इब्राहीम को कुल, दाऊद को कुल, यीशु मसीह को वंस। इब्राहीम से इसहाक भए; इसहाक से याकूब और याकूब से यहूदा और ऊके भईया भए। यहूदा से फिरिस, यहूदा और तामार से जोरह भए; फिरिस से हिस्त्रोन और हिस्त्रोन से एराम भए। एराम से अम्मीनादाब भओ; अम्मीनादाब से नहशोन और नहशोन से सलमोन भओ। सलमोन और राहब से बोअज भओ। और बोअज और रूत से ओबेद भओ; और ओबेद से यिशै भओ। और यिशै से दाऊद राजा भओ। और दाऊद से सुलैमान ऊ बईयर से भओ जौन पेंला उरिय्याह की घरवारी हती। और सुलैमान से रहबाम भओ; और रहबाम से अबिय्याह और अबिय्याह से आसा भओ; और आसा से यहोशाफात भओ; और यहोशाफात से योराम भओ, और योराम से उज्जिय्याह भओ। और उज्जियाह से योताम भओ; और योताम से आहाज भओ; और आहाज से हिजकिय्याह भओ। और हिजकिय्याह से मनश्शिह भओ। और मनश्शिह से आमोन और आमोन से योशिय्याह भओ। और बन्दी होकें बाबुल हां जाबे की बेरा में योशिय्याह से यकुन्याह, और ऊके भईया भए। बन्दी होकें बाबुल पोंचाए जाबे के बादई यकुन्याह से शालतिएल भओ; और शालतिएल से जरूब्बाबिल भओ। और जरूब्बाबिल से अबीहूद भओ, और अबीहूद से इल्याकीम और इल्याकीम से अजोर भओ। और अजोर से सदोक भओ; और सदोक से अखीम और अखीम से एलीहूद भओ। और एलीहूद से इलियाजार भओ; और इलियाजार से मत्तान और मत्तान से याकूब भओ। और याकूब से यूसुफ भओ; जो मरियम कौ घरवालो हतो जीसे यीशु पैदा भओ जौन मसीह कहाऊ त आय। इब्राहीम से दाऊद तक सबई चौदह पीढ़ियां भईं और दाऊद से बाबुल हां बन्दी होकें पहुंचाए जाबे लौ चौदह पीढ़ियां और बन्दी होकें बाबुल हां पहुंचाए जाबे की बेरा से लेके मसीह लौ चौदह पीढ़ियां भईं। यीशु मसीह कौ जन्म ऐसो भओ, कि जब ऊकी मताई मरियम की पक्‍यात यूसुफ के संग्गै हो गई, तो उनके जुरबे के पेंलईं बे पवित्र आत्मा की कोद से गरभ से पाई गई। ऊको घरवारो यूसुफ ने जौन धर्मी हतो, ऊहां बदनाम करबो नईं चाहत हतो, और मसकई ऊहां छोड़ देबे की सोसी। परन्त जब बो जौ सब सोचई रओ हतो तो पिरभू कौ एक सरगदूत ऊहां सपने में जौ कहत भओ दिखो; कि ऐ यूसुफ दाद के पूत, तें मरियम हां अपनी घरवाली बनाबे से न डरा; कायसे जौन ऊके गरभ में आय, बो पवित्र आत्मा की कोद से आय। बो पूत हां जन्म दै है और तें ऊकौ नाओं यीशु धरियो; कायसे बे अपने लोगन हां उन के पापन से छुड़ै है। जौ सब ई काजें भओ कि जो बचन पिरभु के आगमवकता ने कहे हते; बो पूरे होबें। कि हेरो, एक कुंवारी गरभ से हुईये बो एक पूत हा जन्म दै है और ऊको नाओं इम्मानुएल धरो जै है, जीको मतलब आय “परमेसुर हमाए संग्गै”। सो यूसुफ सोउत से जागो और पिरभू के सरगदूत की आग्यां मान के ऊहां ब्याह के ले आओ। मरियम के ऐंगर जब लौ नईं गओ, जब लौ बो पूत हां नईं जनी: और यूसुफ ने ऊको नाओं यीशु धरो। राजा हेरोदेस के दिना में जब यहूदिया के बैतलहम में यीशु कौ जन्म भओ, तो तको, पूरब दिसा से ज्योतिषी आके पूंछन लगे। कि यहूदियन कौ राजा जीको जन्म भओ है, बो किते आय? कायसे पूरब में ऊको तारा दिखानो और हमन ऊहां परनाम करबे हां चले आए। जब हरोदेस राजा ने ऐसो सुनो, तो बो और ऊके संग्गै सबरो यरूशेलम घबरया गओ। ऊने सबई महायाजकन और शास्त्रियन हां जोड़ के उन से पूंछी, कि मसीह कौ जन्म किते हुईये? उनन ने ऊसे कई, यहूदिया के बैतलहम में; कायसे आगमवकता ने ऐसई लिखो आय। कि ऐ बैतलहम, जौन यहूदा के देस में आय, तें यहूदा के हाकिमन में कोऊ से हल्को नईंयां; कायसे तो में से एक हाकिम कड़ है, जो मोरी परजा इस्राएल की रखनवारी कर है। तो हेरोदेस ने ज्योतिषियन हां बालई बाला टेर के उन से पूंछो, कि तारा सही की बेरा दिखानो हतो। और जौ कहके उन हां बैतलहम पठैव, कि जाओ ऊ मोंड़ा कौ सही सही पता लगईयो और जब बो तुम हां मिल जै है, तो मोय खबर दईयो कि मैं सोई जाके ऊहां परनाम करों। राजा की बात सुनके बे चल पड़े, और हेरो, जौन तारा, उन ने पूरब में तको हतो, बो उन के आंगू आंगू चलत रओ, और ऊ जांगह के ऊपरै ठहरो, जिते मोंड़ा हतो। बे ऊ तारे हां हेर के बिलात खुस भए। उन ने घर के भीतरै मोंड़ा हां ऊकी मताई मरियम के संग्गै देखो, और धरती पे झुक के ऊहां परनाम करो; और अपनो अपनो झोला खोल के ऊहां सोना, लोहबान, और गन्धरस की भेंट चढ़ाई। और सपने में परमेसुर से चितौनी मिली, कि फिरके हेरोदस के ऐंगर न जईयो, बे दूसरी गैल से अपने मुलक हां चले गए। जब बे चले गए तो हेरो, पिरभू के दूत ने सपने में यूसुफ हां दिखाई देके कई, उठो; और मोंड़ा और ऊकी मताई हां लेके मिस्र देश हां चलो जा, और जब लौ मैं न कहों, तब लौ उतईं रहियो; कायसे हेरोदेस ई मोंड़ा हां ढूढ़त आय कि ऊहां मरवा डारे। बो रातई में उठके मोंड़ा और ऊकी मताई हां लैके मिस्र हां चल दओ। और हेरोदस के मरबे लौ उतईं रओ; ई लाने कि जौन चरचा पिरभू के आगमवकता ने कई हती, कि मैं ने अपने पूत हां मिस्र से बुलाओ पूरी भई। जब हेरोदस ने जौ हेरो, कि ज्योतिषयन ने मोरे संग्गै दगा करो आय, तो बो आग-बबूला भओ; ऊने हुकम दैके बैतलहम और ऊके ऐंगर के सबरे मोंड़न हां जौन दो बरस, और ऊसे हल्के हते, मरवा डारो। तो जो बात यिर्मयाह आगमवकता द्वारा कही गई हती, पूरी भई। कि रामाह में एक गुहार और चिचयाबो सुनाई पड़ो, रोबो और बड़ो कलपबो, राहेल अपने मोंड़न के लाने रो रई हती, चिमाओ न चाहत हती, कायसे बे अब नईं रए। जब हेरोदस मर गओ तो हेरो, मिस्र में प्रभु के दूत ने यूसुफ हां सपने में दिखाई दैके कई। कि उठ, मोंड़ा और ऊकी मताई हां लैके इस्राएल के देश में चलो जा; कायसे जो ऊको प्राण लेबो चाहत हतो, बो मर गओ। बो उठो, और मोंड़ा और ऊकी मताई हां संग्गै लैके इस्राएल के देश में चलो आओ। पर जौ सुनके कि अरखिलाउस अपने बाप हेरोदस की जांगा यहूदिया में राज्य करत आय, ऊतै जाबे से डरानो; फिन सपने में परमेसुर से चितौनी पाके बो गलील देश में चलो गओ। और नासरत नाओं के एक नगर में जाके रान लगो; जीसे आगमवकता की कई बात पूरी होबै, कि बो नासरी कहा है। उन दिनन में यूहन्ना बपतिस्मा देबेवारो यहूदिया के हार में आओ और जौ कह के परचार करत हतो। कि मन फेरो; कायसे सरग कौ राज्य ऐंगर आ गओ आय। जौ ओई आय जीको बखान आगमवकता यशायाह ने जौ कहत भए करो हतो कि हार में कोऊ बोलबेवारे कौ ऐरो हो रओ आय, कि पिरभू की गैल सई करो, ऊको रास्तो सूदो करो। यूहन्ना ऊंट के बाल कौ उन्ना पैरें हतो, और अपनी करियाई में चमड़ा कौ फेंटा बांधे हतो, और ऊ टिडि्डयां और मैपर खात हतो। तबई ऊके ऐंगर यरूशेलम और सारे यहूदिया और यरदन के असपेर के सबरे परगना के मान्स ऊके ऐंगर आए। और उन ने अपने पापन हां मानो और ऊसे यरदन नदिया में बपतिस्मा लओ। जब ऊने बिलात फरीसियन और सदूकियन हां बपतिस्मा लेबे आत तको, तो उन से कई, हे सांप की लड़ेर, तुम हां कीने चिता दओ, कि आबेवारे कोप से भगो? ई लाने अपने मन फिराबे के जैसे फल लाओ। और अपने मन में जौ न सोचियो, कि हमाओ बाप इब्राहीम आय; कायसे मैं तुम से कहत आंव, कि परमेसुर, इन पथरन से इब्राहीम के लाने लड़ेर पैदा कर सकत आय। कुलरिया अबै पेड़न की जड़ पे धरी आय, और जौन जौन पेड़ साजो फल नईं लात, उन हां काटो और आगी में डारो जै है। मैं तुम हां पानू से मन फिराबे कौ बपतिस्मा देत आंव, पर जो मोरे बाद आबेवारो आय, बो मोय से बली आय; मैं ऊकी पनईयां उठाबे के लाक नईंयां, बो तुम हां पवित्र आत्मा और आगी से बपतिस्मा दै है। ऊको सूपा ऊके हाथन में आय, बो अपनो खलिहान हां पूरो साफ्र कर है, और अपने नांज हां बन्डा में धर है, और भुसा हां ऊ आगी में बार दै है जौन बुझत नईंयां। यीशु गलील से यरदन नदिया के तीरे यूहन्ना के ऐंगर बपतिस्मा लैबे आए। यूहन्ना जौ कै के ऊहां रोकन लगो, कि मोय तोसे बपतिस्मा लैबे की जरूरत आय, और तें मोरे ऐंगर आओ आय? यीशु ने ऊसे कई, अब तो ऐसई होन दे, कायसे हमाए लाने जौई साजो आय कि ई तरहां ऐसई सबरी धार्मिकता हां पूरो करबें, तब ऊने ऊकी बात मान लई। बपतिस्मा लेबे के बाद यीशु तुरतईं पानू के बायरें आए, और हेरो, ऊके लाने आकास खुल गओ; और ऊने परमेसुर के आत्मा हां परेवा की भांत उतरत और अपने ऊपरै आत तको। और हेरो, जा आकासवानी भई, कि जौ मोरो प्यारो पूत आय, जीसे मैं बिलात खुस हों। तबई आत्मा यीशु हां हार में लै गओ कि शैतान छलिया ऊकी परख करे। बो चालीस दिना, और चालीस रात, उपासो रहो, और ऊहां भूख लगी। और परखबेवारे ने ऐंगर आके ऊसे कई, अगर तें परमेसुर कौ पूत आय, तो हुकम दे, कि जे पत्थरा रोटियां बन जाबें। ऊने उत्तर दओ; जौ भी लिखो है कि मान्स केवल रोटी से नईं, पर हर एक बोल से जो परमेसुर के मों से कड़त आय जीयत रै है। तब शैतान ऊहां पवित्र नगरी में ले गओ और मन्दर के कंगूरे पे ठांड़ो करो। और ऊसे कई अगर तें परमेसुर कौ पूत आय, तो अपने हां खालें गिरा दे; कायसे लिखो है, कि बो तोरे बारे में स्वर्गदूतन हां हुकुम दै है; और बे तोहां हाथन पे उठा लै हैं; कहूं ऐसो न होबै कि तोरे गोड़न में पत्थरा से ठेस लगे। यीशु ने ऊसे कई; जौ भी लिखो है, कि तें अपने प्रभु परमेसुर हां न परख। फिन शैतान ऊहां एक बिलात ऊंचे पहरवा पै लै गओ, और जगत कौ पूरो राज्य और सिहांसन तका के। ऊसे कई, अगर तें गिरके मोय परनाम करे, तो मैं जौ सब कछु तोय दै दे हों। तब यीशु ने ऊसे कई; हे शैतान छलिया दूर हट जा, कायसे लिखो आय, कि तें प्रभु अपने परमेसुर हां परनाम कर, और केवल उनईं की भक्ति कर। तब शैतान उनहां छोड़ के चलो गओ; और हेरो, सरगदूत आके ऊकी खुसामत करन लगे। जब ऊने सुनो कि यूहन्ना पकड़वा दओ गओ है, तो बो गलील हां चलो गओ। और बो नासरत हां छोड़ के कफरनहूम में आओ जो बड़े ताल के तीरे जबूलून और नपताली परगना में आय उते जाके रहन लगो। जीसे कि बा बात जो यशायाह आगमवकता ने कई हती, पूरी होबै। कि जबूलून और नपताली के देश, बड़े तला की गैल से यरदन के पार अन्‍यजातन कौ गलील। जौन मान्स अन्धयारे में बैठे हते उन ने बड़ो उजेरो तको; और जो मृत्यु के देश और छांव में बैठे हते, उन पे एक उजयारो चमको। ऊ बेरा से यीशु ने प्रचार करबो और कहबो शुरू करो, कि मन फिराओ कायसे सरग कौ राज्य ऐंगर आ गओ है। ऊ ने गलील की झील के किनारे निंगत भए ऊने दो भईयन हां शमौन जो पतरस कहाऊ त हतो, और ऊके भईया अन्द्रियास हां झील में जाल डारत तको; कायसे बे ढीमर हते। ऊने उन से कई, मोरे पाछें चले आओ, तो मैं तुमन हां मान्सन कौ पकड़बेवारो बना हों। बे तुरतईं जाल हां छोड़ के ऊके पाछें निंगन लगे। और उते से आंगू बढ़के, ऊने दूसरे दो भईयन हां यानि जब्दी के पूत याकूब और ऊके भईया यूहन्ना हां तको, जो अपने दद्दा जब्दी के संग्गै डोंगी पे जाल हां सुलझा रए हते; और ऊने उन हां टेरो। बे तुरतईं अपनी नाव और बाप हां छोड़के, ऊके पाछें चले आय। यीशु सबरे गलील में निंगत भओ उन के सभाघरन में सन्देस देत और राज्य कौ सन्देसो सुनाउत, और लोगन की हर एक बीमारियन हां और हर तरहां की कमजोरियन हां दूर करत रहो। और ऊकी खबर पूरे सीरिया में फैल गई; और मान्स सब बीमारन हां, जौन तरह तरह की बीमारियन और पिराबे में गसे हते, और जिन में दुष्ट आत्माएं हतीं, मिरगी वारन और लकवा के मारे भयन हां, ऊके ऐंगर ले आए और ऊने उन हां साजो करो। और गलील और दिकापुलिस और यरूशेलम और यहूदिया और यरदन नदिया के पार से भीड़ की भीड़ ऊके पाछें चली आई। बो ई भीड़ हां हेरके, पहरवा पे चढ़ गओ; और जब बैठ गओ, ऊके चेला ऊके ऐंगर आए। और बो अपनो मों खोलके उन हां जौ सन्देसो देन लगो। धन्न आंय बे, जौन मन के दीन आंय, कायसे सरग कौ राज्य उनईं कौ आय। धन्न आंय बे, जौन रंज करत आंय, कायसे उनहां सान्ति मिल है। धन्न आंय बे, जौन नरम हैं, कायसे बे धरती के अधकारी हुईंये। धन्न आंय बे, जौन धर्म के भूखे और प्यासे हैं, कायसे बे अफर जें हैं। धन्न आंय बे, जौन दयावान हैं, कायसे उन पै दया करी जै है। धन्न आंय बे, जिन के हिये साजे हैं, कायसे बे परमेसुर हां तक हैं। धन्न आंय बे, जौन मेल कराबेवारे हैं, कायसे बे परमेसुर के पूत कहा हैं। धन्न आंय बे, जौन धर्म के लाने मारे पीटे जात हैं, कायसे स्वर्ग कौ राज्य उनईं कौ आय। धन्न आव तुमन, जब मान्स मोरे काजें तुमाई हंसी उड़ाबें, और तुम हां सताएं और लबरो बोल बोल के तुमाए बिरोध में सब तरहां की बातें कयें। खुस और मगन हुईयो कायसे स्वर्ग में तुमाए लाने बड़ो फल धरो है, उन ने तो उन आगमवकता हां भी जौन तुम से पेंला हते ऐई तरहां सताओ हतो। तुम धरती के नोंन आव; पर जदि नोंन कौ सुवाद बिगड़ जाबै, तो बो काय से नोंनो करो जै है? बो कोऊ काम कौ नईं रै जै है, केवल ईके कि बायरें फेंको जाए और मान्सन के गोड़े तरें रोंदो जाए। तुम जगत की ज्योत आव; पहरवा पे बसो नगर छुप नईं सकत। और लोग दिया हां बार के टुकनियां के खालें नईं पर दीवट पे धरत आंय, तब ऊसे घर के सबरे जनन हां उजयारो मिलत है। तुमाओ उजयारो मान्सन के सामूं ई तरहां चमके, कि बे तुमाए भले कामन हां हेर के तुमाए बाप की, जो स्वर्ग में है, गुनगान करें। जौ न समझियो, कि मैं रीतियन हां और आगमवकतन की पोथियन की बातन हां मिटाबे आओ हों। मिटाबे नईं, परन्त पूरो करबे आओ हों; कायसे मैं तुम से सांची