkoli alusu'é sibawa riyétauri ri sininna linoé. Eh, iko maneng iya monroiyéngngi linoé! Pénessaiwi rékko ripaénré'i bandérana ri tompo'na sining bulué! Engkalingai rékko ripaoniwi tarompé'é! Makkedai Puwangnge lao ri iyya, “Polé ri onrok-Ku ri yasé, maélo-Ka makkita liyawa sibawa tennang nenniya matajang, sittennang cinoddo iya riwinrué ri wenni iya mapellaé ri wettu éngngalangngé, sibawa siccakka tappa mata essoé ri essoé. Ri wettu dé'napa na wettu buwaé, wettunna madduttunni unganna sibawa buwa anggoro'é dé'pa namatasa ri ponna, riyancuru'i matu Sudan ri balié, siggampang pisoé rette'i takké-takké polé ri pong anggoro'é. Ujuna sining prajuri'na nasalaiwi matu mancaji inanréna manu'-manu'é ri wettu tikkaé sibawa olokolo masekkangngé ri wettu cekké'é.” Narapii matu wettunna ripalettu sining pakkasuwiyanna lao ri Puwang Iya Pommakuwasaé polé ri wanuwaéro iya nalaloiyé sining salo, polé ri bangsana iya mawatangngé sibawa poré, polé risining taunna iya matanré sibawa makkoli alusu'é sibawa riyétauri risininna linoé. Laowi matu mennang ri Bulu Sion, ri onronna Puwang Iya Pommakuwasaé risompa. Iyanaé pasenna passalenna Maséré. Laowi Puwangnge ri Maséré tonangi ellung iya magattié. Ténré barahala-barahala Maséré'é ri yolo-Na sibawa marenni ati tau Maséré'é. Makkedai Puwangnge, “Pakangkaka matu musu assilessureng ri Maséré: Silessurengngé méwai silessurengngé, balibolaé méwai balibolaé, kotaé méwai kotaé sibawa akkarungengngé méwai akkararungengngé. Dé' upajajiwi matu rancana-rancanana Maséré sibawa lemmaiwi sumange'na mennang. Méllauwi matu mennang pattulung ri barahala-barahalaé, méllau pangaja sibawa panunju lao risining sanroé sibawa roh-roh-é. Uwabbéréyangngi matu Maséré lao ri limanna séddié arung mabecco iya paréntaéngngi mennang sibawa mabecco. Iyya, Puwang Iya Pommakuwasaé, pura mabbicara.” Nonnoi matu uwaina Salo Nil angkanna marakko. Makebbongngi matu baunna sining sépe'é wettunna pédé cappu uwaina. Arasoé sibawa wellaé makelle'i matu. Sininna appallengngekengngé ri sillampé wirinna Salo Nil mancaji marakkoi matu nainappa riluttureng ri angingngé. Sining pakkajaé iya biyasaé tikkeng balé ri saloéro maddarékéi matu sibawa mpating nasaba méng sibawa jalana mennang dé' nakkégunana. Pettu paddennuwangngi matu sining pattennungngé; Madonggo senna pamimping-pamimpinna kota Zoan! Tau Maséré iya kaminang mapanré mabbéréi pangaja iya madonggoé! Barani senna'i mennang powadangngi arungngé makkedaé wijannai mennang sining tau mapanré sibawa sining arungngé ri wettu riyolo! Eh arung Maséré, kégani sining pappangajana datu iya maccaéro? Naullé naisseng mennang aga narancana Puwang Iya Pommakuwasaé untu' Maséré. Sining pamimpinna Zoan sibawa Mémfis iyanaritu sining tau madongo. Tenniya mennang pamimping, mala napapusai bangsana. Puwangnge ritu mébbui mennang mabbéré pangaja iya mappamalingngé. Addimonrinna, salani Maséré, sibawa tassulus-sulung pada-pada tau mabo' iya tappasollaé ri yasé'na luwana muto. Ri Maséré dé'gaga tau iya mawatangngé mupa, muwi panguwasaé iyaré'ga ra'ya'é, muwi tau pentingngé iyaré'ga tau biyasaé. Narapii matu wettunna mancajiwi bangsa Maséré'é pada-pada makkunrai bali'bellaé sibawa pellorengngé. Ténréi mennang nataro tau rékko naitai Puwang Iya Pommakuwasaé paénré'i limanna untu' hukkungngi mennang. Tana Yéhuda mancajiwi amétaurenna tau Maséré'é sises-siseng mennang riparéngngerangi ri apettunna Puwang Iya Pommakuwasaé passalenna menang. Iyaro wettué basa Ibranié ripakéi ri laleng lima kotana Maséré. Sining tauwé kuwaro mattanroi ri laleng asenna Puwang Iya Pommakuwasaé. Sala séddinna kotaéro riyasengngi matu “Kota Mata Esso”. Ri wettuéro ri tengnga-tengngana wanuwa Maséré engka matu séddi mézba untu' Puwangnge, sibawa ri pakkasésénna séddi alliri batu iya ripallaingngé untu' Puwangnge. Iyaro mézbaé sibawa alliri batué sinrupai lambang ahadérékenna Puwang Iya Pommakuwasaé ri Maséré. Rékko ritenre'i iyaro bangsaé, namangobbii méllau tulung lao ri Puwangnge, nasuroi matu séddi tau untu' passalama'i mennang. Nappaddissengengngi matu Aléna Puwangnge lao ri bangsa Maséré'é, nanaissengngi matu mennang sibawa sompai, enrengngé tiwi akkarobangeng sibawa pakkasuwiyang lao ri Aléna. Majjanciwi matu mennang lao ri Aléna sibawa mattanro nenniya napogau'na. Naajara'i matu Puwangnge bangsa Maséré'é, iyakiya puranana napajjappai matu mennang. Balé'i matu lao ri Puwangnge, sibawa méngkalingai matu sempajanna mennang enrengngé mpéréngngi ajjappang. Ri wettuéro engka matu watattana ri pallawangenna Maséré sibawa Asyur. Pabbanuwana iya duwa wanuwaéro lao lisuwi matu molai lalengngéro sibawa massompai matu massibawa. Iyaro wettué padai matu tudangenna Israélié sibawa Maséré nenniya Asyur, sibawa iya tellu bangsaéro mancaji barakka'i matu untu' sininna linoé. Puwang Iya Pommakuwasaé barakkakiwi matu mennang sibawa makkeda, “Ubarakkakiko, éh Maséré umma'-Ku, Asyur winru-Ku, sibawa Israélié umma upilé-Ku.” Nasaba paréntana Sargon, arung Asyur, pallima tentarana Asyur gasai Asdod, séddi kota Filistin. Telluttaung ri yolona, Puwangnge suroi Yésaya ana' Amos ludungngi lapikajéna sibawa kaing karung iya mattengngangngé napaké. Turui sibawa joppai mallusu-lusu nenniya dé' nallapikajé. Wettunna rikeppung kota Asdod, makkedai Puwangnge, “Atak-Ku Yésaya telluttaunni mallusu-lusu sibawa dé' nallapikajé. Iyanaé tanranna polé ri aga iya kajajiyangngé matu sibawa Maséré nenniya Sudan. Natawangngi matu arung Asyur sining tau polé ri iya duwa wanuwaéro naririmpa matu sibawa mallusu-lusu. Macowa sibawa malolo, iya manenna joppai matu temmabbaju nenniya lapikajé sibawa paita poncinna, selaku pappakatuna lao ri Maséré. Sining tau iya mattuwangngéngngi Sudan sibawa mattempowangngi Maséré majuléi matu sibawa ancuru paddennuwanna. Ri wettuéro makkedai matu sining tau iya monroé ri wiring tasi'é, ‘Itani aga kajajiyang sibawa bangsa iya tattuwangngé untu' linrungiki polé ri arung Asyur. Pékkugi weddikki salama?’ ” Iyanaé pasengngé passalenna Babél: Pada-pada anging talippurué memmu lalo ri padang kessi'é, makkuwaniro apolénna abala polé ri wanuwa iya maseroé. Lolongekka pakkitang passalenna kajajiyang-kajajiyang iya mappakatau-taué; passalenna abali'bellarengngé sibawa appabbinasangngé. Alluruno, tentara Elam, gasai! Eh tentara Madai, keppungngi! Napappajai matu Allataala sininna anrasa-rasang iya napapolé Babél. Iyaro pakkitangngé naébbuka malippu angkanna dé' uwulléi makkita iyaré'ga maréngkalingana. Métauka sibawa mapeddi, pada-pada séddié makkunrai iya mattengngangngé mémmana. Maséssai atikku; pappénedding métaué mébbuka ténré. Wenni iya uwuddaningiyé banna tiwii amétaureng. Uwita towi pésta perjamuwang iya puraénna ripassadiya; onrong tudangeng untu' sining undangangngé tassadiyani. Manréni sibawa ménung mennang. Tennasenna-senna riyéngkalingai paréntaé: “Eh sining parawira-parawira! Passadiyaiwi kaliyawomu!” Nainappa makkeda Puwangnge lao ri iyya, “Laono mutaro séddi tau panganrowang sibawa suroi laporo'i aga iya naitaé. Rékko mitai pasukang makkinnyarang polé tadduwa-duwa, pasukang iya tonangiyé kaleddé sibawa unta, harusu'i nasalidiki madécéd-décéng.” Nainappa iyaro panganrowangngé, “Puwang, purana jaga esso sibawa wenni.” Itai, iyanaro mennang! Pasukang makkinnyarangngé iya polé tadduwa-duwa. Nainappa iyaro pajagaé nabbirittang, “Sempé'ni Babél! Dato-dato nasompaé mennang ancuru'ni tassiya-siya ri tanaé.” Bangsa-Ku Israélié! Purano napucca-pucca sibawa naléjja-léjja pada-pada gandongngé. Makkekkuwangngé Upalettukekko karéba madécéng iya Uwéngkalingaé polé ri Puwang Iya Pommakuwasaé, Allataalana Israélié. Iyanaé pasengngé passalenna Edom. Engka tau gora lao ri iyya polé ri Edom, “Eh pajaga, malampé mupaga iyaé wennié? Siyagapi janna naélé?” Pappébalikku, “Poléi matu éléé, iyakiya wennito. Rékko maéloko makkutana, poléno makkutanasi?” Iyanaé pasengngé passalenna Arab: Eh tau Dédan, makkémai kafila-kafilamu ri alekale'na tana Arab. Eh pabbanuwana tana Téma, painungngi sining tau madekka iya laowé ri iko, sibawa panréi sining pangungsié. Saba' larini mennang polé ri peddang pura rampué, polé ri uso iya ripaggettengngé, sibawa polé ri musu marowaé. Nainappa makkeda Puwangnge lao ri iyya, “Sitauppi arajanna suku-suku Kédar naccappa matu. Pappana-pappanana Kédar iyanaritu tau iya kaminang baranié. Iyakiya banna céddé polé ri mennang salama matu. Iyya, Puwang Allataalana Israélié pura mabbicara.” Iyanaé pasengngé passalenna Lompo Pakkitangngé: Eh pabbanuwana Yérusalém, magi muwénré maneng ri pabbingeng bolaé? Dé' nasipato sininna kotaé mappésta-pésta sibawa gora marennu. Saba' sining pajuwammu iya maté ri laleng musuéwé dé' namaté nasaba mammusui. Sininna pallimamu lariwi sibawa ritawangngi ri wettu dé'napa nattémbakengngi mennang panana. Sininna tau mawatammu ritawang towi namuni larini mabéla. Aja' mujampangika; leppessakka watingiwi sining tau polé ri bangsaku iya matéénna. Aja' mucobai saléworika. Mémeng Puwang Iya Pommatanré sibawa Pommakuwasaé pura pattentui iyaé essoé selaku esso akacaungeng, awéwangeng sibawa arocakeng ri Lompo Pakkitangngé. Riruttunni témbo-témbo kotaé. Kelli méllau tulungngé maddaremmeng ri bulu-bulué. Poléi tau Siria sibawa anyarang nenniya karéta musu, tau Elangngé massenjata panai, tau Kir-é passadiyai kaliyawona. Lompo-lompo macommo'na Yéhuda pennoi sibawa karéta musu. Sadiyani pasukang makkinnyarangngé ri yolona gerbang-gerbanna Yérusalém. Maruttung maneng attahanangenna Yéhuda. Iyaro wettué, muparéssai paréwa musué ri gudang senjataé. mébbuko kolang ri laleng kotaé sibawa pattarimai uwai polé ri kolang malaungngé. Iyakiya dé' mujampangiwi Allataala iya maittaénna rancana manengngiro, sibawa iya nassabariyéngngi nakajajiyanro. Ri wettuéro Puwang Iya Pommatanré sibawa Pommakuwasaé suroko teri sibawa mpating, maccukkuru gemme sibawa paké kaing karung. Iyakiya sibalé'na, massennas-sennakko sibawa mappésta. Maggéré sapikko sibawa bimbala, manré juku sibawa ménung uwai anggoro namangobbito, “Laono mai tanré sibawa ménung, saba' baja tamaté!” Puwang Iya Pommatanré sibawa Pommakuwasaé mappaitangngi aléna sibawa makkeda lao ri iyya, “Tongeng, jana mennanro dé' uwaddampengengngi matu narapi maté mennang. Iyya, Puwang, pura mabbicara.” Puwang Iya Pommatanré sibawa Pommakuwasaé suroka méwai sita Sébna, kapala ruma tanggana saorajaé, untu' palettukengngi aléna pasenna Puwang -ngéwé, “Muwasengngi niga iko? Aga ha'mu angkanna muparengngi kuburu alému ri bulu-bulu batué? Rimakkuwannanaro Upaléssoko matu polé ri jabatammu sibawa Upanonno polé ri pangka'mu iya matanré. Ri wettuéro Uwobbii matu atakku Elyakim ana' Hilkia. Pakéyang arajammu sibawa babbammu Upakkennai matu ri aléna. Sininna akuwasammu Uwéréngngi matu aléna. Mancajiwi matu ambo' untu' pabbanuwana Yérusalém sibawa Yéhuda. Sukkui matu makuwasa ri yawana arung wija-wijanna Daud. Makkatenningngi matu goncing akkarungeng. Rékko natimpa'i, dé'gaga mulléi tongkoi, sibawa rékko natongkoi, dé'gaga mulléi timpa'i. Uwéréngngi matu tudangeng iya masse'é pada-pada patto'é tappasang masse ri témbo'é. Sininna kaluwargana ripakalebbii matu nasaba aléna. Iyakiya sumpulolona sibawa tanggungenna mancaji répoi matu ri aléna. Nagattungngi matu aléna mennang ri aléna, pada-pada oring lowaé taggattung ri patto'é. Rékko kajajiyangngi iyaro, patto iya ripasangngé sibawa masse'ro mareddu'i matu sibawa sempé. Na iyanaro paccappurenna sumpulolona sibawa sininna tau iya gattungngéngngi aléna ri aléna. Iyya, Puwang, pura mabbicara.” Iyanaé pasengngé passalenna Tirus. Eh sining passompe Spanyol iya sompekiyéngngi dolangengngé, mpatinno! Wettunna sompe lisu polé ri Siprus, ripaissengiko makkedaé ancuru'ni kota Tirus. Pangkalang sibawa sining bolamu mancaji ruttungengngi. Eh kota Sidon, teddénni alebbiremmu! Dolangeng iya maliyungngé dé'na nangakuiko, adanna, “Dé'pa naengka uwémmana, dé'pa naengka upawekke ana' worowané iyaré'ga makkunrai.” Mala tau Maséré'é tassélengngi matu sibawa marukka rékko naéngkalingai makkedaé purani ripaccappu Tirus. Mpatinno sibawa massalano lao ri Spanyol, éh pabbanuwa wiring tasi'é! Itani kota Tirus iya engkaénna ri wettu riyolo. Iyanaé kota iya biyasaé massennas-sennang? Iyanaéga kota iya kiringngé sining tau lao ri liweng tasi untu' sompe kuwaro? Dé'ga nasining padangkanna wija arung iya kaminang ripakalebbié ri linoé? Niga mala apettung untu' pasempé'i Tirus, kota iya kaminang makuwasaéwé? Puwang Iya Pommakuwasaé, Aléna ritu malai iyaro apettungngé. Napettuiwi untu' paccappa'i atemponna pabbanuwana lao ri sininna wassélé iya puraé nalolongeng mennang, sibawa pakariyawai sining tau iya malebbié ri linoé. Laono mujamai dare'mu, éh pabbanuwana Spanyol, saba' dé'na gaga onrong mébbu kappala. Purani natanréyang limanna Puwangnge ri yasé'na tasi'é sibawa galéttéi sining akkarungengngé. Mabbéréi parénta kuwammengngi nariyancuru sining bénténna Funisia. Adanna Puwangnge, “Eh kota Sidon! Dé'na mumassennas-sennang matu. Ritenre'i pabbanuwamu. Namuni mangungsiwi mennang lao ri Siprus, dé' mennang naamang.” ( Tenniya bangsa Asyur, sangadinna bangsa Babél iya leppessangngéngngi kota Tirus rikuwasai ri olokolo masekkangngé. Mennang toritu iya patettongngé sining manara akkeppungeng, ruttungngi sining bénténna sibawa pancajiwi iyaro kotaé ruttungeng.) Mpatinno, éh sining passompe! Kota iya muwattuwangngé ancuru'ni. Narapii matu wettunna riyallupaiwi Tirus pituppulo taung ittana, pada umuru'na séddié arung. Rékko labe'ni iyaro wettué, padai matu Tirus makkunrai cakkuribangngé ri laleng élongngéwé: Alano kacapi, attulilingiwi kotaé, éh cakkuribang cilaka iya riyallupaiyé! Getti'i kacapié, akkélossiko, kuwammengngi riyéngngerakko paimeng. Labe'nana iyaro pituppuloé taung, naéngngerangngi matu Puwangnge Tirus sibawa pakkulléi pogau'i jama-jamanna riyolo. Dangkangngi matu sibawa sininna akkarungengngé ri tompo'na linoé. Laba sibawa saro iya nalolongengngé dé' matu nataroi, iyakiya nakkasuwiyangengngi matu lao ri Puwangnge. Sining tau iya sompaéngngi Puwangnge napakéi matu iyaro dowié untu' melli anré sibawa pakéyang iya napparelluwangngé mennang. Napaccappui matu Puwangnge linoé, angkanna mancaji makabuttu sibawa masino-sino. Nabalé'i matu tompo'na sibawa passara-sarangngi pabbanuwana. Sininna tauwé napéneddingiwi toto iya padaé: imang-ngimangngé sibawa ra'ya'é, ata riyelli sibawa ponggawana, pabbalu'é sibawa pangelli, panginrengngé sibawa pappainrengngé, sugié sibawa kasiyasié. Tabburé-buréi matu linoé sibawa riyancuru. Puwangnge pura mabbicara, na iyaro gau'é pasti kajajiyang. Mancaji marakkoi linoé sibawa makelle, sininna linoé makkanrodongngi. Langi sibawa linoé pada-padai makkanrodong. Mancaji macarépai linoé nasaba najjalékkaiwi pabbanuwana parénta-paréntana Allataala, napinrai attettekeng-attettekenna sibawa massakkarengngi assijancing iya naébbué sibawa mennang untu' mannennungeng. Rimakkuwannanaro purani natanroi Puwangnge linoé sibawa hukkungngi pabbanuwana nasaba pangkaukenna mennang. Riyangurengngi mennang sibawa céddé bawang polé ri mennang iya salama'é. Makkanrodong pong anggoro'é sibawa mawatang rilolongeng uwai anggoro'é. Tau iya marennué riyolo messéni makkekkuwangngé. Dé'na napaéngkalinga getti kacapi iya marennué sibawa tetté rabana iya marowaé. Aramé-raméngenna tau iya mariyo-riyoé mappésauni. Dé' gagana ménung uwai anggoro sibawa makkélong, dé' gagana péneddingiwi nyamenna énungeng maserié. Marukka sininna kotaé; taggoncing maneng tange bolaé nasaba métaui monroiyéngngé. Gora sining tauwé risining lalengngé nasaba acappurengngi uwai anggoro. Dé' gagana arennung ri wanuwaéro untu' mannennungeng. Ancuru sisenni kotaé, sibawa maruttung tassiya-siya gerbanna. Iyanaro kajajiyang matu ri sininna linoé ri tungke bangsa. Padai gau'na ri wettu éngngalangngé, wettunna riyala buwa zaitungngé gangka cappu sibawa buwa anggoro iya paccappurengngé ricéppu polé ri ponna. Sining tau iya salama'é makkélongngi matu marennu. Tauwé ri yajang nabbirittangngi matu arajanna Puwangnge sibawa tauwé ri alau pojiwi matu. Pabbanuwaé ri wiring tasi'é napakarajai matu Puwangnge, Allataalana Israélié. Polé ri cappa linoé riyéngkalingai élong pappojiyangngé untu' Israélié, bangsa iya mapatoé. Iyakiya cilakana iyya! Makkanrodokka! Pabbali'bella'é matteru mupi bali'bella, mala pédé bali'bellai mennang. Engkalingai éh sininna pabbanuwana linoé! Akacaungengngé, siyo-siyoé sibawa sappangngé tajekko. Tau iya lariyé polé ri akacaungengngé sempé'i matu ri laleng sappangngé, sibawa tau iya leppe'é polé ri sappangngé nalai matu siyo. Tattiri'i matu bosi rajaé polé ri langié, sibawa taggottangngi matu pallanggana linoé. Mallesse'i matu linoé, mareppo sibawa goyang. Tassulus-sulungngi matu linoé pada-pada tau mabo'é, sibawa goyang pada-pada bola-bolaé ri laleng anginrajaé. Maruttungngi linoé nasaba matane'i dosana. Ancuru'i sibawa dé'na naulléi tokkonna matu. Ri wettuéro Puwangnge hukkungngi matu sining panguwasana bitara malowangngé sibawa sining arungngé ri linoé. Ripaddeppungengngi matu massibawa pada-pada tahanangngé ri laleng liyangngé, sibawa riputtama ri laleng attarungkungngé narapi wettunna untu' rihukkung. Mancaji mapettangngi matu kétengngé sibawa mata essoé dé'na nattappa, saba' Puwang Iya Pommakuwasaé mapparéntai matu selaku arung. Mapparéntai matu ri Yérusalém, ri tompo'na Bulu Sion, sibawa mappaitangngi arajan-Na lao risining pamimping umma'-Na. Puwang, Iko ritu Allataalaku, upakaraja-Ko sibawa upojiwi asem-Mu. Saba' ébbu-ébbu-Mu mappabengnga senna; mappammulai riyolo Murancanai, sibawa pogau'i sibawa matinulu. Purani Muancuru iyaro kotaé; iyaro kota mabbénténgngé mancajini ruttungeng. Saoraja iya napatettongngé tau laingngé ancuru'ni, sibawa dé' naripatettonna untu' mannennungeng. Ripojiko matu ri bangsa-bangsa iya mawatangngé, sibawa riyétauri ri kota-kotana bangsa-bangsa iya mabecco'é. Saba' mancaji-Ko angungsingeng untu' tau malemmaé, onrong iya amangngé untu' tau kasiyasié ri laleng aperisengngé. Iko ritu allinrungeng polé ri anginrajaé, accinaungeng polé ri pella matire'é. Saba' maggasai tau mabecco'é pada-pada anginrajaé ri wettu pabosié, pada-pada anging pellaé ri tana makabuttué. Iyakiya Muwébbui balitta mammekko, Mupappajai gora-gorana sining tau mabecco'é, pada-pada accinaungeng ellungngé patteddéngngi pella matire'é. Ri Bulu Sion, Puwang Iya Pommakuwasaé passadiya matu perjamuwang untu' sininna bangsaé ri linoé. Napatalai inanré iya kaminang malunra'é sibawa anggoro iya ripilé. Ri yasé'na bulu-buluéro natimpa'i matu ellung amesséngngé iya sampoéngngi bangsa-bangsaé. Puwang Iya Pommakuwasaé pabbinasai matu amaténgngé untu' mannennungeng! Nasussui matu uwai mataé polé ri tungke rupaé, sibawa pabélaiwi atunang iya natanggungngé umma'-Na ri sininna linoé. Puwangnge pura mabbicara, na iyaro gau'é pasti kajajiyangngi. Ri wettuéro makkedai matu tauwé, “Sitongenna, Aléna ritu Allataalata; Aléna ritu tatajeng, kuwammengngi naripassalama'ki. Tongeng, iyanaé Puwang; Aléna ritu tatajeng. Makkekkuwangngé gorani marennu, saba' purani Napassalama.” Puwangnge linrungiwi matu Bulu Sion, iyakiya Moab riléjja'-léjja'i matu pada-pada daramé ri onrong warowoé. Naloro'i matu limanna pabbanuwana pada-pada tau maéloé nangé. Iyakiya Puwangnge pakariyawai matu atemponna mennang angkanna dé' pakkullénna. Sining bénténna Moab silaong sining témbo'na iya matanré Naruttungngi matu sibawa Naggeppuwangngi ri tanaé angkanna ancuru pada-pada awué. Ri wettuéro napuwélongngi matu tauwé iyaé élongngé ri tana Yéhuda: “Temmaka asse'na iyaé kotaé; Aléna Allataala patettongngi béntén-Na, kuwaki'é salama. Timpa'i sining pintu gerbanna, kuwammengngi nauttama bangsa iya matinulué, bangsa iya pogau'éngngi élona Allataala. Puwang, Iko mabbéré adaméngeng sibawa asaléwangeng lao ri tau iya mattinettoé atinna, saba' mateppe'i ri Iko. Tuli mateppe'no ri Puwangnge, saba' tuli nalinrungiki Puwang Allataala. Napakariyawai Puwangnge tau iya matempoé; Naancuru'i kota mabbénténna mennang, nenniya paratai sibawa tana. Sining tau kasiyasié sibawa manrasa-rasaé léjja'-léjja'i matu.” Tau malempué joppai ri laleng malempué, saba' Iko, Puwang, wajikengngi laleng. Maccowéki ri apettum-Mu, oh Puwang, sibawa tajek-Ko; Iko ritu ripoji sibawa nauddaningi atitta. Nasénge'-Ko nyawaku ri wennié, nauddaningi-Ko atikku ri éléé. Rékko Muadéléki linoé matti, naissengngi matu pabbanuwana linoé aga iya tongengngé. Muwi tau majaé rigaukengngi sibawa makessing, dé'to nagguru aga iya tongengngé. Muwi ri wanuwa hukkungngé macéko-céko towi, sibawa dé' namaélo mangakuiwi akuwasanna Puwangnge. Puwang, sadiyano hukkungngi balim-Mu, iyakiya dé' naissengngi mennang. Leppessangngi mennang masiri senna mitai pammasé-Mu untu' umma'-Mu. Leppessangngi mennang cappu ancuru polé ri pahukkungeng iya Mupassadiyangengngéngngi mennang. Puwang, Muwébbuki matu saléwangeng; sininna iya ripogau'é, Iko ritu pogau'i untu' idi. Engka naengka nakuwasaiki sining puwang laingngé, iyakiya banna Iko iya riyakuiyé, oh Puwang Allataalata! Maténi mennang nadé' natuwo matu paimeng, dé' namakkullé moto paimeng waliyalana. Saba' cappuni mennang Mupabbinasa sibawa Muledda polé ri paréngngerangngé. Purani Mupalleppi-leppiki umma'-Mu, oh Puwang, sibawa lowangiwi daérata, rimakkuwannanaro naripakaraja-Ko. Puraki Muhukkung; ri laleng aperisengngé gilikki lao ri Iko, sibawa massempajang lao ri Iko, Puwang. Pada-pada makkunrai iya maéloé mémmana maggulicci sibawa kelli nataro peddi, makkuwaniro idi ri yolomu, Puwang. Mattampu'ki sibawa maggulicci nataro peddi, iyakiya dé' aga-aga rijajiyang; dé' tamabbéré asalamakeng lao ri linoé, dé'to tatambaiwi pabbanuwana. Umma'-Mu iya matéénna tuwoi matu paimeng, tokkongngi matu paimeng sining ujuna. Tau iya puraénna rikuburu ri laleng tanaé tokkongngi matu sibawa gora-gora. Pada-pada cinoddo iya pétakkariyéngngi linoé, Mupatuwoi umma'-Mu iya maittaénna maté. Uttama'no ri laleng bolamu, éh bangsaku, namusului tange'é. Ussubbuno untu' cinampe narapi soro caina Puwangnge. Nonnoi matu Puwangnge polé ri onrong Naonroiyé ri surugaé untu' hukkungngi pabbanuwana linoé nasaba dosana mennang. Abbunowang iya napogau'é mennang sibawa massubbu ritimpa'i matu. Tanaé dé'na natongkoi sining tau iya maté riyunoé. Ri wettuéro napakéi matu Puwangnge peddan-Na iya masse'é sibawa matareng untu' hukkungngi Léwiatan, ula iya kolli-kolli'é sibawa mabbampaluéro, sibawa untu' mpunoi naga tasi'é. Ri wettuéro makkedai matu Puwangnge, “Akkélonno passalenna palla anggoro'-Ku iya magelloé. Iyya, Puwang, panganrowanna; tungke wettu Ubolo, esso wenni Uwanrowang, kuwammengngi aja' naengka ganggui. Dé'na Umarasa macaina. Ebara'na engka wella iyaré'ga alekale maddori, maélo-Ka paccappui, sibawa tunu manengngi. Iyakiya rékko sining balinna umma'-Ku sappai allinrungeng ri iyya, leppessangngi mennang sidamé sibawa Iyya, ya, sidamé sibawa Iyya.” Ri wettu iya mangoloé, pada-padai matu bangsa Israélié aju iya makkure'é sibawa mabbija, enrengngé pennoiwi tompo'na linoé sibawa buwa-buwana. Puwangnge hukkungngi umma'-Na dé' nasittane Nahukkungngi bangsa-bangsa iya musuéngngi mennang. Dé' naunoi umma'-Na pada-pada naunoi balin-Na. Nahukkungngi Puwangnge umma'-Na sibawa palii mennang lao ri wanuwa laingngé. Narukkai mennang sibawa anging maja polé alaué. Iyakiya dosa-dosana Israélié banna weddingngi riyaddampengeng rékko rilélui gangka alusu mézba déwata-déwataé pada-pada puwalé. Sininna addupa-dupangngé sibawa lambanna Déwi Asyéra harusu towi riancuru. Iyaro kota mabbénténgngé mancaji masino-sinoni sibawa risalai pada-pada padang makkale-ale iya lobbangngé. Olokolo makkonrongngé mabbellai sibawa mappésau kuwaro nanapaccappu towi daud-daung polé ri takké-takké ajué. Rékko marakkoni takké-takkéna sibawa mapolo, poléni sining makkunraié sibawa pancajiwi aju tunung. Iyaro bangsaé dé' najeppuiwi aga-aga, na Allataala Pappancajiyé dé' matu naéloriwi iyaré'ga mamaséiwi mennang. Ri wettuéro napadeppungengngi matu Puwangnge bangsa-Na tasséddi-séddi polé ri Salo Efrat lettu ri pakkasésénna Maséré. Napallaingngi matu mennang pada-pada tau pallaingngéngngi gandongngé polé ri awanna. Ri wettuéro ripaoniwi matu tarompé battowaé untu' mobbii lisu sininna tau Israélié iya ripalié ri Asyur sibawa ri Maséré. Laowi matu mennang ri Yérusalém untu' sompai Puwangnge ri bulu-bulu-Na iya mapaccingngé. Macilakai kota iya mancajiyé abangkakenna sining pammabo'na Israélié! Mapeddai akessingenna pada-pada bunga-bunga iya makelle'é ri tompo ulunna mennang. Cilakani kota iya maccaloli'é matanré ri tengngana lompo macommo'é, abangkakenna sining tau iya mabo'é sitengnga maté. Nasuroi matu Puwangnge séddi tau iya mawatangngé sibawa baranié. Apolénna pada-padai anginrajaé nasibawang bosi ése, pada-pada bosi rajaé sibawa lémpe iya paalirengngé. Nasibawang ateddekeng naggeppuwangngi mennang ri tanaé. Abangkakenna sining pamimping iya mabo'éro naléjja-léjja'i matu. Ataromporenna kotana mennang iya mammulaénna massalawuro lennye'i matu. Totona pada-padai totona buwa ara iya matasa'é ri wettu dé'napa narapii wettunna; riitana muwa, matteru ricéppu sibawa riyanré. Puwang Iya Pommakuwasaé mancaji matu bunga iya magelloé untu' sésana umma'-Na. Puwangnge mpéréngngi matu rasa adélékeng lao risining hakingngé, sibawa abaraningeng lao risining tau iya monrowangngéngngi kotaé polé ri paggasaé. Makkuwatoro nabi-nabié sibawa sining imang iya mabo'é nasaba maéga senna anggoro sibawa arak naénung. Joppai mennang tassulus-sulung sibawa tabbuttu-buttu nasaba kacauwi pikkiranna mennang. Dé'na naulléi nabi-nabié pahangngi sining pakkitang iya nabbéréyangngé Allataala lao ri mennang. Dé'na naulléi imang-ngimangngé pettuiwi parakara-parakara iya ripangoloé ri aléna mennang. Méjanna mennang pennoi sibawa luwa, angkanna dé' gagana onrong iya mapaccingngé. Maddarékéi mennang passalekku, adanna, “Nasengngi niga napagguru? Niga topa iya parellué pappakatajang? Nasekki idi'é ana' baiccu iya nappa risalla'é susu? Masa napagguruki tassihurupu tassihurupu, tassiada tassiada, tassiwérékkada tassiwérékkada.” Rékko dé' mumaélo méngkalingaka, nasuroi matu Puwangnge tau laingngé untu' pagguruko ri laleng basa makalallaingngé sibawa basa laingngé. Nappéddarangngi Puwangnge onrong appésaungengngé lao ri iko maneng, iyakiya dé' mumaélo méngkalingai Aléna. Rimakkuwannanaro napagguruko Puwangnge tassihurupu tassihurupu, tassiyada tassiyada sibawa tassiwérékkada tassiwérékkada. Na wettummu joppa menrung léngekko angkanna malo, nala siyo sibawa tattawang. Engkalingai aga napowada Puwangnge, éh pakkéllé-kéllé iya paréntaéngngi ra'ya'é ri Yérusalém! Makkedako makkedaé purano mébbu assijancing sibawa amaténgngé sibawa pakangka assitujungeng sibawa linona tau maté. Mupérasai mattentu makkedaé abala iya maélo poléro dé' nakennai matu alému, nasaba pakéko bellé untu' linrungiwi alému. Rimakkuwannanaro, makkeda makkuwaiyé Puwang Iya Pommatanré, “Maélo-Ka palénne pallangga iya mawatangngé sibawa masse'é ri Sion; séddi batu pallangga iya mangke'é sibawa oki: ‘Niga mateppe masse, dé' matu namanyara kala.’ Adélékengngé Upancaji tulu pangukkuru, sibawa alempurengngé Upancaji tulu becci'na.” Bosi batué seringngi matu gangka mapaccing sininna bellé iya muwattuwangngé. Lémpe'é malirengngi matu onrong assubbuwammu. Assijancimmu sibawa amaténgngé sibawa assitujuwammu sibawa linona tau maté rirusa'i matu, angkanna rékko poléi abalaé, ancuru'ko riléjja-léjja. Nakennako matu abala matteru-teru sibawa harusu'ko tanggungngi esso-esso, élé, lakesso sibawa wenni. Ténréko matu nataro tau rékko muwajeppuiwi pasenna Allataala. Pada-padako tau iya maéloé matinro ri laleng ranjang iya makurang lampéé untu' onrong pallempui alé. Parampa'na makurang sakka untu' parampakiwi alému. Tokkongngi matu Puwangnge pada-pada ri Bulu Pérazim. Méwai matu pada-pada ri Lompo Gibéon untu' pogau'i akkatta-Na, akkatta iya makalallaingngé untu' tolinoé! Napogau'i matu winru-Na iya mappabengngaé. Purani uwéngkalinga apettunna Puwang Iya Pommatanré sibawa Pommakuwasaé untu' paccappui sininna wanuwaé. Aja' mucellai ada-ada papparéngngerang iya upalettu'éwé. Pédé lebbi mawatangngi matti ri alému untu' paleppe'i alé! Engkalingai ada-adakku, puriyatiwi pasekku. Séddié patani dé' namatteru-teru maddakkala, mabbéngkung sibawa salagai tanana untu' ritanengi. Rékko sadiyani iyaro tanaé, namponi binéna, ébara'na jintang lotong sibawa jintang puté. Tanengngi duwanrupa gandong majjiji-jijireng, sibawa ri wirinna tanet-taneng laing. Naisseng carana jamai, saba' purani ripagguru ri Allataalana. Dé' napakéi paddése rigettengngé untu' rése'i jintang lotongngé iyaré'ga padati garoba' untu' lélui jintang puté. Untu' iyaro napaké pakkadang iya maringengngé. Wettunna maddése gandong, dé' napeppé'i matteru-teru narapi ancuru. Dé! Naisseng cara maddése iya teppa'é sibawa tonangi garoba' ri yasé'na tennaancuru lise-lise gandongngéro. Iyaro apanréngngé poléi ri Puwang Iya Pommakuwasaé. Sininna rancana-Na Puwangnge mapanréi sibawa tuli mallolongengngi. Cilakano kota Yérusalém iya riteppué mézbana Allataala! Cilakano kota onronna Daud makkéma! Leppessanni taut-taungngé sisullé sibawa ramé-raména. Iyakiya Allataala papoléngengngi matu abala ri yasé'na kotaéro, angkanna maddararing sibawa maddaréké. Sininna kotaé maddupa mézbai iya pennoé dara. Nagasai matu Allataala iyaro kotaé sibawa keppungngi polé risininna sulapa'na. Yérusalém pada-padai bombo'cilla iya makkuragaé untu' mapparéngkalingangngi saddanna polé ri laleng tanaé, sadda iya dé'é namanessa polé ri laleng awué. Iyakiya sininna tau laing iya mabecco'éro teddéngngi matu pada-pada awué iyaré'ga awangngé nairi anging. Tappa dé' nasenna-sennai. Puwang Iya Pommakuwasaé paleppe'i matu iyaro kotaé nasibawang anginraja sibawa mpéwang tana iya maseroé. Papoléi matu anginraja sibawa api iya majjallo'é. Nainappa sininna pasukang laing iya gasaéngngi Yérusalém, kota mézbana Allataala, sininna iya makkeppungngé sibawa gasaéngngi iyaro kotaé, teddéngngi matu pada-pada nippié ri wennié. Bangsa-bangsa iya maddeppungengngé untu' gasai Yérusalém pada-padai matu tau alupureng iya mannippié mattengngang manré, nanaoto sibawa babuwa iya lobbangngé, iyaré'ga pada-pada tau adekkang iya mannippié mattengngang ménung, nanaoto sibawa tigaro marakko. Atteruno hérang sibawa tongkoi matammu pada-pada tau butaé! Jajino mabo', iyakiya aja' nasaba ménung uwai anggoro. Joppano tassulus-sulung, iyakiya tenniya nasaba ménung ara'. Puwangnge mébbuko cakkaruddu sibawa memme matinro. Natongkoi matanna sining nabié sibawa bombo'i rupanna sining pakkitaé. Bettuwanna tungke pakkitangngé tassubbui matu ri alému, pada-pada bobbo iya riségélé'é. Rékko iyaro bobbo'é ritiwii ri séddié tau iya weddingngé mabbaca kuwammengngi nabacangekko, makkedai matu makkedaé dé' nawedding, nasaba iyaro bobbo'é riségélé'i. Rékko ritiwii lao ri tau iya buta hurupu'é, mappébaliwi matu makkedaé dé' naulléi mabbaca. Makkedai Puwangnge, “Iyaro sining tauwé nasompaka banna sibawa ada-ada, iyakiya atinna mennang mabélai polé ri Iyya. Agamana mennang banna peraturang tolino iya naapala'é. Rimakkuwannanaro maélo-Ka patassélengngi sibawa pakkunru makkolik-koling. Tau iya mapanré mancaji madonggoi matu, sibawa sininna amaccanna mennang dé' nakkéguna matu.” Cilakano tau iya makkuragaé subbui rancanana polé ri Puwangnge! Tinda'i mennang sibawa mammekko-mekko, sibawa masengngi dé' muwi séddi tau mitai iyaré'ga missengngi aga iya napogau'é mennang. Napasibalékeng manengngi mennang. Kéga lebbi penting, pakkébu oringngé iyaré'ga tana litaé? Naulléga iya riyébbué makkeda lao ri pakkébbuna, “Tenniya iko mébbuka”? Iyaré'ga naulléga iyaro barangngé makkeda lao ri aléna, “Dé' aga-aga mullé”? Engka warékkada makkeda, “Dé'na namaitta ale'é namancaji dare sibawa dare'é lisu mancaji ale'.” Ri wettuéro tau mataru-tarué naulléi matu méngkalingai ada-ada polé riséddié bobbo iya ribacaé, sibawa tau buta iya tuwoé onna ri laleng apettangengngé naulléi matu makkita. Sining tau kasiyasié sibawa matunaé lisui paimeng péneddingiwi asennangeng iya nabbéréyangngé Allataala mapaccinna Israélié. Iyanaro paccappurenna sining tau iya tenre'éngngi tau laingngé sibawa pakatunai Allataala. Napabbinasai matu Allataala sininna tau madosaé, tau iya pojiyéngngi mappétenna, tau iya pésangkaiyéngngi tau majaé rihukkung, sibawa tau iya pallebbangngé curita-curita bellé kuwammengngi dé' nalolongeng adélékeng tau malempué. Rimakkuwannanaro Puwangnge, Allataalana Israélié iya paleppe'éngngi Abraham, makkedai makkekkuwangngé, “Bangsa-Ku, dé'na naripakatunako sibawa rupammu dé'na namakawiya nasaba masiri. Saba' rékko muwitai ana'-ana'mu iya Uwéréngngékko, muwangakuiwi matu makkedaé Iyya'na ritu Allataala mapaccinna Israélié. Mupakalebbi-Ka matu sibawa métauko lao ri Iyya. Maggurui matu tau madonggoé majeppuiwi sibawa tau iya tuli mannoko-noko'é masennangngi matu ripagguru.” Makkedai Puwangnge, “Cilakani sining pamimpinna Yéhuda, nasaba maronta'i mennang lao ri Iyya. Naccowériwi mennang rancana-rancana iya tenniyaé rancana-Ku. Natékéngngi mennang assijancing iya siéwaé sibawa élo-Ku. Nasitenre-tenre'na dosana mennang. Laowi mennang ri Maséré temméllauwi apettuk-Ku. Mallinrungngi mennang ri Maséré sibawa mamménasaiwi pattulunna arung Maséré. Iyakiya iyaro arungngé pajuléiwi matu mennang, sibawa allinrungeng iya namménasaiyé polé ri Maséré dé' naduppai matu. Namuni sining surona Yéhuda lettu'ni ri kota-kotana Zoan sibawa Hanes ri Maséré, sininna tauwé mancaji masirii matu nasaba purai nattuwang bangsa iya dé'é nakkéguna untu' mennang. Iya nalolongengngé mennang tenniya asarong iyaré'ga pattulung, sangadinna pappakatuna.” Makkuwaniyé sining pasenna Puwangnge passalenna sining olokolo iya monroiyéngngi tana yattang, “Sining suroé patékériwi kaleddé'na nenniya untana mennang sibawa hadiya-hadiya, nainappa nalléttoi daéra iya pennoé abala iya naonroiyé singa, ula mamoso sibawa naga mappanni. Iyaro sining hadiyaé nakkasuwiyangengngi lao riséuwaé bangsa iya dé'é naulléi tulungngi mennang. Paracuma bawang bantuwanna Maséré. Rimakkuwannanaro Utellai Maséré, ‘Naga iya dé'é nabbahaya.’ ” Nasuroka Allataala mokii jana umma'-Na ri laleng séddié bobbo selaku papparéngngerang untu' mannennungeng. Saba', mennang ritu bangsa iya pojiyéngngi maronta lao ri Allataala, napoji mabbellé sibawa dé' naengka namaélo méngkalingai pappagguruwanna Puwangnge. Makkedai mennang lao risining nabié, “Tutu'i témummu! Aja' mupowadai lao ri idi aga iya tongengngé, iyakiya aga iya macinnaé riyéngkalinga. Leppessakki tette mannawa-nawa. Anyingkiri'no sibawa alano laleng laing. Aja' mugangguki sibawa Allataala mapaccinna Israélié.” Rimakkuwannanaro makkeda makkuwaiyé Allataala mapaccinna Israélié, “Musampéyangngi ada-adakku namuwattuwangngi patenre'é nenniya pabengnguwangngé. Rimakkuwannanaro pasalako. Pada-padako témbo matanré iya mallesse'é polé ri yasé liyawa; sibawa tennasenna-senna bawang maruttukko matu. Mareppo'ko matu pada-pada lowa tanaé iya mareppa'é tassiya-siya, angkanna ri yelle'na reppa'na dé'gaga iya weddingngé ripaké untu' mala bara api polé ri dapurengngé iyaré'ga untu' séro uwai polé ri kullangngé.” Puwang Iya Pommatanré, Allataala mapaccinna Israélié, makkeda lao ri umma'-Na, “Toba'no sibawa tette tennang, na-Upassalama'ko matu. Ateppe'no ri Iyya sibawa ati iya amangngé, na-Upéwatangiko matu.” Iyakiya dé' mumaélo! Mala mébbuko rancana untu' lari polé ri balié sibawa tonangi anyarang iya magattié. Makessinni! Mémeng matti harusu'ko lari! Mupikkiri'i iyaro anyarammu cuku' kencang larinna, padahal sining pallellummu mabéla lebbi gattina. Sisebbu tau lari matu mitai ancamanna séddié tau balié, sibawa ancamanna lima tau mébbuko lari maneng. Polé ri pasukammu banna monroi séddi alliri bandéra ri tompo'na bulu-bulué. Namuni makkuwaro, natajengngi Puwangnge wettunna untu' mappaitangngi paressé babuwa-Na lao ri iko. Sadiyai untu' mamaséiko. Saba' Puwangnge iyanaritu Allataala iya pogau'éngngi aga iya teppa'é. Masennangngi tau iya mamménasaé ri Aléna. Eh iko iya monroé ri Yérusalém, dé' mumatteru matu teri. Maressé babuwai Puwangnge, sibawa nabaliko masitta rékko mangobbiko méllau tulung ri Aléna. Nawérékko Puwangnge wettu accobang iya matane'é untu' majara'ko. Iyakiya makkekkuwangngé Aléna ranrekko angkanna mupéneddingiwi ahadéréken-Na. Rékko lésséko polé ri lalengngé, paéngkalingai matu ri monrimmu saddan-Na iya makkedaé, “Iyanaé lalenna; accowérini iyaé lalengngé.” Dato-dato barahalamu iya mallapi péra'é sibawa ulaweng mubuwangngi matu pada-pada roppo'é, namuwakkedato, “Eddé'no polé ri aléku!” Rékko mampoko biné, kiringngi matu Puwangnge bosi kuwammengngi natuwo matu iyaro biné sibawa powassélé éngngalang iya maonaé. Untu' Olokolo'mu tassadiyai matu padang wella iya malowangngé. Saping lai sibawa kaleddé iya rakkalaéngngi dare'mu manréi matu inanré olokolo iya kaminang makessingngé iya ripassadiya secara dé' padanna. Ri esso rikeppunna sining bénténna balimmu sibawa riyuno sining taunna, tungke bulu sibawa bulu-bulué passui matu ana'-ana' salo. Mattappai matu kétengngé sittajang mata essoé, sibawa mata essoé leppi wékkapitu matu lebbi macakka naiya biyasaé, pada-pada tajanna pitué esso ripaddeppungeng mancaji séddi. Iya manennaro kajajiyangngi matu wettunna Puwangnge bebbe'i sibawa pasauwi sining lona umma'-Na iya puraé nacalla. Akuwasanna sibawa arajanna Puwangnge paitai polé mabéla. Api sibawa rumpué mappaitangngi cai-Na. Mabbicarai sibawa mennang, sibawa ada-adan-Na mattunui pada-pada apié. Nasuroi angingngé poddiyoloiwi pada-pada lémpe'é sittanré ellongngé iya malirengngéngngi sini-sininnaé. Napaccappui bangsa-bangsaé, sibawa rusa'i sining rancanana mennang iya majaé. Iyakiya iko, umma'na Allataala, marennui matu sibawa makkélong pada-pada ri wenni ramé-ramé agamaé. Mariyo-riyoko matu pada-pada sining tau iya joppaé sibawa riyaccowéri ri solingngé mattuju ri Bolana Puwangnge, pangéwainna Israélié. Napparéngkalingangngi matu saddanna Puwangnge iya marajaé, sibawa tungke tau napéneddingiwi matu akuwasan-Na iya héba'é. Cai-Na papoléi matu api iya paangurengngé, bosi raja, bosi batu sibawa anginraja. Tassélengngi matu tau Asyur-é rékko naéngkalingai saddanna Puwangnge sibawa napéneddingiwi pahukkungen-Na iya matane'é. Ri wettu napéneddinginna mennang sining pakkunruna, massennas-sennangngi umma'na Puwangnge sibawa musi' genrang sibawa kacapi. Aléna Allataala mammusu matu méwai tau Asyur-é. Riyilopa napura napassadiya onrong attunung untu' arung Asyur. Iyaro onrongngé maliyung sibawa malowang, mallise aju tunung iya maggoppo-goppoé. Puwangnge palluwa'i matu sibawa masseppungengngi nappase'-Na pada-pada salo belérangngé. Cilakani tau iya laowé ri Maséré untu' méllau bantuwang! Nattuwangngi mennang awatangeng tentarana Maséré nasibawang pasukang pakkinnyaranna sibawa anyaranna iya mawatangngé enrengngé karétana iya maégaé. Iyakiya dé' namateppe mennang lao ri Puwangnge, Allataala mapaccinna Israélié sibawa dé' naéllauwi bantuwan-Na. Mapanréi Puwangnge sibawa naisseng aga iya Napogau'é. Papoléi abala sibawa napogau'i ancaman-Na untu' hukkungngi tau majaé sibawa tau iya tulungngéngngi mennang. Tau Maséré'é bannai tolino, tenniyai Allataala. Anyaranna mennang mahlu' biyasai, dé' nassipa ilahi. Rékko tinda'i Puwangnge, iyaro bangsa pattulungngé tabbuttui matu sibawa bangsa iya Natulungngé sempé'i matu. Nabinasa duwa matu. Makkedai Puwangnge lao ri iyya, “Pada-pada singaé mangngaung untu' mattahangengngi anréna sibawa dé' namakkullé ripéttauri ri paggera'na sibawa kelli'na sirombongan pakkampi iya ripangaraé untu' méwai, makkuwatoniro umusui matu sibawa mattahangengngi Bulu Sion. Pada-pada séddié manu'-manu' kampa-kampa ri yasé'na saranna untu' linrungiwi ana'-ana'na, makkuwatoro Iyya, Puwang Iya Pommakuwasaé linrungiwi matu, méwaiwi sibawa passalama'i Yérusalém.” Makkedai Puwangnge, “Bangsa Israélié, pura-Ka muéwa sibawa madosa lao ri Iyya. Iyakiya makkekkuwangngé, lisuno ri alé-Ku! Narapii matu wettunna iko maneng muwabbéyangngi dato-dato barahala polé ri péra'é sibawa ulawengngé iya alémuwé mébbui sibawa penno dosa. Ripabbinasai matu Asyur ri laleng musué, iyakiya tenniya nasibawang awatangeng tolino. Lariwi matu tau Asyur-é polé ri ammusurengngé, nasining tau malolona mennang ripancajiwi matu ata. Lariwi matu arunna mennang nataro tau, nasining parawirana tasséleng senna'ni, angkanna nasalai mennang bandéra-bandéra musuna.” Puwangnge pura mabbicara, Puwang iya risompaé nenniya ripakalebbié sibawa akkarobangeng ritunu ri Yérusalém. Itai, narapii matu wettunna séddi arung mapparénta sibawa adélé nenniya pamimping-pamimpinna bangsaé pajoppai adélékengngé. Tungke-tungke'i mennang pada-padai onrong allinrungeng polé ri angingngé sibawa anginrajaé. Pada-padai mennang salo massolo'é ri padang kessi'é, pada-pada accinaungeng batu iya battowaé ri tana iya makabuttué. Tau iya naullé makkita dé' natongkoi matu matanna, sibawa iya naullé maréngkalinga napénessaiwi matu. Tau iya masitta'é mapella riyolo tinda'i matu sibawa sabbara enrengngé penno pappéjeppu. Tau iya gaga'é mabbicarai matu sibawa manessa. Tau madonggoé dé'na nariyangga malebbi, sibawa pabbelléngngé dé'na naripowada malempu. Tau madonggoé napowadai ada-ada iya madonggoé sibawa rancanai iya majaé. Agi-agi iya napogau'é iyaré'ga napowadaé maddupai pappakatuna lao ri Allataala. Dé' naengka nabbéré inanré lao ri tau malupué iyaré'ga uwai lao ri tau madekkaé. Na séddié pabbelléng napikkiri'i sibawa napogau'i iya majaé. Sappai akkaleng untu' cilakaiwi tau kasiyasié sibawa ada-ada bellé nenniya lawa-lawaiwi mennang lolongengngi ha'na. Iyakiya tau iya malempué akkalenna narancanai gau'-gau' iya malempué nenniya tinda'i sibawa malemputo. Engkalingai éh sining makkunrai iya tuwoé mannyamen-nyameng, leppe polé ri asussangngé! Makkekkuwangngé weddinno marasa amang, iyakiya kira-kira sitauppi mupettu paddennuwang matu, saba' salai matu buwa anggoro'é, sibawa wassélé tana laingngé dé'to gaga. Lettu makkekkuwangngé tuwoko mannyamen-nyameng, leppe polé ri asussangngé. Iyakiya makkekkuwangngé, ténréno nataro tau! Ludungngi pakéyammu namusiyoi kaing karung babuwamu. Teringiwi sining dare'mu iya macommo'é sibawa sining palla anggoro'mu iya maégaé buwana, saba' tanana bangsaku natuwoiwi alekale maddori. Ya, teringiwi sining bolamu onronna tauwé massennas-sennang sibawa kota iya pennoé arowaseng! Mala risalaiwi matu saorajaé sibawa ibukota iya marowaé mancajiwi masino-sino. Bulu-bulu sibawa manara-manara jagangngé purani riparata sibawa tana untu' mannennungeng. Kaleddé-kaleddé liyaé sibawa bimbala-bimbala'é mallamparengngi matu sibawa mabbella kuwaro. Iyakiya siseppi poléi matu Allataala sibawa akuwasan-Na. Na padang kessi'é mancajiwi matu sining dare iya macommo'é, sibawa sining dare'é mancajiwi matu pada-pada ale'é. Ri sininna wanuwaé engka matu alempureng sibawa adélékeng. Tungke tau napogau'i matu aga tongengngé, angkanna engka asaléwangeng sibawa atennangeng untu' mannennungeng. Leppe'i matu umma'na Allataala polé ri asussangngé sibawa tuwoi ri onrong iya amangngé sibawa tennangngé. Cilakani sining balitta! Marrampo'i mennang namuni dé' narirampo, sibawa bali'bellai namuni dé' naribali'bellari. Iyakiya purana marrampo sibawa bali'bella, aléna mennang mancaji matu rirampo sibawa ribali'bellari. Oh Puwang, amaséiki. Idi ritu addennuwangetta. Linrungiki polé ri essoé lao ri essoé sibawa passalama'ki ri wettu aperisengngé. Rékko tokkok-Ko sibawa mapparéngkalingangngi saddam-Mu iya maggalenrungngé, lariwi matu bangsa-bangsaé sibawa tassiya-siya. Pada-padai incalé makkonrongngé maggasai tauwé sibawa rampo'i waramparanna mennang. Malempu senna'i Puwangnge; Nakuwasaiwi sini-sininnaé. Napatettongngi matu hukkungngé sibawa adélékengngé ri Yérusalém sibawa paamangngi umma'-Na. Waramparang iya passalama'éngngi umma'-Na mennang iyanaritu apanréng sibawa pangissengeng enrengngé pappakalebbi lao ri Puwangnge. Gorai méllau tulung sining tau iya poré nabarani; sining suro iya mangusahakangngéngngi assidaméngngé teriwi sibawa messé. Mabbahaya senna watattanaé angkanna mancaji masino-sino; dé'gaga tau molai. Nassakkarengngi assijancingngé sibawa nasampéyangngi assamaturusengngé. Dé'na gaga iya nabati-batié. Nasalaiwi wanuwaé mancaji masino-sino. Makkanrodong sining ale'na Libanon, sibawa Lompo Saron iya macommo'é mancajiwi pada-pada padang kessi'é. Ri Basan sibawa ri Bulu Karmél madduttung daud-daungngé. Makkedai Puwangnge lao ri bangsaéro, “Makkekkuwangngé maélo-Ka tokkong sibawa tinda mappaitangngi akuwasak-Ku. Siya-siyai rancanamu, sibawa sininna iya mupogau'é dé'gaga gunana. Caimu pada-padai api iya paccappuéngngi alému muto. Pada-padako batu karang iya ritunué untu' ripancaji puwalé; pada-pada alekale maddori iya ritubbangngé sibawa ritunu ri laleng apié. Leppessanni sininna tauwé iya macawé'é iyaré'ga mabélaé méngkalingai passalenna pangkaukem-Mu sibawa mangakuiwi akuwasak-Ku.” Ténréi nataro tau sining tau madosaé ri Sion. Adanna mennang, “Apettunna Allataala pada-padai api malluwa'é untu' mannennungeng. Naulléga engka wedding tahang ri laleng api iya mappaccappuéro?” Mulléi tahang rékko makkedako sibawa pogau'i iya tongengngé. Aja' musappa saro sibawa para'i tau kasiyasié, sibawa aja' mutarima dowi pasoso. Aja' muwaccowériwi tau iya rancanaéngngi abbunowangngé iyaré'ga ja laingngé. Natallinrukko matu sibawa amang, samanna engkako ri laleng bénténg iya masse'é. Inanré sibawa énungeng tassadiyai matu untu' alému. Narapii matu wettunna muwitai séddi arung mapparénta sibawa mattappa ri yasé'na wanuwaé iya mallebbangngé lao ri sinina sulapa'é. Taumu iya pura labe'é lao ri pallélé simaé, pajaba'é sibawa jennang laingngé riyéngngerang mani bawang. Dé'na muwitai sining tau laing temmakéampé iya mabbicaraé ri laleng basa iya dé'é muwajeppuiwi. Itai kota Sion, onronna ramé-raméiwi pésta-pésta agamaé. Itai Yérusalém! Temmaka amanna iyaro onrongngé untu' riyonroi, pada-padai kéma iya dé'é naengka naripalétté, dé' naengka naribébbu patto'na sibawa tuluna dé' naengka naripettu. Nappaitangngi matu Puwangnge arajan-Na lao ri idi. Tuwoki matu ri wiring salo iya malowangngé, iya dé'é naulléi somperiwi kappala'na balié. Dé' muwi séddi tau ri wanuwatta maddaréké matu nasaba malasai, sibawa sininna dosaé riyaddampengengngi matu. Laono mai maddeppungeng, éh bangsa-bangsaé, sibawa éngkalingai. Leppessanni sininna linoé sibawa sininna iya tuwoé ri lalenna polé sibawa méngkalingai. Macayii Puwangnge lao ri sininna bangsaé sibawa sininna pasukanna mennang. Nahukkungngi matu sibawa napaccappui mennang. Dé' narikuburu matu sining ujuna mennang, iyakiya rileppessangngi bawang makebbong sibawa mabbau. Macella'i matu sining bulué nasaba nalémpekiwi darana mennang. Mata essoé, kétengngé sibawa wéttowingngé ancuru'i matu. Rilulungngi matu langié pada-pada karettasa rilulungngé. Sempé'i matu sining wéttowingngé pada-pada daud-daung iya madduttungngé polé ri ponna. Purani napassadiya Puwangnge peddan-Na ri surugaé, na makkekkuwangngé iyaro peddangngé nageppai matu bangsa Edongngé iya puraé ripakennai pahukkungeng sibawa maélo ripaccappu. Pennoi matu dara peddanna Puwangnge nenniya penno sibawa lunra'na mennang, pada-pada darana nenniya lunra'na olokolo akkarobangengngé. Saba' Puwangnge passadiyai akkarobangengngé ri Bozra, sibawa pakangka abbunowang battowa ri tana Edom. Matéi matu tauwé pada-pada saping liyaé sibawa saping loloé. Macella'i matu wanuwanna sibawa dara nenniya pennoi sibawa lunra. Iyanaro wettunna Puwangnge méwaiwi Sion sibawa makkabale lao risining balin-Na. Tappinrai matu sining salona Edom mancaji kamalo, sibawa tanana mancaji balérang. Angkanna sininna wanuwaé malluwa pada-pada kamaloé. Esso wenni iyaro luwa'é dé' napeddé, sibawa maggalimpuwa rumpué polé ri aléna untu' mannennungeng. Iyaro tanaé risalaiwi matu kullang sibawa makabuttu massossoreng, sibawa dé' muwi séddi tau molai matu. Unrengngé sibawa landa'é monroiwi matu, kacoci'é sibawa kao-kaoé monro matu kuwaro. Puwangnge pancajiwi iyaro tanaé kacau sibawa kullang pada-pada ri wettu dé'napa appancajingengngé. Dé'gaga arung paréntai iyaro wanuwaé, sibawa sininna pamimpinna lennye'ni. Sining saorajana sibawa kota-kotana iya mabbénténgngé natuwoini matu alekale maddori sibawa wella, sibawa naonroi asu ale nenniya manu'-manu' unta. Mallamparengngi matu olokolo masekkangngé ri lalenna; sibali-baliwi bombocilla'é, sibawa bombocilla wennié sappa onrong mappésau. Ri onrongngéro mébbui sarang ula mamosoé, mattello, mangarang sibawa piyarai ana'-ana'na. Muwi bokang pakkanré incalé maddeppungeng towi sibawa pasangenna tungke-tungke. Sappani sibawa bacai ri laleng Kitta'na Puwangnge: Dé' muwi séddi polé ri mahlu'éro teddéng matu iyaré'ga temmappasangeng. Saba' makkuwaniro paréntana Puwangnge, sibawa Aléna muto pura paddeppungengngi mennang. Puwangnge ritu tawai iyaro wanuwaé ri yelle'na mennang sibawa tungke-tungke tarimai tawana. Monroi matu mennang kuwaro untu' mannennungeng, sibawa iyaro tanaé mancajiwi matu appunnangenna massossoreng. Padang kessi'é sibawa tana rakkoé marennui matu, tabbakkai bunga-bungaé ri padang makkale-ale'é. Mpungai padang kessi'é sibawa makkompe, nenniya maddéndang sibawa élokkélong marennu. Agellorenna pada-padai Bulu Libanon, commo'na pada-padai Lompo Karmél sibawa Saron. Na tungke tau naitai matu akuwasanna Puwangnge, sibawa arajanna Allataalata. Péwatangiwi lima iya malemmaé, pakkasse'i uttu iya kédo-kédoé. Powadai lao ri iya marenni atié, “Pakkasse'i atimmu, aja' mumétau, poléi Allataalamu untu' hukkungngi balié, poléi untu' passalama'ko.” Ri wettuéro naulléi makkita matu tau butaé, sibawa tau mataru-tarué naulléi maréngkalinga matu. Luppe-luppe'i matu tau péso'é pada-pada jongaé, tau pépé gora-gorai marennu. Saba' compoi mata uwai ri padang kessi'é, massolo'i uwai ri padang makkale-ale'é. Kessi iya mapellaé mancaji kolangngi matu, tana iya makarossaé mancaji bubbu uwaiwi. Onrong iya naonroiyé riyolo asu ale'é, natuwoiwi matu araso sibawa padang. Engka matu kuwaro watattana, asenna “Laleng mattujué ri asalamakengngé”. Tau madosaé dé' nalalo matu kuwaro, tau madonggoé dé' napapusai matu tau iya molaéngngi. Ri onrongngéro dé'gaga matu singa, iyaré'ga olokolo masekkang laingngé. Sining tau iya ripassalama'é ri Puwangnge joppai matu kuwaro. Sining tau iya ripaleppe'é ri Puwangnge lisui matu; muttama'i mennang ri kota Yérusalém sibawa gora-gora, macora mennang tappana nasaba ariyo-riyong mannennungengngé. Marennui matu mennang sibawa mariyo-riyo; sara nenniya asussangngé lennye'ni. Ri laleng taung maseppuloé eppa apparéntanna Hizkia arunna Yéhuda, kota-kotana Yéhuda iya mabbénténgngé rigasai sibawa ricaui ri Sanhérib, arung Asyur. Purairo nasuroni parawira tanréna polé ri Lakhis lao ri Yérusalém nasibawang tentara iya maégaé untu' tuntu'i kuwammengngi namanyara Arung Hizkia. Lettu'ni mennang ri kotaéro sibawa mala onrong ri dare iya riyasengngé Dare Ménatu, seddéna sépe iya massolokengngéngngi uwai polé ri kolang yasé'é. Nainappa tellu tau pegawénna Hizkia lao méwai sita iyaro parawirana Asyur. Iya tellu pegawéro iyanaritu Elyakim ana' Hilkia kapala ruma tanggana saorajaé, Sébna jurutulisi'na wanuwaé, sibawa Yoah ana' Asaf, jurutulisi'na saorajaé. Makkedani iyaro parawirana Asyur lao ri mennang, “Palettukengngi Hizkia ada-adanna arung Asyur-é, ‘Magi muwasengngi alému mawatang? Muwasengngi ada-adaé bawang wedding sulléiwi siyasa'é sibawa awatangeng tentaraé? Niga muwattuwang angkanna baraniko méwai Asyur? Mémeng maddennuwakko bantuwang polé ri Maséré, iyakiya iyaro pada muwi pakééngngi batang ariyaé untu' tekkeng; – poloi matti iyaro tekkengngé nanatoddo'i limammu. Makkuwaniro arung Maséré untu' sininna tau iya maddennuwangngé ri aléna.’ ” Napatterui paimeng adanna iyaro parawirana Asyur, “Iyaré'ga naullé makkedako makkedaé maddennuwakko ri Puwang Allataalamu? Wettunna Hizkia mapparéntangngi kuwammengngi tau Yéhudaé sibawa Yérusaléngngé, banna massompai ri yolona mézbaé ri Yérusalém, tenniyaga iya naancuru'éro mézba sibawa onrong-ngonrong assompanna Puwangnge? Makkekkuwangngé iyya ri laleng asenna arung Asyur baranika siyéwa makkedaé rékko riwérékko duwassebbu kajunna anyarang, pasti dé' muwappunnai tau singngégaéro untu' tonangiwi. Muwi untu' méwai parawirana Asyur iya kaminang mariyawaé tenniya tokko tandingenna. Iyakiya muwaddennuwangi muwi Maséré kiring bantuwang karéta musu sibawa pasukang makkinnyarang! Muwasekki maggasa sibawa caui wanuwammu tennaduwakki Puwangnge? Aléna Puwangnge ritu suroki maggasa sibawa mancuru'i.” Namakkeda Elyakim, Sébna sibawa Yoah lao ri parawira Asyur-éro, “Puwang, abbicara bawanni ri laleng basa Aram sibawa idi, tapahang muwa. Aja' tapakéi basa Ibranié, napahangngi matu ra'ya'é ri yasé'na témbo kotaéro.” Nametté iyaro parawirana Asyur, “Ri ikoga bawang sibawa ri arummu nasuroka arung Asyur untu' palettu manengngi iyaé? Mabbicara tokka lao ri ra'ya'é iya tudangngé ri témbo'éro, iya sibawaékko matu manréi tainna sibawa ménungngi téména muto.” Nainappa tettong iyaro parawira tanré sibawa gora ri laleng basa Ibrani, “Engkalingai aga napowada arung Asyur, ‘Aja' mumaélo ribengnguwang ri Hizkia! Dé' naulléi passalama'ko! Aja' muwéngkalingai pappalécéna untu' maddennuwang lao ri Puwangnge. Aja' muwasengngi Puwangnge passalama'ko matu iyaré'ga lawa-lawaiwi tentarana Asyur sittaiwi kotamu. Aja' muwéngkalingai Hizkia! Iyya, arung Asyur mappétangngarengngi kuwammengngi mumassu polé ri kotaé sibawa manyara. Weddikko matti manré buwa anggoro polé ri palla'mu muto, sibawa péneddingiwi buwa araé polé ri pommu muto, enrengngé ménung uwai polé ri bujummu muto, narapi upalétté'ko lao ri séuwaé wanuwa iya maéloé pada wanuwammu muto. Kuwaro engka palla anggoro iya powassélékengngékko anggoro, sibawa dare gandong iya powassélé'é labbu untu' inanrému. Aja' muwéngkalingai Hizkia! Banna nabengnguwakko bawang sibawa makkeda makkedaé Puwangnge passalama'ko matu. Engkaga naengka déwatana bangsa laingngé passalama'i wanuwanna polé ri akuwasakku? Kégani déwata-déwatana wanuwa Hamat sibawa Arpad? Kégani déwata-déwatana Séfarwaim? Engka polé passalama'i Samaria? Déwata kégana pura paleppe'i wanuwanna polé ri akuwasakku? Pékkugi wedding Puwangnge passalama'i Yérusalém!’ ” Naéngkalinganaro, dé' nappébali pabbanuwana Yérusalém, saba' purani napparéntang Arung Hizkia kuwammengngi nammekko bawang mennang. Nanasapé'ni pakéyanna Elyakim, Sébna sibawa Yoah tanrang masussa, nainappa lao laporo'i ri arungngé aga pura napowada iyaro parawirana Asyur. Wettunna naéngkalinga Arung Hizkia laporanna iya tellu tauwéro, nasapé'ni pakéyanna nanapaké kaing karung tanrang masara, nainappa lao ri Bolana Puwangnge. Nainappa nasuro Elyakim kapalana saorajaé, Sébna jurutulisi'na wanuwaé sibawa sining imang iya makképangka'é méwai sita Nabi Yésaya, ana' Amos. Paké towi mennang pakéyang karung. Iyanaé pasenna Hizkia iya napalettu'é mennang lao ri Yésaya, “Iyaé essoé, esso asarang; rihukkukki sibawa ripakatuna. Pada-padaki makkunrai iya maéloénna mémmana, iyakiya acappurenni awatangeng. Purai nasuro arung Asyur parawira tanréna untu' pakatunai Allataala iya tuwoé. Nigana missengngi purani naéngkalinga Puwang Allataala iyaro pappakatunaé sibawa hukkungngi mennang iya powadaéngngi! Rimakkuwannanaro assempajanno lao ri Allataala untu' sining tautta iya tuwoé mupa.” Purana natarima paseng polé ri Arung Hizkiaro, risuroni iyaro sining suroé ri Yésaya palettu'i iyaé pappébalié, “Makkedai Puwangnge, dé' naparellu métau datu méngkalingai adanna iyaro ata-atanna arung Asyur makkedaé dé' naulléi Puwangnge paleppe'ki. Puwangnge mébbui matu arung Asyur jampangiwi séuwa karéba anging angkanna lisu ri wanuwanna, na kuwaniro riyuno matu.” Iyaro parawira tanréna Asyur lolongenni karéba makkedaé nasalaini arunna Lakhis sibawa mattengngang mammusu méwai kota Libna, dé' namabéla polé kuwaro. Nalaona kuwaro untu' méwai sita arunnaro. Purani tarima karéba arung Asyur makkedaé pasukanna Maséré iya napimpingngé Tirhaka polé ri Sudan mattengngang polé untu' gasai mennang. Rimakkuwannanaro, kirinni sure' arung Asyur lao ri Hizkia, arung Yéhuda. Mappakkuwaiyé oninna iyaro sure'é, “Aja' muribellé ri jancinna Allataala iya muwattuwangngéro makkedaé dé' musempé matu ri limakku. Purani muwéngkalinga makkedaé tungke wanuwa iya nagasaé arung-ngarung Asyur naancuru siseng. Aja' muwasengngi muwulléi leppe. Wettunna toriyoloku mancuru'i kota Gozan, Haran, sibawa Rézéf, enrengngé mpunoi sining tau Edén iya monroé ri Télasar, dé' muwi séddi polé ri déwata-déwatana passalama'i mennang. Kégani arung-ngarunna kota Hamat, Arpad, Séfarwaim, Héna sibawa Iwa?” Natarimani Hizkia iyaro sure'é polé risining suroé sibawa nabacai. Nainappa lao ri Bolana Puwangnge sibawa pallebba'i iyaro sure'é ri yolona Puwangnge, nainappa massempajang, adanna, “ Puwang Iya Pommakuwasaé, Allataalana Israélié, iya monroé ri yasé'na kérub-é, Iko alé-aléna Allataala iya makuwasaéngngi sininna akkarungengngé ri tompo'na linoé. Iko ritu pancajiwi langié sibawa linoé. Puwang, tennapodo tapénessaiwi aga mattengngang kajajiyang sibawa idi. Engkalingai sininna pappakatunana Sanhérib lao ri Iko, Allataala iya tuwoé. Riisseng maneng idi, Puwang, makkedaé arung-ngarung Asyur purani napaccappu maéga bangsa sibawa mancuru'i sining wanuwanna mennang. Natunu towi déwata-déwatana mennang sibawa naancuru'i, saba' iyaro déwata-déwataé dé' sises-siseng namakuwasa. Bannai mennang dato-dato polé ri ajué sibawa batu ébbu tolinoé. Oh Puwang Allataalata, paleppe'ki polé risining tau Asyur-éro, kuwammengngi sininna bangsaé ri linoé naissengngi makkedaé Idi alé-aléna Puwang.” Nainappa kiring Yésaya paseng lao ri Arung Hizkia makkedaé selaku pappébalinna sempajanna arungngé, makkedai Puwangnge, “Kota Yérusalém cawa-cawaiko sibawa méllé-kéllé'ko, Sanhérib! Muwissegga niga murodda-roddai sibawa mupakatunaro? Iyya, Allataalana Israélié, Allataala iya mapaccingngé. Kirikko suro untu' mabboro makkedaé nasibawang égana karéta musumu, purai mupatunru sining bulu matanré ri Libanon. Muwattempowangngi makkedaé purani mutubbang sining pong camarana iya kaminang matanré sibawa kaminang magelloé, enrengngé bettui sining ale'na iya kaminang maworongngé. Muwattempowang towi makkedaé kaliko bujung sibawa ménung uwai ri wanuwa-wanuwa laingngé, sibawa makkedaé sining prajuri'mu pucca-pucca'i Salo Nil angkanna marakko. Dé'paga naengka muwéngkalingai makkedaé iya manennaro purani Urancana sipongenna riyolo? Na makkekkuwangngé Upogau'ni. Iyya ritu mpérékko akuwasang untu' mancuru'i kota-kota mabbénténgngé mancaji ruttungeng. Sining tau iya monroé kuwaro dé' pakkullénna; tassélenni mennang sibawa métau. Pada-padai mennang wellaé ri padangngé iyaré'ga wella iya tuwoé ri pabbingeng bolaé, iya marakkoé rékko nairii anging alau iya mapellaé. Iyakiya Uwisseng maneng passalenna aléna. Uwisseng aga iya mupogau'é sibawa kégako lao. Uwisseng makkedaé macai senna'ko lao ri Iyya, sibawa purani uwéngkalinga passalenna iyaro caimu sibawa atempommu. Makkekkuwangngé Upasangngi pakkadak-kadangngé ri inge'mu sibawa galang ri bawamu, kuwammengngi Ugettekko lisu molai laleng iya muwolaé wettummu polé.” Nakiring towi Yésaya iyaé pasengngé lao ri Hizkia, “Iyanaé mancaji tanrang matu ri alému. Iyaé taungngé sibawa taung mangoloé manréi matu tauwé gandong iya natuwongngé aléna. Iyakiya purairo weddinni mennang mattaneng gandong sibawa anggoro enrengngé péneddingiwi wassélé'na. Tau Yéhuda iya tuwoé mupa madécéngngi matu pada-pada tanet-taneng iya maliyung senna'é ure'na sibawa powassélé buwa. Ri Yérusalém sibawa ri tompo'na Bulu Sion engka matu tau salama, saba' Puwang Iya Pommakuwasaé pura pattentui makkedaé iyaro gau'é kajajiyangngi matu. Iyanaé napowada Puwangnge passalenna arung Asyur: ‘Dé' nauttamakiwi matu Yérusalém iyaré'ga mattémbakeng pana lao ri kotaéro. Prajuri-prajuri makkaliyawoé dé'gaga maddeppériwi iyaro kotaé, sibawa ri mattulilinna dé' matu naripatettong pétawu akkeppungeng. Lisui matu arung Asyur molai laleng iya naolaé wettunna polé, tennauttamakiwi kotaéro. Iyya, Puwang, pura mabbicara. Uwéwaiwi matu kota Yérusalém sibawa Ulinrungi nasaba alebbirek-Ku nenniya nasaba jancik-Ku sibawa atak-Ku Daud.’ ” Iyatoro wennié napolé malaéka'na Puwangnge ri akkémanna tau Asyur-é sibawa mpunoi 185.000 tau prajuri. Pappa bajana essoé maéléni tattale-tale ujuna mennang. Nasorona Sanhérib, arung Asyur, sibawa lisu lao ri Niniwé. Ri séuwaé esso, wettunna mattengngang massompa ri laleng bolana Déwata Nisrokh, riyunoi sibawa peddang ri Adramélékh sibawa Sarézer, ana'-ana' worowanéna. Purairo larini mennang lao ri Ararat. Na Esarhadon, ana' worowanéna iya laingngé, mancaji arung sulléiwi. Ri seddéna wettuéro nakennai lasa Hizkia sibawa céddé'i maté. Nabi Yésaya ana' Amos, célléngiwi sibawa makkeda, “Mappasengngi Puwangnge kuwammengngi napappuraiwi Datu sininna urusanna, saba' dé' najjappa matu Datu. Dé'na namaitta namaté Datu.” Gilinni Hizkia ri témbo'é, nainappa massempajang, “ Puwang, éngngerangngi makkedaé iyya'é purana mattumani ri alému sibawa matinulu nenniya malempu. Tuli makkuragaka turusiwi élomu.” Nainappa teri Hizkia sibawa mapeddi. Laonana Yésaya, risuroni ri Puwangnge lisu ri Hizkia sibawa palettu'i iyaé pasengngé, “Iyya, Puwang, Allataala iya nasompaé Daud toriyolomu, naéngkalingani sempajammu sibawa naitani uwai matammu. Maélo-Ka tambaiwi umuru'mu sibawa seppulo lima tauppa. Iko sibawa kota Yérusalém Upaleppe'i matu polé ri arung Asyur. Iyaé kotaé tette'i matu Ulinrungi.” Nappébali Yésaya, “Iyanaé tanrang iya nabbéréyangngé Puwangnge lao ri Datu makkedaé Narupaiwi jancin-Na. Ri pajjello jang mata esso ebbuna Arung Ahas, naébbui matu Puwangnge soro wajo-wajona seppulo jori.” Nasorona iyaro wajo-wajoé seppulo jori. Majjappanana Hizkia, naokini iyaé élong pappojiyangngé: “Adakku, nappai sitengnga umuru uharusu lao, paccappui sésana atuwokku ri linona tau maté. Adakku, dé'na uwitai matu Puwangnge ri linoé, iyaré'ga mitai tolinoé ri linoéwé. Pettui nyawaku, narapini ajjalekku, pada-pada kéma pakkampi iya ribongkara'é; pada-pada kaing rirette'é polé ri pessaé; uwasengngi Allataala maéloni paccappa'i atuwokku. Puppu benni kelli'ka nataro peddi, samanna buku-bukukku rireppo ri sikajué singa; uwasengngi Allataala maéloni paccappa'ni atuwokku. Pédé massalawu saddakku sibawa malemma, pada-pada jangang-jangangngé maddaréké. Matekko matakku nasaba céngai ri langié, Puwang, paleppe'ka polé ri asussangngéwé. Aga wedding upowada? Iyaé pangkaukenna Puwangnge; dé' uwulléi matinro nasaba messéka. Oh Puwang, wérékka atuwong nasaba ada-adammu sibawa pangkaukem-Mu, leppessanni tuwoka untu' alé-Mu bawang. Apeddirekku tappinrai matu mancaji atennangeng, Mupassalama'ka polé ri bahayaé; pura manenni Muwaddampengeng dosa-dosaku. Ri linona amaténgngé dé'gaga poji-Ko, tau maté dé' nawedding maddennuwangiwi atinulurem-Mu. Banna tau tuwoé iya pojiyék-Ko, pada-pada iya upogau'é iyaé essoé. Tomatowaé nacuritai lao ri ana'na temmaka tinulu-Mu, oh Puwang. Puwang, puraka Mupajjappa, natamakkélong pappojiyang ri Bolamu sibawa getti kacapi, gangka tuwota.” Nainappa Yésaya suroi tauwé peppé buwa ara nanabbabekengngi ri lettanna Hizkia kuwammengngi najjappa. Makkutanani Arung Hizkia, “Aga tanranna makkedaé maéloi Puwangnge pajjappaka sibawa weddikka lao ri Bolana Puwang -ngéssi?” Ri seddéna wettuéro, arung Babél, iyanaritu Mérodakh Baladan ana' Baladan, méngkalingai makkedaé Arung Hizkia silalona majjappa polé ri lasana. Nasurona tau untu' tiwi sure' sibawa hadiya lao ri Hizkia. Naduppaini Hizkia iyaro sining suroé sibawa ati masennang nenniya mappaitangngi lao ri mennang sininna asugirenna, iyanaritu ulaweng sibawa péra', rampa-rampa sibawa minnya wangi, nenniya sininna passakke'na tentarana. Dé' muwi séddi ri saorajaé sibawa ri sininna akkarungenna iya dé'é nappaitangngi lao ri mennang. Nainappa Nabi Yésaya mangolo ri Arung Hizkia sibawa makkutana, “Polé kégi sining tauwéro? Aga adanna mennang?” Nappébali Hizkia, “Poléi mennang ri Babél, wanuwa iya mabélaé.” Nakkutana paimeng Yésaya, “Aga naita mennang ri saorajaé?” Nappébali Hizkia, “Sini-sininnaé. Dé'gaga barang ri laleng attarong waramparanna saorajaé iya dé'é uwappaitangngi lao ri mennang.” Nainappa makkeda Yésaya lao ri arungngé, “Makkedai Puwang Iya Pommakuwasaé, ‘Narapii matu wettunna sininna asugirengngé ri laleng saorajamu, sibawa iya puraé napaddeppungeng toriyolomu lettu essoéwé, riyakkai lao ri Babél. Dé'gaga matu monro. Polé ri ana' eppomu engka matu riyala sibawa ripancaji pegawé saoraja untu' tumaningiwi arung Babél.’ ” Nappébali Arung Hizkia, “Makessitto pasenna Puwangnge iya mupalettukengngékka.” Mappébali makkuwairo nasaba mappikkiri'i: “Assaleng tette muwi amang akkarungekku sibawa damé ri wettu tuwoku mupa.” Makkuwaniyé adanna Allataalamu, “Saléworiwi, saléworiwi bangsa-Ku! Pattennangngi atinna tau Yérusaléngngé, powadai makkedaé maccappa'ni angatangenna. Purani Uwaddampengeng asalanna mennang, dosa-dosana mennang purani Uhukkung leppi wékkaduwa.” Engka sadda iya mangobbié, “Passadiyai lalengngé ri padang kessi'é untu' Puwangnge. Pallempui lalengngé ri padang makkale-ale'é untu' Allataalata! Tungke lompo'é harusu'i ritongko, bulu sibawa bulu-bulué riparatai. Tana mabbulu-bulué mancajiwi matu tanété, sibawa iya makkalebbong-kalebbongngé ripalengngoriwi. Naripannessai matu arajanna Puwangnge; sininna rupa tauwé nasabbingngi matu. Tongeng, Aléna Puwangnge pura majjanciyangngi!” Engka sadda iya makkedaé, “Abbirittangngi!” Makkutanaka, “Aga harusu uwabbirittang?” “Abbirittangngi makkedaé tolinoé pada-padai wellaé, pada-padai bunga iya cinampe'émmi bawang agellorenna. Mancaji marakkoi wellaé sibawa mancaji makelle'i bungaé, rékko nasseppungengngi Puwangnge anging iya mapellaé. Tongeng, iyaro bangsaé pada-padai wellaé. Mancaji marakkoi wellaé sibawa mancaji makelle'i bungaé, iyakiya saddanna Allataalata mattahangngi mannennungeng.” Enré'ni ri tompo bulu iya matanré, sibawa appallebbangenno karéba madécéng lao ri Yérusalém! Angobbino sibawa sadda macenno, sibawa appallebbangenni karéba madécéngngé lao ri Sion! Powadani lao ri kota-kotana Yéhuda makkedaé poléi matu Allataalana mennang! Itai, poléi Puwang Allataala sibawa akuwasang untu' tinda sibawa barani. Ritinrosiwi risining tau iya puraé Napaleppe. Pada-padai séddié pakkampi Napiyarai ampi-Na; Aléna paddeppungengngi mennang. Nakokkongngi ana'-ana' bimbala'é, nasibawang alemmang Natinrosiwi sining indo'-Na. Niga mola'i dolangengngé sibawa pale'limanna, iyaré'ga mukkuru'i bitaraé sibawa jakkai? Niga mola'i tanana linoé sibawa ola' iyaré'ga timbangngi bulué nenniya bulu-bulué sibawa timbangeng? Niga pimpingngi Puwangnge, iyaré'ga paggurui Aléna selaku pappangaja-Na? Kégai makkutana Puwangnge kuwammengngi nalolongeng pangissengeng sibawa pappéjeppu? Niga mpéréngngi panunju untu' tinda sibawa teppa? Untu' Puwangnge bangsa-bangsaé pada-padai sitetti uwai ri laleng séro'é, pada-padai séddié awu ri timbangengngé; padai ringenna pulo-puloé sibawa awu manenné'é. Sininna olokolo'é ri ale Libanon dé' nagenne untu' mancaji akkarobangeng ritunu; céddé senna ajukajunna untu' ripancaji aju apinna. Sininna bangsaé dé' bettuwanna lao ri Aléna, samanna dé'gaga ri yolo-Na. Jaji nasibawang niga maéloko pappadaiwi Allataala? Niga muwangga sinrupa sibawa Aléna? Dé' napada-pada dato-dato ébbuna tukangngé, dato-dato iya mallapi ulawengngé sibawa rilapikiyé péra'. Tau iya dé'é namampu melli ulaweng iyaré'ga péra', napiléi aju iya dé'é namagampang masolang. Sappai panré iya maccaé untu' mébbu dato-dato iya dé'é namagampang kédo-kédo. Masa dé' muwissengngi sibawa dé' muwéngkalingai, sibawa dé' naripaissengiko sipongenna riyolo? Masa dé' muwajeppuiwi polé ri pammulanna pékkugi pammula-mulanna linoé? Iya pancajiyéngngi makkarung ri tompona lébuna linoé, pabbanuwana paitai baiccu pada-pada incalé. Napallebba'i langié pada-pada kaingngé, sibawa pasangngi pada-pada kémaé untu' riyonroi. Naébbui sining panguwasaé dé' pakkullénna, sibawa sining tomarajaé ateddéngeng akuwasanna. Pada-padai mennanro tanet-taneng maloloé iya nappaé mammula tuwo ure'na. Rékko masseppungengngi anging Puwangnge, marakkoi mennang sibawa riluttureng pada-pada daramé. Niga muwangga sippada sibawa Allataala Iya Pommapaccingngé? Nasibawang niga maéloko pappadaiwi Aléna? Akkitano ri langié, sibawa pénessaiwi! Niga pancajiwi sining wéttowingngé? Aléna matoro'i mennang pada-pada pasukangngé, naisseng jumellana maneng mennang, sibawa mobbii tungke-tungke sibawa asenna. Dé' muwi séddi teddéng, nasaba battowana akuwasanna Puwangnge! Jaji Israélié, magi mumaddaréké, samanna dé' naissengngi Puwang Allataalamu masussako? Samanna dé' nabati-batiwi totomu, sibawa dé' najampangiwi ha'mu? Masa dé' muwissengngi sibawa dé' muwéngkalingai? Puwangnge ritu Allataala iya mannennungengngé, iya pancajiyéngngi sininna linoé. Dé' naengka naposo iyaré'ga matekko; pikkiran-Na dé' nariyullé mpellungiwi. Napéwatangiwi tau iya posoé, nawéréngngi sumange iya dé'é pakkullénna. Sining tau maloloé mancaji posoi sibawa matekko ana'-ana' mammulaé kallolo menrungngi tabbuttu. Iyakiya tau iya mattuwangngéngngi Puwangnge, lolongengngi matu awatangeng mabaru. Padai mennang kuwajangngé iya luttué matanré sibawa awatangeng pannina. Lariwi mennang sibawa dé' naposo, joppai mennang sibawa dé' namatekko. Adanna Allataala, “Ammekkono sibawa éngkalinga-Ka, éh pabbanuwana sining wanuwa mabélaé. Sadiyano untu' maju ri pengadilangngé, alluruno sibawa pangoloni parakaramu. Laono mai tasisama massidang, untu' pettuiwi niga tongeng, niga sala. Niga pakédoi panguwasa polé alaué, sibawa mpéréngngi apakalang matteru-teru? Niga mébbui cau bangsa-bangsaé, sibawa patunru'i arung-ngarungngé untu' aléna? Peddanna mébbui mennang tassiyampo pada-pada awué, panana patassiyampoi mennang pada-pada daramé nairi anging. Matterui mallellung sibawa malluru tenrilawa-lawai; magatti ajéna, samanna dé' nagéssai lalengngé. Niga pogau' manengngi iyaro? Niga pattentui lalenna sejaraé? Iyya, Puwang, Iyya'na ritu iya mammulangngé, sibawa tette engka lettu paccappureng. Naitai pabbanuwana sining wanuwa mabélaé aga pura Upogau'. Tassélengngi mennang sibawa ténré nataro tau, nainappa maddeppungeng massibawa napolé. Sininna tauwé sisulléi situlung, sibawa sisullé sipéwatangi ati. Panré ajué péwatangiwi atinna panré ulawengngé, tau iya palleppangngéngngi bessié sibawa palu-palu pojiwi tau iya mallanroé ri yasé'na appalangkangngé. Adanna, ‘Makessing tongeng jama-jamammu’; nainappa napakkasse sibawa paku kuwammengngi aja' nakédo. Iyakiya iko, Israélié, atak-Ku, umma upilé-Ku, iko wijanna Abraham, sellao-Ku. Purano Uwala polé ri cappa-cappa'na linoé, Uwobbi polé ri onrong-ngonrong iya kaminang mabélaé. Adak-Ku, ‘Iko ritu atak-Ku; dé' Usampéyangngi pappilé-Ku.’ Aja' mumétau, saba' Iyya sibawakko, aja' mumanenneng, saba' Iyya Allataalamu. Upakkasse'ko matu sibawa Utulung, Udulung sibawa limak-Ku iya poré. Itani, sininna tau iya macaié lao ri iko, ricaui matu sibawa masiri senna. Sining tau iya méwaékko, binasai matu sibawa cappui risering. Musappai matu sining tau iya méwaékko, iyakiya dé' muruntu'i matu. Sining tau iya mammusué sibawa iko binasani makkekkuwangngé sibawa teddéng. Saba' Iyya Puwang, Allataalamu, makkatenningngi lima ataummu; adak-Ku, ‘Aja' mumétau, Utulukko matu.’ ” Adanna Puwangnge, “Aja' mumétau, Israél, namuni baiccu'ko sibawa malemma. Iyya ritu Puwang iya tulungngékko, Iya Pommapaccingngé, Allataalana Israélié iyanaritu Pappassalama'mu. Itani, Upancajiwi pada-pada pépeng paddése'é, iya barué, matareng sibawa makkisi duwabbarisi. Murése'i matu sining bulué sibawa mancuru'i; mupancajiwi bulu-bulué pada-pada awangngé. Mutapiwi matu mennang, nainappa naluttureng mennang anging sibawa napatassiya anginraja. Marennuko matu nasaba Iyya, Puwang, sibawa maloppo ati nasaba Iyya, Allataalana Israélié. Rékko sappai uwai iyaro bangsa-Ku iya macilakaé, sibawa marakko tigero'na mennang nasaba madekkai, na Iyya, Puwang, baliwi matu sempajanna; Allataalana Israélié dé' nasalaiwi matu umma'-Na. Uwébbui matu massolo sining saloé ri bulu-bulu iya makellué; mompoi matu mata uwai ri tengngana tanété. Padang kessi'é Upancajiwi matu tappareng; jompii matu uwai polé ri tana marakkoé. Utanengiwi matu pong camara padang kessi'é, pong zaitun, pong murad sibawa pong akasia. Padang makkale-ale'é Upancajiwi matu ale, ale camara, berangang sibawa ajuwanging. Nanaitai matu sininna tauwé sibawa naissenna makkedaé Iyya, Puwang, iya pogau'éngngi. Napuriyatiwi matu mennang sibawa najeppuiwi, Allataala mapaccinna Israélié mébbui iyaro kajajiyang.” Puwang, arunna Israélié, makkeda lao ri déwata-déwataé, “Pangoloni parakaramu, powadani alasang-alasanna! Poléno, sibawa botoni aga kajajiyang matu, kuwammengngi taissengngi accappurenna matti. Appaissengenni kajajiyang-kajajiyang iya mariyoloé, pakatajangngi bettuwanna kuwammengngi tapénessaiwi. Powadani aga kajajiyang matu, kuwammengngi taissengngi tongekko ilahi. Pogau'ni iya makkégunaé iyaré'ga iya mapparogiyé, kuwammengngi tabengnga mitai. Sitongenna, iko sibawa pangkaukemmu dé'gaga, sibawa sining sompaékko mappakaciddi-ciddi bawang. Purana pakédo séddi tau polé alau: Uwobbii untu' maggasa polé manorang. Naléjja-léjja'i matu panguwasaé pada-pada bungkaé, pada-pada pakkébbu oringngé léjja-léjja'i tana litaé. Niga polé ri iko pura botoi angkanna weddikki pattongengngi? Iyakiya ri yelle'mu dé'gaga iya mappaissengengngéngngi, dé'gaga méngkalingako mabbicara. Iyya, Puwang, iya bunge mabbirittangngéngngi lao ri Sion; kirikka pattiwi karéba makessing lao ri Yérusalém. Wettunna Usappa ri yelle'na déwata-déwataé, dé' muwi séddi mulléi mabbéré panunju, dé'gaga mulléi mappébali. Tongeng, iyaro déwata-déwataé dé' nakkéguna, bannai mennang dato-dato ricuwang iya dé'é pakkullénna, sibawa dé' namampu pogau' agi-agi.” Adanna Puwangnge, “Iyanaé atak-Ku iya Usokongngé, tau upilé-Ku iya sennangiyéngngi atik-Ku. Purani Uwéréng akuwasak-Ku lao ri aléna, untu' tiwi adélékeng lao ri tungke bangsaé. Dé' matu nagora iyaré'ga mangobbi sibawa macenno, saddanna dé' nariyéngkalinga matu ri lalengngé. Bulo iya nroko'é dé' naripolo matu, pajjennangeng iya mappidé-pidé dé' naripeddéi matu. Nasibawang atinulureng napannessai matu atongengengngé, tekkaléwa-léwa iyaré'ga pettu paddennuwang, narapi ripatettong adélékengngé ri linoé. Sining wanuwa iya mabélaé muddaningiwi pappagguruwanna.” Puwang Allataala pancajiwi sibawa pallebba'i langié; Natappai linoé sibawa sininna iya tuwoé ri yasé'na. Nawéréngngi tolinoé nappase atuwong sibawa nyawa. Napalettu'i iyaé pasengngé lao ri atan-Na, “Iyya, Puwang, mangobbi sibawa suroko untu' pajoppai adélékengngé. Upimpikko sibawa Upiyara untu' mancaji assijancing lao ri rupa tauwé, sibawa cahaya untu' sininna bangsaé. Untu' timpa'i matanna tau butaé, sibawa paleppe'i tauwé polé ri apettangenna tarungkué. Iyyana ritu Puwang, iyanaro asek-Ku; arajak-Ku dé' Uwabbéréyangngi lao ri muwi niga; ataromporek-Ku dé' Uwabbéréyangngi lao ri dato-dato'é. Iya Ubotoé makkekkuwangngé maddupani; maélo-Ka mappaissengengngi gau'-gau' iya barué; ri wettu dé'napa nakajajiyang iyaro, purani Upowadakko.” Akkélonno élong baru untu' Puwangnge, pojiwi Aléna, éh sininna linoé! Angoro'no, éh tasi sibawa sininna lise'na, sining wanuwa iya mabélaé sibawa sininna pabbanuwana! Sitinajai padang kessi'é sibawa kota-kotana pojiwi Puwangnge, makessinni pabbanuwana Kédar pojiwi Aléna! Sitinajai pabbanuwana kota Séla gora-gora, sibawa mangobbi-obbi polé ri tompo bulué! Makessingengngi mennang pakarajai Puwangnge, sibawa pakalabbai ri wanuwa-wanuwa mabélaé. Mallurui Puwangnge mammusu pada-pada séddié pahlawang, pada-pada séddié prajuri penno sumange mammusu. Nagoranni kelli ammusurengngé, sibawa mappaitangngi aporén-Na lao ri balié. Makkedai Allataala, “Maittana mammekko; mammekkoka sibawa tahangngi alé. Makkekkuwangngé narapini wettunna untu' tinda, maélo-Ka gora pada-pada makkunrai iya mémmana'é. Bulu sibawa bulu-bulué Uwébbui matu makabuttu, sininna tanet-tanenna Upakellekiwi. Lompo-lompo saloé Upinrai mancaji padang kessi, sininna tapparengngé Urakkoiwi. Bangsa-Ku iya butaé Urénréngngi matu molai laleng iya dé'é naissengngi mennang; Urénréngngi matu mennang risining laleng iya dé'é naissengngi mennang. Pettangngé Upancajiwi tajang untu' mennang, sibawa laleng iya makkalebbong-kalebbongngé Uparatai. Iyanaro Upogau' matu untu' mennang, napasti Upogau' matu. Tau iya mateppe'é ri dato-dato barahalaé sibawa mangakuiwi selaku déwatana mennang, ripakatunai matu sibawa ripakasiri.” Makkedai Puwangnge, “Engkalingai, éh sining tau mataru-tarué! Itai, éh sining tau butaé! Niga lebbi buta naiya Israélié atak-Ku? Niga lebbi mataru-taru naiya suro-Ku? Israélié, maéga iya muwitaé, iyakiya dé' mujampangiwi, tattimpa'i daucculimmu, iyakiya dé' muwéngkalingai.” Maéloi Puwangnge mappassalama; macinnai ripakalebbi hukkun-Na sibawa ripakaraja. Iyakiya iyaro bangsaé cappuni rirampo; ritahangngi mennang ri laleng bili'-bili' ri yawana tanaé, sibawa riurung ri laleng sining tarungkué. Mancajiwi mennang addampokeng, na dé'gaga polé mabbéré pattulung. Niga ri yelle'mu maélo méngkalingai gau'éwé, sibawa jampangiwi untu' matteru? Niga mabbéréyangngi Israélié untu' rirampasa? Tenniyaga Aléna Puwangnge? Lao ri Aléna ritu madosaki, dé' tatuwo situru parénta-Na, sibawa temmaccowériwi pappagguruwan-Na. Nanaébbuki péneddingiwi cai-Na iya maseroé, sibawa manrasa-rasa nasaba musu iya maseroé. Patunu cai-Na ri Israélié pada-pada apié, iyakiya dé' tamaingekiwi, sibawa dé' tagguruiwi polé ri iya ripéneddingiyé. Israélié, mappakkuwaiyé adanna Puwangnge, “Iyya ritu mappancaji sibawa tappako, aja' mumétau, pasti Upassalama'ko! Purano uwobbi sibawa asemmu, appunnangek-Ku iyanaritu iko. Rékko léttoko uwai, Usibawakko matu, dé' mutallémme matu ri laleng asukkarakemmu. Rékko molako api, dé' mumangu matu, paccobang-paccobang matane'é dé' nacilakaiko matu. Saba' Iyya ritu Puwang, Allataalamu, Allataala mapaccinna Israélié, Pappassalama'-Mu. Uwabbéréyangngi Maséré selaku pakkamajamu, Sudan sibawa Syéba selaku passullému. Mangke'ko ri matak-Ku, Uwangke'ko sibawa Uwamaséiko; na-Uwabbéréyangngi tolinoé selaku passullému, bangsa-bangsaé selaku passuléna nyawamu. Aja' mumétau, saba' Iyya linrungiko. Polé ri yajang sibawa ri alau Usuroi ana' eppomu polé maddeppungeng. Uparéntangngi manorang sibawa yattang, kuwammengngi namasitta mennang rileppessang. Leppessanni ana'-ana' worowanému lisui polé mabéla, sibawa ana'-ana' makkunraimmu lisui polé ri cappa-cappa linoé. Saba' pura manenni mennang riyobbi sibawa asek-Ku, Upancajiwi mennang untu' pakarajaka.” Makkedai Allataala, “Suroi malluru liyolo bangsa-Ku iya butaé, namuni mappunnaiwi mata; iya mataru-tarué, namuni mappunnaiwi daucculing. Suroi sininna bangsaé maddeppungeng sibawa sininna sukué sipulung. Nigana ri yelle'na déwata-déwatana mennang pura mappaissengengngi aga iya kajajiyangngé makkekkuwangngé? Niga ri yelle'na mulléi botoi wettu mangoloé? Leppessanni sabbi-sabbinna mennang malluru, sibawa pabuttiwi makkedaé tongengngi mennang, kuwammengngi sininna iya méngkalingaéngngi mennang makkedai, makkedaé mémeng makkuwairo! Eh umma'-Ku, iko ritu sabbi-sabbik-Ku, iko Upilé mancaji ata-atak-Ku, kuwammengngi naissek-Ka sibawa mateppe'i ri Iyya, sibawa majeppuiwi makkedaé Iyya'na Allataala. Iyya Allataala Iya Posséuwaé, dé'gaga laingngé ri yolona sibawa puraku-Na. Iyya'na ritu Puwang, ri lainnaé Iyya dé'gaga mappassalama. Purani Uwappaissengeng lao ri iko, Iyya ritu passalama'ko, sibawa tenniya déwata laing iya engkaé ri yelle'mu; iko ritu mancaji sabbi-sabbik-Ku. Na Iyya, Iyya'naé Allataala, untu' mannennungeng tette'-Ka Allataala. Dé'gaga mulléi leppe polé ri akuwasak-Ku, iyaré'ga lawa-lawaiwi rancana-Ku.” Puwang Pappassalama'mu, Iya Mapaccingngé Israélié, makkedai, “Nasaba iko, kirik-Ka tentara lao ri Babél, na-Usorongngi paccala-cala tange'na tarungkué; gora-gorana tau Kasdingngé Upinrai mancaji wating. Iyya ritu Puwang, Allataalamu iya mapaccingngé, Arummu, iya pancajiyékko, éh Israélié!” Puwangnge pura mébbu séddi laleng molai tasi'é, molai uwai iya mabbombangngé. Nasuroi tentaraé sibawa parawira-parawirana mammusu, sibawa mallurui mennang sibawa karéta makkinnyarang. Iyakiya menrungngi mennang, dé'na naulléi tokkonna, matéi mennang pada-pada sumbung iya peddé. Makkedai Puwangnge, “Dé'gaga gunana méngngerangngi wettu labe'é, paracuma sénge'i iya puraénna. Pénessaiwi mébbu-Ka séuwa iya barué; mammulani makkekkuwangngé, dé'ga muwitai? Maélo-Ka mébbu laleng ri padang kessi'é, sibawa salo-salo ri padang makkale-ale'é. Nabengngari-Ka matu olokolo liyaé; napoji-Ka matu serigalaé sibawa manu'-manu' untaé saba' passolo'-Ka uwai ri padang kessi'é, sibawa salo-salo ri padang makkale-ale'é untu' mpéréngngi uwai umma upilé-Ku. Mennang ritu bangsa iya Utappaé untu' alé-Ku, kuwammengngi naulléi mabbirittangngi pappojiyangngé untu' alé-Ku.” Makkedai Puwangnge, “Iyakiya iko Israélié, dé' musompa-Ka, sibawa dé'tona muwattumani lao ri Iyya. Dé' mutiwi bimbala untu' akkarobangeng ritunummu, dé' mupakalebbi-Ka sibawa pakkasiwiyamu. Padahal dé' Upatiwiriko sibawa akkarobangeng, iyaré'ga sussaiko sibawa tuntu kamennyang. Dé' muwelli dupa bau untu' alé-Ku, dé' mupagélléri-Ka sibawa lunra akkarobangeng rigérému. Sibalé'na mupatiwiri-Ka sibawa dosa-dosamu, sussai-Ka sibawa asalang-asalammu. Iyakiya Iyya Allataala iya leddaéngngi dosamu, Uwaddampengekko nasaba makkuwaniro sipa'-Ku; dé' uwéngngerangngi dosamu. Paréngngerangi-Ka, laono mai talao ri pengadilangngé, parape'i parakaramu kuwammengngi namanessa makkedaé tongekko. Néné-nénému iya mammulangngé madosani, sining pamimpimmu purai maronta lao ri Iyya, imang-ngimammu purai nacarépai Bola-Ku. Na-Uwabbéréyangngi Israélié untu' ripakatuna, wija-wijanna Yakub Uleppessangngi ripaccappu.” Makkedai Puwangnge, “Engkalingai, éh Yakub atak-Ku, éh Israélié, umma upilé-Ku! Iyya ritu Puwang iya pancajiyékko, iya tappaékko mappammulai ri parémmanang, sibawa iya tulungngékko. Aja' mumétau, iko ritu atak-Ku, umma ripilé-Ku iya Uwamaséiyé. Saba' maélo-Ka tiri uwai ri tana iya marakkoé, sibawa passolo'i sining saloé ri tana iya makarossaé. Maélo-Ka mabbéréyangngi akuwasak-Ku lao ri wija-wijammu, sibawa barakkakiwi ana' eppomu. Tuwoi matu sibawa macommo pada-pada wellaé ri seddéna uwai, pada-pada pong gandarusaé ri wiring saloé. Tasséddi-séddi tau mangakuiwi matu aléna appunnangek-Ku, sibawa polé siyempe sibawa wija-wijanna Yakub. Tungke-tungke mokii ri limanna: Appunnangenna Puwangnge, sibawa teppui aléna anggota umma'na Allataala.” Iyanaé adanna Puwang Iya Pommakuwasaé, Arung sibawa pallinrunna Israélié, “Iyya Allataala Iya Posséuwaé, iya pammulangngé sibawa paccappurengngé. Nigana pada-pada Iyya? Suroi mangaku! Leppessanni nappaissengeng sibawa pabuttiwi ri Iyya! Niga pura botoi wettu mangoloé mappammulai pammulanna lettu paccappurenna linoé? Bangsa-Ku, aja' mumétau iyaré'ga tasséleng; dé'ga napolé ri yolo lettu makkekkuwangngé purani Uboto aga iya kajajiyangngé? Iko ritu sabbi-sabbik-Ku. Pallinrung iya laingngé dé'gaga sibawa dé' Uwissengngi.” Sining tau iya mébbué dato-dato barahalaro dé' nakkéguna, sibawa déwata-déwata iya nasompaé mennanro dé' akkégunana. Sining tau iya sompaéngngi dato-dato'éro butai sibawa dé' aga-aga naisseng, rimakkuwannanaro masirii matu. Siya-siyai mébbu dato-dato ricuwang sibawa sompai selaku déwata! Tongeng, sininna tau iya sompaéngngi dato-dato'é masirii matu. Tau iya mébbuéngngi dato-dato'éro tolino biyasa. Suroi mennang malluru massibawa; pasti mennang métau sibawa masiri. Panré bessié malai sipolo bessi nainappa natappa ri laleng apié nenniya lanroi sibawa palu-palu. Najamai sibawa sininna awatangeng iya engkaé ri aléna. Ri wettu najamana, malupui, madekkai sibawa posoi. Panré ajué mukkuru'i ajué. Nagambara'i patta-pattana sibawa puwalé, nasobbi'i sibawa pakkakkasa'na sibawa pancajiwi dato-dato tolino iya mamelloé, nainappa nataro ri lalempolana. Naullé aju iya napaké assalenna poléi ri aju camaraé, aju érué iyaré'ga aju terpentin iya natubbangngé ri ale'é. Wedditto tanengngi aju salam nainappa natajeng narapi bosié patuwoi. Madonggo tongeng sining tau pada-padaéro! Natongkoi matanna sibawa atinna mennang angkanna dé' najeppuiwi aga-aga. Iyaro pakkébbu dato-dato'é dé' narapii pikkiri'i, “Iyaro ajué sibagiyang utunu, na osinna upakéi untu' mattunu roti sibawa mappanggang juku untu' inanréku. Nainappa sésana iyaro ajué upancajiwi dato-dato. Jaji makkekuwangngé sompaka sipolo aju!” Iyaro pangkaukengngé pada muwi sibawa manré awu. Iyaro tauwé ripapusai ri pikkiranna iya madonggoé, angkanna dé'na naritulung. Dé' naulléi mangakuiwi makkedaé dato-dato iya engkaé ri limannaro bellé simata. Makkedai Puwangnge, “Engngerang manengngi iyaé, éh Israélié, saba' iko ritu atak-Ku. Iyya tappako, sibawa atak-Kuko, Israél, dé' Uwallupaiko matu! Ulellungngi asalammu pada-pada ellungngé, Upaddésu'i dosamu pada-pada saléwué. Lisuno ri Iyya, saba' purano Upaleppe!” Gorano marennu, éh langi, Gora-gorano, éh bagiyang lalenna linoé! Gorano marennu, éh sining bulu! makkuwatoro ale'é sibawa tungke ajué ri lalenna! Saba' purani Puwangnge nappaitang arajan-Na ri laleng napaleppe'na Israélié umma'-Na. Mappakkuniyé adanna Puwang Pappassalama'mu iya tappaékko sipongenna ri laleng parémmanang, “Iyya'na Puwang iya pancajiyéngngi sini-sininnaé, iya alé-alénaé pallebba'i langié, sibawa tenriduwang napancajiwi linoé. Iyya ritu rusa'i botona tukang pabotoé, sibawa macculé-culéiwi tukang pappalakiyaé. Ubantai ada-adanna tau mapanré, apanrénna mennang Upancajiwi adonggong. Iyya ritu pakkasse'i ada-adanna atak-Ku, sibawa pogau'i rancana iya napannessaé suro-Ku, makkedaka makkedaé riyonroiwi matu paimeng Yérusalém, sibawa kota-kotana Yéhuda Upatettongngi matu paimeng; Upalisui matu sésa-sésana. Iyya ritu iya makkedaé lao ri borina tasi'é: Nonnono! Maélo-Ka rakkoiwi sining salomu. Iyya ritu iya makkedaé lao ri Korésy, ‘Iko ritu mapparéntangek-Ka matu, sibawa pogau'i sininna élo-Ku. Paréntangngi kuwammengngi naripatettong paimeng Yérusalém, sibawa Bolana Puwangnge ripalénne'i pallanggana.’ ” Puwangnge pura piléi Korésy mancaji arung; rijello'i untu' caui bangsa-bangsaé sibawa untu' pettuiwi akuwasanna arung-ngarungngé. Natimpakengngi matu aléna Puwangnge gerbang-gerbang kotana, dé' muwi séddi monro tattongko. Ri alénai makkeda Puwangnge, “Maélo-Ka passadiya laleng untu' alému; bulu sibawa bulu-bulué Uparatai matu, tange-tange tembagaé Ureppa'i matu, sibawa paccala-cala bessié Upoloi. Na-Uwérékko matu waramparang asugireng iya tassubbué, kuwammengngi muwissengngi Iyya ritu Puwang, Allataalana Israélié, iya puraé mobbiko sibawa asemmu. Uwobbiko sibawa Uwérékko pattellareng, namuni dé' muwissek-Ka. Usuroko tulungngi Israélié atak-Ku, saba' mennang bangsa upilé-Ku. Iyya ritu Puwang, dé'gaga laingngé, Iyya Allataala Iya Posséuwaé. Purano Upassenjatai, namuni dé' muwissek-Ka. Iya manennaro Upogau'i kuwammengngi napolé ri alau lettu ri yajang naissengngi sininna tauwé Iyya ritu Puwang, dé'gaga déwata ri laik-Ku. Iyya ritu pancajiwi tajangngé sibawa pettangngé, papolé-Ka barakka sibawa abala. Iyya ritu Puwang iya pogau' manengngéngngiro. Polé ri langié Upanonnoi apakalangngé pada-pada bosié, natimpa'i aléna linoé untu' tarimai, nainappa patuwo asalamakeng sibawa alaluwasang; Iyya Puwang iya mébbuéngngi iyaro kajajiyang.” Macilakai tau iya sibantaé sibawa Pappancajinna; pada-padai oring iya méwaéngngi tau iya mébbuéngngi. Makkutanaga tana litaé ri tukang oringngé, “Mattengngakko maga?” Aga maddaréké oringngé makkedaé pakkébbuna dé' nappunnai amaccang? Macilakai tau iya makkedaé lao ri tomatowanna, “Magi narijajiyakka makkuwaé?” Puwang, Allataala mapaccinna Israélié makkeda, “Tanai-Ka passalenna wettu mangoloé. Iyakiya aja' muwakkutana passalenna ana'-ana'-Ku, iyaré'ga suro-Ka pogau'i séuwaé. Iyya ritu Puwang iya pancajiyéngngi linoé, sibawa pancajiwi tolinoé untu' monroiwi. Nasibawang akuwasak-Ku Upallebba'i langié, sibawa paréntangngi mata essoé, kétengngé sibawa sining wéttowingngé. Iyya ritu pakédoi Korésy untu pajoppai akkatta-Ku sibawa patettongngi adélékengngé. Maélo-Ka paratai sininna laleng iya naolaé. Napatettongngi matu paimeng kota-Ku Yérusalém sibawa paleppe'i umma'-Ku iya ritawangngé, tenripasoso sibawa tenriwaja.” Puwang Iya Pommakuwasaé pura mabbicara. Makkedai Puwangnge lao ri Israélié, “Appunnangiwi wassélé tanana Maséré sibawa alabanna Sudan. Sining tau Syéba iya baranié mancajiwi appunnangemmu; joppai mennang ri munrimmu sibawa ribalenggu. Suju'i matu mennang sibawa mangakuiwi, ‘Allataala tonget-tongengngi ri tengngamu; dé'gaga déwata ri lainnaé Aléna! Allataala iya passalama'éngngi Israélié iyanaritu Allataala iya subbuéngngi aléna. Sininna tau iya mébbué dato-dato barahala; ripakasirii matu sibawa ripakatuna. Iyakiya Israélié ripassalama'i ri Puwangnge; asalamakenna mattahangngi matu. Dé' naripakasiriko matu sibawa ripakatuna lettu mannennungeng.’ ” Puwangnge ritu iya pancajiyéngngi langié, Aléna ritu Allataala! Aléna ritu mappancaji sibawa mébbui linoé, mébbui masse sibawa tette tettong. Dé' napancajiwi onrong iya masino-sinoé, iyakiya onrong untu' rionroi. Aléna ritu iya makkedaé, “Iyya'na Puwang, na dé'gaga laingngé. Dé' umabbicara sibawa massubbu-subbu, iyaré'ga secara rahasiya. Dé' usuroi umma'-Ku Israélié sappa-Ka sibawa paracuma. Iyya, Puwang, powadai iya tongengngé, sibawa mappaissengengngi aga iya tongengngé.” Makkedai Puwangnge, “Addeppungenno sibawa poléno massibawa, iko maneng iya leppe'é ri yelle'na bangsa-bangsaé! Madonggoi sining tau iya mpulééngngi dato-dato ajué, sibawa massempajang lao ri dato-dato'é iya dé'é naulléi mappassalama. Palluruni parakaramu, pangoloni butti-buttinna, ya, leppessanni mennang barunding massibawa. Niga mabbirittangngi gau'éro sibawa mabbirittangngi sipongenna riyolo? Tenniyaga Iyya, Puwang? Dé'gaga déwata ri laik-Ku. Iyya ritu Allataala iya adélé'é sibawa Pappassalama, dé'gaga laingngé sangadinna Iyya! Eh, sininna pabbanuwana linoé, gilinno lao ri Iyya kuwammengngi naripassalama'ko, saba' banna Iyya Allataala, dé'gaga iya laingngé! Puraka majjanci, na jancik-Ku dé' namarusa' matu; untu' alé-Ku muto Umattanro: Tungke tauwé makkaluttui matu ri yolo-Ku, sibawa ri laleng basana muto majjanci untu' matinulu lao ri Iyya. Makkedai matu sining tauwé, ‘Adélékengngé sibawa awatangengngé banna poléi ri Puwangnge!’ Sininna tau iya céccéék-Ka poléi matu ri Iyya sibawa masiri. Iyakiya wija-wijanna Yakub ripassalama'i matu, sibawa napoji-Ka matu, Puwang. Iyanaé accappurenna déwata-déwatana Babél; riyolo dato-dato Bél sibawa Nébo nasompa, iyakiya makkekkuwangngé napatonangngi ri yasé'na olokolo'é, mancaji tiwi untu' olokolo iya matekkoé. Iyaro dato-dato'é dé' namampu tulungngi tau mpulééngngi, aléna mennang ritiwi selaku tawangeng. Iyanaro accappurenna mennang. Engkalinga-Ka, éh wija-wijanna Yakub, iko maneng iya risésaé polé ri umma'-Ku. Purano Upiyara sipongenna rijajiyakko. Tette'-Ka Allataalamu lettu macowako; sibawa tette'i jagaiko lettu maubekko. Iyya pancajiko sibawa tette piyarako, Utulukko matu sibawa passalama'ko. Nasibawang niga maéloko pasibandik-Ka? Engkaga wedding ripappadaiyak-Ka? Natimpa'i tase-tase'na tauwé sibawa naloloi ulawenna, nainappa natimbang péra'na sibawa timbangeng. Napéssaroiwi panré ulawengngé untu' mébbu dato-dato barahala, nainappa nasompa dato-dato ébbuna. Iyaro dato-dato'é napakui sibawa nataroi ri onronna, tettongngi kuwaro sibawa dé' naulléi létté. Rékko massempajangngi tauwé lao ri aléna, dé' nappébali, sibawa dé' napassalama'i polé ri asussanna. Engngerangngi sibawa timbangngi, éh sining tau madorakaé! Engngerangngi sining kajajiyangngé ri wettu riyolo; akuiwi makkedaé Iyya Allataala, sibawa dé'gaga laingngé, Iyya Allataala, sibawa dé'gaga iya pada-padaiyék-Ka. Polé ri pammulanna Uwappaissengengngi gau'-gau' iya rimunriyé, sipongenna riyolo Ubotoi aga iya maéloé kajajiyang. Adak-Ku: Kajajiyangngi matu apettuk-Ku, élo-Ku pasti Upogau'i! Uwobbii séddi panguwasa polé alau poléi pada-pada sikaju, manu-manu masekkang untu' pogau'i apettuku-Ku. Aga Upowada pasti Upogau'i matu, aga Urancana pasti Upogau'i matu. Engkalinga-Ka, éh sining tau macongka'é, iko iya masengngéngngi makkeadaé mabéla mupa apakalangngé. Maélo-Ka paddeppéi esso akkabalekengngé. Asalamakeng iya Uwabbéréyangngé dé'na naripasorona. Maélo-Ka passalama'i Yérusalém, sibawa mpéréngngi alebbireng Israélié.” Makkedai Puwangnge, “Eh Babél, nonnono polé ri kadéra akkarungemmu, sibawa tudang ri tompo'na awué. Dé' mumapecci sibawa macenning pada-pada riyolo. Lélui labbu'é sibawa batu; timpa'i bowommu, akkai ro'mu narapi paita bitimu, sibawa alléttoiwi sining saloé. Naitako matu tauwé mallusu-lusu, ripakatuna sibawa ripakasiri. Maélo-Ka makkabale lao ri iko, na dé muwi séddi tau Upaleppe.” Allataala mapaccinna Israélié paleppe'ki, asenna Puwang Iya Pommakuwasaé. Makkedai Puwangnge lao ri Babél, “Ammekkono, sibawa uttama'no ri laleng pettangngé. Dé'na nariteppuko ‘Ratunna sining akkarungengngé.’ Riyolo macai-Ka lao ri umma'-Ku, dé'na mennang Uwangga'i appunnangek-Ku. Nainappa Uwabbéréyang mennang lao ri iko, na iko dé' muwamaséiwi mennang, mala iya macowa-cowaé mutenre'i sibawa mabecco. Muwasengngi mancaji ratui mannennungeng, sibawa dé' mumaingekiwi iyaré'ga pikkiri'i accappurenna. Rimakkuwannanaro éngkalinga-Ka, éh iko iya pojiyéngngi lellungngi asennangengngé! Muwasengngi amangngi atuwommu, sibawa dé'gaga iya pada-padaé iko. Mupikkiri'i dé' mumancaji janda matu, sibawa wija-wijammu dé' nacappu matu. Iyakiya cinampe bawang, ri laleng siesso, iya duwa gau'éro massamangngi kajajiyang. Muwi pakéko passéhéré sibawa pajjappi, risittai towi lakkaimmu sibawa ana'mu. Marasa amakko ri laleng jamu, mupikkiri'i pangkaukemmu dé' narijampangi. Ripapusako ri apanrémmu sibawa pangissengemmu, muwasengngi dé'gaga iya pada-padaé iko. Iyakiya nakennako matu abala, pangissengeng passéhéré'mu dé' naulléi pasalai. Nalokkaiko matu abalaé, sibawa dé' mulléi pasalai. Poléi matu abinasangngé tenrisenna-senna, sibawa dé' musenna-sennai ri yolona. Attunru-tunruno bawang sibawa sininna pajjappi sibawa passéhéré'mu, iya réppaiyékko mappammulai wettu baiccu'mu. Nigana missengngi makkégunai iyaro ri alému, untu' péttauriwi sining balimmu. Posoko nasaba égana pangaja. Suroi sining pabotoé malluru passalama'ko; mennang iya puraé salidikiwi sininna sunna langié sibawa magguruiwi sining wéttowingngé, sibawa ri tungke uleng baru botoi aga iya mancajiyé totomu. Itai, padai mennang daramé iya nanré api; dé' naulléi mennang passalama'i aléna! Iyaro luwa' apié mapella senna'i untu' mennang, tenniya api mapella-pella untu' maddellang. Iyanaro akkégunana tau pabotoé untu' alému iya réppaiyékko mappammulai wettu baiccu'mu; tungke-tungke lao salaiko; dé'gaga polé untu' tulukko.” Engkalingai éh wija-wijanna Yakub, wija-wijanna Yéhuda iya pakééngngi asenna Israélié, adammu muwangakuiwi Allataalana Israélié, sibawa mattanro ri laleng asenna Puwangnge. Iyakiya iyaro ada-adammu dé' namalempu. Namuni makkuwaro, muwangakuiwi sibawa matempo makkedaé pabbanuwanako kota mapaccingngé; sibawa sanréko ri Allataalana Israélié iya riteppué Puwang Iya Pommakuwasaé. Makkedai Puwangnge, “Engkalingai, éh Israélié! Aga kajajiyang riyolo, maittani Uwabbirittanna; aga Upowada, tennasenna-senna Upogau'i sibawa Upancaji annessang. Uwisseng makkedaé matanré atiko, matedde ati sibawa kapala batu. Riyolopa nariyolo napurano Uboto; ri wettu dé'napa nakajajiyang, purani Uwappaissengeng, kuwammengngi aja' muwakkeda, makkedaé iyaro pangkaukenna dato-dato barahalaé. Sininna boto-Ku iya muwéngkalingaé purani kajajiyang; harusu'ko mangakuiwi makkedaé tongengngi iyaro adak-Ku. Makkekkuwangngé Uwappaissengengngi gau'-gau' iya barué, rahasiya-rahasiya iya dé'éppa muwissengngi. Nappai makkekkuwangngé Upancaji, natenniya riyolo; dé'pa naengka muwéngkalingai passalenna gau'éro, kuwammengngi dé' naweddikko makkeda, makkedaé muwissengngi sini-sininnaé. Uwisseng dé' naweddikko riyatepperi, riyolopa mutarompo selaku tomadoraka. Rimakkuwannanaro dé' muwissengngi, dé' muwi séddi ada lettu ri daucculimmu. Utahangngi cai-Ku kuwammengngi naripakalabba asek-Ku. Utahangngi untu' alému, kuwammengngi dé' naripaccappuko. Uwojiko ri laleng api anrasa-rasangngé, pada-pada péra'é ripatuléng ri laleng dapureng apié. Upogau'i iyaro untu' alé-Ku muto. saba' dé' Uleppessangngi asek-Ku ricarépai; alebbirek-Ku dé' Ubagéi sibawa muwi niga.” Makkedai Puwangnge, “Engkalingai Israél, umma iya Uwobbié, tette'-Ka Allataalamu. Iyya ritu pammulang, sibawa Iyya'to paccappureng. Limak-Ku palénne'i pallanggana linoé sibawa pallebba'i bitaraé. Rékko Uwobbii asenna, masitta'i mennang polé. Addeppungeng manenno sibawa éngkalingai! Ri yelle'na déwata-déwataé dé'gaga iya botoéngngi makkedaé tau ripilé-Ku gasai matu Babél; napogau'i matu aga iya Upuwéloé. Iyya ritu powadai sibawa mobbii, iya pimpingngéngngi, angkanna mallolongeng. Poléno maddeppé ri Iyya sibawa éngkalingai, riyolopa nariyolo Umabbicara sibawa patterui; sibawa ada-adak-Ku tuli Upancajiwi annessang.” Makkekkuwangngé Puwang Allataala suro-Ka sibawa mpérékka akuwasan-Na muto. Adanna Allataala mapaccinna Israélié, pappassalama'mu, “Iyya ritu Puwang Allataalamu, iya pagguruékko aga iya makkégunaé untu' alému, sibawa pimpikko ri laleng iya harusu'é muwola. Akkalarapanna mupuriyatiwi sining parénta-Ku, na asaléwangemmu pada-padai salo iya dé'é naengka namarakko, sibawa amaupekemmu pada-padai bombangngé ri tasi'é iya dé'é naengka nappésau. Wija-wijammu singngégai matu kessi'é; Utanggungngi mennang dé' naripaccappu matu.” Laono sibawa larino polé ri Babél, pallebbangngi iyaé birittaé lao kégi-kégi. Abbirittangngi sibawa gora-gora marennu: “ Puwangnge pura passalama'i Israélié, atan-Na! Wettunna Napimping mennang molai padang iya makabuttué, dé' mennang namanrasa-rasa madekka. Puwangnge puwé'i bulu batué sibawa passolo'i uwai, polé ri batué jompii uwai untu' mennang. Dé'gaga asalamakeng untu' tau majaé,” makkuwaniro adanna Puwangnge. Engkalingaka, éh sining wanuwa iya mabélaé pénessaiwi ada-adakku. Puwangnge mobbika ri wettu dé'napa rijajiyang, Napiléka mappammulai ri parémmanangngé. Naébbui ada-adakku sittareng peddangngé, nasibawang liman-Na muto, nalinrungika. Napancajika pada-pada ana' pana iya riyasaé, sibawa nataroi ri laleng tokkaé kuwammengngi nasadiya ripaké. Adan-Na lao ri aléku, “Iko ritu atak-Ku; ripakaraja-Ka matu nasaba iko.” Iyakiya makkedaka, “Paracumai turuppuse'ku; upaccappui awatangekku sibawa siya-siya!” Iyakiya mateppe'ka Puwangnge méwaiwi ha'ku, Allataala mpale'ka situru pangkaukekku. Ri wettu dé'napa ujaji, naobbika Puwangnge mancaji atan-Na, untu' paddeppungengngi umma Israélié, kuwammengngi nalisu mennang ri Aléna. Puwangnge pancajika ripakalebbi, Allataala iyanaritu awatangekku. Makkedai Puwangnge lao ri iyya, “Tugas iya lebbi battowaé tajekko, éh atak-Ku; tenniya banna mupalisui sésana wija-wijanna Yakub sibawa palisui arajanna suku-suku Israélié, iyakiya Upancaji towi tajanna bangsa-bangsaé, kuwammengngi naripassalama sininna linoé.” Allataala mapaccing Pappassalama'na Israélié makkeda lao ri tau iya ripakatuna senna'é, sibawa iya ricéccé ri bangsa-bangsaé enrengngé mancaji atanna sining panguwasaé, “Naitai matu sining arungngé pangkaukek-Ku; tokkongngi matu mennang pakalebbi-Ka. Naita towi matu sining panguwasaé, nanasuju' massompa.” Kajajiyangngi iyaro nasaba Puwangnge pura piléi atan-Na; Allataala mapaccinna Israélié matinului lao ri jancin-Na. Makkedai Puwangnge lao ri umma'-Na, “Ri wettu upuwéloé, mappébalika matu; ri esso mappassalama'-Ku, Utulukko. Ulinrungiko sibawa Ujagai, sibawa Upancaji assijancing untu' bangsa-bangsaé. Upalisui wanuwa iya masino-sinoé mancaji tana mana iya riyonroiyé. Tau iya ritarungkué Usuroi massu; iya engkaé ri onrong makalemmengngé Utiwii lao ri tajangngé. Mala ri bulu-bulu iya makellué dé' naakurangeng mennang, ri sillampé lalengngé tassadiyai inanré. Dé' mennang namancaji madekka iyaré'ga malupu, sibawa dé' nakennai tire mata esso ri padang kessi'é. Saba' Iyya, passayanna, pimpingngi matu mennang, sibawa dulungngi mennang lao ri bubbu-bubbu uwai. Maélo-Ka mébbu laleng lalo ri bulué, sininna watattana-Ku Uparatai matu. Polé mabéla makkapoléngngi umma'-Ku, polé ri manorang, yajang sibawa Sinim ri yattang.” Akkélonno éh langi, gorano éh lino, éh sining bulu, gorano marennu! Saba' poléi Puwangnge saléworiwi umma'-Na, Namaséiwi umma'-Na iya ritenre'é. Iyakiya makkedai pabbanuwana Yérusalém, “Nasalaini Puwangnge, nallupaini Puwat -ta.” Mappébaliwi Puwangnge, adan-Na, “Makkulléga séddié indo' mallupaiwi ana'na, sibawa dé' nasayangngi ana' riyaléna? Namuni nallupaiwi, dé' Uwallupaiko matu! Yérusalém, tuli Uwéngngerakko; Usobbi'i asemmu ri pale limak-Ku. Sining tau iya patokkongngékko masitta'i polé, sibawa iya puraé mancuru'ko laowi matu. Itai sibawa tiroi ri mattulilimmu, maddeppungenni ra'ya'mu sibawa lao ri iko. Nasaba Iyya, Allataala iya tuwoé, makkeda, tongeng, matempoko matu nasaba pabbanuwamu, pada-pada makkunraié mabangka'i nasaba bélo-bélona. Wanuwammu iya makabuttué sibawa masino-sinoé, macipi senna'ni makkekkuwangngé untu' sining tau iya macinnaé monroiwi. Sibawa sining tau iya maéloé paccappuko, laoni mabéla polé ri iko. Ana'-ana' iya jajiyé ri appalirengngé makkedai matu lao ri iko, ‘Iyaé wanuwaé macikke senna untu' aléku, wérénni onrong kuwammengngi weddikka monro kuwaé.’ Namumakkeda matu ri laleng ati, ‘Niga jajiyangngi iyaro ana'-ana'é untu' aléku? Dé'ga napura ateddéngenna ana'-ana'ku, sibawa dé'na wedding mémmana'na? Ritiwika ri laleng appalirengngé sibawa ripassala sibawa risalai alé-alé. Jaji polé kégi iyaro ana'-ana'é, sibawa niga pawekke'i mennang?’ ” Makkedai Puwang Iya Pommatanré lao ri umma'-Na, “Maélo-Ka mabbéré tanrang lao ri bangsa-bangsaé nanapalisui matu mennang ana'-ana'mu; ana'-ana'mu worowané naépa'i matu, sibawa ana'-ana'mu makkunraié nasoppoi. Arung-ngarungngé pada-padai matu ambo'é lao ri iko, sibawa sining ratué selaku indo'. Suju'i matu pakalebbiko sibawa pakariyawai aléna lao ri iko. Namuwissengngi matu makkedaé Iyya Puwang; tau iya mamménasaé ri Iyya dé' naripakacélé.” Makkutanaro, “Makkulléga rirampasa barang rappaé polé ri limanna pabbaranié, iyaré'ga tawangengngé risittai polé ri pakkatenninna tau mabecco'é?” Nappébali Puwangnge, “Iyanaro kajajiyang matu. Tawangenna sining pabbaranié risittaiwi paimeng. Barang rappana tau mabecco'é rirampasa'i matu paimeng. Saba' alé-Ku méwai balimmu; Upassalama'i matu ana'-ana'mu. Uwébbui matu balimmu mabo' dara, angkanna sisulléi matu mennang siyuno. Nanaissengngi matu sininna tolinoé, makkedaé Iyya, Puwang, Pappassalama'mu; Iya Pommawatangngé, Allataalana Yakub, Paccéra'mu.” Makkedai Puwangnge lao ri Israélié, “Eh umma'-Ku, muwasengngi Upaddésu'ko pada-pada séddié lakkai paddésu'i bainéna? Rékko makkuwaitu, kégani sure' telle'na? Muwasengngi Iyya balu'ko, pada-pada séddié ambo' balu'i ana'na lao ri passinge inrengngé? Dé'! Ritawakko sibawa riyabbéyang, nasaba dosa nenniya jamu muto! Magi napolé ri umma'-Ku dé' muwi séddi mappébali, wettuk-Ku polé mobbii mennang? Aga mammekkoiga bawang mennang nasaba nasengngi dé' Uwulléi paleppe'i sibawa passalama'i mennang? Sitongenna, nasaba parenta-Ku namarakko tasi'é, sining saloé Upancajiwi padang kessi, angkanna maté sining balé sibawa mabbau makennyé. Upancajiwi langié malotong senna, Utongkoi pada-pada sibawa kaing abbaratangngé.” Puwang Iya Pommatanré pagguruka mabbicara, kuwammengngi ada-adakku napéwatangiwi tau iya malemmaé. Elé-élé Napatokkong cinnaku untu' mapparéngkalingangngi pappagguruwan-Na ri aléku. Puwangnge mpérékka pappéjeppu; dé' umaronta iyaré'ga giling polé ri Aléna. Uwabbéréyangngi lekke'ku lao ri tau iya munruékka; sibawa rupakku lao ri tau iya bébbuéngngi janggo'ku. Dé' upagilingngi tappaku wettukku ripakatuna sibawa riyamméccui. Saba' Puwang Allataala tulukka, na dé' naripakasirika. Upéwatangiwi atikku kuwammengngi nasabbara; uwisseng dé' naripakasirika matu. Saba' macawé'i Allataala, Napannessaka dé' upasala. Niga maélo sibanta sibawa iyya? Laono mai tasilaong malluru. Niga méwaka? Suroi maddeppé ri iyya. Tongeng, Puwang Iya Pommatanré méwaika, niga barani pannessai pasalaka? Sininna iya tenre'ékka lennye'i matu pada-pada kaing macaré-caré nanré ané. Eh iko iya pakalebbiéngngi Puwangnge, sibawa méngkalingai ada-adanna atan-Na, laleng iya muwolaé naullé mapettangngi, sibawa dé'gaga cahaya iya mattappaé ri alému; iyakiya ateppe'no ri Puwangnge; attulekkenno ri Allataala. Eh iko maéloé cilakaiwi tau laingngé, ripabbinasako matu ri rancana riyalému. Puwangnge ritu mébbui iyaro kajajiyang, risissako matu sibawa masero. Makkedai Puwangnge, “Engkalinga-Ka, éh iko iya macinnaé ripassalama sibawa lao ri Iyya méllau pattulung. Engngerangngi bulu batué polé kégako ripa, sibawa akkaling batué polé kégako rikali. Engngerangngi néné-nénému Abraham sibawa Sara; wettuk-Ku mobbii Abraham, dé' nappunnai ana'; nainappa Ubarakkaki sibawa Uwéréng wija-wijanna iya maégaé. Yérusalém, Usaléworiko matu, sibawa sininna iya monroé ri sésé-sésamu. Sining padammu iya makabuttué Upancajiwi tammeng, pada-pada Edom, tammek-Ku iya macommo'é. Marennui matu tauwé kuwaro sibawa mariyo-riyo nenniya sukkuru sibawa élok-kélong. Pénessaiwi saddak-Ku, éh bangsa-bangsa, éngkalingai ada-adakku, éh umma'ku. Uwabbéréyangngi pappagguruwak-Ku lao ri bangsa-bangsaé, hukkung-hukkuk-Ku tajangiwi matu mennang. Asalamakeng iya Uwabbéréyangngé macawé'ni; wettu apakalak-Ku mawé'ni lettu. Aléku muto maélo paréntai bangsa-bangsaé. Sining wanuwa iya mabélaé tajek-Ka sibawa maddennuwangiwi pangkaukek-Ku iya baranié. Itani langié sibawa tiroi linoé; lennye'i matu langié pada-pada rumpué sibawa malusai matu linoé pada-pada waju cowaé, matéi matu sininna pabbanuwana pada-pada namo'é. Iyakiya asalamakeng iya Uwabbéréyangngé tette'i mannennungeng, sibawa apakalak-Ku dé' namaccappa matu. Engkalinga-Ka, éh bangsa-Ku, muwisseng aga iya tongengngé; pappagguruwak-Ku ritaroi ri laleng atimmu. Aja' mumétau rékko naéllé'ko tolinoé, aja' mumanenneng rékko napakatunako mennang. Binasai matu mennang sibawa lennye, pada-pada pakéyangngé nanré ané sibawa kaing bulu bimbala'é nanréi bebbu. Iyakiya asalamakeng iya Uwabbéréyangngé tette'i mannennungeng, apakalak-Ku matterui massossoreng.” Tokkonni oh Puwang, tulukki, passalama'ki sibawa akuwasam-Mu. Tokkonni pada-pada riyolo wettunna Mureppo Rahab sibawa gajangngi iyaro naga tasi'é gangka maté. Ikoto rakkoiwi tasi'é, uwai dolangeng iya maliyungngé. Mébbu-Ko laleng molai uwaiéro, kuwammengngi sining tau iya ripassalama'é weddingngi mallétto. Na sining tau iya ripaleppe'é ri Puwangnge lisui matu muttama'i mennang ri Yérusalém sibawa gora-gora mattappai rupanna mennang nasaba ariyo-riyong mannennungengngé. Marennui mennang sibawa mariyo-riyo, asarang sibawa addarékéngngé lennye'ni. Makkedai Puwangnge, “Iyya ritu saléworiko. Magi mumaélo lao ri tolino iya dé'é namannennungeng, lao ri tolino iya riyabbéyangngé pada-pada wellaé? Masa muwallupaiwi Puwang Pappancajimmu iya pallebba'éngngi langié sibawa palénne'i pallanggana linoé? Magi napuppu esso métauko lao ri ajjallo'na si pattenre'é iya sadiya-sadiyaé mappaccappu? Sitongenna, ajjallo'na mennanro dé' nakkanré matu lao ri iko. Sining tawangengngé ripaleppe'i matu masitta; dé' naakurangeng matu mennang inanré, sibawa dé' namaté matu sibawa rikuburu. Saba' Iyya ritu Puwang Allataalamu, iya pabbombangngéngngi tasi'é angkanna memmu bombanna. Asek-Ku iyanaritu Iya Pommakuwasaé. Iyya ritu pallebba'i langié sibawa palénne'i pallangga-pallanggana linoé. Makkedaka lao ri Sion: Iko ritu umma'-Ku; Uwérékko pappagguruwak-Ku nenniya linrungiko sibawa akuwasak-Ku.” Tokkonno, éh Yérusalém, tokkonno! Pahukkungeng iya napatakkennaé Puwangnge nasaba caina purani mulaloi gangka cappu. Polé ri pabbanuwamu dé'gaga pimpikko, polé ri tau monroiyékko dé'gaga dulukko. Nakennako duwanrupa abala; addimonrinna musué ancuru binasai wanuwammu sibawa matéi alupureng ra'ya'mu. Dé'gaga iya mamasé sibawa saléworiko. Ri tungke cappa laleng menrungngi sining taummu acappureng awatangeng pada-pada jonga iya nalaé sappang. Nakennai mennang caina Puwangnge, sibawa nakenna pakkamparenna Allataala. Engkalingai éh sining tau iya ritenre'é, iya tassulus-sulungngé pada-pada tau mabo'é! Makkuwaiyé adanna Puwang -mu, Puwang Allataalamu iya méwaiyékko, “Anrasa-rasang iya Uwabbéréyangngé ri laleng cai-Ku, Uwalai matu paimeng polé ri iko. Soroi matu cai-Ku, na dé'na mutanggungngi. Iyaro anrasa-rasangngé Uwabéréyangngi lao ri tenre'ékko, iya puraé suroko léwu ri tanaé, sibawa léjja-léjja'ko, samannako laleng iya naolaé tauwé.” Tokkonno, éh Yérusalém, tokkonno! Pakkasse'i atimmu! Pasangngi pakéyang arajammu! Eh Yérusalém, kota iya mapaccingngé, tau najisi'é dé'na nauttama lalo ri gerbammu. Tokkonno polé ri awué, éh Yérusalém, akkeppikengngi awu iya maddeppéé ri alému. Leppessangngi ranté iya siyoéngngi ellommu, éh pabbanuwana Sion iya ritawangngé! Makkedai Puwangnge lao ri umma'-Na, “Ribalu'ko sibawa paracuma, jaji makkekkuwangngé ripaleppe'ko sibawa paracumato. Riyolo laoko ri Maséré sibawa monro kuwaro selaku tau laing. Nainappa Asyur para'ko temmakkéalasang. Makkekkuwangngé aga urusak-Ku kuwaé? Natawakko tau Babél-é sibawa makkuwaro bawang. Mennang iya tenre'ékko matempoi sibawa matteru-teru pakatuna-Ka. Rimakkuwannanaro muwangakuiwi matu makkedaé Iyya Allataala, na ri wettuéro muwissengngi matu makkedaé iyya ritu mabbicara lao ri iko.” Temmaka sennanna mitai apolénna suroé; joppai malléttoiwi bulué sibawa tiwi karéba madécéng, karéba asaléwangeng, biritta asalamakeng untu' Sion; adanna, “Allataalamu Arung!” Engkalingai kelli marennunna pengawalna kotaé, gora-gorai mennang massibawa! Nasaba nasibawang mata ulunna mennang mitai Puwangnge lisu ri Sion. Gora-gorano éh sésa-sésana Yérusalém, saba' Puwangnge saléworiwi umma'-Na sibawa paleppe'i Yérusalém. Nappaitangngi akuwasanna Puwangnge ri yolona matanna sininna bangsaé. Nanasabbingngi sininna linoé asalamakeng polé ri Allataalata. Laono! Salaiwi kota Babél, éh iko iya tiwiéngngi pakkakkassa bolana Allataala! Aja' mugéssai barang iya najisi'é; pépaccingiwi alému ri wettu dé'napa mujoppa. Dé' mumapperi-peri matu lao, sibawa dé' napada-pada tau iya lariyé. Saba' Puwangnge pimpikko matu; Allataalana Israélié linrungiko polé ri sininna sulapa'é. Makkedai Puwangnge, “Sitongenna, mallolongengngi matu atak-Ku; ripojiwi matu sibawa ripakatanré. Riyolo maéga tau tasséleng mitai, risolangiwi rupanna angkanna dé'na napada-pada tolinoé. Iyakiya makkekkuwangngé maéga bangsa naébbu hérang, mammekkoi sining arungngé nasaba bengngai. Naitai matu sibawa najeppuiwi, iya riyolonaé dé' mennang naissengngi.” Nappébali iyaro bangsaé, “Niga mateppe ri aga iya puraé taéngkalinga? Lao riniga pura ripannessa akuwasanna Puwangnge? Napuwéloi Puwangnge iyaro atan-Na pada-pada lokkoé iya tuwoé ri tana iya makarossaé. Dé'gaga magello ri aléna untu' taita; dé'gaga pataré' untu' tacinnai. Tapakatunai sibawa mabélaiwi aléna, tau iya pennoé anrasa-rasang sibawa tanggung apeddireng. Dé' muwi séddi tau maélo mitai, sibawa muwi idi dé'to tajampangiwi. Sitongenna lasata ritu natanggung, anrasa-rasatta ritu iya nanrasa-rasaiyé, padahal riyasengngi anrasa-rasannaro pahukkungenna Allataala ri aléna. Iyakiya riloi nasaba dosa-dosata, sibawa ribarasa nasaba jata. Rihukkungngi kuwammengngi ripassalama'ki, nasaba sining lona naripajjappaki. Pusa manekki pada-pada bimbala'é, tungke-tungke sappai lalenna muto. Puwangnge pura patakkennai ri aléna jata maneng. Rigaukengngi sibawa mabecco, iyakiya natanggungngi sibawa sabbara. Dé' natimpa'i bawana pada-pada ana' bimbala iya ritiwié ri aggérékengngé iyaré'ga indo' bimbala iya ricukkuru'é bulunna. Ritahangngi sibawa riadéléki, nainappa riyassarénréngeng sibawa rihukkung maté. Dé'gaga paduliwi totona; matéi nasaba dosana bangsata. Rikuburu'i silaong tau majaé; tampunna ri tengnga-tengnganai tau sugié, namuni dé' naengka napogau' ja, sibawa dé' naengka napabengnguwang.” Napuwéloi Puwangnge makkedaé manrasa-rasai, sibawa mabbéréyangngi aléna selaku akkarobangeng pappaledda dosa. Namalampé umuru'i matu sibawa mitai asaronna naolai aléna nakajajiyang élona Puwangnge. Rimakkuwannanaro makkedai Puwangnge, “Puranana nakenna anrasa-rasang, masennangngi matu sibawa massaunna. Iyaro atak-Ku, iya pésennangiyéngngi atik-Ku, purani natanggung pahukkungenna tau maégaé; nasaba aléna Uwaddampengengngi matu mennang. Macenningngi mabbéréyangngi atuwonna sibawa muttama abbilangenna tau majaé. Naéssangngi dosana tau maégaé sibawa massempajang kuwammengngi mennang nariyaddampengeng. Na-Uwéréngngi maéga tau selaku hadiya, sibawa lolongengngi bagiyang silaong sining tau tongengngé.” Yérusalém, riyolo pada-padako makkunrai manangngé iya dé'é nawedding mémmana. Iyakiya makkekkuwangngé gora-gorano, sibawa akkélonno sibawa marennu! Saba' maéga senna ana'-ana'mu, napakacauri ana'-ana' makkunrai iya dé' narisalai ri lakkaié. Lowangiwi kéma-kéma onrommu; palampériwi sining tuluna sibawa pakkasse'i patto-patto'na! Tattamba malowakko matu liyatau sibawa liyabéyo, pabbanuwamu natudangiwi matu tanana bangsa-bangsaé sibawa monroiwi kota-kota iya masino-sinoé makkekkuwangngé. Aja' mumétau, dé' muripakasiri matu; dé' muripakatuna matu sibawa masiri senna. Muwallupaiwi matu atemmatinuluremmu ri wettu malolomu; dé'na muwéngngerangngi asino-sinommu selaku janda. Pappancajimmu pada-padai lakkaié ri alému, Allataala mapaccinna Israélié iyanaritu Pappassalama'mu. Puwang Iya Pommakuwasaé, iyanaro asen-Na, Aléna Allataala makuwasaiwi sininna linoé. Israélié, pada-padako séddi bainé maloloé iya messé nasaba risalaiwi ri lakkainna. Iyakiya Allataala mobbiko paimeng sibawa makkeda, “Cinampe bawang Usalaiko; nasibawang pammasé pappoji Uwalako paimeng. Cinampe bawang mabboko-Ka polé ri iko nasaba cai-Ku iya mpo'bo'é. Iyakiya nasibawang pammasé mannennungengngé Uwamaséiko.” Makkuwaniro adanna Allataala Pappassalama'mu. “Pada-pada ri wettunna Nuh majjanci-Ka makkedaé lémpe rajaé dé'na nalle'i linoé, makkuwatoro makkekkuwangngé majjanci-Ka makkedaé dé'na Umacai matu iyaré'ga mancakko paimeng. Namuni goyang sining bulué sibawa bulu-bulué, dé'to Uwappésau mamaséiko. Tuli Uwakkatenningngi assijancing assidaméngek-Ku,” adanna Puwang iya mamaséiyékko. Makkedai Puwangnge, “Eh Yérusalém, kota iya macilakaé, dé' pakkullémmu sibawa dé' passaléwo. Maélo-Ka palénne'i paimeng sining pallanggamu, sibawa batu-batu mangke'é. Upatettongngi sining bénténgngé polé ri paramata batu dalimaé, pintu-pintu gerbammu poléi ri batu paramataé, sining témbo'mu poléi ri maddupa-rupang paramata intang. Sininna pabbanuwaku mancajiwi ana' guruk-Ku, madécéngngi matu mennang sibawa saléwangeng. Ripatettokko ri yasé'na adélékengngé, ripabélai polé ri amétaurengngé sibawa attenrekengngé. Rékko rigasako, tenniya Iyya suroi, nigi-nigi gasako menrungngi matu. Iyya ritu pancajiwi panré bessié iya papiéngngi apié untu' lanroi senjataé. Iyya'to ritu pancajiwi prajuri'é iya pakééngngi iyaro senjataé untu' mabbuno. Iyakiya tungke senjata iya rilanroé untu' méwako, dé' namallolongeng matu. Sibawa tungke nattenrekengngé ri laleng pengadilangngé mupabuttiwi matu sala. Uhadiyakangngi matu apakalangngé lao risining atak-Ku,” makkuwaniro adanna Puwangnge. Makkedai Puwangnge, “Lao manenno mai iko iya madekkaé, énunno, tassadiyai uwai. Poléno iko iya dé'é nappunnai dowi, tarimani gandongngé temmakkamaja, sibawa manréno! Anggoro sibawa susué tassadiyai, tarimai sibawa cuma-cuma. Untu' aga melli séuwaé iya dé'é namappésennang, sibawa majjama untu' aga iya dé'é napawessori? Turusiwi parénta-Ku, namuwanréi matu iya makessingngé, sibawa péneddingiwi patala iya malunra'é. Engkalingai, éh bangsa-Ku, laono ri Iyya, Uwérékko matu atuwong mannennungengngé. Nasaba pammasé sibawa atinulureng iya Uwajjanciyangngé lao ri Daud, siyoka janci mannennungeng sibawa iko. Sitongenna, Upancajiwi pamimping sibawa pallima, sabbi polé ri akuwasak-Ku untu' bangsa-bangsaé. Muwobbii matu bangsa-bangsa laingngé, sibawa masitta'i mennang polé ri iko, nasaba Iyya, Puwang Allataalamu, Allataala mapaccinna Israélié, saba' Iyya pura pakarajako.” Lisuno ri Puwangnge ri wettu weddinna mupa; angobbino ri Aléna ri wettu macawé'-Na mupa. Sitinajai tau majaé pédécéngiwi atuwonna, sibawa pinrai cara mappikkiri'na. Leppessangngi lisu ri Puwangnge, kuwammengngi nalolongeng paressé babuwa-Na. Sitinajai giling lao ri Allataalata, saba' maddampengngi Puwangnge sibawa makacuwa. Makkedai Puwangnge, “Pikkirak-Ku tenniya pikkirammu, sibawa lalek-Ku tenniya lalemmu. Sittanré langié polé ri yasé'na tanaé, sittanréto iyaro pikkirak-Ku ri yasé'na pikkirammu, sibawa lalek-Ku ri yasé'na lalemmu. Pada-pada bosié teppai polé ri langié, na dé' nalisu, sangadinna narica'i linoé, pacommokiwi sibawa patuwoi tanet-tanengngé, mabbéré wassélé untu' riyampo sibawa riyanré, makkuwatoro ada-ada iya Upowadaé dé' nalisu ri Iyya sibawa siya-siya, iyakiya naulléi pogau'i aga iya Upuwéloé, sibawa narapii sininna iya Uwakkattaiyé. Musalaiwi matu Babél sibawa masennang, sibawa riantara massu sibawa salama. Bulu sibawa bulu-bulué marennui matu sibawa gora-gora, aju-kajungngé ri dare'é mappaleppa'i. Aju camaraé sulléiwi matu alekale maddorié, tanet-taneng bungaé sulléiwi alekale'é. Kajajiyangngi iyaro kuwammengngi naripakalabba-Ka; selaku tanrang mannennungeng iya dé'é nateddéng.” Makkedai Puwangnge lao ri umma'-Na, “Pogau'i aga iya adélé'é sibawa iya siturué sibawa hukkuk-Ku. Saba' dé'na namaitta Upolé passalama'ko sibawa adélékek-Ku ripannessai. Ubarakkaki tau iya turusiyéngngi esso Saba'é sibawa dé' napanajisi'i iyaro essoé. Tau iya dé'é napogau'i majaé Ugaukengngi matu sibawa makessing.” Tau laing iya masséddié sibawa umma'na Puwangnge dé' nawedding makkeda, “Dé' napalaloka Puwangnge sompai Aléna silaong umma'-Na.” Tau iya rilase'é dé' nawedding mappikkiri “Dé' naweddikka mancaji wargana umma'na Puwangnge, saba' dé' naweddikka lolongeng wija-wijanna.” Makkedai Puwangnge lao ri mennang, “Rékko mujampangiwi esso Saba'é, rékko matinuluko lao ri assijancik-Ku sibawa pogau'i aga iya sennangiyéngngi atik-Ku, riyéngngerangngi matu asemmu ri laleng Bola-Ku sibawa ri yelle'na bangsa-Ku. Lebbi makessingngi iyaro naiya mappunnaiyé ana'-ana' worowané sibawa makkunrai. Uwérékko aseng mannennungeng iya dé'é nariyallupai matu.” Makkedai Puwangnge lao risining tau laingngé iya muttama'énna bilangenna umma'na Puwangnge, iya pojiyéngngi Puwangnge sibawa massompa lao ri Aléna, iya pakalebbiéngngi esso Saba'é sibawa matinulu lao ri assijancin-Na, “Utiwiko matu ri Sion, ri bulu-bulu-Ku mapaccingngé, sibawa Uwéréng arennung ri bola assompak-Ku. Sining akkarobangeng iya muwakkasuwiyangengngé ri mézba-Ku Utarimai matu. Riteppui matu Bola-Ku bola sempajang untu' sininna bangsaé.” Mappakkuwaiyé adanna Puwang Iya Pommatanré iya mantara'éngngi Israélié lisu polé ri appalirengngé, “Maélo-Ka tiwii sining tau laingngé untu' masséddi sibawa mennang iya maddeppungengngénna.” Puwangnge suroi bangsa-bangsa laingngé polé pada-pada olokolo masekkangngé untu' luruiwi umma'-Na. Adanna Puwangnge, “Sining pamimpinna bangsa-Ku iyanaritu sining tau buta! Dé' aga-aga mennang naisseng. Pada-padai mennang asu pépé iya dé'é nabbokka, iyakiya matinroi bawang sibawa mannippi. Masennang tongeng mennang matinro! Pada-padai mennang asu mabélalaé iya dé'é naengka namesso. Iyaro sining pamimpingngé dé' naengka najeppuiwi. Tungke-tungke pogau'i siyélo-élo atinna sibawa sappa asarong rialéna. Makkedai iyaro sining pammabo'é, ‘Laono mai taénung anggoro sibawa ménung gangka cau! Lebbi kessingngi baja naiya essoéwé!’ ” Iyakiya iko, tau madosaé, poléno untu' riadéléki! Dé' mulebbi makessing naiya tukang passéhéré'é, tau iya pojiyéngngi malaweng sibawa cakkuribangngé! Niga mucawa-cawai? Niga muwéllé-kéllé? Tenniyakoga wijanna pabbellé sibawa parronta'é? Musompai déwata-déwata acommokengngé sibawa leppessangngi alému rikuwasai ri napessummu ri yawana ajukajung makarame'é. Mukuburu'i ana'-ana'mu ri lompo saloé, ri yelle-elle batué. Jaji sinnanna paddeppungekko batu-batu malengngo polé kuwaro. Iyanaro bagiyammu! Lao ri batu-batuéttoro tiri'ko anggoro sibawa makkasuwiyangeng gandong. Muwasengngi masennakka sibawa sininnaro? Laoko ri tompo-tompo bulué untu' makkasuwiyangeng akkarobangeng sibawa sennangiwi napessummu. Mupasangngi dato-dato'mu iya macarépaé ri tau-tau tange'na bolamu. Musalai-Ka. Muludungngi pakéyammu sibawa ménré ri onrong atinrong iya rilowangiyé sibawa canrimmu iya mupéssaroiyé untu' méwako siyatinrong, nainappa musennangi napessummu. Pakéko minnya sibawa wangi-wangiyang, nainappa lao sompai déwata Molokh. Kirikko sining suro lao ri wanuwa-wanuwa mabélaé, mala lao ri linona tau maté. Teppettu paddennuwakko sipposo-poso sappa déwata-déwata. Muwasengngi mennang naulléi mpérékko sumange baru, angkammu dé' mumancaji malemma. Makkedai Puwangnge, “Niga iyaro déwata-déwataé iya mébbuékko métau, angkammu mabbellé sibawa dé'na muwéngngerak-Ka? Dé'naga musompa-Ka nasaba maitta senna'-Ka mammekko? Iyakiya Upaissengiko; iyaro atinuluremmu dé' natongeng, sibawa sininna pangkaukemmu dé' nakkéguna untu' alému. Rékko gorako, leppessangngi iyaro sining dato-dato'é passalama'ko! Teddéngngi matu naluttureng anging nenniya lennye sibawa séddi seppung nappase! Iyakiya tau iya mallinrungngé ri Iyya namanai matu iyaro wanuwaé sibawa sompa-Ka ri Bola-Ku.” Engka iya makkedaé, “Ebbuno sibawa passadiyano laleng untu' umma'-Ku, paddésu'i sininna palawa-lawaiyé.” Saba' makkuwaiyé adanna Allataala Iya Pommatanré sibawa mapaccingngé, iya makuwasaé untu' mannennungeng, “Monroka ri onrong iya matanré sibawa mapaccingngé, iyakiya ri yelle'nato sining tau iya mariyawa atié sibawa iya sesse'éngngi dosa-dosana, untu' palisui sumange'na sibawa amménasanna mennang. Dé' na untu' mannennungeng Upassalai umma'-Ku; dé' na untu' matteru-teru macai-Ka, kuwammengngi dé' mennang napettu paddennuwang, padahal Iyya ritu patuwoi mennang. Dosa angowanna mennang mébbu-Ka macai, rimakkuwannanaro Uhukkungngi mennang sibawa Usalai. Iyakiya matedde atiwi mennang sibawa tette'i piléi lalenna muto. Purani uwita kédona mennang, iyakiya Upajjappa towi matu mennang. Maélo-Ka pimpingngi sibawa tulungngi mennang sibawa saléworiwi tau iya messé atié. Maélo-Ka mabbéré atennangeng lao risininna tauwé, muwi macawé'é iyaré'ga mabélaé. Maélo-Ka pajjappai umma-Ku Iyakiya tau majaé iyanaritu pada-padai tasi'é iya mabbombangngé sibawa dé' naengka natennang. Solo'na tiwii roppo sibawa bungka. Dé'gaga atennangeng untu' tau madosaé,” adanna Puwangnge. Makkedai Puwangnge, “Gorano maggangka ullé! Paissengiwi umma'-Ku dosa-dosana mennang. Nasompa-Ka mennang esso-esso, sibawa macinna missengngi élo-Ku, samanna mennang napogau'i iya makessingngé, sibawa mapato lao ri hukkuk-Ku. Makkedai mennang makkedaé masennangngi mennang sompa-Ka sibawa macinnaiwi hukkuk-Ku iya adélé'é.” Makkutanai iyaro bangsaé, “Aga akkégunana mappuwasa rékko dé' naitai Puwangnge? Aga gunana tapakariyawai alé rékko dé' Najampangiki?” Makkedai Puwangnge, “Sitongenna, ri wettu mappuwasamu, sappako asarong riyalé sibawa para'i sining tau mupagajiyé. Ri wettu mappuwasamu, sibantako sibawa mallaga nenniya tinda sibawa ateddekeng. Muwasengngi caramu mappuwasa pakédo-Ka untu' méngkalingai sining sempajammu? Rékko mappuwasako, musissai alému; pacuku'i ulummu pada-pada daunna wellaé. Pallebba'ko kaing karung sibawa muguguriwi awu, namuléwu ri yasé'na. Iyagaro muwaseng puwasa? Muwasengngi masennak-Ka sibawa pangkaukengngéro? Iyanaé puwasa iya Uwéloriyé: Paleppe'i balenggu pattenre'é sibawa tiwi dé'é naadélé, nenniya paleppe'i sining tau iya ritenre'é. Bagéi inanrému sibawa tau iya malupué, tarimai sining tau paréllau-éllauwé ri bolamu. Wéréngngi pakéyang tau mallusu-lusué, sibawa aja' musampéyangngi silessuremmu iya parellué ritulung. Namasiya' matu tajangngé ri alému pada-pada éléé, sibawa sining lomu masitta'i majjappa matu. Usibawakko matu untu' passalama'ko. Ahadérékek-Ku linrungiko matu polé ri sininna sulapa'é. Rékko massempajakko, Utarimai matu. Rékko mangobbiko ri Iyya, Ubaliwi matu. Aja'na mutenre'i pada-padammu, pappésauni assimusurengngé sibawa pétenna'é. Panréi tau malupué sibawa tulungngi sining tau iya ritenre'é. Rékko mupogau'i makkuwaéro, pettangngé ri seddému mancajiwi matu sittajang essoé. Tuli upimpikko matu sibawa pamessoriko ri tana iya marakkoé; Ujagaiko matu kuwammengngi tette'ko madising sibawa mawatang. Pada-padako matu tammeng iya genne'é uwaina, pada-pada mata uwai iya dé'é naengka namarakko. Kota iya maittaénna mancaji ruttungeng mupatettongngi matu paimeng ri yasé'na tettongenna iya riyoloé. Riteppuko matu ‘Bangsa iya mappatettongngé paimeng témbo-témbo sibawa pédécéngiwi sining bola iya ancuru'é.’ ” Makkedai Puwangnge, “Pakalebbii esso Saba'é selaku esso untu' Puwangnge. Aja' muurusu'i apentingeng ri alému ri essoéro. Pakarajai essoéro selaku esso mariyo-riyo; pakalebbii essona Puwangnge sibawa aja' mulao; aja'to muwappallaung iyaré'ga mabbicara iya siya-siyaé. Namumarennu matu nasaba mattumaniko ri Iyya. Uwébbuko matu malebbi risininna linoé. Tuwoko matu masennang sibawa wassélé tana manana Yakub, néné-nénému. Iyya, Puwang pura mabbicara.” Aja' muwasengngi Puwangnge malemma senna'i untu' passalama'ko, iyaré'ga mataru-taru senna untu' méngkalingai pangobbina. Nasaba jamu ritu na dé' Naéngkalingai wettummu massempajang lao ri Aléna. Dosa-dosamu ritu passarakko polé ri Allataala. Salako nasaba mabbelléko sibawa macéko-céko, nasaba pogau'i ateddekengngé sibawa mabbuno. Muwapparapekengngi parakaraé temmakkéalasang sibawa madélékiwi dé' naadélé. Mabbelléko sibawa mattuwangngi iya siya-siyaé; mébbuko rancana untu' cilakaiwi tau laingngé sibawa pogau' ja. Matteru-teruko rancanai majaé, sibawa macinna pajoppai masitta. Dé' mubata-bata mpunoi tau iya dé'é napasala. Kégi-kégiko lao, salaiko aruttungeng sibawa abinasang. Dé' muusahakangngi assipammasé-maséngngé, sibawa sininna pangkaukemmu dé' naadélé. Lalemmu malléko-léko, na tau iya maccowériyéngngi iyaro lalengngé dé' namasennang matu. Makkedai iyaro bangsaé lao ri Allataala, “Riissenni makkekkuwangngé magi dé' Mupassalama'ki polé risining tau iya tenre'ékki. Tajekki tajang, iyakiya banna apettangeng engka. Maggarambakki pada-pada tau butaé; tabbuttuki ri tangassoé pada-pada ri tengnga bennié; ri tengngana tau tuwoé pada-padaki tau maté. Métauki sibawa messé; sappaki adélékeng, iyakiya dé'gaga; mamménasaki asalamakeng, iyakiya siya-siyai. Maéga tongenni jata lao ri Iko; dosa-dosata passalaki. Rimaingeki tongenni jata, sibawa missengngi dosa-dosata. Massakkani sibawa maronta lao ri Puwangnge, sibawa dé' tamaélo maccowériwi Allataalata. Purani ritenre tau laingngé sibawa kédo sala; pusai pikkiratta, sibawa ada-adatta belléi. Hukkung iya adélé'é purani napassala, sibawa adélékengngé napabélaiwi. Napakariyawai alempurengngé ri onrong-ngonrong samaé, sibawa napalibenréngngi atinulurengngé. Dé'na gaga tau malempu, na nigi-nigi mabélaiwi jaé, aléna mancaji korbanna jaé.” Purani naita Puwangnge, na dé' namasennang makkedaé dé'na gaga adélékeng. Hérangngi makkedaé dé'gaga malluru sibawa dé'gaga paéwai. Nanapakéi akuwasan-Na untu' passalama'i nenniya mpéréngngi mennang apakalang. Napakéi adélékengngé sibawa asalamakengngé selaku waju bessi sibawa palo-palo baja. Mattedde'i untu' palisui keadaangngé sibawa wale'i dé'é naadélé. Nawale'i sining balin-Na situru sibawa pangkaukenna mennang. Mala bangsa-bangsaé ri pulo-pulo iya mabélaé dé' naleppe polé ri pahukkungen-Na. Akuwasang sibawa arajan-Na naétauriwi matu sininna tauwé polé ri alau lettu ri yajang. Poléi matu pada-pada salo iya masolo'é iya ripabbombangngé ri anging marajaé. Makkedai Puwangnge lao ri umma'-Na, “Maéloka lao ri Yérusalém untu' passalama manekko iya toba'é polé ri dosa-dosamu. Mébbuka assijancing sibawa iko: Uwérékko akuwasak-Ku sibawa pappagguruwak-Ku untu' mannennungeng. Pagguruwangngi ana'-ana'mu kuwammengngi wedding towi nappagguruwang mennang massossoreng makkekkuwangngé lettu mannennungeng.” Tokkonno sibawa ancajino tajang, éh Yérusalém, saba' tajang asalamakemmu poléni; natappako Allataala sibawa alebbiren-Na. Napennoiwi apettangeng linoé, bangsa-bangsaé natongkoi akalemmengeng; iyakiya tajanna Puwangnge mompoi ri yasé'mu, cahaya alebbiren-Na mancaji manessai ri yasé'mu. Mattinro-tinrosengngi bangsa-bangsaé lao ri tajammu, tattaré'i sining arungngé ri cahaya iya mompoé untu' alému. Itai aga kajajiyang ri mattulilimmu; maddeppungengngi ra'ya'é untu' lisu ri iko. Ana'-ana'mu worowané poléi polé mabéla, ana'-ana'mu makkunraié naépa'i. Muwitanaro hérakko sibawa maccahaya tappamu; masé'ko sibawa maloppo ati. Waramparanna bangsa-bangsaé ritiwii ri iko, asugireng polé ri liweng tasi patabbolloiko. Rikatulungngi wanuwammu ri maéga unta, poléi mennang ri Midian sibawa Efa. Polé ri Syéba tiwii tauwé ulaweng sibawa kamennyang, nanapojiwi pangkaukenna Puwangnge. Bémbé bimbala'na Kédar ritiwii lao ri iko bimbala lai polé ri Nébayot tassadiyai untu' assompammu. Iyaro akkarobangengngé pésennangiwi atinna Puwangnge Napattappai Bola-Na iya pennoé arajang. Aga iyaro sajéé pada-pada ellungngé pada-pada jangang-jangang iya luttué lisu? Iyanaro sining kappala iya polé mallabu tiwii umma'na Allataala lisu polé ri wanuwa mabélaé. Péra' sibawa ulaweng natiwi untu' pojiwi Puwang Allataalamu; untu' Allataalana Israélié Iya Pommapaccingngé, iya mébbuéngngi umma'-Na ripakalebbi. Makkedai Puwangnge lao ri Yérusalém, “Tau laingngé patettongngi matu paimeng témbo'mu, sibawa arung-ngarungngé tumaniko matu. Riyolo Uhukkukko ri laleng cai-Ku, iyakiya makkekkuwangngé Upuwéloi mamaséiko. Esso wenni pintu gerbammu tattimpa'i matu, kuwammengngi asugirenna bangsa-bangsaé weddingngi riantara lao ri iko, nasibawang arung-ngarunna mennang selaku tawanang. Bangsa sibawa akkarungeng iya dé'é namaélo mattumani ri iko, binasai matu sibawa lennye'i teddeng. Abangkakenna ale Libanon ritiwii matu ri iko aju pong berangangngé, camaraé sibawa érué untu' pancajiwi Bola-Ku mattappa, sibawa pagelloriwi onrok-Ku makkella. Ana'-ana'na tenre'ékko poléi suju', iya puraé pakatunako tunru'i matu, riteppuko matu ‘Kotana Puwangnge ’, ‘Sion, Kotana Allataala Mapaccinna Israélié’. Dé' narisalaiko matu sibawa ricéccé, sibawa dé' narileppessang mancaji masino-sino. Upancajiko abangkakeng iya mannennungengngé, onrong arennung untu' mannennungeng. Napiyarako matu bangsa-bangsaé sibawa arung-ngarungngé, pada-pada séddié indo' piyarai ana'na. Namuwissengngi matu makkedaé Iyya'na Puwang, Pappassalama'mu, sibawa Allataalana Israél iya mawatangngé Pappaleppe'mu. Tiwika ulaweng selaku passulléna gessaé, sibawa péra' passulléna bessié. Uwéréngngi gessa selaku passulléna ajué, sibawa bessi selaku passulléna batué. Uwébbui matu wanuwammu amang sibawa tennang, nenniya riparéntai sibawa adélé. Dé'na gaga karéba passalenna ateddekengngé ri wanuwammu, passalenna ancurukengngé sibawa aruttungengngé ri daéramu. Pada-padai témbo'é Ulinrungiko matu, sibawa mupoji-Ka matu selaku Pappassalama'mu. Dé' muparellu ritappa mata esso ri essoé, sibawa dé' naparellu ritajangi kéteng ri wennié. Saba' Iyya Puwang mancaji tajang mannennungeng ri alému, Utappako sibawa arajak-Ku. Untu' alému engka matu mata esso iya dé'é naengka nalabu, sibawa kéteng iya dé'é naengka nalabu. Saba' Iyya Puwang mancaji tajang mannennungeng ri alému maccappa'i matu wettu abbaratammu. Tinda'i matu pabbanuwamu sibawa tongeng, nappunnangiwi matu wanuwaé untu' mannennungeng. Pada-padai mennang cangkokangngé iya alé-Kué tanengngi, untu' pannessai arajak-Ku. Mala kaluwarga iya baiccu'é sibawa matunaé mancajiwi matu bangsa iya battowaé sibawa mawatangngé. Iyya Puwang tinda masitta, ri wettu iya teppa'é.” Akuwasanna Puwang Iya Pommatanré engkai ri aléku; napiléka sibawa nasuroka untu' tiwi karéba lao ri tau kasiyasié sibawa pajjappai tau iya mareppo'é atinna; untu' mappallebbangengngi lao ri tau ritahangngé makkedaé ripaleppe'i mennang masitta, sibawa lao risining tauwé ri laleng tarungkué makkedaé ripaleppe'i matu mennang. Nasuroka untu' mabbirittangngi makkedaé narapini wettunna Puwangnge mappassalama; untu' saléworiwi sininna iya masaraé, sibawa mpale'i sining balinna mennang; untu' mabbéré arennung sibawa ariyo-riyong lao ri tau iya messé sibawa mabbarataé; untu' pinrai amessénna mennang mancaji élong pappojiyang. Pada-padai matu mennang aju iya alénaé Puwangnge tanengngi. Napogau'i matu mennang iya makessingngé sibawa tongengngé, angkanna Puwangnge ripakaraja. Napatettongngi matu mennang kota-kota iya maittaénna maruttung sibawa patettongngi onrong-ngonrong iya maittaénna masino-sino. Eh bangsaku, tau laingngé tumaningiko matu; naampii matu olokolo'mu enrengngé jamai dare sibawa palla anggoro'mu. Riteppuko matu atanna Allataala sibawa riyaseng imanna Puwat -ta. Mupéneddingiwi matu asugirenna bangsa-bangsaé sibawa marasa matempo nasaba waramparanna mennang. Nasaba purano masiri leppi wékkaduwa, enrengngé rota'é nenniya atunangngé mancajini bagiyammu, namulolongeng matu mana leppi wékkaduwa ri wanuwammu sibawa mappunnaiwi ariyo-riyong mannennungengngé. Makkedai Puwangnge, “Upojiwi adélékengngé nenniya céccéi attenrekengngé enrengngé jaé. Uwérékko matu saromu sibawa matinulu, sibawa siyo janci mennennungeng sibawa iko. Tarompoi matu wija-wijammu kégi-kégi, kalabba ri yelle'na sininna bangsaé. Nasininna tau iya mitaéngngi mangakuiwi matu, makkedaé iyaé bangsaé Ubarakkakiwi.” Makkedai Yérusalém, “Marennuka nasaba Puwangnge, mariyo-riyoi atikku nasaba Allataala. Pada-pada bottimpurané sibawa makkunraié pakéi bélo-bélo sining magello, makkuwaniro Puwangnge pakkennangekka waju asalamakengngé sibawa apakalangngé. Pada-pada biné iya riyampoé tuwoi mancaji tanet-taneng, Makkuwaniro Puwang Allataala patuwoi asalamakengngé na sininna bangsaé pojiwi matu Aléna.” Nasaba Yérusalém maéloka mabbicara, nasaba Sion dé' umaélo monro mammekko, narapi ripassalama sibawa apakalanna mattappa pada-pada suloé ri wennié. Eh Yérusalém, naitai bangsa-bangsaé apakalammu, arung-ngarungngé natiroi arajammu. Riteppuko matu sibawa aseng baru, Aléna Puwangnge mabbéréyangngi iyaro asengngé. Mancajiko pada-pada passigera magelloé ri limanna Puwangnge, passigera akkarungeng ri limanna Allataalamu. Asemmu tenniyana ‘Iya Risalaiyé’, wanuwammu tenniyana ‘Iya Masino-sinoé’. Riteppuko matu, ‘Iya Nasayangngé Allataala’, sibawa wanuwammu riyasengngi, ‘Iya Puraénna Kawing’, saba' naéloriko Puwangnge, pada-padai lakkaié untu' wanuwammu. Pada-pada séddié kallolo kawingiwi ana'daraé, makkuwaniro Pappancajimmu pubainéko matu. Pada-pada séddié botting marennu mitai bainéna, makkuwaniro Allataala sennangiko matu. Ri témbo'na Yérusalém taroka matu pengawal; esso wenni dé' nawedding mennang mammekko, iyakiya harusu'i matteru paréngngerangiwi Allataala lao ri janci iya puraé Naébbu. Dé' nawedding mennang naleppessang Aléna monro mammekko ri wettu Napatettonna paimeng Yérusalém, sibawa pancajiwi tassebbo risininna linoé. Puwangnge pura majjanci sibawa mattanro nenniya napogau'i matu sibawa akuwasan-Na; “Dé'na uwabbéréyangngi matu gandommu lao ri balié; tau laingngé dé'na naénungngi anggoro'mu iya mulolongengngé sibawa massussa-sussa. Iyakiya iko paddeppungengngi éngngalangngé, manréi matu wassélé'na sibawa pojiwi Puwangnge; sibawa iko iya céppué buwa anggoro, ménungngi matu uwaina ri seddé Bola-Ku.” Pabbanuwana Yérusalém, assuno lalo ri pintu gerbangngé, passadiyai lalengngé untu' sining tau iya lisué. Ebbuno watattana, paddésu'i batunna, patettongngi bandéraé untu' bangsa-bangsaé. Puwangnge mabbéréyangngi pasengngéwé lao risininna sulapa'na linoé, “Powadangngi pabbanuwana Sion, ‘Itai, Puwang Pappassalama'é poléni! Ritinrosiwi risining tau iya puraé Napaleppe.’ ” Riyasengngi matu mennang: ‘Umma mapaccing’; ‘Umma iya napassalama'é Puwangnge ’. Riteppui matu Yérusalém ‘Kota iya ripalécé ri Puwangnge ’, ‘Kota iya dé'énna risalaiwi ri Puwangnge ’. “Niga engka polé ri Bozra ri Edom? macella wajunna, mattappa pakéyanna; joppai sibawa barani.” “Iyya'na Puwang iya mullééngngi mappassalama sibawa polé tiwi karéba apakalang.” “Magi namacella makkuwaro pakéyammu, pada-pada wajunna pappara buwa anggoro'é?” “Alé-alé-Ku muttama ri onrong apparakeng anggoro'é ri yelle'na umma'-Ku dé'gaga tuluk-Ka. Uléjja-léjja'i bangsa-bangsaé ri laleng cai-Ku, pada-pada léjja-léjja'i buwa anggoro'é. Tapporo darana mennang rica'i wajuk-Ku, rotakiwi sininna pakéyak-Ku. Purani urancana esso akkabalekengngé, sibawa wettu appaleppekengngé untu' umma'-Ku. Massappaka, iyakiya dé'gaga mattulung, Hérakka nasaba dé'gaga mabbantu. Nainappa awatangeng ri alé-Ku tuluk-Ka, cai-Ku bantu-Ka. Ri laleng cai-Ku iya malluwa-luwa'é, Uléjja-léjja'i bangsa-bangsaé; Upabbinasai mennang, sibawa darana mennang Utuppa'i ri tanaé.” Maéloka mabbirittangngi pammaséna Puwangnge sibawa pojiwi nasaba sininna pangkauken-Na. Nabarakkakiwi umma'-Na sibawa maona, nasaba mapparessé babuwai na pammasé-Na dé' paccappurenna. Makkedai Puwangnge, “Tongeng, mennang iyanaritu umma'-Ku, ana'-ana' iya dé'é namappéjulé.” Namancajiwi Pappassalama'na mennang, Aléna paimeng nakenna asussanna mennang. Dé' nakiring Puwangnge suro iyaré'ga duta; Aléna ritu paleppe'i mennang nasaba pammasé sibawa paressé babuwa-Na. Tuli napiyarai mennang riyolopa nariyolo. Iyakiya maronta'i mennang sibawa pamesséiwi atinna Puwangnge. Nagiling mancaji balinna mennang Aléna muto mammusu méwai mennang. Nanaéngngeranni mennang wettu riyolo, wettunna Musa, atanna Puwangnge. Makkutanai mennang, “Kégani Puwangnge iya dulungngéngngi sining pamimpinna umma'-Na molai tasi'é? Kégani Puwangnge iya mabbéréyangngéngngi akuwasan-Na lao ri mennang? Kégani Puwang iya ranrengngéngngi Musa sibawa liman-Na iya mawatangngé naporé sibawa puwé'éngngi uwaié ri yolona mennang kuwammengngi nakalabba asen-Na mannennungeng? Kégani Puwang iya dulungngéngngi mennang joppa molai uwai iya maliyungngé? Pada-pada anyarangngé molai padang kessi'é, dé' naengka mennang natabbuttu.” Puwangnge tiwii mennang ri onrong appésaungengngé, pada-pada olokolo ritinrosiyé untu' mabbella ri padangngé. Makkuwaniro Aléna pimpingngi umma'-Na, kuwammengngi naripakaraja asen-Na. Oh Puwang, itaki polé ri surugaé, polé ri onrom-Mu iya mapaccingngé sibawa malebbié. Kégani pammasé-Mu sibawa aporéngem-Mu? Kégani pammasé-Mu sibawa paressé babuwamu? Aja' mutahangngi iyaro polé ri idi. Tenniyaga Iko Ambo'ta? Abraham sibawa Yakub dé' naissekki. Iyakiya Idi oh Puwang, iyanaritu Ambo'ta, Pappassalama'ta riyolopa nariyolo. Oh Puwang, magi Muleppessakki pusa? Magi Mupateddekiwi atitta angkanna dé' tamétau ri Iko? Lisuno nasaba ata-atam-Mu, nasaba umma'-Mu, appunnangeng mana-Mu. Magi Muleppessangngi balié léjja-léjja'i Bola-Mu, sibawa sining tauwé carépaiwi bulu-bulu-Mu iya mapaccingngé? Mugaukekki samanna dé' naengka Mukuwasaiki; samanna dé' naengka tamancaji umma'-Mu. Sapé'i langié natanonno, oh Puwang, ébbui sining bulué taggottang ri yolo-Mu, pada-pada apié palluwa'i ajué sibawa mébbui uwai rédé. Pannessai akuwasam-Mu lao risining balim-Mu, angkanna ténré bangsa-bangsaé ri yolo-Mu. Engka naengka Mupogau'i pangkaukeng maseroé, iya dé'é tasenna-sennai. Nonnoko, na ri yolo-Mu taggottangngi sining bulué. Dé'pa naengka iya méngkalingaéngngi, sibawa dé'pa naengka iya mitaéngngi makkedaé ri lainnaé Iko, engka déwata iya tinda'é, lao ri tau iya mamménasaé ri aléna. Muduppaiwi tau iya malempué sibawa iya tuwoé situru élo-Mu. Macaiko lao ri idi, iyakiya tette'ki madosa mémeng riyolopa nariyolo tapasala. Idi manengngé iyanaritu tau najisi, mala muwi pangkauketta iya makessingngé marota'to sibawa macarépa. Lennye'ki matu nasaba jata pada-pada daung makelle'é naluttureng anging. Dé'gaga massempajang lao ri Iko, iyaré'ga méllauwi pattulum-Mu, saba' Musubbui tappa-Mu polé ri idi, sibawa leppessakki ripaccappu ri dosata. Iyakiya Idi, oh Puwang, iyanaritu Ambo'ta, tana litaki, na Iko tappaki; idi manengngé iyanaritu ébbu limam-Mu. Jaji aja' tamacai senna, oh Puwang, aja'na taéngngerangngi dosata; itani, idi'é umma'-Mu. Kota-kota mapaccim-Mu sinrupai padang kessi'é, mancaji padang makabuttui Yérusalém iya masino-sinoé. Bolana Allataala iya mapaccingngé sibawa malebbié onron-Na toriyolota poji-Ko, purani ripaccappu ri apié; sininna onrong iya ripojiyé mancajini ruttungeng. Muwita manengngi iyaro, oh Puwang, masa monro-Ko mammekko? Aga maélo-Koga malleppessakki manrasa-rasa senna? Makkedai Puwangnge, “Sadiyaka baliwi umma'-Ku, iyakiya dé' nassempajang mennang lao ri Iyya. Sadiyaka riyéwa siruntu ri mennang, iyakiya dé' mennang nasappa-Ka. Iyaro bangsaé dé' naobbi-Ka, namuni sadiya-Ka mappébali: Iyya'naé! Tuli sadiyaka duppaiwi umma'-Ku, iyakiya napoji mennang maronta. Iyaro bangsaé napogau'i majaé sibawa maccowériwi rancanana muto. Matteru-terui mennang mébbu-Ka macai nasaba makkasuwiyangengngi akkarobangeng ri palla-palla'é untu' déwata-déwataé sibawa mattunu kamennyang ri mézba-mézbana. Ri wennié laowi mennang ri gowa-gowaé sibawa kuburu'é untu' méllau pangaja ri waliyalaé. Manréi mennang juku bawi sibawa ménung duro juku iya harangngé. Makkedai mennang ‘Laono mabéla-béla, aja' mugéssaki saba' mapaccikki sibawa mallaikki polé ri iko!’ Dé' Utahang mitai kédo-kédona mennang! Cai-Ku lao ri mennang pada-padai api iya dé'é naengka napeddé. Pahukkungenna mennang pura tarokini ri yolo-Ku. Tongeng, dé' Umaélo monro mammekko. Maélo-Ka mpale'i jana mennang nasaba dosana mennang sibawa dosana toriyolona. Napakatuna-Ka mennang ri laleng tununna kamennyang untu' déwata-déwataé ri onrong assompanna ri bulu-bulué. Maélo-Ka mpale'i mennang situru sibawa pangkaukenna ri wettu labe'é.” Makkedai Puwangnge, “Buwa anggoro iya engkaé mupa uwaina dé' nariyabbéyang, iyakiya ripancajiwi uwai anggoro. Makkuwatoniro bangsa-Ku dé' Upabbinasa manengngi matu, saba' ri yelle'na mennang engka mupa iya massompaé ri Iyya. Sijumella tau Israél polé ri suku Yéhuda Ubarakkaki matu, sibawa wija-wijanna mennang mappunnangiwi matu tana bulu-Ku. Sining tau upilé-Ku iya massompaé ri Iyya monroi matu kuwaro. Nasompaka matu umma'-Ku; bimbala sibawa sapingngé mabbellai matu ri Tanéténa Saron sibawa ri Lompo Akhor. Iyakiya dé' nakkuwaro totona sining tau iya salaiyék-Ka, iya dé'é nabati-batiwi Sion, bulu-bulu-Ku iya mapaccingngé, iya makkasuwiyangengngé patala lao ri Gad sibawa Méni, déwata-déwatana amaupekengngé sibawa totoé. Maté manekko matu selaku korbang ateddekeng. Saba', wettuk-Ku mangobbi, dé' mumappébali, sibawa wettuk-Ku mabbicara, dé' mumaréngkalinga. Lebbi mupojiwi méwa-Ka sibawa pogau'i iya majaé. Sitongenna, tau iya sompaék-Ka manréi matu, na iko alupurekko. Ménungngi matu, na iko adekkakko. Marennui matu mennang, na iko masiriko. Sitongenna, gorai matu marennu, na iko teriko sibawa mapeddi. Sining tau ripilé-Ku napakéi matu asemmu selaku tanro: “Tennapodo Puwang Iya Pommatanré mpunoko pada-pada mennang!” Iyakiya tau iya matinulué ri Iyya Uwéréngngi matu aseng baru. Tungke tau ri wanuwaéro iya méllauwé barakka, naéllauwi matu ribarakkaki ri Allataala iya matinulué. Tungke tau iya maéloé mattanro, mattanroi matu ri laleng asenna Allataala iya matinulué. Saba' anrasa-rasang iya riyoloé teddénni sibawa riyallupai.” Makkedai Puwangnge, “Maélo-Ka mébbu langi iya barué sibawa lino iya barué. Kajajiyang-kajajiyang iya riyoloé riyallupaiwi matu sibawa dé' nariyéngngerang paimeng. Arennuno sibawa mariyo-riyo untu' mannennungeng nasaba aga iya Upancajiyé. Upancajiwi Yérusalém barué penno arennung, sibawa pabbanuwana mariyo-riyo. Aléku paimeng marennu matu nasaba Yérusalém, sibawa mariyo-riyo nasaba pabbanuwana. Ri kotaéro dé'na gaga teri, sibawa dé'gaga kelli méllau tulung. Ana'-ana'na dé'gaga maté ri wettu baiccu, sibawa tau battowaé narapii matu umuru macowa. Tau iya makkéumuru'é sératu taunna riyangga'i malolo, sibawa tau iya maté ri yolonaéro riyangga'i nakenna pahukkungek-Ku. Sininna iya napogau'é mallolongengngi, sibawa ana'-ana'na mennang dé' namaté tennasenna-senna. Mennang sibawa wijanna mennang Ubarakkakiwi matu untu' mannennungeng. Ri wettu dé'napa naéllauwi, mappébali-Ka; ri wettu dé'napa napura massempajang, Utarimani sempajanna mennang. Serigalaé sibawa ana' bimabala'é sisamai manré wella; manréi daramé singaé pada-pada sapingngé, sibawa ulaé dé'na nabbahayana. Ri sininna bulu-bulu-Ku iya mapaccingngé, dé'na gaga iya mapparogiyé iyaré'ga pogau'i majaé.” Makkedai Puwangnge, “Langié iyanaritu kadéra arajak-Ku, sibawa linoé attuppungeng ajé-Ku. Jaji bola maragaénna maélo mupatettongek-Ka, sibawa onrong agana maélo mupancaji onrok-Ku? Sininna alangngé iyanaritu ébbu limak-Ku, na sininnaro ripancajiwi. Iyakiya iya Upojiyé iyanaritu tau iya mariyawa atié, iya sesse'éngngi dosa-dosana, iya métaué sibawa mapatoé ri Iyya. Iyakiya iyaro bangsaé napogau'i siyélo-élona mennang; masennangngi mennang massompa sibawa cara iya mappakacciddi-ciddi'é. Untu' mennang dé'gaga assilaingenna: makkarobangeng saping lai sibawa makkarobangeng tolino, makkarobangeng ana' bimbala sibawa rettoi ellonna asué; makkasuwiyangeng gandong sibawa makkarobangeng dara bawi, mattunu kamennyang sibawa massompa dato-dato. Rimakkuwannanaro maélo tok-Ka pogau'i siyélo-élo-Ku sibawa pateppangengngi mennang abala-abala iya naétauriyé mennang. Saba' wettuk-Ku mangobbi, dé'gaga mappébali; wettuk-Ku mabbicara, dé'gaga maréngkalinga. Lebbi napojiwi mennang méwa-Ka sibawa pogau'i majaé.” Engkalingai aga napowada Puwangnge, éh iko iya métaué sibawa mapatoé ri Aléna, “Nasaba matinuluko lao ri Iyya, engka ri yelle'na bangsamu iya céccéékko, sibawa dé' namaélo siwollompollong sibawa iko. Naéllé-kéllé'ko mennang sibawa makkeda, ‘Leppessanni Puwangnge nappaitang arajan-Na, kuwammengngi taitai arennummu.’ Iyakiya aléna muto masiri. Engkalingai! Engka oni memmu ri kotaé; engka sadda polé ri Bola-Ku; iyanaro saddak-Ku iya mattengngangngé mpale'i balié! Kota mapaccik-Ku pada-padai séddi indo' iya mémmana'é ri wettu dé'napa naggulicci mapeddi; iya jajiyangngé ana' worowané ri wettu dé'napa napéneddingiwi peddié mémmana. Niga pura méngkalingai gau' pada-padaéro? Niga pura mita kajajiyang makkuwaéro? Iyakiya bangsa Israélié jajini ri wettunna Sion mammula napéneddingi mapeddi mémmana. Aja' muwasengngi Utiwii umma'-Ku narapi wettu ajajiyanna sibawa dé' Uleppessangngi mennang rijajiyang.” Makkuwaniro adanna Puwangnge. Ariyo-riyono silaong Yérusalém, éh sininna tau iya pojiyéngngi. Iko iya masaraé nasaba aléna, makkekkuwangngé weddinno marennu. Mupéneddingiwi matu adécéngenna, pada-pada séddié ana' susu ri indo'na. Saba' makkedai Puwangnge, “Uwérékko matu asaléwangeng pada-pada salo iya massolo'é; asugirenna bangsa-bangsaé ritiwii matu lao ri iko pada-pada salo iya mappennaé. Pada-padako ana' iya ripasusué sibawa riyépa ri indo'na, enrengngé ricapu-capu ri wakkanna. Usaléworiko matu ri Yérusalém, pada-pada séddié indo' saléworiwi ana'na. Naitanaro, marennuko matu, enrengngé mancaji mawatang sibawa madising pada-pada wella loloé. Na ata-atak-Ku péneddingiwi matu akuwasak-Ku sibawa sining balik-Ku napérasai matu cai-Ku.” Tongeng, poléi matu Puwangnge sibawa api; Natonangiwi matu karéta-Na pada-pada anginrajaé, untu' pallessui cai-Na, nenniya makkampareng sibawa maladde. Saba' sininna tau iya ripoléiyé pasala Nahukkungngi matu sibawa api nenniya peddang, na maéga ritu rihukkung maté. Makkedai Puwangnge, “Sininna pépaccingiyéngngi aléna untu' mallompéngeng lao ri palla-palla'é untu' déwata-déwataé sibawa massompa lao ri mennang, lennye'i matu silaong sining tau iya manré juku bawi sibawa balawo enrengngé inanré laing iya mappakaciddi-ciddi'é. Uwisseng pikkiranna sibawa pangkaukenna mennang. Poléka untu' paddeppungengngi sining tau polé ri sininna bangsaé. Ri wettu maddeppungenna mennang, naitai matu akuwasak-Ku. Taroka matu séddi tanrang ri tengnga-tengngana mennang. Sibagiyang céddé ri yelle'na mennang Upassalama matu. Usuroi matu mennang lao ri bangsa-bangsaé ri wanuwa-wanuwa mabélaé iya dé'éppa naengka naéngkalingai passalenna Iyya iyaré'ga mitai arajak-Ku sibawa akuwasak-Ku; lao ri Tarsis, Libia, nenniya Lidia sibawa pappana-pappana iya maccaé, lao ri Tubal sibawa Yunani. Nabbirittangngi matu mennang arajak-Ku ri yelle'na bangsa-bangsaéro. Polé risining wanuwaéro natiwii matu mennang lisu sining silessuremmu sibangsaé selaku hadiya untu' alé-Ku. Natiwii matu mennang sining tauwéro lao ri bulu-bulu-Ku iya mapaccingngé ri Yérusalém sibawa tonangi anyarang, kaleddé sibawa unta, enrengngé nasibawang karéta nenniya padati, pada-pada biyasaé tiwii tau Israélié lao ri Bolana Puwangnge pakkasuwiyang gandong ri laleng onrong iya mapaccingngé. Sibagiyang ri yelle'na mennang Upancajiwi matu imang sibawa tau Léwi. Pada-pada langi barué sibawa lino barué mattahangngi matu nasaba akuwasak-Ku, makkuwatoro wijammu sibawa asemmu tette'i matu monro. Tungke Uleng Baru sibawa esso Saba' poléi matu sininna rupa tauwé untu' sompa-Ka ri Yérusalém. Wettunna joppa, naitai matu mennang ujuna sining tau iya puraé maronta lao ri Iyya. Ule' iya manrééngngi bakkéna mennang dé' namaté matu, sibawa api iya tunuéngngi mennang dé' napeddé matu; séuwa pakkitang iya mappakatau-taué lao ri sininna tauwé.” 156 1 Iyaé kitta'é mallise'i ada-adanna Yérémia ana' Hilkia, sala séddinna imangngé ri kota Anatot ri daérana Bényamin. Mabbicarai Puwangnge lao ri Yérémia ri taung maseppuloé tellu apparéntanna Yosia ana' Amon arunna Yéhuda. Purairo mabbicarasi Puwangnge ri aléna makkolik-koling, mappammulai ri wettu apparéntanna Yoyakim ana' Yosia lettu ri taung maseppuloé séddi apparéntanna Zédékia ana' Yosia. Ri taung malimaéttoro naritiwi pabbanuwana Yérusalém lao ri appalirengngé. Makkedai Puwangnge lao ri iyya, “Ri wettu dé'napa Utappako ri laleng parémmananna indo'mu, sibawa ri wettu dé'napa mujaji, pura mémenno Upilé sibawa makkako untu' mancaji nabi lao ri bangsa-bangsaé.” Mappébalika, “Oh Puwang Iya Pommatanré, dé' umacca mabbicara nasaba malolo senna mupa.” Iyakiya mappébaliwi Puwangnge, “Aja' muwakkeda malolo senna mupo. Rékko Iyya suroko lao ri nigi-nigi, harusu'ko lao, sibawa sininna iya Uwassurowangngé Upowada, harusu'i mupalettu lao ri mennang. Aja' mumétau lao ri mennang, saba' Iyya sibawakko matu untu' linrungiko. Iyya, Puwang, pura mabbicara!” Purairo naloro'ni limanna Puwangnge, sibawa géssai témukku nainappa makkeda, “Engkalingai sibawa appallebbangengngi ada-ada iya Upowadaéwé. Iyaé essoé Uwérékko akuwasang lao ri bangsa-bangsaé sibawa sining akkarungengngé – akuwasang untu' léttungngi sibawa ruttungngi, untu' galéttéi sibawa paccappui, untu' mappatettong sibawa mattaneng.” Makkutanai Puwangnge ri iyya, “Aga muwita, Yérémia?” Mappébalika, “Takké aju badam, Puwang.” Nakkedana Puwangnge, “Tongeng, Ujagaiwi kuwammengngi sininna iya Upowadaé mancajiwi mannessa.” Nainappa makkutanasi Puwangnge lao ri iyya, “Agapi muwita?” Mappébalika, “Ri seddé manorang uwitai oringngé rédé lise'na sibawa céddé'i tabbalé lao kumaiyé.” Makkedai Puwangnge, “Polé ri manorangngi luwang matu abalaé sibawa kennai sininna pabbanuwana wanuwaéwé. Usuroi matu sininna bangsaé ri seddé manorang polé untu' makuwasaiwi Yérusalém. Nasittaiwi matu mennang témbo'-témbo' mattulilingiyéngngi kotaéwé enrengngé pintu-pintu gerbanna sibawa sininna kotaé ri Yéhuda. Uhukkungngi matu umma'-Ku, nasaba madosai mennang sibawa mabbokori-Ka. Purai mennang makkasuwiyangeng akkarobangeng lao ri déwata-déwata laingngé, enrengngé mébbu dato-dato nanasompai. Sadiya-sadiyano Yérémia! Laono sibawa palettu'ni ri mennang, sininna iya Uwapparéntengngé ri iko. Aja' mumétau ri mennang, kuwammengngi aja' Uwébbuko lebbi métaupasi rékko siyolokko sibawa mennang. Nasuroka Puwangnge mappallebbangengngi karébaéwé lao ri sininna tauwé ri Yérusalém, “Eh Israél, uwéngngerangngi temmaka tinulumu ri wettu malolomu mupa; temmaka battowana pappojimmu wettutta bottimparu. Muwaccowéri-Ka lao ri padang kessi'é molai daéra iya dé'é naritanengi. Israél, iko appunnangek-Ku paribadi, buwa atik-Ku iya Usayangngé. Upatatteppai abalaé lao ri sininna iya mébbuékko manrasa-rasa, Iyya, Puwang, pura mabbicara.” Engkalingai pasenna Puwangnge, éh iko wijanna Yakub, suku-suku Israélié! Makkedai Puwangnge, “Asalang aga nalolongeng toriyolomu ri Iyya, angkanna nabali'bellari-Ka mennang? Nalellungngi mennang barahala iya dé'é angke'na na angkanna aléna mennang mancaji matuna. Dé' nabati-batika; Iyya, iya puraé dulungngi mennang ri lalengngé, sibawa tiwii mennang massu polé ri Maséré molai padang kessi'é, daéra makabuttu iya maégaé kalebbok-kalebbonna, enrengngé marakko namabbahaya – padang iya dé'é nariyonroi sibawa dé' narilaloi! Lao ri wanuwa iya macommo'é Uwantara'i mennang untu' péneddingiwi sining wassélé'na sibawa sininna iya makessingngé kuwaro. Iyakiya kuwaro napanajisi'i mennang tana-Ku sibawa appunnangek-Ku napancajiwi mennang séuwa iya mappakaciddi-ciddi'é. Sining imangngé dé'gaga makkutana kéga-Ka, Puwan -na. Muwi sining pappatettong hukkungngé dé'to naissengngi niga Iyya, sining panguwasaé maronta'i lao ri Iyya. Ri laleng asenna Baal mabbicarai sining nabié, sibawa sompai barahala iya dé'é nakkéguna.” Makkedai Puwangnge, “Makkekkuwangngé Uwapparakarassi umma'-Ku, sibawa Uwadélékiwi wija-wijanna. Tuttunni wirinna Siprus seddé yajang, kiringngi tauwé lilau ri wanuwa Kédar, paréssai kuwaro sibawa matutu, puraga kajajiyang gau' iya sinrupaé? Dé'pa naengka séuwa bangsa séléi déwatana namuni iyaro tenniya Allataala tongengngé. Iyakiya, umma'-Ku purana nasélé Iyya, abangkakenna mennang sibawa séuwa iya dé'é naulléi pogau' aga-aga. Rimakkuwannanaro, éh langi, taggottanno! Tasséleng sibawa ténré! Pogau'i umma'-Ku duwanrupa dosa: nabbokori-Ka mennang, bubbu uwai pabbéré atuwong untu' tolinoé; naébburengngi mennang aléna kolang milé iya dé'é nawedding tahangngi uwaina.” “Israélié tenniya ata, tenniyato wija-wija ata. Iyakiya magi namancaji anréna balinna? Mangngaungngi balinna lao ri aléna pada-pada singaé, tanana ripancajiwi makabuttu sibawa lobbang, kota-kotana cappui nanré api, rileppessang kariya-riya dé' monroiwi. Eh Israélié, rilébongngi gemme'na ulummu ri tau Memfis-é sibawa Tahpanhés-é. Iko muto nassabariwi sininna iya kajajiyangngé ri alému, nasaba wettummu Udulung ri laleng allalengengngé, muwabbokori-Ka, Puwang Allataalamu. Aga sarona laoko ri Maséré? Maéloko ménungngi uwaina Solo Nil? Aga sarona laoko ri Asyur? Maéloko ménungngi uwaina Salo Efrat? Jamu muto hukkungngi alému, risissako nasaba musampéyak-Ka, Allataalamu. Makkekkuwangngé pérasani temmaka paina sibawa pesséna rékko muwabbokori-Ka sibawa dé' mupakalebi-Ka. Iyya, Puwang Allataalamu pura mabbicara; Iyya ritu Puwang Allataala Iya Pommatanré sibawa Pommakuwasaé.” Makkedai Puwangnge, “Maittani dé' mumaélo massompa ri alé-Ku; dé' mumaélo turusi-Ka iyaré'ga sompa-Ka. Ri tompo'na tungke bulu-bulu iya maccaloli'é, sibawa ri yawana tungke aju iya maworongngé musompai déwata-déwatana acommokengngé. Utanekko pada-pada pong anggoro'é iya Upilé polé ri biné iya makessingngé. Iyakiya makkekkuwangngé tappinrano, mancaji tanet-taneng maliya sibawa temmakéguna. Namuni cemméko sibawa paké sabung maéga senna, iyakiya rota-rota asalammu paita mupi ri alé-Ku. Barani senna'ko makkeda makkedaé dé' mumatuna, sibawa dé' naengka muwaccowériwi Baal! Itai kédo-kédomu ri lompo'é, éngngerangngi jamu sibawa akuini! Pada-padako unta komba iya allaingengngé, lari lao tulili tenrikuwasai, nainappa muttama ri padang kessi iya masino-sinoé. Dé' nariyullé tahangngi rékko allaingengngi. Iya macinnaiyéngngi dé' naparellu massappa, saba' ri wettu allaingenna tuli nabbéréyangngi aléna. Israélié, aja' mulari lellungngi déwata-déwataé, sibawa aja' mugora mobbii mennang, maloi matu ajému sibawa marakkoi tigero'mu nasaba dekka. Makkedako, ‘Dé', dé' namakkullé lisuka,’ ‘saba' uwéloriwi déwata-déwataé, sibawa maélo maccowériwi mennang.’ ” Makkedai Puwangnge, “Pada-pada pangaé masirii wettunna ritikkeng, makkuwatoniro iko maneng masiri matu, éh tau Israélié, arung-ngarummu sibawa sining pajaba'mu, imang-ngimammu sibawa nabi-nabimmu! Ripakasiriko matu, saba' sipolo aju muwobbi ambo' sibawa séddi batu muwobbi indo'. Mala dé' mulao ri Iyya, sangadinna musalai-Ka. Iyakiya rékko poléi asukkarakengngé, Iyya ritu muwobbi untu' polé passalama'ko. Kégani sining barahalamu iya muwébbuéro? Rékko engka asukkarakeng, suroi mennang passalama'ko, rékko weddingngi! Eh Yéhuda, déwata-déwatamu singngéga kota-kotamu! Aga iya dé'é musennangiwi passalek-Ku angkanna muwé-Ka? Paracuma bawang Uhukkukko, saba' dé' mumaélo tarima pakkampareng. Pada-pada singa iya mattengngangngé majjallo, makkuwatoniro iko mpunoi sining nabimmu. Eh umma' Israélié, éngkalingai iyaé ada-adak-Ku. Engkaga naengka pada-pada-Ka padang kessi'é ri alému iyaré'ga pada-pada tana iya mapettang kape'é? Iyakiya magi muwakkeda makkedaé maéloko laluwasa, sibawa dé'na mumaélo lisu ri Iyya? Engkaga ana'dara mallupaiwi bélo-bélona, iyaré'ga botting makkunrai mallupaiwi waju bottinna? Iyakiya iko maitta senna'ni mallupai-Ka – sipongenna wettu iya tenribilangngé ittana. Macca tongekko matoro siyasa' untu' taré'i atinna sining canrimmu. Muwi cakkuribang iya kaminang matunaé wedding topa magguru polé ri iko! Marota'i pakéyammu polé ri darana tau kasiyasié sibawa tau dé'é napasala, tenniya darana panga iya ritikkengngé. Namuni makkuwaro, makkedako makkedaé dé' mupasala, makkedaé dé'na Umacai lao ri iko. Iyakiya Iyya, Puwang, maélo hukkukko nasaba dé' mumaélo mangakuiwi makkedaé pasalako. Masitta senna'ko lao ri déwata-déwata bangsa laingngé untu' méllau tulung! Pasti ripakacéléko matu ri Maséré, pada-pada ripakacélému ri Asyur. Musalaiwi matu Maséré sibawa kacélé nenniya masiri. Iyya, Puwang, pura sampéyangngi mennang iya muwattuwangngé; dé' aga-aga asarong mulolongeng matu polé ri mennang.” Makkedai Puwangnge, “Rékko séddié bainé ritelle ri lakkainna, nainappa iyaro makkunraié mancaji bainéna tau laingngé, poro lakkainna dé' nawedding malai paimeng selaku bainéna, saba' iyaro gau'é nasolangiwi iyaé wanuwaé. Iko Israélié, mappunnaino maéga senna canring, masa makkekkuwangngé maéloko lisu lao ri Iyya! Cobai makkita liyasé, lao ri coppo-coppo bulu-bulué! Onrong kégaénna dé' naengka mulaowi untu' maccakkuribang? Pada-pada tau Arab-é ri padang kessi'é, makkuwatoniro tudakko ri wiring lalengngé tajengngi tau iya maéloé macculé cinta. Mupanajisi'i wanuwaéwé sibawa alawengeng nenniya jamu. Iyanaro saba'na natattahang uwai polé ri langié, sibawa bosi ri wettu keccé'é teppudu-pudu polé. Maéloko pada cakkuribangngé, sibawa dé' muwissengngi masirié. Ri wettu asukkarakemmu makkedako lao ri Iyya makkedaé Iyya ambo'mu, makkedaé Uwamaséiko mappammulai baiccu'mu. Makkeda tokko makkedaé dé' Umatteru-teru macai lao ri iko. Iyanaro mupowada, éh Israélié, iyakiya ri wettuéro mupogau' towi sininna ja iya mullé pogau'.” Ri wettu apparéntanna Arung Yosia, makkeda makkuwaiyé Puwangnge lao ri iyya, “Puraniga muwita aga napogau' Israélié, makkunrai iya dé'é namatinuluro? Nasalai-Ka sibawa pogau'i accakkuribangengngé ri tompo'na tungke bulu-bulu iya matanré sibawa ri yawana tungke aju iya maworongngé. sibawa dé' sises-siseng namasiri. Malawengngi nasaba sompai batu sibawa aju, angkanna iyaé wanuwaé mancaji najisi. Purana napogau' sininnaro, Yéhuda iya dé'é namatinuluro lisui ri Iyya iyakiya najjaimi, nasaba atinna dé' namalempu. Iyya, Puwang, pura mabbicara.” Nainappa napaissengika Puwangnge makkedaé namuni Israélié purani nabbokori Aléna, iyakiya annessana Israélié lebbi kessing muwi naiya Yéhuda iya dé'é namatinuluro. Nasuroka Puwangnge lao untu' powadai gau'éwé lao ri Israélié: “Eh Israél iya dé'é namatinulu, lisuno ri alé-Ku! Pennoka paressé babuwa sibawa dé' umatteru-teru matu macai lao ri alému. Angakui bawanni makkedaé pasalako sibawa purano maronta lao ri Puwangnge, Allataalamu. Angakuini makkedaé ri yawana tungke aju maworongngé purani muwabbéréyang pappojimmu lao ri déwata-déwatana bangsa laingngé, sibawa dé' muturusiwi parénta-parénta-Ku. Iyya, Puwang pura mabbicara.” Makkedai Puwangnge, “Eh umma iya dé'é namatinulu, lisuno ri Iyya! Iko ritu appunnangek-Ku. Maélo-Ka malako, séddi tau polé ri tungke kota, duwa tau polé ri tungke appang, sibawa tiwiko lisu lao ri Bulu Sion. Maélo-Ka mpérékko pamimping-pamimping iya mapatoé lao ri Iyya. Napimpikko matu sibawa mapanré nenniya penno pappéjeppu. Nainappa rékko tattamba maégano ri wanuwaéwé, dé'na nabbicara matu tauwé passalenna Petti Assijancik-Ku. Dé' napikkiri'i matu mennang iyaré'ga méngngerassi, mala mennang dé' napparelluwangngi matu iyaré'ga mébbu Petti Assijancingngé iya laingngé. Iyaro wettué riteppui matu kota Yérusalém ‘Kadéra arajanna Puwangnge ’, sibawa sininna bangsaé maddeppungengngi matu ri kotaéro untu' sompa-Ka. Dé'na naccowériwi matu mennang élo atinna mennang iya madonggoé sibawa majaéro. Masséddiwi matu Israélié sibawa Yéhuda, sibawa silaong lao polé ri wanuwa appalirengngé ri seddé manorang. Lisui matu ri wanuwa iya puraé Uwéréngngi selaku tana manana lao ri toriyolona.” Makkedai Puwangnge, “Israélié, macinna-Ka tarimako selaku ana'-Ku, sibawa mpérékko wanuwa iya pasennangiyé, wanuwa iya kaminang makessingngé ri sininna linoé. Macinna-Ka muteppu Ambo', sibawa dé'na mulari polé ri Iyya. Iyakiya pada-pada bainé iya dé'é namatinulu, dé'to mumatinulu lao ri Iyya. Iyya, Puwang pura mabbicara.” Ri tompo'na sining coppo bulué riyéngkalingai sadda marukkaé; iyaro saddanna umma Israélié iya teriyé sibawa maréllauwé, nasaba madosani mennang, sibawa mallupaiwi Puwang Allataalana. Eh iko maneng iya salaénni Puwangnge, lisuno! Maéloi pajjappako, sibawa pancajiko matinulu. Makkedako, “Ya, makkekkuwangngé poléni ri idi Puwang, saba' Aléna Allataalata. Siya-siya bawakki ramé-ramé massompa barahala ri tompo'na coppo-coppo bulué! Pattulung untu' Israélié banna poléi ri Puwang Allataalata. Assompangngé lao ri Baal, barahala iya mappakasiri-siriéro purani naébbu ateddéngeng ana'-ana'ta enrengngé olokolo saping sibawa bimbala, iyanaritu sini-sininnaé iya puraé nausahakang toriyolota riyolopa nariyolo. Jaji, leppessanni idi tanggungngi sirié, sibawa leppessanni mancaji matuna. Saba', idi sibawa toriyolota madosani lao ri Puwang Allataalata, sibawa dé' naengka naturu lao ri parénta-parénta-Na.” Makkedai Puwangnge, “Umma Israélié, rékko maéloko lisu, lisuno ri Iyya. Abbéyangngi riyolo barahala-barahala iya Ucéccéro, sibawa atinuluno lao ri Iyya. Rékko mattanroko ri laleng asek-Ku sibawa tuwoko malempu, adélé sibawa tongeng, sininna bangsaé méllauwi matu ri Iyya kuwammengngi Ubarakkakiwi mennang, nanapoji-Ka matu mennang.” Makkedai Puwangnge lao ri pabbanuwana Yéhuda sibawa Yérusalém, “Jamai tanamu iya dé'éppa narijama; aja' muwampo biné ri onrong natuwoiyé tanet-taneng maddori. Akkatenningngi jancimmu sibawa Iyya, Puwang -mu, sibawa pallaingngi alému untu' Iyya, éh pabbanuwana Yéhuda sibawa Yérusalém. Rékko dé', mallumpai matu cai-Ku sibawa patunui pada-pada api iya dé'é nariyullé peddéi muwi niga. Iya manennaro nakennai matu alému nasaba sining pangkaukemmu iya majaé.” Seppungngi tarompé'é risininna wanuwaé! Gorano sibawa manessa nenniya macenno. Suroi pabbanuwana Yéhuda sibawa Yérusalém lari lao ri kota-kota mabbénténgngé. Ajjellokenni laleng laowé ri Sion, bulu-buluna Puwangnge, asitta'no mangungsi, aja' muwomro mammekko. Mattengngangngi Puwangnge mappapolé abala sibawa ancurukeng battowaé polé ri manorang. Pada-pada singaé massu polé ri assubbuwanna makkuwatoniro joppani pappaccappu bangsa-bangsaé iya polé maélo paccappui Yéhuda. Mancajiwi matu kota-kotana Yéhuda ruttungeng onrong iya dé'é naonroiwi tauwé. Rimakkuwannanaro, terino sibawa mpating, pakéni kaing karungngé tanrang masara. Nasaba caina Puwangnge iya malluwa-luwa'é dé'pa nasoro polé ri Yéhuda. Makkedai Puwangnge, “Iyaro essoé arung-ngarungngé sibawa pajaba-pajaba'é pettu paddennuwangngi matu; métaui imang-ngimangngé sibawa tassélengngi nabi-nabié.” Nainappa makkedaka, “ Puwang Iya Pommatanré, purani Mubellé tau Yéhudaé sibawa pabbanuwana Yérusalém! Makkeda-Ko makkedaé engka matu adaméngeng, padahal nyawata makkekkuwangngé tarancangngi peddang.” Narapii matu wettunna tau Yéhudaé sibawa pabbanuwana Yérusalém lolongengngi biritta makkedaé anging pellaé polé ri padang kessi'é mangirii lao ri mennang. Iyaro angingngé tenniya anging biyasa iya banna paluttuéngngi awangngé, sangadinna anging makeddo iya polé nasaba paréntana Puwangnge untu' pateppai pahukkungengngé ri yasé'na umma'-Na. Itai, mompoi balié pada-pada ellungngé. Karéta-karéta musuna pada-padai anginrajaé, sining anyaranna lebbi magattii naiya kuwajangngé. Wah, cilakani! Cappuki! Yérusalém, abbéyangngi jaé polé ri laleng atimmu kuwammengngi naripassalama'ko. Gangka kégi iyaro sining pikkirang majaé maélo mutaro ri laleng atimmu? Polé ri kota Dan, enrengngé polé ri buluna Efraim poléni sining suro iya tiwié karéba maja. Naparéngngerangiwi mennang bangsa-bangsaé sibawa paissengiwi pabbanuwana Yérusalém makkedaé mattengnganni polé balié polé ri wanuwa iya mabélaé. Nagorangngi matu kelli musué lao ri kota-kotana Yéhuda sibawa keppungngi Yérusalém pada-pada tau jagaiyéngngi dare'é. Iya manennaro kajajiyangngi nasaba maronta'ni bangsa Yéhudaé lao ri Puwangnge. Puwangnge pura mabbicara. Yéhuda, iko muto ritu papoléi iyaro abalaé ri yasé'mu. Cara atuwommu sibawa sining pangkaukemmu nassabariwi sininna anrasa-rasangngéro natoddo'i atimmu. Temmaka anrasa-rasana atikku, dé'na utahang manrasa-rasa. Dé' uwulléi pattennangngi alé maddumba-dumba aroku, saba' uwéngkalingai moni tarompé'é, sibawa mango kelli musué. Poléi abalaé makkolik-koling mancuru'i sininna wanuwaé. Tappa nasolangiwi kémaku, nasapé-sapé'i sining kainna. Gangka kégi harusu usabbing nammaté-matéyang mammusu tauwé? Gangka kégi harusu uwéngkalinga oni tarompé iya palicco'é? Makkedai Puwangnge, “Madonggo senna umma'-Ku, dé' mennang naissek-Ka. Pada-padai mennang ana'-ana' madonggoé simata temmappéjeppu muwi céddé; macca ri laleng jaé, temmallolongeng ri laleng akessingengngé.” Makkitai matakku lao ri linoé, paitai lobbang sibawa makabuttu, congaka ménré ri langié, dé'gaga mattappa. Uwitai bulué sibawa bulu-bulu matanré taggottang senna'i. Uwitai dé'gaga tolino, luttu maneng toni manu'-manu'é. Tana commo'é mancajini padang kessi marakko, ancuru kota-kotaé, nasaba macai senna'i Puwangnge lao ri umma'-Na. ( Napowadai Puwangnge makkedaé sininna linoé mancajiwi matu padang kessi, iyakiya dé' Namaélo paccappu sisengngi.) Masarai matu linoé, mapettang kape'i langié. Puwangnge pura mabbicara dé' namaélo pinrai rancana-Na. Purani mala apettung sibawa dé' namaélo soro muwi sipale. Riyéngkalingai arukkanna pasukang pakkinnyarangngé sibawa pappanaé, mébbui tungke tauwé lari tapposo-poso. Nauttamakiwi mennang ale'é, bulu batué naémpé mennang. Sininna kotaé mancaji masino-sinoi, dé'na gaga maélo monro kuwaro. Eh Yérusalém, risalaino sibawa dé' aga-aga mullé pogau'! Untu' aga paké waju cella sibawa bélo-béloiwi alé sibawa ulaweng nenniya péra', enrengngé cilla'i mataé sibawa cilla? Paracuma pagelloriwi alému, saba' sining canrimmu dé'na napojiko, mala maéloi mennang reddui nyawamu. Méngkalingaka sadda maddaréké pada-pada makkunrai iya maéloé mémmana; pada-pada makkunrai maloloé jajiyangngéngngi ana' bunge'na, makkuwaniro terinna Yérusalém iya mabbusessangngé nappase'na. Makkarampaé-karampaé limanna sibawa maddaréké, “Cilakana – maéloka riyuno ri balié!” Eh pabbanuwana Yérusalém, tuttungngi sining lalengngé ri kotamu! Sappai kégi-kégi, sibawa alému sabbingngi. Paréssai ri tana lapanna kotaé aga engka séddi tau malempu iya makkuragaé matinulu lao ri Allataala. Rékko engka, naddampengengngi matu Puwangnge Yérusalém. Makkedako makkedaé musompai Puwangnge, padahal dé' mumakkatta makkuwaro. Sitongenna iya natuntu'é Puwangnge iyanaritu atinulureng. Puwangnge munruko, iyakiya dé' mupaduliwi. Nalolongekko, iyakiya dé' mumaélo ripagguru. Matedde atiko, sibawa dé' mumaélo toba' polé ri dosa-dosamu. Mappikkiri'ka, “Ah, mennang banna ra'ya' biyasa iya dé'é aga-aga naisseng. Tinda'i mennang madonggo, nasaba dé' naissengngi aga nacinnai sibawa natuntu'é Puwang Allataala polé ri mennang. Makessingengngi laoka risining tomarajaé, enrengngé mabbicara sibawa mennang. Pasti naisseng mennang aga iya nacinnaiyé sibawa natuntu'é Puwang Allataala polé ri mennang.” Iyakiya, dé'to namaélo maneng mennang riparénta ri Puwangnge; dé' namaélo mennang mapato ri aléna. Iyanaro saba'na nariyuno matu mennang ri singa polé ri ale'é, sibawa risapé-sapé ri serigala polé ri padang kessi'é. Mallamparengngi matu macang tutul-é sappa anré ri seddéna kota-kotana mennang, sibawa tungke tau iya massué naluruiwi matu. Iya manennaro kajajiyangngi nasaba purai mennang maéga madosa, sibawa makkolik-koling mabbokoriwi Allataala. Makkedai Puwangnge, “Magi naharusu'-Ka maddampengengngi dosa-dosana umma'-Ku? Nasalai-Ka mennang sibawa sompai tenniyaé Allataala. Uwéréngngi mennang inanré narapi messo mennang, iyakiya malawengngi, sibawa biyasai nalokkai cakkuribang-cakkuribangngé. Pada-padai mennang anyarang lai iya macommo'é sibawa maraja napessunna; tungke-tungke macinnaiwi bainéna silaonna. Aga dé' naharusu'-Ka hukkungngi bangsa makkuwaéro sibawa wale'i aga iya puraé napogau' mennang? Suroka matu bali untu' solangiwi palla anggoro'na mennang, iyakiya tenniya untu' paccappui. Usuroi matu iyaro balié lébongngi carangé-carangéna pong anggoro'na mennang, saba' iyaro carangé-carangéé tenniya appunnangek-Ku. Umma Israélié sibawa Yéhuda tonget-tongenni pura nabali'bellari-Ka. Iyya, Puwang, pura mabbicara.” Napowadai umma'na Puwangnge iya dé'é natongeng passalenna Puwangnge. Makkedai mennang, “Ah, dé' aga-aga matu napogau'. Dé' nakennaki abala sibawa dé'to ripéneddingiwi matu musué iyaré'ga alupurengngé. Angga'i iyaro nabi-nabié anging bawang, saba' pasenna Puwangnge dé'i gaga ri mennang.” Nainappa Puwang Iya Pommakuwasaé makkeda lao ri iyya, “Yérémia, nasaba iyaro sining tauwé mabbicara makkuwairo, nakennai matu abala iya manuru'é mennang dé' nakajajiyang matu. Maéloka pancajiwi ada-adak-Ku pada-pada apié ri laleng bawamu. Iyaé bangsaé pada-padai matu aju tunungngé, na iyaro apié natunui matu mennang gangka cappu.” Eh umma Israélié, Puwangnge mattengngang papolé séuwa bangsa polé ri wanuwa iya mabélaé untu' gasako. Iyaro bangsaé engkani riyolopa nariyolo, basana dé' muwissengngi. Mawatang senna'i, sibawa pappana-pappanana mennang baraniwi; mabbunoi mennang temmapparessé babuwa. Napaccappui matu mennang wassélé tanaé sibawa inanrému enrengngé mpunoi ana'-ana'mu. Olokolo sapimmu sibawa bimbala'mu nagéréi matu mennang, sibawa palla-palla anggoro'mu nenniya sining pong aramu napaccappui matu mennang. Kota-kota mabbénténg iya muwattuwangngé naancuru'i matu mennang. Makkedai Puwangnge, “Namuni makkuwaro, iyaro wettué dé'to upaccappui umma'-Ku. Iyakiya rékko makkutanai mennang magi Upogau' manengngi iyaro lao ri mennang, powadai éh Yérémia, makkedaé pékkugiwi mennang salai-Ka ri wanuwanna untu' massompa lao ri déwata-déwatana bangsa laingngé, makkuwatoniro mennang mancaji matu atanna sining tau laingngé ri wanuwa laingngé.” Puwangnge suroka palettu'i iyaé pasen-Na lao ri wija-wijanna Yakub iya monroé ri Yéhuda, “Engkalingai, éh iko tau madonggoé sibawa madongo'é! Mappunnaiko mata iyakiya dé' muwakkita, mappunnaiko daucculing iyakiya dé' muwaréngkalinga! Iyya ritu Puwang; magi dé' mumétau lao ri Iyya? Harusu'ko métau lao ri iyya! Iyya ritu mébbui wiring tasi'é mancaji pakkasésénna tasi'é iya dé'é nawedding naliweng untu' mannennungeng. Weddingngi tasi'é mabbombang sibawa weddingngi majjallo bombangngé, iyakiya dé' naulléi malléttoiwi iyaro pakkaséséngngé. Iyakiya matedde atiko sibawa pojiwi méwa; lésséko sibawa salai-Ka. Dé' naengka muwéngngerangngi untu' pakalebbi-Ka, padahal Iyya ritu kiring bosi, muwi ri pammulanna iyaré'ga ri cappa'na wettu pabosié. Iyya'to ritu mpérékko wettu éngngalang tungke taung. Iyakiya dosa-dosamu ritu iya lawa-lawai manengngéngngi makessingngéro angkanna dé' mupéneddingiwi. Eh umma'-Ku, ri yelle'mu engka sining tau maja. Pada-pada tau monrowangngéngngi siyo iya natangngé untu' tikkeng manu'-manu', makkuwaniro mennang tang siyo untu' tikkengngi tolinoé. Pada-pada pattikkeng manu'-manu'é lisekiwi jebba'na sibawa manu'-manu', makkuwatoniro mennang lisekiwi bolana sibawa barab-barang wassélé pabengnguwang. Makkuwaniro mennang mancaji makuwasa sibawa sugi enrengngé macommo sibawa madécéng. Jana mennang dé'gaga paggangkanna. Dé' mennang naadélé ri laleng parakarana ana'-ana' béué, sibawa dé' naéwaiwi ha'na sining tau ritenre'é. Iyakiya, Iyya, Puwang, hukkungngi matu mennang nasaba iya manennaro; maélo-Ka mpale'i sining pangkaukenna iyaé bangsaé. Séuwa iya maseroé sibawa mappakatau-taué kajajiyang ri wanuwaéwé: mabbelléi nabi-nabié, mattumaniwi imang-ngimangngé situru élona na iko umma'-Ku mupoji gau'éro. Iyakiya aga mupogau' matu rékko narapini esso paccappurengngé?” Laono massala, éh sining tau Bényamingngé! Salaiwi Yérusalém! Paoniwi tarompé'é ri Tékoa, sibawa palluwa'ko api tanra-tanrang ri Bét-Kérém! Bahaya sibawa abala battowaé mangangcangngi polé manorang. Magello senna kota Sion, iyakiya maéloi Puwangnge mancuru'i; maddeppungengngi matu sining panguwasaé kuwaro silaong tentarana. Ri mattulilinna kotaéro napasangngi matu ténda-téndana mennang, tungke-tungke ri onrong iya napojiyé. Makkedai matu mennang, “Ayo, sadiyano gasai Yérusalém! Laono mai tagasai iyaé essoé!” Iyakiya makkeda towi matu mennang, “Wah, matengnge'ni! Mammulani makalemmeng essoé, mammulani malampé wajo-wajoé. Makessingengngi tagasai ri wennié, sibawa mancuru'i sining bénténna kotaéro.” Puwang Iya Pommakuwasaé pura paréntangngi sining panguwasaéro kuwammengngi natubbang aju-kajung sibawa mébbu bulu-bulu attahangeng untu' keppungngi Yérusalém. Makkedai Puwangnge, “Maélo-Ka hukkungngi iyaé kotaé nasaba ri lalenna purani napogau' maéga senna attenrekeng. Pékkugiwi mata uwai tette'i passu uwai macinnong, makkuwatoro iyaro kotaé tette'i powassélé ja. Banna karéba ateddekeng sibawa arrampokeng simata iya Uwéngkalingaé polé ri kotaéro; lo sibawa lasa Uwita kégi-kégi. Eh pabbanuwana Yérusalém, sitinajai sininna asukkarakengngéro mancaji papparéngngerang lao ri iko! Aja' narapii Usalaiko sibawa Upinrai kotamu mancaji padang kessi iya dé'é naonroiwi tauwé.” Makkedai Puwang Iya Pommakuwasaé lao ri iyya, “Maéloi rikellu Israélié gangka mapaccing pada-pada palla anggoro iya puraé ricéppu maneng buwana. Rimakkuwannanaro, ri wettu engkana mupa wettu, passalama'i iya nasésaé.” Umappébali, “ Puwang, niga harusu uwéwa mabbicara, sibawa niga harusu uparéngngerangi? Matedde atiwi mennang sibawa dé' namaélo jampangiwi. Nacawa-cawaiwi sibawa nacéccéi mennang pasem-Mu iya upalettu'é lao ri mennang. Cai-Mu lao ri mennang mabbara towi ri laleng aléku, Puwang! Mawatang untu' tahangngi.” Namakkeda Puwangnge, “Pallessui iyaro caimu lao ri ana'-ana'é risining watattanaé sibawa lao risining tau malolo iya mattengngangngé maddeppungeng. Ritikkengngi matu worowané sibawa makkunraié, nenniya tau macowaé dé'to naleppe. Riyabbéréyangngi matu bolana mennang lao ri tau laingngé, makkuwatoro sining dare'na sibawa sining bainéna mennang. Maélo-Ka hukkungngi pabbanuwana wanuwaéwé. Iya manenna, baiccu battowa, sappai asarong sibawa dé' namalempu. Mala nabié sibawa imangngé bengnguwang towi tauwé. Lona umma'-Ku naangga'i mennang lo baiccu bawang. Makkedai mennang, ‘Ah, dé' namagaga, makessing maneng sibawa amang.’ Padahal dé' sises-siseng. Sitongenna harusu'i mennang masiri nasaba purai napogau' sininna iya matunaéro. Iyakiya maompe'i rupanna mennang sibawa dé' naissengngi masiri. Rimakkuwannanaro sempé'i matu mennang pada-pada tau laingngé; cappuni curitana rékko Uhukkungngi mennang. Iyya, Puwang, pura mabbicara.” Makkedai Puwangnge lao ri umma'-Na, “Tettonno ri pékka-pékka lalengngé, sibawa pénessaiwi madécéd-décéng! Akkutanangngi sining lalengngé riyolo, sibawa kégana kaminang makessing ri yelle'na. Accowériwi iyaro lalengngé, kuwammengngi mutuwo tennang.” Iyakiya makkedai mennang, “Dé', dé' tamaélo maccowériwi iyaro lalengngé!” Nainappa makkolik-koling Puwangnge makka panganrowang untu' paréngngerangiwi mennang kuwammengngi naéngkalingai oni tanra-tanrang tarompé'é. Iyakiya makkedai umma'é, “Dé' tamaélo méngkalingai.” Rimakkuwannanaro makkedai Puwangnge, “Engkalingai, éh bangsa-bangsa! Harusu'ko missengngi aga iya maéloé kajajiyang ri yasé'na umma-Ku. Pénessaiwi, éh lino! Dé' namaélo umma'-Ku tarimai pappagguruwak-Ku sibawa dé' naturu ri Iyya. Selaku addimonrinna rancanganna mennang papolé-Ka abala ri yasé'na. Untu' aga kamennyangngé iya natiwirengngék-Ka mennang polé ri Syéba, iyaré'ga rampa-rampa polé ri wanuwa mabélaé? Dé' Umaélo tarimai pakkasuwiyanna mennang. Dé' Upojiwi akkarobangeng-akkarobangeng ritununna mennang. Iyya nassabariwi matu natabbuttu sining tauwéwé namenrung. Ambo' sibawa ana', silaong sibawa balibola cappu manengngi matu.” Makkedai Puwangnge, “Séuwa bangsa iya mawatangngé mattengngang kédo polé ri wanuwa iya mabélaé ri manorang. Poléi mennang untu' mammusu. Massenjata panai mennang sibawa bessi; mapéddarai mennang sibawa naissengngi maddampeng. Pada-pada oni tasi'é memmu makkuwaniro oni ajé anyaranna mennang iya mattengngangngé napalari untu' maju gasai Yérusalém.” Naéngkalingana karébaéro, dé'na pakkullénna pabbanuwana Yérusalém. Nakennani pappénedding métau, sibawa mapeddi pada-pada makkunrai iya maéloé mémmana. Dé' nabarani mennang nonno ri lalengngé iyaré'ga lao ri dare'é, saba' kégi-kégi bali iya massenjataé paompoi ajapperuseng. Makkedai Puwangnge lao ri umma'-Na, “Pakéno kaing karung sibawa aggaléluno ri laleng awué. Abbaratano nenniya mpatinno sibawa mapessé pada-pada tau teringiyéngngi amaténna ana' tungke'na, saba' nagasako matu pappabbinasaé temmusenna-senna.” Namakkeda Puwangnge lao ri Yérémia, “Ojiwi umma'-Ku, pada-pada mojiko ulaweng. Salidikiwi ampé-ampéna mennang. Parronta maneng mennang iya matedde atié, sittedde gessaé sibawa bessié. Kédo majai mennang sibawa joppa lao kégi-kégi untu' patassiya karéba iya péjariyéngngi tau laingngé. Mapella senna'ni accuwangengngé, iyakiya tai bessié dé' namaélo maccolo sibawa teddéng. Paracuma umma'-Ku matteru-teru rioji untu' ripatuléng, saba' sining taunna iya majaé dé' naripassala. Riyasengngi matu mennang péra' riyabbéyang, saba' Iyya, Puwang, pura mabbéyangngi mennang.” Aja' mumateppe lao ri pabbelléngngé iya makkedaé, ‘Amakki, saba' iyaé Bolana Puwangnge. Tongeng iyaé Bolana Puwangnge!’ Pinrai atuwommu sibawa kédo-kédomu. Adélé'ko séddié lao ri laingngé. Aja'na mutenre'i tau laingngé, ana' béué, sibawa janda-jandaé. Aja' muwunoi tau iya dé'é napasala ri wanuwaéwé. Aja' musompa déwata-déwata laing, saba' iyaro gau'é napaccappuko matu. Rékko mupinrai cara atuwommu sibawa ampé-ampému enrengngé mappésau pogau' manengngi iyaro, maélo-Ka palaloko tette monro ri wanuwaéwé iya puraé Uwabbéréyang selaku tana mana lao ri toriyolomu. Iyakiya, sitongenna paracuma bawang mateppe'ko lao ri ada-ada bellé. Ménnauko, mabbuno, malaweng, mabbéré asabbiyang bellé-bellé, makkasuwiyangeng akkarobangeng lao ri Baal, sibawa sompa déwata-déwata iya dé'é muwissengngi. Purana mupogau' maneng iyaro, laoko mangolo ri Iyya kuwaé ri Bola-Ku, sibawa makkeda, ‘Amakki!’ Nainappa mupatteru pangkaukemmu iya majaéro. Muwasengngiga iyaé Bola-Ku sarang parampo? Sininna pangkaukemmu purani Uwita. Laono ri Silo, kota iya Upilé riyolo mancaji onrong massompa lao ri alé-Ku. Itai aga iya puraé Upogau' lao ri onrongngéro nasaba dosana umma'-Ku Israélié. Namuni makkolik-kolik-Ka mabbicara lao ri iko, dé' mumaélo méngkalingai. Mupogau'i sininna dosaéro, sibawa dé' mumaélo metté rékko mangobbi-Ka. Nah, Bola-Ku iya muwattuwangngé, sibawa onrong iya Uwabbéréyangngé lao ri toriyolomu sibawa lao ri ikoé Ugaukengngi matu pada-pada Silo riyolo. Upaddésu'ko matu polé ri yolo-Ku pada-pada purana Upaddésu sumpulolomu, umma Israélié.” Makkedai Puwangnge, “Yérémia, aja' muwassempajangengngi sining tauwéwé. Aja' muwéllau tulung iyaré'ga massempajang untu' mennang; aja' mudessa'-Ka, saba' dé' Umaélo méngkalingai paréllaungngéro. Alému pura mitai aga napogau' mennang ri kota-kotana Yéhuda sibawa risining lalengngé ri Yérusalém! Paddeppungengngi aju tunung ana'-ana'é, tau worowané palluwa api, sibawa makkunraié campuru'i lama labbu'é untu' mébbu béppa untu' déwi iya nasengngé mennang Ratunna Surugaé. Sibawa untu' peddiriwi atik-Ku makkasuwiyangeng towi mennang uwai anggoro lao ri déwata-déwata laingngé. Iyakiya sitongenna, tenniya Iyya napeddiri, sangadinna aléna muto angkanna masiri mennang. Iyya, Puwang Iya Pommatanré, maélo pakennaiwi cai-Ku iya maseroé ri yasé'na bola assompangngéwé, ri yasé'na tolinoé sibawa olokolo'é, makkuwatoro ri ajukajungngé sibawa wassélé tanaé. Mallalatungngi matu cai-Ku pada-pada api iya dé'é nariyullé peddéi.” Makkedai Puwangnge, “Eh umma'-Ku, muwisseng makkedaé pakkasuwiyang iya mutunué ri yasé'na mézbaé harusu'i ritunu gangka cappu, na pakkasuwiyang laingngé weddingngi muwanré. Iyakiya Iyya, Puwang makkeda, anré manenni! Wettuk-Ku tiwii toriyolomu massu polé ri Maséré, dé' Uwéréngngi mennang peraturang passalenna akkarobangeng ritunué iyaré'ga sining akkarobangeng laingngé. Banna uparéntangngi mennang untu' turusi-Ka kuwammengngi Umancaji Allataalana mennang, na mennang mancaji umma'-Ku. Usuroi mennang tuwo situru parénta-parénta-Ku kuwammengngi namasennang mennang. Iyakiya dé' namaélo mennang maréngkalinga sibawa dé' namaélo jampangiwi. Mala mennang naturusiwi élo atinna muto iya matedde'é sibawa majaéro. Dé' mennang namancaji makessing sangadinna mancaji lebbi majai. Sipongenna massu toriyolomu polé ri Maséré lettu essoéwé tuli Usuroi ata-atak-Ku, sining nabié lao ri iko. Iyakiya dé'gaga méngkalingai iyaré'ga jampangiwi. Mala mancajiko lebbi matedde ati sibawa maja naiya toriyolomu.” Nainappa makkeda Puwangnge, “Rimakkuwannanaro, éh Yérémia, namuni muwappaissengeng manengngi iyaro lao ri umma'-Ku, dé' najampangiwi matu ada-adammu. Namuni muwobbii mennang, dé' matu nappébali. Jaji powadangngi mennang makkedaé mennang iyanaritu séuwa bangsa iya dé'é namaélo mapato lao ri Iyya, Puwang, Allataalana. Dé' namaélo mennang magguru polé ri pahukkungeng iya puraé napéneddingi. Atinulurenna lao ri Iyya lennye'ni, mala dé'na nabicarai.” Makkedai Puwangnge, “Eh pabbanuwana Yérusalém, abbaratano! Rette'ni gemme'mu sibawa abbéyanni! Puwélonno élong mpating ri tompo-tompo bulué, saba' Iyya, Puwang, mattengngang macai sibawa pura sampéyang manekko. Purani pogau' ja tau Yéhudaé. Barahala-barahalana iya Ucéccéro purani mennang nataro ri laleng Bola-Ku, angkanna napanajisi. Séuwa mézba iya riyasengngé Tofét pura napatettong mennang ri Lompo Hinom untu' makkasuwiyangengngi ana'-ana'na mennang selaku akkarobangeng ritunu. Padahal dé' naeng-Ka Usuroi mennang pogau'i gau'éro, mala dé' naengka naompo ri laleng pikkirak-Ku gau' makkuwaéro. Rimakkuwannanaro, narapii matu wettunna iyaro onrongngé dé'na nariteppu Tofét iyaré'ga Lompo Hinom, sangadinna Lompo Abbunowang. Iyaro tanaé mancajiwi matu tana akkuburukeng nasaba dé'gaga onrong laingngé. Uju-ujuna mennang mancajiwi matu inanréna manu'-manu'é sibawa olokolo masekkangngé, dé'gaga rukkai. Iyaé wanuwaé mancajiwi matu padang makabuttu. Sadda marennu sibawa sadda mappésta abottingengngé Upappajai matu ri kota-kotana Yéhuda sibawa risining lalenna Yérusalém. Iyaro wettué buku-bukunna arung-ngarungngé sibawa pajaba-pajaba pamaréntaé ri Yéhuda, makkuwatoro buku-bukunna sining imangngé, nabié, sibawa pabbanuwana Yérusalém laingngé ripassui matu polé ri kuburu'na mennang, tenniya untu' ripaddeppungeng sibawa rikuburu paimeng, sangadinna rileppessang ri tanaé selaku roppo. Iyaro buku-bukunna sining tauwé tattale'i ri yolona mata essoé, kétengngé sibawa sining wéttowing iya nangga'é déwata mennang, naélori, natumaningi, nasompa, sibawa naéllauwi panunju. Na sining tau iya tuwoé mupa polé ri bangsa iya majaéwé iya puraé Upatassiya-siya lao kégi-kégi lebbi napojiwi matu maté naiya tuwoé. Iyya, Puwang Iya Pommakuwasaé, pura mabbicara.” Nasuroka Puwangnge makkeda makkuwaé lao ri umma'-Na, “Rékko menrungngi tauwé, tentu tokkongngi matu paimeng, sibawa rékko pusai tauwé ri lalengngé, tentu lisui paimeng. Iyakiya magi iko, umma'-Ku, matteru-teruko léssé sibawa salai-Ka? Makkatenning masse'ko ri barahalamu, sibawa dé' mumaélo lisu ri Iyya! Purani uwéngkalinga madécéd-décéng, iyakiya dé' muwabbicara pékkugi mestinna. Dé' muwi séddi tau polé ri iko sesse'i pangkaukenna iya majaé. Dé'gaga makkeda, ‘Aga asalakku?’ Lalemmu muto muwaccowéri maneng pada-pada anyarang maggasaé lao ri laleng ammusurengngé. Muwi coko'é naissetto wettunna untu' lisu; bekkué, lajang-lajangngé sibawa muraié naissetto wettunna untu' létté onrong. Iyakiya iko, umma'-Ku, dé' muwissengngi hukkung-hukkung iya Uwabbéréyangngé lao ri iko. Barani tongekko makkeda makkedaé mapanréko, sibawa missengngi hukkung-hukkuk-Ku! Coba mitai hukkung-hukkuk-Kuro ripinra ri ahli-ahli agama iya macéko-cékoé! Sining tau maccaé ri tengnga-tengngamu ripakasirii matu. Ateddéngengngi matu akkaleng sibawa tajjebba'i. Dé' namaélo mennang tarimai pangaja-Ku; makkekkuwangngé, apanréng agapi iya engkaé ri mennang? Rimakkuwannanaro maélo-Ka mabbéréyangngi dare'na mennang lao ri punna tana laingngé, sibawa bainéna lao ri tau laingngé. Iya manenna mennang, baiccu battowa, sappai asarong sibawa dé' namalempu. Mala muwi nabié sibawa imangngé belléi tauwé. Sining lona umma'-Ku naangga'mi mennang lo baiccu bawang. Makkedai mennang, ‘Ah, dé' namagaga, makessing maneng muwa sibawa amang.’ Padahal dé' sises-siseng. Eh umma'-Ku, harusu'ko masiri nasaba purai mupogau' sininna iya matunaéro! Iyakiya maompe rupako sibawa dé' muwissengngi masiri. Rimakkuwannanaro sempé'ko matu pada-pada tau laing iya sempé'énna; cappuni curitamu rékko Uhukkukko. Iyya, Puwang, pura mabbicara. Macinna senna'-Ka paddeppungengngi umma'-Ku pada-pada tau paddeppungengngéngngi wassélé tanana. Iyakiya, umma'-Ku pada-padai pong anggoro'é sibawa pong ara iya dé'é nabbuwa, mala daud-daunna makelle toni. Iyanaro saba'na napura Upalalo tau laingngé polé sibawa makuwasaiwi wanuwanna mennang. Iyya, Puwang, pura mabbicara.” Makkedai umma'na Allataala, “Magi nadé' aga-aga tapogau'? Laono mai tasibawa mangungsi lao ri kota-kota mabbénténgngé, leppessanni maté kuwaro. Puwang Allataalata pura pettuiwi makkedaé harusu'ki binasa. Purani nawéréng racung riyénung saba' madosaki lao ri Aléna. Paracuma bawang mamménasaiwi adaméngengngé sibawa wettu ajjappangngé, saba' iya engkaé banna ateddekeng. Engkani balié ri kota Dan; paéngkalingani kiki anyaranna mennang, na sininna wanuwaé métauni. Poléi balié untu' mancuru'i sininna wanuwatta, makkuwatoro kotata sibawa sininna pabbanuwana.” Nakkeda Puwangnge, “Pénessaini! Makkekkuwangngé kirik-Ka sining ula lao ri tengnga-tengngamu untu' pitto'ko, ula mamoso iya dé'é nawedding nakenna pajjappi.” Tassépa atikku sibawa mapessé, saraku dé' nariurai. Engkalingai! Maddengngoni ri sininna wanuwaé kelli terinna bangsaku iya makkutanaé, “Dé'niga Puwangnge ri Sion? Kégani arunna makkekkuwangngé?” Nappébali Puwangnge, arunna mennang, “Magi musuju' lao ri déwata-déwataé iya dé' sises-sisengngé nakkéguna? Magi mupeddiriwi atik-Ku sibawa sompa barahala-barahala?” Mangobbii umma Israélié, “Wettu éngngalangngé sibawa wettu tikkaé labe'ni makkekkuwangngé, iyakiya dé' topa tasalama.” Mareppo atikku nasaba masero lasai bangsaku; mabbarataka sibawa mausé. Agangngaré nassabariwi angkanna bangsaku lettu makkekkuwangngé dé' topa najjappa? Aga ri sininna Giléad, dé'gaga dottoro iyaré'ga pabbura? Temmaka kessinna rékko ulukku pada-padai bujung iya pennoé uwai, sibawa matakku jompi iya matterué massolo! Nauwulléi teri esso sibawa wenni, watingiwi sining tau sibangsaku iya riyunoé ri balié. Akkalarapanna uwulléi runtu'i ri padang kessi'é onrong mappéruma untu' tau iya engkaé ri laleng allalengengngé! Maéloka salaiwi bangsaku, sibawa lari lao kuwaro untu' mabéla polé ri mennang. Tobali'bella maneng mennang, séuwa addeppungenna tau iya dé'é namatinulu, sibawa tuli sadiya untu' mabbellé. Ri sininna wanuwaé, dé' namakuwasa atongengengngé, mala sassa atemmalempurengngé. Makkedai Puwangnge, “Pogau'i ja umma'-Ku sibawa dé' appésaunna, dé' nangakui-Ka mennang selaku Allataalana.” Lao ri silaongngé, tungke tau harusu'i matike sibawa muwi silessurengngé dé'to nawedding riyatepperi. Saba', pada-pada Yakub makkuwaniro mennang, tungke-tungke belléi silessurenna. Tungke tau joppai lao kégi-kégi pallebbang pétenna sibawa bellé. Rimakkuwannanaro makkedai Puwang Iya Pommakuwasaé, “Pada-pada bessié, Uwojiwi matu umma'-Ku kuwammengngi mennang namancaji tuléng. Agapi wedding Upogau' lao ri umma'-Ku iya puraé pogau' ja? Mabbahaya senna ada-adanna mennang, naullé pauno pada-pada pana mamosoé. Pau-paunna mennang bellé simata, Ada-adanna mennang macenning pataré, iyakiya sitongenna pasangngi mennang siyo-siyo. Masa ri yasé'na bangsa makkuwaéwé dé' Upakennaiwi pahukkungeng iya sicoco'é? Uwale'i matu pangkaukenna mennang; Iyya, Puwang, pura mabbicara!” Iyya, Yérémia, makkeda, “Maéloka teri sibawa mabbarata nasaba padang wellaé ri padang kessi'é sibawa risining bulué iya marakko makarossaénna enrengngé dé' naolai tauwé. Oni olokolo'é dé'na napaéngkalinga, manu'-manu' sibawa olokolo laingngé larini sibawa lennye'ni.” Makkedai Puwangnge, “Upancajiwi matu Yérusalém ruttungeng onronna massubbu asu ale'é. Kota-kotana Yéhuda mancaji masino-sinoi matu, onrong iya dé'énna nariyonroi.” Makkutanaka, “ Puwang, magi narileppessang iyaé wanuwaé makabuttu sibawa marakko pada-pada padang kessi'é angkanna dé'gaga molai? Aga engka iya genne'é amaccanna untu' majeppuiwi iya manennaé? Nigana pura Muwéréng pappakatajang kuwammengngi naulléi patterui lao ri tau laingngé?” Nappébali Puwangnge, “Kajajiyangngi iyaro nasaba umma'-Ku dé'na najampangiwi sining pappagguruwang iya Uwabbéréyangngé lao ri mennang. Dé' namatinulu mennang lao ri Iyya, sibawa dé' namaélo turusiwi parénta-Ku. Matedde atiwi sibawa sompai barahala-barahala Baal pada-pada iya nappagguruwangngé toriyolona mennang. Rimakkuwannanaro, éngkalingai aga Iyya, Puwang Iya Pommakuwasaé, Allataalana Israélié, maélo Upowada: Uwéréngngi matu umma'-Ku tanet-taneng mapai untu' naanré sibawa racung untu' naénung. Upatassiya-siyai matu ri yelle'na bangsa-bangsa iya dé'é naissengngi mennang iyaré'ga toriyolona mennang. Matteru-Ka matu kiring tentara iya gasaéngngi mennang narapi Upabbinasa siseng mennang.” Puwang Iya Pommakuwasaé makkeda lao ri umma'-Na, “Pénessaiwi aga iya kajajiyangngé ri wanuwaéwé, sibawa obbini masitta sining mpatingngé. Suroi mennang polé sibawa makkélong élong abbaratang.” Makkedai tau Yéhudaé, “Suroi mennang masitta puwélongngi élong abbaratang untu' idi maneng, kuwammengngi namallénél-lénéng uwai mataé rica'i rupatta.” Ri Sion paéngkalingai sadda terié, “Binasaki sibawa ripakasiri senna. Wanuwatta harusu'i risalai, sining bolata ancuru'ni tassiya-siya.” Makkeda-Ka, “Engkalingai ada-adanna Puwangnge, éh sininna makkunraié! Lao ri ana'-ana'daramu paggurui élong awatingeng, lao ri silao-silaommu élong abbaratang. Muttama'ni amaténgngé lalo ri tellongengngé, nabettuni muttama ri laleng saorajaé; naluruini ana'-ana'é ri lalengngé enrengngé ana'-ana' maloloé ri tana lapangngé. Tattale'ni ujué kégi-kégi pada-pada roppo'é ri tanaé; pada-pada gandong iya puraé rirette narisalai sibawa dé'na naripaddeppungeng. Iyanaro pasenna Puwangnge iya harusu'é uwabbéréyang.” Makkedai Puwangnge, “Tau maccaé dé' nawedding mabangka nasaba apanrénna, tau mawatangngé nasaba awatangenna, sibawa tau sugié nasaba asugirenna. Niga maélo mabbangka passalenna séuwaé, harusu'i mabbangka makkedaé naissek-Ka sibawa najeppui-Ka; makkedaé naissek-Ka mamasé untu' mannennungeng sibawa Upatettongngi hukkungngé enrengngé adélékengngé ri linoé. Iya manennaro napésennangiwi atik-Ku. Iyya, Puwang, iya powadaéngngi iyaro.” Umma Israélié, éngkalingai pasenna Puwangnge lao ri iko. Makkedai, “Aja' muwaccowériwi abiyasanna bangsa-bangsa laingngé, sibawa aja' mumétau mitai tanra-tanrangngé ri langié iya naétauriyé bangsa-bangsaéro. Ade abiyasanna bangsa-bangsaéro dé' sises-siseng nakkéguna. Tubbangngi mennang aju ri ale'é, nanasuroi panré ajué jamai sibawa pakkakkasa mancaji dato-dato barahala. Nainappa iyaro dato-dato barahalaé nabélo-béloi sibawa ulaweng nenniya péra', nainappa napakkasse sibawa paku kuwammengngi aja' namenrung. Iyaro dato-dato barahalaé pada-padai tau-tauwé ri dare bonté'é. Dé' naulléi mennang mabbicara, dé' naulléi majjongka, sibawa harusu riyakka. Aja' mumétau lao ri mennang, saba' dé' naulléi mennang pogau'i majaé lao ri iko; muwi pogau'i makessingngé dé'to namampu.” Puwang iya malebbié, dé'gaga pada-padam-Mu, marajai asem-Mu sibawa penno akuwasang. Nigana dé' namaélo mateppe lao ri Iko, arunna sininna bangsaé? Tongeng, sipato senna'-Ko ripakalebbi. Polé ri sininna iya maccaé ri yelle'na bangsa-bangsaé sibawa polé ri sininna arung-ngarunna mennang, dé' muwi séddi wedding ripappadaiyangngi sibawa alé-Mu, oh Puwang. Madongo sibawa madonggo maneng mennang saba' déwatana banna aju simata, dé' naulléi mappagguruwangngi iya makkégunaé. Rilapiriwi sibawa péra' nenniya ulaweng iya ritiwii polé ri Spanyol sibawa kota Ufas, iya manenna ébbu limanna sining panré sibawa panré ulawengngé. Pakéyanna poléi ri kaing collipao macowaé sibawa collipao maloloé, najamai sining pattennungngé sibawa matutu. Iyakiya Idi, Puwang, Allataala iya tongengngé, Allataala mabbéré atuwong, arung mannennungengngé. Rékko macai-Ko, taggottangngi linoé, rékko majjameru'-Ko dé' natahang bangsa-bangsaé. ( Iko, éh umma, harusu paissengiwi mennang makkedaé déwata-déwata iya dé'é napancajiwi langié sibawa linoéro ripaccappui matu. Lennye'i matu polé ri tompo'na linoé.) Napancajiwi Puwangnge linoé sibawa akuwasan-Na, tappai linoé sibawa amaccan-Na, nenniya pallebba'i langié sibawa akkalen-Na. Banna mabbéréi parénta, memmu'ni uwai ri bitaraé. Polé ri cappa-cappa linoé Napapoléi ellungngé, sibawa Naébbui billa'é mattappa ri laleng bosié, enrengngé Nakiringngi angingngé polé ri onrong attaron-Na. Naita manennaro mainge'ni tolinoé, makkedaé madonggoi sibawa dé' nappunnai pappéjeppu. Masirini sining panré ulawengngé, saba' dato-dato barahala ébbunaro palsui sibawa dé' nakkényawa. Iyaro barahala-barahalaé dé' angke'na, sipato'i riyéllé-kéllé sibawa ripakatuna. Rékko narapini wettunna binasai matu mennang. Allataalana Yakub dé' napada-pada barahala-barahalaéro; Aléna pancajiwi sininna séuwa-séuwaé. Asen-Na iyanaritu Puwang Iya Pommakuwasaé; purani Napilé Israélié mancaji umma'-Na. Pabbanuwana Yérusalém, rikeppukko! Rimakkuwannanaro, apperi-perino! Iyaé sisengngé Puwangnge maélo maggenrungengngi sininna bangsa Yéhudaé lao ri akkabbéyangengngé; iko maneng riyancuru sisekko matu. Iyanaro paseng polé ri Puwangnge. Gorai pabbanuwana Yérusalém, “Masero lota sibawa dé' nawedding majjappa. Riyolo riyasengngi makkedaé iyaé anrasa-rasangngé riyullé tanggungngi, padahal dé'. Masolanni kémata, sibawa sining tuluna pettu manenni. Dé'na gaga iya mullééngngi patettong kéma sibawa pasangngi sining kainna, nasaba laoni ana'-ana'é.” Mappébalika, “Madonggoi iyaro sining pamimpitta. Dé' naéllau mennang panunju polé ri Puwangnge, iyanaro saba'na dé' mennang nallolongeng, na idi tassiyaki lao kégi-kégi. Engkalingai! Engka karéba makkedaé séuwa bangsa ri manorang paompo awéwangeng. Tentarana mébbui matu kota-kotana Yéhuda mancaji masino-sino sibawa dé'gaga monroiwi. Asu-asu ale'é massubbui matu kuwaro.” Puwang, uwisseng dé' muwi séddi tau makuwasa pattentui totona iyaré'ga paturui laleng atuwonna. Ajara'ki oh Puwang, iyakiya aja' nasibawangngi pakkunru iya papeddiri senna'é. Aja'to muhukkukki rékko mattengngakko macai, saba' pasti binasa manekki matu. Pallessuni cai-Mu ri yasé'na bangsa-bangsa iya dé'é nangakui-Ko sibawa iya dé'é namaélo massompa ri Iko. Saba' purai mennang napabbinasa siseng umma'-Mu sibawa mancuru'i wanuwatta. Makkedai Puwangnge lao ri iyya, “Pénessaiwi sara'-sara'na assijancing iya Uwébbué sibawa umma'-Ku. Paissengiwi tau Yéhudaé sibawa pabbanuwana Yérusalém makkedaé Iyya, Puwang Allataalana Israélié, tanroiwi nigi-nigi iya dé'é naturusiwi sara'-sara'na assijancingek-Kuro. Iyaro assijancingngé purai Uwébbu sibawa toriyolona wettunna mennang Utiwi massu polé ri Maséré, wanuwa iya pada-padaé naraka untu' mennang. Usuroi mennang mapato lao ri Iyya sibawa pogau'i sininna iya puraé Uwapparéntang. Makkekkuwangngé pura toni Upowada lao ri tau Yéhudaé sibawa pabbanuwana Yérusalém makkedaé rékko matinului mennang lao ri Iyya, mancajiwi matu umma'-Ku sibawa Iyya Allataalana mennang. Rékko napogau' manengngiro mennang, Urupaiwi matu jancik-Ku lao ri toriyolona mennang makkedaé wanuwa iya macommo'é sibawa madécéngngé, iyaro naonroiyé mennang makkekkuwangngé, Uwéréngngi matu mennang.” Mappébalika, “Makessinni, Puwang.” Namakkeda Puwangnge lao ri iyya, “Laono ri kota-kotaé ri Yéhuda sibawa risining lalengngé ri Yérusalém. Palettu'i iyaé pasek-Ku lao risining tauwé kuwaro. Suroi mennang pénessaiwi sibawa turusiwi sara'-sara'na assijancik-Ku. Wettuk-Ku tiwii toriyolona massu polé ri Maséré, Uparéngngerangiwi mennang sibawa matedde kuwammengngi namapato lao ri Iyya. Lettu essoéwé matteru mupa paréngngerangiwi umma-Ku passalenna gau'éro, sibawa suroi mennang turusiwi assijancingek-Kuro, iyakiya dé' namaélo mennang méngkalingai sibawa dé' namaélo matinulu. Mala tette'i mennang matedde ati sibawa maja pada-pada riyolo. Rimakkuwannanaro sininna pahukkungeng iya tarokié ri laleng assijancingngéro purani Upakennaingengngi mennang.” Nainappa makkedasi Puwangnge lao ri iyya, “Masséddini tau Yéhudaé sibawa pabbanuwana Yérusalém méwa-Ka. Purani mennang napogau' dosa iya napogau'é toriyolona mennang iya dé'é namaélo matinulu lao ri Iyya, sompai mennang déwata-déwata laing sibawa dé' namaélo turusiwi parénta-Ku. Muwi Israélié iyaré'ga Yéhuda majjalékaiwi assijancing iya puraé Uwébbu sibawa toriyolona. Rimakkuwannanaro Iyya, Puwang, mapparéngngerangengngi makkedaé maélo-Ka papolé abala ri yasé'na mennang na dé' naulléi mennang léssériwi. Rékko mangobbii mennang méllau tulung ri Iyya dé' Umaélo méngkalingai. Nainappa tau Yéhudaé sibawa pabbanuwana Yérusalém lao méllau tulung ri déwata-déwata laingngé iya nasompaé mennang sibawa makkasuwiyangeng akkarobangeng. Iyaro déwata-déwataé dé' naulléi matu passalama'i mennang ri wettu poléna iyaro abalaé. Maéga senna déwatana tau Yéhudaé, singngéga kota-kotana mennang. Pabbanuwana Yérusalém patettongngi mézba-mézba singngéga sining lalengngé ri kota Yérusalém untu' makkasuwiyangeng akkarobangeng lao ri Déwa Baal. Rimakkuwannanaro, Yérémia, aja' muwassempajang untu' mennang iyaré'ga méllau tulung ri Iyya untu' mennang! Rékko mennang ri lalengngi asussang naméllau tulung ri Iyya, dé' Umaélo méngkalingai mennang.” Makkedai Puwangnge, “Umma'-Ku iya Uwamaséiyé purani napogau' gau'-gau' iya majaé. Dé' ha'na mennang engka ri Bola-Ku. Nasengngi mennang makkedaé ri laleng mébbuna janci-janci, sibawa nasibawang makkasuwiyangeng olokolo, naulléi mennang lawa-lawaiwi abalaé. Aga nasibawang iyaro weddingngi mennang masennang? Engka naengka Uwasengngi mennang pong zaitun maworongngé, penno buwa-buwa iya makessingngé. Iyakiya, makkekkuwangngé nasibawang oni memmu iya maseroé Utunui matu daud-daunna sibawa Upoloi sininna takkéna. Iyya ritu patettongngi Israélié sibawa Yéhuda, Iyya, Puwang Iya Pommakuwasaé. Iyakiya makkekkuwangngé purani Urancana untu' papolé abala ri yasé'na mennang. Aléna muto mennang nassabariwi sininnaro, nasaba purai mennang napogau' jaé, iyanaritu makkasuwiyangeng akkarobangeng lao ri Baal angkanna macai-Ka.” Napaissengika Puwangnge passalenna rancana majana sining balié lao ri iyya. Pada-padaka bimbala iya tebbata-bataé ritiwi ri onrong aggérékengngé. Dé' uwissengngi makkedaé iyya ritu mancaji akkatta rancana-rancana majana mennang. Makkedai, “Laono mai tatubbangngi iyaé ajué ri wettu naulléna mupa powassélé buwa; natapallennye'i kuwammengngi nallupaiwi tauwé asenna.” Nainappaka massempajang, “Oh Puwang Iya Pommakuwasaé, Idi haking iya adélé'é; Idi ritu mojiwi pikkirangngé sibawa atinna tauwé. Iyaé parakaraku uwabbéréyangngi lao ri Idi. Tennapodo weddikka sabbik-Ko mpale'i pangkaukenna sining tauwéro.” Macinnai sining tau Anatot-é kuwammengngi umaté. Makkedai mennang, “Rékko matteruko bawang palettu'i sining pasenna Puwangnge lao ri idi, maéloki mpunoko.” Rimakkuwannanaro, makkedai Puwang Iya Pommakuwasaé, “Maélo-Ka hukkungngi mennang! Sining tau malolona mennang matéi matu ri laleng ammusurengngé, ana'-ana'na mennang matéi alupureng. Purani upattentu wettunna untu' papoléi abalaé ri yasé'na sining tau Anatot-é, sibawa rékko narapii wettu pahukkungenna mennanro, dé' muwi séddi tau leppe.” “Rékko upangoloi iyaé parakaraku ri yolo-Mu, oh Puwang, tentu pabuttiwi matu makkedaé Iko ritu tongeng. Iyakiya macinna tokka makkutangngi ri Iko passalenna adélékengngé: Magi namadécéng tau majaé? Magi mala tau dé'é namalempu lolongeng wassélé? Mutanengngi mennang pada-pada tanet-tanengngé, nainappa makkure mennang, tuwo, sibawa mabbuwa. Tuli mabbicarai mennang iya makessingngé passalenna alé-Mu, iyakiya ri laleng ati, sitongenna dé' napaduli-Ko mennang. Iyakiya Iko, oh Puwang, missekka. Muwitai aga upogau', sibawa Muwisseng pékkugi perasaanna atikku lao ri Iko. Assarénréngengngi sining tau majaéro massu, tiwii mennang pada-pada bimbala'é lao ri aggérékengngé. Jagaiwi mennang narapi wettunna rigéré. Gangka siyagapi ittana iyaé wanuwaé marakko, sibawa makelle wellana ri tungke dare? Manu'-manu'é sibawa olokolo laingngé matéi nasaba jana bangsata. Makkedai mennang, makkedaé dé' uwitai matu totona mennang.” Makkedai Puwangnge, “Yérémia, rékko posono makkabéttang sibawa tolinoé, pékkugi weddikko makkabéttang sibawa anyarangngé? Rékko ri tana iya amangngé métauko, aga maélo mupogau' rékko engkako ri alekale'é ri wirinna Yordan? Purano ribali'bellari mala ri sumpulolomu muto; maccowéi mennang gasako. Aja' mumateppe ri mennang, namuni macenning ada-adanna mennang.” Makkedai Puwangnge, “Dé'na Upaduliwi onrong Uwonroiyé, wanuwa iya mancajiyé appunnangek-Ku Usalaini, sibawa umma'-Ku iya Uwamaséiyé purani Uwabbéréyang lao ri limanna sining balinna. Naéwa-Ka umma Upilé; pada-pada singaé ri ale'é makkuwaniro mennang mangngaung lao ri Iyya. Iyanaro saba'na Ucéccéi mennang. Pada-padai mennang manu'-manu' iya riluruiyé ri bokangngé polé tulili. Obbini sininna olokolo ale'é untu' maccowé paccappui mennang. Maéga tomakuwasa laing pura solangiwi palla anggoro'-Ku sibawa léjja-léjja'i sining dare'-Ku. Wanuwak-Ku iya magelloé napinrai mennang mancaji padang kessi iya masino-sinoé. Uwitai mennang pancajiwi wanuwak-Ku onrong masino-sinoé iya mappamessé. Kariya-riya maneng, dé'gaga jampangiwi. Polé ri liwenna padang kessi'é ri bulué, poléi sining tauwé untu' marrampo. Papoléka musu untu' solangiwi sininna wanuwaé angkanna dé' muwi séddi tau mulléi tuwo damé. Mampoi gandong umma'-Ku, iyakiya dori ritu naéngngala. Massussa-sussai mennang iyakiya dé' nallolongeng usahana. Macai senna'-Ka angkanna dé' najaji éngngalanna mennang.” Makkedai Puwangnge, “Iyanaé pasek-Ku passalenna wanuwa-wanuwa sideppéna Israélié iya puraé solangiwi wanuwa iya Uwabbéréyangngé lao ri umma'-Ku Israélié. Pada-pada tanet-taneng iya ribébbué polé ri tanaé, makkuwaniro sining tau majaéro Upassui matu polé ri wanuwa-wanuwanna mennang, sibawa Uleppessangngi Yéhuda polé ri pakkarekkenna mennang. Iyakiya purana Upassu mennang, Uwamaséisi matu mennang; tungke bangsaé Utiwii matu lisu ri wanuwanna muto. Rékko sukkui atinna mennang maélo tarimai agamana umma'-Ku nenniya maélo mattanro sibawa makkeda, ‘Nasabbing Puwang iya tuwoé,’ – pada-pada riyolo paggurui umma'-Ku mattanro nasabbing Baal – na muttama towi matu mennang umma'-Ku sibawa mancaji madécéng. Iyakiya bangsa iya dé'é namaélo turusi-Ka, Ureddu'i matu pada-pada tanet-tanengngé sibawa Upallennye'i. Iyya, Puwang, pura mabbicara.” Puwangnge suroka lao melli lipa' ponco polé ri lénangngé sibawa pakéi, iyakiya dé' naweddikka remméi ri laleng uwai. Naulaona melliwi iyaro lipa' ponco'é, nainappa pakéi. Nainappa mabbicarasi Puwangnge lao ri iyya, adan-Na, “Laono ri Salo Efrat, namusubbui iyaro lipa' ponco'é ri yelle-elle batué.” Na situru sibawa paréntana Puwangnge laona sibawa subbui iyaro lipa' ponco'é ri seddéna Salo Efrat. Siyagangngaré wettu ri munrinna nasurona Puwangnge laosi ri Salo Efrat untu' malai iyaro lipa' ponco'é. Naulaona, sibawa passui iyaro lipa' ponco'é polé ri onronna usubbu. Annessana iyaro lipa'é matabu'ni, sibawa dé' sises-sisenna nakkégunana. Nainappa mabbicarasi Puwangnge lao ri iyya, adan-Na, “Mappakkuwaiyé cara-Ku tinda matu lao ri tau Yéhudaé sibawa pabbanuwana Yérusalém. Maélo-Ka mancuru'i atemponna mennang iya dé'é padannaro. Bangsa iya majaéwé matedde ati senna sibawa dé' namaélo mapato lao ri Iyya. Massompai mennang lao ri déwata-déwata laingngé. Iyanaro saba'na namancaji matu mennang pada-pada lipa' ponco iya dé'é nakkégunaro. Pada-pada lipa' ponco tassiyo mare'é ri babuwana pakééngngi, makkuwatoniro makkatta-Ka kuwammengngi umma Israélié sibawa Yéhudaé tassiyo masse'i ri Iyya. Nanallalengiwi namancaji mennang umma'-Ku iya mébbuéngngi asek-Ku ripoji sibawa ripakalebbi. Iyakiya, dé' namaélo mennang turusiwi élo-Ku.” Makkedai Puwang Allataala lao ri iyya, “Yérémia, palettu'i pasek-Ku lao ri tau Israélié makkedaé tungke guci onrong anggoro'é harusu'i riliseki penno sibawa anggoro. Mappébaliwi matu mennang, ‘Masa dé' taissengngi makkedaé tungke guci harusu'i ripennoi sibawa anggoro?’ Powadangngi mennang makkedaé sining tauwé ri wanuwaéwé, arung-ngarung wija-wijanna Daud, sining imangngé, nabié, sibawa sininna pabbanuwana Yérusalém Ulisekiwi matu gangka penno sibawa anggoro narapi mabo'. Nainappa Upasileppo matu séddié sibawa laingngé. Macowa malolo Ugaukengngi matu makkuwaro temmaddampeng. Upabbinasai matu temmarasa sayangngi iyaré'ga mamasé. Iyya, Puwang, pura mabbicara.” Umma Israélié, Puwangnge pura mabbicara! Aja' Mumatempo, éngkalingai Aléna! Puwang Allataalamu harusu mupakaraja ri wettu dé'napa Napapoléi pettangngé, sibawa ajému tabbuttu ri bulué, ri wettu dé'napa tajang iya muwaddennuwangiyé Napinra mancaji akalemmengeng. Rékko bata-batako méngkalingai, terika matu sibawa mammekko-mekko. Sibawa pappénedding masé' senna muteringiwi atempommuro. Mallénél-lénéngngi matu uwai matakku nasaba ritiwii umma'na Puwangnge selaku tawangeng. Makkedai Puwangnge lao ri iyya, “Suroi arungngé sibawa indo'na arungngé nonno polé ri kadéra arajanna, passigera'na iya magelloé sempé'ni polé ri ulunna. Kota-kotana Yéhuda ri bagiyang yattang mattengngang rikeppung, na dé'gaga mulléi bettui akkeppungengngéro. Sininna taunna Yéhuda riyakkani lao ri appalirengngé.” Makkedai Puwangnge lao ri pabbanuwana Yérusalém, “Pénessaiwi! Mattengnganni polé sining balimmu polé ri manorang! Kégani sining tau iya harusu'é mulinrungi sibawa muwabbangkakeng senna'ro. Aga mupowada matu rékko sining tau iya mugaukengngé selaku silao-silaommu cauko sibawa makuwasaiko? Pasti makkéneddikko matu pada-pada makkunrai iya mattengngangngé mémmana. Naullé makkutanako magi na iya manennaro nakennai alému, magi narisapé pakéyammu sibawa rigau' majako. Issenni makkedaé kajajiyangngi iyaro nasaba battowa senna'ni dosamu. Naulléga tau mabolongngé pinrai olina, iyaré'ga macangngé patteddéngngi bellanna? Tentu dé'! Makkuwatoro iko iya biyasaé pogau'i majaé dé' namakkullé pogau'i makessingngé. Maélo-Ka passara-sarakko matu pada-pada awangngé nairi anging polé ri padang kessi'é. Iyanaro totomu iya puraé Upattentu nasaba purani muwallupai-Ka, sibawa mateppe'no lao ri déwata-déwata bellé. Alé-Ku muto sapé'i matu pakéyangngé polé ri watakkalému kuwammengngi mumallusu-lusu sibawa masiri. Purano uwita pogau'i gau'-gau' iya Ucéccé. Purano uwita lellungngi déwata-déwata laingngé ri bulu-bulué sibawa ri dare'é, pada-pada séddi worowané jangej-jangeng lao ri bainéna tau laingngé iyaré'ga pada-pada anyarang laié mangamparu lao ri anyarang komba'é. Pabbanuwana Yérusalém, macilakano iko! Uppannapa leppe'ko polé ri sininna jaéro?” Makkeda makkuwaiyé Puwangnge lao ri iyya passalenna wettu timo iya maseroé, “Messé atiwi Yéhuda céddé'ni maté kota-kotana. Léwuni sining taunna ri tanaé sibawa maddaréké. Kelli Yérusalém méllau ribantu. Sining pattumaninna tau sugié risuroni sappa uwai kégi-kégi; laoni mennang risining bujungngé iyakiya cappu manenni uwai. Lobbanni kendié iya natiwié mennang lisu. Nasibawang abata-batang sibawa pettu paddennuwang masirini mennang sibawa sampoi rupanna. Dé' nateppa bosié sibawa marakko makarossa tanaé; natongko rupanna patanié saba' majulé senna'i. Dé'na gaga wellana, rimakkuwannanaro meddé'ni indo' jongaé. Nasalaiwi ana'na iya nappa jajiyé ri padang makkale-ale'é. Ri tompo bulué tettong bawammi kaleddé liyaé, maréddé matanna nasaba dé'gaga wella; tapposo-posoi pada-pada serigalaé. Mangobbii umma'-Ku, ‘ Puwang, namuni dosata tenre'ki iyakiya tulukki situru sibawa jancim-Mu. Purano risalai makkolik-koling; tongeng, madosaki lao ri Iko. Iko alé-aléna amménasanna Israélié, iya passalama'ékki polé ri acilakangngé. Iyakiya magi Mupada-pada tau laingngé ri wanuwatta, pada-pada passollé iya bannaé léppang siwenni nainappa lao? Magi Mupada-pada tau iya malippunoé; pada-pada pabbarani iya dé'é naulléi mattulung? Iyakiya, pasti engka-Ko ri tengngata, Puwang! Idi umma'-Mu, aja' Musalaiki!’ ” Passalenna iyaro bangsaé makkedai Puwangnge, “Dé' Umasennang sibawa sining tauwéro iya pojiyéngngi lari polé ri Iyya, sibawa dé' namaélo makuwasaiwi aléna. Dé' Uwallupaiwi matu asalanna mennang, Uhukkungngi matu mennang nasaba dosana.” Makkedai Puwangnge lao ri iyya, “Aja' muwéllau-Ka tulungngi sining tauwéro. Namuni mennang mappuwasai, dé' Umaélo jampangiwi pangobbina mennang méllau tulung; sibawa namuni mennang makkasuwiyangngi lao ri Iyya akkarobangeng ritunu sibawa akkarobangeng gandong, dé' Umasennang matu sibawa mennang. Sibalé'na, Upaccappui matu mennang sibawa musu, akkadéreng sibawa sai.” Nainappa makkedaka, “Oh Puwang Iya Pommatanré, Muwisseng purai makkeda nabi-nabié lao ri ra'ya'é makkédaé dé'gaga matu musu iyaré'ga akkadéreng, nasaba pura-Ko majjanci makkedaé ri wanuwaéwé tuli engka matu adaméngeng.” Iyakiya mappébaliwi Puwangnge, “Iyaro nabi-nabié tiwii karéba bellé ri laleng asek-Ku; dé' Usuroi mennang, sibawa dé'to Uwéréngngi parénta iyaré'ga mabbicara lao ri mennang. Sining pakkitang iya nacuritaé mennang dé' napolé ri Iyya; nabotoi mennang gau'-gau' iya dé'é nakkéguna iya alénaé karangngi. Makkedai mennang ri laleng asek-Ku makkedaé iyaé wanuwaé dé' nakennai matu musu iyaré'ga akkadéreng, padahal dé' Usuroi mennang powadai iyaro. Iyya, Puwang, paissengiko, Yérémia, aga Upogau' matu sibawa nabi-nabi iya dé'é Usuroiro. Uwunoi matu mennang sibawa musu nenniya akkadéreng. Sining tau iya puraé tarimai sining botona mennanro riyuno towi matu sibawa cara iya padaé. Riyaggenrungengngi matu ujuna mennang lao risining lalenna Yérusalém na dé'gaga kuburu'i. Makkuwaniro totona mennang sibawa ana' nenniya bainéna mennang. Uwébbui matu mennang péneddingiwi addimonrinna jana mennang.” Puwangnge suroka mappaissengengngi amessékku lao ri umma'-Na. Harusu'ka makkeda makkuwaé, “Leppessakka teri dé' pajana, esso wenni mabbarébé uwai matakku. Saba' malo senna'i bangsaku sibawa manrasa-rasa senna. Rékko laoka ri padangngé, uwitai sining uju iya maté ri laleng musué. Ri laleng kotaé uwitai anrasa-rasangngé, sining tauwé céddé'i maté alupureng. Nabi sibawa imangngé napajoppai kewajibanna tennajeppui aga iya napogau'é mennang.” Puwang, puraniga Musampéyang siseng Yéhuda sibawa Mucéccéi pabbanuwana Sion? Magi namaladde senna Muunruki angkkatta dé' nariyullé majjappana? Paracuma bawang sappaki adaméngeng, dé'gaga akkégunana mamménasaki ajjappang, saba' iya engkaé banna ateddekeng. Puwang, lao ri Iko bawang puraki madosa. Riyakuiwi dosata muto sibawa dosana toriyolota. Engngerangngi jancim-Mu, aja' tapakatunaki; assijancim-Mu sibawa Iko aja' Murusa'i. Yérusalém onrong kadéra arajam-Mu iya malebbié, aja' Mupakatunai. Déwata-déwatana bangsa-bangsaé dé' naulléi pateppa bosi ri linoé. Muwi langié dé'to nawedding tiri'i bosié sibawa akuwasanna muto. Banna Iko ritu amménasatta. Iko mébbui sininnaro kajajiyang. Makkedai Puwangnge lao ri iyya, “Dé' Umaélo mamaséiwi bangsaéwé, namuni Musa sibawa Samuél tettongngi kuwaé untu' méllauwi paressé babuwa-Ku untu' mennang. Suroi iyaé bangsaé lao, dé' Umaélo mitai mennang! Rékko makkutanai mennang ri iko kégai mennang harusu lao, baliwi makkuwaé, ‘Makkedai Puwangnge, iya ripattentué untu' maté nasaba malasai, leppessanni maté nasaba lasa. Iya ripattentué untu' maté ri laleng ammusurengngé leppessanni maté ri laleng ammusurengngé. Iya ripattentué untu' maté nasaba lupu leppessanni maté alupureng! Iya ripattentué untu' ritawang, leppessanni ritiwi selaku tawangeng!’ Iyya, Puwang, pura pattentui makkedaé eppa pahukkungeng iya mappakatau-taué kajajiyang matu ri mennang: matéi matu ri laleng ammusurengngé, ujuna mennang riyassarénréngengngi matu ri asué, riyanréi ri manu'-manu'é, sibawa ripaccappu ri olokolo masekkangngé. Uwébbui matu sininna bangsaé ri linoé métau mitai mennang. Iya manennaro Upogau'i nasaba pangkaukenna Manasyé ana' worowanéna Hizkia ri Yérusalém wettunna mancaji arunna Yéhuda.” Makkedai Puwangnge, “Eh pabbanuwana Yérusalém, nigana maélo mamaséiko? Nigana maélo messé ati sibawakko? Nigana maélo léppang untu' makkutanangngi keadaammu? Purani musampéyak-Ka sibawa salai-Ka, rimakkuwannanaro Uwakkai limak-Ku untu' mancuru'ko, saba' cauna tahangngi cai-Ku. Ri tungke kota ri wanuwaéwé Uwabbéyakko matu pada-pada daramé. Namuni iko iyanaritu umma'-Ku iyakiya Upaccappuko matu sibawa ana'-ana'mu nasaba dé' mumaélo pinrai cara atuwom-Mu. Wanuwammu pennoi matu sibawa janda, nacau kessié ri wiring tasi'é égana. Uwunoi matu sining tauwé ri wettu malolona angkanna manrasa-rasa indo'na mennang. Ri essoé Upapoléngengngi mennang séddi tau pabbinasa angkanna métau sibawa mausé. Indo' iya ateddéngengngé pitu ana' worowané marenne'i nasaba mabbusessangngi nappase'na. Esso atuwonna mancaji mapettanni, marasa ripakatunai sibawa ripakasiri. Sining balimmu Usuroi mabbuno iya tuwoé mupa ri yelle'mu. Iyya, Puwang, pura mabbicara.” Macilaka tongekka iyya'é! Untu aga indo'ku jajiyakka? Nasibawang tungke tau ri wanuwaéwé harusu'ka massasa sibawa sibanta. Namuni dé' naengka umappainreng iyaré'ga minreng, iyakiya ritanroika ri sininna tauwé. Puwang, rékko mémeng dé' upogau'i jamakku sibawa makessing, sibawa dé' uwéwaiwi sining balié ri yolo-Mu ri wettunna mennang lolongeng abala sibawa asussang, leppessanni tanrona sining tauwéro tonget-tongengngi kajajiyang. ( Dé' muwi séddi tau poloi bessié, lebbi-lebbipi bessi polé manorangngé iya puraénna ricampuru sibawa tembaga.) Makkedai Puwangnge lao ri iyya, “Ukiringngi matu balié untu' makkai asugirenna sibawa waramparanna umma'-Ku selaku pahukkungeng nasaba dosa-dosa iya puraé napogau' mennang ri sininna wanuwaé. Ri wanuwa laing iya dé'é naissengngi mennang, Upancajiwi matu mennang atanna sining balinna mennang, saba' mpo'bo'ni cai-Ku pada-pada api iya mallumpaé sibawa dé' namaélo peddé.” Nainappa makkedaka, “ Puwangnge, tajeppui. Engngerangngi sibawa tulukka. Wale'i mennang iyaro mallellungngé sibawa tenre'ka. Aja' musabbara senna lao ri mennang angkanna naulléi mennang mpunoka matti. Engngerangngi makkedaé nasaba Iko ritu naripakatunaka. Mabbicara-Ko lao ri iyya, sibawa uwéngkalingai tungke ada-adam-Mu. Appunnangem-Mu iyya, oh Puwang Allataala Iya Pommakuwasaé, rimakkuwannanaro pasennangi ada-adam-Mu sibawa nariyo-riyoika. Dé' uwaccowé massennas-sennang sibawa sining tau iya maddeppungengngé untu' mabbonga-bonga. Nasaba mapatoka lao ri Iko, naumallaing sibawa macai. Magi umatteru-teru bawang manrasa-rasa? Magi namasero loku sibawa teppudu-pudu sau? Makkatta-Koga pajuléika pada-pada salo iya mancaji marakkoé ri wettu timoé?” Nappébali Puwangnge, “Rékko lisuko, Utarimako matu. Mancajiko matu atak-Kusi. Rékko muwabbirittangngi gau'-gau' iya makkégunaé sibawa tenniya omong kosong, weddisiko mancaji nabik-Ku. Poléi paimeng sining tauwé ri iko, sibawa dé' naparelluko lao ri mennang. Upancajiko matu pada-pada bénténg gessaé lao ri mennang. Namusuko matu mennang, iyakiya dé' naulléi matu cauko. Usibawakko matu untu' linrungiko sibawa passalama'ko. Uleppessakko matu polé ri akuwasanna sining tau maja iya mabecco'é. Iyya, Puwang, pura mabbicara.” Mabbicarasi Puwangnge lao ri iyya, adan-Na, “Aja' mukawing sibawa lolongeng ana' ri onrongngéwé. Upowadakko matu aga iya kajajiyangngé matu sibawa ana'-ana' iya jajiyé kuwaé sibawa tomatowanna. Matéi matu mennang nakenna lasa iya tiwié amaténg, sibawa matéi matu ri laleng ammusurengngé iyaré'ga maté alupureng. Dé' muwi séddi tau teringiwi matu iyaré'ga kuburu'i mennang. Tassiya-siyai matu ujuna mennang pada-pada pupu'é ri tanaé, nenniya nanréi manu'-manu' sibawa olokolo masekkang. Aja' mulao ri bolana tau iya mattengngangngé masara, Yérémia. Aja' muwabbarata untu' niga-niga. Dé'na ubarakkakiwi matu umma'-Ku sibawa asaléwangeng, sibawa dé'to uwappaitang matu rasa sayang iyaré'ga paressé babuwa lao ri mennang. Tau sugié sibawa tau kasiyasié ri wanuwaéwé matéi matu na dé'gaga kuburu'i mennang. Dé' muwi séddi tau sissai aléna iyaré'ga kellui gemme'na selaku tanrang mabbarata untu' mennang. Dé'to gaga maélo pakangka bacadowang untu' saléworiwi tau iya mattengngangngé mabbarata. Dé'gaga maccowé masara mala sibawa tau iya ateddéngengngé ambo'na iyaré'ga indo'na. Aja' mumuttama ri bolana tau iya mattengngangngé mappésta. Aja' mumanré ménung sibawa mennang. Engkalingai aga iya Iyya'é, Puwang Iya Pommakuwasaé, Allataalana Israélié, maélo upowada lao ri iko. Sadda marennu sibawa mariyo-riyo enrengngé ramé-raména pésta abottingengngé Upappaja manengngi matu. Iyaro gau'é nasabbingngi matu sining tau iya tuwoé ri wettummué. Rékko mupalettu manengngi iyaé lao ri mennang, naullé makkutanai matu mennang magi umaélo hukkungngi mennang makkuwaro tedde'na. Makkutanai matu mennang aga asalanna sibawa dosana mennang lao ri Iyya, Puwang Allataalana mennang. Paissengiwi mennang makkedaé Iyya makkeda makkuwaka'é, ‘Nasalai-Ka toriyolomu untu' massompa sibawa mattumani lao ri déwata-déwata laingngé. Dé' najampangi-Ka sibawa dé' namaélo turusiwi peraturang-peraturak-Ku. Iyakiya mupogau'i iya lebbi majaéppasi. Matedde atiko sibawa banna maccowériwi élomu muto iya majaé. Dé' mumaélo mapato lao ri Iyya. Rimakkuwannanaro, Upaddésu'ko matu polé ri wanuwaéwé sibawa Upali lao riséuwaé wanuwa iya dé' sises-sisengngé muwissengngi sibawa toriyolomu. Kuwaro massompako matu esso wenni lao ri déwata-déwata laingngé, sibawa dé' matu Umaressé babuwa lao ri iko.’ ” Makkedai Puwangnge, “Poléi matu wettunna dé'na nattanro tauwé nasaba Iyya, Allataala iya tuwoé, iya tiwiéngngi umma Israélié massu polé ri Maséré, sangadinna nasaba Iyya, Allataala iya tuwoé, iya tiwiéngngi umma Israélié massu polé riséuwaé wanuwa ri manorang sibawa polé ri sininna wanuwa laingngé kégi mennang pura Upatassiya-siya. Utiwii matu lisu ri tana assalenna mennang, wanuwa iya puraé Uwabbéréyang lao ri toriyolona mennang.” Makkedai Puwangnge, “Maélo-Ka mobbi maéga pakkaja untu' tikkengngi sining tauwéwé. Nainappa maélo-Ka mobbi maéga paddengngeng untu' lellungngi mennang ri tungke bulu sibawa bulu-bulu sibawa ri gowa-gowa bulu-bulu batué. Uwita sininna iya napogau'é mennang. Dé'gaga tassubbu ri alé-Ku; muwi dosa-dosana mennang pura toni Uwita. Dosa sibawa jana mennang Uwale'i matu sibawa leppi wékkaduwa, saba' purai napanajisi' wanuwak-Ku sibawa maéga barahala. Iyaro sining barahalaé dé' nakkényawa pada-padai ujué.” Puwang, Iko ritu linrungika sibawa mpérékka awatangeng; Iko tulukka ri wettu asukkarakengngé. Bangsa-bangsaé polé ri cappa linoé laowi matu ri Iko sibawa makkeda, “Toriyolota banna mappunnaiwi déwata palsu iya dé' sises-sisengngé nakkéguna. Naulléga tolinoé mébbui déwatana muto? Tentu dé'! Iya naébbuéro pasti tenniya Allataala.” Nakkeda Puwangnge, “Rimakkuwannanaro, iyaé sisengngé maélo-Ka mébbui bangsa-bangsaé péneddingiwi akuwasak-Ku sibawa awatangek-Ku kuwammengngi naissengngi matu mennang untu' mannennungeng makkedaé Iyya ritu Puwang.” Makkedai Puwangnge, “Eh bangsa Yéhuda, pura risobbi'ni dosamu ri atimmu sibawa ri sininna sunna mézba-mézbamu sibawa péna bessi iya mammata péna intangngé. Massompai sining taummu ri mézba-mézbaé sibawa alliri-alliri barahala iya puraé napatettong untu' Déwi Asyéra ri tungke aju iya maworongngé, ri tompo bulu-bulué, sibawa risining bulu-bulué ri saliweng kota. Nasaba sininna onrong assompang barahala iya puraé mupatettong ri sininna wanuwaé sibawa sininna dosa iya puraé mupogau', Uwébbui matu sining balimmu makkai sininna waramparammu sibawa appunnangemmu. Tarapassako matu mabbéréyangngi tana iya puraé Uwérékko, sibawa Uwébbuko matu mattumani lao ri balimmu ri wanuwa iya dé' sises-sisengngé muwissengngi. Upogau'i sininna iyaro nasaba cai-Ku mallalatunni pada-pada api iya malluwa'é sibawa dé' nariyullé peddéi.” Makkedai Puwangnge, “Rékko nasalai-Ka tauwé, Puwan -na, sibawa mamménasa lao ri tolinoé enrengngé sanré ri awatangenna, Uhukkungngi matu. Pada-padai tanet-taneng iya tuwoé ri padangngé, ri tana makabuttué, masino-sino sibawa mapejjé, dé' naengka napéneddingi akessingengngé. Iyakiya tau iya mamménasaé ri Iyya tuli Ubarakkakiwi matu. Pada-pada pong ajué ri wiring salo massolo'é; makkalolo ure'na lettu ri uwai. Dé' namétau wettu timoé, tuli manyilai daud-daunna. Namuni nakennai timo wanuwaé, dé' namausé saba' tuli powassélé'i buwa. Atinna tolinoé dé' nariyullé gangka, kaminang macéko-céko polé risini-sininnaé sibawa masero senna lasana. Iyya, Puwang, salidikiwi atié, Uwojiwi baténna tolinoé. Uwale'i matu tungke tauwé situru kédo-kédona, sibawa Ugaukeng situru sibawa pangkaukenna.” Samanna manu'-manu' mangarangiyéngngi tellona iya tenniyaé appunnangenna, makkuwaniro tau iya dé'é namalempu lolongeng waramparang. Ri sitengnga umuru'é ateddéngengngi matu sininna waramparanna. Ri paccappureng atuwonna pabuttiwi tau madonggo senna'i. Bolana Puwat -ta pada-padai kadéra arajang iya malebbié, ri pammulanna mupa ri bulu iya matanré. Puwang, Iko ritu paddennuwanna Israélié, umma'-Mu; sininna iya salaiyék-Ko masirii matu. Lennye'i matu mennang polé ri linoéwé nanalao ri linona tau maté. Saba', Iko assalenna uwai atuwongngé purano nasalai mennang, oh Puwang. Puwang, pajjappaka, naumancaji madising. Passalama'ka, nausalama matu. Iko bawang upakalebbi! Makkedai tauwé ri iyya, “Kégani sininna ancamanna Puwang -ngéro? Leppessanni napogau' makkekkuwangngé!” Iyakiya, oh Puwang, dé' naengka umaddessa kuwammengngi Mupapolé acilakang ri yasé'na mennang. Dé'to uwacinnaiwi kuwammengngi nakennai mennang acilakang. Muwisseng iyaro, Puwang. Muwisseng aga iya upowadaé. Aja' Mumancaji séuwa iya péttauriyéngngi atikku. Iko onrong assalang ri aléku rékko poléi asukkarakengngé. Tennapodo iya mallellungngé sibawa tenre'ékka, Mupakasirii sibawa Mupennoiwi sibawa amétaureng. Iyakiya aja' Mupogau'i makkuwaéro lao ri iyya, oh Puwang. Papoléngengngi abala ri yasé'na mennang narapi ancuru binasa mennang. Makkedai Puwangnge lao ri iyya, “Yérémia, laono ri Pintu Gerbang Ra'ya' iya naolaé arung-ngarunna Yéhuda rékko massu muttama'i ri kotaé. Lao tokko risininna pintu gerbang laingngé ri Yérusalém. Palettu'i pasek-Ku lao ri arung-ngarungngé sibawa sininna tau Yéhudaé enrengngé sininna pabbanuwana Yérusalém iya laloé ri pintu-pintuéro. Powadai makkedaé: ‘Rékko dé' mumacinna maté, aja' muwakka barang ri esso Saba'é, iyaré'ga tiwii muttama molai pintu-pintu gerbanna Yérusalém. Aja' muwappallaung iyaré'ga mattiwi muwi barang aga massu polé ri bolamu ri esso Saba'é. Pallaingngi essoéro untu' Iyya pada-pada iya puraé Uwapparéntang lao ri toriyolomu. Iyakiya toriyolomu dé' namaélo méngkalingai iyaré'ga jampangiwi aga iya Upowadaé. Matedde atiwi mennang, sibawa dé' namaélo mapato iyaré'ga riyampareng. Turusiwi sininna parénta-Ku. Aja' muwakka muwi barang aga molai pintu gerbang kotaéwé ri Esso Saba'é. Pallaingngi, esso Saba'é untu' Iyya, sibawa aja mupogau'i muwi aga ri essoéro. Rékko tonget-tongekko pajoppai iyaro parénta-parénta-Ku, arung-ngarung sibawa pajaba-pajaba iya mapparéntaé pada-pada Daud nauttamakiwi matu gerbang-gerbanna kota Yérusalém. Silaongngi mennang tau Yéhudaé sibawa pabbanuwana Yérusalém, tonangiwi matu karéta anyarang, angkanna kota Yérusalém mancaji marowa senna. Poléi matu sining tauwé polé ri kota-kotana Yéhuda, sibawa polé ri désa-désa seddéna Yérusalém; poléi matu mennang ri daérana Bényamin, polé ri daéra ponna bulu-bulué, polé ri daéra bulué, sibawa polé ri Yéhuda bagiyang yattang. Tiwii matu mennang ri Bola-Ku olokolo akkarobangeng, muwi untu' ritunué iyaré'ga dé'é, makkuwatoro pakkasuwiyang gandong sibawa kamennyang enrengngé pakkasuwiyang sukkuru. Iya manennaro kajajiyangngi matu narékko muturusi-Ka sibawa pallaingngi esso Saba'é untu' Iyya. Aja' muwakka muwi barang aga lalo ri pintu-pintu gerbanna Yérusalém ri essoéro. Rékko muwajjalékkaiwi iyaro parénta-parénta-Ku, utunui matu gangka cappu pintu-pintu gerbanna Yérusalém enrengngé saoraja-saorajana na iyaro apié dé' nawedding ripeddéi.’ ” Makkedai Puwangnge lao ri iyya, “Laono ri bolana pakkébbu oringngé; kuwaro Upalettukekko matu pasek-Ku.” Naulaona ri bolana pakkébbu oringngé sibawa uwitana mattengngang majjama pallébui sibawa panyelluriwi. Réko oring iya mattengngangngé naébburo makurang sukkui, najamai paimeng mancaji oring iya laingngé situru sibawa iya napuwéloé. Nainappa nasuroka Puwangnge powadai lao ri umma Israélié, “Eh umma'-Ku, masa Iyya dé' Uwulléi pogau'i lao ri iko pada-pada iya napogau'é pakkébbuéro lao ri tana litana? Pada-pada tana litaé ri laleng limanna pakkébbu oringngé, makkuwatoniro iko ri laleng limak-Ku. Rékko riséuwaé wettu Upettuiwi untu' massitta, ruttungngi sibawa mancuru'i séuwa bangsa iyaré'ga akkarungeng, nainappa toba' iyaro bangsaé polé ri dosana, naurusa'i matu iyaro niya'-Ku. Sibalé'na, narékko Upettuiwi untu' mappatettong iyaré'ga péwatangiwi séuwa bangsa iyaré'ga akkarungeng, iyakiya nainappa iyaro bangsaé dé' namapato lao ri Iyya nainappa napogau' iya majaé, iyaro niya'-Ku Urusa'i matu.” Makkedai Puwangnge lao ri iyya, “Makkekkuwangngé, powadai lao risining tau Yéhudaé sibawa pabbanuwana Yérusalém makkedaé mattengngak-Ka mébbu rancana untu' méwai mennang, sibawa passadiya pahukkungeng untu' mennang. Suroi mennang pappésauwi cara atuwonna mennang iya madosaéro enrengngé pédécéngiwi kédo-kédona sibawa pangkaukenna mennang. Iyakiya mappébaliwi matu mennang, ‘Aga akkégunana? Tette'ki maélo maccowériwi élota muto! Tungke'-tungke'ki pogau'i matu cinna atitta iya majaé!’ ” Makkedai Puwangnge, “Tanaiwi tungke bangsa aga pura kajajiyang gau' pada-padaéwé. Purani napogau' umma Israélié séuwa iya mappakatau-taué! Dé' naengka nalennye saljué polé ri bulu batué ri Libanon. Dé' naengka uwai makeccé iya massolo'é ri bulué mancaji marakko. Iyakiya umma'-Ku nallupaina, sibawa mattunu dupa untu' barahalaé. Tabbuttui mennang ri laleng mariyoloé iya harusu'é naola mennang, nainappa léssé ri laleng iya dé'éppa namalappa. Iyaé wanuwaé purani napancaji mennang onrong iya mappakatau-taué, sibawa tuli mancajiwi akkéllé-kéllékeng. Sininna iya laloiyéngngi napaccilic-cilingngi matu ulunna nasaba métaui. Pada-pada awué nairi anging alau, makkuwaniro umma'-Ku Uwabbéréyang matu ri yolona balié. Rékko poléi acilakangngé, Uwabbokoriwi matu sibawa dé' Utulungngi mennang!” Makkedai tauwé, “Laono mai tasikongkolo méwai Yérémia. Tenniya bawang aléna iya weddingngé mabicara untu' Allataala. Tuli engka matu imang iya weddingngé mappagguru, engka tau mapanré iya weddingngé mappangaja; sibawa engka nabi iya weddingngé palettukekki sining paseng polé ri Allataala. Laono mai tappissengengngi ri pengadilangngé sibawa aja'na taéngkalingai ada-adanna.” Naumassempajanna, “ Puwang, éngkalingai sempajakku; jampangiwi aga iya napowadaé balikku passalekku! Sipato'ga décéngngé riwale sibawa ja? Iyakiya purani mennang kali kalebbong kuwammengngi usempé ri lalenna. Engngerangngi makkedaé purani uwéwai mennang ri yolo-Mu, kuwammengngi aja' Mumacai lao ri mennang. Iyakiya makkekkuwangngé, Puwang, leppessanni ana'-ana'na mennang maté alupureng iyaré'ga maté ri laleng musué. Leppessanni sining makkunrainna ateddéngeng lakkai sibawa ana'; leppessani sining worowané maté nasaba sai sibawa tau maloloé maté ri laleng ammusurengngé. Suroi parampo'é polé sibawa tennasenna-senna ri bolana, angkanna kelli mennang nataro tau. Purani mennang kali kalebbong kuwammengngi usempé ri lalenna, sibawa purani mennang pasang siyo-siyo untu' tikkekka. Iyakiya Iko, Puwang, misseng manengngi iya narancanaé mennang untu' paccappui nyawaku. Rimakkuwannanaro, aja' muwaddampengengngi mennang; aja' muleddai asalanna mennang. Unrui mennang narapi sempé. Tinda'no lao ri mennang ri laleng cai-Mu.” Nasuroka Puwangnge lao melli kendi, sibawa mérai siyagangngaré pamimping bangsa enrengngé siyagangngaré imang iya macowaénna, untu' lao silaong mennang ri Lompo Hinom lalo ri Pintu Gerbang Beling. Kuwaniro harusu'ka mappallebbangengngi aga iya Nappasengengngé ri iyya. Harusu'-Ka makkeda makkuwaé, “Eh sining arunna Yéhuda sibawa pabbanuwana Yérusalém! Engkalingai aga Iyya, Puwang Iya Pommakuwasaé, Allataalana Israélié, maélo napowada lao ri iko. Upapoléi matu abala iya battowaé ri yasé'na onrongngéwé angkanna tau iya méngkalingaéngngi tasséleng. Upogau'i iyaro gau'éro nasaba iyaé bangsaé nasalaina Iyya. Napanajisi'i mennang onrongngéwé sibawa makkasuwiyangeng akkarobangeng lao ri déwata-déwata iya dé'é naissengngi mennang, untu' toriyolona sibawa untu' arung-ngarunna Yéhuda. Pura toni naliseki mennang iyaé onrongngé sibawa darana sining tau iya dé'é napasala. Napatettongengngi mennang mézba Baal untu' makkasuwiyangengngi ana'-ana'na selaku akkarobangeng ritunu, padahal dé' naengka Usuroi mennang pogau'i gau'éro, mala dé' naengka naompo gau' makkuwaéro ri laleng pikkirak-Ku. Rimakkuwannanaro, narapii matu wettunna iyaé onrongngé dé'na nariyaseng Tofét iyaré'ga Lompo Hinom, sangadinna Lompo Abbunowang. Ri onrongngéwé maélo-Ka rusa'i sininna rancanana tau Yéhudaé sibawa pabbanuwana Yérusalém. Uleppessangngi matu mennang ricau risining balinna mennang sibawa riyuno ri laleng ammusureng. Uleppessangngi matu ujuna mennang nanré manu'-manu' sibawa olokolo masekkang. Maélo-Ka pakennaiwi abala iya maseroé ri yasé'na kotaéwé angkanna tungke tau iya laloé kuwaro métaui matu sibawa tasséleng. Nakeppungngi matu balié iyaé kotaé, sibawa makkuraga mpunoi pabbanuwana. Iyaro akkeppungengngé makkuwamani serona, angkanna sining tauwé ri kotaéwé sisulléi sianré silaonna, mala ana'-ana'na muto mennang.” Nainappa nasuroka Puwangnge reppa'i iyaro kendié ri yolona sining tau iya maccowériyékka. Harusu'ka powadai lao ri mennang makkedaé Puwang Iya Pommakuwasaé makkeda makkuwaé, “Iyaé bangsaé sibawa kotaé Uwancuru'i matu angkanna mancaji pada-pada kendi iya reppa'éro iya dé'énna nawedding ripédécéngina. Nakuburu'i matu tauwé sining ujuna mennang ri Tofét, nasaba dé'na gaga onrong akkuburukeng laing. Iyaé kotaé sibawa pabbanuwana Upancajiwi matu pada-pada Tofét. Sininna bolaé ri Yérusalém sibawa sininna bolana arung-ngarunna Yéhuda mancaji najisi'i matu pada-pada Tofét; nasaba ri tompo'na pabbingenna sining bolaéro purani tauwé mattunu dupa untu' déwata-déwatana langié, sibawa makkasuwiyangeng anggoro untu' déwata-déwata laingngé.” Nainappa usalai Tofét, onrokku risuro palettu'i pasenna Puwangnge. Laoka ri seddé Bolana Puwangnge sibawa tettong kuwaro, naupaissengiwi sininna tauwé, makkedaé Puwang Iya Pommakuwasaé, Allataalana Israélié, makkeda makkuwaiyé, “Nasaba matedde atiko sibawa dé' mumaélo méngkalingai, Upapoléi matu ri yasé'na kotaéwé sibawa ri yasé'na iya manenna désaé ri seddéna, sininna abala iya puraé Urancana.” Imang Pasyhur ana' Imer iyanaritu kapalana jennanna Bolana Puwangnge. Wettunna naéngkalingaka mappallebbangengngi sininna gau'éro, napparéntanni kuwammengngi riyunruka sibawa risakkala ri Pintu Gerbang Bényamin, gerbang bagiyang yasé'é ri Bolana Puwangnge. Elé rappina purana napaleppe'ka Pasyhur polé ri sakkalaé, makkedana lao ri aléna, “Aseng iya nawéréngngékko matu Puwangnge tenniya Pasyhur, iyakiya ‘Ajapperusengngé kégi-kégi’. Aléna Puwangnge makkeda, ‘Upancajiko matu majapperu untu' alému muto sibawa untu' silao-silaommu. Muwitai matu mennang riyuno ri balinna mennang. Sininna tau Yéhudaé Uleppessangngi matu rikuwasai ri arung Babél; sibagiyang polé ri mennang natiwii matu selaku tawangeng lao ri Babél, na lebbinna naunoi. Uleppessang towi matu balinna mennang rappai sibawa tiwii ri Babél sininna asugirenna kotaéwé, enrengngé sininna waramparang appunnangenna, mala sininna barang manana arung-ngarunna Yéhuda. Na iko, Pasyhur, silaong sininna kaluwargamu ritikkeng towi matu naritiwi ri Babél. Kuwaniro matéko matu sibawa rikuburu; makkuwatoro sininna sellaomu iya puraé méngkalingai sining bellému.’ ” Puwang, Mupalécéka sibawa purana ripalécé. Lebbi mawatak-Ko naiya iyya sibawa purana Mupatunru. Riyéllé'ka ri tungke tau, ripakatuna polé ri élé lettu arawéng. Sises-siseng mabbicaraka, harusu'ka gora maggangka ullé, “Abeccokeng! Abala!” Puwang, riyéllé'ka sibawa ripakatuna tungke wettu, nasaba palettu'i pasem-Mu. Iyakiya rékko ri laleng atikku makkedaka, “Leppessanni uwallupai bawang Puwangnge, dé'na umaélo mabbicara ri laleng asen-Na,” na pasem-Mu samanna api iya mabbaraé ri ati marilalengngé. Purani ucoba tahangngi, iyakiya annessana dé' umakuwasa. Paéngkalingai tauwé mabbici-bici kégi-kégi, “Kalallani taué! Laono mai talaporo'i lao ri iya makuwasaé!” Mala sininna sahaba maréppé'ku tajengngi asempékekku. Adanna mennang, “Naullé nasibawang pappalécé, taulléi caui, kuwammengngi taulléi makkabale lao ri aléna.” Iyakiya Iko, oh Puwang, ri aléku; mawatang senna'-Ko nabarani. Mennang iya mallellungngé sibawa tenre'ékka sempé'i matu sibawa dé' pakkullénna. Masirii matu mennang matteru-teru, marusa'ni sininna rancanana mennang. Atunanna mennanro tuli riyéngngerangngi matu. Iyakiya, oh Puwang Iya Pommakuwasaé, Muojiwi tolinoé sibawa adélé; Muwisseng ati sibawa pikkiranna mennang. Rimakkuwannanaro palaloka mita-Ko wale'i jana balié saba' lao ri Iko uwabbéréyangngi parakaraku. Akkélonno untu' Puwangnge sibawa pojiwi Aléna saba' Naleppessangngi sining tau ritenre'é polé ri akuwasanna tau madorakaé. Tattanroi esso ajajiyakku! Leppessanni ripakatuna wettukku rijajiyang ri indo'. Tattanro towi pattiwi karéba iya mébbuéngngi ambo'ko marennu senna, wettunna ripaissengi aléna, “Lolongekko séddi ana' worowané!” Leppessanni pattiwi karébaéro sinrupai kota-kota iya naancuru'é Puwangnge temmamasé. Leppessanni méngkalinga kelli mapeddi ri éléé, sibawa kelli ammusureng ri tangassoé. Saba' dé' naunoka wettukku ri laleng tampu mupa, kuwammengngi tette'ka ri tampu ri indo'ku sibawa parémmananna mancaji samanna kuburu ri aléku. Magi naharusu'ka rijajiyang? Bannaga untu' anrasa-rasang sibawa asukkarakeng? Kuwammengngi nalalo atuwokku simata-simata ri laleng siri? Nasuroni Zédékia arung Yéhuda lao ri iyya Imam Pasyhur ana' Malkia, sibawa Imam Zéfanya ana' Maaséya. Nasuroi mennang palettu'i ri iyya paréllaungngéwé, “Ellauno panunju polé ri Puwangnge untu' idi, saba' Nébukadnézar arung Babél silaong pasukanna mattengngang keppungngi kotata. Naulléi Puwangnge pakangka matu anu makalallaing untu' idi, sibawa passai Nébukadnézar gettengngi soro pasukanna.” Nainappa mabbicara Puwangnge lao ri iyya, nausuroi sining tau iya nasuroéro paissengiwi Zédékia makkedaé Puwangnge, Allataalana Israélié, makkeda makkuwaé, “Zédékia, maélo-Ka caui pasukammu iya mattengngangngé mammusu méwai arung Babél sibawa pasukanna. Senjata-senjatana tentaramu Ugoppoi matu ri tengnga-tengngana kotaé. Iyya muto matu musuko sibawa maggangka ullé nenniya nasibawang cai iya mallumpa-lumpaé. Uwunoi matu iyaé pabbanuwana kotaé, muwi tolinoé iyaré'ga olokolo'é matéi matu nasaba sai iya maseroé. Iko sibawa sining pegawémmu enrengngé sining tau iya leppe'é polé ri musué, alupurengngi sibawa nakennai sai, iya manenna Uleppessangngi ritikkeng ri Arung Nébukadnézar sibawa sining bali iya maéloé mpunoko. Nauno manekko matu Nébukadnézar temmaddampeng sibawa temmamasé. Iyya, Puwang, pura mabbicara.” Nainappa nasuroka Puwangnge makkeda makkuwaé lao ri umma'-Na, “Engkalingai! Iyya, Puwang, mpérékko séuwa appiléng: laleng iya mattujué ri atuwongngé, iyaré'ga laleng iya mattujué ri amaténgngé. Tungke tau iya monroé ri laleng kota matéi matu nasaba musu, alupureng, iyaré'ga sai. Iyakiya iya massué untu' manyara ri tau Babél-é iya mattengngangngé gasai iyaé kotaé, leppe'i matu sibawa dé' nariyuno. Purani Upettui untu' mancuru'i kotaéwé, sibawa dé' Usayangngi. Iyaé kotaé riyabbéréyangngi matu lao ri arung Babél; natunui matu gangka cappu siseng. Iyya, Puwang, pura mabbicara.” Nainappa makkeda Puwangnge lao ri Yérusalém, “Eh Yérusalém! Lebbi tanréi onrommu naiya sining lompo'é ri seddému. Pada-padako bulu-bulu batué maccaloli ri padang malappaé, iyakiya maélo-Ka méwako. Makkedako makkedaé dé' muwi séddi mulléi gasako iyaré'ga leppoi sining béntémmu, iyakiya maélo-Ka hukkukko nasaba pangkaukemmu. Utunui matu saorajamu, sibawa sininna séuwa-séuwaé ri seddému ritunui matu. Iyya, Puwang, pura mabbicara.” “Kédo adélé'no sibawa malempu. Paleppe'i tau iya ripara'é polé ri akuwasanna tau iya para'éngngi. Aja' mutenre'i iyaré'ga kédo maja lao ri tau laingngé, ana' béué, iyaré'ga jandaé. Aja' muwunoi tau iya dé'é napasala ri onrongngéwé. Rékko tonget-tongekko pajoppai iyaro parénta-parénta-Ku, arung-ngarung iya mapparéntaé pada-pada Daud nauttamakiwi matu sining gerbang saorajaéwé. Mennang silaong sining pegawé nenniya ra'ya'na mennang tonangiwi matu karéta sibawa anyarang. Iyakiya rékko dé' muturusiwi parénta-parénta-Ku, mattanro-Ka makkedaé iyaé saorajaé mancajiwi matu sésa-sésa. Iyya, Puwang, pura mabbicara. Untu' alé-Ku saorajana arung Yéhuda magello senna, siggello tana Giléad sibawa sining buluna Libanon; iyakiya iyaro onrongngé Upancajiwi matu pada-pada padang kessi'é iya dé'é naonroiwi tauwé. Kirik-Ka matu tau untu' mancuru'i. Tiwii matu mennang wasé, sibawa ruttungngi sining allirinna iya magelloé iya riyébbué polé ri aju camara Libanongngé. Nainappa naggenrungeng matu mennang ri laleng apié. Purairo maéga tau laing lalo matu kuwaro sibawa makkutana séddié lao ri laingngé magi Iyya, Puwang, pura tinda makkuwaro lao ri kota iya magelloéwé. Namappébali matu tauwé makkedaé iya manennaro kajajiyangngi nasaba purai muwassakkareng assijancimmu sibawa Iyya, Allataalamu, sibawa purano massompa nenniya mattumani lao ri déwata-déwata laingngé.” Tau Yéhudaé, aja' mumasara untu' amaténna Arung Yosia. Teringi bawanni Yoahas ana' worowanéna saba' purani ritiwi lao na dé'na nalisu matu. Tana assalenna dé'na naitani matu. Passalenna Yoahas, ana' worowanéna Yosia, iya mancaji arunnaé Yéhuda sulléiwi ambo'na, makkeda makkuwaiyé Puwangnge, “Laoni polé kuwaé, na dé' nalisu paimeng. Matéi matu ri appalirengngé, sibawa dé' naitai matu wanuwaéwé paimeng.” Macilakai tau iya patettongngéngngi bolana sibawa dé' naadélé, sibawa lowangiwi sibawa dé' namalempu. Macilakai iya suroéngngi tauwé mappallaung tenripéssaroi. Macilaka towi tau iya makkedaé, “Upatettongngi matu saoraja iya battowaé sibawa bili'-bili' iya malowangngé ri langga yasé'na,” nainappa mébbu tellongeng ri saorajaéro sibawa pamiring polé ri aju camara Libanongngé, sibawa riparadai cella. Iyakiya iko, Yoyakim, laingngi. Banna sappako asarong paribadi. Muwunoi tau iya dé'é napasala, sibawa tenre'i ra'ya'mu sibawa mabecco. Rimakkuwannanaro passalenna Yoyakim arunna Yéhuda, ana' worowanéna Yosia, makkeda makkuwaiyé Puwangnge, “Dé' nariteringi matu amaténna; dé'gaga makkeda matu, ‘Aduh, silaokku, aduh.’ Dé'gaga masara iyaré'ga mangobbi, ‘Kasiyang Datu!’ Riyassarénréngengngi matu Yoyakim sibawa riyaggenrungeng massu ri pintu gerbanna Yérusalém, pada-pada iya napogau'é tauwé lao ri bakké kaleddé'é.” Makkedai Puwangnge, “Eh pabbanuwana Yérusalém, laono ri Libanon sibawa ri Basan, sibawa gorano kuwaro. Kelli'no ri buluna Moab, saba' ricauni sininna sikongkolo'mu. Purana mabbicara ri iko wettunna makessing keadaammu, iyakiya dé' mumaélo méngkalingai. Mémeng makkuwairo ampé-ampému polé riyolo lettu makkekkuwangngé; dé' naengka mumaélo mapato lao ri Iyya. Rimakkuwannanaro, lennye'i matu sining pamimpimmu pada-pada nairi anging. Ritiwii matu sining sikongkolo'mu selaku tawangeng, sibawa ripakatunai kotamu nenniya ripakasiri nasaba sininna jamu. Monroko sibawa amang riyattulilingi alliri-alliri camara Libanon, iyakiya matti narékko nakennako peddi, manrasa-rasako matu pada-pada makkunrai iya mattengngangngé mémmana.” Makkedai Puwangnge lao ri Arung Yoyakhin, ana' worowanéna Yoyakim arunna Yéhuda, “Nasaba Iyya, Allataala iya tuwoé, Uteddekiwi makkedaé namuni ri alé-Ku pada-padako ciccing materéié ri lima atauk-Ku, iyakiya Ubébbuko matu sibawa Uwabbéréyang lao risining tau iya muwétauriyé sibawa iya macinnaé mpunoko. Uwabbéréyakko matu lao ri Nébukadnézar arung Babél, silaong ana' buwana. Upaddésu'ko matu silaong indo'mu sibawa Upali ri wanuwa iya tenniyaé tana ancajingemmu, na kuwaniro matéko matu. Muddani senna'ko matu ri wanuwaéwé, iyakiya dé' mulisu matu.” Iyya Yérémia makkeda, “Aga Arung Yoyakhin mancajini pada-pada oring reppa iya ribuwangngé sibawa dé'na naripoji? Iyagaro saba'na aléna sibawa ana'-ana'na naripaddésu sibawa ribuwang lao ri wanuwa iya dé'é naissengngi mennang?” Eh wanuwakku, éngkalingai aga iya napowadaé Puwangnge, “Iyaro tauwé purani ripattentu untu' ateddéngeng ana'-ana'na sibawa tuli dé' namallolongeng ri laleng atuwonna. Polé ri wija-wijanna dé'gaga iya mawwassélé'é mapparénta ri Yéhuda selaku arung wijanna Daud. Iyya, Puwang, pura mabbicara.” Iyakiya sésa-sésana umma'-Ku Upaddeppungengngi polé ri wanuwa-wanuwa onronna mennang Upali. Utiwii matu mennang lisu ri tana ancajingenna mennang sibawa wija-wijanna tattambai matu maéga. Makkaka matu pamimping untu' piyarai mennang. Dé'na namétau umma'-Ku iyaré'ga namaséleng; dé' muwi séddi tau polé ri mennang teddéng matu. Iyya, Puwang, pura mabbicara.” Makkedai Puwangnge, “Narapii matu wettunna, Uwakkai séddi tau arung iya adélé'é polé ri wija-wijanna Daud. Iyaro arungngé mapparéntai matu sibawa mapanré, nenniya pogau'i aga iya adélé'é sibawa tongengngé ri sininna linoé. Rékko mapparéntai, salama'i matu tau Yéhudaé, sibawa tuwoi matu tau Israélié sibawa amang. Iyaro arungngé riteppui matu ‘ Puwangnge Asalamaketta.’ Narapii matu wettunna, dé'na nattanro tauwé ri laleng asek-Ku, Allataala iya tuwoé, iya tiwiéngngi umma Israélié massu polé ri Maséré, sangadinna nasabbing Iyya, Allataala iya tuwoé, iya tiwiéngngi umma Israélié massu polé ri séuwaé wanuwa ri manorang, sibawa polé ri sininna wanuwa laingngé kégi mennang pura Upassara-sarang. Monroi matu mennang ri tana assalenna muto.” Iyanaé pasekku passalenna nabi-nabié: Ancuru'i atikku sibawa ténréka. Puwangnge sibawa ada-adan-Na iya mapaccingngé mébbuka pada-pada tau mabo'é iya ménungngé anggoro maéga senna. Wanuwatta pennoi sibawa tau iya dé'é namatinulu lao ri Puwangnge. Tuwoi mennang sibawa maja nenniya makkégunang salai akuwasanna mennang. Nasaba tanrona Puwangnge, mancaji marakkoi wellaé ri padangngé sibawa sininna wanuwaé masarai. Makkedai Puwangnge, “Nabié sibawa imangngé dé' namaélo mapato ri alé-Ku. Mala Upoléini mennang ri Bola-Ku pogau'i majaé. Rimakkuwannanaro, malengngoi matu lalenna sibawa makalemmeng, angkanna tabbuttu sibawa menrung. Papoléka matu acilakang ri yasé'na mennang, narékko narapini wettunna untu' hukkungngi mennang. Iyya, Puwang, pura mabbicara. Purani Uwita dosa-dosana nabi-nabi Samariaé. Mabbicarai mennang ri laleng asenna Baal, sibawa papusai umma Israélié, umma'-Ku. Iyakiya ri Yérusalém Uwitai nabi-nabié pogau'i iya lebbi majaéppasi. Mabbelléi mennang sibawa malaweng, enrengngé nasokongngi tau iya pogau'éngngi majaé, angkanna dé' muwi séddi tau maélo toba'. Untu' Aléku maja manengngi mennang pada-padai pabbanuwana Sodom nenniya Gomoro.” Makkedai Puwang Iya Pommakuwasaé, “Uwéréngngi matu sining nabié ri Yérusalémro tanet-taneng mapaié untu' nanré sibawa racun untu' naénung, nasaba mennang nassabariwi sining tauwé ri sininna wanuwaé dé' napakalebbi-Ka.” Lao ri pabbanuwana Yérusalém, makkedai Puwang Iya Pommakuwasaé, “Aja' muwéngkalingai ada-adanna sining nabi iya tuli bannaé mabbéré paddennuwang iya kosongngé. Banna palettu'i mennang nawa-nawanna muto sibawa tenniya pasek-Ku. Lao risining tau iya dé'é namaélo méngkalingai ada-adakku, tuli makkedai mennang, ‘Salama'ko matu.’ Sibawa lao ri tau iya matedde atié, makkedai mennang, ‘Dé' mulolongeng matu acilakang.’ ” Makkedaka, “Dé' muwi séddi tau polé ri nabi-nabiéro missengngi aga iya tattampu'é ri laleng pikkiranna Puwangnge. Dé'gaga polé ri mennang méngkalingai sibawa majeppuiwi rancana-rancana-Na; dé'to gaga jampangiwi iyaré'ga bati-batiwi ada-adan-Na. Caina Puwangnge padai anginraja iya majjallo'é sibawa mappo'i sining tau majaé. Dé' nasoro cai-Na ri wettu dé'napa Nakajajiyang sininna iya Narancanaé. Najeppuiwi matu umma'na Puwangnge iyaro gau'é ri esso ri munri.” Makkedai Puwangnge, “Mapato senna iyaro nabi-nabié, padahal dé' Usuroi mennang. Palettu'i mennang biritta ri laleng asek-Ku, padahal dé'gaga paseng iya Uwabbéréyangngé lao ri mennang. Akkalarapanna naissengngi mennang aga iya tattampu'é ri laleng pikkirak-Ku, tentu purani mennang napalettu lao ri umma'-Ku sininna iya puraé Upowada. Natoba' matu umma'-Ku polé ri dosa-dosana sibawa ampé-ampéna iya majaé. Iyya Allataala iya engkaé kégi-kégi, tenniya ri séddi onrong bawang. Dé' muwi séddi tau mulléi subbui aléna polé ri pakkitak-Ku, saba' engka-Ka kégi-kégi: ri surugaé sibawa ri linoé. Sininna iya napowadaé iyaro nabi-nabié Uwissenni. Mabbelléi mennang ri laleng asek-Ku makkedaé purai natarima pasek-Ku naola nippi. Gangka uppanna iyaro nabi-nabié maélo papusai umma'-Ku sibawa biritta iya aléna muto karangngi? Napikkiri'i mennang makkedaé nasibawangngi nippi-nippi iya nacuritaé mennanro, naulléi umma'-Ku mallupai-Ka pada-pada toriyolona mennang mallupai-Ka sibawa sompa Baal. Nabi iya mannippié sitongenna harusu'i makkeda, ‘Iyaé banna nippi.’ Iyakiya nabi iya lolongengngé paseng polé ri Iyya harusu'i palettu'i iyaro pasengngé sibawa tongeng. Dé' nawedding ripappada gandongngé sibawa daramé. Pada-padai api ada-adak-Ku, sibawa pada-pada palu-palué iya mancuru'éngngi batué! Maéloka méwai nabi-nabi iya palettu'é paseng polé ri pada-padanna sellaona, nainappa napowada makkedaé iyaro pasengngé poléi ri Iyya. Uwéwa towi nabi-nabi iya palettu'éngngi ada-adanna muto, ninappa napowada makkedaé iyaro poléi ri Iyya. Iyya, Puwang, méwai matu nabi-nabiéro iya palettu'éngngi nippi-nippinna iya pennoé bellé. Napapusai mennang umma'-Ku sibawa bellé nenniya abboronna mennang. Dé' Usuroi iyaro nabi-nabié. Dé' sises-siseng mennang nakkéguna untu' umma'-Ku. Iyya, Puwang, pura mabbicara.” Makkedai Puwangnge, “Yérémia, rékko sala séddinna polé ri umma'-Ku, iyaré'ga séddi nabi iyaré'ga séddi imang makkutana ri iko, ‘Aga pasenna Puwangnge?’ Harusu'ko baliwi, ‘Iko ritu tiwina Puwangnge; rimakkuwannanaro nabuwakko matu.’ Rékko sala séddinna polé ri umma'-Ku iyaré'ga nabi iyaré'ga imang mabbicara mupi passalenna ‘tiwina Puwangnge ’, Uhukkungngi matu aléna sibawa kaluwargana. Sibalé'na, tungke tauwé harusu'i makkutanangngi lao ri silaonna sibawa lao ri kaluwargana, ‘Pappébali aga polé ri Puwangnge?’ iyaré'ga ‘Aga napowada Puwangnge?’ Dé'na nawedding mennang makkégunangngi warékkadaé ‘tiwina Puwangnge ’. Rékko engka mupa makkégunangngi iyaro warékkadaé, Upancajiwi matu pasek-Ku tonget-tongeng tiwi ri aléna. Tau iya powadaéngngi ‘tiwina Puwangnge ’ banna naputara'balé'i ada-adak-Ku, Allataalana mennang, Allataala iya tuwoé, Puwang Iya Pommakuwasaé. Banna mennang weddingngi makkeda lao ri nabi-nabié, ‘Aga pappébalinna Puwangnge lao ri iko? Aga napowada Puwangnge?’ Rékko engka iya dé'é namatinulu lao ri parénta-Kuro, sibawa paké warékkada ‘tiwina Puwangnge ’, Uwittéi matu mennang, sibawa maggenrungengngi mabéla, muwi mennang iyaré'ga kota iya puraé Uwéréngngi lao ri mennang sibawa toriyolona mennang. Uwébbui matu mennang masiri sibawa matuna untu' mannennungeng sibawa totona mennanro dé' nallupaiwi matu tauwé.” Séuwa wettu ritiwinana Yoyakhin ana' worowanéna Yoyakim arunna Yéhuda silaong sining pajaba pamaréntana Yéhuda, sining panré sibawa sining pajjama ahlié ri Nébukadnézar arung Babél, sibawa ritiwi selaku tawangeng polé ri Yérusalém lao ri Babél, mabbéréni Puwangnge séuwa pakkitang lao ri iyya. Uwitani duwa baka mallise buwa ara lenne ri yolona Bolana Puwangnge. Baka mammulangngé mallise'i buwa ara iya makessingngé, pada-pada buwa ara wassélé mammulangngé, na baka iya maduwaé mallise'i buwa ara iya makebbongngé, angkanna dé' nawedding riyanré. Namakkeda Puwangnge lao ri iyya, “Yérémia, aga muwita?” Umappébali, “Buwa ara, Puwang. Iya makessingngé makessing senna, sibawa iya makebbongngé makebbong senna angkanna dé' nawedding riyanré.” Namakkedasi Puwangnge, “Sining tau iya puraé Uleppessang ritiwi lao ri Babél-éro Uwakkai pada-pada buwa ara iya makessingngéwé; rimakkuwannanaro Iyya, Puwang, Allataalana Israélié, gaukengngi matu mennang sibawa makessing. Ujagaiwi matu mennang sibawa tiwii mennang lisu ri wanuwaéwé. Mappatettokka matu, tenniya ruttungngi mennang; mattanekka matu, tenniya bébbui mennang. Uwéréngngi matu mennang pangéloreng untu' majeppuiwi makkedaé Iyya ritu Puwang. Namancaji matu mennang umma'-Ku, na Iyya mancaji Allataalana, nasaba lisui matu mennang ri Iyya sibawa sukku atinna. Iyakiya Zédékia arunna Yéhuda, silaong sining pajaba iya macawé'é sibawa aléna, enrengngé sésana tau Yérusalém iya tette'é monro ri wanuwaéwé iyaré'ga létté'é ri Maséré, ugaukeng manengngi matu mennang pada-pada buwa ara iya makebbongngéwé, iya dé'é nawedding riyanré. Iyya, Puwang, pura mabbicara. Maélo-Ka cilakaiwi mennang makkuwa mani rupanna angkanna métau sininna bangsaé ri sininna linoé. Kégi-kégi Upatassiya-siya mennang, riyéllé'i matu mennang, ripancaji addicawang sibawa ribuwé'. Ripakéi matu asenna mennang selaku tanro. Upapoléi matu musué ri yasé'na mennang, alupurengngé, sibawa sai angkanna maté maneng mennang na dé'gaga monro ri wanuwaéwé iya puraé Uwabbéréyang lao ri mennang sibawa toriyolona.” Ri taung maeppaé mancaji arunnana Yoyakim ana' worowanéna Yosia ri Yéhuda, lolongenna paseng polé ri Puwangnge passalenna sininna bangsa Yéhudaé. Iyaro wettué taung mammulangngé mancaji arunna Nébukadnézar ri Babél. Makkedaka lao risininna bangsa Yéhudaé sibawa pabbanuwana Yérusalém, “Duwappulo tellu taung ittana, mappammulai ri taung maseppuloé tellu apparéntanna Yosia ana' worowanéna Amon ri Yéhuda, lettu essoéwé purani mabbicara Puwangnge lao ri iyya na dé' naengka uwallupaiwi palettu'i ri iko aga iya puraé Napowada. Iyakiya dé' mupaduliwi. Matteru-teru towi Puwangnge suroi lao ri iko sining nabié ata-atan-Na, iyakiya dé' mumaélo méngkalingai sibawa jampangiwi mennang. Nasuroko salaiwi cara atuwommu iya majaé, sibawa sining pangkaukemmu iya madosaé, kuwammengngi naweddikko tette monro ri wanuwaéwé iya puraé nabbéréyang Puwangnge lao ri iko sibawa lao ri toriyolomu selaku appunangeng mana. Iyaro nabi-nabié nattéyakko massompa sibawa mattumani lao ri déwata-déwata laingngé. Nattéyakko mennang massompa barahala-barahala ébbumu muto, saba' iyaro gau'é naébbui Puwangnge macai. Rékko muturusiwi paréntana Puwang -ngéro, dé' nahukkukko. Iyakiya aléna Puwangnge makkeda makkedaé dé' muwéngkalingai Aléna. Mala mupaénré'i cai-Na nasaba barahala-barahalamuro. Alému ritu papoléi pahukkungenna ri yasé'na alému. Nasaba dé' mumaélo méngkalingai ada-adan-Na, namakkeda Puwang Iya Pommakuwasaé, ‘Maélo-Ka mobbii sininna bangsaé polé ri manorang, sibawato atak-Ku, Nébukadnézar arung Babél. Upangarai matu mennang untu' mammusu méwai Yéhuda sibawa pabbanuwana enrengngé sininna bangsaé ri seddéna. Bangsa Yéhudaé sibawa bangsa-bangsaé ri seddéna Upabbinasai matu sibawa Uleppessang ancuru untu' mannennungeng. Sining tau iya mitaéngngi tassélengngi matu sibawa métau. Iyya, Puwang, pura mabbicara. Saddanna mennang iya marennué sibawa rowana pésta abottingengngé Upappésauwi matu. Dé' nappunnai matu mennang minnya untu' lampunna, sibawa cappui matu gandonna mennang. Uleppessangngi matu ancuru sininna wanuwaéwé sibawa mancaji masino-sino. Bangsa-bangsaé ri seddéna mattumaniwi matu lao ri arung Babél pituppulo taung ittana. Purairo Uhukkungngi matu bangsa Babél-é sibawa arunna nasaba dosana mennang. Uruttungngi matu wanuwa Babél sibawa Uleppessang ancuru untu' mannennungeng. Uhukkungngi matu Babél sibawa sininna abala iya puraé Urancana untu' bangsa-bangsaé sibawa iya puraé Uwappaissengeng naolai Yérémia – iyanaritu sininna abala iya riyokié ri laleng kitta'éwé. Uwale'i matu sining pangkaukenna tau Babél-é; ripowatai matu ri arung-ngarung battowaé sibawa ri maéga bangsa.’ ” Puwang, Allataalana Israélié, makkeda lao ri Iyya, “Alai iyaé kaca anggoro'é iya puraé Uliseki sibawa anggoro cai-Ku. Tiwii lao ri sininna bangsaé kégiko Usuro, sibawa suroi mennang ménungngi iyaé anggoro'é. Narékko naénungngi mennang, tassulus-sulungngi sibawa ateddéngeng akkaleng nasaba musu iya Upapolé ri mennang.” Nautarimani iyaro kaca anggoro'é polé ri limanna Puwangnge, naulao ri sininna bangsaé kégi puraka nasuro Puwangnge, nainappa uwébbu mennang ménungngi iyaro anggoro'é. Yérusalém sibawa sininna kotaé ri Yéhuda, silaong sining arungngé nenniya pajaba-pajaba'na, uwérénni naénungngi iyaro anggoro'é, angkanna mancajini mennang pada-pada padang iya makabuttué sibawa mappakatau-taué. Lettu essoéwé ripakéi asenna mennang selaku tanro. Namakkeda Puwangnge lao ri iyya, “Powadangngi sining tauwéro makkedaé Iyya, Puwang Iya Pommakuwasaé, Allataalana Israélié, suroi mennang ménungngi gangka mabo' sibawa talluwa-luwa. Uwébbui mennang menrung sibawa dé' naulléi tokkonna nasaba musu iya Upapoléngengngéngngi mennang. Narékko dé' namaélo mennang tarimai iyaro kacaé polé ri limammu untu' ménungngi anggoro'na, powadai makkedaé Puwang Iya Pommakuwasaé pura mapparéntangngi gau'éro. Maélo-Ka pammulaiwi angancurukengngéro ri kota-Ku muto. Aja' narapii mennang nasengngi makkedaé dé' narihukkung matu mennang. Pasti rihukkungngi matu nasaba Upapoléngengngi matu musu sininna bangsaé ri sininna linoé. Iyya, Puwang Iya Pommakuwasaé, pura mabbicara. Sininna iya Upowadangngékko, éh Yérémia, harusu'i mupalettu. Powadangngi mennang, ‘Maggalenrungngi saddanna Puwangnge polé ri surugaé; polé ri onron-Na iya mapaccingngé memmu'i méwai umma'-Na. Sininna pabbanuwana linoé méngkalingai kelli pada-pada pajjama iya mappara anggoro'é ri onrong addésekengngé. Lettu ri cappa linoé maddaremmeng saddan-Na; Puwangnge mébbu parakara lao ri bangsa-bangsaé. Riadélékiwi matu sininna tauwé sibawa iya majaé rihukkung matéi matu.’ ” Makkedai Puwang Iya Pommakuwasaé, “Polé ri cappa'na linoé memmu'i anginrajaé; nakennai abala bangsa-bangsaé tasséddi-séddi.” Iyaro essoé ujuna sining tau iya riyunoé ri Puwangnge makkalénnerengngi matu ri sininna linoé. Dé' nariteringi matu mennang, dé'to nariyakka untu' rikuburu, sangadinna rileppessang bawang ri tanaé pada-pada goppo roppo'é. Eh sining pamimping, éh sining pakkampina umma'na Puwangnge! Terino maladde-ladde! Aggaléluno ri laleng awué, saba' narapini wettunna riyunoko, na iya leppe'é ripassara-sarangngi matu. Pada-padako matu kullang mangke'é iya sempé'é nareppa. Pasti dé' muleppe matu. Pada-pada singa massué polé ri liyanna, makkuwatoniro Puwangnge massu untu' hukkungngi umma'-Na. Abeccokenna musué sibawa caina Puwangnge pura pinrai wanuwaéwé mancaji padang kessi. Mancaji arunna muwa Yoyakim ana' worowanéna Yosia ri Yéhuda, Makkedai Puwangnge lao ri iyya, “Laono tettong ri seddé Bola-Ku sibawa abbicarano lao ri pabbanuwana Yéhuda iya polé massompa kuwaro. Palettukeng manengngi mennang iya Uparéntangngékko untu' ripaissengiwi mennang. Aja' mukurangiwi muwi céddé. Ajakké maéloi méngkalingai iyaro bangsaé, namappésau pogau'i majaé, angkanna Upasoro akkatta-Ku untu' cilakaiwi mennang situru sibawa pangkaukenna iya majaé.” Nasuroka Puwangnge powadai makkuwaé lao ri mennang, “Iyya, Puwang, pura mapparéntangngi kuwammengngi mumapato lao ri Iyya sibawa pajoppai hukkung-hukkung iya puraé Uwabbéréyang lao ri iko. Harusu tokko méngkalingai aga napowada ata-atak-Ku, sining nabi iya matteru-terué Usuro lao ri iko. Iyakiya dé' mumaélo méngkalingai mennang. Rékko tette'ko dé' mumaélo turu, iyaé bola assompangngé Ugaukengngi matu pada-pada Silo, angkanna sininna bangsaé ri linoé pakéi asenna iyaé kota Yérusalém selaku tanro.” Sininna iya upogau'é ri Bolana Puwang -ngéro naéngkalingai sining imangngé, sining nabié sibawa ra'ya'é. Purana muwa uwappallebbangeng sininna pasenna Puwangnge pada-pada iya Napparéntangngé, natikkenna nanagorato, “Harusu'ko maté! Barani tongekko makkeda ri laleng asenna Puwangnge makkedaé iyaé Bola-Na mancajiwi matu pada-pada Silo, sibawa iyaé kotaé ripaccappui matu nenniya mancaji onrong iya dé'é nariyonroina.” Nainappaka rikatulung ri tau maégaé. Wettunna pajaba-pajaba pamaréntana Yéhuda méngkalingai aga iya puraé kajajiyang, mapperi-perini massu polé ri saorajaé nanalao ri Bolana Puwangnge, sibawa tudang ri Pintu Gerbang Barué. Makkedani sining imangngé sibawa sining nabié lao ri pajaba-pajaba'éro sibawa lao ri ra'ya'é, “Iyaé tauwé sipato'i rihukkung maté nasaba purai passu ada-ada iya méwaéngngi kotataé. Iko paimeng purato méngkalingai.” Nainappaka makkeda, “ Puwangnge ritu suroka palettu'i paseng iya méwaéngngi Bolana Puwangnge sibawa kotaéwé pada-pada iya muwéngkalingaé. Rimakkuwannanaro pinrani cara atuwommu sibawa sining pangkaukemmu; turusiwi Puwang Allataalamu, kuwammengngi Napasoroi akkatta-Na untu' cilakaiko. Passalenna aléku, mémeng engkai ri laleng akuwasammu untu' pogau'i agi-agi situru élomu. Iyakiya éngngerangngi, rékko muwunoka, iko sibawa pabbanuwana kotaéwé tanggungngi matu asalanngé nasaba abbunowangngé lao ri tau iya dé'é napasala. Saba' Puwangnge suroka untu' mabbéréyangngi iyaro papparéngngerangngé lao ri iko.” Namakkedana sining pajaba pamaréntaé sibawa ra'ya'é lao ri imang-ngimangngé sibawa nabi-nabiéro, “Iyaé tauwé mabbicarai ri laleng asenna Puwang Allataalata; dé' nasipato rihukkung maté.” Purairo siyagangngaré ri yelle'na pamimping bangsaé malluru liyolo sibawa makkeda lao risining tau iya maddeppungengngé kuwaro, “Wettunna Hizkia mancaji arunna Yéhuda, Nabi Mikha polé ri Morésyét palettu'i ri ra'ya'é ada-adaéwé polé ri Puwang Iya Pommakuwasaé, ‘Rirakkalai matu Sion pada-pada dare'é, mancajiwi matu Yérusalém goppo ruttungeng, sibawa mancaji ale'i matu Bulu-bulu Bolana Puwangnge.’ Iyakiya Arung Hizkia sibawa tau Yéhudaé dé' naunoi Mikha. Mala métaui Hizkia lao ri Puwangnge sibawa méllau riyamaséi. Nanagettenni paimeng Puwangnge ancaman-Na untu' cilakaiwi mennang. Na makekkuwangngé, céddé'ki idi'é papoléngengngi acilakang battowa aléta.” Engkato naengka séddi tau laing mabbicara méwai kotaé sibawa bangsaéwé ri laleng asenna Puwangnge, pada-pada iya upogau'é. Iyaro tauwé riyasengngi Uria ana' Sémaya polé ri Kiryat-Yéarim. Wettunna Arung Yoyakim silaong parawira-parawirana nenniya sining pajaba pamaréntaé naéngkalinga ada-adanna Uria, makkuragani arungngé mpunoi. Iyakiya naéngkalingai Uria gau'éro namétauna nanalari lao ri Maséré. Iyakiya Arung Yoyakim suroi Elnatan ana'na Akhbor silaong siyagangngaré tau laing lao ri Maséré sibawa malai Uria. Nainappa ritiwi ri mennang lisu lao ri Arung Yoyakim. Nainappa arungngé massuro mpunoi, nariyabbéyang ujuna ri akkuburukeng samaé. Iyakiya makkekkuwangngé barakka pattulunna Ahikam ana' Safan, iyya Yérémia dé' nariyabbéréyakka lao ri ra'ya'é untu' riyuno. Dé' namaitta mancaji arunnana Zédékia ana' worowanéna Yosia ri Yéhuda, Puwangnge suroka mébbu tulu polé ri bingkulangngé nenniya lémpa polé ri ajué, sibawa pasangngi si salangkakku. Nasuro tokka palettu'i pasen-Na lao ri arung-ngarung Edom, Moab, Amon, Tirus nenniya Sidon, sibawa naolai sining surona mennang iya poléénna ri Yérusalém untu' célléngiwi Arung Zédékia. Harusu'ka paissengiwi mennang makkedaé Puwang Iya Pommakuwasaé, Allataalana Israélié, makkeda, “Nasibawang akuwasak-Ku iya battowaé nenniya nasibawang awatangek-Ku purani Upancaji linoé sibawa tolinoé nenniya sininna olokolo'é, naweddik-Ka mabbéréyangngi lao ri nigi-nigi iya Uwéloriyé. Iyya ritu pura mabbéréyangngi sininna bangsaéwé ri laleng akuwasanna atak-Ku, Nébukadnézar, arung Babél. Mala muwi olokolo'é Uwabbéréyang towi lao ri aléna untu' nakuwasai. Mattumaniwi matu sininna bangsaé lao ri aléna, lao ri ana' worowanéna, sibawa lao ri eppona narapi wettunna sempe wanuwanna muto. Iyaro wettué mattumaniwi matu bangsa Babél-é lao ri bangsa-bangsa iya mawatangngé sibawa arung-ngarung iya battowaé. Bangsa iyaré'ga akkarungeng iya dé'é namaélo tunru lao ri Nébukadnézar Uhukkungngi matu sibawa musu, akkadéreng, sibawa sai, narapi paccappurenna iyaro bangsaé tunru lao ri aléna. Aja' muwéngkalingai nabi-nabié iyaré'ga muwi nigi-nigi iya mattéyangngékko tunru lao ri arung Babél, namuni mangakui mennang purani tarima panunju polé ri nippié, roh-roh alusu'é, iyaré'ga pakéi awatangeng iya mappallajangngé. Nabengnguwakko mennang angkanna ritiwiko mabéla polé ri wanuwammu. Urukkako matu polé ri wanuwammu sibawa binasako matu. Iyakiya bangsa iya maéloé tunru sibawa mattumani lao ri arung Babél Uleppessangngi matu monro ri tana ancajingenna muto, sibawa mallaonruma kuwaro. Iyya, Puwang, pura mabbicara.” Lao ri Zédékia arunna Yéhuda, iyya, Yérémia, palettu'i gau' iya padaé. Makkedaka, “Manyarano lao ri arung Babél. Turusini aléna sibawa bangsana, kuwammengngi nasalama Datu. Purani makkeda Puwangnge makkedaé bangsa iya dé'é natunru lao ri arung Babél matéi matu nasaba musu, akkadéreng, iyaré'ga sai. Magi Datu sibawa ra'ya'é namaélo maté sibawa cara makkuwaro? Aja' muwéngkalingai nabi-nabi iya mattéyangngéngngi Datu tunru lao ri arung Babél, nasaba nabelléi mennang Datu. Makkedai mennang makkedaé mabbicarai mennang ri laleng asenna Puwangnge, iyakiya mabbelléi mennang. Aléna Puwangnge makkeda makkedaé dé' Nasuroi mennang. Rimakkuwannanaro maéloi passara-sarangngi sibawa paccappui Datu silaong nabi-nabi iya puraé mabbellé lao ri Datu.” Nainappa upaissengi imang-ngimangngé sibawa sininna ra'ya'é makkedaé makkeda makkuwaiyé Puwangnge, “Aja' muwéngkalingai nabi-nabi iya makkedaé dé' namaittana sining barangngé ri laleng Bola-Ku ritiwii matu lisu polé ri Babél. Mabbelléi mennang. Aja' muwéngkalingai mennang! Manyarano lao ri arung Babél, kuwammengngi musalama. Untu' aga naharusu ancuru iyaé kotaé? Rékko mémeng mennang tongengngi nabi, sibawa pura tarima paseng polé ri Iyya, pasti naéllauwi makkekkuwangngé ri Iyya, Puwang Iya Pommakuwasaé, kuwammengngi sining barang iya engkaé mupa ri Bola-Ku sibawa ri saorajana arungngé ri Yérusalém dé' naritiwi lao ri Babél. Iyatoro taungngé ri uleng limana taung maeppaé apparéntanna Arung Zédékia, Hananya ana' Azur, séddiwi nabi polé ri kota Gibéon, mabbicara lao ri iyya ri Bolana Puwangnge. Ri yolona imang-ngimangngé sibawa ra'ya'é napowadai lao ri iyya makkedaé Puwang Iya Pommakuwasaé, Allataalana Israélié, makkeda makkuwaiyé, “Purani Uképo awatangenna arung Babél. Ri laleng wettu duwattaungngéwé Upalisui matu barab-barang polé ri Bola-Ku, iya puraé riyakka lao ri Babél ri Arung Nébukadnézar. Utiwi towi matu lisu Yoyakhin ana' worowanéna Yoyakim arunna Yéhuda, silaong sininna ra'ya'na Yéhuda iya puraé ritiwi lao ri Babél. Tongeng, Uképoi matu awatangenna Babél. Iyya, Puwang, pura mabbicara.” Na ri yolona imang-ngimangngé sibawa ra'ya' iya tettongngé ri Bolana Puwang -ngéro, makkedaka lao ri Hananya, “Makessinni! Memmuwaré iyaro botomu kajajiyangngi, sibawa tonget-tongengngi Puwangnge tiwii lisu polé ri Babél barab-barang Bolana Puwangnge silaong sibawa sininna tau iya puraé ripali lao kuwaro. Iyakiya iko, Hananya, sibawa iko maneng, éh ra'ya', éngkalingai iyaé: Nabi-nabi ri yolona wettutta pura botoi makkedaé musué, abalaé, enrengngé saié nakennai matu maéga bangsa sibawa akkarungeng iya mawatangngé. Iyakiya nabi iya botoéngngi keadaang damé, banna weddingngi riyangakui selaku nabi iya tonget-tongengngé risuro ri Puwangnge, rékko sining botona kajajiyangngi.” Nainappa nasittai Hananya lémpaé polé ri salangkakku nanapoloi. Ri yolona sininna ra'ya' iya hadéré'é kuwaro, makkedai, “Makkedai Puwangnge makkedaé makkuwaiyé carana poloi matu lémpa iya napasangngé Arung Nébukadnézar ri salangkanna sininna bangsaé; napogau'i matu Puwangnge iyaro ri laleng wettu duwattaungngéwé.” Purairo lao tona. Dé' namaitta labe'na kajajiyangngéro, nasuroka Puwangnge lao ri Hananya untu' powadangngi makkuwaé, “Makkedai Puwangnge makkedaé weddikkosa poloi lémpa ajué, iyakiya nasulléi matu sibawa lémpa bessi. Puwang Iya Pommakuwasaé, Allataalana Israélié, makkeda makkedaé maéloi pasang lémpa bessi ri salangkanna sininna bangsaéwé, sibawa mattumaniwi matu mennang lao ri Nébukadnézar, arung Babél. Makkeda towi Puwangnge makkedaé muwi olokolo masekkangngé nabbéréyang towi matu lao ri akuwasanna Nébukadnézar.” Iya manennaro upalettu'i lao ri Hananya, nainappa makkedasika, “Engkalingai, éh Hananya! Dé' nasuroko Puwangnge; purani muwébbu iyaé bangsaé mateppe lao ri ada bellé. Rimakkuwannanaro aléna Puwangnge makkeda makkedaé Napallennye'ko matu polé ri tompo'na linoé. Iyato taungngéwé mumaté matu, saba' purai musuro bangsaéwé méwai Puwangnge.” Na iyatoro taungngé ri uleng mapitué, maténi Hananya. Mokina sure' lao ri imang-ngimangngé, nabi-nabié, pamimping-pamimping bangsa iya tuwoé mupa, sibawa lao risininna tau laing iya puraé ritiwi polé ri Yérusalém lao ri Babél ri Nébukadnézar. Iyaro sure'é uwokii purana ritiwi ri appalirengngé Arung Yoyakhin, indo'na, pegawé-pegawé saorajaé, pajaba-pajaba pamaréntana Yéhuda sibawa Yérusalém, sining panré, sibawa sining pajjama-jama maccaé. Uwappalalowangengngi iyaro sure'é lao ri Elasa ana' Safan, sibawa Gemarya ana' Hilkia iya risuroé ri Zédékia arunna Yéhuda lao ri Nébukadnézar arung Babél. Oninna iyaro sure'é, “Makkuwaniyé adanna Puwang Iya Pommakuwasaé, Allataalana Israélié lao ri sininna tau iya puraé nabbéyang polé ri Yérusalém lao ri Babél: ‘Attette'no kuwatu. Patettonni sining bolamu. Bukkano dare sibawa péneddingini wassélé'na. Kawinno kuwammengngi mulolongeng ana', sibawa leppessanni ana'-ana'mu kawitto kuwammengngi nalolongetto mennang ana'. Harusu'i tattamba jumellamu sibawa dé' nawedding kurang. Ajjamano untu' asaléwangenna kota-kota onrommu Upali. Assempajanno lao ri Iyya untu' apentingenna kota-kotaéro, saba' rékko madécéngngi iyaro kota-kotaé, madécéng tokko matu. Iyya Puwang, Iya Pommakuwasaé, Allataalana Israélié, paréngngerangiko kuwammengngi aja' muleppessangngi alému ribengnguwang ri nabi-nabi iya monroé ri tengnga-tengngamu iyaré'ga muwi niga iya powadaéngngi makkedaé naulléi mennang botoi wettu mangoloé. Aja' mujampangiwi nippi-nippinna mennang. Napakéi mennang asekku untu' curitai lao ri iko gau'-gau' iya dé'é natongeng. Dé' usuroi mennang. Iyya, Puwang, pura mabbicara.’ Makkedai Puwangnge, ‘Rékko genne'ni wettunna pituppulo taung untu' Babél, Ujampangisiko matu, sibawa rupaiwi jancik-Ku untu' tiwiko lisu ri onrongngéwé. Dé'ga na alé-Ku bawang missengngi rancana-rancana-Ku untu' iko? Iyaro rancana-rancanaé tenniya untu' cilakaiko, iyakiya untu' asaléwangemmu sibawa untu' mpérékko wettu mangolo iya pennoé paddennuwang. Naméllau tulukko matu ri Iyya. Poléko matu untu' massempajang ri Iyya, na-Ubaliwi matu sempajammu. Musappaka matu sibawa muruntu'-Ka, saba' musappa-Ka sibawa sukku ati. Tongeng, muruntu'-Ka matu. Upaddeppungekko matu polé ri tengnga-tengngana tungke bangsaé sibawa polé ri tungke wanuwa onrommu ripassara-sarang sibawa ripali. Utiwiko matu lisu ri wanuwa assalemmué enrengngé palisui keadaammu. Iyya, Puwang, pura mabbicara.’ Manuru iko, Puwangnge pura mpérékko nabi-nabi ri Babél. Engkalingai aga napowada Puwangnge passalenna arung iya mapparéntaé makkekkuwangngéwé, iyanaritu arung wijanna Daud, sibawa passalenna pabbanuwana kotaéwé, iyanaritu sumpulolomu iya dé'é naritiwi lao ri appalirengngé silaong iko. Makkedai Puwang Iya Pommakuwasaé, ‘Papolé-Ka matu musu, akkadéreng, sibawa sai ri yasé'na mennang. Ugaukengngi matu mennang pada-pada buwa-buwa ara iya makebbong senna'é angkanna dé' nawedding riyanré. Ulellungngi matu mennang sibawa musu, akkadéreng, sibawa sai angkanna sininna bangsaé risininna linoé takkini-kini matu mitai keadaanna mennang. Kégi-kégi Upassara-sarangngi mennang, takkini-kinii matu tauwé sibawa métau mitai aga iya puraé kajajiyang sibawa mennang. Riyéllé'i matu mennang, sibawa asenna mennang ripakéi selaku tanro. Iya manennaro kajajiyangngi ri yasé'na mennang, nasaba dé' naturusiwi mennang pasek-Ku iya matteru-terué Upalettu ri mennang naolai sining nabié atak-Ku. Dé' namaélo mennang jampangiwi iyaro pasek-Ku. Na iko maneng iya puraé Upali lao ri Babél, éngkalingai aga Iyya, Puwang, upowada.’ Puwang Iya Pommakuwasaé, Allataalana Israélié, pura mabbicara passalenna Ahab ana' worowanéna Kolaya, sibawa passalenna Zédékia ana' worowanéna Maaséya iya pakééngngi asenna Puwangnge untu' palettu'i ri iko gau'-gau' iya dé'é natongeng. Makkedai Puwangnge makkedaé nabbéréyangngi matu mennang lao ri akuwasanna Nébukadnézar arung Babél, iya mpunoéngngi matu mennang ri yolona matammu. Narékko sining tau iya puraé ritiwi polé ri Yérusalém lao ri Babél maélo tanroiwi séddié tau, makkedai matu, ‘Tennapodo Puwangnge gaukekko pada-pada Zédékia sibawa Ahab, iya puraé ritunu tuwo-tuwo ri arung Babél.’ Makkuwaniro totona mennang nasaba purai napogau' dosa-dosa battowaé ri Israél: malawengngi mennang, sibawa napakéi asenna Puwangnge untu' curitai gau'-gau' iya dé'é natongeng. Iyaro siyéwai sibawa élona Puwangnge. Naisseng aga iya napogau'é mennang, sibawa aléna muto mancaji sabbi méwai mennang. Puwangnge pura mabbicara.” “ Puwangnge pura makkako mancaji imang sulléiwi Yoyada, na makkekkuwangngé iko ritu pajaba pommatanré ri Bolana Puwangnge. Jamammu iyanaritu mapparéntangngi kuwammengngi tungke tau jangeng, iya mangakuéngngi aléna nabi, ribalenggui sibawa ranté bessi ri ellonna. Iyakiya magi na dé' mutinda lao ri Yérémia tau Anatot-éro iya puraé kédo selaku nabi ri yelle'na bangsata? Iyaro tauwé harusu'i rilape' bawana, saba' napowadai lao risining tautta ri Babél makkedaé maitta mupa mennang monro kuwaro. Narimakkuwannanaro, adanna, harusu'i mennang patettong bola enrengngé bukka dare sibawa péneddingiwi wassélé'na.” Iyaro sure'é nabacangekka Imang Zéfanya. Rimakkuwannanaro nasuroka Puwangnge kiring biritta passalenna Sémaya lao ri sininna tau Israél iya ripalié ri Babél. Iyanaé birittaéro, “Purai mabbicara Sémaya lao ri iko samanna nabiwi; padahal Iyya, Puwang, dé' usuroi. Nasaba purako naébbu mateppe lao ri ada-ada bellé, nasaba purano nasuro méwa-Ka, na-Uhukkungngi matu sibawa wija-wijanna. Dé' muwi séddi polé ri yelle'na mennang iya monroé matu ri yelle'ta untu' mitai gau'-gau' makessingngé iya Upogau'é matu untu' sininna umma'-Ku. Iyya, Puwang, pura mabbicara.” Puwang, Allataalana Israélié, makkeda lao ri iyya, “Okii ri laleng séddi kitta sininna iya puraé Upowada lao ri iko. Saba' narapii matu wettunna Upalisui matu keadaanna umma'-Ku Israélié sibawa Yéhuda. Utiwii matu mennang lisu ri wanuwa iya puraé Uwabbéréyang lao ri toriyolona mennang. Iyaro wanuwaé nappunnangiwi matu mennang paimeng. Iyya, Puwang, pura mabbicara.” Makkedai Puwangnge lao ri umma Israélié sibawa Yéhuda, “Purani Uwéngkalinga kelli'na sining tau iya métaué, kelli'na tau iya pellorengngé iya dé'é nappunnai adaméngeng. Coba pikkiri'i sibawa salidikiwi! Makkulléga worowané jajiyang ana'lolo? Rékko makkuwaitu, magi Uwitai tungke worowané makawiya tappana nenniya tahangngi babuwana sibawa lima pada-pada makkunrai iya maéloé mémmana? Narapi esso maseroé, esso iya dé'é gaga padanna. Untu' umma'-Ku, panennengi iyaro essoé; iyakiya Upassalama'i matu mennang.” Makkedasi Puwang Iya Pommakuwasaé lao ri umma'-Na, “Narékko narapini iyaro essoé, lémpa iya ripasangngé ri salangkammu Upoloi matu, sibawa Upaleppe'i balenggumu. Dé'na mumancaji atanna tau laingngé. Mattumaniko matu ri Iyya, Puwang Allataala, sibawa lao riséddié wija-wijanna Daud iya Uwakkaé matu selaku arung. Umma'-Ku Israélié, aja' mumétau! Atak-Ku Yakub, aja' mumétau! Iko sibawa wija-wijammu Upassalama'i matu polé ri wanuwa mabélaé, onrommu ritawang. Lisuko matu sibawa monro ri wanuwammu sibawa amang. Tuwoko matu sibawa damé; dé'gaga iya parellué muwétauri. Poléka matu sibawa Upassalama'ko matu. Bangsa-bangsa, onrommu Upassara-sarang Upaccappu manengngi matu, iyakiya iko dé' Ugaukengngi makkuwaro. Mémeng dé' muleppe matu polé ri pahukkungengngé iyakiya pahukkungek-Ku lao ri iko iyanaritu adélé'i situru sibawa attentuwangngé. Iyya, Puwang, pura mabbicara.” Makkedai Puwangnge lao ri umma'-Na: “Maladde senna lomu, dé'gaga pabburana lomu. Dé' muwi séddi tau sadiya musahakangngi ajjappammu, dé'gaga pabbura untu' sining lettammu, dé'gaga amménasang ri alému untu' majjappa. Sininna canrimmu nallupaino; dé'na mennang namaélo pikkiri'i alému. Pada-pada balié pura-Ka maggasa nenniya hukkukko sibawa mabecco, nasaba maéga ritu dosamu sibawa battowai asalammu. Aja'na muwaddaréké passalenna sining lomu, saba' dé'na gaga amménasang majjappako. Uhukkung makkuwakoro nasaba maégai dosamu sibawa battowai asalammu. Iyakiya makkekkuwangngé sininna iya memme'ékko riyemme'i matu, sibawa sininna balimmu ritiwii matu ri appalirengngé. Utenre'i matu iya tenre'ékko, Urampo'i matu iya rampo'ékko. Namuni makkedai balimmu, ‘Purani riyabbéyang Sion, na dé'gaga pajampangi,’ iyakiya Uwébbuko matu madising paimeng, sibawa Uwuraiwi sining lomu.” Makkedapi Puwangnge: “Iko, umma'-Ku Uwamaséiwi matu sibawa Upalisui keadaammu ri tana ancajimmu muto. Ripatettongngi matu paimeng Yérusalém, sibawa ripédécéngi saorajana. Napoji-Ka matu pabbanuwana sibawa élong, nenniya gora-gora sibawa marennu. Uwébbui mennang ripakalebbi sibawa dé'na naripakatuna, sibawa jumellana mennang matterui tattamba. Upatarompoi matu bangsamu pada-pada riyolo, sibawa tettossi selaku umma'-Ku. Sininna iya tenre'éngngi Uhukkung towi matu. Makkedai Puwangnge, “Engka matu wettunna Umancaji Allataalana sininna suku Israélié, na mennang mancaji umma'-Ku. Uwappaitangngi ri padang kessi'é paressé babuwa-Ku lao ri mennang iya leppe'énna polé ri amaténgngé. Wettunna umma Israélié sappa atennangeng, Uwappaitangngi alé-Ku polé mabéla lao ri mennang. Eh umma Israélié, riyolopa natuli Uwamaséiko, na untu' matteru tette'i matu Uwappaitang makkedaé tuli Uwamaséiko. Upatarompoi matu bangsamu pada-pada riyolo. Siseppi malasiko matu rabana, nenniya séré sibawa marennu. Bukkako matu dare anggoro ri buluna Samaria, sibawa iya mattanengngé nacéppui towi matu buwana. Tongeng, engka matu wettunna nasining pengawal kotaé gorai ri buluna Efraim, ‘Laono mai taénré ri Sion, ri Puwang Allataalata.’ ” Makkedai Puwangnge, “Akkélong marennuno untu' Israélié, umma'-Ku – bangsa iya mapongngé polé ri sininna bangsaé. Puwélonni élong pappojiyangngé, sibawa abbirittanni: ‘ Puwangnge pura passalama'i iya nasésaé polé ri umma'na.’ Polé ri manorang Utiwii mennang lisu paimeng; Upaddeppungengngi mennang polé ri cappa-cappa linoé. Tau butaé sibawa tau péso'é maccowéi matu silaong mennang, makkuwatoro makkunrai iya nappaé mémmana sibawa mattampu loppoé. Polé manengngi matu paimeng mennang ri laleng jumella iya battowaé lao ri wanuwaéwé. Joppai mennang sibawa mabbarébé uwai matanna, Usaléwori sibawa Upimping mennang. Utiwii mennang molai onrong-ngonrong iya maégaé uwaina, molai laleng malappaé ri onrong iya dé'é natabbuttu matu mennang. Untu' Israélié, samannaka Iyya ambo'; Efraim iyanaritu ana' worowané-Ku macowaé.” Makkedai Puwangnge, “Engkalingai éh bangsa-bangsa! Palettu'i pasek-Ku ri liweng tasi: Umma'-Ku iya puraé Upassara-sarang Upaddeppungengngi matu sibawa Upiyara pada-pada pakkampié monrowangngi bimbala'na. Purani Upassalama umma Israélié, sibawa Upaleppe polé ri bangsa iya mawatangngé. Laowi matu mennang ri Bulu Sion sibawa tappa iya maccahayaé, namakkélotto sibawa marennu nasaba sininna pabbéré-Ku lao ri mennang, iyanaritu gandong, minnya, anggoro, saping sibawa bimbala. Pada-padai matu mennang tammeng iya genne'é uwaina, sibawa dé' naakurangeng agi-agi. Iyaro wettué séréi matu ana'-ana'daraé sibawa masennang ati. Tomatowaé sibawa kalloloé pada-padai masennang, saba' Usaléworiwi matu mennang. Sarana mennang Upinrai mancaji asennangeng, amessénna Upinrai matu mancaji ariyo-riyong. Upajinnaiwi matu sining imangngé sibawa inanré maonaé; sibawa sininna iya napparelluwangngé umma'-Ku Uwéréngngi matu. Iyya, Puwang, iya powadaéngngi.” Makkedai Puwangnge, “Ri Rama riyéngkalingai sadda mpatingngé, sibawa addarékéng iya risalipuriyé apeddireng. Rahél mpatingiwi ana'-ana'na, dé' namaélo risaléwori saba' dé'ni mennang. Pappésauni terimmu sibawa rakkoiwi uwai matammu! Dé' nasiya-siya turuppuse'mu untu' ana'-ana'mu. Untu' alému engka matu pamale'na, lisui matu ana'-ana'mu polé ri wanuwanna balié. Engka amménasang ri alému ri wettu mangoloé; lisui matu ana'-ana'mu ri kampong assalenna. Uwéngkalingai umma Israélié makkeda penno amesséng, ‘Oh Puwang, pada-padaki olokolo iya dé'éppa naripakacuwai iyakiya Mulatiki untu' mapato, na makkekkuwangngé sadiyani untu' lisu ri Iko. Jaji, tiwini lisu, oh Puwang, Allataalata. Purani mabbokori-Ko, iyakiya iyaro pangkaukengngé risesse'ni. Puranana Muhukkukki, cannunnuni ulutta nasaba messéi. Masiriki sibawa mancaji matuna nasaba purani madosa ri wettu malolota.’ Israél, iko ana' uwélorik-Ku, ana' upojiyé, buwa atik-Ku. Sises-siseng Uwancakko tuli Uwéngngerakko sibawa muddani. Ugaukekko matu sibawa penno paressé babuwa. Tanrangiwi sining lalengngé, pasangngi tanra-tanrangngé sappai laleng iya muwolaé riyolo. Eh Israélié, lisuno! Lisuno ri kota-kotamu pammulangngé. Gangka uppannapa matteruko bata-bata, éh bangsa iya dé'é namatinulu lao ri Iyya? Purana pancaji séuwa iya barué ri linoé, séuwa iya makalallaingngé – sikkalallaing makkunrai linrungiyéngngi worowané.” Puwang Iya Pommakuwasaé, Allataalana Israélié makkeda, “Rékko purani Upatarompo umma'-Ku pada-pada riyolo, riyéngkalingasi matu ri wanuwa Yéhuda sibawa ri désa-désana makkeda tauwé, ‘Tennapodo Puwangnge barakkakiwi bulu-bulu mapaccingngé ri Yérusalém onrong appérumang ripallaingngé untu' Aléna.’ Monroi matu tauwé ri Yéhuda sibawa ri désa-désana. Engka matu kuwaro patani sibawa pappiyara saping sibawa bimbala. Mennang iya posoé Upétakkariwi matu, sibawa iya malemmaé nasaba alupurengngi Upamessoriwi matu. Iyaro wettué makkedai matu tauwé, ‘Purana memme matinro, matakkana.’ Iyya, Puwang, powadai makkedaé narapii matu wettunna wanuwa Israélié sibawa Yéhuda Upennoiwi sibawa tolino nenniya olokolo. Pada-pada riyolo purai Ujagai mennang kuwammengngi ri munri Ureddu'i, ruttungngi sibawa mancuru'i mennang, makkuwatoro Ujagaiwi matu mennang kuwammengngi Upakkasse'i sibawa patettongngi mennang paimeng. Iyaro wettué dé'na nakkeda matu tauwé, ‘Tomatowaé manré buwa iya makeccié, isinna ana'na mangélu,’ sangadinna niga manré buwa iya makeccié, aléna muto mangélu isinna. Tungke tau matéi matu nasaba dosana muto.” Makkedai Puwangnge, “Narapii matu wettunna mébbu-Ka assijancing iya barué sibawa umma Israélié sibawa Yéhuda. Iyakiya iyaro assijancingngé dé' napada-pada assijancing iya Uwébbué sibawa toriyolona mennang wettunna Udulung mennang massu polé ri Maséré. Namuni pada-pada-Ka séddié lakkai untu' mennang, iyakiya nassakkarengngi assijancik-Ku sibawa mennang. Iyanaé assijancing mabaru iya Uwébbué matu sibawa umma Israélié: Utaroi matu hukkung-hukkuk-Ku ri laleng baténna mennang, sibawa Uwokii ri laleng atinna mennang. Mancaji-Ka Allataalana mennang, na mennang mancaji umma'-Ku. Dé' naparelluna séddi polé ri mennang paggurui pada-padanna untu' missengngi Puwangnge. Saba' sininna mennang, baiccu battowa, naissek-Ka matu. Sining asalanna mennang Uwallupaiwi matu, dosa-dosana mennang Uwaddampengengngi matu. Iyya, Puwang, pura mabbicara.” Puwangnge passadiyai mata essoé untu' tajangiwi essoé; kéteng sibawa sining wéttowingngé untu' tajangiwi wennié. Nagarui tasi'é angkanna mabbombang, Puwang Iya Pommakuwasaé, iyanaro asenna. Majjanciwi Puwangnge, “Angka dé'na natappinra hukkung alangngé tette towi matu engka Israélié selaku bangsa. Akkalarapanna riséuwaé wettu weddingngi riukkuru langié, sibawa borina linoé weddingngi risalidiki, ri wettuénnaro Usampéyangngi matu Israélié nasaba sininna pangkaukenna mennang iya majaé. Iyya, Puwang, pura mabbicara.” Makkedai Puwangnge, “Engka matu wettunna ripatettongngi paimeng sininna Yérusalém selaku kota-Ku, polé ri Manara Hananeel lettu ri Pintu Gerbang Sunna. Polé kuwaro jori pakkasésénna mattujui lao ri Bulu Garéb, nainappa bélo' lao ri Gowa. Sininna lompo'éro, iya ripaké selaku kuburu nenniya onrong akkabbéyangeng warowo, sibawa sininna dare'é ri wirinna Salo Kidron lettu ri Pintu Gerbang Anyarangngé ri alau, ripallaingngi matu untu' Iyya. Dé' nariruttunna matu kota Yérusalém iyaré'ga riyancuru.” Ri taung maseppuloé apparéntanna Zédékia arunna Yéhuda, iyanaritu taung maseppuloé aruwa apparéntanna Nébukadnézar arung Babél, mabbicarai Puwangnge lao ri iyya. Iyaro wettué tentarana arung Babél mattengngangngi gasai Yérusalém. Ritahakka ri seddéna saorajana arungngé ri Arung Zédékia nasaba ritenre'i purai mappallebbangengngi makkedaé makkeda makkuwaiyé Puwangnge, “Uleppessangngi matu arung Babél caui sibawa tudangiwi kotaéwé, na Arung Zédékia dé' naleppe matu. Riyabbéréyangngi matu lao ri arung Babél, enrengngé mangoloi ri arungngéro nenniya mabbicara sibawa aléna. Nainappa ritiwi matu Zédékia lao ri Babél sibawa monro kuwaro narapi Uhukkungngi. Namuni namusui tau Babél-é, dé' namallolongeng matu. Iyya, Puwang, pura mabbicara.” Makkedai Puwangnge lao ri iyya makkedaé Hanameel, ana' worowanéna amauréku Salum, maéloi polé untu' méllauwi kuwammengngi uwelliwi tanana ri Anatot ri daérana Bényamin. Saba', iyya ritu sumpulolona iya kaminang macawé'é iya mappunnaiyé ha' melliwi tanaéro. Nainappa pada-pada iya pura napowadaé Puwangnge, poléni Hanameel ri iyya ri seddéna saorajaé, sibawa méllauwi kuwammengngi iyya melliwi tanana. Rimakkuwannanaro mateppe'na tonget-tongengngi Puwangnge pura mabbicara lao ri iyya. Nainappa uwala iyaro sure' angellingengngé iya puraénna ritaroi ségélé sibawa mallise sara-sara nenniya attentuwang-attentuwanna. Uwala towi lémbana sure' iya dé'é gaga ségélé'na, na iya duwa sure'éro uwabbéréyangngi lao ri Barukh ana' Néria eppona Mahséya. Uwabbéréyangngi ri yolona Hanameel enrengngé sining sabbi iya puraé tékéngngi sure'-sure'éro, sibawa ri yolona sining tau iya mattengngangngé tudang ri seddéna saorajaéro. Ri yolona maneng mennang makkedaka lao ri Barukh, “ Puwang Iya Pommakuwasaé, Allataalana Israélié, paréntakko kuwammengngi muwalai iya duwa sure'éwé, muwi iya aslié iyaré'ga lémbana, namuputtama'i ri laleng séddié oring kuwammengngi natahang maitta. Puwang Iya Pommakuwasaé, Allataalana Israélié, powadai makkedaé bola, tana, sibawa palla anggoro'é ribalu'i sibawa riyelliwi matti ri wanuwaéwé.” Purana uwabbéréyang iyaro sure'-sure' angellingengngé lao ri Barukh, massempajanna, “ Puwang Iya Pommatanré, Iko ritu pancajiwi langié nenniya linoé sibawa akuwasam-Mu nenniya amampungem-Mu iya battowaé. Dé' muwi séuwa iya masukkara'é ri alé-Mu. Muwappaitangngi pammasé-Mu iya mannennungengngé lao ri massebbu-sebbu tau, iyakiya Ikoto hukkungngi tauwé nasaba dosana tomatowanna. Iko Allataala iya marajaé sibawa poré; asem-Mu Puwang Iya Pommakuwasaé. Masero sining rancana-Mu, sibawa makalallaing sining pangkaukem-Mu; Muwitai sininna iya napogau'é tolinoé, nenniya mpale'i mennang situru sibawa pangkaukenna mennang. Riyolo Mupogau'i makalallaingngé sibawa gau'-gau' dé'é padanna ri Maséré, na muwi lettu makkekkuwangngé matteru Mupo pogau'i, muwi ri yelle'na tau Israélié iyaré'ga ri yelle'na sininna bangsa laingngé. Rimakkuwannanaro Mutarompono makkekkuwangngé kégi-kégi. Nasibawang akuwasam-Mu nenniya awatangem-Mu iya battowaé Mutiwii umma Israélié massu polé ri Maséré. Pogau'ko sining anu dé'é padanna nenniya sining makalallaingngé enrengngé kajajiyang-kajajiyang iya sélengiyéngngi balié. Wanuwa iya makessingngé sibawa macommo'éwé Muwéréngngi mennang pada-pada iya puraé Mujanciyangngi toriyolona mennang. Iyakiya wettunna mennang lettu ri wanuwaéwé sibawa sittaiwi, dé' naturusiwi mennang parénta-parénta-Mu, sibawa dé' natuwo situru sining pappagguruwam-Mu. Sininna iya Muparéntangngéngngi mennang dé' muwi séddi iya napogau'é mennang. Rimakkuwannanaro Mupapoléi sininna abalaéwé ri yasé'na mennang. Purani patettong témbo-témbo akkeppungeng sining tau Babél-é ri mattulilinna kotaé untu' sittaiwi, na makkekkuwangngé maggasani mennang. Ammusurengngé, akkaderéngngé sibawa saié nassabariwi matu nasempé iyaé kotaé ri limanna mennang. Muwitai makkedaé sininna iya Mupowadaé kajajiyanni. Namuni makkuwaro, oh Puwang Iya Pommatanré, Iko ritu iya suroékka melliwi tanaéwé ri yolona sining sabbié, namuni dé'na namaitta narisittai matu iyaé kotaé ri tau Babél-é.” Nainappa makkeda Puwangnge lao ri iyya, “Iyya ritu Puwang, Allataalana sininna tauwé. Dé'gaga mawatang ri alé-Ku. Iyaé kotaé Uleppessangngi matu rikuwasai ri Nébukadnézar arung Babél silaong pasukanna. Nasittaiwi matu mennang kotaéwé, sibawa tunui gangka cappu silaong sibawa sining bola kégi tauwé paompoi cai-Ku, nasaba ri pabbingenna sining bolaéro tunui mennang dupa lao ri Baal sibawa tiri anggoro untu' pakkasuwiyang lao ri déwata-déwataé. Bunge pammulang sejarana mupa mennang, purana naébbu Iyya dé' namasennang tau Israélié sibawa tau Yéhudaé. Napaénré'i mennang cai-Ku sibawa pangkaukeng-pangkaukenna mennang iya majaé. Sipongeng ripatettonna iyaé kotaé, pura-Ka naébbu macai senna pabbanuwana. Purani Upettui untu' paccappui, nasaba sininna ja iya napogau'é tau Yéhudaé sibawa Yérusaléngngé silaong sining arunna, pajaba pamaréntaé, imangngé, sibawa nabi-nabinna mennang. Nasalaina mennang sibawa namuni matteru-Ka paggurui mennang, dé' namaélo mennang méngkalingai sibawa dé' namaélo mainge. Mala bola iya ripatettongngé untu' onrong assompang lao ri Iyya purani napanajisi mennang sibawa palénne'i barahala-barahalana iya mappakaciddi-ciddi'é ri onrongngéro. Patettongngi mennang sining mézba untu' Baal ri Lompo Hinom, sibawa makkasuwiyangengngi ana'-ana'na lao ri Déwa Molokh. Padahal, dé' naengka Usuroi mennang pogau'i gau'éro, mala dé' naengka naompo ri laleng pikkirak-Ku makkedaé napogau'i matu mennang pangkaukeng maja makkuwaéro nenniya mébbui tau Yéhudaé madosa.” Puwang, Allataalana Israélié, makkedai lao ri iyya, “Yérémia, makkedai bangsa Israélié makkedaé musué, akkadérengngé, sibawa saié mébbui matu iyaé kotaé sempé ri limanna arung Babél. Makkekkuwangngé, éngkalinga towi aga Upowada matu. Upaddeppungengngi matu iyaé bangsaé polé ri sininna wanuwaé onronna mennang Upassara-sarang nasaba cai-Ku lao ri mennang. Utiwii matu mennang lisu ri onrongngéwé sibawa Upakkulléi monro kuwaé sibawa amang. Mancajiwi matu mennang umma'-Ku, sibawa Iyya mancaji Allataalana. Uwéréngngi matu mennang banna séddi akkatta atuwong: iyanaritu, pakalebbi-Ka mannennungeng; iyaro gau'é tiwii matu akessingeng untu' aléna mennang, sibawa untu' wija-wijanna. Mébbu-Ka matu assijancing iya mannennungengngé sibawa mennang. Dé' Uwappésau matu pogau'i makessingngé lao ri mennang. Uwébbui matu mennang métau sibawa mappakalebbi lao ri Iyya sibawa sukku atinna kuwammengngi dé' nabélai-Ka. Masennak-Ka matu pogau'i makessingngé lao ri mennang, sibawa mébbuka mattette ri wanuwaéwé untu' mannennungeng. Pada-pada pura-Ka papolé abala ri yasé'na bangsaéwé, makkuwatoniro Uwabbéréyang manengngi matu iya makessingngé iya puraé Uwajjanciyang lao ri mennang. Makkedai tauwé makkedaé iyaé wanuwaé mancajini pada-pada padang kessi iya dé'é nariyonroi ri tolinoé sibawa olokolo'é, sibawa iyaé wanuwaé sempé'ni ri limanna tau Babél-é. Iyakiya makkeda-Ka makkedaé ribalu'si matu matti sining dare'é ri wanuwaéwé; sure' angellinna ritékéngngi matu, riségélé, nenniya ripakkasse sibawa sabbi-sabbi. Iyaro kajajiyangngi matu ri daérana Bényamin, ri désa-désa ri seddéna Yérusalém, ri kota-kotana Yéhuda, ri kota-kotaé ri daéra bulué, ri daéra pong bulué, sibawa ri Yéhuda yattang. Iyaé bangsaé Upalisui matu keadaanna ri wanuwaéwé. Iyya, Puwang, pura mabbicara.” Wettukku ritahang mupa ri seddé saorajaé, lolongekka paseng laing polé ri Puwangnge iya pancajiyéngngi linoé sibawa tappai nenniya taroi ri onronna. Makkedai, “Angobbino ri Iyya, na Umetté matu; Upaissengiko matu gau'-gau' iya magelloé sibawa mappabengngaé iya dé'éppa muwissengngi. Saorajana arung Yéhuda sibawa sining bolaé ri kota Yérusalém purani ribongkara untu' pakkasse'i attahanangngé lao ri akkeppungenna sibawa paggasana balié. Iyakiya Iyya, Puwang, Allataalana Israélié, powadai makkedaé, paracuma bawang méwai tau Babél-é, nasaba iyaro gau'é banna naébbui matu kotaéwé penno sibawa ujuna sining tau iya Uwunoé ri laleng cai-Ku lao ri mennang. Dé'na Umaélo mitai kotaéwé, nasaba sining taunna purani napogau' iya majaé. Iyakiya matti Upalisui keadaana iyaé kotaé sibawa pabbanuwana; mawatangngi matu paimeng. Uwabbéréyangngi matu lao ri mennang asaléwangengngé sibawa amangngé iya maonaé. Upatarompoi matu Yéhuda sibawa Israélié pada-pada riyolo sibawa tettongngi matu paimeng selaku umma'-Ku. Upépaccingiwi matu mennang polé ri dosa-dosa iya napogau'é mennang lao ri Iyya; Uwaddampengengngi matu dosa-dosana sibawa adorakanna. Mancajiwi matu Yérusalém arennuk-Ku sibawa abangkakek-Ku. Sininna bangsaé ri linoé mancaji métaui matu sibawa masélengngi enrengngé pakalebbi-Ka, narékko naéngkalingai sininna akessingeng iya Upogau'é untu' pabbanuwana Yérusalém, sibawa passalenna adécéngeng iya Uwabbéréyangngé lao ri kotaéro.” Makkedai Puwangnge, “Makkedai tauwé makkedaé iyaé onrongngé pada-padai padang kessi'é, dé'gaga tau iyaré'ga olokolo iya monroé kuwaro. Ada-adanna mennang mémeng tongengngi, saba' kota-kota Yéhuda sibawa sining lalengngé ri Yérusalém lobbang manenni; dé'gaga tau iyaré'ga olokolo iya monroé kuwaro. Iyakiya ri onrong-ngonrongngéro riyéngkalingasi matu sadda ariyo-riyongngé sibawa arennungngé nenniya sadda pésta abottingengngé. Riyéngkalinga towi matu élonna sining tau iya tiwié pakkasuwiyang sukkuru lao ri Bola-Ku. Makkedai matu, ‘Sukkuru'no lao ri Puwang Iya Pommakuwasaé, nasaba makessingngi sibawa pammasé-Na mannennungengngi.’ Upédécéngiwi matu iyaé wanuwaé pada-pada pammulanna. Iyya, Puwang, pura mabbicara.” Makkedai Puwang Iya Pommakuwasaé, “Wanuwa sibawa kota-kotana iya pada-padaé padang kessi'éwé dé' naonroiwi tolinoé iyaré'ga olokolo'é. Namuni makkuwaro, ri esso ri munri engkasi paimeng padang wella onronna tauwé mampii sining bimbala'na. Ri kota-kotaé ri daéra bulué, ponna bulué, daérana Yéhuda yattang, sibawa ri daérana Bényamin enrengngé ri désa-désa ri seddéna Yérusalém, sibawa ri kota-kotana Yéhuda, sining pakkampié nabilassi matu paimeng sining bimbala'na mennang. Iyya, Puwang, pura mabbicara.” Makkedai Puwangnge, “Engka matu wettunna Urupaiwi janci iya puraé Uwébbu sibawa Israélié nenniya Yéhuda. Ri wettuéro séddi tau iya adélé'é polé ri wija-wijanna Daud Upilé matu mancaji arung. Iyaro arungngé napogau'i matu aga iya adélé'é sibawa tongengngé ri sininna wanuwaé. Tau Yéhudaé sibawa pabbanuwana Yérusalém ripassalama'i matu sibawa tuwoi amang. Riyasengngi matu kota Yérusalém ‘ Puwangnge Pappassalama'-Ta’. Iyya, Puwang, majjanci makkedaé tuli engka matu séddi tau polé ri wija-wijanna Daud iya mancaji arunnaé Israélié; tuli engka matu imang-ngimang polé ri suku Léwi iya tumaningiyék-Ka sibawa makkasuwiyangeng akkarobangeng olokolo, gandong sibawa pakkasuwiyang iya ritunué.” Makkedai Puwangnge lao ri iyya, “Purana siyo assijancing sibawa essoé nenniya wennié, kuwammengngi natuli polé essoé sibawa wennié ri wettunna; iyaro assijancingngé dé' nawedding ripaddé. Makkuwatoro pura tok-Ka siyona assijancing sibawa atak-Ku Daud, makkedaé polé ri wija-wijanna tuli engka matu séddi tau mancaji arung; sibawa pura tok-Ka siyona assijancing sibawa imang-ngimang wija-wijanna Léwi makkedaé tuli natumaningi-Ka matu mennang. Iyaro sining assijancingngé dé' nawedding riledda. Utambaiwi matu wija-wijanna atak-Ku Daud sibawa imang-ngimang suku Léwi, angkanna jumellana mennang mancajiwi singngégai kessi'é ri wiring tasi'é sibawa wéttowing iya dé'é nariyullé bilang.” Makkedai Puwangnge lao ri iyya, “Puraniga mupénessai aga iya napowadaé tauwé lao ri Israélié sibawa Yéhuda? Makkedai mennang makkedaé purani Uwabbéyang iya duwa bangsa iya puraé Upiléro. Iyanaro saba'na naita mariyawai umma'-Ku, sibawa dé'na naangga'i mennang selaku séddi bangsa. Iyakiya pékkugi Iyya, Puwang, pura mébbu séuwa assijancing tassiyo sibawa essoé nenniya wennié, sibawa mébbu hukkung iya matoro'éngngi langié sibawa linoé, makkuwatoniro tette'-Ka matu makkatenningngi assijancik-Ku sibawa wija-wijanna Yakub nenniya atak-Ku Daud. Séddi polé ri wijanna Daud Upilé matu untu' paréntai wija-wijanna Abraham, Ishak, sibawa Yakub. Maressé babuwa-Ka matu lao ri umma'-Ku, sibawa mébbui madécéng paimeng.” Wettunna Nébukadnézar arung Babél sibawa tentarana iya ripakkasse'é ri pasukang-pasukang polé ri sininna bangsaé nenniya wanuwa iya tunru'é ri aléna poléni gasai Yérusalém sibawa kota-kotaé ri seddéna, Puwangnge mabbicara lao ri iyya. Nasuroka lao ri Zédékia arunna Yéhuda, sibawa makkeda makkuwaé, “Iyya, Puwang Allataalana Israélié, mabbéréyangngi matu iyaé kotaé lao ri arung Babél nanatunui matu. Dé' muleppe matu, sangadinna ritikkeng sibawa riyabbéréyang lao ri aléna. Siruntu'ko matu nenniya mabbicarako sibawa aléna, namulao matu ri Babél. Iyakiya éngkalingai ada-adak-Kué passalenna iko, Zédékia! Dé' Mumaté matu ri laleng ammusurengngé, sangadinna maté sibawa tennang. Napékkugi ra'ya'é mattunu kamennyang wettunna tampungngi toriyolomu iya mapparéntaé ri yolomu, makkuwatoro ra'ya'é tunui matu kamennyang untu' iko. Mabbaratai matu mennang sibawa makkeda, ‘Aduh! Dé'ni gaga arutta!’ Iyya, Puwang, pura mabbicara.” Naupalettu'ni iyaro pasenna Puwangnge lao ri Arung Zédékia ri Yérusalém, wettunna pasukanna arung Babél mattengngang gasai kotaéro. Nagasa towi mennang kota Lakhis sibawa Aséka, duwa kota mabbénténg iya mattahangngé mupa ri Yéhuda. Arung Zédékia sibawa pabbanuwana Yérusalém mébbuni assijancing untu' paleppe'i ata-ata Ibraninna mennang, muwi worowané iyaré'ga makkunrai kuwammengngi dé' muwi séddi tau polé ri bangsa Israélié iya powataéngngi tau sibangsana. Sininna ra'ya'é sibawa sining pajaba pamarénta iya puraé mébbu assijancing untu' paleppe'i ata-atanna mennang sibawa dé' namaélona powatai paimeng, tonget-tongengngi paleppe'i ata-atanna mennanro. Iyakiya rimunri tappinrai pikkiranna mennang, nainappa nala paimeng iyaro ata-ataé, sibawa passai mancaji atasi paimeng. Makkedaka makkedaé sininna ata Ibrani iya puraé mattumani enneng taung ittana, harusu'i ripaleppe ri cappa'na taung mapitué. Iyakiya toriyolomu dé' namaélo puriyatiwi iyaré'ga méngkalingai aga iya Upowadaéro. Siyagangngaré esso labe'é upinrai kédo-kédomu sibawa pogau'i iya pésennangiyéngngi atik-Ku. Musitujui manenni untu' paleppe'i ata-ata sibangsamu, nenniya mébbu assijancing sibawa Iyya ri laleng Bola-Ku. Uwabbéréyakko matu lao ri bali iya macinnaé mpunoko. Naanréi matu ujumu manu'-manu' sibawa olokolo masekkang. Zédékia arung Yéhuda sibawa sining pajaba pamaréntana Uwabbéréyangngi matu lao risining tau iya macinnaé mpunoi mennang. Uwabbéréyangngi matu mennang lao ri tentara Babél, iya salaiyékko makkekkuwangngé. Mabbéré-Ka matu tanra-tanrang kuwammengngi nalisu mennang ri kotaéwé, nainappa maggasa, pasittai, sibawa tunui. Kota-kotana Yéhuda Upancajiwi matu pada-pada padang kessi iya dé'é naonroiwi tauwé. Iyya, Puwang, pura mabbicara.” Wettunna Yoyakim ana' Yosia mancaji arunna Yéhuda, makkedai Puwangnge lao ri iyya, “Laono mabbicara sibawa sining tau appanna Rékhab. Tiwii mennang ri sala séddinna bili'é ri laleng Bola-Ku, sibawa patalangengngi mennang anggoro.” Naulaona duppaiwi sininna appanna Rékhab, iyanaritu Yaazanya (ana'na séddi tau iya riyasengngé Yérémia ana' Habazinya) silaong sininna silessurenna nenniya ana'-ana'na iya worowané. Utiwini mennang ri Bolana Puwangnge muttama ri bili'na ana'-ana' gurunna Nabi Hanan ana' Yigdalya. Iyaro bili'é engkai ri yasé'na bili'na Imang Maaséya ana' Salum, seddéna bili'na pajaba-pajaba laingngé. Maaséya iyanaritu pajaba tanré iya jagaiyéngngi sining tange'é ri Bolana Puwangnge. Nainappa upalénne ri yolona sining tau Rékhab-éro énungeng-énungeng iya pennoé sibawa anggoro, sibawa sining kacaé. Nainappa makkedaka lao ri mennang, “Taénunna.” Iyakiya mappébaliwi mennang, “Dé' taénung anggoro. Toriyolota Yonadab ana' Rékhab pésangkaiki sibawa wija-wijatta untu' ménung anggoro. Iyaro pappésangkaé takkennai untu' mannennungeng. Dé' naweddikki mallaonruma, sibawa dé'to nawedding mabbukka iyaré'ga mappunnai palla anggoro. Gangka tuwota, dé'to naweddikki patettong bola. Harusu'ki monro ri laleng kémaé, kuwammengngi weddikki mattette ri tanaéwé selaku tau laing. Sininna iya napparéntangngé Yonadab lao ri idi purani riturusi. Gangka tuwota, idi sibawa ana' bainéta dé' naénung anggoro. Iyakiya wettunna Arung Nébukadnézar gasai wanuwaéwé, ripettuiwi untu' lari polé ri tentara Babél-é sibawa tentara Siriaé, sibawa mangungsi ri Yérusalém. Iyanaro saba'na taonro makkekkuwangngé kuwaé.” Napésangkaiwi Yonadab wija-wijanna ménung anggoro, nanaturusiwi mennang pappésangkaéro. Lettu essoéwé dé' muwi séddi polé ri mennang ménung anggoro. Iyakiya Iyya matteru-teruka mabbicara lao ri iko, na iko dé' mumaélo méngkalingai. Matteru-teru-Ka suroi lao ri iko maneng atak-Ku sining nabié, napurani mennang napangajariko untu' pédécéngiwi ampé-ampému sibawa mappésau pogau'i majaé. Naparéngngerangiko mennang untu' dé' mumassompa déwata-déwata laing sibawa dé' mumattumani lao ri mennang, kuwammengngi weddikko matteru monro ri wanuwaéwé iya puraé Uwabbéréyang lao ri iko sibawa lao ri toriyolomu. Iyakiya dé' mumaélo jampangiwi sibawa dé' mumaélo méngkalinga-Ka. Wija-wijanna Yonadab naturusiwi paréntana ambo'na toriyolona mennang, iyakiya iko dé' mumaélo mapato lao ri Iyya. Rimakkuwannanaro, Iyya, Puwang Iya Pommakuwasaé, Allataalana Israélié, papoléi matu ri yasé'mu – tau Yéhudaé sibawa Yérusaléngngé – sininna abala iya puraé Upattentu untu' iko, pada-pada iya puraé Upowada. Upogau'i iyaro nasaba dé' mumaélo méngkalingai narékko mabbicara-Ka lao ri iko, sibawa dé' mumaélo mappébali wettuk-Ku mobbiko.” Nainappa makkeda-Ka lao risining tau appanna Rékhab makkedaé Puwang Iya Pommakuwasaé, Allataalana Israélié, makkeda makkuwaiyé, “Purano mapato lao ri toriyolomu Yonadab; sininna paréntana purani muturusi sibawa mupajoppa. Rimakkuwannanaro, Iyya, Puwang Iya Pommakuwasaé, Allataalana Israélié, majjanci makkedaé polé ri wija-wijanna Yonadab ana' Rékhab tuli engka matu tau worowané iya tumaningiyék-Ka.” Ri taung maeppaé mancaji arunnana Yoyakim ana' Yosia ri Yéhuda, makkedai Puwangnge lao ri iyya, “Alano séddi kitta lulung, namuwokii kuwaro sininna iya puraé Upowada lao ri iko passalenna Israélié sibawa Yéhuda, sibawa passalenna sininna bangsaé. Okii sininna ada-adak-Ku mappammulai bunge' mabbicara-Ku lao ri iko ri wettu apparéntanna Arung Yosia lettu essoéwé. Naullé mappésauwi matu tau Yéhudaé pogau'i majaé narékko naéngkalingai passalenna sininna abala iya Upatatteppaé matu ri yasé'na mennang. Na-Uwaddampengengngi matu dosana sibawa jana mennang.” Rimakkuwannanaro uwobbini Barukh ana' Néria sibawa bacangengngi sininna iya napowadaé Puwangnge lao ri iyya. Nanaoki manenni Barukh ri kitta lulungngéro. Nainappa uwabbéréyang paréntaéwé lao ri aléna, “Dé'na naripaloka muttamakiwi Bolana Puwangnge. Rimakkuwannanaro, narékko narapini essona tauwé mappuwasa, harusu'ko lao kuwaro, nenniya bacai sibawa sadda battowa sininna iya puraé ubacangekko, kuwammengngi naéngkalinga manengngi mennang iya napowadaé Puwangnge lao ri iyya. Pogau'i iyaro ri onrong iya makkullé weddikko riyéngkalinga ri tungke tau iya engkaé ri Bolana Puwangnge, muttama'ni tau Yéhudaé iya polé ri kota-kotana mennang. Naullé nasaba iyaro massempajangngi matu mennang lao ri Puwangnge, sibawa toba' polé risining pangkaukenna mennang iya majaé. Macai senna'i Puwangnge lao ri mennang sibawa mancangngi mennang.” Nanabacani Barukh ada-adanna Puwangnge ri Bolana Puwangnge, pada-pada iya usurowangngéngngi. Ri uleng maaséraé taung malimaé apparéntanna Yoyakim arunna Yéhuda, mappuwasani ra'ya'é untu' lolongengngi paressé babuwa polé ri Puwangnge. Pabbanuwana Yérusalém sibawa sining tau iya polé ri kota-kotana Yéhuda, mappuwasa manenni. Nainappa nabaca Barukh polé ri kitta lulungngéro sininna séuwa-séuwa iya puraé upowada, sibawa naéngkalinga sininna tauwé. Iyaro abbacangengngé ripogau'i ri laleng Bolana Puwangnge ri kantoro'na Gemarya, ana' Safan jurutulisi'na wanuwaé. Iyaro kantoro'é engkai ri seddé bagiyang yasé, seddéna laleng muttama'é ri Pintu Gerbang Barué ri Bolana Puwangnge. Mikhaya ana' Gemarya sibawa eppona Safan naéngkalingani Barukh bacai ada-adanna Puwangnge polé ri kitta lulungngéro. Nainappa lao ri saorajaé, ri kantoro'na jurutulisi'na wanuwaé. Mattengngangngi rapa' sininna pajaba'é kuwaro. Delaya ana' Sémaya, Elnatan ana' Akhbor, Gemarya ana' Safan, Zédékia ana' Hananya, Elisama séddiwi jurutulisi, sibawa pajaba-pajaba laingngé engka towi kuwaro. Nappaissengenni Mikhaya lao ri mennang, sininna iya nabacaé Barukh ri Bolana Puwangnge. Nainappa iyaro sining pajaba'é suroi Yéhudi (iyanaritu ana'na Nétanya, eppona Sélémya, eppo riyuttuna Kusyi) lao ri Barukh sibawa parénta untu' polé nenniya tiwii lao ri mennang kitta lulung iya puraé nabacaro. Nanatiwini Barukh iyaro kitta'é. Adanna mennang, “Tudanni, bacani iyaro kitta lulungngé.” Turuni Barukh. Puranana nabaca, sisulléni sitangnga mennang sibawa perasaang bata-bata nainappa makkeda lao ri Barukh, “Harusu'ki laporo'i iyaé gau'é lao ri arungngé.” Nainappa mennang makkutana, “Coba paissengiki pékkugiko moki manengngi iyaé. Aga Yérémia bacangekko?” Nappébali Barukh, “Tongeng, tungke ada iya tarokii kuwaé nabacangekka Yérémia, na iyya mokii sibawa dawa' ri kitta lulungngéwé.” Nakkeda mennang, “Iko sibawa Yérémia harusu'ko massubbu. Aja' narapii naisseng tauwé onrong assubbuwammu.” Iyaro sining pajaba'é nataroni iyaro kitta lulungngé ri bili'na Elisama, jurutulisi'éro, nainappa lao ri arungngé sibawa laporo manengngi. Nanasuroni arungngé Yéhudi lao untu' malai kitta lulungngéro. Puranana nala polé ri bili'na Elisama, nabacangenni Yéhudi arungngé sibawa sininna pajaba iya tettongngé ri mattulilinna. Iyaro wettué uleng aséra, na arungngé mattengngangngi tudang ri yolona addellangengngé ri saorajana wettu keccé'é. Purana muwa nabaca Yéhudi tellu iyaré'ga eppa barisi, narette'ni arungngé iyaro bagiyangngé sibawa piso baiccu nanaggenrungengngi muttama ri apié. Makkuwaniro napogau' matteru narapi sininna kitta lulungngéro cappu ritunu. Mala arungngé naparéntang ana' worowanéna, iyanaritu Yérahmeel, silaong sibawa Séraya ana' Azriél nenniya Sélémya ana' Abdeel, kuwammengngi natikkekka sibawa Barukh jurutulisi'ku. Iyakiya Puwangnge subbuki. Puranana natunu Arung Yoyakim kitta lulung iya ubacangengngéngngi Barukhro, nasuroka Puwangnge mala kitta lulung iya laingngé, sibawa moki manengngi iya puraé uwoki ri kitta lulung mammulangngéro. Puwangnge suroka powadai makkuwaé lao ri arungngé, “Purani mutunu kitta lulungngéro, namakkutanako ri Yérémia magi naokii makkedaé poléi matu arung Babél sibawa mancuru'i wanuwaéwé enrengngé mpunoi pabbanuwana silaong sining olokolo'na. Rimakkuwannanaro, Iyya, Puwang, makkeda lao ri iko, éh Arung Yoyakim, dé' muwi séddi tau polé ri wija-wijammu mapparénta matu selaku arung wija-wijanna Daud. Riyaggenrungengngi matu massu ujumu, nakenna pella ri essoé, sibawa cinoddo ri wennié. Iko, wija-wijammu, sibawa sining pajaba'mu Uhukkungngi matu nasaba dosa-dosa iya mupogau'é. Upapoléi matu ri yasé'mu sininna abala iya puraé Uwancangekko, nasaba muwi iko iyaré'ga pabbanuwana Yérusalém sibawa Yéhuda dé' najampangiwi sining ancamak-Ku.” Nauwalani kitta lulung iya barué, nauwéréngngi Barukh jurutulisi'ku. Nainappa naoki maneng iya ubacangengngéngngi, iyanaritu lise'na kitta lulung mammulangngé ritambai siyagangngaré paseng laing makkuwaéro. Wettunna Nébukadnézar arung Babél paléssoi Yoyakhin ana' Yoyakim, nakkani Zédékia ana' Yosia mancaji arunna Yéhuda. Iyakiya muwi Zédékia iyaré'ga sining pajaba'na enrengngé ra'ya'na dé' naturusiwi pasenna Puwangnge iya Nabbéréyangngé naolaka. Arung Zédékia suroi Yukhal ana' Sélémya, sibawa Imang Zéfanya ana' Maaséya untu' méllauwi kuwammengngi umassempajang lao ri Puwang Allataala untu' apentingenna bangsaé. Iyaro wettué dé'pa nariputtama'ka ri laleng tarungkué sibawa laluwasa mupa kédo ri yelle'na ra'ya'é. Tentara Babél-é mattengngang keppungngi Yérusalém, iyakiya wettunna mennang naéngkalinga makkedaé joppani tentara Maséré polé ri Maséré untu' mammusu, soroni mennang. Puwangnge, Allataalana Israélié, suroka makkeda makkuwaé lao ri surona Arung Zédékia: “Powadangngi Zédékia, ‘Tentara Maséré iya mattengngangngé lao mai untu' bantuko, balé'i matu nalisu. Nainappa lisu tau Babél-é nanagasai kotaéwé, enrengngé caui sibawa tunui. Iyya, Puwang, paréngngerangiko, kuwammengngi aja' nabelléi alému sibawa mappikkiri makkedaé meddé'ni tau Babél-é sibawa dé'na nalisu. Saba' pasti lisui matu mennang. Akkalarapanna mucau manengngi tentara Babél-é angkanna iya monroé banna sining tau iya malo senna'é ri laleng kéma-kémana mennang, iyakiya moto'i matu mennang sibawa tunui gangka cappu iyaé kotaé.’ ” Soroni tentara Babél-é polé ri Yérusalém nasaba kédoi tentara Maséré'é mattuju ri kotaéro. Nausalaini Yérusalém sibawa lao ri daéra Bényamin untu' tarimai attawangeng manaku polé ri tana appunnangenna kaluwargaku. Iyakiya wettukku lettu ri Pintu Gerbang Bényamin, komandang tentara iya jagaé kuwaro natahakka sibawa makkeda, “Maéloko lari lao ri tau Babél-é!” (Iyaro parawiraé asenna Yéria; ana'nai Sélémya sibawa eppona Hananya.) Mappébalina, “Dé' natongeng! Dé' Umakkatta lao ri balié.” Iyakiya dé' namaélo Yéria méngkalingai. Natikkekka sibawa natiwika mangolo risining pajaba pamaréntaé. Macai senna'ni lao ri iyya, sibawa mapparéntangngi kuwammengngi naribarasa'ka sibawa riurung ri bolana Yonatan, jurutulisi'na wanuwaé. Iyaro bolaé ripancajini tarungku. Riputtama'na riséuwaé kolang ri yawana tanaé, namaitta ritahakka kuwaro. Nainappa Arung Zédékia suroi tauwé tiwika mangolo ri aléna ri saorajaé. Kuwaniro secara rahasia makkutana ri iyya aga engka paseng polé ri Puwangnge. Umappébali, “Engka.” Nainappa utambai, “Riyabbéréyangngi matu Datu lao ri arung Babél.” Purairo makkutanana, “Aga pappéjaku lao ri Datu iyaré'ga lao risining pajaba'na Datu iyaré'ga ra'ya'é, angkanna naputtama'ka Datu ri laleng tarungkué? Kégani sining nabinna Datuéro iya powadaéngngi makkedaé arung Babél dé' nagasai matu Datu sibawa wanuwaéwé? Makkekkuwangngé, Datu iya malebbié, taéngkalingani paréllaukkué. Aja'na nakirikka Datu lisu ri tarungkué ri bolana Yonatanro, matéka matu kuwaro.” Nanapparéntanni Arung Zédékia kuwammengngi ritarungkuka ri seddéna saorajaé. Jaji monrona kuwaro, na tungke esso riwérékka roti polé ri onrong akkébbureng rotié narapi cappu maneng pappassadiyang rotié ri kotaéro. Nanalaona sining pajaba'éro ri arungngé sibawa makkeda, “Iyaé tauwé harusu'i rihukkung maté. Saba', ri laleng makkeda makkuwannaro napalemmai sumange'na sininna prajuri'é sibawa tau laing iya monroé mupa ri kotaéwé. Dé' natulungngi ra'ya'é, sangadinna nacilakaiwi mennang.” Nappébali Arung Zédékia, “Makessinni! Gaukenni situru sibawa élomu, dé' uwulléi pésangkaiko.” Nainappa mennang nalaka nanapanonnoka sibawa tulu ri laleng bujung appunnangenna Malkia ana' worowanéna arungngé, iya engkaé ri seddéna saorajaé. Dé'gaga uwai ri laleng bujungngéro, banna bungka, namuttama'na ri laleng bungkaéro. Iyaro wettué engka séddi tau Sudan iya majjamaé ri saorajana arungngé. Asenna Ebéd-Mélékh. Naéngkalingani makkedaé riputtama'na ri laleng bujungngéro. Wettunna arungngé mattengngang pimpingngi rapa'é ri Pintu Gerbang Bényamin, laoni Ebéd-Mélékh kuwaro sibawa makkeda lao ri arungngé, “Petta Iya Malebbié, pangkaukenna iyaro sining tauwé maja. Purani mennang naputtama Nabi Yérémia ri laleng bujungngé; pasti matéi matu alupureng kuwaro, saba' cappuni inanré ri kotaéwé.” Nariparéntanna Ebéd-Mélékh ri arungngé, “Tiwino tellu tau sibawa passui Yérémia polé ri bujungngéro ri wettu dé'napa namaté.” Nanalaona Ebéd-Mélékh silaong iya tellu tauwéro ri gudanna saorajaé, nanala kaing-kaing malaung kuwaro, nanaloro'i sibawa tulu lao ri iyya ri laleng bujungngéro. Nasurona Ebéd-Mélékh taroi iyaro kaing-kaingngé ri yawana lépa'ku selaku pallapi, kuwammengngi iyaro tulué dé' napeddirika. Nauwaccowérini paréntana Ebéd-Mélékh. Nainappa nagettekka ménré, massu polé ri bujungngéro. Purairo ritahanna ri seddéna saorajaéro. Ri séuwaé wettu iya laingngé, nasuroni tauwé Arung Zédékia tiwika mangolo ri aléna ri pintu gerbang iya matellué ri Bolana Puwangnge. Makkedai lao ri iyya, “Maéloka makkutana lao ri iko, na harusu'ko mappébali sibawa terus terang. Aja' musubbui agi-agi.” Mappébalika, “Rékko upowadai iya tongengngé, pasti napateppaika matu Datu pahukkungeng maté; sibawa rékko mabbéréka pangaja, dé' namaélo Datu turusiwi iyaro pangajaé.” Majjancini Arung Zédékia sibawa mammekko-mekko lao ri iyya, adanna, “Nasabbing Allataala iya tuwoé, Allataala iya mabbéré atuwong lao ri idi, mattanroka makkedaé dé' uwunoko matu iyaré'ga mabbéréyakko lao risining tau iya maéloé mpunoko.” Nainappa upowadang Zédékia makkedaé Puwang Iya Pommakuwasaé, Allataala iya nasompaé tau Israélié, makkeda makkuwaé, “Rékko manyarako lao ri pajaba-pajaba'na arung Babél, dé' nariyunoko matu, sibawa iyaé kotaé dé'to naritunu matu. Iko sibawa kaluwargamu salama'i matu. Iyakiya rékko dé' mumaélo manyara, iyaé kotaé sempé'i ri laleng limanna tau Babél-é. Natunui matu mennang gangka cappu, sibawa dé' muleppe matu.” Nappébali arungngé, “Métauka lao risining tau sibangsata iya lariyénna lao ri tau Babél-é. Ajakké nabbéréyakka matu lao ri mennang sibawa risissa.” Pappébalikku, “Dé', dé' nariyabbéréyang matu Datu lao ri mennang. Uwéllauwi sibawa masero kuwammengngi naturusiwi Datu pasenna Puwangnge; jaji manengngi matti, sibawa dé' nariyuno matu Datu. Iyakiya narékko dé' namaélo mabbéréyangngi aléna Datu, purani nappaitang Puwangnge lao ri iyya aga kajajiyang matu. Ri laleng pakkitangngéro uwitai sininna makkunraié iya engkaé mupa ri saorajana Yéhuda riyassarénréngeng massu lao ri pajaba-pajaba'na arung Babél. Joppai mennang namakkedato, ‘Purani ribellé ri arungngé ri sahaba-sahaba maréppé'na, sibawa rikuwasai ri mennang. Makkekkuwangngé, tappasollanana ajéna ri laleng bungkaé, soro manenni mennang.’ ” Makkedasika, “Sininna ana' bainéna Datu ritiwii matu massu lao ri tau Babél-é. Muwi Datu dé'to naleppe polé ri mennang. Ritikkengngi matu Datu ri arung Babél, sibawa iyaé kotaé ritunui gangka cappu.” Nainappa makkeda Zédékia, “Aja' muwappaissengengngi lao ri muwi niga passalenna assipabbicarattaé, kuwammengngi dé' nariyancang nyawamu. Narékko naéngkalingai sining pajaba'é makkedaé puraka mabbicara sibawa iko, poléi matu mennang sibawa makkutana ri iko passalenna assipabbicaratta. Majjanciwi matu mennang untu' dé' naunoko, rékko mucuritangeng manengngi mennang. Powadang bawanni makkedaé mupalécéka kuwammengngi dé' ukirikko lisu ri tarungkué sibawa maté kuwaro.” Dé' namaitta ri munrinna poléni sininna pajaba'é sibawa makkutana ri iyya. Upaissengini mennang pada-pada iya napparéntangngé arungngé ri iyya. Nanallalengiwi dé' aga-aga naullé pogau' mennang saba' dé' muwi séddi tau missengngi assipabbicaranna arungngé sibawa iyya. Tette'ka ritahang ri seddéna saorajaé narapi ri esso risittainna Yérusalém ri balié. Ri uleng maseppuloé taung maaséraé apparéntanna Zédékia arung Yéhuda, Nébukadnézar arung Babél silaong sininna tentarana poléni sibawa gasai Yérusalém. Ri tanggala asérana uleng eppa taung maseppuloé séddi apparéntanna Arung Zédékia, narumpa'ni balié témbo'na kotaé, sibawa risittaini Yérusalém. Na sininna pajaba-pajaba'na arung Babél poléni sibawa lao tudang ri Pintu Gerbang Tengngaé. Ri yelle'na mennang engkai Nérgal Sarézer, Samgar Nébo, Sarsekim kapala ruma tanggana saorajaé, Nérgal Sarézer Rabmag sibawa parawira-parawira laingngé. Wettunna Arung Zédékia sibawa sininna tentarana mitai sininna kajajiyangngéro, makkuragani lari mattuju ri Lompo Yordan iyatoro wennié. Laloi mennang ri laleng tammenna saorajaé, nainappa massu molai pintu gerbang iya pasisumpungngéngngi iya duwa témbo'é ri onrongngéro. Iyakiya rilellungngi mennang ri tentara Babél-é sibawa tikkengngi Zédékia ri tanéténa Yérikho. Nainappa ritiwi ri Arung Nébukadnézar ri kota Ribla ri daéra Hamat, nainappa ripakennai pahukkungeng maté. Ri kotaéttonaro riyuno ana'-ana'na ri yolona matanna, sibawa sininna pajaba pamaréntana Yéhuda riyunoto. Purairo ricukkéni matanna Zédékia, nainappa ribalenggu naritiwi lao ri Babél. Na wettuéro natununi sining tau Babél-é saorajana arungngé sibawa sining bolana ra'ya'é, enrengngé ruttungngi témbo-témbo'na Yérusalém. Angkanna ra'ya' iya engkaé mupa ri kotaé, silaong sining tau iya lariénna maccowé ri tau Babél-é, ritiwini ri Babél ri Nébuzaradan, komandanna pasukang Babél. Sibagiyang polé ri ra'ya' iya kaminang kasiyasié sibawa dé'é nappunnai waramparang, risalaini ri Yéhuda erengngé riwéréng palla anggoro sibawa dare. Purani risuro Nébuzaradan ri Arung Nébukadnézar, komandang pasukanna, passui parénta mangoloéwé, “Laono sappai Yérémia, sibawa jagaiwi madécéd-décéng. Aja' muwagagai; pogau'i aga iya naéllauwé.” Nasilaonna Nébuzaradan sibawa iya duwa parawira tanréna, Nébusyazban sibawa Nérgal-Sarézer enrengngé sininna parawira Babél laingngé, malaka ri seddéna saorajaé. Nainappa riyabbéréyakka lao ri Gedalya ana' Ahikam sibawa eppona Safan, iya harusu'é mantara'ka lisu sibawa salama. Namonrona ri yelle'na ra'ya'é. Wettukku ritarungku mupa ri seddé saorajaé, nasuroka Puwangnge powadai lao ri Ebéd-Mélékh tau Sudangngéro makkedaé Puwang Iya Pommakuwasaé, Allataalana Israélié, makkeda makkuwaé, “Pada-pada iya Upowadaé riyolo, Upapoléi matu abalaé ri yasé'na kotaéwé, na tenniya adécéngeng. Muwitai matu iyaro gau'é kajajiyang. Iyakiya Iyya, Puwang, linrungiko. Dé' nariyabbéréyakko matu lao risining tau iya muwétauriyé. Dé' nariyunoko matu, saba' Iyya passalama'ko matu. Salama'i matu nyawamu nasaba sanréko ri Iyya. Iyya, Puwang, iya mabbicaraé.” Mabbicarai Puwangnge lao ri iyya purakuna napaleppe Nébuzaradan, komandang pasukangngéro ri Rama. Ritiwika lao kuwaro ri laleng keadaang ribalenggu silaong sininna tau laing polé ri Yérusalém sibawa Yéhuda iya mattengngangngé ritiwi selaku tawangeng lao ri Babél. Iyaro komandang pasukangngé naobbika alé-aléku sibawa makkeda, “Purai mangancang Puwang Allataalamu untu' mancuru'i wanuwaéwé. Makkekkuwangngé purani Napakajajiyang gau'éro, nasaba purani madosa bangsamu sibawa dé' namapato lao ri Aléna. Makkekkuwangngé upaleppe'i iyaé balenggué polé ri limamu sibawa upaleppe'ko. Rékko maéloko, weddikko maccowé lao ri Babél, sibawa iyya piyarako matu. Iyakiya rekko dé' mumaélo, dé' namaga. Ri sininna wanuwaéwé laluwasako lao kégi-kégi mupuwélo.” Ri wettu dé'napa nalao, makkedai Nébuzaradan, “Rékko maéloko, weddikko lisu lao ri Gedalya ana' Ahikam sibawa eppona Safan, iya puraé riyakka ri arung Babél mancaji gubernurna kota-kotana Yéhuda. Weddikko monro silaong aléna ri yelle'na ra'ya'é, iyaré'ga lao kégi-kégi situru cinnamu.” Nainappa nawérékka bokong inanré sibawa hadiya, nanaleppessakka lao. Laona ri Gedalya ri Mizpa, sibawa monro silaong aléna ri tengnga-tengngana ra'ya'é iya risalaiyé ri wanuwa Yéhuda. Purani nakka arung Babél Gedalya mancaji gubernur ri Yéhuda untu' paréntai sininna tau iya monroé mupa ri Yéhuda, iyanaritu sining tau iya kaminang kasiyasié. Sibagiyang polé risining parawiraé sibawa prajuri'na Yéhuda iya dé'é namanyara lao ri Babél, naéngkalingani passalenna riyakkana Gedalyaro. Na Ismaél ana' Nétanya, Yohanan ana' Karéah, Séraya ana' Tanhumét, sibawa ana'-ana'na Efai polé ri Nétofa, enrengngé Yézanya polé ri Maakha laoni sibawa sining taunna mennang ri Gedalya ri Mizpa. Makkedani Gedalya lao ri mennang, “Dé' naparelluko métau untu' manyara lao ri tau Babél-é. Onro bawanno ri wanuwattaé, sibawa mancaji atanna arung Babél. Utanggukko salama matu. Onrono ri kota-kota iya muwéloriyé, sibawa paddeppungenno nenniya taro anggoro, buwa-buwa sibawa minnya zaitun. Aléku paimeng monro matu ri Mizpa nenniya wakkélékiwi ra'ya'é narékko laowi sining tau Babél-é kumaiyé.” Iyaro wettué sininna tau Israél iya engkaé ri wanuwa Moab, Amon, Edom, sibawa wanuwa-wanuwa laingngé, naéngkalingani makkedaé purani ripalalo sibagiyang tau Israélié ri arung Babél monro ri Yéhuda, sibawa purani nakka Gedalya mancaji gubernur. Rimakkuwannanaro nasalaini mennang sining onrong kégi mennang pura ripassara-sarang, nainappa lisu ri Yéhuda. Laoni mennang ri Gedalya ri Mizpa, sibawa paddeppungeng maéga senna anggoro nenniya buwa-buwa. Purairo, Yohanan sibawa sining parawira iya dé'é namanyara lao ri balié, laoni ri Gedalya ri Mizpa sibawa makkeda, “Muwissegga makkedaé Baalis arung Amon purani nasuro Ismaél mpunoko?” Iyakiya dé' namateppe Gedalya lao ri ada-adanna mennang. Nainappa mammekko-mekkoni Yohanan makkeda lao ri Gedalya, “Makessinni laoka mpunoi Ismaél; dé' muwi séddi tau missengngi matu niga pogau'i. Magi naharusu rileppessangngi mpunoko? Iyaro nassabariwi matu sininna tau Yéhuda iya puraénna maddeppungeng kuwaé sibawa iko, massara-sarassi paimeng, na iyaro gau'é naancuru'i matu sininna ra'ya' iya nasésaé mupa ri Yéhuda.” Iyakiya mappébaliwi Gedalya, “Aja'! Iya mupowadaé passalenna Ismaélro dé' natongeng!” Ri uleng mapitué taungngéro Ismaél ana' Nétanya sibawa eppona Elisama laowi silaong seppulo tau ri Mizpa untu' siruntu sibawa Gedalya. (Ismaél iyanaritu séddiwi arung, sala séddinna parawira tanréna akkarungengngé.) Wettunna mennang manre maneng sisama, Ismaél sibawa iya seppulo tauwéro rampui peddanna mennang nanaunoi Gedalya, gubernur iya riyakkaé ri tau Babél-éro. Nauno towi Ismaél sininna tau Yéhuda iya engkaé silaong Gedalya ri Mizpa, sibawa sininna tentara Babél iya nasitujuwangngé engkai kuwaro. Esso rappina, wettunna dé'pa naissengngi tauwé riyunona Gedalya, poléni aruwa pulona tau polé ri Sikhem, Silo, sibawa Samaria. Purani mennang nacukkuru janggo'na, sapé'i pakéyanna, sibawa cori-cori'i watakkaléna mennang. Tiwii mennang gandong sibawa kamennyang untu' nakkasuwiyangeng ri Bolana Puwangnge. Nanassuna Ismaél polé ri Mizpa nanalao méwai sita mennang. Nakkeda, naterito, “Laono mai taitai Gedalya.” Iyaro bujungngé iyanaritu bujung battowa iya naébbué Arung Asa ri wettu rigasana ri Baésa arung Israél. Nainappa natikkeng Ismaél sining ana' makkunrainna arungngé sibawa sininna tau iya engkaé mupa ri Mizpa iya puraé nabbéréyang Nébuzaradan lao ri anganrowangenna Gedalya. Ritawanni mennang ri Ismaél nainappa joppa silaong mennang mattuju ri daérana Amon. Yohanan ana' Karéah sibawa sininna parawira iya sibawangngéngngi naéngkalingani passalenna jana Ismaél. Nasilaonni mennang ana' buwana lao lellungngi, nanaruntu'ni ri kolang battowana Gibéon. Naitana Yohanan silaong parawira-parawiraéro polé, marennu senna'ni sining tawangenna Ismaél, nainappa balé' nalari lisu méwai sita rombonganna Yohanan. Iyakiya Ismaél sibawa aruwa ana' buwana leppe'i, nalari lao ri wanuwa Amon. Nainappa Yohanan sibawa parawira-parawirana paddeppungengngi sining prajuri'é, makkunraié, ana'-ana'é, sibawa sining pegawé saoraja iya ritawangngé ri Ismaél puranana nauno Gedalya. Purairo sininna tauwé, battowa baiccu, silaong parawira-parawiraé muttama'ni Yohanan ana' Karéah sibawa Azarya ana' Hosaya laoni ri iyya sibawa makkeda, “Pa', pada-pada iya alénaé Bapa' mitai, riyolo maégaki, makkekkuwangngé céddé mani monro. Riyéllauwi Bapa' maélo massempajangekki lao ri Puwang Allataala iya nasompaé Bapa'. Assempajangekki iya risésaéwé, kuwammengngi nappaitangngi Puwang Allataala lao ri idi kégaki harusu lao sibawa aga harusu ripogau'.” Umappébali, “Makessinni rékko makkuwaitu. Utarimai paréllaummuro. Maéloka massempajang lao ri Puwang Allataalata, na muwi aga pappébalin-Na, uwappaissengeng manengngi matu; muwi séddi dé'to usubbui polé ri iko.” Seppulo esso ri munrinna mabbicarani Puwangnge lao ri iyya. Nauwobbini Yohanan enrengngé parawira-parawirana sibawa sininna tau laing iya polé silaong aléna. Makkedaka lao ri mennang, “Musuroka palettu'i paréllaummu lao ri Puwangnge, Allataalana Israélié. Nah, makkedai Puwangnge, ‘Rékko maéloko tette monro ri wanuwaéwé, Uwakkako matu, tenniya pasempé'ko; Upatettokko matu, tenniya ruttukko. Messé senna'-Ka nasaba purai Upapolé acilakangngé ri yasé'mu. Aja'na mumétau lao ri arung Babél-éro. Engkaka ri tengnga-tengngamu untu' mattulung sibawa paleppe'ko polé ri akuwasanna. Nasaba maressé babuwa-Ka lao ri iko, Uwébbui matu arung Babél messéiko sibawa palaloko lisu. Iyya, Puwang, pura mabbicara.’ ” “Musu sibawa akkadéreng iya muwétauriyéro nalellukko matu lettu ri Maséré, namumaté matu ri wanuwaéro. Sininna tau iya matedde atié untu' lao ri Maséré sibawa monro kuwaro matéi matu ri laleng musué, iyaré'ga matéi ri akkadérengngé iyaré'ga saié. Dé' muwi séddi tau leppe polé ri abala iya Upapolé matu ri yasé'na mennang; maté manengngi matu. Pada-pada Iyya, Puwang Allataalana Israélié tuppa'i cai-Ku sibawa apéddarak-Ku ri yasé'na pabbanuwana Yérusalém, makkuwatoro Utuppa'i matu apéddarak-Ku ri yasé'mu iya laowé ri Maséré. Masélengngi matu tauwé mitako; ripakatunako matu, sibawa ripakéi matu asemmu selaku tanro. Dé'na muwitai matu iyaé tana ancajingemmu.” Nainappa makkedasika, “Purani napparéntang Puwangnge kuwammengngi iko iya risésaé mupa ri Yéhuda dé' mulao ri Maséré. Rimakkuwannanaro uparéngngerangiko makkekkuwangngé makkedaé purako mébbu séuwa asalang battowa. Muwéllauka kuwammengngi massempajakka lao ri Puwang Allataalata untu' iko, sibawa majjanciko untu' pogau' manengngi iya napowadaé Puwangnge. Makkekkuwangngé purani upalettu pasenna Puwang Allataalata lao ri iko, iyakiya dé' mumaélo turusiwi iyaro pasengngé. Rimakkuwannanaro, éngngerangngi: wanuwa iya muwacinnaiyé laowi untu' mattette kuwaro, matéko matu ri laleng musué, iyaré'na nasaba akkadéreng iyaré'ga sai.” Pasenna Puwangnge, Allataalana Israélié, iya harusu'é upalettu lao ri ra'ya'é purani upalettu maneng. Nainappa Azarya ana' Hosaya sibawa Yohanan ana' Karéah enrengngé sininna tau laing iya matempoéro makkeda lao ri iyya, “Mabbelléko. Puwang Allataalata dé' nasuroko mattéyakki untu' lao monro ri Maséré. Barukh ana' Néria ritu pakiri-kiriko untu' méwaki, kuwammengngi nakuwasaiki tau Babél-é sibawa naulléi mpunoki iyaré'ga tiwiki lao ri Babél.” Muwi Yohanan iyaré'ga sininna parawiraé sibawa ra'ya'é dé' namaélo turusiwi paréntana Puwangnge untu' monro ri Yéhuda. Yohanan sibawa sininna parawiraéro natiwini lao ri Maséré tungke tau iya engkaé mupa ri Yéhuda, makkuwatoro tungke tau iya lisuénna polé ri wanuwa laingngé onronna mennang tattale. Worowané, makkunrai, ana'-ana', sibawa ana'-ana' makkunrainna arungngé iya nabbéréyangngé Nébuzaradan lao ri anganrowangenna Gedalya, muttama'na sibawa Barukh, iya manenna ritiwini lao ri Maséré. Naéwani mennang paréntana Puwangnge, nanalao ri Maséré lettu sibbéla kota Tahpanhés. Kuwaniro makkeda Puwangnge lao ri iyya, “Alano batu-batu battowa, namutanengngi ri laleng tanaé ri yolona sumpang muttama'é ri bola pamaréntana kotaéro. Usahakangngi kuwammengngi naitako sining tau Yéhudaé pogau'i gau'éro. Nainappa mupowadang mennang makkedaé Iyya, Puwang Iya Pommakuwasaé, Allataalana Israélié, papoléi matu atak-Ku Nébukadnézar arung Babél, lao ri onrongngéro. Na ri yasé'na batu-batu iya mutanengngé ri laleng tanaéro, napatettongngi matu kadéra akkarungenna enrengngé pallebba'i kéma akkarungenna. Poléi matu Nébukadnézar sibawa caui Maséré. Na sining tau iya puraé ripattentu untu' maté nasaba sai matéi matu nasaba sai. Mennang iya ripattentué untu' ritiwi selaku tawangeng ritiwii matu selaku tawangeng, sibawa iya ripattentué untu' maté ri laleng musué matéi matu ri laleng musué. Upalluwa'i matu apié ri bola-bola déwatana Maséré, na arung Babél tunui matu dato-dato barahalaé ri bola-bolaéro iyaré'ga natiwii lao ri wanuwanna. Pada-pada séddi pakkampi pépaccingiwi pakéyanna polé ri tumaé, makkuwatoniro arung Babél saringngi matu gangka mapaccing Maséré nainappa joppasi sibawa dé'gaga ganggui. Tugu-tugu barahalaé ri Héliopolis ri Maséré, naancuru'i matu, sibawa bola-bola déwata Maséré'é natunui matu gangka cappu.” Mabbicarai Puwangnge lao ri iyya passalenna sininna tau Israél iya monroé ri Maséré, iyanaritu ri kota Migdol, Tahpanhés, Mémfis, sibawa ri daéra yattang. Iyanaé pasenna Puwang Iya Pommakuwasaé, Allataalana Israélié, lao ri mennang, “Alému pura sabbingngi abala iya Upateppaé ri yasé'na Yérusalém sibawa sininna kota laingngé ri Yéhuda. Lettu makkekkuwangngé iyaro kota-kotaé ri laleng keadaang ancuru mupi dé'gaga monroiwi. Kajajiyangngi iyaro gau'é nasaba madosai pabbanuwana, angkanna naébbu-Ka macai. Makkasuwiyangngi mennang akkarobangeng sibawa mattumaniwi lao ri déwata-déwata iya dé'éppa naengka nasompai mennang, iko iyaré'ga toriyolomu. Matteru-teru-Ka kiringngi lao ri iko ata-atak-Ku sining nabié, iya mattéyangngéngngi mennang pogau'i ja iya ucéccéro. Iyakiya dé' mumaélo méngkalingai sibawa dé' mumaélo jampangiwi. Dé' mumaélo mappésau pogau'i majaé, iyanaritu makkasuwiyangeng akkarobangeng lao ri déwata-déwataé. Iyanaro saba'na Utuppa'i cai-Ku sibawa apéddarak-Ku ri yasé'na kota-kotana Yéhuda sibawa sining lalengngé ri Yérusalém. Utunu manengngi angkanna mancaji sésa-sésa sibawa makabuttu pada-pada iya weddingngé riita makkekkuwangngéwé. Na makkekkuwangngé Iyya, Puwang Iya Pommakuwasaé, Allataalana Israélié, makkutana magiko mupogau'i gau' iya mappapolé acilakang iya battowaéro lao ri alému. Maélokoga paccappui sininna tauwé – worowané, makkunrai, ana'-ana' sibawa ana'lolo – angkanna dé'na muwi séddi polé ri bangsamu monro? Magi mupogau'i gau'-gau' iya mébbuék-Ka macai? Laoko sibawa monro ri Maséré, wanuwa iya dé'é muwissengngiro, nainappako massompa barahala sibawa makkasuwiyangeng akkarobangeng lao ri déwata-déwatana wanuwaéro! Maélokoga mancuru'i alému kuwammengngi naripakatunako ri sininna bangsaé ri linoé sibawa ripakéi asemmu selaku tanro? Muwallupainiga sininna ja iya napogau'é toriyolomu, arung-ngarunna Yéhuda sibawa sining bainéna mennang nenniya iko sibawa sining bainému ri tana Yéhuda sibawa risining lalenna kota Yérusalém? Iyakiya lettu essoéwé dé' mupakariyawai alému. Dé' mupakalebbi-Ka sibawa dé' mutuwo situru hukkung iya Uwéréngngékko sibawa toriyolomu. Rimakkuwannanaro, Iyya, Puwang Iya Pommakuwasaé, Allataalana Israélié, méwako matu sibawa mancuru'i sininna Yéhuda. Sibawa rékko polé ri tau Yéhuda iya risésaé engka iya tette'é macinna lao ri Maséré untu' monro kuwaro, cappu manengngi matu mennang. Iya manenna mennang, baiccu battowa, matéi matu ri Maséré ri laleng musué iyaré'ga nasaba akkadéreng. Maséleng matu tauwé mitai mennang sibawa napakatunai matu mennang. Ripakéi matu asenna mennang selaku tanro. Pada-pada Uhukkung Yérusalém, makkuwatoniro Uhukkung matu mennang iya monroé ri Maséré. Matéi matu mennang ri laleng musué, nasaba akkadéreng iyaré'ga sai. Polé ri tau Yéhuda iya risésaé, iya laoénna ri Maséré untu' monro kuwaro, dé' muwi séddi tau leppe matu iyaré'ga tuwo. Dé' muwi séddi tau polé ri mennang lisu matu ri Yéhuda, namuni makkuwamani nacinnainna iyaro gau'é. Tongeng, dé'gaga iya lisué matu sangadinna siyagangngaré tomangungsi.” Namaéga senna'na tau lao ri iyya, iyanaritu sininna worowané iya missengngéngngi makkedaé bainéna makkasuwiyangengngi akkarobangeng lao ri déwataé, sibawa sininna makkunrai iya mattengngangngé tettong kuwaro, muttama'ni tau Israél iya monroé ri Patros, bagiyang yattanna Maséré. Makkedai mennang lao ri iyya, “Dé' tamaélo méngkalingai aga iya mupowadaé lao ri idi ri laleng asenna Puwangnge. Sininna iya puraé tajjanciyang, maéloki pogau'i. Tette'ki matu makkasuwiyangeng akkarobangeng lao ri Ratu Surugaé, sibawa tiri uwai anggoro selaku pakkasuwiyang lao ri aléna pada-pada iya biyasaé napogau' toriyolota, arung-ngarungngé sibawa pajaba-pajaba pamaréntata enrengngé idi paimeng ri kota-kotana Yéhuda sibawa risining lalenna Yerusalém. Iyaro wettué mappunnaiko genne inanré, madécékki, sibawa dé' tappunnai asukkarakeng aga-aga. Iyakiya sipongetta mappésau makkasuwiyangeng lao ri Ratu Surugaé, sibawa dé'na tatiri anggoro selaku pakkasuwiyang lao ri aléna, akurangekki sini-sininnaé; matéi sining tautta ri laleng musué iyaré'ga nasaba akkadéreng.” Nainappa makkeda iyaro sining makkunraié, “Nasitujuiwi lakkaitta makkedaé mébbuki roti pada Ratu Surugaé sibawa mattunu akkarobangeng enrengngé makkasuwiyangeng anggoro untu' déwatataro.” Lao ri sininna worowané sibawa makkunraié iya mappébali makkuwaéro, makkedaka, “Muwaseggi Puwangnge dé' naissengngi iyaré'ga mallupaini sining akkarobangeng iya nakkasuwiyangengngé toriyolomu, arung-ngarummu sibawa pajaba-pajaba'mu, enrengngé ra'ya'na wanuwaéwé sibawa iko paimeng ri kota-kotana Yéhuda sibawa risining lalengngé ri Yérusalém? Iyakiya makkekkuwangngé éngkalingai aga Upowada lao ri iko, éh iko tau Israélié ri Maséré: Iyya, Puwang, mattanro ri laleng asek-Ku iya marajaé makkedaé dé'na Upalaloko pakéi asek-Ku untu' mébbu séuwa janci. Dé' naweddikko makkeda, ‘Mattanroka nasabbing Allataala iya tuwoé!’ Makkuragaka matu kuwammengngi mumacilaka sibawa dé' mumasennang, narapi maté manekko, muwi ri laleng musué iyaré'ga nasaba sai. Banna siyagangngaré tau bawang iya salama'é matu sibawa lisu ri Yéhuda polé ri Maséré. Na sininna tau Yéhuda iya engkaé ri Maséré naitai matu aga ada-adanna mennang iyaré'ga ada-adak-Ku iya kajajiyangngé. Papoléka acilakang ri yasé'mu ri onrongngéwé untu' pabuttiwi lao ri iko makkedaé pahukkungeng iya Urancanaé untu' iko, tonget-tongengngi kajajiyang matu. Uwabbéréyangngi matu Hofra arung Maséré lao risining balimmu iya macinnaé mpunoi, pada-pada muto Iyya mabbéréyangngi Zédékia arunna Yéhuda lao ri Nébukadnézar arung Babél, balinna iya maéloé mpunoiro.” Ri taung maeppaé apparéntanna Yoyakim ana' Yosia ri Yéhuda, naokini Barukh aga iya ubacangengngéngngi. Nainappa upalettukeng aléna ada-adanna Puwangnge, Allataalana Israélié. Makkedai Puwangnge, “Barukh, maddarékéko makkuwaé, ‘Ah, macilaka tongekka iyya'é! Maéga senna asukkarakekku, nanatambaisi Puwangnge sibawa anrasa-rasang. Posona maddaréké, dé' sises-siseng gaga atennangeng!’ Eh Barukh! Iyya, Puwang, mattengngang ruttungngi iya puraé Upatettong, sibawa mattengngang bébbui iya puraé Utaneng. Sininna linoé Ugaukengngi makkuwaro. Magi mumacinna ripallaing? Aja' muwappakkuwaro, Barukh! Uhukkung manengngi rupa tauwé sibawa abala, iyakiya passalenna iko, salama'ko matu. Muwi kégako lao, tette'ko matu tuwo. Iyya, Puwang pura mabbicara.” Mabbicarani Puwangnge lao ri iyya passalenna bangsa-bangsaé, mappammulai sibawa Maséré. Nappaissengengngi lao ri iyya passalenna tentarana Nékho arung Maséré, iya ricaué ri Karkemis seddéna Salo Efrat ri Nébukadnézar arung Babél ri taung maeppaé apparéntanna Yoyakim, arunna Yéhuda. Iyanaé napowada Puwangnge passalenna gau'éro, Iyakiya Iyya, Puwang, mitai mennang soro métau. Ricauni sining prajuri'na mennang, sibawa lari métau teggiling limonri. Iya mapecci'é dé' namampu lari, sibawa iya baranié dé' naulléi leppe polé ri balié. Tabbuttui mennang namabuwang ri manorang, ri wirinna Salo Efratro. Larino, éh nyarang! Kédono, éh karéta! Alluruno, éh pahlawang pattiwi kaliyawo polé ri Sudan sibawa Libia. Makkuwatoro iko, éh sining pappana macca polé ri wanuwa Lidia.’ ” Iyakiya iyya, Yérémia powadai makkedaé iyanaé essona Puwang Allataala Iya Pommatanré sibawa Pommakuwasaé; iyaro essoé pakangkai akkabalekeng ri yasé'na sining balin-Na. Peddan-Na manréi matu mennang gangka messo, sibawa ménungngi darana gangka cau. Iyaé essoé Puwang Iya Pommakuwasaé, géréi sining akkarobangen-Na ri manorang, ri wirinna Salo Efratro. Eh pabbanuwana Maséré, laono ri Giléad untu' sappa pabbura! Iyakiya, namuni makkuwaro dé'gaga pabbura iya weddingngé pajjappako. Keadaammu iya mappakasiri-sirié naissenni bangsa-bangsaé. Sadda kelli'mu riyéngkalingani ri sininna linoé. Prajuri iya séddié tabbuttui ri iya laingngé; pada menrung moppangngi mennang ri tompo'na tanaé. Wettunna Nébukadnézar arung Babél polé gasai Maséré, mabbicarai Puwangnge lao ri iyya, adanna, “Yérémia, appallebbangengngi biritta mangoloéwé ri kota-kota Maséré, iyanaritu ri Memfis, Migdol sibawa Tahpanhés, ‘Sadiyano untu' mattahangengngi alému saba' sininna iya muwappunnangiyé ripaccappui matu ri laleng musué! Magi Apis, déwatamu iya mawatangngéro nalarina? Nasaba Puwangnge pura caui!’ Maéga tentaramu tabbuttu namabuwang. Makkedai mennang séddié lao ri laingngé, ‘Laono mai talisu ri bangsata kuwammengngi naweddikki leppe polé ri bahaya peddanna balié.’ Wéréngngi aseng baru arung Maséré: ‘Tukang marukkaé iya palabe'éngngi kasempatangngé.’ Iyya Allataala iya tuwoé, Iyya arung, Puwang Iya Pommakuwasaé. Pada-pada Bulu Tabor maccaloli ri yelle'na sining bulué, nenniya Bulu Karmél maccaloli ri yasé'na tasi'é, makkuwaniro awatangenna aléna iya polé gasako. Sadiya-sadiyano, pabbanuwana Maséré, untu' ritawang sibawa ritiwi lao! Mancajiwi matu Memfis ruttungeng – onrong iya masino-sinoé nasaba dé' monroiwi. Maséré pada-padai ana' saping macommo'é, iyakiya riganggui lale loppo polé manorang. Mala prajuri-prajuri naséwaé dé' pakkullénna pada-padai ana' saping iya macommo senna'é. Dé' naulléi mennang mattahang. Balé' manengngi mennang nalari kuwammengngi nasalama. Esso pahukkungengngé untu' mennang narapini; wettunnana mennang nakenna abala. Larini Maséré pada-pada ulaé nasaba pédé macawé'i tentarana balié. Maggasai mennang sibawa wasé pada-pada tau mattubbang ajué sibawa kellui ale malowang iya dé'é nariyullé bettui. Tenribilang tentarana balié, lebbi maégai naiya incalé. Iyya, Puwang makkeda. Napakasirii matu pabbanuwana Maséré, nasaba ricaui ri bangsa polé manorangngé. Iyya, Puwang, pura mabbicara.” Puwang Iya Pommakuwasaé, Allataalana Israélié, makkeda, “Uhukkungngi matu Amon, déwata polé ri Tébé, silaong sininna Maséré sibawa déwata-déwatana enrengngé arung-ngarunna. Arung Maséré sibawa sininna tau iya mattuwangngéngngi Uwabbéréyangngi matu lao ri Nébukadnézar arung Babél sibawa tentarana iya maéloé mpunoi mennang. Iyakiya ri munri, riyonroiwi matu Maséré pada-pada biyasaé. Iyya, Puwang, pura mabbicara.” “Umma'-Ku, Israélié, aja' mumétau! Atak-Ku Yakub, aja' mumaséleng! Iko sibawa wija-wijammu Upassalama'i matu polé ri wanuwa mabélaé, ri onrommu ritawang. Lisuko matu sibawa monro ri wanuwammu sibawa amang. Tuwoko matu sibawa tennang; dé'gaga parellu muwétauri. Jaji aja' mumétau, éh umma'-Ku, polé-Ka matu untu' passalama'ko. Bangsa-bangsa, onrommu Upassara-sarang, iya manenna Upaccappui matu, iyakiya iko dé' Ugaukekko makkuwaro. Mémeng dé' muleppe polé ri pahukkungengngé iyakiya pahukkungek-Ku lao ri iko iyanaritu adélé'i situru sibawa attentuwangngé. Iyya, Puwang, pura mabbicara.” Ri wettu dé'napa arung Maséré nagasai Gaza, mabbicarai Puwangnge lao ri iyya passalenna wanuwa Filistin. Makkedai Puwangnge, “Itai, massolo'i uwai polé manorang sibawa mappenna pada-pada salo iya mattengngangngé lémpe malle'i wanuwaé enrengngé lise'na, kota-kotaé silaong pabbanuwana. Gorai matu tauwé méllau tulung sibawa mpatingngi sininna ra'ya'é. Méngkalingai matu mennang anyarang joppa, oni karéta maddukéku, sibawa oni-oni padatinna. Mancaji malemmai matu tomatowaé sibawa dé'na napikkiri'i ana'na. Narapini wettunna bangsa Filistingngé ripaccappu maneng, angkanna Tirus sibawa Sidon dé'na nalolongeng bantuwang. Iyya, Puwang, paccappui matu sininna tau Filistin iya nasésaé polé ri Kréta. Nakennani amesséng battowa tau Gazaé; mammekkoni tau Askélongngé. Gangka uppanna tau Filistin iya nasésaé masara matteru? Gorako, ‘Gangka uppannako maggasa, éh peddanna Puwangnge? Lisuno ri wanuwammu sibawa onrono kuwaro sibawa tennang!’ Iyakiya naulléga mancaji tennang, narékko Iyya pura mapparéntangngi untu' gasai Askélon sibawa pabbanuwana ri wiring tasi'é?” Iyanaé napowada Puwang Iya Pommakuwasaé, Allatalana Israélié passalenna Moab, “Macilakani pabbanuwana Nébo, maruttunni kotana! Risittaini Kiryataim, sibawa bénténna iya masse'é riancuru'ni, angkanna mancaji masiri pabbanuwana; lennye'ni abangkakenna Moab. Nasittaini balié Hésybon nakkuwaniro narancana mennang untu' pallennye'i sininna bangsa Moab-é. Ripappajai matu oni-onié ri kota Madmén, nasaba nagasai matu tentara iyaro kotaé. Engkalingai! Gorai pabbanuwana Horonaim, ‘Abinasang! Ancurukeng!’ Lennye'ni Moab! Riyéngkalingani gora ana'-ana' baiccu'na lettu ri Zoar. Engkalingai sadda terié ri laleng ménré'é ri Luhit, sibawa sadda mpatingngé ri laleng nonnoé ri Horonaim. Adanna mennang, ‘Asitta'no! Passalama'i nyawamu! Larino pada-pada kaleddé liyaé ri padang kessi'é!’ Moab! Muwattuwangngi apeccikemmu sibawa asugiremmu. Iyakiya makkekkuwangngé alémuna maélo ricau. Kamos, déwatamu, silaong sining imangngé nenniya sining pajaba'na ritiwii matu ri appalirengngé. Ancuru manengngi matu kotaé, dé' muwi séddi iya leppe'é. Lompo sibawa tanété mariyawaé ancuru manengngi matu. Iyya, Puwang, pura mabbicara. Pasanno batu mésa untu' Moab, saba' dé'na namaitta nariyancuru siseng iyaro wanuwaé. Maruttungngi matu kota-kotana na dé' muwi séddi tau monro matu kuwaro.” Tattanroi tau iya dé'é napogau'i jamanna polé ri Puwangnge sibawa mattonget-tongeng. Tattanroi iya dé'é naddampu peddang sibawa mabbuno. Makkedai Puwangnge, “Riyolopa nariyolo tuwoi Moab sibawa amang. Dé'pa naengka naritiwi ri appalirengngé. Pada-padai uwai anggoro iya rileppessangngé mattennang sibawa dé' naengka naritiri ri onrong anggoro laingngé. Mabau mupi anggoro'na sibawa malunra. Iyakiya, narapii matu wettunna massuro-Ka kuwammengngi naritiri Moab pada-pada anggoro'é, sibawa ripalobbang sining onronna nenniya rireppa. Majuléi matu Moab lao ri Kamos, déwatana mennang, pada-pada tau Israélié majuléi lao ri Bétel iya nattuwangngéro. Pékkugi wedding barani worowané Moab-é makkeda, ‘Pabbaraniki, prajuri poré iya puraé rioji ri laleng musué?’ Moab sibawa kota-kotana purani riancuru, sibawa sining kallolona iya kaminang makessingngé purani riyuno. Iyya pura mabbicara. Iyya arung, Puwang Iya Pommakuwasaé. Abala untu' Moab engkani ri yolona sumpangngé, dé'na namaitta naancuru. Eh iko wanuwa-wanuwa sidéppéna Moab iya missengngéngngi passalenna ataromporenna, abbaratano untu' aléna! Powadai, ‘Dé'na namakuwasana Moab, lennye'ni arajanna sibawa awatangenna!’ Eh pabbanuwana Dibon, nonnono polé ri onrommu iya malebbié; tudanno ri tanaé sibawa ri tompo'na awué. Nasaba iya solangiyéngngi Moab wanuwammu lettu'ni, nanaancuru'i matu sininna béntémmu. Iko iya monroé ri Aroér, tettonno ri wiring lalengngé sibawa pénessaiwi! Akkutanangngi lao ri mennang iya lariyé, sibawa leppe'é, ‘Aga pura kajajiyang?’ Mappébaliwi matu mennang, ‘Sempé'ni Moab sibawa mancaji matuna, rimakkuwannanaro teringini. Appallebbangengngi risillampé Salo Arnon makkedaé ancuru'ni Moab.’ ” “Purani ripateppa pahukkungengngé ri yasé'na kota-kotaé ri daérana tanété tanré: ri yasé'na Holon, Yahas, Méfaat, Dibon, Nébo, Bét-Diblataim, Kiryataim, Bét-Gamul, Bét-Méon, Kériot, sibawa Bozra. Sininna kota Moab, mabéla sibawa macawé, purani rihukkung. Purani ripolo awatangenna Moab, sibawa akuwasanna riancuru. Iyya, Puwang, pura mabbicara.” Makkedai Puwangnge, “Ebbui Moab mancaji mabo', nasaba nattempowangngi aléna lao ri Iyya. Maggalélui matu ri laleng luwana, sibawa ricawa-cawai ri tauwé. Dé'ga nariyolo purani ricawa-cawai tau Israélié ri Moab sibawa ripetenna samanna mennang purai ripoléi mattengngang silaong sining pangaé? Iko pabbanuwana Moab, salaini kota-kotamu namuwonro ri bulu-bulu batué pada-pada jangang-jangangngé mébbui saranna ri pepping liyangngé. Matempo senna'ko! Purani uwéngkalinga temmaka tempomu, matanré ati, mabangka, sibawa maboromu! Iyya, Puwang, uwisseng abangkakemmu. Bicarammu dé' lise'na, sibawa pangkaukemmu dé' bettuwanna. Rimakkuwannanaro maélo-Ka teri maladde-ladde untu' iko maneng sibawa untu' sining tauwé ri Kir-Héres, ibukotamu. Maélo-Ka lebbi teringiwi pabbanuwana Sibma naiya pabbanuwana Yaézer. Kota Sibma padai tanet-taneng anggoro iya makkalolo'é takké-takkéna lettu ri liweng Tasi Maté sibbéla Yaézer. Iyakiya makkekkuwangngé buwa-buwa wettu timona sibawa buwa anggoro'na purani riancuru. Teddénni gora-gora ariyongngé polé ri wanuwa Moab iya macommo'é. Uwébbui uwai anggoro'é mappésau massolo polé ri pakkakkasa apparakeng anggoro'é; dé'na gaga tau mébbu anggoro sibawa gora marennu. Teri tauwé ri Hésybon sibawa Eléalé napaéngkalinga terinna lettu ri Yahas, sibawa naéngkalingato sining tau polé ri Zoar lettu ri Horonaim sibawa Eglat-Selisia. Teriwi mennang nasaba uwai ri ana' Salo Nimrim marakko toni. Maélo-Ka mébbui tau Moab-é mappésau mattunu akkarobangeng ri onrong-ngonrong assompanna mennang sibawa mappésau makkasuwiyangeng akkarobangeng lao ri déwata-déwatana mennang. Iyya, Puwang, pura mabbicara. Sininna asugirenna Kir-Héres sibawa sininna Moab lennye'ni. Messé-Ka mitai keadaanna mennanro; pada-pada-Ka tau iya makkélongngé élong masara ri sulingngé. Pura manenni mennang cukkuru'i gemme ulunna sibawa janggo'na, naloi taiyyana, sibawa paké kaing karung tanrang messé. Ri tompo'na sining coppo bolaé sibawa ri tana-tana lapangngé banna riyéngkalingai teriyé. Saba' purani Ureppa Moab pada-pada bémpa iya dé'é naripoji. Ancuru sisenni Moab! Temmaka sirina Moab! Teriwi nasaba purani ripakatuna sibawa mancaji addicawanna bangsa-bangsaé ri mattulilinna. Iyya, Puwang, pura mabbicara.” Makkedai Puwangnge, “Pada-pada kuwajangngé masséro sibawa panni mallebba'é, makkuwatoniro séddié bangsa polé matu sibawa séro'i Moab. Kota-kotana sibawa sining bénténna risittaiwi matu sibawa métaui matu tentarana pada-pada makkunrai iya maéloé mémmana. Ancuru'i matu Moab sibawa dé'na namaddupa séddi bangsa, nasaba nattempowangngi aléna mennang lao ri Iyya. Ripangoloi mennang ri ajapperusengngé, kalebbong sibawa siyo-siyoé. Tau iya lariyé polé ri ajapperusengngé sempé'i matu ri laleng kalebbongngé, sibawa iya massué polé ri kalebbongngéro ritikkengngi matu ri laleng siyo-siyoé. Iya manennaro kajajiyangngi matu ri wettu iya puraé Upattette untu' mancuru'i Moab. Tau mangungsi iya dé'é pakkullénna laowi sappa allinrungeng ri Hésybon, iyakiya iyaro kotaé mattengngangngi ritunu sibawa muwi saorajana Arung Sihon nanréto api. Purani napaccappu api daéra pakkaséséngngé sibawa buluna Moab, wanuwanna sining tau iya pojiyéngngi mammusu. Macilakono Moab! Pabbanuwana iya sompaéngngi Déwata Kamos purani ripaccappu, sibawa ana'-ana'na mennang ritiwini selaku tawangeng. Iyakiya ri munri Upalisui matu keadaanna wanuwa Moab. Iyya, Puwang, pura mabbicara!” Iyanaro napogau' matu Puwangnge lao ri Moab. Iyanaé napowada Puwangnge passalenna Amon, “Magi narisittai tanana suku Gad sibawa naonroi sining tau iya sompaéngngi Déwata Milkom? Aga dé'na gaga tau Israél iya weddingngé méwaiwi iyaro daéraé? Iyakiya narapii matu wettunna Uwébbui pabbanuwana Raba, ibukotana wanuwa Amonro, méngkalingai kelli-kelli ammusurengngé. Iyaro kotaé mancajiwi matu ruttungeng sibawa désa-désaé ri seddéna ritunui gangka cappu. Nainappa nalai matu paimeng Israélié tanana polé risining tau iya sittaiyéngngi riyolo. Eh tau Hésybon, terino nasaba ancuru'ni kota Ai! Eh sining makkunrainna kota Raba, mpatinno! Pakéni kaing karungngé tanrang messé. Larino lao tulili penno alippuwang. Milkom déwatamu ritiwii matu lao ri appalirengngé silaong imang-ngimanna nenniya sining pajaba pamaréntana! Eh iko iya dé'é mumatinulu! Magi muwabbangkakengngi sining lompo'mu iya macommo'é? Aga saba'na muwattuwangngi asugiremmu? Pékkugi weddikko makkeda makkedaé dé' muwi séddi tau barani gasako? Nakennako matu abeccokeng iya Upapolé polé ri sininna sulapa'é. Lariko matu, tungke-tungke makkuraga passalama'i aléna muto, na dé'na gaga paddeppungekko paimeng. Iyakiya ri munri, Upalisui matu keadaanna bangsa Amongngé. Iyya, Puwang, pura mabbicara.” Iyanaé napowada Puwang Iya Pommakuwasaé passalenna Edom, “Dé'ga naulléi mappikkiri tau Edongngé secara mapanré? Aga sining pappangajana dé' nabbéré pangajana lao ri mennang? Lennye'niga apanrénna mennang? Eh pabbanuwana Dédan, balé'no mulari! Laono massubbu. Maélo-Ka mancuru'i wija-wijanna Esau, nasaba wettunnana Uhukkung mennang. Rékko maccéppu buwa anggoro'i tauwé, tuli engka nasésa, sibawa rékko poléi pangaé ri wennié, banna nalai aga iya nacinnaiyé. Iyakiya, Usaringngi gangka mapaccing appunnangenna wija-wijanna Esau sibawa bukkai rahasiya onrong assubbunna mennang; dé'na naulléni subbui aléna mennang. Tau Edongngé silaong silessu-silessurenna sibawa bali-balibolana mennang, pura manenni ripaccappu, dé' muwi séddi tau leppe. Eh Edom! Salaini ana'-ana' béummu ri Iyya, maélo-Ka piyarai mennang. Leppessanni sining jandamu matepperi-Ka. Muwi tau iya dé'é nasipato rihukkung, nakenna towi pahukkungeng, masa iko dé'? Pasti harusu'ko rihukkung! Mattanroka ri laleng asek-Ku muto makkedaé kota Bozra mancajiwi matu onrong iya mappakatau-tau iya nasalaiyé tauwé. Nacawa-cawaiwi matu tauwé sibawa pakéi asenna selaku tanro. Sininna désaé ri seddéna mancajiwi matu ruttungeng untu' mannennungeng. Iyya, Puwang, pura mabbicara.” Iyya, Yérémia makkeda, “Eh Edom, purana tarima séuwa biritta polé ri Puwangnge. Purani kiring suro lao ri bangsa-bangsaé untu' suroi mennang paddeppungeng tentara sibawa sadiya-sadiya untu' gasako. Puwangnge mébbuko matu malemma sibawa ripakatuna ri tauwé. Ribelléko ri atempongemmu. Dé'gaga métau lao ri iko pada-pada muwasengngé. Monroko ri yelle-elle batué, mabéla ri coppo'na bulué. Iyakiya, namuni muwébbui bolamu ri onrong iya matanré senna'é, sittanré saranna kuwajangngé, Puwangnge panonnoko matu polé kuwaro. Puwangnge ritu powada manengngiro.” Makkedai Puwangnge, “Abala iya kennaéngngi Edom makkuwamani serona matu angkanna tungke tau iya laloé kuwaro tassélengngi matu sibawa métau. Pékkugi Sodom sibawa Gomoro ripaccappu silaong désa-désaé ri seddéna, makkuwatoro Edom. Dé'na muwi séddi tau monrona matu kuwaro. Iyya, Puwang, pura mabbicara. Pada-pada singaé mompo polé ri ale maworongngé ri seddéna Salo Yordan sibawa lokkaiwi padang onronna bimbala'é mabbella, makkuwa toniro polé-Ka matu sibawa mébbui tau Edongngé lari polé ri wanuwanna mennang tennasenna-senna. Nainappa pilé-Ka séddi tau pamimping untu' paréntai iyaro bangsaé. Nigana wedding ripappadaik-Ka? Niga barani mébbu parakara sibawa Iyya? Engkaga pamimping iya mullééngngi méwa-Ka? Rimakkuwannanaro, éngkalingai aga iya puraé Urancana lao ri tau Edongngé, sibawa aga iya maéloé Upogau' lao ri pabbanuwana kota Téman. Muwi ana'-ana'na mennang riyassarénréngeng towi mennang lao, sibawa sininna tauwé métaui matu. Rékko sempé'i Edom, riyéngkalingai matu rukka iya masero senna'é angkanna taggottang sininna linoé; gora-gorana pabbanuwana riyéngkalingai matu lettu ri Tasi Gelaga. Pada-pada kuwajangngé masséro'i sibawa panni mallebba, makkuwaniro poléi matu balié sibawa séro'i Bozra. Iyaro essoé métaui matu tentara Edongngé pada-pada makkunrai iya maéloé mémmana.” Iyanaé napowada Puwangnge passalenna Damsyik. “Pabbanuwana kota Hamat sibawa Arpad bata-batai sibawa mauséi nasaba méngkalingai karéba maja. Maséssai atinna sibawa kawilimpilingngi pada-pada bombang tasi'é. Mancaji malemmai pabbanuwana Damsyik, sibawa lariwi nataro tau. Mapeddii mennang sibawa manrasa-rasa pada-pada makkunrai iya maéloé mémmana. Kota tassebbo'é sibawa mariyo-riyoéro masino-sinoni makkekkuwangngé dé' monroiwi. Iyaro essoé matéi matu kallolo-kallolona risining lalenna kotana, sibawa sininna tentarana riyancuru'i. Témbo'-témbo'na Damsyik Utunui matu, sibawa sining saorajana Arung Bénhadad Uwangurengngi. Iyya, Puwang Iya Pommakuwasaé, pura mabbicara.” Iyanaé napowada Puwangnge passalenna suku Kédar sibawa daéra-daéra akuwasanna Hazor, iya puraé nasittai Nébukadnézar arung Babél, “Eh Nébukadnézar, gasani suku Kédar sibawa paccappui sining tauwé ri alau! Rampasa'i bimbala'é, untaé, enrengngé kéma-kémana mennang silaong sininna lise'na, sibawa gorano lao ri mennang, ‘Ajapperusengngé salipuriko!’ Eh iko tau Hazor! Iyya, Puwang, makkeda: Asitta'no lao massala, sibawa massubbu. Nébukadnézar arung Babél pura rancanai untu' gasako. Makkedai, ‘Ayo maju! Laono mai tagasai sining tau iya marasa amangngé sibawa tennangngéro. Kotana mennang dé' nallinrung nasaba dé'gaga pintu gerbanna sibawa dé'gaga paccala'na.’ ” Makkedapi paimeng Puwangnge lao ri Nébukadnézar, “Rampasa'i sining untana sibawa olokolo'na mennang! Sining tau iya rette ponco'éngngi gemme'naro upatassiya-siyai matu lao kégi-kégi. Papoléka matu abala ri yaséna mennang polé tulili. Kariya-riyai matu Hazor untu' mannennungeng sibawa mancaji onrong massubbunna asu ale'é. Dé'na muwi séddi tau monro matu kuwaro. Iyya, Puwang, pura mabbicara.” Dé' namaitta mancaji arunna Zédékia ri Yéhuda, Puwang Iya Pommakuwasaé mabbicara lao ri iyya passalenna wanuwa Elam. Makkedai Puwangnge, “Maélo-Ka mpuno manengngi sininna ahli mappanaé iya mébbuéngngi Elang mawatang senna. Maélo-Ka masseppungeng anging lao ri Elam polé risininna sulapa'é, sibawa patassiya-siyai pabbanuwana lao kégi-kégi angkanna dé' muwi séddi wanuwa iya dé'é nalokkaiwi pangungsi-pangungsi polé ri Elamro. Uwébbui tau Elangngé métau lao ri bali iya maéloé mpunoi mennang. Macai senna'ka lao ri mennang sibawa mancuru'i matu mennang. Ukiringngi matu tentara iya musuéngngi mennang narapi mennang cappu siseng. Sining arunna sibawa pajaba-pajaba'na Uwancuru'i matu, sibawa ri wanuwanna mennang Upatettongngi matu kadéra akkarungek-Ku. Iyakiya ri esso ri munri, Upalisui matu keadaanna Elam. Iyya, Puwang, pura mabbicara.” Iyanaé pasenna Puwangnge lao ri iyya passalenna kota Babél sibawa pabbanuwana, “Pasanno tanrang sibawa appallebbangengngi lao ri bangsa-bangsaé makkedaé sempé'ni Babél! Aja' murahasiyakangngi gau'éro! Purani riyancuru Mérodakh déwatana, sibawa dato-dato'na iya mappangaddié mareppa'ni tassiya-siya, enrengngé barahala-barahalana ripakatuna senna'ni. Séuwa bangsa polé manorang poléi matu gasai Babél sibawa mébbui iyaro wanuwaé mancaji padang makabuttu. Lariwi matu tauwé sibawa olokolo'é, sibawa dé'na gaga maélo monro kuwaro.” Makkedai Puwangnge, “Iyaro wettué tau Israélié sibawa Yéhuda poléi matu massibawa nateri, sappa-Ka, Allataalana mennang. Nakkutanangngi matu mennang laleng laowé ri Sion, nainappa joppa lao ri tibangngéro. Mébbui matu mennang assijancing mannennungeng sibawa Iyya, na tette'i matu makkatenningngi. Umma'-Ku sinrupai bimbala iya puraé rileppessang pusa ri bulué ri pakkampi-pakkampina. Solléi mennang polé ri séddié bulu lao ri bulu laingngé na dé'na naissengngi kégani bolana mennang. Rigasai mennang sibawa risissa ri sininna iya siruntu'é sibawa mennang. Makkedai sining balinna umma'-Ku, ‘Aga iya tapogau'é, dé' nasala, saba' iyaro sining tauwé madosani lao ri Puwangnge. Toriyolona mennang mateppe'i lao ri Puwangnge, jaji harusu towi mennang tette matinulu lao ri Aléna.’ Eh umma Israélié, larino polé ri Babél! Iko ritu bunge-bunge harusu lao, kuwammengngi namaccinrola iya laingngé. Upangarai matu sijumella bangsa iya mawatangngé polé ri manorang kuwammengngi nagasai mennang Babél. Naatoro'i matu mennang barisi'na untu' mammusu méwai Babél sibawa caui. Mennang iyanaritu pappana-pappana maccaé iya dé'é naengka naléssé panana. Rirampasa'i matu Babél, nanalai matu parrampasa'na sini-sininnaé sibawa siyélo atinna. Iyya, Puwang, pura mabbicara.” Makkedai Puwangnge, “Eh tau Babél, murampo'i umma'-Ku. Luppe-luppe'ko marennu pada-pada anyarang iya kiki'é, sibawa pada-pada saping iya mattengngangngé mabbella. Iyakiya mancajiko matu bangsa iya kaminang dé'é bettuwanna ri yelle'na sininna bangsaé. Kotamu iya battowaéro ripakatunai matu sibawa ripakasiri. Wanuwammu mancajiwi matu padang kessi iya makabuttué sibawa marakko. Nasaba macai-Ka, mancaji ruttungengngi matu Babél sibawa dé' monroiwi. Sininna iya lalowé kuwaro métaui matu sibawa maséleng. Eh iko sining pappana! Atoro'i barisi'é untu' keppungngi sibawa gasai Babél. Annémbakengngi sininna ana' panamu mattuju ri Babél, nasaba madosani lao ri Iyya. Gorangngi kelli ammusurengngé ri mattulilinna kotaéro! Manyarani Babél makkekkuwangngé. Purani rileppo sining témbo'na sibawa riruttung. Mattengngakka pogau'i akkabalekengngé lao ri Babél. Rimakkuwannanaro gaukengngi mennang pada-pada mennang gaukengngi sining tau laingngé. Aja' muleppessangngi tauwé mallaonruma iyaré'ga méngngala ri wanuwaéro. Sininna tau laing iya monroé ri wanuwaéro lisui matu ri wanuwanna, nasaba métaui lao ri tentara iya maggasaé.” Makkedai Puwangnge, “Tau Israélié padai bimbala makkonrongngé iya rilellungngé sibawa ripassara-sarang ri singaé. Bunge-bunge'na rigasai mennang ri arung Asyur, nainappa Nébukadnézar arung Babél bibbi'i buku-bukunna mennang. Rimakkuwannanaro, Iyya, Puwang Iya Pommakuwasaé, Allataalana Israélié, hukkungngi matu Arung Nébukadnézar sibawa wanuwanna pada-pada uhukkunna arung Asyur. Upalisui matu tau Israélié lao ri wanuwanna mennang. Nanréi matu wassélé tanana Bulu Karmél sibawa daéra Basan. Ripamessoriwi matu mennang ri wassélé tanana daéra Efraim sibawa Giléad. Iyaro wettué Israélié sibawa Yéhuda mapaccingngi matu polé ri dosaé, nasaba Iyya matu maddampengengngi sining tau iya puraé Upassalama. Iyya, Puwang pura mabbicara.” Makkedai Puwangnge lao riséuwaé bangsa polé ri manorangngé, “Gasai pabbanuwana Merataim sibawa Pékod. Unoi sibawa paccappui mennang. Pogau'i parénta-Ku. Iyya, Puwang pura mabbicara.” Maggalenrunni oni musué ri wanuwaéro, na kajajiyanni ancurukeng battowaé. Ripalu-paluini sininna linoé gangka ancuru ri Babél, iyakiya makkekkuwangngé iyaro palu-palué mapoloni! Tassélenni sininna bangsaé méngkalingai aga iya kajajiyangngé sibawa wanuwaéro. Makkedai Puwangnge, “Babél, muéwa-Ka, rimakkuwannanaro tajjebba'ko ri laleng siyo-siyo iya Upasangngé untu' iko, iyakiya dé' mumaingekiwi. Purani Utimpa gudang senjata-Ku, nanasibawang cai Upassui senjata-senjataéro, nasaba Iyya Puwang Iya Pommatanré sibawa Pommakuwasaé harusu pogau'i séuwa tugas ri Babél. Gasani Babél polé tulili, sibawa lepponi sining gudang gandonna! Gopponi barab-barang rampasa'é pada-pada goppoko gandong! Ancuru'i wanuwaéro! Aja' naengka risésangengngi! Unoi sininna tentarana! Pamatéi mennang! Macilakani bangsa Babél! Narapini wettunna rihukkung mennang!” ( Sining tau iya lariyé lao ri Yérusalém polé ri Babél curitai pékkugi Puwang Allataalata mpale'i pangkaukenna tau Babél-é lao ri Bolana Puwangnge.) Makkedai Puwangnge, “Suroi sining pappanaé gasai Babél. Pangarai tungke tau iya maccaé mappana. Keppungngi kotaéro sibawa aja' muleppessangngi muwi séddi tau leppe. Wale' manengngi pangkaukenna sibawa gaukengngi situru sibawa kédo-kédona, saba' purai tinda' kurang ajara' lao ri Iyya, Iya Pommapaccingngé, Allataalana Israélié. Iyaro essoé matéi matu sining kallolona ri lalel-laleng kotana, sibawa sininna tentarana riyancuru'i. Iyya, Puwang, pura mabbicara. Babél, matanré ati senna'ko! Rimakkuwannanaro Iyya, Puwang Iya Pommatanré, Allataala Iya Pommakuwasaé, méwako. Wettunnana Uhukkukko. Tabbuttui matu bangsamu iya matanré atiro namenrung. Dé' muwi séddi tau tulukko matu untu' tokkong. Utunui matu kota-kotamu, sibawa sininna iya engkaé ri seddéna Upaccappui matu.” Makkedai Puwang Iya Pommakuwasaé, “Ritenre'ni tau Israélié sibawa tau Yéhudaé. Sininna iya tawangngéngngi jagaiwi mennang sibawa masero nenniya dé' namaélo leppessangngi mennang. Iyakiya Iyya pappassalama'na mennanro mawatang, asek-Ku Puwang Iya Pommakuwasaé. Alé-Ku méwaiwi matu parakarana mennang sibawa tiwi adaméngeng ri tompo'na linoé. Iyakiya ri yasé'na tau Babél-é Upapoléi matu arocakengngé sibawa amétaurengngé.” Makkedai Puwangnge, “Binasai Babél silaong ra'ya'na nenniya pajaba pamaréntana enrengngé tomaccana mennang! Binasai nabi-nabinna Babél! Pabbelléng mennang sibawa madongo. Binasai tentara Babél iya baranié! Temmaka tauna mennang! Ancuru'i anyaranna sibawa karéta musuna! Binasai prajuri-prajuri naséwana! Temmaka lemmana mennang! Ancuru'i asugirenna Babél! Rappai waramparanna! Rakkoiwi sininna salona sibawa dare'na! Saba', pennoi Babél sibawa barahala-barahala iya mappakatau-taué, iya mébbuéngngi sininna sompaéngngi mancaji jangeng. Rimakkuwannanaro mancajiwi matu Babél onronna sining jingngé sibawa roh-roh majaé enrengngé sining manu'-manu' untaé. Untu' mannennungeng dé'na matu gaga tau iya maéloé monro kuwaro. Pada-pada Uwancuru'na Sodom sibawa Gomora silaong désa-désaé ri seddéna, makkuwatoro Iyya mancuru'i matu Babél. Dé'na muwi séddi tau monro matu kuwaro. Iyya, Puwang, pura mabbicara. Séuwa bangsa iya mawatangngé mattengngang kédo polé ri wanuwa iya mabélaé ri manorang. Poléi mennang silaong maéga arung untu' mammusu. Massenjata panai mennang sibawa bessi; mabecco'i mennang sibawa dé' naissengngi maddampeng. Pada-pada oni tasi mabbombangngé makkuwaniro oninna ajé anyaranna mennang iya mattengngangngé ripalari untu' maju gasai Babél. Naéngkalingana birittaéro, dé'ni pakkullénna arung Babél. Ricekké'ni ri pappénedding métaué, sibawa mapeddi pada-pada makkunrai iya maéloé mémmana. Pada-pada singa iya mompoé polé ri ale maworongngé ri seddéna Salo Yordan sibawa lokkaiwi padangngé onronna bimbala mabbellaé, makkuwaniro Iyya, Puwang, poléi matu sibawa mébbui tau Babél-é lari polé ri kotana mennang sibawa tennasenna-senna. Nainappa pilé-Ka matu séddi tau pamimping untu' paréntai iyaro bangsaé. Nigana wedding ripappadaiyak-Ka? Nigana barani mébbu parakara sibawa Iyya? Aga engka pamimping iya mullééngngi méwa-Ka? Rimakkuwannanaro, éngkalingai aga iya puraé Urancana lao ri kota Babél, sibawa aga iya maéloé Upogau' lao ri pabbanuwana. Muwi ana'-ana'na mennang riyassarénréngeng towi matu lao, na sininna tauwé métaui matu. Narékko sempé'ni Babél, riyéngkalingai matu rukkaé iya masero makkuwaéro angkanna taggottang sininna linoé; naéngkalingai matu bangsa-bangsa laingngé kelli'-kelli'na pabbanuwana.” Makkedai Puwangnge, “Ukiringngi matu anging pakkasolang iya mangirié mattuju ri Babél sibawa mattuju ri pabbanuwana. Usuroi matu sining tau laing iya mancuru'éngngi matu Babél pada-pada anging iya lutturengngéngngi oli gandongngé. Ri esso abalaéro nagasai matu mennang iyaro wanuwaé polé tulili sibawa saringngi gangka mapaccing. Aja' muwéréngngi kasempatang tentarana untu' mannémbakengngi ana' panana iyaré'ga mabbangkakengngi pakéyang musuna. Aja' narileppessang tuwo kallolo-kallolona. Ancuru'i sininna tentarana! Maladde'i matu lona mennang sibawa matéi ri lalel-laleng kotana mennang. Iyya, Puwang, Allataala Iya Pommakuwasaé, Allataala Mapaccinna Israélié, dé' Usalaiwi matu Israélié sibawa Yéhuda, namuni purai mennang madosa lao ri Iyya. Passalama'i alému! Larino polé ri Babél, aja' narapiko maccowé riyuno nasaba dosana! Saba' iyanaé wettunna Uwale' jana Babél, sibawa hukkungngi situru sibawa pangkaukenna. Iya labe'é pada-padai Babél kaca ulaweng iya Uwakkatenningngé sibawa iya mébbuéngngi sininna linoé mabo'. Ménungngi anggoro bangsa-bangsaé polé ri kacaéro, angkanna mennang mancaji jangeng. Iyakiya tennasenna-senna sempé'i Babél sibawa reppa. Teringini, sibawa sappano pabbura untu' sining lona, ajakké weddingngi majjappa. Tau laing iya monroé kuwaro makkedai séddié lao ri laingngé, ‘Purani makkuraga tulungngi Babél, iyakiya matengnge'ki! Lebbi kessing muwi tasalaiwi iyaé wanuwaé natalisu ri wanuwatta tungke-tungke. Puwangnge pura hukkungngi Babél sibawa maladde, sibawa mancuru sisengngi.’ ” Makkedai umma'na Puwangnge, “Pura nappaitanni Puwangnge makkedaé engkaki ri tongengngé. Laono mai talao ri Yérusalém sibawa curitai kuwaro aga pura napogau' Puwang Allataalata.” Puwangnge pura pakiri-kiriwi arung-ngarung Média, nasaba maéloi mancuru'i Babél. Iyanaro cara-Na mpale'i pangkaukenna sining tau iya mancuru'éngngi Bola-Na. Napparéntanni sining kapalana pasukang paggasaé, “Tarengiwi ana' panamu! Passadiyai kaliyawoé! Wéréngngi tanrang untu' gasai témbo'-témbo'na Babél. Pakkasse'i anganrowangengngé. Taroi pengawal-é. Passadiyai paggasaé!” Purani napogau' Puwangnge aga iya Narancanaé lao ri tau Babél-é. Sugi senna iyaro wanuwaé sibawa maéga salona, iyakiya wettu atuwonna cappuni; narapini paccappureng atuwonna. Mattanroi Puwang Iya Pommakuwasaé nasaba Aléna, makkedaé kiringngi matu tau singngéga incalé untu' gasai Babél, sibawa nagorangngi matu mennang gora-gora apakalangngé. Napancajiwi Puwangnge linoé sibawa akuwasan-Na, natappai linoé sibawa pangissengen-Na, nenniya pallebba'i langié sibawa akkalen-Na. Banna mabbéréi parénta, namemmu uwai ri bitaraé. Polé ri cappa-cappa linoé Napapoléi ellungngé, sibawa Naébbui billa'é mattappa ri laleng bosié, enrengngé Nakiringngi anging polé ri onrong assubbuwanna. Naita manennaro mainge'ni tolinoé, makkedaé madonggoi sibawa dé' nappunnai pappéjeppu. Ateddéngenni tappa sining panré ulawengngé, saba' dato-dato barahala ébbunaro palsui sibawa dé' nakkényawa. Iyaro barahala-barahalaé dé' angke'na, sipato'i riyéllé sibawa ripakatuna. Narékko narapini wettunna, binasai matu mennang. Allataalana Yakub dé' napada-pada iyaro barahala-barahalaé; Aléna pancajiwi sininna séuwa-séuwaé. Asen-Na iyanaritu Puwang Iya Pommakuwasaé; purani Napilé Israélié mancaji umma'-Na. Makkedai Puwangnge, “Babél, samannako palu-palu, senjata-Ku untu' mammusu. Upakéko untu' hantangngi bangsa-bangsaé sibawa akkarungeng-akkarungengngé. Upakéko untu' mancuru'i anyarangngé sibawa pakkinnyaranna, enrengngé karétaé sibawa tonangiyéngngi. Upakéko untu' mpunoi worowané sibawa makkunraié, macowa iyaré'ga malolo, ana'dara sibawa kallolo. Upakéko untu' paccappui pakkampié sibawa olokolo'na, patanié sibawa saping paddakkalana, panguwasaé sibawa parawira-parawira matanré.” Makkedai Puwangnge, “Alémuna sabbingngi pékkugi-Ka makkekkuwangngé mpale'i Babél sibawa pabbanuwana nasaba ja iya napogau'é mennang lao ri Yérusalém. Eh Babél, pada-padako bulu iya mancuru'éngngi sininna linoé. Iyakiya Iyya, Puwang, méwako matu. Ugettekko matu sibawa Ugalétté enrengngé Uleppessang ritunu mancaji awu. Dé' muwi séddi batu polé ri ruttungemmu iya ripaké matu paimeng untu' mappatettong. Mancajiko matu pada-pada padang kessi'é untu' mannennungeng. Iyya, Puwang, pura mabbicara.” “Eh arung polé manorangngé! Abbéréno tanrang untu' maggasa! Paoniwi tarompé'é kuwammengngi naéngkalingai bangsa-bangsaé! Pangarai bangsa-bangsaé untu' mammusu méwai Babél! Suroi akkarungeng Ararat, Mini sibawa Askénas maggasa. Akkano séddi pallima untu' pimpingngi aggasarengngéro. Pangarai anyarangngé singngéga incalé maggoppoé. Passadiyai bangsa-bangsaé untu' mammusu méwai Babél. Obbii arung-ngarung Média silaong panguwasa-panguwasana sibawa tomariyolo-mariyolona enrengngé tentara polé ri sininna wanuwa iya nakuwasaiyé mennang. Ténré linoé sibawa taggottang nasaba Iyya mattengngang pogau'i rancana-Ku untu' pancajiwi Babél onrong makabuttu iya dé'é naonroiwi tau. Mappésauni mammusu tentara Babél sibawa monro risining bénténgngé. Teddénni mennang abaraningenna sibawa dé' pakkullénna. Purani rileppo pintu-pintu gerbanna kotaé, sibawa ritunu sining bolaé. Siyola-olai sining suroé lari untu' paissengiwi arung Babél makkedaé rigasani kotana polé ri sininna sulapa'é. Natudangini balié onrong alléttongngé, sibawa natununi sining bénténg attahanangngé. Malippuni tentara Babél-é. Dé'na namaitta naricau mennang sibawa riléjja-léjja ri balié pada-pada gandongngé ri onrong addésekengngé. Iyya, Puwang Iya Pommakuwasaé, Allataalana Israélié, pura mabbicara.” Riyancuru'i Yérusalém sibawa riyanré gangka cappu ri arung Babél; napalobbangngi kotaéro pada-pada tauwé palobbangngi botolo'é. Pada-pada sikajué olokolo rassasa, memme'i Yérusalém sibawa lisekiwi babuwana sibawa sininna iya makessingngé polé ri kotaéro, nainappa nabbéyang sésana. Pabbanuwana Sion, powadani, “Tennapodo nakennai Babél apéddarang iya nagaukengngékki!” Pabbanuwana Yérusalém, powadani, “Tennapodo nakennai Babél anrasa-rasang iya napakennaingengngékki!” Rimakkuwannanaro makkedai Puwangnge lao ri pabbanuwana Yérusalém, “Uwéwaiwi matu parakaramu sibawa mpale'i pangkaukenna sining balimmu lao ri iko. Bubbu-bubbu uwaina sibawa sining salona Babél Urakkoiwi matu. Mancaji aggoppong ruttungengngi matu iyaro wanuwaé, onronna massubbu asu ale'é. Maséleng tauwé mitai, sibawa dé' muwi séddi tau maélo monro kuwaro. Mangngaungngi tau Babél-é pada-pada singaé, nenniya marang pada-pada ana' singaé. Na ri wettu mompona napessu manréna mennang, Upassadiyangengngi matu mennang inanré, sibawa mébbui mennang mabo' sibawa malippu narapi matinro na dé'na naoto'na. Utiwii matu mennang untu' rigéré pada-pada ana' bimbala'é, bémbé'é, sibawa bimbala laié. Iyya, Puwang, pura mabbicara.” Makkedai Puwangnge, “Babél iya ripojiyé ri sininna linoé risittaini sibawa ritudangini! Temmaka mappakatau-tauna iyaro wanuwaé untu' bangsa-bangsaé. Luwanni uwaina tasi'é lao ri Babél; memmu'ni bombanna mappo'i wanuwaéro. Kota-kotana mancajini onrong iya mappakatau-taué, pada-pada padang kessi iya makarossaé. Dé'gaga tau iya maéloé monro iyaré'ga lalo kuwaro. Bél, déwatana wanuwa Babél, Uhukkungngi matu. Uwébbui matu napalisu aga iya puraé narampasa. Dé'na nasompai matu bangsa-bangsaé. Maruttunni sining témbo'na Babél. Rimakkuwannanaro larino polé kuwaro, éh umma Israélié! Passalama'i alému polé ri cai-Ku iya luwangngé. Aja' mumétau iyaré'ga manenneng nasaba karéba-karéba iya muwéngkalingaé. Tungke taung tassiyai karéba iya silaingengngé – karéba passalenna abeccokengngé ri lalempanuwa sibawa passalenna arung-ngarung iya musuéngngi séddié lao ri laingngé. Ateppe'no, narapii matu wettunna Uhukkungngi barahala-barahalana Babél. Ripakatunai matu sininna wanuwaéro, sibawa riyunoi sininna pabbanuwana. Sininna séuwa-séuwaé ri langié sibawa ri linoé gorai matu marennu narékko sempé'ni Babél ri limanna bangsa polé manorangngé iya polé untu' mancuru'i. Maéga bangsa ri sininna linoé iya matéénna nasaba Babél, iyakiya makkekkuwangngé sempé'ni Babél nasaba tau Israél iya maté riyuno. Iyya, Puwang, pura mabbicara.” Makkedai Puwangnge lao ri tau Israélié ri Babél, “Leppe'no polé ri abbunowangngé! Jaji, laono makkekkuwangngé! Aja' mumattajeng! Namuni sempé'ko polé ri bolaé, éngngerakka, Puwang -mu, sibawa lao ri Yérusalém. Makkedako, ‘Ripakatunaki sibawa ripakasiri; ateddéngenni rupa nasaba natudangiwi sining tau laingngé sining bili' mapaccingngé ri Bolana Puwangnge.’ Nah, puriyatiwi iyaé ada-adak-Ku. Poléi matu wettunna Uhukkungngi barahala-barahalana Babél. Ri sininna wanuwaéro riyéngkalingai matu saddanna tau maddaréké nasaba masero loi. Namuni naulléi Babél ménré ri langié sibawa patettong attahangeng iya dé'é nawedding rirapi, tette'-Ka matu kiring tau untu' solangiwi. Iyya, Puwang, pura mabbicara.” Makkedai Puwangnge, “Engkalingai! Kelli'i tauwé ri Babél sibawa teriwi messé nasaba ancurukeng iya kajajiyangngé ri wanuwaéro. Mattengngakka mancuru'i Babél sibawa pammekkoi sadda-sadda arowasenna. Poléi balié pada-pada bombang memmué, sibawa maggasai tentarana sibawa kelli musu. Poléi mennang untu' solangiwi Babél, tikkengngi sining prajuri'na nenniya poloi sining senjatana mennang. Iyya ritu Puwang iya hukkungngéngngi jaé, sibawa Uwale'i Babél situru sibawa pangkaukenna. Upamabo'i matu sining pajaba pamaréntana Babél – sining tomaccana, pamimpinna sibawa tentarana. Dé'na mennang natokkonna matu paimeng, matinroi untu' mannennungeng. Pura-Ka mabbicara; Iyya ritu arung, Iyya Puwang Iya Pommakuwasaé. Témbo'na Babél iya masse'é Uwancuru'i matu angkanna mancaji sillappa tanaé. Pintu gerbanna iya matanré Utunui matu gangka cappu. Paracuma bawang turuppuse'na bangsa-bangsaé, saba' sininna wassélé jama-jamanna mennang nanréi matu api. Iyya, Puwang Iya Pommakuwasaé, pura mabbicara.” Pengawal paribadinna Arung Zédékia iyanaritu Séraya ana' Néria eppona Mahséya. Ri taung maeppaé apparéntanna Zédékia arung Yéhuda, maccowéni Séraya ri Zédékia lao ri Babél. Nauwérénni aléna séuwa tugas. Sininna abala iya kennaéngngi matu Babél sibawa gau'-gau' laing passalenna wanuwaéro purani uwoki ri laleng séuwaé kitta lulung. Nainappa makkedaka lao ri Séraya, “Lettu'mu muwa ri Babél, usahakangngi kuwammengngi na sininna iya tarokié ri laleng kitta'éwé weddingngi mubacangeng sining tauwé kuwaro. Purairo assempajanno makkuwaé, ‘ Puwang, Iko pura makkeda makkedaé Muwancuru'i matu iyaé kotaé angkanna muwi tauwé iyaré'ga olokolo'é lennye sisengngi, sibawa iyaé onrongngé mancajiwi pada-pada padang kessi untu' mannennungeng.’ Nah, purana mubaca lise'na iyaé kitta'é lao risining tauwéro, assiyorenno batu ri kitta'éwé, nainappa muwaggenrungeng lao ri tengnga-tengngana Salo Efrat, namuwakkedato, ‘Makkuwaniyé kajajiyang matu sibawa Babél. Tallemme'i matu iyaé wanuwaé na dé'na naompona nasaba abala iya napatakkennaé Puwangnge ri yasé'na.’ ” Maccappuni ada-adanna Yérémia kuwaé. Umuru'na Zédékia wettunna mancaji arunna Yéhuda duwappulo séddi taung. Mapparéntai ri Yérusalém seppulo séddi taung ittana. Indo'na riyasengngi Hamutal, ana' Yérémia polé ri kota Libna. Pada-pada Arung Yoyakim, Arung Zédékia madosa towi lao ri Puwangnge. Macai senna'i Puwangnge lao ri pabbanuwana Yérusalém sibawa tau Yéhudaé angkanna Napaddésu'i mennang sibawa dé'na nalinrungiwi mennang. Maronta'i Zédékia lao ri Nébukadnézar arung Babél, rimakkuwannanaro Nébukadnézar sibawa sininna tentarana polé sibawa gasai Yérusalém ri tanggala seppulona uleng seppulo ri laleng taung maaséraé apparéntanna Zédékia. Patettonni mennang markas ri saliweng kota, patettong témbo' akkeppungeng sibawa matteru keppungngi iyaro kotaé lettu ri taung maseppuloé séddi apparéntanna Zédékia. Ri tanggala asérana uleng eppa iyatoro taungngé, wettunna abala akkadérengngé makkuwamani serona angkanna dé' sisenna nappunnai ra'ya'é anré, nalepponi balié témbo'na kotaé. Iyaro wennié, namuni mattengngangngi tau Babél-é keppungngi kotaéro, sininna tentarana Yéhuda larini mattuju ri Lompo Yordan. Laloi mennang ri laleng tammeng saorajaé, nainappa massu lalo ri pintu gerbang iya pasisumpungngéngngi iya duwa témbo'é ri onrongngéro. Iyakiya rilellungngi Arung Zédékia ri tentara Babél-é, sibawa tikkengngi ri tanéténa Yérikho. Lari manenni ana' buwana salaiwi. Naritiwina Arung Zédékia lao ri Arung Nébukadnézar ri kota Ribla ri daéra Hamat, nainappa ripateppai pahukkungeng maté. Ri kotaéttonaro riyuno ana'-ana'na ri yolona matanna, sibawa sininna pajaba pamaréntana Yéhuda riyuno toni. Purairo ricukkéni matanna Zédékia, nainappa ribalenggu naritiwi lao ri Babél. Kuwaniro riputtama ri tarungkué, na dé' naengka nassu polé kuwaro narapi wettunna maté. Ri tanggala seppulona uleng lima ri laleng taung maseppuloé aséra apparéntanna Nébukadnézar arung Babél, laoni ri Yérusalém séddi tau riyasengngé Nébuzaradan. Aléna iyanaritu pappangajana sibawa kapala pengawal paribadinna Nébukadnézar. Natununi Nébuzaradan Bolana Puwangnge, saorajana arungngé, sibawa bolana sininna tau mariyoloé ri Yérusalém. Nainappa sininna ana' buwana ruttungngi témbo'-témbo'na kotaéro. Nainappa ra'ya' iya engkaé mupa ri kotaé, iyanaritu sining pajjama-jama ahli iya nasésaé, sining tau kasiyasié, sibawa sining tau iya lariyé lao ri tau Babél-é, iya manenna ritiwini lao ri Babél ri Nébuzaradan. Iyakiya sibagiyang polé ri ra'ya' iya kaminang kasiyasié sibawa dé'é nappunnai waramparang, nasalaiwi ri Yéhuda, sibawa nasuroi jamai palla anggoro'é sibawa sining dare'é. Alliri-alliri gessaé sibawa karéta-karétaé ri Bolana Puwangnge silaong kullang gessaé nareppa'ni tau Babél-é, nainappa natiwi sininna gessana lao ri wanuwanna mennang. Natiwi towi mennang barab-barangngéwé: passanru-sanru'é, onrong awunna mézbaé, pakkakkasa'na pajjennangengngé, mangko-mangko untu' pattarimai dara olokolo iya rigéréé untu' akkarobangeng, mangko-mangko untu' mattunu dupa, sibawa sininna barang gessa laingngé iya ripaké untu' upacara assompang. Barab-barang ulawengngé sibawa péra'é, muttama'ni mangko-mangko baiccu'é sibawa onrong baraé, mangko-mangko untu' onrong dara olokolo iya rigéréé untu' akkarobangeng, onrong awu, ajé pajjennangeng, mangko-mangko untu' dupa, sibawa mangko-mangko untu' tiri'i pakkasuwiyang uwai anggoro'é, iya manenna aléna Nébuzaradan malai. Barab-barang gessa iya naébbué Arung Salomo untu' Bolana Puwangnge, iyanaritu iya duwa allirié, karéta-karétaé, kullangngé sibawa iya seppulo duwa saping iya tula'éngngi iyaro kullangngé, iya manenna makkuwamani tane'na, angkanna tenritimbang. Buwa dalimaé ri anengengngé ri tungke ulu alliriéro engka sératu, iyakiya banna aséra pulona enneng iya paitaé polé ri yawa. Ri lainnaéro, natikkengngi Nébuzaradan Imang Lompo Séraya, Zéfanya wakkélé'na, tellu tau panganrowang sumpanna Bolana Puwangnge, iya pitu pappangaja paribadinna arungngé iya engkaé mupa ri kotaé, pallimana, wakkélé pallima iya murusu'éngngi administrasinna tentaraé, sibawa enneng pulona tomaraja laingngé. Sininna tauwéro natiwii lao ri Nébukadnézar ri kota Ribla, ri daérana Hamat. Kuwaniro mennang risissa nainappa riyuno. Makkuwaniro sining tau Yéhudaé ritiwi polé ri wanuwanna mennang naritiwi ri appalirengngé; Ri tanggala duwappulona lima uleng seppulo duwa ri laleng taung matelluppulona pitu purana Yoyakhin ritiwi ri appalirengngé, Ewil-Mérodakh mancaji arunna Babél. Iyatoro taungngé nappaitangngi paressé babuwana lao ri Yoyakhin, nanapaleppe'i polé ri tarungkué, enrengngé gaukengngi sibawa makessing. Nawérénni Yoyakhin tudangeng iya lebbi matanré naiya arung-ngarung laing iya ripaliétto lao ri Babél. Temmaka sino-sinona Yérusalém makkekkuwangngé, kota iya marowa senna'é riyolo. Riyolo riyattuwang ri yelle'na bangsa-bangsaé, makkekkuwangngé pada-padani jandaé. Riyolo kota iya kaminang ripakalebbié, makkekkuwangngé ripancaji atani. Puppu benni messé teri, mabbarébé uwai mataé ri rupaé. Dé' muwi séddi tau polé risining sipojinna iya maéloé saléworiwi. Ribali'bellariwi ri silao-silaonna iya balé'énna mancaji bali. Nasalaini wanuwanna pabbanuwana Yéhuda, nasaba ripowatai sibawa manrasa-rasa senna'i. Monroni makkekkuwangngé ri yelle'na bangsa-bangsaé temmappunnai onrong iya mabbéré adaméngeng. Rikeppungngi mennang ri balié wettunna mennang manrasa-rasa. Ri esso-esso marajaé dé' muwi séddi tau lao ri Bolana Allataala. Ana'-ana' dara pakkélongngé kuwaro manrasa-rasai, sibawa maddarékéi imang-ngimangngé. Dé'gaga tau ri pintu-pintu gerbangngé, risalipurini amesséng Kota Sion. Héba'ni sining balinna nasaba naulléi makuwasaiwi. Puwangnge mébbui manrasa-rasa, nasaba maéga senna'i dosana. Ritawanni pabbanuwana, sibawa ritiwi ri appalirengngé. Ahébakenna kota Yérusalém banna curita wettu labe'é. Mancaji malemmani sining pamimpinna pada-pada jonga malupu senna'é. Dé' pakkullénna lao ri bali iya mallellungngé. Maruttunnana sibawa manrasa-rasa, naéngngeranni Yérusalém wettu labe'na, wettunna maéga mupa waramparang; pékkugi pabbanuwana sempé ri limanna balié, na dé' muwi séddi tau polé mattulung. Banna macawai sining balinna mitai aruttungenna. Nacarépaiwi aléna muto Yérusalém ri laleng napogau'na maéga dosa matunaé. Sininna iya pakalebbiéngngi riyolo, makkekkuwangngé napakatunani nasaba naitai allusu-lusunna. Maddarékéi, nasaba ateddéngenni rupa. Paitani sibawa manessa anajisikenna iyakiya dé' nabati-batiwi aga iya kajajiyangngé matu sibawa aléna. Masero senna aruttungenna, iyakiya dé' muwi séddi saléworiwi. Nanaéllauna paressé babuwa polé ri Puwangnge, nasaba pakalani sining balinna. Rirampasa'ni sininna waramparanna risining balinna. Mala harusu'i naita mennang muttamakiwi Bolana Allataala, séuwa pangkaukeng iya nattéyangngé Puwangnge untu' tau iya tenniyaé umma'-Na. Ri laleng maddarékéna sappai dallé pabbanuwana; barang mangke'é naséléi mennang sibawa roti, banna kuwammengngi natette mennang tuwo sibawa aja' namaté. Mangobbii Yérusalém, “Oh Puwang, itaka, pénessaiwi sininna anrasa-rasaku.” “Eh sining tau iya laloé ri lalengngé, itai sibawa pénessaiwi! Engkaga silloppona passissa iya upéneddingiyé makkekkuwangngé, passissa iya napatakkennaé Puwangnge lao ri iyya, nasaba cai-Na iya battowa senna'éro? Napanonnoi apié polé ri langié iya tunuéngngi lettu ri laleng batékku. Natangngi siyo-siyoé ri yoloku iya mébbuékka mabuwang. Nainappa Naleppessakka alé-aléku manrasa-rasa puppu esso. Nalai sininna dosaku, nainappa nasiyo mancaji séddi, nanapaggénoi ri ellokku, angkanna napalemmaika tane'na. Puwangnge mabbéréyakka lao ri balié; dé' pakkullékku méwai mennanro. Naangga mariyawai Puwangnge pahlawakku iya baranié. Napangarai tentaraé kuwammengngi namaté maneng sininna kalloloku. Naléjja-léjja'i bangsaku gangka ancuru, pada-pada tauwé para' buwa anggoro. Iyanaro saba'na namabbarébé uwai matakku, dé'gaga mabbéré sumange sibawa passaléwo. Ateddéngenni bangsaku sini-sininnaé, nasaba lebbi makuwasai balié. Uwakkai limakku méllau bantuwang, iyakiya dé'gaga mabbéré passaléwo. Polé ri sininna sulapa'é, kiringngi Puwangnge bali; poléi mennang gasaka. Rigaukekka pada-pada warowoé, barang iya mappakaciddi-ciddi'é ri tengnga-tengngana mennang. Iyakiya Puwangnge ritu iya tongengngé, saba' purani uwajjalékkai parénta-Na. Engkalingaka, éh bangsa-bangsa, itaka ri laleng anrasa-rasangngé. Sining kalloloku sibawa ana'daraku ritawangngi, sibawa ritiwi lao ri appalirengngé. Uwobbii sining silaong maréppé'ku iyakiya nabali'bellarika mennang. Sining imangngé sibawa pamimping bangsaé maté manenni ri lalel-laleng kotaé. Wettunna sappa inanré untu' mattahangengngi nyawana. Oh Puwang! Pénessaika, manennengngi atikku sibawa kacau, ancuru'i nasaba adorakakku riyolo. Engka abbunowang risining lalengngé, ri lalempolaé engka amaténg. Oh Puwang! Engkalingai addarékékku, dé'gaga saléworika. Marennui sining balikku, nasaba Muwébbuka macilaka. Papoléni esso iya Muwajjanciyangngéro; ébbui mennang manrasa-rasa pada-pada iyya. Pénessaiwi sininna jana mennanro, sibawa gaukenni mennang pada-pada Mugaukengngékka, nasaba sininna dosa iya upogau'é lao ri Iko. Maddarékéka ri laleng anrasa-rasangngé, messéi atikku sibawa makkanrodongngi.” Tinda'i Puwangnge ri laleng caina, Nasalipuriwi Sion sibawa pettang. Arajanna Israélié iya sittanré langié, purani Naggeppuwang ri linoé. Wettunna macai Puwangnge, muwi Bola-Na ri Sion dé'to Najampangiwi. Tungke' padang wellaé ri wanuwa Yéhuda, Naancuru'i temmaressé. Naleppoi ri laleng cai-Na gangka maruttung sining bénténg iya linrungiyéngngi wanuwaéro. Iyaro akkarungengngé silaong sining pamimpinna Napasempé'i angkanna mancaji matuna. Ri laleng cai-Na iya malluwa-luwa'é, Napoloi awatangenna Israélié. Wettutta nagasa balié, bata-batai mabbéré pattulung. Pada-pada apié majjallo paccappui sini-sininnaé, makkuwaniro Puwangnge macai lao ri idi maneng. Pada-pada balié paggettengngi uso pana-Na sibawa pattujui ana' pana-Na lao ri idi. Sininna tau iya pésennangiyéngngi atitta, cappui Nauno. Napporokengngi cai-Na pada-pada apié ri laleng kota Yérusaléngngéwé. Mancajiwi Puwangnge pada-pada balié; Naunrui Israélié gangka maruttung. Naancuru'i sining bénténgngé nenniya saorajaé, sibawa pamégaiwi sara ninnawaé ri pabbanuwana Yéhuda. Naancuru'i Bola-Na onronna umma'-Na maddeppungeng untu' sompai. Naébbui tauwé mallupaiwi esso Saba'é sibawa esso-esso marajaé. Nasaba macai senna'i Puwangnge, imang sibawa arungngé Nasampéyangngi. Nasampéyangngi Puwangnge mézba-Na iya mapaccingngé, sibawa salaiwi Bola-Na muto; Naleppessangngi balié ruttungngi sining témbo'na. Ri onrotta riyolo massompa sibawa mappésta, gora-gorai balié nasaba battowai. Purani napettui Puwangnge makkedaé sining témbo'na Sion harusu'i riruttung. Iyaro sining témbo'é purani naukkuru, kuwammengngi naullé manengngi mancuru'i. Sining témbo'é sibawa sining manaraé, mancaji ruttungeng manenni makkekkuwangngé. Natébunni tana sining gerbanna, poloni sining paccala'na; arung sibawa pajaba pamaréntaé engkai ri appalirengngé. Dé'na nappagguruwangngi hukkunna Puwangnge; dé'na natarima wéré nabié polé ri Puwangnge. Pada tudanni tomacowa-cowana kotaé mammekko ri tanaé; namporiwi awu ulunna mennang, sibawa paké kaing karung tanrang masara. Muwi ana'-ana'daraé cannunnuto lettu ri tanaé. Boro matakku nasaba teri temmappésau, maddéké-rékéi nyawaku dé' padanna. Ancuru atikku mitai aruttungenna bangsaé; mitai ana'-ana'é nenniya ana'loloé marenne ri lalel-lalenna kotaé. Posoni mennang teri méllau manré sibawa ménung ri indo'na. Pada-pada tau maloé, rebbai mennang ri lalel-lalengngé nainappa maté ri wakkanna indo'na. Oh Yérusalém, Kota Sion iya riyéloriyé, ruttungemmu silloppoi dolangengngé. Aga wedding upowada untu' mpéréngngi passaléwo? Saba', dé' naengka iya manrasa-rasaé pada-pada iko. Dé' tongeng gaga iya mullééngngi palisui keadaammu. Iya napalettu'é nabi-nabié ri iko, banna pabengnguwang sibawa belle simata. Dé' naengka mennang natimpa'i dosamu, angkanna nasaba iyaro dé' mutoba'. Sibalé'na banna mennang palettu'i ri iko ada-ada bellé iya pataré'é. Sininna iya laloé méllé-kéllé'ko, nasaba ancuruko iya manenna. Napaccilic-cilingngi mennang ulunna sibawa makkeda, “Iyaroga kota iya kaminang magelloé, kota nabbangkakengngé linoé?” Sininna balimmu naitai tappamu sibawa paccéccé, nacawa-cawaiko mennang sibawa paéllé. Makkedai mennang, “Iyaro kotaé purani riyancuru! Angkanna narapi toni wettunna iya maittaénna tatajengngi!” Pura napogau'ni Puwangnge Naancangengngé iya narancanaé riyolo sibawa Napparéngngerangengngé lao ri idi. Naancuru'ki temmaressé babuwa, Nawéréngngi apakalang balié. Naébbui mennang marennu mitai asempéketta. Eh témbo'-témbo' Yérusalém, angobbino lao ri Puwangnge! Pabbarébé'i uwai mataé pada-pada salo massolo'é esso wenni. Atteruno teri, aja' muwappésau narapi matekko watakkalému! Oto'no makkolik-koling puppu wenni untu' gora loloi lise atimmu lao ri Puwangnge. Ellauni kuwammengngi Namaressé babuwa lao ri ana'-ana'mu iya alupurengngé sibawa marenne'é ri tungke' tékko lalengngé. Puwang, itani sibawa pénessaini mennang iya Musissaéro! Engkaga pura Mugaukeng makkuwaro? Nanréi indo'é ana' riyaléna iya naéloriyé, riyunoi imangngé sibawa nabié ri Bola-Mu iya mapaccingngé. Macowa malolo matéi makkalénnereng ri lalengngé, matéi kalloloé sibawa ana' daraé polé ri peddangngé. Ri esso macai-Mu, Mugéréi mennang temmappénedding messé. Muundangngi sining bali iya taétauriyé untu' pakangka pésta apéddarang ri mattulilitta. Nauno manengngi mennang iya rijampangiyé sibawa risayangngé. Ri esso acairem-Mu, dé' muwi séddi tau mulléi lari. Iyya ritu tau iya puraé péneddingi anrasa-rasang, nasaba nakennaka caina Allataala. Pédé mabéla Nassarénréngekka ri laleng onrong iya mapettang kape'é. Riyunruka makkolik-koling, temmamasé puppu esso. Naébbui watakkaléku malo senna, sibawa polo buku-bukukku. Nasalipurika sibawa sara nenniya anrasa-rasang. Napassaka monro ri laleng pettangngé pada-pada tau iya maté ri wettu labe'é. Nasibawang balenggu iya masse'é Nasiyoka, angkanna dé'gaga laleng massu ri aléku. Kelli'ka méllau pattulung, iyakiya dé' namaélo Allataala maréngkalinga. Nalawa-lawaiwi lalekku sibawa témbo'-témbo' batu. Pada-padai beruwangngé mattajeng, pada-padai singaé mangadang. Nalellukka narapi lésséka polé ri lalengngé, nainappa nasapé-sapé'ka sibawa nasalai. Napaggettengngi uso pana-Na, sibawa pancajika attujuwanna ana' panana. Nabettui tubukku ana' panana gangka natoddo lise lalekku. Puppu esso nacawa-cawaika sininna tauwé, sibawa ripancaji assindirikeng. Banna apaireng iya Nawéréngngékka untu' inanré sibawa énungekku. Naggosokengngi rupakku ri tanaé, Naggappukengngi isikku ri batué angkanna mapolo. Maittani dé' umarasa saléwangeng; uwallupaini pékkugiwi pappénedding asennangengngé. Dé'na uwappunnai ataromporeng, lennye'ni paddennuwakku ri Puwangnge. Pikkiri'i asollérekku sibawa acilakakku samanna manré racung iya mapaié. Matteru-terui upikkiri gau'éro, angkanna tattenre batékku. Namuni makkuwaro tokkongngi paimeng paddennuwakku, wettunna uwéngngerang gau'éwé: Pammaséna Puwangnge mannennungengngi, dé' naengka nacappu pammasé-Na, tuli barui tungke' esso tongeng, matinulu senna'i Puwangnge! Puwangnge iyanaritu waramparakku séddi-séddié. Rimakkuwannanaro, mamménasaka ri Aléna. Makessingngi Puwangnge lao ri tau iya maddennuwangngé ri Aléna, sibawa lao ri tau iya sappaéngngi. Jaji, makessinni mattajekki sibawa tennang narapi polé Puwangnge mabbéré pattulung; makessinni magguruki mancaji sabbara ri wettu malolota mupa. Wettunna Puwangnge mabbéré anrasa-rasang, sitinajaki tudang alé-alé sibawa mammekko. Leppessakki pakariyawai alé sibawa manyara, nasaba naullé engka mupa paddennuwang. Namuni rileppa'ki sibawa ripakatuna, sitinajai ritarima maneng iyaro. Saba' dé' nasampéyakki matu Puwangnge untu' mannennungeng. Puranana mabbéré anrasa-rasang maressé babuwasi, nasaba tette'i Namaséiki sibawa pammasé iya dé'é paggangkanna. Dé' nasibawangngi cenning ati leppessakki manrasa-rasa sibawa messé. Rékko tattenre'i nyawata ri laleng tahanangngé, rékko ateddéngekki ha' iya nabbéréyangngé Puwangnge, nasaba ripasibalékengngi adélékengngé, pastini naisseng Puwangnge sibawa najampangi. Rékko dé' napuwéloi Puwangnge séuwaé, pasti dé' aga-aga naullé pogau' tauwé untu' iyaro. Makessing sibawa maja napajoppai banna nasaba paréntana Puwangnge. Magi naharusu tauwé maddaréké rékko rihukkungngi nasaba dosa-dosana? “Madosaki sibawa maronta'ki lao ri Iko, oh Puwang, na dé' Muwabbéré paddampeng. Mulellukki sibawa Muwuno, tassubbui paressé babuwa-Mu ri laleng cai-Mu. Cai-Mu pada-padai ellung iya maumpe senna'é angkanna sempajatta dé' naulléi bettui. Puraki Mupancaji pada-pada warowoé ri pakkitanna sininna linoé. Napakatunaki sininna balitta sibawa nacawa-cawai; nakennaki acilakang sibawa ancurukeng, enrengngé tuwo ri laleng bahayaé sibawa amétaurengngé. Massolo'i uwai matakku pada-pada saloé nasaba ancuru'ni bangsaku. Maéloka teri temmappésau, narapi Iko, oh Puwang ri surugaé tajampangiki. Messéni atikku mitai totona sining makkunraié ri kotata. Pada-pada manu'-manu'é, nalellukka balié iya temmakkéalasangngé céccéka. Ri laleng bujung iya marakkoé nabuwakka tuwo-tuwo nainappa natébukka sibawa batu. Ménré'ni uwai lettu ri ulukku, naumappikkiri, – ‘Cappuni curitaku!’ Oh Puwang, mangobbika lao ri Iko, polé ri borina bujung iya maliyungngéro. Polé-Ko méwaiwi parakaraku, oh Puwang, purani Mupassalama nyawaku. Iko, Puwang, méngkalingaka ripakatuna; Muwisseng sininna rancanana mennang. Nabicaraka mennang puppu esso. Untu' cilakaika, mébbui mennang rancana majaé. Polé ri éléé lettu ri wennié, ripancajika addicawang. Hukkungngi mennang situru pangkaukenna, oh Puwang. Tanroiwi mennang, sibawa leppessangngi mennang monro ri laleng apettu-paddennuwangngé. Lellungngi sibawa paccappu manengngi mennang narapi mennang cappu risaring polé ri linoé.” Ulaweng iya lala'-lala'é mancaji massalawuni batu-batunna Bolana Allataala tattale'ni ri lalengngé. Riyolo sining ana'-ana'na Kota Sion pada-padai ulaweng iya mangke'é, iyakiya makekkuwangngé rigaukenni pada-pada kullang tanaé simata. Na indo' serigalaé pasusui ana'na, iyakiya mabecco senna'i umma'ku pada-pada manu'-manu' untaé ri padangngé. Ana'-ana'loloé dé' naripasusu, angkanna maté adekkang. Méllauwi inanré ana'-ana'é, iyakiya dé'gaga mabbéré. Mennang iya biyasaé péneddingiwi inanré iya malunra'é, sibawa tuwo ri laleng amaonarengngé, makkalolo'ni makkekkuwangngé untu' sappa inanré ri goppo warowoé, sibawa maté alupureng ri lalel-lalengngé. Purani rihukkung umma'ku lebbi matane'i naiya pabbanuwana Sodom iya ri laleng sikédé mataé ancuru'i nasaba limanna Allataala na dé'gaga tindakanna tolinoé. Riyolo mapaccingngi sining pamimpitta pada-pada ape iya maputé mapaccingngé. Tettongngi mennang sibawa mawatang, matakka sibawa madising. Iyakiya makkekkuwangngé malotonni rupanna mennang naiya attapangngé makkalénnekeng ri sining lalengngé na dé'gaga mulléi rupai mennang. Makkapuru olina mennang ri buku-bukunna, pada-pada aju iya marakkoé. Manrasa-rasai mennang sibawa maté taccéddé-céddé, nasaba dé' sises-siseng nappunnai inanré; iya maté ri ammusurengngé, lebbi maupe'i naiya maté alupureng. Masero senna iyaro abalaé iya kennaéngngi umma'ku angkanna sining indo' iya makacuwaé naséwongngi ana' riyaléna untu' pallise babuwa. Napallessui caina Puwangnge sibawa tunui Kota Sion narapi rata sibawa tanaé. Ri yelle'na arung-ngarungngé sibawa pabbanuwana linoé dé' muwi séddi iya mateppe'é makkedaé gerbang-gerbanna kota Yérusalém weddingngi nauttamaki balié. Iyakiya iyaro gau'é purani kajajiyang, nasaba dosana sining imangngé sibawa nabié. Purani mennang napatabbollong daraé, polé ri tau iya dé'é napasala. Pada-pada tau butaé sollé ri lalel-lalengngé makkuwaniro sining pamimpinna kota Yérusalém. Marota pakéyanna mennang nataro dara angkanna dé'gaga iya maéloé géssai mennang. Makkedai tauwé, “Laono polé kuwaé! Najisi'ko, aja' mugéssaki!” Nalaona mennang sibawa sollé polé ri bangsaé lao ri bangsaé, iyakiya dé' naripalalo mattette ri muwi niga. Dé'na najampangini Puwangnge umma'-Na; Aléna muto passara-sarangngi mennang sibawa mébbui imang-ngimangngé dé'na riyangke; sining pamimpingngé dé'gaga mamaséiwi. Posoni matatta makkita, tajengngi bantuwang iya teppudu-pudué polé. Maddennuwangiki pattulunna séddié bangsa, iya sitongennaé dé' naulléi mabbéré aga-aga. Dé' taulléi massu lao ri lalengngé, nasaba tuli nainti'ki balié. Macawé'ni accappurenna atuwotta, nasaba genne'ni esso-essota. Masitta senna sining pallellutta mabélai lebbi gatti naiya kuwajangngé. Nalellukki mennang ri bulué, sibawa madakki ri padang kessi'é. Natikkengngi mennang arung napiléna Puwangnge, tau iya tattuwangngé selaku pabbéré atuwong, sibawa pallinrung polé ri balié. Eh bangsa Edom sibawa Us, macawano, akkérennuno, ri wettu weddinna mupa! Polé towi matu abalaé ri iko sibawa nasaba mabo'ko mupallusu-lusui matu alému. Purani najoppai pahukkungenna Sion nasaba dosa-dosa iya napogau'é; makkekkuwangngé dé'na matu naleppessakki Puwangnge sibawa dé'na ritiwiki matu ri laleng appalirengngé. Iyakiya iko, éh Edom, nahukkukko matu Puwangnge. Ritimpa'i matu dosa-dosamu. Engngerangngi, oh Puwang, aga kajajiyangngé ri idi. Tiroki, sibawa itani atunatta. Sempé'ni waramparang manata ri limanna tau laingngé, sining bolata naonroini tau laingngé. Purani riyuno ambo'ta ri balié; makkekkuwangngé jandani indo'ta, sibawa béuki. Uwai rinungngé sibawa aju tunungngé harusu'ki melliwi. Pada-pada olokolo'é, ripassa majjama matane, posoki, iyakiya dé' nawérékki wettu mappésau. Laoki maréllau-éllau ri Maséré, méllauki inanré ri Asyur. Madosai toriyolota, dé'ni gaga makkekkuwangngé; iyakiya harusu'ki manrasa-rasa, nasaba dosa-dosana mennang. Naparéntaki sining tau iya dé'é nalebbi naiya ataé; dé'gaga makuwasa paleppe'ki polé ri mennang. Ri saliweng kota, mallamparengngi pabbunoé; riyancangngi nyawata wettutta sappa inanré. Manrasa-rasaki alupureng, angkanna mabbara olita pada-pada addellangengngé. Rigau' majariwi sining makkunrai Siongngé. Napéjariwi sining ana'daraé ri désa-désana Yéhuda. Ritikkengngi sining pamimpitta sibawa rigattung, sining tomacowata dé'na naripoji. Napassai mappallaung sining kallolota ri allélurengngé, ana'-ana' worowané ritenre'i ri éssang ajunna angkanna marenne. Sining tomatowaé dé'na naddeppungeng ri pintu gerbang kotaé, dé'na napaéngkalingana musi'é ri yelle'na kalloloé. Ateddéngenni asennangeng; tappinrani séré-séré mancaji abbaratang. Dé'ni gaga abangkaketta, macilakaki nasaba madosaki. Iyakiya Iko, oh Puwang, tette'ki makuwasa, mapparénta-Ko mannennungeng. Masa Musalaiki makkuwaro ittana? Makkulléga Muwallupaiki sillampé wettué? Oh Puwang, tiwiki lisu ri alé-Mu; maéloki lisu ri alé-Mu! Palisuni keadaatta pada-pada riyolo. Iyaré'ga purani Muwabbéyang siseng? Dé'ga paggangkanna cai-Mu lao ri idi? Congana nauwitai anginrajaé mangiri polé ri manorang. Siyanré-anré letté polé ri sitékké ellung iya battowa senna'é, sibawa langié ri seddéna macakka. Ri laleng billa iya mattappa-tappaéro paitani séuwa iya lala'-lala'é pada-pada gessaé. Ri tengnga-tengngana ellungngéro, uwitai eppa kérub iyanaritu anu tuwo iya sinrupaé tolino, iyakiya tungke-tungke mappunnaiwi eppa tappa sibawa duwappasang panni. Ajéna malempu sibawa lala' pada-pada gessa iya rigoso'é. Jari ajéna makkanukui pada-pada kanuku banténgngé. Ri lainnaé eppa tappana sibawa duwappasang panniro, mappunnai mennang lima tolino ri yawana tungke panni. Sipasang panni polé ri tungke mahlu'éro mallebba'i sibawa sigéssa cappa-cappa'na sibawa pannina mahlu iya laingngé, angkanna iya eppa mahlu'éro mébbu sulapa eppa. Rékko kédoi, tungke-tungke kédo mallempui liyolo tennabalé' tubunna. Tungke mahlu'éro mappunnai tappa iya mallail-laingengngé; tappa tolino ri yolo, tappa singa ri seddé atau, tappa banténg ri seddé abéyo, sibawa tappa kuwajang ri monri. Sipasang panni polé ri tungke mahlu'éro napallebba'i liyasé angkanna nagéssai cappa panni-pannina mahlu'é ri seddéna, na sipasang pannisi naleppe'i tongkoi tubunna. Tungke-tungke mahlu'éro mangoloi ri eppa tibang massamang, angkanna weddingngi mennang lao kégi-kégi napoji tennapaccenné tubunna. Ri tengnga sining mahlu'éro engka séuwa iya paitaé pada-pada bara api iyaré'ga sulo malluwa iya kédo-kédoé dé' naengka nappésau. Iyaro apié reppe-reppe sibawa patassiya billa-billa letté. Aléna iyaro mahlu'-mahlu'é kédoi lolésu siggatti billa'é. Wettunna upénessai iya manennaro, uwitani eppa padati ri tompo'na tanaé, séddi padati ri seddéna tungke mahlu'éro. Iya eppa padatiéro sirupai nenniya lala'-lala' pada-pada batu paramataé, sibawa tungke-tungke mappunnai séddi padati laingngé iya mappoloé ri tengnga-tengngana. Nanallalengiwi iyaro padati-padatié weddingngi mattuju ri eppa sulapa. Iyaro lébuna padatié pennoi sibawa mata. Ri tompo ulunna mahlu'-mahlu'éro mallebba'i séuwaé iya pada-padaé kubba polé ri kaca iya pawilo-wiloé. Ri yawana iyaro kubbaé tungke mahlu'éro pallebba'i sipasang pannina mattuju ri mahlu' ri seddéna, na pannina iya sipasangngéssi natongkoi tubunna. Rékko luttui mennang, uwéngkalinga sadda kampa pannina; oninna pada-pada uwai jompié, pada-pada akka ajéna pasukang tentara iya battowaé, pada-pada saddanna Allataala Iya Pommakuwasaé. Rékko mappésauwi luttu, naleppe'i sining pannina, iyakiya polé ri tompo'na kubbaé ri yasé'na ulunna mennang, paéngkalinga mupi oni sadda. Ri tompo'na kubbaéro engka séuwa iya sinrupaé kadéra arajang polé ri batu nilangngé, na ri yasé'na tudangngi séuwa iya paitaé pada-pada tolino. Bagiyang ri yasé'na maccahayai pada-pada gessaé ri tengngana luwa apié. Bagiyang ri yawana mattappai macakka, sibawa madduparupang balona pada-pada tarawué. Iyanaro tajang pawilo-wiloé iya mappaitangngéngngi ahadérékenna Puwangnge. iya makkedaé, “Eh tolino dé'é namannennungeng, tettonno. Macinnaka mabbicara sibawa iko.” Wettunna uwéngkalinga iyaro saddaé, muttama'ni Rohna Allataala ri laleng aléku, sibawa napatettokku. Nainappa uwéngkalingasi iyaro saddaé makkeda, “Eh tolino dé'é namannennungeng, Usuroko lao risining tau Israél iya maronta'é méwa-Ka. Mennanro tau maronta pada-padato néné-nénéna mennang. Matedde atiwi mennang sibawa dé' napakalebbi-Ka. Usuroko lao ri mennang untu' palettu'i aga Iyya, Puwang Allataala Iya Pommatanré powadai lao ri mennang, maéloiga mennang méngkalingai iyaré'ga dé'; iya pentingngé, harusu'i naisseng mennang makkedaé engka nabi ri tengnga-tengngana mennang. Iyakiya iko, éh tolino dé'é namannennungeng, aja' mumétau lao risining parronta'éro, iyaré'ga lao ri muwi aga iya napowadaé mennang. Naéwako matu mennang sibawa napakatunako, angkanna samannako tuwo ri yelle'na dokkéngngé. Namuni makkuwaro, aja' mumétau. Palettu manengngi pasek-Ku lao ri mennang, maéloiga mennang méngkalingai iyaré'ga dé'. Engngerangngi makkedaé mennanro sining parronta. Eh tolino dé'é namannennungeng, éngkalingai aga Upowada lao ri iko. Aja' muwaccowé maronta'to. Timpa'i témummu namuwanréi aga iya Uwéréngngékko.” Nauwitana lima iya riyajjulluwangngé lao ri iyya. Ri laleng limaéro engka kitta lulung, iya riyarokiriyé ri iya duwa leppanna. Nainappa natimpa iyaro kitta lulungngé nataroki kuwaro awatingengngé, addarékéngengngé sibawa addararingengngé. Makkedai Allataala, “Eh tolino dé'é namannennungeng, anréni iyaé kitta lulungngé, nainappa lao sibawa abbicarano lao risining tau Israélié.” Nainappa utimpa bawaku na Allataala mabbéréyangngi iyaro kitta lulungngé lao ri iyya kuwammengngi uwanréi. Adan-Na, “Eh tolino dé'é namannennungeng, anréni! Lisekini babuwamu sibawa kitta lulungngéwé.” Nainappa uwanré iyaro kitta'é na rasana macenning pada-pada cani'é. Makkedasi Allataala, “Eh tolino dé'é namannennungeng, laono risining tau Israélié namupalettu'i sininna pasek-Ku lao ri mennang. Iyakiya bangsa Israélié dé' namaélo méngkalingako, mala muwi Iyya dé'to nabati-batiwi mennang. Matedde ati maneng mennang sibawa napoji méwa. Makkekkuwangngé Uwébbuko matu mateddé ati sibawa mapecci pada-padato mennang. Upancajiko matu mattinetto pada-pada batu karangngé sibawa sittedde intangngé. Aja' mumétau lao risining parronta'éro.” Makkedai paimeng Allataala, “Eh tolino dé'é namannennungeng, pénessaiwi madécéd-décéng sibawa éngngerangngi sininna iya maéloé Upowada lao ri iko. Laono ri bangsamu iya engkaé ri laleng appalirengngéro, sibawa palettu'i aga Iyya, Puwang Iya Pommatanré napowada lao ri mennang, maéloiga mennang méngkalingai iyaré'ga dé'.” Nainappa naakkaka Rohna Allataala na ri munrikku uwéngkalingai sadda memmu iya makkedaé, “Pojiwi alebbirenna Puwangnge ri surugaé!” Uwéngkalingai oni pannina mahlu'-mahlu'éro iya sisullé sigéssa, sibawa oni maddukéku'na iyaro padati-padatié iya siccennoé oni tatténrénna tanaé. Nalokkaina akuwasanna Puwangnge sibawa masero, na wettukku riyakka sibawa ritiwi ri Roh-Na, mapaini pappénedding atikku sibawa mapella. Naulettu'na ri onrong naonroiyé sining toripalié ri Tél-Abib ri wirinna Salo Kébar. Pitungngesso ittana monroka kuwaro; takkamennye'ka nasaba sininna iya nappaé uwéngkalinga sibawa uwitaro. Labe'nana pitungngesso, makkedai Puwangnge lao ri iyya, “Eh tolino dé'é namannennungeng, Uwakkako mancaji panganrowanna bangsa Israélié. Palettu'i lao ri mennang papparéngngerang iya Uwabbéréyangngéwé. Rékko Uwappaissengengngi makkedaé séddi tomaja maté matu, iyakiya iko dé' muparéngngerangiwi kuwammengngi napinrai ampé-ampéna nasalama, namatéi matu selaku tau madosa mupa, na tanggung jawa' lao ri amaténna rituntu'i matu polé ri iko. Rékko muparéngngerangiwi tau majaéro na dé' namaélo mappésau pogau'i majaé, matéi matu selaku tau madosa, iyakiya iko salama'ko matu. Rékko séddié tau makessing mammulai pogau' dosa, na-Upasiyoloi sibawa bahayaé, matéi matu narékko dé' muparéngngerangiwi. Matéi matu nasaba dosa-dosana, na sining pangkaukenna iya makessingngé dé' Uwéngngerangngi matu. Iyakiya tanggung jawa' ri amaténnaro Utuntu'i matu polé ri iko. Rékko iyaro tau iya makessingngé muparéngngerangiwi kuwammengngi aja' napogau' dosa, nanaturusiwi pangajamu, dé' Uhukkungngi matu sibawa salama'ko matu.” Upéneddingiwi ahadérékenna Puwangnge sibawa uwéngkalingai makkeda lao ri iyya, “Oto'no namulao ri lompo'é. Kuwaro maélo-Ka mabbicara lao ri iko.” Naulaona ri ri lompo'é, na kuwaro uwitai tajangngé pawilo iya mappaitangngéngngi ahadérékenna Puwangnge pada-pada iya puraé uwita ri wirinna Salo Kébar. Nainappa mabuwang moppakka ri tompo'na tanaé, iyakiya nauttamakika Rohna Allataala sibawa patettokka. Makkedai Puwangnge lao ri iyya, “Lisuno sibawa akkurunno ri lalempolaé. Eh tolino dé'é namannennungeng, risiyoko matu sibawa tulu angkammu dé' muwulléi massu sibawa dé' muwulléi siruntu sibawa tauwé. Uwébbui matu lilamu matojo angkanna dé' muwulléi paréngngerangiwi bangsa parronta'éwé. Matti, rékko mabbicara-Ka lao ri ikosi sibawa palisui amampungemmu untu' makkeda-ada, harusu'ko palettu'i aga Iyya, Puwang Iya Pommatanré upowada lao ri mennang. Sibagiyang polé ri mennang méngkalingai matu, iyakiya sibagiyassi dé', nasaba mennang mémeng bangsa parronta.” Makkedai Allataala, “Eh tolino dé'é namannennungeng, alano séddi bata, palénne'i ri yolomu sibawa jorii ri tompo'na gambara'na kota Yérusalém. Nainappa mugambara séuwa akkeppungeng lao ri kotaéro, sibawa sining sépe'na, goppo-goppo tana, akkémang-akkémang sibawa pakkakkasa-pakkakkasa pattunrung ri mattulilinna témbo'na. Alano panci bessi sibawa angga'ni iyaro séuwa renring bessi; palénne'i iyaro pancié ri pallawangemmu sibawa kota Yérusalém. Nainappa angolono ri kotaéro samanna iko ritu keppungngi. Mancaji lambangngi matu iyaro untu' bangsa Israélié. Purairo, léwu titti liyatauno sibawa péneddingini pahukkungenna Yéhuda patappulo esso ittana, siesso napulambangngi sitaung pahukkungenna mennang. Itani akkeppungenna Yérusalém. Tanréyanni pajjagguru'mu lao ri kotaéro namupalettu'i pasek-Ku passalenna pahukkungenna mennang. Usiyoko matu angkammu dé' muwulléi pagilingngi tubummu polé ri yabéo lao ri atau iyaré'ga sibalé'na narapi maccappa iyaro akkeppungengngé. Makkekkuwangngé, alano gandong, cadduku, buwé cella, bénggali, wetteng sibawa gandong nenné. Pasicampuru manengngi iyaro namuwébbui roti. Iyanaro inanrému 390 esso ittana léwu titti liyabéyoro. Iyaro rotié harusu'i mubagé makkuwaro rupanna angkanna tungke esso banna muwanréi 230 geram. Dé' nawedding lebbi na iyaro. Uwai rénummu engkato atte'na, iyanaritu duwa cangkiri siesso. Ebbuno api sibawa tai tauwé selaku aju tununna. Pangganni rotimmu ri yasé'na apiéro sibawa anréi iyaro rotié ri yolona sininna tauwé.” Makkedai Puwangnge, “Makkuwaniro carana tau Israélié matti manréi inanré iya nattéyangngé hukkunna Musa, wettunna mennang Upali lao ri wanuwa-wanuwa laingngé.” Iyakiya mappébalika, “Aduh Puwang Iya Pommatanré! Mappammulai baiccu'ku lettu makkekkuwangngé, dé'pa naengka upanajisi'i aléku sibawa manré bakké olokolo iyaré'ga sésa inanréna olokolo masekkangngé. Dé' naengka uwanré inanré iya riyangga harangngé.” Namakkeda Allataala, “Makessinni, selaku passulléna tai tauwé, weddikko pakéi tai sapingngé untu' tunui rotimmu.” Nainappa makkeda paimeng, “Eh tolino dé'é namannennungeng, maélo-Ka paccappui pappassadiyang inanré ri Yérusalém. Nasibawang anennengeng sibawa abata-batang naatte'i matu sining tauwé inanré iya nanré mennang sibawa uwai iya naénungngé mennang. Pettu paddennuwangngi matu mennang nasaba acappurenni roti sibawa uwai, na angkanna matéi nasaba dosa-dosana mennang.” Makkedai Puwangnge, “Eh tolino dé'é namannennungeng, alano peddang iya matarengngé namupakéi iyaro untu' cukkuru'i gangka cappu janggo'mu sibawa gemme'mu. Nainappa mutimbang iyaro gemme'é sibawa timbangeng nainappa bagéi mancaji tellu bagiyang. Tawatellunna harusu'i mutunu ri tengnga-tengngana kotaéro maccappa'nana akkeppungengngé. Tawatellunnasi harusu'i mutetta sibawa peddammu namuwattulilingi towi kotaéro. Na tawatellunna iya paccappurengngé harusu'i muwassiyamporeng ri yelle'é, nainappa Ulellung sibawa peddak-Ku. Taroi céddé polé ri gemme'éro namudokoi ri laleng leppi jumbamu. Nainappa alasi céddé polé ri gemme'éro, aggenrungengngi ri laleng apié sibawa leppessangngi mangu. Polé kuwaro makkalolo'i matu apié lao ri sininna bangsa Israélié.” Makkedai Puwang Iya Pommatanré, “Itai, iyanaé Yérusalém. Iyaé kotaé Utaroi ri posina linoé, sibawa wanuwa-wanuwa laingngé ri mattulilinna. Iyakiya Yérusalém purani nasampéyang parénta-Ku na annessana lebbi majai naiya bangsa-bangsa laingngé, mala lebbi dé' namatinulu naiya wanuwa-wanuwaé ri mattulilinna. Najjalékkai Yérusalém parénta-parénta-Ku sibawa dé' namaélo turusiwi hukkung-hukkuk-Ku.” Makkedai Puwang Iya Pommatanré, “Eh Yérusalém, éngkalingai! Dé' muturusiwi parénta-parénta-Ku sibawa hukkung-hukkuk-Ku; lebbi matedde atiko naiya bangsa-bangsa laingngé ri mattulilimmu, sibawa pura maccowériwi ade-abiyasanna bangsa-bangsaéro. Na Iyya, Puwang Iya Pommatanré, pannessai makkedaé Iyya iyanaritu balimmu. Uhukkukko matu ri yolona bangsa-bangsa laingngé. Nasaba sininna pangkaukemmu iya Ucéccé, Uhukkungngi matu pabbanuwamu masero senna iya dé'éppa naengka Upogau'i sibawa dé'na Upogau'i matu paimeng. Nanréi matu tomatowaé ana' ri aléna sibawa ana'é nanréi matu tomatowanna. Makkuwaniro mennang Uhukkung matu, na iya tuwoé mupa Upassara-sarangngi lao ri sininna sulapa'é. Iyya iyanaritu Allataala iya tuwoé, Puwang Iya Pommatanré, na iyanaé adak-Ku: Nasaba purano carépaiwi Bola-Ku nasibawang sining pangkaukemmu iya majaé sibawa mappakaciddi-ciddi'é, Uwancuru'ko matu temmaddampeng. Tawatellunna pabbanuwamu maté matu nasaba sai enrengngé abala akkadéreng iya kennaéngngi kotaé. Tawatellunna Uwunoi matu sibawa peddang ri saliweng kota, sibawa tawatellunnasi Uwassiyamporeng matu lao ri sininna sulapa'é nenniya Ulellungngi matu sibawa peddang. Mupéneddingiwi matu aseronna caina sibawa ajjallo'-Ku narapi najinna-Ka. Kajajiyang manennaro, mateppe'ko matu makkedaé Iyya, Puwang, pura mabbicara lao ri iko nasaba macai-Ka lao ri atemmatinuluremmu. Mancajiko matu sésa-sésa ruttungeng simata sibawa bangsa-bangsaé ri mattulilimmu méllé-kéllé'ko matu; tungke tau iya laloé mabélaiko matu. Rékko macai-Ka sibawa majjamerru lao ri iko enrengngé hukkukko, sininna bangsaé ri mattulilimmu masélengngi matu. Naéllé'ko matu sibawa maja péneddinna mitako. Uwancuru'i matu pappassadiyang inanrému sibawa leppessangngi pabbanuwamu alupureng. Napéneddingiwi matu pesséna pappénedding malupué, pada-pada ana' pana matarengngé iya pabettué sibawa pabbinasaékko. Ri lainnaé abala akkadérengngé Upapolé towi matu saié, ajapperusengngé sibawa musué untu' mpunoi pabbanuwamu, enrengngé olokolo masekkangngé untu' mpunoi ana'-ana'na mennang. Iyya, Puwang, pura mabbicara.” Makkedai Puwangnge lao ri iyya, “Eh tolino dé'é namannennungeng, tironi sining buluna Israélié, namupalettu'i pasek-Ku passalenna pahukkungengngé untu' mennang. Suroi mennang méngkalingai sibawa pénessai aga Iyya, Puwang Iya Pommatanré upowada lao risining buluéro, makkuwatoro lao risining bulu-bulué, sining peppingngé nenniya sining lompo'é. Tongeng, kirikka matu peddang untu' mancuru'i onrong-ngonrong assompang barahalaé. Riruttungngi matu sining mézbana sibawa sining addupa-dupanna rireppa'i matu. Sininna tauwé kuwaro riyunoi matu ri yolona barahalana. Uwébbui matu sining ujuna tau Israélié tassiya-siya; sibawa buku-bukunna mennang Uwassiyamporengngi ri seddéna sining mézbaéro. Ripaccappui matu sininna kotana Israélié, sininna mézbana sibawa barahalana ancuru'i tassiya-siya, sining addupa-dupanna tessiyomporeng, sibawa sininna aga iya naébbué teddéngngi matu. Kégi-kégi engka tau riyuno, na mennang iya salama'é naissengngi matu makkedaé Iyya ritu Puwang. Sibagiyang céddé polé ri mennang Upaleppe'i matu polé ri abbunowangngéro iyakiya ripassara-sarangngi matu mennang ri yelle'na bangsa-bangsaé; kuwaniro mennang tuwo ri laleng appalirengngé. Nainappa naéngngerak-Ka matu mennang enrengngé najeppuinna makkedaé Iyya pahukkung sibawa pakatunai mennang saba' atinna mennang dé' namatinulu lao ri Iyya. Nasalaina mennang sibawa piléi barahalaé selaku passullé-Ku. Nainappa majai matu pappéneddinna mennang lao ri aléna muto mennang nasaba sininna ja sibawa atunang iya puraé napogau' mennang. Nanaissengngi matu mennang makkedaé Iyya ritu Puwang sibawa sininna papparéngngerang iya Uwabbéréyangngé tenniya pangancang kosong simata.” Makkedai Puwang Iya Pommatanré, “Messéno! Mpatinno! Terino sibawa masé nasaba sininna ja nenniya atunang iya puraé napogau' bangsa Israélié. Matéi matu mennang nasaba musu, akkadéreng sibawa sai. Napérasai manengngi matu ajjallo'na cai-Ku. Sining tau iya mabélaé ri appalirengngé nakennai matu lasa namaté; iya macawé'é matéi matu ri laleng musué, na sésana matéi matu alupureng. Tattale'i matu sining ujué ri yelle'na barahala-barahalaé sibawa ri seddéna sining mézbaé, tattale ri tungke bulu-bulu iya matanré, sibawa ri coppo'na tungke bulué, ri yawana tungke aju iya maworongngé sibawa ri tungke aju iya battowaé; riponcoki adaé, kégi-kégi mennang mattunu akkarobangeng untu' barahalana. Nanaissengngi matu tungke tau makkedaé Iyya ritu Puwang. Ya, Utanréyangngi matu limak-Ku sibawa mancuru'i wanuwanna mennang, angkanna mancaji masino-sino, mappammulai ri Padang kessi'é ri Yattang lettu ri kota Ribla ri manorang. Polé ri onrong-ngonrong iya naonroiyé tau Israélié, dé' muwi séddi ripassalama matu. Nanaissengngi matu sininna tauwé makkedaé Iyya ritu Puwang.” Mabbicarai Puwangnge lao ri iyya, “Eh tolino dé'é namannennungeng, Iyya, Puwang Iya Pommatanré, maélo powadai iyaé lao ri tana Israélié: Iyanaé paccappurenna curitana sininna wanuwaéwé!” Makkedai Puwangnge, “Eh Israélié, narapini makkekkuwangngé accappuremmu. Mupérasai matu cai-Ku. Uwadélékiko matu situru sibawa pangkaukemmu iya matunaé. Dé' uwamaséiwi matu iyaré'ga mabbéré paddampeng lao ri iko. Uhukkukko matu sibawa sininna atunang iya puraé mupogau'. Namuwissengngi matu makkedaé Iyya ritu Puwang.” Iyanaé iya napowadaé Puwang Iya Pommatanré lao ri bangsa Israélié, “Nakennako matu abala. Makkekkuwangngé maccappa manenni. Iyanaé accappuremmu. Dé'na gaga paddennuwanna ri alému. Maccappa manenni untu' alému, éh bangsa iya monroé ri tanaéwé. Makkekkuwangngé dé'na pésta-pésta risining mézbamu ri bulué, iya engkaé banna akacaungeng bawang. Dé'na namaitta namupéneddingiwi matu cai-Ku iya maseroé. Uwadélékiko situru sibawa pangkaukemmu. Uwale'i matu lao ri iko sininna pangkaukemmu iya matunaé. Dé' Uwamaséiwi matu iyaré'ga Uwaddampengekko. Uhukkukko matu situru sibawa sininna atunang iya puraé mupogau'. Namuwissengngi matu makkedaé Iyya ritu Puwang sibawa Iyya ritu hukkukko.” Narapini esso abalaé untu' bangsa Israélié. Sassai ajapparusengngé. Narapini coppo'na atempongngé. Abeccokengngé nassabariwi lebbi maéga ja. Sininna asugirengngé, arajangngé sibawa akalabbarenna mennang cappui matu dé' nabbaté. Masitta'i polé wettunna, macawé'ni essona! Pangellié sibawa pabbalu'é dé' aga-aga saro nalolongeng, saba' pahukkungenna Allataala nakennai sininna tauwé. Dé'gaga padangkang iya dé'é narapii lolongengngi paimeng aga iya puraé nabalu, saba' caina Allataala nakennai nigi-nigi. Tau majaé dé' nasalama matu. Moniwi tarompé'é na sininna tauwé sadiya-sadiyai. Iyakiya dé' muwi séddi tau joppa lao ri ammusurengngé, saba' caina Allataala kennai sininna tauwé. Risining lalenna kotaé engka musu, risining bolaé engka sai sibawa akkadéreng. Nigi-nigi engka ri saliweng kota matéi matu ri laleng musué, sibawa iya monroé ri kotaé nakennai matu lasa sibawa akkadéreng. Leppe'i matu sibagiyang nanalari lao ri bulué. Kuwaro pada-padai matu mennang jangang-jangang iya rirukkaé polé ri lompo-lompo'é; maddaréké manengngi matu nasaba dosa-dosana mennang. Tungke tauwé mancaji malemmai matu limanna sibawa kédo uttuna. Pakéi matu mennang kaing karung sibawa ténré sibatangngi matu tubunna. Rikellui matu ulunna mennang sibawa ripakasiri. Nabuwangngi matu ulawengngé sibawa péra'é ri lalengngé pada-pada warowoé, saba' ri esso napallessuna caina Puwangnge, iyaro ulawengngé sibawa péra'é dé' naulléi passalama'i mennang, mala purai napatassolla mennang ri laleng dosaé. Dé' naulléi mennang makkégunangngi untu' pajinnaiwi napessunna iyaré'ga untu' lisekiwi babuwana. Riyolo mabangka'i ri paramatana mennang iya magelloé, iyakiya nasaba napakéi mennang untu' mébbu barahala-barahala iya mappakaciddi-ciddi'é, naébbui Puwangnge waramparanna mennanro mancaji séuwa iya mappakatau-taué. Makkedai Puwangnge lao ri bangsa Israélié, “Uleppessangngi matu sining tau laingngé rampo'ko. Narampasa'i matu sining tau majaé waramparammu sibawa napanajisi'i. Dé' matu utinda rékko nasolangiwi Bola-Ku sibawa nacarépaiwi sining parampo'é. Mancaji kacauni sininna wanuwaé; kégi-kégi engka abbunowang sibawa abeccokeng. Upapoléi matu bangsa-bangsa iya kaminang majapperué untu' tudangiwi sining bolamu. Métaui matu sining tau porému iya baranié narékko Uleppessangngi iyaro bangsa-bangsaé mancuru'i onrong-ngonrong assompammu. Nakennai matu mennang amesséng sibawa apettu-paddennuwangeng, nainappa sappa adaméngeng, iyakiya dé' naruntu'i mennang. Abalaé sibawa karéba majaé poléi matu matteru-teru. Muwéllauwi matu kuwammengngi sining nabié maéloi mabboto, iyakiya dé' nawedding mennang. Makkuwatoro sining imangngé dé' nappunnai aga-aga untu' riyappagguruwang lao ri umma'é, sibawa sining pamimpingngé acappurenni pangaja. Mpatingngi matu arungngé, pettu paddennuwangngi ana' pattolaé sibawa ténréi matu ra'ya'é nataro tau. Uhukkukko matu situru sibawa sininna pangkaukemmu sibawa madélékiko pada-pada iko madélékiwi tau laingngé. Namuwissengngi matu makkedaé Iyya ritu Puwang.” Ri tanggala limana uleng enneng ri laleng taung maennengngé ri wettu appaliretta, sining pamimpinna sining tau Yéhuda ripalié laoni ri bolaku sibawa tudat-tudang sibawakka. Tennasenna-senna akuwasanna Puwang Iya Pommatanré makuwasaika. Congana nauwitai séuwa iya sinrupaé tolino. Polé ri benrénna liyawa paitai pada-pada apié, sibawa polé ri benrénna liyasé lala'-lala'i pada-pada gessa iya rigoso'é. Najjulluwanni séuwa iya sinrupaé lima, nainappa nakarappo gemme'ku. Nainappa ri laleng pakkitangngéro, riyakkaka matanré ri yelle'é ri Rohna Allataala naritiwi ri Bolana Puwangnge ri Yérusalém, ri sumpang muttama'é ri seddé ri lalenna ri tibang manorang. Kuwaro engka dato-dato barahala iya puraé paénré'i caina Allataala. Nainappa usabbing tajang pawiloé iya tanrangiyéngngi ahadérékenna Allataalana Israélié, pada-pada iya uwitaé wettukku engka ri wirinna Salo Kébar. Makkedai Allataala lao ri iyya, “Eh tolino dé'é namannennungeng, akkitano lao ri manorang.” Turuna, na ri seddéna mézba ri laleng muttama'é, uwitai barahala iya puraé paénré'i caina Allataalaro. Makkedai Allataala lao ri iyya, “Eh tolino dé'é namannennungeng, aga muwita mattengngang kajajiyang? Pénessaiwi sining pangkaukeng mappakaciddi-ciddi'é iya napogau'é tau Israélié, iya pabélaiyék-Ka polé ri Bola-Ku! Laono mai, Uwappaitangngi matu lao ri iko gau'-gau' iya lebbi matunaéppasi.” Nainappa Natiwika ri sumpang muttama'é ri seddé saliwenna Nanappaitangngi séddi sebbo ri témbo'é. Adan-Na, “Eh tolino dé'é namannennungeng, paloppoiwi sebbo'éwé.” Purana upogau', uwitani séddi sumpang. Adan-Na lao ri iyya, “Uttama'no sibawa itai sining pangkaukeng matunaé sibawa mappakaciddi-ciddi'é iya napogau'é mennang kuwaro.” Muttama'na nauwitai. Sining renrinna iyaro bili'é risobbi'i sibawa sininna rupanna ulaé sibawa olokolo harang laingngé, makkuwatoro madduparupang gambara barahala iya nasompaé sining tau Israélié. Pituppulo tau pamimping bangsa Israélié engka kuwaro, muttama'ni Yaazanya ana' Safan. Tungke-tungke makkatenning séddi addupa-dupang iya maddumpué. Makkedai Allataala lao ri iyya, “Eh tolino dé'é namannennungeng, muwitaga iya napogau'é sining pamimpinna Israélié sibawa mammekko-mekko? Massompai mennang ri laleng bili' iya pennoé barahala sibawa alasang makkedaé purani Usalai wanuwaéwé sibawa dé' uwitai pangkaukenna mennang.” Nainappa makkeda Puwangnge lao ri iyya, “Muwitai matu mennang pogau'i gau' iya lebbi mappakaciddi-ciddi'é.” Nanatiwika lao ri gerbang manoranna Bolana Puwangnge sibawa Nappaitangngi lao ri iyya sining makkunrai iya mpatingiyéngngi amaténna Déwa Tamus. Makkutanani Puwangnge ri iyya, “Eh tolino dé'é namannennungeng, muwitaga gau'éro? Maéga mupa iya lebbi mappakaciddi-ciddi'é.” Natiwika ri seddé ri lalenna Bolana Puwangnge. Ri seddéna sumpang muttama'é ri bili' mapaccingngé, ri pallawangenna mézbaé sibawa loronna, engka duwappulo lima tau. Nabbokoriwi mennang bili' mapaccingngé, nanasuju' mattuju ri alau sompai mata esso mompoé. Makkedai Puwangnge lao ri iyya, “Eh tolino dé'é namannennungeng, muwitaga iyaro? Iyaé sining tau Yéhudaé dé' najinnai rékko banna napogau'i gau'-gau' iya mappakaciddi-ciddi'éro sibawa pogau' tindakang-tindakang iya dé'é namaséiwi padanna rupa tau ri sininna wanuwaé. Mala napogau'i mennang sininnaro kuwaé, ri laleng Bola-Ku sibawa mébbu-Ka lebbi macaipasi. Itai pékkugi mennang pakatuna-Ka sibawa cara iya kaminang matunaéwé! Napéneddingiwi matu mennang cai-Ku iya maseroé! Dé' Uwaddampengengngi matu sibawa Uwampungiwi mennang. Namuni nagorangngi mennang sempajangngé maladde senna, dé' umaélo méngkalingai!” Nainappa uwéngkalinga Allataala mangobbi, “Laono kuwaé éh sining tau iya maéloé pajoppai pahukkungek-Ku ri kotaéwé. Tiwini sining senjatamu.” Massamang mompo enneng tau polé ri saliweng gerbang Manoranna Bolana Puwangnge, tungke-tungke tiwi senjata. Nasibawang mennang engka tau mappakéyang lénang iya tiwié paréwa maroki. Muttama'ni mennang sibawa tettong ri seddéna mézba gessaé. Nainappa cahaya iya pawiloé iya tanrangiyéngngi ahadérékenna Allataalana Israélié, mattappa polé risining kérub-é, nainappa létté polé ri onronna iya mammulangngéro lao ri pintu muttama'é Bolana Puwangnge. Nanaobbini Puwangnge tau iya mappakéyang lénangngéro, adan-Na, “Laono ri sininna sulapa'na kotaé sibawa tanrangiwi linrona sininna tau iya messé sibawa masussaé nasaba sininna pangkaukeng iya mappakaciddi-ciddi iya napogau'é ri kotaéro.” Uwéngkalingai Allataala makkeda lao risining tau laingngé, “Accowériwi lao ri sininna sulapa'na kotaé namuwunoi tungke tau temmaddampeng. Unoi sininna tau worowané sibawa makkunraié, macowa sibawa malolo, tomatowaé sibawa ana'-ana'é. Iyakiya aja' mugéssai muwi séddi tau iya engkaé tanrang ri linrona. Appammulano polé kuwaé, ri Bola-Kué.” Nanapammulaini tugasna mennang sibawa mpunoi sining pamimpinna Israélié iya mattengngangngé tettong ri Bolana Puwangnge. Makkedai Allataala lao ri mennang, “Rotakiwi Bola-Kué! Pennoiwi sining seddéna sibawa sining uju! Pammulaini” Nanapammulaini mennang mpunoi sining tauwé ri laleng kotaé. Ri laleng napogau'na iyaro abbunowangngé, engkaka kuwaro alé-aléku. Suju'na sibawa mangobbi, “ Puwang Iya Pommatanré, makkuwamaniga cai-Mu lao ri Yérusalém angkanna Muwunoi sininna tau iya engkaé mupa ri Israéliéwé?” Nappébali Allataala, “Sining tau Israélié sibawa Yéhuda purani pogau' dosa iya battowa senna'é. Pogau'i mennang abbunowang ri sininna onrongngé, sibawa Yérusalém nacarépaiwi sibawa ja. Napowadai mennang makkedaé Iyya, Puwang, salaiwi iyaé wanuwaé angkanna dé' naulléi mitai pangkaukenna. Dé' uwamaséiwi matu mennang. Upogau'i matu lao ri mennang aga iya napogau'é mennang lao ri tau laingngé.” Nainappa tau iya mappaké lénangngéro lisu sibawa laporo'i lao ri Puwangnge, adanna, “Sininna paréntana Puwang kajajiyanni.” Nainappa makkitaka lao ri kubba iya engkaé ri tompo ulunna sining kérub-éro, nauwitai séuwaé iya pada-padaé kadéra arajang polé ri batu nilangngé. Nainappa makkeda Allataala lao ri tau iya mappaké lénangngéro, “Uttama'no ri yelle'na padati-padati iya engkaé ri yawana sining kérub-éro, namuwala sikemmo bara api. Nainappa muwassiyamporeng iyaro baraé ri yasé'na kotaé.” Naturusini, naupénessaini. Wettunna muttama, iyaro sining kérub-é mattengngangngi tettong ri seddé yattanna Bolana Puwangnge. Sitékké ellung pennoiwi seddé lalenna sibawa sininna Bolana Puwangnge. Cahaya pawilo iya tanrangiyéngngi ahadérékenna Puwangnge mattappai polé risining kérub-éro sibawa létté ri sumpang muttama'é ri Bolana Puwangnge, angkanna seddéna mancaji macakka senna. Iyaro oni kampa pannina sining kérub-é riyéngkalingai lettu ri seddé saliweng, pada-pada saddanna Allataala Iya Pommakuwasaé. Puranana nasuro Puwangnge tau iya mappaké lénangngéro malai sikemmo bara api polé ri yelle'na padati-padatié ri yawana sining kérub-éro, muttama'ni iyaro tauwé sibawa tettong ri benrénna sala séddinna padati-padatiéro. Nainappa sala séddinna polé ri kérub-éro puttama'i limanna ri laleng api iya engkaé ri tengnga-tengngana mennang, mittéi siyagangngaré tékké bara, nanawéréngngi tau iya mappaké lénangngéro. Iyaro tauwé natarimani nainappa lao. Uwitani makkedaé ri yawana pannina tungke kérub-éro engka séuwa iya pada-padaé lima tolino. Narimakkuwannanaro iyaro sining kérub-é weddingngi mattuju lao ri iya eppa sulapa'é. Naulléi mennang lao kégi-kégi napoji mennang, tennagiling tubunna. Sininna tubunna, lekke'na, limanna, pannina sibawa padati-padatinnato pennoi sibawa mata. Uwéngkalingai makkedaé iyaro padati-padatié riteppui “talippuru”. Tungke kérub-éro mappunnaiwi eppa tappa iya silaingengngé. Tappa mammulangngé iyanaritu tappa banténg, iya maduwaé tappa tau, iya matellué tappa singa, sibawa iya maeppaé tappa kuwajang. Nainappa cahaya pawilo iya tanrangiyéngngi ahadérékenna Puwangnge salaiwi sumpang muttama'é Bolana Puwangnge sibawa létté ri yasé'na sining kérub-éro. Uwitai iyaro sining kérub-é pallebba'i pannina sibawa luttu salaiwi tanaé nainappa lao, nanaccowéto padati-padatinna. Nainappa mappésau mennang ri seddéna pintu gerbanna Bolana Puwangnge ri seddé alau, na cahaya pawiloé tette'i ri yasé'na mennang. Uwéngngeranni makkedaé iyanaro sining kérub iya uwitaé riyolo engka ri yawana Allataalana Israélié, ri wirinna Salo Kébar. Iyaro sining kérub-é tungke-tungke mappunnaiwi eppa tappa, duwappasang panni, sibawato séuwa iya pada-padaé lima tau ri yawana panni-panninaro. Tappana mennang sinrupa towi sibawa tappana sining kérub iya uwitaé ri wirinna Salo Kébar. Tungke-tungke joppai mallempu liyolo. Nainappa riyakkaka ri Rohna Allataala naritiwi lao ri pintu gerbang Alau ri Bolana Puwangnge. Kuwaniro uwita 25 tau, ri yelle'na engka duwa pamimpinna bangsaé, iyanaritu Yaazanya ana' Azur sibawa Pélaca ana' Bénaya. Makkedai Allataala lao ri iyya, “Eh tolino dé'é namannennungeng, iyanaé sining tau iya rancanaéngngi jaé ri kotaéwé sibawa mabbéré pangaja iya mappapusaé. Nainappa napennoika Rohna Puwangnge, na risuroka ri Puwangnge makkeda lao ri umma Israélié, “Eh bangsa Israélié, Uwisseng aga iya mupowadaé sibawa iya murancanaé. Makkuwamani égana tau pura muwuno, angkanna sining lalengngé ri kotaé pennoi uju. Rimakkuwannanaro, Iyya, Puwang Iya Pommatanré, makkeda lao ri iko: Mémeng, iyaé kotaé iyanaritu oring, iyakiya jukué ri lalenna tenniya iko, sangadinna ujuna sining tau iya puraé muwuno! Na iko Urukkako matu massu polé ri kotaéwé! Métaukoga ri peddangngé? Upapoléi matu tau iya tiwié peddang untu' gasako. Utiwiko massu polé ri kotaé sibawa Uwabbéréyang lao ri tau laingngé. Purani Upateppa pahukkungeng maté ri yasé'mu. Matéko matu ri laleng musué ri wanuwammu muto, namuwissengngi matu makkedaé Iyya'na Puwang. Jaji, dé' muamang matu ri laleng kotaéwé, dé' napada-pada jukué ri laleng séddié oring. Ulellukko matu sibawa Uhukkukko muwi kégako engka ri wanuwanna Israélié. Namuwissengngi matu makkedaé Iyya ritu Puwang sibawa Uhukkukko nasaba purai muwajjalékkai sining peraturak-Ku sibawa mujampaléllériwi sining parénta-Ku sibawa maccowériwi hukkung-hukkunna bangsa-bangsaé ri mattulilimmu.” Ri wettu upowadana mupa iyaro adaé, tappa menrung muni Pélaca namaté. Nausuju'na sibawa mangobbi, “Aduh Puwang Iya Pommatanré! Aga sininna sésana Israéliéwé maélo-Ko mpunoi?” Makkedasi Puwangnge lao ri iyya, “Eh tolino dé'é namannennungeng, iko sibawa silao-silaommu ri laleng appalirengngé mattengngang ribicara ri pabbanuwana Yérusalém. Adanna mennang, ‘Iyaro sining toripalié mabéla senna'i polé ri Yérusalém untu' massompa lao ri Puwangnge. Tana Israélié pura nabbéréyanni Puwangnge lao ri idi.’ Rimakkuwannanaro, palettu'i iyaé pasek-Ku lao ri silao-silaommu ri laleng appalirengngé, makkedaé Iyya ritu tiwii mennang mabéla lao ri yelle'na bangsa-bangsaé sibawa patassiyai mennang risining wanuwaéro. Iyakiya wettunna mennang engka kuwaro, Iyya ranrengngi matu mennang. Iyya, Puwang Iya Pommatanré, pannessai makkedaé Upaddeppungengngi matu mennang polé risining wanuwa ri onronna mennang tassiya, nainappa palisui tana Israélié lao ri mennang. Rékko lisui mennang, nabuwangngi matu mennang sininna barahala iya matunaé sibawa mappakaciddi-ciddi'é iya nalolongengngé mennang. Uwéréngngi matu mennang ati iya mabarué sibawa akkaleng iya mabarué. Atinna mennang iya sittedde'é batué Uwalai matu na-Usulléiwi sibawa ati iya mapatoé lao ri Iyya. Nanaturusiwi matu mennang sining peraturak-Ku sibawa matinului turusiwi sininna parénta-Ku. Mancajiwi matu mennang umma'-Ku sibawa Iyya mancaji Allataalana. Iyakiya sining tau iya pojiyéngngi massompa barahala-barahala iya matunaé sibawa mappakaciddi-ciddi'é Uhukkungngi matu nasaba ampé-ampéna iya majaéro.” Makkuwaniro adanna Puwang Iya Pommatanré. Iyaro sining kérub-é mammulani luttu na iyaro sining padatié maccowé toni. Cahaya pawiloé iya tanrangiyéngngi ahadérékenna Allataalana Israélié engkai ri yaséna mennang. Nainappa cahaya pawiloéro salaiwi Yérusalém sibawa létté ri bulu seddé alauna kotaéro. Ri laleng pakkitangngéro, naakkana Rohna Allataala nanapalisuka lao risining tau ripalié ri Babél. Nainappa teddénni iyaro pakkitangngé. Nainappa ucuritang sining tau ripalié sininna iya nappaitangngé Puwangnge lao ri iyya. Mabbicarasi Puwangnge lao ri iyya, adan-Na, “Eh tolino dé'é namannennungeng, monroko ri tengnga-tengngana bangsa parronta'é. Mappunnaiwi mennang mata, iyakiya dé' nakkita; mappunnai daucculing, iyakiya dé' namaréngkalinga, saba' napojiwi mennang maronta. Nainappa upogau' paréntana Puwangnge laowé ri iyya. Iyatoro essoé, essona mupa, upangujui barab-barakku ri laleng séddié paddoko, pada-pada iya biyasaé napogau' tomangungsié. Wettunna mammulani wenni, mébbuna sebbo sibawa limakku ri témbo'na bolaku, nainappa massu lalo ri sebbo'éro. Napénessai sininna tauwé, uwéssanni iyaro paddokoé ri salangkakku, nainappa joppaka. Pappa bajana mabbicarani Puwangnge lao ri iyya, adan-Na, “Eh tolino dé'é namannennungeng, bangsa Israél, iyaro bangsa parronta'é purani nakkutanang lao ri iko aga iya mattengngangngé mupogau'. Rimakkuwannanaro palettukengngi mennang aga Iyya, Puwang Iya Pommatanré upowada lao ri mennang. Iyaro pasek-Ku ripattujui lao ri arungngé ri Yérusalém, sibawa sininna pabbanuwana kotaéro. Pakatajangngi makkedaé aga iya mupogau'éro iyanaritu lambanna aga iya kajajiyangngé matu ri yasé'na mennang, iyanaritu: mancajiwi matu mennang tau ripali sibawa ritawang. Ri laleng pettanna wennié naéssangngi matu arunna mennang paddokona ri salangkanna nanajoppa. Mébbui matu sebbo sining tauwé ri témbo'é kuwammengngi naulléi massu. Natongkoi matu matanna angkanna dé' naitai laleng iya naolaé. Iyakiya Upallebba'i matu jala-Ku untu' tikkengngi. Nainappa Utiwi matu ri kota Babél, nakkuwaniro maté matu tennaitani paimeng iyaro kotaé. Sininna monroiyéngngi saorajaé, muttama'ni sining pappangajaé nenniya pangawal paribadinna arungngéro Upassara-sarangngi matu lao ri sininna sulapa'é. Ulellungngi matu mennang sibawa Uwunoi. Wettunna mennang Upassara-sarang lao ri tengnga-tengngana bangsa-bangsa laingngé ri wanuwa-wanuwa laingngé, naissengngi matu mennang makkedaé Iyya'na ritu Puwang. Sibagiyang céddé polé ri mennang Upassalama'i matu polé ri musué, polé ri akkadérengngé, sibawa saié, kuwammengngi ri tengnga-tengngana bangsa-bangsa laingngéro mainge'i matu mennang makkedaé purani mennang tinda matuna senna. Nanaakuiwi matu mennang makkedaé Iyya ritu Puwang.” Makkedai Puwangnge lao ri iyya, “Eh tolino dé'é namannennungeng, ténréno wettummu manré, mekke'no nataro tau wettummu ménung. Palettu'i lao risininna bangsaé aga Iyya, Puwang Iya Pommatanré upowada lao ri pabbanuwana Yérusalém iya monroé mupa ri tanana mennang. Ténréi matu mennang wettunna manré sibawa mekke'i nataro tau wettunna ménung. Mancaji makabuttui matu tanana mennang, saba' sininna tau iya monroé kuwaro matteru-terui majjalékkaiwi hukkungngé. Kota-kota iya makkekkuwangngé pennoi sibawa pabbanuwa riyancuru'i matu sibawa sining dare'na mancaji padang kessi'i. Nanaissenni mennang makkedaé iyya ritu Puwang.” Makkedai Puwangnge lao ri iyya, “Eh tolino dé'é namannennungeng, magi tau Israélié napojiwi teppu-teppui iyaé warékkadaé: ‘Tassulléi wettué, iyakiya teppudu-pudu kajajiyangngi botoé’? Nah, Palettu'i lao ri mennang makkedaé Iyya, Puwang Iya Pommatanré, mabbéréyangngi iyaé pasengngéwé: Iyaro warékkadaé uleddai matu, angkanna dé'na naripowadana paimeng ri Israélié. Selaku passulléna powadai lao ri mennang makkedaé narapini wettunna, na tungke boto kajajiyangngi matu. Ri Israélié dé'na matu gagana pakkitang iyaré'ga boto bellé. Iyya, Puwang Iya Pommatanré mabbicara matu lao ri bangsa Israélié, na sininna iya upowadaé pasti kajaiyangngi matu, tenripasoro-pasorona. Engkalingai, éh appang parronta'é! Ri wettu tuwomu Upogagau'i matu sininna iya Uparéngngerangiyékko. Iyya, Puwang Iya Pommatanré pura mabbicara.” Adanna Puwangnge lao ri iyya, “Eh tolino de'é namannennungeng, makkedai sining tau Israélié makkedaé pakkitang sibawa botomu maitta mupa nappa kajajiyang. Rimakkuwannanaro, powadangngi mennang makkedaé Iyya, Puwang Iya Pommatanré, makkeda: Sininna iya Upowadaé pasti kajajiyangngi matu, tenripasoro-pasoro. Iyya, Puwang Iya Pomatanré pura mabbicara!” Makkedai Puwangnge ri iyya, “Eh tolino dé'e namannennungeng, cellai nabi-nabinna Israélié iya powadaéngngi boto nakarang rialé. Suroi mennang méngkalingai adak-Ku.” Makkedai Puwang Iya Pommatanré, “Cilakani nabi-nabi iya madonggoéro! Wéréna nalolongengngi polé ri nippinna muto sibawa pakkitanna palsui simata. Eh Israélié, iyaro nabi-nabimmu dé'nakkéguna, pada-padai sining asu ale'é iya tuwoé ri tengnga-tengngana sésa-sésana kotaé. Dé' najagaiwi mennang onrong-ngonrong kégai sining témbo'na maruttung, sibawa dé'topa napédécéngiwi sining témbo'éro. Jaji, dé' nawedding riyattahangeng Israélié narékko poléi musué ri esso Iyya, Puwang polé pahukkung. Sining pakkitanna mennang belléi sibawa sining botona mennang banna belléi. Mangakui mennang tiwi paseng polé ri Iyya, padahal dé' naengka Usuroi mennang. Pékkugi makkullé mennang maddennuwangiwi botona mennanro kajajiyang matu? Uhukkukko matu, éh nabi-nabi iya powadaéngngi boto bellé sibawa nawa-nawaéngngi sining pakkitangngé! Dé'na naweddikko maccowé mabbéré apettung ri laleng addeppu-deppungenna umma'-Ku. Ricoré'i matu aseng-ngasemmu polé ri daftar appanna Israélié, sibawa dé' matu mulisuna ri tana assalemmu. Namuwissengngi matu makkedaé Iyya ritu Puwang Iya Pommatanré. Eh nabi-nabi bellé! Purani mupapusa umma'-Ku sibawa powadai makkedaé amang manenni sibawa makkapponi. Padahal dé' sises-siseng! Purani umma'-Ku patettong témbo' sibawa bata iya malogaé pasanna, nainappako polé sibawa puwaléiwi. Eh, nabi-nabi bellé, maruttungngi matu témbo'mu. Upateppai matu bosi rajaé. Iyaro témbo'é nakennai matu anginraja sibawa nageppai bosi ése angkanna maruttung, na tungke tauwé makkutanai matu aga akkégunana ripuwaléi iyaro témbo'é.’ ” Makkedai Puwang Iya Pommatanré, “Ri laleng cai-Ku, Upapoléi matu anginrajaé, bosi rajaé sibawa bosi ése'é untu' mancuru'i iyaro témbo'é. Manniya'-Ka untu' ruttungngi témbo iya mupuwaléiyéro, mancuru'i angkanna pandaménna mani monro bawang. Iyaro témbo'é pageppai matu sibawa mpuno manekko. Namuwissengngi matu makkedaé Iyya ritu Puwang. Iyaro témbo'é sibawa iko iya puraé puwaléiwi napérasai matu serona cai-Ku. Nainappa Upogau' matu lao ri iko makkedaé iyaro témbo'é teddénni sibawa lennye, pada-padai iko puwaléiwi, éh nabi-nabi bellé! Mubotoi makkedaé amangngi sibawa makkapponi Yérusalém, padahal dé' sises-siseng!” Makkuwaniro adanna Puwang Iya Pommatanré. Makkedai Puwangnge, “Makkekkuwangngé, éh tolino dé'é namannennungeng, pénessaiwi sining makkunrai iya mallaga' nabié ri yelle'na bangsamu. Bantai mennang, namupalettu'i aga Iyya, Puwang Iya Pommatanré upowada lao ri mennang: ‘Macilakano iko! Muwébburengngi sininna tauwé gellang-gellang sima' sibawa bowong-bowong makarame'é kuwammengngi tau iya pakééngngi naulléi makuwasaiwi atuwonna tau laingngé. Macinnako makuwasaiwi tuwo maténa umma'-Ku, na iyaro akuwasangngé mupakéi untu' asarommu muto. Pura-Ka mupakatuna ri yolona umma'-Ku banna untu' lolongeng siyagangngaré kemmona cadduku sibawa siyagangngaré batunna roti. Sining tau iya dé'é napasala, muwunoi na sining tau iya sipato'é maté muleppessangngi tuwo. Nainappa mubellé umma'-Ku sibawa mateppe'na mennang ri iko.’ ” Puwang Iya Pommatanré makkeda lao risining makkunrai iya mallaga' nabiéro, “Ucéccé mitai iyaro sining gellang sima' iya mupaké untu' makuwasaiwi tuwo maténa umma'-Ku. Usitta'i matu iyaro sining gellangngé polé ri paggellangemmu, sibawa sining tau iya mukuwasaiyé Upaleppe'i matu. Sining bowong makarame'mu Usapé'i matu, sibawa umma'-Ku Upalésséi matu polé ri pangaru majamu untu' mannennungeng. Namuwissengngi matu makkedaé Iyya ritu Puwang. Sining tau makessingngé iya dé'é namaélo Uwagaga, muwébbui marenni ati sibawa bellému. Sining tau majaé muwébbui maloppo atinna kuwammengngi natette madosa sibawa dé' naripassalama. Makkekkuwangngé maccappa'ni sining pakkitang bellé sibawa sining boto bellému. Upassalama'i umma'-Ku polé ri pangaru majamu. Namuwissengngi makkedaé Iyya ritu Puwang.” Siyagangngaré tau polé ri pamimping bangsana Israélié lao ri iyya untu' makkutanangngi élona Puwangnge. Namakkedana Puwangnge lao ri iyya, “Eh tolino dé'é namannennungeng, iyaé sining tauwé purani nappaddettangeng aléna lao ri barahalaé angkanna menrungngi mennang ri laleng dosaé. Masa maélo-Ka ritanai ri mennang? Rimakkuwannanaro, powadanni mennang makkedaé Iyya, Puwang Iya Pommatanré mappaseng makkuwaé, ‘Tungke tau Israél iya puraé mappaddettangengngi aléna lao ri barahalaé sibawa leppessangngi aléna mabuwang ri laleng dosaé, nainappa lao untu' méllau pangaja ri séddié nabi, aléku baliwi sibawa pappébali iya sitinajaé untu' sining barahalana iya maégaéro! Sininna barahalaéro purani napabélai umma'-Ku polé ri Iyya, iyakiya memmuwaré nasibawangngi pappébalik-Kuro lisui matu umma'-Ku ri Iyya.’ Paissengi towi tau Israélié makkedaé Iyya, Puwang Iya Pommatanré makkeda lao ri mennang, ‘Toba'no polé ri dosa-dosamu, namusalaiwi sining barahalamu iya mappakaciddi-ciddi'éro.’ Tungke tau Israélié iyaré'ga tau laing iya monroé ri yelle'na bangsa Israélié, iya mabélaiyék-Ka sibawa mappaddettangengngéngngi aléna lao ri barahalaé, nainappa méllau pangaja polé riséddié nabi, alé-Ku baliwi matu. Uwéwai matu sibawa pancajiwi conto untu' tau laingngé. Upassalai matu polé ri masaraka'na umma'-Ku, nanaissengngi umma'-Ku makkedaé Iyya ritu Puwang. Rékko séddié nabi purani ribengnguwang angkanna mabbéré pappébali iya salaé, Iyya ritu pura belléi. Iyya, Puwang Allataala Iya Pommatanré passalai matu polé risining tau Israélié. Muwi iyaro nabié iyaré'ga iya méllauéngngi pangajana, lolongengngi matu pahukkungeng iya padaé. Iya manennaro Upogau'i kuwammengngi tau Israélié aja'na namabélai-Ka sibawa aja'to napanajisi'i aléna sibawa dosa. Nanallalengiwi namancaji matu mennang umma'-Ku, na Iyya mancaji Allataalana mennang.” Iyya, Puwang Iya Pommatanré pura mabbicara. Makkedai Puwangnge lao ri iyya, “Eh tolino dé'é namannennungeng, rékko séuwaé wanuwa madosa sibawa dé' namatinulu lao ri Iyya, Uhukkungngi matu iyaro wanuwaé. Uwancuru'i matu passadiyaang inanréna, papolé abala akkadéreng sibawa mpunoi muwi tolinoé iyaré'ga olokolo'é. Namuni Nuh, Danél sibawa Ayub monro ri onrongngéro, akessingenna mennang sipattellu banna naulléi passalama'i nyawana muto mennang bawang. Iyya, Puwang Iya Pommatanré pura mabbicara. Weddissa jaji papolé-Ka sining olokolo masekkang untu' luruiwi pabbanuwana wanuwaéro, angkanna iyaro daéraé mancaji mabbahaya senna'i na dé'na muwi séddi tau barani molai. Numuni Nuh, Danél sibawa Ayub monro kuwaro, nasaba Iyya, Allataala iya tuwoé, Puwang Iya Pommatanré, dé' naulléi matu mennang passalama'i muwi niga, mala muwi ana'na mennang dé'to. Banna aléna mennang bawang iya salama'é, na iyaro wanuwaé mancaji padang kessi'i. Wedding jaji papolé-Ka musu ri wanuwaéro, sibawa Ukiringngi sining senjata poré untu' paccappui muwi tolinoé iyaré'ga olokolo'é. Namuni iya tellu tauwé onna monroi kuwaro, nasaba Iyya, Allataala iya tuwoé, Puwang Iya Pommatanré, dé' naulléi matu mennang passalama'i muwi niga, mala muwi ana'na dé'to. Banna aléna mennang bawang iya salama'é. Weddissa jaji papolé-Ka sai ri wanuwaéro, sibawa pallessui cai-Ku lao ri aléna angkanna muwi tolinoé iyaré'ga olokolo'é binasai matu. Namuni Nuh, Danél sibawa Ayub monro kuwaro, nasaba Iyya, Allataala iya tuwoé, Puwang Iya Pommatanré, dé' naulléi matu mennang passalama'i muwi niga, mala ana'na mennang dé'to. Banna aléna mennang bawang iya salama'é nasaba akessingenna.” Makkedai Puwang Iya Pommatanré, “Upateppai matu iya eppa pahukkungek-Ku iya kaminang maseroé ri yasé'na Yérusalém untu' paccappui muwi tolinoé iyaré'ga olokolo'é. Iyaro pahukkungengngé iyanaritu: musu, abala akkadéreng, olokolo masekkang sibawa sai. Akkalarapanna engka iya mullééngngi leppe sibawa passalama'i ana'-ana'na, pénessaiwi mennang narékko poléi mennang ri iko. Itai pékkugi jana mennang, namumainge matu makkedaé coco'i tindakak-Ku untu' hukkungngi Yérusalém. Namuwajeppui towi matu makkedaé sininna tindakak-Kuro mappunnaiwi alasang. Iyya Puwang Iya Pommatanré pura mabbicara.” Makkedai Puwangnge lao ri iyya, “Eh tolino dé'é namannennungeng, aga alebbinna aju anggoro'é naiya aju laingngé ri ale'é? Aga akessingenna pong anggoro'é polé ri ajukajung ri ale'é? Weddigga ajunna ripaké untu' mébbu séuwa? Weddigga ripancaji aggattungeng untu' sappéyangngi pakkakkasa'é? Dé'gaga akkégunana rilainnaé ripancaji aju tunung. Sibawa rékko cappuni iya duwa cappa'na ritunu, sibawa bagiyang tengngana mancaji osing toni, engkamupaga akkégunana? Dé'gaga! Mala dé'napa naritunu, dé' nawedding riyakkégunang. Apalagi puranana ritunu sibawa naangureng api!” Rimakkuwannanaro makkedai Puwang Iya Pommatanré, “Pada aju pong anggoro iya riyalaé polé ri ale'é sibawa ritunu, makkuwatoro Ugaukengngi matu pabbanuwana Yérusalém! Uhukkungngi matu mennang. Namuni leppe'ni mennang polé ri apié, iyakiya apito paccappui matu mennang. Namuwissengngi matu makkedaé Iyya ritu Puwang. Dé' namatinulu mennang lao ri Iyya, rimakkuwannanaro, Upancaji padang kessi'i iyaro tanaé. Iyya Puwang Iya Pommatanré pura mabbicara.” Mabbicarasi Puwangnge lao ri iyya, “Eh tolino dé'é namannennungeng, appaitangngi lao ri Yérusalém sining pangkaukeng matunaé iya puraé napogau'.” Puwang Iya Pommatanré suroka palettu'i iyaé pasengngé lao ri Yérusalém, “Eh Yérusalém, jajiko ri tana Kanaan. Ambo'mu tau Amori sibawa indo'mu tau Hét. Wettummu jaji dé'gaga rette'i lolomu, iyaré'ga cemméko, iyaré'ga talemmé'iko sibawa pejjé, iyaré'ga salémoriko sibawa kaing. Dé' muwi séddi tau marasa kasiyang lao ri iko angkanna maélo pogau'i gau'-gau'éro untu' alému. Wettummu jaji, dé'gaga sayakko, mala nabuwakko ri dare'é. Nainappa lalo-Ka sibawa mitako maggulicci ri laleng daramu, iyakiya dé' Uleppessakko maté. Nainappa Upappakéngekko waju iya risulangngé, sapatu polé ri bingkulang iya kaminang alusu'é, passiyo ulu polé ri kaing lénangngé sibawa jumba sabbé. Ubélo-béloiko sibawa paramata, ranté sibawa gellang. Uwérékko ciccing inge, angting-nganting sibawa passigera iya magelloé. Makkuwaniro mabbélo-bélo ulawekko sibawa péra'; pakéyammu riyébbui polé ri kaing lénangngé sibawa sabbé risulangngé. Weddikko manré roti polé ri tarigu iya kaminang makessingngé, nasibawang cani sibawa minnya zaitun. Agelloremmu dé' tongeng padanna sibawa mancaji ratuko. Sininna bangsaé pojiwi agelloremmu iya sukkuéro, na Iyya ritu pura mébbuko mamello. Iyya Puwang Iya Pommatanré pura mabbicara. Iyakiya muwakkégunang salai agelloremmu enrengngé abaurenna asemmu. Matinroko sibawa worowané muwi niga iya laloé. Sibagiyang polé ri pakéyammu muwakkégunangngi untu' bélo-béloiwi onrong assompang barahalamu. Mancaji cakkuribakko sibawa mabbéréyangngi tubummu lao ri tungke worowané. Polé ri paréwa ulaweng sibawa péra' iya Uwéréngngékko, muwébbui dato-dato tau worowané, nainappa mappangaddiko sibawa dato-dato'éro. Mupappakéiwi iyaro dato-dato'é pakéyang risulang iya puraé Uwérékko. Muwakkasuwiyangengngi lao ri mennang minnya zaitungngé sibawa dupa iya puraé mutarima polé ri Iyya. Uwérékko inanré polé ri tarigu iya kaminang makessingngé, cani sibawa minnya zaitun iya kaminang tuléngngé. Iyakiya iya manennaro muwakkasuwiyangengngi lao ri barahala-barahalaéro untu' pésennangiwi atinna mennang. Iyya Puwang Iya Pommatanré pura mabbicara. Nainappa muwakkasuwiyangeng ana'-ana'ta, worowané sibawa makkunraié, mancaji akkarobangeng lao ri barahala-barahalaé. Dé'paga nagenne makkedaé dé' mumatinulu lao ri Iyya? Harusu'iga muwalato ana'-ana'-Ku sibawa makkarobangengngi mennang lao ri barahala-barahalaé? Ri laleng atuwommu iya mappakaciddi-ciddi'é selaku cakkuribanro, muwi céddé dé'to muwéngngerangngi wettu malolomu riyolo, wettummu mallusu-lusu sibawa maggulicci ri laleng daramu muto.” Makkedai Puwang Iya Pommatanré, “Macilakano! Macilaka tongeng! Purani mupogau' sininna jaéro. Nainappani, ri tana lapanna kotaé sibawa ri tungke wirinna lalengngé patettokko onrong-ngonrong untu' massompa barahala sibawa maccakkuribang. Mucarépaiwi agelloremmu. Muwappéddarangngi tubummu lao ri tungke worowané iya laloé, sibawa dé' pajana malawekko. Maséré, si deppému iya battowaé napessunnaro, purani musilaongeng matinro. Muwattungkai maccakkuribang untu' mébbu-Ka macai. Makkekkuwangngé tinda'-Ka untu' hukkukko sibawa malai barakka iya puraé Uwérékko. Uwabbéréyakko lao risining tau Filistin iya céccéékko sibawa maciddi'é mitai ampému iya macarépaéro. Iyakiya dé'topa najinnako; rimakkuwannanaro mulellungngi tau Asyur-é. Mancajiko cakkuribanna mennang, iyakiya dé'topa mulolongeng asennangeng polé ri mennang. Nainappako mancaji cakkuribanna tau Babél-é, bangsa padangkangngéro. Iyakiya dé'to mennang naulléi mabbéré asennangeng lao ri iko.” Makkedai Puwang Iya Pommatanré, “Iya manennaro purai mupogau' pada-pada cakkuribang iya dé'é naissengngi masiri. Ri tana lapanna kotaé sibawa ri tungke lalengngé patettokko onrong-ngonrong untu' massompa barahala sibawa maccakkuribang. Iyakiya tenniyako cakkuribang biyasa iya parellué dowi. Pada-padako bainé iya bali'bellariyéngngi lakkainna sibawa kédo majaé sibawa worowané laingngé. Séddié cakkuribang tuli lolongengngi pakkamaja, iyakiya sibalé'na iko ritu mabbéré hadiya lao risining canrimmu, mala mupalécéi mennang sibawa dowi kuwammengngi napolé tulili untu' sibawakko matinro. Iko cakkuribang iya laingngé naiya lail-laingngé. Dé'gaga passako mancaji cakkuribang. Dé' nariwajako, mala alému makkamaja. Mémeng, laikko polé ri lail-laingngé.” Rimakkuwannanaro, sininna canrimmu riyolo Upaddeppungengngi matu, muwi iya mupojiyé iyaré'ga iya mucéccé. Tettongngi matu mennang mattulilingiko sibawa ludungngi sininna pakéyammu, angkanna naulléi mennang mitai tubummu iya mallusu-lusué. Uhukkukko matu nasaba alawengemmu sibawa abbunowang iya puraé mupogau'ro. Ri laleng cai-Ku Uhukkung matéko matu. Uwabbéréyakko matu lao risining canrimmuro, nanaruttungngi matu onrong-ngonrommu maccakkuribang sibawa massompa barahala. Sininna pakéyammu sibawa bélo-bélomu narampasa'i matu mennang, angkammu mallusu-lusu. Nasuroi matu mennang tau maégaé genrukko sibawa batu, nenniya tetta'i tubummu sibawa peddang. Natunui matu mennang sining bolamu sibawa suroi sining makkunraié sabbingngi pahukkungemmu. Makkuwaniro Upappaja matu alawengemmu. Dé'na mubagé-bagéi matu hadiyaé lao risining canrimmu. Purapiro nainappa soro matu cai-Ku, sibawa mancaji tennak-Ka matu paimeng. Dé'na Umacaina iyaré'ga mangémpuru. Uhukkukko matu nasaba dé' muwéngngerangngi pékkugi-Ka jampangiko wettummu malolo mupa. Muwébbu-Ka macai nasibawang sininna pangkaukemmu iya majaéro. Magi na sininna ampé-ampému iya mappakaciddi-ciddi'éro mutambai mupi sibawa alawengeng? Iyya Puwang Iya Pommatanré pura mabbicara.” Makkedai Puwangnge, “Eh Yérusalém, napakennaiko matu sining tauwé iyaé warékkadaé, ‘Pada-pada indo'na, makkuwatoro matu ana' makkunrainna.’ Mémeng, iko ritu ana' makkunrainna indo'mu. Nacéccéi lakkainna sibawa ana'-ana'na muto. Maéloko pada silessu-silessuremmu makkunraié iya céccéitongngi lakkainna sibawa ana'-ana'na. Iko sibawa sining silessuremmu, iyanaritu kota-kotaé ri seddému mappunnaiwi indo' tau Hét sibawa ambo' tau Amori. Kakamu iyanaritu Samaria ri manorang sibawa sininna désana. Sibawa anrimmu iyanaritu Sodom ri yattang silaong sininna désana. Najinnanoga maccowériwi baténa mennang sibawa turui pangkaukenna mennang iya mappakaciddi-ciddi'éro? Dé'pa! Dé'na nasiyaga ittana mala lebbi majapo naiya mennang. Nasaba Iyya, Allataala iya tuwoé, adanna Puwang Iya Pommatanré, silessuremmu Sodom silaong désa-désana dé'pa naengka nasijjako silaong désa-désamu. Sodom silaong désa-désana matempoi nasaba mappunnai maéga pappassadiyaang inanré enrengngé naulléi tuwo sibawa tennang nenniya damé. Iyakiya dé' mennang najampangiwi tau kasiyasié sibawa tau matunaé. Matempoi mennang sibawa matedde ati, enrengngé pogau'i gau'-gau' iya Ucéccé. Rimakkuwannanaro Uwancuru'i pada-pada iya puraé muwita. Makkedai Puwangnge lao ri Yérusalém, “Sodom sibawa Samaria enrengngé désa-désana mennang Upancajiwi matu madécéng paimeng. Purairo, nappako Upancaji madécétto. Nanallalengiwi mumasiri matu ri alému muto, na atunammu mappaitangngi matu lao ri silessu-silessuremmu temmaka kessinna totona mennang. Mennang sibawa désa-désana mancajiwi matu madécéng paimeng, makkuwatoro iko sibawa désa-désamu. Dé'ga naéngka mucawa-cawaiwi Sodom wettummu matempo mupa sibawa dé'napa napaisseng jamu? Makkekkuwangngé pada muko sibawa aléna; mancajiko addicawanna tau Edongngé, tau Filistingngé sibawa bali-balibolamu laingngé iya céccéékko. Harusu'ko manrasa-rasa selaku addimonrinna pangkaukemmu iya macarépaé sibawa mappakaciddi-ciddi'éro. Iyya Puwang pura mabbicara.” Makkedai Puwang Iya Pommatanré, “Ugaukekko matu situru sibawa pangkaukemmu, saba' purani muwassakkareng tanromu enrengngé majjalékkaiwi assijancik-Ku sibawa iko. Iyakiya Uwéngngerangngi matu assijancing iya puraé Uwébbu silaong iko ri wettu malolomu sibawa mébbu assijancing sibawa iko iya takkennaé lettu mannennungeng. Maréngngerakko matu lao risining pangkaukemmu sibawa masiri wettunna silessu-silessuremmu Upalisu ri iko. Upancajiwi matu pada-pada ana'-ana'mu, namuni gau'éro dé' nauttama ri laleng assijancik-Ku sibawa iko. Mébbu-Ka matu assijancing iya barué sibawa iko. Namuwissengngi makkedaé Iyya ritu Puwang. Uwaddampengengngi matu sininna asalammu, iyakiya dé' muwulléi mallupaiwi matu sibawa masiriko matu untu' powadai muwi aga. Iyya Puwang Iya Pommatanré pura mabbicara.” Makkedai Puwangnge lao ri iyya, “Eh tolino dé'é namannennungeng, curitai lao risining tau Israélié pakkalarapangngé, nainappa natiwi sibawa napalénne ri kota dangkangeng iya marowaé. Nainappa mala sipong tanet-taneng iya maloloé mupa polé ri tana Israélié, nanatanengngi ri dare macommo'é, iya dé'é naengka naakurangeng uwai. Iyaro tanet-tanengngé mancajiwi pong anggoro iya tuwoé mapancé iyakiya makkalolo'i malowang. Takké-takkéna mattujui lao ri kuwajangngéro, na ure-ure'na maddince'i masse ri laleng tanaé. Iyaro pong anggoro'é maworong senna'i. Wettuéro engka kuwajang battowa laingngé; malebba pannina sibawa maumpe bulunna. Nainappa iyaro pong anggoro'é pattujui ure-ure'na sibawa takké-takkéna lao ri kuwajang iya baruéro nasibawang paddennuwang kuwammengngi iyaro manu'-manu'é maéloi mabbéré lao ri aléna lebbi maéga uwai naiya engkaé ri dare'éro. Padahal iyaro pong anggoro'é tattanenni ri laleng tana iya macommo'é sibawa uwai iya maonaé, angkanna naulléi maddaung maworong, mabbuwa maéga, sibawa mancaji pong anggoro iya makessingngé. Naumakkutana Iyya, Puwang Iya Pommatanré: Weddigga iyaro pong anggoro'é tuwo sibawa mabbija? Dé'ga na kuwajang iya mammulangngé bébbui matu sibawa ure-ure'na, céppui buwana, reppéi takké-takkéna sibawa leppessangngi makelle? Dé' nariyapparelluwang maéga awatangeng iyaré'ga bangsa iya poré untu' reddu'i iyaro pongngé lettu ri ure-ure'na. Mémeng tattanenni masse, iyakiya naulléga tuwo matteru enrengngé mabbija-bija? Dé'ga namakelle matu rékko nairii anging Alau? Dé'ga namarakko matu ri onronna ritaneng?” Makkedai Puwangnge lao ri iyya, “Akkutanangngi lao risining parronta'éro, najeppuiga mennang betuwanna pakkalarapangngéro. Palettu'i lao ri mennang makkedaé poléni arung Babél ri Yérusalém, sibawa tiwii arung Yéhuda enrengngé tomarajana kotaéro lao ri Babél. Nainappa napilé sala séddinna kaluwargana arung Yéhudaro, mébbu assijancing sibawa aléna, sibawa suroi mattanro matinulu ri aléna. Natahanni arung Babél sining tau pentingngé, kuwammengngi iyaro akkarungeng Yéhuda dé'na natokkong paimeng, sibawa untu' tanggungngi makkedaé iyaro assijancingngé tonget-tongengngi rirupai. Iyakiya maronta'i arung Yéhuda enrengngé kiring suro lao ri Maséré untu' lolongeng anyarang sibawa tentara iya maégaé. Naulléga matu? Rileppessagga matu leppe? Dé' namakkullé massakkarengngi assijancingngé tenripakennai pahukkungeng! Nasaba Iyya, Allataala iya tuwoé, Puwang Iya Pommatanré, matéi matu arung Yéhuda ri Babél, nasaba purai nassakkareng tanrona sibawa majjalékkaiwi assijancinna sibawa arung Babél iya puraé patudangngi ri kadéra akkarungenna. Mala tentarana Maséré iya héba'éro, dé' naulléi tulungngi polé ri paggasana sining tau Babél iya mébbué goppo-goppo tana sibawa kali sépe-sépe untu' mpunoi maéga tau. Nasaba purai najjalékkai tanrona sibawa assijancinna, dé' naulléi matu paleppe'i aléna. Nasaba Iyya, Allataala iya tuwoé, Puwang Iya Pommatanré, rihukkungngi matu arung Yéhuda nasaba purai najjalékkai assijancinna sibawa arung Babél, padahal purani mattanro ri laleng asek-Ku untu' rupaiwi. Upallebba'i matu jalaé untu' tikkengngi. Utiwii matu lao ri Babél sibawa Uhukkung kuwaro, nasaba dé' namatinulu lao ri Iyya. Tentarana iya kaminang makessingngé matéi matu ri laleng ammusurengngé, naiya mullééngngi leppe tassiya-siyai matu lao ri sininna sulapa'é. Nanaissengngi umma'-Ku makkedaé Iyya, Puwang pura mabbicara.” Iyanaé iya napowadaé Puwang Iya Pommatanré, “Polé ri aju camara iya matanré, Utobbo'i matu colli'na nainappa Upolo séddi takkéna iya maloloé; Utanengngi takkéro ri bulu iya maccaloli'é ménre ri ellungngé. Uwaddincekengngi ri bulu iya kaminang matanré ri Israélié. Kuwaniro matu cura', sibawa powassélé buwa, nainappa mancaji aju camara iya magaggaé. Sininna rupanna manu'-manu'é massarangngi matu ri lalenna sibawa mallinrung ri yawana accinaungenna. Napahangngi matu sininna ajué ri wanuwaé makkedaé Iyya'na Puwang. Utubbangngi aju iya matanré; aju iya mapancé'é Uwébbui tuwo maccaloli. Aju iya manyilaé Uwébbui marakko; sibawa aju iya marakkoé Uwéréngngi cura' sibawa unga. Iyya, Puwang, pura mabbicara, sininna ada-adak-Ku kajajiyangngi matu.” Makkedai Puwangnge lao ri iyya, “Magi nariteppu matteru-teru iyaé warékkadaé ri Israélié? ‘Tomatowaé manré buwa anggoro iya makeccié, iyakiya ana'-ana'na iya mangélué isinna.’ Nasaba Iyya, Allataala iya tuwoé, Puwang Iya Pommatanré, iyaro warékkadaé dé'na naripowada ri Israélié. Nyawana tungke tau iyanaritu appunnangek-Ku, muwi nyawana tomatowaé iyaré'ga nyawana ana'na. Tau iya madosaé, aléna ritu maté matu. Ebara'na engka tau makessing, adélé sibawa malempu. Dé' nasompai barahalana tau Israélié iyaré'ga manréi akkarobangeng pakkasuwiyangngé ri onrong-ngonrong assompanna déwata-déwataé. Dé' naengka naganggui bainéna tau laingngé iyaré'ga silaong matinro makkunrai iya maddaraé. Dé' naengka napabengnguwang iyaré'ga marrampo. Barab-barang boro'na tau iya makkinrengngé ri aléna tuli napalisui. Tau iya alupurengngé napanréi sibawa tau iya dé'é nappunnai waju, nawéréngngi pakéyang. Dé' naengka nappainreng sibawa mabbunga. Dé' namaélo pogau' ja sibawa ri laleng tungke assasang mabbéréi apettung iya malempué. Napatoiwi parénta-Ku sibawa naturusiwi hukkung-hukkuk-Ku. Tau makkuwaéro ritu malempu sibawa tette'i matu tuwo. Iyya, Puwang Iya Pommatanré pura mabbicara. Iyakiya akkalarapanna iyaro tauwé mappunnaiwi ana' iya pojiyéngngi marrampo, mabbuno, sibawa pogau'i maéga ja laingngé iya dé'é naengka napogau'i ambo'na. Nanréi akkarobangeng pakkasuwiyangngé ri onrong-ngonrong assompanna déwata-déwataé. Naganggui sibawa naéwai siatinrong bainéna tau laingngé. Napoji belléi tau kasiyasié, marrampo, nasittaiwi barang boro'na tau iya makkinrengngé ri aléna. Laowi risining bola assompanna tau iya dé'é naissengngi Puwangnge sibawa sompai barahala iya mappakaciddi-ciddi'é. Mappainrengngi sibawa mabbunga. Aga tau makkuwaéro tuwoi matu? Dé'! Purani napogau' sininna pangkaukeng iya mappakaciddi-ciddi'éro, na matéi matu! Amaténna iyanaritu selaku addimonrinna pangkaukenna muto. Ebara'na tau iya mébbué maéga jaro mappunnai ana', na iyaro ana'é naitai sininna pangkaukenna ambo'na, iyakiya dé' naturui. Iyaro tauwé dé' namaélo sompai barahalana tau Israélié, iyaré'ga manré akkarobangeng pakkasuwiyangngé ri onrong-ngonrong assompanna déwata-déwataé. Dé' naengka naganggui bainéna tau laingngé, iyaré'ga tenre'i iyaré'ga rampo'i muwi niga. Barab-barang boro'na tau iya makkinrengngé ri aléna tuli napalisui. Tau iya alupurengngé napanréi sibawa tau iya dé'é nappunnai waju nawéréngngi pakéyang. Dé' naengka napogau'i majaé iyaré'ga mappainreng sibawa mabbunga. Turui lao ri hukkung-hukkuk-Ku sibawa mapatoi lao ri parénta-Ku. Iyaro ana'é dé' namaté nasaba dosa-dosana ambo'na, sangadinna tette'i tuwo. Sibalé'na, ambo'na iya pojiyéngngi pabengnguwang, marrampo sibawa pogau' ja laingngé, matéi matu nasaba dosa-dosa iya napogau'é muto. Iyakiya naullé engka tau makkutana magi na iyaro ana'é dé' naccowé tanggungngi addimonrinna dosa-dosana ambo'na. Pappébalinna iyanaritu, nasaba iyaro ana'é makessingngi sibawa malempui. Naturusiwi hukkung-hukkuk-Ku sibawa pogau'i sibawa matinulu, natette'i tuwo. Tau iya pogau'é dosa, aléna ritu maté matu. Dé' naharusu ana'é tanggungngi addimonrinna polé ri asalanna ambo'na; sibalé'na, ambo'é dé'to naharusu tanggungngi addimonrinna polé ri dosa-dosana ana'na. Tau iya makessingngé lolongengngi matu pamale iya makessingngé nasaba pangkaukenna iya makessingngé. Sibawa tau iya majaé manrasa-rasai matu polé ri jana. Rékko séddié tau maja dé'na napogau' dosana, sibawa mappammulani turusiwi hukkung-hukkuk-Ku, enrengngé pogau' pangkaukeng iya makessingngé sibawa tongengngé, dé' namaté matu. Riyaddampengeng manengngi matu dosana; tuwoi matu, nasaba napogau'i iya tongengngé. Mupikkiri'iga Iyya Puwang Iya Pommatanré masennang rékko matéi tau majaé? Dé' sises-siseng! Macinna-Ka kuwammengngi nasalaiwi dosa-dosana kuwammengngi natuwo. Iyakiya rékko séddié tau iya makessingngé dé'na napogau'i makessingngé, mala mappammulani pogau'i jaé sibawa sininna pangkaukeng mappakaciddi-ciddi iya biyasaé napogau' tau majaé, aga tette'i matu tuwo? Dé'! Polé risining pangkaukenna iya makessingngéro, dé' muwi séddi riyéngngeranna. Matéi matu nasaba pogau'i dosa sibawa dé' namatinulu lao ri Iyya. Naullé engka makkeda makkuwaé, ‘Kalirui tindakanna Puwangnge.’ Engkalingai. Eh tau Israélié! Kaliruiga tindakak-Ku? Iko ritu kaliru. Rékko tau iya makessingngé dé' napogau'ni makessingngénna, mala mammulani pogau'i majaé. matéi matu, nasaba ja iya puraé napogau'. Iyakiya rékko tau iya majaé dé'na napogau'i dosaénna sangadinna mammulani pogau'i pangkaukeng iya tongengngé sibawa makessingngé, salama'i matu nyawana. Purani namaingeki sininna pangkaukenna nainappa mappésau pogau' dosa. Nanallalengiro dé'na matu namaté, sangadinna tette'i tuwo. Na iko, éh sining tau Israélié, makkedako makkedaé kalirui iyaro tindakanna Puwangnge. Kaliruga tindakaku, éh Israélié? Dé'! Iko ritu kaliru!” Makkedai Puwang Iya Pommatanré, “Eh sining tau Israélié, Uwadélékiwi matu tungke tauwé situru sibawa pangkaukenna. Toba'no polé ri dosa-dosamu. Aja' muleppessangngi dosamu mancuru'i alému. Pappésauwi sininna ja iya mupogau'é sibawa leppessangngi ati nenniya pikkirammu mancaji mabaru. Magi naharusu'ko maté? Dé' Umassennang rékko séddié tau matéi. Salaini dosa-dosamu kuwammengngi mutette tuwo. Iyya Puwang Iya Pommatanré pura mabbicara.” Allataala suroka puwélongngi iyaé élong mpatingngé untu' duwa tau ana' pattolana Israélié: Samannai indo'mu singa komba iya héba'é sibawa dé'é padanna. Napawekke'i ana'-ana'na ri yelle'na singa-singa poré. Napaggurui sala séddinna ana'na sibawa napaggurui sappa anré. Namancajina singa battowa pattikkeng sibawa pakkanré tau. Bangsa-bangsa iya méngkalingaéngngi passalenna aléna maddeppungeng untu' tikkengngi. Ripalaiwi kalebbong naritawang, nainappa riyassarénréngeng lao ri Maséré sibawa pakkadak-kadang. Siya-siyai indo'na tajengngi ana'na; nainappa naisseng makkedaé teddénni paddennuwanna. Nanalatini ana'na laingngé mancaji singa masekkang sibawa poré. Iyaro ana' singaé mancaji battowani nenniya siwollompollong sibawa singa-singa laingngé. Magguruni sappa inanré, sibawa mancaji pakkanré tau towi. Naleppoi sining bénténgngé, nasolangiwi sining kotaé. Métau manenni pabbanuwana wanuwaé méngkalingai angngaungenna iya maddalenrungngé. Iyakiya bangsa-bangsaé polé ri daéra mattulilinna katulungngi polé kégi-kégi. Pallebba'i mennang jala untu' tikkengngi, natajjebba'na ri laleng siyo-siyona mennang. Riputtama'ni ri laleng urungeng singaé nainappa ritiwi ri wanuwa Babél, mangolo ri arungngé. Rijagai senna'i kuwammengngi aja' napaéngkalingana angngaunna ri tompo'na sining bulu-buluna Israél iya matanré. Indo'mu samannai pong anggoro magello iya tuwoé ri dare macawé'é ri ana' saloé. Mancaji maworongngi sibawa mabbuwa saba' tabbollompollongngi uwai kuwaro. Masse'i takkéna, dé' namagampang ripolo sitinaja ripancaji tekkeng akkarungeng. Coppo'na matanré maccaloli narapi ellungngé. Nabengngari sininna tauwé saba' matanréi sibawa maworong daunna. Iyakiya rireddu'i ri sining lima iya macaié, nainappa riyaggeppuwang ri tanaé. Mangirii anging Alaué, rakkoiwi buwana iya manyilaé. Poloi takkéna, mancaji marakko nainappa ritunu. Makkekkuwangngé ritanenni ri padang kessi'é, ri tana makabuttué sibawa dé'é nakkuwai. Iyaro pong anggoro'é nalépe'i api makkalolo'é; takké sibawa buwana cappu ritunu. Takkéna makkekkuwangngé dé'na awatangenna; dé'na namakkullé ripancaji tekkeng akkarungeng. Iyanaro mpating iya makkolik-kolingngé napuwélong umma'é. Ri tanggala seppulona uleng lima, ri laleng taung mapitué wettu appaliretta, siyagangngaré tau pamimpinna Israélié lao ri iyya untu' méllauwi panunju'na Puwangnge. Tudannana mennang ri yoloku, uwéngkalingani Puwangnge makkeda lao ri iyya, “Eh tolino dé'é namannennungeng, abbicarano lao risining pamimpingngéro, namupowadai makkedaé Iyya, Puwang Iya Pommatanré makkeda makkuwaé, ‘Barani senna'ko méllau panunju polé ri Iyya! Nasaba Iyya, Allataala iya tuwoé, dé' Upojiwi riyéllauwi panunju ri iko! Iyya, Puwang Iya Pommatanré pura mabbicara.’ ” “Eh tolino dé'é namannennungeng, sadiyanoga madélékiwi mennang? Nah, pogau'ni! Paréngngerangiwi mennang sininna atunang iya puraé napogau' néné-nénéna. Palettu'i aga iya Upowadaéwé. Purani Upilé Israélié sibawa mattanro untu' mennang. Ri Maséré, Uwappaissengengngi aléku lao ri mennang enrengngé makkeda, ‘Iyya'na Puwang Allataalamu.’ Iyaro wettué mattanro-Ka maélo tiwii mennang massu polé ri Maséré mattuju ri wanuwa iya Upilé untu' mennang. Iyaro wanuwaé sugi sibawa macomo, tana iya kaminang makessingngé ri sininna linoé. Usuroi mennang mabbéyangngi dato-dato mappakaciddi-ciddi iya napojiéro mennang, sibawa Uwattéyangngi mennang panajisi'i aléna sibawa massompa barahala-barahala polé ri Maséré, saba' Iyya ritu Puwang Allataalana mennang. Iyakiya naéwa-Ka mennang sibawa dé' namaélo méngkalinga-Ka. Dé' namaélo mennang buwangngi dato-dato iya mappakaciddi-ciddi'éro sibawa dé'to namaélo mappésau sompai barahala-barahalana Maséré. Wettunna mennang kuwa mupiro, sadiyana maélo leppessangngi cai-Ku lao ri mennang. Iyakiya dé' Upogau'i, kuwammengngi aja' naripakatuna asek-Ku ri bangsa-bangsaé ri onronna mennang engka. Saba' ri yolona bangsa-bangsaéro, purani Uwappallebbangeng makkedaé Utiwii matu bangsa Israélié massu polé ri Maséré. Na-Utiwini mennang massu polé ri Maséré mattuju ri padang kessi'é. Kuwaniro Uwéréng mennang sining parénta-Ku sibawa Upagguruwangngi hukkung-hukkuk-Ku iya harusu'é naturusi mennang, saba' tau iya turusiyéngngi tette'i matu tuwo. Usuroi mennang pakalebbii esso Saba'é selaku tanrang assijancik-Ku sibawa mennang, untu' paréngngerangiwi mennang makkedaé Iyya Puwang, pura pallaingngi mennang untu' alé-Ku. Iyakiya ri padang kessi'éttonaro naéwa-Ka mennang. Najjalékkaiwi mennang parénta-parénta-Ku, sibawa sampéyangngi hukkung-hukkuk-Ku iya tanggungngéngngi makkedaé tau iya turusiyéngngi tette'i tuwo. Nacarépai senna'i mennang esso Saba'é. Rimakkuwannanaro, ri padang kessi'éro sadiyana maélo-Ka malleppessangngi ajjallo'na cai-Ku lao ri mennang sibawa pabbinasai mennang. Iyakiya dé' Upogau'i nasaba alebbirenna asek-Ku, kuwammengngi aja' naripakatuna asek-Ku ri bangsa-bangsa iya mitaék-Ka tiwii Israélié massu polé ri Maséré. Ri padang kessi'éttonaro mangancak-Ka makkedaé bangsa Israélié dé' Utiwii matu muttama ri tana iya puraé Upassadiya untu' mennang, tana iya sugié sibawa macommo nenniya iya kaminang makessingngé ri sininna linoé. Iyaro ancamangngé Upowadai nasaba dé' najampangiwi mennang sining parénta-Ku, najjalékkaiwi sining hukkuk-Ku sibawa napanajisi'i esso Saba'é. Lebbi napojiwi mennang sompai barahala-barahalana. Iyakiya rimunri Uwamaséiwi mennang, angkanna dé' najaji Uwuno mennang ri padang kessi'éro. Sibalé'na sining tau maloloé ri yelle'na mennang, Upangajariwi makkuwaé, ‘Aja' muwaccowériwi sining peraturang iya naébbué néné-nénému. Aja' muturui abiyasanna mennang sibawa aja'to mupanajisi'i alému sibawa sompai sining barahalana. Iyya ritu Puwang Allataalamu. Turusiwi hukkung-hukkung sibawa parénta-parénta-Ku. Pakalebbii esso Saba'é kuwammengngi namancaji tanrang assijancing ri Iyya sibawa iko, untu' paréngngerangiko makkedaé Iyya ritu Puwang Allataalamu.’ Iyakiya iyaro assossoreng maloloé dé'to naturu lao ri Iyya. Najjalékkaiwi mennang hukkung-hukkuk-Ku sibawa dé' najampangiwi parénta-parénta-Ku, iya tanggungngéngngi makkedaé tau iya turusiyéngngi tette'i tuwo. Narotakiwi mennang esso Saba'é. Rimakkuwannanaro sadiyana untu' leppessangngi ajjallo'na cai-Ku lao ri mennang ri padang kessi'éro sibawa mpuno manengngi mennang. Iyakiya dé' Upogau'i kuwammengngi aja' naripakatuna asek-Ku ri bangsa-bangsa iya mitaék-Ka tiwii Israélié massu polé ri Maséré. Ri padang kessi'éro mattanro tok-Ka makkedaé Upassara-sarangngi matu mennang lao risininna linoé, nasaba dé' mennang najampangiwi parénta-parénta-Ku, najjalékkaiwi hukkung-hukkuk-Ku, napanajisi'i esso Saba'é, sibawa tette sompai déwata-déwata iya nasompaé néné-nénéna mennang. Nainappa Uwéréng mennang hukkung-hukkung iya dé'é namakessing sibawa parénta-parénta iya dé'é naulléi mabbéré atuwong. Uleppessangngi mennang panajisi'i aléna sibawa sining akkarobangenna muto, mala ana'-ana' worowanéna mennang iya macowaé nakkarobangengngi mennang. Nasibawang caraéro Uhukkungngi mennang kuwammengngi naissengngi mennang makkedaé Iyya ritu Puwang. Nah, tolino dé'é namannennungeng, palettu'i lao ri tau Israélié, aga Iyya Puwang Iya Pommatanré upowada lao ri mennang: Iyaé conto laing iya mappaitangngéngngi pékkugi néné-nénému pakatuna-Ka sibawa dé' namatinulu lao ri Iyya. Utiwii mennang lao ri tana iya puraé Uwajjanciyang lao ri mennang. Wettunna naita mennang sining bulu-bulu iya matanré sibawa ajukajung iya maworongngé, makkasuwiyangenni mennang akkarobangeng ri onrong-ngonrongngéro. Naébbu-Ka mennang macai nasaba sining akkarobangeng ritunué sibawa pakkasuwiyang anggoro'na. Makkutana-Ka lao ri mennang, ‘Onrong-ngonrong matanré aga iya mulokkaiyéro?’ Nasipongennaro iyaro onrong-ngonrongngé riteppui ‘Onrong-ngonrong matanré’. Jaji palettu'i lao ri tau Israélié aga Iyya, Puwang Allataala Iya Pommatanré upowada lao ri mennang, ‘Magi mupogau'i dosa-dosa pada-pada iya napogau'é néné-nénému? Pada-pada mennang, muwaccowéri towi sining barahala iya mappakaciddi-ciddi'éro. Mala lettu essoéwé mupanajisi' mupi alému sibawa tiwi pakkasuwiyang nenniya tunui ana'-ana'mu selaku akkarobangeng lao ri barahala-barahalaé. Nabarani mupoga méllau panunju polé ri Iyya? Nasaba Iyya, Allataala iya tuwoé, Puwang Iya Pommatanré, dé' Upalaloko méllau panunju polé ri Iyya. Macinnako pappadaiwi bangsa-bangsa laingngé sibawa pabbanuwana sining wanuwa laing iya sompaéngngi ajué sibawa batué. Iyakiya iyaro cinnamu dé' nakajajiyang matu.’ ” Nainappa Utiwiko lao ri ‘Padang kessi'na Bangsa-Bangsaé’. Kuwaniro Uwadélékiko matu sibawa siyolong tappa, pada-pada iya puraé Upogau' lao ri néné-nénému ri Padang kessi Sinai. Iyya Puwang Iya Pommatanré pura mabbicara. Ugaukekko matu sibawa matedde kuwammengngi muturusiwi assijancik-Ku. Sining parronta'é sibawa tomajaé Upaddesu'i matu polé ri tengnga-tengngamu. Utiwii matu massu polé ri wanuwa-wanuwa onronna mennang makkekkuwangngé monro sibawa dé' Upalaloi lisu ri tana Israélié. Namuwissengngi matu makkedaé Iyya Puwang.” Makkedai Puwang Iya Pommatanré, “Eh sining tau Israélié, makkekkuwangngé iko mani bawang. Patteru bawanni pogau' dosa sibawa sompai sining barahalamu! Iyakiya éngngerangngi makkedaé purairo harusu'ko turusi-Ka sibawa dé'na murotakiwi asek-Ku iya mapaccingngé sibawa tiwi pakkasuwiyang lao risining barahalamuro. Saba' ri tana Israélié, ri coppo bulu-Ku iya mapaccingngé, iko maneng, bangsa Israélié sompa-Ka matu. Kuwaniro masennak-Ka matu lao ri iko sibawa tarimai sining akkarobangemmu, sining pakkasuwiyammu iya kaminang makessingngé nenniya sining pabbérému iya ripallaingngé. Puramuna Utiwi massu polé ri wanuwa-wanuwa onrommu ripassara-sarang, Upaddeppungekko matu sibawa tarimai sininna akkarobangeng ritunummu. Nanaissengngi sininna bangsaé makkedaé Iyya'é Allataala Iya Pommapaccingngé. Narékko Utiwino lisu ri tana Israélié, tana iya Uwajjanciyangngé lao ri néné-nénému, muwissenni makkedaé Iyya ritu Puwang. Muwéngngeranni matu kuwaro sininna pangkaukeng mappakaciddi-ciddi iya puraé panajisi'i alému. Namaja matu péneddimmu méngngerangngi sininna jaéro. Narékko Ugaukenno makkuwaro nasaba alebbirenna asek-Ku, sibawa tenniya situru sibawa ampé-ampému iya majaé enrengngé pangkaukemmu iya majaé, muwissenni matu iko tau Israélié makkedaé Iyya ritu Puwang. Iyya Puwang Iya Pommatanré pura mabbicara.” Mabbicarai Puwangnge lao ri iyya, makkuwaé, “Eh tolino dé'é namannennungeng, akkitano lao ri tibang yattang. Amparengngi tana yattang sibawa bantai ale'na kuwaro. Suroi iyaro ale'é méngkalingai aga Iyya Puwang Iya Pommatanré upowada lao ri aléna. ‘Engkalingai! Upalluwa'i matu api iya tunuéngngi gangka cappu tungke aju iya engkaé ri alému, muwi marakkoé iyaré'ga iya manyilaé. Api iya malluwa-luwa'éro dé' nariyullé peddéi. Makkalolo'i matu polé ri yattang lao ri manorang, na sininna tauwé napéneddingiwi matu pellana. Namaingekiwi matu mennang makkedaé Iyya, Puwang pura palluwa'i iyaro apié, na dé' muwi séddi tau mulléi peddéiwi.’ ” Iyakiya iyya Yéhézkiél pannessai pappotane'ku sibawa makkeda, “ Puwang Iya Pommatanré, aja' musuroka powadai iyaro! Maddaréké manenni tauwé saba' upoji mabbicara sibawa pakkalarapang angkanna mawatang riyajeppui.” Makkedai Puwangnge lao ri iyya, adan-Na, “Eh tolino dé'é namannennungeng, tanroiwi Yérusalém. Tanroiwi onrong-ngonrong assompangngé kuwaro. Paréngngerangiwi tana Israélié, makkedaé Iyya, Puwang, makkeda makkuwaé, ‘Iyya'é balimmu. Urampui matu peddak-Ku sibawa mpuno manekko, iya majaé iyaré'ga makessingngé. Nasibawang peddak-Ku Uwéwai matu sininna tau polé manorangngé lettu ri yattang. Nanaissengngi matu sininna tauwé makkedaé Iyya, Puwang, rampui peddak-Ku sibawa dé'na Upariwanuwaiwi matu paimeng.’ ” “Eh tolino dé'é namannennungeng, maranno sibawa maddarékéno ri yolona sining tau Israélié, samanna pettu paddennuwakko. Rékko makkutanai mennang magi mumaddaréké, powadai makkedaé messéko nasaba biritta iya maéloé polé. Iyaro birittaé naébbui matu atinna mennang métau, kapé limanna mennang, sibawa ténré uttuna mennang, pettui sumange'na matu. Polé tongenni wettunna, na iya manennaro kajajiyangngi matu. Iyya Puwang Iya Pommatanré pura mabbicara.” Makkedai Puwangnge lao ri iyya, “Eh tolino dé'é namannennungeng, akkira-kirano! Paissengiwi sining tauwé makkedaé Iyya, Puwang makkeda makkuwaé, ‘Engka séuwa peddang, peddang iya riyasaé sibawa ritarengi. Ritarengiwi kuwammengngi weddingngi pauno, rilengngoriwi kuwammengngi naccilla. Untu' umma'-Ku dé'na gaga arennung saba' sininna papparéngngerangngé sibawa pahukkungengngé dé' nabati-batiwi mennang. Iyaro peddangngé riyasai kuwammengngi natuli sadiya ripaké nainappa riyabbéréyang lao ri séddié tau pabbuno. Eh tolino dé'é namannennungeng, mpatinno sibawa mangobbi! Saba' iyaro peddangngé sadiyai méwai umma'-Ku. Sining pamimpinna Israélié silaong sininna bangsaé rigajang matu ri peddangngéro angkanna maté. Peppé'ni aromu sibawa messé, saba' mattengngak-Ka mojiwi umma'-Ku, rékko dé' namaélo pakessingiwi ampé-ampéna, iya manennaro kajajiyangngi matu ri mennang.’ Nah, tolino dé'é namannennungeng, akkira-kirano. Pappaleppa'i limammu, selaku tanrang lao ri peddangngéro untu' mappammula mabbuno. Iyaro peddangngé mappakatau-tau senna. Naébbui bangsa-Ku teddéng abaraningenna sibawa menrung tabbuttu. Uwancangngi kotana mennang sibawa peddangngéro iya lala'-lala'é pada-pada billa'é, sibawa iya sadiyaé untu' mabbuno. Eh peddang iya matarengngé, attéppe'no liyatau sibawa liyabéyo, sibawa lao ri kégi-kégi situru cinnamu. Maélo tokka mappaleppa limato, nainappa soro cai-Ku. Iyya, Puwang pura mabbicara.” Mabbicarai Puwangnge lao ri iyya, adan-Na, Tettongngi arung Babél ri seddéna papeng pajjello lalengngéro. Untu' missengngi laleng kéga naola matu, méllauwi panunju polé ri barahala-barahalana, goso'i panaé sibawa paréssai atinna olokolo iya nappaé riyakkarobangeng. Annessana pana iya nalaé ri lima ataunna mattanrang Yérusalém! Iyaro bettuwanna makkedaé harusu'i arungngé gasai kota Yérusalém, gorangngi kelli ammusurengngé sibawa suroi tentarana susungngi paréwa palleppoé, pasangngi ri pintu-pintu gerbanna Yérusalém, goppo tana mancaji témbo pakkeppung sibawa kali sépe-sépe. Dé' namateppe pabbanuwana Yérusalém makkedaé rigasai mennang, nasaba purai mennang mébbu assijancing sibawa Babél. Iyakiya iyaro botoé paréngngerangiwi matu mennang makkedaé ritikkengngi matu mennang nasaba dosa-dosana mennang. Iyya, Puwang Iya Pommatanré makkeda lao ri mennang, ‘Kaissengenni dosa-dosamu sibawa sininna tauwé naissenni makkedaé pasalako. Paitai jamu ri tungke tindakammu. Makkekkuwangngé narapini wettunna rihukkukko sibawa Uwabbéréyakko matu lao ri balimmu.’ Sibawa lao ri arunna Israélié makkeda-Ka, ‘Eh arung iya majaé sibawa madorakaé! Wettu untu' pahukkungemmu iya paccappurengngé macawé'ni. Iyya, Puwang Iya Pommatanré pura mabbicara. Leppessanni passigera'mu sibawa lukkani passapummu. Makkekkuwangngé, tappinrani keadaangngé. Akkani tudangenna tau kasiyasié sibawa wéréngngi mennang akuwasang! Panonnoi sining panguwasaé polé ri alebbirenna! Iyaé kotaé Uwancuru sisengngi matu, angkanna kégi-kégi engka sésa-sésa ruttungeng. Iyakiya iyaro gau'é nappai kajajiyang narékko tau iya Upilé untu' hukkungngi kotaéwé poléni. Lao ri aléna ritu Uwabbéréyang iyaé kotaé.’ ” “Eh tolino dé'é namannennungeng, akkira-kirano! Appaissengenni lao ri tau Amongngé iya puraé pakatunai Israélié, makkedaé Iyya, Puwang Iya Pommatanré makkeda, ‘Sadiyani séddi peddang untu' mabbuno; iyaro peddangngé purani riyasa maccilla pada-pada billa'é, kuwammengngi nasadiya untu' mabbuno. Pakkitang iya muwitaé iyanaritu belléi, sibawa boto iya mupowadaé belléto. Majako sibawa madoraka, na wettu untu' pahukkungemmu iya paccappurengngé macawé'ni. Iyaro peddangngé natéppe'i matu ellommu. Eh tau Amon, pariwanuwaiwi paimeng peddammu! Uwadélékiko matu ri onrommu ripancaji sibawa rijajiyang. Upallessui matu ri yasé'mu cai-Ku iya malluwa-luwa'é. Sibawa Uwabbéréyakko matu lao risining tau mabecco iya tallatié untu' mappaccappu. Cappuko matu nanré api. Tabbollongngi matu daramu ri wanuwammu muto, na dé'gaga muwi séddi tau iya méngngerangngé mupo. Iyya Puwang pura mabbicara.’ ” Mabbicarai Puwangnge lao ri iyya, adan-Na, “Eh tolino dé'é namannennungeng, sadiyanoga madélékiwi kota iya pennoé sibawa pabbunoro. Appaitanni lao ri aléna sininna pangkaukenna iya mappakaciddi-ciddi'é.” Riyéllé-kéllé'ko ri wanuwa-wanuwa iya mabélaé sibawa macawé'é nasaba matteru-teruko majjalékkaiwi hukkungngé sibawa peraturangngé. Sininna pamimpinna Israélié nattuwangngi awatangeng aléna sibawa pogau'i abbunowang. Dé' muwi séddi pabbanuwamu pakalebbii tomatowanna. Mubengnguwangngi tau laingngé sibawa mala saro polé ri asussanna jandaé sibawa ana' béué. Mucarépaiwi onrong-ngonrong assompangngé lao ri Iyya sibawa dé' mubati-batiwi esso Saba'é. Ri yelle'na pabbanuwamu engka tau mappakiri-kiri iya pojiyéngngi pétenna'i tau laingngé kuwammengngi narihukkung maté. Engkato pojiwi manréi juku iya riyakkarobangengngé lao ri barahalaé. Engkato pojiwi mappangaddi. Engka godai sibawa siléwureng poroindo'na, makkunrai iya maddaraé, bainéna tau laingngé iyaré'ga manéttunna iyaré'ga anrinna polé ri laing indo'. Engkato mancaji pabbuno riwaja, pappabunga dowi sibawa para'i sining tau sibangsana. Nallupai manek-Ka mennang. Iyya Puwang Iya Pommatanré pura mabbicara. Iyakiya makkekkuwangngé maélo-Ka hantangngi sining parampo'mu sibawa pabbunomu. Barani mupoga iyaré'ga mawatang mupoga untu' makkai limammu pura-Kuna hukkukko? Iyya, Puwang Iya Pommatanré pura mabbicara sibawa Upogau'i matu aga pura Upowada. Upassara-sarangngi matu pabbanuwamu lao ri sininna wanuwaé sibawa bangsaé, sibawa Upappajai matu pangkaukemmu iya majaéro. Ripakatunako matu ri bangsa-bangsa laingngé, namuwissengngi matu makkedaé Iyya ritu Puwang.” Makkedai Puwangnge lao ri iyya, “Eh tolino dé'é namannennungeng, iyaro sining tau Israélié dé' nakkéguna lao ri Iyya. Padai mennang tai bessi campurangngé, padaénna tembagaé, tumeraé, bessié sibawa tumera lotongngé iya nasésaé puranana ripatuléng péra'é ri laleng apié. Ya, Upaddeppungengngi matu mennang ri Yérusalém, Upasangngi matu api cai-Ku ri yawana mennang, angkanna ancuru siseng. Pada-pada péra'é ripaccolo ri laleng apié, makkuwatoro mennang ripaccolo'i matu ri Yérusalém. Nanaissenni mennang makkedaé Iyya, Puwang, pura leppessangngi cai-Ku ri yasé'na mennang.” Mabbicarasi Puwangnge lao ri iyya, adan-Na, “Eh tolino dé'é namannennungeng, powadai lao ri tau Israélié makkedaé najisi'i tanana mennang, narimakkuwannanaro Umacai sibawa hukkungngi. Sining pamimpinna pada-padai singa iya mangngaungngé puranana natikkeng anréna. Naunoi mennang ra'ya'é, narampasa manengngi sininna waramparangngé sibawa asugireng iya naruntu'é mennang sibawa nassabariwi namaéga makkunrai mancaji janda. Sining imanna Israélié najjalékkaiwi hukkung-hukkuk-Ku sibawa carépaiwi barab-barang iya ripallaingngé untu' alé-Ku. Dé' napasilaingengngi mennang kéga hallala' sibawa kéga harang. Makkuwatoro mennang dé' napaggurui ra'ya'é untu' pasilaingengngi kéga mapaccing sibawa kéga najisi' situru peraturanna agamaé. Dé' mennang nabati-batiwi esso Saba'é. Nanallalengiwi ripakatuna-Ka ri bangsa Israélié. Pajaba-pajaba pamaréntana pada-padai serigala iya sapé-sapé'éngngi anréna. Mabbunoi mennang banna untu' sappa asarong. Sining nabié nasubbui iyaro dosa-dosaé; pada-padai mennang tau iya puwaléiyéngngi témbo' iya marota'é. Belléi sining pakkitanna mennang, makkuwatoro sining botona mennang. Mangakui mennang makkedaé paseng iya napalettu'é mennang iyanaritu natarimai mennang polé ri Puwang Iya Pommatanré, padahal dé' sises-siseng Umabbicara lao ri mennang. Sining tau sugié pabengnguwangngi sibawa marrampo. Nagaukengngi mennang tau kasiyasié sibawa siyélo-élona nenniya malai asarong polé ri tau laingngé. Ri yelle'na tau Israéliéro, sappa-Ka tau iya mullééngngi patettong témbo', iyaré'ga tettong ri onrong-ngonrong iya maruttungngé témbo'na untu' mattahangengngi iyaro wanuwaé narékko maélo-Ka mancuru'i ri laleng allumpana cai-Ku; iyakiya dé' muwi séddi tau uruntu. Rimakkuwannanaro Uleppessangngi cai-Ku makkekkuwangngé lao ri mennang, na pada-pada apié Upaccappui matu mennang nasaba sininna pangkaukenna. Iyya Puwang Iya Pommatanré pura mabbicara.” Mabbicarai Puwangnge lao ri iyya, adan-Na, “Eh tolino dé'é namannennungeng, engka duwa makkunrai, kaka maranri. Ri wettu malolona, monroi mennang ri Maséré. Kuwaniro mennang ateddéngeng aparawangenna, nainappa mennang mancaji cakkuribang. Iya macowaé riyasengngi Ohola; napulambangngi Samaria. Anrinna riyasengngi Oholiba; napulambangngi Yérusalém. Kawik-Ka sibawa mennang sibawa lolongeng ana' polé ri iya duwanna. Namuni Ohola mancajini bainé-Ku, tette'i maccakkuribang, sibawa maraja éloi tumaningiwi sining canrinna polé ri Asyur. Iyaro mennang iyanaritu tentara iya mappaké padaé cella collipao, sining arungngé sibawa parawira-parawira tanré; iya manenna parawira-parawira pasukang makkinnyarang iya magelloé tappana. Nasibawang sining tomarajaé ritu malawengngi Ohola. Nainappani nasaba battowa senna'i napessunna, napanajisi'i aléna sibawa sompai barahala-barahalana mennang. Matterui bawang maccakkuribang pada-pada iya napogau'é riyolo ri Maséré, kégai ateddéngeng aparawangenna. Sipongeng baiccu'na, purani riyatinroi sibawa rigaukeng selaku cakkuribang. Rimakkuwannanaro Uwabbéréngngi lao risining canrinna, sining tau Asyur iya nauddaningi senna'éro. Ripallusu-lusuiwi ri mennang sibawa makassara, nainappa riyuno sibawa peddang, sibawa rirampasa ana'-ana'na. Kégi-kégi iyaro totona mancaji buwa témunnai makkunraié. Oholiba, anrinna naitai kajajiyangngéro, iyakiya lebbi battowai napessunna pogau'i alawengengngé naiya Ohola. Nacinnai senna towi Oholiba iyaro sining tau Asyur-é, iyanaritu kallolo-kallolo magello polé ri pasukang makkinnyarangngé, sining arungngé sibawa pajaba tanré, enrengngé tentara iya mappaké sirupaé macella collipaoéro. Uwitani makkedaé iyaro Oholiba maja sipa tongeng, pada-padai kakana. Wettunna naita Oholiba iyaro gambara-gambara'é, poléni napessunna nanakiring undangeng lao ri parawira-parawiraéro ri Babél. Napoléna mennang namatinro sibawa aléna. Rirotakini ri mennang makkuwaro rupanna angkanna maciddi sibawa mennang. Purairo tennasubbu-subbuni maccakkuribang sibawa mappita-pitangngi aléna lao ri tau maégaé. Maciddi'na mitai aléna, pada-pada maciddi'-Ku lao ri kakana. Pédé maitta pédé biyasa malaweng, dé'gaga assilaingenna pada-pada ri wettu malolona wettunna maccakkuribang ri Maséré. Battowa senna'i napessunna lao ri worowané iya mallumpaé napessu cintana, sibawa iya napessu cintanaé silloppo napessunna anyarang laié. ( Eh Oholiba, macinnako makuwasaiwi appangadding iya mupogau'é ri wettu malolomu, wettunna tau Maséré'é siraga-ragako sibawa iko.)” Makkedai Puwang Iya Pommatanré, “Eh Oholiba, cauno sibawa sining canrimmu, iyakiya maélo-Ka pakiri-kiriwi mennang kuwammengngi namacai mennang lao ri iko sibawa keppukko. Upaddeppungengngi matu sibawa Utiwii lao ri iko sininna canrimmu polé ri Babél, Pékod, Soa, Koa, Asyur, enrengngé sining tau Kaldéaé. Utiwii lao ri iko sining kallolo magelloé iya matanré pangka'na, arung, pajaba penting sibawa parawira-parawira pasukang makkinnyarang. Nagasako matu polé manorang sibawa tentara iya battowaé, sibawa karéta-karéta musu nenniya karéta-karéta pattiwi bokong. Rilinrungiwi sibawa kaliyawo nenniya palo-palo baja, nakeppukko matu mennang. Uleppessangngi matu mennang madélékiko situru hukkung-hukkunna muto mennang. Nasaba macai-Ka lao ri iko, Uleppessangngi mennang gaukekko sibawa mabecco. Inge sibawa daucculimmu narette'i matu sibawa nalai ana'-ana'mu nanatunui tuwo-tuwo. Napallusu-lusuiko matu sibawa narampasa'i matu sining bélo-bélomu. Makkuwaniro Upappésau matu napessu cintamu sibawa sininna alawengeng iya mupogau'é sipongenna engkako ri Maséré. Dé'na mumamménasa matu lao ri barahalaé muwi kégi iyaré'ga maréngngerang lao ri Maséré.” Makkedai Puwang Iya Pommatanré, “Uwabbéréyakko matu lao risining tau mappakaciddi-ciddi iya mucéccé. Nasaba nabenciko mennang, sininna wassélé turuppuse'mu narampasa'i matu mennang. Risalaiko matu mallusu-lusu sibatang selaku cakkuribang sibawa mancaji akkita-itang tau maégaé. Napessu cintamu sibawa appangaddimmu ritu iya papolééngngi toto majaéwé lao ri iko. Mancaji cakkuribakko untu' bangsa-bangsaé, sibawa panajisi'i alému sibawa barahala-barahalana mennang. Muwaccowériwi baténa kakamu, narimakkuwannanaro Uhukkukko matu sibawa pahukkungeng iya padaé.” Makkedai Puwang Iya Pommatanré, “Harusu'i muwemme lise' cangkiri'na kakamu. Iyaro cangkiri'é battowa sibawa maliyung. Lise'na pennoi pangéllé, iya harusu'é mutanggung polé ri tungke tau. Makkedai Puwang Iya Pommatanré, “Nasaba pura-Ka muwallupai sibawa mabbokori-Ka, muwanrasa-rasaiwi matu addimonrinna napessu cintamu sibawa accakkuribangemmu.” Makkedai Puwangnge lao ri iyya, “Eh tolino dé'é namannennungeng, sadiyanoga madélékiwi Ohola sibawa Oholiba? Amparengngi mennang passalenna atunang iya puraé napogau'. Purani mennang pogau' alawengengngé sibawa abbunowangngé; purani mennang malaweng sibawa sining barahalaé nenniya mpunoi ana'-ana'-Ku iya najajiyangngé mennang. Iyaro ana'-ana'é purani mennang nakkasuwiyangeng lao risining barahalana. Na tenniya iyaro bawang. Napanajisi' towi mennang Bola-Ku sibawa esso Saba' iya puraé Upattette'ro. Ri esso naunona mennang ana'-ana'-Ku sibawa makkasuwiyangengngi lao risining barahalaé, iya duwa kaka maranriéro laowi ri Bola-Ku sibawa carépaiwi! Mala kiringngi mennang undangeng lao risining worowané ri wanuwa-wanuwa iya mabélaé, nanarupaiwi mennang iyaro undangangngé. Untu' duppaiwi iyaro sining topolé, iya duwa kaka maranriéro cemméi, pakéi cilla mata sibawa pakéi sining bélo-bélona. Nainappa tudang ri yasé'na onrong atinrong iya magelloé. Ri yolona engka méjang iya pennoé sibawa patala, muttama'ni dupaé sibawa minnya zaitun iya puraé Uwabbéréyang lao ri mennang. Polé ri saliweng riyéngkalingai sadda marukkana tau maégaé iya massennas-sennangngé. Iyaro sining tauwé purani riundang polé ri padang kessi'é. Puttama'i mennang gellang ri taiyyana kaka maranriéro, sibawa pasang passigera-passigera magello ri ulunna. Na pikkiri'-Ku, ‘Maélo mupiga iyaro sining tauwé macculé cinta sibawa sining cakkuribang iya makelle'énna nasaba alawengeng?’ Sisullé-sulléni sining tauwé lokkaiwi Ohola sibawa Oholiba, iya duwa cakkuribang iya matunaénnaro. Iyakiya, sining tau malempué madélékiwi matu kaka maranriéro nasaba alawengeng sibawa abbunowang, saba' mémeng pasalai mennang.” Makkedai Puwang Iya Pommatanré, “Obbino sigarembolang tau untu' sissai sibawa rampo'i iya duwa cakkuribangngéro. Leppessanni mennang rigenrung sibawa batu nenniya rigasa sibawa peddang. Leppessanni ana'-ana'na riyuno sibawa ritunu sining bolana. Upaccappui matu ajareng sipa' makkuwaéro ri sininna wanuwaé. Iyaro tindakak-Ku mancajiwi matu papparéngngerang untu' tungke makkunraié kuwammengngi aja' namalaweng pada-pada iya duwa kaka maranriéro. Eh Ohola sibawa Oholiba, Uhukkukko matu nasaba malawekko sibawa massompa barahala. Namuwissengngi matu makkedaé Iyya ritu Puwang Iya Pommatanré.” Ri tanggala seppulona, uleng seppulo, ri laleng taung maaséraé ri wettu appaliretta, makkedai Puwangnge lao ri iyya, “Eh tolino dé'é namannennungeng, okii tanggala'na essoéwé, nasaba iyaé essoé nappammula arung Babél keppungngi Yérusalém. Iyya, Puwang, mappunnai séuwa pakkalarapang untu' ripalettu lao ri umma'-Ku iya pojiyéngngi maronta: Tiri'i uwai ri laleng pancié nainappa mutaro ri yasé'na apié. Puttama'i jukué ri lalenna juku iya kaminang makessingngé; juku palip-palinna sibawa juku poppanna enrengngé buku-buku iya maégaé uta'na. Pakéi juku bimbala iya macommo'é sibawa maloloé tambaiwi pappassadiyaang aju tununna. Leppessangngi rédé sibawa maggalimpuwa uwaina séwongngi iyaro jukué silaong buku-bukunna.” Makkedai Puwang Iya Pommatanré, “Macilakai kota iya pennoé sibawa abbunowanro! Iyaro kotaé pada-padai oring taiseng iya dé'é naengka narigoso'. Juku iya engkaé ri lalenna ripassui tassikare-tassikare, narapi dé'na muwi séddi monro. Ri kotaéro kajajiyangngi abbunowangngé, iyakiya darana toriyunoé dé' natattiri ri tanaé, sangadinna ri yasé'na batu iya matedde'é, angkanna dé' nawedding ritébung. Iyaro daraé Uleppessangngi kuwaro angkanna weddingngi riita sibawa tuntu'i pakkabale.” Makkedai Puwang Iya Pommatanré, “Macilakai kota iya pennoé sibawa abbunowanro! Aléku matu susung aju untu' tunui. Tambaiwi ajunna! Papii apinna! Séwongngi jukuna! Buwangngi durona. Tunui buku-bukunna! Makkekkuwangngé taroi iyaro oring gessa iya kosongngéro ri yasé'na apié namuleppessangngi narapi macella mabbara. Matununnana taisenna, iyaro oringngé mapaccingngi paimeng situru peraturanna agamaé. Iyakiya dé' nateddéng maneng taisenna nanré api. Eh Yérusalém, sining tindakammu iya majaé purani napanajisi' alému. Purani Ucoba pépaccingiko, iyakiya dé'gaga akkégunana, saba' tette'ko najisi'. Dé' mumapaccing matu paimeng narapi Uleppessang cai-Ku ri yasé'mu. Iyya, Puwang Iya Pommatanré pura mabbicara. Narapini wettunna untu' alé-Ku tinda. Dé' Uwallupaiwi matu dosamu sibawa dé'to Umaddampeng iyaré'ga mamaséiko. Rihukkukko matu situru sibawa sininna pangkaukemmu. Iyya Puwang Iya Pommatanré pura mabbicara.” Makkedai Puwangnge lao ri iyya, “Eh tolino dé'é namannennungeng, temmusenna-sennai Uwalai matu tau iya kaminang mupojiyé. Iyakiya dé' naweddikko mpating sibawa teri, iyaré'ga leppessangngi uwai matammu mallénél-lénéng. Aja' narapii tassénge-sénge'mu paéngkalinga. Aja' mujoppa teppaké pattutu ulu, iyaré'ga teppaké pallapi ajé, selaku tau iya mabbarataé. Aja'to mututu'i rupammu, sibawa aja' muwanré roti abbaratang.” Mabbicaraka maélé lao ri bangsaéro na wenninna maténi bainéku. Bajana upogau'ni aga iya riyapparéntangngé lao ri iyya. Makkutanai ra'ya'é, “Magi napogau'i Bapa' makkuwaé? Aga bettuwanna untu' idi?” Nainappa makkedaka lao ri mennang, “ Puwangnge suroka palettu'i iyaé pasengngé lao ri iko: Muwabbangkakengngi awatangenna Bolana Puwangnge. Mupoji mitai sibawa lokkaiwi, iyakiya Puwangnge carépaiwi matu Bola-Na. Sibawa anggota-anggota kaluwargamu iya maloloé mupa, iya monroé ri Yérusalém, riyunoi matu ri laleng ammusurengngé. Nainappa mupogau'i matu pada-pada iya upogau'é makkekkuwangngéwé. Dé' mutongkoi matu rupammu iyaré'ga manré roti abbaratang. Dé' mujoppa matu teppaké pattutu ulu iyaré'ga pallapi ajé, dé' nawating iyaré'ga teri. Pédé maddoko-rokoko matu nasaba dosa-dosamu; maddarékéko matu séddié lao ri laingngé. Na iyya, Yéhézkiél mancaji matu conto untu' alému; mupogau'i matu pada-pada iya upogau'é makkekkungngéwé. Napowadai Puwangnge makkedaé narékko kajajiyangngi gau'éro, muwissengngi matu makkedaé Aléna ritu Puwang Iya Pommatanré.” Makkedai Puwangnge lao ri iyya, “Nah, tolino dé'é namannennungeng, Uwalai matu polé ri mennang Bola-Ku iya masse'éro, iya puraé mancaji abangkakenna sibawa asennangenna mennang, sibawa iya naitaé mennang sibawa nalokkai sibawa macenning ati. Nainappa uwala towi matu ana'-ana'na mennang. Ri esso upogau'na gau'éro, séddi tau iya mullé leppe polé ri abinasangngéro poléi matu, sibawa palettu'i iyaro karébaé lao ri iko. Ri essoéttoro mulléi matu mabbicara paimeng sibawa dé'na napépé. Nainappa mabbicarako matu sibawa tauwéro. Makkuwaniro mancajiko matu tanrang untu' mennang; nanaissengngi matu mennang makkedaé Iyya ritu Puwang.” Mabbicarai Puwangnge lao ri iyya, “Eh tolino dé'é namannennungeng, tanroiwi wanuwa Amon. Suroi bangsaéro méngkalingai aga Iyya, Puwang Iya Pommatanré Upowada lao ri mennang, ‘Masennakko mitai ricarépai Bola-Ku sibawa risolangi tanana Israélié enrengngé bangsa Yahudié ritiwi ri appalirengngé. Rimakkuwannanaro Uleppessakko ricau ri suku-suku bangsa polé ri padang kessi Alau. Patettongngi matu mennang sining akkémang ri wanuwammu nainappa mattette kuwaro. Nanréi matu buwa-buwamu sibawa naénungngi dadi olokolo'mu. Upinrai matu kota Raba mancaji onrong makkampi unta, sibawa sininna wanuwa Amon mancaji onrong makkampi bimbala. Namuwissengngi matu makkedaé Iyya ritu Puwang.’ ” Makkedai Puwang Iya Pommatanré, “Mappaleppa'ko namuséréto marennu. Mupakariyawai tanana Israélié. Narimakkuwannanaro Uwabbéréyakko matu lao ri maéga bangsa iya rampo'ékko matu sibawa rampasa'i sininna appunnangemmu. Upabbinasako matu makkuwaro rupanna, angkanna dé'na mumancaji séuwa bangsa nenniya dé'to muwappunnai wanuwa riyalé. Namuwissengngi matu makkedaé Iyya ritu Puwang.” Makkedai Puwang Iya Pommatanré, “Napowadai Moab makkedaé iyaro Yéhuda padai bangsa-bangsa laingngé. Rimakkuwannanaro kota-kota iya mattahangengngéngngi sining pakkasésénna wanuwa Moab Uleppessangngi matu rigasa ri balié muttama'ni kota-kota iya kaminang magelloé, iyanaritu: Bét-Yésimot, Baal-Méon sibawa Kiryataim. Uleppessangngi matu suku-suku bangsa polé ri padang kessi Alau caui Moab silaong wanuwa Amon, angkanna Moab dé'na naddupa séuwa bangsa. Uhukkungngi matu Moab, nanaissengngi mennang makkedaé Iyya ritu Puwang.” Makkedai Puwang Iya Pommatanré, “Purani mébbu asalang battowa bangsa Edongngé nasaba kédo mabecco senna'i lao ri Yéhuda, selaku tindakang makkabale. Rimakkuwannanaro Uwappallebbangengngi makkedaé Iyya hukkungngi matu Edom sibawa mpunui tungke tauwé sibawa tungke olokolo'é kuwaro. Sininna wanuwaéro, polé ri kota Téman lettu ri kota Dédan, Upancajiwi masino-sino; matéi matu ra'ya'na ri laleng ammusurengngé. Upakéi matu bangsa-Ku Israélié untu' makkabale lao ri Edom, narigaukeng matu Edom situru serona cai-Ku. Naissengngi matu Edom pékkugi rasana mancaji attujuwanna cai-Ku. Iyya Puwang Iya Pommatanré pura mabbicara.” Makkedai Puwang Iya Pommatanré, “Purani makkabale sining tau Filistingngé sibawa mabecco lao ri bali massossorenna mennang nenniya paccappui mennang sibawa penno paccéccé. Rimakkuwannanaro Uwappallebbangengngi makkedaé Ugasai matu sining tau Filistingngé sibawa paccappui mennang. Tungke tau iya nasésaé mupa ri daéra wiring tasi'na Filistin Uwunoi matu. Uhukkungngi matu mennang sibawa matane senna nenniya pallessui pakkabale'-Ku narapi cau-Ka. Rékko napérasai mennang cai-Ku, naissennitu mennang makkedaé Iyya ritu Puwang.” Ri tanggala séddinna uleng mattentué ri laleng taung maseppuloé séddi ri wettu appaliretta, mabbicarai Puwangnge lao ri iyya, adan-Na, “Eh tolino dé'é namannennungeng, purani gora-gora pabbanuwana Tirus namakkedato, ‘Ancuru'ni Yérusalém! Awatangenna ri laleng dangkangengngé teddénni! Dé'na namancaji saingatta!’ ” Makkedai Puwang Iya Pommatanré, “Iyya'é balimmu, éh Tirus! Utiwii matu maéga bangsa untu' gasako, napoléi matu mennang pada-pada bombang tasi'é. Naancuru'i matu sining témbo'mu sibawa ruttungngi sining manaramu. Sininna tana iya engkaé kuwaro Usaringngi matu angkanna iya monroé banna séddi batu manyellu ri tengnga tasi. Naessoiwi matu mennang jalana sining pakkajaé ri tompo'na batuéro. Iyya Puwang Iya Pommatanré pura mabbicara. Mancajiwi matu Tirus inanréna maéga bangsa. Marrampo'i matu nenniya mpunoi pabbanuwaé ri kota-kotaé ri pottananna Tirus. Nanaissengngi pabbanuwana Tirus makkedaé Iyya ritu Puwang.” Makkedai Puwang Iya Pommatanré, “Utiwii matu Arung Nébukadnézar polé ri Babél untu' gasako, éh Tirus. Arung iya kaminang mawatangngéro poléi matu polé ri manorang sibawa tentara iya battowaé, sibawa maéga anyarang nenniya karéta-karéta musu enrengngé pasukang makkinnyarang. Sining pabbanuwana sininna kotaé ri pottanangngé riyunoi matu ri laleng ammusurengngéro. Kaliwi matu balié sépe-sépe attahangeng, goppoi témbo'-témbo' akkeppungeng sibawa susungngi kaliyawo-kaliyawo battowa iya napaké mennang selaku bénténg méwako. Naleppoi matu mennang sining témbo'mu sibawa pakkakkasa-pakkakkasa palleppo nenniya ruttungngi manara-manaramu sibawa bessi mabbatang. Anyaranna mennang makkuwamani égana, angkanna larinna mébbui tassiyampo awué pennoiko. Oni merunna pasukang makkinnyarangngé iya gettengngé karéta bokong sibawa karéta musu patatténréngngi matu témbo'-témbo'mu wettunna mennang nalaloi pintu-pintu gerbangngé sibawa muttamakiwi kota iya mancaji sésa-sésa ruttungengngénnaro. Iyaro pasukang makkinnyarangngé maggasai matu risining lalemmu nenniya mpunoi pabbanuwamu sibawa peddanna. Tugu-tugummu iya magelloé sibawa masse'é naruttungngi matu. Iyaro sining balimmu narampasa'i matu sininna asugiremmu nenniya dangkangemmu. Naruttungngi matu mennang sining témbo'mu sibawa ropo'i sining bolamu iya magelloé. Nalai matu mennang sining batunna, sining papenna sibawa tanana, nainappa naggenrungeng muttama ri tasi'é. Upappajai matu sininna élommu sibawa kacapimmu. Iya Usésaé banna séddi batu manyellué bawang, onronna sining pakkajaé messoiwi jalana. Iyaro kotaé dé'na naripatettong paimeng. Iyya, Puwang Iya Pommatanré pura mabbicara.” Makkedai Puwang Iya Pommatanré lao ri kota Tirus, “Pabbanuwana daéra wiring tasi'é ténréi matu nataro tau rékko méngkalingai kelli akalanna sibawa kelli'na sining tau iya mattengngangngé riyuno. Naitana totomu, tokkongngi matu sining arung polé ri bangsa-bangsa wiring tasi'é polé ri kadéra arajanna, ludungngi jumba arajanna sibawa wajunna iya massulangngé, nanatudang ténré ri tanaé. Métau senna'ni matu mennang angkanna dé' naulléi tennang. Nainappa napuwélong matu mennang iyaé élong akkuburukengngéwé untu' iko: Ancuru'ni kota iya risompaé! Sininna kappala'na risarinni polé ri dolangengngé. Bunge'na makuwasai pabbanuwana ri tasi'é mébbui sining tauwé ri wiring tasi'é métau. Makkekkuwangngé, ri esso ricaumu, ténréi pabbanuwana pulo-puloé. Tasséleng maneng mennang mitai ancurukemmu iya tenrikiraé.” Makkedai Puwang Iya Pommatanré, “Upancajiko masino-sino pada-pada kota iya dé'é pabbanuwana. Maélo-Ka tongkoko sibawa uwai polé ri borina dolangengngé. Nainappa Ukirikko lao ri linona tau maté untu' masséddi sibawa sining tau polé ri wettu riyolo. Uleppessakko mattette ri linona tau matéro, ri tengnga-tengngana sésa-sésa mannennungengngé, silaong sibawa tau maté. Na dé'na nariyonroina tanamu, sibawa dé' naribilakko matu ri yelle'na tau tuwoé. Upancajiko conto iya mappakatau-taué, na iyanaro paccappurenna curitamu. Nasappako matu sining tauwé, iyakiya dé' nariruntu'ko matu. Iyya Puwang Iya Pommatanré pura mabbicara.” Untu' alému dolangengngé samannai bola. Ripatettokko samanna kappala magello. Paddenrimmu samanna aju arasna Bulu Hérmon alliri sompe'mu camara polé ri Libanon. Sining wisému riyébbui polé ri ajukajung battowaé ri Basan. Dapara'na riyébbui polé ri aju camaraé, polé ri pulo Siprus assalenna, bélo-bélona paramata gading mangke'é. Sompe sibawa tanrang riissemmu poléi ri lénangngé ébbu Maséré, sibawa maddupa-rupang sulangeng. Manenné tongeng ténda-téndamu, kaing polé ri Siprus pecco collipao. Pabbisému poléi ri Sidon sibawa Arwad. Ana' buwamu iyanaritu sining passompe iya maccaé. Panré aju iya majjamaé ri kappala'é iyanaritu sining panré poléi ri Gebal. Polé ri tungke wanuwa poléi sining kappala'é maélo pakangka assisumpungeng dangkangeng. Sining prajuri polé ri Persia, Lidia sibawa Libia muttama'i tentaramu. Nagattungngi mennang kaliyawona sibawa palo-palo baja'na ri témbo'-témbo' kotamu. Purani mennang naduwakko caui sining balimmu sibawa tambaiwi ataromporemmu. Prajuri-prajuri polé ri Arwad jagai ri témbo-témbo'mu; sining manaramu nanrowangngi sining tau polé ri Gamad. Kaliyawona mennang taggattungngi majjijireng ri témbo'mu. Mennang ritu paggenne'i agelloremmu. Mubalu'i barab-barang dangkangemmu iya maonaéro ri Spanyol, na selaku pakkamajana tarimako péra', bessi, tumera puté sibawa tumera lotong. Dangkakko ri Yunani, ri Tubal, sibawa ri Mésékh, na selaku pakkamajana tarimako polé ri mennang ata-ata sibawa barab-barang polé ri gessaé. Muwassélérengngi barab-barammu sibawa anyarang karéta, anyarang tonangeng sibawa bagal polé ri Bét-Togarma. Dangkang towi pabbanuwana Rodus sibawa iko sibawa pabbanuwa wiring tasi'é melliwi barab-barang dangkangemmu sibawa gading nenniya aju lotong. Sining padangkang polé ri wanuwa Siria melliwi barab-barang dangkangemmu sibawa sining wassélé'mu iya maégaéro. Nawajai mennang sibawa paramata polé ri batu zamrud-é, kaing cella collipaoé, kaing risulangngé, lénang alusu, paramata polé ri batu koral-é sibawa batu cella dalimaé. Yéhuda sibawa Israélié séléi barang dangkangemmu sibawa gandong, cani, minnya zaitun sibawa rampa-rampa. Pabbanuwana Dédan wajai barab-barammu sibawa kaing lapi-lapi. Kota-kota Haran, Kané, Edén, sining padangkang polé ri Syéba, kota-kota Asyur sibawa Kilmad, iya manenna dangkangngi sibawa iko. Nabalu'i mennang lao ri iko pakéyang magelloé, kaing cella collipaoé, kaing massulangngé, sining paramadani iya maddupa-rupangngé, sibawa sining tulu iya masse'é. Barang dangkangemmu natiwii sibawa kappala padangkang mallompéngeng iya maloppoé. Samannako kappala iya matane'é lurenna, kappala iya limbangngéngngi dolangengngé. Sining pabbisé tiwiko ri tasi malowangngé. Nahantakko anging alau iya majjallo'é. Sininna barang dangkangeng luremmu, sininna passompe'é silaong ana' buwamu, sininna panré ajué sibawa padangkammu, tungke prajuri ri kappala'éro, teddéng manengngi mennang tallemme wettummu tallemme. Gorani sining passompe'mu nasaba métaui mango kelli'na risining wiring tasi'é. Nasalaini makkekkuwangngé iyaro kappala'é, sininna passompe'mu ménré'ni ri pottanangngé. Nateringini mennang totomu, maddaréké nenniya mpating sibawa masussa. Maggugurengngi mennang awu ri ulunna sibawa maggalélu ri awué tanrang masara. Nasaba iko nakellui mennang ulunna, pakéi kaing karung penno asarang. Teriwi mennang masé sibawa mpatingiwi totomu. Nainappa mennang puwélong séuwa élong akkuburukeng, ‘Tirus, niga tandingiko? Tirus, mammekkono makkekkuwangngé ri tasi'é. Wettummu limbangngi dolangengngé sibawa lureng sara' mallise, mupennoiwi apparelluwanna bangsa-bangsaé; muwi arung-ngarungngé mupancaji towi sugi. Tallemme'no makkekkuwangngé, ancuru ri borina tasi'é. Sininna ana' buwamu sibawa sininna luremmu silaokko teddéng ri tengngana tasi'é.’ Sininna tauwé iya monroé ri wiring tasi'é tasséleng méngkalingai totomu. Muwi sining arunna mennang métau senna'to; paita appakatau-taurengngé ri tappana mennang. Lennye'no teddéng untu' mannennungeng. Sining padangkangngé ri sininna linoé tassélengngi nasaba métaui péneddingiwi toto pada-padaéro.” Makkedai Puwangnge lao ri iyya, “Eh tolino dé'é namannennungeng, palettu'i lao ri arung Tirus, aga iya Iyya Puwang Iya Pommatanré upowada lao ri aléna, ‘Nasibawang atempong muwangga'i alému déwata iya makkarungngé ri tengnga-tengngana tasi'é. Weddissa mallaga'ko selaku déwata, iyakiya éngngerangngi, bannako tolino biyasa. Muwasengngi lebbi maccako naiya Danél, angkanna dé'gaga rahasiya iya tassubbué ri alému. Mupakéi amaccammu sibawa pappéjeppummu untu' paddeppungeng waramparang, ulaweng sibawa péra'. Mémeng, maccako dangkang na makkekkuwangngé sugi senna'no, na iyaro asugiremmu mébbuko matempo!’ ” Riyunoko matu sibawa rikuburu ri laleng tasi'é. Nah, rékko narapini iyaro wettué, mullé mupaga powadai makkedaé Allataalako? Ri yolona sining pabbunomu, manessani makkedaé bannako tolino simata. Matéko matu pada-pada tau matunaé nasaba riyuno ri tau laing iya dé'é naissengngi Allataala. Iyya, Puwang Iya Pommatanré pura mabbicara.” Makkedasi Puwangnge lao ri iyya, adan-Na, “Eh tolino dé'é namannennungeng, mpatinno untu' arung Tirus. Palettu'i aga Iyya, Puwang Iya Pommatanré upowada lao ri aléna, ‘Purako mancaji lambang asukkurengngé; riyolo mapanré tongekko sibawa magello! Onrong muwonroiyé ri Edén, tammenna Allataala. Pakéyammu mubélo-béloiwi maddupa-rupang paramata: batu dalima sibawa intang, topas, batu pirus, batu yakut, ratna, cempaka, batu nilang, zamrud sibawa batu alkai cella. Paréwa ulawemmu maégato. Iyaro barab-barangngé riyébburekko ri esso wettummu ripancaji. Malaéka' iya makarame'é Utaroi kuwaro untu' jagaiko. Monroko ri tompo bulu-Ku iya mapaccingngé sibawa joppa ri tengnga-tengngana batu paramata iya reppe-reppe'é. Sukku ampé-ampému wettummu ripancaji narapi mappammulako pogau'i majaé. Malippuko mabbalu mangelli, na iyanaro tiwiko ri ateddekengngé sibawa dosaé. Na-Upaddésu'ko polé ri bulu-Ku iya mapaccingngé, sibawa malaéka' panganrowammu lellukko polé ri tengnga-tengngana paramata iya reppe-reppe'éro. Tappamu iya magelloé mébbuko matempo sibawa ataromporemmu nassabariko tinda madonggo. Rimakkuwannanaro Uwabbantingekko ri tanaé sibawa Upancaji papparéngngerang untu' arung-ngarung laingngé.’ ” Makkedai Puwangnge, “Eh Tirus, mucarépaiwi onrong-ngonrong assompammu nasaba asalang-asalammu sibawa acéko-cékommu wettu mabbalu mangellimmu. Rimakkuwannanaro Utunuko angkanna mancaji sillappa sibawa tanaé. Sininna tau iya mitaékko banna mitai awu. Lennye'no teddéng untu' mannennungeng. Sininna bangsa iya missengngékko masélengngi nasaba métaui péneddingiwi matu toto pada-padaéro.” Makkedai Puwangnge lao ri iyya, “Eh tolino dé'é namannennungeng, tanroiwi kota Sidon. Palettu'i lao ri pabbanuwana makkedaé Iyya Puwang Iya Pommatanré makkeda lao ri mennang, ‘Iyya'é balimmu, éh Sidon. Napoji-Ka matu sining tauwé nasaba tindakak-Ku lao ri iko. Wettuk-Ku hukkungngi pabbanuwamu, naissengngi matu mennang makkedaé Iyya ritu Puwang iya mapaccingngé. Papolé-Ka matu sai, sibawa leppessangngi massolo daraé risining lalemmu. Naluruiko matu balié polé risininna sulapa'é, sibawa riyunoi matu pabbanuwamu. Namuwissengngi matu makkedaé Iyya ritu Puwang.’ ” Makkedai Puwangnge, “Wanuwa-wanuwa sideppému iya puraé pakatunai Israélié, dé'na namaddupa dori iya peddiriyéngngi Israélié. Mainge'i matu mennang makkedaé Iyya'na ritu Puwang Iya Pommatanré.” Makkedai Puwang Iya Pommatanré, “Upaddeppungengngi matu sining tau Israélié polé ri wanuwa-wanuwa mabélaé ri onronna mennang pura Upassara-sarang, sibawa sininna bangsaé naissengngi matu makkedaé mapaccik-Ka. Monrosi matu bangsa Isaraélié ri tanana, tana iya puraé Uwabbéréyang lao ri atak-Ku Yakub. Tuwoi matu mennang sibawa amang kuwaro nenniya patettong sining bola enrengngé mébbu palla-palla anggoro. Uhukkungngi matu sining balibolana iya puraé pakatunai mennang, angkanna mancaji amang Israélié. Nanaissengngi mennang makkedaé Iyya'na ritu Puwang Allataalana.” Ri tanggala seppulona duwa uleng seppulo, ri laleng taung maseppuloé wettu appaliretta, makkedai Puwangnge lao ri iyya, “Eh tolino dé'é namannennungeng, bantai arung Maséré. Powadai lao ri aléna makkedaé aléna sibawa sininna ra'ya' Maséré rihukkungngi matu.” Puwang Iya Pommatanré suroka palettu'i lao ri arung Maséré pasengngéwé, “Iyya'é balimmu, éh buwaja loppo iya léwué ri tengngana saloé. Maggempukko makkedaé Salo Nil iyanaritu appunnangemmu sibawa iko ritu mébbui. Maélo-Ka pasang pakkadak-kadang ri langomu sibawa paddekkéi sining balé ri sessi'mu. Nainappa Ugettekko massu polé ri Salo Nil sibawa silaong sininna balé iya maddekkéé ri sessi'muro. Nainappa iko sibawa sininna baléro Uwaggenrungengngi lao ri padang kessi'é. Taggeppai matu tubummu ri tanaé sibawa lénne kuwaro. Dé' muwi séddi tau kuburu'ko matu. Uwabbéréyangngi matu tubummu lao ri manu'-manu'é sibawa olokolo laingngé untu' nanré. Nanaissengngi matu sininna ra'ya' Maséré makkedaé Iyya ritu Puwang.” Makkedai Puwangnge, “Eh bangsa Maséré! Naddennuwangiwi tau Israélié bantuwammu, iyakiya annessana bannako pada-pada tekkeng iya masomé'é bawang. Wettunna mennang sanré ri iko, poloko sibawa toddo'i alépa'na mennang, angkanna malékko lekke'na mennang. Rimakkuwannanaro Iyya, Puwang Iya Pommatanré, powadai lao ri iko, makkedaé kirik-Ka matu tentara iya gasaékko matu sibawa peddang, nenniya mpunoi pabbanuwamu enrengngé olokolo'mu. Mancajiwi matu Maséré tana iya masino-sinoé. Namuwissengngi matu makkedaé Iyya ritu Puwang.” Makkedai Puwangnge, “Eh arung Maséré! Nasaba makkedako makkedaé Salo Nil iyanaritu appunnangemmu sibawa iko ritu mébbui, na Iyya mancaji balimmu, sibawa balinna Salo Nilmu. Sininna Maséré Upancajiwi matu tana iya masino-sinoé mappammulai polé ri kota Migdol ri menorang lettu ri kota Aswan ri yattang, angkanna pakkasésénna Sudan. Dé'gaga tau iyaré'ga olokolo molai matu. Ri lalenna patappulo taung ittana dé'gaga matu tau monroiwi. Uwébbui matu Maséré masino-sino angkanna ri yelle'na wanuwa-wanuwa masino-sino laingngé, Maséré ritu kaminang masino-sino. Ri lalenna patappulo taung ittana kota-kotaé ri Maséré maddupai matu sésa-sésa ruttungeng iya mabélaé lebbi masero naiya sésa-sésa ruttungennaé kota muwi kégi. Upancajiwi matu bangsa Maséré'é sining pangungsi. Massanrai matu mennang lao ri sininna wanuwaé sibawa monro ri tengnga-tengngana bangsa laingngé.” Makkedai Puwang Iya Pommatanré, “Eh bangsa Maséré, labe'na patappulo taunro, Utiwiko matu lisu polé ri wanuwa-wanuwa ri onrommu pura ripatassiya. Upalisuko matu sibawa Usuro monro ri Maséré bagiyang yattang, tana assalemmu. Kuwaro mébbuko matu akkarungeng iya malemmaé, iya kaminang malemmaé ri sininna linoé. Uwébbuko matu malemma senna angkanna dé' matu muwulléi paréntai bangsa-bangsa laingngé iyaré'ga mattempowangngi alému lao ri mennang. Dé'na matu naéllauwi Israélié bantuwammu. Totomu éh bangsa Maséré paréngngerangiwi matu Israélié pékkugi kelirunna mattuwangngi Maséré, pada-pada iya puraé napogau'. Nanaissenni Israélié makkedaé Iyya ritu Puwang Iya Pommatanré.” Ri tanggala séddinna uleng séddi ri laleng taung maduwappuloé pitu wettu appaliretta, makkedai Puwangnge lao ri iyya, “Eh tolino dé'é namannennungeng, Arung Nébukadnézar polé ri Babél gasai Tirus. Nasuroi sining prajuri'é méssang tiwi iya makkuwaémmani tane'na, angkanna mancaji bota' ulunna sibawa malleppa salangkanna, iyakiya muwi arunna iyaré'ga tentarana dé' nalolongeng muwi wassélé aga sibawa iyaro assussa-sussangngé. Rimakkuwannanaro, Iyya Puwang Iya Pommatanré makkeda: Uwabbéréyangngi matu tana Maséré lao ri Arung Nébukadnézar. Marrampo'i matu sibawa marrampasa'i enrengngé makkai sininna asugirenna Maséré selaku sarona tentarana. Uwabbéréyangngi tana Maséré selaku pamale'na jasa-jasana, nasaba purai tentarana majjama untu' Iyya. Iyya, Puwang Iya Pommatanré pura mabbicara. Rékko kajajiyanni iyaro gau'é, Upancajiwi matu Israélié bangsa iya mawatangngé, sibawa pakkulléko Yéhézkiél, laluwasa mabbicara angkanna sininna tauwé naulléi méngkalingako. Nanaissengngi matu mennang makkedaé Iyya ritu Puwang.” Mabbicarasi Puwangnge, adan-Na, Abala battowa kennai matu Sudan. Ri Maséré engka matu musu. Makkalénnerengngi matu maté; rirampo'i sininna wanuwaé sibawa ripancaji ruttungeng. Ri laleng ammusurengngéro maté towi matu sining prajuri riséwaé polé ri Sudan, Lidia, Libia, Arab, Kub sibawa mala polé ri bangsa-Ku muto.” Makkedai Puwang Iya Pommatanré, “Polé ri Migdol ri manorang lettu ri Aswan ri yattang, sininna siyempe'na Maséré matéi matu ri laleng ammusurengngé. Na tentara Maséré iya matempoéro ancuru'i matu tessiyomporeng. Iyya Puwang Iya Pommatanré pura mabbicara. Iyaro wanuwaé mancajiwi matu wanuwa iya masino-sinoé ri yelle'na sining wanuwa masino-sino laingngé, sibawa kota-kotana mancajiwi matu sésa-sésa ruttungeng. Ri wettu utununna Maséré sibawa mpunoi sininna siyempe'na, naissennitu mennang makkedaé Iyya ritu Puwang. Uppanna narapi iyaro essoé, sibawa ancuru'ni Maséré, kirik-Ka matu sining suro sibawa kappala-kappala untu' sélengiwi sining tau Sudan iya dé'é nabata-bataro, namétauna matu mennang. Tongeng, poléi matu iyaro essoé!” Makkedai Puwang Iya Pommatanré, “Upakéi matu Arung Nébukadnézar polé ri Babél untu' mancuru'i sininna asugirenna Maséré. Nébukadnézar silaong tentarana iya dé'é naissengngi maddampeng poléi matu sibawa mancuru'i tanaéro. Nagasai matu Maséré sibawa peddang, natattale-tale matu ujué ri wanuwaéro. Urakkoiwi matu Salo Nil sibawa mabbéréyangngi sininna Maséré lao risining tau majaé. Usuroi matu sining tau laingngé mancuru'i sininna wanuwaéro. Iyya, Puwang, pura mabbicara.” Makkedai Puwang Iya Pommatanré, “Uwancuru'i matu sining barahalaé sibawa déwata-déwataé ri Memfis. Dé'na matu gaga arung ri Maséré. Uwébbu manengngi matu métau pabbanuwana. Sininna Maséré yattang Uwébbu manengngi matu masino-sino sibawa kota Soan ri manorang Utunui matu. Tébé ibukotaéro Uhukkungngi matu, sibawa asugirenna Upaccappui. Uleppessangngi matu cai-Ku lao ri Pelusium, kota iya mancaji bénténnaé Maséré, namanrasa-rasa senna'i matu iyaro kotaé. Tongeng, Utunui matu Maséré. Maruttungngi matu sining témbo'na kota Tébé sibawa nakenna lémpe iyaro kotaé. Sining kallolona kota Héliopolis sibawa Bubastis matéi matu ri laleng ammusurengngé, sibawa sining makkunraié ritawangngi. Ri wettu Upaccappa'na akuwasanna Maséré sibawa malai akuwasanna iya makkuwaémmani nabbangkakenna, nasalipuriwi matu pettang Tahpanhés sibawa ritawangngi matu sining makkunrainna. Makkuwaniro Uhukkung matu Maséré, nanaissengngi mennang makkedaé Iyya ritu Puwang.” Ri tanggala pitunna uleng séddi ri laleng taung maseppuloé séddi wettu appaliretta, makkedai Puwangnge lao ri iyya, “Eh tolino dé'é namannennungeng, purani Upolo taiyyana arung Maséré, na dé'gaga bebbe'i iyaro taiyyana iyaré'ga saulai kuwammengngi najjappa sibawa genne awatangenna untu' makkatennissi peddang. Iyya Puwang Iya Pommatanré makkeda: Iyya'é balinna arung Maséré, na iya duwa taiyyana upoloi matu, muwi iya mawatangngé mupa iyaré'ga iya poloénna. Nasempé matu iyaro peddangngé polé ri limanna. Upassara-sarangngi matu tau Maséré'é lao ri sininna linoé. Nainappa Upéwatangi taiyyana arung Babél, sibawa Utaroi peddak-Ku ri laleng limanna. Iyakiya taiyyana arung Maséré upoloi matu angkanna marangngi matu sibawa matéi ri yolona arung Babél, balinna. Tongeng, Upalemmaiwi matu arung Maséré, na Upéwatangiwi matu arung Babél. Uppanna Uwéréngngi peddak-Ku ri aléna, sibawa natanréyangngi mattuju lao ri Maséré, naissengngi matu mennang makkedaé Iyya ritu Puwang. Upatattale'i matu sining tau Maséré'é lao risininna linoé. Nanaissenni mennang makkedaé Iyya ritu Puwang.” Ri tanggala séddinna uleng tellu ri laleng taung maseppuloé séddi wettu appaliretta, makkedai Puwangnge lao ri iyya, “Eh tolino dé'é namannennungeng, palettu'i iyaé pasek-Ku lao ri arung Maséré sibawa sininna bangsana: Masero tongeng arajammu! Dé'gaga wedding mancaji saingammu! Pada-padako camara Libanon iya magaggaé penno takké iya maworongngé sibawa magello. Malempu batanna sibawa maluru narapi ellungngé coppo'na. Tuwoi nasaba genne uwaina. Salo ri yawanaé tanaé mpéréngngi inanré, boloi sininna ure'na, sibawa rica'i ajukajung laingngé. Nasaba dé' naengka nakurang uwaina, macommo'i tuwona, takkéna maloppo sibawa malampé. Polé ri sininna ajué ri alé'é, aléna ritu kaminang matanré maccaloli. Maddupa-rupang manu'-manu' massarang ri takkéna. Olokolo liyaé mémmana'i ri accinaungenna. Sininna bangsa battowaé risininna linoé tudangngi mallinrung ri yawana. Iyaro ajué magello untu' riita; batanna malempu, takkéna malampé. Ure'na mabélai mabbettu liyawa narapii bubbu uwai ri laleng tanaé. Ajukajung camaraé ri Edén, tammenna Allataala dé' nawedding ripappadangngi. Dé'gaga camara iya mullééngngi saingiwi, dé'gaga aju iya makkuwaéro lampéna takkéna. Tongeng, ri tammenna Allataala dé'gaga aju siggeloé aléna. Iyya ritu mébbui magello sibawa takké-takkéna iya malampéé namaworong. Sininna ajué ri tammenna Allataala mangémpuru lao ri aléna. Rimakkuwannanaro, Iyya, Puwang Iya Pommatanré, paissengiko aga kajajiyang matu ri aju iya coppo'naé lettu ri ellungngéro. Saba' pédé matanréi, pédé matempo towi. Na-Usampéyangngi sibawa mabbéréyangngi matu lao ri panguwasa laingngé, iya gaukengngéngngi matu situru sibawa jana. Tentara laing iya dé'é naissengngi maddampeng tubbangngi matu nainappa dé' najampangiwi. Takkéna iya mapoloénna makkasempé-sempékengngi matu ri sininna bulué sibawa lompo'é ri wanuwaéro. Sininna bangsa iya monroé ri yawana laowi matu salaiwi. Poléi matu manu'-manu'é sibawa teppa ri aju iya rebbaénnaro, sibawa olokolo liyaé léjja-léjja'i matu takké-takkéna. Iya manennaro kajajiyangngi kuwammengngi mappammulai wettuéwé, dé'na matu gagana aju iya tuwoé sittanréro; dé'na gagana coppo aju iya rapiéngngi ellungngé namuni lolongeng uwai maona. Iya manenna harusu'i maté pada-pada tolino iya dé'é namannennungeng, sibawa maddeppungeng silaong sining tau iya nonnoénna ri linona tau maté.” Makkuwaiyé adanna Puwang Iya Pommatanré, “Uppanna iyaro ajué nonno ri linona tau maté, Usuroi uwai ri yawana tanaé malle'i selaku tanrang mabbarata. Utahangngi matu solo' uwai sibawa lape'i ana'-ana' saloé. Nasaba maténi iyaro ajué, papolé-Ka matu pettang ri yasé'na sining buluna Libanon sibawa pakelleki manengngi sininna ajué ri ale'é. Wettunna Upanonno iyaro ajué ri linona tau maté, oni sempé'na patatténréngngi matu bangsa-bangsaé. Sininna ajué ri Edén sibawa ajukajung ripilé ri Libanon iya lolongengngé uwai maona, sibawa iya nonnoénna ri lino iya kaminang mariyawaé masennang matu nasaba sempé'na iyaro ajué. Natinrosiwi matu mennang lao ri linona tau maté nenniya maddeppungeng sibawa mennang iya sempé'énna lebbi riyolo. Na sininna iya tudangngé riyolo ri yawana ajuéro ritale'i matu ri yelle'na bangsa-bangsaé. Iyaro ajué napulambangngi arung Maséré sibawa bangsana. Dé'gaga aju ri Edén iya matanré makkuwaéro sibawa malebbi. Iyakiya makkekkuwangngé, pada-pada towi ajukajungngé ri Edén, iyaro ajué nonno towi ri linona tau maté nenniya maddeppungeng sibawa mennang iya dé'é naissengngi Allataala sibawa mennang iya maté ri laleng ammusurengngé. Iyya, Puwang Iya Pommatanré pura mabbicara.” Ri tanggala séddinna uleng seppulo duwa ri laleng taung maseppuloé duwa wettu appaliretta, makkedai Puwangnge lao ri iyya, “Eh tolino dé'é namannennungeng, wéréngngi papparéngngerang matedde lao ri arung Maséré. Palettu'i iyaé pasek-Ku lao ri aléna, ‘Mallaga'ko pada-pada singa loloé ri yelle'na bangsa-bangsaé, iyakiya lebbi sinrupako buwaja iya monroé ri laleng uwai. Ajému luccakiwi sibawa rotakiwi sininna saloé. Wettunna maddeppungeng bangsa-bangsaé, Utikkekko matu sibawa jala-Ku, sibawa leppessangngi iyaro bangsa-bangsaé massarénréngekko lao ri pottanangngé. Uwaggeppuwakko matu ri tanaé na sininna manu'-manu'é sibawa olokolo'é polé ri sininna linoé Usuroi matu manréko. Nainappa sining bulué sibawa sining lompo'é Upennoiwi matu sibawa bakkému iya makebbongngéro. Utuppa'i matu daramu angkanna narica sining bulué sibawa pennoiwi sining saloé. Ri wettu upabbinasamu, Utongkoi matu langié sibawa sining wéttowingngé Upassalawui matu. Mata essoé usubbui matu ri munrinna ellungngé sibawa kéténgngé dé' nattappa matu. Tongeng, sining tajangngé ri langié upeddéiwi matu, sibawa upancajiwi mapettang kape' linoé. Iyya, Puwang iya Pommatanré pura mabbicara. Wettunna upatassiya birittaé passalenna ancurukemmu ri wanuwa-wanuwa iya dé'é muwissengngi, maéga bangsa mancaji manenneng matu. Tongeng, Utanréyangngi matu peddakku sibawa cauko. Naitai matu sining arungngé sibawa bangsa-bangsaé iyaro tindakakku lao ri iko. Iyaro wettué ténréi matu nataro tau sibawa mékkéi nasaba métaui maté.’ ” Makkedai Puwang Iya Pommatanré lao ri arung Maséré, “Natanréyangngi matu peddanna arung Babél lao ri iko. Prajuri-prajuri polé ri bangsa-bangsa iya mabecco'é Usuroi matu rampui peddanna mennang sibawa mpunoi sininna ra'ya'mu. Ra'ya'mu sibawa sininna aga iya muwabbangkakengngé ancuru sisengngi matu. Uwunoi matu olokolo'mu ri wiring salo-saloé onronna mennang ménung. Muwi tolinoé iyaré'ga olokolo'é dé'na matu naluccakiwi uwaina iyaro saloé. Na salo-saloé ri wanuwammu Ucinnongiwi matu sibawa Uwébbui massolo sibawa tennang. Iyya, Puwang Iya Pommatanré pura mabbicara. Uppanna Maséré Upancajiwi padang kessi iya masino-sinoé, enrengngé Upaccappu sininna iya monroé kuwaro, naissengngi matu mennang makkedaé Iyya ritu Puwang. Papparéngngerang iya matedde'éwé mancajiwi matu élong abbaratang. Makkunrai polé ri bangsa-bangsa laingngé napuwélongngi matu selaku tanrang mabbarata untu' Maséré sibawa sininna ra'ya'na. Iyya, Puwang Iya Pommatanré pura mabbicara.” Ri tanggala seppulona lima uleng séddi taung maseppuloé duwa wettu appaliretta, makkedasi Puwangnge lao ri iyya, “Eh tolino dé'é namannennungeng, abbaratano untu' ra'ya'é ri Maséré. Kiringngi mennang lao ri linona tau maté silaong sibawa wanuwa-wanuwa mawatang laingngé. Powadangngi mennang, ‘Muwasengngi ikoga kaminang mamello? Nonnoko matu ri linona tau maté, sibawa ripaléwu ri yelle'na sining tau iya dé'é naissengngi Allataala.’ Matéi matu bangsa Maséré'é silaong sibawa mennang iya maté ri laleng ammusurengngé. Sadiyani séddi peddang untu' mpuno manengngi mennang. Sining pahlawang iya baranié sibawa sining tau iya mammusué silaong Maséré duppaiwi sibawa marennu apolénna tau Maséré'é ri linona tau maté. Gorai mennang makkuwaé, ‘Sining tau iya dé'é naissengngi Allataalaro maténi ri laleng ammusurengngé. Makkekkuwangngé poléni kumaiyé sibawa léwu kuwaé!’ Mésékh sibawa Tubal engkai kuwaro, riyattulilingi ri kuburu'na sining prajuri'na mennang. Tenrisunna, maté manengngi mennang ri laleng ammusurengngé. Wettunna tuwo, paompoi mennang amétaureng ri linoé. Dé' mennang nalolongeng akkuburukeng secara malebbi pada-pada pahlawangngé ri wettu riyolo iya nonnoé ri linona tau maté sibawa massenjata sukku. Iyaro sining pahlawangngé rikuburu'i sibawa peddang ri yawana ulunna nenniya kaliyawo ri tompona arona. Wettunna tuwo mupi, sining pahlawang poré tongengngi angkanna mébbui métau sininna tauwé. Makkuwaniro tau Maséré'é rikuburu matu sibawa ripaléwu ri tengngana sining tau iya dé'é naissengngi Allataala sibawa maté ri laleng ammusurengngé. Engkai Edom kuwaro sibawa sininna arungngé nenniya panguwasana. Riyolo mennang iyanaritu sining prajuri iya mawatangngé, iyakiya makkekkuwangngé léwuni ri linona tau maté silaong sibawa sining tau maté laingngé iya dé'é naissengngi Allataala. Sininna ana' pattolaé polé ri manorang engkai kuwaro, makkuwatoro sining tau Sidongngé. Riyolo akuwasanna mennang paompoi amétaureng, iyakiya makkekkuwangngé ripakasirini mennang sibawa tenrisunna nonnoi ri linona tau maté silaong sining tau iya maté ri laleng ammusurengngé. Kuwaniro mennang léwu sibawa tanggungngi arotakengngé silaong sining tau iya nonnoé ri linona tau maté. Uppanna nalettu arung Maséré sibawa tentarana lettu'ni ri linona tau maté sibawa mitai sininna tauwéro iya matéénna ri laleng ammusurengngé, tassaléwoni matu mennang. Iyya Puwang Iya Pommatanré pura mabbicara. Iyya ritu nassabariwi arung Maséré paompoi amétaurengngé risining tau iya tuwoé, iyakiya aléna sibawa tentarana matéi matu sibawa ripaléwu silaong sininna tau iya dé'é naissengngi Allataala iya maté ri laleng ammusurengngé. Iyya Puwang Iya Pommatanré pura mabbicara.” Mabbicarasi Puwangnge lao ri iyya, adan-Na, “Eh tolino dé'é namannennungeng, powadai lao ri bangsamu makkedaé uppanna Upapoléi musué ri séuwaé wanuwa, iyanaé kajajiyang matu. Pabbanuwana iyaro wanuwaé piléi matu ri yelle'na mennang séddi tau panganrowang. Rékko iyaro panganrowangngé naitai balié polé, napaoniwi tanrang bahayaé kuwammengngi namatike sininna tauwé. Iyakiya rékko iyaro panganrowangngé naitai balié polé na dé' napaoniwi tanrang bahayaé, nainappa balié mpunoi sining tau madosaéro, tanggung jawa' lao ri amaténna mennang Utuntu'i matu polé ri aléna. Eh tolino dé'é namannennungeng, Uwakkako mancaji panganrowanna bangsa Israélié. Palettu'i lao ri mennang papparéngngerangngéwé: Rékko Uwappaissengengngi makkedaé matéi matu séddi tau maja, iyakiya dé' muparéngngerangiwi kuwammengngi napinrai ampé-ampéna angkanna salama, matéi matu selaku tau madosa mupa. Iyakiya tanggung jawa' lao ri amaténna Utuntu'i matu polé ri iko. Rékko muparéngngerangiwi tau majaéro na dé' namaélo mappésau pogau'i majaé, matéi matu selaku tau madosa, iyakiya iko salama'ko matu.” Makkedai Puwangnge lao ri iyya, “Eh tolino dé'é namannenungeng, pakkolingngi lao ri tau Israélié adanna mennangngé, ‘Maddéké-rékéki nasaba ripatiwiriki dosa sibawa jata. Pékkugiki wedding tuwo?’ Powadangngi mennang makkedaé nasaba Iyya, Allataala iya tuwoé, Puwang Iya Pommatanré, dé' Umasennang rékko matéi tau majaé; sibalé'na macinna-Ka nasalaiwi dosa-dosana kuwammengngi natette tuwo. Eh bangsa Israélié, appésauno pogau'i majaé! Magi mumaélo maté? Nah, tolino dé'é namannennungeng, powadangngi tau Israélié makkedaé narékko tau iya makessingngé pogau'i dosa, akessingenna riyolo dé' nawedding tulungngi. Rékko tau majaé mappésauwi pogau' dosa, dé' narihukkung matu sibawa rékko tau makessingngé pogau'i dosa, dé' naripassalama. Wedding jaji pura-Ka majjanci maélo passalama'i tau makessingngé, iyakiya rékko mappammulai pogau' dosa sibawa mamménasa makkedaé ripassalama'i matu nasaba akessingenna riyoloro, kalirui. Dé'na uwéngngerangngi matu akessingenna iya puraé napogau' sibawa matéi matu nasaba dosa-dosana. Dé'na Uwéngngerangngi matu dosa-dosana iya puraé napogau', sibawa tuwoi matu nasaba napogau'i aga iya tongengngé sibawa makessingngé. Iyakiya iyaro bangsaé napowadai makkedaé iyaro tindakak-Ku dé' naadélé! Padahal tindakanna mennang dé' naadélé. Siseppi Upattedde makkedaé rékko tau iya makessingngé mappammulai pogau'i majaé, matéi matu nasaba iyaro. Rékko tau majaé mappésauwi pogau' dosa, sibawa mappammula pogau'i aga iya makessingngé sibawa tongengngé, tuwoi matu nasaba iyaro. Namuni makkuwaro napowadai bangsa Israélié makekdaé dé' naadélé tindakakku. Tongeng, Uwadélékiwi matu mennang tungke-tungke situru pangkaukenna.” Ri tanggala limana uleng seppulo, ri laleng taung maseppuloé duwa wettu appaliretta, engka séddi tau iya mullééngngi leppe polé ri Yérusalém polé sibawa paissengika makkedaé sempé'ni iyaro kotaé. Ri wenni dé'napa napolé, purani upérasa akuwasanna Puwangnge. Jaji wettunna iyaro tauwé polé ri iyya, weddinna mabbicara sibawa dé' upépéna. Makkedai Puwangnge lao ri iyya, “Eh tolino dé'é namannennungeng, makkedai sining tau iya monroé ri ruttungenna kota-kota Israéliéro, ‘Abraham lolongengngi sininna tanaéwé, padahal banna alé-aléna. Idi'é maégaki jumellata, jaji iyaé tanaé mancajiwi appunnangetta.’ ” Rimakkuwannanaro Puwang Iya Pommatanré suroka palettu'i pasengngéwé lao ri mennang, “Muwanréi juku iya engkaé mupa darana; sompako barahala sibawa pogau' abbunowang. Barani tongekko mangaku iyaé tanaé selaku appunnangemmu. Muwattuwangngi peddammu. Mappakaciddi-ciddi tindakammu. Pogau' manekko alawengeng. Barani mupoga mangakuiwi iyaé tanaéwé selaku appunnangemmu? Nasaba Iyya, Allataala iya tuwoé, Puwang Iya Pommatanré, sining tau iya monroé ri sésa-sésa ruttungenna kotaéro matéi matu riyuno. Mennang iya monroé risining padangngé nanréi matu olokolo masekkang. Mennang iya massubbué risining bulué sibawa gowa-gowaé matéi matu nasaba sai. Iyaro wanuwaé Upancajiwi matu padang kessi iya masino-sinoé, sibawa akuwasang iya nabbangkakengngéro maccappa'i matu. Sining bulué ri Israélié mancaji masino-sinoi angkanna dé' muwi séddi tau barani limbangngi. Ri wettu Uhukkunna iyaro bangsaé nasaba dosa-dosana sibawa pancajiwi iyaro wanuwaé masino-sino, naissenni mennang makkedaé Iyya ritu Puwang.” Makkedai Puwangnge, “Eh tolino dé'é namannennungeng, mancajino buwa témunna tau sibangsamu wettunna mennang siruntu ri seddéna sining témbo'na kotaé iyaré'ga ri yolona sining sumpang bolaé. Makkedai séddié lao ri laingngé, ‘Ayo, taéngkalingai aga pasenna Puwangnge iyaé essoé.’ Poléi mennang mallompéngeng na selaku umma'-Ku tudangngi mennang méngkalingai ada-adammu, iyakiya aga muwapparéntang dé' naturusiwi mennang. Témunna mennang napowadai ada-ada cintaé, iyakiya atinna banna pikkiri'i asarong. Riyangga'ko séddi tau pakkélong élok-kélong accintang iya macennoé sibawa macca makkacapi. Mémeng naéngkalingai mennang ada-adammu iyakiya dé' naturusiwi. Sininna iya mupowadaéro kajajiyangngi matu, na uppanna narapi iyaro wettué, naissengngi matu mennang makkedaé engka naengka séddi nabi ri tengnga-tengngana mennang.” Makkedai Puwangnge lao ri iyya, “Eh tolino dé'é namannennungeng, bantani arung-ngarung Israélié, sibawa palettu'i aga Iyya, Puwang Iya Pommatanré upowada lao ri mennang, ‘Macilakano iko, éh pakkampi-pakkampina Israélié. Banna mupikkiri'i apentingenna alému, tenniya apentingenna sining bimbala'mu. Muwénungngi dadi'na, bulu-bulunna mupancaji pakéyang, sibawa bimbala'na iya kaminang macommo'é mugéréi sibawa muwanréi. Dé' naengka muurusu'i sining bimbala'mu. Sining bimbala'mu iya malemmaé dé' mupiyarai, iya malasaé dé' muuraiwi, iya maloé dé' mubebbe'i, iya pusaé sibawa teddéngngé dé' musappai sibawa tiwii lisu. Mala sininna bimbala'muro mugaukengngi sibawa mapéddara. Nasaba dé' muwappunnai pakkampi, iyaro sining bimbala'é massara-sarangngi sibawa mancaji inanrénai olokolo masekkangngé. Namancaji passoléna sining bimbala'-Ku risining bulu-bulu iya matanré sibawa risining bulué. Tattale'i mennang lao ri sininna linoé, dé' muwi séddi tau jampangiwi iyaré'ga sappai mennang. Nah, pakkampi-pakkampi, éngkalingai aga Iyya Puwang Iya Pommatanré Upowada lao ri iko: Nasaba Iyya, Allataala iya tuwoé, pénessaiwi! Ritikkenni sining bimbala'-Ku sibawa riyanréni ri olokolo masekkangngé, nasaba dé'gaga mampii mennang. Iko sining pakkampi-Ku dé' mujampangiwi sining bimbala'éro. Banna mupikkiri'i bawang alému, tenniya apentingenna sining bimbala'mu. Jaji, éngkalingai éh sining pakkampi, Iyya, Puwang Iya Pommatanré makkeda lao ri iko, makkedaé Iyya'é balimmu. Iyaro sining bimbala'-Ku Uwalai matu lisu polé ri iko sibawa dé'na Uwappaddettangengngi lao ri iko; dé'na Upalaloko pikkiri'i apentingeng riyalému. Upassalama'i matu sining bimbala'-Ku polé ri iko angkanna dé'na mennang namancaji inanrému.’ ” Makkedai Puwang Iya Pommatanré, “Alé-Ku maélo sappai sining bimbala'-Ku sibawa piyarai mennang, pada-pada séddi pakkampi sappaii sibawa paddeppungengngi sining bimbala'na iya tassiya-siyaé nainappa napiyara mennang. Utiwii matu mennang lisu polé ri sininna onronna tattale ri esso iya mapettangngé sibawa mabbahayaéro. Upassui matu mennang polé ri tengngana bangsa-bangsaé sibawa wanuwa-wanuwa laingngé, nainappa Upaddeppungeng sibawa Utiwi ri wanuwanna muto. Uwampii matu mennang risining bulué sibawa risining lompo'na Israélié sibawa Udulungngi mennang lao risining padang wella iya manyamengngé. Tongeng, Upassadiyangengngi matu mennang sining padang wella iya macommo'é ri bulué sibawa risining lompo'na tana Israélié. Kuwaniro mennang mappésau matu sibawa manré wella sibawa amang. Aléku mancaji matu pakkampina sining bimbala'-Ku sibawa passadiyangengngi onrong mappésau untu' mennang; Iyya, Puwang Iya Pommatanré pura mabbicara. Iya teddéngngé Usappai matu, iya pusaé Utiwii matu lisu, iya maloé Ubebbe'i matu, iya malasaé Uwuraiwi matu; iyakiya iya macommo'é sibawa mawatangngé Upaccappui matu, saba' Iyya pakkampi iya pogau'éngngi aga iya makessingngé. Engkalingai, éh sining bimbala'-Ku! Iyya, Puwang Iya Pommatanré makkeda lao ri iko makkedaé Iyya madélékiko matu tungke-tungke sibawa pallaingngi iya makessingngé polé ri majaé, sining bimbala'é polé risining bémbé'é. Ri yelle'mu engka dé' namasennang banna paccappui wella iya kaminang makessingngé, iyakiya naléjja-léjja towi wella iya dé'é mennang nanréi! Ménungngi mennang uwai iya macinnongngé nainappa nalucca uwai iya dé'é naénungngi mennang! Sining bimbala'-Ku iya laingngé harusu'i nanré wella iya puraé naléjja-léjja sibawa ménungngi uwai iya puraé nalucca. Rimakkuwannanaro, Iyya, Puwang Iya Pommatanré powadai lao ri iko, éh sining bimbala iya macommo'é, makkedaé maélo-Ka polé mancaji haking ri yelle'na bimbala iya mawatangngé sibawa bimbala iya malemmaé. Muredde'i sibawa mutanru'i bimbala iya malasaé angkanna rilellung polé ri konronna bimbala'é. Iyakiya alé-Ku passalama'i matu sining bimbala'-Ku, kuwammengngi dé'na mennang narigaukeng sibawa mapéddara. Uwadélékiwi sining bimbala'-Ku tasséddi-séddi sibawa pallaingngi iya makessingngé polé ri majaé. Makka-Ka matu séddi arung iya pada-padaé atak-Ku Daud, untu' mancaji alé-aléna pakkampina mennang, na aléna piyarai matu mennang. Iyya, Puwang, mancaji matu Allataalana mennang, sibawa arung iya pada-padaé atak-Ku Daudro mancaji matu panguwasana mennang. Iyya Puwang pura mabbicara. Mébbu-Ka matu assijancing sibawa mennang, iya tanggungngéngngi keamananna. Urukkai matu sininna olokolo masekkangngé polé ri sininna wanuwaé, kuwammengngi nawedding monro sining bimbala'-Ku sibawa amang risining padangngé sibawa matinro risining ale'é. Ubarakkakiwi matu mennang sibawa palaloi mennang monro ri seddéna bulu-bulu-Ku iya mapaccingngé. Uwéréngngi matu mennang bosi rékko napparelluwangngi mennang. Mabbuwai matu ajukajungngé, mabbéréi matu wassélé sining dare'é, sibawa sininna tauwé monroi matu sibawa amang ri tanana muto. Rékko purani Upettui ranté passiyona umma'-Ku sibawa purani mennang Upaleppe polé risining tau iya powataéngngi, naissennitu mennang makkedaé Iyya ritu Puwang. Dé'na matu mennang narirampo ri bangsa-bangsa iya dé'é naissek-Ka, iyaré'ga riyanré ri olokolo masekkangngé. Tuwoi matu mennang sibawa saléwangeng, sibawa dé'gaga muwi séddi tau mébbui mennang métausi. Ucommokiwi matu sining dare'na angkanna dé'gaga wettu akkadérenna ri wanuwaéro. Dé'na naripakatuna matu mennang ri bangsa-bangsa laingngé. Nanaissengngi matu sininna tauwé makkedaé Israélié iyanaritu umma'-Ku sibawa iyya linrungiwi. Iyya, Puwang Iya Pommatanré pura mabbicara. Tongeng, iko ritu bimbala makkonrok-Ku iya Uwéréngngé inanré. Iko iyanaritu umma'-Ku, na Iyya Allataalamu. Iyya, Puwang Iya Pommatanré pura mabbicara.” Makkedai Puwangnge lao ri iyya, “Eh tolino dé'é namannennungeng, tanroiwi wanuwa Edom. Sipongenna riyolo mumusui Israélié sibawa leppessangngi mennang riyuno wettunna mennang nakenna abala selaku pahukkungeng paccappureng lao ri dosana. Rimakkuwannanaro, nasaba Iyya, Allataala iya tuwoé, Puwang Iya Pommatanré, amaténgngé iyanaritu totomu, na dé' muwulléi leppe polé ri aléna. Pasalano saba' pogau'i abbunowangngé, na abbunowangngétto lellukko matu. Kota-kotamu ri buluna Edom Upancajiwi matu masino-sino sibawa tungke tau iya limbangngéngngi Uwunoi matu. Utongkoi matu sining bulué sibawa sining ujumu, bulu-bulué sibawa lompo'é Upennoiwi matu sibawa bakké ammusurengngé. Upancajiwi matu wanuwammu padang makkale-ale'é untu' mannennungeng, sibawa kota-kotamu dé'na naonroiwi matu tauwé. Namuwissengngi matu makkedaé Iyya ritu Puwang. Mupowadai makkedaé muwi Yéhuda iyaré'ga Israélié sibawa tanana tungke-tungke iyanaritu ha'mu, sibawa muwappunnaiwi matu namuni Iyya, Puwang, iyanaritu Allataalana mennang. Rimakkuwannanaro, nasaba Iyya, Allataala iya tuwoé, Puwang Iya Pommatanré, makkabale'-Ka matu lao ri iko, nasaba macaiko, mangémpuru sibawa mucéccéi umma'-Ku. Naissengngi matu mennang makkedaé Uhukkukko nasaba pangkaukemmu lao ri mennang. Namuwissengngi makkedaé Iyya, Puwang, pura méngkalingai pangéllé'mu wettummu makkeda: Mancaji masino-sinoni sining buluna Israélié sibawa riyabbéréyang mancaji inanréta. Eh bangsa Edom, maloppo bawamo nenniya mabbicara sibawa matempo lao ri Iyya. Iyya pura méngkalingai iya manennaro. Iyya Puwang Iya Pommatanré makkeda: Masennangngi matu sininna linoé wettunna sininna wanuwammu Upancaji padang iya masino-sinoé, pada-pada towi masennakko wettu muwitana Israélié appunnangek-Ku, mancaji masino-sino. Sining buluna Séir, mala sininna tana Edom mancajiwi matu masino-sino. Nanaissengngi matu sininna tauwé makkedaé Iyya ritu Puwang.’ ” Makkedai Puwangnge, “Eh tolino dé'é namannennungeng, abbicarano lao risining buluna Israélié sibawa suroi mennang méngkalingai pasenna Puwang Iya Pommatanré, Iyya, Puwang Iya Pommatanré mattanro makkedaé iyaro bangsa-bangsaé ri seddému ripakatuna towi matu. Iyakiya lao ri iko Upowadai éh sining buluna Israélié, cura'i matu ajukajummu sibawa mabbuwasi untu' umma'-Ku Israélié iya dé'énna namaitta nalisu matu. Engka-Ka ri iko éh Israélié, sibawa Upattentui makkedaé ribéngkussi matu tanamu sibawa riyampori biné. Utambaiwi matu jumellana umma'-Ku Israélié. Monroi matu mennang ri kota-kotaé sibawa patettongngi paimeng sininna ruttungenna. Utambaiwi matu pabbanuwamu sibawa olokolo'mu, angkanna mancaji maéga senna, lebbi maégai naiya pammulanna, sibawa makkéana' eppoi matu maéga. Tuwoi matu mennang kuwaro pada-pada pammulanna sibawa Upancajiwi madécéng, pada-pada dé'pa naengka mupéneddingiwi. Nanaissenni mennang makkedaé Iyya ritu Puwang. Umma'-Ku Israélié, Utiwii matu lisu untu' monroiwi wanuwannasi. Iyaro tanaé mancajiwi matu appunnangeng riyaléna sibawa tuli nabbéréyangngi matu wassélé'na angkanna ana'-ana'na mennang dé'na matu namaté makkadéreng. Iyya, Puwang Iya Pommatanré makkeda: Mémeng tongeng iyaé tanaé ritellai pakkanré tau sibawa parrampasa ana'-ana' – bangsa iya monroiyéngngi. Iyakiya mappammulai makkekkuwangngé iyaé tanaé dé'na matu nanré tau iyaré'ga rampasa'i ana'-ana'na mennang. Iyya Puwang Iya Pommatanré pura mabbicara. Dé'na naparellu iyaé tanaé méngkalingai pangéllé'na bangsa-bangsaé iyaré'ga tanggungngi pappakatunana tauwé. Iyaé tanaé dé'na napaccappui matu bangsa iya monroiyéngngi. Iyya Puwang Iya Pommatanré pura mabbicara.’ ” Makkedai Puwangnge lao ri iyya, “Eh tolino dé'é namannennungeng, wettunna sining tau Israélié monro ri wanuwanna muto, purai mennang nacarépai sibawa tindakanna nenniya ampé-ampéna mennang. Uwangga'i iyaro ampé-ampéna mennang harangngi, pada-padai makkunrai iya mattengngangngé maddara. Utuppa'i cai-Ku lao ri mennang nasaba purai napogau' mennang maéga abbunowang ri tanaéro nenniya rotakiwi sibawa sining barahalana. Uhukkungngi mennang situru sibawa cara atuwonna ampé-ampéna mennang, nainappa Upassara-sarang lao ri wanuwa-wanuwa laingngé. Kégi-kégi mennang lao, tuli nacarépaiwi mennang asek-Ku iya mapaccingngé. Saba' makkeda makkuwaiyé sining tauwé, ‘Iyaé bangsaé iyanaritu umma'na Allataala, iyakiya harusu'i mennang nasalai tana iya nabbéréyangngé Allataala lao ri mennang.’ Messé-Ka nasaba asek-Ku iya mapaccingngé nacarépaiwi sining tau Israélié kégi-kégi mennang lao. Narimakkuwannanaro, palettu'i aga Iyya Puwang Iya Pommatanré upowada lao ri bangsa Israélié, ‘Aga iya maéloé Upogau' matti tenniya nasaba iko, éh sining tau Israélié, sangadinna nasaba asek-Ku iya mapaccingngé, iya puraé mucarépai kégi-kégiko lao. Uwappaitangngi matu apaccingenna asek-Ku iya battowaéro, aseng iya puraé mucarépai ri tengngana bangsa-bangsaé, nanaissenni mennang makkedaé Iyya Puwang. Iyya, Puwang Iya Pommatanré pura mabbicara. Upakéko matu untu' mappaitangngi lao ri bangsa-bangsaé makkedaé mapaccik-Ka Iyya'é, Puwang Iya Posséuwaé. Polé ri tungke bangsa sibawa wanuwa, Upaddeppungekko matu sibawa Upalisu lao ri tanamu muto. Purairo Uweppikiko matu sibawa uwai macinnong, kuwammengngi namumapaccing polé ri sininna barahalamu sibawa polé ri sininna séuwa-séuwaé iya puraé carépaiko. Na-Uwérékko ati iya mabarué sibawa pikkirang iya mabarué. Atimmu iya sittedde'é baturo Usulléiwi matu sibawa ati iya mapatoé. Utiri'i matu Roh-Ku ri laleng atimmu sibawa Ujagaiko kuwammengngi mutuwo situru hukkung-hukkuk-Ku enrengngé turusiwi sininna parénta-Ku. Namuwonro matu ri tana iya puraé Uwabbéréyang lao ri néné-nénému. Mancajiko matu umma'-Ku sibawa mancaji tok-Ka matu Allataalamu. Upaleppe'ko matu polé ri sininna acarépammu. Uparéntangngi matu gandongngé kuwammengngi natuwo sibawa macommo angkanna dé'na naengka nakennako akkadéreng. Utambaiwi matu acommokenna pong buwa-buwamu sibawa wassélé'na sining dare'mu, angkanna dé'na matu mupéneddingiwi wettu akkadérengngé iya solangiyéngngi asemmu ri yelle'na bangsa-bangsaé. Maréngngerakko matu lao ri ampé-ampému iya majaé sibawa tindakammu iya dé'é nasitinajaro, nainappako mancaji maciddi ri alému muto nasaba dosa-dosamu sibawa atunammuro. Engngerangngi éh Israélié, makkedaé iya manennaro Upogau'i tenniya nasaba iko. Harusu'ko masiri sibawa matuna nasaba ampé-ampému. Iyya Puwang Iya Pommatanré pura mabbicara.’ ” Makkedai Puwang Iya Pommatanré, “Puramuna Upépaccingi polé ri sininna dosamu, Upalaloko matu monro ri kota-kotamusi, sibawa patettongngi paimeng sésa-sésa ruttungenna. Riyolo sining tau iya joppaé molai sining padammu naitai pékkugi kabuttunna iyaro tanaé, iyakiya Upakkulléko matu jamasi paimeng iyaro tanaé. Namancaji hérang maneng matu tauwé, nasaba tana iya makabuttué onna'ro tappinrani makkekkuwangngé mancaji Tammeng Edén, sibawa kota-kota iya masino-sinoé onna, ancuru sibawa mancaji sésa-sésa ruttungeng, makkekkuwangngé mancajini kota-kota iya mawatangngé attahangenna sibawa makkompe pabbanuwana. Na bangsa-bangsa sideppéna iya engkaé mupa, naissengngi matu makkedaé Iyya, Puwang, pura patettongngi paimeng kota-kota iya ancuru'énna, sibawa jamai paimeng sining dare iya makabuttué. Iyya, Puwang, pura mabbicara sibawa pasti Upogau'i matu.” Makkedai Puwang Iya Pommatanré, “Eh bangsa Israélié, Upalalosiko méllau tulung ri Iyya; Utambaiwi matu jumellamu pada-pada bimbala makkonrongngé. Kota-kota iya ancuru'é makkekkuwangngé, matti pennoi matu tau monroiwi pada-pada Yérusalém ri esso-esso marajaé ri wettu labe'é, penno sibawa sining bimbala iya riyakkasuwiyangengngé. Namuwissengngi makkedaé Iyya ritu Puwang.” Upéneddingini akuwasanna Puwangnge, nanatiwina Roh-Na nonnoriwi lompo iya pennoé sibawa buku-buku. Ridulunna ri Puwangnge mattulili ri lompo'éro, nauwitai makkedaé ri sininna lompo'éro tattale'i maéga senna buku-buku sibawa marakko senna. Makkutanai Puwangnge ri iyya, “Eh tolino dé'é namannenungeng, naulléga iyaé buku-bukué tuwo paimeng?” Mappébalika, “ Puwang Iya Pommatanré, banna Iko ritu missengngi.” Nainappa nasuroka Puwangnge palettu'i pasen-Na lao ri buku-buku iya marakkoéro, “Iyya Puwang Iya Pommatanré masseppungeng nappase ri laleng alému kuwammengngi mutuwo paimeng. Utaroiwi ure' sibawa juku alému enrengngé Ubebbe'ko sibawa oli. Uwérékko matu nappase angkanna tuwo. Namuwissengngi makkedaé Iyya ritu Puwang.” Nainappa iyya Yéhézkiél mabbicara lao ri buku-bukuéro situru sibawa paréntana Puwangnge. Namattengngakka mabbicararo, uwéngkalingai onié maddukéku, nasaba iyaro buku-bukué mammulai sisumpung séddié sibawa laingngé. Ri wettu upénessainna, iyaro buku-bukué mammulani makkure' sibawa majjuku, sibawa makkolito iyakiya iyaro sining tubué dé'pa nannyawa. Makkedai Allataala lao ri iyya, “Eh tolino dé'é namannennungeng, abbicarano lao ri angingngé. Powadai makkedaé Iyya, Puwang Iya Pommatanré paréntangngi aléna kuwammengngi napolé ri sininna sulapa'é, untu' masseppungeng nappase ri laleng sining tubu iya matéro angkanna tuwo mennang paimeng.” Naumabbicarana situru sibawa paréntana Puwangnge namasseppunna angingngé nappase muttama ri laleng sining tubuéro nanatuwona mennang sibawa tettong. Jumellana mennang maéga senna, genne untu' mébbu asséddiyang tentara iya battowaé. Makkedai Allataala lao ri iyya, “Eh tolino dé'é namannennungeng, iyaé buku-bukué napulambangngi bangsa Israélié. Maddarékéi mennang makkedaé marakkoi mennang, temmaddennuwang sibawa temmappunnai esso mangolo. Rimakkuwannanaro abbotono lao ri umma'-Ku Israéliéro makkedaé Iyya, Puwang Iya Pommatanré timpa'i matu kuburu'na mennang. Upassui matu mennang polé kuwaro sibawa palisui mennang lao ri tana Israélié. Pura-Kuna pogau'i sininnaro, naissengngi matu umma'-Ku makkedaé Iyya ritu Puwang. Masseppungek-Ka matu nappase ri laleng aléna untu' patuwoi mennang, nainappa Upakkullé mennang monro ri wanuwanna muto. Nanaissengngi mennang makkedaé Iyya ritu Puwang. Iyya Puwang pura mabbicara sibawa mattentuni Upogau'.” Makkedasi Puwangnge lao ri iyya, “Eh tolino dé'é namannennungeng, alano séddi tekkeng sibawa okini iyaé ada-adaé ri yasé'na, ‘Akkarungeng Yéhuda’. Nainappa alano séddi tekkeng iya laingngé, sibawa okini ri yasé'na, ‘Akkarungeng Israélié’. Nainappa akkatenningngi iya duwa tekkengngé makkuwamani rupanna angkanna cappa-cappa'na masséddiwi sibawa mancaji séddi tekkeng. Rékko nakkutanangngi bangsamu bettuwanna, powadangngi mennang, makkedaé Iyya, Puwang Iya Pommatanré malai matu tekkeng iya pulambangngéngngi Israélié nenniya passéddiwi sibawa tekkeng iya pulambangngéngngi Yéhuda. Iya duwa tekkengngéro upancaji séddiwi matu sibawa Uwakkatenning ri laleng limak-Ku. Akkatenningngi iya duwa tekkengngéro sibawa appaitangngi lao ri bangsaéro. Nainappa powadai lao ri mennang makkedaé Iyya, Puwang Iya Pommatanré malai matu sininna bangsa-Ku polé ri wanuwa-wanuwa kégi mennang pura lao. Upaddeppungengngi matu sibawa Utiwii lisu ri wanuwanna muto. Upancajiwi matu séddi bangsa ri tanaéro, ri buluna Israélié. Riparéntai matu mennang ri séddi arung, sibawa dé'na matu nassarang mancaji duwa bangsa iyaré'ga akkarungeng. Dé'na matu napanajisi'i aléna sibawa pogau' dosa sibawa massompa sining barahala iya mappakaciddi-ciddi'é. Upaleppe'i matu mennang polé ri sininna pelanggarang iya mébbuéngngi mennang nabali'bellari-Ka. Upaccingiwi matu mennang; mancajiwi matu mennang umma'-Ku, na Iyya Allataalana. Maélo-Ka mébbu séuwa assijancing sibawa mennang iya tanggungngéngngi keamananna mennang lettu mannennungeng. Ubarakkakiwi matu sibawa tambaiwi jumellana mennang. Ri tanana mennang Upatettongngi matu Bola-Ku iya tette'é kuwaro untu' mannennungeng. Monro-Ka matu silaong mennang, mancaji-Ka matu Allataalana na mennang umma'-Ku. Rékko engkani Bola-Ku ri tengnga-tengngana mennang untu' mannennungeng, naissennitu bangsa-bangsa laingngé makkedaé Iyya, Puwang, pura piléi Israélié mancaji umma riyalé-Ku.” Makkedai Puwangnge lao ri iyya, “Eh tolino dé'é namannennungeng, tanroiwi Gog arung maraja polé ri wanuwa-wanuwa Mésékh sibawa Tubal ri tana Magog. Powadangngi aléna makkedaé Iyya, Puwang Iya Pommatanré, iyanaritu balinna. Upabélo'i matu aléna, pasangiwi pakkadak-kadang langona, sibawa sitta'i massu silaong sininna pasukanna. Maéga senna pasukang makkinnyaranna iya mappaké padaéro. Tungke prajuri tiwii kaliyawo sibawa peddang. Ritinrosiwi arungngé ri prajuri-prajuri polé ri Persia, Sudan sibawa Libia, tungke-tungke tiwi peddang sibawa palo-palo baja'. Sininna pajuwang polé ri wanuwa-wanuwa Gomér sibawa Bét-Togarma ri manorang, majui silaong aléna, sibawa maéga bangsa laing maccowéto. Suroi aléna sadiya-sadiya sibawa paréntangngi sininna tentara iya siyempe'é sibawa aléna kuwammengngi nasadiya turusiwi paréntana. Siyagangngarépi taunna uparéntangngi matu untu' gasai séddié wanuwa sibawa pabbanuwa iya puraénna ripaddeppungeng paimeng polé ri yelle'na maéga bangsa nainappa monro ri wanuwaéro sibawa tennang. Natudangiwi matu Gog sining buluna Israélié iya maittaénna masino-sino sibawa penno sésa-sésa ruttungeng, iyakiya makkekkuwangngé naonroini ra'ya' iya tuwoé sibawa damé. Aléna sibawa tentarana enrengngé maéga bangsa iya tinrosiyéngngi poléi matu maggasa pada-pada anginrajaé sibawa tongkoi sininna wanuwaé pada-pada ellungngé.” Makkedai Puwang Iya Pommatanré lao ri Gog, “Iyaro wettué mébbuko matu rancana iya majaé. Mupettuiwi matu' gasai wanuwa iya dé'é nabbénténro, kégi pabbanuwana tuwoi sibawa amang nenniya tennang ri kota-kota iya dé'é nattémbo sibawa dé' nappunnai pakkakkasa attahangeng. Murampo'i matu sibawa murampasa'i barab-baranna pabbanuwaé ri kota iya sésa-sésaé riyoloro. Pabbanuwana iya ripaddeppungengngé polé rimaddupa-rupang bangsa, makkekkuwangngé mappunnaini maéga waramparang sibawa olokolo nenniya monroi mennang ri posina linoé. Pabbanuwana Syéba sibawa Dédan enrengngé sining padangkangngé ri kota-kota wanuwa Spanyol makkutanai matu lao ri iko makkuwaé, ‘Aga mupangaraiga tentaramu banna untu' rampasa sibawa rampo ulaweng, péra', olokolo sibawa waramparang, enrengngé tiwi manengngiro?’ ” Rimakkuwannanaro Puwang Iya Pommatanré suroka untu' palettu'i lao ri Gog iyaé pasengngé, “Mala ri wettunna umma'-Ku Israélié tuwo sibawa amang nenniya tennang, poléko maggasa. Joppako polé ri onrong muwonroiyé, mabéla ri manorang, ritinrosi ri tentara iya battowaé sibawa masero, iya manenna pasukang makkinnyarang polé ri sininna rupanna bangsaé. Nainappa mugasa umma'-Ku Israélié pada-pada anginraja mappo'éngngi linoé. Rékko narapii wettunna, Ukirikko matu untu' tudangiwi tana-Ku. Nasibawang tindakak-Ku molaékko, éh Gog, naissengngi matu sining bangsaé niga Iyya, iyanaritu Allataala iya mapaccingngé. Dé'ga napassalenna iko mabbicara-Ka riyolo naolai ata-atak-Ku sining nabinna Israélié? Purai mennang naboto makkedaé ri wettu iya maéloé polé Usuroi matu séddi tau untu' gasai Israélié. Iyya Puwang Iya Pommatanré pura mabbicara.” Makkedai Puwang Iya Pommatanré, “Iyakiya purana muwa Gog nagasa Israélié, majjallo'-Ka matu. Sibawa nasibawang amacaireng masero mangancak-Ka matu, makkedaé iyaro essoé engka tatténréng tana iya maseroé ri wanuwa Israélié. Sininna balé sibawa manu'-manu'é, sininna olokolo battowaé sibawa baiccu'é, sibawa sininna tauwé ri tompo'na linoé ténréi matu métau moloi-Ka. Maruttungngi matu sining bulué, mailii matu sining peppingngé sibawa maruttungngi matu sining témbo'é. Nainappa Usélengi matu Gog sibawa sininna rupanna abalaé. Iyya, Puwang Iya Pommatanré pura mabbicara. Sisulléi matu sigasa ana' buwana sibawa peddanna mennang. Uhukkungngi matu sibawa sai nenniya assiyunong. Bosi rajaé sibawa bosi ése'é, api sibawa balérang Utiri'i matu ri yasé'na aléna sibawa tentarana nenniya ri yasé'na maéga bangsa iya siyempe'énna sibawa aléna. Nasibawang caraéro Uwappaitangngi matu lao ri sininna bangsaé makkedaé Iyya'é maraja sibawa mapaccing. Nanaissengngi mennang makkedaé Iyya ritu Puwang.” Makkedai Puwang Iya Pommatanré, “Eh tolino dé'é namannennungeng, ancangngi Gog, arung marajaé polé ri wanuwa-wanuwa Mésékh sibawa Tubal, sibawa powadangngi aléna makkedaé Iyya'é balinna. Upabélo'i matu, sibawa tiwii massu polé ri daéra mabélaé ri manorang, lao risining buluna Israélié. Kuwaniro Uwunru matu uso panana angkanna leppe polé ri lima abéyona, sibawa Upasempé ana'-ana' panana polé ri lima ataunna. Ri tompo'na sining buluna Israélié, Gog silaong sininna tentarana sibawa siyempe'na matéi matu, na sining ujuna mennang Uwabbéréyangngi lao ri sininna manu'-manu'é sibawa olokolo masekkangngé untu' riyanré. Iyaro sining prajuri'é menrungngi matu sibawa maté risining dare'é. Iyya, Puwang Iya Pommatanré pura mabbicara. Paompoka matu anré api ri tana Magog sibawa risining wiring tasi'é, kégi pabbanuwana tuwo sibawa amang. Nanaisseng manengngi matu mennang makkedaé Iyya ritu Puwang. Iyakiya ri tengnga-tengngana tau Israélié, Upannessai matu asek-Ku iya mapaccingngé, na iyaro asek-Ku dé'na matu narirotaki. Nanaissengngi bangsa-bangsaé makkedaé Iyya ritu Puwang, Allataala iya mapaccingngé polé ri Israélié.” Makkedai Puwang Iya Pommatanré, “Tongeng, esso iya Uteppuéro poléi matu. Pabbanuwana kota-kotaé ri Israélié massui matu mallompéngeng untu' paddeppungeng sining senjata iya nasalaiyénna, iyanaritu kaliyawo sibawa peddang, uso sibawa ana' pana enrengngé tekkeng pakkunru. Iya manennaro napancajiwi mennang aju tunung, na iyaro genne untu' pituttaung. Jaji dé' naparellu mennang paddeppungeng aju tunung ri dare'é iyaré'ga mattubbang aju ri ale'é, saba' senjata-senjata iya nasalaiyéro genne égana untu' aju tunung. Maddampo'i matu mennang sibawa rampasa'i waramparanna sining tau iya puraé marrampo sibawa rampasa'i waramparanna mennang. Iyya, Puwang Iya Pommatanré pura mabbicara.” Makkedai Puwangnge, “Narékko kajajiyang manengngiro, Uwéréngngi matu Gog tana akkuburukeng ri Israél, ri Lompo Alléttong iya engkaé ri seddé alauna polé ri Tasi Maté. Kuwaniro Gog sibawa sininna tentarana rikuburu matu, sibawa iyaro lompo'é riteppui matu ‘Lompo Pasukang Gog’. Pitumpuleng ittana sining tau Israélié malippui matu kuburu'i sininna ujué kuwammengngi dé' nanajisi'na iyaro tanaé. Sininna pabbanuwana wanuwaé bantui matu jama-jamang akkuburukengngéro; na untu' iyaro tarimai matu mennang pappakalebbi ri esso apakalak-Ku. Iyya, Puwang Iya Pommatanré pura mabbicara. Labe'na pitumpulenro, siyagangngaré tau risuro matu jalajja'i iyaro wanuwaé untu' sappai sining uju iya makkalénnekengngé mupa ri tanaé, narékko engka, kuburu'i untu' pépaccingiwi wanuwaéro polé ri najisi'é. Ri laleng allalengengngéro, sises-siseng runtu mennang buku tau, nawéréngngi matu mennang tanrang ri benrénna, kuwammengngi naitai sining tukang pakkuburu'é iyaro nanakuburu'i iyaro bukué ri Lompo Pasukang Gog. Nasibawang caraéro ripépaccingiwi iyaro tanaé polé ri iya najisi'é. (Ri munri, ri lompo'éro engka matu kota iya asennaé pada sibawa Pasukang Gog.)” Makkedai Puwang Iya Pommatanré lao ri iyya, “Eh tolino dé'é namannennungeng, obbii sininna manu'-manu'é sibawa olokolo laingngé, kuwammengngi napolé kégi-kégi untu' manré akkarobangeng iya Upassadiyaé untu' mennang. Maélo-Ka pakangka pésta marowa risining buluna Israélié, kuwaniro mennang wedding manré juku sibawa ménung dara. Weddingngi mennang manréi sining ujuna pahlawangngé, sibawa ménungngi darana sining panguwasana linoé. Iyaro sining pahlawangngé sibawa panguwasaé riyunoi matu pada-pada sining bémbé laié iyaré'ga ana'-ana' bémbé'é, iyaré'ga sining banténg majjallo'é. Purana Uwuno sining tauwéro pada-pada akkarobangengngé, sining manu'-manu'é sibawa sining olokolo laingngé nanré manengngi matu lunra'na narapi najinna, sibawa ménungngi darana narapi mabo'. Ri méjak-Ku weddingngi mennang pawessoriwi babuwana sibawa sininna anyarangngé nenniya tonangiyéngngi silaong sining pajuwangngé. Iyya, Puwang Iya Pommatanré pura mabbicara.” Makkedai Puwangnge, “Ujampangiwi matu alebbirekku lao ri bangsa-bangsaé. Naita manengngi matu mennang pékkugika makkégunangngi akuwasakku untu' pogau'i sining apettung iya adélé'é. Mappammulai wettuéro naissengngi matu tau Israélié makkedaé Iyya ritu Puwang Allataalana mennang. Sibawa namaingekiwi matu sininna bangsaé makkedaé rikiringngi tau Israélié lao ri appalirengngé nasaba dosana mennang lao ri Iyya. Purani Usalai mennang sibawa Uleppessang ricau ri balié nenniya riyuno ri laleng ammusurengngé. Ugaukengngi mennang situru sibawa anajisikenna sibawa jana mennang, nainappa Usalai mennang.” Makkedai Puwang Iya Pommatanré, “Iyakiya makkekkuwangngé Uwamaséiwi matu umma Israélié wijanna Yakub, sibawa mébbui mennang madécéng paimeng. Nanallalengiwi Ujagaiwi kuwammengngi tette'i asek-Ku ripakalebbi. Rékko monro mupi mennang sibawa tennang ri wanuwanna muto, na dé'gaga muwi séddi tau mancangngi mennang, nanallupaiwi matu mennang pékkugiwi mennang pura ripakasiri nasaba nabali'bellari-Ka. Utiwii matu mennang lisu polé ri wanuwa-wanuwanna balinna, sibawa paitai matu apaccingek-Ku lao ri sininna bangsaé nasaba pangkaukek-Kuro. Nanaissengngi umma'-Ku makkedaé Iyya ritu Puwang Allataalana mennang. Saba' Iyya ritu kiringngi mennang lao ri appalirengngé, iyakiya Iyya'to iya tiwiéngngi mennang lisu ri wanuwanna muto, tessalaiwi muwi séddi tau polé ri mennang kuwaro. Utiri'i matu Roh-Ku ri yasé'na bangsa Israélié, sibawa dé' Usalaiwi matu mennanna. Iyya, Puwang Iya Pommatanré pura mabbicara.” Iyaro wettué tanggala seppulo uleng séddi, ri laleng taung maduwappuloé lima wettu appaliretta, seppulo eppa taung purana ricau Yérusalém, upérasani akuwasanna Puwangnge, Nainappa ritiwika lao. Ri laleng séuwaé pakkitang, natiwika Allataala lao ri tana Israélié sibawa taroka ri bulu iya matanré. Ri yoloku uwitai sikalompo bola iya maddupaé séuwa kota. Natiwina kuwaro sibawa uwitai séddi tau worowané iya millak-killangngé pada-pada gessaé tettong ri seddéna pintu gerbangngé. Makkatenningngi tulu pangukkuru polé ri lénangngé enrengngé aju pangukkuru. Makkedai iyaro worowané lao ri iyya, “Eh tolino dé'é namannennungeng, éngkalingai madécéd-décéng sibawa pénessaiwi sininna séuwa-séuwaé iya uwappaitangngé lao ri iko, saba' untu' iyanaro naritiwiko lao mai. Paissengiwi bangsa Israélié sininna iya muwitaé matu.” Nainappa uwita Bolana Puwangnge iya nattulilingiyé témbo'. Iyaro worowané mappammulani mukkuru'i iyaro témbo'é sibawa aju pangukkuru'na iya lampénaé tellu météré. Annessana iyaro témbo'é tanréna tellu météré sibawa umpe'na telluto météré. Nainappa lao ri gerbang iya mangoloé ri alau. Naénrékini addénénna nalettu'nana ri yasé, naukkuru'ni sakkana sumpangngéro, sakkana tellu météré. Nainappa iyaro worowané naukkuru sakkana lorongngé ri pintu gerbangngé; enneng sitengnga météré, sibawa sakkanato iyaro pintu gerbangngé lima météré. Ri yolona bili'-bili' jagang iya ukkurannaé wékkatellu tellué météré'ro, engka témbo' mariyawa iya tanrénaé sitengnga météré, sibawa umpe'na sitengnga météré'to. Nainappa iyaro worowané mukkuru'i pallawangenna polé ri témbo' ri monrinna séddié bili' jagang lettu ri témbo' ri monrinna bili' jagang ri liwenna, iyanaritu 12,5 météré. Naukkuru towi ruang battowaéro: lampéna seppulo météré. Sumpanna iyaro ruangé mattujui ri seddé saliwenna Bolana Puwangnge. Pallawangenna polé ri pintu gerbang seddé saliweng lettu ri témbo'na ruang battowaé ri bagiyang iya mangoloé ri Bolana Puwangnge iyanaritu 25 météré. Ri témbo' monrié sibawa témbo' pallawana bili'-bili'éro engka tello-tellongeng baiccu. Témbo'-témbo' bagiyang ri lalengngé iya mangoloé ri lorongngé, ribélo-béloiwi sibawa sobbi-sobbi pong pattuku. Nainappa iyaro worowané natiwika molai pintu gerbangngé lao ri seddé saliwenna Bolana Puwangnge. Ri benrénna témbo' saliwengngé ri mattulilinna Bolana Puwang -ngéro riyébburengngi 30 bili'. Ri yolona sining bili'éro engka dapara batu iya mattulilingiyéngngi sininna seddénaro. Iyaro seddé saliwenna lebbi mariyawai naiya seddé lalenna. Kuwaro engka pintu gerbang laing iya lebbi matanré onronna sibawa iya mattujué ri seddé ri lalengngé. Iyaro worowané mukkuru'i pallawangenna iya duwa pintu gerbangngéro: 50 météré. Nainappa iyaro worowané naukkuru gerbang manorang iya mattujué ri seddé ri lalengngé. Ri gerbangngéro, iya tellu bili' jagangngé ri tungke'-tungke' benrénna lorongngé, témbo'-témbo' pallawana enrengngé bili' battowana, iya manenna pada ukkuranna sibawa iya engkaé ri gerbang seddé alau. Sininna loronna gerbangngéro lampéna 25 météré sibawa sakkana 12,5 météré. Makkuwatoro bili' battowana, sining tellongenna, sibawa sobbi-sobbi pong pattukunna pada sibawa iya engkaé ri gerbang alaué. Pitu ana' addénéng mattuju ri gerbangngéro, sibawa ri cappa'na engka bili' battowa iya mangoloé ri seddé saliwenna Bolana Puwangnge. Siyolong sibawa gerbang manorang, engka gerbang laing iya mattujué ri seddé ri lalengngé, pada-pada iya engkaé ri seddéna gerbang alaué. Iyaro tauwé naukkuru'ni pallawangenna iya duwa gerbangngéro: 50 météré. Nainappa iyaro worowané natiwika lao ri gerbang yattang sibawa mukkuru'i. Annessana iyaro gerbangngé padai sibawa gerbang-gerbang iya laingngé. Sining tellongengngé ri bili'-bili'na padai sibawa iya engkaé risining gerbang laingngé. Lampéna loronna gerbangngéro 25 météré, sibawa sakkana 12,5 météré. Pitu ana' addénéng mattuju ri gerbangngéro sibawa bili' battowana engka towi ri cappa'na, mangolo ri seddé saliwenna Bolana Puwangnge. Témbo'-témbo'na bagiyang ri lalengngé iya mangoloé ri lorongngé, ribélo-béloiwi sibawa sobbi-sobbi pong pattuku. Kuwaro engkato gerbang iya mattujué ri seddé ri laleng. Iyaro worowané mukkuru'i pallawangenna iya duwa gerbangngéro: 50 météré. Nainappa iyaro worowané natiwika molai gerbang yattang muttama ri seddé ri laleng. Naukkuru'ni gerbang yattangngéro, na ukkuranna padai sibawa gerbang-gerbangngé ri seddé saliweng. Iyakiya bili' battowana mangoloi ri seddé saliweng. Témbo'-témbo'na bagiyang lalengngé iya mangoloé ri lorongngé, ribélo-béloi towi sibawa sobbi-sobbi pong pattuku. Aruwa ana' addénéng mattuju ri gerbangngéro. Purairo iyaro worowané natiwika molai gerbang alaué muttama ri seddé lalenna. Naukkuru'ni gerbangngéro na ukkuranna pada sibawa gerbang-gerbang laingngé. Bili'-bili' jaganna, témbo'-témbo' ri lalenna sibawa bili' battowana ukkuranna pada-padai iya engkaé ri gerbang-gerbang laingngé. Ri bili'-bili'éro sibawa ri bili' battowana engka tello-tellongeng. Lampéna loronna iyaro gerbangngé 25 météré sibawa sakkana 12,5 météré. Bili' battowaé mangoloi ri seddé saliweng. Témbo'-témbo' bagiyang laleng iya mangoloé ri lorongngé, ribélo-béloiwi sibawa sobbi-sobbi pong pattuku. Aruwa ana' addénéng mattuju ri gerbangngéro. Paccappurenna iyaro worowané natiwika ri gerbang manorang. Naukkuru'i iyaro gerbangngé na ukkuranna padai sibawa gerbang-gerbang laingngé. Makkuwatoro bili'-bili' jaganna, témbo'-témbo' lalenna sibawa bili' battowana padai sibawa iya engkaé ri gerbang-gerbang laingngé. Risining bili'na sibawa bili' battowana engka tello-tellongeng. Lampéna loronna iyaro gerbangngé 25 météré sibawa sakkana 12,5 météré. Bili' yolona mangolo towi ri seddé saliweng. Témbo'-témbo' bagiyang lalengngé iya mangoloé ri lorongngé, ribélo-béloiwi sibawa sobbi-sobbi pong pattuku. Aruwa ana' addénéng mattuju ri gerbangngéro. Ri seddé saliwenna engka séddi bili' pattambana ri gerbang lalengngé tibang manorang. Polé ri bili' pattambanaro engka séddi sumpang iya mattujué ri bili' battowaé. Kuwaniro ribissai sining olokolo untu' akkarobangeng ritunué. Ri bili' battowaéro engka eppa méjang, duwa ri tungke benrénna. Ri yasé'na sining méjangngénnaro rilétta olokolo untu' akkarobangeng ritunué, iyaré'ga akkarobangeng pappaledda dosaé iyaré'ga akkarobangeng passullé arogingngé. Ri saliwenna bili' battowaéro engka topa eppa méjang, duwa ri tungke benrénna gerbang manorangngéro. Jaji, iya manenna engka aruwa méjang onrong mallétta akkarobangeng: eppa ri laleng sibawa eppa ri saliwenna seddéna. Iya eppa méjangngé ri bili' pattambana iya ripaké untu' passadiyai akkarobangeng ritunué ripai polé ri batué. Tanréna iyaro méjangngé sitengnga météré, na bagiyang yasé'na massulapa eppai, lampé sibawa sakkana tungke-tungke tellu siparape météré. Ri yasé'na sining méjangngéro ritaro pakkakkassa'é untu' létta'i olokolo akkarobangengngé. Wirinna iyaro sining méjangngé mappunnai pamiring sillebba 75 milli. Sininna juku iya maéloé riyakkarobangeng ripalénne'i ri yasé'na sining méjangngéro. Nainappa iyaro worowané tiwika ri seddé laleng. Kuwaro engka duwa bola, iya séddié ri benrénna gerbang manorangngé mangoloi ri yattang, na iya séddiéssi ri benrénna gerbang yattang mangoloi ri manorang. Iyaro worowané napowadai lao ri iyya makkedaé bola iya mangoloé ri yattanro ripassadiyai untu' sining imang iya majjamaé ri Bolana Puwangnge, na bola iya mangoloé ri manorang ripassadiyai untu' sining imang iya majjamaé ri mézbaé. Iya manenna imangngéro harusu'i polé ri wija-wijanna Zadok. Saba' polé ri suku Léwi banna wija-wijanna Zadok iya weddingngé mangolo ri Puwangnge untu' tumaningiwi Aléna ri laleng assompangngé. Iyaro worowané naukkuru'ni seddé lalenna. Bentu'na massulapa eppa: lampé sibawa sakkana tungke-tungke 50 météré. Bolana Puwang -ngéro engkai ri tibang yajang, na ri yolona engka séddi mézba. Iyaro worowané natiwika ri laleng bili' tengngaé, iya riyasengngé Onrong Iya Mapaccingngé. Naukkuru'ni lorong iya mattujué kuwaro: lampéna tellu météré, na sakkana lima météré. Renringngé ri iya duwa benrénna umpe'na duwa sitengnga météré. Nainappa naukkuru Onrong Iya Mapaccingngéro: lampéna 20 météré sibawa sakkana seppulo météré. Nainappa nauttamaki bili' lalengngé. Naukkuru'ni lorong iya matujué lao kuwaro: lampéna séddi météré, sakkana tellu météré, na renrinna ri iya duwa benrénna umpe'na tellu sitengnga météré. Nainappa naukkuru'to bili'éro: bentu'na massulapa eppa, lampéna sibawa sakkana tungke-tungke seppulo météré. Nainappa makkeda lao ri iyya, “Iyanaé Onrong Iya Pommapaccingngé.” Purairo naukkuru'ni iyaro worowané témbo lalengngé polé ri Bolana Puwangnge: umpe'na tellu météré. Ri témbo mattulilinna Bolana Puwang -ngéro engka bili'-bili' iya sakkanaé duwa météré. Iyaro bili'-bili'é mallangga tellu na ri tungke langga engka 30 bili'. Témbo saliwenna tungke langga lebbi manipii naiya témbo langga ri yawana, angkanna iyaro bili'-bili'é weddingngi risusung tessebbo'i témbo Bolana Puwang -ngéro. Polé ri saliweng, iyaro témbo Bolana Puwangnge paitai pada umpe'na polé ri yawa lettu ri yasé. Ri témbo saliwengngé polé ri Bolana Puwangnge, ri seddé saliwenna bili'-bili'éro, engka duwa addénéng loppo angkanna weddingngi tauwé ménré polé ri langga ri yawaé ménré ri langga duwaé sibawa tellué. Ri liwenna seddéna tibang yajang, engka bola loppo iya lampénaé 45 météré sibawa sakkana telluppulo lima météré, na umpe'na sining renrinna duwa sitengnga météré. Iyaro worowané naukkuru'ni lampéna Bolana Puwangnge: limappulo météré. Polé ri monri Bolana Puwangnge lettu ri témbo monrinna bola loppoé ri seddé yajanro pallawangenna limappulo météré. Bagiyang yolona polé ri Bolana Puwangnge iya mangoloé ri alau sibawa séddéna ri abéyo ataunna, sakkana limappulo météré. Iyaro worowané naukkuru towi bola loppo iya mangoloé ri seddéna ri tibang yajang: sakkana limappulo météré, muttama'ni sining renrinna ri abéyo ataunna. Sining bili'é ri Bolana Puwangnge, bili' yoloé, Onrong Iya Mapaccingngé, sibawa Onrong Iya Pommapaccingngé, ribélo-béloiwi sibawa pamiring aju, polé ri appéna lettu ri tello-tellongenna. Iyaro tello-tellongengngé weddingngi ritongko sibawa kaing paddenring. Sininna renring bagiyang lalengngé ribélo-béloiwi sibawa sobbi-sobbi pong pattuku sibawa kérub, séddi pong pattuku ri yelle'na tungke duwa kérub. Iyaro kérub-é mappunnaiwi duwa tappa, séddi tappa tolino iya mangoloé ri pong pattukué seddé abéyo, sibawa tappa singa iya mangoloé ri pong pattukué seddé atau. Iyaro sobbi-sobbi'é engka ri sininna Bolana Puwangnge, mappammulai ri appéna lettu ri bagiyang yasé'na sumpangngé. Tau-tau tange'na Onrong Iya Mapaccingngé massulapa eppai. Ri yolona Onrong Iya Pommapaccingngé engka séuwa iya paitaé pada-pada mézba polé ri ajué. Tanréna séddi sitengnga météré sibawa sakkana séddi météré. Sining sunna, pabborina sibawa renrinna riyébbui polé ri ajué. Makkedai iyaro worowané lao ri iyya, “Iyanaé méjang iya engkaé ri yolona ahadérékenna Puwangnge.” Ri cappa'na lorong iya mattujué ri Onrong Iya Mapaccingngé engka séuwa sumpang, makkuwatoro ri cappa'na lorong iya mattujué ri Onrong Iya Pommapaccingngé. Iyaro sining sumpangngé mappunnai duwa tange iya tattimpa ri tengngaé. Tange'na Onrong Iya Mapaccingngé ribélo-béloiwi sibawa sobbi-sobbi pong pattuku sibawa kérub-kérub, pada-pada risining renrinna. Ri yolona bili' yoloé iyanaritu ri saliwenna, engka paddenring polé ri ajué. Ri iya duwa tittina renring benrénna engka tello-tellongeng, sibawa renrinna ribélo-béloiwi sibawa sobbi-sobbi pong pattuku. Nainappa iyaro worowané natiwika lao ri seddé saliweng sibawa dulukka lao ri bola laingngé ri tibang manoranna Bolana Puwangnge, dé' namabéla polé ri bola loppoé ri tibang yajanna Bolana Puwang -ngéro. Iyaro bolaé lampéna limappulo météré, sibawa sakkana duwappulo lima météré. Séddi benrénna iyaro bolaé mangoloi ri légo-légo iya sakkanaé seppulo météré, na benréng iya laingngé mangoloi ri appé batué ri seddé saliweng. Iyaro bolaé mallangga tellui; tungke langga tassiso'i muttama naiya langga ri yawanaé. Ri yolona sining bili'éro, ri tibang lalenna engka lorong iya sakkanaé lima météré sibawa lampéna limappulo météré. Sining sumpanna mangoloi ri manorang. Sining bili'é ri langga yasé'é lebbi macikke'i naiya sining bili'é ri langga-langga yawana, saba' lorong-lorongngé ri yolona sining bili' ri yasé'éro lebbi masakkai naiya engkaé ri yawana. Iyaro sining bili'é mallangga tellui sibawa dé' naritula' ri alliri-allirié pada-pada sining bolaé ri seddéna. Ri yolona bili'-bili'na engka séddi lorong iya pada-padaé lorongngé ri tibang manorang. Pada ukkuranna, pada modélé'na, sibawa padato sining sumpanna. Ri yawana bili'-bili'é ri benréng yattang, iyanaritu ri cappa alauna ri ponna témbo'é, engkato séddi sumpang. Makkedai iyaro worowané lao ri iyya, “Mapaccing duwa iyaro bolaé. Kuwaro, sining imang iya weddingngé mangolo ri ahadérékenna Puwangnge, manréi sining akkarobangeng iya kaminang mapaccingngé. Kuwatoniro harusu mennang taroi sining akkarobangeng iya kaminang mapaccingngé, iyanaritu: akkarobangeng gandong sibawa akkarobangeng pappaledda dosa iyaré'ga akkarobangeng passullé aroging. Rékko leppe jamanni sining imangngé ri Bolana Puwangnge, namaéloi lao ri seddé saliweng, pakéyang ripallaing iya napaké mennang wettunna tumaningiwi assompangngé harusu'i nasalai mennang ri bili'-bili'éro. Harusu'i mennang paké pakéyang laing, purapiro nappa mennang wedding lao ri onronna ra'ya'é maddeppungeng.” Puranana iyaro worowané mukkuru'i bolaé ri seddéna Bolana Puwangnge ri bagiyang lalengngé, natiwina massu molai gerbang alau, nainappa mukkuru'i bagiyang mattulilinna Bolana Puwangnge. Nasibawang tekkeng pangukkuru'na naukkuru'ni benréng tibang alauna: 250 météré. Jaji, daéra Bolana Puwangnge nassanraiwi sikonrong tana massulapa eppaé, ukkuranna 250 météré ri tungke benrénna. Iyaro tanaé nattulilingiwi séddi témbo untu' passarangngi daéra iya ripallaingngé untu' Puwangnge naiya daéra untu' tau maégaé. Nainappa iyaro worowané natiwika ri gerbang iya mangoloé ri alau, nakkuwanrio uwita polé ri alau cahaya pawiloé iya tanrangiyéngngi ahadérékenna Allataalana Israélié. Paéngkalingani saddanna Allataala pada-pada dolangeng memmu'é, namillak-killang linoé nasaba cahaya ahadérékenna Allataala. Iyaro pakkitangngé pada-pada iya uwitaé wettunna Allataala polé untu' mancuru'i Yérusalém, sibawa pada-pada iya uwitaé ri Salo Kébar. Nainappa uparebba aléku sibawa suju'. Cahaya iya pawilo-wiloéro kédoi lalo ri gerbang alaué nainappa muttama ri laleng Bolana Puwangnge. Naakkana Rohna Puwangnge sibawa natiwika lao ri seddé laleng; kuwaniro uwita Bolana Puwangnge risalipuri cahaya ahadérékenna Puwangnge. Wettunna tettong mupi iyaro worowané ri benrékku, uwéngkalingai makkeda Puwangnge lao ri iyya polé ri laleng Bolana Puwangnge, adan-Na, “Eh tolino dé'é namannennungeng, iyanaé kadéra arajak-Ku. Kuwaniyé maélo-Ka monro ri tengnga-tengngana umma'-Ku Israélié sibawa paréntai mennang mannennungeng. Muwi mennang, iyaré'ga arung-ngarunna, dé'na nacarépaiwi matu asek-Ku iya mapaccingngé sibawa massompa barahala iyaré'ga kuburu'i ujuna arung-ngarunna mennang ri onrongngéwé. Riyolo arung-ngarunna mennang naébbui tau-tau tange'na saorajana ri benrénna tau-tau tange'na Bola-Ku, angkanna banna engka séddi renring bawang ri pallawangenna. Purai mennang nacarépai asek-Ku iya mapaccingngé nasibawang pangkaukenna mennang iya mappakaciddi-ciddi'é. Rimakkuwannanaro Upabbinasai mennang ri laleng cai-Ku. Iyakiya mappammulai makkekkuwangngé harusu'i mennang mappésau massompa barahala sibawa palétté'i ujuna arung-ngarunna mennang. Purairo, monro-Ka matu ri tengnga-tengngana mennang untu' mannennungeng.” Nainappa makkedasi Puwangnge, “Eh tolino dé'é namannennungeng, paissengiwi umma Israélié passalenna Bola-Kué, sibawa suroi mennang salidikiwi rancanganna. Ebbui mennang masiri nasaba dosana. Namasirinana mennang nasaba sining pangkaukenna, tarangkanni rancanganna Bola-Kué lao ri mennang: modélé'na, sining sumpang muttama'na sibawa massuna, susunang bangunanna, sininna peraturanna sibawa hukkuk-hukkunna. Oki manengngi iyaro untu' mennang kuwammengngi weddingngi naita mennang sibawa pénessaiwi carana matoro manengngi, enrengngé turusiwi sininna peraturanna. Iyanaé sipa' assilaingenna Bolana Puwangnge: Sininna daéraé ri seddéna coppo bulué iyanaritu mapaccing senna'i.” Iyanaé ukkuranna mézbaé situru ukkurang iya napaké untu' mukkuru'i Bolana Puwangnge. Ri mattulilinna ajéna mézbaé engka séddi bénrang iya liyunnaé sitengnga météré sibawa sakkana sitengnga météré'to, sibawa wiring saliwenna sittanré siparape météré. Polé ri bénrangngé lettu mézbaé iya kaminang mariyawaé, tanréna séddi météré. Bagiyang tengngana tanréna duwa météré, na sitengnga météré lebbi cipii naiya lébuna ajéna mézbaé. Bagiyang matellué, iyanaritu coppo'na mézbaé, sitengnga météré'to lebbi macipi naiya lébuna bagiyang tengngana. Iyaé bagiyang matellué iyanaritu onrong mattunu akkarobangeng; tanréna duwa météré. Ri iya eppa sunna engka bagiyang iya mabbuccué pada-pada tanru'é. Coppo'na iyaro mézbaé massulapa eppai; tungke benrénna ukkuranna enneng météré. Bagiyang tengngana massulapa eppato, tungke benrénna ukkuranna pitu météré, sibawa séddi pamiring saliweng iya tanrénaé siparape météré. (Sakkana bénranna sitengnga météré). Ri benréng alauna engka addénéng iya mattujué ri coppo'na mézbaé. Makkedai Puwang Iya Pommatanré lao ri iyya, “Eh tolino dé'é namannennungeng, éngkalingai ada Upowadaé lao ri iko. Rékko tépuni iyaro mézbaé, harusu'ko résmikangngi sibawa mattunu akkarobangeng ri yasé'na nenniya meppikiwi sibawa dara akkarobangeng. Banna imang wija-wijanna Zadok polé ri suku Léwi bawang iya weddingngé lao ri yolo-Ku untu' pakangka assompang. Iyya, Puwang Iya Pommatanré mapparéntangngi gau'éro. Wéréngngi mennang sikaju saping lai lolo untu' akkarobangeng pappaledda dosa. Alai céddé darana namuwassapuwangngi ri tanru-tanru'é ri iya eppa sunna coppo'na mézbaéro, makkuwatoro sining sunna ri bagiyang tengngana enrengngé ri mattulilinna wirinna mézbaéro. Nasibawang caraéro mupaccingiwi iyaro mézbaé sibawa pallaingngi untu' Iyya. Nainappa alano saping lai untu' pappaledda dosaéro, namutunui ri onrong iya puraé ripattentu, iyanaritu ri saliwenna daéra mapaccinna Bolana Puwangnge. Bajana harusu'ko makkasuwiyangeng sikaju bémbé lai iya dé'é gaga sala-salanna untu' akkarobangeng paddampengeng dosa. Paccingiwi iyaro mézbaé sibawa dara bémbé'éro, pada-pada iya mupogau'é sibawa saping lai loloéro. Rékko purani mupogau', alano sikaju saping lai lolo sibawa sikaju bémbé lai lolo, iya duwanna iya dé'é gaga sala-salanna, nainappa mutiwi lao ri Iyya. Sining imangngé harusu'i guguruwi pejjé ri yasé'na iya duwa olokolo'éro sibawa tunui mancaji akkarobangeng untu' Iyya. Pitungngesso ittana, esso-esso harusu'ko makkarobangeng sikaju bémbé, saping lai lolo, sibawa bimbala lai untu' akkarobangeng paddampengeng dosa. Iyaro olokolo'é dé nawedding engka sala-salanna. Pitungngesso ittana harusu'i sining imangngé pakangka upacara rirésmikanna mézbaéro sibawa passadiyai untu' wedding ripaké. Labe'nana iya pitu essoéro, sining imangngé harusu'i mappammula makkasuwiyang ri yasé'na mézbaéro akkarobangeng ritunu sibawa akkarobangeng assidaméngeng untu' umma'é. Na-Umasennang matu sibawa iko maneng. Iyya, Puwang Iya Pommatanré pura mabbicara.” Nainappa iyaro worowané nadulussika lao ri gerbang saliwengngé ri tibang alauna daéra Bolana Puwangnge. Iyaro gerbangngé tattongkoi, makkedai Puwangnge lao ri iyya, “Iyaé gerbangngé harusu'i tette tattongko sibawa dé' nawedding ritimpa. Dé' muwi séddi tau wedding muttamakiwi, saba' Iyya, Puwang Allataalana Israélié, pura muttama ri Bola-Ku molai gerbangngéwé. Jaji, iyaé gerbangngé harusu'i tette tattongko. Iyakiya panguwasa iya mapparéntaé weddingngi lao ri gerbangngéro untu' manré inanré mapaccing ri yolo-Ku. Harusu'i muttama lalo ri bili' battowaé sibawa lisu molai iyatoro lalengngé.” Nainappa iyaro worowané natiwika lao ri gerbang manorang iya siyolongngé Bolana Puwangnge. Upénessaini, nauwitani iyaro Bolana Puwangnge risalipuri cahaya pawilo-wilo iya tanrangiyéngngi ahadérékenna Puwangnge. Nainappaka parebbai aléku sibawa suju', namakkeda Puwangnge lao ri iyya, “Eh tolino dé'é namannennungeng, pénessaiwi madécéd-décéng aga iya muwitaé sibawa iya muwéngkalingaé. Upaissengiko matu sininna peraturangngé sibawa hukkungngé passalenna Bola-Kué. Okii madécéd-décéng niga-niga iya ripalaloé muttama ri Bola-Ku sibawa niga-niga iya riyattéyangngé. Powadangngi umma Israél iya pojiyéngngi maronta'ro makkedaé Iyya, Puwang Iya Pommatanré, dé'na Umaélo leppessangngi mennang pogau'i najisi'é. Purai mennang nacarépai Bola-Ku, saba' wettunna riyakkasuwiyangeng lunra sibawa dara akkarobangengngé lao ri Iyya, napalaloi mennang muttama ri lalenna sining tau laing iya dé'é narisunna, sibawa iya dé'é naturusi-Ka. Nasibawang sining pangkaukenna mennang iya mappakaciddi-ciddi'éro, purani mennang najjalékkai assijancik-Ku sibawa mennang. Tenniya bawang aléna mennang iya pakangkaé upacara-upacara mapaccing ri laleng Bola-Ku, sangadinna sining tau laing iya nasuroé mennang untu' pogau'i. Iyya, Puwang Iya Pommatanré, mappallebbangengngi makkedaé tau laing iya dé'é narisunna sibawa tau iya dé'é namapato lao ri Iyya, dé' naripalalo muttama ri Bola-Ku. Iyaro takkennai towi untu' tau laing iya monro mattette'é ri tengnga-tengngana bangsa Israélié.” Makkedai Puwangnge lao ri iyya, “Iyya hukkungngi matu sining tau Léwi iya silaongngé sibawa sining tau Israél laingngé, nasalaika namassompa barahala. Ri laleng Bola-Ku, banna mennang weddingngi natumaningi-Ka selaku pajjama sibawa panganrowang gerbang. Weddingngi mennang maggéré olokolo untu' akkarobangeng ritunu sibawa pakkasuwiyang, sibawa waji'i mennang untu' tuli tumaningiwi umma'é. Iyakiya nasaba purai mennang napogau' upacara assompang barahalaé untu' bangsa Israélié, nanasibawang caraéro nassarénréngengngi bangsaéro muttama ri laleng dosaé, na Iyya, Puwang Iya Pommatanré, mattanro makkedaé harusu'i mennang rihukkung. Dé'na nawedding mennang tumaningi-Ka selaku imang iyaré'ga géssai aga iya mapaccingngé untu' Iyya, iyaré'ga muttamakiwi onrong Iya Pommapaccingngé. Iyanaro pahukkungenna sining pangkaukeng najisi'é iya puraé napogau' mennang. Makkekkuwangngé Usuroi mennang untu' pogau' jama-jamang makassara iya parellué ripogau' ri Bola-Ku.” Makkedai Puwang Iya Pommatanré, “Wettunna tau Israélié nasalai-Ka, sining imang Léwié polé ri wija-wijanna Zadok tette'i matinulu tumaningi-Ka ri Bola-Ku. Rimakkuwannanaro mennang ritu makkekkuwangngé harusu tumaningi-Ka sibawa lao ri yolo-Ku untu' makkasuwiyangeng lunra sibawa dara polé risining akkarobangengngé. Banna mennang bawang iya weddingngé muttama ri Bola-Ku, tumaningi-Ka ri mézba-Ku, sibawa pimpingngi kebaktiyangngé ri Bola-Ku. Wettunna mennang muttamakiwi pintu gerbang mattujué ri seddé laleng, harusu'i mennang paké pakéyang lénang. Dé' nawedding mennang paké pakéyang polé ri wol-é rékko mattengngangngi jaga ri seddé laleng, iyaré'ga ri laleng Bola-Ku. Kuwammengngi aja' namapella sibawa mapuse, harusu'i mennang paké saluwara' lénang temmabbabbang, sibawa passiyo ulu polé ri lénangngé. Rékko laowi mennang ri seddé saliweng, kégi maddeppungeng umma'é, iyaro imang-ngimangngé harusu'i naludung pakéyang dinasna mennang ri laleng bili'-bili' mapaccingngé ri Bola-Ku, nainappa paké pakéyang laingngé, kuwammengngi pakéyang ripallaingngéro dé' nacilakaiwi umma'é. Dé' nawedding sining imangngé kellui ulunna, iyaré'ga leppessangngi gemme'na malampé. Iyaro gemme'é harusu'i rirette ponco situru atoreng iya ripattette'é. Dé' nawedding mennang ménung anggoro rékko maéloi muttama ri seddé lalenna. Sining imangngé banna weddingngi nakawingi ana'-ana'dara Israél iya perawangngé mupa iyaré'ga jandana imangngé. Dé' nawedding nakawingi makkunrai iya ritelle'é. Harusu'i nappagguruwang sining imangngé lao ri umma'-Ku untu' pasilaingengngi kéga ripallaing untu' Iyya sibawa kéga dé', kéga mapaccing situru agamaé sibawa kéga najisi'. Rékko mompoi assisalang parakara hukkung, harusu'i mennang napurai situru sibawa hukkung-hukkuk-Ku. Harusu'i mennang napakaraja pésta-pésta agamaé, situru sining atorek-Ku sibawa hukkung-hukkuk-Ku, enrengngé pakalebbii Saba'é selaku esso iya ripallaingngé untu' Iyya. Séddié imang dé' nawedding panajisi'i aléna sibawa géssa uju, sangadinna ujuna tomatowanna, ana'na, silessurenna worowané iyaré'ga ana'daranna iya dé'éppa nakawing. Mapaccinnana paimeng, harusu'i natajeng pitungngessopa, nainappa lao ri seddé lalenna Bolaku, sibawa makkasuwiyangeng akkarobangeng untu' pépaccingiwi aléna kuwammengngi nawedding majjamasi ri Bola-Ku. Iyya, Puwang Iya Pommatanré pura mabbicara. Sining imangngé natarimai jabatang imangngéro selaku bagiyang untu' mennang polé ri aga iya Uwabbéréyangngé lao ri Israélié massossoreng. Dé' nawedding mappunnai agi-agi ri Israélié: Iyya ritu waramparanna mennang. Harusu'i mennang tuwo polé ri pakkasuwiyang gandongngé, akkarobangeng pappaledda dosaé, sibawa akkarobangeng passullé arogingngé; sibawa sininna séuwa-séuwaé iya puraé ripallaing untu' Iyya, harusu'i riwéréng mennang. Harusu'i riwéréng imangngé bagiyang iya kaminang makesingngé polé ri sininna rupanna wassélé éngngalang iya mammulangngé, sibawa polé ri agi-agi iya riyakkasuwiyangengngé lao ri Iyya. Sises-siseng bangsa Israélié mébbu roti, roti iya mammulangngé harusu'i untu' sining imangngé. Na-Ubarakkakiwi matu sining bolana bangsa Israélié. Manu'-manu' sibawa olokolo iya maté riyalé, iyaré'ga iya ritikkengngé ri olokolo masekkangngé, dé' nawedding nanré sining imangngé.” Ri wettu dé'napa naritawa-tawa iyaro tanaé mancaji tana mana untu' tungke suku, harusu'i ripallaing séddi bagiyang untu' Puwangnge. Iyaro tanaé harusu'i lampéna 12,5 kilo, sibawa sakkana seppulo kilo. Sininna daéraéro ripannessai mapaccing. Untu' Bolana Puwangnge ripassadiyangengngi polé ri tanaéro sibagiyang iya massulapa eppaé, ukkuranna 250 météré tungke sulapa'na, sibawa riyattulilingi lapangang sissakka 25 météré nakkuwaniro harusu ripatettong Bolana Puwangnge. Sitengngana polé ri tanaéro, iya lampénaé 12,5 kilo, sibawa sakkana lima kilo harusu'i ripassadiya untu' patettongngi Bolana Puwangnge, iyanaritu daéra iya kaminang mapaccingngé. Iyaro tanaé mapaccingngi, sibawa ripassadiyai untu' sining imang iya majjamaé pajoppai assompangngé ri Bolana Puwangnge. Sibagiyang polé ri tanaéro mancaji onronnai matu untu' bolana mennang, na sibagiyassi untu' Bolana Puwangnge. Sitengngasi polé ri tanaéro sillowang 12,5 kilo kali lima kilo harusu'i ripassadiya untu' sining tau Léwi iya majjamaé ri Bolana Puwangnge. Kuwaniro patettong matu kota-kota kégi mennang wedding monro. Ri lainnaé tana iya mapaccingngéro, harusu'i ripallaing sikonrong tana iya lampénaé seppulo duwa sitengnga kilo sibawa sakkana duwa sitengnga kilo, untu' séddi kota iya weddingngé naonroi nigi-nigi polé ri bangsa Israélié. Untu' panguwasa iya mapparéntaé harusu towi ripassadiyangeng tana. Iyaro tanaé mallebbangngi polé ri pakkaséséng yajanna daéra iya ripallaingngé untu' Puwang -ngéro, lettu ri Tasi Tengngaé, sibawa polé ri pakkaséséng alauna daéra iya ripallaingngéro, lettu ri pakkaséséng alauna wanuwaéro. Jaji lampéna padai sibawa lampéna polé ri sala séddinna bagiyang tana iya riyabbéréyangngé lao ri suku-suku Israélié. Iyaro tanaé mancajiwi appunnangenna panguwasa iya mapparéntaé ri tana Israélié, kuwammengngi dé'na natenre'i umma'-Ku, sangadinna mpéréngngi daéra lebbinnaro mancaji appunnangenna suku-suku Israélié. Makkedai Puwang Iya Pommatanré, “Genne'ni dosa-dosamu, éh sining panguwasana Israélié! Pappésauni tindakammu iya siyélo-élomué sibawa tenre'i ra'ya'éro. Pogau'ni aga iya tongengngé sibawa adélé'é. Aja' sises-sisenna mupaddésu'i umma'-Ku polé ri tanana mennang. Iyya, Puwang Iya Pommatanré mapparéntangngi iyaro lao ri iko. Pakéi timbangengngé sibawa ola iya tongengngé. Séddi éfa untu' mola'i anu marakkoé harusu'i pada lise'na sibawa séddi bat untu' mola'i anu maccolo'é. Ukkuranna harusu'i séddi homer. Jaji, iyaro sining ola'é harusu'i makkuwaé: 1 homer = 10 éfa = 10 bat. Timbangengngé harusu'i makkuwaé: 1 syikal = 20 gera 1 mina = 60 syikal Sininna pabbanuwana wanuwaé harusu'i natiwi sining pakkasuwiyangngéro lao ri panguwasa iya mapparéntaé ri Israélié. Aléna ritu harusu melli olokolo untu' akkarobangeng ritunu sibawa bahab-bahang untu' akkarobangeng gandong sibawa akkarobangeng anggoro untu' sininna bangsa Israélié ri esso-esso marajaé, Ramé-ramé Uleng Barué, esso-esso Saba'é sibawa esso-esso maraja laingngé. Harusu'i passadiya akkarobangeng paddampengeng dosa, akkarobangeng gandong, akkarobangeng ritunu, sibawa akkarobangeng pappasidamé untu' méllaungengngi addampeng bangsa Israélié.” Makkedai Puwang Iya Pommatanré lao ri umma'-Na, “Ri tanggala séddinna uleng séddi, harusu'ko pépaccingiwi Bola-Ku sibawa makkasuwiyangeng sikaju saping lai malolo iya dé'é gaga sala-salanna. Harusu'i nala imangngé darana akkarobangeng pappaledda dosaéro, nainappa nassapuwang ri tau-tau tange'é ri Bola-Ku, makkuwatoro ri iya eppa sunna mézbaé, sibawa ri tau-tau tange'na gerbang iya mattujué ri seddé lalengngé. Ebbu towi makkuwaro ri tanggala pitunna ulengngéro, untu' tungke tau iya puraé madosa sibawa dé' nattungkaiwi iyaré'ga nasaba dé' naissengngi. Nasibawang caraéro mujagaiwi matu apaccingenna Bola-Ku. Ri tanggala seppulona eppa uleng séddi, harusu'ko ramé-raméiwi Pésta Paskaé. Pitungngesso ittana sininna tauwé harusu'i manré roti iya dé'é raginna. Ri esso iya mammulangngé, panguwasa iya mapparéntaé harusu'i makkasuwiyangeng sikaju saping lai untu' akkarobangeng pappaledda dosa untu' aléna sibawa untu' sininna ra'ya'é. Ri lalenna ramé-ramé iya pitungngessoéro ittana, esso-esso harusu'i makkasuwiyangeng lao ri Puwangnge pitu kajunna saping lai sibawa pitu kajunna bimbala lai iya dé'é gaga sala-salanna, nainappa natunu makkalépu. Harusu towi esso-esso makkasuwiyangeng sikaju bémbé lai untu' akkarobangeng paddampengeng dosa. Ri lainnaéro, harusu'i makkasuwiyangeng gandong singngéga 17,5 bang untu' tungke sikaju saping lai enrengngé tellu bang minnya zaitun untu' tungke kajunna bimbala laié. Ri Pésta Kalampang Daud-daungngé, iya ripammulaiyé ri tanggala seppulo lima uleng pitu, pitungngesso ittana harusu'i panguwasaé makkasuwiyangeng sining akkarobangeng iya padaé esso-esso, iyanaritu akkarobangeng paddampengeng dosa, akkarobangeng ritunu, sibawa akkarobangeng gandong enrengngé minnya zaitun.” Makkedai Puwang Iya Pommatanré, “Pintu gerbang alau iya mattujué ri seddé laleng harusu'i tette tattongko ittana enneng esso appallaungeng. Iyaro gerbngngé banna weddingngi ritimpa ri esso Saba'é sibawa Ramé-ramé Uleng Barué. Ri esso-essoéro harusu'i muttama panguwasaé polé ri seddé saliweng lalo ri bili' battowaé nainappa tettong ri benrénna alliri gerbangngé, ri wettunna sining imangngé makkasuwiyangeng akkarobangeng ritunu sibawa akkarobangeng pappasidamé polé ri panguwasaé. Ri pintu gerbangngéro harusu'i suju' sibawa sompai Puwangnge, nainappa lao. Nainappa narapi wenni, iyaro gerbangngé dé' nawedding ritongko. Ri yolonatoro gerbangngé, sininna ra'ya'é harusu suju' sompai Puwangnge tungke esso Saba' sibawa Ramé-ramé Uleng Baru. Ri esso Saba'é harusu'i panguwasaé makkasuwiyangeng lao ri Puwangnge akkarobangeng ritunu iya polé ri enneng kajunna ana' bimbala sibawa sikaju bimbala lai, iya manenna iya dé'é gaga sala-salanna. Nasibawang bimbala laiéro harusu towi riyakkasuwiyangeng akkarobangeng gandong singngéga 17,5 bang, sibawa nasilaongeng tungke ana' bimbala, harusu'i riyakkasuwiyangeng akakrobangeng gandongngé singngéga iya nacinnaiyé. Tungke akkarobangeng gandongngé harusu'i nasibawang pakkasuwiyang minnya zaitun tellu bang. Ri Ramé-ramé Uleng Barué iyaro pakkasuwiyangngé harusu'i maddupa sikaju saping lai, enneng kajunna ana' bimbala, sibawa sikaju bimbala lai, iya manenna iya dé'é gaga sala-salanna. Nasilaongeng tungke saping laié sibawa bémbé laié, harusu'i makkasuwiyangeng gandong singngéga 17,5 bang, sibawa nasilaongeng tungke ana' bimbala'é, siyagi-siyagi situru cinnana. Tungke akkarobangeng gandongngé harusu'i nasilaongeng pakkasuwiyang minnya zaitun tellu bang. Rékko maéloi panguwasaé massompa ri Bola-Ku, harusu'i muttama lalo ri bili' battowaé, sibawa lisunna mola towi lalengngéro. Sibalé'na, rékko ri esso-esso marajaé poléi ra'ya'é untu' massompa lao ri Puwangnge, mennang iya muttama'é lalo ri gerbang manorang, rékko lisui harusu'i lalo ri gerbang yattang rékko purani mennang massompa. Na mennang iya muttama'é lalo ri gerbang yattang, wettu lisunna harusu'i lalo ri gerbang manorang. Riyattéyang sining tauwé lisu lalo ri laleng iya naolaé wettunna muttama; harusu'i mennang lisu lalo ri gerbang ri liwenna. Panguwasaé harusu'i muttama ri Bolana Puwangnge silaong sibawa ra'ya'é na wettu lisunna harusu towi silaong. Ri esso-esso péstaé sibawa ramé-ramé, nasilaongeng tungke saping laié sibawa tungke bimbala laié harusu'i riyakkasuwiyangeng gandongngé singngéga 17,5 bang, sibawa nasilaongeng tungke ana' bimbala'é, siyagi-siyagi situru cinnana tau iya massompaé. Tungke akkarobangeng gandongngé harusu'i nasibawang pakkasuwiyang minnya zaitun tellu bang. Rékko macinnai panguwasaé mabbéré pakkasuwiyang cenning ati lao ri Puwangnge, muwi maddupa akkarobangeng ritunu iyaré'ga akkarobangeng pappasidamé, gerbang alau iya mattujué ri seddé lalengngé harusu'i ritimpakengngi. Harusu'i nakkasuwiyangeng iyaro akkarobangengngé sibawa cara iya pada-padaé napogau'é ri esso Saba'é, iyakiya lisunna muwa, iyaro gerbangngé harusu'i ritongkosi.” Makkedai Puwangnge, “Esso-esso ri éléé, sikaju ana' bimbala iya makkéumuru'é sitaung sibawa iya dé'é gaga sala-salanna harusu'i riyakkasuwiyangeng untu' akkarobangeng ritunu lao ri Puwangnge. Ri lainnaéro, tungke élé harusu towi riyakaksuwiyangeng duwa kilo gandong sibawa sibang minnya zaitun untu' rikoréngngi gandongngéro. Iyanaro akkarobangeng gandong iya esso-essoé harusu riyakkasuwiyangeng lao ri Puwangnge; iyaro atorengngé takkennai untu' mannennungeng. Elé-élé, harusu'i tuli riyakaksuwiyangeng lao ri Puwangnge: sikaju ana' bimbala, akkarobangeng gandong sibawa minnya zaitun.” Puwang Iya Pommatanré mabbéré parénta, adanna, “Rékko panguwasa iya mapparéntaé mabbéréyangngi sibagiyang polé ri tana manana lao ri séddié ana' worowanéna, iyaro tanaé mancajiwi appunnangenna ana' worowanéna sibawa maddupai waramparang kaluwarga. Iyakiya rékko iyaro panguwasaé nabbéréyangngi sibagiyang polé ri tana manana lao ri séddié atanna, iyaro tanaé lisui matu mancaji appunnangenna panguwasaéro ri Taung Appalisungngé. Iyaro tanaé iyanaritu appunnangenna sibawa banna aléna sibawa ana'-ana' worowanéna bawang iya weddingngé mappunnangiwi iyaro tanaé matteru. Iyaro panguwasaé dé' nawedding nala muwi céddé polé ri waramparang manana ra'ya'é. Banna tanana muto bawang iya weddingngé nabbéréyang lao ri ana'-ana' worowanéna angkanna dé' muwi séddi tau polé ri umma'-Ku wedding ripassarang polé ri appunnangenna.” Nainappa iyaro worowané natiwika molai sumpangngé ri benrénna gerbangngé, lao ri bili'-bili' mapaccing iya mangoloé ri manorang. Iyaro bili'-bili'é ripassadiyai untu' sining imangngé. Iyaro worowané majjello'i lao ri bili' ri cappa tibang yajang, sibawa makkeda, “Ri onrongngéwé harusu'i sining imangngé séwongngi akkarobangeng pappaledda dosaé sibawa akkarobangeng passullé arogingngé enrengngé panggangngi akkarobangeng gandongngé, kuwammengngi muwi céddé polé ri akkarobangeng iya mapaccingngéro dé' naritiwi ri seddé saliweng angkanna nacilakai ra'ya'é.” Tungke seddénaro riyattulilingiwi ri témbo batué, na ri témbo'éro engka dapo-dapo. Makkedai iyaro worowané lao ri iyya, “Iyanaé dapureng onronna sining pattumaninna Bolana Puwangnge séwongngi sining akkarobangeng pakkasuwiyanna ra'ya'é.” Iyaro worowané natiwika lisu ri sumpang muttama'é Bolana Puwangnge. Uwitai uwai massolo polé ri yawana sumpangngéro lao alau, pada-padato Bolana Puwangnge mangolo alau. Iyaro uwai massolo'i polé ri yawana sumpanna Bolana Puwangnge bagiyang yattang molai benréng yattanna mézbaé. Nainappa iyaro worowané natiwika massu lalo ri gerbang manorang nanadulukka lao ri gerbang alau. Iyaro salo baiccu'é massolo'i polé ri benréng yattanna gerbangngéro. Ri laleng mangukkuru'na sibawa tekkeng pangukkuru'na, iyaro worowané natiwi tokka maccowériwi uwai massolo'éro lilau sibbéla 500 météré, nainappa nasuroka mallétto. Ri onrongngéro uwaina banna angka acing-kacing bawang. Nainappa mangukkuru 500 météré'si, na uwaina kuwaro gangka uttu. Mangukkuru'si 500 météré, na uwaina narapi babuwaé. Siseppi mangukkuru sibbéla 500 météré, na uwaina kuwaro maliyung senna untu' riyola sibawa mallaleng. Rékko maéloi mallétto tauwé harusu'i nangé. Nainappa makkeda iyaro tauwé lao ri iyya, “Eh tolino dé'é namannennungeng, pénessai manengngi iyaé madécéd-décéng.” Nainappa natiwika lisu tuttungngi saloé, nauwitai makkedaé ri iya duwa wirinna saloéro maéga senna ajukajung. Makkedai lao ri iyya, “Iyaé saloé massolo'i lilau molai wanuwaéwé sibawa molai Lompo'na Salo Yordan mattuju ri Tasi Maté. Rékko lettu'ni uwaina ri Tasi Maté, uwai tasi iya mapejjéro nasulléini sibawa uwai kawa. Kégi-kégi lao iyaé saloé massolo, kuwatoniro engka sininna rupanna balé sibawa olokolo laingngé. Naébbui matu uwaina Tasi Maté mancaji makawa, sibawa muwi kégi lao massolo iyaro uwai, engka matu kuwaro atuwong. Polé ri bubbu-bubbu uwai ri En-Gedi lettu ri bubbu-bubbu uwai ri En-Eglaim, marowai matu sining wirinna sibawa sining pakkaja iya messoiyéngngi jalana mennang kuwaro. Sininna rupanna balé engka matu ri laleng uwaiéro, pada-pada iya engkaé ri Tasi Tengngaé. Iyakiya uwai ri rawa-rawaé risillampé wirinnaro dé' matu namancaji makawa, sangadinna tette'i maddupa assalenna pejjé. Risillampé iya duwa wirinna saloéro tuwoi sininna rupanna pong buwa-buwaé. Daunna iyaro ajué dé' naengka namakelle, sibawa buwa-buwana dé' naengka nacappu. Iyaro ajukajungngé powassélé'i matu buwa-buwa iya barué tungke uleng, saba' uwai iya massolokiyéngngi poléi ri Bolana Puwangnge. Buwa-buwana mancaji inanréi sibawa daud-daunna makkégunai untu' pabbura.” Makkedai Puwang Iya Pommatanré, “Iyanaé sining pakkasésénna tana iya ritawa-tawaé matu lao ri iya seppulo duwa sukunna Israélié. Suku Yusuf tarimai duwa bagiyang. Puraka mattanro makkedaé iyaro tanaé Uwabbéréyangngi matu lao ri néné-nénému. Rimakkuwannanaro, alani iyaro tanaé nenniya tawani sibawa adélé ri yelle'mu. Pakkasésénna ri tibang manorang ripammulaiwi polé ri Tasi Tengngaé mattuju ri alau ri kota Hétlon, mattuju ri Hamat, matteru ri kota Zédad, lao ri Bérota sibawa Sibraim (iyaro kota-kotaé engkai ri pallawangenna kota Damsyik sibawa kota Hamat), nainappa lao ri kota Hazar-Enan, ri pakkasésénna kota Hauran. Jaji, pakkaséséng tibang manoranna ripammulaiwi polé ri Tasi Tengngaé lettu ri alau, lao ri kota Hazar-Enan; na daéra Damsyik sibawa Hamat engkai ri tibang manoranna pakkaséséngngéro. Pakkasésénna ri tibang alau mattujué ri yattang, polé ri séuwaé onrong pallawangenna daéra Damsyik sibawa daéra Hauran. Jaji Salo Yordan iyanaritu mancajiwi pakkasésénna tana Israélié ri tibang yajang sibawa Giléad ri tibang alau, lettu ri Tamar ri wirinna Tasi Maté. Pakkasésénna ri tibang yattang mattuju ri yajang yattang, polé ri Tamar lao ri mata uwai Kadés-Mériba, nainappa liyajang manorang pakkasésénna Maséré lettu ri Tasi Tengngaé. Pakkasésénna ri tibang yajang naébbui ri Tasi Tengngaé, nainappa mattuju ri manorang ri séddié onrong ri tibang yajang laleng muttama'é ri Hamat. Tawani iyaro tanaé ri yelle'mu, situru suku-suku Israélié; na iyaro tanaé iyanaritu appunnangemmu untu' mannennungeng. Sining tau laing iya mattette'é ri tengnga-tengngamu, sibawa mappunnai ana'-ana' iya jajiyé kuwaro, harusu towi lolongeng tawa polé ri tanaéro. Harusu'i mennang riyangga warga sukku polé ri bangsa Israélié, sibawa harusu'i maccowé mennang riloteréi untu' lolongeng tana ri wettu ripakangkana attawang tanaé ri yelle'na suku-suku Israélié. Tungke pabbanuwa laingngé harusu'i riwéréng tana silaong suku Israélié kégiwi monro. Iyya, Puwang Iya Pommatanré pura mabbicara.” Bagiyang mangoloéwé polé ri tanaéro harusu'i ripallaiseng untu' akkégunang mattentué. Lampéna harusu'i 12,5 kilo polé ri pakkaséséng manorang lettu ri yattang. Pakkaséséng alauna sibawa yajang harusu'i pada lampéna sibawa bagiyab-bagiyang iya riyabbéréyangngé lao ri suku-suku Israélié. Bolana Puwangnge ripatettongngi matu ri bagiyangngéro. Sibagiyang polé ri daéraéro ripallaingngi untu' Puwangnge, iyanaritu sikonrong tana ri bagiyang tengnga-tengngana, lampéna 12,5 kilo sibawa sakkana 10 kilo. Ri bagiyang tengngana tanaéro dipatettongngi matu Bolana Puwangnge. Sining imangngé harusu'i lolongeng bagiyang polé ri daéra iya mapaccingngéro. Bagiyanna mennang iyanaritu 12,5 kilo polé ri sulapa alau liyajang, sibawa lima kilo polé ri sulapa manorang liyattang. Daéra iya ripallaingngéro mancajiwi matu appunnangenna imang-ngimang wija-wijanna Zadok. Purai mennang natumaningi Puwangnge sibawa matinulu na dé' napada tau Léwi sisukué sibawa mennang, iya maccowéé pogau' dosa silaong sibawa sining tau Israél laingngé. Rimakkuwannanaro lao ri wija-wijanna Zadokro harusu'i riwéréng tana mattentué ri lainnaé tana iya riyabbéréyangngé matu lao ri tau Léwié. Na iyaro tana mattentué mapaccing senna'i. Tanana sining tau Léwiéro lampéna 12,5 kilo polé ri alau liyajang, sibawa sakkana lima kilo polé ri manorang liyattang na onronna makkadambangngi sibawa tanana sining imangngé. Muwi sijakka polé ri tanaéro dé'to nawedding nabalu mennang iyaré'ga nasséléreng; bagiyang kaminang makessingngé polé ri tanana Israélié dé' nawedding lélé ri limanna tau laingngé, saba' iyaro tanaé purani ripallaing untu' Puwangnge sibawa mancajiwi appunnangen-Na. Ri tibang yattanna tana mattentuéro, engka mupa nasésa lampéna 12,5 kilo, sibawa sakkana duwa sitengnga kilo. Iyaro bagiyangngé dé' namapaccing sibawa wedding napaké ra'ya'é untu' onrong naonroi sibawa untu' padang wella, ri bagiyang tengngana harusu'i ripatettong séddi kota. Iyaro kotaé harusu'i massulapa eppa, tungke sulapa'na ukkuranna duwa siparape kilo. Ri mattulilinna sininna kotaéro harusu'i engka tana lapang iya sakkanaé 125 météré. Ri tibang alauna sibawa yajanna kotaéro engka tana lapang iya tungke-tungke'é ukkuranna wékkalima duwa sitengnga kilo. Iya duwa tana lapangngéro harusu'i ripaké untu' tana allaonrumang ri pabbanuwana kotaé. Sining tau polé risininna suku Israél iya monroiyéngngi kotaéro weddingngi jamai iyaro tanaé. Jaji, sininna daéraéro, muttama'ni tana iya mattentué sibawa tana untu' kotaé, massulapa eppai ukkuranna 12,5 kilo ri tungke sulapa'na. Ri tibang yattanna tana Gad engka pakkaséséng iya mappammulaé polé ri yajang yattanna Tamar lalo ri mata uwai Kadés-Mériba, nainappa liyajang manorang sillampé pakkasésénna Maséré lettu ri Tasi Tengngaé. Makkedai Puwang Iya Pommatanré, “Makkuwaniro iyaro tanaé harusu ritawa-tawa lao ri suku-suku Israélié.” Sininna témbo'éro lampéna aséra kilo. Namappammula wettuéwé nasenni tauwé iyaro kotaé: “ENGKAI Puwangnge KUWARO!” 128 Telluttaung mapparéntana Arung Yoyakim ri Yéhuda, Nébukadnézar arung Babél, maggasa lao ri kota Yérusalém sibawa keppungngi. Puwangnge palaloi aléna caui Arung Yoyakim sibawa rampasa'i sibagiyang polé ri barab-barang mangke'é ri Bolana Puwangnge. Sining tau iya natawangngé, natiwii lao ri bola déwatana ri Babél, sibawa barab-barang mangke iya narampasa'é, nataroi ri laleng sining gudanna bola déwataéro. Nainappa arungngé paréntangngi Aspénas, kapala ruma tanggana saorajaé, untu' piléi polé risining tawanang Israélié siyagangngaré kallolo wija arung iyaré'ga maddara arung. Harusu'i mennang kallolo-kallolo iya dé'é sala-salanna. Harusu'i mennang magello, matanré aggurunna, macca sibawa malowang pangissengenna enrengngé sipato untu' majjama ri laleng saorajaé. Aspénas harusu paggurui mennang mabbaca sibawa maroki basa Babél. Napattentu towi arungngé makkedaé inanré sibawa énungeng untu' mennang harusu'i pada sibawa iya dipassadiyaé untu' anggota kaluwargana arungngé. Puranana rilati telluttaung ittana, harusu'i mennang mangolo ri arungngé untu' majjama ri saorajaé. Ri yelle'na sining kalloloéro engka towi Daniél, Hananya, Misaél sibawa Azarya, iya manenna poléi ri suku Yéhuda. Kapala ruma tanggana saorajaé sulléiwi aseng-ngasenna mennang mancaji: Béltsazar, Sadrakh, Mésakh sibawa Abédnégo. Nasaba métaui lao ri arungngé, makkedai Aspénas, “Aléna arungngé pura pattette'i inanrému sibawa énungemmu, jaji rékko manuru pallolongenna paitako makurang madising naiya kallolo-kallolo laingngé, pasti naunoka matu.” Nainappa narundingkang Daniél iyaro gau'é sibawa pengawal iya risuroé ri Aspénas untu' murusu'i Daniél sibawa iya tellu silaonna. Adanna Daniél, “Ojiki seppulo esso ittana; wérékki banna ukkaju sibawa uwai untu' inanré sibawa énungetta. Labe'na seppulo esso, pasibandinni rupatta sibawa rupanna kallolo-kallolo iya manré inanré iya napattette'é arungngé, nainappa alano apettung situru sibawa pakkitammuro.” Nasitujuini iyaro pegawé sibawa pakangkai iyaro percobaangngé seppulo esso ittana. Cappunnana iyaro essoé, paitani mennang lebbi madising sibawa mawatang naiya sininna kallolo iya puraé lolongeng inanré polé ri méjanna arungngé. Sipongennaro iyaro pengawal-é dé'na napatalai lao ri mennang inanré sibawa énungeng iya napattette'é arungngé, sangadinna banna ukkaju sibawa uwai bawang. Allataala mabbéréyangngi lao ri iya eppa kalloloéro amaccang sibawa apanréng ri laleng kitta'é sibawa pangissengengngé. Ri lainnaéro lao ri Daniél riwéréng towi amaccang untu' pakatajangngi pakkitangngé sibawa nippié. Ri paccappurenna tellu taung wettu appagguruwang iya napattentué arungngéro, natiwini Aspénas sininna kalloloéro mangolo ri Arung Nébukadnézar. Puranana sipabbicara sibawa iya maneng mennang, nalolongenni arungngé makkedaé Daniél, Hananya, Misaél sibawa Azarya napakacauriwi iya lail-laingngé ri laleng sininna passalengngé. Namappammulana mennang majjama ri saorajana arungngé. Tungke' arungngé pangolo persoalang iya mapparelluwangngé pappakatajang sibawa pertimbangang, naitai makkedaé pangaja sibawa tangngana iya eppa kalloloéro wékkaseppulo lebbi makessinna naiya pangajana sibawa tangngana sininna paboto enrengngé pajjappi maccaé risininna akkarungenna. Tette'i Daniél majjama ri saorajaé narapi Arung Korésy polé ri Persia caui Babél. Riséuwaé wenni, duwattaung mapparéntanana Arung Nébukadnézar, mannippiwi. Iyaro nippinna makkuwamani pausérinna atinna, angkanna dé'na nawedding matinro. Rimakkuwannanaro naobbini sining pabotoé, pajjappi maccaé, sanroé sibawa sining tau mappangissengengngé, untu' pakatajangngi nippinnaro. Wettunna mennang tettong ri yolona, makkedani arungngé, “Mannippika, namauséi atiku nasaba macinnaka missengngi bettuwanna!” Mappébalini mennang ri laleng basa Aram, “Tuwoi Puwakku mannennungeng! Curitani nippiéro lao ri idi, natapakatajangngi matu bettuwanna.” Nappébali arungngé, “Purani uwala apettungngéwé: Harusu'ko mappaissengengngi nippiéro lao ri iyya, makkuwatoro bettuwanna. Rékko dé' muwulléi, rilétta'-létta'ko matu sibawa riruttungngi matu bolamu. Iyakiya rékko muwulléi, uwérékko matu hadiya iya magelloé enrengngé alebbireng iya battowaé. Nah, appaissengenni makkekkuwangngé nippikkuro sibawa bettuwanna!” Mappébalisi mennang, “Sitinajanna Puwakku mappaissengengngi riyolo iyaro nippié lao ri idi, purapiro natapakatajangngi matu bettuwanna.” Naéngkalinganaro mappébalini arungngé, “Pada-pada pura utasséré'é. Banna pasoro-soroi bawang wettué, nasaba muwissengngi makkedaé makkattaka untu' hukkung manekko sibawa cara iya padaé rékko dé' muwulléi mappaissengengngi nippiéro lao ri iyya. Masséddiko untu' matteru belléka nenniya macculé-culéika sibawa paddennuwang makkedaé upinrai matu apettukku. Nah, appaissengengngi nippiéro, nauwissengngi matu makkedaé muwullé towi pakatajangngi bettuwanna.” Nappébali sining tau accaéro, “Ri sininna linoé dé' muwi séddi tau iya mullééngngi mappaissengengngi aga iya nacinnaiyé Puwakkuro. Sibawa dé'pa naengka séddi arung, muwi maga rajanna sibawa lebbina, tuntu'i gau' pada-padaéro polé risining pabotoé, pajjappi maccaé, sibawa sining tau mappangissengengngé ri saorajana. Nacinnaiwi Puwakku séuwa iya mawatang senna'é. Dé' muwi séddi mulléi pennoiwi sangadinna sining déwataé, iyakiya dé' mennang naonro ri yelle'na tolinoé.” Naéngkalinganaro mancaji macai senna'ni arungngé sibawa mabbéré parénta untu' mpuno manengngi sining tau accaé iya engkaé ri Babél. Nainappa riyappallebbangeng iyaro paréntaé, na sininna tau accaé, muttama'ni Daniél sibawa silao-silaonna risappani untu' riyuno. Nanaéwani Daniél sita Ariokh, pamimpinna pengawalna arungngé, iya sadiyaénna pogau'i pahukkungeng matéro. Namakkutana Daniél sibawa matutu lao ri aléna, magi arungngé napura passu parénta iya matedde'éro. Nappaissengenni Ariokh lao ri Daniél aga iya puraé kajajiyang. Namasitta'na Daniél mangolo ri arungngé sibawa méllauwi riwéréng wettu untu' pakatajangngi bettuwanna iyaro nippié. Ritarimani paréllaunna, nainappa lisu Daniél ri bolaé sibawa mappaissengengngi sininna kajajiyangngéro lao ri Hananya, Misaél sibawa Azarya. Nasuroni mennang massempajang lao ri Allataala ri surugaé kuwammengngi Namaressé babuwa lao ri mennang sibawa timpa'i rahasiyana iyaro nippié. Nanallalengiwi dé' narihukkung maté mennang silaong sining tau acca laingngé. Iyatoro wennié nappaissengengngi Allataala rahasiyaéro lao ri Daniél ri laleng séuwa pakkitang. Nanapojini Daniél Allataala ri surugaé, adanna, “Iyaro Allataala mapanréi sibawa barani, ripojiwi Aléna mannennungeng! Aléna ritu pattette'i wettué sibawa pattaungengngé, Aléna galéttéi sibawa lanti'i panguwasaé. Aléna ritu mabbéré apanréng, enrengngé mabbéréyangngi pappéjeppué. Aléna ritu timpa'i rahasiya iya malamung senna'é. Naisseng sininna iya kajajiyangngé ri laleng pettangngé. Risalipuriwi ri cahaya matajangngé. Ya, Allataala nasompaé toriyoloku, upoji-Ki sibawa upakalebbi. Saba' Muwérékka amaccang sibawa awatangeng. Purani Mutarima paréllautta. Sibawa pappébali untu' arungngé purani Muwappaitang.” Purairo laoni Daniél ri Ariokh iya puraé risuro untu' mpunoi sining tau accaé ri Babél. Nakkeda Daniél lao ri aléna, “Aja' taunoi sining tau accaéro. Tiwika mangolo ri arungngé, saba' maéloka paissengiwi Datu bettuwanna nippinnaro.” Masitta'ni Ariokh tiwii Daniél mangolo ri Arung Nébukadnézar nainappa makkeda, “Engkana nalolongeng atatta ri yelle'na sining tau Yahudi ripalié séddi tau iya mullééngngi mappaissengengngi bettuwanna nippinna Puwakku.” Namakkedana arungngé lao ri Daniél iya riyasengngétto Béltsazar, “Mulléga paissengika nippikku sibawa bettuwannato?” Nappébali Daniél, “Puwakku, dé'gaga tau mappangissengeng, pajjappi macca, paboto iyaré'ga pappalakiya iya mullééngngi mappaissengengngi gau'éro lao ri Puwakku. Iyakiya ri surugaé engka Allataala iya timpa'éngngi sininna rahasiyaé, na Aléna pura paissengiwi Puwakku aga iya kajajiyangngé matu ri esso ri munri. Makkekkuwangngé, palaloni atatta pakatajangngi nippi sibawa pakkitang iya natarimaé Puwakku wettunna matinroro. Wettunna Puwakku mattengngang matinro, mannippiwi Puwakku passalenna wettu mangoloé. Allataala iya timpa'éngngi sininna rahasiyaé mappaitangngi lao ri Puwakku aga kajajiyang matu. Iyaé rahasiyaé purai napannessa lao ri atatta tenniya nasaba lebbi maccai atatta naiya muwi niga, sangadinna kuwammengngi naulléi Puwakku missengngi bettuwanna nippinna Puwakkuro sibawa majeppuwi towi passalenna lise atinna Puwakku. Iyanaé pakkitang iya naitaé Puwakku: Ri yolona Puwakku engka séddi dato-dato! Iyaro dato-dato'é maloppo senna sibawa lala'-lala' iyakiya mappakatau-tau senna tappana. Ulunna riyébbui polé ri ulaweng tuléngngé, aro sibawa taiyyana poléi ri péra'é, benréng sibawa poncinna poléi ri tembagaé, poppanna poléi ri bessié sibawa ajéna sibagiyang polé ri bessié na sibagiyassi poléi ri tana litaé. Wettunna Puwakku mettengngang tangngai, séuwa batu loppo leppe polé ri peppingngé, tennagéssa tauwé, nanageppai dato-dato'éro ri ajéna iya polé ri bessié sibawa tana litaéro, angkanna mareppo. Na iyatoro wettué namaruttung sininna dato'-dato'éro sibawa mancaji goppo bessi, tana lita, tembaga, péra', sibawa ulaweng iya ancuru'énna pada-pada awué ri onrong addésekeng gandongngé ri wettu pellaé. Iyaro goppoé makkalutturengngi nairi anging, angkanna tettaro baté muwi aga. Iyakiya batu iya ruttungngéngngi iyaro dato'-dato'é mancaji silloppoi bulué sibawa pennoiwi sininna linoé. Iyanaro nippinna Puwakku, na makkekkuwangngé maéloi atatta pakatajangngi bettuwanna. Iya malebbié Puwakku iyanaritu arungngi polé ri sininna arungngé; Puwakku ritu iya kaminang makuwasaé. Allataala ri surugaé pura mpéréngngi Puwakku akkarungengngéwé, akuwasang, awatangeng sibawa arajang. Napancajiwi Puwakku panguwasana lao ri sibagiyang linoé iya engkaé pabbanuwana sibawa lao ri sininna manu'-manu'é nenniya olokolo laingngé. Aléna Puwakku iyanaritu ulu ulawengngé ri dato'-dato'éro. Iyakiya, maccappa'nana akkarungenna Puwakku, mompoi matu akkarungeng laingngé iya dé'e nasilloppo akkarungenna Puwakku. Nainappa mompo ritu akkarungeng matellué iya ripulambangngé ri bagiyang polé ri tembagaé ri dato-dato'éro, iya makuwasaiyéngngi matu sininna linoé. Rappina mompoi matu akkarungeng maeppaé, iya singngasse'é bessié. Na pada-pada bessi iya pareppo'é sibawa paancuru'é agi-agi, makkuwatoro akkarungeng iya maeppaéwé reppo'i matu sibawa mancuru'i akkarungeng-akkarungeng iya laingngéro. Ajé sibawa jari-jari ajéna dato-dato iya sibagiyangngé polé ri tana litaé sibawa sibagiyang polé ri bessiéro, mappaitangngi makkedaé ri esso ri munri iyaro akkarungengngé tabbagé-bagéi. Iyaro akkarungengngé engkato awatangenna nasaba tana litaéro engka campurang bessinna. Jari-jari ajéna iya sibagiyangngé polé ri bessié sibawa sibagiyang polé ri tana litaé bettuwanna makkedaé engka bagiyanna akkarungengngé iya mawatangngé sibawa engkato iya malemmaé. Campurang bessinna sibawa tana litaro tanrangi towi makkedaé iyaro akkarungengngé makkuragai matu péwatangiwi aléna sibawa pakangka kawing sicampuru, iyakiya iyaro usahaé siya-siyai, pada-padato bessié dé' naulléi siyameng sibawa tana litaé. Ri wettu apparéntanna arung-ngarungngéro, Allataala ri surugaé patettongngi matu séuwa akkarungeng iya mattahangngé matu mannennungeng sibawa iya dé'é naricau matu muwi ri bangsa niga. Iyaro akkarungengngé nancuru'i matu sininna akkarungeng iya laingngéro. Dé'ga napura naitai Puwakku makkedaé tenrigéssa ri tauwé, séuwa batu leppe polé ri peppingngé nanageppai sibawa nareppo'i dato'-dato' bessié, tembagaé, tana litaé, péra'é sibawa ulawengngéro? Allataala iya marajaé pannessai lao ri Puwakku aga kajajiyang matti. Iyaro nippié wedding riyatepperi sibawa pappakatajanna atatta dé' nasala.” Nanasuju'na Arung Nébukadnézar ri yolona Daniél sibawa mabbéré parénta kuwammengngi naripakalebbi Daniél sibawa riyakkasuwiyangeng lao ri aléna akkarobangeng ritunu enrengngé akkarobangeng-akkarobangeng iya laingngé. Makkedai arungngé, “Tongeng, Daniél, iyaro Allataalamu kaminang maloppo ri yelle'na sining Allataalaé. Aléna iyanaritu makuwasa ri sininna arungngé, sibawa timpa'éngngi sininna rahasiyaé. Uwisseng gau'éro saba' muwulléi pakatajangngi bettuwanna rahasiyaéwé.” Nainappa nawéréng Daniél tudangeng iya matanré, nawérénni maéga hadiya iya magelloé, sibawa naakkai mancaji gubernurna Babél, enrengngé napancajiwi pamimping kaminang matanré lao ri sininna pappangajana saorajaé. Iyakiya nasaba paréllaunna Daniél, nabbéréyangngi arungngé apparéntanna propinsi Babélro lao ri Sadrakh, Mésakh sibawa Abédnégo, na aléna Daniél monroi ri saorajaé. Ri séuwaé wettu mébbui Arung Nébukadnézar séuwa dato-dato ulaweng iya tanrénaé 27 météré sibawa sakkana nawéki 3 météré. Napatettongngi ri tanété Dura ri propinsi Babél. Nainappa naundang arungngé sininna arung daéraé, sining gubernur-é, bupatié, pappangajana wanuwaé, bendaharaé, hakingngé, ahli hukkungngé, sibawa sininna kapala daéraé untu' hadérékiwi upacara rirésmikanna dato'-dato' iya puraé napatettonro. Engka manennana mennang polé sibawa tettong ri yolona dato'-dato'éro, gorani ajudanna arungngé sibawa macenno, “Saudara-saudara polé ri sininna bangsaé, suku bangsaé sibawa basaé! Engkalingai iyaé paréntana arungngé: Rékko moniwi tarompé'é, riyaccowéri ri oni sulingngé, kacapié, rebanaé, gambusu'é, serdangngé sibawa paréwa musi' laingngé, harusu'i saudara-saudara suju' sompai dato'-dato' ulaweng iya puraé napatettong Arung Nébukadnézar. Nigi-nigi dé' naturusiwi iyaé paréntaé, matterui riyaggenrungeng ri laleng api iya malluwa'-luwa'é.” Naéngkalinganana ripaoni paréwa musi'éro, sining tau polé risininna bangsaé, suku bangsaé sibawa basaé, suju'ni sibawa sompai dato'-dato' ulawengngéro. Siyagangngaré tau Babél pakéi kasempatangngéro untu' cilakaiwi tau Yahudié. Makkedai mennang lao ri Arung Nébukadnézar, “Tuwoi Puwakku mannennungeng! Aléna Puwakku pura passu parénta makkedaé ripaoninna muwa paréwa musi'é, sininna tauwé harusu'i suju' sibawa sompai dato'-dato' ulawengngéro, na nigi-nigi dé' napatoiwi paréntaéro riyaggenrungengngi matu ri laleng api iya malluwa'-luwa'é. Iyakiya siyagangngaré tau Yahudi iya puraé nawéréng Puwakku apparéntang ri propinsi Babél dé' nabati-batiwi paréntana Puwakkuro. Iyanaritu Sadrakh, Mésakh sibawa Abédnégo. Iyaro sining tauwé dé' namaélo sompai déwata-déwatana Puwakku sibawa dé'to nasompai dato-dato ulaweng iya napatettongngé Puwakku.” Naéngkalinganaro mancaji macai senna'ni arungngé, nainappa mabbéré parénta kuwammengngi naiya tellu tauwéro ritiwii mangolo ri aléna. Makkutanani arungngé lao ri mennang, “Sadrakh, Mésakh sibawa Abédnégo! Tongegga dé' mumaélo sompai déwata-déwataku sibawa dé'to mumaélo suju' lao ri dato-dato ulaweng iya puraé upatettonro? Nah, makkekkuwangngé, sadiyakoga untu' suju' sibawa sompai dato'-dato'éro wettunna moni musi'é? Rékko dé' mumaélo, matteruko matu riyaggenrungeng ri laleng api iya malluwa'-luwa'é. Na déwata nigana mulléi passalama'ko matu polé ri akuwasakku?” Nappébali Sadrakh, Mésakh sibawa Abédnégo, “Datu iya malebbié, dé' tamaélo méwaiwi aléta. Rékko Allataala iya risompaé naulléi passalama'ki polé ri api iya malluwa'-luwa'éro sibawa polé ri akuwasanna Puwakku, pasti napogau'i. Iyakiya ébara'na dé' Napogau'i, sitinajai napahang Puwakku makkedaé dé' tamaélo sompai déwatana Puwakku sibawa dé'to tasompai dato'-dato' ulaweng iya napatettongngéro Puwakku.” Namallumpana caina Arung Nébukadnézar lao ri Sadrakh, Mésakh sibawa Abédnégo, angkanna mancaji mabbara rupanna. Napparéntanni kuwammengngi nariyébbu apié lebbi mapella wékkapitu naiya biyasaé. Nainappa nasuro siyagangngaré tau iya mawatang senna'é polé ri tentarana untu' siyoi Sadrakh, Mésakh sibawa Abédnégo, nanaggenrungengngi mennang ri laleng api iya malluwa'éro. Masitta'ni iya tellu tauwéro risiyo mare' silaong pakéyanna, iyanaritu kaméja, jumba, palo-palo sibawa pakéyang laingngé, nainappa riyaggenrungeng ri laleng api iya malluwa'-luwa'éro. Nasaba paréntana arungngé makkuwamani tedde'na, na iyaro apié purani ripellai dé' padanna angkanna luwa' apié tunui gangka maté sining tau iya makkaéngngi Sadrakh, Mésakh sibawa Abédnégo lao ri seddéna apié. Makkuwaniro, iya tellu tau iya tassiyo mare'éro sempé ri laleng api iya malluwa-luwa'éro. Tappa tasséleng senna'ni Arung Nébukadnézar. Tettonni masitta sibawa gora lao risining pegawénna, “Dé'ga natellu tau tasiyo onna sibawa maggenrungengngi mennang ri laleng apiéro?” Mappébalini mennang, “Mémeng tongeng, Puwakku.” Nametté arungngé, “Iyakiya magi na eppa tau uwita joppa-joppa ri tengnga-tengngana apiéro? Dé' mennang natassiyo sibawa dé' sises-siseng namagaga. Na iya maeppaéro tappana pada-padai déwataé.” Nainappa maddeppé Nébukadnézar ri sumpanna apiéro sibawa mangobbi, “Sadrakh, Mésakh sibawa Abédnégo, ata-atanna Allataala Iya Pommatanré! Assuno polé ri apiéro!” Namassuna mennang. Sininna wakkélé'na arungngé, sining gebernur-é, bupatié, sibawa pegawé-pegawé laingngé mattulilingiwi iya tellu tauwéro sibawa mitai makkedaé dé' sises-siseng mennang narigéssa ri apié. Dé' namangu gemme'na, sibawa pakéyanna dé' namangu, mala muwi bau rumpu dé'to gaga ri mennang. Nainappa makkeda arungngé, “Pojiwi Allataala iya nasompaé Sadrakh, Mésakh sibawa Abédnégo. Purai nasuro malaéka'-Na untu' passalama'i iya tellu atan-Na iya mateppe'é ri Aléna. Purai mennang najjalékkai paréntaku sibawa lebbi napojiwi maté naiya sompaéngngi iyaré'ga tumaningiwi muwi déwata niga sangadinna Allataalana muto mennang. Rimakkuwannanaro uwapparéntangngi makkedaé tungke' tauwé muwi polé ri bangsaé, suku bangsaé iyaré'ga basaé, iya powadaé pappakatuna lao ri Allataala iya nasompaé Sadrakh, Mésakh sibawa Abédnégo, rilétta'-létta'i matu sibawa riruttungngi matu bolana naripancaji goppo sésa-sésa. Saba' dé' gaga déwata iya mullééngngi pogau'i aga iya puraé napogau' Allataalaro.” Purairo napaénré'ni arungngé pangka'na Sadrakh, Mésakh sibawa Abédnégo, angkanna mennang mancaji pajaba-pajaba matanré ri propinsi Babél. Iyanaé pappallebbanna Arung Nébukadnézar iya nakkiringengngé lao risining tau polé ri sininna bangsaé, suku bangsaé sibawa basaé ri sininna linoé: “Salama! Macinnaka curitai passalenna anu makalallaingngé sibawa mappahérangngé iya puraé napogau' Allataala Iya Pommatanré lao ri iyya. Temmaka rajanna appahérangeng iya napogau'é! Temmaka serona anu makalallaing iya napogau'é! Mancaji arungngi matu Allataala untu' mannennungeng. Makuwasai sillampé wettué.” Monroka sibawa saléwangeng ri laleng saorajaku nenniya tuwo sibawa masennang. Iyakiya riséuwaé wenni wettukku matinro, mannippika sibawa lolongeng pakkitang iya pénennengi sennaéngngi atikku. Nainappa uwobbi sining tau acca iya engkaé ri Babél untu' pakatajangekka bettuwanna nippiéro. Iyakiya wettunna sining pabotoé, pajjappi maccaé, sining tau mappangissengengngé sibawa sining pappalakiyaéro polé sibawa ucuritangngi nippikkuro lao ri mennang, dé' muwi séddi tau mulléi pakatajangngi bettuwanna. Angkanna poléni Daniél iya riyasengngétto Béltsazar pada-pada asenna déwataku. Ripennoini Daniél ri rohna déwata-déwata iya mapaccingngé. Ucuritang towi aléna nippikku, adakku, “Eh Béltsazar, pamimpinna sining tau mappangissengngé, uwisseng makkedaé ripennoiko ri rohna déwata-déwata iya mapaccingngé, angkanna dé'gaga rahasiya iya tassubbué ri alému. Engkalingai nippikkué, sibawa pakatajanni bettuwanna. Wettukku mattengngang matinro, uwitai séddi aju iya tuwoé ri tengnga-tengngana linoé. Iyaro ajué matanré senna; maloppo senna batanna sibawa masse. Coppo'na lettu ri langié, angkanna naullé mitai sininna tauwé ri linoé. Manyila daud-daunna sibawa maéga senna buwana, genne untu' nanré pabbanuwana sininna linoé. Olokolo maliyaé léwui ri yawa accinaungenna sibawa manu'-manu'é massarangngi ri takké-takkéna. Na sininna anu tuwoé weddingngi nanré buwa-buwana. Wettukku mattengngang nennun-nennungngi pakkitangngéro, uwitai séddi malaéka nonno polé ri surugaé; paitai sadiya-sadiya sibawa matike. Makkedai sibawa macenno, ‘Tubbangngi ajuéro sibawa rette'i takké-takkéna, padduttungngi daud-daunna sibawa assiyamporengngi buwana. Rukkai olokolo iya léwué ri yawana sibawa manu'-manu' iya massarangngé ri takké-takkéna. Iyakiya leppessangngi tona monro ri laleng tanaé. Siyoi sibawa ranté bessi sibawa tembaga nainappa musalai ri padang wellaé. Leppessanni narica cinoddo, nenniya tuwo silaong sining olokolo'é enrengngé tanet-tanengngé. Leppessanni akkaleng tolinona tappinra mancaji akkaleng olokolo pituttaung ittana. Iyanaro apettutta idi malaéka'-malaéka' iya matike'é sibawa sadiya-sadiyaé. Akkattata iyanaritu kuwammengngi sining tauwé muwi kégi mangakuiwi, makkedaé Allataala Iya Pommatanré makuwasai lao ri akkarungenna tolinoé sibawa iyaro akkarungengngé Nabbéréyangngi lao ri nigi-nigi iya Napilé, mala muwi lao ri tau iya kaminang dé'é gaga bettuwanna!’ Eh Béltsazar, iyanaro nippikku. Makkekkuwangngé powadani bettuwanna lao ri iyya. Dé' muwi séddi tau polé risining tau accaé iya engkaé ri akkarungekku mulléi powadai lao ri iyya, iyakiya iko mulléi, saba' ripennoiko ri rohna déwata-déwata iya mapaccingngé.” Naéngkalinganaro, Daniél iya riyasengngétto Béltsazar, tassélenni sibawa bengnga untu' siyagangngaré ittana. Na iyya, Arung Nébukadnézar makkeda lao ri aléna, “Béltsazar, aja' mubata-bata nasaba iyaro nippié sibawa bettuwanna.” Nappébali Béltsazar, “Puwakku, temmaka kessinna ébara'na kajajiyang-kajajiyang iya nabotoé nippiéro nakennai sining balinna Puwakku na tenniya Puwakku. Aju iya naitaé Puwakkuro makkuwamani tanréna, angkanna coppo'na lettu ri langié, sibawa naullé mitai sininna tauwé ri linoé. Manyila daud-daunna sibawa sara' buwana angkanna genne untu' panréi sininna pabbanuwana linoé. Sining olokolo maliyaé léwui ri yawa accinaungenna, sibawa manu'-manu'é massarangngi ri takké-takkéna. Ya Puwakku, Puwakku ritu aju iya matanré sibawa masse'éro. Arajanna Puwakku tattambai lettu ri langié sibawa akuwasanna Puwakku mallowangengngi lettu ri cappa'na linoé. Naita towi Puwakku séddi malaéka' nonno polé ri surugaé namakkedato, ‘Tubbangngi iyaé ajué sibawa paccappui, iyakiya leppessangngi tona monro ri laleng tanaé. Siyoi sibawa ranté bessi nenniya tembaga nainappa musalai ri padang wellaé. Leppessanni narica cinoddo sibawa tuwo silaong sibawa olokolo'é pituttaung ittana.’ Puwakku, iyanaé bettuwanna pakkitangngéro, sibawa iyanaé iya napettuiyé Allataala Iya Pommatanré passalenna Puwakku. Ripaddésu'i matu Puwakku polé ri masaraka tolinoé sibawa tuwo ri yelle'na sining olokolo'é ri padangngé. Pituttaung ittana manréi matu wella Puwakku pada-pada sapingngé sibawa matinro ri tana lapangngé, angkanna ririca ri cinoddoé. Purapiro nappai nangakui Puwakku makkedaé Allataala Iya Pommatanré makuwasai ri yasé'na akkarungeng tolinoé, Nanabbéréyangngi iyaro akkarungengngé lao ri nigi-nigi iya Napilé. Napparéntangngi sining malaéka'é kuwammengngi na tona iyaro ajué rileppessangngi monro ri laleng tanaé. Bettuwanna iyaro makkedaé mancaji arungngi matu paimeng Puwakku purana nangakui Puwakku makkedaé Allataala makuwasaiwi sininna linoé. Rimakkuwannanaro sitinajai Puwakku turusiwi pangajana atatta. Aja'na namadosasi Puwakku, iyakiya pogau'i aga iya makessingngé sibawa adélé'é, sibawa amaséiwi tau kasiyasié. Nanallalengiwi tette'i matu masennang Puwakku.” Iya manennaro kajajiyangngi ri aléku, Arung Nébukadnézar. Seppulo duwa uleng ri munrinna, wettukku joppa-joppa ri tammengngé ri langga yasé'na saorajaku ri Babél, makkedaka, “Itai, anengka héba'na kota Babél! Iyya ritu patettongngi mancaji ibukota wanuwa untu' pabuttiwi akuwasakku sibawa awatangekku, arajakku sibawa aloppokku!” Dé'pa napajaka mabbicara wettunna paéngkalinga sadda polé ri langié, “Arung Nébukadnézar, éngkalingai iyaé! Akuwasammu selaku arung riyalani polé ri alému. Ripaddésu'ko matu polé ri masaraka tolinoé, nenniya tuwo sibawa sining olokolo'é ri padangngé. Pituttaung ittana manréko matu wella pada-pada sapingngé. Purairo muwangakuiwi matu makkedaé Allataala Iya Pommatanré makuwasai ri yasé'na akkarungenna tolinoé na iyaro akkarungengngé Nabbéréyangngi lao ri nigi-nigi iya Napilé.” Iyatoro wettué, naddupa iyaro ada-adaé. Iyya, Nébukadnézar ripaddésu'ka polé ri masaraka tolinoé sibawa manré wella pada-pada sapingngé. Narica cinoddo tubukku, gemme'ku mancaji sillampé bulu bokangngé, nenniya kanukukku sillampé kanukunna manu'-manu'é. Labe'nana iyaro wettu pituttaungngé, congana ri langié, nanalisuna amaingekekku. Naupojiwi Allataala Iya Pommatanré. Upojiwi sibawa upakalebbii Aléna iya tuwoé mannennungenro. “Mancaji arungngi matu Allataala untu' mannennungeng. Makuwasai sillampé wettué. Dé' bettuwanna bangsa-bangsaé ri linoé. Nakuwasaiwi Allataala malaéka'é ri surugaé sibawa pabbanuwana linoé. Dé' muwi séddi tau mulléi méwai élo-Na, dé'gaga barani makkutanangngi aga iya Napogau'é.” Wettunna lisuni amaingekekku ri aléku, na alopponna, arajanna sibawa ataromporenna arajakku ripalisuni lao ri iyya. Riduppaina risining pegawéku nenniya sining tomarajaku, naripalisuka ri akkarungekku, mala arajakku mancaji lebbi battowai naiya riyoloé. Jaji makkekkuwangngé iyya, Nébukadnézar pojiwi, pakatanréi sibawa pakalebbii Arunna Surugaé. Sininna pangkauken-Na tongengngi sibawa adélé, Nanaulléi pakariyawai tau iya kédo matempoé. Ri séuwaé esso naundangngi Arung Bélsyazar sisebbu tomaraja untu' hadérékiwi péstana iya marowaé, sibawa ménum-ménung anggoro. Wettunna mennang mattengngang ménum-ménung, napparéntanni Bélsyazar untu' malai mangko'-mangko' ulawengngé sibawa péra'é, iya puraé narampasa Nébukadnézar, ambo'na, polé ri laleng Bolana Puwangnge ri Yérusalém. Akkattana Arung Bélsyazar iyanaritu kuwammengngi sining tomarajana, sining bainéna, gundi'na sibawa aléna paimeng, ménungngi polé ri mangko'-mangko'éro. Masitta'ni ritiwi iyaro mangko'-mangko'é lao ri aléna, nainappa ménung maneng mennang anggoro polé ri paréwa énungengngéro. Ri wettu ménunna napoji-poji towi mennang déwata-déwata iya riyébbué polé ri ulawengngé, péra'é, tembagaé, ajué sibawa batué. Tappa paita muni jari tolino iya marokié séuwa ri renrinna saorajaé ri onrong iya kaminang matajangngé nakenna tappa lampu, angkanna naulléi arungngé mitai sibawa manessa. Mancaji makawiyani sibawa makkuwamani tauna angkanna ténré uttuna. Nagorana méllauwi kuwammengngi nariyobbi sining pabotoé, ahli pajjappié sibawa ahli pappalakiyaé. Wettunna mennang engkani, makkedani arungngé, “Nigi-nigi mulléi bacai iyaro okié sibawa paissengika bettuwanna, uwéréngngi matu pakéyang akkarungeng maddupa jumba collipao sibawa ranté ulaweng tanrang alebbireng. Ri lainnaéro uwakkai matu mancaji panguwasa matellué ri laleng akkarungekku.” Malluruni sining tau accaé, iyakiya dé' muwi séddi tau mulléi bacai iyaro okié iyaré'ga mappaissengengngi bettuwanna lao ri arungngé. Mancaji lebbi manennenni sibawa makawiyani Arung Bélsyazar; makkuwatoro sining tomarajana malippu senna'ni. Naéngkalingana gora-gorana arungngé sibawa sining tomarajana, muttama'ni indo'na arungngé ri laleng onrong appéstangngéro. Nainappa makkeda, “Tuwoi Puwakku mannennungeng! Pattennanni atinna Puwakku sibawa aja' mumakawiya. Saba' ri laleng akkarungenna Puwakku engka séddi worowané iya ripennoiyé ri rohna déwata-déwata iya mapaccingngé. Ri wettu apparéntanna ambo'na Puwakku, pabuttini iyaro tauwé mappunnaiwi amaccang, pappéjeppu sibawa pangissengeng, iya pada-padaé pangissengenna sining déwataé. Ambo'na Puwakku Arung Nébukadnézar pura makkai mancaji pamimpinna sining pabotoé, ahli pajjappié, sining tau mappangissengengngé sibawa ahli pappalakiyaé. Dé' padanna amaccanna sibawa apanrénna enrengngé maccai ri laleng pakatajangngi nippié, timpa'i rahasiyaé enrengngé pacceppiwi parakara-parakara iya masukkara'é. Asenna Daniél, iyakiya arungngé masengngi Béltsazar. Obbini. Nappaissengengngi matu lao ri Puwakku aga bettuwanna okiéwé.” Ritiwini masitta Daniél mangolo ri arungngé. Namakkutanana arungngé lao ri aléna, “Ikoga Daniél, tau Yahudi ripalié, iya puraé natiwi ambo'ku polé ri tana Yéhuda? Uwéngkalingai makkedaé ripennoiko ri roh-rohna déwata iya mapaccingngé, sibawa mappunnaiko amaccang, pappéjeppu, sibawa pangissengeng iya dé'é padanna. Sining tomaccaé sibawa ahli pajjappié purani nacoba bacai iyaé okié sibawa paissengika bettuwanna. Iyakiya dé' naulléi mennang. Silalona uwéngkalinga makkedaé mulléi timpa'i sininna rahasiyaé sibawa pacceppiwi parakara-parakara iya masukkara'é. Rékko muwulléi bacai iyaé okié sibawa paissengika bettuwanna, uwérékko matu pakéyang akkarungeng maddupa jumba collipao sibawa ranté ulaweng tanrang alebbireng. Ri lainnaéro uwakkako matu mancaji panguwasa matellué ri laleng akkarungekku.” Nappébali Daniél, “Dé' naparellu Puwakku mabbéréyangngi iyaro sining hadiyaé lao ri iyya, wéréng bawanni tau laingngé. Maéloka bacai iyaro okié untu' Puwakku sibawa mappaissengengngi bettuwanna. Allataala Iya Pommatanré mébbui Nébukadnézar, ambo'na Puwakku mancaji arung maraja sibawa mpéréngngi arajang nenniya ataromporeng. Makkuwamani rajanna, angkanna sining tau polé ri sininna bangsaé, suku bangsaé, sibawa basaé, ténré sibawa métau ri aléna. Rékko macinnai mpunoi tauwé, nauno bawang iyaro tauwé. Rékko maéloi passalama'i séddié tau, napassalama'i tauwéro. Napakatanréi iyaré'ga napakariyawai nigi-nigi situru élona. Iyakiya wettunna mancaji matempo, matedde ati sibawa mabecco, ripasempé'i polé ri kadéra akkarungenna angkanna ateddéngeng arajanna. Ripaddésu'i polé ri masaraka tolinoé sibawa akkalenna mancajiwi pada-pada akkaleng olokolo'é. Tuwoi silaong kaleddé ale'é, manré wella pada-pada sapingngé sibawa matinroi ri tana lapangngé angkanna ririca ri cinoddoé. Angkanna nangakui makkedaé Allataala Iya Pommatanré makuwasai ri akkarungeng tolinoé na iyaro akkarungengngé Nabbéréyangngi lao ri nigi-nigi iya Napilé. Iyakiya ana' worowanéna, iyanaritu aléna Puwakku, dé' namaélo pakariyawai aléna, namuni naissengngi Puwakku iya manennaro. Napakatanréi aléna Puwakku lao ri Puwangnge ri surugaé sibawa barani massurowangngi tiwii muttama mangko'-mangko' iya puraé rirampasa polé ri Bolana Puwangnge. Nainappa Puwakku enrengngé sining tomarajaé, sining bainéna sibawa sining gundi'na Puwakku ménung polé ri mangko'-mangko'éro. Napojiwi Puwakku déwata-déwata iya riyébbué polé ri ulawengngé, péra'é, tembagaé, bessié, ajué sibawa batué, déwata-déwata iya dé'é naulléi makkita iyaré'ga maréngkalinga iyaré'ga majeppuiwi agi-agi. Dé' napakalebbii Puwakku Allataala iya pattentuéngngi atuwonna sibawa amaténna Puwakku sibawa pattette'i laleng atuwonna Puwakku. Iyanaro saba'na nakiringngi Allataala iyaro limaé untu' mokii pasen-Na. Iyanaé iyaro okié, ‘Ribilang, ribilang, ritimbang, ritawa.’ Na iyanaé bettuwanna: Ribilang, wettu apparéntanna Puwakku purani nabilang Allataala sibawa napaccappa'na; ritimbang, purani ritimbang Puwakku narilolongengngi dé' namappésennang; ritawa; akkarungenna Puwakku ritawai sibawa riyabbéréyang lao ri tau Médiaé sibawa Persiaé.” Masitta'ni Bélsyazar paréntangngi sining pegawénna kuwammengngi napappakéiwi Daniél jumba collipao sibawa paddantéiwi ellonna ranté ulaweng. Nainappa naakka Daniél mancaji panguwasa matellué ri laleng akkarungenna. Iyatoro wennié nariyuno Bélsyazar arung Babélro. Puranana riyuno Bélsyazar, Darius tau Médiaé sittaiwi kadéra akkarungengngé. Iyaro wettué umuru'na enneng pulona duwa taung. Nabagéi Darius akkarungenna mancaji sératu duwappulo propinsi iya tungke'-tungke'é naparénta séddi gubernur. Daniél sibawa duwa tau laing naakkai untu' jennangiwi sining gubernur-éro kuwammengngi aja' nariparogi arungngé. Masitta'ni manessa makkedaé jama-jamanna Daniél lebbi makessingngi naiya jama-jamanna sining gubernur nenniya sining jennang laingngé. Rimakkuwannanaro, macinnai arungngé makkai mancaji panguwasana sininna akkarungengngé. Iyakiya sining gubernur-é sibawa sining jennangngéro makkuragai sappai asalang-asalanna Daniél ri laleng apparéntangngé, iyakiya dé' nalolongengngi, nasaba matinului sibawa malempui Daniél enrengngé dé' napogau'i ajampaléllérengngé iyaré'ga muwi asalang aga. Nainappa mennang makkeda, “Banna weddikki lolongengngi asalanna Daniél ri laleng passaleng iya engkaé assisumpungenna sibawa agamana.” Nainappa massamang mennang lao mangolo ri arungngé sibawa makkeda, “Puwakku Arung Darius, tuwoi Puwakku untu' mannennungeng! Idi maneng murusu'i akkarungenna Puwakku, muwi sining jennangngé, sining gubernur-é, sining wakkélé gubernur-é sibawa pajaba-pajaba laingngé, purani masséddi untu' mappétangngarengngi kuwammengngi napassu Puwakku sure' parénta iya harusu'é riturusi sibawa mattonget-tongeng. Sitinajai napparéntang Puwakku kuwammengngi telluppulo esso ittana dé' muwi séddi tau ripalalo palettu paréllaung lao ri sala séddinna déwataé iyaré'ga tolinoé, sangadinna lao ri aléna Puwakku. Nigi-nigi majjalékkaiwi paréntaéro riyaggenrungengngi matu ri laleng gowa singaé. Riyéllauwi kuwammengngi natékéngngi Puwakku sure' paréntaéro kuwammengngi namancaji undang-undanna Média sibawa Persia iya dé'énna nawedding ribébbu paimeng.” Nanatékénni Arung Darius sure' paréntaéro. Wettunna naéngkalinga Daniél passalenna gau'éro, lisuni ri bolana. Bili'na iya ri langga yasé'é mappunnaiwi tello-tellongeng iya mangoloé mattuju ri Yérusalém. Na pada-pada abiyasanna, massempajanni lao ri Allataalana sibawa pojiwi wékkatellu si esso sibawa makkaluttu ri yolo-Na tello-tellongeng iya tattimpa'éro. Wettunna sining balinna Daniél naita Daniél mattengngang massempajang lao ri Allataalana, lao manenni mennang mangolo ri arungngé untu' mapparapekengngi Daniél. Makkedani mennang, “Dé'ga Puwakku pura tékéngngi sure' parénta iya mattéyangngéngngi sininna tauwé telluppulo esso ittana palettu paréllaung lao ri sala séddinna déwataé iyaré'ga tolinoé sangadinna lao ri Puwakku bawang? Sibawa topa, makkedaé nigi-nigi majjalékkaiwi paréntaéro riyaggenrungengngi matu ri laleng gowa singaé?” Nappébali arungngé, “Mémeng, na iyaro paréntaé mancajiwi undang-undanna Média sibawa Persia iya dé'é nawedding ribébbu paimeng.” Nainappa makkeda mennang lao ri arungngé, “Daniél, sala séddinna tau ripali polé ri Yéhuda, dé' nabati-batiwi Puwakku sibawa naangga énténgngi paréntana Puwakku. Massempajangngi secara taratoro wékkatellu si esso.” Naéngkalinganaro messéni arungngé sibawa bata-bata, angkanna sappa akkaleng untu' passalama'i Daniél. Narapi arawénna essoé mappikkiri-pikkiri mupi arungngé. Nainappa iyaro sining tauwé lisu mangolo ri arungngé sibawa makkeda, “Puwakku, sitinajai naéngngerang Puwakku makkedaé situru undang-undanna Média sibawa Persia, parénta iya napassué arungngé dé' nawedding ripinra.” Angkanna napparéntang arungngé kuwammengngi naritikkeng Daniél sibawa riyaggenrungeng ri laleng gowa singaé. Adanna arungngé lao ri Daniél, “Tennapodo Allataalamu iya musompaé sibawa matinuluro passalama'ko.” Purairo séuwa batu loppo ripalénne ri sumpanna gowaéro, na arungngé ca'i iyaro batué sibawa ca' akkarungeng nenniya ca'na sining tomarajaé, angkanna dé' muwi séddi tau wedding paleppe'i Daniél polé risining singaéro. Nainappa lisu arungngé ri saorajana. Dé' namaélo manré iyaré'ga risaléwori. Na puppu benni dé' nawedding matinro. Ri subunnana moto'ni arungngé sibawa lao mapperi-peri ri gowana singaé. Lettu'nana kuwaro, gorani sibawa sadda bata-bata, “Daniél, atanna Allataala iya tuwoé! Aga Allataalamu iya musompaé sibawa matinuluro naulléi passalama'ko polé risining singaéro?” Nanaéngkalingani saddanna Daniél iya mappébaliyé, “Tuwoi Puwakku untu' mannennungeng! Allataalana atatta pura suroi malaéka'-Na untu' tongkoi pannyoro'na singa-singaéro angakanna dé' mennang naagagai atatta. Allataala passalama'i atatta saba' Naissengngi makkedaé dé' napogau' asalang atatta lao ri Aléna sibawa lao ri Puwakku.” Tenniya pato sennanna atinna arungngé nanapparéntangngi kuwammengngi naripassu Daniél polé ri gowaéro. Purana ripogau' paréntaéro, annessana makkedaé dé' narilolongeng lo muwi céddé ri Daniél, nasaba mateppe'i ri Allataalana. Nainappa naparéntang arungngé tauwé kuwammengngi natikkengngi sining tau iya puraé mapparapekengngi Daniél. Nainappa mennang silaong sibawa ana'-ana'na nenniya sining bainéna riyaggenrungeng ri laleng gowa singaéro. Dé'pa mennang nalettu ri borina gowaéro, iyaro singa-singaé naluruini mennang sibawa reppo'i buku-bukunna. Purairo kirinni sure' Arung Darius lao risining tau polé ri sininna bangsaé, suku bangsaé sibawa basaé ri sininna linoé, “Salama! Uwapparéntangngi lao ri sininna tauwé iya engkaé ri daérana akkarungekku kuwammengngi namétau sibawa mappakalebbi lao ri Allataala iya nasompaé Daniél! Aléna iyanaritu Allataala iya tuwoé mannennungeng, lettu ripaccappurenna linoé mapparéntai. Akkarungen-Na dé' namakkullé binasa. Akuwasan-Na dé'gaga cappuna. Mappassalama'i sibawa mappaleppe, pogau'i anu makalallaing sibawa dé'é padanna ri langié iyaré'ga ri linoé. Purani ripassalama Daniél, polé ri pakkokkona singa-singaé.” Makkuwaniro Daniél tette matanré tudangenna ri wettu apparéntanna Darius sibawa apparéntanna Korésy, tau Persiaéro. Namompona polé ri laleng uwai eppa kajunna olokolo battowa, iya séddié silaingeng sibawa laingngé. Iya mammulangngé tappana pada-padai singaé, iyakiya mappunnaiwi panni kuwajang. Wettunna utangnga, tappa mareddu'i pannina sibawa leppe; tarakkani polé ri tanaé naripatettong ri duwa ajéna pada-pada tolinoé, nainappa riwéréng akkaleng tolino. Olokolo iya maduwaé tappana pada-padai beruwangngé. Tettongngi ri iya duwa ajé monrinna, sibawa tiwii telluppolo buku rusu ri yelle'na isi-isinna. Uwéngkalingai saddaé makkeda lao ri aléna, “Ayo, anréno juku singngéga iya mupojiyé!” Wettukku mattengngang pénessai tonget-tongengngi, momponi olokolo laingngé. Tappana pada-padai macang tutul-é, iyakiya ri lekke'na engka eppa panni manu'-manu', sibawa eppa ulunna. Paitai makuwasa. Wettukku mattengngang tangngai, momponi olokolo iya maeppaé. Mawatang senna sibawa masero enrengngé mappakatau-tau. Nasibawang isi-isinna iya battowaé sibawa sittedde'é bessié, nareppo'i sibawa nanréi anréna, nainappa naléjja'-léjja' sésa-sésana. Silaingeng sibawa sining olokolo ri yolona mattanru seppuloi. Ri wettu upénessainna tanru-tanru'na, tappa tuwoi séddi tanru laing ri yelle'na. Iyaro tanru'é baiccu'i, iyakiya naulléi redde'i sibawa bébbui tellu tanru ri yelle'na tanru-tanru iya bunge'-bunge'éro. Iyaro tanru baiccu'é mappunnaiwi mata pada-pada mata tolinoé nenniya bawa iya mabboroé sibawa matempo. Ri wettu makkitaku matteru, siyagangngaré kadéra akkarungeng ripalénne. Nainappa aléna iya tuwoé mannennungeng tudang ri yasé'na sala séddinna kadéra-kadéra akkarungengngéro. Pakéyan-Na sibawa gemme'-Na maputé mapaccing pada-pada ape'é. Kadéra akkarungen-Na sibawa padati-padatinna malluwa'-luwa' nasaba lumpa api, sibawa solo' api massolo polé ri kadéra akkarungengngéro. Massebbu tauwé tumaningiwi Aléna, sibawa majjuta tauwé tettong ri yolo-Na. Nainappa ripammulai sidang pengadilangngé, sibawa ritimpa sining bobbo'é. Wettukku mattengngang mitai, uwéngkalinga mupi iyaro tanru baiccu'é mabboro sibawa tempona. Nainappa olokolo iya maeppaéro riyuno, na bakkéna riyaggenrungengngi ri laleng apié angkanna cappu. Sining olokolo laingngé purani ribébbu akuwasanna, iyakiya ripalaloi tuwo narapi wettu iya puraé ripattentu. Ri laleng pakkitakku iyaro wennié, uwitai séuwa iya pada-padaé tolino. Poléi sibawa riyattulilingi ri ellungngé nainappa lao ri Aléna iya tuwoé mannennungeng sibawa riyappaddissengeng lao ri aléna. Riwéréngngi alebbireng sibawa akuwasang selaku arung, angkanna sining tau polé ri sininna bangsaé, suku bangsaé sibawa basaé mattumaniwi lao ri aléna. Mattahangngi matu akuwasanna lettu mannennungeng, apparéntanna dé' matu naripalésso. Iyaro sining pakkitang iya uwitaé mappamalim-maling sibawa napauséri atikku. Nainappa uwaddeppéri sala séddinna tau iya tettongngé kuwaro sibawa uwéllauwi pappakatajanna passalenna iya manennaro. Nanappaissengeng toni. Makkedai, “Iya eppa kajunna olokolo battowaéro iyanaritu eppa akkarungeng iya mompoé matu ri linoé. Iyakiya umma'na Allataala Iya Pommatanré tarimai matu ha' untu' mapparénta na apparéntanna mattahangngi matu lettu mannennungeng.” Nainappa macinnaka missengngi bettuwanna olokolo iya maeppaéro, iya sisalaé sibawa laingngé; iya makkuwaémmani mappakatau-tauna sibawa iya paancuru'é nenniya memme'i anréna sibawa kanuku tembagana nenniya isi bessinna, enrengngé léjja-léjja'i sésa-sésana. Macinna tokka missengngi passalenna iya seppulo tanru'é ri ulunna sibawa passalenna tanru baiccu iya monriyé mompo nainappa nabébbu tellu polé ri tanru iya bunge'-bunge'éro. Iyaro tanru baiccu'é mappunnaiwi mata sibawa bawa iya mabboroé sibawa tempona. Lebbi mappakatau-taui naiya tanru-tanru iya laingngéro. Wettukku pénessaiwi, iyaro tanru'é mammusui méwai umma'na Allataala sibawa caui mennang. Nainappa Aléna iya tuwoé mannennungenro polé nainappa mabbéré apettung iya pattongengngéngngi umma'na Allataala Iya Pommatanré. Narapini wettunna mennang tarima akuwasang untu' mapparénta. Iyanaé pappakatajang iya utarimaé, “Olokolo iya maeppaéro iyanaritu akkarungeng iya maeppaé iya tettongngé matu ri linoé nasisalai matu sibawa akkarungeng-akkarungeng iya laingngé. Iyaro akkarungengngé naancuru'i matu sibawa memme'i sininna linoé nanaléjja'-léjja'i matu sésana. Iya seppulo tanru'éro iyanaritu iya seppulo arung iya paréntaéngngi matu akkarungengngéro. Nainappa mompo matu séddi arung iya laingngé; sisala senna'i matu sibawa arung-ngarung iya bunge'-bunge'é, nanacaui matu tellu tau arung. Mabbicarai matu méwai Allataala Iya Pommatanré sibawa tenre'i umma'na Allataala. Makkuragai matu pinrai hukkung-hukkungngé sibawa pésta-pésta agamana umma'na Allataala, narikuwasai matu mennang tellu sitengnga taung ittana. Nainappa massidang matu pengadilanna surugaé nanabébbui akuwasanna enrengngé mancuru'i gangka lennye. Akuwasang nenniya arajanna sininna akkarungengngé ri linoé nabbéréyangngi matu lao ri umma'na Allataala Iya Pommatanré. Akuwasan-Na mennang untu' mapparénta dé' matu naccappa sibawa sininna panguwasaé ri linoé mattumaniwi matu mennang sibawa mapato.” Sikumiro iyaé laporangngé. Mausé senna'ka angkanna mancaji makawiya, iyakiya dé' muwi séddi tau upaissengi passalenna iya manennaro. Ri taung matellué apparéntanna Arung Bélsyazar, lolongekka pakkitang iya maduwaé. Ri laleng pakkitangngéro engkaka uwita ri propinsi Elam, ri Susan, ibukotana Persia. Tettokka ri seddéna Salo Ulai, na ri wiring saloéro paitai sikaju bimbala lai iya mappunnaiyé duwa tanru lampé, iya séddié lebbi malampéi sibawa lebbi barui naiya laingngé. Uwitai iyaro bimbala laié mattanru lao ri yajang, manorang sibawa yattang. Dé' muwi séddi olokolo iya tahangngé moloiwi iyaré'ga leppe polé ri akuwasanna. Napogau'i siélo atinna sibawa mancaji matempoi. Ri wettu uwitana, paitai sikaju bémbé lai lari-lari polé ri yajang mappoloiwi linoé. Makkuwamani kencanna lari angkanna ajéna dé' nagéssai tanaé. Ri pallawangenna iya duwa matanna engka séddi tanru cicca. Iyaro bémbé laié naddeppériwi bimbala lai iya uwitaé ri wiring saloéro, nainappa malluru lao ri onronna sibawa majapperu. Upénessaiwi gasai iyaro bimbala laié. Makkuwamani japperuna angkanna naleppo bimbala laiéro sibawa poloi iya duwa tanru'na. Iyaro bimbala laié dé' pakkullénna untu' méwa. Taddémpe'ni ri tanaé sibawa riléjja'-léjja', na dé' muwi séddi tau mulléi tulungngi. Iyaro bémbé laié pédé maloppoi. Iyakiya wettunna lettu ri coppo akuwasanna, poloni tanru'na iya maloppoéro, nainappa ri onrongngéro tuwoi eppa tanru iya ciccaé, tungke'-tungke' majjello'i lao ri onrong iya silaingengngé. Polé ri sala séddinna tanru'éro tuwoi tanru baiccu, iya mancaji maloppo senna'é sibawa akuwasanna mallowangengngi mattuju ri yattang, mattuju ri alau sibawa mattuju ri tana iya magelloé. Iyaro tanru'é mancajiwi pédé maloppo narapi genne awatangenna untu' gasai tentarana surugaé iyanritu sining wéttowingngé, mala siyagangngaré ri yelle'na naggenrungeng ri tanaé sibawa naléjja'-léjja'i. Mala naéwai pallimana tentara surugaé, napappajai akkarobangeng pakkasuwiyang esso-essoé iya nakkasuwiyangengngé lao ri pallimaéro, sibawa ruttungngi bola assompangngé untu' aléna. Nainappa sining tauwé kuwaro mappammulani madosa sibawa dé' nakkasuwiyangeng akkarobangeng-akkarobangeng iya riwajikangngéngngiro. Na assompang iya tongengngé purani nappéyang lao ri tanaé. Iyaro tanru'é mallolongengngi ri laleng sininna pangkaukenna. Nainappa uwéngkalinga séddi malaéka' makkeda lao ri laingngé, “Gangka siyaga ittana sininna iya paitaé ri laleng pakkitangngéro matteru matu? Gangka kégi dosa battowaéro sulléiwi akkarobangeng esso-essoé? Gangka kégi tentara surugaé sibawa bola assompangngéro riléjja'-léjja'?” Uwéngkalingai malaéka iya séddiéssi mappébali, “Gangka 1.150 essopi. Ri lalenna wettuéro akkarobangeng arawéngngé sibawa akkarobangeng éléé dé' nariyakkasuwiyangeng. Purapiro nainappa ripalisu matu bola assompangngé.” Wettukku mattengngang makkuraga untu' pahangngi bettuwanna pakkitangngéro, tappa tettonni ri yoloku séuwa iya pada-padaé tolino. Uwéngkalingai sadda iya mangobbié ri liwenna Salo Ulai, adanna, “Gabriél, pakatajanni lao ri aléna pakkitangngéro.” Nainappa Gabriél iya tettongngé ri yolokuro maddeppérika. Makkuwamani tauku, angkakku rebba. Adanna Gabriél lao ri iyya, “Eh tolino dé'é namannennungeng, harusu'i muwisseng makkedaé iyaro pakkitangngé iyanaritu passalenna paccappurenna linoé.” Ri wettu mabbicarana mupa, marenne'na. Iyakiya nakkatennikka sibawa natulukka tettong paimeng. Nainappa makkeda, “Maélo-Ka paissengiko aga iya maéloé kajajiyang matti selaku addimonrinna caina Allataala. Saba' iyaro pakkitammu majjello'i lao ri paccappurenna linoé. Bimbala lai iya muwitaéro, iya mappunnaiyé duwa tanru, napulambangngi akkarungeng Média sibawa Persia. Iyaro bémbé laié napulambangngi akkarungeng Yunani, na tanru iya ciccaé ri yelle'na iya duwa matannaro iyanaritu arunna mammulangngé. Iya eppa tanru iya mompoé purana tanru iya mammulangngéro polo, bettuwanna makkedaé tabbagé-bagéi matu akkarungeng Yunani mancaji eppa akkarungeng, iyakiya muwi séddi dé'to gaga pada watanna akkarungeng iya bunge'-bunge'éro. Mawé'nana maccappa iyaro akkarungeng-akkarungengngé, narékko narapini coppo'na jaé, mompoi matu séddi arung iya matedde atié, sibawa macca mabbellé. Mancaji mawatang senna'i matu, iyakiya tenniya nasaba awatangeng riyaléna. Mappapoléi matu abinasang iya mappakatau-taué na agi-agi iya napogau'é mallolongengngi matu. Napabbinasai matu sining tau baranié sibawa umma'na Allataala. Nasaba maccai mabbellé, mallolongengngi matu sining belléna. Nattempowangngi matu aléna, na temmabbéré papparéngngerang lebbi riyolo napabbinasai matu lebbi maéga tau. Mala baraniwi méwai Arung Iya Pobbattowaé. Iyakiya riyancuru'i matu tenniya awatangeng tolino. Pakkitang passalenna akkarobangeng arawéngngé sibawa éléé iya puraé ripakatajang lao ri ikoro, tonget-tongengngi kajajiyang matu. Iyakiya iya manennaro kajajiyangngi matu ri wettu mangoloé iya mabélaé mupa; jaji aja' mucuritai muwi lao ri séddié tau.” Namalemmana pappéneddikku nainappa nakennaka lasa siyagangngaré esso ittana. Purairo moto'na naulisu pogau'i jama-jamakku untu' arungngé. Iyakiya mauséka pikkiri'i sining pakkitangngéro na dé' uwulléi pahangngi. Nainappa massempajakka sibawa mattonget-tongeng lao ri Puwang Allataala, sibawa méllauwi paressé babuwana. Mappuwasa tona sibawa paké kaing karung enrengngé tudang ri tompo'na awué. Uwakuiwi dosana sininna bangsaku lao ri Puwang Allataalaku. Adakku, “ Puwang Allataala, marajaki, na Idi pakalebbiki. Tuli Murupaiwi assijancim-Mu sibawa mappaitangngi pammasé-Mu iya mannennungengngé lao ri mennang iya mamaséiyék-Ko sibawa pogau'i aga iya Muwapparéntangngé. Purani madosaki, purani ripogau' majaé, sibawa pogau' asalang. Purani maronta'ki sibawa majjalékkaiwi parénta-Mu enrengngé léssé polé ri atoreng-atorem-Mu. Dé' taéngkalingai sining nabié, ata-atam-Muro, iya puraé mabbicara ri laleng asem-Mu lao risining arutta, lao risining pamimpingngé, sining toriyolota sibawa lao ri sininna bangsata. Oh Puwang, tuli teppa'i tindakam-Mu sibawa adélé, iyakiya idi tuli mappapoléki asiriseng lao ri aléta, iyanaritu idi maneng iya monroé ri Yudéa sibawa ri Yérusalém nenniya sininna tau sibangsata iya puraé Mupatassiya lao ri wanuwa-wanuwa iya mabélaé sibawa iya macawé'é nasaba dé' mennang namatinulu lao ri Iko. Arung-ngarutta, sining pamimpitta sibawa néné-nénéta purani napogau' gau'-gau' iya mappakasiri-sirié sibawa purani madosa lao ri Iko, oh Puwang. Penno-Ko paddampeng sibawa paressé babuwa, namuni puraki méwa-Ko. Dé' taéngkalingai saddam-Mu, oh Puwang Allataalata, wettutta Musuroki tuwo situru hukkung-hukkung iya puraé Muwabbéréyang lao ri idi naolai sining nabié, ata-atam-Muro. Sininna Israélié purani najjalékkai hukkung-hukkum-Mu sibawa dé' namaélo méngkalingai saddam-Mu. Madosaki lao ri Iko, narimakkuwannanaro Mupakennaiki tanro iya tarokiénna ri laleng Kitta'na Musa, atam-Mu. Tinda'ko situru pada-pada iya puraé Muwajjanciyang lao ri idi sibawa lao risining panguwasata. Purani Muhukkung Yérusalém lebbi matedde naiya muwi kota niga ri linoéwé. Sininna abala iya tarokié ri laleng Hukkunna Musa purani Mupakennaingekki. Iyakiya namuni makkuwaro, oh Puwang Allataalata, tette mupi massampéyang untu' pésennangiwi atim-Mu. Tette'ki dé' tamaélo salaiwi dosa-dosata sibawa dé'to tapuriyatiwi sining pappagguruwam-Mu. Iko, oh Puwang Alltaalata, pura hukkukki sibawa abala iya puraé Mupassadiya; tindakam-Mu tuli coco'i sibawa adélé, iyakiya idi dé' taéngkalingai saddam-Mu. Oh Puwang, Allataalata, purani Muwappaitang akuwasam-Mu sibawa tiwii umma'-Mu massu polé ri Maséré, na iyaro akuwasam-Mu tette mupi risénge. Purani madosaki sibawa pogau' asalang. Purani Muéwai ri wettu riyolo, rimakkuwannanaro aja'na Mumacaisi lao ri Yérusalém, kota-Mu muto, bulu-bulu-Mu iya mapaccingngé. Nasaba dosata sibawa jana néné-nénéta, na sininna tauwé ri mattulilitta naita mariyawai Yérusalém sibawa umma'-Mu. Oh Allataalata, éngkalingai sempajakku sibawa paréllaukku. Palisui Bola-Mu iya puraé riyancuru'ro, pédécéngiwi kuwammengngi naissengngi sininna tauwé makkedaé Iko ritu Allataala. Engkalingaki, Oh Allataala, tangngaki sibawa pénessaiwi anrasa-rasatta enrengngé asolangenna kota iya riteppué sibawa asem-Mu. Massempajakki lao ri Iko tenniya nasaba jasa-jasata, sangadinna nasaba pennoko paressé babuwa. Puwang, éngkalingaki, addampengekki, jampangiki sibawa tinda'ni masitta! Aja'na taccana-cana, kuwammengngi naissengngi sininna tauwé makkedaé Iko ritu Allataala. Saba' Yérusalém sibawa umma'-Mu iyanaritu appunnangem-Mu iya dé'é padanna.” Matteruka massempajang sibawa mangakuiwi dosaku sibawa dosana bangsaku Israélié, enrengngé méllauwi ri Puwang Allataalaku untu' palisui Bola-Na iya mapaccingngé. Ri wettu massempajakku, Gabriél iya puraé uwita ri laleng pakkitakku iya riyoloéro, luttui mattuju lao ri iyya. Iyaro wettué, wettunna tauwé makkasuwiyangeng akkarobangeng arawéng. Nainappa napakatajang Gabriél makkuwaéwé, “Daniél, poléka untu' bantuko pahangngi iyaro botoé. Wettummu mammula méllauwi lao ri Allataala, mabbéréi pappébali. Poléka palettu'i saba' Namaséiko. Nah, éngkalingai madécéd-décéng ri wettu upakatajanna bettuwanna pakkitangngéro. Wékkapitu pituppulo taung iyanaritu wettu iya napattette'é Allataala untu' paleppe'i bangsamu sibawa kotamu iya mapaccingngéro polé ri dosaé sibawa jaé. Sininna dosaé riyaddampengengngi sibawa ripatettongngi adélékeng iya mannennungengngé, angkanna pakkitang sibawa botoéro mannessai matu, sibawa Bolana Puwang iya mapaccingngéro riyassompaisi matu lao ri Puwangnge. Cata'i sibawa pahangiwi iyaé: Wékkapitu pituttaung labe'é matu, mappammulai wettu ripassuna paréntaé untu' patettongngi paimeng Yérusalém, narapi poléna séddi tau pamimping napilé Allataala. Ri lalenna wékkapitu enneppulona duwa taung sining lalenna sibawa sining bénténna Yérusalém ripatettongngi matu paimeng, iyakiya iyaro wettué pennoi asukkarakeng. Ri paccappurenna wettuéro iyaro pamimping napiléna Allataala riyunoi matu, padahal dé' napasala. Napoléna tentarana séddié arung iya mawatangngé, nanapaccappui Yérusalém enrengngé Bolana Puwangnge. Paccappurenna iyaro wettué poléi matu pada-pada lémpe iya tiwié musu sibawa ancurukeng, pada-pada iya puraé napattentu Allataala. Iyaro arungngé mébbui matu assijancing masse'é sibawa maéga tau ri lalenna pituttaungngé. Ri pattengnganna wettuéro, napappésauwi matu ripakangkana akkarobangengngé sibawa pakkasuwiyangngé. Nainappa séuwa iya mappakatau-taué iya riyasengngé Ja iya paancuru'é ritaroi matu ri Bolana Puwangnge sibawa tette'i matu engka kuwaro narapi iya taroéngngi kuwaro nakenna abinasang iya puraé napattette Allataala untu' aléna.” Ri taung matellué apparéntanna Arung Korésy ri Persia, séuwa paseng ripannessa lao ri Daniél iya ritellaétto Béltsazar. Iyaro pasengngé tongeng, iyakiya mawatang senna untu' riyajeppui. Wettunna makkuraga untu' pahangngi, tarimani Daniél pappakatajang passalenna pasengngéro ri laleng séuwaé pakkitang. Iyaro wettué mattengngakka tapakkoro' tellu minggu bujuru'. Ri lalenna wettuéro dé' uwanré inanré iya malunra'é iyaré'ga juku; dé' uwénung anggoro, sibawa dé'to ujakkaiwi gemme'ku. Ri tanggala duwappulona eppa uleng mammulangngé ri taungngéro, mattengngakka tettong ri wirinna Salo Tigris iya maloppoéro. Congaka, nauwitai séddi tau iya mappaké pakéyang polé ri lénangngé sibawa babbang polé ri ulaweng tuléngngé. Mattappa tubunna pada-pada paramataé, rupanna siccakka cahaya billa'é, sibawa malluwa-luwa' matanna pada-pada apié. Taiyya sibawa ajéna millak-killang pada-pada tembaga iya rigoso'é, sibawa saddanna paéngkalinga pada-pada saddanna tau maégaé. Alé-aléku bawang mitai iyaro pakkitangngé. Sining tau iya silaongengngékka dé' naitai, iyakiya métaui mennang angkanna lari sibawa massubbu. Nasalaika kuwaro alé-alé, naupénessai towi pakkitang iya mappasélengiyéro. Dé'na gaga pakkullékkuna sibawa makawiyani rupakku. Wettukku méngkalingai saddanna, marenne'na mabuwang gangka moppang ri tanaé. Nainappa engka lima géssaka sibawa mébbuka moto' namattulekketto ri limakku sibawa uttuku. Makkedai iyaro malaéka'é lao ri iyya, “Daniél, namaséiko Allataala. Tokkonno namutettong nainappa éngkalingai iyaé ada-adakku madécéd-décéng. Iyya'é pura risuro lao ri iko.” Wettunna napowada gau'éro, tettonna sibawa ténré. Nainappa makkeda lao ri iyya, “Daniél, aja' mumétau. Purani naéngkalinga Allataala sempajammu mappammulai esso mammulangngé sipongenna malako apettung untu' pakariyawai alému kuwammengngi mumancaji mapanré. Poléka selaku pappébalinna sempajammu. Naéwaka malaéka' pallinrunna akkarungeng Persia duwappulo séddi esso ittana. Nainappa Mikhaél, sala séddinna polé risining pamimpinna malaéka'é, polé tulukka. Usalaini kuwaro, ri Persia. Poléka untu' mébbuko majeppuiwi aga iya kajajiyangngé matu matti ri bangsamu. Iyaé pakkitangngé passalenna esso mangoloé.” Wettunna napowada gau'éro, cuku'na sibawa dé' uwulléi mabbicara. Nainappa malaéka' iya maddupa tolinoéro loro'i limanna sibawa géssai témukku. Makkedaka lao ri aléna, “Puwang, iyaé pakkitangngé mébbuka makkuwamani natenre'ku angkanna dé' siseng pakkullékku. Pada-padaka séddié ata iya tettongngé ri yolona puwanna. Pékkugi makkullé mabbicaraka lao ri Puwang? Cappuni awatangekku sibawa mabbusessanni nappase'ku.” Nasiseppi nagéssaka, nainappa upérasa awatangekku tattamba. Makkedai, “Namaséiko Allataala, rimakkuwannanaro aja' mubata-bata iyaré'ga métau, ayo', ancajino mawatang!” Ri wettu napowadana gau'éro, upéneddingini lebbi mawatakka sibawa makkeda, “Abbicarano, Puwang. Purani natambai awatangekku Puwang.” Aléna iya risuro untu' mabbantu sibawa méwaika ri taung mammulangngé apparéntanna Darius tau Médiaéro. Na aga upowada matu lao ri iko iyanaritu tongengngi.” Napowadai iyaro malaéka'é, “Tellu arung laing paréntai matu Persia, riyaccowéri ri arung iya maeppaé iya lebbi sugié naiya laingngé. Ri coppo'na akuwasanna sibawa asugirenna, siyéwa awatangengngi matu sibawa akkarungeng Yunani. Nainappa mompo matu séddi arung iya poré. Naparéntai matu akkarungeng iya battowa senna'é sibawa napogau'i matu siyélo-élona. Iyakiya ri coppo arajanna, mareppa'i matu akkarungenna sibawa tabbagé-bagé mancaji eppa bagiyang. Arung-ngarung iya tenniyaé wijanna mapparéntai matu selaku passulléna, sibawa dé' matu mennang napada-pada awatangenna aléna. Mancaji mawatangngi matu arunna wanuwa yattang. Iyakiya sala séddinna polé risining pallimana mancajiwi matu lebbi mawatang naiya aléna, sibawa naparéntai matu akkarungeng iya lebbi battowaéppa. Siyagangngaré taung ri munrinna arunna wanuwa ri yattang pakangkai matu assiyempekeng sibawa arunna wanuwa manorang nanapasiyalai ana' makkunrainna sibawa arunna wanuwa manoranro. Iyakiya iyaro assiyempekengngé dé' namattahang, na iyaro ana' makkunraié riyunoi matu, makkuwatoro lakkainna sibawa ana'na nenniya ata-ata iya puraé mantara'i. Dé' namaitta puranaro, séddi tau iya sikaluwargaé sibawa ana' makkunraiéro mancaji arung matu. Nagasai matu tentarana arunna wanuwa manorang, naluruiwi bénténna sibawa caui. Wettunna lisu ri Maséré, natiwii matu dato-dato déwatana balinna sibawa paréwa ulawengngé nenniya péra'é iya puraé nakkasuwiyangeng lao ri déwataéro. Siyagangngaré taung ittana dé' matu namusui arunna wanuwa manorang. Nainappa arunna wanuwa manorang nagasai matu wanuwa yattang, iyakiya ripasoroi matu sibawa lisu ri wanuwanna muto. Nainappa ana'-ana' worowanéna arunna wanuwa manorang sadiya-sadiyai matu untu' mammusu sibawa mébbu tentara iya battowaé. Sala séddinna polé ri mennanro mallurui matu maggasa pada-pada lémpe'é. Ri laleng aggasareng iya maduwaé nagasai bénténna balié. Namacaina arunna wanuwa yattang, namalluru matu ri ammusurengngé méwai arunna wanuwa manorang. Naulléi matu caui tentara battowa iya napangaraé arunna wanuwa manorang. Namatempona matu nasaba apakalanna sibawa nasaba purani nauno maéga bali, iyakiya dé' matu natteru makuwasa. Untu' mabbékkaduwanna arunna wanuwa manorang mébbui matu pasukang iya battowaé, mala iya lebbi battowaé naiya mammulangngé. Rékko narapini wettunna, mallurui matu sibawa tentara iya battowaé sibawa paréwa iya maéga senna'é. Namaéga tau maronta matu lao ri arunna wanuwa yattang. Sibawa siyagangngaré tau mabecco polé ri bangsamu, Daniél, maronta towi matu nasaba purani mennang mita séuwa pakkitang. Iyakiya dé' namallolongeng matu mennang. Nainappa arunna wanuwa manorang keppungngi matu séddi kota mabbénténg sibawa sittaiwi. Dé' naulléi matu mattahang tentarana wanuwa yattang, sibawa muwi pasukang-pasukang ripiléna dé'to naulléni méwa. Napogau'i matu siyélonaé arunna wanuwa manorang na dé'gaga méwai muwi céddé. Natudangi towi matu tana iya magelloé sibawa makuwasai manengngi. Nainappa arunna wanuwa manorang passadiyai matu sininna tentarana untu' gasai wanuwa yattang. Akkattana makuwasaiwi sininna akkarungeng balinna, mébbui matu assamaturuseng sibawa aléna nenniya pasiyalai ana' makkunrainna sibawa arung Maséré'ro; iyakiya iyaro rancanana dé' namallolongeng. Purairo nagasai matu bangsa-bangsaé ri wiring tasi'é, namaéga iya nacaué. Iyakiya séddi pamimpinna wanuwa laingngé pappajai matu pappakatuna iya napogau'éro, mala nawale'i matu iyaro pappakatunaé lao ri aléna. Iyaro arunna wanuwa manorang lisui matu risining bénténna wanuwanna muto, iyakiya ricaui matu na dé'na gaga karébanna passalenna aléna. Risulléiwi matu ri séddié arung iya suroéngngi matu pegawéna iya mabecco'é untu' paddeppungeng sima sibawa tarapassa untu' tambaiwi asugirenna akkarungenna. Ri laleng wettu iya dé'é namaitta riyunoi matu iyaro arungngé mammekko-mekko sibawa dé'to na ri laleng musué.” Makkedasi iyaro malaéka'é, “Arung rappina iya paréntaéngngi wanuwa manorang iyanaritu séddi tau matuna iya dé'é nappunnai ha' mancaji arung. Iyakiya poléi matu tennasenna-senna sibawa sittaiwi tudangenna arungngé sibawa bellé. Sininna tentara iya méwaéngngi, mala muwi Imang Lompoé, napépaccingiwi sibawa napaccappui. Nabali'bellariwi sining assijancing iya silalonaé naébbu sibawa bangsa-bangsa laingngé. Sibawa mancajiwi pédé mawatang matu, namuni banna naparéntai wanuwa iya baiccu'é. Nagasai matu daéra-daéra iya macommo'é sibawa macéko-céko wettunna pabbanuwana marasa amang kuwaro. Napogau'i matu aga iya dé'éppa napogau'i néné-nénéna. Nainappa natawa-tawangeng matu sining pabbanuwana sininna barang rappaé sibawa asugireng iya nalolongengngé ri laleng musué. Mébbui matu siyasa' untu' gasai onrong-ngonrong iya mabbénténgngé, iyakiya masitta'i matu cappu wettunna. Nainappa nasibawang abaraning mébbui matu tentara iya battowaé untu' gasai arunna wanuwa yattang iya sadiya-sadiyaéttona maélo méwai aléna sibawa tentara mawatangngé nenniya battowa senna'é. Iyakiya arunna wanuwa yattang dé' naulléi mattahang nasaba ribali'bellariwi matu. Sining pappangajana iya kaminang macawé'é sibawa aléna pasempé'i matu. Maéga ri yelle'na sining prajuri'na riyuno matu, sibawa ripaccappui matu tentarana. Nainappa iya duwa arungngéro tudangngi matu ri séddié méjang sibawa sisama manré, iyakiya makkatta majai mennang, sibawa sisulléi sibellé. Iyakiya rancanana mennang dé' najaji saba' dé'pa narapii wettunna. Nainappa arunna wanuwa manorang lisui matu ri wanuwanna sibawa sininna barang rappana iya nalolongengngé. Mattonget-tongengngi untu' mancuru'i agama iya naccowériyé umma'na Allataala. Napogau'i matu siyélo-élona nainappa lisu ri wanuwanna muto. Siyagangngaré wettu ri munrinna nagasasi wanuwa ri yattang, iyakiya addimonrinna silaingengngi naiya mammulangngé. Saba' sining tau Romaé sibawa sining kappala'na poléi matu polé ri Siprus nanamusui, angkanna mancaji métau. Nainappa lisui matu sibawa macai senna namakkuraga mancuru'i agamana umma'na Allataala. Naccowériwi matu pangajana mennang iya salaiyénni agamaéro. Nainappa nakiring sining pasukang iya carépaiyéngngi Bolana Puwangnge. Naleddai matu mennang akkarobangeng esso-essoé sibawa patettongngi séuwa iya mappakatau-taué iya riteppué Ja iya paancuru'é. Nanasibawang belléna arungngéro napalécéi matu sining tau iya salaiyénni agamana, kuwammengngi namaélo bantui. Iyakiya sining tau iya matinulué lao ri Allataala baraniwi matu méwai. Sining tau mapanré iya pimpingngéngngi ra'ya'é naébbui matu maéga tau majeppuiwi. Iyakiya untu' siyagangngaré wettu ittana, siyagangngaré ri yelle'na mennang matéi matu nasaba musué iyaré'ga nasaba api, nasiyagangngaré tausi rirampo'i matu sibawa ritawang. Ri wettu matteruna iyaro abbunowangngé, lolongengngi matu umma'na Allataala sibawa céddé bantuwang, iyakiya maéga tau masséddi matu sibawa mennang banna untu' apentingenna muto mennang. Sibagiyang polé risining pamimping iya mapanréro riyunoi matu, iyakiya iyaro sinrupai ojiyang untu' umma'é angkanna mennang mancaji mapaccing matu. Iyaro gau'é matterui matu lettu ri paccappurenna linoé, iyanaritu wettu iya puraé napattentu Allataala. Arunna wanuwa manorang napogau'i matu siyélo atinna. Nasibawang atempong makkedai matu makkedaé lebbi battowai naiya muwi déwata niga, mala lebbi battowa towi naiya Allataala Iya Pommatanré. Naulléi matu pogau'i makkuwaéro narapi maccappa caina Allataala. Saba' aga iya puraé napattette Allataala harusu'i kajajiyang riyolo. Iyaro arungngé dé' matu najampangiwi muwi déwata niga iya nasompaé néné-nénéna, muttama'ni déwata nasompaé sining makkunraié. Dé' napaduliwi iyaro déwata-déwataé nasaba naangga'i aléna lebbi battowa naiya mennang. Sibalé'na, napakalebbii matu déwata iya dé'éppa naengka nasompai néné-nénéna, iyanaritu déwata pallinrunna sining bénténgngé. Makkasuwiyangngi matu ulaweng, péra', paramata sibawa pakkasuwiyang-pakkasuwiyang makessing laingngé lao ri déwata iya dé'eppa naengka nasompai néné-nénéna. Napiléi matu sining tau iya sompaéngngi déwata laingngé, untu' gasai sining bénténg iya mawatangngé. Nigi-nigi mangakuiwi iyaro déwataé nawéréngngi matu alebbireng battowa sibawa tudangeng iya matanré enrengngé tana selaku saro. Rékko mawé'ni narapi cappa'na akuwasanna arunna wanuwa manorang, arunna wanuwa yattang gasai matu. Nainappa arunna wanuwa manorang mpale'i matu iyaro paggasaé sibawa masero. Pangarai matu maéga karéta musu, anyarang sibawa kappala. Maggasai matu pada-pada lémpe rajaé, sibawa tudangi maéga wanuwa. Mala muwi tana iya magelloé nagasato, sibawa mappulo sebbu tau nauno matu. Iyakiya akkarungeng-akkarungenna Edom, Moab sibawa bagiyang iya kaminang pentingngé polé ri akkarungenna Amon salama'i matu. Wettunna natudangi sining akkarungengngéro, muwi akkarungeng Maséré dé'to naleppe. Narampasa'i matu waramparanna Maséré maddupa ulaweng sibawa péra' enrengngé waramparang laing iya mangke senna'é. Ribantui matu ri tau Libiaé sibawa Sudangngé. Nainappa karéba polé alaué sibawa manorangngé sélengiwi matu, angkanna mammusui matu sibawa masero nanaunoi maéga tau. Mala pasangngi matu kéma akkarungeng ri pallawangenna tasi'é sibawa bulu onronna Bolana Puwangnge. Iyakiya ri munri matéi matu na dé'gaga muwi séddi tau iya tulungngéngngi matu.” Makkedasi malaéka' iya paké pakéyang lénanro, “Iyaro wettué mompoi matu malaéka' battowaé Mikhaél pallinrunna bangsamu. Nainappa engka matu wettu asukkarakeng iya dé'é gaga pada-padanna sipongenna engka bangsa-bangsaé. Iyakiya sininna tau polé ri bangsamu iya tarokié asenna ri laleng kitta'na Allataala, ripassalama'i matu. Maéga ri yelle'na mennang iya matéénna tuwoi matu paimeng; sibagiyang péneddingiwi matu atuwong mannennungengngé, na sibagiyassi péneddingiwi matu atunangngé sibawa appakatau-taureng iya mannennungengngétto. Sining pamimping iya mapanré mattappai matu pada-pada cahaya langié. Sibawa mennang iya puraé paggurui maéga tau untu' pogau'i aga iya makessingngé sibawa adélé'é, mattappai matu pada-pada sining wéttowingngé untu' mannennungeng.” Nainappa makkedasi iyaro malaéka'é lao ri iyya, “Daniél, tongkoi iyaro kitta'é makkekkuwangngé, sibawa paddeppériwi ségélé kuwammengngi tette'i tattongko narapi paccappurenna linoé. Maéga tau cobai matu salidikiwi aga iya mattengngangngé kajajiyang. Iyakiya siya-siyai matu usahana mennanro.” Nainappa uwita duwa tau worowané. Iya séddié tettongngi ri wirinna saloé kumaiyé, na iya laingngé ri wirinna saloé kuwaro. Iya séddié makkutanai lao ri iya tettongngé lebbi macawé' sibawa ulunna saloé, “Uppannapa sining kajajiyang iya makalallaingngéwé maccappa matu?” Tau iya laingngéro makkai iya duwa limanna ménré ri langié. Uwéngkalingai mattanro nasabbing Allataala iya mannennungengngé sibawa makkeda, “Iyaro sining kajajiyangngé matterui matu tellu sitengnga taung ittana. Pajanana paccallangngé lao ri umma'na Allataala, paja toni iyaro sining kajajiyang makalallaingngé.” Sininna iya napowadaéro mémeng uwéngkalinga, iyakiya dé' upahangngi. Nainappa makkutanaka, “Puwang, pékkugi matu iya manennaé paja?” Nappébali, “Laono makkekkuwangngé, Daniél, saba' iyaé ada-adaé harusu'i risubbu sibawa rirahasiyakang narapi paccappurenna linoé. Maéga tau riyoji matu sibawa ripatuléng. Mennang iya majaé dé' najeppuiwi matu sibawa matterui matu pogau'i majaé; banna mennang iya mapanré majeppuiwi matu. Polé ri wettu akkarobangeng esso-essoéro ripappésau sibawa ripatettonna séuwa iya mappakatau-taué iya riteppué Ja iya paancuru'éro, labe'i matu 1.290 essona. Masennangngi mennang iya tette'é matinulu lettu ri esso ma-1.335. Iko Daniél, atinuluno lettu ri paccappurenna. Matéko matu, iyakiya moto'ko matu untu' tarimai saromu ri paccappurenna linoé.” Iyanaé paseng iya nabbéréyangngé Puwangnge lao ri Hoséa ana' Bééri wettunna akkarungenna Yéhuda matturu-turusengngi riparénta ri Arung Uzia, Yotam, Ahas, enrengngé Hizkia, sibawa akkarungenna Israélié riparéntai ri Yérobéam ana' Yoas. Wettunna bunge'-bunge' mabbicara Puwangnge lao ri bangsa Israélié sibawa naolaka, makkedai Puwangnge, “Hoséa, kawingiwi séddi tau iya pojiyéngngi maccakkuribang, na ana'-ana'mu mancaji towi matu pada-pada aléna. Umma'-Ku pada-padai bainémuro; dé' namatinulu mennang lao ri Iyya, sibawa nasalai-Ka.” Naukawingini séddi makkunrai riyasengngé Gomér ana'na Diblaim. Najajiyannana ana'ta bunge'é, séddi ana' worowané, makkedai Puwangnge lao ri iyya, “Asengngi ana'muro Yizreel saba' dé'na namaittana Uhukkungngi matu arunna Israélié nasaba abbunowang iya napogau'é Yéhu, toriyolona, ri Yizreel. Upaccappa'i matu apparéntanna wijanna Yéhu. Iyaro wettué ri Lompo Yizreel Uwancuru'i matu awatangenna tentara Israélié.” Nainappa iyaro bainéku najajiyang ana'ta iya maduwaé, séddi ana' makkunrai. Makkedai Puwangnge lao ri iyya, “Hoséa, asengngi ana'muro ‘Iya Dé'é Nariyamaséi’, nasaba dé'na Uwamaséiwi matu bangsa Israélié, sibawa dé' sises-sisenna Uwaddampengengngi mennang. Iyakiya bangsa Yéhuda Uwamaséiwi matu. Iyya Puwang, Allataalana, passalama'i matu mennang, iyakiya tenniya sibawa musu, tenniyato sibawa peddang iyaré'ga pana iyaré'ga anyarang sibawa tonangiyéngngi.” Risalla'nana susu ana'ta maduwaé, mattampu'si bainéku nanajajiyang séddi ana' worowané. Makkedai Puwangnge lao ri iyya, “Asengngi iyaro ana'mu ‘Tenniya Umma'-Ku’, saba' tau Israélié tenniya umma'-Ku, sibawa Iyya tenniya Allataalana mennang.” Mancajiwi matu bangsa Israélié singngéga kessi'é ri tasi'é, angkanna dé' nawedding riyukkuru iyaré'ga ribilang. Makkekkuwangngé makkedai Allataala lao ri mennang, “Tenniyako umma'-Ku,” iyakiya narapii matu wettunna makkedai matu lao ri mennang, “Iyya ritu Allataala iya tuwoé na iko ana'-ana'-Ku!” Bangsa Yéhuda sibawa bangsa Israélié ripasséddiwi matu paimeng. Makkai matu séddi tau pamimping, namabbijai matu mennang sibawa madécéngngi paimeng ri wanuwanna mennang. Tongeng, essona Yizreel mancajiwi matu esso iya battowaé! Rimakkuwannanaro obbini pada-padammu sibawa aseng “Umma'na Allataala” sibawa “Riyamaséi ri Puwangnge ”. Makkedai Puwangnge, “Eh ana'-ana'-Ku, indo'mu tenniyana bainé-Ku, sibawa Iyya tenniya lakkainna. Rimakkuwannanaro, apparakarangngi aléna kuwammengngi aja' namalaweng sibawa aja' naccakkuribanna. Rékko tette'i maccakkuribang, maélo-Ka ludungngi pakéyanna kuwammengngi namallusu-lusu pada-pada ri esso wettunna rijajiyang. Upancajiwi matu pada-pada tana marakkoé sibawa makarossaé, namatéi matu adekkang. Iko, ana'-ana'na, dé' Uwamaséiwi matu; jajiko polé ri accakkuribangengngé. Cakkuribang indo'mu iya dé'é naissengngi masiri. Makkedai, ‘Maéloka lao risining canrikku iya mpéréngngékka inanré sibawa énungeng, wol sibawa kaing lénang, minnya zaitun sibawa anggoro.’ Rimakkuwannanaro, maélo-Ka murungngi sibawa alekale maddori, sibawa tongkoi lalenna sibawa sappo témbo'. Nalellungngi matu sining canrinna, iyakiya dé' nalettu matu ri mennang. Nasappai matu mennang, iyakiya dé' naruntu'i matu mennang. Nainappa makkedai matu, ‘Maéloka lisu ri lakkaikku iya mammulangngé; lebbi makessingngi keadaakku riyolo naiya makkekkuwangngé.’ Dé' naengka nangakuiwi indo'mu makkedaé Iyya ritu mpéréngngi gandong, anggoro, minnya zaitun, sibawa sininna ulaweng péra' iya napaké untu' sompai iyaro Baal. Rimakkuwannanaro, Ugettengngi matu lisu pabbéré-Ku ri wettu éngngalangngé, iyanaritu gandong sibawa anggoro, enrengngé wol sibawa kaing lénang iya Uwéréngngéngngi untu' pakéyanna. Upallusu-lusui matu ri yolona sininna canrinna. Dé' muwi séddi polé ri mennang mulléi paleppe'i polé ri akuwasak-Ku. Sininna péstana Upappajai matu, muwi pésta pattaungengngé iyaré'ga pésta uleng-ngulengngé sibawa esso-esso Saba'é; rippe'na, sininna ramé-ramé agamana. Upaccappui matu sining pong anggoro'é sibawa sining pong ara iya siturué aléna iyanaritu sarona attumaningenna lao risining canrinna. Upinrai matu sining palla anggoro'na sibawa sining palla arana mancaji ale'; nasolangiwi matu sining olokolo masekkangngé. Uhukkungngi matu nasaba esso-esso iya napaké untu' mattunu dupa lao ri Baal, enrengngé mammodé sibawa bélo-bélona untu' lellungngi sining canrinna, nainappa nallupai sisek-Ka. Iyya, Puwang, pura mabbicara.” Makkedai Puwangnge, “Rimakkuwannanaro maélo-Ka tiwii lao ri padang kessi'é; kuwaniro Upalécé matu sibawa ada-ada assicintang. Upalisui matu sining palla anggoro'na lao ri aléna, sibawa Lompo Asussangngé Upancajiwi matu sumpanna amménasangngé. Kuwaniro naduppai-Ka matu pada-pada ri wettu malolona, wettunna silalona massu polé ri Maséré. Nainappa nateppu-Ka matu lakkainna, natenniyana Baalna. Dé' Upalaloi matu teppuni asenna Baal, angkanna nallupai matu tauwé iyaro asengngé. Iyaro wettué mébbu-Ka matu assijancing sibawa sininna rupanna olokolo'é kuwammengngi mennang dé' naganggui umma'-Ku. Upappajai matu sininna musué sibawa passalai paréwa-paréwa musué polé ri wanuwanna umma'-Kuro, sibawa mébbui mennang tuwo sibawa tennang nenniya amang. Israélié, Upancajiko matu bainé-Ku, bainé iya essaé untu' mannennungeng. Uwamaséiko matu sibawa tuli Upoji; malempu-Ka matu sibawa matinulu. Situru jancik-Ku, Ukawingiko matu. Muwangakui-Ka matu selaku Puwam -mu. Uwébbui matu umma'-Ku tuwo saléwangeng sibawa mattette ri wanuwanna mennang. Lao ri mennang iya riteppué ‘Iya Dé'é Riyamaséi’ Uwappaitangngi matu makkedaé Uwamaséiwi mennang, sibawa lao ri mennang iya riteppué ‘Tenniya Umma'-Ku’ Upowadai matu, ‘Iko Umma'-Ku’. Mappébaliwi matu mennang makkuwaé, ‘Iko ritu Allataalata.’ ” Makkedai Puwangnge lao ri iyya, “Laosiko sibawa mupojiwi séddié makkunrai iya pojiyéngngi malaweng. Pojiwi pada-padato Iyya pojiwi tau Israélié namuni mennang nasalai-Ka sibawa massompa déwata-déwata laing enrengngé napoji makkasuwiyangeng béppa kismis lao ri barahalaé.” Nauwajani seppulo lima dowi sibawa 150 kilo gandong untu' lolongengngi iyaro makkunraié. Makkedaka lao ri aléna makkedaé harusu'i natajekka untu' wettu iya maittaé. Ri lalenna wettuéro dé' nawedding maccakkuribang iyaré'ga malaweng, na iyya dé'to uwaddeppériwi matu. Makkuwaniro gau'na sibawa bangsa Israélié; maitta senna mennang harusu tuwo dé' arunna iyaré'ga pamimpinna, dé' akkarobangeng iyaré'ga tugu-tugu makarame, dé' barahala-barahala iyaré'ga sima'-sima' iya mappaissengengngéngngi rahasiyana wettu mangoloé. Iyakiya poléi matu wettunna lisui bangsa Israélié lao ri Puwang Allataalana mennang, sibawa lao ri arunna mennang polé ri wijanna Daud. Namétauna matu mennang sibawa mappakalebbi lao ri Puwangnge, enrengngé tarimai sining barakka'-Na. Mappunnaiwi parakara Puwangnge sibawa pabbanuwana wanuwaéwé. Eh Israélié, éngkalingai aga iya Napowadaé, “Ri wanuwaéwé dé'gaga atinulureng iyaré'ga pammasé, sibawa pabbanuwana dé' nangakui-Ka selaku Allataala. Mattanroi mennang, iyakiya dé' narupaiwi; mabbelléi, mabbuno, ménnau, sibawa malawengngi mennang. Tattambai jaé, sibawa kajajiyangngi abbunowangngé matturu-turuseng. Rimakkuwannanaro iyaé wanuwaé mancajiwi matu marakko, sibawa sininna iya tuwoé kuwaro matéi matu. Sininna rupanna olokolo'é ri yelle'é, pottanangngé sibawa tasi'é cappui matu.” Makkedai Puwangnge, “Eh sining imangngé, aja' naengka pasalai iyaré'ga macairiwi umma'-Ku, saba' iko ritu Upassala! Esso wenni mébbuko asalang, makkuwatoro sining nabié. Rimakkuwannanaro upabbinasai matu Israélié, indo'mu. Iko, sining imangngé, dé' mupaduli-Ka, na umma'-Ku dé'to napaduli-Ka angkanna macilaka mennang. Musampéyangngi sining pappagguruwak-Ku. Jaji, Usampéyang tokko matu, sibawa ana'-ana'mu dé' Uwangakuiwi matu selaku imang-ngimak-Ku. Pédé tattamba maégako, pédé madosa tokko lao ri Iyya, éh imang-ngimang! Rimakkuwannanaro Upinrai matu keadaammu: Dé'na naripakalebbiko matu, sangadinna ripakatuna. Mancaji sugiko nasaba dosana umma'-Ku, rimakkuwannanaro macinnaka kuwammengngi namadosa mennang matteru. Namumanrasa-rasa matu pada-pada ra'ya'é! Uhukkukko matu situru sibawa sining pangkaukemmu. Manréko matu polé ri akkarobangeng-akkarobangeng iya riyakkasuwiyangengngé, iyakiya tette'ko matu malupu. Musompai matu déwata-déwata acommokengngé, iyakiya pabbanuwamu tette'i dé' natattamba, saba' musalai-Ka untu' massompa déwata-déwata laing.” Makkedai Puwangnge, “Eh umma'-Ku, muwi anggoro iya malaungngé iyaré'ga anggoro iya mabarué pura pallennye'i amampungenna untu' mappikkiri secara madécéng. Méllauko panunju polé ri sipolo aju! Séddi tekkeng paissengiko aga iya muwacinnaiyé misseng! Pada-padako séddi bainé iya mancaji cakkuribangngé; musalai-Ka sibawa mabbéréyangngi alému lao ri déwata-déwata laingngé. Ri onrong-ngonrong assompang barahalaé ri coppo-coppo bulu-bulué sibawa bulué, makkasuwiyangekko akkarobangeng, sibawa mattunu dupa ri yawana ajukajung battowa iya maworongngé kuwaro nasaba makeccé iyaro onrongngé. Iyakiya aga addimonrinna? Mancaji cakkuribangngi ana'-ana'daramu sibawa malawengngi sining ménéttu makkunraimmu! Iyakiya dé' Uhukkungngi matu pangkaukenna mennanro, saba' muwi iko lao tokko ri cakkuribang-cakkuribang iya majjamaé ri bola-bola déwataé, sibawa silaong mennang makkasuwiyangekko akkarobangeng lao ri déwataé. Tongeng senna warékkadaéwé: ‘Bangsa iya dé'é nappunnai pappéjeppu passalenna Allataala maruttungngi matu.’ Eh iko tau Israélié, dé' mumatinulu lao ri Iyya! Iyakiya, mamménasa-Ka Yéhuda dé' napogau'i asalang iya padaé! Aja' muwassompa ri Gilgal iyaré'ga ri Bétel. Aja' muwattanro kuwaro nasabbing asenna Puwang iya tuwoé. Iko, éh tau Israélié, matedde ati senna'ko! Pékkugi weddik-Ka mampiko pada-pada bimbala'é ri padang wellaé?” Nakennani pangaru barahala umma Israélié. Rimakkuwannanaro leppessangngi mennang. Mabo'nana nasaba ménungngi maéga anggoro, maccakkuribanni mennang sibawa masennang atinna. Lebbi napojiwi mennang ripakatuna naiya ripakalebbi. Rimakkuwannanaro lennye'i matu pada-pada nairi anging. Masirii matu nasaba sining akkarobangeng iya nakkasuwiyangengngé mennang lao ri déwata-déwataé. Makkedai Puwangnge, “Engkalingai, éh sining imangngé! Pénessaiwi, éh tau Israélié! Engkalingai, éh sining tau wijanna arungngé! Purani ripateppa pahukkungengngé ri yasé'mu. Saba', sitongenna harusu'ko mangadélé sibawa adélé, iyakiya sibalé'na mancajiko pada-pada jebba'é ri Mizpa, pada-pada siyo-siyoé ri Bulu Tabor, sibawa pada-pada kalebbong iya maliyungngé ri Sitim. Rimakkuwannanaro maélo-Ka hukkung manekko! Uwisseng maneng sini-sininnaé passalenna alému, éh Israélié! Dé' namakkullé murahasiyangeng séuwa polé ri Iyya. Massompako barahala sibawa dé'na mumatinulu lao ri Iyya. Rimakkuwannanaro, sining taummu dé' nasipato'na sompa-Ka.” Ja iya napogau'é tau Israélié nassabariwi mennang dé' naulléi lisu lao ri Allataalana. Rikuwasaini mennang ri assompang barahalaé, angkanna mennang dé'na napaduliwi Puwangnge. Atemponna bangsa Israélié paitai sibawa manessa, sibawa mancaji butti asalanna. Dosana mennang nassabariwi tabbuttu sibawa mabuwang, na bangsa Yéhudaé menrungngi silaong mennang. Laowi mennang sappai Puwangnge sibawa tiwi bimbala nenniya saping untu' akkarobangeng, iyakiya iya manennaro dé' nakkéguna. Saba' risalaini mennang ri Puwangnge, sibawa dé' naulléi mennang runtu'i. Dé' namatinulu mennang lao ri Puwangnge; ana'-ana'na mennang tenniya ana'-ana'na. Rimakkuwannanaro, dé'na namaita naripabbinasa matu mennang silaong sibawa sining dare'na. Seppunni tarompé'é ri Gibéa! Paoniwi tanrang pangobbi ammusurengngé ri Rama! Gorangngi kelli musué ri Bétel! Ayo, tau Bényamingngé, majuno mammusu! Binasai matu Israélié, saba' narapini essona untu' hukkungngi aléna. Engkalingai, éh ra'ya' Israélié, pasti kajajiyangngi matu gau'éro. Makkedai Puwangnge, “Macai-Ka nasaba sining pamimpinna Yéhuda purai nagasa Israélié sibawa rampasa'i tanana. Rimakkuwannanaro Upateppaiwi matu pahukkungeng mennang pada-pada lémpe'é. Ritenre'i Israélié; ateddéngengngi ha'na tanana, nasaba mattedde'i untu' méllau tulung lao ri iya sitongennaé dé' naulléi tulungngi. Iyanaro saba'na Uwancuru'i matu bangsa Israélié, sibawa pabbinasai tau Yéhudaé. Namaingekini keadaanna bangsa Israélié sibawa bangsa Yéhudaé iya majaé, nalaona Israélié ri Asyur untu' méllau bantuwang polé ri arung marajaé. Iyakiya iyaro arungngé dé' naulléi mattulung iyaré'ga pédécéngiwi keadaanna mennang. Pada-pada singaé palurui, makkuwaniro Ulurui matu tau Israélié sibawa Yéhudaé. Alé-Ku sapé'-sapé'i matu mennang, nainappa Usalai. Rékko Uwassarénréngengngi mennang lao, dé' muwi séddi tau mulléi paleppe'i mennang. Usalaiwi matu umma'-Ku narapi mennang genne anrasa-rasanna nasaba dosa-dosana, nanapolé sappa-Ka. Naullé ri laleng anrasa-rasanna, makkuragai matu mennang runtu'-Ka.” Makkedai sining tau Israélié, “Laono mai talisu lao ri Puwangnge. Aléna ritu peddiriki, iyakiya Alénato mappajjappa matu. Aléna palori, iyakiya Alénato bebbe'i matu sining lota. Ri laleng duwa iyaré'ga tellungngessoéwé napajjappaki matu, sibawa tuwoki matu ri laleng allinrungen-Na. Rimakkuwannanaro laono mai tamakkuraga untu' mattonget-tongeng missengngi Puwangnge. Pasti laowi matu ri idi pada-pada apolénna éléé, sibawa pada-pada bosi iya rica'éngngi tanaé ri cappa'na wettu bare'é.” Iyakiya makkedai Puwangnge, “Eh Israélié sibawa Yéhuda! Aga harusu Upogau' sibawa iko? Pappojimmu lao ri Iyya masitta'i teddéng pada-pada saléwué iyaré'ga cinoddoé ri éléé. Iyanaro saba'na Usuroi nabi-nabik-Ku untu' palettukekko apettuk-Ku makkedaé harusu'ko rihukkung sibawa ripabbinasa. Iya Uwacinnaiyé polé ri iko matajanni sibawa manessa: Lebbi Upojiwi muwissek-Ka sibawa tuli mamaséi-Ka, naiya mattunué sibawa makkasuwiyangeng akkarobangeng lao ri Iyya. Iyakiya pada-pada Adam, muwassakkarengngi jancimmu sibawa Iyya. Giléad iyanaritu kota iya pennoé sibawa tomaja sibawa pabbuno. Imang-ngimangngé ri kotaéro pada-padai sikalompo makkunrai iya madangngéngngi tau iya laloé. Muwi ri laleng iya mattujué ri onrong iya mapaccingngé ri Sikhem pogau' towi mennang abbunowang! Sininna jaéro napogau'i mennang sibawa nattungkai. Ri Israélié Uwitai séuwa iya mappakatau-taué: napanajisi'i aléna umma'-Ku sibawa massompa barahala. Passalenna iko, éh tau Yéhudaé, purani Upattette wettunna untu' hukkung tokko nasaba pangkaukemmu.” Makkedai Puwangnge, “Sises-siseng macinna-Ka pajjappai umma'-Ku Israélié sibawa palisui keadaanna mennang, na iya Uwitaé banna jana sibawa dosana. Sisulléi mennang sibengnguwang, nauttamakiwi mennang bolana tauwé untu' ménnau, sibawa maddampo'i mennang risining lalengngé. Dé' naengka naéngngerangngi ri laleng pikkiranna makkedaé Uwéngngerangngi matu sininna janaro. Iyakiya dosa-dosana salipuriwi angkanna manessai Uwita.” Makkedai Puwangnge, “Nasibawang bellé sibawa sining pangkaukenna iya majaé makkuragai ra'ya'é pésennangiwi atinna arungngé sibawa pajaba'-pajaba'na pamaréntaé. Tobali'bella maneng mennang sibawa tau iya dé'é namatinulu. Paccéccénna mennang pada-padai apié ri laleng dapo iya dé'é napallumpai pakkébbu rotié ri wettu dé'napa nasadiya lama labbu'na untu' ritunu. Ri esso péstana arungngé, naébbui arungngé sibawa pajaba'-pajaba'na ménung anggoro gangka mabo' sibawa pogau'i gau'-gau' iya madonggoé. Paccappurenna massennas-sennangngi arungngé sibawa sining tobali'bellaéro. Pada-pada apié ri laleng dapoé makkuwaniro niya' majana sibawa caina mennang mabbara ri laleng atinna puppu benni, na ri éléé mallumpai mancaji luwa' api iya majjallo'é. Ri laleng napessu caina, naunoi mennang sining pamimpinna. Sininna arunna naunoi matturu-turuseng. Iyakiya namuni keadaangngé mancaji makkuwaro jana, dé' muwi séddi tau massempajang lao ri Iyya untu' méllau tulung.” Makkedai Puwangnge, “Siyempe'i bangsa Israélié sibawa bangsa-bangsaé ri mattulilinna, angkanna mennang mancaji pada-pada roti iya manasu sipuwé'é. Dé' namaingekiwi mennang makkedaé mala nasaba passéddiyanna sibawa bangsa-bangsaé ritu, nateddéng awatangenna mennang. Macawé'ni cappa'na curitana mennang, iyakiya dé' naissengngi mennang. Paitani sibawa manessa atemponna tau Israélié sibawa mancaji butti asalanna. Namuni kajajiyang manenni iyaro, dé'to mennang nasappaka iyaré'ga lisui ri Iyya, Puwang Allataalana. Mallolisui Israélié pada-pada jangang-jangang iya madonggoé. Bunge'-bunge'na sining taunna méllau bantuwangngi lao ri Maséré, nainappa lari lao ri Asyur! Iyakiya sises-siseng mennang lalo, pasak-Ka matu jala sibawa tikkengngi mennang pada-pada tauwé tikkeng manu'-manu'. Uhukkungngi matu mennang nasaba sining jana iya Uwissengngénna. Macilakai mennang, saba' nasalai-Ka mennang. Ancuru'i matu mennang nasaba naéwa-Ka. Macinna-Ka passalama'i mennang, iyakiya assompanna mennang lao ri Iyya bellé simata. Dé' nattonget-tongeng massempajang lao ri Iyya. Rékko massempajangngi mennang, naggeppuwangngi aléna ri onrong atinrongngé, sibawa mpating pada-pada iya napogau'é sining tau iya dé'é namateppe lao ri Iyya. Narékko massempajangngi mennang untu' méllau gandong sibawa anggoro, naloi mennang aléna pada-pada iya napogau'é sining tau iya massompaé déwata. Tonget-tongengngi mennang naéwa-Ka! Namuni Iyya ritu pawekke'i sibawa péwatangiwi mennang, iyakiya sikongkolo'i mennang méwa-Ka. Matteru-terui mennang maccowériwi déwata-déwata iya dé' sises-sisengngé nappunnai akuwasang aga-aga. Dé' mennang nawedding riyattuwang pada-pada uso makkompé'é. Sining pamimpinna mennang mabbicarai sibawa matempo, rimakkuwannanaro riyunoi matu mennang ri peddangngé, sibawa ricawa-cawai risining tau Maséré'é.” Makkedai Puwangnge, “Paoniwi tanrang bahayaé! Nagasai balié wanuwak-Ku pada-pada bokangngé séro'i anréna! Najjalékkaiwi umma'-Ku assijancik-Ku sibawa mennang, sibawa méwai sining pappagguruwakku. Namuni mennang nateppu-Ka Allataalana, sibawa makkeda makkédaé mennang iyanaritu umma'-Ku iya missengngék-Ka, iyakiya dé' namaélo mennang tarimai aga iya makessingngé. Rimakkuwannanaro rilelungngi matu risining balinna. Napiléi umma'-Ku arungngé temmakkutanangngi pallolongek-Ku. Makkai mennang pamimping tengngusitujui. Nalai mennang ulawenna sibawa péra'na nainappa mébbu dato'-dato' barahala iya nassabariyéngngi ancurukenna muto mennang. Ucéccé saping ulaweng iya nasompaé pabbanuwana kota Samaria. Macai senna'ka lao ri mennang. Gangka uppanna mennang maélo matteru carépaiwi aléna sibawa massompa barahala? Saping ulaweng iya nasompaé ri Samariaro iyanaritu ébbuna sining panré ri Israélié! Tenniya Allataala iyaro, na harusu'i riyancuru! Mampoi umma'-Ku anging naméngngalai matu talippuru! Dare gandonna mennang dé' namaridi, na dé' napowassélé matu labbu untu' inanré. Iyakiya rékko to maridiwi iyaro dare'é, napaccappui matu bangsa-bangsa laingngé gandonna. Pada-pada oring iya reppa'é, makkuwaniro Israélié dé'na bettuwannana, sibawa mancajini bangsa iya biyasaé pada-pada bangsa-bangsa laingngé. Pada-pada kaleddé liya iya matumpengngé, makkuwaniro sining tau Israélié turusiwi élona muto. Sappai mennang bantuwang polé ri Asyur, sibawa melliwi assisellaongenna bangsa-bangsa laingngé. Namuni makkuwaro Upaddeppungengngi matu sibawa Uhukkungngi mennang. Dé'na namaitta naddaréké matu mennang apeddireng, narékko ritenre'i mennang ri arung Asyur. Pédé maégai mézba napatettong tau Israélié untu' leddai dosana, pédé maéga towi onrong untu' mennang pogau' dosa! Maéga senna pappagguruwang Uwoki untu' mennang, iyakiya iya manennaro nasampéyangngi mennang nasaba naangga'i dé'gaga assisumpungenna sibawa mennang. Napoji mennang makkasuwiyangeng akkarobangeng lao ri Iyya, sibawa manréi juku akkarobangengngéro, iyakiya Iyya Puwang, dé' Umasennang sibawa sining akkarobangengngéro. Makkekkuwangngé maélo-Ka méngngerangngi dosana sibawa hukkungngi mennang nasaba dosa-dosaéro; Ukiringngi matu mennang lisu ri Maséré! Patettongngi tau Israélié sining saoraja, iyakiya takkalupai mennang lao ri Pappancajinna. Napamaégaiwi tau Yéhudaé kota-kota mabbénténgngé, iyakiya maélo-Ka panonno api untu' tunui gangka cappu sining saorajana sibawa kota-kotana.” Eh bangsa Israélié, aja'na muramé-raméini esso-esso marajamu pada-pada bangsa-bangsa laingngé. Purani musalai Allataalamu sibawa dé' mumatinulu lao ri Aléna. Ri tungke' addésekeng gandongngé, mubalu'i alému selaku cakkuribang lao ri Déwata Baal, sibawa masennang tarima gandong iya muwangga'é selaku sarona déwataéro lao ri iko. Iyakiya dé'na namaittana muakurangeng matu gandong enrengngé minnya zaitun, sibawa muwi anggoro'é cappu towi matu. Iko, éh bangsa Israélié, dé' mutette matu monro ri tana iya nabbéréyangngé Puwangnge lao ri iko. Harusu'ko lisu lao ri Maséré, sibawa harusu manré inanré harang ri Asyur. Ri wanuwa-wanuwaéro dé' mulléi matu makkasuwiyangeng anggoro sibawa akkarobangeng olokolo untu' pésennangiwi atinna Puwangnge. Inanrému mébbui matu tungke' tau iya manrééngngi mancaji najisi, pada-pada inanré iya nanré ri upacara attampungengngé. Iyaro inanré banna makkégunai untu' pamessoriwi babuwamu; muwi céddé dé'to naritiwi ri Bolana Puwangnge untu' riyakkasuwiyangeng kuwaro. Ri esso-esso maraja agamaé untu' pakalebbii Puwangnge, dé'gaga mullé pogau'i matu untu' ramé-raméiwi. Narékko lettu'ni abalaé, naritiwiko ri wanuwa laingngé, na iya monroé ri yelle'mu ripaddeppungengngi matu risining tau Maséré'é untu' riyuno sibawa rikuburu ri Memfis! Tuwoi matu wellaé sibawa dorié sampoi onrong-ngonrong abbolammu sibawa paréwa péra'mu iya mangke'é. Narapini wettu pahukkungengngé, wettu untu' tarima pakkabale polé ri sininna pangkaukenna. Napéneddingiwi matu Israélié! Makkedako, “Nabi iya rikuwasaiyé ri roh éwé madonggoi! Jangengngi!” Makkeda makkuwakoro nasaba mucéccé senna'ka sibawa battowa senna'i dosamu. Nasuroka Allataala selaku nabi untu' paréngngerangiko umma'-Na, iyakiya kégi-kégika lao, makkuragako palaika siyo pada-pada manu'-manu'é. Ri wanuwa appunnangenna muto Allataala, idi nabi-nabié namusuki ra'ya'é. Maja senna pangkaukemmu pada-pada iya puraé napogau' tauwé ri Gibéa. Naéngngerangngi matu Allataala asalammu, sibawa nahukkukko nasaba dosamu. Makkedai Puwangnge, “Wettuk-Ku bunge' runtu'i Israélié, marennu-Ka pada-pada tau runtu'é buwa anggoro ri padang kessi'é. Wettuk-Ku bunge' mitai toriyolomu, masennak-Ka pada-pada tau mitaéngngi wassélé bunge'na buwa arana. Iyakiya, wettunna mennang lao ri Bulu Péor, mammulani mennang massompa Baal, angkanna mennang mancaji najisi' pada-pada déwata iya napojiyé mennanro. Luttui matu massuwajang arajanna Israélié pada-pada manu'-manu'é; dé'gaga matu mattampu, sibawa dé'gaga ana'-ana' iya rijajiyangngé. Iyakiya namuni engka ana'-ana' jaji sibawa ripawekke, Uwalai matu mennang; dé' muwi séddi tau Uleppessang tuwo. Macilakano, éh bangsa Israélié, narékko Usalaiko!” Puwang, uwitai ana'-ana'na mennang rilellung sibawa riyuno. Aga harusu uwéllaui ri Iko untu' sining tauwéro? Pancajiwi sining makkunrainna manang! Ebbui mennang dé' naulléi pasusui ana'lolona! Makkedai Puwangnge, “Sininna jana mennang mappammulai ri Gilgal. Kuwaniro mappammula-Ka céccéi mennang. Nasaba pangkaukenna iya majaé, Urukkai matu mennang polé ri wanuwak-Kué. Dé' Uwamaséiwi matu mennanna; sininna pamimpinna pura-Ka naéwa. Uhukkungngi matu tau Israélié. Mancajiwi matu mennang pada-pada tanet-taneng iya dé'é nabbuwa, sibawa iya marakkoénna ure'-ure'na. Dé' matu mennang nappunnai ana'; iyakiya namuni mennang mappunnaiwi ana', Uwunoi matu ana'-ana' iya namaséiyé mennang.” Allataala iya utumaningiyéro nasampéyangngi matu umma'-Na, nasaba dé' Namaélo mennang méngkalingai. Solléi matu mennang ri yelle'na bangsa-bangsaé. Israélié pada-padai pong anggoro iya sara'é buwana. Pédé tattambai asugirenna, pédé maégai mézba iya naébbué. Pédé madécéngngi, pédé makessing towi naébbu tugu-tugu barahala iya nasompaé. Sining tau iya macéko-cékoé atinnaro, makkekkuwangngé harusu'i natanggung addimonrinna dosana. Naancuru'i matu Allataala mézbana, sibawa ruttungngi tugu-tugu barahalana. Dé'na namaitta namakkeda matu, “Dé' tamappunnai arung saba' dé' tamétau lao ri Puwangnge. Aga akkégunana séddié arung untu' idi?” Mabboroi mennang sibawa mébbu janci bellé enrengngé siyo assijancing iya dé'é nakkéguna. Naputara'balé'i angkanna tuwoi dé'é naadélé pada-pada tanet-taneng paracungngé ri dare' iya puraé nabéngkung. Métaui matu pabbanuwana kota Samaria; messéi sibawa teriwi matu mennang sibawa imang-ngimang iya tumaningiyéngngi saping ulawengngé ri Bétel nasaba lennye'ni sininna aga'ganna barahalana mennanro. Iyaro barahalaé ritiwii matu ri Asyur untu' rihadiyakang lao ri arung marajaé. Naccowériwi Israélié rancana iya mébbuéngngi mennang masiri sibawa ripakatuna. Ancuru'i matu Samaria sibawa ritiwii lao arunna pada-pada sipoloé aju iya riyalirengngé ri uwai. Riyancuru'i matu bola-bola déwataé ri bulu-bulué ri Bétel onronna tau Israélié massompa barahala. Tuwoi matu dorié sibawa wellaé ri mézbana. Nainappa gora mennang lao risining bulué, “Tongkoki!” sibawa lao ri bulu-bulué, “Geppaki!” Makkedai Puwangnge, “Sipongenna kajajiyangngé ri Gibéa, dé'pa nappésau tau Israélié pogau' dosa méwa-Ka. Rimakkuwannanaro nakenna towi matu mennang musu ri Gibéa. Maélo-Ka gasai sining tau iya madosaéro sibawa hukkungngi mennang. Masséddiwi matu bangsa-bangsaé untu' méwai mennang, narihukkungngi matu mennang nasaba dosana iya maégaéro. Riyolo Israélié padai saping lolo iya makessingngé latinna, sibawa iya pojiyéngngi maddése gandong. Dé' naparelluka pasang salekko ri cekkonna iya makessingngéro. Iyakiya makkekkuwangngé purani Upettui untu' passai majjama marejjing. Usuroi Yéhuda maddakkala, sibawa Israélié Usuro massalaga. Makkedaka, ‘Eh Israél! Bukkano dare' baru untu' alému, amporini biné adélékeng, sibawa éngngalani barakka iya napowassélé'é attonget-tongengenna pappojimmu lao ri Iyya. Saba', wettunnana musappa-Ka, Puwam -mu. Maélo-Ka polé sibawa pabosingiko sibawa sining barakka'-Ku.’ Iyakiya mupogau'i iya sibalé'naé; muusahakangngi jaé, sibawa méngngala dé'é naadélé. Purani muwanré buwa-buwa wassélé bellému.” Makkedasi Puwangnge, “Eh bangsa Israélié, nasaba muwattuwangngi karéta-karéta musumu sibawa égana prajuri'-prajuri'mu, nanakennai matu musu ra'ya'mu, sibawa sininna béntémmu naancuru'i matu. Padai matu keadaanna ri esso napabbinasana Arung Salman kota Bét-Arbél ri laleng ammusurengngé, sibawa lélui sining indo'é silaong ana'-ana'na. Iyanaro kajajiyang matu sibawa iko, éh pabbanuwana Bétel, nasaba purako pogau' ja iya battowaé. Ri élénana, ripammulainna muwa musué, matéi matu arummu.” Makkedai Puwangnge, “Uwamaséiwi Israélié mappammulai baiccu'na, Uwobbii iyaro ana'-Ku massu polé ri Maséré. Iyakiya pédé Uwobbii iyaro umma'-Ku pédé nabélai-Ka. Tiwii akkarobangeng sibawa mattunu dupa untu' Baal sibawa déwata-déwata lainna. Padahal Iyya ritu paggurui Israélié joppa, sibawa iya kaddaoéngngi sibawa paressé babuwa. Iyya ritu jampangiwi iyakiya dé' namaélo mangakuiwi. Nasibawang sininna pammasé-Ku, Upaddeppéi ri alé-Ku. Sininna anrasa-rasanna Uringengiwi, sibawa nasibawang akacuwang Uwéréngngi inanré. Iyaro sining tau Israélié dé' namaélo lisu ri Iyya, rimakkuwannanaro harusu'i lisu ri Maséré, na bangsa Asyur-é paréntai matu mennang. Marowai matu musué lettu ri laleng kota-kotana, nasolangiwi matu pintu-pintu gerbangngé, sibawa napaccappui umma'-Ku. Kajajiyangngi iyaro nasaba naccowériwi mennang élona muto, sibawa mattedde'i untu' salai-Ka. Naritenre'i matu mennang, iyakiya dé'gaga paleppe'i mennang namuni gorai mennang méllau tulung.” Makkedai Puwangnge, “Eh bangsa Israélié, dé' namakkulléko Uleppessang iyaré'ga Usalai. Makkulléga Upabbinasako pada-pada Adma? Iyaré'ga Ugaukeng pada-pada Zéboim? Dé' narapii atik-Ku pogau'i gau'éro, nasaba pappojik-Ku battowa senna lao ri alému! Dé' Uhukkukko matu ri laleng cai-Ku; dé'na Uwancuru'ko matu. Saba' Iyya Allataala, tenniya tolino. Iyya, Iya Mapaccingngé, sibawakko, na dé'na umaélo macai lao ri iko.” Makkedai Puwangnge, “Naccowéri-Ka matu umma'-Ku narékko mangngauk-Ka pada-pada singaé sibawa sélengiwi balinna. Mapperi-periwi matu umma'-Ku polé ri tibang yajang untu' sompa-Ka. Poléi matu mennang polé ri Maséré siggatti manu'-manu'é, sibawa polé ri Asyur pada-pada jangang-jangang makkonrongngé. Nainappa Utiwii matu mennang lisu ri bolana. Iyya, Puwang, iya mabbicaraé.” Makkedai Puwangnge, “Nattulilingi-Ka bangsa Israélié sibawa bellé nenniya pabengnguwang; tette'-Ka naéwa bangsa Yéhudaé, Allataala Iya Mapaccingngé sibawa matinulué. Sininna séuwa-séuwaé iya napogau'é tau Israélié polé ri élé narapi wenni dé' nakkéguna sibawa mappaccappui pada-pada anging alaué. Acéko-cékongngé sibawa apéddarangngé pédé tattambai ri yelle'na. Mébbui mennang assijancing-assijancing sibawa Asyur nenniya tiwii minnya lao ri Maséré selaku tanrang assisellaong.” Mappunnaiwi Puwangnge parakara sibawa bangsa Yéhudaé; Nahukkung towi matu Israélié nasaba ampé-ampéna mennang. Nawale'i matu pangkaukenna mennang. Mappammulai ri laleng parémmanang, Yakub toriyolona mennang purai nasittai Esau silessureng dénrunna; na battowanana, mallagai Yakub sibawa Allataala. Mallagai sibawa séddi malaéka, napakalai. Nainappa teri sibawa méllau ribarakkaki. Nainappa ri Bétel, laowi Allataala ri Yakub toriyolotaro, namabbicara sibawa aléna. Iyaro Allataala iyanaritu Puwang Iya Pommakuwasaé. Asenna iyanaritu Puwang. Nasibawang asengngénnaro napuwéloi tauwé massompa lao ri Aléna. Rimakkuwannanaro, éh iko wijanna Yakub, ateppe'no lao ri Allataalamu sibawa lisuno ri Aléna. Tuwono sibawa penno pammasé nenniya alempureng, enrengngé tajenni sibawa sabbara narapi Allataalamu tinda. Makkedai Puwangnge lao ri bangsa Israélié, “Macéko-cékoko pada-pada tau Kanaangngé; sining padangkammu napoji belléi sining langgananna sibawa timbangang iya dé'é natongeng. Makkedai mennang, ‘Sugiki makkekkuwangngé. Saroki! Dé' muwi séddi tau wedding tenre'ki makkedaé lolongekki asugireng secara dé' tamalempu.’ Iyakiya Iyya, Puwang Allataalamu, iya tiwiékko massu polé ri Maséré, mébbuko matu monro paimeng ri kéma-kémaé pada-pada riyolo wettuk-Ku lao ri iko ri padang kessi'é. Pura-Ka mabbicara lao ri nabi-nabié, sibawa mpéréngngi maéga pakkitang lao ri mennang. Naolai mennang Uwappaissengengngi rancana-rancana-Ku untu' iko, umma'-Ku, namuni makkuwaro engka mupa iya massompaé barahala ri Giléad, sibawa makkasuwiyangeng saping ri yasé'na mézbaé ri Gilgal. Iyakiya mennang iya massompaé barahalaro matéi matu, sibawa mézba-mézbana ri Gilgalro mancajiwi matu goppo batu risining dare'é.” Yakub toriyolota lariwi lao ri Mésopotamia, na untu' lolongeng bainé, mancaji atai lao ri tauwé kuwaro sibawa mampii sining bimbala'na tauwé kuwaro. Suroni Puwangnge séddi nabi untu' tiwii tau Israélié massu polé ri angatangengngé ri Maséré, sibawa untu' jagaiwi mennang. Purani naébbu tau Israélié macai senna Puwangnge; sipato'i mennang rihukkung nasaba jana. Puwangnge hukkungngi matu mennang nasaba purai mennang Naébbu tauwé pakatunai. Riyolo ripakalebbii suku Efraim angkanna narékko engka parénta polé ri sukuéro, métau suku-suku laingngé ri Israélié. Iyakiya madosai suku Efraim nasaba massompai Baal, rimakkuwannanaro lennye'i matu. Lettu makkekkuwangngé iyaro sining tau Efraingngé matteru mupi pogau' dosa; mébbui mennang dato'-dato' péra' untu' nasompa – dato'-dato' iya narancanaé akkalenna tolinoé sibawa riwinru ri lima tolinoé. Makkedai mennang, “Akkasuwiyangekko akkarobangeng lao ri dato'-dato'éwé!” Malallaing, nabau tolinoé dato'-dato' ana' sapingngé! Rimakkuwannanaro lennye'i matu sining tauwéro pada-pada saléwué iyaré'ga cinoddoé ri éléé. Pada-padai matu mennang awu aroé iya nairié anging ri addésekeng gandongngé, sibawa pada-pada rumpué iya massué polé ri kacawangngé. Makkedai Puwangnge, “Iyya ritu Puwang Allataalamu, iya tiwiékko massu polé ri Maséré. Dé' muwappunnai Allataala ri laik-Ku. Iyya ritu alé-aléna pappassalama'mu. Ri tana makarossaé ri padang kessi'é, Iyya ritu jagaiko. Iyakiya engkamuna ri wanuwa iya makessingngé, sibawa messoko enrengngé najinna, mancaji matempoko nainappa muwallupai-Ka. Rimakkuwannanaro maélo-Ka kéloko pada-pada singaé. Pada-pada macang tutul-é Uwadakko matu ri lalengngé. Uluruiko matu pada-pada beruwang iya ateddéngengngé ana'-ana'na. Usapé'-sapé'ko matu. Pada-pada singaé Uluruiko matu ri onrommu, sibawa pada-pada olokolo masekkangngé Usapé'-sapé'ko matu. Uwancuru'ko matu, éh bangsa Israélié! Na nigana mulléi tulukko? Méllauko arung sibawa pamimping, iyakiya kéga manenni mennang makkekkuwangngé? Naulléga mennang passalama'i ra'ya'mu? Nasibawang cai Uwérékko arung, nenniya nasibawang majjamerru Ugettengngi mennang lisu.” Makkedai Puwangnge, “Dosa sibawa asalanna Israélié purani riyoki, sibawa ritaroi catatanna. Mappunnaiwi kasempatang Israélié untu' tuwo, iyakiya nasaba donggona angkanna dé' nakkégunangngi iyaro kasempatangngé. Pada-padai ana'lolo iya mawé'énna jaji iyakiya dé' namaélo massu polé ri parémmananna indo'na. Iyaé bangsaé dé' Upassalama'i matu polé ri akuwasanna linona tau maté. Eh amaténg, passanrani saimmu! Pogau'ni jama-jamammu iya paancuru'éro! Dé'na Uwamaséiwi iyaé bangsaé. Namuni madécéngngi Israélié pada-pada wella iya macommo'é, iyakiya kirik-Ka matu anging alau iya mapellaé polé ri padang kessi'é. Iyaro angingngé narakkoiwi matu sininna mata uwai sibawa sining bujungngé, angkanna lennye sininna iya mangke'é. Harusu'i rihukkung Samaria nasaba maronta'i méwa-Ka. Matéi matu ra'ya'na ri laleng ammusurengngé; rilélui matu ana'-ana'lolona, sibawa sining makkunrai mattampu'é ripuwé'i babuwana.” Lisuno ri Puwang Allataalamu, éh bangsa Israélié! Dosamu pura nallalengiko tappasolla sibawa menrung. Lisuno lao ri Puwangnge sibawa palettu'i iyaé sempajangngé selaku pakkasuwiyammu lao ri Aléna, “ Puwang, addampengengngi sininna dosata, sibawa tarimani sempajattaé, natapoji-Ko matu pada-pada iya puraé riyajjanciyang. Dé' naulléi matu Asyur passalama'ki, sibawa anyarang pammusué dé' naulléi tulukki. Dé'na namakkeda matu lao ri dato'-dato' ébbuta makkedaé mennang Allataalata. Oh Puwang, tamaséiwi sining tau iya dé'é nappunnai niga-niga iya weddingngé mennang nattuwang.” Makkedai Puwangnge, “Umma'-Ku iya lésséé, Uwalai paimeng na-Uwamaséiwi sibawa sissukku ati; dé'na matu Uwacairiwi. Pada-pada-Ka bosié lao ri tau Israélié iya rica'éngngi tana iya makarossaé. Tabbakkai matu pada-pada bungaé sibawa pada-pada aju camara iya maliyungngé ure'na. Tuwoi matu mennang sibawa tattambai pada-pada tanet-taneng iya ranru'é kégi-kégi, pada-pada pong zaitungngé gellona mabau pada-pada pong camaraé! Lisui matu mennang lao ri Iyya sibawa monro ri laleng allinrungek-Ku. Pédé tattambai matu mennang décénna, pada-pada gandongngé tuwo ri dare' iya macommo'é sibawa pada-pada palla anggoro'é. Pada-pada uwai anggoro Libanon kalabbai asenna mennang. Nabbéyangngi matu tau Israélié sining dato-dato barahalana; Upiyarai mennang sibawa Utarimai sempajanna. Pada-pada aju iya tuli maworongngé daunna, Ucinaungiwi matu mennang. Iyya ritu assalenna sininna barakka'na. Iyya, Puwang, pura mabbicara.” Tennapodo sininna iya mapanré majeppuiwi aga iya tarokié kuwaé, sibawa puriyatiwi. Panunju'-panunju' polé ri Puwangnge iyanaritu tongengngi, sibawa tau iya malempué tuwoi situru panunju'-panunju'éro. Iyakiya tau madosaé dé' najampangiwi angkanna tappasolla sibawa mabuwang. Iyanaé pasenna Puwangnge lao ri Yoél, ana' Pétuél. Engkalingai, éh sining tau macowa-cowaé; pénessaiwi, sininna tauwé ri Yéhuda. Engkaga naengka nakajajiyang gau' makkuwaéwé ri wettummu, iyaré'ga ri wettunna sining néné-nénému? Curitai iyaro kajajiyangngé lao ri ana'-ana'mu; kuwammengngi napalettu'i mennang lao ri ana'-ana'na curitaéro. Harusu towi naéngkalinga wija-wija rappina, sibawa patterui lao ri wija-wija rappina. Incalé makkonrong iya dé'é naribilang jumellana, teppai risining dare'é sibawa manréi wassélé'na. Aga nasésa iyaé sikonrongngé, napaccappui konrong laingngé. Eh sining pammabo'é, oto'no! Eh sining pamménungngé, terino! Saba' anggoro iya barué purani rirampasa polé ri témummu. Nagasai pasukang incalé wanuwatta; mawatangngi mennang sibawa tenribilang égana, isinna sittareng suwana singa komba'é. Napaccappui mennang pong anggoro'ta, sibawa pong arata, banna monroi tona. Nalopéi mennang sining batanna, angkanna maputé carangé-carangéna. Terino, éh umma, pada-pada ana'dara iya masaraé iya teringiyéngngi amaténna tunanganna iya napojiyé. Gandong sibawa anggoro'é teddénni polé ri Bolana Puwangnge. Namabbaratana sining imangngé, iya matinulué tumaningiwi Puwangnge. Ancuru'ni sining dare'é makkekkuwangngé. Mabbaratai tanaé; saba' cappuni sininna gandongngé, marakkoni buwa anggoro'é, sibawa cappuni minnya zaitungngé. Eh pallaonruma, mpatinno! Eh pappalla anggoro, terino! Saba' gandongngé, caddukué sibawa sininna éngngalangngé cappuni. Pong buwa-buwaé ri padangngé mancaji marakko manenni: pong anggoro'é, apél-é, araé, karomaé sibawa dalimaé. Na muwi ra'ya'é dé' tona namarennu. Eh sining imang iya mattumaniyé ri mézbaé, pakéi kaing karungngé, sibawa terino. Uttama'no ri Bolana Puwangnge untu' mpating puppu benni, saba' dé'gaga akkarobangeng anggoro sibawa gandong untu' Allataalamu. Paréntangngi umma'mu untu' mappuwasa, appallebbangengngi addeppungeng marowaé! Undangngi sining pamimpingngé sibawa tomacowa-cowaé enrengngé sininna pabbanuwana Yéhuda, kuwammengngi nalao ri Bolana Allataala, untu' mangobbi méllau tulung ri Aléna. Macawé'ni Essona Puwangnge, esso iya mappakatau-taué; wettunna Iya Pommakuwasaé mappapolé ancurukeng. Cappuni inanré ri yolona matatta ri Bolana Allataalata dé'na gaga gora-gora marennu. Matéi biné ri tana iya makarossaé. Dé'gaga gandong untu' ritaro, nalobbanna sining lappoé sibawa mancaji ruttungeng. Mangnguwa' olokolo'é sibawa mausé; dé'na gaga padang wella untu' aléna. Maddoko-roko toni bimbala makkonrongngé. Méllau tulukka ri Iko, oh Puwang saba' manguni sining padang wellaé marakko toni sibawa maté ajukajungngé samanna nanré api. Mala olokolo liyaé ri ale'é mangobbii lao ri Iko méllau bantuwang. Dé' naulléi mennang passauwi dekkana, saba' marakko maneng sining saloé. Seppungngi tarompé'é, paoniwi tanrang bahayaé ri Bulu Sion iya mapaccingngé, onronna Allataala. Ténréno, éh pabbanuwana Yéhuda! Saba' macawé'ni Essona Puwangnge sibawa masitta'i polé. Iyaro essoé makalemmengngi namapettang, pennoi saléwu iya mallawu-lawué. Makkapoléngngi tentara incalé pada-pada ellung iya mallebba'é ri yasé'na bulué. Kajajiyang pada-padaéro dé' naengkapa, sibawa dé'to nakkoling matu lettu mannennungeng. Pada-pada apié patunu sibawa paangureng napaccappui mennang sininna tanet-tanengngé. Ri yolona, iyaro wanuwaé pada-padai Edén, tammenna Puwangnge, puranaro, sinrupai padang kessi iya makarossaé. Dé' muwi séuwa iya nasésaé, dé'gaga leppe polé ri paggasana mennang. Tappana mennang pada-padai anyarangngé; larinna padai anyarangngé ri ammusurengngé. Luppe-luppe'i mennang ri coppo'na bulué, oninna padai addukéku'na karéta pammusué sibawa padai oni api tunuéngngi aroé. Mabbarisi'i mennang pada-pada pasukang baranié, iya sadiyaé maju ri ammusurengngé. Wettunna mennang maggasa, métau maneng tauwé, makawiya maneng rupaé sibawa dé' naccahaya. Pada-pada pabbaranié, maggasai mennang, sibawa tuppuiwi témbo'é pada-pada pajuwangngé. Mabbarisi lempui mennang liyolo, dé' nabélo' iyaré'ga pinrai angolonna. Dé' mennang nasiredde-redde, joppai mennang ri lalenna muto. Ramé-raméi mennang leppoi sininna attahangengngé, dé' naulléi patangngi barisi'na mennang. Maggasai mennang muttama ri laleng kotaé, sibawa lari ri tompo'na témbo'na. Makkémpéi mennang muttama ri lalempolaé; pada-pada pangaé, muttama'i mennang lalo ri tellongengngé. Mattengngang mennang malluru, mpéwang linoé, sibawa ténréto langié. Nainappa mapettanni mata essoé nenniya kétengngé, sibawa teddénni cahayana sining wéttowingngé. Magguttu saddanna Puwangnge, mabbéré tanra-tanrang, lao ri tentarana. Temmaka battowana jumellana tentarana! Temmaka watanna tentara iya pogau'éngngi parénta-Na! Masero tongeng sibawa héba' Essona Puwangnge! Dé' muwi séddi tau mulléi mattahang. Makkedai Puwangnge, “Iyakiya makkekkuwangngéwé, lisuno ri Iyya sibawa sukku ati, sibawa mappuwasa, mpating nenniya teri. Sapé'i atimmu na aja' pakéyammu.” Gilinno ri Puwang Allataalamu. Malampé sabbara'i sibawa makacuwa Masémpo atiwi sibawa pennoi pammasé. Masennang maddampeng sibawa dé' napojiwi patakkennai pahukkungengngé. Ajakké tappinrai pikkiranna Puwang Allataalamu, sibawa barakkakiko sibawa maona. Angkanna muwulléi makkasuwiyangengngi akkarobangeng gandongngé sibawa anggoro'é untu' Puwangnge, Allataalamu. Seppunni tarompé'é ri Sion, buluna Allataala, appallebbangengngi esso appuwasangngé, pakangkano addépungeng marowa. Paddeppungengngi sininna ra'ya'é, pangarai addeppungenna umma'é. Suroi polé sining tomatowaé, ana'-ana'é sibawato ana'-ana'loloé. Mala sining bottimparué harusu towi polé. Suroi mennang salaiwi bili'na. Suroi sining imang iya tumaningiyéngngi Puwangnge, teri ri pallawangenna mézbaé sibawa légo-légo ri yoloé, namakkedato, “Eloriwi umma'-Mu, oh Puwang; aja' taleppessangngi umma'-Mu mancaji matuna,” angkanna massindiri sibawa makkeda bangsa-bangsa laingngé, “Kégani Allataalana mennang?” Nainappa nappaitang Puwangnge tana-Na, sibawa mamaséiwi umma'-Na. Nabaliwi mennang makkuwaé, “Makkekkuwangngé Uwéréng manekko: gandong, anggoro sibawa minnya zaitun untu' inanré, kuwammengngi naripamessori manekko. Dé' Uleppessakko matu ripakatuna iyaré'ga ricawa-cawai ri bangsa-bangsaé. Urukkai matu pasukang incalé polé ri manorang, sibagiyang Ulellungngi lao ri padang kessi'é. Uredde'i barisi' yolona lao ri Tasi Maté, Usorongngi barisi monrinna lao ri Tasi Tengngaé. Mabbauwi matu sining bakkéna. Upabbinasai mennang saba' purai napanrasa-rasako. Aja' mumétau, éh dare', pésennangiwi atimmu; éngngerangngi gau' battowa iya napogau'é Puwangnge untu' alému! Eh sining olokolo, aja' mubata-bata. Manyilani makkekkuwangngé sining padang wellaé. Sara'ni mabbuwa ajukajungngé, buwa anggoro'é sibawa araé maonani. Eh ra'ya' Sion, akkérennuno! Ariyo-riyono sibawa gorano! Nasaba sininna akessingengngé poléi ri Puwang Allataalamu. Ri wettu madduttunna daud-daungngé nawérékko genne bosi. Ri wettu keccé'é Natiri'i bosié, makkuwatoro ri wettu lemmaé pada-pada biyasaé. Nanalisekiwi matu paimeng gandong onrong addésekengngé; luwangngi matu anggoro sibawa minnya zaitungngé polé ri onrong apparakengngé. Usulléiwi matu sininna arogimmu ri taut-taung wettunna incalé manréi wassélé éngngalammu. Saba' Iyya ritu kiringngi pasukang incaléro lao ri iko. Genne'ko matu inanré sibawa messoko. Mupakalebbii matu Puwang Allataalamu, saba' untu' alému Napogau'i maéga anu makalallaing. Dé'na matu namancaji umma'-Ku akkéllé-kéllékeng! Namuwissengngi, Israélié, makkedaé engkaka ri tengnga-tengngamu, sibawa makkedaé Iyya, Puwang, iyanaritu Allataalamu. Dé'gaga Allataala laing, sangadinna Iyya bawang. Dé'na naripakasirina matu umma'-Ku!” “Labe'nanaro matti sininna tauwé Upennoiwi matu sibawa roh-Ku. Na ana' worowanému sibawa makkunraimmu napalettu'i matu sining pasek-Ku; tau macowa-cowaé ri yelle'mu mannippiwi matu riwéréngngi matu pakkitang kalloloé sibawa ana'daraé. Iyaro wettué Utiri towi matu roh-Ku ri yasé'na pattumani-pattumani worowané sibawa makkunraié.” Upogau'i matu maéga anu makalallaing ri langié sibawa ri linoé. Engka matu assiyunong, luwa' api sibawa rumpu mattéké. Mancaji mapettangngi matu mata essoé sibawa kétengngé mancaji macella'i pada-pada daraé. Iya manennaro kajajiyangngi matu ri wettu dé'napa napolé Essona Puwangnge, esso iya maseroé sibawa mappakatau-taué! Iyakiya nigi-nigi méllauwi pattulunna Puwangnge, ripassalama'i matu. Makkedai Puwangnge, “Salama'i matu sining tau iya Upilé ri Yérusalém.” Makkedai Puwangnge, “Iyaro wettué Upalisui matu adécéngenna Yérusalém sibawa Yéhuda. Upaddeppungengngi matu sininna bangsaé na-Utiwii lao ri Lompo Angadélékengngé. Nainappa Uwadéléki mennang kuwaro nasaba jana lao ri umma'-Ku nasaba purai mennang natawa-tawa tanana Israélié sibawa napalii umma'-Ku lao ri maddupa-rupang wanuwa. Naundiwi mennang untu' pattette'i niga lolongengngi matu sining tawangengngé. Nabalu'i mennang ana'daraé sibawa kalloloé untu' ripancaji ata. Na ellinna napakéi mennang untu' maccakkuribang sibawa untu' ménung anggoro. Maéloko maga-Ka, éh Tirus, Sidon sibawa sininna daéarana Filistin? Macinnakoga makkabale lao ri Iyya? Nah, tarimani pakkabale'-Ku sibawa masitta. Purani murampo ulawekku sibawa péra'-Ku, sibawa waramparakku iya mangke'é mutiwii lao ri bola-bola déwatamu. Pabbanuwana Yéhuda sibawa Yérusalém mutiwii mabéla polé ri wanuwanna; nainappa mubalu lao ri bangsa Yunanié. Makkekkuwangngé Utiwini mennang massu polé ri onrong-ngonronna mubalu, na-Uwale'i matu jamu lao ri mennang. Ana' worowanému sibawa makkunraimmu Ubalu'i matu lao ri pabbanuwana Yéhuda, iya balu'éssi matu lao ri Syéba, wanuwa iya mabéla senna'é. Iyya, Puwang, pura mabbicara. Appallebbangengngi iyaé pappallebbangengngé lao ri bangsa-bangsaé: Sadiyano untu' mammusu sibawa mappasicoba awatangeng! Pangarai sining pabbaranié sibawa pahlawangngé; paddeppungengngi sininna prajuri'é, namumalluru! Lanroni mata rakkalamu mancaji peddang, sibawa piso pabbéle'mu mancaji paggajang. Makkuwatoro tau malemmaé harusu'i makkeda, ‘Weddikka mammusu pada-pada tentaraé!’ Ayo, poléno sibawa masitta, éh bangsa-bangsa polé ri sininna sulapa'é! Addeppungenno ri lompo kuwaro.” Oh, Puwang, suroi tentara-Mu gasai mennang! Makkedasi Puwangnge, “Harusu'i sadiya-sadiya bangsa-bangsaé sibawa lao ri Lompo Angadélékengngé. Kuwaniro Iyya Puwang madélékiwi matu bangsa-bangsa sideppéna umma'-Ku. Maja senna'i mennang; wéle'i mennang pada-pada gandong matasa'é ri dare'é. Léjja'-léjja'i mennang pada-pada anggoro'é ri laleng apparakeng anggoro iya pennoé narapi tuppa. Massebbu-sebbu tau engka ri Lompo Angadélékengngé. Saba' kuwaro masitta'i polé Essona Puwangnge. Mata essoé sibawa kétengngé mancaji mapettangngi, sibawa sining wéttowingngé dé'na nattappa.” Mangngaungngi Puwangnge polé ri Sion, bulu-Na; polé ri Yérusalém magguttui saddan-Na. Taggottang langié sibawa linoé nasaba Aléna. Iyakiya tette'i matu Puwangnge méwaiwi sibawa linrungiwi Israélié, umma'-Na. “Eh Israélié, makkekkuwangngé muwissenni matu, makkedaé Iyya ritu Puwang Allataalamu. Monroka ri Sion, bulu-Ku iya mapaccingngé. Namancaji kota mapaccing toni Yérusalém, tau laingngé dé'na nauttamakini matu. Iyaro wettué pennoi matu sining bulué sibawa palla anggoro. Olokolo piyaraé manréi matu wella ri bulu-bulu iya macommo'é. Sining saloé ri Yéhuda dé' matu naengka nacappu uwaina. Engka séddi salo massolo matu polé ri Bolana Puwangnge, sibawa rica'i Lompo Akasia sibawa uwai manyameng. Mancajiwi matu Maséré padang kessi marakkoé, sibawa Edom mancaji makabuttu, dé' naonroiwi tauwé. Saba' purai mennang nagasa tau Yéhudaé, sibawa mpunoi pabbanuwana wanuwa iya dé'é gaga asalanna. Amos iyanaritu séddiwi pakkampi bimbala polé ri kota Tékoa. Mancaji nabiwi wettunna wanuwa Yéhuda riparénta ri Arung Uzia, sibawa Israélié riparénta ri Arung Yérobéam, ana' worowanéna Yoahas. Duwattaung ri wettu dé'napa nakajajiyang séuwa tatténrénna tanaé, nappaitangngi Allataala lao ri Amos gau'-gau' passalenna Israélié. Iyanaé napowada Amos, “Mangngaungngi Puwangnge polé ri Bulu-bulu Sion, maddalenrungngi saddan-Na polé ri Yérusalém. Marakkoi sining padang wellaé, marakko senna'ni wellaé ri Bulu Karmél.” Makkedai Puwangnge, “Makkolik-kolinni madosa pabbanuwana Damsyik, rimakkuwannanaro pasti Uhukkungngi matu mennang. Nagaukengngi mennang tau Giléad-é sibawa majapperu senna, rimakkuwannanaro kirik-Ka matu api lao ri saorajana Arung Hazaél, sibawa tunui gangka cappu sining bénténna Arung Bénhadad. Usolangiwi matu pintu-pintu gerbanna Damsyik, sibawa Usaringngi matu gang-Ka mapaccing pabbanuwana Lompo Awen polé ri onrong naonroiyé mennang. Upanonnoi matu panguwasana Bét-Edén polé ri kadéra akkarungenna, sibawa ritawangngi matu pabbanuwana Siria enrengngé ritiwii ri wanuwa Kir.” Makkedai Puwangnge, “Makkolik-kolinni madosa pabbanuwana Gaza, rimakkuwannanaro pasti Uhukkungngi matu mennang. Purai mennang natiwi maneng séddié bangsa, nanabalu'i selaku ata lao ri tau Edongngé. Rimakkuwannanaro kirik-Ka matu api lao ri témbo'-témbo'na Gaza, sibawa tunui gangka cappu sining bénténna. Upaddésu'i matu pabbanuwana sibawa panguwasana kota Asdod enrengngé Askélon. Uhukkungngi matu kota Ekron, sibawa sininna sésana tau Filistingngé Upaccappui matu.” Makkedai Puwangnge, “Makkolik-kolinni madosa pabbanuwana Tirus, rimakkuwannanaro pasti Uhukkungngi matu mennang. Purai mennang natiwi maneng séuwa bangsa lao ri appalirengngé, nanabbéréyangngi lao ri Edom; purai mennang najjalékkai assijancing assisellaongngé. Rimakkuwannanaro kirik-Ka matu api lao ri sining témbo'na Tirus sibawa tunui gangka cappu sining bénténna.” Makkedai Puwangnge, “Makkolik-kolinni madosa pabbanuwana Edom, rimakkuwannanaro pasti Uhukkungngi matu mennang. Purai mennang nagasa tau Israélié temmaddampeng, silessu-silessurenna mennang. Matterui mennang macai, sibawa tette'i maélo makkabale. Rimakkuwannanaro, kirik-Ka matu api lao ri kota Téman, sibawa tunui gangka cappu sining bénténg Bozra.” Makkedai Puwangnge, “Makkolik-kolinni madosa bangsa Amongngé, rimakkuwannanaro pasti Uhukkungngi matu mennang. Wettunna mammusu untu' lowangiwi daérana, napuwé'i mennang babuwana sining makkunrai mattampu'é ri Giléad. Rimakkuwannanaro, kirik-Ka matu api lao risining témbo'na kota Raba, sibawa tunui gangka cappu sining bénténna. Iyaro wettué paéngkalingai matu rukka ammusurengngé, sibawa majjallo'i matu musué pada-pada bombang rajaé. Arunna mennang sibawa pajaba-pajaba pamaréntana ritiwii matu ri appalirengngé. Iyya, Puwang, pura mabbicara.” Makedai Puwangnge, “Makkolik-kolinni madosa pabbanuwana Moab, rimakkuwannanaro pasti Uhukkungngi matu mennang. Napakatunai mennang arung Edom iya matéénnaro, sibawa nabongkara'na tampunna enrengngé malai buku-bukunna nanatunui mancaji awu. Rimakkuwannanaro, kirik-Ka matu api lao ri wanuwa Moab, sibawa tunui gangka cappu sining bénténg Kériot. Matéi matu tau Moab-é ri tengnga-tengngana rukka ammusurengngé, ri wettu ripaoninna mupa tarompé'é, sibawa rigoranna pagganti musué. Uwunoi matu panguwasana Moab sibawa sininna pajaba pamaréntana.” Makkedai Puwangnge, “Makkolik-kolinni Yéhuda madosa, rimakkuwannanaro pasti Uhukkungngi matu mennang. Najjalékkaiwi mennang sining parénta-Ku sibawa dé' nabati-batiwi sining pappagguruwak-Ku. Ripapusai mennang ri déwata-déwata laing iya nasompaé toriyolona. Rimakkuwannanaro, kirik-Ka matu api lao ri Yéhuda sibawa tunui gangka cappu sining bénténna Yérusalém.” Makkedai Puwangnge, “Makkolik-kolinni madosa tau Israélié, rimakkuwannanaro pasti Uhukkungngi matu mennang. Tau malempu iya dé'é naulléi palisui inrenna, purani mennang nabalu mancaji ata. Makkuwatoro pangkaukenna mennang lao ri tau kasiyasi iya dé'é naulléi mpajai inrenna, namuni iyaro inrengngé banna singngangke sipasangngé lapikajé. Natenre'i mennang tau malemma iya dé'é pakkullénna, sibawa passalai tau kasiyasié. Ambo' sibawa ana'é lusérengngi ata makkunrai iya padaé, angkanna nacarépai asek-Ku iya mapaccingngé. Ri tungke' onrong assompang, matinroi tauwé sibawa waju iya nalaé selaku boro'na inrenna tau kasiyasié. Ri Bolana Allataalana, ménungngi mennang anggoro iya nalaé polé ri tau iya makkinrengngé ri mennang. Namuni makkuwaro, éh umma'-Ku, untu' iko ritu upaccappui tau Amori iya matanré pada-pada pong camaraé sibawa mawatangngé pada-pada pong terpentingngé. Purano Utiwi massu polé ri Maséré, sibawa Udulung molai padang kessi'é patappulo taung ittana. Purani Uwabbéréyang lao ri iko tanana tau Amorié mancaji wanuwammu muto. Purani upilé siyagangngaré polé ri ana'-ana'mu untu' mancaji nabi, sibawa siyagangngaré tau malolomu untu' mancaji tau Nazir. Dé'ga natongeng iyaro, éh tau Israélié? Iyya, Puwang pura mabbicara. Iyakiya mupaénungngi anggoro tau Nazir-é, angkanna mébbui mennang massakkarengngi jancinna. Sibawa muwattéyangngi nabi-nabié palettu'i pasek-Ku. Makkekkuwangngé Utenre'ko matu lettu ri tanaé, angkammu maddaréké pada-pada karéta iya pennoé sibawa lureng gandong. Muwi tau magattié lari dé'to naulléi leppe; tau mawatangngé ateddéngengngi matu awatangenna, sibawa tau baranié dé' naulléi matu passalama'i aléna. Dé' naulléi matu mattahang pappanaé, tau magattié lari dé' nalulléi matu lari, sibawa pakkinnyarangngé dé' naleppe matu. Iyaro essoé muwi prajuri iya kaminang baranié nasalai towi matu senjatana, nainappa lari. Iyya Puwang pura mabbicara.” Engkalingai iyaé pasenna Puwangnge, éh bangsa Israél iya puraé ritiwi massu polé ri Maséré ri Puwangnge! Makkedai Puwangnge, “Polé ri sininna bangsaé ri linoé, iko ritu alé-aléna bangsa iya Uwissengngé sibawa Ujampangiyé. Iyanaro saba'na nabattowa dosamu, sibawa pasti Uhukkukko.” Makkulléga duwa tau silaong lao dé' nabarunring lebbi riyolo? Mangngaugga singaé ri ale'é, rékko dé'pa nalolongeng anré? Mangngaugga ana' singaé ri laleng liyanna rékko dé'pa aga-aga natikkeng? Nalaga siyo manu'-manu'é, rékko dé' naripasang siyoé? Tattongkoga jebba'é rékko dé'gaga natikkeng? Dé'ga naténré tauwé ri kotaé rékko méngkalingai oni tarompé tanrang ammusureng? Makkulléga séddié kota nakenna abala, rékko dé' nakiringngi Puwangnge? Puwang Iya Pommatanré dé' naengka napogau'i séuwaé tennapannessai rancana-Na lao risining nabié, ata-atan-Na. Narékko mangngaungngi singaé, nigana dé' namétau? Narékko mabbicarai Puwang Iya Pommatanré, nigana mulléi mammekko sibawa dé' nappallebbangengngi pasenna? Appallebbangengngi iyaé lao risining tau iya monroé ri saorajana Maséré sibawa Asdod, “Addeppungenno risining bulué seddéna Samaria, sibawa pénessaini akacaungeng battowaé enrengngé appanrasa-rasang iya napogau'é kuwaro.” Makkedai Puwangnge, “Iyaro sining tauwé nalisekiwi sining saorajana mennang sibawa barab-barang iya nalolongengngé polé ri appanrasa-rasanna sibawa abeccokenna. Mala dé' sises-siseng mennang naissengngi kédo malempu. Rimakkuwannanaro nakeppungngi matu balié wanuwanna, riyancuru'i attahangenna, sibawa rirampo'i sining saorajana mennang. Pada-pada séddié pakkampi iya lolongengngéngngi paimeng banna sipasang ajéna iyaré'ga sipolo daucculinna bimbala'na iya puraé ritikkeng ri singaé, makkuwatoro banna céddé bawang iya monroé matu polé ri pabbanuwana Samaria iya makkekkuwangngé mannyamen-nyameng léwu ri onrong atinrong iya masommo'é.” Makkedai Puwang Allataala Iya Pommakuwasaé sibawa Pommatanré, “Pénessaiwi makkekkuwangngé, sibawa paréngngerangiwi wija-wijanna Yakub. Ri esso Uhukkunna tau Israélié nasaba dosana, Upaccappui matu sining mézbaé ri Bétel. Tungke' mézbaé ripoloi matu coppo'-coppo'na angkanna sempé ri tanaé. Sining bolaé untu' wettu keccé'é sibawa sining bola appésau-pésaungengngé ri wettu pellaé Uwancuru'i matu. Sining bola iya ribélo-béloiyé sibawa gading maruttungngi matu; sininna bola iya battowaé ancuru'i matu. Engkalingai, éh sining makkunrai Samaria iya tattamba commo'é pada-pada sining saping commo'é ri Basan! Mutenre'i tau malemmaé, mupara'i tau kasiyasié, sibawa tuntu'i kuwammengngi lakkaimmu tuli passadiyangekko énungeng maseri! Iyya, Puwang Iya Pommatanré iyanaritu Puwang iya mapaccingngé, napura-Ka majjanci makkedaé matti riyassarénréngekko sibawa samparaja; pada-pada manekko matu balé ri mata méngngé. Riyassarénréngekko matu mattuju ri Hérmon sibawa riyaggenrungeng massu, tungke'-tungke' molai sebbo-sebbo témbo' iya kaminang macawé'é. Iyya Puwang pura mabbicara.” Makkedai Puwang Iya Pommatanré, “Eh umma Israélié! Lao bawanno ri onrong assompangngé ri Bétel, namupogau' dosa kuwaro! Laono ri Gilgal, namupogau' dosa siyélo-élona atimmu! Akkasuwiyangenno akkarobangeng tungke' élé, sibawa tiwii tawa seppulona polé ri sininna pallolongemmu tungke' tellungngesso! Akkasuwiyangenno roti selaku kurru sumange'mu lao ri Iyya, sibawa abborono makkedaé purani mutiwi pattambana pakkasuwiyangngé! Pasti iyaro musennangi pogau'i! Iyya ritu patakkennai abala akkadérengngé ri yasé'na sininna kotamu, iyakiya dé' mulisu lao ri Iyya. Ulawa-lawaiwi teppana bosié wettunna tanet-tanemmu mapparelluwang senna'i uwai. Iyya pateppa bosi ri kota iya séddié na dé' ri kota iya laingngé. Dare' iya séddié lolongengngi teppa bosi, na dare' iya laingngé arakkongngi. Ri siyagangngaré kota, pabbanuwana iya malemmaénna adekkang, sappai uwai ri kota iya laingngé, iyakiya uwai kuwaro dé' nagenne. Namuni makkuwaro, dé'to mulisu lao ri Iyya. Masseppungekka anging pella sibawa kiring pakkasolang iya solangiyéngngi tanet-tanemmu enrengngé palla-palla anggoro'mu. Sining pong araé sibawa sining pong zaitummu cappuni nanré incalé. Namuni makkuwaro dé'to mulisu lao ri Iyya. Kirikka sai lao ri iko pada-pada iya Ukiringngé lao ri Maséré. Uwunoi sining tau malolomu ri laleng ammusurengngé, sibawa rirampasa'i sining anyarammu. Ulisekiwi akkémammu sibawa sining bakké iya makebbongngé baunna. Namuni makkuwaro, dé'to mulisu lao ri Iyya. Sibagiyang polé ri iko Upaccappui pada-pada Upaccappuna Sodom sibawa Gomora. Iya tuwoé mupa ri yelle'mu iyanaritu pada-padai appulu iya riyalaé polé ri apié. Namuni makkuwaro, dé'to mulisu lao ri Iyya. Rimakkuwannanaro, éh umma Israél, Uhukkukko matu. Jaji, sadiya-sadiyano moloiwi pahukkungeng iya Upateppaé lao ri iko!” Bulu sibawa angingngé, Puwangnge ritu pancajiwi; napannessai rancana-Na lao ri tolinoé. Naébbui essoé sibawa wennié; joppai ri yasé'na coppo-coppo linoé. Puwang Allataala Iya Pommakuwasaé, iyanaro asen-Na. Engkalingai éh umma Israélié! Maélo-Ka makkélongekko séddi élong masara: Sempé'ni Israélié iya perawangngé mupa, dé'na natokkonna matu! Rileppessangngi ri yaséna tanana muto, dé'gaga bantui tettong. Makkedai Puwang Iya Pommatanré, “Séddi kota ri Israélié pangara sisebbu tau prajuri, iyakiya iya lisué banna sératu; kota laingngé pangarai sératu tau, iya lisué banna seppulo.” Makkedai Puwangnge lao ri umma Israélié, “Lisuno lao ri Iyya, namutuwo matu. Aja' mulao ri Bérsyéba untu' massompa. Aja' musappa-Ka ri Bétel, saba' lennye'i matu Bétel. Aja'to mulao ri Gilgal, saba' pabbanuwana iyaro kotaé ritiwii matu lao ri appalirengngé.” Lisuno lao ri Puwangnge, namutuwo matu. Rékko dé' mulisu lao ri Aléna, poléi matu pada-pada api iya makkalolo'é sibawa tunui gangka cappu tau Israélié. Ri Bétel dé' muwi séddi tau mulléi peddéiwi iyaro apié. Macilakano iko, iya pasibalékengngéngngi adélékengngé sibawa léjja-léjja'i ha'na tauwé! Puwangnge ritu mébbui sining wéttowingngé ri bitaraé – wéttowing Belantik sibawa wéttowing Kartika. Napinrai pettangngé mancaji tajang sibawa essoé mancaji wenni; uwai polé ri tasi'é Natiri'i ri pottanangngé. Iya pogau' manengngéngngi iyaro asen-Na iyanaritu Puwang. Napabbinasai tau makuwasaé silaong attahangenna mennang. Mucéccéi tau iya méwaéngngi dé'é naadélé sibawa iya mabbicara tongengngé ri laleng pengadilangngé. Mutenre'i tau kasiyasié sibawa murampasa'i gandonna. Rimakkuwannanaro dé' muwonro matu ri laleng sining bolamu iya magelloé, iya puraé mupatettonro. Dé' matu muwénung anggoro polé ri palla-palla anggoro iya mutanengiyé. Uwisseng temmaka battowana jamu sibawa temmaka égana dosamu. Mutenre'i tau makessingngé; tarimako pasoso sibawa leppessangngi tau kasiyasié rigaukeng sibawa dé' naadélé ri pengadilangngé. Nasaba pangkaukemmuro, na sining tau iya mapanré mappéneddingngi lebbi kessing muwi mammekko bawang ri wettu iya maja pada-padaéro. Akkuragano pogau'i makessingngé sibawa aja' mupogau'i majaé, kuwammengngi mutuwo. Na Puwang Iya Pommakuwasaé mattonget-tongengngi matu monro ri yelle'mu pada-pada iya mupowadaé. Céccéi iya majaé, éloriwi iya makessingngé, sibawa patettongngi adélé'é. Naullé namaséiwi matu Puwangnge sining tau iya risésaé polé ri bangsa Israélié. Makkedai Puwang Iya Pommakuwasaé, “Risining lalenna kotaé, mpatingngi matu tauwé sibawa maddaréké nasaba messéi. Mala riyobbii matu sining pallaonrumaé untu' maccowé teri silaong sining tau iya ripagajiyé untu' mpatingiwi tau maté. Ri sininna palla anggoro'é, mpatingngi matu tauwé nasaba poléka sibawa hukkukko. Iyya, Puwang, pura mabbicara.” Macilaka tongekko iya muddaningiyéngngi essona Puwangnge! Aga akkégunana iyaro essoé ri alému? Iyaro essoé banna maddupai esso iya makalemmengngé, tenniya esso iya matajangngé ri alému. Keadaanna pada-padai tau iya lariyé polé ri singaé, iyakiya siruntu'i beruwangngé. Iyaré'ga pada-pada tau iya lisué ri bolaé sibawa mattulekkeng sibawa limanna ri témbo'é, naripitto ri ulaé! Essona Puwangnge mémeng mappapoléi akalemmengeng, tenniya tajang – esso malilling iya massalawué. Makkedai Puwangnge, “Ucéccé sibawa maciddi'ka mitai ramé-ramé agamamu! Rékko tiwiko akkarobangeng ritunu sibawa akkarobangeng gandong, dé' Utarimai matu. Dé' Umaélo tarimai olokolo'mu iya macommo'éro iya muwakkasuwiyangengngé lao ri Iyya selaku akkarobangeng pappasidamé. Pappésauwi élok-kélommu iya palicco'éro; dé' Umaélo méngkalingai culé-culé kacapimmu. Lebbi kessing muwi makkuragano kuwammengngi nassolo adélékengngé pada-pada uwai, sibawa alempurengngé pada-pada salo iya dé'é naengka namarakko. Eh umma Israélié, wettuk-Ku dulukko molai padang kessi'é patappulo taung ittana, dé' utuntu pakkasuwiyang sibawa akkarobangeng polé ri iko. Iyakiya makkekkuwangngé musompai Sakut iya muwangga'é arummuro, sibawa Kéwan, wéttowing iya mupodéwataéro. Rimakkuwannanaro dato-dato iya puraé muwébburo alému harusu makkai. Narékko Iyya mabbéyakko lao ri séuwaé wanuwa iya lebbi mabélaé polé ri Damsyik. Iyya Puwang iya riyasengngé Allataala Iya Pommakuwasaé pura mabbicara.” Macilakono iko tuwoé mannyamen-nyameng ri Sion, sibawa iko iya marasa amangngé ri Samaria – iko éh sining pamimpinna masyaraka bangsa Israél iya poréwé, iko iya biyasaé rilokkai ri ra'ya'é untu' méllau pattulung! Laono mitai ri Kalné, nainappa joppano matteru lao ri kota Hamat iya battowaéro, nainappa lao ri kota Gat ri Filistin. Muwasengngi iyaro kota-kotaé lebbi kessingngi naiya akkarungeng Yéhuda sibawa Israélié? Aga daérana mennang lebbi battowai naiya daéramu? Mattedde'ko makkedaé mabéla mupi esso abalaé, iyakiya sining pangkaukemmu banna pagattiriwi apolénna esso apéddarangngéro. Macilakano iko iya léwué ri ranjang magelloé nenniya mappésta sibawa juku saping enrengngé bimbala iya maloloé! Masennakko karang élong, pada-pada iya napogau'é Daud, namuwacculéyangngi iyaro élok-kélongngé sibawa kacapi. Ménukko anggoro polé ri kaca iya pennoé riliseki, sibawa pakéko minnya wangi iya kaminang makessingngé, iyakiya dé' mumessé ati lao ri ancurukenna Israélié. Rimakkuwannanaro iko ritu bunge'-bunge' ritiwi matu lao ri appalirengngé. Pésta-pésta sibawa perjamuwang-perjamuwammu pajai matu. Nasibawang ateddekeng Puwang Allataala Iya Pommakuwasaé sibawa Pommatanré pura mabbéréyangngi iyaé papparéngngerangngé, “Ucéccé atemponna umma Israélié; dé' Umasennang sibawa sining saorajana iya magelloé. Ibukotana mennang silaong sininna iya engkaé ri lalenna Uwabbéréyangngi matu lao ri balié.” Narékko engka mupa seppulo tau massubbu ri laleng séddié bola, maté towi matu mennang. Séddi anggota kaluwarga iya risuroé murusu'i akkuburukenna, poléi matu sibawa tiwii massu ujuna sahaba'na. Gorai matu lao ri tau iya engkaé ri monri bolaéro, “Engka mupaga tuwo ri lainnaé iko?” Napaéngkalinga matu pappébalié, “Dé'!” Nakkeda matu anggota iya risuroé kurubu'i iyaro ujué, “Aja'na muwabbicara! Dé' tawedding teppui asenna Puwangnge.” Narékko Puwangnge mabbéré parénta, riyancuru'i matu sining bola battowaé sibawa baiccu'é. Naulléga lari anyarangngé ri bulu-bulu batué? Engkaga naengka narakkalai tauwé tasi'é sibawa saping? Iyakiya iko purai mupasibalékeng adélékengngé mancaji racun iya paunoé, sibawa iya tongengngé mancaji iya salaé. Mabboroko makkedaé purai mucau Lodébar. Makkeda tokko, “Genne awatangetta untu' sittaiwi Karnaim.” Aléna Puwang Allataala Iya Pommatanré sibawa Pommakuwasaé makkeda, “Umma Israélié, kirik-Ka matu tentara polé ri séddié bangsa laing untu' gasai wanuwammu. Natenre'ko matu mennang polé ri laleng laowé ri Hamat ri manorang lettu ri Lompo Araba ri yattang.” Lolongekka séuwa pakkitang polé ri Puwang Iya Pommatanré. Uwitai pancaji séuwa konrong incalé battowaé wettunna tauwé pura massangki wella untu' arungngé, namammulasi tuwo paimeng wella barué. Iyaro sining incalé céddé'i nanré maneng sininna tanet-tanengngé ri tanaé. Nainappaka makkeda, “ Puwang Iya Pommatanré, addampengengngi umma'-Mu! Baiccu senna'i mennang sibawa malemma, pékkugi mennang makkullé mattahang?” Napinrai rancanana Puwangnge sibawa makkeda, “Iya muwitaéro dé' nakajajiyang matu.” Lolongekka séuwa pakkitassi polé ri Puwang Iya Pommatanré. Uwitai mattengngang sadiya-sadiya untu' hukkungngi umma'-Na sibawa api. Iyaro apié nalépe'i gangka cappu dolangengngé ri yawana linoé sibawa mammula mangurengngi dare'é. Makkedaka, “Oh Puwang Iya Pommatanré, tennapodo tapeddéiwi iyaro apié! Makkuwamani baiccu'na sibawa lemmana umma'-Mu, pékkugi makkullé naulléi tahang?” Napinrasi rancanana Puwangnge sibawa makkeda, “Muwi iyaé dé'to nakajajiyang matu.” Lolongekka séuwa pakkitang laing polé ri Puwangnge. Uwitai tettong ri benrénna séddié témbo' iya ripatettongngé sibawa makkégunang tulu becci iya tettong lempué. Ri liman-Na Nakkatenningngi iyaro tulu becci'é untu' mitai malempuniga tettonna iyaro témbo'é iyaré'ga dé'. Makkutanai lao ri iyya, “Aga muwita, Amos?” Mappébalika, “Tulu becci tettong lempu, Puwang.” Nainappa makkeda Puwangnge, “Upakéi iyaé tulu becci'é untu' mappaitangngi makkedaé umma'-Ku pada-padai témbo' iya dé'é namalempu. Dé' Upinrai matu rancana-Kuna, pasti Uhukkungngi matu mennang. Onrong-ngonrong iya napaké wijanna Ishak untu' massompa riyancuru'i matu. Onrong-ngonrong mapaccinna tau Israélié riruttungngi matu. Upaccappui matu wijanna Arung Yérobéam.” Amazia, imang ri Bétel, kiringngi iyaé laporangngé lao ri Yérobéam arunna Israélié, “Sikongkolo'i Amos sibawa ra'ya'é méwai Datu. Ada-adanna iya pakiri-kiriyéngngi ra'ya'é nassabariwi matu ancuru iyaé wanuwaé. Makkedai makkkedaé matéi matu Datu ri laleng ammusurengngé, na tau Israélié pasti ritiwii ri appalirengngé, mabéla polé ri wanuwanna.” Nainappa makkeda Amazia lao ri Amos, “Eh nabi, lisuno ri Yéhuda! Akkatobbano kuwaro. Leppessanni mennang mpérékko inanré! Aja'na muwakkatobba ri Bétel. Iyaé kotaé untu' arungngé bawang, sibawa onrong assompanna bangsaé.” Nappébali Amos, “Tenniyaka nabi nasaba pangka. Sitongenna pakkampika sibawa paccéppu buwa ara. Iyakiya Puwangnge malaka polé ri jama-jamakku, nanasuroka palettu'i pasen-Na lao ri tau Israélié. Rimakkuwannanaro éngkalingai aga napowada Puwangnge lao ri iko. Nasaba muwattéyakka makkatobba méwai bangsa Israélié. Makkedai Puwangnge makkedaé mancaji cakkuribangngi matu bainému risining lalenna kotaé, sibawa ana'-ana'mu riyunoi ri laleng musué. Ritawa-tawai matu tanamu lao ri tau laingngé, na alému paimeng matéko ri wanuwanna tau iya dé'é naissengngi Puwangnge. Pabbanuwana Israélié pasti ritiwii matu ri appalirengngé, mabéla polé ri wanuwanna.” Lolongekka séuwa pakkitassi polé ri Puwang Iya Pommatanré. Mitaka séddi baka mallise buwa iya matasa'é. Makkutanai Puwangnge, “Aga muwita, Amos?” Mappébalika, “Séddi baka iya mallise'é buwa-buwa iya matasa'é.” Makkedai Puwangnge, “Matasa'ni wettunna untu' umma'-Ku Israélié. Dé'na Upinrai rancana-Ku sibawa pasti uhukkungngi matu mennang. Iyaro essoé élok-kélongngé ri saorajaé mancaji teriwi matu. Kégi-kégi tattale'-tale'i matu ujué iya puraé riyabbéyang sibawa mammekko-mekko.” Engkalingai éh iko iya tenre'éngngi tau kasiyasié ri wanuwaéwé angkanna cappu mennang! Makkedako lao ri alému, “Tenniya pato ittana esso-esso ramé-ramé. Macinnaki masitta-sitta balu'si gandotta, iyakiya iyaro ramé-ramé teppudu-pudu paja. Uppannapa maccappa esso Saba'é, kuwammengngi weddikki mammula mabbalu'si? Macinna senna'ki maccatu', pabengnguwang sibawa ola, nenniya macéko-céko sibawa timbangeng. Gandong iya masolangngé weddingngi tabalu sibawa elli iya matanré. Sappaki tau kasiyasi iya dé'é naulléi wajai inrenna, namuni iyaro inrengngé banna elli sipasang lapikajé, nataelliwi aléna mancaji atatta.” Puwang, Allataalana bangsa Israélié, purani mattanro, “Dé' sises-siseng Uwallupaiwi matu pangkaukenna mennang iya majaé. Ténréi matu linoé, sibawa sininna tauwé masussa atiwi matu. Taggotangngi matu sininna wanuwaé sibawa tassompo-sompo pada-pada Salo Nil. Engka matu wettunna Uwébbui mata essoé labu ri tangassoé sibawa mapettangngi linoé ri essoé. Iyya, Puwang Iya Pommatanré, pura mabbicara. Upinrai matu ramé-ramému mancaji abbaratang, sibawa élok-kélommu mancaji mpating. Uwébbuko matu cukkuru'i gemme'mu sibawa paké kaing karung tanrang masara. Mancajiko matu pada-pada ambo' indo' iya teringiyéngngi amaténna ana' tungke'na. Iyaro essoé maccappa'i matu sibawa mappamessé senna.” Makkedai Puwang Iya Pommatanré, “Engka matu wettunna Upapolé abala akkadéreng ri wanuwaéwé. Malupui matu tauwé, iyakiya tenniya malupu lao ri inanré. Madekkai matu tauwé, iyakiya tenniya madekka lao ri uwai. Malupui sibawa madekkai mennang lao ri pasek-Ku. Solléi matu tauwé polé ri manorang lao ri yattang sibawa polé ri alau lao ri yajang untu' lolongengngi pasek-Ku, iyakiya dé' naruntu'i matu mennang. Ri essoéro mala sining tau malolo iya madisid-disingngé marenne'i matu nasaba adekkang. Sining tau iya mattanroé nasabbing barahalana Samaria sibawa makkeda, ‘Nasabbing déwatana bangsa Dan’, iyaré'ga ‘Nasabbing Déwatana Bérsyéba’ – menrungngi matu sibawa dé'na natokkong paimeng.” Uwitai Puwangnge tettong ri seddéna mézbaé. Nabbéréyangngi iyaé paréntaé, “Unrui maladde'-ladde' ulu-ulu allirié ri Bola-Ku kuwammenngi nataggottang sininna légo-légoé. Léttungngi iyaro alliri-allirié ri yasé'na ulunna sining tauwé. Mennang iya dé'é namaté Uwunoi matu ri laleng musué. Dé' muwi séddi tau mulléi lari, dé' muwi séddi tau leppe matu. Namuni mennang nabettui lao ri linona tau maté, Uwampaéto matu mennang. Namuni ménré'i mennang ri langié, Upanonnoi matu mennang polé kuwaro. Rékko massubbui mennang ri coppo'na Bulu Karmél, Usappai matu sibawa Utikkengngi mennang. Rékko massubbui mennang ri borina tasi'é, Uparéntangngi matu naga tasi'é untu' pitto'i mennang. Rékko ritawangngi mennang ri balié, Uwapparéntangngi matu kuwammengngi nariyuno mennang. Mattonget-tongek-Ka untu' paccappui mennang, sibawa dé' Ubantui matu mennang.” Taggottangngi linoé namasara pabbanuwana, nasaba nagéssai Puwang Iya Pommatanré sibawa Pommakuwasaé. Pada-pada Salo Nil noté uwaina makkuwaniro mennang ménré nainappa sempé. Napatettongngi Bolana Puwangnge mabéla ri bitaraé, ri yasé'na linoé Napasangngi langié selaku kubba, sibawa Natiri'i uwai polé ri tasi'é lao ri pottanangngé, iya pogau' manengngéngngi iyaro asen-Na iyanaritu Puwang! Makkedai Puwangnge, “Eh umma Israélié, Ujampangiwi tau Sudangngé pada-pada Ujampangimmu. Iyya pura tiwii tau Filistingngé polé ri Kréta sibawa tau Siriaé polé ri Kir pada-padato Utiwiko polé ri Maséré. Iyya, Puwang Iya Pommatanré, mattengngang salidikiwi akkarungeng Israél iya madosaéwé, na Upallennye'i matu polé ri tompo'na linoé. Iyakiya wija-wijanna Yakub dé' Upaccappu manengngi matu. Iyya, Puwang, pura mabbicara. Mabbéré-Ka matu parénta sibawa tapiwi bangsa Israélié pada-pada tauwé mattapi gandong ri laleng pattapié. Untu' paddésu'i sininna iya dé'é nakkéguna ri yelle'na mennang, Upasigaru-garui matu mennang ri yelle'na bangsa-bangsaé. Makkedai sining tau madosaé ri yelle'na umma'-Ku, ‘Dé' naleppessakki matu Allataala nakenna abala.’ Iyakiya, sitongenna riyunoi matu mennang ri laleng musué.” Makkedai Puwangnge, “Narapi matu wettunna Upalisui akkarungenna Daud. Makkekkuwangngé iyaro akkarungengngé mancajini pada-pada bola iya maruttungngé. Iyakiya Upédécéngiwi matu sining témbo'na sibawa Upatettongngi paimeng angkanna mancaji pada-pada riyolo. Nakuwasaiwi matu tau Israélié wanuwa Edom iya nasésaé mupa enrengngé sininna bangsaé iya appunnangek-Kué riyolo. Iyya, Puwang, pura mabbicara na Upogau'i matu gau'éro.” Makkedai Puwangnge, “Narapii matu wettunna tuwoi gandongngé makkuwamani sitta'na angkanna wettu éngngalangngé dé'gaga appettunna. Tuwoi matu pong anggoro'é makkuwamani akkompe'na angkanna matteru-terui matu tauwé mébbu uwai anggoro. Tetti'i matu uwai anggoro'é polé risining bulué sibawa massolo polé ri bulu-bulué. Upancajiwi matu umma'-Ku Israélié madécéng paimeng. Napatettossi matu mennang kota-kotana iya maruttungngénna, nainappa monro matu mennang kuwaro. Natanengiwi matu mennang palla-palla anggoro'na, sibawa ménungngi anggoro'na. Mallaonrumai matu mennang, sibawa manréi wassélé'na. Utaroi matu umma'-Ku ri wanuwa iya puraé Uwabbéréyang lao ri mennang. Dé'na matu naribébbu mennang polé kuwaro. Iyya Puwang Allataalana pura mabbicara.” Iyanaé botona Obaja; napalettu'i pasenna Puwang Iya Pommatanré passalenna bangsa Edom: Purani nakiring Puwangnge suro-Na lao ri bangsa-bangsaé, na purani taéngkalinga paseng iya natiwié selaku mangoloéwé, “Sadiyano untu' mammusu! Laono mai tajoppa gasai Edom.” Na lao ri Edom, makkedai Puwangnge, “Uwébbuko malemma, angkanna ripakatuna ri sininna bangsaé. Ribengnguwakko ri atimmu iya matempoé. Ibukotamu iyanaritu bulu batu iya mawatangngé; onrong muwonroiyé ri coppo bulu iya matanré. Rimakkuwannanaro mappikkiri'ko, ‘Niga mulléi pasempé'-Ka?’ Namuni muwébbui bolamu sittanré sarang kuwajangngé, sibawa sittanré sining wéttowingngé ri langié, pasti Upasempé'ko. Panga iyaré'ga parampo iya polé ri wennié, banna nalai iya nacinnaiyé. Tau iya maccéppu anggoro'é ri palla'é, tuli napallaingngi siyagangngaré batunna. Iyakiya risarikko gangka cappu risining balimmu. Eh wijanna Esau, rigalédako sibawa muwi waramparammu iya tassubbué rirappato. Ribengnguwakko risining siyempe'mu, sibawa ripaddésu polé ri wanuwammu. Ricauko ri sahaba'-sahaba'mu, rijebba ri tau iya sisamaékko manré. Makkutana-kutanai passalenna alému, ‘Kégani makkekkuwangngé sininna amaccanna?’ Ri esso Uhukkunna Edom, sining taunna iya mapanré Upabbinasai. Sibawa sininna amaccanna mennang teddéngngi matu, dé'gaga baténa. Sining pejuwang polé ri Téman métaui matu, sibawa sininna prajuri'na Edom matéi matu.” “Purako kédo majapperu lao ri silessu-silessuremmu wijanna Yakub. Rimakkuwannanaro ripaccappuko matu, sibawa ricella ri tauwé sillampé wettué. Tettokko mabéla, ri esso natunrunna tange'na Yérusalém sibawa caui iyaro kotaé. Mammekko bawammo wettunna mennang tiwi manengngi asugirenna Yérusalém sibawa tawa-tawai ri yelle'na mennang. Pada-padako jana sibawa baliéro. Dé' nasipato'ko masennang lao ri toto macilakana tau Yéhudaé sibawa marennu ri esso binasana silessuremmuro. Dé' nasiratakko mabboro ri wettu masussana. Dé' nasitinajako muttamakiwi kotana umma'-Ku, sibawa gora-goraiwi sining tau iya manrasa-rasaé, apalagi rampo'i waramparanna ri esso acilakanna! Dé' naharusu'ko tettong ri pékka lalengngé, untu' madangngi sining tau iya mattengngangngé lari polé ri balié, iyaré'ga mabbéréyangngi mennang lao ri balié ri esso nakennana mennang asussang.” “Tongeng, macawé'ni essona, Iyya, Puwang, madélékiwi bangsa-bangsaé. Aga napogau' Edom riwalekengngi matu lao ri aléna. Napéneddingi towi matu aga iya puraé napogau'. Ri tompo'na bulu-Ku iya mapaccingngé purani ménung umma'-Ku énungeng iya pulambangngéngngi pahukkungenna. Iyakiya énungeng untu' bangsa-bangsaé ri linoéwé lebbi mapaipi. Iyaro pahukkungengngé dé' naulléi mennang léssériwi. Harusu'i mennang naénung gangka cappu, nainappa mennang lennye matu temmabbaté.” “Iyakiya ri Bulu Sion, engka matu iya salama'é, sibawa iyaro bulué mancajiwi onrong iya ripallaingngé untu' Iyya. Nanappunnangiwi matu paimeng wija-wijanna Yakub tana manana mennang. Umma'-Ku Israélié padai matu api iya tunuéngngi gangka cappu wijanna Esau, pada-pada api tunuéngngi gangka cappu daramé ri dare'é. Dé' muwi séddi tau polé ri wijanna Esau leppe matu. Iyya, Puwang pura mabbicara! Sining tau Yéhuda Yattangngé natudangiwi Edom. Sining tau polé ri bulué tibang yajang nacaui matu daéra Filistin. Suku Bényamin tudangiwi matu Giléad, sibawa Israélié umma'-Ku nakuwasaiwi matu sininna Efraim sibawa Samaria. Tau Israél Manorangngé lisui matu polé ri appalirengngé sibawa tudangiwi Fénisia lettu ri Zarfat. Sining tau Yérusalém iya ripalié ri Sardis, lisui matu sibawa mappunnangiwi kota-kota ri bagiyang yattanna Yéhuda. Pabbanuwana Yérusalém iya poré nagasai matu Edom sibawa caui. Na Iyya Puwang mapparénta matu selaku arung.” Ri séuwaé esso, mabbicarai Puwangnge lao ri Yunus, ana' Amitai. Adan-Na, “Laono ri Niniwé, kota battowaéro, untu' mancangngi, nasaba Uwissengngi mekkedaé maja senna'i pabbanuwana.” Iyakiya mala Yunus joppai lao ri onrong laingngé untu' mabélaiwi Puwangnge. Laowi ri Yopa, nanasitujuwangngi engka kappala iya maéloé lao ri Spanyol. Puranana nawaja tampana, ménré'ni ri kappalaé, nainappa sompe silaong ana' kappala'é lao ri Spanyol, untu' mabélaiwi Puwangnge. Wettunna nakodana iyaro kappala'é nonno ri yawa, naruntu'ni Yunus kuwaro mattengngang matinro. Nanakkeda, “Masa weddikko matinro ri laleng keadaang makkuwaéwé! Ayo, oto'no! Assempajanno lao ri déwatamu untu' méllau tulung. Nigana missengngi mamaséi matu lao ri idi angkatta dé' tabinasa.” Ménré'nana Yunus sibawa nakodaéro ri yasé, makkedani sining ana' kappala'éro ri padanna mennang, “Laono mai, taundiwi kuwammengngi taissengngi niga pasala angkanna nakennaki abalaéwé!” Naundini mennang, na asenna Yunus nakenna. Namakkeda mennang lao ri Yunus, “Tongegga iko nassabariwi abalaéwé? Polé kégako? Bangsa aga? Magi muwengka kuwaé?” Nappébali Yunus, “Tau Ibranika. Usompai Puwangnge, Allataala ri surugaé, iya pancajiyéngngi tasi'é sibawa pottanangngé.” Nainappa nacurita pékkugiwi makkuraga lari polé ri Puwangnge. Naéngkalinganaro pédé métauni sining ana' kappala'é, namakkeda lao ri aléna, “Macongeng senna pangkaukemmuro!” Napédé marajatona bombangngé, nainappa makkutana sining ana' kappala'é lao ri aléna, “Aga harusu tapogau' lao ri iko kuwammengngi nappésau iyaé bombangngé?” Nappébali Yunus, “Buwakka ri laleng tasi'é, pasti mappésau bombangngé. Saba' uwissenni makkekkuwangngé, makkedaé iyya ritu nassabari bombang iya maseroéwé nakennako.” Iyakiya makkuraga mupi sining ana' kappala'é maggangka ullé untu' mpiséi iyaro kappala'é lao ri pottanangngé. Iyakiya pédé majjallo towi bombangngé, angkanna usahana mennang siya-siyai simata. Rimakkuwannanaro gorani mennang lao ri Puwangnge, “Oh Puwang, maréllauki, aja' tabinasa nasaba malai nyawana tau iya dé'é napogau' muwi asalang aga lao ri idi. Oh Puwang, purani Mupogau' aga iya Mupuwéloé.” Nainappa naggenrungeng Yunus ri laleng tasi'é. Nappésauna iyaro bombangngé majjallo. Métau senna'ni iyaro sining ana' kappala'é lao ri Puwangnge, namappottanannana, makkasuwiyanni mennang akkarobangeng sibawa majjanciyangngi maddupa-rupang passaleng lao ri Puwangnge. Napapoléna Puwangnge sikaju balé loppo iya memme'éngngi Yunus. Nanaonrona Yunus ri lalenna babuwana baléro tellungngesso tellumpenni. Polé ri lalenna babuwana baléro, massempajanni Yunus lao ri Puwang Allataala. Adanna, “Oh Puwang, ri laleng asussakku mangobbika lao ri Iko na mubalika. Polé ri linona tau maté méllauka pattulung, Muwéngkalingai paréllaukku sibawa Mujampangiwi. Muwaggenrungekka lao ri onrong iya maliyungngé, lettu ri borina tasi'é. Kuwaniro nattulilingika solo' uwai, naggeppuwakka bombangngé. Makkedaka ri laleng atikku: Purana napaddésu Puwangnge polé ri yolo-Na. Dé'na uwitai matu paimeng bola onron-Na iya mapaccingngé. Ménré'ni uwaina tasi'é lettu ri témukku, nasalipurini dolangeng malowang sininna tubukku, nabebbe'ni ulukku lumu-lumu tasi. Sining passompa barahala iya siya-siyaé, nasalai-Ko sibawa dé'na namatinuluna. Iyakiya makkélokka matu pappoji-pojiyang untu' alé-Mu sibawa makkasuwiyangekka akkarobangeng untu' alé-Mu. Sininna jancikku upogau'i matu. Iko ritu Puwang iya mappassalama'é.” Nainappa, nasaba paréntana Puwangnge, iyaro balé naluwani Yunus ri pottanangngé. Untu' mabbékkaduwanna mabbicarai Puwangnge lao ri Yunus. Adan-Na, “Laono ri Niniwé, kota battowaéro, namupalettukengngi ra'ya'na, paseng iya Uwéréngngékko.” Nanaturusini Yunus Puwangnge sibawa lao ri Niniwé, séuwa kota iya battowa senna'é; angkanna tellungngesopa riyapparellung untu' jokkaiwi. Nauttamakini Yunus kotaéro na puranana joppa puppu esso, mappammulani makkatobba, adanna, “Patappulopi essona, nariyancuru matu Niniwé!” Mateppe'ni pabbanuwana Niniwé ri pasenna Allataalaro. Napettuini sininna ra'ya'é untu' mappuwasa, sibawa sininna tauwé, battowa iyaré'ga baiccu, pakéi kaing karung untu' mappaitangngi makkedaé nasesse'i mennang dosa-dosana. Wettunna naéngkalinga arung Niniwé iyaro karébaé, masitta'ni nonno polé ri kadéra akkarungenna. Naludunni jumba akkarungenna nanapakéi kaing karungngé, nainappa tudang ri tompo'na awué. Napallebbang towi iyaé pappallebbangngé, “Iyaé paréntaé ripassui ri Niniwé polé ri apettunna arungngé sibawa sining menterinna: Sininna tauwé, sapingngé, bimbala'é sibawa olokolo piyara laingngé riyattéyang manré sibawa ménung. Harusu'i tauwé sibawa olokolo'é paké kaing karung. Selaku tanrang assessekeng sininna tauwé harusu'i massempajang sibawa mattonget-tongeng lao ri Allataala. Harusu'i mennang napédécéngi ampé-ampéna iya majaé sibawa pangkaukenna iya pennoé dosa. Naullé napinrai matu niya'na Allataala sibawa dé'na namacai angkanna dé' tajaji binasa!” Naitani Allataala pangkaukenna mennang; Naitani makkedaé nasalaini mennang ampé-ampéna iya majaé. Nanapinrani apettun-Na, sibawa dé' najaji hukkungngi mennang. Dé' sises-siseng namasennang Yunus lao ri gau'éro; mala mancaji macayii. Nainappa massempajang, “Oh Puwang, dé'ga napura mémeng upowada ri wettu dé'napa ujoppa polé ri bolaku riyolo, makkedaé pasti napogau'i matu makkuwaé? Iyanaro saba'na umatteru lari lao ri Spanyol! Uwisseng makkedaé idi Allataala iya makacuwaé sibawa mamasé, maraja sabbara, malemma sibawa tuli sadiya untu' pinrai rancana pahukkungenna. Makkekkuwangngé, oh Puwang, leppessakka siya maté, saba' lebbi kessing muwi matéka naiya tuwoé.” Nappébali Puwangnge, “Dé' muwappunnai alasang untu' mancaji macai.” Nainappa lao Yunus ri seddé alauna kotaé, nanatudang kuwaro. Mébbuni séuwa kalampang sibawa maccinaung ri lalenna, nanatajeng towi aga kajajiyang matu ri kota Niniwé. Nanapatuwona Puwang Allataala séuwa tanet-taneng makkalolo iya cinaungiyéngngi Yunus angkanna masennang. Mémeng, masennang senna'i Yunus sibawa tanet-tanengngéro. Iyakiya bajanana ri subué, mébbui Allataala sikaju lati manréi ure'na iyaro tanet-tanengngé, angkanna makelle. Momponana essoé, papoléni Allataala anging pella iya mangirié polé alau. Céddé'i Yunus marenne nasaba nakennai tappa esso iya samannaé tunui ulunna. Pettu paddennuwanni sibawa macinna maté. Adanna, “Lebbi kessing muwi matéka bawang naiya tuwoé!” Iyakiya makkedai Allataala lao ri aléna, “Dé' nasipato'ko messé makkuwaro nasaba iyaro tanet-tanengngé!” Nappébali Yunus, “Magi na dé'? Sipato'ka mancaji macai senna gangka maté.” Nainappa makkeda Puwangnge lao ri aléna, “Iyaé tanet-tanengngé tuwoi ri lalenna siwennié bawang, namakelle'i ri esso rappina; dé' sises-siseng na iko patuwoi iyaré'ga piyarai. Namuni makkuwaro messéko nasaba makelle'i. Masa dé' Umessé pikkiri'i Niniwé, kota iya battowaéro. Saba' ri lainnaé sining olokolo'na iya dé'é naribilanro, kuwaro engkato lebbi 120.000 ana' iya dé'éppa naulléi pasilaingengngi aga iya makessingngé sibawa aga iya majaé.” Assalenna Mikha poléi riséddié kota baiccu riyasengngé Morésyét. Wettunna wanuwa Yéhuda riparénta matturu-turuseng ri Arung Yotam, Ahas sibawa Hizkia, natarimai Mikha pasenna Puwangnge passalenna Samaria sibawa Yérusalém. Engkalingai, éh bangsa-bangsa! Pénessaiwi, éh pabbanuwana sininna linoé! Poléi Puwang Iya Pommatanré selaku sabbi méwa manekko! Engkalingai Aléna mabbicara polé ri Bola-Na iya mapaccingngé ri surugaé. Nonnoi polé ri onron-Na iya mapaccingngé sibawa joppa ri coppo-coppo bulué ri linoé. Maccolo sining bulué ri yawana palakajé-Na pada-pada lilingngé ri laleng api iya malluwa'é; maili tanana muttama risining lompo'é, pada-pada uwai ri tompo'na bulu-bulu massolo liyawa. Iya manennaro kajajiyangngi matu nasaba madosai sibawa maronta'i tau Israélié lao ri Allataala. Niga nassabariwi namadosa Israélié? Tenniyaga Samaria ibukotana muto? Niga nassabariwi nassompa barahala Yéhuda? Tenniyaga Yérusalém muto? Iyanaro saba'na namakkeda Puwangnge, “Upancajiwi matu Samaria goppo ruttungeng ri padangngé, sibawa onronna tauwé mattaneng pong anggoro. Ruttungenna kotaéro Uwabbéyangngi matu ri laleng lompo'é, sibawa Ubongkara'i sining pandaménna. Dato-dato'na iya mangke'é Uwancuru'i matu, sibawa tungke' barang iya riwéréngngéngngi sining makkunrai iya majjamaé ri bola-bola déwataé ritunui matu, enrengngé sininna barahalana ripabbinasai. Iyaro barab-barangngé iyanaritu wassélé assompanna lao ri déwata acommokengngé. Makkekkuwangngé iya manennaro ritiwii matu risining balinna untu' pakkasuwiyang sukkuru lao ri déwata-déwatana.” Rimakkuwannanaro iyya, Mikha, messé ati sibawa maddaréké. Maéloka joppa temmappakéyang sibawa temmassandala untu' mappaitangngi pékkugi messéna atikku. Maéloka mabbokka pada-pada asu ale'é sibawa kelli-kelli pada-pada manu'-manu' untaé. Saba' sining lona Samaria dé' nawedding ripajjappa, sibawa Yéhuda nakennai matu toto iya padaé. Lettu'ni abalaé ri Yérusalém, pintu gerbanna tana assalenna bangsaku. Aja' muwappaissengengngi lao risining balitta ri Gat passalenna abalata; aja' muleppessangngi mennang mitako teri. Eh pabbanuwana Bét-Lé-Afra, aggaléluno ri laleng awué selaku tanrang pettu paddennuwang! Iko pabbanuwana Safir, joppano lao ri appalirengngé temmappakéyang sibawa pappénedding masiri! Dé' nabarani massu sining tau Zaanangngé polé ri kotana mennang. Kelli'na pabbanuwana Bét-Haézel mappaitangngi lao ri iko makkedaé dé'na gaga kuwaro allinrungeng. Abala polé ri Puwangnge lettu'ni ri yolona pintu gerbanna Yérusalém! Rimakkuwannanaro, dé' namakkullé tau Marot-é maddennuwangiwi pattulungngé. Iko ritu pabbanuwana Lakhis, pasanno anyarang ri karéta musué! Muturui dosa-dosa iya ripogau'é ri Israélié angkanna nassabariwi muwi Yérusalém madosato. Makkekkuwangngé, éh tau Yéhudaé ateddéngekko matu kota Morésyét-Gat. Arung-ngarunna Israélié dé' matu nalolongeng bantuwanna polé ri kota Akhzib. Eh tau Marésya, Puwangnge mabbéréyakko matu lao ri bali iya maéloé caui kotamu. Pamimping-pamimping Israél iya makuwasaé massubbui matu ri laleng gowaé ri Adulam. Eh tau Yéhuda, rette'i gemme'mu selaku tanrang mabbarata untu' ana'-ana'mu iya muwamaséiyé. Cukkuru'i ulummu gangka makellu pada-pada manu'-manu' pakkanré bakké, saba' ana'-ana'mu ritiwii matu ri appalirengngé. Macilakai sining tau iya rancanaéngngi majaé ri wettu léwuna ri onrong atinrongngé ri wennié, nainappa napogau' ri éléé nasaba mappunnaiwi mennang awatangeng untu' pogau'i. Rékko nacinnaiwi mennang séuwa dare', narampasa'i mennang. Rékko nacinnaiwi mennang séddi bola, nasarobo'i. Muwi waramparang iyaré'ga kaluwarga, dé'gaga iya amangngé. Rimakkuwannanaro makkedai Puwangnge, “Urancanai abalaé ri yasé'mu, angkanna dé' muwulléi leppe. Ri wettu iya macilakaéro dé' muwulléi matu joppa sibawa matempona. Napakéi matu tauwé totomu selaku bahang assindirikeng, sibawa naébbui matu mennang élong abbaratangngéwé, ‘Purani nasittai Puwangnge wanuwattaé sibawa mabbéréyangngi lao ri iya méwaékki. Ancuru sisekki.’ ” Rimakkuwannanaro, narékko narapini wettunna ripalisu iyaro wanuwaé lao ri umma'na Puwangnge, dé' muwi séddi tau polé ri iko tarimai matu bagiyanna. Sining tau iya makkatobbaé lao ri iyya, adanna, “Aja' muwakkatobba lao ri idi. Aja' muwakkatobba passalenna iya manennaro. Dé' tamasiri matu. Aja' muwasengngi purani ritanroi umma Israélié ri Puwangnge! Dé' napogau'i matu Puwangnge gau'-gau' iya makkuwaéro. Dé' naengka nateddéng asabbaraken-Na. Dé'ga Nabbicara sibawa mabessa lao risining tau iya pogau'éngngi tongengngé?” Nappébali Puwangnge, “Iko ritu gasai umma'-Ku pada-pada balié. Lisui tauwé polé ri ammusurengngé sibawa paddennuwang amangngi matu ri bolana, padahal kuwaro mala mattajekko untu' rampasa'i bolana. Sining makkunraié ri yelle'na umma'-Ku mupaddésu'i polé ri bolana iya napojiyé, sibawa murampasa'i untu' mannennungeng barakka iya Uwabbéréyangngé lao ri ana'-ana'na mennang. Tokkonno namulao; dé'na na amang kuwaé. Mappapoléni abala dosa-dosamu iya mappakatau-taué ri onrongngéwé. Mupuwéloi nabi iya pojiyéngngi mabbellé sibawa pabengnguwang enrengngé botoi makkedaé mappunnaiko matu anggoro sibawa énungeng maseri iya maonaé.” Makkedasi Puwangnge, “Eh umma Israél iya nasésaé mupa! Pasti Upaddeppungekko matu sibawa Upasséddi pada-pada bimbala iya lisué ri wakkéna. Pada-pada padang wella iya pennoé sibawa bimbala, makkuwatoniro wanuwammu pennosi matu sibawa maéga tau. Utimpa'i matu lalengngé sibawa tiwiko massu polé ri appalirengngé. Murumpa'i matu pintu-pintu gerbangngé nennniya lao sibawa laluwasa. Iyya, Puwang muto, iyanaritu Arummu, na-Upimpikko matu massu.” Engkalingai, éh iko sining panguwasana Israélié! Harusu'i muwisseng aga iya adélé'é, iyakiya mala mucéccéi iya makessingngé, sibawa masennang lao ri majaé. Mulopéi tuwo-tuwo bangsaku, namubibbi'i jukuna polé ri buku-bukunna. Muwanréi bangsaku. Musapé-sapé'i olina sibawa muancuru'i buku-bukunna. Mukare'-kare'i mennang pada-pada kare'-kare' jukué untu' riputtama ri laleng oringngé. Narapii matu wettunna kelli'ko matu méllau tulung lao ri Puwangnge, iyakiya dé' namaélo mappébali. Dé' naéngkalingai matu sining sempajammu, nasaba purai mupogau' majaé. Ribengnguwangngi bangsaku ri nabi-nabi iya botoéngngi makessingngé lao ri tau iya mabbéré dowi, iyakiya musui sibawa pakariyawai tau iya dé'é nabbéré. Lao ri nabi-nabi iya makkuwaéro, makkedai Puwangnge, “Eh nabi, mawé'ni cappu wettummu; mattengnganni labu mata essomu. Dé'na mulolongeng matu pakkitang iya pannessaéngngi sining rancana-Ku. Dé'na mulléi matu botoi aga-aga.” Sining tau iya botoéngngi esso mangoloé masirii matu nasaba lésséi botona. Ateddéngeng manenni mennang rupa nasaba Allataala dé' nabaliwi mennang. Iyakiya passalenna alékué, purana naliseki Puwangnge sibawa roh-Na nenniya akuwasan-Na. Nawérékka pappéjeppu passalenna adélékengngé, sibawa abaraning untu' pannessai lao ri tau Israélié dosa-dosa iya puraé napogau'. Engkalingai ada-adakkué, éh iko panguwasana Israél iya céccééngngi adélékengngé sibawa balé'éngngi atongengengngé. Mupatettongngi Yérusalém, kotana Allataala, polé ri abbunowammu sibawa dé'é naadélé. Mapparéntai sining panguwasana kotaé untu' lolongeng dowi pasoso, nappagguruwangngi imang-ngimangngé hukkunna Puwangnge untu' gaji, sibawa nabi-nabié méllauwi panunju polé ri Allataala untu' lolongeng dowi – nainappa naseng manengngi mennang engkai Puwangnge maccowériwi mennang. Makkedai mennang, “Engkai Puwangnge ri tengnga-tengngata; dé' nakennaki matu abala.” Nasaba jamuro, rirakkalai matu Sion pada-pada dare'é, Yérusalém mancajiwi matu goppo ruttungeng, sibawa bulu-buluna Bolana Puwangnge mancajiwi matu alekale. Ri esso-esso mangoloé bulu-bulu, onronna Bolana Puwangnge, tettong lempui matu sibawa maccaloli matanré naliwengngi sining bulué sibawa bulu-bulué. Mallompéngengngi sininna bangsaé lao kuwaro makkeda manengngi matu mennang, “Laono mai taénré ri bulu-buluna Puwangnge ri Bolana Allataalana Israélié! Nappagguruwangngi matu lao ri idi aga iya harusu'é tapogau'. Taccowériwi matu lalen-Na saba' pappagguruwanna Puwangnge poléi ri Yérusalém; Aléna mabbicarai polé ri Sion lao ri umma'-Na.” Puwangnge pettuiwi matu parakaraé ri yelle'na bangsa-bangsaé, ri yelle'na sining wanuwa mawatangngé, iya mabélaé iyaré'ga macawé'é. Nalanroi matu mennang sining peddanna mancaji rakkala sibawa sining bessinna mennang mancaji piso pabbéle. Dé'na nasisullé sigasa bangsa-bangsaé, dé'to nasadiya-sadiya maélo mammusu. Tungke' tauwé tuwoi matu amang sibawa saléwangeng ri tengngana palla anggoro'é sibawa palla aras-é; dé'gaga péttau-péttauriwi matu, iyanaro jancinna Puwang Iya Pommakuwsaé. Tungke' bangsaé ri yasé'na linoé massompai sibawa mapatoi lao ri déwatana muto. Iyakiya idi mapatoki matu lao ri Puwang Allataalata sibawa sompai Aléna untu' mannennungeng. Makkedai Puwangnge, “Narapii matu wettunna Upaddeppungengngi sining tau iya Uhukkungngé, iyanaritu mennang iya manrasa-rasaé ri appalirengngé. Purani mennang riképo sibawa mabéla polé ri kampong assalenna. Iyakiya, polé risining tau iya risésaéro maélo-Ka pammulaiwi séuwa assossoreng iya barué. Mancajiwi matu nennang bangsa iya battowaé sibawa mawatang. Uparéntai matu mennang ri Bulu-bulu Sion lettu mannennungeng.” Na iko Yérusalém, onronna Allataala jagaiwi umma'-Na pada-pada pakkampié jagaiwi bimbala makkonronna, lisuko matu mancaji ibukotana akkarungemmu pada-pada pammulanna. Magi muteri maladde-ladde? Magi mumapeddi pada-pada makkunrai iya maéloé mémmana? Aga nasaba dé' muwappunnai arung, sibawa maténi sining pappangajamu? Eh pabbanuwana Yérusalém, agguliccino sibawa maranno pada-pada makkunrai iya mattengngangngé mémmana! Saba', harusu'i makkekkuwangngé musalai kotaé sibawa monro ri padangngé. Harusu'ko lao ri Babél, iyakiya napaleppe'ko matu Puwangnge kuwaro polé risining balimmu. Maéga bangsa pura maddeppungeng untu' gasako, éh Yérusalém! Makkedai mennang, “Harusu'i riyancuru Yérusalém! Maéloki mitai iyaro kotaé mancaji ruttungeng!” Iyakiya iyaro bangsa-bangsaé dé' naissengngi aga mattengngang narancana Puwangnge. Dé' namaingekiwi mennang makkedaé purani napaddeppungeng mennang untu' rihukkung, pada-pada gandong ripaddeppungengngé untu' rirése. Makkedai Puwangnge, “Eh pabbanuwana Yérusalém, laono sibawa lé'ja'ni sining balimmu! Upancajiko matu mawatang pada-pada saping iya mattanru bessié sibawa makkanuku tembagaé. Muancuru'i matu maéga bangsa, sibawa asugireng iya nalolongengngé mennang polé ri wassélé arrampasakenna muwakkasuwiyangengngi matu lao ri Iyya, Puwan -na sininna alangngé.” Eh pabbanuwana Yérusalém, éllauni sibawa masero kuwammengngi natulukko Puwangnge! Mattengngakki rikeppung! Mattengngangngi balié gasai pamimpinna Israélié! Makkedai Puwangnge, “Eh Bétléhém Efrata, iko sala séddinna kota iya kaminang baiccu'é ri Yéhuda! Iyakiya polé ri iko Upatokkongngi matu séddi tau panguwasa untu' Israél iya assalennaé poléi riyolo senna.” Jaji, naleppessangngi matu Puwangnge umma'-Na rikuwasai risining balinna narapi makkunrai iya ripattentué untu' mancaji indo'na iyaro panguwasaé jajiyangngi Aléna. Purairo sining tau sibangsana iya engkaé ri appalirengngé ripasséddiwi matu paimeng sibawa bangsana. Narékko poléni iyaro panguwasaé, naparéntai matu umma'na sibawa awatangeng nenniya akuwasang polé ri Puwang Allataalana muto. Tuwoi matu umma'-Na sibawa amang, nasaba sininna tauwé risininna linoé nangakuiwi matu arajan-Na, Tau Israél iya nasésaé mupa mancajiwi matu cinoddo makeccé'é polé ri Puwangnge untu' maéga bangsa, sibawa padai teppana bosié ri tanet-tanengngé. Sanréi matu mennang lao ri Allataala, natenniya lao ri tolinoé. Tau Israél iya monroé mupa ri yelle'na bangsa-bangsaé padai matu singaé ri tengngana sining olokolo'é ri ale'é iyaré'ga ri tengngana bimbala makkonrongngé ri padang wellaé. Iyaro singaé muttama'i ri tengnga-tengngana bimbala makkonrongngéro nanaléjja'-léjja'i sibawa nasapé'-sapé'i; dé'gaga mulléi paleppe'i iyaro sining bimbala'é. Nacaui matu Israélié sining balinna enrengngé mancuru manengngi mennang. Makkedai Puwangnge, “Iyaro wettué Uleppessangngi matu sininna anyarammu, sibawa pabbinasai karéta-karéta musumu. Uwancuru'i matu kota-kota mabbénténgngé ri wanuwammu, sibawa sininna attahangemmu Uruttungngi. Upallennye'i matu sima'-sima'mu sibawa sininna pappalakiyamu Upaddésu'i. Uwancuru'i matu dato'-dato'mu sibawa tugu-tugu makarame'mu; dé'na matu musompani barab-barang ébbu limammu. Uruttungngi matu tugu-tugunna Déwi Asyéra ri wanuwammu, sibawa kota-kotamu iya mabbénténgngé Uwancuru'i matu. Ri laleng cai-Ku iya mpo'bo'é Uwale'i matu jana sininna bangsa iya dé'é namapato lao ri Iyya.” Engkalingai aga nattenrekeng Puwangnge lao ri Israélié. Tokkonni oh Puwang, sibawa pangoloni papparape'-Mu! Leppessanni naéngkalinga bulué sibawa bulu-bulué aga maélo Mupowada. Eh sining bulu, éh sining pabborina linoé, éngkalingai papparape'na Puwangnge! Mappunnaiwi parakara sibawa Israélié umma'-Na sibawa maélona tuntu'i mennang. Makkedai Puwangnge, “Eh umma'-Ku, aga pura Upogau' lao ri iko? Ri laleng gau' agaé Usussaiko? Bali-Ka! Purano Utiwi massu polé ri Maséré, sibawa Upaleppe polé ri angatangengngé; purani Usuro Musa, Harun, sibawa Miryam untu' pimpikko. Umma'-Ku, éngngerangngi aga iya narancanaé Balak arung Moab lao ri iko, sibawa aga iya nappébalingngé Biléam ana' Béor lao ri aléna. Engngerangngi aga kajajiyang ri allalengengngé ri pallawangenna akkémangngé ri Sitim sibawa Gilgal. Rékko muwéngngerang manengngiro, mumaingekiwi matu aga iya puraé Upogau' untu' passalama'ko.” Aga harusu takkasuwiyangeng lao ri Puwangnge, Allataala ri surugaé, narékko laoki untu' massompa ri Aléna? Harusu'ki'ga tiwi saping lolo iya kaminang makessingngé untu' riyakkasuwiyangeng selaku akkarobangeng ritunu lao ri Aléna? Masennagga matu Puwangnge narékko tiwiki lao ri Aléna massebbu-sebbu bimbala iyaré'ga minnya zaitun iya tabbollompollongngé? Harusu'ki'ga makkasuwiyang lao ri aléna ana' macowata selaku pakkamajana dosa-dosata? Dé'! Puwangnge pura pannessai lao ri idi aga iya makessingngé. Iya Natuntu'é polé ri idi iyanaritu kuwammengngi nakédo adélé'ki, tuli makkammalakengngi pappoji pammasé, enrengngé mariyawa ati tuwo masséddi sibawa Allataalata. Métau lao ri Puwangnge iyanaritu mapanré senna. Mangobbii lao ri pabbanuwana kotaé, “Engkalingai, éh iko iya maddeppungengngé ri kotaé! Ri bolana sining tau majaé engka waramparang iya rilolongengngé sibawa bellé. Napakéi mennang ola' iya dé'é natongeng, séuwa pangkaukeng iya Ucéccé. Tau iya pogau'éngngi Uhukkungngi matu. Masa Uwaddampengeng tau iya pakééngngi timbangeng iya dé'é natongeng? Sining tau sugié ri kotamu natenre'i tau kasiyasié, sibawa iko maneng pabbellékko. Makkekkuwangngé Iyya mammulana makkunru sibawa mancuru'ko nasaba dosa-dosamu. Manréko matu, iyakiya dé' mumesso – mala tette malupu. Makkako matu barab-barang, iyakiya dé' mulléi paamangngi. Agi-agi mupaamangngé Uwancuru'i matu ri laleng ammusurengngé. Mampoko matu gandong, iyakiya dé' muwéngngalai wassélé'na. Mébbuko matu minnya polé ri buwa zaitungngé, iyakiya dé' mulléi pakéi minnya'na. Para'ko matu uwai anggoro, iyakiya dé' matu muwénungngi. Iya manennaro kajajiyangngi nasaba muwaccowériwi sining pangkaukeng majana Arung Omri sibawa ana'na, iyanaritu Arung Ahab. Muwaccowériwi cara-carana mennang. Rimakkuwannanaro Uwancuru'ko matu, nariyéllé'ko matu sibawa ripakatuna ri sininna bangsaé.” Macilakaka! Pada-padaka séddié tau alupureng iya laowé maccéppu buwa labe'nana wettunna. Dé'na gaga buwa-buwa ri ajukajungngé. Buwa anggoro sibawa buwa ara iya makessingngé cappu manenni ricéppu. Lennye'ni tau malempué polé ri wanuwaé, tau iya matinulué lao ri Allataala dé'na gaga riruntu. Tungke' tauwé tajengngi kasempatang untu' mabbuno. Tungke'-tungke' pasangngi siyo-siyo lao ri pada-padanna. Macca manengngi ri laleng pogau'i majaé. Pajaba sibawa hakingngé méllauwi dowi pasoso, sibawa tomariyolona masaraka'é nappassangngi élona, makkuwaniro mennang massikongkolo massibawa. Muwi kaminang makessingngé sibawa kaminang malempué polé ri mennang pada towi alekale maddori iya dé'é nakkéguna. Narapini wettunna nahukkung Allataala umma'-Na pada-pada iya puraé Napparéngngerangeng lao ri mennang naolai nabi-nabin-Na. Momponi makkekkuwangngé akacaungeng ri yelle'na mennang. Aja' mumateppe lao ri balibolamu, aja' musanré lao ri sellaoé. Atutuko sibawa ada-adammu namuni iya méngkalingaéngngi iyanaritu bainému. Saba', ri wettu pada-padaéwé sisulléi simusu matu anggota kaluwargaé; ana' worowané napakatunai ambo'na, ana' makkunraié naéwai indo'na, sibawa ménéttu makkunraié massasai sibawa matuwa makkunrainna. Iyakiya mamménasaki lao ri Puwangnge; sibawa penno ateppereng tatajengngi Allataalata. Naéngkalingai matu sempajatta sibawa napassalama'ki. Dé'gaga alasang lao risining balitta untu' marennu nasaba ancuruketta. Saba' namuni sempé'ki, tokkokki matu paimeng. Makkekkuwangngé engkaki ri laleng pettangngé, iyakiya Puwangnge tajangiki matu. Madosani lao ri Puwangnge, rimakkuwannanaro harusu'ki makkekkuwangngé péneddingiwi cai-Na. Iyakiya dé'na namaitta naéwaiki matu sibawa nawérékki adélékeng. Natiwiki matu massu lao ri tajangngé; aléta matu péneddingiwi makkedaé napassalama'ki. Riyolo napakatunaki balié sibawa makkeda, “Kégani Puwangnge, Allataalamuro?” Iyakiya makkekkuwangngé naitai matu mennang aga napogau' Puwangnge untu' idi, namasiri matu mennang. Tasabbingngi matu iyaro sining balitta ricau sibawa riléjja'-léjja' pada-pada bungkaé ri lalengngé. Eh Yérusalém! Narapini wettunna mupatettong paimeng témbo'-témbo' kotamu. Iyaro essoé rilowangiwi matu daéramu. Lisui matu sining taummu lao ri iko polé kégi-kégi – polé ri Asyur ri seddé alau, polé ri Maséré ri seddé yattang, polé ri seddéna Salo Efrat, polé ri liweng tasi sibawa polé risining bulu iya mabélaé. Iyakiya mancaji makabuttui matu tanaé nasaba jana pabbanuwana. Oh Puwang, ampii umma'-Mu, umma Mupilé. Monroi mennang massala ri ale' karajaé, ri tengngana tana macommo'é. Leppessanni mennang lolongeng inanré ri padang wellana Basyan sibawa ri Giléad pada-pada riyolo. Ebbuno anu makalallaing untu' idi, oh Puwang, pada-pada iya Mupogau'é riyolo wettunna Mutiwiki massu polé ri Maséré. Naitai matu bangsa-bangsaé gau'éro namancaji masiri nasaba namaingekiwi makkedaé sininna awatangenna mennang dé' aga-aga bettuwanna. Ateddéngengngi matu mennang akkaleng angkanna dé' naulléi mabbicara iyaré'ga maréngkalinga. Makkalolo'i matu ri tanaé pada-pada ulaé. Nasibawang tau sibawa ténré massui matu mennang polé ri attahangenna, nanalao ri Iko, oh Puwang Allataalata. Dé'gaga Allataala pada-padam-Mu, oh Puwang, iya maddampengengngéngngi dosana umma Mupilé iya risésaé. Dé' na untu' mannennungeng macai-Ko; sibalé'na, masennak-Ko mappaitangngi pappojim-Mu iya dé'é gaga paggangkannaro. Maressési-Ko matu lao ri idi sibawa maddampengekki. Muléjja'-léjja'i matu dosa-dosata sibawa Muwaggenrungengngi lao ri borina tasi'é! Lao ri umma'-Mu, wijanna Abraham sibawa Yakub, Muwappaitangngi matu atinulurem-Mu sibawa pappojim-Mu iya dé'é gaga paggangkannaro pada-pada iya Muwajjanciyangngé lao ri toriyolota riyolo. Iyanaé pasenna Allataala passalenna Niniwé. Iyaro pasengngé napannessai sibawa pakkitang iya nabbéréyangngé lao ri Nahum, séddiwi nabi iya assalennaé polé ri Elkos. Dé' namaélo Allataala mappunnai saingang, tau iya méwaéngngi Aléna, pasti lolongengngi pahukkungeng. Nasibawang cai maseroé, makkabale'i lao ri mennang. Mémeng Puwangnge, dé' namasitta macai; iyakiya makuwasa senna towi angkanna nigi-nigi pogau' asalang dé' Napaleppe'i matu polé ri pahukkungengngé. Kégi Puwangnge joppa, kuwaro mompo anginraja; ri onrong ajé-Na makkella, kuwaro awué mancaji ellung. Naancangngi tasi'é sibawa rakkoiwi, sininna saloé napaccappui uwaina. Bulu Karmél sibawa sining padangngé ri Basyan mancaji makabuttui sibawa ri Libanon makelle'i sininna bunga-bungaé. Ténréi sining bulué ri yolo-Na; sibawa bulu-bulué mancaji maccolo manengngi. Rékko mallurui Puwangnge, tatténréng linoé, ténré linoé sibawa sininna pabbanuwana. Niga mulléi tahang narékko macayii Puwangnge? Dé'gaga mulléi leppe polé ri cai-Na? Napallessui cai-Na iya malluwa'é ancuru'i batué sibawa mancaji awu ri yolo-Na. Makessing iyaro Puwangnge, Nalinrungiwi umma'-Na wettunna mennang masussa, Najagaiwi tau iya mallinrungngé ri Aléna. Pada-padai lémpe raja iya paappo'é, Naancuru'i sining balin-Na. Mennang iya baranié méwai Naunrui sibawa amaténg angkanna binasa. Muwi rancana aga iya mupogau'é naéwai Puwangnge, pasti dé' nallolongeng matu. Dé' Nakkabale matu narapi wékkaduwa lao ri sining balin-Na. Ritunuko matu pada-pada daramé iya marakkoé pada-pada alekale maddori iya sialu-alué. Polé ri iko, éh Niniwé, momponi séddi tau iya pennoé sibawa rancangang majaé. Mébbui rancana untu' méwai Puwangnge. Nakkeda Puwangnge lao ri Israélié, umma'-Na, “Namuni iyaro sining tau Asyur-é mawatangngi erengngé maéga jumellana, iyakiya riyancuru'i matu nanalennye. Eh bangsa-Ku, Iyya pura mébbuko manrasa-rasa, iyakiya dé' Upogau'ni matu. Makkekkuwangngé maélo-Ka paccappa'ni akuwasanna Asyur lao ri iko, sibawa upettuiwi ranté iya siyoékko.” Iyanaé apettunna Puwangnge passalenna bangsa Asyur-é, “Dé' nappunnai matu wija untu' patterui bangsana. Dato'-dato' barahala iya engkaé ri laleng bola-bola déwatana, Uwancuru'i matu. Kuburu untu' bangsa Asyur-é mattengnganni Upassadiya, saba' dé' nasipato mennang tuwo!” Itani, engka séddi suro polé lalo risining bulué, tiwi karéba madécéng, karéba apakalang. Eh bangsa Yéhuda, ramé-raméini esso marajamu sibawa wajani tinja'mu lao ri Allataala. Dé'na narijajana matu wanuwammu ri tomajaé. Purani mennang riyancuru siseng. Eh Niniwé, éngkalingai! Iya maéloé solangiko poléni! Jagaini sining bénténg attahangengngé! Jagaini lalengngé! Sadiyano untu' mammusu. ( Tongeng, napalisui matu Puwangnge aga'ganna Israélié, kuwammengngi namancaji pada-pada riyolo, dé'napa narirampo risining balinna.) Macella balona kaliyawona balié, nenniya pakéyang pada-padanna sinrupai daraé. Sadiyani balié untu' pakélo. Samanna api, maccillang bessi karétana. Kanja-kanja sininna anyaranna. Mallurui sining karétana sibawa magatti ri lalengngé. Silellul-lellungngi mennanro ri lapangangngé. Paitai samanna sulo iya mallumpaé, makkalaring kencang pada-pada billa'é. Naobbii maju sining parawiraé; tabbuttu-buttu mennang wettunna maggasa. Kajili-jiliwi mennang mattuju ri témbo'na kotaé, napatettonni mennang masitta paréwa pattunrungngé. Tattimpa'ni sumpang uwaina sininna saloé, namasélenna sininna saorajaé! Ritikkenni Ratué, mowanni sibawa mpating sining pattumaninna, maddarékéi mennang pada-pada jangang-jangangngé, sibawa tampuiwi arona tanrang masara. Makkalarinni ra'ya'na Niniwé, pada-pada uwai massué polé ri téppo iya marumpa'é. Engka gora, “Appésauno, appésauno!” Iyakiya dé'gaga iya maéloé lisu. Rampasa'i sininna ulawenna sibawa péra'na! Maona senna waramparangngé ri kotaéwé! Ancuru'ni Niniwé, masino-sino sibawa makabuttu. Makawani atié nasaba tau. Ténréni uttué sibawa mancaji malemma. Makawiya manenni tappana sininna tauwé. Kégani iyaro kotaé makkekkuwangngé? Kota iya pada-padaé gowa onronna massarang singaé? Onronna ana'-ana' singaé riwéréng inanré, onrong akkattana singa laié sibawa komba'é, onrong iya amangngé untu' ana'-ana'na? Riyolo kuwaro natikkeng anréna singaé, sibawa nabibbi untu' komba'na sibawa ana'na. Napennoiwi akkattana sibawa bibbi-bibbi juku lellunna. Nakkeda Puwang Iya Pommakuwasaé, “Iyya'é balimmu. Utunui matu gangka cappu sining karétamu. Matéi matu prajuri'mu ri laleng ammusurengngé, sibawa uwalai matu sininna séuwa-séuwa iya puraé muwala polé ri tau laingngé. Tuntutanna sining suromu dé'na napaéngkalingana matu.” Macilakani kotaéwé iya pennoé bellé sibawa abbunowang; penno barang rampasang iyaré'ga rirappaé. Engkalingai petti babbaé sibawa addukéku'na padatié, oni ajé anyarang larié sibawa addukéku'na karétaé. Maggasai pasukang makkinnyarangngé penno sumange, mattappa peddangngé sibawa maccillang bessié. Tenribilang tau maté, silappo-lappo ujuna mennang, mébbui sining tauwé tabbuttu. Niniwé cakkuribangngéro mattengngang rihukkung. Mappamennye-mennye agellorenna. Maéga bangsa pura napakennai paddisseng, nenniya napalécé sibawa pappalécéna. Makkedai Puwang Iya Pommakuwasaé, “Eh Niniwé, Usissako matu! Uludungngi kaimmu ri yolona bangsa-bangsaé, angkanna naitai mennang jamu. Ugaukekko selaku barang mappakaciddi-ciddi'é, Ugenrukko sibawa tai, Upancajiko akkita-itang. Iya mitaékko napabélaiwi matu aléna sibawa makkeda, ‘Ruttungennna mani Niniwé monro! Niga maccowé masara sibawa aléna? Dé'gaga iya maéloé saléworiwi.’ ” Eh Niniwé, masa lebbi kessikko naiya Tébe, ibukotana Maséré? Onronna Tébe ri wiring saloétto iya linrungiyéngngi selaku témbo'. Salo Nil ritu bénténg attahangenna. Naparéntai Tébe Sudan sibawa Maséré, na akuwasanna dé'gaga paggangkanna; Libia sibawa Put iyanaritu siyempe'na. Namuni makkuwaro, pabbanuwana Tébe ritawangngi sibawa ritiwi ri appalirengngé. Ri sininna pékka lalengngé, ribarasakiwi ana'-ana'na gangka maté. Sining tomarajana ribalenggui sibawa ranté naritawa-tawa ri yelle'na sining tawangngéngngi. Eh Niniwé, muwi iko marenne tokko matu nasaba mabo'ko. Makkuraga tokko matu kuwammengngi naleppe polé risining balimmu. Sininna béntémmu pada-padai matu pong ara iya pennoé buwa-buwa iya matasa'é. Rékko rigottangngi iyaro ajué, sempé'i matu buwa-buwana ri laleng bawana tau iya macinnaé manréi. Malemmai prajuri'-prajuri'mu pada-pada makkunraié na wanuwammu dé' sises-siseng matu pakkullénna moloiwi balié. Nangurengngi matu api sining paccala'na pintu gerbammu. Séro' bawanni uwai untu' pappassadiyang ri wettu rikkeppummu, sibawa pakkasse'i sining béntémmu! Pucca'-pucca'ni bungkaé untu' mébbu bata, sibawa passadiyani cétakanna! Muwi aga upogau', siya-siyato bawang, saba' pasti cappuko matu ritunu iyaré'ga maté ri laleng ammusurengngé. Lennye'ko matu pada-pada wassélé dare'é nanré incalé. Purano mabbija-bija pada-pada incalé! Sining paddare'mu nacau égai jumellana wéttowingngé ri langié! Iyakiya makkekkuwangngé lennye'ni, pada-pada incalé iya pallebba'éngngi pannina nainappa luttu massuwajang. Sining tomarajamu sibawa pajaba'mu pada-padai incalé makkonrong iya mallinrungngé risining témbo'é ri wettu keccé'é. Iyakiya momponana matanna essoé, masitta'i mennang luttu massuwajang; dé' muwi séddi tau missengngi kégai mennang lao. Eh arunna wanuwa Asyur! Maténi sining gubernurmu, sibawa sining bupatimmu matinroni untu' mannennungeng. Tassiya-siyani ra'ya'mu ri bulué, na dé'gaga muwi séddi tau mulléi tiwii mennang lisu paimeng. Dé' nariyullé mpurai lomu sibawa dé' nariyullé pajjappa. Sininna tau iya méngkalingaéngngi karéba ancurukemmu mappaleppa'i marennu. Saba' manrasa-rasa manenni tauwé nasaba jamu iya dé'é nacappuro. Iyanaé paseng iya napalettu'é Puwangnge lao ri Nabi Habakuk. Oh Puwang, gangka kégika harusu gora méllau pattulung? Uppannapa Muwéngkalingai sibawa mupassalama'ki polé ri appanrasa-rasangngé? Magi Muleppessakka mitai maéga makkuwaro ja? Masa tahak-Ko mitai maéga makkuwaro pelanggarang? Kégi-kégi engka ancurukeng sibawa assasang. Ripakariyawai hukkungngé sibawa adélékengngé dé' naengka naripatettong. Lebbi poréi tau majaé naiya tau malempué, naripasibalékeng adélékengngé. Nainappa makkeda Puwangnge lao ri umma'-Na, “Pénessaiwi bangsa-bangsaé ri seddému, namuhérang matu sibawa bengnga. Saba' ri wettummu engka séuwa maélo Upogau', iya dé'é muwatepperiwi rékko ricuritai bawang lao ri iko. Bangsa Babél iya masegge'é namajapperuro Upancajiwi matu bangsa iya makuwasaé. Mabbarisi'i matu mennang massu polé ri wanuwanna nanajalajja'i sininna linoé untu' patunru'i sininna bangsa-bangsa laingngé. Kégi-kégi paompoi mennang amétaureng; nasibawang atempong nasampéyangngi mennang sininna hukkungngé sangadinna iya siturué sibawa élona. Anyaranna lebbi magattii naiya macang tutul-é, sibawa lebbi masekkangngi naiya serigala iya malupué. Pasukang makkinnyaranna poléi ri wanuwa-wanuwa mabélaé; poléi mennang pada-pada bokang iya séro'éngngi anréna. Maggasai tentarana untu' pogau'i ateddekengngé, métau maneng tauwé mitai apolénna mennang. Tenribilang jumellana tawangenna. Naéllé'i mennang arung-ngarungngé sibawa nacawa-cawaiwi sining pegawé tanré. Naangga éntémmi tungke' bénténgngé, natémpungiwi tana nainappa nasittai bénténgngéro. Nainappa siggatti angingngé joppani sining tau iya pakarajaéngngi awatangeng riyalénaro.” Puwang, riyolopa Iko iyanaritu Allataala. Iko Allataalaku iya mapaccingngé sibawa mannennungeng. Allataalaku sibawa pallinrukku, iyaro bangsa Babél-é Mupiléi sibawa Muwébbui barani untu' hukkukki. Iyakiya pékkugi-Ko tahang mitai sining tau maja iya mabecco'éro? Dé'ga na-Mumapaccing senna untu' mitai jaé? Dé'ga namaja péneddim-Mu mitai dé'é naadélé? Jaji, magi Muwammekko bawang wettunna tau malempué riyancuru ri tomadorakaé? Magi Muwangga'i tolinoé pada-padai balé ri tasi'é, sibawa pada-pada béré-béré iya dé'é gaga pamimpinna? Natikkengngi bangsa Babél-é sining tauwé sibawa méng, samanna mennang baléi. Nassarénréngengngi iyaro sining tauwé ri laleng jala-jalaé namassennas-sennanna bangsa Babél-é sibawa wassélé'na mennang. Nainappa nasompa mennang iyaro jalaé sibawa nawéréngngi pakkasuwiyang akkarobangeng, saba' nasibawang iyaro jalaé lolongenni mennang dallé maona sibawa mancajini madécéng. Masa mennang matteru-terui matu rampui peddanna sibawa mpunoi bangsa-bangsaé, temmaddampeng? Maéloka ménré ri manara jagakku, sibawa tajengngi aga iya maéloé napowada Puwangnge lao ri iyya, na pékkugi pappébalin-Na lao ri addarékékku. Nabalika Puwangnge makkuwaé, “Sobbi'i sibawa manessa ri reppa tana litaé, aga Upannessaé lao ri iko, kuwammengngi weddingngi ribaca sibawa magampang. Okii iyaro, saba' makkekkuwangngé dé'pa nawettunna. Iyakiya iyaro wettué masitta'i polé, na aga iya Upannessaé lao ri iko pasti kajajiyangngi matu. Namuni paitai samanna maitta mupa, iyakiya tajeng bawanni! Iyaro wettué pasti poléi matu sibawa dé'na naripasoro matu. Na éngngerangngi: Tau iya majaé dé' nasalama matu, iyakiya tau iya pogau'éngngi élona Allataala tuwoi matu nasaba atinulurenna lao ri Allataala.” Iyaro asugirengngé tuli nabelléi tauwé. Tau iya mangowaéro matempoi sibawa mauséi. Pada-padai amaténgngé, dé'to naengka nacau; sisullé bangsaé narampasa. Iyakiya sininna iya napatunru'éro nasindiri'i matu sibawa naéllé-kéllé. Makkedai matu mennang, “Tattanroko saba' goppoko barang iya tenniyaé appunnangemmu! Siyagapi ittana mupasugiriwi alému sibawa passai sining tau iya makkinrengngé ri iko untu' wajai inrenna mennang?” Iyakiya dé' umaingekiwi, iko ritu pura caui tau laingngé, makkinreng towi matu sibawa ripassa untu' makkamaja bunga. Poléi matu sining balimmu nanaébbuko métau. Narampo'i matu mennang waramparammu! Purani murampo maéga bangsa, iyakiya bangsa-bangsa iya mullééngngi leppe narampo'ko matu, nasaba abbunowang iya puraé mupogau', sibawa nasaba apéddarammu lao ri wanuwa-wanuwaé, kota-kotaé sibawa pabbanuwana. Tattanroko! Mupasugiriwi kaluwargamu sibawa asarong iya mulolongengngé sibawa majapperu, kuwammengngi naamang bolamu sibawa mabélai polé ri asussangngé nenniya abalaé. Iyakiya iyaro rancanamu banna tiwii siri untu' kaluwargamu. Ri laleng murampo'na maéga bangsa, muparogiwi alému. Mala batu-batué ri témbo'é gora-gorai tanroiko, sibawa alliri-alliri bolaé mangorengngi iyaro gora-goraé. Tattanroko! Mupatettongngi kotaé polé ri jamu nenniya bangungngi sibawa abbunowang. Bangsa-bangsa iya mupatunru'é massussa-sussai temmakkéguna, sibawa sininna séuwa-séuwa iya napatettongngé mennang cappui nanré api. Iya manennaro iyanaritu élona Puwang Iya Pommakuwasaé. Iyakiya pada-pada tasi'é ripennoiwi sibawa uwai, makkuwatoro linoé ripennoi matu sibawa pangissengeng passalenna Puwangnge sibawa akuwasan-Na. Tattanroko! Mupakatunai sibawa mupakasirii bali-balibolamu; muwébbui mennang tassulus-sulung pada-pada tau mabo'é. Makkekkuwangngé narapini lélémmu untu' ripakasiri, natenniya untu' ripakalebbi. Tappinrai matu alebbiremmu mancaji atunang. Napassako matu Puwangnge ménung polé ri énungeng iya mallise'é pahukkungeng ri alému. Ménukko matu sibawa tassulus-sulung. Tubbakko ajukajung ri ale Libanon, na makkekkuwangngé alému ritubbang matu. Muwunoi sining olokolo'na, na makkekkuwangngé napéttauriko olokolo'é. Iya manennaro kajajiyangngi nasaba abbunowang sibawa ajapperuseng iya puraé mupogau' lao risining wanuwaé, kota-kotaé sibawa sining pabbanuwana. Engkai Puwangnge ri laleng Bola-Na iya mapaccingngé; sitinajai sininna tauwé ri linoé mammekko ri yolo-Na. Iyanaé sempajanna Nabi Habakuk: Oh Puwang, uwéngkalingai passalenna pangkaukem-Mu, na pappénedding amaccangngé pennoiwi atikku. Tennapodo pangkaukeng battowaéro Mupakkolingngi sibawa Mupannessai ri wettuttaé. Sitinajanna Muwamaséiki namuni mapellai atim-Mu. Iko Allataala Iya Pommapaccingngé polé ri Téman, Poléko ri buluna Paran. Nasalipuriwi langié arajam-Mu; pennoi linoé sibawa pappojiyang untu' alé-Mu. Poléko sibawa cahaya mattappa, polé ri limam-Mu massui cahaya mattappaé, kuwaniro Musubbu akuwasam-Mu. Musuroi lasaé joppa ri yolo-Mu sibawa maccowéi amaténgngé ri monrim-Mu. Rékko mappésau-Ko, tatténréng linoé; rékko makkita-Ko, maséleng bangsa-bangsaé. Mapuwé-puwé sining bulu mannennungengngé; bulu-bulu mannennungengngé mariyawato, ri bulu-buluénnaro joppa-Ko sipongenna wettu riyolo. Uwitai ra'ya' Kusyan nakenna ataureng, sibawa ténré tau Midiangngé. Oh Puwang, nasaba tasi'koga naménré dara-Mu? Sining saloégga mébbu-Ko macai? Mutonangiwi ellungngé selaku anyarang sibawa karéta musu, wettunna umma'-Mu Muwéréng apakalang. Purani Mupassadiya uso-Mu, sadiyani pana-Mu untu' rileppessang. Nainappa Mupuwé linoé mancaji salo-salo. Naita-Mu, taggottang sining bulué polé ri langié nonnoi bosié pada-pada ritiri'é. Mangoro oninna uwai ri yawana tanaé, mallulung bombangngé sibawa mangappo. Tajjelli tappana sining pana-Mu nataro gatti, pawilo bessim-Mu millak-killang, namappésauna mata essoé sibawa kétengngé ri onronna. Nasibawang ajapperuseng Mujalajja'i linoé; Muléjja-léjja'i bangsa-bangsaé sibawa mapella ati. Majjongkako malluru untu' paleppe'i umma'-Mu sibawa untu' passalama'i arung Mupilé. Muwunrui gangkanna mabuwang pamimpinna tau madorakaé, Musaringngi gangka cappu sininna tomaccowériyéngngi. Sining pana-Mu nabettui pamimpinna pasukanna balié wettunna polé tentarana pada-pada watanna anginrajaé, kuwammengngi naripassara-sarakki. Macawai mennang sibawa masennang pada-pada tau iya mammekko-mekkoé tenre'i tau iya akurangengngé. Nasibawang anyaram-Mu Muléjja'-léjja'i dolangengngé sibawa tasi iya maputé mabbusa. Métau atikku méngkalingai iyaro sibawa ténré témukku. Mancaji malemmaka dé' pakkullékku, ajéku tabbuttu, muwi kégika joppa. Maélo-Ka mattajeng sibawa tennang pahukkungenna Allataala lao risining paggasaé. Namuni pong araé dé'gaga buwana sibawa pong anggoro'é dé'gaga anggoro'na, namuni buwa zaitungngé dé' najaji sibawa wassélé gandongngé ri dare'é mappakacélé, namuni maté maneng sining bimbala'é sibawa dé'gaga lise'na wakké olokolo'é, tuli marennuka matu, saba' Iko Puwang Allataala pappassalama'ku. Muwérékka awatangeng pada-pada ajé jongaé, Mupakkasse'i ajéku. Mupimpikka kuwammengngi amakka wettukku joppa ri bulué. Zéfanya iyanaritu ana'na Kusyi. Atturu-turuseng assossorenna polé ri yawa liyasé iyanaritu Kusyi, Gedalya, Amazia sibawa Arung Hizkia. Iyanaé pasenna Puwangnge lao ri Zéfanya wettunna Arung Yosia ana' Amon paréntai Yéhuda. Makkedai Puwangnge, “Maélo-Ka paccappui sininna séuwa-séuwaé ri linoé: sininna tolinoé sibawa olokolo'é, muttama'ni manu'-manu'é sibawa balé. Uwunoi matu tau majaé. Sininna rupa tauwé Upaccappui matu, dé' muwi séddi tau Uleppessang tuwo. Iyya, Puwang, pura mabbicara. Maélo-Ka hukkungngi pabbanuwana Yérusalém sibawa sininna Yéhuda. Sésa-sésana assompanna Baal Upallennye'i matu polé ri onrong-ngonrongngéro. Imang-ngimang iya tumaningiyéngngi Baal riyallupai sisenni matu. Usaringngi gangka mapaccing nigi-nigi ménré ri pabbingengngé untu' sompai mata essoé, kétengngé sibawa sining wéttowingngé. Upallennye towi matu mennang iya sompaék-Ka sibawa mattanro matinulu lao ri Iyya, iyakiya mattanro towi ri laleng asenna Déwa Milkom. Upaccappui matu mennang iya dé'é nalao ri Iyya iyaré'ga méllauwi pappimpik-Ku sibawa iya salaiyék-Ka na dé' namaélona maccowéri-Ka.” Macawé'ni essona Puwangnge, iyaro essoé tinda'i matu Allataala; rimakkuwannanaro, ammekkono ri yolo-Na. Sadiya-sadiyani Puwangnge untu' mpunoi umma'-Na pada-pada akkarobangeng pakkasuwiyangngé sibawa purani Naundang sining balinna Yéhuda. Makkedai Puwangnge, “Ri esso abbunowangngéro, maélo-Ka hukkungngi sining tomarajaé, sining ana' worowanéna arungngé, sibawa sininna tau iya maccowériyéngngi ade'na tau laingngé. Maélo-Ka hukkungngi sininna tau iya massompaé pada-pada tau iya dé'é naissek-Ka, enrengngé iya ménnauwé sibawa mabbunoé untu' pennoiwi bolana ponggawana mennang sibawa barab-barang rampasa.” Makkuwaiyé adanna Puwangnge, “Iyaro essoé, paéngkalingai matu teriyé ri Gerbang Balé. Paéngkalingai matu sadda mpatingngé polé ri akkampongeng barué, sibawa oni ruttungeng maseroé maddaremmengngi matu polé ri bulu-bulué. Mpatinno sibawa terino wettunna muwéngkalinga iyaro, éh pabbanuwana kotaé ri bagiyang yawa, saba' sininna padangkangngé sibawa sining tau iya mappainrengngé dowi maténi riyuno! Ri wettuéro mala-Ka matu sulo, naugalédai kota Yérusalém. Uhukkungngi matu pabbanuwana iya dé'é napabati-batiro enrengngé iya masennangngénna sibawa aléna muto, sibawa iya mappikkiri'é makkedaé Iyya, Puwang dé' naengka natinda makkuwaé iyaré'ga makkuwaro. Rirampasa'i matu waramparanna mennang sibawa riyancuru'i sining bolana mennang. Patettongngi matu mennang bola, iyakiya dé' naonroiwi. Jamai matu mennang palla anggoro iyakiya dé' naénungngi anggoro'na.” Macawé'ni esso angadélékenna Puwangnge, ya, macawé senna'ni, mala lettu matu sibawa masitta. Iyaro essoé pennoi apesséng, angkanna muwi sining prajuri iya kaminang baranié mowam-mowatto matu nasaba pettu paddennuwangngi! Iyaro essoé esso amacaireng, asukkarakeng sibawa asussang, esso aruttungeng sibawa ancurukeng, esso apettangeng sibawa akalemmengeng, esso iya massalawué. Puppu esso riyéngkalinga oni tarompé'é sibawa kelli musué polé ri pejuwang-pejuwang iya gasaéngngi kota-kota mabbénténgngé sibawa manara-manara tanré. Makkedai Puwangnge, “Maélo-Ka papolé maéga abala ri yasé'na rupa tauwé, angkanna makkapése'i matu pada-pada tau butaé. Madosani mennang lao ri Iyya, na makkekkuwangngé tattiri'i matu darana mennang pada-pada uwai, sibawa sining ujuna makebbongngi ri tompo'na tanaé.” Ri esso iya maseroéro nappaitangngi matu Puwangnge cai-Na, na sininna ulawenna sibawa péra'na dé' naulléi passalama'i mennang. Ancuru'i matu maccolo sininna linoé ritunu ri api cai-Na. Tennasenna-senna ribébbui matu sininna nyawaé ri linoéwé. Eh bangsa iya dé'é naissengngi masiri, mainge'no ri wettu dé'napa mumakelle sibawa marakko pada-pada bungaé! Mainge'no ri wettu dé'napa narapii esso macaina Puwangnge, sibawa nakenna caina Puwang iya malluwa'-luwa'éro. Lisuno lao ri Puwangnge, éh sininna tau iya mariyawa atié ri wanuwaéwé, sibawa sininna tau iya turusiyéngngi parénta-parénta-Na. Tinda'no situru élona Puwangnge, sibawa pakariyawai alému ri yolo-Na. Nigana missekko leppe'ko matu polé ri pahukkungengngé ri esso nappaitanna Puwangnge cai-Na. Ri kota Gaza dé' muwi séddi tau ripassalama matu. Askélon masino-sinoi matu dé' monroiwi. Pabbanuwana Asdod ripaddésu'i matu ri laleng séddié paggasa tennasenna-senna ri lakessoé sibawa pabbanuwana Ekron risuroi matu lao polé ri kotana. Tattanroko, éh tau Filistin, bangsa iya monroé ri sillampé wiring tasi'é. Purani napattette Puwangnge pahukkungengngé untu' alému. Napabbinasako matu, dé' muwi séddi tau polé ri iko leppe matu. Daéramu ri seddéna tasi'é mancaji padang wellai; bola-bola pakkampi sibawa wakké-wakké bimbala ripatettong matu kuwaro. Pabbanuwana Yéhuda iya mullééngngi leppe, natudangiwi matu daéramuro. Mampii matu mennang olokolo ri tanaéro, na ri wennié matinroi matu mennang risining bolana tau Askélongngé. Saba' Puwangnge, Allataalana mennang linrungiwi matu mennassi sibawa pancajiwi mennang madécéng paimeng. Makkedai Puwang Iya Pommakuwasaé, “Purani Uwéngkalinga bangsa Moab-é sibawa Amongngé pakatunai sibawa méllé'i umma'-Ku. Mabboroi mennang maélo sittaiwi tanana umma'-Ku. Nasaba Iyya iya tuwoé, Allataalana bangsa Israélié, Usaringngi matu gangka mapaccing Moab sibawa Amon pada-pada Sodom sibawa Gomora. Iyaro sining wanuwaé pennoi matu sibawa sining bujung pejjé sibawa sining ruttungeng mannennungeng iya natuwoiyé alekale maddori. Sésana umma'-Ku iya leppe'é rampo'i matu pabbanuwana, sibawa sittaiwi tanana mennang.” Makkuwaniro pabbanuwana Moab sibawa Amon rihukkung matu nasaba atemponna sibawa atanréatinna, kuwaéttopa nasaba purai mennang napakatuna umma'na Puwang Iya Pommakuwasaé. Puwangnge mébbui matu mennang métau. Naancuru'i matu sining déwataé ri linoé. Nainappa sininna bangsaé massompai matu lao ri Puwangnge, tungke'-tungke' ri wanuwanna muto. Makkuwatoro pabbanuwana Sudan ripateppaiwi matu pahukkungeng maté ri Puwangnge. Purairo nakkégunangngi matu Puwangnge akuwasan-Na untu' mancuru'i Asyur. Napancajiwi matu kota Niniwé masino-sino sibawa padang kessi iya makabuttué. Kuwaniro olokolo makkonrongngé sibawa sininna rupanna olokolo'é mallekku matu sibawa mappésau. Massarangngi matu kacoci'é ri sésa-sésa ruttungennaro sibawa gora-gora polé ri tello-tellongengngé. Kao-kaoé makkao-kaoi matu ri sumpangngé. Aju camaraé risining bangunanna kotaéro cappui matu riredduki. Iyanaro kajajiyang matu ri kota iya marowaéro sibawa iya mangga'éngngi aléna amang sibawa tennang. Nasengngi pabbanuwana makkedaé iyaro kotana mennang kota kaminang battowa ri linoé. Temmaka sino-sinona daéraéro, dé'gaga monroiwi sangadinna olokolo ale iya massarangngé kuwaro! Tungke' tau iya laloé ri kotaéro tasséleng matu sibawa taggeringkering. Tattanroi Yérusalém, kota solang iya pojiyéngngi maronta lao ri Puwangnge sibawa iya tenre'éngngi pabbanuwana muto! Macilakai kota iya dé'é namaélo tarimai papparéngngeranna Puwangnge, sibawa dé'to nabati-batiwi pakkamparen-Na, iya dé'é nabbéréyangngi totona lao ri Puwangnge, sibawa dé' naéllau tulung ri Aléna. Sining tomarajana kotaéro padai singa iya mangngaungngé. Sining hakinna padai serigala iya malupué; mangowa senna angkanna muwi séddi buku dé'to gaga nasalai untu' bajana. Nabi-nabinna dé' nappunnai rasa tanggung jawa' sibawa dé' nawedding riyatepperi; sining imangngé napanajisi'i aga ripallaing untu' Puwangnge sibawa napasibalékengngi hukkung-hukkunna Allataala untu' asaronna mennang. Iyakiya engka mupi Puwangnge ri kotaéro; tuli Napogau'i iya tongengngé sibawa dé' naengka iya salaé. Tungke' élé pasti mabbéréi adélékeng lao ri umma'-Na. Iyakiya tau iya dé'é naissengngi adélékengngé ri kotaéro tette'i pogau'i majaé tennaisseng masirié. Makkedai Puwangnge, “Purani Upallennye maéga bangsa; Uwancuru'i kota-kotana mennang, sibawa Upancajiwi sésa-sésa ruttungeng témbo'-témbo'na sibawa manara-manarana mennang. Masino-sinoi kota-kotana mennang dé' monroiwi sibawa masino-sinoi sining lalenna lalenna. Pikkiri'-Ku, ‘Makkekkuwangngé pasti napakalebbi-Ka matu umma'-Ku sibawa jampangiwi sininna pakkamparek-Ku. Tentu maréngngerangngi mennang pappagguruwang iya Uwabbéréyangngé lao ri mennang.’ Iyakiya annessana, lebbi mapatoi mennang pogau'i majaé naiya ri yolona. Iyakiya jagako! Tajeng bawanni essona tokkok-Ka matu selaku papparape. Saba' purani Upettui untu' paddeppungengngi bangsa-bangsaé sibawa akkarungeng-akkarungengngé untu' pateppai cai-Ku ri yasé'na mennang. Cappui matu sininna linoé nanré api cai-Ku. Iyakiya ri munri Upinrai matu atinna bangsa-bangsaéro, angkanna massempajangngi mennang lao ri Iyya bawang, na tenniya lao ri déwata-déwata laingngé. Iyaro bangsa-bangsaé naturusi manek-Ka matu. Mala polé ri Sudan iya mabélaé, umma'-Ku iya massara-sarangngéro poléi matu sibawa makkasuwiyangeng akkarobangeng lao ri Iyya. Iyaro wettué, éh umma'-Ku, dé' naparelluko masirina nasaba purako maronta lao ri Iyya. Upaddésu'i matu tungke' tau iya matempoé sibawa matanré atié, sibawa dé'na mumaronta'na matu lao ri Iyya ri bulu-bulu-Ku iya mapaccingngé. Uleppessangngi matu kuwaro mattette séuwaé bangsa iya mariyawa atié, iya mattuwangngéngngi pattuluk-Ku. Weddingngi mennang monro kuwaro. Tau Israél iya risésaé mupa, dé'na matu napogau'i majaé muwi lao ri niga; dé'na matu nabbelléna sibawa dé'tona napabengnguwang. Madécéngngi matu mennang sibawa saléwangeng, sibawa dé' namétau lao ri nigi-nigi.” Eh Israélié, gora-gorano sibawa makkélong! Eh Yérusalém, akkérennuno sibawa sukku ati! Saba' mappésauwi Puwangnge hukkukko; purai napaddésu sininna balimmu. Rilinrungiko ri arunna Israélié, Puwam -mu muto. Makkekkuwangngé dé'na naparelluko métauna. Narapii matu wettunna makkedai matti sining tauwé, “Eh Yérusalém, aja' mumétau sibawa makawa atimmu. Rilinrungiko ri Puwang Allataalamu iya baranié. Pakalako nasaba akuwasan-Na. Marennui sibawa mariyo-riyoi Puwangnge nasaba iko, ri laleng pammasé-Na Nawérékko atuwong mabaru. Nasaba iko, Aléna makkélongngi marennu pada-pada tau iya mattengngangngé mappésta.” Makkedai Puwangnge, “Abala iya mancangngékko Upaddéi. Atunammu purani Uledda. Poléi matu wettunna Uwancuru'i tau tenre'ékko, sibawa tau képpangngé Upassalama'i; sininna tau ripalié Upimpingngi lisu. Atunanna mennang Upinrai mancaji alebbireng; kégi-kégi, mala ri sininna linoé, ripakalebbii matu mennang sibawa ripoji. Poléi matu wettunna, pabbanuwamu iya tassiya-siyaé Upimpingngi lisu. Uwébbuko tarompo ri sininna linoé, sibawa adécéngemmu Upalisui matu paimeng.” Puwangnge pura mabbicara. Ri taung maduwaé apparéntanna Arung Darius ri yasé'na Persia, ri tanggala séddinna uleng maennengngé, mabbicarai Puwangnge naolai Nabi Hagai. Iyaro pasenna Puwangnge napattujui lao ri Zérubabél ana' Séaltiél, gubernurna Yéhuda, sibawa lao ri Imang Lompoé Yosua ana' Yozadak. Makkedai Puwang Iya Pommakuwasaé lao ri Hagai, “Makkedai iyaé bangsaé makkedaé tenniyapa wettunna untu' patettongngi paimeng Bola-Ku.” Nainappa naolai Nabi Hagai, makkedai Puwangnge lao ri umma'-Na, “Eh umma'-Ku, wettunnanaga monroko ri lalempola iya masse'é namawatang, na Bola-Ku maddupa mupi ruttungeng? Coba pénessaiwi keadaammu! Purano mampo maéga biné, iyakiya céddé éngngalammu. Engka inanrému, iyakiya dé' nagenne untu' pamessoriwi babuwamu. Mappunnaiko anggoro, iyakiya dé' nagenne untu' pajinnai atimmu. Mappunnaiko pakéyang, iyakiya dé' nagenne untu' pellaiwi alému. Sibawa saro iya natarimaé koli-kolié dé' nagenne untu' sambungngi atuwonna mennang. Dé'ga mumainge, magi nakajajiyang gau'éro? Makkekkuwangngé, énré'no ri bulu-bulué untu' mala aju, nainappa mupatettong Bola-Ku; naumasennang matu sibawa risompasi-Ka matu pékkugi mestinna. Cobai pénessaiwi keadaammu! Muwaddennuwangiwi wassélé éngngalang iya maonaé, annessana céddé senna mulolongeng; mutiwii lisu, iyakiya iyaro wassélé éngngalammu Uwarungngi, angkanna cappu natiwi angingngé. Magi Upogau'i iyaro? Pappébalinna iyanaritu: Nasaba Bola-Ku maddupa mupi ruttungeng, na iko maneng mapatoko patettongngi bolamu tungke'-tungke'. Iyanaro saba'na nateppudu-pudu teppa bosié angkanna dé'gaga tanet-taneng iya weddingngé tuwo. Purani Upapolé tikkaé ri yasé'na tanaé sibawa bulu-bulué, ri yasé'na sining dare' gandongngé sibawa palla-palla anggoro'é enrengngé palla-palla zaitungngé, sibawa ri yasé'na sininna tanet-tanengngé ri tanaéwé, mala makkuwatoro ri yasé'na tolinoé sibawa olokolo'e enrengngé sininna séuwa-séuwa iya muusahakangngé.” Nainappa Zérubabél sibawa Yosua enrengngé sininna umma Israél iya lisuénna polé ri appalirengngé ri Babél, turusiwi ada-adanna Hagai, surona Puwang -ngéro. Napogau'ni mennang aga iya napparéntangngé Puwangnge lao ri mennang, nasaba métaui lao ri Puwangnge. Nainappa napalettu Hagai lao ri ra'ya'é pasenna Puwangnge makkedaé purani Puwangnge majjanci maélo linrungiwi mennang. Makkuwaniro Puwangnge pakédoi atinna Gubernur Zérubabél, Imang Lompo Yosua enrengngé sininna tau iya lisuénna polé ri appalirengngé, kuwammengngi najjama maneng mennang patettongngi Bolana Puwang Iya Pommakuwasaé, Allataalana mennang. Mammulani mennang majjama ri tanggala duwappulona eppa, uleng enneng ri laleng taung maduwaé wettu apparéntanna Arung Darius. Ri tanggala duwappulona séddi, uleng pitu ri laleng taungngéttoro, mabbicarasi Puwangnge naolai Nabi Hagai. Puwangnge suroi Hagai mabbicara lao ri Gubernur Zérubabél, Imang Lompo Yosua, enrengngé ra'ya'é untu' palettu'i pasengngéwé, “Engkaga ri yelle'mu iya méngngerangngé mupi pékkugi gellona Bola-Kué riyolo? Makkekkuwangngé pékkugi keadaanna, manuru pallolongemmu? Dé' sises-siseng namappésennang? Iyakiya, aja' mupettu paddennuwang, éh iko maneng! Patterui iyaro jama-jamangngé, saba' tette'-Ka matu bantuko. Wettummu massu polé ri Maséré, pura-Ka majjanci tuli maélo linrungiko matu. Na makkekkuwangngé Ulinrungi mupo. Jaji, dé' naparelluko manennenneng. Ri laleng wettu iya macawé'é maélo-Ka pataggottangngi langié sibawa linoé, pottanangngé sibawa tasi'é. Upawéwang manengngi matu sininna bangsaé sibawa ritiwii matu waramparanna lao Kumaiyé, angkanna pennoi matu Bola-Ku sibawa asugirenna mennang. Sininna ulawengngé sibawa péra'é ri linoéwé iyanaritu appunnangek-Ku. Bola-Ku iya mabarué lebbi magelloi matu naiya riyoloé, na-Uwabbéréyangngi matu kuwaé adaméngengngé sibawa adécéngengngé lao ri bangsa-Ku.” Puwang Iya Pommakuwasaé pura mabbicara. Ri tanggala duwappulona eppa uleng aséra ri laleng taung maduwaé apparéntanna Arung Darius, mabbicarasi Puwang Iya Pommakuwasaé lao ri Nabi Hagai. Adan-Na, “Ellauwi apettunna sining imangngé passalenna persoalangngéwé: Akkalarapanna engka tau mala sikare' juku polé ri akkarobangeng iya riyakkasuwiyangengngé lao ri Puwangnge, nainappa natiwi lisu ri laleng leppinna jumbana, nainappa nasibawang jumbanaro nagéssai rotié iyaré'ga séuwaé nasu-nasu, iyaré'ga anggoro'é, iyaré'ga minnya zaitungngé, iyaré'ga inanré agi-agi, aga iya manennaro mancaji mapaccing towi?” Wettunna napangolo Hagai pakkutanaéro, mappébaliwi sining imangngé, “Dé'.” Nainappa makkutanasi Hagai, “Akkalarapanna engka tau mancaji najisi' nasaba géssai uju, nainappa nagéssa sala séddinna polé ri inanréro, aga mancaji najisi' towi iyaro inanré?” Nappébali sining imangngé, “Iyyé, tentuni!” Nainappa makkedasi Hagai, “Napowadai Puwangnge makkedaé iyaro peraturangngé takkenna towi untu' umma Israélié ri wanuwaéwé sibawa lao ri sininna séuwa-séuwaé iya napowassélé'é mennang. Jaji, aga nakkasuwiyangeng mennang ri mézbaéwé iyanaritu najisi'i.” Makkedai Puwangnge, “Coba pénessaiwi aga puraé kajajiyang ri yolona essoéwé, iyanaritu dé'napa naripédécéngi Bola-Kué! Pékkugi keadaammu wettuéro? Poléno mitai goppo gandongngé sibawa muwasengngi lolongekko matu 200 kilo gandong, iyakiya annessana banna engka 100 kilo. Laoko untu' séro' 100 bang anggoro polé ri darong anggoro'é, iyakiya iya engkaé banna 40 bang. Purana panonno anging pella sibawa bosi batu untu' mancuru'i sininna wassélé dare'mu, iyakiya dé'topa mumaélo lisu ri Iyya. Iyaé essoé, tanggala duwappulo eppa uleng aséra, purani ripasang pandaménna Bola-Ku! Pénessaiwi aga kajaiyang matu mappammulai essoéwé. Namuni dé'na gaga gandong monro, sibawa pong anggoro, pong ara, pong dalima sibawa pong zaitungngé dé'pa nabbuwa, iyakiya mappammulai wettuéwé maélo-Ka barakkakiko!” Iyatoro essoé, iyanaritu tanggala duwapulo eppa uleng aséra, nabbéréyangngi Puwangnge pasen-Na iya maduwaé lao ri Hagai, untu' ripalettu ri Gubernur Zérubabél. Adanna Puwangnge, “Dé'na namaitta Ugottangngi langié sibawa linoé, akkarungeng-akkarungengngé Uruttungngi sibawa akuwasanna mennang Uwancuru'i. Karéta-karéta musué sibawa tonangiyéngngi Ubaliccuwai; sininna anyaranna matéi matu sibawa sining pakkinnyaranna sisulléi matu siyuno. Iyaro essoé iko Zérubabél, atak-Ku, Uwakka matu untu' mapparénta ri laleng asek-Ku. Nasaba iko ritu pura Upilé.” Puwang Iya Pommakuwasaé pura mabbicara. Ri uleng maaruwaé ri laleng taung maduwaé apparéntanna Arung Darius ri yasé'na Persia, napalettu'i Puwangnge iyaé pasengngé lao ri iyya, Nabi Zakharia ana' Bérékhya sibawa eppona Ido. Naparéntakka Puwangnge untu' makkeda makkuwaé lao ri umma'-Na, “Ri wettu labe'é Iyya, Puwang Iya Pommakuwasaé, macai senna lao ri néné-nénému. Iyakiya makkekkuwangngé makkeda-Ka lao ri iko: Lisuno lao ri Iyya, naulisuto lao ri iko. Aja' mupada-pada néné-nénému. Riyolo napalettu'i sining nabié pasek-Ku lao ri mennang kuwammengngi aja'na mennang napogau'i majaé sibawa pogau' dosa. Iyakiya dé' mennang napaduliwi sibawa dé' namaélo turu lao ri Iyya. Kégani néné-nénému sibawa iyaro nabi-nabié makkekkuwangngé? Dé'ni gaga mennanna. Naolai sining nabié ata-atak-Kuro, Upalettu'i parénta-parénta-Ku sibawa sining papparéngngerak-Ku lao ri néné-nénému. Iyakiya dé' nabati-batiwi mennang angkanna harusu'i natanggung mennang addimonrinna. Nainappa mennang massesse kalé sibawa mangakuiwi makkedaé Iyya, Puwang Iya Pommakuwasaé, pura hukkungngi mennang situru sibawa asalanna mennang, nenniya situru sibawa attentuwak-Ku.” Ri tanggala duwappulona eppa uleng Syébat, iyanaritu uleng seppulo séddi, ri laleng taung maduwaé apparéntanna Arung Darius, napalettu'i Puwangnge pasen-Na lao ri iyya. Ri laleng séuwaé pakkitang ri wennié, uwitai malaéka'na Puwangnge tonangi si kaju anyarang cella. Mappésauwi ri séddié lompo ri yelle'na ajukajung murad-é. Ri monrinna tentongngi siyagangngaré kajunna anyarang iya laingngé, engka macella, engka balibi sibawa tembaga. Makkutanaka lao ri aléna, “Puwang, aga bettuwanna iya manenna iyaé anyarangngé?” Mappébaliwi, “Uwappaitangngi matu bettuwanna lao ri iko. Rikiringngi mennang ri Puwangnge untu' paréssai linoé.” Iya manenna anyarangngéro nalaporo'i lao ri malaéka'é, “Purani rijalajja sininna linoé, annessana iyaé linoé tennanni sibawa amang.” Nainappa makkeda iyaro malaéka'é, “ Puwang Iya Pommakuwasaé, pituppulo taung ittana macaiko lao ri Yérusalém sibawa kota-kotaé lao ri Yéhuda. Gangka kégi tette'-Ko matu macai sibawa dé' muwaddampengengngi mennang?” Puwangnge baliwi iyaro malaéka'é sibawa ada-ada iya massaléwoé, sibawa iyaro malaéka'é nasuroka palettu'i aga napowada Puwang Iya Pommakuwasaé, “Uwamaséi senna'i sibawa mappakaessé-essé kota Yérusalém, kota-Ku iya mapaccingngé. Iyakiya macai senna'-Ka lao ri bangsa-bangsa iya marasa amangngé sibawa tennangngé. Nasaba wettuk-Ku tahangngi cai-Ku ri yasé'na umma'-Ku, iyaro bangsa-bangsaé natambaiwi anrasa-rasanna umma'-Ku. Makkekkuwangngé lisu-Ka ri Yérusalém untu' mabbéré paddampeng lao ri kotaéro. Ripatettongngi matu paimeng Bola-Ku sibawa ripalisui matu paimeng Yérusalém.” Iyaro malaéka'é nasuro tokka palettu'i iyaé pasengngé, “ Puwang Iya Pommakuwasaé majjanciwi makkedaé mancaji madécéngngi matu paimeng kota-kota-Na sibawa siseppi Natulung matu Yérusalém sibawa mangakuiwi selaku appunnangeng riyalé-Na.” Ri laleng pakkitang iya laingngé, mitaka eppa tanru saping. Makkutanaka lao ri malaéka' iya puraé mabbicara lao ri iyya, “Aga bettuwanna iyaro tanru'-tanru'é?” Mappébaliwi, “Iyaro tanru'-tanru'é iyanaritu napulambangngi sining akkarungeng mawatangngé iya patassiya-siyaéngngi pabbanuwana Yéhuda, Israélié sibawa Yérusalém.” Nainappa nappaitang Puwangnge lao ri iyya eppa tau panré bessi iya tiwié palu-palu. Makkutanaka, “Aga akkattana apolénna mennang?” Mappébaliwi, “Untu' patatténréngngi sibawa galéttéi bangsa-bangsa iya puraé mancuru'i Yéhuda enrengngé patassiya-siyai pabbanuwana.” Ri laleng pakkitang rappina mitaka séddi worowané iya makkatenningngé tulu pangukkuru. Makkutanaka, “Kégiki maélo lao?” Nappébali, “Maéloka mukkuru'i Yérusalém, macinnaka missengngi siyaga lampéna sibawa sakkana kotaéro.” Nainappa uwita malaéka' iya puraé mabbicara sibawa iyya'ro, majjongka malluru, sibawa séddi malaéka' laing méwai sita. Makkedai malaéka' mammulangngé lao ri malaéka' iya maduwaé, “Laono masitta ri kalloloéro, namupowadangngi makkedaé makkuwamani matu ripennoinna Yérusalém sibawa tau enrengngé olokolo angkanna dé' namakkullé ripatettong témbo'é ri mattulilinna. Puwangnge pura majjanci makkedaé aléna matu mancaji témbo' api iya mattulilingiyéngngi kotaéro untu' linrungiwi sibawa monroi matu kuwaro ri laleng sininna akuwasan-Na sibawa arajan-Na.” Niga gasako, nagasai buwa atik-Ku.” Nanasurona Puwang Iya Pommakuwasaé palettu'i iyaé pasengngé lao ri bangsa-bangsa iya puraé rampo'i umma'-Na, “Aléna Puwangnge méwako matu! Narirampo'ko matu ri ata-atammu muto riyolo. Rékko kajajiyangngi gau'éro, muwissengngi matu makkedaé Puwang Iya Pommakuwasaé pura suroka.” Makkedai Puwangnge, “Akkélonno sibawa marennu éh pabbanuwana Yérusalém! Maélo-Ka monro ri tengnga-tengngamu!” Iyaro wettué maéga bangsa lao matu ri Puwangnge untu' mancaji umma'-Na. Monroi matu ri tengnga-tengngamu, namuwissengngi matu makkedaé Puwangnge pura kirikka lao ri iko. Siseppi Yéhuda mancajiwi matu appunnangeng ripallainna Puwangnge ri tana-Na iya mapaccingngé, sibawa Yérusalém mancajiwi matu kota iya kaminang Naéloriyé. Ammekko manenno ri yolona Puwangnge! Nasaba joppani polé ri onrong Naonroiyé ri surugaé. Ri laleng pakkitang iya laingngéssi, nappaitangngi Puwangnge lao ri iyya Imang Lompo Yosua mattengngang tettong ri yolona malaéka'na Puwangnge. Ri seddéna Yosua, tettonni Sétangngé iya sadiyaénna untu' tenre'i. Makkedai malaéka'na Puwangnge lao ri Sétangngé, “Tennapodo Puwangnge hukkukko éh Sétang! Tennapodo iya méloriyéngngi Yérusalém hukkukko. Iyaé tauwé padai appulu iya rigettengngé polé ri luwa' apié.” Tettongngi Yosua kuwaro paké pakéyang macarépa senna. Namakkedana iyaro malaéka'é lao ri pabbantu-pabbantué ri surugaé, “Abbéyanni pakéyang carépa iya napaké tauwéwé.” Sibawa lao ri Yosua makkedai, “Purani uwabbéyang dosamu, uwérékko matu pakéyang iya mabarué.” Naparéntanni pabbantu-pabbantunna untu' mappasang passapu iya mapaccingngé ri ulunna Yosua. Turuni mennang sibawa puranaro mennang pappakéiwi pakéyang iya mabarué sibawa rijagai ri malaéka'na Puwangnge. Nainappa iyaro malaéka'na napalettu adanna Puwangnge lao ri Yosua, “Rékko mupatoiwi hukkung-hukkuk-Ku nenniya pogau'i jama-jamang iya uwéréngngékko, untu' matteru weddikko mancaji pamimping ri laleng Bola-Ku sibawa murusu'i seddéna. Uwéngkalingai matu sining sempajammu, pada-pada uwéngkalingai sempajanna sining malaéka iya engkaé ri seddé-Ku. Engkalingai éh Imang Lompo Yosua, makkuwatoro iko imang-ngimang iya mancajiyé sellao-sellaona, iko maneng iyanaritu lambanna wettu mangolo iya makessingngé. Iyaro wettué Usuroi matu atak-Ku iya riyasengngé ‘Cura'’. Upalénne'i matu ri yolona Yosua séddi batu massulapa pitu iya Usobbi'é matu sibawa oki-oki. Ri laleng si essoé Uwabbéyangngi matu dosaé polé ri wanuwaéwé. Rékko narapini iyaro essoé, tungke' tau naobbii matu balibolana untu' polé sibawa péneddingiwi adaméngengngé nenniya asaléwangengngé ri tengnga-tengngana palla-palla anggoro'mu sibawa ajukajung aramu.” Malaéka' iya puraé mabbicara lao ri iyya'ro polési sibawa tedduka pada-pada teddué tau matinro. Makkutanani, “Aga muwita?” Mappébalika, “Séddi ajé lampu polé ri ulawengngé. Ri cappa yasé'na engka onrong minnya'na, sibawa ri mattulilinna engka pitu lampu, iya tungke'-tungke'é mappunnai pitu onrong sumbung. Ri seddé atau sibawa abéyona ajé lampuéro engka duwa pong zaitun.” Nainappaka makkutana lao ri malaéka'éro, “Aga iya ripulambangngé ri barab-barangngéro, Puwang?” “Dé'ga muwissengngi?” pakkutanana lao ri iyya. Pappébalikku, “Dé' Puwang.” Iyaro malaéka'é nasuroka palettu'i lao ri Zérubabél pasenna Puwang -ngéwé, “Tenniya nasibawang awatangeng tentara sibawa tenniyato nasibawang awatangeng riyalé mumallolongeng matu, sangadinna nasibawang Roh-Ku. Muwi pallawa silloppoé bulué maddésu'to matu polé ri yolomu. Mupatettongngi matu paimeng Bola-Ku, na wettunna mupalénne batu iya mapongngé ri onronna, gorai matu sining tauwé, ‘Anengka makkuwa gellona!’ ” Nainappa polési paseng iya laingngé polé ri Puwangnge. Adan-Na, “Purani napalénne Zérubabél pandaménna Bola-Ku, sibawa napattépui matu sininna bolaéro. Rékko kajajiyangngi iyaro, naissengngi matu umma'-Ku makkedaé Iyya ritu pura suroko Zakharia lao ri mennang. Makkedai iyaro malaéka'é lao ri iyya, “Iya pitu lampuéro iyanaritu iya pitu matanna Puwangnge iya jagaiyéngngi sininna tompo'na linoé.” Engka dé' nabati-batiwi iyaé kajajiyangngé. Iyakiya naitai matu mennang Zérubabél patterui appatettongenna Bola-Ku, sibawa marennui matu mennang.” Nainappaka makkutanasi ri aléna, “Aga bettuwanna iya duwa pong zaitungngé ri atau abéyona lampuéro? Aga topa bettuwanna takké zaitun ri benrénna iya duwa pipa ulaweng iya passolo'éngngi minnya zaitungngéro?” Pappébalinna ri iyya, “Dé'ga muwissengngi?” “Dé' Puwang.” pappébalikku. Makkedani, “Iyaro iyanaritu duwa tau iya puraé napilé Puwangnge sininna alangngé sibawa rijello untu' Tumaningiwi.” Upénessaisi paimeng, na iya sisengngé uwitai séddi kitta rilulung luttu ri yelle'é. Iyaro malaéka'é nakkutangngi aga uwita. Pappébalikku, “Séddi kitta rilulung luttu ri yelle'é. Lampéna aséra météré sibawa sakkana eppa sitengnga météré.” Nainappa makkutana lao ri iyya, “Ri kitta lulungngéro tarokii tanroé lao ri sininna wanuwaéwé. Ri leppang yolona tarokii makkedaé tungke' pangaé ripassui matu polé ri wanuwaéwé. Na ri leppang lainna tarokii makkedaé tungke' tau iya mattanro bellé-bellé ripassu towi matu. Makkedai Puwang Iya Pommakuwasaé makkedaé iyaro tanroé napatakkennai matu ri yasé'na bolana tungke' pangaé sibawa bolana tungke' tau iya mattanro bellé-bellé. Iyaro sining bolaé nakennai matu matteru-teru iyaro tanroé narapi mancaji ruttungeng.” Momposi iyaro malaéka'é sibawa makkeda, “Itai! Engkasi polé!” Pakkutanaku, “Aga iyaro?” Pappébalinna, “Séddi baka. Iyanaro lambanna dosaé polé ri sininna wanuwaé.” Iyaro bakaé mappunnaiwi pattongko polé ri tumeraé. Ri wettu upénessainna, tarakkani iyaro pattongkoé na annessana ri laleng bakaéro tudangngi séddi makkunrai. Makkedai iyaro malaéka'é, “Iyaé makkunraié napulambangngi jaé.” Nainappa natenre paimeng iyaro makkunraié ri laleng bakaé nanatongkoi iyaro bakaé. Makkitaka ri yasé nauwitai duwa makkunrai luttu lao ri iyya. Mappunnaiwi mennang panni iya masse'é pada-pada panni coko'é. Nalai mennang bakaé onna nanatiwii mennang luttu. Makkutanaka lao ri malaéka'éro, “Kégai mennang natiwi iyaro bakaé?” Pappébalinna, “Ri Babél, kuwaniro mennang maélo patettong bola déwata untu' aléna. Rékko tépuni iyaro bola déwataé, nataroni iyaro bakaé kuwaro untu' nasompa.” Lolongekka pakkitang iya laingngé. Iyaé sisengngé mitaka eppa karéta musu massu polé ri pallawangenna duwa bulu gessa. Iyaro sining karétaé nagettengngi anyarang mappasangngé, iya mammulangngé anyarang cella, iya maduwaé anyarang bolong, iya matellué anyarang tembaga sibawa iya maeppaé anyarang balo. Makkutanaka lao ri malaéka'éro, “Puwang, aga bettuwanna iyaé sining karétaé?” Mappébaliwi, “Joppai mennang lao ri iya eppa sulapa'é puranana mennang mangolo ri Puwang sininna alangngé. Karéta musu iya nagettengngé anyarang bolong mattujui ri Babél ri manorang. Anyarang tembagaé mattujui ri yajang sibawa anyarang iya baloé mattujui ri wanuwaé ri yattang.” Wettunna massu iyaro anyarang baloé, paitai mennang dé' nasabbara untu' lao paréssai linoé. Makkedai iyaro malaéka'é, “Laono untu' paréssai linoé!” Nanalaona mennang. Nainappa mangobbi iyaro malaéka'é lao ri iyya, “Anyarang iya laowé ri Babélro purani napasoro caina Puwangnge.” Puwangnge mabbéréyangngi iyaé pasengngé lao ri iyya. Adan-Na, “Alani pakkasuwiyang iya nabbéréyangngé Héldai, Tobia sibawa Yédaya, iyanaritu sining tau iya nappa lisué polé ri appalirengngé ri Babél. Tiwini masitta pakkasuwiyanna mennanro ri bolana Yosia ana' Zéfanya. Polé ri ulaweng sibawa péra' pabbéréna mennanro, ébbuno séddi passigera namupasangngi ri ulunna Imang Lompo Yosua ana' Yozadak. Palettukengngi makkedaé Iyya Puwang Iya Pommakuwasaé makkeda, ‘Tau iya riyasengngé Cura', mallolongengngi matu ri onrong iya naonroiyé sibawa napatettongngi matu paimeng Bolana Puwangnge. Aléna ritu patettongngi matu Bola-Ku sibawa tarima pappakalebbi pada-pada séddié arung, sibawa mapparéntai matu ri yasé'na ra'ya'na. Séddi imang ranrengngi matu sibawa sisamai matu mennang majjama sibawa sipammasé-masé.’ Iyaro passigera'é ritaroi matu ri Bola-Ku untu' paréngngerangiwi Héldai, Tobia, Yédaya, sibawa Yosia. Poléi matu sining tauwé polé ri onrong iya mabélaé sibawa tulungngi patettongngi Bola-Ku. Narékko tépuni iyaro appatettongengngé, naissengngi matu mennang makkedaé Iyya Puwang Iya Pommakuwasaé pura suroko lao ri mennang. Iya manennaro kajajiyangngi matu rékko tonget-tongengngi mennang pennoiwi parénta-parénta-Ku, Puwang Allataalana mennang.” Ri tanggala seppulona eppa uleng Kisléw, iyanaritu uleng aséra, ri laleng taung maeppaé apparéntanna Arung Darius, mabbérési paseng Puwangnge lao ri iyya. Pabbanuwana Bétel pura suroi Sarézer sibawa Régém-Mélék enrengngé ana' buwana lao ri Bolana Puwang Iya Pommakuwasaé untu' méllauwi barakka'-Na. Risuro towi mennang makkutana lao ri imang-ngimangngé sibawa sining nabié, makkuwaé, “Parellu mupi'ga mpatingiwi Bolana Puwangnge sibawa mappuwasa ri tungke' uleng malimaé pada-pada iya puraé ripogau' mattaut-taung ittana?” Iyanaé pasenna Puwangnge iya laowé ri iyya. Adan-Na, “Palettu'i lao ri sininna pabbanuwana wanuwaéwé sibawa lao risining imangngé, makkedaé puwasaé sibawa awatingeng iya napogau'é mennang ri uleng malimaé sibawa mapitué ri laleng pituppuloé taungngéwé tenniya appakalebbireng untu' alé-Ku. Makkuwatoro wettunna mennang manré sibawa ménung, sappai mennang asennangeng riyalé.” Iyanro napowada Puwangnge naolai nabi-nabié ri wettu labe'é wettunna Yérusalém riyonroi mupa sibawa madécéng pabbanuwana. Iyaro wettué tauwé dé' na ri désa-désaémmi bawang monro ri seddéna kotaé iyakiya mala ri bagiyang yattang sibawa ri pong bulué ri seddé yajang. Puwang Iya Pommakuwasaé mabbéréyangngi iyaé pasengngé lao ri iyya, “Mattaut-taung iya labe'é Uwabbéréyangngi iyaé sining paréntaé lao ri umma'-Ku, ‘Harusu'ko kédo adélé, maressé babuwa sibawa makessing ati lao ri pada-padammu. Aja' mutenre'i sining jandaé, ana'-ana' béué, sining tau laingngé iya mattette'é ri tengnga-tengngamu, iyaré'ga nigi-nigi ri laleng keadaang masussaé. Sibawa aja'to murancanai majaé lao ri pada-padammu.’ Iyakiya matedde atiwi umma'-Ku sibawa dé' sises-siseng namaélo méngkalingai; nalape'i daucculinna mennang kuwammengngi dé' namaréngkalinga. Napateddekiwi atinna mennang angkanna mancaji sittedde batué. Macai senna'-Ka nasaba dé' naturusiwi sining pappagguruwang iya puraé Uwabbéréyang lao ri mennang naolai nabi-nabié riyolo. Dé' ubaliwi sempajanna, nasaba dé'to mennang naéngkalingai wettuk-Ku mabbicara. Pada-padai anginrajaé, purai Usaring mennang angkanna tarapassai mennang monro ri wanuwa-wanuwa laingngé. Tana iya macommo'éwé mancajini masino-sino dé' monroiwi sibawa makabuttu.” Puwang Iya Pommakuwasaé mabbéréyangngi iyaé pasengngé lao ri iyya, “Macinna senna'ka tulungngi Yérusalém nasaba Uwamaséi senna'i pabbanuwana, nasaba pammasé-Kuro, mapellai atik-Ku lao risining balinna kotaéro. Maélo-Ka lisu lao ri Yérusalém, kota-Ku iya mapaccingngéro, sibawa monro kuwaro. Riissengngi matu kota Yérusalém selaku kota iya matinulué, sibawa Bulu-buluna Puwang Iya Pommakuwasaé riteppui matu Bulu-bulu Mapaccing. Ri tana lapanna Yérusalém, tudassi matu paimeng sining néné worowané sibawa makkunraié iya macowa senna'énna angkanna harusu'i joppa sibawa tekkeng. Lalel-lalengngé ri kotaé pennosi matu sibawa ana'-ana' iya macculé-culé. Iyaro gau'é paitai mustahélé untu' sining iya tuwoé mupa polé ri bangsaéwé, iyakiya dé' namustahélé lao ri Iyya. Upassalama'i matu umma'-Ku polé ri wanuwa-wanuwa onronna mennang pura ritiwi, sibawa tiwii mennang lisu polé alau sibawa polé ri yajang, angkanna monroi mennang ri Yérusalém paimeng. Mancajiwi matu mennang umma'-Ku na Iyya Allataalana. Uparéntai matu mennang sibawa matinulu nenniya adélé.” Makkedai Puwangnge lao ri umma'-Na, “Péwatangiwi atim-Mu! Makkekkuwangngé muwéngkalinga towi ada-ada iya puraé napowada sining nabié wettunna ripasang pandaménna, untu' patettongngi paimeng Bola-Ku. Ri yolona wettuéro dé'gaga mulléi séwai awatangeng tolinoé iyaré'ga olokolo'é, sibawa dé'to gaga iya amangngé polé ri pagganggunna balié. Purani upattanru bimbala'na séddié tau sibawa laingngé. Iyakiya makkekkuwangngé sining tau iya tuwoé mupa polé ri bangsaéwé Ugaukengngi sisala sibawa riyolo. Mampoi matu biné sibawa damé. Mabbuwai matu sining pong anggoro'na mennang, mabbéréi matu wassélé tanaé, sibawa teppai matu bosié sibawa maona. Sininna barakka'éro Uwabbéréyangngi lao risining tau iya tuwoé mupa polé ri bangsaéwé. Eh pabbanuwana Yéhuda sibawa Israélié! Ri wettu iya labe'é, rékko sining tau laingngé sisulléi sitanro, makkedai mennang, ‘Tennapodo abala iya kennaéngngi Yéhuda sibawa Israélié kenna tokko!’ Iyakiya Upassalama'ko matu, angkanna sining tau laingngéro makkedai matu lao ri pada-padanna, ‘Tennapodo barakka iya nonnoé ri yasé'na Yéhuda sibawa Israélié, nonno towi ri alému!’ Rimakkuwannanaro péwatangini atimmu sibawa aja'na mumétau!” Makkedai Puwang Iya Pommakuwasaé, “Wettunna néné-nénému mébbu-Ka macai, Upettuiwi untu' hukkungngi mennang sibawa masero. Dé' upinrai iyaro apettuk-Ku, sangadinna pajoppai. Iyakiya makkekkuwangngé maélo-Ka barakkakiwi pabbanuwana Yérusalém sibawa pabbanuwana Yéhuda. Jaji, aja' mumétau. Iyanaé parénta-parénta iya harusu'é mupogau': Rékko mabbicarako, powadai iya tongengngé lao ri pada-padammu. Abbéréko apettung pengadilang iya adélé'é sibawa iya tiwié adaméngeng. Aja' murancanai iya majaé lao ri pada-padammu. Aja' mupowada tanro bellé. Ucéccé bellé sibawa dé'é naadélé nenniya ateddekengngé.” Puwang Iya Pommakuwasaé mabbéréyangngi iyaé pasengngéwé lao ri iyya untu' umma'-Na, “Puwasa iya ripogau'é ri laleng uleng iya maeppaé, malimaé, mapitué, sibawa maseppuloé mancajiwi matu ramé-ramé iya pennoé arennuwang sibawa asennangeng untu' pabbanuwana Yéhuda. Eloriwi atongengengngé sibawa adaméngengngé!” Makkedai Puwang Iya Pommakuwasaé, “Narapii matu wettunna pabbanuwa polé ri maéga kota laowi matu ri Yérusalém. Pabbanuwa polé ri kota iya séddié makkedai matu lao ri pabbanuwa kota laingngé, ‘Laono mai talao sompai Puwang Iya Pommakuwasaé sibawa méllauwi barakka'-Na. Accowéno ri idi!’ Namaéga tau sibawa maéga bangsa iya mawatangngé lao matu ri Yérusalém untu' sompa-Ka Puwang Iya Pommakuwasaé sibawa méllauwi barakka'-Ku. Ri esso-essoéro seppulo tau laing laowi matu ri séddié tau Yahudi sibawa makkeda, ‘Macinna tokki maupe pada-pada iko; saba' riyéngkalingai makkedaé Allataala barakkakiko.’ ” Puwang Iya Pommakuwasaé pura mabbicara. Iyanaé pasenna Puwangnge. Purani Napettui untu' hukkungngi wanuwa Hadrakh sibawa kota Damsyik. Tenniya bawang suku-suku Israélié, iyakiya ibukotanato Siria iyanaritu appunnangenna Puwangnge. Hamat iya sipakkaséséngngé sibawa Hadrakh appunnangen-Nato, makkuwatoro kota-kota Tirus nenniya Sidon nasibawang sininna apanrénna pabbanuwana. Purani Tirus patettong sining bénténg untu' aléna sibawa goppo maéga senna ulaweng nenniya péra' angkanna mancaji pada-pada barang biyasaé, pada-pada kessi'é sibawa bungkaé ri lalengngé. Iyakiya Puwangnge mébbui matu kasiyasi. Sininna asugirenna kotaéro Nabuwangngi matu ri laleng tasi'é sibawa iyaro kotaé cappui matu nanré api. Kota Askélon sibawa Gaza naitai matu sibawa métauna. Naita towi matu Ekron sibawa ateddéngeng sininna paddennuwanna. Ateddéngengngi matu Gaza arunna, sibawa Askélon masino-sinoi matu dé' monroiwi. Asdod naonroiwi matu sining tau polé ri bangsa campurangngé. Makkedai Puwangnge, “Tau Filistin iya matempoéro Upaccappui matu. Dé'na matu mennang nanré juku iya maddaraé mupa iyaré'ga inanré laing iya riyattéyangngé. Sininna tau iya risalaiyé mancajiwi matu umma'-Ku sibawa riyangga'i selaku bagiyang polé ri suku Yéhuda. Ekron mancajiwi matu anggota umma'-Ku pada-pada tau Yébus-é riyolo. Ujagaiwi matu tana-Ku sibawa lawa-lawaiwi sining pasukang laingngé iya maéloé limbangngi. Dé'na Upalaloni matu sining pattenre'é jajai umma'-Ku. Saba' Uwitani anrasa-rasanna mennang.” Eh pabbanuwana Sion, arennuno! Eh pabbanuwana Yérusalém, gorano! Itani! Poléi arummu sibawa apakalang! Aléna arung adélé iya tiwié asalamakeng. Iyakiya lettu'i sibawa penno ariyawang ati tonangi kaleddé, sikaju kaleddé lolo. Makkkedai Puwangnge, “Uwabbéyangngi karéta-karéta musu polé ri Efraim, sininna anyarangngé ri Yérusalém Upallennye'i matu sibawa sininna panaé Uwancuru'i matu. Nappallebbangengngi matu arummu adaméngengngé ri yelle'na bangsa-bangsaé. Polé ri tasi'é lao ri tasi'é makuwasai matu, polé ri Salo Efrat lettu ri cappa'na linoé.” Makkedai Puwangnge lao ri umma'-Na, “Nasaba assijancing iya Uwébbué sibawa iko, assijancing iya ripaessaé sibawa dara akkarobangeng pakkasuwiyang, Upaleppe'i matu ra'ya'mu iya manrasa-rasaé ri laleng appalirengngé pada-pada tau iya riyurungngé ri laleng bujung marakkoé. Lisuno éh sining tau ripalié, mappunnaino makkekkuwangngé paddennuwang. Lisuno ri onrong allinrungemmu, tette'-Ka matu barakkakiko. Engkalingai: Leppi wékkaduwa Ubarakkakiko matu nasaba sininna anrasa-rasang iya puraé mupéneddingi. Upakéi matu Yéhuda selaku panana pabbaranié, sibawa Israélié selaku ana' pana iya sadiyaénna riyattémbakeng. Pabbanuwana Sion Upaké selaku peddang; nasibawang iyaro peddangngé Ugasai matu sining tau Yunanié.” Nappaitangngi matu aléna Puwangnge lao ri umma'-Na, pada-pada billa'é Nattémbakengngi ana'-ana' pana-Na. Naseppungngi matu Puwangnge tarompé'é tanrang maggasa nainappa joppa malluru ri laleng anginraja polé yattangngé. Pasti Nawéréngngi allinrungeng umma'-Na, angkanna naulléi mennang caui sininna balié. Pada-pada kelli'na tau iya mabo' ménungngé, makkuwaniro kelli'na mennang ri laleng ammusurengngé. Samanna dara akkarobangeng iya ritiri'é ri yasé'na mézbaé, makkuwaniro darana balinna mennang tuppa. Rékko narapini iyaro essoé, napassalama'i matu Puwangnge umma'-Na, pada-pada pakkampié passalama'i bimbala'na polé ri abalaé. Mattappai matu mennang ri tanana Puwangnge, pada-pada paramata passigera iya millakkillangngé. Temmaka kessinna tanana Puwangnge matti, temmaka kessinna sibawa gellona! Kuwaniro tuwo makkompe anggoro'é sibawa gandongngé, mébbui kalloloé sibawa ana'daraé tattamba mawatang. Rékko narapini wettu lemmaé, éllauno bosi lao ri Puwangnge. Nanapaddeppungengngi matu Puwangnge ellung malillingngé, sibawa pateppa bosi raja angkanna manyila sining dare'é sibawa matakka untu' sininna tauwé. Méllauwi sining tauwé panunju lao ri barahala-barahalaé sibawa sining pabotoé, iyakiya sining pappébali iya nalolongengngé iyanaritu bellé nenniya omong kosong simata. Engka pakatajang nippi, iyakiya pappakatajanna mennang banna papusako, sibawa passaléwo iya nabbéréyangngé dé'gaga bettuwanna. Rimakkuwannanaro tassiya-siyai ra'ya'é pada-pada bimbala'é. Makkanrodongngi mennang nasaba dé' nappunnai pamimping. Makkedai Puwangnge, “Macai senna'ka lao ri panguwasa iya paréntaéngngi umma'-Ku, sibawa Uhukkungngi matu mennang. Iyakiya pabbanuwana Yéhuda iyanaritu appunnangek-Ku, na Iyya, Puwang Iya Pommakuwasaé piyarai matu mennang. Upancajiwi matu mennang anyarang pammusu iya baranié untu' Iyya. Polé ri yelle'na mennang Upiléi matu panguwasaé, pamimpingngé, sibawa pallimmaé iya paréntaéngngi matu umma'-Ku.” Pacaui matu pabbanuwana Yéhuda pada-pada sining pajuwang iya léjja-léjja'éngngi balié samanna bungka ri lalengngé. Maggasai matu mennang nasaba Iyya, Puwang bantui mennang, sibawa pasukang bali iya tonangiyé anyarang nacau manengngi matu mennang. “Upéwatangi matu pabbanuwana Yéhuda, Upassalama'i matu umma Israélié. Utiwii mennang lisu ri wanuwanna nasaba Uwéloriwi mennang. Ugaukengngi matu mennang pada-pada bangsa iya dé'é naengka Uwassakkarengngi. Iyya ritu Puwang Allataalana mennang, Ujampangiwi matu sininna sempajannasi. Umma Israélié padai matu pabbarani iya mawatangngé, pada-pada tau iya ménungngé anggoro, marennui matu mennang. Wija-wijanna mennang polé ri wettué lao ri wettué dé' nallupaiwi iyaé apakalang iya Uwabbéréyangngé. Mariyo-riyoi matu mennang nasaba pangkaukek-Ku untu' mennang. Uwobbii matu umma'-Ku sibawa Upaddeppungengngi mancaji séddi. Upaleppe'i mennang sibawa Uwébbui singngéga riyolo. Namuni Upassanrai mennang lao ri tengnga-tengngana bangsa-bangsaé, tette'-Ka matu naéngngerang mennang kuwaro. Salama'i matu mennang, makkuwatoro ana'-ana'na sibawa silaong matu lisu ri wanuwanna. Polé ri Maséré sibawa Asyur, Upalisui matu mennang. Utaroi matu mennang ri wanuwanna muto. Utiwii matu mennang ri Giléad sibawato Libanon, angkanna pennoi sininna wanuwaé sibawa mennang. Rékko malléttoiwi mennang tasi asukkarakeng, Iyya, Puwang munrui matu sibawa bombang; namancaji marakko matu borina Salo Nil. Ripakariyawai matu bangsa Asyur iya matempoé, sibawa Maséré iya baranié ateddéngengngi matu akuwasang. Upéwatangiwi matu umma'-Ku, matinului matu mennang sibawa massompai lao ri Iyya. Iyya, Puwang, pura mabbicara.” Eh Libanon, timpa'i sining tange'mu, kuwammengngi natunui api sining pong arasmu! Eh pong daru, mpatinno, nasaba maléttunni sining pong camaraé, rebbani pong iya héba'é. Eh sining pong battowaé ri Basan, terino. Saba' malappani pura wéle' sining ale malowangngé. Engkalingai watinna sining panguwasaé lennye'ni asugirenna mennang! Engkalingai angngaunna sining singaé ri ale'é; saba' masolanni onronna mennang sillampé Salo Yordan. Makkedai Puwang Allataala lao ri iyya, “Kédono samannako pakkampi iya mampié bimbala iya maéloé rigéré. Sining pangellinna mpunoi iyaro sining bimbala'é tenrihukkung. Makkedai mennang iya balu'éngngi jukuna sining bimbala'éro, ‘Ripojiwi Puwangnge! Tattamba sugini makkekkuwangngé!’ Iyaro sining pakkampié dé' namessé lao risining bimbala piyarana mennang. Dé'na umaélona mamasé muwi lao ri niga ri wanuwaéwé. Aléku maélo mabbéréyang manengngi sininna pabbanuwana lao risining panguwasaé. Naancuru'i matu mennanro wanuwaéwé, na dé' Usittaini matu polé ri akuwasanna mennang.” Iyya, Zakharia, nainappa ripéssaroi risining padangkang bimbala'é untu' mampii sining bimbala iya maéloé rigéré. Mappunnaika duwa tekkeng; iya séddié uwasengngi “Asémpong” sibawa séddiéssi “Siyo”. Nainappaka mappammula manganrowang sibawa piyarai iyaro sining bimbala'é. Tellu tau pakkampi iya céccéékka paccappui asabbarakekku. Upaddésu'i mennang ri laleng wettu si ulengngé. Nainappaka makkeda lao ri bimbala makkonrongngéro, “Dé'na umaélona mampiko. Iya harusu'é maté leppessang bawanni maté, sibawa iya harusu'é binasa, leppessang bawanni binasa. Nainappa sésana weddingngi sisullé siyuno.” Nainappa tekkeng iya uwasengngé “Asémpong” uwalai sibawa upoloi untu' rusa'i assijancing iya naébbué Puwangnge sibawa sininna bangsaé. Iyatoro essoé narirusa' iyaro assijancingngé. Iyaro sining padangkang bimbala'é najagaika, sibawa mainge'i mennang makkedaé Puwangnge mattengngang makkeda-ada naolai sininna pangkaukekku. Purairo upoloi tekkekku iya maduwaé, iyanaritu iya uwasengngé “Siyo”, namareppa'na asséddiyanna Yéhuda sibawa Israélié. Namakkedana Puwangnge lao ri iyya, “Kédoko siseppa samanna pakkampiko, iyakiya iyaé sisengngé selaku pakkampi iya majaé. Nasaba maélo-Ka suro séddi tau pakkampi untu' jagaiwi bimbala makkonrok-Ku, iyakiya dé' najampangiwi bimbala iya teddéngngé; dé' nasappai bimbala iya pusaé, dé'to nauraiwi bimbala iya maloé, sibawa dé' napanréi bimbala iya tuwoé mupa. Mala aléna manréi juku bimbala iya kaminang macommo'é sibawa reddu'i kanuku-kanukunna olokolo'éro. Tattanroi pakkampi iya dé'é nakkégunaro! Purai nasalai bimbala makkonronna. Musué paccappa'i matu akuwasanna. Malemmai matu taiyyana sibawa butai matu mata ataunna.” Iyanaé pasenna Puwangnge passalenna Israélié. Puwang iya pallebba'éngngi langié, pancajiwi linoé enrengngé mabbéré atuwong lao ri tolinoé, makkeda, “Uwébbui matu Yérusalém pada-pada énungeng mallise'é anggoro; wanuwa-wanuwa sideppéna ménungngi matu natassulus-sulung pada-pada tau mabo'é. Sibawa rékko rikeppungngi Yérusalém, kota-kotaé ri wanuwa Yéhuda iya monroé mupa, rikeppung towi matu. Iyakiya rékko narapini iyaro essoé, Uwébbui matu Yérusalém pada-pada batu iya matane'é; muwi bangsa niga iya cobaéngngi makkai lolongetto matu acilakang. Masséddiwi matu sininna bangsaé untu' gasai Yérusalém. Iyaro essoé sininna anyarangngé Uwébbui malippu sibawa sining pakkinnyaranna Upajangengngi, Ujagaiwi matu pabbanuwana Yéhuda, iyakiya sininna anyaranna balinna Upabutai. Nainappa makkedai matu ri laleng ati kaluwarga-kaluwarga Yéhudaé, ‘ Puwang Iya Pommakuwasaé ritu iya mabbéré awatangeng lao ri umma'-Na iya monroé ri Yérusalém.’ Iyaro essoé Upancajiwi matu kaluwarga-kaluwarga Yéhudaé pada-pada apié ri laleng goppo aju tunungngé iyaré'ga sulo malluwa'é ri yawana wessé-wessé gandongngé; napabbinasai matu mennang bangsa-bangsaé ri mattulilinna. Iyakiya pabbanuwana Yérusalém tette'i matu monro ri laleng kotaé sibawa amang. Iyya, Puwang, bunge'-bunge' mabbéré matu apakalang lao ri tentarana Yéhuda, kuwammengngi alebbireng iya natarimaé wijanna Daud enrengngé pabbanuwana Yérusalém dé' napakacauriwi alebbireng iya natarimaé pabbanuwana Yéhuda laingngé. Iyaro essoé Ulinrungiwi matu pabbanuwana Yérusalém; sibawa muwi iya kaminang malemmaé ri yelle'na mennang mancajiwi matu pada watanna Daud. Ripimpingngi matu mennang ri wijanna Daud pada-pada malaéka'-Ku, mala pada-pada-Ka. Iyaro essoé Upabbinasai matu tungke' bangsa iya cobaéngngi gasai Yérusalém. Nainappa wija-wijanna Daud enrengngé pabbanuwana Yérusalém Uwéréngngi matu ati iya pojiyéngngi mamasé sibawa pojiyéngngi massempajang. Naitai matu mennang iya puraé nagajang mennang sibawa mpatingiwi pada-pada tau mpatingiyéngngi amaténna ana' tungke'na. Mpatingngi matu mennang sibawa mamasé, pada-pada tau iya ateddéngengngénna ana' macowa. Iyaro essoé engka matu mpatingeng masero ri Yérusalém, pada-pada mpatingengngé untu' Hadad-Rimon ri Lompo Megido. Makkedai Puwang Iya Pommakuwasaé, “Iyaro essoé jompii matu séddi mata uwai untu' paccingiwi wijanna Daud sibawa pabbanuwana Yérusalém polé ri dosana nenniya assompang barahala iya puraé napogau' mennang. Iyaro essoé Uleddai matu asenna barahala-barahala polé ri tanaéwé, angkanna dé' muwi séddi tau méngngerangngi. Sininna tau iya mangakué aléna nabi Urukkai matu silaong mennang iya tama-tamangngé roh iya macéko-cékoé. Narékko engka mupa tau makkeda makkedaé palettu'i paseng, ambo' indo'na muto powadangngi matu makkedaé harusu'i rihukkung maté, saba' iya napowadaé iyanaritu bellé. Rékko tette'i nangakui aléna selaku nabito, rigajangngi matu gangka maté ri ambo'na sibawa indo'na muto. Iyaro essoé, masirii matu sining nabié untu' tinda pada-pada nabié. Dé' matu mennang napakéi pakéyang nabié untu' mabbellé sibawa mattempowangngi sining pakkitanna. Sibalé'na, makkedai matu mennang, ‘Tenniyaka nabi. Banna séddika patani iya mappallaungngé ri dare'é gangka tuwoku.’ Sibawa rékko makkutanai tauwé ri aléna, ‘Lo aga iya engkaé ri aromuro?’, mappébaliwi matu, ‘Nakennaka iyaro loé ri bolana sellaoku.’ ” Makkedai Puwang Iya Pommakuwasaé, “Tokkonno, éh peddang, sibawa gasani pakkampi iya mappallaungengngék-Ka! Unoi, natassiya-siya matu sining bimbala'é. Maélo-Ka gasai umma'-Ku, sibawa ri sininna wanuwa duwapattellunna polé ri pabbanuwana maté matu. Banna tawa tellunna salama matu. Na-Upaccingiwi matu mennanro pada-pada péra'é ripépaccingi ri apié. Uwojiwi matu mennang pada-pada tauwé moji ulaweng. Nainappa mennang massempajangngi matu lao ri Iyya, na-Ubaliwi matu mennang. Upowadai matu lao ri mennang makkedaé mennang iyanaritu umma'-Ku, sibawa mangaku towi matu mennang makkedaé Iyya ritu Puwang Allataalana.” Esso angadélékenna Puwangnge macawé'ni. Narirampo'i matu Yérusalém, sibawa ritawa-tawai matu wassélé'na ri yolona matammu. Napaddeppungengngi matu Puwangnge sininna bangsaé untu' gasai Yérusalém. Risittaiwi matu iyaro kotaé, rirampo'i sining bolana, sibawa rikédo salaiwi sining makkunrainna. Sitengnga polé ri pabbanuwana ritiwii matu ri appalirengngé, iyakiya lebbinna monroi matu ri kotaéro. Nainappa malluru matu Puwangnge sibawa mammusu méwai bangsa-bangsaéro, pada-pada iya Napogau'é ri wettu riyolo. Iyaro essoé tettongngi matu ri Bulu-bulu Zaitun, ri seddé alauna Yérusalém. Naripuwé matu Bulu-bulu Zaitun ri lompo iya malowangngé, mappammulai ri alau lettu ri yajang. Sitengngana polé ri bulu-buluéro kédoi matu lao ri manorang, na sitengnganasi liyattangngi. Lariko matu molai lompo iya bagééngngi iyaro bulu-bulué mancaji duwa. Lariko matu pada-pada néné-nénému wettunna kajajiyang tatténréng tanaé ri wettu apparéntanna Uzia, arunna Yéhuda. Nanapoléna Puwang Allataalaku, ritinrosi ri sininna malaéka'é. Rékko narapini iyaro essoé, dé'na gaga matu hawa keccé iyaré'ga ése. Iyaro essoé dé'na gaga apettangeng. Tette'i matu matajang essoé, makkuwatoro ri wennié. Iyakiya banna Puwangnge missengngi uppanna narapi iyaro essoé. Iyaro essoé, massolo'i matu uwai matakkaé polé ri Yérusalém; sitengngana polé ri uwaiéro mattujui matu lao ri Tasi Maté sibawa sitengnganasi lao ri Tasi Tengngaé. Iyaro uwaié massolo'i sillampé taungngé, muwi ri wettu bosié iyaré'ga ri wettu tikkaé. Namapparénta matu Puwangnge selaku arung ri sininna linoé; tungke' tauwé nasompai matu Aléna selaku Allataala nenniya missengngi sibawa aseng iya padaé. Sininna wanuwaé polé ri Géba ri manorang lettu ri Rimon ri yattang, mancajiwi matu tanété. Iyakiya Yérusalém maccaloli'i matu matanré, lebbi matanréi naiya tanaé ri seddéna; iyaro kotaé mallowangngi matu polé ri Pintu Gerbang Bényamin lettu ri Pintu Gerbang Sunna, iyanaritu onronna Pintu Gerbang Mammulangngé sibawa polé ri Manara Hananél lettu ri onrong apparakeng anggoro appunnangenna arungngé. Monroi matu sining tauwé sibawa amang ri kotaéro, tenriyancang abinasanna. Papoléi matu Puwangnge lasa iya mappakatau-taué ri yasé'na sininna bangsa iya puraé mammusu méwai Yérusalém. Mata sibawa lilana mennang, mala sininna tubunna mennang makebbongngi matu ri wettu tuwona mupa. Iyaro essoé naébbui matu Puwangnge iyaro bangsa-bangsaé malippu senna sibawa métau angkanna tungke' tauwé natikkengngi matu silaonna iya engkaé ri seddéna nanagasai. Mammusui matu sining tau worowané ri Yéhuda untu' méwaiwi Yérusalém. Selaku barang rirappa nalai matu mennang sininna waramparanna bangsa-bangsaé ri seddéna maddupa ulaweng, péra' sibawa pakéyang massusus-susung. Séuwato lasa iya maseroé kennai matu anyarangngé, bagal-é, untaé sibawa kaleddé'é, enrengngé sininna olokolo'é ri akkémanna balié. Nainappa sininna tau iya tuwoé mupa ri yelle'na bangsa-bangsa iya gasaéngngi Yérusalém, laowi matu ri kotaéro untu' sompai Arungngé, Puwang Iya Pommakuwasaé, sibawa untu' pakarajai Pésta Kalampang Daud-daungngé. Narékko engka bangsa iya dé'é namaélo lao ri Yérusalém untu' sompai Arungngé, Puwang Iya Pommakuwasaé, dé' nateppa bosié ri wanuwanna. Sibawa rékko dé' namaélo tau Maséré'é pakarajai Pésta Kalampang Daud-daungngé, nakenna towi matu mennang lasa iya napapolé Puwangnge ri yasé'na tungke' bangsa iya dé'é namaélo lao massompa. Iyanaro pahukkungeng untu' Maséré sibawa untu' sininna bangsa iya dé'é namaélo pakarajai Pésta Kalampang Daud-daungngé. Iyaro essoé garéncang-garéncangngé ri pakéyanna anyarangngé risobbi'i matu sibawa ada-ada “Ripallaingngi untu' Puwangnge ”. Panci-pancié ri Bolana Puwangnge riyangke'i matu pada-pada mangko-mangko pakkasuwiyangngé ri yolona mézbaé. Sininna pancié ri Yérusalém sibawa risininna Yéhuda ripallaingngi matu mancaji appunnangenna Puwang Iya Pommakuwasaé. Pabbanuwa iya makkasuwiyangengngé akkarobangeng napakéi matu untu' masséwong juku pakkasuwiyang. Narékko narapini iyaro wettué, dé'na gaga matu padangkang ri Bolana Puwang Iya Pommakuwasaé. Iyanaé pasenna Puwangnge lao ri Maléakhi untu' umma Israélié. Makkedai Puwangnge lao ri umma'-Na, “Uwamaséiko.” Iyakiya mappébaliwi mennang, “Pékkugi Puwangnge mamaséiki?” Mappébaliwi Puwangnge, “Tenniyaga Esau kakana Yakub? Iyakiya Uwamaséiwi Yakub, na Esau Ucéccéi. Daéra mabbulu-buluna Esau purani Uwancuru, sibawa Uwabbéréyangngi tanana lao risining olokolo masekkangngé ri padang kessi'é.” Akkalarapanna wija-wijanna Esau, iyaro sining tau Edongngé makkedai, “Purani riyancuru kota-kotata, iyakiya maéloki patettongngi paimeng,” mappébaliwi matu Puwangnge, “Weddingngi mennang patettongngi paimeng, iyakiya Uruttungngi matu. Riteppui matu mennang, ‘Wanuwa madoraka’ sibawa ‘Bangsa iya nakennaé caina Puwangnge untu' mannennungeng.’ ” Aléna bangsa Israélié mitai matu, sibawa makkeda, “Battowa tongengngi Puwangnge; akuwasan-Na narapii ri saliwenna tanana Israélié!” Makkedai Puwang Iya Pommakuwasaé lao risining imangngé, “Séddié ana' napakalebbii ambo'na, sibawa séddié pattumani napakalebbii puwanna. Iyya'é Ambo'mu; magi dé' mupakalebbi-Ka? Iyya'é ponggawamu; magi dé' mumétau lao ri Iyya? Mupakatuna-Ka, iyakiya makkutanako, ‘Nasibawang cara aga ripakatuna-Ko?’ Ri laleng makkarobangenna inanré iya dé'é nasitinaja riyakkarobangeng ri yasé'na mézba-Ku. Nainappako makkutana, ‘Nasibawang cara aga ripakariyawa-Ko?’ Di laleng mucarépainna mézba-Ku. Rékko makkasuwiyakko lao ri Iyya olokolo iya butaé, iya malasaé iyaré'ga képoé, dé'ga na iyaro pangkaukeng sala? Coba mabbéréyangngi olokolo sinrupaéro lao ri gubernur-é! Masennagga sibawa nagaukekkoga sibawa makessing?” Makkekkuwangngé, éh imang-ngimang, coba méllauwi lao ri Allataala kuwammengngi Namaséiki. Dé' Nabaliwi matu sempajammu, na iyaro asalammu muto. Makkedai Puwang Iya Pommakuwasaé, “Lebbi kessing muwi ritongko sumpang Bola-Ku, saba' siya-siyako palluwa api ri mézba-Ku. Dé' Upojiko, sibawa dé' Umaélo tarimai pakkasuwiyammu. Ripakalebbi-Ka ri bangsa-bangsaé ri sininna linoé. Kégi-kégi ritunui dupaé untu' pakalebbii asek-Ku sibawa riyakkasuwiyangeng sining akkarobangeng iya sitinajaé, saba' sininna bangsaé pakalebbi-Ka! Iyakiya iko mupakatuna-Ka nasaba muwangga'i mézba-Ku dé' angke'na, sibawa makkasuwiyang kuwaro inanré iya musampéyangngé. Adammu, ‘Najinnani sibawa sininnaro’, namupakariyawa-Ka. Tiwiko olokolo riyénnau, olokolo iya képo iyaré'ga iya malasaé untu' riyakkasuwiyangeng lao ri Iyya. Mupikkiri'i maélo-Ka tarimai pakkasuwiyammuro? Tattanroi topabbelléng iya makkasuwiyangengngé lao ri Iyya olokolo iya dé'é angke'na, rékko ri yelle'na olokolo'na engka olokolo makessing iya puraé najjanciyang lao ri Iyya! Saba' Iyya ritu Arung Maraja, sibawa ripakalebbi ri sininna bangsaé.” Makkedai Puwang Iya Pommakuwasaé lao risining imangngé, “Iyanaé parénta-Ku lao ri iko: Pakalebbi-Ka sibawa pangkaukemmu. Rékko dé' mumaélo méngkalingai ada-adak-Ku, Utanroiko matu. Sininna iya mutarimaé selaku dallé tappinrai matu mancari tanro. Sitongenna, sininna iya makessingngé purani Utanroi, nasaba dé' mubati-batiwi parénta-Ku. Uhukkungngi matu ana'-ana'mu, sibawa Usapuiwi matu rupammu sibawa tainna olokolo iya muwakkarobangengngé, sibawa riyassarénréngekko matu lao ri yaggoppong taié. Namuwissengngi matu makkedaé iyaé paréntaé purani Uwabbéréyang, kuwammengngi assijancik-Ku sibawa sining imangngé, wijanna Léwi tette'i takkenna. Ri laleng assijancingngéro Uwajjanciyangngi lao ri mennang atuwong iya amangngé sibawa saléwangengngé, sibawa Usuroi pakalebbi-Ka. Ri wettuéro mémeng mennang napakalebbi-Ka sibawa métau lao ri Iyya. Nappagguruwangngi mennang iya tongengngé, sibawa tenniya iya salaé. Maréppé'i mennang lao ri Iyya, nenniya naccowériwi élo-Ku sibawa malempu. Natulung towi mennang maéga tau untu' dé'na napogau'i iya majaé. Mémeng kewajibanna sining imangngé untu' mappagguruwangngi iya tongengngé passalek-Ku, Puwang Iya Pommatanré. Lao ri mennang ritu harusu'i makkutana ra'ya'é aga élo-Ku, nasaba mennang ritu sining suro-Ku. Iyakiya makkekkuwangngéwé, iko, imang-ngimangngé, lésséno polé ri laleng iya tongengngé. Sining pappagguruwammu pura massarénréngengngi maéga tau untu' pogau'i salaé. Purani musolangi assijancing iya Uwébbué sibawa iko. Na-Uwébbu tokko matu ripakariyawa ri umma Israélié nasaba dé' muturusiwi élo-Ku, sibawa nasaba mupasilaingengngi tauwé wettunna mupagguru umma'-Ku.” Dé'ga tappunnai maneng Ambo' iya padaé? Dé'ga naripancaji manekki ri Allataala iya padaé? Rékko makkuwaitu, magi tasi sullé rusa'i janci sibawa nallalengiwi narusa'i assijancing iya naébbué Allataala sibawa toriyolota? Purani najjalékkai umma Yéhudaé assijancinna Allataala sibawa mennang nenniya pogau'i gau'-gau' iya mappakatau-taué ri Yérusalém sibawa ri sininna wanuwaé. Purani mennang nacarépai Bolana Puwang iya napojiyé nenniya kawing sibawa sining makkunrai iya sompaéngngi déwata-déwatana bangsa laingngé. Memmuwaré tau iya pogau'éngngi makkuwaéro ripaddésu'i ri Puwangnge polé ri umma Israélié. Tennapodo dé'na mennang naccowé ri bangsata makkasuwiyang akkarobangeng-akkarobangeng lao ri Puwang Iya Pommakuwasaé. Na iyaé pangkaukemmu iya laingngé. Mupalleriwi mézbana Puwangnge sibawa uwai mata; teriko sibawa mpating nasaba dé' napuwéloi Puwangnge tarimai sining akkarobangemmu. Makkutanako magi dé' mumaélo tarimai. Nasaba naissengngi Puwangnge makkedaé dé' mumatinulu lao ri makkunrai iya mukawingiyé ri wettu malolomu. Iyaro makkunraié silaong atuwommu, iyakiya purani mubali'bellari, namuni purako majjanci ri yolona Allataala untu' tette matinulu lao ri aléna. Dé'ga na Allataala Iya Séuwaé pancajiko séddi tubu nenniya séddi nyawa sibawa makkunraiéro? Aga akkatana Puwangnge sibawa iyaro? Dé' lainna kuwammengngi mulolongeng ana'-ana' iya mancajiyé umma'na Allataala iya tuléngngé. Jaji jagaiwi alému, aja' narapii engka ri yelle'mu iya dé'é namatinulu lao ri bainéna. Makkedai Allataalana Israélié, “Ucéccé assarangengngé. Ucéccé rékko sala séddinna polé ri iko pogau'i majapperu makkuwaéro lao ri bainéna. Jagaiwi alému sibawa aja' sises-siseng mubali'bellariwi bainému.” Muwébbui Allataala najinna sibawa bicarammu. Iyakiya makkutanako, “Pékkugiki pajinnaiwi Puwangnge?” Sibawa makkeda, “Sininna tau iya pogau'éngngi majaé naangga makessing Puwangnge, sibawa naéloriwi mennang.” Iyaré'ga sibawa makkutana, “Kégani Allataala iya riyangga adélé'éro?” Pappébalinna Puwang Iya Pommakuwasaé, “Ukiringngi matu suro-Ku untu' passadiyangek-Ka laleng. Na temmusenna-sennai Iyya, Puwang iya musappaé, laowi matu ri Bola-Ku. Suro-Ku iya muwuddaniyéro poléi matu sibawa mappallebbangengngi assijancik-Ku.” Iyakiya nigana mulléi tahang ri esso poléna Puwangnge sibawa mappaitangngi Aléna? Saba' pada-padai apinna panré paccelloé, sibawa pada-pada sabunna tukang ménatué. Poléi untu' mangadéléki, pada-pada tau iya mappépaccingngé sibawa patuléngngéngngi péra'é. Pada-padai séddié tau panré ulaweng iya patuléngngéngngi ulawengngé sibawa péra'é, makkuwaniro surona Puwangnge pépaccingiwi matu sining imangngé kuwammengngi namakkasuwiyangeng sining akkarobangeng sibawa cara iya napuwéloé Puwangnge. Na pada-pada wettu riyolo, naéloriwi matu Puwangnge sining akkarobangeng iya riyakkasuwiyangengngé lao ri Aléna polé ri umma Yéhudaé sibawa Yérusaléngngé. Adanna Puwang Iya Pommakuwasaé, “Polé-Ka matu ri iko untu' mangadéléki. Masitta'-Ka matu mancaji sabbi lao ri passéhéré'é, sining tau iya malawengngé, iya sabbi bellé-bellé, iya macéko-cékoé ri laleng pagajiwi tau napéssaroiyé, iya tenre'éngngi sining jandaé, ana' béué sibawa tau laingngé, lao risininna tau iya dé'é napakalebbi-Ka.” “Iyya ritu Puwang, na dé' Utappinra. Rimakkuwannaro iko, wijanna Yakub dé' naripabbinasa. Pada-pada toriyolomu riyolo, léssé manenno polé ri hukkung-hukkuk-Ku sibawa dé' mumatinulu pajoppai. Lisuno ri Iyya, na-Ulisuto lao ri iko. Iyakiya makkutanako, ‘Aga harusu ripogau' untu' lisu ri Iko?’ Makkekkuwangngé makkutana-Ka ri iko: Weddigga tauwé belléi Allataala? Tentuni dé'. Iyakiya iko mubellé-Ka. Makkutanako, ‘Pékkugiwi?’ Pappébalik-Ku: Ri laleng muwajana tawa seppuloé sibawa mabbéré pakkasuwiyang. Sininna bangsaé nabellé-Ka, nanakenna manekko tanro. Tiwi manengngi tawa seppuloé ri Bola-Ku kuwammengngi engka inanré maona kuwaro. Ojina, namuwitai matu makkedaé Utimpa'i sining sumpanna surugaé sibawa Upatabbolongiko sibawa sininna iya makessingngé. Dé' uleppessangngi matu olokolo'é solangiwi wassélé tanamu; sara'i matu buwana sining pong anggoro'mu. Nariyasekko matu masennang ri sininna bangsaé, saba' mancajiwi wanuwammu onrong iya makessingngé untu' riyonroi.” Makkedai Puwangnge, “Napakatuna tongek-Ka ada-adammu. Iyakiya makkutanako, ‘Aga ripowada passalem-Mu?’ Makkedako, ‘Paracuma bawang massompa lao ri Allataala. Aga akkégunana pogau'i kewajibatta lao ri Puwang Iya Pommakuwasaé, iyaré'ga majjellokengngi lao ri Aléna makkedaé risesse'i asalatta? Aléta mitai makkedaé sining tau iya matempoé masennangngi. Tau majaé dé' natattamba madécéng bawang, iyakiya narékko naojiwi mennang asabbarakenna Allataala sibawa pogau'i majaé, leppe towi mennang.’ ” Nainappa mabbicara séddié lao ri laingngé tau iya métaué lao ri Puwangnge. Naéngkalinga Puwangnge sibawa najampangi aga napowada mennang. Sining tau iya pakalebbiéngngi sibawa métaué lao ri Aléna, riyokii asen-Na ri laleng séddié kitta catatang iya engkaé ri yolo-Na. Makkedai Puwang Iya Pommakuwasaé, “Mancajiwi matu mennang umma'-Ku. Ri esso tinda'-Ku, mancajiwi matu mennang appunnangek-Ku Uwéloriyé. Uwamaséiwi matu mennang, pada-pada séddié ambo' méloriwi ana' iya mattumaniyé lao ri aléna. Naitai matu paimeng umma'-Ku assilaingenna ri yelle'na totona tau makessingngé sibawa tau majaé, ri yelle'na tau iya massompaé lao ri Iyya sibawa dé'é.” Adanna Puwang Iya Pommakuwasaé, “Poléi matu essona sininna tau iya matempoé sibawa majaé ritunui pada-pada daramé. Iyaro essoé ritunui matu mennang gangka cappu, sibawa dé'gaga risésa polé ri mennang. Iyakiya untu' iko iya matinulué lao ri Iyya, akuwasak-Ku iya mappassalama'é mompoi matu pada-pada mata essoé, sibawa tappana mappapoléi ajjappang. Leppe'ko matu sibawa marennu pada-pada ana' saping iya nappaé massu polé ri wakkéé. Iyaro essoé tinda'-Ka matu, sibawa mucaui matu sining tau majaé, angkanna pada-padai matu mennang awu iya muléjja-léjja'é. Engngerangngi sining pappagguruwanna atak-Ku Musa, éngngerangngi hukkung-hukkung sibawa parénta-parénta iya Uwabbéréyangngé lao ri aléna ri Bulu Sinai untu' riturusi ri sininna umma Israélié. Iyakiya ri wettu dé'napa napolé esso iya héba'é sibawa maseroé iya Upattentuéro, Usuroi matu lao ri iko Nabi Elia. Naébbui matu sining ambo'é sibawa sining ana'é masséddi ati, kuwammengngi dé' Upolé paccappui wanuwammu.” Iyanaé assossorenna néné-nénéna Yésus Kristus, wijanna Daud, wijanna Abraham. Polé ri Abraham lettu ri Daud tarokii aseng-ngaseng makkuwaéwé: Jaji polé ri Abraham lettu ri Daud, iya manenna engka seppulo eppa assossoreng. Polé ri Daud lettu ri wettu ripalina bangsa Israélié ri Babél engkato seppulo eppa assossoreng. Polé ri wettu ripalina bangsa Israélié ri Babél lettu ajajiyanna Kristus, engkato seppulo eppa assossoreng. Makkunié curitana passalenna ajajiyanna Yésus Kristus. Indo'-Na iyanaritu Maria, mattunangangngi sibawa Yusuf. Iyakiya riwettu dé'napa mennang nakawing, mattampu'ni Maria. Dé' naissengngi Yusuf rékko mattampu'i Maria nasaba akuwasanna Rohna Allataala. Iyaro Yusuf tunanganna, iyanaritu séddiwi tau iya tuli turusiyéngngi hukkunna agamaé. Jaji maéloi pettuiwi attunanganna, iyakiya dé' narukkangngi, kuwammengngi dé' namasiri Maria ri yolona tau maégaé. Mattengngangngi Yusuf timbat-timbangngi iyaro gau'é, mannippiwi. Ri laleng nippinnaro, naitai séddi malaéka'na Puwangngé makkeda lao ri aléna, “Yusuf wijanna Daud, aja' mumétau kawingi Maria; saba' iyaro ana' engkaé ri laleng tampu'na, jajiwi polé ri akuwasanna Rohna Allataala. Najajiyangngi matu Maria séddi ana' worowané. Iyaro ana'é harusu'i muwéréng aseng Yésus, nasaba Napassalama'i matu umma'-Na polé ri dosana mennang.” Iya manennaro kajajiyangngi makkuwaro kuwammengngi nakajajiyang aga iya napowadaé Puwangngé naolai nabin-Na, iyanaritu, “Mattampu'i matu séddié ana'dara nanajajiyang séddi ana' worowané. Iyaro ana'é riyasengngi matu Immanuél.” (Immanuél iyanaritu ada Ibrani iya bettuwannaé, “Allataala engka sibawakki”.) Moto'nana Yusuf, napogau'ni aga iya napowadaé iyaro malaéka'na Puwangngé lao ri aléna. Kawinni sibawa Maria. Iyakiya riwettu dé'napa najajiyangngi Maria iyaro ana'é, dé' nasilureng Yusuf sibawa Maria. Jajinnana iyaro ana'é, Nasenni Yusuf Yésus. Yésus rijajiyang ri kota Bétléhém ri wanuwa Yudéa; ri wettu apparéntanna Arung Hérodés. Iyaro wettué siyagangngaré ahli wéttowing polé alau, poléi ri Yérusalém. Makkutanai mennang kégi-kégi, “Kégai jaji iyaro ana'é, iya jajiyé untu' mancaji arunna tau Yahudié? Riitai wéttowin-Na mompo ri seddé alau, na engkaki polé maélo sompai Aléna.” Wettunna naéngkalinga Arung Hérodés iyaro, tasséleng senna'ni, makkuwatoro sininna tauwé ri Yérusalém. Nasuroni sininna kapala imangngé sibawa guru-guru agamana bangsa Yahudié polé maddeppungeng. Nainappa makkutana ri mennang, “Kégai maélo jaji Arung iya najjanciyangngé Allataala?” Nappébali mennang, “Ri kota Bétléhém ri wanuwa Yudéa. Nasaba makkuwaniyé naoki nabié, ‘Iko Bétléhém, ri wanuwa Yéhuda, sitonget-tongenna tenniyako kaminang baiccu ri yelle'na kota-kota mapongngé ri Yéhuda. Nasaba polé ri iko poléi matu séddi pamimping iya pimpingngéngngi umma'-Ku Israélié.’ ” Puranana nalolongeng pappakatajangngéro, naobbini Hérodés iyaro ahli wéttowing polé alaué mammekko-mekko. Nainappa makkutana ri mennang, siyaganna tongeng nappammula paita iyaro wéttowingngé. Purairo nasuroni mennang lao ri Bétléhém sibawa pasengngéwé, “Laono musappai sibawa madécéd-décéng passalenna Ana'éro. Narékko muruntu'ni, paissengika, kuwammengngi ulaoto sompai.” Muttama'ni mennang ri laleng bolaéro nanaitai iyaro Ana'é sibawa Maria, indo'-Na. Suju'ni mennang nanasompai iyaro Ana'é, nainappa natimpa onrong waramparanna, nanakkasuwiyangengngi lao ri ana'éro ulaweng, kamennyang, sibawa mur. Napparéngngerangenni Allataala lao ri mennang ri laleng nippi kuwammengngi aja' nalisu ri Hérodés. Jaji lisuni mennang molai laleng laingngé. Joppanana sining ahli wéttowingngéro, nappaitanni aléna malaéka'na Puwangngé lao ri Yusuf ri laleng nippi. Makkedai iyaro malaéka'é, “Engka akkattana Hérodés sappai iyaro Ana'é untu' mpunoi. Rimakkuwannanaro oto'no, tiwii iyaro Ana'é sibawa indo'-Na manyingkiri' ri Maséré'. Onrono kuwaro narapi mabbicarasi-Ka lao ri iko.” Moto'ni Yusuf, nainappa iyatoro wennié natiwii iyaro Ana'é sibawa indo'-Na manyingkiri' ri Maséré'. Monroni kuwaro mennang narapi maté Hérodés. Makkuwaniro nakajajiyang aga napowada Puwangngé naolai nabin-Na, makkuwaé, “Uwobbii Ana'-Ku polé ri Maséré'.” Wettunna naisseng Hérodés makkedaé ribelléi ri ahli wéttowing polé alauéro, macai senna'ni. Nainappa napparéntang untu' mpuno manengngi ana' worowané ri Bétléhém sibawa ri seddéna iya makkéumuru duwattaungngé liyawa. Sicoco'i iyaro sibawa pappakatajang iya nalolongengngé polé risining ahli wéttowingngéro, passalenna wettunna paita iyaro wéttowingngé. Makkuwaniro kajajiyang aga pura napowada Nabi Yérémia, iyanaritu, “Riyéngkalingai sadda mpatingngé ri Rama sadda maddararing sibawa teri. Rahél mpatingiwi ana'-ana'na; dé' namaélo risaléwori saba' dé'ni mennang.” Maténana Hérodés, wettunna engka mupi Yusuf ri Maséré', nappaitanni aléna malaéka'na Puwangngé ri Yusuf ri laleng nippi. Makkedai iyaro malaéka'é, “Sining tau iya maéloé mpunoi iyaro Ana'é maténi. Rimakkuwannanaro oto'no, alai iyaro Ana'é sibawa indo'-Na, namulisu ri Israél.” Moto'ni Yusuf, nanatiwii iyaro Ana'é sibawa Maria lisu ri Israél. Iyakiya ri munri naéngkalingai Yusuf makkedaé Arkélaus, ana'na Hérodés sulléiwi ambo'na mancaji arunna wanuwa Yudéa. Jaji métauni Yusuf lao kuwaro. Puranana lolongessi pappaitana Puwangngé ri laleng nippi, laoni ri daéra Galiléa. Monroni kuwaro ri kota riyasengngé Nazarét. Namakkuwannanaro kajajiyanni aga iya napowadaé nabi-nabié passalenna iyaro Ana'é: “Riyasengngi matu Tau Nazarét.” Iyaro wettué, poléni Yohanés Paccemmé ri padang kessi'é ri Yudéa mappammula makkatobba. Adanna, “Toba'no polé ri dosa-dosamu, saba' dé'na namaitta napparénta matu Allataala selaku Arung!” Yohanés iyanaé tau nakkattaiyé Nabi Yésaya ri laleng adannaé, “Engka tau gora-gora ri padang kessi'é, ‘Passadiyangengngi laleng Puwangngé; palapparengngi laleng Aléna.’ ” Pakéyang napaké Yohanés poléi ri bulu untaé. Babbanna poléi ri bingkulangngé, sibawa anréna incalé sibawa cani ale'. Maéga tau polé ri Yérusalém, polé ri sininna wanuwa Yudéa sibawa daéra-daéra seddéna Salo Yordan lao ri Yohanés. Nangakuini mennang dosa-dosana, sibawa ricemméni ri Yohanés ri Salo Yordan. Maégato tau Farisi sibawa Saduki lao ri Yohanés untu' ricemmé. Iyakiya wettunna mennang naita polé, makkedani lao ri mennang, “Tau majako iko! Niga powadai makkedaé weddikko leppe' polé ri pahukkungenna Allataala iya maéloé polé? Appaitanni ri laleng pangkaukemmu makkedaé toba'no polé ri dosa-dosamu. Aja' muwasengngi muwulléi leppe' polé ri pahukkungengngé sibawa powadai makkedaé Abraham iyanaritu néné-nénému. Engngerangngi, polé ri batu-batuéwé, naulléi Allataala mébbu wija-wijanna untu' Abraham! Sadiyani wasé untu' tubbangngi pong ngajué lettu ri ure'-ure'na. Tungke' pong ngaju iya dé'é napowassélé' buwa makessing ritubbangngi matu naribuwang ri laleng apié. Ucemméko sibawa uwai untu' pannessai makkedaé toba'no polé ri dosa-dosamu; iyakiya iya maéloé polé ri munrikku, nacemméko matu sibawa Rohna Allataala enrengngé api. Lebbi battowai na iyya. Muwi untu' tiwii sapatun-Na dé'to usitinaja. Ri liman-Na engka pattapi untu' tapi manengngi gandon-Na gangka mapaccing. Napaddeppungengngi matu gandongngé ri laleng lappoé, iyakiya sininna awanna Natunui matu ri laleng api iya dé'é nawedding peddé.” Iyaro wettué laoni Yésus ri Salo Yordan polé ri Galiléa. Nalaona kuwaro ri Yohanés sibawa méllauwi naricemmé. Iyakiya nacobai Yohanés sampéyangngi paréllaun-Naro. Makkedai Yohanés, “Iyya sitongenna harusu' ricemmé ri Bapa'. Namakkekkuwangngé mala Bapa' lao ri iyya.” Iyakiya mappébaliwi Yésus, “Leppessanni siya untu' makkekkuwangngé. Saba' nallalengiro naripogau' iya manenna napuwéloé Allataala.” Jaji nacemméni Yohanés Yésus. Puranana ricemmé, masitta'ni Yésus massu polé ri uwai ri saloéro. Tappa tattimpa' muni langié nanaitai Yésus Rohna Allataala nonno pada-pada jangang-jangangngé ri yasé'na Yésus. Nainappa naéngkalingani saddanna Allataala makkeda, “Iyanaé Ana'-Ku iya Uwamaséiyé. Napésennangi atik-Ku.” Nainappa ripimpinni Yésus ri Rohna Allataala lao ri padang kessi'é untu' ricobai ri Ibillisi'. Patappulo esso patappulo wenni Yésus dé' nanré. Nainappa napéneddingi malupué. Poléni Ibillisi' sibawa makkeda, “Ana' Allataala-Koto? Nah, suroi batu-batuéwé mancaji roti.” Nappébali Yésus, “Ri laleng Kitta'é tarokii: Tolinoé dé' naulléi tuwo polé ri rotié bawang, iyakiya polé towi ri tungke' ada-ada iya napowadaé Allataala.” Purairo natiwini Ibillisi' Yésus ri Yérusalém, kota marajaé, nanataroi ri coppo Bolana Puwangngé. Nainappa makkeda Ibillisi' lao ri Yésus, “Ana' Allataala-Koto? Rékko makkuwaitu luppe'no; saba' ri laleng Kitta'é engka taroki makkuwaéwé, ‘Nasuroi matu Allataala malaéka'-malaéka'-Na linrungi-Ko, naduppai-Ko matu mennang sibawa limanna mennang, kuwammengngi nadé' nataggéssa ajé-Mu ri batué.’ ” Nappébali Yésus, “Iyakiya ri laleng Kitta'é taroki towi, ‘Aja' mucobaiwi Puwang Allataalamu.’ ” Nainappa natiwisi Ibillisi' Yésus ri bulu iya matanré senna'é nanappaitangngi ri Aléna sininna akkarungengngé ri linoé sibawa sininna asugirenna. Nainappa makkeda Ibillisi' lao ri Yésus, “Iya manennaé uwérék-Ko matu, rékko suju'-Ko sompaka.” Nappébali Yésus, “Addésu'ko Ibillisi'! Ri laleng Kitta'é tarokii: Sitinajako sompai Puwang Allataalamu, sibawa tumaningiwi Aléna bawang!” Angkanna Ibillisi' nasalaini Yésus, napoléna malaéka'-malaéka'é tumaningiwi. Wettunna naéngkalinga makkedaé, riputtama'ni Yohanés ri laleng tarungkué, manyingkiri'ni Yésus lao ri Galiléa. Nasalaini Nazarét, naonro ri Kapernaum ri wirinna Tappareng Galiléa ri daérana Zébulon sibawa Naftali. Ri laleng napogau'na Yésus iyaro gau'é, kajajiyanni aga napowada Nabi Yésaya: “Tana Zébulon sibawa tana Naftali, ri laleng laowé ri tasi'é, ri liwenna Salo Yordan, Galiléa tanana tau tenniyaé Yahudi! Bangsa tuwoé ri laleng pettangngé naitani tajang mattappaé! Lao ri iya monroé ri laleng wanuwa apettangenna amaténgngé mompoi cahaya macakkaé!” Mappammulai wettuéro nabbirittanni Yésus, “Toba'no polé ri dosa-dosamu, nasaba dé'na namaitta napparénta Allataala selaku Arung!” Wettunna Yésus mattengngang joppa ri wirinna Tappareng Galiléa, mitani duwa pakkaja, iyanaritu Simon (iya riyasengngétto Pétrus) sibawa anrinna, Andréas. Mattengngangngi mennang mattikkeng balé ri tapparengngéro sibawa jala. Nakkeda Yésus lao ri mennang, “Laono mai accowéno ri Iyya. Maélo-Ka pagguruko majjala tau.” Tappa matteruni nasalai jalana mennang nainappa maccowériwi Yésus. Joppani Yésus matteru, nainappa naitasi duwa tau massilessureng laingngé, iyanaritu Yakobus sibawa Yohanés, ana'-ana'na Zébédéus. Silaongngi mennang ambo'na mattengngang padécéngiwi jalana ri laleng lopinna. Riyobbi towi mennang ri Yésus, nanatteru mennang nasalai lopinna sibawa ambo'na nainappa naccowéri Yésus. Ri Galiléa, mattulilini Yésus ri sininna wanuwaéro. Mappagguruni risining bola assompangngéro, sibawa nappallebbangengngi Karéba Madécéngngé makkedaé mapparéntai matu Allataala sibawa napajjappai sining tau sala-salangngé sibawa malasaé. Iyaro karébaé passalenna Yésus mallebbanni risininna wanuwa Siria, angkanna maéga tau lao ri Aléna. Natiwii mennang sining tau iya nakennaé maddupa-rupang lasa, sibawa maddupa-rupangngé asussang: sining tau atama-tamangngé roh maja, malasa maté manu'-manu'é, sibawa iya péso'é napajjappa manengngi Yésus. Maéga senna tau maccowériwi Yésus iyaro wettué – engka polé ri Galiléa, polé ri Seppuloé Kota, polé ri Yérusalém, polé ri Yudéa sibawa engkato polé ri wanuwa ri liwenna Yordan. Wettunna naita Yésus tau maégaéro, menré'ni ri tompo'-Na bulu-bulué. Tudannana, poléni ri Aléna sining tau iya maccowériyéngngi, nainappa napammulaini paggurui mennang: “Masennangngi tau iya marasa dé'é pakkullénna na banna maddennuwang ri Puwangngé bawang; anggotanai iyanaritu umma'na Allataala! Masennangngi tau iya messé atié; risaléworiwi matu mennang ri Allataala! Masennangngi tau iya pakariyawaéngngi atinna; narupaiwi matu Allataala jancin-Na lao ri mennang! Masennangngi tau iya muddaniyé pogau'i élona Allataala; ripaggenne'i matu apparelluwanna mennang ri Allataala! Masennangngi tau iya mamaséiyéngngi tau laingngé; riyamaséi towi matu mennang ri Allataala! Masennangngi tau iya mapaccingngé atinna; naissengngi matu mennang Allataala. Masennangngi tau iya tiwié assidaméngeng ri yelle'na tauwé; riyakuiwi matu mennang ri Allataala selaku ana'-ana'-Na! Masennangngi tau iya nakennaé paccallang nasaba napogau'i élona Allataala; anggota umma'nai Allataala! Asennakko rékko ricellako, ricalla, sibawa ripétenna nasaba Iyya. Nabi-nabi iya tuwoé ri yolomu pura towi ricalla pada-padaéro. Mariyoriyono sibawa marennu, saba' battowai saromu iya napassadiyangengngékko Puwangngé.” “Ikona iyanaritu pejjéna linoé. Rékko makawai pejjé, weddigga ripejjéi paimeng? Dé'na gaga gunana, sangadinna riyabbéyang mani naléjja'-léjja'i tauwé. Ikona iyanaritu tajanna linoé. Kota monroé ri yasé'na bulu-bulué, dé' nariyulléi subbui. Dé'gaga tau palluwa lampu, nainappa natongko iyaro lampué sibawa baku. Mala nataroi iyaro lampué ri onrong lampué, kuwammengngi nabbéré tajang lao ri tungke' tau ri laleng bolaéro. Makkuwatoniro tajammu harusu'i mattappa ri yolona tauwé, kuwammengngi naitai tauwé pangkaukeng-pangkaukemmu madécéngngé, nainappa napojiwi Ambo'mu ri surugaé.” “Aja' muwangga'i makkedaé engka-Ka polé untu' pallennye'i hukkung iya nabbéréyangngé Musa sibawa pappagguruwanna nabi-nabié. Engka-Ka polé tenniya untu' pallennye'i, iyakiya untu' mappaitangngi bettuwanna iya tongengngé. Engngerangngi! Ri wettu engkana mupa langié sibawa linoé, muwi séddi hurupu' iyaré'ga tetti iya kaminang baiccu'é ri laleng hukkungngéro, dé' matu nariledda, rékko dé'pa nakajajiyang maneng! Rimakkuwannanaro, nigi-nigi majjalékkaiwi sala séddinna polé risining paréntaéro muwi iya kaminang baiccu'é, sibawa paggurui tau laingngé pogau'i makkuwaéttoro, mancajiwi matu iya kaminang baiccu'é ri yelle'na umma'na Allataala. Sibalé'na, nigi-nigi pajoppai iyaro hukkungngé sibawa paggurui tau laingngé pogau'i makkuwaéttoro, mancajiwi matu battowa ri yelle'na umma'na Allataala. Jaji, éngngerangngi: Dé' nakkulléko mancaji umma'na Allataala, rékko dé' mupakacauriwi guru-guru agamaé sibawa sining tau Farisié ri laleng pogau'i élona Allataala!” “Muwisseng makkedaé ri néné-nénéta engka pappagguruwang pada-padaéwé: Aja' muwabbuno; nigi-nigi mabbuno, harusu'i riadéléki. Iyakiya makkekkuwangngé makkeda-Ka lao ri iko, nigi-nigi macai lao ri tau laingngé, riadélékiwi matu; sibawa nigi-nigi cella-cellai tau laingngé, riadélékiwi matu ri yolona Mahkamana Agamaé. Sibawa nigi-nigi makkeda ri tau laingngé, ‘Donggo’, sitinajai riyabbéyangngi ri laleng api ranakaé. Rimakkuwannanaro, rékko sala séddinna ri yelle'mu mattengngang makkasuwiyangengngi pabbéréna lao ri Allataala, nanaéngngerangngi makkedaé engka tau mapeddi ati ri aléna, sitinajai nasalai riyolo' pakkasuwiyannaro ri yolona mézbaé, nalao sidamé iyaro tauwé. Purapiro, weddinni lisu nanakkasuwiyangengngi pabbéréna ri Allataala. Akkalarapanna engka tau mapparapekekko ri mahkamaé, sidaméko sibawa iyaro ri wettu engkana mupa wettu, sangadi dé'napa mulettu ri mahkamaé. Rékko dé', nabbéréyakko matu iyaro tauwé ri hakingngé, iya mabbéréyangngékko matu ri polisié. Nainappa polisié puttama'ko matu ri laleng tarungkué. Na éngngerangngi: Pasti dé' muwulléi massu polé ri tarungkuéro, riwettu dé'napa napura muwaja maneng sininna ridendangengngékko.” “Muwisseng makkedaé engka pappagguruwang pada-padaéwé: Aja' mumalaweng. Iyakiya makkekkuwangngé makkeda-Ka ri iko: nigi-nigi mitai séddié makkunrai sibawa napessu maélo péjariwi, iyaro tauwé malawenni sibawa iyaro makkunraié ri laleng atinna. Rékko mata ataummu nassabariko madosa, cukkéi namuwabbéyangngi iyaro mataé! Lebbi kessing muwi teddéng sala séddinna anggota tubummu naiya sininna tubummu riyabbéyangngi ri laleng ranakaé. Rékko lima ataummu nassabariko madosa, rette'i namuwabbéyangngi iyaro limaé! Lebbi muwi teddéng siwali limammu naiya sininna tubummu muttama' ri ranakaé.” “Engkato pappagguruwang makkuwaéwé: Tungke' tau iya massarangngé bainéna, harusu'i nawéréng sure' telle. Iyakiya makkekkuwangngé makkeda-Ka ri iko: nigi-nigi massarang bainéna padahal iyaro makkunraié dé' nakédo sala, nassabariwi iyaro bainé malaweng rékko kawingngi paimeng iyaro bainéna. Sibawa nigi-nigi kawing sibawa makkunrai iya massarangngéro, malaweng towi.” “Muwisseng makkedaé ri néné-nénéta engka pappagguruwang makkuwaéwé: aja' muwassakkarengngi jancimmu. Aga pura muwajjanciyang sibawa mattanro ri yolona Allataala, harusu'i mupogau'. Iyakiya makkekkuwangngé makkedaka lao ri iko: aja' sises-siseng muwattanro, muwi nasabbing langié, saba' langié iyanaritu kadéra arajanna Allataala, iyaré'ga nasabbing tanaé, saba' tanaé iyanaritu akkalarenna ajé-Na; iyaré'ga nasabbing Yérusalém, saba' iyanaritu kotana Arung battowaé. Aja'to muwattanro nasabbing ulummu, saba' dé' muwulléi mébbui maputé gemme'mu iyaré'ga malotong, namuni silampa bawang. Akkedako bawang, ‘Eyyé’ iyaré'ga ‘Dé'’ – lebbi naiyaro poléi ri Ibillisi'.” “Muwisseng makkedaé engkato pappagguruwang pada-padaéwé: mata risulléi mata, isi risulléi isi. Iyakiya makkekkuwangngé makkeda-Ka lao ri iko: Aja' muwakkabale lao ri tau pogau'é ja lao ri iko. Sibalé'na rékko naleppa'i tauwé pili ataummu, leppessangngi siya naleppa towi pili abéyomu. Sibawa narékko napparapekekko tauwé ri hakingngé, nanatuntu'i wajummu, wéréng towi siya jumbamu. Rékko séddié tau makuwasa passako méssangngi barangngé bélana séddi kilo, éssangngi duwa kilo bélana. Rékko engka séuwa naéllau tauwé ri iko, wéréngngi siya. Sibawa aja'to musampéyangngi tau iya maéloé minreng séuwa ri iko.” “Muwisseng makkedaé engkato pappagguruwang pada-padaéwé: amaséiwi sellao-sellaomu namubenciwi sining balimmu. Iyakiya makkekkuwangngé makkeda-Ka ri iko: amaséiwi sining balimmu, sibawa assempajangengngi sining tau iya cellaé'kko, kuwammengngi mumancaji ana'-ana'na Ambo'mu ri surugaé. Saba' napaompoi Allataala mata esso-Na untu' tau makessingngé sibawa untu' tau iya majaétto. Napateppai bosinna untu' tau iya pogau'é atongengeng sibawa untu' tau iya pogau'é majaé. Saba' rékko iyami muwamaséi tau iya mamaséiyékko, untu' aga Allataala harusu' nawale' pangkaukemmuro? Dé'ga nasining passinge' simaé pogau' towi makkuwaéro? Narékko banna sellao-sellaomu bawang mupassalama', aga alebbimmu? Sining tau iya dé'étto naissengngi Allataala pogau' towi makkuwaéro! Ambo'mu ri surugaé namaséiwi sininna tauwé sibawa sukku. Harusu' tokko makkuwaro.” “Engngerangngi, aja' mupogau'i kewajibanna agamaé ri yolona tau maégaé kuwammengngi naitai tauwé. Rékko mupogau'i makkuwaéro, dé' nariwérékko matu saro ri Ambo'mu ri surugaé. Jaji rékko mabbéréko sidekka ri tau kasiyasié, aja' mugora-gorangngi iyaro gau'é pada-pada iya napogau'é sining munapé'é. Napoji mennang pogau'i iyaro ri laleng bola assompangngé sibawa ri watattanaé, kuwammengngi naripoji ri tauwé. Engngerangngi purani mennang natarima sarona. Iyakiya iko, rékko mabbéréko sidekka, abbéréko sibawa mammekko-mekko, angkanna dé'gaga missengngi. Leppessangngi siya iyaro pangkaukemmu dé'gaga missengngi muwi niga, sangadinna Ambo'mu ri surugaé. Naitai pangkaukemmu iya tassubbuéro nanawérékko matu saro.” “Rékko massempajakko, aja' mupada pada tau iya majjaiyéngngi. Napoji mennang massempajang sibawa tettong ri bola assompangngé enrengngé ri pékka lalengngé kuwammengngi nariita ri tauwé. Engngerangngi iyanaro sarona natarima mennang. Iyakiya rékko massempajakko, uttama'ko ri bili'é, namutongkoi tange'na, namumassempajang ri Ambo'mu iya dé'é napaitaro. Na Ambo'mu iya mitaéngngi pangkaukemmu tassubbué mpérékko matu saro. Rékko massempajakko aja' nakkolik-koling pada-pada tau dé'é naissengngi Puwangngé. Nasengngi mennang riyéngkalingai matu mennang nasaba sempajanna mennang iya malampé'éro. Aja' mupada-pada mennang. Naisseng Ambo'mu aga muwapparellung, riwettu dé'napa muwéllauwi. Jaji assempajakko makkuwaéwé: ‘Ambo'ta ri surugaé: Iko ritu Allataala iya Séuwaé. Tennapodo risompa-Ko sibawa ripakalebbi. Iko ritu Arutta. Tennapodo mapparénta-Ko ri linoé, na élo-Mu riturusi pada-pada ri surugaé. Wérékki essoéwé inanré iya riyapparelluwangngé. Addampengekki polé ri asalatta, pada-padato pura riyaddampengenna tau iya pasalaé ri idi. Aja' taleppessakki ateddéngeng ateppereng wettutta ricobai, iyakiya taleppessakki polé ri akuwasanna iya mappéjariyé. [Ikona Arung makuwasa sibawa malebbi lettu mannennungeng. Amin.]’ Rékko muwaddampengengngi tau iya pasalaé ri iko, Ambo'mu ri surugaé naddampengeng towi matu asalammu. Iyakiya rékko dé' muwaddampengengngi asalanna tau laingngé, Ambo'mu ri surugaé dé'to matu naddampengengngi asalammu.” “Rékko mappuwasako aja' mupajjameru'i rupammu pada-pada tau iya pojiyéngngi majjaiwi. Napinrai mennang rupanna kuwammengngi sininna tauwé naissengngi makkedaé mappuwasai mennang. Engngerangngi, iyanaro sarona pura natarima mennang. Iyakiya rékko mappuwasako, ajjumatako sibawa jakkaiwi gemme'mu, kuwammengngi nadé' gaga missengngi makkedaé mappuwasako, sangadinna Ambo'mu bawang iya dé'é napaita. Naitai iyaro tassubbué sibawa nawérékko matu saro.” “Aja' mupaddeppungengngi alému waramparang ri linoé, ri onrong iya weddingngé nasolangi karat sibawa taisseng enrengngé panga polé ménnauwi. Sibalé'na, paddeppungekko waramparang ri surugaé, ri onrong dé'é naulléi solangiwi karat, sibawa taisseng enrengngé panga dé' naulléi ménnauwi. Saba' kégi-kégi waramparammu, kuwatowitu atimmu!” “Mataé iyanaritu lampu untu' watakkalé. Rékko macakkai matammu, matajangngi sininna watakkalému. Iyakiya rékko massalawui matammu, mapettakkape'i sininna watakkalému. Jaji rékko lampué ri laleng watakkalému mapettangngi, temmakana pettanna iyaro kalemmengngé!” “Dé' séddi tau mulléi majjama untu' duwa ponggawa. Saba' lebbi namaséiwi matu séddié naiya laingngé. Iyaré'ga lebbi matinului lao ri ponggawa séddié naiya laingngé. Makkuwatoniro iko. Dé' muwulléi majjama untu' Allataala sibawa untu' waramparangngétto. Rimakkuwannanaro éngngerangngi; aja' mubata-bata passalenna atuwommu, iyanaritu aga maélo muwanré sibawa muwénung, iyaré'ga aga maélo mupaké. Dé'ga atuwongngé lebbiwi naiya anré, sibawa watakkalé lebbiwi naiya pakéyangngé? Itai manu'-manu'é ri yelle'é, dé' mennang nattaneng, dé' naéngngala, sibawa dé'to napaddeppungengngi wassélé tanet-tanenna ri laleng lappona. Namuni makkuwaro Ambo'mu ri surugaé piyarai mennang! Dé'ga mulebbi mangke naiya manu'-manu'é? Nigana polé ri iko ri laleng abata-batangngé mulléi palampéiriwi umuru'na muwi céddé? Magi mubata-bata passalenna pakéyammu? Pénessaiwi bunga-bunga bakungngé iya tuwoé ri padangngé. Iyaro bunga-bungaé dé' najjama sibawa dé'to natennung; iyakiya muwi Arung Salomo iya sugi makkuwaéro, dé' napaké pakéyang iya siggelloé bunga-bungaéro! Iyaro wellaé tuwoi ri padangngé essoéwé, na pappabajana ritunui gangka cappu. Namuni makkuwaro, Allataala bélo-béloiwi iyaro wellaé makkuwamani kessinna. Apalagi iko! Iyakiya iko makurang teppe'ko! Aja' mubata-bata sibawa makkeda, ‘Aga matu riyanré’, iyaré'ga, ‘Aga matu riyénung’, iyaré'ga, ‘Aga matu ripaké’? Iyaro gau'-gau'é tuli nalellungngi sining tau iya dé'é naissengngi Allataala. Padahal Ambo'mu ri surugaé naisseng makkedaé muwapparelluwang manengngiro. Jaji usahakangngi riyolo', kuwammengngi napparénta Allataala ri laleng atuwo-tuwommu sibawa pogau'ni élo-Na. Naiya manenna laingngé nawéréttokko matu Allataala. Rimakkuwannanaro, aja' mubata-bata passalenna esso bajaé. Saba' baja engka muto abata-batanna. Iyaé essoé genne'ni asussanna, dé'na naparellu mutambai.” “Aja' muwadélékiwi tau laingngé, kuwammengngi na alému dé'to nadélékiwi Allataala. Saba' pékkugiko madélékiwi tau laingngé, makkuwatoro Allataala madélékiko matu. Na ukkurang mupaké untu' tau laingngé, napaké towi matu Allataala untu' iko. Magi muwitai bulisa'é ri laleng matanna silessuremmu, na balo'é ri laleng matammu dé' mupéneddingiwi? Pékkugi mulléi makkeda lao ri silessuremmu, ‘Laono mai upassurekko bulisa'é polé ri matammu’, na ri laleng matammu engka balo'? Eh munapé'! Passuni riyolo' iyaro balo'é polé ri matammu, nainappako makkita sibawa manessa, nanamuwulléi passui bulisa'é polé ri matanna silessuremmu. Aja' muwéréngngi barang mapaccingngé lao ri asué, kuwammengngi iyaro asué dé' nagiling luruiko. Aja' muwéréngngi mutiyara bawié, kuwammengngi iyaro bawié dé' naléjja'-léjja'i iyaro mutiyaraé.” “Ellauno, namutarimai matu. Sappai, namulolongengngi matu. Getto'i, naritimpakekko matu tange'é. Nasaba tau iya maréllauwé, natarimai matu; tau iya massappaé nalolongengngi matu; na tau iya maggettoé ritimpakengngi matu tange'. Ri yelle'mu engkaga ambo' iya mpéréngngéngngi batu ana'na, rékko méllauwi roti? Iyaré'ga mpéréngngi ula, rékko méllauwi balé? Namuni majako, iyakiya muwisseng towi mabbéréyangngi iya makessingngé lao ri ana'-ana'mu, apalagi Ambo'mu ri surugaé? Lebbi-lebbipi Ambo'mu ri surugaé nabbéréyangngi matu iya makessingngé lao ri tau iya méllauwéngngi ri Aléna. Gaukengngi tau laingngé pada-pada iya muwéloriyé rigaukekko ri mennang. Iyanaro poko'na hukkunna Musa sibawa nappagguruwangngé nabi-nabié.” “Uttama'no lalo ri tange' macipié, saba' tange' sibawa laleng iya mattujué ri ranakaé battowa sibawa malowang, na maéga tau molai. Iyakiya macipii sibawa mawatangngi tange' nenniya laleng iya tiwiéngngi tauwé ri atuwongngé. Na banna céddé tau iya lolongengngéngngi.” “Atike'ko lao ri nabi-nabi palsué. Poléi matu mennang ri iko sibawa mallarikkodo bimbala', iyakiya sitongenna mennang pada-padai asu ale' masekkangngé. Muwissengngi matu mennang polé ri wassélé pangkaukenna. Alekale maddorié dé' napassu anggoro, sibawa alekale maddorié dé' napowassélé buwa ara. Polé ri pong ngaju macommo'é rilolongengngi buwa makessingngé, na polé ri pong ngaju iya dé'é namacommo, buwa maja. Pong ngaju macommo'é dé' nakkullé powassélé'i buwa majaé, sibawa pong ngaju iya dé'é namacommo dé' naulléi powassélé buwa makessingngé. Tungke' pong ngaju iya dé'é naulléi powassélé buwa makessingngé, ritubbangngi naritunu. Makkuwatoniro nabi-nabi palsué. Muwissengngi matu mennang polé ri wassélé pangkaukenna.” “Dé' naiya maneng tau iya mobbiék-Ka, ‘Puwang, Puwang’, mancaji matu anggotana umma'na Allataala, iyakiya banna bawang sining tau iya pogau'éngngi élona Ambo'-Ku ri surugaé. Ri Esso Kiyame', maéga tau makkeda matu ri Iyya, ‘Puwang, Puwang, tenniyaga ri laleng asemmu Puwang puraki palettu'i pasenna Allataala? Sibawa tenniyaga ri laleng asemmuto Puwang puraki paddésu'i sétangngé enrengngé pakangka maéga anu makalallaingngé?’ Iyakiya mappébali-Ka matu, ‘Dé' naengka uwissekko! Esu'ko polé kuwaé, iko pogau'éngngi majaé!’ ” “Tau iya méngkalingaéngngi ada-adak-Kué sibawa turusiwi, pada-padai tau mapanré iya patettongngéngngi bolana ri yasé'na batué. Wettunna teppa bosié sibawa poléi lempe'é enrengngé anginrajaé munrui bolaéro, iyaro bolaé dé' namaruttung saba' ripatettongngi ri yasé'na batué. Na tau iya méngkalingaéngngi ada-adak-Kué, iyakiya dé' naturusiwi, pada-padai tau madonggoé iya patettongngéngngi bolana ri yasé'na kessi'é. Wettunna teppa bosié, sibawa polé lempe'é enrengngé anginrajaé munrui bolaéro, maruttunni iyaro bolaé. Namaladde senna asolangenna!” Angkanna pajani Yésus mappagguru, nasining tau iya engkaé kuwaro hérang senna'ni méngkalingai pappagguruwan-Na. Saba' Aléna mappaggurui sibawa akuwasang, dé' napada-pada guru-guru agamana mennang. Nonnoni Yésus polé ri bulu-bulué, namaéga tau maccowériwi. Iyaro wettué poléni séddi tau iya malasa oli iya mappakatau-taué. Makkaluttuni ri yolona Yésus, nainappa makkeda, “Pa', rékko maéloki Pa', taullé pajjappaka' Pa'.” Nakarawani Yésus iyaro tauwé, namakkedato, “Uwéloriwi. Ajjappano!” Iyatoro wettué najjappa lasana. Nakkeda Yésus lao ri aléna, “Engngerangngi! Aja' mucuritai lao ri nigi-nigi. Iyakiya laoko ri imangngé, namuwéllauwi untu' pattentui makkedaé majjappano. Purairo akkasuwiyangenno akkarobangeng iya napparéntangngé Musa, selaku butti lao ri tauwé makkedaé tonget-tongenno majjappa!” Wettunna Yésus muttama' ri Kapernaum, engka séddi parawira Roma polé méwai sita, nanaéllau tulung ri Aléna. Nakkeda iyaro parawiraé, “Pa', malasai pattumanikku ri bolaé. Léwui dé' pakkullénna ri onrong atinrongngé sibawa manrasa-rasa senna'na.” Nakkeda Yésus, “Maélo-Ka lao pajjappai.” Nappébali iyaro parawiraé, “Aja'na Pa'. Dé' usitinaja tarimaki ri laleng bolaku. Tapparéntanni bawang Pa'. Najjappa matu iyaro pattumanikku. Saba' harusu' tokka tunru' ri paréntana ri tau mariyasé'é. Na ri yawaku engkato parajuri'-parajuri' iya harusu'é tunru ri paréntaku. Rékko usuroi séddié parajuri' ‘Laoko!’ laowi. Rékko makkedaka lao ri laingngé, ‘Laoko mai!’ poléi; sibawa rékko uparéntangngi atakku, ‘Ebbui iyaé!’ naébbui.” Wettunna naéngkalinga Yésus aga napowada iyaro parawiraé, bengnga senna'ni. Nanakkeda lao risining tau iya maccowériyéngngi, “Tenniya culé-culé iyaé tauwé. Dé'pa naengka Uruntu ri yelle'na tau Israélié teppe' makkuwaé tedde'na! Tongeng! Maéga tau polé alau sibawa yajang untu' mariyo-riyo sibawa Abraham, Ishak enrengngé Yakub ri laleng Lino Barunna Allataala. Padahal sining tau iya harusu'é mancaji umma'na Allataala ribuwangngi matu ri saliweng ri laleng pettangngé. Kuwaniro matu teri sibawa manrasa-rasa.” Nakkeda Yésus lao ri parawiraéro, “Lisuno, aga muwatepperiyéro kajajiyanni matu.” Na iyatoro wettué najjappa iyaro pattumaninna. Laoni Yésus ri bolana Pétrus. Naitani kuwaro matuwa makkunrainna Pétrus masemmeng ri onrong atinrongngé. Nakarawani Yésus limanna, nasoro semmenna. Naoto'na nappammula tumaningiwi Yésus. Mammulanana mapettang, natiwini tauwé lao ri Yésus maéga tau iya nauttamakiyé sétang. Na silappa adami bawang napaddésu'i Yésus sining sétangngéro sibawa napajjappa towi sininna tau malasaé. Napogau'i Yésus iya manennaro, nanallalengi iyaro kajajiyangngi aga napowada Nabi Yésaya, iyanaritu, “Natanggungngi anrasa-rasatta sibawa napajjappai lasata.” Engka maéga senna tau mattulilingiwi Yésus. Wettunna Yésus naita maneng mennang, nasuroni sining tau iya maccowériyéngngi malléttoiwi tapparengngé. Naengka séddi guru agama lao ri Yésus sibawa makkeda, “Pa' Guru, maéloka maccowériwi Bapa' kégi-kégi lao!” Nappébali Yésus, “Asu ale'é mappunnai liyang, sibawa manu'-manu'é mappunnai sarang, iyakiya Ana'na Tolinoé dé' nappunnai onrong léwu.” Nainappa engka séddi tau iya maccowériyéngngi makkeda, “Pa' tapalalona riyolo' lisu untu' kuburu'i ambo'ku.” Iyakiya mappébaliwi Yésus, “Accowéno ri Iyya, leppessanni siya tau maté kuburu'i taunna iya maté.” Naénré'na Yésus ri lopié namaccowéto ana'-ana' gurunna sibawangngi. Tennasenna-sennana anginraja masero senna'é mappo'i tapparengngéro angkanna iyaro lopié naunru bombang. Naiyaro wettué mattengngangngi Yésus matinro. Nalaona sining ana' gurun-Na nateddui. Namangobbi, “Pa', tulukki! Cilakaki'é!” Nakkeda Yésus, “Magi mumétau? Makurang teppe'ko ri Iyya!” Nainappa Yésus tettong nanagera'i angingngé sibawa tapparengngéro. Natennang senna'na iyaro tapparengngé. Héranni sining ana' gurunna Yésus. Nakkeda mennang, “Tau agana iyaé, namuwi angingngé sibawa bombangngé maccowéri towi paréntana!” Lettu'ni Yésus ri wiring tapparengngé ri daéra Gadara. Kuwaro engka duwa tau iya nauttamakiyé sétang lao ri Yésus. Iya duwa tauwéro majapperu senna, angkanna dé' séddi tau barani lalo kuwaro. Massui mennang polé ri gowa-gowana tampungngé nanagora, “Eh Ana' Allataala, maélo-Ko magaki? Maélonoga sissaki namuni tenniyapa wettunna?” Dé' namabéla polé kuwaro, engka maéga senna bawi sappa anré. Naéllauni iyaro sining sétangngé ri Yésus, “Rékko maélo-Ko suroki massu, suroki muttama' risining bawiéro.” Nakkeda Yésus, “Laono!” Nalaona iyaro sining sétangngé polé ri iya duwa tauwéro nanauttama ri laleng sining bawiéro. Nalarina iyaro sining bawié naluppe' polé ri wirinna peppingngé muttama' ri tapparengngé natallemme. Nalarina sining panganrowanna iyaro sining bawié lao ri kotaé, nanacuritai sining kajajiyangngéro, makkuwatoro passalenna aga pura kajajiyang sibawa iya duwa tau nauttamakiyé iyaro sétangngé. Na sininna tauwé ri kotaéro laoni mitai Yésus. Wettunna naita Yésus, naéllauni sibawa masero kuwammengngi nasalaiwi daérana mennang. Ménré'ni Yésus ri laleng lopié, nanalléttoiwi tapparengngé, nalisu ri kampong assalen-Na. Nanatiwina tauwé kuwaro ri Aléna séddi tau péso' iya léwué ri onrong atinrongngé. Wettunna Yésus naita battowana teppe'na sining tauwéro, makkeda-Ni ri tau péso'éro, “Sabbara'ko ana'-Ku! Riyaddampengenni dosa-dosamu.” Siyagangngaré guru-guru agama iya engkaé kuwaro makkeda ri laleng atinna, “Iyaé tauwé napakatunai Allataala!” Naissengngi Yésus pikkiranna mennang, jaji makkedai, “Magi namaja makkuwaro pikkirammu? Kéga lebbi gampang: powadai, ‘Riyaddampengenni dosamu’, iyaré'ga powadai, ‘Oto'no namujoppa?’ Iyakiya makkekkuwangngé maélo-Ka pabuttiwi ri iko makkedaé Ana'na Tolinoé makuwasai ri yasé'na linoéwé untu' maddampengengngi dosaé.” Nainappa makkeda Yésus lao ri tau péso'éro, “Oto'no, akkai onrong atinrommu namulao!” Naoto'na iyaro tau péso'é nalisu ri bolana. Wettunna naita iyaro sining tauwé kajajiyangngéro, métauni mennang sibawa napojini Allataala, saba' Allataala pura mabbéréyangngi akuwasanna iya battowa makkuwaéro lao ri rupatauwé. Nasalaini Yésus onrongngéro. Mattengngangngi joppa, naita-Ni séddi passinge' sima, riyasengngé Matius, tudang ri kantoro assimanna. Nakkeda Yésus ri aléna, “Laono mai namuwaccowé ri Iyya!” Natettonna Matius, nanaccowériwi Yésus. Wettunna Yésus mattengngang manré ri bolana Matius, poléni maéga passinge' sima sibawa sining tau iya riyangga' dé'é namakessing ri masaraka'é, maccowé manré sisama Yésus enrengngé sining ana' gurun-Na. Engka tau Farisi mitai gau'éro. Nakkutanana mennang ri ana'-ana' gurunna Yésus, “Aga saba'na gurummu namanré sisama passinge' simaéro enrengngé sining tau iya dé'é namakessing?” Naéngkalingai Yésus pakkutanana mennang, nanappébali, “Tau madisingngé dé' napparelluwang dottoro', banna tau malasaé bawang. Salidikiwi aga bettuwanna aya'na Kitta'éwé: ‘Paressé babuwa Uwélori, tenniya akkarobangeng olokolo'.’ Saba' engka-Ka polé tenniya untu' mobbii tau iya tongengngénna, sangadinna tau iya madosaé.” Purairo laoni sining ana' gurunna Yohanés Paccemmé ri Yésus. Nanakkutana mennang, “Magi idi sibawa sining tau Farisié nappuwasa na sining ana' gurunna Bapa' dé'?” Nappébali Yésus, “Pékkugi pallolongemmu? Weddigga sining undangengngé ri abottingengngé tassinnau atinna rékko engka mupi bottimpurané silaong mennang? Tentu dé'! Iyakiya engka matu narapii wettunna nariyala iyaro bottimpurané polé ri mennang. Ri wettuénnaro nainappa mappuwasa mennang. Dé'gaga tau téppangngi waju malaungngé sibawa sikenné kaing mabarué. Saba' iyaro kaing pattéppangngé cakkikkii matu nanasapé'i iyaro wajué, angkanna pédé' malowangngi sapé'na. Makkuwatoro dé'gaga tau tiri' anggoro baru ri laleng popang koli iya malaungngé. Saba' reppa'i matu sibawa masolangngi iyaro popangngé, natabbé anggoro'na. Iyaro anggoro barué ritiri'i ri laleng popang iya baruétto, kuwammengngi natette' madécéng iya duwa.” Ri wettu mabbicarana mupa Yésus sibawa sining ana' gurunna Yohanés Paccemmé, poléni séddi pamimpinna bola assompangngé. Makkaluttuni ri yolona Yésus, nakkeda, “Silalona maté ana' makkunraikku. Iyakiya, laoki mai takarawai kuwammengngi natuwo paimeng.” Natokkonna Yésus nasilaong sining ana' gurun-Na lao sibawa tauwéro. Iyatoro wettué nanagiling Yésus nanaitai iyaro makkunraié, nainappa makkeda ri aléna, “Pakkasse'i atimmu, ana'-Ku! Nasaba mateppe'ko ri Iyya, namuwajjappa!” Iyatoro wettué najjappa iyaro makkunraié. Nainappa lettu Yésus ri bolana pamimpinna bola assompangngé. Wettunna naita pacculé-culé oni-oni abbaratangngé sibawa maéga tau marukka, makkedani ri mennang, “Assu manekko! Iyaé ana'é dé' namaté'; matinroi bawang.” Nacawa-cawai manenni mennang Yésus. Massunana sining tauwéro, muttama'ni Yésus ri laleng bili'na iyaro anana'é nanakkatenningngi limanna. Natokkonna iyaro anana' makkunraié. Iyaro karébaé tassiyani ri sininna daéraéro. Laoni Yésus polé kuwaro na ri tengnga laleng engka duwa tau buta maccowériwi. Gorani mennang, “Ana' Daud, amaséiki!” Wettunna Yésus muttama' ri lalempola, poléni iya duwa tau butaéro ri Aléna. Makkutanani Yésus ri mennang, “Mateppe'koga makkedaé Uwullé pajjappako?” Nappébali mennang, “Mateppe', Pa'!” Nainappa nakarawa Yésus matanna mennang nakkedato, “Nasaba mateppe'ko, jajini aga muwamménasaiyé.” Naweddinna makkita mennang. Riparéngngerangini mennang ri Yésus sibawa matedde kuwammengngi aja' nappaissengengngi iyaro gau'é lao ri nigi-nigi. Iyakiya laowi mennang napatassiyai iyaro karébaé passalenna Yésus ri sininna daéraé. Wettunna meddé'na iya duwa tauwéro, séddi tau pépé iya nakuwasaiyé sétang ritiwi lao ri Yésus. Napaddésu'ni Yésus iyaro sétangngé, naiyatoro wettué naweddinna mabbicara iyaro tauwé. Héranni iyaro tau maégaé nakkeda, “Dé'pa naengka taita kajajiyang makkuwaéwé ri Israélié!” Iyakiya makkedai sining tau Farisié, “Kapalana sining sétangngé ritu mpéréngngi kuwasa untu' paddésu'i iyaro sining sétangngé.” Makkuwaniro Yésus lao mattulili polé riséddié kota lao ri kota laingngé sibawa polé riséddié kampong lao ri kampong laingngé. Mappagguruni risining bola assompangngé, sibawa mappallebbangengngi Karéba Madécéngngé, pékkugi Allataala mapparénta selaku Arung. Napajjappai sining tau nakennaé maddupa-rupang lasa sibawa sala-salangngé watakkaléna. Wettunna naita Yésus tau maégaéro, messéni babuwana lao ri mennang, saba' malippui mennang enrengngé dé' pakkullénna, pada-pada bimbala' dé'é pakkampina. Nakkedana Yésus lao ri sining ana' gurun-Na, “Maéga éngngalang, iyakiya céddé'mi paréngngala. Rimakkuwannanaro, éllauno ri punnaé dare'ro kuwammengngi nakiring paréngngala untu' éngngalanna.” Engka séuwa esso naobbii Yésus iya seppulo duwa ana' gurun-Na maddeppungeng. Nanawéréngngi mennang kuwasa untu' paddésu'i roh-roh majaé sibawa pajjappai sininna rupa-rupanna lasaé enrengngé sininna rupanna tau sala-salangngé watakkaléna. Asenna iyaro seppuloé duwa rasul iyanaritu: mammulangngé, Simon (iya ritasengngétto Pétrus) sibawa silessurenna Andréas, nainappa Yakobus sibawa silessurenna Yohanés, iyanaritu ana'-ana'na Zébédéus. Purairo, Pilipus nenniya Bartoloméus, sibawa Tomas kuwaéttopa Matius, passinge' simaé, enrengngé Yakobus ana' Alféus sibawa Tadéus; paccappurenna Simon, si Patriot sibawa Yudas Iskariot iya bali'bellariyéngngi Yésus. Nainappa nakirinni Yésus iyaro seppuloé duwa rasul sibawa lolongeng panunju'-panunju'éwé, “Aja' mulao ri daérana sining tau tenniyaé tau Yahudi. Aja'to ri kota-kotana tau Samariaé. Iyakiya laono risining tau Israélié, lebbi-lebbipi ri iya maneng pusaé. Powadangngi mennang makkedaé dé'na namaitta napparénta Allataala selaku Arung. Pajjappai sining tau malasaé; patuwoi sining tau iya mate'; pajjappai sining tau iya malasa oli mappakatautaué, sibawa paddésu'i sétangngé. Purani mutarima manenro sibawa cuma-cuma. Jaji abbéréyang towi sibawa cuma-cuma. Aja' mutiwi dowi ulaweng, dowi péra', iyaré'ga muwi dowi tembaga. Aja'to mutiwi sépu-sépu passidekka, iyaré'ga duwallampa pakéyang untu' laommu, iyaré'ga sapatu, iyaré'ga tekkeng. Saba' tau majjamaé, sitonget-tongenna harusu'i ritanggung apparelluwanna. Rékko lettu'ko ri kotaé iyaré'ga ri kampongngé, sappako séddi tau iya maéloé tarimako. Onrono silaong iyaro narapi joppasiko. Ri wettu muttama'mu bolaé, akkedako, ‘Tennapodo Puwangngé barakkakiko!’ Rékko natarimako sining tauwé ri bolaéro, leppessanni siya pappassalama'muro tette ri mennang. Iyakiya rékko dé' natarimako mennang, gettengngi lisu iyaro pappassalama'mu. Rékko bolaé iyaré'ga kotaé dé' namaélo tarimako iyaré'ga dé' namaélo méngkalingako, salaiwi iyaro onrongngé sibawa akkeppikengngi awunna palakajému. Engngerangngi! Ri Esso Kiyame', sining taunna Kota Sodom sibawa Gomora lebbi gampangngi matu riyaddampengeng ri Allataala, naiya sining tau ri kotaéro.” “Pénessaiwi iyaé: Ukirikko pada-pada bimbala'é ri tengnga-tengngana asu ale'é. Harusu'ko matike' pada-pada ulaé sibawa matinulu pada-pada jangang-jangangngé. Jaga-jagako, saba' ritikkekko matu naripangolo ri Mahkamana Agamaé. Risissako matu risining bola assompangngé. Ritiwiko matu ri yolona panguwasa-panguwasaé sibawa sining arungngé nasaba maccowéko ri Iyya. Na iyanaro kasempatammu mabbéré asabbiyang passalenna alé-Ku lao ri mennang sibawa risining tau dé'é naissengngi Allataala. Iyakiya rékko ritiwiko untu' riyadéléki, aja' mubata-bata passalenna aga harusu' mupowada, iyaré'ga pékkugiko harusu' mabbicara. Saba' aga iya harusu'é mupowadaro, ripaissengiko matu ri wettunna. Nasaba iya mabbicaraé ri wettuéro tenniya iko, sangadinna Rohna Ambo'é ri surugaé, na iko nallalengi. Kajajiyangngi matu makkedaé nabbéréyangngi matu tauwé silessurenna untu' riyuno. Naiyatoro matu kajajiyang ri ambo'é sibawa ana'na. Ana'-ana'é naéwai matu indo' ambo'na, sibawa nabbéréyangngi mennang untu' riyuno. Ribenciko matu ri sininna tauwé nasaba muwaccowéri-Ka. Iyakiya tau iya tahangngé lettu ri paccappurenna ripassalama'i matu. Rékko ripanrasa-rasako riséddié kota, lariko ri kota rappina. Upaissengiko: Riwettu dé'napa napura maneng mujoppai kota-kotana Israélié, engkani polé Ana'na Tolinoé. Ana' gurué dé' nalebbi battowa naiya gurunna. Na séddié pattumani dé' nalebbi battowa naiya puwanna. Cuku'ni rékko séddié ana' guru mancajiwi pada-pada gurunna, sibawa séddié pattumani pada-pada puwanna. Rékko riyasengngi Béélzébul kapala kaluwargaé, apalagi silise bolana. Riyasengngi matu mennang iya lebbi majaéppasi!” “Aja' mumétau ri tolinoé. Dé' gaga tassubbu iya dé'é napaita matu, sibawa dé' gaga iya rirahasiyakangngé iya dé'é naribongkara' matu. Aga iya Upowadaé ri laleng pettangngé harusu'i mupakkoling ri laleng tajangngé ri lakessoé. Sibawa aga ribicikengngé ri daucculimmu, appallebbangengngi iyaro pédé' malowang! Aja' mumétau lao ri mennang iya mpunoéngngi tubué, iyakiya dé' namakuwasa mpunoi nyawaé. Etauko ri Allataala iya makuwasaé pabbinasai tubué nenniya nyawaé ri laleng ranaka. Duwakkaju dongi wedding riyelli sibawa dowi kaminang baiccu'é. Namuni makkuwaro dé' gaga muwi sikaju sempé ri tanaé rékko dé' napuwéloi Ambo'mu. Muwi jumellana gemme'mu ri ulummu pura manetto ribilang. Rimakkuwannanaro aja' mumétau! Lebbi mangke'ko naiya manu'-manu' dongiéro!” “Nigi-nigi mangakuiwi ri yolona tau maégaé makkedaé maccowéi ri Iyya, Uwangakui towi ri yolona Ambo'-Ku ri surugaé. Iyakiya nigi-nigi massakkarekka ri yolona tau maégaé makkedaé maccowéi ri Iyya, Uwassakkareng towi ri yolona Ambo'-Ku ri surugaé.” “Aja' muwasengngi makkedaé tiwi-Ka adaméngeng ri linoé. Dé' Utiwi adaméngeng, iyakiya assipangéwangeng. Engkaka polé nassabariwi ana' worowané naéwai ambo'na, ana' makkunraié naéwai indo'na, sibawa ménéttu makkunraié naéwai matuwa makkunrainna. Ya, iya mancajiyé matu bali kaminang battowaé iyanaritu anggota kaluwargata. Tau iya mamaséiyéngngi ambo'na iyaré'ga indo'na lebbi na Iyya, dé' nasitinaja mancaji ana' guruk-Ku. Makkuwatoro tau iya mamaséiyéngngi ana' worowanéna iyaré'ga makkunrainna lebbi na Iyya. Sibawa tau dé'é namaélo méssangngi sallina nanaccowéri-Ka, dé' nasitinaja mancaji ana' guruk-Ku. Tau linrungiyéngngi atuwonna, ateddéngengngi matu atuwonna, iyakiya tau iya ateddéngengngé atuwong nasaba matinului ri Iyya, nalolongengngi matu atuwonna.” “Tau iya tarimaékko, natarima-Ka. Na tau iya tarimaék-Ka, natarimai iya suroék-Ka. Tau iya tarimaéngngi nabié nasaba nabiwi, tarimai matu saro séddié nabi. Na niga tarimai séddié tau iya makessingngé nasaba makessingngi, tarimai matu saro séddié tau iya makessingngé. Nigi-nigi mappainung, namuni uwai keccé bawang lao ri sala séddinna tau polé risining tau matunaéwé, nasaba ana' guruk-Kui, ateppe'no pasti natarimai matu sarona!” Puranana Yésus mabbéré panunju'-panunju' lao riseppuloé duwa ana' gurun-Na, Nasalaini iyaro onrongngé. Laoni mappagguru sibawa mappallebbangengngi pasenna Allataala ri kota-kota iya macawé'é kuwaro. Yohanés Paccemmé iya ritarungkué, naéngkalingani passalenna jama-jamanna Kristus. Nainappa nasuro siyagangngaré ana' gurunna lao ri Yésus untu' makkutanangngi, “Bapa'ga tau maéloé polé situru jancinna Allataala, iyaré'ga harusu'ki tajeng tau laing?” Nappébali Yésus, “Lisuno ri Yohanés namupowadangngi aga muwéngkalinga sibawa muwita: Makkita tau butaé, joppa tau péso'é, majjappa tau malasa oli iya mappakatau-taué; maréngkalinga tau mataru-tarué, tuwo tau maté, sibawa Karéba Madécéng polé ri Allataala riyabbirittang lao ri tau kasiyasié. Masennangngi tau iya dé'é nappunnai alasang untu' sampéyangngi Iyya” Lisunnana iyaro sining surona Yohanés, mammulani Yésus mabbicara lao ri tau maégaé passalenna Yohanés, adan-Na, “Laoko ri padang kessi'é aga maélo muwita? Silampa wellaga iya nairié anging? Aga maélo lao muwita? Séddi tau iya mappakéyang makessingngéga? Tau iya mappakéyang makkuwaéro monroi ri saorajaé! Jaji magi mulao ri padang kessi'é? Untu' mita séddi nabiga? Tongeng, mala lebbi na séddié nabi. Saba' Yohanés ritu naseng ri laleng Kitta'éwé, ‘Iyanaé suro-Ku, adanna Allataala, Usuroi lebbi riyolo na Iko kuwammengngi natimpakek-Ko laleng.’ Engngerangngi! Ri linoéwé dé' naengka tau lebbi battowa naiya Yohanés Paccemmé. Namuni makkuwaro, tau iya kaminang baiccu'é ri yelle'na umma'na Allataala lebbi battowai naiya Yohanés. Sipongenna Yohanés nabbirittang karébanna lettu makkekkuwangngé, riyéwai umma'na Allataala risining tau iya makkuragaé makuwasaiwi sibawa awatangeng. Narapi apolénna Yohanés, sininna hukkung nabbéréyangngé Musa sibawa pappagguruwanna nabi-nabié nabotoi passalenna gau'-gau' iya harusu'é kajajiyang. Narékko maéloko mateppe', Yohanés ritu Elia, iya pura ribotoénna apolénna. Rékko mappunnaiko daucculing, éngkalingai! Nasibawang niga harusu' Upasibanding sining tauwé makkekkuwangngé? Pada-padai mennang ana'-ana' iya tudangngé ri pasaé. Sikonrong gora lao ri laingngé, ‘Riyakkélongekko élong mariyo-riyo, iyakiya dé' mumaélo séré! Makkélokki élong mabbarata, na iko dé' mumaélo teri!’ Poléi Yohanés – mappuwasai dé' nainung anggoro; nakkeda sining tauwé ‘Nauttamakiwi sétang!’ Namakkekkuwangngé poléni Ana'na Tolinoé – manréi sibawa ménung; nakkeda sining tauwé, ‘Itai tauwéro! Mabélala, pammabokeng, sellaonai passinge' simaé sibawa tau madosaé.’ Namuni makkuwaro, apanrénna Allataala pabuttiwi polé ri wassélé'-wassélé'na.” Nainappa mappammulani Yésus cellai kota-kotaé, ri onrong kaminang maégaé mébbu anu makalallaingngé. Saba' sining tauwé ri kota-kotaéro dé' namaélo toba' polé ri dosa-dosana mennang. “Cilakano iko Korazim! Macilaka tono iko, Bétsaida! Akkalarapanna sining anu makalallaingngé iya naébbué ri tengnga-tengngamu pura napogau'i ri Tirus sibawa Sidon, pasti sining tauwé kuwaro maittana natoba' polé ri dosa-dosana mennang sibawa paké pakéyang mabbarata enrengngé taroiwi awu ulunna. Engngerangngi, ri Esso Kiyame', sining tau Tirus-é sibawa Sidongngé lebbi magampangngi matu riyaddampengeng ri Allataala naiya iko! Na iko, Kapernaum! Maélokoga ripakatanré lettu ri surugaé? Mala riyabbéyakko matu ri ranakaé! Saba' akkalarapanna sining anu makalallaingngé iya naébbué ri tengnga-tengngamuro pura ri yébbui ri Sidon, engka mupi Sodom lettu makkekkuwangngé! Engngerangngi, ri Esso Kiyame', lebbi gampangngi tau Sodongngé riyaddampengeng ri Allataala naiya iko!” Iyaro wettué massempajanni Yésus, “Ambo', Puwang iya makuwasaiyéngngi langié sibawa linoé! Mattarima kasi'-Ka lao ri Iko saba' iya manennaro Murahasiyakangngi polé risining tau maccaé sibawa engkaé pangissengenna, iyakiya Muwappaitangngi lao risining tau dé'é namacca. Iyanaro pésennangiwi atinna Ambo'.” Nainappa Yésus makkeda, “Sininna séuwa-séuwaé purani nabbéréyang Ambo'é lao ri Iyya. Dé' séddi tau missengngi Ana'é saliwenna Ambo'é. Dé'to gaga missengngi Ambo'é saliwenna Ana'é sibawa lao risining tau iya Ana'é pura napaissengi passalenna Ambo'é. Laono mai ri Iyya iko maneng posoé sibawa péneddingiyéngngi tane'na tiwié; maélo-Ka pétakkariko. Accowériwi parénta-Ku sibawa agguruno ri Iyya. Saba' Iyya'é malemma kininnawaka, namatakka matu péneddimmu. Nasaba pasennangi sining parénta-Ku, sibawa maringeng tiwi iya Upatiwiriyékko.” Riséuwaé esso Saba', wettunna Yésus lalo riséddié dare' gandong, mammulani ana'-ana' gurun-Na mala gandong saba' malupui. Wettunna naita sining tau Farisiéro, makkedani mennang lao ri Yésus, “Itai! Ana'-ana' gurum-Mu majjalékkaiwi hukkunna agamata ri laleng napogau'na iya riyattéyangngé ri esso Saba'é.” Nappébali Yésus, “Dé'paga naengka mubacai passalenna aga iya napogau'é Daud wettunna aléna sibawa sininna taunna malupu? Muttama'i ri laleng Bolana Allataala, nainappa nanré roti iya puraé riyakkasuwiyangeng ri Allataala. Padahal manuru' hukkunna agamata, Daud sibawa sining taunnaro dé' nawedding nanré iyaro rotié – banna bawang sining imangngé wedding. Iyaré'ga dé'paga naengka mubacai ri laleng Hukkunna Musa makkedaé tungke' esso Saba' sining imang iya majjamaé ri Bolana Puwangngé najjalékkaiwi peraturanna esso Saba'é, iyakiya dé' naripassala? Pénessaiwi aga iya upowadaéwé: kuwaé engka iya lebbi battowaé naiya Bolana Puwangngé. Ri laleng Kitta'é tarokii: Paressé babuwa ritu iya Uwéloriyé, tenniya akkarobangeng olokolo. Rékko mémeng mupahangngi tonget-tongeng adaéwé, pasti dé' mumaélo passalai sining tau iya dé'é napasala. Nasaba Ana'na Tolinoé nakuwasaiwi esso Saba'é.” Nasalaini Yésus iyaro onrongngé nanalao riséddié bola assompang. Kuwaro engka tau iya maté siwalié limanna. Siyagangngaré tau iya maéloé sappai asalanna Yésus, makkutana ri Aléna, “Weddigga ripajjappa tauwé ri esso Saba'é?” Nappébali Yésus, “Akkalarapanna engka séddi tau polé ri yelle'mu mappunnai séddi bimbala', na ri esso Saba'é iyaro bimbala'é sempé'i ri laleng kalebbong iya malamungngé; dé'ga naiyaro tau punnaé bimbala' makkuragai passui iyaro bimbala'é polé ri laleng kalebbongngéro? Nalebbi mangke'i rupatauwé naiya bimbala'é! Jaji, rékko makkuwaitu wedding ritulung tauwé ri esso Saba'é.” Nainappa makkeda Yésus lao ri tau iya maté siwalié limanna, “Loro'i limammu.” Naloro'ni limanna iyaro tauwé, najjappana limanna iyaro tauwé pada-pada limanna siwalié. Iyakiya sining tau Farisié nasalaiwi iyaro bola assompangngé, nasiyempe maélo mpunoi Yésus. Naisseng Yésus makkedaé iyaro sining tau Farisié majai akkattana lao ri Aléna. Jaji Nasalaini onrongngéro namaéga tau maccowériwi. Nanapajjappai sininna tau malasaé. Iyakiya nattéyangngi mappaissengengngi passalenna Aléna lao ri tau laingngé. Narimakkuwannanaro kajajiyanni aga napowada Allataala naolai Nabi Yésaya, “Iyanaé suro-Ku Upilé, Tau iya Uwamaséiyé sibawa nasitujuiyé atik-Ku. Uwéréngngi matu Roh-Ku ri Aléna, Nabbirittangngi matu adélékek-Ku ri bangsa-bangsaé. Dé' matu Nassasa iyaré'ga gora, iyaré'ga mappidatong risining watattanaé. Bulo iya nroko'é dé' matu Naripolo pajjennangeng iya mappiddé-piddéé dé' Naripeddéi. Méwai matu narapi Nalolongeng adélékengngé; sininna bangsaé nataroi matu amménasanna ri Aléna.” Naritiwina ri Yésus séddi tau iya butaé sibawa pépé nasaba rikuwasaiwi ri sétangngé. Napajjappani Yésus iyaro tauwé angkanna naulléi mabbicara sibawa makkita. Hérang manenni tauwé nakkeda, “Makkulléga iyanaé Ana'na Daud iya riyajjanciyangngéro?” Wettunna naéngkalinga sining tau Farisié, mappébalini mennang, “Iyaé banna naulléi paddésu'i sétangngé, nasaba Béélzébul, kapalana sining sétangngé, pura mpéréngngi iyaro akuwasangngé lao ri Aléna.” Naissengngi Yésus pikkiranna sining tau Farisiéro. Jaji makkedani lao ri mennang, “Rékko séuwaé wanuwa tabbagéi ri laleng golongang-golongang iya sisullé simusu, dé' natahang matu iyaro wanuwaé. Na séddié kota iyaré'ga kaluwarga iya tabbagé-bagé sibawa simusu séddié sibawa laingngé ancuru' matu paggangkanna. Makkuwatoro ri laleng akkarungenna Ibillisi'é; rékko séddié kalompo' rukkai kalompo' laingngé, tabbagé-bagéi matti iyaro akkarungenna Ibillisi'é angkanna maruttung. Makkedako makkedaé Upaddésu'i sétangngé nasaba akuwasanna Béélzébul. Rékko makkuwaitu, nasibawang akuwasang niga ana'-ana' gurummu paddésu'i sétangngé? Aléna ana'-ana' gurummu pabuttiwi makkedaé salako! Iyakiya Iyya Upaddésu'i sétangngé sibawa akuwasanna Rohna Allataala. Bettuwanna iyaro makkedaé mappammulani Allataala mapparénta ri tengnga-tengngamu. Pékkugi tauwé naulléi muttama' ri lalempolana séddié tau iya mawatangngé untu' rampasa'i waramparanna, rékko dé' nasiyoi lebbi riyolo iyaro tau mawatangngé? Purapiro, nainappa naulléi rampasa'i waramparanna. Tau iya dé'é naccowé ri Iyya, sitongenna naéwa-Ka. Na tau iya dé'é nabantu-Ka, sitongenna nasolangiwi jama-jamak-Ku! Rimakkuwannanaro, issengngi, rékko pogau'i dosa tauwé sibawa powada pappakatuna, weddingngi riyaddampengeng! Iyakiya rékko napakatunai Rohna Allataala dé' nawedding riyaddampengeng! Rékko engka napowada tauwé méwai Ana'na Tolinoé, weddingngi riyaddampengeng, iyakiya rékko napakatunai Rohna Allataala, dé' nakkullé riyaddampengeng, muwi makkekkuwangngé iyaré'ga ri ahéra'.” “Untu' lolongeng buwa iya makessingngé, harusu'i macommo' ponna. Rékko dé' namacommo ponna, dé'to namakessing buwana. Macommo' iyaré'ga dé'na séddié pong ngaju riissengngi polé ri buwana. Iko tau majako, pékkugi mulléi powadai gau'-gau' iya makessingngé rékko majako? Aga napowada iyaro témué massui polé ri atié! Tau makessingngé napowadai gau'-gau' iya makessingngé nasaba pennoi akessingeng. Sibalé'na tau iya majaé napowadai gau'-gau' iya majaé nasaba pennoi ja. Jaji, éngngerangngi: ri Esso Kiyame', tungke' tau harusu'i tanggung jawakiwi tungke' ada-adanna iya dé'é nakkéguna. Saba'ada-adammu ritu ripaké matu pettuiwi pasalakoga iyaré'ga dé'.” Nainappa siyagangngaré guru agama sibawa tau Farisi makkeda, “Pa' Guru, macinnaki mitai Bapa' mébbu anu makalallaing.” Nappébali Yésus, “Temmaka jana sibawa dorakana sining tauwé wettuéwé! Muwéllau-Ka mébbu anu makalallaing? Dé' matu nariwérékko anu makalallaing, muwi séddi, sangadinna anu makalallainna Nabi Yunus. Monroi Yunus tellung ngesso tellumpenni ri lalenna babuwana balé loppoé. Makkuwatoro Ana'na Tolinoé monroi matu tellung ngesso tellumpenni ri lalenna babuwana tanaé. Ri Esso Kiyame', moto'i matu pabbanuwana Niniwé silaong sining tauwé makkekkuwangngéwé nanatenre'i mennang. Saba' toba'ni tau Niniwé polé ri dosana, wettunna Yunus makkatobba lao ri mennang. Iyakiya makkekkuwangngé kuwaé engka lebbi battowa naiya Yunus! Ri Esso Kiyame', tokkongngi matu ratu polé ri wanuwa yattangngé silaong sining tauwé makkekkuwangngé nanatenre'i mennang. Saba' untu' méngkalingai pangajana Salomo iya mapanré, iyaro ratué joppai mabéla senna polé ri cappa'na linoé. Iyakiya makkekkuwangngé kuwaé engka lebbi battowa naiya Salomo!” “Rékko roh majaé nasalaiwi séddié tau, iyaro roh-é mattuliliwi risining onrong marakkoé untu' sappa onrong mappésau, iyakiya dé' nalolongengngi. Rimakkuwannanaro makkedai, ‘Maéloka lisu ri bola iya puraé usalai.’ Wettunna lettu kuwaro, iyaro bolaé lobbanni, mapaccing sibawa taratoro'. Nalaona sibawa tiwi pitu roh laing iya lebbi majaé naiya aléna. Nainappa muttama' ri lalenna tauwéro, naonro kuwaro. Na angkanna keadaanna iyaro tauwé lebbi majani naiya pammulanna. Iyatonaro kajajiyang matu sibawa sining tau majaé wettuéwé.” Wettunna Yésus mabbicara mupi sibawa tau maégaéro, poléni indo'na sibawa silessu-silessuren-Na. Tettongngi mennang ri saliweng nanakkuragato untu' mulléi mabbicara sibawa Aléna. Séddi tau polé ri tau maégaéro makkeda lao ri Yésus, “Pa', indo' sibawa silessu-silessurenna Bapa' engkai ri saliweng. Macinnai mennang mabbicara sibawa Bapa'.” Nappébali Yésus, “Niga indo'-Ku? Niga silessu-silessurek-Ku?” Nainappa majjello' lao ri ana'-ana' gurun-Na sibawa makkeda, “Iyanaé indo' sibawa silessu-silessurek-Ku. Tau iya pogau'éngngi élona Ambo'-Ku ri surugaé, aléna ritu silessureng worowané, silessureng makkunrai, sibawa indo'-Ku.” Iyatoro essoé nasalaiwi Yésus iyaro bolaé nalao ri wirinna tapparengngé natudang kuwaro. Maéga senna tau maddeppungeng mattulilingiwi Yésus, rimakkuwannanaro laoni Yésus tudang ri lalenna lopié na iyaro tau maégaé tudangngi ri wirinna tapparengngé. Nanappagguruna Yésus maéga passaleng lao ri mennang ri laleng pakkalarapang. Napammulaini Yésus curita-Na, “Engka séddi patani lao mangampo biné. Wettunna mampo, engka biné teppa ri lalengngé. Napoléna manu'-manu'é nananréi iyaro biné angkanna cappu. Engkato teppa ri onrong mabbatu-batué, iya céddé'mmi tanana. Iyaro sining biné masitta'i tuwo nasaba céddé tanana. Iyakiya wettunna matanréni essoé, mammulani makelle cura'-cura'na sibawa maté nasaba dé' namalamung ure'na. Engkato teppa ri tengngana alekale maddorié. Iyakiya alekale maddorié tuwoi sibawa nalimpengiwi iyaro cura'-cura'é angkanna dé' naulléi mabbuwa. Iyakiya engkato biné teppa ri tana iya macommo'é, nanabbuwa; engka leppe' wekkasératu, engka enneng pulona na engkato telluppulo.” Puranana nacurita pakkalarapangngéro makkedani Yésus, “Rékko mappunnaiko daucculing, éngkalingai!” Nainappa poléni ana'-ana' gurunna Yésus nanakkutana ri aléna, “Magi Bapa' napaké pakkalarapang rékko mabbicarai sibawa tau maégaéro?” Nappébali Yésus, “Saba' purani riwéréng pangissengeng untu' missengngi rahasiyana passalenna pékkugi Allataala mapparénta, na mennang dé'. Tau iya mappunnaiyénna, maéloi riwéréng lebbi maéga, na pédé' alebbinna matu. Iyakiya tau iya dé'é nappunnai agaga, na céddé iya engkaé ri aléna mala riyalai matu. Iyanaro saba'na Upaké pakkalarapangeng, rékko mabbicaraka sibawa tau maégaé, saba' naitai mennang, iyakiya pada-padai tau dé'é nakkita; maréngkalingai mennang iyakiya pada-padai tau iya dé'é namaréngkalinga sibawa dé'é namappahang. Ri lalennaé kajajiyangngi iya nabotoé Nabi Yésaya, ‘Makkedai Allataala: Matteru-terui matu mennang maréngkalinga iyakiya dé' mupahangngi; matteru-terui matu mennang pénessaiwi iyakiya dé' muwissengngi aga kajajiyang. Saba' makunruni pikkiranna sining tauwé, mataru-taruni daucculinna sibawa napappeddenni matanna mennang. Kajajiyangngi iyaé kuwammengngi aja' nakkita matanna mennang, aja' namaréngkalinga daucculinna mennang, aja' nappahang pikkiranna mennang na aja' nalisu ri Iyya, na-Upajjappai mennang.’ ” Nakkeda Yésus lao ri ana'-ana' gurun-Na, “Iyakiya temmaka upe'mu iko, saba' tonget-tongengngi muwita sibawa muwéngkalinga. Engngerangngi, maéga nabi sibawa tau iya matinulué lao ri Allataala macinna mitai iyaro muwitaé makkekkuwangngéwé, iyakiya dé' mennang naitai. Macinnai mennang méngkalingai aga iya muwéngkalingaé makkekkuwangngéwé, iyakiya dé' naéngkalingai mennang.” “Engkalingani bettuwanna pakkalarapangeng passalenna pangampoéro. Biné iya teppaé ri lalengngé maddapangengngi tau iya méngkalingaéngngi karéba passalenna pékkugi Allataala mapparénta, iyakiya dé' napahangngi. Poléi Ibillisi'é narampasa'i aga iya pura riyampoé ri laleng atinna mennang. Biné iya teppaé ri tana mabbatu-batué, maddapangengngi tau iya méngkalingaéngngi iyaro karébaé, namatteru natarima sibawa masennang atinna. Iyakiya iyaro karébaé dé' nakkure' ri laleng atinna mennang, angkanna dé' natahang maitta. Lolongenna mennang asussang iyaré'ga paccallang nasaba iyaro karébaé, matteruna mennang massakka. Biné iya teppaé ri tengnga-tengngana alekale maddorié maddapangengngi tau iya méngkalingaéngngi iyaro karébaé, iyakiya bata-batai passalenna atuwonna mennang sibawa macinnai magello atuwo-tuwonna. Rimakkuwannanaro iyaro karéba polé ri Allataala tassipii ri laleng atinna mennang angkanna dé' nakkébuwa. Na biné iya teppaé ri tana macommo'é maddapangengngi tau iya méngkalingaéngngi iyaro karébaé sibawa napahanna. Mabbuwai mennang maéga, engka sératu, engka enneng pulona, na engkato leppe' wékkatelluppulo wassélé'na.” Nacuritasi Yésus séddi pakkalarapangeng, lao ri tau maégaé, adan-Na, “Rékko mapparéntai Allataala, keadaanna pada-padai iyaé: Engka séddi patani mampo biné gandong iya makessingngé ri dare'na. Riséuwaé wenni, wettunna matinro maneng tauwé, iyaro balinna patanié poléi mampo biné ariya ri yelle'na gandongngéro, nainappa lao. Wettunna tuwo iyaro tanet-tanengngé sibawa mammula cumpa toso'na, paita toni iyaro ariyaé. Napoléna iyaro sining tau iya napagajiyé patanié ri pataniéro, nakkeda, ‘Puwang, tenniyaga biné makessing Puwang ritaneng ri dare'ta? Pékkugi carana naéngka ariya kuwaro?’ Nappébali iyaro patanié, ‘Iyaro pangkaukenna balié.’ Nanakkutanasi sining tau napagajié iyaro patanié, ‘Tapuwéloiga Puwang laoki bébbui iyaro ariyaé?’ Nappébali, ‘Aja', saba' rékko ribébbui iyaro ariyaé, maccowé towi matu mabébbu gandonna. Leppessanni siya iyaro ariyaé tuwo sibawa lettu wettu éngngalang. Upowadappi matu sining tau méngngalaé: Paddeppungengngi riyolo' ariyaé, siyoi nainappa ritunu. Purairo paddeppungengngi gandonna, nainappa mutaro ri laleng lappoé.’ ” Nacuritasi Yésus séddi pakkalarapangeng lao ri tau maégaé, adan-Na, “Rékko mapparéntai Allataala, keadaanna pada-padai pakkalarapangngéwé: Séddié batu sawi riyala riséddié tau nainappa nataneng ri dare'na. Batu sawi iyanaritu biné iya kaminang baiccu'é. Iyakiya rékko tuwoi, mancajiwi iya kaminang battowaé ri yelle'na tanet-tanengngé. Mabbatangngi, angkanna poléi manu'-manu'e massarang ri takke-takkena.” Engka séuwa pakkalarapangeng laing iya nacuritaé Yésus lao ri tau maégaé. “Rékko mapparéntai Allataala, keadaanna pada-padai ragi iya nalaé séddié makkunrai, nainappa napasigaru patappulo banna labbu tarigu angkanna sawé maneng.” Iya manennaro nappagguruwangngi Yésus lao ri tau maégaé sibawa paké pakkalarapangeng. Ri lalennaro kajajiyangngi iya napowadaé nabié, “Pakéka pakkalarapangeng rékko mabbicaraka sibawa mennang; maélo-Ka mabbirittangngi gau'-gau' iya tassubbué sipongenna ripancaji linoé.” Purairo nasalaini Yésus iyaro tau maégaé, nanauttama ri bolaé. Napoléna ana'-ana' gurun-Na sibawa makkeda, “Coba Bapa' pakatajangekki bettuwanna iyaro pakkalarapangeng ariyaé ri yelle'na gandongngé.” Nappébali Yésus, “Iyaro tau mampoé biné makessingngé iyanaritu Ana'na Tolinoé. Iyaro dare'é iyanaritu linoéwé. Biné makessingngé iyanaritu sining tau iya mancajiyénna umma'na Allataala. Iyaro ariyaé iyanaritu sining tau iya maccowéé ri Ibillisi'. Bali iya tanengngéngngi iyaro ariyaé iyanaritu Ibillisi'. Wettu éngngalangngé iyanaritu Esso Kiyame', na sining tau iya méngngalaéro iyanaritu malaéka'-malaéka'é. Pékkugi ariyaé ripaddeppungeng naritunu ri laleng apié, makkuwatoniro ri Esso Kiyame' matti. Ana'na Tolinoé suroi matu malaéka'-malaéka'-Na paddeppungengngi polé ri yelle'na umma'-Na sininna iya nassabariyé tauwé pogau' dosa, sibawa sininna tau laingngé iya pogau'é ja. Ribuwangngi matu mennang ri laleng dapo malluwa'-luwa'é; nakkuwanaro matu teri sibawa manrasa-rasa. Na sining tau iya pogau'éngngi élona Allataala mattappai matu pada-pada mata essoé ri laleng Lino Barunna Allataala, Ambo'na mennang. Jaji, rékko maddaucculikko, éngkalingai!” “Rékko mapparéntai Allataala, keadaanna pada-padai pakkalarapangengngéwé: Engka waramparang tallemme' ri laleng tanaé nariruntu' riséddié tau, nanaputtama'i paimeng ri laleng tanaé. Nasaba rennunna iyaro tauwé, laoni nabalu'i sininna appunna-punnangenna, nainappa lisu melliwi iyaro tanaé.” “Rékko mapparéntai Allataala, keadaanna pada-padai pakkalarapangengngéwé: Engka séddi padangkang sappa mutiyara iya masulié. Wettunna nalolongeng sibatu mutiyara iya magello senna'é iya dé'é padanna, masitta'ni lao nanabalu' manengngi appunna-punnangenna, nainappa naelli iyaro mutiyara sibatué.” “Rékko mapparéntai Allataala, keadaanna riyakkalarapangengngi jala iya ripallebba'é ri tapparengngé, nalolongeng maddupa-rupang balé. Pennonana iyaro jalaé, nakkani sining pakkajaé iyaro jalaé ménré ri pottanangngé. Nainappa tudang piléi iyaro sining balé: Iya makessingngé nataroni ri bémpaé naiya dé'é namakessing nabuwanni. Makkuwatoniro lao-laona ri Esso Kiyame', laowi matu malaéka'-malaéka'é passara-sarangngi sining tau majaé polé risining tau iya pogau'éngngi élona Allataala. Nainappa iyaro sining tau majaé ribuwangngi ri laleng dapo makkéapié. Nakkuwanaro matu teri sibawa manrasa-rasa.” Nakkutana Yésus, “Mupahagga iya manennaro?” Nappébali mennang, “Ripahang Pa'!” Nakkeda Yésus, “Iyanaro saba'na tungke' guru agama iya mancajiyé anggotana umma'na Allataala, pada-padai séddié punna bola iya passué polé ri onrong waramparanna barab-barang barué sibawa malaungngé.” Puranana nacurita Yésus sining pakkalarapangngéro, nasalaini iyaro onrongngé, nalisu ri kampong assalen-Na. Kuwaniro lao mappagguru ri bola assompangngé, na sining tau iya méngkalingaéngngi kuwaro, hérang senna'ni. Makkedani mennang, “Polé kégi iyaé tauwé lolongeng pangissengeng pada-padaéro? Sibawa polé kégi towi lolongeng akuwasang untu' pogau'i anu makalallaingngé? Tenniyaga iyaé ana' panré aju? Tenniyaga iyaro Maria indo'-Na; sibawa silessu-silessuren-Na iyanaritu Yakobus, Yusuf, Simon sibawa Yudas? Sibawa tenniyaga ana'-ana'daran-Na monroto kuwaé? Polé kégi lolongeng iya manennaro?” Na sining tauwé dé' namaélo tarimai Yésus. Nakkedana Yésus lao ri mennang, “Séddié nabi ripakalebbii kégi-kégi, sangadinna ri kampong assalenna sibawa ri bolana muto.” Rimakkuwannanaro dé' napogau'i Yésus maéga anu makalallaing kuwaro saba' dé' mennang namateppe'. Iyaro wettué, Hérodés, panguwasana wanuwaé ri Galiléa, naéngkalingani passalenna Yésus. Nakkeda Hérodés lao ri pajaba'-pajaba'na, “Pasti iyaé Yohanés Paccemmé iya tuwoénna paimeng! Iyanaro saba'na nappunnai akuwasang pogau'i anu makalallaingngé.” Saba' riyolonaro purani nassurowang Hérodés tikkengngi Yohanés sibawa siyoi enrengngé puttama'i ri laleng tarungkué. Napogau'i Hérodés iyaro, nasaba Hérodias, bainéna silessurenna, iyanaritu Filipus. Nasaba engka naengka nakkeda makkuwaé Yohanés lao ri Hérodés, “Dé' naweddikko kawing sibawa Hérodias!” Sitongenna macinnai Hérodés mpunoi Yohanés, iyakiya métaui risining tauwé, nasaba nasengngi mennang Yohanés nabi. Wettunna Hérodés ramé-raméiwi esso ajajiyanna, ana' makkunrainna Hérodias séréi ri yolona tau engkaé hadéré'. Naiyaro séré-séréna napésennangi senna'i atinna Hérodés, angkanna majjancini Hérodés lao ri ana' makkunraiéro sibawa mattanro makkedaé agi-agi muwéllau, riwérékko matti. Nasaba ripaggurui ri indo'na, nakkedana iyaro ana'daraé, “Uwéllauwi ulunna Yohanés Paccemmé riwérékka makkekkuwangngétto ri yasé'na baki'é!” Naéngkalingana iyaro paréllaungngé, messé senna'ni Hérodés. Iyakiya nasaba purani mattanro ri yolona sininna tau engkaé hadéré', napparéntanni kuwammengngi nariturusi paréllaunna iyaro ana'daraé. Nasuroni tauwé lao ri tarungkué untu' rette'i ulunna Yohanés. Nainappa ritiwi muttama' iyaro ulunna Yohanés ri yasé'na baki'é nariwérénna iyaro ana'daraé. Nainappa iyaro ana'daraé natiwireng tosi indo'na. Purairo poléni ana'-ana' gurunna Yohanés malai ujuna Yohanés nanakuburu'i. Nainappa mennang lao nanapaissengiwi Yésus iyaro gau'é. Wettunna naéngkalinga Yésus iyaro karébaé, ménré'ni alé-aléna ri lopié nanasalaiwi iyaro onrongngé, maélo lao riséuwaé onrong iya masino-sinoé. Iyakiya wettunna naéngkalinga sining tauwé iyaro gau'é, nasalaini mennang kota-kotana nalao maccinrolaiwi Yésus lalo ri laleng pottanangngé. Wettunna Yésus nonno polé ri lopié nanaitai tau maégaéro, messéni babuwana lao ri mennang. Nainappa napajjappa sining tau iya malasaé ri yelle'na mennang. Arawénnana, poléni ana'-ana' gurunna Yésus makkeda, “Arawénni na onrongngéwé tassubbu. Lebbi kessing muwi Bapa' tasuroi iyaro sining tauwéro lao, kuwammengngi nawedding melli anré ri désa-désaé.” Nakkeda Yésus, “Aja'na nalao mennang, ikona mpéréngngi mennang anré.” Nappébali ana'-ana' gurunna Yésus, “Lima bawang roti riyappunnangi sibawa duwakkaju balé.” Nakkeda Yésus, “Tiwii mai.” Nainappa Nasuro iyaro tau maégaé tudang ri tompo'na wellaé. Purairo nalani iyaro roti limaé sibawa balé duwaé, nainappa conga ménré ri langié nanasukkuru ri Allataala. Purairo napuwé'-puwé'ni iyaro rotié sibawa liman-Na na-Nawéréngngi ana'-ana' gurun-Na untu' nabagé-bagé lao ri tau maégaé. Nanré manenna mennang gangka messo. Purairo napaddeppungenni ana'-ana' gurunna Yésus lebbinna iyaro nanré; engka seppulo duwa baku penno. Iya manréro wettué engka kira-kira limassebbu tau, dé'pa naribilang makkunraié sibawa ana'-ana'é. Purairo nasuroni Yésus ana'-ana' gurun-Na ménré ri lopié nalebbi riyolo mallétto ri tapparengngéro, nanasuroi tau maégaéro lisu. Laonana tau maégaéro, ménré'ni Yésus ri séddié bulu-bulu alé-aléna untu' massempajang. Na wenninnana, monro mupi Yésus kuwaro alé-aléna. Na iyaro wettué lopi iya natonangiyé ana'-ana' gurunna Yésus, mabélani ri tengnga-tengngana tapparengngé. Iyaro lopié takkunru-kunruni naunru bombang, saba' madduppangngi angingngé iyaro lopié. Pallawangenna tetté tellu sibawa tetté enneng éléé, poléni Yésus ri mennang ri tompo'na uwai. Wettunna ana'-ana' gurun-Na naita ri tompo'na uwai, tasséleng senna'ni mennang. Gorani mennang métau, “Sétang!” Iyakiya tappa mappébaliwi Yésus, “Tennakko! Iyya Yésus. Aja' mumétau!” Nakkeda Pétrus, “Rékko mémekki Yésus, suroka joppa ri tompo'na uwai.” Nakkeda Yésus, “Laono mai!” Nonnoni Pétrus polé ri lopié najoppa ri tompo'na uwai lao ri Yésus. Iyakiya wettunna Pétrus naita pékkugi rajanna angingngé ri tapparengngéro métauni, nanammulana tallemme'. Nagorana, “Puwang, tulukka!” Naloro'ni masitta limanna Yésus nanatikkengngi, sibawa makkeda, “Pétrus, Pétrus, makurang teppe'ko. Magi mubata-bata ri alé-Ku?” Naénré'na iya duwa ri lopié, napaja tona angingngé. Nasuju'na massompa ana'-ana' gurunna Yésus. Makkedani mennang, “Tongekki Puwang iyanaritu Ana'na Allataala!” Wettunna mennang lettu ri liweng tapparengngéro, mappottananni mennang ri Génésarét. Na wettunna riita risining tauwé kuwaro makkedaé iyaro tau polé iyanaritu Yésus, napatassiyani iyaro karébaé lao ri sininna daéraé ri seddéna kotaéro. Naritiwina sining tau malasaé ri Yésus. Nanaéllauni mennang ri Yésus kuwammengngi weddingngi mennang nagéssa jumba-Na, namuni cappa'na bawang. Na sininna iya géssaéngngi majjappai. Engka sikalompo' tau Farisi sibawa siyagangngaré guru agama polé ri Yérusalém lao ri Yésus. Makkutanai mennang ri Yésus, “Magi ana'-ana' gurum-Mu najjalékkaiwi ade'na toriyolota? Wettu maélona manré, dé' mennang nabbissa jari lebbi riyolo situru peraturangngé!” Nappébali Yésus, “Namagi towi iko muwajjalékkaiwi paréntana Allataala, nasaba maélono bawang maccowériwi ade'na néné-nénému? Saba' makkedai Allataala, ‘Pakalebbii ambo'-indo'mu,’ sibawa ‘Nigi-nigi makkeda-kedaiwi ambo'-indo'na, harusu'i rihukkung maté.’ Iyakiya iko mappagguruwangngi! Rékko makkedai tauwé ri tomatowanna, ‘Dowi iya harusu'é uwéréngngi ambo' sibawa indo', purani uwakkasuwiyangeng lao ri Allataala.’ na iyaro tauwé dé'na niwajikkan untu' pakalebbii tomatowanna. Jaji, nasaba ade'na néné-nénému, mupakariyawai ada-adanna Allataala. Tau munapé'ko iko! Sicoco' tongeng iya nabotoé Nabi Yésaya passalemmu, iyanaritu, ‘Makkuwaiyé adanna Allataala: Iyaé sining tauwé pakalebbi-Ka ri témunna bawang, iyakiya atinna mennang mabélai polé ri Iyya. Percuma mennang sompa-Ka, saba' peraturang tolino nappagguruwang mennang samanna iyaro peraturak-Ku.’ ” Nanaobbini Yésus sining tauwé nakkeda lao ri mennang, “Engkalingai kuwammengngi mupahangngi! Iya muttama'é ri temué dé' napanajisi'i tauwé'; iya bawang massué polé ri témunna, iyanaritu mébbui tauwé najisi'.” Nanapoléna ana'-ana' gurunna Yésus nanakkeda ri Yésus, “Naissegga Bapa' makkedaé sining tau Farisié tassinggungngi wettunna naéngkalinga Bapa' makkeda makkuwaro?” Nappébali Yésus, “Tungke' tanet-taneng iya dé'é natanengngi Ambo'-Ku ri surugaé, ribébbui matu. Aja'na mujampangiwi sining tau Farisiéro. Pamimping-pamimping buta maneng iyaro; narékko tau butaé pimpingngi tau butaé, sempé' duwai matu ri laleng sépe'é.” Nakkeda Pétrus, “Tulungngi tapénessaingekki iyaro pakkalarapangngé, Pa'!” Nappébali Yésus lao ri mennang, “Dé'paga palé mupahang towi? Dé'ga muwissengngi, makkedaé iya muttama'é ri laleng témué muttama'i ri laleng babuwaé, nainappa massusi? Iyakiya iya massué polé ri témué, assalenna poléi ri atié; na iyanaro panajisi'i. Saba' nawa-nawa majaé mompoi polé ri atié, iya nassabariyé tauwé mabbuno, malaweng, kédo maja, ménnau, mabbéré sabbi bellé-bellé sibawa mappétenna. Gau'-gau'énnaro mébbui tauwé najisi', na tenniya manré sibawa jari dé'é naribissai.” Nasalaini Yésus iyaro onrongngé nalao ri daéra seddéna kota Tirus sibawa Sidon. Engka séddi makkunrai Kanaan polé ri daéraéro lao ri Yésus nagora-gorato, “Ana' Daud, amaséika! Nauttamakiwi sétang ana' makkunraikku. Namaladde senna.” Dé' siseng nabaliwi Yésus iyaro makkunraié. Nanapoléna ana'-ana' gurunna Yésus ri Aléna nanaéllauwi, “Pa', suroi iyaro makkunraié meddé. Marukka bawammi ri monritta!” Nappébali Yésus, “Risuro-Ka bawang lao ri bangsa Israélié, lebbi-lebbipi iya pusaé.” Napolé iyaro makkunraié nasuju' ri yolona Yésus nakkeda, “Tulukka, Puwang.” Nappébali Yésus, “Dé' namakessing malai nanréna ana'-ana'é naribuwangeng asué.” Nakkeda iyaro makkunraié, “Tongeng, Puwang, iyakiya iyaro asué nanréi sésa-sésana iya sempé'é polé ri méjanna puwanna.” Nanakkeda Yésus lao ri makkunraiéro, “Bu', maraja tongeng teppe'mu! Leppessanni kajajiyang aga muwacinnai!” Iyatoro wettué najjappa iyaro ana' makkunraié. Nasalaini Yésus iyaro onrongngé, nanallaleng tuttungngi wiring Tappareng Galiléa. Nainappa ménré ri séddié bulu-bulu nanatudang kuwaro. Maégani tau lao ri Yésus tiwii sining tau iya képpangngé, butaé, péso'é, pépé, sibawa maéga mupa malasa laingngé. Iyaro sining tauwé nataroi mennang ri yolona Yésus, nanapajjappai Yésus iyaro sining tauwé. Hérang senna'ni tau maégaé iya engkaé kuwaro wettunna naita tau pépé mulléi mappau, majjappa tau képpangngé, joppa tau péso'é sibawa makkita tau butaé. Nanapakalebbini mennang Allataalana bangsa Israélié. Nainappa naobbi Yésus ana'-ana' gurun-Na nanakkeda, “Messé babuwa-Ku lao ri tau maégaéwé. Tellungngessoni ittana mennang sibawak-Ka, na makkekkuwangngé dé' mennang nappunnai anré. Dé' Umaélo leppessangngi mennang lisu sibawa lobbang babuwana, marenne'i matu ri lalengngé.” Nanakkutanana ana'-ana' gurunna Yésus lao ri Aléna, “Kégani wedding lolongeng anré ri daéra tassubbué untu' tau singngégaéwé?” Nakkutana Yésus ri mennang, “Engka siyaga rotimmu?” Nappébali mennang, “Pitu, sibawa siyagangngaré kajunna balé baiccu.” Nasuroni Yésus tau maégaéro tudang ri tompo'na tanaé. Nainappa nala iyaro pitué roti sibawa balé, nanasukkuru ri Allataala. Purairo napuwé'-puwé'ni iyaro rotié enrengngé balé sibawa liman-Na, nainappa Nawéréng ana'-ana' gurun-Na. Nanabbagé-bagéyanni mennang lao ri tau maégaéro. Manré manenni iyaro tau maégaé gangka messo. Purairo napaddeppungenni ana'-ana' gurunna Yésus lebbinna iyaro nanré. Iya manenna pitu baku penno. Jumellana tau iya manré wettuéro engka patassebbu tau worowané bawang, dé'pa naribilang makkunraié sibawa ana'-ana'é. Nainappa nasuro Yésus lisu tau maégaéro. Na Yésus ménré'ni ri séddié lopi nalao ri daéra Magadan. Engka siyagangngaré tau Farisi sibawa tau Saduki lao ri Yésus maélo palaiwi jebba. Naéllauwi mennang pogau' anu makalallaing untu' pabuttiwi makkedaé poléi ri Allataala. Nappébali Yésus, [“Rékko labui essoé, makkedako, ‘Makessing wettué, saba' macella langié.’ Na ri éléé, makkedako, ‘Maéloi bosi iyaé essoé, saba' macella langié sibawa massalawu.’ Nah, mulléi teppui wettué ri laleng muwitana langié, padahal tanra-tanranna esso ri monrié dé' mulléi teppui!”] “Anengka makkuwa jana tauwé makkekkuwangngé. Muwéllau-Ka mébbu anu makalallaing. Dé' nariwérékko matu muwi séddi anu makalallaing, sangadinna anu makalallainna Nabi Yunus.” Purana makkeda makkuwaro Yésus, nasalaini mennang nalao. Wettunna ana'-ana' gurunna Yésus lettu ri liweng tappareng, nappai naisseng mennang makkedaé nallupaiwi tiwi roti. Nakkeda Yésus lao ri mennang, “Atike'ko lao ri raginna tau Farisié sibawa Sadukié.” Naéngkalingana iyaro ada-adanna Yésus, makkedani ana'-ana' gurunna Yésus séddié lao ri laingngé, “Makkeda makkuwairo nasaba dé' natiwi roti.” Naissengngi Yésus aga nabicara mennang. Jaji makkedani, “Magi mupersoalkangngi dé muwappunnai roti? Makurang teppe'ko iko! Dé'paga mupahangngi? Dé'ga muwéngngerangngi limaé roti iya Upuwé'-puwé'é untu' limassebbu tau? Siyaga baku lebbinna iyaro rotié iya mupaddeppungengngé? Na pékkugi towi pitué roti untu' patassebbué tau? Siyaga baku lebbinna iya mupaddeppungengngé? Magi nadé' muna mupahangngi makkedaé dé' Uwabbicara sibawa iko passalenna rotié? Atike'ko lao ri raginna tau Farisié sibawa Sadukié!” Angkanna napahanni ana'-ana' gurunna Yésus makkedaé Yésus suroi mennang matike' tenniya lao ri ragi iya ripaké mébbu roti, iyakiya lao risining pappagguruwanna tau Farisié sibawa Sadukié. Laoni Yésus ri daéra seddéna kota Kaisaréa Filipi. Nakkutanana kuwaro lao ri ana'-ana' gurun-Na, “Manuru' adanna tauwé, niga iyaro Ana'na Tolinoé?” Nappébali ana'-ana' gurunna Yésus, “Engka makkeda Yohanés Paccemmé. Engkato makkeda Elia. Laingngé makkedai Yérémia, iyaré'ga sala séddinna nabié.” “Iyakiya manuru' iko, niga Iyya'é?” pakkutanana Yésus ri mennang. Nappébali Simon Pétrus, “Bapa' iyanaritu Arung Pappassalama'é, Ana'na Allataala Iya Tuwoé.” Nakkeda Yésus, “Maupe' senna'ko Simon, ana' Yona! Saba' tenniya tolino paissengiko gau'éro, sangadinna Ambo'-Ku ri surugaé. Rimakkuwannanaro issenni, ikona iyanaritu Pétrus, batu masse'é. Na ri yasé'na pallangga batuéwé maélo Upatettong garéja-Ku, iya dé'é nawedding ricau; namuni amaténgngé! Namaélo-Ka mpérékko goncinna Lino Barunna Allataala. Aga muwattéyang ri linoé, riyattéyang towi ri surugaé. Na aga mupattongeng ri yasé'na linoé, ripattongeng towi ri surugaé.” Purairo naparéngngerangini Yésus ana'-ana' gurun-Na kuwammengngi aja' napowadai lao ri nigi-nigi makkedaé Aléna ritu Arung Pappassalama'. Mappammulai wettuéro, napowadani Yésus terus-terang lao ri ana'-ana' gurun-Na, makkedaé harusu'i lao ri Yérusalém na-Napéneddingiwi maéga anrasa-rasang polé risining pamimpingngé, kapala-kapala imangngé sibawa guru-guru agamaé. Riyunoi matu, iyakiya ri esso matellué, moto'i matu paimeng. Nainappa Pétrus nagettenni Yésus lao ri benrén-Na nanakaddaowi, adanna, “Memmuwaré' napabélaiwi Allataala iyaro gau'é, Puwang! Aja' lalo nakajajiyang iyaro gau'é lao ri Puwang!” Nagilinna Yésus nakkeda lao ri Pétrus, “Esu'ko, Paggoda! Mulawa-lawai-Ka. Iyaro pikkirammu, pikkirang tolino; tenniya pikkirang Allataala!” Nainappa makkeda Yésus lao ri ana'-ana' gurun-Na, “Tau maéloé maccowéri-Ka, harusu'i nallupai apentingeng aléna, naéssangngi sallina, namatteru maccowéri-Ka. Saba' tau iya maéloé méwaiwi atuwonna, ateddéngengngi matu atuwong. Iyakiya tau iya mappésonangngéngngi atuwonna untu' Iyya, nalolongengngi matu. Aga sarona lao riséddié tau, rékko sininna linoéwé mancajiwi appunnangenna iyakiya teddéngngi atuwonna? Weddigga atuwongngé risélé sibawa anu séuwaé? Dé'na namaitta Ana'na Tolinoé silaong sining malaéka'-Na napolé matu sibawa akuwasanna Ambo'-Na. Iyaro wettué Nawale'i tungke'-tungke' tau situru pangkaukenna. Issenni! Riyelle'mu mennang kuwaé engka dé' namaté matu, riwettu dé'napa naitai Ana'na Tolinoé polé selaku Arung.” Enneng essona ri munrinna natiwini Yésus Pétrus sibawa Yakobus enrengngé silessurenna Yohanés, massala riséuwaé bulu matanré. Ri yolona mennang, tappinrani tappana Yésus: Macakkai rupan-Na pada-pada mata essoé sibawa pakéyan-Na maputé lala'-lala'. Nainappa iya telluro ana' gurunna Yésus naitai Musa enrengngé Elia mabbicara sibawa Yésus. Nakkeda Pétrus lao ri Yésus, “Puwang, manyameng senna'ki kuwaé. Rékko tapojiwi Puwang, upatettongekki matu tellu kéma kuwaé: séddi untu' Puwang, séddi untu' Musa sibawa séddi untu' Elia.” Ri wettu mabbicarana mupa Pétrus, ellung iya macakka senna'é salipuriwi mennang, na polé ri ellungngéro, naéngkalingai saddaé makkeda, “Iyanaé Ana'-Ku iya Uwamaséiyé. Napésennangiwi atik-Ku. Engkalingai Aléna!” Wettunna ana'-ana' gurunna Yésus méngkalingai iyaro saddaé, makkumani tauna mennang angkanna tassulung ri tanaé. Iyakiya poléi Yésus géssai mennang. Nakkeda-Na, “Oto'no, aja' mumétau!” Wettunna mennang makkita, dé'na naitai mennang, muwi niga sangadinna Yésus bawang. Wettunna mennang nonno polé ri buluéro, riparéngngerangiwi mennang ri Yésus, “Aja' mupauwi lao ri niga-niga aga muwitaé onna'ro, riwettu dé'napa naripatuwo paimeng Ana'na Tolinoé polé ri amaténgngé.” Nakkutana ana'-ana' gurunna Yésus ri Aléna, “Magi guru-guru agamaé napowadai makkedaé harusu'i polé Elia lebbi riyolo?” Nappébali Yésus, “Mémeng poléi Elia sibawa maéloi pacceppiwi sininna séuwa-séuwaé. Iyakiya makkeda-Ka ri iko, purani engka Elia, iyakiya dé' naissengngi tauwé; nagaukengngi mennang siyélo-élona bawang. Namakkuwatoro rigaukengngi matu Ana'na Tolinoé.” Nanapahanni ana'-ana' gurunna Yésus makkedaé mabbicarai Yésus passalenna Yohanés Paccemmé. Wettunna Yésus sibawa iya tellu ana' gurun-Na lisu ri tau maégaéro, engka séddi tau worowané polé, suju' ri yolona Yésus, nakkeda, “Bapa', amaséiwi ana'ku. Malasa sésé manu'-manu'kengngi. Makkumani serona iyaro lasa sésé manu'-manu'kenna angkanna biyasai sempé ri lalenna apié sibawa biyasa towi sempé ri lalenna uwai. Purani utiwi ri ana'-ana' gurunna Bapa', iyakiya dé' naulléi pajjappai.” Nappébali Yésus, “Tenniya culé-culé ikoé! Lao sala tongekko sibawa dé' mumateppe. Gangka kéga-Ka harusu' monro sibawakko sibawa sabbara' lao ri iko? Tiwii iyaro ana'é kumaiyé!” Nainappa Yésus nasuro roh maja iya engkaé ri lalenna iyaro ana'é massu. Massuna iyaro roh majaé, majjappana iyaro ana'é iyatoro wettué. Nainappa laoni ana'-ana' gurunna Yésus polé ri Aléna secara alé-alé sibawa makkutana ri Aléna, “Pa' aga saba'na idi dé' nariyullé paddésu'i roh majaé?” Nappébali Yésus, “Saba' makurang teppe'ko. Engngerangngi! Rékko mappunnaiko teppe' silloppo batu sawi-sawié, weddikko makkeda lao ri buluéwé, ‘Létté'ko kuwaro!’ Pasti létté matu buluéwé. Dé'na gaga muwi séddi iya dé'é mulléi pogau'i! [ Iyakiya sétang makkuwaéwé, banna weddingngi ripassu ri sempajangngé sibawa puwasaé bawang.]” Wettunna ana'-ana' gurunna Yésus maddeppungeng ri Galiléa, makkedani Yésus lao ri mennang, “Dé'na namaitta nariyabbéréyang Ana'na Tolinoé lao ri akuwasanna tolinoé. Riyunoi matu, iyakiya ri esso matellué ripatuwoi paimeng.” Namessé senna'na ana'-ana' gurun-Na. Wettunna Yésus sibawa ana'-ana' gurun-Na lettu ri Kapernaum, poléni sining passinge' simana Bolana Puwangngé ri Pétrus nanakkutana, “Nawajaga gurummu simana Bolana Puwangngé iyaré'ga dé'?” Nappébali Pétrus, “Nawaja!” Wettunna lisu Pétrus, riyéwai ada ri Yésus lebbi riyolo, “Simon, pékkugi pallolongemmu? Niga harusu' wajai simana iyaré'ga simana lao risining arunna linoéwé? Ra'ya'éga iyaré'ga tau laingngé?” Nappébali Pétrus, “Tau laingngé.” Nakkeda Yésus, “Rékko makkuwaitu, dé'tu naparellu makkamaja ra'ya'é. Iyakiya aja'na tasinggungngi pappéneddinna sining tauwéro. Jaji laono ri tapparengngé mamméng. Alani balé bunge' mutikkengngé. Muruntu'i matu ri laleng témunna dowi iya genne'é untu' simata sipadduwa. Alani iyaro dowié namuwajai lao ri mennang simata untu' Bolana Puwangngé.” Iyaro wettué poléni ana'-ana' gurunna Yésus ri Yésus nanakkutana, “Niga riyangga' kaminang battowa ri yelle'na umma'na Allataala?” Naobbini Yésus séddi ana' baiccu, nanasuroi tettong ri yolona mennang. Nainappa makkeda Yésus, “Ateppe'no! Banna rékko tappinrako mancaji pada-pada ana'-ana'éwé, mumancaji matu anggota-Na umma'na Allataala. Tau iya pakariyawaéngngi aléna mancajiwi pada-pada iyaé anana'é, iyanaritu kaminang battowa ri yelle'na umma'na Allataala. Na tau iya tarimaéngngi anana' iya pada-padaéwé nasaba Iyya, bettuwanna natarima-Ka.” “Niga nassabariwi sala séddinna polé risining tau iya marenni'éwé dé' namateppe' ri Iyya, lebbi kessing muwi rékko batu pallélué riyassiyorengngi ri ellonna naripatallemme ri tasi' malamungngé. Temmaka cilakana linoéwé nasaba gau'-gau' iya nassabariyé tauwé namadosa. Mémeng gau'-gau' makkuwaéro tuli engka matu, iyakiya cilakai tau iya nassabariyé! Rékko limammu iyaré'ga ajému mébbuko madosa, rette'i namuwabbéyangngi. Lebbi kessing muwi tuwo sibawa Allataala dé'gaga lima siwali iyaré'ga ajé, naiya riyabbéyangngé ri laleng api ranakaé sibawa iya duwa limammu sibawa ajému. Narékko matammu nassabariko pogau' dosa, cukkéi namuwabbéyangngi. Lebbi kessing muwi tuwoko sibawa Allataala dé' gaga séddi matammu naiya riyabbéyangngé ri laleng api ranakaé sibawa iya duwa matammu.” “Atike'ko! Aja' mupakatunai sala séddinna polé risining tau iya marenni'éwé. Saba' éngngerangngi, sining malaéka'na mennang tuli engkai ri yolona Ambo'-Ku ri surugaé. [ Saba' Ana'na Tolinoé poléi untu' passalama'i tau iya pusaé!] Pékkugi pallolongemmu? Akkalarapanna engka séddi tau iya mappunnaiyé sératu kajunna bimbala', na sikaju polé risining bimbala'éro teddéng, aga napogau' matu iyaro tauwé? Pasti nasalaiwi matu bimbala' iya aséraé pulona aséra kajunnaro ri bulu-bulué nalao sappai iya teddéngngéro. Narékko nalolongenni paimeng iyaro bimbala'é – mateppe'-Ka – lebbi rennui matu lao ri bimbala' sikajuéro naiya laowé riaséraé pulona aséra kajunna laingngé iya dé'é nateddéng. Makkuwatoniro Ambo'mu ri surugaé dé' namaélo sala séddinna polé risining tauwé iya nappaé mateppe' lao ri Iyya'é pusa.” “Rékko madosai silessuremmu lao ri iko, laono ri aléna namupaitangngi asalanna. Pogau'i iyaro sibawa mammekko-mekko sipadduwa bawang. Rékko naccowéri ada-adammu, mulolongenni iyaro silessuremmu paimeng. Iyakiya rékko dé', paccowéko séddi iyaré'ga duwa taupa. Saba' ri laleng Kitta'é tarokii, ‘Kaminang céddé duwa iyaré'ga tellu sabbi riyapparellung untu' pannessai séddié tau iya riteppué pasala.’ Rékko dé' natarimai pangajana iyaro sining tauwé, paissengini iyaro gau'é lao ri jema'é. Na angkanna, rékko dé' namaélo tarimai pangajana jema'é, angga'ni selaku passinge' sima sibawa séddi tau iya dé'é naissengngi Allataala.” “Issenni: Aga riyattéyang ri linoé, riyattéyang towi ri surugaé. Na aga mupattongeng ri linoé, ripattongeng towi ri surugaé. Naisseng towi: Rékko ri yelle'mu ri linoéwé duwa tau siyempe' passalenna agi-agi sibawa nassempajangenna, iyaro sempajanna natarimai matu Ambo'-Ku ri surugaé. Saba' kégi duwa iyaré'ga tellu tau maddeppungeng nasaba Iyya, engka-Ka ri tengnga-tengngana mennang.” Nainappa laoni Pétrus ri Yésus nanakkutana, “Puwang, rékko madosai silessurekku lao ri iyya, gangka wékkasiyaga harusu'ka maddampengengngi? Gangka wékkapituga?” Nappébali Yésus, “Dé', dé' nagangka wékkapitu, iyakiya wékkapituppuloi wékkapitué! Saba' rékko mapparéntai Allataala, keadaanna pada-padai ri laleng pakkalarapangngéwé: Engka séddi arung maélo pacceppi manengngi inrenna ata-atanna. Wettunna bunge' mapparéssa ripangoloni ri aléna séddi ata iya makkinrengngé majjuta-juta, nadé' naulléi mpajai. Jaji napparéntanni iyaro arungngé kuwammengngi iyaro ataé naribalu' silaong ana'na enrengngé bainéna, kuwaéttopa sininna appunnangenna untu' mpajai inrenna. Nasuju'na iyaro ataé ri yolona iyaro arungngé, nanaéllauwi, ‘Puwang, sabbara'ki lao ri atatta. Maélo muwi atatta mpajai manengngi inrenna atatta.’ Namesséna iyaro arungngé lao ri ataéro, angkanna naleddani sininna inrenna. Wettunna massu iyaro ataé, siruntu'ni sellaona, séddié atato, iya makkinrengngé ri aléna siyagangngaré sebbunna. Natikkenni iyaro sellaona, nanrekké'i nanakkeda, ‘Wajani sininna inremmu!’ Nasuju'na iyaro sellaona ri yolona nanaéllau towi, ‘Sabbara'ki riyolo' sellao, maéloka waja manengngi!’ Iyakiya nasampéyangngi iyaro ataé. Sibalé'na naputtama'i ri tarungkué narapi pura nawaja maneng inrenna. Wettunna naita ata-ata laingngé aga pura kajajiyang, messéni mennang nanalaporo'i gau'éro ri arungngé. Naiyaro arungngé naobbini iyaro ata majaé nanakkeda lao ri ataéro, ‘Ata iya majaé! Sininna inremmu purani uledda nasaba muwéllauwi ri iyya. Dé'ga naharusu' tokko mamaséiwi sellaomu pada-pada purana uwamaséiko?’ Macai senna'ni iyaro arungngé. Naputtama'ni iyaro ata majaé ri laleng tarungkué narapi nawaja maneng inrenna.” Natutu'ni curitana Yésus sibawa ada-adaéwé, “Makkuwatoniro Ambo'-Ku ri surugaé nagaukekko matu tungke'-tungke', rékko dé' muwaddampengengngi silessuremmu sibawa masagagéna.” Puranana napowada maneng Yésus, nasalaini Galiléa nalao ri daéra Yudéa ri liwenna Salo Yordan. Maéga tau maccowériwi Aléna, naripajjappana mennang kuwaro. Napoléna sining tau Farisié untu' palaiwi siyo. Makkutanani mennang, “Manuru' hukkunna agamata, weddigga tauwé massarang bainéna sibawa alasang agi-agi?” Nappébali Yésus, “Dé'paga mubacai ri laleng Kitta'é makkedaé Pappancajié iya mébbuéngngi rupa tauwé, ri mulanna naébbui mennang worowané sibawa makkunraié? Napurairo makkedani, ‘Iyanaro saba'na worowané nasalaiwi indo' ambo'na namasséddi sibawa bainéna, namancaji séddi iya duwa.’ Jaji tenniyana mennang duwa tau, iyakiya séddi. Iyanaro saba'na aga pura napasséddi Allataala dé' nawedding napassarang tolinoé.” Nanakkutanana sining tau Farisié ri Yésus, “Rékko makkuwaitu, magi Musa nasuroi tauwé telle'i bainéna iya nabbéyangngé?” Nappébali Yésus, “Napalaloko Musa massarang bainému saba' mawatang senna'ko ripagguru. Iyakiya sitongenna dé' nappakkuwaro ri pammulanna. Jaji, éngkalingai iyaé: Nigi-nigi massarang bainéna – padahal iyaro makkunraié dé' nakédo sala – nainappa kawissi sibawa makkunrai laingngé, iyaro tauwé malawengngi.” Nanakkedana ana'-ana' gurunna Yésus lao ri Yésus, “Rékko assisumpungenna lakkaié sibawa bainé pada-padaéro, lebbi kessing muwi aja' takawing.” Nappébali Yésus, “Dé' nasininna tauwé mulléi tarimai ada-adaéro, banna sining tau iya puraé napattentu Allataala. Nasaba engka tau dé' naulléi tennakawing, saba' mémeng mennang jajiwi makkuwaro. Engkato dé' nakawing nasaba tau laingngé mébbui makkuwaro. Sibawa engkato iya aléna muto piléi dé' nakawing, kuwammengngi naulléi tumaningiwi Allataala. Tau iya mulléngngi tarimai pappagguruwangngéwé, leppessanni natarima.” Engka sining tau tiwi ana'-ana' lao ri Yésus kuwammengngi napalénne'i liman-Na ri tompo' ulunna sibawa riyéllaudowangeng. Iyakiya ana'-ana' gurunna Yésus macairiwi iyaro sining tauwé. Nakkeda Yésus lao ri ana'-ana' gurun-Na, “Leppessangngi iyaro ana'-ana'é lao ri Iyya! Aja' muwattéyangngi mennang, saba' sining tau makkuwaéwé mancaji anggotana umma'na Allataala.” Nanapalénne'ni Yésus liman-Na ri tompo' ulunna iyaro ana'-ana'é nanabarakkakiwi mennang. Nainappa Nasalai kuwaro. Riséuwaé esso, engka séddi worowané polé ri Yésus. Adanna, “Pa' Guru, pangkaukeng makessing maragaé harusu' upogau' kuwammengngi weddingngi utarima atuwong tongengngé sibawa mannennungengngé?” Nappébali Yésus, “Magi muwakkutana ri Iyya passalenna aga iya makessingngé? Banna Séddi bawang makessing. Rékko maéloko tuwo, harusu'ko turusiwi parénta-paréntana Allataala.” Nakkutana iyaro tauwé, “Parénta kégaénnaro?” Nappébali Yésus, “Aja' muwabbuno; aja' mumalaweng; aja' muwénnau; aja' musabbi bellé-bellé; pakalebbii ambo' sibawa indo'mu; sibawa amaséiwi pada-padammu tau pada-pada muwamaséinna alému.” Nappébali iyaro kalloloé, “Pura manenni uturusi iyaro paréntaé. Agapi parellu?” Nakkeda Yésus lao ri kalloloéro, “Rékko maéloko mancaji sukku, laono mubalu'i sininna appunnangemmu. Wéréngngi ellinna tau kasiyasié, namulolongengngi matu waramparang ri surugaé. Purairo, laono muwaccowéri-Ka!” Naéngkalingana iyaro ada-adaé, laoni iyaro kalloloé sibawa masussa atinna saba' sugi senna'i. Nainappa makkedani Yésus lao ri ana'-ana' gurun-Na, “Makkeda-Ka lao ri iko, mawatang senna' tau sugié mancaji anggota-Na umma'na Allataala. Na iyapaé maéloto Upowadakko; lebbi gampang muwi séddié unta muttama' ri sebbo'na jarungngé, naiya séddié tau sugi muttama' ri Lino Barunna Allataala.” Wettunna ana'-ana' gurun-Na naéngkalinga iyaro adanna Yésus, héranni mennang. Nakkeda mennang, “Rékko makkuwaitu, nigana wedding salama'?” Naitani Yésus mennang nainappa makkeda, “Untu' tolinoé, mustahélé' iyaro! Iyakiya untu' Allataala, wedding maneng.” Nakkeda Pétrus, “Itai, idi'é pura risalaini sini-sininnaé untu' maccowériwi Bapa'. Na agana matu ritarima?” Nakkeda Yésus lao ri mennang, “Ateppe'no: Ri Lino Baruéro, Ana'na Tolinoé tudangngi matu ri kadéra arajan-Na malebbié. Iyaro wettué iko ana'-ana' guruk-Ku tudakko matu ri yasé'na seppuloé duwa kadéra arajang sibawa madélékiwi seppuloé duwa suku bangsana Israélié! Na tungke' tau iya salaiyéngngi bolana, iyaré'ga padaorowanéna, iyaré'ga ana'daranna, iyaré'ga ambo' indo'na, iyaré'ga ana'-ana'na, iyaré'ga dare'na nasaba Iyya, iyaro tauwé natarimai matu lisu leppe' ikkasiratu. Nanatarima towi atuwong mannennungengngé. Iyakiya maéga tau makkekkuwangngéwé poddiyolo namancaji matu poddimonri na makkekkuwangngéwé iya poddimonrié mancajiwi matu poddiyolo.” “Rékko mapparéntai Allataala, keadaanna pada-padai pakkalarapangengngéwé: Engka séddi tau mappunnai dare' anggoro, massui ri éléé untu' sappa tau majjama ri dare' anggoro'na. Nasitujuinnana untu' riwaja' mennang séddi dowi péra' si esso, nasuroni majjama ri dare' anggoro'na. Tetté aséra éléé, laosi iyaro punna dare'é, nanaitai siyagangngaré tau ri pasaé dé' jamanna. Nakkedana lao ri mennang, ‘Laono majjama ri dare' anggoro'ku. Uwajapo sibawa gaji iya sitinajaé.’ Laoni mennang. Tetté seppulo duwa tangassoé sibawa tetté tellu arawéngngé, massusi iyaro punna dare'é nanapogau'i gau' pada-padaé. Kira-kira tetté lima arawéngngé, massusi nanaitai engka mupa tau dé' jamanna. Nanakkutana lao ri mennang, ‘Magi mutettong puppu esso kuwaé dé' gaga mupogau'?’ Nappébali iyaro sining tauwé, ‘Dé'gaga tau pajjamaki.’ Nakkeda iyaro punna dare'é, ‘Rékko makkuwaitu, laono majjama ri dare' anggoro'ku.’ Labunnana essoé, makkedani iyaro punna dare' anggoro'é lao ri mandoro'na, ‘Obbini iyaro sining pajjamaé, namuwajai gajinna tungke'-tungke', mappammulai muttama'é poddimonrié gangka iya bungé muttama'é.’ Napoléna sining pajjamana iya mappammulaé majjama tetté lima arawéngngé. Tungke'-tungke' tarima séddi dowi péra'. Napolé tona sining pajjama iya riséuwaé mappammula éléé. Mappikkiri'ni mennang tentu lebbi mennang natarima matu. Padahal séddi tommi dowi péra' bawang riwéréngngi. Wettunna natarima iyaro dowié, mannoko'-noko'ni mennang lao ri punna dare'é: ‘Iyaro sining pajjama iya polé poddimonrié sijammi bawang majjama. Na idi'é si essoki majjama ri yawana tire' pella kessoé, iyakiya Puwang mpajai mennang pada-pada idi'!’ Nappébali iyaro punna dare' anggoro'é lao ri sala séddinna polé ri mennang, ‘Eh sellao, dé' upassala lao ri iko. Dé'ga na iko situjui tarima gaji séddi dowi péra' untu' majjama si esso? Nah, alani gajimmu namulao. Mémeng macinnaka mpéréngngi tau iya muttama'é poddimonri, gaji iya padaé uwéréngngékko. Dé'ga naweddikka pogau'i siéloku lao ri appunnangekku? Iyaré'ga mangémpurukoga, nasaba makacuwaka?’ ” Nainappa makkedasi Yésus, “Makkuwa toniro sining tau iya poddimonrié mancaji matu poddiyolo, nasining tau poddiyoloé mancajiwi matu poddimonri.” Wettunna Yésus mattuju ri Yérusalém, ri tengnga laleng Naobbini iya seppulo duwa ana' gurun-Na maddeppungeng. Nakkeda lao ri mennang, “Engkalingai! Makkekkuwangngé mattujuki ri Yérusalém. Kuwaniro riyabbéréyang matu Ana'na Tolinoé lao ri kapala-kapala imangngé sibawa guru-guru agamaé. Narihukkung maté matu, nainappa riyabbéréyang lao risining tau tenniyaé Yahudi. Naéllékéllé'i matu mennang, napanrasa-rasai, sibawa nasallii. Iyakiya ri esso matellué, ripaoto'i matu paimeng.” Napoléna bainéna Zébédéus sibawa ana'-ana'na ri Yésus. Suju'ni ri yolona Yésus untu' méllauwi anu séuwaé. Nakkutana Yésus, “Aga riyélori Bu'?” Nappébali iyaro ibu'é, “Macinnaka iya duwa ana'ku tudang ri abéyona sibawa ataunna Bapa' rékko mancaji arungngi Bapa' matti.” Nakkeda Yésus lao ri mennang, “Dé' muwissengngi aga muwéllau. Mulléga ménungngi polé ri inungeng anrasa-rasang iya harusu'é Uwénung?” Nappébali mennang, “Uwullé.” Nakkeda Yésus, “Ménung tokko matu polé ri inungek-Ku. Iyakiya passalenna iya tudangngé ri abéyo-Ku iyaré'ga ri atauk-Ku, tenniya ha'-Ku pattentui. Iyaro sining onrongngé iyanaritu untu' sining tau iya pura napattentué Ambo'-Ku.” Wettunna iya seppulo ana' guru laingngé naéngkalinga gau'éro, macaini mennang lao ri iya duwa tau massilessurengngéro. Rimakkuwannanaro riyobbi manenni mennang ri Yésus nainappa makkeda, “Muwisseng makkedaé sining pamimping bangsa iya dé'é naissengngi Allataala napanrasa-rasai ra'ya'na, sibawa sining tomarajana mennang natanroiwi mennang. Iyakiya iko dé' naweddikko makkuwaro. Sibalé'na, tau maéloé mancaji battowa ri yelle'mu, harusu'i mancaji pattumanimmu. Sibawa tau maéloé mancaji mariyolo ri yelle'mu, harusu'i mancaji atammu. Pada-padato Ana'na Tolinoé; poléi tenniya untu' ritumaningi, iyakiya untu' mattumani, sibawa mabbéréyangngi nyawa-Na untu' paleppe'i maéga tau.” Wettunna mennang nasalai Yérikho, maéga tau maccowériwi Yésus. Engka duwa tau buta tudang ri wiring lalengngé. Wettunna mennang naéngkalinga makkedaé Yésus lalo, gorani mennang, “Ana' Daud, amaséiki!” Tau maégaé iya engkaé kuwaro macairiwi mennang sibawa suroi mennang mammekko. Iyakiya lebbi cennoi mennang gora, “Puwang, Ana' Daud, amaséiki!” Naléppanna Yésus nainappa naobbi mennang. Nakkutana Yésus, “Aga macinna Upogau' lao ri iko?” Nappébali mennang, “Puwang, macinnaki makkita!” Messéni Yésus lao ri mennang, nanakarawai matanna mennang. Iyatoro wettué naulléi mennang makkita. Nainappa mennang maccowériwi Yésus. Macawé'nana ri Yérusalém, lettu'ni mennang ri Bétfagé ri Bulu-bulu Zaitun. Kuwaniro nasuro Yésus duwa ana' gurun-Na joppa lebbi riyolo. Nappaseng Yésus ri mennang, “Laono ri kampong engkaé ri yolomuro. Namuwitai matu sikaju kaleddé tassiyo silaong ana'na. Leppessang duwai namutiwii mai. Rékko engka tau makkutana, powadangngi iyaro tauwé, ‘Napparelluwangngi Puwangngé,’ na iyaro tauwé naleppessangngi matu iyaro kaleddé'é muwala.” Makkuwaniro gau'é kuwammengngi nakajajiyang aga napowada nabié pada-padaéwé, “Powadanni lao ri Sion, poléni Arummu ri iko. Malemma kininnawai sibawa tonangi sikaju kaleddé, sikaju ana' kaleddé lolo.” Nalaona iya duwaro ana' gurunna Yésus napogau'i pada-pada ripasengengngéngngi mennang ri Yésus. Natiwini mennang iyaro kaleddé'é silaong ana'na. Nainappa nalapiki mennang iyaro sining kaleddé'é sibawa jumbana. Nainappa natonangi Yésus. Maéga tau kuwaro pallebba'i sining jumbana ri lalengngé, na tau laingngé rette'i takké-takké aju nanatale'i ri tengnga-tengnga lalengngé. Tau maégaé iya joppaé ri yolo sibawa ri monrinna Yésus gora-gorani, “Tuwoi Ana' Daud! Ribarakkakiwi iya polé ri laleng asenna Puwangngé! Pojini Allataala Iya Pommatanré!” Wettunna Yésus muttama' ri Yérusalém, marukkani sining pabbanuwana kotaéro. Nakkutana sining tauwé, “Niga iyaé?” Nappébali tau maégaé iya tinrosiyéngngi Yésus, “Aléna Nabi Yésus, polé ri Nazarét ri Galiléa.” Nainappa muttama'ni Yésus ri Bolana Puwangngé, nanarukkai sining tau mabbalu'-balué sibawa mangelliyé kuwaro. Nabalé'i méjanna passélé dowié, sibawa bangko-bangkona pabbalu jangang-jangangngé. Nakkeda lao risining tauwéro, “Ri laleng Kitta'é tarokii makkedaé napowadai Allataala, ‘Riyasengngi matu Bola-Ku bola onrong massempajang.’ Iyakiya iko mupancajiwi saranna paddampo'é!” Poléni ri Yésus sining tau butaé sibawa péso'é ri Bolana Puwangngé, naripajjappa mennang ri Yésus. Iyakiya kapala-kapala imangngé sibawa guru-guru agamaé macaii mitai sining anu makalallaing iya napogau'é Yésus. Sibawa macai towi mennang méngkalingai ana'-ana'é gora-gora ri Bolana Puwangngé, “Tuwoi Ana' Daud!” Nakkeda mennang lao ri Yésus, “Muwéngkalingaga napowadaé mennang?” Nappébali Yésus, “Iyyé, Uwéngkalinga. Dé'paga naengka mubacai aya' Kitta'é: ‘Ana'-ana'é sibawa ana'loloé purani Mupagguru untu' powadai pappojiyang sukkué?’ ” Nainappa Yésus salaiwi mennang, nanassu polé ri kotaéro nalao ri Bétania, nanabbenni kuwaro. Maéléni pappa bajana, ri laleng allalengenna lisu ri kotaé, malupuni Yésus. Naitana sipong ara ri wiring lalengngé. Nalaona ri pong araéro, iyakiya dé' nalolongengngi muwi séddi buwa sangadinna daud-daung bawang. Nainappa makkeda Yésus lao ri pong ajuéro, “Dé'na muwabbuwana matu!” Tappa matteru makelle iyaro pong araé. Wettunna ana'-ana' gurunna Yésus naita iyaro kajajiyangngé, hérang senna'ni mennang. Nakkutana mennang, “Pékkugi wedding matteru maté siseng iyaro pong araé?” Nappébali Yésus, “Tongeng. Rékko mateppe'ko sibawa dé' mubata-bata, wedding tokko pogau'i aga iya puraé Upogau' lao ri pong araé. Natenniya iyaro bawang, mala mulléto matu makkeda lao ri bulu-buluéwé, ‘Tarakkano sibawa létté ri laleng tasi'é’; nakajajiyang matu iyaro gau'é. Agi-agi muwéllau ri laleng sempajammu, mutarimai matu, assaleng mateppe'ko.” Nainappa lisuni Yésus ri Bolana Puwangngé, nanauttama sibawa mappagguru kuwaro. Wettun-Na mappagguru, poléni kapala-kapala imangngé sibawa sining pamimpinna Yahudié ri Aléna nanakkutana, “Aga nallalengi na-Mupogau'i iya manennaro? Niga mpérék-Ko ha'?” Nappébali Yésus, “Maélo tokka makkutana ri iko. Narékko mubaliwi, nainappa Upowadakko ha' niga nasibawang Upogau'i gau-gau'éwé. Ha' niga napaké Yohanés Paccemmé? Allataala iyaré'ga tolinoé?” Nappammulana kapala-kapala imangngé sibawa sining pamimpinna Yahudié barunding ri yelle'na mennang, “Rékko makkedaki, ‘Sibawa ha'na Allataala,’ makkedai matu, ‘Rékko makkuwaitu magi nadé' mumateppe ri aléna?’ Iyakiya rékko makkedaki, ‘Sibawa ha'na tolinoé',’ métauki lao ri tau maégaé, saba' nangga' manengngi mennang Yohanés séddiwi nabi.” Jaji mappébaliwi mennang, “Dé' taissengngi.” Nakkeda Yésus lao ri mennang, “Rékko makkuwaitu dé'to Umaélo powadakko ha' niga nasibawang Upogau'i iya manennaro.” Nakkeda Yésus, “Pékkugi pallolongemmu makkekkuwangngé passalenna gau'éwé? Engka séddi ambo' mappunnai duwa ana' worowané. Iyaro tauwé laowi ri ana'na macowaé sibawa makkeda, ‘Na', laono iyaé essoé majjama ri dare' anggoro'é.’ Nappébali iyaro ana'é, ‘Dé' umaélo.’ Iyakiya rimunri, napinrai pikkiranna nanalao ri dare' anggoro'éro. Nainappa iyaro ambo'é laosi ri ana'na maduwaé, napowadangngi pada-pada ana' macowaé. Nappébali iyaro ana' maduwaé, ‘Madécénni Ambo'.’ Iyakiya dé' nalao. Nari yelle'na iya duwa ana'éro, nigana pogau'i élona ambo'na?” Nappébali kapala-kapala imangngé sibawa sining pamimpinna Yahudié, “Iya macowaé.” Nakkeda Yésus lao ri mennang, “Ateppe'no: Sining passinge' simaé sibawa sining makkunrai cakkuribangngé poddiyoloiko matu mancaji anggotana umma'na Allataala naiya iko. Nasaba poléi Yohanés Paccemmé, sibawa mappaitangngi lao ri iko cara atuwong iya naéloriyé Puwangngé, iyakiya iko dé' mumaélo mateppe' ri pappagguruwanna, na sining passinge' simaé sibawa sining makkunrai cakkuribangngé mateppe'i ri aléna. Iyakiya namuni purani muwita iya manennaro, dé'to mupinrai pikkirammu sibawa dé' mumateppe ri Puwangngé.” Nakkeda Yésus, “Engkalingai iyaé pakkalarapangeng séddiéppa. Engka séddi punna tana tanengiwi séuwaé dare' anggoro. Nasappoi mattulili, sibawa kalinna kalebbong untu' napparaki anggoro, nainappa napatettongeng langkiyang anganrowangeng. Purairo nappasséwanni iyaro dare' anggoro'é lao risining pajjamana, nainappa lao ri wanuwa laingngé. Narapinana wettunna maccéppu buwa anggoro, nakirinni iyaro punna tanaé sining pattumaninna lao risining pajjamana dare' anggoro'éro untu' tarimai bagiyanna. Iyakiya iyaro sining pajjamana dare' anggoro'é natikkengngi iyaro sining pattumaninna punna tanaé: Iya séddié nabarasa'i, iya laingngé naunoi, na laingngéssi nagenrungiwi batu. Nakirissi punna tanaéro sining pattumani laingngé. Iyakiya rigaukeng towi sibawa cara pada-padaé dénré. Angkanna iyaro punna tanaé nakirinni lao ri mennang ana' ri aléna. Pikkiri'na, ‘Pasti napakalebbii matu iyaro ana'ku.’ Iyakiya wettunna iyaro sining pajjama dare' anggoro'é naita ana'na punna tanaéro, makkedani mennang séddié lao ri laingngé, ‘Iyanaé ahli warisi'na. Laono mai taunoi, kuwammengngi narilolongeng warisi'na!’ Natikkenni iyaro ana'é, nanabuwangngi massu, nanaunoi.” Nakkutana Yésus, “Rékko lisui iyaro punna dare' anggoro'é, aga napogau' lao risining pajjamaéro?” Nappébali mennang, “Pasti naunoi matu iyaro sining tau majaé, nainappa nappasséwang iyaro dare' anggoro'é lao ri tau laingngé iya maéloé mabbéréyangngi bagiyanna polé ri wassélé tanaéro ri wettunna.” Nakkeda Yésus lao ri mennang, “Dé' paga mubacai iya tarokié ri laleng Kitta'é? ‘Batu iya dé'é napakéi tukang bangunangngé mancajiwi batu iya poko'é. Iyanaé pangkaukenna Puwangngé, temmaka gellona!’ ” Nakkeda Yésus, “Jaji éngngerangngi, sininna ha'é selaku umma'na Allataala ribébbui matu polé ri iko nariwéréng lao riséddié bangsa iya pajoppaéngngi parénta-paréntana Allataala. [ Tau iya sempé'é polé ri batuéro, ancuru'i matu, na tau iya nageppaé iyaro batué, nalélui matu mancaji awu.]” Wettunna naéngkalinga kapala-kapala imangngé sibawa sining tau Farisié iyaro sining pakkalarapangenna Yésus, naissenni mennang makkedaé mabbicarai Yésus passalenna mennang. Jaji makkuragani mennang tikkengngi. Iyakiya métaui lao ri tau maégaé, saba' iyaro tau maégaé nangga'i Yésus séddiwi nabi. Mabbicarasi Yésus lao ri tau maégaéro sibawa paké pakkalarapangeng, adan-Na, “Rékko mapparéntai Allataala, keadaanna pada-padai pakkalarapangengngéwé: Engka séddi arung pabbottingngi ana' worowanéna. Iyaro arungngé nasuroni sining pattumaninna lao duppaiwi sining tau puraé naundang lao ri péstaéro. Iyakiya iyaro sining undangengngé dé' namaélo polé. Nainappa iyaro arungngé nasurosi sining pattumaninna laingngé. Nakkeda lao ri mennang: ‘Powadangngi sining undangengngéro: Sadiyani patalaé. Saping sibawa ana'-ana' sapikku iya kaminang makessingngé purani rigéré. Sadiya manenni. Talaona ri abottingengngé!’ Iyakiya iyaro sining undangengngé pada dé' nabati-batiwi. Laowi mennang tungke'-tungke' ri jama-jamanna – iya séddié laowi ri dare'na, iya laingngé ri perusahaanna; na iya laingngéssi natikkengngi sining pattumaninna arungngéro, nainappa nabarasa' sibawa nauno mennang. Wettunna naéngkalinga arungngé iyaro gau'é, macai senna'ni. Nakirinni sining tentarana untu' mpunoi sining pabbunoéro, sibawa natunui kotana mennang. Purairo naobbini sining pattumaninna, nainappa makkeda, ‘Sadiyani pésta abottingengngé, iyakiya sining undangengngé dé' nasipato'. Laono makkekkuwangngé ri watattanaé, namuwobbii tauwé lao ri abottingengngé singngéga-égana.’ Nalaona iyaro sining pattumanié. Laoni mennang ri watattanaé nanapaddeppungengngi sininna tauwé iya naruntu'é mennang kuwaro, iya makessingngé sibawa majaé. Napennona ruwangang abottingengngéro sibawa sining undangeng. Nainappa muttama' iyaro arungngé untu' mita-itai sining undangenna. Naitani engka séddi tau ri pestaéro iya dé'é nappaké pakéyang pésta. Nanakkutana lao ri tauwéro, ‘Eh sellao, pékkugiko mulléi muttama' kuwaé nadé' muwappaké pakéyang pésta?’ Iyaro tauwé dé'gaga naulléi pogau. Nainappa iyaro arungngé makkeda lao risining pattumaninna, ‘Siyoi ajé sibawa limanna iyaro tauwé, namubuwangngi massu ri onrong iya mapettangngé. Nakkuwanaro matu engka teri sibawa anrasa-rasang.’ ” Nainappa natutu' Yésus iyaro pakkalarapangngé makkuwaé, “Maéga riyobbi, iyakiya céddé'mi bawang ripilé.” Nainappa sining tau Farisié sibawani lao barunding passalenna pékkugi mennang wedding palaiwi siyo-siyo Yésus sibawa pakkutana-pakkutanana. Nanakirinna mennang ana'-ana' gurunna lao ri Yésus silaong siyagangngaré anggota-anggotana golonganna Hérodés. Makkedani iyaro sining tauwé lao ri Yésus, “Pa' Guru, irissekki Bapa' malempu. Mappaggurui Bapa' sibawa terus terang passalenna élona Allataala lao ri tolinoé, nadé' mubati-batiwi pallolongenna nigi-nigi. Saba' Bapa' dé' napasilaingengngi tauwé. Rimakkuwannanaro, coba Bapa' powadakki: Manuru' peraturanna agamata, weddigga makkamaja sima lao ri Kaisar iyaré'ga dé'?” Naissengngi Yésus akkattana mennang iya majaéro, jaji makkedai, “Eh sining tau munapé'é! Magi mumaélo palai-Ka siyo? Cobasai paitak-Ka dowi iya mupaké untu' makkamaja sima!” Nainappa nawérénni mennang Yésus séddi dowi péra'. Nakkutana Yésus lao ri mennang, “Niga gambara sibawa aseng iyaé?” Nappébali mennang, “Kaisar.” Nakkeda Yésus lao ri mennang, “Rékko makkuwaitu, wérénni lao ri Kaisar aga iya nappunnaiyé Kaisar, sibawa lao ri Allataala aga iya nappunnangiyé Allataala.” Wettunna naéngkalinga pappakatajangngéro, héranni mennang. Nanalaona salaiwi Yésus. Iyatoro wettué, engka siyagangngaré tau Saduki polé ri Yésus. Mennang iyanaritu golongang iya mappallolongengngé makkedaé tau maté dé'na natuwo paimeng. Nakkeda mennang, “Bapa' Guru, Musa mappagguruwangngi makkedaé: Rékko séddié worowané maté, nadé' nappunnai ana', padaorowanéna harusu' kawingiwi iyaro jandana, kuwammengngi nawéréngngi wija-wijanna lao ri tau iya matéénnaro. Engka naengka pitu tau mappadaorowané iya monroé kuwaé. Kawingngi iya macowaé, namaté dé' nappunnai ana'. Naiyaro jandana ritarongenni padaorowanéna. Naiyaro padaorowanéna maté towi dé' nappunnai ana'. Gau' padaéro kajajiyang towi sibawa padaorowanéna matellué sibawa lettu rimapitué. Angkanna iyaro makkunraié matéto. Nah, ri wettunna ripatuwo tau maté paimeng, nigana punna bainé iyaro makkunraié? Saba' iya pituro purai napubainé.” Nappébali Yésus, “Sala pahang senna'ko, saba' dé' mupahangngi Kitta'é, iyaré'ga akuwasanna Allataala. Saba' rékko tuwoi matu paimeng tau maté, dé'na nakawinna matu mennang, sangadinna tuwoi matu pada-pada malaéka'é ri surugaé. Dé'paga naengka mubacai aga napowada Allataala passalenna ripatuwona paimeng tau maté? Makkedai Allataala, ‘Iyya'na Allataalana Abraham, Allataalana Ishak sibawa Allataalana Yakub.’ Iyaro Allataalaé tenniya Allataalana tau maté. Allataalanai tau tuwoé!” Wettunna naéngkalinga tau maégaéro pappakatajanna Yésus, bengnga senna'ni lao ri pappagguruwan-Na. Wettunna naéngkalinga sining tau Farisié makkedaé purani naébbu Yésus sining tau Sadukié dé' naulléi makkedadana, maddeppungenni mennang. Engka séddi tau polé ri mennang, iyanaritu séddiwi guru agama, coba palaiwi siyo Yésus sibawa séddi pakkutana, “Pa' Guru, parénta kégaénna kaminang poko' ri laleng hukkunna agamaé?” Nappébali Yésus, “Amaséiwi Puwang Allataalamu sissukku atimmu, sibawa sissukku nyawamu, enrengngé sininna akkalemmu. Iyanaro parénta poko'é sibawa kaminang pentingngé! Parénta maduwaé iya padaé mammulangngéro: Amaséiwi pada-padammu, pada-pada muwamaséinna alému. Sininna hukkunna agamaé iya nabbéréyangngé Musa sibawa pappagguruwanna sininna nabié poléi ri iya duwa paréntaéro.” Ri wettu maddeppungenna mupa sining tau Farisié kuwaro, makkutanani Yésus lao ri mennang, “Aga pallolongemmu passalenna Arung Pappassalama'é? Wijannai niga?” Nappébali mennang, “Wijannai Daud.” Nakkutana Yésus, “Rékko makkuwaitu, aga saba'na Rohna Allataala nawéréngngi wahyu Daud untu' teppui Arung Pappassalama'é ‘Puwang’? Saba' makkedai Daud, ‘Makkedai Puwangngé lao ri Puwakku: Tudanno ri seddé atauk-Ku, narapi Upatunru' sining balim-Mu lao ri Iko.’ Jaji rékko nateppui Daud Arung Pappassalama'éro ‘Puwang’, pékkugi wedding wijanna Daud?” Dé' séddi tau mulléi baliwi Yésus. Nappammula essoéro, dé'gaga barani makkutanangngi agi-agi lao ri Yésus. Nakkeda Yésus lao ri tau maégaé sibawa ri ana'-ana' gurun-Na, “Guru-guru agamaé sibawa sining tau Farisié lolongeng akuwasang untu' tasséré'i hukkunna Musa. Rimakkuwannanaro atinuluriwi sibawa turusiwi sininna napparéntangngé mennang. Iyakiya aja' mupogau'i aga iya napogau'é mennang, saba' dé' napajoppai mennang aga nappagguruwang mennang. Natuntu'i mennang gau'-gau' mawatangngé sibawa mabbéréi peraturang-peraturang iya matane'é, iyakiya muwi céddé dé'to natulungngi tauwé pajoppai. Sininna napogau'é mennang banna untu' naita tauwé bawang. Nattungka mennang paké tulu sempajang iya malebba'é sibawa palampériwi jombé-jombé jumbana mennang! Napoji sining onrong iya makessingngé ri péstaé, sibawa kadéra-kadéra magelloé ri bola assompangngé. Napoji mennang ripakalebbi ri tauwé ri pasaé sibawa riyobbi ‘Pa' guru’. Iyakiya iko, aja' mumaélo riyobbi ‘Pa' Guru’, saba' séddi bawang Gurummu, na iko maneng massilessurekko. Sibawa aja' muwobbii séddié tau ri linoéwé ‘Ambo’, saba' séddi bawang Ambo'mu, iyanaritu Ambo' ri surugaé. Na aja'to mumaélo riyobbi ‘Pamimping’, saba' séddi bawang pamimpimmu, iyanaritu Arung Pappassalama'é iya najjanciyangngé Allataala. Tau iya kaminang battowaé ri yelle'mu, harusu'i mancaji pattumanimmu. Tau iya pakatanréngngi aléna ripakariyawai matu, na tau iya pakariyawaéngngi aléna ripakatanréi matu.” “Cilakano iko guru-guru agamaé sibawa sining tau Farisié! Mupoji mabbonga-bonga. Mulawa-lawaiwi tauwé untu' mancaji wargana umma'na Allataala. Nadé' mumaélo mancaji wargana umma'na Allataala, na tau laingngé iya maéloé mulawa-lawaiwi. [ Cilakano iko guru-guru agamaé sibawa sining tau Farisié: Mupoji mabbonga-bonga. Mubelléi sining jandaé sibawa murampasa'i bolana, na untu' tongkoi jamuro massempajakko malampé'. Iyanaro saba'na namatane matu pahukkungemmu!] Cilakano iko guru-guru agamaé sibawa sining tau Farisié! Mupoji mabbonga-bonga! Laoko mabéla limbang tasi', sibawa sollériwi pottanangngé banna untu' puttama'i séddié tau ri agamamu. Namuttama'nana iyaro tauwé ri agamamu, muwébbui mennang calonna ranakaé iya wékkaduwaé lebbi maja naiya iko! Cilakano iko sining pamimping butaé! Muwappagguruwangngi makkuwaé, ‘Rékko nattanrowangngi tauwé Bolana Puwangngé, iyaro tauwé dé' natassiyo ri tanrona; iyakiya rékko nattanrowangngi ulaweng engkaé ri laleng Bolana Puwangngé, tassiyoi ri tanrona.’ Iko sining tau donggo iya butaé! Kéga lebbi penting, ulawenna iyaré'ga Bolana Puwangngé iya pancajiyéngngi ulawengngéro mapaccing? Muwappagguruwang towi iyaé, ‘Rékko séddié tau nattanrowangngi mézbaé, iyaro tauwé dé' natassiyo ri tanrona; iyakiya rékko nattanrowangngi pakkasuwiyang iya engkaé ri yasé'na mezbaéro, tassiyoi ri tanronaro.’ Anengka makkuwa butamu! Kéga lebbi penting? Pakkasuwiyammu iyaré'ga mézba iya pancajiyéngngi pakkasuwiyangngéro mapaccing? Rimakkuwannanaro, rékko séddié tau mattanrowangngi mézbaé, bettuwanna nattanrowangngi mézbaé sibawa sininna pakkasuwiyang iya engkaé ri yasé'na. Narékko séddié tau nattanrowangngi Bolana Puwangngé, bettuwanna iyaro nattanrowangngi Bolana Puwangngé, sibawa Allataala iya monroé kuwaro. Rékko séddié tau mattanrowangngi surugaé, bettuwanna iyaro nattanrowangngi kadéra arajanna Puwangngé sibawa Allataala iya tudangngé ri yasé'na kadéra arajangngéro. Cilakano iko guru-guru agamaé sibawa sining tau Farisié! Mupoji mabbonga-bonga. Rampa-rampa padaé talasi, adas cenning, sibawa jintang, muwabbéréyangngi tawa seppulona untu' Puwangngé. Padahal gau'-gau' iya kaminang pentingngé ri laleng hukkung-hukkunna agamaé, padaénna: Adélékengngé, pammasé sibawa atinulurengngé dé' mubati-batiwi. Padahal iyaro sitongenna harusu' mupogau', sibawa dé'nato muwallupaiwi laing-laingngé. Iko pamimping-pamimping butako! Mupanapii lale'é ri laleng uwai énungemmu padahal untaé muwemme! Cilakano iko guru-guru agamaé sibawa sining tau Farisié! Mupoji mabbonga-bonga! Mangko'-mangko'mu sibawa sining pennému mubissaiwi mapaccing bagiyang saliwenna, padahal bagiyang ri lalenna macarépa senna' sibawa gau'-gau' iya mulolongengngé sibawa apéddarang enrengngé angowang. Eh tau Farisi iya butaé! Bissaiwi riyolo' mapaccing-paccing bagiyang ri lalenna mangko'-mangko'mu sibawa sining pennému, kuwammengngi namapaccitto bagiyang saliwenna! Cilakano iko guru-guru agamaé sibawa tau Farisié! Mupoji mabbonga-bonga! Pada-padako tampung iya riparada puté; makessing riita ri saliwenna, iyakiya ri lalenna penno buku-buku sibawa sininna iya makebbongngé. Makkuwa tokkoro iko. Polé saliweng makessikko paita lao ri tauwé; iyakiya ri lalenna, pennoko sibawa apalessuwang enrengngé palanggarang-palanggarang.” “Cilakano iko guru-guru agamaé sibawa sining tau Farisié! Mupoji mabbonga-bonga! Muwébburengngi tampung nabi-nabié iya makessingngé, sibawa bélo-béloiwi tugu-tugu apparéngngerangenna sining tau iya makessingngé atuwo-tuwonna. Namumakkeda, ‘Akkalarapanna tuwoki ri wettunna néné-nénéta riyolo, dé' taccowé sibawangngi mennang mpunoi nabi-nabié.’ Jaji alému mangakuiwi makkedaé iko ritu wija-wijanna sining tau iya mpunoéngngi nabi-nabié! Rékko makkuwaitu, patteruni sibawa pacceppini dosa-dosa iya puraé napammulai néné-nénémuro! Majako sibawa wija-wijanna tau majako! Pékkugi weddikko passalama'i alému polé ri pahukkungenna ranakaé? Engkalingai madécéd-décéng: Maélo-Ka kiringngi lao ri iko nabi-nabié, sining tau maccaé sibawa guru-gurué; sibagiyanna mennang muwunoi matu, na sibagiyanna laingngé musallii. Engka matu mupanrasa-rasa ri laleng sining bola assompangngé, sibawa mulellungngi polé riséddié kota lao ri kota laingngé. Rimakkuwannanaro, rihukkukko matu nasaba abbunowang iya mupogau'é lao ri sininna tauwé iya dé'é asalanna – mappammulai riyunona Habél iya dé'é napasala, lettu riyunona Zakharia ana'na Bérékia, iya muwunoé ri pallawangenna Bolana Puwangngé sibawa mézbaé. Ateppe'no. Iya manennaro natanggungngi matu sining tauwé makkekkuwangngéwé!” “Yérusalém, Yérusalém! Muwunoi nabi-nabié, sining surona Allataala mugenrungiwi batu gangka maté. Maléwe'ni maélo-Ka pasipuppung manengngi pabbanuwamu pada-pada indo' manu'é iya rokongiyéngngi ana'-ana'na ri yawana pannina, iyakiya dé' mumaélo! Rimakkuwannanaro dé'na nasibawakko Allataala. Issenni: Mappammulai makkekkuwangngé dé'na muwita-Ka narapi makkedako, ‘Ribarakkakiwi iya polé sibawa asenna Puwangngé.’ ” Wettunna Yésus nasalai Bolana Puwangngé, poléni ana'-ana' gurun-Na nanajello'i Bolana Puwangngé. Nakkeda Yésus lao ri mennang, “Muwitaga iya manennaro? Issenni, dé'gaga muwi séddi batu polé ri bolaéro monro matu tassusung ri onronna. Iya manennaro riruttungngi matu.” Nalaona Yésus ri Bulu-bulu Zaitun, tudanna-Na, poléni ana'-ana' gurun-Na untu' mabbicara mammessang-messang. Nakkeda mennang ri Yésus, “Powadakki uppanna kajajiyang iya manennaro! Aga tanra-tanranna iya mappaitangngéngngi apolénna Bapa' sibawa paccappurenna linoé?” Nappébali Yésus, “Atike'ko, ajakké ribelléko. Saba' maéga tau polé matu sibawa pakéi asek-Ku sibawa makkeda, ‘Iyya'na Arung Pappassalama'é!’ Nabelléi matu mennang maéga tau. Muwéngkalingai matu oni-oni ammusurengngé sibawa sining karébanna, iyakiya aja' mumétau. Saba' iyaro gau'-gau'é harusu'i kajajiyang, iyakiya tenniya bettuwanna makkedaé wettunnana kiyame'. Bangsa séddié mammusui matu méwai bangsa laingngé, sibawa wanuwa séddié nagasai wanuwa laingngé. Kajajiyangngi matu akkadérengngé kégi-kégi sibawa mpéwangngi tanaé. Iya manennaro pammulanna bawang, pada-pada peddi napéneddingiyé séddié makkunrai ri wettu maélona mémmana'. Nainappa ritikkekko matu sibawa riyabbéréyang untu' risissa sibawa riyuno. Nabenciko matu sininna linoé nasaba muwaccowéri-Ka. Iyaro wettué maéga tau massakka sibawa bali'bella enrengngé sibenci-benciwi séddié lao ri laingngé. Mompoi matu nabi-nabi palsué, nanabelléi maéga tau. Mallebbangngi matu gau' majaé makkuwamani héba'na angkanna maéga tau dé'na naulléi mamasé. Iyakiya tau iya mattahangngé lettu ri paccappurengngé, ripassalama'i matu. Sibawa Karéba Madécéngngé passalenna pékkugi Allataala mapparénta riyappallebbangengngi matu ri sininna linoé, kuwammengngi sininna tauwé naéngkalingai. Purapiro, nainappa polé kiyame'é.” “Muwitai matu ‘Ja iya paancuru'é’, pada-pada napowadaé Nabi Daniél, tettong ri onrong mapaccingngé. (Papparéngngerang lao ri pabbacaé: Pénessaiwi aga bettuwanna.) Iyaro wettué, tau iya engkaé ri Yudéa, harusu'i lari lao ri bulué. Tau iya engkaé ri coppo bolaé aja' nanonno untu' mala anu séuwa ri lalempola. Tau iya engkaé ri dare'é, aja' nalisu untu' malai jumbana. Anengka makkuwa mappakatau-tauna iyaro essoé lao ri makkunrai iya mattampu'é, sibawa indo' iya pasusuémmupi ana' lolona! Assempajakko kuwammengngi aja' lalo muharusu' lari ri wettu pabosié iyaré'ga ri esso Saba'é! Ri esso-esso iya mappakatau-tauéro engka matu asussang battowa iya dé'éppa naengka nakajajiyang sipongenna linoé lettu makkekkuwangngé, sibawa dé' tona nakajajiyanna. Akkalarapanna Allataala dé' naponcokiwi wettunna; dé'gaga séddi tau salama'. Iyakiya nasaba umma'-Na, naponcokiwi Allataala iyaro wettué. Iyaro wettué, rékko engka séddi tau makkeda lao ri iko, ‘Itai, iyaro Arung Pappassalama'é engkai kuwaé!’ iyaré'ga ‘Engkai kuwaro!’ – aja' mumateppe ri tauwéro. Saba' mompoi matu pappassalama'-pappassalama' palsué sibawa nabi-nabi palsué. Napogau'i matu gau'-gau' iya makalallaingngé sibawa mappahérang-hérangngé untu' pabengnguwang, naullé umma'-Na muto Allataala. Jaji, éngngerangngi! Purano upowadang lebbi riyolo riwettu dé'napa nakajajiyang iyaro gau'é. Rékko makkedai tauwé ri iko, ‘Itai, Engkai kuwaro ri padang kessi'é!’ – aja' mulao kuwaro. Iyaré'ga rékko makkedai, ‘Itai mallekke'i ri laleng bili'é kuwaé!’ – aja' mumateppe. Saba' apolénna Ana'na Tolinoé pada-padai tappa billa'é iya mattappaé polé alau, namattappa lettu ri yajang. Kégi engka bakké, kuwatowitu engka manu'-manu' pakkanré bakké.” “Dé' namaitta purana asussangngéro, mapettangngi matu mata essoé, sibawa dé' nattappa kétengngé. Maddenne'i matu sining wéttowingngé, sibawa sining panguwasaé ri bétaraé kacauwi matu. Purairo tanranna Ana'na Tolinoé paitani matu ri langié. Iyaro wettué sininna bangsaé ri linoé teriwi matu. Naitai matu mennang Ana'na Tolinoé polé ri yasé'na ellungngé sibawa akuwasanna enrengngé alebbirenna battowaé. Ripaonini matu tarompé' battowaé, nanasuroi matu Ana'na Tolinoé malaéka'-malaéka'-Na paddeppungengngi umma'-Na polé ri eppaé sulapa', polé ri cappa langié séddié lettu ri cappa langié, laingngé.” “Agguruko polé ri pong araé. Rékko manyilai takké-takkéna sibawa masomé', enrengngé mammulani cura'-cura', muwissennitu makkedaé mawé'ni wettu timoé. Makkuwatoniro rékko muwitai kajajiyang gau'-gau'éro, muwissennitu makkedaé macawé'é senna'ni wettunna. Issenni! Iyaro gau'-gau'é kajajiyangngi matu ri wettu dé'napa namaté sining tauwé makkekkuwangngé. Lennye'i matu langié sibawa linoé, iyakiya ada-adak-Ku tette'i mannennungeng.” “Dé'gaga missengngi uppanna essona sibawa wettunna, muwi sining malaéka' ri surugaé iyaré'na Ana'na Allataala, banna Ambo'é bawang missengngi. Rékko poléi matu Ana'na Tolinoé, keadaanna pada-padai wettunna Nuh riyolo. Ri esso-esso dé'napa nalémpe raja, sining tauwé manréi, minungngi sibawa bottingngi. Makkuwaniro matteru-teru narapi esso nauttamakiyé Nuh ri laleng kappala'é. Wettunna lémpe' rajaé mappo manengngi mennang, nappai mainge' mennang aga matu kajajiyang. Makkuwaniro keadaanna matu rékko poléi Ana'na Tolinoé. Iyaro wettué, duwa tau mattengngang majjama ri dare'é: séddi tau ritiwi matu, na séddié risalai. Duwa makkunrai mattengngang mallélu gandong: Séddi ritiwi matu, na séddi risalai. Jaji, atike'ko, saba' dé' muwissengngi uppanna polé matu Puwammu. Engngerangngi iyaé! Akkalarapanna naissengngi punna bolaé tetté siyaga ri wennié napolé matu pangaé, dé'na namatinro, kuwammengngi dé' namuttama pangaé ri lalempolana. Rimakkuwannanaro, harusu' tokko sadiya-sadiya. Saba' Ana'na Tolinoé poléi matu ri wettu iya dé'é musenna-sennai.” Nakkedasi Yésus, “Rékko makkuwaitu, pattumani nigana matinulu sibawa mapanré? Aléna ritu riyakka ri puwanna mancaji kapala lao ri sining pattumani laingngé; kuwammengngi napanréi mennang ri wettunna. Temmaka senna'na iyaro pattumanié rékko lisui puwanna, nanapoléiwi mattonget-tongeng pogau'i jama-jamanna. Ateppe'no, iyaro puwangngé nappaddettangengngi matu sininna waramparanna lao ri pattumaninnaro. Iyakiya rékko majai iyaro pattumanié, makkedai ri laleng atinna, ‘Maitta mupa nappa lisu Puwakku,’ nappammula barasakiwi pattumani-pattumani laingngé, enrengngé manré ménung sibawa sining tau pammabokengngé. Nainappa lisuni matu Puwanna ri esso sibawa wettu iya dé'é nasenna-sennai. Nariajara' tongenna matu iyaro pattumanié ri Puwanna, enrengngé riyabbéyang ri onronna tau munapé'é. Naterina matu mennang sibawa manrasa-rasa kuwaro.” “Rékko poléi Ana'na Tolinoé selaku Puwang, keadaanna pada-padai ri laleng pakkalarapangngéwé: Engka seppulo ana'dara tinrosiwi bottingngé tungke'-tungke' mala pajjennangeng, nainappa lao duppaiwi bottimpurané. Na lima tau polé ri mennang madonggo sibawa lima lainna mapanré. Iya lima ana'dara madonggoé tiwii pajjennangeng, iyakiya dé' natiwi bokong minnya'. Iya lima ana'dara mapanré tiwii pajjennangeng sibawa bokong minnya'. Iyaro bottimpurané matengnge'i polé, nacakkarudduna iyaro ana'-ana'daraé angkanna matinro. Tengnga benni nappa ritu naéngkalinga sadda gora, ‘Poléni bottimpurané! Laono mai muduppaiwi!’ Moto'ni iyaro seppuloé ana'dara, nanatunuiwi pajjennangenna mennang. Nakkeda ana'-ana'dara iya madonggoé lao ri mapanré, ‘Wérékki céddé minnya'mu, saba' maéloi peddé pajjennangetta.’ Nappébali iyaro ana'-ana'dara mapanré, ‘Dé' nawedding, nasaba dé' matu nagenne minnya'ta untu' idi maneng. Laono muwelli ri tokoé!’ Nalaona iyaro ana'-ana'dara iya madonggoé melli minnya'. Ri wettu laona mennang, lettu'ni bottimpurané. Iyaro limaé ana'dara iya sadiyaénna muttama'ni silaong bottimpurané ri onrong péstaé, narisuluna tange'é! Purairo lettu'ni ana'-ana'dara laingngé. Gorani mennang, ‘Puwang, Puwang, timpakekki tange'.’ Iyakiya mappébaliwi bottimpurané, ‘Dé' Uwissekko!’ ” Nainappa natutu'ni Yésus pakkalarapangngéro makkuwaé, “Rimakkuwannanaro jaga-jagako, saba' dé' muwissengngi essona iyaré'ga wettunna.” “Rékko poléi Ana'na Tolinoé selaku Puwang, keadaanna pada-pada towi ri laleng pakkalarapangngéwé. Engka séddi worowané maélo lao ri onrong mabélaé. Naobbini sining pattumaninna, nainappa nappaddettangeng waramparanna ri mennang. Nawérénni lao ri tungke' pattumaniéro situru pakkullénna tungke'-tungke'. Lao riséddié tau nawéréngngi limassebbu dowi laweng. Laingngé nawéréngngi duwassebbu dowi laweng sibawa lao riséddiéppa nawéréngngi sisebbu dowi laweng. Nainappa joppa. Pattumani iya tarimaé limassebbu dowi laweng masitta'ni lao dangkang, nasarona limassebbu dowi laweng. Makkuwatoro pattumani iya tarimaé duwassebbu dowi laweng saro toni duwassebbuto. Iyakiya pattumani iya lolongengngé sisebbu dowi laweng laowi kali kalebbong ri tanaé, nanasubbui dowina puwanna kuwaro. Maitta senna' puranaro, lisuni puwanna iyaro sining pattumanié, nappammula mappasilolongeng sibawa mennang. Poléni pattumani iya lolongengngé limassebbu dowi laweng, nanabbéréyangngi seppulo sebbu. Adanna, ‘Puwang, limassebbu dowi laweng tawérékka Puwang. Taitani, lolongessika saro limassebbu.’ Nakkeda iyaro puwanna, ‘Madécénni, iko iyanaritu pattumani iya makessingngé sibawa matinulué. Nasaba weddikko riyatepperi lao ri iya céddé'é, maéloka mappaddettangengngi iya maégaé lao ri iko. Uttama'no sibawa accowéno massennas-sennang sibawa iyya.’ Nainappa poléni iyaro pattumani tarimaé duwassebbu dowi laweng, nakkeda, ‘Puwang, duwassebbu dowi laweng tawérékka Puwang. Taitani, lolongessika saro duwassebbusi.’ Nakkeda iyaro puwanna, ‘Madécénni, ikonatu pattumani iya makessingngé sibawa matinulué. Nasaba weddikko riyatepperi lao ri iya céddé'é, maéloka mappaddettangengngi iya maégaé lao ri iko. Uttama'no sibawa accowéno massennas-sennang sibawa iyya!’ Nainappa poléni iyaro pattumani iya lolongengngé sisebbu dowi laweng, nanakkeda, ‘Puwang, uwissekki séddi tau iya mabecco'é. Maccéppu buwaki Puwang ri onrong dé'é tattaneng, sibawa méngngalaki ri onrong dé'é tamporiwi biné. Métauka, jaji laoka subbui dowita Puwang ri lalenna tanaé. Engkanié dowita Puwang.’ Nakkeda iyaro puwanna, ‘Ikonatu pattumani maja sibawa makuttu! Dé'ga napura muwissengngi makkedaé maccéppu buwaka ri onrong dé'é uwattaneng, sibawa méngngala ri onrong dé'é uwampo biné? Rékko makkuwaitu, sitongenna harusu'ko taroi iyaro dowiku ri bangngé, kuwammengngi ri wettukku lisu, weddingngi utarima iyaro dowiku sibawa bungana. Rimakkuwannanaro, alai iyaro dowié polé ri aléna, namuwéréngngi tau iya mappunnaiyé seppulo sebbu dowi laweng. Nasaba tau iya mappunnaiyénna, riwéréngngi matu lebbi maégapa, na alebbinna matu. Iyakiya tau iya dé'é nappunnai, céddé iya engkaé mupa ri aléna riyala towi matu. Na iyaro pattumani dé'é nakkéguna, buwanni ri laleng pettangngé ri saliweng. Kuwaniro matu teri sibawa manrasa-rasa!’ ” “Rékko poléi Ana'na Tolinoé selaku Arung ritinrosi ri sininna malaéka'-Na, tudangngi matu ri yasé'na kadéra arajan-Na iya malebbié. Sininna bangsaé ri linoé ripaddeppungengngi matu ri yolo-Na. Nainappa napassarang mennang mancaji duwakkonrong pada-pada pakkampié pallaisengngi bimbala'é polé ri bémbé'é. Sining tau iya pogau'éngngi élona Allataala ripaddeppungengngi ri seddé ataun-Na, na laingngé ri seddé abéyo-Na. Nainappa makkeda matu iyaro Arungngé lao risining tauwé ri seddé ataun-Na, ‘Laono mai iko iya nabarakkakiyé Ambo'-Ku. Uttama'no ri laleng akkarungeng iya napassadiyangengngékko mappammulai pammulanna linoé. Saba' ri wettuk-Ku malupu, muwérék-Ka nanré, sibawa ri wettuk-Ku madekka, mupainuk-Ka. Tau polé-polé-Ka, mutarima-Ka ri bolamu. Dé' Uwappakéyang, muwérék-Ka pakéyang. Malasa-Ka, laoko célléngi-Ka. Ritarungku-Ka, laoko tuluk-Ka.’ Nakkedana matu iyaro sining tauwé, ‘Puwang, maraganna riitaki Puwang malupu nariwérékki nanré Puwang, iyaré'ga madekka naripainukki Puwang? Maraganna nariitaki Puwang selaku tau polé-polé, nariduppaiki Puwang muttama' ri lalempolata? Maraganna Puwang dé' tappakéyang, nariwérékki pakéyang Puwang? Maraganna nariitaki Puwang malasa, iyaré'ga ritarungku, naritulukki Puwang?’ Nappébali matu iyaro Arungngé, ‘Issenni: wettunna mupogau' gau'éro, namuni lao risala séddinna polé ri silessu-silessurek-Ku iya kaminang matunaé, mupogau' tonitu lao ri Iyya!’ Nainappa makkeda matu iyaro Arungngé lao risining tauwé ri seddé abéyo-Na, ‘Addésu'no jahanam! Uttama'no ri laleng api iya dé'é nawedding peddé, iya puraé ripassadiya untu' Ibillisi' sibawa malaéka'-malaéka'na! Saba' ri wettuk-Ku malupu, dé' muwérék-Ka nanré; wettuk-Ku madekka, dé' mupainuk-Ka. Séddi-Ka tau polé-polé, dé' mutarima-Ka ri lalempolamu. Temmappakéyak-Ka, dé' muwérék-Ka pakéyang. Malasa-Ka sibawa ritarung-Ku, dé' mujampangi-Ka.’ Namakkeda mennang ri Aléna, ‘Puwang, maraganna Puwang nariitaki malupu, iyaré'ga madekka, iyaré'ga selaku tau polé-polé, iyaré'ga temmappakéyang, iyaré'ga malasa, iyaré'ga ritarungku nadé' ritulukki Puwang?’ Nappébali matu iyaro arungngé, ‘Issenni: ri wettunna dé' mumaélo tulungngi sala séddinna tau iya kaminang matunaéwé, bettuwanna dé'totu mumaélo tuluk-Ka.’ Narihukkung matu iyaro sining tauwé sibawa pahukkungeng mannennungengngé, nasining tau pogau'éngngi élona Allataala napéneddingiwi matu atuwong tongengngé sibawa mannennungengngé.” Wettunna Yésus pura manenni nappagguruwang gau'éro, makkedani lao ri ana'-ana' gurun-Na, “Muwissettu duwangngessopi na Esso Maraja Paska, na Ana'na Tolinoé riyabbéréyangngi matu untu' risalli!” Iyaro wettué kapala-kapala imangngé sibawa sining pamimpinna Yahudié maddeppungenni ri saorajana Imang Lompoé Kayafas. Barundinni mennang untu' tikkengngi Yésus sibawa mammekko-mekko enrengngé mpunoi. Nakkeda mennang, “Iyakiya aja' naripogau' iyaro gau'é ri wettu ramé-ramé, saba' mompo ammai rukkaé ri yelle'na ra'ya'é.” Wettunna Yésus engka ri Bétania, ri bolana Simon, iya nakennaé riyolo lasa oli iya mabbahayaé, engka séddi makkunrai polé ri Yésus. Tiwii séddi botolo' mallise' minnya' wangi iya masolié. Wettunna Yésus tudang manré, iyaro makkunraié nabbolorenni iyaro minnya' wangié ri yasé'na ulunna Yésus. Namacaina ana'-ana' gurunna Yésus mitai kajajiyangngéro. Nakkeda mennang, “Aga gunana iya manennaé riyabboloreng? Iyaro minnya' wangié wedding ribalu' sibawa masuli, na ellinna riwéréngngi tau kasiyasié!” Naissengngi Yésus pikkiranna mennang, nanakkeda, “Magi musussaiwi iyaro makkunraié? Napogau'i séuwa makessingngé sibawa ripojiyé untu' Iyya. Tau kasiyasié tuli engkai ri yelle'mu, iyakiya Iyya dé' utuli sibawakko. Ri laleng nabbolorenna iyaro minnya' wangié ri watakkalé-Ku, napassadiya-Ka untu' amaték-Ku. Ateppe'no! Risininna linoé, kégi-kégi ripallebbang Karéba Madécéng polé ri Allataala, pangkaukenna iyaé makkunraié ricurita towi matu selaku papparéngngerang ri aléna.” Naengka séddi polé riseppuloé séddi ana' gurunna Yésus, iya riyasengngé Yudas Iskariot, lao ri kapala-kapala imangngé. Makkedai ri mennang, “Aga maélo muwérékka rékko uwabbéréyangngi Yésus lao ri iko?” Nanabilanna telluppulo dowi péra'; nainappa nawéréng iyaro dowié. Mappammulai wettuéro sappani Yudas kasempatan iya makessingngé untu' bali'bellariwi Yésus. Ri esso mammulangngé ri laleng Ramé-ramé Roti Dé'é Raginna, poléni ana'-ana' gurunna Yésus ri Aléna. Makkutanani mennang, “Kégai Bapa' macinna ripassadiyangeng nanre Paska?” Nappébali Yésus, “Laono riséddié tau ri kotaé namuwakkeda ri aléna, ‘Adanna Pa' Guru, narapini wettukku maélo-Ka ramé-raméiwi Paskaé ri bolamu silaong ana'-ana' guruk-Ku.’ ” Napogau'ni ana'-ana' gurunna Yésus iya risurowangngéngngi mennang ri Yésus. Laoni mennang passadiyai iyaro Paskaé. Wenninnana, tudanni Yésus sibawa iya seppulo duwa ana' gurun-Na manré. Wettunna mennang manré, makkedani Yésus, “Engkalingai: engka séddi polé ri yelle'mu bali'bellari-Ka matu.” Naéngkalinganaro, messé senna'ni ana'-ana' gurunna Yésus. Nainappa mennang tasséddi-séddi mappammula makkutana ri Yésus, “Tentu tenniya iyya naseng Bapa'?” Nappébali Yésus, “Tau iya pajajje'éngngi rotié ri laleng mangko'é massamang Iyya, iyanaritu bali'bellari-Ka matu. Mémeng Ana'na Tolinoé matéi matu pada-pada tarokié ri laleng Kitta'é. Iyakiya cilakai tau iya bali'bellariyéngngi Ana'na Tolinoé! Lebbi kessing muwi dé' siseng naengka najaji iyaro tauwé!” Nainappa makkeda Yudas, tau bali'bellaéro, “Tentu tenniya iyya naseng Bapa' Guru?” Nappébali Yésus, “Makkuwaitu adammu!” Wettunna mennang manré, malani Yésus roti, nainappa massempajang sukkuru'. Purairo napuwé-puwé'ni rotié sibawa liman-Na nainappa nawéréng ana'-ana' gurun-Na nanakkedato, “Alai, namuwanréi; iyanaé tubuk-Ku.” Purairo malani séddi énungeng anggoro, nainappa mappale' sukkuru' ri Allataala. Nainappa nawéréng iyaro énungengngé ana'-ana' gurun-Na nanakkedato, “Enung manenno. Saba' iyanaé dara-Ku iya paessaéngngi assijancingenna Allataala – dara ribollowangngé untu' tau maégaé nariyaddampengeng dosana mennang. Ateppe'no: Dé'na Uwénungngi iyaé anggoro'é narapi wettunna ménuk-Ka anggoro baru sibawa iko ri laleng Lino Barunna Ambo'-Ku.” Nainappa makkélong mennang séddi élong pappojiyang. Purairo laoni mennang ri Bulu-bulu Zaitun. Nanakkeda Yésus lao ri ana'-ana' gurun-Na, “Iyato wenniéwé namulari maneng matu salai-Ka; saba' tarokii ri laleng Kitta'é: Makkedai Allataala, ‘Maélo-Ka mpunoi iyaro pakkampié, natassiya-siyana matu bimbala'na.’ Iyakiya pura-Kuna ripaoto' paimeng, maélo-Ka lao ri Galiléa poddiyoloiko.” Nakkeda Pétrus lao ri Yésus, “Namuni iya maneng laingngé nasalaiwi Bapa', dé' sises-siseng iyya!” Nakkeda Yésus lao ri Pétrus, “Engngerangngi, iyato wenniéwé, riwettu dé'napa naoni manu'é, wékkatelluni muwassakkarek-Ka.” Nappébali Pétrus, “Namuni harusu'ka maté silaong Bapa', dé'to umaélo makkeda makkedaé dé' uwissengngi Bapa'!” Nasininna ana'-ana' guru laingngé makkeda makkuwatoro. Purairo laoni Yésus sibawa ana'-ana' gurun-Na riséuwaé onrong riyasengngé Gétsémani. Nakkuwanaro makkeda lao ri mennang, “Tudanno kuwaé, maélo-Ka lao massempajang.” Nanaérani Pétrus sibawa iya duwa ana'na Zébédéus lao silaongengngi. Nappammulana messé babuwa sibawa mausé. Nakkeda lao ri ana'-ana' gurun-Na, “Messé senna'i atik-Ku, samanna maélo-Ka maté. Onrono kuwaé, sibawa accowéno majjaga-jaga sibawak-Ka.” Nainappa Yésus lao mabéla-béla céddé, nanakkaluttu ri tanaé massempajang. Adan-Na, “Ambo', rékko weddingngi, pabélaini polé ri Iyya anrasa-rasang iya harusu'é Upéneddingi. Iyakiya aja' nasituru' élo-Ku, sangadinna situru élona Ambo' bawang.” Purairo lisuni Yésus ri iya tellu ana' gurun-Na nanapoléini mennang mattengngang matinro. Nakkeda lao ri Pétrus, “Dé'muna mulléi iko tellu jaga sibawak-Ka sijang bawang? Jaga-jagako, sibawa assempajakko kuwammengngi aja' mupéneddingiwi paccobangngé. Mémeng rohmu maéloi pogau'i tongengngé iyakiya dé' mulléi, saba' sipa'na tolinoé malemmai!” Laosi paimeng Yésus massempajang, adan-Na, “Ambo', rékko iyaé anrasa-rasangngé harusu'i Upéneddingi, sibawa dé' nawedding ripabélai, leppessanni élona Ambo' jaji.” Purairo lisuni Yésus, nanalolongessi ana'-ana' gurun-Na matinro mupa, nasaba cakkaruddu senna'i. Siseppi Yésus nasalai mennang, na untu' mabbékkatellunna massempajang sibawa powada ada-ada iya padaé. Purairo lisuni ri ana'-ana' gurun-Na nakkeda, “Matinro mupoga sibawa passauwi tekkomu? Itai, narapini wettunna Ana'na Tolinoé riyabbéréyang lao ri akuwasanna sining tau madosaé. Oto'no, talao. Itai! Engkani polé tau iya bali'bellariyék-Ka!” Ri wettu mabbicarana mupa Yésus, Yudas, sala séddinna polé ri ana'-ana' gurunna Yésus poléni. Maéga tau naéwa silaong iya tiwié peddang sibawa tarasulu. Risuroi mennang ri kapala-kapala imangngé sibawa sining pamimpinna Yahudié. Na iyaro tau bali'bellaé pura napaissengiwi mennang tanrangngéwé, “Tau iya ubauwé, iyanaritu taunna. Tikkengngi!” Lettu'nana ri onrongngéro, matteruni Yudas lao ri Yésus nakkeda, “Salama', Pa' Guru!” Nanabauwi Yésus. Nappébali Yésus, “Eh saudara, untu' aga nalao saudara kumaiyé?” Nainappa malluruni tau maégaéro nanatikkengngi Yésus. Sala séddinna ana' gurunna Yésus iya engkaé kuwaro sibawa Yésus, rampui peddanna nanawettai atanna imang lompoé angkanna massarang daucculinna. Nakkeda Yésus lao ri ana'-ana' gurun-Naro, “Pariwanuwai paimeng peddammu. Saba' sininna tau iya makkégunangngéngngi peddanna matéi matu sibawa peddang. Muwasengngiga dé' Uwulléi méllau tulung ri Ambo'-Ku, namasitta matu kiringngi lebbi seppulo duwa pasukang tentara malaéka'? Iyakiya rékko makkuwairo, pékkugi wedding kajajiyang iya puraé riboto ri laleng Kitta'é makkedaé mémeng harusu'i kajajiyang pada-pada iya makkekkuwangngéwé?” Nakkeda Yésus lao ri tau maégaéro, “Tau maja-Ka'ga, namupolé mai sibawa tiwi peddang enrengngé tarasulu untu' tikkek-Ka? Esso-esso-Ka mappagguru ri Bolana Allataala, nadé' mutikkek-Ka! Iyakiya mémeng harusu'i makkuwaro kuwammengngi nakajajiyang aga naokié nabi-nabié ri laleng Kitta'é.” Purairo, lari manenni ana'-ana' gurunna Yésus salaiwi Yésus. Sining tau iya tikkengngéngngi Yésus natiwini ri bolana Imang Lompoé Kayafas. Maddeppungenni guru-guru agamaé sibawa sining pamimpinna Yahudié kuwaro. Naccowéna Pétrus ri Yésus mabéla-béla lettu ri seddé bolana imang lompoé. Nainappa muttama' Pétrus ri laleng seddé bolaéro, natudang silaong pengawal-pengawal-é. Macinnai missengngi pékkugi accappurenna matu iya manennaro. Makkuragani kapala-kapala imangngé sibawa sininna Mahkama Agamaé sappa asabbiyang bellé-bellé untu' pakennaiwi pahukkungeng maté Yésus. Iyakiya dé'gaga séddi butti nalolongeng namuni maégani malluru mancaji sabbi bellé. Accappurenna engka duwa tau malluru liyolo. Makkedai mennang, “Iyaé tauwé makkedai, ‘Uwullé ruttungngi Bolana Allataala, na ri laleng tellungngessoé Uwullé patettongngi paimeng.’ ” Nainappa tettong imang lompoé, nakkeda lao ri Yésus, “Dé'ga Mubaliwi iyaro riteppuwangngék-Ko?” Iyakiya mammekko bawammi Yésus. Siseppi makkeda iyaro imang lompoé lao ri Yésus, “Nasabbing Allataala iya tuwoé, powadani Ikoga Arung Pappassalama'é, Ana'na Allataala?” Nappébali Yésus, “Makkuwaitu adatta puwang. Iyakiya ateppe'no: mappammulai makkekkuwangngé, muwitai matu Ana'na Tolinoé tudang ri seddé ataunna Allataala Iya Pommakuwasaé, sibawa polé ri yasé'na ellungngé ri langié!” Nasapé'-sapé'ni pakéyanna iyaro imang lompoé, nanakkeda, “Napakatunai Allataala! Dé'na naparelluki sabbi. Alémuna méngkalinga manengngi ada-ada iya pakatunaéngngi Allataala. Pékkugi pallolongemmu makkekkuwangngé?” Nappébali mennang, “Salai, sibawa harusu'i maté.” Nanamméccuini mennang rupanna Yésus, sibawa nabarasa'i. Engkato leppa'i sibawa makkeda, “Coba teppui sibawa paissengiki, éh Arung Pappassalama'é! Niga leppa'-Ko?” Tudat-tudanni Pétrus ri saliweng, ri seddé bolaé. Napoléna sala séddinna pattumani makkunrai makkeda lao ri Pétrus, “Dé'ga musilaotto Yésus tau Galiléaéro?” Iyakiya massakkai Pétrus ri yolona maneng mennang, nappébali Pétrus, “Dé' uwissengngi aga akkattamu.” Nainappa lao ri sumpanna seddé bolaé. Na engka séddi pattumani makkunrai laingngé mitai Pétrus, nakkeda lao risining tauwé kuwaro, “Iyaé tauwé sibawa towi onna' Yésus polé ri Nazarét-éro.” Nassakkasi Pétrus sibawa mattanro, adanna, “Dé' tongeng uwissengngi iyaro tauwé!” Dé' namaitta puranaro, sining tau iya tettongngé kuwaro laoni ri Pétrus sibawa makkeda, “Pasti iko sala séddinna polé ri mennang. Matanrang senna' polé ri saddammu.” Nappammulana Pétrus mattanro-tanro, “Matéka, dé' uwissengngi iyaro tauwé!” Iyatoro wettué naonina manu'é. Naéngngeranni Pétrus makkedaé purai makkeda Yésus ri aléna, “Riwettu dé'napa naoni manu'é, wékkatelluna muwassakkareng.” Nassuna Pétrus, sibawa teri tassénge'-sénge'. Maélé senna'ni sininna kapala imangngé sibawa pamimpinna Yahudié mébbu apettung untu' mpunoi Yésus. Nabalengguni Yésus, nanabbéréyangngi lao ri Pilatus, gubernurna pamarénta Roma. Wettunna Yudas, iya bali'bellariyéngngi Yésus naita makkedaé ripakennaini pahukkungeng Yésus, massessekaléni. Nainappa napalisu iyaro telluppuloé dowi péra' ri kapala-kapala imangngé sibawa pamimping-pamimpinna Yahudié. Makkedani, “Madosaka bali'bellariwi tau iya dé'é asalanna, angkanna rihukkung maté!” Iyakiya mappébaliwi mennang, “Magi naripaduli iyatu? Iyaro urusammu!” Naggenrungenni Yudas iyaro dowié muttama' ri Bolana Puwangngé, nainappa lao gattungngi aléna. Naitténi kapala-kapala imangngé iyaro dowié nakkeda, “Iyaé dowié, dowi dara. Manuru' hukkunna agamaé, iyaé dowié dé' nawedding riputtama' ri onrong akkasuwiyangengngé ri Bolana Puwangngé.” Puranana mennang masséddi, napakéni mennang iyaro dowié untu' melli tana iya riyasengngé Tanana Pakkébbu Oringngé. Iyaro tanaé ripakéi untu' tampunna sining tau polé-polé. Iyanaro saba'na lettu essoéwé iyaro tanaé riyasengngi “Tana Dara”. Na ri lalennaro, kajajajiyanni aga pura napowada Nabi Yérémia, iyanaritu, “Tarimai mennang telluppulo dowi péra', iyanaritu elli nasitujuiyé bangsa Israélié selaku pakkamaja untu' Aléna. Na iyaro dowié napakéi mennang untu' melliwi Tanana Pakkébbu Oringngé, pada-pada iya pura napparéntangngé Puwangngé lao ri iyya.” Wettunna Yésus mangolo ri Pilatus, gubernurna wanuwaéro, makkutanani Pilatus, “Ikonaga Arunna tau Yahudié?” Nappébali Yésus, “Makkuwaitu adatta puwang.” Iyakiya wettunna kapala-kapala imangngé sibawa pamimping-pamimpinna Yahudié pauwi maéga riteppuwangngi Yésus, dé' sises-siseng nabaliwi. Rimakkuwannanaro makkedani Pilatus lao ri Yésus, “Dé'ga Muwéngkalingai iya maneng nateppuwangngék-Ko mennanro?” Iyakiya dé' nappébali Yésus muwi céddé angkanna hérang senna' iyaro gubernur-é. Tungke' Ramé-Ramé Paskaé, biyasana gubernur-é malleppessang séddi tau tarungku situru napilé tau maégaé. Iyaro wettué engka séddi tau rihukkung iya tarompoénna. Asenna Yésus Barabas. Jaji, wettunna tau maégaé maddeppungenna, makkutanani Pilatus ri mennang, “Nigana muwélori uleppessangekko? Yésus Barabas iyaré'ga Yésus iya riyasengngé Kristus?” Makkeda makkuwairo Pilatus nasaba naissengngi makkedaé sining panguwasana Yahudié mabbéréyangngi Yésus nasaba mangémpurui mennang. Wettunna Pilatus tudang ri onrong pangadélékengngé nakirinni bainéna pasengngéwé lao ri aléna, “Aja' mucampuru'i parakarana tau iya dé'é napasalaro, nasaba nakarena Aléna, mannippika' essoéwé iya mappakatau-taué.” Iyakiya kapala-kapala imangngé sibawa pamimping-pamimpinna Yahudié matteru-terui napakiri-kiri iyaro tau maégaé untu' méllauwi ri Pilatus kuwammengngi naripaleppe Barabas sibawa rihukkung maté Yésus. Nanakkutanasi iyaro gubernur-é lao ri mennang, “Niga muwélori uleppessangekko polé ri iya duwa tauwéro?” Nappébali mennang, “Barabas.” Nakkutana Pilatus lao ri mennang, “Rékko makkuwaitu, aga ugaukengngi Yésus iya riyasengngé Kristus?” Nappébali maneng mennang, “Sallii!” Nakkutana Pilatus, “Iyakiya aga asalan-Na?” Napédé' maladde'na mennang gora, “Sallii!” Angkanna mainge'ni Pilatus makkedaé dé'na agaga wedding napogau' sibawa ajakké maronta'i iyaro sining tauwé. Jaji malani uwai, na ri yolona iyaro tau maégaé bissaiwi limanna sibawa makkeda, “Dé' utanggung jawakiwi amaténna iyaé tauwé! Urusammu iyaé!” Nappébali iya maneng tau maégaéro, “Leppessanni idi sibawa ana'-ana'ta tanggungngi pahukkungengngé nasaba amatén-Na!” Nainappa Pilatus leppessangngi Barabas untu' mennang; sibawa nasuroi tauwé barasa'i Yésus, sibawa nabbéréyanna Yésus untu' risalli. Nainappa prajuri'-prajuri'na Pilatus natiwi Yésus muttama' ri saorajana gubernur-é, naddeppungenna sininna tentaraé mattulilingiwi Yésus. Naludunni mennang pakéyanna Yésus, nanapasangiwi jumba lango-lango. Mébbuni mennang séuwa passigera' polé ri takké-takké maddorié, nanapasangngi ri ulunna Yésus. Nainappa napatéténgi jari ataun-Na séuwa tekkeng, nainappa makkaluttu ri yolo-Na sibawa méllékéllé'i. Adanna mennang, “Oh Puwakku, Arunna Tau Yahudié!” Namméccuini mennang sibawa nalai iyaro tekkengngé, nainappa naunru ulun-Na. Puranana nacculé-culéi, naludunni iyaro jumba lango-langoé, nainappa napapasangi paimeng pakéyan-Na. Purairo natiwini massu untu' risalli. Ri tengnga laleng, siruntu'i mennang séddi tau polé ri Kiréné asenna Simon. Napassani mennang iyaro tauwé méssangngi sallina Yésus. Lettu'nana mennang riséuwaé onrong iya riyasengngé Golgota, bettuwanna, “Onrong Tengkora”. Kuwaniro mennang napaénung Yésus anggoro iya sicampuru'é essung. Iyakiya purana nakanyamé Yésus iyaro anggoro'é, dé'na namaélo ménungngi. Nainappa nasalli mennang, sibawa nabagé-bagé pakéyan-Na sibawa naundi. Purairo tudanni mennang jagaiwi kuwaro. Ri yasé'na ulun-Na napasanni mennang oki iya riteppuwangngéngngi, iyanaritu: “Iyanaé Yésus, Arunna Tau Yahudié”. Nasalli towi mennang duwa parampo' silaong Yésus; séddi tau ri seddé ataun-Na, séddi ri seddé abéyo-Na. Sining tau iya lalowé kuwaro maccilic-ciling ulunna, sibawa nacella-cellana Yésus. Makkedai mennang, “Iko maéloé ruttungngi Bolana Allataala, sibawa patettongngi ri laleng tellungngesso! Rékko Ana'nako Allataala, nonnono polé ri salliéro, namupassalama'i alé-Mu!” Makkuwatoro kapala-kapala imangngé sibawa guru-guru agamaé enrengngé sining pamimpinna Yahudié naéllékéllé'ni Yésus. Makkedai mennang, “Napassalama'i tau laingngé, padahal Aléna dé' naulléi passalama'i! Rékko arunnai Israélié, madécénni makkekkuwangngé nonno polé ri salliéro, nainappaki maélo mateppe' ri Aléna. Mateppe'i ri Allataala, sibawa makkeda makkedaé Ana'nai Allataala. Nah, laono mai taitai maélo muwiga Allataala passalama'i makkekkuwangngé.” Parampo'-parampo' iya risallié sibawa Aléna mala nacella-cella towi pada-padaéro. Ri tangassonana, tellujjang ittana, sininna iyaro wanuwaé mapettang. Tetté tellu arawéngngé, gorani Yésus sibawa sadda maloppo, “Eli, Eli lama sabakhtani?” bettuwanna, “Oh Allataala-Ku, oh Allataala-Ku magi Musalai-Ka?” Siyagangngaré tau kuwaro méngkalingai iyaro gau'é, nakkeda, “Naobbii Elia!” Engka séddi tau polé ri mennang mapperi-perini lao mala bunga karang, nanapajajje'i ri laleng anggoro' makeccié, nainappa napasopo ri laleng cappa'na séddié aju, nanassoppakengngi ri témunna Yésus. Iyakiya tau laingngé makkedai, “Tajengngi, taitai polé aré'gi Elia passalama'i!” Nainappa gorasi Yésus sibawa sadda maloppo, nanasseppungenni nappase'-Na paccappurengngé. Kaing paddenring iya taggattungngé ri Bolana Puwangngé makenné'ni mancaji duwa polé ri yasé' lettu ri yawa. Mpéwang tanaé sibawa mapuwé' sining bulu batué. Tattimpa' sining tampungngé, sibawa maéga umma'na Allataala iya matéénna tuwo paimeng. Massu mennang polé risining tampungngé puranana Yésus moto polé ri amaténgngé, sibawa muttama' ri Yérusalém. Namaéga tau mitai mennang kuwaro. Kapalana tentaraé sibawa prajuri'-prajuri'na iya jagaiyéngngi Yésus métau senna'ni wettunna naita mpéwang tanaé sibawa sininna iya kajajiyangngéro. Makkedani mennang, “Tongeng, iyanaé Ana'na Allataala!” Engkato kuwaro maéga makkunrai mitai polé mabéla. Iya mennang ritu pura maccowériyéngngi Yésus untu' tulungngi mappammulai polé ri Galiléa. Ri yelle'na iyanaritu Maria Magdaléna, Maria indo'na Yakobus sibawa Yusuf, enrengngé indo'na ana'-ana'na Zébédéus. Iyaro wennié poléni séddi tau sugi iya polé ri Arimatéa, iya riyasengngé Yusuf. Maccowé towi ri Yésus. Laoni ri Pilatus nanaéllauwi ujuna Yésus. Nanapparéntanni Pilatus kuwammengngi nariwéréng ujuna Yésus. Nalani Yusuf iyaro ujué, nanadokoi sibawa kaing walu polé ri lénang iya mabarué mupa. Nainappa nataro ujuna Yésus ri laleng tampung appunnangenna iya naébbué ri laleng séddié bulu-bulu batu. Purairo galétténi séddi batu loppo tongkoi sumpanna tampungngéro, nainappa meddé. Maria Magdaléna sibawa Maria laingngé monroi tudang kuwaro moloiwi iyaro tampungngé. Pappa bajanana, ri esso Saba'é, kapala-kapala imangngé sibawa sining tau Farisié laoni silaong mangolo ri Pilatus. Nakkeda, “Puwang, wettunna tuwo mupa iyaro pabbelléngngé, riyéngngerangngi purai makkeda, ‘Labe'na tellungngesso moto'-Ka matu.’ Rimakkuwannanaro, suroi tauwé jagaiwi iyaro tampungngé madécéd-décéng narapi esso matellué, kuwammengngi ana'-ana' gurun-Na dé' naulléi ménnauwi uju-Na nainappa makkeda lao risining tauwé makkedaé purani ripaoto' polé ri amaténgngé. Na bellé iya paccappurengngéwé lebbi majapi naiya mammulangngé.” Nakkeda Pilatus lao ri mennang, “Namappunnaiko tentara pengawal, laono mujagaiwi iyaro tampungngé madécéd-décéng.” Nalaona ri tampungngé, naségélé'i batu pattongkona sibawa taro tau jaga ri yolona, kuwammengngi nadé'gaga tau ganggui iyaro tampungngé. Wettunna labe'na esso Saba'é, ri esso Aha'é, maélé senna'ni Maria Magdaléna sibawa Maria laingngé lao mitai iyaro tampungngé. Tappa mpéwang muni tanaé iya maseroé. Engka séddi malaéka'na Puwangngé nonno polé ri surugaé nanagaléttéi iyaro batu pattongkona, nanatudang ri yasé'na. Tappana iyaro malaéka'é pada-padai billa'é, sibawa pakéyanna maputé senna'. Tentara pengawal iya jagaé kuwaro makkumani tauna angkanna ténré mennang, sibawa pada-pada tau maté. Nakkeda iyaro malaéka'é lao risining makkunraiéro, “Aja' mumétau! Uwisseng musappai Yésus iya puraé risalliro. Dé'ni kuwaé. Moto'ni pada-pada Napowadaé riyolo. Laono mai muwitai onronna ripaléwu. Makkekkuwangngé, apperi-perino lao namupowadangngi ana'-ana' gurun-Na, ‘Moto'ni, namakkekkuwangngé laoni lebbi riyolo naiya iko ri Galiléa. Kuwaro muwitai matu!’ Engngerangngi aga pura upowadakko.” Mapperi-perini iyaro sining makkunraié salaiwi tampungngé. Nasibawang pappénedding métau sicampuru' marennu; lari-larini mennang untu' powadangngi iyaro gau'é lao ri ana'-ana' gurunna Yésus. Tappa polé muni Yésus méwai sita iyaro sining makkunraié, nakkeda, “Salama'!” Napoléna mennang maddeppériwi, nainappa nakaddao ajé-Na sibawa nasompai. Nakkeda Yésus lao ri mennang, “Aja' mumétau, lao mupowadangngi saudara-saudara-Ku kuwammengngi nalao ri Galiléa; kuwaro naita-Ka matu mennang.” Ri wettu laona iyaro sining makkunraié, siyagangngaré polé ri tentara pengawal iya jagaiyéngngi iyaro tampungngé lisuni ri kotaé, sibawa laporo'i ri kapala-kapala imangngé sininna iya puraé kajajiyang. Iyaro kapala-kapala imangngé barundinni sibawa sining pamimpinna Yahudié, nainappa nawéréng maéga dowi iyaro tentara pengawal-é, nakkeda, “Harusu'ko powadai makkedaé, poléi ana'-ana' gurunna Yésus ri wennié, nanaénnauwi ujuna ri wettu matinromu. Rékko naéngkalingai gubernur-é, ripalécépi kuwammengngi dé' mulolongeng asukkarakeng.” Nalani tentara pengawal-é iyaro dowié, nanapogau'i pada-pada iya ripasengengngéngngi lao ri mennang. Rimakkuwannanaro iyaro curitaé tassiya mupi ri yelle'na tau Yahudié lettu essoéwé. Iyaro seppulo séddié ana' gurunna Yésus laoni ri bulu-bulué ri Galiléa situru iya napparéntangngé Yésus lao ri mennang. Wettunna mennang naita Yésus kuwaro, suju'ni mennang sompai. Iyakiya engka ri yelle'na mennang bata-bata. Maddeppéni Yésus ri mennang, nakkeda, “Sininna akuwasangngé ri surugaé sibawa ri linoé purani riyabbéréyang ri Iyya. Rimakkuwannanaro laono ri sininna bangsaé ri sininna linoé, pancajiwi mennang ana'-ana' guruk-Ku. Cemméi mennang sibawa teppui asenna Ambo'é, sibawa Ana'é, enrengngé Rohna Allataala. Paggurui mennang turusiwi sininna iya puraé Uparéntakko. Na éngngerangngi tuli Usibawakko matu lettu paccappurenna linoé.” Iyanaé Karéba Madécéng passalenna Yésus Kristus, Ana'na Allataala. Iyaro Karéba Madécéngngé napammulaiwi pada-pada iya naokié Nabi Yésaya, makkuwaéwé: “ ‘Iyanaé suro-Ku,’ adanna Allataala, ‘Usuroi lebbi riyolo naiya Iko, kuwammengngi natimpakek-Ko laleng.’ Engka tau gora-gora ri padang kessi'é, ‘Passadiyangengngi laleng Puwangngé; paratai sining laleng iya maéloé Nalaloi.’ ” Pada-pada iya tarokiéro, makkuwatoniro mompoi Yohanés ri padang kessi'é. Nacemméi tauwé sibawa napalettu'i karéba polé ri Allataala. Makkedai Yohanés, “Harusu'ko toba' polé ri dosa-dosamu sibawa harusu'ko ricemmé, kuwammengngi naddampengekko Allataala.” Sininna tauwé polé ri wanuwa Yudéa sibawa kota Yérusalém lao méngkalingai Yohanés. Nangakuini mennang dosa-dosana, nappa ricemmé ri Yohanés ri Salo Yordan. Pakéyang iya napaké Yohanés poléi ri bulu untaé. Babbanna poléi ri bingkulangngé, sibawa anréna incalé nenniya cani' ale'. Nappallebbangenni karébaéwé, “Ri munrikku matu, poléi matu séddi tau iya lebbi battowaé na iyya. Dé' usitinaja cuku' lukkai tulu sapatun-Na. Iyya ucemméko sibawa uwai, iyakiya iyaro Nacemméko matu sibawa Rohna Allataala.” Iyaro wettué engkani Yésus polé ri Nazarét daérana Galiléa, naricemmé-Na ri Yohanés ri Salo Yordan. Massuna Yésus polé ri saloéro, Naitani tabbukka langié sibawa Rohna Allataala nonno ri yasé'na pada-pada jangang-jangangngé. Nainappa naéngkalinga saddanna Allataala makkeda, “Ikona Ana'-Ku iya Uwamaséiyé. Mupésennangi atik-Ku.” Puranaro, matteruni Yésus ritiwi ri Rohna Allataala ri padang kessi'é. Naonrona kuwaro patappulo essona ricobai ri Ibillisi'. Engkato kuwaro olokolo liya naéwa sibawang, naritumaningi ri malaéka'é. Ritarungkunnana Yohanés, laoni Yésus ri Galiléa, nanappagguruwangngi kuwaro Karéba Madécéng polé ri Allataala. Adan-Na, “Dé'na namaitta napammulaiwi Apparéntanna Allataala. Toba'no polé ri dosa-dosamu, sibawa mateppe'no ri Karéba Madécéng polé ri Allataala!” Wettunna Yésus joppa ri wirinna Tappareng Galiléa, Naitani duwa pakkaja, iyanaritu Simon sibawa Andréas anrinna. Mattengngangngi mennang jala. Nakkeda Yésus lao ri mennang, “Accowéno ri Iyya. Maélo-Ka pagguruko majjala tau.” Matteruni mennang nasalai jalana nainappa naccowéri Yésus. Joppani matteru Yésus, naitasi duwa tau massilessureng laingngé, iyanaritu Yakobus sibawa Yohanés, ana'-ana'na Zébédéus. Engkai mennang ri lopié, pedécéngiwi jalana. Natteruna Yésus mobbii mennang. Nanasalaini ambo'na ri laleng lopié silaong sining tau napagajié. Nainappa lao maccowériwi Yésus. Lettu'ni Yésus sibawa ana'-ana' gurun-Na ri kota Kapernaum. Ri esso Saba' rappina, muttama'ni Yésus ri bola assompangngé nanappammula mappagguru. Héranni sininna tau iya méngkalingaéngngi cara-Na mappagguru. Saba' mappaggurui sibawa kuwasa, dé' napada guru-guru agamaé. Iyaro wettué engka séddi tau nauttamai roh maja muttama' ri laleng bola assompangngé, nagora, “Oh Yésus, tau Nazarét-é, aga maélo Mugaukekki? Polé-Koga untu' pabbinasaki? Uwisseng niga Iko: Ikona suro mapaccingngé iya polé ri Allataala!” Nagara'ni Yésus iyaro roh-é, “Ammekkoko! Assuko polé ri tauwéro!” Naiyaro roh majaé nagottanni iyaro tauwé sibawa masero, nainappa massu polé ri tauwéro nanagorato. Hérang senna'ni sininna tauwé, angkanna makkeda séddié lao ri laingngé, “Wah, aga iyaé? Séuwa pappagguruwang baru! Nasuroi massu roh-roh majaé sibawa kuwasa, namatinulu ri Aléna!” Nallebbanna masitta iyaro karébaé passalenna Yésus lao risininna daérana Galiléa. Nasalaini Yésus sibawa ana'-ana' gurun-Na iyaro bola assompangngé, nalao ri bolana Simon sibawa Andréas. Nalaoto Yakobus sibawa Yohanés silaongengngi mennang. Matuwa makkunrainna Simon masemmengngi ri onrong atinronna. Jaji wettunna Yésus sibawa ana'-ana' gurun-Na muttama' ri bolaéro, ripowadanni Yésus iyaro gau'é. Nalaona Yésus ri matuwa makkunrainna Simon, nanakkatenningngi limanna, nanatulungngi moto'. Soroni semmenna, nanatumaningiwi mennang. Arawénnana, labunana essoé, natiwini sining tauwé lao ri Yésus iya maneng tau malasaé sibawa tau nauttamakiyé sétang. Maddeppungenni sininna pabbanuwana kotaéro ri yolona bolaéro. Nanapajjappani Yésus maéga tau iya nakennaé maddupa-rupang lasa, sibawa napaddésu' towi maéga sétang. Dé' napalaloi iyaro sining sétangngé mabbicara, saba' naissengngi mennang niga Yésus. Pappa bajanana, subu-subu mupa, moto'ni Yésus nanasalaiwi bolaé. Nalao ri onrong masino-sinoé ri saliweng kota, nassempajang kuwaro. Iyakiya Simon sibawa sellao-sellaona laowi sappai Aléna. Naruntu'na-Na mennang, makkedani, “Sininna tauwé sappaki Pa'.” Iyakiya mappébaliwi Yésus, “Laono mai tapatterui joppatta lao ri kota-kota laingngé kuwaé mattulili. Harusu' tok-Ka makkatobba kuwaro, saba' iyanaro akkattana Ulao kumaiyé.” Rimakkuwannanaro laoni Yésus kégi-kégi ri sininna Galiléa, nanakkatobba risining bola assompangngé enrengngé napaddésu'i sining sétangngé. Engka séddi tau malasa oli iya mappakatau-taué lao ri Yésus. Makkaluttuni iyaro tauwé, nakkeda, “Rékko naéloriwi Bapa', naullé Bapa' pajjappaka'.” Namesséna Yésus ri tauwéro. Jaji nakarawani iyaro tauwé, nanakkedato, “Uwéloriwi, ajjappano!” Iyatoro wettué nateddéng lasana najjappa. Nainappa Yésus suroi lao sibawa papparéngngerangngéwé, “Jaga-jagako, aja' mucuritai lao ri nigi-nigi, iyakiya laoko ri imangngé, namuwéllauwi untu' pattentui makkedaé majjappano. Nainappa untu' ajjappammuro, akkasuwiyangekko akkarobangeng situru napparéntangngé Musa, selaku butti lao risining tauwé makkedaé tonget-tongenno majjappa.” Iyakiya iyaro tauwé laoni, sibawa matteru-terui nacurita kajajiyangngéro kégi-kégi, angkanna dé'na naulléi Yésus muttama' ri kotaé sibawa mannessa-nessa. Ri saliweng kota bawang monro ri onrong-ngonrong masino-sinoé. Iyakiya matteru-teru mupi tauwé lao ri Aléna polé kégi-kégi. Siyagangngaré esso ri munrinna, lisuni Yésus ri Kapernaum. Nallebbanna karébaé makkedaé engkai ri bolaé. Namaégana tau polé. Makkatulunni mennang kuwaro angkanna dé'na gaga onrong. Muwi ri sumpangngé pennoto siredde-redde tauwé. Napalettu'ni Yésus karéba polé ri Allataala lao ri mennang. Ri wettu mabbicarana Yésus, engka eppa tau mpulé séddi tau péso' natiwi lao ri Yésus. Iyakiya maéga senna' tau, dé' naulléi lettu ri seddéna Yésus. Jaji nabukkai pabbingengngé persis ri yasé'na naonroiyé Yésus. Purairo, naloro'ni iyaro tau péso'é sibawa tappéréna. Wettunna naita Yésus pékkugi rajanna teppe'na mennang, makkedani lao ri tau péso'éro, “Ana'-Ku, riyaddampengenni dosa-dosamu.” Engka siyagangngaré guru agama iya tudangngé kuwaro mammulani makkutana ri laleng atinna, “Barani senna' iyaé tauwé mabbicara makkuwaro! Napakatunai Allataala. Niga wedding maddampengengngi dosaé, saliwenna Allataala?” Iyatoro wettué naissengngi Yésus pikkiranna mennang. Nainappa makkeda, “Magi mumakkutana makkuwaro ri laleng atimmu? Kéga lebbi gampang: makkeda, ‘Riyaddampengengngi dosamu’, iyaré'ga makkeda, ‘Oto'no, akkai tappérému, namujoppa’? Iyakiya makkekkuwangngé maélo-Ka pabuttiwi ri iko makkedaé ri yasé'na linoéwé makuwasai Ana'na Tolinoé maddampengengngi dosaé.” Nainappa makkeda Yésus lao ri tau péso'éro, “Oto'no, akkai tappérému namulisu!” Mapperi-perini moto' malai tappéréna nainappa massu risabbing risininna mennang. Hérang senna'ni sininna tauwé nanapojiwi Allataala. Makkedani mennang, “Dé'pa naengka nariita kajajiyang makkuwaéwé!” Lisuni paimeng Yésus ri wirinna Tappareng Galiléa. Maéga tau lao ri Aléna, naripagguru mennang. Ri wettunna Yésus joppa kuwaro, naitani séddi passinge' sima riyasengngé Léwi, ana'na Alféus, mattengngang tudat-tudang ri kantoro accukéngngé. Nakkeda Yésus lao ri Léwi, “Accowéno ri Iyya.” Natettonna Léwi naccowériwi Yésus. Wettunna Yésus mattengngang manré ri bolana Léwi, poléni maéga passinge' sima sibawa sining tau iya riyangga'é maja ri masaraka'é maccowé manré sisama Yésus enrengngé ana'-ana' gurun-Na. Saba' maéga ri yelle'na mennang maccowériwi Yésus. Engka siyagangngaré guru agama polé ri golongang Farisié mitai Yésus manré sisama passinge'-singe' simaé sibawa sining tau iya riyangga'é majaro. Jaji makkutanani mennang ri ana'-ana' gurunna Yésus, “Magi gurummu nanré sisama passinge'-singe' simaé sibawa sining tau majaéro?” Naéngkalingai Yésus pakkutanana mennanro, nanappébali, “Tau madisingngé dé' napparelluwang dottoro'; bannami tau malasaé bawang. Polé-Ka tenniya untu' mobbii tau iya mangga'éngngi aléna makessing, sangadinna tau iya riyangga'é matuna.” Riséuwaé wettu mappuwasai ana'-ana' gurunna Yohanés Paccemmé sibawa sining tau Farisié. Nainappa engka tau polé ri Yésus sibawa makkutana, “Magi ana' gurunna Yohanés Paccemmé sibawa ana' gurunna tau Farisié nappuwasa, na ana' gurunna Bapa' dé'?” Nappébali Yésus, “Dé'ga nanré padaé ri pésta abottingengngé? Rékko sibawa mupi mennang bottimpurané, tentu manréi mennang. Iyakiya poléi matu wettunna nariyala iyaro bottimpurané polé ri mennang. Ri wettuénnaro matu dé' nanré. Dé'gaga tau téppangngi waju laungngé sibawa sikenné kaing baru. Saba' cakkikkii matu iyaro pattéppangngé nanasapé'i iyaro wajué, angkanna pédé' malowangngi sapé'na. Makkuwatoniro dé'gaga tau tiri' anggoro baru ri laleng popang koli malaungngé. Nasaba iyaro anggoro barué nareppa'i matu iyaro popangngé, angkanna tabbé duwai. Iyaro anggoro barué harusu'i ritiri' ri laleng popang iya mabaruétto!” Riséuwaé esso Saba', wettunna Yésus lalo riséuwaé dare' gandong, mammulani ana'-ana' gurun-Na mala gandong. Nakkeda sining tau Farisié lao ri Yésus, “Magi na ana'-ana' gurum-Mu najjalékkaiwi hukkunna agamata, ri laleng napogau'na aga riyattéyangngé ri esso Saba'é?” Nainappasi makkeda Yésus, “Esso Saba'é ripakangkai untu' rupa tauwé; tenniya rupa tauwé untu' esso Saba'é. Jaji, Ana'na Tolinoé makuwasai, muwi lao ri esso Saba'é.” Lisusi Yésus ri bola assompangngé. Kuwaro engka tau iya maté siwalié limanna. Na kuwaro engka tau maélo sappai asalanna Yésus, kuwammengngi weddingngi riyapparapekeng. Jaji napénessaini matteru, maéloiga pajjappai tauwé ri esso Saba'é. Nakkeda Yésus lao ri tau maté sibalié limanna, “Laoko mai mutettong kuwaé, ri yolo.” Namakkutana lao ri sining tau iya engkaé kuwaro, “Manuru' agamaé, aga wedding ripogau' ri esso Saba'é? Pogau'i madécéngngé iyaré'ga majaé? Passalama'i tauwé iyaré'ga mpunoi?” Mammekko bawammi mennang. Nakkitana Yésus mattulili sibawa macai. Iyakiya messé towi, nasaba matedde ati senna'i mennang. Nainappa makkeda lao ri tauwéro, “Loro'i limammu.” Naloro'ni limanna iyaro tauwé, najjappana limanna. Nanasalaini sining tau Farisié iyaro bola assompangngé, nappa lao barunding sibawa siyagangngaré tau iya sokongngéngngi Hérodés, untu' mpunoi Yésus. Soroni Yésus sibawa ana'-ana' gurun-Na ri Tappareng Galiléa. Namaéga senna'na tau polé ri Galiléa lao maccowériwi Yésus. Maégato polé ri Yudéa, polé ri Yérusalém, polé ri daéra Iduméa, sibawa daéra seddé alauna Yordan, enrengngé polé ri seddéna kota-kota Tirus sibawa Sidon. Lao manenni ri Yésus, saba' purani naéngkalinga passalenna gau'-gau' iya puraé Napogau'. Iyaro tauwé makkumani égana, angkanna Yésus suroi ana'-ana' gurun-Na passadiyangengngi lopi, saba' ajakké riredde'i risining tauwéro. Maéga senna' tau napajjappa, angkanna sininna tau malasaé siredde-redde makkuraga maddeppériwi kuwammengngi weddingngi nakarawai. Sining tau iya nauttamakiyé roh maja, sises-siseng naitai, matteru bawammi suju' ri yolo-Na sibawa gora, “Ikona Ana'na Allataala!” Iyakiya nattéyang senna'i Yésus iyaro roh-roh majaé mappaddissengengngi niga Aléna. Nainappa Yésus ménré riséddié bulu-bulu, sibawa naobbii sining tau Naéloriyé. Napoléna iyaro sining tauwé, nainappa napilé polé ri yelle'na mennang seppulo duwa tau. Adan-Na, “Upiléko, kuwammengngi musibawak-Ka, enrengngé Usuroko untu' mappallebbangengngi Karéba Madécéng polé ri Allataala, sibawa lolongekko kuwasa untu' paddésu'i sining sétangngé.” Iyanaé asenna iyaro seppuloé duwa tau: Simon (iya riyasengngétto Pétrus), Yakobus sibawa Yohanés silessurenna, iyanaritu ana'-ana'na Zébédéus (iya mennanro Nawéréngngi aseng Boanérges bettuwanna “ana' letté”), Andréas, Filipus, Bartoloméus, Matius, Tomas, Yakobus ana' Alféus, Tadéus, Simon si Patriot, sibawa Yudas Iskariot iya bali'bellariyéngngi Yésus. Nainappa lisuni Yésus ri bolaé. Iyakiya polési tau maégaé maddeppungeng, angkanna Yésus sibawa ana'-ana' gurun-Na dé'na nadapii manré. Nakkeda sining tauwé, “Jangenni!” Naéngkalingana kaluwarga-Na iyaro gau'é, poléni untu' malai Aléna. Makkedani guru-guru agamaé iya polé ri Yérusalém, “Nauttamakiwi Béélzébul! Kapalana sining sétangngéro mpéréngngi akuwasang untu' paddésu'i sétangngé.” Nanaobbini Yésus iyaro tau maégaé, nanacuritangngi mennang siyagangngaré pakkalarapangeng. Nakkeda Yésus, “Pékkugi wedding sétangngé paddésu'i sétangngé?” “Rékko séddié wanuwa tabbagéi ri laleng konro-konrong iya simusué, iyaro wanuwaé pasti dé' natahang. Sibawa rékko ri laleng séddié kaluwarga dé' gaga passéddiyang sibawa anggota-anggotana sisulléi simusu, ancuru' matu iyaro kaluwargaé. Sibawa rékko ri laleng akkarungenna Ibillisi' tabbagéi sibawa mammusui, iyaro akkarungengngé dé' natahang maitta sibawa pasti lennye'i matu. Dé' séddi tau mulléi muttama' ri lalempolana séddié tau mawatang nanarampasa'i waramparanna rékko dé' nasiyoi lebbi riyolo iyaro tau mawatangngé. Purapiro nainappa wedding narampasa' waramparanna. Issenni! Rékko pogau'i dosa tauwé sibawa powada pappakatuna, wedding muwa riyaddampengeng. Iyakiya rékko napakatunai Rohna Allataala, dé' nawedding riyaddampengeng! Saba' iyaro pappakatunaé iyanaritu dosa mannennungeng.” ( Napowadai Yésus makkuwaro, nasaba engka tau makkeda makkedaé nauttamakiwi Yésus roh maja.) Purairo, poléni indo'na sibawa silessu-silessuretta Yésus. Mattajengngi mennang ri saliweng, nanasuroi tauwé mobbii Yésus. Iyaro wettué maéga tau tudang mattulilingiwi Yésus. Makkedai mennang ri Yésus, “Pa', indo'ta sibawa silessu-silessuret-Ta engkai ri saliweng, nasappaki mennang Pa'.” Nappébali Yésus, “Niga indo'-Ku? Niga silessu-silessurek-Ku?” Nainappa makkita lao risining tau iya tudangngé mattulilingiwi, nappa makkeda, “Iyanaé indo'-Ku sibawa silessu-silessurek-Ku! Tau iya pogau'éngngi élona Allataala, iyanaritu padaorowané-Ku, ana' darak-Ku, sibawa indo'-Ku.” Mappaggurusi Yésus ri wirinna Tappareng Galiléa. Maéga senna' tau katulungngi. Rimakkuwannanaro laoni tudang ri lalenna séuwaé lopi iya engkaé ri tompo'na uwai, na iyaro tau maégaé tettongngi ri wirinna tapparengngé. Nanappagguruwanna Yésus maéga passaleng lao ri mennang sibawa paké pakkalarapangeng. Mappakkuwiyé paggurui mennang. “Engkalingai! Engka séddi patani lao mampo biné. Wettunna mampo, engka biné teppa ri lalengngé. Napoléna manu'-manu'é manréi iyaro biné gangka cappu. Engkato teppa ri onrong mabbatu-batué, iya céddé'é tanana. Iyaro biné masitta'i tuwo nasaba makurang tanana, iyakiya wettunnana matanré essoé, mammulani makelle iyaro cura'-cura'na nainappa marakko sibawa maté nasaba dé' namalamung ure'na muttama'. Engkato biné teppa ri tengngana alekale maddorié. Tuwoni iyaro alekale maddorié nanalimpengiwi iyaro cura'-cura'é angkanna dé' naulléi mabbuwa. Iyakiya engkato teppa ri tana macommo'é. Iyaro biné tuwoi, namancaji maloppo nainappa mabbuwa, engka leppe' wékkatelluppulo, engka enneppulona, sibawa engkato sératu.” Purana nacurita iyaro pakkalarapangngé, makkedani Yésus, “Mappunnaikoto daucculing, éngkalingani!” Wettunna Yésus alé-alénami, poléni sining tau iya puraé méngkalingai pappagguruwan-Na silaong iya seppulo duwa ana' gurun-Na. Naéllauni mennang pakatajangngi bettuwanna iyaro pakkalarapangngé. Nakkedana Yésus lao ri mennang, “Purano riwéréng pammasé untu' missengngi rahasiyana passalenna pékkugi Allataala mapparénta. Iyakiya sining tau saliwengngé ripaggurui sibawa pakkalarapangeng, kuwammengngi ‘Natonget-tongengngi matu mennang makkita, iyakiya dé' nakkita, matterui matu mennang maréngkalinga, iyakiya dé' nappéjeppu, kuwammengngi naaja' mennang nakkita sibawa mappéjeppu naaja' napolé ri Allataala nariyaddampengeng mennang ri Allataala.’ ” Nainappa Yésus makkeda lao ri mennang, “Rékko dé' mupahangngi pakkalarapangngéro, pékkugi mulléi pahangngi sining pakkalarapang laingngé? Iyaro pangampoé iyanaritu tau iya mappallebbangengngéngngi karéba polé ri Allataala. Biné iya teppaé ri lalengngé iyanaritu pada-padai sining tau iya méngkalingaéngngi karéba passalenna pékkugi Allataala mapparénta. Iyakiya maréngkalingana poléna Ibillisi' malai aga iya puraé riyampo ri laleng atinna mennang. Biné iya teppaé ri onrong mabbatu-batué sinrupai sining tau iya méngkalingaéngngi iyaro karébaé, namatteru natarima sibawa masennang atinna. Iyakiya iyaro karébaé dé' nakkure' ri laleng atinna mennang, angkanna dé' natahang maitta. Lolongenna mennang anrasa-rasang iyaré'ga paccallang nasaba karébaéro, matteruna massakka. Biné iya teppaé ri tengngana alekale maddorié sinrupai sining tau iya méngkalingaéngngi iyaro karébaé, iyakiya bata-batai passalenna atuwonna mennang sibawa macinnana tuwo sibawa masennang. Napessunna untu' maddupa-rupang gau' muttama'i ri laleng atinna mennang. Rimakkuwannanaro iyaro karéba polé ri Allataala tassipii ri laleng atinna mennang, angkanna dé' nabbuwa. Sibawa biné iya teppaé ri tana macommo'é sinrupai sining tau iya méngkalingaéngngi iyaro karébaé sibawa natarimana, makkébuwani mennang maéga, engka telluppulo, engka enneppulona, sibawa engka leppe' wékkasératu wassélé'na.” Makkedai paimeng Yésus, “Engkaga naengka tauwé napalluwa pajjennangeng nainappa natongko baku iyaré'ga nataroi ri yawana onrong atinrongngé? Dé'ga nataroi iyaro pajjennangengngé ri ajé pajjennangengngé? Dé'gaga anu tassubbu iya dé'é napaita matu, sibawa dé'gaga iya rirahasiyakangngé dé' naribongkara' matu. Rimakkuwannanaro, rékko mappunnaiko daucculing, éngkalingani!” Nainappasi makkeda Yésus, “Pénessaiwi aga iya muwéngkalingaéwé! Ukkurang iya mupaké untu' tau laingngé, napaké towi matu Allataala untu' iko – sibawa mala lebbi maégapi. Saba' tau iya mappunnaiyénna, riwéréngngi matu lebbi égapa; iyakiya tau iya dé'é nappunnai, céddé iya engkaé ri aléna, riyala towi matu.” Nasambussi bicaranna Yésus, “Rékko mapparéntai Allataala selaku Arung, keadaanna weddingngi riyakkalarapangeng pada-pada séddié tau pangampo biné ri dare'na. Matinroi ri wennié; péseddingngi ri essoé. Naiyaro sining biné tuwoi matteru sibawa mancaji battowa. Iyakiya pékkugi carana iyaro sining biné tuwo mancaji battowa, iyaro tauwé dé' naissengngi. Tanaé muto ritu passu wassélé: bunge'-bunge'na takkéna, nainappa takké-takkéna, nappa buwana. Narékko matasa'ni iyaro gandongngé, mappammulani tauwé sangkiwi nasaba narapini wettunna méngngala.” Nakkutana Yésus, “Rékko mapparéntai Allataala, aga wedding ripasibandingengngi? Aga contona wedding ripaké untu' pakatajangngi? Rékko mapparéntai Allataala, keadaanna pada-padai iyaé pakkalarapangengngé: Séuwa batu sawi iya nalaé séddi tau nainappa nataneng ri tanaé. Iyaro batu sawi-sawié iyanaritu biné kaminang baiccu ri linoé. Iyakiya rékko tuwoi, mancajiwi pong battowa ri yelle'na tanet-tanengngé. Takké-takkéna makkuwamani woronna angkanna poléi manu'-manu'é mébbu sarang ri yawana accinaungenna.” Makkuwaniro Yésus paggurui tauwé sibawa makkégunang maéga pakkalarapangeng pada-padaéro, situru iya weddingngé napahang mennang. Tuli pakéi Yésus pakkalarapangeng rékko napaggurui iyaro sining tauwé. Iyakiya rékko Alénami sibawa ana'-ana' gurun-Na, napakatajang manengngi lao ri mennang. Iyatoro arawéngngé, nakkeda Yésus lao ri ana'-ana' gurun-Na, “Laono mai tasompe lao ri liweng tappareng.” Naénré'na Yésus ri lopié, na ana'-ana' gurun-Na salaiwi tau maégaé ri wiring tapparengngé, nainappa ménré ri lopi iya padaé. Nainappa Yésus silaong ana'-ana' gurun-Na mappammula sompe. Engkato lopi-lopi laing kuwaro. Dé' namaitta ri munrinna poléni anginrajaé. Naunruni bombang lopié sibawa muttama' ri laleng angkanna céddé'pi napenno uwai iyaro lopié. Na Yésus mattengngangngi matinro ri borina lopié sibawa ulun-Na ri yasé'na angkalungungngé. Naritedduna ri ana'-ana' gurun-Na. Makkedai mennang, “Pa' Guru, dé'ga tapaduliwi rékko nakennaki abala?” Moto'ni Yésus, nanagera'i iyaro angingngé, nanakkeda lao ri tapparengngé, “Ammekkono, tennanno!” Nasorona angingngé sibawa tennang senna'ni tapparengngé. Nainappa makkeda Yésus lao ri ana'-ana' gurun-Na, “Magi mumétau? Magi nadé' mumateppe lao ri Iyya?” Namétauna mennang, nakkeda séddié lao ri laingngé, “Niga sitongenna iyaé tauwé, namuwi angingngé sibawa bombangngé tunru'to ri Aléna.” Nainappa Yésus sibawa ana'-ana' gurun-Na lettu'ni ri liwenna Tappareng Galiléa, ri daérana Gadara. Nonnona Yésus polé ri lopié, rilokkaini riséddié worowané iya massué polé ri gowa-gowana tampungngé. Iyaro tauwé rikuwasaiwi ri roh majaé sibawa monroi ri tampungngé. Dé'na nariyullé siyoi; muwi sibawa ranté. Biyasani ribalenggu ajéna sibawa limanna, iyakiya tuli napettuiwi iyaro sining ranté, sibawa napoloi bessié ri ajéna. Makkuwamani watanna angkanna dé' séddi tau mulléi tahangngi. Esso wenni lao tulili ri tampungngé sibawa ri bulu-bulué, nagora-gorato sibawa naloi watakkaléna sibawa batu. Mabéla mupi naitai Yésus polé, lari-larini nappa suju' ri yolona Yésus. Nasibawang sadda battowa gorani, “Yésus, Ana'na Allataala Iya Pommatanré! Maélo-Ko magaka? Uwéllauwi ri laleng asenna Allataala, aja' Mupanrasa-rasaka!” ( Iyaro tauwé makkeda makkuwairo nasaba makkedai Yésus ri aléna, “Eh roh, assuko polé ri tauwéwé!”) Nainappa makkutana Yésus ri aléna, “Niga asemmu?” Nappébali iyaro tauwé, “Asekku, ‘Legiun’ – saba' maéga senna'ki idi'é!” Namasero paréllaunna makkolik-koling kuwammengngi na aja' Yésus nasuroi iyaro roh-roh majaé massu polé ri daéraéro. Ri seddéna iyaro onrongngé, engka maéga senna' bawi iya sappaé inanré ri émpenna bulué. Iyaro roh-roh majaé naéllauni ri Yésus, “Suroki' muttama' ri lalenna sining bawiéro.” Nasitujuini Yésus. Jaji massuni iyaro roh-roh majaé polé ri tauwéro nainappa muttama' ri lalenna sining bawiéro. Nalarina sininna bawiéro malluppereng polé ri wirinna peppingngé muttama' ri tapparengngé natallemme' – iya manenna engka kira-kira duwassebbu bawi. Nalarina sining panganrowanna iyaro bawié, sibawa napatassiyai iyaro karébaé ri kotaé enrengngé ri désaé kuwaéttopa ri seddéna. Namassuna sining tauwé untu' mitai aga pura kajajiyang. Laoni mennang ri Yésus, nanaitani tau iya nauttamakiyé onna' roh majaéro tudang kuwaro. Mappakéyanni sibawa makessinni pikkiranna. Namétau manenni mennang. Sining tau iya alénaé pura mitai kajajiyangngé passalenna iyaro tauwé sibawa iyaro sining bawié, nacuritani aga pura kajajiyang. Nainappa iyaro pabbanuwana daéraé naéllauwi kuwammengngi nasalaiwi Yésus iyaro daéraé. Wettunna Yésus ménré ri lopié, iyaro tau nakuwasaiyé onna' sétang, naéllauni ri Yésus, kuwammengngi nawedding towi maccowé. Iyakiya dé' nasitujuiwi Yésus adan-Na, “Lisuno namupowadangngi sumpulolomu aga pura napogau' Puwangngé lao ri iko sibawa pékkugi kessinna lao ri iko!” Laoni iyaro tauwé, nappammula curitai ri daéra Seppulo Kota aga pura napogau' Yésus lao ri aléna. Hérang manenni tauwé méngkalingai. Lisuni Yésus ri liweng tappareng. Ri liwenna tapparengngéro, maéga tau polé makkatulung mattulilingiwi Yésus. Poléni séddi tau iya riyasengngé Yairus. Séddiwi pamimpinna bola assompangngé ri kotaéro. Wettunna naita Yésus, suju'ni ri yolo-Na, namasero paréllaunna, “Pa', malasa seroi ana' makkunraikku. Tulukka talao karawai, kuwammengngi najjappa nadé' namaté!” Nalaona Yésus silaong Yairus. Maéga tau maccowériwi sibawa redde'i Aléna polé tulili. Ri yelle'na engkato séddi makkunrai iya seppuloénna duwa taung malasa maddara iya maladde'é. Sininna asugirenna cappuni napaké untu' mpajai sining dottoro'é, iyakiya dé'gaga mulléi pajjappai, mala pédé' maseroi lasana. Iyaro makkunraié maégani pura naéngkalinga passalenna Yésus. Na ri tengnga-tengngana tau maégaéro, naddeppérini Yésus polé ri monri, nasaba mappikkiri'i, “Assaleng ugéssai bawang jumba-Na, majjappaka' matu!” Nagéssani jumbana Yésus, na iyatoro wettué nappésau maddara. Napérasani makkedaé majjappani. Iyatoro wettué napérasai Yésus makkedaé engka awatangeng massu polé ri Aléna. Nagilinna lao ri tau maégaéro sibawa makkutana, “Niga géssai jumba-Ku?” Nakkeda ana'-ana' gurun-Na, “Aléta Pa' mitai égana tau siredde-redde. Natakkutana mupa Pa', niga géssai Bapa'?” Iyakiya matteru-terui Yésus makkita mattulili untu' sappai tau iya puraé géssai. Iyaro makkunraié iya missengngéngngi aga pura kajajiyang sibawa aléna, ténréni sibawa métau suju' ri yolona Yésus nangakui manengngi. Nainappa makkeda Yésus lao ri makkunraiéro, “Ana'-Ku, nasaba mateppe'ko ri Iyya, majjappako! Laono sibawa salama'. Madising sisenno!” Ri wettu mabbicarana mupa Yésus, engka siyagangngaré tau risuro polé ri bolana Yairus. Nakkeda mennang ri Yairus, “Maténi ana' makkunraitta Puwang. Aja'na tasussaiwi Bapa' Guru.” Tennapaduliwi aga napowada sining tauwéro, nakkeda Yésus lao ri Yairus, “Aja'mumétau, ateppe'ko bawang!” Najoppana Yésus matteru, iyakiya dé' séddi tau Napalalo maccowériwi, sangadinna Pétrus sibawa Yakobus enrengngé Yohanés massilessureng. Wettunna mennang lettu ri bolana Yairus, naitani Yésus keadaangngé sipalu-palu, sibawa méngkalinga teri enrengngé mpating maloppo. Nauttama'na Yésus sibawa makkeda lao ri mennang, “Magi mumarukka sibawa teri? Iyaro ana'é dé' namaté, matinromi bawang!” Nacawa-cawaini mennang Yésus. Nasuroni Yésus massu maneng mennang. Nainappa natiwi indo' ambo'na iyaro ana'é sibawa iya tellu ana' gurun-Na muttama' ri kamara'na iyaro ana'é. Nakkatenninni Yésus limanna iyaro ana'é nainappa makkeda, “Talita kum,” bettuwanna, “Ana' makkunrai, makkeda-Ka lao ri iko: oto'no!” Masitta'ni moto' iyaro ana'daraé najoppa. (Seppulo duwa taung umuru'na.) Sininna iya mitaéngngi iyaro kajajiyangngé hérang senna'ni! Iyakiya nattéyang senna'i Yésus mennang mappaissengengngi iyaro gau'é lao ri nigi-nigi. Nanakkeda-Na, “Panréi iyaro ana'é!” Polé ri onrongngéro, lisuni Yésus silaong ana'-ana' gurun-Na ri kampong assalen-Na. Ri esso Saba'é mappammulani mappagguru ri bola assompangngé. Engka maéga tau kuwaro. Wettunna iyaro sining tauwé naéngkalinga pappagguruwanna Yésus, hérang senna'ni mennang. Makkedani mennang, “Polé kégai iyaé tauwé lolongeng iya manennaro? Pangissengeng agana rupanna iya engkaé ri Aléna? Pékkugi naulléi pogau'i anu makalallaingngé? Tenniyaga iyaé panré ajui, ana'na Maria, sibawa silessurenna Yakobus, Yosés, Yudas sibawa Simon? Na ana'-ana' daranna engkato monro kuwaé.” Rimakkuwannanaro nasampéyangngi mennang. Nakkeda Yésus lao ri mennang, “Séddié nabi ripakalebbii kégi-kégi; sangadinna ri kampong assalenna, sibawa ri yelle'na sumpulolona nenniya kaluwargana.” Ri onrongngéro dé' naulléi Yésus pogau' anu makalallaing. Sangadinna pajjappai siyagangngaré tau malasa sibawa napalénne bawang liman-Na ri yasé'na mennang. Héranni dé' namateppe' mennang. Nainappa Yésus lao ri kampong-kampong ri seddénaro, sibawa mappagguru. Naobbini iya seppulo duwa ana' gurun-Na, nainappa nasuro mennang tadduwa-duwa sibawa nawéréngngi mennang kuwasa untu' paddésu'i roh-roh majaé. Nawéréngngi mennang panunju'éwé lao ri mennang, “Aja' mutiwi aga-aga untu' laommu, sangadinna tekkeng. Aja' mutiwi nanré, iyaré'ga sépu-sépu sidekka, iyaré'ga dowi. Pakéko sapatu iyakiya aja' mupaké duwa waju.” Makkeda towi, “Rékko muttama'ko ri séddié bola, onrono kuwaro narapi musalai iyaro kotaé. Iyakiya rékko lettu'ko riséddié onrong, nasining tauwé kuwaro dé' namaélo tarimako sibawa méngkalingako, salaiwi iyaro onrongngé. Namuwakkeppikengngi awué ri ajému selaku papparéngngerang lao ri mennang!” Najoppana iyaro seppuloé duwa ana' gurunna Yésus. Laoni mennang mappallebbangengngi karébaé makkedaé harusu'i toba' rupa tauwé polé ri dosa-dosana. Iyaro ana'-ana' gurunna Yésus napaddésu'ni maéga sétang, nasapuiwi minnya' zaitun tau malasaé sibawa pajjappai mennang. Karéba passalenna iyaro kajajiyangngé lettu toni ri Arung Hérodés, saba' kalabbani asenna Yésus kégi-kégi. Engka tau makkeda, “Tuwoni paimeng Yohanés Paccemmé! Iyanaro saba'na nappunnai kuwasa pogau'i iyaro makalallaingngé.” Iyakiya makkedai sining tau laingngé, “Elia.” Engkato makkeda, “Nabiwi, pada-pada sala séddinna nabié ri wettu riyolo.” Wettunna naéngkalinga Hérodés iyaro, makkedani, “Pasti iyaé Yohanés Paccemmé iya uwassuro rette'é ulunna riyolo. Makkekkuwangngé tuwoni paimeng!” Saba' ri yolonaro, purai nasuro Hérodés tauwé tikkengngi Yohanés, sibawa puttama'i ri laleng tarungkué. Napogau'i Hérodés iyaro nasaba Hérodias, bainéna silessurenna, iyanaritu Filipus. Saba' purani Hérodés nakawingi Hérodias, namakkolik-kolinni Yohanés mamparengngi Hérodés passalenna gau'éro, makkuwaé, “Dé' naweddikko kawing sibawa bainéna silessuremmuro!” Iyanaro saba'na Hérodias nabenciwi Yohanés sibawa macinna mpunoi, iyakiya dé' naulléi pogau'i gau'éro; nasaba rilawa-lawaiwi ri Hérodés. Saba' purai Hérodés nasuro tauwé jagaiwi madécéd-décéng asalamakenna Yohanés ri tarungkué, nasaba métaui ri Yohanés. Naissengngi Yohanés séddiwi tau iya makessingngé iya risuroé ri Allataala. Na mémeng rékko mabbicarai Yohanés napojito Hérodés méngkalingai, namuni maséssa senna'i nasaba iyaro. Angkanna lolongenni kasempatang Hérodias ri wettu esso ajajiyanna Hérodés. Iyaro wettué mappéstai Hérodés untu' iya maneng pajaba' tanréna akkarungengngé, sining parawirana sibawa sining tomariyolona masaraka'é ri Galiléa. Ri péstaéro séréi ana'darana Hérodias, na iyaro séréna napésennangi senna'i atinna Hérodés sibawa undangenna. Nanakkeda Hérodés ri ana'daraéro, “Aga mupoji, éllau bawanni, nauwérékko matu!” Majjancini Hérodés lao ri ana'daraéro sibawa mattanro. Makkedai Hérodés, “Agi-agi muwéllau uwérékko matu, namuni sitengngana akkarungekku!” Nassuna iyaro ana'daraé makkutana ri indo'na, “Indo', aga makessing harusu' uwéllau?” Nappébali indo'na, “Ellauwi ulunna Yohanés Paccemmé.” Masitta'ni lisu iyaro ana'daraé ri Hérodés nakkeda, “Uwéllauwi ulunna Yohanés Paccemmé riwérékka makkekkuwangngé ri yasé'na séddié baki!” Naéngkalingana iyaro paréllaungngé, messé senna'ni Hérodés. Iyakiya dé' naulléi sampéyangngi paréllaungngéro nasaba purai mattanro ri yolona sining undangenna. Jaji matteruni naparéntang séddié pangawalna nalai ulunna Yohanés Paccemmé. Nalaona iyaro parajuri'é ri tarungkué, nanarette'i ulunna Yohanés. Nainappa natiwi iyaro ulué ri yasé'na séddié baki nanawéréngngi iyaro ana'daraé. Nainappa iyaro ana'daraé nawéréng tosi indo'na. Wettunna ana'-ana' gurunna Yohanés naéngkalinga iyaro gau'é, laoni malai ujuna Yohanés, nanakuburu'i. Nainappa lisu paimeng sining rasul iya puraé nasuro Yésus, namaddeppungeng sibawa Yésus. Nalaporo'ni ri Yésus sininna iya puraé napogau' sibawa nappagguruwang. Maéga senna' tau polé sibawa medde', angkanna muwi untu' manré Yésus sibawa ana'-ana' gurun-Na dé'tona nadapii. Rimakkuwannanaro makkedani Yésus lao ri ana'-ana' gurun-Na, “Laono mai talao ri onrong masino-sinoé, naweddikki alé-alétami sibawa wedding tokko mappésau cinampe'.” Nalaona mennang sibawa mallopi ri onrong masino-sinoé. Iyakiya maéga tau mitai mennang salaiwi iyaro onrongngé, sibawa naissenna niga mennang. Jaji polé ri sininna kotaé ri daéraéro, lari-larini sining tauwé molai laleng pottanangngé poddiyoloiwi Yésus sibawa ana'-ana' gurun-Na. Wettunna Yésus nonno polé ri lopié, naitani tau maégaé. Messéni lao ri mennang, saba' pada-padai mennang bimbala' dé'é nappunnai pakkampi. Nanappammulana mappagguru maéga passaleng lao ri mennang. Mawenninnana, makkedani ana'-ana' gurunna Yésus lao ri Aléna, “Mawé'ni wenni na onrongngéwé tassubbu. Lebbi kessing muwi tasuroi Pa' iyaé sining tauwé medde, kuwammengngi naelli nanré ri désa-desaé sibawa ri kampong-kampongngé kuwaé.” Iyakiya mappébaliwi Yésus, “Iko bawanna mpéréngngi mennang nanré.” Nakkeda ana'-ana' gurunna Yésus, “Wah, harusu'ki'ga lao melli roti duwa ratu dowi péra' untu' panréi sining tauwéwé?” Nakkutana Yésus, “Engka siyaga rotimmu? Coba laoko mitai!” Polénana mennang mitai, makkedani, “Engka lima roti sibawa duwato balé.” Nainappa nasuroni Yésus sining tauwé tudang makkonro-konrong ri wella-wella manyilaé. Natudanna iyaro sining tauwé sibawa taratoro', makkonro-konrong. Engka sératu tau sikonrong, sibawa engkato limappulo tau sikonrong. Nainappa nalani Yésus iyaro limaé roti sibawa duwaé balé, nappa conga ri langié mattarima kasi ri Allataala. Purairo napuwé'-puwé'ni iyaro rotié sibawa liman-Na nappa nawéréng ana'-ana' gurun-Na untu' nabagé-bagé lao ri tau égaéro. Na iya balé duwaéro nabagé-bagé toni lao ri iya maneng mennang. Manréni mennang gangka messo. Nainappa iyaro lebbinna nanré napaddeppungenni ana'-ana' gurunna Yésus, – engka seppulo duwa baku penno iya maneng. Tau worowané iya manrééngngi iyaro rotié engka kira-kira limassebbu. Purairo masitta'ni Yésus suroi ana'-ana' gurun-Na lao sibawa mallopi poddiyoloiwi lao ri Bétsaida ri liweng tappareng, nanasuroi tau maégaéro lisu. Puranana naleppessang tau maégaéro, laoni Yésus ri bulu-bulué untu' massempajang. Mawenninnana, engkani lopinna ana'-ana' gurunna Yésus ri tengnga-tengngana tapparengngé, na Yésus engka mupi ri pottanangngé. Naitani mennang sipanrasa-rasa mpiséi iyaro lopié nasaba madduppangngi angingngé iyaro lopié. Rimakkuwannanaro kira-kira pallawangenna tetté tellu sibawa tetté enneng éléé, laoni Yésus ri mennang mallaleng ri tompo'na uwai. Najoppa-Na matteru samanna maéloi liwengngi mennang. Wettun-Na mennang naita makkedaé joppai ri tompo'na uwai, nasenni mennang sétang, angkanna kelli'ni mennang nataro tau. Saba' naita manengngi mennang sibawa métau senna'na. Iyakiya matterui Yésus mabbicara lao ri mennang, “Tennanno! Iyya Yésus. Aja' mumétau!” Nainappa ménré ri lopinna mennang, nasorona angingngé. Hérang senna'ni ana'-ana' gurunna Yésus. Iyaro roti limabbatu mappahérangngé dé'pa napahangngi mennang. Mawatang senna' untu' napahang mennang. Wettun-Na lettu ri liweng tappareng, mallabuni mennang ri wirinna Tappareng Génésarét. Wettunna mennang massu polé ri lopié, naitani sining tauwé, makkedaé iyaro polé iyanaritu Yésus. Napada larina mennang lao tulili ri sininna daéraéro, nammulana tiwii tau malasaé ri yasé'na tappéré lao ri Yésus. Rékko naéngkalingai mennang makkedaé engkai Yésus riséddié onrong, natiwini mennang tau malasaé kuwaro. Kégi-kégi Yésus lao – muwi ri kampongngé iyaré'ga ri kotaé iyaré'ga ri désaé – kuwatoro tuli lao tauwé sibawa taroi sining tau malasana mennang ri tana lapangngé. Nainappa naéllau sibawa masero kuwammengngi iyaro sining tau malasaé ripalaloi géssai jumbana Yésus, muwi cappa'na muwa bawang. Sininna géssaéngngi majjappani. Engka sikalompo' tau Farisi sibawa siyagangngaré guru agama polé ri Yérusalém, lao ri Yésus. Purai naita siyagangngaré ana' gurunna Yésus manré sibawa jari dé'é namapaccing situru agamaé, iyanaritu dé' nabissaiwi jarinna lebbi riyolo situru peraturanna agamaé. Sining tau Farisié, makkuwatoro sininna tau Yahudié, mapato senna' maccowériwi ade'na néné-nénéna mennang. Dé' nanré mennang, ri wettu dé'napa nabissaiwi jarinna situru cara-carana pura ripattentué. Aga iya riyelliyé ri pasaé dé' nanréi rékko dé' napura nabissai lebbi riyolo. Maéga mupa peraturang laing polé ri néné-nénéna mennang iya nakkatenning masse'é mennang; padaénna akkalarapanna peraturang mabbissa kaca, mangko, sibawa paréwa-paréwa tembagaé. Rimakkuwannanaro iyaro sining tau Farisié sibawa guru-guru agamaé makkutanani ri Yésus, “Magi ana' gurum-Mu nanré sibawa jari iya dé'é naribissai? Aga saba'na ana'-ana' gurum-Mu dé' naccowériwi ade'na néné-nénéta?” Nappébali Yésus, “Iko tau munapé'ko! Sicoco' senna' aga naboto Yésaya passalemmu, iyanaritu, ‘Makkuwaiyé adanna Allataala, Iyaro sining tauwé nasompa-Ka sibawa ada-ada, iyakiya atinna mabélai polé ri Iyya. Percuma mennang sompa-Ka, saba' peraturang tolino mennang nappagguruwang samanna iyaro peraturak-Ku!’ Parénta-paréntana Allataala dé' mupogau'i, na peraturang-peraturanna tolinoé muwakkatenningngi masse'-masse'.” Nainappa makkeda Yésus, “Macca senna'ko sampéyangngi paréntana Allataala kuwammengngi mulléi pattahangngi pappagguruwammu. Purani nabbéréyang Musa iyaé paréntaé, ‘Pakalebbii indo'mu sibawa ambo'mu’, sibawa ‘Nigi-nigi makkeda-kedaiwi ambo' indo'na, harusu'i rihukkung maté.’ Iyakiya iko muwappagguruwangngi: Rékko makkedai tauwé lao ri tomatowanna, ‘Aga iya harusu'é uwéréngngi ambo' sibawa indo', purani uwakkasuwiyangeng lao ri Allataala,’ namupaleppe'i iyaro tauwé polé ri kawajibanna tulungngi ambo' indo'na. Jaji pappagguruwammu muto muwabbéréyang lao risining tauwé, mupaddéi ada-adanna Allataala. Maéga mupa gau' pada-padaéwé mupogau'.” Nainappa Yésus mobbii tau maégaéro siseppa sibawa makkeda lao ri mennang, “Engkalingai kuwammengngi mupahangngi! Dé'gaga iya polé saliwengngé iya muttama'é ri laleng tauwé mulléi panajisi'i tauwé. Sibalé'na, iya massué polé riséddié tau, iyanaritu panajisi'i. [ Jaji, rékko mappunnaiko daucculing, éngkalingai.]” Wettunna Yésus nasalai tau maégaéro sibawa muttama' ri bolaé, makkutanani ana'-ana' gurun-Na ri Aléna passalenna akkattana pakkalarapangngéro. Nakkeda Yésus lao ri mennang, “Dé'paga mupahangngi? Dé'ga mulléi pahangngi makkedaé iya muttama'é riséddié tau dé' naulléi panajisi'i tauwé? Saba' iya muttama'éro dé' nalalo ri atié, iyakiya laloi ri babuwaé, nainappasi massu.” Nasibawang iyaro ada-adaé napannessai Yésus makkedaé sininna nanré hallala'i. Nainappasi makkeda Yésus, “Iya massué polé ri tauwé, iyanaritu carépaiwi. Saba' polé ri lalengngi, iyanaritu polé ri laleng ati, mompoi sining akkaleng majaé iya nassabariyé tauwé pogau' mappangaddié, ménnau, mabbuno, malaweng, mabbellé, mappétenna, sibawa pogau'i sininna majaé, mancaji mangowa, maja ampéna, pangémpurung, matempo, sibawa mawatang ripagguru. Sininna majaéro mompoi polé ri laleng, na iyanaro pancajiwi tauwé najisi.” Nainappa nasalai Yésus iyaro onrongngé, nalao ri daéra seddéna kota Tirus. Muttama'ni ri laleng séddié bola nadé' namaélo riisseng ri tauwé makkedaé engkai ri bolaéro. Iyakiya dé' naulléi subbui aléna. Engka séddi makkunrai, iya nauttamakiyé sétang ana' makkunrainna, naéngkalingani passalenna Yésus. Laoni ri Yésus nasuju' ri yolo-Na, nanaéllau towi kuwammengngi napaddésu'i Yésus sétangngé polé ri ana'naro. Iyaro makkunraié tenniya tau Yahudi, jajiwi ri daéra Fénésia ri Siria. Jaji makkedai Yésus lao ri makkunraiéro, “Harusu'i lebbi riyolo riwéréng nanré anana'é. Dé' namakessing riyala nanréna anana'é untu' riyappéyangengngi asué.” Nappébali iyaro makkunraié, “Puwang, sining asué iya engkaé ri yawana méjangngé nanréi sésa-sésana iya napasempé'é anana'é!” Nainappa makkeda Yésus lao ri makkunraiéro, “Nasaba pappébalimmuro, lisuno, massuni sétangngé polé ri ana'mu!” Lisuni iyaro makkunraié. Ri bolaé, napoléini ana'na léwu ri onrong atinrongngé, sibawa massu tongenni sétangngé polé ri ana'éro. Nainappa nasalai Yésus daéra Tirus, nanapatterui joppa-Na lalo ri Sidon lao ri Tappareng Galiléa. Laleng laloé ri daéra Seppuloé Kota naola. Kuwaniro engka natiwi tauwé lao ri Yésus séddi tau mataru-taru sibawa pépé. Naéllauni mennang ri Yésus palénne'i liman-Na ri yasé'na tauwéro. Natiwini Yésus iyaro tauwé massala polé ri tau maégaé nainappa napalénne jarin-Na ri laleng iya duwa daucculinna tauwéro. Nainappa Yésus mamméccu, nanagéssai lilana iyaro tauwé. Purairo congani Yésus ri langié, nainappa mannyawa loppo sibawa makkeda lao ri tauwéro, “Efata,” bettuwanna, “Tabbukkano!” Tabbukani daucculinna iyaro tauwé sibawa masomé'ni lilana paimeng, sibawa mappammulani mabbicara sibawa magampang. Nariyattéyanna mennang ri Yésus untu' curitai gau'éro lao ri niga-niga. Iyakiya pédé' nattéyang Yésus, pédé' nappallebangeng towi mennang. Nasininna tau iya méngkalingaéngngiro, hérang senna'ni. Makkedani mennang, “Napogau' manengngi sibawa makessing! Mala naébbui tau mataru-tarué maréngkalinga sibawa tau pépé mabbicara!” Dé' namaitta ri munrinna, engkasi sikalompo' tau maéga polé maddeppungeng. Nasaba dé' nappunnai mennang nanré, naobbini Yésus ana'-ana' gurun-Na nanakkeda, “Messéka lao ri tau maégaéwé. Tellungngessoni ittana mennang silaongek-Ka, namakkekkuwangngé dé' nappunnaina mennang inanré. Rékko Usuroi mennang lisu sibawa lobbang babuwana, marenne'i matu mennang ri tengnga laleng. Apalagi engka ri yelle'na mennang polé mabéla.” Nappébali ana'-ana' gurunna Yésus, “Ri onrong tassubbuéwé, kégani wedding lolongeng inanré iya genne'é untu' iya maneng tauwéwé?” Nakkutana Yésus, “Engka siyaga égana roti ri alému?” Nappébali mennang, “Pitu.” Nasuroni Yésus tau maégaéro tudang ri tompo'na tanaé, nainappa nala pitu iyaro rotié, nappa sukkuru' ri Allataala. Purairo napuwé'-puwé'ni iyaro rotié sibawa liman-Na nanawéréngngi ana'-ana' gurun-Na untu' nabagé-bagé lao risining tauwé. Nanapogau'ni ana'-ana' gurun-Na. Mappunnai towi mennang siyagangngaré kajunna balé baiccu. Nasukkurukenni Yésus ri Allataala iyaro sining balé, nainappa nasuro ana'-ana' gurun-Na bagé-bagéi iyaro sining balé. na Yésus enrengngé ana'-ana' gurun-Na matteruni ménré ri lopié nalao ri daérana Dalmanuta. Engka siyagangngaré tau Farisi lao ri Yésus, sibawa mammulani siddebba' untu' palaiwi jebba. Naéllauwi mennang ri Yésus pogau' anu makalallaingngé selaku tanrang makkedaé Aléna poléi ri Allataala. Naddarékéna Yésus nainappa mappébali, “Aga saba'na sininna tauwé ri wettuéwé naéllau-Ka pogau' anu makalallaingngé? Dé' Umaélo mabbéréyangngi tanrang makkuwaéro lao ri mennang!” Nainappa Yésus salaiwi mennang, nanauttama ri laleng lopié; nainappa mallétto ri liwenna tapparengngéro. Nallupaiwi ana'-ana' gurunna Yésus tiwi roti iya sitinaja genne'é. Sibatu bawang roti nappunnai mennang ri lopié. Nakkeda Yésus lao ri mennang, “Atike'ko lao ri raginna sining tau Farisié sibawa raginna Hérodés.” Nappammulana ana'-ana' gurunna Yésus bicarai gau'éro. Makkedai mennang, “Makkeda makkuwairo nasaba dé' tappunnai roti.” Naissengngi Yésus aga napersoalkang mennang. Rimakkuwannanaro makkedai lao ri mennang, “Magi mupersoalkangngi dé' muwappunnai roti? Dé'ga muwissengngi sibawa dé'paga mupahangngi? Magi namakunru makkuwaro pikkirammu? Mappunnaiko mata – magi nadé' muwakkita? Mappunnaiko daucculing – magi nadé' namuwaréngkalinga? Dé'ga muwéngngerangngi iyaro limaé roti iya Upuwé-puwé'é untu' limassebbu tau? Siyaga baku penno lebbinna iya mupaddeppungengngé?” Nappébali mennang, “Seppulo duwa.” Nakkutana Yésus, “Na wettunna Upuwé'-puwé' pitué roti untu' patassebbu tau, siyaga baku lebbinna iya mupaddeppungengngé?” Nappébali mennang, “Pitu.” Nakkedasi Yésus, “Dé'paga mupahangngi?” Lettu'ni mennang ri Bétsaida. Engka kuwaro natiwi tauwé séddi tau buta lao ri Yésus, sibawa naéllauwi kuwammengngi nakarawai iyaro tau butaé untu' pajjappai. Nanakkatenninni Yésus limanna iyaro tau butaé nainappa narénréng massu ri saliweng kota. Nainappa namméccui Yésus matanna iyaro tauwé. Napalénne'i liman-Na ri matanna tauwéro, nainappa makkutana ri tau butaéro, “Engka mullé mita makkekkuwangngé?” Makkitani iyaro tauwé liyolo, nainappa makkeda, “Iyyé, engka uwita joppa-joppa iyakiya pada-padai pong aju-kajungngé.” Napalénne'si paimeng limanna Yésus ri tauwéro. Iyaé sisengngé makkuragani iyaro tauwé makkita gangka ulléna. Majjappani matanna, naita manenni sibawa manessa. Nainappa Yésus makkeda, “Lisuno. Aja'na mulisu ri kotaéro!” Laoni Yésus sibawa ana'-ana' gurun-Na ri désa-désaé ri seddéna Kaisaréa Filipi. Na ri tengnga laleng, makkutanani Yésus lao ri mennang, “Manuru' adanna tauwé, niga Iyya?” Nappébali mennang, “Engka makkeda: Yohanés Paccemmé; engkato makkeda Elia, na laingngé makkeda: sala séddinna nabié.” Nakkutana Yésus, “Iyakiya manuru' iko, niga Iyya'é?” Nappébali Pétrus, “Bapa' iyanaritu Arung Pappassalama'é!” Nainappa napparéngngerangenni Yésus lao ri mennang, kuwammengngi aja' nappaddissengengngi lao ri nigi-nigi passalenna Aléna. Purairo mappammulani Yésus paggurui ana'-ana' gurun-Na makkedaé Ana'na Tolinoé pasti napéneddingi maéga anrasa-rasang, sibawa riyéwai risining pamimpingngé, kapala-kapala imangngé, sibawa guru-guru agamaé. Riyunoi matu, iyakiya ri esso matellué, ripaoto'i paimeng. Manessa senna'i nabbirittang Yésus gau'éro lao ri ana'-ana' gurun-Na. Nanagettenni Pétrus Yésus libenréng, nanamparengngi. Iyakiya gilingngi Yésus nanaitai ana'-ana' gurun-Na, nainappa nampareng Pétrus, “Addésu'ko polé kuwaé, Paggoda! Iyaro pikkirammu, pikkirang tolino; tenniya pikkiranna Allataala!” Nainappa naobbi Yésus tau maégaé iya engkaé kuwaro silaong ana'-ana' gurun-Na. Nanakkeda lao ri mennang, “Tau iya maéloé maccowéri-Ka, harusu'i nallupai apentingeng aléna, nainappa naéssang sallina, natteru maccoweri-Ka. Saba' tau iya maéloé méwaiwi atuwonna, ateddéngengngi matu atuwong. Iyakiya tau iya makkarobangengngéngngi atuwonna untu' Iyya sibawa untu' Karéba Madécéng polé ri Allataala, napassalama'i matu. Aga sarona lao riséddié tau, rékko sininna linoéwé mancajiwi appunnangenna, iyakiya ateddéngengngi atuwonna? Weddigga atuwongngé risélé sibawa anu laingngé? Rékko séddié tau masiri mangakui-Ka sibawa pappagguruwak-Ku ri wettu madorakaé sibawa majaéwé, Ana'na Tolinoé masiri towi mangakuiwi iyaro tauwé, ri wettu poléna matu sibawa akuwasanna Ambo'-Na, nasibawang malaéka'-malaéka' mapaccingngé.” Nakkeda Yésus, “Issenni! Polé ri yelle'mu kuwaé engka matu dé' namaté, ri wettu dé'napa naitai Allataala mapparénta sibawa makuwasa!” Enneng esso ri munrinna, natiwini Yésus Pétrus sibawa Yakobus enrengngé Yohanés, silessurenna, massala riséddié bulu matanré. Ri yolona matanna mennang tappinrai rupanna Yésus. Pakéyan-Na maputé millakkillang. Dé' séddi tukang ménatu ri linoéwé mullé sessa'i pada-padaéro puténa. Nainappa iya telluro ana' gurunna Yésus naitai Yésus sipabbicara sibawa Elia enrengngé Musa. Nakkeda Pétrus lao ri Yésus, “Pa' Guru, manyameng senna'ki kuwaé. Makessikki patettong tellu kéma: Séddi untu' Bapa', séddi untu' Musa, sibawa séddito untu' Elia.” Sitongenna dé' naissengngi aga harusu' napowada Pétrus, saba' métau senna'i Pétrus sibawa iya duwa sellaona. Nainappa nasalipurini ellung mennang, napolé ri ellungngéro engka sadda riyéngkalinga makkeda, “Iyanaé Ana'-Ku Uwamaséiyé. Engkalingai Aléna!” Masitta'ni mennang makkita mattulili, nadé'na gaga naita muwi niga kuwaro silaong mennang, sangadinna Yésus bawang. Wettunna mennang nonno polé ri buluéro, riparéngngerangini mennang ri Yésus, “Aja' mupowadai lao ri niga-niga aga muwita onna', riwettu dé'napa Ana'na Tolinoé ripaoto' polé ri amatén-Na.” Naturusini iyaro pasengngé, iyakiya ri yelle'na mennang mammulani nacurita aga akkattana Yésus sibawa “tuwo paimeng polé ri amaténgngé”. Nanakkuta-Na mennang lao ri Yésus, “Magi nakkeda guru-guru agamaé makkedaé harusu'i Elia polé lebbi riyolo?” Nappébali Yésus, “Mémeng poléi Elia lebbi riyolo untu' passaniyasai sini-sininnaé. Iyakiya pékkugiwi Ana'na Tolinoé? Aga saba'na ri laleng Kitta'é tarokii makkedaé péneddingiwi matu maéga anrasa-rasang sibawa ricella-cellai ri tauwé? Iyakiya makkeda-Ka lao ri iko: Engkani Elia, sibawa sining tauwé gaukengngi siélo-élona mennang. Coco' iyaro sibawa tarokié ri laleng Kitta'é passalenna aléna.” Wettunna Yésus sibawa iya tellu ana'-ana' gurun-Na engka paimeng silaong ana'-ana' gurun-Na laingngé, naitani maéga tau kuwaro. Engka siyagangngaré guru agama mattengngang siddebba' sibawa ana'-ana' gurunna Yésus. Naitana Yésus sining tauwéro, bengngani mennang, nainappa lari-lari duppaiwi. Nakkutana Yésus ri ana'-ana' gurun-Na, “Agasi muwassipangéwangi sibawa guru-guru agamaéro?” Naengkana séddi polé ri yelle'na tau maégaéro mappébali, “Bapa' Guru, engka ana'ku utiwi lao ri Bapa'. Pépéi nasaba nauttamakiwi roh maja. Rékko iyaro roh-é naluruiwi, naggeppu-geppuwang aléna ri tanaé, mabbusa témunna, kéku' isinna sibawa matojo maneng aléna. Uwéllauwi ana'-ana' gurunna Bapa' paddésu'i iyaro roh majaé, iyakiya dé' naulléi pogau'i.” Nakkeda Yésus lao ri mennang, “Tenniya culé-culé ikoé! Tonget-tongekko iko tau dé' mumateppe. Gangka kégi-Ka harusu' monro sibawakko sibawa sabbara' lao ri iko? Tiwii iyaro ana'é lao kumaiyé!” Natiwini mennang iyaro ana'é lao ri Yésus. Naitana iyaro roh majaé Yésus, napatojoini watakkaléna iyaro ana'é angkanna iyaro ana'é maggalétté ri tanaé. Mabbusa témunna. Nainappa makkutana Yésus ri ambo'na, “Siyagani ittana makkuwaé?” Nappébali ambo'na, “Baiccu mupi! Biyasai iyaro roh majaé makkuraga mpunoi sibawa buwangngi ri apié iyaré'ga ri laleng uwai. Iyakiya narékko naulléi Bapa' tulungngi, tamaséiki sibawa tatulukki!” Nappébali Yésus, “Aga muwaseng? Rékko naulléi Bapa'? Wedding maneng, assaleng mateppe'i tauwé!” Matteruni gora iyaro ambo'na anana'é, “Puwang, mateppe'ka, iyakiya makurang atepperekku. Tulukka kuwammengngi napédé' mateppe'ka!” Wettunna naita Yésus makkedaé mammulani polé tau maégaé makkatulung, nasuroni iyaro roh majaé meddé. Makkedani, “Eh roh mataru-tarué sibawa pépé, Uparéntakko massu polé ri ana'éwé sibawa aja' sises-sisenna mumattama ri lalenna!” Gorani iyaro roh majaé, nainappa napatojoi watakkaléna iyaro anana'é, nappa massu polé ri anana'éro. Iyaro anana'é pada-padani ujué riita, angkanna makkeda sininna tauwé, “Maténi!” Iyakiya nakkatenningngi Yésus limanna sibawa natulungngi moto'. Naoto'na iyaro anana'é. Engkanana Yésus ri bolaé, poléni ana'-ana' gurun-Na secara peribadi ri Yésus nanakkutana, “Aga saba'na idi dé' nariyullé paddésu'i iyaro roh majaé?” Nappébali Yésus, “Iyaro roh maja bangsana dé' nawedding ripaddésu' sibawa muwi cara aga, sangadinna sempajang.” Nanasalaini Yésus sibawa ana'-ana' gurun-Na iyaro onrongngé, napatterui joppana lalo Galiléa. Dé' namaélo Yésus riisseng kégai engka, saba' Napaggurui ana'-ana' gurun-Na. Nakkeda Yésus, “Riyabbéréyangngi matu Ana'na Tolinoé lao ri akuwasanna tolinoé; riyunoi matu, iyakiya ri esso matellué moto'i matu!” Dé' napahangngi ana'-ana' gurunna Yésus iya nappagguruwangngé Yésus, iyakiya métaui makkutana ri Aléna. Lettu'ni mennang ri Kapernaum. Lettu'nana ri bolaé, makkutanani Yésus ri ana'-ana' gurun-Na, “Aga mupersoalkan onna' ri tengnga laleng?” Dé'pa nappébali mennang. Saba' mappangéwangngi mennang ri tengnga laleng passalenna niga kaminang battowa. Tudanni Yésus nainappa naobbi iya seppulo duwa ana'-ana' gurun-Na. Makkedani lao ri mennang, “Tau iya maéloé mancaji nomoro' séddi, harusu'i mancaji paccappureng sibawa harusu' towi mancaji pattumaninna sininna tauwé.” Nainappa Yésus mala anana' nanasuroi iyaro anana'é tettong ri yolona maneng mennang. Nakaddaoni Yésus iyaro anana'é, nanakkeda lao ri ana'-ana' gurun-Na, “Tau iya tarimaéngngi séddié anana' pada-padaéwé nasaba Iyya, bettuwanna natarima tok-Ka. Na tau iya tarimaék-Ka, tenniya Iyya bawang natarima, iyakiya natarima towi iya suroék-Ka.” Nakkeda Yohanés lao ri Yésus, “Pa' Guru, mitaki séddi tau iya paddésu'éngngi sétangngé ri laleng asenna Bapa'. Nariyattéyangngi nasaba dé' napolé ri idi.” Iyakiya makkedai Yésus, “Aja' muwattéyangngi, saba' dé' séddi tau iya pogau'éngngi anu makalallaingngé ri laleng asek-Ku, mulléi cella-cella-Ka. Saba' tau iya dé'é naéwaki, bettuwanna naccowériki. Engngerangngi! Tau iya painungngékko nasaba ana' gurunnako Arung Pappassalama'é, pasti natarimai sarona.” “Nigi-nigi nassabariwi sala séddinna polé risining tau iya baiccu'éwé dé'na namateppe' ri Iyya, lebbi kessing muwi narékko batu allélurengngé riyassiyorengngi ri ellonna, naribuwang ri lalenna tasi'é. Rékko limammu nallalengiko madosa, rette'i iyaro limaé! Lebbi kessing muwi tuwoko sibawa Allataala dé' limammu siwali naiya muttama'é ri ranakaé sibawa iya duwa limammu, iyanaritu api mannennungengngé! [ Kuwaro dé' nawedding peddé apié, sibawa dé' nawedding maté ule'é.] Sibawa narékko ajému nallalengiko madosa, rette'i iyaro ajé. Lebbi kessing muwi tuwoko sibawa Allataala dé' ajému siwali, naiya riyabbéréyangngékko ri laleng ranakaé sibawa iya duwa ajému. [ Kuwaro dé' nawedding peddé apié, sibawa dé' nawedding maté ule'é.] Rékko matammu nallalengiko madosa, cukkéi iyaro mataé! Lebbi kessing muwi muttama'ko ri Lino Barunna Allataala sibawa dé' matammu séddi, naiya riyabbéyakko ri laleng ranakaé sibawa iya duwa matammu. Kuwaro apié dé' nawedding peddé sibawa ule'é dé' nawedding maté. Tungke' tau ripatuléngngi matu sibawa api, pada-pada akkarobangengngé ripaccingiwi sibawa pejjé. Iyaro pejjé makessingngi, iyakiya rékko makawai, weddigga ripejjéi paimeng? Jaji sitinajako mancaji pada-pada pejjé – tuwono massibawa sipammasé-masé.” Nasalaini Yésus iyaro onrongngé, nalao ri daéra Yudéa sibawa ri daéra ri liwenna Salo Yordan. Polési tau maégaé makkatulung ri Yésus. Napada biyasaé, Yésus paggurui mennang. Engka siyagangngaré tau Farisi poléto untu' palaiwi jebba Yésus. Makkutanani mennang, “Manuru' hukkunna agamata, weddigga tauwé massarang bainéna?” Nappébali Yésus, “Parénta aga nabbéréyang Musa lao ri iko?” Nappébali mennang, “Napalaloi tauwé Musa massarang bainéna, assaleng mokii sure' telle riyolo'.” Nakkeda Yésus lao ri mennang, “Naokii Musa iyaro paréntaé nasaba mawatang senna'ko ripagguru. Iyakiya bunge'na, wettunna Allataala pancajiwi rupa tauwé, napowadai makkedaé, ‘Allataala pancajiwi mennang worowané sibawa makkunrai. Iyanaro saba'na worowané nasalaiwi matu ambo' indo'na nanasséddi sibawa bainéna, namancaji seddina matu iya duwa.’ Jaji, dé'na mennang naduwa tau, sangadinna séddimi. Iyanaro saba'na, aga pura napasséddi Allataala, dé' nawedding napassarang tolinoé!” Muttama'nana mennang ri lalempola, makkutanani ana'-ana' gurun-Na lao ri Yésus passalenna gau'éro. Nakkeda Yésus lao ri mennang, “Nigi-nigi massarang bainéna nainappa kawing sibawa makkunrai laingngé, iyaro tauwé malawengngi lao ri bainéna pammulangngé. Makkuwatoro makkunrai iya massarangngé lakkainna nainappa kawing sibawa worowané laingngé, malaweng towi.” Engka sining tau tiwi ana'-ana'na lao ri Yésus kuwammengngi narikarawa sibawa ribarakkakiwi mennang. Iyakiya ana'-ana' gurunna Yésus macairiwi iyaro sining tauwé. Naitana gau'éro, macaini Yésus nakkeda lao ri ana'-ana' gurun-Na, “Leppessangngi siya iyaro ana'-ana'é lao ri Iyya! Aja' muwattéyangngi mennang, saba' sining tau pada-padaénnaé mancaji anggotana umma'na Allataala. Engngerangngi iyaé! Nigi-nigi dé' namangolo ri Allataala pada-pada séddié ana'-ana', dé' namancaji matu anggotana umma'na Allataala.” Puranana makkeda makkuwaro, nakaddaoni Yésus iyaro ana'-ana'é, nainappa Napalénne liman-Na ri yasé'na tungke'-tungke' sibawa nabarakkakiwi mennang. Wettunna Yésus napatterusi joppa-Na, engka séddi tau polé lari-lari lao ri Aléna. Iyaro tauwé suju'i ri yolona Yésus sibawa makkutana, “Guru iya makessingngé, aga harusu' upogau' kuwammengngi weddikka tarima atuwong tongengngé sibawa mannennungengngé?” Nakkutana Yésus, “Magi muwasek-Ka makessing? Dé'gaga makessing sangadinna Allataala bawang. Muwissenniga parénta-paréntana Allataala, ‘Aja' muwabbuno; aja' mumalaweng; aja' muwénnau; aja' musabbi bellé-bellé, aja' muwabbellé, pakalebbii ambo' sibawa indo'mu.’ ” Nakkeda iyaro tauwé, “Pa' Guru, iya manenna paréntaéro purani uturusi sipongekku kallolo.” Messéni Yésus mitai iyaro tauwé nappa makkeda, “Séddi mani passaleng muwapparelluwang. Laono mubalu'i sininna appunnangemmu; namuwéréngngi ellinna tau kasiyasié, namulolongengngi matu waramparang ri surugaé. Purairo laono mai muwaccowéri-Ka.” Naéngkalingana Yésus makkeda makkuwaro, kacéléni iyaro tauwé, nappa nasalai iyaro onrongngé sibawa masussa atinna nasaba sugi senna'i. Naitani Yésus ana'-ana' gurun-Na nainappa makkeda lao ri mennang, “Mawatang senna' tau sugié mancaji anggota-Na umma'na Allataala!” Héranni ana'-ana' gurun-Na méngkalingai adanna Yésus. Iyakiya makkedai Yésus, “Ana'-ana'-Ku, mémeng mawatang untu' mancaji anggotana umma'na Allataala! Lebbi gampang muwi séddié unta muttama' ri sebbo jarungngé naiya séddié tau sugi muttama' ri Lino Barunna Allataala.” Iyaro ada-adanna Yésus nassabariwi ana'-ana' gurun-Na hérang, angkanna makkutana séddié lao ri laingngé, “Rékko makkuwaitu, nigana wedding salama'?” Naitani Yésus mennang nappa mappébali, “Lao ri tolinoé mustahélé' iyaro; iyakiya lao ri Allataala dé' namustahélé'; iya manenna wedding ri Allataala.” Nanakkeda Pétrus, “Itai, idi'é pura risalaini sini-sininnaé nataccowériwi Bapa'.” Nakkeda Yésus, “Ateppe'no: tau iya salaiyéngngi ruma tanggana; iyaré'ga padaorowanéna iyaré'ga ana'daranna, iyaré'ga indo'na, iyaré'ga ambo'na, iyaré'ga ana'-ana'na, iyaré'ga dare'na sibawa galunna nasaba Iyya sibawa nasaba Karéba Madécéng polé ri Allataala, iyaro tauwé tarimai lebbi maéga ri wettuéwé. Lolongengngi matu wékkasératu lebbi maéga bola, padaorowané, ana'dara, indo', ana'-ana', dare sibawa galung, – sibawa paccallatto. Na ri wettu mangoloé matti, iyaro tauwé tarimai atuwong mannennungeng. Iyakiya maéga tau iya makkekkuwangngéwé pammulang, mancajiwi matu poddimonri sibawa maéga iya makkekkuwangngéwé poddimonri mancajiwi matu pammulang.” Yésus sibawa ana'-ana' gurun-Na mattengngang ri laleng allalengengngé lao ri Yérusalém. Yésus monriyolo, nabata-bata maneng ana'-ana' gurun-Na. Nasining tau iya maccowériyéngngi mennang polé monri, métauto pappéneddinna. Nainappa naobbisi Yésus ana'-ana' gurunna mallaing nanapaissengiwi mennang aga kajajiyang matu lao ri Aléna. Adan-Na, “Engkalingai makkekkuwangngé mattengngakki mattuju lao ri Yérusalém. Kuwaro matu riyabbéréyang Ana'na Tolinoé lao ri kapala-kapala imangngé sibawa guru-guru agamaé. Rihukkung matéi matu, nainappa riyabbéréyang lao risining tau tenniyaé Yahudi. Naéllekéllé'i matu, namméccuiwi, nacallai, sibawa nasallii. Iyakiya ri esso matellué, moto'i matu.” Nainappa Yakobus sibawa Yohanés, iyanaritu ana'-ana'na Pa' Zébédéus, laowi ri Yésus. Adanna mennang, “Pa' Guru, engka séddi passaleng riyacinnai ri Bapa' untu' ripogaukengngi.” Nakkutana Yésus, “Aga muwacinnai untu' ripogaukekko?” Nappébali mennang, “Macinnaki tudang ri seddé ataunna sibawa abéyona Bapa', rékko tudanni Bapa' ri kadéra arajanna sibawa malebbi.” Nakkeda Yésus lao ri mennang, “Dé' muwissengngi muwéllauwé. Mulléga ménung polé ri énungeng anrasa-rasangngé iya maéloé Uwénung sibawa muttama' ri laleng onrong anrasa-rasangngé iya maéloé Uwattamaki?” Nappébali mennang, “Wullé.” Nakkeda paimeng Yésus lao ri mennang, “Mémeng ménung tokko matu polé ri énungeng anrasa-rasang iya Uwénungngé matu, sibawa muttama' ri onrong anrasa-rasangngé iya maéloé Uwattamaki. Iyakiya passalenna niga tudang matu ri atauk-Ku iyaré'ga ri abéyo-Ku, iyaro tenniya ha'-Ku patténtué. Allataala pattentui niga-niga tudang matu risining onrongngéro.” Wettunna naéngkalinga iya seppulo ana' gurunna Yésus laingngé, macaini mennang lao ri Yakobus sibawa Yohanés. Jaji naobbi manenni Yésus mennang, nanakkeda, “Muwisseng makkedaé sining pamimping bangsaé iya dé'é naissengngi Allataala napanrasa-rasai ra'ya'na. Sibawa sining tomarajana mennang natenre'i ra'ya'na. Iyakiya iko dé' naweddikko makkuwaro! Sibalé'na, tau iya maéloé mancaji battowa ri yelle'mu, harusu'i mancaji pattumanimmu. Sibawa tau iya maéloé mancaji pammulang ri yelle'mu, harusu'i mancaji ata lao ri iya maneng. Saba' Ana'na Tolinoé dé' napolé untu' ritumaningi. Poléi untu' mattumani sibawa untu' mabbéréyangngi nyawa-Na untu' paleppe'i tau maégaé.” Lettu'ni mennang ri Yérikho. Na wettunna Yésus sibawa ana'-ana' gurun-Na enrengngé tau maégaé salaiwi kotaéro, engka séddi tau buta tudang ri wiring lalengngé maréllau-éllau. Asenna Bartiméus, ana'na Timéus. Wettunna naéngkalinga makkedaé iya mattengngangngé laloro iyanaritu Yésus, tau Nazarét-éro, gorani, “Yésus Ana' Daud! Amaséika!” Maégani tau macairiwi sibawa suroi mammekko. Iyakiya pédé' malade'i gora, “Ana' Daud! Amaséika!” Naléppanna Yésus nainappa makkeda, “Obbii.” Jaji naobbini mennang iyaro tau butaé. Makkedani mennang ri aléna, “Tennano! Naobbiko Yésus, oto'no!” Nappéyanni jumbana iyaro tau butaé, nainappa mapperi-peri tettong nalao ri Yésus. Nakkutana Yésus ri aléna, “Aga muwacinnai Upogau' lao ri iko?” Nappébali iyaro tau butaé, “Pa' Guru, macinnaka makkita.” Nakkeda Yésus, “Laono, napajjappano teppe'mu.” Iyatoro wettué naulléi makkita iyaro tauwé. Nainappa naccowériwi Yésus ri lalengngé. Wettunna naddeppéri Yérusalém, lettu'ni mennang ri kota Bétfagé sibawa Bétania, ri émpenna Bulu-bulu Zaitun. Kuwaro engka duwa tau ana' gurunna Yésus risuro lebbi riyolo ri Yésus. Nakkeda Yésus lao ri mennang, “Laono ri kampong ri yolomuro. Muttama'mu ri kampongngéro, muwitai matu sikaju ana' kaleddé riyassiyoreng, iya dé'éppa naengka natonangiwi tauwé. Leppessangngi iyaro kaleddé'é namutiwii kumaiyé. Narékko engka tau makkutana ri iko, aga saba'na mupaleppe'i iyaro kaleddé'é, powadangngi, ‘Napparelluwangngi Puwangngé, cinampe'pi napalisui.’ ” Nalaona iya duwaro ana' gurunna Yésus, nanapoléini sikaju ana' kaleddé tassiyo ri sumpanna bolaé ri wiring lalengngé. Naleppessanni iyaro kaleddé'é. Makkutanani sining tau tettongngé kuwaro lao ri mennang, “Eh, aga mupogau? Magi muleppessangngi iyaro ana' kaleddé'é?” Mappébalini mennang pada-pada iya puraé ripowadangngi mennang ri Yésus. Narileppessanna mennang risining tauwéro tiwii iyaro kaleddé'é. Lettu'nana ri Yésus, nalapikini lekke'na iyaro kaleddé'é sibawa jumbana mennang, nainappa natonangi Yésus. Maéga tau pallebba'i jumbana ri lalengngé, engkato tale' ri tengnga lalengngé takké-takké aju iya nalaé polé ri dare'é. Sining tau joppaé ri yolo, sibawa sining tau iya maccowériyéngngi polé monri, gora-gora maneng, “Pojiwi Allataala! Ribarakkakiwi Aléna iya polé ri laleng asenna Puwangngé! Tuwoi apparéntan-Na mangoloé – apparéntanna Daud néné-nénéta! Pojiwi Allataala iya Pommatanré!” Angkanna lettu'ni Yésus ri Yérusalém, nainappa muttama' ri Bolana Puwangngé. Kuwaniro napénessai mattulili. Iyakiya nasaba mawé'ni mapettang, najoppana lao ri Bétania silaong iya seppulo duwa ana' gurun-Na. Pappa bajanana, wettunna mennang joppa massu polé ri Bétania, malupuni Yésus. Naitani polé mabéla engka sipong ara iya maworongngé daunna. Jaji laoni ri pong ajuéro untu' mitai engkaga buwana. Iyakiya wettunna lettu ri pong ajuéro, dé'gaga agaga nalolongeng sangadinna daud-daung bawang, saba' iyaro wettué tenniya wettunna mabbuwa araé. Nanakkeda Yésus lao ri pong araéro, “Mappammulai makkekkuwangngé dé' séddi tau manréi matu buwamu!” Naéngkalingai ana'-ana' gurunna Yésus iyaro adaé. Nainappa lettu'ni mennang ri Yérusalém, nalaosi Yésus ri Bolana Puwangngé. Nappammulana kuwaro rukkai sininna tau iya mabbalu'é sibawa mangelliyé ri onrongngéro. Nabalé'ni sining méjanna passélé-sélé dowié, sibawa bangko-bangkona pabbalu jangang-jangangngé. Nadé' séddi tau napalalo tiwi aga-aga molai seddé Bolana Puwangngéro. Nainappa napagguruni Yésus sining tauwé kuwaro. Makkedani, “Ri laleng Kitta'é tarokii makkedaé: Makkedai Allataala, ‘Riyasengngi matu Bola-Ku onrong massempajang sininna bangsaé.’ Iyakiya iko mupancajiwi saranna paddampo'é!” Naéngkalingani sining kapala imangngé sibawa guru-guru agamaé. Nappammulana sappa laleng untu' mpunoi Yésus. Métauni mennang ri Aléna, nasaba sininna tauwé hérang maneng méngkalingai pappagguruwan-Na. Mawé'nana wenni, nasalaini Yésus sibawa ana'-ana' gurun-Na iyaro kotaé. Pappa bajanana éléé, wettunna mennang nalaloi iyaro pong araé, naitani mennang iyaro pong ajué maté lettu ri ure'-ure'na. Naéngngeranni Pétrus kajajiyangngé ri iwenni'na. Nakkedana Pétrus lao ri Yésus, “Bapa' Guru, coba mitai! Pong ara iya natanroiyé Bapa' maténi!” Nappébali Yésus, “Ateppe'ko ri Allataala. Tongeng, weddikko makkeda lao ri bulué, ‘Tarakkano namusempé ri tasi'é!’ naripogaukekko matu iyaro gau'é; assaleng dé' mubata-bata, sibawa mateppe'ko makkedaé iya mupowadaéro kajajiyang tongengngi matu. Rimakkuwannanaro éngngerangngi iyaé: Rékko massempajakko sibawa engka muwéllau, ateppe'ko makkedaé purano nawéréng Allataala aga muwéllau, namutarimai matu. Narékko massempajakko, iyakiya atimmu dé' namasennang lao riséddié tau, addampengengngi riyolo' iyaro tauwé, kuwammengngi Ambo'mu ri surugaé naddampengeng towi dosa-dosamu. [ Rékko dé' muwaddampengengngi tau laingngé, Ambo'mu ri surugaé dé'to naddampengengngi matu dosa-dosamu.]” Lisuni mennang ri Yérusalém. Na wettunna Yésus joppa mattulili ri laleng Bolana Puwangngé, kapala-kapala imangngé, guru-guru agamaé sibawa sining pamimpinna Yahudié poléni ri Aléna. Makkutanani mennang, “Aga nassabari Mupogau'i iya manennaé? Niga mpérék-Ko iyaro ha'é?” Nappébali Yésus, “Maélo tokka makkutana ri iko. Balini na-Upowadang tokko ha' niga nassabari Upogau'i iyaé gau'-gau'é. Yohanés cemméi tauwé sibawa ha'na niga, Allataala iyaré'ga tolinoé?” Nainappa kapala-kapala imangngé sibawa sining pamimpinna Yahudié mammulani barunding ri yelle'na mennang. Makkedai mennang, “Rékko makkedaki, ‘Sibawa ha'na Allataala’, makkedai matu, ‘Magi palé dé' mumateppe ri Yohanés?’ Iyakiya mawatatto untu' makkeda, ‘Sibawa ha'na tolinoé.’ ” Saba' métaui lao ri tau maégaé, nasaba sininna tau maégaé nangga'i Yohanés séddi nabi. Jaji, mappébaliwi mennang, “Dé' narisseng.” Nanakkeda Yésus lao ri mennang, “Rékko makkuwaitu, Iyya dé'to Umaélo powadakko nasibawang ha' niga Upogau'i iya manennaé.” Nainappa mappammulani Yésus mabbicara sibawa pakkalarapangeng lao ri kapala-kapala imangngé, guru-guru agamaé sibawa sining pamimpinna Yahudié. Nakkeda Yésus, “Engka séddi tau iya tanengiyéngngi séuwaé dare' anggoro, nainappa nasappo mattulili. Purairo kalini kalebbong untu' mappera' anggoro, nainappa naébbureng séuwa langkiyang anganrowangeng. Purairo nappasséwanni iyaro dare' anggoro'na lao ri risiyagangngaré tau paddare' nainappa joppa ri wanuwa laingngé. Narapinana wettunna maccéppu buwa anggoro, iyaro tauwé nasuroni séddi pattumaninna lao risining pajjamana dare'éro untu' tarimai bagiyanna. Iyakiya iyaro sining pajjamaé natikkengngi iyaro pattumanié, nanabarasa'i nappa nasuro lisu kosong limanna. Nanasurosi iyaro punna dare'é séddi pattumanina laingngé. Iyakiya iyaro sining pajjamaé naunrui ulunna iyaro pattumanié, nappa napaddésu' sibawa nakkeda-kedai. Iyaro punna dare'é nasurosi séddié pattumaninna laingngé. Iyakiya naunoi mennang iyaro pattumanié. Namakkuwaniro matteru nagaukengngi mennang maéga pattumani iya laingngé: engka nabarasa' sibawa engkato nauno. Nigasi wedding nasuro makkekkuwangngé iyaro punna dare'é? Séddi mani tau monro, iyanaritu ana'na iya namaséiyé. Jaji angkanna nasuroni iyaro ana'na lao risining pajjamaéro. ‘Pasti napakalebbi ana'ku',’ pikkiri'na. Iyakiya iyaro sining pajjamaé makkedai séddié lao ri laingngé, ‘Iyanaé ahli warisi'na. Laono mai taunoi, kuwammengngi talolongengngi warisi'na!’ Natikkenni iyaro ana'é, nanaunoi. Nainappa nabuwang mennang massu ujuna ri saliweng dare'éro.” Nakkutana Yésus, “Agana napogau' matu iyaro punna dare'é? Pasti poléi matu nanaunoi sining pajjama dare'éro, nainappa nabbéréyang iyaro dare'é lao risining pajjama laingngé. Tentu purani mubaca iyaé aya'éwé ri laleng Kitta'é, ‘Batu iya dé'é napakéi sining tukang bangunangngé mancajiwi matu iya mapongngé. Iyanaé napogau' Puwangngé; temmaka kessinna!’ ” Nasininna tomariyolona bangsa Yahudié iya méngkalingaéngngi pakkalarapangngéro, makkuragani tikkengngi Yésus, saba' naissengngi mennang aléna ripakennai ri Yésus iyaro pakkalarapangngé. Iyakiya métaui mennang ri tau maégaé. Jaji laoni nasalaiwi Yésus. Engka siyagangngaré tau Farisi sibawa siyagangngaré anggotana golonganna Hérodés risuro palaiwi jebba Yésus sibawa pakkutana-pakkutana. Laoni mennang ri Yésus nanakkeda, “Bapa' Guru, irisseng makkedaé malempui Bapa', sibawa dé'na najampangiwi pallolongenna niga-niga. Terus terangngi nappagguruwang Bapa' élona Allataala lao ri tolinoé, saba' Bapa' dé' napasilaingengngi tauwé. Nah, coba Bapa' powadakki, ‘Manuru' pallolongenna agamata, weddikki'ga makkamaja sima lao ri Kaisar iyaré'ga dé'? Harusu'ki'ga wajai iyaro simaé iyaré'ga dé'?’ ” Naissengngi Yésus amunapékenna mennang. Nappébali, “Aga saba'na mumaélo palai-Ka jebba? Coba paitak-Ka séddi dowi péra'.” Nanawérénni mennang séddi dowi péra'. Nakkutana Yésus, “Gambara niga sibawa asenna niga iyaé?” Nappébali mennang, “Kaisar.” Nakkeda Yésus, “Rékko makkuwaitu, wérénni Kaisar, aga iya nappunnangiyé Kaisar, sibawa Allataala aga iya nappunnangiyé Allataala.” Héranni mennang méngkalingai. Siyagangngaré polé ri golongang Sadukié lao ri Yésus. (Mennang iyanaritu golongang iya mappallolongengngé makkedaé dé' naoto paimeng tau maté.) Nakkeda mennang lao ri Yésus, “Bapa' Guru, naokii Musa iyaé hukkungngé untu' idi: ‘Rékko séddié worowané maté sibawa dé' nappunnai ana', padaorowanéna harusu'i kawing sibawa jandana kuwammengngi nawéréngngi wija-wijanna tau iya matéénnaro.’ Engka naengka pitu tau mappadaorowané. Iya macowaé kawingngi, namaté dé' nappunnai ana'. Nainappa iya maduwaé kawingiwi jandana, iyakiya maté towi dé' nappunnai ana'. Gau' pada-padaéro kajajiyang towi lao ri padaorowané matellué, sibawa matteru-teru lettu ri mapitué. Angkanna matéto iyaro makkunraié. Ri esso amotokenna paimeng tau maté, nigana punna bainé iyaro makkunraié? Saba' iya pituro pura manenni kawingiwi?” Nappébali Yésus, “Sala pahang senna'ko. Saba' dé' mupahangngi Kitta'é sibawa akuwasanna Allataala. Saba' rékko moto'i paimeng sining tau maté, dé'na nakawinna matu, sangadinna tuwoi pada-pada malaéka'é ri surugaé. Na passalenna ripaoto'na tau maté paimeng, dé'paga naengka mubacai ri laleng Kitta'na Musa passalenna alekale' iya malluwa'é? Ri lalenna aya'-aya'éro engka taroki makkedaé, makkedai Allataala lao ri Musa, ‘Iyya'naé Allataalana Abraham, Allataalana Ishak sibawa Allataalana Yakub.’ Iyaro Allataala tenniya Allataalana tau maté. Allataalanai tau tuwoé. Sala pahang senna'ko!” Napoléna séddi guru agama méngkalingai assipabbicaranna Yésus sibawa sining tau polé ri golongang Sadukiéro. Naitani guru agamaéro makkedaé purani nabali' Yésus iyaro tauwé sibawa makessing. Nakkutana ri Yésus, “Parénta kégaénna kaminang penting polé ri sininna paréntaé?” Nappébali Yésus, “Parénta mammulangngé iyanaritu, ‘Engkalingai éh bangsa Israélié! Puwang Allataalata, iyaro Puwangngé séuwai. Amaséiwi Puwang Allataalamu sibawa sissukku atimmu, sibawa sissukku nyawamu, sibawa sininna akkalemmu enrengngé sininna awatangemmu.’ Parénta maduwaé iyanaritu: ‘Amaséiwi pada-padammu, pada-pada muwamaséinna alému.’ Dé'na gaga parénta laing iya lebbi pentingngé naiya duwa paréntaéro.” Nainappa makkeda iyaro guru agamaé lao ri Yésus, “Coco' senna' Bapa' Guru! Mémeng tongeng aga napowada Bapa': Puwangngé ritu Allataala séuwaé, nadé'na gaga Allataala laingngé. Sibawa harusu'i tolinoé mamaséiwi Allataala sibawa sukku atinna, sibawa sininna akkalenna enrengngé sininna awatangenna. Sibawa harusu' towi namaséi pada-padanna pada-pada aléna. Lebbi kessingngi iyaro naiya makkasuwiyangengngé akkarobangeng ritunu sibawa sining akkarobangeng laingngé lao ri Allataala.” Naitani Yésus makkedaé iyaro guru agamaé purani nabali' sibawa makessing senna'. Nakkeda Yésus lao ri tauwéro, “Mawé'no mancaji anggotana umma'na Allataala.” Purairo dé'na séddi tau baranina makkutana lao ri Yésus. Mattengngangngi mappagguru ri Bolana Puwangngé, makkutanani Yésus, “Pékkugi guru-guru agamaé naulléi makkeda makkedaé iyaro Arung Pappassalama'é wijannai Daud? Padahal aléna Daud – nasaba ripanurungengngi ri Rohna Allataala – makkeda, ‘Makkedai Puwangngé lao ri Puwakku: Tudanno ri seddé atauk-Ku narapi sining balim-Mu Uwébbu tunru' ri Iko.’ Jaji rékko nateppui Daud iyaro Arung Pappassalama'é ‘Puwang’, pékkugi wedding Aléna wijanna Daud?” Masennanni tau maégaé iya engkaé ri Bolana Puwangngé méngkalingai Yésus mappagguru. Nakkeda lao ri mennang, “Atutuko lao ri guru-guru agamaé. Napoji mennang joppa-joppa sibawa jumba malabbué sibawa napoji ripakalebbi ri pasaé. Napoji mennang sining onrong malebbié ri laleng bola assompangngé sibawa ri pésta-péstaé. Nabelléi mennang sining jandaé sibawa narampasa'i bolana. Sibawa untu' tongkoi jana mennang, nataroi malampé' sempajanna. Matane matu pahukkungenna!” Wettunna tudang siyolong petti pakkasuwiyangngé ri Bolana Puwangngé, napénessaini Yésus sining tau iya puttama'éngngi dowina ri lalenna pettiéro. Maéga tau sugi puttama' maéga dowi; napolétona séddi janda kasiyasi. Puttama'i duwa dowi tembaga, iyanaritu dowi récé-récé iya kaminang baiccu'é angke'na. Naobbini Yésus ana'-ana' gurun-Na nainappa makkeda lao ri mennang, “Pénessaiwi iyaé: Janda iya kasiyasiéro puttama' ri laleng pettiéro lebbi maéga naiya naputtama'é sining tau laingngé. Saba' iya maneng mennang mabbéréi polé ri lebbi waramparanna. Iyakiya iyaro jandaé, namuni kasiyasi senna'i nabbéréyangngi iya manenna iya engkaé ri aléna – mala iya napparelluwangngé untu' atuwo-tuwonna.” Wettunna nasalai Yésus Bolana Puwangngé, engka séddi polé ri ana'-ana' gurun-Na makkeda, “Bapa' Guru, cobasai mitai iyaro bangunangngé. Pénessaiwi batu-batunna. Anengka makkuwa kessinna!” Nappébali Yésus, “Muwitaga iyaro sining bangunang iya battowaé? Muwi séddi dé'to gaga batu bangunangngéro monro tassusung ri onronna. Riruttung manengngi matu.” Nainappa Yésus lao ri Bulu-bulu Zaitun, natudang ri onrong iya siyolongngé Bolana Puwangngé. Nainappa Pétrus, Yakobus, Yohanés, sibawa Andréas poléni ri Yésus untu' mabbicara mammessam-messang. Nakkeda mennang ri Yésus, “Coba Bapa' powadakki uppanna iya manennaro nakajajiyang matu? Sibawa tanra-tanrang aga mappaitangngi makkedaé narapini wettunna?” Nappébali Yésus, “Atutuko, aja' narapiko ribengnguwang. Maéga tau matu polé sibawa pakéi asek-Ku sibawa makkeda, ‘Iyya'naé!’ nanabengnguwangngi maéga tau. Rékko muwéngkalingani oni-oni ammusurengngé sibawa karéba-karéba ammusurengngé, aja' mumétau. Iyaro gau-gau'é harusu'i kajajiyang, iyakiya iyaro tenniya bettuwanna makkedaé narapini wettunna kiyame'. Bangsa séddié mammusui matu méwai bangsa laingngé. Wanuwa séddié namusui matu wanuwa laingngé. Kégi-kégi kajajiyangngi matu mpéwangngi tanaé sibawa poléi akkadérengngé. Iya manennaro nappai pammulanna bawang, pada-pada peddi napéneddingiyé séddié makkunrai maéloé mémmana'. Harusu'ko matutu, saba' ritikkekko matu nariyassarénréngeng lao ri mahkamana agamaé. Ribarasa'ko matu risining bola assompangngé. Ritiwiko matu mangolo risining tomakuwasaé sibawa sining arungngé nasaba ana' guruk-Kuko. Na iyanaro kasempatammu untu' mabbéré asabbiyang passalenna Iyya lao ri mennang. Karéba Madécéng polé ri Allataala harusu'i ripallebbang riyolo' lao ri sininna bangsaé. Narékko ritikkekko sibawa ritiwi ri pengadilangngé, aja' mubata-bata passalenna aga harusu' mupowada. Rékko narapini wettunna untu' mabbicara, powada bawanni aga iya ripowadangngékko ri wettunna. Nasaba ada-ada iya mupowadaéro tenniya ada-adammu muto, sangadinna poléi ri Rohna Allataala. Nabali'bellariwi matu tauwé silessurenna untu' riyuno. Nakajajiyang towi iyaro ri yelle'na ambo'é sibawa ana'na. Ana'-ana'é naéwai matu indo' ambo'na sibawa nabbéréyangngi mennang untu' riyuno. Nabenciko matu sininna tauwé nasaba ana' guruk-Kuko. Iyakiya tau mattahangngé lettu ri paccappurengngé, ripassalama'i matti.” “Muwitai matu, ‘Ja iya Paancuru'é’ tettong ri onrong iya riyattéyangngé untu' aléna. (Catatan untu' pabbacaé: Pénessai aga bettuwanna!) Iyaro wettué, tau iya engkaé ri Yudéa harusu'i lari lao ri bulué. Tau iya engkaé ri pabbingeng bolaé aja' nanonno sibawa muttama' ri lalempola untu' malai agi-agi. Tau iya engkaé ri dare'é aja' nalisu untu' malai jumbana. Temmaka mappakatau-tauna iyaro essoé lao ri makkunrai mattampu'é sibawa indo' iya pasusué mupi ana' lolona! Assempajakko kuwammengngi iyaro gau'é aja' nakajajiyang ri wettu pabosié. Ri esso-esso iya mappakatau-tauéro, engka matu asussang iya dé'éppa naengka nakajajiyang, sipongenna napancaji Allataala linoé lettu makkekkuwangngé, sibawa dé'tona nakajajiyang matti. Ebara'na Allataala dé' naponcokiwi iyaro wettué, dé'gaga séddi tau salama'. Iyakiya nasaba umma'-Na naponcokiwi Allataala iyaro wettué. Rékko iyaro wettué engka tau makkeda ri iko, ‘Itai, iyaro Arung Pappassalama'é engkai kuwaé!’ iyaré'ga ‘Itai, engkai kuwaro!’ – aja' mumateppe lao ri tauwéro. Saba' maéga pappassalama' palsu sibawa nabi-nabi palsu polé matu. Napogau'i matu pangkaukeng-pangkaukeng dé'é padanna sibawa mappahérangngé untu' pabengnguwang rékko naulléi, umma'na Allataala. Jaji, atike'ko! Pura manenno Upowadang iyaro ri wettu dé'napa nakajajiyang gau'éro.” “Puranana wettu asussangngéro, mapettanni matu matanna essoé, sibawa dé'na nattappa kétengngé. Sempé'i matu sining wéttowingngé polé ri langié, sibawa sining makuwasaé ri bétaraé sipalu-paluni matu. Iyaro wettué paitai matu Ana'na Tolinoé polé ri lalenna ellungngé sibawa akuwasanna battowaé nenniya marajaé. Nasuroi matu malaéka'-malaéka'é untu' paddeppungengngi umma'-Na polé ri eppaé sulapa'na linoé, polé ri cappa'-cappa'na langié.” “Alako pappagguruwang polé ri pong araé. Rékko manyilai takké-takkéna sibawa masomé, enrengngé mammulai maccolli, muwissengngi makkedaé macawé'ni wettu tikkaé. Makkuwatoniro rékko muwitai gau'-gau'éro kajajiyang, muwissennitu makkedaé macawé'é senna'ni wettunna. Issenni! Iya manenna gau'éwé kajajiyangngi matu riwettu dé'napa namaté maneng sining tau iya tuwoé makkekkuwangngé. Lennye'i matu langié sibawa linoé, iyakiya ada-adak-Ku tette'i mannennungeng.” “Namuni makkuwaro, dé'to séddi tau missengngi uppanna essona iyaré'ga tetté siyaganna. Malaéka'-malaéka'na ri surugaé dé, sibawa Ana'na dé'to, banna Ambo'é bawang missengngi. Jaji harusu'ko jaga-jaga sibawa matike', saba' dé' muwissengngi uppanna wettunna. Keadaanna sinrupai séddié tau iya salaiyéngngi bolana nalao ri onrong mabélaé. Nasuroi sining pattumaninna murusu'i bolana, sibawa nawérénna tungke'-tungke' jamang. Lao ri panganrowang tange'é, mappasengngi kuwammengngi najaga madécéd-décéng. Rimakkuwannanaro harusu'ko jaga-jaga, saba' dé' muwissengngi uppanna matu lisu punna bolaé – naullé ri arawéngngé, naullé ri tengnga bennié, naullé ri subué, iyaré'ga naullé ri wettu mompona essoé. Rékko poléi tenrisenna-senna, aja' lalo napoléiko matinro. Aga iya Upowadaéwé ri iko, Upowada towi lao ri sininna tauwé: jaga-jagako!” Duwangngessopi na Esso Paskaé sibawa Ramé-ramé Roti Dé'é Raginna. Mammekko-mekkoni sining imangngé sibawa guru-guru agamaé sappa laleng untu' tikkengngi Yésus maélo mpunoi. Nakkeda mennang, “Iyakiya aja' tapogau'i ri wettu ramé-ramé, saba' mompoi matu ronta'é.” Wettunna Yésus engka ri Bétania, ri bolana Simon iya nakennaé riyolo lasa oli iya mabbahayaé, engka séddi makkunrai lao ri Aléna. Tiwii séddi botolo' iya mallise'é minnya' wangi iya masulié, riyébbui polé ri ure' wangié. Wettunna Yésus tudang manré, iyaé makkunraié nareppa'i iyaro botolo'é nanabolorengngi iyaro minnya' wangié ri tompo' ulunna Yésus. Siyagangngaré tau iya engkaé kuwaro macai sibawa makkeda séddié lao ri laingngé, “Aga gunana iyaro minnya' wangié riyallabowang? Iyaro minnya'é wedding ribalu' sibawa lebbi telluratu dowi péra' ellinna; na ellinna riyabbéréyangngi lao ri tau kasiyasié!” Namacaina mennang lao ri makkunraiéro. Iyakiya makkedai Yésus, “Leppessangngi siya! Magi musussaiwi? Napogau'i anu makessingngé sibawa ripojiyé lao ri Iyya. Tau kasiyasié tuli engkai ri yelle'mu. Tungke' wettu rékko maéloko, wedding mutulung mennang. Iyakiya Iyya dé' namatteru-teru-Ka sibawakko. Iyaé makkunraié napogau'i aga iya naullé pogau'. Pura-Ka napassadiya sibawa minnya' wangi untu' attampungek-Ku sangadi dé'napa wettunna. Ateppe'no! Ri sininna linoé, kégi-kégi Karéba Madécéng polé ri Allataala riyabbirittang, pangkaukenna iyaé makkunraié ricurita towi matu selaku passénge' ri aléna.” Nainappa Yudas Iskariot, séddiwi polé riseppuloé duwa ana' gurunna Yésus, laoni ri kapala-kapala imangngé akkattana bali'bellariwi Yésus lao ri mennang. Masennang senna'ni mennang méngkalingai pappéddarangngéro, namajjancina maélo mpéréngngi dowi lao ri Yudas. Nammulana Yudas sappa kasempatang untu' bali'bellariwi Yésus. Ri esso pammulanna ri laleng Ramé-ramé Roti Dé'é Raginna – wettunna tauwé géréi bimbala' Paskaé – makkutanani ana'-ana' gurunna Yésus ri Aléna, “Kégai nacinnai Bapa' passadiyaki nanré Paska untu' Bapa'?” Nasuroni Yésus duwa tau polé ri yelle'na mennang, “Laono ri kotaé, kuwaro engka séddi worowané mattengngang tiwi séuwa kendi mallise' uwai, muwéwa matu siruntu'. Accowériwi lao ri bola iya nauttamakiyé namupowadangngi iyaro punna bolaé, ‘Makkutanai Pa' Guru, kégai onronna Aléna sibawa ana'-ana' gurun-Na maélo manré nanré Paska.’ Iyaro tauwé najellorekko matu séuwa bili' ri loténgngé iya battowaé. Iyaro bili'é taratoro'ni, sakke' sibawa paréwanna. Tassadiya manenni kuwaro untu' idi.” Nalaona iya duwaro ana' gurunna Yésus ri kotaé. Napoléini mennang kuwaro iya manenna pada-pada iya napowadaé Yésus. Nanapassadiyani nanré Paskaé. Wenninnana, poléni Yésus sibawa iya seppulo duwa ana' gurun-Na. Namattengngang mennang tudang manré, makkedani Yésus, “Engkalingai: séddi polé ri yelle'mu, iya makkekkuwangngé méwa-Ka sisama manré bali'bellari-Ka matu.” Naéngkalinganaro, messé senna'ni ana'-ana' gurunna Yésus. Nainappa mammula tasséddi-séddi makkutana ri Yésus, “Tentu tenniya iyya naseng Bapa'?” Nappébali Yésus, “Iyaro sala séddinna polé ri iko seppuloé duwa, iya manré séddi penné Uwadduwai. Mémeng Ana'na Tolinoé matéi matu pada-pada tarokié ri laleng Kitta'é. Iyakiya temmaka cilakana tau iya bali'bellariyéngngi Ana'na Tolinoé! Lebbi kessing muwi rékko iyaro tauwé dé' naengka narijajiyang siseng!” Wettunna mennang manré, nalani Yésus rotié nanassempajang sukkuru' ri Allataala. Nainappa Napuwé'-puwé' iyaro rotié sibawa liman-Na, na-Nawéréngngi ana'-ana' gurun-Na nanakkedato, “Alai namuwanréi, iyanaé tubuk-Ku!” Purairo, malani séuwa énungeng anggoro. Nassempajang sukkuru' ri Allataala, nainappa nabbéréyang iyaro énungengngé lao ri ana'-ana' gurun-Na. Nainappa naénung manenni mennang iyaro anggoro'é. Purairo makkedani Yésus, “Iyanaé dara-Ku iya paessaéngngi assijancingenna Allataala, dara iya ripatabbolloé untu' maéga tau. Ateppe'no: Dé'na Uwénungngi iyaé anggoro'é, narapi wettunna Uwénung anggoro barué sibawa iko ri Lino Barunna Ambo'-Ku.” Nainappa mennang makkélong séuwa pappojiyang. Napurairo laoni mennang ri Bulu-bulu Zaitun. Nainappa makkeda Yésus lao ri mennang, “Lari manekko matu salai-Ka. Saba' tarokii ri laleng Kitta'é, ‘Naunoi matu Allataala pakkampina, natassiya-siyana matu bimbala'na.’ Iyakiya pura-Kuna ripaoto' paimeng, Upoddiyoloiko matu lao ri Galiléa.” Nappébali Pétrus, “Dé', muwi iya manenna mennang salaiwi Bapa', dé' sises-siseng iyya.” Nakkeda Yésus, “Engngerangngi, iyato wennié, riwettu dé'napa naoni manu'é wékkaduwa, wékkatelluni muwassakkarek-Ka.” Namatedde'na pappébalinna Pétrus, “Muwi harusu'ka maté silaong Bapa', dé' sises-siseng uwakkeda matu makkedaé dé' uwissengngi Bapa'!” Namakkeda makkuwatoro ana'-ana' gurun-Na laingngé. Lettu'ni mennang riséuwaé onrong iya riyasengngé Gétsémani, nanakkeda Yésus lao ri ana'-ana' gurun-Na, “Tudanno kuwaé, ri wettu lao-Ku massempajang.” Nanaérani Yésus Pétrus, Yakobus sibawa Yohanés, lao silaong Aléna. Mammulani tassinnau sibawa maséssa. Nakkeda Yésus lao ri mennang, “Tassinnau senna'i atik-Ku, samanna pappéneddikku maélona maté. Onrono kuwaé sibawa jagano!” Laoni Yésus mabéla-béla céddé nakkaluttu ri tanaé massempajang. Ri laleng sempajan-Na Naéllauwi rékko weddingngi aja'na napéneddingiwi anrasa-rasangngéro. Adanna, “Ambo', oh Ambo', dé' gaga mustahélé' ri Ambo'. Akkani anrasa-rasangngéwé polé ri Iyya. Iyakiya aja' taccowériwi élo-Ku, sangadinna élona Ambo.” Purairo lisuni Yésus, nanapoléini ana'-ana' gurun-Na matinro. Makkedani ri Pétrus, “Simon, matinrokoga? Sijang bawang dé' muwulléi jaga?” Nanakkeda Yésus lao ri mennang, “Jaga-jagano, sibawa assempajanno kuwammengngi dé' mupéneddingiwi paccobangngé. Mémeng rohmu maélo pogau'i iya tongengngé, iyakiya dé' mulléi saba' sipa'na tolinoé malemmai.” Siseppi Yésus lao massempajang sibawa powada-adai ada-ada padaé. Purairo lisuni lao ri ana'-ana' gurun-Na, nanapoléisi mennang matinro, nasaba cakkaruddu senna'i. Dé'na naissengngi mennang aga harusu' napowada lao ri Yésus. Wettunna Yésus lisu ri mennang untu' mabbékkatellunna, makkedani, “Matinro mupoga sibawa passauwi tekkomu? Genne'ni! Narapini wettunna Ana'na Tolinoé riyabbéréyang ri limanna sining tau madosaé. Oto'no, talao. Itai! Poléni tau iya bali'bellariyék-Ka!” Ri wettu mabbicarana mupa Yésus, poléni Yudas, séddiwi polé riseppuloé duwa ana' gurun-Naro. Namaéga tau silaongengngi iya tiwié peddang sibawa tarasulu. Risuroi mennang ri kapala-kapala imangngé, guru-guru agamaé sibawa sining pamimpinna Yahudié. Naiyaro Yudas pura napattentuni séddi tanrang lao ri mennang. Adanna lao ri mennang, “Tau iya ubauwé, Aléna ritu taun-Na. Tikkenni Namutiwii sibawa jagaiwi madécéd-décéng.” Wettunna polé Yudas, matteruni lao ri Yésus nakkeda, “Bapa' Guru!” Nainappa nabau Yésus. Nainappa iyaro sining tau polé silaong Yudas natikkenni Yésus nanabalenggui. Iyakiya sala séddinna iya engkaé kuwaro narampui peddanna nanawettai atanna imang lompoé angkanna pettu dauccinna. Nakkeda Yésus lao ri mennang, “Tau maja-Ka'ga, namupolé sibawa peddang nenniya tarasulu untu' tikkek-Ka? Esso-esso-Ka mappagguru ri Bolana Puwangngé ri yolomu, nadé' mutikkek-Ka. Iyakiya mémeng harusu'i makkuwaro, kuwammengngi nakajajiyang aga iya tarokié ri laleng Kitta'é.” Lari manenni ana' gurun-Na salaiwi Yésus. Engka séddi kallolo, iya paké silampa kaing lénang bawang untu' tongkoi watakkaléna, maccowériwi Yésus. Sining tauwé maéloi tikkengngi, iyakiya naleppessangngi iyaro kainna, nainappa lari mallusu-lusu. Ritiwini Yésus ri bolana imang lompoé. Maddeppungengngi kuwaro sininna kapala imangngé, pamimpinna Yahudié sibawa guru agamaé. Maccowérini Pétrus Yésus polé mabéla lettu muttama' ri laleng seddé bolana imang lompoé. Natudanna kuwaro pellaiwi watakkaléna ri seddéna apié silaong pengawal-pengawal-é. Kapala-kapala imangngé sibawa sininna Mahkama Agamaé makkuragani lolongeng butti-butti iya passalaéngngi Yésus kuwammengngi naulléi pakennaiwi pahukkungeng maté ri Aléna. Iyakiya dé'gaga séddi butti nalolongeng mennang. Maéga sabbi riyobbi untu' mabbéré sabbi bellé lao ri Yésus, iyakiya asabbiyanna mennang sisalai séddié lao ri laingngé. Nainappa siyagangngaré sabbi tettong sibawa mabbéré asabbiyang belléwé passalenna Yésus, “Riyéngkalingai iyaé tauwé makkeda, ‘Maélo-Ka ruttungngi iyaé Bolana Allataala iya naébbué tolinoé, na ri esso matellué, maélo-Ka patettong laingngé iya tenniyaé ébbu tolino.’ ” Iyakiya iyaro asabbiyanna tauwé sisala towi séddié sibawa laingngé. Natettonna imang lompoé ri yolona mennang nanakkutana ri Yésus, “Dé'ga Mubaliwi iyaro riteppuwangngék-Ko?” Iyakiya mammekko bawammi Yésus. Dé' sises-siseng nappébali. Nanakkutanapa siseng iyaro imang lompoé ri Yésus, “Ikonaga Arung Pappassalama'é, Ana'na Allataala Pommapaccingngé?” Nappébali Yésus, “Iyya'na, namuwita maneng matu Ana'na Tolinoé tudang ri seddé ataunna Allataala Iya Pommakuwasaé enrengngé polé ri laleng ellungngé ri langié!” Nasapé-sapé'ni pakéyanna imang lompoé sibawa makkeda, “Dé'na naparellu sabbi! Alémuna méngkalingai ada-adan-Na iya cella-cellaéngngi Allataala. Makkekkuwangngé aga apettummu?” Napettui manenni mennang makkedaé pasalai Yésus, sibawa sitinajai rihukkung maté. Nasiyagangngaré tau mammulani mamméccuiwi Yésus, sibawa nasampoi matan-Na enrengngé nabarasa'i nappa makkeda, “Coba teppui niga barasa'-Ko?” Iyaro pengawal-pengawal-é maccowé toni leppa'i Yésus. Wettunna Pétrus engka mupa ri seddé bolaé, sala séddinna pattumani makkunrainna imang lompoé lao kuwaro. Wettunna naita Pétrus maddellang ri seddéna apié, napénessaini madécéd-décéng tappana Pétrus nainappa makkeda, “Dé'ga musibawato Yésus tau Nazarét-éro?” Iyakiya massakkai Pétrus. Nakkeda lao ri pattumaniéro, “Dé' uwissengngi sibawa dé' upahangngi akkattamu.” Nainappa Pétrus lao ri pintu gerbanna bolana imang lompoéro. [Iyaro wettué, monini manu'é.] Iyaro pattumani makkunraié naitasi Pétrus, nanakkedato lao risining tau engkaé kuwaro, “Iyaé mémeng sala séddinna polé ri mennang!” Iyakiya massakkasi Pétrus. Dé' namaitta rimonrinna, sining tauwé kuwaro makkedasi lao ri Pétrus, “Dé'na wedding riyassakkareng, mémeng iko sala séddinnato polé ri mennang, saba' polé tokko ri Galiléa!” Nappammulana Pétrus mattanro-tanro, “Matéka, dé' uwissengngi tau iyaro muwasengngé!” Iyatoro wettué naoni manu'é mabbékkaduwanna. Nanaéngngeranni Pétrus makkedaé purai makkeda Yésus ri aléna, “Ri wettu dé'napa naoni manu'é wekkaduwa, wékkatelluni muwassakkarek-Ka.” Naterina Pétrus tassénge'-sénge'. Maélé senna'ni sininna Mahkama Agamaé muttama'ni kapala-kapala imangngé, sining pamimpinna Yahudié sibawa guru-guru agamaé mapperi-perini barunding. Nabalenggui mennang Yésus, nainappa natiwi Aléna sibawa nabbéréyangngi lao ri Pilatus. Nakkutana Pilatus lao ri Yésus, “Tongek-Koga Arunna tau Yahudié?” Nappébali Yésus, “Makkunitu adatta puwang.” Maéga napowada kapala-kapala imangngé iya nateppuwangngéngngi Yésus. Nanakkutanasi Pilatus lao ri Yésus, “Dé'ga Mumaélo mappébali? Coba mitai siyaga égana nateppuwak-Ko mennang!” Iyakiya dé' sises-siseng nappébali Yésus, angkanna hérang Pilatus. Tungke' Ramé-ramé Paskaé, biyasai Pilatus paleppe' séddi tau tarungku iya napilé tau maégaé. Ri laleng tarungkué, ri yelle'na sining tau maronta'é iya pogau'éngngi abbunowangngé ri wettu akacaungengngé, engka séddi tau riyaseng Barabas. Naddeppungeng tau maégaé sibawa méllauwi ri Pilatus kuwammengngi naleppessangngi séddi tau tarungku pada-pada biyasaé. Nakkutana Pilatus ri mennang, “Muwéloriga upalepperekko iyaro tau Yahudié?” Saba' nasadariwi Pilatus makkedaé kapala-kapala imangngé mabbéréyangngi Yésus lao ri Pilatus nasaba mangémpurui. Iyakiya kapala-kapala imangngé napakiri-kiriwi tau maégaé kuwammengngi naéllauwi ri Pilatus paleppe'i Barabas untu' mennang. Nanakkedasi Pilatus lao ri tau maégaéro, “Rékko makkuwaitu, agana harusu' ugaukengngi tau iya muwasengngé arunna tau Yahudiéro?” Gorani mennang, “Sallii!” Nakkutana Pilatus, “Iyakiya aga asalanna?” Nagorana pédé' maloppopa, “Sallii!” Macinnai Pilatus pésennangiwi tau maégaéro, nanaleppessangngi Barabas untu' mennang. Nainappa nasuroi tauwé barasa'i Yésus, nappa nabbéréyang untu' risalli. Ritiwini Yésus ri prajuri'-prajuri'éro ri onrong pengadilangngé ri saorajana gubernur-é. Nainappa riyobbi maddeppungeng maneng pasukangngé. Nainappa napappakéi mennang Yésus jumba lango-lango sibawa naébburengngi passigera' polé ri takké-takké maddorié, nainappa napasang ri ulunna Yésus. Purairo mabbéré sellenni mennang lao ri Aléna, “Makuwasai Arunna tau Yahudié!” adanna. Naunruni mennang ulunna Yésus sibawa tekkeng, nainappa namméccui sibawa suju' massompa ri yolo-Na. Puranana nacculé-culéi Yésus, naludunni mennang jumba lango-langoéro nainappa napappakéi pakéyan-Na paimeng. Purairo natiwini massu untu' risalli. Ri tengnga laleng engka séddi tau napassa mennang méssangngi sallina Yésus. Nasitujuwangngi iyaro tauwé nappai polé ri desaé maélo muttama' ri kotaé. (Asenna Simon – assalenna poléi ri Kiréné – ambo'na poléi ri Aléksander sibawa Rufus.) Ritiwini Yésus riséuwaé onrong iya riyasengngé Golgota, bettuwanna “Onrong Tengkora”. Kuwaniro mennang maélo mpéréngngi Yésus anggoro iya sicampuru'é mur, iyakiya dé' namaélo Yésus ménungngi iyaro anggoro'é. Nainappa mennang Nasallii, enrengngé bagé-bagéwi pakéyan-Na sibawa naundiwi untu' pattentui bagéyanna tungke'-tungke'. Assalliren-Naro iyanaritu tetté aséra éléé. Ri yasé'na salli-Na tarokii passalenna iya riteppuwangngéngngi, iyanaritu “Arunna Tau Yahudié”. Nasalli towi mennang sibawa Yésus duwa tau parampo'; séddi ri seddé atau, séddi ri seddé abéyo-Na. [ Narimakkuwannanaro kajajiyanni iya tarokié ri laleng Kitta'é; iyanaritu: “Riyangga'i muttama' ri sining tau majaé.”] Sining tau iya laloé kuwaro napaccilic-ciling ulunna sibawa cella-cellai Yésus. Makkedai mennang, “Eh, Iko maéloé ruttungngi Bolana Allataala sibawa patettongngéngngi ri laleng tellungngesso. Cobano nonno polé ri salliéro sibawa passalama'i alé-Mu!” Makkuwatoro kapala-kapala imangngé sibawa guru-guru agamaé naéllé'i Yésus. Makkedani séddié lao ri laingngé, “Napassalama'i tau laingngé, iyakiya Aléna dé' naulléi passalama'i! Rékko Aléna arunnai Israélié, Arung Pappassalama'é, madécéngenni makkekkuwangngé nonno polé ri salliéro, kuwammengngi taitai natamateppe ri Aléna!” Sining tau risallié silaong Yésus nacella-cella toni Yésus. Ri tangassona essoé, tellujjang ittana sininna wanuwaéro mapettang. Na ri tetté tellunna arawéngngé, gorani Yésus sibawa sadda maloppo, “Eloi, Eloi, lama sabakhtani?” bettuwanna, “Oh Allataala-Ku, oh Allataala-Ku, magi Musalai-Ka?” Siyagangngaré tau kuwaro méngkalingai gorana Yésus, nanakkeda, “Engkalingai, Naobbii Elia!” Engka séddi tau polé ri mennang mapperi-perini lao mala bunga karang, nainappa napajajje ri laleng anggoro makeccié. Nainappa iyaro bunga karangngé naddincekeng ri cappa'na séddié aju, nappa nassoppakeng ri témunna Yésus, nanakkedato, “Tajengngi, taitai, polé aré'gi Elia panonnoi Aléna polé ri salliéro.” Nainappa gorani Yésus, namaténa. Kaing paddenring iya taggattungngé ri laleng Bolana Puwangngé sapé'ni mancaji duwa polé ri yasé' lettu ri yawa. Parawira iya tettongngé ri yolona salliéro, naitani pékkugi Yésus maté. Makkedani iyaro parawiraé, “Mémeng tongeng iyaé tauwé Ana'nai Allataala!” Naengkato kuwaro siyagangngaré makkunrai mitai iya manennaro polé mabéla. Ri yelle'na engkai Salomé, Maria Magdaléna, sibawa Maria indo'na Yakobus iya maloloé sibawa Yosés. Mennang ritu sining makkunrai iya maccowériyéngngi sibawa tulungngi Yésus wettunna engka ri Galiléa. Naengka mupa maégapa makkunrai laing kuwaro iya laowé silaong Yésus ri Yérusalém. Héranni Pilatus méngkalingai makkedaé maténi Yésus. Jaji nasuroni tauwé mobbii kapalana pasukangngé sibawa makkutana ri aléna, maittaniga maténa Yésus. Naéngkalingana laporanna iyaro parawiraé, napalaloni Pilatus Yusuf malai ujuna Yésus. Nainappa Yusuf melli kaing walu polé ri lénang alusu'é. Napuranana napanonno ujuna Yésus, nadokoni sibawa kaingngéro. Nainappa napalénne ujuna Yésus ri laleng séuwaé tampung, iya riyébbué ri laleng bulu-bulu batué. Purairo galétténi séuwa batu loppo tongkoi iyaro sumpanna tampungngé. Na Maria Magdaléna sibawa Maria indo'na Yosés, napénessaini kégai Yésus ripalénne. Labe'nana esso Saba'é, Maria Magdaléna, Maria indo'na Yakobus sibawa Salomé laoni melli rampa-rampa untu' minnyakiwi ujuna Yésus. Maélé senna'ni wettunna mompo matanna essoé, ri esso mammulangngé ri mingguéro, laoni mennang ri tampungngé. Nainappa muttama'ni mennang ri lalenna tampungngéro. Ri laleng ri seddé atau, naitani mennang séddi kallolo majjumba puté tudang, natassélenna mennang. Nakkeda iyaro kalloloé, “Aja' mumétau! Uwisseng musappai Yésus, tau Nazarét iya puraé risalli. Dé'ni gaga kuwaé. Tuwoni paimeng! Ita bawanni, iyanaé onronna mennang paléwui. Makkekkuwangngé laono, palettu'i iyaé karébaé lao ri ana'-ana' gurun-Na, muttama' toni Pétrus. Powadai, ‘Laowi poddiyoloiko ri Galiléa. Kuwaro matu muwitai, pada-pada iya puraé Napowadakko.’ ” Nanassuna mennang polé ri tampungngéro nanalari saba' tassélengngi enrengngé métaui. Dé' agaga mennang napowada lao ri nigi-nigi, nasaba métaui. PACCAPPURENNA IYA NAOKIE MARKUS SITURU SURE' RIYOLOE [ Tuwonana Yésus polé ri amaténgngé, maéléni ri esso Aha'é, bunge'-bunge'i nappaitangngi Aléna lao ri Maria Magdaléna. (Polé ri Maria énnaro engka naengka Yésus napassu pitu sétang.) Laoni iyaro sining makkunraié ri Pétrus sibawa sellao-sellaona, nainappa nacurittang sibawa marippe sininna iya puraé ripaissengiwi lao ri mennang ri kalloloéro. Nanalaona Maria Magdaléna paissengiwi kajajiyangngéro ri sellao-sellaona Yésus, iya mattengngangngé mabbarata sibawa teri. Purairo, aléna Yésus, naolai ana'-ana' gurun-Na mappallebbangengngi polé alau liyajang karéba iya mapaccingngé sibawa mannennungeng passalenna asalamakeng iya mannennungengngé.] Iyakiya wettunna mennang naéngkalinga makkedaé tuwoni Yésus, sibawa puranana Maria naita Yésus, dé' namateppe' mennang. Purairo nappaitanni aléna Yésus lao riduwaé tau ana' gurun-Na sibawa cara laingngé. Iyaro kajajiyangngi wettunna iya duwa tauwéro joppa lao ri séddié kampong. Jaji lisuni mennang sibawa nappaissengengngi gau'éro lao ri laing-laingngé. Iyakiya dé' namateppe' mennang. Angkanna Yésus mappaitangngi aléna lao riseppuloé séddi ana' gurun-Na, wettunna mennang mattengngang manré. Namparengngi mennang nasaba makurang teppe'i sibawa matedde ati senna'nana, angkanna dé' namateppe' lao risining tau iya alénaé pura mitai makkedaé tuwoi Yésus. Nakkeda Yésus lao ri mennang, “Laono risininna linoé namuwappallebbangengngi Karéba Madécéng polé ri Allataala lao ri sininna rupatauwé. Tau iya dé'é namateppe' rihukkungngi matu. Iyakiya tau iya mateppe'é sibawa ricemmé salama'i matu. Selaku buttinna makkedaé mateppe'i mennang, sining tauwé napaddésu'i sétangngé ri laleng asek-Ku; mabbicarai matu mennang ri laleng sining basa iya dé'é naissengngi mennang. Rékko makkatenningngi mennang ula iyaré'ga minung racung, dé' nalolongeng mennang abala. Rékko napalénne'i limanna ri yasé'na sining tau iya malasaé, majjappai matu iyaro sining tauwé.” Puranana Puwang Yésus mabbicara sibawa mennang, riyakkani ménré ri surugaé. Napparénta kuwaro sibawa Allataala. Nalaona ana'-ana' gurun-Na mappallebbangengngi kégi-kégi karéba polé ri Allataala. Naturu' tona Puwangngé majjama silaong mennang sibawa napabuttinna naolai sining anu makalallaingngé makkedaé tongengngi pabbirittanna mennang.] [ Téofilus iya makessing atié, Maégani tau makkuraga mokii sibawa taratoro' passalenna kajajiyang-kajajiyang iya puraé kajajiyang ri tengnga-tengngata. Naokii mennang situru iya ricuritaé lao ri idi polé risining tau iya alénaé pura mitai iyaro sining kajajiyangngé mappammulai pammulanna, nainappa nappallebbangeng karébanna. Puranana usalidiki madécéd-décéng iya manennaro polé ri pammulanna, uwasengngi madécéng untu' moki séddi laporang iya taratoro'é untu' Bapa'. Upogau'i iyaro, kuwammengngi naissengngi Bapa' makkedaé aga iya puraé ripagguruwakki Bapa' mémeng tongeng. Wettunna Hérodés mancaji arunna wanuwa Yudéa, engka séddi imang asenna Zakharia. Muttama'i ri laleng golongang imang-ngimang Abia. Bainéna riyasengngi Elisabét, wijanna imang towi. Atuwonna mallaibinéro napésennangiwi atinna Allataala. Iya duwa naturusiwi sininna paréntaé sibawa Hukkunna Puwangngé sibawa tonget-tongeng. Dé' nappunnai mennang ana' saba' manangngi Elisabét na macowani mennang iya duwa. Riséuwaé esso, wettunna golongang Abia nakenna léléng, napajoppani Zakharia jamanna selaku imang ri yolona Allataala. Biyasana riloteréiwi iyaro imang-ngimangngé, na Zakharia rijello untu' muttama' ri lalenna Bolana Puwangngé sibawa mattunu kamennyang. Wettunna napogau' iyaro upacara mattunu kamennyangngé, tau maégaé massempajangngi ri saliweng. Iyaro wettué, nappaitangngi aléna malaéka'na Puwangngé ri Zakharia. Iyaro malaéka'é tettongngi ri seddé ataunna méjang onrong mattunu kamennyangngé. Wettunna naita Zakharia iyaro Malaéka'é, malippuni sibawa métau. Iyakiya makkedai iyaro Malaéka'é, “Aja' mumétau Zakharia! Naéngkalingani Allataala sempajammu. Bainému Elisabét jajiyangngi matu séddi ana' worowané. Harusu'ko mpéréngngi aseng Yohanés. Masennang senna'ko matu sibawa maéga tau mariyo-riyo rékko jajiwi matu iyaro ana'é! Mancajiwi matu tau maraja manuru' pakkitanna Puwangngé, nadé' matu nainung anggoro iyaré'ga énungeng maseri. Mappammulai jajinna rikuwasaiwi matu ri Rohna Allataala. Maéga tau Israél napimping matu lisu ri Allataala, Puwanna mennang. Mancajiwi matu surona Puwangngé iya mawatangngé sibawa makuwasana pada-pada Elia. Napasidaméi matu ambo'é sibawa ana'é, enrengngé tau iya dé'é namatinulu napimpingngi matu lisu ri laleng pikkiranna iya tongengngé. Nanallalengiro napassadiyai matu séuwa umma' iya sadiyaénna untu' Puwangngé.” Nakkutana Zakharia lao ri Malaéka'éro, “Pékkugi uwissengngi makkedaé kajajiyangngi iyaro gau'é? Macowana' na bainéku macowa toni.” Nappébali iyaro Malaéka'é, “Iyya'na Gabriél! Utumaningiwi Allataala sibawa Aléna ritu suroka palettu'i karéba madécéngngé lao ri iko. Aga upowada, kajajiyangngi matu ri wettunna. Iyakiya nasaba dé' mumateppe, dé' matu mulléi mabbicara; pépéko matu narapi kajajiyang aga iya upowadangngékko.” Na iyaro wettué, sining tauwé matterui natajeng Zakharia. Héranni mennang magi namaitta makkuwaro ri laleng Bolana Puwangngé. Na wettunna massu, dé'na naulléi mabbicara lao ri mennang. Matteru-teru bawang mabbéré tanrang sibawa limanna, natette'i pépé. Naissenni sining tauwé makkedaé purani mita séuwa pakkitang ri laleng Bolana Puwangngé. Leppe'nana jamanna ri Bolana Puwangngé, lisuni Zakharia ri bolana. Dé' namaitta ri munrinna, mattampu'ni Elisabét, bainéna, nanaurunni aléna ri bolaé lima uleng ittana. Makkedani, “Angkanna natulukka Puwangngé sibawa naleddai atunangekku.” Wettunna Elisabét mattampu'ni enneng ulenna, nasuroni Allataala malaéka' Gabriél lao ri Nazarét, séuwa kota ri daéra Galiléa. Risuroi Gabriél lao riséddié ana'dara, riyasengngé Maria. Iyaro ana'daraé mattunangangngi sibawa séddié tau riyasengngé Yusuf, wijanna Arung Daud. Iyaro malaéka'é laowi ri Maria sibawa makkeda, “Salama'ko, iko iya nabarakkakiyé Puwangngé iya dé'é padanna! Puwangngé sibawakko!” Naéngkalingana adanna iyaro malaéka'é, tassélenni Maria, angkanna makkutana ri laleng ati, aga akkattana iyaro bérésellengngé. Nanakkeda iyaro Malaéka'é lao ri Maria, “Aja' mumétau Maria, saba' nasitujuiko atinna Allataala. Mattampu'ko matu sibawa jajiyang séddi ana', iya harusu'é muwaseng Yésus. Mancajiwi matu maraja nariyaseng Ana'na Allataala Iya Pommatanré. Napancajiwi matu Puwang Allataala arung pada-pada Arung Daud, néné-nénéna. Nanapparénta matu selaku arung ri wijanna Yakub mannennungeng. Nadé' cappuna matu akkarungenna.” Nakkeda Maria lao ri Malaéka'éro, “Iyakiya parawang mupa', pékkugi iyaro gau'é wedding kajajiyang?” Nappébali iyaro Malaéka'é, “Poléi matu Rohna Allataala ri iko, sibawa akuwasanna matu Allataala salipuriko. Iyanaro saba'na ana' iya mujajiyangngé matu riyasengngi matu Mapaccing, Ana'na Allataala. Engngerangngi: Elisabét, sumpulolomuro, ennenni uleng mattampu'na, namuni macowani sibawa makkedanna tauwé makkedaé manangngi. Saba' ri Allataala dé'gaga mustahélé'.” Nanakkeda Maria, “Iyya'é atannaka Allataala, leppessanni kajajiyang pada-pada mupowadaé.” Nalaona iyaro malaéka'é salaiwi Maria. Dé' namaitta puranaro, laoni Maria riséuwaé kota ri Yudéa ri daéra buluna. Laoni ri bolana Zakharia, na wettunna muttama', nabérésellengini Elisabét. Na wettunna naéngkalinga Elisabét bérésellenna Maria, kédoni iyaro anana' ri laleng parémmananna Elisabét. Narikuwasaina Elisabét ri Rohna Allataala, nanagora, “Ikona kaminang ribarakkaki ri yelle'na sininna makkunraié! Memmuwaré' ribarakkakiwi iyaro anana' mujajiyangngé matu! Niga iyya'é nanalaowika indo'na Puwangngé? Uwéngkalingana bérésellemmu, anana' ri laleng parémmanakku kédoi nataro rennu. Masenna'ko, nasaba mateppe'ko makkedaé aga napowada Puwangngé ri iko kajajiyangngi matu!” Nakkeda Maria, “Atikku pojiwi Puwangngé, sibawa mariyo-riyoi nyawaku nasaba Allataala Pappassalama'ku. Naéngngerakka atan-Na iya matunaé! Mappammulai makkekkuwangngé sininna bangsaé makkedai mariyo-riyoka. Nasaba Allataala Iya Pommakuwasaé pogau'i gau'-gau' battowaé ri aléku. Mapaccingngi asen-Na. Abbijangeng lao ri abbijangeng mamaséi Puwangngé lao ri tau métaué ri Aléna. Nasibawang liman-Na iya mawatangngé napassara-sarangngi tau matempoé, sibawa nakacauwi rancanana mennang. Napanonnoi sining arungngé polé ri akkarungen-Na sibawa napakatanréi tau matunaé. Napésennangiwi tau malupué sibawa sininna adécéngengngé tau sugié napaddésu'i sibawa kosong. Natulungngi Israélié, atan-Na, situru janci iya Naébbué sibawa néné-nénéta. Dé' Nallupaiwi jancinna Puwangngé, namaséiwi Abraham sibawa wijanna lettu mannennungeng.” Kira-kira tellumpuleng ittana Maria monro ri Elisabét, nainappa lisu ri bolana. Narapini wettunna Elisabét untu' mémmana'. Najajiyanni séddi ana' worowané. Sining balibolana sibawa sumpulolona naéngkalingani pékkugi kessinna Puwangngé lao ri Elisabét, nanaccowéna marennu silaong Elisabét. Wettunna iyaro ana'loloé makkéumuru aruwa essona, poléni mennang untu' sunna'i. Maéloi mennang masengngi iyaro ana'loloé Zakharia situru asenna ambo'na, iyakiya makkedai indo'na, “Dé'! Harusu'i riwéréng aseng Yohanés.” Nakkeda mennang ri Elisabét, “Nadé'gaga polé ri sumpulolomu riyaseng makkuwatu.” Nakkutana mennang sibawa tanra-tanrang lao ri Zakharia, aseng aga maélo nawéréngngi ana'na. Naéllauna Zakharia séddi pépeng batu nainappa maroki, “Asenna Yohanés.” Hérang manenni mennang. Iyatoro wettué naulléni paimeng Zakharia mabbicara sibawa pojiwi Allataala. Métauni sining balibolana, nanallebbanna iyaro karébaé ri sininna daéra buluna Yudéa. Sininna tau méngkalingaéngngi iyaro gau'é makkutanani ri laleng ati, “Mancaji agai matu iyaro ana'é?” Saba' risibawangngi ri Puwangngé. Zakharia, ambo'na iyaro anana'é, rikuwasaini ri Rohna Allataala angkanna napalettu paseng polé ri Puwangngé. Nakkeda, “Laono mai tapojiwi Puwangngé, Allataalana bangsa Israélié! Poléni tulungngi umma'-Na sibawa paleppe'i mennang. Nawérékki pappassalama' iya baranié, wijanna Daud, atan-Na. Riyolopa nariyolo naolai nabi-nabi Napilé, purani nabbéréyang Puwangngé jancin-Na untu' passalama'ki polé ri balitta sibawa polé ri akuwasanna sining tau iya benciyékki. Untu' mappaitangngi asémpowatin-Na lao ri toriyolota, jancin-Na iya mapaccingngéro Narupaiwi matu. tuli sompai Aléna sibawa pésennangiwi atin-Na gangka tuwota. Iko, éh ana'ku, riyasekko matu nabinna Allataala Iya Pommatanré. Risuroko poddiyoloiwi Puwangngé untu' sarakengngi laleng Aléna. Untu' mabbirittangngi lao ri umma'-Na sibawa ripassalama'i matu mennang, rékko purani naddampengeng Allataala dosa-dosana mennang. Masémpo atiwi Puwatta namakacuwa; poléi untu' passalama'ki. Pada-pada mata essoé mompoé ri éléé. Makkuwani ritu mabbéréyangngi tajan-Na lao ri sininna tauwé iya tuwoé ri laleng apettangengngé sibawa amétaurengngé. Napimpikki ri laleng iya mattujué ri adaméngengngé.” Napédé' battowana iyaro ana'na Zakharia sibawa pédé' mawatang rohna. Monroi ri padang kessi'é, narapi lettu wettunna nappaissengeng aléna lao ri bangsa Israélié. Iyaro wettué, napparéntanni Kaisar Agustus, kuwammengngi sininna pabbanuwana Akkarungeng Roma nadaftar i aléna untu' ribilang. Iyanaé abbilangeng mammulangngé iya ripajoppaé wettunna Kirénius mancaji gubernurna wanuwa Siria. Sininna tauwé iyaro wettué laoni untu' ridaftar ri kotana tungke'-tungke'. Joppani Yusuf polé ri Nazarét ri Galiléa, lao ri Bétléhém ri Yudéa, onrong ajajiyanna Arung Daud; saba' Yusuf wijannai Arung Daud. Nadaftarni Yusuf aléna silaong Maria tunanganna, iya mattampu'éro. Wettunna ri Bétléhém, narapini wettunna Maria mémmana'. Najajiyanni séddi ana' worowané, ana'na macowaé. Iyaro ana'na nadokoni sibawa caré-caré kaing, nainappa napalésso ri laleng dulang olokolo'é iya mallise'é daramé; saba' dé' nalolongeng onrong untu' mappéruma. Ri wenniéro engka pakkampi-pakkampi iya monrowangngéngngi sining bimbala'na ri padangngé ri daéraéro. Tappa nappaitanni aléna malaéka'na Puwangngé ri mennang, sibawa alebbirenna Puwangngé mattappa tajangiwi mennang, namétau senna'na mennang. Iyakiya makkedai iyaro malaéka'é, “Aja' mumétau! Saba' poléka tiwirekko karéba madécéng – karéba iya pésennangi senna'éngngi sininna tauwé. Iya essoé ri kota Daud, jajini Arung Pappassalama'mu iyanaritu Kristus, Puwangngé. Iyanaé tanranna: Mupoléiwi matu séddi ana'lolo ridoko sibawa kaing, enrengngé léwu ri laleng dulangngé.” Tennasenna-sennana iyaro malaéka'é risibawangngi maéga malaéka' laing, iya pojiyéngngi Allataala. Makkedai mennang, “Ripojiwi Allataala ri langi iya kaminang matanré! Sibawa ri yasé'na tanaé, saléwangengngi rupa tauwé iya pésennangiyéngngi atinna Puwangngé!” Risalainnana mennang risining malaéka'é nalisu ri surugaé, makkedani iyaro sining pakkampié séddié lao ri laingngé, “Laono mai talao ri Bétléhém nataitai gau' iya kajajiyangngéro, iya napaissengengngékki Puwangngé.” Mapperi-perini mennang lao, nanapoléini Maria sibawa Yusuf, enrengngé ana' loloéro iya léwué ri laleng dulangngé. Wettunna naita iyaro sining pakkampié ana'loloéro, nacuritani mennang aga napowada iyaro sining malaéka'é passalenna iyaro ana'loloé. Nahéranna sininna tauwé méngkalingai curitana sining pakkampiéro. Iyakiya Maria nataro manengngi iyaro ri laleng atinna sibawa nanennun-nennunna. Lisuni ri padangngé iyaro sining pakkampié sibawa pojiwi enrengngé pakalebbii Allataala, nasaba sininna iya puraé naéngkalinga sibawa naita, sicoco'i pada-pada iya napowadaé malaéka'é. Genne'nana aruwa essona umuru'na, risunna'ni iyaro Anana'é, sibawa nasengngi Yésus, aseng iya riwéréngngéngngi ri malaéka'é riwettu dé'napa naritampu' ri indo'-Na. Narapini wettunna Yusuf sibawa Maria pajoppai ade' pappépaccing siturué hukkunna Musa. Jaji natiwini iyaro Anana'é ri Yérusalém untu' riyabbéréyang lao ri Puwangngé. Saba' ri laleng Hukkunna Puwangngé tarokii makkuwaéwé, “Tungke' ana' worowané macowaé, harusu'i riyabbéréyang lao ri Puwangngé.” Akkattanato mennang maéloi makkasuwiyangeng akkarobangeng, iyanaritu sipasang bekku iyaré'ga duwakkaju jangang-jangang malolo, pada-pada iya ripattentué ri laleng Hukkunna Puwangngé. Iyaro wettué ri Yérusalém engka séddi tau riyaseng Siméon. Tau makessingngi, métaui ri Allataala sibawa natajengngi wettunna Allataala passalama'i Israélié. Risibawangngi ri Rohna Allataala, sibawa Rohna Allataala pura paissengiwi makkedaé' dé' namaté matu riwettu dé'napa naitai Arung Pappassalama'é iya najjanciyangngé Puwangngé. Nasaba pappimpinna Rohna Allataala, muttama'i Siméon ri Bolana Allataala. Iyaro wettué Yusuf sibawa Maria natiwii Yésus muttama' iya baiccu'é mupa, untu' pogau'i upacara iya napparéntangngé hukkunna agamaé. Nanalani Siméon iyaro Anana'é nanaépa'i, nainappa napoji Allataala, “Makkekkuwangngé, purani Murupai jancimmu Puwang. Leppessanni atam-Muéwé maté sibawa tennang. Saba' mata alékuna pura mitai Pappassalama' polé ri Iko. Iyaro Pappassalama'é purani Mupassadiya untu' sininna bangsaé: pada-pada tajang iya tappaéngngi lalenna sininna bangsa-bangsa laingngé, untu' lao ri Iko; iyanaritu tajang iya mappapolé alebbireng lao ri umma'-Mu Israélié.” Héranni ambo'na sibawa indo'na iyaro Anana'é méngkalingai aga napowada Siméon passalenna Ana'na mennang. Ribarakkakini mennang ri Siméon sibawa makkeda lao ri Maria, indo'-Na iyaro Anana'é, “Iyaé Anana'é purani napilé Allataala untu' paccappui sibawa passalama'i maéga tau Israélié. Mancajiwi matu tanrang polé ri Allataala, iya naéwaé matu maéga tau, nanallalengiro nassu lise' atinna mennang. Nasoppa'i matu atimmu atassinnaureng pada-pada peddang matarengngé.” Engkato séddi nabi makkunrai iya macowa senna'énna. Asenna Hana, ana'na Fanuél, polé ri suku Asyer. Pitu taung bawang siyonrong lakkainna, namancaji janda Hana, na makkekkuwangngé umuru'na aruwani pulona eppa taung. Dé' naengka nasalaiwi Bolana Puwangngé. Esso wenniwi massompa kuwaro lao ri Allataala massempajang sibawa mappuwasa. Iyatoro wettué napolé, nanapojiwi Allataala sibawa mabbicara passalenna iyaro Anana'é lao ri sininna tauwé iya tajengngéngngi wettunna Allataala paleppe'i Yérusalém. Puranana napogau' Yusuf sibawa Maria sininna iya nawajikengngé Hukkunna Puwangngé, lisuni ri Nazarét ri Galiléa. Napédé' battowana iyaro anana'é sibawa mawatang. Mapanré senna'i sibawa riyamaséinna ri Allataala. Tungke'-tungke' taung laowi tomatowanna Yésus ri Yérusalém untu' pakarajai Esso Maraja Paskaé. Na wettunna Yésus makkéumuru seppulo duwa taung, laosi mennang ri ramé-raméro situru abiyasangngé. Leppe'nana iyaro ramé-ramé, lisuni mennang. Iyakiya Yésus, Anana'éro, monro mupi ri Yérusalém, nadé' naissengngi ambo' indo'-Na. Nasengngi mennang maccowé muto ri laleng rombongangngé. Joppanana puppu esso, nappai mennang nasappa ri yelle'na sumpulolona sibawa sining sissenna. Iyakiya dé' nalolongengngi mennang, jaji lisuni mennang ri Yérusalém sappai. Genne'nana tellungngesso massappa, naruntu'ni mennang ri laleng Bolana Puwangngé. Tudat-tudangngi méngkalingai sining guru agamaé sibawa passu pakkutana-pakkutana. Héranni sininna tau méngkalingaéngngi nasaba sining pappébalin-Na iya maccaé. Hérang toni tomatowan-Na mitai. Nakkeda indo'-Na lao ri Yésus, “Na', magi Mupakkuwaki'é? Ambo'-Mu sibawa iyya tassélesséleng sappa-Ko!” Nappébali Yésus, “Magi tasappa-Ka ambo' sibawa indo'? Dé'ga taissengngi ambo' sibawa indo' makkedaé harusu'-Ka engka ri laleng bolana Ambo'-Ku?” Iyakiya dé' napahangngi pappébalinna Yésus. Nalisuna Yésus silaong mennang lao ri Nazarét, sibawa matinuluna lao ri mennang. Sininna gau'éro nataroi indo'-Na ri laleng atinna. Napédé' battowana Yésus sibawa tattamba accana, enrengngé ripoji ri Allataala sibawa ri rupa tauwé. Ri taung maseppulona lima apparéntanna Kaisar Tibérius, Pontius Pilatus mancaji gubernur ri Yudéa, sibawa Hérodés mapparénta ri Galiléa. Filipus, silessurenna Hérodés mapparéntai ri daérana Ituréa sibawa Trakhonitis, na Lisanias mapparéntai ri Abiléné. Iya mancajiyé imang-ngimang lompo iyanaritu Hanas sibawa Kayafas. Ri taungngénnaro nabbicara Allataala ri padang kessi'é lao ri Yohanés, ana'na Zakharia. Nalao tulilina Yohanés ri sininna daérana Salo Yordan sibawa palettu'i karéba polé ri Allataala. Nagora Yohanés, “Toba'no polé ri dosa-dosamu sibawa harusu'ko ricemmé, kuwammengngi naddampengekko Allataala.” Iyaro siturui iya riyokié ri laleng kitta'na Nabi Yésaya: “Engka tau gora-gora ri padang kessi'é, ‘Passadiyangengngi laleng Puwangngé, paratangengngi laleng untu' Aléna. Tungke' lompo' sitinajai ritémpung, tungke' bulu sibawa bulu-bulué riparatai. Laleng malléko-lékoé sitinajai ripallempu, sibawa laleng makkalebbok-kalebbongngé riparatai. Sining tauwé ri sininna linoé naitai matu Allataala passalama'i tolinoé!’ ” Maéga tau lao ri Yohanés untu' ricemmé. Makkedai Yohanés lao ri mennang, “Tau majako iko! Niga powadai makkedaé mullé leppe' polé ri pahukkungenna Allataala iya mangoloé? Appaitanni ri laleng pangkaukemmu makkedaé toba'no polé ri dosa-dosamu! Aja' muwakkeda makkedaé Abraham iyanaritu néné-nénému. Engngerangngi! Polé ri batu-batuéwé, naulléi Allataala pinru wija-wijanna untu' Abraham! Sadiyani wasé untu' tubbangngi pong ajué lettu ri ure'-ure'na. Tungke' pong aju iya dé'é napowassélé' buwa makessing ritubbangngi matu naribuwang ri laleng apié.” “Jaji, aga harusu' ripogau'?” pakkutanana sining tauwé lao ri Yohanés. Nappébali Yohanés, “Tau iya mappunnaiyé duwallampa waju, harusu'i nawéréng silampa iya dé'é nappunnai; sibawa tau iya mappunnaiyé anré, harusu'i nabagé.” Polé toni passinge'-singe' simaé ri Yohanés untu' ricemmé. Makkutanani mennang, “Bapa' Guru, aga harusu' ripogau'?” Nappébali Yohanés, “Aja' musinge'i lebbi maéga naiya pura ripattentué.” Engkato parajuri' makkutana, “Pékkugitosi idi'é? Aga harusu' ripogau'?” Nappébali Yohanés, “Aja' mupanrasa-rasai muwi niga-niga, sibawa aja' murampasa' dowi nasaba pétenna'-pétenna' dé'é natongeng. Asennanno sibawa gajimmu!” Iyaro wettué mammulani sining tauwé makkutana, aga Yohanés Arung Pappassalama' natajengngé mennang. Iyanaro saba'na nakkeda Yohanés lao ri sininna mennang, “Iyya ucemméko sibawa uwai, iyakiya poléi matu tau iya lebbi battowaé na iyya. Muwi lukkai tulu sapatun-Na dé'to usitinaja. Nacemméko matu sibawa Rohna Allataala sibawa api. Ri liman-Na engka pattapi untu' tapiwi sininna gandonna gangka mapaccing. Napaddeppungengngi matu gandongngé ri laleng lappoé, iyakiya sininna awanna Natunui matu ri laleng api iya dé'é nawedding peddé!” Makkuwaniro Yohanés pangajariwi sining tauwé sibawa maddupa-rupang cara, ri wettu nappallebbangenna Karéba Madécéngngé. Iyakiya Hérodés, iya makuwasaé ri Galiléa, riyamparengngi ri Yohanés passalenna akawingenna sibawa Hérodias, bainéna silessurenna, sibawa passalenna sininna ja laingngé iya puraé napogau'. Iyakiya mala Hérodés natambaiwi sining jana ri laleng naputtama'na Yohanés ri laleng tarungkué. Puranana ricemmé maneng iyaro tauwé, ricemmé toni Yésus. Na wettunna massempajang, tattimpa'ni langié, na Rohna Allataala nonnoni ri yasé'-Na sinrupa jangang-jangangngé. Nanaéngkalingai saddanna Allataala makkeda, “Ikona Ana'-Ku iya Uwamaséiyé. Mupésennangi atik-Ku.” Wettunna Yésus napammulai jama-jaman-Na, umuru'-Na kira-kira telluppulo taung. Manuru' pallolongenna tauwé, Aléna ana'na Yusuf, ana' Eli, ana' Maat, ana' Léwi, ana' Malkhi, ana' Yanai, ana' Yusuf, ana' Matica, ana' Amos, ana' Nahum, ana' Hésli, ana' Nagai, ana' Matat, ana' Matica, ana' Siméi, ana' Yosékh, ana' Yoda, ana' Yohanan, ana' Résa, ana' Zérubabel, ana' Séaltiél, ana' Néri, ana' Malkhi, ana' Adi, ana' Kosam, ana' Elmadam, ana' Er, ana' Yésua, ana' Eliéser, ana' Yorim, ana' Matat, ana' Léwi, ana' Siméon, ana' Yéhuda, ana' Yusuf, ana' Yonam, ana' Elyakim, ana' Méléa, ana' Mina, ana' Matata, ana' Natan, ana' Daud, ana' Isai, ana' Obéd, ana' Boas, ana' Salmon, ana' Nahason, ana' Aminadab, ana' Admin, ana' Arni, ana' Hézron, ana' Pérés, ana' Yéhuda, ana' Yakub, ana' Ishak, ana' Abraham, ana' Térah, ana' Nahor, ana' Sérug, ana' Réhu, ana' Pélég, ana' Eber, ana' Salmon, ana' Kénan, ana' Arpakhsad, ana' Sém, ana' Nuh, ana' Lamékh, ana' Métusalah, ana' Hénokh, ana' Yaréd, ana' Mahalaléél, ana' Kénan, ana' Enos, ana' Sét, ana' Adam, ana' Allataala. Rikuwasaini Yésus ri Rohna Allataala wettunna nasalai Salo Yordan. Ripimpinni ri Rohna Allataala lao ri padang kessi'é. Nakkuwanaro ricobai ri Ibillisi' patappulo esso ittana. Ri lalenna wettuéro, dé' agaga nanré. Jaji paccappurenna malupuni. Nakkeda Ibillisi' ri Aléna, “Ana'na-Koto Allataala? Jaji suroni iyaé batué mancaji roti.” Nappébali Yésus, “Ri laleng Kitta'é tarokii, ‘Rupa tauwé dé' naulléi tuwo polé ri rotié bawang.’ ” Nainappa Ibillisi' natiwi Yésus ri onrong iya matanré, na ri laleng sikédé mata nappaitangngi Ibillisi' lao ri Yésus sininna akkarungengngé ri linoé. Nakkeda Ibillisi' lao ri Yésus, “Iya manennaé akuwasangngé sibawa asugirengngé uwabbéréyangngi matu lao ri Iko, saba' iya manennaro purani riwérékka, naweddikka mabbéréyangngi lao ri nigi-nigi iya upojiyé mpéréngngi. Iya manennaro mancajiwi appunnangem-Mu matu, rékko suju'-Ko sompaka.” Nappébali Yésus, “Ri laleng Kitta'é tarokii, ‘Sitinajako pakalebbii Puwang Allataalamu sibawa tumaningiwi Aléna bawang!’ ” Nainappa Ibillisi' natiwi Yésus ri Yérusalém, nanataroi ri yasé'na coppo'na Bolana Puwangngé, nanakkeda lao ri Yésus, “Ana'na-Koto Allataala? Jaji luppe'no polé kuwaé. Saba' ri laleng Kitta'é tarokii, ‘Nasuroi matu Allataala sining malaéka'-Na jagai-Ko madécéd-décéng.’ Sibawa topa, ‘Natimak-Ko matu sining malaéka'é sibawa limanna mennang, kuwammengngi aja' nanatabbuttu ajé-Mu ri batué.’ ” Nappébali Yésus, “Ri laleng Kitta'é tarokii, ‘Aja' mucobaiwi Puwang, Allataalamu.’ ” Puranana Ibillisi' nacobai Yésus sibawa maddupa-rupang cara, nasalaini Yésus namattajeng wettu makessingngé. Nainappa lisuni Yésus ri Galiléa, narikuwasaina ri Rohna Allataala. Karéba passalenna Aléna tassiyani ri sininna daéraéro. Mappagguruni risining bola assompangngé, na sininna tauwé pojiwi Aléna. Laosi paimeng Yésus ri Nazarét, onron-Na ripawekke. Ri esso Saba'é, situru abiyasan-Na laoni ri bola assompangngé. Tettonni untu' bacai Kitta'é, nariwéréng kitta'na Nabi Yésaya. Natimpa'ni kitta iya rilulungngéro, na-Nalolongengngi aya'éwé, “Engkai Rohna Puwangngé ri Iyya, saba' pura-Ka nalanti' untu' mabbirittangngi Karéba Madécéngngé lao ri tau kasiyasié. Nasuro-Ka untu' mappallebbangengngi aleppekengngé lao ri tau ritawangngé sibawa ajjappang lao ri tau butaé; untu' paleppe'i tau iya ripanrasa-rasaé sibawa mabbirittangngi apolénna wettunna Puwangngé passalama'i umma'-Na.” Nalulunni paimeng Yésus iyaro kitta'é, napalisui ri pajagaé, nainappa tudang. Sininna tauwé ri laleng bola assompangngéro mitai Aléna. Nappammulana Yésus mabbicara lao ri mennang, makkuwaé, “Iyaé aya'-aya'na Kitta'é ripaddupani iyaé essoé ri wettu muwéngkalingana.” Ada-ada iya Napowadaé makessing senna', angkanna bengnga mennang sibawa nasokon-Na. Makkedani mennang, “Tenniyaga iyaé ana'na Yusuf?” Nakkeda Yésus lao ri mennang, “Pasti mupakéi iyaé warékkadaé lao ri Iyya, ‘Eh dottoro', pajjappai alé-Mu. Anu makalallaing riyéngkalingaé iya Mupogau'é ri Kapernaum, pogau' toni ri kampong assalem-Mu.’ ” Natambaiwi Yésus, “Engngerangngi dé' gaga nabi ripakalebbi ri kampong assalenna. Iyakiya éngkalingai: ri wettunna Elia, wettunna dé' nateppa bosié tellut taung sitengnga ittana, poléi akkadérengngé iya masero senna'é ri sininna wanuwaé. Iyaro wettué engka maéga janda ri Israélié. Namuni makkuwaro, Allataala dé' nasuroi Elia lao risala séddinna polé risining jandaéro sangadinna banna lao riséddié janda ri Sarfat ri daérana Sidon. Makkuwatoro ri wettunna Nabi Elisa engka maéga tau ri Israélié malasa oli iya mappakatautaué, iyakiya dé' séddi polé ri mennang ripajjappa; sangadinna Naaman tau Siriaéro.” Sininna tauwé ri bola assompangngéro macai senna'ni wettunna naéngkalinga gau'éro. Tettonni mennang nainappa narukka Yésus massu ri saliweng kota, sibawa natiwii ri émpenna bulué, naonroiyé napatettong kotana mennang. Akkattana mennang maéloi sorongngi ri laleng peppingngé. Iyakiya nalullu'i Yésus iyaro tau maégaé nainappa lao. Nainappa Yésus lao ri Kapernaum ri Galiléa. Kuwaniro napagguru sining tauwé ri esso Saba'é. Bengngani mennang mitai carana mappagguru, saba' mabbicarai sibawa akuwasang. Kuwaro ri bola assompangngé engka séddi tau iya nakuwasaiyé sétang. Iyaro tauwé kelli'-kelli'ni, “Eh Yésus, tau Nazarét, aga maélo Mugaukekki? Polé-Koga maélo pabbinasaki? Uwisseng nigako, iko suro polé ri Allataala iya mapaccingngé!” Naggera' Yésus lao ri sétangngéro, “Ammekkoko! Assuko polé ri tauwéwé!” Nainappa iyaro sétangngé naggeppuwangngi iyaro tauwé ri yolona maneng mennang, nainappa massu polé ri tauwéro dé'na napeddiriwi. Hérang manenni tauwé, nakkeda séddié lao ri laingngé, “Tenniya culé-culé ada-adan-Na. Nasibawang akuwasang, nasuroi roh-roh majaé massu, namassu tona mennang!” Na karéba passalenna Yésus tassiyani ri sininna daéraéro. Nasalaini Yésus iyaro bola assompangngé, nanalao ri bolana Simon. Matuwa makkunrainna Simon mattengngangngi masemmeng, nasining tauwé napaissengini Yésus gau'éro. Nalaona Yésus ri onrong atinronna makkunraiéro, napaddésu'i iyaro semmengngé. Nasorona iyaro semmengngé, naoto'na matuwa makkunrainna Simon nanatumaningiwi mennang. Wettunna labu essoé, natiwini sininna tauwé lao ri Yésus silessu-silessurenna iya nakennaé maddupa-rupang lasa. Napalénne'ni limanna Yésus ri yasé'na mennang tungke'-tungke' nanapajjappai. Nassuna sining sétangngé polé ri tau maégaé, nagora-gorato, “Ikona Ana'na Allataala!” Iyakiya rigera'i mennang ri Yésus sibawa dé'naripalalo mennang mabbicara, saba' naissengngi mennang makkedaé Aléna ritu Arung Pappassalama'é. Wettunna mammula mompo matanna essoé, nasalaini Yésus iyaro kotaé nanalao riséuwaé onrong iya masino-sinoé. Nappammulana tauwé sappai Aléna, na wettunna mennang naruntu', makkuragani kuwammengngi aja' narisalai mennang. Iyakiya makkedai Yésus, “Karéba Madécéng passalenna Allataala sibawa Apparéntanna harusu' towi Uwabbirittang ri kota-kota laingngé, saba' untu' iyanaro narisuro-Ka muttama' ri linoé.” Iyanaro saba'na nakkatobba Yésus ri laleng sining bola assompangngé ri sininna wanuwa Yudéa. Riséuwaé wettu, tettongngi Yésus ri wirinna Tappareng Génésarét. Maéga tau siredde-redde untu' méngkalingai karéba polé ri Allataala. Naitani Yésus engka duwa lopi ri wirinnaro; sining pakkajana nonnoni polé ri lopiéro namattengngang bissaiwi jalana. Naénré'na Yésus risala séddinna iyaro sining lopié, iyanaritu lopinna Simon, nainappa nasuro Simon sorongngi iyaro lopinna mabéla céddé polé ri wiring. Natudanna Yésus ri laleng lopiéro, nanapaggurui tau maégaé. Puranana mappagguru, makkedani ri Simon, “Mpiséno lao ri onrong malamungngé, namupallebba'i jalamu untu' tikkeng balé.” Nappébali Simon, “Bapa' Guru, puppu benniki majjama ladde', nadé'gaga agaga ritikkeng! Iyakiya nasaba Bapa' suroki, madécénni; maélosika pallebba' jala.” Puranana napogau' iyaro gau'é, lolongenni mennang makkumani égana balé angkanna mammulani sapé' jalana. Rimakkuwannanaro méllau tulunni mennang ri sellao-sellaona ri lopi laingngé. Poléni sining sellaona mennang lisekiwi iya duwa lopiéro penno sibawa balé angkanna maéloni tallemme' iyaro sining lopié. Wettunna naita Simon iyaro, suju'ni ri yolona Yésus, nainappa makkeda, “Salaika Puwang! Saba' tau madosaka!” Héranni Simon sibawa sininna tau iya naéwaé silaong mitai égana balé natikkeng mennang. Makkuwatoro sining sellaona Simon, iyanaritu Yakobus sibawa Yohanés, ana'-ana'na Zébédéus. Nakkeda Yésus lao ri Simon, “Aja' mumétau! Mappammulai makkekkuwangngé mancajiko matu pajjala tau.” Nagettenni Simon sibawa sellao-sellaona iyaro sining lopinna lao ri wiring, nainappa nasalai maneng, nanaccowériwi Yésus. Riséuwaé esso engkai Yésus riséuwaé kota. Kuwaro engka séddi worowané iya pennoé watakkaléna sibawa lasa oli mappakatau-taué. Wettunna naita Yésus, suju'ni ri yolo-Na maréllau, “Pa', rékko taéloriwi Bapa', taullé pajjappaka' Bapa'!” Nakarawani Yésus iyaro tauwé nakkedato, “Upuwéloi, ajjappano!” Iyatoro wettué najjappa lasana. Nainappa nattéyang Yésus iyaro tauwé curitai gau'éro lao ri nigi-nigi, adan-Na, “Laono ri imangngé, namuwéllauwi untu' pattentui makkedaé majjappano. Nainappako lao makkasuwiyangeng akkarobangeng pada-pada iya napparéntangngé Musa, selaku butti lao risining tauwé makkedaé tonget-tongenno majjappa.” Iyakiya karéba passalenna Yésus pédé' tassiyai lao tulili, namaégana tau polé untu' méngkalingai Aléna sibawa untu' ripajjappa polé ri lasana mennang. Purairo laoni Yésus massempajang ri onrong masino-sinoé. Riséuwaé esso wettunna Yésus mattengngang mappagguru, engka siyagangngaré tau Farisi sibawa guru-guru agama tudang kuwaro. Poléi mennang ri Yérusalém, sibawa ri kota-kotaé ri Galiléa enrengngé Yudéa. Akuwasanna Puwangngé engkai ri Yésus untu' pajjappai sining tau malasaé. Iyaro wettué engka siyagangngaré tau polé tiwi séddi tau péso' iya léwué ri yasé'na onrong atinrongngé. Makkuragai mennang tiwii iyaro tauwé ri lalempola kuwammengngi naulléi palénne'i ri yolona Yésus. Iyakiya nasaba maéga senna' tau kuwaro, dé' naulléi mennang tiwii muttama'. Rimakkuwannanaro napaénré'i mennang ri yasé'na pabbingenna bolaé. Nainappa nabongkara' genténna, nanapanonnoi silaong onrong atinronna ri yolona Yésus ri tengnga-tengngana tau maégaéro. Wettunna naita Yésus pékkugi rajanna teppe'na mennang, makkedani Aléna lao ri tauwéro, “Eh silessureng, riyaddampengenni dosamu.” Sining guru agamaé sibawa sining tau Farisié mammulani makkeda séddié lao ri laingngé, “Niga iyaé tauwé nabarani cellai Allataala? Niga wedding maddampengengngi dosaé, rilainnaé Allataala?” Naissengngi Yésus pakkutanana mennang. Jaji makkedani, “Magi muwakkutana makkuwaro ri laleng atimmu? Kéga lebbi gampang makkeda, ‘Riyaddampengenni dosamu’, iyaré'ga makkeda, ‘Oto'no namujoppa!’ Iyakiya maélo-Ka buttikangngi makkekkuwangngé lao ri iko makkedaé Ana'na Tolinoé makuwasai ri yasé'na linoéwé untu' maddampengengngi dosaé.” Nainappa makkeda Yésus lao ri tau péso'éro, “Oto'no, akkai onrong atinrommu, namulisu!” Masitta'ni iyaro tauwé moto' ri yolona maneng mennang, nainappa nakka onrong atinronna, nanalisu sibawa pojiwi Allataala. Bengnga manenni mennang nanapojiwi Allataala. Nasibawang tau, makkedani mennang, “Makalallaing senna' kajajiyang iya riitaé iya essoé!” Purairo massuni Yésus nanaitai séddi passinge' sima iya riyasengngé Léwi, mattengngang tudang ri kantoro'na. Nakkeda Yésus ri Léwi, “Accowéko ri Iyya.” Tettonni Léwi nanasalai manengngi, nainappa maccowériwi Yésus. Purairo mappéstani Léwi ri bolana untu' Yésus. Maéga passinge' sima sibawa tau laing maccowé manré sisama mennang. Engka siyagangngaré tau Farisi sibawa guru-guru agama dé' namasennang, nanakkeda ri ana'-ana' gurunna Yésus, “Magi mumanré ménung maneng sibawa passinge' simaé sibawa sining tau dé'é namakessing?” Nappébali Yésus, “Tau madisingngé dé' napparelluwang dottoro', banna tau malasaé bawang. Polé-Ka tenniya untu' mobbii sining tau tongengngé, sangadinna sining tau madosaé kuwammengngi natoba' mennang polé ri dosa-dosana.” Nakkeda sining tauwé lao ri Yésus, “Ana'-ana' gurunna Yohanés sibawa ana' gurunna tau Farisié biyasai mappuwasa sibawa massempajang. Iyakiya ana'-ana' gurum-Mu manréi sibawa ménungngi.” Nappébali Yésus, “Weddigga musuro mappuwasa sining undangammu ri pésta abottingengngé, ri wettu engkana mupa bottimpurané silaong mennang? Tentu dé'! Iyakiya engka matu narapii wettunna nariyala bottimpurané polé ri mennang. Ri wettuénnaro nappuwasa matu mennang.” Nainappa nacuritani Yésus pakkalarapangengngéwé, “Dé' tau téppangngi waju launna sibawa sikenné kaing polé ri waju barué. Saba' nasapé'i waju baruéro. Kuwaéttopa iyaro pattéppang mabarué dé' nasicoco' waju malaungngé. Makkuwatoro dé'gaga tau tiri' anggoro baru ri laleng popang koli malaungngé, nasaba iyaro anggoro barué nassabariwi matu mareppa iyaro popangngé. Natabbé anggoro'na sibawa masolang popanna. Anggoro barué harusu'i ritiri' ri popang iya baruétto. Makkuwatoro dé'gaga tau maélo ménung anggoro baru rékko purai ménung anggoro laung. Adanna, ‘Lebbi kessingngi anggoro malaungngé.’ ” Riséuwaé esso Saba', wettunna Yésus lalo riséuwaé dare' gandong, malai gandong ana'-ana' gurun-Na. Napessii iyaro gandongngé nainappa nanré. Siyagangngaré tau Farisi makkeda, “Magi muwajjalékkaiwi hukkung-hukkunna agamata ri laleng mupogau'na iya riyattéyangngé ri esso Saba'é?” Nappébali Yésus, “Dé'paga naengka mubacai passalenna napogau'é Daud, wettunna Daud sibawa sining taunna malupu? Muttama'i ri laleng Bolana Puwangngé nanalai roti iya puraé riyakkasuwiyangeng ri Allataala, nainappa nanré. Nanawéréng towi iyaro rotié lao risining taunna. Padahal manuru' hukkung-hukkunna agamata, banna sining imangngé bawang wedding manréi iyaro rotié.” Nanakkeda Yésus, “Ana'na Tolinoé makuwasai lao ri esso Saba'é!” Riséuwaé esso Saba' laingngé, laowi Yésus mappagguru ri bola assompangngé. Naengka kuwaro tau maté siwali limanna. Engka siyagangngaré guru agama sibawa tau Farisi maélo sappai asalanna Yésus, kuwammengngi weddingngi napparapekeng. Jaji matterui napénessai maéloiga pajjappai tauwé ri esso Saba'é. Iyakiya naissengngi Yésus pikkiranna mennang. Nakkedana lao ri tau iya maté siwalié limanna, “Laoko kuwaé tettong ri yolo!” Tokkonni iyaro tauwé, natettong kuwaro. Nainappa makkutana Yésus risining tau engkaé kuwaro, “Manuru' agamaé, aga harusu' ripogau' ri esso Saba'é? Pogau'i makessingngé iyaré'ga majaé? Passalama'i tauwé iyaré'ga cilakaiwi?” Nakkita Yésus mattulili lao ri iya maneng mennang, nainappa makkeda lao ri tauwéro, “Loro'i limammu.” Iyaro tauwé naloro'ni limanna, najjappana limanna. Iyakiya macai senna'i iyaro guru-guru agamaé sibawa sining tau Farisié, nappammulana barunding, aga wedding napogau' mennang lao ri Yésus. Iyaro wettué ménré'ni Yésus riséuwaé bulu-bulu untu' massempajang. Kuwaniro massempajang lao ri Allataala puppu benni. Wettunna macakkani essoé, Naobbini ana'-ana' gurun-Na, nainappa napilé seppulo duwa tau polé ri mennang. Nasenni iyaro seppuloé duwa tau rasul. Iya mennang iyanaritu: Simon (iya riyasengngétto Pétrus), sibawa Andréas silessurenna Simon; Yakobus sibawa Yohanés, Filipus sibawa Bartoloméus, Matius sibawa Tomas, Yakobus ana'na Alféus, sibawa Simon (iya riyasengngé Patriot), Yudas ana'na Yakobus sibawa Yudas Iskariot iya bali'bellaé ri munri. Nonnoni Yésus polé ri bulu-buluéro silaong rasul-rasul-éro, nainappa tettong mappésau riséuwaé onrong iya malappaé. Naengkato kuwaro maéga ana'-ana' gurun-Na laingngé sibawa maéga tau iya polé tulilié ri sininna Yudéa, Yérusalém enrengngé kota-kota Tirus sibawa Sidon ri wiring tasi'é. Poléi mennang untu' méngkalingai Yésus sibawa ripajjappa polé risining lasana. Mennang iya nauttamakiyé roh maja polé towi sibawa ripajjappa. Sininna tauwé makkuragani untu' karawai Yésus, nasaba engka akuwasang massu polé ri Aléna iya pajjappa manengngéngngi mennang. Naitani Yésus ana'-ana' gurun-Na, nainappa makkeda, “Asennanno iko sining tau kasiyasié, nasaba anggotanako umma'na Allataala! Asennanno iko iya malupué makkekkuwangngé; ripawessoriko matu! Asennanno iko iya teriyé makkekkuwangngé; macawako matu! Akkérennuko rékko ribenciko, risampéyang, ripakatuna sibawa ripétenna nasaba Ana'na Tolinoé! Nabi-nabié riyolo rigaukeng towi makkuwaéro. Rékko kajajiyangngi gau'éro, sitinajako masennang ati sibawa séré nataro rennu, saba' battowai saromu iya tassadiyaé ri surugaé. Iyakiya cilakano iko iya sugié makkekkuwangngéwé; saba' purani mupéneddingi anyamengengngé! Cilakano iko iya messoé makkekkuwangngéwé; saba' malupuko matu! Cilakano iko macawaé makkekkuwangngé; saba' tassinnaui matu atimmu sibawa teri! Cilakano rékko sininna tauwé pojiko; saba' makkuwatoro néné-nénéna mennang pojiwi nabi-nabi palsué riyolo.” “Iyakiya lao ri iko iya méngkalingaéngngi Iyya makkekkuwangngéwé, Uwappasengengngi: amaséiwi sining balimmu, sibawa pogau'i iya makessingngé lao ri tau iya benciyékko. Barakkakiwi tau iya tanroiyékko, sibawa assempajangengngi tau iya péjariyéngngékko. Rékko naleppa'i tauwé rupammu séddié, leppessangngi siya naleppa iya siwaliétto. Rékko narampasa'i jumbamu, wéréng towi wajummu. Rékko engka naéllau tauwé ri iko, wéréngngi; sibawa rékko narampasa'i appunnangemmu, aja'na muwéllauwi lisu. Gaukenni tau laingngé pada-pada muwacinnaiyé rigaukekko ri mennang. Rékko muwamaséiwi sining tau iya mamaséiyékko bawang, aga saromu? Tau madosaé namaséi towi sining tau iya mamaséiyéngngi mennang! Sibawa rékko pogau'ko makessingngé lao risining tau iya pogau'éngngi makessingngé lao ri iko bawang, aga saromu? Sining tau madosaé pogau' towi makkuwaéro! Sibawa rékko iyami bawang mupainrengi dowi tau iya mulléngngi palisui, aga saromu? Tau madosaé mappainreng towi dowi lao ri tau madosaé, nainappa naéllau lisu! Sitonget-tongenna dé' nakkuwaro! Sibalé'na harusu'ko mamaséiwi balimmu sibawa pogau'i makessingngé lao ri mennang. Harusu'ko mappainreng, naaja' murennuwangngi lisu. Rékko makkuwairo, battowai saromu sibawa mancajiko matu ana'-ana'na Allataala Iya Pommatanré. Saba' makessing atiwi Allataala lao ri tau iya dé'é naissengngi mattarima kasi, sibawa lao ri iya majaétto. Sitinajako mamasé pada-pada Ambo'mu mamaséto!” “Aja' muwadélékiwi tau laingngé, kuwammengngi nadé'to nadélékiko Allataala. Aja' muhukkungngi tau laingngé, kuwammengngi naaja'to nahukkukko Allataala. Addampengengngi tau laingngé, kuwammengngi naddampengeng tokko Allataala. Wéréngngi tau laingngé, kuwammengngi nawéréng tokko Allataala; mutarimai matu pabbéré iya tabbollompollongngé iya puraénna riolakekko malise' senna'. Saba' ola' iya mupaké untu' tau laingngé napakéngettokko matu Allataala.” Nainappa nacurita Yésus lao ri mennang pakkalarapangeng makkuwaé, “Rékko tau butaé pimpingngi tau buta laingngé, pasti menrung duwai nonno ri sépe'é. Dé'gaga tau lebbi battowa naiya gurunna. Iyakiya ana' guru iya temme'énna magguru, mancajiwi matu pada-pada gurunna. Muwitai bulisa'é ri matanna silessuremmu, na balo'é ri matammu dé' mupénessaiwi? Pékkugi mulléi makkeda ri silessuremmu, ‘Laono mai, silessureng, upassui iyaro bulisa'é polé ri matammu,’ na ri laleng matammu engka balo' dé' muwitai? Eh munapé'! Passuni riyolo' balo' iya engkaé ri matammu. Nainappa mullé mitai sibawa manessa kuwaéttopa passui bulisa'é polé ri matanna silessuremmu.” “Pong ngaju macommo'é dé' napowassélé' buwa iya majaé. Makkuwatoro pong ngaju makojoé dé' napowassélé' buwa iya makessingngé. Tungke' pong ngaju riissengngi polé ri buwana. Alekale' maddorié dé' napowassélé buwa ara, sibawa alekale' maddorié dé' napowassélé' buwa anggoro. Tau iya makessingngé passui gau'-gau' makessingngé nasaba pennoi atinna sibawa akessingeng. Tau iya majaé passui gau'-gau' iya majaé nasaba pennoi atinna sibawa majaé. Saba' aga napowada témué tabbollongngi polé ri atié.” “Magi muwobbi-Ka, ‘Puwang, Puwang’, iyakiya dé' mupogau'i aga iya Upowadangngékko? Nigana wedding ripappadangngi tau iya laowé ri Iyya, sibawa méngkalingai ada-adak-Ku, enrengngé pogau'i? – Makessinni Upaitakko –. Pada-padai tau iya wettunnaé mappatettong bola iya kaliyéngngi maliyung, nainappa naébbu pandaménna ri batué. Wettunna polé lémpe'é sibawa uwai saloé mappo'i iyaro bolaé, dé' naulléi pakédoi iyaro bolaé, saba' purai ripatettong ri yasé'na pandaméng iya makessingngé. Iyakiya tau iya méngkalingaéngngi ada-adak-Ku nadé' napajoppai, pada-padai tau iya patettongngé bola dé' napandaméngngi. Rékko nappo'i lémpe' iyaro bolaé, masitta'i maruttung; namalanre' asolangenna!” Puranana napowada gau'-gau'éro lao ri tau maégaé, laoni Yésus ri Kapernaum. Kuwaro engka parawira Roma iya mappunnaiyé ata iya namaséi senna'é. Iyaro ataé malasai nacéddé'pi namaté. Wettunna naéngkalinga iyaro parawiraé passalenna Yésus, nasuroni siyagangngaré pamimpinna tau Yahudié lao ri Yésus untu' méllauwi kuwammengngi napolé sibawa pajjappai atanna. Wettunna lettu ri Yésus, iyaro sining tauwé naéllauni sibawa masero kuwammengngi Natulungngi iyaro parawiraé. Nakkeda mennang lao ri Yésus, “Iyaé parawiraé sitinajai tatulung Bapa', saba' namaséiwi bangsata sibawa purana napatettongekki bola assompang.” Nalaona Yésus silaong mennang. Wettunna Yésus macawé'é lettu ri bolaéro, iyaro parawiraé nasuroni sellao-sellaona lao ri Yésus untu' makkeda, “Aja'na Bapa' tasussa-sussaiwi aléta lao ri bolaku. Dé' usitinaja tarimai Bapa' ri bolaku. Iyanaro saba'na dé' ubarani mangolo ri Bapa'. Jaji wéréng bawanni parénta kuwammengngi najjappa pattumanikku. Saba' iyya'é tunru' tokka ri paréntana tomariyasé'é, na ri yawaku engkato parajuri'-parajuri' iya harusu'é tunru' ri parénta-paréntaku. Rékko usuroi séddié parajuri', ‘Laoko!’ laowi; sibawa rékko makkedaka ri laingngé, ‘Laoko mai!’ poléi. Narékko uparéntangngi atakku, ‘Ebbui iyaé!’ naébbui.” Héranni Yésus méngkalingai iyaro. Gilinni nakkeda ri tau maégaé iya maccowériyéngngi, “Tenniya culé-culé iyaé tauwé. Ri yelle'na tau Israélié dé'pa naengka Ulolongeng teppe' silloppoéwé.” Wettunna iyaro sining tau risuroé lisu ri bolana parawiraéro, majjappani iyaro ataé. Dé' namaitta ri munrinna, laoni Yésus ri kota Nain. Ana'-ana' gurun-Na sibawa tau maégaé laowi sibawangngi. Wettunna Yésus lettu ri seddéna pintu gerbanna kotaé, sining tauwé mattengngangngi mangantara' uju massu ri kotaé. Iya maté iyanaritu ana' worowané, ana' tungke'na séddié janda. Maéga pabbanuwana iyaro kotaé silaongengngi iyaro makkunraié. Wettunna Puwang Yésus naita iyaro makkunraié, messéni lao ri makkunraiéro nanakkeda, “Aja' muteri, Indo!” Nainappa Yésus maddeppériwi uléreng ujuéro nanakarawai. Naléppanna iyaro sining tau mabbuléé. Nakkeda Yésus, “Eh kallolo, Usuroko moto!” Moto'ni tudang kallolo iya matéro, sibawa mammula mabbicara. Nabbéréyanni Yésus lao ri indo'na. Métau maneng tauwé sibawa mammulani pojiwi Allataala. Makkedai mennang, “Momponi ri tengnga-tengngata séddi nabi iya battowaé! Poléni Allataala untu' passalama'i umma'-Na!” Tassiyani karébaé passalenna Yésus ri sininna Yudéa sibawa ri daéra seddéna. Ana'-ana' gurunna Yohanés napowadanni Yohanés sininna kajajiyangngéro. Nanaobbini Yohanés duwa ana' gurunna, nanasuroi lao ri Puwang Yésus makkutana, “Bapa'ga tau iya maéloé polé situru jancinna Allataala, iyaré'ga harusu'ki mattajeng séddi tau laing?” Laoni ri Yésus iyaro duwaé ana' gurunna Yohanés nakkeda, “Nasuroki Yohanés Paccemmé makkutana ri Bapa', Bapa'ga ritu tau maéloé polé situru jancinna Allataala, iyaré'ga harusu'ki tajeng tau laing?” Iyaro wettué Yésus pajjappai maéga tau, sibawa paddésu' maéga roh maja enrengngé mébbui maéga tau buta makkita. Jaji mappébalini Yésus, “Lisuno lao ri Yohanés namupowadangngi aga muwéngkalinga sibawa muwita: makkita tau butaé, joppa tau péso'é, majjappa tau malasa oli mabbahayaé, maréngkalinga tau mataru-tarué, tuwo paimeng tau maté, sibawa Karéba Madécéng polé ri Allataala riyabbirittangngi lao risining tau kasiyasié. Masennangngi tau iya dé'é gaga alasanna untu' sampéyak-Ka.” Meddé'nana iyaro sining surona Yohanés, mappammulani Yésus mabbicara lao ri tau maégaéro passalenna Yohanés, adan-Na, “Laoko ri padang kessi'é untu' mita aga? Sipong wellaga iya nairié anging? Laoko untu' mita aga? Séddi tau iya mappaké makessingngéga? Sining tau iya mappaké makkuwaéro sibawa tuwoé massennas-sennang monroi ri saorajaé! Jaji massuko untu' mita aga? Untu' mita séddi nabiga? Tongeng, mala lebbi na séddié nabi. Saba' Yohanés ritu naseng ri laleng aya'na Kitta'éwé, ‘Iyanaé suro-Ku,’ adanna Allataala, ‘Maélo-Ka suroi lebbi riyolo naiya Iko, kuwammengngi natimparek-Ko laleng!’ ” Nakkedapa Yésus, “Engngerangngi, ri linoéwé dé'pa naengka tau lebbi battowaé naiya Yohanés Paccemmé. Iyakiya tau iya kaminang baiccu'é ri yelle'na umma'na Allataala, lebbi battowai naiya Yohanés Paccemmé.” Sininna tauwé – muttama' toni sining passinge' simaé – naéngkalingai Yésus powadai gau'éro: mennang ritu sining tau iya puraé turusiwi sining tuntutanna Allataala sibawa maélona ricemmé ri Yohanés. Iyakiya sining tau Farisié sibawa guru-guru agamaé dé' namaélo tarimai rencanana Allataala untu' aléna mennang. Dé' namaélo mennang ricemmé ri Yohanés. Nainappa mabbicarasi Yésus, adan-Na, “Agana harusu' Upasibandingengngi sining tauwé makkekkuwangngéwé? Pada-padai aga mennang? Pada-padai mennang ana'-ana' iya tudangngé ri pasaé; sikonrong gora lao ri laingngé, ‘Riyakkélongekko élong mariyo-riyo, iyakiya dé' mumaélo séré! Riyélongekko élong mabbarata, na iko dé' mumaélo teri!’ Poléi Yohanés Paccemmé – mappuwasai sibawa dé' nainung anggoro – namumakkeda, ‘Nauttamakiwi sétang!’ Poléi Ana'na Tolinoé – manréi sibawa ménung – mumakkeda, ‘Itai iyaro tauwé! Mabuwaja, pammabokeng, sellaona passinge' simaé sibawa sellaona tau madosaé.’ Namuni makkuwaro, amaccanna Allataala pabuttiwi polé ri sininna tau iya tarimaéngngi.” Engka séddi tau Farisi riyaseng Simon, naundangngi Yésus manré. Laoni Yésus ri bolana sibawa tudang manré. Engkato ri kotaéro séddi makkunrai iya tuwoé ri laleng dosaé. Wettunna naéngkalinga makkedaé Yésus manréi ri bolana tau Farisiéro, laoni sibawa tiwi séddi botolo' mallise' minnya' wangi. Tettongngi ri munrinna Yésus ri seddéna ajé-Na sibawa teri nanarica'i ajéna Yésus sibawa uwai matanna. Nainappa narakkoi ajéna Yésus sibawa gemme'na nappa nabau sibawa natirikinna minnya' wangi. Wettunna tau Farisié iya mundangngengngi Yésus naita iyaro gau'é, makkedani ri laleng atinna, “Akkalarapanna iyaé tauwé nabi, tentu Naisseng niga iyaro makkunrai géssaéngngi, sibawa iyaro makkunraié tuwoi ri laleng dosaé!” Nakkeda Yésus lao ri Simon, “Simon, engka maélo Upowadakko.” Nappébali Simon, “Iyyé, Pa' Guru, tapowadani.” Nakkeda Yésus, “Engka duwa tau makkinreng lao ri séddié tau iya mappainreng dowié. Iya séddié makkinreng lima ratu dowi péra', naiya séddié limappulo dowi péra'. Iya duwaro dé' naulléi paleppe'i inrenna, narileddana iyaro inrenna. Nah, niga ri yelle'na iya duwa tauwéro kaminang mamaséiwi matu tau iya mappainrengngéro dowi?” Nappébali Simon, “Ukira-kirai tau iya kaminang maégaé inrenna riledda!” Nappébali Yésus, “Tongeng pallolongemmu.” Nainappa makkita Yésus lao ri makkunraiéro sibawa makkeda lao ri Simon, “Muwitaga iyaro makkunraié? Lao-Ka ri bolamu, nadé' mupassadiya uwai untu' pépaccingiwi ajé-Ku, iyakiya iyaé makkunraié purani napépaccingi ajé-Ku sibawa uwai matanna, enrengngé rakkoiwi sibawa gemme'na. Iko dé' muduppai-Ka sibawa pabbau, iyakiya iyaé makkunraié dé' nappésau bauwi ajé-Ku sipongek-Ku engka kuwaé. Iko dé' mutirikiwi minnya' uluk-Ku, iyakiya iyaé makkunraié purani natiriki minnya' wangi ajé-Ku. Tongeng: pammasé iya battowaéro mappaitangngi makkedaé dosana iya maégaéro riyaddampengenni! Rékko céddé'mi tauwé riyaddampengeng, céddé' tommi mamasé matu.” Nakkeda Yésus lao ri makkunraiéro, “Riyaddampengenni dosa-dosamu.” Sining tau laingngé iya tudangngé manré sibawa Yésus mammulani makkeda séddié lao ri laingngé, “Niga iyaé tauwé naweddingngi maddampengengngi dosaé?” Iyakiya makkedai Yésus lao ri makkunraiéro, “Nasaba mateppe'ko lao ri Iyya, ripassalama'ko. Laono sibawa damé!” Dé' namaitta ri munrinna, laoni Yésus ri kota-kotaé sibawa ri kampong-kampongngé, untu' mabbirittangngi Karéba Madécéngngé makkedaé Allataala mappammulani mapparénta selaku Arung. Iya seppulo duwa ana' gurun-Na maccowé towi silaongengngi. Makkuwatoro siyagangngaré makkunrai iya puraé ripajjappa polé ri roh majaé sibawa lasaé. Iyanaritu Maria iya riyasengngé Magdaléna (pitu sétang pura ripassu polé ri aléna); makkuwatoro Yohana, bainéna Khuza, pegawé saorajana Hérodés; Susana sibawa maéga mupa makkunrai laingngé. Nanabantui mennang Yésus sibawa ana'-ana' gurun-Na sibawa ongkoso' aléna. Matteru-terui sining tauwé lao ri Yésus polé rimaddupa-rupang kota. Na wettunna maégani tau maddeppungeng, nacuritani Yésus lao ri mennang pakkalarapangeng makkuwaéwé: “Engka séddi pangampo lao mampo biné. Wettunna mampo, engka biné teppa ri lalengngé. Sibagiyang naléjja tauwé na laingngé nanréi manu'-manu'. Engkato teppa ri onrong mabbatu-batué. Wettunna massu cura'-cura'na iyaro biné, makelle'i nasaba marakkoi tanana. Engkato biné teppa ri tengngana alekale' maddorié. Iyaro alekale' maddorié tuwoi silaong iyaro biné, sibawa nalimpenginna angkanna dé' naulléi mabbuwa. Iyakiya engkato biné teppa ri tana macommo'é, natuwo sibawa powassélé' buwa leppe' wékkasératu.” Puranana nacurita pakkalarapangengngéro, makkedani Yésus, “Rékko mappunnaiko daucculing, éngkalingai!” Nakkutanana ana'-ana' gurunna Yésus lao ri Yésus aga bettuwanna pakkalarapangngéro. Nappébali Yésus, “Purano riwéréng pammasé untu' missengngi rahasiyana pékkugi Allataala mapparénta selaku Arung. Iyakiya tau laingngé ripaggurui sibawa pakkalarapangeng, kuwammengngi napénessaiwi, iyakiya dé' naissengngi aga iya kajajiyangngé; sibawa maréngkalingai, iyakiya dé' napahang.” “Iyanaé bettuwanna iyaro pakkalarapangngé: Iyaro biné iyanaritu ada-adanna Allataala. Biné iya teppaé ri lalengngé sinrupai sining tau iya méngkalingaéngngi ada-adaéro. Iyakiya poléi Ibillisi' nanarampasa'i iyaro karébaé polé ri atinna mennang, kuwammengngi naaja' namateppe' sibawa ripassalama'. Biné iya teppaé ri onrong iya mabbatu-batué sinrupai tau iya ri wettu naéngkalingana iyaro karébaé, natarimai sibawa masennang atinna. Iyakiya iyaro karébaé dé' nakkure' ri laleng atinna. Cinampe'mi bawang mateppe', ri wettu poléna paccobangngé massakkai mennang. Biné iya teppaé ri tengngana alekale' maddorié sinrupai tau iya méngkalingaéngngi iyaro karébaé, iyakiya bata-batai passalenna atuwonna mennang enrengngé macinnana tuwo massennas-sennang sibawa napojinna ri laleng linoéwé. Iya manennaro sipii mennang angkanna dé' napowassélé' buwa iya matasa'é. Biné iya teppaé ri tana macommo'é sinrupai tau iya méngkalingaéngngi iyaro karébaé, sibawa natarona ri laleng atinna iya makessingngé namalempu. Mattahangngi mennang narapi powassélé' buwa.” “Dé'gaga tau palluwa pajjennangeng nainappa natongko baku, iyaré'ga nataroi ri yawana onrong atinrongngé. Iyakiya nataroi ri yasé'na ajé pajjennangengngé, kuwammengngi tau iya muttama'é naulléi mitai tajanna. Dé'gaga tassubbu dé' napaita matu; sibawa dé'gaga rirahasiyakang dé' naribongkara' sibawa riisseng matu. Rimakkuwannanaro pénessaiwi madécéd-décéng aga muwéngkalinga. Saba' tau iya mappunnaiyénna riwéréngngi matu lebbi maégapa; iyakiya tau iya dé'é nappunnai, céddé iya engkaé ri aléna riyalai matu.” Laoni ri Yésus indo'na sibawa silessu-silessuren-Na, iyakiya dé' naulléi lettu ri Yésus nasaba maéga senna' tau. Na engka séddi tau makkeda ri Yésus, “Pa', indo'-Mu sibawa silessu-silessuremmu Pa' engkai ri saliweng. Macinnai sita Bapa'.” Iyakiya makkedai Yésus lao ri mennang, “Sining tau iya méngkalingaéngngi ada-adanna Allataala sibawa napogau'na, iyanaritu indo' sibawa silessu-silessurek-Ku.” Riséuwaé esso, Yésus sibawa ana'-ana' gurun-Na mallopiwi. Nakkeda Yésus lao ri mennang, “Laono mai talliweng ri tapparengngé.” Najoppana mennang. Mattengngangngi mennang sompe, namatinro Yésus. Tappa natappo' muni anginraja iyaro tapparengngé. Mammulani muttama' uwai ri laleng lopié, angkanna bahaya manenni mennang. Laoni ana'-ana' gurunna Yésus ri Yésus nateddui. Makkedani mennang, “Pa' Guru, Pa' Guru, nakennaki abala!” Moto'ni Yésus nanagera'i angingngé sibawa bombangngé iya siyappo-appo'é. Napajana angingngé sibawa bombangngé, tennang senna'ni iyaro tapparengngé. Nakkeda Yésus lao ri ana'-ana' gurun-Na, “Magi nadé' mumateppe lao ri Iyya?” Héranni mennang sibawa métau. Nakkedana mennang séddié lao ri laingngé, “Niga sitongenna iyaé tauwé, nariturusi paréntana ri angingngé sibawa bombangngé!” Sompe'ni Yésus sibawa ana'-ana' gurunna matteru lettu ri daéra Gerasa ri liwenna Tappareng Galiléa. Wettunna Yésus nonno ri pottanangngé, rilokkaini riséddié tau worowané iya nauttamakiyé roh maja. Iyaro tauwé poléi ri kotaé. Maittani dé' naengka nappakéyang sibawa dé' namaélo monro ri bolaé. Ri gowa-gowaé bawang onrong attampungengngé maélo monro. Wettunna naita Yésus, gorani nainappa suju' ri yolona Yésus sibawa mangobbi, “Yésus Ana'na Allataala Iya Pommatanré! Maélo-Ko magaka? Uwéllauwi aja' mucallaka!” Iyaro tauwé makkeda makkuwairo nasaba Yésus suroi iyaro sétangngé massu polé ri aléna. Biyasani rikuwasai ri sétangngéro, angkanna muni risiyo limanna kuwaéttopa ajéna sibawa ranté nenniya rijagainna tonget-tongeng, naulléto pettuiwi iyaro ranté nainappa ritiwi ri sétangngéro ri padang kessi'é. Nakkutana Yésus lao ri tauwéro, “Niga asemmu?” Nappébali iyaro tauwé, “Asekku ‘Legiun’,” – saba' engka maéga sétang muttama' ri laleng aléna. Iyaro sining sétangngé naéllauwi sibawa masero kuwammengngi dé' naripaddésu' ri Yésus lao ri laleng Balorang Amaténgngé. Ri seddéna onrongngéro engka maéga senna' bawi iya mattengngangngé makkinanré ri émpenna bulu-bulué. Iyaro roh-roh majaé naéllauwi sibawa masero lao ri Yésus kuwammengngi na ripalalo muttama' ri laleng sining bawiéro. Nanasitujuini Yésus. Nanassuna iyaro roh-roh majaé polé ri tauwéro nanauttama ri laleng sining bawiéro. Nainappa iyaro sining bawié larini nanaluppe polé ri wiring balorangngé muttama' ri tapparengngé, natallemme. Naitanana iyaro sining panganrowang bawié aga kajajiyang, larini nanappallebbangengngi iyaro karébaé ri kotaé sibawa ri désa-désaé ri seddéna. Nanassuna sining tauwé untu' mitai aga kajajiyang. Laoni mennang ri Yésus, nanapoléini mennang kuwaro tau iya puraé ripaleppe' polé risining sétangngé tudang ri seddé ajéna Yésus, mappakéyanni sibawa mainge'ni. Métauni mennang. Nacuritani mennang iya mitaéngngi kajajiyangngéro lao risining tauwé pékkugi iyaro tauwé ripajjappa. Nainappa iyaro sininna pabbanuwana Gerasa naéllauni sibawa masero kuwammengngi nasalaiwi Yésus iyaro onrongngé, saba' métau senna' manenni mennang. Jaji ménré'ni Yésus ri lopié maélo lisu. Tau iya puraé ripaleppe' polé risining sétangngéro naéllauwi ri Yésus kuwammengngi naweddingngi maccowé. Iyakiya Yésus suroi lao, adanna, “Lisuno namuwabbirittangngi aga pura napogau' Allataala lao ri iko.” Nanalaona iyaro tauwé mappaissengengngi ri kotaé, aga pura napogau' Yésus lao ri aléna. Wettunna Yésus lisu ri liweng tappareng, masennanni sining tauwé duppaiwi nasaba ritajengngi ri mennang. Napoléna séddi tau, kapalana bola assompangngé ri onrongngéro. Asenna Yairus, suju'ni ri yolona Yésus naéllauwi sibawa masero kuwammengngi nalao Yésus ri bolana, nasaba séddi-séddinna ana' makkunrainna iya seppuloé duwa taung umuru'na céddé'pi namaté. Wettunna Yésus joppa lao ri bolana Yairus, sining tauwé redde'i Yésus polé tulili. Na ri yelle'na engkato séddi makkunrai iya seppuloénna duwa taung malasa maddara. Purani napaccappu sininna appunnangenna untu' mabbura ri dottoro'é, iyakiya dé'gaga mulléi pajjappai. Iyaro makkunraié naddeppérini Yésus polé monri, nanagéssai cappa jumbana. Iyatoro wettué nappésau massu darana iyaro makkunraié. Nakkutana Yésus, “Niga géssaka?” Nassakka maneng tauwé. Nanakkeda Pétrus, “Pa', maéga senna' tau mattulilingiwi Bapa'; naredde'i mennang Bapa'!” Nakkeda Yésus, “Iyakiya engka tau géssaka. Uwisseng saba' engka awatangeng massu polé ri Iyya.” Naissenni iyaro makkunraié makkedaé riissenni pangkaukenna. Jaji laoni sibawa ténré nasuju' ri yolona Yésus. Nacuritani ri yolona sininna tauwé, magi nagéssai Yésus, sibawa majjappana lasana iyatoro wettué. Nakkeda Yésus lao ri makkunraiéro, “Ana'-Ku, nasaba mateppe'ko ri Iyya, majjappako. Laono sibawa salama'.” Ri wettu mabbicarana mupa Yésus, engkasi séddi tau risuropa polé ri bolana Yairus. Makkedai lao ri Yairus, “Maténi Puwang ana' makkunraitta. Aja'na tasussaiwi Bapa' Guru.” Wettunna Yésus naéngkalingaro, makkedani lao ri Yairus, “Aja' mumétau. Ateppe'no bawang pasti majjappa matu ana'mu.” Lettu'nana ri bolana Yairus, dé' napalaloi Yésus muwi séddi tau muttama' sibawa aléna sangadinna Pétrus, Yohanés, Yakobus sibawa indo' ambo'na iyaro ana'é bawang. Teri maneng tauwé sibawa mpating nasaba maténana iyaro ana'é. Iyakiya makkedai Yésus, “Aja' muteri. Iyaro ana'é dé' namaté, matinromi bawang!” Nacawa-cawaini mennang Yésus, nasaba naissenni mennang maténi iyaro ana' makkunraié. Nainappa nakkatenninni Yésus limanna iyaro ana'é sibawa makkeda, “Oto'na na'!” Lisuni nyawana iyaro ana'é, na iyatoro wettué naoto. Purairo nasuroni Yésus mennang mpéréngngi nanré iyaro ana'é. Hérang senna'ni tomatowanna ana'éro. Iyakiya riyattéyangngi ri Yésus nappaissengengngi gau'éro lao ri nigi-nigi. Naobbini Yésus iya seppulo duwa ana' gurun-Na, nainappa nawéréng mennang akuwasang untu' paddésu'i sétangngé sibawa pajjappai lasaé. Nainappa nasuro mennang lao pajjappai tau malasaé sibawa mappallebbangengngi pékkugi Allataala mapparénta selaku Arung. Nakkeda Yésus lao ri mennang, “Aja' mutiwi agi-agi untu' laommu. Aja' mutiwi tekkeng, iyaré'ga sépu-sépu passidekka, iyaré'ga nanré, iyaré'ga dowi, iyaré'ga pakéyang duwallampa. Kégi-kégiko ritarima, onrono kuwaro narapi musalai iyaro kotaé. Nakégi-kégi dé' naritarimako, wettunna musalai kotaéro, akkeppiyangngi awué ri palakajému, selaku papparéngngerang lao ri mennang.” Najoppana ana'-ana' gurunna Yésus, nalao ri désa-desaé untu' mabbirittangngi Karéba Madécéngngé sibawa pajjappai tau malasaé kégi-kégi. Wettunna Hérodés iya mapparéntaé ri Galiléa, naéngkalinga passalenna iya maneng gau'éro, bengngani. Saba' engka makkeda makkedaé tuwoi paimeng Yohanés Paccemmé. Engkato powadai makkedaé momposi paimeng Elia. Tau laingngé powadai makkedaé séddi nabi polé ri nabi-nabié riyolo tuwoni paimeng. Makkedai Hérodés, “Purani usuro tauwé rette'i ulunna Yohanés. Iyakiya iyaé tauwé, niga sitongen-Na? Maégani pura uwéngkalinga passalenna Aléna.” Nanakkuragana Hérodés untu' mitai Yésus. Lisunnana sining surona Yésus, nacuritani lao ri Yésus iya maneng puraé napogau'. Naérani Yésus mennang lao silaong massala ri kota Bétsaida. Iyakiya wettunna sining tauwé naisseng passalenna gau'éro, naccowérini mennang Yésus. Natarimani mennang, nainappa mabbicara lao ri mennang passalenna pékkugi Allataala mapparénta selaku Arung. Enrengngé Napajjappa towi tau malasaé ri yelle'na mennang. Wettunna labuni essoé, poléni iya seppulo duwa ana' gurunna Yésus ri Aléna sibawa makkeda, “Pa' iyaé onrongngé tassubbu. Lebbi kessing muwi Bapa' suroi sining tauwéro lao, kuwammengngi naweddingngi sappa anré sibawa onrong mappéruma ri kampong-kampongngé sibawa désa-désaé ri onrongngéwé.” Iyakiya mappébaliwi Yésus, “Iko bawanna panréi mennang.” Nakkeda ana'-ana' gurunna Yésus, “Lima bawang roti riyappunnai sibawa duwa balé. Harusu'ki'ga lao melli anré untu' iya maneng tauwéwé?” (Engka kira-kira limassebbu tau worowané kuwaro.) Nakkeda Yésus lao ri ana'-ana' gurun-Na, “Suroi iyaé tauwé tudang makkonro-konrongeng kira-kira limappulo tau sikonrong.” Napogau'ni ana'-ana' gurunna Yésus iya napowadaé Yésus lao ri mennang. Nainappa nalani Yésus iyaro limaé roti sibawa duwaé balé, nanaconga ri langié mattarima kasi ri Allataala. Purairo napuwé'-puwé'ni rotié nenniya baléro sibawa liman-Na nainappa nawéréng ana'-ana' gurun-Na untu' nabbagé-bagéyang lao ri tau maégaéro. Manré manenni mennang gangka messo. Nainappa ana'-ana' gurunna Yésus paddeppungengngi lebbinna iyaro anré égana seppulo duwa baku. Riséuwaé esso, wettunna Yésus massempajang alé-aléna, poléni ana'-ana' gurun-Na. Makkutanani Yésus lao ri mennang, “Manuru' adanna tauwé, niga Iyya'é?” Nappébali mennang, “Engka makkeda Yohanés Paccemmé. Engkato makkeda Elia, iya laingngé makkedai sala séddinna nabié riyolo iya tuwoénna paimeng.” Nakkeda Yésus, “Iyakiya manuru' alému, niga Iyya'é?” Nappébali Pétrus, “Bapa' iyanaritu Arung Pappassalama' iya najjanciyangngé Allataala.” Nanakkeda Yésus lao ri ana'-ana' gurun-Na, “Aja' sises-siseng muwappaddissengengngi iyaro gau'é lao ri nigi-nigi.” Makkeda towi Yésus, “Mémeng Ana'na Tolinoé harusu'i manrasa-rasa sibawa riyéwa risining pamimpingngé sibawa kapala-kapala imangngé, enrengngé guru-guru agamaé. Riyunoi matu, iyakiya ri esso matellué ripatuwoi matu paimeng.” Nainappa makkeda Yésus lao ri iya maneng engkaé kuwaro, “Tau iya maéloé maccowéri-Ka harusu'i nallupai apentingeng aléna, naéssangngi sallina esso-esso sibawa matteruna maccowéri-Ka. Saba' tau iya maéloé méwaiwi atuwonna, ateddéngengngi matu atuwong. Iyakiya tau iya makkarobangengngéngngi atuwonna untu' Iyya, napassalama'i matu. Aga sarona lao riséddié tau rékko sininna linoéwé mancajiwi appunnangenna, iyakiya nasolangiwi sibawa ateddéngengngi atuwonna? Rékko masirii tauwé mangakui-Ka sibawa pappagguruk-Ku, Ana'na Tolinoé masiri towi matu mangakuiwi iyaro tauwé ri wettu poléna matti sibawa akuwasan-Na, kuwaéttopa akuwasanna Ambo'é, enrengngé akuwasanna sining malaéka' mapaccingngé! Issenni: polé ri yelle'mu kuwaé engka matu dé' namaté riwettu dé'napa naitai matu Allataala mapparénta.” Kira-kira siminggu purana nappagguruwang Yésus gau'-gau'éro, natiwini Pétrus, Yohanés sibawa Yakobus ri yasé'na séddié bulu untu' massempajang. Ri wettu massempajanna Yésus kuwaro, tappinrani tappa-Na sibawa pakéyan-Na mancaji maputé millakkillang. Iyaro wettué Pétrus sibawa sellao-sellaona matinroni, iyakiya tennasenna-sennani moto, nanaitai Yésus maccahaya sibawa iya duwa tauwéro tettong silaong Yésus. Wettunna iya duwa tauwéro maélo salaiwi Yésus, makkedani Pétrus ri Yésus, “Bapa' Guru, manyameng senna'ki kuwaé. Madécéngenni patettokki tellu kéma: séddi untu' Bapa', séddi untu' Musa, sibawa séddito untu' Elia.” (Makkeda makkuwairo Pétrus, dé' napahangngi aga napowada.) Ri wettu mabbicarana mupa Pétrus, poléni séuwa ellung, nanasalipuriwi mennang. Na polé ri ellungngéro, naéngkalingai saddaé makkeda, “Iyanaé Ana'-Ku iya Upilé. Engkalingai Aléna!” Pajanana saddaéro, naitani Yésus alé-aléna mani kuwaro. Mammekko bawammi ana'-ana' gurunna Yésus passalenna iya manennaro, sibawa dé' nappaissengengngi lao ri niga-niga aga pura naita mennang. Pappa bajanana nonnoni Yésus sibawa iya tellu ana' gurun-Na polé ri buluéro, na poléna tau maégaé ri Yésus. Engka kuwaro séddi tau worowané polé ri tengnga-tengngana tau maégaéro gora, “Pa' Guru, tulukka taitai ana'ku – iyaro bawang alé-aléna ana'ku! Rékko riluruiwi ri roh majaé, tappa gora sibawa matojo watakkaléna angkanna mabbusa bawanna. Iyaro roh-é matteru-terui napanrasa-rasa sibawa dé' namaélo massu polé ri aléna! Purani uwéllau ana'-ana' gurunna Bapa' untu' paddésu'i iyaro roh-é, iyakiya dé' naulléi mennang.” Nappébali Yésus, “Tenniya culé-culé ikoé! Lao sala tongekko iko sibawa dé' mumateppe! Gangka kégi harusu'ka monro sibawakko sibawa sabbara' lao ri iko? Tiwii iyaro ana'mu kumaiyé!” Ri wettu joppana mupa iyaro ana'é lao ri Yésus, iyaro roh majaé naggeppuwangngi iyaro ana'é sibawa napatojoi watakkaléna. Iyakiya nagera'i Yésus iyaro roh-é sibawa napajjappai iyaro ana'é. Nainappa nabbéréyang paimeng lisu iyaro ana'é lao ri ambo'na. Hérang maneng tauwé mitai akuwasanna Allataala iya maraja makkuwaéro. Ri wettu pada hérang manenna mupa sining tauwéro mitai sininna iya napogau'é Yésus, makkedani Yésus lao ri ana'-ana' gurun-Na, “Pénessai madécéd-décéng sibawa aja' muwallupaiwi ada-adak-Kué: Ana'na Tolinoé riyabbéyangngi matu lao ri akuwasanna tolinoé.” Iyakiya iyaro ana'-ana' gurunna Yésus dé' napahangngi iyaro adaé. Iyaro gau'é rirahasiyakangngi lao ri mennang kuwammengngi dé' napahangngi. Iyakiya métaui makkutanangngi iyaro gau'é ri Yésus. Naompona appangéwangeng ri yelle'na ana'-ana' gurunna Yésus passalenna niga polé ri mennang iya kaminang battowaé. Naissengngi Yésus pikkiranna mennang, rimakkuwannanaro malani séddi ana' baiccu nanasuroi tettong ri seddé-Na. Nainappa makkeda lao ri ana'-ana' gurun-Na, “Tau iya tarimaéngngi iyaé ana'é nasaba Iyya, bettuwanna natarima-Ka. Sibawa tau iya tarimaék-Ka, natarima towi iya suroék-Ka. Saba' tau iya kaminang baiccu'é ri yelle'mu, iyanaritu kaminang battowa!” Nakkeda Yohanés, “Puwang, idi mitai tauwé paddésu'i sétangngé ri laleng asenna Puwang, nariyattéyangngi, saba' dé' napolé ri idi.” Nakkeda Yésus lao ri Yohanés sibawa ana'-ana' gurun-Na laingngé, “Aja' muéwai, saba' tau iya dé'é naéwako, bettuwanna maccowéi ri iko.” Wettunna macawé'é senna'ni Yésus riyakka ménré ri surugaé, malani apettung untu' lao ri Yérusalém. Nasuroni tauwé poddiyoloiwi. Sining tau iya Nasuroé lao, muttama'ni riséuwaé kampong ri Samaria kuwaniro napassadiya sini-sininnaé untu' Yésus. Iyakiya iyaro sining tauwé ri kampongngé dé' namaélo tarimai Yésus, saba' manessa senna'i mattengngangngi lao ri Yérusalém. Ri wettunna ana'-ana' gurunna Yésus, iyanaritu Yakobus sibawa Yohanés naisseng passalenna gau'éro, makkedani mennang, “Puwang, maéloki'ga Puwang, riyéllauwi apié nonno polé ri langié untu' pabbinasai sining tauwéwé?” Gilinni Yésus, nanacairiwi mennang. Purairo laoni mennang ri kampong laingngé. Wettunna Yésus sibawa ana'-ana' gurun-Na patterui joppana, engka tau makkeda lao ri Yésus, “Pa', maéloka maccowériwi Bapa' kégi-kégi!” Nappébali Yésus, “Asu ale'é mappunnai kalebbong, sibawa manu'-manu'é mappunnai sarang, iyakiya Ana'na Tolinoé dé' nappunnai onrong léwu.” Nakkeda Yésus lao riséddié tau laing, “Accowéno ri Iyya.” Iyakiya makkedai iyaro tauwé, “Pa', palalona riyolo' lisu untu' kuburu'i ambo'ku.” Nappébali Yésus, “Leppessangngi siya tau maté kuburu'i taunna maté. Iyakiya iko laono namuwappallebbangengngi karébaé makkedaé mappammulani Allataala mapparénta.” Engkato tau laing makkeda, “Pa', maéloka maccowériwi Bapa', iyakiya palaloka lisu riyolo' untu' massimang.” Nakkeda Yésus lao ri tauwéro, “Tau iya mappammulaénna maddakkala, nagiling limonri, dé' nasitinaja mancaji anggotana umma'na Allataala.” Purairo pilési Puwangngé pituppulo ana' guru, nainappa nasuro mennang tadduwa-duwa poddiyoloiwi lao ri tungke' kota sibawa onrong iya maéloé Nalokkai. Adan-Na lao ri mennang, “Engngalang iya maéloé riyéngngala maéga, iyakiya paréngngala iya maéloé méngngalai céddé'mi. Rimakkuwannanaro, éllauno ri Punna dare'é kuwammengngi nakiring paréngngala untu' méngngalai wassélé' tanet-tanen-Na. Nah, joppano! Usuroko pada-pada bimbala'é ri tengnga-tengngana asu ale'é. Aja' mutiwi tase'-tase' iyaré'ga sépu-sépu passidekka, iyaré'ga sapatu. Aja' muléppang ri tengnga laleng untu' mabbéré selleng muwi lao ri niga-niga. Rékko muttama'ko riséddié bola, powadai lebbi riyolo, ‘Tennapodo saléwangengngi ri lalempolaéwé.’ Rékko kuwaro engka tau napoji damé, iyaro béré selleng damému tette'i matu ri alému; rékko dé', gettengngi lisu iyaro béré sellemmu. Onrono bawang riséddié bola. Tarimai aga napatalangekko kuwaro, saba' tau majjamaé mappunnaiwi ha' tarimai sarona. Aja' mukalélé-lélé polé riséddié bola lao ri bola laingngé. Rékko laoko riséddié kota naritarimako kuwaro sibawa madécéng, anréi aga ripatalangekko kuwaro. Pajjappai sining tau iya malasaé ri kotaéro, sibawa birittangngi sining tauwé kuwaro, ‘Dé'na namaitta nappammula matu Allataala mapparénta selaku Arung ri tengnga-tengngamu.’ Iyakiya rékko laoko riséddié kota nadé' naritarimako kuwaro, assuko ri lalengngé namuwakkeda, ‘Muwi awu kotamu iya engkaé maddekké ri ajéta riyakkeppiketto selaku papparéngngerang lao ri iko. Iyakiya issengngi makkedaé macawé'ni wettunna Allataala mappummula mapparénta selaku Arung ri tengnga-tengngamu!’ Engngerangngi, ri Esso Kiyame' lebbi gampangngi riyaddampengeng tau Sodongngé ri Allataala naiya taunna kotaéro!” “Cilakano iko Korazim! Sibawa cilakano iko, Bétsaida! Ebara'na sining anu makalallaingngé iya ripogau'é ri tengnga-tengngamuro purani ripogau' ri Tirus sibawa Sidon, pasti maittani sining tauwé kuwaro natoba' polé ri dosa-dosana mennang, sibawa paké pakéyang mabbarata enrengngé taroiwi awu ulunna mennang. Ri Esso Kiyame', sining tau Tirus-é sibawa Sidongngé lebbi gampangngi matu riyaddampengeng ri Allataala naiya iko. Sibawa iko Kapernaum! Muwasengngiga ripakatanréko lettu ri surugaé? Dé'! Mala riyabbéyakko matu ri ranakaé!” Nanakkeda Yésus lao ri ana'-ana' gurun-Na, “Tau iya méngkalingaékko, naéngkalinga-Ka. Tau iya sampéyangngékko, nasampéyang tok-Ka. Sibawa tau iya sampéyangngék-Ka, nasampéyang towi iya suroék-Ka.” Lisuni sibawa marennu senna' iyaro pituppuloé ana' guru. Nakkeda mennang, “Puwang, sining sétangngé tunru' ri idi rékko riparéntai mennang ri laleng asenna Puwangngé!” Nappébali Yésus, “Uwitai Ibillisi'é sempé polé ri langié pada-pada billa'é. Issenni! Pura Uwérénno akuwasang kuwammengngi mulléi malléjja'i ulaé sibawa dokkéngngé enrengngé lemmaiwi awatangenna sininna balié, nadé' gaga séuwa mulléi cilakaiko. Namuni makkuwaro aja' mumarennu nasaba sining roh majaé tunru' ri iko. Lebbi kessing muwi akkérennuko nasaba riyokii asemmu ri surugaé.” Iyatoro wettué namarennu Yésus nasaba rikuwasaiwi ri Rohna Allataala. Makkedai Yésus, “Ambo', Puwang iya makuwasaiyéngngi langié sibawa linoé! Mattarima kasi'ka ri Iko nasaba iya manennaro Murahasiyakangngi polé ri tau iya maccaé sibawa mappangissengengngé, iyakiya Muwajjellokengngi lao risining tau iya dé'é namacca. Iyanaro pésennangiwi atinna Ambo'. Sininna séuwa-séuwaé pura nabbéréyanni Ambo' lao ri Iyya. Dé' séddi tau missengngi Ana'é, rilainnaé Ambo'é. Dé'to gaga missengngi Ambo'é rilainnaé Ana'é, sibawa lao risining tau iya maéloé nappaddissengeng Ana'é lao ri Ambo'é.” Nagiling Yésus lao ri ana'-ana' gurun-Na, nainappa lao ri mennang bawang makkedai, “Maupe'ko nasaba purani muwita iya muwitaé makkekkuwangngé. Saba' éngngerangngi: Maéga nabi sibawa arung macinna mitai iya muwitaé makkekkuwangngé iyakiya dé' naitai mennang. Macinnai mennang méngkalingai iya muwéngkalingaé makkekkuwangngéwé, iyakiya dé' naéngkalingai mennang.” Namalluruna séddi guru agama maélo palaiwi siyo Yésus. Makkutanai, “Bapa' Guru, aga harusu' upogau' kuwammengngi weddingngi ulolongeng atuwong tongengngé sibawa mannennungengngé?” Nappébali Yésus, “Aga taroki ri laleng Kitta'é? Pékkugi pallolongemmu passalenna gau'éro?” Nappébali iyaro tauwé, “ ‘Amaséiwi Puwang Allataalamu sitonget-tongeng atimmu, sibawa sitonget-tongeng nyawamu, sibawa sininna awatangemmu enrengngé sininna akkalemmu,’ sibawa ‘Amaséiwi pada-padammu pada-pada muwamaséinna alému.’ ” Nakkeda Yésus, “Tongeng pappébalimmu, pogau'ni iyaro, namutuwo matu.” Iyakiya iyaro guru agamaé maéloi pattongengngi aléna. Makkutanani, “Niga iyaro pada-padakku rupa tau?” Nappébali Yésus, “Engka séddi tau worowané nonno polé ri Yérusalém lao ri Yérikho. Ri tengnga laleng riluruiwi ri parampo'é, rirampasa'i sininna nappunnangiyé, ribarasa'i sitengnga maté, nainappa risalai ri lalengngé sibawa maladde' lona. Nasitujuwangngi séddi imang lalo towi ri lalengngé. Wettunna naita iyaro tauwé, lésséni nainappa joppa matteru. Makkuwatoro séddié tau Léwi iya laloé kuwaro; wettunna naita iyaro tauwé, maddeppéni untu' paréssai. Iyakiya léssé towi nainappa joppa matteru. Iyakiya purairo, engka séddi tau Samaria lalo kuwaro. Wettunna naita iyaro tauwé, tassinnau senna'ni atinna nasaba messéi. Naddeppérini iyaro tauwé nainappa napaccingi lona sibawa anggoro enrengngé naurai sibawa minnya', purairo nabebbe'ni iyaro lona. Nainappa napaénré iyaro tauwé ri kaleddé'na, nanatiwii riséuwaé passanggarahang nanajampangiwi. Pappa bajanana, malani duwa dowi péra' nanawéréngngi iyaro punna passanggarahangngé, nanakkeda, ‘Jampangiwi, narékko engka ongkoso'-ongkoso' laing, uwajapi matu rékko lisuka kumaiyé.’ ” Nainappa natutu' Yésus curitaéro sibawa pakkutanaéwé, “Polé ri iya tellu tauwéro, kégana manuru' pallolongemmu mattinda' selaku pada-padanna polé ri tau iya rirampo'éro?” Nappébali iyaro guru agama iya ritanaiyé, “Tau iya puraé tulungngi iyaro tauwé.” Nakkeda Yésus, “Nah, laono namupogau' towi pada-padaéro!” Nainappa Yésus sibawa ana'-ana' gurun-Na patterui joppana, nalettu'na riséuwaé désa. Kuwaro engka séddi makkunrai riyaseng Marta mobbii Aléna lao ri bolana. Marta mappunnai padakkunrai riyaseng Maria. Iyaé Maria tudangngi riseddéna Puwang Yésus méngkalingai sining pappagguruwan-Na. Iyakiya Marta malippu senna'i sibawa jama-jamang ri bolaé. Laoni ri Yésus nakkeda, “Puwang, dé'ga Puwang tapaduliwi Maria naleppessakka majjama alé-aléku bawang? Suroi duwakka!” Nappébali Puwangngé, “Marta, Marta! Bata-batako sibawa malippuko pikkiri'i iyaé sibawa iyaro; padahal iya pentingngé séddi bawang. Na Maria pura napiléni iya makessingngé, iya dé'é nariyala matu polé ri aléna.” Riséuwaé esso, massempajangngi Yésus riséuwaé onrong. Pajanana massempajang, sala séddinna polé ri ana'-ana' gurun-Na makkeda, “Puwang, pagguru tokki massempajang pada-pada Yohanés paggurui ana'-ana' gurun-Na massempajang.” Nakkeda Yésus lao ri mennang, “Rékko massempajakko, powadai makkuwaéwé, ‘Ambo', Iko ritu Allataala iya Séuwaé. Tennapodo risompa-Ko sibawa ripakalebbi. Wérékki esso-esso inanré iya tapparelluwangngé. Addampengengngi dosa-dosata, saba' riyaddampengeng towi tungke' tau iya pasalaé ri idi. Sibawa aja' taleppessakki ateddéngeng ateppereng wettutta ricobai.’ ” Nakkeda Yésus lao ri ana'-ana' gurun-Na, “Ebara'na engka séddi polé ri yelle'mu lao ri bolana sellaona ri tengnga bennié, sibawa makkeda, ‘Sellao, painrengika roti tellubbatu, saba' sellaoku iya engkaé ri laleng allalengenna léppangngi ri bolaé nadé' uwappunnai nanré untu' aléna!’ Akkalarapanna sellao iya mulokkaiyéro makkeda makkuwaiyé polé ri lalempolana, ‘Aja' musussaika! Taccala'ni tange'é sibawa matinrona sibawa ana'-ana'ku. Dé' uwulléi moto' sibawa mpérékko agi-agi.’ ” Nakkeda Yésus patterui, “Napékkugini? Makkeda-Ka, iyyé! Namuni iko iyanaritu sellaona, dé'to namaélo moto' sibawa mpérékko agi-agi. Iyakiya nasaba dé' mumasiri untu' méllau ri aléna matteru-teru, nanaoto'na matu sibawa mpérékko aga iya muwapparelluwangngé. Jaji, makkeda-Ka lao ri iko: Ellauni, nariwérékko matu; sappai, namulolongengngi matu; getto'ni, naritimpakekko matu. Nasaba tau iya méllauwé natarimai matu; tau iya massappaé nalolongengngi matu, sibawa tau iya maggettoé, ritimpakengngi matu tange. Engkaga ri yelle'mu ambo' iya mpéréngngengngi ula ana'na rékko méllauwi balé? Iyaré'ga mpéréngngi dokkéng rékko méllauwi tello? Namuni majako, muwisseng towi mpéréngngi makessingngé lao ri ana'mu. Apalagi Ambo'é ri surugaé! Nabbéréyangngi matu Roh-Na lao ri mennang iya méllauwéngngi ri Aléna!” Riséuwaé esso, Yésus paddésu'i sétangngé massu polé riséddié tau pépé. Massunana iyaro sétangngé, mammulani mabbicara iyaro tauwé. Maéga tau hérang, iyakiya engkato makkeda, “Naulléi paddésu'i sétangngé, nasaba akuwasanna Béélzébul, kapalana sining sétangngé.” Engkato tau laing iya maéloé palaiwi siyo Yésus, méllauwi mennang séuwa anu makalallaing selaku tanrang makkedaé poléi ri Allataala. Iyakiya naissengngi Yésus akkattana mennang. Nakkedana lao ri mennang, “Rékko séuwaé bangsa tabbagé-bagéi ri laleng golongang-golongangngé iya simusué, iyaro wanuwaé dé' natahang. Na séuwaé kaluwarga iya tabbagé-bagé sibawa simusui séddié sibawa laingngé, ancuru'i matu. Makkuwatoro ri laleng akkarungenna sétangngé; rékko séddié kalompo mallagai sibawa kalompo laingngé, maruttungngi matu iyaro akkarungengngé. Makkedako makkedaé Upaddésu'i sétangngé nasaba akuwasanna Béélzébul. Rékko makkuwaitu, nasibawang akuwasanna niga ana'-ana' gurummu paddésu'i sining sétangngéro? Aléna ana'-ana' gurummu pabuttiwi ritu makkedaé pasalako! Iyakiya Iyya, Upaddésu'i sétangngé sibawa akuwasanna Allataala, na bettuwanna iyaro iyanaritu mappammulai Allataala mapparénta ri tengnga-tengngamu. Rékko séddié tau mawatang, massenjata sakke'i jagaiwi bolana, salama' manengngi matu appunnangenna. Iyakiya rékko séddié tau iya lebbi mawatangngé luruiwi sibawa caui, iyaro tau iya lebbi mawatangngé narampasa' manengngi matu senjata iya narennuwangngé punna bolaéro, nainappa nabagé-bagé sininna waramparanna. Tau iya dé'é naccowé ri Iyya, sitonget-tongenna naéwa-Ka, na tau iya dé'é nabantu-Ka, sitonget-tongenna nasolangi jama-jamak-Ku!” “Rékko roh majaé nasalaiwi séddié tau, iyaro roh-é mattuliliwi ri onrong-ngonrong iya marakkoé untu' sappa onrong mappésau, iyakiya dé'gaga nalolongeng. Rimakkuwannanaro, makkedai, ‘Maéloka lisu ri bola iya puraé usalai!’ Wettunna lettu kuwaro, napoléini iyaro bolaé mapaccing sibawa taratoro'. Nainappa lao sibawa tiwi pitu roh laing iya lebbi majaé polé ri aléna. Nainappa muttama' mennang ri laleng tauwéro naonro kuwaro. Angkanna atuwo-tuwonna iyaro tauwé lebbi majapi naiya pammulanna.” Puranana Yésus makkeda makkuwaro, engka séddi makkunrai polé ri yelle'na tau maégaéro makkeda lao ri Yésus, “Masennang tongeng makkunrai iya jajiyangngék-Ko sibawa pasusuék-Ko!” Iyakiya mappébaliwi Yésus, “Lebbi masennappi tau iya méngkalingaéngngi ada-adanna Allataala sibawa pajoppaéngngi!” Wettunna sining tauwé mattulilingiwi Yésus, napatteruni bicaran-Na, adan-Na, “Temmaka jana sining tauwé wettuéwé. Méllauwi mennang anu makalallaingngé, iyakiya dé' nariwéréng matu mennang muwi séddi anu makalallaing, sangadinna anu makalallainna Nabi Yunus. Pékkugi Nabi Yunus sinrupai anu makalallaingngé lao risining tauwé ri kota Niniwé, makkuwatoro Ana'na Tolinoé mancajiwi matu séuwa anu makalallaingngé untu' sining tauwé wettuéwé. Ri Esso Kiyame', Arung makkunrainna wanuwa ri Yattang moto'i matu silaong sining tauwé wettuéwé, nanateppui mennang. Saba' untu' méngkalingai pappagguruwanna Salomo iya maccaé, iyaro Arung makkunraié mallalengngi mabéla senna' polé ri cappa'na linoé. Iyakiya kuwaé makkekkuwangngé engka iya lebbi battowaé naiya Salomo! Ri Esso Kiyame', tuwoi matu pabbanuwana Niniwé silaong sining tauwé makkekkuwangngé, sibawa teppui mennang, saba' iyaro tau Niniwé toba'ni polé ri dosa-dosana wettunna Yunus makkatobba lao ri mennang. Iyakiya makkekkuwangngé kuwaé engka iya lebbi battowaé naiya Yunus!” “Dé'gaga tau tunuwi pajjennangeng nappa nasubbu iyaré'ga natongko sibawa baku. Nataroi matu iyaro pajjennangengngé ri ajé pajjennangengngé, kuwammengngi tau iya muttama'é naitai tajanna. Mataé iyanaritu lampunna watakkalé. Rékko macakkai matammu, sininna watakkalému matajangngi. Iyakiya rékko massalawui matammu, sininna watakkalému mancajiwi mapettakkape'. Rimakkuwannanaro, atutuko, aja' nacakka iya engkaé ri alémuro nancaji mapettang. Rékko sininna watakkalému macakkai, sibawa dé' namapettang muwi saisa', tentu sininna watakkalémuro matajangngi pada-pada natappaé cahaya lampu.” Pajanana Yésus mabbicara, engka séddi tau Farisi mobbii Aléna manré ri bolana. Nalaona Yésus manré kuwaro. Héranni iyaro tau Farisié mitai Yésus manré saba' dé' nabissaiwi liman-Na riyolo' situru peraturanna agamaé. Rimakkuwannanaro makkedani Puwang Yésus ri tau Farisiéro, “Mémeng iko sining tau Farisié biyasana mupaccingiwi mangko'é sibawa penné ri saliwenna bawang, iyakiya ri laleng alému penno sibawa apéddarang enrengngé ja. Madonggoko! Tenniyaga Allataala mébbui iyaro saliwengngé, pura mébbu towi ri lalengngé? Iya engkaé ri laleng mangko'mu sibawa pennémuro, iyanaro harusu' muwabbéréyang lao risining tau kasiyasié. Caraénnaro nallalengi namapaccing maneng matu untu' iko. Cilakano iko sining tau Farisié! Wassélé tanet-tanemmu padaénna ébara'na talasi sibawa inggu enrengngé rampa-rampa laingngé, muwéréngngi tawa seppulona lao ri Allataala, iyakiya adélékengngé sibawa pammasé lao ri Allataala dé' mujampangiwi. Padahal iyaro sitongenna harusu' mupogau', temmallupaiwi laing-laingngétto. Cilakano iko, sining tau Farisié! Mupoji sining onrong malebbié ri laleng bola assompangngé, sibawa mupoji ripakalebbi ri pasaé. Cilakano iko! Pada-padako tampung iya dé'é mésana, iya naléjja'-léjja'é tauwé dé' naissengngi.” Sala séddinna guru agama makkeda ri Yésus, “Pa' Guru, Mupakatuna tokki sibawa ada-adaéro!” Nappébali Yésus, “Cilaka tono iko guru-guru agamaé! Mutuntu'i gau'-gau' mawatangngé ri laleng mabbérému peraturang-peraturang matane'é, iyakiya dé' mumaélo tulungngi muwi céddé lao ri tau iya pajoppaéngngi. Cilakano iko! Muwébburengngi tampung nabi-nabié, iya riyunoé ri néné-nénému. Jaji iko muto mangakuiwi makkedaé musitujuiwi aga iya puraé napogau' néné-nénému saba' mémeng mennang mpunoi iyaro nabi-nabié sibawa iko ritu mébbui tampunna. Iyanaro saba'na nakkeda Apanrénna Allataala, ‘Maélo-Ka kiring lao ri mennang nabi-nabi sibawa sining suro-Ku; sibagiyang nauno matu sibawa sibagiyang nacalla!’ Napogau'i Allataala iyaro kuwammengngi narihukkung sining tauwé wettuéwé nasaba abbunowang iya napogau'é lao ri sininna nabié sipongenna ripancaji linoé, mappammulai riyunona Habél lettu riyunona Zakharia, iya kajajiyangngé ri pallawangenna mézbaé sibawa Bolana Puwangngé. Ateppe'no: Sining tauwé wettuéwé pasti rihukkungngi nasaba iya manennaro. Cilakano iko, guru-guru agamaé! Goncinna untu' timpa'i tange'na pangissengengngé ritaroi ri iko, iyakiya dé' mumaélo muttama' ri laleng untu' sappai iyaro pangissengengngé. Sibalé'na mulawa-lawaiwi sining tau iya makkuragaé muttama' ri lalemmu!” Wettunna Yésus nasalai iyaro onrongngé, guru-guru agamaé sibawa sining tau Farisié nacella senna'i Yésus. Mammulani mennang makkuragaiwi Yésus kuwammengngi namaélo mabbicara maéga passaleng. Nanapénessai towi mennang madécéd-décéng untu' tikkengngi iya tappasalaé Napowada. Massebbu-sebbu tau siredde-redde angkanna engka riléjja-léjja ajéna. Ri wettu makkapulunna mupa iyaro tauwé, makkedani Yésus lao ri ana'-ana' gurun-Na, “Atutuko lao ri raginna tau Farisié, akkatta-Ku, amunapékenna mennang. Dé'gaga tassubbu dé' napaita matu, sibawa dé'gaga rirahasiyakang iya dé'é naribongkara' matu. Iya mupowadaé ri wennié, riyéngkalingai matu ri essoé; sibawa iya Muwabbicikengngé ri daucculinna tauwé ri laleng bili' tattutu'é, riyappallebbangengngi matu silowang-lowanna.” “Engngerangngi, sellao-sellao-Ku! Aja' mumétau lao ri mennang iya mpunoéngngi watakkalé iyakiya dé' naulléi mappogau' lebbi naiyaro. Madécéngengngi Upaitakko niga harusu' muwétauri. Etauko ri Allataala! Saba' purana mabbuno, makuwasa towi buwangngi ri laleng ranakaé! Ateppe'no, Aléna ritu harusu' muwétauri. Limakkaju dongi ribalu' duwa dowi iya kaminang baiccu'é. Namuni makkuwaro dé' séddi nallupai Allataala. Gemme' ri ulummu pura ribilang manetto, rimakkuwannanaro aja' mumétau; lebbi mangke'ko naiya sining dongiéro!” “Engngerangngi madécéd-décéng: Tau iya mangakué ri yolona tau maégaé makkedaé ana' guruk-Kui, riyangakui towi matu ri Ana'na Tolinoé ri yolona sining malaéka'na Allataala. Iyakiya tau iya massakkaé ri yolona tau maégaé makkedaé ana' guruk-Kui, riyassakkareng towi matu ri Ana'na Tolinoé ri yolona sining malaéka'na Allataala. Rékko engka napowada tauwé iya méwaéngngi Ana'na Tolinoé, weddingngi riyaddampengeng; iyakiya rékko napakatunai Rohna Allataala, dé' nawedding riyaddampengeng. Rékko ritiwiko risining bola assompangngé untu' riadéléki ri yolona pamaréntaé iyaré'ga tomakuwasaé, aja' mubata-bata passalenna pékkugiko harusu' méwaiwi alému iyaré'ga passalenna aga harusu' mupowada. Saba' aga iya harusu'é mupowadaro nappagguruwangngi matu Rohna Allataala ri iko ri wettunna.” Engka séddi tau polé ri yelle'na tau maégaéro makkeda ri Yésus, “Bapa' Guru, cobasai Bapa' suroi silessurekku mpérékka sibagiyang polé ri waramparang nasalaiyé ambo'ta.” Nappébali Yésus, “Eh saudara, niga makka-Ka mancaji haking iyaré'ga pabbagé mana ri yelle'ta sipadduwa?” Nainappa lao ri sininna tauwé iya engkaé kuwaro makkedai Yésus, “Atutuko sibawa atike'ko, aja' namumangowa. Saba' atuwonna rupa tauwé dé' nataggattung polé ri asugirenna, namuni tabbollompollongngi waramparanna.” Nainappa nacuritani Yésus iyaé pakkalarapangngé, “Engka séddi tau sugi. Iya mappunnaiyé tana iya mappapolé maéga wassélé'. Iyaro tau sugié mamulani mappikkiri' ri laleng atinna, ‘Dé'na gaga onronna wassélé tanaku. Agana akkalekku makkekkuwangngé?’ Nainappa mappikkiri'si sibawa makkeda lao ri aléna, ‘Nah, engka akkalekku; maéloka massuro ruttungngi sining gudakku nainappa upatettong iya lebbi battowaé. Kuwaniro matu utaro sininna gandokku sibawa barab-barakku laingngé. Nainappaka makkeda lao ri aléku: Maupe'ko! Sininna iya makessingngé, uwappunnangini dé'na matu nacappu mattaut-taung ittana. Appésauno makkekkuwangngé! Manré ménunno sibawa péneddingini atuwommu!’ Iyakiya makkedai Allataala lao ri tauwéro, ‘Eh donggo! Iyato wennié mumaté matu, na nigana matu lolongengngi sininna asugireng iya puraé mupaddeppungengngi alému?’ Makkuwaniro jajinna tungke' tau iya makkuragaé mancaji sugi untu' aléna, iyakiya dé' nakkuraga mancaji sugi ri matanna Allataala.” Nakkeda Yésus lao ri ana'-ana' gurun-Na, “Iyanaro saba'na Uwakkeda, ‘Aja' mubata-bata passalenna atuwommu, iyanaritu aga iya maéloé muwanré, iyaré'ga iya maéloé mupaké.’ Atuwongngé iyanaritu lebbiwi naiya anré, sibawa watakkalé lebbiwi naiya pakéyangngé. Pénessaiwi kao-kaoé! Dé' nattaneng mennang, dé' naéngngala, dé'to nappunnai gudang iyaré'ga lappo. Iyakiya ripiyarai mennang ri Allataala! Iko lebbi mangke'ko naiya manu'-manu'éro! Nigana ri yelle'mu iya ri laleng abata-batanna mullé palampériwi umuru'na namuni céddé? Rékko iyaro gau' baiccu'é bawang dé'na mulléi pogau'i, magi mubata-bata passalenna gau'-gau' laingngé? Pénessaiwi pékkugi bunga-bunga bakungngé tuwo; iyaro bunga-bungaé dé' najjama, dé'to natennung. Iyakiya namuni Arung Salomo iya sugi makkuwaéro dé'to napaké pakéyang iya siggelloé bunga-bungaéro! Wellaé ri padangngé tuwoi essoéwé napappa bajana cappui ritunu. Iyakiya Allataala bélo-béloiwi iyaro wellaé magello makkuwaro! Apalagi iko! Iyakiya iko makurang teppe'ko! Jaji, aja' mubata-bata iyaré'ga bengnga passalenna aga maélo muwanré sibawa muwénung. Gau'-gau' pada-padaéro nalellungngi tau iya dé'é naissengngi Allataala. Padahal naisseng Ambo'mu makkedaé muwapparelluwang manengngi iyaro. Iyakiya harusu'ko makkuraga kuwammengngi naparéntai Allataala atuwommu, naiyaro laingngé nawéréng tokko matu Allataala.” “Iko iya céddé'mi jumellamu, aja' mumétau! Saba' masennang Ambo'mu mpérékko barakka polé ri Apparéntan-Na. Balu'ni appunnangemmu, namuwéréngngi ellinna tau kasiyasié. Ebburengngi alému tase'-tase' iya dé'é nawedding malaung, iyanaritu waramparang ritaroé ri surugaé. Iyaro waramparangngé dé' naulléi teddéng nasaba dé' naulléi pangaé malai sibawa dé' naulléi solangi karat. Saba' kégi waramparammu, kuwa towitu atimmu!” “Jaga-jagako moloiwi tungke' gau'. Harusu'ko tuli sadiya mappakéyang sibawa pura ripalluwa pajjennangemmu, pada-pada sining pattumani iya sadiyaé tajengngi puwanna lisu polé ri abottingengngé. Rékko lisui iyaro puwangngé sibawa getto'i tange'é, masitta'i matu mennang timpa'i tange'é. Temmaka upe'na sining pattumani iya ripoléiyé mattajeng ri wettu poléna puwanna. Ateppe'no: iyaro puwanna sadiya-sadiyani matu nanasuroi sining pattumaninnaro tudang, nanatumaningiwi mennang. Temmaka upe'na sining pattumaniéro rékko ripoléiwi mennang ri puwanna sadiya-sadiya mattajeng, namuni poléi ri tengnga bennié iyaré'ga lebbi tengnge'pi naiyaro! Engngerangngi iyaé! Akkalarapanna naissengngi punna bolaé tetté siyaga napolé pangaé, jagai matu kuwammengngi dé' nauttama pangaé ri lalempolaé. Rimakkuwannanaro harusu' tokko sadiya-sadiya, nasaba poléi matu Ana'na Tolinoé ri wettu dé'é musenna-sennai.” Nakkutana Pétrus, “Puwang, Mupattujugi ri idi Puwang iyaro pappagguruwangngé iyaré'ga lao ri sininna tauwé?” Nappébali Puwangngé, “Niga pattumani iya matinulué sibawa maccaé angkanna riyakka ri puwanna mancaji kapala lao risining pattumani laingngé kuwammengngi nawéréngngi nanré ri wettunna? Temmaka senna'na pattumaniéro rékko lisui puwanna, naripoléiwi pogau'i jama-jamanna! Ateppe'no: Iyaro puwanna nappaddettangengngi matu sininna waramparanna lao ri pattumaniéro. Iyakiya rékko makkedai iyaro pattumanié ri laleng atinna, ‘Maitta mupa nappa lisu puwakku,’ nabarasa'i sininna pattumanié enrengngé manré ménungngi gangka mabo', nanalisu matu puwanna ri esso sibawa wettu iya dé'é nasenna-sennai. Nariajara' tongeng matu iyaro pattumanié masero senna' ri puwanna enrengngé ripappada-padai totona sining tau iya dé'é namatinulu ri Allataala. Pattumani iya missengngéngngi élona puwanna, iyakiya dé' nasadiya-sadiya sibawa dé' napogau'i élona puwannaro, ribarasa'i matu sibawa maladde'. Iyakiya pattumani iya dé'é naissengngi élona puwanna, nanapogau'i iya salaé angkanna harusu'i ribarasa', ribarasa'i matu sibawa maladde'. Saba' tau iya maégaé pura riwéréngngi, maéga towi rituntukengngi matu polé ri aléna. Sibawa tau puraé ripaddettangi maéga, maéga towi rituntu' matu polé ri aléna.” “Polé-Ka untu' paompo anré api ri linoé. Temmaka kessinna rékko malluwa'ni apinna! Engka mupa anrasa-rasang masero iya harusu'é Ujoppai. Namasussa senna' atik-Ku riwettu dé'napa nakajajiyang. Muwaseggi polé-Ka untu' tiwi adaméngeng ri linoéwé? Dé', tenniya adaméngeng sangadinna appangéwangeng. Mappammulai makkekkuwangngéwé, kaluwarga iya engkaé lima tau siéwai matu, tellu siéwa duwa, iyaré'ga duwa siéwa tellu. Ambo'é méwai matu ana' worowané sibawa ana' worowané méwai matu ambo'na. Indo'é méwai ana'na makkunraié sibawa ana' makkunraié méwai indo'na. Matuwa makkunraié méwai ménéttu makkunrainna, sibawa ménéttu makkunraié méwai matu matuwa makkunrainna.” Makkeda towi Yésus lao ri tau maégaé, “Rékko muwitai ménré ellungngé ri yajang, matteruko makkeda, ‘Maéloi bosi.’ Na bosi tongengngi. Rékko mupéneddingiwi angingngé polé ri yattangngi, makkedako, ‘Maéloi mapella.’ Na mapella tongengngi. Mupoji mabbonga-bonga! Mullé pattujuiwi wettu bosié iyaré'ga pellaé ri laleng makkitamu ri langié sibawa ri linoé. Magi tanra-tanranna esso kiyame' dé' mulléi péttujuiwi?” “Magi natenniya alému pettuiwi aga tongengngé? Rékko engka tau mapparapekekko ri pangadilangngé, makkuragako siullé-ullému untu' puraiwi iyaro parakaraé sibawa tauwéro ri wettummu mattengnga laleng mupa. Rékko dé', nassarénréngekko matu lao ri yolona hakingngé, na hakingngé mabbéréyakko matu lao ri polisié, na polisié puttama'ko ri laleng tarungkué. Ateppe'no! Dé' mumassu matu polé ri tarungkué riwettu dé'napa muwajai iya ridendangengngékko.” Iyaro wettué engka tau curitangngi Yésus passalenna siyagangngaré tau Galiléa riyuno ri Pilatus, wettunna mennang makkasuwiyangeng akkarobangeng lao ri Allataala. Naéngkalingana curitaéro, makkedani Yésus, “Nasaba iyaro sining tau Galiléaé riyuno makkuwairo, muwasengngiga iyanaro buttinna mennang lebbi madosai naiya maneng tau Galiléa laingngé? Dé' sises-siseng! Iyakiya éngngerangngi: Rékko dé' mutoba' polé ri dosa-dosamu, maté maneng tokko matu pada-pada mennang. Pékkugi towi seppulo aruwa tau iya maté ri Siloam, wettunna nageppa manara mennang? Muwasengngiga iyaro mappaitangngi lebbi madosai mennang naiya sininna tau laingngé iya monroé ri Yérusalém? Dé' sises-siseng! Siseppi Upowada: Rékko dé' mutoba' polé ri dosa-dosamu, maté maneng tokko matu pada-pada mennang.” Purairo nacurita towi Yésus pakkalarapangngéwé, “Engka séddi tau mappunnai pong ara ri dare anggoro'na. Riséuwaé esso laoni sappa buwa ara ri pong ngajuéro, iyakiya dé'gaga nalolongeng muwi sibatu. Jaji, makkedai lao ri paddare'na, ‘Itai, telluttaunni poléka sappa buwa ara ri pong araéwé, iyakiya dé'gaga ulolongeng muwi sibatu. Tubbang bawanni pong araéro! Paccappu bawammi anré polé ri tanaé!’ Iyakiya mappébaliwi iyaro paddare'é, ‘Leppessanni tuwo taungngéppaé, Puwang. Maéloka béngkungngi tanaé mattulilingiyéngngi sibawa pupu'i. Ajakké mabbuwai matu taung mangoloé. Iyakiya rékko dé', weddinni Puwang tassuro tubbang.’ ” Riséuwaé esso Saba', mappaggurui Yésus riséuwaé bola assompang. Kuwaro engka makkunrai iya seppuloénna aruwa taunna malasa, nasaba engka roh maja ri laleng aléna. Iyaro makkunraié bukku'ni sibawa dé' sisenna naulléi tettong lempu. Wettunna Yésus mitai, gorani lao ri makkunraiéro, “Indo', leppe'no polé ri lasamu!” Nainappa napalénne limanna Yésus ri yasé'na makkunraiéro, na iyatoro wettué natettong lempu nanapojiwi Allataala. Macaini iyaro kapalana bola assompangngé, nasaba mappajjappai Yésus ri esso Saba'é, rimakkuwannanaro makkedai lao risining tauwé, “Engka enneng essona untu' majjama; poléno ri esso-essoéro untu' mappajjappa, aja' na ri esso Saba'é!” Nappébali Puwangngé, “Munapé'ko iko! Ri esso Saba'é sininna tauwé paleppe'i sapinna iyaré'ga kaleddé'na polé ri wakkéna sibawa natiwii massu untu' paénungngi. Makkekkuwangngé engka kuwaé séddi makkunrai wija-wijanna Abraham, iya seppuloénna aruwa taung ittana risiyo ri Ibillisi'. Dé'ga nawedding ripaleppe' polé ri passiyonaro ri esso Saba'é?” Iyaro pappébalinna Yésus pakasiri senna'i sining balinna Yésus; iyakiya sininna tau laingngé masennangngi mitai anu makalallaingngé iya napogau'é Yésus. Nakkutana Yésus, “Rékko mapparéntai Allataala, pékkugi keadaanna? Aga wedding Upappadaiyangngi? Keadaanna pada-pada pakkalarapang mangoloéwé. Séddi batu sawi nalai séddié tau nainappa nataneng ri dare'na. Iyaro batu sawi-sawié tuwoi namancaji pong ngaju, naébbuna sarang manu'-manu'é ri takké-takkéna pong ngajuéro.” Siseppi Yésus makkutana, “Rékko mapparéntai Allataala, agana wedding Upappadaiyangngi keadaana? Keadaanna pada-padai ragié iya nalaé séddié makkunrai nainappa napasilama patappulo liter labbu, angkanna sawé maneng.” Ri laleng allalengenna Yésus lao ri Yérusalém laloi ri kota-kotaé sibawa ri kampong-kampongngé nanappagguruto. Naengkana tau makkutana ri Aléna, “Pa', céddé'miga bawang tau ripassalama' matu?” Nappébali Yésus, “Akkuragako muttama' lalo ri tange' macipié. Saba' éngngerangngi! Maéga tau makkuraga muttama' iyakiya dé' naulléi. Wettunna moto punna bolaé sibawa nasului tange'na, tettokko ri saliweng namumammula maggetto-getto sibawa makkeda, ‘Puwang, timpakekki tange!’ Nappébali matu iyaro Puwangngé, ‘Dé' uwissekko, polé kégao!’ Namumappébali matu, ‘Puraki manré ménung sibawa Puwang, sibawa pura towi Puwang mappagguru risining lalenna kotata!’ Iyakiya makkedai matu iyaro Puwangngé, ‘Dé' uwissekko polé kégao. Addésu'no, iko pogau'éngngi majaé!’ Ri wettu muwitana Abraham, Ishak sibawa Yakub enrengngé iya maneng nabi-nabié mariyo-riyo ri laleng Lino Barunna Allataala, teriko matu sibawa manrasa-rasa nasaba rirukkako massu. Pada poléi matu sining tauwé ri alau sibawa ri yajang, manorang sibawa yattang, enrengngé mariyo-riyo matu ri laleng Lino Barunna Allataala. Sitongenna, engka tau poddimonri mancaji matu pammulang, na engka tau pammulang mancajiwi matu poddimonri.” Iyatoro wettué, engka siyagangngaré tau Farisi lao ri Yésus sibawa makkeda, “Aja' muwonro kuwaé! Laoko ri onrong laingngé, saba' maéloi Hérodés mpuno-Ko.” Nappébali Yésus, “Laono namupowadangngi tau iya dé'é nakkégunaro, ‘Iyaé essoé sibawa baja upaddésu'i sétangngé sibawa pajjappai tau malasaé, iyakiya ri esso matellué maélo-Ka pattépui jama-jamak-Ku.’ Namuni makkuwaro harusu'-Ka patterui joppa-Ku iyaé essoé, baja sibawa sangadi, saba' maja séddié nabi riyuno ri saliwenna Yérusalém. Yérusalém! Yérusalém! Muwunoi nabi-nabié! Mugenrungiwi batu sining surona Allataala gangka maté! Wékkasiyagani macinna-Ka paddeppungengngi sininna pabbanuwamu pada-pada indo' manu'é karokongiwi ana'-ana'na ri yawana pannina, iyakiya dé' mumaélo! Rimakkuwannanaro dé'na namaélo Allataala sibawakko. Issenni, mappammulai makkekkuwangngé dé'na muwita-Ka matu, narapiko matu makkeda, ‘Ribarakkakiwi Aléna iya polé ri laleng asenna Puwangngé.’ ” Riséuwaé esso Saba' laowi Yésus manré ri bolana séddié tomariyolona tau Farisié. Naripénessaina tonget-tongeng Yésus kuwaro risining tauwé. Napoléna ri Yésus séddi tau iya malasa boro-boroé ajéna sibawa limanna. Nakkutanana Yésus lao ri guru-guru agamaé sibawa sining tau Farisié iya engkaé kuwaro, “Manuru' hukkunna agamata, weddikki'ga pajjappai tauwé ri esso Saba'é iyaré'ga dé'?” Mammekko bawammi guru-guru agamaé sibawa sining tau Farisié. Nainappa naobbi Yésus iyaro tauwé nanapajjappai, nainappa nasuro lao. Purairo makkedani Yésus lao risining tauwé, “Akkalarapanna engka séddi tau polé ri yelle'mu mappunnai séddi ana' iyaré'ga sikaju saping iya sempé'é ri bujungngé ri esso Saba'é, dé'ga mumasitta gettengngi massu iyaro ana'é iyaré'ga sapingngé ri iyatoro essoé?” Iyakiya dé' séddi tau mulléi baliwi Yésus passalenna gau'éro. Naitai Yésus engka sining topolé iya pilééngngi sining onrong iya kaminang makessingngé. Rimakkuwannanaro nawérénni iyaé pappagguruwangngé lao ri iya maneng mennang. “Rékko riundakko ri pésta abottingengngé, aja' mulao tudang ri kadéra malebbié. Saba' ajakké engka tau laing iya lebbi pentingngé naiya iko iya riundangngétto, angkanna punna bola iya puraé mundang duwakoro, tarapassai lao ri iko nakkeda, ‘Taddampengekka, iyaé onrongngé pura ripassadiyangengngi iyaro topolé.’ Na tarapassano sibawa masiri senna' tudang ri onrong kaminang mariyawaé. Rimakkuwannanaro, rékko riundakko, piléi onrong iya kaminang marimonrié, kuwammengngi napolé punna bolaé sibawa makkeda ri iko, ‘Sellao, kumaiyé tatudang ri onrong iya lebbi makessingngé.’ Narimakkuwannanaro ripakalebbiko matu ri yolona sininna topolé iya laingngé. Saba' tungke' tau iya pakatanréngngi aléna ripakariyawai matu, iyakiya iya pakariyawaéngngi aléna ripakatanréi matu.” Nakkeda Yésus lao ri punna bolaé, “Rékko muwobbii tauwé manré esso iyaré'ga manré wenni, aja' muwobbii sellaomu iyaré'ga silessuremmu, iyaré'ga sumpulolomu, iyaré'ga bali bolamu iya sugié. Saba' naobbi tokko matu, narimakkuwannanaro lolongekko pamale' polé ri pangkaukemmuro. Jaji rékko mappéstako, undangngi tau kasiyasié, tau sala-salangngé, tau péso'é sibawa tau butaé. Ribarakkakiko matu, saba' iyaro sining tauwé dé' naulléi mpale'i akessingemmu. Allataala matu mpale'i akessingemmu ri wettu ripatuwona paimeng polé ri amaténgngé sining tau makessingngé.” Wettunna sala séddinna iya sisamaé manré kuwaro naéngkalinga adanna Yésus, makkedani, “Maupe' senna'i tau iya manré matu sisama Allataala rékko poléi selaku Arung!” Iyakiya makkedai Yésus lao ri tauwéro, “Séuwa wettu engka séddi tau mappésta marowa sibawa naundanna maéga tau. Narapinana wettunna ripammulai pestaéro, iyaro tauwé nasuroni pattumaninna lao risining naundangngé sibawa makkeda, ‘Laoni', saba' sadiya manenni!’ Iyakiya sininna mennang, tassédi-séddi méllau addampeng. Iya pammulangngé makkedai lao ri pattumaniéro, ‘Silalona mellika tana, naparelluka lao paréssai. Taddampengekka.’ Iya laingngé makkedai, ‘Silaloku melli limangngajuwa saping, namaéloka cobai iyaro sining sapingngé. Taddampengekka.’ Iya laingngéssi makkedai, ‘Silaloku botting, rimakkuwannanaro dé' udapii lao.’ Nalisuna iyaro pattumanié nanapowadangngi punna péstaéro. Namacai senna'na Puwannaro, nanakkeda lao ri pattumaninna, ‘Apperi-perino namulao risining lalengngé sibawa loro-loronna kotaé. Tiwii lao mai tau kasiyasié, tau sala-salangngé, tau butaé sibawa tau péso'é.’ Nainappa makkeda iyaro pattumanié, ‘Puwang, purani ripogau' parénta Puwang, iyakiya maéga mupa onrong.’ Nakkeda Puwannaro, ‘Laono ri watattana-watattanaé sibawa lorong-lorongngé ri saliweng kota, namudessa'i sining tauwé napolé, kuwammengngi napenno bolaku. Engngerangngi! Dé' séddi tau polé ri yelle'na sining undangeng puraé riundang péneddingiwi matu nanréna péstakué!’ ” Maéga tau maccowé joppa silaong Yésus. Nagiling Yésus sibawa makkeda lao ri mennang, “Rékko poléi tauwé ri Iyya, iyakiya lebbi namaséiwi indo'na, ambo'na, bainéna, ana'-ana'na, silessu-silessurenna, mala alénato, dé' nawedding mancaji ana' guruk-Ku. Tau iya dé'é namaélo méssangngi sallina sibawa maccowéri-Ka, dé' naulléi mancaji ana' guruk-Ku. Rékko engka séddi polé ri iko maélo patettong séddi manara, tentu tudangngi matu riyolo' bilangngi ongkoso'na kuwammengngi naissengngi genne' muga dowina untu' pattepui iyaro manaraé iyaré'ga dé'. Saba' rékko dé' naulléi pattépui, padahal purani riyébbu pandamenna, sininna tau mitaéngngi jama-jamanna cawa-cawaiwi matu. Makkedai matu mennang, ‘Eh, mappatettongngi tauwé iyakiya dé' naulléi pattépui!’ Rékko séddié arung iya mappunnaiyé seppulo sebbu tentara maélo mammusu sibawa arung laingngé iya mappunnaiyé duwappulo lima sebbu tentara, tentu iyaro arungngé tudangngi pasitimbangngi riyolo', genne' muwaga awatangenna untu' méwai iyaro balinna. Rékko naissengngi makkedaé dé' nacuku' awatangenna, tentu ri wettu mabélana mupa iyaro balinna, kiringngi matu suro untu' méllauwi sidamé.” Paccappurenna Yésus makkedai, “Makkuwatoro iko. Dé' séddi polé ri iko mulléi mancaji ana' guruk-Ku, rékko dé' nappésonangngi sini-sininnaé.” “Iyaro pejjé' makessing, iyakiya rékko makawai, weddigga ripejjéi paimeng? Dé'na gaga gunana, muwi untu' dare'é iyaré'ga untu' pappakacommo. Jaji riyabbéyang bawang. Rékko mappunnaiko daucculing, éngkalingai!” Riséuwaé esso, maéga passinge' sima sibawa sining tau iya riyangga' dé'é namakessing ri masaraka'é, polé méngkalingai Yésus. Sining tau Farisié sibawa guru-guru agamaé mammulani mannoko'-noko'. Makkedai mennang, “Cih, iyaé tauwé natarimai sining tauwé iya dé'é namakessing sibawa mala manréi sisama mennang!” Rimakkuwannanaro nacuritai Yésus pakkalarapangngéwé lao ri mennang, “Akkalarapanna engka séddi ri yelle'mu mappunnai sératu bimbala', nateddéng sikaju – aga napogau' matu? Pasti nasalaiwi matu iyaro aséraé pulona aséra kajunna ri padangngé, nalao sappai iyaro teddéngngé gangkanna nalolongeng. Narékko nalolongenni paimeng iyaro bimbala'é, makkumani senna'na angkanna naéssanni iyaro bimbala'é ri salangkanna, nanatiwii lisu. Nainappa naobbi sining sellaona sibawa bali-bali bolana, nanakkeda, ‘Laono mai tamariyo-riyo. Bimbala'ku iya teddéngngé, ulolongenni paimeng!’ Nah, makkuwaniro ri surugaé, engka ariyo-riyong iya lebbi battowaé nasaba toba'na séddié tau madosa, naiya lao ri aséraé pulona aséra tau iya makessingngé dé'é naparellu toba'.” “Iyaré'ga ébara'na engka séddi makkunrai mappunnai seppulo dowi péra', nateddéng séddi – aga napogau'? Napalluwa'i pajjennangengngé sibawa naseringngi bolana enrengngé massappai kégi-kégi narapi nalolongeng iyaro dowié. Ri wettu nalolongenna iyaro dowié, naobbini sellao-sellaona enrengngé bali-bali bolana, nanakkeda, ‘Marennu senna'ka ulolongenni paimeng dowiku iya teddéngngé. Laono mai tamariyo-riyo!’ Makkuwatoniro malaéka'na Allataala marennui rékko engka séddi tau maja toba' polé ri dosa-dosana. Ateppe'no!” Nanakkedasi Yésus, “Engka séddi ambo' mappunnai duwa ana' worowané. Makkedai maloloé lao ri ambo'na, ‘Ambo', wérékka makkekkuwangngéwé attawangekku polé ri asugiretta!’ Nanabagéni ambo'na iyaro asugirenna ri iya duwa ana'na. Siyagangngaré esso ri munrinna iyaro ana' maloloé nabalu'ni mana attawangenna nanalao ri wanuwa iya mabélaé. Nakkuwanaro nallabo-labowang dowina sibawa massennas-sennang. Cappu manennana dowina, poléni akkadéreng maseroé ri wanuwaéro, angkanna mammulani mappeddi-peddi. Nalaona majjama riséddié pabbanuwa kuwaro, iya suroéngngi lao ri dare'é monrowangngi bawinna. Namakkuwa mani lupuna angkanna macinnani lisekiwi babuwana sibawa nanréna sining bawiéro. Namuni makkuwaro dé' séddi tau mpéréngngi inanré. Angkanna mainge'ni nakkeda, ‘Sining tau iya majjamaé ri ambo'ku tabbollompollong inanréna, na iyya kuwaé mawéka maté temmanré! Maéloka joppa lao ri ambo'ku sibawa makkeda ri aléna: Ambo', madosaka lao ri Allataala sibawa ri Ambo'. Dé'na nasitinajaka riteppu ana'na Ambo'. Angga'ni séddi pajjamana Ambo'.’ Najoppana lisu ri ambo'na. Mabéla mupi polé ri bolaé, riitani ri ambo'na. Nalarina ambo'na lao méwai sita, nanakaddaowi sibawa nabauwi. Nanakkeda iyaro ana'é, ‘Ambo', madosaka lao ri Allataala sibawa ri Ambo'. Dé'na nasitinajana riyobbika ana'na Ambo'.’ Iyakiya ambo'na naobbii sining pattumaninna namakkeda, ‘Asitta'ko! Alai pakéyang kaminang magelloé namupappakéngengngi. Pasangiwi ciccing ri jarinna, sibawa sapatu ri ajéna. Purairo alako ana' saping macommo'é namugéréi. Maéloki manréi sibawa mariyo-riyo. Saba' iyaé ana'ku maténi, namakkekkuwangngé tuwosi; teddénni, namakkekkuwangngé rilolongenni paimeng.’ Nappammulana mennang mappésta. Na iyaro wettué, ana' macowana engkai ri dare'é. Wettunna lisu sibawa lettu ri seddé bolaé, naéngkalingani oni-onié sibawa séré-séré. Naobbini sala séddinna polé risining pattumaninna, nanakkutana, ‘Engka aga ri bolaé?’ Nappébali iyaro pattumanié, ‘Anritta Puwang lisu! Na ambo'ta Puwang pura massurowang géré ana' saping macommo'é, saba' nalolongenni ana'na paimeng ri laleng keadaang salama'!’ Macai senna'ni iyaro ana' macowaé, angkanna dé' namaélo muttama' ri bolaé. Namassuna ambo'na palécéi muttama'. Iyakiya makkedai, ‘Mattaut-taunna ittana majjama gangka ulléku untu' Ambo'. Dé' naengka uwéwai paréntana Ambo'. Na aga tawérékka Ambo'? Muwi sikaju bémbé dé'to naengka tawérékka Ambo' untu' mappésta sibawa sellao-sellaoku! Iyaro ana'na ambo' purani napaccappu asugirenna Ambo' sibawa makkunrai cakkuribangngé, iyakiya lisunna muwa, Ambo' gérékengngi ana' saping iya macommo'é!’ Nappébali ambo'na, ‘Ana'ku, iko tuli engkako kuwaé sibawakka. Sininna uwappunnangiyé iyanaritu appunnangemmuto. Iyakiya harusu'ka mappésta sibawa mariyo-riyo, saba' iyaro anrimmu maténi, iyakiya makkekkuwangngé tuwoi paimeng, teddénni, iyakiya makkekkuwangngé rilolongenni paimeng.’ ” Nakkeda Yésus lao ri ana'-ana' gurun-Na, “Engka séddi tau sugi. Mappunnaiwi séddi pakkatenning dowi iya marusu'éngngi asugirenna. Iyaro tau sugié lolongengngi laporang makkedaé iyaro pakkatenning dowina nallabowangngi dowina. Jaji naobbini iyaro pakkatenning dowié, nakkeda, ‘Aga iyaé uwéngkalingaé passalemmu? Makkekkuwangngé, wérékka laporanna passalenna jama-jamammu murusu'i asugirekku. Dé'na naweddikko mancaji pakkatenning dowiku.’ Nappikkiri'na iyaro pakkatenning dowié, ‘Aga harusu' upogau' makkekkuwangngé? Maéloi Puwakku paléssoka. Nadé' uwulléi mabbéngkung, sibawa masirika maréllau-éllau. Engka akkalekku; rékko ripaléssoka, harusu'ka mappunnai maéga sellao iya maéloé pappérumaka ri bolana!’ Jaji iyaro pakkatenning dowié naobbini tungke' tau iya makkinrengngé ri puwanna. Nakkeda lao ri mammulangngé, ‘Siyaga inremmu ri puwakku?’ Nappébali iyaro tauwé, ‘Sératu bémpa minnya' zaitun.’ Nakkeda iyaro pegawaié lao ri tauwéro, ‘Iyaé sure' inremmu. Tudanno namumapperi-peri mokii: limappulo.’ Nainappa makkeda ri tau maduwaé, ‘Na iko saudara, siyaga inremmu?’ Nappébali iyaro tauwé, ‘Sisebbu karung gandong.’ Nakkeda iyaro pakkatenning dowié, ‘Iyaé sure' inremmu. Okini: aruwa ratuna.’ Na iyaro ponggawana pegawé pakkatenning dowi dé'é namalempu napojini iyaro pegawéna nasaba pangkaukenna iya maccaéro; saba' sining tolinoéwé lebbi accai matoro'i urusanna mennang naiya sining tau iya tuwoé ri laleng tajangngé.” Nabbicarasi Yésus, adan-Na, “Engkalingai! Pakéi asugirenna linoéwé untu' lolongeng sellao, kuwammengngi riwettu dé'na gaga angke'na asugirenna linoé, ritarimako matu ri onrong appérumang mannennungengngé. Tau iya weddingngé riyatepperi ri laleng gau'-gau' iya baiccu'é, wedding towi riyatepperi ri laleng gau'-gau' iya battowaé. Iyakiya tau iya dé'é nawedding riyatepperi ri laleng gau'-gau' iya baiccu'é, dé'to nawedding riyatepperi ri laleng gau'-gau' battowaé. Jaji rékko passalenna asugirenna linoé dé'na naweddikko riyatepperi, niga maélo paddettangiko asugireng baténgngé? Sibawa rékko passalenna barang nappunnangiyé tau laingngé, pabuttiwi dé' naweddikko riyatepperi, niga maélo mpérékko aga iya mancajiyé appunnangemmu? Dé' séddi tau mulléi majjama untu' duwa ponggawa; saba' lebbi namaséiwi matu séddié naiya laingngé; iyaré'ga lebbi matinului matu lao ri ponggawa séddié naiya laingngé. Makkuwatoniro iko. Dé' mulléi majjama untu' Allataala sibawa untu' waramparangngétto.” Naéngkalingani sining tau Farisié iya napowadaé Yésus. Nainappa mennang cawa-cawaiwi, saba' napoji mennang dowié. Iyakiya makkedai Yésus lao ri mennang, “Ikona ritu tau iya tongengngé rita ri yolona tau laingngé, iyakiya naissengngi Allataala lise' atimmu. Saba' aga naseng matanré rupa tauwé, naita mariyawai Allataala. Hukkunna Musa sibawa pappagguruwanna nabi-nabié, iya manenna tette'i ripajoppa narapi wettunna Yohanés Paccemmé. Mappammulai wettuéro Karéba Madécéng passalenna pékkugi Allataala mapparénta selaku Arung riyabbirittangngi matteru. Nakkuraga tauwé passai aléna untu' mancaji anggotana umma'na Allataala. Iyakiya lebbi gampangngi lennye' langié sibawa linoé, naiya séddié hurupu' ri laleng Hukkunna Allataala riledda. Niga massarang bainéna nainappa kawing sibawa makkunrai laingngé, malawengngi iyaro tauwé. Sibawa tau iya kawingiyéngngi makkunrai iya massarangngé, malaweng towi.” “Engka séddi tau sugi. Pakéyanna masuli, sibawa masennang atuwo-tuwonna esso-esso. Ri yolona tange'na bolana ripalénne'i séddi tau kasiyasi riyasengngé Lazarus. Watakkaléna pennoi sibawa lettang. Macinnai lisekiwi babuwana sibawa barubbu-barubbu roti iya sempé'é polé ri méjanna tau sugiéro. Iyakiya mala asué poléi lépekiwi iyaro lettanna. Namaténa iyaro tau kasiyasié naritiwi ri malaéka'é ri onrong malebbié ri surugaé ri seddéna Abraham. Namaté tona iyaro tau sugié sibawa ritampung. Namanrasa-rasa senna'na ri linona tau maté. Na wettunna makkita polé kuwaro lao ri yasé', naitani Abraham ri onrong iya mabélaé sibawa Lazarus engka ri seddéna Abraham. Nagorana iyaro tau sugié, ‘Bapa' Abraham! Amaséika. Suroi Lazarus remméi jarinna ri laleng uwai nainappa lao bésa'i lilaku. Manrasa-rasa senna'ka ri lalenna apiéwé!’ Iyakiya mappébaliwi Abraham, ‘Engngerangngi ana'ku: sillampé umuru'mu purani mulolongeng maneng iya makessik-kessingngé, na Lazarus lolongengngi iya majaé. Makkekkuwangngé masennangngi kuwaé na iko manrasa-rasa. Ri lainnaé ritu, ri pallawangemmu sibawa idi purani riyébbu séddi balorang battowa, kuwammengngi tau engkaé kuwaé dé' naulléi lao kuwatu sibawa tau engkaé kuwatu dé' naulléi lao kumaiyé.’ Nakkeda iyaro tau sugié, ‘Rékko makkuwaitu Pa', uwéllauwi sibawa masero tasuroi Bapa' Lazarus lao ri bolana ambo'ku. Engka lima silessurekku kuwaro. Suroi Lazarus paréngngerangiwi mennang, kuwammengngi aja' mennang nasempé ri onrong paccallangngéwé.’ Nappébali Abraham, ‘Naengka mennang nappunnai kitta'-kitta'na Musa sibawa sining nabié! Leppessanni siya naturusi aga taroki ri laleng sining kitta'éro!’ Iyakiya mappébaliwi iyaro tau sugié, ‘Dé' nagenne iyaro, Bapa' Abraham. Iyakiya rékko engka tau maté tuwo paimeng sibawa lao ri mennang, toba'i matu mennang polé ri dosa-dosana.’ Iyakiya makkedai Abraham, ‘Rékko mennang dé' nabati-batiwi paréntana Musa sibawa nabi-nabié, tentuni mennang dé'to namateppe' matu, namuni engka tau maté tuwo paimeng.’ ” Nakkeda Yésus lao ri ana'-ana' gurun-Na, “Gau'-gau' iya nassabariyé namadosa pasti engka. Iyakiya cilakai tau iya nassabariyé! Lebbi kessing muwi rékko batu allélurengngé riyassiyoreng ri ellonna nainappa ribuwang ri tasi'é naiya nassabariyé sala séddinna tau polé risining tau baiccu'éwé pogau' dosa. Rimakkuwannanaro atike'ko! Rékko madosai silessuremmu, amparengngi. Rékko massesse kaléi, addampengengngi. Rékko madosai lao ri iko wékkapitu siesso, natungke napogau' poléi ri iko sibawa makkeda, ‘Méllau addampekka,’ addampengengngi.” Nakkeda sining rasul-é ri Puwangngé, “Puwang, péwatangekki teppe'ta.” Nappébali Puwangngé, “Rékko mappunnaiko teppe' silloppo batu sawi-sawié, weddikko makkeda lao ri pong murbéiéwé, ‘Mareddu'ko namutattaneng ri tasi'é,’ pasti iyaro pong ngajué naturusi matu paréntamu.” “Akkalarapanna engka séddi tau polé ri yelle'mu mappunnai pattumani iya maddakkalaé, iyaré'ga mampi bimbala'. Rékko lisui iyaro pattumanié polé ri dare'é, makkedakoga ri aléna, ‘Laono mai masitta manré'?’ Tentu dé'! Sibalé'na makkedako matu ri aléna, ‘Passadiyangekka nanréku. Pakéni pakéyang mapaccingngé namutumaningika ri wettu manré ménukku; purapiro nappako wedding manré.’ Iyaro pattumanié dé' naparellu ripoji nasaba mapatoi riparéntana puwanna? Makkuwatoro iko. Rékko purani mupogau' maneng iya riparéntangngékko, akkedako, ‘Pattumani biyasaki bawang; ripogau'mi bawang kewajibatta.’ ” Ri laleng allalengenna lao ri Yérusalém, laloi Yésus ri daéra pakkasésénna Samaria sibawa Galiléa. Wettunna nauttamaki séddié kampong, rilokkaini riseppulo tau iya malasa oli mappakatau-taué. Mabélai mennang tettong sibawa gora, “Yésus! Puwang! Amaséiki!” Wettunna Yésus naita mennang, makkedani, “Laono risining imangngé, éllauwi mennang paréssai watakkalému.” Ri wettu joppana mennang, teddénni lasana mennang. Wettunna engka séddi tau polé ri mennang majeppuiwi makkedaé majjappani, lisuni sibawa gora-gora pojiwi Allataala. Nasuju'na sibawa mattarima kasi ri yolona Yésus. Iyaro tauwé séddiwi tau Samaria. Nainappa makkeda Yésus, “Dé'ga naseppulo tau ripajjappa? Kégani iya aséraé? Magi na tau polé-poléwé bawang lisu mattarima kasi ri Allataala?” Nanakkeda Yésus lao ri tauwéro, “Oto'no, namulao. Nasaba mateppe'ko ri Iyya, namumajjappa.” Siyagangngaré tau Farisi makkutana ri Yésus uppanna Allataala polé untu' mapparénta. Nappébali Yésus, “Apparéntanna Allataala dé' napammulaiwi sibawa tanra-tanrang iya naullé mitai tauwé, angkanna tauwé naulléi makkeda, ‘Laono mai mitai, engkanié!’ iyaré'ga, ‘Engkairo!’ Saba' mappammulai Allataala mapparénta ri tengnga-tengngamu.” Purairo makkedani Yésus lao ri ana'-ana' gurun-Na, “Engka matu narapii wettunna namacinnako mita siesso polé ri esso-esso Ana'na Tolinoé, iyakiya dé' mulléi mitai. Makkedai matu tauwé ri iko, ‘Itai, kuwaro!’ iyaré'ga, ‘Itai, kuwaé!’ Iyakiya aja' mumassu sappai. Pékkugi billa'é mattappa ri langié sibawa maccahaya polé ri cappa'na lao ri cappa'na, makkuwatoniro matu keadaanna Ana'na Tolinoé ri esso apolénna. Iyakiya mula-mulanna harusu'i manrasa-rasa maéga sibawa dé' naritarima ri tauwé ri wettuéwé. Ri esso riyappaitanna matu Ana'na Tolinoé, keadaanna pada-padai ri wettunna Nuh riyolo. Manré ménung tauwé sibawa botting; makkuwaro matteru-teru narapi muttama' Nuh ri laleng kappala'é sibawa poléi lémpe' rajaé enrengngé mpuno manengngi tauwé. Pada-pada towi ri wettunna Lot. Manré ménungngi tauwé, mabbalu' sibawa mangelli, mappatani sibawa mappatettong bola. Iyakiya wettunna Lot massu polé ri Sodom, iyaro essoé nanonno apié sibawa balérangngé polé ri langié paccappu manengngi mennang. Makkuwaniro matu keadaanna wettunna riyappaitang Ana'na Tolinoé. Iyaro essoé, tau iya engkaé ri coppo bolaé, aja'na nanonno untu' malai waramparanna iya engkaé ri lalempolaé. Makkuwatoro tau iya engkaé ri dare'é aja'na nalisu ri bolana. Engngerangngi aga kajajiyang sibawa bainéna Lot! Tau iya makkuragaé passalama'i atuwonna, teddéngngi matu atuwonna. Iyakiya tau iya teddéngngé atuwonna napassalama'i matu. Ateppe'no: Iyaro wennié, duwa tau matinro riséddié ranjang, séddi tau riyala na séddié risalaiwi. Duwa tau maddése' gandong, séddi tau riyala, na séddié risalaiwi. [ Duwa tau majjama ri dare'é, séddi tau riyala, na séddié tau risalaiwi.]” Nakkutana ana'-ana' gurunna Yésus, “Kégai iyaro kajajiyang matu Puwang?” Nappébali Yésus, “Kégi engka bakké, kuwa towitu engka manu'-manu' pakkanré bakké.” Purairo nacuritani Yésus séddi pakkalarapangeng untu' paggurui ana'-ana' gurun-Na kuwammengngi natuli massempajang sibawa dé' napettu paddennuwang. Nakkeda Yésus, “Ri séddié kota engka séddi haking iya dé'é namétau ri Allataala, sibawa dé'na napaduliwi niga-niga. Na ri kotaéro engkato séddi janda iya makkolik-kolingngé mangolo ri hakingngéro méllauwi nariyéwaiwi parakarana. Makkedai iyaro jandaé, ‘Tulukka moloiwi balikku.’ Siyagangngaré ittana iyaro hakingngé dé' namaélo tulungngi iyaro jandaé. Iyakiya angkanna mappikkiri' iyaro hakingngé, ‘Muwi dé' umétau lao ri Allataala sibawa dé'na upaduliwi muwi lao ri niga, iyakiya nasaba iyaé jandaé matteru-terui gangguka, lebbi kessing muwi uwéwaiwi parakarana. Rékko dé', matteru-terui matu polé gangkanna matu nasussaika.’ ” Nanakkeda Puwangngé, “Pénessaini aga napowada iyaro haking iya dé'é naadélé'! Dé'ga Allataala naéwaiwi matu parakarana umma'-Na iya mangobbié ri Aléna esso wenni? Aga matengnge'gika matu Aléna untu' tulungngi mennang? Ateppe'no: Masitta'i matu méwaiwi parakarana mennang! Iyakiya rékko poléi Ana'na Tolinoé, engka mupaga rilolongeng tau mateppe' ri Aléna ri linoéwé?” Nacurita towi Yésus pakkalarapangngéwé iya Napattujué lao ri tau iya pakariyawaéngngi tau laingngé, iyakiya mateppe'i makkedaé makessingngi aléna. Nakkeda Yésus, “Engka duwa tau lao ri Bolana Puwangngé untu' massempajang. Iya séddié tau Farisi, naiya laingngé séddiwi passinge' sima. Iyaro tau Farisié natampuiwi arona namassempajang ri laleng ati, ‘Oh Allataala, mattarima kasi'ka ri Idi, saba' dé' upada-pada tau laingngé, iya mangowaé, macéko-céko iyaré'ga malaweng. Sukkuru'ka saba' dé' upada iyaro passinge' simaé. Mappuwasaka wékkaduwa siminggu, sibawa makkasuwiyakka ri Idi tawa seppulona polé ri sininna pallolongekku.’ Iyakiya iyaro passinge' simaé tettongngi mabéla-béla sibawa mala dé' nabarani conga ri langié. Nasappurui arona nanakkedato, ‘Oh Allataala, amaséika, tau madosaéwé!’ ” Nakkeda Yésus, “Ateppe'no, wettunna lisu ri bolaé, iyaro passinge' simaé ritarimai ri Allataala na tenniya iyaro tau Farisié. Saba' tungke' tau iya pakatanréngngi aléna ripakariyawai matu; natungke tau iya pakariyawaéngngi aléna ripakatanréi matu.” Engka sining tau tiwi ana'-ana'na lao ri Yésus kuwammengngi narikarawa sibawa ribarakkakiwi mennang. Wettunna ana'-ana' gurunna Yésus mitai iyaro, nacairini mennang iyaro sining tauwé. Iyakiya naobbii Yésus iyaro ana'-ana'é nainappa makkeda lao ri ana'-ana' gurun-Na, “Leppessangngi ana'-ana'é lao ri Iyya! Aja' muwattéyangngi mennang. Saba' tau pada-padaénnaé mancaji anggotana umma'na Allataala. Engngerangngi! Tau dé'é namangolo ri Allataala pada-pada ana'-ana'é, dé' namancaji matu anggotana umma'na Allataala.” Engka séddi pamimping Yahudi makkutana lao ri Yésus, “Pa' Guru iya makessingngé, aga harusu' upogau' kuwammengngi weddingngi utarima atuwong tongengngé sibawa mannennungengngé?” Nakkutana Yésus lao ri pamimpinna Yahudiéro, “Magi muwasek-Ka makessing? Dé'gaga makessing saliwenna Allataala bawang. Muwissenniga parénta-paréntana Allataala: ‘Aja' mumalaweng, aja' muwabbuno, aja' muwénnau, aja' musabbi bellé-bellé, sibawa pakalebbii ambo' indo'mu.’ ” Nakkeda iyaro tauwé, “Iya manenna paréntaéro purani uturusi ri wettu maloloku.” Naéngkalingana iyaro, makkedani Yésus, “Engka mupa séddi passaleng harusu' mupogau': Balu'ni sininna appunnangemmu, namuwéréngngi ellinna tau kasiyasié, namulolongeng matu waramparang ri surugaé. Purairo laono maccowéri-Ka.” Iyakiya wettunna naéngkalinga iyaro tauwé, tassinnauni nasaba sugi senna'i. Naissengngi Yésus makkedaé tassinnaui atinna iyaro tauwé, rimakkuwannanaro makkedai Yésus, “Mawatang senna' tau sugié untu' mancaji anggotana umma'na Allataala! Lebbi gampang muwi sikajué unta muttama' ri sebbo jarungngé, naiya séddié tau sugi muttama' ri Lino Barunna Allataala.” Makkutanani sining tau iya méngkalingaéngngi Yésus makkeda makkuwaro, “Rékko makkuwaitu, nigana wedding salama'?” Nappébali Yésus, “Iya dé'é nakkullé ri rupa tauwé, makkulléi ri Allataala!” Nakkeda Pétrus, “Itai! Idi'é pura risalaini bolata untu' maccowériwi Bapa'.” Nakkeda Yésus, “Ateppe'no, tau iya puraé salaiwi bolana, iyaré'ga bainéna, iyaré'ga silessurenna, iyaré'ga indo' ambo'na, iyaré'ga ana'na nasaba natumaningiwi Allataala, iyaro tauwé riwale'i malleppi-leppi ri wettuéwé, sibawa ri wettu mangoloé riwéréngngi matu atuwong mannennungengngé.” Napaddeppungenni Yésus iya seppulo duwa ana' gurun-Na mallaiseng, nainappa makkeda, “Engkalingai! Makkekkuwangngé mattujuki ri Yérusalém. Kuwaro, sininna iya naokié nabi-nabié passalenna Ana'na Tolinoé, kajajiyangngi matu. Riyabbéréyangngi matu lao risining tau tenniyaé Yahudi, iya méllékéllé'éngngi matu, pakatunai sibawa mamméccuiwi. Napanrasa-rasai matu sibawa naunoi, iyakiya ri esso matellué, moto'i matu.” Iya manennaro dé' napahangngi muwi céddé ana'-ana' gurunna Yésus. Bettuwanna, iyaro ada-adaé rirahasiyakangngi polé ri mennang. Dé' naissengngi passaleng aga Nabicara. Wettunna Yésus macawé'ni lettu ri Yérikho, engka séddi tau buta tudang méllau sidekka ri wiring lalengngé. Wettunna naéngkalinga iyaro tau maégaé lalo, makkutanani, “Engka aga?” Nakkeda mennang lao ri tau butaéro, “Yésus, tau Nazarét-é lalo.” Nagorana iyaro tau butaé, “Yésus, Ana' Daud! Amaséika!” Riyacairini sibawa risuro mammekko risining tau iya monroyoloé. Iyakiya pédé' gorai lebbi cenno, “Ana' Daud! Amaséika!” Naléppanna Yésus nanasuroi tauwé tiwii iyaro tau butaé ri Aléna. Lettu'nana, makkutanani Yésus, “Aga muwélori Upogau' ri iko?” Nappébali iyaro tau butaé, “Puwang, macinnaka makkita.” Nakkeda Yésus, “Rékko makkuwaitu, itani! Nasaba mateppe'ko lao ri Iyya, majjappako.” Iyatoro wettué naulléi makkita, nanaccowériwi Yésus nanattarima kasi'to lao ri Allataala. Wettunna naita iyaro tau maégaé gau'é, napoji-poji manenni mennang Allataala. Wettunna Yésus lettu ri Yérikho, joppani matteru molai iyaro kotaé. Ri kotaéro engka séddi kapala passinge' sima iya sugié. Asenna Zakhéus. Macinnai mitai niga Yésus, iyakiya nasaba maéga senna' tau, namapancé'i aléna, jaji dé' naulléi mitai Yésus. Jaji, larini poddiyoloiwi sining tauwé, nainappa mémpé séddi pong ngaju, kuwammengngi naulléi mitai Yésus iya dé'é namaitta nalalo kuwaro. Wettunna Yésus lettu ri pong ngajuéro, makkitani liyasé' nainappa makkeda, “Zakhéus, nonnono masitta! Saba' harusu'-Ka lao ri bolamu essoéwé.” Mapperi-perini Zakhéus nonno nanaduppaiwi Yésus sibawa marennu. Sininna tauwé iya mitaéngngi gau'éro mammulani mannoko'-noko'. Makkedani mennang, “Cih! Laowi massurolellang ri bolana tau iya dé'é namakessing!” Natettonna Zakhéus ri bolana makkeda lao ri Yésus, “Puwang, sitengngana waramparakku maélo uwassidekkang lao ri tau kasiyasié; sibawa nigi-nigi pura ubellé', maéloka mpajai paimeng leppe' wékkaeppa!” Nakkeda Yésus, “Iya essoéwé iko sibawa kaluwargamu pura ripassalama'ni ri Allataala sibawa riwéréng atuwong iya barué, saba' wijanna tokko Abraham. Ana'na Tolinoé poléi untu' sappai sibawa passalama'i tau iya pusaé.” Ri wettu naéngkalingana mupa tauwé Yésus mabbicara, nacuritani séuwa pakkalarapangeng. Saba' iyaro wettué engkai ri seddéna Yérusalém, nanasengngi tauwé makkedaé dé'na namaittana napparénta Allataala selaku Arung ri linoé. Nakkeda Yésus, “Engka séddi arung iya laowé ri wanuwa mabélaé untu' rilanti' mancaji arung, nainappa lisu. Riwettu dé'napa najoppa, naobbini seppulo pattumaninna, nainappa nawéréng tungke'-tungke' séuwa dowi ulaweng. Nakkeda lao ri mennang, ‘Dangkanno sibawa iyaé dowié ri wettu laoku.’ Iyakiya iyaro pabbanuwana wanuwaé nabenciwi. Jaji labe'nana, kirinni mennang suro untu' powadai, ‘Dé' tamaélo iyaé tauwé mancaji arutta.’ Iyakiya iyaro arungngé rilanti'ni mancaji arung, nainappa lisu ri wanuwanna. Naobbini masitta sining pattumaninna mangolo, untu' missengngi siyaga saro nalolongeng mennang. Poléni pattumani pammulangngé sibawa makkeda, ‘Puwang, séddi dowi ulaweng iya tawéréngngekka, purani upancaji seppulo.’ Nakkeda iyaro puwangngé, ‘Makessinni, iko pattumani makessingngé. Nasaba ri laleng gau'-gau' baiccu'é weddikko riyatepperi, maéloka pancajiko tomakuwasana seppulo kota.’ Pattumani maduwaé polé toni sibawa makkeda, ‘Puwang, iyaro séddié dowi ulaweng tabbéréyangngé Puwang, purani upancaji lima.’ Nakkeda iyaro arungngé lao ri pattumaniéro, ‘Mancajiko matu tomakuwasana lima kota.’ Polé toni pattumani laingngé sibawa makkeda, ‘Puwang, engkanié dowita Puwang; utaroi ri laleng lénso-lénsoé. Métauka ri idi Puwang, saba' mabecco'ki Puwang. Talai Puwang tenniyaé appunnangetta, sibawa malléléki ri onrong iya tenniyaé Puwang tanengiwi.’ Nakkeda iyaro arungngé lao ri pattumaniéro, ‘Pattumani majako iko! Maéloka hukkukko situru ada-adammu muto. Muwisseng iyya tau mabecco'ka: Uwalai aga iya tenniyaé appunnangekku sibawa mallélé ri onrong tenniyaé iyya tanengiwi. Rékko makkuwaitu magi nadé' muputtama'i iyaro dowié ri bangngé kuwammengngi rékko lisuka weddingngi utarima iyaro dowié sibawa bungana?’ Nainappa makkeda iyaro arungngé lao risining tau tettongngé kuwaro, ‘Alai iyaro dowié polé ri alénaro namuwéréngngi pattumani iya mappunnaiyé seppulo dowi ulaweng.’ Iyakiya makkedai iyaro sining tauwé, ‘Puwang, engkana seppulo nappunnangi.’ Nappébali iyaro arungngé, ‘Engngerangngi: tau iya mappunnaiyénna, riwéréngngi matu lebbi maégapa. Iyakiya tau iya dé'é nappunnai, aga iya engkaé ri aléna riyalai matu polé ri aléna. Namakkekkuwangngé tiwii lao mai sining balikku iya dé'é naéloriwi iyya mancaji arunna. Uno manengngi mennang ri yoloku!’ ” Purana napowada maneng Yésus iyaro, joppani ri yolona mennang mattuju ri Yérusalém. Wettunna lettu ri seddéna Bétfagé sibawa Bétania ri Bulu-bulu Zaitun, nasuroni duwa ana' gurun-Na lao lebbi riyolo. Nakkeda Yésus lao ri mennang, “Laono ri kampong iya engkaé ri yolomuro. Rékko muttama'ko kuwaro, muwitai matu sikaju ana' kaleddé tassiyo. Iyaro kaleddé'é dé'pa naengka natonangiwi tauwé. Leppessangngi iyaro kaleddé'é namutiwii kumaiyé. Rékko makkutanai tauwé ri iko, ‘Magi muleppessangngi iyaro kaleddé'é?’ powadangngi, ‘Napparelluwangngi Puwangngé.’ ” Laoni iya duwaro ana' gurunna Yésus, nanapoléini iya manennaro pada-pada iya napowadaé Yésus. Ri wettu naleppessanna mennang iyaro ana' kaleddé'é, makkedani punnana lao ri mennang, “Magi muleppessangngi iyaro kaleddé'é?” Nappébali mennang, “Napparelluwangngi Puwangngé.” Natiwini mennang iyaro kaleddé'é lao ri Yésus. Nainappa nataro jumbana mennang ri yasé'na iyaro kaleddé'é sibawa natulunna Yésus ménrékiwi. Wettunna Yésus lalo tonangiwi iyaro kaleddé'é, napallebba'ni jumbana sining tauwé ri lalengngé. Wettunna Yésus macawé'ni lettu ri Yérusalém, ri laleng turungngé ri Bulu-bulu Zaitun, sininna tomaccowériyéngngi iya maégaéro mammulani gora-gora pojiwi Allataala sibawa mattarima kasi ri Allataala, saba' iya manenna anu makalallaingngé iya puraé naita mennang. Gorani mennang, “Ribarakkakiwi Arung iya polé sibawa asenna Puwangngé! Saléwangengngi ri surugaé sibawa ripojiwi ri Allataala!” Siyagangngaré tau Farisi polé ri yelle'na tau maégaéro makkeda lao ri Yésus, “Bapa' Guru, suroi ana'-ana' gurunna Bapa' mammekko.” Nappébali Yésus, “Ateppe'no! Rékko mammekkoi mennang, gorai matu iyaé batu-batuéwé.” Wettunna Yésus pédé' macawé'é ri Yérusalém sibawa naita iyaro kotaé, Nateringini. Adan-Na, “Kasiyang, lebbi kessingngi rékko iya essoéwé muwissengngi aga iya weddingngé mappapolé assidaméngeng! Iyakiya makkekkuwangngé dé' mulléi mitai. Mupéneddingiwi matu séuwa wettu, na balimmu mébburekko pallawa-lawa mattulilingiko; nakeppukko matu sibawa naredde'mu polé tulili. Nancuru'ko matu mennang silaong sininna pabbanuwamu; nadé' séddi batu naleppessang matu mennang tassusung ri onronna, saba' dé' mupénessaiwi wettunna Allataala polé untu' passalama'ko!” Muttama'ni Yésus ri Bolana Puwangngé sibawa mappammulani paddésu'i sining padangkangngé kuwaro. Nakkeda lao ri mennang, “Ri laleng Kitta'é tarokii makkuwaé: Makkedai Allataala, ‘Mancajiwi matu Bola-Ku onrong massempajang.’ Iyakiya iko mupancajiwi saranna parampo'é!” Esso-esso Yésus mappagguru ri Bolana Puwangngé. Kapala-kapala imangngé, sibawa guru-guru agamaé enrengngé sining pamimpinna Yahudié macinnani mpunoi, iyakiya dé' nalolongeng laleng untu' pogau'i gau'éro, nasaba sininna tauwé matteru-terui méngkalingai, sibawa tattaré'i ri ada-adan-Na. Riséuwaé esso, Yésus mappagguru sibawa mabbirittangngi Karéba Madécéng polé ri Allataala lao risining tauwé ri laleng Bolana Puwangngé. Napoléna kapala-kapala imangngé, guru-guru agamaé silaong sining pamimpinna Yahudié namakkeda lao ri Yésus, “Coba powadakki aga nallalengi na-Mupogau'i iya manennaro? Niga mpérék-Ko iyaro ha'é?” Nappébali Yésus, “Macinnaka makkutana. Coba powadak-Ka, nasibawang ha' niga Yohanés maccemmé? Allataala iyaré'ga tolinoé?” Nappammulana mennang barunding, “Rékko makkedaki, ‘Sibawa ha'na Allataala,’ makkedai matu, ‘Rékko makkuwaitu, magi nadé' mumateppe ri aléna?’ Iyakiya rékko makkedaki, ‘Sibawa ha'na tolinoé,’ nagenrukki matu batu sininna tauwé saba' mateppe'i mennang makkedaé Yohanés séddiwi nabi.” Jaji mappébaliwi mennang, “Dé' taissengngi.” Nakkeda Yésus lao ri mennang, “Rékko makkuwaitu, Iyya dé'to Umaélo powadakko nasibawang ha' niga Upogau'i iya manennaé.” Nacuritani Yésus lao risining tauwéro, pakkalarapangengngéwé, “Engka séddi tau iya tanengiyéngngi séuwa dare'é anggoro. Iyaro dare'é nappasséwangngi lao ri siyagangngaré paddare, nainappa lao ri wanuwa laingngé namaitta monro kuwaro. Narapinana wettunna maccéppu buwa anggoro, nakirinni pattumaninna iyaro punna dare'é lao risining pajjamana iyaro dare' anggoro'é untu' tarimai bagiyanna. Iyakiya iyaro sining pajjama dare' anggoro'é naunrui iyaro pattumanié sibawa nasuroi lisu sibawa kosong limanna. Naiyaro punna dare'é kirissi séddi pattumani laingngé; iyakiya ribarasa' towi sibawa rituna-tunai risining pajjamana dare' anggoro'éro, nainappa nasuro lisu sibawa kosong limanna. Nainappa iyaro punna dare'é kirissi pattumani mabbékkatellué. Iyakiya iyaro pattumanié ribarasa' towi risining pajjamana dare' anggoro'éro sibawa riyabbéyang massu ri saliweng dare'éro. Angkanna iyaro punna dare'é makkeda, ‘Agana harusu' upogau'? Maéloka kiringngi ana' riyaléku iya uwamaséiyé. Pasti napakalebbii matu mennang!’ Iyakiya wettunna iyaro sining pajjama dare' anggoro'é naita iyaro ana'na punna dare'é, makkedani mennang séddié lao ri laingngé, ‘Iyanaé ahli warisi'na. Laono mai taunoi, kuwammengngi talolongengngi manana.’ Nanassarénréngenni massu ri saliweng dare'éro nainappa nauno.” Nainappa makkutana Yésus, “Nah, rékko lisui iyaro punna dare'é, agana nagaukengngi matu iyaro sining pajjama dare'é? Pasti poléi matu sibawa naunoi pajjama-pajjama dare'éro, nainappa iyaro dare'é nabbéréyangngi lao risining pajjama-pajjama dare' laingngé.” Naéngkalingana iyaro, makkedani sining tauwé lao ri Yésus, “Sitonget-tongenna dé'!” Nakkitana Yésus lao ri mennang, nainappa makkeda, “Rékko makkuwaitu, aga bettuwanna aya'na Kitta'éwé? ‘Batu iya dé'é napakéi tukang bangunangngé, mancajiwi batu iya poko'é.’ Sininna tauwé iya sempé'é ri batuéro ancuru'i matu; sibawa nigi-nigi nageppa iyaro batué nalélui matu mancaji awu.” Naissenni guru-guru agamaé sibawa kapala-kapala imangngé makkedaé iyaro pakkalarapangengngé napattujui Yésus lao ri mennang. Rimakkuwannanaro macinnani mennang tikkengngi Yésus iyaro wettué, iyakiya métaui lao ri tau maégaé. Jaji sappani kasempatang iya makessingngé. Nanasogo'ni mennang tauwé untu' majjaiwi selaku tau lempu, nanasuroi sining tauwéro untu' palaiwi siyo-siyo Yésus sibawa pakkutana-pakkutanana, kuwammengngi naulléi mabbéréyangngi lao ri akuwasanna gubernur-é. Nasining tau iya puraé risogo'ro makkedani lao ri Yésus, “Pa' Guru, irissenni makkedaé sininna napowadaé sibawa nappagguruwangngé Bapa' tongengngi. Irisseng towi Bapa' mappaggurui sibawa terus terang passalenna napuwéloé Allataala lao ri tolinoé, saba' dé' nappilé bulu Bapa'. Rimakkuwannanaro coba Bapa' powadakki, manuru' peraturanna agamata, weddikki'ga makkamaja sima lao ri Kaisar Roma iyaré'ga dé'?” Iyakiya naissengngi Yésus akkattana mennang. Rimakkuwannanaro makkedai, “Coba paitak-Ka séddi dowi péra'. Gambara sibawa asenna niga iyaé?” Nappébali mennang, “Kaisar.” Nakkeda Yésus lao ri mennang, “Rékko makkuwaitu, wéréngngi Kaisar, aga nappunnangi Kaisar sibawa lao ri Allataala, aga nappunnangi Allataala.” Angkanna ri yolona tau maégaéro dé' naulléi mennang lolongeng muwi séddi asalang ri Yésus. Mammekko bawammi mennang sibawa bengnga lao ri pappébalin-Naro. Engka siyagangngaré tau polé ri golongang Sadukié lao ri Yésus. (Mennang iyanaritu golongang iya mappunnaiyé pallolongeng makkedaé tau maté dé' naoto paimeng.) Makkutanai mennang ri Yésus, “Bapa' Guru, naokirekki Musa hukkungngéwé: Rékko séddié worowané matéi nadé' nappunnai ana', iyaro padaorowanéna harusu'i kawingiwi jandana kuwammengngi nawéréngngi wija-wijanna tau iya matéénnaro. Engka naengka pitu tau mappadaorowané. Bottingngi iya macowaé, namaté temmappunnai ana'. Nainappa jandana rikawingiwi ri maduwaé, iyakiya maté towi temmappunnai ana'. Gau' padaé kajajiyang towi sibawa padaorowanéna matellué narapi mapitué. Angkanna matéto iyaro makkunraié. Ri esso ripatuwona matu paimeng tau maté, nigana punna bainé iyaro makkunraié? Saba' iya pitu pura kawingiwi?” Nappébali Yésus, “Sining tau iya tuwoé makkekkuwangngéwé bottingngi, iyakiya sining tau maté iya sitinajaé ripaoto', sibawa tuwo ri wettu mangoloé, dé'na mennang nabotting. Keadaanna mennang pada-padai malaéka'é, sibawa dé'na naulléi maté. Ana'-ana'na Allataala mennang ritu. Saba' purani mennang ripaoto' paimeng polé ri amaténgngé. Aléna Musa pakatajangngi sibawa manessa makkedaé ripaoto'i paimeng tau maté. Ri laleng sure'na passalenna iyaro alekale' malluwa'é nateppui Puwangngé selaku ‘Allataalana Abraham, Allataalana Ishak sibawa Allataala Yakub.’ Naiyaro Allataalaé, tenniya Allataalana tau maté! Allataalanai sining tau tuwoé! Saba' untu' Allataala, sininna tauwé tuwoi.” Engka siyagangngaré guru agama makkeda, “Makessing senna' pappébalinna Bapa' Guru.” Rimakkuwannanaro dé'na nabaranina makkutanangngi agi-agi lao ri Yésus. Nakkutana Yésus lao ri mennang, “Pékkugi wedding ripowada makkedaé Arung Pappassalama'é wijannai Daud? Padahal aléna Daud makkeda ri laleng kitta Mazmur, ‘Puwangngé makkeda ri Puwakku: Tudanno ri seddé atauk-Ku, narapi Uwébbu sining balim-Mu tunru' ri Iko.’ Jaji rékko Daud teppui iyaro Arung Pappassalama'é ‘Puwang’, pékkugi wedding wijannai Daud?” Wettunna sining tauwé naéngkalinga Yésus mabbicara, makkedani Yésus lao ri ana'-ana' gurun-Na, “Atutuko lao ri guru-guru agamaé. Napoji joppa sibawa jumba iya malabbué, sibawa napoji ripakalebbi ri pasaé. Napoji onrong malebbié ri laleng bola assompangngé sibawa ri pésta-péstaé. Nabelléi mennang sining jandaé sibawa narampasa' i bolana. Na untu' tongkoi jana mennanro, massempajangngi mennang sibawa malampé'! Matane' matu pahukkungenna mennang!” Ri Bolana Puwangngé, naitai Yésus sining tau sugié puttama dowi ri laleng petti-petti pakkasuwiyangngé. Naitai séddié janda iya kasiyasi senna'é puttama duwa dowi tembaga. Nakkeda Yésus, “Engkalingai: iyaé jandaé puttama'i lebbi maéga naiya maneng laingngé. Saba' iya manennaro mennang mabbéréi polé ri alebbinna waramparanna. Iyakiya iyaé jandaé, namuni kasiyasi senna'i, nabbéréyang manengngi iya engkaé ri aléna iya napparelluwangngé untu' atuwonna.” Sining tau iya mabbicaraé passalenna pékkugi kessinna Bolana Puwangngé ribélo-béloi sibawa batu magello enrengngé barab-barang iya riyakkasuwiyangengngé lao ri Allataala. Nakkeda Yésus lao ri mennang, “Engka matu wettunna, sininna iya muwitaéwé riruttungngi matu; dé' matu séddi batu monro tassusung ri onronna!” Nakkutana mennang ri Yésus, “Bapa' Guru, uppanna kajajiyang matu iyaro gau'é? Sibawa aga tanranna makkedaé narapini wettunna iyaro gau'é maéloni kajajiyang?” Nakkeda Yésus, “Atike'ko, aja' narapiko ribellé. Maéga tau matu polé pakéi asek-Ku, sibawa makkeda, ‘Iyya'naé!’ sibawa ‘Narapini wettunna.’ Iyakiya aja' muwaccowériwi mennang. Aja'to mumétau rékko méngkalingako karéba passalenna musué sibawa ronta'é. Iya manennaro harusu'i kajajiyang riyolo'. Iyakiya iyaro tenniya bettuwanna makkedaé narapini wettunna kiyame'.” Nanapatteruni Yésus bicaran-Na, adan-Na, “Bangsa séddié mammusui matu méwai bangsa laingngé, sibawa wanuwa séddié nagasai matu wanuwa laingngé. Kajajiyangngi matu kégi-kégi mpéwangngi tanaé sibawa masero, bahaya akkadérengngé sibawa saiyé. Kajajiyangngi matu gau'-gau' iya mappakatau-taué sibawa maseroé ri langié. Iyakiya riwettu dé'napa nakajajiyang manenro, ritikkekko matu sibawa ricalla. Riadélékiko matu risining bola assompangngé sibawa riputtama' ri laleng tarungkué, enrengngé riyassarénréngekko matu lao ri yolona sining arungngé sibawa sining tomakuwasaé nasaba muwaccowéri-Ka. Iyanaro kasempatammu untu' mabbirittangngi Karéba Madécéng polé ri Allataala. Esserini makkedaé dé' matu mubata-bata passalenna aga harusu' mupowada untu' méwaiwi alému. Aléku matu mpérékko iyaro ada-adaé sibawa pangissengengngé, angkanna dé' séddi tau polé risining balimmu mulléi méwa iyaré'ga massakkarengngi aga mupowada. Nabali'bellariko matu indo' ambo'mu, silessu-silessuremmu, sumpulolomu sibawa sellao-sellaomu. Sibagiyang polé ri iko riyunoi matu ri mennang. Ribenciko matu risininna tauwé nasaba muwaccowéri-Ka. Iyakiya muwi silampa gemme' polé ri ulummu dé'to nateddéng. Rékko mattahakko sibawa sabbara', salama'ko matu.” “Rékko muwitani Yérusalém rikeppung ri tentaraé, muwissennitu matu makkedaé iyaro kotaé dé'na namaitta nariyancuru. Iyaro wettué, tau iya engkaé ri Yudéa harusu'i lari lao ri bulué. Iya engkaé ri laleng kotaé harusu'i mennang nasalai kotaé. Iya engkaé risaliweng kota aja' mennang nauttama ri kotaé. Saba' iyaro esso-essoé iyanaritu ‘Esso-esso Ripatakkennana Pahukkungengngé’, kuwammengngi nakajajiyang aga pura tarokié ri laleng Kitta'é. Temmaka mappakatau-tauna iyaro essoé lao ri makkunrai iya mattampu'é, sibawa indo' iya pasusué mupi ana'lolona! Iyaé wanuwaé péneddingiwi matu asussang battowa, sibawa Puwangngé matu hukkungngi iyaé bangsaé. Engka matu riyuno sibawa peddang, engkato matu ritiwi selaku tawangeng ri wanuwa-wanuwanna tauwé; nasining tau iya dé'é naissengngi Allataala naléjja'-léjja'i matu Yérusalém narapi cappu wettu iya pura napattentué Puwangngé untu' mennang.” “Paitai matu tanra-tanrangngé ri mata essoé, kétengngé sibawa sining wéttowingngé. Ri linoé, métaui matu bangsa-bangsaé sibawa malippunna moloiwi oni-onié nenniya bombanna tasi'é. Namétau senna'na matu rupa tauwé moloiwi aga maélo kajajiyang ri sininna linoéwé, saba' sining makuwasaé ri bétaraé sipalu-palui matu. Ri wettuénnaro napolé matu Ana'na Tolinoé ri ellungngé sibawa akuwasan-Na nenniya alebbiren-Na battowaé. Rékko mammulani kajajiyang iyaro sining gau'é, oto'no namuwakkai ulummu, saba' dé'na namaitta naripassalama'ko.” Nanacuritani Yésus lao ri mennang pakkalarapangengngéwé, adan-Na, “Pénessaiwi pong araé sibawa sininna pong laingngé. Rékko paitani colli-colli'na, muwissenni makkedaé macawé'ni wettu tikkaé. Makkuwatoro rékko muwitai gau'-gau'é kajajiyang, muwissenni matu makkedaé dé'na namaitta napparénta Allataala selaku Arung. Issenni! Iyaro gau'-gau'é kajajiyangngi matu riwettu dé'napa namaté maneng tauwé iya tuwoé makkekkuwangngé. Lennye'i matu langié sibawa linoé, iyakiya ada-adak-Ku tette'i mannennungeng.” “Jagaiwi alému, aja' lalo mutuli mappésta-pésta sibawa ménung énungeng maserié, iyaré'ga tuli pikkiri'i passalenna atuwommu, angkanna dé' musadiya wettunna polé iyaro Essoé temmusenna-sennai. Saba' iyaro Essoé poléi matu pada-pada sappangngé lao ri sininna tauwé ri yasé'na linoéwé. Jaga-jagako, sibawa tuli massempajakko kuwammengngi mulléi niniriwi sininna gau' maéloé kajajiyang sibawa mulléi mangolo ri Ana'na Tolinoé.” Yésus mappagguru ri Bolana Puwangngé ri lakessoé, na ri wennié laowi ri Bulu-bulu Zaitun sibawa monro kuwaro. Tungke' élé sininna tauwé laowi ri Bolana Puwangngé untu' méngkalingai Yésus mappagguru. Ramé-ramé Roti Dé'é Raginna iya riyasengngé Paska macawé'ni. Kapala-kapalana imangngé sibawa guru-guru agamaé sappani laleng untu' mpunoi Yésus secara mammekko-mekko nasaba métaui mennang ri tau maégaé. Namuttama'na Ibillisi'é ri Yudas iya riyasengngétto Iskariot, iyanaritu séddiwi polé riseppuloé duwa ana' gurunna Yésus. Rimakkuwannanaro laoni Yudas barunding sibawa kapala-kapala imangngé sibawa sining kapala pengawalna Bolana Puwangngé passalenna pékkugi naulléi mabbéréyangngi Yésus lao ri mennang. Masennang senna'ni mennang sibawa majjanci maélo mpéréngngi dowi. Nasitujuini Yudas, nammulana sappa kasempatang untu' mabbéréyangngi Yésus lao ri mennang, sibawa dé' naissengngi tauwé. Narapini essona Ramé-ramé Roti Dé'é Raginna makkedaé bimbala' untu' nanré Paskaé rigéré. Nasuroni Yésus Pétrus sibawa Yohanés, “Laono mupassaniyasangekki nanré Paska.” Nakkutana mennang, “Kégai taélori Bapa' ripassaniyasa?” Nappébali Yésus, “Ri wettu muttama'mu ri kotaé, siruntu'ko matu séddi worowané iya tiwié séuwa kendi mallise' uwai. Accowériwi lao ri bola nauttamakiyé, sibawa powadangngi iyaro punna bolaé: Makkedai Gurué, ‘Kégai onronna ana'-ana' guruk-Ku sibawa Iyya manré nanré Paska?’ Nanajellokekko matu iyaro punna bolaé séuwa bili' battowa ri loténgngé, sakke' sibawa paréwanna. Passaniyasa manenni kuwaro.” Nalaona Pétrus sibawa Yohanés, nanapoléi manenni pada-pada iya napowadaé Yésus. Napassaniyasani mennang nanré Paskaéro. Narapinana wettunna manré nanré Paska, tudanni Yésus silaong sining ana' gurun-Na ri onrong perjamuwangngé. Nakkeda lao ri mennang, “Macinna senna'-Ka sisamako manré nanré Paskaéwé riwettu dé'napa Uwanrasa-rasa. Saba' ateppe'no: Dé'na uwanréi matu iyaé narapi bettuwanna perjamuwangngéwé ripannessa ri Lino Barunna Allataala.” Purairo nakkani Yésus énungeng anggoro'é, nainappa massempajang sukkuru' lao ri Allataala, nanakkeda, “Alani iyaé, sibawa abbagé-bagéyangngi; nasaba issenni: mappammulai makkekkuwangngé dé'na Uwénungngi matu iyaé anggoro'é narapi Allataala makuwasai manengngi.” Purairo nalani Yésus rotié. Napuranana massempajang sukkuru', Napuwé'-puwé'ni iyaro rotié sibawa liman-Na, nainappa nawéréng mennang, sibawa makkeda, “Iyanaé tubuk-Ku [iya riyabbéréyangngé untu' iko. Pogau'ni iyaé untu' sénge'-Ka.” Makkuwatoro purana manré, Nabbéréyanni énungeng anggoro'é lao ri mennang sibawa makkeda, “Iyaé énungengngé iyanaritu assijancingenna Allataala iya mabarué, iya risahkangngé sibawa dara-Ku – dara iya ripatabbollongngé untu' iko.]” “Iyakiya itai! Tau iya bali'bellariyék-Ka engkai kuwaé sibawak-Ka! Mémeng matéi matu Ana'na Tolinoé pada-pada pura napattentué Allataala; iyakiya cilakai tau iya bali'bellariyéngngi!” Nappammulana mennang makkutana séddié lao ri laingngé, niga polé ri yelle'na mennang iya pogau'éngngi matu gau'éro. Naompona appangéwangeng ri yelle'na ana'-ana' gurunna Yésus, passalenna niga polé ri yelle'na mennang harusu' riyangga' kaminang battowa. Nakkeda Yésus lao ri mennang, “Sining arunna bangsaé iya dé'é naissengngi Allataala napanrasa-rasai ra'ya'na, sibawa sining tomakuwasaé riyasengngi ‘Pallinrunna Ra'ya'é.’ Iyakiya iko dé' naweddikko makkuwaro. Sibalé'na, tau iya kaminang battowaé ri yelle'mu harusu'i mancaji pada-pada iya kaminang baiccu'é, sibawa pamimpingngé harusu'i mancaji pada-pada pattumanié. Niga lebbi battowa: tau iya tudangngé manré ri méjangngé, iyaré'ga tau iya tumaningiyéngngi? Tentu tau iya tudangngé. Iyakiya Iyya engkaka ri yelle'mu selaku pattumani. Ri laleng sininna asussak-Ku, tuli musibawak-Ka. Pada-pada Ambo'é pura mpérék-Ka ha' untu' mapparénta, makkuwatoniro Uwérékko matu iyaro ha'é. Narimakkuwannanaro weddikko maccowé massennas-sennang sibawa Iyya ri wettuk-Ku mancaji Arung. Natudakko matu ri yasé'na seppuloé duwa kadéra akkarungengngé untu' paréntai seppuloé duwa suku bangsana Israélié.” “Simon, Simon, éngkalingai! Purani ripalalo Ibillisi'é untu' mojiko; pada-pada gandongngé ripallaing polé ri olina, makkuwatoniro iya madécéngngé ripallaing matu polé ri majaé. Iyakiya purana massempajangekko, Simon, kuwammengngi aja' nalollo teppe'mu. Sibawa narékko lisuno ri Iyya, harusu'ko péwatangiwi silessu-silessuremmu.” Nappébali Pétrus, “Puwang, sadiyaka muttama' tarungkué sibawa maté silaong Idi Puwang!” Nakkeda Yésus, “Ateppe'no Pétrus, riwettu dé'napa naoni manu'é iyaé essoéwé, wékkatelluni muwassakkarek-Ka.” Purairo makkedani Yésus lao ri mennang, “Riyolo wettunna Usuroko sibawa dé' Upalaloko tiwi tase'-tase', sépu iyaré'ga sapatu, engkaga akurangemmu?” Nappébali mennang, “Dé'!” Nakkeda Yésus, “Iyakiya makkekkuwangngé niga mappunnai tase'-tase' iyaré'ga sépu, harusu'i natiwi; sibawa niga dé' nappunnai peddang, harusu'i nabalu' jumbana untu' melli peddang. Saba', ateppe'no, aya'na Kitta'é iya makkedaé, ‘Riyangga'i matu selaku séddi tau maja,’ harusu'i kajajiyang ri alé-Ku. Saba' aga taroki ri lalenna Kitta'é passalenna Iyya, kajajiyanni makkekkuwangngéwé.” Nakkeda ana'-ana' gurunna Yésus, “Puwang, itai, engka duwa peddang kuwaé.” Nappébali Yésus, “Sikuna!” Nasalaini Yésus kotaé nalao pada-pada biyasaé ri Bulu-bulu Zaitun, nalaoto ana'-ana' gurun-Na silaongengngi. Lettu'nana kuwaro, makkedani lao ri mennang, “Assempajakko kuwammengngi aja' mupéneddingiwi paccobangngé.” Nalaona Yésus mabéla-béla céddé polé ri mennang, kira-kira sipaggenrungeng, nainappa makkaluttu massempajang, adan-Na, “Ambo', rékko weddingngi, pabélaiwi polé ri Iyya anrasa-rasang iya harusu'é Upéneddingi. Iyakiya aja' nasituru élo-Ku, sangadinna situru élona Ambo' bawang.” [ Engka séddi malaéka' lao ri Aléna péwatangiwi. Manrasa-rasa senna'ni Yésus secara baténg, angkanna pédé' matonget-tongenni massempajang. Puse'-Na pada-padai daraé tetti ri tanaé.] Puranana massempajang, lisuni Yésus ri ana'-ana' gurun-Na. Napoléini mennang matinro nasaba messé senna'i. Nakkeda lao ri mennang, “Magi mumatinro? Oto'no namuwassempajang, kuwammengngi dé' nakennako paccobang.” Ri wettu mabbicarana mupa Yésus, poléni sirombongang tau. Ripimpingngi mennang ri Yudas, sala séddinna ana' gurunna Yésus. Nalaona Yudas ri Yésus nanabauwi. Iyakiya makkedai Yésus lao ri Yudas, “Yudas, maélokoga bali'bellariwi Ana'na Tolinoé sibawa pabbau?” Wettunna ana'-ana' gurunna Yésus iya engkaé kuwaro naita aga iya maéloé kajajiyang, makkedani mennang, “Puwang, rilurui bawanni sibawa peddang!” Na sala séddinna polé ri mennang munrui atanna imang lompoé sibawa peddang angkanna pettu daucculing ataunna. Iyakiya makkedai Yésus, “Sikuna!” Nainappa nakarawa daucculinna iyaro tauwé sibawa napajjappai. Nanakkeda Yésus lao ri kapala-kapala imangngé sibawa sining parawira pangawalna Bolana Puwangngé, enrengngé sining pamimpinna Yahudié iya engkaé kuwaro untu' tikkengngi, “Tau maja-Ka'ga, namupolé sibawa peddang nenniya tarasulu untu' tikkek-Ka? Esso-essoka sibawa ri Bolana Allataala, magi nadé' mutikkek-Ka? Iyakiya iyanaé wettunna tinda'ko, sibawa wettunna pettangngé makkatenning akuwasang.” Natikkenni mennang Yésus nanatiwii ri bolana imang lompoé. Maccoweni Pétrus polé mabéla. Ri tengnga-tengngana seddé bolaéro ripalluwa'ni api appulué, nalaona Pétrus tudang silaong sining tau iya tudangngé mattulilingiwi. Sala séddinna pattumani makkunrai mitai Pétrus tudang ri seddéna apiéro; naiyaro pattumani makkunraié napénessaini Pétrus, nainappa makkeda, “Iyaé tauwé silaong towi onna' Yésus!” Iyakiya massakkai Pétrus. Nanakkeda, “Dé' sises-siseng uwissengngi iyaro tauwé!” Dé' namaitta ri munrinna, engka séddi tau laing mitai Pétrus sibawa makkeda, “Ikoto sala séddinna polé ri mennang!” Iyakiya mappébaliwi Pétrus, “Dé', tenniyaka!” Kira-kira sijang ri munrinna, engka séddi tau laissi makkeda sibawa sadda battowa, “Mémeng iyaé tauwé ana' gurunnai Yésus, saba' tau Galiléa towi!” Iyakiya mappébaliwi Pétrus, “Aga akkattamu, dé' uwissengngi!” Iyatoro wettué, ri wettu mabbicarana mupa Pétrus, naonina manu'é. Nagilinna Yésus nanaitai Pétrus. Nanaéngngeranni Pétrus, pura makkedai Puwangngé ri aléna, “Riwettu dé'napa naoni manu'é iya essoéwé, wékkatelluni muwassakkarek-Ka.” Nassuna Pétrus polé kuwaro nateri tassénge'-sénge'. Sining tau iya jagaiyéngngi Yésus, nacculé-culéini sibawa nababbai. Natongkoi mennang matan-Na sibawa makkutana ri Aléna, “Coba teppui niga barasa'-Ko!” Maéga mupa ada-ada paccella iya napowadaé lao ri aléna. Elénana, sining pamimpinna Yahudié, kapala-kapala imangngé, sibawa guru-guru agamaé maddeppungeng, nainappa Yésus ritiwi ri yolona Mahkama Agamana mennang. Nakkeda mennang ri Aléna, “Paissengiki, Arung Pappassalama'-Koga?” Nappébali Yésus, “Muwi Upowadakko, dé'to mumateppe matu. Narékko makkutana-Ka ri iko, dé'to mumappébali matu. Iyakiya mappammulai makkekkuwangngé, Ana'na Tolinoé tudangngi matu ri seddé ataunna Allataala Iya Pommakuwasaé.” Makkeda manenni mennang, “Rékko makkuwaitu, Ana'na-Ko Allataala?” Nappébali Yésus, “Makkuwaitu adammu.” Nakkeda mennang, “Dé'na naparelluki sabbi! Riyéngkalingani polé ri témun-Na!” Tettong manenni iyaro tau maddeppungengngé, nanatiwii Yésus ri yolona Pilatus. Nakkuwanaro mennang mappammula tenre'i. Makkedani mennang, “Rilolongengngi iyaé tauwé papusai ra'ya'é. Napangarai tauwé kuwammengngi aja' nakkamaja sima lao ri Kaisar, saba' adanna Aléna iyanaritu Kristus, séddiwi arung.” Nakkutana Pilatus lao ri Yésus, “Tongek-Koga Arunna tau Yahudié?” Nappébali Yésus, “Makkuwaitu adatta puwang.” Nakkeda Pilatus lao ri kapala-kapala imangngé sibawa tau maégaéro, “Dé' ulolongeng muwi séddi asalang ri tauwéwé untu' hukkungngi.” Iyakiya pédé' maddessa'i mennang, “Pappagguruwan-Na pangarai tauwé ri sininna Yudéa; mula-mulanna ri Galiléa, namakkekkuwangngé lettu toni kuwaé.” Wettunna naéngkalinga Pilatus iyaro, makkutanani, “Aga iyaé tauwé tau Galiléa?” Ripowadannana makkedaé assalenna Yésus poléi ri daéra iya ri yawa paréntanaé Hérodés, nakirinni Pilatus Yésus lao ri Hérodés, iya wettuéro engka towi ri Yérusalém. Masennang senna'ni Hérodés wettunna naita Yésus, saba' maittana naéngkalingai passalenna Yésus sibawa macinnana mitai Yésus pogau' anu makalallaingngé. Rimakkuwannanaro maéga nakkutang ri Yésus, iyakiya dé' sises-siseng nappébali Yésus. Kapala-kapala imangngé sibawa guru-guru agamaé mangolo towi kuwaro sibawa tenre'i Yésus. Hérodés sibawa anggota-anggota tentarana nacculé-culéiwi sibawa napakatunai Yésus, nainappa napappakéi pakéyang maraja, nanakiringngi lisu ri Pilatus. Iyatoro essoé Hérodés sibawa Pilatus, iya simusué riyolo, massellaoni paimeng. Napaddeppungenni Pilatus kapala-kapala imangngé, sining pamimpingngé sibawa ra'ya'é, nainappa makkeda lao ri mennang, “Mutiwii iyaé Tauwé lao ri iyya sibawa makkeda makkedaé Napapusai sining tauwé. Makkekkuwangngé purani uparéssa ri yolomu, iyakiya dé' sises-siseng ulolongengngi séddi ja iya muteppuwangngéngngi. Makkuwatoro pallolongenna Hérodés, saba' nasuro towi Yésus lisu paimeng ri idi. Iyaé tauwé dé'gaga napogau' iya nasitinajaiyé rihukkung sibawa pahukkungeng maté. Rimakkuwannanaro maéloka barasa'i nainappa uleppessang.” [ Tungke' ramé-ramé Paska, harusu'i Pilatus leppessang séddi tau tarungku untu' ra'ya'é.] Gorani sininna tauwé iya maddeppungengngé kuwaro, “Unoi! Leppessangengngi Barabas!” ( Ritarungkui Barabas nasaba ronta kajajiyangngé ri kotaé sibawa nasaba abbunowang.) Maéloi Pilatus leppessangngi Yésus, rimakkuwannanaro mabbicarapi siseng lao ri tau maégaéro. Iyakiya gorai mennang, “Sallii! Sallii!” Na untu' mabbékkatellunna Pilatus gora lao ri mennang, “Iyakiya aga asalan-Na? Dé' asalang ulolongeng ri Aléna muwi séddi iya nasitinajaiyé rihukkung sibawa pahukkungeng maté! Maéloka barasa'i, nainappa leppessangngi.” Iyakiya matteru-terui mennang gora siullé-ulléna makkedaé harusu'i Yésus risalli. Na angkanna makkéwassélé gorana mennang. Napateppaini Pilatus pahukkungeng maté Yésus situru élona sining tauwéro, sibawa leppessangngi tau iya naéllauwé mennang, iyanaritu tau iya ritarungkué nasaba maronta'na sibawa abbunowanna. Nainappa nabbéréyang Yésus lao ri mennang untu' rigaukeng siélo-élona mennang. Naritiwina Yésus ri mennang. Siruntu'ni mennang ri tengnga laleng séddi tau iya riyasengngé Simon, iya assalennaé poléi ri Kiréné, iya muttama'é ri kotaé. Natikkenni mennang, nainappa napassa méssangngi aju salliéro ri monrinna Yésus. Maégato tau maccowé joppa ri munrinna Yésus – ri yelle'na engkato sining makkunrai. Iyaro sining makkunraié nateringini sibawa nawatingi Yésus. Iyakiya gilingngi Yésus ri mennang sibawa makkeda, “Eh sining makkunrai Yérusalém! Aja' muteringi-Ka. Teringiwi alému sibawa ana'-ana'mu. Saba' engka matu napolé wettunna nakkeda tauwé, ‘Temmaka upe'na sining makkunrai iya dé'é naengka nappunnai ana', iya dé'é naengka naémmana' sibawa dé' naengka napasusu ana'lolo!’ Ri wettuénnaro nakkeda matu tauwé lao ri bulué, ‘Geppaki!’ Sibawa lao ri bulu-bulué, ‘Timpukki!’ Saba' rékko lao ri pong ngaju iya tuwoé mupa, napogau'i tauwé pada-padaéwé, agaré' tosi nagaukengngi matu mennang lao ri aju iya marakkoénna!” Engkato duwa tau laing – tau maja duwa – iya natiwié mennang untu' rihukkung maté silaong Yésus. Wettunna lettu ri onrong iya riyasengngé “Tengkora”, nasallini mennang Yésus sibawa iya duwa tau majaéro – séddi ri seddé ataunna sibawa séddi ri seddé abéyona Yésus. Nassempajanna Yésus, “Ambo', addampengengngi mennang! Dé' naissengngi mennang aga napogau'.” Nabagé-bagéni kuwaro pakéyanna Yésus ri yelle'na mennang sibawa naloteréi. Pada tettonni tauwé kuwaro makkita-ita, nasining pamimpinna Yahudié méllékéllé'i Yésus sibawa makkeda, “Purani napassalama' tau laingngé; cobani makkekkuwangngé passalama'i alé-Mu, rékko tonget-tongengngi Arung Pappassalama' iya napilé Allataala!” Prajuri'-prajuri'é méllékéllé towi. Poléi mennang nanawéréngngi anggoro kecci sibawa makkeda, “Rékko arunna-Ko tau Yahudié, passalama'ni alé-Mu!” Ri coppo'na aju sallina Yésus, tarokii ada-adaéwé: “Iyanaé Arunna Tau Yahudié.” Sala séddinna tau maja iya risallié kuwaro cella-cellai Yésus. Makkedai, “Arung Pappassalama'-Koto? Nah, passalama'ni alé-Mu sibawa idi!” Iyakiya tau maja séddié mamparengngi, adanna, “Dé'ga mumétau ri Allataala? Pada-padako rihukkung maté. Iyakiya pahukkungetta idi duwa mémeng siwale' pangkauketta. Iyakiya Alénaro dé' napasala!” Nainappa makkeda lao ri Yésus, “Yésus, éngngerakka, rékko polé-Ko selaku Arung!” Nakkeda Yésus lao ri tauwéro, “Ateppe'no, iyaé essoé sibawakko matu Iyya ri Firdaus.” Kira-kira tetté seppulo duwa tangassoé, dé'na nattappa essoé, namapettang siseng sininna wanuwaé narapi tetté tellu arawéngngé. Kaing paddenring iya taggattungngé ri laleng Bolana Puwangngé, sapé' mancaji duwa. Nagora Yésus sibawa sadda battowa, “Ambo'! Ri laleng limam-Mu Uwabbéréyang alé-Ku!” Purana makkeda makkuwaro, maténi. Wettunna naita parawira tentaraé aga pura kajajiyang, napojini Allataala. Nakkeda, “Dé' tongeng Napasala iyaro tauwé!” Tau maégaé iya laowé kuwaro makkita-ita, naitani aga kajajiyang. Lisu manenni mennang sibawa massesse kalé. Nasininna sissenna Yésus, muttama' toni sining makkunrai iya maccowériyéngngi polé ri Galiléa, mabélai tettong mita manengngi iyaro. Iyaé Yusuf, laoni mangolo ri Pilatus sibawa naéllaunna kuwammengngi nariwéréng ujuna Yésus. Nainappa napanonno ujuna Yésus polé ri aju sallié, nainappa nadoko sibawa kaing walu polé ri kaing lénangngé. Purairo napalénne'ni ri laleng tampung iya riyébbué ri laleng bulu-bulu batué – iyaro tampungngé dé'pa naengka naripaké. Iyaro essoé, esso Jumai; namawé'ni esso Saba'é. Sining makkunrai iya silaongngé Yésus polé ri Galiléa naccowérini Yusuf sibawa mitai iyaro tampungngé. Naita towi mennang pékkugi ujuna Yésus ripalénne ri laleng tampungngé. Nainappa lisu mennang passadiya rampa-rampa sibawa minnya' wangi untu' minnyakiwi ujuna Yésus. Ri esso Saba'é, mappésauni mennang majjama untu' turusiwi parénta-paréntana agamaé. Ri esso Aha'é, maélé senna'ni iyaro sining makkunraié lao ri tampungngé tiwi rampa-rampa iya puraé napassadiya mennang. Lettu'nana ri tampungngé, napoléini mennang batu pattongkona pura rigalétté. Namuttama'na ri laleng tampungngéro, iyakiya dé' naruntu'i ujuna Yésus kuwaro. Ri wettu tettonna mupa mennang kuwaro sibawa pusana pikkiri'i iyaro gau'é tappa engka duwa tau tettong ri seddéna sibawa millakkillang pakéyanna. Métau senna'ni mennang, nainappa suju' lettu ri tanaé, nakkeda iya duwa tauwéro lao ri mennang, “Magi musappai tau tuwoé ri yelle'na tau maté? Dé'ni kuwaé; moto'ni! Engngerangngi aga pura Napowada lao ri iko wettunna mupa ri Galiléa, makkedaé, ‘Ana'na Tolinoé harusu'i riyabbéréyang lao ri tau madosaé; nainappa risalli, na ri esso matellué tuwoi matu paimeng.’ ” Naéngngeranni sining makkunraiéro ada-adanna Yésus. Lisunnana polé ri tampungngéro, nacuritani mennang sininna iyaro kajajiyangngé lao ri seppuloé séddi rasul sibawa sininna tau maccowé laingngé. Sining makkunrai iya powadangngéngngi iya manennaro lao ri ana'-ana' gurunna Yésus, iyanaritu: Maria Magdaléna, Yohana sibawa Maria indo'na Yakobus, enrengngé sining makkunrai laingngé iya silaongngé mennang. Iyakiya iyaro rasul-rasul-é nasemmi iyaro sining makkunraié maccurita bawammi. Dé' natepperiwi mennang curitana iyaro sining makkunraié. Iyakiya tokkongngi Pétrus nalari lao ri tampungngé. Nabbukku makkita lilaleng, nanaitani bannami kaing pawwalunna bawang kuwaro. Hérang senna'ni Pétrus, nainappa lisu sibawa penno pakkutana ri laleng atinna passalenna aga pura kajajiyang. Iyatoro essoé, engka duwa tau maccowé ri Yésus iya joppaé lao riséddié désa iya riyasengngé Emaus, kira-kira seppulo séddi kilo bélana polé ri Yérusalém. Ri laleng joppana mennang nabicarai passalenna sininna gau'é iyaro puraé kajajiyang. Ri wettu mabbicara-bicarana mennang pada passui pallolongenna, alénana Yésus polé joppa silaong mennang. Naitani mennang Yésus, iyakiya engka mébbui mennang nadé' narupai Aléna. Nakkeda Yésus, “Passaleng aga mubicara ri tengnga laleng onna'?” Mappésauni mennang sibawa masussa tappana. Na séddi polé ri mennang, iya riyasengngé Kléopas, makkutana ri Yésus, “Bapa'ga bawang alé-aléna topolé-polé ri Yérusalém dé' naissengngi gau' iya kajajiyangngé kuwaro céddé-céddé'éwé?” Nakkutana Yésus, “Gau' agaro?” Nappébali mennang, “Gau' kajajiyangngé lao ri Yésus, tau polé ri Nazarét. Nabiwi; ada-adan-Na sibawa pangkauken-Na makuwasa senna'i – muwi situru pakkitanna Allataala muwi situru pakkitanna sininna tauwé. Kapala-kapala imangngé sibawa sining pamimpinna bangsata mabbéréyangngi untu' rihukkung maté, na-Nasallii mennang! Padahal riyamménasaiwi makkedaé Aléna ritu paleppe'i matu Israélié! Na iyaé essoé, esso matellunnani sipongenna kajajiyang gau'éro. Na engka topa siyagangngaré makkunrai polé ri yelle'ta mébbuki tasséleng. Maélé senna' mupa nalao mennang ri tampungngé, iyakiya dé' naruntu'i uju-Na kuwaro. Nalisu mennang powadai makkedaé mitai mennang malaéka', na iyaro malaéka'é powadai makkedaé tuwoni Yésus. Siyagangngaré tau polé ri idi lao ri tampungngé nanapoléini makkedaé aga napowada sining makkunraiéro makkuwa mémengngi, iyakiya dé' naitai Yésus.” Nakkeda Yésus lao ri mennang, “Mémeng madonggoko! Matengnge senna'ko matepperiwi sininna iya puraé napowada nabi-nabié! Dé'ga na Arung Pappassalama'é harusu'i napéneddingi riyolo' anrasa-rasangngé, nainappa nalolongeng alebbiren-Na?” Nainappa napakatajang Yésus lao ri mennang aga tarokié ri laleng sininna Kitta'é passalenna Aléna, mappammulai ri Kitta'-kitta'na Musa enrengngé Kitta'na sining Nabié. Namacawé'na mennang ri désa iya nakkattaiyé. Najjaini Yésus maélo joppa matteru, iyakiya ritahangngi ri mennang. Nakkeda mennang, “Onrono ri onrotta, mammulani wenni sibawa mammula toni mapettang.” Nauttama'na Yésus untu' mabbenni ri onronna mennang. Ri wettu tudanna mennang manré, malani Yésus roti, Nasukkuru' ri Allataala, nainappa Napuwé-puwé iyaro rotié, na-Nawéréngngi lao ri mennang. Namainge'na mennang makkedaé Yésus iyaro. Iyakiya lennye'i polé ri pakkitanna. Nakkeda mennang séddié lao ri laingngé, “Dé'ga nasamanna luwang atitta wettunna mabbicara ri idi ri tengnga laleng, wettunna napakatajang lise'na Kitta'é lao ri idi?” Iyatoro wettué natettong nalisu lao ri Yérusalém. Napoléini mennang kuwaro iya seppuloé séddi ana' gurunna Yésus maddeppungeng sibawa laingngé. Nakkedana mennanro, “Mémeng tongeng, tuwoni paimeng Puwangngé! Purani nappaitang Aléna lao ri Simon!” Iya duwa tau maccowériyéngngi Yésus iya nappa poléro nacuritani pangalamanna mennang ri tengnga allalengenna, sibawa pékkugi mennang rupai Puwangngé ri wettu Napuwé'-puwé'na rotié. Ri wettu maccuritana mupa mennang, tappa engka muni Yésus tettong ri tengnga-tengngana sibawa makkeda, “Saléwangekko!” Tassélenni mennang sibawa métau, nasaba nasengngi mennang mita sétang. Iyakiya makkedai Yésus, “Magi mumétau? Magi naompo abata-batangngé ri laleng atimmu? Itai limak-Ku sibawa ajé-Ku. Issenni, makkedaé Iyya'naé! Karawani sibawa pénessaini, nasaba sétangngé dé' nappunnai juku iyaré'ga buku, pada-pada iya muwitaé ri Iyya.” Makkeda makkuwairo Yésus nanappaitang towi lao ri mennang limanna sibawa ajé-Na. Na riwettu dé'na mupa namateppe' mennang, nasaba marennu senna'na sibawa héranna, makkutanani Yésus ri mennang, “Engkaga nanré muwappunnai kuwaé?” Riwérénni ri mennang sipolo balé pura nasu. Nalani Yésus iyaro balé, nananréi ri yolona mennang. Purairo makkedani lao ri mennang, “Iyanaé gau'-gau' iya puraé Upowadakko wettuk-Ku sibawa mupo: makkedaé tungke' gau' iya tarokié passalenna Iyya ri laleng Kitta'na Musa, sining Nabié, sibawa Mazmur-é, harusu'i kajajiyang.” Nanatimpa'ni Yésus akkalenna mennang untu' pahangngi akkattana Kitta'é. Nakkeda Yésus lao ri mennang, “Ri laleng Kitta'é tarokii makkedaé Arung Pappassalama'é harusu'i manrasa-rasa, sibawa harusu'i moto' paimeng polé ri amaténna ri esso matellué. Makkuwatoro ri laleng asenna iyaro Arung Pappassalama'é harusu'i riyabbirittang lao ri sininna bangsaé makkedaé harusu'i toba' rupa tauwé, sibawa Allataala maddampengengngi dosaé. Na iyaro karébaé harusu'i riyabbirittang mappammulai ri Yérusalém. Ikona ritu sabbi'-sabbinna iya manenro. Na alé-Ku maélo kiringngi lao ri iko aga pura najjanciyang Ambo'é. Iyakiya harusu'ko tette mattajeng ri kotaéwé narapi akuwasang polé ri Allataala pennoiko.” Purairo natiwini Yésus mennang massu ri saliweng kota lettu ri Bétania. Kuwaniro nakka liman-Na, na-Nabarakkakiwi mennang. Ri wettu Napogau'naro, tarakkani ménré ri surugaé, nassaran-Na sibawa mennang. Suju'ni mennang sompai, nainappa lisu ri Yérusalém sibawa marennu senna'na atinna, sibawa matteru-terui pojiwi Allataala ri Bolana Puwangngé. Ri pammulanna, dé'napa naripancaji linoé, engka mémenni Saddaé. Engkai Saddaé silaong Allataala sibawa Saddaé pada-padai Allataala. Pammulanna mupa nasibawa Allataala. Iya manenna ripancajiwi naolai Aléna, sibawa polé ri sininna iya engkaé, dé'gaga séddi dé' naripancaji polé ri Aléna. Iyaro Saddaé assalennai atuwongngé, na iyaro atuwongngé mabbéréi tajang lao ri rupa tauwé. Iyaro tajangngé mattappai ri laleng pettangngé, na iyaro pettangngé dé' naulléi peddéiwi. Poléni tau iya nasuroé Allataala, asenna Yohanés. Poléi mabbirittangngi passalenna iyaro tajangngé, kuwammengngi nasininna tauwé mateppe'i. Aléna paimeng tenniya iyaro tajangngé, nabbirittangngi bawang. Tajang tonget-tongengngé iya tappaéngngi sininna rupa tauwé, poléi ri linoé. Saddaé engkai ri linoé, ripancajiwi linoé polé ri Aléna, iyakiya dé' naissengngi linoé. Laowi ri wanuwan-Na muto iyakiya dé' naritarima ri bangsa-Na. Namuni engkato tau tarimai sibawa mateppe' ri Aléna, nawéréngngi ha' mancaji ana' Allataala, iya riyajjanciyangngé tenniya polé ri rupa tauwé, saba' iyaro atuwong mabarué poléi ri Allataala assalenna. Mancaji rupa tauni Saddaé, monroi ri yelle'ta, napurani riita arajan-Na. Iyaro arajangngé natarimai selaku Ana' Tungke'na Ambo'é. Naolai Aléna nariita Allataala sibawa pammasé-Na lao ri idi. Poléi Yohanés selaku sabbin-Na mabbirittangngi: “Iyanaé Aléna iya upowadaé: Poléi matu lebbi ri monri naiya iyya, saba' dé'napa uwengka, engka mémenni.” Pennoi pammasé; dé' appésaunna, barakkakiki. Hukkunna Puwangngé ritarimai naolai Musa. Iyakiya pammasé sibawa atinulurenna Allataala ripannessai naolai Yésus Kristus. Dé' gaga pura mitai Allataala, ri lainnaé Ana' Tungke'na Ambo'é, iya padaé sibawa Ambo'é, sibawa mareppé senna'ki ri Aléna, Aléna ritu pannessai Ambo'é lao ri idi. Sining panguwasa Yahudié ri Yérusalém nasuroi imang-ngimangngé sibawa sining tau Léwié lao ri Yohanés sibawa makkutanangngi ri aléna, “Niga ikoé?” Namangakuna Yohanés terus terang, “Tenniyaka Arung Pappassalama'é.” Nakkutana mennang, “Rékko makkuwaitu, niga iko? Ikoga Elia?” Nappébali Yohanés, “Tenniya.” Nakkutanasi mennang, “Ikoga Nabié?” Nappébali, “Tenniya.” Nakkeda mennang, “Rékko makkuwaitu, powadanni niga iko, kuwammengngi weddikki mpéréngngi pappébali lao risining tau iya suroékki. Aga adammu passalenna alému?” Nappébali Yohanés, “Iyya'naé iya napowadaé Nabi Yésaya: ‘Tau iya goraé ri padang kessi'é: Paratai lalengngé untu' Puwangngé.’ ” Sining tau iya risuroé ri tau Farisiéro makkutanasi, “Rékko tenniyako Arung Pappassalama'é, tenniya Elia, tenniya Nabié, magi palé mumaccemmé?” Nappébali Yohanés, “Iyya maccemméka sibawa uwai. Iyakiya ri tengnga-tengngamu engka tau iya dé'é muwissengngi. Poléi lebbi ri monri naiya iyya, iyakiya muwi untu' lukkai tulu sapatun-Na dé'to usitinaja.” Iya manennaro kajajiyangngi ri Bétania, seddé alauna Salo Yordan onronna Yohanés maccemmé. Pappa bajanana, naitani Yohanés, Yésus lao ri aléna. Nakkeda Yohanés, “Itai, iyanaro Ana' Bimbala'na Allataala iya leddaéngngi dosana linoé. Aléna ritu iya uwasengngé poléi matu lebbi ri monri naiya iyya, iyakiya lebbi battowai naiya iyya, saba' ri wettu dé'napa ujaji, engka mémenni. Ri yolonaro dé' uwissengngi niga Alénaro. Padahal poléka maccemmé sibawa uwai kuwammengngi naissengngi bangsa Israélié.” Nappésabbing towi Yohanés iyaé, “Uwitai Rohna Allataala nonno pada-pada jangang-jangangngé polé ri langié naonro ri yasé'-Na. Iyaro wettué dé'pa uwissengngi niga Aléna? Iyakiya Allataala iya suroékka maccemmé sibawa uwai pura makkeda ri iyya ‘Rékko muwitai Rohna Allataala nonno, naonro ri yasé'na séddié tau, iyanaritu maccemmé matu sibawa Rohna Allataala.’ Alékuna pura mitai,” adanna Yohanés, “nausabbingngi makkedaé Aléna ritu Ana' Allataala.” Pappa bajanana, engkasi Yohanés ri onrongngéro sibawa duwa ana' gurunna. Wettunna naita Yésus lalo, makkedani, “Itai! Iyanaro Ana' Bimbala'na Allataala.” Iyaro duwaé ana' gurunna Yohanés naéngkalingani ada-adaéro, nanalao maccowériwi Yésus. Nagilinna Yésus limonri, nanaitai mennang maccowériwi. Nakkutana-Na, “Aga musappa?” Nappébali mennang, “Rabi, kégai Rabi monro?” – (‘Rabi’ bettuwanna guru.) Nakkeda Yésus, “Laono mai, na alému mitai.” Laoni mennang sibawa Aléna nenniya mitai kégai monro. Iyaro wettué tetté eppani arawéngngé. Iyaro essoé monroni mennang silaong Aléna. Sala séddinna polé ri Iya duwa tau iya puraé méngkalingai aga napowada Yohanés nainappa lao maccowériwi Yésus, iyanaritu Andréas, silessurenna Simon Pétrus. Mapperi-perini Andréas sappai Simon, silessurenna, nakkeda ri aléna, “Purani siruntu Mesias!” (Mesias padai Kristus, iyanaritu: Arung Pappassalama'é.) Risilaongenni Simon ri Andréas lao ri Yésus. Ritangngani Simon ri Yésus, nainappa makkeda, “Iko Simon, ana' Yona. Riyasekko matu Kéfas.” (Kéfas pada-padai Pétrus, bettuwanna: bulu batu.) Pappa bajanana, napettuini Yésus untu' lao ri Galiléa. Siruntu'ni Filipus, nakkeda ri aléna, “Laono mai muwaccowéri-Ka!” Assalenna Filipus iyanaritu Bétsaida, iyanaritu onrong naonroiyé Andréas sibawa Pétrus. Siruntu'ni Filipus sibawa Natanaél nakkeda ri aléna, “Siruntu'ni tau iya nasengngé Musa ri laleng Kitta Hukkunna Allataala, sibawa iya nabbirittangngé nabi-nabié. Iyanaritu Yésus polé ri Nazarét, ana'na Yusuf.” Iyakiya mappébaliwi Natanaél, “Weddigga séuwa iya makessingngé polé ri Nazarét?” Nappébali Filipus, “Laono mai na alému mitai.” Naitani Yésus Natanaél polé, nakkeda passalenna aléna, “Itai, iyanaro tau Israél tonget-tongeng. Dé'gaga apalessuwang ri aléna.” Nakkutana Natanaél ri Yésus, “Pékkugi taissekka Pa'?” Nappébali Yésus, “Riwettu dé'napa naobbiko Filipus, Uwita mémenno ri yawana pong araé.” Nakkeda Natanaél, “Pa' Guru, Bapa' iyanaritu Ana' Allataala! Bapa' ritu Arunna bangsa Israélié!” Nakkeda Yésus, “Mateppe'ko nasaba Upowadai makkedaé Uwitako ri yawana pong araé? Gau'-gau' iya lebbi battowaé na iyaro muwita matu!” Nakkedapa Yésus, “Tongeng, ateppe'no, muwitai matu langié tattimpa', na malaéka'-malaéka'na Allataala noté ri Ana'na Tolinoé.” Duwangngesso ri munrinna engka pésta abottingeng ri kota Kana ri Galiléa, na engkai kuwaro indo'na Yésus. Yésus sibawa ana'-ana' gurun-Na riyobbi towi lao ri péstaéro. Wettunna cappu anggoro'é, makkedani indo'na Yésus lao ri Yésus, “Acappurengngi mennang anggoro.” Nappébali Yésus, “Indo', aja' musuro-Ka. Dé'pa narapii wettunna Uwappaddissengeng alé-Ku.” Iyakiya makkedai indo'na Yésus lao risining pattumanié, “Pogau' bawanni aga napowadakko.” Engka enneng bémpa napassadiya kuwaro untu' apparelluwang abbissang situru ade' Yahudié. Tungke' bémpa lise'na kira-kira sératu liter. Nakkeda Yésus lao risining pattumaniéro, “Lisekiwi iyaro sining bémpaé sibawa uwai.” Nalisekini mennang gangka penno. Nainappa makkeda Yésus lao ri mennang, “Alani céddé' iyaro uwaié makkekkuwangngé namutiwii lao ri pamimping péstaé.” Natiwini mennang iyaro uwaié lao ri pamimpinna péstaé, nanakanyaméi uwai iya tappinraénna mancaji anggoro. (Dé' naissengngi polé kégi iyaro anggoro'é, banna sining pattumani iya tiri'éngngi iyaro uwaié bawang missengngi.) Na iyaro pamimping péstaé naobbini bottimpurané, nainappa makkeda ri aléna, “Biyasana tauwé anggoro makessingngé riyolo' napatala, cau maneppi sining undangengngé ménung, nainappa anggoro biyasaé. Iyakiya idi Saudara nataroi anggoro kaminang makessingngé lettu makkekkuwangngé!” Iyanaro anu makalallaing mammulang napogau' Yésus. Iyaro napogau'i ri Kana ri Galiléa. Nasibawang tanrangngéro nappaitangngi arajan-Na. Namateppe'na ana'-ana' gurun-Na. Purairo laoni Yésus ri Kapernaum silaong indo'-Na, sining silessuren-Na sibawa sining ana' gurun-Na. Monroni mennang kuwaro siyagangngaré esso ittana. Macawé'nana Esso Maraja Paskana Yahudié, laoni Yésus ri Yérusalém. Napoléini Yésus ri Bolana Allataala sining pabbalu' sapingngé, bimbala'é, sibawa jangang-jangangngé; makkuwatoro sining passélé dowié tudang kuwaro. Mébbuni Yésus séuwa cambu polé ri tulué nainappa narukka sininna olokolo'éro, muwi bimbala' iyaré'ga saping polé ri laleng Bolana Allataala. Nabalé'ni sining méjanna passélé-sélé dowié angkanna tassiya-siya dowina lao tulili. Nakkeda lao ri pabbalu' jangang-jangangngé, “Akka manengngi polé kuwaé! Aja' mupancajiwi Bolana Ambo'-Ku onrong dangkang!” Nanaéngngeranni sining ana' gurun-Na aya'na Kitta'éwé, “Pappojik-Ku lao ri Bola-Mu oh Allataala, natunui atik-Ku.” Nasining panguwasana Yahudié naéwani Yésus, adanna mennang, “Cobasai mébbu anu makalallaingngé selaku tanrang lao ri idi makkedaé engka ha'-Mu tinda' pada-padaéwé.” Nappébali Yésus, “Ruttunni Bolaéwé, na ri laleng tellungngesso Upatettongngi matu paimeng.” Nakkeda mennang, “Patappulo enneng taunna riyapparelluwang untu' patettongngi iyaé Bolana Allataala. Na iko maéloko patettongngi paimeng ri laleng tellungngesso?” Iyakiya Bolana Allataala iya nasengngé Yésus iyanaritu watakkalé-Na. Jaji rimunri, puranana ripaoto' Yésus polé ri amaténgngé, naéngngeranni ana'-ana' gurun-Na makkedaé iyaro gau'é purai napowada. Namateppe'na mennang lao ri iya tarokié ri laleng Kitta'é sibawa lao ri iya napowadaé Yésus. Ri wettu engkana mupa Yésus ri Yérusalém ri wettu Ramé-Ramé Paskaé, maéga tau mateppe' ri Aléna nasaba sining anu makalallaing iya napogau'é. Iyakiya aléna Yésus dé' natepperiwi mennang, saba' naisseng manengngi sininna tauwé. Dé' naparellu tauwé mabbéré pappakatajang lao ri Aléna passalenna nigi-nigi, saba' aléna missengngi aga iya engkaé ri laleng atinna rupa tauwé. Engka séddi pamimping agama polé ri yelle'na tau Farisié iya riyasengngé Nikodémus. Riséuwaé wenni laowi ri Yésus sibawa makkeda, “Bapa' Guru, irissengngi Bapa' risuroi ri Allataala. Saba' dé' muwi séddi tau mulléi mébbu anu makalallaing pada-pada naébbué Bapa', rékko dé' narisibawang ri Allataala.” Nappébali Yésus, “Ateppe'no, dé' séddi tau mulléi mancaji anggotana umma'na Allataala, rékko dé' narijajiyang paimeng.” Nakkeda Nikodémus lao ri Yésus, “Masa' tau battowaé wedding jaji paimeng? Weddigga muttama' paimeng ri laleng parémmananna indo'na nappa rijajiyang paimeng?” Nappébali Yésus, “Tongeng senna' adak-Ku: rékko tauwé dé narijajiyang polé ri uwai sibawa polé ri Rohna Allataala, iyaro tauwé dé' nawedding mancaji anggotana umma'na Allataala. Secara mallahéreng rijajiyangngi rupa tauwé ri tomatowaé, iyakiya secara baténg rijajiyangngi ri Rohna Allataala. Aja' muhérang rékko makkeda-Ka: iko maneng harusu'ko rijajiyang paimeng. Mangirii angingngé kégi naélori; riyéngkalingai oninna, iyakiya dé' narisseng polé kégai apolénna sibawa kégai laona. Makkuwatoro tau iya rijajiyangngé ri Rohna Allataala.” Nakkutana Nikodémus, “Pékkugi iyaro wedding kajajiyang?” Nappébali Yésus, “Na guruko ri Israél; masa' dé' muwissengngi? Ateppe'no: mabbicaraki banna passalenna aga iya riissengngé, namabbéréki asabbiyang banna passalenna aga iya puraé riita; iyakiya dé' mumaélo tarimai asabbiyattaro. Dé' mumateppe rékko ucuritakko passalenna gau'-gau' polé ri linoéwé; pékkugi weddikko mateppe', rékko ucuritakko gau'-gau' passalenna surugaé? Dé' séddi tau pura ménré ri surugaé, ri lainnaé iya nonnoé ri linoé, iyanaritu Ana'na Tolinoé. Pada-pada Musa paénré ula tembaga ri sibatangngé aju ri padang kessi'é, makkuwatoro Ana'na Tolinoé harusu' ripaénré, kuwammengngi nasininna tau iya matepperiyéngngi lolongengngi atuwong tongengngé sibawa mannennungengngé.” Nasaba makkumani Allataala namaseinna rupa tauwé ri linoéwé, angkanna Nabbéréyangngi Ana' Tungke'na, kuwammengngi na tungke' tau iya matepperiyéngngi dé' nabinasa sangadinna lolongengngi atuwong tongengngé sibawa mannennungengngé. Saba' nakiringngi Allataala Ana'-Na tenniya untu' madélékiwi linoéwé, iyakiya untu' passalama'i. Tau iya mateppe'é ri Aléna dé' narihukkung. Iyakiya tau iya dé'é namateppe' ri Ana'na Allataala purani rihukkung ri Allataala, nasaba dé' namateppe' ri Ana'na Allataala iya séddi-séddié. Rituntu'i nallalengiwi gau'éwé: Iyaro tajangngé engkani polé ri linoé, iyakiya rupa tauwé lebbi napojiwi pettangngé naiya tajangngé, saba' majai pangkaukenna mennang. Tungke' tau iya pogau'é ja, nabenciwi tajangngé; dé' namaélo lao ri tajangngé, kuwammengngi pangkaukenna majaé dé' napaita. Iyakiya tau iya pogau'éngngi élona Allataala, laowi ri tajangngé kuwammengngi namanessa makkedaé aga napogau' iyanaritu siturui élona Allataala. Purairo laoni Yésus sibawa ana'-ana' gurun-Na ri Yudéa. Monroni kuwaro siyagangngaré esso ittana silaong mennang sibawa maccemmé. Siyagangngaré ana' gurunna Yohanés mammulani mappangéwang sibawa tau Yahudié passalenna peraturang apaccingengngé. Laoni mennang ri Yohanés, sibawa makkeda, “Pa' Guru, naéngngerang mupaga Bapa' tau sibawangngéngngi Bapa' ri liwenna Salo Yordanro, iya najellorengngékki Bapa' riyolo? Maccemmé towi makkekkuwangngé, nasininna tauwé laowi ri Aléna!” Nappébali Yohanés, “Dé' naulléi mappunnai agi-agi tolinoé rékko dé' nariwéréng ri Allataala. Alému pura méngkalingaka makkeda, ‘Tenniyaka Arung Pappassalama'é. Risuroka poddiyoloiwi Aléna.’ Botting makkunraié iyanaritu appunnangennai bottimpurané. Sellaona bottimpuranéro banna tettongngi ranrengngi sibawa méngkalingai, sibawa masennangngi rékko naéngkalingai saddanna bottimpurané. Makkuwatoniro iyya. Makkekkuwangngé masennang senna'ka. Aléna ritu harusu' pédé' penting, na iyya pédé' makurang penting.” Iya polé ri yasé'é napakacauri manengngi. Iya polé ri linoé rigolongkangngi tolino, sibawa mabbicara passalenna gau'-gau' linoé. Iya polé ri yasé napakacauri manengngi. Mabbicarai passalenna iya puraé naita sibawa naéngkalinga, iyakiya dé' séddi tau mateppe' ri pappésabbiyan-Na. Tau iya mateppe'é ri pappésabbiyan-Naro, nangakuiwi makkedaé tongengngi Allataala. Saba' tau iya nasuroé Allataala untu' palettu'i ada-adanna Allataala, nasaba pura riwérénni Rohna Allataala sukku lao ri Aléna. Ambo'é namaséiwi Ana'-Na, sibawa pura nabbéréyang manengngi akuwasangngé ri Aléna. Tau iya mateppe'é ri Ana'éro lolongengngi matu atuwong mannennungeng. Iyakiya tau iya dé'é namatinulu ri Ana'éro dé' nalolongeng atuwong. Rihukkungngi ri Allataala lettu mannennungeng. Naéngkalingani sining tau Farisié makkedaé Yésus lolongengngi sibawa cemméi lebbi maéga ana' guru naiya Yohanés. ( Sitongenna Yésus dé' naccemmé, sangadinna ana'-ana' gurun-Na bawang.) Wettunna naisseng Yésus makkedaé naéngkalingani sining tau Farisié passalenna gau'éro, lisuni ri Galiléa polé ri Yudéa. Ri laleng allalengennaro harusu'i nalaloi Samaria. Nalettu'na Yésus riséuwaé kota ri Samaria iya riyasengngé Sikhar, dé' namabéla polé ri tana iya nabbéréyangngé Yakub riyolo lao ri Yusuf, ana'na. Kuwaniro monro bujunna Yakub. Matekko senna'i Yésus nasaba allalengengngéro, rimakkuwannanaro tudanni ri wirinna bujungngé. Iyaro wettué kira-kira tetté seppulo duwa tangassoé. Nappébali iyaro makkunrai Samariaé, “Puwang tau Yahudi, na iyya tau Samaria; magi Puwang taéllau uwai rinung ri iyya?” (Saba' dé' gaga assisumpungenna sining tau Yahudié sibawa tau Samariaé.) Nappébali Yésus, “Akkalarapanna muwissengngi pabbéréna Allataala sibawa niga iya méllauwé uwai rinung ri iko, tentu méllau tokko uwai rinung ri Aléna, na-Nawérékko matu uwai tuwo.” Nakkeda iyaro makkunraié, “Dé' tappunnai banrong Puwang, na iyaé bujungngé malamung senna'. Polé kégaki Puwang lolongeng uwai tuwo? Yakub, ambo'na toriyolota, mpérékki iyaé bujungngé. Aléna malato uwai rinung polé kuwaé; makkuwatoro ana'-ana'na enrengngé olokolo'na. Tasengngiga Puwang lebbi battowaki na iya Yakub?” Nakkeda Yésus, “Tau iya ménungngéngngi iyaé uwaiéwé madekka mupi paimeng. Iyakiya tau iya ménungngéngngi uwai maéloé Uwabbéréyang, dé'na namadekkana lettu mannennungeng. Saba' uwai maéloé Uwabbéréyang mancajiwi matu mata uwai ri laleng aléna iya jompié massu sibawa mabbéré atuwong mannennungeng.” Nakkeda iyaro makkunraié, “Puwang tawérénna iyaro uwaiéro, kuwammengngi dé'na umadekkana; sibawa dé'na naparelluka lisuna kuwaé untu' mala uwai.” Nakkeda Yésus, “Laono muwobbii lakkaimmu, nainappa lisu kuwaé.” Nappébali iyaro makkunraié, “Dé' uwappunnai lakkai.” Nakkeda Yésus, “Tongeng adammu. Saba' wékkalimano kawing, na worowané iya muéwaé siyonrong makkekkuwangngé tenniya lakkaimmu.” Nakkeda iyaro makkunraié, “Uwissenni makkekkuwangngé, Puwang séddiwi nabi. Néné-nénéta nasompai Allataala ri buluéwé, iyakiya bangsana Puwang makkedai banna ri Yérusalém bawang onronna tauwé sompai Allataala.” Nakkeda Yésus lao ri makkunraiéro, “Ateppe'no, séuwa wettu matu nasompai tauwé Ambo'é, tenniyana ri buluéwé, sibawa tenniyato ri Yérusalém. Iko tau Samariako sompai iya dé'é muwissengngi, na idi tau Yahudié sompaki iya riissengngé, saba' asalamakengngé poléi ri tau Yahudié. Iyakiya poléi matu wettunna, mala poléni, makkedaé nasibawang akuwasanna Rohna Allataala, nasompai matu tauwé Ambo'é selaku Allataala tongengngé pada-pada naéloriyé Ambo'é. Saba' iyaro Allataala Roh-i, na banna iya nasibawangngé akuwasanna Rohna Allataala naulléi tauwé sompai Ambo'é selaku Allataala iya tongengngé.” Nakkeda iyaro makkunraié lao ri Yésus, “Uwisseng Arung Pappassalama'é (iya riyasengngé Kristus) maéloi polé. Rékko poléi, nappaddissengengngi matu sininna séuwa-séuwaé lao ri idi.” Nakkeda Yésus, “Iyya'naé. Iyya, iya makkekkuwangngé mabbicara sibawa iko.” Iyaro wettué lisuni ana'-ana' gurunna Yésus. Héranni mennang mitai Yésus mabbicara sibawa séddi makkunrai. Iyakiya dé'gaga séddi polé ri mennang makkutana ri makkunraiéro, “Aga parellutta Bu?” Iyaré'ga makkutana lao ri Yésus, “Magi Bapa' nabbicara sibawa makkunraiéro?” Na iyaro makkunraié nasalaini busunna kuwaro nalari lao ri kotaé nanakkeda lao risining tauwé kuwaro, “Laono mai muwitai tau iya powadangngékka sininna puraé upogau'. Naulléga iyanaro Arung Pappassalama'é?” Nasalaini iyaro sining tauwé kotaé nalao ri Yésus. Iyaro wettué ana'-ana' gurunna Yésus naérani Yésus manré. Nakkeda mennang, “Bapa' Guru, anréni.” Iyakiya mappébaliwi Yésus, “Engka nanré ri alé-Ku, iya dé'é muwissengngi.” Nammulana ana'-ana' gurunna Yésus sisullé-sullé makkutana, “Engkaga tau tiwirengngi nanré?” Nakkeda Yésus, “Nanré-Ku iyanaritu maccowériwi élo-Na iya suroék-Ka, sibawa pappurai jamang iya nawéréngngék-Ka. Makkedako, ‘Patampuleppi na wettu éngngalang.’ Iyakiya makkeda-Ka lao ri iko: Itani sining dare iya maridiénna, sadiyani untu' riyéngngala! Tau iya méngngalaé mammulani nanatarima sarona sibawa paddeppungeng wassélé' untu' atuwong mannennungengngé. Na tau iya mampoé sibawa tau iya méngngalaé weddingngi massennas-sennang massibawa. Iyaé warékkadaé tongeng towi, ‘Iya séddié mattaneng laingngé méngngalai.’ Usuroko lao méngngala ri dare iya dé'é mujamai, tau laingngé pura majjama kuwaro, na iko tarimako saro polé ri jama-jamanna mennang.” Maéga tau Samaria pabbanuwana kotaéro mateppe' lao ri Yésus, nasaba makkedai iyaro makkunraié, “Napowadai lao ri iyya sininna puraé upogau'.” Na wettunna iyaro sining tau Samariaé siruntu Yésus, naéllauni mennang sibawa masero kuwammengngi naonro silaong mennang. Jaji monroni Yésus kuwaro duwangngesso ittana. Napédé' maégana tau mateppe' ri Yésus nasaba aga pura nappagguruwang lao ri mennang. Nakkeda mennang lao ri makkunraiéro, “Mateppe'ni makkekkuwangngé, tenniya nasaba aga pura mupowadaé lao ri idi, iyakiya nasaba alétana pura méngkalingai, sibawa missengngi makkedaé mémengngi Pappassalama'nai linoé.” Labe'nana duwangngesso monro ri Sikar, laoni Yésus ri Galiléa. Yésus muto pura makkeda, “Séddié nabi dé' naripakalebbi ri wanuwanna.” Iyakiya wettun-Na lettu ri Galiléa, sining tauwé kuwaro duppaiwi sibawa masennang atinna, saba' engkai mennang ri Yérusalém wettunna Esso Maraja Paskaé, napurani naita maneng iya napogau'é Yésus. Nainappa Yésus lisu ri Kana ri Galiléa, iya naonroiyé pinrai uwai mancaji anggoro. Ri kotaéro engka séddi pegawé saoraja iya malasaé ana'na ri Kapernaum. Wettunna naéngkalinga makkedaé engkani Yésus ri Galiléa polé ri Yudéa, laoni ri Yésus nanaéllauwi Yésus lao ri Kapernaum untu' pajjappai ana'na iya mawé'énna maté. Nakkeda Yésus lao ri pegawé saorajaéro, “Rékko dé' muwitai anu makalallaingngé, dé' mumateppe.” Nappébali pegawé saorajaéro, “Puwang, apperi-perini lao riwettu dé'napa namaté ana'ku.” Nakkeda Yésus lao ri pegawéro, “Laono, majjappani ana'mu.” Mateppe'ni iyaro tauwé ri ada-adanna Yésus, nainappa lao. Ri tengnga laleng, poléni sining pattumaninna nanabbirittangngi, “Majjappani ana'ta Puwang.” Nakkutana lao ri mennang, tetté siyaga iyaro ana'é najjappa. Nappébali mennang, “Kira-kira tetté séddi iwenni' tangassoé nasoro semmenna.” Naéngngeranni ambo'na iyaro ana'é makkedaé iyaro wettué nakkeda Yésus lao ri aléna, “Majjappani ana'mu.” Namateppe'na ri Yésus sibawa sininna kaluwargana. Iyanaro anu makalallaing maduwaé iya napogau'é Yésus ri Galiléa polénana ri Yudéa. Purairo engka ramé-ramé Yahudi, nalaona Yésus ri Yérusalém. Ri Yérusalém ri seddéna “Sumpang Bimbala'” engka séuwa kolang iya riyasengngé Bétésda ri laleng basa Ibrani. Kuwaro engka lima légo-légona. Ri légo-légoéro maéga tau malasa léwu; engka buta, engka képpang, na engkato péso'. [Mattajeng manengngi mennang taggoccang iyaro uwaina kolangngé. Saba' biyasai malaéka'na Puwangngé nonno ri lalenna kolangngéro nanagoccangngi uwaina. Na tau malasa iya bunge' muttama'é ri laleng kolangngéro ri wettu taggoccanna uwaina majjappai matu polé ri lasa aga iya kennaéngngi.] Ri onrongngénnaro engka séddi tau worowané iya telluppuloé aruwa taung ittana malasa. Naitai Yésus léwu kuwaro, sibawa naissenna makkedaé maitta senna'ni malasa; nakkutanana Yésus ri tauwéro, “Maélokoga majjappa?” Nappébali iyaro tauwé, “Bapa', dé' gaga tau kuwaé puttama'ka ri laleng kolangngé wettunna taggoccang uwaina. Nappaka mattuju lao ri kolangngé, napoddiyoloina tau laingngé muttama'.” Nakkeda Yésus lao ri tauwéro, “Oto'no, akkai tappérému namujoppa.” Iyatoro wettué najjappa iyaro tauwé. Nakkani tappéréna nanajoppa. Iyaro gau'é kajajiyangngi ri esso Saba'é. Rimakkuwannanaro sining tau makuwasana Yahudié makkedai lao ri tau iya nappa majjappaéro, “Iyaé essoé, esso Saba'i. Dé' naweddikko makkai tappérému.” Iyakiya mappébaliwi iyaro tauwé, “Tau iya pajjappaékka onna suroka makkai tappéréku sibawa joppa.” Nakkutana mennang, “Niga suroko makkai tappérému sibawa joppa?” Iyakiya tau iya majjappaénnaro dé' naissengngi taunna, saba' lennye'ni Yésus ri yelle'na tau maégaéro. Nainappa Yésus siruntu iyaro tauwé ri laleng Bolana Puwangngé, nakkeda lao ri tauwéro, “Makkekkuwangngé majjappano. Aja'na mumadosasi, kuwammengngi aja' mupéneddingiwi iya lebbi majaé.” Nanalaona iyaro tauwé nanapowadangngi sining panguwasana Yahudié makkedaé Yésus ritu pajjappai. Narimakkuwannanaro makkuragani mennang callai Yésus, saba' purai napajjappa tauwé ri esso Saba'é. Iyakiya makkedai Yésus lao ri mennang, “Ambo'-Ku majjamai matteru-teru lettu makkekkuwangngé, na Iyya majjamato.” Iyaro ada-adaé nassabari sining panguwasana Yahudié napédé' makkuraga untu' mpunoi. Napogau'i mennang iyaro, tenniya banna nasaba najjalékkai peraturanna agamaé passalenna esso Saba'é, iyakiya nasaba makkeda towi iyaro Allataala Ambo'-Na; bettuwanna napappadai Aléna Allataala. Nabalini Yésus sining tauwéro makkuwaé, “Ateppe'no, dé'gaga naullé pogau' Ana'é sibawa akuwasang aléna. Banna iya napogau' aga iya naitaé napogau' Ambo'-Na. Saba' aga napogau' Ambo'é, iyatoro napogau' Ana'é. Saba' Ambo'é namaséiwi Ana'é sibawa nappaitangngi sininna iya napogau'é Aléna. Mala Ambo'é maéloi mappaitangngi ri aléna sining pangkaukeng iya lebbi battowaéppasi, angkanna hérakko. Iyaro Ambo'é napaoto'i tau maté, sibawa nawéréngngi mennang atuwong tongengngé sibawa mannennungengngé; makkuwatoro Ana'é Nabbéréyangngi atuwong mannennungengngé lao ri tau iya maéloé nawéréng atuwong. Aléna Ambo'é dé' nadélékiwi niga-niga. Sininna akuwasangngé untu' madéléki pura nabbéréyanni lao ri Ana'-Na. Napogau'i Ambo'é iyaro kuwammengngi nasininna tauwé pakalebbii Ana'é pada-pada mennang pakalebbii Ambo'é. Tau iya dé'é napakalebbii Ana'é dé'to napakalebbii Ambo'é iya suroéngngi Ana'é. Tongeng senna' ada-adak-Kué: Tau iya pénessaiyéngngi ada-adak-Kué, sibawa mateppe' lao ri iya suroék-Ka, mappunnangiwi atuwong mannennungengngé. Dé' matu narihukkung: leppe'ni polé ri amaténgngé nalolongengngi atuwongngé. Ateppe'no: Poléi matu wettunna – mala narapini wettunna – naéngkalingai matu tau maté saddanna Ana'na Allataala. Na tau iya méngkalingaéngngi tuwoi matu. Pada-pada aléna Ambo'é assalennai atuwongngé, napancaji towi Ana'-Na assalenna atuwongngé. Purani nawéréng Ana'-Na ha' untu' madéléki, saba' Ana'na Tolinoé. Aja' muhérang méngkalingai iyaé gau'é, saba' poléi matu wettunna makkedaé sininna tau iya matéénna naéngkalingai saddan-Na, nappa massu polé ri tampungngé. Tau iya pogau'éngngi madécéngngé moto'i matu untu' tuwo. Iyakiya tau iya pogau'é ja moto'i matu untu' rihukkung.” “Dé'gaga uwullé pogau' polé ri élo alé-Ku. Banna uwadélékiwi situru napparéntangngé Allataala. Na apettuk-Ku adélé'i, saba' dé' Uwaccowériwi élo alé-Ku, sangadinna élona Ambo' iya suroék-Ka. Akkalarapanna mabbéré-Ka asabbiyang passalenna alé-Ku, iyaro asabbiyangngé dé' nawedding riyatepperi. Iyakiya engka tau laing iya mabbéré asabbiyang passalek-Ku, na-Uwisseng makkedaé iyaro asabbiyanna tongengngi. Kirikko suro lao ri Yohanés, namabbéréni asabbiyang iya tongengngé passalek-Ku. Upowadai gau'éwé, tenniya nasaba Uwapparelluwangngi asabbiyang polé ri tolinoé, iyakiya kuwammengngi naripassalama'ko. Iyaro Yohanés pada-padai lampu malluwa'é sibawa iya mattaparengngé cahaya. Untu' wettu iya dé'é namaitta masenna'ko tarimai cahayanaro. Iyakiya asabbiyak-Ku lebbi battowai naiya asabbiyanna Yohanés. Aga iya makkekkuwangngéwé Upogau', iyanaritu jama-jamang iya nassurowangngé Ambo'é lao ri Iyya, pabuttiwi makkedaé Ambo'é pura suro-Ka. Na Ambo'é iya suroék-Ka mabbéré towi asabbiyang passalek-Ku. Iko dé'pa naengka muwéngkalingai saddan-Na iyaré'ga muwitai tappa-Na. Ada-adan-Na dé' naonro ri laleng atimmu saba' dé' mumateppe lao ri Iyya iya Nasuroé. Muwagguruiwi Kitta'é saba' muwasengngi makkedaé nasibawang caraéro mappunnaiko atuwong mannennungengngé. Na aléna iyaro Kitta'é mabbéré asabbiyang passalek-Ku. Iyakiya dé' mumaélo lao ri Iyya untu' lolongengngi atuwong mannennungengngé. Dé' usappa pappoji polé ri tolinoé. Uwissekko. Uwissekko dé' muwamaséiwi Allataala ri laleng atimmu. Poléka ri laleng akuwasanna Ambo'-Ku, iyakiya dé' mutarima-Ka. Iyakiya rékko tau laingngé poléi ri laleng akuwasang ri aléna, maéloko tarimai. Pékkugiko wedding mateppe', rékko sappako pappojiyang polé ri pada-padammu, nadé' muwakkuraga sappa pappojiyang Allataala iya Séuwaé? Aja' muwasengngi Upassalako matu ri yolona Ambo'é. Mala iya passalaékko matu iyanaritu Musa, tau iya muwaddennuwangiyé. Akkalarapanna mateppe'ko lao ri Musa, mateppe' tokko matu lao ri Iyya, saba' naokii ritu passalek-Ku. Iyakiya rékko dé' mumateppe lao ri aga iya naokié Musa, pékkugiko wedding mateppe' lao ri aga iya Upowadaé?” Siyagangngaré wettu ri munrinna, laoni Yésus ri liwenna Tappareng Galiléa, iya riyasengngétto Tappareng Tibérias. Lettu'nana kuwaro, maéga tau maccowériwi saba' purani mennang naita sining anu makalallaingngé iya napogau'é ri laleng napajjappana sining tau malasaé. Ménré'ni Yésus ri yasé'na bulué, natudang kuwaro sibawa ana'-ana' gurun-Na. Iyaro wettué macawé'ni Esso Maraja Paska Yahudié. Wettunna Yésus makkita mattulili, Naitani tauwé mattinro-tinroseng lao ri Aléna. Nakkeda lao ri Filipus, “Kégaki wedding melli nanré, kuwammengngi nasininna tauwéwé weddingngi manré?” ( Naisseng Yésus aga Napogau' matu, iyakiya makkeda makkuwairo saba' maéloi mojiwi Filipus.) Nappébali Filipus, “Roti elli duwa ratué dowi péra' dé' nagenne untu' sining tauwéwé, namuni tungke' tau céddé bawang nalolongeng.” Séddi ana' gurunna Yésus laingngé, iyanaritu Andréas, silessurenna Simon Pétrus, makkedai, “Kuwaé engka ana' worowané mappunnai lima roti sibawa duwa balé. Iyakiya aga bettuwanna iyaro untu' tau makkuwaéwé égana?” Nakkeda Yésus, “Suroi sining tauwéro tudang.” Ri onrongngéro engka maéga wella, jaji iyaro sining tauwé tudanni ri wellaé – iya manenna engka kira-kira limassebbu tau worowané. Nainappa nala Yésus iyaro rotié, nanasukkuru ri Allataala. Purairo nabagé-bagéni iyaro sining rotié lao ri tau maégaéro. Nainappa sukkuru'to nanabagé-bagéi iyaro sining balé, nanréna mennang gangka messo. Puranana manré maneng gangka messo, makkedani Yésus lao ri ana'-ana' gurun-Na, “Paddeppungengngi lebbinna iyaro nanré; aja' naengka tabbé.” Napaddeppungengngi mennang seppulo duwa baku penno lebbinna iyaro nanré polé ri limaé roti iya nanré tau maégaéro. Wettunna naita tau maégaé anu makalallaing iya napogau'é Yésus, makkedani mennang, “Iya tongennaé nabi riyamménasaiyé lao ri linoé!” Naissengngi Yésus mennang maéloi polé untu' passai mancaji arunna mennang. Rimakkuwannanaro laoni massala ri daéra mabbulu-bulué. Mammulanana mawenni essoé, nonnoni ana'-ana' gurunna Yésus ri tapparengngé. Nainappa ménré mennang ri lopié malléttoiwi tapparengngéro mattuju ri Kapernaum. Mapettanni essoé nadé'pi Yésus polé ri mennang. Nammulana mabbombang tapparengngé nasaba anginraja. Sompe'nana kira-kira lima iyaré'ga enneng kilo, naitani Yésus polé joppa ri tompo'na uwai. Métau senna'ni mennang. Iyakiya makkedai Yésus lao ri mennang, “Aja' mumétau, Iyya'é!” Namasennanna atinna mennang tarimai ri lalen-Na lopié, na iyatoro wettué nalettu' lopinna mennang ri onrong nakkattaiyé. Pappa bajanana tau maégaé iya monroé mupa ri liweng tappareng, naéngngeranni makkedaé séddimi bawang lopi engka kuwaro. Naisseng mennang makkedaé joppani ana'-ana' gurunna Yésus sibawa iyaro lopié, na Yésus dé' naccowé. Nasiyagangngaré lopi polé ri Tibérias lettu sibawa mallabu ri seddéna onronna tau maégaéro manré roti puranana Puwangngé méllau sukkuru'. Wettunna naita tau maégaéro muwi Yésus iyaré'ga ana'-ana' gurun-Na dé'i kuwaro, ménré toni mennang ri lopié nalao ri Kapernaum sappai Yésus. Wettunna iyaro sining tauwé siruntu Yésus ri liweng tappareng, makkutanani mennang ri Aléna, “Pa' Guru, siyaganna taengka Pa' kuwaé?” Nappébali Yésus, “Tongeng, musappa-Ka tenniya mupahangngi akkattana iyaro sining anu makalallaingngé iya Upogau'é, iyakiya nasaba purano manré gangka messo. Aja' muwajjama untu' lolongeng nanré iya weddingngé cappu sibawa makebbong. Ajjamako untu' lolongeng nanré iya dé'é nawedding makebbong sibawa mabbéréwé atuwong mannennungeng. Iyaro nanré nabbéréyangngi matu Ana'na Tolinoé lao ri iko, saba' purani rilanti ri Allataala Ambo'é.” Namakkutanana mennang ri Yésus, “Aga harusu' ripogau' untu' turusiwi élona Allataala?” Nappébali Yésus, “Iyanaé naélori Allataala polé ri iko: Ateppe'ko lao ri iya nasuroé Allataala.” Nakkeda mennang, “Rékko makkuwaitu butti aga wedding nabbéréyang Bapa' kuwammengngi nariita sibawa mateppe'ki lao ri Bapa'? Aga maélo napogau' Bapa'? Néné-nénéta manréi manna ri padang kessi'é. Pada-pada tarokié ri laleng Kitta'é, ‘Nawéréngngi mennang manré roti polé ri surugaé.’ ” Nakkeda Yésus lao ri mennang, “Tongeng ateppe'no: Tenniya Musa, sangadinna Ambo'-Ku ritu iya mpéréngngékko roti iya tongengngé polé ri surugaé. Saba' roti iya nabbéréyangngé Allataala iyanaritu iya nonnoé polé ri surugaé sibawa mabbéré atuwong lao ri rupa tauwé ri linoé.” Nakkeda mennang, “Bapa', tuli wérénni iyaro rotié.” Nakkeda Yésus lao ri mennang, “Iyya'na roti iya mabbéré atuwong. Tau iya laowé ri Iyya dé'na namalupu lettu mannennungeng. Sibawa tau iya mateppe'é ri Iyya dé'na namadekkana lettu mannennungeng. Iyakiya pada-pada pura Upowadangngékko, namuni pura muwita-Ka, dé'to mumateppe. Sininna tauwé iya nabbéréyangngé Ambo'é lao ri Iyya laowi matu ri Iyya. Dé' Umaélo sampéyangngi nigi-nigi lao ri Iyya. Saba' nonno-Ka polé ri surugaé, tenniya untu' pogau'i élo ri aléku, sangadinna élo-Na iya suroék-Ka. Na iyanaé élo-Na iya suroék-Ka: kuwammengngi nasininna tauwé iya nawéréngngék-Ka, dé' nateddéng muwi séddi; iyakiya kuwammengngi Upaoto'i mennang ri Esso Kiyame'. Mémeng iyanaé élona Ambo'-Ku: Kuwammengngi sininna iya mitaéngngi Ana'é sibawa mateppe' ri Aléna mappunnai atuwong mannennungeng, sibawa Upatuwoi paimeng ri Esso Kiyame'.” Nammulana mannoko'-noko' sining tau Yahudié lao ri Yésus, saba' makkedai, “Iyya'na roti iya nonno'é polé ri surugaé.” Nakkeda mennang, “Tenniyaga iyaé Yésus, ana'na Yusuf? Riisseng ambo' indo'-Na! Pékkugi weddingngi makkeda makkedaé nonnoi polé ri surugaé?” Nakkeda Yésus lao ri mennang, “Aja' muwannoko'-noko'. Dé' séddi tau wedding polé ri Iyya, rékko Ambo' iya suroék-Ka, dé' natiwii lao ri Iyya; na nigi-nigi polé, Upaoto'i matu ri Esso Kiyame'. Ri laleng Kitta'na Nabi-nabié tarokii makkuwaé, ‘Sininna tauwé ripaggurui matu ri Allataala.’ Jaji sininna tau méngkalingaéngngi Ambo'é sibawa magguru polé ri Aléna, laowi ri Iyya. Iyakiya tenniya bettuwanna makkedaé engka tau purani naita Ambo'é. Banna iya polé ri Allataala, pura mitai Ambo'é. Issengngi: Tau iya mateppe'é, mappunnaiwi atuwong mannennungeng. Iyya'na roti iya mabbéré atuwong. Nénému manré manna ri padang kessi'é sibawa maté towi mennang. Iyakiya dé' nakkuwaro roti nonnoé polé ri surugaé; tau iya manrééngngi iyaro rotié dé' namaté. Iyya'na roti nonnoé polé ri surugaé – roti iya mabbéré atuwong. Tau iya manrééngngi iyaé rotié tuwoi matu mannennungeng. Roti iya maéloé Uwabbéréyang untu' atuwonna rupa tauwé ri linoé iyanaritu juku-Ku.” Naéngkalinganaro, mappangéwanni sining tau Yahudié pada iya muto. Nakkeda mennang, “Pékkugi iyaé tauwé wedding nabbéréyang juku-Na lao ri idi untu' riyanré?” Nakkeda Yésus lao ri mennang, “Ateppe'no: Rékko dé' muwanréi jukuna Ana'na Tolinoé sibawa muwénungngi dara-Na, dé' tongeng muwappunnai matu atuwong ri laleng alému. Tau iya manrééngngi juku-Ku sibawa ménungngi dara-Ku mappunnai atuwong mannennungeng sibawa Upaoto'i matu ri Esso Kiyame'. Nasaba tongengngi juku-Ku nanré sibawa tongengngi dara-Ku énungeng. Tau iya manrééngngi juku-Ku sibawa ménungngéngngi dara-Ku, tette'i masséddi sibawa Iyya, enrengngé Iyya sibawa aléna. Ambo' iya tuwoéro, nasuro-Ka na Iyya tuwo tokka polé ri Ambo'é. Nakkuwatoro tau iya manrééngngi juku-Ku, tuwoi polé ri Iyya. Iyya'naé roti iya nonnoé polé ri surugaé: tenniya roti nanré néné-nénému. Nasaba purana nanré iyaro rotié, maté muwi mennang. Iyakiya tau manrééngngi iyaé rotié tuwoi matu mannennungeng.” Iya manennaro napowadai Yésus wettunna mappaggurui ri bola assompangngé ri Kapernaum. Purana naéngkalinga iyaro ada-adanna Yésus, maéga ri yelle'na ana'-ana' gurun-Na makkeda, “Matane senna' iyaé pappagguruwangngé. Niga mulléi tarimai?” Naissengngi Yésus makkedaé mannoko'-noko'i ana'-ana' gurun-Na passalenna gau'éro. Nakkedana, “Tassinggukkoga nasaba ada-adaéro? Pékkugi jajinna matu rékko muwitai Ana'na Tolinoé ménré paimeng ri onronna mammulangngé? Iya patuwoéngngi rupatauwé iyanaritu Rohna Allataala. Awatangenna rupa tauwé dé'gaga gunana. Ada-ada iya Upalettukengngékkoé iyanaritu ada-adanna Rohna Allataala iyanaritu ada-ada iya mabbéré atuwong. Iyakiya engka mupa ri yelle'mu dé' namateppe'.” (Naissengngi Yésus ri pammulanna mupa nigi-nigi iya dé'é namaélo mateppe', sibawa niga bali'bellariwi matu.) Nakkedasi Yésus, “Iyanaro saba'na Upowadakko makkedaé dé' séddi tau mulléi polé ri Iyya, rékko tenniya Ambo'é palaloi.” Mappammulai wettuéro maégani ana' gurun-Na salaiwi, sibawa dé'na namaélo maccowérini. Nanakkutana Yésus lao ri iya seppulo duwa ana' gurun-Na, “Maélo tokkoga salai-Ka?” Nakkeda Simon Pétrus ri Yésus, “Puwang, niga maélo rilaowi? Ada-adatta Puwang mabbéré atuwong mannennungeng. Mateppe'ni sibawa riyesserinna makkedaé Puwangngé ritu suro mapaccing polé ri Allataala.” Nappébali Yésus, “Tenniyaga Iyya piléko iya seppulo duwa tauwéwé? Namuni séddi ri yelle'mu iyanaritu Sétang!” Iya nasengngé Yésus iyanaritu Yudas ana'na Simon Iskariot. Saba' muni Yudas séddiwi polé ri iya seppulo duwa ana' gurunna Yésus, nabali'bellariwi matu Yésus. Purairo, lao tulilini Yésus ri Galiléa. Dé' namaélo lao ri daéra Yudéa saba' sining panguwasana Yahudié kuwaro maéloi mpunoi. Iyaro wettué macawé'ni Esso Maraja Kalampang Daud-daungngé. Nakkeda silessu-silessurenna Yésus lao ri Aléna, “Salaini iyaé onrongngé namulao ri Yudéa, kuwammengngi na ana'-ana' gurum-Mu weddingngi naitato jama-jamam-Mu. Dé'gaga tau subbui matu aga iya napogau'é, rékko maéloi tarompo. Rékko Mupogau'i gau'-gau' pada-padaéro, naissengngi sininna linoé!” ( Saba' silessu-silessuren-Na dé'to namateppe' ri Aléna.) Nakkeda Yésus lao ri mennang, “Dé'pa narapii wettuk-Ku, iyakiya untu' iko, tungke' wettu wedding. Iyaé linoé dé' namungking nabenciko. Iyakiya Iyya mémeng ribencika ri linoé saba' tuli makkeda-Ka lao ri linoé makkedaé maja pangkaukenna. Laono alé-alému ri ramé-raméro. Iyya dé' ulao saba' dé'pa narapii wettunna untu' alé-Ku.” Makkuwaniro ada-adanna Yésus lao risining silessuren-Na, nanaonrona ri Galiléa. Laonana sining silessurenna Yésus ri ramé-raméro, lao toni Yésus alé-aléna mammekko-mekko dé' naissengngi tauwé. Sillampé ramé-raméro, sining panguwasana Yahudié sappai sibawa makkutana-kutana, “Kégani?” Maéga tau mammula mabbici'-bici' passalenna Aléna. Engka makkeda, “Tau décéngngi.” Engkato makkeda, “Dé'! Napapusai tau maégaé.” Iyakiya dé' séddi tau barani mabbicara terus-terang passalenna Aléna saba' métaui risining tomakuwasana Yahudié. Mattengngangngi ramé-ramé, nauttama Yésus ri laleng Bolana Puwangngé, nappammula mappagguru. Hérang senna'ni tomakuwasana Yahudié, nakkeda, “Pékkugi iyaé tauwé weddingngi naisseng maéga makkuwa, padahal dé' naengka nassikola?” Nappébali Yésus, “Iya Uwappagguruwangngéwé tenniya pappagguruwak-Ku, iyakiya pappagguruwan-Na iya suroék-Ka. Tau iya maéloé turusiwi élona Allataala, naisseng matu polégi iyaro Uwappagguruwangngé ri Allataala iyaré'ga ri alé-Ku muto. Tau iya mabbéréyangngéngngi pappagguruwanna sappai alebbireng untu' aléna. Iyakiya tau iya sappaé alebbireng untu' iya suroéngngi, malempu iyaro tauwé, dé' bellé ri aléna. Dé'ga napura Musa mpérékko parénta-paréntana Allataala? Iyakiya ri yelle'mu dé'gaga turusiwi parénta-paréntaéro. Magi mumaélo mpuno-Ka?” Nappébali tau maégaéro, “Jangek-Ko! Niga maélo mpuno-Ko?” Nappébali Yésus, “Séddi bawang jamang Upogau' ri esso Saba'é, namuhérang. Nawérékko Musa peraturang untu' massunna – namuni iyaro sunna'é dé' napolé ri Musa assalenna, iyakiya poléi ri ambo'na toriyolota ri yolona Musa. Rimakkuwannanaro muwi ri esso Saba'é maélo tokko sunna'i tauwé. Mupogau'i iyaro kuwammengngi aja' muwajjalékkai peraturanna Musa passalenna sunna'é, magi mumacai lao ri Iyya nasaba Upajjappai sininna watakkaléna tauwé ri esso Saba'é? Aja' muadélékiwi tauwé situru iya paitaé, iyakiya situru iya adélé'é.” Nainappa engka siyagangngaré tau Yérusalém makkeda, “Tenniyaga iyanaé taunna iya mattengngangngé risappa untu' riyuno? Itani mabbicarai siélo-élona ri yolona tau maégaé, nadé'gaga makkeda agaga lao ri Aléna! Napahanniga sining panguwasata makkedaé iyanaé Arung Pappassalama'é? Iyakiya rékko poléi Arung Pappassalama'é, dé' séddi tau missengngi polé kégi assalen-Na! Padahal riisseng idi polé kégi assalen-Na iyaé tauwé.” Wettu mappaggurunna Yésus ri laleng Bolana Allataala, gorani sibawa sadda battowa, “Jaji muwissenniga niga Iyya'é, sibawa polé kégi assalek-Ku? Dé' Upolé nasaba élo alé-Ku. Risuroka ri iya engkaé ha'na suro-Ka, sibawa weddingngi riyatepperi. Iyakiya iko dé' muwissengngi Aléna. Uwisseng Aléna, nasaba assalek-Ku poléi ri Aléna, na Aléna ritu suro-Ka.” Iyatoro wettué namacinna tikkengngi Yésus, iyakiya dé'gaga barani makkatenningngi, nasaba dé'pa narapii wettunna. Maéga ri yelle'na sining tauwéro mammulani mateppe' ri Aléna, sibawa makkeda, “Rékko poléi Arung Pappassalama'é, naulléga pogau'i lebbi maéga anu makalallaing naiya iyaé tauwé?” Naéngkalingani sining tau Farisié pékkugi tau maégaéro mabbici'-bici' passalenna Yésus. Rimakkuwannanaro, sibawani kapala-kapala imangngé nasuroi siyagangngaré pengawalna Bolana Puwangngé lao tikkengngi Yésus. Nakkeda Yésus lao ri tau maégaé ri laleng Bolana Puwangngé, “Cinampe' bawang Usibawakko. Purairo lisu-Ka matu lao ri iya suroék-Ka. Musappa-Ka matu, iyakiya dé' mulléi lolongek-Ka; saba' dé' mulléi lao ri onrong Uwonroiyé.” Nakkeda sining tomakuwasana Yahudié séddié lao ri laingngé, “Kégai maélo lao iyaé tauwé nadé' nirullé runtu'i? Maéloiga lao risining tau Yahudié iya monroé ri saliwempanuwa ri yelle'na tau Yunanié, sibawa paggurui tau Yunanié? Aga akkatta-Na nakkeda makkedaé maéloki sappai, iyakiya dé' nirullé runtu'i sibawa dé' nirullé lao ri onrong Naonroiyé?” Ri esso paccappurenna ramé-raméro, iyanaritu esso kaminang pentingngé. Tettonni Yésus ri laleng Bolana Allataala nainappa gora, “Tau iya madekkaé sitinajai lao ri Iyya untu' ménung. Passalenna tau iya mateppe'é ri Iyya, tarokii ri laleng Kitta'é: ‘Polé ri atinna massolo'i solo'-solo' uwai iya mabbéré atuwong.’ ” ( Mabbicarai Yésus passalenna Rohna Allataala, iya natarimaé matu sining tau iya mateppe'é ri Aléna. Saba' iyaro wettué dé'pa nariyabbéréyang Rohna Allataala; saba' dé'pa naripakalebbi Yésus sibawa amatén-Na.) Maéga tau méngkalingai aga napowada Yésus, na ri yelle'na mennang engka makkeda, “Iyaé tauwé pasti iyanaro Nabié!” Iya laingngé makkedai, “Iyanaé Arung Pappassalama'é!” Iyakiya engkato makkeda, “Ah? masa' Arung Pappassalama'é polé ri Galiléa? Ri laleng Kitta'é tarokii makkedaé Arung Pappassalama'é iyanaritu wija-wijanna Daud sibawa poléi matu ri Bétléhém, iyanaritu kampong assalenna Daud.” Angkanna mappammulani mappangéwang sining tauwé passalenna Yésus. Engka maélo tikkengngi, iyakiya dé' séddi tau makkatenningngi. Wettunnana lisu sining pengawalna Bolana Allataala iya risuroé tikkengngi Yésus, makkutanani kapala-kapala imangngé sibawa sining tau Farisié lao ri mennang, “Magi nadé' mutiwii Aléna lao kumaiyé?” Nappébali sining pengawal-éro, “Wah, dé'pa naengka tau mabbicara pada-padan-Na!” Nakkeda sining tau Farisiéro, “Napapusatonoga?” “Engkaga sining panguwasata iyaré'ga tau Farisié mateppe' ri aléna? Iyakiya tau maégaéwé dé' naissengngi hukkunna Musa, sibawa muwi maga ritanroi toni mennang.” Sala séddinna ri yelle'na sining tau Farisiéro iyanaritu Nikodémus iya puraé lao ri Yésus. Nakkeda Nikodémus lao risining tau Farisi laingngé, “Manuru Hukkungngé, séddié tau dé' nawedding rihukkung riwettu dé'napa nariyéngkalinga parakarana sibawa riparéssa pangkaukenna.” Nappébali mennang, “Polé ri Galiléa tokkoga? Paréssa bawanni Kitta'é! Muwitai matu makkedaé dé'gaga nabi iya assalenna polé ri Galiléa!” [ Purairo, lisu manenni tauwé ri bolaé. Iyakiya laowi Yésus ri Bulu-bulu Zaitun. Pappa bajanana maélé senna'ni laosi ri Bolana Allataala, namaéga tau lao ri Aléna. Tudanni Yésus, nappammula paggurui mennang. Na iyaro wettué, guru-guru agamaé sibawa sining tau Farisié natiwini ri Yésus séddi makkunrai iya napoléiyé malaweng. Nasuroni mennang iyaro makkunraié tettong ri tengnga-tengnga, nainappa makkeda ri Yésus, “Bapa' Guru, iyaé makkunraié ripoléiwi malaweng. Ri laleng Hukkunna Musa engka peraturang makkedaé, makkunrai makkuwaéwé harusu'i rigenrung batu gangka maté. Pékkugi pallolongenna Bapa'?” Makkutana makkuwairo mennang untu' palaiwi siyo-siyo Yésus, kuwammengngi weddingngi mennang passalai. Iyakiya cuku' bawammi Yésus, nanaroki sibawa liman-Na ri tanaé. Wettunna mennang maddessa matteru, congani nakkeda lao ri mennang, “Tau iya dé'é nappunnai dosa ri yelle'mu, iyanaritu bunge' genrungngi batu iyaro makkunraié.” Purairo cuku'ni Yésus paimeng marokisi ri tanaé. Naéngkalingana Yésus makkeda makkuwaro, laoni mennang tasséddi-séddi nasalaiwi onrongngéro, mammulai ri iya macowaé. Angkanna Yésus mani alé-aléna monro kuwaro sibawa iyaro makkunraié tettong mupi ri onronna. Nanacongana Yésus sibawa nakkeda lao ri makkunraiéro, “Kéga manenni mennang? Dé'ga gaga hukkukko?” Nappébali, “Dé'gaga Pa'.” Nakkeda Yésus, “Madécénni, Iyya dé'to uhukkukko. Laono makkekkuwangngé, aja' mumadosa paimeng.”] Nabbicarasi Yésus lao ri tau maégaé, adan-Na, “Iyya'naé tajanna linoé. Tau iya maccowériyék-Ka dé' matu najoppa ri laleng pettangngé, iyakiya nappunnangiwi tajanna atuwongngé.” Nakkeda sining tau Farisiéro lao ri Yésus, “Makkekkuwangngé mabbéréko asabbiyang passalenna alému. Iyaro asabbiyam-Mu dé' natongeng.” Nappébali Yésus, “Namuni mabbéré-Ka asabbiyang passalenna alé-Ku, iyaro asabbiyak-Ku tongengngi; saba' Uwisseng kéga-Ka polé sibawa kéga-Ka maélo lao. Dé' muwissengngi kéga-Ka polé sibawa kéga-Ka lao. Iko muwadélékiwi tauwé sibawa cara tolino; na Iyya dé' Uwadélékiwi muwi séddi tau. Iyakiya ébara'na Uwadélékiwi tauwé, apettuk-Ku adélé'i saba' tenniya-Ka alé-alé-Ku; Ambo' iya suroék-Ka engkai sibawak-Ka. Ri laleng Hukkunna Musa tarokii makkuwaé: Asabbiyang tongengngé iyanaritu asabbiyang iya polé ri duwa tau. Iya mabbéré asabbiyang passalenna alé-Ku engka duwa – Iyya sibawa Ambo' iya suroék-Ka.” Nakkeda mennang, “Kégani Ambo'-Muro?” Nappébali Yésus, “Iko dé' muwissek-Ka sibawa Ambo'-Ku. Akkalarapanna muwissek-Ka, pasti muwisseng towi Ambo'-Ku.” Iya manennaro napowadai Yésus wettunna mappagguru ri Bolana Allataala ri seddéna petti-petti dowi pakkasuwiyangengngé. Iyakiya dé' muwi séddi tau tikkengngi, saba' dé'pa narapii wettunna. Makkedasi Yésus lao ri mennang, “Maélo-Ka lao, namusappa-Ka matu, iyakiya matéko matu ri laleng dosa-dosamu. Ri onrong Ulaoiyé, dé' mulléi lao.” Nakkeda sining panguwasana Yahudié, “Naullé kapang maéloi mpunoi Aléna, saba' makkedai, ‘Ri onrong Ulaoiyé dé' mulléi lao.’ ” Nakkeda Yésus lao ri mennang, “Iko polé ri yawako; iyakiya Iyya polé ri yasé'ka. Iko polé ri linoé; Iyya dé' upolé ri linoé. Iyanaro saba'na Uwakkeda lao ri iko, makkedaé matéko matu ri laleng dosa-dosamu. Namémeng matéko matu ri laleng dosa-dosamu, rékko dé' mumateppe makkedaé ‘Iyya'na iya riteppué IYYA ENGKA.’ ” Nakkutana mennang, “Niga sitonget-tongenna iko?” Nappébali Yésus, “Untu' aga mabbicarasi sibawa iko! Maéga mupa passaleng iya maéloé Upowada sibawa madéléki. Iyakiya iya suroék-Ka wedding riyatepperi. Na Iyya paissengiwi linoé aga Uwéngkalinga polé ri Aléna.” Dé' napahangngi mennang makkedaé mabbicarai lao ri mennang passalenna Ambo'é. Rimakkuwannanaro makkedai Yésus lao ri mennang, “Matu rékko purani mupakalebbi Ana'na Tolinoé, muwissenni matu makkedaé ‘Iyya'naé iya riteppué IYYA ENGKA’, sibawa muwisseng toni matu makkedaé dé' séddi iya Upogau'é polé ri alé-Ku. Iya bawang Upowada iya napagguruwangngékka Ambo'é. Naiya suroék-Ka engkai sibawak-Ka. Dé' naengka naleppessakka alé-aléku, saba' tuli upogau'i iya pésennangiyéngngi atinna.” Purana napowada Yésus iya manennaro, maégani tau mateppe' ri aléna. Nainappa Yésus mabbicara lao risining tau Yahudié iya mateppe'énna ri Aléna, “Rékko tuwoko situru pappagguruwakku, tonget-tongennotu maccowé ri Iyya, namuwissennitu Allataala iya tongengngé, narimakkuwannanaro ripamaradékako matu.” Nakkeda mennang, “Idi'é wijannaki Abraham. Dé'pa taengka tancaji atanna niga-niga! Aga akkatta-Mu namuwakkeda, ‘Ripamaradékako matu’?” Nakkeda Yésus lao ri mennang, “Tongeng senna' adak-Kué. Tau pogau'é dosa iyanaritu atannai dosaé. Na séddié ata dé' nappunnai onrong iya mattette'é ri laleng kaluwargaé, na ana'é mappunnaiwi onrong lettu mannennungeng ri laleng kaluwargaé. Rimakkuwannanaro, rékko Ana'é pamaradékako, maradéka' tongennotu. Mémeng Uwissekko wija-wijanna Abraham. Iyakiya maéloko mpuno-Ka, nasaba dé' mumaélo tarimai pappagguruwak-Ku. Aga iya Uwitaé ri Ambo'-Ku, iyanaritu Upowada. Na iko mupogau'i aga iya nappagguruwangngé ambo'mu ri iko.” Nappébali mennang, “Ambo'ta iyanaritu Abraham.” Nakkeda Yésus, “Ebara'na tonget-tongekko ana'na Abraham, pastini mupogau'i iya napogau'é Abraham. Upalettukekko atongengeng iya Uwéngkalingaé polé ri Allataala, iyakiya iko maéloko mpuno-Ka. Abraham dé' napogau'i makkuwaéro! Iko mupogau'i aga iya napogau'é ambo'mu.” Nappébali mennang, “Tenniyaki ana'-ana' harang. Séddimi bawang Ambo'ta, iyanaritu Allataala.” Nakkeda Yésus lao ri mennang, “Akkalarapanna iyaro Allataala Ambo'mu, muwamaséi-Ka matu, saba' polé-Ka ri Allataala. Dé' Upolé sibawa élo ri aléku, iyakiya Aléna ritu iya suroék-Ka. Aga saba'na dé' mupahangngi aga iya Upowadaé? Saba' dé' mutahang méngkalingai pappagguruwak-Ku. Ibillisi' ritu ambo'mu. Pammulanna mupa na iyaro Ibillisi' pabbuno. Dé' naengka naccowé ri atongengengngé, saba' dé' atongengeng ri aléna. Rékko mabbelléi, mémeng sitinaja, saba' makkuwa mémenro sipa'na. Pabbelléngngi sibawa assalenna sininna bellé. Iyakiya Upowadai atongengengngé, narimakkuwannanaro dé' mumateppe ri Iyya. Niga ri yelle'mu mulléi pabuttiwi makkedaé engka dosa-Ku? Rékko Upowadai atongengengngé, magi nadé' mumateppe ri Iyya? Tau iya assalennaé poléi ri Allataala, naéngkalingai ada-adanna Allataala. Iyakiya iko dé' mupolé ri Allataala, iyanaro saba'na dé' mumaélo maréngkalinga.” Iyaro sining tau Yahudié nabalini Yésus, “Dé'ga natongeng adatta makkedaé tau Samaria-Ko iya nauttamakiyé sétang?” Nappébali Yésus, “Dé'nauttamai-Ka sétang. Upakalebbii Ambo'-Ku, iyakiya iko mupakatuna-Ka. Dé' Usappa alebbireng untu' alé-Ku. Engka séddi makkuragangek-Ka alebbireng, na Aléna ritu madélékiki. Tongeng senna' adak-Kué, tau iya turusiyéngngi adak-Ku, lettu mannennungeng dé' namaté matu.” Nanakkeda sining tau Yahudiéro lao ri Yésus, “Riissenni makkekkuwangngé nauttamaki tongek-Ko sétang! Maténi Abraham, makkuwatoro sininna nabi-nabié. Iyakiya makkeda-Ko, ‘Tau iya turusiyéngngi adak-Ku, lettu mannennungeng dé' namaté matu.’ Rékko aléna Abraham maténi, sibawa maté toni sininna nabi-nabié, nigako Iko? Masa Iko lebbi battowa naiya ambo'ta Abraham!” Nappébali Yésus, “Akkalarapanna sappa-Ka alebbireng untu' alé-Ku, iyaro alebbirengngé dé'gaga bettuwanna. Iya pakalebbiék-Ka iyanaritu Ambo'-Ku iya muwangga'é Allataalamu, padahal dé' muwissengngi. Iyakiya Iyya uwissengngi. Akkalarapanna makkeda-Ka makkedaé dé' Uwissengngi, tentu séddika tau pabbelléng pada-pada iko. Uwissengngi sibawa mapatoiwi adan-Na. Ambo'mu Abraham masennang senna' makkedaé naitai matu esso-Ku. Purani naita sibawa masennanna!” Nanakkeda sining tau Yahudié lao ri Yésus, “Dé'pa gaga limappulo taung umuru'-Mu, na purani Muwita Abraham?” Nappébali Yésus, “Makkeda tongek-Ka lao ri iko: riwettu dé'napa najaji Abraham, eng-Ka mémenna.” Napada malana batu sining tau Yahudiéro untu' genrungngi Yésus; iyakiya mallekke'i Yésus, nappa lao nasalaiwi Bolana Allataala. Wettunna Yésus joppa, mitani tau iya butaé sipongenna jaji. Nakkutanana ana'-ana' gurunna Yésus lao ri Yésus, “Bapa' Guru, magi iyaé tauwé narijajiyang buta? Nasaba alénaga madosa iyaré'ga nasaba indo' ambo'na madosa?” Nappébali Yésus, “Butai tenniya nasaba dosa aléna iyaré'ga dosa tomatowanna, iyakiya kuwammengngi naweddingngi naita tauwé akuwasanna Allataala iya majjamaé ri laleng aléna. Ri wettu essona mupa, harusu'ki pogau'i jama-jaman-Na iya suroék-Ka. Poléi matu wennié, namuwi séddi tau dé'to naulléi majjama matu. Ri wettu engka-Ku mupa ri linoéwé, Iyya'na tajanna linoé.” Puranana makkeda makkuwaro mamméccuni Yésus ri tanaé, nainappa napasigaru iyaro méccun-Na tanaé. Nainappa nasapungengngi matanna tauwéro, nakkeda lao ri tauwéro, “Laono mupaccingiwi rupammu ri Kolang Siloam.” (Siloam bettuwanna ‘Risuro’.) Nalaona iyaro tauwé paccingiwi rupanna. Wettunna lisu, naulléni makkita. Sining balibolana enrengngé sining tau iya puraé mitai maréllau-réllau, makkeda manenni, “Tenniyaga iyaé tauwé biyasa tudang maréllau-réllau?” Engka makkeda, “Mémeng aléna.” Iyakiya engkato makkeda, “Tenniya, maélomi bawang pada iyaro tauwé.” Iyakiya aléna iyaro tauwé makkeda, “Iyya'na.” Nakkeda mennang lao ri tauwéro, “Pékkugi ammulanna naweddikko makkita?” Nappébali, “Iyaro tau riyasengngé Yésus mébbui céddé bungka, nappa nasapuingeng matakku sibawa makkeda, ‘Laono mupaccingiwi rupammu ri Kolang Siloam.’ Nalaona. Na wettunna upaccingi rupakku, weddinna makkita.” Nakkutana mennang, “Kégani iyaro tauwé?” Nappébali, “Dé' uwissengngi.” Makkutana towi mennang lao ri tauwéro pékkugi naulléi makkita. Nappébali, “Nataroiwi bungka matakku, nainappa upaccingi naweddinna makkita.” Engka siyagangngaré ri yelle'na sining tau Farisiéro makkeda, “Dé' nakkullé tau iya pogau'éngngi iyaé assalenna poléi ri Allataala, saba' dé' najampangiwi esso Saba'é.” Iyakiya makkedai tau laingngé, “Masa' naullé tau madosaé pogau'i anu makalallaing pada-padaéwé?” Namompona assisalang pallolongeng ri yelle'na mennang. Nakkutanasi sining tau Farisiéro lao ri tauwéro, “Aga pallolongemmu passalenna tau iya mébbuékko makkita?” Nappébali iyaro tauwé, “Nabiwi.” Iyakiya sining panguwasana Yahudié dé' namaélo mateppe' makkedaé iyaro tauwé mémeng butai riyolo namakkekkuwangngé weddinni makkita. Rimakkuwannanaro naobbii mennang tomatowanna, nanakkutana, “Tongegga iyaé ana'mu iya muwasengngé buta simula jaji? Pékkugi naulléi makkita makkekkuwangngé?” Nappébali indo' ambo'na iyaro tauwé, “Mémeng iyaé ana'ta, sibawa mémeng butai simula jaji. Iyakiya pékkugi naulléi makkita makkekkuwangngé, dé' nirisseng. Sibawa niga mébbui naulléi makkita, iyaro dé'to nirisseng. Tanai bawanni aléna, battowani sibawa naullé muto aléna mappébali.” Makkeda makkuwairo indo' ambo'na iyaro tauwé saba' métaui risining panguwasana Yahudié; saba' masséddini mennang, makkedaé tau iya mangakuiyéngngi Yésus selaku Arung Pappassalama'é, dé'na nawedding muttama' ri bola assompangngé. Iyanaro saba'na nakkeda indo' ambo'na iyaro tauwé, “Battowani, tanai bawanni aléna.” Nainappa naobbisi tau iya butaé onna'ro, nakkeda ri tauwéro, “Attanroko makkedaé makkedako matu iya tongengngé. Riisseng iyaro tauwé tau madosa.” Nappébali iyaro tauwé, “Madosa iyaré'ga dé', dé' uwissengngi. Séddi gau' bawang uwisseng; riyolo butaka, makkekkuwangngé makkitana.” Makkedani mennang ri tauwéro, “Aga napogau' lao ri iko? Pékkugi nagaurekko namuwakkita?” Nappébali iyaro tauwé, “Purani ucuritakko, iyakiya dé' mumaélo méngkalingai. Magi mumaélo méngkalingai? Naullé kapang maélo tokko mancaji ana'-ana' gurun-Na?” Nainappa nakkeda-kedaini sibawa makkeda, “Iko ana' gurun-Nako; idi tenniya! Idi ana' gurunnaki Musa. Riissengngi makkedaé Allataala pura mabbicara lao ri Musa. Iyakiya passalenna tauwéro, dé' riissengngi polé kégi assalen-Na.” Nappébali iyaro tauwé, “Mappahérang senna' makkedaé dé' muwissengngi polé kégi assalen-Na, padahal puraka naébbu wedding makkita. Riissengngi makkedaé Allataala dé' naéngkalingai tau madosaé, sangadinna tau iya pakalebbiéngngi Allataala, sibawa pogau'éngngi élo-Na. Sipongenna linoé dé'pa naengka nariyéngkalinga engka tau mébbui tauwé makkita iya butaé simula jaji. Rékko iyaro tauwé dé' napolé ri Allataala, dé' nakkullé pogau'i agi-agi.” Nappébali mennang, “Aga? Iko pennoé dosa simula jaji, maéloko pagguruki?” Mappammulai iyaro wettué riyattéyanni muttama' ri bola assompangngé. Naéngkalingani Yésus makkedaé purai mennang nattéyang iyaro tauwé muttama' ri bola assompangngé. Nasappani iyaro tauwé nainappa makkeda lao ri aléna, “Mateppe'koga ri Ana'na Tolinoé?” Nappébali iyaro tauwé, “Niga iyaro Puwang? Tulukka tapaissengika kuwammengngi mateppe'ka ri Aléna.” Nappébali Yésus, “Purani muwita, Aléna ritu mabbicara ri iko makkekkuwangngé.” Nakkeda iyaro tauwé, “Mateppe'ka, Puwang.” Nasuju'na ri yolona Yésus. Nakkeda Yésus, “Polé-Ka ri linoéwé untu' madélékiwi; kuwammengngi naulléi makkita tau butaé, na tau iya mulléngngi makkita mancaji butai.” Engka siyagangngaré tau Farisi iya engkaé kuwaro naéngkalingai Yésus makkeda makkuwaro, nanakkutana mennang lao ri Yésus, “Akkatta-Mu idi'é buta tokki?” Nappébali Yésus, “Akkalarapanna butako, dé' mumadosa. Iyakiya saba' makkedako ‘Makkitaki’, bettuwanna iyaro madosa mupo.” “Tongeng senna' adak-Kué: Tau iya muttama'é ri laleng wakké bimbala'é lalo ri sappoé, dé' nalalo ri sumpangngé, iyakiya makkémpéi lalo ri laleng laingngé, iyaro tauwé panga sibawa parampo. Iyakiya tau iya muttama'é lalo ri sumpangngé, iyanaritu pakkampi bimbala'. Panganrowang wakké'é timpakengngi tange', na bimbala'-bimbala'é maccowériwi saddanna ri wettu mangobbina mennang sibawa asenna tungke'-tungke' enrengngé natinrosinna massu. Natiwinana massu iyaro sining bimbala'é, iyaro pakkampié joppani monriyolo, nasining bimbala'é maccowériwi saba' naissengngi mennang saddan-Na. Dé' namaélo mennang maccowériwi tau laingngé, mala lariwi polé ri tauwéro, saba' dé' naissengngi saddanna.” Nacuritai Yésus iyaro pakkalarapangngé, iyakiya dé' naissengngi mennang aga akkatta-Na. Nainappa makkeda Yésus siseppa, “Tongeng senna' adak-Kué: Iyya'na tange' untu' bimbala'é. Sininna iya polé ri yolo-Ku, iyanaritu panga sibawa parampo', iyakiya sining bimbala'é dé' naéngkalingai saddanna mennang. Iyya'na tange'. Niga muttama' lalo ri Iyya salama'i matu; massu muttama'i sibawa lolongeng anré. Poléi pangaé banna untu' ménnau, untu' mabbuno, sibawa untu' makkasolang. Iyakiya Iyya polé kuwammengngi nalolongeng tolinoé atuwong – atuwong maonaé. Iyya'na pakkampi makessingngé. Pakkampi iya makessingngé nabbéréyangngi nyawana untu' sining bimbala'na. Tau ripéssaroiyé iya tenniyaé pakkampi sibawa tenniyaétto punna iyaro sining bimbala'é lariwi salaiwi sining bimbala'éro rékko naitai polé asu ale'é. Na iyaro sining bimbala'é natikkenni matu sibawa ripassara-saranna ri asu ale'é. Iyaro tau ripéssaroiyé lariwi, saba' majjamai untu' saro. Dé' napaduliwi sining bimbala'éro. Engka mupa bimbala'-bimbala' laing iya Uwappunnangiyétto, iya dé'é nauttama ri laleng konrong bimbala'éwé. Harusu' towi Uputtama mennang sibawa naéngkalingana matu saddak-Ku. Nancaji manengngi matu mennang sikonrong sibawa séddi pakkampi. Namaséi-Ka Ambo'é saba' Uwabbéréyangngi nyawa-Ku, untu' tarimai paimeng. Dé' séddi tau mulléi malai polé ri Iyya. Uwabbéréyangngi saba' élo-Ku muto. Makuwasa-Ka untu' mabbéréyangngi, sibawa makuwasa untu' malai paimeng. Iyanaro jamang iya Utarimaé polé ri Ambo'-Ku.” Nasaba makkeda makkuwairo Yésus, mappammulani mappangéwang sining tau Yahudié. Maéga makkeda, “Nauttamakiwi sétang! Jangengngi! Untu' aga muwéngkalingai?” Iyakiya engkato makkeda, “Tau nauttamakiyé sétang dé' nabbicara makkuwatu! Naulléga sétangngé mébbui tau butaé makkita?” Ri Yérusalém sining tauwé mattengngang ramé-raméiwi Esso Maraja Rirésmikanna Bolana Puwangngé. Iyaro wettué wettu keccé. Joppai Yésus ri Légo-légona Salomo ri lalenna Bolana Puwangngé, wettunna sining tau Yahudié polé maddeppungeng mattulilingiwi Yésus. Makkedani mennang, “Gangka kégi-Ko maélo leppessakki bata-bata? Powadanni terus terang, rékko tonget-tongek-Ko Arung Pappassalama'é.” Nappébali Yésus, “Purano Upowadang, iyakiya dé' mumateppe. Jama-jamang iya Upogau'é ri laleng asenna Ambo'-Ku, mabbéré butti passalek-Ku. Dé' mumateppe saba' dé' mumattama bimbala'-bimbala'-Ku. Sining bimbala'-Ku naéngkalingai saddak-Ku. Uwisseng mennang, nanaccowéri-Ka mennang. Uwéréngngi mennang atuwong mannennungeng, na untu' mannennungeng dé' nabinasa matu mennang. Dé' séddi tau mulléi rampasa'i mennang polé ri limak-Ku. Ambo'-Ku, iya puraé mabbéréyangngi mennang lao ri Iyya, napakacauri sini-sininnaé. Nadé' séddi tau mulléi rampasa'i mennang polé ri limanna Ambo'é. Iyya sibawa Ambo'é iyanaritu séddimi.” Nanalasi batu sining tau Yahudié untu' genrungngi Yésus. Iyakiya makkedai Yésus lao ri mennang, “Purana muwita pogau' maéga jama-jamang makessingngé, iya nawéréngngék-Ka Ambo'é. Polé ri iya manenna jama-jamangngéro, kégana nassabari mumaélo genruk-Ka?” Nappébali sining tau Yahudié, “Tenniya nasaba jama-jamammu iya makessingngéro namaéloki genruk-Ko batu, iyakiya nasaba Mupakatunai Allataala. Iko séddiko tolino, namumaélo pancajiwi alé-Mu Allataala.” Nappébali Yésus, “Dé'ga nataroki ri laleng Kitta Hukkummu: Makkedai Allataala, ‘Ikona iyanaritu allataala’? Riissenni makkedaé aga taroki ri laleng Kitta'é kajajiyangngi lettu mannennungeng. Jaji, rékko Allataala nateppui ‘allataala’ lao risining tau iya tarimaéngngi ada-adan-Na, magi muwakkeda Ucella-cellai Allataala nasaba makkedak-Ku Ana'naka Allataala? Padahal napilé-Ka Ambo'é sibawa nasuro lao ri linoé. Rékko dé' Upogau'i jama-jamang iya nasuroéngngékka Ambo'é, aja' mumateppe lao ri Iyya. Iyakiya nasaba Upogau'i, ateppe'no aga iya Upogau'éro, namuni dé' mumaélo mateppe' ri Iyya. Narimakkuwannanaro muwissengngi sibawa mupahangngi makkedaé Ambo'é tette'i masséddi sibawa Iyya, sibawa Iyya tette masséddi sibawa Ambo'é.” Makkuragasi mennang maélo tikkengngi Yésus, iyakiya leppe'i polé ri mennang. Lisuni Yésus ri liwenna Salo Yordan, ri onronna Yohanés riyolo maccemmé, naonrona kuwaro. Maéga tau lao ri Aléna. Makkedani mennang, “Yohanés dé' napogau'i sining anu makalallaingngé, iyakiya iya manenna iya napowadaé passalenna iyaé tauwé tongengngi.” Namaégana tau kuwaro mateppe' lao ri Yésus. Engka séddi tau riyaseng Lazarus monro ri Bétania silaong silessurenna Maria sibawa Marta. Maria iyanaritu makkunrai iya tirikiyéngngi minnya' wangi ri ajéna Puwangngé, nanalullu'i sibawa gemme'na. Séuwa wettu namalasa Lazarus. Iya duwa silessurennaro nabirittanni Yésus, “Puwang, silessuretta iya tamaséiyé Puwang malasai.” Wettunna naéngkalinga Yésus iyaro karébaé, makkedani, “Iyaé lasaé dé' nassabari namaté. Kajajiyangngi iyaé kuwammengngi naripakaraja Allataala, nanassabari towi Ana'na Allataala ripakarajato.” Yésus mamaséiwi Marta, Maria sibawa Lazarus. Iyakiya wettunna Yésus natarima karébaé makkedaé malasai Lazarus, nattungkai monro ri onron-Na duwangngessopa. Purairo nappa makkeda ri ana'-ana' gurun-Na, “Laono mai talisu ri Yudéa.” Nappébali mennang, “Bapa' Guru, silalona sining tau Yahudié maélo genrungngi batu Bapa', namakkekkuwangngé maélosi Bapa' lisu kuwaro?” Nakkeda Yésus, “Dé'ga naseppulo duwa jang siessoé? Tau iya joppaé ri essoé, dé' natabbuttu saba' naitai tajanna linoéwé. Iyakiya tau iya joppaé ri wennié tabbuttui, saba' dé'gaga tajang ri aléna.” Makkuwaniro adanna Yésus. Nappa makkedasi, “Sellaota Lazarus matinroni, iyakiya maélo-Ka lao teddui.” Nakkeda ana'-ana' gurunna Yésus, “Puwang, rékko matinroi Lazarus, majjappai matu matti.” Akkattana Yésus iyanaritu makkedaé maténi Lazarus. Iyakiya nasengngi mennang akkattana Yésus iyanaritu makkedai matinro biyasai Lazarus. Rimakkuwannanaro makkedai Yésus lao ri mennang sibawa terus-terang, “Maténi Lazarus. Iyakiya masennang tok-Ka dé'-Ka gaga kuwaro, saba' lebbi kessing muwi untu' iko, kuwammengngi naweddikko riyatepperi. Laono mai talao ri Lazarus.” Tomas iya riteppué “Si Dénru” makkedai lao ri sellao-sellaona ana'-ana' gurunna Yésus, “Laono mai taccowé, leppessakki maté silaong Aléna!” Wettunna Yésus lettu ri onrongngéro, patangngessoni ittana Lazarus rikuburu'na. Bétania macawé'é ri Yérusalém, kira-kira tellu kilo bélana. Maégani tau Yahudi polé célléngiwi Marta sibawa Maria untu' saléworiwi mennang nasaba amaténna silessurenna. Wettunna naéngkalinga Marta engkai Yésus, massuni duppaiwi Yésus, na Maria monroi ri bolaé. Nakkeda Marta lao ri Yésus, “Puwang, ébara'na engkaki kuwaé Puwang wettuéro, tentu dé' namaté ana' buranéku. Iyakiya muni makkuwaro uwisseng makkedaé makkekkuwangngétto nabbéréyangngi matu Allataala aga taéllau Puwang ri Aléna.” Nakkeda Yésus lao ri Marta, “Tuwoi matu paimeng ana' buranému.” Nappébali Marta, “Uwisseng tuwoi matu paimeng Lazarus rékko ripaoto'i tau maté ri Esso Kiyame'.” Nakkeda Yésus lao ri Marta, “Iyya ritu mabbéré atuwong sibawa paoto'i tau maté. Tau iya mateppe'é ri Iyya, tuwoi matu namuni maténa. Na tau tuwoé iya mateppe'é lao ri Iyya, dé'na namaté mannennungeng. Mateppe'koga ri gau'éro?” Nappébali Marta, “Puwang, mateppe'ka, Puwang Ana'na Allataala, Arung Pappassalama'é iya maéloé polé ri linoéwé.” Purana Marta makkeda makkuwaro, laoni mobbii Maria padakkunrainna nanabici'i, “Engkai kuwaé Bapa' Guru; nakkutanakko.” Naéngkalinganaro, mapperi-perini Maria moto, nalao sita Yésus. Iyaro wettué, dé'pa nauttama Yésus ri désaé. Ri onronna mupi Marta duppaiwi. Sining tau Yahudié iya saléworiyéngngi Maria ri bolaé, naitai Maria moto sibawa mapperi-peri massu; jaji laoni maccowériwi, saba' nasengngi lao ri tampungngé untu' teri. Wettunna Maria lettu ri onronna Yésus sibawa naitani, makkaluttuni Maria ri yolo-Na sibawa makkeda, “Puwang, akkalarapanna engkaki Puwang kuwaé wettuéro, tentu dé' namaté ana' buranéku.” Wettunna naita Yésus Maria teri, sibawa sining tau Yahudié iya duwangngéngngi Maria terito, messéni atin-Na, sibawa messé senna' rita. Namakkutanana Yésus lao ri mennang, “Kégai mukuburu'?” Nappébali mennang, “Laoni mai taitai Puwang.” Naterina Yésus. Nakkedana sining tau Yahudiéro, “Itai, anengka makkuwa namaséin-Na Lazarus!” Iyakiya engka ri yelle'na mennang makkeda, “Naébbui tau butaé makkita, magi nadé' naulléi pésangkai kuwammengngi aja' namaté Lazarus?” Masé' senna'si Yésus, nanalao ri kuburu'é. Iyaro kuburu'é iyanaritu séddiwi gowa iya ritongkoé sibawa batu loppo. Nakkeda Yésus, “Paddésu'i iyaro batué!” Nappébali Marta, silessurenna tau iya matéro. “Puwang, patang-ngessoni rikuburu'na. Tentu makebbonni!” Nakkeda Yésus lao ri Marta, “Dé'ga napurano Upowadang: Rékko mateppe'ko, muwitai matu pékkugi battowana akuwasanna Allataala!” Nanapaddésu'ni iyaro batué. Nainappa conga Yésus ri langié sibawa makkeda, “Tarima kasi, Ambo', saba' Muwéngkalinga-Ka. Uwisseng tuli Muwéngkalinga-Ka, iyakiya Upowadai iyaé, untu' sining tau iya engkaé kuwaé; kuwammengngi namateppe' mennang makkedaé Iko suro-Ka.” Purana makkeda makkuwaro, gorani Yésus sibawa sadda battowa, “Lazarus, assuko!” Nassuna tau iya maténnaro. Limanna sibawa ajéna ridoko mupa kaing pawwalu, sibawa rupanna tattongko sibawa kaing pattongko rupa. Nakkeda Yésus lao risining tauwé kuwaro, “Leppessangngi kaing pawwalunna kuwammengngi nalaluwasa joppa.” Maéga polé risining tau Yahudié iya laowé célléngiwi Maria, mateppe' lao ri Yésus wettunna mennang naita iyaro kajajiyangngé. Iyakiya engka siyagangngaré ri yelle'na mennang lao ri tau Farisié nanalaporo'i aga pura napogau' Yésus. Rimakkuwannanaro sining tau Farisié sibawa kapala-kapala imangngé pakangkani rapa' sibawa Mahkamana Agamaé. Makkedai mennang, “Aga harusu' ripogau'? Iyaé tauwé maéga anu makalallaing napogau'! Rékko rileppessangngi matteru-teru makkuwaé, mateppe' manengngi matu sininna tauwé lao ri Aléna. Na angkanna poléi matu panguwasana Roma nanaancuru'i Bolana Puwangngé sibawa sininna bangsata!” Engka séddi polé ri mennang riyaseng Kayafas, imang lompo ri taungngéro, makkeda, “Dé' agaga muwisseng iko. Dé'ga mupahangngi makkedaé nasaba untu' ra'ya'é, lebbi kessing muwi séddi tau maté naiya sininna bangsata ancuru?” Sitongenna napowadai Kayafas iyaro, dé' napolé ripikkirang aléna. Iyakiya selaku imang lompo ri taungngéro nabotoi makkedaé matéi matu Yésus untu' bangsa Yahudié. Natenniya untu' bangsa Yahudié bawang, iyakiya untu' paddeppungeng towi sibawa passéddiwi ana'-ana'na Allataala iya massara-sarangngé. Mappammulai iyaro essoé sikongkolo'ni sining panguwasana Yahudié untu' mpunoi Yésus. Rimakkuwannanaro dé'na nappaitangngi aléna Yésus ri yolona tau maégaé ri yelle'na tau Yahudié. Nasalaini Yudéa, nalao ri kota riyasengngé Efraim seddéna padang kessi'é. Kuwaniro monro silaong ana'-ana' gurun-Na. Iyaro wettué macawé'ni Esso Maraja Paska Yahudié. Maéga tau polé ri désa-désaé labe'ni lao ri Yérusalém untu' pogau'i upacara pappépaccing alé ri wettu dé'napa naramé-raméro. Nasappani mennang Yésus, na wettunna maddeppungeng ri Bolana Allataala, makkedani séddié lao ri laingngé, “Pékkugi pallolongemmu? Naullé dé' nalao ri ramé-raméwé.” Napowadai mennanro saba' kapala-kapala imangngé sibawa sining tau Farisié pura passu parénta makkedaé tau missengngéngngi kégi Yésus monro, harusu'i nalaporo' kuwammengngi weddingngi ritikkeng. Enneng esso riwettu dé'napa na Esso Maraja Paskaé, laoni Yésus ri Bétania. Ri onrongngénnaro Lazarus monro iya puraé ripaoto' ri Yésus polé ri amaténna. Kuwaniro ritumaningi ri mennang, sibawa rilayani ri Marta. Lazarus sibawa sining topolé tudanni manré silaong Yésus. Napoléna Maria sibawa tiwi kira-kira sitengnga liter minnya' wangi narwastu iya masuli senna'é. Iyaro minnya'é natirii ri ajéna Yésus, nainappa nalullu'i sibawa gemme'na. Namabauna sininna bolaéro nasaba minnya' wangiéro. Iyakiya Yudas Iskariot, sala séddinna ana' gurunna Yésus – iya accappurennaé bali'bellariwi Yésus – makkeda, “Magi nadé' naribalu minnya' wangiéro tellu ratu dowi péra' ellinna, nainappa ellinna riwéréngngi tau kasiyasié?” Makkeda makkuwairo Yudas tenniya nasaba najampangiwi tau kasiyasié, iyakiya nasaba pangai. Biyasai mala dowi polé ri kas-é iya ritaroé ri aléna. Iyakiya makkedai Yésus, “Leppessangngi iyaro makkunraié! Napogau'i iyaé untu' esso attampungek-Ku. Tau kasiyasié tuli engkai ri yelle'mu, iyakiya Iyya dé'.” Maéga tau Yahudi méngkalingai makkedaé engkai Yésus ri Bétania. Jaji laoni mennang kuwaro. Laowi mennang tenniya bawang nasaba Yésus, iyakiya nasaba maélo towi mitai Lazarus, iya puraé ripaoto' polé ri amaténgngé ri Yésus. Iyanaro saba'na na kapala-kapala imangngé maélo towi mpunoi Lazarus; nasaba aléna nassabari namaéga tau Yahudi salaiwi mennang sibawa mateppe' lao ri Yésus. Pappa bajanana, naéngkalingani tau maégaé iya polé untu' ramé-raméiwi Paskaé makkedaé mattengnganni Yésus ri laleng allalengengngé mattuju ri Yérusalém. Nanalana mennang daud-daung pattuku nalao duppaiwi, nagora-gorato, “Pojiwi Allataala! Ribarakkakiwi iya polé ri laleng asenna Puwangngé. Ribarakkakiwi Arunna Israélié!” Lolongenni Yésus séddi kaleddé malolo mupa, nanatonangiwi. Nakajajiyanna iya tarokié ri laleng Kitta'é: “Aja' mumétau, ana' makkunrainna Sion! Itai Arummu polé, tonangi si kaju ana' kaleddé!” Iyaro wettué dé'pa napahangngi ana'-ana' gurunna Yésus iya manennaro. Iyakiya puranana Yésus ripakaraja sibawa amatén-Na, nappai naéngngerang mennang makkedaé iya rigaukengngéngngi risining tauwé pura tarokii ri laleng Kitta'é passalenna Aléna. Sining tau iya engkaé wettunna Yésus mobbii Lazarus massu polé ri kuburu'é sibawa paoto'i polé ri amaténgngé, matteru mabbéré asabbiyang passalenna gau'éro. Iyanaro saba'na nalao iyaro tau maégaé ri Yésus saba' naéngkalingai mennang makkedaé Aléna ritu pura pogau'i anu makalallaingngéro. Makkedani sining tau Farisié séddié lao ri laingngé, “Dé'gaga riyullé pogau'! Ita bawanni, sininna linoé lari maccowériwi!” Ri yelle'na sining tau iya laowé ri Yérusalém untu' massompa ri ramé-raméro engkato siyagangngaré tau Yunani. Laowi mennang ri Filipus sibawa makkeda, “Saudara, rékko weddingngi, macinnaki sita Yésus.” (Assalenna Filipus poléi ri Bétsaida ri Galiléa.) Nalaona Filipus powadangngi Andréas gau'éro, nainappa sipadduwani mennang palettu'i ri Yésus. Nakkeda Yésus lao ri mennang, “Narapini wettunna Ana'na Tolinoé ripakaraja. Tongeng senna' adak-Kué: Rékko sibatué gandong dé' naritaneng ri laleng tanaé sibawa maté, tette'i matu sibatu. Iyakiya rékko iyaro gandong sibatué matéi, nappai mappapolé matu maéga gandong. Tau iya mamaséiyéngngi atuwonna, ateddéngengngi matu atuwonna. Iyakiya tau iya benciyéngngi atuwonna ri linoéwé, napiyarai matu untu' atuwong mannennungengngé. Tau iya maéloé tumaningi-Ka harusu'i maccowéri-Ka; kuwammengngi nasibawa-Ka matu pattumanik-Ku kégi-kégi-Ka engka. Tau iya tumaningiyék-Ka ripakalebbii matu ri Ambo'-Ku.” “Takkini-kini atik-Ku; aga harusu' Upowada makkekkuwangngé? Harusu'-Ka'ga makkeda, ‘Ambo', paleppe'-Ka polé ri wettuéwé'’? Iyakiya mala untu' péneddingiwi iyaé anrasa-rasangngé na Upoléna. Ambo', pakarajai asem-Mu!” Na paéngkalingana sadda polé ri langié makkeda, “Purani Upakaraja, namaélosi-Ka pakarajai.” Tau maégaé iya engkaé kuwaro, naéngkalingani iyaro saddaé. Makkedani mennang, “Letté iyaro!” Iyakiya engkato makkeda, “Tenniya! Malaéka' mabbicara ri Aléna!” Nakkeda Yésus lao ri mennang, “Iyaro saddaé paéngkalingai, tenniya untu' apentingek-Ku, iyakiya untu' apentingemmu. Narapini wettunna makkekkuwangngé riyadéléki linoé; risulléini panguwasana linoé makkekkuwangngé. Iyakiya Iyya'é, rékko purana ripakatanré ri yasé'na linoé, maélo-Ka getteng manengngi tauwé lao ri Iyya.” Makkeda makkuwairo untu' mappaitangngi pékkugi carana matu maté. Nakkeda tau maégaéro lao ri Aléna, “Manuru' Kitta Hukkutta, Arung Pappassalama'é tuwoi matu mannennungeng. Pékkugi-Ko wedding makkeda makkedaé Ana'na Tolinoé harusu'i ripakatanré ri yasé'na linoé? Niga iyaro Ana'na Tolinoé?” Nappébali Yésus, “Cinampe' bawang iyaro tajangngé engka ri yelle'mu. Jaji joppako ri wettu engkana mupa iyaro tajangngé, kuwammengngi aja' nakennako pettang. Tau iya joppaé ri laleng pettangngé dé' naissengngi kégai lao. Ateppe'no lao ri tajangngéro, ri wettu engkana mupa iyaro tajangngé ri iko, kuwammengngi namumancaji ana'-ana'na tajangngé.” Puranana Yésus makkeda makkuwaro, nasalaini onrongngéro sibawa dé' namaélo mappaitangngi aléna lao ri mennang. Namuni maégani anu makalallaing napogau' Yésus ri yolona mennang, dé'to namateppe' ri Aléna. Nakajajiyanna aga napowadaé Nabi Yésaya, “Puwang, nigana mateppe' ri karébatta? Lao ri niga riyappaitang akuwasanna Puwangngé?” Iyanaro saba'na dé' naulléi mennang mateppe', saba' pura towi makkeda Yésaya, “Makkedai Allataala, ‘Upabutai matanna mennang, mébbui mennang matedde ati; kuwammengngi dé' nakkita matanna mennang, aja' nappéjeppu pikkiranna mennang. Kuwammengngi aja' mennang nalisu ri Iyya, na-Upajjappai mennang.’ ” Makkeda makkuwaro Yésaya saba' purai naita arajanna Yésus, sibawa mabbicara passalen-Na. Namuni makkuwaro, maéga tau, mala ri yelle'na panguwasa Yahudié mateppe' lao ri Yésus. Iyakiya dé' nabarani mangakuiwi terus terang, saba' métaui ajakké dé' nariyelloreng mennang ri tau Farisié muttama' ri bola assompangngé. Lebbi napojiwi mennang lolongeng pappoji tolino naiya pappakalebbi polé ri Allataala. Nanagora Yésus, “Tau iya mateppe'é ri Iyya, dé' na ri Iyya mateppe', iyakiya lao ri iya suroék-Ka. Na tau iya mitaék-Ka, naitai iya suroék-Ka. Engkaka ri linoéwé selaku tajang, kuwammengngi sininna tau iya mateppe'é ri Iyya dé' naonro ri laleng pettangngé. Tau iya méngkalingaéngngi pappagguruwak-Ku, iyakiya dé' naturusiwi – tenniya Iyya hukkungngi. Saba' polé-Ka tenniya untu' madélékiwi linoéwé, iyakiya untu' passalama'i. Tau iya sampéyangngék-Ka sibawa dé' naéngkalingai ada-adak-Ku, engkana madélékiwi. Ada-ada iya Upalettu'é, iyanaro matu madélékiwi ri Esso Kiyame'. Saba' dé' Uwabbicara polé ri élo alé-Ku; Ambo'é suro-Ka, Aléna ritu parénta-Ka aga harusu' Upowada sibawa Upalettu'. Na-Uwisseng makkedaé iyaro parénta-Na mabbéréi atuwong mannennungeng. Na-Upalettu'i pada-pada iya nappagguruwangngé Ambo'é lao ri Iyya.” Siesso riwettu dé'napa na Esso Maraja Paskaé, naissenni Yésus makkedaé narapini wettunna Yésus salaiwi linoéwé untu' lisu ri Ambo'-Na. Namaséiwi sining tau iya mancajiyé appunnangen-Na ri linoé, natette'i namaséi mennang lettu paccappureng. Yésus sibawa ana'-ana' gurun-Na mattengngang manré wenni. Purani naputtama' Ibillisi'é ri laleng atinna Yudas ana'na Simon Iskariot niya' untu' bali'bellariwi Yésus. Naissenni Yésus makkedaé pura nabbéréyanni Ambo'é sininna akuwasangngé lao ri Aléna. Naisseng towi makkedaé poléi ri Allataala sibawa maéloi lisu ri Allataala. Rimakkuwannanaro tettonni ludungngi jumba-Na, nanasiyoi handu babuwa-Na. Purairo tiwini uwai ri laleng séddié katowang, nappammula bissaiwi ajéna ana'-ana' gurun-Na enrengngé rakkoiwi sibawa handu iya tassiyoé ri babuwa-Na. Narapinana Simon Pétrus, makkedani, “Puwang, masakang idi Puwang bissaiwi ajéku?” Nappébali Yésus, “Dé' mupahangngi. Makkekkuwangngé aga iya Upogau'é, iyakiya mupahang muwatu matu.” Nakkeda Pétrus lao ri Yésus, “Aja' Puwang. Aja' sises-siseng Puwang tabissaiwi ajéku!” Iyakiya mappébaliwi Yésus, “Rékko dé' Ubissaiko, dé'gaga assisumpungek-Ku sibawa iko.” Nakkeda Simon Pétrus, “Rékko makkuwaitu Puwang, aja' na ajéku bawang iyakiya lima sibawa ulukkuto!” Nakkeda Yésus lao ri Pétrus, “Tau puraé cemmé, mapaccing manenni watakkaléna. Dé'na naparellu ripaccingina; sangadinna ajéna. Mapaccinno iko, iyakiya dé' naiya maneng.” ( Naissengngi Yésus niga bali'bellariwi matu. Iyanaro saba'na nakkeda, “Mapaccinno iko, iyakiya dé' naiya maneng.”) Puranana Yésus nabissai ajéna mennang, napakéni paimeng jumba-Na nanatudassi. Nappa makkeda lao ri mennang, “Mupahagga iya nappaé Upogau' lao ri iko? Muwobbi-Ka Guru sibawa Puwang. Na mémeng makkuwaro. Rékko Iyya selaku Puwang sibawa Gurummu bissaiwi ajému, sitinaja tokko sibissai ajé. Uwérékko iyaé contoé, kuwammengngi mupogau' towi aga iya puraé Upogau' lao ri iko. Tongeng senna' adak-Kué: Séddié ata dé' nalebbi battowa polé ri puwanna, sibawa séddié suro dé' nalebbi battowa polé ri iya suroéngngi. Rékko muwissengngi iya manennaé, masennanno rékko mupogau'i. Aga iya Upowadaéwé tenniya iko maneng nakenna. Uwisseng niga-niga iya puraé Upilé. Iyakiya aga iya tarokié ri laleng Kitta'é, harusu'i kajajiyang, iyanaritu ‘Tau iya sisamaék-Ka manré, naéwa-Ka matu.’ Iyaro gau'é Upalettukekko makkekkuwangngé, riwettu dé'napa nakajajiyang, kuwammengngi rékko kajajiyangngi matu iyaro gau'é, mateppe'ko matu makkedaé Iyya'naé iya riteppué IYYA ENGKA. Tongeng senna' adak-Kué: Niga tarimai tau iya Usuroé, natarima-Ka. Na niga tarima-Ka, natarimai iya suroék-Ka.” Puranana Yésus makkeda makkuwaro, masé' senna'ni. Nappa makkeda, “Tongeng senna' adak-Kué: Sala séddinna polé ri yelle'mu bali'bellari-Ka matu.” Hérang senna'ni ana'-ana' gurun-Na sisullé sitangnga nasaba dé' naissengngi niga naseng. Ana' guru iya mamaséiyéngngi Yésus tudangngi ri seddéna Yésus. Nabbéréna tanrang Simon Pétrus lao ri aléna, kuwammengngi nakkutana ri Yésus niga nakkattai. Naddeppéna iyaro ana' gurué ri Yésus, nanakkutana, “Niga Puwang?” Nappébali Yésus, “Tau iya Uwéréngngé roti iya Upajajje'é ri laleng mangko'é, iyanaritu taunna.” Nalana Yésus sipolo roti, napajajje'i ri laleng mangko'é; nappa nawéréng Yudas ana'na Simon Iskariot. Natarimana Yudas iyaro rotié, muttama'ni Ibillisi' ri laleng atinna. Nainappa makkeda Yésus lao ri aléna, “Pogau'ni masitta aga maélo mupogau'.” Dé' séddi polé ri mennang iya tudangngé manré kuwaro pahangngi magi Yésus nakkeda makkuwaro lao ri Yudas. Engka masengngi Yésus suroi Yudas melli anu iya riyapparelluwangngé untu' ramé-raméro, iyaré'ga mpéréngngi céddé dowi tau kasiyasié – saba' Yudas iyanaritu pakkatenning dowina mennang. Natarimana Yudas iyaro rotié, matteruni massu. Mawenni toni. Labe'nana Yudas, makkedani Yésus, “Ripakarajani Ana'na Tolinoé makkekkuwangngé, naripakarajato Allataala naolai Aléna. Rékko ripakarajai Allataala naolai Aléna, ripakaraja towi matu ri Allataala naolai Aléna muto. Na Allataala pakarajai matu sibawa masitta. Ana'-ana'-Ku, dé'na namaitta Uwonro sibawakko. Musapak-Ka matu, iyakiya pada-pada iya puraé Upowada lao risining panguwasana Yahudié, makkuwatoro Upowadakko matu; ri onrong Ulaoiyé, dé' mulléi lao. Parénta baru Uwérékko: Amaséi séddié lao ri laingngé. Pada-pada Iyya mamaséiko, makkuwatoniro iko harusu' siyamaséi. Rékko siyamaséiko, naissengngi matu sininna tauwé makkedaé iko ana'-ana' guruk-Ku.” Nakkutana Simon Pétrus lao ri Yésus, “Puwang, kégaki maélo lao Puwang?” Nappébali Yésus, “Kéga-Ka lao, dé' mulléi maccowé makkekkuwangngé. Muwaccowéri-Ka matu, ri munripi.” Nakkutanasi Pétrus, “Magi nadé' nawedding maccowéki Puwang makkekkuwangngé? Macenning atikku maté untu' Puwang!” Nappébali Yésus, “Tongegga macenning atimmu maté untu' Iyya? Issenni, riwettu dé'napa naoni matu manu'é, wékkatelluno makkeda makkedaé dé' muwissek-Ka!” Nakkeda Yésus lao ri mennang, “Aja' namasara atim-Mu. Ateppe'no ri Allataala sibawa ateppe' tono lao ri Iyya. Ri Bolana Ambo'-Ku engka maéga onrong maddibola. Lao-ka kuwaro untu' passadiyangekko onrong. Dé' Uwakkeda makkuwaro matu lao ri iko, akkalarapanna dé' nakkuwaro. Purakuna passadiyangekko onrong, lisu-Ka matu duppaiko, kuwammengngi kéga-Ka engka, engka tokko matu kuwaro. Ri onrong Ulaoiyé muwissenni lalenna.” Nakkeda Tomas lao ri Yésus, “Puwang, dé' nariisseng kégaki Puwang lao, pékkugiki missengngi lalenna?” Nappébali Yésus, “Iyya'na laleng untu' missengngi Allataala sibawa lolongengngi atuwongngé. Dé' séddi tau mulléi lao ri Ambo'é, rékko dé' naola-Ka. Akkalarapanna muwissek-Ka, tentu muwisseng towi matu Ambo'-Ku. Makkekkuwangngé muwissenni sibawa purana-Na muwita.” Nakkeda Filipus lao ri Yésus, “Puwang, paitaki Ambo'é; kuwammengngi tamasennang.” Iyakiya mappébaliwi Yésus, “Makkuwamani ittana Usibawakko, nadé'paha muwissek-Ka, Filipus? Tau iya puraé mita-Ka, purani naita Ambo'é. Pékkugiko wedding makkeda, ‘Jellokekki Ambo'é?’ Filipus! Dé'ga mumateppe, makkedaé masséddi-Ka sibawa Ambo'é, na Ambo'é masséddiwi sibawa Iyya? Aga Upowadakko, dé' Upowadai polé ri alé-Ku. Ambo' iya tette'é masséddi sibawa Iyya, Aléna ritu jama manengngi. Ateppe'ko ri Iyya, makkedaé masséddi-Ka sibawa Ambo'é na Ambo'é masséddiwi sibawa Iyya. Iyaré'ga kaminang dé'na, ateppe'no nasaba aga puraé Upogau'? Tongeng senna' adak-Kué: Tau iya mateppe'é ri Iyya, napogau'i matu aga iya puraé Upogau' – mala napogau'i matu iya lebbi battowaéppasi – saba' lao-Ka ri Ambo'é. Na agi-agi muwéllau ri laleng asek-Ku, Upogau'i iyaro untu' alému, kuwammengngi naripakaraja Ambo'é naolai Ana'é. Agi-agi muwéllau ri laleng asek-Ku, Upogau'i matu.” “Rékko muwamaséi-Ka, mupajoppai parénta-parénta-Ku. Uwéllauwi matu ri Ambo'é, nanawérékko matu Pattulung laing, iya monroé matu sibawakko lettu mannennungeng. Aléna Rohna Allataala iya pannessaéngngi matu atongengengngé passalenna Allataala. Dé' naulléi linoé tarimai, saba' dé' naitai iyaré'ga naissengngi. Iyakiya iko muwissengngi, nasaba monroi sibawakko enrengngé maélona masséddi sibawa iko. Dé' Usalaiko alé-alému pada-pada ana' biué. Maélo-Ka lisu ri iko. Dé'na namaitta nadé' naita-Ka matu linoé. Iyakiya iko muwita-Ka. Sibawa nasaba tuwo-Ka, tuwo tokko matu. Rékko narapini essoéro, muwissengngi matu makkedaé masséddi-Ka sibawa Ambo'é, masséddiko sibawa Iyya, na Iyya masséddi sibawa iko. Tau iya tarimaéngngi parénta-parénta-Ku sibawa napogau'na, iyanaritu mamaséiyék-Ka. Namaséiwi matu Ambo'-Ku tau iya mamaséiyékko. Uwamaséi towi iyaro tauwé sibawa Uwappaitanna alé-Ku lao ri aléna.” Yudas (tenniya Yudas Iskariot) makkutana ri Yésus, “Puwang, magi Puwang tamaélo mappaitangngi aléta lao ri idi tenniya lao ri linoé?” Nappébali Yésus, “Tau iya mamaséiyékka, naturusiwi pappagguruwak-Ku. Ambo'-Ku mamaséiwi. Ambo'é sibawa Iyya laowi matu ri aléna sibawa monroi sibawangngi. Tau iya dé'é namaséi-Ka, dé' naturusiwi pappagguruwak-Ku. Pappagguruwang iya Uwéngkalingaéro, dé' napolé ri Iyya, sangadinna poléi ri Ambo iya suroék-Ka. Iya manennaro Upowadakko ri wettu Usibawammu mupa. Iyakiya Rohna Allataala, Pattulung iya nasuroé matu Ambo'é ri laleng asek-Ku, Aléna matu pagguruko sini-sininnaé sibawa paréngngerangiko lao ri sininna iya puraé Upaissengiko. Asaléwangeng Utarongekko. Asaléwangek-Ku Uwérékko. Iya Uwabbéréyangngéro dé' napada-pada nabbéréyangngé linoé lao ri iko. Aja' mumausé, aja' mumétau. Pura-Ka muwéngkalinga makkeda, ‘Maélo-Ka lao, iyakiya maélo-Ka lisu paimeng ri iko.’ Rékko muwamaséi-Ka, masenna'ko matu rékko lao-Ka ri Ambo'é, saba' lebbi battowai Ambo'é naiya Iyya. Upaissengiko iyaro makkekkuwangngé, riwettu dé'napa nakajajiyang maneng, kuwammengngi rékko kajajiyangngi matu, mateppe'ko matu. Dé' namaéga Upowada matu lao ri iko, saba' narapini wettunna panguwasana linoéwé polé. Iyakiya dé' nakuwasaiwi alé-Ku. Iyakiya harusu' manengngi kajajiyang kuwammengngi namainge' linoé makkedaé Uwamaséiwi Ambo'é sibawa Upogau'na sininna iya napparéntangngé Ambo'é lao ri Iyya. Nah, laono mai talao polé kuwaé.” Makkedasi Yésus, “Iyya'na pong anggoro tongengngé, na Ambo'-Ku iyanaritu paddare'na. Tungke' takké-Ku iya dé'é nakkébuwa, narette'i, sibawa tungke' takké mabbuwaé, nakurangiwi daunna sibawa Napaccingiwi kuwammengngi nalebbi maégapasi buwana. Mapaccinno iko nasaba pappagguruwang iya Uwéréngngékko. Tette'no masséddi sibawa Iyya, na Iyya tette tokka matu masséddi sibawa iko. Iyaro takké dé' naulléi makkébuwa, sangadinna rékko tette'i ri ponna. Makkuwatoniro iko, iya bawang mulléi mabbuwa rékko tette'ko masséddi sibawa Iyya. Iyya'na pong anggoro, na iko takké-takkéna. Tau iya tette'é masséddi sibawa Iyya, na Iyya sibawa aléna, mabbuwai matu maéga; saba' rékko dé' nasibawa Iyya, dé' agaga mullé pogau'. Tau iya dé'é natette' masséddi sibawa Iyya, riyabbéyangngi matu pada-pada takké, namancaji marakko. Takké-takké iya pada-padaéro ripaddeppungengngi matu, nariyabbéyang ri apié, nainappa ritunu. Rékko tette'ko masséddi sibawa Iyya enrengngé pappagguruwak-Ku monroi ri laleng atimmu, éllauni ri Ambo'é; agi-agi muwacinnai; iyaro paréllaummu ripaddupai matu. Rékko mabbuwako maéga, Ambo'-Ku ripakaraja; narimakkuwannanaro tonget-tongekko mancaji ana' guruk-Ku. Pada-pada Ambo'é mamaséiko, makkuwatoniro Iyya mamaséiko. Sitinajako tette tuwo selaku tau iya Uwamaséiyé. Rékko mupajoppai parénta-parénta-Ku, tette'ko matinulu ri pammasé-Ku, pada-pada Iyya tette matinulu ri pammaséna Ambo'é nasaba pajoppai parénta-parénta-Na. Iya manennaé Upaissengiko, kuwammengngi arennuk-Ku engkai ri laleng atimmu, sibawa mancaji sukku arennummu. Iyanaé paréntaku: Amaséiwi séddié lao ri laingngé, pada-pada Iyya mamaséiko. Tau iya kaminang mamaséiyéngngi sellao-sellaona iyanaritu tau iya mabbéréyangngi atuwonna untu' mennang. Iko iyanaritu sellao-sellao-Ku, rékko mupogau'i aga iya Uparéntangengngékko. Dé'na Uwobbiko ata, saba' ataé dé' naissengngi aga napogau' puwanna. Uwobbiko sellao, saba' sininna Uwéngkalingaé poléi ri Ambo'é, pura manenni Upaissengiko. Tenniya iko pilé-Ka. Iyya ritu piléko, sibawa suroko lao untu' mabbuwa maéga – buwa-buwa iya dé'é nawedding binasa. Nawérékko Ambo'é agi-agi muwéllau ri Aléna ri laleng asek-Ku. Iyanaé parénta-Ku lao ri iko: Amaséiwi séddié lao ri laingngé.” “Rékko nabenciko linoé, éngngerangngi makkedaé Iyya, lebbi riyolo mémenna nabenci linoé. Akkalarapanna nappunnangiko linoé, namaséiko matu linoé selaku appunnangenna. Iyakiya purano Upilé polé ri linoéwé, jaji tenniyano appunnangenna linoé. Iyanaro saba'na nabenciko linoé. Engngerangngi aga pura Upowadakko, ‘Ataé dé' nalebbi battowa naiya puwanna.’ Rékko purai mennang napanrasa-rasa-Ka, napanrasa-rasa tokko matu. Rékko naturusiwi pappagguruwak-Ku, naturusi towi matu pappagguruwammu. Iya manennaro napogau'i matu mennang lao ri iko, nasaba ana' guruk-Kuko, saba' dé' naissengngi iya suroék-Ka. Akkalarapanna dé' Upolé sibawa dé'na Upowadai iya manennaro lao ri mennang, dé' mennang namadosa. Iyakiya makkekkuwangngé dé'na mennang nappunnai alasang untu' dosana mennang. Tau iya benciyék-Ka, nabencito Ambo'-Ku. Akkalarapanna ri tengnga-tengngana mennang dé' Upogau'i gau'-gau' iya dé'éppa naengka napogau'i tau laingngé, dé'na namadosa mennang. Iyakiya makkekkuwangngé purani naita aga iya Upogau'é, nanabenci-Ka mennang sibawa Ambo'-Ku. Iyakiya mémeng harusu'i makkuwaro, kuwammengngi kajajiyangngi aga taroki ri laleng Kitta Hukkunna mennang, iyanaritu: ‘Nabenci-Ka mennang temmakkéalasang.’ Usuroi matu lao ri iko Pattulung iya polé ri Ambo'é. Iyanaritu Roh iya pannessaéngngi matu atongengeng passalenna Allataala. Rékko poléi, mabbéréi matu asabbiyang passalek-Ku. Na iko harusu' tokko mabbéré asabbiyang passalek-Ku, saba' sibawa Iyya mémenni mappammulai ri pammulanna. Iya manennaro Upaissengiko kuwammengngi nadé' muwassuriwi atepperemmu. Ripassuko matu polé risining bola assompangngé. Napoléi matu wettunna makkedaé tau iya mpunoékko nasekko matu mattumani lao ri Allataala. Napogau'i mennang lao ri iko saba' dé' naissengngi Ambo'é sibawa Iyya. Iyakiya makkekkuwangngé Upowadakko iyaro, kuwammengngi rékko kajajiyangngi matu, muwéngngeranni makkedaé purano Upowadang.” “Iyaé gau'é dé' Upaissengiko polé ri pammulanna, saba' Usibawang mupo. Iyakiya makkekkuwangngé maélo-Ka lao ri iya suroék-Ka; nadé' séddi tau polé ri iko makkutana kéga-Ka lao. Makkekkuwangngé mala tassinnau atimmu, saba' Upowadai gau'éro lao ri iko. Iyakiya Upowadai iya tongengngé lao ri iko: Lebbi kessing muwi untu' iko, rékko lao-Ka; saba' rékko dé' Ulao, iyaro Pattulungngé dé' matu napolé ri iko. Iyakiya rékko lao-Ka, Usoroi matu Aléna lao ri iko. Rékko poléi, napannessai matu lao ri linoé bettuwang tonget-tongenna dosaé, polé ri aga iya tongengngé, sibawa polé ri pahukkungenna Allataala. Napannessai matu makkedaé dé' namateppe' ri Iyya iyanaritu dosa; makkedaé tongek-Ka, nasaba laoka ri Ambo'é nadé'na muwitaka matu paimeng; sibawa makkedaé mappammulani Allataala pahukkung, saba' purani rihukkung panguwasana linoé. Maéga mupa maélo upowada lao ri iko, iyakiya dé'pa mulléi tarimai makkekkuwangngé. Iyakiya rékko poléni iyaro Roh-é, iyanaritu iya pannessaéngngi atongengengngé passalenna Allataala, Napimpikko matu untu' missengngi sininna atongengengngé. Dé'na nabbicara matu polé ri Aléna iyakiya napowadai aga pura naéngkalinga, sibawa napaissengiko matu aga maéloé kajajiyang ri esso ri munri. Napakaraja-Ka matu, saba' aga Napalettu ri iko, Natarimai polé ri Iyya. Sininna engkaé ri Ambo'é iyanaritu appunnangekku. Iyanaro saba'na Uwakkeda makkedaé aga napalettu Roh-é lao ri iko, Natarimai polé ri Iyya.” “Dé'na namaitta nadé'na muwitaka matu, sibawa céddé' mani wettunna muwita-Ka.” Siyagangngaré ana'-ana' gurunna Yésus mappammula makkutana séddié lao ri laingngé, “Aga akkattana nakkeda makkuwaro lao ri Idi: ‘Céddé' mani wettunna nadé' muwita-Ka matu, sibawa céddé' tommani wettunna muwita-Ka matu?’ Aga topa akkattana: ‘Lao-Ka ri Ambo'é?’ ” Makkutanai mennang matteru, “Aga bettuwanna, ‘Céddé' mani wettunna’? Dé' naripahang passaleng aga nabicara!” Naissengngi Yésus maéloi mennang makkutana ri Aléna. Jaji makkedani, “Makkeda-Ka onna, ‘Céddé' mani bawang wettunna, dé' namaitta-Ka matu, sibawa céddé' tommani wettunna muwita-Ka matu.’ Iyagaro mupersoalkang ri yelle'mu? Ateppe'no, teriko matu sibawa mpating, iyakiya marennui matu linoé. Masussai atimmu matu, iyakiya iyaro asussammu tappinrai matu mancaji arennung. Rékko séddié makkunrai mawé'ni mémmana', masussai, saba' wettunnana manrasa-rasa. Iyakiya jajinnana ana'na, iyaro makkunraié nallupaiwi anrasa-rasanna matu nasaba marennui makkedaé séddi ana'lolo jaji ri linoé. Makkuwatoro sibawa iko: makkekkuwangngé masussai atimmu, iyakiya maélo-Ka sita paimeng sibawa iko, namarennu atimmu; nadé' séddi tau mulléi malai arennummuro polé ri atimmu. Iyaro essoé dé' agagana muwakkutanang matu lao ri Iyya. Ateppe'no: Agi-agi muwéllau lao ri Ambo'é ri laleng asek-Ku, nabéréyangngi matu iyaro Ambo'é lao ri iko. Narapi makkekkuwangngé dé'pa agaga muwéllau ri laleng asek-Ku. Ellauni, namutarimai matu, kuwammengngi nasukku arennummu.” “Iya manennaé Upowadakko sibawa rapang-rapang. Iyakiya engka matu napolé wettunna, nadé' Upaké rapang-rapang, iyakiya mabbicara terus terang lao ri iko passalenna Ambo'é. Iyaro wettué muwéllauwi matu ri Ambo'é ri laleng asek-Ku; issenni, dé' Umaélo matu méllaungekko polé ri Ambo'é, nasaba aléna Ambo'é mamaséiko. Namaséiko nasaba mumaséi-Ka, sibawa mateppe' makkedaé polé-Ka ri Allataala. Mémeng assalek-Ku poléi ri Ambo'é, naulao ri linoé. Iyakiya makkekkuwangngé Usalaini linoé untu' lisu ri Ambo'é.” Nanakkeda ana'-ana' gurunna Yésus lao ri Yésus, “Makkekkuwangngé mabbicaraki Puwang terus terang sibawa dé' tapaké rapang-rapang, nariissenni makkedaé taisseng manenni Puwang. Dé' naparellu séddié tau makkutangngi agi-agi lao ri Puwang. Rimakkuwannanaro mateppe'ki poléki Puwang ri Allataala.” Nappébalina Yésus lao ri mennang, “Jaji mateppe'ko makkekkuwangngé? Engngerangngi! Poléi matu wettunna, mala engkani, ripassara-sarakko matu. Lisuko matu tungke'-tungke' ri bolamu namusalai-Ka alé-alé-Ku. Iyakiya dé' Uriyalé-alé saba' Ambo'é engkai sibawak-Ka. Iya manennaé Upowadai kuwammengngi mulolongeng asaléwangeng nasaba masséddiko sibawa Iyya. Ri linoé manrasa-rasako matu. Iyakiya pakkasse'i atimmu! Purani Ucau linoé!” Purana makkeda makkuwaro, congani Yésus ri langié makkeda, “Ambo', narapini wettunna makkekkuwangngé. Pakarajani Ana'-Mu, kuwammengngi na Ana'-Mu napakaraja towi Ambo'é. Ambo'é pura mabbéréyangngi akuwasangngé ri sininna rupa tauwé lao ri Ana'é, kuwammengngi nabbéréyangngi atuwong mannennungengngé lao ri sininna tau iya nabbéréyangngé Ambo'é. Iyanaé atuwong mannennungengngé; kuwammengngi tauwé naissengngi Ambo'é, séddi-séddinna Allataala iya tongengngé, sibawa missengngi Yésus Kristus iya nasuroé Ambo'é. Purani Upakaraja Ambo'é ri yasé'na linoéwé ri laleng pappurai jama-jamang iya nasurowangngék-Ka Ambo'é. Ambo'! Pakarajana makkekkuwangngé ri Ambo', sibawa arajang iya Uwappunnaiyé silaong Ambo'é riwettu dé'napa naripancaji linoé. Purani Uwappaddissengeng Ambo' lao risining tau iya polé ri linoéwé iya puraé nabbéréyang Ambo' lao ri Iyya. Mennang iyanaritu appunnangennai Ambo', na Ambo' pura mabbéréyangngi mennang lao ri Iyya. Purani mennang naturusi ada-adanna Ambo'. Naissenni mennang makkekkuwangngé makkedaé sininna iya nawéréngngékka Ambo' assalenna poléi ri Ambo'. Purani Upalettu' ri mennang ada-ada iya nawéréngngék-Ka Ambo'; napurani natarima mennang. Naisseng mennang makkedaé Ambo' ritu suro-Ka. Massempajakka untu' mennang. Dé' Uwassempajang untu' linoé, sangadinna untu' sining tau iya puraé nabbéréyang Ambo'é lao ri Iyya, saba' appunnangennai Ambo' mennang. Sininna appunnangek-Ku iyanaritu appunnangenna towi Ambo'; sibawa sininna appunnangenna Ambo', appunnangek-Kuto. Ripakaraja-Ka ri yelle'na mennang. Makkekkuwangngé lao-Ka ri Ambo'. Dé'na Uwonrona ri linoé. Ambo' iya mapaccingngé! Jagaiwi mennang sibawa akuwasang asenna Ambo', iyanaritu aseng puraé nawérék-Ka Ambo' – kuwammengngi namancaji seddi mennang, pada-pada Ambo' sibawa Iyya séddito. Ri wettuk-Ku sibawa mupa mennang, Iyya purana jagai mennang sibawa akuwasang asenna Ambo'é – aseng mabbéréyangngi Ambo' lao ri Iyya. Purani ujagai mennang, nadé' séddi polé ri mennang teddéng, sangadinna iya harusu'é mennang teddéng, kuwammengngi nakajajiyang aga tarokié ri laleng Kitta'é. Makkekkuwangngé lao-Ka ri Ambo'. Iya manennaé Upowadai ri wettukku ri linoé mupa; kuwammengngi napéneddingiwi mennang sibawa sukku arennuk-Ku. Purani Upalettukengngi mennang ada-adanna Ambo'é, na linoé benciwi mennang, saba' tenniya mennang appunnangenna linoé, pada-pada Iyya tenniya tokka appunnangenna linoé. Dé' Uwéllauwi kuwammengngi Ambo'é malai mennang polé ri linoéwé, iyakiya Uwéllauwi kuwammengngi Ambo'é jagaiwi mennang polé ri majaé. Pada-pada mutowi Iyya tenniya-Ka appunnangenna linoé, tenniya towi mennang appunnangenna linoé. Pancajiwi mennang appunnangeng ripallainna Ambo' naolai atongengengngé; ada-adanna Ambo' iyanaritu atongengeng. Pada-pada Ambo' pura suro-Ka lao ri linoé, makkuwatoniro Iyya suroi mennang lao ri linoé. Untu' apentingenna mennang, Uwabbéréyangngi alé-Ku selaku appunnangeng ripallainna Ambo'é, kuwammengngi namancaji mennang appunnangeng ripallainna Ambo'é naolai atongengengngé. Tenniya untu' mennang bawang massempajak-Ka. Massempajang tok-Ka untu' sining tau iya mateppe'é matu lao ri Iyya polé ri asabbiyanna mennangngé. Uwéllauwi Ambo', kuwammengngi iya maneng mennang mancajiwi séddi, pada-pada Ambo'é masséddiwi sibawa Iyya, na Iyya sibawa Ambo'. Tennapodo mancaji séddiwi mennang sibawa Idi kuwammengngi namateppe' linoé makkedaé Ambo' suro-Ka. Purani Uwéréng mennang arajang iya nawéréngngék-Ka Ambo', kuwammengngi nancaji séddi mennang, pada-pada Idi séddi tokki; Iyya sibawa mennang, na Ambo' sibawa Iyya; kuwammengngi natonget-tongengngi séddiwi. Nanaissengngi matu linoé makkedaé Ambo' ritu suro-Ka, sibawa makkedaé Ambo' mamaséiwi mennang pada-pada Ambo' mamaséi-Ka. Ambo', macinna-Ka kuwammengngi mennang iya tabbéréyangngé lao ri Iyya, engkai sibawak-Ka ri onrong Uwonroiyé, kuwammengngi naitai mennang arajak-Ku; iyanaritu arajang iya nawéréngngék-Ka Ambo'é, nasaba namaséi-Ka Ambo'é riwettu dé'napa naripancaji linoé. Ambo' iya adélé'é! Dé' naissek-Ka linoé Ambo', iyakiya Iyya uwisseng Ambo'; sibawa iyaé sining tauwé naisseng makkedaé Ambo' suro-Ka. Purani Uwappaissengeng asenna Ambo' lao ri mennang; namatteru-Ka pogau'i matu makkuwaro, kuwammengngi napammaséna Ambo'é lao ri Iyya tette'i ri laleng atinna mennang sibawa masséddi-Ka sibawa mennang.” Puranana Yésus massempajang makkuwaro, laoni sibawa ana'-ana' gurun-Na ri liwenna Salo Kidron. Engka séuwa tammeng kuwaro, nanauttama'na Yésus sibawa ana'-ana' gurun-Na ri tammengngéro. Iyaro Yudas, tau bali'bellaé, naisseng iyaro onrongngé; saba' biyasai Yésus maddeppungeng kuwaro sibawa ana'-ana' gurun-Na. Nalaona Yudas ri onrongngéro sibawa tiwi sipasukang tentara Romawi sibawa siyagangngaré pengawalna Bolana Puwangngé iya risuroé ri kapala-kapala imangngé sibawa sining tau Farisié. Tiwii mennang senjata, pajjennangeng sibawa sulo. Naisseng maneng Yésus iya maéloé kajajiyang lao ri Aléna. Jaji naddeppérini sining tauwéro nanakkuta-Na, “Niga musappa?” Nappébali mennang, “Yésus, tau Nazarét-é.” Nakkeda Yésus, “Iyya'naé.” Iyaro Yudas tau bali'bellaé tettonni kuwaro silaong mennang. Wettunna Yésus makkeda lao ri mennang, “Iyya'naé,” soro manenni mennang namabuwang ri tanaé. Siseppi Yésus makkutana lao ri mennang, “Niga musappa?” Nappébali mennang, “Yésus tau Nazarét-é.” Nakkeda Yésus, “Purani Upowada, Iyya'naé. Rékko mémeng musappa-Ka, leppessangngi mennangngé laingngé lao.” ( Ri laleng makkeda makkuwannaro, kajajiyangngi aga pura napowada Yésus riyolona: “Ambo', polé risining tau tawéréngngékka Ambo', muwi séddi tau dé'to gaga teddéng.”) Simon Pétrus iya tiwié sipeppa peddang, narampuni nanawettai atanna imang lompoé angkanna massarang daucculing ataunna. Asenna iyaro ataé Malkus. Nakkeda Yésus lao ri Pétrus, “Puttama'i paimeng peddammu ri laleng wanuwanna! Muwasengngiga dé' Uwénungngi matu énungeng anrasa-rasang iya nawéréngngék-Ka Ambo'é?” Nainappa prajuri'-prajuri' Romawi sibawa komandanna enrengngé sining pengawalna Yahudié tikkengngi sibawa siyoi Yésus. Bunge'-bunge'na natiwii mennang Yésus mangolo ri Hanas, matuwa worowanéna Kayafas. Kayafas iyanaritu imang lompo ri taungngéro. Na aléna ritu pura pangajariwi sining panguwasana Yahudié makkedaé lebbi kessing muwi séddié tau maté untu' sininna bangsaé. Simon Pétrus sibawa séddi ana' gurun-Na laingngé maccowériwi Yésus. Ana' gurun-Na iya laingngéwé riissengngi ri imang lompoé; jaji maccowé toni muttama' sibawa Yésus ri seddé bolana imang lompoé, na Pétrus mattajeng ri saliweng, ri sumpangngé. Nainappa iyaro ana' gurun-Na iya laingngé laoni ri saliweng namabbicara sibawa pattumani makkunraié iya jagaiyéngngi sumpangngé, nappa natiwi Pétrus muttama' ri laleng. Nakkeda iyaro pattumani makkunraié lao ri Pétrus, “Héi, dé'ga na ikoto sala séddinna ana' gurunna tauwéro?” Nappébali Pétrus, “Tenniya.” Iyaro wettué makeccé hawaé, jaji sining pattumanié sibawa sining pengawal-é purani palluwa api osing naddellang mennang kuwaro. Laoni Pétrus kuwaro natettong maddellang silaong mennang. Makkutanani imang lompoé lao ri Yésus passalenna ana'-ana' gurun-Na sibawa passalenna pappagguruwan-Na. Nappébali Yésus, “Tuli mabbicara-Ka terus terang ri yolona tau maégaé. Tuli mappagguru-Ka risining bola assompangngé sibawa ri Bolana Allataala, onronna biyasa maddeppungeng tau Yahudié. Dé' naengka Uwakkedada sibawa usubbu-subbu. Jaji magi Puwang tatanai-Ka? Tanaiwi mennang iya puraé méngkalinga-Ka mappagguru. Tentu naisseng mennang aga Upowada.” Wettunna Yésus makkeda makkuwaro, sala séddinna pengawal-é kuwaro leppa'i sibawa makkeda, “Barani senna'-Ko mabbicara makkuwaro lao ri imang lompoé!” Nappébali Yésus, “Rékko engka séuwa Upowada sala, powadani kuwaé aga salana! Iyakiya rékko iyaro Upowadaé mémeng tongengngi, magi muleppa'-Ka?” Nainappa Hanas suroi tauwé tiwii Yésus sibawa ribalenggu lao ri Imang Lompoé Kayafas. Tettong mupi Simon Pétrus maddellang kuwaro. Nakkeda sining tauwé lao ri aléna, “Tenniyaga ikoto ana' gurunna tauwéro?” Iyakiya massakkai Pétrus, adanna, “Tenniya!” Engka séddi atanna imang lompoé, iyanaritu kaluwargana polé ri tau iya narette'é Pétrus daucculinna, makkeda, “Dé'ga nauwita tokko ri tammengngéro silaong Yésus?” Nassakkasi Pétrus, “Dé',” – na iyatoro wettué naoni manu'é. Maélé senna'ni mennang tiwii Yésus polé ri bolana Kayafas lao ri saorajana gubernur-é. Sining tau Yahudié dé' nauttama ri laleng saorajaé, kuwammengngi dé' nanajisi' secara agama, nasaba maéloi maccowé manré nanré Paska. Rimakkuwannanaro laoni Pilatus ri saliweng ri mennang nanakkutana, “Aga pappotane'mu lao ri tauwéwé?” Nappébali mennang, “Akkalarapanna dé' napasala, dé' tatiwii lao ri Bapa' Gubernur.” Nakkeda Pilatus lao ri mennang, “Alani namuwadélékiwi situru hukkummu!” Iyakiya mappébaliwi iyaro sining tau Yahudié, “Dé' naweddikki hukkung matéi tauwé.” ( Kajajiyangngi iyaé kuwammengngi nakajajiyang aga napowada Yésus passalen-Na pékkugi cara-Na maté matti.) Muttama'ni paimeng Pilatus ri saorajaé, nanaobbii Yésus, nainappa makkutana, “Ikoga arunna tau Yahudié?” Nappébali Yésus, “Polé ri alénaga puwang iyaé pakkutanaé iyaré'ga engka tau laing pura paissengiwi puwang passalenna alé-Ku?” Nappébali Pilatus, “Tau Yahudika'ga iyya'é? Iya mabbéréyangngék-Ko lao ri iyya iyanaritu bangsa-Mu muto sibawa kapala-kapala imangngé. Aga pura Mupogau'?” Nakkeda Yésus, “Akkarungek-Ku dé' napolé ri linoéwé. Ebara'na akkarungek-Ku poléi ri linoéwé, sining tauk-Ku méwai matu kuwammengngi na aja' nariyabbéréyak-Ka lao risining panguwasana Yahudié. Iyakiya mémeng akkarungek-Ku dé' napolé ri linoéwé!” Nakkutana Pilatus ri Aléna, “Rékko makkuwaitu, aruk-Kotu?” Nappébali Yésus, “Tapowadai puwang makkedaé Iyya'é arung. Jaji-Ka sibawa lao-Ka ri linoé untu' séddi akkatta, iyanaritu mabbéré asabbiyang passalenna atongengengngé. Tau iya polé ri atongengengngéro naéngkalinga-Ka.” Nakkutana Pilatus ri Aléna, “Aga bettuwanna atongengengngé?” Nanassusi Pilatus polé ri saorajaé nanakkeda risining tau Yahudié, “Dé'gaga muwi séddi asalang ulolongeng ri Aléna. Iyakiya manuru' abiyasammu, tuli malleppessakka séddi tau tarungku ri Esso Maraja Paskaé. Maélokoga kuwammengngi uleppessangekko arunna tau Yahudié?” Nappébalina mennang sibawa gora-gora, “Dé' na iyaro, iyakiya Barabas!” (Barabas iyanaritu séddiwi parampo.) Nainappa muttama' Pilatus nanasuroi tauwé barasa'i Yésus. Mébbuni sining prajuri'é séuwa passigera' polé ri takké-takké maddorié, nainappa napasang ri ulunna Yésus. Purairo napappakéini mennang jumba lango-lango, nainappa makkolik-koling lao ri Aléna sibawa makkeda, “Tuwoni arunna tau Yahudié!” Nainappa naleppa. Purairo massusi Pilatus siseppa nanakkeda lao ri tau maégaéro, “Itai! Utiwii massu lao ri iko, kuwammengngi muwissengngi makkedaé dé' ulolongeng muwi séddi asalang ri Aléna.” Nassuna Yésus sibawa paké passigera' dori enrengngé jumba lango-lango. Nakkeda Pilatus lao ri mennang, “Itani tauwéro.” Wettunna kapala-kapala imangngé sibawa sining pengawal-é mitai Yésus, gorani mennang, “Sallii! Sallii!” Nakkeda Pilatus lao ri mennang, “Alani na alému sallii, dé' ulolongeng muwi séddi asalang ri Aléna.” Nappébali sining tau Yahudiéro, “Manuru' hukkutta, harusu'i rihukkung maté nasaba nangakui Aléna Ana'na Allataala.” Wettunna Pilatus naéngkalinga mennang makkeda makkuwaro, pédé' métauni. Nauttama'na paimeng ri laleng saorajaé, ritiwinana Yésus muttama', makkutanani Pilatus ri Aléna, “Polé kégai assalemmu?” Iyakiya dé' nappébali Yésus. Jaji makkedasi Pilatus, “Dé'ga Mumaélo mabbicara sibawa iyya? Issenni, mappunnaika akuwasang paleppe'-Ko, sibawa akuwasang salli-Ko!” Nappébali Yésus, “Rékko Allataala dé' nabbéréyangngi iyaro akuwasangngé lao ri puwang, dé' sises-siseng puwang tappunnai akuwasang lao ri Iyya. Rimakkuwannanaro tau iya mabbéréyangngék-Ka lao ri puwang, lebbi battowai dosana naiya puwang.” Wettunna naéngkalinga Pilatus iyaro, makkuragani untu' leppessangngi Yésus. Iyakiya gora-gorai sining tau Yahudié, “Rékko tapaleppe'i Puwang, tenniyana Puwang sellaona Kaisar! Tau iya mangakué aléna arung, iyanaritu balinna Kaisar!” Wettunna naéngkalinga Pilatus ada-adaéro, natiwini Yésus massu nainappa tudang ri kadéra pengadilangngé ri onrong riyasengngé Témbo' Batu. (Ri laleng basa Ibrani asenna Gabata.) Iyaro wettué mawé'ni tetté seppulo duwa essoé, esso riyolona Esso Maraja Paskaé. Nakkeda Pilatus lao risining tauwéro, “Iyanaé arummu!” Gora-gorani mennang, “Unoi! Unoi! Sallii!” Nakkutana Pilatus, “Harusu'ka'ga sallii arummu?” Nappébali kapala-kapala imangngé, “Banna Kaisar alé-aléna arutta!” Nanabbéréyanni Pilatus Yésus lao ri mennang untu' risalli. Nalani mennang Yésus, nanatiwii lao. Massuni Yésus méssangngi salli-Na lao ri onrong riyasengngé “Onrong Tengkora”. (Ri laleng basa Ibrani riyasengngi Golgota.) Kuwaniro risalli. Nasibawang Aléna, engkato duwa tau laing risalli; séddi ri seddé abéyo, séddi ri seddé atau, na Yésus ri tengnga-tengnga. Ri aju sallina Yésus, nassurowangngi Pilatus pasangngi okiéwé: “Yésus polé ri Nazarét, Arunna Tau Yahudié”. Maéga tau Yahudi bacai iyaro okié, saba' iyaro onronna Yésus risalli dé' namabéla polé ri kotaé. Iyaro okié ri laleng basa Ibrani, Latin sibawa Yunani. Nakkeda kapala-kapala imangngé lao ri Pilatus, “Aja' taokii ‘Arunna tau Yahudié'’, sangadinna okii, ‘Makkedai iyaé tauwé, Iyya Arunna tau Yahudié.’ ” Iyakiya mappébaliwi Pilatus, “Iya puraé uwoki, tette'i taroki.” Puranana iyaro sining prajuri'é nasalli Yésus, nalani pakéyan-Na. Iyaro pakéyangngé nabagé eppai: tungke'-tungke' lolongeng sibagiyang. Nala towi mennang jumba-Na. Iyaro jumbaé dé'gaga pajjaina – ritennungngi polé ri yasé lettu ri yawa. Makkedani iyaro sining prajuri'é séddié lao ri laingngé, “Aja' tarette'-rette'i iyaé jumbaé. Laono mai taundiwi untu' pattentui niga wedding lolongengngi.” Iyaro gau'é kajajiyangngi kuwammengngi nakajajiyang aga taroki ri laleng Kitta'é, iyanaritu: “Nabagé-bagéni mennang pakéyak-Ku, sibawa naundiwi jumba-Ku.” Na mémeng iyaro sining prajuri'é pura napogau'ni makkuwaéro. Ri seddéna sallina Yésus tettonni indo'na Yésus, padakkunrainna indo'-Na, Maria bainéna Klopas, sibawa Maria Magdaléna. Wettunna Yésus naita indo'-Na sibawa ana' gurun-Na namaséiyé tettong kuwaro, makkedani ri indo'-Na, “Indo', iyaro ana'na Indo'.” Nainappa makkeda Yésus lao ri ana' gurun-Naro, “Iyaro indo'mu.” Mappammulai wettuéro iyaro ana' gurué natarimai indo'na Yésus untu' monro ri bolana. Naissenni Yésus makkedaé tépu manenni makkekkuwangngé, nakuwammengngi aga iya tarokié ri laleng Kitta'é weddingngi kajajiyang, makkedani, “Madekka-Ka.” Engka kuwaro séuwa mangko penno uwai anggoro iya makeccié. Nappajajjekenni séuwa bunga karang ri lalenna uwai anggoro'éro, nainappa nattoddokeng ri sitakké hisop, nanassoppakengngi ri témunna Yésus. Napérasaini Yésus uwai anggoro'éro nainappa makkeda, “Tépuni!” Nainappa napacannunnu ulun-Na namaté. Sining panguwasana Yahudié dé' naéloriwi rékko iyaro ujuna sining tau risallié tette'i taggattung ri aju sallié ri esso Saba'é, apalagi iyaé sisengngé iyaro Saba'é Esso Maraja iya ripallaingngé. Nasaba esso risallina Yésus kajajiyangngi ri yolona iyaro esso Saba'é, sining tau Yahudié méllau paramisini ri Pilatus untu' poloi ajéna sining tau iya puraé risalli sibawa panonnoi sining ujuéro polé ri aju sallié. Nanalaona iyaro sining prajuri'é nanapoloi lebbi riyolo ajéna iya duwa tau risallié silaong Yésus. Wettunna mennang lettu ri Yésus, naitani mennang maténi. Jaji dé'na napoloi ajé-Na. Iyakiya sala séddinna polé risining prajuri'éro gajangngi benrénna Yésus sibawa bessi; nassuna daraé sibawa uwai. Tau iya mitaéngngi kajajiyangngéro, aléna ritu curitai gau'éro, kuwammengngi namumateppe'to. Na tongengngi asabbiyannaro, sibawa naissengngi makkedaé tongeng iyaro. Kajajiyangngi iyaro kuwammengngi nakajajiyang aga iya tarokié ri laleng Kitta'é, iyanaritu “Dé' séddi bukun-Na ripolo”. Ri laleng Kitta'é taroki towi, “Naitai matu mennang iya puraé mennang nagajang.” Purairo méllau paramisini Yusuf polé ri Arimatéa ri Pilatus untu' malai ujuna Yésus. (Yusuf iyanaritu ana' gurunnai Yésus iyakiya secara subbu-subbui, saba' métaui risining panguwasana Yahudié.) Naripalalona ri Pilatus, jaji laoni malai ujuna Yésus. Nikodémus iya laowé riyolo ri Yésus ri wennié, lao towi silaong Yusuf. Nikodémus tiwi rampa-rampa mur sibawa gaharu – iya manenna kira-kira telluppulo kilo égana. Iya duwa tauwéro nalani ujuna Yésus nainappa nadoko sibawa kaing pawwalu silaong iyaro rampa-rampa wangié situru ade' mattampunna tau Yahudié. Ri onronna Yésus risalli engka séddi tammeng. Ri lalenna tammengngéro engka séddi kuburu' baru, iya dé'éppa naengka naripaké untu' kuburu'i tauwé. Nasaba iyaro kuburu'é macawé'i, namawé' toni mappammula esso Saba'é, nakuburu'ni mennang Yésus kuwaro. Ri esso Aha'é élléé, wettu makalemmenna mupa, laoni Maria Magdaléna ri tampungngé. Naitani batu pattongkona léssé polé ri kalebbonna iyaro tampungngé. Nalarina lao sappai Simon Pétrus sibawa ana' guru iya namaséiyé Yésus, nakkeda lao ri mennang, “Riyalani Puwangngé polé ri tampungngé, nadé' uwissengngi kégai ritaro.” Nalaona Pétrus sibawa ana' guru laingngé ri kuburu'é. Lari duwani, iyakiya iyaro ana' guru laingngé lebbi masitta'i na Pétrus, nalettu' lebbi riyolo ri kuburu'é. Céllénni muttama' ri laleng kuburu'é nanaitai kaing pawwalué lénne kuwaro, iyakiya dé' nauttama. Maccinrolani Pétrus polé ri monri namatteru muttama' ri kuburu'éro. Naitani kaing pawwalué lénne kuwaro, iyakiya kaing iya risiyorengngéngngi ulunna Yésus dé'i gaga ri seddéna sangadinna mallaingngi tallulung. Nainappa ana' guru iya lebbi riyoloé lettu ri kuburu'éro, muttama' toni. Naitani sibawa mateppe'. ( Narapi wettuéro dé'pa napahangngi aga iya tarokié ri laleng Kitta'é makkedaé harusu'i moto polé ri amaténgngé.) Purairo lisuni iyaro ana'-ana' gurunna Yésus. Tettonni Maria Magdaléna ri yolona kuburu'éro teri. Teriwi nacéllétto ri laleng kuburu'éro, nanaitana duwa malaéka' mappaké maputé. Tudangngi mennang ri onronna ujuna Yésus, séddi ri yulu na laingngé ri ajéna. Nakkutana iyaro sining malaéka'é, “Indo', magi muteri?” Nappébali Maria, “Riyalani Puwakku, nadé' uwissengngi kégai ritaro.” Purana makkeda makkuwaro, gilinni limonri nanaitai Yésus tettong kuwaro. Iyakiya dé' naissengngi makkedaé Yésus iyaro. Nakkutana Yésus lao ri aléna, “Indo', magi muteri? Niga tasappa indo'?” Nasengngi Maria iyaro paddare, jaji makkedani, “Pa', rékko Bapa' palétté'i polé kuwaé, tulukka tapowadakka kégai tataro Pa', kuwammengngi weddingngi uwala.” Nakkeda Yésus lao ri Maria, “Maria!” Gilinni Maria lao ri Yésus, nakkeda ri laleng basa Ibrani, “Rabbuni!” (Bettuwanna “Guru”.) Nakkeda Yésus ri Maria, “Aja' mukarawa-Ka, saba' dé'pa Uwénré ri Ambo'é. Iyakiya laoko risining silessurek-Ku sibawa powadangngi mennang makkedaé makkekkuwangngé ménré'-Ka ri Ambo'-Ku sibawa Ambo'mu, Allataala-Ku sibawa Allataalamu.” Nalaona Maria powadangngi ana'-ana' gurunna Yésus makkedaé purani naita Puwangngé, sibawa Puwangngé pura powada manengngi iyaro lao ri aléna. Iyatoro esso Aha'é, ri wettu mawenninnana, maddeppungenni ana'-ana' gurunna Yésus riséuwaé bola sibawa taggoncing sining tange'na, saba' métaui risining panguwasana tau Yahudié. Tappa engka muni Yésus polé natettong ri tengnga-tengngana mennang sibawa makkeda, “Salama' saléwangekko.” Purana makkeda makkuwaro, nappaitanni lao ri mennang liman-Na sibawa benrén-Na. Wettunna naita Puwangngé, marennu senna'ni mennang. Nakkedapa Yésus siseppa lao ri mennang, “Salama' saléwangekko. Pada-pada Ambo'é suro-Ka, makkuwatoniro Iyya suroko.” Nainappa nasseppungeng nappase'-Na lao ri mennang sibawa makkeda, “Tarimani Rohna Allataala. Rékko muwaddampengengngi dosana séddié tau, naddampengeng towi Allataala. Rékko dé' muwaddampengengngi dosana séddié tau, dé'to naddampengengngi Allataala.” Tomas, (iya riteppué “Dénru”), séddiwi polé riseppuloé duwa ana' gurunna Yésus, dé'i gaga silaong laingngé wettunna Yésus polé. Nakkeda ana'-ana' gurun-Na laingngé lao ri Tomas, “Purani idi mitai Puwangngé!” Iyakiya mappébaliwi Tomas, “Rékko dé'pa uwitai baté pakué ri liman-Na, dé'pa utaroi jarikku ri baté pakuéro sibawa dé'pa utaroi limakku ri benrén-Na, dé' sises-siseng umaélo mateppe'.” Siminggu ri munrinna engkasi ana'-ana' gurunna Yésus ri onrongngéro, na engka towi Tomas. Taggoncing maneng tange'é. Iyakiya poléi Yésus natettong ri tengnga-tengngana, nanakkeda, “Salama' saléwangekko.” Nainappa makkeda Yésus lao ri Tomas, “Itai limak-Ku sibawa taroni jarimmu kuwaé. Loro'i limammu namutaroi ri benrék-Ku. Aja'na mubata-bata, iyakiya ateppe'no!” Nakkeda Tomas lao ri Yésus, “Puwakku sibawa Allataalaku!” Nakkeda Yésus lao ri aléna, “Mateppe'ko saba' pura-Ka muwita? Masennangngi tau iya mateppe'é, namuni dé' naita-Ka!” Maéga mupa sining anu makalallaing laing iya napogau'é Yésus ri yolona ana'-ana' gurun-Na, iyakiya dé' nariyoki ri lalenna kitta'éwé. Iyakiya iya manennaé riyokii, kuwammengngi mumateppe makkedaé Yésus iyanaritu Arung Pappassalama'é, Ana'na Allataala, sibawa nasaba teppe' ri aléna, lolongekko atuwong. Purairo nappaitassi aléna Yésus siseppa ri Tappareng Tibérias lao ri ana'-ana' gurun-Na. Makkuwaiyé kajajiyanna: Riséuwaé esso, Simon Pétrus, Tomas iya riyobbié si Dénru, Natanaél polé ri Kana ri Galiléa, ana'-ana' Zébédéus, sibawa duwa ana' gurunna Yésus laingngé, mattengngang maddeppungeng. Nakkeda Simon Pétrus lao ri laingngé, “Maéloka lao mattikkeng balé.” Nakkeda mennang lao ri Pétrus, “Maélo tokki maccowé.” Nalaona mennang mallopi. Iyakiya puppu benniwi dé' agaga natikkeng mennang. Mammulanana mompo matanna essoé, tettonni Yésus ri wiring, iyakiya dé' naissengngi mennang makkedaé iyaro Yésus. Nakkeda Yésus lao ri mennang, “Ana'-ana', engkaga balé muwappunnai?” Nappébali mennang, “Dé'.” Nakkeda Yésus lao ri mennang, “Appéyangngi jalamu ri seddé ataunna lopié, lolongekko matu balé.” Nanappéyanni mennang jalaéro, iyakiya dé'na naulléi gettengngi paimeng saba' makkuwamani égana balé ri lalenna. Nakkeda ana' gurun-Na iya riyamaséiyé ri Yésus lao ri Pétrus, “Puwangngé iyaro!” Wettunna naéngkalinga Simon Pétrus makkedaé Puwangngé iyaro, napakéni wajunna (saba' dé' nabbaju) nanaluppe ri laleng uwai. Ana'-ana' gurun-Na laingngé maccinrolai lao ri pottanangngé sibawa mallopi, nanagetteng towi jala iya pennoé balé. Dé' namabéla mennang polé ri pottanangngé, kira-kira sératu metéré bawang. Wettunna mennang nonno polé ri lopié, naitani mennang engka api mabbara kuwaro sibawa balé ri yasé'na enrengngé roti. Nakkeda Yésus lao ri mennang, “Coba tiwii kumaiyé siyagangngaré balé iya nappaé mutikkeng.” Ménré'ni Simon Pétrus ri lopié, nanagettengngi jalana lao ri pottanangngé. Iyaro jalaé penno sibawa balé battowa; iya manenna engka sératu limappulo tellu kajunna. Namuni makkuwaro égana, dé' nasapé jalana. Nakkeda Yésus lao ri mennang, “Laono mai tanré.” Muwi séddi dé'to gaga ana'-ana' gurun-Na barani makkutana, “Niga Bapa'?” Saba' naissengngi mennang makkedaé Puwangngé. Nainappa Yésus maddeppériwi mennang, nalai iyaro rotié, nanawéréngngi mennang. Napogau' towi makkuwaro sibawa iyaro balé. Iyanaé mabbékkatellunna Yésus mappaitangngi Aléna lao ri ana'-ana' gurun-Na, moto'nana polé ri amaténgngé. Puranana mennang manré, makkedani Yésus lao ri Simon Pétrus, “Simon ana' Yona, lebbi muwamaséi-Ka'ga naiya mennangngé mamaséi-Ka?” Nappébali Pétrus, “Tongeng Puwang, taisseng Puwang uwamaséiki Puwang.” Nakkeda Yésus lao ri Pétrus, “Piyarai ana'-ana' bimbala'-Ku.” Untu' mabbékkaduwanna makkutanai Yésus lao ri Pétrus, “Simon ana' Yona, muwamaséi-Ka'ga?” Nappébali Pétrus, “Tongeng Puwang, taisseng Puwang uwamaséiki Puwang.” Nakkeda Yésus lao ri Pétrus, “Piyarai bimbala'-bimbala'-Ku.” Untu' mabbékkatellunna Yésus makkutana ri aléna, “Simon ana' Yona, muwamaséi-Ka'ga?” Messéni Pétrus saba' genne'ni wékkatellu Yésus makkutana ri aléna. Nappébali Pétrus, “Puwang, taisseng Puwang sini-sininnaé. Taisseng Puwang uwamaséiki Puwang!” Nakkeda Yésus lao ri aléna, “Piyarai bimbala'-Ku. Tongeng senna' adak-Kué: Wettummu kallolo mupa, alému muto siyoi babuwamu, sibawa lao kégi-kégi muwéloriyé. Iyakiya rékko macowano matu, muloro'i limammu, na tau laingngé siyoko sibawa natiwiko ri onrong dé'é mumaélo lao.” (Nasibawang iyaro ada-adaé nappaitangngi Yésus pékkugi Pétrus maté matti untu' pakarajai Allataala.) Purairo makkedani Yésus lao ri Pétrus, “Accowéno ri Iyya!” Wettunna giling Pétrus, naitani ri monrinna ana' guru iya riyamaséiyé ri Yésus. (Aléna ritu tudang ri seddéna Yésus wettunna manré sibawa iya makkutanaé ri Aléna, “Puwang, niga maélo bali'bellariwi Puwang?”) Naitana, makkutanani Pétrus ri Yésus, “Puwang, pékkugi sibawa iyaé tauwé?” Nappébali Yésus, “Akkalarapanna Uwéloriwi monro tuwo narapi polé-Ka, iyaro tenniya issemmu. Iyakiya iko, accowéko ri Iyya!” Natassiyana karébaé ri yelle'na ana' gurunna Yésus makkedaé iyaro ana' gurué dé' namaté matti. Padahal dé' napowadai Yésus makkedaé iyaro ana' gurué dé' namaté matu, sangadinna: “Akkalarapanna Uwéloriwi monro tuwo narapi polé-Ka, iyaro tenniya issemmu.” Ana' guruénnaro mabbéré asabbiyang passalenna sining kajajiyangngéwé. Alénato ritu pura mokii. Sibawa riissenni makkedaé aga iya naokiéro tongengngi. Maéga mupa gau' laing iya napogau'é Yésus. Akkalarapanna iya manennaro riyokii tasséddi-séddi, uwasengngi dé' nagenne onrongngé risininna linoé untu' riyattaroi kitta iya maéloé riyokiro. Téofilus iya makessing atié. Ri laleng kitta'ku iya mammulangngé pura mémenni upakatajang iya napogau'é sibawa nappagguruwangngé Yésus sipongen-Na mappammula napogau' jama-jaman-Na, narapi esso riyakkana ménré ri surugaé. Riwettu dé'napa naénré ri surugaé, nasibawang akuwasanna Rohna Allataala mabbéréi panunju'-panunju' lao ri rasul-rasul-Na iya tappilé. Maténana, patappulo esso ittana biyasai nappaitang aléna sibawa cara manessa senna'é lao ri rasul-rasul-éro makkedaé tonget-tongengngi tuwo. Naitai mennang, nenniya mabbicarai sibawa mennang passalenna pékkugi Allataala mapparénta selaku Arung. Na wettun-Na maddeppungeng massibawa mennang, nabbéréyangngi paréntaéwé lao ri mennang, “Aja' musalaiwi Yérusalém. Tajengngi kuwaro narapi Ambo'é mabbéréyangngi aga iya puraé najjanciyangngé, iyanaritu iya puraé Upowadakko riyolo. Saba' Yohanés maccemméi sibawa uwai, iyakiya siyagangngaré essonapa ricemméko matu sibawa Rohna Allataala.” Wettunna iyaro rasul-rasul-é maddeppungeng sibawa Yésus, makkutanani mennang ri Aléna, “Puwang, maéloki'ga Puwang makkekkuwangngé patettongngi paimeng Apparéntanna bangsa Israélié?” Nappébali Yésus, “Aléna Ambo'-Ku pattentui esso sibawa wettunna. Iyaro dé' naparellu muwisseng, saba' iyaro ha'na Ambo'é. Iyakiya lolongekko matu kuwasa, rékko engkani ri iko Rohna Allataala. Mancajiko matu sabbi-sabbik-Ku ri Yérusalém, ri sininna Yudéa, ri Samaria, sibawa lettu ri cappa'na linoé'.” Puranana Yésus makkeda makkuwaro, riyakkani ménré ri surugaé ri yolona matanna mennang, naritongko-Na ri ellungngé polé ri pakkitanna mennang. Ri wettu makkitana mupa mennang ri langié, ri wettu laona Yésus, tappa engka muna duwa tau mappakéyang maputé tettong ri seddéna mennang. Nakkeda iya duwa tauwéro, “Eh sining tau Galiléaé, magi mutettong bawang kuwatu makkita ri langié? Yésus, iya muwitaé tarakka ménré ri surugaéro ri yolomu, maéloi lisu paimeng sibawa caraéttoro pada-pada muwitaé onna'.” Nainappa lisu iyaro rasul-rasul-é ri Yérusalém polé ri Bulu-bulu Zaitun. Onronna iyaro bulu-bulué kira-kira séddi kilo bélana polé ri Yérusalém. Ri Yérusalém laowi mennang ri bola nappérumaiyé mennang, nainappa ménré ri bili' yasé'é. Iyaro rasul-rasul-é, iyanaritu Pétrus sibawa Yohanés, Yakobus sibawa Andréas, Filipus sibawa Tomas, Bartoloméus sibawa Matius, Yakobus ana' Alféus, Simon Patriot sibawa Yudas ana' Yakobus; iya manennaro tuli masséddi atiwi maddeppungeng untu' massempajang. Massempajangngi mennang silaong sining makkunraié sibawa Maria indo'na Yésus kuwaéttopa silessu-silessurenna Yésus. Riséuwaé esso, wettunna mennang maddeppungeng – engka kira-kira sératu duwappulo tau hadéré' – tettonni Pétrus untu' mabbicara. Nakkeda, “Saudara-saudara! Aga taroki ri laleng Kitta'é, harusu'i kajajiyang iyaro. Riyolo naolai Daud, purani naboto Rohna Allataala passalenna Yudas, pamimpinna sining tau iya tikkengngéngngi iyaro Yésus. Yudas iyanaritu sala séddinna polé ri idi, napura toni ripilé untu' maccowé majjama sibawakki.” ( Iyaé Yudas nalolongengngi tana tampunna polé ri saro bali'bellana iya majaé. Mabuwanni sibawa maté mapuwé' babuwana angkanna massu lise babuwana. Sininna tau monroé ri Yérusalém naisseng iyaro gau'é. Iyanaro saba'na ri laleng basana mennang, nasengngi mennang iyaro tanaé Akeldama, bettuwanna ‘Tana Dara’.) “Nasaba ri laleng Kitta Mazmur-é engka taroki makkuwaéwé, ‘Leppessanni siya onrong naonroiyé masino-sino; aja' naengka séddi tau monro ri lalenna.’ Engkato taroki makkuwaé, ‘Leppessanni siya tudangenna nala tau laingngé.’ Nasininna tau iya engkaé hadéré kuwaro nappétangngarenni duwa tau, iyana ritu Yusuf iya riyasengngétto Barsabas (riyaseng towi Yustus), sibawa Matias. Purairo riloteréini iya duwa asengngéro, na Matias nakenna. Jaji riyakkani mancaji rasul untu' maccowé silaong iya seppulo séddi rasul laingngé. Wettunna narapi Esso Péntakostaé, maddeppungenni sininna tau mateppe'é riséddié onrong. Tappa méngkalingani oni polé ri langié pada-pada anginrajaé mangiri. Bola iya naonroiyéro sining tauwé tudang penno manenni sibawa iyaro onié. Nainappa mitani mennang lila-lila luwa' api massanra kégi-kégi sibawa léppang ri tungke'-tungke' mennang. Rikuwasai manenni ri Rohna Allataala, sibawa mappammula mabbicara ri laleng maddupa-rupang basa laing. Mabbicarai mennang situru aga nabbéréyangngé iyaro Roh-é lao ri mennang untu' napowada. Iyaro wettué maéga tau Yahudi, polé rimaddupa-rupang wanuwa ri sininna linoé, monro ri Yérusalém. Iya mennang iyanaritu sining tau iya matinulué lao ri Allataala. Wettunna naéngkalinga iyaro onié, maéga senna' tau polé makkatulung. Tasséleng manenni mennang méngkalingai sining tau mateppe'éro mabbicara ri laleng basana mennang tungke'-tungke'. Nakkedana mennang sibawa hérang enrengngé takkamennye, “Dé'ga na iyaé sining tau mabbicaraé iya manenna tau Galiléa? Pékkugi ajajingenna angkanna riyéngkalingai mennang mabbicara ri laleng basana wanuwatta tungke'-tungke'? Idi'é sining tau polé ri Partia, Média, Elam; polé ri Mésopotamia, Yudéa sibawa Kapadokia; polé ri Pontus sibawa Asia, polé ri Frigia sibawa Pamfilia, polé ri Maséré' sibawa daéra-daéra Libia seddéna Kiréné; engka ri yelle'ta polé ri Roma, engka tau Yahudi sibawa engkato tau bangsa laing iya muttama'énna agama Yahudi; engkato polé ri Kréta sibawa Arab. Riyéngkalinga manengngi mennang mabbicara ri laleng basata tungke'-tungke' passalenna gau'-gau' iya makalallaingngé iya napogau'é Allataala!” Nahéranna sibawa takkamennye maneng mennang, makkutana séddié lao ri laingngé, “Aga bettuwanna iyaé?” Iyakiya engkato tau mangéllé. Makkedai mennang, “Ah, iyaro sining tauwé mabo'mi bawang!” Nainappa tettong Pétrus silaong seppulo séddié rasul laingngé, mabbicara lao ri tau maégaéro. Nakkedana sibawa sadda battowa, “Saudara-saudara sining tau Yahudié sibawa sininna iya monroé ri Yérusalém! Engkalingai madécéd-décéng. Saba' iyaé gau'é parellui upakatajang lao ri iko. Iyaé sining tauwé dé' namabo' pada-pada muwasengngé; saba' nappai tetté aséra éléé makkekkuwangngé. Iyakiya iyaé purani nappaissengeng Allataala naolai Nabi Yoél: Makkedai Allataala, ‘Ripaccappurenna linoé Upanurungengngi matu Roh-Ku ri yasé'na sininna tauwé. Ana'-ana'mu worowané sibawa ana'-ana'mu makkunraié powadakko matu gau'-gau' iya Upaissengiyéngngi mennang. Sining tau malolomu naitai matu gau'-gau' iya Upaitangngéngngi mennang. Sining tau macowana mannippiwi matu passalenna nippi iya Uwéréngngéngngi mennang. Lao risining atak-Kuto – muwi worowané iyaré'ga makkunrai –, Upanurungengngi matu Roh-Ku ri esso-essoéro. Nappaissengengngi matu mennang gau'-gau' iya Upaissengiyéngngi mennang. Upakangkai matu sining anu makalallaingngé ri yasé' kuwaro ri langié, sibawa gau'-gau' dé'é padanna ri yawa kuwaé ri linoé; engka matu dara sibawa api, sellung sibawa rumpu. Mapettangngi matu mata essoé, macella'i matu kétengngé pada-pada daraé riwettu dé'napa Essona Puwangngé, Esso iya battowaé sibawa malebbiéro polé. Iyaro wettué, tau iya mangobbié ri Puwangngé ripassalama'i matu.’ Saudara-saudara tau Israélié! Engkalingai aga iya upowadaé: Yésus tau Nazarét-éro pura riwérénni jamang ri Allataala untu' saudara. Iyaro manessa senna' risining anu makalallaingngé sibawa gau'-gau' dé'é padanna iya napogau'é Allataala ri tengnga-tengngamu naolai iyaro Yésus. Iya manennaro aléna saudara misssengngi. Situru élo-Na muto, napettuiwi Allataala untu' mabbéréyangngi Yésus lao ri iko. Na wettunna riyabbéréyang, muwunoi sibawa leppessangngi sining tau majaé sallii. Iyakiya Allataala patuwoi paimeng polé ri yelle'na sining tau maté. Riyemme'i ri amaténgngé, iyakiya rileppessangngi ri Allataala, saba' dé' nakkullé rikuwasai matteru ri amaténgngé. Passalenna iyaé Yésus, makkedai Daud, ‘Tuli uwitai Puwangngé ri yoloku; Naranrekka, kuwammengngi nadé' naripakaléwa'-léwa'ka muwi aga. Iyanaro saba'na namarennu atikku, témukku powada-adai pappoji-pojiyangngé; sibawa iyaé watakkaléku mattajengngi matu sibawa tennang ri laleng kuburu'é. Saba' dé' Muleppessangngi nyawaku monro ri laleng linona tau maté. Dé' Muleppessangngi iyaro atam-Mu iya matinulué ancuru' sibawa cappu. Purani Muwappaitang ri aléku laleng mattujué ri atuwong tongengngé. Talliwe'-liwe'ni rennukku nasaba engka-Ko sibawakka.’ Saudara-saudara, palalona mabbicara terus terang passalenna Daud, ambo'na toriyolotaro. Maténi sibawa rikuburu' toni; iyaro kuburu'na engka mupi ri tengnga-tengngata lettu makkekkuwangngé. Pura majjanciwi Allataala lao ri Daud, sibawa mattanro, makkedaé sala séddinna polé ri wijanna Daud nakkai matu Allataala mancaji arung. Nasaba naissengngi Daud iyaro jancié, nasaba séddi towi nabi, naisseng towi aga matu napogau' Allataala. Jaji purani naboto makkedaé Arung Pappassalama'é iya najjanciyangngé Allataala tuwoi matu paimeng polé ri amaténgngé. Makkedai Daud, ‘Dé' Naleppessangngi monro ri laleng linona sining tau maté; dé' naancuru' matu watakkalé-Na enrengngé cappu.’ Yésus iyanaé ripatuwo paimeng polé ri amaténgngé ri Allataala. Idi manengngé pura sabbingngi iyaro gau'é. Riyakkai ri tudangeng matanré sibawa riwéréng akuwasang ri Allataala, nainappa natarima Rohna Allataala iya puraé najjanciyang Ambo'é. Naiya muwéngkalingaé sibawa muwitaé makkekkuwangngé iyanaritu Roh iya ripanurungngé lao ri idi. Aléna Daud dé' naénré ri surugaé, iyakiya makkedai Daud, ‘Makkedai Puwangngé lao ri Puwakku: Tudanno ri seddé atauk-Ku, narapi Uwébbu sining balim-Mu tunru' ri iko!’ Iyanaro saba'na sininna tau Israélié harusu'i naisseng tonget-tongeng makkedaé iyaro Yésus iya musallié, Yésus éttonaro pura napancaji Allataala mancaji Puwang sibawa Arung Pappassalama'é!” Wettunna naéngkalinga iyaro sining tauwé, masé senna'ni atinna mennang. Nainappa mennang makkutana ri Pétrus sibawa rasul-rasul laingngé, “Saudara-saudara, aga harusu' ripogau'?” Nappébali Pétrus, “Toba'no polé ri dosa-dosamu sibawa sitinajako tungke'-tungke' ricemmé ri laleng asenna Yésus Kristus, kuwammengngi nariyaddampengeng dosa-dosamu. Namutarimai matu hadiya Rohna Allataala polé ri Allataala. Saba' iyaro najjanciyangngé Allataala iyanaritu untu' iko sibawa wija-wijammu enrengngé sining tau iya engkaé risining onrong mabélaé – iyanaritu sininna tau iya naobbié Allataala Puwatta untu' lao ri Aléna.” Makkuwaniro Pétrus pakatajangngi lao ri mennang. Sibawa maégato ada-ada laingngé pétangngariwi mennang kuwammengngi naleppe polé ri bangsa iya majaéwé iya maéloé rihukkung ri Allataala. Maéga tau mateppe' lao ri iya napowadaé Pétrus, nainappa mennang ricemmé. Na jumellana tau mateppe'é iyaro essoé tattambai sibawa tellussebbu tau. Namatinuluna mennang magguru matteru ri rasul-rasul-é sibawa tuli silaongngi maddeppungeng. Sisamai mennang manré enrengngé massempajang massibawa. Maéga senna' anu makalallaing iya napogau'é iyaro rasul-rasul-é angkanna sininna tauwé hérang sibawa métau. Iyaro sining tau mateppe'é matterui masséddi maneng sibawa aga nappunnai mennang, napakéi mennang massibawa. Barab-baranna sibawa waramparanna, nabalu'i mennang, nainappa nabagé-bagé dowina ri yelle'na maneng mennang situru apparelluwanna tungke'-tungke'. Esso-esso mennang maddeppungeng ri Bolana Puwangngé; enrengngé sisamai manré sibawa marennu kuwaéttopa pakariyawai aléna ri bolana mennang. Matteru-terui mennang napoji Allataala sibawa ripoji risininna tauwé. Esso-esso pédé' tattambai jumellana mennang nasaba Puwangngé mpéréngngi mennang sining tau iya ripassalama'é. Riséuwaé esso, Pétrus sibawa Yohanés laowi ri Bolana Puwangngé ri tetté tellué arawéngngé, iyanaritu wettu untu' massempajang. Kuwaro ri pintu gerbang riyasengngé “Pintu Gello”, engka séddi tau worowané iya péso'é sipongenna jaji. Esso-esso iyaro tauwé ritiwi kuwaro untu' méllau sidekka risining tau iya muttama'é ri Bolana Puwangngé. Wettunna iyaro tauwé naita Pétrus sibawa Yohanés tudat-tudang ri Bolana Puwangngé, naéllauni mennang mpéréngngi agi-agi ri aléna. Natangngani mennang, nainappa makkeda Pétrus, “Itai!” Nainappa iyaro tauwé pénessaiwi mennang nasibawang amménasang lolongeng agi-agi polé ri mennang. Iyakiya makkedai Pétrus lao ri tauwéro, “Dé' sises-siseng uwappunnai dowi. Iyakiya aga engka ri aléku, iyaro matu uwérékko: Nasibawang akuwasanna Yésus Kristus tau Nazarét-éro, joppano!” Nainappa nakkatenning Pétrus lima ataunna iyaro tau péso'é sibawa natulunna moto. Tappa mawatanni ajéna iyaro tauwé sibawa acingkacinna. Nainappa luppe tettong, sibawa mammulani joppa mallolisu. Nainappa muttama' ri Bolana Puwangngé silaong Pétrus sibawa Yohanés, joppa sibawa luppe'-luppe'to pojiwi Allataala. Sininna tauwé mitai joppa sibawa pojiwi Allataala. Napahanni mennang makkedaé aléna ritu paréllau sidekkaé iya biyasaé tudang ri “Pintu Gelloé” ri Bolana Puwangngé. Hérang senna'ni mennang sibawa bengnga mitai aga kajajiyang ri aléna. Iyaro tauwé matteruni maccowériwi Pétrus sibawa Yohanés. Na wettunna mennang sipattellu lettu ri légo-légo iya riyasengngé “Légo-Légo Salomo”, poléni sininna tauwé makkatulung ri mennang nasaba bengngana. Wettunna naita Pétrus iyaro sining tauwé, makkedani lao ri mennang, “Eh sining tau Israélié, magi muhérang Saudara-saudara ri gau'éwé? Magi mumakkita matteru lao ri idi? Muwasengngiga Saudara-saudara iyaé tauwé naulléi joppa nasaba engka akuwasang ri idi iyaré'ga nasaba matinuluki ri Allataala? Allataala iya nasompaé Abraham, Ishak, Yakub, Allataalana néné-nénéta, iyaro Allataalaé purani napakalebbi Atan-Na, iyanaritu Yésus. Yésus iyanaro muwabbéréyang lao ri panguwasaé, sibawa muéwa ri yolona Pilatus, wettunna Pilatus maélo leppessangngi-Na. Mapaccingngi sibawa makessingngi, iyakiya muéwai sibawa mudessa'-Na kuwammengngi naleppessangekko Pilatus séddi tau pauno-uno. Muwunoi, padahal Aléna ritu assalenna atuwongngé untu' sininna tauwé. Na Allataala pura patuwoi paimeng polé ri amaténgngé. Alétana pura mitai gau'éro. Purani Saudara-saudara naita sibawa nasabbing aga kajajiyang sibawa tau péso'éwé. Mawatanni sibawa madisinni paimeng nasaba mateppe'i lao ri Yésus sibawa akuwasan-Na. Nasaba mateppe'i lao ri Yésus na iyaé tauwé mancaji madisingngi paimeng ri yolona maneng Saudara-saudara. Saudara-saudara! Uwissenni makkekkuwangngé makkedaé aga iya mupogau'éwé sibawa sining pamimpimmu lao ri Yésus, iyaro mupogau'i nasaba dé' muwissengngi aga iyaro mupogau'é. Nasaba iyanaro kajajiyatto aga pura nappaddissengeng Allataala riyolopa nariyolo naolai sininna nabin-Na, makkedaé Arung Pappassalama'é iyaro najjanciyangngé harusu'i manrasa-rasa. Rimakkuwannanaro, toba'no polé ri dosa-dosamu sibawa lisuno ri Allataala, kuwammengngi naleddai dosa-dosamu. Poléi matu Puwangngé ri iko, namupéneddingiwi matu atakkareng baténgngé. Na Puwangngé suroi matu Yésus lao ri iko, nasaba pura ripattentui ri Allataala mancaji Arung Pappassalama'mu. Harusu'i monro ri surugaé narapi Allataala pancaji manengngi baru pada-pada iya napowadaé Allataala naolai nabi-nabin-Na ri wettu riyolo. Engka naengka nakkeda Musa, ‘Puwang Allataalamu kiringekko matu séddi nabi polé ri bangsamu, pada-pada Aléna suroka. Harusu'ko méngkalinga manengngi iya napowadaé iyaro nabié lao ri iko. Tau iya dé'é napénessaiwi aga napowada iyaro nabié, iyaro tauwé ripaddésu'i matu polé ri umma'na Allataala sibawa ripaccappui.’ Nabi-nabi iya puraé mappalettu biritta polé ri Allataala, mappammulai ri Nabi Samuél sibawa nabi-nabi laingngé iya marimonriyé polé, iya manenna nabbirittangngi passalenna wettuéwé. Janci-janci polé ri Allataala iya napalettu'é nabi-nabié iyanaritu untu' iko. Ri laleng assijancingeng iya naébbué Allataala sibawa néné-nénému, makkedai Allataala lao ri Abraham makkuwaé, ‘Polé ri wijammu maélo-Ka barakkakiwi sininna bangsaé ri linoé.’ Iyaro assijancingengngé iyanaritu untu' ikoto. Iyanaro saba'na Allataala piléi Atan-Na, nainappa nasuro lao ri iko lebbi riyolo, kuwammengngi nabarakkakiko. Carana mabbarakkaki iyanaritu naébbui Saudara-saudara toba' polé ri atuwo-tuwommu majaé.” Wettunna Pétrus sibawa Yohanés mabbicara mupa sibawa sining tauwéro, kapala-kapala imangngé sibawa komandang pengawalna Bolana Allataala enrengngé sining tau Sadukié laoni ri Pétrus sibawa Yohanés. Macaii mennang nasaba Pétrus sibawa Yohanés makkedai lao risining tauwé makkedaé tuwoi paimeng Yésus polé ri amaténgngé. Na iyaro pabuttiwi makkedaé tuwoi matu paimeng tau maté. Natikkenni mennang iya duwa rasul-éro nanaputtama'i ri laleng tarungkué. Nasaba wennini, ritahanni Pétrus sibawa Yohanés kuwaro narapi pappa bajana. Iyakiya sining tau iya méngkalingaéngngi pappagguruwanna iyaro sining rasul-é, maéga mateppe'. Natattambana jumellana mennang narapi kira-kira limassebbu tau. Pappa bajanana sining tomariyolona Mahkama Agamaé, sining pamimpinna Yahudié sibawa guru-guru agamaé maddeppungenni ri Yérusalém. Sitani mennang sibawa Imang Lompoé Hanas, enrengngé Kayafas, Yohanés, Aléksander, kuwaéttopa sininna iya muttama'é kaluwargana imang lompoéro. Ritiwini Pétrus sibawa Yohanés mangolo ri mennang, nakkutanana mennang, “Pékkugi caramu pajjappai iyaro tau péso'é? Nasibawang awatangeng aga iyaré'ga nasibawang akuwasang polé riniga mupogau'i iyaro?” Nappébali Pétrus iya rikuwasaiyénna ri Rohna Allataala, “Bapa'-bapa' pamimping bangsaé sibawa Bapa'-bapa' anggotana mahkamaé! Riadélékiki iya essoé nasaba pogau'ki iya madécéngngé untu' tulungngi séddié tau péso', sibawa nasaba maéloi Bapa'-bapa' missengngi pékkugi iyaro tauwé ripajjappa. Harusu'i napahang Bapa'-bapa' sibawa harusu' towi napahang sininna bangsa Israélié makkedaé iyaé tau tettongngé makkekkuwangngéwé sibawa watakkalé madisingngé ri yolona Bapa'-bapa', nasaba awatangeng sibawa akuwasang polé ri Yésus Kristus tau Nazarét-éro. Bapa'-bapa' pura sallii iyaro Yésus, iyakiya Allataala patuwoi paimeng. Yésus iyanaé naseng aya'éwé ri laleng Kitta'é, ‘Batu iya dé'é napakéi sining tukang batué mancajiwi batu kaminang poko'é.’ Yésus bawang naola nasalama tauwé. Saba' ri sininna linoé ri yelle'na rupa tauwé dé' séddi tau laing iya puraé lolongeng akuwasang polé ri Allataala untu' passalama'ki.” Héranni iyaro anggota-anggotana Sidang Pengadilangngé mitai abaraningenna Pétrus sibawa Yohanés, apalagi naissengngi mennang makkedaé iya duwa rasul-éro iyanaritu tau biyasa iya dé'é gaga sikolana. Namainge'na mennang makkedaé iya duwa rasul-éro iyanaritu sining tau iya maccowériyéngngi Yésus. Iyakiya dé'gaga naullé powada mennang, nasaba iyaro tau puraé ripajjappa engkai tettong kuwaro ri yolona mennang silaong Pétrus sibawa Yohanés. Nanasuroni mennang iya duwa rasul-éro massu polé ri onrong sidangngé nainappa mennang barunding. Nakkeda mennang, “Aga harusu' ripogau' lao risining tauwéwé? Sininna tau monroé ri Yérusalém naissenni makkedaé gau' makalallaing iya dé'é padanna, napogau'ni mennang sipadduwa. Dé' nariyullé massakkarengngi iyaro. Iyakiya kuwammengngi iyaé gau'é aja' nallebbang pédé' malowang ri yelle'na sining tauwé, laono mai tancangngi iya duwa makkedaé dé' sises-sisenna nawedding mennang mabbicara lao riséddié tau sibawa pakéi asenna Yésus.” Nanaobbini mennang iya duwa rasul-éro muttama' paimeng, sibawa powadangngi makkedaé dé' sises-sisenna nawedding teppui iyaré'ga mappagguru sibawa asenna Yésus. Iyakiya mappébaliwi Pétrus sibawa Yohanés, “Alémuna pikkiri'i aga tongeng ri yolona Allataala: turusiwi paréntana Bapa'-bapa' iyaré'ga turusiwi paréntana Allataala. Saba' dé' naweddikki mappésau mabbicara passalenna aga iya puraé riita sibawa riyéngkalinga.” Dé'na naulléi lolongeng séddi alasang iyaro anggota-anggotana sidangngé untu' hukkungngi Pétrus sibawa Yohanés. Jaji nancanni iya duwa rasul-éro, nainappa naleppessang duwa, saba' sininna tauwé pojiwi Allataala nasaba gau'éro. Tau iya ripajjappaé sibawa mappahéranro lebbini patappulo taung umuru'na. Ripaleppe'nana Pétrus sibawa Yohanés, lisuni mennang ri sellao-sellaona sibawa curitai sininna napowadaé kapala-kapala imangngé sibawa sining pamimpinna Yahudié lao ri mennang. Naéngkalinganana sellao-sellaona iyaro, sibawani mennang massempajang masséddi ati lao ri Allataala. Makkedani mennang, “Puwang, Idi ritu pancajiwi langié sibawa linoé enrengngé tasi'é sibawa sininna lise'na. Pura-Ko mabbicara sibawa Roh-Mu naolai néné-nénéta, Daud, iyanaritu atam-Mu; makkeda, ‘Magi nasining tauwé, dé' naissengngi Puwangngé, macai; magi na bangsa-bangsaé mébbui rancana iya dé'é nakkéguna? Sadiya-sadiyani sining arung linoé untu' mammusu, sibawa sining pamimpingngé masséddi méwai Puwangngé sibawa Arung Pappassalama'é.’ Saba' mémeng Hérodés sibawa Pontius Pilatus purani pakangka addeppungeng sibawa sining tau iya dé'é naissengngi Puwangngé sibawa tau Israélié ri kotaéwé. Siruntu'i mennang untu' méwai Yésus Atam-Mu iya mapaccingngéro, iya puraé Muwakka mancaji Arung Pappassalama'é. Masséddiwi mennang untu' pogau'i sini-sininnaé, iya puraé Mupattentu lebbi riyolo makkedaé iyaro kajajiyangngi matu. Na-Mupattentui iyaro ri laleng akuwasang sibawa élo-Mu. Makkekkuwangngé, Puwang, itani pékkugi mennang mancakki, sibawa palaloni, ata-atam-Muéwé, patassiyai birittam-Mu sibawa dé' tamétau. Wérénni pattulum-Mu kuwammengngi naripajjappa tau malasaé sibawa gau'-gau' makalallaingngé enrengngé gau'-gau' dé'é padanna kajajiyangngi naolai akuwasang sibawa awatangeng polé ri asenna Yésus, Atam-Mu mapaccingngéro.” Pajanana mennang massempajang, mpéwanni onronna mennang maddeppungeng. Rikuwasai manenni ri Rohna Allataala, sibawa mappammula mabbicara sibawa barani senna' passalenna biritta polé ri Allataala. Sininna tau iya mateppe'énnaro tuwoi masséddi ati sibawa sinyawa. Dé' séddi tau polé ri mennang mangga'i makkedaé aga nappunnai iyanaritu appunnangeng aléna. Sininna engkaé ri aléna, napakéi mennang massibawa. Nasibawang akuwasang battowaé, iyaro rasul-rasul-é mabbéréi asabbiyang makkedaé tuwoni Yésus paimeng. Naribarakkaki senna'na mennang ri Allataala. Nadé' gaga séddi tau polé ri yelle'na mennang akurangeng agi-agi. Saba' iya mennang mappunnaiyé tana iyaré'ga bola, nabalu'i mennang tanana iyaré'ga bolana; nainappa iyaro dowi ellinna natiwii mennang nanabbéréyangngi lao ri rasul-rasul-é. Nainappa iyaro dowié nabbagé-bagéyangngi lao ri tungke' tau iya mapparelluwangngengngi. Iyakiya engka séddi tau riyaseng Ananias. Sibawa bainéna iya riyasengngé Safira, nabalu' towi tana appunnangenna. Iyaro dowi ellinna nataroi sibagiyang untu' aléna na laingngé nabbéréyangngi lao ri rasul-rasul-é. Napogau'i makkuwaéro sibawa naisseng bainéna. Nakkeda Pétrus lao ri aléna, “Ananias, magi muleppessangngi Ibillisi'é makuwasaiwi atimmu, angkanna mabbelléko lao ri Rohna Allataala, namuwammekko-mekkorengngi taroi saisa' dowi ellinna tanaéro? Iyaro tanaé iko punna riwettu dé'napa mubalu'i. Sibawa muwi puranana ribalu', iko topa punna iyaro dowi ellinna. Jaji magi naengka akkattamu ri laleng atimmu untu' pogau'i makkuwaéro? Tenniya tolinoé mubellé iyakiya Allataala!” Naéngkalingana Ananias iyaro ada-adaé, mabuwanni namaté. Sininna tau méngkalingaéngngi iyaro kajajiyangngé métauni. Napoléna sining kalloloé dokoi ujuna Ananias, nanatiwii massu untu' nakuburu'. Kira-kira tellujjang ri munrinna muttama'ni bainéna. Dé' naissengngi aga nappa kajajiyang. Nakkeda Pétrus ri aléna, “Cobasai powadakka: Iyaro tana mubalu'é sibawa lakkaimmu, singngégaga iyaé ellinna?” Nappébali bainéna Ananias, “Tongeng, iyanaritu ellinna.” Nakkeda Pétrus lao ri aléna, “Magi iko sibawa lakkaimmu siyempe'ko untu' belléi Rohna Puwangngé? Engkalingai! Sining tau kuburu'éngngi lakkaimmu lisuni. Natiwi tokko matu mennang massu.” Iyatoro wettué namabuwang bainéna Ananias namaté ri yolona Pétrus. Na wettunna iyaro sining kalloloé muttama', napoléini maté. Nanatiwini ujuna massu, nanakuburu'i ri seddéna lakkainna. Nasininna tau mateppe'éro sibawa sining tau laingngé, iya méngkalingaéngngi kajajiyangngéro, métauni. Nasaba jama-jamanna rasul-rasul-é, maéga anu makalallaing sibawa mappahérang kajajiyang ri yelle'na masaraka'é. Masséddi atini sininna tau mateppe'é maddeppungeng ri Légo-Légo Salomo ri Bolana Puwangngé. Nadé'gaga tau saliweng barani polé maddeppungeng sibawa sining tau mateppe'éro. Iyakiya iyaro sining tau mateppe'é ripakalebbi senna'i ri masaraka'é. Pédé' maitta pédé' tattamba égana sining tau iya mateppe'é lao ri Puwangngé – worowané makkunrai. Mala iyaro wettué, sining tau iya malasaé ritaroi ri yasé'na onrong atinrongngé iyaré'ga tappéré, naritiwi ri lalengngé, kuwammengngi nakaminang céddé'na weddingngi rikenna ri wajo-wajona Pétrus, rékko laloi Pétrus kuwaro. Mallompéngeng sining tauwé polé ri kota-kotaé seddéna Yérusalém. Natiwii mennang sining taunna malasaé sibawa iya nauttamakiyé roh-roh maja. Naripajjappa maneng iyaro tauwé. Angkanna imang lompoé sibawa ana'-ana' gurunna, iyanaritu golongang tau Sadukié, mammulani tinda', nasaba mangémpurui mennang. Natikkengngi iyaro rasul-rasul-é, nainappa naputtama' ri tarungkué. Iyakiya wenninnana, engka séddi malaéka'na Puwangngé timpa'i tange'na tarungkué, nainappa natiwi massu rasul-rasul-é. Nakkeda iyaro malaéka'é lao ri rasul-rasul-é, “Laono mutettong ri Bolana Puwangngé sibawa powadangngi sining tauwé passalenna atuwong mabarué.” Naturusini iyaro rasul-rasul-é pasenna malaéka'éro. Maélé senna'ni lao ri Bolana Puwangngé nappammula mappagguru kuwaro. Napoléna imang lompoé sibawa ana' gurunna, napakangka sidang mahkama sibawa sining pamimpinna Yahudié. Nainappa nasuro mennang tauwé lao malai iyaro rasul-rasul-é ri tarungkué untu' ritiwi mangolo ri mennang. Iyakiya wettunna sining tau risuroéro lettu ri tarungkué, dé'ni napoléi iyaro rasul-rasul-é kuwaro. Jaji lisuni mennang, nanalaporo'i iyaro gau'é ri mahkamaé. Nakkeda mennang lao ri mahkamaé, “Wettutta lettu ri tarungkué, ripoléi muwi iyaro tange'na tarungkué makessing taggoncinna, sibawa pengawal-pengawal-é jaga ri sumpangngé. Iyakiya wettutta timpa'i iyaro tange'é, dé'gaga séddi rilolongeng ri lalenna.” Wettunna parawira pengawalna Bolana Puwangngé sibawa kapala-kapala imangngé naéngkalinga iyaro laporangngé, bengngani passalenna iyaro rasul-rasul-é sibawa métauna aga wedding kajajiyang. Napoléna séddi tau worowané tiwii birittaéwé, “Engkalingai! Sining tau natahangngé Bapa'-bapa' ri tarungkuéro, makkekkuwangngé napaggurui tau maégaé ri Bolana Puwangngé!” Nalaona parawira pengawalna Bolana Puwangngé silaong pengawal-pengawalna malai iyaro rasul-rasul-é paimeng. Iyakiya dé' napaké awatangeng, saba' métaui ri tau maégaé; ajakké iyaro tau maégaé genrungngi matu mennang sibawa batu. Ritiwini muttama' mangolo iyaro rasul-rasul-é ri mahkamaé. Nariparéssana mennang ri imang lompoé. Makkedani, “Purano riyattéyang sibawa masero kuwammengngi aja' muwappagguru passalenna iyaé Tauwé. Iyakiya makkekkuwangngé coba mitai aga mupogau'! Muwappallebbangengngi pappagguruwammuro ri sininna Yérusalém, sibawa mala maéloko tenre'ki makkedaé idi ritu nassabari amaténna iyaro Tauwé.” Nappébali Pétrus sibawa rasul-rasul laingngé, “Harusu'ki turusiwi Allataala, tenniya turusiwi tolinoé. Yésus iya musallié, purani ripatuwo paimeng polé ri amaténgngé ri Allataalana néné-nénéta. Napurani riwéréng ri Allataala tudangeng sibawa akuwasang iya matanré selaku Pamimping sibawa Pappassalama'; kuwammengngi nariwéréng kasempatang bangsa Israélié untu' toba' polé ri dosa-dosana sibawa riyaddampengeng. Idi'naé sabbi-sabbinna passalenna iya manennaro – idi kuwaéttopa Rohna Allataala iya nabbéréyangngé Allataala lao risining tau iya turusiyéngngi parénta-Na.” Wettunna naéngkalinga iyaro sining anggotana Mahkama Agamaéro, macai senna'ni mennang, angkanna siyempe'ni mennang untu' mpunoi iyaro rasul-rasul-é. Iyakiya ri yelle'na sining anggotana mahkamaé engka séddi tau Farisi riyaseng Gamaliél. Guru agama iya ripakalebbi senna'é ri sininna tauwé. Tettonni nainappa nasuro tauwé tiwii massu iyaro rasul-rasul-é cinampe'. Nainappa makkeda lao ri Mahkama Agamaéro, “Saudara-saudara tau Israélié! Pikkiri'i madécéd-décéng passalenna aga maélo napogau' saudara-saudara lao risining tauwéwé. Saba' riyolo mompoi Téudas, iya makkaéngngi aléna tau maraja, angkanna kira-kira eppa datu tau maccowériwi. Iyakiya riyunoi sibawa sininna ana'-ana' gurunna tassiya-siya sibawa iyaro gerakanna lennye' toni. Purairo, wettunna engka abbilangeng, momposi Yudas, tau polé ri Galiléa. Nasaba pangarunna, maégato tau maccowériwi. Iyakiya riyuno towi, sibawa sininna ana'-ana' gurunna tassiya-siyani. Jaji makkekkuwangngé ri laleng kajajiyangngéwé, pangajaku iyanaritu: aja'na mugaukengngi agi-agi sining tauwéwé, leppessangngi siya mennang. Saba' rékko pappagguruwanna sibawa gerakanna mennang poléi ri tolinoé, tentuni iyaro pappagguruwangngé sibawa gerakangngé lennye'i matti. Rékko iyaro poléi ri Allataala, tentu Saudara-saudara dé' mulléi matu caui mennang. Mala naullé matu manessani makkedaé Saudara-saudara méwai Allataala.” Iyaro pangajana Gamaliél natarimani mahkamaé. Nariyobbina iyaro rasul-rasul-é, nainappa ribabba, sibawa riyattéyannana mappagguru passalenna Yésus. Purairo nappa rileppessang mennang. Iyaro rasul-rasul-é nasalaini iyaro Mahkama Agamaé sibawa masennang nasaba Allataala pura mangga'i mennang sitinaja lolongeng pappakatuna nasaba Yésus. Na esso-esso ri Bolana Puwangngé sibawa sining bolana tauwé, matteru-terui mappagguru mennang sibawa mabbirittangngi Karéba Madécéngngé passalenna Yésus makkedaé Aléna ritu Arung Pappassalama'é iya riyajjanciyangngé. Pédé' maitta pédé' tattamba maégai tau maccowériyéngngi Yésus. Iyaro wettué sining tau Yahudi iya maccowériyéngngi Yésus iya mabbasa Yunanié, dé' namasennang lao risining tau Yahudi tuléngngé iya maccowériyéngngi Yésus. Makkedai iyaro mabbasa Yunanié, “Sining makkunraitta iya jandaénna dé' nallolongeng bantuwang ongkoso' esso-esso iya nabbagé-bagéyangngé lao risining tauwé.” Rimakkuwannanaro, iya seppulo duwa rasul-rasul-é napaddeppungengngi sininna tau maccowéé nakkeda lao ri mennang, “Dé' namakessing narékko mappésauki mabbirittangngi ada-adanna Allataala, nasaba harusu'ki murusu'i passaleng anré. Jaji madécéngengngi Saudara-saudara piléi polé ri yelle'mu pitu tau iya mappunnaiyé aseng makessing sibawa rikuwasai ri Rohna Allataala enrengngé mapanré, iya weddingngé risuro murusu'i passalengngéwé; saba' maéloki massempajang sibawa mabbirittangngi ada-adanna Allataala bawang.” Nasitujui manenni iyaro tauwé pallolongenna iyaro rasul-rasul-é. Napiléni mennang Stéfanus, séddiwi tau mateppe' senna' ri Yésus sibawa rikuwasai ri Rohna Allataala. Ripilé towi: Filipus, Prokhorus, Nikanor, Timon, Parménas, sibawa Nikolaus polé ri Antiokhia; tenniyai tau Yahudi, iyakiya muttama'ni agama Yahudi. Iya pitu tauwéro nappétangngarenni ri rasul-rasul-é, nainappa iyaro rasul-rasul-é massempajang sibawa méllaungengngi mennang barakka'na Puwangngé. Makkuwaniro biritta polé ri Allataala pédé' mallebbangngi sibawa tau maccowériyéngngi Yésus ri Yérusalém pédé' tattambato égana. Namaéga tona imang mateppe' lao ri Yésus. Ribarakkaki senna'ni Stéfanus ri Allataala, angkanna pakangkani maéga anu makalallaing sibawa gau'-gau' dé'é padanna ri yelle'na masaraka'é. Iyakiya engka tau méwai; anggota-anggotana mennang bola assompangngé iya riyasengngé Bola Assompanna sining Tau Maradéka'é. Iyaro anggota-anggotana bola assompangngé iyanaritu sining tau Yahudi polé ri Kiréné sibawa Aléksandria. Sibawai mennang sining tau Yahudi polé ri Kilikia sibawa Asia siddeba' sibawa Stéfanus. Iyakiya dé' naulléi mennang bantai aga napowada Stéfanus, nasaba Rohna Allataala pura mpéréngngi apanréng untu' mabbicara. Rimakkuwannanaro nawérénni pasoso siyagangngaré tau untu' makkeda, “Riyéngkalingai iyaro tauwé cella-cellai Musa sibawa Allataala!” Makkuwaniro mennang pakiri-kiriwi sining tauwé sibawa sining pamimping Yahudié, enrengngé guru-guru agamaé. Nainappa mennang lao tikkengngi Stéfanus, nanatiwii mangolo ri Mahkama Agamaé. Nanapangolo towi mennang sabbi-sabbi iya mabbéré pappakatajang iya dé'é natongeng passalenna Stéfanus. Nakkeda iyaro sining sabbié, “Iyaé tauwé tuli nacella-cellai Bolana Puwangngé iya mapaccingngé sibawa cella-cellai sining paréntana Allataala iya napalettu'é Musa. Purani riyéngkalinga napowada, makkedaé Yésus iyaro polé ri Nazarét maéloi ruttungngi Bolana Puwangngé, nainappa napinra maneng ade'-ade' iya napaturungngé Musa lao ri idi!” Sininna tau iya hadéré'é ri lalenna sidang Mahkama Agamaéro mitai Stéfanus. Na iyaro wettué rupanna Stéfanus paitai pada-pada rupa malaéka'é. Nakkutana imang lompoé lao ri Stéfanus, “Tongegga sininna iya napowadaé iyaro tauwé?” Nappébali Stéfanus, “Saudara-saudara sibawa Bapa'-bapa'! Coba méngkalingaka. Riwettu dé'napa néné-nénéta Abraham nalétté ri Haran, iyaro wettué monro mupi ri Mésopotamia, Allataala iya malebbié laowi ri aléna sibawa makkeda, ‘Salaini wanuwammu sibawa sumpulolomu. Laono ri wanuwa iya maéloé Ujéllorekko.’ Nasalaini Abraham wanuwa Kasdim, nalétté ri Haran. Maténana ambo'na Abraham, Allataala palétté'i Abraham ri wanuwaéwé iya naonroiyé Saudara-saudara sibawa Bapa'-bapa' makkekkuwangngé. Iyaro wettué dé'gaga sibagiyang polé ri wanuwaéwé iya nabbéréyangngé Allataala lao ri Abraham untu' mancaji appunnangenna Abraham; muwi sijongka dé'to nariwéréng. Iyakiya majjanciwi Allataala makkedaé maéloi mpéréngngi Abraham untu' mancaji appunnangenna Abraham sibawa wija-wijanna. Iyaro wettué dé' nappunnai ana' Abraham. Iyakiya iyanaé napowada Allataala ri Abraham, ‘Wija-wijammu monroi matu selaku tau polé-polé ri wanuwanna tau laingngé. Iyaro sining taunna wanuwaé najajai matu mennang sibawa nagaukenna sibawa mabecco eppa datu taung ittana. Iyakiya maélo-Ka hukkungngi bangsa iya powataéngngi mennang, sibawa passui matu polé ri wanuwaéro nanasompa-Ka matu ri onrongngéwé.’ Puranana makkeda makkuwaro iyaro assijancingengngé nasahkanni Allataala sibawa sunna'. Jajinnana Ishak, ana'na Abraham, nasunna'ni Abraham ri wettunna umuru' aruwa essona. Nainappa Ishak nasunna' toni ana'na, iyanaritu Yakub. Na Yakub nasunna' toni iya seppulo duwa ana'na, iyanaritu iya mancajiyé toriyolona bangsa Yahudié. Iyaro toriyolota mangémpurui lao ri Yusuf, angkanna nabalu'ni mennang mancaji ata ri Maséré'. Iyakiya Allataala sibawangngi, enrengngé paleppe'i polé ri sininna asussanna. Allataala mpéréngngi ati sibawa apanréng wettunna mennang mangolo ri Firaun, arung Maséré', angkanna Firaun pancajiwi gubernurna wanuwa Maséré' nenniya panguwasana saorajana Firaun. Nainappa kajajiyanni séuwa akkadéreng iya marajaé ri sininna wanuwa Maséré' sibawa Kanaan angkanna manrasa-rasa senna'ni tauwé. Dé'na naulléi lolongeng anré néné-nénéta. Na wettunna naéngkalinga Yakub engka gandong ri Maséré' nasuroni ana'-ana'na, néné-nénéta, lao kuwaro untu' pammulanna. Mabbékkaduwannana mennang lao, nappaddissengenni aléna Yusuf lao ri silessu-silessurennaro makkedaé aléna ritu Yusuf. Nappai naisseng wettuéro arung Maséré' passalenna kaluwargana Yusuf. Nainappa Yusuf kiring karéba lao ri ambo'na, iyanaritu Yakub, untu' méllauwi silaong sining kaluwargana létté ri Maséré' – iya manenna engka pituppulo lima tau. Nalétté'na Yakub ri Maséré', nakkuwanaro maté sibawa néné-nénéta. Narimunri ritiwii paimeng ujuna ri Sikhém narikuburu ri kuburu' iya naelliyé Abraham sibawa sijumella dowi polé ri suku bangsa Hémor-é ri Sikhém. Macawé'nana wettunna Allataala narupai jancin-Na ri Abraham, bangsata ri Maséré' pédé' tattambani égana. Angkanna séddi arung laing iya dé'é naissengngi Yusuf, mapparénta ri Maséré'. Iyaro arungngé nacculé-culéiwi bangsata sibawa majapperuna lao ri néné-nénéta. Napassai mennang mabbiyangngi ana'-ana'lolona iya nappa jajiyé kuwammengngi namaté. Ri wettuénnaro najaji Musa; séddiwi ana'lolo iya magello senna'é. Tellumpuleng ittana ripiyara ri bolana ambo'na, napuranana riyabbéyang, riyalani ri ana' makkunrainna Firaun, nanapiyarai selaku ana' ri aléna. Sining pangissengeng bangsa Maséré'é ripagguruwanni namancajina tau makuwasa senna' ri laleng ada-adanna sibawa pangkaukenna. Wettunna Musa makkéumuru patappulo taung, momponi ri laleng atinna macinna lao mitai keadaanna bangsana tau Israélié. Nanaitana séddi tau polé ri mennang ricalla riséddié tau Maséré'; nanaéwaini tau ricallaéro sibawa naunoi iyaro tau Maséré'é. Nasengngi Musa najeppuiwi matu bangsana makkedaé Allataala pakéi untu' paleppe'i mennang. Iyakiya dé' najeppuiwi mennang. Pappa bajana naitasi duwa tau Israélié mallaga, nakkuragana pasidaméi mennang. Nakkedana, ‘Iko ritu massilessurekko. Magi muwallaga?’ Iyakiya tau iya munruéngngi sellaonaro nasorongngi Musa lao ri wiring nainappa makkeda, ‘Niga makkako mancaji pamimping sibawa hakitta? Maélokoga mpuno tokka pada-pada muwunona iyaro tau Maséré'é ri wenni?’ Wettunna naéngkalinga Musa aga napowada iyaro tauwé, larini Musa polé ri Maséré' nanaonro ri wanuwa Midian. Kuwaniro lolongeng duwa tau ana'. Patappulo taung ri munrinna engka séddi malaéka' lao ri Musa ri padang kessi seddéna Bulu Sinai. Iyaro Malaéka'é poléi ri laleng apié ri alekale malluwa'é. Héranni Musa mitai iyaro gau'é, angkanna laoni macawé'-macawé'é untu' missengngi aga iyaro. Nanaéngkalingana saddanna Puwangngé makkeda, ‘Iyya'naé Allataalana néné-nénému; Iyya'na Allataalana Abraham, Ishak, sibawa Yakub.’ Naténréna Musa nataro tau angkanna dé'na nabaranina makkita lao ri alekale'éro. Nainappa makkedasi Puwangngé, ‘Leppessangngi sandala iya mupakéro, saba' iyaro tana muwonroiyé tettong, iyanaritu tana mapaccing. Purani Uwita sibawa upénessai paina anrasa-rasanna umma'-Ku ri Maséré'. Purani Uwéngkalinga addarékénna mennang naunonnona untu' paleppe'i mennang. Makkekkuwangngé laono mai! Maélo-Ka suroko lisu ri Maséré'.’ Musa iyanaé tenriyangakui ri bangsa Israélié enrengngé risampéyang sibawa ada-adaéwé, ‘Niga pura makkako mancaji pamimping sibawa hakitta?’ Iyakiya mala aléna ritu tau nasuro Allataala untu' mancaji pamimping sibawa pappassalama', naolai bantuwanna malaéka'é iya laowé ri aléna ri alekale malluwa'éro. Musa iyanaro pimpingngi bangsa Israélié massu polé ri Maséré' sibawa pogau' maéga anu makalallaing sibawa gau'-gau' dé'é padanna ri Maséré', ri Tasi' Cella'é sibawa ri padang kessi'é patappulo taung ittana. Alénato Musa iya makkedaé lao ri bangsa Israélié, ‘Allataala maélo mpérékko séddi nabi iya napilé polé ri yelle'mu, pada-pada Aléna napiléka.’ Musa ritu iya ri tengnga-tengngana bangsa Israélié ri padang kessi'é, mancaji pappasisumpung untu' malaéka' iya mabbicaraé ri aléna ri Bulu Sinai sibawa néné-nénéta. Aléna ritu tarimai polé ri Allataala karéba iya tuwoé untu' ripalettu' ri idi. Namuni makkuwaro, néné-nénéta dé' namaélo matinulu lao ri aléna. Risampéyangngi ri mennang sibawa macinnana lisu ri Maséré'. Makkedai mennang ri Harun, ‘Ebburekki déwata-déwata, kuwammengngi iyaro déwata-déwataé pimpikki. Saba' dé'na narisseng aga kajajiyang sibawa Musa iya tiwiékki massu polé ri Maséré'!’ Nainappa iyaro wettué mébbuni mennang dato'-dato' ana' saping, nainappa makkasuwiyangeng akkarobangeng lao ri dato'-dato'éro sibawa pakangka pésta untu' pakarajai ébbu limanna mennang. Narisalaina mennang ri Allataala sibawa rileppessang massompa wéttowing ri langié. Iyaro siturui aga taroki ri laleng kitta nabi-nabié. Makkuwaé, ‘Eh sining tau Israélié! Tenniya untu' alé-Ku muwaggéré sibawa makkarobangeng olokolo patappulo taung ittana ri padang kessi'é. Kémana barahala Molokh ritu mutiwi-tiwi silaong dato'-dato'na wéttowing barahalamu, iyanaritu Réfan; iyanaro dato'-dato' muwébbu untu' risompa. Rimakkuwannanaro maélo-Ka mabbéyakko lettu mabéla ri liweng ri wanuwa Babél.’ Kéma naonroiyé Allataala lao ri rupa tauwé rilolongengngi ri néné-nénéta ri padang kessi'é. Iyaro kémaé riyébbui nasaba paréntana Allataala lao ri Musa sibawa situru conto nappaitangngé Allataala lao ri Musa. Nainappa iyaro kémaé natiwii néné-nénéta wettunna mennang sibawa Yosua lao sittaiwi wanuwattaé polé ri akuwasanna bangsa-bangsa iya napaddésu'é Allataala ri yolona mennang. Iyaro kémaé engkai kuwaro lettu wettunna Daud. Napésennangiwi Daud atinna Allataala sibawa naéllauwi ri Aléna kuwammengngi naripalalo mébbu séddi bola untu' Allataala iya nasompaé Yakub. Iyakiya Salomo ritu patettong bola untu' Allataala. Namuni Allataala Pommatanré dé' naonro ri laleng bola iya naébbué tolinoé; saba' ri laleng kitta'na nabié tarokii makkuwaé, ‘Langié iyanaritu kadéra arajak-Ku, na linoé lapikajé-Ku. Bola aga maélo mupatettongek-Ka? Kégani onrok-Ku untu' mappésau? Tenniyaga Iyya pancajiwi sininna séuwa-séuwaé?’ makkuwaniro adanna Allataala. Tenniya culé-culé tedde' atinna Saudara-saudara sibawa watanna matinulu ri Allataala! Mataru-taru senna' daucculimmu lao ri ada-adanna Allataala! Pada tokko sibawa néné-nénéna; tuli méwai Rohna Allataala! Engkaga nabi dé' nacallai néné-nénému? Naunoi mennang sining surona Allataala iya engkaénna riyolo mappallebbangengngi makkedaé Atanna Allataala iya tongengngéro maéloi polé. Na makkekkuwangngé mubali'bellariwi sibawa mpunoi iyaro Atanna Allataala. Purani napalettu sining malaéka'é sining paréntana Allataala lao ri iko, iyakiya dé' muturusiwi!” Naéngkalingana iyaro anggota-anggota Mahkama Agamaé sininna napowadaé Stéfanus, mapeddini atinna mennang sibawa macai senna'na lao ri aléna. Iyakiya Stéfanus iya rikuwasaiyé ri Rohna Allataala, makkitai ri langié. Naitani alebbirenna Allataala sibawa Yésus tettong ri onronna makuwasaé ri seddé ataunna Allataala. Nakkeda Stéfanus, “Itai, uwitai surugaé tattimpa' sibawa Ana'na Tolinoé tettong ri seddé ataunna Allataala!” Natongkoni daucculinna mennang iyaro anggota-anggotana mahkamaé nagora-gorato, nainappa massamang luruiwi Stéfanus. Nassarénréngenni massu ri saliweng kota nainappa nagenrung batu. Sining tau iya sabbingngéngngi iyaro kajajiyangngé nappaddettangenni pakéyanna mennang riséddié kallolo riyasengngé Saulus. Wettunna mennang nagenrung Stéfanus, mangobbini Stéfanus, “Puwang Yésus tarimai rohku!” Nakkaluttuna sibawa gora loppo, “Puwang, aja' naripaéssangi iyaé dosaé ri yasé'na mennang!” Purana makkeda makkuwaro, maténi. Namasennang tona Saulus ri abbunowangngéro. Iyatoro essoé nappammula rilellung jema'é ri Yérusalém, angkanna sininna tau mateppe'é, sangadinna rasul-rasul-é, tassiya-siyani lao ri sininna daéra Yudéa sibawa Samaria. Sining tau iya métaué ri Allataala natampunni Stéfanus enrengngé nateringinna sibawa masé' senna'. Iyakiya Saulus matterui makkuraga mancuru'i jema'é. Laowi ri tungke'-tungke' bola nanassarénréngengngi massu sining tau mateppe'é, nainappa naputtama' mennang ri tarungkué. Sining tau mateppe'é iya tassiya-siyaénnaro nappallebbangenni Karéba Madécéng polé ri Allataala lao kégi-kégi. Laoni Filipus ri kota Samaria sibawa mabbirittangngi lao risining tauwé kuwaro passalenna Arung Pappassalama'é iya najjanciyangngé Allataala. Wettunna sining tauwé naéngkalinga Filipus mabbicara sibawa naitana mennang sining anu makalallaing iya napogau'é, maéga polé ri mennang pénessaiwi aga napowada Filipus. Saba' massuni roh-roh majaé polé ri maéga tau iya nauttamakiyé sétang. Sining tau péso'é sibawa képpangngé maéga napajjappa. Nasining tauwé ri kota Samaria marennu senna'ni. Ri kotaéro engka séddi tau riyaseng Simon, siyagangngaré'ni ittana mébbui sining tau Samariaé riparemma sibawa pangissengeng séhéré'na. Makkedai lao risining tauwé makkedaé dé' tau padanna. Nasininna tauwé ri kotaéro polé ri sininna masaraka'é napénessai senna'ni. Makkedai mennang, “Iyaé tauwé iyanaritu awatangeng Allataala iya kalabbaé selaku ‘Awatangeng Battowa’.” Maitta senna'ni paremma'i sining tauwé sibawa awatangeng séhéré'na, angkanna napénessai senna'i. Iyakiya Filipus mabbirittangngi lao ri mennang passalenna Karéba Madécéng pékkugi Allataala patettongngi matu Apparéntan-Na sibawa passalenna Yésus Kristus, Arung Pappassalama'éro. Namateppe'na mennang lao ri karéba napalettu'é Filipus, nainappa ricemmé mennang muwi worowané iyaré'ga makkunrai. Mateppe' toni Simon. Napurana ricemmé, matteruni maccowériwi Filipus. Sining anu makalallaing iya kajajiyangngé pahérangngi Simon. Naéngkalingani rasul-rasul-é ri Yérusalém makkedaé sining tau Samariaé natarimani ada-adanna Allataala. Rimakkuwannanaro nasuroni mennang Pétrus sibawa Yohanés lao kuwaro. Wettunna Pétrus sibawa Yohanés lettu, massempajanni mennang untu' iyaro sining tau Samariaé kuwammengngi nalolongeng mennang Rohna Allataala, saba' dé'pa napolé Rohna Allataala kuwasaiwi muwi séddi tau polé ri mennang, nappai mennang ricemmé ri laleng asenna Yésus Kristus bawang. Nainappa Pétrus sibawa Yohanés palénne'i limanna ri yasé'na iyaro sining tau Samariaé; nanatarimani Rohna Allataala. Naitani Simon makkedaé nasaba limanna rasul-rasul-é ripalénne'i ri yasé'na sining tauwéro, nanabbéréyangngi Rohna Allataala lao risining tauwéro. Rimakkuwannanaro tiwini Simon dowi lao ri Pétrus sibawa Yohanés, nainappa makkeda, “Wéréng tokka iyaro akuwasangngé kuwammengngi narékko upalénne'i limakku ri nigi-nigi, iyaro tauwé natarimai Rohna Allataala.” Iyakiya mappébaliwi Pétrus, “Cilakako sibawa dowimu! Muwasengngiga pabbéréna Allataala weddingngi riyelli sibawa dowi? Dé' muwappunnai ha' untu' maccowé ri laleng jama-jamatta, nasaba dé' natongeng atimmu lao ri Allataala. Rimakkuwannanaro buwanni akkattamu iya majaé, sibawa éllauni ri Puwangngé kuwammengngi naddampengengngi pikkirammu iya majaé! Uwissengngi pennoko sibawa angémpurung enrengngé ripowatako ri jaé.” Nakkeda Simon lao ri Pétrus sibawa Yohanés, “Tulukka muwéllauwi ri Puwangngé kuwammengngi nadé' séddi polé ri mupowadaéro saudara-saudara kajajiyang ri iyya.” Puranana mennang mabbéré asabbiyang sibawa mabbirittangngi ada-adanna Puwangngé, lisuni Pétrus sibawa Yohanés ri Yérusalém. Na ri lalengngé nabbirittanni mennang iyaro Karéba Madécéngngé ri kampong-kampongngé ri Samaria. Engka séddi malaéka'na Puwangngé makkeda lao ri Filipus, “Ayo joppano! Lao ri yattang ri laleng iya pasisumpungngéngngi Yérusalém sibawa Gaza!” Iyaro lalengngé masino-sino. Nakkeda Rohna Allataala lao ri Filipus, “Laono muwaddeppériwi iyaro karétaé.” Nalaona Filipus maddeppériwi iyaro karétaé, nanaéngkalingai iyaro tauwé bacai Kitta Yésaya. Nakkutanana Filipus ri aléna, “Tapahagga Puwang iya tabacaéro?” Nappébali iyaro tauwé, “Pékkugiwi upahang, rékko dé'gaga pakatajangekka?” Nainappa naéra Filipus ménré ri karétaé sibawa sisama tudang. Iyanaé aya'-aya' iya nabacaéro, “Pada-padai bimbala' iya rirénréngngé untu' rigéré, pada-pada ana' bimbala' iya dé'é nabbémbé rékko rigoncingngi bulunna, makkuwaniro dé' nakkedada muwi silappa. Ripakatunai sibawa rigaukengngi dé' naadélé'. Rireddu'i nyawa-Na polé ri yasé'na linoé angkanna muwi séddi tau dé'to gaga mulléi curitai passalenna wija-wijan-Na.” Iyaro pegawé tanré polé ri Etiopia makkedai lao ri Filipus, “Coba paissengika, niga naseng iyaé nabié? Alénaga iyaré'ga tau laingngé?” Nappammulana Filipus mabbicara; napakéi iyaro aya'-aya'é selaku pammulang untu' mabbirittangngi Karéba Madécéngngé passalenna Yésus lao ri pegawé tanréro. Ri tengnga laleng, lettu'ni riséuwaé onrong iya engkaé uwaina. Nakkeda iyaro pegawé, “Itai iyaro engka uwai! Agapi kurang untu' ricemmé?” [ Nakkeda Filipus, “Rékko mateppe'ki Puwang sissukku atitta, weddikki ricemmé Puwang.” Nakkeda iyaro pegawé tanré polé ri Etiopia, “Mateppe'ka Yésus Kristus iyanaritu Ana'na Allataala.”] Nainappa nasuro léppang karétana; nasipadduwa mennang, Filipus sibawa pegawéro nonno ri uwai naricemmé ri Filipus. Wettunna mennang massu polé ri uwai, riyalani Filipus ri Rohna Allataala polé kuwaro. Iyaro pegawé tanré polé ri Etiopia dé'na naitai. Namasennanna iyaro pegawé tanré patterui joppana. Tenrisenna-senna engkani Filipus ri Asdod. Na wettunna napatteru joppana, nappallebbangengngi Karéba Madécéngngé passalenna Yésus ri sininna kotaé angkanna lettu ri Kaisaréa. Iyaro wettué matteru-terui Saulus macinna mancangngi sibawa mpunoi sining tau maccowériyéngngi Puwang Yésus. Laoni ri imang lompoé, naéllau sure' kuwasa untu' lao risining pamimpinna sining bola assompanna tau Yahudié ri Damsyik, kuwammengngi rékko nalolongengngi kuwaro sining tau iya mateppe'é ri Yésus, weddingngi natikkeng mennang sibawa natiwi ri Yérusalém. Wettunna mattuju ri Damsyik, macawé'nana ri kotaéro, tappa engka séuwa cahaya polé ri langié mattappa mattulilingiwi Saulus. Mabuwanni ri tanaé nainappa méngkalinga séuwa sadda makkeda ri aléna, “Saulus, Saulus! Aga saba'na mucalla-Ka?” Nakkutana Saulus, “Niga Iko, Puwang?” Nappébali iyaro saddaé, “Iyya'na Yésus, iya mucallaé. Iyakiya makkekkuwangngé oto'no namumattama ri kotaé. Kuwapiro matu ripowadakko aga harusu' mupogau'.” Tassélenni sining tau maccowéé silaongengngi Saulus, angkanna dé'na naulléi massadda; nasaba naéngkalingai mennang iyaro saddaé iyakiya dé'gaga séddi tau naita. Natettonna Saulus sibawa timpa'i matanna, iyakiya dé'na aga-agana naullé mita matanna. Jaji riyakkatenninni limanna ri mennang narirénréng muttama' ri Damsyik. Tellungngesso ittana dé' naulléi makkita sibawa dé' sises-siseng tona nanré iyaré'ga naénung wettuéro. Ri Damsyik engka séddi tau maccowériwi Puwang Yésus asenna Ananias. Ri laleng séuwaé pakkitang, mabbicarai Puwangngé ri aléna. Makkedai Puwangngé, “Ananias!” Nappébali Ananias, “Iyyé, Puwang.” Nakkeda Puwangngé, “Joppano makkekkuwangngé. Laono ri bolana Yudas ri Laleng Lempué. Akkutanangngi kuwaro tau riyasengngé Saulus iya assalennaé polé ri kota Tarsus. Iyaro tauwé mattengngangngi massempajang, na ri laleng séuwaé pakkitang naitai séddi tau worowané, riyaseng Ananias, lao ri aléna sibawa palénne'i limanna ri yasé'na kuwammengngi naulléi makkita paimeng.” Nappébali Ananias, “Puwang, maégani tau pura uwéngkalinga curitai passalenna iyaé tauwé, lebbi-lebbipi passalenna sining paccallang iya napogau'é lao ri umma'-Mu ri Yérusalém. Na makkekkuwangngé engkai kuwaé sibawa pappalalo polé ri kapala-kapala imangngé untu' tikkengngi sining tau mateppe'é ri Iko.” Iyakiya makkedai Puwangngé lao ri Ananias, “Lao bawanno! Saba' purani Upilé untu' tumani-Ka, kuwammengngi nabbirittangngi passalekku lao risining arungngé enrengngé laoto ri umma' Israélié. Na alé-Ku matu majjellokengngi ri aléna sininna anrasa-rasang iya harusu'é napéneddingi nasaba Iyya.” Nalaona Ananias ri bolaéro sibawa palénne'i limanna ri yasé'na Saulus. Nakkeda Ananias, “Saudara Saulus, Puwang Yésus iya muwitaé ri tengnga laleng wettunna saudara lao kumaiyé, Aléna ritu suroka polé kuwammengngi weddingngi Saudara makkita paimeng sibawa rikuwasai ri Rohna Allataala.” Iyatoro wettué engka pada-pada sessi balé leppe' polé ri matanna Saulus naweddinni makkita paimeng. Naoto'na nainappa ricemmé. Napuranana manré, mawatanni paimeng. Monroni Saulus ri Damsyik sibawa sining tau maccowériyéngngi Yésus siyagangngaré esso ittana. Matteruni lao ri bola assompangngé sibawa mappammula mabbirittangngi makkedaé Yésus ritu Ana'na Allataala. Hérang manenni tauwé méngkalingai Saulus. Makkedani mennang, “Tenniyaga iyaé pura mpunoi sininna tauwé ri Yérusalém iya mateppe'é ri Yésus? Laowi kumaiyé untu' tikkengngi sibawa tiwii mennang lao risining kapala imangngé!” Iyakiya pédé' masse'i pangarunna. Butti-butti iya napassué passalenna Yésus makkumani nattamakinna akkalengngé makkedaé Yésus ritu Arung Pappassalama'é, angkanna sining tau Yahudié iya monroé ri Damsyik dé'na naulléni mabbanta. Labe'nana siyagangngaré wettu ittana masséddini sining tau Yahudié untu' mpunoi Saulus. Iyakiya naissengngi rancanana mennang. Esso wenniwi mennang mattajeng ri pintu gerbanna kotaé untu' mpunoi. Iyakiya riséuwaé wenni, ana'-ana' gurunna Saulus malai Saulus, nainappa napanonno ri laleng séddié baka lalo ri témbo'na kotaé. Laoni Saulus ri Yérusalém, nakkuwanaro makkuraga masséddi sibawa sining tau maccowériyéngngi Yésus. Iyakiya métaui mennang ri Saulus, saba' dé' mennang namateppe' makkedaé tonget-tongenni mancaji maccowériwi Yésus. Nainappa laoni Barnabas ri Saulus, nainappa natiwi ri rasul-rasul-é. Nacuritani Barnabas lao ri mennang passalenna pékkugi Saulus mitai Puwangngé ri tengnga laleng sibawa pékkugi Puwangngé mabbicara lao ri aléna. Nappaissengeng towi Barnabas passalenna pékkugi baraninna Saulus mappagguru ri Damsyik sibawa asenna Yésus. Rimakkuwannanaro monroni Saulus sibawa mennang, sibawa barani makkatobba ri sininna Yérusalém sibawa asenna Puwangngé. Mabbicarai sibawa maddebba towi sibawa sining tau Yahudié iya mabbasa Yunanié, iyakiya makkuragai mennang untu' mpunoi. Wettunna sining tau mateppe' laingngé naisseng gau'éro, natiwini mennang Saulus ri Kaisaréa, nainappa nakiring lao ri Tarsus. Na jema'é ri sininna Yudéa, Galiléa, sibawa Samaria mancaji tennanni. Nasibawang tau lao ri Puwangngé sibawa ribantu ri Rohna Allataala iyaro jema-jema'é tattamba mawatanni sibawa maéga. Laoni Pétrus kégi-kégi mitai jema-jema'é. Riséuwaé esso laoni mitai umma'na Puwangnge iya monroé ri Lida. Siruntu'ni kuwaro séddi tau worowané iya riyasengngé Enéas, iya péso'é sibawa dé'na naoto'-oto'na polé ri onrong atinronna aruwa taung ittana. Nakkeda Pétrus lao ri Enéas, “Enéas, Yésus Kristus pajjappako. Oto'no namupaccingiwi onrong atinrommu.” Iyatoro wettué naoto' Enéas. Sininna pabbanuwaé ri Lida sibawa Saron naitai Enéas, namateppe' manenna mennang lao ri Puwangngé. Ri Yopé engka séddi tau makkunrai riyaseng Tabita. Séddiwi tau mateppe' ri Yésus. (Asenna ri laleng basa Yunani iyanaritu Dorkas, bettuwanna jonga.) Tuli napogau'i gau'-gau' makessingngé sibawa natulungngi sining tau kasiyasié. Iyaro wettué malasai namaté. Puranana ricemmé ujuna, ripalénne'ni ri bili'na ri yasé. Yopé dé' namabéla polé ri Lida. Jaji wettunna sining tau maccowériyéngngi Yésus ri Yopé naéngkalinga Pétrus engka ri Lida, suroni mennang duwa tau lao ri Pétrus sibawa pasengngéwé, “Apperi-perino lao mai.” Natteruna moto Pétrus naccowériwi mennang. Lettu'nana kuwaro, ritiwini ménré ri bili ri yasé. Sininna jandaé kuwaro katulungngi Pétrus naterito sibawa mappaitangngi sining waju sibawa sining jumba iya rijairengngéngngi ri Dorkas wettunna tuwo mupa. Nasuroni Pétrus massu maneng mennang, nainappa makkaluttu massempajang. Purairo mangobbini ri ujuna Dorkas nakkeda, “Tabita, oto'no!” Natimpa'ni matanna Dorkas, na wettunna naita Pétrus, tudanni. Nainappa Pétrus makkatenningngi limanna sibawa natulunna tettong. Nainappa naobbi Pétrus sining tau mateppe'é kuwaro silaong sining iyaro jandaé, nainappa nabbéréyang Dorkas iya tuwoénnaro lao ri mennang. Karéba passalenna kajajiyangngéro mallebbanni ri sininna Yopé, angkanna maéga tau mateppe' lao ri Yésus selaku Arung Pappassalama'na mennang. Monroni Pétrus kuwaro siyagangngaré essosi ri bolana séddié pappecco bingkulang iya riyasengngé Simon. Ri Kaisaréa engka séddi worowané riyaseng Kornélius. Séddiwi kapiténg “Pasukang Italia”. Séddiwi tau métau ri Allataala sibawa sininna kaluwargana massompai ri Allataala. Maléwe'i natulung sining tau Yahudié iya kasiyasié, sibawa tuli massempajangngi lao ri Allataala. Riséuwaé esso, kira-kira tetté tellu arawéngngé naitani sibawa manessa ri laleng séuwaé pakkitang, séddi malaéka'na Allataala polé sibawa mobbii, “Kornélius!” Naitani Kornélius iyaro malaéka'é sibawa métauna nainappa makkeda, “Engka aga Puwang?” Nappébali iyaro malaéka'é, “Sempajammu sibawa asémpoatimmu natarimani Allataala sibawa naéngngeranna Allataala. Suroni tauwé makkekkuwangngé lao ri Yopé mobbii Simon iya aseng sukkuna iyana ritu Simon Pétrus. Maddibolai ri bolana séddié pappecco bingkulang riyasengngé Simon, iya monroé ri wiring tasi'é.” Meddé'nana iyaro malaéka' mabbicaraé sibawa Kornélius, naobbini Kornélius duwa tau pattumani bolana sibawa séddi anggota tentara pengawalna iya métaué ri Puwangngé. Nacuritani Kornélius lao ri mennang aga pura kajajiyang, nainappa nasuro lao ri Yopé. Pappa bajanana, ri wettu engkana mupa ri laleng allalengengngé sibawa mawé'nana lettu ri Yopé. Ménré'ni Pétrus ri pabbingeng bolaé untu' massempajang. Namalupu senna'na sibawa macinna manré. Ri wettu ripassadiyana nanré, lolongenni séddi pakkitang. Naitai langié tattimpa' naengka pada-pada kaing iya mallebba'é riloro' ri tanaé, taggattung ri iya eppa sunna'. Ri lalenna engka sininna rupanna olokolo eppaé ajéna, sininna olokolo makkalolo'é sibawa manu'-manu' liyaé. Nainappa engka sadda makkeda ri aléna, “Pétrus, oto'no! Géréi namuwanréi!” Nappébali Pétrus, “Dé' Puwang! Dé'pa naengka uwanré aga-aga iya harangngé iyaré'ga najisi'é.” Iyakiya iyaro saddaé makkedai ri aléna, “Aga pura ripattentu hallala' ri Allataala, aja' muwangga'i iyaro harang.” Iyaro pakkitangngé makkolingngi gangka wékkatellu, nainappa iyaro kaingngé tarakka ménré ri surugaé. Pusani akkalenna Pétrus pikkiri'i aga bettuwanna iyaro pakkitangngé. Ri wettu mappikkiri'-pikkiri'na mupa Pétrus, sining tau iya nasuroé Kornélius nalolongenni bolana Simon sibawa engkani mennang ri yolona sumpangngé. Nanaobbini tauwé sibawa makkutana, “Engkaga kuwaé topolé mappéruma, iya riyasengngé Simon Pétrus?” Iyaro wettué matteru mupi Pétrus makkuraga missengngi bettuwanna iyaro pakkitangngé, makkedani Rohna Allataala ri aléna, “Eh Pétrus, engka tellu tau sappako. Apperi-perino nonno ri yawa sibawa aja' mubata-bata maccowériwi mennang, saba' Iyya ritu suroi mennang.” Nanonnona Pétrus ri yawa sibawa makkeda risining tauwéro, “Iyya'na iya musappaé saudara-saudara. Untu' aga mupolé saudara-saudara?” Nappébali mennang, “Kapiténg Kornélius suroki lao mai. Séddiwi tau makessing sibawa métau ri Allataala, enrengngé ripakalebbi senna' ri sininna tau Yahudié. Engka séddi malaéka'na Allataala suroi méllauki Puwang lao ri bolana nasaba, selaku pappébalinna sempajanna, risuroi méngkalingai aga tapowada matu Puwang ri aléna.” Nariyobbina mennang ri Pétrus muttama' untu' mappéruma kuwaro. Pappa bajanana moto'ni Pétrus nalao silaong mennang. Engkato siyagangngaré tau mateppe' polé ri Yopé maccowéto. Pappa bajana lettu'ni mennang ri Kaisaréa. Ritajenni mennang kuwaro ri Kornélius sibawa sumpulolona enrengngé sining sellaona maréppé'é iya puraé naobbi. Lettu'nana Pétrus, laoni Kornélius duppaiwi sibawa suju' ri yolona. Iyakiya ritulungngi ri Pétrus tettong, nainappa makkeda, “Oto'no! Iyya tolino muto.” Ri wettu mabbicarana mupa sibawa Kornélius, muttama'ni Pétrus ri lalempola. Naitani kuwaro maéga tau maddeppungenna. Nakkeda lao ri mennang, “Alétana saudara-saudara missengngi makkedaé riyattéyang tau Yahudié ri agamana lokkaiwi iyaré'ga sisumpung sining tau polé ri bangsa laingngé. Iyakiya Allataala pura mappaitangngi ri iyya makkedaé dé' nawedding uwangga najisi' iyaré'ga harang muwi niga-niga. Iyanaro saba'na wettunna Bapa' méllauwi kuwammengngi upolé, dé' ukabaratang. Jaji makkekkuwangngé macinnaka missengngi magi Bapa' taéllauka polé.” Nappébali Kornélius, “Tellungngesso labe'é, kira-kira wettu pada-padaéwé, massempajakka ri bolaku ri tetté tellu arawéngngé. Tappa engka séddi tau worowané tettong ri yoloku. Pakéyanna iyaro tauwé lala'-lala'. Makkedai, ‘Kornélius! Natarimani Allataala sempajammu sibawa naéngngeranni asémpoatimmu. Jaji suroni tauwé lao ri Yopé mobbii tau riyasengngé Simon Pétrus. Mappérumai ri bolana séddié pappecco bingkulang riyasengngé Simon; iyaro bolaé ri wiring tasi'é.’ Iyanaro saba'na umasitta suroi tauwé lao mobbiki Puwang. Namakessing ati tongekki Puwang, natalao kumaiyé. Makkekkuwangngé maddeppungekki kuwaé ri yolona Allataala untu' méngkalingai sininna iya nassurowangngé Allataala ri Puwang untu' mupowadakki.” Nakkeda Pétrus, “Upahang tonget-tongenni makkekkuwangngé makkedaé Allataala dé' nappasilaingeng gaukengngi sininna tauwé. Tau iya métaué ri Allataala sibawa pogau'éngngi tongengngé, iyaro tauwé ritarimai ri Allataala, dé' napaduliwi bangsa agai. Naissenni saudara-saudara lise'na karéba iya napalettu'é Allataala lao ri bangsa Israélié. Iyaro karébaé iyanaritu passalenna Karéba Madécéngngé lao-laona adaméngengngé naolai Yésus Kristus, iyanaritu Puwanna sininna tauwé. Muwissenni aga pura kajajiyang ri sininna Yudéa, iyanaritu mappammulai ri Galiléa puranana Yohanés nassurowang acemméngngé. Muwissenni makkedaé Allataala pura piléi Yésus tau Nazarét-éro sibawa mpéréngngi Rohna Allataala nasibawang akuwasang. Muwisseng toni makkedaé iyaro Yésus laowi kégi-kégi untu' pogau' décéng; napajjappa manengngi tau nakuwasaiyé Ibillisi', saba' Allataala sibawangngi. Idi'naé sining tau iya puraé mitai sininna napogau'é ri wanuwanna tau Yahudié sibawa Yérusalém. Namuni makkuwaro risallii sibawa riyunoi ri mennang. Iyakiya ri esso matellué, Allataala patuwoi paimeng Aléna polé ri amaténgngé sibawa mappaitangngi Aléna lao ri rupa tauwé; dé' nalao risininna tauwé, sangadinna banna lao ri idi bawang iya puraé napilé Allataala lebbi riyolo untu' mancaji sabbi-sabbin-Na: Manré ménukki sibawa Aléna tuwonana paimeng polé ri amaténgngé. Nasuroki mabbirittangngi iyaro Karéba Madécéngngé lao risining tauwé sibawa mabbéré asabbiyang makkedaé Aléna ritu riyakka ri Allataala mancaji Hakinna sining tau iya tuwoé sibawa sining tau iya matéénna. Sininna nabi-nabié mabbicarai passalen-Na. Makkedai mennang makkedaé sininna tau mateppe'é ri Yésus, riyaddampengengngi matu dosana sibawa akuwasang polé ri Yésus.” Ri wettu mabbicarana mupa Pétrus, turunni Rohna Allataala sibawa makuwasaiwi sininna tau iya méngkalingaéngngi karébaéro. Sining tau Yahudi iya mateppe'énna ri Yésus sibawa iya maccowériyéngngi Pétrus polé ri Yopé, hérang manenni mitai Allataala mabbéréyang towi Roh-Na lao risining tau bangsa laingngé tenniyaé Yahudi. Saba' naéngkalingai sining tauwéro mabbicara ri laleng maddupa-rupang basa sibawa poji-pojiwi arajanna Allataala. Nakkeda Pétrus, “Cobasai mitai, sining tauwéwé lolongenni Rohna Allataala pada-pada idi. Jaji weddigga tauwé lawa-lawaiwi mennang untu' ricemmé sibawa uwai?” Nasuroni Pétrus mennang ricemmé ri laleng asenna Yésus Kristus. Purairo naéllauni mennang kuwammengngi naonro Pétrus silaong mennang siyagangngaré esso ittana. Naéngkalingani sining rasul-é sibawa sining tau mateppe'é ri sininna Yudéa makkedaé muwi sining tau iya dé'é naggama Yahudi natarimani ada-adanna Allataala. Nainappa wettunna Pétrus lao ri Yérusalém, sining tau Yahudi iya mateppe'énnaro, nacellani Pétrus. Makkedai mennang, “Magi mulao ri bolana sining tau iya dé'éppa naricemmé? Mala manré tokko sisama mennang!” Rimakkuwannanaro napakatajanni Pétrus lao ri iya maneng mennang iya puraé kajajiyang, mappammulai pammulanna. Makkedai Pétrus, “Mattengngakka massempajang ri kota Yopé, nauwita séuwa pakkitang. Uwitai engka pada-pada silampa kaing iya mallebba'é ripaturung polé ri langié, taggattung ri iya eppa sunna', nainappa léppang ri seddéku. Wettunna upénessai ri lalenna, uwitai olokolo makkéajé eppaé, olokolo liyaé, olokolo makkalolo'é sibawa manu'-manu' liyaé. Nainappa uwéngkalinga séuwa sadda makkeda lao ri iyya, ‘Oto'no Pétrus! Géréi iyaro namuwanréi!’ Iyakiya mappébalika, ‘Dé' Puwang! Dé'pa naengka uwanré nanré iya harangngé sibawa najisi'é.’ Iyakiya iyaro saddaé makkedai paimeng polé ri langié, ‘Barang iya puraé napattentu Allataala hallala', aja' naripowada harang.’ Iyaro gau'é uwitai gangka wékkatellu, napaccappurenna tarakka manenni lisu ri surugaé. Nasitujuwang toni iyaro wettué iya tellu tau polé ri Kaisaréa, iya risuroé lao ri iyya, lettu ri bola onrokku mappéruma. Nainappa nasurona Rohna Allataala lao silaong mennang sibawa dé'na ubata-bata. Iya enneng saudaraéwé maccowé toni sibawakka lao ri Kaisaréa, namuttama manenni ri lalempolana Kornélius. Nainappa nacuritakki Kornélius pékkugi mitai séddi malaéka' tettong ri bolana sibawa makkeda, ‘Suroi tauwé lao ri Yopé mobbii séddi tau worowané riyasengngé Simon Pétrus. Napalettukekko matu karéba iya passalama'ékko matti sibawa kaluwargamu.’ Na wettukku mappammula mabbicara makkuwaro,” makkuwaniro Pétrus patterui curitana, “Poléni Rohna Allataala ri yasé'na mennang pada-pada iya kajajiyangngé ri idi riyolo ri pammulanna. Nauwéngngeranni, engka naengka nakkeda Puwangngé, ‘Yohanés maccemméi sibawa uwai, iyakiya iko ricemméko sibawa Rohna Allataala.’ Jaji manessani nabbéréyang towi Allataala lao risining tau iya dé'é naggama Yahudiro, pabbéré iya pada-padaé nawéréngngékki ri wettutta mateppe' ri Puwang Yésus Kristus. Rimakkuwannanaro, pékkugi weddikka mattéyangngi Allataala!” Naéngkalinganaro, dé'na nabbantana mennang. Napojini Allataala. Makkedani mennang, “Rékko makkuwaitu, muwi sining tau tenniyaé Yahudi riwérétto kasempatang ri Allataala untu' toba' polé ri dosa-dosana sibawa nennun-nennungngi atuwong tongengngé!” Puranana riyuno Stéfanus, sining tau mateppe'é ri Yésus mappammulani rilellung, angkanna tassiya-siyani lao kégi-kégi. Engka lari narapi Fénésia, na engkato lettu ri Siprus sibawa Antiokhia. Nappallebbangenni mennang karéba polé ri Allataala banna lao risining tau Yahudié bawang. Iyakiya polé ri yelle'na sining tau mateppe'éro, iya assalennaé polé ri Siprus sibawa Kiréné, engkato lao ri Antiokhia sibawa mabbirittangngi Karéba Madécéngngé passalenna Yésusro lao risining tau iya dé'étto naggama Yahudi. Akuwasanna Puwangngé engkai ri mennang angkanna maéga tau mateppe' sibawa mabbéréyangngi aléna lao ri Puwangngé. Curita-curita passalenna sining kajajiyangngéwé lettu toni ri jema'é ri Yérusalém. Nakirinni mennang Barnabas lao ri Antiokhia. Na wettunna Barnabas lettu kuwaro, sibawa naitana pékkugi Allataala pura barakkakiwi sining tauwéro, marennu senna'ni. Nanaéllauni kuwammengngi nattonget-tongeng matinulu lao ri Puwangngé sibawa sukku atinna. Iyaé Barnabas tau makessing atiwi sibawa rikuwasainna ri Rohna Allataala enrengngé mateppe' senna' ri Puwangngé angkanna maéga tau maccowériwi Puwangngé. Nainappa Barnabas lao ri Tarsus sappai Saulus. Siruntu'nana Saulus, natiwini Saulus ri Antiokhia na sitaung bujuru monroni mennang ri jema'é kuwaro nanapagguru towi maéga tau. Ri Antiokhiana ritu iyaro sining tau mateppe'é ri Yésus bunge'-bunge'na riteppu tau Kristéng. Iyaro wettué engka siyagangngaré nabi polé ri Yérusalém lao ri Antiokhia. Ri yelle'na engka séddi riyaseng Agabus. Nasaba doronganna Rohna Allataala nabotoni makkedaé ri sininna linoé maéloi kajajiyang akkadéreng iya maseroé. (Na iyaro gau'é mémeng kajajiyangngi wettunna Kaisar Klaudius mapparénta.) Nasininna iyaro tau maccowériyéngngi Yésus masséddini untu' kiring sumbangeng lao ri saudara-saudara iya monroé ri Yudéa; tungke'-tungke' kiring situru amampungenna. Iyaro assamaturusengngé napogau' tongenni, nainappa Barnabas sibawa Saulus rikiring untu' mantara'i iyaro sumbangengngé lao risining pamimpinna jema'é. Kira-kira iyaro wettué mappammulani Arung Hérodés tenre'i anggota-anggota jema'é. Nasaba paréntana, Yakobus silessurenna Yohanés riyunoi sibawa peddang. Wettunna naita Hérodés makkedaé iyaro pangkaukenna napésennangiwi atinna sining tau Yahudié, napogau'si pada-padaéro, nasurosi tauwé tikkeng towi Pétrus. Iyaro gau'é kajajiyangngi ri wettu Esso Maraja Roti Dé'é Raginna. Ritikkennana, riputtama'ni Pétrus ri laleng tarungkué. Eppa regu tentara riwéréng tugas untu' jagaiwi Pétrus kuwaro – tungke'-tungke' regu eppa tentara. Purapi Ramé-ramé Paskaé, nainappa Hérodés maélo madélékiwi Pétrus ri yolona tau maégaé. Jaji ritahanni Pétrus ri tarungkué, iyakiya anggota-anggota jema'é matteru-terui massempajangengngi Pétrus sibawa tonget-tongeng lao ri Puwangngé. Ri wenni dé'napa namaélo Hérodés pangoloi Pétrus ri yolona tau maégaé, matinroi Pétrus sibawa tassiyo duwa balenggu ri yelle'na duwa tentara pengawal. Ri sumpanna tarungkué, pengawal-pengawal laingngé najagai towi tarungkué. Tennasenna-sennana malaéka'na Puwangngé tettong kuwaro sibawa séuwa cahaya mattappa ri laleng bili'na iyaro tarungkué. Iyaro malaéka'é nagottangngi Pétrus angkanna moto. Nainappa makkeda iyaro malaéka'é, “Eh, asitta'ko moto!” Iyatoro wettué naddenne ranté bessié polé ri limanna Pétrus. Purairo, makkedani iyaro malaéka'é, “Pakéni pakéyammu sibawa siyoni sapatummu.” Napakéni Pétrus pakéyanna sibawa nasiyoni sapatunna. Nainappasi makkeda iyaro malaéka'é, “Pakéi jumbamu namuwaccowérika.” Naccowérini Pétrus iyaro malaéka'é massu polé ri tarungkué. Iyakiya dé' namaingekiwi Pétrus makkedaé aga iyaro napogau'é malaéka'é tonget-tongengngi kajajiyang. Nasemmi Pétrus iyaro séddi pakkitang. Wettunna mennang nalaloi onrong jagang mammulangngé sibawa maduwaé, lettu'ni mennang ri tange' bessié, iya mattujué ri kotaé. Iyaro tange'é natimpa' aléna, nainappa mennang massu lalo riséuwaé lorong. Tennasenna-sennana iyaro malaéka'é nasalaiwi Pétrus. Purairo nappai Pétrus mainge' aga pura kajajiyang ri aléna, nainappa makkeda, “Uwajeppuini makkekkuwangngé makkedaé tonget-tongengngi Puwangngé kiringngi malaéka'-Na untu' paleppe'ka polé ri akuwasanna Hérodés sibawa polé risininna aga iya maéloé nagaukekka bangsa Yahudié.” Namaingekinnana keadaangngéro, laoni Pétrus ri bolana Maria, indo'na Yohanés iya riyasengngétto Markus. Kuwaro maéga tau maddeppungeng sibawa massempajang. Nagetto'ni Pétrus tange'é ri saliweng, na séddi pattumani makkunrai riyaseng Rodé, polé untu' timpa'i tange'é. Matterui naisseng saddanna Pétrus. Nasaba senna, mapperi-perini muttama' paimeng nadé' natimpa'i tange'é, nanapowadangngi sining tauwé kuwaro makkedaé engkai Pétrus ri saliweng. Nakkeda mennang, “Jangekko!” Iyakiya mattedde'i Rodé makkedaé iyaro tonget-tongengngi Pétrus. Nakkeda mennang, “Malaéka'na iyaro!” Nanagetto'ni Pétrus tange'é matteru-teru. Na wettunna mennang natimpa' tange'é, sibawa naitana Pétrus, hérang senna'ni mennang. Mabbéréni Pétrus tanra-tanrang sibawa limanna kuwammengngi natennang mennang, nainappa nacurita pékkugi Puwangngé pura tiwii massu polé ri tarungkué. Nainappa makkeda, “Powadangngi iyaé lao ri Yakobus sibawa saudara-saudara laingngétto.” Purairo nasalaini Pétrus iyaro onrongngé nalao ri onrong laingngé. Pappa bajanana éléé marukkani tentara-tentara pengawal-é. Bengnga senna'ni mennang passalenna aga pura kajajiyang sibawa Pétrus. Nainappa Hérodés nasuroni tauwé sappai Pétrus, iyakiya dé' naulléi lolongengngi. Jaji napparéntanni kuwammengngi iyaro tentara-tentara pengawal-é ritanaiwi nainappa riyuno. Purairo nasalaini Hérodés ri Yudéa naonro siyagangngaré ittana ri Kaisaréa. Macai senna'ni Hérodés lao risining tau Tirus-é sibawa Sidongngé. Rimakkuwannanaro silaonni mennang lao mangolo ri aléna. Mula-mulanna napalécéi Blastus, iya kapalaiyéngngi saorajana Hérodés, angkanna maccowéni mennang. Nainappa lao mangolo ri Hérodés, nanaéllauwi sidamé, saba' iyaro wanuwanna mennang taggattungngi ri anré polé ri wanuwanna Hérodés. Riséuwaé esso iya pura ripattentué, napakéni Hérodés pakéyang arajanna nainappa tudang ri kadéra arajanna nappammula mappidatong ri yolona ra'ya'é. Gora-gorani iyaro ra'ya'é iya méngkalingaéngngi, “Iyaé sadda déwata, tenniya sadda tolino!” Iyatoro wettué narileppa Hérodés ri malaéka'na Puwangngé, saba' dé' napakarajai Allataala. Nanréni lati Hérodés nainappa maté. Napédé' mallebbanni ada-adanna Allataala sibawa pédé' makkasse'na. Puranana jama-jamanna Barnabas sibawa Saulus, lisuni mennang polé ri Yérusalém sibawa tiwii Yohanés Markus silaong mennang. Ri laleng jema'é ri Antiokhia engka nabi-nabi sibawa guru-guru, iyanaritu Barnabas, Siméon iya ritellangngé Si Bolong, Lukius polé ri Kiréné, Menahém iya ripawekke'é silaong Arung Hérodés, sibawa Saulus. Wettunna mennang massompa lao ri Puwangngé sibawa mappuwasa, makkedani Rohna Allataala lao ri mennang, “Piléi Barnabas sibawa Saulus untu' Iyya, kuwammengngi napogau'i mennang jamang iya puraé Upattentungengngi mennang.” Puranana mappuwasa sibawa massempajang napalénne'ni mennang limanna ri yasé'na Barnabas sibawa Saulus nainappa nakiring sipadduwa. Nasaba rikiringngi ri Rohna Allataala, joppani Barnabas sibawa Saulus lao ri Seléukia. Polé kuwaro sompe'ni mennang lao ri pulo Siprus. Wettunna lettu ri Salamis, nabbirittanni mennang ada-adanna Allataala risining bola assompang Yahudié. Yohanés Markus bantui mennang ri laleng allalengenna. Najalajja'ni mennang sininna puloéro lettu ri Pafos. Siruntu'ni mennang kuwaro séddi tau Yahudi, asenna Bar Yésus. Séddiwi passéhéré' iya mangakué nabi. Sergius Paulus, gubernurna puloéro iyanaritu sellao maréppé'na iyaro passéhéré'é. Iyaro gubernur-é séddiwi tau macca namapanré. Purai naobbi Barnabas sibawa Saulus saba' macinnai méngkalingai ada-adanna Allataala. Iyakiya riyéwai Barnabas sibawa Saulus ri Elimas passéhéré'éro, nasaba Elimas (iyaro asenna ri laleng basa Yunani) makkuragai kuwammengngi iyaro gubernur-é aja' namateppe' lao ri Yésus. Iyakiya Saulus – iya riyasengngétto Paulus – rikuwasaiwi ri Rohna Allataala, angkanna naita iyaro passéhéré'é, nainappa makkeda, “Eh pabbelléng senna', ana' madoraka! Iko balinna sininna makessingngé. Magi namutéya mappésau solangiwi rencanana Allataala untu' passalama'i rupa tauwé? Itai makkekkuwangngé, Puwangngé maélo hukkukko! Butako matu, angkanna dé' mulléi mitai tappa essoé siyagangngaré ittana.” Iyatoro wettué napéneddingiwi Elimas engka saléwu iya mapettangngé tongkoi matanna, angkanna makkapése'ni joppa sappa tau untu' rénréngngi. Wettunna naita iyaro gubernur-é aga pura kajajiyang, mateppe'ni lao ri Yésus; saba' bengnga senna'ni lao ri pappagguruwanna passalenna Puwangngé. Polé ri Pafos, Paulus sibawa sining sellaona sompe'ni lao ri Pérga ri Pamfilia. Kuwaniro Yohanés Markus salaiwi mennang, nainappa lisu ri Yérusalém. Polé ri Pérga napatteruni mennang joppana lao ri Antiokhia ri Pisidia, nainappa ri Esso Saba'é laoni mennang tudang ti laleng bola assompangngé. Puranana nabaca Kitta'na Musa sibawa Kitta'na Nabi-nabié, iyaro sining pamimpinna bola assompangngé nasuroni tauwé makkutana lao ri Paulus sibawa sellao-sellaona, “Saudara-saudara, rékko engka pangajana saudara untu' sining tauwéwé, tapalettu'ni iyaro pangajaé.” Tettonni Paulus, nainappa mabbéré tanra-tanrang sibawa limanna, nainappa makkeda, “Saudara-saudara bangsa Israélié sibawa sininna saudara-saudara laingngé kuwaé iya matinulué ri Allataala! Cobasai méngkalingaka: Allataalana bangsa Israélié pura piléi néné-nénéta, sibawa napancajinna bangsaéwé bangsa battowa wettunna mennang monro ri Maséré' selaku topolé-polé. Nainappa nasibawang akuwasanna Allataala iya battowaé tiwii mennang massu polé ri Maséré'. Sabbara'i lao ri ampé-ampéna mennang ri padang kessi'é patappulo taung ittana. Pitu bangsa Napaccappu ri wanuwa Kanaan untu' bagé-bagéi iyaro wanuwaé lao ri bangsa Israélié kuwammengngi iyaro wanuwaé mancajiwi appunnangenna. Iya manennaro ittana eppadatu limappulo taung. Puranana nabagé iyaro wanuwa Kanaan nabbéréyanni Allataala lao ri mennang haking-hakingngé. Haking paccappurengngé iyanaritu Nabi Samuél. Nainappa méllau mennang séddi arung. Nabbéréyanni Allataala lao ri mennang Saul ana' Kish polé ri suku bangsa Bényamin untu' arunna mennang patappulo taung. Puranana napaésa' Allataala polé ri tudangenna, nakkani Allataala Daud mancaji arunna mennang. Na iyanaé naseng Allataala passalenna Daud, ‘Ulolongenni Daud ana'na Isairo séddi tau iya sennangiyéngngi atik-Ku. Iyanaé tau pogau'éngngi matu Uwéloriyé.’ Polé ri wija-wijanna Daud, Allataala pura passadiyangengngi bangsa Israélié séddi Arung Pappassalama'é, pada-pada pura najjanciyangngé. Na Yésus ritu Arung Pappassalama'éro. Riwettu dé'napa napammulai Yésus jamanna, purani nappallebbangeng Yohanés lao risining tau Israélié kuwammengngi natoba mennang polé ri dosana sibawa ricemmé. Namacawé'nana maccappa jama-jamanna, makkedani Yohanés lao risining tauwé, ‘Niga iyya'é manuru' pallolongemmu? Tenniyaka Tau iya mutajengngé. Engngerangngi, iyaro Tauwé poléi matu ri munrikku; namuwi untu' ludungngi sapatun-Na dé'to usitinaja.’ Saudara-saudara wijanna Abraham, sibawa sininna Saudara-saudara laingngé kuwaé iya matinulué ri Allataala! Allataala pura kiringngi lao ri idi karéba asalamakengngéro; saba' sining tau iya monroé ri Yérusalém sibawa sining pamimpinna dé' najeppuiwi makkedaé Aléna ritu pappassalama'éro. Dé' napahangngi mennang pappagguruwanna nabi-nabié iya ribacaé tungke' Esso Saba'. Angkanna mennang nahukkung Yésus. Iyakiya mala nasaba napogau'i mennang makkuwaéro nassabariwi makkedaé aga naboto iyaro nabi-nabié kajajiyangngi. Namuni dé'gaga mennang wedding nalolongeng ri Aléna iya sitinajaé rihukkung sibawa pahukkungeng maté, iyakiya naéllauwi mennang ri Pilatus kuwammengngi nariyuno. Na puranana napogau' maneng mennang iya tarokié ri laleng Kitta'é passalenna aléna, napanonnoni mennang uju-Na polé ri aju sallié, nainappa napalésso ri laleng tampungngé. Iyakiya Allataala patuwoi paimeng polé ri amaténgngé. Nainappa siyagangngaré esso ittana poléi mappaitangngi Aléna lao risining tau iya naéwaé silaong polé ri Galiléa lao ri Yérusalém. Iyanaro mennang makkekkuwangngé mancaji sabbi-sabbi untu' Aléna lao ri bangsa Israélié. Jaji, makkekkuwangngé ripalettu'ni iyaro Karéba Madécéngé lao ri Saudara-saudara: Aga pura najjanciyang Allataala lao ri néné-nénéta, iyaro purani Napogau' ri aléta ri laleng napatuwona Yésus paimeng polé ri amaténgngé. Saba' ri laleng Mazmur maduwaé engka taroki, ‘Ikona Ana'-Ku, iyaé essoé Umancaji Ambo'-Mu.’ Allataala pura patuwoi paimeng polé ri amaténgngé, makkekkuwangngé dé'na napéneddingiwi matu amaténgngé ri laleng tampungngé. Passalenna iyaro gau'é makkedai Allataala; ‘Maélo-Ka mpérék-Ko janci mapaccingngé iya mattentué rirupai matu, iya pura Uwajjanciyangngé lao ri Daud.’ Makkuwatoro ri laleng aya' laingngé ripowadai, ‘Dé' Muleppessangngi matu Atam-Mu iyaro matinulué makebbong ri laleng tampungngé.’ Maténi Daud sibawa purana tona ritampung silaong néné-nénéna, puranana napogau' aga iya nassurowangngé Allataala ripogau'. Ancuru'ni cappu maneng ujuna Daud. Iyakiya Yésus, iya napatuwoé paimeng Allataala polé ri amaténgngé, iyaro Yésus dé' nacappu ancuru. Iyanaro saba'na naharusu'ko pénessaiwi madécéd-décéng, aja' narapii kajajiyang ri iko aga iya napowadaé nabi-nabié, ‘Pénessaiwi madécéd-décéng, éh iko sining tau iya pojiyéngngi maccella-cella! Hérakko matu, nainappa maté! Saba' iya wettuéwé engka séuwa Upogau' iya dé'é muwatepperiwi matu, namuni engka tau pakatajangekko.’ ” Wettunna Paulus sibawa Barnabas salaiwi bola assompangngéro, sining tauwé ri bola assompangngéro méllauwi mennang lisusi ri Esso Saba' paimenna, untu' pakatajangngi matteru gau'-gau'éro. Massunana sining tauwé polé ri bola assompangngéro, riyaccowérini Paulus sibawa Barnabas ri maéga tau Yahudi sibawa tau bangsa laing iya muttama'é agama Yahudi. Naripangajarina mennang ri rasul-rasul-é kuwammengngi natteru mennang sanré ri pammaséna Allataala. Ri Esso Saba' paimennana, mawé' engka maneng sininna tauwé ri kotaéro polé méngkalingai ada-adanna Puwangngé. Wettunna sining tau Yahudié naita tau maégaéro, mangémpuru senna'ni mennang. Nacellani mennang Paulus sibawa naéwana sininna iya napowadaé. Iyakiya pédé' lebbi baraniwi Paulus sibawa Barnabas mabbicara terus terang. Makkedai mennang, “Ada-adanna Allataala mémeng harusu'i ripalettu' lao ri iko riyolo. Iyakiya nasaba dé' mumaélo tarimai, iko muto pura pattentui makkedaé dé' musitinaja tarima atuwong tongengngé sibawa mannennungengngé. Namakkekkuwangngé risalaiko natalao ri bangsa laingngé. Saba' iyanaé paréntana Puwangngé lao ri idi; makkedai Puwangngé, ‘Purano Upattentu mancaji séddi tajang lao risining bangsa laing tenniyaé Yahudi, kuwammengngi mumappapolé asalamakeng lao risininna linoé.’ ” Wettunna bangsa-bangsa laing tenniyaé Yahudi naéngkalinga iyaro, masennang senna'ni mennang, napoji-pojiwi ada-adanna Puwangngé. Nasining tau iya puraé napattentu Allataala untu' lolongeng atuwong mannennungengngé, iyaro sining tauwé mateppe'i. Mallebbang toni ada-adanna Puwangngé lao ri kégi-kégi risininna daéraéro. Iyakiya sining tomarajana kotaéro sibawa sining makkunrainna iya polé ri golongang sining tomatanré iya métaué ri Allataala, ripakiri-kiriwi risining tau Yahudié. Papoléi mennang assimusureng lao ri Paulus sibawa Barnabas, sibawa narukkana mennang iya duwa polé ri daéraéro. Nanakkeppikenni iyaro rasul-rasul-é awué ri ajéna ri yolona sining tauwéro selaku papparéngngerang, nainappa lao ri Ikonium. Sining tau maccowériyéngngi ri Antiokhia marennu senna'ni sibawa rikuwasai ri Rohna Allataala. Ri Ikonium napéneddingiwi gau' padaé Paulus sibawa Barnabas. Lao towi mennang ri bola assompanna Yahudié sibawa makkumani baténa mabbicara kuwaro angkanna maéga tau Yahudi sibawa tau bangsa laing iya tenniyaé Yahudi mancaji mateppe' lao ri Yésus. Iyakiya sining tau Yahudié dé'é namaélo mateppe', pakiri-kiriwi sining tau bangsa laingngé iya tenniyaé Yahudi, angkanna nassabari sining tauwéro nabenciwi sining tau iya mateppe'é ri Yésus. Rimakkuwannanaro maittai Paulus sibawa Barnabas monro kuwaro. Sibawa baraninna mennang mabbicara passalenna Puwangngé. Napabutti toni Puwangngé makkedaé birittanna mennang passalenna iyaro pammasé-Na tongengngi; Nawéréngngi mennang akuwasang untu' pogau'i sining anu makalallaingngé sibawa gau'-gau' dé'é padanna. Iyakiya pabbanuwana iyaro kotaé siyéwai séddié sibawa laingngé; engka maccowé risining tau Yahudié sibawa engka maccowé ri rasul-rasul-éro. Nainappa sining tau Yahudié sibawa sining pamimpinna silaong sining tau bangsa laingngé iya tenniyaé Yahudi masséddini untu' callai sibawa genrungngi batu iyaro rasul-rasul-é. Iyakiya najeppuiwi iyaro rasul-rasul-é keadaangngéro, namanyingkiri'na lao ri Listra sibawa Dérbé, iyanaritu kota-kota ri Likaonia, sibawa daéra seddéna. Nakkuwanaro mennang mabbirittassi iyaro Karéba Madécéngngé. Ri Listra engka séddi tau worowané iya péso'é simula jaji, angkanna dé' naengka naulléi joppa, nasaba malemma senna'i ajéna. Iyaro tauwé tudangngi kuwaro méngkalingai Paulus mabbicara. Naitai Paulus makkedaé iyaro tauwé mateppe'i narimakkuwannanaro weddingngi ripajjappa. Naitani Paulus nainappa makkeda sibawa sadda battowa, “Tettong lempuno!” Naluppe'na iyaro tauwé tettong nainappa joppa. Wettunna naita tau maégaé aga pura napogau' Paulus, gorani mennang ri laleng basa Likaonia, “Nonnoni déwata-déwataé ri linoé sibawa tubu tolino.” Nasenni mennang Barnabas Zéus, na Paulus nasenni mennang Hérmés, saba' aléna ritu mabbicara. Imanna Déwata Zéus, iya monroé bola assompanna ri yolona kotaé, poléni tiwi sining saping lai sibawa bunga-bunga ri pintu gerbanna kotaé. Maéloi maccowé silaong tau maégaéro makkasuwiyangeng akkarobangeng lao ri rasul-rasul-éro. Wettunna naéngkalinga Barnabas sibawa Paulus aga maélo napogau' sining tauwéro, nasapé'-sapé'ni pakéyanna mennang nalari ri tengnga-tengngana tau maégaéro, nainappa gora, “Eh, magi mupogau'i iyaé? Idi'é tolino mutokki pada-pada Saudara! Engkaki kuwaé untu' mabbirittangngi Karéba Madécéngngé lao ri iko kuwammengngi namusalaiwi gau'-gau' iya dé'é nakkéguna namulao ri Allataala iya tuwoé, iya pancajiyéngngi langié sibawa linoé nenniya tasi'é enrengngé sininna iya engkaé ri lalenna. Ri wettu labe'é naleppessangngi Allataala tuwo bangsa-bangsaé situru élona tungke'-tungke'. Iyakiya dé' Nallupaiwi mpéréngngi butti-butti passalenna Aléna, iyanaritu pogau' décéng. Nawérékko bosi polé ri langié sibawa wassélé tana ri wettunna. Nawérékko anré sibawa napésennangiwi atimmu.” Iyakiya muwi nasibawang iyaro ada-adaé mawatang mutopi iyaro rasul-rasul-é lawa-lawaiwi iyaro sining tauwé makkasuwiyangengngi akkarobangengngé lao ri mennang. Siyagangngaré tau Yahudi iya laowé ri Listra polé ri Antiokhia ri Pisidia sibawa polé ri Ikonium pangaruiwi iyaro tau maégaé angkanna iyaro tau maégaé maccowéni lao ri mennang. Nagenrunni mennang Paulus sibawa batu, nainappa nassarénréngeng massu ri saliweng kota. Nasenni mennang maténi, iyakiya wettunna sining tau mateppe'é kuwaro tettong mattulilingiwi, moto'ni sibawa muttama' paimeng ri kotaé. Pappa bajana joppani lao ri Dérbé silaong Barnabas. Ri Dérbé, Paulus sibawa Barnabas mabbirittangngi iyaro Karéba Madécéngngé sibawa maéga tau mateppe' lao ri Yésus. Purairo lisuni mennang lao ri Listra, nainappa Ikonium, nainappasi Antiokhia ri Pisidia. Ri kota-kotaéro napakkasse'ni mennang atinna sining tau maccowériyéngngi Yésus sibawa napangajarinna iyaro sining tau maccowéé kuwammengngi tette'i maccowé ri Yésus. “Harusu'ki maéga manrasa-rasa riyolo, nainappa weddikki péneddingiwi asennangenna Lino Barunna Allataala,” makkuwaniro iyaro rasul-rasul-é paggurui sining tau maccowériyéngngi Yésus ri kotaéro. Na ri tungke'-tungke' jema', makkai Paulus sibawa Barnabas pamimping-pamimping untu' jema'-jema'éro. Nainappa massempajang sibawa mappuwasa, nabbéréyangngi mennang iyaro sining pamimpingngé lao ri Puwang iya natepperiyéro mennang. Purairo napatteruni joppana Paulus sibawa Barnabas lao ri daéra Pisidia sibawa lettu ri Pamfilia. Napuranana mennang nabbirittang ada-adanna Allataala ri Pérga, laoni mennang ri Atalia. Polé kuwaro sompe'ni mennang lisu ri Antiokhia. Iyanaro kota naonroiyé riyolo mennang riyabbéréyang lao ri pammaséna Allataala, kuwammengngi najamai jama-jamang iya makkekkuwangngé purani mennang napattépu. Wettunna lettu ri Antiokhia, napaddeppungenni mennang sining tau polé ri jema'éro, nainappa nacurita manenni iya puraé napogau' Allataala naolai mennang. Nacurita toni mennang passalenna pékkugi Allataala pura timpa'i lalengngé kuwammengngi sining tau bangsa laingngé iya tenniyaé Yahudi mateppe'i lao ri Yésus. Ri kotaéro Paulus sibawa Barnabas maittai monro silaong sining tau mateppe'é. Siyagangngaré tau polé ri Yudéa lao ri Antiokhia sibawa paggurui sining tau mateppe'é ri Antiokhiaro kuwammengngi rékko dé' mennang narisunna' situru parénta-paréntana Allataala iya nappagguruwangngé Musa, dé' nawedding mennang ripassalama'. Paulus sibawa Barnabas naéwa senna'i pallolongenna sining tauwéro. Angkanna ripattentui kuwammengngi Paulus sibawa Barnabas silaong siyagangngaré tau laing polé ri Antiokhia lao ri Yérusalém untu' bicarai iyaro passalengngé sibawa rasul-rasul-é enrengngé sining pamimpingngé kuwaro. Jema'é ri Antiokhia mantara'i mennang lettu ri saliweng kota, nanajoppa mennang lalo Fénésia sibawa Samaria. Kuwaniro mennang maccurita pékkugi sining tau bangsa laingngé tenniyaé Yahudi mabbéréyangngi aléna lao ri Allataala. Iyaro birittaé napurennu senna'ni sining tau iya mateppe'é kuwaro. Wettunna mennang lettu ri Yérusalém, ritarimani sibawa madécéng ri jema'é, sibawa ri rasul-rasul-é enrengngé sining pamimpingngé. Nainappa mennang maccurita lao risining tauwéro passalenna sininna iya puraé napogau' Allataala naolai mennang. Iyakiya siyagangngaré tau polé ri golongang Farisié iya mateppe'énnaro tettongngi sibawa makkeda, “Sining bangsa laingngé iya mateppe'énnaro harusu'i risunna sibawa riwajibkang maccowériwi parénta-paréntana Allataala iya napalettu'é Musa.” Nainappa iyaro rasul-rasul-é sibawa sining pamimpingngé maddeppungeng untu' bicarai passalengngéro. Maitta senna' mennang sipabbicara. Angkanna Pétrus tettong sibawa makkeda, “Saudara-saudara! Alémuna missengngi makkedaé siyagangngaré wettu labe'é Allataala piléka polé ri yelle'mu untu' mabbirittangngi iyaro Karéba Madécéngngé lao risining tau bangsa laingngé tenniyaé Yahudi, kuwammengngi naéngkalinga towi namateppe'na. Na Allataala iya missengngéngngi atinna tolinoé pura majjellokengngi makkedaé natarimai mennang; najjellokengngi gau'éro sibawa nabbéréyangngi lao ri mennang Rohna Allataala pada-pada iya puraé Nabbéréyang lao ri idi. Allataala dé' napasilaingekki sibawa mennang. Napaccingiwi atinna mennang, nasaba mateppe'ki. Aga saba'na mumaélo méwai Allataala makkekkuwangngé sibawa mpéréngngi séuwa kewajibang matane'é lao risining tau maccowééwé, padahal néné-nénéta sibawa idi dé'to nariyulléi pogau'i? Sibalé'na, mateppe'ki makkedaé ripassalama'ki nasaba paressé babuwana Puwang Yésus; makkuwatoro mennang.” Mammekko manenni tau maddeppungengngé kuwaro. Nainappa naéngkalinga mennang Barnabas sibawa Paulus curitai paimeng sininna anu makalallaingngé sibawa gau'-gau' dé'é padanna iya puraé napogau' Allataala naolai mennang ri yelle'na sining tau bangsa laing tenniyaé Yahudi. Pajanana mennang mabbicara, makkedani Yakobus, “Saudara-saudara! Coba méngkalingai! Silalona Simon napakatajang pékkugi Allataala ri pammulanna mappaitangngi perhatian-Na lao risining bangsa laing tenniyaé Yahudi, akkattana piléi polé ri mennang sining tau laingngé iya maéloé mancaji umma'-Na. Situru iyaro puraé naboto nabi-nabié. Nasaba engka taroki makkuwaéwé, ‘Purairo maélo-Ka polési,’ adanna Puwangngé, ‘Maélo-Ka patettongngi paimeng bolana Daud iya maruttungngénna, sibawa pédécéngiwi aruttungenna, nainappa patettongngi paimeng; kuwammengngi sininna tau iya nasésaéro nasappai Puwangngé, silaong sininna bangsa laingngé iya tenniyaé Yahudi iya puraé Uwobbi mancaji appunnangek-Ku.’ Makkuwaniro ada-adanna Puwangngé, iya puraé mappaddissengengngi gau'éro riyolopa nariyolo.” Nakkeda Yakobus, “Jaji manuru' pallolongekku, dé' tawedding sussaiwi sining tau bangsa laingngé iya tenniyaé Yahudiro iya mabbéréyangngéngngi aléna lao ri Allataala. Iyakiya harusu'ki moki sure' lao ri mennang sibawa pangajariwi kuwammengngi aja' mennang nanré anré najisi'é iya puraé riyakkasuwiyangeng lao ri barahalaé, iyaré'ga manré juku olokolo iya maté riyanrekké'é, iyaré'ga manré dara. Sibawato kuwammengngi napabélaiwi aléna polé risining pangkaukeng malawengngé. Saba' hukkunna Musa riyolopa nariyolo naribacangeng tungke' esso Saba' risining bola assompangngé, sibawa riyabbirittang ri sininna kotaé.” Napettuini rasul-rasul-é sibawa sining pamimpingngé, silaong sininna anggota jema'éro untu' pilé siyagangngaré tau polé ri mennang iya maéloé risuro lao ri Antiokhia silaong Paulus sibawa Barnabas. Napiléni mennang Silas sibawa Yudas iya riyasengngétto Barsabas. Iya duwa tauwéwé iyanaritu sining tomariyolo ri yelle'na sining tau mateppe'é ri Yérusalém. Silaongngi iyaro sining suroé kiring toni mennang sure' iya makkuwaé oninna, “Lao ri sininna saudara-saudara iya assalennaé polé ri bangsa-bangsa laing tenniyaé Yahudi, iya monroé ri Antiokhia, Siria sibawa Kilikia. Selletta idi, rasul-rasul-é sibawa sining pamimpingngé, iyanaritu saudara-saudaramu. Riyéngkalingai engka siyagangngaré polé ri yelle'ta iya laoénna ri iko sibawa makkacau enrengngé pakamaling-malikko sibawa sining pappagguruwanna. Padahal tenniya idi suroi mennang pogau'i iyaro. Iyanaro saba'na napuraki barunding nanasitujui manenni untu' mappilé siyagangngaré tau sibawa suroi mennang lao ri iko. Maéloi lao mennang silaong Saudara Barnabas sibawa Paulus iya riyamaséiyé. Iya duwa tauwéwé iyanaritu sining tau iya puraé mappésonangngi nyawana nasaba Puwatta Yésus Kristus. Jaji, risuroi Yudas sibawa Silas lao ri Saudara-saudara. Aléna ritu mennang palettu'i matu lao ri iko biritta iya tarokié ri laleng sure'éwé. Nasitujuini Rohna Allataala – na idi risitujui toni – kuwammengngi nadé' nariwé rékko kewajibang-kewajibang iya lebbi matane'é naiya kewajibang-kewajibang iya parelluwé bawang: aja' muwanréi nanré puraé riyakkasuwiyangeng lao ri barahalaé; aja' muwanréi juku olokolo iya maté riyanrekké'é, sibawa abélaiwi sining pangkaukeng malawengngé. Narékko mupabélaiwi alému polé risining gau'éro, mupogau'nitu iya madécéngngé. Sikumiro bawang, salama'!” Puranana siyassimangeng, joppani iyaro risuroé lao ri Antiokhia. Naobbini mennang kuwaro sininna anggota jema'é maddeppungeng nainappa napalettu sure'éro. Wettunna iyaro anggota-anggota jema'é nabaca iyaro sure'é, masennang senna'ni mennang ri lise'na iyaro sure'é iya saléworiyéngngi atinna mennang. Yudas sibawa Silas, iya nabiétto, maitta mabbicara sibawa iyaro saudara-saudara iya mateppe'é ri Antiokhia untu' mpéréngngi dorongang sibawa abaraningeng lao ri mennang. Puranana Yudas sibawa Silas monro kuwaro siyagangngaré ittana, iyaro sining tau mateppe'é ri Antiokhia nakirinni mennang lisu sibawa suroi mennang palettu' selleng lao risining tau iya suroéngngi mennang. [ Iyakiya Silas napettuiwi untu' tette' monro ri Antiokhia.] Paulus sibawa Barnabas monro towi siyagangngaré ittana ri Antiokhia. Kuwaniro mennang mappagguru sibawa mabbirittangngi ada-adanna Puwangngé silaong maéga tau laing. Dé' namaitta ri munrinna makkedai Paulus lao ri Barnabas, “Laono mai talisu mitai saudara-saudara iya mateppe'é ri Yésus ri sininna kota puraé ribirittaiyang ada-adanna Puwangngé; kuwammengngi nariita pékkugi keadaanna mennang.” Macinnai Barnabas tiwii Yohanés Markus, iyakiya napérasai Paulus dé' namakessing ritiwi Markus, iya dé'é namaélo majjama silaong mennang sibawa nasalaiwi mennang ri Pamfilia. Nappangéwang ladde'na Paulus sibawa Barnabas angkanna mennang massarang: Barnabas nalani Markus nasompe silaong lao ri Siprus. Paulus napiléi Silas nainappa joppa silaong puranana saudara-saudaraé ri Antiokhia mabbéréyangngi mennang lao ri pammaséna Puwangngé. Nattulilingini mennang Siria sibawa Kilikia; kuwaniro mennang pakkasse'i jema'-jema'é. Napatteruni joppana Paulus lao ri Dérbé, nainappa lao ri Listra. Kuwaro engka séddi tau maccowé ri Yésus asenna Timotius. Indo'na séddiwi tau Yahudi, iya mateppe'énna ri Yésus, iyakiya ambo'na tau Yunani. Ri yelle'na sining tau mateppe'é iya monroé ri Listra sibawa Ikonium, tarompoi Timotius séddi tau makessing. Macinnai Paulus kuwammengngi maccowéi Timotius silaong aléna; rimakkuwannanaro nasunna'ni Timotius. Napogau'i iyaro nasaba sining tau Yahudié ri daéraéro naisseng manengngi makkedaé ambo'na Timotius séddiwi tau Yunani. Tungke'-tungke' kota nalaoiyé mennang, napalettu'i mennang risining tau mateppe'é sining apettung iya puraé napattentu rasul-rasul-é sibawa sining pamimpingngé ri Yérusalém. Napangajarini mennang saudara-saudara iya mateppe'énnaro kuwammengngi naturusiwi iyaro peraturang-peraturangngé. Natattamba masse'na teppe'na iyaro sining jema'é, natungke esso pédé' tattambai égana jumellana. Dé' naripalalo Paulus sibawa Silas ri Rohna Allataala mappallebbangengngi ada-adanna Allataala ri daéra Asia. Jaji napatteruni joppana lao ri daéra Frigia sibawa Galatia. Wettunna lettu ri pakkasésénna Misia nacobani mennang muttama' ri daéra Bitinia, iyakiya Rohna Yésus mattéyangngi mennang lao kuwaro. Jaji nalaloini mennang Misia natteru ri Troas. Wenninnana, ri Troas, mitani Paulus séuwa pakkitang. Ri laleng pakkitangngéro naitai séddi tau Makedonia tettong ri yolona nanaréllau sibawa masero kuwammengngi nalao ri Makedonia untu' tulungngi mennang. Puranana nalolongeng Paulus iyaro pakkitangngé, matteruni sadiya-sadiya untu' lao ri Makedonia. Saba' mateppe'ki ri laleng malata apettung makkedaé Allataala suroki mabbirittangngi Karéba Madécéngngéro lao risining tauwé kuwaro. Ri salaini Troas natasompe matteru lao ri Samotrake, na pappa bajana lao ri Néapolis. Polé kuwaro laoki ri Filipi, séddi kota kacamatang mammulangngé ri Makedonia. Filipi iyanaritu jajahanna akkarungeng Roma. Monroni kuwaro siyagangngaré essona. Ri Esso Saba'é laoni ri wiring saloé ri saliwenna pintu gerbanna kotaé, saba' ripérasaiwi kuwaro engka onrong massempajang untu' tau Yahudié. Natatudanna sibawa mabbicara-bicara sibawa sining makkunrai iya maddeppungengngénna ri onrongngéro. Séddi polé ri yelle'na mennang iyanaritu padangkang kaing lango-lango, asenna Lidia sibawa assalenna poléi ri Tiatira. Namaséiwi Allataala, naripakédona atinna ri Puwangngé kuwammengngi natarimai aga nappagguruwang Paulus lao ri aléna. Ricemméni Lidia sibawa silise bolana. Puranana ricemmé, naundanni. Makkedai, “Rékko napérasai Saudara-saudara tonget-tongekka mateppe' lao ri Yésus, laono mai mappéruma ri bolaku.” Nainappa maddessa'ni kuwammengngi nariturusi paréllaunna. Riséuwaé esso wettutta lao ri onrong assempajangengngé, siruntu'ki séddi makkunrai; atai. Iyaro makkunraié rikuwasaiwi ri roh sétang iya mulléngngi botoi kajajiyang-kajajiyang mangoloé. Iyaro makkunraié nawéréngngi asarong battowa puwanna ri laleng nabotona dallé'na tauwé. Iyaro makkunraié naccowériwi Paulus matteru sibawa idi nagora-gorato, “Iyaé sining tauwé atannai Allataala Iya Pommatanré! Poléi mennang untu' paissengiwi Saudara-saudara pékkugi carana mulléi salama'!” Siyagangngaré esso ittana iyaro makkunraié matteru-terui gora makkuwaro. Teddénni asabbarakenna Paulus, angkanna gilinni nainappa makkeda lao ri roh-éro, “Ri laleng asenna Yésus Kristus uparéntakko massu polé ri makkunraiéro!” Iyatoro wettué iyaro roh-é nasalaiwi iyaro makkunraié. Wettunna sining puwanna napahang makkedaé kasempatanna mennang untu' lolongeng dowi teddénni, natikkenni mennang Paulus sibawa Silas, nainappa nassarénréngeng iya duwa lao ri tana lapangngé ri yolona saorajaé mangolo ri pamaréntaé. Napangoloi mennang Paulus sibawa Silas ri pajaba'-pajaba' pamarénta Roma, nainappa makkeda, “Iyaé sining tauwé tau Yahudi. Nakacauwi mennang kotata. Napétangngariwi mennang tauwé pogau'i ade' abiyasang iya dé'é nasicoco' hukkung-hukkutta, sining tau Romaé. Dé' taulléi tarimai iyaré'ga turusiwi iyaro ade' abiyasangngé!” Maccowéni tau maégaé gasai Paulus sibawa Silas; enrengngé pajaba'-pajaba'na pamaréntaé sapé'-sapé'i pakéyanna polé ri watakkaléna iya duwaro rasul-é nainappa nasuro tauwé barasa' duwai mennang. Puranana mennang ribarasa' sibawa maladde', riputtama'ni mennang ri laleng tarungkué. Risuroni kapala tarungkué jagaiwi mennang sibawa makkumani tedde'na. Nasaba paréntaéro, iyaro kapala tarungkué natahangngi mennang ri bili' tarungkué iya kaminang marilalengngé, sibawa nabalenggui ajéna ri balo'é. Kira-kira ri tengnga benninna Paulus sibawa Silas massempajang sibawa makkélong poji-pojiyang lao ri Allataala. Sining tau tarungku laingngé méngkalingai mennang makkélong. Tappa mpéwang muni tanaé masero senna', angkanna pandaménna iyaro tarungkué maccowéto taggottang. Tattimpa' maneng sininna tange'na tarungkué sibawa sining ranté iya balengguéngngi sininna tau tarungkué leppe'to. Moto sélenni iyaro kapala tarungkué. Wettunna naita tattimpa' sining tange'na tarungkué, narampuni peddanna maélo mpunoi aléna nasaba nasenni lari maneng tau tahanangngé. Iyakiya gorai Paulus siullé-ulléna, “Aja' muwunoi alému! Engka maneng muki kuwaé!” Méllauni lampu iyaro kapala tarungkué nainappa lari muttama', naténréna suju' ri yolona Paulus sibawa Silas. Nainappa natiwi mennang massu sibawa makkeda, “Bapa'-bapa', aga harusu' upogau' kuwammengngi ripassalama'ka?” Nappébali Paulus sibawa Silas, “Ateppe'no lao ri Puwang Yésus! Salama'ko matu – iko sibawa sininna tauwé ri bolamu!” Nainappa Paulus sibawa Silas pakatajangngi ada-adanna Puwangngé lao ri kapala tarungkuéro sibawa lao ri sininna tau iya engkaé ri bolana. Iyatoro tengnga bennié, naritiwi mennang ri kapala tarungkuéro nainappa ripaccingi sining lona mennang. Natteruna ricemmé iyaro kapala tarungkué silaong sininna tauwé ri lalempolana. Nainappa natiwi Paulus sibawa Silas ri bolana sibawa patalangengngi mennang inanré. Masennang senna'ni silaong sininna kaluwargana saba' mateppe'ni makkekkuwangngé lao ri Allataala. Pappa bajana éléé, kirinni pajaba'-pajaba'na pamarénta Roma polisi lao ri tarungkué untu' palettu'i paréntaé kuwammengngi Paulus sibawa Silas naripaleppe. Iyaro kapala tarungkué napaissengiwi gau'éro lao ri Paulus. Makkedai, “Bapa'-bapa', pajaba'-pajaba'na pamaréntaé pura mabbéré parénta untu' leppessangngi Bapa'-bapa'. Weddinni Bapa'-bapa' lisu makkekkuwangngé. Salama'ki ri lalengngé!” Iyakiya makkedai Paulus lao ri patugas-patugasna polisiéro, “Idi'é tau warga wanuwa Roma. Purani ribarasa' ri yolona tau maégaé sibawa riputtama' ri laleng tarungkué, sibawa dé' nariadélékiki. Na makkekkuwangngé nasuroki lao sibawa mammekko-mekko? Dé' tamaélo! Suroi iyaro aléna pajaba'-pajaba'na pamaréntaé lao kuwaé leppessakki.” Nalaporo'ni iyaro patugas-patugasna polisié gau'éro lao ri pajaba'-pajaba'na pamarénta Roma. Wettunna iyaro pajaba'-pajaba'é naéngkalinga makkedaé Paulus sibawa Silas warga wanuwa Roma, métauni mennang. Nainappa lao méllau addampeng ri Paulus sibawa Silas, nainappa nantara mennang iya duwa massu polé ri tarungkué, enrengngé naéllaunna kuwammengngi nalao mennang polé ri kotaéro. Nasalaini Paulus sibawa Silas iyaro tarungkué nainappa lao ri bolana Lidia. Puranana siruntu' sining tau mateppe'é kuwaro, sibawa mpéréngngi mennang sumange', joppani Paulus sibawa Silas. Napatteruni joppana Paulus sibawa Silas lalo Amfipolis sibawa Apolonia nalettu'na ri Tésalonika. Kuwaro engka bola assompang tau Yahudi. Nalaona Paulus ri bola assompangngéro – pada-pada biyasaé napogau' rékko engka séuwa bola assompang Yahudi – nainappa mappasicoco pallolongeng sibawa sining tauwé kuwaro passalenna aya'-aya'na Kitta'é. Napogau'i iyaro tellu Esso Saba' matturu-turuseng. Napakatajanni situru aya'-aya'na Kitta'é sibawa napabuttinna makkedaé Arung Pappassalama'é iya najjanciyangngé Allataala parellui manrasa-rasa sibawa tuwo paimeng polé ri amaténgngé. Makkedai Paulus, “Yésus iya uwabbirittangngéro lao ri iko, Aléna ritu Arung Pappassalama' iya riyajjanciyangngé.” Siyagangngaré tau mancaji mateppe' nainappa maccowériwi Paulus sibawa Silas; makkuwatoro maéga senna' tau Yunani iya métaué ri Allataala, sibawa maéga mupa makkunrai mariyolo. Iyakiya sining tau Yahudié mangémpurui. Naobbii mennang sining tau dé'é gaga jama-jamanna risining lalengngé sibawa mébbu garembolang pangacau. Nanakacauni mennang sininna kotaéro sibawa katulungngi bolana Yason untu' sappai Paulus sibawa Silas, nasaba maéloi mennang tiwii Paulus sibawa Silas massu mangolo ri tau maégaé. Iyakiya wettunna mennang dé' nalolongengngi Paulus sibawa Silas, nassarénréngenni Yason sibawa siyagangngaré tau mateppe' laingngé ri yolona pajaba'-pajaba' iya makuwasaé ri kotaéro. Gorani mennang, “Iyaé sining tauwé makkacauwi kégi-kégi! Makkekkuwangngé nalokkai toni mennang kotata, na Yason pura tarimai mennang ri bolana. Najjalékkaiwi mennang sining iya pura napattentué Kaisar Roma, nasaba makkedai mennang makkedaé engka mupa arung laing iya riyasengngé Yésus.” Nasibawang ada-adaéro, naébbui mennang tau maégaé sibawa sining panguwasaé ri kotaéro tasséleng. Nainappa iyaro sining panguwasaé suroi Yason sibawa sining tau mateppe' laingngéro makkamaja dowi boro'. Purairo nainappa rileppessang mennang. Iyaro wennié sining tau mateppe'é ri kotaéro suroi Paulus sibawa Silas lao ri Béréa. Lettu'nana kuwaro, laoni Paulus sibawa Silas ri bola assompanna tau Yahudié. Sining tauwé ri Béréa lebbi tabbukkai atinna naiya sining tauwé ri Tésalonika. Masennang atinna mennang méngkalingai karébaé passalenna Yésus, na esso-esso mennang salidikiwi Kitta'é untu' missengngi tongegga iyaro pappagguruwanna Paulus. Maéga ri yelle'na mennang mateppe' lao ri Yésus, nadé' céddé'to tau Yunani mariyoloé mateppe'; makkunrai sibawa worowané. Wettunna naéngkalinga sining tau Yahudié ri Tésalonika makkedaé pura toni nappallebbangeng Paulus ada-adanna Allataala ri Béréa, laoni mennang ri Béréa sibawa pakiri-kiriwi enrengngé péttauriwi sining tauwé kuwaro. Mapperi-perini sining Saudara-saudaraé ri Béréa mantara'i Paulus lao ri wiring tasi'é, na Silas sibawa Timotius tette'i monro ri kotaéro. Puranana nantara Paulus lettu ri Aténa, lisuni iyaro Saudara-saudaraé ri Béréa sibawa tiwii paseng polé ri Paulus kuwammengngi Silas sibawa Timotius naccinrolato masitta-sitta. Wettunna Paulus natajeng Silas sibawa Timotius ri Aténa, messéni atinna mitai kotaéro penno sibawa barahala-barahala. Rimakkuwannanaro ri bola assompangngé, mappasicoco pallolongenni Paulus sibawa sining tau Yahudié enrengngé sining tau laingngé iya sompaéngngi Allataala kuwaro. Makkuwatoro risining pasaé esso-esso mappasicoco pallolongeng sibawa tungke' tau iya engkaé kuwaro. Guru-guru iya maccowéé ri Epikuros sibawa maccowéé ri Stoa siddebba' toni sibawa Paulus. Siyagangngaré polé ri mennang makkeda, “Aga naisseng iyaé tauwé? Céddé bawang pangissengenna, iyakiya maéga bicarai!” Siyagangngaré laingngé makkeda, “Samanna nabbirittangngi passalenna déwata-déwata bangsa laingngé.” Makkeda makkuwairo mennang, nasaba mabbicarai Paulus passalenna Yésus sibawa passalenna atuwongngé paimeng purana amaténgngé. Nainappa natiwi mennang Paulus ri addeppungengngé ri Bulu-bulu Aréopagus. Kuwaniro makkeda mennang lao ri Paulus, “Macinnaki missengngi pappagguruwang baru iya muwabbirittangngéro. Saba' mupowadai gau'-gau' iya makalallaingngé riyéngkalinga ri daucculitta. Rimakkuwannanaro macinnaki missengngi bettuwanna.” ( Saba' sininna tau Aténaé sibawa sining tau polé-polé iya monroé kuwaro napoji senna' paccappui wettu appésau-pésaungenna mennang untu' méngkalingai sibawa mabbicara passalenna gau'-gau' iya kaminang barué.) Wettunna Paulus tettong ri yolona sining tau iya maddeppungengngé ri Aréopagus-éro, makkedani Paulus, “Eh sining tau Aténaé! Uwitai makkedaé ri laleng sininna gau'é maggama senna'ko. Saba' wettukku joppa-joppa mattulilingiwi kotamu sibawa pénessaiwi sining onrong assempajangemmu, uwita towi séddi onrong makkasuwiyangeng akkarobangeng; ri onrongngéro tarokii, ‘Lao ri Allataala Iya Dé'é Nariisseng.’ Allataala iya musompaé iyakiya dé' naissengngi, iyanaro uwabbirittang lao ri iko. Allataala iya pancajiyéngngi linoéwé sibawa sininna lise'na, iyanaritu Puwanna langié sibawa linoé. Dé' naonro ri laleng bola-bola déwata iya naébbué tolinoé. Dé'to napparelluwangngi bantuwanna tolinoé, saba' Aléna ritu mabbéré atuwong sibawa nappase' enrengngé sininna séuwa-séuwaé lao ri tolinoé. Polé riséddié rupa tau Naébbui sininna bangsaé sibawa nasuroi mennang monroiwi sininna linoé. Alénato ritu pattentui mappammula pammulanna, uppanna sibawa kégai mennang wedding tuwo. Napogau'i Allataala iyaro kuwammengngi nasappai mennang Aléna. Memmuwaré' siruntu'i mennang sibawa Aléna ri wettunna mennang sappai. Iyakiya sitongenna Allataala dé' namabéla polé ri idi tungke'-tungke'. Pada-pada napowadaé tauwé, ‘Tuwoki sibawa kédo enrengngé engkaki ri linoéwé nasaba akuwasan-Na.’ Pada-pada mutowi iya napowadaé siyagangngaré paccuritamu. Makkedai mennang, ‘Idi manengngé iyanaritu ana'-ana'-Na.’ Nasaba idi'é ana'-ana'ki Allataala, dé' naweddikki mangga'i Allataala pada-pada dato'-dato' polé ri ulawengngé iyaré'ga péra'é iyaré'ga batué iya riyébbué situru accana tolinoé. Iyaro wettué nallupaini Allataala adonggotta, iyakiya makkekkuwangngé nasuro manengngi tauwé ri sininna linoé toba' polé ri dosa-dosana. Saba' pura napattentuni séddi wettu untu' madélékiwi sininna linoéwé sibawa adélé. Iyaro jamangngé napogau'i matu séddi tau iya puraé napilé Allataala untu' iyaro. Na kuwammengngi sininna tauwé mateppe'i matu ri gau'éro, purani napatuwo paimeng Allataala iyaro tauwé polé ri amaténgngé!” Wettunna naéngkalinga iyaro sining tauwé passalenna atuwongngé paimeng purana amaténgngé, engka polé ri mennang cawa-cawaiwi Paulus. Engkato makkeda, “Macinnaki méngkalingai Saudara mabbicara paimeng passalenna gau'éwé.” Nainappa nasalai Paulus iyaro addeppungengngé. Iyakiya engka ri yelle'na mennang maccowé ri Paulus sibawa mateppe' ri Yésus, padaénna: Dionisius anggotana majelis Aréopagus, sibawa séddi makkunrai riyaseng Damaris, enrengngé siyagangngaré tau pasi. Purairo nasalaini Paulus Aténa nalao ri Korintus. Kuwaniro siruntu' séddi tau Yahudi riyaseng Akwila, assalenna poléi ri wanuwa Pontus. Silalona Akwila polé ri Italia sibawa bainéna Priskila. Laowi mennang ri Korintus saba' Kaisar Klaudius purani nasuro sininna tau Yahudié massu polé ri Roma. Laoni Paulus célléngiwi mennang iya duwa, nainappa monro kuwaro sibawa mennang enrengngé silaong mennang majjama, saba' assappa-sapparenna mennang pada-padai assappa-sapparenna Paulus, iyanaritu mébbu kéma. Iyakiya tungke' Esso Saba', laowi Paulus maccurita-curita ri bola assompangé untu' mébbui sining tau Yahudié sibawa sining tau Yunanié, mateppe' lao ri Yésus. Lettu'nana Silas sibawa Timotius polé ri Makedonia, nakkégunanni sininna wettunna Paulus untu' mabbirittangngi biritta polé ri Allataala lao risining tau Yahudié makkedaé Yésus iyanaritu Arung Pappassalama' iya najjanciyangngé Allataala. Iyakiya nasaba sining tauwé matteru-terui méwai sibawa cellai, nakkeppikenni Paulus awué polé ri pakéyanna selaku tanrang untu' paréngngerangiwi mennang asalanna. Makkedai, “Rékko nakennako abala, asalammu mutotu! Leppe' limakku! Mappammulai makkekkuwangngé maéloka lao risining tau tenniyaé Yahudi.” Nainappa Paulus nasalai mennang nalao monro ri bola ri seddéna bola assompangngé. Iyaro bolaé bolana séddi tau tenniyaé Yahudi, iyakiya nasompai Allataala. Asenna iyaro tauwé Titius Yustus. Iyakiya Krispus, kapalana iyaro bola assompangngé sibawa sininna kaluwargana mateppe'i lao ri Puwang Yésus. Na maégato tau Korintus laingngé méngkalingai biritta iya napalettu'é Paulus, namateppe'na mennang lao ri Yésus nainappa ricemmé. Riséuwaé wenni ri laleng séuwaé pakkitang, makkedai Puwangngé lao ri Paulus, “Aja' mumétau! Abbicarako matteru aja' muwammekko. Saba' Usibawakko. Dé' séddi tau laing mulléi pogau'i majaé lao ri Iko, saba' maéga tau ri kotaéwé iyanaritu sining tauk-Ku.” Rimakkuwannanaro monroni Paulus ri Korintus séddi sitengnga taung ittana sibawa mappagguruwangngi ada-adanna Allataala lao ri mennang. Wettunna Galio mancaji gubernur Akhaya, masséddini sining tau Yahudié méwai Paulus sibawa tiwii ri pengadilangngé. Mapparape'ni mennang makkuwaé, “Iyaé tauwé napangaruiwi tau maégaé kuwammengngi nasompai Allataala sibawa cara dé'é nasicoco' sining paréntana Allataala iya nabbéréyangngé Musa lao ri idi!” Wettunna Paulus maélo mappébali, makkedani Galio lao risining tau Yahudié, “Eh sining tau Yahudié! Rékko iya muwapparapekengngéwé séddiwi pelanggarang iyaré'ga séddiwi pangkaukeng maja, mémeng sitinajaka sabbara' méngkalingai papparapekemmué. Iyakiya iyaé assisalang ada-ada sibawa aseng-ngaseng enrengngé hukkung-hukkummu muto. Jaji harusu'ko pacceppiwi. Dé' usitujuiwi madélékiwi gau'-gau' makkuwaéwé!” Nainappa Galio narukka mennang massu. Natikkenni mennang Sosténés, kapalana bola assompangngéro, nabarasa'i ri yolona mejang pengadilangngé. Iyakiya Galio dé' sises-siseng napaduliwi gau'éro. Purairo maitta mupa Paulus monro ri Korintus. Nainappa massimang lao risining tau mateppe'é kuwaro, nainappa sompe' silaong Priskila sibawa Akwila lao ri Siria. Ri Kéngkréa, nacukkuru'ni Paulus gemme'na iya puraé naleppessang malampé nasaba jancinna lao ri Puwangngé. Wettunna lettu ri Efésus, nasalaini Paulus Priskila sibawa Akwila, nainappa muttama' ri bola assompangngé sibawa mappasicoco pallolongeng sibawa sining tau Yahudié kuwaro. Naéllauni mennang kuwammengngi monroi lebbi maitta sibawa mennang, iyakiya dé' namaélo. Namuni makkuwaro, wettunna maélo joppa, makkedani, “Rékko napuwéloi Allataala, maéloka lisu paimeng kuwaé.” Purana makkeda makkuwaro, nasalaini Efésus. Nonnona ri Kaisaréa, laoni ri Yérusalém untu' mabbéré selleng lao ri jema'é kuwaro, nainappa matteru lao ri Antiokhia. Monronana kuwaro siyagangngaré ittana, joppasi mitai daéra Galatia sibawa Frigia untu' pakkasse'i sining tau mateppe'é. Iyaro wettué, poléni ri Efésus séddi tau Yahudi iya jajiyé ri Aléksandria, asenna Apolos. Maccai mabbicara sibawa najeppuinna lise'na Kitta'é, enrengngé pura ripagguru untu' missengngi pappagguruwangngé passalenna Yésus. Nasibawang sumange' iya malluwa'-luwa'é mappaggurui sibawa matutu passalenna Yésus, namuni nappai paccemména Yohanés bawang iya naissengngé. Nabaranina Apolos mappammula mabbicara ri bola assompangngé na wettunna Priskila sibawa Akwila méngkalingai pappagguruwanna, ritiwini ri mennang lao ri bolaé. Kuwaniro mennang napakatajang lao ri aléna sibawa lebbi sukku passalenna rancanana Allataala untu' passalama'i tolinoé naolai Yésus. Nainappa akkattana Apolos lao ri Akhaya. Nasining tau iya mateppe'é lao ri Yésus ri Efésus mokini sure' lao ri Saudara-saudara iya mateppe'é ri Akhaya kuwammengngi mennang maéloi tarimai Apolos sibawa masennang atinna. Na wettunna Apolos lettu ri Akhaya, manessani makkéguna senna' pattulunna lao risining tau iya mateppe'é lao ri Yésus nasaba pammaséna Allataala. Saba' nacaui Apolos sining tau Yahudié ri laleng addebbakengngé ri yolona tau maégaé. Enrengngé napabuttiwi sibawa aya'-aya' polé ri Kitta'é makkedaé Yésus ritu Arung Pappassalama' iya riyajjanciyangngé. Wettunna Apolos engka mupi ri Korintus, najalajja'i Paulus pedalamanna iyaro daéraé nanalettu'na ri Efésus. Kuwaniro siruntu' siyagangngaré tau iya mateppe'énna lao ri Yésus. Makkutanani lao ri mennang, “Puraniga Saudara-saudara natarima Rohna Allataala wettunna Saudara mateppe' lao ri Yésus?” Nappébali mennang, “Dé'pa. Mala dé'pa naengka nariyéngkalinga makkedaé engka Rohna Allataala.” Nakkutana Paulus, “Rékko makkuwaitu, nasibawang acemméng aga saudara ricemmé?” Nappébali mennang, “Nasibawang acemménna Yohanés.” Nainappa makkeda Paulus, “Yohanés cemméi tauwé untu' pannessai makkedaé iyaro sining tauwé toba'ni polé ri dosa-dosana mennang. Iyakiya iyaro wettué matteru mutowi Yohanés mappaddissengengngi lao risining tau Israélié makkedaé harusu'i mennang mateppe' lao ri Tau iya polé matu ri monrinna, iyanaritu Yésus.” Wettunna mennang naéngkalinga iyaro, ricemméni mennang ri laleng asenna Puwang Yésus. Na wettunna Paulus palénne'i limanna ri yasé'na mennang, rikuwasaini mennang ri Rohna Allataala, nainappa mennang mabbicara ri laleng sining basa iya makalallaingngé enrengngé palettu'i biritta polé ri Allataala. Jumellana mennang kira-kira engka seppulo duwa tau. Tellumpuleng ittana Paulus matterui mabbicara sibawa barani lao risining tauwé ri bola assompangngé enrengngé siddebba sibawa mennang untu' papahangi mennang passalenna Allataala sibawa Apparéntanna selaku Arung. Iyakiya siyagangngaré ri yelle'na sining tauwéro matedde ati sibawa dé' namaélo mateppe'. Ri yolona sininna tauwé iya maddeppungengngé kuwaro nacellai mennang pappagguruwangngé passalenna rancanana Allataala untu' passalama'i tolinoé naolai Yésus. Rimakkuwannanaro nasalaini Paulus mennang, nainappa lao silaong sining tau maccowériyéngngi Yésus ri onrong assikolanna Tiranus. Kuwaniro esso-esso sitanai sibawa sining tauwé. Napogau'i iyaro gau'éro matteru-teru sitaung ittana narapi sininna tauwé iya monroé ri daéra Asia, muwi tau Yahudi iyaré'ga tau bangsa laing, iya manenna naéngkalingai ada-adanna Puwangngé. Napogau'i Allataala gau'-gau' iya dé'é gaga padanna naolai Paulus. Rékko lénso-lénso iyaré'ga kaing pabbekkeng iya puraé napaké Paulus ritiwi lao risining tau malasaé, majjappai lasana sibawa massu towi roh sétangngé polé ri mennang. Engka siyagangngaré sanro Yahudi lao kégi-kégi, paddésu'i roh majaé polé risining tauwé. Iyaro sining sanroé nacoba-coba towi pakéi asenna Puwang Yésus untu' paddésu'i iyaro roh-roh sétangngé. Makkedai mennang lao ri roh-roh sétangngéro, “Ri laleng asenna Yésus iya nabbirittangngé Paulus, upaddésu'ko!” Engka pitu ana' worowanéna séddié kapala imang, riyasengngé Skéwa, iya pogau'éngngi gau' makkuwaéro. Iyakiya makkedai iyaro roh sétangngé lao ri mennang, “Uwisseng Yésus sibawa uwissetto Paulus, iyakiya iko niga?” Nainappa iyaro tau nauttamakiyé sétang luppe sibawa luruiwi mennang sibawa masekkang senna' angkanna lari mennang polé ri bolaéro sibawa sining lo enrengngé mallusu-lusu, nasaba pakéyanna risapé'-sapé'ni polé ri watakkaléna. Sininna tau Yahudié sibawa tau bangsa laingngé iya monroé ri Efésus méngkalingai passalenna gau'éro, namétauna mennang. Napédé ripoji-pojini asenna Puwang Yésus. Maéga tau iya mateppe'énna ri Yésus polé mangakuiwi ri yolona tau maégaé sining pangkaukenna mennang. Iya mennang biyasaé makkégunang paddissengeng, napaddeppungenni kitta'-kitta'na nanatunui ri yolona tau maégaé. Iyaro ellinna kitta'-kitta'é rékko rijumella manengngi engka kira-kira limappulo sebbu dowi péra'. Makkuwaniro nasibawang cara iya héba'éro pédé mallebbangngi ada-adanna Puwangngé sibawa pédé masse'i pangarunna. Puranana sining kajajiyangngéro, napettuiwi Paulus untu' lao ri Makedonia sibawa Akhaya nainappa matteru lao ri Yérusalém. Nakkeda Paulus, “Rékko poléka kuwaro, harusu' tokka lao ri Roma.” Nasuroni duwa tau polé risining pabbantunna, iyanaritu Timotius sibawa Erastus untu' lao ri Makedonia, na aléna monro mupi siyagangngaré ittana ri daéra Asia. Kira-kira wettuénnaro nakajajiyang arocakeng battowaé ri Efésus nasaba pappagguruwang passalenna Yésus. Saba' ri kotaéro engka séddi panré péra' riyaseng Démétrius, iya mébbué bola-bola déwata untu' Déwi Artémis. Usahana iyaro tauwé mappapoléi wassélé iya battowaé lao risining pajjamana. Rimakkuwannanaro napaddeppungenni sining pajjamana silaong sining pajjama tukang péra' laingngé, nainappa makkeda, “Saudara-saudara! Taissettu makkedaé lolongekki wassélé polé ri jama-jamangngéwé. Makkekkuwangngé alétana mitai sibawa méngkalingai aga napogau' iyaro si Paulus. Makkedai makkedaé sining déwata iya naébbué rupa tauwé sitonget-tongenna tenniyai déwata. Namaégani tau naébbu mateppe' ri pappagguruwanna, tenniya bawang kuwaé ri Efésus, iyakiya céddé'pi ri sininnato daéra Asia. Bahayana iyanaritu iyaé usahata lolongengngi matu aseng maja. Na tenniya iyaro bawang, sangadinna bolana Déwi Artémis naangga' énténg towi enrengngé arajanna naléjja'-léjja'i; padahal aléna déwi iya nasompaé sininna tauwé ri Asia sibawa sininna linoé!” Naéngkalingana iyaro sining tauwé mapellani atinna, nainappa mennang gora-gora, “Tuwoi Artémis, déwinna Efésus!” Nallebbanna iyaro roca'é lettu ri sininna kotaé. Nainappa iyaro garembolang-garembolang paddoca'é natikkengngi Gayus sibawa Aristarkhus, iyanaritu sining tau Makedonia iya silaongengngéngngi Paulus ri laleng allalengenna, nainappa nassarénréngeng mennang lao ri stadionna kotaéro. Maéloi Paulus muttama' maccowériwi mennang, iyakiya sining tau iya mateppe'é lao ri Yésus kuwaro mattéyangngi. Siyagangngaré tomarajana iyaro daéra Asia, iya massellaowé sibawa Paulus, suroi tauwé paissengiwi Paulus kuwammengngi na aja' nappaitangngi aléna ri stadiongngéro. Iyaro wettué sining tau maddeppungengngé ri stadiongngéro mancaji kacauni. Engka gora makkuwaé, engka gora makkuwaro, nasaba maégangngéngngi polé ri mennang dé' naissengngi aga saba'na mennang naddeppungeng kuwaro. Sibagiyang polé risining tauwéro masengngi Aléksander dulungengngi, nasaba aléna ritu risorong liyolo risining tau Yahudié. Nabbéréna tanrang Aléksander sibawa limanna untu' méllauwi riwéréng kasempatang bélai aléna ri yolona sining tauwéro. Iyakiya naitana mennang makkedaé tau Yahudiwi, massama-samanni mennang gora loppo, “Tuwoi Artemis, déwinna tau Efésus-é!” Angkanna jurutulisi'na kotaé naulléni pattennangngi tau maégaéro. Makkedai, “Pabbanuwana Efésus! Tungke' tau missengngi makkedaé Efésus ritu kota iya piyaraéngngi bolana Déwi Artémis sibawa batu mapaccingngé iya sempé'é polé ri langié. Dé'gaga séddi tau mulléi bantai iyaro gau'é. Rimakkuwannanaro tennanno sibawa aja' mupogau'i séuwaé sibawa mapperi-peri. Iyaé sining tauwé, mutiwii kuwaé tenniya nasaba purai mennang maddampo bola déwa iyaré'ga nasaba purai mennang nacella-cella déwitta. Rékko iyaro Démétrius sibawa sining pajjamana mapparapekengngi séddié tau, leppessangngi mennang natiwi iyaro parakarana lao ri pengadilangngé. Tattimpa'i pengadilangngé untu' iyaro sibawa sining pajaba'na pamaréntaé tuli engkai. Iyakiya rékko engka mupa séuwa laingngé iya mucinnaiyé, iyaro harusu'i ripacceppi ri laleng addeppungenna tau maégaé iya essa. Saba' aga iya kajajiyangngé iya essoéwé weddingngi mabbahaya ri idi. Weddikki riteppu pakangka ronta, nasaba dé' tappunnai séddi alasang untu' pattongengngi iyaé roca'é.” Puranana napowada iya manennaro, iyaro juru tulisi'na kotaé nasuroni iyaro tau maégaé lisu. Tennannana paimeng keadaangngé ri Efésus, napaddeppungenni Paulus jema'é sibawa nawérénna dorongang mennang. Nainappa massimanni patterui joppana lao ri Makedonia. Laowi ri daéra-daéra Makedonia sibawa mabbéré maéga pangaja risining tau mateppe'é ri Yésus kuwaro untu' mpéréngngi dorongang mennang. Nainappa lao ri Yunani. Tellumpuleng ittana monro kuwaro, Na wettunna sadiya-sadiya untu' sompe' lao ri Siria, engka karéba makkedaé sining tau Yunanié masséddiwi untu' mpunoi. Rimakkuwannanaro napettuini untu' lisu paimeng lalo ri Makedonia. Sopater ana' Pirus iya assalennaé polé ri Béréa laoni silaong aléna; makkuwatoro Aristarkhus sibawa Sékundus tau Tésalonikaé sibawa Gayus tau Dérbé. Makkuwatoro Timotius, Tikhikus sibawa Trofimus, sining tau polé ri daéra Asia. Napoddiyoloini mennanro nainappa natajekki ri Troas. Puranana Ramé-ramé Roti Dé'é Raginna, sompe'ni salaiwi Filipi. Limangngesso ri munrinna maddeppungenni paimeng sibawa mennang ri Troas. Simingguki monro kuwaro. Wenni Aha'na maddeppungekki untu' sisama manré secara massilessureng. Mabbicara-bicarani Paulus sibawa sining tauwé, nasaba mamménasani joppa pappa bajana. Narapi tengnga bennié Paulus mabbicara matteru. Ri laleng bili' ri langga' yasé'é, onrotta maddeppungenro, engka maéga lampu. Engka séddi kallolo riyaseng Eutikhus tudang ri tellongengngé. Nasaba dé' nappésau-pésau Paulus mabbicara, iyaro kalloloé cakkaruddu senna'ni angkanna matinro ri tellongengngéro, nanasempé'na polé ri langga' tellué. Wettunna mennang nakka, maténi. Iyakiya nonnoi Paulus ri yawa, nainappa léwu ri yasé'na iyaro kalloloé sibawa nakaddaonna. Nakkeda Paulus, “Aja' mubata-bata, tuwo mupi!” Nainappa ménré paimeng Paulus ri yasé, nanabagé-bagé rotié nasisama manré. Maittanana mabbicara sibawa sining tauwé narapi élé, joppani Paulus. Iyaro sining tauwé natiwini lisu iyaro kalloloé sibawa tuwo ri bolana. Masennanni mennang sibawa tassaléwona. Laoni ri kappala'é nainappa sompe'ni lebbi riyolo lao ri Asos untu' duppaiwi Paulus ri kappala'é kuwaro. Aléna pura matoro'i makkuwaro saba' maéloi lao kuwaro lalo ri pottanangngé. Puranana siruntu' ri Asos, masitta'ni Paulus ménré ri kappala'é nainappaki sompe' lao ri Metiléné. Polé kuwaro sompe'si, napappa bajana lettu'ni ri onrong siyolongngé sibawa Khios. Sangadinnana lettu'ni ri Samos sibawa siesso rimunrinna ri Milétus. Pura napattentuni Paulus untu' dé' naléppang ri Efésus, kuwammengngi aja' nabbéyang wettu ri daéra Asia. Macinnai masitta-sitta lettu ri Yérusalém ri Esso Maraja Péntakostaé. Polé ri Milétus kirinni Paulus karéba lao ri Efésus untu' méllauwi sining pamimpinna jema'é kuwaro lao méwai sita aléna. Wettunna mennang lettu, makkedani Paulus lao ri mennang, “Naisseng Saudara-saudara pékkugika tuwo wettuéwé ri yelle'mu mappammulai ri esso mammula lettu'ku ri Asia. Nasibawang ati mariyawa sibawa maéga uwai mata, majjamaka untu' Puwangngé ri tengnga-tengngana anrasa-rasangngé iya upéneddingiyé nasaba rencanana sining tau Yahudié iya majaé. Naisseng saudara makkedaé dé' ubata-bata paissengiko aga makkéguna lao ri iko. Upagguruko ri addeppu-deppungenna tau maégaé sibawa risining bolaé. Muwi lao risining tau Yahudié muwi lao risining tau bangsa laingngé tuli mabbéréka papparéngngerang kuwammengngi natoba' mennang polé ri dosa-dosana sibawa lao ri Allataala, enrengngé mateppe' ri Puwang Yésus. Makkekkuwangngé untu' turusiwi paréntana Rohna Allataala, laoka ri Yérusalém. Nadé' uwissengngi aga maélo kajajiyang ri iyya kuwaro. Iya bawang uwisseng makkedaé ri tungke'-tungke' kota, mattedde'ni Rohna Allataala paissengika, makkedaé muttama'ka matu tarungkué sibawa manrasa-rasa matu. Iyakiya dé' upaduliwi atuwokku, assaleng uwullé muwi paccappui jamang iya nawéréngngékka Puwang Yésus sibawa assaleng matinulu muka lettu ri ajjalekku untu' mabbirittangngi Karéba Madécéngngéro passalenna pammaséna Allataala. Pura manenno Saudara-saudara ulaowi sibawa pura toni ubirittangekko passalenna pékkugi Allataala mapparénta selaku Arung. Upérasaini makkekkuwangngé dé'na tasiruntu'na matti paimeng Saudara-saudara. Rimakkuwannanaro upowadakko iya essoé sibawa mattentu makkedaé rékko engka ri yelle'mu iya binasaé matu, tenniya asalakku iyaro. Dé' naengka ulari polé ri jama-jamakku untu' pakatajangngi lao ri iko sininna rancanana Allataala. Sitinajako jagaiwi aléna sibawa jagai towi sininna jema'é iya puraé nabbéréyang Rohna Allataala lao ri iko untu' rijagai, saba' pura riyakkako mancaji jennang ri jema'éro. Sitinajako jagaiwi iyaro jema'na Allataala pada-pada pakkampié jagaiwi bimbala'na, nasaba Allataala pura pancajiwi iyaro jema'é appunnangeng ri Aléna naolai amaténna Ana'-Na. Pada-padaénna iyya, pasti poléi matu sining asu ale'é iya masekkangngé ri tengnga-tengngamu. Nasining tau iya mujagaiyéro mancajiwi matu nanréna iyaro sining asu ale'é. Mala poléto ri yelle'na Saudara-saudara mompoi matu sining tau iya mabbirittangngéngngi karéba dé'é natongeng. Napogau'i makkuwaéro kuwammengngi nasining tau iya mateppe'énna ri Yésus pusai naccowériwi mennang. Rimakkuwannanaro jaga-jagako! Engngerangngi makkedaé telluttaungngi ittana maéga uwai mata, esso wenni dé' naengka uwappésau paggurui tungke' tau polé ri iko. Makkekkuwangngé uwabbéréyakko lao ri Allataala kuwammengngi Napiyarako sibawa kuwammengngi muwakkatenning ri biritta pammaséna Allataala. Allataala mappunnai kuwasa untu' péwatangiko sibawa mpérékko barakka-barakka iya puraé Napassadiya untu' sininna umma'-Na. Dé'pa naengka ucinnaiwi dowié iyaré'ga pakéyang polé riséddié tau. Aléna saudara missengngi, makkedaé sibawa awatangekku majjamaka untu' paggenne'i apparelluwakku sibawa sellao-sellaoku iya maccowériyékka. Ri laleng sininna gau'é purano uwéréng conto, makkedaé ri laleng majjama marejjing pada-pada iyaé harusu'ki tulungngi sining tau iya dé'é namawatang. Nasaba harusu'ki méngngerangngi aga pura napowada Puwang Yésus, ‘Lebbi masennang muwi mabbéré naiya mattarimaé.’ ” Puranana Paulus mabbicara, makkaluttuni sibawa iya maneng mennang nainappa massempajang. Teri manenni mennang nanakaddao towi Paulus sibawa massimang. Messéni mennang, nasaba makkedai Paulus makkedaé dé'na mennang naitai paimeng. Nainappa mennang mantara'i lettu ri kappala'é. Siyassimangenni sibawa sining pamimpinna jema'é iya polé ri Efésus, nainappa nasalai mennang. Nainappa sompe'ki matteru lao ri pulo Kos; na pappa bajanana lettu'ni ri pulo Rodos. Polé kuwaro sompe'ki matteru lao ri pelabuhang Patara. Ri Patara, rilolongenni kappala iya maéloé lao ri Fénésia. Ménré'ni ri kappala'éro nainappa joppa sibawa sompe'ni angkanna rita pulo Siprus ri seddé abéyota; iyakiya sompe'ki matteru mattuju ri Siria. Mappottananni ri Tirus, saba' iyaro kappala ritonangiyé maéloi bongkara'i lurenna kuwaro. Laoni célléngiwi sining tau iya mateppe'é ri Yésus ri onrongngéro, nainappa monro kuwaro ri mennang siminggu ittana. Nasaba panunju'na Rohna Allataala, napangajarini mennang Paulus kuwammengngi aja' nalao ri Yérusalém. Iyakiya cappunana wettunna untu' monroki kuwaro risalaini mennang naripatteru joppatta. Silaong manenni mennang sibawa bainéna kuwaéttopa ana'-ana'na mantara'ki lettu ri saliweng kota. Kuwaniro ri wiring tasi'é, makkaluttu manekki massempajang. Purairo pada majjama'ni, nainappa ménré'ki ri kappala'é nalisu tona mennang ri bolana. Sompe'ni matteru polé ri Tirus lettu ri Ptolemais. Laoni kuwaro célléngiwi Saudara-saudara mateppe'é, untu' passalama'i mennang, namonroni siesso sibawa mennang. Pappa bajanana joppasiki, natalettu ri Kaisaréa. Laoni kuwaro ri panginjil iya riyasengngé Filipus, nataonro ri bolana. Sala séddinna iyanaritu polé ri iya pitu tau tappilé ri Yérusalém. Eppa ana'na ana'dara pura riwérénni pakkulléng ri Allataala untu' mabbirittangngi karéba polé ri Allataala. Siyagangngaré ittana kuwaro, engkani polé ri Yudéa séddi nabi riyaseng Agabus. Laoni ri idi nainappa nala babbanna Paulus. Nasibawang iyaro babbangngé nasiyoi ajéna sibawa limanna nainappa makkeda, “Iyanaé napowada Rohna Allataala: Iyaé tau punnaé babbangngé risiyoi matu pada-pada iyaé ri Yérusalém risining tau Yahudié, sibawa riyabbéréyang lao risining tau bangsa laingngé iya tenniyaé Yahudi.” Wettutta méngkalingai iyaro, idi sibawa sininna saudarata iya monroé ri Kaisaréa naéllau senna'ni ri Paulus kuwammengngi aja' nalao ri Yérusalém. Iyakiya mappébaliwi, “Aga gunana Saudara teri pada-pada iyaé angkanna muwébbui atikku ancuru? Sadiyaka tenniya bawang untu' ritikkeng kuwaro, iyakiya muni untu' maté nasaba Puwang Yésus.” Dé' namaélo Paulus méngkalingaki, natamappésauna mattéyangngi. Makkedaki, “Leppessanni siya élona Puwangngé jaji.” Monronana kuwaro siyagangngaré ittana, ripassadiyani barab-baratta, nainappa joppa lao ri Yérusalém. Siyagangngaré saudara polé ri Kaisaréa laoto silaongekki untu' mantara'ki lao ri bolana Manason, nasaba ri bolana ritu maéloki mappéruma. (Manason iyanaritu séddiwi tau Siprus iya maittaénna maccowé ri Yésus.) Wettutta lettu ri Yérusalém, naduppaini Saudara-saudarata kuwaro sibawa masennang. Pappa bajana silaonni Paulus lao célléngiwi Yakobus; sininna pamimping-pamimpinna jema'é engka towi kuwaro. Puranana ripassalama' mennang, nacuritani Paulus lao ri mennang sininna séuwa-séuwaé iya napogau'é Allataala naolai aléna ri yelle'na sining tau tenniyaé Yahudi. Purana naéngkalinga iyaro curitana Paulus, napoji manenni Allataala. Nainappa mennang makkeda lao ri Paulus, “Saudara Paulus! Harusu'i naisseng Saudara makkedaé massebbu-sebbuni tau Yahudi mateppe' lao ri Yésus. Iya maneng mennang iyanaritu sining tau iya matinulué turusiwi sining paréntana Allataala iya napalettu'é Musa. Na makkekkuwangngé naéngkalingani mennang makkedaé Saudara paggurui sininna tau Yahudié iya monroé ri yelle'na bangsa laingngé, kuwammengngi naleppessangngi hukkunna Musa. Saudara pangajariwi mennang kuwammengngi aja' mennang nasunna'i ana'-ana'na iyaré'ga naccowériwi ade'na Yahudié. Makkekkuwangngé sining tau Yahudié iya mateppe'énna tentu naéngkalingai matu makkedaé engkani Saudara kuwaé. Jaji pékkugini makkekkuwangngé? Madécéngengngi accowériwi pangajata. Engka eppa tau kuwaé iya puraé majjanci lao ri Puwangngé. Nah, sitinajai Saudara pakangka upacara pappépaccing alé silaong mennang, sibawa tanggungngi ongkoso'na mennang kuwammengngi nawedding ricukkuru' gemme'na mennang. Nanallalengiwi matu namanessa lao ri sininna tauwé makkedaé aga iya naéngkalingaé mennang passalenna Saudara dé' natongeng, nasaba aléna Saudara pajoppa mutowi hukkunna Musa. Iyakiya passalenna tau bangsa laingngé iya tenniyaé Yahudi iya mateppe'énna ri Yésus, purani kiring sure' lao ri mennang passalenna apettutta makkedaé dé' nawedding mennang manré inanré iya puraé riyakkasuwiyangeng lao ri barahalaé, dé' nawedding manré dara, iyaré'ga manré olokolo iya maté riyanrekké'é; sibawa dé' nawedding pogau' pangkaukeng-pangkaukeng malawengngé.” Nalaona Paulus silaong iya eppa tauwéro nainappa pakangka upacara pappépaccing alé silaong mennang pappa bajana. Nainappa mennang muttama' ri Bolana Puwangngé untu' powadangngi siyagangngessopi nappa upacara pappépaccingngéro leppe' sibawa akkarobangenna mennang tungke'-tungke' riyakkasuwiyangeng. Wettunna iyaro atte wettu pitungngessoé mawé'ni cappu, siyagangngaré tau Yahudi polé ri daéra Asia mitai Paulus ri laleng Bolana Puwangngé. Nainappa napakiri-kiri tau maégaé, nainappa nakkatenning Paulus nagora-gorato, “Eh sining tau Israélié, tulungngi! Iyanaé taunna iya laowé kégi-kégi mappagguru ri sininna tauwé sining pappagguruwang iya méwaéngngi bangsa Israélié, naéwai hukkunna Musa enrengngé naéwai iyaé Bolana Puwangngé. Na makkekkuwangngé mala natiwii sining tau tenniyaé Yahudi muttama' ri laleng Bolana Puwangngé nanapanajisi'i onrong mapaccingngéwé!” ( Makkeda makkuwairo nasaba purani mennang naita Trofimus iyaro tau Efésus-é ri kotaé silaong Paulus; nanasengngi Paulus pura tiwii muttama' ri Bolana Puwangngé.) Kacauni sininna kotaé, sibawa sininna tauwé makkalari-larinni maddeppu-deppungeng. Natikkenni mennang Paulus sibawa nassarénréngeng massu polé ri Bolana Puwangngé. Iyatoro wettué naritongko tange'na Bolana Puwangngé. Ri wettu makkuragana iyaro tau mébbué roca' mpunoi Paulus, engkana tau powadangngi komandang pasukang Romaé makkedaé sininna Yérusalém kacaui. Matteruni iyaro komandangngé mobbii siyagangngaré parawira sibawa prajuri' nainappa mapperi-peri lao sibawa mennang ri onronna iyaro kacaué. Wettunna iyaro tau maégaé naita iyaro komandangngé sibawa pasukanna, mappésauni barasa'i Paulus. Laoni iyaro komandangngé ri Paulus nanatikkengngi, sibawa nasuroi tauwé rantéi. Nainappa iyaro komandangngé makkutana passalenna niga iyaro Paulus sibawa aga pura napogau'. Sibagiyang polé ri tau maégaéro mappébali makkuwaé na sibagiyassi mappébali makkuwaro. Makkuwamani kacaunna iyaro keadaangngé angkanna iyaro komandangngé dé' naulléi missengngi aga sitongenna pura kajajiyang. Rimakkuwannanaro napparéntanni kuwammengngi naritiwi Paulus ri markas-é. Wettunna mennang natiwi lettu ri addénéngngé iyaro sining tau mébbué akacaungeng, pédé' majjallo'ni angkanna Paulus harusu' riyullé risining prajuri'é. Riyaccowériwi mennang polé ri monri ri garembolang pakkacauéro iya gora-goraé, “Unoi!” Maélona muttama' ri markas-é, makkedani Paulus ri komandangngéro, “Weddikka'ga mabbicara cinampe' sibawa Bapa'?” Nakkutana iyaro komandangngé, “Muwissegga mabbasa Yunani? Rékko makkuwaitu, tenniyakotu tau Maséré'éro iya pakangkaé ronta riyolo nainappa tiwi patassebbu tau pangacau massenjata muttama' ri padang kessi'é?” Nappébali Paulus, “Tau Yahudika; pabbanuwanaka kota Tarsus, kota pentingngé ri Kilikia. Tulukka tapalaloka mabbicara lao risining tauwéro.” Ripalalonana Paulus mabbicara, tettonni Paulus ri addénéngngé, nainappa mabbéré tanrang sibawa limanna. Tennang manenni tauwé. Nainappa Paulus mabbicara lao ri mennang ri laleng basa Ibrani. Makkedai Paulus, “Bapa'-bapa' sibawa Saudara-saudara iya maneng! Maéloka bélai aléku polé ri iko. Coba méngkalingai!” Wettunna mennang naéngkalingai Paulus mabbicara ri laleng basa Ibrani, pédé' tennanni mennang. Napatteruni Paulus pappakatajanna. Nakkeda Paulus, “Iyya tau Yahudika, jajika ri Tarsus ri wanuwa Kilikia, iyakiya ripawekke'ka kuwaé ri Yérusalém sibawa ripagguru ri anré guru lompoé Gamaliél ri laleng hukkung-hukkung iya nabbéréyangngé Musa lao ri néné-nénéta. Pada-pada maneng muto saudara-saudara kuwaé essoéwé, iyya mapato senna' muto lao ri Allataala. Ucallai gangka maté sining tau maccowéé ri pappagguruwang baruéro. Iya maneng mennang, muwi worowané iyaré'ga makkunrai, utikkengngi nainappa uputtama ri laleng tarungkué. Aléna imang lompoé sibawa sininna Mahkama Agamaé naullé mabbéré asabbiyang makkedaé dé' uwabbellé. Saba' mennang ritu pura mpérékka sure' pangantara' iya ripattujué lao risining tau Yahudié ri Damsyik. Nasibawang iyaro sure'é weddikka tikkengngi kuwaro sining tau iya mateppe'é lao ri pappagguruwangngéro sibawa tiwii mennang ri Yérusalém untu' rihukkung.” “Wettukku ri laleng allalengengngé sibawa mawé'nana lettu ri Damsyik, kira-kira tangasso, séuwa cahaya iya macakka senna'é tappa mattappa polé ri langié mattulilingika. Rebbana ri tanaé nainappa méngkalingaka séuwa sadda makkeda lao ri iyya, ‘Saulus, Saulus! Magi mucallaka?’ Naumakkutana, ‘Niga Iko, Puwang?’ Pappébalin-Na, ‘Iyya'naé Yésus, tau Nazarét-éro iya mucallaé.’ Sining tau iya engkaé kuwaro silaongekka mitai iyaro cahayaé, iyakiya dé' naéngkalingai mennang sadda iya mabbicaraé lao ri iyya. Naumakkutanapa, ‘Aga harusu' upogau', Puwang?’ Nappébali Puwangngé, ‘Oto'no namutama ri Damsyik. Kuwaro matti ripaissengiko matu passalenna sininna iya naéloriyé Allataala mupogau'.’ Butaka nasaba cahaya iya pawilo-wiloéro. Jaji sellao-sellaoku rénrékka muttama' ri Damsyik. Kuwaro engka séddi tau riyaseng Ananias. Séddiwi tau métau ri Allataala sibawa matinului pogau'i hukkunna Musa lao ri idi. Sininna tau Yahudié iya monroé ri Damsyik pakalebbi senna'i. Poléni célléngika, nainappa tettong ri seddéku nakkeda, ‘Saudara Saulus, sitinajako makkita paimeng!’ Iyatoro wettué uwakkai rupakku, nainappa nauwitani. Nainappa makkeda lao ri iyya, ‘Allataalana néné-nénéta pura piléko kuwammengngi muwissengngi élo-Na, sibawa kuwammengngi muwitai Yésus, Atanna Allataala iya pogau'éngngi élona Allataala enrengngé méngkalingai saddanna Yésus. Mancajiko matu sabbi untu' mabbirittangngi lao ri sininna tauwé aga pura muwita sibawa muwéngkalingai. Makkekkuwangngé aja'na muwattajeng maitta. Oto'no, sibawa abbéréyangngi alému ricemmé. Angobbino ri Puwangngé kuwammengngi namuripaleppe polé ri dosa-dosamu.’ ” “Lisuna ri Yérusalém, na wettukku massempajang ri Bolana Puwangngé, rikuwasaina ri Rohna Allataala. Uwitani Puwangngé; makkedai lao ri iyya, ‘Masitta'ko salaiwi Yérusalém, saba' sining tauwé kuwaé dé' namaélo tarimai asabbiyammu passalek-Ku.’ Umakkeda, ‘Puwang, naisseng tongeng mennang makkedaé purana muttama' risining bola assompangngé untu' tikkengngi mennang sibawa barasa'i sining tau iya mateppe'é lao ri Iko. Makkuwatoro wettunna sabbim-Mu Stéfanus riyuno, engka tokka kuwaro sibawa usitujui abbunowangngéro. Mala iyya monrowangngi pakéyanna sining tau iya mpunoéngngi.’ Iyakiya makkedai paimeng Puwangngé lao ri iyya, ‘Laono bawang, saba' maélo-Ka suroko lao ri onrong iya mabélaé lao risining tau tenniyaé Yahudi.’ ” Sining tauwé matteru mupi méngkalingai Paulus mabbicara, iyakiya ri warékkada paccappurennaro gorai mennang siullé-ulléna, “Uno bawanni tau makkuwaéro. Dé' nasitinaja tuwo!” Nappapirengngi jumbana mennang nagorato sibawa pattarumpui awué ri yelle'é. Nassurowanni iyaro komandanna pasukang Romaé naritiwi Paulus ri markas-é kuwammengngi nariparéssa kuwaro sibawa ricalla untu' missengngi aga saba'na nagora makkuwaro sining tau Yahudié lao ri aléna. Iyakiya wettunna Paulus pura risiyo untu' ribarasa', makkedani Paulus lao ri parawira iya tettongngé kuwaro, “Ripalaloga barasa'i séddié warga akkarungeng Roma riwettu dé'napa nariadéléki?” Naéngkalinganaro, laoni iyaro parawiraé ri komandang pasukangngé sibawa makkeda, “Aga iyaé maélo napogau' Bapa'? Iyaé tauwé pabbanuwana wanuwa Roma!” Nalaona iyaro komandangngé ri Paulus sibawa makkutana, “Coba powadai, pabbanuwanakoga wanuwa Roma?” Nakkeda Paulus, “Iyyé, pabbanuwanaka wanuwa Roma.” Nakkeda paimeng iyaro komandangngé, “Mancajika pabbanuwana wanuwa Roma sibawa maéga senna' uwaja!” Nappébali Paulus, “Iyakiya iyya jajika selaku pabbanuwana wanuwa Roma.” Iyatoro wettué anggota-anggota tentaraé iya maéloé paréssai iyaro Paulus, soroni sibawa iyaro komandangngé métau toni nasaba purani naranté Paulus, padahal Paulus pabbanuwana wanuwa Roma. Iyaro komandang pasukang Romaé macinna senna'i missengngi aga sitongenna nassabariwi sining tau Yahudié napasalai Paulus. Rimakkuwannanaro pappa bajanana naobbini kapala-kapala imangngé sibawa Mahkama Agamaé kuwammengngi naddeppungeng. Nainappa rileppessang Paulus polé ri balenggunna, naritiwi mangolo ri iya maneng mennang. Naitani Paulus iyaro anggota-anggota mahkamaé nainappa makkeda, “Saudara-saudaraku! Narapi essoéwé dé' umarasa pasala lao ri Allataala ri laleng atikku passalenna atuwo-tuwokku.” Wettunna Paulus makkeda makkuwaro, Imang Lompoé Ananias nasuroni tau iya tettongngé ri seddéna Paulus leppa'i témunna Paulus. Nakkeda Paulus lao ri imang lompoéro, “Allataala pasti leppa'ko, tau munapé' iya majjaiyéngngi mapaccing! Tudakko kuwatu madélékika manuru' hukkunna Musa, padahal alému majjalékkai parénta-paréntaéro sibawa suroi tauwé leppa'ka!” Nakkeda sining tauwé iya engkaé ri seddéna Paulus lao ri Paulus, “Mupakatunai imang lompona Allataala!” Nappébali Paulus, “Oh dé' uwissengngi, Saudara-saudara, makkedaé imang lompoi. Mémeng ri laleng Kitta'é engka taroki, ‘Aja' mupakatunai pamimping bangsamu.’ ” Naitai Paulus makkedaé sibagiyang polé ri anggota-anggota mahkamaéro sining tau Saduki sibawa sibagiyassi sining tau Farisi. Rimakkuwannanaro nakkeda lao ri mahkama agamaéro, “Saudara-saudara! Iyya séddika tau Farisi, wija-wijanna Farisi. Riadélékika kuwaé nasaba mateppe'ka makkedaé sining tau maté tuwoi paimeng.” Wettunna makkeda makkuwaro, iyaro sining tau Farisié sibawa sining tau Sadukié mammulani mappangéwang, angkanna iyaro sidangngé tabbagéni mancaji duwa golongang. ( Nasaba sining tau Sadukié mappallolongengngi makkedaé tau maté dé'na natuwo paimeng, sibawa dé'gaga malaéka', enrengngé dé'gaga roh-roh; padahal tau Farisié mateppe'i engka maneng iyaro.) Naompona rukka masero. Siyagangngaré tau Farisi iya mancajiyé guru agama tettong sibawa tonget-tongeng méwai. Makkedai mennang, “Manuru' idi, iyaé tauwé dé' napasala muwi céddé! Naullé mémeng engka roh iyaré'ga malaéka' iya mabbicaraé ri aléna!” Iyaro appangéwangngé pédé' maseroni angkanna iyaro komandangngé métauni rékko Paulus riborongngi matu ri mennang. Jaji nasuroni pasukanna lao malai Paulus polé ri tengnga-tengngana sining tauwéro nanatiwii ri markas-é. Wenni paimenna tettonni Puwang Yésus ri benrénna Paulus sibawa makkeda, “Pakkasse'i atimmu! Purani muwabbéréyang asabbiyammu passalek-Ku ri Yérusalém. Harusu' tokko matu mabbéréyangngi asabbiyangngéro ri Roma.” Pappa bajanana, subu-subu mupi, mammulani sikongkolo sining tau Yahudié. Mattanroni mennang dé' namaélo manré iyaré'ga ménung rékko dé'pa mennang naunoi Paulus. Engka patappulo tau lebbi iyaro sikongkolo'é. Laoni mennang ri kapala-kapala imangngé sibawa pamimping-pamimping Yahudié namakkeda, “Puraki mattanro massibawa, dé' tamaélo manré iyaré'ga ménung agi-agi rékko dé'pa taunoi Paulus. Nah, Saudara-saudara anggotana Mahkama Agamaé sitinajai makkekkuwangngé kiring sure' lao ri iyaro komandang pasukang Romaé untu' méllauwi, tiwii paimeng Paulus mangolo ri iko, samannako maélo paréssai paimeng parakarana lebbi ati-ati. Nasadiyaki matu untu' mpunoi riwettu dé'napa nalettu' kuwaé.” Iyakiya naéngkalingai ana'na ana'daranna Paulus iyaro rancana assikongkolokengngé. Nalaona ri markas-é nanapowadangngi Paulus iyaro gau'é. Nanaobbina Paulus séddi parawira nanakkeda ri aléna, “Tiwii iyaé kalloloé ri komandangngé, engka maélo nalaporo' ri aléna.” Natiwini parawiraé iyaro kalloloé ri komandangngé sibawa makkeda, “Paulus, tau ritahangngéro, naobbika sibawa naéllauka tiwii iyaé kalloloé ri Bapa'; engka maélo nalaporo'.” Iyaro komandangngé nakkatenninni limanna iyaro kalloloé, nainappa natiwi massala ri benréng nakkutana, “Aga maélo mupowadakka?” Nappébali iyaro kalloloé, “Masséddiwi sining tau Yahudié untu' méllauwi Bapa' tiwii Paulus mangolo ri Mahkama Agamaé baja, pada-pada rékko maéloi paréssai paimeng parakarana sibawa pédé' ati-ati. Iyakiya aja' Bapa' taturusiwi paréllaunna mennanro, nasaba engka lebbi patappulo tau mallekke' untu' tajengngi ri lalengngé. Pura manenni mattanro dé' namaélo manré sibawa ménung rékko dé'pa naunoi Paulus. Sadiyani makkekkuwangngé; pappébalinna mani Bapa' natajeng.” Nakkeda iyaro komandangngé, “Aja' mupowadangngi muwi niga makkedaé purai mulaporo' iyaé ri iyya.” Nainappa nasuro iyaro kalloloé lisu. Nainappa iyaro komandangngé mobbi duwa parawira, nanakkeda lao ri mennang, “Passadiyako duwa ratu prajuri' sibawa pituppulo tentara makkinnyarang sibawa duwa ratu tentara mabbessi untu' joppa tetté aséra iyato wenniéwé lao ri Kaisaréa. Passadiyangeng towi anyarang untu' natonangi Paulus namutiwii sibawa salama' lettu ri Gubernur Féliks.” Naokina sure' iyaro komandangngé iya makkuwaéwé oninna, “Iya Malebbié Gubernur Féliks. Salama' polé ri Klaudius Lisias! Iyaé tauwé natikkengngi sining tau Yahudié nacéddé'pi nanaunoi mennang, rékko dé' upolé sibawa pasukakku, sibawa passalama'i; saba' uwéngkalingai makkedaé pabbanuwanai wanuwa Roma. Nasaba macinnaka missengngi aga sitongenna asalanna iya riteppuwangngéngngi, utiwini lao ri Mahkama Agamana mennang. Manessani dé'gaga napogau' iya sitinajaé rihukkung sibawa pahukkungeng maté iyaré'ga ritarungku. Iya nateppuwangngéngngi mennang banna engka assisumpungenna sibawa hukkung-hukkung agamana mennang. Nainappa ripaissengika engka rancana maja polé risining tau Yahudié lao ri aléna. Jaji matteruni ukiring lao ri Bapa' Gubernur. Napurani usuro sining tau iya tenre'éngngi tiwii iyaro napputanekengngé lao ri Bapa'.” Napajoppani iyaro anggota-anggota tentaraé tugasna. Nalani mennang Paulus nanatiwii iyaro wennié lettu ri Antipatris. Pappa bajanana naleppessanni mennang tentara makkinnyarangngé patterui joppana sibawa Paulus, na aléna mennang lisuni ri markas-é. Wettunna iyaro tentara makkinnyarangngé lettu ri Kaisaréa, napalettu'ni iyaro sure'é ri gubernur-é, nainappa nabbéréyang Paulus lao ri aléna. Purana nabaca sure'é iyaro gubernur-é, makkutanani ri Paulus polé kégi assalenna. Wettunna naisseng makkedaé Paulus poléi ri Kilikia, makkedani, “Madécénni! Maéloka paréssai parakaramu, rékko sining tau iya mapparapekengngékko lettu'ni kuwaé.” Nainappa napparéntang kuwammengngi naritahang Paulus ri laleng saorajana Hérodés. Limangngesso ri munrinna, laoni Imang Lompoé Ananias sibawa sining pamimpinna Yahudié ri Kaisaréa silaong séddi pangacara iya riyasengngé Tértulus. Mangoloni mennang ri Gubernur Féliks sibawa pangoloi napparapekengngé mennang lao ri Paulus. Wettunna Tértulus riyobbi liyolo, nateppuni Paulus makkuwaé, “Bapa', Gubernur Iya Malebbié! Ri yawa paréntana Bapa' amangngi wanuwatta. Sibawa polé ri apanrénna Bapa' maéga pappédécéng ripogau' untu' bangsata. Iya manennaro tuli ritarimai sibawa mattarima kasi sibawa pappakaraja iya kaminang matanré muwi kégi. Iyakiya kuwammengngi aja' natabbé maéga wettunna Bapa', uwéllauwi tennapodo naéngkalingai Bapa' pappotane'ta iya maponco'éwé. Rilolongengngi iyaé tauwé pangacau iya mabbahayaé. Kégi-kégi paompoi arukkang ri yelle'na sining tau Yahudié sibawa mancajiwi pamimpinna gerakang tau Nazarét-é. Mala purani nacoba untu' panajisi'i Bolana Puwangngé, iyakiya ritikkengngi. [Akkattata maéloki madélékiwi situru hukkunna agamata. Iyakiya nasittaiki komandang Lisias, sibawa napparéntangngi kuwammengngi sining tau mapparapekengngéngngi ripangoloi ri Bapa'.] Rékko naparéssai Bapa' iyaé tauwé, aléna Bapa' méngkalingai matu polé ri aléna atongengenna iya maneng ritenrekengngéngngi.” Sining tau Yahudié kuwaro maccowéto tenre'i Paulus sibawa pattongengngi sininna iya napowadaé Tértulus. Nainappa iyaro gubernur-é mabbéré tanra-tanrang lao ri Paulus makkedaé'weddinni mabbicara. Nakkeda Paulus, “Uwisseng Bapa' mattaut-taunni ittana mancaji hakinna wanuwaé. Iyanaro saba'na masennang pappéneddikku bélai aléku ri yolona Bapa'. Wedding aléna Bapa' salidikiwi makkedaé dé' nalebbi seppulo duwa esso labe'é laoka ri Yérusalém untu' massempajang. Nadé' naengka napoléika iyaro sining tau Yahudié mappangéwang sibawa muwi séddi tau iyaré'ga paddeppungeng tau untu' pakangka akacaungeng muwi ri Bolana Puwangngé iyaré'ga risining bola assompangngé iyaré'ga kégi-kégi ri laleng kotaé. Dé'to naulléi mennang pabuttiwi sining nattenrekengngé iya napangoloé ri Bapa' passalekku. Mémeng harusu' uwangakui lao ri Bapa' makkedaé usompai Allataalana néné-nénéta situru nappagguruwangngé Yésus iya nangga'é mennang sala. Iyakiya uwatepperi mupi iya manenna tarokié ri laleng Kitta'na Musa sibawa Kitta'na Nabi-nabié. Pada-pada mennang, mappunnai tokka paddennuwang ri Allataala makkedaé sininna tauwé tuwoi matu paimeng polé ri amaténgngé – sining tau makessingngé, iyaré'ga sining tau majaé! Iyanaro saba'na nauwakkuraga senna', kuwammengngi namapaccing atikku lao ri Allataala sibawa mapaccing lao ri rupa tauwé. Labe'nana siyagangngaré taung dé' uwonro ri Yérusalém, lisuka kuwaro untu' tiwi bantuwang dowi lao ri bangsaku sibawa untu' makkasuwiyangeng akkarobangeng lao ri Allataala. Wettunna upogau' iyaro, naruntu'ka mennang ri Bolana Puwangngé, wettu purakuna upacara mappépaccing alé. Dé'gaga tau maéga sibawakka, sibawa dé'to gaga arukkang kuwaro iyaro wettué. Banna engka siyagangngaré tau Yahudi kuwaro polé ri daéra Asia. Sitongenna mennang ritu harusu' engka kuwaé untu' pangoloi pappotane'na mennang lao ri Bapa', rékko engka séuwa napotanekekka. Iyaré'ga leppessanni siya aléna sining tauwéwé powadai ja aga nalolongeng mennang ri iyya wettukku ri Mahkama Agamaé. Banna warékkada séddiéwé bawang napoléi mennang upowada ri yolona mennang, iyanaritu: Riadélékika iyaé essoé saba' mateppe'ka makkedaé sining tau maté ripatuwoi matu paimeng.” Nainappa Féliks iya maégaénna naisseng passalenna pappagguruwanna Yésus, natutu'ni iyaro sidang parakaraé. Adanna, “Maéloka pettuiwi iyaé parakaraé, rékko engkani komandang Lisias.” Nainappa naparéntang parawira iya tanggung jawa'éngngi iyaro Paulus kuwammengngi natette natahang Paulus, iyakiya nawéréngngi céddé alaluwasang sibawa napalalona sellao-sellaona mpéréngngi aga napparelluwangngé. Siyagangngesso rimunrinna poléni Féliks, risilaongeng ri bainéna iya riyasengngé Drusila, séddiwi tau Yahudi. Nainappa nasuro tauwé Féliks malai Paulus, nainappa naéngkalinga Féliks Paulus mabbicara passalenna mateppe'é lao ri Yésus Kristus. Iyakiya wettunna Paulus napatteru bicaranna passalenna alempurengngé sibawa tahangngi napessué sibawa passalenna pahukkungengngé ri Esso Kiyame', métauni Féliks nakkeda, “Weddinno lao makkekkuwangngé. Maéloka mobbisiko paimeng rékko engka kasempatang.” Iyaro wettué mamménasai Féliks lolongeng matu dowi polé ri Paulus. Iyanaro saba'na nakkolik-koling nasuro tauwé malai Paulus untu' sipabbicara aléna. Labe'nana duwattaung Perkius Féstus sulléiwi Féliks selaku gubernur. Nasaba maéloi Féliks malai atinna sining tau Yahudié, naleppessangngi Paulus ri laleng tarungkué. Tellungngesso lettu'na Féstus ri daéraéro, laoni ri Yérusalém polé ri Kaisaréa. Kuwaro sining kapala imangngé sibawa sining pamimpinna Yahudié mapparapekengngi Paulus ri aléna. Matteru-teruni mennang napalécé Féstus kuwammengngi napolé akessingeng atinna lao ri mennang, maéloi suroi tauwé tiwii Paulus ri Yérusalém; saba' masséddini mennang untu' mpunoi ri tengnga laleng. Iyakiya mappébaliwi Féstus, “Ritahangngi Paulus ri Kaisaréa; na iyya dé'to namaitta ulisu kuwaro. Jaji, leppessanni siya sining tomariyoloé ri yelle'mu lao sibawa iyya ri Kaisaréa sibawa mapparakarakangngi kuwaro, rékko mémeng engka asalang pura napogau'.” Monronana ri Yérusalém kira-kira aruwa iyaré'ga seppulo essona, lisuni Féstus ri Kaisaréa. Pappa bajana pakangkani sidang pangadilang sibawa mapparéntangngi kuwammengngi naritiwi Paulus mangolo. Wettunna lettu Paulus, sining tau Yahudié iya lettu'énna polé ri Yérusalém tettong mattulilingiwi, sibawa mappammula pauwi sining natenrekengngéngngi Paulus iya matane'é. Iyakiya dé' naulléi buttikangngi sining nattenrekengngéro. Nakkeda Paulus bélai aléna, “Dé'gaga séuwa upogau' iya salaé lao ri hukkunna Musa iyaré'ga lao ri Bolana Puwangngé iyaré'ga lao ri Kaisar Roma.” Iyakiya maéloi Féstus malai atinna tau Yahudié. Nakkutana lao ri Paulus, “Maélokoga lao ri Yérusalém untu' riyadéléki kuwaro ri yoloku sibawa passalenna sining nattenrekengngéro?” Nappébali Paulus, “Tettokka makkekkuwangngé ri yolona mahkama Kaisar Roma; na ri onrongngénnaro harusu'ka riadéléki. Naisseng aléna Bapa' makkedaé dé' upassala lao ri tau Yahudié. Rékko majjalékkaika hukkung sibawa pogau' séuwa iya sitinajaé rihukkung sibawa pahukkungeng maté, macenning atikku maté. Iyakiya rékko sining natteppuwangngé mennang dé' natongeng, dé'gaga séddi tau wedding mabbéréyakka lao ri mennang. Uwéllauwi riadélékika ri pengadilanna Kaisar!” Puranana barunding sibawa penaséha'-penaséha'na, makkedani Féstus, “Muwéllauwi riadéléki ri pengadilanna Kaisar, jaji harusu'ko lao mangolo ri Kaisar.” Dé' namaitta ri munrinna, Arung Agripa sibawa Berniké engkani polé ri Kaisaréa untu' passalama'i Féstus. Monronana kuwaro siyagangngaré esso, napakatajanni Féstus parakarana Paulus lao ri Arung Agripa. Makkedai Féstus, “Engka kuwaé séddi tahanang nasalai Féliks. Wettukku engka ri Yérusalém, sining kapala imangngé sibawa sining pamimpinna Yahudié mapparapekengngi mennang iyaro tauwé sibawa méllauwi kuwammengngi upakennaiwi pahukkungeng. Iyakiya mappébalika makkedaé tau Romaé dé' nabiyasa mabbéréyang makkuwaro bawang séddié tau riteppu untu' rihukkung, rékko iyaro tau riteppué dé'pa nasiyolong sibawa sining tau iya teppuéngngi sibawa riwéréng kasempatang untu' bélai aléna. Jaji wettunna mennang lao kumaiyé, dé'na uwattajeng maitta. Pappa bajana matteruka pakangka sidang pengadilang sibawa mapparéntangngi iyaro tauwé ritiwi mangolo. Wettunna sining tau tenre'éngngi tettong powadai natteppuwangngé mennang, dé'gaga séuwa anu maja napowada pada-pada upikkiri'é maélo napowada mennang. Sisala pallolongengngi bawang mennang passalenna agamana sibawa passalenna séddié tau riyasengngé Yésus. Iyaro tauwé maténi, iyakiya mattedde'i Paulus makkedaé tuwoi iyaro tauwé. Nasaba dé' upahangngi pékkugi wedding lolongeng pappakatajang passalenna parakaraéro, makkutanaka lao ri Paulus – maéloiga lao ri Yérusalém sibawa diadéléki kuwaro nasaba parakaraéro. Iyakiya naéllauwi Paulus ménré banding; naéllauwi kuwammengngi tette'i monro ri tahanangngé narapi parakarana ripettui ri Kaisar. Rimakkuwannanaro uwapparéntangngi kuwammengngi naritahang matteru, narapi lolongekka kasempatang untu' kiringngi lao ri Kaisar.” Namakkeda Agripa lao ri Féstus, “Macinna tokka méngkalingai iyaro tauwé.” Nappébali Féstus, “Baja weddingngi taéngkalinga Bapa'.” Pappa bajana poléni Agripa kuwaéttopa Berniké sibawa upacara maraja. Nauttamakini mennang onrong sidanna pengadilangngé silaong sining tau marajana tentaraé sibawa sining tomariyoloé ri kotaéro. Nasaba paréntana Féstus, ritiwini Paulus muttama'. Nainappa makkeda Féstus, “Datu Agripa sibawa sining hadéré'é! Iyaé tauwé riyapparapekengngi ri iyya ri sininna bangsa Yahudié, muwi iya engkaé ri Yérusalém iyaré'ga engkaé kuwaé. Natuntu'i mennang sibawa gora-gora makkedaé dé' nasitinaja rileppessang tuwo. Iyakiya dé'gaga ulolongeng muwi séuwa iya puraé napogau' iya weddingngé rihukkung sibawa pahukkungeng maté. Sibawa nasaba aléna pura méllauwi parakarana riadéléki ri pengadilanna Kaisar, purani upettui untu' kiringngi lao ri Kaisar. Iyakiya dé' uwappunnai séuwa pappakatajang matedde'é passalenna aléna untu' riyoki ri laleng sure'ku lao ri Kaisar. Iyanaro saba'na upangoloi ri Bapa'-bapa' maneng, lebbi-lebbipi lao ri Iya Malebbié Datu Agripa! Akkattaku iyanaritu kuwammengngi napurana apparéssangngéwé, engkana wedding uwoki. Saba' manuru' pérasakku, dé' nasipato' kiring séddi tahanang sibawa dé' naripannessa asalang-asalang iya riteppuwangngéngngi.” Nakkeda Agripa lao ri Paulus, “Ripalaloko mabbicara untu' bélai alému.” Nanakkani limanna Paulus nainappa mabbicara bélai aléna makkuwaéwé, “Iya Malebbié Datu Agripa! Maupe' senna'ka usedding weddikka bélai aléku ri yolona Datu passalenna iya maneng nateppuwangngékka tau Yahudié; lebbi-lebbipi nasaba manessai naisseng Datu ade'-ade'na sibawa masaala-masaalana tau Yahudié. Rimakkuwannanaro, uwéllauwi tennapodo Datu méngkalingai pappakatajakku sibawa sabbara'. Sininna tau Yahudié naisseng pékkugi atuwo-tuwokku mappammulai kalloloku. Naisseng mennang makkedaé sipongekku mancaji kallolo, tuwoka ri yelle'na bangsaku ri Yérusalém. Maittani mennang naissekka. Rékko maéloi mennang, naullé mennang mabbéré asabbiyang makkedaé mappammulai pammulanna tuwoka selaku tau Farisi sibawa turusiwi sininna peraturanna iya kaminang marejjingngé ri laleng agamata. Na makkekkuwangngé tettokka kuwaé untu' riadéléki nasaba mateppe'ka ri assijancingeng naébbué Allataala lao ri néné-nénéta. Iyatoro assijancingengngé namménasai iya seppulo duwa suku bangsa Israélié, angkanna massompa lao ri Allataala esso wenni. Na mala nasaba mateppe'ka ri assijancingengngéro, Datu Iya Malebbié, naripassalaka risining tau Yahudié. Magi saudara-saudara sining tau Yahudié dé' mulléi mateppe' makkedaé Allataala patuwoi paimeng tau maté? Riyolo mappallolongeng tokka makkedaé harusu'ka pogau'i sini-sininnaé untu' méwai Yésus iyaro polé ri Nazarét. Na mémeng iyanaro pura upogau' ri Yérusalém. Nasibawang sure' kuwasa polé ri kapala-kapala imangngé, maéga tau matinulu ri Allataala pura uputtama ri laleng tarungkué. Mala maccowé tokka situjuiwi makkedaé pakennaiwi mennang pahukkungeng maté. Maléwe' senna' usissa mennang risining bola assompangngé, passai mennang kuwammengngi nassakkarengngi aga natepperiyé. Makkuwamani pellana atikku lao ri mennang, angkanna laoka ri kota-kota laingngé untu' lellungngi mennang kuwaro.” “Na akkatta makkuwaéttonaro nautiwi sure' kuwasa polé ri kapala-kapala imangngé naulao ri Damsyik. Na wettukku ri tengnga laleng, kira-kira tangasso, Datu Iya Malebbié, uwitai cahayaé polé ri langié iya lebbi cakkaé naiya mata essoé. Iyaro cahayaé mattappai mattulilingika sibawa mattulilingiwi sining tau iya uwéwaé silaong joppa. Mabuwang manekki ri tanaé. Nainappa méngkalinga séuwa sadda makkeda lao ri iyya ri laleng basa Ibrani, ‘Saulus, Saulus! Magi mumatteru-teru mupa panrasa-rasa-Ka? Mupéneddingiwi matu peddié, rékko matteru mupo méwai pappimpin-Na iya mancajiyé Puwammu.’ Nauwakkeda, ‘Niga Iko, Puwang?’ Nappébali Puwangngé, ‘Iyya'na Yésus iya mupanrasa-rasaé. Oto'no namutettong! Uwappaitangngi aléku ri iko sibawa akkatta untu' makkako mancaji pattumanik-Ku. Harusu'ko mabbirittangngi lao ri tau laingngé aga iya muwitaé iyaé essoéwé passalenna Iyya sibawa passalenna aga iya maéloé Ujéllorekko matti ri wettu mangoloé matu. Maéloka paleppe'ko polé ri bangsa Israélié sibawa bangsa-bangsa laingngé iya tenniyaé Yahudi. Maélo-Ka suroko lao ri mennang untu' pakkitai matanna, kuwammengngi nassu polé ri pettangngé nanauttama ri laleng cakkaé; kuwammengngi naleppe polé ri pangarunna Ibillisi'é, narikuwasai ri Allataala. Na ri laleng mateppe'na ri Iyya, riyaddampengengngi matu dosa-dosana sibawa mancajiwi matu mennang anggotana umma'na Allataala iya ripilé.’ ” “Rimakkuwannanaro, Datu Agripa, tuli makkuragaka turusiwi pakkitang iya puraé utarima polé ri Allataalaro. Terus terakka powadangngi sining tauwé makkedaé harusu'i mennang toba' polé ri dosa-dosana sibawa mabbéréyangngi aléna lao ri Allataala enrengngé mappaitangngi ri laleng atuwo-tuwonna mennang makkedaé toba'ni mennang polé ri dosa-dosana. Upowadangngi iyaro gau'é bunge'-bunge'na ri Damsyik, nainappa ri Yérusalém sibawa sininna Yudéa sibawa ri yelle'na tau tenniyaé Yahudi. Nasaba iyanaro nanatikkekka sining tau Yahudié ri Bolana Puwangngé sibawa makkuragana mpunoka. Iyakiya lettu iya essoéwé nalinrungika Allataala, angkakku weddikka tettong kuwaé mabbéréyangngi asabbiyakku lao ri sininna tauwé – battowa iyaré'ga baiccu. Aga iya upowadaéwé dé' nasilaingeng naiya puraé naboto nabi-nabié sibawa Musa; iyanaritu makkedaé Arung Pappassalama' iya najjanciyangngé Allataalaro harusu'i manrasa-rasa, sibawa mancajiwi tau bunge' tuwo paimeng polé ri amaténgngé; kuwammengngi nallalengi iyaro naulléi mabbéré tajang – iyanaritu asalamakeng – muwi lao risining tau Yahudié muwi lao risining tau tenniyaé Yahudi.” Ri wettu mabbicarana Paulus bélai aléna, gorani Féstus, “Jangennoga Paulus! Pangissengemmu iyaro maégaé pajangekko!” Iyakiya mappébaliwi Paulus, “Dé' ujangeng, Iya Malebbié. Ada-ada iya upowadaéro tongeng sibawa massu polé ri pikkirang madécéngngé. Aléna Datu Agripa naisseng madécéng gau'-gau'éro. Iyanaro saba'na naubarani mabbicara ri yolona Datu sibawa terus terang. Mateppe'ka dé' séddi polé ri gau'-gau'éro iya dé'é naissengngi Datu, saba' iya manennaro dé' nakajajiyang risining onrong iya tassubbué. Iya Malebbié Datu Agripa, mateppe'ga Datu aga napowada nabi-nabié? Uwaseng mateppe' Datu!” Nainappa makkeda Agripa lao ri Paulus, “Muwasengngiga magampang pancajika tau Kristéng ri laleng wettu dé'é namaitta?” Nappébali Paulus, “Ri laleng wettu dé'é namaitta iyaré'ga ri laleng wettu maittaé, massempajakka lao ri Allataala kuwammengngi na Datu sibawa sininna Bapa'-bapa' iya méngkalingaékka essoéwé weddingngi mancaji pada-pada iyya – sangadinna iyaé balenggué!” Paccappurenna Datu Arungngé, Gubernur-é Berniké, enrengngé sininna laingngé tettonni. Engkanana ri saliweng, makkedani mennang séddié lao ri laingngé, “Iyaé tauwé dé'gaga aga-aga napogau' iya sitinajaé rihukkung sibawa pahukkungeng maté iyaré'ga ritarungku.” Nakkeda Agripa lao ri Féstus, “Iyaé tauwé weddinni rileppessang, akkalarapanna dé' natuntu'i parakarana riadéléki ri pengadilanna Kaisar.” Puranana ripettui makkedaé harusu'ki sompe' lao ri Italia, Paulus sibawa siyagangngaré tau tahanang laingngé riyabbéréyanni lao ri Yulius, parawira pasukang tentara Roma iya riyasengngé “Résiméng Kaisar”. Tonang kappala'ki ri Adramitium, nainappa sompe'ni sibawa kappala'éro iya sadiyaénna sompe' ri pelabuhang-pelabuhang ri daéra Asia. Aristarkhus, séddiwi tau Makedonia iya polé ri Tésalonika, sompe' towi sibawakki. Pappa bajana lettu'ni ri Sidon. Makessing senna'ni rigaukengngi Paulus ri Yulius. Ripalaloi lao célléngiwi sellao-sellaona kuwammengngi weddingngi mennang mpéréngngi aga napparelluwangngé. Polé kuwaro ripatteruni sompeketta. Nasaba siduppai angingngé kappala'é, sompe'ki mabbiring pottanang ri pulo Siprus iya mallinrungngé céddé polé ri angingngé. Nainappa molai tasi' siyolongngé Kilikia sibawa Pamfilia nalettu' ri Mira ri wanuwa Likia. Kuwaniro iyaro parawiraé runtu séddi kappala polé ri Aléksandria iya maéloé sompe' lao ri Italia. Nanapalétté'ni ri kappala'éro. Siyagangngaré esso ittana sompe'ki madoddo senna', nasipanrasa-rasaki angkanna lettu sibbéla kota Knidus. Nasaba maja mupi angingngé, dé' nariyullé patterui sompeketta ri akkattata mammulangngé. Sompe'ni ri yattanna pulo Kréta laloiwi Tanjong Salmoné kuwammengngi mallinrukki kuwaro polé ri angingngé. Nasipanrasa-rasani sompe' mattuttung wirinna puloéro gangkanna lettu'ki riséddié onrong riyasengngé Pelabuhang Gello, dé' nasiyaga bélana polé ri kota Laséa. Iyaro wettué labe'ni Esso Maraja Assidaméngeng tau Yahudié. Ateddéngenni maéga wettu, angkanna tenniyana wettunna untu' sompe' sibawa amang. Rimakkuwannanaro mappangajani Paulus lao ri mennang, “Saudara-saudara, manuru' pallolongekku, bahaya senna' rékko sompe'ki matteru. Lolongekki matu aroging battowa tenniya bawang luretta sibawa kappala'ta, iyakiya nyawata wedditto teddéng.” Iyakiya iyaro parawiraé lebbi mateppe'i ri jurumudié sibawa kapiténg kappala'é naiya ada-adanna Paulus. Pelabuhangngé kuwaro mémeng maja untu' monro kappala-kappala'é kuwaro ri wettu keccé'é. Rimakkuwannanaro maégangngéngngi ana' kappala'é situjuiwi untu' sompe' paimeng salaiwi iyaro pelabuhangngé nasaba maéloi mennang makkuraga lettu ri Féniks sibawa monro gangka wettu keccé'é. Féniks iyanaritu pelabuhang ri Kréta iya mangoloé ri yajang yattang sibawa yajang manorang. Iyaro wettué mangirii anging polé yattangngé sibawa madoddo. Nasemmi ana' kappala'é naulléi mennang sompe' paimeng. Jaji nakkani balangona nasompe mattuttung wirinna pulo Kréta. Iyakiya dé' namaitta ri munrinna poléi anginrajaé – iyanaritu anging iya riyasengngé anging Alau Manorang – mangiri polé ri pottanangngé, nanaunrui kappala'ta. Nasaba dé' nakkullé sompe' matteru kappala'é méwai angingngé, manyarani' bawang sibawa leppessangngi kappala'é mali natiwi anging. Mallinrukki céddé, wettutta lalo ri seddé yattanna pulo Kauda iya baiccu'éro. Sipanrasa-rasani kuwaro nariyullé kuwasaiwi sikocinna kappala'ta. Puranana ripaénré iyaro sikocié ri kappala'é, iyaro kappala'é ripakkasse'ni sibawa siyoi tulu mattemmuiwi iyaro kappala'é. Nasaba métaui tasséngké ri kessi'é ri Sirtis iya macéné'é, ripanonnoni sompe'é nainappa rileppessang kappala'é maccowériwi angingngé. Majjallo'ni matteru angingngé, angkanna pappa bajana mammulani ribuwang lurenna kappala'é ri tasi'é. Esso rappinasi iyaro ana'-ana' kappala'é nabbéyassi pakkakkasa'-pakkakkasa'na kappala'é ri tasi'é sibawa limanna muto mennang. Siyagangngaré esso ittana dé' taita mata esso sibawa wéttowing, na angingngé matteru-terui majjallo. Angkanna lennye'ni amménasatta untu' salama'. Siyagangngaré wettu ittana iyaro sining tauwé dé' nanré. Nalaona Paulus tettong ri tengnga-tengngana mennang nakkeda, “Saudara-saudara! Rékko muturusiwi pangajaku sibawa dé' tasompe polé ri Kréta, dé' tapéneddingiwi iya manenna asolangengngéwé sibawa arogingngéwé. Iyakiya muwi makkekkuwangngé uwéllauwi sibawa masero kuwammengngi mupésennangiwi atimmu. Dé' séddi polé ri Saudara iya maté matu; banna ateddéngekki matu iyaé kappala'é bawang. Saba' onna' wennié malaéka' polé ri Allataala iya usompaé, iyanaritu Allataala iya mappunnangiyékka, poléi ri iyya. Makkedai iyaro malaéka'é, ‘Aja' mumétau, Paulus! Saba' mangoloko matu ri Kaisar. Sibawa nasaba akessingeng atinna Allataala ri iko, sininna tau iya muwéwaé sisompereng salama'i matu nasaba iko.’ Rimakkuwannanaro, Saudara-saudara, sitinajai Saudara pakaloppoi atinna! Saba' mateppe'ka lao ri Allataala makkedaé iya manennaro kajajiyangngi matu pada-pada iya Napowadaé lao ri iyya. Iyakiya rappé'ki matti ri wirinna séuwaé pulo.” Ri wenni maseppulo eppana taronak-konanni ri Tasi' Adria. Kira-kira tengnga benninna napérasani ana' kappala'é maddeppériwi pottanangngé. Jaji loro'ni mennang tulu sibawa batu untu' gangkai lamunna tasi'é. Naissenni iyaro onrongngé lamunna nawéki patappulo météré. Dé' namaitta ri munrinna nagangkasi mennang paimeng, nanalolongenni ri onrongngéro lamunna tasi'é nawéki telluppulo météré. Métauni mennang tasséngké ammai matu kappala'é ri batu karangngé, jaji panonnoni mennang eppa balango ri poncinna kappala'é, nainappa mamménasa rékko weddingngi namasitta élé. Coco'-coco'ni sining ana' kappala'é coba-cobai lari polé ri kappala'éro. Panonnoni mennang sikoci ri tasi'é pada-pada rékko maéloi panonno balango polé ri yolona kappala'é. Iyakiya makkedai Paulus lao ri parawiraé sibawa sining prajuri' engkaé ri kappala'éro, “Rékko iyaro ana' kappala'é dé' naonro ri kappala'é, dé' maneng naulléi Saudara salama'.” Rimakkuwannanaro iyaro sining prajuri'é narette'i tuluna iyaro sikocié, angkanna mali iyaro sikocié. Ri wettu dé'napa na élé, nappétangngarenni Paulus kuwammengngi nanré maneng mennang. Makkedai Paulus, “Seppuloni eppa esso ittana idi maneng Saudara banna mattajeng bawang ri laleng keadaang métau nadé' aga-aga riyanré. Uwéllauwi manréki céddé. Makessing iyaro untu' Saudara, kuwammengngi mumawatang paimeng. Nasaba salama' manengngi Saudara sibawa dé'gaga akurangeng agi-agi.” Purana makkeda makkuwaro malani roti Paulus nainappa mattarima kasi ri Puwangngé ri yolona maneng mennang. Nainappa nabagé-bagé iyaro rotié, nananréi. Nassumange' manenna mennang paimeng sibawa maccowéto manré. Sininna iya engkaé ri kappala'éro engka duwa ratu pituppulo enneng tau. Puranana manré maneng situju genne'é, nabuwanni lureng gandonna ri tasi'é kuwammengngi namaringeng kappala'é. Matajanna essoé, naitani ana' kappala'é pottanangngé, iyakiya dé' naissengngi pottanang aga iyaro. Naitani mennang séuwa teluk sibawa wirinna. Jaji akkattana mennang maéloni pappottanangngi iyaro kappala'é kuwaro rékko naulléi. Narette'ni sining tulu balangoé nainappa naleppessang tallemme' iyaro sining balangoé ri tasi'é. Naleppessang toni tulu siyoéngngi golingngé. Nainappa paénré sompe' ri bagiyang yolona kappala'é kuwammengngi nairii anging iyaro kappala'é mattuju ri wiring. Iyakiya iyaro kappala'é tabbuttui ri kessi'é. Tasséngkéni bagiyang yolona nadé' nakédo, na bagiyang monri ancuru nakenna bombang raja. Sining prajuri'é ri kappala'éro manniya'ni mpuno manengngi tau tahanangngé, nasaba métaui mennang ajakké matu engka nangé lao ri pottanangngé sibawa lari. Iyakiya iyaro parawiraé napésangkaiwi niya'na mennanro nasaba maéloi passalama'i Paulus. Nasuroni sininna tau naullé nangé luppe riyolo' sibawa nangé lao ri wiring. Iya laingngé harusu'i maccinrola sibawa makkatenning risining papengngé iyaré'ga reppa' kappala'éro. Na iyanaro nallalengi nawedding manekki salama' lettu ri pottanangngé. Mappotanannana sibawa salama', nappai riisseng makkedaé iyaro puloé riyasengngi Malta. Pabbanuwana iyaro puloé mabessa senna' lao ri idi. Naduppai manekki mennang sibawa madécéng enrengngé napalluwakekki api nasaba mammulani teppa bosié sibawa makeccé'to. Paddeppungenni Paulus aju, nanataroi iyaro ajué ri apié. Ri wettu napogau'na iyaro, engka sikaju ula massu, nasaba pellana iyaro apié, nanaokkoi limanna. Wettunna pabbanuwana iyaro puloé naita iyaro ulaé taggattung ri limanna Paulus, makkedani mennang séddié lao ri laingngé, “Iyaé tauwé tentu pabbuno, saba' namuni leppe'ni polé ri abalaé ri tasi'é, Déwi Adélé'é dé' naleppessangngi tuwo.” Iyakiya nakkeppikengngi Paulus iyaro ulaé ri laleng apié sibawa dé' napéneddingiwi peddié muwi céddé. Mappikkiri'ni mennang dé'na namaitta naboro iyaro limanna Paulus nainappa tappa mabuwang namaté. Iyakiya mattajennana siyagangngaré ittana sibawa dé'gaga makalallaing kajajiyang ri aléna, tappinrani pikkiranna nainappa makkeda mennang makkedaé Paulus iyanaritu déwata. Dé' namabéla polé ri onrongngéro engka tana appunnangenna Publius, kapala sukunna puloéro. Namasennanna atinna tarimaki selaku topoléna tellungngesso ittana. Iyaro wettué malasai ambo'na, nakennai semmeng sibawa jamba-jambang. Laoni Paulus mitai ambo'na iya malasaéro nainappa massempajang sibawa palénne'i limanna ri yasé'na angkanna majjappa. Nasaba iyaro kajajiyangngé, sininna tau iya malasaé ri puloéro laoni ri Paulus, naripajjappa. Mabbéréni mennang maéga hadiya, na wettunna maélo sompe', tiwini mennang ri kappala'é sininna iya riyapparelluwangngé untu' joppatta. Tellumpulennana kuwaro, joppani polé ri puloéro tonang riséddié kappala polé ri Aléksandria iya mallabué ri puloéro ri wettu keccé'é. Iyaro kappala'é pakéi lambang, “Déwata Dénru Kastor sibawa Poluks.” Mallabuni ri kota Sirakusa, sibawa monrona kuwaro tellungngesso. Polé kuwaro sompe'ki mattuttung wiring tasi' lettu ri kota Régium. Pappa bajanana mammulani miri angingngé polé ri yattang, angkanna ri laleng duwangngesso lettu'ni ri kota Putioli. Kuwaniro siruntu' siyagangngaré tau iya mateppe'é ri Yésus, nasaba naobbiki mennang, monroni sibawa mennang siminggu ittana. Nainappaki joppa lao ri Roma. Saudara-saudaraé ri Roma iya mateppe'é ri Yésus naéngkalingani karébatta, angkanna poléni mennang lettu ri Pasa Apius sibawa Passanggarahang Tellué untu' duppaiki. Wettunna Paulus siruntu' mennang, mattarima kasi'ni ri Allataala sibawa masse'na atinna. Wettunna lettu ri Roma, ripalaloni Paulus monro alé-alé sibawa rijagai riséddié prajuri'. Labe'nana tellungngesso naobbini Paulus ponggawa-ponggawana tau Yahudié ri onrongngéro. Maddeppungennana mennang, makkedani lao ri mennang, “Saudara-saudara! Dé'gaga asalakku lao ri bangsata, iyaré'ga majjalékkai ade' abiyasatta iya ritarimaé polé ri néné-nénéta. Namuni makkuwaro ritikkekka ri Yérusalém sibawa riyabbéréyang lao risining tau Romaé. Puranana riparéssa parakaraku, maéloni mennang paleppe'ka, nasaba manessani dé' upogau' muwi séddi asalang iya sitinajaé rihukkung sibawa pahukkungeng maté. Iyakiya nasaba méwai sining tau Yahudié, tarapassaka tuntu'i parakaraku riadéléki ri pengadilanna Kaisar Roma. Upogau'i iyaro tenniya nasaba mappunnaika séuwa pappotane' iyaré'ga maéloka mapparapekengngi bangsaku. Na iyanaro saba'na uwéllauwi sitaki untu' mabbicara-bicara sibawa iko; saba' ribalengguka, mala nasaba Pappassalama' iya namménasaiyé bangsa Israélié.” Nainappa makkeda mennang lao ri aléna, “Dé'pa gaga sure' ritarima polé ri Yudéa passalenna Saudara muwi séddi. Nadé'to gaga séddi Saudara polé kuwaro lao mai tiwi karéba passalenna Saudara iyaré'ga mabbicara maja passalenna Saudara. Iyakiya maélo tokki méngkalingai passalenna atepperenna Saudara, saba' idi manengngé purani riyéngkalinga tauwé cellai pappagguruwang iya muwaccowériyéro.” Napattentuni mennang sibawa Paulus séddi esso untu' siruntu'. Iyaro essoé maéga tau lao ri onronna Paulus. Mappammulai élé lettu arawéng Paulus pakatajangngi sibawa birittaiyangngi mennang biritta pékkugi passalenna Allataala mapparénta selaku Arung. Makkuragani Paulus untu' patepperiwi mennang ri Yésus, sibawa pakéi aya'-aya' polé ri Kitta'na Musa sibawa Kitta'na Nabi-nabié. Engka mateppe' lao ri aga iya napowadaé Paulus, iyakiya engkato dé' namateppe'. Nasalaini mennang onrongngéro sibawa pallolongeng iya siéwa-éwaé, puranana napowada Paulus iyaé lao ri mennang, “Mémeng coco' senna' aga napowada Rohna Allataala naolai Nabi Yésaya lao ri néné-nénému! Makkedai Rohna Allataala, ‘Laono powadangngi bangsaéwé: Matteru-teruko matu maréngkalinga, iyakiya dé' mupahangngi; matteru-teruko matu makkita, iyakiya dé' muwakkita. Saba' atinna iyaé bangsaé madonggoi, nalape'i daucculinna, sibawa nasampoi matanna. Saba' rékko dé' nakkuwaro, tentu makkitai matu matanna, maréngkalingai matu daucculinna, mappahangngi matu atinna, nalisu matu mennang ri alé-Ku,’ adanna Allataala, ‘Na-Upajjappai matu mennang.’ ” Paccappurenna makkedai Paulus, “Harusu'i naisseng Saudara-saudara makkedaé karéba passalenna asalamakengngé iya polé ri Allataala makkekkuwangngé purani riyabbirittang lao ri bangsa-bangsa laingngé iya tenniyaé Yahudi. Maéloi mennang turusiwi!” [ Purana Paulus makkeda makkuwaro, nasalaini onrongngéro iyaro sining tau Yahudié sibawa mappangéwang séddié sibawa laingngé.] Duwattaung ittana Paulus monro ri Roma, ri bola iya aléna muto séwai. Masennangngi tarimai sininna tauwé iya laowé célléngiwi. Baraniwi mabbirittangngi lao ri mennang passalenna pékkugi Allataala mapparénta selaku Arung, sibawa passalenna Puwatta Yésus Kristus. Napogau'ni Paulus iyaro sibawa laluwasa, tenrihalang-halangi. Saudara-saudara iya maneng ri Roma iya namaséiyé Allataala sibawa iya puraé naobbi Allataala untu' mancaji umma'-Na. Allataala pura piléka sibawa makkaka banna untu' mabbirittangngi Karéba Madécéng polé ri Allataala. Iyaro Karéba Madécéngngé purani najjanciyang Allataala témpo riyolo naolai nabi-nabin-Na sibawa purani riyoki ri laleng Kitta'é. Iyaro Karéba Madécéngngé passalennai Ana'na Allataala, Puwatta Yésus Kristus. Selaku tolino, wijannai Daud, iyakiya selaku ilahiwi ripannessai Ana'nai Allataala. Iyaro ripabuttiwi sibawa akuwasang dé'é padanna naolai tuwo-Na paimeng polé ri amaténgngé. Naola towi Aléna nawérékka Allataala pammasé mancaji rasul, kuwammengngi – untu' pakalebbii Kristus – upimpingngi sining tauwé polé ri sininna bangsaé kuwammengngi namateppe' sibawa matinulu. Iya nakkattaiyé sibawa sininna bangsaé iyanaritu ikoto iya engkaé ri Roma; pura tono riyobbi untu' mancaji umma'na Yésus Kristus. Iyaro saba'na uwokii iyaé sure'é lao ri iko. Tennapodo Allataala Ambo'ta sibawa Puwang Yésus Kristus mabbéré barakka sibawa asaléwangeng lao ri iko. Bunge'-bunge'na naolai Yésus Kristus, mattarima kasi'ka ri Allataala nasaba Saudara-saudara maneng; saba' purani naéngkalinga sininna linoé makkedaé mateppe' senna'ko lao ri Yésus Kristus. Tuli uwéngngerakko rékko massempajakka. Allataala sabbinna makkedaé aga iyaro upowadaé tongengngi. Aléna Allataala iya utumaningiyé sissukku atikku ri laleng mabbirittangngi Karéba Madécéngngé passalenna Ana'-Na. Uwéllauwi sibawa masero ri Allataala, tennapodo maéloi palaloka makkekkuwangngé célléngiko. Saba' macinna senna'ka méwako sita kuwammengngi weddikka mabbagé sibawa iko pammasé polé ri Rohna Allataala péwatangiko. Akkattaku iyanaritu nasaba pada mateppe'ni ri Yésus Kristus, naweddikki sisullé sipéwatangi. Saudara-saudara! Macinnaka kuwammengngi muwissengngi makkedaé maléwe' senna'ni maéloka célléngiko, iyakiya tuli engka halangenna. Macinnaka kuwammengngi na ri yelle'mu engka wassélé'na jama-jamakku pada-padato engkana wassélé'na jama-jamakku ri yelle'na sining tau tenniyaé Yahudi ri onrong-ngonrong laingngé. Saba' mappunnaika kewajibang lao ri sininna bangsaé: iya engkaénna ampé-ampéna sibawa dé'é, iya massikolaénna sibawa dé'éppa. Iyanaro saba'na umacinna senna' mabbirittangngi iyaro Karéba Madécéngngé lao ri iko iya monroétto ri Roma. Mateppe' senna'ka ri Karéba Madécéngngéro, nasaba iyaro karébaé iyanaritu awatangenna Allataala untu' passalama'i sininna tauwé iya mateppe'é; mula-mulanna tau Yahudié sibawa bangsa laingngétto. Saba' nasibawang iyaro Karéba Madécéngngé, nappaitangngi pékkugi carana assisumpungenna rupa tauwé sibawa Allataala mancaji madécéng paimeng; carana iyanaritu mateppe' ri Allataala, mappammulai pammulanna lettu paccappureng. Iyaro pada-padai tarokié ri laleng Kitta'é, “Tau mateppe'é ri Allataala angkanna assisumpungenna sibawa Allataala madécéng paimeng, iyaro tauwé tuwoi matu!” Polé ri surugaé nappaitangngi Allataala cai-Na lao ri sininna dosaé sibawa jana tolinoé, saba' jaé lawa-lawaiwi tolinoé untu' missengngi pappagguruwang tongengngé passalenna Allataala. Aga naullé misseng tolinoé passalenna Allataala manessani ri laleng ati marilalenna rupa tauwé, saba' aléna Allataala pura pannessai iyaro lao ri rupa tauwé. Sipongenna napancaji Allataala linoé, sipa'na Allataala iya dé'é napaita, iyanaritu keadaan-Na selaku Allataala sibawa akuwasan-Na iya mannennungengngé, weddinni najeppui rupa tauwé naolai sininna iya puraé napancaji. Jaji dé' sises-siseng rupa tauwé nappunnai alasang untu' pattongengngi aléna. Rupa tauwé naissengngi Allataala, iyakiya rupa tauwé dé' napakalebbii selaku Allataala sibawa dé'to natarima kasi ri Aléna. Sibalé'na mappikkiri'i rupa tauwé iya tessiratangngé; mapettanni atinna mennang. Napérasai mennang aléna mapanré, padahal madonggoi mennang. Tenniya Allataala iya mannennungengngé nasompa mennang, sangadinna dato'-dato' iya sinrupaé mahlu' weddingngé maté; iyanaritu rupa tauwé, manu'-manu'é, olokolo iya eppaé ajéna, sibawa olokolo makkalolo'é. Rimakkuwannanaro Allataala leppessangngi mennang rikuwasai ri cinnana atinna untu' pogau'i majaé, angkanna napogau'i mennang gau'-gau' iya macarépaé lao ri padanna muto. Allataala iya tongengngé, nasulléiwi mennang sibawa iya dé'é natongeng. Tenniya iya mappancajiyé sangadinna iya ripancajiyé ritu nasompa sibawa natumaningi mennang. Padahal iya mappancajiyé ritu harusu' ripoji mannennungeng! Aming. Nasaba napogau'i rupa tauwé makkuwaéro, nanaleppessangngi Allataala mennang turusiwi napessunna iya matunaé. Sining makkunrainna dé'na natattaré' lao risining worowané pada-pada biyasaé ri rupa tauwé, sangadinna tattaré'i lao ri padanna muto makkunrai. Makkuwatoro worowané; dé'na mennang nasisumpung makkunraié pada-pada biyasaé, sangadinna naéloriwi padanna worowané. Napogau'i worowané pangkaukeng mappakasiri-sirié lao ri padanna worowané, angkanna tarimai mennang pakkabale iya siratangngé sibawa pangkaukeng majaéro. Nasaba dé' namarasa parellu rupa tauwé missengngi Allataala, na Allataala leppessangngi pikkiranna mancaji masolang, angkanna napogau'i mennang gau'-gau' iya dé'é nawedding napogau' mennang. Pennoi atinna sibawa sininna majaé, iya dé'é natongeng, akebbongeng sibawa abenciyang; pennoi sibawa pangéloreng untu' mabbuno, mallaga, pabengnguwang sibawa peddi ati. Napoji bicarai tau laingngé, napoji tuna-tunaiwi asenna tau laingngé, matempoi mennang sibawa makurang ajara', iya benciyéngngi Allataala sibawa napoji mabboro. Macca mennang sappa cara-cara baru untu' pogau'i majaé. Naéwai mennang indo' ambo'na; dé' namaélo pahangngi tau laingngé; dé' namatinulu sibawa dé' najampangiwi padanna tau. Naisseng mennang, makkedaé manuru' hukkunna Allataala, tau iya pogau' manengngéngngiro sitinajai rihukkung maté. Namuni makkuwaro napogau' mutowi mennang gau'-gau'éro; sibawa mala nasitujui towi tau laingngé pogau'i. Rimakkuwannanaro, Saudara-saudara, niga Saudara angkanna Saudara maélo passalai tau laingngé? Dé' agaga nappunnai Saudara untu' méwaiwi alému! Saba' rékko Saudara passalai tau laingngé, padahal napogau' towi Saudara pangkaukeng iya pada-padaé mennang, tentu Saudara pakennai towi aléna pahukkungeng. Riissenni makkedaé rékko Allataala patatteppai pahukkungengngé ri yasé'na sining tau iya pogau'éngngi sining pangkaukeng pada-padaéro, iyaro apettunna Allataala tongengngi. Iyakiya iko, Saudara-saudara, mupogau' towi gau'-gau' iya muteppuwangngéngngi sining tau laingngé! Namupikkiri'i mulléi leppe' polé ri pahukkungenna Allataala? Iyaré'ga mupandang énténgngi asémpowanna Allataala sibawa asagénang atinna enrengngé asabbaraken-Na iya makkuwaéro loppona? Pasti muwisseng makkedaé Allataala mappaitangngi akessingeng atin-Na nasaba maéloi kuwammengngi mutoba' polé ri dosa-dosamu. Iyakiya matedde atiko sibawa dé' mumaélo tappinra. Rimakkuwannanaro alému muto mébbui pahukkungemmu pédé' tattamba tane'na ri Esso Kiyame', rékko nappaitanni caina Allataala sibawa patatteppai pahukkungemmu iya adélé'é. Saba' Allataala mpale'i matu tungke' tau situru pangkaukenna. Allataala mabbéréyangngi atuwong tongengngé sibawa mannennungengngé lao ri mennang iya mattunru-tunrué pogau' décéng untu' lolongeng iya malebbié, iya ripakarajaé sibawa mannennungengngé. Iyakiya sining tau iya pentingkangngéngngi aléna sibawa dé' namaélo matinulu ri Allataala, sangadinna maccowériwi iya majaé, iyaro sining tauwé riyacairi senna'i matu ri Allataala. Tungke' tau iya pojiyéngngi pagau'i majaé masussai matu sibawa manrasa-rasai mula-mulanna tau Yahudié, sibawato bangsa-bangsa laingngé. Iyakiya sininna tau iya pojiyéngngi pogau' makessingngé riwéréngngi matu alebbireng sibawa ripakarajai enrengngé asaléwangeng polé ri Allataala; mula-mulanna lao ri tau Yahudié, makkuwatoro lao risining tau bangsa laingngé. Saba' Allataala gaukengngi sininna tauwé pada-padai. Sining tau bangsa laingngé madosai tennaisseng hukkunna agama Yahudié. Jaji rihukkungngi risaliwenna hukkung-hukkungngéro. Iyakiya sining tau Yahudié madosai puranana naisseng hukkung-hukkungngéro; rimakkuwannanaro rituntu' towi matu mennang situru hukkung-hukkungngéro. Saba' simadécéngengngi paimeng tauwé sibawa Allataala, tenniya nasaba iyaro tauwé naissengngi hukkunna agama Yahudié, sangadinna nasaba napogau'i aga taroki ri laleng hukkung-hukkungngéro. Sining tau bangsa laingngé dé' naissengngi hukkung-hukkung agama Yahudié. Iyakiya rékko mennang nasaba élo aléna pogau'i aga napparéntang iyaro hukkung-hukkungngé, atinna mennang ritu mancaji hukkung lao ri mennang, namuni mennang dé' naissengngi hukkung agama Yahudié. Ampé-ampéna mennang mappaitangngi makkedaé aga napparéntang iyaro hukkung-hukkungngé tarokii ri laleng atinna. Ati marilalenna muto mennang pettuiwi gau'éro, saba' biyasa towi mennang ripasala sibawa biyasa towi ripattongeng ri pikkiranna. Makkuwaniro kajajiyangngé matti ri Esso puraé ripattenturo. Iyaro Essoé – manuru' Karéba Madécéng iya uwabbirittangngé – Allataala naolai Yésus Kristus, madélékiwi matu rahasiyana atié sibawa pikkiranna sininna tauwé. Iyakiya makkekkuwangngé pékkugi tosi Saudara-saudara? Mangakui Saudara tau Yahudi. Taggattungngi Saudara ri hukkunna agama Yahudié sibawa maloppo nyawana ri laleng assisumpungenna Saudara sibawa Allataala. Lolongengngi Saudara panunju'-panunju' polé ri hukkungngéro, angkanna muwisseng élona Allataala sibawa muwissenna pattentui kéga makessing. Mateppe'ko makkedaé Saudara iyanaritu pamimpinna tau butaé sibawa tajang lao ri mennang iya engkaé ri laleng pettangngé; Saudara gurunna sining tau iya matunaé ampé-ampéna, sibawa gurunna sining tau iya namadonggoé. Mateppe'i Saudara makkedaé ri laleng hukkunna agama Yahudié, nappunnaiwi Saudara sininna pangissengengngé sibawa pappagguruwang iya tongengngé. Mupaggurui tau laingngé; magi nadé' mupaggurui alému? Mupaggurui tauwé kuwammengngi aja' naénnau, padahal Saudara muto ménnau! Mupaggurui tauwé kuwammengngi aja' namalaweng, padahal Saudara muto malaweng! Mubenciwi barahalaé, padahal Saudara muto malai barab-barang polé ri bola-bola abbarahalangngé. Nattempo-tempowangngi Saudara makkedaé nappunnaiwi Saudara hukkunna Musa, padahal napakatunai Saudara Allataala ri laleng dé'na muturusiwi parénta-Na. Ri laleng Kitta'é tarokii makkuwaé, “Nasaba iko, sining tau Yahudié, naricarépai asenna Allataala ri yelle'na bangsa-bangsa laingngé.” Rékko matinului Saudara ri hukkunna agama Yahudié, sunna'na Saudara engkato akkégunanna. Iyakiya rékko dé' mulléi mapatoiwi gau'-gau' iya riyapparéntangngé ri laleng hukkung-hukkungngéro, sunna'na Saudara dé' sisenna nakkéguna. Rékko séddié tau tenniya Yahudi iya dé'é narisunna', turusiwi hukkunna agama Yahudié, dé'ga nangga'i Allataala selaku tau iya puraénna risunna? Nasining tau iya dé'é narisunna'ro napassalai matu tau Yahudié, saba' mappunnaiwi Saudara hukkung agama Yahudi sibawa risunna'na Saudara, iyakiya muwajjalékkaiwi hukkung-hukkungngéro. Dé' narisunna' mennang, iyakiya mala mennang ritu iya turusiyéngngi hukkunna agama Yahudié. Nasaba tau Yahudi iya tuléngngé tenniya iya asennaé bawang tau Yahudi; sibawa tau iya tonget-tongengngé risunna tenniya tau iya risunna'é secara mallahéreng bawang. Sibalé'na, séddié tau Yahudi iya tuléngngé iyanaritu tau iya atinnaé mannyawa Yahudi; sibawa sunna' tongengngé iyanaritu sunna' ri atié iya najamaé Rohna Allataala, tenniya iya riyokié ri laleng kitta'é. Tau sinrupaéro tarimai pappojiyang polé ri Allataala, tenniya polé ri rupa tauwé. Rékko makkuwaitu, aga sarona mancaji tau Yahudi? Sibawa aga gunana turusiwi peraturang sunna'é? Tentu maéga muwa gunana! Bunge'-bunge'na, nasaba lao ri tau Yahudié ritu Allataala mappaddettangengngi ada-adanna Allataala. Iyakiya pékkugi rékko sibagiyang tau Yahudié dé' namatinulu? Nassabarigaro na Allataala dé'to namatinulu? Tentu dé'! Nasaba manessani Allataala tuli tongengngi, namuni tungke' tauwé mabbelléi. Ri laleng Kitta'é tarokii, “Sitinajako pabutti tongeng ri laleng aga iya mupogau'é, sibawa pakalako wettummu riyadéléki.” Iyakiya rékko pédé' manessani adélékenna Allataala, nasaba pogau'ki iya dé'é natongeng, agana maélo tapowada? Makkedaé Allataala dé' naadélé' rékko nahukkukki? (Mémeng iyaé pakkutanaé siratangngi secara tolino.) Dé' sises-siseng! Saba' rékko dé' naadélé' Allataala, pékkugi naulléi madélékiwi linoéwé? Iyakiya narékko pangkaukeng iya dé'é natongeng, aga iya tongengngé passalenna Allataala pédé' paitai, angkanna ripojiwi, magi tau iya pogau'éngngi majaéro ripasala mupi selaku tau madosa? Na magi nadé' naweddikki makkeda, “Madécéngengngi pogau'ki majaé kuwammengngi mompoi décéngngé?” Mémeng engka sining tau iya pakatunaiyékka sibawa powadai makkedaé purana makkeda makkuwaro. Sining tau sinrupaéro siratangngi rihukkung ri Allataala. Aga tudangetta selaku tau Yahudi lebbi makessingngi naiya pangka'na sining tau bangsa laingngé? Dé' sises-siseng! Purani upowada makkedaé muwi tau Yahudié iyaré'ga bangsa laingngé, iya manenna rikuwasaini ri dosaé. Pada-pada iya tarokié ri laleng Kitta'é, “Dé' muwi séddi tau tongeng, dé' muwi séddi tau pahangngi sibawa dé' muwi séddi tau sompai Allataala. Sininna tauwé purani napabélai aléna polé ri Allataala; pusa manenni. Dé' muwi séddi tau pogau'i tongengngé; muwi séddi dé'to! Tigero'na mennang pada-padai tampung tattimpa'é. Bellé massolo polé ri lilana, sibawa témunna mennang mapporokeng pétenna, pada-pada moso ulaé. Pennoi témunna mennang sibawa tanro enrengngé mabbanta. Masitta jongkana mennang rékko maéloi mabbuno tau. Ancurekeng sibawa asussangngé, namporengngi mennang kégi-kégi. Butai mennang lao ri laleng asaléwangengngé, sibawa dé' nappakalebbi ri Allataala.” Riissenni makkekkuwangngé makkedaé sininna iya tarokié ri laleng hukkunna agama Yahudié, iyanaritu untu' sining tau iya engkaé riyawa paréntana hukkung-hukkungngéro. Rimakkuwannanaro dé' séddi tau mulléi mabbéré alasang muwi agi-agi sibawa sininna linoé naulléi Allataala tuntu'i. Saba' dé' séddi tau makkullé simadécéngeng Allataala nasaba iyaro tauwé nattuwangngi gau'-gau' iya engkaé ri laleng hukkunna agamaé. Sibalé'na iyaro hukkung-hukkungngé banna najjellokengngi lao ri rupa tauwé makkedaé madosai rupa tauwé. Iyakiya makkekkuwangngé Allataala pura mappaitangngi lalengngé pékkugi tolinoé nasimadécéngeng sibawa Allataala; na caranaro dé' gaga assisumpungenna sibawa hukkunna agama Yahudié. Kitta'-kitta'na Musa sibawa kitta'-kitta'na nabi-nabié mala pannessai gau'éro, makkedaé Allataala mpéréngngi pakkulléng tolinoé simadécéngeng sibawa Allataala, banna rékko rupa tauwé mateppe'i ri Yésus Kristus. Napogau'i Allataala iyaé untu' sininna tau iya mateppe'é ri Kristus; saba' dé'gaga assilaingenna: Sininna tauwé madosani sibawa mabélai polé ri Allataala iya maéloé passalama'i mennang. Banna nasaba pammaséna Allataala bawang iya nabbéréyangngé sibawa cuma-cuma; assisumpungenna tolinoé sibawa Allataala madécéngngi paimeng; carana iyanaritu: ripaleppe'i tolinoé ri Yésus Kristus. Allataala makkarobangengngi Yésus Kristus kuwammengngi na amatén-Naro ripannessai tolinoé leppe'i polé ri asalangngé rékko mateppe'i mennang ri Aléna. Napogau'i Allataala makkuwaéro untu' mappaitangngi adéléken-Na. Saba' ri wettu labe'é sabbara'i Allataala lao ri dosa-dosana tolinoé, angkanna dé' nahukkungngi mennang. Iyakiya makkekkuwangngé tinda'i lao ri dosaé untu' pabuttiwi adéléken-Na. Nasibawang caraéro, nappaitangngi makkedaé tongengngi Aléna; sibawa tungke' tau iya mateppe'é ri Yésus, Ripannessai selaku tau iya simadécéngengngé paimeng sibawa Allataala. Rimakkuwannanaro dé'na gaga alasang ri idi untu' mammingki-mingki. Magi nakkuwaro? Aga nasaba ripogau'i iya tarokié ri laleng hukkunna agama Yahudié? Tenniya. Iyakiya nasaba mateppe'ki. Saba' rippe'na iyanaritu makkuwaiyé: Ripannessai tauwé simadécéngeng paimeng sibawa Allataala, tenniya nasaba nattuwangngi aga iya tarokié ri laleng hukkunna agama Yahudié, sangadinna nasaba mateppe'i ri Yésus Kristus. Iyaré'ga iyaro Allataala, Allataalanai tau Yahudié bawang? Dé'ga na Allataalana towi bangsa laingngé? Ya, mémeng Allataalana towi bangsa laingngé! Saba' séddi bawang Allataala. Aléna ritu nakkulléngiwi sining tau Yahudié nasimadécéngeng paimeng sibawa Allataala nasaba mateppe'i mennang. Na Alénato nallalengi nasining tau bangsa laingngé simadécéngngi paimeng sibawa Allataala; iyatoro nasaba mateppe'i mennang. Aga iyaé bettuwanna makkedaé nasaba mateppe'ki ri Kristus, riyabbéyangngi hukkunna agama Yahudié? Dé' sises-siseng! Mala nasaba atepperettaro, naripakarajai hukkung-hukkungngéro. Rékko makkuwaitu, aga wedding ripowada passalenna Abraham, néné-nénéna bangsata? Pékkugi pangalamanna? Rékko gau'-gau' iya napogau'é nassabariwi Allataala natarimai selaku tau iya pésennangiyéngngi atinna Allataala, engka tona alasang ri aléna untu' mammingki-mingki. Iyakiya dé' naulléi mammingki ri yolona Allataala. Ri laleng Kitta'é tarokii, “Mateppe'i Abraham lao ri Allataala, nasaba atepperennaé ritarimai ri Allataala selaku tau iya pésennangiyéngngi atinna Allataala.” Tau majjamaé, tarimai gaji; na gajinna dé' nangga'i selaku séuwa pabbéré, saba' iyaro mémeng ha'na. Iyakiya engka tau iya dé'é nataggattung ri usahana aléna; nappaddettangengngi aléna ri Allataala iya pannessaéngngi tau madosaé leppe'i polé ri asalangngé. Situru teppe'naro nallalengiwi Allataala natarimai tauwéro selaku tau iya pésennangiyéngngi atinna Allataala. Makkuwatoro pallolongenna Daud; iyanaro saba'na nawérékkadaiwi salama' masennangngi lao ri tau iya ritarimaénna ri Allataala selaku tau iya pésennangiyéngngi atinna Allataala, sibawa dé'na Allataala najampangiwi sining pangkaukenna tauwéro. Makkeda makkuwaiyé Daud, “Masennangngi tau iya riyaddampengengngé sining asalanna sibawa dosa-dosana purani nakuburu' Allataala! Masennangngi tau iya dé'é narituntu' dosa-dosana ri Puwangngé!” Aga iyaé ada-ada masennangngé ripattujui bawang lao risining tau iya turusiyéngngi peraturang sunna'é bawang? Iyaré'toga lao ri tau iya dé'é naturusiwi peraturang sunna'é? Purani ripowada ri yolona, makkedaé ritarimai Abraham ri Allataala selaku tau iya pésennangiyéngngi atinna Allataala, nasaba mateppe'i Abraham ri Allataala. Namaraganna Allataala napannessai iyaro gau'é? Riwettu dé'napa iyaré'ga puranana Abraham risunna? Mémeng riwettu dé'napa narisunna', tenniya puranana. Ri munriwi risunna, sibawa iyaro sunna'na banna selaku tanrang makkedaé Allataala pura tarimai selaku tau iya pésennangiyéngngi atinna Allataala, nasaba mateppe'i ri Allataala. Ritarimai ri Allataala riwettu dé'napa naccowériwi peraturang sunna'é. Sibawa Abraham mancaji ambo'i secara baténg lao ri sininna tau iya mateppe'é ri Allataala, sibawa iya nassabariyé pura ritarimai ri Allataala selaku tau iya pésennangiyéngngi atinna Allataala, namuni mennang dé' naccowériwi peraturang sunna'é. Ambo' baténna towi Abraham untu' sining tau iya maccowériyéngngi peraturang sunna'é. Ambo' baténnai mennang tenniya bawang nasaba naccowériwi mennang peraturang sunna'é, iyakiya nasaba tuwo towi mennang sibawa mateppe'na lao ri Allataala, pada-padato Abraham riwettu dé'napa naccowériwi peraturang sunna'é. Majjanciwi Allataala lao ri Abraham sibawa wija-wijanna makkedaé iyaé linoé mancajiwi matu appunnangenna Abraham. Majjanci makkuwairo Allataala tenniya nasaba matinului Abraham ri hukkunna agama Yahudié, iyakiya nasaba mateppe'i lao ri Allataala angkanna ritarimai ri Allataala selaku tau iya pésennangiyéngngi atinna Allataala. Saba' rékko banna sining tau iya matinulué lao ri hukkunna agama Yahudié bawang iya tarimaéngngi matu aga najjanciyang Allataala, teppe'é lao ri Allataala dé' sises-sisenna nakkéguna, sibawa jancinna Allataala dé'tona nallise. Hukkunna agama Yahudié napapoléi pahukkungenna Allataala, iyakiya rékko dé'gaga hukkung-hukkung, dé'to gaga pelanggarang. Jaji iyaro jancinna Allataala siturui teppe'na tauwé lao ri Allataala. Mancajiwi iyaro séddi boro' lao ri sininna wija-wijanna Abraham makkedaé iyaro jancié riwéréngngi mennang selaku séddi pabbéré polé ri Allataala iya cuma-cumaé; tenniya bawang lao ri mennang iya matinulué lao ri hukkunna agama Yahudié bawang, iyakiya laoto ri mennang iya mateppe'é ri Allataala pada-pada Abraham mateppe' lao ri Aléna. Saba' Abraham iyanaritu ambo'ta maneng secara baténg. Saba' makkeda makkuwaiyé Allataala lao ri Abraham, “Purano upancaji ambo' untu' maéga bangsa.” Makkuwaniro Allataala mabbéréyangngi iyaro jancié lao ri Abraham. Namateppe'i Abraham lao ri Aléna. Aléna ritu Allataala iya patuwoéngngi tau maté; Alénato Allataala iya makkedaé bawang nanaébbui aga iya dé'é naengka mancaji engka. Abraham maddennuwang bawang matteru sibawa mateppe' namuni dé'na gaga paddennuwanna. Rimakkuwannanaro mancajiwi ambo'na maéga bangsa. Pada-pada tarokié ri laleng Kitta'é, “Mancajiwi matu maéga senna' wija-wijammu.” Iyaro Abraham wettué dé'na akkullénna mappunnai wijanna, saba' macowa senna'ni sibawa umuru'na nacawékini sératu taung; makkuwatoro Sara, bainénaro, manangngi. Iyakiya teppe'na Abraham dé' nakurang. Tette'i mateppe' sibawa dé' nakaléwa'-léwa' lao ri jancinna Allataala. Mala teppe'na pancajiwi tattamba mawatang, angkanna napojiwi Allataala. Mateppe' senna'i makkedaé naulléi Allataala pogau'i aga iya pura Najjanciyangngé. Iyanaro saba'na naritarima Abraham ri Allataala selaku tau iya sennangiyéngngi atinna Allataala. Ada-ada “ritarimai selaku tau iya sennangiyéngngi atinna Allataala” riyokii tenniya untu' alé-aléna Abraham bawang, iyakiya untu' idi'to. Ritarima tokki matu selaku tau iya puraé sennangi atinna Allataala, nasaba mateppe'ki lao ri Allataala iya patuwoéngngi Yésus, Puwatta, polé ri amaténgngé. Iyaro Yésus purani riyabbéréyang untu' riyuno nasaba dosa-dosata; nainappa napatuwo paimeng Allataala untu' nallalengiki simadécéngeng paimeng sibawa Allataala. Makkekkuwangngé simadécéngenni paimeng sibawa Allataala, nasaba mateppe'ki. Rimakkuwannanaro tuwoki ri laleng adaméngengngé sibawa Allataala naolai Puwatta Yésus Kristus. Nasaba mateppe'ki ri Yésus Kristus, namakkulléki péneddingiwi pammaséna Allataala, nanasibawangngi iyaro pammasé natuwoki makkekkuwangngé. Rimakkuwannanaro mariyo-riyo atitta nasaba mappunnaiki paddennuwang makkedaé ripérasai matu asennangengngé iya nabbéréyangngé Allataala! Nalebbi naiyaro, marennu tokki ri laleng anrasa-rasangngé, nasaba riissengngi makkedaé anrasa-rasangngé mébbui tauwé mancaji matinulu, na atinulurengngé mébbui matu tauwé tahang ri paccobangngé; iyanaé paompo paddennuwang. Paddennuwang iya pada-padaéwé dé' napakacéléki matu, nasaba purani riliseki atitta ri Allataala sibawa pammasé. Napogau'i Allataala iyaro naolai Roh Mapaccin-Na, iya puraé nawérékki. Wettutta ri laleng keadaang dé'gaga pakkulléng, matéi Kristus untu' idi ri wettu iya pura napattentué Allataala; padahal idi sining tau iya mabélaé polé ri Allataala. Muwi untu' séddié tau adélé mawatatto tauwé maélo maté. Naullé untu' séddié tau iya makessingngé, engkato tau iya baranié maté. Iyakiya Allataala pannessai pammasé-Na lao ri idi wettunna Kristus maté untu' idi wettutta tau madosa mupa. Makkekkuwangngé simadécéngenni paimeng sibawa Allataala naolai amaténna Kristus; rimakkuwannanaro mattentuni ripassalama' tokki matu polé ri caina nasaba Kristus. Rékko ri wettutta simusu sibawa Allataala; ripasidaméki sibawa Aléna naolai amaténna Ana'-Na, lebbi-lebbipi makkekkuwangngé simadécéngenna paimeng assisumpungetta sibawa Allataala, tentu ripassalama' tokki matu naolai atuwonna Kristus. Nalebbi na iyaro, marennu tokki nasaba akessingenna Allataala naolai Puwatta Yésus Kristus. Saba' naolai Kristus, ripéneddingiwi makkekkuwangngé assisumpungetta iya madécéngngéro sibawa Allataala. Muttama'i dosaé ri laleng linoé naolai séddi tau, na polé ri dosaéro momponi amaténgngé. Addimonrinna, iyaro amaténgngé nassanraiwi sininna rupa tauwé, saba' sininna tauwé madosani. Riwettu dé'napa nariyabbéréyang hukkunna agama Yahudié, engka mémenni dosaé ri laleng linoé. Iyakiya dé' narituntu' dosaé, nasaba dé'gaga hukkung iya weddingngé riyajjalékkai. Namuni polé ri wettunna Adam lettu ri wettunna Musa, sininna rupa tauwé rikuwasaiwi ri amaténgngé. Mala sining tau iya dé'é napogau' pelanggarang sibawa cara iya padaé iya napogau'é Adam, iyaro sining tauwé maccowé towi rikuwasai ri amaténgngé. Adam iyanaritu gambaran-Na polé ri iya maéloé polé matti. Iyakiya dé' napada duwa iyaro; nasaba asémpowang atinna Allataala mabélai lebbi battowa rékko ripasibandingngi sibawa palanggarang iya napogau'é Adam. Pelanggaranna séddi tau nassabariwi maéga tau maté. Lebbi battowapasi addimonrinna pammaséna Allataala sibawa hadiya asalamakengngé iya nabbéréyangngé lao ri maéga makkuwaro tau, naolai akessingeng atinna séddié tau iyanaritu Yésus Kristus. Hadiya polé ri Allataala lebbi battowa towi naiya dosana tau séddiéro. Saba' puranana séddié tau pogau' pelanggarang, tatteppani apettung “Pasalaé”. Iyakiya maéganana tau pogau' dosa poléni pammaséna Allataala iya pannessaéngngi, “Dé' napasala”. Nasaba palanggaranna séddi tau, massanrai amaténgngé lao kégi-kégi naolai tau séddiéro. Lebbi battowa pasi addimonrinna naiya napogau'é séddié tau laing, iyanaritu Yésus Kristus. Naolai Aléna, nabbéréyangngi Allataala pammasé-Na lao ri maéga tau sibawa nallalengiwi mennang simadécéngeng paimeng sibawa Allataala sibawa cuma-cuma; makuwasai matu mennang ri linoéwé naolai Kristus. Jaji pékkugi pelanggaranna séddié tau nassabariwi sininna rupa tauwé rihukkung, makkuwatoro pangkaukenna séddié tau iya maccowériyéngngi élona Allataala, nassabariwi sininna tauwé ripaleppe' polé ri asalanna sibawa riwéréng atuwong. Na pékkugi namaéga tau mancaji tau madosa nasaba séddi tau dé' namatinulu, makkuwatoniro maéga tau ripakkullé simadécéngeng paimeng sibawa Allataala nasaba séddi tau matinulu ri Allataala. Iya mabbéréyangngéngngi hukkunna agama Yahudié iyanaritu Allataala muto. Iyakiya pédé' makkuragai tolinoé turusiwi iyaro hukkung-hukkungngé, pédé' najjalékkaiwi mennang sibawa madosa lao ri Allataala. Iyakiya namuni pédé' pogau' dosa tolinoé, Allataala pédé' mamaséiwi mennang. Na, harusu'ki maté nasaba pogau'ki dosa, iyakiya Allataala mamaséiki sibawa mabbéréi laleng lao ri idi untu' simadécéngeng paimeng sibawa Aléna. Nasaba assisumpungetta sibawa Allataala madécéngi paimeng, nabbéréyang towi atuwong mannennungengngé lao ri idi naolai Yésus Kristus, Puwatta. Rékko makkuwairo, aga wedding ripowada? Harusu'ki'ga matteru-teru pogau' dosa kuwammengngi napédé' namaséiki Allataala? Tentu dé'! Dé'na nakuwasaiki dosaé, jaji, pékkugi weddikki matteru-teru tuwo sibawa pogau' dosa? Taissegga Saudara-saudara makkedaé wettutta ricemmé, ripasséddiki sibawa Kristus Yésus? Bettuwanna iyaé ripasséddiki sibawa amatén-Na. Nasaba acemméngngéro, rikuburu'ki silaong Kristus sibawa maccowéki maté silaong Aléna, kuwammengngi napékkugi Kristus ripatuwo polé ri amaténgngé nasaba akuwasanna Ambo' iya malebbié, makkuwatoniro weddikki joppaiwi séuwa atuwong iya mabarué. Rékko masséddini sibawa Kristus nasaba maccowé tokki maté sibawa Aléna, mancaji séddi tokki matu sibawa Aléna nasaba maccowé tokki ripatuwo paimeng pada-pada Aléna. Riissenni makkedaé ampé-ampéta riyolo selaku tolino pura riyunoi silaong Kristus ri aju sallié kuwammengngi nariyancuru akuwasanna ampé-ampéta iya madosaéro; nanallalengiro dé'na naripowataki ri dosaé. Nasaba rékko séddié tau matéi, iyaro tauwé ripaleppe'i polé ri akuwasanna dosaé. Rékko purani maté silaong Kristus, mateppe'ki makkedaé tuwo tokki matu silaong Aléna. Saba' riissengngi makkedaé pura ripatuwoni Kristus polé ri amaténgngé sibawa dé'na namaté; dé'na namakuwasana amaténgngé ri yasé'na Aléna. Amaténg iya napéneddingiyé Kristus iyanaritu amaténg nasaba dosa. Iyaro sisemmi bawang kajajiyang lettu mannennungeng. Sibawa atuwong iya napéneddingiyé makkekkuwangngéwé iyanaritu atuwong untu' Allataala. Harusu' tokko mangga'i alému maté nasaba dosa, iyakiya tuwo ri laleng assisumpungeng iya mare'é sibawa Allataala naolai Yésus Kristus. Aja'na muleppessangngi dosaé kuwasaiwi atuwommu iya dé'é namannennungeng ri linoé, kuwammengngi aja' muturusiwi pangéloremmu iya majaé. Aja'to muwabbéréyangngi anggota tubummu lao ri akuwasanna dosaé untu' riyakkégunang lao ri akkatta-akkatta majaé. Iyakiya abbéréyangngi alému lao ri Allataala selaku sining tau iya puraé ripalétté polé ri amaténgngé lao ri atuwongngé. Abbéréyang manengngi alému lao ri Allataala kuwammengngi nariyakkégunang untu' élona Allataala. Dé' nawedding dosaé makuwasaiko, nasaba dé'na mutuwo riyawana hukkunna agama Yahudié iyakiya ri yawana pammaséna Allataala. Makkekkuwangngé, aga rippe'na? Weddikki'ga madosa, nasaba dé'na na ri yawanaki akuwasanna hukkungngé, sangadinna ri yawa akuwasanna pammaséna Allataala? Dé' sises-siseng! Muwissegga makkedaé rékko muwabbéréyangngi alému lao riséddié tau untu' pogau'i élona, tentu iyanaritu atannako tau iya muturusiéro – iyaré'ga atannai dosaé iya tiwiékko lao ri amaténgngé, iyaré'ga ata iya matinulué ri Allataala, nanallalengiro nasimadécéngeng paimeng sibawa Allataala. Iyakiya sukkuru'ki lao ri Allataala! Saba' riyolo mancaji atannako dosaé, iyakiya makkekkuwangngé sukku atinna saudara turusiwi pappagguruwang tongengngé iya puraé riwérékko. Purano ripaleppe' polé ri dosaé, namakkekkuwangngé mancaji atano untu' élona Allataala. Nasaba makkumani lemmana pappéjeppummu, makkégunakka conto-conto angatangeng kuwammengngi nalebbi gampang mupahang. Riyolo muwabbéréyangngi alému selaku ata lao ri gau'-gau' iya macarépaé sibawa majaé untu' akkatta-akkatta majaé. Makkuwatoro makkekkuwangngé, sitinajako mabbéréyangngi sininna alému selaku ata lao ri élona Allataala untu' akkatta-akkattana Allataala iya mapaccingngé. Wettummu ripowata ri dosaé, dé' narikuwasaiko ri élona Allataala. Iyaro wettué asarong aga mutarima polé ri gau'-gau' iya makkekkuwangngéwé muposiri pogau'i? Iyaro sining pangkaukengngé banna tiwi amaténg! Iyakiya makkekkuwangngé ripaleppe'no polé ri dosaé, sibawa mancaji atanna Allataala. Asarommu iyanaritu makkedaé tuwoi Saudara banna untu' Allataala na iyaro gau'é powassélé'i atuwong tongengngé sibawa mannennungengngé. Saba' amaténgngé iyanaritu saronai dosaé; iyakiya atuwong tongengngé iya mannennungengngé sibawa Kristus Yésus Puwatta iyanaritu pabbéré iya nabbéréyangngé Allataala sibawa cuma-cuma. Saudara-saudara! Naisseng manenni Saudara hukkungngé. Jaji, muwisseng makkedaé akuwasanna hukkungngé ri yasé'na séddié tau, takkennai ri wettu tuwona mupa iyaro tauwé. Ebara'na, séddié makkunrai iya mallakkaiyé, tassiyoi lao ri hukkungngé lao ri lakkainna banna ri wettu tuwona mupa lakkainna. Rékko maténi lakkainna, iyaro bainé leppe'i polé ri hukkung iya siyoéngngi lao ri lakkainna. Rékko iyaro makkunraié siyonrongngi sibawa worowané laingngé ri wettu tuwona mupa lakkainna, secara hukkung, iyaro makkunraié riyasengngi malaweng. Iyakiya rékko maténi lakkainna, secara hukkung, iyaro makkunraié leppe'ni. Narékko kawingngi paimeng sibawa séddié worowané laing, dé' namalaweng. Makkuwatoro gau'na sibawa iko, Saudara-saudara. Lao ri hukkunna agama Yahudié maténo, nasaba pura ripasséddino sibawa tubunna Kristus sibawa mancaji appunnangen-Na iya puraé ripatuwo paimeng polé ri amaténgngé. Ripatuwoi polé ri amaténgngé kuwammengngi tamancaji makkéguna lao ri Allataala ri laleng atuwotta. Saba' riyolo tuwoki manuru' sipa-sipa tolinoé. Iyaro wettué sining cinnata iya madosaé, iya mompoé nasaba engkana hukkunna agamaé, mappattentu ri laleng aléta. Iyanaro saba'na naripogau' gau'-gau' iya nassabariyé amaténg. Iyakiya makkekkuwangngé dé'na tatassiyo ri hukkunna agama Yahudié. Purani maté lao ri hukkung-hukkung iya makuwasaiyékki riyolo. Dé'na tassompa sibawa cara-cara maittaé, situru hukkung-hukkung iya tarokié. Makkekkuwangngé massompaki situru cara baru iya nappaitangngé Rohna Allataala lao ri idi. Rékko makkuwaitu, agana wedding tapowada? Majaga hukkunna agama Yahudié? Tentu dé'! Iyakiya hukkung ngénnaro pagguruka passalenna dosaé. Dé' uwissengngi aga iyaro mangowaé, rékko hukkung agamaé dé' napowadai, “Aja' mumangowa.” Naolai hukkung agamaé, nalolongeng kasempatang dosaé untu' paompoi sininna rupanna cinnaé iya mangowaé ri laleng atikku, saba' rékko dé'i gaga hukkunna agamaé, tentu maté towi dosaé. Iyya riyolo tuwoka temmakké hukkung agama. Iyakiya wettunna mompo hukkung agamaé, mammulani tuwo dosaé na iyya matéka. Na hukkung agamaéro, iya bunge'-bunge'naé naseng untu' mabbéré atuwong, mala papoléi amaténg lao ri iyya. Nasaba naolai hukkung agamaéro, malai kasempatang dosaé bengnguwakka sibawa mpunoka. Assalenna hukkung agamaé poléi ri Allataala, na tungke' parénta ri laleng hukkungngéro apolénna poléi ri Allataala, jaji adélé sibawa makessing. Nah, aga iyaé makkébettuwangngi makkedaé iya makessingngéro mappapoléi amaténg lao ri iyya? Tentu' dé'! Dosaé ritu mappapolé amaténg. Ri laleng napakéna iya makessingngé, namappapolé dosaé amaténg lao ri iyya, kuwammengngi sipa-sipa dosaé napaita sibawa namanessa. Naolai parénta-paréntana Allataala, pabuttini pékkugi jana dosaé. Riissenni makkedaé hukkunna agama Yahudié assalenna poléi ri Rohna Allataala; iyakiya iyya'é tolino malemmaka. Purana ribalu' untu' mancaji atanna dosaé. Saba' aléku paimeng dé'to upahangngi pangkaukekku. Gau'-gau' iya macinnaé upogau', iyaro dé' upogau'i; iyakiya gau'-gau' iya ubenciyé, mala iyaro upogau'. Rékko upogau'i gau'-gau' iya siéwaé sibawa cinnaku, bettuwanna iyaro uwangakuiwi makkedaé iyaro hukkunna agama Yahudié makessingngi. Jaji, tenniyana iyya sitongenna pogau'i iyaro, sangadinna dosa iya kuwasaiyéngngi aléku. Uwisseng makkedaé dé'gaga muwi séuwa iya makessingngé ri laleng aléku; iyanaritu ri laleng ampé-ampéku selaku tolino. Saba' engka cinna ri aléku untu' pogau'i makessingngé, iyakiya dé' uwulléi pajoppai. Dé' upogau'i iya makessingngé iya macinnaé upogau'; sibaléna upogau'i gau'-gau' iya majaé, iya dé'é umaélo pogau'i. Rékko upogau'i gau'-gau' iya dé'é umaélo pogau'i, bettuwanna iyaro tenniyana iyya pogau'i iyaro gau'-gau'é, sangadinna dosaé iya kuwasaiyéngngi aléku. Jaji, malaka apettung makkedaé hukkungngénnaé makkatenning peranang: iyanaritu makkedaé rékko maéloka pogau'i iya makessingngé, na banna iya majaé bawang mompo ri aléku. Napoji batékku hukkunna Allataala, iyakiya mainge'ka makkedaé ri laleng aléku engkato hukkung laing iya mattenningngé peranang – iyanaritu hukkung iya siyéwaé sibawa hukkung iya riyangakuiyé ri akkalekku. Iyanaro saba'na tassiyoka ri hukkung dosaé iya makkatenningngé peranang ri laleng aléku. Makkekkuwangngé dé'na gaga pahukkungeng lao ri mennang iya tuwoé masséddi sibawa Kristus Yésus. Saba' hukkunna Rohna Allataala iya mébbuékki tuwo masséddi sibawa Kristus Yésus pura paleppe'ka polé ri hukkung iya nassabariyé dosaé sibawa amaténgngé. Aga iya dé'é naulléi napogau' hukkung agamaé, nasaba idi tau malemmaki, iyaro pura napogau'ni Allataala. Allataala caui akuwasanna dosaé ri laleng sipa'na tolinoé sibawa kiringngi Ana'na, iya polé ri laleng keadaang iya padaé sibawa tolinoé iya madosaé, untu' leddai dosaé. Napogau'i Allataala iyaro kuwammengngi élo-Na iya napannessaé ri laleng hukkunna agama Yahudiéro weddingngi ripajoppa ri laleng aléta iya tuwoé situru Rohna Allataala sibawa dé' nasituru' sipa'na tolinoé. Sining tau iya tuwoé situru sipa' tolinoé, mappikkiri'i matteru-teru aga nacinnai iyaro sipa' tolinoé. Iyakiya sining tau iya tuwoé situru Rohna Allataala, mappikkiri'i matteru-teru aga nacinnaiyé Rohna Allataala. Rékko pikkirammu rikuwasaiwi ri sipa' tolinoé, addimonrinna amaténg. Iyakiya rékko pikkirammu rikuwasaiwi ri Rohna Allataala, addimonrinna iyanaritu atuwong sibawa assidaméngeng sibawa Allataala. Tau iya rikuwasaiyé pikkiranna ri sipa' tolinona, iyaro tauwé simusui sibawa Allataala; nasaba iyaro tauwé dé' natunru' lao ri hukkunna Allataala; na mémeng dé' naulléi tunru' lao ri hukkunna Allataala. Sining tau iya tuwoé situru sipa' tolinoé, iyaro sining tauwé dé' naulléi pésennangiwi Allataala. Iyakiya dé' mutuwo situru sipa' tolinoé. Tuwoko situru Rohna Allataala – rékko, Rohna Allataala tonget-tongengngi makkatenning peranang ri laleng alému. Tau iya dé'é nappunnai Rohna Kristus, iyaro tauwé tenniya appunnangenna Kristus. Iyakiya rékko Kristus tuwoi ri laleng alému, namuni watakkalému matéi matti nasaba dosa, iyakiya Rohna Allataala mabbéré atuwong lao ri iko, saba' assisumpungengngé sibawa Allataala makessinni. Rékko Rohna Allataala, iya patuwoéngngi Kristus polé ri amaténgngé, tuwoi ri laleng alému, tentu iya patuwoéngngi Kristus polé ri amaténgngéro, patuwo towi matu watakkalému iya weddingngéro maté. Napogau'i iyaro sibawa Roh-Na iya tuwoé ri lalemmu. Iyanaro saba'na, Saudara-saudara, mappunnaiki tanggung jawa'; iyakiya tenniya tanggung jawa' lao ri sipa' tolinoé; dé' naparelluki tuwo situru élona. Nasaba rékko tuwoko situru sipa' tolinoé, matéko matu; iyakiya rékko nasibawang akuwasanna Rohna Allataala, matteruko bawang mpunoi pangkaukeng-pangkaukemmu iya madosaé, tuwoko matu. Sining tau iya ripimpingngé ri Rohna Allataala, iyanaritu ana'-ana'na Allataala. Saba' Roh iya nabbéréyangngé Allataala lao ri iko, dé' napancajiko ata angkanna tuwoko ri laleng amétaurengngé. Sibalé'na iyaro Rohna Allataala napancajiko ana'-ana'na Allataala. Nasibawang akuwasanna iyaro Rohna Allataala riyobbii iyaro Allataala, “Ambo', Ambo'ku!” Rohna Allataala silaong iyaro rohta pannessai makkedaé idi iyanaritu ana'-ana'na Allataala. Nah, rékko idi iyanaritu ana'-ana'-Na, tentu idi'to iyanaritu ahli warisi'-Na iya tarimaé matu barakka-barakka iya napassadiyaé Allataala untu' ana'-ana'-Na. Tarimaki matu silaong Kristus aga iya puraé napassadiyangengngi Allataala; saba' rékko manrasa-rasaki silaong Kristus, ripakalebbi tokki silaong Aléna. Sininna anrasa-rasang iya ripéneddingiyé makkekkuwangngé, manuru' pallolongekku, dé' sises-siseng nawedding ripasibanding sibawa alebbireng iya maéloé ripannessa lao ri idi. Sininna alangngé mattajeng sibawa muddani senna' lao ri wettunna Allataala pannessai ana'-ana'-Na. Nasaba pura rileppessanni alangngé untu' mancaji marapo, tenniya nasaba élo aléna, iyakiya nasaba Allataala malleppessangngi makkuwaro. Namuni makkuwaro engka muto paddennuwangngéwé: makkedaé riséuwaé wettu ripaleppe'i matu alangngé polé ri akuwasang iya paancuru'é sibawa maccowéto matu ripaleppe' sibawa ripakaraja silaong ana'-ana'na Allataala. Riissenni makkedaé lettu makkekkuwangngé sininna alangngé maddarékéi nasaba manrasa-rasai pada-pada séddié indo' mapeddi ri wettunna jajiyang ana'lolo. Sibawa tenniya sininna alangngé bawang maddaréké, idi paimeng maddaréké ri laleng batétta. Purani ritarima Rohna Allataala selaku pabbéréna Allataala iya pammulangngé, iyakiya ritajeng mupi Allataala paleppe'i sininna aléta sibawa pancajiki ana'-ana'-Na. Nasaba amménasang naripassalama'ki. Iyakiya rékko aga iyaro riyamménasaiyé purani riita, iyaro tenniyana amménasang. Nasaba nigana maddennuwangi mupi séuwaé iya puraénna naita? Iyakiya rékko maddennuwangiki séuwaé iya dé'éppa nariita, ritajengngi sibawa sabbara'. Makkuwatoro Rohna Allataala poléi tulukki rékko malemmaki. Saba' dé' taissengngi pékkugi sitongennaki massempajang; aléna iyaro Roh-é mangolo ri Allataala untu' méllaungekki sibawa uddaning iya marilaleng senna'é angkanna dé' nariyullé pau. Na Allataala, iya missengngéngngi lise atinna tolinoé, napahang élona iyaro Roh-é; saba' iyaro Roh-é méllauwi ri Allataala untu' umma'na Allataala, sibawa situru élona Allataala. Taisseng makkedaé Allataala matoro'i sininna gau'é, angkanna napowassélé iya makessingngé untu' sining tau iya mamaséiyéngngi sibawa iya Naobbié situru rancana-Na. Mennang iya puraé ripilé ri Allataala, pura toni ripattentu polé ri pammulanna untu' mancaji sinrupa sibawa Ana'-Na, iyanaritu Yésus Kristus. Rimakkuwannanaro iyaro Ana'é mancajiwi iya mammulangngé ri yelle'na maéga saudara. Makkuwaniro Allataala mobbii mennang iya pura Napattentué lebbi riyolo; sibawa mennang iya Naobbiéro, Nakkulléngiwi nasimadécéngeng paimeng sibawa Allataala. Sibawa mennang iya puraé nakkulléngiwi nasimadécéngeng paimeng sibawa Allataala, malani bagiyang ri laleng atuwonna Allataala. Agana wedding ripowada makkekkuwangngé passalenna iya manennaro? Rékko engkai Allataala ri idi, nigana mulléi méwaki? Ana' ri Aléna paimeng dé' Nacarinnaiwi, sangadinna nabbéréyangngi untu' apentingetta maneng; masa' dé' nabbéréyangngi matu lao ri idi sininna séuwa-séuwaé iya laingngé? Nigana mulléi lura'ki umma' puraé ripilé ri Allataala, rékko aléna Allataala pura pannessai makkedaé dé' tappasala? Engkaga tau maélo pasalaki? Kristus Yésus matti bélaki! Aléna ritu iya puraé maté, iyaré'ga mala Aléna ritu iya puraé ripatuwo paimeng polé ri amaténgngé sibawa engkani ri Allataala ri onrong iya makuwasaé. Engkaga mulléi pésangkaiwi Kristus mamaséiki? Naulléga asussangngé pésangkaiwi, iyaré'ga asukkarakengngé, iyaré'ga paccallangngé, iyaré'ga akkadérengngé, iyaré'ga akasiyasingngé, iyaré'ga bahayaé, iyaré'ga amaténgngé? Ri laleng Kitta'é tarokii makkuwaé, “Puppu esso tuwoki ri laleng bahaya amaténgngé nasaba Iko. Rigaukekki pada-pada bimbala' iya maéloé rigéré.” Dé'! Mala ri laleng iya manennaro lolongekki apakalang iya sukkué polé ri Aléna iya mamaséiyékki! Saba' mateppe' senna'ka makkedaé ri sininna linoé, muwi amaténgngé iyaré'ga atuwongngé; muwi malaéka' iyaré'ga panguwasa; muwi sining paancangngé makkekkuwangngé iyaré'ga ancamang-ancamang ri wettu mangoloé iyaré'ga awatangeng-awatangeng laingngé; muwi sining anu ri langié, iyaré'ga sining anu ri laleng linoé, iyaré'ga agi-agi laingngé, iya manenna dé' naulléi pésangkaiwi Allataala mamaséiki, pada-pada iya pura Najjellokengngé naolai Kristus Yésus, Puwatta. Aga iya maéloé upowadaé iyanaritu tongeng nasaba iyya appunnangennaka Kristus. Dé' uwabbellé. Ati marilalekku iya napimpingngé Rohna Allataala, patepperi tokka makkedaé tongengngi iyaé ada-adakku. Messé senna'ka sibawa mapeddi senna' atikku nasaba saudara-saudaraku iya si bangsaékka. Nasaba untu' mennang, aléku paimeng macenning ritanroi ri Allataala sibawa ripassarang polé ri Kristus. Mennang iyanaritu umma'-Na iya napilé sibawa Allataala pancajiwi mennang ana'-ana' ri Aléna, enrengngé pannessai akuwasan-Na lao ri mennang. Pakangkai assijancingeng sibawa mennang enrengngé mpéréngngi mennang hukkung-hukkung agama. Allataala paissengiwi lao ri mennang pékkugi mennang harusu' massompa sibawa pura toni mennang natarima janci-jancin-Na. Mennang iyanaritu wija-wijanna polé ri néné-nénéta. Kristus selaku tolino assalenna poléi ri bangsana. Lebbi tanréi polé ri iya manenna. Ripojiwi Allataala untu' mannennungeng! Aming. Tenniya akkattaku untu' powadai makkedaé jancinna Allataala dé' nalakuna; iyakiya dé' nasininna tau Israélié iyanaritu umma' napilé Allataala. Dé' nasininna wija-wijanna Abraham iyanaritu ana'-ana'na Allataala. Saba' makkedai Allataala lao ri Abraham, “Banna wija-wijanna Ishak bawang ritu riteppu matu wija-wijammu.” Bettuwanna iyaro makkedaé wija-wijanna Abraham iya mancajiyé ana'-ana'na Allataala, iyanaritu banna iya jajiyé nasaba jancinna Allataala; natenniya maneng wijanna. Saba' jancinna Allataala iyanaritu makkuwaiyé, “Ri wettu iya ripattentué, maéloka lisu, na Sara mappunnaiwi matu séddi ana' worowané.” Sibawa iyatoé: Jajiyangngi Ribka duwa tau ana' worowané polé ri séddié ambo', iyanaritu Ishak néné-nénéta. Ri wettu dé'napa najaji iyaro ana'é, purani napattentu Allataala iya napilé untu' mangoloé. Iyaro appilénna Allataala dé' nataggattung polé ri aga iya naullé pogau' tauwé, iyakiya taggattungngi ri pangobbina matu Allataala. Saba' wettunna iya duwaro ana' worowanéna Ribka dé'pa naulléi pogau' anu iya makessingngé iyaré'ga iya majaé, pura napowadai Allataala lao ri Ribka, “Iya macowaé tumaningiwi matu maloloé.” Ri laleng Kitta'é tarokii makkedaé makkeda makkuwaiyé Allataala, “Uwamaséiwi Yakub, iyakiya Ubenciwi Esau.” Agana kasimpulatta makkekkuwangngé? Makkedaé dé'ga naadélé' iyaro Allataala? Pura mattentuni Allataala adélé! Saba' makkedai Allataala lao ri Musa, “Maélo-Ka mappaitangngi pammasé, sibawa maélo-Ka mappaitangngi paressé babuwaé lao ri tau iya maéloé Upaitang paressé babuwa.” Jaji, iyaro apettunna Allataala, dé' nataggattung ri acenningeng atinna tolinoé iyaré'ga ri usahana tolinoé, sangadinna ri akessingeng atinna Allataala bawang lao ri tau Napiléro. Saba' tarokii ri laleng Kitta'é, “Makkedai Allataala lao ri Arung Maséré', ‘Upancajiko matu arung untu' séddié akkatta bawang, iyanaritu kuwammengngi nasibawakko Uwappaitangngi akuwasak-Ku sibawa mébbui asek-Ku tarompo risininna linoé.’ ” Jaji, maressé babuwai Allataala lao riséddié tau, rékko naéloriwi Allataala makkuwaro. Sibawa Allataala nassabariwi séddié tau nancaji matedde ati, rékko napuwéloi Allataala makkuwaro. Makkedai matu Saudara lao ri iyya, “Rékko makkuwaitu magi Allataala namaélo mupa passalai tolinoé? Dé'ga na séddié tau naulléi lawa-lawaiwi élona Allataala?” Iyakiya, Saudara! Saudara banna tolino bawang. Na Saudara dé' nawedding barani metté lao ri Allataala! Weddigga po' bungaé makkutana ri tau iya mébbuéngngi, “Magi muwébbuka makkuwaé?” Dé'ga na tau iya mébbuéngngi po' bungaéro mappunnai ha' jamai iyaro tana litaé siélo-élona atinna? Polé ri sitékké tana lita, iyaro tauwé mappunnai ha' mébbu duwanrupa po' bunga: séddi makessing, na iya laingngé makurang kessing. Makkuwatoniro sibawa aga iya naébbué Allataala. Manniya'i untu' pallessui cai-Na sibawa mappaitangngi akuwasan-Na. Namuni sabbara'i lao ri mennang iya harusu'é rihukkung nasaba naébbui macai. Manniya' towi Allataala untu' mappaitangngi lao ri idi asennangeng tabbollompollongngé iya natiri'é lao ri idi iya Namaséiyé. Purani Napassadiyaki untu' tarimai asennangengngéro. Idi ritu pura Naobbi, tenniya bawang polé ri bangsa Yahudié, iyakiya poléto ri bangsa-bangsa laingngé. Saba' ri lalenna kitta Nabi Hoséa, makkedai Allataala, “Sining tau tenniyaé umma'-Ku, riteppui matu ‘Umma'-Ku’. Bangsa iya dé'é Uwamaséiwi, Uteppui matu ‘Uwamaséiwi’. Sibawa ri onrong naonroiyé ripowada lao ri tauwé, ‘Tenniyako umma'-Ku’, kuwaniro iyaro sining tauwé riteppui matu ana'-ana'na Allataala iya tuwoé.” Matedde'i Nabi Yésaya makkeda passalenna bangsa Israélié, “Namuni jumellana bangsa Israélié singngégai kessi'é ri tasi'é, banna céddé bawang matu iya salama'é; saba' masitta'i Puwangngé matu patatteppai pahukkungengngé lao ri silise linoé.” Makkeda makkuwa towiyé Yésaya, “Akkalarapanna Allataala Iya Pommakuwasaé dé' natarongekki wija-wijanna, tentu idi manengngé mancajini pada-pada Sodom sibawa Gomora.” Jaji, rippe'na iyanaritu iyaé: Bangsa-bangsa laingngé iya tenniyaé Yahudi dé' nakkuraga kuwammengngi assisumpungenna mennang sibawa Allataala mancaji makessingngi paimeng. Iyakiya nasaba mateppe'i mennang, nanaébbui Allataala assisumpungenna mennang sibawa Allataala mancaji makessingngi paimeng. Sibalé'na, sining tau Yahudié tuli makkuragai turusiwi hukkungngé kuwammengngi assisumpungenna mennang sibawa Allataala makessingngi paimeng. Iyakiya mala mennang dé' namakkéwassélé. Magi mennang dé' namakkéwassélé? Saba' napogau'i mennang iyaro dé' naolai teppe' laowé ri Allataala, sangadinna naolai usaha ri aléna. Namabuwanna mennang tabbuttu ri “Batu Tabbutturengngé”. Passalenna iyaro batué ri laleng Kitta'é tarokii makkuwaé, “Pénessaiwi iyaé: Ri Sion pura Upalénne'i séuwa batu iya nassabariyéngngi matu tauwé tabbuttu; iyanaritu séuwa batu battowa iya nassabariyé tauwé mabuwang. Iyakiya tau iya mateppe'é ri Aléna dé' nakacélé matu.” Saudara-saudara! Muddani senna'ka kuwammengngi bangsaku ripassalama'i. Mattonget-tongekka massempajang lao ri Allataala untu' mennang. Baranika powadai makkedaé massumange' senna'i mennang massompa lao ri Allataala. Iyakiya sumange'na mennanro dé' natettong ri pangissengeng polé ri Allataala. Dé' naissengngi mennang carana Allataala mébbui assisumpungenna tolinoé sibawa Aléna mancaji makessing paimeng. Sibawa nasaba maéloi mennang maccowériwi cara aléna, nadé' natunru' mennang ri cara iya najello'é Allataala. Hukkung agamaé purani narupai Kristus, angkanna tungke' tau iya mateppe'é lao ri Kristus, assisumpungenna sibawa Allataala mancaji makessingngi paimeng. Naokii Musa makkedaé tau iya simadécéngengngé sibawa Allataala situru hukkung agamaé, iyaro tauwé tuwoi matu nasaba matinului lao ri hukkung agamaéro. Iyakiya passalenna carana tauwé simadécéngeng sibawa Allataala situru atepperenna lao ri Allataala, napowadai Kitta'é makkedaé, “Aja' lalo namuwakkeda ri laleng atimmu, ‘Nigana ménré ri surugaé?’ (bettuwanna tiwii Kristus nonno), iyaré'ga, ‘Nigana matu nonno ri linona tau maté?’ (bettuwanna makkai Kristus ménré polé ri amaténgngé).” Akkatana iyanaritu makkuwaiyé, “Iyaro karéba polé ri Allataala macawé'é senna' ri iko; ri témummu sibawa ri laleng atimmu.” Iyanaro karéba iya riyappallebbangngé idi; karéba makkedaé harusu'i tauwé mateppe' lao ri Yésus Kristus. Saba' rékko mangakui Saudara sibawa témunna makkedaé “Yésus ritu Puwang”, sibawa mateppe'i Saudara ri laleng atinna Saudara makkedaé Allataala pura patuwoi Yésus polé ri amaténgngé, salama'i matu Saudara. Nasaba mateppe'i tauwé sibawa atinna, angkanna Allataala tarimai selaku tau iya simadécéngengénna sibawa Allataala. Nasibawang témunna tauwé mangakui, angkanna ripassalama'. Ri laleng Kitta'é tarokii, “Sininna tau iya mateppe'é dé' naripakacélé.” Iyaro kajajiyangngi lao ri sininna tauwé, saba' dé' gaga assilaingenna tau Yahudié sibawa tau bangsa laingngé. Allataala iya séddiéro iyanaritu Puwang untu' sininna tauwé. Mabbéréi barakka iya tabbollompollongngé lao ri sininna tauwé iya méllauwé pattulung ri Aléna. Ri laleng Kitta'é tarokii, “Sininna tauwé iya goraé mangobbi lao ri Puwangngé, salama'i matu.” Iyakiya pékkugiwi tauwé naulléi mangobbi lao ri Puwangngé rékko dé'pa mennang namateppe'? Sibawa pékkugiwi mennang naulléi mateppe' lao ri Puwangngé rékko dé' mennang naéngkalingai passalenna Aléna? Makkuwatoro, pékkugiwi mennang naulléi maréngkalinga passalenna Puwangngé, rékko dé'gaga mabbirittangngi? Sibawa pékkugi tauwé naulléi tiwii iyaro karébaé rékko dé' mennang narisuro? Ri laleng Kitta'é tarokii makkuwaéwé, “Temmaka kessinna apolénna sining tau iya tiwié Karéba Madécéng polé ri Allataala!” Iyakiya dé' nasininna tauwé tarimai Karéba Madécéngngéro. Saba' makkedai Yésaya, “Puwang, nigana mateppe' ri karébatta?” Iyanaro saba'na namancaji mateppe' sining tauwé nasaba naéngkalingai mennang karébaé, na iyaro karébaé naéngkalingai nasaba engka tau mabbirittangngi passalenna Kristus. Iyakiya makkutanaka: Mémegga mennang dé'pa naéngkalingai iyaro karébaé? Tentu purani! Saba' ri laleng Kitta'é tarokii makkuwaé, “Mengngoni saddanna mennang ri sininna linoé, ada-adanna lettu'ni ri cappa'na linoé.” Makkutanasika: Dé'paga naissengngi bangsa Israélié? Leppessangngi siya iyaro pakkutanaé Musa bunge' baliwi. Makkedai Musa, “Makkuwaiyé adanna Allataala, ‘Uwébbuko matu mangémpuru lao ri séddié bangsa iya tenniyaé umma' sibawa Uwébbuko matu macai lao ri séddié bangsa iya madonggoé.’ ” Lebbi baranipasi Yésaya. Makkedai, “Makkuwanié adanna Allataala, ‘Sining tau iya dé'é nasappa-Ka, naruntu'na; sibawa Uwappaitangngi alé-Ku lao ri mennang iya dé'é nakkutanangngi passalek-Ku.’ ” Iyakiya passalenna bangsa Israélié makkedai Yésaya, “Makkuwanié adanna Allataala, ‘Puppu esso Uloro'i limak-Ku lao ri riséddié bangsa iya matedde atié sibawa dé'é namatinulu.’ ” Makkutanaka: Puraniga nabbéyang Allataala umma' ri Aléna? Tentu dé'! Aléku paimeng séddi tau Israél wija-wijanna Abraham, sibawa polé ri suku Bényamin. Dé'! Dé' nabbéyangngi umma'na Allataala iya puraé Napilé mappammulai pammulanna. Naisseng Saudara-saudara aga taroki ri laleng Kitta'é passalenna Elia, wettunna napparapekeng passalenna Israélié lao ri Allataala. Makkedai Elia, “Puwang, sining tauwé purani nauno nabi-nabim-Mu sibawa nancuru'i sining onrong makkasuwiyangengngé akkarobangeng untu'-Mu. Iyya mani alé-aléku monro, namaélo towi mennang mpunoka.” Aga pappébalinna Allataala lao ri Elia? Mappébaliwi Allataala, “Purani Utarongeng alé-Ku pitussebbu tau. Dé'pa naengka mennang nassompa ri Déwata Baal.” Makkuwatoniro makkekkuwangngé: Engka céddé iya puraé napilé Allataala nasaba pammasé-Na. Napiléi mennang situru pammasé-Na sibawa tenniya situru pangkaukenna mennang. Saba' rékko iyaro pappiléna Allataala siturui pangkaukenna tolinoé, tentu iyaro pammaséna Allataala tenniyana pammasé iya tongengngé. Jaji, pékkugi? Umma' Israélié dé' nalolongengngi aga iya nasappaé mennang. Iya lolongengngéngngi banna séddi golongang baiccu tau iya puraé napilé Allataala. Iya maneng laingngé mancajiwi matedde ati lao ri pangobbina Allataala. Saba' ri laleng Kitta'é tarokii makkuwaé, “Allataala mébbui atinna sibawa pikkiranna mancaji madonggo; nanarapi makkekkuwangngéwé matanna dé' naulléi makkita sibawa daucculinna dé' naulléi maréngkalinga.” Makkeda towi Daud, “Leppessanni siya pésta-péstana mancaji jebba lao ri aléna mennang, sibawa mancaji kalebbong, onronna sempé sibawa ancuru! Leppessanni siya pakkitanna mancaji mapettang kuwammengngi dé' naulléi mennang makkita; sibawa leppessanni siya mancaji bukku lettu mannennungeng.” Makkutanasika: Wettunna mabuwang tau Yahudié, kajajiyangngi iyaro kuwammengngi naancuru mennang? Dé' sises-siseng! Iyakiya nasaba madosai mennang, naripassalama' bangsa laingngé, nanassabariwi bangsa Yahudié mangémpuru lao ri bangsa laingngéro. Nasaba pasalai bangsa Yahudié sibawa dé' naturusiwi élona Allataala, naribarakkaki bangsa-bangsa laingngé ri Allataala. Apalagi rékko assisumpungenna bangsa Yahudié sibawa Allataala madécéngngi paimeng; tentu lebbi battowa pasi barakka iya maéloé nabbéréyang Allataala! Iyakiya makkekkuwangngé madécéngengngi mabbicaraka lao ri Saudara-saudara iya tenniyaé Yahudi! Lettu makkekkuwangngé, selaku rasul untu' bangsa-bangsa iya tenniyaé Yahudi, upakaraja senna'i jama-jamakku. Mamménasaka uwulléi paompoi angémpurunna bangsaku, kuwammengngi nallalengiro uwulléi passalama'i sibagiyang polé ri mennang. Nasaba risampéyangngi mennang ri Allataala, namadécéng paimeng assisumpungenna linoé sibawa Allataala; apalagi rékko ritarimai mennang ri Allataala! Tentu iyaro pada muwi tau maté tuwosi paimeng! Rékko sipoloé roti mammulangngé purani riyabbéréyang lao ri Allataala, bettuwanna sininna rotié riyabbéréyang towi lao ri Allataala. Sibawa rékko ure'na ajué iyanaritu appunnangennai Allataala, bettuwanna takké-takkéna iyanaritu appunnangen-Nato. Sibagiyang polé ri takké-takkéna pong zaitungngé – iyanaritu sining tau Yahudié – purai rirette. Na ri onrong addettekengngéro ricangko'kangngi takké pong zaitun liyaé, iyanaritu Saudara-saudara tenniyaé Yahudi. Ricangko'kangngi Saudara kuwaro kuwammengngi napéneddingiwi Saudara sininna makessingngé polé ri atuwong atepperenna sining tau Yahudié. Rimakkuwannanaro, aja' muangga' énténgngi mennang iya puraé rirette pada-pada takkéro. Harusu'ko méngngerangngi makkedaé banna takkéko bawang. Na tenniya takké mabbéré anré lao ri ure'é, sangadinna ure'é mabbéré anré lao ri takké. Iyakiya makkedai matu Saudara, “Iyyé, iyakiya iyaro takké-takké rirette'i kuwammengngi weddikka riyaccangkokeng ri ponna!” Mémeng tongeng iyaro. Iyakiya riyabbéyangngi mennang nasaba dé' namateppe' mennang, na Saudara ritarima nasaba mateppe'i Saudara. Jaji aja'na namatempo Saudara nasaba iyaro; sibalé'na harusu'i Saudara métau. Saba' rékko Allataala dé' namarasa kasiyang untu' mabbéyangngi tau Yahudié iya pada-padaé takké-takké tuléngngéro, aja' muwasengngi kasiyangngi matu untu' mabbéyangngi Saudara! Jaji riitani kuwaé pékkugi kessinna Allataala sibawa pékkugi towi tedde'na. Matedde'i mattinda' lao ri mennang iya madosaé, iyakiya makessing atié lao ri Saudara – assaleng tette'i Saudara tuwo polé ri akessingen-Na. Rékko dé', riyabbéréyang towi Saudara. Na passalenna sining tau Yahudiéro, rékko mappésauwi mennang kédo-kédo dé' namateppe', ritarimai matu mennang paimeng; saba' makuwasai Allataala untu' tarimai mennang paimeng. Saudara iya dé'é na assalenna polé ri bangsa Yahudié iyanaritu pada-padai takké polé ri zaitun liyaé. Rékko Saudara, siéwai sibawa sipa'na Saudara, weddingngi riyaccangkokeng ri pong zaitun tuléngngé, apalagi sining tau Yahudi iya riyakkalarapangengngé sibawa takké-takké pong zaitun tulengngéro. Tentu lebbi gampangngi ri Allataala untu' palisui mennang ri pong zaitunna muto mennang. Saudara-saudara! Uwéllauko aja' muwasengngi muwissenni sini-sininnaé. Saba' engka séddi passaleng iya napuwéloé Allataala, iyakiya dé'pa naissengngi tauwé. Nauwéloriwi muwisseng; iyanaritu iyaé: Sibagiyang polé ri tau Yahudié matedde atiwi, iyakiya attangenna mennanro matteru-terui matu banna lettu ri jumella sining tau Yahudi iya laowé ri Allataala genne'ni. Makkuwaniro sininna tau Yahudié salama'i matu. Saba' ri laleng Kitta'é tarokii makkuwaé, “Arung Pappassalama'é poléi matu ri Sion; naleddai matu sininna ja polé ri wija-wijanna Yakub. Maélo-Ka siyoi assijancingengngéwé sibawa mennang ri wettunna Uwaddampengengngi dosa-dosana.” Nasaba tau Yahudié dé' namaélo tarimai Karéba Madécéng polé ri Allataala, mancajiwi mennang balinna Allataala; na mala iyaro mancajiwi amaupekeng lao ri Saudara-saudara iya tenniyaé Yahudi. Iyakiya nasaba pappiléna Allataala, na iyaro sining tau Yahudié tette'i riyamaséi ri Allataala nasaba néné-nénéna. Saba' rékko Allataala piléi tauwé sibawa barakkakiwi iyaro tauwé, dé' naengka nagettengngi paimeng Allataala aga iya puraé Napogau'. Riyolo dé' mumatinulu lao ri Allataala. Iyakiya makkekkuwangngé Allataala pura pannessai makkedaé leppe'ko polé ri asalangngé, nasaba dé' namatinulu sining tau Yahudié. Makkuwatoro sining tau Yahudiéro. Makkekkuwangngéwé dé' namatinulu lao ri Allataala, kuwammengngi naripannessako leppe' polé ri asalangngé. Iyakiya matti mennang maélo towi ripannessa leppe' polé ri asalangngé. Saba' pura naleppessangngi Allataala sininna rupa tauwé rikuwasai ri atemmatinulurengngé, kuwammengngi Naulléi mappaitangngi paressé babuwana lao ri iya maneng mennang. Masero senna' asugirenna Allataala! Battowa tongeng apanréngen-Na sibawa pangissengen-Na! Nigana mulléi salidikiwi sining apettun-Na? Nigana mulléi majeppuiwi cara-carana majjama? Ri laleng Kitta'é tarokii makkuwaé, “Nigana missengngi pikkiranna Puwangngé? Nigana mulléi pangajariwi? Nigana pura mpéréngngi séuwa lao ri Puwangngé naweddingngi natuntu' pamale'-Na?” Allataala pancajiwi sininna séuwa-séuwaé. Iya manenna assalenna poléi ri Allataala sibawa iyanaritu untu' Allataala. Ripojiwi Allataala lettu mannennungeng! Aming. Saudara-saudara! Makessing senna'i Allataala lao ri idi. Iyanaro saba'na uwéllauwi sibawa masero kuwammengngi muwakkasuwiyangengngi aléna selaku séddi akkalarapangeng tuwo iya ripallaingngé untu' Allataala sibawa pésennangiwi atin-Na. Assompako lao ri Allataala harusu'i makkuwaro. Aja' muwaccowériwi peraturang-peraturang linoéwé. Leppessanni Allataala mébbui paribadimmu mancaji mabaru, kuwammengngi mutappinra. Rimakkuwannanaro mulléi missengngi élona Allataala – iyanaritu aga iya makessingngé sibawa iya sennangiyéngngi atin-Na sibawa iya sukkué. Allataala pura mabbéré pammasé lao ri iyya. Iyanaro saba'na upangajari manengngi Saudara-saudara: Aja' muwasengngi alému lebbi matanré naiya sitongennaé. Sitinajako mangke'i keadaammu sibawa ati mariyawa; tungke'-tungke' mangke'i aléna situru pakkulléng iya nabbéréyangngé Allataala lao ri aléna nasaba mateppe'i lao ri Yésus. Watakkaléta mappunnaiwi maéga anggota. Tungke' anggota mappunnaiwi jamang. Makkuwatoro sibawa idi. Namuni idi manengngé maégaki, iyakiya sinrupaki séddié watakkalé nasaba idi masséddiki ri Kristus. Sibawa tungke'-tungke'ki sisumpung séddié sibawa laingngé selaku anggota-anggota polé riséddié watakkalé. Tungke'-tungke'ki mappunnai wéré attumaningeng iya laingngé. Iyaro sining wéré nawérékki Allataala situru pammasé-Na. Rimakkuwannanaro harusu'ki pakéi iyaro sining wéré. Tau iya mappunnaiyé wéré untu' mabbirittangngi karéba polé ri Allataala, iyaro tauwé harusu'i mabbirittangngi iyaro karéba polé ri Allataala situru amampungeng iya engkaé ri aléna. Tau iya mappunnaiyé wéré untu' tulungngi tau laingngé, iyaro tauwé harusu'i mattonget-tongeng tulungngi tau laingngé. Tau iya mappunnaiyé wéré untu' mappagguru, iyaro tauwé harusu'i tonget-tongeng mappagguru. Tau iya mappunnaiyé wéré untu' mpéréngngi sumange' tau laingngé, iyaro tauwé harusu'i tonget-tongeng mpéréngngi sumange' tau laingngé. Tau iya mappunnaiyé wéré untu' mpéréngngi tau laingngé aga iya nappunnaiyé, iyaro tauwé harusu'i napogau' iyaro sibawa malabo iya sitinajaé. Tau iya mappunnaiyé wéré untu' mappimping, iyaro tauwé harusu'i tonget-tongeng mappimping. Tau iya mappunnaiyé wéré untu' mappaitangngi paressé babuwaé lao ri tau laingngé, iyaro tauwé harusu'i napogau' sibawa masennang ati. Mamaséno sibawa matinulu. Benciwi iya majaé, sibawa akkatenninno lao ri aga iya makessingngé. Sitinajai Saudara-saudara siyamaséi séddié lao ri laingngé sibawa siyélori pada-pada tau iya massilessurengngé ri laleng séddié kaluwarga, sibawa sitinajako sipoddiyoloi sipakaraja. Ajjamano sibawa mapato. Aja' mumakuttu. Ajjamano untu' Puwangngé sibawa sumange' polé ri Rohna Allataala. Sitinajai Saudara mamménasa lao ri Puwangngé sibawa marennu, sabbara'no ri laleng asussangngé, sibawa mattinetto massempajang. Tulungngi paggenne'i apparelluwanna sining tau Kristéng laingngé enrengngé tarimai Saudara-saudara siatepperengngé iya dé'é muwissengngi, sibawa ati masennang ri lalempolamu. Ellauwi ri Allataala kuwammengngi nabarakkakiwi sining tau iya mapéddaraé lao ri iko. Ellauwi Allataala barakkakiwi mennang, aja' mutanroiwi. Accowéno marennu silaong sining tau iya marennué, sibawa terino silaong mennang iya teriyé. Tuwono sipammasé-masé séddié lao ri laingngé. Aja' mumatanré ati, iyakiya pappada-padai alému sibawa tau iya mariyawaé. Aja' muwangga'i alému lebbi acca naiya sitongennaé. Rékko pogau'i ja tauwé lao ri iko, aja' muwale'i sibawa ja. Pogau'i aga iya nangga' makessingngé sininna tauwé. Polé ri iko, akkuragano siullé-ullému untu' tuwo sidamé sibawa sininna tauwé. Saudara-saudaraku! Aja' sises-siseng muwakkabale, leppessangngi Allataala pahukkung. Saba' ri laleng Kitta'é tarokii, “Iyya ritu makkabale'. Iyya maélo hukkungngi, adanna Puwangngé.” Sibalé'na, rékko malupui balimmu, panréi, sibawa rékko madekkai, paénungngi. Nasaba ri laleng mupogau'na makkuwaéro, mupakasirii matu. Aja' muleppessangngi alému ricau ri majaé, iyakiya sitinajai Saudara caui jaé sibawa adécéngeng. Tungke' tau harusu'i tunru' lao ri pamaréntaé, saba' dé'gaga pamarénta iya dé'é nalolongengngi akuwasanna polé ri Allataala. Na pamarénta iya engkaé makkekkuwangngéwé, napajoppai akuwasanna nasaba parénta polé ri Allataala. Iyanaro saba'na tau iya méwaéngngi pamarénta pada-padai méwai aga iya pura napattentué Allataala. Na tau iya pogau'éngngi makkuwaéro tarimai matu pahukkungeng. Nasaba tau iya pogau'éngngi makessingngé dé' naparellu métau ri pamaréntaé. Banna tau iya pogau'éngngi majaé bawang harusu' métau. Rékko macinnai Saudara kuwammengngi dé' namétau ri pamaréntaé, harusu'i Saudara pogau'i makessingngé, ripojiwi matu Saudara. Saba' pamaréntaé iyanaritu atannai Allataala iya majjamaé untu' adécéngemmu. Iyakiya rékko Saudara pogau'i majaé, mémeng Saudara harusu'i métau ri aléna, saba' dé' nasiya-siya bawang makuwasai untu' hukkungngi tauwé. Aléna iyanaritu atanna Allataala, iya pateppaéngngi pahukkungenna Allataala lao ri risining tau iya pogau'éngngi majaé. Iyanaro saba'na Saudara naharusu' matinulu lao ri pamaréntaé – tenniya bawang nasaba dé' namaélo Saudara rihukkung, iyakiya nasaba sadda ati marilalemmu. Iyanaro saba'na magi nakkamaja sima Saudara, nasaba pamaréntaé iyanaritu pegawénai Allataala iya pogau'éngngi jamang iya dé'é padanna. Jaji wajani ri pamaréntaé aga iya harusu'é nawaja Saudara ri aléna. Wajai simaé, rékko harusu'i Saudara makkamaja sima; sibawa wajai cuké rékko harusu'i Saudara makkamaja cuké. Pakarajai mennang iya harusu'é ripakaraja sibawa pakalebbii mennang iya harusu'é ripakalebbi. Aja' muwakkinreng muwi aga lao ri niga, sangadinna makkinreng pammasé lao riséddié sibawa laingngé. Saba' tau iya mamaséiyéngngi pada-padanna rupa tau, purani naturusi sininna pamaréntana Allataala iya napalettu'é Musa. Saba' hukkunna agama Yahudié, iyanaritu: Aja' mumalaweng, aja muwabbuno; aja' muwénnau; aja' mumacinna mappunnaiwi aga nappunnai tau laingngé; iya manennaro silaongngi hukkung-hukkung iya laingngé, purani ririppeki mancaji séddi hukkung bawang, iyanaritu, “Amaséiwi pada-padammu rupa tau pada-pada muwamaséinna alému.” Tau iya mamaséiyéngngi tau laingngé, dé' namaélo pogau'i majaé lao ri tauwéro. Jaji tau iya mamaséiyéngngi pada-padanna iyanaritu tau iya puraé turusiwi sininna sara'-sara'na hukkung agamaé. Ri lainnaé iya manennaro muwisseng makkedaé iyaé wettué iyanaritu wettummu untu' pésedding polé ri tinroé. Saba' wettunnana untu' ripassalama'ki pédé' macawé'ni makkekkuwangngéwé naiya wettutta bunge' nappa mammula mateppe'. Mawé'ni labe' wennié; nadé'na namaitta namatajang. Jaji, madécéngenni mappésauki pogau'i pangkaukeng-pangkaukeng mapettangngé. Harusu'ki passakkekiwi aléta sibawa senjata tajang. Harusu'ki pogau'i gau'-gau' malebbié pada-pada biyasaé napogau' tauwé ri essoé; aja' muwappésta talliwe'-liwe', iyaré'ga mabo'. Aja' mupogau'i iya ricellaé, iyaré'ga maja ampé-ampé. Aja' muwallaga, iyaré'ga mangémpuru. Leppessanni Puwang Yésus Kristus pattentui aga iya harusu'é mupogau'. Sibawa aja' muturusiwi sipa-sipa tolino iya madosaé untu' turusiwi napessummu. Tau iya dé'é namateppe' ri aga iya natepperiyé harusu'i ritarima sibawa madécéng ri yelle'na Saudara-saudara. Aja' muwassasa sibawa aléna passalenna sining pallolongenna. Engka tau mappallolongeng makkedaé weddingngi naanré agi-agi. Iyakiya engka tau laing iya malemmaé teppe'na; napérasai makkedaé banna ukkaju-ukkaju bawang wedding naanré. Tau iya manrééngngi agi-agi aja' naangga' mariyawai tau iya manrééngngi banna anrékanré mattentué bawang, aja'to napasalai tau iya manrééngngi sini-sininnaé, saba' Allataala pura tarimai. Niga Saudara angkanna Saudara harusu' madélékiwi atanna tau laingngé? Menruggi iyaré'ga tokkongngi iyaro ataé, iyanaritu urusanna puwanna. Na mémeng iyaro ataé tettong lempui matu, nasaba naulléi Puwangngé patettong lempui. Engka tau pérasai séddié esso mattentué lebbi pentingngi naiya esso-esso laingngé, na tau laingngé nangga tosi makkedaé iyaro essoé pada-pada muwa. Leppessangngi tungke'-tungke' tau pattentui pallolongenna. Tau iya pentingkangngéngngi esso-esso mattentué, iyaro tauwé napogau'i makkuwaéro untu' pakalebbii Puwangngé. Tau iya manrééngngi sini-sininnaé, napogau'i makkuwaro untu' pakalebbii Puwangngé, nasaba sukkuru'i lao ri Allataala nasaba iyaro naanré. Makkuwatoro sibawa tau iya manrééngngi banna anrékanré mattentué bawang; iyaro tauwé napakalebbi towi Puwangngé sibawa sukkuru' lao ri Allataala. Dé' muwi séddi tau ri idi iya tuwoé untu' aléna bawang; sibawa dé'to muwi séddi tau polé ri idi iya maté untu' aléna bawang. Rékko tuwoki, tuwoki untu' Puwangngé. Sibawa rékko matéki, maté tokki untu' Puwangngé. Jaji tuwo iyaré'ga maté, appunnangennaki Puwangngé. Purani maté Kristus sibawa tuwo paimeng. Iyanaro saba'na nancaji Puwang untu' sining tau iya tuwoé sibawato untu' sining tau iya matéénna. Jaji, Saudara-saudara! Untu' aga mupasalai saudaramu iya siyatepperengngé? Sibawa untu' aga muwangga' mariyawai? Idi manengngé mangoloki matu ri Allataala untu' riadéléki. Ri laleng Kitta'é tarokii, Makkedai Puwangngé, “Sitongenna, tungke'-tungke' tau suju'i matu massompa ri yolo-Ku; sibawa tungke' tau mangakui matu makkedaé Iyya'na ritu Allataala.” Jaji tungke'-tungke'ki harusu' tanggung jawakiwi sininna pangkauketta lao ri Allataala. Rimakkuwannanaro aja' tasisullé sipassala. Sibalé'na usahakangngi kuwammengngi dé' mupogau'i muwi séuwa iya nassabariyé séddié Saudara siyatepperengngé rigoda sibawa madosa. Nasaba iyya masséddika sibawa Puwang Yésus, mateppe' senna'ka makkedaé dé' gaga muwi séddi iya sitongennaé najisi'; iyakiya iyaro gau'é najisi'i lao riséddié tau, rékko iyaro tauwé nangga'i najisi'. Iyakiya rékko agi iya naanré Saudara, séddié Saudara siyateppereng ripeddiriwi atinna, tentu Saudara dé'na nattinda' situru pammasé. Rékko purani maté Kristus untu' séddié tau, aja' muleppessangngi iyaro tauwé risolangi ri aga iya muwanré. Iyanaro saba'na aja' muleppessangngi aga iya madécéngngé untu' Saudara, riyangga' dé' namakessing ri tau laingngé. Saba' rékko Allataala paréntai atuwonna rupa tauwé, aga iya weddingngé naanré iyaré'ga naénung rupa tauwé, iyaro dé'na napenting. Iya pentingngé iyanaritu makkedaé rupa tauwé turusiwi élona Allataala, napéneddingiwi atennangeng atié sibawa tarimai ariyo-riyong iya nabbéréyangngé Rohna Allataala. Tau iya tumaningiyéngngi Kristus secara makkuwaro, iyaro tauwé napésennangiwi atinna Allataala, sibawa riyangke'i risining tau laingngé. Rimakkuwannanaro akkattata harusu'i tuli untu' gau'-gau' iya paompoé assipammasé-maséng sibawa sisullé sipétangngari. Aja' nasaba soal inanré, namusolangiwi aga iya puraé najama Allataala. Sininna anrékanré mémeng hallala' untu' riyanré; iyakiya rékko aga iyaro naanré Saudara nassabariwi tau laingngé madosa, tentu pasalai Saudara. Lebbi kessing muwi aja' tanré juku iyaré'ga ménung anggoro iyaré'ga pogau'i agi-agi rékko iyaro gau'é nassabariwi séddié Saudara siyatepperetta mancajiwi madosa. Leppessanni aga iya muwatepperiyéro, mupogau'i ri yolona Allataala bawang untu' aléna Saudara. Tau iya dé'é nappunnai alasang untu' marasa pasala iya nasengngé tongeng, iyaro tauwé masennangngi. Iyakiya tau iya marasa bata-bataé untu' manréi séuwaé, nainappa paggangkanna nanréi iyaro anrékanré, iyaro tauwé ripasalai ri Allataala; saba' iyaro tauwé dé' nattinda' situru atepperenna, passalenna aga iya tongengngé sibawa iya salaé. Na agi-agi iya ripogau'é dé' nasibawangngi ateppereng iyanaritu dosai. Idi iya tonget-tongengngé mateppe' ri aga iya riyatepperiyé harusu'i sabbara' lao risining pappotane'na sining tau iya malemmaé atepperenna. Aja' tamaélo sennangiwi aléta bawang. Sibalé'na harusu'ki tungke'-tungke' sennangiwi atinna pada-padatta untu' adécéngenna kuwammengngi atepperenna natattamba awatangenna. Saba' Kristus dé'to napikkiri'i asennangeng Aléna bawang. Ri laleng Kitta'é tarokii makkuwaé, “Sininna paccellaé iya ripattujué ri Iko sempé'ni ri yasé'ku.” Sininna iya riparisure'é ri laleng Kitta'é iyanaritu untu' pagguruki. Saba' pappagguruwang iya ritarimaé polé ri Kitta'é pancajiki sabbara' sibawa mawatang, angkanna weddikki maddennuwang lao ri Allataala. Tennapodo Allataala, iya mabbéré asabbarakeng sibawa passaléwo lao ri rupa tauwé, tulukko untu' tuwo massiati, turusiwi pappaitana Yésus Kristus. Sibawa massiatiwi Saudara iya maneng massibawa weddingngi pojiwi Allataala, Ambo'na Puwatta Yésus Kristus. Rimakkuwannanaro sitinajai Saudara-saudara tarimai séddié sibawa laingngé sibawa masennang ati, pada-pada towi Kristus tarimako untu' pakalebbii Allataala. Nasaba, éngngerangngi, makkedaé Kristus purani natumaningi tau Yahudié untu' mappaitangngi makkedaé Allataala matinului rupaiwi sining jancin-Na lao ri néné-nénéta. Naébbu towi Yésus bangsa-bangsa laingngé pakalebbii Allataala nasaba akessingeng atin-Na lao ri mennang. Ri laleng Kitta'é tarokii makkuwaé, “Rimakkuwannanaro maéloka poji-Ko ri yelle'na bangsa-bangsaé, maéloka makkélong pappojiyang untu' asem-Mu.” Engkato taroki makkuwaé, “Ariyo-riyono silaong umma'na Allataala iya tappilé, éh bangsa-bangsa!” Sibawa iyatoé, “Pojiwi Allataala, éh sininna bangsaé, sitinajai sininna tauwé pojiwi!” Sibawa iyatoé napowada Yésaya, “Polé ri wija-wijanna Isai mompoi matu séddi tau iya paréntaéngngi matu bangsa-bangsaé; ri Alénai matu bangsa-bangsaé mamménasa.” Allataala iyanaritu onronna Saudara mamménasa. Tennapodo nalisekiwi atimmu sibawa sininna ariyo-riyongngé sibawa asaléwangengngé nasaba mateppe'ko ri Aléna, kuwammengngi nasaba akuwasanna Rohna Allataala pédé' mamménasako lao ri Allataala. Saudara-saudaraku! Mateppe'ka makkedaé engka maéga senna' passaleng iya makessingngé ri iko. Muwisseng towi sini-sininnaé sibawa mullé mappagguru séddié sibawa laingngétto. Iyakiya passalenna gau'-gau' mattentué, uparéngngerangiko sibawa matedde ri laleng sure'éwé, nasaba Allataala pura mpérékka jamangngéro. Puraka napancaji pattumaninna Kristus Yésus untu' rikiring lao ri bangsa-bangsaé iya tenniyaé Yahudi. Sibawa tinda'ka selaku imang, iya mappallebbangengngéngngi Karéba Madécéng polé ri Allataala, kuwammengngi sining tau tenniyaé Yahudi mancajiwi séuwa pakkasuwiyang lao ri Allataala iya weddingngé natarima Allataala. Tennapodo Rohna Allataala mébbui mennang mancaji séddi pakkasuwiyang iya ripallaingngé untu' Allataala. Jaji, nasaba masséddika sibawa Kristus Yésus, naweddikka marasa battowa nyawaku ri jama-jamakku untu' Allataala. Baranika mabbicara makkuwaro banna passalenna aga iya puraé napogau' Kristus naolaka untu' pancajiwi sining tau tenniyaé Yahudi mapato lao ri Allataala. Upogau'i iyaro sibawa ada-ada enrengngé pangkaukeng, iya nasibawangngé gau'-gau' makalallaing sibawa gau'-gau' iya dé'é padanna; iya manennaro poléi ri akuwasanna Rohna Allataala. Karéba Madécéngngé passalenna Kristus pura manenni uwabbirittang lao ri risining tauwé, mappammulai ri Yérusalém lettu ri Ilirikum. Cita-citaku iyanaritu mabbirittangngi Karéba Madécéng polé ri Allataala risining tau iya dé'éppa naengka naéngkalingai passalenna Kristus. Saba' dé' umaélo patettong jamang ri pandaméng iya napalénne'é tau laingngé. Ri laleng Kitta'é tarokii, “Sining tau iya dé'éppa naengka natarima karéba passalenna Aléna, naitai matu; sibawa iya dé'éppa naengka naéngkalingai, najeppuiwi matu.” Iyanaro saba'na biyasaka tassangkalangeng untu' célléngiko. Iyakiya makkekkuwangngé jama-jamakku ri daéra-daéraéro cappuni. Mattaut-taunni ittana macinnaka célléngiko. Rékko laloka matu ri kotamu ri laleng allalengekku lao ri Spanyol, mamménasaka wedding siruntu' saudara sibawa mariyo-riyo cinampe' sibawa iko. Purairo mamménasaka ri iko kuwammengngi weddingngi tabantuka untu' allalengekku lao ri Spanyolro. Iyakiya makkekkuwangngéwé maéloka lao ri Yérusalém untu' tiwi bantuwang untu' umma'na Allataala kuwaro. Saba' jema'-jema'é ri Makedonia sibawa Akhaya nasitujuini untu' mabbéré sumbangeng lao ri Saudara-saudara iya kasiyasié ri yelle'na umma'na Allataala ri Yérusalém. Masennang atinna mennang pettuiwi untu' pogau'i iyaro. Mémeng sitongenna sitinajai mennang tulungngi Saudara-saudara iya kasiyasié ri Yérusalém, saba' polé risining tau Yahudié ritu nasining tau tenniyaé Yahudiro purani natarima barakka-barakka polé ri Allataala. Jaji, sining tau tenniyaé Yahudiro sitinaja towi natulung sining tau Yahudié sibawa barakka-barakka maddupa barab-barangngé. Rékko purani upattéppu jama-jamakkué, sibawa mabbéréyangngi lao ri mennanro iya engkaé ri Yérusalém sumbangeng iya pura ripaddeppungengngéro, maéloka joppa lao ri wanuwa Spanyol laloiwi kotamu. Rékko laoka ri iko, pasti poléka sibawa maéga barakka polé ri Kristus untu' iko. Nasaba Puwatta Yésus Kristus, sibawa nasaba pammasé iya nabbéréyangngé Rohna Allataala, uwéllauwi sibawa masero ri iko, tennapodo maccowéko massempajang tonget-tongeng sibawakka lao ri Allataala untu' aléku. Assempajanno kuwammengngi Allataala napaleppe'ka polé ri limanna sining tau iya dé'é namateppe' ri Yudéa, sibawa kuwammengngi na jama-jamakku untu' tiwii sumbangengngé ri Yérusalém natarimai sibawa masennang atinna umma'na Allataala kuwaro. Rimakkuwannanaro, narékko napuwéloi Allataala, weddikka lao ri iko sibawa ati iya masennangngé. Sibawa tassaléwoka matu ri tengnga-tengngamu. Tennapodo Allataala, iya mabbéré asaléwangeng ri rupa tauwé, sibawang manengngi Saudara. Aming. Macinnaka mappaddissengengngi Saudarata, Fébé. Nabantui jema'é ri Kéngkréa. Tarimai selaku sala séddinna polé ri umma'na Puwangngé. Mémeng makkuwairo sining tau iya mateppe'é lao ri Allataala harusu'i tarimai séddié sibawa laingngé. Tulungngi, rékko mapparrelluwangngi bantuwang polé ri iko, nasaba aléna pura toni nabantu maéga tau – muttama' toni aléku. Palettukekka sellekku ri Priskila sibawa Akwila, sellao-sellaoku iya pada-padaé majjama untu' Kristus Yésus. Céddé'i mennang maté nasaba maéloi passalama'ka. Mattarima kasi'ka lao ri mennang – na tenniya iyya bawang, iyakiya sininna jema'é ri bangsa laingngé iya tenniyaé Yahudi mattarima kasi towi lao ri mennang. Palettukeng tokka sellekku lao ri jema'é iya maddeppungengngé ri bolana mennang. Selleng lao ri Epenétus iya uwamaséiyé. Iyanaritu tau iya bunge'-bunge' mateppe'é ri Kristus ri daéra Asia. Sellekkuto lao ri Maria. Makkumani rejjinna pura majjama untu' iko. Palettukeng tokka sellekku lao ri Andronikus sibawa Yunias. Sisuku bangsaka sibawa mennang enrengngé pura riputtama' tarungkué silaong iyya. Ri wettu dé'napa umateppe ri Kristus, lebbi riyoloi mennang mateppe'. Tarompoi mennang ri yelle'na rasul-é. Sellekku lao ri Ampliatus, iya uwamaséiyé nasaba sibawaka pura masséddi sibawa Puwangngé. Palettukekka sellekku ri Urbanus, sellaota iya majjamaé sibawa idi untu' Kristus. Makkuwatoro sellekku lao ri Stakhis iya uwamaséiyé. Sellekku lao ri Apélés. Pabuttini atinulurenna lao ri Kristus. Sellekkuto lao ri kaluwargana Aristobulus, sibawa lao ri Hérodion. Sisuku bangsai sibawa iyya. Makkuwatoro sellekku lao ri Saudara-saudara siyatepperengngé ri laleng kaluwargana Narkisus. Sellekku lao ri Triféna sibawa Trifosa iya marejjingngé majjama tumaningiwi Puwangngé, sibawa lao ri Persis iya uwamaséiyé. Pura toni marejjing majjama untu' Puwangngé. Sellekku lao ri Rufus sibawa indo'na, iya pada-padaé indo' ri aléku. Rufus iyanaritu tau iya napilé Puwangngé iya ripojiyé. Palettukekka sellekku lao ri Asinkritus, Flégon, Hérmés, Patrobas, Hérmas, sibawa sininna saudara siyatepperengngé iya silaongngé mennang. Sellekku lao ri Filologus sibawa Yulia; lao ri Néréus sibawa ana'daranna; lao ri Olimpas sibawa lao ri sininna tau mateppe'é iya silaongngé mennang. Siyasselles-sellengekko sibawa sipammasé-masé selaku Saudara Kristéng. Sininna jema'na Kristus palettu'i sellenna mennang lao ri Saudara-saudara. Saudara-saudara! Uwéllauwi sibawa masero: atike'ko lao risining tau iya paompoé assisalang sibawa pakacauwi atepperenna tauwé lao ri Puwangngé. Iyaro gau'é sisalai sibawa aga iya puraé riyappagguruwang lao ri iko. Abélaiwi sining tau makkuwaéro. Saba' sining tau iya pogau'éngngi makkuwaéro dé' najjama untu' Kristus Puwatta, sangadinna untu' pawessoriwi cinna atinna. Nasibawang pappalécé sibawa ada-ada iya macenningngé, nabengnguwangngi sining tau iya dé'é agaga naisseng. Naissenni sininna tauwé makkedaé matinuluko lao ri pappagguruwang passalenna Karéba Madécéng iya polé ri Allataala. Namasennakka ri gau'éro passalenna. Macinnaka kuwammengngi mumapanré passalenna gau'-gau' iya makessingngé, sibawa madonggo passalenna gau'-gau' iya majaé. Allataala iya mabbéré asaléwangeng lao ri rupa tauwé, masitta'i matu taroi Ibillisi ri yawa akuwasammu sibawa mancuru'i. Tennapodo Saudara-saudara tuli ribarakkakiwi ri Yésus Kristus Puwatta! Timotius, sellaoku, palettu'i sellenna lao ri iko. Makkuwatoro Lukius, Yason sibawa Sosipater, iya sisuku bangsaé sibawa iyya. Iya mokiéngngi iyaé sure'é iyanaritu iyya, Tértius. Palettu'ka selleng assisellaongeng lao ri iko. Massellengngi Gayus lao ri iko. Mappérumaka ri bolana sibawa jema'ta massompai kuwato. Erastus, kapala bendaharana kotaé, massellengngi lao ri iko, makkuwatoro saudara Kwartus. [ Tennapodo Puwatta Yésus Kristus barakkaki manengngi Saudara. Aming.] Ripojiwi Allataala! Makuwasai péwatangiwi atepperenna Saudara situru Karéba Madécéng polé ri Allataala iya uwabbirittangngé passalenna Yésus Kristus. Uwabbirittangngi iyaro karébaé situru sibawa aga iya napannessaé Allataala; iyanaritu rancanana Allataala iya maddatu-datu taungngénna ittana dé' naissengngi tauwé. Iyakiya makkekkuwangngé, nasaba paréntana Allataala iya mannennungengngé, iyaro rancanaé purani ripannessa sibawa riyappaddissengeng lao risininna bangsa-bangsaé naolai kitta'-kitta'na sining nabié, kuwammengngi naiya maneng mennang namateppe' sibawa namatinulu lao ri Allataala. Aléna ritu Allataala tungke'é, mapanré senna'i. Tennapodo ripakatanréi lettu mannennungeng naolai Yésus Kristus! Aming. Salama, Tuli mattarima kasi'ka lao ri Allataala passalenna iko, saba' mutarimai pammasé polé ri Allataala naolai Kristus Yésus. Nasaba mancajiko appunnangenna Kristus, nasugi atuwommu ri laleng sininna gau'é. Pangissengemmu passalenna sininna séuwaé malamung senna', namaccako mappagguruwangngi iyaro pangissengengngé. Iyaro mappaitangngi makkedaé karéba passalenna Kristus makkuwamani mattemme'na ri laleng atimmu, angkanna dé' muakurangeng muwi séddi barakka, ri wettu mutajenna Puwatta Yésus Kristus sibawa naitana sininna tauwé. Aléna matu Kristus tanggukko lettu ri accappurenna; kuwammengngi ri wettunna polé paimeng, ripoléiko matu temmakkécella. Weddingngi Allataala riyatepperi tonget-tongeng. Aléna ritu Allataala iya puraé mobbiko untu' mancaji séddi sibawa Ana'-Na, iyanaritu Yésus Kristus, Puwatta. Saudara-saudara! Ri laleng asenna Puwatta Yésus Kristus uwéllauwi kuwammengngi mumasséddi ada maneng; kuwammengngi aja' naengka assisalang ri yelle'mu. Sitinajako masséddi, siati sibawa sinawa-nawa. Saba', sining tau polé ri kaluwarga Kloé laporo'i ri iyya engka assasang ri yelle'mu. Iya uwasengngé iyanaritu makkedaé ri yelle'mu engka makkeda, “Iyya maccowéka ri Paulus,” engkato makkeda, “Iyya maccowéka ri Apolos,” iya laingngé makkedai, “Iyya maccowéka ri Pétrus,” na laingngé makkeda tosi, “Iyya maccowéka ri Kristus.” Masa' Kristus tabbagé-bagé! Paulus dé' namaté risalli untu'mu! Dé'to muricemmé untu' mancaji ana'-ana' gurunna Paulus? Sukkuru'ka dé' ucemméi muwi séddi tau polé ri yelle'mu, ri lainnaé Krispus sibawa Gayus. Aja' narapii séddié tau makkeda makkedaé puraka cemméi untu' mancaji ana' gurukku. ( Stéfanus sibawa kaluwargana, mémeng iyya cemméi mennang. Iyakiya ri lainnaéro iya uwéngngerangngé dé'na gaga tau lainna iya ucemmé.) Nasuroka Kristus tenniya untu' cemméi tauwé, sangadinna untu' mappallebbangengngi Karéba Madécéng polé ri Allataala; na iyaro harusu'i upogau' tekkupaké amaccang mabbicaraé secara tolino, kuwammengngi akuwasanna amaténna Kristus risallié dé' namancaji siya-siya. Saba' lao risining tau iya mattujué ri abinasangngé, karéba passalenna amaténna Kristus ri sallié pada-padai omong kosongngé. Iyakiya lao ri idi iya ripassalama'é ri Allataala, iyaro karébaé pada-padai carana Allataala mappaitangngi akuwasan-Na. Saba' ri laleng Kitta'é, makkedai Allataala, “Apanrénna tau maccaé maélo Upakacau, pappahanna tau makképangissengengngé maélo Upallennye.” Aga akkégunananna sining tau makképangissengengngéro? Aga akkégunanna mennang iya maccaé? Aga akkégunanna ahli-ahli pannawa-nawa linoéwé? Pura nappaitanni Allataala makkedaé apanrénna linoéwé iyanaritu omong kosongngi simata! Nasaba muwi pékkugi accana rupa tauwé, dé' naulléi missengngi Allataala naolai acca ri aléna. Iyakiya mala nasaba mapanréi Allataala, nanasitujuiwi passalama'i sining tau iya mateppe'é ri Aléna naolai biritta iya riyappallebbangengngé iya nangga'é séuwa omong kosong linoé. Natuntu'i tau Yahudié anu makalallaingngé selaku butti, sibawa tau Yunanié napentingkangngi apanrénna linoéwé. Iyakiya idi'é banna mabbirittangngi Kristus iya maté ri sallié. Iyaro birittaé nasinggungngi pappéneddinna sining tau Yahudié sibawa nangga'i omong kosong sining tau tenniyaé Yahudi. Sibawa tau tenniyaé Yahudi naangga'i iyaro séuwa adonggong. Iyakiya lao risining tau iya puraénna riyobbi ri Allataala – muwi tau Yahudi iyaré'ga tenniya tau Yahudi – iyaro birittaé sinrupai carana Allataala mappaitangngi akuwasan-Na sibawa apanrén-Na. Saba' iya paitaé madonggo ri Allataala, iyanaritu lebbi mapanréi na iya apanrénna tolinoé; sibawa iya paitaé malemma ri Allataala, iyanaritu lebbi watangngi na iya awatangenna rupa tauwé. Saudara-saudara! Cobai méngngerangngi pékkugi keadaammu wettunna Allataala mobbiko. Céddé bawang polé ri yelle'mu iya mapanré, iyaré'ga makuwasaé, iyaré'ga matanré tudangenna manuru' pakkitanna rupa tauwé. Saba' mémeng nattungka Allataala piléi iya nangga madonggoé linoéwé, kuwammengngi nasining tau maccaé namasiri. Sibawa Allataala pilé towi iya nangga malemmaé linoéwé, kuwammengngi nasining tau iya baranié naporé nancaji masiri. Allataala piléi iya riyangga mariyawaé, matuna, sibawa mala iya riyangga dé'é nakkébettuwang ri linoéwé, kuwammengngi na Allataala mancuru'i iya nangga pentingngé linoé. Rimakkuwannanaro dé' muwi séddi tau mulléi mattempowangngi aléna ri yolona Allataala. Allataala muto mébbui angkanna Saudara masséddi sibawa Kristus Yésus. Naolai Kristus naripancajiki mapanré. Sibawa naolai Alénato, naébbuki Allataala simadécéngeng paimeng sibawa Aléna enrengngé pancajiki umma'-Na iya mapaccingngé, kuwaéttopa paleppe'ki. Jaji, pada-pada iya tarokié ri laleng Kitta'é, “Tau iya maéloé mammingki-mingki, harusu'i mammingki-mingki ri aga iya napogau'é Puwangngé.” Saudara-saudara! Wettukku lao ri iko sibawa mabbirittangngi ri iko passalenna rancanana Allataala iya dé'éppa naissengngi linoé, dé' upakéi apanrénna linoéwé iyaré'ga mabbicara iya héba'-héba'é. Saba' pura upattette'ni makkedaé ri wettu engkaku mupa sibawakko, dé' umaélo powadai agi-agi, ri lainnaé Yésus Kristus; lebbi-lebbipi makkedaé purai maté ri sallié. Wettukku sibawakko, malemmaka sibawa ténréka nataro tau. Karéba iya upalettu'é ri iko dé' upalettu'i sibawa ada-ada iya mappangarué situru apanrénna rupa tauwé. Upalettu'i iyaro sibawa cara iya pabuttiyéngngi makkedaé makuwasai Rohna Allataala. Upogau'i makkuwaéro, kuwammengngi atepperemmu lao ri Kristus dé' nasituru' apanrénna tolinoé, sangadinna siturui akuwasanna Allataala. Namuni makkuwaro, ri yelle'na sining tau iya matasa'énna atuwong baténna, mabbicara mémekka passalenna apanréngngé. Iyakiya iyaé apanréngngé tenniya apanréng linoé, iyaré'ga apanrénna sining panguwasaé wettuéwé, iya lennye'é matti akuwasanna. Apanréng iya upangoloéro iyanaritu apanréng polé ri Allataala. Iyaro apanréngngé dé' naissengngi linoé, iyakiya Allataala pura passadiyangengngi untu' asennangetta riwettu dé'napa naripancaji linoéwé. Dé' muwi séddi tau polé risining panguwasaé wettuéwé iya missengngéngngi passalenna apanréngngéro. Saba' akkalarapanna mennang naissenni, tentu dé' mennang namaélo sallii Puwang iya malebbiéro. Sibalé'na iyaro gau'é pada-padai iya tarokié ri laleng Kitta'é, “Aga iya dé'é naengka naitai iyaré'ga naéngkalingai tolinoé, sibawa dé'to naengka naompo ri laleng pikkiranna tolinoé, iyanaro napassadiya Allataala untu' sining tau iya Namaséiyé.” Iyakiya pura napannessani Allataala lao ri idi sibawa naolai Roh-Na. Iyaro Rohna Allataala nasalidikiwi sininna séuwa-séuwaé, lettu risining rancanana Allataala muwi iya kaminang tassubbué. Saba' iya missengngéngngi atinna séddié tau iyanaritu rohna muto iyaro tauwé? Makkuwatoro passalenna Allataala. Iya missengngéngngi lise atinna Allataala banna Rohna Allataala bawang! Na idi dé' nariwérékki rohna linoéwé, sangadinna Roh polé ri Allataala, kuwammengngi nariisseng maneng iya puraé nabbéréyang Allataala lao ri idi. Rimakkuwannanaro rékko mappakatajakki gau'-gau' passalenna Allataala lao risining tau iya mappunnaiyé Rohna Allataala, dé' naripangolo situru apanrénna tolinoé, sangadinna situru pappagguruwanna Rohna Allataala. Tau iya dé'é nappunnai Rohna Allataala, dé' naulléi tarimai aga iya napannessaé iyaro Roh-é. Saba' lao ri iyaro tauwé iyaro gau'-gau'é pada-padai séddi adonggong bawang. Iyaro tauwé dé' naulléi pahangngi, saba' iyaro gau'-gau'é banna weddingngi riyangke' secara baténg. Tau iya mappunnaiyé Rohna Allataala naulléi mangke'i sininna séuwa-séuwaé, iyakiya dé' muwi séddi tau mappunnai ha' mangke'i Aléna. Ri laleng Kitta'é tarokii, “Niga missengngi pikkiranna Puwangngé? Sibawa niga mulléi pangajariwi?” Idi ritu iya mappunnaiyé pikkirang iya pada-padaé Kristus! Saudara-saudara, sitongenna dé' uwulléi mabbicara sibawa Saudara pada-pada tau iya mappunnaiyé Rohna Allataala. Banna uwulléi mabbicara sibawa iko pada-pada tau iya tuwoé mupa situru cinna mallinona; pada-pada tau iya ana'loloé mupa ri laleng atepperenna lao ri Kristus. Riyolo banna uwulléi mpérékko nanré ana'lolo, tenniya nanré tau battowa; saba' dé'pa nagenne awatangemmu untu' iyaro. Iyakiya muwi makkekkuwangngé dé'topa namawatang untu' iyaro, nasaba tuwo mupo situru sipa'-sipa'mu secara tolino. Saba' rékko mangémpuru mupo sibawa mallaga séddié sibawa laingngé, dé'ga na iyaro mappaitangngi makkedaé tuwo mupo situru sipa'-sipa' tolinoé, pada-pada sining tau iya dé'é naissengngi Allataala? Rékko engka makkeda, “Idi maccowéki ri Paulus,” na laingngé makkeda, “Idi maccowéki ri Apolos,” dé'ga iyaro nappaitangngi makkedaé Saudara makkéampéi pada-pada sining tolinoé? Niga sitongenna iyaro Apolos? Sibawa niga Paulus? Bannaki pattumani-pattumaninna Allataala, iya pimpingngékko untu' mateppe' lao ri Kristus. Bannaki pajoppai jama-jamang iya nawéréngngékki Puwangngé lao ri idi tungke'-tungke'. Iyya mattaneng na Apolos boloi, iyakiya Aléna muto Allataala iya mébbuéngngi tanet-tanenna tuwo. Jaji iya pentingngé iyanaritu Allataala, saba' Aléna ritu patuwoi. Iya mattanengngé sibawa iya mabboloé dé' napenting; pada-padai iyanaritu iya duwa. Tungke'-tungke' tarimai matu saro situru turuppuse'na. Idi iyanaritu sining tau iya sibawaé majjama untu' Allataala; na iko pada-padai dare'na Allataala. Saudara-saudara iyanaritu pada-pada towi bolana Allataala. Nasibawang amaccang iya nabbéréyangngé Allataala, iyya selaku panré bola pura pasangngi pandaménna untu' iyaro bolaé, na tau laingngé patettongngi bolaé ri yasé'na pandaméngngéro. Tungke'-tungke' tau harusu' pénessaiwi madécéd-décéng pékkugiwi patettongngi ri yasé'na iyaro pandaméngngé. Saba' aléna muto Allataala pura taroi Yésus Kristus selaku alé-aléna pandaméng untu' iyaro bolaé; dé' gaga pandaméng laingngé. Engka mappatettong ri yasé'na pandaméngngéro sibawa makkégunang ulaweng, engka makkégunang péra', engka makkégunang batu paramata, engkato makkégunang aju, wella rakko iyaré'ga daramé. Jama-jamanna tungke' tau paitai matu matti ri wettu poléna Kristus paimeng. Saba' iyaro Essoé apié matu mébbui jama-jamanna tungke' tau paitai. Apié muto mojiwi sibawa pattentui matu agellorenna jama-jamangngéro. Rékko bola iya napatettongngé tauwé ri yasé'na pandaméngngéro tahangngi nanré api, iyaro tauwé natarimai matu hadiyana. Iyakiya rékko nanréi api jama-jamanna tauwé, rogiwi matu; salama' mutowi matu aléna, iyakiya pada-padai tau iya leppe'é molai apié. Muwissegga Saudara makkedaé iko iyanaritu Bolana Allataala? Sibawa Rohna Allataala monro ri alému? Rékko engka tau solangiwi Bolana Allataala, iyaro tauwé nasolangi towi Allataala. Nasaba Bolana Allataala iyanaritu banna untu' Allataala bawang, na ikona iyanaritu iyaro bolaé. Aja' muwi séddi tau belléi aléna. Rékko engka tau ri yelle'mu masengngi aléna mapanré manuru' ukkuranna linoéwé, iyaro tauwé harusu'i madonggo, kuwammengngi natonget-tongeng mancaji mapanré. Saba' iya nangga'é mapanré linoéwé iyanaritu madonggoi ri pakkitanna Allataala. Ri laleng Kitta'é tarokii, “Allataala jebba'i sining tau mapanré ri laleng amaccang aléna mennang.” Engkato taroki makkuwaé, “Naissengngi Puwangngé makkedaé nawa-nawanna sining tau mapanré iyanaritu nawa-nawa iya dé'é nakkéguna.” Rimakkuwannanaro, aja' naséddié tau makka-akkai tolinoé, saba' sininna séuwa-séuwaé pura riyabbéréyanni mancaji appunnangemmu: Paulus, Apolos, Pétrus, linoéwé, atuwongngé sibawa amaténgngé, iyaé wettué iyaré'ga wettu mangoloé, iya manennaro iyanaritu appunnangemmu. Na iko iyanaritu appunnangennai Kristus, na Kristus appunnangennai Allataala. Angga'ni idi pattumani-pattumaninna Kristus, iya tanggung jawakiyéngngi mabbirittangngi sining rancanana Allataala iya dé'éppa naissengngi linoé. Iya bunge'-bunge' natuntu'é polé ri pattumani makkuwaéro iyanaritu matinului ri puwanna. Untu' aléku, dé' nancaji soal aga iya mupikkiri'é – iyaré'ga muwi niga – passalenna aléku. Mala aga iya upikkiri'é passalenna aléku dé'to nancaji soal. Dé' uwasengngi aléku pasala muwi ri laleng aga, iyakiya iyaro tenniya buttinna makkedaé mémekka dé' upassala. Aléna Puwangngé ritu iya pattentuéngngi pasalaka iyaré'ga dé'. Rimakkuwannanaro, nasaba dé'pa na wettunna, aja' mumasitta pattentui makkedaé séddié tau pasalai iyaré'ga dé'. Tajengngi narapi Puwangngé polé matti. Aléna ritu bukkai matu sininna rahasiya iya tassubbué ri laleng pettangngé. Aléna ritu matu bongkara'i sininna niya' iya radde'é ri laleng atinna rupa tauwé. Ri wettuénnaro nappa tungke' tau tarimai polé ri Allataala pappoji iya sitinajaé natarima. Saudara-saudara! Untu' apentingemmu, purani upakennai manenro lao ri Apolos sibawa lao ri alékuto. Akkattana kuwammengngi napolé ri contotaro, weddikko magguru aga bettuwanna warékkadaé, “Akkatenninno lao ri peraturang iya engkaé.” Nanallalengiro dé' muwi séddi tau polé ri iko mulléi mammingki-mingkikengngi séddié tau, nainappa pakatunai iya laingngé. Niga pancajiwi Saudara lebbi naiya tau laingngé? Dé'ga nasininna séuwa-séuwaé natarimai Saudara polé ri Allataala? Jaji, magi mumaélo mammingkikengngi alému, samanna aga iya engkaé ri Saudararo tenniya séuwa iya riyabbéréyangngé? Mémeng dé'na muwapparelluwassi aga-aga! Sugino iko! Mancaji arunno! Na idi dé'! Temmaka kessinna rékko tonget-tongekko mancaji arung, kuwammengngi weddikki mapparénta silaong iko. Nasaba manuru' pallolongekku, idi rasul-rasul-é purani ripancaji ri Allataala selaku akkita-itang ri yolona rupa tauwé sibawa malaéka'é. Pada-padaki idi sining tau matunaé iya ripateppaiyé pahukkungeng maté ri yolona tau maégaé sibawa rigora-gorai ri linoé. Nasaba Kristus, idi iyanaritu tau madonggoki, na iko tau Kristéng iya maccaé! Malemmaki, na iko mawatang! Ricellaki, na iko sanging ripoji! Narapi makkekkuwangngéwé péneddingiki akkadéreng sibawa adekkang; pakéyatta iya bawang monro ri watakkalé; napanrasa-rasaki tauwé; dé' tappunnai onrong untu' mattette'; riyaggangkaulléyangngi untu' sappa dallé. Rékko ritanroiki, ribaliwi sibawa barakka; rékko ripanrasa-rasaki, sabbara'ki; rékko napau majaki tauwé, ribaliwi sibawa ada-ada iya macenningngé. Idi'é dé' talebbi naiya worowona linoéwé; lettu makkekkuwangngéwé idi riyangga'ki pada-pada rota'na tanaé. Uwokii iyaé lao ri iko tenniya untu' pakasiriko, iyakiya untu' pangajariko pada-pada ana'-ana' ri aléku. Saba' iyya ritu mancaji ambo'mu, namuni naullé selaku tau Kristéng, mappunnaiko seppulo sebbu guru. Ri laleng atuwommu selaku sining tau iya masséddié sibawa Kristus, mancajika ambo' lao ri iko, nasaba iyya tiwii Karéba Madécéngngé passalenna Kristus lao ri iko. Rimakkuwannanaro uwéllauwi sibawa masero kuwammengngi namuwaccowériwi contoku. Untu' iyanaro, na purani usuro Timotius lao ri iko. Selaku tau maccowé ri Kristus, pada-padai ana' ri aléku iya uwamaséiyé. Ana' iya weddingngé riyatepperi. Na aléna matti paréngngerangiko passalenna cara-cara atuwo-tuwong iya uwaccowériyé mateppe'kuna ri Kristus, iyanaritu cara tuwong iya uwappagguruwangngé ri tungke' jema'é kégi-kégi onrong. Siyagangngaré polé ri yelle'mu matemponi, saba' nasekka mennang dé' umaélo lao ri iko. Iyakiya rékko napuwéloi Puwangngé, maélo tokka lao ri iko. Dé'na namaitta, ri wettuépparo matti uwita towi matu aga iya weddingngé napogau' sining tau iya matempoéro; tenniya bawang banna ada-adanna mennang. Nasaba rékko Allataala paréntai atuwonna séddié tau, iyaro gau'é ripabuttiwi ri awatangeng atuwonna tauwéro, tenniya ri ada-adanna. Jaji pilé bawanni aga lebbi mupoji! Muwéloriga poléka untu' pagguruko sibawa matedde iyaré'ga poléka untu' mappagguru sibawa malemma sibawa paressé babuwa? Sitongenna engkana laporan utarima makkedaé ri yelle'mu engka appangaddiyang iya talliwe'-liwe'é: Engka ri yelle'na Saudara iya malawengngé sibawa poro indo'na. Muwi sining tau iya dé'é naissengngi Puwangngé dé'to napogau'i makkuwaéro! Namuni makkuwaro, matanré ati mupi Saudara. Sibalé'na harusu'i Saudara messé, sibawa passui polé ri yelle'na Saudara tau iya pogau'éngngi gau'éro. harusu'ko mabbéréyangngi iyaro tauwé lao ri Ibillisi' kuwammengngi na watakkaléna iyaro tauwé nabinasa, nanallalengiro naripassalama' rohna ri wettunna Puwangngé polé paimeng. Dé' nasipato'ko matempo! Naullé muwissenni warékkadaéwé, “Ragi céddé'é pasawéi lama labbu'é!” Abbéyangngi riyolo' ragi iya malaungngéro, iyanaritu ragi dosaé, kuwammengngi mumancaji pada-pada lama labbu iya barué, mapaccing polé ri ragi dosa malaungngé, na uwisseng makkedaé mémeng iko makkuwakoro. Saba' ramé-ramé Paskata sadiyani, nasaba Kristus mancaji selaku bimbala' Paskata, purani riyakkarobangeng. Jaji, laono mai taramé-raméiwi iyaro péstaé sibawa roti iya dé'é gaga raginna, iyanaritu roti maddapangengngéngngi apaccingengngé sibawa sininna iya nasitujuiyé atinna Allataala. Aja' taramé-raméiwi pésta Paskaéro sibawa roti iya engkaé ragi launna, iyanaritu ragi dosa sibawa ja. Ri laleng sure'ku iya labe'é, upaissengekko kuwammengngi aja' musiwollompollong sibawa tau pappangaddingngé. Iya uwakkattaiyé tenniya tau pappangaddiyé iyaré'ga mangowaé, iyaré'ga pabengnguwangngé iyaré'ga passompa barahalaé iya dé' sises-sisengngé naissengngi Allataala. Tenniya! Tenniya mennang uwakkattai; saba' rékko harusu'ko mabélaiwi mennang, tentu parelluko massu siseng polé ri linoéwé. Akkattaku iyanaritu, makkedaé aja' musiwollompollong sibawa tau iya mangakuiyéngngi aléna tau Kristéng, iyakiya iyaro tauwé pappangaddiwi, iyaré'ga mangowa, iyaré'ga passompa barahala, iyaré'ga napoji pau-pau majai tau laingngé, iyaré'ga pammabokeng, iyaré'ga panga. Muwi tudang manré sibawa tau makkuwaéro, aja'to! Magi naengka ri yelle'mu iya baranié lao ri hakingngé iya dé'é naissengngi Allataala, untu' mapparapekengngi saudara siatepperengngé, rékko massasai sibawa saudaranaro? Magi nadé' naéllauwi umma'na Allataala pacceppiwi parakaraéro? Dé'ga muwissengngi makkedaé umma'na Allataala matu madélékiwi linoéwé? Jaji, rékko mémeng muadélékiwi matu linoéwé, dé'ga muwulléi pacceppiwi parakara-parakara angngadélékengngé iya dé'é bettuwanna? Dé'ga muwissengngi makkedaé idi matu madélékiwi sining malaéka'é? Lebbi-lebbipi parakara-parakara atuwong esso-essoé! Rékko mompoi parakara-parakara makkuwaéro, mupangologa lao ri sining tau iya dé' sises-sisengngé nappunnai pangka' ri laleng jema'é? Mappakasiri-siri tongeng! Tentu ri yelle'mu engka séddi tau iya genne'é apanrénna untu' pacceppiwi assisalangngé ri yelle'na Saudara-saudara iya pada-padaé Kristéng! Iyakiya sibalé'na séddié tau Kristéng lao riséddié tau tenniyaé Kristéng untu' mapparapekengngi parakarana lao ri saudarana iya Kristéngngétto! Aja' mulao makkara-kara ri tau tenniyaé Kristéng; engkana sining assisalangngé ri yelle'mu sinrupai séuwa apakalang ri iko. Lebbi kessing muwi rigau' dé' naadélé', iyaré'ga riparogi! Iyakiya mala iko muto gaukengngi tau laingngé sibawa dé' naadélé'. Iko muto parogiwi tau laingngé. Na iyaro mupogau'i mala lao ri Saudara-saudara siatepperengngé! Muwissegga makkedaé sining tau iya dé'é naturusiwi élona Allataala, dé' namancaji matu anggotana umma'na Allataala? Aja' naribelléko. Sining tau iya pogau'éngngi pappangaddiyangngé, sining tau iya massompaé barahala, iya malawengngé, iya pogau'éngngi pangkaukeng mappakasiri-sirié lao ri pada-padanna, iya ménnauwé, iya mangowaé, iya pammabokengngé, iya pojiyéngngi pau-pau majai tau laingngé, sibawa para'éngngi tau laingngé – sininna tau pada-padaéro dé' nancaji matu anggotana umma'na Allataala. Siyagangngaré ri yelle'mu riyolo kédo-kédo makkuwaro. Iyakiya makkekkuwangngé ripannessano mapaccing polé ri dosaé. Mancajino appunnangenna Allataala iya ripallaingngé. Simadécéngenno paimeng sibawa Allataala, nasaba mateppe'ko lao ri Puwang Yésus Kristus sibawa nasaba akuwasanna Roh polé ri Allataala. Engka powadai, makkedaé tungke' tau weddingngi napogau' sininna séuwa-séuwaé. Iyakiya untu' ri aléku dé' nakkéguna maneng. Jaji namuni wedding upogau' agi-agi, iyakiya dé' umaélo malleppessangngi aléku rikuwasai ri muwi aga. Engkato powadai makkedaé nanré iyanaritu untu' babuwaé, na babuwaé ripassadiyai untu' nanré. Iyakiya iya duwa ripaddéi matu ri Allataala. Tubunna tolinoé dé' nawedding ripaké untu' pangkaukeng iya mappangaddié, iyakiya banna untu' tumaningiwi Puwangngé. Na Puwangngé piyarai matu iyaro tauwé. Allataala pura patuwoi Puwang Yésus polé ri amaténgngé, makkuwatoro Allataala patuwoi matu idi sibawa akuwasan-Na. Naisseng Saudara-saudara makkedaé tubummu iyanaritu anggota tubunnai Kristus. Jaji, weddikka'ga mala séddi anggota tubunna Kristus nainappa pancajiwi anggota tubunna séddié cakkuribang? Dé' sises-siseng! Iyaré'ga naullé dé'pa muwissengngi makkedaé tau iya sicampuru'é sibawa séddié cakkuribang, mancaji séddini sibawa cakkuribangngéro! Saba' ri laleng Kitta'é tarokii, “Mancaji séddiwi iya duwa.” Iyakiya tau iya passéddiyéngngi aléna sibawa Puwangngé, Rohna Puwangngé sibawa rohna tauwéro mancaji séddiwi. Abélaiwi pangkaukeng-pangkaukeng iya mappangaddiyé. Saba' sininna dosa laing iya napogau'é tauwé, kajajiyangngi ri saliwenna tubunna tauwéro. Iyakiya tau iya pogau'éngngi mappangaddiyé, bettuwanna pogau'i dosa lao ri tubunna muto. Harusu'i muwisseng makkedaé tubummu iyanaritu onronna Rohna Allataala monro. Iyaro Roh-é monroi ri laleng iko. Na Aléna muto Allataala mabbéréyangngi iyaro Roh-é lao ri iko. Watakkaléna Saudara tenniya appunnangemmu. Iyaro appunnangenna Allataala. Allataala pura melliko sibawa purana nawaja maneng. Rimakkuwannanaro, pakéi tubummu pékkugi caramu angkanna Allataala ripakalebbi. Makkekkuwangngé maéloka mabbicara passalenna persoalang iya mupowadaé ri laleng sure'mu. Rékko séddié worowané dé' nakawing, makessing iyaro. Iyakiya kuwammengngi dé' narigoda untu' pogau'i iya dé'é nasitinaja, lebbi kessing muwi tungke' worowané mappunnaiwi bainéna muto sibawa tungke' makkunrai mappunnaiwi lakkainna muto. Lakkaié harusu'i napennoi kewajibanna selaku lakkai lao ri bainéna, na bainé harusu'i napennoi kewajibanna selaku bainé lao ri lakkainna; tungke'-tungke' pennoiwi kewajibanna lao ri laingngé. Bainé dé' nakuwasaiwi tubunna muto; iya makuwasaiyéngngi tubunna iyanaritu lakkainna. Makkuwatoro lakkaié dé' nakuwasaiwi tubunna muto; iyakiya iya makuwasaiyéngngi tubunna iyanaritu bainéna. Aja' muwabélaiwi séddié lao ri laingngé selaku mallaibinéngeng. Wedding muwa untu' cinampe', assaleng sipadduwano pada-pada situjuiwi. Nanallalengiro tungke'-tungke' weddingngi massempajang sibawa dé' nariganggu. Iyakiya ri munri, harusu'ko lisu sisullé siyaddeppéri selaku mallaibinéngeng. Rékko dé' nakkuwaro, weddingngi matti muwaccowériwi pappalécéna sétangngé, nasaba dé' mumatedde tahangngi napessunna. Upowadai iyaé tenniya selaku parénta, iyakiya selaku pangaja. Sitongenna lebbi upojiwi rékko sininna tauwé mancajiwi pada-pada iyya. Iyakiya tungke'-tungke' pada purani tarima pammasé iya dé'é napada polé ri Allataala. Séddié tau mappunnaiwi pammasé makkuwaé, iya laingngé mappunnaiwi pammasé iyaro. Lao risining tau iya dé'éppa nakawing enrengngé sining makkunrai iya jandaénna, iyanaé pangajaku: Lebbi kessing muwi Saudara tette' tuwo alé-alé pada-pada iyya. Iyakiya rékko dé' naulléi Saudara tahangngi napessunna, sitinajai Saudara kawing. Saba' lebbi kessing muwi Saudara kawing naiya malluwa'-luwa'é napessunna. Lao ri mennang iya puraénna kawing, iyanaé paréntaku: (Sitongenna tenniya iyya mabbéréyangngi iyaé paréntaé, iyakiya Puwangngé.) Séddié makkunrai iya puraénna kawing aja' nasalaiwi lakkainna. Iyakiya rékko nasalaiwi, harusu'i tette' dé' nallakkai, iyaré'ga lisui ri lakkainna. Sibawa séddié lakkai dé' nawedding nabbéyang bainéna. Lao ri laingngé, pangajaku iyanaritu: – iyaé pangajaku muto, tenniya Puwangngé – rékko séddié tau Kristéng napubainéi tau iya dé'é namateppe' ri Kristus, na bainéna nasitujuiwi untu' tuwo silaong aléna, iyaro tauwé dé' nawedding nabbéyang bainéna. Narékko séddié makkunrai Kristéng mallakkaiwi tau iya dé'é namateppe' ri Kristus, iyaro bainé dé'nawedding nabbéyang lakkainna. Nasaba lakkai iya dé'é namateppe' ripalaloi untu' mancaji umma'na Allataala nasaba allaibinéngenna sibawa bainé iya mancajiyénna appunnangenna Allataala. Makkuwatoro bainé iya dé'é namateppe' ripalaloi mancaji umma'na Allataala, nasaba allaibinéngenna sibawa lakkai iya mancajiyénna appunnangenna Allataala. Rékko dé' nakkuwaro, ana'-ana'na mennang tentu pada-padai ana'-ana' kapéré'é, padahal iyaro ana'-ana'é riyangga'i selaku anggotana umma'na Allataala. Iyakiya rékko tau iya dé'é namateppe'ro salaiwi bainéna iyaré'ga lakkainna iya Kristéngngé, aja' mutahangngi. Ri laleng gau'éwé iyaro makkunraié iyaré'ga worowané laluwasai, saba' maéloi Allataala kuwammengngi na Saudara tuwoi sibawa sipammasé-masé. Nasaba Saudara selaku bainé – iya mateppe'énna lao ri Puwangngé – pékkugi Saudara naulléi missengngi sibawa mattentu makkedaé Saudara dé' naulléi mappassalama'i lakkaimmu? Makkuwatoro Saudara selaku lakkai Kristéng, pékkugi Saudara weddingngi naisseng sibawa mattentu makkedaé Saudara dé' naulléi passalama'i bainému? Sitinajai tungke'-tungke' matoro'i atuwo-tuwonna situru pappimpinna Puwangngé pada-pada iya pura ripattentungengngéngngi ri Allataala wettunna Allataala mobbii untu' mateppe' ri Aléna. Iyanaro peraturang iya uwappagguruwangngé ri tungke'-tungke' jema'é. Ebara'na, rékko séddié tau purani risunna wettunna natarima pangobbina Allataala, aja'na iyaro tauwé nakkuraga leddai iyaro tanra-tanrang sunna'é. Makkuwatoro rékko séddié tau dé'pa narisunna' wettunna natarima pangobbina Allataala, aja'na iyaro tauwé naéllauwi risunna. Saba' naccowériwi peraturang sunna'é iyaré'ga dé' naccowériwi, pada-padai iya duwa, dé' agaga bettuwanna. Iya pentingngé iyanaritu turusiwi parénta-paréntana Allataala. Sitinajai tungke' tau tette' tuwo ri laleng keadaang pada-pada wettunna natarima pangobbina Allataala. Rékko wettunna Saudara riyobbi, Saudara iyanaritu séddiwi ata, aja'na Saudara nassussa-sussa pikkiri'i gau'éro. Iyakiya rékko matti Saudara lolongengngi kasempatang untu' mancaji maradéka', pakéi iyaro kasempatangngé. Saba' séddié ata iya mateppe'énna ri Puwangngé, iyanaritu taunnai Puwangngé iya maradéka'é. Sibawa séddié tau maradéka' iya mateppe'énna ri Puwangngé, iyanaritu atannai Kristus. Pura riyellini Saudara sibawa purani nawaja maneng. Rimakkuwannanaro, aja' Saudara nabbéréyangngi aléna untu' mancaji atanna tolinoé. Jaji, Saudara-saudara, muwi pékkugi keadaammu wettunna riyobbi, sitinajai Saudara tette' tuwo pada-padaro silaong Allataala. Makkekkuwangngé passalenna sining tau iya dé'éppa nakawing. Passalenna gau'éro dé' utarima parénta agi-agi polé ri Puwangngé. Iyakiya selaku tau iya nasaba pammaséna Puwangngé sitinajai riyatepperi, maéloka mabbéréyangngi pangajaku. Rékko riyéngngerangngi sininna asussang iya mancangngéngngi makkekkuwangngéwé, uwasengngi lebbi kessing muwi rékko tette'i tauwé tuwo pada-pada makkekkuwangngé. Rékko mabbainéni Saudara, aja' muwakkuraga leppe' polé ri bainéro. Rékko dé'pa nabbainé Saudara, aja'na musappa bainé. Iyakiya rékko kawingngi Saudara, iyaro tenniya dosa. Makkuwatoro rékko séddié ana'dara kawing, tenniyai bettuwanna madosai. Banna mennang iya kawingngéro moloiwi matu maéga asussang. Macinnaka kuwammengngi Saudara ripabélai polé risining asussangngéro. Akkattaku makkuwaiyé, Saudara-saudara: Dé'na tappunnai maéga wettunna. Mappammulai makkekkuwangngé, tungke' tau iya mabbainénna sitinajai tuwo samanna dé'pa nabbainé; tau iya teriyé, tuwo samanna dé' namessé ati; tau iya macawaé, samanna dé' namarennu; tau iya puraé mangelli, samanna dé' nappunnai aga-aga; sibawa tau iya malippué sibawa gau'-gau' linoé, sitinajai tuwo samanna dé' narilippui ri gau'-gau'éro. Saba' iyaé linoé, ri laleng keadaanna makkekkuwangngé, lennye'i matu! Macinnaka kuwammengngi naleppe Saudara polé ri asussangngé. Tau iya dé'é nabbainé napattette'i matu pikkiranna ri gau'-gau' passalenna Puwangngé, nasaba macinnai pésennangiwi Puwangngé. Iyakiya tau iya mabbainéénna maégai matu napikkiri gau'-gau' linoéwé, saba' macinnai pésennangiwi atinna bainéna; addimonrinna tabbagé-bagéi matu pikkiranna. Séddié makkunrai iya dé'é nallakkai, iyaré'ga séddié ana'dara, maégai matu napikkiri passalenna Puwangngé, nasaba macinnai kuwammengngi nyawa tubunna mancajiwi appunnangenna Allataala. Iyakiya séddié makkunrai iya mallakkaiyénna, napattujui pikkiranna ri gau'-gau' linoéwé, nasaba macinnai sennangiwi atinna lakkainna. Uwoki manengngiro untu' adécéngemmu muto, tenniya akkattaku mattéyangngi iyaé mattéyangngi iyaro. Iya uwacinnaiyé banna ritu kuwammengngi Saudara napogau'i iya tongengngé sibawa sitinajaé, enrengngé kuwammengngi naulléi Saudara pattujui pikkiranna lao ri Puwangngé. Rékko séddié tau marasa dé' napajoppai iya sitinajaé lao ri tunanganna, rékko dé' naulléi tahangngi napessunna, namarasa parellui kawing sibawa ana'daraéro; leppessanni pogau'i aga iya napérasaiyé makessing. Dé' namadosa, rékko kawingngi mennang. Rékko séddié tau purani napettui ri laleng atinna untu' dé' nakawing sibawa tunanganna, na iyaro apettunna dé' natarapassa, iyaro napogau'é makessingngi, assaleng naulléi pogau'i. Riponcokiwi adaé, tau iya kawingngé, makessing pangkaukenna, na tau iya dé'é nakawing lebbi kessing pasi pangkaukenna. Séddié makkunrai iya kawingngénna tassiyoi ri lakkainna ri wettu tuwonami bawang lakkainna. Rékko maténi lakkainna, iyaro makkunraié laluwasani kawissi sibawa tau iya napojiyé; assaleng iyaro akawingengngé, akawingeng Kristéng. Namuni lebbi maupe'i matu rékko dé'na nakawinna. Iyaro pallolongekku muto, iyakiya upéneddingiwi ri aléku makkedaé iya upowadaéro nasibawang akuwasanna Rohna Allataala. Makkekkuwangngé passalenna anrékanré iya riyabbéréyangngé selaku pakkasuwiyang lao ri barahalaé. Mémeng tongeng pada-pada adanna tauwé, “Macca manenni.” Iyakiya amaccangngé mébbui tauwé mancaji matempo, padahal pammasé napatokkongngi paribadinna tauwé. Tau iya masengngéngngi maéga naisseng, sitongenna dé'pa naissengngi iya kaminang malamungngé. Iyakiya tau iya tonget-tongengngé mamaséiwi Allataala, riissengngi ri Allataala. Passalenna manré anrékanré iya puraé riyakkasuwiyangeng ri barahalaé, riissenni makkedaé barahalaé maddapangengngi séuwaé iya sitongennaé dé'gaga. Na riisseng towi makkedaé Allataala banna séddi bawang; dé'gaga laingngé. Mémeng maégato aga iya riyasengngé déwata iyaré'ga puwang; muwi iya engkaé ri langié muwi iya engkaé ri yasé'na tanaé. Iyakiya untu' idi, Allataala banna séddi. Ambo'i iya mpinruéngngi sininna séuwa-séuwaé. Untu' Aléna ritu tatuwo. Na Puwangngé séddi tommi bawang, iyanaritu Yésus Kristus. Naolai Aléna nariwinru sininna séuwa-séuwaé, sibawa nasaba Aléna natatuwo. Namuni makkuwaro, dé' naiya maneng tauwé naisseng gau'éro. Engka riyolo biyasana massompa barahala. Jaji, rimakkuwannanaro muwi lettu makkekkuwangngé naseng mupi mennang makkedaé anrékanré iya puraé riyakkasuwiyangeng lao ri barahalaé, iyanaritu anrékanrénna barahalaé. Narékko nanréi iyaro anrékanré, marasa madosai mennang; nasaba dé'pa namatedde atepperenna. Sitongenna iyaro anrékanré dé' naébbui assisumpungetta sibawa Allataala mancaji lebbi madécéng. Rékko riyanréi iyaro anrékanré, dé' gaga asarong rilolongeng. Sibalé'na rékko dé' tanréi iyaro anrékanré, dé'to tarogi aga-aga. Iyakiya, atike'ko! Aja' narapii kajajiyang makkedaé tau laingngé madosa – nasaba dé'pa namatedde atepperenna – nasaba laluwasai Saudara pogau'i agi-agi. Akkattaku makkuwaiyé: Akkalarapanna Saudara, iya mappunnaiyé ateppereng iya matedde'énna, mattengngang tudang manré ri bola abbarahalangngé. Nainappa séddié tau mitai Saudara tudang manré kuwaro. Rékko atepperenna iyaro tauwé dé' namatedde, dé'ga na iyaro naébbui matu iyaro tauwé barani manréi anrékanré iya puraé riyabbéréyang lao ri barahalaéro? Narimakkuwannanaro, atepperenna Saudara mébbui tau iya atepperennaé dé' namatedde'ro mancaji pusa. Padahal matéi Kristus untu' iyaro tauwé. Narékko pogau'i Saudara asalang pada-padaéro lao ri Saudara-saudara Kristéngngé – iyanaritu nasolangiwi Saudara atepperenna mennang iya malemmaé – tentu madosai Saudara lao ri Kristus. Iyanaro saba'na, rékko anrékanré nassabariwi Saudaraku madosa, tentu dé' sises-siseng umaélo manréi jukuénnaro. Saba' ajakké madosai Saudaraku nasaba iyya. Tenniyaka'ga tau maradéka'? Tenniyaka'ga rasul? Dé'paga naengka uwitai Yésus, Puwatta? Dé'ga na iko wassélé jama-jamakku untu' Puwangngé? Namuni sining tau laingngé dé' namaélo mangakuika selaku rasul, kaminang céddé'na muwakuiwi iyaro! Saba' atuwommu selaku tau Kristéng iyanaritu butti makkedaé iyya séddika rasul. Rékko nacellaka tauwé, maéloka baliwi makkuwaéwé: Dé'ga gaga ha'ku tarimai anrékanré sibawa énungeng nasaba jama-jamakku? Dé'ga gaga ha'ku tiwi séddi bainé Kristéng sibawakka ri laleng allalengekku, pada-pada iya napogau'é saudara-saudarana Puwang Yésus sibawa rasul-rasul laing-laingngé, muttama' toni Pétrus? Iyaré'ga banna Barnabas sibawa iyya bawang iya riharusu'kangngé sappai nanréna muto? Dé'gaga anggota tentara iya harusu'é mongkosokiwi aléna ri laleng atentarangngé! Dé'gaga patani iya mattaneng anggoro'é ri dare'na nainappa dé' nanréi wassélé anggoro polé ri dare'éro! Dé'gaga pakkampi iya piyaraé bimbala', nainappa dé' naénung susu polé ri bimbala'-bimbala'naro! Upangoloi iyaro tenniya bawang situru iya biyasaé ri laleng pangalamang esso-essoé, iyakiya nasaba Kitta'é napangolo towi gau'éro. Ri laleng Kitta'na Musa tarokii, “Rékko mattengngangngi sapingngé rése'i gandongngé untu' malleppessangngi gandongngé polé ri olina, aja' na ringong pannyoro'na.” Sapingngégga najampangi Allataala? Iyaré'ga iyaro akkattana untu' idi? Mémeng tarokii iyaro untu' idi. Saba' tau iya jamaéngngi dare'é sibawa tau iya pancajiyéngngi gandonna mémeng sitinajai majjama nasibawang amménasang untu' tarimai sibagiyang polé ri wassélé jama-jamanna. Purani' mampo biné rohani ri laleng atuwo-tuwonna saudara-saudara. Narékko méngngalaki barakka-barakka maddupa barab-barangngé polé ri iko, aga iyaro bettuwanna maéga senna' rituntu' polé ri iko? Rékko sining tau laingngé mappunnai ha' mamménasaiwi iyaé polé ri iko, dé'ga talebbi mappunnai ha' naiya mennang? Iyakiya iyya dé' uwakkégunangngi iyaro ha'é. Sibalé'na lebbi upojiwi tanggungngi sining-sininnaé naiya paompoé séddi gau' iya halangiyéngngi appallebbangenna Karéba Madécéngngé passalenna Kristus. Tentu naisseng Saudara makkedaé tau iya majjamaé ri laleng Bolana Allataala natarimai inanréna mennang polé ri Bolana Allataala. Sibawa sining tau iya murusu'éngngi onrong akkasuwiyangeng akkarobangengngé, lolongengngi sibagiyang polé ri akkarobangeng iya nakkasuwiyangengngé kuwaro. Makkuwatoro Puwangngé pura pattentui makkedaé tau iya mabbirittangngéngngi iyaro Karéba Madécéngngé harusu'i lolongeng inanré polé ri appallebbangennaro. Iyakiya dé'pa naengka upakéi muwi séddi ha'ku polé ri ha'-ha'éro. Nauwokii iyaé sure'éwé tenniyato akkattana kuwammengngi gau'-gau'éro rigaukekka makkekkuwangngé. Lebbi kessing muwi matéka naiya ateddéngekka gau' iya uwammingkikengngéro. Nasaba, rékko iyaro banna persoalang mabbirittangngi Karéba Madécéng polé ri Allataala, tentu iyya dé' gaga ha'ku mingkiingki, saba' Allataala pura paréntakka untu' pogau'i. Cilakana iyya, rékko dé' uwabbirittangngi iyaro Karéba Madécéngngé! Akkalarapanna upajoppai jama-jamakkuro nasaba éloku, tentu weddikka mamménasa untu' lolongeng saro. Iyakiya uwabbirittangngi Karéba Madécéngngéro mala nasaba riwaji'kangnga. Risuroka ri Allataala untu' pogau'i iyaro. Rékko makkuwaitu, aga saroku? Iyanaé saroku: makkedaé weddikka mabbirittangngi Karéba Madécéngngéro sibawa dé' utanekiwi muwi séddié tau untu' mongkosokika, nasaba dé' utuntu'i ha'-ha'ku selaku pabbiritta Karéba Madécéngngéro. Iyya'é tenniyaka atanna muwi niga; maradékaka. Namuni makkuwaro, upancajiwi iyaé aléku ata lao ri sininna tauwé. Upogau'i iyaro kuwammengngi uwulléi malangngi tau singngéga-égana untu' Kristus. Lao ri tau Yahudi, kédoka selaku tau Yahudié kuwammengngi weddikka tiwii ri Kristus tau Yahudié. Lao risining tau iya tuwoé situru hukkunna Musa, kédoka samanna tassiyoka ri hukkungngéro, namuni sitongenna dé' utassiyo ri hukkungngéro. Upogau'i iyaro, kuwammengngi weddikka tiwii ri Kristus iyaro sining tauwé. Lao ri tau tenniyaé Yahudi, kédoka pada-pada séddié tau tenniya Yahudi, iyaé tauwé ri saliwennai hukkunna Musa. Upogau'i iyaro kuwammengngi weddikka tiwii ri Kristus iyaro sining tauwé. Iyakiya tenniya bettuwanna iyaro makkedaé dé' umatinulu lao ri parénta-paréntana Allataala; mala rikuwasaika ri parénta-paréntana Kristus. Ri tengnga-tengngana sining tau iya maléré teppe'na, kédo tokka pada-pada tau iya maléré teppe'na kuwammengngi weddikka gettengngi mancaji ana' gurunna Kristus. Rippe'na, mancajika sini-sininnaé untu' sininna tauwé kuwammengngi nallalengi muwi pékkugi weddikka passalama'i sibagiyang polé ri mennang. Iya manennaro upogau'i untu' iyaro Karéba Madécéng polé ri Allataala, kuwammengngi maccowé tokka ribarakkaki. Tentu naisseng Saudara makkedaé ri laleng akkalaringngé sininna tomaccowéé lari manengngi, iyakiya banna séddi tau bawang tarima hadiya. Rimakkuwannanaro larino pékkugi carana angkanna Saudara tarimai hadiyana. Tungke' tau iya mattengngangngé ri laleng latihangngé, tahangngi aléna ri laleng sininna passalengngé. Napogau'i iyaro nasaba macinnai ripaggénoi bunga apakalang, iyanaritu bunga iya dé'é namaitta namakelle. Iyakiya idi'é ritahangngi alé ri laleng sininna gau'é nasaba macinnaki ripaggénoi sibawa bunga apakalang iya dé'é namakelle matu. Iyanaro saba'na ulari sibawa akkatta iya mattentué. Pada-pada ri laleng attandingeng sijagguru'é, dé' uwajjagguru sembarangeng. Uleppessangngi watakkaléku riwinru sibawa matedde narapi weddikka kuwasaiwi. Upogau'i makkuwaéro, saba' dé' umaélo narapi kajajiyang makkedaé purani uwéra tau laingngé maccowé ri laleng akkalaringngéro, na aléku risampéyang. Saudara-saudara! Sitinajai naéngngerang Saudara aga iya kajajiyangngé lao ri néné-nénéta wettunna mennang naccowériwi Musa. Rilinrungi manengngi mennang ri ellungngé, sibawa salama'i malléttoiwi Tasi' Cella'é. Untu' mancaji ana'-ana' gurunna Musa, ricemmé manengngi mennang ri laleng ellungngé sibawa ri laleng tasi'éro. Manré manengngi mennang nanré rohani iya padaé, sibawa ménung énungeng rohani iya padaé. Ménung manengngi mennang polé ri bulu batu rohani iya sibawangngéngngi mennang; iyaro bulu batué iyanaritu Kristus. Namuni makkuwaro, dé' namasennang Allataala lao ri maégangngéngngi polé ri mennang, na iyanaro saba'na sining ujuna mennang makkalénnekengngi ri padang kessi'é. Iya manennaro mancaji contoi ri idi, untu' paréngngerangiki kuwammengngi na aja' nariyacinnai gau'-gau' iya majaé pada-pada mennang. Kuwammengngi na aja'to tassompa barahala pada-pada iya napogau'é sibagiyang polé ri mennang. Ri laleng Kitta'é tarokii, “Nappammulana iyaro bangsaé manré ménung, sibawa séré-séré untu' sompai barahalaé.” Dé' nawedding ripogau' gau'-gau' iya mappangaddié pada-pada iya napogau'é sibagiyang polé ri mennang. Saba', duwappulo tellu sebbu tau polé ri mennang maté ri laleng siesso nasaba napogau'i iyaro. Dé' naweddikki coba-cobaiwi Puwangngé pada-pada iya napogau'é sibagiyang polé ri mennang riyolo, angkanna matéi mennang napitto ula momosoé. Dé'to naweddikki mannoko'-noko'; pada-pada iya napogau'é sibagiyang polé ri mennang riyolo, angkanna riyunoi mennang ri Malaéka' Amaténgngé. Iya manenna gau'éro kajajiyangngi lao ri mennang untu' mancaji conto lao risining tau laingngé. Na iya manennaro taroki towi untu' mancaji papparéngngerang lao ri idi. Saba' tuwoki makkekkuwangngé ri wettu accappurenna linoé. Tau masengngéngngi aléta tettong masse, sitinajai matutu; aja' narapii menrung. Tungke' paccobang iya napéneddingiyé Saudara iyanaritu paccobang iya biyasaé napéneddingi rupa tauwé. Iyakiya matinului Allataala ri jancin-Na. Dé' naleppessangngi Saudara ricobai lebbi na iya pakkulémmu. Ri wettu nakennana Saudara paccobang, nawérékko matu laleng untu' mancaji mawatang kuwammengngi Saudara naulléi mattahang. Rimakkuwannanaro, Saudara-saudara iya uwamaséiyé, sitinajako benci assompang barahalaé. Mabbicaraka lao ri iko pada-pada lao ri sining tau iya maccaé. Sitinajako timbangngi ada-adakkué. Wettutta ménung anggoro sibawa mattarima kasi lao ri Allataala, dé'ga na iyaro nappaitangngi makkedaé masséddiki sibawa Kristus ri laleng amatén-Na? Sibawa wettutta bagé-bagéwi rotié untu' riyanré' massibawa, dé'ga na iyaro nappaitangngi makkedaé masséddiki ri laleng tubunna Kristus? Nasaba banna séddimi roti, na idi maneng manréki polé ri roti iya séddiétto, na idi iya maégaéwé sinrupaki séddi tubu. Coba pénessaiwi sining tau Yahudié. Iya mennang manrééngngi inanré iya riyakkasuwiyangengngé ri yasé'na onrong akkasuwiyangeng akkarobangengngé, iyanaritu sining tau iya masséddié sibawa onrongngéro. Aga akkataku sibawa iyaro? Barahala iyaré'ga inanré iya riyakkasuwiyangengngé lao ri barahalaéro dé' sises-siseng napunnai bettuwang. Aga iya riyakkasuwiyangengngé ri onronna akkarobangenna barahalaé dé' nariyakkasuwiyangeng lao ri Allataala, sangadinna lao risining sétangngé. Nadé' umaélo masséddiko sibawa sétangngé. Dé' naweddikko ménung polé ri énungeng anggoro'na Puwangngé sibawa massamang polé ri énungeng anggoro'na sétangngétto. Dé' naweddikko manré ri méjanna Puwangngé, sibawa ri méjannato sétangngé. Maéloki'ga mébbui Puwangngé mangémpuru? Lebbi watakki'ga naiya Puwangngé? Adanna tauwé, “Weddikki pogau' agi-agi iya riyéloriyé.” Tongeng! Iyakiya dé' naiya maneng iya riyéloriyéro makkéguna. “Weddikki pogau' agi-agi iya riyéloriyé” – iyakiya dé' naiya maneng iya riyéloriyéro napakessingiwi atuwo-tuwotta. Aja' namuwi séddi tau lellungngi apentingeng aléna bawang. Tungke' tau harusu'i lellung towi apentingenna tau laingngé. Weddikko nanré agi-agi iya ribalu'é ri pasa jukué. Dé' naparellu risalidiki lebbi riyolo, namuni engka pappotane' ri laleng ati marilalemmu. Saba' ri laleng Kitta'é tarokii, “Iyaé linoé sibawa sininna lise'na iyanaritu appunnangenna Puwangngé.” Rékko riundakko manré ri séddié tau iya tenniyaé Kristéng, namutarimai iyaro undangengngé, anréni aga iya napatalangengngékko. Aja'na musalidikiwi polé kégi iyaro inanré, kuwammengngi aja' naengka pappotane'-pappotane' ri laleng ati marilalemmu. Iyakiya rékko engka makkeda lao ri iko, “Iyaé inanré purai riyakkasuwiyangeng lao ri barahalaé,” aja' muwanréi iyaro inanré, nasaba mujampangiwi apentingenna iyaro tauwé sibawa nasaba sadda ati marilalenna. Akkattaku tenniya sadda ati marilalemmu, iyakiya sadda ati marilalenna iyaro tauwé. Naullé engka makkutana, “Wah, magi na amaradékakku harusu'i rilawai ri sadda ati marilalenna tau laingngé? Rékko manréka inanré sibawa mattarima kasi lao ri Allataala, magi na tauwé harusu'i cellaka nasaba iyaro inanré, napurana mattarima kasi lao ri Allataala?” Muwi aga napogau' Saudara – manréi Saudara iyaré'ga ménungngi – pogau'i iya manennaro untu' pakalebbii Allataala. Tuwono pékkugi baténa angkanna Saudara dé' nassabariwi tau laingngé pogau' dosa; tau Yahudigi mennang iyaré'ga tau tenniya Yahudigi, iyaré'ga jema'na Allataala. Tuwono pada-pada iyya. Makkuragaka sennangiwi atinna sininna tauwé ri laleng sininna séuwa-séuwaé, sibawa dé'gaga akkatta-akkatta apentingeng ri alé. Akkattaku iyanaritu banna kuwammengngi nawedding ripassalama' maneng mennang. Accowériwi batékku, pada-padato iyya maccowériwi baténa Kristus. Upojiko saba' tuli muwéngngerakka sibawa turusiwi pappagguruwang iya uwabbéréyangngé lao ri iko. Iyakiya macinnaka muwissengngi séddipa passaleng, iyanaritu iya mancajiyé kapala ri yasé'na tungke' worowané iyanaritu Kristus; iya mancajiyé kapala ri yasé'na bainé iyanaritu lakkaié, sibawa iya mancajiyé kapala ri yasé'na Kristus iyanaritu Allataala. Rékko séddié worowané wettunna massempajang iyaré'ga wettunna palettu'i biritta polé ri Allataala ri yolona maéga tau, pakéi pattutu' ulu, iyaro tauwé napakatunai Kristus. Narékko séddié makkunrai wettunna massempajang iyaré'ga wettunna palettu'i biritta polé ri Allataala ri yolona maéga tau, dé' napaké pattutu' ulu, iyaro makkunraié napakatunai lakkainna iya mancajiyé kapala ri yasé'na aléna. Pada-pada muwi iyaro samanna purai ricukkuru' ulunna iyaro makkunraié. Saba' rékko séddié makkunrai dé' namaélo paké pattutu' ulu lebbi kessing muwi rigoncingngi gemme'na. Iyakiya rékko séddié makkunrai ricukkuru'i ulunna iyaré'ga nagoncingngi gemme'na, iyaro séuwaé pappakatuna ri aléna. Rimakkuwannanaro lebbi kessing muwi pakéi pattutu' ulu. Worowané dé' naparellu paké pattutu' ulu, saba' naddapangiwi paribadinna sibawa arajanna Allataala. Iyakiya makkunraié naddapangengngi arajanna worowané, saba' worowané dé' naripancaji polé ri makkunraié, makkunraié ritu ripancaji polé ri worowané. Dé'to naripancaji worowané untu' apentingenna makkunraié, sangadinna ripancajiwi makkunraié untu' apentingenna worowané. Rimakkuwannanaro, untu' pésennangiwi sining malaéka'é, séddié makkunrai harusu'i paké pattutu' ulu selaku tanrang makkedaé ri yawana akuwasanna lakkainna. Namuni makkuwaro ri laleng atuwo-tuwotta selaku tau Kristéng, dé' natettong ri alé-alé makkunraié leppe' polé ri worowané; na worowané dé'to natettong ri alé-alé leppe' polé ri makkunraié. Nasaba muni makkunraié mula-mulanna ripancaji polé ri worowané, iyakiya purairo jajiwi worowané polé ri makkunraié; nasininna séuwa-séuwaé assalenna poléi ri Allataala. Coba aléna Saudara-saudara timbangngi gau'-gau'éwé: Makessigga séddié makkunrai massempajang lao ri Allataala ri yolona tau maégaé, nadé' napaké pattutu' ulu? Polé ri pangalamang samaé, purano ripagguru makkedaé rékko worowané malampéi gemme'na, iyaro séuwaé iya makurang sipato'é. Iyakiya lao ri makkunraié, riwéréngngi gemme' untu' tongkoi ulunna sibawa gemme' malampé'é iyanaritu alebbirenna. Rékko engka tau iya maéloé massasa passalenna gau'éwé, séddi bawang uwullé powada iyanaritu makkedaé muwi idi iyaré'ga jema'-jema'na Allataala laingngé, maégangngéngngi banna mappunnai iyaro séddié abiyasang ri laleng jema'é, ri lainnaéro dé'gaga. Passalenna iyaé gau'é, dé' upojiko. Addeppungeng assompammu dé' napowassélé'i iya makessingngé, sangadinna iya dé'é namakessing. Bunge'-bunge'na uwéngkalingai, makkedaé ri laleng addeppungemmu, engka golongang-golongang iya siéwa-éwaé. Na uwasengngi iyaro karébaé céddé iyaré'ga maégana engka tongenna. Mémeng siratang rékko mompoi sala pahang ri yelle'mu, kuwammengngi napaita matti niga-nigana tau Kristéng iya tongengngé. Iyakiya wettummu maddeppungeng tenniya Perjamuwanna Puwangngé mupogau'. Saba' ri wettu manrému tungke'-tungke'ko mabbétta-béttang malai nanrému, angkanna engka dé' nallolongeng agaga naiya laingngé mabo'. Magi nakkuwaro? Dé'ga Saudara nappunnai bola? Weddingngi Saudara manré ménung kuwaro? Iyaré'ga maéloiga Saudara pakatunai jema'na Allataala sibawa pakasirii sining tau kasiyasié? Aga harusu' upowada lao ri iko? Harusu'ka'ga pojiko? Dé' sises-siseng umaélo pojiko. Saba' iya uwappagguruwangngé lao ri iko, utarimai iyaro polé ri Puwangngé muto: makkedaé ri wenniéro wettunna Yésus, Puwatta, ribali'bellari, malani roti, na puranana mattarima kasi lao ri Allataala nasaba rotiéro, napuwé-puwé'ni iyaro rotié sibawa liman-Na, nainappa makkeda, “Iyanaé tubuk-Ku iya riyabbéréyangngé untu' iko. Pogau'ni iyaé untu' méngngerak-Ka.” Makkuwatoro puranana manré, nalani énungeng anggoro'é nainappa makkeda, “Iyaé anggoro'é iyanaritu assijancingenna Allataala iya mabarué, iya ripaessaé sibawa dara-Ku. Sises-siseng muwénung iyaé, pogau'i iyaé untu' méngngerak-Ka.” Mémeng sises-sisekko manré roti sibawa ménung anggoro, muwabbirittangngi amaténna Puwangngé, narapii polé. Rimakkuwannanaro, tau iya manrééngngi rotinna Puwangngé iyaré'ga ménungngi anggoro'na Puwangngé sibawa cara iya dé'é nasipato, iyaro tauwé madosai lao ri Puwangngé iya puraé makkarobangengngi tubun-Na sibawa dara-Na. Jaji, tungke' tau harusu'i paréssai aléna riyolo', nainappa wedding manré iyaro rotié sibawa naénung anggoro'é. Saba' rékko manréi roti tauwé sibawa ménungngi anggoro'é nadé' najampangiwi makkedaé iyaro perjamuwangngé engka assisumpungenna sibawa tubunna Puwangngé, iyaro tauwé manréi sibawa ménungngi untu' tarimai pahukkungenna Allataala ri yasé'na aléna muto. Iyanaro saba'na maéga polé ri yelle'mu iya malasaé sibawa malemma, sibawa engkato maté. Rékko mujampangiwi gau'éwé addeppu-deppungeng assompammu dé' matu napapoléi pahukkungenna Allataala ri yasé'na alému. Iyakiya rékko nahukkukki Allataala, Nacambu'ki matu, kuwammengngi dé' nakennaki pahukkungeng silaong linoéwé. Rimakkuwannanaro, Saudara-saudaraku, rékko maddeppungekko untu' manré ri Perjamuwanna Puwangngé, harusu'ko sisullé mattajeng. Rékko engka malupu, harusu'i manré riyolo' ri bolaé. Rékko mupuriatiwi gau'éro, addeppu-deppungeng assompammu dé' napapolé pahukkungeng polé ri Allataala ri yasé'na alému. Passalenna masaala-masaala iya laingngé, upakatajappi matu lao ri iko, rékko poléka matti. Makkekkuwangngé passalenna sining wéré iya nabbéréyangngé Rohna Allataala. Passalenna iyaro, uwéloriwi naisseng Saudara-saudara iya sitongennaé. Engngerangngi makkedaé wettunna dé'pa muwissengngi Puwangngé, tappangaruko untu' maccowériwi barahala iya pépé. Harusu'i muwisseng makkedaé tau iya ripimpingngé ri Rohna Allataala dé' nawedding makkeda, “Tattanroi Yésus!” Makkuwatoro dé' muwi séddi tau wedding makkeda, “Yésus ritu Puwang!” rékko iyaro tauwé dé' naripimping ri Rohna Allataala. Engka maddupa-rupang wéré polé ri Allataala, iyakiya iya manenna nabbéréyangngi iyaro Roh iya séddié. Engka maddupa-rupang jama-jamang untu' tumaningiwi Puwangngé, iyakiya Puwang iya ritumaningiyéro, Puwang iya tommi séddié! Engka maddupa-rupang cara jamai jama-jamanna Puwangngé, iyakiya iya mabbéré awatangeng untu' iyaro lao ri tungke' tau iyanaritu Allataala iya tommi séddié. Untu' adécéngetta maneng, majjamai Rohna Allataala ri tungke'-tungke' tau secara alé-alé. Lao riséddié tau, iyaro Roh-é mabbéréi amampungeng untu' mabbicara sibawa akuwasang. Lao ri laingngé iyaro Roh iya padaé mabbéréi amampungeng untu' pakatajangngi passalenna Allataala. Iyatoro Roh iya séddié mabbéréi lao ri tau iya séddié, amampungeng untu' mateppe' lao ri Kristus, na lao ri laingngé, iyaro Roh-é mabbéréi akuwasang untu' pajjappai tauwé. Lao riséddié tau riwéréngngi kuwasa untu' pakangka anu makalallaing sibawa lao ri iya laingngé riwéréngngi wéré untu' mabbirittangngi rancana-rancanana Allataala. Lao ri iya laingngéssi iyaro Roh-é mabbéréi amampungeng pasilaingengngi kéga wéré polé ri Rohna Allataala sibawa kéga iya tenniyaé. Engka riwéréng amampungeng untu' mabbicara sibawa maddupa-rupang basa iya makalallaingngé, sibawa engkato riwéréng amampungeng untu' pakatajangngi bettuwanna iyaro sining basaé. Iya manennaro najamai iyaro Roh séddié bawang; tungke'-tungke' tau riwéréng wéré iya mallaingngé situru élona muto iyaro Roh-é. Kristus iyanaritu pada-padai tubunna tolinoé; iyaro tubué séddimi iyakiya poléi ri maéga anggota. Iya manenna anggotaéro, namuni maégai, napappadaiwi séddié tubu. Makkuwatoro idi maneng, muwi tau Yahudi iyaré'ga tau tenniya Yahudié, ata-ata iyaré'ga tau maradéka'; idi maneng purani ricemmé ri Roh iya padaéro, kuwammengngi naripasséddiki ri tubunna Kristusro. Ripéneddingi maneng towi idi iyaro Roh iya séddié sibawa sukku. Saba' iyaro tubué dé' napolé riséddié anggota bawang iyakiya maéga anggotana. Rékko makkedai ajé, “Tenniyaka jari, rimakkuwannanaro tenniyaka bagiyanna tubué,” tenniya bettuwanna iyaro makkedaé iyaro ajé' tenniyai bagiyanna tubué. Sibawa narékko makkedai daucculingngé, “Saba' tenniyaka mata, tenniyaka bagiyanna tubué,” iyaro tenniyato bettuwanna makkedaé iyaro daucculingngé tenniya bagiyanna tubué. Akkalarapanna sininna iyaro tubué mancaji matai bawang, pékkugi iyaro tubué naulléi maréngkalinga? Iyaré'ga rékko sininna iyaro tubué mancaji daucculingngi bawang, pékkugi iyaro tubué marémmau? Riitani makkedaé Allataala taroi iyaro anggota-anggotaé ri tubué. Tungke'-tungke' nataroi Allataala ri onronna situru élo-Na. Rékko iya manenna banna séddi bawang anggota, kégana riyaseng tubu? Jaji mémeng engka maéga anggota, iyakiya tubué banna séddi bawang. Rimakkuwannanaro, dé' nawedding mataé makkeda lao ri limaé, “Dé' uwapparelluwakko!” iyaré'ga ulué makkeda lao ri ajé, “Dé' uwapparelluwakko!” Sibalé'na iyaro anggota-anggotana tubué iya riyangga' malemmaé, riyapparelluwang senna'i; sibawa anggota-anggota iya riyangga'é dé' namaéga angke'na, mala iyanaritu anggota-anggota iya riwéréngngé lebbi maéga angke'. Anggota-anggota tubu iya dé'é napaita magello, mala lebbi rijampangiwi. Anggota-anggota tubu iya magelloénna riita, dé'na napparelluwangngi pajjampata. Pura nasusunni Allataala tubutta makkuwaro rupanna angkanna anggota-anggota iya makurang mangke'é nawéréngngi lebbi maéga angke'na. Rimakkuwannanaro iyaro tubué dé' natabbagé-bagé; tungke'-tungke' anggota jampangiwi séddié sibawa laingngé. Rékko séddié anggota mapeddi, sininna anggota laingngé mapeddi towi; rékko séddié anggota ripoji, sininna anggota laingngé maccowé marennu. Iya maneng Saudara massibawa iyanaritu tubunna Kristus sibawa iko tungke'-tungke'to iyanaritu anggota polé ri tubuéro. Makkuwatoro ri laleng jema'é, purani napattentu Allataala onrong untu' maddupa-rupang tau: Mula-mulanna rasul-rasul; maduwanna, nabi-nabi, matellunna guru-guru, nainappa mennang iya pakangkaé sining anu makalallaingngé, nainappa mennang iya riwéréngngé pangissengeng untu' pajjappai tauwé, iyaré'ga untu' tulungngi tau laingngé, iyaré'ga untu' mappimping, iyaré'ga mabbicara sibawa basa iya makalallaingngé. Iya mennang tenniya maneng rasul, iyaré'ga nabi, iyaré'ga guru. Dé' nappunnai maneng akuwasang untu' pakangka anu makalallaingngé, iyaré'ga untu' pajjappai tauwé, iyaré'ga untu' lémbai iyaro sining basaé. Rimakkuwannanaro, sitinajako makkuraga tonget-tongeng untu' lolongeng sining wéré iya kaminang pentingngé. Iyakiya iya mangoloéwé uppaitakko laleng iya kaminang makessingngé. Namuni uwulléi mabbicara maddupa-rupang basa tolino, mala muwi sibawa basa malaéka', iyakiya dé' uwamaséiwi tau laingngé, tentu iyaro ada-adakku banna oni iya macennoé dé'gaga bettuwanna. Namuni maccaka palettu'i biritta polé ri Allataala, majeppuiwi sininna passaleng iya malamungngé; namuni mappunnaika teppe' enrengngé mateppe' senna'ka lao ri Allataala angkanna uwulléi palétté'i bulué, iyakiya dé' uwamaséiwi tau laingngé, tentu dé'gaga bettuwakku! Namuni iya maneng iya uwappunnaiyé, uwassidekkangngi lao ri tau kasiyasié, sibawa uwabbéréyangngi aléku untu' ritunu, iyakiya dé' uwamaséiwi tau laingngé, iya manennaro dé' sises-siseng gaga appalanna. Tau iya mamaséiyéngngi tau laingngé, sabbara' sibawa makessing ati. Dé' narédé angémpurunna, dé' naggempung, sibawa dé' namatempo. Dé' namingki sibawa dé' namakasara', dé' napassai tau laingngé untu' maccowériwi élo aléna, dé'to namasitta tassinggung, sibawa dé'to nakkabale rékko pasalai tauwé ri aléna. Tau iya mamasé dé' namasennang lao ri majaé, banna masennangngi bawang lao ri madécéngngé. Tahangngi moloiwi sininna séuwa-séuwaé sibawa maélo mateppe' lao ri iya kaminang makessingngé ri tungke' tau; ri laleng keadaang muwi maga iyaro tau mamasé dé' naengka nateddéng paddennuwanna sibawa sabbara'i tajengngi sininna séuwa-séuwaé. Dé' naengka matu wettunna nadé' naparellu tauwé siyamaséi. Makkekkuwangngéwé engka tau macca palettu'i biritta polé ri Allataala, iyakiya matti mappésauwi matu palettu'i biritta polé ri Allataala. Makkekkuwangngéwé engka tau macca mabbicara ri laleng basa iya makalallaingngé, iyakiya matti mappésauwi matu mabbicara ri laleng maddupa-rupang basa iya makalallaingngé. Makkekkuwangngéwé engka tau iya maccaé missengngi sininna séuwa-séuwaé, iyakiya riséuwaé wettu dé'na nariyapparelluwanna. Saba' pangissengetta sibawa amampungetta palettu'i biritta polé ri Allataala, makurang sukku mupi. Naébbui matti Allataala sininna séuwa-séuwaé sukku, naiya dé'é nasukkuro teddéngngi matu. Wettukku anana' baiccu mupa, mabbicaraka pada-pada anana' baiccu'é, mappérasaka pada-pada anana' baiccu'é sibawa mappikkiri'ka pada-pada anana' baiccu'é. Makkekkuwangngé battowana; kédo-kédoku iya anana'é uwabbéyanni. Aga iya riitaé makkekkuwangngéwé iyanaritu pada-padai wajo-wajoé iya massalawué ri cammingngé. Iyakiya matti riitai matu matteru sibawa manessa. Makkekkuwangngéwé dé'pa uwisseng manengngi, iyakiya matti uwissengngi matu sini-sininnaé pada-pada Allataala missengngi passalekku. Jaji, makkekkuwangngéwé engka tellu passaleng iya tette'é ripogau': mateppe', mamménasa sibawa makkamasé. Naiya kaminang battowaé polé ri iya telluéro iyanaritu mamaséiwi sining tau laingngé. Sitinajako makkuraga untu' mamaséiwi tau laingé. Sibawa makkuragato tarimai sining pabbéré iya nabbéréyangngé Rohna Allataala, lebbi-lebbipi amampungengngé untu' palettu'i rancana-rancanana Allataala lao ri tolinoé. Tau iya mabbicaraé ri laleng basa iya makalallaingngé, iyaro tauwé dé' nabbicara lao ri tolinoé; mabbicarai lao ri Allataala. Dé'gaga tau iya pahangngéngngi aga napowadaé, saba' Rohna Allataala nassabariwi nanapowadai-adai gau'-gau' iya bannaé Allataala missengngi. Sibalé'na tau iya palettu'éngngi biritta polé ri Allataala, napalettu'i lao ri rupa tauwé; untu' péwatangiwi mennang, untu' mpéréngngi sumange' mennang sibawa untu' saléworiwi mennang. Tau iya mabbicaraé ri laleng basa iya makalallaingngé banna napéwatangiwi aléna bawang, na tau iya palettu'éngngi biritta polé ri Allataala natulungngi jema'é mancaji maju. Temmaka kessinna rékko naullé manengngi Saudara mabbicara sibawa maddupa-rupang basa iya makalallaingngé. Iyakiya iya kaminang makessingngé iyanaritu rékko naulléi Saudara mabbirittangngi rancana-rancanana Allataala. Saba' tau iya palettu'éngngi biritta polé ri Allataala, lebbi battowai naiya tau iya mabbicaraé sibawa maddupa-rupang basa iya makalallaingngé; silaingengngi rékko tau iya mabbicaraé ri laleng maddupa-rupang basa iya makalallaingngéro naulléi pakatajangngi aga iya napowadaéro, kuwammengngi nasininna jema'é lolongengngi appalanna. Rékko ébara'na laoka ri iko sibawa mabbicara ri laleng maddupa-rupang basa iya makalallaingngé, aga appalanna iyaro lao ri iko? Dé'gaga appalanna muwi céddé! Silaingengngi rékko upannessai séuwa pappakatajang polé ri Allataala, iyaré'ga upakatajangngi séuwaé passalenna Allataala, iyaré'ga palettu'i biritta polé ri Allataala, iyaré'ga mappagguruka. Paréwa oni-oni iya dé'é nannyawa muwi céddé, padaénna ébara'na sulingngé sibawa kacapié, rékko lagu-lagunna dé' nariyacculéyang sibawa manessa, pékkugi tauwé naissengngi lagu aga iya riyacculéyangngé? Séuwa conto iya laingngéssi: Rékko sembarangngi ripaoni tarompé'é, nigana maélo sadiya untu' mammusu? Makkuwatoniro sibawa amampungemmu untu' mabbicara sibawa maddupa-rupang basa iya makalallaingngé. Rékko Saudara sibawa iyaro amampungengngé powadai ada-ada iya dé'é namanessa, dé'gaga séddi tau iya weddingngé pahangngi aga iya napowadaé Saudara. Iyaro ada-adammu lennye'i matu temmattentu. Ri linoéwé engka siyagangngaré égana basa, iyakiya dé' muwi séddi polé ri basa-basaéro iya dé'é nappunnai bettuwang. Iyakiya rékko dé' upahangngi basa iya napaké séddié tau, tentu tau iya pakéyéngngi iyaro basaé sinrupai tau polé-polé lao ri iyya; makkuwatoro iyya lao ri aléna. Passalenna alému, uwisseng macinna senna'ko lolongeng sining wéré polé ri Rohna Allataala. Iyakiya iya poko' senna'é, harusu'ko makkuraga untu' pakéi amampungeng iya tulungngéngngi jema'é mancaji maju. Iyanaro saba'na tau iya mabbicaraé ri laleng basa iya makalallaingngé, harusu'i naéllau ri Allataala kuwammengngi nariwéréng towi amampungeng untu' pakatajangngi aga iya napowadaéro. Saba' rékko massempajakka sibawa basa iya makalallaingngé, mémeng massempajangngi rohku, iyakiya pikkirakku dé' najjama. Jaji, aga harusu' upogau'? Iyaé harusu' upogau': Maéloka massempajang sibawa rohku, iyakiya maélo tokka massempajang sibawa pikkirakku. Maéloka makkélong sibawa rohku, iyakiya maélo tokka makkélong sibawa pikkirakku. Saba' rékko mattarima kasi'i Saudara lao ri Allataala sibawa rohna bawang, na engka tau laing iya dé'é napahangngi iyaro basa makalallaing polé ri Rohna Allataala, tentu iyaro tauwé dé' naulléi makkeda, “Usitujuiwi” iyaro sempajang sukkuru'mu; nasaba dé' naissengngi aga napowada Saudara. Namuni iyaro sempajang tarima kasi'mu lao ri Puwangngé makessing senna', iyakiya iyaro sempajangngé dé' sises-siseng gaga akkégunana lao ri tau laingngé. Mattarima kasi'ka lao ri Allataala saba' uwulléi mabbicara ri laleng maddupa-rupang basa iya makalallaingngé lebbi na iko maneng. Iyakiya ri laleng addeppu-deppungengngé untu' sompai Puwangngé, lebbi upojiwi pakéi lima ada-ada iya naullé pahangngi tauwé naiya pakéi massebbu-sebbu ada-ada ri laleng basa iya makalallaingngé. Lebbi upojiwi makkuwaro kuwammengngi uwulléi paggurui tauwé. Saudara-saudara! Aja' muwappikkiri pada-pada ana'-ana'é. Ri laleng gau' majaé, sitinajako tette' pada-pada anana' baiccu'é. Iyakiya ri laleng pikkirang, sitinajako mancaji tau iya battowaénna. Ri laleng Kitta'é tarokii makkuwaé, “Makkedai Puwangngé, ‘Naolai sining tauwé iya mabbicaraé sibawa basa iya makalallaingngé, maélo-Ka mabbicara lao ri umma'éwé. Mala naolai sining tau polé-polé, maélo-Ka mabbicara lao ri umma'-Ku; namuni makkuwaro, dé' namaélo mennang méngkalingai ada-adak-Ku.’ ” Jaji wéré untu' mabbicara sibawa maddupa-rupang basa iya makalallaingngé iyanaritu selaku tanrang untu' sining tau iya dé'é namateppe', tenniya untu' sining tau iya mateppe'é. Sibawa wéré untu' mappaddissengengngi rancanana Allataala lao ri tolinoé iyanaritu tanrang untu' sining tau iya mateppe'é, tenniya untu' sining tau iya dé'é namateppe'. Rimakkuwannanaro, rékko ébara'na ri laleng addeppungenna jema'é, sininna jema'é mabbicarai ri laleng basa iya makalallaingngé, nainappa poléi siyagangngaré tau saliweng, iyaré'ga sining tau tenniyaé Kristéng, tentu iyaro sining tauwé nasekko matu jangeng manenni! Iyakiya rékko Saudara maneng palettu'i biritta polé ri Allataala, napolé séddié tau tenniyaé Kristéng iyaré'ga séddi tau saliweng, tentu gau'-gau' iya nabbirittangngé Saudara iya maneng nappaitangngi matu dosa-dosana iyaro tauwé sibawa mébbui mainge' lao ri dosa-dosana. Gau'-gau' iya tassubbué ri laleng atinna ripannessai matu, angkanna napakariyawai matu aléna nainappa nasompa Allataala. Mangakui matu makkedaé tonget-tongengngi Allataala engka ri tengnga-tengngamu. Jaji, Saudara-saudara, aga bettuwanna iya manennaro? Rékko maddeppungekko untu' sompai Puwangngé, engka makkélong, engka mappagguru, engka iya mappaissengengngi agi-agi polé ri Allataala, engka mabbicara ri laleng basa iya makalallaingngé, sibawa engka iya pakatajangngéngngi aga iya ripowadaéro. Iyakiya iya manennaro harusu'i ripogau' untu' mappagguru sibawa untu' adécéngenna maneng. Rékko engka maélo mabbicara ri laleng basa iya makalallaingngé, harusu'i duwa iyaré'ga kaminang égana tellu tau bawang sisullé. Sibawa harusu' engka tau pakatajangngi aga iya napowadaé iyaro tau mabbicaraé. Rékko dé'gaga mulléi pakatajangngi, iyaro sining tau mabbicaraé ri laleng basa iya makalallaingngé harusu'i mammekko ri laleng addeppungengngéro. Leppessanni siya mabbicara ri laleng ati lao ri Allataala. Duwa iyaré'ga tellu tau iya mappunnaiyé biritta polé ri Allataala harusu' palettu'i iyaro birittaé ri wettunna iya laingngé timbangngi aga iya napowadaéro. Iyakiya rékko ébara'na biritta iya polé ri Allataala poléi riséddié tau laing iya tudangngé ri laleng addeppungengngéro, tau iya mattengngangngé mabbicara, harusu'i mappésau. Nasibawang cara makkuwaéro, Saudara-saudara iya maneng, tasséddi-séddi, mulléi palettu'i biritta polé ri Allataala; kuwammengngi naiya maneng naulléi tarima pappagguruwang sibawa pédé' mateppe'i. Pangissengeng polé ri Roh-é untu' palettu'i biritta polé ri Allataala wedding ripattuju ri tau iya palettu'éngngi iyaro birittaé. Allataala iyanaritu Allataala iya pojiyéngngi ataratorokengngé; tenniya Allataala iya pojiyéngngi akacaungengngé. Pada-pada ripakajajiyangngé ri laleng sininna jema'na Allataala, makkunraié harusu'i mammekko ri laleng addeppungenna jema'é. Dé' naripalalo mennang mabbicara. Dé' nawedding mennang mancaji pamimping; iyaro siturui hukkung agamaé. Rékko engka maélo naisseng mennang, harusu'i mennang nakkutanang iyaro ri lakkainna ri bolaé. Dé' namakessing séddié makkunrai mabbicara ri laleng addeppungenna jema'é. Poléiga ri iko ada-adanna Allataala? Iyaré'ga banna lao ri iko bawang iyaro ada-adaé ripalettu'? Rékko engka tau marasa mappunnai pangissengeng untu' palettu'i biritta polé ri Allataala, iyaré'ga mappunnai pangissengeng laingngé polé ri Rohna Allataala, iyaro tauwé harusu'i napahang makkedaé aga iya uwokiéwé iyanaritu parénta polé ri Puwangngé. Iyakiya rékko engka iya dé'é natarimai iyaé, aja' mujampangiwi. Rimakkuwannanaro, Saudara-saudara, akkuragano untu' palettu'i biritta polé ri Allataala, iyakiya aja' muwattéyangngi tauwé iya maéloé mabbicara ri laleng maddupa-rupangngé basa iya makalallaingngé. Iyakiya iya manenna harusu'i ripogau' sibawa makessing enrengngé taratoro'. Na makkekkuwangngé Saudara-saudara, uwéloriwi muwéngngerangngi paimeng Karéba Madécéng polé ri Allataala iya uwabbirittangngé riyolo lao ri iko. Purani mutarima, sibawa mateppe' lao ri Kristus nasaba Karéba Madécéngngéro. Rékko makkatenning masse'ko ri aga iya uwabbirittangngéro, iyaro Karéba Madécéngngé napassalama'ko; sangadinna rékko saudara mateppe'i temmappahang. Aga iya upalettu'éwé lao ri Saudara-saudara iyanaritu iya puraé utarimato. Iya kaminang pentingngé, pada-pada iya tarokié ri laleng Kitta'é, upalettu'i lao ri iko makkedaé matéi Kristus nasaba dosa-dosata; sibawa rikuburu'i, iyakiya rimunri ripatuwoi paimeng ri esso matellué. Iyaro taroki towi ri laleng Kitta'é. Uwappaissengeng towi lao ri iko makkedaé iyaro Kristus iya puraé ripatuwo paimeng pura toni nappaitang Aléna lao ri Pétrus, nainappa lao ri iya seppulo duwa rasul-é. Purairo nappaitang towi Aléna lao ri lebbi lima ratu tau iya maccowériyéngngi. Maégangngéngngi polé risining tauwéro tuwo mupi makkekkuwangngé, nappai siyagangngaré tau iya matéénna. Purairo nappaitang towi aléna Kristus lao ri Yakobus nainappa lao ri sininna rasul-é. Paccappureng senna'na nappaitang towi aléna lao ri iyya – iyya iya pada-padaé ana'loloé iya jajiyé dé'pa nawettunna! Iyya iyanaritu rasulna Puwangngé iya kaminang mariyawaé. Dé' usitinaja riteppu rasul, saba' purani upanrasa-rasa jema'na Allataala. Iyakiya nasaba pammaséna Allataala, mancajika pada-pada keadaakku makkekkuwangngé. Nadé' naparacuma Allataala maddampengekka. Mala iyya ritu iya majjamaé lebbi marejjing naiya sininna rasul laingngé. Iyakiya iyaro sitongenna tenniya usahaku; iyaro usahana Allataala iya mamaséiyékka sibawa iya majjamaé sibawakka. Jaji, muwi polé kégai mutarima Karéba Madécéngngéro – polé ri iyya'ga iyaré'ga polé ri rasul-rasul laingngé – iyaro dé' namancaji soal. Iya pentingngé iyanaritu riyabbirittangngi iyaro Karéba Madécéngngé namateppe' Saudara. Rékko iya riyabbirittangngéro iyanaritu makkedaé purani ripatuwo paimeng Kristus polé ri amaténgngé, magi naengka polé ri yelle'mu iya powadaéngngi makkedaé tau maté dé' naripatuwo paimeng? Rékko tongengngi tau maté dé' naripatuwo matu paimeng, iyaro bettuwanna dé'to naripatuwo paimeng Kristus polé ri amaténgngé. Narékko akkalarapanna Kristus dé' naripatuwo paimeng polé ri amaténgngé, tentu dé'gaga appalanna mabbirittangngi agi-agi sibawa dé'to gaga appalammu mateppe', saba' iyaro atepperemmu dé' nappunnai alasang agi-agi. Lebbi na iyaro, manessani makkedaé mabbelléki passalenna Allataala, nasaba riyabbirittangngi makkedaé purani Allataala napatuwo paimeng Kristus polé ri amaténgngé, padahal Allataala dé' napatuwoi Aléna paimeng – rékko mémengngi tau maté dé' naripatuwo paimeng! Saba' rékko tau maté dé' naripatuwo paimeng, tentu Kristus dé'to naripatuwo paimeng polé ri amaténgngé. Sibawa rékko Kristus dé' naripatuwo tentu atepperemmu banna nippi bawang; bettuwanna iyaro ri laleng keadaang madosa mupo sibawa dé' siseng muwappunnai paddennuwang. Iyaro bettuwannato makkedaé sining tau Kristéngngé iya matéénna dé'to nappunnai paddennuwang. Rékko paddennuwatta lao ri Kristus ri wettu tuwota ri laleng linoéwé bawang, tentu polé ri sininna rupa tauwé ri laleng linoéwé, idi'na ritu kaminang macilaka! Iyakiya annessana purani ripatuwo paimeng Kristus polé ri amaténgngé. Iyanaé boro'na makkedaé sining tau iya matéénna ripatuwoi matu paimeng. Saba' amaténgngé muttama'i ri laleng linoé naolai séddié tau, makkuwatoro atuwongngé polé ri amaténgngé riwéréngngi rupa tauwé naola towi séddié tau. Pékkugi sininna rupa tauwé matéi nasaba ripasséddiwi sibawa Adam, makkuwatoniro iya manenna ripatuwoi matu, nasaba ripasséddiwi sibawa Kristus. Iyakiya tungke'-tungke' ripatuwoi matu situru lélénna: bunge'-bunge'na Kristus; nainappa ri wettun-Na matti polé paimeng, nainappa lélénna sining tau iya muttama'é appunnangenna Kristus. Purairo kiyame'ni. Iyaro wettué nacaui matu Kristus sininna pamaréntaé, sininna akuwasangngé; sibawa sininna awatangengngé; nainappa nabbéréyang matu akuwasanna selaku arung, lao ri Allataala, Ambo'ta. Harusu'i Kristus mapparénta matteru narapi Allataala napatunru' maneng balinna Kristus lao ri Kristus. Bali kaminang poddimonrié napatunru' matu iyanaritu amaténgngé. Ri laleng Kitta'é tarokii makkuwaé, “Allataala pura mébbui sininna séuwa-séuwaé tunru' lao ri Aléna.” Manessani makkedaé iya riyakkattaiyé sibawa “sininna séuwa-séuwaé” iyaro dé' nauttama Allataala, iya mébbuéngngi sininna séuwa-séuwaé tunru' lao ri Kristus. Iyakiya pura manennana ripatunru' ri yawa paréntana Kristus, na Aléna, iyanaritu Ana'na Allataala, napatunru'i matu Aléna lao ri Allataala iya puraé mébbui sini-sininnaé tunru' ri Aléna. Na aléna Allataala matu parénta manengngi. Rékko tau maté dé' naripatuwo paimeng, magi naengka tau ricemmé untu' tau maté? Untu' aga mennang napogau'i gau'éro? Rékko mémeng tau maté dé' sises-siseng naripatuwona matu, untu' aga mennang napogau'i gau'éro? Sibawa untu' agato idi tamaélo moloiwi abalaé tungke' wettu? Saudara-saudara! Esso-esso tahakka manrasa-rasa nasaba malompo nyawaku lao ri atuwommu saba' mateppe'ko lao ri Kristus Yésus, Puwatta. Narékko iyaro banna poléi ri rupa tauwé bawang aga saroku untu' méwa samanna méwai olokolo masekkangngé kuwaé, ri Efésus? Rékko mémeng tau maté dé' naripatuwo paimeng, lebbi kessing muwi maccowériwi warékkadaéwé: “Laono mai taanré sibawa taénung, saba' matéki matu baja.” Aja' muribengnguwang! Assiwollompollongeng iya majaé nasolangi ampé-ampé iya makessingngé. Mainge'ni makkekkuwangngé, sibawa aja'na mupogau' dosa. Sitinajako harusu' masiri makkedaé ri yelle'mu engka mupa iya dé'é naissengngi Allataala. Naullé engka makkutana, “Pékkugiwi tau maté ripatuwo paimeng? Tubu maragaé riwéréngngi mennang, wettunna tuwo mennang paimeng?” Donggo paha! Rékko tanengngi Saudara biné ri laleng tanaé, iyaro biné dé' namaélo tuwo, rékko iyaro biné dé' namaté riyolo. Sibawa biné iya natanengngé Saudara ri laleng tanaéro – naullé biné gandong iyaré'ga biné laingngé – iyanaritu batunna iyaro biné bawang, tenniya sininna iyaro tanet-tanengngé iya maéloé tuwo matti. Allataala muto mpéréngngi iyaro biné rupa iya manuru'é pakkitan-Na makessing untu' tanet-tanengngéro. Untu' tungke' rupanna biné, Allataala mpéréngngi rupa tanet-tanen-Na mattungke-tungke. Watakkaléna mahlu'-mahlu' iya makkényawaé dé' napada maneng. Rupa tauwé mappunnaiwi sinrupa watakkalé, olokolo'é mappunnaiwi rupa watakkalé laingngé; manu'-manu'é laitto rupanna watakkaléna, sibawa balé laing towi rupanna watakkaléna. Makkuwatoro sibawa sining engkaé ri langié enrengngé sining engkaé ri tanaé. Tungke'-tungke' iya sining engkaé ri langié mappunnaiwi agelloreng, namakkuwatoro sining engkaé ri tanaé. Agellorenna mata essoé laingngi naiya agellorenna kétengngé. Sining wéttowingngé mappunnai towi agelloreng tungke'-tungke'. Mala iyaro sining wéttowingngé tungke'-tungke' mallail-laingétto agellorenna. Makkuwatoro gau'na matti sibawa sining tau maté iya ripatuwoé paimeng. Iyaro tubu iya rikuburu'é iyanaritu tubu iya weddingngé makebbong, iyakiya tubu iya ripatuwoé paimeng, iyanaritu tubu iya dé'é nawedding makebbong. Wettunna rikuburu iyaro tauwé, iyaro tubué majai sibawa malemmai; iyakiya wettunna ripatuwo paimeng, iyanaritu tubu iya magelloé namawatang. Wettunna rikuburu, iyaro tubué, tubu iya mallahérengngé; iyakiya puranana ripatuwo paimeng, iyaro tubué, tubu iya nabbéréyangngé Rohna Allataala. Engka tubu iya polé ri tanaé, engkato tubu iya polé ri Allataala. Ri laleng Kitta'é engka taroki makkuwaé, “Rupa tau mammulangngé, iyanaritu Adam, mancajiwi mahlu' iya tuwoé,” iyakiya Adam iya poddimonrié iyanaritu Roh iya mabbéré atuwong. Iya bunge'-bunge'é engka iyanaritu iya mallahérengngé, tenniya iya mabbaténgngé. Iya baténgngé rimonriwi polé. Adam mammulangngé ripancajiwi polé ri tanaé, iyakiya Adam iya maduwaé assalenna poléi ri surugaé. Sining taunna linoéwé iyanaritu pada-padai Adam mammulangngé iya ripancajiyé polé ri tanaé, iyakiya sining taunna surugaé iyanaritu pada-pada Aléna iya polé ri surugaé. Pékkugiki makkekkuwangngé iyanaritu pada-pada Adam iya ripancajiyé polé ri tanaé, tentu matti mancajiki matu pada-pada Aléna iya polé ri surugaéro. Akkattaku, Saudara-saudara, iyanaritu: tubu iya riwinrué polé ri daraé sibawa jukué, dé' naulléi muttama' ri Lino Barunna Allataala; sibawa tubu iya weddingngé maté dé' nawedding maccowé mancaji mannennungeng. Pénessaini iyaé rahasiyaé: Dé' tamaté maneng matu, iyakiya tappinra manekki matu. Iyaro gau'é kajajiyangngi matu tenrisenna-senna ri laleng sikédé mata, wettunna ripaoni tarompé'é untu' paccappurenna. Saba' wettunna riyéngkalinga oni tarompé'éro, sining tau maté ripaoto'i matu paimeng sibawa tubu iya mannennungengngé, sibawa idi manengngé ripinraki matu. Watakkaléta iya weddingngéwé maté harusu'i risulléi watakkalé iya dé'é nawedding maté, na watakkalé iya polé ri linoé harusu'i risulléi watakkalé iya polé ri surugaé. Rékko watakkalé iya weddingngé maté purani risulléi iya dé'é nawedding maté, sibawa watakkalé iya polé ri linoé purani risulléi watakkalé iya polé ri surugaé, ri wettuénnaro nakajajiyang aga iya tarokié ri laleng Kitta'é, “Purani ripallennye' amaténgngé; rilolongenni apakalangngé!” “Eh amaténg, kégani apakalammu? Eh amaténg, kégani mosomu?” Mosona amaténgngé iyanaritu dosaé, na dosaé pajoppai perananna naolai hukkunna agamaé. Iyakiya sukkuru'ki lao ri Allataala; nawérékki apakalang naolai Yésus Kristus, Puwatta! Rimakkuwannanaro, Saudara-saudara iya uwamaséiyé, sitinajako mawatang sibawa makkamasé. Ajjamani' matteru untu' Puwangngé sibawa mattonget-tongeng, saba' muwissenni makkedaé sininna iya mupogau'é untu' Puwangngé, dé' nasiya-siya matu. Makkekkuwangngé passalenna dowi iya maéloé muwassumbangeng lao ri pada-padatta tau Kristéng, uwappétangngarengngi kuwammengngi mupogau'i situru panunju' iya uwabbéréyangngé lao ri jema'-jema'é ri Galatia. Tungke' Aha', ri esso mammulangngé sitinajai Saudara pallaing dowi, tungke'-tungke' situru pallolongenna. Taroi iyaro dowié narapika polé, kuwammengngi iyaro wettué dé'na naparelluna mappaddeppungeng. Rékko lettu'ka matti, maéloka suroi sining tau iya musitujuiyénna. Uwéréngngi matu mennang sure' pangantara', kuwammengngi natiwii mennang iyaro dowi sumbangengngé lao ri Yérusalém. Narékko riitai makessing makkedaé lao tokka sibawa mennang, maélo tokka lao silaong mennang. Maéloka célléngiko rékko ulaloini Makedonia, saba' akkattaku lalo kuwaka'ro. Wedding jaji monroka matu cinampe' silaong iko, naullé singngétta wettu keccé'é. Purairo weddinno bantuka patterui allalengekku lao ri onrong rappina. Dé' umaélo célléngiko léppang-léppang bawang. Rékko napuwéloi Puwangngé, maéloka monro maitta sibawakko. Iyaro wettué monroka matu kuwaé, ri Efésus, narapi Esso Péntakostaé. Maéga wettukku kuwaé untu' jama-jamang iya makkégunaé, namuni maégato tau méwai. Rékko engkani Timotius, tarimai sibawa makessing kuwammengngi namarasa masennang ri yelle'mu, saba' pada-pada towi iyya majjamai untu' Puwangngé. Aja' lalo naengka pakatunai. Bantui kuwammengngi naulléi patterui joppana lisu ri iyya sibawa salama', saba' utajengngi apolénna silaong Saudara-saudara iya laingngé. Iyakiya saudarata Apolos, wékkasiyagangngaré'ni upétangngari kuwammengngi nasilaong saudara laingngé lao célléngiko. Iyakiya dé'pa namateppe' makkedaé harusu'i lao makkekkuwangngé. Iyakiya rékko engka wettu matti, tentu maéloi lao. Sitinajako matike' sibawa masse ri laleng atuwommu selaku tau Kristéng. Tinda'no sibawa barani enrengngé ancajino mawatang. Sininna iya mupogau'é, pogau'i sibawa pammasé. Tentu Saudara naisseng Stéfanus sibawa kaluwargana; mennang ritu tau iya bunge'-bunge'é mancaji Kristéng ri Akhaya. Sukku atinna mennang majjamai banna untu' tumaningiwi umma'na Allataala. Uwappétangngarengngi sibawa mattonget-tongeng kuwammengngi muwaccowériwi pappimpinna sining tau iya pada-padaéro enrengngé sining tau laing iya sibawaé majjama kuwaéttopa tumaningiwi massibawa mennang. Masenna'ka lao ri apolénna Stéfanus, Fortunatus sibawa Akhaikus. Mennang ritu passullému lao ri iyya. Purani naébbu atikku marennu; pada-pada mennang pérennuiwi atimmu. Sining tau pada-padaéro harusu'i tonget-tongeng ripakaraja. Jema'-jema'é ri Asia palettu'i sellenna mennang lao ri iko. Akwila sibawa Priskila enrengngé jema'-jema'é iya maddeppungengngé ri bolana masselleng Kristéng towi mennang iya mapellaé. Sininna saudaraé palettu'i selleng ri iko. Siyasselles-sellengenno secara sipammasé-masé selaku saudara Kristéng. Utambaiwi kuwaé selleng iya alékué mokii: Sellekku polé ri iyya, Paulus. Tau iya dé'é namaséiwi Puwangngé, leppessanni siya tattanro! Maranata – Puwatta, poléni! Tennapodo Puwang Yésus barakkakiwi Saudara. Nasibawang pammasé lao ri Saudara maneng iya masséddié sibawa Kristus Yésus. Salama, Saudara-saudara jema'na Allataala ri Korintus sibawa sininna umma'na Allataala ri Akhaya. Iyya, Paulus, rasulna Kristus Yésus, iya riyakkaé nasaba élona Allataala silaong saudarata Timotius, maddennuwang tennapodo Allataala, Ambo'ta sibawa Puwang Yésus Kristus mabbéré barakka enrengngé asaléwangeng lao ri iko. Ripojiwi Allataala, Ambo'na Puwatta Yésus Kristus. Ambo' iya makessing senna'é atinna, sibawa Allataala iya mabbéré awatangeng baténg lao ri tolinoé. Napéwatangiwi batétta ri laleng tungke'-tungke' asukkarakeng iya ripéneddingiyé, kuwammengngi nasibawang awatangeng iya ritarimaé polé ri Allataalaro, riyullé toni péwatangiwi baténna tauwé iya engkaé ri laleng asussangngé. Anrasa-rasang iya napéneddingiyé Kristus maéga toni ripéneddingi idi. Sibawa naola towi Kristus, ripéwatangi senna'i batétta. Rékko péneddingiki asukkarakeng, iyaro untu' péwatangiwi batémmu, untu' asalamakemmu. Rékko ripéwatangiwi batétta, tentu maccowé tokko ripéwatangi angkammu mancaji sabbara' ri laleng sining asukkarakengngé pada-padato iya riyanrasa-rasaiyé. Dé' naengka tabata-bata, sibawa tuli mateppe'ki passalenna Saudara, saba' riissengngi makkedaé maccowé tokko manrasa-rasa sibawa idi. Narimakkuwannanaro maccowé tokko ripéwatangi silaong idi. Saudara-saudara! Maéloki kuwammengngi muwissengngi passalenna asukkarakeng iya ripéneddingiyé ri daéra Asia. Anrasa-rasang iya ritanggungngéro matane' senna'i tenre'ki, angkanna dé'na tamménasana maélo tuwo; samanna pada-pada pura ripateppaiyé pahukkungeng maté bawang. Iyakiya kajajiyangngi iyaro gau'é kuwammengngi aja' tasanré ri awatangeng ri aléta bawang, sangadinna ri Allataala iya patuwoéngngi tau maté. Iyanaritu iya puraé passalama'ki polé ri abala amaténg iya battowaéro. Sibawa Aléna ritu matu passalama'ki matti ri esso-esso rimunri, saba' ri Alénaki mamménasa. Mateppe'ki makkedaé nasibawang sining sempajammu untu' idi, Allataala passalama'siki matu polé ri abalaé. Nainappa Allataala situjuiwi barakkakiki selaku pappébalinna lao ri maéga sempajang untu' idi. Nassabariro namaéga tau mattarima kasi matu lao ri Allataala. Masenna'ki, saba' ati marilaletta pannessai makkedaé atuwotta ri linoéwé – utamana assisumpungetta sibawa Saudara – ripogau'i sibawa matinulu enrengngé mattonget-tongeng. Ripogau'i iyaro tenniya nasaba apanréng tolino, iyakiya nasaba amampungeng iya nabbéréyangngé Allataala. Nasaba atepperengngéro, mula-mulanna urancanai untu' célléngiko kuwammengngi mulolongeng barakka leppe' wékkaduwa. Akkattaku célléngiko ri laleng allalengekku lao ri Makedonia sibawa léppang paimeng ri iko ri laleng allalengekku lisu, kuwammengngi muwulléi bantuka patterui allalengekku lao ri Yudéa. Iyakiya upinrani iyaro niya'ku; nah, aga iyaro mappaitangngi makkedaé dé' namasse attangekku? Ri wettu mébbuna rancana, mébbuka'ga rancana situru élo ri aléku, cinampe' makkeda “Iyyé”, sibawa cinampe' makkeda “Dé'”? Nasibawang Allataala iya weddingngé riyatepperi, jancikku lao ri Saudara tenniya “Iyyé” sibawa “Dé'”. Saba' Yésus Kristus, Ana'na Allataala, iya riyabbirittangngé lao ri iko polé ri Silas, Timotius, sibawa iyya paimeng tenniya tau “Iyyé” sibawa “Dé'”. Sibalé'na sinrupai pappébali “Iyyé” polé ri Allataala. nasaba naolai Aléna pura napowadai Allataala “Iyyé” lao ri sininna jancinna. Nallalengiro natapowadai “Aming” lao ri Allataala nasaba Yésus Kristus. Ripogau'i makkuwaéro kuwammengngi naripakalebbi Allataala. Aléna muto Allataala mébbuki sibawa Saudara masse masséddi sibawa Kristus; Iyanaritu piléki banna untu' Aléna. Untu' iyanaro napurani napaessaki mancaji appunnangen-Na sibawa mabbéréyangngi Roh-Na ri laleng atitta selaku boro'-Na makkedaé nabbéréyangngi matu Allataala sininna iya Najjanciyangngé. Allataala sabbikku – saba' naissengngi lise atikku – makkedaé dé' ujaji lao ri Korintus, nasaba dé' umaélo mébbui atimmu messé. Dé' upassako passalenna aga iya harusu'é muwatepperi; saba' mateppe' senna'no lao ri Kristus. Banna majjamaka sibawa iko kuwammengngi napédé' masennang. Rimakkuwannanaro purani upettui untu' dé' ulaona ri iko sibawa apoléng iya mébbuékko messé. Saba' rékko upamesséiko, nigatona wedding polé saléworika, rékko tenniya sining tau iya puraé upamesséi atinna? Iyanaro saba'na uwokii iyaro sure'é lao ri iko. Dé' umaélo célléngiko, nainappa mupamesséika. Padahal iko sitongenna harusu' pérennuika. Saba' mateppe'ka makkedaé rékko marennuka, Saudara tentu marennu maneng towi. Uwokii lao ri iko sibawa ati iya messéwé enrengngé matane'é kuwaéttopa maéga paddunui uwai mataé. Akkattaku tenniya kuwammengngi mumessé, iyakiya kuwammengngi mumaingekiwi makkedaé uwamaséi senna'ko. Rékko engka tau iya puraé nassabari amesséngngéwé, tentu napogau'i iyaro gau'é tenniya lao ri iyya, sangadinna lao ri Saudara maneng iyaré'ga kaminang dé'na sibagiyang polé ri Saudara. Dé' umaélo matedde senna' lao ri aléna. Lao ri tau makkuwaéro, pahukkungeng iya ripateppaiyéngngi polé ri maégangngéngngi ri yelle'na Saudara, genne'ni. Makkekkuwangngé harusu'ko maddampengengngi sibawa mpéréngngi sumange'si ri aléna kuwammengngi aja' namessé ati senna' angkanna pettu paddennuwang. Rimakkuwannanaro uwéllauwi, kuwammengngi muwappaitangngi paimeng lao ri aléna makkedaé tonget-tongekko mamaséiwi. Uwokii iyaro sure'é lao ri iko sibawa akkatta untu' mojiko, aga tuli maélokoga turusiwi pappaita-pappaita polé ri iyya. Rékko muwaddampengengngi tau iya puraé pogau' asalang lao ri iko, na iyya uwaddampengeng towi iyaro tauwé. Saba' aga iya puraé uwaddampengeng – rékko mémeng engka parellu riyaddampengeng – iyaro uwaddampengengngi ri yolona Kristus untu' adécéngemmu. Upogau'i iyaro kuwammengngi Ibillisi' aja' nala kasempatang untu' makuwasaiki; saba' taissengngi rancana-rancananna. Wettukku lettu ri Troas sibawa akkatta untu' mabbirittangngi Karéba Madécéngngé passalenna Kristus, purani natimpakekka laleng Puwangngé untu' majjama ri onrongngéro. Iyakiya dé' utennang saba' dé' usiruntu' saudarata Titus kuwaro. Nauwassimanna risining tauwé ri onrongngéro nainappa lao ri Makedonia. Iyakiya sukkuru'ka lao ri Allataala! Tuli napimpikka untu' maccowé ri laleng pésta apakalangenna Kristus nasaba masséddiki sibawa Aléna. Napakéki Allataala kuwammengngi biritta passalenna Kristus mallebbangngi pada-pada bau mabaué iya lellangngé kégi-kégi. Dé' tapada-pada maéga tau iya pogau'éngngi biritta polé ri Allataala pada-pada barang dangkangengngé bawang. Sining akkattataé iyanaritu tonget-tongengngi, saba' risuroki ri Allataala. Na Allataala muto mitai makkedaé idi palettu'i iyaro birittaé selaku ata-atanna Kristus. Aga iyaé paitai samanna ripojiwi alétasi? Iyaré'ga wedding jaji mapparelluwakki sure' pappojiyang untu' iko, iyaré'ga polé ri iko, pada-pada napparelluwangngé sining tau laingngé? Aléna Saudara ritu sure' pappojiyatta, iya tarokié ri laleng atitta sibawa iya weddingngé riisseng sibawa ribaca polé ri tungke' tau. Aléna muto mennang mitai makkedaé Saudara sinrupai sure' iya naokié Kristus, iya nakkiringengngé naolaki. Iyaro sure'é dé' nariyoki sibawa dawa, iyakiya sibawa Rohna Allataala iya tuwoé; tenniyato ri yasé'na pépeng batué, iyakiya ri atinna rupa tauwé. Makkeda makkuwaki'ro nasaba atepperetta lao ri Allataala naolai Kristus. Dé'gaga muwi séddi alasang ri aléta untu' pannessai makkedaé rulléi pogau'i jama-jamangngéwé, iyakiya Allataala mpéréngngi iyaro pakkulléngngé. Aléna ritu mébbuki mulléi mancaji pattumani untu' séuwa assijancingeng iya mabarué; assijancingeng iya taggattungngé ri Rohna Allataala, tenniya ri hukkung iya tarokié. Saba' iyaro tarokié tiwii amaténg, padahal Rohna Allataala tiwii atuwong. Wettunna assijancingeng iya tiwié amaténro riyébbu sibawa risobbi ri batué, cahayana Allataala mattappa sibawa macakka ri rupanna Musa. Makkuwa mani cakkana iyaro cahaya-Na angkanna bangsa Israélié dé' naulléi mitai tappana Musa, namuni iyaro cahayaé ri tappana mammulani massalawu iyaro wettué. Narékko iyaro abbinrusenna assijancingeng iya mappamatéro rirésmikangngi sibawa cakka iya makkuwaémmani loppona, tentu abbinrusenna assijancing iya nabbéréyangngé Rohna Allataala, rirésmikangngi lebbi macakkapasi. Rékko assijancingeng iya hukkungngéngngi rupa tauwé makkuwa mani cakkana, tentu lebbi cakka pasi assijancingeng iya nakkulléngiyéngngi rupa tauwé simadécéngeng sibawa Allataala. Wedding ripowada makkedaé aga riyolo macakka, dé'na namacakkana nasaba acakkarenna iya makkekkuwangngéwé. Rékko séuwaé iya tahangngé banna cinampe', makkuwamani cakkana, tentu iya mannennungengngé lebbi macakka pasi. Rimakkuwannanaro mappunnaiki paddennuwang pada-padaéro, nabaraniki mabbicara makkuwaro. Dé' tapada-pada Musa iya tongkoéngngi rupanna sibawa bowong kuwammengngi nadé' naitai bangsa Israélié cahayana Puwangngé peddé sibawa lennye' ri rupanna. Tattongkoni pikkiranna mennang. Nalettu' essoéwé tattongko mupi pikkiranna mennang sibawa bowong ri wettunna mennang bacai kitta'-kitta' passalenna assijancingeng iya malaungngénnaro. Iyaro bowongngé banna naulléi tabbukka rékko masséddiwi tauwé sibawa Kristus. Muwi makkekkuwangngé, rékko nabacai mennang kitta'-kitta'na Musa, iyaro bowongngé natongko mupi pikkiranna mennang. Iyakiya rékko séddié tau poléi mangolo ri Puwangngé, riyakka toni iyaro bowongngé polé ri rupanna iyaro tauwé. Na, Puwang iya nakkattaiyé kuwaé iyanaritu Roh-é. Na kégi-kégi engka Rohna Puwangngé, kuwatoniro engka amaradékang. Makkekkuwangngé sininna rupatta dé'na naritongko bowong, sibawa idi mattapparengngi acakkarenna Puwang Yésus. Narimakkuwannanaro matteru-teruki ripinra mancaji pada-pada Aléna; pédé' maittaki pédé' mancaji macakkaki. Acakkaretta poléi ri Roh-é, na iyaro Roh-é iyanaritu Puwangngé. Ripogau'i iyaé jama-jamangngé nasaba asémpo atinna Allataala. Iyanaro saba'na nadé' tapettu paddennuwang. Dé' tapakéi cara-cara mapettang iya mappakasiri-sirié. Dé' tamaélo majjama sibawa macéko-céko iyaré'ga putara' balé'i ada-adanna Allataala. Ritumaningiwi Allataala sibawa ati iya mattonget-tongengngé enrengngé situru élo-Na. Rimakkuwannanaro mamménasaki sininna tauwé mangke'ki sibawa makessing ri laleng ati marilalenna. Rékko Karéba Madécéng iya riyabbirittangngéro, dé' mupa naripahang, na banna sining tau iya mattengngangngé mattuju ri ancurukengngé bawang iya dé'é napahangngi. Déwata maja iya makuwasaéngngi linoéwé tongkoi pikkiranna sining tau iya dé'é namateppe'ro. Iyanaritu lawa-lawaiwi mennang kuwammengngi mennang dé' naitai tajang polé ri Karéba Madécéngngéro passalenna arajanna Kristus, iya maddapangengngéngngi gambara'na Allataala. Biritta iya ripalettu'éro tenniya biritta passalenna aléta. Iyaro birittaé iyanaritu biritta passalenna Yésus Kristus; makkedaé Aléna iyanaritu Puwang; na idi iyanaritu ata-atannako nasaba Aléna. Allataala iya makkedaé, “Sitinajai polé ri laleng pettangngé mompoi tajangngé,” Allataala éttoro iya paompoéngngi tajangngéro ri laleng atitta, kuwammengngi namancaji matajang pakkitatta untu' pahangngi acakkarenna Allataala iya mattappaé ri rupanna Kristus. Iyakiya waramparang rohani iya magelloéro ritiwii ri aléta iya dé'é angke'naé iya riyébbué polé ri tanaé. Rimakkuwannanaro manessani makkedaé arajanna iyaro akuwasangngé monroi ri Allataala natenniya ri idi. Riluruiki polé tulili, iyakiya dé' tatassipi. Malippuki, iyakiya dé' narapii pettu paddennuwakki. Maéga musuki, iyakiya dé' naengka taonro alé-alé. Namuni biyasaki riyunru gangkatta menrung, iyakiya dé' tamaté. Tuli ripéneddingiwi amaténna Yésus ri tubutta, kuwammengngi atuwon-Na nancaji manessa ri tubutta. Sipongetta tuwo, tuli riancakki sibawa amaténg nasaba Yésus, kuwammengngi ri laleng atuwongngé wedding towi Yésus riyappaitang ri tubutta iya dé'é namannennungeng. Iyaé bettuwanna makkedaé ri laleng aléta mapatoi amaténgngé pajoppai perananna, iyakiya marennuki makkedaé atuwongngé ritu mattengngang mapato ri laleng alému. Ri laleng Kitta'é engka iyaé adaé, “Mateppe'ka, iyanaro saba'na uwabbicara.” Nasibawang sumange' teppe' iya pada-padaéttoro, mabbicaraki nasaba mateppe'ki. Mateppe'ki ri Allataala iya puraé patuwoi paimeng Puwang Yésus, maélo towi patuwoki silaong Yésus, enrengngé tiwiko sibawa idi ri yolo-Na. Iya manennaro iyanaritu untu' apentingemmu. Saba' pédé' maégai tau péneddingiwi pammaséna Allataala, pédé' maéga towi sempajang sukkuru' iya ripalettu'é ri Allataala; nanallalengiwi naripakalebbi Allataala. Iyanaro saba'na dé' napettu paddennuwang. Namuni secara mallahérekki pédé' tattamba masolakki, iyakiya secara baténg esso-essoki ripancaji baru. Na asussang iya dé'é nasiyagaé, iya ripéneddingiyé untu' cinampe', powassélékekki matu séuwa asennangeng iya dé'é padanna sibawa mannennungeng. Iyaro asennangengngé mabélai lebbi battowana rékko ripasibandingngi sibawa iyaro asussangngé. Saba' dé' tajampangiwi gau'-gau' iya paitaé, sangadinna iya dé'é napaita. Iya paitaé banna tahang cinampe', iyakiya iya dé'é napaitaro mannennungengngi. Saba' riissengngi makkedaé rékko bola – iyanaritu watakkalé – iya riyonroiyé ri linoéwé ribongkara'i, napassadiyangekki matu Allataala séuwa bola ri surugaé, iya aléna muto Allataala mébbui sibawa iya tahangngé lettu mannennungeng. Ri laleng bola iya makkekkuwangngéwé, maddarékéki nasaba muddani senna'ki monro ri laleng bolata ri surugaéro. Bolaénnaro tubutta iya mabarué. Ri wettu monrota mupa ri laleng bola iya polé ri linoéwé, maddarékéki nasaba matane' tiwita. Tenniya nasaba macinnaki leppe' polé ri watakkaléta iya polé ri linoéwé, iyakiya nasaba macinnaki pakkennai watakkalé iya polé ri surugaéro, kuwammengngi watakkaléta iya weddingngé matéwé rikuwasaiwi ri iya tuwoé. Iya passadiyangengngékki iyaro iyanaritu Allataala muto, sibawa mabbéréyangngi Roh-Na lao ri idi selaku boro'. Rimakkuwannanaro tuli marasa mawatangngi atitta. Riissengngi makkedaé ri wettu monrota mupa ri laleng watakkalétaé, mabélaki polé ri bola iya maéloé riyonroi silaong Puwangngé. Saba' tuwoki nallalalengi teppe'é lao ri Kristus, natenniya nallalengi aga iya riyullé mita, iyanaro saba'na nasabbara' atitta. Lebbi ripojiwi leppe' polé ri watakkalétaé, kuwammengngi weddikki monro sibawa Puwangngé. Rimakkuwannanaro makkuragaki tonget-tongeng untu' pésennangiwi atin-Na, muwi wettutta monro mupa ri bolata kuwaé, iyaré'ga kuwaro. Saba' pasti idi maneng ripangoloki matu ri yolona angadélékenna Kristus, na tungke'-tungke' matu lolongengngi pamale' iya siratangngé sibawa pangkaukenna ri linoéwé – pangkaukeng makessing iyaré'ga maja. Riisseng aga bettuwanna métau lao ri Puwangngé; iyanaro saba'na tamakkuraga patepperiwi tauwé passalenna aléta. Naisseng senna'ki Allataala, namamménasaka ri iko naisseng tokki ri laleng atimmu. Ri lalennaé dé' taéllauwi kuwammengngi na pojiwi aléta. Maélomi bawang mabbéréyang séuwa alasang iya makessingngé lao ri iko untu' mancaji maloppo nyawamu lao ri idi, kuwammengngi muwissengngi pékkugi baliwi sining tau iya pentingkangngéngngi tappana tauwé natenniya sipa'na. Rékko mémeng paitaki jangeng, iyaro untu' apentingenna Allataala, sibawa rékko paitaki mainge', iyaro untu' apentingemmu. Pammaséna Kristus ritu makuwasaiki; narimaingekiwi makkedaé rékko séddié tau matéi untu' sininna tauwé, na bettuwanna iyaro makkedaé maté manenni sininna tauwé. Matéi Kristus untu' sininna tauwé, kuwammengngi nasining tau iya tuwoé, dé'na natuwo untu' aléna bawang, sangadinna untu' Kristus iya puraé maté sibawa ripatuwo paimeng untu' apentingenna mennang. Rimakkuwannanaro, dé'na taangke'i tauwé situru ukkurang tolinoé. Mémeng engka naengka nariyangke Kristus polé ri tolinona, iyakiya makkekkuwangngé dé'na. Tau iya masséddiénna sibawa Kristus, mancajiwi tolino mabaru siseng. Iya malaungngé dé'ni gagana – mancaji manengngi mabaru. Iya manennaro najamai Allataala. Naolai Kristus naébbuki Allataala simadécéngeng paimeng sibawa Aléna, nainappa nasuroki untu' pakkulléi tau laingngé nasimadécéngeng towi sibawa Allataala. Birittatta iyanaritu makkedaé nasibawang pappasisumpunna naolai Kristus, naébbui Allataala tolinoé simadécéngeng paimeng sibawa Aléna. Napogau'i Allataala iyaro sibawa tennatuntu sining asalang iya puraé napogau' tolinoé lao ri Aléna. Pura risuroni ri Allataala untu' mabbirittangngi iyaro karébaé. Jaji idi'na sining surona Kristus. Naolaki idi Allataala muto palettu'i pasen-Na. Ri laleng asenna Kristus, riyéllauwi sibawa masero, tarimai limanna Allataala iya nakkulléngiyéngngi musimadécéngeng sibawa Aléna. Dé' namadosa Kristus, iyakiya Allataala mébbui Natanggungngi dosata, kuwammengngi tasimadécéngeng paimeng sibawa Allataala nasaba masséddiki sibawa Kristus. Nasaba majjamaki sibawa Allataala, nariyéllauwi sibawa masero aja'na musiya-siyakangngi iyaro akessingeng atinna Allataala. Ri laleng Kitta'é, makkedai Allataala, “Ri wettu iya naéloriyé, purani Uwéngkalingako, sibawa ri esso asalamakengngé, purano Utulukko.” Engngerangngi madécéd-décéng! Makkekkuwangngénna ritu wettu iya nasitujuiéro! Makkekkuwangngénna ritu esso untu' ripassalama'! Dé' taéloriwi attumaningetta ripasala. Rimakkuwannanaro makkuragaki dé' tabbéré alasang muwi lao riséddié tau untu' pogau'i iyaro gau'é. Sibalé'na, ri laleng sininna pangkaukengngé, riyappaitangngi makkedaé idi iyanaritu ata-atanna Allataala. Sininna rupanna asukkarakengngé purani ripéneddingi sibawa sabbara': risissaki, ritarungku, sibawa riborong; marejjikki majjama, biyasaki dé' tamatinro sibawa biyasa tokki dé' tappunnai inanré. Ri laleng matinuluta, mapanré, sabbara' sibawa makessing ati, riyappaitangngi makkedaé idi iyanaritu atanna Allataala. Makkuwatoro ri laleng ataggattungengngé ri Rohna Allataala, nasibawang pammasé iya matinulué, enrengngé ri laleng mabbirittangngi karéba iya polé ri Allataala kuwaéttopa nasibawang akuwasanna Allataala, riyappaitangngi makkedaé idi'é iyanaritu ata-atanna Allataala. Makkatennikki ri élona Allataala selaku senjatata untu' méwa iyaré'ga méwaiwi alé. Ripakarajaki, iyakiya ripakatuna tokki, ripoji sibawa ripétenna'to. Namuni malempuki, riteppuki pabbelléng. Riyangga'ki dé' tatarompo, iyakiya riissekki ri sininna tauwé. Nasekki maté, iyakiya anessana tuwo mupi. Namuni ripanrasa-rasaki, dé' tamaté. Namuni ripaesséi atitta, iyakiya tuli masennang tokki. Kasiyasiki riita, iyakiya puraki passugii maéga tau. Paitaki dé' gaga riyappunnai, iyakiya sitongenna riyappunaiwi sini-sininnaé. Saudara-saudara iya ripojiyé ri Korintus! Purani' terus terang lao ri iko. Sininna lise atitta purani ripassu. Dé' naritongko atié lao ri iko, banna iko ritu tongkoi atimmu lao ri idi. Makkekkuwangngé, leppessakka mabbicara pada-pada lao ri ana' ri aléku. Timpa toni atimmu lao ri idi. Aja' mumaélo siyempe' sining tau iya dé'é namateppe' ri Yésus; iyaro dé' nacoco'. Pékkugi wedding adécéngengngé masséddi sibawa jaé! Dé' nakkullé tajangngé sibawa pettangngé masséddi! Dé' nakkullé Kristus sipekke Ibillisi'é. Aga assipadanna tau Kristéngngé sibawa tau tenniyaé Kristéng? Aga assisumpungenna Bolana Puwangngé sibawa bolana barahalaé? Idi'é Bolana Puwangngé, Allataala iya tuwoé. Allataala muto makkeda, “Maélo-Ka monro ri tengnga-tengngana mennang, sibawa tuwo silaong mennang. Mancaji-Ka matu Allataalana mennang, sibawa mennang mancaji matu umma'-Ku. Rimakkuwannanaro, salaiwi iyaro sining tau iya dé'é naissengngi Allataala, sibawa pallaingngi alému polé ri mennang. Aja' sises-siseng musisumpung sibawa iya najisi'é, na-Utarimako matu. Mancaji-Ka matu Ambo'mu, na iko matu mancaji ana'-ana'-Ku, makkuwaniro adanna Puwang Iya Pommakuwasaé.” Saudara-saudara iya upojiyé! Sininna iyaro jancié ripattujui lao ri idi. Rimakkuwannanaro sitinajaki pépaccingiwi alé polé ri sininna iya rota'iyéngngi tubu nyawata. Sitinajaki métau ri Allataala, kuwammengngi tasukku nataulléi tuwo banna untu' Allataala bawang. Tarimaki ri laleng atimmu. Dé' tappasala muwi lao riséddié tau, sibawa dé' naengka nariparogi tauwé. Dé' sises-siseng takarao' saro polé ri niga-nigato. Makkeda makkuwaka'ro, tenniya untu' pasalako. Saba' pada-pada iya puraé upowada riyolo, riyamaséi senna'ko, sibawa idi iyanaritu sellao-sellao siamaténgngé sibawa siatuwongngé. Uwatepperi tongekko. Mala masennang senna'ka lao ri iko! Namuni péneddingiki maéga asukkarakeng, tassaléwo senna'ni atikku nasaba iko. Marennu tongeng atikku! Muwi wettutta lettu ri Makedonia, dé' sises-siseng gaga wettutta mappésau. Polé tulili lolongekki asukkarakeng: polé ri laingngé assasang, napolé ri laleng atié muto iyanaritu amétaureng. Iyakiya sukkuru'ki, Allataala tuli pakaloppoiwi atinna tau iya pettu paddennuwangngé; Napétakkariwi atitta ri laleng apolénna Titus. Tassaléwoi atitta tenniya bawang nasaba engkani polé Titus, iyakiya nasaba nalaporo' towi pékkugi atinna risaléwori ri iko. Napaissengiki makkedaé muddani senna'ko méwaka siruntu'; makkedaé massesse kaléko ri pangkaukenna riyolo na makkekkuwangngé macenninni atinna méwaika. Iyaro gau'é naébbuka lebbi marennupasi. Namuni sure'ku pamesséiwi atimmu, dé'to uwassesse kalé mokii iyaro sure'é. Mémeng massesse kalé tokka céddé wettunna uwita makkedaé iyaro sure'ku pamesséiko namuni iyaro amessémmu cinampe'mi bawang. Iyakiya mamménasaka makkekkuwangngé – tenniya nasaba messéi atimmu, sangadinna nasaba iyaro amessémmu mébbui tappinra ampé-ampému. Mémeng iyaro amesséngngé siturui élona Allataala. Jaji, dé' taparogiko. Saba' amesséng iya pada-padaéro powassélé'i atappinrang ati iya mappapolé asalamakeng. Nadé' nassesse kalé matu tauwé lao ri gau'éro. Sibalé'na, amesséng iya siturué élona tolinoé powassélé'i amaténg. Cobako pénessaiwi aga wassélé'na ri iko polé ri amesséng iya siturué élona Allataala! Wassélé'na iyanaritu mattonget-tongekko makkuraga untu' pacinnongiwi aluccakengngé! Mubenciwi dosaé, métauko, muddaniko, masumange'ko, macennikko hukkungngi iya pasalaé! Ri laleng sininna passalengngéwé muwappaitangngi makkedaé dé' mupasala. Jaji, muni uwokii iyaro sure'é, iyaro sure'é riyokii tenniya nasaba iyaro tau pasalaé. Tenniyato nasaba tau iya manrasa-rasaé nasaba asalangngéro. Uwokii iyaro sure'é kuwammengngi na ri yolona Allataala, mumaingekiwi pékkugi loppona pajjampamu lao ri idi. Iyanaro saba'na natassaléwo atitta. Ri lainnaé tassaléwo, lebbi-lebbipi rirennuitta nasaba riitai arennunna atinna Titus; tassaléwo manengngi atimmu. Mémeng purano uwammingki-mingkikeng lao ri aléna. Sukkuru'ni dé' mupakasirika. Sininna iya puraé ripowada lao ri iko iyanaritu tongengngi. Makkuwatoro aga iya riyammingkikengngé passalemmu lao ri Titus manessani tongeng towi. Makkekkuwangngé pédé' namaséiko, saba' naéngngerangngi pékkugiko iya manenna maélo turusiwi pappimpinna sibawa pékkugiko tarimai sibawa pakarajai enrengngé mapatoiwi. Masennang senna'ka, nasaba weddikko riyatepperi risininna gau'é. Saudara-saudara, macinnaki kuwammengngi muwisseng towi passalenna pékkugi kessinna Allataala lao ri jema'-jema'é ri Makedonia. Purani mennang rioji sibawa asukkarakeng-asukkarakeng iya matane'é. Iyakiya ri tengnga-tengngana asukkarakengngéro, marennui mennang sibawa masémpo ati senna'na ri laleng mabbéré sumbangeng untu' tulungngi tau laingngé, namuni kasiyasi senna'i mennang. Wedding upattentu makkedaé mabbéréi mennang situru amampungenna mennang mabbéré, mala lebbi. Nadé'gaga suroi, naéllauwi mennang sibawa masero ri idi rékko weddingngi mennang maccowé mabbantu mabbéré sumbangeng lao ri umma'na Allataala ri Yudéa. Mabbéréi mennang mabéla lebbi égana naiya riyamménasaiyé. Mula-mulanna mennang purani nabbéréyang aléna lao ri Puwangngé, nainappa laoto ri idi, situru élona Allataala. Iyanaro saba'na naripétangngari senna' Titus – iya pammulaéngngi usahaéwé – kuwammengngi napatterui usaha iya makessingngéwé ri yelle'muto. Dé'gaga cauko ri laleng sini-sininnaé: Dé'gaga cauko ri laleng atepperengngé, ri laleng mappassu pallolongeng, dé'gaga caui ri laleng pangissengengngé, ri laleng sininna rupanna usahaé, sibawa ri laleng pammasému lao ri idi. Rimakkuwannanaro, madécéngekko dé'to gaga caui ri laleng iya makessingngéwé. Dé' uwappétangnarengngi iyaro selaku séddi parénta. Iyakiya mappaitangngi pékkugi patona sining tau laingngé tulungngi padanna, macinna tokka missengngi gangka kégi pammasému. Saba' muwisseng tongeng makkedaé riyamaséi senna'ki ri Yésus Kristus Puwatta: Aléna sugii, iyakiya napakasiyasiwi Aléna untu' apentingemmu, kuwammengngi nasaba akasiyasin-Naro, namusugi. Manuru pallolongekku, ri onronna ritu mupacceppiwi aga iya puraé mupammulai ri taung labe'é. Saba' iko ritu bunge'-bunge' pikkiri'i sibawa pammulaiwi iyaé usahaé. Na, makkekkuwangngé sitinajako patterui situru amampungemmu. Sitinajako masumange' untu' patterui iyaro usahaé, pékkugiko riyolo masumange'to rancanai. Rékko macennikko mabbéré, natarimai matu Allataala iyaro pabbérému situru aga iya engkaé ri iko, dé' nasituru' aga iya dé'é naengka ri iko. Ri laleng Kitta'é tarokii, “Tau iya maégaé pallolongenna, dé' na alebbing, sibawa tau iya céddé'é pallolongenna, dé' na akurangeng.” Temmaka sukkuru'ki lao ri Allataala saba' purani naébbu Titus sippato idi untu' tulukko! Saba' Titus tenniya bawang macenning paddupai parelluta, iyakiya mapato towi maélo tulukko angkanna nasaba élona muto pettuiwi untu' lao ri iko. Kiring tokki silaong aléna séddi saudara iya ripakaraja senna'é ri sininna jema'é nasaba jama-jamanna mabbirittangngi Karéba Madécéng polé ri Allataala. Ri lainnaéro, iyaro tau makkuwaéro pura toni ripilé sibawa ripattentu ri jema'-jema'é untu' silaongekki ri laleng allalengetta. Saba' maéloki joppa untu' palettu'i iyaro sumbangengngé, kuwammengngi naripakalebbi Puwangngé sibawa kuwammengngi muwitai makkedaé macennikki tulungngi. Matutu senna'ki kuwammengngi aja' naengka tau iya pasalaékki ri laleng gau' ripalettu'na sumbangeng iya maégaéwé. Maéloki kédo malempu tenniya banna ri yolona Puwangngé, iyakiya ri yolonato rupa tauwé. Silaong Titus sibawa iyaro Saudaraé, kiring tokki séddi saudara laingngé. Purani rioji makkolik-koling namanessani tuli napojiwi mattulung. Namakkekkuwangngé lebbi-lebbipi maélona tulukko saba' battowai paddennuwanna ri iko. Passalenna Titus, iyanaritu sellaoku, iya uwéwaé sibawa majjama untu' bantuko. Na passalenna iya duwa saudaraé, passalenna iyaro, iya laowé silaong aléna, mennang iyanaritu tau iya risuroé ri jema'-jema'é sibawa mancajiwi arennutta lao ri Kristus. Mamménasaki muwappaitangngi pammasému lao ri mennang, kuwammengngi nasininna jema'é naissengngi makkedaé muwamaséiwi mennang sibawa aga iya paloppoiyéngngi nyawata passalemmu iyanaritu tongengngé. Sitongenna dé'na naparelluna marokika lao ri iko passalenna bantuwang iya mattengngangngé rikiring lao ri umma'na Allataala ri Yudéa. Uwisseng mupoji mattulung, sibawa purana mammingkikekko saudara lao risining tauwé ri Makedonia. Upowadai lao ri mennang, makkedaé mappammulai taung labe'é saudara-saudaraé ri Akhaya sadiyani untu' mabbéré sumbangeng. Sibawa sumange'mu pura pallalatung towi sumange'na maégangngéngngi polé ri mennang. Makkekkuwangngé usuroi Titus sibawa iya duwa lao ri iko kuwammengngi aga iya riyammingkikengngé passalemmu aja' namancaji bicara kosong bawang. Jaji sitinajako sadiyana, saba' makkeda makkuwaka'ro lao ri mennang. Bata-bataka rékko engka tau Makedonia iya maccowéé sibawakka matti ri wettukku lao ri iko. Narékko nalolongengngi mennang makkedaé dé'pa musadiya, temmaka sirita matti, nasaba purai napowada makkedaé mateppe' senna'ki lao ri iko! Na alému muto masirito matu. Iyanaro saba'na umarasa parellu suroi mennanro lao ri iko lebbi riyolo untu' murusu'i sumbangeng iya muwajjanciyangngéro. Upogau'i iyaro kuwammengngi rékko poléka matti, sadiyani pabbérému. Rimakkuwannanaro, manessani makkedaé iyaro pabbérému riyabbéréyangngi sibawa masennang ati na tenniya nasaba tarapassa. Engngerangngi! Tau iya mampoé biné taccéddé-céddé, léléwi matu wassélé iya céddé'étto. Iyakiya tau iya mampoé biné maéga-éga léléwi matu wassélé iya maégaétto. Tungke' tau harusu'i mabbéré manuru' cenning atinna. Aja' nabbéré sibawa tabbata-bata iyaré'ga nasaba tarapassa, saba' Allataala mamaséiwi tau iya mabbéré sibawa masennang ati. Makuwasai Allataala mabbéré lao ri iko barakka iya tabbollompollongngé, kuwammengngi tuli muwappunnai aga iya muwapparelluwangngé; mala alebbikko matu untu' pogau'i madécéngngé sibawa makkammala. Ri laleng Kitta'é tarokii makkuwaé passalenna Allataala, “Nassiyampo-amporengngi lao ri tau kasiyasié; akessingeng atin-Na lettu'i mannennungeng.” Allataala iya passadiyaéngngi biné untu' pangampoé sibawa inanré untu' idi. Alénato passadiyai matu enrengngé pamégaiwi aga iya muampoé, kuwammengngi wassélé asémpo atimmu tattamba towi. Nanallalengiro dé' muakurangeng matu ri laleng sininna gau'é angkanna tuli muwulléi matu mabbéré sibawa masémpo ati. Nasining pabbérému iya riyabbagi-bagiyangngé, nassabariwi maéga tau mattarima kasi lao ri Allataala. Saba' pangkaukeng makessing iya mupogau'é tenniya banna paggenne'i matu akurangenna umma'na Allataala bawang, iyakiya nassabari towi matu maéga tau mattarima kasi lao ri Allataala. Na polé ri adécéngeng iya muwajjellokengngéro, maéga tau Kristéng ri Yudéa napojiwi matu Allataala nasaba naitai mennang atinuluremmu lao ri Karéba Madécéng passalenna Kristus iya muwaccowériyéro. Napoji towi mennang Allataala nasaba masémpo ati senna'ko untu' bagé-bagéwi lao ri mennang sibawa lao risininna tau laingngé aga iya engkaé ri iko. Nanassempajangekko matu mennang sibawa pappénedding paressé babuwa nasaba makessing ati senna'i Allataala lao ri iko. Sitinajaki sukkuru' lao ri Allataala nasaba pabbéré-Na iya dé'é padannaro! Makkekkuwangngé iyya, Paulus, pangolo séuwa lao ri iko. Iyya'é, manuru adanna tauwé, malemma rékko siyolokko, iyakiya barani rékko sibélangngi. Nasaba alemmanna sibawa akessingeng atinna Kristus, uwéllauwi sibawa masero aja' muwébbuka tarapassa maggau' matedde lao ri iko rékko poléka matti. Saba' uwanniyakengngi untu' tinda' sibawa tegas lao risining tau iya powadaéngngi makkedaé majjamaki untu' akkatta-akkatta linoé. Mémeng tuwo mupi ri laleng linoé, iyakiya dé' taéwa manuru akkatta linoé. Senjata-senjata iya riyakkégunangngé ri laleng angéwangetta tenniya senjata linoéwé, iyakiya senjata-senjatana Allataala iya makuwasaé. Nasibawang sining senjataéro nariyancuru sining attahangengngé; ritangkisi'i sining addebbakengngé sibawa leppoi sining bénténg atempongeng iya napatettongngé untu' méwai pangissengengngé passalenna Allataala. Ritawangngi pikkiranna sining tauwé sibawa mébbui mennang tunru' lao ri Kristus. Narékko mapatoko sibawa sukku, sadiyani untu' hukkungngi sininna tauwé iya dé'é namatinulu. Sitinajai mumaingeki keadaang iya sitongennaé. Rékko séddié tau mateppe'i makkedaé appunnangennai Kristus, sitinajai naparéngngerangi aléna sibawa maingekiwi makkedaé appunnangenna tokki Kristus pada-pada aléna. Dé' umasiri rékko harusu'ka lebbi maéga mammingkikengngi akuwasang iya puraé nabbéréyang Puwangngé lao ri idi; saba' iyaro akuwasangngé nabbéréyangngi untu' patettokko, tenniya untu' ruttungngi. Dé' uwéloriko marasa makkedaé upéttau-péttauriko sibawa sining sure'ku. Makkedai tauwé, “Sining sure'na Paulus matedde'i sibawa riyakkitangiwi, iyakiya rékko aléna engka ri tengnga-tengngata, paribadinna malemmai sibawa ada-adanna dé'gaga bettuwanna!” Sitinajai tau pada-padaéro namaingeki makkedaé rékko engkaki ri tengngamu, coco'i tindaketta pada-pada aga iya riyokié ri laleng sining sure'ta. Tentu dé' tabarani pasibandingngi iyaré'ga taroi aléta sippada sibawa sining tau iya masengngéngngi aléna matanré. Anengka makkuwa donggona mennang! Naébbui mennang ukkuranna aléna sibawa nangke'i aléna sibawa ukkurangngéro. Dé' takkuwaro idi. Rékko mingki'-ingki'ki, dé' tatalliwe'-liwe'. Monroki ri laleng pakkaséséng-pakkaséséng daéra jama-jamang iya puraé napattentungekki Allataala. Na iko muttama' tokko ri laleng daéraéro. Jaji wettutta célléngiko sibawa tiwii Karéba Madécéng passalenna Kristus lao ri iko, sitonget-tongenna dé' tassu polé ri risining pakkasésénna jama-jamatta. Dé' naripoji aléta nasaba jama-jamanna tau laingngé iya engkaé ri saliwenna pakkaséséng iya napattentungengngékki Allataala. Sibalé'na tette'ki ri laleng sining pakkaséséng iya napattentungengngékki Allataala sibawa mamménasa makkédaé pédé' mateppe'ko lao ri Kristus, kuwammengngi weddikki pogau'i jama-jamang iya lebbi battowaé ri yelle'mu. Nanallalengiro nariyullé mappallebbangeng towi Karéba Madécéngngéro ri wanuwa-wanuwa laingngé sibawa dé' naripoji-poji alé nasaba jama-jamang iya puraé ripogau' ri daéra jama-jamanna tau laingngé. Ri laleng Kitta'é tarokii, “Tau iya mammingki-mingkikengngéngngi séuwaé, sitinajai mammingkikengngi aga iya puraé naébbu Puwangngé.” Saba' tau iya ripojiyé iyanaritu tau iya napojiyé Puwangngé, tenniya tau iya pojiyéngngi aléna. Palaloka maddonggo-donggo céddé. Wedditto? Muddanika lao ri iko, pada-pada muto Allataala muddani lao ri iko. Iko iyanaritu pada-padai séddié ana'dara iya mapaccingngé mupa iya puraé uwajjanciyang untu' ripabbotting sibawa séddié lakkai, iyanaritu Kristus. Iyakiya ubata-bataiwi pikkirammu rigodai matu untu' dé' namatinuluna lao ri Kristus, pada-padato Hawa riyolo rigoda ri amaccanna ulaé. Saba' samammu masennang bawang tarimai tau iya polé ri iko sibawa paggurui passalenna Yésus iya laingngé – tenniya Yésus iya riyappaddissengengngé lao ri iko. Sibawa maélo tokko tarimai roh sibawa “karéba madécéng” iya sisala senna'é sibawa Rohna Allataala sibawa Karéba Madécéng iya puraé mutarima polé ri idi. Dé' sises-siseng umarasa lebbi mariyawa naiya “rasul-rasul” iya dé'é padannaro! Naullé makurang accaka mabbicara, iyakiya passalenna pangissengengngé, tenniyaka tau donggo. Purani tapabutti lao ri iko ri laleng sininna gau'é. Wettukku mabbirittangngi Karéba Madécéng polé ri Allataala lao ri iko, dé' uwéllauko mongkosokika' muwi céddé; narimakkuwannanaro upakariyawai aléku. Upogau'i iyaro untu' pakatanréko. Aga iyaro séddiwi asalakku lao ri iko? Wettukku tumaningiko, riongkosokika' ri jema'-jema' laingngé. Wedding ripowada uparogiwi tulukko iyaro jema'-jema'é kuwammengngi uwulléi tulukko. Rékko akurangekka iyaro wettué, dé' naengka usussaiwi muwi séddié tau polé ri iko. Sininna iya uwapparelluwangngé napaggenne'i saudara-saudara iya polé ri Makedonia. Ujagaiwi madécéd-décéng kuwammengngi dé' usussaiko muwi ri laleng aga, sibawa matteruka matu jagaiwi kuwammengngi natette makkuwaro. Iyaé asennangenna atikkué dé' nawedding riledda muwi kégi-kégi ri wanuwa Akhaya, nasaba pappagguruwanna Kristus iya tongengngé engkai ri iyya. Magi uwakkeda makkuwaro? Aga nasaba dé' uwamaséiko? Naisseng Allataala mamaséka! Aga iya upogau'é makkekkuwangngé maéloka pogau'i matteru kuwammengngi “rasul” iya laingngéro dé' nappunnai alasang untu' pojiwi aléna sibawa makkeda makkedaé majjamai mennang pada-pada idi. Sining tau pada-padaéro iyanaritu rasul-rasul palsu. Mennang pajjama-jama iya bengnguwangngéngngi tauwé sibawa mallarikkodo selaku rasul-rasul Kristus. Tenrihérangeng mennang pogau'i makkuwaéro, saba' muwi Ibillisi' mallarikkodoto selaku malaéka'na tajangngé! Jaji tenrihérangetto rékko pattumani-pattumaninna Ibillisi' mallarikkodoi selaku pattumani-pattumani iya pogau'éngngi élona Allataala. Paccappurenna tarima towi matu mennang pamale' iya singngangke'é sibawa pangkaukenna. Upakkolippi siseng: Aja' lalo naengka mangga'ka madonggo. Iyakiya rékko to muwangga'ka makkuwaro, palalona iya madonggoéwé mingki' céddé. Mangoloéwé maéloka teppui ammingkikekkuro, iyakiya tenniya Puwangngé suroka powadai iyaro. Ri laleng gau'éwé mattonget-tongekka mabbicara pada-pada séddié tau donggo. Mémeng engka maéga tau iya mammingkikengngéngngi gau'-gau' mallinoé, jaji maélo tokka mingki'-ingki'. Masennangngi atimmu sabbara' lao ri tau madonggoé, nasaba marasako alému makkumani accana! Muleppessang bawammi tauwé powatako, iyaré'ga para'i sibawa mala asarong polé ri iko, iyaré'ga nasengngi aléna lebbi matanréi polé ri iko sibawa baraninna leppa'ko! Masirika mangakuiwi makkedaé malemma senna'ki untu' pogau'i pada-padaéro. Iyakiya aga iya tau laingngé baraniwi mingkikengngi, barani tokka! (Mabbicaraka pada-pada tau donggoé.) Tau Ibraniga mennang? Tau Ibrani tokka iyya. Tau Israélga mennang? Tau Israél tokka iyya. Wijannaga Abraham mennang? Makkuwatoro iyya! Pattumani-pattumaninnaga Kristus mennang? Samanna riyéngkalinga pada-pada ateddéngenna akkaleng, iyakiya mémeng iyya pattumani iya lebbi kessingngé naiya maneng mennang! Majjamaka lebbi rejjing, lebbi biyasaka riputtama' ri tarungkué, lebbi égaka ripanrasa-rasa sibawa biyasa céddé maté. Wékkalimana ripanrasa-rasa ri tau Yahudié sibawa pakkunru cambu wékkatelluppulo aséra. Wékkatelluka ricambu situru hukkunna Roma; engkato naengka rigenrukka batu. Wékkatelluka péneddingiwi abala tallemme'é ri tasi'é, sibawa siseng taronak-konang ri tasi'é siesso siwenni. Maléwe' senna'na ri laleng allalengengngé nakenna abala: lémpé, abala parampo', abala polé ri tau Yahudié iyaré'ga ri tenniyaé Yahudi, abala ri laleng kotaé, abala ri saliweng kotaé, abala ri tasi'é, sibawa abala polé risining tau iya masengngéngngi aléna selaku saudara Kristéng padahal tenniya. Sitengnga matéka majjama sibawa méwa: biyasa temmatinro, temmanré, maléwe' senna'ni tenrijampangi ri laleng alupurengngé, akurangeng pakéyang sibawa temmappunnai onrong mappéruma. Ri saliwenna iya manennaro, esso-esso tokka manenneng lao ri keadaanna jema'é. Rékko engka malemma maccowé tokka malemma. Rékko engka sempé' ri dosaé, maccowé tokka ancuru atikku. Narékko harusu'ka mammingkikengngi séuwaé, tentu uwammingkikengngi gau'-gau' iya mappaitangngéngngi alemmakku. Allataala, Ambo'na Puwang Yésus, naisseng makkedaé dé' uwabbellé! Ripojiwi asen-Na mannennungeng. Wettukku engka ri Damsyik, gubernur iya makuwasaé kuwaro ri yawa akuwasanna Arung Arétas, suroi tentaraé jagaiwi tange'na kotaéro untu' tikkekka. Iyakiya nasibawang séddi baka riloro'ka liyawa lalo riséddié sebbo ri tembo'é. Makkuwaniro nauleppe polé ri limanna iyaro gubernur-é. Mémeng dé'gaga sarona untu' mingki'. Iyakiya maéloka mammingkikengngi gau'-gau' iya nappaitangngé Allataala lao ri iyya ri laleng wahyu iyaré'ga ri laleng pakkitang. Uwisseng séddi tau Kristéng iya seppulo eppa taung labe'é riyakka ménré ri onrong iya kaminang matanré. (Dé' uwissengngi tonget-tongeggi watakkaléna tarakka iyaré'ga iyaro banna séddi pakkitang – Allataala bawang missengngi.) Passalennana iyaro tauwé maélo uwammingkikeng, tenniya passalenna aléku. Passalenna aléku, banna gau'-gau' iya mappaitangngéngngi alemmakku ritu, iya maéloé uwammingkikeng. Akkalarapanna macinna tokka mammingkikengngi séuwaé, dé' umaélo mancaji pabboro iya omong kosongngé; maéloka powadai iya tongengngé. Iyakiya utahangngi aléku, kuwammengngi nadé' gaga tau iya masengngékka lebbi naiya aga iya puraé naita upogau' iyaré'ga iya puraé naéngkalinga upowada. Iyakiya kuwammengngi dé' umatempo senna' nasaba sining pakkitang iya dé'é padannaro, riwérékka sirupa lasa ri watakkaléku iya sinrupaé paréwanna Ibillisi'é. Iyaro lasaé nabbéréyangngi untu' munruka kuwammengngi aja' umancaji matempo. Wékkatelluka massempajang lao ri Puwangngé kuwammengngi nariyakka iyaro lasaé polé ri iyya. Iyakiya mappébaliwi Puwangngé, “Uwamaséiko na iyaro genne'ni untu' iko; saba' akuwasak-Ku mala pédé' mawatangngi rékko ri laleng alemmakko.” Iyanaro saba'na lebbi masenna'ka mammingkikengngi sining alemmakku, saba' rékko malemmaka, mala ri wettuénnaro upérasai Kristus linrungika sibawa awatangen-Na. Jaji marennuka sibawa sining alemmakku. Marennu tokko rékko nasaba Kristus naripétenna'ka, péneddingiwi aperisengngé, ri lellung sibawa péneddingiwi asukkarakengngé. Saba' rékko malemmaka, mala ri wettuénnaro umawatang. Kédo pada-pada tongenna tau donggoé – iyakiya iko ritu mébbuka mancaji makkuwaro. Sitongenna iko ritu iya harusu'é pojika. Saba' namuni dé'gaga bettuwakku, dé' sises-siseng ucau lao ri “rasul-rasul” iya dé'é padannaro! Sining anu makalallaingngé sibawa gau'-gau' iya dé'é padanna enrengngé jama-jamang iya battowaé purani nappaitang lao ri iko sibawa sabbara' untu' pabuttiwi makkedaé séddika rasul. Ri laleng gau' maragaénna kurang rijampangiko, rékko ripasibandingngi sibawa jema'-jema' laingngé? Naullé banna ri laleng gau'éwé: makkedaé dé' usussaiko untu' mongkosokika. Taddampengekka nasaba asalangngéro! Makkekkuwangngéwé untu' mabbékkatellunnani sadiyaka untu' célléngiko. Nadé' umaélo sussaiko, saba' iya uwacinnaiyé tenniya aga iya muwappunnaiyé, sangadinna alému. Nasaba tenniya ana'-ana'é harusu' sappa dallé untu' tomatowanna, iyakiya tomatowaé ritu harusu' sappa dallé untu' ana'-ana'na. Rimakkuwannanaro, masennang atikku sibawa macenning makkarobangengngi sini-sininnaé untu' iko, mala muwi aléku. Rékko makkumani uwamaséimmu, sipato'koga kurang mamaséika? Nasitujui makkedaé dé' naengka usussaiko. Iyakiya engka powadai makkedaé macéko-cékoka; makkedaé lolongekka saro polé ri iko nasaba acéko-cékongekku. Pékkugi wedding! Nalaloiga sining tau iya usuroé lao ri iko naulolongeng saro polé ri iko? Purani usuro Titus lao célléngiwi saudara, sibawa usuroi saudara Kristéng iya laingngéro lao sibawangngi. Lolongegga saro Titus polé ri iko? Iyakiya sipadduwaki majjama sibawa akkatta iya padaé, enrengngé tinda'i sibawa cara-cara iya padaé! Wedding jaji muwasekki iyaé labe'é makkuraga méwaiwi alé lao ri iko? Sala pahang senna'ko! Naisseng Allataala makkedaé sininna iya ripowadaéro iyanaritu siturui élona Kristus. Sibawa sininna iya ripogau'é iyanaritu untu' patettongngi atuwong batémmu. Bata-bataka makkedaé wettukku célléngiko matti, upoléiko dé' napada-pada aga iya uwamménasaiyé, na iko mupoléi tokka matu dé' napada-pada iya muwamménasaiyé. Ajakké matu engka mallaga, mangémpuru, mangowa, mappakiri, matempo sibawa mappakacau. Métauka rékko Allataala pakatunaka matu ri yolomu wettukku polé matti. Terika matu nasaba maéga ri yelle'mu iya madosaé ri yolo, dé' natappinra sibawa dé' nappésau pogau'i pangkaukeng-pangkaukenna iya mappangaddié, marota'é sibawa dé'é nasitinaja. Untu' mabbékkatellunnanié poléka célléngiko. Ri laleng Kitta'é tarokii, “Tungke' parakara harusu'i ripakkasse ri asabbiyanna duwa iyaré'ga tellu tau sabbi, nainappa essa iyaro parakaraé.” Sining tauwé iya wettu labe'é pogau' dosa sibawa sininna tau laingngé, purani uparéngngerangi lebbi riyolo wettukku célléngiko mabbékkaduwanna. Makkekkuwangngé, ri wettu sibélatta, uwapparéngngerangngengngi paimeng makkedaé rékko engkaka polé paimeng, dé' muwi séddi tau polé ri mennang iya leppe'é polé ri pahukkungengngé. Mulolongengngi matu sininna buttinna makkedaé Kristus tonget-tongengngi mabbicara naolaka. Rékko tinda'i Kristus lao ri iko, dé' natinda' sibawa malemma, sibalé'na nappaitangngi akuwasan-Na ri yelle'mu. Mémeng wettunna risalli, malemmai, iyakiya makkekkuwangngé tuwoi nasaba akuwasanna Allataala. Idi' malemma tokki, ri laleng atuwotta iya masséddié sibawa Kristus, iyakiya rékko moloiko, mawatang tokki silaong Kristus nasaba akuwasanna Allataala. Cobako mojiwi aléna engka muwiga tonget-tongekko tuwo situru atepperengngé lao ri Kristus! Pasti musadariwi makkedaé Kristus Yésus engkai ri laleng iko! – silaingengngi rékko mémeng iko dé' natonget-tongeng mateppe'. Mamménasaka mumaingekiwi makkedaé tenniyaki tau iya dé'é natahang riuji. Massempajakki lao ri Allataala tennapodo maéloi tulukko untu' dé' napogau'i iya salaé. Tenniya untu' mappaitangngi makkedaé mémeng idi'é maccaki jamai jama-jamangngé, iyakiya kuwammengngi mupogau'i aga iya naéloriyé Allataala – namuni paitaki dé'gaga wassélé'na, dé' namaga! Saba' dé'gaga riyullé pogau' iya sisalaé élona Allataala; harusu'ki turusiwi élona Allataala. Masenna'ki rékko malemmaki, na iko mawatang. Massempajang tokki kuwammengngi namancaji sukkuko. Iyanaro saba'na uwokii iyaé sure'é wettukku dé'pa uwengka ri tengnga-tengngamu. Nanallalengiro, rékko poléka matti, dé'na naparelluka tinda' matedde lao ri iko sibawa makkégunang akuwasang iya nabbéréyangngé Puwangngé lao ri iyya. Iyaro akuwasangngé nabbéréyangngi untu' patokkokko, tenniya untu' mancuru'i. Paccappurenna, Saudara-saudara, sitinajako marennu, sibawa makkuraga mancaji sukku. Tarimai sininna pangajaku. Sitinajako masséddi ati sibawa tuwo sipammasé-masé. Allataala Iya Pommamasé sibawa mappasidaméro sibawakko matu. Sipammasé-maséno séddié sibawa laingngé secara mariyo-riyo selaku Saudara Kristéng. Sininna umma'na Allataala masselleng lao ri iko. Tennapodo Puwang Yésus Kristus barakkakiko, Allataala mamaséiko, enrengngé Rohna Allataala sibawakko maneng! Salama, Mapatoiwi élona Allataala Ambo'ta, Kristus mabbéréyangngi Aléna mancaji akkarobangeng untu' dosa-dosata, kuwammengngi Naripassalama'ki polé ri wettu iya majaéwé. Ripojiwi Allataala mannennungeng! Aming. Hérakka passalenna Saudara-saudara! Riyobbiko ri Allataala nasaba pammaséna Kristus, iyakiya makkekkuwangngé masitta wéggakko mabbokoriwi Allataala sibawa maccowériwi “karéba madécéng” iya laingngé naiya Karéba Madécéng iya polé ri Allataala. Sitongenna dé'gaga “karéba madécéng iya laingngé”. Banna engka sining tau iya mabbirittangngéngngi lao ri iko “karéba madécéng” passalenna Kristus iya naputara'balé'é mennang angkanna napakacauko. Tau iya mabbirittangngéngngi “karéba madécéng” iya laingngé naiya Karéba Madécéng iya puraé riyabbirittang, leppessanni rihukkung ri Allataala – namuni iyaro tauwé idi muto iyaré'ga malaéka' polé ri surugaé. Purani tapowada riyolo, makkekkuwangngé upowadai siseppa: Tau iya mabbirittangngéngngi lao ri iko “karéba madécéng” iya laingngé naiya Karéba Madécéng iya puraé mutarima polé ri idi, iyaro tauwé sitinajai rihukkung ri Allataala. Aga nassabariro paitaka samanna mamménasa riakui ri tolinoé? Dé' sises-siseng! Banna mamménasaka riakui ri Allataala. Makkuragaka'ga malai atinna tolinoé kuwammengngi nariétauri ri tauwé? Rékko upogau' mupi makkuwaéro, tenniyaka atanna Kristus. Harusu'i naisseng Saudara-saudara makkedaé Karéba Madécéng iya uwabbirittangngéro dé' napolé ri tolinoé. Dé' utarimai iyaro karébaé polé ri tolinoé, sibawa dé'to muwi séddi tau iya mappagguruwangngéngngi lao ri iyya. Yésus Kristus muto ritu iya pallessuéngngi lise'na Karéba Madécéngngéro polé ri iyya. Tentu purani muwéngkalinga passalenna atuwo-tuwokku riyolo selaku séddi paggama Yahudi. Muwisseng pékkugi péddaraku gaukengngi jema'na Allataala sibawa pékkugi tedde'ku makkuraga mancuru'i. Ri laleng pajoppai agama Yahudié, upakacauriwi maégangngéngngi tau Yahudi iya uwéwaé sippangka. Masumange' senna'ka ri laleng gau'-gau' passalenna ade'na néné-nénéta. Iyakiya nasaba akessingeng atinna Allataala, napiléka ri wettu dé'napa ujaji enrengngé mobbika untu' tumaningiwi. Allataala mappaddissengengngi Ana'-Na lao ri iyya kuwammengngi Karéba Madécéngngé passalenna Ana'-Na weddingngi uwabbirittang lao risining tau tenniyaé Yahudi. Iyaro wettué dé' ulao muwi riséddié tau untu' méllau pangaja. Dé'to ulao risining tauwé ri Yérusalém iya lebbi mariyoloé na iyya mancaji rasul. Iyakiya laoka ri wanuwa Arab, nainappa polé kuwaro lisusi ri Damsyik. Telluttaung ri munrinna, lisuka ri Yérusalém untu' sisseng sibawa Pétrus. Monroka sibawa aléna seppulo lima esso bawang ittana. Dé' usiruntu sibawa rasul-rasul iya laingngé, sangadinna Yakobus, silessurenna Puwangngé. Aga iya uwokiéwé tongeng. Naisseng Allataala sibawa dé' uwabbellé. Purairo laoka ri daéra-daéra ri Siria sibawa Kilikia. Narapi iyaro wettué jema'-jema' Kristéngngé ri Yudéa dé'pa naissekka secara langsung. Naéngkalingami bawang mennang tauwé makkeda, “Tau iya cellaékki riyolo, makkekkuwangngé nabbirittangngi atepperengngé iya maéloé ripallennye' riyolo.” Nanapojini mennang Allataala nasaba iyya. Seppulo eppa taung ri munrinna, lisuna ri Yérusalém sibawa Barnabas, enrengngé tiwi towi Titus. Laoka ri Yérusalém saba' Allataala pura pannessai ri iyya makkedaé harusu'ka lao. Na ri laleng séuwaé addeppu-deppungeng sibawa sining pamimpingngé kuwaro bawang, upakatajangngi Karéba Madécéng iya uwabbirittangngé lao risining tau tenniyaé Yahudi. Saba' dé' umaélo usahaku riyolo, iyaré'ga makkekkuwangngé siya-siya bawang. Titus iya silaongengngékka, iyanaritu séddiwi tau Yunani, iyakiya dé' naripassa maccowériwi peraturang sunna'é, namuni engka sining tau iya maddessakengngéngngi gau'éro. Mennang iyanaritu sining tau maccelle'é ri laleng golongetta sibawa mallarikkodo selaku saudara. Muttama'i mennang sibawa mammekko-mekko untu' salidikiwi alaluwasang iya engkaé ri idi nasaba masséddiki sibawa Kristus Yésus. Maéloi mennang palisuki ri laleng keadaang bunge'-bunge'na selaku ata, iyakiya dé' tamanyera muwi céddé lao ri mennang, nasaba maéloki jagaiwi kuwammengngi iyaro Karéba Madécéngngé tette'i tuléng untu' iko. Namuni makkuwaro, dé'gaga gau'-gau' baru iya natuntu'é polé ri iyya risining tau iya nangga'é riyakkitangi – untu' aléku dé'gaga sisalana rékko riyakkitangiwi mennang iyaré'ga dé', saba' Allataala dé' nakkita tappa. Sibalé'na, sining tau iya riyangga' riyakkitangiyéro nangakui makkedaé Allataala pura suroka untu' mabbirittangngi Karéba Madécéngngé lao risining tau tenniyaé Yahudi; pada-pada pura nasurona Pétrus untu' mabbirittangngi Karéba Madécéngngéro lao ri tau Yahudié. Saba' Allataala mabbéréyangngi lao ri Pétrus amampungeng untu' mancaji rasulna sining tau Yahudié, mpéréng tokka amampungeng untu' mancaji rasulna sining tau tenniyaé Yahudi. Yakobus, Pétrus sibawa Yohanés, iya riitaé mancaji sining pamimpinna jema'é, nangakui makkedaé Allataala pura mpérékka jama-jamang dé'é padannaé. Najjama'na mennang sibawa Barnabas enrengngé iyya selaku tanrang assisellaongeng. Nainappa mennang sibawa idi risitujuini makkedaé majjamaki matu ri yelle'na bangsa-bangsa iya tenniyaé Yahudi, na mennang ri yelle'na tau Yahudié. Séddi-séddinna paréllaunna mennang iyanaritu kuwammengngi narijampangi tau kasiyasié. Na iyya mala masennang pogau'i iyaro gau'é. Wettunna Pétrus lao ri Antiokhia, uwéwai sibawa uwappita-pitang, nasaba salai tindakanna. Bunge'-bunge'na tudangngi manré sisama sibawa Saudara-saudara iya tenniyaé Yahudi. Iyakiya wettunna lettu sining tau nasuroé Yakobus, napabélai aléna polé ri Saudara-saudara tenniyaé Yahudi sibawa dé' namaélona manré sibawa mennang, saba métaui lao risining tau iya méloriyéngngi risunna sining tauwé. Saudara-saudara Yahudié iya laingngé maccowé towi munapé' pada-pada Pétrus, angkanna muwi Barnabas tappangaruto untu' kédo-kédo pada-pada mennang. Uwitanaro makkedaé dé' nappallolongeng mennang situru atongengenna Karéba Madécéngngéro, makkedana lao ri Pétrus ri yolona sininna tau iya hadéré'é kuwaro, “Rékko Sudara selaku tau Yahudi purano tuwo pada-pada tau tenniyaé Yahudi, magi Sudara makkekkuwangngé namaélo passai sining tau laingngé tuwo pada-pada tau Yahudié?” Mémeng manuru' ajajiyang, idi iyanaritu tau Yahudi sibawa tenniya “tau tenniyaé Yahudi iya madosaé”. Namuni makkuwaro riissengngi makkedaé simadécéngengngi paimeng tauwé sibawa Allataala banna nasaba teppe' lao ri Yésus Kristus, sibawa tenniya nasaba pajoppai Hukkunna Agamaé. Aléta paimeng mateppe' lao ri Yésus Kristus, kuwammengngi tasimadécéngeng sibawa Allataala naolai teppe'taro, tenniya nasaba tapajoppai Hukkunna Agamaé. Saba' ri laleng ripajoppana Hukkunna Agamaé, dé' muwi séddi tau simadécéngeng paimeng sibawa Allataala. Makkuragaki simadécéngeng paimeng sibawa Allataala naolai tuwoé masséddi sibawa Kristus. Iyakiya rékko purani ripogau' iya makkuwaéro, manessani idi “sining tau madosa” mupa pada-padato sining tau tenniyaé Yahudi, aga iyaé bettuwanna makkedaé Kristus ritu nassabariki madosa? Tentu dé'! Rékko mappammulaka patettongngi paimeng bentu'na Hukkunna Agamaé iya puraé uruttung, nauwappaitangngi makkedaé mancajika iya majjalékkaiyéngngi hukkungngé. Iyakiya maténa lao ri Hukkunna Agamaé – hukkung-hukkungngé mutoro mpunoi – kuwammengngi uwulléi tuwo untu' Allataala. Purana risalli silaong Kristus. Makkekkuwangngé tenniyana iyya tuwo, iyakiya Kristus iya tuwoé ri laleng aléku. Atuwongngéwé iya uwattemmekiyé makkekkuwangngé iyanaritu tuwo ri laleng teppe' lao ri Ana'na Allataala iya mamaséiyékka sibawa iya puraé makkarobangngi Aléna untu' iyya. Dé' upakariyawai pammaséna Allataala. Rékko assisumpungenna tauwé sibawa Allataala simadécéngengngi paimeng nasaba napajoppai Hukkunna Agamaé, bettuwanna iyaro amaténna Kristus dé'gaga gunana! Saudara-saudara tau Galatiaé! Madonggo tongekko! Pangaru nigaré'na kennako? Amaténna Kristus ri sallié purani upakatajang sibawa manessa lao ri iko! Coba paissengika iyaé séddié passaleng: Puraniga mutarima Rohna Allataala nasaba pajoppai Hukkunna Agamaé, iyaré'ga nasaba muwéngkalingai Karéba Madécéng polé ri Allataala sibawa mateppe' lao ri Kristus? Magi mumadonggo makkuwaro! Purani mupammulai atuwong mabarué sibawa Rohna Allataala, masakang makkekkuwangngé maéloko lolongengngi asukkurenna sibawa awatangeng alému? Percumaga bawang sininna iyaro puraé mupéneddingi? Masa' percuma! Allataala mabbéréyangngi Rohna lao ri iko sibawa pakangka anu makalallaing ri yelle'mu. Napogau'iga Allataala iyaro nasaba mupajjappai Hukkunna Agamaé iyaré'ga nasaba muéngkalingai iyaro Karéba Madécéngngé sibawa mateppe' ri Kristus? Iyaro pada-padai iya tarokié ri laleng Kitta'é passalenna Abraham – makkuwaiyé, “Mateppe'i Abraham lao ri Allataala, nasaba atepperennaé ritarimai ri Allataala selaku tau iya sennangiyéngngi atinna Allataala.” Jaji sitinajako mainge' makkedaé tau iya tonget-tongengngé wija-wijanna Abraham iyanaritu tau iya mateppe'é ri Allataala. Pura naitani Kitta'é lebbi riyolo makkedaé Allataala nanakkulléngiwi sining tau tenniyaé Yahudi simadécéngeng paimeng sibawa Allataala, rékko mateppe'i mennang ri Aléna. Iyaro Karéba Madécéngngé riyappaddissengengngi lebbi riyolo lao ri Abraham ri laleng janciéwé, “Naolako, Allataala barakkakiwi matu sininna rupa tauwé ri yasé'na linoé.” Mateppe'i Abraham, naribarakkakiki. Makkuwatoro sininna tau iya mateppe'é, ribarakkakiwi matu silaong Abraham. Sining tau iya taggattungngé ri Hukkunna Agamaé, iya manenna tuwoi ri yawana pahukkungengngé. Saba' ri laleng Kitta'é tarokii, “Tau iya dé'é namatinulu pajoppai sininna iya tarokié ri laleng Kitta Hukkunna Agamaé, ritanroiwi ri Allataala!” Dé' muwi séddi tau simadécéngeng sibawa Allataala, nasaba napajoppai Hukkunna Agamaé. Iyaro gau'é pura ripannessai ri laleng Kitta'é, “Banna tau iya mateppe'é ri Allataala angkanna assisumpungenna sibawa Allataala mancaji makessing paimeng, tuwo matu!” Iyakiya Hukkunna Agamaé dé' natettong polé ri teppe'é. Ri laleng Kitta'é tarokii makkedaé tau iya pajoppaéngngi hukkunna agamaé, tuwoi matu nasaba hukkungngéro. Iyakiya Kristus paleppe'ki polé ri tanrona Hukkunna Agamaé. Napogau'i iyaro ri laleng naleppessanna aléna tattanro nasaba idi. Saba' ri laleng Kitta'é tarokii, “Tattanroi tau iya maté rigattung ri alliri ajué.” Napogau'i Kristus makkuwaéro kuwammengngi nabarakka iya najjanciyangngé Allataala lao ri Abraham nabbéréyang towi lao risining tau tenniyaé Yahudi. Nanallalengiwi, idi iya mateppe'é ri Allataala, naulléi tarimai Roh iya najjanciyangngé Allataalaro. Saudara-saudara! Makessingngi pakéka conto polé ri pengalamang esso-essoé. Rékko mébbui tauwé séuwa assijancingeng na iyaro assijancingngé purani napaessa, dé' muwi séddi tau mulléi rusa'i iyaro assijancingngé, iyaré'ga tambaiwi muwi séuwa ri assijancingngéro. Janci-jancinna Allataala naébbui Allataala untu' Abraham sibawa untu' tau wijanna Abraham. Ri laleng Kitta'é dé' nataroki “sibawa untu' sining tau wijanna Abraham”, iya bettuwannaé maéga tau. Iya tarokié kuwaro iyanaritu “sibawa untu' tau wijanna”, bettuwanna séddi tau bawang, iyanaritu Kristus. Iya maéloé upangolo kuwaé iyanaritu iyaé: purani naébbu jancinna Allataala sibawa napaessa lebbi riyolo. Hukkunna Agamaé iya nabbéréyangngé eppadatu telluppulo taung rimunrinna dé' naulléi rusa'i essana enrengngé leddai iyaro jancinna Allataala. Saba' rékko pabbéréna Allataala taggattungngi ri Hukkunna Agamaé, iyaro tenniyana pabbéré iya najjanciyangngé. Mala nasaba Allataala pura majjanciyangngi lao ri Abraham, nanabbéréyangngi Allataala iyaro lao ri aléna. Rékko makkuwaitu, untu' aga Hukkunna Agamaé riyabbéréyang? Pappébalinna iyanaritu makkedaé iyaro sining hukkungngé riyattambangngi untu' pannessai pelanggaranna tolinoé. Iyaro pahukkungenna agamaé takkennai narapi bawang apolénna séddié tau wijanna Abraham, iya riteppué ri laleng jancinna Allataala lao ri Abraham. Iyaro Hukkunna Agamaé napalettu'i sining malaéka'é sibawa naolai séddi tolino. Naharusu'i engka duwa piha', nainappa parellu séddi pappasimpung. Iyakiya Allataala dé' napparelluwang pappasisumpung, saba' Aléna muto tinda'. Aga iyaro bettuwanna makkedaé siéwai Hukkunna Agamaé sibawa jancinna Allataala? Tentu dé'! Saba' rékko riyabbéréyangngi Hukkunna Agamaé untu' mabbéréyangngi atuwongngé lao ri rupa tauwé, naulléi simadécéngeng tolinoé sibawa Allataala naolai Hukkunna Agamaé. Iyakiya ri laleng Kitta'é tarokii makkedaé sininna rupa tauwé engkai ri yawa akuwasanna dosaé. Rimakkuwannanaro, pabbéré iya najjanciyangngé nasaba teppe' lao ri Yésus Kristus nabbéréyangngi lao ri mennang iya mateppe'é. Riwettu dé'napa narapii wettunna untu' mateppe' lao ri Kristus, rijagai senna'ki ri Hukkunna Agamaé; samannaki riurung narapi iyaro teppe'é ripannessa. Nanallalengiro, Hukkunna Agamaé mancajiwi selaku jennatta narapi polé ri Kristus untu' mébbuki simadécéngeng paimeng sibawa Allataala nasaba mateppe'ki ri Kristus. Makkekkuwangngé, nasaba wettunna tolinoé wedding mateppe' ri Kristus, nadé'na narijagaiki ri Hukkunna Agamaé. Nasaba mateppe'ko ri Kristus Yésus, namumasséddi sibawa aléna; narimakkuwannanaro mancajiko ana'-ana'na Allataala. Pura manenno ricemmé ri laleng asenna Kristus, jaji purani mutarima ri alému sipa'-sipa'na Kristus. Ri laleng passalengngéwé dé'na naripasilaingeng tau Yahudié sibawa tenniyaé Yahudi, ataé sibawa tau maradéka'é, worowané sibawa makkunraié. Séddi maneng mani Saudara nasaba Kristus Yésus. Rékko appunnangennako Kristus, iko iyanaritu wijannai Abraham. Sibawa mutarimana matu aga najjanciyangngé Allataala. Makkuwatoro sibawa idi: Riwettu dé'napa taballéré, ripowataki ri roh-roh iya makuwasaiyéngngi linoéwé. Iyakiya ri wettunna iya teppa'é, nasuroi Allataala Ana'-Na lao ri linoé. Iyaro Ana'-Na rijajiyangngi riséddié makkunrai sibawa tuwo ri yawana akuwasanna Hukkunna Agamaé. Nanallalengiwiro napaleppe'i sining tau iya tuwoé ri yawana akuwasanna Hukkunna Agamaé; kuwammengngi wedding tokki mancaji ana'-ana'na Allataala. Nasaba iko iyanaritu ana'-ana'na Allataala, nasuroi Allataala Rohna Ana'-Na muttama ri laleng atitta, iyanaritu Roh iya mangobbié, “Ambo', éh Ambo'-Ku.” Jaji tenniyano ata, sangadinna ana'. Nasaba iko ana' Allataala, Allataala mpérékko matu sininna séuwa-séuwaé iya napassadiyaé untu' ana'-ana'-Na. Riyolo dé' muwissengngi Allataala, iyanaro saba'na mancajiko ata polé risining akuwasang iya riyangga'é selaku déwata iyakiya sitongenna tenniya sises-siseng Allataala. Iyakiya makkekkuwangngé muwissenni Allataala, iyaré'ga lebbi coco'i, Allataala missekko. Na magi mumaélo lisusi ri roh-roh linoéwé, iya malemmaé sibawa kasiyasié? Magi mumaélo ripowatasi ri roh-roh-éro? Muramé-raméiwi esso-esso mattentué, uleng-uleng mattentué sibawa taut-taung mattentué. Bata-bataka, ajakké turuppuse'ku untu' iko siya-siyai bawang. Saudara-saudara! Uwéllauwi sibawa masero kuwammengngi mumancaji pada-pada iyya. Nasaba pura tokka mancaji pada-pada iko. Dé' agaga mupogau' iya salaé lao ri iyya. Tentu muwéngngerang mupa aga iya nassabariyé pammulanna na uwabbirittangngi iyaro Karéba Madécéngngé lao ri iko. Saba'na iyanaritu nasaba nakennaka lasa. Iyaro wettué dé' mumaciddi lao ri iyya, namuni watakkaléku sinrupai paccobang iya battowaé lao ri iko. Mala mutarimaka pada-pada tarimai malaéka'na Allataala iyaré'ga tarimai aléna Kristus Yésus. Masennang senna'ko wettuéro. Iyakiya makkekkuwangngé, kégani iyaro asennangengngé? Uwisseng iyaro wettué macennikko cukkéi matammu untu' mpérékka, rékko weddingngi ripogau' iyaro. Muwangga'na'ga makkekkuwangngé selaku bali, nasaba upannessai iya tongengngé lao ri iko? Iyaro sining tau laingngé masumange'i sappako, iyakiya akkattana mennang dé' namakessing. Macinnai bawang mennang pettui assisumpungemmu sibawa idi, kuwammengngi namuccowériwi mennang sibawa masumange'. Mémeng makessing untu' masumange' ri laleng gau'-gau' iya makessingngé, assaleng tuli makkuwamuwiro sibawa aja' bawang narékko engkaka sibawakko. Ana'-ana'ku iya riyamaséiyé! Makkekkuwangngéwé manrasa-rasasika nasaba iko. Manrasa-rasaka pada-pada makkunrai mapeddié wettunna jajiyang ana'. Maéloka matteru-teru manrasa-rasa, rékko sipa'-sipa'na Kristus dé'pa natattaneng ri alému! Muddani senna'ka engka ri tengnga-tengngamu makkekkuwangngé, kuwammengngi weddikka mabbicara lao ri iko sibawa sadda laingngé, nasaba dé'na uwissengngi agana maélo upogau' lao ri iko! Saudara-saudara iya maéloé tuwo ri yawana akuwasanna hukkung-hukkunna Agamaé, cobai méngkalingaka! Maéloka powadakko aga sitongenna taroki ri laleng Kitta Hukkunna Musa. Tarokii kuwaro makkedaé Abraham mappunnaiwi duwa ana': Indo'na ana'é séddié iyanaritu séddiwi ata, sibawa indo'na ana'é laingngéro iyanaritu séddiwi tau maradéka'. Ana'na makkunrai iya mancaji ataé jaji biyasai nasaba élo tolino. Iyakiya ana'na makkunrai maradéka'é, jajiwi nasaba najjanciyangngi Allataala. Iyaé weddingngi ripaké selaku rapang. Iyaro duwaé makkunrai iyanaritu akkalarapanna duwa assijancingeng: iya séddié polé ri Bulu Sinai – iyanaritu Hagar; ana'-ana'na rijajiyangngi selaku ata. Jaji Hagar iyanaritu Bulu Sinai, ri tana Arab. Pulambangngéngngi kota Yérusalém sibawa sininna pabbanuwana iya makkekkuwangngé mancaji atani. Iyakiya Yérusalém iya engkaé ri surugaéro iyanaritu Yérusalém iya maradéka'é, sibawa alénana iyanaritu indo'ta. Saba' ri laleng Kitta'é tarokii, “Arennuno iko éh makkunrai manangngé, iya dé'é naengka naémmana! Ariyo-riyono sibawa gora-gorano éh iko iya dé'é naengka napéneddingiwi peddi émmanakengngé! Saba' makkunrai iya risalaiyé ri lakkainna lolongengngi matu lebbi maéga ana' naiya makkunrai iya silollongngé lakkainna.” Saudara-saudara! Alému iyanaritu ana'-ana'na Allataala iya rijajiyangngé nasaba jancinna Allataala; pada-padako Ishak. Iyaro wettué ana' iya jajiyé manuru élo tolino, callai ana' iya jajiyé nasaba élona Rohna Allataala. Makkuwatoro makkekkuwangngé. Iyakiya aga taroki ri laleng Kitta'é? Tarokii kuwaro makkedaé: “Paddésu'i ata makkunraiéro silaong ana'na, saba' ana' polé ri ataéro dé' nancaji matu ahli warisi'na silaong ana' polé ri makkunrai maradéka'éro.” Jaji, Saudara-saudara, idi'é tenniya ana' polé riséddié ata; idi iyanaritu ana'-ana' polé ri makkunrai maradéka'é. Maradéka'i makkekkuwangngé, saba' Kristus pura pamaradékaki! Rimakkuwannanaro attahangengngi amaradékammu, sibawa aja'na mumaélo ripowatasi. Engngerangngi, rékko méllauko risunna, bettuwanna iyaro dé'gaga gunana Kristus lao ri iko. Iya powadaéngngi iyaé iyanaritu iyya muto, Paulus. Siseppi mabbéréka papparéngngerang lao ri tau iya méllauéngngi risunna, makkedaé waji'i pajoppai sininna Hukkunna Agamaé! Rékko makkuragai saudara simadécéngeng sibawa Allataala naolai Hukkunna Agamaé, bettuwanna iyaro assisumpungemmu sibawa Kristus pettui. Rimakkuwannanaro tuwoko risaliwenna pammaséna Allataala. Iyakiya untu' idi, mamménasaki makkedaé nasibawang pattulunna Rohna Allataala sibawa nallalengi teppe'ta lao ri Kristus, napakkulléki Allataala simadécéngeng sibawa Aléna. Saba' rékko masséddini sibawa Kristus Yésus, passaleng turusiwi iyaré'ga temmaccowériwi peraturanna sunna'é dé'na nancaji soal. Iya pentingngé banna teppe' lao ri Kristus, na iyaro manessai ri laleng pammaséta lao ri tau laingngé. Riyolo purano méwa sibawa madécéng! Makkekkuwangngé magi dé'na mumatinulu lao ri élona Allataala? Niga pura palécéko? Tentu iya pogau'éngngi iyaro tenniya Allataala iya puraé mobbiko! Makkedai tauwé, “Ragi céddé'é napasawéi matu sininna lama labbu'é.” Namuni makkuwaro mateppe' mupa makkedaé dé' matu muwaccowériwi attangenna tau laingngé, saba' masséddiki sibawa Kristus. Namateppe'ka makkedaé muwi niga pakacauwi pikkirammu, rihukkungngi matu ri Allataala. Passalenna iyya, Saudara-saudara, magi namatteru-teruka bawang rimusu rékko uwabbirittang mupi makkedaé iyaro peraturang sunna'é parellui? Rékko mémeng uwabbirittangngi makkuwaro, tentu pabbirittakku passalenna sallina Kristus dé' napaompo persoalang. Lebbi kessing muwi sining tau iya pakacauéngngi pikkirammuro matterui bawang massu maneng polé ri jema'é! Purani riyobbi Saudara untu' mancaji tau iya maradéka'é. Iyakiya aja' naripaké iyaro amaradékangngé untu' matteru-teru pogau'i agi-agi iya muwacinnaiyé pogau'i. Sibalé'na harusu'ko sisullé siyamaséyang sibawa situmaningi. Sininna Hukkunna Agamaé ririppekiwi ri laleng parénta iya séddiéwé, “Sitinajako mamaséiwi padammu rupa tau pada-pada muwamaséinna alému.” Iyakiya rékko sisulléko sikarebbé-karebbé, jaga-jagako, pada ancuru'ko matu. Akkattaku makkuwaiyé: Leppessanni Rohna Allataala pimpikko sibawa aja'na mutuwo situru sipa'na tolinoé. Saba' cinnana tolinoé sisalai sibawa cinnana Rohna Allataala, sibawa cinnana Rohna Allataala sisalai sibawa cinnana tolinoé. Iya duwa sisulléi siéwa, angkanna dé' muwulléi pogau'i aga iya muwacinnaiyé. Iyakiya rékko Rohna Allataala pimpikko, dé' narikuwasaiko ri Hukkunna Agamaé. Cinnana sipa'na rupa tauwé manessai ri laleng pangkaukeng-pangkaukeng iya mappangaddié, macarépaé, sibawa dé'é nasipato; ri laleng assompangngé ri barahalaé sibawa paddissengengngé; ri laleng simusu-musué, mallaga, mangémpuru, masitta macai, sibawa pentingkangngi aléna, atemmasséddingngé sibawa makkonro-konrong, enrengngé mangémpuru ati, mammabo-mabokeng, mappésta-pésta sibawa rilainnaéttopa paimeng. Lao ri sininnaro uparéngngerangiko makkekkuwangngé pékkugi pada-pada uparéngngerangiko riyolo, makkedaé sining tau iya pogau'éngngi makkuwaéro dé' nancaji matu anggota umma'na Allataala. Sibalé'na rékko ripimpingngi tauwé ri Rohna Allataala, iyanaé wassélé'na: Sisulléi siyamaséi, marennui mennang, mappunnai mennang adaméngeng, sabbara'i mennang sibawa masémpo ati, makessingngi mennang lao ri tau laingngé, matinului mennang, mariyawa atiwi mennang, sibawa tuli naulléna makuwasaiwi aléna. Sining tau makkuwaéro dé' naparellu bata-bata untu' matinulu lao ri Hukkunna Agamaé. Sining tau iya mancajiyénna appunnangenna Kristus Yésus, iyaro sining tauwé purani nauno sipa' tolinona sibawa sininna napessunna enrengngé sining cinnana. Purani nabbéréyang Rohna Allataala lao ri idi atuwong mabarué, rimakkuwannanaro, alénato ritu harusu makuwasaiwi atuwotta. Dé' naweddikki matempo, sibawa sisullé sipeddiri ati, enrengngé mangémpuru ati séddié lao ri laingngé. Saudara-saudara! Rékko séddié tau ripoléiwi pogau' séddi dosa, sitinajako iya tuwoé manuru' Rohna Allataala, pimpingngi iyaro tauwé lisu ri laleng iya tongengngé. Iyakiya harusu'ko pogau'i iyaro sibawa malemma, sibawa jagaiwi aja' narapii alémmu rigodato. Sitinajako sisullé sibantu tanggungngi tiwina tauwé, kuwammengngi nassabariwi muturusiwi paréntana Kristus. Rékko séddié tau nasengngi aléna penting, padahal dé', iyaro tauwé aléna muto nabellé. Tungke' tau harusu'i paréssai aléna makessigga ampé-ampéna iyaré'ga dé'. Rékko makessingngi, weddingngi marasa mabangka ri gau'éro. Iyakiya dé' naparelluna napasibanding sibawa aga iya napogau'é tau laingngé. Saba' tungke' tau harusu'i méssangngi tanggung jawa'na. Tau iya tarimaéngngi pappagguruwanna Kristus, sitinajai mabbagé sibawa gurunna sininna iya makessingngé iya engkaé ri aléna. Aja' muribengnguwang. Dé' nawedding riyacculé-culéi Allataala! Aga ritaneng, iyanaritu riduppa. Rékko mattanengngi tauwé situru sipa' tolinona, naduppai matu amaténgngé polé ri sipa'naro. Iyakiya rékko mattanengngi manuru Rohna Allataala, naduppai matu atuwong tongengngé iya mannennungengngé polé ri Rohna Allataala. Rimakkuwannanaro, aja' tacau pogau'i gau'-gau' iya makessingngé; saba' rékko dé' tappésau pogau'i gau'-gau'éro séuwa wettu riduppai matu wassélé'na. Jaji, ri wettu engkana mupa wettutta, sitinajaki pogau'i makessingngé lao ri sininna tauwé, lebbi-lebbipi lao ri Saudara-saudarata iya siyatepperengngé. Pénessaiwi madécéd-décéng iyaé bagiyangngé iya alékué mokii sibawa hurupu' iya battowaé! Sining tau iya maéloé pakatanréi aléna sibawa gau'-gau' mallahérengngé, mennang ritu makkuraga passako maccowériwi peraturanna sunna'é. Iyakiya napogau'i mennang gau'éro banna kuwammengngi nadé' mennang naricalla ri tau Yahudié nasaba sallina Kristus. Muwi sining tau iya maccowériyéngngi peraturang sunna'é dé'to napajoppai hukkunna agamaé. Iyakiya naéloriwi mennang risunna'ko, kuwammengngi naulléi mennang mammingkikengngi makkedaé muturusiwi iyaro peraturangngé. Iyakiya iyya dé' sises-siseng umaélo mammingkikengngi muwi aga, ri lainnaé Puwatta Yésus Kristus iya puraénna maté ri sallié. Saba' mala nakarena amaténna ri sallié, na linoé dé'na agagana bettuwanna ri aléku. Na lao ri linoéwé, muwi iyya samanna maté tona. Risunna iyaré'ga dé' narisunna, dé' napenting iyaro. Iya pentingngé iyanaritu mancaji tolino baru. Untu' sining tau iya tuwoé sibawa atongengengngéwé, sibawa makkuwatoro untu' sininna umma'na Allataala, mamménasaka Allataala mpéréngngi matu asaléwangeng sibawa pammaséna. Napurairo, aja'na muwi séddi tau sussaisika, saba' ri watakkaléku engka butti-butti makkedaé ana' gurunnaka Yésus. Tennapodo Puwatta Yésus Kristus tuli barakkakiwi Saudara-saudara. Aming. Salama, Umma'na Allataala ri Efésus, iya matinulué lao ri Kristus Yésus! Iyya, Paulus, surona Kristus Yésus nasaba élona Allataala, mamménasa tennapodo Allataala Ambo'ta sibawa Puwang Yésus Kristus mabbéré barakka sibawa asaléwangeng lao ri iko. Ripojiwi Allataala, Ambo'na Puwatta Yésus Kristus! Nabarakkakiki sibawa sininna barakka rohanié ri laleng surugaé, nasaba masséddiki sibawa Kristus. Riwettu dé'napa naripancaji linoéwé, purani napilé Allataala naolai Yésus Kristus sibawa akkatta kuwammengngi mancajiki appunnangen-Na bawang sibawa dé'gaga cellana ri yolo-Na. Nasaba pammaséna Allataala, napurani Napattentu lebbi riyolo sibawa naolai Yésus Kristus, Nakkaki untu' mancaji ana'-ana'-Na muto. Na mémeng iyanaro macinna Napogau'. Ripojiwi Allataala iya marajaé nasaba naolai Ana'-Na iya naéloriyé, Nanamaséi senna'ki. Saba' amaténna Kristus, napaleppe'ki Allataala, bettuwanna puraki Naddampengeng polé ri dosa-dosata. Napogau'i iyaro nasaba Namaséi senna'ki. Na iyaro pammasé purani nabbéréyang lao ri idi sibawa penno apanréng enrengngé pappéjeppu. Manuru élo-Na muto, Allataala mappaddissengengngi lao ri idi rahasiya-Na rancana-Na; purani Napettui makkedaé iyaro rancana-Na napattépui matu naolai Kristus. Iyaro rancanana iyanaritu muwi ri surugaé iyaré'ga ri linoé, mancaji séddiwi sibawa Kristus selaku Kapala. Na iyaro gau'é napattépui matu Allataala rékko narapini wettunna. Najamai Allataala sininna séuwa-séuwaé manuru élo-Na sibawa apettun-Na muto. Mappummulai pammulanna puraki Napilé saba' macinnai kuwammengngi mancajiki umma'-Na nasaba masséddiki sibawa Kristus. Leppessakki, iya bunge'-bunge'é mamménasa ri Kristus, pojiwi Allataala nasaba arajan-Na! Mancaji tono umma'na Allataala wettummu méngkalingai pasenna Allataala, iyanaritu Karéba Madécéng iya mabbéré asalamakeng lao ri iko. Mateppe'ko ri Yésus Kristus, na iyanaro saba'na nabbéréyangngi Allataala tanrang appunnangen-Na lao ri iko, iyanaritu Rohna iya Najjanciyangngé. Roh-énna ritu boro' makkedaé tarimaki matu aga iya puraé najjanciyang Allataala lao ri umma'-Na. Iyanaé mpérékki ateppereng makkedaé Allataala paleppe'i matu umma'-Na. Ripojiwi Allataala nasaba arajan-Na! Rimakkuwannanaro, sipongenna uwéngkalinga makkedaé mateppe'ko lao ri Puwang Yésus, sibawa muwamaséiwi sininna umma'na Allataala, dé' appettunna mattarima kasi'ka ri Allataala passalemmu. Tuli uteppui asemmu wettukku massempajang. Uwéllauwi kuwammengngi Allataalana Puwatta Yésus Kristus, Ambo' iya malebbié, mabbéréyangngi Rohna lao ri iko. Iyaro Roh-é napancajiko mapanré, sibawa napannessai matu Allataala lao ri iko kuwammengngi muwissengngi Aléna. Uwéllauwi kuwammengngi Allataala timpa'i pikkirammu angkanna macakka; kuwammengngi mupahangngi aga wedding muwamménasai polé ri Allataala iya mobbiékko. Makkuwatoro kuwammengngi muwissengngi pékkugi tabbollonna barakka-barakka iya magelloé iya napassadiyaé Allataala untu' umma'-Na; napékkugi héba'na Allataala majjama sibawa sukku akuwasan-Na ri laleng idi iya mateppe'é. Iyaro akuwasanna Allataala pada-padai akuwasang iya dé'é padan-Na iya Napaké wettunna napatuwo paimeng Kristus polé ri amaténgngé sibawa mpéréngngi Aléna tudangeng kaminang matanré silaong Allataala ri surugaé. Iyaro tudangenna Kristus mabélai lebbi matanré naiya tudangenna sininna pamaréntaé, sininna tau makuwasaé, sininna pamimpingngé, sininna bapa'-bapa'é sibawa muwi nigi-nigi iya puraé riwéréng tudangeng matanré muwi iya tuwoé ri wettuéwé iyaré'ga iya tuwoé ri wettu mangoloé. Napatunru manengngi Allataala ri yawa akuwasanna Kristus, sibawa mabbéréyangngi Kristus lao ri jema'é selaku Kapala polé ri sininna séuwa-séuwaé. Jema'é iyanaritu tubunna Kristus, ripassukkui ri Aléna iya passukkuéngngi sininna séuwa-séuwaé muwi kégi. Riyolo matéko secara rohani nasaba madosako sibawa majjalékkaiwi parénta-paréntana Allataala. Iyaro wettué muwaccowériwi sining abiyasanna linoéwé; bettuwanna matinuluko lao ri panguwasana langi marajaé iyanaritu roh iya makuwasaiyéngngi makkekkuwangngé atinna sining tau iya dé'é namatinulu lao ri Allataala. Riyolo pada-pada maneng tokki sibawa mennang; tuwoki situru kédo-kédo tolinota sibawa pogau'i aga iya sennangiyéngngi watakkalé sibawa pikkiratta. Iyaro wettué idi'na iyanaritu sining tau iya nakennaétto caina Allataala, pada-pada sining tau laingngé. Iyakiya temmaka loppona asémpo atinna Allataala! Makkuwa mani Namaséitta, angkanna maté mupi' secara rohani nasaba sining pelanggaratta, Napatuwoki paimeng silaong Kristus. Jaji banna nasaba akessingeng atinna Allataala, naripassalama'ko ri Aléna. Nasaba masséddiki sibawa Kristus Yésus, Allataala patuwoki paimeng silaong Aléna, kuwammengngi mapparénta tokki silaong Aléna ri laleng surugaé. Napogau'i Allataala iyaro kuwammengngi na ri wettu iya mangoloé, naulléi mitai tolinoé temmaka loppona pammaséna Allataala. Iyaro pammasé napannessai Allataala naolai akessingeng atin-Na lao ri idi ri laleng Kristus Yésus. Idi iyanaritu winrunaki Allataala, nanaolai Kristus Yésus, nabentu'ki Allataala kuwammengngi naripogau' gau'-gau' iya makessingngé iya puraé napassadiyangekki. Saudara-saudara tenniyaé tau Yahudi! Engngerangngi keadaammu wettu riyolo: Riteppuko “tau tenrisunna”, ri tau Yahudié iya mangakué risunna (akkattana iya lolongengngénnaé tanrang iya naébbué tolinoé ri tubunna). Iyaro wettué dé' muwasséddi sibawa Kristus, tau polé-poléko iya dé'é nauttama umma' napiléna Allataala. Dé' namumattama ri laleng assisiyoreng assijancingngé iya naébbué Allataala sibawa umma'-Na. Tuwoko ri laleng linoéwé temmaddennuwang sibawa temmakké Allataala. Iyakiya makkekkuwangngé, nasaba masséddiko sibawa Kristus Yésus, iko iya mabélaé riyolo, ripacawékini nasaba amaténna Kristus. Saba' Kristus muto iyanaritu pappasidaméta. Napasséddiwi sining tau Yahudié mancaji séddi bangsa. Témbo' pallawangenna mennang, iyanaritu assimusurengngé purani nancuru' Kristus ri laleng nakkarobangenna Aléna. Hukkunna Agama Yahudié sibawa parénta-paréntaé enrengngé sining peraturanna purani riledda ri Kristus kuwammengngi iyaro duwaé bangsa mancaji séddiwi bangsa rupa tau baru, iya masséddié sibawa Aléna. Nasibawang caraé ritu napakangkai Kristus assidaméngengngé. Nasaba amatén-Na ri sallié, Kristus passéddiwi iya duwaéro bangsaé, sibawa pasidaméi mennang sibawa Allataala, angkanna lennye'ni assimusurengngéro. Iyanaro saba'na napolé Kristus untu' mabbirittangngi Karéba Madécéngngé passalenna assidaméngengngéro lao ri iko; muwi lao ri iko tenniyaé Yahudi iya mabélaé riyolo polé ri Allataala, iyaré'ga lao ri tau Yahudié iya macawé'é ri Allataala. Naolai Kristus, idi maneng – muwi tau Yahudi iyaré'ga tau tenniyaé Yahudi – polé ri Rohna Allataala iya séddié, weddingngi maddeppériwi Ambo'é. Rimakkuwannanaro, dé'na namumuttama tau polé-polé iyaré'ga tau saliweng. Iko makkekkuwangngé iyanaritu pada-padai wargana umma'na Allataala. Iko iyanaritu anggota-anggota kaluwarganai Allataala. Ripatettong tokko ri yasé'na tettongeng iya napalénne'é rasul-rasul-é sibawa nabi-nabié, sibawa Kristus Yésus mancaji batu iya kaminang poko'é. Aléna ritu susungngi sininna bolaéro mancaji Bolana Allataala iya ripallaingngé untu' Puwangngé. Nasaba tuwo masséddiwi sibawa Kristus, mattengngang tokko ripatettong silaong sining tau laingngé mancaji séddi bola untu' Allataala; kuwaniro Allataala monro sibawa Roh-Na. Iyanaro saba'na iyya, Paulus, massempajangekko. Ritarungkuka nasaba Kristus Yésus, untu' apentingemmu iya tenniyaé Yahudi. Tentu purani muwéngkalinga makkedaé Allataala, nasaba akessingeng atin-Na, nanawérékka iyaé jamangngé untu' apentingemmu. Nabukkai Allataala rahasiyana rancana-Na nanapowadakka. (Passalenna iyaé purani uwokii riyolo sibawa marippe, narékko mubacai, muwajeppuiwi matu rahasiyaé passalenna Kristus pada-pada iya uwajeppuiyé.) Riyolo iyaro rahasiyaé dé' naengka nariyappaissengeng lao ri rupa tauwé, iyakiya makkekkuwangngé Rohna Allataala pura mappaitangngi lao ri rasul-rasul-é sibawa lao ri nabi-nabin-Na. Iyaro rahasiyaé iyanaritu: Naolai Karéba Madécéngngéro, tau tenniyaé Yahudi maccowé towi napéneddingi barakka'-barakka'na Allataala iya riyolo banna untu' tau Yahudié. Sining tau tenniyaé Yahudi mancajiwi anggota polé ri tubu iya padaé, sibawa maccowé towi tarima aga iya najjanciyangngé Allataala naolai Kristus Yésus. Allataala mpérékka pammasé – iyanaritu jamang – untu' pallebbangngi Karéba Madécéngngéro. Utarimai iyaro pammasé naolai akuwasanna Allataala iya majjamaé ri laleng aléku. Ri yelle'na sininna umma'na Allataala, iyya'na ritu kaminang matuna. Iyakiya Allataala mpérékka iyaé pammasé: jamang untu' mabbirittangngi lao risining tau tenniyaé Yahudi Karéba Madécéng passalenna asugirenna Kristus iya dé'é gaga cappuna; sibawa makkuwatoro kuwammengngi naolaka nanaissengngi sininna tauwé pékkugi Allataala, Pabbinruna sininna alangngé, pogau'i rancana-Na iya mappammulaé riyolopa nariyolo narirahasiyakang lao ri linoé. Akkattana Allataala iyanaritu kuwammengngi makkekkuwangngé naolai jema'é, sininna iya makkatenningngé akuwasang ri langié naissengngi apanrénna Allataala ri laleng sininna rupanna bentu'na. Napogau'i Allataala iyaro situru sibawa rancana-Na iya mannennungengngé, iya napajoppaé sibawa naolai Kristus Yésus Puwatta. Nasibawang teppe' lao ri Kristus sibawa nasaba masséddi sibawa Aléna, riwérékki alaluwasang untu' maddeppériwi Allataala sibawa penno ateppereng. Rimakkuwannanaro, paréllaukku iyanaritu: aja'na mubata-bata passalenna aga iya uwanrasa-rasaiyé nasaba iko; saba' iya manennaro iyanaritu untu' adécéngemmu. Narimakkuwannanaro umakkaluttu ri yolona Ambo'é. Polé ri Alénai ritu na tungke' kaluwarga ri surugaé sibawa ri linoé tarimai sipa'-Na iya dé'é padanna. Massempajakka tennapodo Allataala iya pommalebbié naéloriwi untu' péwatangiwi batémmu sibawa Roh-Na. Tennapodo nasaba mateppe'ko ri Kristus, monroi Kristus ri laleng atimmu, sibawa atuwommu rilapiriwi enrengngé rikuwasaiwi ri pammasé. Massempajakka tennapodo nasibawang sininna umma'na Allataala, muwulléi mpellungiwi temmaka lowanna sibawa lampéna enrengngé tanréna kuwaéttopa lamunna pammaséna Kristus, iya nasibawangngé akkaleng tolino dé' nariyullé majeppuiwi lamunna. Tennapodo muwissengngi iyaro pammaséna Kristus, angkanna pennoko sibawa paribadinna Allataala iya sukkué. Nasibawang akuwasanna Allataala iya mapatoé majjama ri laleng aléta, naulléi Allataala pogau'i mabéla lebbi maéga naiya aga iya riyullé méllau iyaré'ga pikkiri. Memmuwaré Allataala ripakalebbi massossoreng ri laleng jema'é, naolai Kristus Yésus. Ripojiwi Allataala mannennungeng! Aming. Iyanaro saba'na iyya – séddiwi tahanang, iya ritahangngé nasaba tumaningiwi Puwangngé – méllauwi sibawa masero ri iko: tuwono situru tudangemmu selaku tau iya puraé riyobbi ri Allataala. Sitinajako tuli mariyawa ati, malemma kininnawa, sibawa sabbara. Appaitangngi pammasému ri laleng bantui séddié lao ri laingngé. Akkuragano tonget-tongeng untu' tuwo sibawa damé kuwammengngi asséddiyang iya napakangkaé Rohna Allataala tette'i tappiyara. Banna séddi bawang tubu, sibawa séddi Roh. Makkuwatoro riyobbiko untu' séddi amménasang iya padaé. Banna séddi bawang Puwang, séddi teppe', séddi acemméng, sibawa séddi Allataala iya mancajiyé Ambo'na sininna tauwé. Aléna ritu Puwanna sininna alangngé, iya majjamaé naolai iya manenna, sibawa makuwasa ri laleng iya manenna. Tungke'-tungke'ki tarima séddi pabbéré situru aga iya nabbéréyangngé Kristus. Ri laleng Kitta'é tarokii: “Wettunna ménré'i ri onrong iya kaminang matanré, tiwii maéga tawangeng, sibawa mabbéréi pabbéré-pabbéré lao ri tolinoé.” Nah, rékko ripowadai “ménré'i” bettuwanna mula-mulanna purani nonno lettu ri onrong iya kaminang mariyawaé ri linoéwé. Na iya puraé nonno, Alénato ritu iya ménré'é lettu ri onrong iya mabélaé lebbi tanré naiya sininna langié angkanna sininna alangngé rilisekiwi sibawa ahadéréken-Na. Aléna ritu iya “mabbéré pabbéré-pabbéré lao ri tolinoé”; sibagiyang nakka mancaji rasul, iya laingngé mancaji nabi; iya laingngéssi mancaji pabbiritta Karéba Madécéngngéro, na laingngéssi nakkai mancaji guru-guru sibawa pappiyarana jema'é. Napogau'i iyaé kuwammengngi umma'na Allataala ripassakke tongengngi kuwammengngi naulléi tumaningi Puwangngé sibawa patettongngi tubunna Kristus. Nanallalengiro mancaji séddi manekki nasaba teppe' iya padaé sibawa pappahang iya padaé passalenna Ana'na Allataala. Sibawa mancajiki sining tau iya balléré'énna iya pédé' maittaé pédé' sukku pada-pada Kristus. Na dé'na tancaji ana'-ana'na iya kaléwa'-kaléwa'é sibawa iya kacowé-cowéé ritiwi ri pangarunna maddupa-rupang pappagguruwang polé risining tau iya maccaé. Napapusai mennang tauwé sibawa belléna. Dé'! Sibalé'na harusu'ki powadai sibawa ati penno pammasé, angkanna ri laleng sininna gau'é pédé' maittaki pédé' mancaji sukkuki pada-pada Kristus, iya mancajiyé Ulutta. Ri yawa pappimpin-Na, sininna anggota tubué tassusungngi makessing, sibawa sisullé ripasisumpung ri padduppa-padduppan-Na tungke'-tungke'. Sibawa rékko tungke'-tungke' iyaro anggotaé majjamai pada-pada sitongennaé, sininna iyaro tubué mpekke'i matu mancaji battowa sibawa mawatang naolai pammasé. Rimakkuwannanaro nasaba asenna Puwangngé, iyanaé upowada matu sibawa pattedde'i: aja'na mutuwo pada-pada sining tau iya dé'é naissengngi Allataala, sibawa pikkiri'i anu dé'é. Mapettanni pikkiranna mennang. Dé' napahangngi mennang atuwong iya nabbéréyangngé Allataala, saba' dé' sises-siseng mennang nappunnai pangissengeng agaga passalenna Allataala. Makkuwairo mennang, nasaba matedde atiwi. Dé'na nappunnai mennang perasaang masirina, angkanna naccowériwi mennang sininna hawa napessunna, sibawa tuwo mappangaddi siélo atinna. Iyakiya Kristus Yésus iya muwissengngé dé' nakkuwaro! Purani muwéngkalinga passalenna Aléna! Na selaku sining tau maccowériyéngngi, pura tono ripagguru passalenna sipa-sipa'na Allataala iya engkaé ri Aléna! Rimakkuwannanaro ludunni rupa tau malaungngé sibawa cara-cara atuwong malaungngé iya mattengngangngé risolangi risining cinnana iya mappapusaé. Sitinajako ati sibawa pikkirammu ripakabarui manengngi. Sitinajako tuwo selaku rupa tau mabaru iya ripancajiyé situru élona Allataala; iyanaritu ampé-ampé iya tongengngé, malempu sibawa mapaccing. Rimakkuwannanaro Saudara-saudara iya maneng, aja'na muwabbellé. Alempuno lao ri laingngé, saba' idi manengngé iyanaritu pada-padaki anggota tubunna Kristus. Rékko macaiko, aja' muleppessangngi iyaro caimu nassabariko madosa. Aja' mumacai puppu esso, kuwammengngi dé' nalolongeng kasempatang Ibillisi'. Tau iya biyasaé ménnau harusu'i mappésau ménnau. Sibalé'na harusu'i majjama kuwammengngi lolongengngi dallé sibawa malempu enrengngé naulléi tulungngi tau iya akurangengngé. Rékko mabbicarako, aja' mupakéi ada-ada iya majaé. Pakéi bawanni ada-ada iya mappédécéngngé sibawa mabbéré pattulung lao ri tau laingngé. Ada-ada pada-padaéro mappapoléi matu adécéngeng risining tau iya méngkalingaéngngi. Aja' mupamesséiwi atinna Rohna Allataala. Purani rimatéréiko sibawa Roh, mancaji appunnangenna Allataala. Iyaro Roh-é sinrupa towi boro' makkedaé Esso Aleppekengngé poléi matu ri iko. Patteddénni sininna perasaang mapeddi atié, maélo makkabale sibawa macai. Aja'na mugora-gora sibawa makkarodda-karodda. Aja'na naengka perasaang paccéccé iyaré'ga perasaang laing pada-padaéro. Sibalé'na, sitinajako makessing ati sibawa mapparessé babuwa séddié lao ri laingngé, sibawa sisullé siyaddampengeng pada-padato Allataala maddampengekko naolai Kristus. Saudara iyanaritu ana'-ana'na Allataala iya namaséiyé, rimakkuwannanaro harusu'ko makkuraga maccowériwi contona Allataala. Atuwommu sitinajai rinyawaiwi ri pammasé, pada-padato Kristus mamaséiki. Nakkarobangengngi aléna untu' idi, selaku séddi pakkasuwiyang iya mabaué sibawa pésennangiyéngngi atinna Allataala. Iko iyanaritu umma'na Allataala. Rimakkuwannanaro sining pangkaukeng iya mappangaddié sibawa iya dé'é nasipato, iyaré'ga angowangngé dé' nasipato engka ri tengngamu. Aja' narapii sining tau laingngé mappunnaiwi alasang untu' powadai makkedaé pogau'ko gau'-gau' pada-padaéro. Dé'to musipato powadai ada-ada iya majaé, mabbicara rota', sibawa iya dé'é nasitinaja. Sibalé'na sitinajako sukkuru' lao ri Allataala. Pénessaiwi madécéd-décéng: tau iya kédo-kédo mappangaddié, iyaré'ga dé'é nasipato, iyaré'ga mangowaé (kédo-kédo makkuwaéro pada muwi massompaé barahala), iyaro tauwé dé' naulléi mancaji anggota umma'na iya naparéntaé Kristus sibawa Allataala. Aja' muribellé ri assipabbicara-bicarang iya kosongngé. Saba' gau'-gau'énna ritu iya paompoéngngi caina Allataala lao risining tau iya dé'é namatinulu ri Aléna. Jaji, aja' sises-siseng musisumpung sibawa sining tau makkuwaéro. Alému riyolo engka ri laleng pettangngé. Makkekkuwangngé mancajino umma'na Puwangngé, jaji engkano ri laleng tajangngé. Rimakkuwannanaro harusu'ko tuwo ri laleng tajangngé. Saba' polé ri tajangngé ritu mompoi sininna rupanna pangkaukeng iya makessingngé ri pakkitanna Allataala. Akkuragano missengngi aga iya sennangiyéngngi atinna Puwangngé. Aja' mupogau'i pangkaukeng-pangkaukeng iya dé'é nakkéguna iya napogau'é sining tau iya tuwoé ri laleng pettangngé. Sibalé'na sitinajako nabuwang gau'-gau' makkuwaéro. ( Saba' gau'-gau' iya napogau'é mennang sibawa massubbu-subbuéro, muwi untu' ribicara bawang mappakasiri-sirito.) Sininna séuwa-séuwaé iya ripattappariyé sibawa tajang, paitai matu sibawa manessa. Saba' sininna iya weddingngé riita sibawa manessa, iyanaritu matajangngi. Iyanaro saba'na naripowada, “Oto'no, éh iko matinroé, sibawa tokkonno polé ri amaténgngé! Mattappai matu Kristus ri yasé'na.” Rimakkuwannanaro, pénessaiwi madécéd-décéng atuwo-tuwommu. Aja' mutuwo pada-pada sining tau iya mapanré. Akkégunangngi madécéd-décéng tungke' kasempatang iya engkaé ri iko, nasaba iyaé wettué iyanaritu wettu iya majaé. Aja' mumadonggo, iyakiya salidikiwi aga iya naéloriyé Puwangngé. Aja' mumabo' ri anggoro'é, saba' iyaro nasolangiko matu. Sibalé'na sitinajako rikuwasai ri Rohna Allataala. Pakéi ada-ada polé ri mazmur-é, élong poji-pojiyangngé sibawa élong rohanié, ri laleng sining assipabbicarammu. Sitinajako nasibawang ati iya marennué makkélong poji-pojiyang lao ri Puwangngé. Tuli sibawa passalenna muwi aga, sitinajako mattarima kasi lao ri Allataala Ambo'é ri laleng asenna Yésus Kristus Puwatta. Untu' pakalebbii Kristus, sitinajako tunru' séddié lao ri laingngé. Bainé, tunru'no lao ri lakkaimmu, pada-pada lao ri Puwangngé. Saba' lakkaié iyanaritu kapala ri bainéna, pada-padato Kristus mancajiwi kapala ri jema'é sibawa Alénato ritu Arung Pappassalama'na jema'é iya mancajiyé tubun-Na. Pada-padato jema'é tunru'i ri Kristus, makkuwatoro ri laleng sininna gau'é, harusu'i bainé tunru' ri lakkaié. Lakkaié, amaséiwi bainému, pada-padato Kristus mamaséiwi jema'é enrengngé makkarobangengngi Aléna untu' iyaro jema'é. Napogau'i Kristus iyaro kuwammengngi naulléi pancajiwi iyaro jema'é sibawa pappagguruwanna enrengngé naolai uwai paccemmé, kuwammengngi rimunri naulléi mabbéréyangngi lao ri Allataala. Narimakkuwannanaro naébbui Kristus iyaro jema'é tettong sibawa maraja enrengngé mapaccing ri yolona, sibawa dé'gaga akurangenna iyaré'ga cellana muwi aga. Makkuwatoniro lakkaié harusu'i mamaséiwi bainéna pada-pada namaséinna tubunna muto. Tau iya mamaséiyéngngi bainéna bettuwanna namaséiwi aléna muto. ( Dé' naengka tau benciwi tubunna. Sibalé'na, napiyarai sibawa najagaiwi pada-padato Kristus piyarai jema'-Na. Riissengngi iyaro nasaba idi iyanaritu anggota-anggota tubunnaki Kristus.) Ri laleng Kitta'é tarokii, “Rimakkuwannanaro séddié worowané nasalaiwi matu ambo'-indo'na untu' masséddi bainéna, namancaji séddi matu iya duwa.” Iyaro aya'éwé tampu'i bettuwang iya malamungngé. Naupasikennai iyaro sibawa assisumpungenna Kristus sibawa jema'é. Iyakiya iyaro aya'éwé engkato assisumpungenna sibawa iko: Sitinajai tungke' lakkai mamaséiwi bainéna pada-pada namaséinna aléna muto sibawa sitinajai tungke' bainé makkuragai untu' pakarajai lakkainna. Ana'-ana'! Selaku tau maccowé ri Kristus, atinuluriwi tomatowammu nasaba iyanaritu sitinaja ripogau'. “Pakarajai ambo'-indo'mu” iyanaritu parénta mammulangngé polé ri Allataala sibawa janci, iyanaritu: “Kuwammengngi namumasennang enrengngé malampé umuru' ri linoé”. Saudara-saudara iya mancaji ambo'é! Aja' nagaukengngi ana'-ana'mu makkuwaro rupanna angkanna mancaji macai mennang. Sibalé'na, pawekke'i mennang sibawa atoreng-atorengngé enrengngé pappagguruwanna Puwangngé. Saudara-saudara iya mancaji ataé! Turusiwi paréntana puwammu ri linoéwé. Pogau'i iyaro sibawa perasaang pappakaraja enrengngé mapato kuwaéttopa mattonget-tongeng pada-pada rékko samanna mupogau'i lao ri Kristus muto. Aja' mukédo makkuwaro ri wettu rijagaimmu bawang, banna untu' lolongeng pappojiyang tolino. Iyakiya sitinajako pogau'i selaku atanna Kristus iya turusiyéngngi élona Allataala sibawa sissukku ati. Jama-jamang iya pogau'é selaku ataro, sitinajako pogau'i sibawa ati iya marennué pada-pada rékko Puwangngé mutumaningi, na tenniya lao ri rupa tauwé bawang. Engngerangngi makkedaé tungke' tau, muwi ata iyaré'ga tau maradéka', tarimai matu pamale' polé ri Puwangngé untu' gau'-gau' iya makessingngé iya napogau'é. Saudara-saudara iya mancaji puwangngé! Sitinajako kédo makkuwatoro lao ri ata-atammu. Aja'na mupakéi mangancangngé. Engngerangngi makkedaé iko sibawa ata-atammu, pada-padako mappunnai séddi puwang, iyanaritu Puwangngé ri surugaé. Dé' nappasilaingeng tappa. Paccappurenna, sitinajako mancaji mawatang sibawa awatangeng iya mulolongengngé polé ri akuwasanna Puwangngé, nasaba masséddiko sibawa Aléna. Pakéi sininna paréwa musu iya nawéréngngékko Allataala, kuwammengngi muwulléi mattahang méwai siyasa'-siyasa'na Ibillisi' iya malengngoé. Saba' mammusuki tenniya méwai tolinoé, sangadinna méwai awatangenna sininna sétangngé iya makuwasaiyéngngi wettu iya majaéwé. Riyéwai awatangenna roh-roh majaé iya makuwasaiyéngngi langié. Rimakkuwannanaro, makkekkuwangngé, pakéni sininna paréwa iya nabbéréyangngé Allataala, kuwammengngi na ri esso iya majaé, muwulléi méwai seranganna balié. Sibawa kuwammengngi napuramu mammusu lettu ri paccappurenna, mawatang mupo naporé. Sitinajako sadiya. Pakéi atinulurengngé lao ri Allataala selaku babbang, sibawa apatongngé selaku baju bessimmu. Sitinajai alogangngé untu' mabbirittangngi Karéba Madécéng iya tiwié asaléwangeng mancaji sapatummu. Tungke' wettu pakéi atepperemmu ri Puwangngé selaku senjata pappasala; nasibawang iyaro teppe'é muwulléi peddéiwi sininna ana' pana makkéapié polé ri Majaé. Alai asalamakengngé selaku palo-palo baja, sibawa ada-adanna Allataala selaku peddang polé ri Rohna Allataala. Pogau'i iya manennaro namuwassempajatto untu' méllau pattulung polé ri Allataala. Tungke' kasempatang, assempajakko pékkugi Rohna Allataala pimpikko. Sitinajako tuli sadiya sibawa aja' mumenyara. Tuli assempajakko untu' sininna umma'na Allataala. Sibawa assempajakko untu' iyya, kuwammengngi ri wettukku mabbicara, Allataala mpérékka ada-ada iya coco'é. Sibawa kuwammengngi ubarani mappaddissengengngi rahasiyana Karéba Madécéngngéro. Nasaba Karéba Madécéngngé ritu, mancajika séddi duta, na makkekkuwangngé engkaka ri laleng tarungkué. Assempajanno kuwammengngi ubarani mabbicara passalenna Karéba Madécéngngéro, pékkugi harusu'ka mabbicara. Tikhikus, Saudarata sibawa pattumani iya mapatoé ri laleng jama-jamanna Puwangngé, mappaissengengngi matu lao ri iko sininna séuwa-séuwaé passalekku, kuwammengngi muwissengngi keadaakku sibawa jama-jamakku. Iyanaro saba'na usuroi lao ri iko untu' mappaissengengngi keadaatta lao ri iko maneng, kuwammengngi napakaloppoi atimmu. Tennapodo Allataala Ambo'é, sibawa Puwang Yésus Kristus nakkulléngiwi sininna jema'é untu' masséddi sibawa siyamaséi enrengngé tette' mateppe' ri Yésus Kristus. Tennapodo Allataala barakkakiwi Saudara maneng iya mamaséiyéngngi Puwatta Yésus Kristus sibawa pammasé iya dé'é naulléi peddé. Salama, Saudara-saudara umma'na Allataala iya monroé ri Filipi, sibawa iya masséddiyénna sibawa Kristus Yésus. Makkuwatoro Saudara-saudara pamimpingngé enrengngé pabbantu jema'é. Iyya Paulus, sibawa Timotius, ata-atanna Kristus Yésus, mamménasa tennapodo Allataala Ambo'ta sibawa Puwang Yésus Kristus mabbéré barakka sibawa asaléwangeng lao ri iko. Tungke' uwéngngerakko, mattarima kasi'ka lao ri Allataala. Sibawa sises-siseng uwassempajangeng manekko, massempajakka sibawa masennang ati. Mattarima kasi'ka lao ri Allataala nasaba sipongenna esso mammulangngé lettu makkekkuwangngé, puraka mubantu pallebbangngi Karéba Madécéng polé ri Allataala. Allataala muto pura pammulaiwi jama-jamang iya makessingngéro ri iko, namateppe'ka napatterui matu iyaro jama-jamangngé narapi tépu ri Essona Kristus Yésus polé paimeng. Mémeng ri onronna mappunnaika pappénedding pada-padaéro lao ri iko saba' iya maneng Saudara tuli macawé'i ri atikku. Makkuwatoro nasaba maccowéko tarima silaong iyya, pammasé iya nawéréngngékka Allataala, muwi makkekkuwangngéwé ri laleng tarungkué iyaré'ga wettukku engka ri saliweng untu' méwaiwi sibawa mattahangengngi Karéba Madécéngngéro. Naisseng Allataala makkedaé muddani senna'ka lao ri iko sibawa pappénedding sipammasé-masé polé ri aléna Kristus Yésus. Iyanaé sempajakku lao ri iko: tennapodo pédé' muwamaséiwi Allataala sibawa pada-padammu enrengngé matteru tattamba ri laleng pangissengengngé sibawa pappaita iya mapanré. Rimakkuwannanaro muwissengngi piléi iya kaminang makessingngé, namapaccing matu atuwommu polé ri paccallangngé iyaré'ga muwi pattenre aga ri Essona Kristus polé paimeng. Tabbollompollongngi matu atuwommu sibawa pangkaukeng iya tonget-tongengngé makessing iya weddingngé bawang napowassélé' aléna Yésus Kristus, naripakalebbi matu Allataala sibawa ripoji-poji. Uwéloriwi muwissengngi, makkedaé gau'-gau' iya puraé kajajiyang lao ri iyya mala nassabariwi maéga tau méngkalingai sibawa matepperiwi Karéba Madécéngngé. Addimonrinna, sininna pengawal saorajaé sibawa sining tau laingngé ri kotaéwé naissengngi makkedaé ritarungkuka nasaba utumaningiwi Kristus. Na ri tarungkuéro nassabariwi maéga polé risining tau Kristéngngé ri kotaéwé iya siyatepperengngé pédé' mateppe'ni ri Puwangngé, angkanna pédé' baraniwi mennang mabbirittangngi pasenna Allataala sibawa dé' namétau. Mémeng engka siyagangngaré ri yelle'na mennang iya mabbirittangngéngngi Kristus nasaba mangémpurui sibawa maéloi massasa, iyakiya iya laingngé mappunnai akkatta iya mapaccingngé. Iyaé sining tauwé napogau'i nasaba namaséiwi Allataala sibawa iyya, saba' naissengngi makkedaé Allataala pura suroi untu' mappaitangngi Karéba Madécéng iya tongengngéro. Iyakiya tau laingngé mabbirittangngi Kristus sibawa akkatta iya dé'é namakessing; nabbirittangngi mennang untu' apentingeng paribadinna. Nanallalengiro mamménasai mennang naulléi mébbuka pédé' masussa ri laleng tarungkué. Iyakiya dé' namagaga! Saba' muwi maga, muwi napogau'i iyaro sibawa akkatta iya mapaccingngé iyaré'ga sibawa akkatta iya salaé, tette' towi Kristus riyabbirittang; jaji masennakka. Na tette'ka matu mappénedding makkuwaro, saba' uwissengngi makkedaé nasibawang sining sempajammu enrengngé nasibawang polé ri Rohna Yésus Kristus, ripaleppe'ka matu. Iya uwacinnai senna'é sibawa uwamménasaiyé iyanaritu kuwammengngi aja' sises-siseng nasala jamakku. Sibalé'na mamménasaka kuwammengngi na tungke' wettu, lebbi-lebbipi makkekkuwangngé, weddikka mappaitang abaraningeng angkanna sininna tubu nyawaku – muwi tuwoka iyaré'ga matéka – ripakalebbii Kristus. Nasaba untu' ri aléku, akkattana atuwokku banna untu' Kristus! Na maté bettuwanna asarong. Iyakiya rékko nasibawang atuwong ri linoéwé, weddikka pogau'i jama-jamang iya lebbi makkégunaé, dé' uwissengngi kégana harusu upilé. Rigettekka polé ri duwa bagiyang. Macinna senna'ka salaiwi linoéwé untu' lao monro silaong Kristus, saba' iyanaro kaminang makessing; iyakiya, untu' apentingemmu, iyanaritu lebbi kessing muwi rékko tette'ka monro ri linoé. Mateppe'ka lao ri gau'éro. Iyanaro saba'na uwissengngi tette'ka matu monro silaong Saudara maneng, kuwammengngi weddingngi tulukko mancaji lebbi mawatang sibawa lebbi masennang ri laleng atepperengngé lao ri Puwangngé. Rimakkuwannanaro, rékko lisuka matti ri iko, iko iya masséddiyénna sibawa Kristus Yésus mappunnai matu lebbi maéga alasang untu' marasa mingki lao ri iyya. Iya pentingngé iyanaritu makkedaé tuwoko situru aga iya natuntu'é Karéba Madécéng passalenna iyaro Kristus. Rimakkuwannanaro, wedding mupaga siruntu'ka iko iyaré'ga dé', uwéngkalingai matu makkedaé masse'ko masséddi enrengngé massibawa méwa untu' banna séddi akkatta sibawa séddi pangéloreng; iyanaritu untu' ateppereng iya sicoco'é sibawa Karéba Madécéng polé ri Allataalaro. Sitinajako tuli barani; aja' mumétau lao risining balimmu. Nanallalengiro muwappaitangngi makkedaé caui matu mennang, na iko pacau matu, nasaba aléna Allataala ritu iya mabbéré apakalang lao ri iko. Saba' Allataala pura mabbéré pammasé lao ri iko tenniya banna untu' mateppe' lao ri Kristus, iyakiya manrasa-rasato nasaba Kristus. Makkekkuwangngé maccowé tokko ri iyya ri laleng ammusureng iya padaé; iyanaritu iya puraé muwita uperjuwangkang riyolo, sibawa iya tette'é mupa uperjuwangkang lettu makkekkuwangngé, pada-pada iya puraé muwéngkalinga. Mawatakko, nasaba masséddiko sibawa Kristus. Sibawa tassaléwoko nasaba Kristus mamaséiko! Ripimpikko Saudara ri Rohna Allataala, nasipammasé-masé tokko enrengngé mappunnaiwi paressé babuwa séddié lao ri laingngé. Nah, cobani tonget-tongekko pésennangi atikku sibawa gau'-gau'éwé: Tuwono massiati sibawa pammasé padaé, pada pikkirang sibawa akkatta iya padaé. Aja' mupogau'i séuwaé nasaba risorokko ri apentingeng ri alé, iyaré'ga untu' mattempowangngi alé. Sibalé'na sitinajako tungke'-tungke' sibawa ati mariyawa mangga'i tau laingngé lebbi makessing naiya aléna. Jampangiwi apentingenna tau laingngé; aja' banna na apentingeng ri alé bawang. Sitinajako mappunnai attangeng pada-pada Yésus Kristus: Sitongenna Aléna pada Allataala, iyakiya dé' napérasai makkedaé keadaan-Na iya tenritaéro harusu'i nattahangeng. Sibalé'na Naleppessang manengngi nainappa mancaji pada-pada séddié ata. Mancajiwi pada-pada tolinoé, sibawa paita tuwo pada-pada tolinoé. Napakariyawai aléna, enrengngé tuwo sibawa matinulu ri Allataala gangka maté – iyanaritu maté ri salli. Narimakkuwannaro Allataala makkai Aléna kaminang matanré, enrengngé mpéréngngi akuwasang iya lebbi battowaé naiya sininna akuwasang laingngé. Na untu' pakarajai Yésus, sininna mahlu'é ri surugaé, sibawa ri linoé, enrengngé ri yawana linoé, sompai matu Aléna. Mangaku manengngi matu mennang makkedaé Yésus Kristus ritu Puwang; nanallalengiro naripakalebbi Allataala Ambo'é. Rimakkuwannanaro, Saudara-saudara iya upojiyé, pékkugiko tuli matinulu lao ri iyya wettukku engka ri tengnga-tengngamu, na lebbi-lebbipi makkekkuwangngé ri wettu sibélangngé, sitinajako matinulu lao ri iyya. Purani ripassalama'ko ri Allataala rimakkuwannanaro akkuragano matteru kuwammengngi namancaji sukku asalamakemmu. Pogau'i iyaro sibawa mappakaraja enrengngé mapato lao ri Allataala, nasaba Allataala muto ritu iya majjamaé ri laleng alému untu' mébbuko réla sibawa mulléi pésennangiwi atinna Allataala. Jamai sini-sininnaé sibawa dé' muwannoko'-noko' iyaré'ga massasa. Naullé riyunoka matu na daraku mancaji pada-pada akkarobangeng riyabbolorengngé ri yasé'na aga iya muwakkasuwiyangengngé lao ri Allataala selaku tanrang makkedaé mateppe'ko ri Aléna. Rékko mémeng harusu'i makkuwaro, sukkuru'ka lao ri gau'éro sibawa maccowéto marennu silaong iko. Makkuwatoniro sitinajako masennang sibawa maccowé marennu sibawakka. Mateppe'ka makkedaé nasibawang pattulunna Puwang Yésus, masitta'ka suroi Timotius lao ri iko kuwammengngi weddikka tassaléwo ri biritta passalemmu. Banna Timotius bawang alé-aléna tau kuwaé iya sinyawaé sibawa iyya, sibawa tonget-tongengngi napikkiri' asennangemmu. Iya maneng laingngé banna naurusu'i apentingemmu aléna bawang, tenniya apentingenna Yésus Kristus. Alémuna pura mitai buttinna makkedaé makkégunai Timotius. Majjama laddé'i silaong iyya untu' pallebbangngi Karéba Madécéng polé ri Allataala. Idi sipadduwa pada-padai ana'é sibawa ambo'é. Rimakkuwannanaro, uwissenna matti pékkugi parakaraku maccappa, usuroi matu lao ri iko. Mateppe'ka makkedaé nasibawang pattulunna Puwangngé, iyya dé'tona umaitta ucélléngi tokko matu. Passalenna saudarata Epafroditus iya puraé musuro bantuka, marasa parelluka suroi lisu lao ri iko. Purana naranreng ri laleng jama-jamangngé sibawa perjuwangekku. Muddani senna'i lao ri Saudara maneng, sibawa maséssai nasaba lolongemmu karéba makkedaé malasai. Mémeng tongengngi malasai angkanna céddé'pi namaté. Iyakiya kasiyangngi Allataala ri aléna; na tenniya ri aléna bawang, iyakiya laoto ri iyya, kuwammengngi aja' upédé' messé. Iyanaro saba'na napédé' battowato pangélorekku untu' suroi lisu ri iko, kuwammengngi mumarennu paimeng rékko siruntu'ko aléna, namancaji tennang tona atikku. Jaji duppaiwi sibawa masennang ati selaku séddi Saudara iya mateppe'é. Angke'i sininna tauwé iya naéwaé pada-pada. Untu' apentingenna jema'-jema'na Kristus, céddé'pi namaté; nappésonangngi nyawana untu' tulukka ri laleng asemmu. Paccappurenna, Saudara-saudaraku, sitinajako marennu nasaba masséddini sibawa Puwangngé. Dé' umatane untu' pakkolingngi aga iya puraé uwokii ri yolona lao ri iko; saba' makessing gau'éro untu' asalamakemmu. Atike'ko lao risining tau iya pogau'éngngi iya majaé, iyaro sining tauwé sipato'i riteppu ‘asu.’ Nadessa'i mennang sining tauwé kuwammengngi narisunna. Padahal idi'na ritu sining tau iya puraé tarimai sunna iya tongengngé, tenniya mennang. Risompai Allataala sibawa pappimpinna muto Rohna Allataala, na sukkuru'ki nasaba tuwoki masséddi sibawa Kristus Yésus. Dé' tataggattung ri upacara-upacara iya mallahérengngé. Sitongenna weddikka'sa maddennuwang ri upacara-upacaraéro. Saba' rékko engka séddi tau marasa mappunnai alasang untu' maddennuwang ri upacaraéro iya mallahérengngé, lebbi kessippi iyya. Risunna'ka wettukku makkéumuru aruwa essona. Jajika selaku séddi tau Israél, polé ri suku bangsa Bényamin; tau Ibrani aslika. Ri laleng atinulurengngé ri hukkunna agama Yahudié, anggotanaka golongang Farisié. Mala makkumani assumange'ku angkanna ucallai jema'é. Rékko ri angke'i situru hukkunna agama Yahudié, iyya séddika tau makessing iya dé'é cellana. Iyakiya nasaba Kristus, nasininna iya riyangga'é riyolo selaku iya mappasaroé, makkekkuwangngé mancajini iya mapparogiyé. Tenniya bawang gau'-gau'éro; iyakiya mala sininna séuwa-séuwaé uwangga'i selaku gau'-gau' iya mapparogiyé bawang. Iya uwappunnaiyé makkekkuwangngéwé iyanaritu lebbi mangke'i: iyanaritu missengngi Yésus Kristus, Puwakku. Nasaba Kristus, uleppessanni sini-sininnaé. Uwangga' manengngiro selaku warowo bawang, kuwammengngi weddingngi ulolongeng Kristus, sibawa tonget-tongeng masséddi sibawa Aléna. Assisumpungeng iya makessingngé sibawa Allataala, dé'na na iyya musahakangngi sibawa naolai laleng matinulué lao ri hukkung agamaé. Makkekkuwangngé mappunnaika assisumpungeng iya makessingngé sibawa Allataala, nasaba mateppe'ka lao ri Kristus. Jaji, assisumpungeng iya makessingngéro poléi ri Allataala, sibawa nassabari teppe' lao ri Yésus Kristus. Séddi-séddinna iya uwacinnaiyé iyanaritu kuwammengngi uwissengngi Kristus, sibawa péneddingiwi akuwasang iya patuwoéngngi Aléna polé ri amaténgngé. Macinnaka maccowé manrasa-rasa sibawa Aléna enrengngé mancaji pada-pada Aléna ri laleng amatén-Na. Namamménasaka makkedaé alékuto ripatuwo matu paimeng polé ri amaténgngé. Dé' uwakkeda makkedaé mallolongekka, iyaré'ga mancaji sukkuka. Iyakiya matteruka makkuraga lolongengngi hadiya iya napassadiyaé Kristus Yésus. Untu' iyanaro nanasitta'ka sibawa napancajika appunnangen-Na. Tentu, Saudara-saudara, sitongenna dé' umarasa makkedaé ulolongenni iyaro hadiyaé. Iyakiya engka séddi passaleng iya upogau'é, iyanaritu uwallupaiwi aga iya engkaé ri munrikku sibawa makkuraga senna' rapii aga iya engkaé ri yolo. Iyanaro saba'na ulari matteru mattuju ri akkatta paccappurengngé untu' lolongeng apakalang, iyanaritu atuwong ri surugaé; untu' iyanaro naobbika Allataala naolai Kristus Yésus. Idi maneng iya déwasaénna secara rohani, harusu'i maggau' makkuwaro. Iyakiya rékko ri yelle'mu engka mappallolongeng laingngé, napakatajang towi matu Allataala lao ri iko. Namuni iyaé gau'é sitinajai ripénessai: Harusu'ki tette' tuwo situru peraturang iya puraé riyaccowéri lettu makkekkuwangngéwé. Saudara-saudara iya maneng! Accowériwi contoku. Purani' mabbéré conto iya tongengngé, rimakkuwannanaro pénessaiwi madécéd-décéng sining tau iya maccowériyéngngi contotaro. Biyasana paissengiko, na makkekkuwangngé upakkolissi sibawa teri, makkedaé engka maéga tau iya atuwonnaé nasolangiwi bettuwanna amaténna Kristus ri sallié. Atuwonna sining tau pada-padaéro maccappa'i matu sibawa ancurukeng, saba' déwatana iyanaritu cinna tubunna muto mennang. Gau'-gau' iya mappakasiri-sirié, mala iyanaro mennang nammingkikeng; saba' banna mennang mappikkiri'i gau'-gau' iya naéloriyé linoéwé bawang. Iyakiya idi'é iyanaritu warga negarana surugaé. Polé kuwatoniro Arung Pappassalama'ta, Puwang Yésus Kristus, poléi matu. Aléna ritu ritajeng sibawa muddani. Watakkaléta iya malemmaé sibawa weddingngé ancuru'é, napinrai matu Kristus mancaji pada-pada watakkalé-Na iya malebbié. Weddingngi napogau' iyaro nasaba mappunnaiwi akuwasang untu' patunru'i sini-sininnaé. Rimakkuwannanaro, Saudara-saudaraku iya uwéloriyé, makkuwaniro sitinajammu tuwo sibawa mattonget-tongeng mateppe' lao ri Puwangngé. Muddaniwi atikku ri iko! Iko ritu uwattuwang mébbuka marennu. Saudara Euodia sibawa Saudara Sintiké! Uwéllauwi sibawa masero kuwammengngi Saudara massiatiwi selaku sining tau iya siatepperengngé. Lao ri sellaoku iya matinulué, uwéllau towi kuwammengngi Saudara bantuwi iya duwa makkunraiéro. Purani majjama senna' mennang sibawakka untu' mabbirittangngi Karéba Madécéng polé ri Allataala; pada-pada Klémén sibawa sininna tau laingngé iya majjamaé sibawakka. Aseng-ngasenna mennang engkai ri laleng Kitta'na Tau Tuwoé. Tennapodo tuli marennuko nasaba tuwoko masséddi sibawa Puwangngé. Siseppa makkeda: arennuno! Sitinajai sininna tauwé naulléi mitai kédo-kédomu iya makessing atié. Saba' dé'na namaittana napolé matu Puwangngé. Aja mubata-bata passalenna muwi aga. Ri laleng sininna gau'-gau'é, assempajanno sibawa pangoloni paréllaummu ri Allataala. Aga muwapparelluwang, tuli powadai lao ri Allataala ri laleng mattarima kasi. Na asaléwangeng polé ri Allataala iya dé'é nakkullé napahang tolinoé, jagaiwi matu atimmu sibawa pikkirammu iya masséddiénna sibawa Kristus Yésus. Paccappurenna, Saudara-saudara lisekiwi pikkirammu sibawa gau'-gau' iya engkaé angke'na, iya sitinajaé ripoji, iyanaritu gau'-gau' iya tongengngé, iya malebbié, iya adélé'é, mapaccingngé, macenningngé, sibawa makessingngé. Pajoppani aga muwaggurui sibawa mutarima polé ri iyya; muwi polé ri ada-adakku iyaré'ga polé risining pangkaukekku. Allataala assalenna asaléwangengngé, sibawakko matu. Ri laleng atuwokku iya masséddié sibawa Puwangngé, masennang senna'i pappéneddikku, saba' puranana makkuwaro ittana, makkekkuwangngé makkullésiko pikkiri'i keadaakku. Akkattaku tenniya makkedaé muwallupaina; mémeng muwajampangika, iyakiya dé' mulolongeng kasempatang untu' mappaitangngi. Upangoloi iyaé tenniya nasaba akurangekka, saba' purana magguru paggenne'i aga iya engkaé. Upéneddingini atuwong iya akurangengngé, sibawato atuwong alebbingngé. Uwissenni rahasiyana untu' moloiwi keadaang muwi maragaé; muwi keadaang décéng iyaré'ga keadaang kasiyasi, muwi keadaang masagéna, iyaré'ga keadaang akurangeng. Nasibawang akuwasang iya nabbéréyangngé Kristus lao ri iyya, mappunnaika awatangeng moloiwi sininna rupanna keadaangngé. Iyakiya puraka mutulung ri laleng asusakku; na aga iya mupogau'éro mémeng makessing. Saudara-saudara tau Filipié! Alémuna misseng tongengngi makkedaé wettukku salaiwi Makedonia riyolo, wettunna Karéba Madécéngngéro uwappallebbangeng untu' bunge'-bunge'na, iko ritu bawang alé-aléna jema' iya bantuékka; iko bawang alé-aléna iya maccowéé kanyaméi peri nyamenna sibawakka. Wettukku ri Tésalonika sibawa mapparelluwang bantuwang, dé' nawékkasiseng muwa kirikko bantuwang lao ri iyya. Tenniya bettuwanna iyaro macinna muka bawang tarima pabbéré. Iya uwacinnaiyé iyanaritu kuwammengngi uwulléi mitai wassélé'-wassélé' iya tambaiyéngngi albammu. Purani utarima maneng – mala lebbi nagenne'é! Sininna pabbéré iya muwakkiringengngé lao ri iyya, purani utarima polé ri Epafroditus. Makkekkuwangngé uwappunnaini sininna iya uwapparelluwangngé. Sining pabbérémuro iyanaritu pada-padai bau mabau polé ri akkarobangeng iya riyakkasuwiyangengngé lao ri Allataala sibawa iya natarimaé Allataala sibawa masennang ati. Allataala iya usompaé, maona sibawa asugireng ri laleng Kristus Yésus, pennoiwi matu sininna apparelluwammu. Ripojiwi Allataala Ambo'ta lettu mannennungeng! Aming. Palettu'i sellekku lao ri sininna umma'na Allataala iya masséddié sibawa Kristus Yésus. Sibawa tarima towi sellenna saudarata iya engkaé sibawakka. Sininna umma'na Allataala ri kotaéwé, utamana mennang iya polé ri saorajana Kaisar, massellengngi lao ri iko. Tennapodo Puwang Yésus Kristus barakkaki manengngi saudara. Salama, Mateppe'ko sibawa mamaséko, saba' mamménasako ri aga iya napassadiyaé Allataala ri surugaé untu' iko. Purani muwéngkalinga passalenna gau'éro, wettunna Karéba Madécéng tongengngé iya polé ri Allataala ripalettu lao ri iko. Iyaro karéba polé ri Allataala mallebbanni lao ri sininna linoé sibawa atuwonna tauwé matterui ribarakkaki ri karébaéro, pada-pada muto atuwommu ribarakkakiwi mappammulai wettunna muwéngkalinga passalenna pammaséna Allataala sibawa tonget-tongengngi nattemmekinna. Iyaro gau'é napalettu'i Epafras lao ri Saudara, sellao iya riyamaséiyé. Aléna ritu pajjamana Kristus iya matinulué majjama untu' apentingetta. Polé ri alénai ritu riyéngkalingai makkedaé nasibawang Rohna Allataala muwulléi siyamaséyang. Iyanaro saba'na natuli massempajakki untu' iko sipongenna riyéngkalinga passalemmu. Riyéllauwi ri Allataala kuwammengngi Rohna Allataala mpérékko apanréng sibawa pappéjeppu angkanna muwisseng sibawa sukku aga napuwélo Allataala. Nanallalengiwi muwulléi tuwo situru élona Allataala, sibawa tuli pésennangiwi atin-Na, angkanna ri laleng sininna séuwa-séuwaé muwulléi powassélé' gau'-gau' iya makessingngé. Sibawa pangissengemmu passalenna Allataala tattamba towi matu. Tennapodo nasibawang akuwasang polé ri Allataala iya marajaé, ripéwatangiko angkanna muwulléi manrasa-rasaiwi sini-sininnaé sibawa sabbara enrengngé masennang ati kuwaéttopa mattarima kasi lao ri Ambo'é. Saba' Ambo'é ritu mébbuko sitinaja tarimai aga iya puraé napassadiya Allataala lao ri umma'-Na sibawa akkarungen-Na iya matajangngé. Puraki napaleppe' polé ri akuwasanna pettangngé sibawa napalétté'ki ri laleng akkarungenna Ana'-Na iya Namaséiyé. Nasaba Ana'-Naro naripaleppe'ki; bettuwanna dosa-dosata riyaddampengenni. Kristus iyanaritu gambara'na Allataala iya manessaé iya dé'é napaita; Kristus iyanaritu ana' iya macowaé, lebbi pentingngi naiya sininna ripancajiyé. Saba' naolai Aléna, Allataala pancajiwi sininna séuwa-séuwaé ri surugaé sibawa ri yasé'na tanaé, sininna iya paitaé sibawa dé'é napaita, muttama toni sininna roh iya makuwasaé sibawa mapparéntaé. Sininna alangngéwé ripancajiwi naolai Kristus sibawa untu' Kristus. Riwettu dé'napa naengka séuwa-séuwaé, engka mémenni Kristus. Sibawa nasaba Alénato ritu nasininna séuwa-séuwaé engkai ri onronna tungke'-tungke'. Aléna ritu kapalana tubunna, iyanaritu jema'é, nasaba Aléna ritu assalenna atuwonna jema'éro. Aléna ritu ana' macowa, iya bunge'-bunge'é ripatuwo paimeng polé ri amaténgngé, kuwammengngi na Aléna bawang iya mancaji kaminang pentingngé polé ri sininna séuwa-séuwaé. Aléna Allataala ritu puwéloi kuwammengngi sininna séuwa-séuwaé iya engkaé ri Aléna Allataala, engka towi sibawa sukku ri Aléna Ana'-Na. Sibawa naola towi iyaro Ana'é Allataala pettuiwi sininna séuwa-séuwaé nasimadécéngeng paimeng sibawa Aléna – muwi iya engkaé ri linoé iyaré'ga iya engkaé ri surugaé. Napogau'i Allataala iyaro naolai amaténna Ana'-Na ri aju sallié. Riyolo mabélako polé ri Allataala. Mumusui nasaba ampé-ampému sibawa pikkirammu majai. Iyakiya makkekkuwangngé, ri laleng amaténna Ana'-Na, Allataala mébbui assisumpungemmu sibawa Aléna simadécéngeng paimeng. Nasibawang caraéro naulléi tiwiko mangolo ri Allataala ri laleng keadaang mapaccing, tuléng sibawa dé' cellana. Iyakiya tentu harusu'ko tette' matinulu mateppe' sibawa tettong masse ri atepperemmu. Aja' narapii muleppessangngi amménasang iya puraé riwérékko wettunna mutarima Karéba Madécéng polé ri Allataala. Iyaro karébaé purani riyabbirittang lao ri tungke' tau ri sininna linoé. Na untu' iyanaro iyya, Paulus, namancaji pattumani. Makkekkuwangngé mamménasaka manrasa-rasa untu' apentingemmu. Nasaba anrasa-rasang watakkaléku, upaggenne'i aga iya harusu'é nanrasa-rasai Kristus untu' jema'-Na, iyanaritu tubun-Na. Allataala suroka mancaji pattumaninna jema'-Na untu' apentingemmu. Harusu'ka palettu'i biritta polé ri Allataala, iya manenna; iyanaritu biritta iya maddatu-datué taung labe'é rirahasiyakang ri Allataala lao ri sininna tauwé, iyakiya makkekkuwangngé ripannessai lao ri umma'-Na. Lao ri umma'-Naro maéloi Allataala pannessai pékkugi kessinna sibawa rajanna rahasiya-Naro untu' sininna rupa tauwé. Iyaro rahasiyaé iyanaritu: Engkai Kristus ri laleng alému, bettuwanna maccowéko matu péneddingiwi arajanna Allataala. Kristus ritu iya riyabbirittangngé lao ri tungke' tau. Riparéngngerangiwi sibawa ripagguru manengngi mennang sibawa sininna apanréngngé. Akkattata iyanaritu kuwammengngi na tungke' tau weddingngi ritiwi lao ri Allataala, selaku tau iya déwasaé ri laleng gau'-gau' rohanié, nasaba masséddini sibawa Kristus. Untu' lettu ri gau'éro majjama laddé'ka. Uwakkulléyangngi sibawa sininna awatangekku iya nabbéréyangngé Kristus lao ri iyya iya majjamaé ri laleng aléku sibawa penno akuwasang. Macinnaka muwissengngi pékkugi serona méwaka ri laleng batékku untu' iko sibawa untu' mennang iya engkaé ri Laodikia enrengngé sininna iya dé'é naissekka secara paribadi. Iya manennaé upogau'i kuwammengngi namawatang atinna mennang enrengngé siyamaséiwi mennang angkanna mare'i mennang masséddi. Nanallalengiro natonget-tongengngi mennang napahang sibawa mateppe' enrengngé naisseng rahasiyana Allataala, iyanaritu Yésus Kristus muto. Kristus ritu timpa'i sininna apanrénna enrengngé pangissengenna Allataala iya tassubbué riyolo. Uwappaissengengngi iyaé kuwammengngi aja' naribengnguwakko muwi riniga iya macenningngé témunna lao ri iko. Nasaba muni mabélaka polé ri iko, angga'ka engka ri yelle'mu. Sibawa marennuka mitako massiati enrengngé masse mateppe' lao ri Kristus. Pura natarimani Saudara-saudara Kristus Yésus selaku Puwang. Rimakkuwannanaro sitinajako masséddi sibawa Aléna, enrengngé makkure' ri laleng Aléna. Sitinajako patettongngi atuwonna na Kristus selaku pallapi'na. Sitinajako pédé mateppe' lao ri Yésus Kristus manuru aga iya puraé ripagguruwangngékko. Nasitinajai atimmu luwang sibawa pattarima kasi. Sitinajako matike', aja' narapii engka palaiko siyo-siyo sibawa pangissengeng-pangissengeng tolino iya dé'é nakkéguna, sangadinna banna mappapusaé. Iyaro sining pangissengengngé dé' napolé ri Kristus, sangadinna poléi ri pallolongenna tolinoé bawang sibawa polé ri roh-roh iya makuwasaiyéngngi linoé. Saba' sininna paribadinna Allataala monroi ri laleng Kristus, iyanaritu ri tolino-Na. Sibawa nasaba tuwoi masséddi sibawa Kristus, nariwéréng tokko atuwong iya sukkué. Nasaba Kristus iyanaritu kapalana tungke' roh iya makuwasaé sibawa mapparéntaé. Nasaba masséddiko sibawa Kristus, napura risunna'ko, tenniya sunna iya naébbué tolinoé, sangadinna sunna iya naébbué Kristus, iya paleppe'ékko polé ri akuwasanna sipa'-sipa' iya madosaé. Saba' wettunna ricemméko, rikuburu'ko silaong Kristus; nasibawang iyaro acemméngngétto, maccowé tokko ripatuwo paimeng silaong Kristus nasaba mateppe'ko ri akuwasanna Allataala iya puraé patuwoi Kristus polé ri amaténgngé. Riyolo, matéko secara rohani nasaba madosako, sibawa nasaba dé' narisunna'ko secara mallahéreng. Iyakiya makkekkuwangngé Allataala patuwoko silaong Kristus. Purani naddampengeng Allataala sininna dosata, enrengngé leddai sure' inretta, iya mancangngékki sibawa sara'-sara' iya matane'é. Ri laleng nasallina iyaro sure'é ri aju sallié, naleddai Allataala sininna natenrekengngékki. Ri salliéro, naébbui Kristus sininna roh-roh iya mapparéntaé sibawa makuwasaé mancaji dé'na pakkullénna. Ripancajiwi mennang akkita-itang ri tau maégaé wettunna Kristus tinrosiwi mennang selaku tawangeng ri laleng barisi' apakalan-Na. Rimakkuwannanaro aja' muleppessangngi tauwé passaloko passalenna anré iyaré'ga énungengngé, iyaré'ga passalenna esso-esso marajana agamaé, iyaré'ga ramé-ramé uleng barué, iyaré'to passalenna Esso Saba'é. Iya manennaro banna wajo-wajona bawang polé ri gau'-gau iya maéloé polé, iyakiya annessana iyaro gau'-gau'é iyanaritu Kristus! Aja' muleppessangngi alému riparogi ri tau iya majjaiyéngngi pakariyawai aléna sibawa iya massompaé malaéka'-malaéka'. Iyaro tauwé matempoi sibawa sining pikkiranna iya linoémmi bawang enrengngé mammingki-mingkikengngi sining pakkitang dé'é padanna, angkanna dé'na nakkatenning ri Kristus iya mancaji ulué. Ri yawa pappimpinna Kristus, sininna tubué ripiyarai enrengngé ripasséddiwi ri padduppa-duppanna, kuwaéttopa mpekke'i situru élona Allataala. Purani matéko silaong Kristus, sibawa purani ripaleppe polé ri roh-roh iya makuwasaiyéngngi alangngé. Nah, magi namutuwo pada-pada tau iya rikuwasaiyé mupa ri linoéwé? Magi saudara natunru lao ri peraturang-peraturang pada-padaéwé, “Aja' mukarawai iyaé”, “Aja' mukarawai iyaro”, “Aja' mugéssai iyaé”. Sininna iyaro peraturangngé iyanaritu passalenna gau'-gau' makkuwaéro iya ripakéénna dé'na nakkégunana. Iyaro banna peraturang-peraturang sibawa pappagguruwang-pappagguruwang iya naébbué tolinoé. Mémeng paitai iyaro gau'é makessingngi, sibawa pappétangngana kuwammengngi tauwé nasompai malaéka'é, pakariyawai aléna enrengngé sissai aléna; iyakiya iya manennaro dé' nakkéguna untu' makuwasaiwi napessunna tolinoé. Purano ripatuwo paimeng silaong Kristus. Rimakkuwannanaro harusu'ko makkuraga untu' lolongengngi gau'-gau' iya engkaé ri surugaé, kégi Kristus tudang ri seddé ataunna Allataala. Pattujui pikkirammu ri gau'-gau'é kuwaro, aja' na ri gau'-gau' iya engkaé ri linoé. Saba matéko, na atuwommu tassubbui silaong Kristus ri laleng Allataala. Nah, assalenna atuwommu iya tongengngé iyanaritu Kristus sibawa rékko paitai matti malluru tokko matu silaong aléna ri laleng arajan-Na! Rimakkuwannanaro, pammaténi sining cinna linoé iya madduppéluriyéngngi alému, padaénna mappangaddi, gau'-gau' iya dé'é nasipato, hawa napessu, pangéloreng iya majaé, sibawa angowangngé (nasaba angowangngé sinrupai massompaé barahala). Gau'-gau' sinrupaéro paénré'i caina Allataala lao risining tau iya dé'é natinuluriwi. Riyolo muturusi towi iyaro sining pangélorengngé, wettummu rikuwasai ri aléna. Iyakiya makkekkuwangngé sitinajako mabbéyangngi gau'-gau' iya majaé polé ri alému; aja'na mumacai iyaré'ga majjallo, iyaré'ga mappunnai perasaang benci lao ri tau laingngé. Aja' sises-siseng nassu polé ri témummu ada-ada makkaroddaiyéngngi tauwé iyaré'ga ada-ada macarépaé. Aja' muwabbellé séddié lao ri laingngé, saba' atuwong pura labe'é sibawa sininna sipa'na purani muleppessang. Makkekkuwangngé purako riwéréng atuwong iya mabarué. Iko iyanaritu tolino baru, iya mattengngangngé ripakabarui matteru-teru ri Pappancajinna, iyanaritu Allataala, situru rupan-Na muto. Akkattana iyanaritu kuwammengngi muwissengngi Allataala sibawa sukku. Selaku addimonrinna iyaro lennye'i sininna assilaingenna tau Yahudié sibawa tenniyaé Yahudi, tau risunna'é sibawa tau dé'é narisunna, dé'na gaga assilaingenna tau polé-polé sibawa tau dé'é nakkéyampé, ataé sibawa tau maradéka'é, saba' Kristus iyanaritu sini-sininnaé enrengngé masséddiwi sibawa sininna mennang! Saudara iyanaritu umma'na Allataala, Allataala mamaséiko sibawa piléko untu' mancaji appunnangen-Na iya napallaingngé. Iyanaro saba'na na harusu'ko mappaitangngi paressé babuwaé, harusu'ko makessing ati, pakariyawai atimmu, malemma kininnawa, sibawa tahang manrasa-rasa. Harusu'ko sabbara séddié lao ri laingngé, sibawa sisullé siyaddampengeng rékko engka maélo makkabale lao ri laingngé. Masennangngi atinna Puwangngé maddampengengngekko, jaji harusu tokko maélo maddampengengngi séddié sibawa laingngé. Iya kaminang pentingngé iyanaritu: Harusu'ko siyamaséi saba' pammasé ritu passéddi manengngi Saudara-saudara angkanna mancaji sukku. Sitinajai sining apettummu ripattentui ri adaméngeng iya nabbéréyangngé Kristus ri laleng atimmu. Saba' Allataala mobbiko untu' mancaji anggota séddi tubu, kuwammengngi mutuwo ri laleng adaméngeng polé ri Kristusro. Sitinajako mattarima kasi. Sitinajai sining pappagguruwanna Kristus mattemme ri laleng atimmu iya pennoé barakka. Sitinajako sisullé sipagguru sibawa sisullé sipangajari iya kaminang makessingngé. Puwélonni Mazmur-é sibawa poji-pojiyangngé enrengngé élokkélong rohanié; akkélonno untu' Allataala sibawa perasaang sukkuru' ri laleng atimmu. Sininna aga iya mupogau'é iyaré'ga mupowadaé, harusu'i iyaro ripogau' sibawa ripowada untu' asenna Puwang Yésus. Sukkuru' lao ri Allataala Ambo'é untu' aga iya napogau'é Yésus lao ri iko. Saudara-saudara iya mancaji bainé! Atinuluno lao ri lakkaimmu, saba' harusu'i makkuwaro kédo-kédo'mu selaku tau Kristéng. Saudara-saudara iya mancaji lakkaié! Amaséiwi bainému. Aja' mumakassara' lao ri mennang. Ana'-ana'! Kewajibammu iyanaritu selaku tau Kristéng untu' matinulu lao ri ambo' indo'é, nasaba iyanaro pésennangiwi atinna Allataala. Saudara-saudara iya mancaji ambo'é! Aja' mupeddiriwi atinna ana'-ana'mu angkanna pettu paddennuwangngi mennang. Saudara-saudara iya mancaji ataé! Ri laleng sininna passalengngé sitinajako matinulu lao ri puwammu ri linoéwé. Aja' mumatinulu lao ri mennang banna ri wettunna mennang jagaiko, nasaba macinnako ripoji. Atinuluriwi mennang sibawa ati iya matinulué, nasaba mupakalebbii Puwangngé. Muwi jama-jamang aga riwérékko, sitinajako sibawa sukku atimmu pada-pada rékko samanna Puwangngé ritu mutumaningi na tenniya bawang tolinoé. Engngerangngi makkedaé tarimako matu appalang polé ri Puwangngé. Aga iya napassadiyaé Puwangngé untu' umma'-Na, iyanaritu riwérékko matu. Saba' puwang iya sitongennaé mutumaningi iyanaritu Aléna Kristus. Na muwi niga iya pogau'é asalang, natanggungngi matu iyaro sining asalanna; nasaba dé' nappasilaingeng Puwangngé. Saudara-saudara iya mancaji puwangngé! Sitinajako gaukengngi atammu sibawa tongeng enrengngé adélé'. Engngerangngi makkedaé mappunnai tokko séddi puwang ri surugaé. Sitinajako massempajang sibawa matinulu enrengngé jaga-jaga, nasukkuru'to lao ri Allataala. Assempajang tokko untu' idi kuwammengngi nawérékki kasempatang Allataala iya makessingngé untu' mappallebbangengngi biritta passalenna rahasiyana Kristus. Nasaba gau'éro, na uwengka makkekkuwangngé ri laleng tarungkué. Assempajanno kuwammengngi uwulléi pannessai iyaro rahasiyaé sinnessa-nessana pékkugi harusu'é. Ri laleng assisumpungemmu sibawa sining tau iya dé'é namateppe', sitinajako tuwo sibawa mapanré enrengngé pakéi tungke' kasempatangngé sibawa makessing. Sitinajai sining passaleng iya mupowadaé tuli mappakasennangngi sibawa mattaré'i. Sitinajai muwisseng pékkugi harusu'ko baliwi sining pakkutanana tauwé. Tikhikus, Saudarata iya riyamaséiyé, paissengiko matu sininna séuwa-séuwaé passalekku. Matinului majjama silaong idi untu' Puwangngé. Usuroi lao ri iko sibawa alasang kuwammengngi muwissengngi keadaatta sibawa natassaléwoko. Maéloi lao Onésimus silaong Tikhikus; séddiwi polé ri yelle'mu. Séddiwi tau iya matinulué, sibawa idi mamaséiwi. Aléna sibawa Tikhikus paissengiko matu sini-sininnaé iya kajajiyangngé ri onrokkué. Aristarkhus, iya engkaé ri laleng tarungkué sibawa iyya, masselleng lao ri iko. Makkuwatoro Markus, sapposisenna Barnabas. (Purani rikiringekko karéba untu' duppaiwi rékko laowi ri iko.) Sellennato Yésus iya riyasengngétto Yustus. Polé risining tau Yahudié iya mateppeénna ri Puwang Yésus, banna mennang sipattellu bawang iya majjamaé makkekkuwangngé sibawakka untu' pajoppai jamang polé ri Allataala. Tonget-tongengngi mennang natulukka. Selleng polé ri Epafras. Polé towi ri yelle'mu. Atannai Kristus Yésus, iya tuli massempajangngé sibawa matonget-tongeng untu' iko. Naéllauwi sibawa masero lao ri Allataala kuwammengngi na atepperemmu mancaji mawatangngi sibawa tonget-tongekko déwasa, kuwammengngi sukkuko matinulu lao ri élona Allataala. Aléku sabbingngi makkedaé purani' majjama senna' untu' iko sibawa untu' sining tau iya engkaé ri Laodikia sibawa Hierapolis. Dottoro' Lukas, iya tamaséiyé, sibawa Démas kiring selleng lao ri iko. Palettukengngi selletta ri Saudara-saudara Kristéngngé ri Laodikia; makkuwatoro lao ri Nimfa, sibawa lao ri jema'é iya massompaé ri bolana. Rékko purani ribacangeng iyaé sure'é lao ri iko, usahakangngi kuwammengngi naribaca towi iyaro lao ri jema'é iya engkaé ri Laodikia. Makkuwatoro harusu'ko bacai sure' iya maéloé rikiring polé ri Laodikia lao ri iko. Sibawa paissengiwi Arkhipus, “Pattépui jamang iya riwéréngngékko untu' tumaningiwi Puwangngé.” Sellekku polé ri iyya, Paulus. Aléku mokii iyaé bagiyangngé. Aja' muwallupaiwi makkedaé engka mupa' ri laleng tarungkué! Tennapodo Puwangngé barakkakiko. Salama, Saudara-saudara jema'é ri Tésalonika, iya mancajiyé umma'na Allataala Ambo'é sibawa Puwang Yésus Kristus. Idi, iyanaritu Paulus, Silas sibawa Timotius mamménasa tennapodo Allataala mabbéré barakka sibawa asaléwangeng lao ri iko. Riisseng idi Saudara-saudara, makkedaé Allataala mamaséiko, sibawa pura piléko mancaji appunnangen-Na iya mallaingngé. Saba' idi palettu'i Karéba Madécéngngé lao ri iko tenniya sibawa ada-ada bawang, iyakiya nasibawatto akuwasang, nasibawang Rohna Allataala. Nasibawang ateppereng makkedaé iyaro Karéba Madécéngngé tongengngi. Muwisseng pékkugiki tuwo untu' apentingemmu wettutta engka ri tengnga-tengngamu. Muwaccowériwi kédo-kédota sibawa kédo-kédona Puwangngé. Namuni manrasa-rasa senna'ko, mutarimai sibawa marennu karéba iya riyabbirittangngé lao ri iko. Iyaro arennungngé nabbéréyangngi Rohna Allataala. Nallalengiro mancaji contoko untu' sininna tau Kristéngngé iya engkaé ri Makedonia sibawa Akhaya. Saba' mappammulai polé ri iko, biritta passalenna Puwangngé mallebbanni lettu ri Makedonia sibawa Akhaya. Na tenniya iyaro bawang, mala biritta passalenna pékkugiko mateppe' lao ri Allataala lettu'ni kégi-kégi, angkanna dé'na taparelluna powadai agi-agi. Sininna iyaro tauwé mabbicarai passalenna pékkugiko tarimaki wettutta riyolo lao ri iko. Mabbicarai mennang passalenna pékkugiko salaiwi barahala-barahalaé, sibawa lao ri séddi-séddinna Allataala iya tuwoé untu' mattumani ri Aléna. Mabbicara towi mennang passalenna pékkugiko mamménasaiwi apolénna Ana'na Allataala polé ri surugaé, iyanaritu Yésus, iya puraé napatuwo Allataala polé ri amaténgngé. Yésus éttonaro iya passalamaékki polé ri caina Allataala iya mangoloé. Saudara-saudara! Alému missengngi makkedaé apoléngetta ri iko dé' naparacuma. Muwisseng makkedaé riwettu dé'napa talao ri iko ri Tésalonika, puraki' ripanrasa-rasa sibawa ripakatuna ri Filipi. Iyakiya namuni maéga tau méwaki, Allataala pura mpérékki abaraningeng untu' mabbirittangngi ri iko Karéba Madécéng iya polé ri Aléna. Angérangetta lao ri iko tenniya séuwa atakkalupang; tenniyato sibawa akkatta iya dé'é namapaccing iyaré'ga untu' mabbellé. Dé'! Dé' tabbicara untu' pésennangiwi atinna tauwé, sangadinna untu' pésennangiwi atinna Allataala iya mojiyéngngi atitta. Saba' nangga'ki sitinaja untu' mappallebbangengngi iyaro Karéba Madécéngngé. Alému missengngi makkedaé dé' taengka tamacenning tému iyaré'ga bengnguwakko untu' subbui akkatta-akkatta mangowaé. Allataala sabbinna! Dé'to takkuraga untu' lolongeng pappojiyang polé ri tauwé – muwi polé ri iko iyaré'ga polé ri tau laingngé. Sitongenna selaku rasulna Kristus, weddikki'sa mattuntu' séuwa polé ri iko. Iyakiya kédoki sibawa malemma kininnawa wettutta engka ri tengnga-tengngamu, pada-pada séddié indo' jampangiwi ana'-ana'na. Nasaba paressé babuwata, sadiyaki mpérékko tenniya bawang Karéba Madécéng iya polé ri Allataalaro, iyakiya atuwottato. Saba' mamasé senna'ki ri iko! Tentu muwéngngerang mupi pékkugi tedde'ta makkuraga sibawa méwa. Esso wenniki majjama kuwammengngi nadé' tasussaiwi muwi séddi tau ri yelle'mu wettutta mappallebbangengngi Karéba Madécéng iya polé ri Allataalaro lao ri iko. Tuwoki sibawa mapaccing, tongeng enrengngé dé' cellana lao ri iko iya mateppe'énna ri Kristus. Iko ritu sabbi-sabbitta, makkuwatoro Allataala. Muwisseng makkedaé puraki gaukekko tungke'-tungke' pada-pada séddié ambo' gaukengngi ana'-ana'na. Idi pangajariko, idi mpérékko sumange' sibawa dessa'ko kuwammengngi mutuwo makkuwa rupanna angkanna mupésennangiwi atinna Allataala. Nasaba Allataala pura mobbiko untu' mancaji wargana Lino Baruna Allataala sibawa péneddingiwi arajan-Na. Engka mupa séddi passaleng laingngé iya mebbuékki tuli mattarima kasi lao ri Allataala. Iyaro passalengngé iyanaritu: wettutta palettu'i biritta polé ri Allataala lao ri iko, muwéngkalingai sibawa mutarimai iyaro birittaé tenniya selaku biritta polé ri tolinoé, iyakiya selaku biritta iya tonget-tongengngé polé ri Allataala. Aléna ritu majjama ri laleng alému iya mateppe'é ri Kristus. Saudara-saudara, gau' iya mupéneddingiyé pura toni napéneddingi jema'-jema'na Allataala ri Yudéa, iya mancajiyé appunnangenna Yésus Kristus. Mupéneddingiwi anrasa-rasangngé polé ri bangsamu muto, pada-pada muto iya napéneddingiyé jema'-jema'na Allataala ri Yudéaro polé ri tau Yahudié. Iyaro sining tauwé purani nauno Puwang Yésus enrengngé nabi-nabié, kuwaéttopa callaki. Namusui mennang sininna tauwé sibawa Allataala dé' sises-siseng namasennang lao ri mennang! Mala nahalang-halangiki mennang untu' mabbirittangngi lao ri bangsa-bangsa tenniyaé Yahudi biritta iya weddingngé passalama'i bangsa-bangsaéro. Nanallalengi iyaro sining tau Yahudié tattambai matteru dosa-dosana narapi sukku jumellana. Na makkekkuwangngé angkanna mennang nakenna caina Allataala! Iyakiya Saudara-saudara, sipongetta massarang polé ri iko ri laleng wettu dé'é namaitta – massarang ri mataé iyakiya ri atié dé' – pédé' muddaniki lao ri iko sibawa makkuraga tonget-tongeng untu' siruntu'si sibawa iko! Manniya'ki maélo lao célléngiko; na iyya, Paulus, purani ucoba wékkaduwa, iyakiya nahalangiki Ibillisi'é. Tongeng iko ritu amménasatta sibawa arennutta. Saba' matti rékko poléi Puwang Yésus, sibawa mangoloki ri Aléna, iko ritu mancaji matu attuwangetta! Mémeng iko ritu attuwangetta sibawa arennutta! Angkanna uddanitta dé'na nattahanna. Rimakkuwannanaro mappikkiri'ka lebbi kessing muwi risalaiki alé-alé ri Aténa, ri wettutta suroi saudarata Timotius. Séddiwi pattumaninna Allataala iya majjamaé sibawa idi untu' mabbirittangngi Karéba Madécéngngé passalenna Kristus. Risuroi Timotius lao ri iko kuwammengngi napéwatangiko sibawa dorokko untu' lebbi mateppe'pa ri Kristus. Nanallalengiro dé'na muwi séddi tau polé ri iko iya soroé nasaba anrasa-rasattaé. Alému missengngi makkedaé iyaro anrasa-rasangngé muttama'i ri laleng rancanana Allataala untu' idi. Wettutta sibawa mupi' iko, puraki paissengiko lebbi riyolo makkedaé manrasa-rasaki matu. Na mémeng iyaro tonget-tongenni pura kajajiyang; alému missengngi. Iyanaro saba'na usuroi Timotius, nasaba macinna senna'ka missengngi pékkugi amajungemmu ri laleng atepperengngé lao ri Kristus. Bata-bataka naullé ammai Ibillisi' godako angkanna sininna turuppuse'ta mancaji paracumai. Makkekkuwangngé lisuni Timotius sibawa purani napalettu ri idi karéba marennué passalenna pékkugiko mateppe' lao ri Kristus sibawa sisullé siyamaséi. Napaissengiki makkedaé tuli taroko passéngereng iya makessingngé passaletta ri atimmu. Sibawa macinnako sita idi, pada-padato idi macinna tokki sita iko. Iyanaro saba'na, Saudara-saudara, ri laleng sininna asussatta sibawa anrasa-rasatta, tassaléwoki polé ri karéba passalemmu. Atepperemmu lao ri Kristus loppoiwi atitta, angkanna makkekkuwangngé marasaki tonget-tongeng tuwo, assaleng tette'ko tettong masse, masséddi sibawa Puwangngé. Temmaka égana tarima kasi'ta lao ri Allataala nasaba sininna arennung iya ripéneddingiyé ri yolona Allataala nasaba iko. Esso wenniki maréllau ri Aléna sibawa sukku atié, kuwammengngi na aléta wedding siruntu sibawa iko untu' passukkui aga iya muwapparelluwangngé mupa untu' mateppe' ri Kristus pékkugi mestinna. Tennapodo aléna Allataala Ambo'ta, sibawa Puwatta Yésus paratai laletta untu' sita sibawa iko! Tennapodo Puwangngé mébbuko pédé' mamaséiwi séddié sibawa laingngé enrengngé pédé' mamaséiwi sininna tauwé, angkanna iyaro pammasému tattamba-tambai, pada-pada pammaséta lao ri iko. Nanallalengiro Puwangngé péwatangiwi matu atimmu, angkammu mapaccing sibawa dé' cellana ri yolona Allataala Ambo'ta, wettunna Puwatta Yésus polé silaong sininna tau iya mancajiyé appunnangen-Na. Paccappurenna saudara-saudara, purani mpérékko conto passalenna pékkugi harusu'ko tuwo untu' pésennangiwi atinna Allataala. Mémeng tuwono pada-padaéro. Iyakiya makkekkuwangngé nasaba akuwasanna Puwang Yésus, riyéllauwi sibawa masero ri iko enrengngé maddessa kuwammengngi nalebbi makkuragasiko ri laleng gau'éro! Saba' muwissenni panunju'-panunju' iya puraé riwérékko ri laleng akuwasanna Puwang Yésus. Iyanaé élona Allataala: Kuwammengngi mutuwo untu' Aléna bawang, mabélaiwi sininna pangkaukeng mappangaddié. Tungke' worowané ri yelle'mu naharusu'i naisseng pékkugi tuwo sibawa bainéna sibawa cara-cara iya sennangiyéngngi atinna Allataala sibawa rupa tauwé. Aja' mutuwo maccowériwi hawa napessummu lao ri bainému, pada-pada iya napogau'é tau iya dé'é naissengngi Allataala. Ri laleng gau' pada-padaéwé, aja' namuwi séddi tau pogau' asalang lao ri saudarana, iyaré'ga bengnguwangngi. Riyolo puraki' mabbirittangngi papparéngngerang iya matedde'é lao ri iko, makkedaé nahukkungngi matu Puwangngé sining tau iya pogau'éngngi sining asalang pada-padaéro. Allataala mobbiki, tenniya kuwammengngi tatuwo mappangaddi, sangadinna kuwammengngi tatuwo iya pésennangiyéngngi atin-Na. Rimakkuwannanaro, tau iya dé'é natarimai pappagguruwangngéwé, tenniya bawang dé' natarimai rupa tauwé, sangadinna nasampéyangngi Allataala iya mabbéréyangngéngngi Roh-Na iya mapaccingngé lao ri iko. Dé'na naparelluki mokii lao ri iko passalenna pékkugiko harusu mamaséiwi Saudara-saudara iya siyatepperengngé. Alémuna pura ripagguru ri Allataala untu' siyamaséi. Na iyaro gau'é purani muwappaitang maneng lao ri sininna saudara siyatepperengngé ri sininna Makedonia. Iyakiya Saudara-saudara, riyéllauwi sibawa masero, kuwammengngi nalebbi makessing pasi atuwommu. Akkuragako tuwo sibawa tennang sibawa aja' mucampuru'i persoalanna tau laingngé. Sitinajako majjama sappai dallé', pada-pada riyolo pura riparéntangngékko riyolo. Rékko tuwoko makkuwaro, dé'na nataggattukko muwi lao ri niga, sibawa sining tau iya dé'é namateppe' ri Kristus, napakarajako matu. Saudara-saudara, macinnaki kuwammengngi muwissengngi iya sitongennaé passalenna sining tau iya matéénna; kuwammengngi dé' mumessé ati pada-pada sining tau laingngé iya dé'é nappunnai paddennuwang. Mateppe'ki makkedaé purai maté Yésus sibawa tuwoi paimeng. Iyanaro saba'na tamateppe'to makkedaé Allataala patuwoi matu paimeng sininna tau iya mateppe'é ri Yésus iya matéénna, kuwammengngi natuwo mennang sibawa Aléna. Passalenna gau'éro, iyanaritu pappagguruwanna Puwangngé iya puraé ripalettu ri iko: Wettunna Puwang Yésus polé, idi iya tuwoé mupa dé' naripoddiyoloi matu sining tau iya matéénna lebbi riyolo. Gorai matu mangobbi malaéka' marajaé sibawa sadda battowa enrengngé ripaoniwi tarompé'na Allataala selaku tanrang. Nainappa Puwang Yésus nonno polé ri surugaé, sibawa sining tau Kristéng iya matéénna ripatuwoi matu lebbi riyolo. Purairo, idi iya tuwoé mupa iyaro wettué riyakkaki matu silaong mennang ri laleng ellungngé untu' siruntu Puwangngé ri langié. Nainappaki monro matu silaong Puwangngé lettu mannennungeng. Rimakkuwannanaro, sitinajako sisullé sipéwatangi ateppereng sibawa ada-adaéwé. Saudara-saudara, dé' naparelluki maroki lao ri iko uppanna wettunna iya mattentué nakajajiyang matu iyaro gau'-gau'é. Saba' alému missengngi sibawa manessa makkedaé Esso apolénna Puwangngé poléi matu pada-pada panga iya polé ri wennié. Rékko makkedai tauwé, “Amang manenni sibawa tennang,” ri wettuénnaro tennasenna-sennai mennang nakenna matu abinasang, nadé' séddi tau mulléi leppe'. Iyaro gau'é tappa kajajiyangngi matu, pada-pada makkénedding mapeddi maéloé mémmana' iya kennaéngngi séddié makkunrai. Iyakiya iko tenniyano tau iya tuwoé ri laleng pettangngé, angkanna iyaro Essoé nasélengiko pada-pada apolénna pangaé. Sininna Saudara iyanaritu tau iya tuwoé ri laleng tajangngé; muttama'ko ri esso iya macakkaé. Tenniyaki tau iya tuwoé ri laleng pettangngé, iyaré'ga muttama'é ri wenni iya mapettangngé. Rimakkuwannanaro dé' naweddikki matinro bawang pada-pada tau laingngé. Harusu'ki jaga-jaga sibawa pikkiratta harusu matajang. Ri wennié matinroi tauwé, sibawa ri wenniétto namabo' tauwé. Iyakiya idi'é iyanaritu tau esso iya muttama'é ri esso iya matajangngé, rimakkuwannanaro pikkiratta harusu'i matajang. Harusu'ki tette' mateppe' ri Puwangngé sibawa mamaséiwi tau laingngé enrengngé mamménasa sibawa mateppe' makkedaé Allataala passalama'ki matti. Iyanaro senjata iya linrungiyékki ri laleng ammusurengngé méwai pettangngé. Dé' napiléki Allataala untu' rihukkung iyakiya untu' ripassalama' naolai Puwatta Yésus Kristus. Matéi untu' idi kuwammengngi na ri wettunna polé matti – tuwo mupi'ga iyaré'ga maténi – weddikki tuwo silaong Aléna. Rimakkuwannanaro, sitinajako tette' sidorong sibawa sipéwatangi, pada-pada iya mupogau'é makkekkuwangngéwé. Saudara-saudara, riyéllauwi sibawa masero kuwammengngi muwangke'i tau iya majjamaé ri tengnga-tengngamu; iyanaritu mennang iya puraé napilé Puwangngé untu' pimpingngi sibawa pangajariko. Gaukengngi mennang sibawa silebbi-lebbina enrengngé paressé babuwa nasaba méngngerangngi jama-jamang aga iya napogau'é mennang. Tuli tuwoko sibawa sipammasé-masé. Riyéllau towi Saudara-saudara, kuwammengngi amparengngi tau iya dé'é namaélo majjama. Pakkasse'i tau iya métaué; tulungngi sining tau iya parellué ritulung, sibawa sabbara'ko lao ri sininna tauwé. Jagaiwi kuwammengngi aja' naengka wale'i jaé sibawa ja. Akkuragano untu' tuli pogau'i madécéngngé, séddié lao ri laingngé sibawa lao ri sininna tauwé. Sitinajako tuli marennu, sibawa tuli massempajang. Ri laleng sininna keadaangngé sitinajako sukkuru', saba' iyanaro naélori Allataala polé ri iko selaku tau iya tuwoé masséddi sibawa Kristus Yésus. Wéréngngi alaluwasang Rohna Allataala. Aja' muwangga énténgngi biritta-biritta iya nabbéréyangngé Rohna Allataala. Sininna séuwa-séuwaé harusu'i rioji, naiya makessingngé harusu'i riyaccowéri. Abélaiwi sininna rupanna jaé. Tennapodo Allataala muto, iya mpéréngngékki asaléwangeng, pancajiko tau iya tonget-tongengngé tuwo banna untu' Allataala. Tennapodo Allataala jagaiwi sininna alému, muwi roh, nyawa iyaré'ga tubummu, angkanna dé'gaga akurangenna wettunna Puwatta Yésus Kristus polé paimeng. Allataala, iya puraé mobbiko, pogau'i matu gau'éro sibawa matinului. Assempajangekki Saudara-saudara! Siyasselles-sellengenno secara sipammasé-masé pada-pada Saudara Kristéngngé. Ri laleng akuwasanna Puwangngé, uwéllauwi sibawa masero kuwammengngi mubacangengngi iyaé sure'é lao ri sininna Saudara siatepperengngé. Tennapodo Puwatta Yésus Kristus barakkakiko. Salama, Saudara-saudara jema'é ri Tésalonika, iya mancajiyé umma'na Allataala Ambo'ta sibawa Puwang Yésus Kristus! Idi, iyanaritu Paulus, Silas sibawa Timotius mamménasa tennapodo Allataala Ambo'é sibawa Puwang Yésus Kristus mabbéré barakka enrengngé asaléwangeng lao ri iko. Saudara-saudara, tuli waji'ki mattarima kasi lao ri Allataala nasaba iko. Na mémeng sipato'ki pogau'i makkuwaéro, saba' pédé' mateppe'ko lao ri Kristus, enrengngé pédé' mamaséiwi séddié lao ri laingngé. Iyanaro saba'na magi tatuli mabbicara passalemmu tungke' wettu ricélléngiwi jema'-jema'na Allataala. Masennakki curitai pékkugiko tette' masse mateppe' lao ri Kristus ri laleng paccallangngé sibawa anrasa-rasangngé iya mupéneddingiyé. Purai mupéneddingi anrasa-rasangngé nasaba Lino Baruna Allataala, nariyangga'ko matu sitinaja muttama ri lalenna. Kuwaniyé manessa pékkugi adélé'na apettunna Allataala. Napogau'i matu aga iya adélé'é, nawalekengngi matu anrasa-rasang lao ri tau iya mébbuékko manrasa-rasa. Nalao ri iko iya manrasa-rasaé makkekkuwangngéwé – makkuwatoro idi – Allataala matu mpérékki asennangeng ri essona Puwang Yésus nonno polé ri surugaé sibawa mappaitangngi Aléna silaong malaéka'-malaéka'-Na iya baranié sibawa api iya malluwa'-luwa'é. Nonnoi untu' hukkungngi tau iya dé'é napaduliwi Allataala sibawa iya dé'é namaélo tuwo situru Karéba Madécéng passalenna Yésus Puwatta. Iyaro sining tauwé tarimai matu pahukkungeng abinasang lettu mannennungeng, ribuwangngi matu massu polé ri daérana Puwangngé sibawa polé ri akuwasanna iya marajaé, ri Esso apolénna matti untu' ripakaraja ri umma'na sibawa untu' ripakalebbi ri sininna tauwé iya mateppe'é. Engka tokko matu ri yelle'na umma'na Allataalaro, saba' mateppe'ko lao ri biritta iya ripalettu'é lao ri iko. Iyanaro saba'na na idi tuli massempajangekko. Massempajakki kuwammengngi Allataala pancajiko sitinaja untu' tuwo situru élo-Na, untu' iyanaro mobbiko. Tennapodo Allataala, nasibawang akuwasan-Na, pennoiwi cinna-Na untu' pogau'i madécéngngé, sibawa passukkui sininna jama-jamang iya mupogau'é nasaba mateppe'ko lao ri Kristus. Nanallalengiro Puwatta Yésus Kristus ripakarajai ri iko, sibawa iko ripakarajato ri Yésus nasaba akessingeng atinna Allataala enrengngé Puwang Yésus Kristus. Passalenna Puwatta Yésus Kristus, sibawa passalenna ripaddeppungetta matu untu' monro sibawa Aléna, iyanaé uwéllau sibawa masero polé ri iko: Aja' mumasitta mammaling-maling iyaré'ga mausé nasaba engkana biritta makkedaé narapini Essona Puwang Yésus polé paimeng. Naullé iyaro karébaé assalenna poléi riséuwaé boto, iyaré'ga polé riséuwaé pappagguruwang; iyaré'ga wedding towi jaji engka powadai makkedaé engka naengka taokii iyaé makkuwaéro ri laleng sala'séddinna sure'ta. Muwi maga, aja' muleppessangngi tauwé bengnguwakko. Saba' riwettu dé'napa narapii iyaro Essoé, harusu'i kajajiyang iyaé gau'éwé lebbi riyolo: Maéga tau salaiwi atepperenna, massakkarengngi Kristus; sibawa Tolino Maja iya ripatotoriyé untu' muttama ri ranakaé, mappaitangngi matu aléna. Namatempo maélo méwai sibawa pakatanréi aléna ri yasé'na sininna iya nasompaé tolinoé, iyaré'ga sininna iya nangga'é déwata tolinoé. Mala muttama'i matu sibawa tudang ri laleng Bolana Allataala sibawa mappallebbangengngi makkedaé aléna iyanaritu Allataala. Engngerangngi makkedaé purani uwappaddissengeng iya manennaro wettukku engka mupa sibawa iko. Muwisseng aga iya lawa-lawaiyéngngi kajajiyanna iya manennaro. Matti ri wettu iya puraé napattentu Allataala, iyaro Tolino Majaé mompoi matu. Awatangeng iya jamaéngngi iyaro jaé mammulani majjama secara rahasiya, iyakiya tuli ritahat-tahang mupi. Matti rékko iya tahangngéngngiro ripaddésu'ni, nappai paita iyaro Tolino Majaé. Narékko poléni Puwang Yésus, naunoi matu iyaro Tolino Majaé sibawa nappase' polé ri témun-Na, enrengngé pabbinasai sibawa cahaya ahadéréken-Na. Iyaro Tolino Majaé mompoi sibawa akuwasang iya battowaé polé ri Ibillisi'. Napakangkai matu sininna rupanna anu makalallaingngé sibawa gau'-gau' iya dé'é padanna iya pennoé sibawa bellé. Napakéi matu sininna bellé iya majaé untu' papusai sining tau iya maéloé binasa. Binasai matu mennang saba' nasampéyangngi sibawa dé' napojiwi biritta iya tongengngé iya polé ri Allataala iya weddingngé passalama'i mennang. Iyanaro saba'na na Allataala napapoléngengngi mennang séuwa akuwasang iya papusaéngngi mennang, angkanna mateppe'i mennang lao ri aga iya dé'é natongeng. Addimonrinna, sininna tauwé iya pojiyéngngi dosaé sibawa dé'é namateppe' lao ri iya tongengngéro, rihukkungngi matu. Saudara-saudara iya namaséiyé Puwangngé! Tuli harusu'ki mattarima kasi lao ri Allataala passalemmu, saba' pammulanna mupa Allataala pura piléko untu' ripassalama'. Kajajiyangngi iyaro gau'é nasaba aga iya napogau'é Rohna Allataala lao ri iko untu' pancajiko umma'na Allataala iya mapaccingngé sibawa nasaba mateppe'ko lao ri biritta iya tongengngé polé ri Allataala. Untu' iyanaro Allataala mobbiko naolai Karéba Madécéng iya riyabbirittangngé lao ri iko. Naobbiko Allataala, nasaba maéloi kuwammengngi muwaccowé péneddingiwi arajanna Puwatta Yésus Kristus. Rimakkuwannanaro, Saudara-saudara, tettong masse'no sibawa attenninno matteru lao risining pappagguruwang iya puraé riyabbirittang lao ri iko, muwi ada-ada iyaré'ga taroki. Paccappurenna, Saudara-saudara, assempajangekki. Assempajanno kuwammengngi biritta polé ri Puwangngé weddingngi matteru mallebbang sibawa masitta enrengngé ritarima sibawa madécéng, pada-pada iya puraé kajajiyang ri iko riyolo. Assempajang tokko kuwammengngi napassalama'ki Allataala polé risining tau iya dé'é nakkéyampé sibawa majaé. Saba' dé' nasininna tauwé mateppe' matu ri biritta iya polé ri Puwangngéro. Iyakiya matinului Puwangngé. Napéwatangiko matu sibawa nalinrungiko polé ri Si Majaé. Nasukkuki mateppe' lao ri Puwangngé passalemmu, makkedaé mattengngakko pogau'i sibawa matteru matu pogau'i aga iya riyappétangngarengngé lao ri iko. Tennapodo Puwangngé pimpikko untu' lebbi pahangngi makkedaé Allataala mamaséiko sibawa Kristus mabbéré asabbarakeng lao ri iko. Saudara-saudara, ri laleng akuwasanna Puwang Yésus Kristus, riparéntakko kuwammengngi muwabélaiwi sininna Saudara iya tuwoé makkuttu-kuttu, sibawa iya dé'é naturusiwi sining pappagguruwang iya riyabbéréyangngé lao ri