कहत हों, कि जब लौ आकास और धरती टर न जाएं, तौ लौ व्यवस्था में से एकऊ चिन्न नईं टल है, जब लौ की सबई कछु पूरो न हो जाबै। ई लाने कोऊ इन हल्की से हल्की कौनऊं एक आज्ञा हां तोड़े, और ऐसई सीख दूसरन हां दे, बो परमेसुर के राज्य में सब से हल्को कहा है; परन्त जौन ऊको मान है और दूसरन हां सोऊ सिखा है, बो परमेसुर के राज्य में बड़ो कहा है। कायसे मैं तुम से कहत आंव, कि जब लौ तुमाओ धरम करम शास्त्रियन और फरीसियन के धरम करम से बढ़के न हुईये, तो तुम सरग के राज्य में कभऊं भीतरे नें जै पाहौ। तुमन ने सुनो है, कि पुरखन से कहो गओ हतो कि हत्या न करियो, और जौन हत्या कर है बो कचहरी में सजा कौ भागी हुईये। परन्त मैं तुमन से कैत हों, कि जौन कोनऊ अपने भईया पे खुन्सयाबे, ऊहां कचहरी में सजा मिल है: और जो कोऊ अपने भईया हां निकम्मो कै है बो पंचायट में दोषी ठहर है; और जो कोऊ कैबे “अरे मूरख” बो नरक की आगी के दण्ड के जोग हुईये। ई लाने अगर तें अपनी भेंट बेदी पे लाए, और उते तोय याद आय, कि मोरे भईया हां मोय से कछु अनबन है, तो अपनी भेंट उतईं बेदी के आंगू छोड़ दे। और जाके पेंला अपने भईया से मेल कर; और तब आके अपनी भेंट हां चढ़ा। जब लौ तें अपने साहूकार के संग्गै गैल में है, तो ऊसे जल्दी मेलजोल कर ले कहूं ऐसो न होए कि साहूकार तोय न्यायी हां सौंप दे, और न्यायी तोय सिपाई हां सौंप दे और तें जेहल में डार दओ जाए। मैं तोसे सांची कैत हों कि जब लौ तें पईसा पईसा चुकता नईं कर है, तब लौ उते से छूट नईं पा है। तुम ने सुनी है कि कहो गओ हतो, कि परतिरिया संगत नईं करियो। परन्त मैं तुम से कैत हों, कि जो मान्स कोनऊ बईयर हां बुरी नजर से हेरे समझो बो अपने मन में ऊसे ब्याभिचार कर चुको। अगर तोरी दांई आंख तोय से पाप करवाए, तो ऊहां काड़ के दूर मेंक दे; कायसे तोरे लाने जौई उमदा आय, कि तोरे अंग में से एक नास हो जाए, जीसे तोरो सबरो सरीर नरक में नईं डारो जाए। और जदि तोरो दायनो हाथ तोसें पाप करवाए, तो ऊहां काट के दूर मेंक दे, कायसे तोरे लाने जौई उमदा आय, कि तोरे अंगन में से एक नास हो जाए, जीसे तोरो सबरो सरीर नरक में न डारो जाए। जौ भी कहो गओ हतो, कि जो कोऊ अपनी घरवारी हां छोड़ दे तो ऊहां छोड़ छुट्टी की लिखत देबे। पर मैं तुम से जौ कहत आंव कि जौन कोनऊं ब्याभिचार के कारन अपनी घरवारी हां छोड़ छुट्टी देत आय, तो बो ऊसे ब्याभिचार करात आय; और जो कोऊ छोड़ छुट्टी वारी से ब्याव करत आय, बो सोऊ ब्याभिचार करत आय। फिन तुम ने सुन लओ आय, कि पुरखन से कई गई हती कि तुम लबरो कौल न खईयो, पर पिरभू के लाने अपने कौल पूरे करियो। पर मैं तुम से जौ कहत आंव, कि कभऊं कौल न खईयो; न तो सरग की, कायसे बो परमेसुर कौ सिंहासन आय। न धरती की, कायसे बो ऊके चरन की चौकी आय; न यरूशेलम की, कायसे बो महान राजा कौ नगर आय। अपने मूंड़ कौ कौल भी न खईयो, कायसे तें अपने एक बाल हां भी करिया या सफेद नईं कर सकत आय। पर तुमाई बात हओ की हओ, या नईं की नईं होबै; कायसे जो क छु तनक से बिलात होत आय बो बुराई से होत आय। तुम ने सुन लओ आय, कि कहो गओ हतो; कि आंख के बदले में आंख, और दांत के बदले दांत। पर मैं तुम से जौ कहत आंव, कि बुरय कौ सामना न करियो; पर जो तोरे दांए गाल पे चांटा मारे, ऊकी कोद दूसरो गाल सोई फेर दे। और जदि कोऊ तोपे नालिस कर के तोरो कुरता लेबो चाहे, तो ऊहां परदनिया सोई लै लेन दे। और कोऊ तोय बेगार में एक कोस लै जाबै तो ऊके संग्गै दो कोस चलो जाबै। जो तोसें मांगे, ऊहां दे; और जो तोसे कर्जा लेबो चाहे, ऊसे मों न मोड़ियो। तुम ने सुन लओ आय, कि कहो गओ हतो; कि तें अपने पड़ोसी से प्रेम रखिये, और अपने बैरियन से बैर। पर मैं तुम से कैत आंव, कि अपने बैरियन से प्रेम रखियो और जो तुम हां परेसान करै उन के लाने बिन्तवाई करियो। जीसे तुम अपने स्वर्गीय बाप की लड़ेर बन सको, कायसे बो अपनो सूरज भले और बुरय दोई के लाने उगात आय, और धर्मियन और अधर्मियन दोई पे पानू बरसात आय। कायसे जदि तुम ऊसे प्रेम करत आव जौन तुम से प्रेम करत आय, तो तुम हां का फल मिल है? का चुंगी लेबेवाले भी ऐसई नईं करत? और जदि तुम अपने भईयन हां परनाम करत आव, तो कोऊ बड़ो काम नईं करत आव? का गैर जात भी ऐसई नईं करत? ई लाने तुम सिद्ध बनो, जैसो कि तुमाओ स्वर्गीय बाप सिद्ध आय। चौकन्ने रओ! तुम अपने धर्म के काम मान्सन हां दिखाबे के लाने न करियो, नईं तो अपने स्वर्गीय बाप से कोऊ भी फल न पाहौ। ई लाने जब तें दान पुन्न करे, तो अपने आंगू बाजे न बजवा, जैसो कपटी सभाओं और गैलों में करत आंय, जीसे लोगबाग उन की बड़वाई करें, मैं तुम से सांची सांची कैत आंव, कि बे अपनो फल पा चुके आंय। पर जब तें दान करे, तो जो तोरो सूदो हाथ कर रओ आय, ऊहां तोरो बांया हाथ न जान पाबे। जीसे तोरो दान गुप्त रए; और तोरो बाप जो गुप्त में हेरत आय, तोय फल दै है। जब तें बिन्तवाई करे, तो कपटियों जैसो न बन कायसे मान्सन हां दिखाबे के लाने सभाघरन और गैलों के मोड़ पे ठांड़े होकें बिन्तवाई करबो उन हां उमदा लगत आय; मैं तुम से सांची कैत आंव, कि बे अपनो फल पा चुके। बरन तें जब बिन्तवाई करे, तो अपनी कुठरिया में जा; और किवाड़ बन्द करके अपने बाप से जो गुप्त में है बिन्तवाई कर; और तब तोरो बाप जो गुप्त में हेरत आय, तोय फल दै है। और जब तें बिन्तवाई करे, अन्यजातिन जैसो बक बक न करिये; कायसे बे सोचत आंय कि उनके बिलात बोलवे से उन की सुनी जै है। ई लाने उन जैसो न बनियो, कायसे तुमाओ बाप तुमाए मांगबे से पेंलई तुमाई जरूरतें जानत आय। ई लाने तुम ई तरहां बिन्तवाई करियो; “हे हमाए बाप, तें जौन सरग में है; तोरो नाम पवित्र मानो जाबे। तोरो राज्य आबे; तोरी मनसा जैसे सरग में पूरी होत आय, वैसई धरती पे भी पूरी होबे। हमाए दिन भर की रोटी आज हम हां दे। और जैसे हम ने अपने अपराधियन हां क्षमा करो आय, वैसई तें हमाए अपराधन हां क्षमा कर। और हम हां परीक्षा में न डारियो, परन्त बुराई से बचाईयो; कायसे राज्य, पराक्रम और मईमा तोरी ही आंय”। आमीन। अगर तुम मान्सन के अपराध हां क्षमा कर हौ, तो तुमाओ स्वर्गीय बाप भी तुम हां क्षमा कर है। और जदि तुम मान्सन के अपराध हां क्षमा न कर हौ, तो तुमाओ बाप भी तुमाए अपराध क्षमा न कर है। जब तुम उपास करौ, तो कपटियन घांई तुमाए मों पे उदासी नईं दिखै, कायसे बे अपनो मों बनाए रहत आंय, जीसे मान्स उन हां उपासो जानें; मैं तुम से सांची कहत आंव, कि बे अपनो फल पा चुके। पर तें जब उपासो रए तो अपने मूंड में तेल लगाईयो और मों धोईये। जीसे तें मान्सन हां उपासो न दिखे, बरन अपने बाप हां जौन गुप्त में आय; और तोरो बाप जौन गुप्त में हेरत आय, तोय फल दै है। अपने लाने धरती पे धन जमा न करियो; जिते कीड़ा और जंग नास करत आंय, और जिते भड़या सेंध मारके भड़याई करत आंय। पर अपने लाने सरग में धन जमा करो, जिते न कीड़ा, और न जंग नास करत आय, और न भड़या सेंध मारके भड़याई करत आंय। कायसे जिते तोरो धन आय उतईं तोरो हिया सोई लगो रै है। सरीर कौ दिया आंख आय: ई लाने जदि तोरी आंख साफ होए, तो तोरो सबरो सरीर उजयारा हुईये। पर जदि तोरी आंख बुरई होबे, तो तोरो सबरो सरीर अन्धयारो जैसे हुईये; ई लाने जौन उजयारो तो में आय जदि अन्धयारो होए तो बौ अन्धयारो कैसो घोर हुईये! कोऊ मान्स दो मालकन की चाकरी नईं कर सकत, कायसे बो एक से बैर और दूसरे से प्रेम रख है, या एक से मिलो रै है और दूसरे हां नैचों जान है; “तुम परमेसुर और धन दोई की भक्ति नईं कर सकत”। ई लाने मैं तुम से कहत आंव, कि अपने प्राण के लाने जा चिन्ता न करियो कि हम का खै हैं? और का पी हैं? और न अपने सरीर के लाने कि का पैर हैं? का प्राण खाबे से, और सरीर उन्ना से बढ़के नईंयां? आकास के चिरईयन हा हेरो! कि बे न तो बोत आंय, और न काटत आंय, और न खत्तों में बटोरत आंय, फिन भी तुमाओ स्वर्गीय बाप उन हां खिलात आय; का तुमाओ मोल उन से बढ़के नईंयां। तुम में से कौन आय, जो चिन्ता कर के अपनी उमर में एक घड़ी भी बढ़ा सकत आय? उन्ना के लाने तुम काए चिन्ता करत आव? हार के फूलन हां हेरो, कि बे कैसे बढ़त आंय, बे न तो मेहनत करत आंय, और न कातत आंय। फिन भी मैं तुम से कैत आंव, कि सुलैमान भी, अपने राजसी ठाट में उन में से कौनऊ के समान उन्ना पैरें भए नईं हतो। ई लाने जब परमेसुर हार की घांस हां, जौन आज आय, और कल भटिया में झोंक दई जै है, ऐसो उन्ना पैरात आय, तो हे कम भरोसा करबेवारो, तो बो तुम हां काय न पैहरा है? ई लाने जौ कै के चिन्ता न करियो, कि हम का खै हैं, या का पी हैं, या का पैर हैं? कायसे अन्य जातियन इन सब बस्तन की खोज में रैत आंय, और तुमाओ स्वर्गीय बाप जानत आय, कि तुम हां जे सब बस्तन चाने। ई लाने पेंला परमेसुर के राज्य और धर्म हां खोजो तो जे सब बस्तें भी तुम हां मिल जै हैं। ई लाने कल की चिन्ता न करियो, कायसे कल कौ दिना अपनी चिन्ता आपऊं कर लै है; आज के लाने आज कौ दुख बिलात आय। लांछन न लगाओ, जीसे तुम पे भी लांछन न लगाओ जाबै। कायसे जी भांत तुम लांछन लगात आव, ओई भांत तुम पे भी लांछन लगाओ जै है; और जी हिसाब से तुम नापत आव, ओई हिसाब से तुमाए लाने सोई नापो जै है। तें काय अपने भईया की आंख के तिनूका हां तकत है, और अपनी आंख कौ लठ्ठा तोए नईं सूजत? यानि तें अपने भईया से कैसे कह सकत आय, कि आ मैं तोरी आंख कौ तिनूका काड़ देओं। हे कपटी, पेंला अपनी आंखन कौ लठ्ठा काड़ ले, तब तें अपने भईया की आंख कौ तिनूका साजो हेर के काड़ सक है। शुद्ध बस्त कूकरन हां न देओ, और अपने मोती सुंगरन के आंगू न डारो; कहूं ऐसो न होबै कि बे उन हां गोड़न तरें रौंदें और पलट के तुम हां फाड़ डारें। मांगौ, तो तुम हां दओ जै है; ढूढ़ौ, तो तुम पा हौ; खटखटा हौ, तो तुमाए लाने खोलो जै है। कायसे जो कौनऊं मांगत आय, ऊहां मिलत आय; और जो खोजत आय, बो पात है? और जो खटखटात आय, ऊके लाने खोलो जै है। तुम में से ऐसो कौन मान्स आय, कि जब ऊकौ पूत रोटी मांगे, तो ऊहां पत्थरा दे? या मछरिया मांगे, तो ऊहां सांप देबे? सो जब तुम बुरय होकें, अपनी लडेर हां साज़ी बस्त देबो जानत आव, तो तुमाओ बाप जौन सरग में रहत आय अपने मांगबे बारन हां साजी बस्त काय न दै है। ई लाने जैसो तुम चाहत आव, कि मान्स तुमाए संग्गै करें, तुम सोई उन के संग्गै वैसई करो; कायसे पुराने नैम और आगमवकतन की जाई शिक्षा आय। सकरे द्वारे से घुसो, कायसे बड़ो आय बो फाटक और चौंड़ी आय बा गैल जो विनास हां लै जात आय; और बिलात आंय जो ऊमें पिड़त आंय। कायसे सकरो आय बो फाटक और सकरी आय बो गैल जो जीवन की कोद लै जात आय, और तनकई आंय जो ऊमें पिड़ पात आंय। लबरे आगमवकतन से चौकन्ने रहियो, जौन गाड़रन के भेष धरके तुमाए ऐंगर आत आंय, पर भीतरै से बे भूखे फाड़खाबे वारे बिगना आंय। उन के फलन से तुम चीन लै हौ का झड़ियन से अंगूर, वा ऊंटकटारे से अंजीर तोड़त आंय? ऐसई हरएक उमदा पेड़ उमदा फल लात है, पर बुरओ पेड़ो, बुरओ फल देत आय। उमदा पेड़ बुरओ फल नईं दे सकत, और न बुरओ पेड़ उमदा फल दे सकत है। हर एक पेड़ जो उमदा फल नईं देत, बो काटो और आगी में बारो जै है। ई लाने तुम उन के फलन से ऊहां चीन लै हौ। जो मोसें, हे पिरभू, हे पिरभू कैत आय, उन में से हर एक सरग के राज्य में नईं पिड़ पा है, पर जो मोरे स्वर्गीय बाप की कई पे निंगत आय ओई पिड़ पा है। ऊ दिना बिलात लोग मोसें कै हैं; हे पिरभू, हे पिरभू, का हम ने तोरे नाओं से आगे की बातें नईं बताईं, और तोरे नाओं से भूत प्रेत हां नईं काड़ो, और तोरे नाओं से बिलात अचरज के काम नईं करे? तब मैं उन से साफ्र कह दै हों कि मैं ने तुम हां कभऊं नईं चीनो, हे बुरय काम करबेवारो, मोरे ऐंगर से दूर रहियो। ई लाने जो कोऊ मोरी इन बातन हां सुनके ऊन हां मानत आय, बो ऊ होसियार मान्स की तरहां हुईये जीने अपनो घर चट्टान पे बनाओ। और पानू बरसो बाढ़ें आईं, आंधी चलीं, और ऊ घर से टकराईं, परन्त बो नईं गिरो, कायसे ऊकी नी चट्टान पे डारी गई हती। पर जो कोई मोरी इन बातन हां सुनत आय और ऊको पालन नईं करत, बो ऊ मूरख की घांई आय जीने अपनो घर रेता पे बनाओ। और पानू बरसो, बाढ़ें आंईं, और आंधी चली, और ऊ घर से टकराईं, और बो गिर पड़ो और पूरो सत्यानास हो गओ। जब यीशु जे बातन कह चुको, तो भीड़ ऊके सन्देसे से चकरया गई। कायसे बो उन के शास्त्रियन के समान नईं परन्त अधकारी के जैसो सन्देसो दे रओ हतो। जब बो ऊ पहड़वा पे से उतरो, तो बिलात भीड़ ऊके पाछें हो लई। और हेरो, एक कोढ़ी ने ऊके ऐंगर आके ऊहां परनाम करो और कहन लगो; कि हे प्रभु अगर तें चाहे, तो मोय शुद्ध कर सकत आय। यीशु ने हाथ बढ़ाके ऊहां छुओ, और कई, मैं चाहत आंव, कि तें शुद्ध हो जा और बो तुरतईं साजो हो गओ। यीशु ने ऊसे कई; कोऊ से न कहिये पर जाके अपने आप हां, याजक हां तका और मूसा के द्वारा ठहराओ गओ चढ़ावा चढ़ा, कि उन पे गवाही होबै। और जब बो कफरनहूम में गओ तो एक दरोगा ऊके ऐंगर आओ और बिनती करी। कि हे पिरभू, मोरो चाकर लकबे कौ मारो घर में पड़ो भओ, बिलात पीड़ा में तड़फ रओ है। ऊने ऊसे कई; मैं आके ऊहां साजो कर हों। दरोगा ने कई; हे पिरभू मैं ई लायक नईंयां, कि तें मोरी छत के तरें आबै, तें अपने मों से कह दे तो मोरो चाकर साजो हो जै है। कायसे मैं भी सरकारी अफसर आंव, और मोरे तरें सिपाही आंय, और जब मैं एक से कहत हों, जा, तो बो जात आय; और दूसरां हां कि आ, तो बो आत आय; और जब अपने चाकर से कहत हों, कि जौ कर, तो बो करत आय। जब यीशु ने जा सुनी तो अचम्भा करो, और अपने पाछें आबेवारन से कई; कि मैं ने इस्राएल में भी ऐसो भरोसा नईं देखो। और मैं तुम से कहत आंव, कि पूरब और पच्‍छिम से बिलात लोग आके इब्राहीम और इसहाक और याकूब के संग्गै सरग के राज्य में बैठ हैं। पर राज्य की लड़ेर हां बायरै अन्धयारे में डाल दओ जै है: उते रोबो और दांत मीसबो हुईये। और यीशु ने दरोगा से कई, जा; जैसो तोरो बिसवास आय, वैसई तोरे लाने होए: और चाकर ओई घड़ी साजो हो गओ। जब यीशु पतरस के घरै आओ तो ऊकी सास ताप में पड़ी हती। ऊने ऊको हाथ छिओ और ऊको ताप उतर गओ; और बा उठके ऊकी सेवा खुसामद करन लगी। और जब संझा भई तो बे बिलात दुष्ट आत्मा से पीड़ित मान्सन हां ऊके ऐंगर लाए, ऊके कहबे से ही दुष्ट आत्माएं कड़ गईं, और ऊने सब हां साजो करो जौन बीमार हते। जीसे जौन बचन यशायाह आगमवकता ने कहो हतो बो पूरो होय, ऊने खुद हमाई कमजोरियन हां हर लओ और हमाए रोगन हां उठा लओ। यीशु ने जब अपने चारऊं कोद भीड़ हां तको तो ऊ पार जाबे कौ हुकुम दओ। और एक शास्त्री ने ऐंगर आके ऊसे कई, हे गुरू, जिते तें जै है, मैं तोरे पाछें पाछें निंग हों। यीशु ने ऊसे कई, लुखरियन की खोह और आकास के पंछियन के बसेरा होत आंय; पर मान्स के पूत के लाने मूड़ धरबे की भी जांगह नईंयां। ऊके चेलन में से एक ने ऊसे कई, हे पिरभू, पेंला मोय जान दे, कि मैं जाके अपने बाप हां गाड़ आओं। यीशु ने ऊसे कई, तें मोरे पाछें चलो आ; और मुरदन हां अपने मुरदा गाड़न दे। जब ऊ नाव पे चढ़ो, तो ऊके चेले ऊके पाछें हो लए। और हेरो, झील में एक ऐसो बड़ो तूफान उठो कि नाव लहरन से डूबन लगी; और यीशु सो रओ हतो। तब बे ऊके ऐंगर आए और ऊसे कई, हे पिरभू, हमें बचा लेओ, हम मरे जात आंय। ऊ ने उन से कई; हे तनक भरोसा करबेवाले, काय डरात आव? तब उठके ऊने तूफान और पानू हां डांटो, और पूरी सान्ति हो गई। और लोग चकित होकें कहन लगे जौ कैसो मान्स आय, कि तूफान और पानू ऊकी बात हां मानत आंय। जब बो ऊ पार गदरेनियों के परगना में पहुंचो, तो दो मान्स जीमें दुष्ट आत्माएं हतीं कबरन से कड़के ऊसे मिलीं, बे इतेक बिलात हतीं, कि कोऊ भी ऊ गैल से नईं कड़ पात हतो। और हेरो, उन ने चिल्या के कई; हे परमेसुर के पूत, हमाओ तोसें का काम? का तें इते हम हां बेरा से पैलईं सताबे हां आओ है? कछु दूर पे, बिलात सुंगरन कौ एक झुण्ड चर रओ हतो। दुष्ट आत्माओं ने ऊसे जौ कह के बिनती करी, कि जदि तें हम हां काड़न चाहत आय, तो सुगरन के झुण्ड में पठै दे। ऊने उन से कई, जाओ, और बे कड़के सुगरन में समा गईं, और हेरो, बो सबरो झुण्ड तुरतईं ढलान पे से पानू में जा गिरो, और डूब के मर गओ। और बरेदी गदबद देत नगर में पहुंचे, और दुष्ट आत्मन से दुखी मान्सन पे जौन कछु बीतो हतो, उन कौ सबरो हाल कै सुनाओ। और हेरो, सबरे नगर के लोग बाग यीशु से मिलबे कड़ आए, और जब उन ने ऊहां तको, जी में से भूत कड़ गए हते, तब यीशु से बिनती करी, कि हमाए परगना से बायरें चलो जा। फिन बो नाव पे बैठ के ऊ पार गओ; और अपने नगर में आओ। और हेरो, कछु लोगबाग लकवा के मारे भए हां खाट पे डाल के ऊके ऐंगर ले आए; यीशु ने उन कौ भरोसा देख के, ऊ लकवा के मारे से कई; हे पूत, हिम्मत बांध; तोरे पाप क्षमा भए। और हेरो, शास्त्रियन में से कछु आपस में कहन लगे, जौ तो परमेसुर कौ ठठ्ठा करत आय। यीशु ने उन के मन कौ विचार जानके कई, तुम अपने अपने मन में बुरय विचार काय कर रए आव? सहज का आय? जौ कहबो, कि तोरे पाप क्षमा भए; या जौ कहबो कि उठ और चल फिर? पर ई लाने की तुम जान लेओ कि मान्स के पूत हां धरती पे पाप क्षमा करबे कौ हक आय (ऊने लकवे के मारे से कई) उठ: और अपनी खटिया उठा, और अपने घरै चलो जा। बो उठके अपने घरै चलो गओ। जब भीड़ ने जौ देखो, तो उन में डर समा गओ और लोग परमेसुर की बड़वाई करन लगे, जीने मान्स हां ऐसो हक दओ आय। यीशु उते से आंगू बढ़े तो ऊने मत्ती नाओं के एक मान्स हां चुंगी नाके पे बैठो तको, और ऊने ऊसे कई, मोरे पाछें हो ले। बो उठो और ऊके पाछें चल दओ। और जब बो घर में खाबे हां बैठो तो बिलात चुंगी लेबेवाले और पापी आके यीशु और ऊके चेलन के संग्गै खाबे हां बैठ गए। जब फरीसियन ने जौ तको तो ऊके चेलन से कई; तुमाओ गुरू चुंगी लेबेवारन और पापियन के संग्गै काय खात है? ऊने जा सुनके उन से कई, भले मान्सन हां वैद्य की जरूरत नईंयां पर बीमारन हां होत आय। तुम जाओ और ईको मतलब सीख लेओ, मैं बलि नईं बल्कि दया चाहत आंव; कायसे मैं धर्मियन हां नईं पर पापियन हां बचाबे हां आओ हों। तब यूहन्ना के चेले ऊके ऐंगर आके कैन लगे; का कारन आय कि हम और फरीसी तो उपासे रहत आंय, पर तोरे चेले उपास नईं धरत? यीशु ने उन से कई; जब लौ दूल्हा बरातियन के संग्गै आय, तो का बे दुख मना सकत आंय? पर बे दिन भी आ हैं, जब दूल्हा उन से न्यारो करो जै है, ऊ बेरा बे उपास कर हैं। पुराने उन्ना पे कोरे उन्ना कौ थिगड़ा कोऊ नईं लगात, कायसे थिगड़ा ऊ उन्ना हां खेंच लेत आय, और बो पेंलई से भी बिलात फट जात आय। पुरानी मशकन में नओ दाखन कौ रस नईं भरत: कायसे ऐसो करबे से मशकें फट जै हैं, और दाखन कौ रस बह जात आय, और मशकें नास हो जात आंय, पर नओ दाखन कौ रस नई मशकन में भरत आंय और दोनऊ साजे बचे रहत आंय। जब बो उन से जे बातें कैई रओ हतो, तो हेरो, प्रार्थनाघर कौ एक हाकिम आओ और ऊहां परनाम कर के कहन लगो, मोरी बिटिया अबई मरी आय; चल के अपनो हाथ ऊपे धर दे, तो बा जिन्दा हो जै है। यीशु उठो और अपने चेलन के संग्गै ऊके पाछें चल दओ। और हेरो, एक बईयर ने जौन बारह बरसन से खून बहवे की बीमारी से दुखी हती, ऊके पाछें से आके ऊको चोगा कौ सिरा छू लओ। कायसे बा अपने मन में कैत हती जदि मैं ऊके उन्ना हां छी लै हों, तो साजी हो जै हों। यीशु ने मुड़के पाछें ऊहां हेरो, और कई; बिटिया हिम्मत धर; तोरे भरोसे ने तोय साजो कर दओ आय; बा बईयर ओई घड़ी साजी हो गई। जब यीशु ऊ हाकिम के घरै पहुंचो और ऊने बांसुरी बजाबेवारनऔर भीड़ हां हल्ला करत हेरो। तो ऊने उन से कई, हट जाओ, मोंड़ी मरी नईंयां, परन्त सोऊत है; ई पे बे ऊकी हंसी करन लगे। पर जब भीड़ बायरें काड़ दई, तो यीशु भीतरै गओ और ऊने हाथ पकड़ के मोंड़ी हां उठाओ, और बा जी उठी। जा खबर ऊ सारे परगना में फैल गई। जब यीशु उते से आंगू बढ़ो, तो दो अन्धरे ऊके पाछें जे चिल्लाउत चले, कि हे दाऊद की सन्तान, हम पे दया करौ। जब बो घर पहुंचो, तब बे अन्धरे ऊके ऐंगर आए; और यीशु ने उन से कई; का तुम भरोसा करत आव, कि मैं जौ कर सकत हों? उन ने ऊसे कई; हओ, पिरभू। तब ऊने जा कहत भए उन की आंखन हां छुओ, तुमाए भरोसे के अन्सार तुमाए लाने होबै। और उन की आंखें खुल गईं और यीशु ने उन हां कड़ी चितावनी दैके उन से कई; हेरो जौ कोऊहां न बतईयो। पर उन ने जाके सारे परगना में ऊकी चरचा करी। जब बे बायरें जा रए हते, तो लोग एक गूंगे हां जौन दुष्ट आत्मा से पीड़ित हतो यीशु के ऐंगर ले आए। और जब दुष्ट आत्मा काड़ दई गई, तो गूंगा बोलन लगो; ई पे भीड़ चकित होकें कैन लगी इस्राएल में ऐसो कभऊं नईं भओ। पर फरीसी कहन लगे, बो तो दुष्ट आत्मन के मुखिया की मदद से दुष्ट आत्माओं हां काड़त आय। यीशु सब नगरन और गांवन में जाके उन के प्रार्थनाघरन में प्रवचन देत, और राज्य के सन्देस कौ प्रचार करत भओ, और सब भांत की बीमरियन और हर तरह की कमजोरिन हां दूर करत रओ। और भीड़ हां देख के ऊहां मान्सन पे तरस आओ, कायसे बे उन गाड़रन जैसे पीड़ित और उदास हतीं, जिन कौ कोऊ रखनवारो न होए। ऊने अपने चेलन से कई, पकी फसल तो बिलात आय पर मजूर थोड़े आंय। ई लाने फसल के मालक से बिनती करियो कि बो फसल काटबे के लाने मजूर पठैय दे। तब यीशु ने अपने बारह चेलन हां टेर के, उन हां असुद्ध आत्मन पे हक दओ, कि उन हां काड़ें और सब तरहां की बीमारियन और सब तरहां की कमजोरियन हां हटा दें। बारह प्रेरितन के नाम जे आंय: पेंला शिमौन, जौन पतरस कहाऊ त आय, और ऊको भईया अन्द्रियास; जब्दी कौ पूत याकूब, और ऊको भईया यूहन्ना; फिलिपुस और बर-तुल्मै, थोमा और चुंगी लेबेवारो मत्ती, हल्फै कौ पूत याकूब और तद्दै। शिमौन कनानी, और यूहदा इस्करियोती, जीने ऊहां पकड़वा सोऊ दओ। इन बारह हां यीशु ने जौ हुकुम दैके पठैव कि अन्यजातियन के ऐंगर न जईयो, और न सामरियन के नगर में पिड़ियो। पर इस्राएल के घराने की हिराई भई गाड़रन के ऐंगर जईयो। और गैल चलत चलत तुम प्रचार करत कहियो कि सरग कौ राज्य ऐंगर आ गओ आय। बीमारन हां साजो करियो: मरे भयन हां जिलाईयो: कोढ़ियन हां शुद्ध करियो: दुष्ट आत्मन हां काड़ियो: तुम ने सेंतमेंत पाओ आय, सेंतमेंत दईयो। अपने बटुआ में न सोनो, न चांदी, और न तांबा धरियो। गैल के लाने न झोला धरोे, और न दो कुरता, न पनईंयां और न लठिया लईयो, कायसे मजूर हां ऊकौ भोजन मिलबो चईये। जो कोऊ नगर या गांव में तुम पिड़ो, तो पूंछतांछ करियो कि उते कोऊ भलो जनो है? और विदा होबे लौ, ओई के इते रहियो। जब तुम ऊ घर में पिड़ो, तो सान्ति की आसीष दईयो। जदि ऊ घर में लायक हुईयें तो तुमाई सान्ति उते बनी रै है, पर लायक न हुईयें तो सान्ति कौ तुमाओ सन्देस तुमाए ऐंगर लौट आ है। जो कोऊ तुम हां न माने, और न तुमाई बातन सुने, तो तुम ऊ घर या नगर से कड़त भए अपने गोड़न की धूरा झार डारियो। मैं तुम से सांची कहत आंव, कि न्याव के दिना ऊ नगर की दसा सदोम और अमोरा देश की दसा से बिलात सहबे लाक हुईये। हेरो, मैं तुम हां भेड़न जैसो बिगना के मजारें पठैत आंव, ई लाने सांपन की भांत चतुर और परेवा जैसो भोलो बनियो। मगर मान्सन से होसियार रहियो, कायसे बे तुम हां कचहरियन में सौंप हैं, और अपनी कचहरियन में कोड़े लगवा हैं। तुम मोरे लाने हाकमन और राजन के आंगू पेस करे जै हौ, कि उन पे और अन्यजातियन पे गवाही होबे। जब बे तुम हां पकरवाएं तो चिन्ता न करियो, कि हम की विधी से; या का कै हैं: कायसे जो कछु तुम हां कहने हुईये, बो ओई बेरा तुम हां बता दओ जै है। कायसे बोलबेवारे तुम नईं आव पर तुमाए बाप कौ आत्मा तुम में बोलत आय। भईया, भईया को और बाप अपने बच्चन हां, मार डालबे के लाने पकरवा दै हैं, और लरकावारे मताई-बाप के बिरोध में ठांड़े होकें उन हां मरवा डार हैं। मोरे नाओं के काजें सब तुम से बैर कर हैं, पर जौन अन्त लौ गम खै है ओई की मुक्ति हुईये। जब बे एक नगर में तुम हां सताएं, तो दूसरी जांगह भग जईयो। कायसे मैं तुम से सांची कैत हों, तुम इस्राएल के सब नगरन में न फिर पा हौ, मान्स कौ पूत आ जै है। न चेला अपने गुरू से, और न चाकर अपने मालक से बढ़के होत आय। चेले हां अपने गुरू के, और चाकर हां अपने मालक के बरोबर होबो कठन है; जब उन ने घर के मालक हां शैतान कई तो का ऊके घरवाले कछु न कै हैं? ई लाने उन से न डरियो, कायसे कछु ढको नईंयां, जौन उगारो न जै है; और न कछु लुको आय, जौन जानो न जै है। जौन मैं तुम से अन्धयारे में कहत आंव, ऊहां तुम उजयारे में कहियो; और जौन तुम कानों कान सुनत आव, ऊहां छत पे चढ़के बतईयो। उन से न डरियो, जौन शरीर हां मार डारत आंय, बे आत्मा हां घात नईं कर सकत आंय, बल्कि उन से डरियो, जो आत्मा और सरीर दोई हां नरक में नास कर सकत आय। का एक पईसा में दो गौरईंयां नईं बिकत? तौभी तुमाए बाप की मनसा के बिना उन में से एक भी धरती पे नईं गिर सकत आय। तुमाए मूंड़ के बाल लौ गिने भए आंय। ई लाने न डरिया; तुम बिलात गौरईंयन से बढ़ के आव। ई लाने जौन मान्सन के आंगू मोहां मान लै हैं, मैं भी ऊहां अपने बाप के आंगू जौन सरग में आय, मान लै हों। पर जौन मान्सन के आंगू मोय नईं मान है, मैं भी ऊहां अपने बाप के आंगू जौन सरग में आय नईं मान हों। जौ न समझो, कि मैं धरती पे मेल कराबे आओ हों; मैं मेल कराबे नईं, बल्कि तलवार चलवाबे हां आओ हों। मैं तो ई लाने आओ कि मान्स हां, ऊके बाप, बिटिया हां ऊकी मताई से, और बहू हां ऊकी सास के खिलाफ कर देओं। और मान्स के बैरी ऊके घरई के लोग हुईयें। जौन मोय से बढ़के अपने मताई या बाप से प्रेम करत आय, बो मोरे लायक नईंयां जौन मोय से बढ़के अपने बिटवा और बिटियन से प्रेम करत आय, बो मोरे जोग नईंयां। और जौन अपनो क्रूस उठाके मोरे पाछें नईं निंगत, बो मोरे लायक नईंयां। जौन अपनो प्राण बचात आय, बो ऊहां खो है; और जौन कोऊ मोरे काजें अपनो प्राण खोत आय, बो ऊहां पा है। जौन तुम हां अपनात आय, बो मोय अपनात आय; और जौन मोय अपनात आय, बो मोरे पठैबेवारे हां अपनात आय। जौन आगमवकता हां, आगमवकता जानके अपनात है, बो आगमवकता कौ फल पा है; और जौन धर्मी हां धर्मी जानके अपना है, बो धर्मी कौ फल पा है। जौन कोऊ इन हल्कन में से एक हां चेला जानके ठंड़ो पानू पीबे हां दै है, मैं तुम से सांची कैत आंव, कि बो अपनो जस कभऊं नईं खो