mennang. Alémuna misseng tongengngi makkedaé harusu'ko turusiwi contota. Dé' takkuttu-kuttu wettutta engka ri tengnga-tengngamu. Dé' tanréi inanréna tauwé sibawa tenriwaja. Sibalé'na esso wenniki mappallaung maggangka ullé kuwammengngi dé' tasussaiwi muwi niga polé ri yelle'mu. Ripogau'i iyaro tenniya nasaba dé' tappunnai ha' mattuntu' kuwammengngi mutulukki, iyakiya nasaba maéloki mancaji conto lao ri iko. Wettutta engka mupa ri tengnga-tengngamu, riyabbéréyangngi peraturangngéwé, “Tau iya dé'é namaélo mappallaung, dé' nawedding manré.” Ripowadai iyaé nasaba riyéngkalingai makkedaé engka tau ri yelle'mu iya tuwoé makkuttu-kuttu. Dé'gaga napogau' mennang sangadinna sibu'i campuru'i urusanna tau laingngé. Ri laleng asenna Puwatta Yésus Kristus riparéntangngi sining tauwéro sibawa paréngngerangiwi, kuwammengngi nappallaung mennang sibawa tennang enrengngé sappai dallé'na muto. Iyakiya aja' mucau pogau' décéng. Naullé engka tau ri yelle'mu iya dé'é namaélo turusiwi aga iya ripowadaé ri laleng sure'éwé. Jaga-jagako ri tau makkuwaéro sibawa aja' musiwollompollong sibawa aléna kuwammengngi namasiri. Iyakiya aja' mugaukengngi selaku bali, banna pangajariwi selaku séddi Saudara. Puwangngé iyanaritu assalenna asaléwangetta. Tennapodo tuli mabbéréi lao ri iko asaléwangeng ri laleng sininna gau'é. Tennapodo Puwangngé sibawang manengngi Saudara. Sellekku polé ri Iyya, Paulus. Aléku muto mokii iyaé bagiyangngé. Mappakkuwaiyé tanranna iya utaroé ri laleng sininna sure'ku. Tennapodo Puwatta Yésus Kristus barakkaki manengngi Saudara. Salama, Macinnaka kuwammengngi tette'ko monro ri Efésus pada-pada iya pura upakkolik-kolingengngékko wettukku lao ri Makedonia. Saba' ri Efésus engka siyagangngaré tau iya mappallebbangengngéngngi pappagguruwang iya dé'é natongeng. Na harusu'ko pappésauwi mennang. Powadangngi mennang kuwammengngi aja'na najampangiwi pau-pau rikadongngé sibawa curita-curita assalennaé iya dé'é pettunna. Iya manennaro banna paompo appangéwangeng bawang, sibawa dé' napamajuwi rancanana Allataala iya bannaé wedding riisseng naolai teppe'é lao ri Aléna. Akkattana iyaro pangajaku iyanaritu kuwammengngi naulléi tauwé mappunnai ati iya tongengngé, sibawa ati marilaleng iya mapaccingngé enrengngé tonget-tongeng mateppe' ri Puwangngé, narimakkuwannanarro naulléi mennang mamaséi pada-padanna. Engka sibagiyang tau iya dé'énna natuwo iya pada-padaénnaro, pusai mennang ri laleng addebbakeng iya dé'é gaga gunana. Macinnai mennang mancaji guru-guru agama, padahal aléna mennang dé' napahangngi ada-ada iya napaké mennang iyaré'ga gau'-gau' iya napangoloé mennang sibawa makkuwamani patepperinna. Taissenni makkedaé hukkunna agamaé iyanaritu makessingngi, rékko riyakkégunangngi pékkugi mestinna. Tentunna harusu'i riyéngngerang makkedaé riyébbui hukkungngé tenniya lao ri tau iya makessingngé, sangadinna lao risining majjalékkaiyéngngi hukkungngé, sining tau majaé, sining tau maja ampé, lao ri tau madosaé, tau dé'é naggama, tau linoéwé, lao risining tau mpunoéngngi ambo'na iyaré'ga indo'na, sining tau maégangngéngngi mabbuno, lao ri tau pappangaddié, sionrongngé pada-padanna worowané, pacculi'é, pabbelléngngé, sabbi-sabbi bellé, sibawa nigi-nigi pogau' gau'-gau' iya siéwaé sibawa pappagguruwang iya tongengngé. Iyaro pappagguruwangngé engkai ri laleng Karéba Madécéng iya appallebbangennaé riyappaddettangengngi lao ri iyya, iyanaritu Karéba Madécéng polé ri Allataala iya marajaé sibawa sipato'é ripoji. Mattarima kasi'ka lao ri Kristus Yésus Puwatta, purani nawérékka awatangeng untu' tumaningiwi, sibawa nangga'ka sitinaja untu' iyaro jamangngé, namuni riyolo mappétenna'ka, sibawa maccalla enrengngé pakatunai Aléna. Iyakiya Allataala mamaséika, nasaba iyaro wettué dé'pa umateppe, jaji dé' uwissengngi aga iya upogau'é. Mala ribolloika sibawa pammaséna Puwatta. Nawérékka amampungeng untu' mateppe' ri Aléna sibawa mamaséiwi pada-padatta rupa tau. Iyaro amampungengngé nawérékki idi maneng iya masséddié sibawa Kristus Yésus. Tongeng senna' iyaé ada-adaé – rimakkuwannanaro sitinajai ritarima sibawa riyatepperi maneng –: “Poléi Kristus Yésus ri linoéwé untu' passalama'i tau madosaé.” Na iyya'na tau madosa iya kaminang majaé. Iyakiya mala nasaba iyaro nanamaséika Allataala, kuwammengngi weddingngi nappaitang asabbarakenna Kristus Yésus lao ri iyya, tau iya kaminang madosaéwé. Na iyaé mancaji séuwai conto untu' sininna tau iya mateppe'é matu matti lao ri Aléna sibawa lolongeng atuwong tongengngé sibawa mannennungengngé. Allataala, Arunna sininna wettué, sitinajai ripakalebbi sibawa tuli ripoji, saba' Aléna mannennungeng, iya dé'é napaita sibawa iya séuwaé! Aming. Timotius, ana'ku! Iyaé jamangngé upaddettangiko, rékko riyéngngerangngi pasenna Allataala iya napalettu'é nabi-nabié ri laleng jema'é passalenna alému. Sitinajai iyaro pasengngé mancaji bokong ri alému ri laleng angéwangeng iya makessingngé. Ewano sibawa makkatenning ri laleng ateppereng iya tongengngé sibawa ati iya mapaccingngé. Engka tau dé' napaduliwi sadda ati marilalenna, angkanna ancuru'i atepperenna mennang. Ri yelle'na iyanaritu Himénéus sibawa Aléksander. Iya duwa tauwéro purani uhukkung ri laleng mabbéréyangngi lao ri Ibillisi', kuwammengngi nagguru mennang untu' mappésau curupiyangiwi Allataala. Mula-mulanna uwéllauwi sibawa masero kuwammengngi paréllaungngé, sempajangngé, sibawa paddowangengngé enrengngé paréllau tarima kasi'é ripalettu'i ri Allataala untu' sininna tauwé; untu' sining arungngé sibawa untu' sininna tauwé iya makkatenningngé akuwasang. Ellauwi kuwammengngi weddikki tuwo sibawa tennang enrengngé amang untu' Allataala sibawa kédo-kédo iya sipato'é. Iyanaro makessing sibawa sennangiwi atinna Allataala, Pappassalama'ta. Maéloi kuwammengngi sininna tauwé ripassalama'i sibawa naissengngi iya tongengngé. Saba', banna engka séddi Allataala, na pappallalang ri yelle'na Allataala sibawa tolinoé iyanaritu Kristus tolinoéro. Purai nabbéréyang Aléna untu' paleppe'i sininna tauwé polé ri dosa-dosana. Nanallalengiro nappaitangngi Allataala ri wettu iya teppa'é, makkedaé macinnai kuwammengngi sininna tauwé ripassalama'i. Na iyanaro saba'na narisuroka lao risining tau iya tenniyaé Yahudi untu' mappallebbangengngi lao ri mennang biritta passalenna ateppereng iya tongengngé. Iya upangoloéwé iyanaritu tongengngi, dé' uwabbellé. Uwéllauwi kuwammengngi muwi kégi massempajangngi worowané sibawa ati iya mapaccingngé, dé namacai iyaré'ga massasa. Sitinajai sining makkunraié bélo-béloiwi aléna sibawa sitinajaé enrengngé paké pakéyang iya sitinajaé. Aja' napaké modélé gemme' iya makalallaingngé iyaré'ga paréwa-paréwa ulaweng iyaré'ga mutiyara, iyaré'ga pakéyang iya masulié. Sibalé'na, sitinajai makkunraié bélo-béloiwi aléna sibawa pangkaukeng-pangkaukeng iya makessingngé pékkugi iya sipato'é lao ri makkunrai iya massompaé ri Allataala. Harusu'i magguru makkunraié sibawa mammekko enrengngé mapato. Dé' upattongengngi makkunraié mappagguru iyaré'ga paréntai worowané; harusu'i mammekko mennang. Saba' iya bunge'-bunge'é ripancaji iyanaritu Adam sibawa rimunri mani nappa Hawa. Na tenniya Adam, sangadinna makkunraié ritu ribellé, angkanna najjalékkai paréntana Allataala. Namuni makkuwaro, salama'i matu makkunraié ri laleng jajiyanna ana', assaleng aléna nasibawang ati mariyawa tette'i mateppe' lao ri Kristus sibawa tette' mamaséiwi tau laingngé enrengngé tuwo banna untu' Allataala. Tongeng senna' ada-adaéwé, “Tau iya macinnaé mancaji pamimpinna jema'é, nacinnaiwi séuwa jama-jamang iya makessing senna'é.” Séddié pamimping jema' harusu'i séddi tau iya dé'é cellana, banna séddi bainéna, naisseng kuwasaiwi aléna, mapanré, enrengngé taratoro'; napoji tarimai tauwé ri bolana, sibawa naullé paggurui tauwé; aja' na tau iya pammabokengngé, iyaré'ga iya pojiyéngngi mallaga. Sibalé'na, harusu'i malemma kininnawa sibawa napoji adaméngengngé. Dé' nawedding mammata dowié. Harusu'i naisseng matoro'i ruma tanggana sibawa makessing, enrengngé didi'i ana'-ana'na untu' tunru' sibawa mappakalebbi ri aléna. Saba' rékko tauwé dé' naissengngi matoro'i ruma tanggana, pékkugiwi naulléi matoro'i jema'na Allataala? Séddié pamimping jema' dé' nawedding tau iya nappaé mancaji Kristéng, saba' matempoi matti angkanna tattanroi pada-pada Ibillisi'é riyolo. Harusu'i tau iya mappunnaiyé aseng makessing ri laleng masaraka'é; saba' rékko dé' nakkuwaro, ripakatunai matu ri tauwé, angkanna sempé' ri laleng jebba'na Ibillisi'é. Pabbantu jema'é harusu'i makessing sibawa matinulu; dé' namammata dowi sibawa dé' napojiwi ménung maéga senna' anggoro. Harusu'i mennang makkatenning masse sibawa ati marilalengngé iya mapaccingngé ri pappagguruwang Kristéngngé iya puraé nappaitang Allataala. Sitinajai mennang riyoji riyolo', narékko manessani mennang dé' gaga cellana, nappai wedding mennang mabbantu ri laleng jema'é. Bainéna mennang harusu towi tau iya makessingngé, tenniya tau iya pojiyéngngi pallebbangngi karéba dé'é natongeng. Harusu'i mennang naisseng makuwasaiwi aléna sibawa malempu ri laleng sininna passalengngé. Pabbantu jema'é harusu'i mappunnai banna séddi bainé. Harusu'i naisseng matoro'i ana'-ana'na enrengngé ruma tanggana sibawa makessing. Sining tau iya mabbantué sibawa makessing ri laleng jema'é, ripakalebbii matu sibawa pédé' baraniwi mabbicara passalenna atepperenna mennang ri Kristus. Mamménasaka dé'na namaitta naucélléngiko. Namuni makkuwaro, uwokii mutowi iyaé sure'é lao ri iko, kuwammengngi rékko matengnge'ka, muwissenni pékkugi harusu tuwo selaku kaluwargana Allataala, iyanaritu jema'na Allataala iya tuwoé. Iyaé jema'é sinrupai alliri pappatettongngé sibawa réngééngngi pappagguruwang tongengngé iya polé ri Allataala. Muwi séddi tau dé'to mulléi massakkarengngi, temmaka loppona rahasiyana agamata: Nappaitangngi aléna ri laleng rupa tolinoé, sibawa ripannessa tongeng ri Rohna Allataala, enrengngé naita sining malaéka'é. Karébanna ripamengngoi ri yelle'na bangsa-bangsaé, sibawa riyatepperi ri sininna linoé sibawa riyakka ménré ri surugaé. Matedde'i napowada Rohna Allataala makkedaé ri wettu-wettu mangoloé, sibagiyang tauwé nassuriwi matu atepperenna, nassakkarengngi Kristus. Mapatoi matu mennang ri roh-roh iya mappapusaé sibawa maccowériwi sining pappagguruwanna sétangngé, iya napalettu'é naolai sining tau munapé'é iya mabbellé. Ati marilalenna iyaro sining tauwé mapettanni. Napaggurui mennang tauwé dé' nakawing sibawa dé' nanré inanré mattentué. Padahal iyaro inanré napancajiwi Allataala untu' riyanré sibawa mattarima kasi lao ri Allataala untu' riyanré sibawa mattarima kasi lao ri Allataala polé risining tau iya mateppe'énna ri Kristus sibawa missengngénni pappagguruwang tongengngé iya polé ri Allataala. Sininna séuwa-séuwaé iya napancajiyé Allataalaro makessing, nadé' muwi séddi iya harusu'é riyangga' harang rékko purani ritarima sibawa mattarima kasi lao ri Allataala. Saba' barakka polé ri Allataala sibawa sempajangngé mébbui iyaro inanré mancaji hallala'. Rékko muwappagguruwangngi iya manennaro lao ri Saudara-saudara siatepperengngé, mancajiko matu pattumanni Kristus Yésus iya majjamaé sibawa makessing. Na matteruko matu piyarai batémmu sibawa ada-adanna Allataala iya tatepperiyé, sibawa sining pappagguruwang tongengngé iya puraé uwaccowéri labe'é. Abélaiwi curita-curita pémmalié iya dé'é nakkéguna. Sitinajai mulati alému untu' atuwong iya massompaé. Latihang watakkalé céddé bawang akkégunana, iyakiya latihang rohanié makkégunai ri laleng sininna gau'é, saba' tampu'i janci untu' atuwong makkekkuwangngé sibawa wettu iya mangoloé. Iyaro gau'é tongengngi sibawa sitinajai ritarima enrengngé riyatepperi maneng. Iyanaro saba'na méwaki sibawa marejjing majjama, saba' mamménasaki sissukku-sukkuna lao ri Allataala iya tuwoé, Aléna ritu Pappasalama'na sininna tauwé, lebbi-lebbipi sining tau iya mateppe'é. Appagguruwangngi iya manennaro sibawa suroi sining tauwé maccowériwi. Aja' muleppessangngi muwi séddié tau mangga'ko mariyawa nasaba malolo mupo. Sibalé'na, sitinajako mancaji conto lao risining tau mateppe'é ri laleng mabbicara, sibawa kédo-kédomu, ri laleng caramu mamaséiwi pada-padammu sibawa mateppe' lao ri Yésus Kristus, sibawa atuwommu iya tongengngé. Narapika polé matti, harusu'ko mattonget-tongeng bacangengngi Kitta'é sining tauwé, sibawa dorongngi mennang enrengngé paggurui mennang. Aja' mujampaléllé makkégunangngi pammasé polé ri Rohna Allataala iya riwéréngngékko wettunna sining pamimping jema'é palénne'i limanna mennang ri yasé'na ulummu, sibawa nabi-nabié palettu'i pasenna Allataala passalenna alému. Pogau' manengngiro sibawa mattonget-tongeng kuwammengngi naitai sininna tauwé amajungemmu. Jagaiwi alému sibawa jagai towi pappaguruwammu. Sitinajako matinulu pogau' manengngiro, saba' nallalengiro mupassalama'i matu muwi alému sibawa sining tau iya méngkalingaékko. Aja' muwacairi senna'i tau iya lebbi macowaé na iya iko, sangadinna érai méngkalingai ada-adammu pada-pada rékko samannai ambo'mu. Gaukengngi sining kalloloé selaku saudara, sibawa sining makkunrai macowaé selaku indo'. Sining ana'daraé sitinajai mugaukeng selaku anri, sibawa kédo-kédo iya malempué. Pakalebbii sining jandaé iya tonget-tongengngé tuwo ri alé-alé. Iyakiya rékko séddié janda mappunnai ana'-ana' iyaré'ga eppo-eppo, mennang ritu lebbi riyolo harusu riwéréng pappahang makkedaé waji'i mennang jampangiwi kaluwargana, sibawa mpale'i pappédécénna tomatowanna sibawa nénéna mennang. Nasaba gau'énnaro pésennangiwi atinna Allataala. Janda iya tonget-tongengngé alé-alé, sibawa dé' nappunnai niga-niga iya weddingngé piyarai, banna mamménasai ri Allataala. Esso wenniwi matteru massempajang lao ri Allataala untu' méllauwi pattulun-Na. Iyakiya janda iya pojiyéngngi tuwo massennas-sennang, maténi namuni tuwo mupi. Palettukengngi iyaé panunju'-panunju'é lao ri mennang, kuwammengngi natuwo dé' cellana. Iyakiya rékko engka tau iya dé'é napiyarai siyajinna, lebbi-lebbipi kaluwargana muto, iyaro tauwé nassakkarengngi atepperenna, lebbi majai naiya tau dé'é namateppe'. Banna janda iya pennoiyéngngi sara'-sara'éwé wedding riputtama ri laleng daftar janda-jandaé: umuru'na harusu'i dé' nakurang enneng pulona taung, banna wékkasiseng kawing sibawa kalabba selaku makkunrai iya pogau'éngngi gau'-gau' iya makessingngé, padaénna ébara'na: napawekke'i ana'-ana'na sibawa makessing, masennang tarima tamu-tamu mappéruma ri bolana, natumaningiwi sining tau mateppe'é, nabantui sining tau masussaé, enrengngé napogau'i sibawa mattonget-tongeng sininna rupanna jama-jamang iya makessingngé. Aja' nariputtama janda-janda iya maloloé mupa ri laleng daftar-éro. Saba' rékko poléi pappénedding pangélorenna iya mawatang senna'é, maéloi mennang kawing sibawa nasalaiwi Kristus. Napasala mennang nasaba dé' napaddupai janci iya nabbéréyangngé lao ri Kristus. Ri lainnaé paimeng nabbéyang bawami wettué ri laleng massu muttama'na ri bolana tauwé. Na iya lebbi majaéppasi, iyanaritu makkedaé maggurui mennang pétenna'i asenna tau laingngé enrengngé campuru'i urusanna tauwé kuwaéttopa bicarai gau'-gau' iya dé'é nasipato ribicara. Iyanaro saba'na naumaélo kuwammengngi nakawing paimeng janda maloloé mupa, lolongeng ana' sibawa murusu'i ruma tanggana, kuwammengngi dé' nalolongeng kasempatang sining balitta untu' kebbongiwi asetta. Saba' engka janda-janda iya pusaénna maccowériwi Ibillisi'é. Iyakiya rékko séddié makkunrai Kristéng mappunnai anggota kaluwarga iya jandaénna, harusu'i nabantu iyaro sining jandaé; aja' muleppessangngi jema'é tanggungngi mennang. Nallalengiro weddingngi jema'é bantui janda-janda iya dé' sises-sisengngé nappunnai siyajing. Pamimping jema'é iya pogau'éngngi jamanna sibawa makessing, sitinajai riwéréng pappakalebbi leppe' wékkaduwa, lebbi-lebbipi mennang iya mapatoé makkatobba sibawa mappagguru. Saba' tarokii ri laleng Kitta'é, “Saping iya mattengngangngé maddése gandong untu' paddunui dandongngé polé ri uléna, aja' naringong pannyoro'na,” makkuwatoro, “Tau iya majjamaé natarimai sarona.” Aja' mutarimai iya ritenrekengngéngngi séddié pamimping jema', sangadinna rékko ripakkasse'i ri duwa tau sabbi iyaré'ga lebbi. Tau iya pogau'é dosa, harusu'i riyampareng ri yolona sininna jema'é, kuwammengngi namétau iya laingngé. Ri yolona Allataala, Kristus Yésus, sibawa malaéka-malaéka'na iya tappilé, uwéllauwi sibawa masero kuwammengngi muturusiwi panunju'-panunju'éwé tebbata-bataiwi muwi niga, sibawa tekkacowé-cowé. Aja' mumasitta senna' palénne'i limammu ri yasé'na séddié tau untu' résmikangngi riyakka selaku pattumaninna Puwangngé. Rékko madosai tau laingngé, aja' muwaccowé ri laleng dosaéro. Jagaiwi alému kuwammengngi natette mapaccing. Aja'na na uwai bawang muwénung; énung tokko céddé anggoro untu' bantui lise' ri lalemmu, saba' biyasako malasa-lasa. Sibagiyang dosana tauwé, riwettu dé'napa nariadéléki, paitani sibawa manessa. Iyakiya dosana sibagiyang tau laingngé nappai naisseng rékko purairo. Makkuwatoro sining pangkaukeng makessingngé matteru paita. Sibawa muwi iya dé'é namagampang paita, dé' nawedding matteru tassubbu. Sining tau Kristéng iya mancaji ataé, harusu'i nangga' makkedaé sitinajai mennang pakalebbii puwanna, kuwammengngi dé' naulléi tauwé péjariwi asenna Allataala iyaré'ga pappagguruwatta. Ata-ata iya puwannaé tau Kristéng, dé' nawedding napandang énténg puwanna nasaba pada-padai mennang tau Kristéng. Mala harusu'i mennang natumaningi puwanna mennanro lebbi kessippa, saba' puwang iya natumaningiyéro iyanaritu pada-padai tau mateppe' iya riyamaséiyé. Iya manennaé harusu'i muwappagguruwang sibawa muwappangajareng. Nigi-nigi mappagguruwangngi pappagguruwang iya laingngé na iyaro sibawa dé' nasitujuiwi pappagguruwang tongeng polé ri Puwatta Yésus Kristus, sibawa iya dé'é nasicoco' pappagguruwanna agamata, iyanaritu sining tauwé matempoi padahal dé' agaga naisseng! Lasana iyanaritu napoji maddebba sibawa mappangéwang passalenna warékkada-warékkadaé angkanna paompo angémpurung, assisalang, mappétenna', bata-bata iya dé'é namakessing, sibawa assasang iya dé'é purana. Pikkiranna sining tauwéro buntuni sibawa dé'na natongeng. Nasengngi wedding mancaji sugi polé ri agamaé. Mémeng agamaé mabbéréi asarong iya battowaé, rékko sukkuru'i tauwé sibawa aga iya nappunnaiyé. Saba' dé'gaga muwi séuwa iya tatiwié ri laleng linoéwé, sibawa dé'to gaga muwi séuwa iya weddingngé tatiwi massu! Jaji, rékko engka inanré sibawa pakéyang, genne'ni iyaro. Iyakiya tau iya maéloé mancaji sugi, rigodai sibawa nalai siyo-siyo polé rimaddupa-rupang cinna iya madonggoé enrengngé makkasolangngé. Iyaro sining cinna'é naébbui tauwé mancaji ancuru' sibawa macilaka. Saba' polé ri pangélorengngé ri dowié na dé'na naturusiwi pappagguruwang Kristéngngé, nanakennai mennang maéga anrasa-rasang iya mancuru'éngngi atinna mennang. Iyakiya iko iyanaritu appunnangennako Allataala, jaji harusu'ko mabélai manengngi iyaro. Akkuragako mancaji tau iya tongengngé ri pakkitanna Allataala, mancaji ata ri Allataala, mateppe' ri Kristus, mamaséiwi pada-padatta, sabbara ri laleng anrasa-rasangngé sibawa kédo-kédo malemma. Ewano tonget-tongeng selaku tau Kristéng kuwammengngi mulolongengngi hadiya atuwong tongengngé sibawa mannennungengngé. Saba' untu' iyanaro naobbiko Allataala ri wettunna muwangakui ri yolona maéga tau makkedaé mateppe'ko ri Kristus. Na makkekkuwangngé, ri yolona Allataala iya mabbéré nyawa lao ri sininna séuwa-séuwaé, sibawa ri yolona Kristus Yésus iya mabbéré asabbiyang iya tongengngé lao ri Pontius Pilatus, uwéllauwi iyaé ri iko: Turusiwi sininna iyaro paréntaé secara tuléng sibawa dé' cellana narapi ri Essona Puwatta Yésus Kristus polé paimeng. Apolén-Na ripattentui matu ri wettu iya teppa'é ri Allataala muto. Aléna ritu Makuwasa séddi-séddié; Marajai, Arunna sininna arungngé, sibawa Puwanna sininna puwangngé. Aléna bawang dé' nawedding rikuwasai ri amaténgngé; tuwoi ri laleng cahaya iya dé'é nawedding riyaddeppéri ri muwi niga. Dé'gaga muwi séddi tolino iya puraé mitai Aléna, iyaré'ga mulléi mitai Aléna. Ri Aléna ritu alebbirengngé sibawa akuwasangngé lettu mannennungeng! Aming. Lao risining tau iya sugié ri linoéwé, sitinajako pangajari kuwammengngi aja' mennang namatempo sibawa aja' namménasa ri barab-barang iya dé'é natette – pada-pada mutowi asugirengngé. Harusu'i mennang mamménasa lao ri Allataala iya mabbéréyangngéngngi sininna séuwa-séuwaé lao ri idi sibawa maona kuwammengngi tapéneddingiwi. Pangajariwi mennang untu' mappaitangngi akessingengngé, untu' pogau'i maéga gau'-gau' iya makessingngé, masémpo ati sibawa napoji mabbéré. Nanallalengiro mappaddeppungengngi mennang waramparang iya mancajiyé modala' iya makessingngé untu' wettu iya mangoloé. Nanallalengiro lolongengngi matu mennang atuwong iya mannennungengngé, iyanaritu atuwong iya tongengngé. Aga iya puraé ripaddettangekko, jagaiwi iyaro madécéd-décéng, Timotius! Abélaiwi sining assipabbicarang iya dé'é nakkéguna sibawa sining addebbakengngé passalenna gau'-gau' iya secara kalirué riyasengngi “Pangissengeng”. Saba' engka sining tau iya powadaéngngi, makkedaé nappunnaiwi pangissengengngéro angkanna léssé polé risining pappagguruwang Kristéng iya natepperiyé mennang riyolo. Tennapodo Puwangngé barakkakiwi Saudara-saudara. Salama, Sukkuru'ka lao ri Allataala iya utumaningiyé sibawa ati iya mapaccingngé pada-pada iya napogau'é néné-nénéku riyolo. Tuli mattarima kasi'ka lao ri Allataala sises-siseng uwéngngerakko ri laleng sempajang, muwi esso iyaré'ga wenni. Uwéngngerangngi amessénna atimmu. Iyanaro saba'na naumacinna senna' siruntu sibawa iko kuwammengngi tonget-tongekka wedding marennu. Maréngngerakka ri atepperemmu iya mattonget-tongengngé lao ri Kristus, pada-pada atepperenna nénému Lois sibawa indo'mu Eunike. Namateppe'ka iko mateppe'to pada-padaéro. Rimakkuwannanaro uparéngngerangiko untu' patuwoi pammasé iya nawéréngngékko Allataala wettukku palénne'i limakku ri yasé'mu. Saba' Roh iya nabbéréyangngé Allataala ri yasé'ta, tenniya Roh iya mébbuékki mancaji pelloreng. Sibalé'na iyaro Rohna Allataala naébbuki mancaji mawatang, penno sibawa pammasé sibawa mulléi tahangngi alé. Rimakkuwannanaro, aja' mumasiri mabbéré asabbiyang passalenna Puwatta, sibawa aja'to mumasiri passalekku, iya ritarungkué nasaba Aléna. Sibalé'na sitinajako nasibawang awatangeng polé ri Allataala, maccowé manrasa-rasa untu' Karéba Madécéngngéro. Napassalama'ki Allataala sibawa naobbiki kuwammengngi namancaji umma' ri Aléna. Napogau'i iyaro tenniya nallalengiwi aga iya puraé ripogau', sangadinna nallalengiwi rancana-Na muto sibawa pammasé-Na. Nawérékki pammasé-Na naolai Kristus Yésus riwettu dé'napa naripancaji linoéwé. Na makkekkuwangngé nappaitangngi iyaro pammaséna Allataala lao ri idi naolai apolénna Arung Pappassalama'ta Kristus Yésus. Nacaui Yésus akuwasanna amaténgngé sibawa tiwi atuwong mannennungeng naolai Karéba Madécéngngéro. Untu' mabbirittangngi iyaro Karéba Madécéngngé nakkaka Allataala mancaji rasul sibawa guru. Iyanaro saba'na nauwanrasa-rasai manengngi iyaé, iyakiya tette'ka mateppe', saba' uwisseng tongengngi niga uwatepperi. Mateppe'ka makkedaé aga iya pura nappaddettangeng lao ri iyya, sanggu' towi jagaiwi narapi Esso Kiyame'. Accowériwi tonget-tongeng pappagguruwang tongengngé iya puraé uwérékko. Sibawa sitinajako tette' makkatenning ri teppe'é sibawa pammasé iya mancajiyé appunnangetta nasaba masséddiki sibawa Kristus Yésus. Nasibawang bantuwang polé ri Rohna Allataala iya tuwoé ri laleng aléta, sitinajako jagaiwi madécéd-décéng gau'-gau' mangke'é iya puraé ripaddettangiko. Muwisseng makkedaé sininna tauwé ri daéra Asia nasalaina, muttama toni Figelus sibawa Hérmogénés. Iyakiya kaluwargana Onésiforus wékkasiyagangngaré'ni napérennui atikku. Tennapodo naéloriwi Puwangngé mappaitangngi paressé babuwana lao ri mennang. Namuni ri lalekka tarungkué. Dé' namasiri Onésiforus ri keadaakkuro. Lettu'na muwa ri Roma, matteruni berusaha sappaka narapi naruntu'ka. Na ri Efésus maéga senna' natulungekka, muwissenni iyaro gau'é. Tennapodo Puwangngé mappaitang paressé babuwa ri aléna wettunna Essona Puwangngé madélékiwi sininna rupa tauwé. Timotius, ana'ku! Sitinajako mancaji mawatang nasaba pammasé iya nabbéréyangngé lao ri idi, nasaba masséddiki sibawa Kristus Yésus. Pappagguruwang iya puraé muwéngkalinga riyolo polé ri iyya ri yolona maéga tau, sitinajai muwappaddettangeng lao risining tau iya weddingngé riyatepperi sibawa iya maccaé paggurui tau laingngé. Harusu'ko maccowé manrasa-rasa selaku parajuri'na Kristus Yésus iya matinulué. Séddié parajuri' iya mattengngangngé jaga, dé' namaélo palippuiwi aléna sibawa urusang-urusang aléna, saba' macinnai sennangiwi atinna pallimana. Séddié pacculé dé' namancaji pakala matu ri laleng séuwaé attandingeng, rékko dé' naturusiwi peraturang-peraturangngé. Patani iya majjama senna'é, aléna ritu bunge'-bunge' punna ha' untu' lolongengngi wassélé' tanet-tanenna. Nennun-nennungngi aga iya upangoloéwé, saba' nabbéréyangngi matu Puwangngé lao ri iko pakkulléngngé untu' pahang manengngiro. Engngerangngi iyaé: Karéba Madécéng iya uwabbirittangngé iyanaritu karéba passalenna Yésus Kristus, wija-wijanna Daud: Aléna ritu Kristus iya tuwoénna paimeng polé ri amaténgngé. Nasaba nabbirittangngi Karéba Madécéngngéro, naumanrasa-rasa; mala narapi rirantéka pada-pada séddié tomaja. Iyakiya ada-adanna Allataala dé' nariyullé rantéi. Iyanaro saba'na nausabbara tanggung manengngiro untu' apentingenna sining tau iya puraé Napilé Allataala, kuwammengngi nalolongetto mennang asalamakeng iya riyabbéréyangngé naolai Kristus Yésus, sibawa iya nasibawangngé arajang mannennungengngé. Tongeng senna' ada-adaéwé, “Rékko maténi' silaong Aléna, tuwo tokki matu silaong Aléna. Rékko tette'ki sabbara, mapparénta tokki matu silaong Aléna. Rékko riyassakkarengngi Aléna, Nassakkareng tokki matu. Rékko dé' tamatinulu, tette' Aléna matinulu, saba' dé' naulléi siéwa Aléna muto.” Sitinajako paréngngerangiwi sining tauwé passalenna iya manennaé. Ri yolona Allataala, pangajariwi mennang kuwammengngi aja' nassasa passalenna warékkada-warékkadaé. Dé'gaga gunana iyaro, mala napakacauwi sining tau iya méngkalingaéngngi. Sitinajako makkuraga tonget-tongeng kuwammengngi nariyakuiko ri Allataala selaku tau iya sitinajaé majjama untu' Allataala. Akkuragano kuwammengngi aja' mumasiri passalenna jama-jamammu, sangadinna mappagguru sibawa sicoco' sining pappagguruwang tongengngé iya polé ri Allataala. Abélaiwi assipabbicarang-assipabbicarang iya dé'é gaga gunana sibawa iya pakatunaéngngi Allataala. Sining assipabbicarang pada-padaéro banna mébbui tauwé pédé' maja. Pappagguruwanna sining tauwéro, makkalolo'i pada-pada lasa kangker iya masekkangngé. Ri yelle'na mennang muttama'ni Himénéus sibawa Filétus. Lésséni mennang polé ri pappagguruwang tongengngé, sibawa pakacauwi atepperenna sibagiyang tauwé. Napowadai mennang makkedaé amotokengngé polé ri amaténgngé purani kajajiyang. Iyakiya alléjjakenna iya masse'é iya naébbué Allataala dé' nariyullé gottangngi. Ri yasé'na tarokii iyaé, “Naisseng Puwangngé sining tau appunnangen-Na,” sibawa “Tau iya powadaéngngi makkedaé appunnangennai Puwangngé, iyaro tauwé harusu'i mappésau pogau'i pangkaukeng iya salaé”. Ri laleng bola iya battowaé engka maddupa-rupang parabo'na. Engka riyébbu polé ri péra'é iyaré'ga ulawengngé, iyakiya engkato iya polé ri ajué iyaré'ga tanaé. Engka iya ripaké untu' apparelluwang-apparelluwang mattentué iya dé'é padanna, sibawa engkato iya ripaké untu' apparelluwang-apparelluwang biyasaé. Tau iya pépaccingiyéngngi aléna polé ri sininna iya dé'é namakessing ripakéi matu untu' apparelluwang-apparelluwang iya dé'é padanna. Mancajiwi appunnangenna iya ripallaingngé sibawa makkégunaé untu' puwanna. Ripassadiyai untu' ripaké lao ri tungke' jama-jamang iya makessingngé. Abélaiwi asennangeng-asennangenna tau malaloé. Akkuragano untu' tuwo situru élona Allataala, matinulu lao ri pappagguruwan-Na, mamaséiwi pada-padatta sibawa mappunnai ariyawang ri laleng atié. Tuwono makkuwaro sibawa mennang iya mangobbié méllau pattulung ri Puwangngé sibawa ati iya mapaccingngé. Aja' muwaccowé ri laleng addebbakenna sining tau madonggoé iya temmissengngé agaga. Muwisseng makkedaé iya manennaro banna paompo appangéwang. Tau iya majjamaé untu' Puwangngé dé' nasipato mappangéwang; harusu'i mabessa lao ri sininna tauwé, sibawa naulléi paggurui tauwé sibawa makessing enrengngé sabbara. Harusu'i nasibawang lemma kininnawa paggurui sining tauwé iya pojiyéngngi méwa; memmuwaré Allataala mpéréngngi wettu lao risining tauwéro untu' toba' polé ri dosa-dosana mennang sibawa missengngi pappagguruwang iya tongengngé. Nanallalengiro namainge' mennang paimeng, sibawa leppe' polé ri siyo-siyona Ibillisi' iya puraé tawangngi mennang sibawa passai mennang maccowériwi élona. Engngerangngi iyaé: Ri esso-esso paccappurengngé engka matu maéga asussang. Napentingkangngi matu élona tolinoé, mammata dowii, matempo sibawa napoji mabboro. Napoji mennang pakatunai tauwé, maronta lao ri tomatowaé, dé' naissengngi mattarima kasi, sibawa nabenci gau'-gau' rohanié. Dé' mennang namaséiwi padanna, dé' napojiwi maddampeng. Napoji mennang pau-pau majai asenna tau laingngé, sibawa paké ateddekeng. Mapéddara mennang sibawa dé' napojiwi adécéngengngé. Napoji mennang bali'bella, mabangka sibawa dé' napikkiri' malampé. Lebbi napoji mennang asennangeng linoé naiya maccowériwi Allataala. Namuni secara mallahéreng, mapatoi mennang pajoppai kewajibanna agamaé, iyakiya nasampéyangngi iya poko'é ri laleng agamaéro. Abélaiwi sining tau makkuwaéro. Engka ri yelle'na mennang iya maccelle'énna ri laleng sining bolaé, nainappa napagguru sining makkunrai malemmaé iya mappunnaiyé maéga senna' dosa sibawa rikuwasai ri maddupa-rupang pangéloreng. Iyaro sining makkunraié matteru-terui méllau ripagguru, iyakiya dé' naengka naulléi missengngi pappagguruwang iya tongengngé iya polé ri Allataala. Pékkugi Yanés sibawa Yambrés méwai Musa riyolo, makkuwatoniro sining tauwéro méwai pappagguruwang polé ri Allataala. Masolanni pikkiranna mennang, sibawa tassangkalanni teppe'na mennang. Iyakiya dé' mennang nalolongeng matu aga-aga, saba' adonggonna mennang naissengngi sininna tauwé, pada-padato iya napéneddingiyé Yanés sibawa Yambrés. Iyakiya iko purani muwaccowéri sining pappagguruwakku, kédo-kédoku, sibawa akkattana atuwokku. Alémuna pura mitai pékkugi tonget-tongekka mateppe' lao ri Yésus Kristus sibawa mamaséiwi pada-padatta rupa tau. Muwissetto asabbarakekku. Purana muwita ricalla sibawa manrasa-rasaka. Muwisseng maneng iya kajajiyangngé ri iyya ri Antiokhia, ri Ikonium, sibawa ri Listra; sibawa muwisseng maneng iya uwanrasa-rasaiyé! Iyakiya Puwangngé passalama'ka polé ri iya manennaro. Mémeng sininna tauwé iya maéloé tuwo sibawa massompa enrengngé tuwo masséddi sibawa Kristus Yésus ricallai matu, sedangkang sining tau iya majaé sibawa sining pabengnguwangngé pédé' majai matu. Nabengnguwangngi mennang tau laingngé padahal ribengnguwang towi mennang. Iyakiya passalenna iko, Timotius, sitinajako tette' makkatenning risining pappagguruwang iya tongengngé iya puraé riyappagguruwang ri iko sibawa iya muwatepperi manengngé; saba' muwissengngi niga guru-gurummu. Harusu'i muwéngngerang makkedaé baiccu mupo muwissenni Kitta'é. Iyaro Kitta'é naullé mpérékko pappahang untu' lolongeng asalamakeng naolai teppe'é lao ri Yésus Kristus. Sininna iya tarokié ri laleng Kitta'é, napanurungngi Allataala sibawa makkéguna untu' mappagguruwangngi iya tongengngé, untu' pétangngariwi rupa tauwé sibawa pédécéngiwi iya salaé, enrengngé untu' paggurui rupa tauwé kuwammengngi natuwo situru élona Allataala. Nasibawang iyaro Kitta'é tau iya tumaningiyéngngi Allataala weddingngi ripassakke sibawa sukku untu' sininna rupanna jama-jamang iya makessingngé. Poléi matu paimeng Kristus Yésus ri linoéwé untu' madélékiwi sining tau iya tuwoé sibawa maté; namaéloi polé untu' mapparénta selaku Arung. Rimakkuwannanaro uwéllauwi sibawa masero ri iko ri yolona Allataala sibawa Kristus Yésus: Sitinajako mabbirittangngi karéba polé ri Allataalaro, sibawa matteru maddessa kuwammengngi naéngkalingai tauwé, maélogi mennang iyaré'ga dé'. Sitinajako patepperiwi tauwé, mappaitangngi iya salaé, sibawa mpéréngngi dorongang mennang. Paggurui tauwé sibawa sabbara. Saba' narapii matu wettunna dé'na namaélo tauwé tarima pappagguruwang iya tongengngé. Sibalé'na, naturusiwi matu mennang cinnana muto, sibawa paddeppungeng maéga guru untu' ripagguru gau'-gau' iya malunra'é naéngkalinga ri daucculinna. Natongkoi matu mennang daucculinna lao ri iya tongengngé, iyakiya napasangngi matu daucculinna lao ri pau-pau rikadongngé. Namuni makkuwaro, harusu'ko kuwasaiwi alému ri laleng keadaang muwi maga. Sabbara'ko ri laleng anrasa-rasangngé, jamai jamammu selaku pabbiritta Karéba Madécéngngéro sibawa pajoppai sikkessik-kessinna kewajibammu selaku pattumaninna Allataala. Passalenna aléku, narapini wettunna maéloka maté selaku akkarobangeng lao ri Allataala. Dé'na namaitta usalaiwi matu linoéwé. Purani uwaccowéri akkalaringngé sibawa makessing, enrengngé lettu'na ri garisi paccappurengngé. Tette'ka matinulu lao ri Kristus lettu paccappurenna. Namakkekkuwangngé hadiya apakalangngé tajekka. Ri Esso Kiyame', Puwangngé, Haking iya adélé'éro mabbéréyangngi matu iyaro hadiyaé lao ri iyya, nasaba tuwoka simadécéngeng sibawa Allataala. Na tenniya iyya bawang iya maéloé tarimai iyaro hadiyaé, iyakiya sininnato tauwé iya tajengngéngngi apolénna Puwangngé sibawa muddani senna'. Akkuragano mulao ri iyya masitta-sitta, saba' nasalaina' Démas nasaba naéloriwi linoéwé. Laoni ri Tésalonika. Kréskés laoni ri Galatia, sibawa Titus ri Dalmatia. Banna Lukas monro sibawakka. Duppaiwi Markus namutiwii lao kumaiyé saba' naulléi bantuka ri laleng jama-jamakku. Purani usuro Tikhikus lao ri Efésus. Rékko poléko, tiwii mantel iya usalaiyé ri Troas ri bolana Karpus. Tiwi towi bobbo-bobbo'ku, lebbi-lebbipi bobbo-bobbo iya riyébbué polé ri karettasa' bingkulangngé. Aléksander, panré tembagaéro purai napogau' gau'-gau' iya maja senna'é lao ri iyya. Puwangngé mpale'i matu situru pangkaukenna. Alému paimeng harusu matutu lao ri aléna, saba' naéwa senna'i birittatta. Wettunna bunge' upangolo untu' méwaiwi aléku, dé' muwi séddi tau ranrekka; nasalai manekka. Memmuwaré' Allataala dé' napasalai mennang ri laleng gau'éwé! Iyakiya Puwangngé ranrekka. Mabbéréi awatangeng angkanna uwulléi mabbirittangngi sininna Karéba Madécéngngéro, kuwammengngi naéngkalingai sininna tau tenniyaé Yahudi. Sibawa leppe'ka polé ri abala amaténgngé. Mémeng Puwangngé maélo leppessakka polé ri tungke' pakkuraga majaé lao ri iyya. Maéloi tiwika sibawa salama' ri laleng akkarungen-Na ri surugaé. Sitinajai Aléna ripakaraja mannennungeng! Aming. Sellekku lao ri Priskila sibawa Akwila enrengngé lao ri kaluwargana Onésiforus. Erastus monro ri Korintus, sibawa Trofimus usalaini ri laleng keadaang malasa ri Milétus. Akkuragano siullé-ulléna untu' polé riwettu dé'napa na wettu keccé'é. Ebulus, Pudés, Linus sibawa Klaudia massellengngi mennang lao ri iko; makkuwatoro sininna Saudara siateppereng laingngé. Tennapodo Puwangngé ranrekko. Tennapodo Puwangngé barakkakiwi Saudara-saudara! Salama, 1 Ana'ku Titus! Iyya, Paulus, mokii iyaé sure'é selaku atanna Allataala sibawa rasulna Yésus Kristus. Ripiléka sibawa risuro untu' tulungngi sining tau napilé Allataala kuwammengngi namancaji mawatang ri laleng teppe'na mennang. Harusu tokka pimpingngi mennang kuwammengngi naissengngi pappagguruwang iya tongengngé iya nappagguruwangngé agamata. Iyaro pappagguruwangngé nallalengi mamménasa makkedaé tarimaki matu atuwong tongengngé sibawa mannennungengngé. Allataala pura majjanciyangngi iyaro atuwongngé riwettu dé'napa nappammula wettué – na Allataala dé' nakkullé mabbellé. Ri wettu iya teppa'é, napannessai Allataala iyaro jancin-Na ri laleng pasen-Na. Iyaro pasenna purani nappaddettangeng ri iyya, sibawa uwabbirittangngi nasaba paréntana Allataala Pappassalama'ta. Titus, tonget-tongekko iyanaritu ana'ku, saba' iko sibawa iyya pada-pada mateppe' ri Kristus. Mamménasaka tennapodo Allataala Ambo'é sibawa Kristus Yésus Arung Pappassalama'ta, mabbéré barakka, sibawa asaléwangeng lao ri iko. Usalaiko ri Kréta kuwammengngi mulléi murusu'i gau'-gau' iya parellué riatoro'. Makkuwatoro, kuwammengngi muwakka pamimping-pamimping jema' ri tungke' kota. Na éngngerangngi matu iyaé panunju'-panunju'ku: Séddié pamimping jema' sitinajai séddi tau iya dé'é gaga cellana; harusu'i mappunnai séddi bawang bainé; ana'-ana'na harusu'i mateppe'ni ri Kristus sibawa tenniya iya riissengngé selaku ana' benna sibawa dé' nawedding riyatoro'. Pamimping jema'é iyanaritu tau iya murusu'éngngi jama-jamanna Allataala, dé' nawedding engka cellana. Dé' nawedding matempo iyaré'ga paccai-caireng, iyaré'ga pammabokeng, iyaré'ga napoji mallaga, iyaré'ga mammata dowi. Harusu'i masennang tarima tau ri bolana, napoji gau'-gau' iya makessingngé, naulléi tahangngi aléna, malempu, mapaccing sibawa taratoro'. Harusu'i makkatenning masse ri pappagguruwang iya weddingngé riyatepperi, pada-pada iya puraé riyappagguruwang lao ri aléna. Nanallalengiro naulléi pangajariwi tauwé naolai pappagguruwang iya tongengngé, sibawa mappaitangngi asalanna sining tauwé iya méwaéngngi. Saba' maéga tau iya pojiyéngngi maronta, lebbi-lebbipi sining tau iya riyolonaéro maggama Yahudiwi; nabengnguwangngi mennang sining tau laingngé sibawa omong kosonna. Sining tau pada-padaéro harusu'i ritutu' témunna, saba' napakacauwi mennang maéga kaluwarga sibawa sining pappagguruwang iya omong kosongngé. Napogau'i mennang iyaro banna nasaba maéloi sappa asarong iya dé'é nasipato! Engka naengka séddi nabinna muto mennang, iya assalennaé poléto ri Kréta, makkeda, “Sining tau Krétaé tuli pabbelléngngi, sibawa pada-padai olokolo' masekkangngé, iya mabuwajaé sibawa makuttu.” Aga iya napowadaé iyaro nabié mémeng tongengngi. Iyanaro saba'na harusu'ko mamparengngi mennang sibawa matedde; kuwammengngi natette mennang makkatenning ri pappagguruwang iya tongengngé sibawa dé'na nakkatenning ri pau-pau rikadonna Yahudié iyaré'ga peraturang-peraturang iya naébbué sining tau iya sampéyangngéngngi pappagguruwang iya tongengngéro. Sininna séuwa-séuwaé mapaccing lao risining tau iya mapaccingngé. Iyakiya lao risining tau iya macarépaé pikkiranna sibawa iya dé'é namateppe', dé' muwi séddi iya mapaccingngé, saba' pikkirang sibawa atinna mennang macarépani! Makkedai mennang makkedaé naissengngi mennang Allataala, padahal pangkaukenna mennang massakkarengngi. Mappakaciddi-ciddi mennang sibawa dé' namaélo turu'; mennang iyanaritu sining tau iya dé'é naulléi pogau'i séuwa iya makessingngé. Iyakiya iko, Titus, sitinajako mappagguruwangngi pappagguruwang iya teppa'é. Pangajariwi worowané iya macowaé, kuwammengngi nakuwasaiwi aléna, mapanré, sibawa tuwo selaku tau iya sipato'é ripakalebbi. Harusu towi mennang makkatenning ri pappagguruwang tongengngé iya polé ri Allataala, makkamasé sibawa sukku enrengngé manrasa sibawa sabbara. Makkuwatoro sitinajako pangajariwi sining makkunrai iya macowaé kuwammengngi na kédo-kédona mennang siturui sibawa iya sipato'é untu' tau iya tuwoé banna untu' Allataala. Dé' nawedding mennang pétenna'i tau laingngé, sibawa dé'to nawedding nacandu énungeng maseri. Harusu'i mennang mappagguruwangngi gau'-gau' iya makessingngé, kuwammengngi nasibawangngi iyaro naulléi mennang paggurui sining makkunrai maloloé untu' mamaséiwi lakkaié sibawa ana'-ana'é, mancaji mapanré, tuwo mapaccing sibawa mancaji ibu ruma tangga iya makessingngé iya tunru'é lao ri lakkainna. Nanallalengiro dé' gaga tau iya mulléngngi cellai biritta polé ri Allataala. Makkuwatoro, pangajariwi sining tau maloloé kuwammengngi naissengngi mennang makuwasaiwi aléna. Ri laleng sininna gau'é, sitinajako mancaji conto kédo-kédo iya makessingngé. Rékko mappagguruko, sitinajako malempu sibawa mattonget-tongeng. Pakéi ada-ada iya makessingngé, iya dé'é nawedding nacella tauwé, kuwammengngi naissengngi balimmu mancaji masirii nasaba dé' gaga gau'-gau' maja iya naullé mennang powada passaletta. Sining ataé harusu'i tunru' ri puwanna, sibawa sennangiwi atinna ri laleng sininna passalengngé. Dé' nawedding mennang mabbanta, iyaré'ga ménnau. Sitinajai mennang mappaitangngi makkedaé tuli kédo makessingngi sibawa matinulu, kuwammengngi nallalengi sipa'na mennanro, napojiwi tauwé pappagguruwangngé passalenna Allataala, Pappassalama'ta. Saba' purani nappaitang Allataala pammasé-Na untu' passalama'i sininna rupa tauwé. Iyaro pammaséna Allataala napagguruki kuwammengngi dé' tatuwona siéwa élona Allataala sibawa dé' nariyaccowéri élona linoé. Ripagguruki untu' tuwo ri laleng linoéwé sibawa missengngi makuwasaiwi alé, mapato sibawa matinulu lao ri Allataala. Makkekkuwangngé mattengngakki tajengngi Esso iya riyamménasaiyéro; ri Essoéro naitai matu linoé arajanna Yésus Kristus, iyanaritu Allataala Pobbatowaé sibawa Arung Pappassalama'ta. Purani nakkarobangeng Aléna untu' idi untu' paleppe'ki polé ri sininna jaé, sibawa pancajiki séddi umma' iya leppe'é polé ri dosaé, iya mancajiyé appunnangen-Na bawang, enrengngé mapato pogau'i makessingngé. Appagguruwangngi iya manennaro, sibawa pangajariwi enrengngé amparengngi sining tau méngkalingaékko sibawa penno akuwasang. Aja' muleppessangngi muwi séddi tau mita mariyawako. Paréngngerangiwi anggota-anggota jema'mu kuwammengngi natunru' mennang lao risining pamimpingngé sibawa tomakuwasana wanuwaé, enrengngé matinulu sibawa sadiya pogau'i tungke' pangkaukeng iya makessingngé. Powadangngi mennang kuwammengngi aja' nappétenna iyaré'ga mappangéwang sibawa muwi niga, sangadinna kuwammengngi nasipammasé-masé sibawa mabessa. Sitinajai mennang tuli malemma kininnawa lao ri sininna tauwé. Saba' riyolo idi paimeng madonggoto, pusa sibawa temmatinulu. Ripowataki rimaddupa-rupang napessué sibawa cinna'é, tuwoki sibawa niya'-niya' majaé sibawa mangémpuru, enrengngé sisullé sibenci. Iyakiya Allataala Pappassalama'ta nappaitangngi pammasé-Na sibawa akessingeng atin-Na lao ri idi. Napassalama'ki, tenniya nasaba puraki pogau'i séuwa iya makessingngé, sangadinna nasaba aléna muto mamaséiki. Napassalama'ki naolai Rohna Allataala, iya mpéréngngékki ajajiyang mabaru sibawa atuwong mabaru ri laleng cara nabissaitta. Natiri'i Allataala Roh-Na lao ri idi naolai Yésus Kristus, Arung Pappassalama'ta, kuwammengngi napolé ri pammaséna Yésus, simadécéngekki paimeng sibawa Allataala natalolongeng atuwong tongengngé sibawa mannennungengngé iya riyamménasaiyé. Tongeng senna' iyaé adaé. Uwéllauwi muteddeki gau'-gau'éwé, kuwammengngi nasining tau iya mateppe'é ri Allataala tonget-tongengngi makkuraga untu' pogau'i jama-jamang iya makessingngé sibawa makkégunaé untu' sininna tauwé. Abélaiwi sining addebbakeng iya dé'é nakkéguna, curita-curita appo-appongennaé, appangéwangengngé sibawa allagangngé passalenna hukkunna agamaé. Iya manennaro dé' gaga gunana sibawa dé' gaga sarona. Tau iya nassabariyé assisalang ri laleng jema'é, sitinajai muwampareng siseng iyaré'ga wékkaduwa; purairo aja'na musiwollompollong sibawa aléna. Muwisseng makkedaé tau pada-padaéro maja sibawa dosa-dosana pabuttiwi makkedaé pasalai. Ukirinna muwa Artémas iyaré'ga Tikhikus lao ri iko, akkurako masitta untu' lao ri iyya ri Nikopolis, saba' manniya'ka monro kuwaro ri wettu keccé'é. Akkuragano tonget-tongeng untu' bantui Zénas, ahli hukkungngéro, sibawa Apolos, kuwammengngi naulléi joppa sibawa dé' naakurangeng agi-agi. Sining tautta harusu'i magguru pogau'i gau'-gau' iya makessingngé kuwammengngi naulléi pennoiwi apparelluwanna iya napparelluwang senna'é; aja' narapii tuwo temmakkéguna. Sininna Saudara iya sibawangngékka, massellengngi ri iko. Palettukekki selletta lao ri sellao-sellaota iya siyateperengngé. Tennapodo Puwangngé barakkaki manengngi Saudara. Salama, Saudara Filémon, sellao sibawa sahaba'ta! Iyya, Paulus, séddiwi tau tahanang nasaba Kristus Yésus, silaong saudarata Timotius, mokii iyaé sure'é lao ri iko sibawa lao ri jema'é iya maddeppungengngé ri bolamu; makkuwatoro lao ri ana' daratta, Apfia sibawa sellao seperjuwangetta, Arkhipus. Mamménasaki tennapodo Allataala Ambo'ta sibawa Puwang Yésus Kristus mabbéré barakka sibawa asaléwangeng lao ri iko. Sises-siseng massempajakka, uteppui asenna Saudara sibawa mattarima kasi lao ri Allataala. Saba' uwéngkalingai makkedaé tonget-tongengngi Saudara mateppe' lao ri Puwang Yésus sibawa mamaséiwi sininna umma'na Allataala. Massempajakka tennapodo assilessuretta selaku tau mateppe' powassélé'i matu pappéjeppu iya lebbi battowaé nasaba sininna barakka iya riyappunnangiyé nasaba masséddiki sibawa Kristus. Saudara Filémon, pammasému lao ri sininna umma'na Allataala, rennuika sibawa mpérékka sumange'! Sininna umma'na Allataala marennu nasaba Saudara. Rimakkuwannanaro, selaku séddi Saudara iya siyatepperengngé, weddissa uparéntang Saudara untu' pogau'i aga iya harusu'é napogau' Saudara. Iyakiya nasaba uwamaséiwi Saudara, iyya maréllauma bawang. Iyya'é séddi tau macowa namakkekkuwangngé mattengngang ritahang ri laleng tarungkué nasaba Kristus Yésus. Iyya, Paulus, pangolo séuwa paréllaung lao ri iko passalenna Onésimus, ana'ku ri laleng Kristus. Saba' ri laleng tarungkué mancajika ambo' rohaninna. Riyolo dé' nakkéguna untu'mu, iyakiya makkekkuwangngé makkégunani, tenniya bawang untu'mu, iyakiya untu' iyya'to. Makkekkuwangngé iyaro tau uwamaséiyé ukiringngi lisu ri iko. Sitongenna maéloka tahangngi sibawakka kuwaé selaku passalemmu, kuwammengngi weddingngi nabantuka, sipongenna ritahakka ri laleng tarungkuéwé nasaba mabbirittangngi Karéba Madécéng polé ri Allataala. Iyakiya dé' umaélo pogau' agi-agi rékko dé'pa nasitujuiwi Saudara. Lebbi upojiwi rékko napogau'i Saudara sibawa macenning; dé' umaélo passako. Naullé massarangngi Onésimus polé ri Saudara untu' dé' namaitta kuwammengngi weddingngi saudara nalolongeng paimeng lettu mannennungeng. Makkekkuwangngé tenniya banna séddiwi ata untu' Saudara; lebbi na iyaro. Iyanaritu pada-padatta tau Kristéng iya riyamaséiyé nasaba Kristus. Makkéguna senna'i untu' iyya, apalagi untu'mu. Tentu makkéguna senna'i, muwi selaku ata iyaré'ga séddi Saudara ri laleng Puwangngé! Rimakkuwannanaro, nasaba Saudara nangga'ka sellao pada-pada Kristéng, tarimani paimeng Onésimus pada-pada natarimaku Saudara. Rékko pasalai iyaré'ga makkinrengngi lao ri iko, leppessanni iyya tanggungngi iya manennaro. Nah, makessinni aléku mokii kuwaé: Iyya, Paulus, maélo paleppe' manengngi. (Tentu dé' naparellu uwapparéngngerangeng makkedaé aléna Saudara mappunnai inreng ri iyya, iyanaritu atuwong barumu selaku tau Kristéng.) Rimakkuwannanaro, nasabbing Puwangngé, coba tulukka; pérennuiwi atikku selaku pada-padatta Saudara ri laleng Kristus. Uwokii iyaé sure'é nasaba teppe' makkedaé Saudara maélo pogau'i aga iya uwéllauwé. Mala uwisseng Saudara maéloi pogau'i lebbi na iyaro. Ri lalennaro, tulungngi passadiyangekka kamara' ri bolamu, saba' mamménasaka Allataala tarimai sempajanna maneng Saudara sibawa tiwika lisu ri iko. Epafras, iya engkaé sibawakka ri laleng tarungkué nasaba Kristus Yésus, masselleng lao ri iko. Tarima towi sellenna sellao-sellaoku: Markus, Aristarkhus, Démas sibawa Lukas. Tennapodo Puwang Yésus Kristus barakkakiko. Salama, Wettu riyolo maléwe' senna' Allataala mabbicara lao ri néné-nénéta naolai nabi-nabié sibawa pakéi maddupa-rupang cara. Iyakiya ri wettu paccappurengngéwé mabbicarai lao ri idi naolai Ana'-Na. Naolai Ana'-Naé napancajiwi Allataala sininna alangngé. Sibawa purani napattentu Allataala makkedaé iyatonaé Ana'-Na iya mappunnaiyé ha' mappunnaiwi sini-sininnaé. Aléna ritu mattapparengngi arajanna Allataala iya millakkillangngé; Aléna ritu gambara'na Allataala iya manessaé. Aléna tona piyarai akkalépunna alangngéwé ri laleng saddan-Na iya makuwasa senna'é. Puranana napakkullé rupa tauwé untu' ripaleppe polé ri dosa-dosana mennang, natudangini kadéra apparéntangngé ri surugaé silaong Allataala, Panguwasa iya kaminang matanré. Iyaro Ana'é lolongengngi tudangeng iya mabélaé lebbi tanré naiya malaéka'é, sibawa aseng iya riwéréngngéngngi ri Allataala lao ri Aléna mabéla towi lebbi malebbina naiya aseng iya riwéréngngéngngi malaéka'é. Dé' naengka nakkeda makkuwaé Allataala muwi lao riséddié malaéka', “Ikona Ana'-Ku; iya essoéwé Umancaji Ambo'-Mu.” Dé'to naengka nakkeda makkuwaé Allataala passalenna muwi malaéka' niga, “Maélo-Ka mancaji Ambo'na, na aléna mancaji matu Ana'-Ku.” Iyakiya wettunna Allataala nasuro Ana'-Na iya macowaé muttama ri linoéwé, makkeda makkuwaiyé Allataala, “Sininna malaéka'na Allataala waji'i sompai iyaro Ana'é.” Passalenna sining malaéka'é, makkeda makkuwaiyé Allataala, “Naébbui Allataala sining malaéka'-Na mancaji anging, sibawa sining pattumanin-Na mancaji luwa' api.” Iyakiya lao ri Ana'éro, makkedai Allataala, “Kadéra arajam-Mu, oh Allataala, mannennungengngi matu! Apparéntangem-Mu iyanaritu apparéntang iya adélé'é. Napoji adélékengngé, sibawa nabenciwi acéko-cékongngé; iyanaro saba'na Allataala, Allataala-Mu, napilé-Ko sibawa mpérék-Ko alebbireng iya mappapolé ariyo-riyong, napakacauri sellao-sellao-Mu.” Makkeda towi Allataala, “Idi, Puwang, bunge'-bunge' pancajiwi tanaé, sibawa alémuto mébbui langié. Iya manennaro lennye'i matu, sibawa mancaji malaung pada-pada pakéyangngé; iyakiya Iko dé' pinrana matu. Alangngé lollong lise'na Muleppiwi matu pada-pada wajué, na-Musulléiwi matu sibawa laingngé. Iyakiya Iko dé' naengka mutappinra matu, sibawa atuwom-Mu dé' naengka nacappu matu.” Dé' naengka nakkeda makkuwaé Allataala muwi lao ri malaéka'é, “Tudanno ri seddé atauk-Ku, narapi Uwébbu sining balimmu tunru' ri iko.” Rékko makkuwaitu, aga sitongenna iyaro sining malaéka'é? Mennang iyanaritu roh-roh iya tumaningiyéngngi Allataala, sibawa iya risuroé untu' tulungngi sining tau iya maéloé tarima asalamakeng. Iyanaro saba'na na harusu'ki pédé' mattonget-tongeng makkatenning risining pappagguruwanna Allataala iya puraé riyéngkalinga, kuwammengngi aja' tasalaiwi atepperetta. Sining paseng iya napalettu'é sining malaéka'é lao ri néné-nénéta manessani tongeng, na tau iya dé'é naturusiwi iyaré'ga napatoiwi tarimai pahukkungeng iya sicoco'é. Apalagi nasibawang asalamakeng iya lebbi héba'é naiya sining pasengngéro! Rékko dé' tajampangiwi asalamakengngéro, tentuni dé' taleppe matu polé ri pahukkungengngé. Saba' Puwangngé muto ritu iya bunge'-bunge'é mappallebbangengngi asalamakengngéro, nasining tau iya bunge'-bunge'é méngkalingai purani napabutti atongengenna lao ri idi. Ri lainnaéro, turu'i Allataala péwatangiwi asabbiyanna iyaro sining tauwé ri laleng napakangkana maddupa-rupang anu makalallaing enrengngé gau'-gau' iya dé'é padanna kuwaéttopa mabbagé-bagéyangngi sining pabbéré polé ri Rohna Allataala situru élo-Na muto. Sining malaéka'é dé' nalolongeng akuwasang polé ri Allataala untu' paréntai lino baru iya mangoloé, iyanaritu lino iya mattengngangngé ribicaraé. Sibalé'na, riséuwaé bagiyang ri laleng Kitta'é tarokii makkuwaé, “Aga iyaro rupa tauwé, oh Allataala, angkanna maéloki méngngerangngi? Rupa tauwé banna rupa tau bawang, iyakiya mujampangiwi! Untu' wettu iya cinna'é Mupancajiwi céddé lebbi ri yawa naiya malaéka'é. Tawéréngngi tudangeng iya malebbié sibawa marajaé, enrengngé pancajiwi makuwasa ri yasé'na sininna séuwa-séuwaé.” Nah, rékko ripowadai Allataala pancajiwi rupa tauwé “makuwasaiwi sininna séuwa-séuwaé”, iyaro bettuwanna makkedaé dé'gaga muwi séddi iya dé'é na ri yawana akuwasanna rupa tauwé. Namuni makuwasai rupa tauwé ri yasé'na sininna séuwa-séuwaé. Iyakiya idi purani riita Yésus makuwasaiwi! Ripancajiwi céddé lebbi ri yawa naiya malaéka'é untu' wettu cinna'é, kuwammengngi ri laleng akessingeng atinna Allataala weddingngi maté untu' sininna rupa tauwé. Riitani makkekkuwangngé riwéréng tudangeng iya malebbié sibawa marajaé nasaba purai manrasa-rasa gangka maté. Mémeng sipato'ni Allataala – iya pinruéngngi sininna séuwa-séuwaé untu' akkatta-Na muto – mébbui Yésus pappassalama' iya sukkué naolai anrasa-rasangngé. Nallalengiro naulléi Allataala mérai maéga tau untu' maccowé ripakaraja silaong Yésus. Saba' Aléna pattimpa laleng lao ri mennang untu' weddingngi ripassalama'. Yésus pépaccingiwi rupa tauwé polé ri dosa-dosana mennang; na Aléna iya pépaccingiyéngngi, enrengngé mennang iya ripépaccingiyéro, pada-padai mappunnai séddi Ambo'. Iyanaro saba'na Yésus dé' namasiri mangakuiwi mennanro selaku saudara-saudara-Na. Makkedai Yésus lao ri Allataala, “Maéloka mabbirittangngi lao ri saudara-saudara-Ku passalenna Iko. Maélo-Ka poji-Ko ri laleng addeppu-deppungenna mennang.” Makkeda towi Yésus, “Maélo-Ka mamménasa lao ri Allataala.” Sibawa makkeda towi, “Iyanaé Iyya, silaong ana'-ana' iya puraé nabbéréyang Allataala lao ri Iyya.” Nasaba sining tau iya nateppué iyaro ana'é, iyanaritu mahlu' tolino iya weddingngé maté, na Yésus muto mancaji pada sibawa mennang enrengngé tuwo ri laleng keadaang tolinoé. Napogau'i makkuwaéro, kuwammengngi nasibawang amatén-Na naulléi mancuru'i Ibillisi' iya makuwasaiyéngngi amaténgngé. Nasibawang caraéro napalettu'i sining tau iya sillampéé umuru'na ripowata nasaba métaui ri amaténgngé. Manessani makkedaé tenniya malaéka' iya Natulungngé, sangadinna wijanna Abraham. Bettuwanna iyaé, makkedaé harusu'i mancaji pada-pada saudara-Na ri laleng sininna gau'é. Nanallalengiro weddingngi mancaji Imang Lompo iya matinulué sibawa maressé babuwaé. Nasaba pattumaninnaro, weddingngi riyaddampengeng dosa-dosana tolinoé. Sibawa nasaba aléna pura manrasa-rasa enrengngé ricobai, nanaulléi tulungngi sining tau iya nakennaé paccobang. Saudara-saudara pada-padatta Kristéng iya puraé riyobbito ri Allataala! Coba pikkiri'i malamul-lamung passalenna iyaé Yésus! Allataala suroi Aléna banna untu' mancaji Imang Lompo ri laleng agama iya riyaccowériyé. Matinului lao ri Allataala iya puraé piléi untu' jama-jamangngéro pada-padato Musa riyolo matinulu pogau'i jama-jamanna ri Bolana Allataala. Iyakiya Yésus sipato'i lolongeng alebbireng iya lebbi battowaé naiya Musa. Saba' tau iya patettongngé bola harusu'i lolongeng alebbireng iya lebbi battowaé naiya iyaro bolaé. Mémeng tungke' bola engka patettongngi, iyakiya iya patettongngéngngi sininna séuwa-séuwaé iyanaritu Allataala muto. Matinului Musa selaku pattumani ri laleng Bolana Allataala enrengngé palettu'i gau'-gau' iya maéloé nappaddissengeng Allataala ri wettu mangoloé. Iyakiya Kristus matinului selaku Ana' iya tanggung jawakiyéngngi Bolana Allataala. Na idi'naé Bolana Allataala, rékko tette'ki masumange' sibawa tette' mateppe' untu' lolongengngi aga iya tamménasaiyé. Rimakkuwannanaro, pada-pada adanna Rohna Allataala, “Rékko iyaé essoé muwéngkalingai saddanna Allataala, aja' mumatedde ati, pada-pada toriyolomu, wettunna mennang maronta lao ri Allataala, enrengngé mojiwi Allataala ri padang kessi'é. ‘Kuwaro nacobai-Ka toriyolomu, enrengngé naoji-Ka,’ adanna Allataala, ‘padahal purani naita mennang pangkaukek-Ku patappulo taung ittana.’ Iyanaro saba'na Umacai lao ri mennang sibawa makkeda, ‘Tuli dé' namatinulu mennang, sibawa dé' namacinna turusiwi parénta-Ku.’ Macai-Ka sibawa mattanro, ‘Dé' nauttama matu mennang ri wanuwaéro untu' lolongeng appésaungeng.’ ” Saudara-saudara, atutuko aja' lalo naengka ri yelle'mu séddi tau iya maja makkuwaéro atinna enrengngé dé' namateppe', angkanna balé'i sibawa mabélaiwi Allataala iya tuwoé! Jaji, kuwammengngi nadé' muwi séddi tau polé ri yelle'mu iya ribengnguwangngé ri dosaé angkanna naéwai Allataala, sitinajako sipangajari esso-esso ri wettu tuwota mupa ri laleng wettu iya riteppué “Essoéwé” ri laleng Kitta'é. Idi manengngé iyanaritu siperjuwangekki sibawa Kristus, assaleng lettu'ki ri paccappurenna makkatenning masse'i ateppereng iya riyappunnaiyé ri pammulanna. Iyanaé taroki ri laleng Kitta'é, “Rékko iyaé essoé muwéngkalingai saddanna Allataala, aja' mumatedde ati, pada-pada toriyolomu, wettunna maronta lao ri Allataala.” Nah, niga sining tau iya méngkalingaéngngi saddanna Allataala nainappa maronta lao ri Aléna? Tenniyaga iyanaritu sininna tau iya napimpingngé Musa massu polé ri Maséré'? Na lao riniga Allataala macai patappulo taung ittana? Tenniyaga lao ri mennang iya madosaé, iya mabuwangngé maté ri padang kessi'é? Wettunna Allataala mattanro makkuwaé, “Dé' nauttama matu mennang ri onrong appésaungek-Ku” – niga palé iya nakkattaiyé Allataala? Tenniyaga, iya nakkattaiyé iyanaritu sining tau iya maronta'é lao ri Allataala? Ripahanni makkekkuwangngé makkedaé dé' naulléi mennang muttama, nasaba dé' mennang namateppe' ri Allataala. Nah, kajajiyang mupi jancinna Allataala, sibawa riwérékki matu onrong untu' mappésau. Jaji, sitinajaki jagaiwi kuwammengngi aja' namuwi séddi tau polé ri yelle'mu iya manessaénna dé' napéneddingiwi onrong appésaungeng iya najjanciyangngéro. Saba' iyaro Karéba Madécéngngé purani riyabbirittang ri idi pada-pada lao ri mennang. Namuni lao ri mennang, iyaro birittaé dé'gaga gunana. Saba' wettunna mennang naéngkalinga, dé' mennang namateppe'. Iyakiya idi iya mateppe'é tarimai onrong appésaungeng iya najjanciyangngé Allataalaro. Iyaro sicoco'i sibawa aga iya napowadaé Allataala, makkuwaé, “Macai-Ka sibawa mattanro, ‘Makkedaé dé' nauttama matu mennang ri onrong appésaungek-Ku.’ ” Makkeda makkuwairo Allataala namuni jama-jaman-Na tépuni sipongenna napancaji linoéwé. Saba' passalenna esso mapitué, engka taroki ri laleng Kitta'é makkuwaé, “Ri esso mapitué mappésauni Allataala polé ri sininna jama-jaman-Na.” Passalenna iyaro gau'é riyokii makkuwaé, “Dé' nauttama matu mennang ri onrong appésaungek-Ku.” Jaji mennang iya bunge'-bunge'é méngkalingai biritta passalenna Karéba Madécéngngéro, dé' natarima onrong appésaungeng nasaba dé' mennang namateppe'. Rékko makkuwaitu manessani makkedaé engka sining tau laing iya weddingngé tarimai onrong appésaungengngéro. Saba' Allataala pura pattentui séddi esso iya laingngéssi, iya riteppué “Essoéwé”. Mattaut-taung ri munrinna Allataala mabbicara passalenna gau'éro naolai Daud, ri laleng aya'éwé onna, “Rékko iya essoéwé muwéngkalingai saddanna Allataala, aja' mumatedde ati.” Rékko ébara'na purani natiwi Yosua iyaro sining tauwé muttama ri onrong appésaungeng iya najjanciyangngé Allataala, tentu Allataala dé'na nabbicarana passalenna séddi esso laingngé. Jaji untu' umma'na Allataala engka mupa janci untu' mappésau pada-pada Allataala mappésau ri esso mapituéro. Saba' tau iya muttama'é ri onrong appésaungeng iya najjanciyangngé Allataala lao ri alénaro, mappésau towi matu polé ri sininna jama-jamanna, pada-padato Allataala. Rimakkuwannanaro, laono mai takkuraga tonget-tongeng untu' muttama ri onrong appésaungeng iya najjanciyangngé Allataalaro. Aja' lalo narapii muwi séddi tau polé ri idi dé' nakkéwassélé' pada-pada mennang riyolo, nasaba dé' namateppe' ri Allataala. Ada-adanna Allataala iyanaritu ada-ada iya tuwoé sibawa mawatang; lebbi tarengngi naiya peddang matareng walié. Iyaro ada-adaé mattoddo'i narapi pakkasésénna nyawaé sibawa roh-é; narapi pakkasésénna padduppa-duppangngé sibawa uta'na buku-bukué, angkanna naisseng silamul-lamunna pikkirang sibawa niya' atinna rupa tauwé. Dé'gaga muwi séddi mahlu' iya tassubbué polé ri pakkitanna Allataala. Sininna séuwa-séuwaé mallusu-lusui sibawa tabbukka ri yolo-Na. Sibawa harusu'ki mabbéré tanggung jawa' ri Aléna. Iyanaro saba'na harusu'ki makkatenning masse ri angakungeng atepperetta. Saba' mappunnaiki Imang Lompo iya battowaé, iya muttama'énna lettu ri yolona Allataala – Aléna ritu Yésus Ana'na Allataala. Iyaro Imang Lompota tenniya imang iya dé'é naulléi maccowé péneddingiwi sining alemmatta. Sibalé'na, purani ricobai ri sininna gau'é, pada-pada muto idi; banna Aléna dé' napogau' dosa! Rimakkuwannanaro, laono mai sibawa penno abaraningeng mangolo ri Allataala iya mapparéntaé sibawa makessing ati. Namaséiki matu Allataala sibawa barakkakiki kuwammengngi lolongekki pattulung ri wettunna. Tungke' imang lompo ripiléi polé ri yelle'na umma'é, sibawa riyakka untu' tumaningiwi Allataala selaku wakkélé'na mennang. Jamanna iyanaritu makkasuwiyangengngi lao ri Allataala sining pabbéréna sibawa akkarobangeng-akkarobangenna untu' riyaddampengenna dosaé. Iyaro imang lompoé malemmai ri laleng maéga passaleng, iyakiya mala nasaba iyaro naweddingngi namalemma kininnawato lao risining tau iya dé'é naissengngi agi-agi sibawa iya pusaé lalenna. Sibawa nasaba malemmai aléna, na harusu'i makkasuwiyangeng akkarobangeng, tenniya bawang nasaba dosa-dosana umma'é, iyakiya nasaba dosa-dosanato aléna. Dé'gaga séddi tau iya aléna muto makkai aléna mancaji imang lompo. Mancajiwi imang lompo tauwé, rékko Allataala mobbii untu' iyaro – pada-pada muto Harun. Makkuwatoro Kristus. Dé' nakkai Aléna mancaji Imang Lompo. Allataala muto makkai. Makkedai Allataala ri Aléna, “Ikona Ana'-Ku: iyaé essoé umancaji Ambo'mu.” Ri onrong laingngé makkeda towi Allataala, “Iko iyanaritu imang mannennungeng, pada-pada Imang Malkisédék.” Wettunna Yésus tuwo ri linoéwé, massempajangngi enrengngé maréllauwi sibawa gora kuwaéttopa teri lao ri Allataala, iya mullé mappassalama' polé ri amaténgngé. Nasaba tunru'i ri Allataala sibawa mappakalebbi, nariyéngkalingai. Yésus iyanaritu Ana' Allataala, iyakiya muni makkuwaro, maggurui mancaji matinulu naolai anrasa-rasan-Na. Na puranana ripancaji pappassalama' iya sukkué, mancajiwi assalenna asalamakengngé iya mannennungengngé lao ri sininna tau iya matinulué ri Aléna, sibawa muwi Allataala pannessa towi selaku Imang Lompo, pada-pada Imang Malkisédék. Passalenna tudangenna Yésus selaku Imang Lompo, engka maéga iya parellué riyappaissengeng lao ri iko, iyakiya mawatang untu' pakatajangngi saba' matengnge' senna'ko mappahang. Sitongenna wettummuna untu' mancaji guru, iyakiya annessana parellu mupo magguru polé ri tau laingngé passalenna poko'-poko' mammulangngé sining pappagguruwanna Allataala. Dé'pa muwulléi tarima anré iya matedde'é; harusu mupo ménung susu bawang. Tau iya ménungngé mupa susu, bettuwanna ana'lolo mupi; dé'pa nappunnai pangalamang passalenna aga iya tongengngé sibawa aga iya salaé. Inanré iya matedde'é, iyanaritu sining tau battowaé iya nasaba pangalamannaé, naulléi pasilaingengngi kéga makessing sibawa kéga maja. Rimakkuwannanaro, laono mai aja' banna puriyatiwi poko'-poko' mammulanna pappagguruwatta. Makessingengngi majuki ri pappagguruwang iya lebbi matterué passalenna atuwong Kristéng secara mattanggung jawa'é sibawa aja' tapakkolingngi paimeng pappagguruwang bunge'-bunge'é makkedaé harusu'i tauwé mappésau pogau'i gau'-gau' iya dé'é nakkéguna sibawa harusu mateppe' lao ri Allataala, iyaré'ga pappagguruwang bunge'-bunge'é passalenna acemméngengngé iyaré'ga passalenna palénne'i limaé ri yasé'na sining tauwé, iyaré'ga passalenna atuwongngé paimeng puranana amaténgngé iyaré'ga pahukkungeng iya mannennungengngé. Laono mai, rékko napuwéloi Allataala, tamaju ri pappagguruwang iya lebbi matterué. Saba', sining tau iya salaiyéngngi atepperenna, dé'na namungking ripimpinna lisu. Riyolo mennang engkai ri laleng tajang polé ri Allataala, enrengngé péneddingiwi pabbéré-Na polé ri surugaé. Turu' toni mennang rikuwasai ri Rohna Allataala. Naisseng mennang polé ri pangalamanna makkedaé iyaro ada-adanna Allataala makessingngi, sibawa purani napérasa mennang sining pammasé iya pennoé akuwasang polé ri wettu iya mangoloé. Iyakiya purairo nasalaiwi mennang atepperenna! Pékkugi makkulléi ripimping mennang lisu untu' toba'si polé ri dosa-dosana. Saba' mattengngangngi mennang nasallisi Ana'na Allataala sibawa mébbui ripakatu-Na ri yolona tau maégaé. Tana iya nattemmekiyé uwai bosi iya biyasaé teppa ri yasé'na, nainappa powassélé' tanet-taneng iya makkégunaé untu' tau iya jamaéngngi, iyaro tanaé nabarakkakiwi Allataala. Iyakiya rékko iyaro tanaé powassélé'i ariya sibawa aju-kajungngé maddorié, iyaro tanaé dé'na gaga gunana sibawa natanroiwi matu matti Allataala sibawa angkanna ritunui matu gangka cappu. Iyakiya Saudara-saudara iya riyamaséiyé, namuni makkeda makkuwaki'ro, iyakiya mateppe'ki passalemmu. Mateppe'ki makkedaé purani mutarima gau'-gau' iya makessingngé iyanaritu barakka-barakka iya sinrupaé bagiyang polé ri asalamakemmu. Allataala tenniya Allataala iya dé'é na adélé'. Dé' nallupaiwi aga iya mupogau'é lao ri Aléna, sibawa pammasé iya muwappitangngé lao ri Aléna wettunna mutulung Saudara-saudara siatepperengngé, riyolo sibawa makkekkuwangngé. Macinna senna'i kuwammengngi na mutungke-tungke matteru masumange' lettu paccappureng, angkanna mutarima aga iya muwamménasaiéro. Dé' taéloriko makuttu. Iyakiya macinnaki kuwammengngi mutuwo pada-pada sining tau iya tarimaéngngi aga iya najjanciyangngé Allataala, nasaba mateppe'i ri Aléna sibawa nasaba mattajengngi sibawa sabbara. Wettunna Allataala majjanci lao ri Abraham, mattanroi makkedaé maéloi pogau'i aga iya puraé najjanciyang. Nasaba dé'gaga iya lebbi matanré naiya Allataala, nattanrona ri laleng asen-Na muto. Makkedai, “Majjanci-Ka maélo barakkakiko sibawa mébbui wija-wijammu mancaji maéga.” Mattajenni Abraham sibawa sabbara, nanatarimani aga iya najjanciyangngé Allataala lao ri aléna. Rékko mattanroi tauwé, mattanroi ri laleng asenna tau laingngé iya lebbi matanré naiya aléna, na iyaro tanroé napaccappa'i sininna abbantangngé. Maéloi Allataala teddekiwi lao risining tau iya tarimaéngngi jancin-Na, makkedaé dé' natappinra matu rancana-Na. Iyanaro saba'na nanatambaiwi tanro ri jancin-Naro. Iyaro duwaé passaleng dé' nawedding tappinra; dé' namakkullé mabbellé Allataala passalenna jancin-Na sibawa tanro-Na! Rimakkuwannanaro, idi iya mallinrungngénna ri Allataala, riwérékki dorongang masero untu' makkatenning masse ri paddennuwang iya mallebba'é ri yolota. Iyaro paddennuwatta pada-padai balangoé iya malamung senna'é tattaneng sibawa sinrupai akkatenningeng iya masse'é sibawa amangngé lao ri atuwotta. Iyaro paddennuwangngé nabettui kaing paddenrinna Bili' Pommapaccingngé ri Bolana Puwangngé ri surugaé. Purani nawajikekki Yésus lalengngé lao ri onrongngéro, sibawa purani muttama kuwaro mancaji Imang Lompota lettu mannennungeng pada-pada Imang Malkisédék. Iyaé Malkisédék iyanaritu arung polé ri Salém sibawa imanna Allataala Iya Pommatanré. Wettunna Abraham lisu polé ri ammusurengngé caui sining arungngé, poléi Malkisédék duppaiwi sibawa barakkakiwi. Nanabbéréyanni Abraham lao ri Malkisédék tawa seppulona polé ri sininna iya narappaé. (Aseng Malkisédék bettuwanna, bunge'-bunge'na, “Arung Adélé'é”; sibawa nasaba arungngi ri Salém, makkébettuwang towi asenna “Arung Saléwangeng”.) Passalenna iyaé Malkisédék dé'gaga pappakatajang muwi kégi makkedaé mappunnaiwi ambo' iyaré'ga indo' iyaré'ga néné; dé'to gaga pappakatajang passalenna ajajiyanna, iyaré'ga amaténna. Pada-padai Ana'na Allataala; aléna iyanaritu imang iya mannennungengngé. Jaji, ritani kuwaé pékkugi loppona iyaé Malkisédék; makkuwamani loppona angkanna Abraham, ambo'na toriyolona bangsata, nawéréngngi tawa seppulona polé ri sininna séuwa-séuwaé iya nalolongengngé polé ri ammusurengngéro. Ri laleng hukkunna agama Yahudié ripattentui makkedaé sining imang wijanna Léwié harusu'i léléi tawa seppulona polé ri pallolongenna umma' Israélié, iyanaritu saudara-saudarana mennang, namuni mennang pada-padai wija-wijanna Abraham. Malkisédék tenniya wija-wijanna Léwi, iyakiya tarima towi tawa seppulona polé ri sininna iya narappaé Abraham, sibawa barakkaki towi Abraham iya puraé tarima janci-janci polé ri Allataala. Mémeng dé' nawedding ribanta makkedaé tau iya ribarakkakiyé iyanaritu lebbi riyawai naiya tau iya pabarakkakiyé. Sining imang iya tarimaéngngi iya rilélé tawa seppuloéro iyanaritu sining tau iya weddingngé maté. Iyakiya manuru Kitta'é, Malkisédék iya tarimaé pabbéré tawa seppulo bagiyanro iyanaritu tau iya tette'é tuwo. Wedding ripowada, makkedaé Léwi – iya wijannaé lélé tawa seppulo bagiyang polé ri umma' Israélié – mpaja towi bagiyangngéro naolai Abraham, ri wettunna Abraham mpajai lao ri Malkisédék. Namuni dé'pa nawajai Léwi, iyakiya wedding ripowada engkani ri laleng tubunna Abraham néné-nénéna, ri wettunna Malkisédék siruntu sibawa Abraham. Ri yawa pappimpinna sining imang Léwié, riwéréngngi umma' Israélié hukkunna agama Yahudié. Nasaba iyaro sining imang Léwié riyolo dé' naulléi pogau'i sibawa sukku aga iya harusu'é napogau', sibawa harusu engka imang laing, iyanaritu pada-padaé Imang Malkisédék, sibawa dé' napolé ri golongang Imang Harun! Nah, rékko tappinrai tudangenna sining imangngé, harusu towi tappinra, hukkunna agama Yahudié. Iya nakkattaiyé kuwaé iyanaritu Puwatta: Poléi ri suku laingngé, sibawa dé'pa naengka muwi séddi tau polé ri sukun-Na majjama selaku imang. Sininna tauwé naisseng makkedaé assalenna Puwatta poléi ri suku Yéhuda; na Musa dé' naengka nateppui iyaro sukué wettunna mabbicara passalenna sining imangngé. Passaleng iya ribicaraéwé lebbi manessai paimeng, ri laleng mompona séddi imang laing iya pada-padaé Malkisédék. Riyakkai mancaji imang, tenniya nasaba peraturang-peraturang tolino, sangadinna poléi ri atuwonna iya makuwasaé sibawa iya dé'é gaga paccappurenna. Saba' ri laleng Kitta'é ripowadai, “Iko iyanaritu imang mannennungeng, pada-pada Imang Malkisédék.” Jaji, makkekkuwangngé peraturang iya malaungngé ri palibenrénni, saba' dé' namawatang sibawa dé' nakkéguna. Hukkunna agama Yahudié dé' naulléi mébbui muwi séuwa mancaji sukku. Iyanaro saba'na nariwérékki makkekkuwangngé séuwa amménasang iya lebbi makessingngé; nanallalengiro nataulléi maddeppériwi Allataala. Iyatopa paimeng, iya manennaro nasibawangngi tanro polé ri Allataala. Dé'gaga tanro pada-padaéro, wettunna sining imang iya laingngéro riyakka. Iyakiya Yésus riyakkai mancaji imang paké tanro, wettunna Allataala makkeda lao ri Aléna, “Purani mattanro Puwangngé, nadé' napinrai matu attangen-Na, ‘Iko iyanaritu imang mannennungeng.’ ” Nasibawatto iyaé mancaji boro'i Yésus untu' séuwa assijancingeng iya lebbi makessingngé. Engka mupa séddi passaleng: iyaro sining imang iya laingngé engka maéga, saba' tungke'-tungke' mennang matéi angkanna dé' naulléi patterui jabatanna. Iyakiya Yésus tuwoi mannennungeng, jaji jabatan-Na selaku imang dé' nalélé ri tau laingngé. Rimakkuwannanaro lettu mannennungeng naulléi Yésus passalama'i sining tau iya laowé ri Allataala naolai Aléna, saba' tuwoi mannennungeng untu' méllauwi ri Allataala untu' sining tauwéro. Jaji, Yésusnaro ritu Imang Lompo iya tapparelluwangngé. Mapaccingngi: ri Aléna dé'gaga asalang iyaré'ga muwi dosa aga. Ripallaingngi polé risining tau madosaé, sibawa ripaénré'i lettu ri onrong iya lebbi matanré polé ri sininna langié. Dé' napada-pada sining imang lompo laingngé, iya esso-essoé harusu makkasuwiyangeng akkarobangeng nasaba dosa-dosa aléna riyolo, nappa nasaba dosa-dosana umma'é. Yésus makkasuwiyangengngi akkarobangengngé siseng bawang lettu mannennungeng, wettunna nakkasuwiyangeng Aléna selaku akkarobangeng. Hukkunna agama Yahudié makkai sining tau iya dé'é nasukku mancaji sining imang lompo. Iyakiya rimunri polé ri hukkung-hukkungngéro, mébbui Allataala assijancingeng sibawa tanro makkedaé nakkai selaku Imang Lompo, Ana' iya puraé mancaji Pappassalama' iya sukkué lettu mannennungeng. Poko'na sininna abbicarangngéwé iyanaritu: Mappunnaiki Imang Lompo iya pada-padaéro, iya tudangngé mapparénta silaong Allataala Pobbattowaé ri sururugaé. Najamai jamangngé selaku Imang Lompo ri Bili' Pommapaccingngé, iyanaritu ri laleng Kémana Puwangngé iya tongengngé, iya napatettongngé Puwangngé, tenniya polé ri tolinoé. Tungke' imang lompo riyakkai untu' makkasuwiyangengngi akkarobangengngé iyaré'ga pakkasuwiyangengngé lao ri Allataala. Makkuwatoniro Imang Lompota; harusu'i mappunnai agi-agi untu' riyakkasuwiyangeng. Ebara'na engkai ri linoéwé, dé' namaélo mancaji imang, saba' engkana imang iya makkasuwiyangengngé akkarobangeng iya rituntu'é ri laleng hukkunna agama Yahudié. Jama-jamang iya napogau'é mennang selaku imanro sitongenna banna séddi gambara sibawa wajo-wajo polé ri aga iya engkaé ri surugaé. Iyaro purani nappaddissengeng Allataala lao ri Musa riyolo, wettunna Musa maélo patettongngi Kémana Puwangngé. Makkeda makkuwaiyé Allataala lao ri Musa, “Engngerangngi! Iya manennaro harusu'i uwébbu situru conto iya napaitangngékko ri yasé'na bulué.” Iyakiya makkekkuwangngé Yésus lolongengngi jamang imang iya mabéla lebbi malebbié naiya jamang imang iya najamaé sining imangngéro. Saba' assijancing iya Napakangkaé Allataala sibawa tolinoé, iyanaritu assijancing iya lebbi makessingngé nasaba tettongngi ri janci untu' gau'-gau' iya lebbi makessingngé! Ebara'na dé'gaga akurangenna ri assijancing iya mammulangngé, tentu dé'na naparellu ripakangka assijancing iya maduwaé. Iyakiya naruntu'ni Allataala asalangngé ri umma'-Na, angkanna makkedai Allataala, “Engngerangngi, poléi matu wettunna, pakangka-Ka matu assijancing iya mabarué sibawa bangsa Israélié, sibawa bangsa Yéhuda. Dé' napada-pada assijancing iya Uwébbué sibawa néné-nénéna mennang wettuk-Ku dulungngi mennang massu polé ri wanuwa Maséré'. Dé' mennang namatinulu ri assijancing iya Uwébbué sibawa mennang; iyanaro saba'na dé' Napaduliwi mennang. Iyakiya makkekkuwangngé, iyanaritu assijancing iya maéloé Uwébbu sibawa umma' Israélié ri esso-esso iya mangoloé, adanna Puwangngé: Maélo-Ka taroi hukkuk-Ku ri laleng pikkiranna, sibawa mokii ri atinna mennang. Maélo-Ka mancaji Allataalana, sibawa mennang mancaji umma'-Ku. Dé'na naparellu mennang paggurui pada-padanna appanna, iyaré'ga paissengiwi silessurenna, ‘Issenni Puwangngé.’ Saba' iya maneng, baiccu battowa, naissek-Ka matu. Maélo-Ka maddampengengngi sining asalanna, sibawa dé'na Uwéngngerangngi dosa-dosana.” Ri laleng napangolona sininna assijancing iya mabarué, naébbui Allataala iyaro assijancing mammulangngé mancaji malaung sibawa malusa; sibawa aga iya macowaénna, dé' namaitta nalennye tona. Assijancing iya mammulangngé mappunnai peraturang-peraturang assompang, sibawa mappunnai towi onrong assompang ébbu tolino. Séuwa kéma ripatettong iya bagiyang ri yolonaé riyasengngi Bili' Mapaccingngé. Kuwaro engka tettongeng pajjennangeng, sibawa engkato méjang sibawa roti iya riyakkasuwiyangengngé lao ri Allataala. Ri bagiyang lalenna, iyanaritu ri munrinna kaing paddenring iya maduwaé, engka bili' iya riyasengngé Bili' Pommapaccingngé Ri laleng bili'éro engka mézba iya riyébbué polé ri ulawengngé untu' mattunu dupa, sibawa engkato Petti Assijancingeng iya rilapiri manengngé sibawa ulaweng. Ri laleng Pettiéro engka oring ulaweng mallise' manna, tekkenna Harun iya cura'énna, sibawa duwa pépeng batu iya riyarokiriyé seppulo parénta polé ri Allataala. Ri yasé'na iyaro Pettié engka duwa Kérub iyanaritu mahlu' makképanni iya pulambangngéngngi ahadérékenna Allataala. Pannina iya duwa mahlu'éro mallebba'i ri yasé'na pattongkona pettié iyanaritu onrong addampengenna dosaé. Iyakiya iya manennaé dé' nariyullé pakatajangngi sibawa tasséddi-séddi. Makkuwani ritu iya manenna riyatoro'. Esso-esso sining imangngé muttama ri laleng bagiyang yolona kémaéro untu' pajoppai jamanna. Iya muttama'é ri bagiyang kaminang marilalenna iyaro kémaé banna imang lompoé bawang. Napogau'i iyaro siseng bawang sitaung. Napogau'i iyaro sibawa tiwi dara untu' riyakkasuwiyangeng ri Allataala nasaba aléna muto sibawa nasaba dosa-dosa iya napogau'é umma'-Na tennasadariwi. Nasibawang iyaro peraturangngé, nappaitangngi Rohna Allataala ri idi sibawa manessa, makkedaé sipongenna kéma bagiyang ri yoloéro tettong mupi, laleng muttama'é ri Bili' Pommapaccingngé dé'pa natattimpa'. Iyaé pulambangngi wettu makkekkuwangngé; bettuwanna makkedaé sining pakkasuwiyangngé sibawa sining akkarobangeng olokolo'é iya riyakkasuwiyangengngé lao ri Allataala, dé' naulléi passukkui ati marilalenna tauwé iya tiwiéngngi pakkasuwiyangngé. Saba' iyaro upacara-upacaraé banna takkennai ri inanré, énungengngé, sibawa maddupa-rupang upacara pappépaccing. Iya manenna banna sining peraturang mallahéreng iya lakué banna narapi wettunna Allataala pakangkai pappakabarué. Iyakiya Kristus poléni selaku Imang Lompona gau'-gau' iya makessingngé iya engkaénna. Kémana Puwangngé iya naonroiyé pogau'i jaman-Na selaku Imang Lompo iyanaritu kéma iya lebbi battowaé sibawa lebbi sukkué. Iyaro dé' naébbui tolinoé; bettuwanna dé' napolé ri linoé iya napancajiyéwé. Muttama'i Kristus ri Bili' Pommapaccingngé ri laleng kémaéro banna siseng bawang lettu mannennungeng. Iyaro wettué dé' natiwi dara bémbé lai iyaré'ga dara ana' saping untu' riyakkasuwiyangeng; dara-Na muto natiwi, nanallalengiro napaleppe'ki lettu mannennungeng. Dara bémbé sibawa saping laié enrengngé awunna akkarobangenna ana' sapingngé, ripakéi untu' meppikiwi sining tau iya najisi'é manuru hukkung agamaé; kuwammengngi namapaccing mennang. Nah, rékko dara sibawa awuéro naulléi pépaccingiwi anajisikenna sining tauwéro, apalagi darana Kristus! Naolai Roh iya mannennungengngé, nakkasuwiyangengngi Aléna lao ri Allataala selaku akkarobangeng iya sukkué. Dara-Na pépaccingiwi atitta polé ri upacara agamaé iya dé'é nakkéguna, kuwammengngi weddikki tumaningiwi Allataala iya tuwoé. Iyanaro saba'na, Kristus mancaji Pappasisumpung untu' séuwa assijancingeng iya mabarué, kuwammengngi na tau iya puraénna riyobbi ri Allataala naulléi tarimai barakka-barakka mannennungengngé iya puraé najjanciyang Allataala. Iya manennaro weddingngi kajajiyang nasaba engkana maté, iyanaritu Kristus; na amatén-Naro paleppe'i tauwé polé risining asalanna iya napogau'é mennang ri wettu takkennana mupa assijancingeng iya mammulangngé. Rékko engka sure' warisi', harusu towi engka buttinna makkedaé tau iya mébbuéngngi iyaro sure'é maténi. Saba' sure' warisi'é dé' nalaku ri wettu tuwona mupa tau iya mébbuéngngi. Iyaro sure'é banna lakui rékko maténi iyaro tauwé. Iyanaro saba'na magi na muwi assijancingeng iya mammulangngé harusu'i ripaessa sibawa dara. Bunge'-bunge'na napalettu'i Musa sininna paréntana hukkunna Allataala lao ri bangsa Israélié. Purairo malani Musa dara ana' saping sibawa dara bémbé lai, nainappa nacampuru'i sibawa uwai, nainappa naeppikeng Kitta' Hukkung-hukkunna Allataala sibawa ri sininna bangsa Israélié sibawa paké wella hisop sibawa bulu-bulu bimbala' macella cowaé. Ri wettu napogau'naro makkedai Musa, “Iyanaé dara iya paessaéngngi assijancingeng polé ri Allataala iya harusu'é muwatinuluri.” Nainappa nasibawang cara iya padaé, nakkeppikeng toni Musa iyaro daraé ri Kémana Puwangngé sibawa ri sininna paréwa-paréwa untu' assompangngé. Mémeng manuru hukkunna agama Yahudié, céddé'pi nasininna séuwa-séuwaé ripaccingiwi sibawa dara; na dosaé banna weddingngi riyaddampengeng rékko engka dara ripatabbollong. Nasibawang cara pada-padaéro barab-barang iya pulambangngéngngi gau'-gau' ri surugaé, parellui ripépaccingiwi. Iyakiya untu' gau'-gau' iya ri surugaé mutoro riyapparelluwangngi akkarobangeng iya mabélaé lebbi makessing. Saba' dé' nauttama Kristus ri Bili' Mapaccingngé ébbu tolinoé, iya bannaé pulambangngi Bili' Mapaccingngé iya sitongennaé. Muttama'i Kristus ri surugana muto; kuwaniro makkekkuwangngé mangolo ri Allataala untu' apentingetta. Imang lompona Yahudié tungke'-tungke' taung muttama'i ri Bili' Pommapaccingngé ri laleng Bolana Puwangngé sibawa tiwi dara sikaju olokolo'. Iyakiya Kristus dé' nauttama untu' makkasuwiyangengngi Aléna makkolik-koling. Saba' rékko makkuwairo, bettuwanna iyaro makkolik-kolinni manrasa-rasa sipongenna ripancaji linoéwé. Iyakiya annessana, makkekkuwangngé ri wettu paccappurengngéwé, siseng bawang polé untu' leddai dosaé ri laleng nakkarobangenna Aléna. Purani napattette Allataala makkedaé sisemmi maté rupa tauwé napurairo riadélékiwi ri Allataala. Makkuwatoro Kristus sisemmi riyakkasuwiyangeng selaku akkarobangeng untu' leddai dosana maéga tau. Maéloi polé paimeng mabbékkaduwanna, tenniya untu' pacceppiwi persoalang dosaé, iyakiya untu' passalama'i sining tau iya tajengngéngngi apolén-Na. Hukkunna agama Yahudié banna mabbéréi gambara iya massalawué passalenna gau'-gau' makessingngé iya mangoloé, na tenniya gambara iya tongengngé polé ri gau'-gau'éro. Dé' nakkullé rékko iyaro passukkui tau iya polé sompai Allataala sibawa tiwi pakkasuwiyang, namuni taut-taung matteru-terui makkasuwiyangeng akkarobangeng iya padaé. Ebara'na sining tau iya sompaéngngi iyaro Allataala tonget-tongengngi purani ripépaccingi polé ri dosaé, dé'na mennang nappunnaina matu pappénedding madosa sibawa dé'na naparellu akkarobangengngé riyakkasuwiyangenna. Iyakiya annessana sining akkarobangeng iya riyakkasuwiyangengngé tungke' taungngéro mala naparéngngerangiwi tauwé lao ri dosa-dosana, saba' mémeng dara sapingngé sibawa dara bémbé laié dé' naulléi leddai dosaé. Iyanaro saba'na wettunna Kristus muttama ri linoé, makkedai lao ri Allataala, “Dé' Muwéloriwi akkarobangengngé sibawa pakkasuwiyangngé; sibalé'na purani Mupassadiyangek-Ka tubu. Dé' Muwéloriwi akkarobangeng ritunué iyaré'ga akkarobangeng untu' paddampengeng dosa. Nainappa-Ka makkeda, ‘Iyya'naé, oh Allataala! Polé-Ka untu' pogau'i élo-Mu, pada-pada iya riparisure'é passalek-Ku ri laleng Kitta'é.’ ” Bunge'-bunge'na makkedai Kristus, “Dé' Muwéloriwi akkarobangengngé sibawa pakkasuwiyangngé; dé' Muwéloriwi akkarobangeng ritunué sibawa akkarobangeng untu' paddampengeng dosaé.” Makkeda makkuwairo Kristus, sininna akkarobangengngéro riyakkasuwiyangengngi manuru hukkunna agama Yahudié. Purairo makkedai Kristus, “Iyya'naé, oh Allataala! Polé-Ka untu' pogau'i élo-Mu.” Jaji Allataala leddai sininna akkarobangeng iya maittaéro, enrengngé sulléiwi sibawa akkarobangenna Kristus. Purani napogau' Yésus Kristus iya napuwéloé Allataala makkasuwiyangengngi Aléna selaku akkarobangeng. Iyakiya iyaro pakkasuwiyangengngé Napogau'i banna sisemmi bawang lettu mannennungeng ripaccingi manekki polé ri dosaé. Tungke' imang Yahudié pajoppai jamanna selaku imang esso-esso, sibawa makkolik-koling makkasuwiyangengngi akkarobangeng iya padaé. Iyakiya iyaro sining akkarobangengngé dé' sises-siseng naulléi leddai dosaé. Sibalé'na, Kristus makkasuwiyangeng banna séddi akkarobangeng untu' paddampengeng dosa, iyaro akkarobangengngé makkanréi lettu mannennungeng. Purana nakkasuwiyangeng iyaro akkarobangengngé, tudanni Kristus ri seddé ataunna Allataala, mapparénta silaong Aléna. Na makkekkuwangngé mattajengngi Kristus narapi Allataala mébbui sining balin-Na tunru' ri Aléna. Jaji nasibawang séddi akkarobangeng, napassukkui Kristus sining tau iya puraé ripaccingi polé ri dosaé. Passalenna gau'éro nabbéréyang towi Rohna Allataala asabbiyan-Na lao ri idi. Makkedai Rohna Allataala, “ ‘Iyanaé assijancing maéloé Uwébbu sibawa mennang ri esso-esso mangoloé,’ adanna Puwangngé, ‘Maélo-Ka taroi hukkung-hukkuk-Ku ri laleng atinna, sibawa mokii ri laleng pikkiranna.’ ” Makkeda towi Allataala, “Maélo-Ka mallupaiwi dosa-dosana sibawa sining jana.” Jaji, iyaro dosa-dosaé sibawa sining jaé purani riyaddampengeng, nadé'na naparelluna riyakkasuwiyangeng akkarobangengngé untu' paddampengeng dosaé. Nah, Saudara-saudara, nasaba amaténna Yésusro makkekkuwangngé baraniki muttamakiwi Bili' Pommapaccingngé. Purani natimpakekki Yésus séddi laleng, iyanaritu laleng iya mabbéré atuwong. Iyaro lalengngé naolai kaing paddenringngé, iyanaritu tubunna muto Yésus. Na makkekkuwangngé mappunnaiki séddi imang iya marajaé, iya tanggung jawa'é ri Bolana Allataala. Rimakkuwannanaro, laono mai taddeppériwi Allataala sibawa ati iya matinulué enrengngé teppe' iya mattinettoé; sibawa ati iya puraé ripépaccingi polé ri pappénedding pasalaé, sibawa watakkalé iya puraé ripépaccingi sibawa uwai iya mapaccingngé. Sitinajaki makkatenning masse ri amménasang iya tangakuiyé, saba' weddingngi riyatepperi Allataala rupaiwi jancin-Na. Na sitinajaki sisullé sijampangi, kuwammengngi naweddikki sisullé mabbéré sumange' untu' péneddingiwi sibawa pogau'i gau'-gau' iya makessingngé. Sitinajaki mattunru-tunru maddeppungeng massibawa sibawa aja' mujampaléllé pada-pada sining tau laingngé. Mala harusu'ki lebbi matinulu pangajariwi séddié lao ri laingngé, saba' riissengngi makkedaé dé'na namaitta napolé Puwangngé. Saba' rékko biritta polé ri Allataala ripalettu'ni ri idi, iyakiya matteruki bawang pogau' dosa sibawa riyattungkai, dé'na gagana akkarobangeng untu' leddai dosata. Séddi-séddinna iya engkaé untu' idi iyanaritu mangoloiwi pengadilanna Allataala sibawa api caina iya tunu manengngéngngi matu sining iya méwaéngngi Allataala. Tau iya dé'é naturusiwi hukkung iya nabbéréyangngé Musa, rihukkung matéi tenriyaddampengeng, rékko nasabbingngi duwa tellu tau, pabuttiwi pasala. Pékkugi lebbi tane'na pahukkungeng iya harusu'é ripakennaiwi tau iya léjja'-léjja'éngngi Ana'na Allataala. Iyaro tauwé nangga' matunai dara assijancingenna Allataala, iyanaritu amaténna Kristus iya pépaccingiyéngngi polé ri dosaé. Napakatunai Roh iya mabbéré pammasé. Taisseng niga Aléna iya makkedaé, “Maélo-Ka makkabale! Maélo-Ka pahukkung!” Sibawa iya makkedaétto, “Puwangngé maélo madélékiwi umma'-Na.” Temmaka mappakatau-tauna rékko sempé'i ri limanna Allataala Iya Tuwoé! Engngerangngi pékkugi keadaanna Saudara-saudara ri wettu labe'é. Iyaro wettué, puranana cahayana Allataala tappako, maéga anrasa-rasammu; iyakiya tette'ko méwa sibawa gegge. Biyasa tokko ripakatuna enrengngé rigaukeng sibawa dé' namakessing riyolona tau maégaé. Biyasa tokko maccowé manrasa-rasa sibawa mennang iya rigaukengngé makkuwaro, namaccowé tokko péneddingiwi asussanna tau iya ritarungkué. Na wettunna iya maneng muwappunnaiyé rirampasa', mutarimai iyaro sibawa masennang atimmu, saba' muwissengngi makkedaé mappunnai mupo séuwa iya lebbi makessingngé iya tahangngé matu mannennungeng. Rimakkuwannanaro, aja' mupettu paddennuwang, saba' rékko tette'ko mateppe' engka saro battowa untu'mu! Parelluko sabbara, kuwammengngi naulléi pogau'i élona Allataala nanallalengiro natarimai aga iya riyajjanciyang-Na. Saba' ri laleng Kitta'é tarokii, “Banna cinampe' bawappi, na iyaro maéloé polé, masitta'i matu polé; dé' napasoro-soroi apolén-Na. Na umma'-Ku iya tongengngé mateppe'i matu sibawa tuwoi; iyakiya rékko engka ri yelle'na mennang iya soroé, dé' Umasennang matu ri aléna.” Idi'é tenniyaki umma' iya soroé sibawa pusaé. Sibalé'na, idi iyanaritu umma' iya mateppe'é ri Allataala sibawa iya ripassalama'é. Mateppe' bettuwanna majeppuiwi tonget-tongeng gau'-gau' iya riyamménasaiyé; bettuwanna mappunnai attentung lao ri gau'-gau' iya dé'é nariita. Nasaba teppe', nasining tau wettu labe'é ripésennangiwi ri Allataala. Nasaba mateppe'i, na tapahangngi makkedaé iyaé alangngé ripancajiwi ri saddanna Allataala; jaji, aga iya weddingngé riita, kajajiyangngi polé ri aga iya dé'é nariyullé mita. Nasaba mateppe'i, na Habél makkasuwiyangengngi lao ri Allataala akkarobangeng iya lebbi makessingngé naiya akkarobangenna Kaing. Nasaba teppe'naro, ritarimai Habél ri Allataala selaku tau iya makessingngé; saba' manessani makkedaé Allataala tarimai pakkasuwiyanna. Maténi Habél, iyakiya nasaba teppe'naro, mabbicara mupi lettu makkekkuwangngé. Nasaba mateppe'i, nadé' namaté Hénokh, sangadinna riyakkai sibawa ritiwii lao ri Allataala. Dé' muwi séddi tau mulléi runtu'i, saba' riyakkai ri Allataala. Ri laleng Kitta'é tarokii makkedaé ri wettu dé'napa nariyakka Hénokh, purani napésennangi atinna Allataala. Temmateppe, dé' muwi séddi tau mulléi sennangiwi atinna Allataala. Saba' tau iya laowé ri Allataala harusu'i mateppe' makkedaé engka Allataala sibawa Allataala mpale'i tau iya sappaéngngi. Nasaba mateppe'i, naripaissengi Nuh ri Allataala passalenna gau'-gau' iya maéloé kajajiyang ri mangoloé, iya dé'é naulléi mitai. Matinului Nuh ri Allataala angkanna mébbui séddi kappala iya passalama'éngngi aléna silaong kaluwargana. Nanallalengiro rihukkungngi linoé, sedangkang Nuh ripannessai ri Allataala selaku tau iya makessingngé nasaba teppe'na. Nasaba mateppe'i, namatinulu Abraham ri Allataala wettunna Allataala mobbii sibawa suroi lao ri ri wanuwa iya najjanciyangngé Allataala ri aléna. Nanajoppana Abraham sibawa dé' naissengngi kégi maélo lao. Nasibawang teppe', monroi Abraham selaku tau polé-polé ri wanuwa iya najjanciyangngé Allataala lao ri alénaro. Monroi Abraham kuwaro ri laleng kémaé. Makkuwatoro Ishak sibawa Yakub, iya tarimaé janci iya padaé polé ri Allataala. Saba' natajengngi Abraham kota iya narancanaé sibawa napatettongngé Allataala sibawa pandaméng iya masse'é. Nasaba mateppe'i, nawedding Abraham lolongeng wija-wijanna polé ri Sara, namuni Abraham macowa senna'ni, sibawa Sara paimeng manang. Mateppe'i Abraham makkedaé narupaiwi matu Allataala jancin-Na. Namuni Abraham wettuéro pada-padai tau iya matéénna tubunna, iyakiya lolongengngi maéga wijanna, iya dé'é naribilang égana – pada-padai égana wéttowingngé ri langié sibawa kessi'é ri wiring tasi'é. Sininna tauwéro tette'i mateppe' lettu maté. Dé' natarimai mennang gau'-gau' iya najjanciyangngé Allataala, iyakiya banna naitai sibawa duppaiwi polé mabéla. Nanallalengiro napannessai mennang makkedaé bannami mennang tau polé-polé sibawa passompa ri linoéwé. Tau iya powadaéngngi makkuwaro mappaitangngi sibawa manessa makkedaé mattengngangngi mennang sappa tana iya mancajiyé matu wanuwanna. Tenniya wanuwa iya nasalaiyénna mennanro napikkiri'-pikkiri' mennang. Saba' rékko makkuwairo, maégani kasempatang lao ri mennang untu' lisu ri wanuwaéro. Iyakiya annessana, nauddaningiwi mennang séuwa wanuwa iya lebbi makessingngé, iyanaritu wanuwa ri surugaé. Iyanaro saba'na dé' namasiri Allataala rékko mennang nateppui Aléna Allataala, saba' Allataala pura passadiyai séddi kota untu' mennang. Nasaba mateppe' towi, nanakkasuwiyangengngi Abraham Ishak, selaku akkarobangeng wettunna rioji ri Allataala. Lao ri Abraham ritu nabbéréyangngi Allataala jancin-Na, iyakiya macenningngi Abraham mabbéréyangngi ana'na iya séddi-séddiéro. Purai makkeda Allataala lao ri Abraham, “Naolai Ishak ritu lolongekko matu wija-wijanna iya Ujanciyangngékko.” Mateppe'i Abraham makkedaé naulléi Allataala patuwoi paimeng Ishak polé ri amaténgngé – jaji, wedding ripowada, natarimai paimeng Abraham Ishak polé ri amaténgngé. Nasaba mateppe'i, nanajjanciyangngi Ishak barakka'-barakka'é lao ri Yakub sibawa Esau untu' wettu mangoloé. Nasaba mateppe'i, riwettu dé'napa namaté Yakub, nabbéréyangngi barakka'na lao ri ana'-ana'na Yusuf – sibawa sanréi ri ulu tekkenna enrengngé sompai Allataala. Nasaba mateppe'i, na Yusuf – wettunna mawé'ni maté – mabbicarai passalenna massuna umma' Israélié polé ri Maséré', sibawa taro paseng passalenna aga iya harusu'é ripogau' lao ri ujuna. Nasaba mateppe'i, na tomatowanna Musa nasubbui tellumpuleng ittana mappammulai jajinna. Naitai mennang makkedaé séddiwi ana' iya makessingngé, nadé' mennang namétau méwai paréntana arungngé. Nasaba mateppe'i, nabattowanana Musa, dé' namaélo riteppu ana' polé ri ana'na arung Maséré'. Lebbi napojiwi manrasa-rasa silaong umma'na Allataala naiya untu' cinampe'é péneddingiwi asennangengngé polé ri atuwong iya madosaé. Napérasaiwi Musa makkedaé mabélai lebbi mangke' untu' lolongeng pappakatuna nasaba Arung Pappassalama'é iya najjanciyangngéro Allataala naiya lolongengngéngngi sininna waramparanna wanuwa Maséré', nasaba namménasaiwi Musa apolénna ri esso ri munri. Nasaba mateppe'i, nasalaiwi Musa Maséré' tennapéneddingiwi métaué lao ri caina arungngé. Majui Musa mattuju ri akkattana samanna purani naita Allataala iya dé'é napaitaro. Nasaba mateppe'i, nanapakangka Musa Paska sibawa paréntangngi kuwammengngi nariyeppiki dara ri sumpang bolana tau Israélié kuwammengngi Malaéka' Amaténgngé aja' naunoi ana'-ana' macowana mennang. Nasaba mateppe'i, nasining tau Israélié naulléi malléttoiwi Tasi' Cella'é, samanna mennang joppai ri yasé'na tana iya marakkoé, nasining tau Maséré'é riyemme'i ri tasi'éro, wettunna mennang nacoba malléttoto. Nasaba mateppe'i, naébbu sining tau Israélié témbo'-témbo'na Yérikho maruttung puranana nattulilingi pitungngesso ittana. Nasaba mateppe' towi, na Rahab, iyaro makkunrai cakkuribangngé, dé' naccowé riyuno silaong sining tau iya méwaéngngi Allataala; saba' natarimai sibawa mabessa mata-matanna Israélié. Nah, weddikka'sa matteru-teru mabbicara, iyakiya dé' nagenne' wettukku. Saba' dé'pa uteppui Gidéon, Barak, Simson, Yéfta, Daud, Samuél, sibawa nabi-nabié. Nasaba mateppe'i, napurai mennang nacau sining akkarungengngé. Napogau'i mennang aga iya tongengngé, angkanna natarimai aga iya najjanciyangngé Allataala. Natongkoi mennang sining bawana singaé, naddeppériwi api maseroé, lésséi polé ri peddangngé. Malemmai mennang, iyakiya mancajiwi mawatang; baraniwi ri laleng ammusurengngé angkanna nacaui sining pasukanna bangsa laingngé. Nasaba mateppe'i, nasining makkunraié nalolongengngi paimeng sining taunna iya matéénna. Engkato iya macenningngé risissa gangka maté, sibawa sampéyangngéngngi untu' ripaleppe, nasaba maéloi ripatuwo paimeng untu' séuwa atuwong iya lebbi makessingngé. Engka iya riyéllékéllé'é, ricambu', risiyo sibawa ranté enrengngé riputtama ri laleng tarungkué. Engka iya rigenrungngé batu gangka maté, iya rigéréé sibawa garagaji, sibawa iya riyunoé sibawa peddang. Solléi mennang sibawa pakéyang polé ri bingkulang bimbala'é iyaré'ga bingkulang bémbé'é; kasiyasiwi mennang, ricalla sibawa risissa. Ri linoéwé tenniya onrong iya sitinajaé untu' mennang. Solléi mennang ri padang kessi'é enrengngé ri bulu-bulué, kuwaéttopa monroi ri laleng gowa-gowaé enrengngé ri laleng sining kalebbongngé ri tanaé. Temmaka loppona apakalang iya nalolongengngé sininna tauwéro nasaba teppe'na mennang! Namuni mennang dé' natarima aga iya najjanciyangngé Allataala, saba' mappunnaiwi Allataala rancana iya lebbi makessingngé untu' idi. Rancana-Na iyanaritu makkedaé banna sibawaki, namancaji sukku matu mennang. Nah, passalenna aléta, ri mattulilitta engka maéga senna' sabbi! Rimakkuwannanaro, laono mai tabuwang manengngi iya tanekiyékki sibawa dosa iya matterué maddeppé ri idi. Sibawa laono mai tamattunru-tunru laloiwi akkabéttangengngé iya engkaé ri yolota. Sitinajai pakkitatta mattuju lao ri Yésus, saba' Aléna ritu iya paoto'éngngi teppe'ta sibawa piyarai polé ri pammulanna lettu ri paccappurenna. Tahangngi Yésus manrasa-rasa ri aju sallié! Dé' Napaduliwi makkedaé maté ri aju salliéro iyanaritu séuwa gau' iya mappakasiri-sirié. Banna maréngngerangngi lao ri arennuwang iya Napérasaiyé matu ri munri. Makkekkuwangngé tudanni ri seddé ataunna akkarungenna Allataala, enrengngé mapparéntai silaong Aléna. Coba pikkiri'i pékkugi anrasa-rasanna Yésus moloiwi sining tau madosaé iya méwaéngngi Aléna sibawa makkuwamani serona! Rimakkuwannanaro aja' mumarenni ati sibawa pettu paddennuwang. Saba' ri laleng ammusuremmu méwai dosaé, dé'pa naengka mumammusu narapi harusu patabbollong dara. Sibawa aja' muwallupaiwi pangajana Allataala, iyaé nawérékko selaku ana'-ana'-Na! “Ana'-Ku, pénessaiwi madécéd-décéng pappagguruwanna Puwangngé, na aja' mumarenni ati rékko Nacairiko. Saba' napaggurui Puwangngé tungke' tau iya Namaséiyé, sibawa Nacambu'i tungke' tau iya Naakuiyé selaku ana'-Na.” Sitinajako tarimai paccambu'na Allataala selaku séddi pappagguruwang polé riséddié ambo'. Saba' engkaga naengka séddié ana' dé' narihukkung ri ambo'na? Rékko dé' muwaccowé rihukkung pada-pada sininna ana'-ana'na iya laingngé, iyaé bettuwanna tenniyako ana' essa, sangadinna ana' iya dé'é naessa. Mappunnaiki ambo' ri linoé. Napagguruki, na idi pakalebbii. Nah, apalagi Ambo' rohanitta iya risurugaé, tentu harusu'ki lebbi tunru' ri Aléna kuwammengngi tatuwo. Tomatowatta ri linoé pagguruki banna ri laleng wettu iya engkaé paggangkanna, manuru aga iya napérasaiyé makessing. Iyakiya Allataala pagguruki untu' adécéngeng ri aléta, kuwammengngi taulléi mancaji mapaccing silaong Aléna. Mémeng wettutta ripagguru, iyaro pahukkungengngé dé' napésennangiwi atitta, sangadinna banna pamesséiwi bawang. Iyakiya ri munrinnaro, untu' idi iya puraénna ripagguru, iyaro pahukkungengngé nassabariki tuwo situru élona Allataala, enrengngé powassélé' pappénedding saléwangeng ri idi. Rimakkuwannanaro péwatangiwi limammu iya malemmaé sibawa uttumu iya ténréro! Tuli joppako ri laleng iya malappaé, kuwammengngi na ajému iya képpangngéro dé' namalékko sangadinna mala majjappai. Akkuragano untu' tuwo sipammasé-masé sibawa sininna tauwé. Akkuragatokko untu' tuwo mapaccing, banna untu' Puwangngé. Saba' dé' muwi séddi tau mulléi mitai Puwangngé rékko dé' natuwo pada-padaéro. Jagaiwi aja' lalo naengka muwi séddi tau iya massué polé ri laleng akessingeng atinna Allataala, kuwammengngi aja' naengka iya mancajiyé pada-pada aju-kajungngé engkaé racunna ri tengnga-tengngamu angkanna paompo asukkarakeng enrengngé solangiwi maéga tau sibawa racunna. Jagaiwi kuwammengngi aja' naengka iya tuwoé mappangaddi iyaré'ga dé' naangke'i gau'-gau' rohanié, pada-pada iya napogau'é Esau. Nabalu'i ha'na selaku ana' macowa, banna untu' simangko inanré. Muwisseng makkedaé rimunri macinnai Esau lolongengngi iyaro barakka'é polé ri ambo'na, iyakiya risampéyangngi. Saba' muni teri sappa laleng untu' pédécéngi asalanna, iyakiya kasempatang untu' iyaro dé'na gaga. Saudara-saudara dé' nalao moloiwi séuwaé pada-pada iya naoloiyé bangsa Israélié riyolo. Naoloiwi mennang séuwa iya weddingngé rikapése', iyanaritu Bulu Sinai sibawa apinna iya malluwa'-luwa'é; moloiwi mennang pettang, akalemmengeng sibawa anginraja; moloiwi mennang oni tarompé', sibawa oni iya héba'é. Wettunna sining tau Israélié naéngkalinga iyaro saddaé, naéllauni mennang sibawa masero kuwammengngi na iyaro saddaé dé'na nabbicarana lao ri mennang. Saba' dé' natahang mennang méngkalingai parénta iya napalettu'é iyaro saddaé. Nasaba makkedai iyaro saddaé, “Sininna iya géssaéngngi iyaé bulué, tenripaduli aga iyaro olokolo' iyaré'ga muwi niga, harusu'i rigenrung sibawa batu narapi maté.” Aga iya naitaé sining tau Israéliéro makkuwamani héba'na angkanna makkeda Musa, “Métauka sibawa ténréka!” Sibalé'na, laoko ri Bulu Sion sibawa kotana Allataala iya tuwoé, iyanaritu Yérusalém iya ri surugaé sibawa massebbu-sebbu malaéka'na. Muwaccowériwi séuwa addeppungeng iya marowaé – addeppungenna ana'-ana' macowana Allataala, iya aseng-ngasennaé riyokii ri laleng surugaé. Laoko mangolo ri Allataala, Hakinna sininna rupa tauwé. Muwoloiwi roh-rohna tau iya makessingngé, iya puraénna ripassukku. Laoko mangolo ri Yésus, Pappasisumpung untu' assijancingeng iya mabaruéro; muwoloiwi pecci dara iya tanggungngéngngi gau'-gau' iya mabéla lebbi kessingngé naiya natanggungngé darana Habél. Rimakkuwannanaro, atutuko aja' narapii dé' mumaélo méngkalingai iya mabbicaraéro. Mennang iya dé'é namaélo méngkalingai Aléna iya laowé ri linoé palettu'i biritta polé ri Allataala, dé' nawedding lari. Apalagi idi'é iya méngkalingaéngngi Aléna iya mabbicaraé polé ri surugaé! Rékko dé' tamaélo méngkalingai, pékkugi makkulléki wedding leppe'. Iyaro wettué saddan-Na pawéwangngi tanaé. Iyakiya makkekkuwangngé majjanciwi, “Siseppi, maélo-Ka mappawéwang, tenniya bawang tanaé iyakiya langiétto.” Ada-ada “siseppi” mappaitangngi makkedaé sininna linoé iya puraé ripancaji rigoccangngi matu sibawa ripaddésu, kuwammengngi iya monroé banna ritu iya dé'é naulléi taggoccang. Rimakkuwannanaro, sitinajaki mattarima kasi lao ri Allataala, nasaba tarimaki polé ri Aléna séuwa akkarungeng iya dé'é nawedding taggoccang. Sitinajaki mattarima kasi sibawa massompa ri Allataala sibawa mappakalebbi enrengngé métau, situru cara iya naéloriyé muto Allataala. Saba' Allataalata pada-padai api iya paangurengngé. Sitinajako tette' mamaséiwi séddié lao ri laingngé selaku sining tau Kristéng iya massilessurengngé. Aja' mubata-bata tarimai ri bolamu, sining tau iya dé'éppa muwissengngi. Saba' ri laleng pogau'i iya makkuwaéro, engka naengka tauwé, tennasadariwi, natarimai malaéka'é ri bolana. Engngerangngi sining tau iya engkaé ri laleng tarungkué, samanna engka tokko ri laleng tarungkué silaong mennang. Sibawa sining tau iya rigaukengngé siélo-élona, sitinajako méngngerangngi mennang samannato rigaukekko makkuwaéro. Sininna tauwé harusu'i mappaitangngi kédo-kédo mappakalebbié lao ri akawingengngé, iyanaro saba'na sitinajai lakkaié sibawa bainé matinulu séddié lao ri laingngé. Tau iya mappangaddié sibawa tau iya malawengngé ri adélékiwi matu ri Allataala. Aja' na atuwommu rikuwasai ri pangéloreng ri dowié, iyakiya sitinajako masennang sibawa aga iya engkaé ri iko. Saba' purai makkeda Allataala, “Dé' Umaélo leppessakko iyaré'ga salaiko.” Rimakkuwannanaro baraniki makkeda, “Puwangngé iyanaritu Pattulukku, dé' umétau. Aga wedding napogau' tolinoé lao ri iyya?” Aja' muwallupaiwi sining pamimpimmu iya palettu'éngngi pasenna Allataala ri iko. Pénessaiwi pékkuwi mennang tuwo sibawa pékkugiwi mennang maté, sibawa contoiwi teppe'na mennang. Yésus Kristus tette'i pada, muwi riyolo, makkekkuwangngé, enrengngé lettu mannennungeng. Aja' muleppessangngi sininna rupanna pappagguruwang makalallaingngé iya papusaékko. Harusu'i ripéwatangi atitta ri akessingeng atinna Allataala, iyanaro makessing; aja' napolé risining peraturangngé passalenna inanré. Sining tau iya matinuluriyéngngi riyolo sining peraturangngéro dé' nalolongengngi appalanna. Mappunnaiki séddi mézba untu' makkasuwiyangeng akkarobangeng lao ri Allataala. Nasining imang iya mattumaniyé ri laleng Kémana Puwangngé, dé'gaga ha'na manré akkarobangeng iya engkaé ri yasé'na mézbaéro. Dara olokolo' iya riyakkasuwiyangengngé selaku akkarobangeng untu' paddampengeng dosa, natiwii Imang Lompoé lao ri Bili' Pommapaccingngé; iyakiya bakkéna iyaro olokolo'é ritunui ri saliweng akkémangngé. Iyanaro saba'na namatéto Yésus ri saliwenna pintu gerbanna kotaé untu' pépaccingiwi umma'-Na polé ri dosaé sibawa dara-Na muto. Rimakkuwannanaro, laono mai talao ri Aléna ri saliweng kémaé sibawa maccowé ripakatuna silaong Aléna. Saba' ri linoé dé'gaga onrong iya mannennungengngé untu' idi; sappaki onrong iya maéloé polé. Rimakkuwannanaro, naolai Yésus, sitinajaki tuli pojiwi Allataala; iyaro sinrupai akkarobangeng sukkuru'ta ri Aléna iya riyakkasuwiyangengngé naolai napowadaé témué untu' pakalebbii asen-Na. Aja' muwallupaiwi pogau'i makessingngé sibawa sisullé situlung, saba' iyanaé sining akkarobangeng iya pésennangiyéngngi atinna Allataala. Accowériwi paréntana sining pamimpimmu sibawa tunru'ko lao ri mennang. Saba' tuli najampangiwi mennang nyawamu, na harusu'i mennang mattanggung jawa' lao ri Allataala. Rékko matinuluko lao ri mennang, weddingngi mennang majjama sibawa masennang ati; rékko dé', majjamai matu mennang sibawa messé atinna, na iyaro dé' napasaroko. Atteruko massempajangekki. Mateppe'ki ati marilaletta mapaccingngi, saba' ri laleng sininna gau'é tuli maéloki pogau'i aga iya tongengngé. Lebbi-lebbipi uwéllaunna sibawa masero, kuwammengngi muwassempajangekka. Kuwammengngi na Allataala masitta'i tiwika lisu lao ri iko. Allataala pura patuwoi Puwatta Yésus polé ri amaténgngé. Nasaba amatén-Naro, na makkekkuwangngé mancajiwi Pakkampi Marajata, iyanaritu sining bimbala'-Na. Iyaro amatén-Na napaessa towi assijancingeng mannennungengngé iya naébbué Allataala sibawa idi. Tennapodo Allataala assalenna asaléwangengngéro passukkuko sibawa sininna iya makessingngé iya muwapparelluwangngé untu' pogau'i élo-Na. Tennapodo naolai Yésus Kristus, najamai Allataala ri laleng idi, aga iya Nacinnaiyé. Sitinajai Kristus ripoji mannennungeng! Aming. Uwéllauwi kuwammengngi mupénessaiwi iyaé sining pangajaku sibawa sabbara, saba' iyaé sure'é dé' namalampé senna'. Sitinajako missengngi makkedaé saudarata Timotius ripaleppe'ni polé ri tarungkué. Rékko laoni ri onrokkué, maéloka tiwii wettukku célléngiko matti. Palettukengngi selletta lao ri sininna pamimpinmu sibawa lao ri sininna umma'na Allataala. Tarima towi sellenna Saudara-saudara polé ri Italia. Tennapodo Puwangngé barakkakiwi Saudara-saudara iya maneng. Saudara-saudara umma'na Allataala iya tassiya-siyaé ri sininna linoé! Sellekku, iyya, Yakobus, atanna Allataala sibawa atanna Puwang Yésus Kristus. Saudara-saudara! Rékko mupéneddingiwi maddupa-rupang paccobang, sitinajako marasa saro. Saba' muwissengngi, rékko tette'ko mateppe' ri Puwangngé ri wettu péneddingiko, addimonrinna iyanaritu: mancajiko sabbara. Jagaiwi kuwammengngi na asabbarakeng atimmu matterui tattamba angkammu mancajiwi tonget-tongeng sukku sibawa dé' na akurangeng ri laleng sininna gau'é. Rékko engka séddi tau ri yelle'mu iya makurang panré, sitinajai naéllau ri Allataala, na Allataala mpéréngngi matu apanréng ri aléna; saba' lao ri tungke' tau, mabbéréi Allataala sibawa makacuwa enrengngé paressé babuwa. Iyakiya tau iya maréllauwé, harusu'i mateppe'; dé' nawedding bata-bata. Saba' tau iya bata-bataé iyanaritu pada-padai bombangngé ri tasi'é iya nairié anging lao riyanrini. Tau Kristéng iya kasiyasié sitinajai marennu rékko Allataala pakatanréi. Sibawa tau Kristéng iya sugié sitinajai marennuto, rékko Allataala pakariyawai. Saba' lennye'i matu tau sugié pada-pada unga wellaé. Ri wettu mompona matanna essoé sibawa pellana iya matire'é, namakelle'na matu iyaro wellaé; angkanna maddunu unganna sibawa teddéng toni agellorenna. Makkuwatoniro sibawa tau iya sugié; ancuru'i matu ri wettunna napajoppa usahana. Masennangngi tau iya mattahangngé ri wettunna péneddingi paccobang. Saba' rékko naulléi mattahang ri laleng paccobangngé, natarimai matu sarona, iyanaritu atuwong iya puraé najjanciyang Allataala lao risining tau iya mamaséiyéngngi Allataala. Rékko séddié tau taggodai ri paccobang makkuwaéro, aja' nakkeda, “Iyaro paccobangngé poléi ri Allataala,” saba' Allataala dé' naulléi taggoda ri jaé, sibawa dé'to nagodai muwi séddi tau. Iyakiya taggodai tauwé rékko rigettengngi sibawa ripangaruiwi ri cinnana muto iya majaé. Nainappa, rékko cinnana iya majaéro naturusiwi, momponi dosaé, sibawa rékko matasa'ni dosaé, addimonrinna iyanaritu amaténg. Aja' muribengnguwang, Saudara-saudaraku iya upojiyé! Tungke' pabbéré iya makessingngé sibawa hadiya iya sukkué apolénna poléi ri surugaé, napanurungngi Allataala, Pabbinruna sininna tajangngé ri langié. Aléna ritu Allataala iya dé'é nappinra sibawa dé'to nassabariwi muwi pettang aga. Nasaba Aléna muto nanapancajiki ana'-ana'-Na naolai ada-adan-Na iya tongengngé. Napogau'i iyaro kuwammengngi talolongeng onrong iya makessingngé ri yelle'na sininna mahlu' napancajiyé. Pénessaiwi iyaé madécéd-décéng, Saudara-saudara iya upojiyé! Tungke' tau harusu'i masitta' maréngkalinga, iyakiya matengnge' mabbicara sibawa matengnge'to untu' macai. Tau iya macaié dé' naulléi pogau'i iya makessingngé, iya pésennangiyéngngi atinna Allataala. Rimakkuwannanaro, buwanni tungke' abiyasang iya macarépaé sibawa majaé. Tarimani sibawa ati mariyawa ada-ada iya natanengngé Allataala ri laleng atimmu, saba' iyaro ada-adaé mappunnaiwi awatangeng untu' passalama'ko. Sitinajako pogau'i aga iya napowadaé Allataala, aja' mumaréngkalinga bawang, angkanna nanallalengiro nabengnguwangngi alému. Tau iya méngkalingaéngngi ada-adanna Allataala, iyakiya dé' napogau'i iyanaritu pada-padai tau iya mitaéngngi tappana iya sitongennaé ri yolona cammingngé. Purana napénessai madécéd-décéng, laona tona namatteru nallupai pékkugi rupanna tappanaro. Hukkunna Allataala sukku sibawa mappunnai awatangeng untu' pamaradékai rupa tauwé. Na tau iya salidikiyéngngi sibawa pénessaiwi madécéd-décéng enrengngé pogau'i sining hukkungngéro, na tenniya maréngkalinga bawang nappa nallupaiwi, iyaro tauwé ribarakkakiwi matu ri Allataala ri laleng tungke' passaleng iya napogau'é. Rékko engka séddi tau iya pérasaéngngi aléna séddi tau iya mapatoé maggama, iyakiya dé' najagaiwi lilana, aléna muto nabengnguwang; assompanna dé'gaga gunana. Atinulurengngé maggama iya mapaccingngé sibawa tuléngngé manuru' pakkitanna Allataala Ambo'é iyanaritu: tulungngi ana'-ana' biué sibawa janda-janda iya manrasa-rasaé, sibawa jagaiwi alé paimeng kuwammengngi dé' narisolangi ri linoéwé. Saudara-saudaraku! Selaku tau iya mateppe'é ri Puwang Yésus Kristus, Puwang Iya Pommalebbié, aja' mupasilail-laingengngi tauwé situru gau'-gau' mallahérengngé. Saba' rékko engka séddi tau sugi paké ciccing ulaweng sibawa pakéyang gello lao ri addeppu-deppungemmu, nainappa poléto séddi tau kasiyasi iya paké pakéyang sapé'-sapé', nalebbi mupakalebbii tau iya mappaké magelloéro. Makkedako ri aléna, “Tudanni Puwang ri kadéra iya kaminang makessingngéwé.” Iyakiya lao ri tau kasiyasié makkedako, “Tettonno kuwaro,” iyaré'ga “Tudanno ri dapara'é kuwaé.” Ri laleng napogau'na makkuwaéro, mébbuko assilaingeng ri yelle'na pada-padammu sibawa mangke'i tauwé situru pikkirang majaé. Engngerangngi, Saudara-saudara iya ripojiyé! Tau iya nangga'é kasiyasi linoéwé, napiléi Allataala untu' mancaji sining tau iya sugié ri laleng teppe'. Iyaro sining tauwé mancajiwi matu anggota umma'na Allataala pada-pada iya najjanciyangngé Allataala lao ri tau iya mamaséiyéngngi Aléna. Iyakiya iko mala napakatunai tau kasiyasié, padahal sining tau sugié ritu tenre'ko sibawa massarénréngekko lao ri pengadilangngé! Mennang ritu pakatunai aseng iya malebbié iya mutarimaé polé ri Allataala! Mupogau'i iya tongengngé, rékko mupogau'i hukkunna Akkarungengngé iya engkaé ri laleng aya'na Kitta'éwé, “Sitinajako mamaséiwi pada-padammu rupa tau pada-pada alému.” Iyakiya rékko mupasilail-laingengngi tauwé nasaba gau'-gau' mallahérengngé, pogau'ko dosa, na hukkunna Allataala pannessai makkedaé iko iyanaritu tau majjalékkai hukkung. Tau iya majjalékkaiyéngngi sala séddinna polé ri hukkung-hukkunna Allataala, bettuwanna najjalékkai manengngi. Saba' iya makkedaé, “Aja' mumalaweng,” alénato ritu iya makkedaé, “Aja' muwabbuno.” Jaji, rékko dé' mumalaweng, iyakiya mabbunoko, muwajjalékkai towi iyanaritu hukkungngé. Abbicarano sibawa tinda'no selaku tau iya maéloé riadéléki situru hukkung-hukkunna Allataala iya pamaradékaéngngi rupa tauwé. Saba' dé' nappaitangngi matu Allataala paressé babuwana lao ri tau iya dé'é naissengngi paressé babuwaé. Iyakiya lebbi mawatangngi paressé babuwaé naiya pahukkungengngé! Saudara-saudara! Aga gunana makkeda tauwé, “Iyya tau mateppe'ka,” rékko dé' nappaitangngi sibawa pangkaukenna? Naulléga teppe' makkuwaéro passalama'i? Ebara'na séddi saudara siateppereng mapparelluwang pakéyang sibawa dé' nappunnai genne inanré untu' esso-esso. Aga gunana saudara makkeda lao ri aléna, “Salama'ki paké pakéyang iya mapellaé sibawa salama'ki manré!” – rékko dé' muwéréngngi aga iya napparelluwangngé untu' tuwo? Makkuwatoniro sibawa teppe'é, rékko dé' nariyappaitang ri pangkaukengngé, iyaro teppe'é dé'gaga gunana. Naullé engka makkeda, “Engka tau iya sanréé ri teppe'na engkato iya sanréé ri pangkaukenna.” Ubaliwi matu, “Jellokekka pékkugi tauwé naulléi mappunnai teppe' temmappangkaukeng na uwajjellokengngi matu sibawa pangkaukeng makkedaé mappunnaika teppe'.” Dé'ga mumateppe makkedaé banna séddi bawang Allataala? Nah, muwi sining sétangngé mateppe'to sibawa ténréna mennang nataro tau! Madonggo senna'ko! Parelluga ripabutti ri iko makkedaé dé'gaga akkégunana mappunnai teppe' temmappangkaukeng? Ita bawani Abraham néné-nénéta. Ritarima madécéngngi ri Allataala nasaba pangkaukenna, iyanaritu wettunna nakkasuwiyangeng Ishak, ana'na, lao ri Allataala ri yasé'na mézbaé. Manessani kuwaé makkedaé teppe'é harusu'i riyappaitang sibawa pangkaukeng kuwammengngi namancaji sukku. Iyaro sicoco'i sibawa aya'na Kitta'éwé, “Mateppe'i Abraham ri Allataala, nasaba teppe'naro natarimai Allataala selaku tau iya pogau'éngngi élona Allataala.” Iyanaro saba'na Abraham nariteppu, “Sahaba'na Allataala.” Manessani makkekkuwangngé, makkedaé ritarima madécéngngi tauwé ri Allataala nasaba aga iya napogau'é iyaro tauwé, na tenniya banna nasaba teppe'na bawang. Ita towi ri Rahab, makkunrai cakkuribangngéro. Ritarima madécéngngi ri Allataala nasaba pangkaukenna, iyanaritu wettunna natarima ri lalempolana mata-matanna bangsa Israélié sibawa natulung mennang nalariyang aléna naolai laleng laingngé. Nah, pékkugi watakkalé iya temmakkéroh-é iyanaritu watakkalé iya maté, makkuwa toniro teppe' temmappangkaukengngé iyanaritu teppe' iya maté. Saudara-saudara! Aja' namaéga polé ri yelle'mu iya maéloé mancaji guru. Muwisseng makkedaé idi iya mancaji gurué riadélékiwi matu lebbi matedde' naiya tau laingngé. Idi manengngé biyasaki pogau' asalang. Iyakiya tau iya dé'é naengka napogau' asalang sibawa ada-adanna, iyanaritu tau iya sukkué, iya mullé kuwasai manengngi aléna. Rigalangngi anyarangngé kuwammengngi naturusiwi élota, nataulléi patunru'i sininna watakkaléna iyaro anyarangngé. Ala towi kappala'é selaku ébara'. Namuni kappala'é iyanaritu séuwai iya makkuwaémmani loppona sibawa ritiwi ri anging iya marajaé, iyakiya ripatunru'i ri golinna iya baiccu senna'é, situru élona jurumudié. Makkuwatoniro sibawa lilata; namuni iyaro lilata baiccu'i, iyakiya naulléi mattempowangngi aléna ri laleng gau'-gau' iya battowaé. Pikkiri'ni pékkugi loppona ale'é weddingngi ritunu ri api iya baiccu senna'é! Lilaé pada-padai apié. Ri watakkaléta, sinrupai assalenna majaé iya patassiyaéngngi jaé lao ri sininna aléta. Nasibawang api iya assalennaé polé ri ranakaé, nangureng manengngi sininna atuwotta. Sininna rupanna olokolo' masekkangngé, manu'-manu'é, olokolo' makkalolo'é sibawa balé weddingngi ripakacuwai, sibawa pura toni ripakacuwai ri rupa tauwé. Iyakiya lilana rupa tauwé muwi séddi tau dé'to naulléi pakacuwaiwi. Iyaro lilaé majai sibawa dé' nariyullé makuwasaiwi; pennoi sibawa racung iya paunoé. Takkégunangngi untu' mattarima kasi lao ri Puwangngé sibawa Ambo'ta, iyakiya untu' tanroi towi pada-padatta rupa tau, iya puraé ripancaji manuru' rupanna Allataala. Polé ri tému iya padaé massui ada-ada tarima kasi'é sibawato ada-ada tanro. Sitongenna dé' nakkuwaro! Engkaga mata uwai iya passué uwai kawa sibawa uwai mapai polé ri assaleng iya padaé? Saudara-saudaraku, pong araé, dé' nawedding powassélé' buwa zaitun, sibawa anggoro'é dé' nawedding powassélé' buwa ara. Mata uwai iya mapejjé dé'to nawedding passu uwai kawa. Rékko ri yelle'mu engka tau mapanré sibawa makkéakkaleng, sitinajai mappaitangngi sibawa tuwo makessing enrengngé pogau'i gau'-gau' iya makessingngé, iya nasibawangngé ariyawang ati nenniya apanréng. Iyakiya rékko mangémpuruko, mapeddi ati sibawa pentingkangngi aléna, aja' muwammingkikengngi iyaro apanréngngé, saba' nallalengiro muputara' balé'i biritta iya tongengngé iya polé ri Allataala. Apanréng makkuwaéro dé' napolé ri surugaé assalenna. Assalenna poléi ri linoé, polé ri napessunna tolinoé, sibawa polé ri sétangngé! Kégi engka angémpurung sibawa sipa' pentingkangngi alé bawang, kuwa towitu engka akacaungeng sibawa sininna rupanna pangkaukeng iya majaé. Iyakiya tau iya mappunnaiyé apanréng iya assalenna polé ri yasé', bunge'-bunge'na mapaccingngi, nainappa napoji sidamé, mabessa, sibawa mapato. Pennoi sibawa paressé babuwa powassélé' pangkaukeng-pangkaukeng iya makessingngé. Dé' nakacowé-cowé sibawa dé' nabbonga-bonga. Mémeng akessingengngé iyanaritu wassélé' polé ri biné adaméngengngé iya riyampoé ri tau iya pojiyéngngi damé! Polé kégi assalenna sininna allagangngé sibawa assasangngé ri yelle'mu? Tenniyaga iyaro assalenna poléi risining cinnamu iya matterué mammusu ri laleng alému untu' lolongengngi asennangeng linoé? Macinnako, iyakiya dé' Mulolongengngi, namaéloko pauno! Masumange'ko, iyakiya dé' naruntu'i aga iya musappaé, massasa sibawa mallaga. Dé' agaga nalolongeng, saba' dé' muwéllauwi ri Allataala. Namuni purani muwéllau, dé'to mulolongengngi, saba' akkattana paréllaummu salai; aga iya muwéllauwé iyanaritu untu' asennangeng aléna bawang. Iko iyanaritu tau iya dé'é namatinulu! Muwissegga makkedaé rékko massellaoko sibawa linoé, mancaji baliko ri Allataala? Aja' muwasengngi makkedaé Kitta'é temmakkéalasangngi nakkeda, “Ri laleng aléta Allataala taroi Roh iya matedde'é cinnana.” Namuni makkuwaro, pammaséna Allataala iya nawéréngngékki lebbi mawatangngi naiya cinnana iyaro rohta. Iyanaro saba'na ri laleng Kitta'é taroki towi, “Allataala méwai tau iya matempoé, iyakiya sibalé'na namaséiwi tau iya mariyawa atié.” Rimakkuwannanaro, tunru'no lao ri Allataala sibawa éwai Ibillisi', nalari matu Ibillisi' polé ri iko. Addeppériwi Allataala, nanaddeppéri tokko matu Allataala. Paccingiwi limammu, iko iya madosaé! Sibawa cinnongiwi atimmu, iko iya mappakka atié! Sitinajako tonget-tongeng massesse kalé sibawa teri enrengngé mpating; sitinajai cawamu mancaji teri sibawa arennummu mancaji atassinnaureng! Sitinajako pakariyawai alému ri yolona Puwangngé, naripakatanréko matu ri Puwangngé. Saudara-saudara, aja' musisullé sicella iyaré'ga sisullé sipassala. Tau iya maccellaé iyaré'ga passalaéngngi saudarana iya pada-padannaé Kristéng, nacellai sibawa napassalai hukkunna Allataala. Narékko mupassalai hukkunna Allataala, bettuwanna iyaro dé' muturusiwi iyaro hukkung-hukkungngé, sangadinna mancajiwi hakinna. Padahal banna séddi iya mappunnaiyé ha' mabbéré hukkung lao ri tolinoé sibawa madélékiwi tolinoé. Aléna ritu Allataala iya makuwasaé mappassalama' sibawa mappabbinasa. Jaji, niga iko, angkammu maélo passalai pada-padatta rupa tau? Saudara-saudara iya makkedaé, “Iyaé essoé iyaré'ga baja maéloki joppa lao ri kota anu sibawa monro kuwaro sitaung ittana untu' dangkang sibawa sappa dowi,” – éngkalingai pangajakué. Aga iya maéloé kajajiyang sibawa atuwommu baja, alému paimeng dé' naissengngi! Bannako pada-pada rumpué iya cinampe'é bawang paita, nainappa lennye. Sitongenna harusu'ko makkeda makkuwaé, “Rékko napuwéloi Puwangngé, maéloki tuwo sibawa pogau'i iyaé iyaré'ga iyaro.” Iyakiya makkekkuwangngé matempoko sibawa mabboro. Sininna abborowang pada-padaéro salai ritu. Rimakkuwannanaro, tau iya missengngéngngi aga iya makessingngé iya harusu'é napogau' iyakiya dé' napogau'i, madosai iyaro tauwé. Saudara-saudara, sining tau sugié! Engkalingai pangajaku. Sitinajako teri sibawa mpating, nasaba péneddingiko matu anrasa-rasang! Makebbonni asugiremmu. Nanréni ané pakéyammu. Ulaweng sibawa péra'mu natongkoni taiseng; mancaji sabbiwi matu taisenna méwako sibawa manréi matu gangka cappu tubummu pada-pada apié. Mupaggoppoi waramparangngé ri esso-esso wettu paccappurengngé. Dé' muwajai sarona sining tau iya majjamaé ri dare'mu. Engkalingani makkekkuwangngé addarékénna mennang! Sining tau iya paddeppungengngéngngi wassélé dare'na, gora méllau tulung nagorana mennang lettu'ni ri daucculinna Allataala, Puwang Iya Pommakuwasaé. Tuwoko sibawa massennas-sennang sibawa péneddingiwi iyaro asennangengngé ri linoéwé. Samammu mattengngang pacommokiwi alému untu' esso aggérékengngé. Muhukkungngi sibawa muunoi sining tauwé iya dé'é napasala, na dé' mennang naéwako. Rimakkuwannanaro, sabbara'ki Saudara-saudaraku, narapi polé Puwangngé. Itai pékkugi sabbara'na séddié patani tajengngi narapi tanana mabbéré wassélé' iya engkaé angke'na ri aléna. Nasibawang asabbarakeng natajengngi bosié wettu maddununa daud-daungngé sibawa bosi wettu mpungana aju-kajungngé. Sitinaja tokko sabbara sibawa pakaloppoiwi atimmu, saba' Esso apolénna Puwangngé macawé'ni. Aja' muwannoko'-noko' sibawa sisullé sipassala, kuwammengngi nadé' narihukkukko ri Allataala. Engngerangngi! Macawé'ni Hakingngé, sadiyani untu' polé. Saudara-saudara, éngngerangngi sininna nabié, iya mabbicaraé ri laleng asenna Puwangngé. Sabbara'i sibawa tahangngi manrasa-rasa. Jaji, alai mennang selaku conto. Riteppui mennang masennang nasaba tahangngi mennang. Purani muwéngkalinga asabbarakenna Ayub, sibawa muwisseng pékkugi Puwangngé ri paccappurenna barakkakiwi. Saba' maseroi paressé babuwana Puwangngé sibawa akessingeng atinna. Iya penting senna'é, iyanaritu: Aja' muwattanro, muwi nasabbing langié, iyaré'ga nasabbing tanaé, iyaré'ga muwi nasabbing agi-agi. Powadai bawang “Iyyé” rékko akkattamu iyyé, sibawa “Dé'” rékko akkattamu dé'; kuwammengngi na aja' naripakennaiko pahukkungeng ri Allataala. Rékko ri yelle'mu engka iya mattengngangngé masussa, sitinajai massempajang. Rékko engka marennu, sitinajai makkélong pojiwi Allataala. Rékko engka malasa, sitinajai naobbi sining pamimpinna jema'é. Nasitinajai iyaro sining pamimpingngé massempajangengngi iyaro tau malasaé enrengngé sapuiwi sibawa minnya ri laleng asenna Puwangngé. Rékko sining sempajanna mennang ripalettu'i ri Puwangngé sibawa mateppe', napajjappai matu Puwangngé iyaro tau malasaé, jaji Puwangngé mappajjappa, sibawa maddampengengngi dosa-dosaé iya puraé napogau'. Rimakkuwannanaro, sitinajako sisullé siyangakui asalang sibawa sisullé siyassempajangeng, kuwammengngi napajjappako. Sempajanna tau iya turusiyéngngi élona Allataala, mappunnaiwi akuwasang iya battowaé. Elia pada-padaki tolino iya pada-padaé idi'é. Massempajangngi sibawa tonget-tongeng kuwammengngi nadé' nateppa bosié, nadé'na nateppa bosié tellu sitengnga taung ittana. Nainappa massempajassi, nanapaturunni langié bosié angkanna tanaé mabbéréyangngi wassélé'na paimeng. Saudara-saudaraku! Rékko ri yelle'mu engka séddi tau iya dé'énna naccowériwi pappagguruwanna Allataala, nainappa séddié tau laing mébbui iyaro tauwé lisu ri Allataala, éngngerangngi iyaé aya'éwé: Tau iya mébbuéngngi tau madosaé balé' polé ri lalenna iya salaé, iyaro tauwé napassalama'i nyawana tau madosaéro polé ri amaténgngé sibawa nassabariwi maéga dosa riyaddampengeng. Salama, Laono mai tasukkuru ri Allataala, Ambo'na Puwatta Yésus Kristus! Namaséi senna'ki, iyanaro saba'na nawérékki atuwong mabaru, ri laleng napatuwona paimeng Yésus Kristus polé ri amaténgngé. Iyaé nawérékki amménasang iya mannennungengngé. Mamménasaki untu' mappunnaiwi barakka-barakka iya napassadiyaé Allataala untu' umma'-Na, iyanaritu barakka-barakka iya Nataroé ri surugaé, angkanna dé' naulléi masolang, iyaré'ga mancaji makebbong iyaré'ga lengngé. Iya manenna iyanaritu untu'mu, nasaba mateppe'ko ri Allataala. Narijagaiko sibawa akuwasanna Allataala kuwammengngi mutarimai asalamakeng iya sadiyaénna ripannessa ri ahéra' matti. Rimakkuwannanaro sitinajako masennang ati, namuni makkekkuwangngé untu' cinampe' harusu'ko mancaji tassinnau nasaba mupéneddingiwi maddupa-rupang paccobang. Akkattana iyanaritu pabuttiwi tonget-tongekkoga mateppe' ri Puwangngé iyaré'ga dé'. Muwi ulaweng iya weddingngé masolang, riojiwi sibawa api. Nah, teppe'mu lebbi mangke'i naiya ulawengngé, jaji harusu towi rioji kuwammengngi nancaji mattinetto. Nanallalengiro murioji matu enrengngé ripakalebbi kuwaéttopa ripakatanré ri Essona Yésus Kristus polé paimeng. Muwamaséiwi Aléna, namuni riyolo dé' muwitai. Sibawa mateppe'ko ri Aléna namuni makkekkuwangngé dé' muwitai. Iyanaro saba'na namarennuko, sibawa pérasaiwi ariyo-riyong iya battowaé sibawa iya dé'é naripowada. Saba' akkattana teppe'mu maddupai, iyanaritu asalamakenna nyawamu. Iyanaé asalamakengngé iya riparéssaé madécéd-décéng sibawa risalidiki risining nabié, nanabotoi mennang passalenna barakka iya nabbéréyangngé Allataala lao ri iko. Nasalidikiwi mennang pékkugi sibawa uppanna iyaro gau'é kajajiyang matu, iya nakkattaiyé Rohna Kristus iya engkaé ri laleng aléna. Iyaro wettué nabotoi Roh-Na lao ri mennang passalenna anrasa-rasang iya harusu'é napéneddingi Kristus sibawa passalenna arajan-Na iya maccinrolaé matu rékko purairo. Lao ri nabi-nabiéro nappaddissengengngi Allataala makkedaé aga iya napogau'é mennang tenniya untu' apentingenna mennang, sangadinna untu'mu; iyanaritu gau'-gau' makkekkuwangngéwé muwéngkalinga sibawa manessa polé risining pabbiritta Karéba Madecéngngé passalenna Yésus Kristus. Napalettu'i mennang gau'-gau'éro lao ri iko sibawa akuwasanna Rohna Allataala iya Nakiringngé polé ri surugaé. Mala muwi sining malaéka'é macinna towi missengngi karéba iya nabbirittangngéro mennang. Rimakkuwannanaro, sitinajako sadiya-sadiya. Atike'ko sibawa amménasa manenno ri barakka iya maéloé riwéréngngékko ri wettunna polé Yésus Kristus matti. Atinuluno ri Allataala, sibawa aja'na mutuwo situru pangéloremmu riyolo, ri wettummu dé'pa muwissengngi Allataala. Sibalé'na, sitinajako mapaccing ri laleng sininna gau'é iya mupogau'é, pada-pada Allataala iya mobbiékko mapaccingngi. Ri laleng Kitta'é tarokii, “Sitinajako mapaccing, saba' mapaccik-Ka.” Muteppui iyaro Allataala Ambo' ri wettummu massempajang ri Aléna. Nah, Allataalaénnaro madélékiwi tolinoé sicoco' sibawa pangkaukenna tungke'-tungke' temmappasilaingeng. Rimakkuwannanaro, ri wettu engkamu mupa ri linoéwé, sitinajako pakarajai Allataala ri laleng atuwommu. Muwisseng aga iya puraé nakkamajareng untu' paleppe'ko polé ri atuwong iya siya-siyaé iya nappammanarengngé néné-nénému. Pakkamajana tenniya séuwa iya weddingngé masolang pada-pada péra'é iyaré'ga ulawengngé, sangadinna séuwai iya mangke'é; iyanaritu aléna muto Kristus, iya mancajiyé selaku bimbala' iya nakkarobangengngé lao ri Allataala iya dé'é ricéccéiyangngi iyaré'ga cellana. Purani ripilé Kristus ri Allataala riwettu dé'napa naripancaji linoé. Na ri esso-esso macawé'nana paccappurenna linoéwé, poléi ri linoé kuwammengngi naripassalama'ko. Naolai Aléna ritu namateppe'ko ri Allataala iya puraé patuwoi paimeng polé ri amaténgngé sibawa arajan-Na. Jaji, Allataala ritu iya muwatepperiyé sibawa lao ri Allataalato ritu mamménasako. Nasaba mapatoko ri pappagguruwang polé ri Allataala, namupépaccingiwi alému sibawa mamaséiwi sining tau siatepperengngé sibawa macenning. Rimakkuwannanaro, sitinajako mamaséiwi séddié lao ri laingngé sibawa sukku atinna. Saba' naolai saddanna Allataala iya tuwoé sibawa mannennungengngéro, purano ripancaji rupa tau mabaru iya dé'é najaji polé ri tolinoé, sangadinna polé ri Ambo' iya mannennungengngé. Ri laleng Kitta'é tarokii makkuwaé, “Sininna rupa tauwé sinrupai wellaé, sibawa sininna arajanna pada-padai unga wellaé. Makelle'i wellaé, maddunu towi unganna; iyakiya saddanna Puwangngé tette'i lettu mannennungeng.” Saddaénna ritu Karéba Madécéng iya puraé riyabbirittang lao ri iko. Rimakkuwannanaro, buwanni polé ri alému sininna iya majaé; aja'na muwabbellé, sibawa aja' muwabbonga-bonga. Aja' muwangémpuru, sibawa aja' mupakatunai tau laingngé. Sitinajako mancaji pada-pada ana'loloé iya silalonaé jaji, tuli madekka lao ri susu rohanié iya mapaccingngé. Nanallalengiro nawekke'ko sibawa ripassalama'. Ri laleng Kitta'é tarokii makkuwaé, “Alémuna pura pérasaiwi pékkugi kessinna Puwangngé.” Rimakkuwannanaro, laono ri Puwangngé. Sinrupai batu iya tuwoé, batu iya nabuwangngé tauwé nasaba nangga'i dé' nakkéguna; iyakiya iya napilé Allataala selaku batu iya mangke'é. Iko pada-padako batu-batu iya tuwoé. Rimakkuwannanaro sitinajako maélo ripaké untu' patettongngi Bolana Allataala iya rohanié. Nanallalengiro mancajiko imang-ngimang iya tuwoé banna untu' Allataala, sibawa iya naolaéngngi Yésus Kristus makkasuwiyangengngi lao ri Allataala, akkarobangeng rohani iya naéloriyé atinna Allataala. Nasaba ri laleng Kitta'é tarokii makkuwaé, “Purani upilé séddi batu iya mangke'é, iya Utaroé ri Sion selaku batu iya pentingngé; na tau iya mateppe'é ri Aléna dé' naripakacélé matu.” Iyaro batué mangke' senna' untu' iko iya mateppe'é. Iyakiya untu' sining tau iya dé'é namateppe', nakennai aya'-aya'na Kitta'éwé, “Batu iya dé'é napakéi sining tukang bangunangngé mancajiwi batu iya pentingngé.” sibawa “Iyanaro batu iya mébbuéngngi tauwé tabbuttu, batu iya mébbuéngngi mennang menrung.” Tabbuttui mennang nasaba dé' namateppe' mennang lao ri ada-adanna Allataala. Makkuwatoniro pura napattentu Allataala passalenna mennang. Iyakiya iko iyanaritu bangsa iya ripilé, imang-ngimang iya tumaningiyéngngi Arungngé, bangsa iya mapaccingngé, banna untu' Allataala, umma'na muto Allataala. Allataala piléko sibawa mobbiko massu polé ri pettangngé untu' muttama ri laleng tajanna iya mattappaé, sibawa akkatta kuwammengngi muwappallebbangengngi biritta passalenna sining pangkaukenna iya dé'é padanna. Riyolo tenniyako umma'na Allataala, iyakiya makkekkuwangngé iko iyanaritu umma'na Allataala. Riyolo dé' nariyamaséiko ri Allataala, iyakiya makkekkuwangngé tarimako paressé babuwa. Saudara-saudara iya ripojiyé! Iko iyanaritu tau polé-polé sibawa passollé ri linoéwé. Rimakkuwannanaro uwéllauwi sibawa masero kuwammengngi aja' muwaccowériwi hawa napessu tolinomu iya tuli mammusué méwai nyawaé. Ampé-ampému ri yelle'na tau iya dé'é naissengngi Puwangngé harusu'i makessing senna', angkanna rékko napétenna'ko selaku tau maja, harusu'i mennang nangakui pangkaukemmu iya makessingngé, angkanna napojiwi matu mennang Allataala ri Esso apolén-Na. Nasabbing Puwangngé, sitinajako tunru' lao ri tungke' iya makuwasaiyéngngi rupa tauwé: muwi lao ri Kaisar iya mancaji panguwasa iya poko'é, iyaré'ga lao ri gubernur-é iya najello'é Kaisar untu' hukkungngi tau iya pogau'éngngi majaé sibawa untu' pakalebbii tau iya pogau'éngngi makessingngé. Saba' maéloi Allataala kuwammengngi nasibawangngi pangkaukemmu iya makessingngé mututu'i témunna tau iya mabbicara madonggoé. Sitinajako tuwo selaku tau maradéka', iyakiya aja' mupakéi amaradékammuro untu' tongkoi majaé, sangadinna tuwono selaku atanna Allataala. Angke'i sininna tauwé, amaséiwi saudara-saudaramu pada-padammu Kristéng. Etauno lao ri Allataala, sibawa pakalebbii Kaisar. Saudara-saudara iya mancaji pattumanié, tunru'no ri ponggawamu sibawa mappakalebbi, tenniya bawang lao ri mennang iya makessing atié sibawa mabessaé, iyakiya laoto ri iya mapéddaraé. Allataala barakkakiko matu, rékko nasaba mainge'ko ri élona Allataala, sabbara'ko manrasa-rasa rigaukeng ri tau iya dé'é naadélé'. Saba' aga alebbimmu rékko sabbara'i manrasa-rasa pahukkungeng iya harusu'é mutanggung nasaba pasalako? Iyakiya rékko sabbara'ko tarimai anrasa-rasang iya kennaékko nasaba pogau'ko iya tongengngé, Allataala barakkakiko matu. Untu' iyanaro Allataala naobbiko. Saba' aléna Kristus pura manrasa-rasa untu'mu, nanallalengiro nabbéréyangngi lao ri iko séuwa conto, kuwammengngi muwaccowériwi baté-Na. Dé' naengka napogau' dosa, sibawa dé' naengka muwi séddi tau méngkalingai mabbellé. Iyaro wettué rirodda-roddaiwi, dé' nappébali sibawa makkarodda-karodda. Wettunna manrasa-rasa, dé' nangancang; banna nabbéréyangngi parakara-Na lao ri Allataala, Haking iya adélé'éro. Kristus muto méssangngi dosa-dosata ri Aléna ri yasé'na aju sallié, kuwammengngi bébasa'i polé ri akuwasanna dosaé, sibawa tuwo manuru' élona Allataala. Lolona Kristus pajjappako. Riyolo pada-padako bimbala' iya pusaé, iyakiya makkekkuwangngé ritiwiko lisu untu' maccowériwi Pakkampi sibawa Pappiyara nyawamu. Makkuwatoro iko, sining bainé, harusu'i tunru' lao ri lakkaié kuwammengngi rékko ri yelle'na mennang engka iya dé'é namateppe' lao ri biritta polé ri Allataala, ampé-ampému naullé mébbui mennang mancaji mateppe'. Nadé' naparelluko powadai aga-aga lao ri mennang, saba' naitai mennang ampé-ampému iya mapaccingngé sibawa makessing. Aja'na agelloremmu banna agelloreng ri saliweng, pada-pada ébara'na bélo-béloiwi gemme'é iyaré'ga paké paréwa ulaweng, iyaré'ga mappaké iya masulié. Sibalé'na, sitinajai agelloremmu mompoi polé ri laleng baténgngé, ampé-ampé iya malemma kininnawaé sibawa tennangngé; iyanaritu agelloreng mannennungengngé iya mangke' senna'é situru pakkitanna Allataala. Nasibawang caraénnaé na ri wettu riyolo sining makkunrai maggamaé iya mamménasaé ri Allataala pagelloriwi aléna sibawa tunru'i lao ri lakkainna. Makkuwatoro Sara, mapatoi lao ri Abraham sibawa nateppui puwanna. Saudara makkekkuwangngé iyanaritu ana'-ana'na Sara, rékko mupogau'i gau'-gau' iya makessingngé sibawa dé' mumétau lao ri muwi aga. Na ikoto, sining lakkaié, sitinajano tuwo sibawa penno pappahang lao ri bainému, enrengngé nasibawang amaingekeng makkedaé mennang iyanaritu abbatireng iya malemmaé. Gaukengngi mennang sibawa malebbi, saba' silaokko mennang, tarimai matu pammasé atuwong mannennungeng polé ri Allataala. Pogau'i iyaé, kuwammengngi nadé' gaga lawa-lawaiwi sempajammu. Rippe'na iyanaritu: sitinajai Saudara-saudara masséddi ada. Sitinajako sisullé siyamasé-maséi pada-pada tau massilessurengngé. Sibawa sitinajako sisullé siesséyang babuwa sibawa kédo pakariyawai alé. Aja' muwale'i jaé sibawa ja, iyaré'ga pakkaroddaé sibawa pakkarodda; sibalé'na wale'i sibawa paréllaung barakka polé ri Allataala. Saba' Allataala mobbiko mala kuwammengngi mutarima barakka polé ri aléna. Ri laleng Kitta'é tarokii makkuwaé, “Tau iya maéloé péneddingiwi atuwongngé sibawa maélo péneddingiwi esso-esso iya makessingngé, harusu'i najagai témunna kuwammengngi aja' nabbicara gau'-gau' majaé sibawa dé' napowadai gau'-gau' iya bellé. Harusu'i mabélaiwi iya majaé sibawa pogau'i makessingngé; sitinajai tonget-tongeng méwa untu' lolongeng adaméngeng. Saba' Puwangngé tuli jampangiwi sining tau iya turusiyéngngi élo-Na, sibawa Puwangngé tuli méngkalingai sining sempajanna mennang; iyakiya Puwangngé méwai sining tau iya pogau'éngngi majaé.” Nigana maélo pogau'i majaé lao ri iko, rékko masennakko pogau'i makessingngé? Iyakiya namuni harusu'ko manrasa-rasa nasaba pogau'i gau'-gau' iya makessingngé, untu'ko! Aja' mumétau muwi lao ri niga, sibawa aja' mubata-bata. Iyakiya ri laleng atimmu, sitinajako mabbéréyangngi lao ri Kristus pappakalebbi iya dé'é padanna iya siturué sibawa tettongenna selaku Puwang. Sibawa sitinajako tuli sadiya untu' mappébali lao ri tungke' tau iya makkutanaé passalenna amménasang iya muwappunnangiyé. Iyakiya pogau'i iyaro sibawa malemma kininnawa sibawa mappakaraja. Sibawa sitinajai ati marilalemmu mapaccing, kuwammengngi rékko ripétenna'ko nasaba tuwoko sibawa makessing selaku Ana' gurunna Kristus, maka tau iya mappétenna'éro mancajiwi matu aléna muto masiri. Lebbi kessing muwi manrasa-rasaé nasaba pogau'i makessingngé – rékko iyaro iyanaritu élonai Allataala – naiya manrasa-rasaé nasaba pogau'i majaé. Saba' aléna Kristus sisemmi bawang maté lettu mannennungeng nasaba dosana tolinoé – séddié tau iya dé'é napasala, matéi untu' tau iya pasalaé. Napogau'i Kristus iyaro kuwammengngi naulléi pimpikko lao ri Allataala. Riyunoi secara tubu, iyakiya ripatuwoi paimeng secara rohani. Ri laleng keadaang roh laowi mabbirittangngi karéba polé ri Allataala lao ri roh-roh iya ritarungkué; iyanaritu rohna sining tau iya dé'é namateppe' ri Allataala ri wettunna Nuh. Iyaro wettué mattajengngi Allataala sibawa sabbara ri wettu naébbuna mupa Nuh kappala'na. Banna sining tau iya engkaé ri kappala'é bawang – iya manenna aruwa tau – iya ripassalama'é naolai lémpe loppoéro. Nah, iyaro kajajiyangngé sinrupai ébara'na acemméngngé iya makkekkuwangngéwé passalama'ko. Iyaé acemméngngé tenniya séuwa upacara mappépaccing alé polé ri sininna iya macarépaé, sangadinna sinrupai jancimmu lao ri Allataala polé ri ati marilaleng iya makessingngé. Iyaro acemméngngé napassalama'ko nasaba Yésus Kristus tuwoni paimeng polé ri amaténgngé, sibawa ménré'ni ri surugaé. Makkekkuwangngé makuwasai silaong Allataala sibawa paréntai sininna malaéka'é, sininna panguwasaé enrengngé sininna awatangengngé. Nasaba purani Kristus manrasa-rasa secara tubu, harusu towi pakkasse'i aléna sibawa attangeng pada-padaéro. Saba' tau iya manrasa-rasaé secara tubu, dé'na napogau' dosa. Rimakkuwannanaro, sitinajako tuwo matteru ri linoéwé situru élona Allataala, na tenniya manuru' élona rupa tauwé. Ri wettu labe'é, cuku'ni ittamu pogau'i aga iya napoji pogau' sining tau iya dé'é naissengngi Puwangngé. Dé' namakessing atuwommu. Muwaccowériwi hawa napessué, mammabo-mabokeng, mappésta-pésta, ménung-ménung sibawa massompa barahala secara mappakaciddi-ciddi. Makkekkuwangngé tau iya dé'é naissengngi Puwangngé, hérangngi makkedaé dé' muwaccowé tuwo pada-pada mennang, péneddingiwi dosaé dé' paggangkanna. Iyanaro saba'na napakatunako. Iyakiya matti harusu'i mennang mattanggung jawa' lao ri Allataala iya sadiyaénna untu' madélékiwi tau iya tuwoé sibawa iya maté. Iyanaro saba'na Karéba Madécéngngé pura toni riyabbirittang lao risining tau maté. Akkattana kuwammengngi mennang, iya puraé riadéléki ri laleng keadaang tubu – pada-pada mutowi sininna tauwé riadélékiwi matu – naulléi tuwo secara rohani, situru élona Allataala. Sininna séuwa-séuwaé nacawékini accappurenna, rimakkuwannanaro sitinajako makuwasaiwi alému sibawa matike', kuwammengngi muwulléi massempajang. Lebbi nasini-sininnaé, sitinajako tonget-tongeng siyamaséi séddié lao ri laingngé, saba' ri laleng sisullé siyamaséi, tuli sadiyako matu untu' sisullé siyamaséi. Sitinajako tarimai séddié lao ri laingngé ri bolana tungke'-tungke', temmaddaréké. Iko pada purano tarima pammasé iya maddupa-rupangngé polé ri Allataala. Rimakkuwannanaro selaku pajjama iya makessingngé polé risining pabbéréna Allataala, sitinajako makkégunangngi sining pabbéréro untu' apentingeng massibawa. Tau iya mappalettu'é biritta, harusu'i palettu' biritta polé ri Allataala; tau iya tumaningiyéngngi tau laingngé, harusu'i natumaningi sibawa awatangeng polé ri Allataala, kuwammengngi ri laleng sininna gau'é, weddingngi ripakaraja Allataala naolai Yésus Kristus. Aléna ritu makuwasa sibawa sipato' ripakaraja lettu mannennungeng. Aming. Saudara-saudara iya ripojiyé! Manrasa-rasa senna'ko makkekkuwangngé nasaba mattengngakko rioji. Iyakiya aja' mumarasa hérang, samanna engka séuwa iya dé'é padanna kajajiyang lao ri iko. Mala, sitinajako masennang nasaba turu'i manrasa-rasa silaong Kristus. Na matti rékko riyappaitanni arajanna Kristus, mariyo-riyoko matu. Saroko rékko ripakatunako nasaba maccowéko ri Kristus. Iyaro bettuwanna Roh iya malebbié, iyanaritu Rohna Allataala, engkai ri alému. Aja' namuwi séddi tau polé ri yelle'mu manrasa-rasa nasaba pabbunoi, iyaré'ga pangai, iyaré'ga tomaja, iyaré'ga nasaba nacampurukiwi urusanna tau laingngé. Iyakiya rékko manrasa-rasako nasaba séddiko tau Kristéng, aja' mumasiri nasaba gau'éro. Attarima kasi'no ri Allataala, makkedaé mutiwii asenna Kristus. Narapini wettunna Allataala madélékiwi linoé. Na umma'na muto Allataala riadéléki matu riyolo'. Nah, rékko Allataala maélo pammulaiwi ri idi, pékkugiwi jajinna matti sibawa sining tau iya dé'é namateppe' lao ri Karéba Madécéng polé ri Allataalaro? Ri laleng Kitta'é tarokii makkuwaéwé, “Rékko sining tau iya makessingngé mawatang toni untu' makkuwaéwé, aga tona kajajiyang matu sibawa sining tau madosaé iya dé'é naissengngi Puwangngé!” Rimakkuwannanaro, rékko engka sining tau iya manrasa-rasaé nasaba Allataala puwéloi makkuwaro, sitinajai sining tauwéro tuwoi sibawa tongeng enrengngé mabbéréyangngi aléna lao ri Pappancajinna mennang. Tuli narupaiwi matu jancin-Na. Uwéllauwi napuriyati sining pamimpinna jema'mu. Uwokii iyaé selaku sellao pamimping enrengngé selaku tau iya alénaé pura sabbingngi anrasa-rasanna Kristus, sibawa iya turu'étto matu ripakaraja, rékko arajanna Kristus riyappaitangngi lao ri rupa tauwé. Uwéllauwi sibawa masero na kuwammengngi muwampii mampii bimbala' iya nabbéréyangngé Allataala lao ri iko. Ampii mennang sibawa masennang ati pada-pada iya nacinnaiyé Allataala, sibawa aja' nasibawangngi ati matane'é. Aja'to mupogau'i jama-jamammu untu' lolongeng asarong, sangadinna nasaba tonget-tongekko macinna mattumani. Aja' mutinda' selaku panguwasa lao ri mennang iya riyappaddettangengngé lao ri iko, sangadinna ancajino conto untu' mennang. Na ri wettunna polé matti iyaro Pakkampi Marajaé, tarimako matu passigera' iya lala'-lala'é, iya dé'é matu nabellang lala'-lala'na. Makkuwatoro Saudara, sining tau maloloé. Tunru'no lao ri sining tau iya macowaé. Harusu manekko pakariyawai alému sibawa sisullé situmaningi sibawa mariyawa ati. Saba' ri laleng Kitta'é tarokii makkuwaé, “Naéwai Allataala tau iya matempoé, iyakiya namaséiwi tau iya pakariyawaéngngi atinna.” Rimakkuwannanaro, pakariyawai alému ri yawa limanna Allataala iya mawatangngé, kuwammengngi napakatanréko rékko wettunna. Abbéréyangngi sininna abata-batammu lao ri Allataala, saba' aléna jampangiko. Sitinajako matike' sibawa sadiya-sadiya! Saba' Ibillisi' iyanaritu balimmu. Pada-padai singaé iya joppaé lao tulili nangngautto sappai nanréna. Ewai sibawa teppe' iya masse'é, saba' muwissengngi makkedaé tau Kristéng laingngé ri sininna linoé manrasa-rasa towi pada-pada iko. Iyakiya puramuna manrasa-rasa cinampe', aléna Allataala mébbuko matu mancaji sukku. Napatettokko matu sibawa napéwatangiko enrengngé napakkasse'ko. Saba' Aléna iyanaritu Allataala iya makessing ati senna'é, iya puraé mobbiko untu' turu' pérasaiwi arajan-Na iya mannennungengngé naolai Kristus. Aléna ritu makuwasa lettu mannennungeng! Aming. Sure'ku iya maponco'éwé uwokii lao ri iko sibawa pattulunna Silas, iya uwangga'é séddi saudara Kristéng iya matinulué. Macinnaka mpéréngngi sumange' lao ri iko sibawa patepperiko makkedaé aga iya uwokiéwé iyanaritu biritta passalenna pammaséna Allataala iya tongengngé. Sitinajako makkatenning masse ri pammaséro. Sellao-sellao si jema'ta ri Babilonia, iya ripiléétto ri Allataala, masselleng lao ri iko, makkuwatoro ana'ku Markus iya upojiyé. Siyasselles-sellengekko séddié lao ri laingngé sibawa penno pammasé selaku saudara Kristéng. Tennapodo Puwangngé mabbéré asaléwangeng lao ri Saudara iya maneng iya mancajiyé appunnangenna Kristus. Salama, Saudara-saudara iya tonget-tongengngé mateppe' pada-pada idi! Yésus Kristus, iyanaritu Allataala sibawa Arung Pappassalama'ta, nakkulléngiki mateppe' ri Aléna, nasaba napogau'i iya tongengngé. Iyaé sure'é poléi ri Simon Pétrus, séddiwi ata sibawa rasulna Yésus Kristus. Tennapodo Allataala mabbéré barakka sibawa asaléwangeng lao ri iko sibawa tabbollompollong, saba' muwissengngi Allataala sibawa Yésus, Puwatta. Purani napaké Allataala kuwasa ilahin-Na untu' mpérékki sininna séuwa-séuwaé iya riyapparellungngé untu' mulléi tuwo massompa. Naolai aga iya riissengngé passalenna Yésus Kristus iya puraé mobbiki untu' péneddingiwi arajan-Na sibawa akessingen-Na. Nasibawang caraéro nawérékki Allataala barakka-barakka iya maseroé dé'é padanna enrengngé mangke'é iya puraé najjanciyang. Nasibawang sining barakka'éro muwulléi leppe' polé risining cinnamu majaé iya makkasolangngé ri linoéwé, namutarima sipa' ilahi. Rimakkuwannanaro, akkuragano tonget-tongeng kuwammengngi mutette mateppe' ri Kristus sibawa iyaro atepperemmu ritumpe'i ri atuwong iya makessingngé. Ri lainnaé atuwong iya makessingngé, parelluko mancaji tau iya engkaé pangissengenna, sibawa ri lainnaé mappunnai pangissengeng, harusu tokko mulléi kuwasaiwi alému. Sibawa ri lainnaé mulléi makuwasaiwi alému, sitinaja tokko musahakangngi alému untu' mattahang moloiwi sininna séuwa-séuwaé. Ri lainnaé tahang moloiwi sininna séuwa-séuwaé, harusu tokko tuwo situru élona Allataala. Sibawa tuwo situru élona Allataala harusu towi ripassakke sibawa pammasé pappoji lao ri sellao-sellao pada-padatta Kristéng. Nainappa sitinajai pammasé pappojimmu lao ri saudara-saudara pada-padatta Kristéng ritambai sibawa pammasé lao ri sininna tauwé. Iya manennaro iyanaritu sipa'-sipa' iya muwapparelluwangngé. Rékko iyaro sipa'-sipa'é engkai ri iko sibawa tabbollompollong, mancajiko materu sibawa mawwassélé', enrengngé missengngi Yésus Kristus Puwatta sibawa lebbi kessippasi. Iyakiya tau iya dé'é nappunnai sipa'-sipa'éro, maponco' pikkiranna; nallupaiwi enrengngé dé' naulléi mitai makkedaé dosa-dosana labe'é purani ripépaccingi. Rimakkuwannanaro, Saudara-saudara, akkuragano lebbi rejjing kuwammengngi pangobbina Allataala sibawa pappilé-Na ri ikoro mancajiwi pédé' masse. Rékko mupogau'i iyaro, dé' matu musalai atepperemmu. Nanallalengiro riwérékko matu ha' penno untu' muttama ri Akkarungeng mannennungengngé iya polé ri Puwangngé sibawa Arung Pappassala'ta Yésus Kristus. Rimakkuwannanaro, tuli uparéngngerangiko passalenna gau'-gau'éro, namuni muwissenni sibawa mateppe' senna' lao ri angérangenna Allataala iya puraé mutarimaro. Ri wettu tuwoku mupa, marasa waji'ka paréngngerangiko lao ri gau'-gau'éro. Saba' uwisseng makkedaé dé'na umaitta usalaiwi linoéwé, nasaba Puwatta Yésus Kristus pura mappaddissengengngi sibawa manessa lao ri iyya. Namaéloka makkuraga kuwammengngi matékuna, tuli muwéngngerangngi paimeng gau'-gau'éwé. Wettutta paissengiko pékkugi arajanna apolénna Puwatta Yésus Kristus, dé' tataggattung ri pau-pau rikadong dé'é natongeng. Arajanna Kristus purani riita sibawa mata ulutta. Engkaki kuwaro wettunna ripakalebbi sibawa ripakaraja ri Allataala Ambo'é. Ri wettuéro riyéngkalingai saddaé polé ri Iya Pommalebbié, iya makkedaé ri Aléna, “Iyanaé Ana'-Ku iya Uwamaséiyé. Napésennangiwi atik-Ku!” Aléta méngkalingai iyaro saddaé polé ri surugaé wettutta engka silaong Aléna ri yasé'na bulu iya mapaccingngéro. Iyanaro saba'na natalebbi mateppe' lao ri pasenna Allataala iya nabbirittangngé sininna nabié. Makessingengngi rékko mupénessaiwi pasengngéro, saba' iyaro pasengngé pada-padai lampu iya mattappaé ri onrong mapettangngé narapi mompo essoé, sibawa tappa wéttowing alaué mattappa ri laleng atimmu. Iyakiya lebbi-lebbipi sitinajai muwéngngerangngi iyaé: Pasenna Allataala iya napalettu'é sining rasul-é, dé' nawedding ritasséré' manuru' pallolongeng aléta. Saba' dé' naengka paseng polé ri Allataala nabbirittang tolinoé nasaba élo aléna. Iyakiya Rohna Allataala makuwasaiwi tauwé untu' palettu'i paseng polé ri Allataala muto. Ri wettu labe'é ri yelle'na umma'na Allataala momponi nabi-nabi palsué. Makkuwatoro ri yelle'mu mompoi matu guru-guru palsué. Naputtama'i matu mennang sining pappagguruwang iya dé'é natongeng, iya solangiyéngngi tauwé. Sibawa nassakkarengngi matu mennang Panguwasa iya puraé paleppe'i mennang. Nanallalengiro papoléi mennang abinasang ri aléna, iya kennaéngngi mennang sibawa masitta'. Namuni makkuwaro, maéga tau maccowériwi matu cara atuwo-tuwonna guru-guru palsuéro iya rikuwasaiyé ri hawa napessunna. Na pangkaukenna guru-guruéro mébbui matu maéga tau pakatunai Laleng Tongengngé iya mattujué ri Allataala. Nasaba mangowai mennang, na iyaro guru-guru palsué nacuritai matu lao ri iko curita-curita iya nakarangngé untu' lolongeng asarong polé ri iko. Iyakiya pengadilang untu' patatteppai pahukkungengngé ri yasé'na mennang maittani ripassadiya, sibawa abinasang iya puraé ripattentu untu' mennang mattengngang tajengngi mennang. Muwi malaéka'-malaéka' iya madosaé dé'to naleppessangngi Allataala leppe' polé ri pahukkungengngé, sangadinna ribuwang ri laleng ranakaé. Riputtama'i mennang ri laleng balorangngé iya makalemmengngé untu' ritahang kuwaro narapi Esso Pangadilangngé. Makkuwatoro sibawa linoé ri wettu riyolo, dé' naleppessangngi Allataala leppe' polé ri pahukkungenna. Allataala kiring lémpe raja ri linona sining tau majaé ri wettuéro. Banna Nuh silaong pitu tau laing bawang ripassalama', nasaba Nuh patassiyai biritta passalenna iya naéloriyé ri atinna Allataala. Pada-pada mutowi kota Sodom sibawa Gomora; Allataala pallennye'i iyaro kota-kotaé sibawa api kuwammengngi nancaji conto passalenna aga iya maéloé kajajiyang sibawa sining tau iya majaé. Iyakiya ripassalama'i Lot, nasaba naturusiwi élona Allataala; manrasa-rasa senna'i nasaba pangkaukeng iya dé'é nasipato' polé risining tau iya maja ampé. Ri tengnga-tengngana sining tau makkuwaéro, Lot iya makessingngéro tuwoi sibawa risissai baténna, nasaba esso-esso naitai sibawa naéngkalingai sining pangkaukenna mennang iya majaé. Jaji, naisseng Puwangngé pékkugi passalama'i sining tau iya turusiyéngngi élo-Na rékko moloiwi paccobang-paccobang. Sibawa naisseng Puwangngé pékkugi taroi sining tau iya majaé untu' risissa ri Esso Pangadilangngé, lebbi-lebbipi sining tau iya turusiyéngngi sining élona hawa napessunna iya macarépaé sibawa iya pakatunaéngngi akuwasanna Allataala. Makkuwa mani baraninna sibawa tempona guru-guru palsuéro angkanna dé' mennang nabata-bata pakatunai sining mahlu' iya malebbié muwi ri surugaé! Sedangkang malaéka'-malaéka' iya mabélaé lebbi mawatang sibawa makuwasa naiya guru-guru palsuéro, dé' nateppui sining mahlu' iya malebbiéro sibawa ada-ada pappakatuna ri yolona Puwangngé. Iyakiya iyaro guru-gurué, tenniya culé-culé! Pada-pada mennang olokolo'é iya jajiyé untu' ritikkeng sibawa riyuno bawang. Dé' napikkiri' mennang, iyakiya tinda'i manuru' parasaanna bawang, angkanna naéwai mennang gau'-gau' iya dé'é napahangngi sibawa ada-ada pappakatuna. Rimakkuwannanaro nasaba sining pangkaukenna muto, binasai matu mennang pada-pada olokolo' masekkangngé. Selaku pamale'na lao ri anrasa-rasang iya napaompoé mennang, péneddingiwi matu mennang anrasa-rasang. Lao ri mennang, gau' iya pésennangiyéngngi atié iyanaritu pogau'i agi-agi ri essoé untu' pésennangiwi cinna watakkaléna. Rékko tudangngi mennang silaong iko ri laleng péstaé manré, kédo-kédona mennang péjariwi pappéneddingngé nasaba mabo'i mennang sibawa hawa napessu. Nasaba dé'gaga cauna mennang pogau' dosa, sibawa iya napojiyé mennang iyanaritu mitai makkunrai cakkuribangngé. Sibawa tau iya nappaé mateppe' sibawa makurangngé mupa teppe'na, napangaruiwi mennang. Atinna mennang biyasani sibawa angowang. Mennang iyanaritu sining tau iya tattanroé! Nasaba dé' namaélo maccowériwi laleng iya malempué, napusa mennang. Nalai mennang laleng iya naccowériyé Biléam ana' Béor riyolo. Iyaé Biléam macinna senna'i lolongeng dowi polé ri pangkaukenna iya majaé. Iyakiya lolongengngi papparéngngerang iya matedde'é lao ri janaro, wettunna mabbicara kaleddé'na sibawa sadda tolino. Naripassa iyaro nabié untu' pappésauwi pangkaukenna iya jangengngéro. Iyaro guru-guru palsué iyanaritu pada-padai mata uwai iya marakkoé sibawa pada-pada saléwué iya nairié anginraja. Allataala pura passadiyangengngi mennang séuwa onrong iya mapettang senna'é. Mébbui mennang pappakatajang iya omong kosongngé sibawa dé'é nallise'; napessu iya mappangaddié napakéi mennang untu' pasempé'i sining tau iya nappaé leppe' polé ri yelle'na tau iya tuwo pusaé. Iyaro guru-guru palsué najjanciyangngi amaradékangngé lao risining tauwéro, padahal aléna mennang ripowata risining abiyasang iya solangiyéngngi rupa tauwé. Saba' rékko ricaui tauwé riséuwaé, mancajiwi ata polé ri iya cauéngngiro. Tau iya missengngéngngi Puwangngé sibawa Pappassalama'ta Yésus Kristus, leppe'ni polé risining akuwasanna linoé iya carépaiyéngngi rupa taruwé. Iyakiya rékko rimunri nalai siyosi angkanna ricau risining akuwasangngéro, nancajina keadaanna iyaro tauwé ri paccappurenna lebbi majapi naiya riyolona. Lebbi kessing muwi sining tau makkuwaéro dé' naengka naissengngi laleng tongengngé polé ri Allataala, naiya naissengngi mennang, iyakiya rimunri dé' namaélo maccowériwi parénta-parénta iya Nabbéréyangngé Allataala lao ri mennang. Aga iya napogau'é mennang pabuttiwi atongengenna iyaé warékkadaé, “Nanréi matu paimeng asué aga iya puraé naluwa,” sibawa “Tédong iya puraé ricemmé, lisui matu maggalélu ri laleng bungkaé.” Saudara-saudaraku iya upojiyé! Iyanaé sure'ku maduwaé lao ri iko. Ri laleng iya duwa sure'éwé, makkuragaka paompoi pikkirang-pikkirang iya makessingngé ri iko. Uwappétangngarengngi kuwammengngi muwéngngerangngi lao ri ada-ada iya napowadaé riyolo nabi-nabinna Allataala, sibawa lao ri parénta polé ri Puwangngé, Arung Pappassalama', iya ripalettu'é ri iko naolai rasul-rasul-é. Bunge'-bunge'na, harusu'i muwisseng makkedaé ri esso-esso paccappurengngé, mompoi matu sining tau iya rikuwasaiyé atuwonna ri hawa napessunna muto. Naéllékéllé'ko matu mennang sibawa makkeda makkuwaé, “Adanna majjanciwi Puwangngé maélo polé! Kégani makkekkuwangngé Aléna? Bapa'-bapa' toriyolota maténi, iyakiya sini-sininnaé pada-pada mupi sipongenna ripancaji alangngé!” Nattungka mennang dé' namaélo mangaku makkedaé riyolo Allataala pancajiwi langié sibawa linoé, polé ri saddan-Na; makkedaé ripancajiwi linoé polé ri uwai, enrengngé nasibawang uwai; kuwaéttopa nasibawang towi uwai, iyanaritu uwai polé ri lémpe rajaé, iyaro linoé riyolo ripabbinasai. Iyakiya langi sibawa lino iya engkaé makkekkuwangngéwé, ripiyara towi ri saddanna Allataala untu' ripallennye' sibawa api matti. Makkekkuwangngé langié sibawa linoé ripiyara mupi narapi ri esso sining tau majaé rihukkung sibawa ripabbinasa. Iyakiya Saudara-saudaraku, iyaro séddié passaleng aja' muwallupaiwi: makkedaé ri laleng pakkitanna Puwangngé, séddié esso dé'gaga sisalana sibawa sisebbu taung – duwa-duwanna pada-pada muwi ri Aléna. Dé' namatengnge Puwangngé mabbéréyangngi aga iya puraé najjanciyang, namuni engka masengngi makkuwaro. Sibalé'na, sabbara'i lao ri iko, saba' dé' namaélo muwi séddi tau binasa. Macinnai kuwammengngi sininna tauwé natoba' polé ri dosa-dosana. Iyakiya Esso apolénna Puwangngé poléi matu pada-pada pangaé. Iyaro Essoé, lennye'i matu langié sibawa oni memmu sibawa anu engkaé ri langié cappui matu ritunu, enrengngé linoé sibawa sininna iya engkaé ri lalenna lennye'i matu. Nasaba iya manennaro riyancuru'i matu sibawa cara makkuwaéro. Pékkugiko harusu tuwo? Harusu'ko tuwo mapaccing sibawa banna untu' Allataala, ri wettu mattajemmu mupa enrengngé muddaningiwi apolénna Essona Allataala. Ri Essoéro cappui matu ritunu langié, sibawa nasaba pellana, nasining anu engkaé ri langié maccolo'i matu. Iyakiya mattajekki aga iya puraé najjanciyang Allataala, iyanaritu langi mabarué sibawa lino mabarué, kégi engka adélékeng. Rimakkuwannanaro, Saudara-saudara iya upojiyé, ri wettu mutajenna iyaro Essoé, akkuragano tonget-tongeng untu' tuwo mapaccing sibawa dé' cellana ri yolona Allataala. Sibawa piyarai assisumpungeng iya makessingngé sibawa Allataala. Angga'ni asabbarakenna Puwatta selaku kasempatang iya Nabbéréyangngé lao ri iko kuwammengngi naweddikko salama'. Paulus, saudarata iya ripojiyé pura toni naoki makkuwaéro lao ri iko. Naokii iyaro sibawa apanréng iya Nabbéréyangngé Allataala ri aléna. Ri laleng sininna sure'na, tuli naokii Paulus passalenna gau'éro. Mémeng engka siyagangngaré passaleng iya mawatangngé ri pahang ri laleng sure'naro. Na iyaro bagiyab-bagiyangngé purani naputara'balé sining tau iya dé'é agaga naisseng sibawa iya dé'é namasse teppe'na. Dé' nappahérang gau'éro, bagiyab-bagiyanna Kitta'é rigaukeng towi makkuwaro ri mennang. Aga iya napogau'éro mennang banna ancurukeng ri mennang muto. Iyakiya iko, Saudara-saudara iya upojiyé, muwissenni passalenna gau'éro. Rimakkuwannanaro, atike'no, aja' narapiko ritiwi ri laleng apusanna sining tau maja ampé angkammu sempé' polé ri onrong akkellaremmu iya matedde'é. Sitinajako pédé' mupérasa pammaséna Yésus Kristus, Puwang sibawa Arung Pappassalama'ta, sibawa sitinaja tokko pédé' missengngi Aléna. Ripojiwi Aléna, makkekkuwangngé sibawa lettu mannennungeng! Aming. Salama, Lise'na iyaé sure'é iyanaritu passalenna Sadda iya mabbéré atuwong, iyanaritu Sadda iya engkaénna sipongenna pammulanna mupa. Purani riyéngkalinga enrengngé purani riita sibawa mata aléta. Purani riita, enrengngé purani riyakkatenning sibawa limatta. Wettunna iyaro atuwongngé ripannessa, aléta mitai. Iyanaro saba'na tamabbéré asabbing passalenna aléna. Idi mabbirittangngi lao ri iko passalenna atuwong tongengngé sibawa mannennungengngé, iya engkaé silaong Ambo'é, enrengngé iya puraé ripannessa lao ri idi. Aga iya puraé riita sibawa riyéngkalinga, iyanaro riyabbirittang lao ri iko, kuwammengngi musibawakki maccowé mattemmeriwi atuwongngé, masséddi sibawa Ambo'é kuwaéttopa Ana'na Yésus Kristus. Riyokii iyaé kuwammengngi natonget-tongeng masennang atitta. Iyanaé biritta iya puraé riyéngkalinga polé ri Ana'-Na sibawa iya tapalettu'é lao ri iko! Iyaro Allataala tajangngi, sibawa ri Aléna dé' siseng gaga apettangeng. Rékko makkedai makkedaé tuwoki masséddi sibawa Aléna, padahal tuwoki ri laleng apettangengngé, tentu mabbelléki muwi nasibawang ada-ada iyaré'ga pangkaukeng. Iyakiya rékko tuwoki ri laleng tajangngé pada-pada Allataala engka ri laleng tajangngé, tentu tuwoki mareppé enrengngé sipammasé-masé séddié lao ri laingngé, sibawa darana Yésus, Ana'-Na, pépaccingiki polé ri sininna dosaé. Rékko makkedaki makkedaé dé' tamadosa, ribelléi aléta muto; sibawa Allataala dé' naengka ri laleng atitta. Iyakiya rékko tangakuiwi dosa-dosata lao ri Allataala, narupaiwi matu jancin-Na sibawa napogau'i aga iya adélé'é. Naddampengengngi dosa-dosata sibawa napépaccingiki polé ri sininna pangkauketta iya salaé. Iyakiya rékko makkedaki makkedaé dé' tamadosa, mappallolongekki samanna Allataala pabbelléng; bettuwanna dé' tataroi ada-adanna Allataala ri atitta. Ana'-ana'ku! Uwokii iyaé lao ri iko kuwammengngi dé' mupogau' dosa. Iyakiya rékko engka pogau' dosa, mappunnaiki séddi tau méwaiki, iyanaritu Yésus Kristus iya adélé'éro; naéllaungekki matu ri yolona Ambo'é. Naolai Yésus Kristus ritu nariyaddampengeng dosa-dosata. Natenniya dosa-dosata bawang, sangadinna dosanato sininna rupa tauwé. Rékko matinuluki ri parénta-paréntana Allataala, iyanaro tanranna makkedaé taissengngi Allataala. Tau iya makkedaé, “Uwissengngi Allataala,” iyakiya dé' namatinulu lao ri parénta-parénta-Na, iyaro tauwé mabbelléi, sibawa Allataala dé' naengka ri laleng atinna. Iyakiya tau iya matinulué lao ri ada-adanna Allataala, iyaro tauwé namaséiwi Allataala sibawa sukku. Iyanaro tanranna makkedaé tuwoki masséddi sibawa Allataala. Nigi-nigi makkeda makkedaé tuwoi masséddi sibawa Allataala, tentu cara atuwonna harusu'i pada-pada Kristus. Saudara-saudara iya upojiyé! Iya uwokiéwé tenniya séuwa parénta iya barué. Iyaé parénta malaung, parénta iya puraé napalettu' lao ri iko sipongemmu mammula mateppe' ri Kristus; iyanaritu biritta polé ri Allataala iya puraé muwéngkalinga ri yolona. Namuni makkuwaro, parénta iya uwokiéwé baru towi; nasaba atongengenna weddingngi riita ri aléna Kristus sibawa ri alému. Saba' pédé' lennye' apettangengngé sibawa tajang iya tongengngé mammulani mattappa. Tau iya powadaéngngi makkedaé engkai ri laleng tajangngé iyakiya nabenciwi saudarana, iyaro tauwé engka mupi ri laleng apettangengngé lettu makkekkuwangngé. Tau iya mamaséiyéngngi saudarana, tuwoi ri laleng tajangngé, angkanna dé' muwi séuwa ri aléna iya nassabariyéngngi matu tau laingngé nasempé ri laleng dosaé. Iyakiya tau iya benciyéngngi saudarana, engkai ri laleng apettangengngé, joppai ri laleng apettangengngé sibawa dé' naissengngi kégai lao, saba' iyaro apettangengngé mébbui aléna dé' naulléi makkita. Uwokii lao ri iko, Ana'-ana', saba' riyaddampengenni dosamu nasaba Kristus. Uwokii lao ri iko, Bapa'-bapa', saba' muwissenni Aléna iya engkaénna ri pammulanna mupa. Uwokii lao ri iko, sining kalloloé, saba' purani mucau Si Majaé. Uwokii lao ri iko, Ana'-ana', saba' muwissengngi Allataala Ambo'é. Uwokii lao ri iko, Bapa'-bapa', saba' muwissengngi' Sadda iya engkaén-Na pammulang mupa. Uwokii lao ri iko, sining kalloloé, saba' mawatakko. Ada-adanna Allataala engkai ri laleng atimmu, sibawa purani mucau Si Majaé. Aja' mupojiwi linoéwé, iyaré'ga agi-agi iya engkaé ri laleng linoéwé. Rékko muwéloriwi linoéwé, dé' muwéloriwi Ambo'é. Sininna séuwa-séuwaé iya engkaé ri laleng linoéwé – iya nacinnaiyé kédo-kédo tolino iya madosaé, iya riitaé, nainappa riyacinnai, sibawa iya riyammingki'-mingkikengngé – iya manenna iyanaritu gau'-gau' iya dé'é napolé ri Ambo'é assalenna, sangadinna poléi rilinoé. Linoé sibawa sininna séuwa-séuwaé ri lalenna iya nacinnaiyé rupa tauwé, mattengngangngi lennye'. Iyakiya tau iya maccowériyéngngi élona Allataala, tette'i tuwo lettu mannennungeng. Ana'-ana'ku, macawé'ni accappurenna linoé! Purani ripaissengiko riyolona makkedaé Balinna Kristus poléi matu, na makkekkuwangngé maégana tau mompo iya musuéngngi Kristus. Iyanaro tanranna makkedaé macawé'ni accappurenna linoé. Iyaro sining Balinna Kristus iyanaritu sining tau iya salaiyékki, nasaba sitongenna mennang mémeng tenniya sining tautta. Rékko mennang sining tautta, tentu mennang tette'i sibawa idi. Iyakiya nasalaiki mennang, kuwammengngi namanessa makkedaé dé' muwi séddi polé ri mennang iya tonget-tongengngé muttama ri golongetta. Iyakiya mutarimani Rohna Allataala iya napanurungngé Yésus Kristus, na iyanaro saba'na namuwisseng manengngi pappagguruwang tongengngé. Jaji uwokii iyaé lao ri iko tenniya nasaba dé' muwissengngi pappagguruwang iya tongengngé, iyakiya mala nasaba muwissenni, sibawa muwisseng toni makkedaé pappagguruwang iya tongengngéro dé' naengka nadé' gaga bellé ri lalenna. Iya mabbellé iyanaritu tau iya makkedaé Yésus tenniya Arung Pappassalama' iya najjanciyangngé Allataala. Iyaro tauwé Balinna Kristus; dé' nangakuiwi Ambo'é iyaré'ga Ana'é. Tau iya dé'é nangakuiwi Ana'é, bettuwanna dé'to natarimai Ambo'é. Sibawa tau iya mangakuiyéngngi Ana'é, bettuwanna natarima towi Ambo'é. Rimakkuwannanaro, biritta iya puraénna muwéngkalinga sipongenna bunge' mateppe'ko, harusu'i mujagai madécéd-décéng ri laleng atié. Rékko mupuriatiwi madécéd-décéng iyaro birittaé, tuli tuwoko matu masséddi sibawa Ana'é enrengngé silaong Ambo'é. Na iyanaé najjanciyang Kristus lao ri idi: Atuwong tongengngé sibawa mannennungengngé. Uwokii iyaé lao ri iko passalenna sining tau iya mattengngangngé makkuraga belléko. Iyakiya passalenna alému, purani napanurung Kristus Roh-Na lao ri iko. Na ri wettu engkana mupa Roh-Na ri iko, dé' naparellu engka tau laing pagguruko. Saba' Roh-Na pagguruko passalenna sininna séuwa-séuwaé; sibawa aga iya nappagguruwangngéro tongengngi, tenniya bellé. Rimakkuwannanaro, sitinajako matinulu lao ri aga iya nappagguruwangngé iyaro Roh-é, sibawa sitinajako tette' tuwo masséddi sibawa Kristus. Jaji, ana'-ana'ku, tette'no tuwo masséddi sibawa Kristus, kuwammengngi na ri Essona poléi, mangoloki Aléna sibawa penno abaraningeng, sibawa dé' tallekke nasaba masiri. Muwissenni makkedaé tuwoi Kristus situru élona Allataala. Rimakkuwannanaro harusu'i muwissetto makkedaé tungke' tau iya tuwoé situru élona Allataala iyanaritu Ana'nai Allataala. Itani pékkugi Allataala mamaséiki angkanna nangakuiki selaku ana'-ana'-Na. Mémeng idi iyanaritu Ana'-ana'na Allataala. Iyanaro saba'na lino iya majaéwé dé' naissekki, saba' linoéwé dé' naissengngi Allataala. Saudara-saudara iya upojiyé! Idi makkekkuwangngé iyanaritu Ana'-ana'na Allataala, iyakiya keadaatta matti dé'pa namanessa. Iyakiya riissengngi makkedaé rékko poléi Kristus, mancajiki matu pada-pada Aléna, saba' taitai matu ri laleng keadaan-Na iya sitongennaé. Sininna tauwé iya mappunnangiyéngngi iyaé paddennuwangngé lao ri Kristus, najagaiwi aléna kuwammengngi natonget-tongeng mapaccing, mapaccing polé ri dosaé pada-padato Kristus mapaccing. Tau iya pogau'é dosa, najjalékkaiwi hukkunna Allataala, saba' dosaé iyanaritu pelanggarang lao ri hukkunna Allataala. Muwisseng makkedaé poléi Kristus untu' leddai dosa-dosana tolinoé, sibawa makkedaé dé'gaga dosa ri laleng aléna. Sininna tau iya tuwoé masséddi sibawa Kristus, dé' natteru-teru pogau' dosa. Tau iya matteru-terué pogau' dosa, dé' naengka naitai Kristus iyaré'ga naissengngi Aléna. Ana'-ana'ku, aja' muleppessangngi muwi niga papusako. Tau iya pogau'éngngi élona Allataala, iyanaritu ana'-ana'na Allataala pada-pada muto Kristus iyanaritu Ana'na Allataala. Iyakiya tau iya matteru-terué pogau' dosa, ana'nai iyanaritu Ibillisi', saba' Ibillisi' pammulanna mupa namadosa. Untu' iyanaé napolé Ana'na Allataala, iyanaritu untu' mancuru'i jama-jamanna Ibillisi'. Tau iya mancajiyénna Ana'na Allataala, dé' natteru-teru pogau' dosa, saba' sipa'na muto Allataala engka ri aléna. Sibawa nasaba iyaro Allataala Ambo'na, nadé' naulléi matteru-teru pogau' dosa. Iyanaé assisalanna ana'-ana'na Allataala sibawa ana'-ana'na Ibillisi': nigi-nigi dé' napogau'i élona Allataala, iyaré'ga dé' namaséiwi saudarana, tenniyai ana'na Allataala. Pammulanna mupa naripalettu iyaé birittaé lao ri iko: Harusu'ki mamaséiwi séddié lao ri laingngé. Aja' tapada-pada Kaing, iya mancaji ana' Ibillisi'é sibawa mpunoi padaorowanéna muto. Aga saba'na Kaing naunoi padaorowanéna? Saba' gau'-gau' iya napogau'é salai, iyakiya gau'-gau' iya napogau'é padaorowanéna iyanaritu tongengngi. Rimakkuwannanaro, Saudara-saudaraku, aja' muhérang rékko sining taunna linoé nabenciko. Taissenni makkedaé massuni' polé ri amaténgngé, sibawa létté lao ri atuwongngé. Taissengngi iyaro, saba' tamaséiwi pada-padanna saudarata. Tau iya dé'é namamasé, bettuwanna rikuwasai mupi ri amaténgngé. Tau iya benciyéngngi saudarana iyanaritu pabbunoi, na muwisseng makkedaé séddié tau pabbuno dé' nappunnai atuwong tongengngé sibawa mannennungengngé. Nallalengi iyaé nataissengngi carana mamaséiwi pada-padatta: Purani nabbéréyang Kristus atuwon-Na untu' idi. Rimakkuwannanaro, harusu' tokki mabbéréyangngi atuwotta untu' Saudara-saudarata! Séddié tau iya agennekengngé mitai saudarana akurangeng, iyakiya dé' namaélo tulungngi saudaranaro, pékkugi iyaro tauwé mulléi makkeda makkedaé namaséiwi Allataala? Ana'-ana'ku! Aja' tamaséiwi banna ri témué iyaré'ga banna ada-ada bawang. Sitinajaki makkamasé sibawa pammasé iya tongengngé, iya ripabuttiyé sibawa pangkauketta. Pékkugiwi carata missengngi makkedaé muttama'ki ana'-ana'na Allataala iya tongengngé, naweddingngi tennang atitta ri yolona Allataala. Taissenni makkedaé rékko ripasalaki ri atitta, pangissengenna Allataala lebbi battowai naiya pangissengenna ati marilaletta, enrengngé makkedaé naissengngi iya manem-manenna. Jaji, Saudara-saudaraku iya upojiyé, rékko ati marilaletta dé' napasalaki, weddikki mangolo ri Allataala sibawa abaraningeng. Na aga riyéllau polé ri Aléna, talolongengngi, nasaba matinuluki ri parénta-parénta-Na sibawa pogau'i aga iya pésennangiyéngngi atin-Na. Iya napparéntangngé lao ri idi iyanaritu: Harusu'ki mateppe' lao ri Ana'-Na, iyanaritu Yésus Kristus, sibawa harusu'ki sisullé siyamaséi, pada-pada iya puraé napparéntang Kristus lao ri idi. Sininna tau iya matinulué lao ri parénta-paréntana Allataala, tuwoi masséddi sibawa Allataala, enrengngé Allataala tuwoi masséddi sibawa mennang. Sibawa taissengngi makkedaé Allataala tuwoi masséddi sibawa idi, nasaba purai nawérékki Roh-Na. Saudara-saudara iya upojiyé! Aja' mumateppe lao ri sininna tauwé iya mangakué mappunnai Rohna Allataala, iyakiya ojiwi mennang riyolo' untu' missengngi aga Roh iya engkaé ri mennannanro assalenna poléi ri Allataala iyaré'ga dé'. Saba' maéga nabi palsu tassiya-siya kégi-kégi. Mappakkuwaiyé caranako missengngi aga iyaro Rohna Allataala iyaré'ga tenniya: Tau iya mangakuiyéngngi makkedaé Yésus Kristus poléi ri linoé selaku tolino, iyaro tauwé mappunnaiwi Roh iya polé ri Allataala. Iyakiya tau iya dé'é nangakuiwi gau'éwé passalenna Yésus, dé' nappunnaiwi Rohna Allataala. Iyaro tauwé mappunnaiwi roh polé ri Balinna Kristus. Purani muwéngkalinga saudara makkedaé iyaro roh-é maéloi polé, na makkekkuwangngé engkani ri laleng linoéwé. Iyakiya Ana'-ana'ku, appunnangennako Allataala. Purani mucau nabi-nabi palsué, saba' Roh iya engkaé ri iko lebbi makuwasai naiya roh iya engkaé risining tau iya appunnangenna linoéwé. Iyaro nabi-nabi palsué mabbicarai passalenna gau'-gau' linoé, nanaéngkalingai linoé ada-adanna mennang, saba' mennang appunnangennai linoé. Iyakiya idi iyanaritu appunnangennaki Allataala; na tau iya missengngéngngi Allataala, naéngkalingai ada-adatta. Tau iya tenniyaé appunnangenna Allataala, dé' naéngkalingai ada-adatta. Makkuwaniro carata missengngi assilaingenna Roh iya mabbéré pappagguruwang iya tongengngé sibawa Roh iya mappapusaé. Saudara-saudara iya upojiyé! Laono mai tamaséiwi séddié lao ri laingngé, saba' pammasé, assalenna poléi ri Allataala. Tau iya mamasé, iyanaritu ana'nai Allataala sibawa naissengngi Allataala. Tau iya dé'é namamasé, dé' naissengngi Allataala; saba' Allataala iyanaritu mamaséiwi. Napannessani Allataala makkedaé namaséiki, ri laleng nakirinna Ana'-Na iya tungke'é ri laleng linoé kuwammengngi talolongeng atuwong naolai iyaro Ana'-Na. Iyanaé pammasé: Tenniya idi iya mamaséiyéngngi Allataala, iyakiya Allataala iya mamaséiyékki sibawa kiringngi Ana'-Na kuwammengngi naolai Aléna talolongeng addampengeng ri dosa-dosata. Saudara-saudara iya upojiyé, rékko makkuwa mani namaséitta Allataala, harusu tokki mamaséiwi séddié lao ri laingngé. Dé' gaga muwi séddi tau pura mitai Allataala, iyakiya rékko sisulléki siyamaséi, masséddiwi Allataala sibawa idi enrengngé pammasé-Na mancaji sukkui ri laleng aléta. Rimakkuwannanaro Allataala pura mpérékki Roh-Na, nataissengngi makkedaé tuwoni masséddi sibawa Allataala, enrengngé Allataala masséddi sibawa idi. Alétana pura mitai Ana'na Allataala, sibawa riyabbirittangngi makkedaé risuroi ri Ambo'é untu' mancaji Arung Pappassalama'na linoéwé. Nigi-nigi mangakuiwi makkedaé iyaro Yésus Ana'i Allataala, tuwoi Allataala masséddi sibawa tauwéro, enrengngé iyaro tauwé tuwo towi masséddi sibawa Allataala. Allataala missengngi sibawa mateppe' lao ri pammaséna Allataala lao ri idi. Iyaro Allataala mamaséi. Tau iya rikuwasaiyé atuwonna ri pammasé, iyaro tauwé masséddiwi sibawa Allataala, enrengngé Allataala masséddi sibawa aléna. Ripassukkui pammasé ri laleng aléta, kuwammengngi tappunnai abaraningeng ri Esso Angadélékengngé. Mappunnaiki matu abaraning, saba' atuwotta ri linoéwé pada-padai atuwonna Kristus. Tau iya péneddingiyéngngi pammaséna Allataala, dé' naissengngi métaué; saba' pammasé iya sukkué napallennye'i sininna tauwé. Jaji manessani makkedaé dé'pa napéneddingiwi tauwé pammaséna Allataala sibawa sukku rékko iyaro tauwé métaui moloiwi Esso Angadélékengngé. Idi mamaséki, nasaba Allataala lebbi riyolo mamaséiki. Rékko séddié tau makkeda, “Iyya uwamaséiwi Allataala,” iyakiya dé' namaséiwi saudarana, iyaro tauwé pabbelléng. Saba' tau iya dé'é namaséiwi saudarana iya naitaé, dé' nakkullé namaséiwi Allataala iya dé'é naitai. Rimakkuwannanaro, iyanaé parénta nabbéréyangngé Kristus lao ri idi: Nigi-nigi mamaséiwi Allataala harusu'i namaséi towi saudarana. Tau iya mateppe'é makkedaé Yésus iyanaritu Arung Pappassalama' iya najjanciyangngé Allataala, iyaro tauwé iyanaritu ana'nai Allataala. Tau iya mamaséiyéngngi séddié ambo', namaséi towi ana'na. Nallalengi iyaé nataissengngi makkedaé tamaséiwi ana'-ana'na Allataala: Tamaséiwi Allataala sibawa matinulu lao ri parénta-parénta-Na. Saba' mamaséi Allataala bettuwanna matinulu lao ri parénta-parénta-Na. Na parénta-parénta-Na dé' namatane untu' aléta, saba' tungke' ana'na Allataala naulléi caui linoé iya majaéwé. Na tacaui linoé sibawa teppe'ta. Nigana mulléi caui linoé? Banna tau iya mateppe'é makkedaé Yésus iyanaritu Ana'nai Allataala. Yésus Kristus ritu iya polé ri linoé sibawa uwai paccemmé-Na enrengngé nasibawang dara amatén-Na. Poléi tenniya banna nasibawang uwai bawang, iyakiya nasibawang uwai sibawa dara. Na Rohna muto Allataala mabbéré asabbiyang makkedaé tongengngi iyaro, saba' Roh-é dé' naengka nabbellé. Engka tellu sabbi: Rohna Allataala, uwai sibawa dara – iya tellu mabbéréi asabbiyang iya padaé. Mateppe'ki ri asabbiyanna tolinoé, iyakiya asabbiyanna Allataala lebbi mawatappasi. Na iyanaro asabbiyang iya puraé nabbéréyang Allataala passalenna Ana'-Na. Rimakkuwannanaro, tau iya mateppe'é ri Ana'na Allataala, purani natarima iyaro asabbiyangngé ri laleng atinna; iyakiya tau iya dé'é natepperiwi Allataala, naangga'ni samanna Allataala pabbelléng, saba' dé' namateppe' lao ri aga iya napowadaé Allataala passalenna Ana'-Na. Iyanaé asabbiyangngéro: Allataala pura mpérékki atuwong tongengngé sibawa mannennungengngé, sibawa Ana'-Na iyanaritu assalenna iyaro atuwongngé. Tau iya mappunnangiyéngngi Ana'na Allataala, nappunnangiwi iyaro atuwongngé; na tau iya dé'é nappunnangiwi Ana'na Allataala, dé' nappunnangiwi iyaro atuwongngé. Uwokii iyaé lao ri iko iya mateppe'é lao ri Ana'na Allataala, kuwammengngi muwissengngi makkedaé muwappunnaini atuwong tongengngé sibawa mannennungengngé. Sibawa baraniki mangolo ri Allataala, nasaba mateppe'ki sibawa natarimai sempajatta, rékko riyéllauwi agi-agi iya siturué sibawa élo-Na! Nasaba taissengngi makkedaé naéngkalingaki rékko maréllauki ri Aléna, sibawa taisseng towi makkedaé nawérékki aga iya taéllauwé polé ri Aléna. Rékko muwitai sala séddinna pada-padammu tau Kristéng pogau' dosa iya dé'é nassabariwi ateddéngeng atuwong tongengngé sibawa mannennungengngé, sitinajako massempajang lao ri Allataala; na Allataala mabbéréyangngi matu iyaro atuwongngé lao ri aléna. Iyaé nakennai mennang iya dosanaé dé' nassabariwi mennang ateddéngeng iyaro atuwongngé. Iyakiya engka dosa iya nassabariyé naateddéngeng tauwé iyaro atuwongngé. Passalenna iyaro gau'é dé' uwakkeda makkedaé harusu'ko massempajang lao ri Allataala. Sininna pangkaukeng iya salaé iyanaritu dosa, iyakiya engka dosa iya dé'é nassabariwi tauwé ateddéngeng atuwong tongengngé sibawa mannennungengngé. Taissenni makkedaé sininna tauwé iya mancajiyénna ana'-ana'na Allataala, dé' natteru-teru pogau' dosa, saba' Ana'na Allataala linrungiwi, na Si Majaé dé'gaga naullé pogau' lao ri aléna. Taissenni makkedaé idi'é appunnangennai Allataala, namuni sininna linoéwé engkai ri yawa akuwasanna Si Majaé. Taissenni makkedaé Ana'na Allataala poléni sibawa purani mabbéré pappahang lao ri idi, kuwammengngi taissengngi Allataala iya tongengngé. Tuwoki masséddi sibawa Allataala iya tongengngé sibawa tuwo masséddi sibawa Ana'na Yésus Kristus. Iyanaé Allataala iya tongengngé, sibawa Aléna ritu atuwong tongengngé sibawa mannennungengngé. Ana'-ana'ku, pabélaiwi alému polé ri barahala-barahalaé! Lao ri Indo' iya napilé Allataala sibawa lao ri ana'-ana'na Indo'. Iyaé Sure'é poléi ri iyya, pamimping jema'é iya tonget-tongengngé pojiko. Tenniya banna iyya, iyakiya sininna tau iya missengngéngngi Allataala iya tongengngé, napoji tokko. Saba' monroi Allataala ri laleng atitta, sibawa tuli monroi matu sibawakki mannennungeng. Tennapodo nawérékki barakka, pammasé sibawa asaléwangeng polé ri Allataala Ambo'é, sibawa Yésus Kristus Ana'na Ambo'éro. Tennapodo iya manennaro tappunnangiwi sibawa ati iya matinulué enrengngé sibawa pammasé. Marennu senna'ka missengngi makkedaé engka ana'-ana'na Indo' iya tuwoé situru pappagguruwanna Allataala, pada-pada iya puraé napparéntang Allataala Ambo'é lao ri idi. Rimakkuwannanaro, Indo', uwéllauwi sibawa masero kuwammengngi na idi maneng sisullé siyamaséi. Iya upangoloéwé tenniya séuwa parénta iya barué; iyaé parénta purani riwérékki sipongenna bunge'-bunge'na mateppe'ki. Mamaséiwi bettuwanna tuwo manuru' parénta-paréntana Allataala. Na parénta iya puraé muwéngkalinga ri pammulanna mupa iyanaritu harusu'ko tuwo sibawa mamaséiwi séddié lao ri laingngé. Maégani tau pabengnguwang tassiya ri sininna linoé. Mennang iyanaritu sining tau iya dé'é nangakuiwi makkedaé Yésus Kristus poléi ri linoé selaku séddi tolino. Tau sinrupaéro iyanaritu pabbelléngngi, enrengngé Balinna Kristus. Rimakkuwannanaro, jagaiwi aja' narapiko ateddéngeng aga iya puraé riusahangekko: Usahano kuwammengngi mutarima manengngi. Tau iya dé'é nakkatenning ri pappagguruwanna Kristus, sangadinna léssé polé ri aga iya nappagguruwangngé Kristus, iyaro tauwé dé' nappunnai Allataala. Tau iya tette'é ri laleng pappagguruwanna Kristus, bettuwanna mappunnaiwi muwi Allataala Ambo'é iyaré'ga Ana'é. Rimakkuwannanaro, rékko engka tau polé sibawa mabbirittangngi lao ri iko pappagguruwang iya dé'é nappagguruwangngi Kristus, aja' mutarimai iyaro tauwé ri lalempolamu; iyaré'ga mabbéré selleng ri aléna. Saba' tau iya mabbéré sellengngé lao ri tau pada-padaéro maccowé towi silaong tauwéro ri laleng pogau'i pangkaukeng iya majaé. Maéga senna' iya parellué upaissengiko, iyakiya rasana lebbi kessing muwi aja' naolai sure'. Mamménasaka wulléi célléngiko sibawa aléku mabbicara lao ri iko, kuwammengngi atitta tonget-tongengngi marennu. Ana'-ana' polé ri ana'daranna Indo' iya napilé Allataala massellengngi lao ri Indo'. Saudara Gayus iya upojiyé! Iyya, pamimping jema' iya tonget-tongengngé mamaséiko, massempajang tennapodo madisid-disingngi Saudara sibawa makessing maneng muwi sibawakko, pada-pada nyawamu makessing muto. Masennang senna'ka wettunna siyagangngaré saudara Kristéng lettu sibawa powadakka pékkugi atinulurenna Saudara lao ri Allataala iya tongengngé, saba' mémeng Saudara tuli tuwoi situru pappagguruwanna Allataala. Dé'gaga iya mullé pancajika lebbi marennu, naiya méngkalingai makkedaé ana'-ana'ku tuwoi manuru' pappagguruwanna Allataala. Saudaraku! Makkuwamani tinuluna Saudara ri laleng jama-jamang iya napogau'é Saudara untu' sellao-sellao pada-padatta Kristéng; mala muwi sining tau Kristéng iya dé'éppa naissengngi Saudara, natumaningiwi Saudara. Purani nappaissengeng mennang lao ri jema'é ri onrotta passalenna pammasému. Tulungngi mennang kuwammengngi naulléi patterui joppana mennang nanallalengiwi napésennangiwi atinna Allataala. Saba' ri laleng allalengengngé untu' tumaningiwi Kristus, dé' natarima mennang bantuwang muwi aga polé risining tau iya dé'é naissengngi Allataala. Rimakkuwannanaro, idi sining tau Kristéngngé harusu'ki tulungngi sellao-sellao pada-padatta Kristéng iya pada-padaéro, kuwammengngi taulléi maccowé ri laleng usahana mennang untu' mappallebbangengngi pappagguruwanna Allataala. Purana moki sure' iya maponco'é lao ri jema'é, iyakiya Diotréfés iya macinnaé mancaji pamimping ri laleng jema'é, dé' namaélo turusika. Rékko poléka matti, maéloka bongkara'i sininna séuwa-séuwaé iya puraé napogau', iyanaritu passalenna gau'-gau' majaé enrengngé bellé iya puraé napowada passaletta! Iyakiya iya manennaro dé'pa nagenne untu' aléna. Ri wettu sellao-sellao pada-padatta Kristénro polé, dé' namaélo tarimai mennang. Mala nattéyangngi sining tau iya maéloé tarimai iyaro saudara-saudaraé, enrengngé nasuroi sining tauwéro massu polé ri jema'é! Saudara iya upojiyé, aja' muturusiwi aga iya majaé. Turusiwi aga iya makessingngé. Tau iya pogau'éngngi iya makessingngé, iyanaritu appunnangennai Allataala. Sibawa tau iya pogau'éngngi iya majaé, dé'pa naissengngi Allataala. Sininna tauwé pojiwi Démétrius. Mala muwi Allataala poji towi. Idi poji towi, sibawa naisseng saudara, makkedaé aga iya tapalettu'é wedding riyatepperi. Maéga senna' iya parellué upowada lao ri iko, iyakiya upérasai lebbi kessing muwi dé' naolai sure'. Mamménasaka dé'na namaitta tasiruntu matu sibawa tasipabbicara matu. Tennapodo Puwangngé barakkakiwi Saudara! Sellao-sellaomu ri onrokkué masselleng lao ri iko. Palettukekka sellekku lao ri sininna sellao-sellaota tasséddi-séddi. Saudara-saudara iya puraé riyobbi sibawa iya riyamaséi senna'é ri Allataala Ambo'é, enrengngé rijagaiyé untu' Yésus Kristus. Selaku atanna Yésus Kristus, iyya – Yudas – saudarana Yakobus, mamménasa: Tennapodo Allataala mabbéré barakka, pammasé sibawa asaléwangeng lao ri iko sibawa tabbollompollong. Saudara-saudara iya upojiyé! Tonget-tongekka makkatta moki sure' lao ri iko passalenna asalamakeng iya pada puraé tapéneddingi. Iyakiya makkekkuwangngé marasa parelluka untu' pangajariko sibawa iyaé sure'é kuwammengngi mumatteru méwa untu' ateppereng iya wékkasisengngénna nabbéréyang Allataala untu' mannennungeng lao ri umma'-Na. Saba' tenrimaingekiwi, engka tau mattentu iya maccelle'é muttama ri tengnga-tengngata. Mennang tau maja ampé iya putara'balé'éngngi biritta passalenna pammaséna Allataalata, untu' lolongeng kasempatang pallessui napessunna. Nanasampéyangngi mennang Yésus Kristus, alé-aléna Panguwasa sibawa Puwatta. Riyolopa nariyolo pahukkungeng untu' mennang pura ribotoni ri laleng Kitta'é. Iya manennaro pura muwissenni. Namuni macinnaka paréngngerangiko passalenna pékkugi Puwangngé passalama'i umma' Israélié polé ri Maséré', iyakiya rimunri napaccappui sining tau iya dé'é namateppe' ri yelle'na mennang. Engngerang towi sining malaéka' iya liwengngéngngi pakkaséséng akuwasanna mennang, angkanna lao salaiwi onronna. Allataala balenggui iyaro sining malaéka'é sibawa ranté mannennungengngé, ri laleng onrong iya mapettangngé ri yawana linoé. Kuwaniro mennang ritahang matteru narapi ripateppa pahukkungengngé ri yasé'na mennang ri Esso iya maseroéro matti. Engngerang towi kota Sodom sibawa Gomora enrengngé kota-kota ri seddéna, iya pabbanuwanaé pogau'i gau'-gau' iya padaé napogau' sining malaéka'éro. Napogau'i mennang gau'-gau' iya mappangaddié sibawa maja ampé, angkanna risissai mennang sibawa pahukkungeng api mannennungengngé, untu' mancaji papparéngngerang lao ri sininna tauwé. Makkuwatoro sining tauwéro mannawa-nawa angkanna mennang pogau' dosa lao ri watakkaléna muto mennang. Nangga' mariyawai akuwasanna Allataala enrengngé pakatunai sining mahlu' iya malebbié ri surugaé. Aléna Mikhaél, iya kapalaiyéngngi sining malaéka'é, dé' naengka napogau'i iya makkuwaéro. Wettunna mappangéwangngi sibawa Ibillisi' ri laleng assisalanna passalenna niga lolongengngi matu ujuna Musa, dé' nabarani Mikhaél madélékiwi Ibillisi' sibawa ada-ada paccella. Banna makkedai Mikhaél, “Puwangngé gera'ko matu!” Iyakiya nasibawang paccella-paccella, iyaro sining tauwé luruiwi sininna séuwa-séuwaé iya dé'é napahangngi mennang. Pada-padai mennang olokolo'é iya dé'é akkalenna, iya missengngéngngi gau'-gau'é sibawa pappérasanna. Iyakiya mala nasaba gau'-gau'énnaro nanassabariwi naancuru' mennang. Cilakani mennang! Naccowériwi mennang laleng iya naolaé Kaing. Kuwammengngi nalolongeng dowi, nassossorengngi aléna ri laleng lompo apusangngé, pada-pada Biléam. Nariancuru' tona mennang nasaba maronta'i pada-pada Korah. Wettummu pakangka pésta manré, kédo-kédona iyaro sining tauwé napéjariwi pappéneddingngé ri yelle'mu. Saba' manréi mennang sibawa mabuwaja temmasiri, enrengngé banna aléna bawang naéngngerang. Pada-padai mennang ritu ellungngé iya nairié anging, iyakiya dé' napateppa bosi. Pada-pada towi aju-kajungngé iya dé'é napowassélé' buwa namuni wettu buwa-buwani; sining pong ngaju iya puraé ribébbu ure'na sibawa maté sisenni. Pada-pada mutowi bombang masekkangngé ri tasi'é iya paompoé busa, makkuwatoniro mennang pabbusai gau'-gau' iya mappakasiri-sirié. Pada-padai mennang sining wéttowingngé iya solléé enrengngé iya puraé napassadiya Allataala onronna ri laleng pettangngé iya kaminang maseroé untu' mannennungeng. Hénokh, assossoreng mapitué polé ri Adam, riyolo engka naengka nabotoi passalenna sining tauwéro. Makkedai Hénokh, “Itai, maéloi polé Puwangngé sibawa massebbu-sebbu malaéka'-Na iya mapaccingngé untu' madélékiwi sininna tauwé. Puwangngé maélo hukkungngi sining tau majaé nasaba sining pangkaukenna iya majaé. Sibawa maéloi hukkungngi tau madosaé enrengngé madorakaé nasaba sininna ada-ada paccella-cella iya napowadaé mennang.” Iyaro sining tauwé tuli mannoko'-noko' bawang sibawa passalai tau laingngé. Tuwoi mennang situru sining cinnana iya madosaé. Mabboroi mennang passalenna aléna, enrengngé leppe'i tauwé kuwammengngi nalolongeng alabang. Iyakiya Saudara-saudaraku iya upojiyé, éngngerangngi aga riyolo napowada rasul-rasulna Puwatta Yésus Kristus. Nappaddissengengngi mennang lebbi riyolo lao ri iko makkedaé nacawékiwi paccappurenna linoé mompoi matu sining tau iya méllékéllé'ékko matu, iyanaritu sining tau iya tuwoé situru sining cinnana mennang iya madosaé. Iyanaé mennang sining tau paompoé assisalang, dé' mennang narikuwasai ri Rohna Allataala, sangadinna ri sipa' linona. Iyakiya iko, Saudara-saudaraku, mupiyarai matteru atuwommu situru teppe'mu lao ri Yésus Kristus, iyaro teppe'mu mapaccing senna'. Namuwassempajatto sibawa akuwasanna Rohna Allataala, sibawa tuli tuwono ri laleng accinaungenna pammaséna Allataala, ri wettu mutajenna pammaséna Puwatta Yésus Kristus, iya mabbéré matu lao ri iko atuwong tongengngé iya mannennungengngé. Lao risining tau iya kaléwa'-léwa'é atinna, sitinajako mappaitangngi paressé babuwaé. Gettengngi tauwé massu polé ri laleng apié untu' passalama'i mennang. Lao risining tau laingngé sitinajako mappaitangngi paressé babuwaé nasibawang perasaang métau, iyakiya benciwi pakéyanna mennang iya puraé nacarépai sibawa cinnana iya madosaé. Allataala, iya mulléngngi jagaiwi kuwammengngi nadé' musempé, sibawa mulléngngi tiwiko lao ri yolo-Na iya malebbié sibawa mariyo-riyo temmakkécella. Aléna ritu alé-aléna Allataala, Pappassalama'ta naolai Yésus Kristus Puwatta. Aléna ritu Allataala iya malebbié, maraja, makuwasa sibawa riyakkitangi riyolopa nariyolo narapi makkekkuwangngé lettu mannennungeng! Aming. Lise'na iyaé kitta'é passalenna aga iya napowadaé Yésus Kristus passalenna sining kajajiyang iya kajajiyangngé matti. Allataala mappaissengengngi lao ri Kristus kuwammengngi nappaitangngi lao ri ata-atanna Allataala aga iya masitta'é harusu kajajiyang. Nasuroi Kristus malaéka'-Na lao ri Yohanés, atan-Na, untu' mappaissengengngi sining kajajiyangngéro lao ri aléna. Nanacuritani Yohanés sininna iya naitaéro; na iyanaé laporanna passalenna paseng polé ri Allataala iya napakkasse'é Yésus Kristus naolai asabbiyan-Na. Masennangngi tau iya bacaéngngi sibawa tau iya méngkalingaéngngi biritta botona iyaé Kitta'é enrengngé matinulu lao ri aga iya tarokié ri lalenna. Saba' dé'na namaittana nakajajiyang matu iya manennaé. Saudara-saudara iya engkaé ripitué jema' ri daérana Asia! Iyya, Yohanés, mamménasaiko riwérékko barakka sibawa asaléwangeng polé ri Allataala – iyanaritu Aléna iya engkaé, iya engkaénna, sibawa iya engkaénna matteru – kuwaéttopa polé ri iya pitu roh iya engkaé ri yolona kadéra arajanna Allataala, sibawa polé ri Yésus Kristus, sabbi iya matinulué. Aléna ritu bunge'-bunge' ripatuwo paimeng polé ri amaténgngé sibawa Aléna ritu makuwasa lao risining arunna linoé. Yésus mamaséiki, nanasibawang amatén-Na nanapaleppe'ki polé ri dosa-dosata, enrengngé pancajiki séddi bangsa banna imang-ngimang, iya tumaningiyéngngi Allataala, Ambo'-Na. Yésus Kristus ritu iya marajaé enrengngé makuwasa lettu mannennungeng. Aming! Itai, poléni risalipuri ri ellungngé! Sininna tauwé naitai matu Aléna, muttama toni mennang iya puraé gajangngi. Sininna bangsaé ri linoé mpatingngi matu nasaba Aléna. Iyyé, pasti! Aming! “Iyya'na ritu iya pammulangngé sibawa iya paccappurengngé,” adanna Puwang Allataala, iya engkaé, sibawa iya engkaénna enrengngé iya engkaé matteru, Iya Pommakuwasaé. Iyya Yohanés, saudaramu iya siputotoé sibawa iko ri laleng anrasa-rasangngé iya napéneddingiyé tungke' iya maccowériyéngngi Kristus. Tahakki manrasa-rasa selaku umma' appunnangen-Na. Ripalika ri Pulo Patmos nasaba uwappallebbangengngi paseng polé ri Allataala, iya napakkasse'é Yésus naolai asabbiyan-Na. Ri essona Puwangngé, rikuwasaika ri Rohna Allataala, nauwéngkalingai séuwa sadda iya maloppoé – siccenno oni tarompé'é – mabbicara ri monrikku. Mabbicarai iyaro saddaé, “Okii aga iya muwitaé, namukiringngi iyaro kitta'é lao ri iya pitu jema'éwé: Efésus, Smirna, Pérgamus, Tiatira, Sardis, Filadelfia sibawa Laodikia.” Gilikka limonri untu' mitai niga iyaro mabbicaraé lao ri iyya. Nauwitai pitu ajé lampu iya riyébbué polé ri ulawengngé. Ri tengnga-tengngana sining ajé lampuéro tettongngi séddi tau iya paitaé pada-pada tolinoé. Pakéi jumba iya labbunaé lettu ri ajé. Ri aro-Na pakéi pattongko aro ulaweng. Gemme'-Na maputé pada-pada bulu bimbala'é, sipputé ape'é. Matan-Na malluwa'-luwa' pada-pada apié; ajé-Na mabbara pada-pada tembaga iya ritunué. Saddan-Na pada-padai oninna uwai jompi iya marajaé. Lima ataun-Na makkatenning pitu wéttowing, sibawa polé ri témun-Na massui sipeppa peddang tareng iya matareng wali-waliyé. Rupan-Na mattappa pada-pada mata essoé ri lakessoé. Wettukku mitai Aléna, mabuwanna ri yolo-Na pada-pada tau maté. Iyakiya napalénne'i lima ataun-Na ri iyya nainappa makkeda, “Aja' mumétau! Iyya'na iya pammulangngé sibawa iya paccappurengngé. Iyya'na ritu Aléna iya tuwoé! Purana maté, iyakiya itani, tuwo-Ka untu' mannennungeng. Ukuwasaiwi amaténgngé, sibawa ri linona sining tau maté. Rimakkuwannanaro, okii gau'-gau' iya muwitaé, iyanaritu gau'-gau' iya engkaé makkekkuwangngéwé, sibawa gau'-gau' iya kajajiyangngé matu matti. Iyanaé rahasiyana polé ripitué wéttowing iya muwitaé ri lima atauk-Ku, sibawa polé ripitu ajé lampu ulawengngéro: Iyaro pitué wéttowing iyanaritu sining malaéka'na pitu jema'é, sibawa pitu ajé lampuro iyanaritu pitu jema'éro.” “Lao ri malaéka'na jema'é ri Efésus, okii makkuwaéwé: Iyanaé paseng polé ri Aléna makkatenningngé pitu wéttowing ri lima ataun-Na, enrengngé joppa ri yelle'na iya pitu ajé lampu ulawengngéro. Uwisseng aga iya muwébbué: majjama laddé'ko enrengngé sabbara senna'. Uwisseng makkedaé dé' muwéréngngi ati tau majaé. Sibawa sining tau iya mangakuiyéngngi aléna rasul, padahal tenniya, purani muwoji, namulolongengngi makkedaé pabbelléngngi mennang. Sabbara'ko enrengngé manrasa-rasako nasaba Iyya, nadé' mupettu paddennuwang. Iyakiya iyanaé pappotane'-Ku lao ri iko: Dé'tona muwamaséi-Ka pada-pada bunge'na. Rimakkuwannanaro, éngngerangngi pékkugi bélanako sempé'na! Toba'no polé ri dosa-dosamu, enrengngé pogau'ni aga iya mupogau'é pammulanna. Rékko dé', maélo-Ka lao ri iko sibawa bébbui ajé lampummuro polé ri onronna. Iyakiya engka séuwa iya makessingngé ri iko, iyanaritu: Mubenciwi pangkaukenna sining tau maccowériyéngngi Nikolaus, iya Ubenciyétto. Nigi-nigi mulléi maréngkalinga, sitinajai pénessaiwi aga iya napowadaé Rohna Allataala lao ri jema'é! Mennang iya pakalaé, Upalaloi matu manréi buwa polé ri pong atuwongngé iya tuwoé ri laleng Tammenna Allataala.” “Lao ri malaéka'na jema'é ri Smirna, okii makkuwaéwé: Iyanaé paseng polé ri Aléna iya mammulangngé sibawa paccappurengngé – iya matéénna natuwo paimeng. Uwisseng sining asussammu; Uwisseng kasiyasiko iyakiya sitongenna sugiko! Uwisseng sining pappétenna iya ripakennaiyékko polé risining tau iya mangakuiyéngngi aléna Yahudi, padahal tenniya; mennang iyanaritu umma'na Ibillisi'! Aja' mumétau ri anrasa-rasang iya dé'énna namaitta naharusu' mupéneddingi. Engngerangngi, naputtama'i matu Ibillisi' sibagiyang polé ri iko ri laleng tarungkué untu' cobaiko. Manrasa-rasako matu seppulo esso ittana. Sitinajako matinulu lao ri Iyya gangka maté, na-Uwérékko matu atuwong tongengngé sibawa mannennungengngé selaku hadiya apakalang. Nigi-nigi mulléi maréngkalinga, sitinajai napénessai aga iya napowadaé Rohna Allataala lao ri jema'-jema'é! Mennang iya pakalaé, dé' sises-siseng matu nanrasa-rasa agi-agi ri amaténg iya maduwaé.” “Lao ri malaéka'na jema'é ri Pérgamus, okii makkuwaé: Iyanaé paseng polé ri Aléna iya makkatenningngé peddang iya matareng walié. Uwisseng kégako monro, iyanaritu ri onronna Ibillisi' makkarung. Iko matinuluko ri Iyya. Mala wettunna Antipas, sabbik-Ku iya matinulué riyuno ri yolomu, ri markasna Ibillisi', dé' muwassakka makkedaé mateppe'ko ri Iyya. Namuni makkuwaro engka siyagangngaré passaleng iya dé'é Umasennangiwi polé ri iko: Engka sibagiyang tau ri yelle'mu iya maccowériyéngngi aga iya nappagguruwangngé Biléam. Biléam paggurui Balak pékkugiwi pasempé'i umma' Israélié ri laleng dosaé; ri laleng napalécéna mennang manré nanré iya puraé riyakkasuwiyangeng lao ri barahalaé enrengngé pogau'i gau'-gau' mappangaddié. Makkuwatoro engka ri yelle'mu sining tau iya makkatenningngé ri pappagguruwanna sining maccowéé ri Nikolaus. Rimakkuwannanaro, toba'no polé ri dosa-dosamu! Rékko dé', dé'na namaitta Umaélo polé ri iko enrengngé musui sining tauwéro sibawa peddang iya engkaé ri bawa-Ku. Nigi-nigi mulléi maréngkalinga, sitinajai napénessai aga iya napowadaé Rohna Allataala lao ri jema'-jema'é! Mennang iya pakalaé, Upalaloi matu manréi manna iya tassubbué, sibawa tungke'-tungke' tarimai matu polé ri Iyya séddi batu puté. Ri batuéro tarokii séddi aseng iya barué, iya dé'é naissengngi muwi niga, ri lainnaé tau iya tarimaéngngi.” “Lao ri malaéka'na jema'é ri Tiatira, okii makkuwaéwé: Iyanaé paseng polé ri Ana'na Allataala, iya malluwa'-luwa'é matan-Na pada-pada apié, enrengngé ajé-Na mabbara pada-pada tembaga ritunué. Uwisseng sininna mupogau'é – Uwisseng muwamaséi pada-padammu, matinuluko, majjamako, sibawa tahakko manrasa-rasa. Uwissekko makkekkuwangngé majjama lebbi maéga naiya riyolo. Iyakiya iyaé pappotane'-Ku lao ri iko: Muwéréngngi ati Izebél, makkunrai iya mangakuiyéngngi aléna surona Allataalaro. Maégani ata-atak-Ku iya nabengnguwangngé enrengngé napaggurui untu' mappangaddi enrengngé untu' manréi nanré iya puraé riyakkasuwiyangeng lao ri barahalaé. Purani Uwéréng kasempatang untu' toba' polé ri dosa-dosana, iyakiya dé' namacinna mappésau pogau'i gau'-gau' iya mappangaddiéro. Engngerangngi! Maéloka mabbantingengngi angkanna mapeddi ri onrong atinrongngé. Kuwaniro aléna sibawa sining tau iya malawengngé silaong matu manrasa-rasa senna'. Iya manennaro maélo-Ka pogau'i makkekkuwangngé – sangadinna rékko mappésauwi mennang pogau'i gau'-gau' iya majaé silaong aléna. Sining iya maccowériyéngngi maélo tok-Ka mpunoi kuwammengngi sininna jema'é namaingekiwi makkedaé Iyya'naé iya mpellungiyéngngi pikkiranna sibawa atinna tolinoé. Iko maneng maélo-Ka mpale'i situru pangkaukemmu tungke'-tungke'. Iyakiya iko iya lail-laingngé ri Tiatira dé' naccowériwi pappagguruwang iya majaéro, enrengngé dé' nagguruiwi pangissengeng-pangissengeng Ibillisi'é. Upowadai makkedaé dé' Umaélo tambaingekko tiwi iya patanekiyé. Iyakiya narapi wettu polé-Ku matti, sitinajako tette' maccowériwi aga iya puraé muwappunnai. Tarimai matu mennang wéttowing alau polé ri Iyya. Nigi-nigi mulléi maréngkalinga, sitinajai napénessai aga iya napowadaé Rohna Allataala lao ri jema'é!” “Lao ri malaéka'na jema'é ri Sardis, okii makkuwaé: Iyanaé paseng polé ri Aléna iya mappunnaiyé pitu roh polé ri Allataala enrengngé iya pitu wéttowingngéro. Uwisseng aga iya mupogau'é. Adanna tuwoko, padahal matéko! Rimakkuwannanaro, oto'no, enrengngé péwatangi aga iya engkaé mupa ri iko ri wettu dé'napa namaté siseng. Saba' Upoléiwi makkedaé aga iya mupogau'é, dé'pa muwi séddi sukku ri yolona Allataala. Jaji, éngngerangngi paimeng aga iya puraé riyappagguruwang lao ri iko riyolo enrengngé aga iya puraé muwéngkalinga. Pajoppai iyaro enrengngé toba'no polé ri dosa-dosamu. Rékko dé' muwoto', maélo-Ka lao ri iko pada-pada pangaé; nadé' muwissengngi matu uppannapa wettuk-Ku polé. Iyakiya ri tengnga-tengngamu ri Sardis engka mupa tau iya jagaé kuwammengngi natette mapaccing pakéyanna. Joppai matu mennanro silaong Iyya sibawa mappakéyang maputé, saba' sitinajai mennang untu' iyaro. Mennang iya pacaué ripappakéiwi matu pakéyang maputé. Asenna mennang dé' Uleddai matu polé ri Kitta'na Tau Tuwoé. Na riyolona Ambo'-Ku enrengngé malaéka'-malaéka'-Na mangaku-Ka matu makkedaé mennang iyanaritu appunnangek-Ku. Nigi-nigi mulléi maréngkalinga, sitinajai pénessaiwi aga iya napowadaé Rohna Allataala lao ri jema'-jema'é!” “Lao ri malaéka'na jema'é ri Filadelfia, okii makkuwaé: Iyanaé paseng polé ri Aléna iya mapaccingngé enrengngé tongengngé. Aléna ritu pakkatenning goncing iya nappunnaiyé Daud; rékko natimpa'i, dé' muwi séddi mulléi tongkoi, sibawa rékko tattongkoi, dé' muwi séddi tau mulléi timpa'i. Uwisseng aga mupogau'é. Uwisseng makkedaé dé' nasiyaga awatangemmu; purani muwaccowéri pappagguruwak-Ku enrengngé matinulu ri Iyya. Untu' iko purani Utimpa séddi tange', iya dé'é naulléi tongkoi muwi niga. Engngerangngi iyaé: Sining tau iya mancajiyé umma'na Ibillisi'éro, sining tau pabbelléng iya mangakuiyéngngi aléna Yahudi, padahal tenniya, maélo Uwébbu angkanna mennang polé suju' ri yolomu. Nanaissengngi matu mennang makkedaé Uwamaséiko. Nasaba purani muwaccowéri parénta-Ku kuwammengngi muwattunru-tunru, maélo tok-Ka linrungiko polé ri wettu asussangngé iya maéloé kennai sininna linoé. Iyaro gau'é kajajiyangngi matu untu' cobaiwi sininna tauwé ri linoé. Masitta'-Ka polé! Jagaiwi madécéd-décéng aga iya muwappunnangiyé, kuwammengngi nadé' muwi séddi tau malai hadiya apakalammu. Tau iya pakalaé, maélo-Ka pancajiwi selaku alliri ri laleng Bola Mapaccinna Allataala-Ku, naonro matu ri onrongngéro mannennungeng. Asenna Allataala-Ku, enrengngé asenna kotana Allataala-Ku – iyanaritu Yérusalém baru iya maéloé nonno polé ri surugaé, polé ri Allataala-Ku – maélo Uwokii ri aléna tauwéro. Makkuwatoro asek-Ku iya mabarué maélo Uwokii ri aléna. Nigi-nigi mulléi maréngkalinga, sitinajai napénessai aga iya napowadaé Rohna Allataala lao ri jema'-jema'é!” “Lao ri malaéka'na jema'é ri Laodikia, okii makkuwaé: Iyanaé paseng polé riyasengngé Aming, Sabbi iya matinulué enrengngé tongengngé, assalenna séuwa-séuwaé iya napancajiyé Allataala. Uwisseng aga iya mupogau'é; Uwissekko dé' mumakeccé sibawa dé'to mumapella. Harusu'no sala séddinna! Iyakiya iko mapella-pellako, mapella dé', makeccé dé'to. Iyanaro saba'na na-Umaélo luwako massu polé ri laleng bawa-Ku. Makkedako, ‘Sugiki enrengngé genne maneng; dé' taakurangeng aga-aga.’ Iyakiya dé' muwissengngi pékkugi kasiyasimmu sibawa pékkugi mappakaessé-esséna keadaammu! Kasiyasiko, mallusu-lusu, enrengngé buta. Rimakkuwannanaro Upangajariko kuwammengngi melli ulaweng polé ri Iyya, iyanaritu ulaweng iya tuléngngé, kuwammengngi mumancaji sugi. Elli tokko pakéyang puté polé ri Iyya kuwammengngi muwappakéyang enrengngé tongkoi keadaammu iya mallusu-lusué sibawa mappakasiri-sirié. Sibawa elli tokko pabbura untu' riyassapuwang ri matammu kuwammengngi namuwulléi makkita. Sining tau iya Uwamaséiyé, mennang ritu Uwampareng enrengngé Ucambu. Rimakkuwannanaro sitinajako masumange', sibawa toba'no polé ri dosa-dosamu. Itai! Tettok-Ka ri yolona tange'é sibawa maggetto. Rékko engka tau méngkalingai saddak-Ku, enrengngé timpa'i tange'é, maélo-Ka muttama méwai sita; maélo-Ka manré sisama aléna enrengngé aléna manréi sisama Iyya. Mennang iya pakalaé, maélo-Ka palaloi tudang ri kadéra akkarungek-Ku silaong Iyya. Pada-pada muto Iyya pura pakala na makkekkuwangngé tudang silaong Ambo'-Ku ri kadéra akkarungen-Na. Nigi-nigi mulléi maréngkalinga, sitinajai pénessaiwi aga iya napowadaé Rohna Allataala lao ri jema'-jema'é!” Purairo lolongessika pakkitang. Uwitai séddi tange' tattimpa' ri surugaé. Nainappa riyéngkalingasi sadda iya bunge'na pura mabbicara lao ri iyya pada-pada oni tarompé'é. Makkedai iyaro saddaé, “Enré'no kuwaé. Maélo-Ka mappaitangngi lao ri iko aga iya maéloé kajajiyang matti.” Matteru bawakka rikuwasai ri Rohna Allataala. Nainappa uwita ri surugaé engka séddi kadéra arajang, sibawa engka séddi tau tudang ri kadéra arajangngéro. Rupanna iyaro tauwé mattappa pada-pada paramata baiduri pandangngé enrengngé paramata dalimaé. Séuwa tarawu mattappa zamrud mattulilingiwi iyaro kadéra arajangngé. Ri laleng allébunna iya mattulilingiyéngngi iyaro kadéra arajangngé engka duwappulo eppa kadéra arajang laingngé. Kuwaro tudangngi duwappulo eppa pamimping iya mappakéyang maputé, enrengngé pakéi passigera' ulaweng. Polé ri kadéra arajangngéro massui cahaya billa'é enrengngé oni letté iya maddalenrungngé. Sibawa ri yolona kadéra arajangngé engka pitu sulo iya malluwa'-luwa'é; iyanaritu iya pitu Rohna Allataala. Engkato ri yolona kadéra arajangngéro séuwa iya paitaé pada-pada tasi' kacaé, macinnong pada-pada kaca macinnongngé. Ri mattulilinna kadéra arajangngé, ri tungke' sulapa'na, engka eppa mahlu', iya bagiyang ri yolona sibawa bagiyang ri munrinna penno sibawa mata. Mahlu' mammulangngé paitai pada-pada singaé. Iya maduwaé, pada-pada saping laié. Iya matellué mappunnaiwi tappa pada-pada tappa rupa tauwé. Iya maeppaé, paitai pada-pada kuwajang iya luttué. Iya eppa mahlu'éro, tungke'-tungke' mappunnaiwi enneng panni, sibawa ri mattulilinna enrengngé ri lalenna pennoi sibawa mata. Esso wenni iyaro mahlu'-mahlu'é dé' nappésau makkélong, “Mapaccing, mapaccing, mapaccingngi Puwangngé, Allataala Pommakuwasaé; iya engkaé, iya engkaénna, sibawa iya engkaé matteru.” Iya eppa mahlu'éro makkélongngi élokkélong pappojiyang, pappakalebbi sibawa sukkuru' lao ri Aléna iya tudangngé ri kadéra arajangngéro, iyanaritu Aléna iya tuwoé lettu mannennungeng. Na wettunna iyaro mahlu'-mahlu'é makkélong, iya duwappuloé eppa pamimpingngéro tassulunni ri yolona iya tudangngé ri kadéra arajangngéro, nainappa nasompa Aléna iya tuwoé mannennungeng. Nainappa naggenrungeng mennang sining passigera'na ri yolona iyaro kadéra arajangngé sibawa makkeda, “Oh Puwang, oh Allataalata! Ikona ritu iya sitinajaé tarima pappojiyang, pappakalebbi sibawa akuwasang! Saba' Iko ritu pancajiwi sininna séuwa-séuwaé, enrengngé nasaba élo-Muto nasininna séuwa-séuwaéro kajajiyangngi sibawa tuwoi.” Nainappa uwita séuwa kitta lulung ri limanna Aléna iya tudangngé ri kadéra arajangngéro. Iyaro kitta'é penno sibawa oki wali-wali enrengngé ri materéi sibawa pitu ségélé'. Nainappa uwita séddi malaéka' iya mawatangngé, gora-gora sibawa sadda iya maloppoé, “Niga sipato' reppa'i iyaé sining ségélé'é enrengngé timpa'i iyaé kitta'é?” Iyakiya muwi ri surugaé iyaré'ga ri linoé iyaré'ga muwi ri yawana linoé dé'to gaga séddi tau ri lolongeng iya mullééngngi timpa'i iyaro kitta'é, enrengngé makkita ri lalenna. Nauterina tassénge'-sénge' saba' dé'gaga muwi séddi tau iya sipato'é timpa'i iyaro kitta'é, enrengngé makkita ri lalenna. Nainappa sala séddinna polé risining pamimpingngéro makkeda lao ri iyya, “Aja' muteri! Itai! Singa polé ri suku bangsa Yéhuda, wijanna Daud iya battowaé, pakalani. Naulléi reppo'i pitu ségélé' enrengngé timpa'i iyaro kitta'é.” Nainappa uwita séddi Ana' Bimbala' tettong ri tengnga-tengngana kadéra arajangngéro, riyattulilingi ri iya eppa mahlu'é enrengngé sininna pamimpingngéro. Iyaro Ana' Bimbala'é samanna purani rigéré. Mappunnaiwi pitu tanru' sibawa pitu mata: iyanaritu pitu roh polé ri Allataala iya puraé risuro lao ri sininna linoé. Nainappa malluru iyaro Ana' Bimbala'é sibawa malai iyaro kitta lulungngé polé ri lima ataunna tau iya tudangngé ri yasé'na kadéra arajangngé. Ri wettu kédo makkuwannaro iyaro Ana' Bimbala'é, tassulunni iya eppa mahlu'é enrengngé iya duwappulo eppa pamimpingngéro ri yolona. Tungke'-tungke' mennang makkatenning kacapi enrengngé mangko' ulaweng iya mallise'é kamennyang, iyanaritu sining paddowangenna umma'na Allataala. Napuwélonni mennang séddi élong iya barué: “Sipato'-Ko malai iyaro kitta'é enrengngé reppa'i sining ségélé'na. Saba' pura-No riyuno, nanallalengiwi amatén-Na, rupa tauwé polé ri sininna sukué, basaé, wanuwaé enrengngé bangsaé purani muwelli untu' Allataala. Purani mupancaji mennang séuwa bangsa imang-ngimang iya ripallaingngé, kuwammengngi natumaniwi Allataalata, enrengngé mapparénta ri yasé'na linoé.” Nainappa makkitasika. Uwéngkalingasi sadda malaéka' iya massebbu-sebbué enrengngé majjuta-jutaé égana! Tettongngi mennang mattulilingiwi kadéra arajangngé sibawa iya eppa mahlu'é enrengngé sining pamimpingngéro. Namakkélong mennang sibawa sadda battowa, “Iyaro Ana' Bimbala' iya puraénna rigéré, sitinajai tarima akuwasang asugireng, apanréng sibawa awatangeng; sitinajai ripakalebbi, ripakaraja enrengngé ripoji-poji!” Nainappa uwéngkalinga sininna mahlu'é ri langié, ri linoé, ri yawana linoé enrengngé ri laleng tasi'é – rippe'na sininna mahlu'é ri lalenna alangngéwé – makkélong, “Aléna iya tudangngé ri yasé'na kadéra arajangngé, sibawa Ana' Bimbala'éro, iyanaritu iya ripoji-pojiyé enrengngé ripakalebbié kuwaéttopa maraja nenniya makuwasa untu' mannennungeng!” Nappébalina iya eppa mahlu'éro, “Aming!” Sibawa iyaro sining pamimpingngé tassulung toni sibawa massompa. Purairo uwitasi iyaro Ana' Bimbala'é reppa'i ségélé' mammulangngé ri yelle'na iya pitu ségélé'éro. Nainappa uwéngkalinga séddi polé ri yelle'na iya eppa mahluéro makkeda, “Laono mai!” Iyaro oni saddanna pada-padai oni letté. Nauwakkita, nainappa paita sikaju anyarang puté. Tau iya tonangiyéngngi makkatenningngi séddi pana, sibawa ri aléna riwéréngngi séddi passigera'. Majui selaku séddi tau pakala iya laowé untu' pakala. Nainappa iyaro Ana' Bimbala'é reppa'i ségélé' iya maduwaé, nauwéngkalingai mahlu' iya maduwaé makkeda, “Laono mai!” Nainappa sikaju anyarang iya laingngé massusi. Iyaro anyarangngé macella mabbara bulunna. Tau iya tonangiyéngngi riwéréngngi akuwasang untu' pallennye'i keadaang damé polé ri linoé, kuwammengngi nasisullé siyuno rupa tauwé. Nariwérénna sipeppa peddang iya battowaé. Nainappa iyaro Ana' Bimbala'é reppa'i ségélé' iya matellué. Nauwéngkalingai mahlu' iya matellué makkeda, “Laono mai!” Makkitana, napaita sikaju anyarang bolong. Tau iya tonangiyéngngi makkatenning sipasang dacing ri limanna. Nauwéngkalinga séuwa iya riyéngkalingaé pada-pada sadda iya goraé polé ri tengnga-tengngana iya eppa mahlu'éro. Iyaro saddaé makkedai, “Sibang gandong ellinna gaji siessoé, sibawa tellubbang gandong laingngé ellinna untu' gaji siessoétto. Iyakiya aja' musolangiwi poppong zaitungngé sibawa dare anggoro'é!” Nainappa iyaro Ana' Bimbala'é reppa'i ségélé' iya maeppaé. Nauwéngkalingai mahlu' iya maeppaé makkeda, “Laono mai!” Makkitana, napaita sikaju anyarang iya makawiyaé. Tau iya tonangiyéngngi riyasengngi Amaténg. Polé ri munri, riyaccowériwi macawé'-cawé' ri Linona Amaténgngé. Akuwasangngé ri tawa eppana linoéwé riyabbéréyangngi lao ri mennang, kuwammengngi naulléi mabbuno naolai musué, naolai wettu akkadérengngé, naolai saiyé enrengngé naolai olokolo' masekkangngé. Purairo iyaro Ana' Bimbala'é reppa'i ségélé' iya malimaé. Nauwitai ri yawana mézbaé engka nyawa-nyawa tau iya maté riyuno nasaba napéwatangiwi mennang paseng polé ri Allataala naolai asabbiyanna mennang. Gorani mennang sibawa sadda iya battowaé, “Oh Puwang Pommakuwasaé, iya mapaccingngé sibawa tongengngé! Siyagapi ittana nappa-Ko madélékiwi pabbanuwana linoé enrengngé hukkungngi mennang nasaba purani naunoki?” Tungke'-tungke' mennang riwéréngngi silampa waju iya maputé. Nainappa risuro mennang mappésau cinampe'si, narapi sukkuni jumellana sellao-sellao seperjuwanganna enrengngé saudara-saudarana mennang iya maéloé riyuno pada-pada mennang. Nainappa uwita iyaro Ana' Bimbala'é reppa'i ségélé' iya maennengngé. Kajajiyanni mpéwang tanaé iya maseroé. Mancaji malotonni mata essoé pada-pada kaing lotong iya makassara'é, enrengngé kétengngé mancaji macella pada-pada daraé. Madduttungeng sining wéttowingngé polé ri langié nonno ri linoé pada-pada buwa ara iya dé'é namatasa madduttung polé ri ponna ri wettunna rigottang ri anginrajaé. Teddéngngi matu langié pada-pada karettasa' rilulungngé enrengngé sininna bulué sibawa puloé ripaésu' polé ri onronna. Nainappa sining arung ri linoé, sining tomarajaé, pallima-pallimaé, sining tau sugié enrengngé sining tau makuwasaé, kuwaéttopa sining tau laingngé, muwi ata iyaré'ga tau maradéka', iya manenna subbui aléna ri laleng gowa-gowaé enrengngé ri selle'-selle'na batu bulué. Lao risining bulué sibawa batuéro, gorai mennang, “Geppaki! Subbuki polé ri pakkitanna Aléna iya tudangngé ri yasé'na kadéra arajangngé, enrengngé polé ri caina Ana' Bimbala'éro! Poléni esso maseroé, makkekkuwangngé nabollowanni mennang caina, nadé' muwi séddi tau mulléi tahang ri yolona mennang!” Purairo, uwitani eppa malaéka' tettong ri eppaé sulapa'na linoé. Natahanggi mennang iya eppa angingngé ri linoé kuwammengngi aja' naengka anging mangiri ri pottanangngé, iyaré'ga ri tasi'é, iyaré'ga ri aju-kajungngé. Nainappa uwita séddi malaéka' laingngé mompo polé ri alau. Tiwii ségélé' polé ri Allataala iya tuwoé. Nasibawang sadda iya battowaé iyaro malaéka'é naobbii iya eppa malaéka' iya puraé lolongeng akuwasang polé ri Allataala untu' solangiwi pottanangngé sibawa tasi'é. Makkedai iyaro malaéka'é, “Aja' riyolo musolangiwi pottanangngé, iyaré'ga tasi'é, iyaré'ga aju-kajungngé rekko dé'pa tawéréngngi tanrang ségélé' ri linrona sining atanna Allataalata.” Nainappa ripaissengika makkedaé engka 144.000 jumellana tau iya riwéréngngé tanrang ségélé' polé ri Allataala ri linrona mennang. Iyaro sining tauwé riyalai polé ri iya seppulo duwa suku bangsa Israélié; polé ri tungke' suku 12.000 tau. Iyanaritu polé ri suku Yéhuda, Rubén, Gad, Asyer, Naftali, Manasyé, Siméon, Léwi, Isakhar, Zébulon, Yusuf, sibawa Bényamin. Purairo makkitasika, nauwitani lémpe tauwé iya dé'é padanna égana – dé muwi séddi tau iya mullé bilangngi jumellana! Mennang iyanaritu sining tau iya polé ri tungke' bangsa, suku, wanuwa, enrengngé basa. Mappaké jumbai iya maputé-puté sibawa makkatenning takké-takké aju pattuku ri limanna, iyaro sining tau maégaé tettongngi moloiwi kadéra arajangngé mangolo ri Ana' Bimbala'éro. Nainappa nasibawang sadda iya battowaé gorai mennang, “Asalamaketta poléi ri Allataala, iya tudangngé ri yasé'na kadéra arajangngé, enrengngé polé ri Ana' Bimbala'éro!” Sininna malaéka'é tettongngi mattulilingiwi kadéra arajangngé enrengngé sining pamimpingngé kuwaéttopa iya eppa mahlu'éro. Iyaro sining malaéka'é tassulunni ri yolona kadéra arajangngé nainappa sompai Allataala. Gorani mennang, “Aming! Ripojiwi Allataalata iya marajaé sibawa mapanré. Aléna ritu Allataala iya sitinajaé riwéréng ada-ada sukkuru' enrengngé pappakalebbi. Makuwasai sibawa mawatangngi lettu mannennungeng! Aming.” Sala séddinna polé risining pamimpingngéro makkutana lao ri iyya, “Iyaé sining tau majjumba puté-puté, niga mennang sibawa polé kégai mennang?” Umappébali, “Dé' uwissengngi Puwang. Puwang muto missengngi.” Nakkeda lao ri iyya, “Iyanaé sining tau iya salama'é laloiwi wettu paccallangngé iya maseroé. Purani mennang nasessa jumbana enrengngé naébbui maputé sibawa darana Ana' Bimbala'éro. Iyanaro saba'na natettong mennang ri yolona kadéra arajanna Allataala, enrengngé massompa ri Aléna esso wenni ri laleng Bolana Allataala. Na Aléna iya tudangngé ri yasé'na kadéra arajangngéro hadéré'i matu sibawa mennang untu' linrungiwi mennang. Dé'na matu mennang namalupu iyaré'ga namadekka; mata essoé iyaré'ga pellaé dé'na matu nangurengngi mennang, saba' Ana' Bimbala' iya tudangngé ri tengnga-tengngana kadéra arajangngéro mancaji matu pakkampina. Nadulungengngi matu mennang lao ri mata uwai iya mabbéré atuwong. Sibawa Allataala matu sussurengngi sininna uwai matanna polé ri matanna mennang.” Wettunna iyaro Ana' Bimbala'é reppa'i ségélé' iya mapitué, masino-sinoi surugaé kira-kira sitengnga jang ittana. Nainappa uwita iya pitu malaéka' iya tettongngé ri yolona Allataala, sibawa riwéréngngi mennang pitu tarompé'. Séddi malaéka' laing, iya tiwié séddi addupa-dupang ulaweng, polé sibawa tettong ri yolona mézbaé. Riwérénni maéga senna' kamennyang untu' riyaggugureng risining paddowangenna sininna umma'na Allataala sibawa untu' riyakkasuwiyangeng ri mézba ulawengngé iya engkaé ri yolona kadéra arajangngé. Nasibawang sining paddowangenna sining umma'na Allataala, rumpu dupa iya mattengngangngé malluwa'ro mallaso ménré' polé ri limanna malaéka' iya tettongngé ri yolona Allataalaro. Nainappa iyaro malaéka'é nala iyaro addupa-dupangngé, nanalisekiwi sibawa api polé ri mézbaé, nainappa naggenrungeng ri yasé'na linoé. Naddalenrunna guttué enrengngé siyanré-anré billa'é, kuwaéttopa mpéwanni tanaé. Purairo, pitu malaéka' iya makkatenningngé pitu tarompé'ro sadiya-sadiyani untu' masseppung. Malaéka' mammulangngé seppungngi tarompé'na, nateppana bosi ése'é sibawa apié iya sikoré dara ri yasé'na linoé sibawa maraja. Cappu tawa tellunna linoé ritunu; makkuwatoro tawa tellunna polé ri aju-kajungngé, enrengngé tungke' wella iya manyilaé. Nainappa malaéka' maduwaé seppungngi tarompé'na, nariyaggenrungeng muttama ri tasi'é séuwa iya maloppo senna'é iya paitaé pada-pada bulu iya malluwa'é. Tawa tellunna tasi'é tappinra mancaji dara, namaténa tawa tellunna polé ri sininna mahlu'é ri tasi'é; makkuwatoro cappu toni tawa tellunna sining kappala'é. Nainappa malaéka' matellué seppungngi tarompé'na, naséuwa wéttowing iya battowaé, iya malluwa'-luwa'é pada-pada suloé, sempé' polé ri langié, nanageppai tawa tellunna sining saloé sibawa mata uwai. (Asenna iyaro wéttowingngé “Mapai”.) Natawa tellunna uwai mancaji mapai, namaténa maéga tau nasaba naénungngi uwai iya mapaiénnaro. Nainappa malaéka' maeppaé seppungngi tarompé'na. Natalleppa'na tawa tellunna mata essoé, tawa tellunna kétengngé, enrengngé tawa tellunna sining wéttowingngé angkanna teddénni tawa tellunna polé ri awatangenna cahayana mennang. Makkuwatoro tawa tellunna polé ri essoé dé'na namacakka sibawa makkuwatoro tawa tellunna polé ri wennié. Nainappaka makkita, nauwéngkalingani sikaju manu'-manu' kuwajang iya mattengngangngé luttu ri bétaraé, gora, “Cilaka! Cilaka! Cilakai sininna tauwé ri linoé rékko naéngkalingai iya tellu malaéka' laingngéro seppungngi tarompé'na matti!” Nainappa malaéka' malimaé seppungngi tarompé'na, nauwitai séuwa wéttowing sempé' polé ri langié nonno ri linoé. Iyaro wéttowingngé riwéréngngi goncinna balorang amaténgngé. Na iyaro wéttowingngé natimpa'ni balorang amaténgngéro, nainappa massuni rumpué polé ri lalenna pada-pada rumpu polé ri dapureng iya battowaé. Mata essoé sibawa bétaraé mapettanni nataro rumpu polé ri peppingngéro. Nainappa polé ri rumpuéro massuni sining incalé iya nonnoé ri linoé. Iyaro sining incalé riwéréngngi akuwasang iya padaé pada-pada iya riwéréngngéngngi dokkéngngé. Riyattéyangngi mennang solangiwi wellaé, iyaré'ga aju-kajungngé, iyaré'ga tanet-taneng laingngé. Banna mennang weddingngi nalurui sining tau iya dé'é tanrang ségélé' polé ri Allataala ri linrona. Iyaro sining incalé dé' naripalalo mpunoi sining tauwéro, sangadinna nasissai bawang mennang limampuleng ittana. Angéttukeng iya napaompoé passissanna iyaro sining incalé pada-padai angéttukeng iya napaompoé passuina dokkéngngé. Ri wettu limampulengngéro, iyaro sining tauwé makkuragai kuwammengngi namaté, iyakiya dé' nawedding mennang maté; macinnai mennang maté, iyakiya amaténgngé mabélai polé ri mennang. Tappana iyaro incalé pada-padai riita anyarang iya sadiyaénna untu' mammusu. Ri ulunna engka séuwa iya paitaé pada-pada passigera' ulawengngé. Tappana pada-padai tappa tolinoé. Gemme'na pada-padai gemme' makkunraié, sibawa isinna pada-pada isi singaé. Arona natongkoi sibawa séuwa iya maéloé pada-pada waju bessié. Oni pannina pada-pada oni karéta anyarang maégaé iya mattengngangngé malluru ri laleng ammusurengngé. Mappunnaiwi ikko enrengngé passuwi pada-pada dokkéngngé. Na ri laleng ikko'naro monro awatangenna untu' sissai tauwé limampuleng ittana. Mappunnaiwi arung iya paréntaéngngi, sibawa arunna iyanaritu malaéka' iya tanggung jawakiyéngngi balorang amaténgngé. Asenna ri laleng basa Ibrani iyanaritu Abadon; sibawa ri laleng basa Yunani Apolion (iya bettuwannaé “Pakkasolang”). Acilakang mammulangngé labe'ni. Purairo engka duwa acilakang iya harusu'é polé. Nainappa malaéka' iya maennengngé seppungngi tarompé'na. Nauwéngkalingai séuwa sadda polé ri iya eppa sunna mézba ulawengngé iya engkaé ri yolona Allataala. Iyaro saddaé makkedai lao ri malaéka' ennengngéro, “Leppessangngi iya eppa malaéka' iya tassiyoé ri Salo Efratro!” Iya eppa malaéka'éro rileppessanni. Purani mennang ripassadiya banna untu' jang, esso, uleng sibawa taungngéro untu' mpunoi tawa tellunna polé ri sininna rupa tauwé. Ripowadanna makkedaé jumellana sining pasukang makkinnyarangngéro iyanaritu égana duwa ratu juta. Sibawa ri laleng pakkitangngé, uwitai sining anyarangngéro enrengngé sining tonangiyéngngi. Sining tonangiyéngngi pakéi waju bessi iya macella malluwa'é tappana, magawu pada-pada batu nilangngé, enrengngé maridi balérang. Ulunna sining anyarangngéro pada-padai ulu singaé, sibawa polé ri bawana massui apié, rumpué sibawa balérangngé. Tawa tellunna polé ri rupa tauwé riyunoi ri iya tellu abalaéro; iyanaritu api, rumpu sibawa balérang iya massué polé ri bawana sining anyarangngéro. Awatangenna sining anyarangngéro monroi ri bawana kuwaéttopa ri ikko'na. Sining ikko'na pada-padai ula makkulué. Nasibawang sining ikko'naro, iyaro sining anyarangngé nasissai rupa tauwé. Iyakiya sésana polé ri umma' tolinoé iya dé'é nariyuno risining abalaéro, dé'to namaélo salaiwi pangkaukeng limanna muto mennang. Dé' nappésau mennang massompa risining sétangngé, sibawa barahala-barahala ulawengngé, péra'é, tembagaé, batu sibawa ajué iya dé'é naulléi makkita, iyaré'ga maréngkalinga, iyaré'ga joppa. Dé'to mennang nasesse'i sining pangkaukenna iya majaé, iyanaritu abbunowangngé, paddissengengngé sibawa mappangaddié enrengngé ménnauwé. Nainappa uwita séddi malaéka' poré iya laingngé nonno polé ri surugaé. Risalipuriwi sibawa ellung, enrengngé séuwa tarawu mattemmuiwi ulunna. Tappana maccahaya pada-pada mata essoé, sibawa ajéna pada-pada alliri apié. Ri limanna engka séddi kitta lulung baiccu iya tattimpa'é. Ajé ataunna makkella ri tasi'é, sibawa ajé abéyona makkella ri pottanangngé. Nainappa gora sibawa sadda battowa pada-pada sining singaé iya mattengngangngé mowang. Puranana gora iyaro malaéka'é, iya pitu guttué mappébalini sibawa sadda maddalenrung. Massaddanna iya pitu guttuéro, maéloka mokii, iyakiya méngkalingaka séuwa sadda polé ri surugaé makkeda, “Rahasiyakangngi aga iya napowadaé iya pitu guttuéro; aja' muwokii!” Nainappa malaéka' iya uwitaé makkella ri tasi'é sibawa ri pottanangngéro makkai lima ataunna ménré' ri langié. Mattanroi ri laleng asenna Allataala iya tuwoé mannennungeng, iya pancajiyéngngi langié, linoé sibawa tasi'é enrengngé sininna séuwa-séuwaé iya engkaé ri lalenna. Makkedai iyaro malaéka'é, “Dé'na matu naripasoro wettunna! Iyakiya rékko malaéka' mapitué seppungngi tarompé'na, Allataala pakajajiyangngi matu rancana rahasiya-Na, pada-pada pura riyabbirittangngé lao ri ata-atan-Na, iyanaritu sining nabié.” Nainappa sadda iya puraé uwéngkalinga polé ri surugaéro, mabbicarasi lao ri iyya. Makkedai, “Laono malai kitta lulung iya tattimpa'é ri limanna malaéka' iya makkellaé ri tasi'é sibawa ri pottanangngéro.” Naulaona ri malaéka'éro sibawa uwéllauwi kuwammengngi nabbéréyangngi kitta lulung baiccu'éro lao ri iyya. Makkedai, “Alani sibawa anréi iyaé. Ri laleng babuwamu mancaji mapaii matu, iyakiya ri laleng bawamu macenningngi pada-pada cani'é.” Uwalani iyaro kitta lulung baiccu'é polé ri limanna nainappa manréi. Ri bawaé rasana pada-pada cani'é, iyakiya purana uwemme, ri laleng babuwaé mancaji mapaii. Nainappa riparéntakka, “Pallebbangngi siseppa birittanna Allataala passalenna bangsa-bangsaé, sining wanuwaé, sining basaé, enrengngé sining arungngé.” Purairo riwérékka sipolo aju iya maéloé pada sipeppa tekkeng pangukkuru', nainappa riparéntang, “Laono muukkuru'i Bolana Allataala sibawa mézbana. Bilangngi siyaga tau iya massompaé ri lalenna. Iyakiya aja' muukkuru'i seddéna iya ri seddé saliwenna Bolana Allataalaro, saba' iyaro bagiyangngé purani riyabbéréyang lao risining tau iya dé'é naissengngi Puwangngé. Naléjja'-léjja'i matu mennang kota iya mapaccingngéro patappulo duwa uleng ittana. Maélo-Ka suroi duwa tau sabbik-Ku iya mappaké pakéyang mabbarata, sibawa nappallebbangengngi matu mennang birittanna Allataala 1.260 esso ittana.” Iyaro duwaé sabbi iyanaritu duwappong zaitun sibawa duwa ajé lampu iya engkaé ri yolona Puwangngé sininna alangngé. Rékko nacobai tauwé pogau'i séuwa iya dé'é namakessing lao ri mennang, napolé ri bawana mennang massui api iya paccappuéngngi sining balinna. Nallalengi caraéro, sininna tau iya maéloé peddiriwi mennang riyunoi matu. Mappunnaiwi mennang akuwasang untu' tongkoi langié kuwammengngi aja' nateppa bosié ri wettu nappallebbangenna mennang biritta polé ri Allataala. Mappunnai towi akuwasang ri sininna mata uwai, untu' pinrai uwai mancaji dara. Sibawa mappunnai towi mennang akuwasang untu' munrui linoé sibawa sininna rupanna abalaé, uppa-uppanna mennang maéloi pogau'i. Puranana mennang nappallebbangeng birittanna, olokolo' iya massué polé ri pepping amaténgngé méwai matu mennang. Nacaui matu mennang sibawa naunoi mennang. Na ujuna tattale'i matu ri watattanana kota battowaé, ri onronna Puwanna risalli. Aseng ébara'na iyaro kotaé iyanaritu Sodom iyaré'ga Maséré'. Sining tau polé ri sininna bangsaé, sukué, basaé, enrengngé wanuwaé naitai matu ujuna tellungngesso sitengnga ittana, sibawa dé' napalaloi iyaro sining ujué rikuburu'. Marennui matu pabbanuwana linoé nasaba maténana iya duwa sabbiéro. Naramé-raméiwi matu mennang enrengngé sisulléi matu sikiringeng hadiya, nasaba iya duwa tau nabiéro purani mappapolé maéga passissang lao ri sininna tauwé ri linoé. Labe'nana tellungngesso sitengnga, poléni nappase' atuwong polé ri Allataala sibawa muttama'si ri laleng iya duwa tau nabiéro. Tokkong toni mennang tellong, angkanna sininna tauwé iya mitaéngngi mennang mancaji métau senna'. Nainappa iya duwa tau nabiéro maréngkalinga sadda battowa iya mobbiéngngi mennang polé ri surugaé, “Laono mai ménré' kuwaé!” Nainappa ri yolona matanna sining balinna, ménré' toni mennang ri surugaé, risalipuri ri ellungngé. Na iyaro wettué kajajiyanni mpéwang tanaé iya maseroé. Tawa seppulona bagiyanna polé ri kotaéro ancuru', sibawa pitussebbu tau maté nasaba iyaro mpéwang tanaé. Sining tau laingngé métau senna'ni, nainappa mennang napoji arajanna Allataala ri surugaé. Acilakang maduwaé labe'ni. Iyakiya itai! Cilaka iya matellué dé'na namaitta naccinrola matu. Nainappa malaéka' mapitué naseppung tarompé'na, nariyéngkalingana ri surugaé sadda battowa senna'é iya makkedaé, “Akuwasang untu' paréntai linoé engkani makkekkuwangngé ri laleng limanna Puwatta enrengngé Arung Pappassalama' iya najjanciyangngé. Mapparéntai matu lettu mannennungeng!” Na iya duwappulo eppa pamimping iya tudangngé ri kadéra arajanna ri yolona Allataala, tassulunni sibawa sompai Allataala. Makkedai mennang, “Puwang, Allataala Pommakuwasaé, iya engkaé, sibawa iya engkaénna! Mattarima kasi'ki ri Idi saba' purani Mupaké akuwasam-Mu iya battowaé, enrengngé purani Mupammulai mapparénta! Sining tau iya dé'é naissengngi Puwangngé, majjallo saba' wettunna Mupatabbollong cai-Mu, enrengngé wettunna tona Muwadéléki sining tau maté. Iyanaé wettunna untu' mpéréngngi saro ata-atam-Mu, sining nabié, sibawa lao ri sininna umma'-Mu, iyanaritu sininna tauwé iya massompaé ri Iko, battowa iyaré'ga baiccu. Iyanaé wettunna untu' mancuru'i sining tau iya mancuru'éngngi linoé!” Natattimpa'na Bolana Allataala ri surugaé, enrengngé paitani Petti Assijancingengngé ri lalenna. Nasiyanré-anré billa'é enrengngé sadda guttué maddalenrung sibawa mango, kuwaéttopa mpéwang tanaé sibawa bosi ése' iya maseroé. Nainappa paita ri langié séuwa iya makalallaingngé enrengngé dé'gaga padanna. Séddi makkunrai iya pakééngngi mata essoé selaku pakéyanna, mattengngang tettong ri yasé'na kétengngé. Ri ulunna engka séuwa passigera' iya polé riseppulo duwa wéttowing. Iyaro makkunraié mattengngangngi mattampu, nasaba narapini wettunna untu' mémmana', nakelli'na nataro peddi. Nainappa paita toni ri langié séuwa iya makalallaingngé. Engka sikaju naga cella iya battowa senna'é iya mappunnaiyé pitu ulu sibawa seppulo tanru'. Tungke' ulunna pakéi séddi passigera'. Nasibawang ikko'na nassarénréngengngi tawa tellunna polé risining wéttowingngé ri langié nanaggenrungengngi lao ri linoé. Iyaro nagaé tettongngi siyolong makkunrai iya maéloé mémmana'ro sibawa akkattana memme'i ana'na, ri wettu jajinna muwa. Nainappa iyaro makkunraié jajiyanni séddi ana' worowané iya maéloé paréntai sininna bangsaé sibawa tekkeng bessi. Iyakiya iyaro ana'é rirampasa'i polé ri makkunraiéro, nainappa ritiwi lao ri Allataala sibawa ri yolona kadéra arajan-Na. Nalarina iyaro makkunraié lao ri padang kessi'é, ri onrong iya puraé ripassadiyangengngi ri Allataala. Ri onrongngéro ripiyarai matu 1.260 esso ittana. Nainappa ri surugaé kajajiyanni musué. Mikhaél silaong malaéka-malaéka'na mammusu méwai iyaro nagaé. Na iyaro nagaé ribantui ri malaéka-malaéka'na, méwai Mikhaél. Iyakiya ricaui iyaro nagaé. Aléna sibawa sining malaéka'na dé'na naripalalo monro ri surugaé. Iyaro naga battowaé riyabbéyanni massu! Aléna ritu iyaro ula macowaé iya riyasengngé Ibillisi' iyaré'ga Sétang, iya bellééngngi sininna linoé. Ribuwanni ri linoé silaong sininna malaéka'na. Nainappa uwéngkalinga sadda battowaé ri surugaé makkeda, “Makkekkuwangngénna wettunna Allataala passalama'i umma'-Na! Makkekkuwangngénna wettunna Allataala mappaitangngi akuwasan-Na selaku Arung! Makkekkuwangngé Arung Pappassalama' iya najjanciyangngéro nappaitang toni akuwasan-Na! Saba' iya teppuéngngi saudara-saudarata ri yolona Allataala esso wenni, purani ripassu polé ri surugaé. Saudara-saudarata purani nacau iyaro sibawa darana iyaro Ana' Bimbala'é, enrengngé nasibawang biritta tongengngé iya polé ri Allataala iya nabbirittangngé mennang. Macenning atinna makkarobangengngi nyawana narapi maté. Rimakkuwannanaro, sitinajai surugaé enrengngé sininna iya monroé ri lalenna, mariyo-riyo! Iyakiya cilakai linoé sibawa tasi'é, saba' nonnoni Ibillisi' ri iko sibawa cai iya battowa senna'é, nasaba naissengngi makkedaé céddé mani wettunna monro.” Wettunna namaingeki iyaro nagaé makkedaé purani ribuwang ri linoé, mammulani nalellung makkunrai iya puraénna jajiyang ana' worowanéro. Iyakiya iyaro makkunraié purani riwéréng duwa panni kuwajang iya battowaé, kuwammengngi naluttu lao ri onronna ri padang kessi'é, ri onronna matu ripiyara tellu sitengnga taung ittana, massala polé ri nagaé. Na iyaro nagaé napporokenni polé ri bawana maéga senna' uwai lao ri makkunraiéro, untu' malirengngi. Iyakiya tanaé bantui iyaro makkunraié; natimpa'i bawana linoé nanaemme'i uwai iya massué polé ri bawana nagaéro. Namacai senna'na iyaro nagaé lao ri makkunraiéro, angkanna lao gasai wijanna lainna iyaro makkunraié, iyanaritu sininna tau iya turusiyéngngi sining paréntana Allataala, enrengngé iya mabbéré asabbiyang passalenna Yésus sibawa akuwasan-Na. Natettong iyaro nagaé ri wiring tasi'é. Nainappa uwita sikaju olokolo' mompo polé ri laleng tasi'é. Mappunnaiwi seppulo tanru' enrengngé pitu ulu. Ri tungke' tanru'na engka séddi passigera', sibawa ri tungke' ulunna tarokii séddi aseng pappakatuna lao ri Allataala. Olokolo' iya uwitaéro tappana pada-padai macang tutul-é, sibawa ajéna pada-pada ajé beruwangngé, enrengngé pannyoro'na pada-pada pannyoro' singaé. Nainappa iyaro olokolo'é riwéréngngi ri nagaéro awatangeng ri aléna, sibawa kadéra arajanna enrengngé akuwasanna iya battowaé. Séddi polé ri yelle'na iya pitu ulunna olokolo'éro paitai pada-pada lo maseroé, iyakiya iyaro loé sauni. Sininna linoé maccowériwi iyaro olokolo'é sibawa marasa hérang. Sibawa nasappai mennang iyaro nagaé saba' purani nawéréng akuwasanna lao ri olokolo'éro. Nanasompai mennang iyaro olokolo'étto. Makkedai mennang, “Dé'gaga iya pada-padaé sibawa olokolo'éwé! Dé'gaga iya mullé mammusu méwai!” Iyaro olokolo'é ripalaloi powadai gau'-gau' iya matempo senna'é sibawa pakatunai Allataala. Ripalaloi mapparénta patappulo duwa uleng ittana. Nainappa mappammula pakatunai Allataala, enrengngé asenna Allataala. Makkuwatoro onrong appérumanna Allataala, enrengngé iya maneng monroé ri surugaé napakatuna towi. Ripalalo towi méwai umma'na Allataala enrengngé caui mennang. Enrengngé akuwasang ri yasé'na sininna sukué, wanuwaé, basaé, sibawa bangsaé riyabbéréyang lao ri aléna. Iyaro olokolo'é risompai matu ri sininna tau iya tuwoé ri yasé'na linoé, sangadinna sining tau iya asennaé purani riyoki riwettu dé'napa naripancaji linoé, ri laleng kitta'na tau tuwoé appunnangenna Ana' Bimbala' iya puraé rigéré. Rimakkuwannanaro, rékko mulléi maréngkalinga, éngkalingai iyaé birittaé: “Tau iya harusu'é ritawang, pasti ritawangngi matu. Sibawa tau iya harusu'é riyuno sibawa peddang, pasti riyunoi matu sibawa peddang. Iyanaro saba'na umma'na Allataala harusu'i sabbara sibawa matinulu.” Nainappa uwita sikaju olokolo' laing mompo polé ri laleng linoé. Mappunnaiwi duwa tanru' pada-pada tanru' ana' bimbala'é. Saddanna pada-padai sadda nagaé. Pakéi akuwasang iya battowaé iya nalolongengngé polé ri olokolo'éttoro, ri yolona olokolo' mammulangngé. Sininna linoé sibawa sininna iya monroé ri yasé'na, napassai sompai olokolo' mammulangngéro, iya majjappaénna lona iya maseroé. Olokolo' iya maduwaéro pakangkai gau'-gau' makalallaing iya battowaé. Ri yolona sininna tauwé naébbui apié nonno ri linoé polé ri langié. Sibawa sininna tau iya tuwoé ri linoé nabengnguwangngi sibawa sining anu makalallaingngé iya weddingngé naébbu ri yolona olokolo' iya mammulangngéro. Sibawa nasuro manengngi mennang patettong séuwa dato'-dato' polé ri olokolo'éro iya puraé nalo peddang, iyakiya tette'i tuwo. Iyaro olokolo' maduwaé ripalaloi mabbéré nyawa lao ri dato'-dato'éro, angkanna iyaro dato'-dato'é naulléi mabbicara sibawa mpunoi sininna tau iya dé'é namaélo sompai. Sininna tauwé, battowa sibawa baiccu, sugi sibawa kasiyasi, ata sibawa tau maradéka', ripassa ri olokolo'éro untu' tarima tanrang ri lima ataunna mennang iyaré'ga ri linrona mennang. Dé' muwi séddi tau mulléi melliwi iyaré'ga balu'i séuwaé, rékko dé' nappunnaiwi iyaro tanrangngé, iyanaritu asenna muto iyaro olokolo'é, iyaré'ga nomoro iya pannessaéngngi asengngéro. Kuwaé parellu engka pangissengeng. Tau iya mapanré naulléi bilangngi bettuwanna iyaro nomoro'na olokolo'é, saba' iyaro nomoro'é iyanaritu asenna séddié tolino. Nomoro'na iyanaritu 666. Nainappaka makkita, napaitana iyaro Ana' Bimbala'é tettong ri yasé'na Bulu-bulu Sion. Nasibawang Aléna engka 144.000 tau iya limannaé tungke'-tungke' taroki asen-Na sibawa asenna Ambo'-Na. Nainappaka méngkalinga séuwa sadda polé ri langié memmu pada-pada uwai jompi iya battowaé sibawa dalenrung guttué iya maseroé. Iyaro saddaé riyéngkalingai pada-pada oni paréwa oni-oni polé ri pakkacapié iya mattengngangngé paoniwi kacapinna. Ri yolona kadéra arajangngé, sibawa iya eppa mahlu'é enrengngé sining pamimpingngé ri mattulilinna kadéra arajangngéro, iya 144.000 tauwéro makkélongngi séddi élong iya mabarué. Iyaro élongngé dé' naulléi magguruiwi muwi séddi tau ri lainnaé 144.000 tauwéro, iya puraé ripaleppe polé ri linoé. Mennang sining tau iya tette'é mapaccing pada-pada parawangngé, nasaba dé' nasisumpung sibawa makkunraié. Naccowériwi mennang iyaro Ana' Bimbala'é kégi-kégi lao. Polé ri yelle'na sininna rupa tauwé, mennang ritu iya puraé ripaleppe selaku pakkasuwiyangeng mammulangngé lao ri Allataala sibawa lao ri Ana' Bimbala'é. Dé' naengka mennang nabbellé, sibawa dé'gaga cellana muwi céddé. Nainappa uwita séddi malaéka' laing iya luttué matanré ri langié. Iyaro malaéka'é tiwii biritta passalenna Karéba Madécéng iya mannennungengngé untu' ripalettu lao ri tolinoé ri linoé; iyanaritu lao ri tungke'-tungke' bangsa, suku, basa sibawa wanuwa. Iyaro malaéka'é gorai sibawa sadda battowaé, “Etauko ri Allataala, sibawa pojiwi arajan-Na! Saba' wettunna Allataala madélékiwi tolinoé. Sompai Aléna iya pancajiyéngngi langié, linoé, tasi'é sibawa sininna mata uwai.” Malaéka' iya maduwaé maccinrolaiwi malaéka' iya mammulangngé nagorato, “Sempé'ni! Kota Babél iya battowaé sempé'ni! Purani naébbu sininna bangsaé mancaji mabo' sibawa uwai anggoro – iyanaritu anggoro polé ri napessu pappangaddinna!” Malaéka' matellué maccinrolaiwi iya duwa malaéka'éro, nagorato sibawa sadda iya maloppoé, “Tau iya sompaéngngi iyaro olokolo'é sibawa dato'-dato'na, enrengngé mappunnaiwi tanranna iyaro olokolo'é ri linrona iyaré'ga ri limanna, iyaro tauwé ménungngi matu anggoro'na Allataala, iyanaritu anggoro cai-Na iya puraé natiri' ri laleng onron-Na, tenrikurangi muwi céddé! Sininna iyaro tauwé risissai matu ri laleng apié sibawa belérangngé ri yolona sining malaéka' mapaccingngé sibawa ri yolona Ana' Bimbala'éro. Rumpunna api iya sissaéngngi sining tauwéro maddumpui matu matteru lettu mannennungeng. Esso wenni dé' appésaunna mennang risissa, iyanaritu mennang iya sompaéngngi olokolo'éro sibawa dato'-dato'na, sininna tau iya mappunnaiyé tanrang aseng olokolo'éro.” Ri laleng gau'éwé umma'na Allataala, iya matinulué ri parénta-paréntana Allataala enrengngé matinulu ri Yésus, parellui mancaji sabbara. Nainappa uwéngkalinga sadda polé ri surugaé makkeda, “Okii iyaé: Mappammulai makkekkuwangngé masennangngi tau iya maté ri wettu natumaninginna mupa Puwangngé!” Nappébali Rohna Allataala, “Tongeng! Mappésauwi matu mennang majjama laddé', nasaba wassélé' attumaningenna tuli sibawangngi matu mennang.” Nainappa makkitaka, napaitana séuwa ellung iya maputé. Ri yasé'na ellungngéro tudangngi séddi tau iya paitaé samanna pada tolinoé. Ri ulun-Na engka séddi passigera' ulaweng, sibawa ri liman-Na engka séddi kandao iya matarengngé. Nainappa séddi malaéka' laing massu polé ri Bolana Allataala. Nasibawang sadda iya battowaé, gorani lao ri iya tudangngé ri yasé'na ellungngéro, “Akkani iyaro kandao-Mu sibawa éngngalani makkekkuwangngé, saba' wettunna untu' méngngala; matasa'ni linoé untu' riyéngngala!” Nainappa iya tudangngé ri yasé'na ellungngéro massangkingngi kandao-Na lao ri linoé, nariyéngngalana linoé. Nainappa uwita séddi malaéka' iya laingngéssi massu polé ri Bolana Allataala ri surugaé. Makkatenning towi séddi kandao iya matarengngé. Purairo, séddi malaéka' laing, iya makuwasaiyéngngi apié, massu polé ri mézbaé. Nasibawang sadda iya maloppoé gorai lao ri malaéka' iya makkatenningngé kandao iya matarengngéro, “Assangkinni kandaomuro namurette'i buwa-buwa pong anggoro'é ri linoé, nasaba matasa'ni buwa-buwana!” Nanassangkinni kandaona iyaro malaéka'é ri linoé nanakandaowi buwa-buwa anggoro'é polé ri batanna, nainappa nappéyang ri laleng apparakeng anggoro caina Allataala iya luwangngé. Iyaro buwa-buwa anggoro'é ripara'i ri saliweng kota, napolé ri apparakengngéro massolo'ni daraé pada-pada saloé, bélana tellu ratu kilo, sibawa lamunna mawé' duwa météré. Nainappa uwita ri langié séuwa iya makalallaingngé sibawa dé'gaga padanna serona. Engka pitu malaéka' sibawa pitu abala iya paccappurengngé. Iyanaé paccappurenna Allataala tuppa'i cai-Na. Purairo uwitani séuwa iya paitaé pada-pada tasi' kacaé sicampuru' api. Uwita towi sining tau iya cauéngngi olokolo'é sibawa dato'-dato'na, sibawa pacau lao ri tau iya asennaé ritanrangi sibawa nomoro'. Sining tau iya pacauénnaro tettongngi ri wirinna tasi' kacaé nanakkatenning towi kacapi iya nabbéréyangngé Allataala lao ri mennang. Sibawa makkélongngi mennang élonna Musa, atanna Allataala, enrengngé élonna Ana' Bimbala'é. Makkuwaiyé oninna, “Puwang, Allataala Pommakuwasaé, temmaka loppona sibawa makalallainna sining pangkaukem-Mu! Arunna sininna bangsaé, temmaka adélé'na sibawa tongenna sining tindakem-Mu! Nigana dé' namétau ri Idi, Puwang? Nigana dé' namaélo mabbirittangngi arajam-Mu? Iko bawang ritu mapaccing. Sininna bangsaé poléi matu sompa-Ko nasaba sining tindakam-Mu iya adélé'é purani naita sininna tauwé.” Purairo uwitani Bolana Puwangngé ri surugaé tattimpa, na Kémana Puwangngé engkai ri lalenna. Nainappa iya pitu malaéka'é sibawa iya pitu abalaéro polé ri Bolana Allataala. Pakéyanna mennang poléi ri kaing lénang iya mapaccingngé sibawa lala'-lala'é. Enrengngé pakéi mennang pattongko aro iya riyébbué polé ri ulawengngé. Nainappa sala séddinna polé ri eppaé mahlu'éro mabbéré lao ri iya pitu malaéka'éro pitu onrong ulaweng iya pennoé sibawa caina Allataala, – Allataala iya tuwoé mannennungeng. Na iyaro Bolana Allataala pennoi sibawa rumpu polé ri arajanna sibawa akuwasanna Allataala. Sibawa ri wettu engkana mupa abala iya natiwié iya pitu malaéka'éro dé'pa naccappa, dé'gaga muwi séddi tau iya mullé muttama ri laleng Bolana Allataala. Nainappa méngkalingaka sadda loppo polé ri laleng Bolana Allataala makkeda lao ri iya pitu malaéka'éro, “Laono sibawa tiri'i lise'na iya pitu onrong caina Allataalaro ri yasé'na linoé!” Laoni malaéka' mammulangngé sibawa tiri'i lise' onronna ri linoé. Naompona sining lettang iya maseroé sibawa maseroé angéttukenna ri sininna tauwé iya mappunnangiyé tanranna olokolo'éro, sibawa sining tau iya sompaéngngi dato'-dato'na. Purairo malaéka' maduwaé tiri'i lise' onronna ri tasi'é. Nancajina uwai ri tasi'é pada-pada darana tau maté, angkanna maténi sininna mahlu' iya tuwoé ri lalenna tasi'é. Nainappa malaéka' iya matellué tiri'i lise' onronna risining saloé sibawa risining mata uwai, namancaji darana sininna uwaina. Uwéngkalingani malaéka' iya makuwasaiyéngngi uwai makkeda, “Pahukkungeng iya Mupatakkennaé iyanaritu adélé'i, oh Pommapaccingngé, Allataala iya engkaé, sibawa iya engkaénna! Purani mennang napatabbollong darana umma'na Allataala sibawa darana nabi-nabié; makkekkuwangngé Muwébbui mennang ménung dara. Mémeng sitinajai iyaro untu' mennang!” Nainappa uwéngkalinga séuwa sadda polé ri mézbaé makkeda, “Puwang, Allataala Pommakuwasaé, tongeng sibawa adélé'i sining pahukkungeng Mupatakkennaé!” Purairo malaéka' maeppaé tiri'i lise' onronna ri mata essoé, naripalalona mata essoé mangurengngi tolinoé sibawa pellana iya maseroéro. Riyangurenni tolinoé ri pellana matire'é, angkanna natanroiwi asenna Allataala, iya makuwasaiyéngngi sining abalaéro. Namuni makkuwaro, dé' namaélo mennang toba' polé ri dosa-dosana sibawa dé' namaélo pojiwi arajanna Allataala. Nainappa malaéka' malimaé tiri'i lise' onronna ri kadéra arajanna olokolo'éro. Nasininna akkarungeng olokolo'éro mapettanni, naokkoni tauwé lilana nataro peddi. Nainappa natanroiwi mennang Allataala ri surugaé nasaba mapeddii mennang sibawa nasaba sining lettanna. Iyakiya dé'topa mennang natoba' polé risining pangkaukenna iya majaé. Purairo malaéka' maennengngé tiri'i lise' onronna ri Salo Efrat iya battowaéro. Namarakkona iyaro saloé angkanna sining arung polé alaué naullé joppa molai. Nainappa uwita tellu roh maja iya tappanaé pada-pada cuppangngé. Tungke'-tungke' iyaro cuppangngé massui polé ri bawana nagaé, polé ri bawana olokolo'é, enrengngé polé ri bawana nabi palsué. Mennang ritu sining roh-roh maja iya mébbué sining anu makalallaingngé. Iya telluro roh-é laowi ri sininna arungngé ri sininna linoé sibawa paddeppungengngi mennang untu' mammusu ri Esso iya battowaé, iyanaritu Esso polé ri Allataala Pommakuwasaé. “Engkalingai! Polé-Ka pada-pada pangaé! Masennangngi tau iya tette'é sadiya sibawa jagaiwi pakéyanna, angkanna dé' najoppa sibawa mallusu-lusu sibawa mancaji masiri ri yolona tau maégaé!” Nainappa iyaro sining roh-é paddeppungengngi iyaro sining arungngé ri onrong iya riyasengngé Harmagedon ri laleng basa Ibrani. Purairo malaéka' mapitué tiri'i lise' onronna ri yelle'é. Nariyéngkalingana sadda iya maloppoé polé ri kadéra arajangngé ri Bolana Allataala, iya makkedaé, “Tépuni!” Nakajajiyanna billa'é siyanré-anré sibawa oni guttué maddalenrung enrengngé marung, kuwaéttopa mpéwang tanaé iya maseroé. Dé' naengka nakajajiyang mpéwang tana pada-padaéro sipongenna ripancaji rupa tauwé. Iyanaé mpéwang tana iya kaminang maseroé! Kota iya battowaéro mareppa'ni mancaji tellu bagiyang, naancuru' tona kota-kotana sininna wanuwaé ri linoé. Nainappa naéngngeranni Allataala matu Babél iya battowaéro. Na Allataala mébbui ménung anggoro polé ri onrong anggoro'na Allataala – iyanaritu anggoro cai-Na iya malluwa'-luwa'é. Teddéng manengngi puloé, sibawa sininna bulué lennye toni. Bosi ése' battowaé, iya tungke'-tungke'é sittane limappulo kilo, sempé' polé ri langié geppai sining tauwé. Nanatanroini mennang Allataala nasaba abala bosi ése' masero senna'éro. Purairo sala séddinna tau polé ri iya pitu malaéka' iya makkatenningngé pitu onrongngéro laowi ri iyya sibawa makkeda, “Laono mai, maéloka paitakko pékkugi iyaro cakkuribang battowaé rihukkung matu, iyanaritu kota battowaéro iya ripatettongngé ri seddéna sining saloé! Sining arung linoé siyappangaddingngi sibawa aléna, sibawa pabbanuwana linoé mabo'i nasaba ménungngi anggoro appangaddinna.” Nainappa nakuwasaika Rohna Allataala, sibawa iyaro malaéka'é natiwika ri padang kessi'é. Kuwaniro mitaka séddi makkunrai tudang ri yasé'na séddié olokolo' iya makellengngé bulunna, sibawa iya riyarokiriyé penno sibawa aseng-ngaseng pappakatuna lao ri Allataala. Iyaro olokolo'é mappunnaiwi pitu ulu sibawa seppulo tanru'. Iyaro makkunraié mabbaju colli paowi sibawa makelleng; enrengngé ribélo-béloi sibawa paréwa-paréwa ulaweng, paramata-paramata, sibawa mutiyara. Ri limanna makkatenningngi séddi mangko' ulaweng iya pennoé sibawa gau'-gau' majaé sibawa macarépaé, wassélé'na appangaddingenna. Ri linrona tarokii séuwa aseng iya mappunnaiyé bettuwang rahasiya. Iyaro asengngé iyanaritu “Babél Iya Battowaé, indo'na sininna cakkuribangngé sibawa sining tau maja ampé ri linoé.” Nainappa uwita iyaro makkunraié mabo'i sibawa darana umma'na Allataala enrengngé darana sininna tau iya riyunoé nasaba matinului lao ri Yésus. Wettukku mitai iyaro makkunraié, mancaji tahhérang-hérakka. Nainappa makkeda iyaro malaéka'é lao ri iyya, “Aga saba'na mutahhérang-hérang? Madécéngengngi upaissengiko rahasiyana iyaro makkunraié sibawa rahasiyana olokolo' iya natonangiyé, iyanaritu iya mappunnaiyé pitu ulu sibawa seppulo tanru'. Iyaro olokolo'é engka naengka natuwo riyolo, iyakiya makkekkuwangngé dé'na natuwo. Cinampe'pi nassu matu polé ri pepping amaténgngé enrengngé nalao matu mattuju ri abinasangngé. Sining tau iya tuwoé ri linoé riwettu dé'napa naripancaji linoé iya asennaé dé' nariyoki ri laleng Kitta'na Tau Tuwoé, iyaro sining tauwé hérangngi matu rékko naitai iyaro olokolo'é. Saba' iyaro olokolo'é engka naengka natuwo riyolo. Makkekkuwangngé dé'na natuwona, iyakiya maéloi mompo paimeng. Ri laleng gau'éwé parellu engka pangissengeng sibawa pappéjeppu. Iyaro pitué ulu iyanaritu pitu bulu-bulu; iyanaritu bulu-bulu onronna iyaro makkunraié tudang. Sibawa iyaro pitué ulu iyatona iyanaritu pitu arung: lima polé ri mennang sempé'ni, séddi mapparénta mupi, naiya séddié dé'pa napolé. Rékko poléi matti, harusu'i mapparénta cinampe' bawang. Sibawa olokolo' iya engkaé naengka natuwo riyolo, iyakiya makkekkuwangngé dé'na natuwona, iyanaritu arung maaruwaé. Sala séddinna towi polé ri iyaro arung pitué, iya makkekkuwangngé mattengngang mattuju lao ri abinasangngé. Seppulo tanru' iya muwitaéro iyanaritu seppulo arung iya dé'éppa nappammula mapparénta. Iyakiya riwéréngngi matu akuwasang untu' mapparénta selaku arung silaong iyaro olokolo'é sijang ittana. Iya seppulo arungngéwé iya manenna mappunnaiwi akkatta iya padaé; iya manenna mennang nabbéréyangngi awatangenna sibawa akuwasanna lao ri olokolo'éro. Mammusui matu mennang méwai iyaro Ana' Bimbala'é. Iyakiya iyaro Ana' Bimbala'é silaong sining ana' gurun-Na iya matinulué iya puraé Naobbi sibawa Napiléro nacaui matu iyaro sining arungngé, nasaba Aléna ritu Puwanna sininna puwangngé, enrengngé Arunna sininna arungngé.” Makkeda towi iyaro malaéka'é, “Uwai iya muwitaéro, onronna cakkuribangngé tudang, iyanaritu bangsa-bangsaé, sining ra'ya'é, sining wanuwaé sibawa sining basaé. Seppulo tanru' iya muwitaé sibawa iyaro olokolo'é nabenciwi matu iyaro cakkuribangngé. Narampasa'i matu sininna séuwa-séuwaé iya nappunnaiyé, sibawa naébbui aléna mallusu-lusu. Nanréi matu mennang jukuna enrengngé napaccappui sibawa api. Saba' Allataala pura pakédoi atinna untu' pajoppai rancanana Allataala. Allataala mébbui atinna siyempe untu' mabbéréyangngi akuwasanna lao ri olokolo'éro, kuwammengngi na iyaro olokolo'é mapparéntai narapi kajajiyang aga iya napowadaé Allataala. Makkunrai iya muwitaéro iyanaritu kota battowaé, iya paréntaéngngi sining arungngé ri linoé.” Purairo uwitani séddi malaéka' laing nonno polé ri surugaé. Mappunnaiwi akuwasang iya battowaé, sibawa tappana mébbui sininna linoéwé mancaji macakka. Nasibawang sadda iya battowaé, gorai, “Sempé'ni! Sempé'ni Babél battowaé! Makkekkuwangngé mancajini onronna sining sétangngé sibawa sining roh majaé. Ri lalenna tuwoi sininna rupanna manu'-manu' iya najisi'é sibawa iya nacéccé tauwé. Saba' sininna bangsaé purani naénung anggoro napessu appangaddinna. Sining arunna linoé siappangaddingngi, sibawa sining padangkangngé ri linoé mancaji sugii polé ri napessunna iya dé'é narikuwasairo.” Nainappa uwéngkalinga sadda laing polé ri surugaé makkeda, “Massuno umma'-Ku! Massuno polé ri lalenna! Aja' muwaccowériwi dosa-dosana, sibawa maccowé tanggungngi pahukkungenna! Saba' sitenre-tenre'ni dosana lettu ri langié, sibawa naéngngerangngi Allataala jana matu. Gaukenni pada-pada pura nagaukekko; wale'ni leppe' wékkaduwa untu' iya maneng iya puraé napogau'. Lisekiwi mangko'na sibawa énungeng iya wékkaduwaé lebbi maserié naiya énungeng iya napassadiyangengngékko. Wéréngngi anrasa-rasang sibawa saraninnawa iya padaé égana sibawa arajangngé sibawa asugireng iya nabbéréyangngé lao ri aléna muto. Saba' tuli makkedai bawang lao ri aléna, ‘Iyya'naé arung makkunrai iya mapparéntaé! Tenniyaka janda; dé' upéneddingiwi matu atassinnaurengngé!’ Nasaba gau'éro, na ri laleng si esso bawang nanakennai matu abala – lasa, atassinnaureng, sibawa akkadéreng. Enrengngé riyangurenngi matu sibawa api, saba' Puwang Allataala iya madélékiyéngngiro makuwasa senna'i.” Sining arung linoé iya maccowéé ri laleng sining pangkaukeng appangaddingngé sibawa napessunna makkuwaéro nateringiwi matu sibawa nawatingiwi kotaéro rékko naitai mennang mallaso rumpué polé ri api iya paangurengngé. Tettongngi matu mennang polé mabéla saba' métaui mennang nakenna anrasa-rasanna. Makkedai mennang, “Aduh, tenniya culé-culé acilakanna kota iya tassebbo'éwé – kota Babél iya mawatangngé! Ri laleng sijang bawang purani ripajoppa pahukkungemmu!” Sining padangkang ri linoé teri towi sibawa mabbaratai nasaba makkunraiéro, saba' dé'na muwi séddi tau iya melliyéngngi barab-barang dangkangenna. Dé'gaga melli ulaweng, péra', paramata, enrengngé mutiyarana; makkuwatoro kaing lénang, kaing colli pao, sabbé, sibawa kaing cella cowa; sininna rupanna aju iya majarangngé rilolongeng, barab-barang polé ri gadingngé enrengngé polé ri aju iya masulié, polé ri tembagaé, bessié, sibawa puwalangngé; oli aju cenning, rampa-rampa, setanggi, mur sibawa kamennyang; anggoro sibawa minnya, labbu sibawa gandong; saping sibawa bimbala', anyarang sibawa karéta, ata-ata, mala muwi nyawa tolino. Makkeda sining padangkangngé lao ri makkunraiéro, “Sininna iya muwacinnaiyé muwappunnai, dé'na gagana, sibawa sininna asugirengngé sibawa ammingkikengngé teddénni. Dé'na mulolongenni paimeng!” Sining padangkang iya sugiénna nasaba dangkangngi ri kotaéro tettongngi matu polé mabéla, saba' métaui mennang nakenna anrasa-rasanna. Teriwi matu mennang sibawa mabbarata, nainappa makkeda, “Aduh, tenniya pato acilakanna kota iya tassebbo'éwé! Biyasana pakéi pakéyang lénang, kaing colli pao sibawa kaing cella cowa; biyasana pennoi sibawa paréwa ulaweng, paramata, sibawa mutiyara! Iyakiya ri laleng sijang bawang, ateddéngenni sininna asugirennaro!” Sininna nakodaé, lurengngé, sibawa ana' kappala'é enrengngé sininna tauwé iya assappa-sapparennaé ri tasi'é, tettongngi polé mabéla. Sibawa gora ri wettunna mennang naita rumpué maddumpu polé ri apié iya tunuéngngi kotaéro. Gorani mennang, “Dé' naengka kota laingngé pada-pada kota iya battowaéwé!” Nanassiyamporenna mennang awu ri ulunna selaku tanrang mabbarata, nainappa teri sibawa kelli-kelli, “Aduh, tenniya pato acilakanna kota iya battowaéwé! Asugirenna pura mébbui sininna tauwé iya mappunnaiyé kappala-kappala ri tasi'é mancaji sugi! Iyakiya ri laleng sijang bawang, ateddéngenni sini-sininnaé.” Eh suruga, akkérennuno nasaba ancurukenna kotaéro! Eh umma' Allataala, rasul-rasul sibawa nabi-nabi, akkérennuno! Saba' Allataala pura hukkungngi selaku pamale'na aga iya puraé napogau' lao ri iko! Purairo, séddi malaéka' iya poré makka séddi batu – silloppo batu allélurengngé iya battowaé – nainappa naggenrungeng ri lalenna tasi'é sibawa makkeda, “Makkuwaniyé carana kota Babél iya tassebbo'éro maélo riyaggenrungeng sibawa masero, angkanna dé'na nariruntu paimeng. Oninna oni-onié polé ri pakkacapié, polé risining pakkélongngé, polé ri passulingngé sibawa polé ripasseppung tarompé'é, dé'na nariyéngkalinga matu ri lalemmu! Dé' tona matu séddi tau pajjama-jama mapanré kuwaro, sibawa oni batu allélurengngé dé'na nariyéngkalinga matu. Dé'na naitai matu tauwé tappa lampué ri lalemmu; sibawa dé'tona matu nariyéngkalinga arowaseng pésta abottingengngé kuwaro. Sining padangkammu iyanaritu sining tau iya kaminang mariyoloé ri linoé, sibawa nasibawang sining pangissengeng mappalennye'-lennye'é nabengnguwangngi sininna bangsaé ri linoé!” Rihukkungngi Babél saba' ri laleng kotaéro rilolongenni darana nabi-nabié, darana umma'na Allataala – rippe'na darana sininna tauwé iya puraé riyuno ri yasé'na linoé. Purairo uwéngkalingani séuwa sadda iya pada-padaé sadda merunna tau maégaé polé ri surugaé iya gora-goraé, “Pojiwi Allataala! Allataalata iyanaritu Allataala iya mappassalama'é; Allataala iya marajaé sibawa makuwasaé! Adélé'i pangadéléken-Na sibawa mapanréi! Purani napatakkenna pahukkungengngé ri yasé'na cakkuribang iya battowaé, iya solangiyéngngi linoé sibawa appangaddinna. Allataala pura hukkungngi iyaro cakkuribangngé, saba' naunoi ata-atanna Allataala.” Nainappa iyaro saddanna tau maégaé gorasi, “Pojiwi Allataala! Rumpunna api iya mangurengngengngi kota battowaéro maddumpuni matu dé' nappésau!” Na iya duwappulo eppa pamimpingngé sibawa iya eppa mahlu' iya mattulilingiyéngngi kadéra arajangngéro tassulunni sibawa sompai Allataala iya tudangngé ri yasé'na kadéra arajangngé. Makkedai mennang, “Aming! Pojiwi Allataala!” Nainappa riyéngkalingani polé ri kadéra arajangngéro oni sadda iya makkedaé, “Pojiwi Allataala, éh sininna atanna Allataala, sibawa sininna tauwé – baiccu battowa – iya sompaéngngi Allataala!” Purairo uwéngkalingani séuwa pada-pada sadda sikonrong tau iya maéga senna'é; oninna pada-pada bombang iya mangappo'é sibawa pada-pada guttu iya maddalenrungngé. Uwéngkalingai mennang makkeda, “Pojiwi Allataala! Saba' Puwang, Allataalata Iya Pommakuwasaéro mapparéntani makkekkuwangngé! Laono mai tamariyo-riyo sibawa marennu; laono mai tapojiwi arajan-Na! Saba' narapini esso abottingenna iyaro Ana' Bimbala'é, sibawa bottin-Na sadiyani untu' akawingen-Na. Purani riwéréng pakéyang lénang iya lala'-lala'é untu' napaké.” (Iyaro pakéyang lénangngé iyanaritu sining pangkaukeng makessingngé iya napogau'é umma'na Allataala.) Nainappa makkeda iyaro malaéka'é lao ri iyya, “Okii iyaé: ‘Masennangngi tau iya riundangngé lao ri pésta akawingenna iyaro Ana' Bimbala'é.’ ” Nainappa iyaro malaéka'é tambai towi, “Iyanaé biritta tongeng polé ri Allataala.” Tassulunna ri yolona iyaro malaéka'é maélo sompai, iyakiya makkedai lao ri iyya, “Aja'! Aja' musompaka, sompai Allataala! Saba' iyya atato pada-pada iko enrengngé pada-pada sininna saudaramu iya makkatenning masse'é ri asabbiyanna Yésus!” Saba' asabbiyanna Yésusnaro iya panurungengngéngngi tau iya mabbotoé. Nainappa uwita tattimpa surugaé, nainappa paita sikaju anyarang puté. Pakkinnyaran-Na riyasengngi Iya Matinulué sibawa Iya Tongengngé. Adélé'i ri laleng pettuiwi pahukkungengngé sibawa ri laleng musu iya Napogau'é. Matan-Na pada-pada luwa' apié sibawa ri ulun-Na pakéi maéga passigera'. Ri Aléna tarokii séuwa aseng; na banna Aléna bawang missengngi iyaro asengngé. Jumba iya Napaké purani riremmé ri laleng daraé. Sibawa riyasengngi “Saddanna Allataala”. Tentarana surugaé maccowériwi sibawa makkinnyarangiwi sining anyarang puté, sibawa mappakéyang lénang iya maputé mapaccingngé. Polé ri bawa-Na massui sipeppa peddang iya matarengngé nasibawang iyaro peddangngé nacaui matu bangsa-bangsaé, sibawa mapparéntai matu mennang sibawa tekkeng bessi. Napara'i matu anggoro'é ri laleng apparakeng anggoro caina Allataala Iya Pommakuwasaé. Ri jumbana sibawa ri poppan-Na tarokii asengngéwé, “Arunna sininna arungngé, sibawa Puwanna sininna puwangngé.” Nainappa uwita séddi malaéka' tettong ri yasé'na matanna essoé. Nasibawang sadda iya battowaé gorai lao ri sininna manu'-manu' iya luttué ri yelle'é, “Laono mai maddeppungeng untu' hadérékiwi pésta battowaé iya naramé-raméiyé Allataala! Laono mai manréi jukuna sining arungngé, jukuna sining pallimaé, sibawa jukuna sining pahlawangngé; laono mai manréi jukuna sining pakkinnyarang anyarangngé sibawa jukuna sining anyaranna enrengngé jukuna sininna rupa tauwé, battowa sibawa baiccu, ata sibawa tau maradéka'!” Nainappa uwita iyaro olokolo'é, sibawa sining arung linoé enrengngé tentarana mennang, maddeppungengngi untu' mammusu méwai iya tonangiyéngngi anyarang putéro sibawa tentara-Na. Na iyaro olokolo'é ritikkenni silaong nabi palsué iya mébbuéngngi sining anu makalallaingngé ri yolona olokolo'éro. (Nasibawang sining anu makalallaingngéro iyaro olokolo'é bengnguwangngi sining tau iya mappunnaiyé tanrang olokolo'éro, sibawa sining tau iya sompaéngngi dato'-dato'na olokolo'éro.) Nainappa iyaro olokolo'é sibawa nabi palsuéro riyabbéyang tuwo-tuwo ri laleng tasi apié iya malluwa'-luwa'é sibawa balérang. Sibawa riyunoi tentarana sibawa peddang iya massué polé ri bawana pakkinnyarang anyarang putéro. Napolé tona sining manu'-manu'é manréi sibawa mallaku-laku jukuna mennang iya riyunoéro. Purairo uwitani séddi malaéka' nonno polé ri surugaé. Ri limanna nakkatenningngi goncinna balorang amaténgngé sibawa séddi balenggu iya battowaé. Nainappa natikkeng iyaro nagaé, ula macowaé – iyanaritu Ibillisi'é iyaré'ga Roh Majaé – sibawa balenggui untu' sisebbu taung ittana. Nainappa iyaro malaéka'é nabuwang iyaro nagaé ri laleng balorang amaténgngé, nainappa nagoncing iyaro peppingngé sibawa naségélé', kuwammengngi iyaro nagaé dé'na naulléi bengnguwangngi bangsa-bangsaé sisebbu taung ittana, riwettu dé'napa nacappu. Purairo harusu'i rileppessang untu' wettu iya dé'é namaitta. Nainappa uwita sining kadéra akkarungengngé, sibawa sining tau iya tudangngé risining kadéra arajangngéro riwéréng kuwasa untu' pettuiwi pahukkungengngé. Uwita towi sining nyawana tau iya puraé rirette ulunna nasaba mabbéréi mennang asabbiyang passalenna Yésus, sibawa mappallebbangengngi paseng polé ri Allataala. Iyaro sining tauwé dé' nasompai olokolo'é, iyaré'ga dato'-dato'na. Dé'to mennang naengka natarima tanranna iyaro olokolo'é ri linrona iyaré'ga ri limanna. Natuwona mennang paimeng sibawa mapparénta selaku arung silaong Kristus sisebbu taung ittana. Iyanaé pammulanna ripaoto'na sining tau maté. (Iyakiya sining tau maté laingngé dé' naripatuwo paimeng ri wettu sisebbué taung ittanaro.) Masennangngi sining tau iya maccowéé ripaoto' ri pammulannaro. Ritarimai mennang mancaji appunnangenna Allataala. Amaténg maduwaé dé'na namakuwasa lao ri mennang. Mancajiwi matu mennang imang-ngimanna Allataala, sibawa imang-ngimanna Kristus; enrengngé mapparéntai matu mennang silaong Aléna sisebbu taung ittana. Cappunana wettu sisebbué taunro, rileppessangngi matu Ibillisi' polé ri tarungkué, nalaona matu bengnguwangngi bangsa-bangsaé iya tassiyaé ri sininna linoé, iyanaritu Gog sibawa Magog. Ibillisi' paddeppungengngi mennang untu' mammusu, séuwa jumella iya battowa senna'é, singngéga kessi'é ri tasi'é. Natassiyana mennang lao ri sininna linoé, nainappa nakeppung akkémangenna umma'na Allataala sibawa kota iya Namaséiyé Allataala. Iyakiya nonnoi apié polé ri langié nanapaccappui mennang. Nainappa Ibillisi' iya bengnguwangngéngngi mennanro, riyaggenrungengngi muttama ri tasi apié sibawa balérangngé. Kuwaniro onronna olokolo'é sibawa nabi palsuéro ribuwang lebbi riyolo. Risissai matu mennang esso wenni lettu mannennungeng. Purairo uwitani séuwa kadéra arajang puté iya battowaé sibawa Aléna iya tudangngé ri yasé'na. Lennye'i langié sibawa linoé polé ri yolo-Na, angkanna dé'na napaitana. Sibawa uwitai sining tau maté, baiccu battowa, tettong ri yolona kadéra arajangngéro. Naritimpa'na sining kitta'é. Nainappa séddi kitta laingngé ritimpa, iyanaritu Kitta'na Tau Tuwoé. Nainappa ripatatteppa pahukkungengngé ri yasé'na sining tau maté, situru pangkaukenna mennang iya riyokié ri laleng sining kitta'éro. Nainappa nabbéréyang tasi'é sining tau maté iya engkaé ri lalenna. Amaténgngé sibawa Linona Amaténgngé nabbéréyang toni sining tau maté iya engkaé ri aléna. Na iyaro sining tau maté ripateppai manenni pahukkungeng siturué pangkaukenna. Nainappa Amaténgngé sibawa Linona Amaténgngé riyaggenrungeng ri laleng tasi apié. (Iyaé tasi apié iyanaritu amaténg maduwaé.) Sining tau iya dé'é nariyoki asenna ri laleng Kitta'na Tau Tuwoé, iyaro sining tauwé ribuwangngi ri laleng tasi apié. Nainappa uwita langi iya barué sibawa lino iya barué. Langi mammulangngé sibawa lino mammulangngé teddéng toni, enrengngé lennye'ni tasi'é. Nauwitani iyaro kota mapaccingngé, iyanaritu Yérusalém iya mabarué, nonno polé ri Allataala. Iyaro kotaé purani ripassadiya pada-pada séddié botting makkunrai iya ribélo-béloiyé untu' duppaiwi bottimpurané. Nainappa uwéngkalinga sadda polé ri kadéra arajangngéro gora sibawa maloppo, “Makkekkuwangngé onronna Allataala iyanaritu silaongngi tolinoé! Tuwoi matu sibawa mennang, nancaji matu mennang umma'-Na. Aléna Allataala sionrong matu sibawa mennang enrengngé namancaji Allataalana mennang. Nasussui matu sininna uwai mata polé ri matanna. Dé'na gaga matu amaténg; atassinnaureng, teri, iyaré'ga muwi lasa dé'tona gaga. Gau'-gau' iya malaungngé lennye'ni.” Nainappa Aléna iya tudangngé ri yasé'na iyaro kadéra arajangngé makkeda, “Makkekkuwangngé Uwébbuni sininna mabaru!” Makkeda towi lao ri iyya, “Okii iyaé, saba' iyaé sining ada-adaéwé tongengngi sibawa weddingngi riyatepperi.” Nainappa makkeda, “Tépuni! Iyya'na ritu mammulang sibawa paccappureng; Iyya'naé Puwang polé ri Pammulanna lettu ri Paccappurenna. Tungke' tau iya madekkaé, Upaénungngi matu cuma-cuma polé ri mata uwai iya mabbéré atuwong. Tau iya pakalaé natarimai matu iyaro gau'-gau'é polé ri Iyya. Mancaji-Ka matu Allataalana, na aléna matu mancaji ana'-Ku. Iyakiya tau pellorengngé, tau bali'bellaé, tau maja ampé, tau pabbunoé, pappangaddié, tau iya paké paddissengeng mappalennye'-lennye'é, passompa barahalaé, sibawa sininna pabbelléngngé, ribuwangngi matu ri laleng tasi apié sibawa balérangngé iya malluwa'-luwa'é, iyanaritu amaténg maduwaé.” Séddi polé ri iya pitu malaéka' iya puraé makkatenningngi sining onrong iya pennoé sibawa iya pitu abala paccappurengngéro laoni ri iyya sibawa makkeda, “Laono mai! Maéloka jellokekko Bottingngé, iyanaritu bainéna Ana' Bimbala'é.” Nanakuwasaina Rohna Allataala, sibawa iyaro malaéka'é natiwika ri coppo'na bulu iya matanré senna'é. Najellokenna Yérusalém, kota mapaccingngéro. Iyaro kotaé nonnoi polé ri surugaé, polé ri Allataala, sibawa mattappa enrengngé arajanna Allataala. Iyaro kotaé millakkillang pada-pada batu paramataé, pada-pada batu baiduri pandangngé iya macinnongngé pada-pada kacaé. Témbo' iya mattulilingiyéngngi matanréi na battowa, sibawa seppulo duwa pintu gerbanna, enrengngé rijagaiwi ri seppulo duwa malaéka'. Risining pintu gerbanna tarokii aseng-ngasenna seppulo duwa suku bangsa Israélié. Engka tellu pintu gerbang iya mangoloé ri tungke' sulapa': tellu ri alau, tellu ri yattang, tellu ri manorang sibawa tellu ri yajang. Iyaro témbo'na kotaé ripatettongngi ri yasé'na seppulo duwa batu pandaméng. Ri batu-batu pandaméngngéro riyokii aseng-ngasenna seppulo duwa rasulna Ana' Bimbala'éro. Malaéka' iya mabbicaraé sibawa iyya'ro mappunnaiwi tekkeng pangukkuru' polé ri ulawengngé, untu' mukkuru'i iyaro kotaé, pintu-pintu gerbanna sibawa témbo'na. Iyaro kotaé massulapa eppai – padai lampéna sibawa sakkana. Na iyaro malaéka'é naukkuru'ni iyaro kotaé sibawa tekkeng pangukkuru'na; na lampéna 2.400 kilo; sakka sibawa tanréna padai lampéna. Wettunna iyaro malaéka'é mukkuru'i témbo'na, tanréna iyaro témbo'na enneng pulona météré. Ukkurang iya napaké iyaro malaéka'é iyanaritu ukkurang iya napaké tolinoé. Iyaro témbo'na kotaé riyébbui polé ri batu baiduri pandangngé, na kotana poléi ri ulaweng tuléngngé, macinnong pada-pada kacaé. Iyaro batu-batu pandaménna kotaéro ribélo-béloiwi sibawa sininna rupanna batu paramataé. Batu pandaméng iya mammulangngé riyébbui polé ri batu baiduri pandangngé, iya maduwaé poléi ri batu nilangngé, matellué poléi ri batu yaku'é, maeppaé poléi ri batu zamrud-é, malimaé poléi ri batu baiduri sépa'é, maennengngé poléi ri batu dalimaé, mapitué poléi ri batu ratna cempakaé, maaruwaé poléi ri batu pirus-é, maaséraé poléi ri batu topas-é, maseppuloé poléi ri batu krisopras-é, maseppuloé séddi poléi ri batu lazuwardié, sibawa maseppuloé duwa poléi ri batu kecubungngé. Iya seppulo duwa pintu gerbanna poléi riseppulo duwa mutiyara, tungke'-tungke' sumpanna riyébbui polé riséddi mutiyara. Watattanana iyaro kotaé riyébbui polé ri ulaweng tuléngngé, macinnong pada-pada kaca iya lala'-lala'é. Dé' uwitai Bolana Allataala ri laleng kotaéro, saba' Bolana Allataalana iyanaritu aléna Puwangngé, Allataala Iya Pommakuwasaé, sibawa iyaro Ana' Bimbala'é. Iyaro kotaé dé' naparellu ritappari mata esso iyaré'ga kéteng, saba' arajanna Allataala tappariwi, sibawa iyaro Ana' Bimbala'é iyanaritu lampunna. Joppai matu bangsa-bangsaé ri linoé ri laleng cahayana, sibawa sining arungngé natiwi towi matu asugirenna mennang ri laleng kotaéro. Iyaro sining pintu gerbanna kotaéro tattimpa'i matu puppu esso; dé' naritongko, saba' dé'gaga wenni kuwaro. Arajanna sibawa asugirenna bangsa-bangsaé ritiwii matu ri laleng kotaéro. Iyakiya sining tau iya pogau'éngngi gau'-gau' iya mappakaciddi-ciddi'é iyaré'ga tau iya mabbellé – rippe'na agi-agi iya najisi'é, dé' sises-siseng nauttama ri lalenna. Iya muttama'é matu banna sining tau iya asennaé taroki ri laleng Kitta'na Tau Tuwoé, kitta'na Ana' Bimbala'éro. Najjelloreng towi iyaro malaéka'é lao ri iyya salo iya mabbéré atuwong uwaina. Iyaro saloé reppe-reppe pada-pada kacaé. Sibawa massolo'i polé ri kadéra arajanna Allataala sibawa Ana' Bimbala'éro, ri tengnga-tengngana watattanaé ri kotaéro. Ri wirinna saloéro, ri wirinna wali-wali engka aju assalenna atuwongngé, iya mabbuwaé wékkaseppulo duwa sitaung, iyanaritu siseng siuleng. Daunna ripakéi untu' pajjappai bangsa-bangsaé. Ri laleng kotaéro dé' narilolongeng muwi séddi iya nakennaé tanrona Allataala. Kadéra arajanna Allataala sibawa iyaro Ana' Bimbala'é engkai ri laleng kotaéro. Sining atanna Allataala massompai matu ri Allataala, sibawa naitai tappa-Na. Asenna Allataala riyokii matu ri linrona mennang. Dé' matu mennang napparelluwang lampu iyaré'ga cahaya mata esso, saba' dé'na gaga wenni, sibawa aléna Puwang Allataala tajangiwi matu mennang. Mapparéntai matu mennang selaku arung lettu mannennungeng. Nainappa makkeda iyaro malaéka'é lao ri iyya, “Iyaé sining ada-adaé tongengngi sibawa weddingngi riyatepperi. Puwang Allataala iya mabbéréyangngéngngi Roh-Na lao ri nabi-nabié, pura suroi malaéka'-Na untu' majjellokengngi lao risining atan-Na aga iya masitta'é harusu kajajiyang.” Nakkeda Yésus, “Pénessaiwi iyaé! Masitta'ka maélo polé. Maupe'i sining tau iya turusiyéngngi ada-ada botoé ri laleng kittaéwé!” Iyya, Yohanés, pura méngkalingai sibawa mitai iya manennaé. Puranana uwéngkalinga sibawa mitai, tassulunna ri yolona malaéka' iya puraé majjellokengngi iya manennaro lao ri iyya, namaéloka sompai, iyakiya makkedai lao ri iyya, “Aja'! Aja' musompaka! Sompai Allataala! Saba' iyya ata muto pada-pada iko, sibawa pada-pada saudara-saudaramu sining nabié sibawa sininna tauwé iya turusiyéngngi sining paseng ri laleng kitta'éwé!” Nainappa makkedasi, “Aja' murahasiyakangngi ada-ada botoé ri laleng kitta'éwé, saba' macawé'ni wettunna iya manennaé maélo kajajiyang. Tau iya majaé, leppessanni matteru pogau'i majaé; tau iya najisi'é, leppessanni matteru panajisi'i aléna; tau iya turusiyéngngi élona Allataala, leppessanni matteru turusiwi élona Allataala, sibawa iya tuwoé banna untu' Allataala, leppessanni matteru tuwo banna untu' Allataala.” Nakkeda Yésus, “Pénessaiwi iyaé! Dé'na namaittana Umaélo polé sibawa tiwi saro untu' mpale'i tungke' tau situru aga iya puraé napogau'. Iyya'naé pammulang sibawa paccappureng; Iyya'na Puwang polé ri Pammulanna lettu ri Paccappurenna.” Masennangngi sining tau iya sessa'éngngi jumbana gangka mapaccing. Mappunnaiwi mennang ha' manréi buwa polé ri pong atuwongngé enrengngé muttama ri laleng kotaéro lalo ri pintu gerbanna. Iyakiya sining tau iya pogau'éngngi sining gau' iya matunaé, iya makkégunangngéngngi sining pangissengeng mappalennye'-lennye'é, iya pogau'éngngi pangkaukeng mappangaddié, iya mabbunoé, iya massompaé barahala, sibawa iya madosaé muwi sibawa ada-ada iyaré'ga sibawa pangkaukeng, sininna tauwéro onronna iyanaritu ri saliwennai kotaéro. “Iyya, Yésus, pura suroi malaéka'-Ku lao ri iko kuwammengngi nappassengengngi gau'-gau'éwé untu' apentingenna jema'-jema'é. Iyya'naé wija-wijanna Daud; Iyya'naé wéttowing alau iya macakkaéro.” Nakkeda Rohna Allataala sibawa Botting Makkunraié, “Laono mai!” Tungke' tau iya méngkalingaéngngi iyaé harusu towi makkeda, “Laono mai!” Niga madekka, sitinajai polé! Sibawa niga iya macinnangiyéngngi, sitinajai mala uwai iya mabbéré atuwonro sibawa cuma-cuma! Lao ri tungké tau iya méngkalingaéngngi ada-ada botoéwé ri laleng kitta'éwé, iyya, Yohanés, mabbéréyangngi papparéngngerangngéwé: Rékko tau iya tambaiyéngngi séuwa ri ada-ada botoéwé, Allataala matu tambaingengngi ri yasé'na tauwéro abala-abala iya ripowadaé ri laleng kitta'éwé. Sibawa rékko nakurangiwi tauwé séuwa polé ri ada-ada botoéwé, Allataala matu kurangiwi towi polé ri tauwéro bagiyanna iya ripowadaé ri laleng kitta'éwé – iyanaritu bagiyanna polé ri aju atuwongngé sibawa polé ri kota mapaccingngéro. Iya palettu'éngngi sininna birittaéwé makkedai, “Tongeng, maélo-Ka polé masitta'!” Aming! Poléni' oh Puwang Yésus! Tennapodo Puwang Yésus mabbéréyangngi barakka'-Na lao ri sininna umma'na Allataala!