है। जब यीशु अपने बारह चेलन हां हुकुम दै चुको, तो उते से बो उन के नगरन में सीख देबे और प्रचार करबे चलो गओ। जब जेलखाने में यूहन्ना ने मसीह के कामन की चरचा सुनी, तो अपने चेलन हां, ऊके ऐंगर जौ पूछबे हां पठैव। का आबेवारो तेंई आय: या हम कोऊ और की बाट हेरें? यीशु ने उन से कई, कि जो कछु तुम सुनत और हेरत आव, जाके ऊकी खबर यूहन्ना हां देओ। कि अंधरे हेरत आंय और लंगड़े निगत आंय; कोढ़ी शुद्ध करे जात आंय और बहिरे सुनत आंय, मुरदा जिलाए जात आंय; और कंगालन हां भलो सन्देसो सुनाओ जात आय। और धन्य आय बो, जौन मोरे काजें ठोकर न खाबै। उन के जातई बेरा यीशु भीड़ के लोगन से यूहन्ना के बारे में कहन लगो; तुम हार में का हेरबे गए हते? का हवा से हिलत भए सरकन्डन हां? फिन तुम का हेरबे गए हते? का रूआं के उन्ना पैरे भए मान्स हां? हेरो, रूआं के उन्ना पैरबेवाले राज-महलन में रहत आंय। फिन तुम का देखबे गए हते? का कोनऊ आगमवकता हां हेरबे हों? हओ; मैं तुम से कैत हों, आगमवकता से भी बड़े जन हां। जौ ओई आय, जीके बारे में लिखो आय, कि हेरो; मैं अपने दूत हां तोरे आंगू पठैत आंव, जौन तोरी गैल तोरे आंगू तईयार कर है। मैं तुम से सांची कहत आंव, कि नारियन में से जन्म लेबेवारन में, यूहन्ना बपतिस्मा देबेवारे से बड़ो कोऊ भी नईं भओ; फिन भी जौन सरग के राज्य मैं हल्के से हल्को आय बो ऊसे बड़ो आय। यूहन्ना बपतिस्मा देबेवारे के दिना से अबै लौ सरग के राज्य पे जोर अजमाइस होत रई आय, और बलवान मान्स ऊपे कब्जा कर लेत आंय। कायसे सब आगमवकता और नैम आगमवानी करत रए। और तुम चाहौ तो मानो, एलिय्याह जौन आबेवारो हतो, बो जौई आय। जीके सुनबे के कान होबें, बो सुन ले। मैं ई पीढ़ी की बरोबरी कीसे करों? जे मान्स बाजारन मैं बैठबेवारे लड़ेरन घांई आंय, जौन दूसरी लड़ेरन हां टेर के कहत आंय। हम ने तुमाए लाने बांसुरी बजाई, और तुम नईं नाचे; हम ने दुख मनाओ, और तुम ने छाती नईं पीटी। कायसे यूहन्ना न खात आओ और न पीयत आओ, और बे कहत आंय कि ऊमें भूत हतो। मान्स कौ पूत खात पीयत आओ, और बे कहत आंय कि हेरो, पेटू और पियक्कड़ मान्स, चुंगी लेबेवारन और पापियन कौ संगी, पर बुद्धि अपने कामन से सांची ठहराई गई आय। तब बो उन नगरन हां, जिन में बिलात चमत्कार के काम करे गए हते उलानो देन लगो; कायसे उन ने मन न फिराओ। हाय खुराजीन; हाय, बैतसैदा; कायसे जौन चमत्कार के काम तुम में करे गए, अगर बे सूर और सैदा में करे जाते, तो टाट ओढ़ के, और राख में बैठ के, बे कब के मन फेर लेते। फिन भी मैं तुम से कहत आंव; कि न्याव के दिना तुमाई दसा से सूर और सैदा की दसा बिलात सहबे लायक हुईये। और हे कफरनहूम, का तें सरग लौ ऊं चो करो जै है? तें पाताल लौ जै है; कायसे जौन चमत्कार के काम तोमें करे गए आंय, अगर बे सदोम में करे जाते, तो बो आज लौ बनो रैतो। फिन मैं तोसे कैत हों, कि न्याव के दिना तोरी दसा से सदोम देश की दसा सहबे लायक हुईये। ओई बेरा यीशु ने कई, हे बाप, सरग और धरती के पिरभू; मैं तोरो धन्न मानत हों, कि तेंने इन बातन हां पंडितन और शास्त्रियन से लुका के धरीं, और हलकन पे दरसाई आंय। हओ, हे बाप, कायसे तोहां जौई अच्छो लगो। मोरे बाप ने मोय सब कछु सौंपो आय, और अकेले पूत हां कोऊ नईं चीनत, अकेले बाप; और कोऊ बाप हां नईं चीनत, अकेले पूत; यानि ओई जीए पूत ऊहां दरसाओ चाहत आय। हे सब थके हारे और बोझा से दबे लोगो, मोरे ऐंगर आओ; मैं तुम हां मुक्ति दै हों। मोरो जुआ अपने ऊपरै उठा लेओ; और मोय से सीखो; कायसे मैं मन में दीन आंव: और तुम अपने मन में मुक्ति पा हौ। कायसे मोरो जुआ मुसकल नईंयां और मोरो बोझा हरओ आय। यीशु सब्त के दिना खेतन में से होकें जा रओ हतो, और ऊके चेलन हां भूख लगी, और बे बालें तोड़ तोड़ के खान लगे। फरीसियन ने जौ हेरो तो ऊसे कई, तक, तोरे चेला बो काम कर रए आंय, जो सब्त के दिना करबो सही नईंयां। ऊने उन से कई; का तुम ने नईं पढ़ो, कि जब दाऊद और ऊके संगियन हां भूख लगी, तो ऊने का करो? ऊने तो परमेसुर के मन्दर में पिड़के, भेंट की रोटियां खाईं, जिन हां खाबो न तो ऊके लाने और न ऊके संगियन के लाने, पर केवल याजकन के लाने सही हतो। का तुम ने नैम की पोथी में नईं पढ़ो, कि याजक सब्त के दिना मन्दर में सब्त के नैम हां नईं मानत, फिन भी बरी माने जात आंय? पर मैं तुम से कैत आंव, कि इते बो आय, जौन मन्दर से भी बढ़के आय। अगर तुम ई को मतलब समझते कि मैं दया चाहत आंव, बलि नईं, तो बरी हां लांछन नईं लगाते। मान्स कौ पूत सब्त के दिना कौ भी पिरभू आय। उते से निकर के बो उन के प्रार्थना घरन में गओ। और हेरो, उते सूखे हाथ वारो एक मान्स हतो; और उन ने यीशु पे लांछन लगाबे के लाने ऊसे पूछो, कि का सब्त के दिना साजो करबो सही आय? ऊने उन से कई; तुम में ऐसो कौन आय, जीकी एक गाड़र होबै, और बो सब्त के दिना गड्ढा में गिर जाबे, तो बो ऊए पकड़ के बायरें न काड़े? तो एक मान्स कौ मोल गाड़र से कितेक बढ़के आय; ई लाने सब्त के दिना भला करबो सजो आय: तब ऊने ऊ मान्स से कई, अपनो हाथ बढ़ा। ऊने बढ़ाओ, और बो फिन दूसरे हाथ की भांत साजो हो गओ। तब फरीसी बायरै कड़े और ऊके खिलाफ सलाह करी, कि ऊहां कैसऊ मार डारें। जौ जानके यीशु उते से कड़ गओ; और बिलात लोग ऊके पाछें हो लए; और ऊने उन सब हां साजो करो। और उन हां चिताओ, कि मोरे बारे में कछु न कहियो। जीसे यशायाह आगमवकता ने जौन कहो हतो, बो पूरो होबै। कि हेरो, जौ मोरो भक्त आय, जीहां मैं ने नबेरो आय; मोरो प्यारो, जीसे मोरो हिया खुस आय: मैं ऊपे अपनो आत्मा डार हों; और बो अन्य जातियन हां सही न्याव की खबर दै है। बो न तो झगड़ा कर है, और न धूम मचा है; और न कोऊ ऊको बतकाओ गलियन में सुन है। बो कुचले भए सरकन्डे हां न तोड़ है; और टिमटिमात भए उजयारे हां न बुझा है, जब लौ बो न्याव हां न जीत ले। और ओई के नाओं में अन्य जातियन आस धर हैं। तब यीशु के ऐंगर एक भूत लगो मान्स हां लाओ गओ, जौन अंधरा और बौरा हतो; और ऊने ऊहां साजो करो; और बो बौरा मान्स बोलन और हेरन लगो। ई पे सबरे लोग अचरज करके कैन लगे, का जौ मान्स दाऊद के गोत्र कौ हो सकत आय? पर जब फरीसियन ने जौ सुनो तो कई, जौ तो दुष्तआत्मन हां ऊके मुखिया शैतान की मदद से काड़त आय। उन के मन की बात जानके ऊने कई; जी राज्य में फूट पड़ जात आय, बो नास हो जात आय, और जी नगर या गांव और घर में फूट हो जै है, बो टिक नईं सकत। और अगर शैतान ही शैतान हां काड़ है, तो बो अपनो बिरोधी कहा है; फिन ऊको राज्य कैसो टिक पा है? अगर मैं शैतान के सहारे भूतन हां काड़त आंव, तो तुमाए पूत कौन की मदद से काड़त आंय? ई लाने बेई तुमाओ न्याव कर हैं। पर जदि मैं परमेसुर के आत्मा के द्वारा दुष्टआत्मन हां काड़त आंव, तो परमेसुर कौ राज्य तुमाए ऐंगर आ पोंचो आय। का कोऊ बलवान मान्स के घर में पिड़के ऊको माल लूट लै है, जब लौ पेंला बे ऊ बलवान हां बांध न लेबें? और तब बो ऊको घर लूट सकत आय। जौन मोरे संग्गै नईंयां, बो मोरे बिरोध में आय; और जौन मोरे संग्गै नईं बटोरत, बो बिखेरत आय। ई लाने मैं तुम से कहत आंव, कि मान्स कौ हर पाप और निन्दा क्षमा करी जै है, पर पवित्र आत्मा की निन्दा क्षमा नईं करी जै है। और जो कोऊ मान्स के पूत के बिरोध में कोऊ बात कै है, ऊको जौ पाप क्षमा करो जै है, पर जौन कोनऊ पवित्र आत्मा के बिरोध में कछु कै है, ऊको पाप न तो ई जुग में और न आबेवारे जुग में क्षमा करो जै है। जदि पेड़ हां उमदा कहो, तो ऊके फल हां सोऊ उमदा कहो; या पेड़ हां बुरओ कहो, तो ऊके फल हां सोऊ बुरओ कहो; कायसे पेड़ अपने फल से ही चीनो जात आय। हे सांप के बच्चो, तुम दुष्ट होत भए भी भली बातें कैसे कह सकत आव? कायसे, जौन मन में भरो आय, ओई मों पे आत है। भलो मान्स अपने हिये के भले भण्डार से नोंनी बातें काड़त आय; और बुरओ मान्स अपने भण्डार से बुरई बातें काड़त आय। मैं तुम से कहत आंव, कि जौन भी बुरई बात मान्स कै हैं, न्याव के दिना बो ऊकौ हिसाब दै हैं। कायसे तें अपनी बातन से बरी और अपनी बातन से पापी ठहराओ जै है। तब कछु शास्त्री और फरीसियन ने ऊसे कई, हे गुरू, हम तोसे एक चिन्ह देखबो चाहत आंय। ऊने उन हां उत्तर दओ, की ई जुग के दुष्ट और व्यभिचारी मान्स चिन्ह हेरबे की मनसा धरत आंय; पर यूनुस आगमवकता के चिन्ह हां छोड़ और कोऊ चिन्ह उन हां न दओ जै है। कायसे यूनुस तीन दिना और तीन रात बड़ी मछरिया के पेट में रहो, ओई तरहां मान्स कौ पूत भी तीन दिना और तीन रात धरती के भीतर रै है। न्याव के दिना, नीनवे के लोग ई पीढ़ी के लोगन के संग्गै उठके उन हां पापी कै हैं, कायसे उन ने यूनुस कौ प्रचार सुनके, मन फिराओ और तको, इते बो आय जौन यूनुस से भी बढ़के आय। न्याव के दिना, दक्खिन की रानी, ई पीढ़ी के लोगन के संग्गै ठांड़ी हुईये और इन हां पापी ठहरा है, कायसे बो सुलैमान कौ ज्ञान सुनबे हां धरती के छोर से आई, और तको, इते बो आय, जौन सुलैमान से भी बढ़के आय। जब अशुद्ध आत्मा मान्स में से कड़ जात आय, तो सुस्ताबे की खोज में सूनी जांगह ढूंढ़त फिरत आय, और पाती नईंयां। तब बो कहत आय, जौन घर से मैं आई हती, अपने ओई घर हां लौट जै हों, और जब बो लौट के आत आय तो ऊहां सूनो, झाड़ो-बुहारो और सजो-संवरो पात आय। तब बो जाके अपने से बिलात बुरई सात आत्मन हां अपने संग्गै ले आत आय, और ब ऊ में पिड़के उते रहन लगत आंय, और ऊ मान्स की दसा पेंलई से बुरई हो जात आय; ई बुरई पीढ़ी के लोगन के संग्गै भी ऐसई हुईये। जब बो मान्सन से बातें कर रओ हतो, तो तको, ऊकी मताई और भईया बायरें ठांड़े हते, और ऊसे बातें करबो चाहत हते। और कोऊ ने यीशु से कई; हेर तोरी मताई और तोरे भईया बायरें ठांड़े आंय, और तोसे बातें करबो चाहत आंय। जौ सुन के कहबेवारे हां उत्तर दओ; को आय मोरी मताई? और को आय मोरो भईया? और अपने चेलन की कोद हाथ बढ़ाके ऊने कई; हेरो; मोरी मताई और मोरे भईया जे आंय। कायसे जौन कोऊ मोरे बाप हां जौन सरग में आय उनकी मनसा पूरी करत आय, ओई मोरो भईया और मोरी बहन और मोरी मताई आय। ओई दिना यीशु घर से बायरें कड़के झील किनारे जा बैठो। और ऊके ऐंगर ऐसी भीड़ जमा भई कि बो नाव पे चढ़के बैठ गओ, और सबरी भीड़ किनारे ठांड़ी रई। ऊने जा कहत भए उन से कनौत में बिलात बातें कईं, कि हेरो, एक बीज बोवेवारो बीज बोवे कड़ो। बोत बेरा कछु बीज गैल किनारे गिरे और चिरईयन ने ऊहां आके चुग लओ। कछु पथरावारी धरती पे गिरे, ऊहां बिलात माटी नईं मिली और जड़ें गहरी माटी न होबे से जल्दी ऊ ग आईं। परन्त सूरज कड़वे पे बे घाम से झुलस गए, और जड़ न पकड़बे से सूख गए। और कछु बीज जरियन में गिरो, और जरियन ने बढ़के उन हां दबा लओ। पर कछु बीज उमदा धरती में गिरे, और फल लाए, कोऊ सौ गुनो, कोऊ साठ गुनो, और कोऊ तीस गुनो। जीके कान होबें बो सुन ले। और चेलन ने ऐंगर आके ऊसे कई, तें उन से कनौत में बातें काय करत आय? ऊने उन हां उत्तर दओ, तुम हां सरग के राज्य के भेदन की समझ दई गई आय, पर उन हां नईं। कायसे जीके ऐंगर आय, ऊहां और दओ जै है; और ऊके ऐंगर बिलात हो जै है; पर जीके ऐंगर नईंयां, ऊसे बो भी जौन ऊके ऐंगर आय, बो भी लै लओ जै है। मैं उन से कनौत में बातें ई लाने करत आंव, कि बे हेरत भए भी नईं हेर पात; और सुनत भए भी नईं सुन पात; और नईं समझत। और उन के बारे में यशायाह की जा आगमवानी पूरी होत आय, कि तुम कानों से सुनत तो रै हौ, पर न समझ पे हौ; और हेरत तो रै हौ, पर तुम हां न सूझ है। कायसे इन लोगन कौ मन कठोर हो गओ आय, और बे अपने कानों से ऊं चो सुनत आंय और उन ने अपनी आंखन हां मूंद लओ आय; कहूं ऐसो न होए कि बे अपनी आंखन से हेरें, और कान से सुनबें और मन से समझें, और फिर जाबें, और मैं उन हां साजो कर हों। मगर धन्य आंय तुमाई आंखें, कि बे हेरतीं आंय; और तुमाए कान, कि बे सुनत आंय। कायसे मैं तुम से सांची कहत आंव, कि बिलात आगमवकतन और धर्मियन ने चाहो कि जौन बातें तुम हेरत आव, ऊहां हेरें, पर न हेरीं; और जौन बातें तुम सुनत आव, सुनो, पर न सुनीं। अब बोवेवारे की कनौत सुनो। जो कोऊ राज्य कौ बचन सुन के ऊहां नईं समझत, जो कछु ऊके मन में बोओ गओ हतो, ऊहां बो दुष्ट छुड़ा लै जात आय; जौ ओई आय, जो गैल किनारे बोओ गओ हतो। और जो पथरीली धरती पे बोओ गओ हतो, जे बो आंय, जौन बोलन हां सुनत आंय और तुरतईं खुसी के साथ मान लेत आंय। फिन भी अपने मन में गहरी जड़ नईं धरत और तनक बेरा कौ आय, और जब बचन के लाने दुख सताव होत आय, तो तुरतईं ठोकर खात आय। और जौन बीजा जरियन में बोओ गओ हतो, बो जौ आय, जौन बचन हां सुनत आय, पर संसार की सोच और धन कौ धोखा बचन हां दबात आय, और बो फल नईं लात। जौन उमदा धरती मैं बोओ गओ, बो जौ आय, जौन बचन हां सुनके समझत आय, और फल लात आय, कोऊ सौ गुनो, कोऊ साठ गुनो, और कोऊ तीस गुनो। ऊने उन हां एक और कनौत कई कि सरग कौ राज्य ऊ मान्स के जैसो आय, जीने अपने खेत में उमदा बीज बोओ। पर जब लोगबाग सो रए हते, तब ऊको बैरी आओ और गेंहूं के बीच में जंगली बीज बोके चलो गओ। मगर जब गेंहूं पीक आओ और ऊमें बालें आईं, तो जंगली दाने सोई दिखाई दए। तब चाकरन ने आके मालक से कई, मालक, का तेंने अपने खेत में उमदा बीज नईं बोआए हते? फिन ऊमें जंगली घांस किते से आई? ऊने उन से कई, जौ कोनऊ बैरी कौ काम आय। चाकरन ने ऊसे कई, का तें चाहत आय, कि हम जाके उन हां काड़ लेबें। ऊने कई, ऐसो नईं, कहूं ऐसो न होबै कि जंगली घांस काड़त बेरा तुम ऊके संग्गै गेंहूं भी काड़ देओ। काटबे की बेरा लौ दोई हां संग्गै बढ़न देओ, और काटबे की बेरा मैं काटबेवारन से कै हों; पेंला जंगली घांस काड़ के बारबे के लाने ऊके गट्ठा बांध लेओ, और गेंहूं हां मोरे खलिहान में इकट्ठो करो। ऊने एक और कनौत कहके उन से कई; सरग कौ राज्य राई के दाने घांई आय, जीहां एक मान्स ने लैके अपने खेत में बो दओ। जौ सब दानों से हल्को होत आय पर जब बढ़ जात आय तो सब साग पात से बड़ो हो जात है; और ऐसो पेड़ बन जात आय, कि आकास के पंछी आके ऊकी डारियन पे बसेरा करत आंय। ऊने एक और कनौत उन से कई; कि सरग कौ राज्य खमीर के घांई आय, जीहां एक बईयर ने तीन पसेरी आटे में मिला दओ और बो सब खमीर हो गओ। यीशु ने जे सब बातें कनौत में कई, और बो कनौत के बिना उन से कछु नईं कैत हतो। कि जो बचन आगमवकता द्वारा कहो गओ हतो, बो पूरो होबे कि मैं कनौत में बोलबे हां अपनो मों खोल हों: मैं उन बातन हां बोल हों, जौन जगत के रचबे की बेरा से लुकी हतीं। फिन बो भीड़ हां छोड़के घरै आओ, और ऊके चेला ऊके ऐंगर आके कैन लगे, खेत के जंगली दाने की कनौत हम हां समझा दे। ऊने उन हां उत्तर दओ, उमदा बीज बोवेवारो मान्स कौ पूत आय। खेत संसार आय, उमदा बीज राज्य की सन्तान आंय, और जंगली बीज शैतान की सन्तान आंय। और बैरी जीने ऊहां बोओ बो शैतान आय; कटनी ई जुग कौ अन्त आय: और फसल काटबेवारे सरगदूत आंय। जैसे जंगली दाने इकट्ठे करके आगी में बार दए जात आंय, ओई तरहां जगत के अन्त में भी हुईये। मान्स कौ पूत अपने सरगदूतन हां पठै है, और बे ऊके राज्य में से सब कुकर्मियन हां इकट्ठो कर हैं। और उन हां आगी के कुण्ड में डाल हैं, उते रोबो और दांत पीसबो हुईये। तब धर्मी अपने बाप के राज्य में सूरज के घांई चमक हैं; जीके कान होबें बो सुन लेबे। सरग कौ राज्य खेत में लुके भए धन घांई आय, जी हां कोऊ मान्स ने पाओ और लुका दओ, और खुस होकें ऊने अपनो सब कछु बेंच दओ और ऊ खेत हां मोल लै लओ। और सरग कौ राज्य मोतियन हां खोजबेवारे एक सेठ के घांई आय। जब ऊहां एक अनमोल मोती मिलो तो ऊने जाके अपनो सब कछु बेंच दओ और ऊ मोती हां मोल लै लओ। और सरग कौ राज्य ऊ बड़े जाल के घांई आय, जौन समन्दर में डालो गओ, और हर तरहां की मछरियन हां समेंट लियाओ। और जब जाल भर गओ, तो लोगबाग ऊहां घाट पे खेंच लाए, और उन ने साजी मछरियन हां तो टुकनियों में इकट्ठो करो और बुरई हां मेंक दओ। ई जुग के अन्त में ऐसई हुईये: सरगदूत आके पापियन हां धर्मियन से अलग कर हैं, और उन हां आग के कुण्ड में डार दें हैं। जिते रोबो और दांत पीसबो हुईये। का तुमाए समझ में जे सब बातें आ गईं? उन ने उत्तर दओ, हओ; और ऊने उन से कई, ई लाने हर एक शास्त्री, जौन सरग के राज्य की सीख पा चुको आय, ऊ घरईया के घांई आय जौन अपने घर से नई और पुरानी बस्त काड़त आय। जब यीशु जे सब कनौतें कह चुको, तो उते से चले गए। बो अपने देस में आके लोगन हां उन के प्रार्थनाघरन में सन्देस देन लगो; और बे अचम्भित होकें कहन लगे; कि ई मान्स हां ऐसो ज्ञान और सक्ति के काम किते से मिले? का जौ बढ़ई कौ पूत नईंयां? का ईकी मताई कौ नाओं मरियम और ईके भईयन कौ नाओं याकूब और यूसुफ और शमौन और यहूदा नईंयां? और का ईकी सब बहनें हमाए बीच में नईं रैतीं? फिन ई मान्स हां जौ सब किते से मिलो? और ऊसे लोगन हां बुरओ लगो, पर यीशु ने उन से कई, आगमवकता कौ अपने देस और अपने घर हां छोड़ और कहूं निरादर नईं होत। और ऊने उते उन के अबिसवास के काजें चमत्कार के बिलात काम नईं करे। ऊ बेरा चौथाई देश के राजा हेरोदेस ने यीशु की चरचा सुनी। और अपने चाकरन से कई, जौ तो यहून्ना बपतिस्मा देबेवारो आय: बो मरे भयन में से जी गओ है, ई लाने जे शक्तियां ईमें काम कर रईं आय। कायसे हेरोदेस ने अपने भईया फिलिप्पुस की घरवारी हेरोदियास के काजें, यूहन्ना हां पकड़वा के बंधवा दओ हतो, और ऊहां जेहल में डरवा दओ हतो। कायसे यूहन्ना ने ऊसे कहो हतो, कि ईहां रखबो तोरे लाने सही नईंयां। हेरोदेस यूहन्ना हां मार डारबो चाहत हतो, पर लोगबाग से डरात हतो, कायसे बे ऊहां आगमवकता मानत हते। पर जब हेरोदेस कौ जन्म दिन आओ, तो हेरोदियास की बिटिया ने उत्सव में नाच के हेरोदेस हां खुस कर दओ। ई लाने ऊ ने कौल खाके बचन दओ, कि जो कछु तें मांग है, मैं तोय दै हों। ऊ ने मताई के उकसाबे पे कई, एक थाली में यूहन्ना बपतिस्मा दैबेवाले कौ मूड़ मोय इते मंगवा दे। हेरोदेस दुखी भओ, अकेले अपने कौल और संग में बैठबेवारन के कारन, हेरोदेस ने हुकुम दओ, कि दै दओ जाबै। ऊने जेहल में लोगन हां पठैय के यूहन्ना को मूड़ कटवा दओ। और ऊकी मूड़ एक टाठी में लाई गई; और बिटिया हां दै दओ; और बो अपनी मताई के ऐंगर ले गई। फिन यूहन्ना के चेलन ने आके और ऊ की लाश हां ले जाके गाड़ दओ, और उन ने जाके यीशु हां खबर दई। जब यीशु ने जौ सुनो, तो बो उते से नाव पे चढ़के अकेलो कोऊ सूनी जांगह हां चलो गओ; जौ सुनके भीड़ के लोगबाग नगर नगर से पैदल ऊके पाछें हो लए। जब ऊ ने एक बड़ी भीड़ हां हेरो; और लोगन पे तरस खाओ; और उन के बीमारन हां साजो करो। जब संजा भई, तो ऊके चेले ऊके ऐंगर आके कहन लगे; जा जांगह सूनी आय, और दिन डूब गओ आय, ई लाने भीड़ हां विदा करो जाए कि लोग बस्तियन में जाके अपने लाने खाबे हां मोल लेबें। यीशु ने उन से कई, उन हां जाबे की जरूरत नईंयां! तुमई उन हां खाबे हां देओ। उन ने ऊसे कई; इते हमाए ऐंगर पांच रोटियां और दो मछरियां आंय। ऊने कई, उन हां मोरे ऐंगर लै आओ। तब लोगन हां घांस पे बिठाओ, और ऊने पांच रोटियां और दो मछरियन हां लओ; और सरग कोद हेर के आसीष मांगी और रोटियां तोड़ तोड़ के चेलन हां दईं, और चेलन ने लोगन हां। और सब खाके अफर गए, और उन ने टुकड़न से बची भई बारह टुकनियां भरके उठाईं। खाबेवारन में, बईयरन और लरका बिटियन हां छोड़के लुगवन की गिनती मानो पांच हजार लौ हती। तब ऊने तुरतईं अपने चेलन हां नाव पे चढ़बे के लाने जबरंई करी, कि बे ऊसे पेंला ऊ पार जाबें, और खुद लोगन हां विदा करन लगो। भीड़ हां विदा करबे के बाद, बो पहड़िया पे अकेलो प्रार्थना करबे के लाने चलो गओ; जब संजा भई तो बो उते अकेलो हतो। ऊ बेरा नाव झील के मजारें लहरों से डगमगा रई हती, कायसे हवा सामूं की हती। और बो रात के चौथे पहर झील पे निंगत भए उन के ऐंगर आओ। जब चेलन ने ऊहां झील पे निंगत भए हेरो तो बे डरा गए! और कैन लगे, जौ तो भूत आय; और डर के मारे चिल्लान लगे। यीशु ने तुरतईं उन से बातें करी, और कई; हिम्मत धरो; मैं आंव, डरियो नईं। पतरस ने ऊसे कई; हे प्रभु, अगर तेंई आय, तो मोय सोऊ पानू पे निंग के अपने ऐंगर आबे कौ हुकुम दे। यीशु ने कई, आ: तब पतरस नाव पे से उतर के पानू पे निगत भओ यीशु की कोद बढ़ो। पर हवा हां हेर के डरा गओ, और जब डूबन लगो, तो चिल्ला के कई; हे प्रभु, मोय बचा। यीशु ने तुरतईं हाथ बढ़ाके ऊहां थाम लओ, और ऊसे कई, हे तनक भरोसा करबेवाले, तेंने काय शंका करी? जब बे नाव पे चढ़ गए, तो हवा थम गई। और जौन लोग नाव में हते, उन ने ऊहां परनाम करके कई, सांची तें परमेसुर कौ पूत आय। बे पार होकें गन्नेसरत देश में पहुंचे। और उते के लोगन ने जब ऊहां चीनो, तो उन ने लिगां के सारे देश में खबर पठैई, और लोग बीमारन हां ऊके ऐंगर ले आए। बे ऊसे बिन्तवाई करन लगे, कि बो अपने उन्ना के छोर हां छी लैन देबे: और जितनन ने ऊहां छिओ, बे साजे हो गए। तब यरूशलेम के कछु फरीसी और शास्त्री यीशु के ऐंगर आके कहन लगे। तोरे चेले पुरखन की रीतियन हां काय नईं मानत आंय, बे तो रोटी खाती बेरा हाथ नईं धोत? ऊ ने उत्तर दओ, तुम अपनी रीतियन के लाने खुद परमेसुर के हुकुम कौ पालन काय नईं करत आव? कायसे परमेसुर ने कई हती, कि अपने बाप और अपनी मताई कौ मान करियो: और जौन कोऊ बाप और मताई हां बुरओ कहे, बो मार डालो जाए। पर तुम कहत आव, कि अगर कोऊ अपने बाप या मताई से कहे, कि जो कछु तोय से लाभ मोय पहुंच सकत हतो, बो परमेसुर हां चढ़ाओ जा चुको आय। तो बो अपने बाप कौ आदर नईं करे, ई तरहां तुम ने अपनी रीतियन के लाने परमेसुर के बचन हां टार दओ। हे कपटियो, यशायाह ने तुमाए लाने जा आगमवानी सही करी हती। कि जे लोग होंठन से तो मोरो मान करत आंय, पर इन कौ मन मोसे दूर रहत आय। और जे बेकार मोरी भक्ति करत आंय, कायसे मान्सन की रीतियन हां धरम के बचन बता के सिखात हैं। और ऊ ने भीड़ हां अपने ऐंगर टेर के उन से कई, सुनो और समजो। जो मों में जात आय, बो मान्स हां अशुद्ध नईं करत, पर जो मों से बायरें कड़त आय, बो मान्स हां अशुद्ध करत आय। तब चेलन ने आके ऊसे कई, का तें जानत आय कि फरीसियन ने जौ बचन सुनके ठोकर खाई? ऊ ने उत्तर दओ, हर पौधा जीहां मोरे स्वर्गीय बाप ने नईं लगाओ, उखाड़ दओ जै है। उन हां रहन दो; बे अन्धी गैल बताबे वाले आंय: और अन्धरा अगर अन्धरा हां गैल बताए, तो दोई गड्ढे में गिर हैं। जा सुन के, पतरस ने ऊसे कई, जा कनौत हम हां समजा दे। ऊ ने कई, का तुम लोग अबै लौ नईं जाने। का तुम नईं जानत, कि जो कछु मों में जात आय, बो पेट में जाके, और संडास में निकल जात है? पर जो मों से कड़त आय, बो मन से कड़त आय, और बो मान्स हां अशुद्ध करत आय। कायसे बुरए सोच, हत्या, व्यभिचार, भड़याई, लबरी गवाई और निन्दा मन से कड़त आय। जेई बातें आंय जौन मान्स हां अशुद्ध करत आंय, पर बिना हाथ धोए मान्स हां अशुद्ध नईं करत। यीशु उते से कड़ के, सूर और सैदा के परगना में चलो गओ। और हेरो, ऊ परगना की एक कनानी बईयर आई और चिल्लया के कहन लगी; हे पिरभू दाऊद की सन्तान, मोय पे दया कर, मोरी बिटिया हां दुष्ट आत्मा सता रई है। पर ऊ ने ऊहां कछु उत्तर नईं दओ, और चेले ऊके ऐंगर आके कहन लगे; ईहां पठैय दे; कायसे जा चीखत भई हमाए पाछें आत आय। ऊ ने उन से कई, मैं केवल इस्राएल के घराने की हिराई भई गाड़रन के ऐंगर पठैव गओ आंव। पर बो आई, और परनाम करके कहन लगी; हे पिरभू, मोरी मदद कर। ऊ ने ऊसे कई, लरका बिटियन की रोटी लैके कुत्तन के आंगू डारबो साजो नईंयां। ऊने कई, सांची आय पिरभू; पर कुत्ते भी तो मालक की मेज से गिरो भओ चूरचार खात आंय। तब यीशु ने कई, ऐ बईयर, तोरो भरोसा बिलात आय: जैसो तें चाहत आय, वैसई तोरे लाने होबै; और ऊ की बिटिया तुरतईं साजी हो गई। यीशु उते से निंग के, गलील की झील के तीरे गओ, और उते पहरवा पे चढ़के बैठ गओ। और बिलात लोग ऊके ऐंगर आए, और बे अपने संग्गै लंगड़े, लूले, अन्धरे, बौरे और बिलात औरन हां लैके आए; और उन हां ऊके गोड़ों में डार दओ, और ऊने उन हां साजो करो। जब भीड़ ने हेरो, कि बौरा बोलत, लूला साजे होत, लंगड़े निंगत और अन्धरे हेरत आंय, तो लोगबाग अचम्भित भए और उन ने इस्राएल के परमेसुर की बड़ाई करी। यीशु ने अपने चेलन हां ऐंगर टेर के कई, मोय भीड़ पे तरस आत आय; कायसे जे लोग तीन दिना से मोरे संग्गै आंय और इन के ऐंगर खैबे हां कछु नईंयां; और मैं उन हां भूखो नईं पठैबो चाहत; कहूं ऐसो न होय कि बे गैल में थक के रह जाबें। चेलन ने ऊसे कई, हम हां ई सूनी जांगह में ऐसी भीड़ हां अफराबे के लाने, इतनी बिलात रोटीं किते से मिल हैं? यीशु ने उन से कई, तुमाए ऐंगर कितेक रोटियां आंय? उन ने कई; सात और तनक सी हल्की मछरियां। तब ऊ ने भीड़ हां धरती पे बैठवे कौ हुकुम करो। फिन ऊ ने सात रोटियां और मछरियन हां लओ और धन्यवाद करके तोड़ो और चेलन हां देत गओ; और चेलन ने भीड़ हां दओ। बे सब खाके अफर गए और बचे भए टुकड़न से सात टुकनियां भरके उठाईं। और खाबे वारे बईयरन और लड़ेर हां छोड़ के चार हज़ार मन्सेलू हते। तब भीड़ हां विदा करके, बो नाव पे चढ़ गओ, और मगदन देश के हल्कन में आओ। फरीसी और सदूकियन ने ऐंगर आके ऊहां परखबे के लाने ऊसे कई, कि हम हां आकास कौ कोऊ चिन्ह दिखाओ। ऊ ने उन हां उत्तर दओ, जब संजा होत आय तो तुम कहत आव कि खुलो रै है कायसे आकास लाल आय। और भुनसारे कहत आव कि आज आंधी आ है कायसे आकाश लाल और धुमला आय; तुम आकास के गुन हां तो चीनत आव, पर समयों के चिन्ह हां नईं बता सकत? बुरय और व्यभिचारी ई जुग में चिन्ह खोजत आंय पर यूनुस के चिन्ह हां छोड़ ऊहां और कोऊ चिन्ह नईं दओ जै है, और बो उन हां छोड़के चलो गओ। फिन चेले ऊ पार पहुंचे और रोटी लेबो बिसर गए हते। यीशु ने उन से कई, हेरो; फरीसी और सदूकियन के खमीर से चौकन्ने रहियो। बे आपस में बतकाव करके कहन लगे, कि हम रोटी लाबो बिसर गए। यीशु ने जौ जानके उन से कई, हे तनक भरोसा करबे वारो, तुम काय आपस में झगड़ रए आव? कि हमाए ऐंगर रोटी नईंयां? का तुम अबै लेओ नईं समजे? कि जब पांच हजार मान्सन के लाने पांच रोटियां हतीं, तो तुम ने कितेक टुकना उठाए हते? और चार हजार के लाने सात रोटियां हतीं; तो तुम ने कितेक टुकना उठाए? तुम काय नईं समजत कि मैं ने तुम से रोटी के बारे में नईं कई? पर जौ कि तुम फरीसी और सदूकियन के खमीर से चौकन्ने रहियो। तब उन की समझ में आओ, कि ऊ ने रोटी के खमीर के बारे में नईं, परन्त फरीसी और सदूकियन की सीख से चौकन्ने रहबे हां कई हती। जब यीशु कैसरिया, फिलिप्पी के परगना में आओ, तो अपने चेलन से जौ पूछन लगो, मान्स कौ पूत हां लोगबाग का कहत आंय? उन ने कई, कछु तो यूहन्ना बपतिस्मा देबेवारो कहत आंय, कछु एलिय्याह और दूसरे यिर्मयाह या आगमवकतन में से कोऊ एक। ऊ ने उन से कई; पर तुम मोहां का कहत आव? शमौन पतरस ने उत्तर दओ, कि तें जीयत परमेसुर कौ पूत मसीह आय। यीशु ने ऊसे कई, कि हे शमौन योना के पूत, तें धन्य आय; कायसे मांस और खून ने ईहां तोपे उजागर नईं करो, बल्कि मोरे बाप ने जौन सरग में आय। मैं तोसे जौ सोई कहत हों, कि तें पतरस आय; और ऐई चट्टान पे मैं अपनी मंडली बना हों: और अधोलोक के फाटक ऊ पे प्रबल न हुईयें। मैं तोय सरग के राज्य की कुंजी दै हों: और जो कछु तें धरती पे बांध है, बो सरग में बंध है; और जो कछु तें धरती पे खोल है, बो सरग में खुल है। तब ऊने चेलन हां चिताओ, कि कोऊ से न कहियो! कि मैं मसीह आओं। ऊ बेरा से यीशु मसीह अपने चेलन हां बतान लगो, कि जरूरी आय, कि मैं यरूशलेम हां जाओं, और पुरनियन, महापुरोहितन और शास्त्रियन द्वारा बिलात दुख उठाओं; और मार डारो जाओं; और तीसरे दिना जी जाओं। ई पे पतरस ऊहां अलग ले गओ, और जे कै कें झिड़कन लगो कि हे पिरभू, परमेसुर न करे; तोपे ऐसो कभऊं न हुईये। तब ऊने मुड़के पतरस से कई, हे शैतान मोरे सामने से दूर हो: तें मोरे लाने ठोकर कौ कारन आय; कायसे तें परमेसुर की बातन पे नईं, पर मान्सन की बातन पे मन लगात आय। तब यीशु ने अपने चेलन से कई; अगर कोऊ मोरे पाछें आबो चाहे, तो बो अपने आप हां त्यागे, और अपनो क्रूस उठाके मोरे पछें हो ले। कायसे जौन अपनो प्राण बचाबो चाहे, बो ऊहां गवां है; और जौन कोऊ मोरे लाने अपनो प्राण गवां है, बो ऊहां पा है। अगर मान्स सारे जगत हां पा ले, और अपने प्राण गंवाए, तो ऊहां का फायदा? या मान्स अपने प्राण के बदले में का दै है? कायसे मान्स कौ पूत अपने सरगदूतन के संग्गै अपने बाप की मईमा में आ है, और ओई बेरा बो हर एक मान्स हां ऊके कामन के अन्सार फल दै है। मैं तुम से सांची कहत आंव, कि जो इते ठांड़े आंय, उन में से कितेक ऐसे आंय; कि जब लौ मान्स के पूत हां ऊके राज्य में आत भए न हेर लै हैं, तब लौ मृत्यु कौ सुवाद कभऊं न चीख हैं। यीशु ने छै दिना के बाद पतरस और याकूब और ऊके भईया यूहन्ना हां अपने संग्गै लओ, और सूने में एक ऊंचे पहरवा पे लै गओ। उन के आंगू ऊको रूप बदल गओ और ऊको मों सूरज घांई चमक उठो, और ऊके उन्ना उजाले जैसे चमकदार हो गए। और हेरो, मूसा और एलिय्याह ऊके संग्गै बातें करत भए उन हां दिखाई दए। पतरस ने यीशु से कई, हे पिरभू, हमाए लाने इते रहबो भलो है; अगर तोरी मनसा होए तो मैं इते तीन मण्डप बनाओं; एक तोरे लाने, एक मूसा के लाने, और एक एलिय्याह के लाने। बो बोलई रओ हतो, कि हेरो, एक उजले बादल ने उन हां छा लओ, और हेरो; बादल में से जौ बोल सुनाई दओ, कि जौ मोरो लाड़लो पूत आय, जीसे मैं बिलात खुस आंव: ई की सुनियो। चेले जा सुन के मों के बल गिर गए और बिलात डरा गए। यीशु ने ऐंगर आके उन हां छुओ, और कई, उठो; डराओ नईं। तब उन ने ऊपरै हेरो और यीशु हां छोड़ कोऊहां नईं देखो। जब बे पहरवा से खालें उतर रए हते तब यीशु ने उन हां हुकुम दैके कई; जब लौ मान्स कौ पूत मरे भयन में से न जी उठे तब तक ई दर्शन के बारे में कोऊ से न कहियो। फिन ऊके चेलन ने ऊसे पूंछी, फिन शास्त्री काय कहत आंय, कि एलिय्याह कौ पेंला आबो जरूरी आय? ऊने उत्तर दओ, कि एलिय्याह तो आहै: और सब कछु सुधार है। पर मैं तुम से कहत आंव, कि एलिय्याह आ चुको; और लोगन ने ऊहां नईं चीनो; परन्त जैसो उन ने चाहो, ऊके संग्गै करो: ऐंसई मान्स कौ पूत भी उन के हाथन से दुख उठा है। तब चेलन से समजो कि ऊने हम से यूहन्ना बपतिस्मा देबेवारे के बारे में कई हती। जब बे भीड़ के ऐंगर आए, तो एक मान्स यीशु के ऐंगर आओ, और ऊके सामूं घुटनन के बल गिर के कहन लगो। हे प्रभु, मोरे लरका पे दया करौ; कायसे ऊहां मिरगी आत आए: और बिलात दुख उठात है; और बो बेर बेर आगी और पानू में गिर पड़त है। मैं ऊहां तोरे चेलन के ऐंगर लाओ हतो, पर बे ऊहां साजो नईं कर पाय। यीशु ने उन से कई, हे तनक भरोसा करबेवारो और हठीले मान्स मैं कब लों तुमाए संग्गै रै हों? मैं कब लों तुमाई सै हों? ऊहां इते मोरे ऐंगर ले आओ। तब यीशु ने दुष्ट आत्मा हां डांटो और बो ऊ में से कड़ गई; और लरका ओई बेरा साजो हो गओ। तब चेलन ने सूने में यीशु के ऐंगर आके कई; हम ऊहां काय नईं काड़ पाए? ऊने उन से कई, अपने भरोसे की कमी से: कायसे मैं तुम से सांची कहत आंव, अगर तुमाओ भरोसा राई के दाने के बरोबर भी होबै, तो ई पहरवा से कै हौ, कि इते से हटके उते चलो जा, तो बो चलो जै है; और कोई बात तुमाए लाने अनहोनी न हुईये। जब बे गलील में हते, तो यीशु ने उन से कई; मान्स कौ पूत मान्सन के हाथन में पकड़वाओ जा है। और बे ऊहां मार डार हैं, परन्त तीसरे दिना बो जी उठ है। ई पे बे बिलात उदास भए। जब बे कफरनहूम में पोंचे, तब मन्दर के लाने कर लेबेवारे पतरस के ऐंगर आके कहन लगे, का तुमाओ गुरू मन्दर कौ कर नईं देत? ऊ ने कई, हओ देत तो है। जब बो घरै आओ, तो यीशु ने ऊसे पूंछी, हे शमौन तें का समजत आय? धरती के राजा चुंगी या कर कीसे लेत आंय? अपने पूतों से या परायों से? पतरस ने ऊसे कई, परायों से। यीशु ने ऊसे कई, तब तो पूत बच गए। पर ऐसो न होय कि हम उन के लाने ठोकर कौ काम करबें, ई लाने तें तला में जाके बंसी डाल, और जौन मछरिया पेंला निकले, ऊहां ले; तो ऊको मों खोलबे पे तोय एक सिक्का मिल है, ऊहां लैके मोरे और अपने बदले उन हां दे दईयो। ऊ बेरा चेले यीशु के ऐंगर आके कैन लगे, सरग के राज्य में बड़ो को आय? तब ऊने एक बच्चा हां, अपने ऐंगर टेरो और बीच में ठांड़ो करके कई। मैं तुम से सांची कैत आंव, कि जब लों तुम न फिरो और बच्चन घांई न बनो, तुम सरग के राज्य में कभऊं न पोंच पा हौ। जौन कोऊ अपने आप हां ई बच्चा के घांई छोटो बना है, बो सरग के राज्य में सब से बड़ो हुईये। और जो कोऊ मोरे नाओं से ऐसई एक बच्चा हां अपनात आय, बो मोय अपनात आय। पर जो कोऊ इन हल्के में से जौन मोय पे भरोसा करत आंय एक हां ठोकर खिलाए, ऊके लाने सही होतो, कि ऊके घींच में चक्की कौ भारी पाट लटकाओ जातो, और ऊहां समुन्दर की तरी में डुबो दओ जातो। ठोकरों के काजें संसार पे हाय! ठोकरों कौ लगबो जरूरी आय; पर हाय ऊ मान्स पे जीके द्वारा ठोकर लगत आय। अगर तोरो हाथ या तोरो गोड़ो तोय ठोकर खिलाए, तो ऊहां काट के मेंक दे; कायसे तोरे लाने लूलो लंगड़ो होकें सरग में जाबो, ईसे कहूं भलो आय, कि दो हाथ और दो गोड़े रहते भए नरक में डार दओ जाए। अगर तोरी आंख तोय ठोकर खिलाए, तो ऊहां काड़ के मेंक दे। कायसे तोरे लाने कनवा होकें सरग के राज्य में जाबो ईसे कहूं भलो आय, कि तें दो आंखें रहत भए नरक की आगी मैं डारो जाबै। हेरो, तुम इन हल्के में से कोऊहां नीचो न जानियो; कायसे मैं तुम से कहत आंव, कि सरग में उन के दूत मोरे बाप कौ मों सदा हेरत आंय। तुम का समजत आव? जदि कोऊ मान्स की सौ गाड़रें होबें, और उन में से एक भटक जाए, तो का बो निन्नानबे हां छोड़के, और पहरवा पे जाके, ऊ भटकी भई गाड़र हां खोजबे न जै है? और अगर ऐसो होबै, कि बो ऊहां पाए, तो मैं तुम से सांची कहत आंव, कि बो ऊन निन्नानबे गाड़रों के लाने जौन हिरानी नईं हतीं बिलात खुस नईं हुईये, जितनो कि ई गाड़र के लाने हुईये। ऐसई तुमाओ बाप की जौन सरग में आय जा मनसा नईंयां, कि इन हल्के में से एकऊ नास होए। अगर तोरो भईया पाप करे, तो जाके ऊहां अकेले में समजा; अगर बो तोरी सुने तो तेंने अपने भईया हां बचा लओ। अगर बो तोरी न सुनै, तो तें अपने संग्गै एक या दो जनें हां लै जा, कि हर एक बात दो या तीन गवाह के मों से सही पाई जाए। अगर बो उन की भी न माने, तो मण्डली से कै दे, अगर बो मण्डली की भी न सुने, तो बो तोरे लाने गैर जातियन और चुंगी लेबेवारन के घांई कहाओ। मैं तुम से सांची कहत आंव, जो कछु तुम धरती पे बांध हौ, बो सरग में बंध है और जो कछु तुम धरती पे खोल हौ, बो सरग में खुल है। मैं तुम से फिन कहत आंव, अगर तुम में से दो जनें धरती पे प्रार्थना के लाने एक मन हुईंयें, तो बो मोरे स्वर्गीय बाप की कोद से उन के लाने पूरी हो जै है। कायसे जिते दो या तीन मोरे नाओं से जुर हैं, उते मैं उन के बीचा में होत आंव। तब पतरस ने ऐंगर आके ऊसे कई, हे प्रभु, जदि मोरो भईया पाप करत रए, तो मैं ऊहां कितेक बेर क्षमा करों, का सात बेर लौ? यीशु ने ऊसे कई, मैं तोसे जौ नईं कैत, कि सात बेर, परन्त सात बेर के सत्तर गुना लौ। ई लाने सरग के राज्य की तुलना ऐसे राजा से करी जा सकत आय, जीने अपने चाकरन से हिसाब लेबो चाहो। जब बो हिसाब लैन लगो, तो ऊके सामूं एक मान्स लाओ गओ, जीपे दस हजार तोड़े कौ करजा हतो। पर ऊके ऐंगर करजा चुकाबे हां कछु नईं हतो, तो ऊके मालक ने हुकुम दओ, कि ऊहां और ऊकी घरवारी और लड़का वारन और जो कछु ऊके ऐंगर आय, सब हां बेंच के करजा चुका दओ जाए। ई पे चाकर ने गिरके ऊहां परनाम करो, और कई, हे मालक, धीरज धर, मैं सब कछु चुका दै हों। तब ऊ चाकर के मालक ने तरस खाके ऊहां छोड़ दओ, और ऊको करजा माफ कर दओ। पर जब बो चाकर बायरें कड़ो, तो ऊके संगी चाकरन में से एक ऊहां मिलो, जौन ऊको सौ दीनार कौ कर्जदार हतो; ऊने ऊहां पकड़ो और ऊकौ गला दबा के कई; मोरो करजा चुका दे। ई पे ऊको संगी चाकर गिरके, ऊसे बिन्तवाई करन लगो; कि धीरज धर मैं सब कछु चुका दै हों। परन्त बो नईं मानो, और ऊहां जेहल में डार दओ; कि जब लौ बो करजा न चुका दे, तब लौ उतईं रहे। जौ देख के ऊके संगी चाकर बिलात दुखी भए, और उन ने अपने मालक हां पूरो हाल सुना दओ। तब ऊके मालक ने ऊहां टेर के कई, हे दुष्ट चाकर, ई लाने की तेंने मोय से बिनती करी, मैं ने तोरो पूरो करजा माफ कर दओ। तो फिन मैं ने जैसे तोपे दया करी, का ओई तरहां तोय भी अपने संगी चाकर पे दया नईं करो चईये? और ऊके मालक ने खुन्सया के ऊहां दण्ड देबेवारन हां सौंप दओ, कि जब लौ सब करजा न चुका देबै, तब लौ उनई के हाथ में रए। ऐंसई अगर तुम में से हर एक अपने भईया हां क्षमा नईं कर है, तो मोरो स्वर्गीय बाप भी तुमाए संग्गै वैसई कर है। जब यीशु जे बातें कह चुको, तो गलील से चलो गओ; और यरदन के पार यहूदिया के परगना में आओ। और बिलात भीड़ ऊके पाछें हो लई, और ऊने उन हां साजो करो। तब फरीसी ऊहां परखबे के लाने ऊके ऐंगर आए और कैन लगे, का मन्सेलू के लाने अपनी घरवारी हां, कोऊ भी कारन से छोड़ छुट्टी करबो सही आय? ऊने उत्तर दओ, का तुम ने नईं पढ़ो, कि जीने उन हां बनाओ, ऊ ने शुरू से उन हां नर और नारी बना के कओ। कि ई काजें मन्सेलू अपने मताई बाप हां छोड़के अपनी घरवारी के संग्गै रै है और बे दोई एक तन हुईयें? ई लाने अब बे दो नईं, पर एक तन आंय, ई लाने जीहां परमेसुर ने जोड़ो आय, ऊहां मान्स न्यारो न करे। उन ने यीशु से कई, फिन मूसा ने काय कई, कि छोड़ छुट्टी कौ कागज देके ऊहां न्यारो कर दे? ऊने उन से कई, तुमाए मन के कर्रेपन के काजें मूसा ने तुम हां अपनी अपनी घरवारी हां छोड़ छुट्टी देबे कौ हुकुम दओ, पर शुरू से ऐसो नईं हतो। और मैं तुम से कहत आंव, कि जो कोऊ व्यभिचार हां छोड़ और कौनऊ कारन से, अपनी घरवारी हां छोड़ छुट्टी देके, दूसरी से ब्याव करत आय, तो बो व्यभिचार करत आय: और जो ऊ छोड़ी भई से ब्याव करत आय, बो भी व्यभिचार करत आय। चेलन ने ऊसे कई, अगर मान्स कौ बईयर के संग्गै ऐसई नातो आय, तो ब्याव करबो भलो नईंयां। ऊने उन से कई, जौ बचन सब नईं अपना सकत, केवल बेई अपना सकत आंय जिन हां जौ दओ गओ आय। कायसे कछु नामर्द ऐसे आंय, जौन अपनी मताई के पेट से ऐसई पैदा भए; और कछु नामर्द ऐसे आंय, जिन हां मान्सन ने नामर्द बनाओ: और कछु नामर्द ऐसे भी आंय, जिन ने सरग के राज्य के लाने अपने आप हां नामर्द बनाओ आय, जौन ईहां अपना सकत आय, बो अपनात रए। तब कछु बच्चा ऊके ऐंगर लाये गए, कि बो उन पे हाथ धर के प्रार्थना करे; पर चेलन ने उन हां डपटो। तब यीशु ने कई, बच्चन हां मोरे ऐंगर आन दो: उन हां मना न करो, कायसे सरग कौ राज्य ऐंसई कौ आय। तब उन पे हाथ धरके, उते से चलो गओ। और हेरो, एक मान्स ने ऊके ऐंगर आके कई, हे गुरू; मैं कौन सो भलो काम करों, कि अनन्त जीवन पाओं? ऊने कई, तें मोय से भले काम के बारे में काय पूंछत आय? केवल एकई तो भलो आय; अगर तें जीवन में जाबो चाहत आय, तो आज्ञाओं कौ पालन कर। ऊने पूंछी कौन सी आज्ञाएं? तब यीशु ने कई, हत्या न करियो, व्यभिचार न करियो, चोरी न करियो, लाबरी गवाह नईं दईयो। अपने बाप और मताई कौ मान करियो, और अपने पड़ोसियन से अपने घांई प्रेम करियो। जवान ने ऊसे कई, इन सब हां तो मैं पालन करत आओ हों, फिन मोय में का घटी आय? यीशु ने ऊसे कई, अपनी जायजाद बेंच के गरीबन हां बांट दे; और आके मोरे पाछें हो ले। जवान ने जा सुनी तो उदास होकें चलो गओ, कायसे बो बिलात धनी हतो। तब यीशु ने अपने चेलन से कई, मैं तुम से सांची कहत आंव, कि धनी कौ सरग के राज्य में जाबो कठन आय। मैं तुम से फिन कहत आंव, कि कोऊ धनी कौ परमेसुर के राज्य में जाबे की जांगह, ऊंट कौ सुई के नाके में से कड़बो बिलात सहज आय। जब चेलन ने जा सुनी, तो बे बिलात अचरज में पड़ गए और कहन लगे, तो फिन की कौ तरन तारन हो सकत आय? यीशु ने उन की कोद हेर के कई, मान्सन से तो जौ नईं हो सकत आय, पर परमेसुर से सब कछु हो सकत आय। ईपे पतरस ने कई, हम तो सब कछु छोड़के तोरे पाछें हो लए आंय: तो हम हां का मिल है? यीशु ने उन से कई, मैं तुम से सांची कहत आंव, कि नई रचना से जब मान्स कौ पूत अपनी मईमा के सिंहासन पर बैठ है, तो तुम भी जो मोरे पाछें हो लए आव, बारह सिंहासनों पे बैठ के इस्राएल के बारह गोत्रन कौ न्याव कर हौ। और हर एक जीने मोरे नाओं के लाने घरद्वार या भईयन या बहन या बाप मताई या बच्चन या खेतन हां छोड़ दओ आय, ऊहां सौ गुना मिल है: और बो अनन्त जीवन कौ अधकारी हुईये। पर जौन पेंला आंय, पाछें हुईंयें; और जौन पाछें आंय बे पेंला हुईंयें। सरग कौ राज्य ऊ मालक के घांई आय, जौन भुनसारे ई लाने कड़ो, कि मजूरन हां अपनी दाख की बगिया में काम करबे के लाने लगाए। ऊने हर मजूर हां एक रुपईया रोज पे, उन हां अपनी दाख की बगिया में पठैव। फिन भुनसारे करीब नौ बजे, जब बो बायरें आओ, तो औरन हां बाजार में बेकर ठांड़ो तको। और ऊने कई, तुम भी दाख की बगिया में जाओ, जौन सही आय, तुम हां दै हों; सो बे भी गए। फिन बारह बजे और तीन बजे करीब ऊने निकल के वैसई करो। और एक घण्टा दिन रहत भए फिन निकल के औरन हां ठांड़े पाओ, और उन से कई; तुम काय इते दिन भर बेकार ठांड़े रए? उन ने ऊसे कई, ई लाने कि कोऊ ने हम हां मजूरी पे नईं लगाओ। ऊने उन से कई, तुम भी दाख की बगिया में जाओ। संजा होबे पे दाख की बगिया के मालक ने मुनीम हां टेर के कई, मजूरन हां टेर, और पाछें आबेवालन से शुरू करके, पेंला आबेवालन लौ सब हां मजूरी दै दे। करीब पांच जौन संजा बेरा मजूरी पे लगाए गए हते, तो उन हां एक एक रुपईया मिलो। जब पेंला लगाये गए मजूर आए, उन ने समझी कि हम हां बिलात मिल है; मगर उन हां सोई एकई एक रुपईया मिलो। जब उन हां रुपईया मिलो तो बे जौ कहके मालक पे बड़बड़ान लगे। बे जौन पाछें आए इन ने तो एकई घण्टा काम करो, और तेंने उन हां हमाए बिरोबर कर दओ, जिन ने दिन भर बोझा ढो और कड़ो घाम सहो? पर ऊने उन में से एक हां उत्तर दओ, हे मित्र मैं तोरे संग कोऊ अन्याय नईं कर रओ आंव; का तेंने मोरे संग्गै एक रुपईया की मजूरी नईं ठैराई हती? जौन तोरो आय, ऊहां ले और चलो जा; जा मोरी मनसा आय कि जितेक तोय दओ आय, उतनईं ई पाछें आबे वारन हां भी देंओं। का मोरे लाने सही नईंयां कि जो मोरो आय ऊहां जैसो चाहों सो बाटों? का मोरो भलो करबो तोरी आंखन में खटकत आय? ई तरहां जो पाछें आए, बो पेंला हुईयें, और जो पेंला आय, बो पाछें हुईयें। यीशु यरूशलेम जाती बेरा बारह चेलन हां सूने में लै गओ, और गैल में उन से कहन लगो। कि हेरो, हम यरूशलेम जा रए आंय; और मान्स कौ पूत महायाजकन और शास्त्रियन के हाथन पकड़वाओ जै है, और बे ऊहां मृत्यु दण्ड के लायक ठहरा हैं। बे ऊहां गैर जातन के हाथन में सौंप हैं, और ऊको ठठ्ठा उड़ा हैं, कोड़ा मार हैं, और ऊहां क्रूस पे चढ़ा हैं और तीसरे दिना बो जी जै है। तब जब्दी के पूतन की मताई नेअपने पूतन के संग्गै ऊके ऐंगर आके परनाम करो, और ऊसे कछु मांगन लगी। यीशु ने ऊसे कई, तें का चाहत आय? बो ऊसे बोली, हुकम कर, कि तोरे राज्य में मोरे जे दो पूत एक तोरे दांयने और एक तोरे डेरे बैठें। मगर यीशु ने उत्तर दओ, तुम नईं जानत कि का मांग रए आव? का तुम बो कटोरा पी सकत आव, जीहां मैं पीबे पे आंव? उन ने कई, हम पी सकत आंय। ऊने उन से कई, मोरो कटोरा तो तुम पी हौ, पर अपने दांयने और डेरे बैठाबो मोरे जिम्मे नईंयां, जौ तो उनईं के लाने आय, जिन के लाने मोरे बाप ने तईयार करो आय। जौ सुनके, दसों चेले उन दोनों भईयन पे खुन्सयाने। यीशु ने उन हां अपने ऐंगर टेर के कई, तुम जानत आव, कि अन्यजातियन के हाकिम उन पे हुकुम चलात आंय; और उन के बड़े हाकिम उन पे हुकुम चलात आंय। पर तुम में ऐसो न हुईये; जो कोऊ तुम में बड़ो बनवो चाहे, बो तुमाओ चाकर बने। और जौन तुम में मुखिया बनवो चाहे, बो तुमाओ चाकर बने। जी तरहां मान्स कौ पूत अपनी चाकरी कराबे नईं, बल्कि चाकर बनके और बिलातन के तरन तारन के लाने अपनो प्राण देबे आओ। जब बे यरीहो से कड़त जात हते, तो बिलात भीड़ ऊके पाछें हो लई। और हेरो, गैल के मजारें बैठे दो अन्धरे जौ सुनके, कि यीशु जा रओ आय, चिल्लया के कैन लगे; हे प्रभु, दाऊद की सन्तान हम पे दया कर। भीड़ के लोगन ने उनहां ललकारो, चिमाने रओ; पर बे औरई जोर से चिल्लया के कैन लगे, हे प्रभु, दाऊद की सन्तान; हम पे दया कर। तब यीशु ने ठांड़े होकें, उन हां टेरो और कई। तुम का चाहत आव कि मैं तुमाए लाने करों? उन ने ऊसे कई, हे पिरभू; हम चाहत आंय, कि हमाई आंखें खुल जाबें। यीशु ने दया करके उन की आंखन हां छिओ, और बे तुरतईं हेरन लगे; और ऊके पाछें हो लए। जब बे यरूशलेम के ऐंगर पोंचे और जैतून पहरवा पे बैतफगे में आए, तो यीशु ने दो चेलन हां जौ कह के पठैव। कि अपने सामूं के गांव में जाओ, उते पोंचतई तुम हां एक गधी के संग्गै ऊको बच्चा बन्धो मिल है; ऊहां खोल के मोरे ऐंगर ले आओ। अगर कोऊ तुम से कछु कय, तो कहियो, कि प्रभु हां ईकी जरूरत आय: और बो तुरतईं ऊहां पठै दै है। जौ ई लाने भओ, कि जो बचन आगमवकता के द्वारा कहे गए हते, बो पूरे होबें। कि सिय्योन की बिटिया से कहो, तको, तोरो राजा तोरे ऐंगर आत आय; बो दीन आय और गधे पे बैठो आय; यानि लादू के बच्चे पे। चेलों ने जाके, जैसो यीशु ने उन से कई हती, वैसई करो। उन ने गधी और ऊके बच्चे हां लिया के, ऊपे अपने उन्ना डारे और बो ऊ पे बैठ गओ। भीड़ में से बिलात ने अपने उन्ना गैल में बिछाए, और औरन ने झाड़ से डारियां काटके गैल में बिछाईं। और जो भीड़ ऊके आंगू-आंगू जा रई हती और बे भी जौन ऊके पाछें निंगत आत हते, चिल्ला चिल्ला के कह रए हते, दाऊद की सन्तान हां होशन्ना; धन्य आय बो जो पिरभू के नाओं से आत आय, आकास में होशन्ना। जब बो यरूशलेम में घुसे, तो सबरे नगर में खलबली मच गई; और सब कैन लगे, जौ को आय? और भीड़ के लोगबाग कह रए हते, जौ गलील के नासरत कौ आगमवकता यीशु आय। यीशु ने मन्दर में पिड़ के, उन सबई हां, जौन मन्दर में लेन-देन कर रए हते, काड़ दओ; और सुनारन की मेजें और परेवा बेंचवे वालन की चौकियां पलट दईं। और ऊने उन से कई, लिखो आय, कि मोरो घर प्रार्थना कौ घर कहला है; पर तुम ने ऊहां डाकुअन की खोह बना दओ आय। तब अन्धरे और लंगड़े, ऊके ऐंगर मन्दर में आए, और ऊने उन हां साजो करो। पर जब महापुरोहितन और शास्त्रियन ने उन अचरज के कामन हां, जौन ऊने करे हते, हेरो और बच्चन हां जो मन्दर में चिल्ला रए हते दाऊद की सन्तान होशन्ना, तो बे गुस्‍सा भय और उन ने ऊसे कई, का तें सुनत आय कि जे का कै रए आंय? यीशु ने उन से कई, हओ; का तुम ने जौ कभऊं नईं पढ़ो, कि बच्चन और दूध मुंहे बच्चन से तेंने अपने लाने भजन गवाए? तब बो उन हां छोड़के नगर के बायरें बैतनिय्याह हां गओ, और उतईं रात बिताई। भुनसारे नगर हां लौटती बेरा ऊहां भूख लगी। और गैल के मजारें एक अंजीर कौ पेड़ देख के ऊके ऐंगर गओ, पर पत्तन हां छोड़के कछु नईं मिलो तब ऊने कई, अब से तोमें कभऊं फल नईं लगें; अंजीर कौ पेड़ ओई घड़ी सूख गओ? जौ हेर के चेले अचरज में पड़के कैन लगे, जौ अंजीर कौ पेड़ तुरतईं कैसो सूख गओ? यीशु ने उन से कई, कि मैं तुम से सांची कहत आंव; कि अगर तुम भरोसा राखौ और शंका न करो; तो न केवल जौ कर हौ, जौन ई अंजीर के पेड़ के संग्गै करो गओ आय; वरन् ई पहरवा से कै हौ, कि उखड़ जा; और समुन्दर में चलो जा, तो जौ भी हो जै है। और जो कछु तुम प्रार्थना में भरोसा धर के मांग हौ बो तुम हां मिल जै है। जब बो मन्दर में आके सन्देस दे रओ हतो, तो महायाजकन और पुरनियन ने ऊके ऐंगर आके कई, कि तें जौ काम कौन अधकार से कर रओ आय? और कीने तोय जौ हक दओ आय? यीशु ने उन हां उत्तर दओ, मैं भी एक बात पूंछत आंव; अगर तुम मोय ऊको उत्तर दै हौ, तो मैं भी तुम हां बता हों; कि मैं की हक से जौ काम करत आंव। यूहन्ना कौ बपतिस्मा कौन की कोद से हतो, सरग की कोद से या मान्सन की कोद से? और बे आपस में सोचन लगे अगर हम कै हैं कि सरग की कोद से, तो बो हम से कै है, कि तुम ने ऊको भरोसा काय नईं करो? अगर हम कै हैं मान्सन की कोद से तो हम हां लोगबाग कौ डर आय; कायसे बे सब यूहन्ना हां आगमवकता मानत आंय। तब उन ने यीशु हां उत्तर दओ, हम नईं जानत; तो ऊने भी उन से कई, तो मैं भी तुम हां नईं बतात, कि जौ काम की हक से करत आंव। का तुम समजत आव? कोऊ मान्स के दो पूत हते; ऊने पेंला के ऐंगर जाके कई; बेटा जा आज दाख की बगिया में काम कर। और ऊने उत्तर दओ, मैं नईं जै हों, पर बाद में पछताबे पे गओ। फिन बाप ने दूसरे के ऐंगर जाके वैसई कई, ऊने उत्तर दओ, मैं जै हों, पर नईं गओ। इन दोई में से कीने बाप की मन की पूरी करी? उन ने कई, पेंला ने: यीशु ने उन से कई, मैं तुम से सांची कहत आंव, कि तुम से पेंला चुंगी लेबेवाले और बेड़नी परमेसुर के राज्य में जै हैं। कायसे यूहन्ना तुमाए ऐंगर धर्मी जीवन की गैल से आओ, और तुम ने ऊको भरोसा नईं करो: पर चुंगी लेबेवारन और वेश्याओं ने ऊको भरोसा करो: और जौ हेर के भी तुम हां पाछें पछतावा नईं भओ कि ऊको भरोसा कर लेते। एक और कनौत सुनो: एक मालक हतो, जीने दाख की बगिया लगाई; और ऊके चारऊं कोद बारी लगाई; ऊने ऊके भीतरै एक रसकुण्ड बनाओ; और एक मचान बनाओ; और ऊहां मजूरन हां ठेका पे दैके अन्त गांव चलो गओ। जब फसल की बेरा आई, तो ऊने अपने चाकरन हां मजूरन के ऐंगर फसल लेबे के लाने पठैव। पर मजूरन ने ऊके चाकरन हां पकड़ के, कौनऊं हां पीटो, कौनऊं हां मार डारो; और कौनऊं हां पत्थरा मारे। फिन ऊने और चाकरन हां पठैव, जौन पेंला से बिलात हते; और उन ने उन के संग्गै वैसई करो। अखीर में ऊने अपने पूत हां ई आसरे में उन के ऐंगर पठैव, कि बे मोरे पूत कौ मान राख हैं। पर जब मजूरन ने पूत हां देखो तो आपस में कई, जौ तो वारिस आय, आओ, हम ईहां मार डारें: और ई को हक छीन लेबें। और उन ने ऊहां पकड़ो और दाख की बगिया के बायरें काड़के मार डारो। ई लाने जब दाख की बारी कौ मालक आ है, तो उन मजूरन के संग्गै का कर है? उन ने ऊसे कई, बो उन दुष्टन हां बुरई तरहां नास कर है; और दाख की बगिया कौ ठेको दूसरे मजूरन हां दै है, जौन सही बेरा पे ऊको फल दै हैं। यीशु ने उन से कई, का तुम ने धर्म शास्त्र में कभऊं नईं पढ़ो, कि जी पत्थरा हां कारीगरन ने बेकार ठैराओ हतो, ओई कौने कौ पत्थरा बन गओ? जौ प्रभु की कोद से भओ, और हमाई नजर में बो अजूबा आय, ई लाने मैं तुम से कहत आंव, कि परमेसुर कौ राज्य तुम से लै लओ जै है; और ऐसी जात हां जौन ऊको फल लाए, दओ जै है। जो ई पत्थरा पे गिर है, बो चकनाचूर हो जै है: और जौन पे जौ गिर है, ऊहां पीस डार है। जब महायाजकन और फरीसियन ने ऊकी कनौत हां सुनो तो बे समझ गए, कि बो हमाए बारे में कह रओ आय। और उन ने ऊहां पकड़बो चाहो, तो बे भीड़ से डरा गए कायसे लोगबाग ऊहां आगमवकता मानत हते। यीशु फिन उन से कनौत में कहन लगे। सरग के राज्य की तुलना ऊ राजा से करी जा सकत आय, जीने अपने पूत कौ ब्याव करो। ऊने नेवताहारियन हां बुलऊआ करबे के लाने अपने चाकर पठैय; परन्त उन ने आबो नईं चाहो। फिन ऊने दूसरे चाकर हां जौ कहके पठैव, नेवताहारियन से कईयो, हेरो; मैं भोजन तईयार कर चुको आंव, मोरे बैल और पले भए ढोर मारे गए आंय: और सब कछु तईयार आय; ब्याव के भोज में आओ। पर उन ने कोऊ ध्यान नईं दओ: कोई अपने खेत हां, कोई अपने धन्धे हां। और बचे भए लोगन ने ऊके चाकरन हां पकड़ो और उन से बुरओ बरताव करके उन हां मार डारो। तब राजा खुन्सया गओ, और अपनी पलटन पठैई और उन हत्यारन हां मार डारो, और उन के नगर में आगी लगवा दई। तब ऊने अपने चाकरन से कई, ब्याव कौ भोज तईयार आय, पर नेवताहारी ठीक नईं कड़े। ई लाने चौगड्डा पे जाओ, और जितेक जनें तुम हां मिलें, सब हां ब्याव के भोज में टेर लियाव। तब उन चाकरन ने गलियन में जाके जौन भी भलो या बुरओ उन हां मिलो, सब हां इकट्ठो करो; और ब्याव कौ घर जेवनहारों से भर गओ। जब राजा जेवनहारों हां देखबे भीतर आओ; तो ऊने उते एक मान्स हां तको, जौन ब्याव कौ उन्ना नईं पैरे हतो। ऊने ऊसे कई, हे मित्र, तें इते ब्याव कौ उन्ना पहिने बिना कैसे आ गओ? बो कछु नईं कह पाओ। तब राजा ने अपने चाकरन से कई, ऊके हाथ और गोड़े बांध के ऊहां बायरें अन्धयारे में डार दो, उते रोबो, और दांत पीसबो हुईये। कायसे बुलाए भए तो बिलात पर चुने भए तनक से आंय। तब फरीसियन ने जाके आपस में विचार करो, कि ऊहां की तरहां बातन में फंसाएं। ई लाने उन ने अपने चेलन हां हेरोदियन के संग्गै ऊके ऐंगर जौ कहबे हां पठैव, कि हे गुरू; हम जानत आंय, कि तें सच्चो आय; और परमेसुर की गैल सच्चाई से सिखात आय; और कोऊ की परवाह नईं करत, कायसे तें मों हेरी बात नईं करत। ई लाने हम हां बता कि तें का समजत आय? कैसर हां चुंगी देबो सही आय, या नईं? यीशु ने उन कौ छल जानके कई, हे कपटियो; तुम मोय काय परखत आव? मोय बो सिक्का दिखाओ: जीसे चुंगी चुकाई जात आय, तब बे ऊके ऐंगर एक दीनार ले आए। ऊने उन से कई, जा मूरत और नाओं की कौ आय? उन ने ऊसे कई, कैसर कौ; तब ऊने उन से कई; जौन कैसर कौ आय, बो कैसर हां देओ; और जौन परमेसुर कौ आय, बो परमेसुर हां देओ। जौ सुनके बे अचरज में पड़ गए, और ऊहां छोड़ के चले गए। ओई दिना कछु सदूकी ऊके ऐंगर आए, जो कहत आंय कि मरे भयन कौ जी जाबो हैई नईंयां, और ऊसे पूछन लगे। कि हे गुरू; मूसा ने कई हती, अगर कोऊ मन्सेलू बिना बच्चा पैदा करे मर जाए, तो ऊको भईया ऊकी घरवारी से ब्याव करके, अपने भईया के लाने वंस पैदा करे। हमाए इते सात भईया हते; पेंला ब्याव करके मर गओ; और बच्चा न होबे पे अपनी घरवारी हां अपने भईया के लाने छोड़ गओ। ऐई तरहां दूसरे और तीसरे ने भी करो, और सातवें लों जौई भओ। और आखरी में बा बईयर सोई मर गई। ई लाने मरे भयन में से जी जाबे पे, बो उन सातई में से कौन की घरवारी हुईये? कायसे बो तो सबई की घरवारी बनी रई। यीशु ने उन हां उत्तर दओ, तुम बिलोरा में पड़ गए आव; कायसे तुम धर्मशास्त्र और परमेसुर की शक्ति हां नईं चीनत। कायसे मरे भयन के जी जाबे पे ब्याव शादी नईं हुईये; पर बे सरग में परमेसुर के दूतन घांई हुईयें। का मरे भयन के फिन से जी जाबे के बारे में तुम ने जौ बचन नईं पढ़ो, जौन परमेसुर ने तुम से कई। कि मैं इब्राहीम कौ परमेसुर, और इसहाक कौ परमेसुर, और याकूब कौ परमेसुर आंव? बो तो मरे भयन कौ नईं, परन्त जियत वारन कौ परमेसुर आय। जब लोगन ने जा सुनी तो बे ऊके बोल से अचरज में पड़ गए। जब फरीसियन ने सुनी, कि ऊने सदूकियन कौ मों बन्द कर दओ; तो बे जुरे। और उन में से एक जौन मुखिया हतो परखबे के लाने, ऊसे सवाल करो। हे गुरू; रीतियन में कौन सी आज्ञा बड़ी आय? ऊने ऊसे कई, तें परमेसुर अपने पिरभू से अपने सारे मन और अपने सारे प्राण और अपनी सारी बुद्धि से प्रेम कर। बड़ी और सही आज्ञा तो जाई आय। और ऐई तरहां दूसरी भी आय, कि तें अपने पड़ोसी से अपने समान प्रेम कर। जेई दो आज्ञाएं सारी रीतियन और आगमवकतन कौ आधार आय। जब फरीसी जमा हते, तब यीशु ने उन से पूंछो। कि मसीह के बारे में तुम का समजत आव? बो कौन को पूत आय? उन ने ऊसे कई, दाऊद कौ। ऊने उन से कई, तब दाऊद आत्मा में होकें ऊहां पिरभू काय कहत आय? कि प्रभु ने, मोरे पिरभू से कई; मोरे दांयने बैठ, जब लों मैं तोरे बैरियन हां तोरे चरन के नेंचें न कर देंओं? अगर, दाऊद ऊहां पिरभू कैत आय, तो बो ऊको पूत कैसे भओ? ऊके उत्तर में कोऊ भी ऊहां कछु उत्तर नईं दे पाओ; और ऊ दिना से कोऊहां ऊसे और कछु पूंछबे की हिम्मत नईं भई। तब यीशु ने भीड़ और अपने चेलन से कई। शास्त्री और फरीसी मूसा की गद्दी पे बैठे आंय। ई लाने जो कछु बे तुम से कएं ऊहां करियो, और मानियो; पर उन के जैसे काम न करियो; कायसे बे कहत तो आंय पर करत नईंयां। बे भारी बोझा बान्ध के मान्सन के कंधा पे तो लदवा देत आंय; पर खुद उन हां अपनी उंगरियन से छूबो नईं चाहत। बे अपने सब काम मान्सन हां दिखाबे के लाने करत आंय: बे अपने ताबीजन हां चौंड़ो करत, और अपने उन्ना की कोरे लम्बी करत आंय। और जेवनारों में ऊं ची जांगा और प्रार्थना घरन में मुख्य आसन। और बाजारों में मान सम्मान और लोगन से गुरू कहलाबो उन हां, पुसात आय। पर तुम गुरू न कहलाईयो; कायसे तुमाओ एकई गुरू आय: और तुम सब भईया आव। और धरती पे कोऊहां अपनो बाप न कहियो, कायसे तुमाओ एकई बाप आय, जौन सरग में आय। और मुखिया भी न कहलाईयो, कायसे तुमाओ एकई मुखिया आय, यानि मसीह। जौन तुम में बड़ो होबै, बो तुमाओ चाकर बनै। जौन कोऊ अपने हां बड़ो बना है, बो हल्को करो जै है: और जौन अपने हां हल्को बना है, बो बड़ो करो जै है। हे कपटी शास्त्रियो और फरीसियो तुम पे श्राप! कायसे तुम मान्सन के विरोध में सरग के राज्य कौ द्वार बन्द कर देत आव, तुम न तो खुद जात आव और न जाबे वारन हां भीतर जान देत आव। हे ढोंगी शास्त्रियो और फरीसियो तुम पे श्राप! कायसे दिखाबे के लाने देरी लों प्रार्थना करत भए भी तुम बिधवाओं के घरन हां खा जात आव, ई लाने तुम हां भारी दण्ड मिल है। हे कपटी शास्त्रियो और फरीसियो तुम पे श्राप! तुम एक मान्स हां अपनी कोद लाबे के लाने पानू और धरती में फिरत आव, और जब बो आ जात आय, तो ऊहां अपने से दूनो बुरओ बना देत आव। हे अन्धरे मुखियो, तुम पे श्राप, जौन कैत आव अगर कोऊ मन्दर की कौल खाबै तो कछु नईं, पर जदि कोऊ मन्दर के सोने की कौल खाबै तो ऊसे बन्ध जै है। हे मूरखो, और अन्धरो, को बड़ो आय, सोना या बो मन्दर जीसे सोना शुद्ध होत आय? फिन कहत आव अगर कोऊ बेदी की कौल खै है, तो बो बन्ध जै है। हे अन्‍धो, को बड़ो आय, चढ़ावा या बेदी: जीसे चढ़ावा शुद्ध होत आय? ई लाने जौन बेदी की कौल खात आय, बो बेदी और ऊपे धरो चढ़ावा दोई की कौल खात आय। और जौन मन्दर कौ कौल खात आय, बो मन्दर और ऊमें रहबेवारे की कौल खात आय। और जौन सरग की कौल खात आय, बो परमेसुर के सिंहासन और ऊपे बैठवेवारे दोई की कौल खात आय। हे कपटी शास्त्रियो, और फरीसियो, तुम पे श्राप; तुम पौदीना, सौंफ और जीरे कौ दसवों हिस्सा तो देव आव, पर रीतियन की गूढ़ बातन यानि न्याव, और दया, और भरोसा हां छोड़ दओ आय; तुम इन बातन हां करत भए, दूसरी बातन को भी मानत रैते। हे अन्धरे मुखियो, तुम मच्छरन हां तो छान डारत आव, पर ऊंट हां निगल जात आव। हे कपटी शास्त्रियो, और फरीसियो, तुम पे श्राप, तुम कटोरे और टाठियन हां बायरें से तो मांजत आव, पर भीतर से बे हर तरहां की बुराईयन और छल से भरे भए आंय। हे अन्धरे फरीसी, पेंला कटोरे और थालियन हां भीतर से मांजो जीसे बे बायरें से शुद्ध हो जाबें। हे कपटी शास्त्रियो, और फरीसियो, तुम पे श्राप; तुम चूने की पुती भई कबरन जैसे आव जौन ऊपरें से तो बढिया दिखाई देत आंय, पर भीतरें मुरदन की हडि्डयन और सब तरहां की गन्दगी से भरी पड़ी आंय। ऐसई तुम मान्सन हां ऊपरें से तो धर्मी दिखाई देत आव, पर भीतरें से ढोंग और अधर्म से भरे भए आव। हे कपटी शास्त्रियो, और फरीसियो, तुम पे श्राप; तुम आगमवकतन की कबरें तो संवारत और धर्मियन की कबरें बनात आव। और कहत आव, अगर हम अपने पुरखन के दिनन में होते तो आगमवकतन की हत्या में उन के संग्गै न होते। ई लाने तो तुम अपने बिरोध में गवाही देत आव, कि आगमवकतन के हत्यारों के वंस के आव। तुम अपने बाप दादन के पाप कौ घैला भर दो। हे सांपो, और करैत के सपोलो, तुम नरक के दण्ड से कैसे बच पा हौ? ई लाने हेरो, मैं तुमाए ऐंगरे आगमवकतन और ज्ञानियन और शास्त्रियन हां पठैत आंव; और तुम उन में से कितनन की हत्या कर हौ, और क्रूस पे चढ़ा हौ; और कितनन हां अपने प्रार्थना घरन में कोड़ा मार हौ, और एक नगर से दूसरे नगर खदेड़त फिर हौ। कि जितेक धर्मियन कौ खून धरती पे बहाओ गओ आय, बो तुमाए मूड़ पे पड़ है, यानि धर्मी हाबिल से लैके बिरिक्याह के पूत जकरयाह लौ, जीहां तुम ने मन्दर और बेदी के बीच में मार डारो हतो। मैं तुम से सांची कैत हों, कि जे सब बातें ई पीढ़ी के लोगन पे आ पड़ हैं। हे यरूशलेम, हे यरूशलेम; तें जो आगमवकतन हां मार डारत आय, और जौन तोरे ऐंगर पठैय गए, उन कौ पत्थरवाह करत आय, मैं ने कितेक बेर चाहो कि जैसे मुर्गी अपने बच्चन हां अपने पंखन तरें इकट्ठो कर लेत आय, वैसई मैं भी तोरे बच्चन हां इकट्ठो करों, पर तुम ने न चाहो। तको, तुमाओ घर तुमाए लाने उजड़ो छोड़ो जात आय। कायसे मैं तुम से कहत आंव, कि अब से जब तक तुम न कै हौ, कि धन्य आय बो, जो प्रभु के नाओं से आत आय, तब लौ तुम मोय फिन कभऊं न हेर हौ। जब यीशु मन्दर से कड़ के जा रओ हतो, तो ऊके चेले मन्दर हां दिखाबे ऊके ऐंगर आए। तब ऊने उन से कई, का तुम जे सब नईं हेरत? मैं तुम से सांची कैत हों, इते एक पत्थरा के ऊपरै दूसरो पत्थरा जुड़ो न रै है, जौन गिराओ न जै है। जब बो जैतून पहरवा पे बैठो हतो, तो ऊके चेले आके ऊसे कैन लगे, हम हां बता की जे बातें कबै हुईयें? और तोरे आबे की, और ई जुग के अन्त की का चिन्हार हुईये? ईपे यीशु ने उत्तर दओ, खबरदार रहियो! कोऊ तुम हां न भरमाने पाबै। कायसे बिलात जनें मोरे नाओं से जौ कहत आ हैं, कि मैं मसीह आंव: और बिलातन हां भरमा हैं। तुम लड़ाईयन और लड़ाईयन की खबर सुन हौ; तको डरियो नईं कायसे इन कौ होबो जरूरी आय, पर ऊ बेरा अन्त न हुईये। कायसे जात पे जात और राज्य पे राज्य चढ़ाई कर है, और बिलात जांगा पे काल पड़ हैं, और भुईडोल हुईंयें। जे सब बातें पीड़ाओं की शुरूआत हुईयें। तब बे सताबे के लाने तुम हां पकरवा हैं, और तुम हां मार डार हैं और मोरे नाओं के काजें सब जातें तुम से अदावट राख हैं। उन दिना में बिलात लोग ठोकर खा हैं, और एक दूसरे हां पकड़वा हैं, और एक दूसरे से बैर राख हैं। और बिलात लबरे आगमवकता हुईंयें, और बिलातन हां भरमा हैं। अधर्म बढ़बे से बिलातन कौ प्रेम जुड़ा जै है। पर जौन अन्त लौ धीरज धरे रै हैं, ओई कौ उद्धार हुईये। राज्य कौ जौ सन्देसो सबरे जगत में प्रचार करो जै है, कि सब जातियन पे गवाही होए, तब अन्त आ जै है। ई लाने जब तुम ऊ उजाड़बेवारी गन्दी बस्त हां जी की चरचा दानिय्येल आगमवकता के द्वारा करी गई हती, पवित्र जांगा में ठांडी तको, (पढ़बेवाले जान लें)। तब जौन यहूदिया में होबें बे पहरवन पे भग जाबें। जौन घर की छत पे होबें, बे घर में से कछु लैबे के लाने खालें न उतरें। और जौन खेतन में होबें, बो अपने उन्ना लैबे के लाने पाछें न लौटें। उन के लाने हाय, जौन उन दिना पेट से हुईयें और जौन दूध पिलात हुईयें। बिनती करियो; कि तुम हां जाड़े के दिना या सब्त के दिना में भागने न पड़े। कायसे ऊ बेरा ऐसी भारी पीड़ा हुईये, जैसो न तो जगत के शुरू से अब लौ भओ, और न कभऊं हुईये। और अगर बे दिना घटाए न जाते, तो एकऊ प्राणी नईं बचतो; पर चुने भयन के काजें बे दिना घटा दए जै हैं। तब अगर कोऊ तुम से कै है, कि तको, मसीह इते आय! या बो उते आय तो न मानियो। कायसे लबरे मसीह और लबरे आगमवकता उठ ठांड़े हुईयें, और बड़े चिन्ह, और अचम्भे के काम दिखा हैं, इते लौ कि अगर उन कौ बस चलो तो चुने भयन हां भरमा दें हैं। तको, मैं ने पेंलई तुम हां बता दओ आय। ई लाने अगर कोऊ तुम से कैबे, कि बो हार में आय, तो बायरें न कड़ जईयो; तको, बो कुठरियन में आय, तो भरोसा न करियो। कायसे जैसे बिजली पूरब से कड़के पच्‍छिम लौ चमकत आय, ऊंसई मान्स के पूत कौ भी आबो हुईये। जिते लाश होबै, उतईं गिद्ध भी जुड़ हैं। ऊ दिना की पीड़ा के तुरतईं बाद सूरज अन्धयारो हो जै है, और चांद अपनो उजयारो न दै है, और आकास के तारे गिर पड़ हैं, और आकास की सक्तियां हिलाई जै हैं। तब मान्स के पूत की चिन्हार आकास में दिखाई दै है, और धरती की सब जातन के लोग छाती पीट हैं; और लोगबाग मान्स के पूत हां बड़े ठाठ बाट और बल के संग्गै आकास के बादरन पे आत हेर हैं। और बो तुरही की तेज आवाज के संग्गै अपने सरगदूतन हां पठै है, और बे चारऊं दिसा से आकास के एक छोर से लैके दूसरे छोर लौ, ऊके चुने भयन हां इकट्ठे कर हैं। अंजीर के पेड़ से जा कनौत सीखो: जब ऊकी डाल कोंरी हो जात और ऊमें कोंपलें कड़न लगत आंय, तो तुम जान लेत आव, कि गरमी की रितु ऐंगर आय। ऐई तरहां जब तुम इन सब बातन हां होत तकी, तो जान लईयो, कि बो ऐंगर आय, परन्त द्वारई पे आय। मैं तुम से सांची कहत आंव, कि जब लौ जे सबरी बातें पूरी न हो जाबें, ई पीढ़ी कौ अन्त न हुईये। आकास और धरती टल जै हैं, पर मोरी बातें कभऊं न टल हैं। ऊ दिन या ऊ घड़ी के बारे में कोऊ नईं जानत; न तो सरग के दूत, और न पूत, पर केवल बाप। मान्स के पूत कौ आबो, ठीक नूह के दिना के समान हुईये। कायसे पानी की बाढ़ के पेंला के दिना में, जी दिना लौ नूह जहाज में न चढ़ो, ऊ दिना लौ लोग खात पीयत रए और उन में ब्याव शादी होत हतीं। और जब लौ पानू की बाढ़ उन हां बहा न लै गई, तब लौ उन हां कछु भी सुर्त न भई; ओई तरहां मान्स के पूत कौ आबो भी हुईये। ऊ बेरा दो मान्स खेत में हुईयें, एक लै लओ जै है और दूसरो छोड़ दओ जै है। दो बईयरन चकिया पीसत हुईयें, एक लै लई जै है और दूसरी छोड़ दई जै है। ई लाने जागत रहियो, कायसे तुम नईं जानत कि तुमाओ प्रभु की दिना आ है। पर जौ सही मानो कि अगर घर के मालक हां पता होतो कि भड़या रात में की बेरा आ है, तो बो जागत रैतो; और अपने घरै सेंध नईं लगन देतो। ई लाने तुम भी तईयार रहौ, मान्स कौ पूत ऊ बेरा आ जै है, जी बेरा के लाने तुम सोचत भी नईयां। ऐसो भरोसे वारो और समझदार चाकर को आय, जीहां ऊको मालक चाकरन के ऊपरै हाकिम धरै, कि सही बेरा पे उन हां खाबे हां दे। धन्य आय, बो चाकर, जीकौ मालक आके ऊहां ऐसो ही करत पाबै। मैं तुम से सांची कहत आंव; कि बो ऊहां अपनी सबरी जाजाद पे हाकिम ठहरा है। पर जदि बो दुष्ट चाकर सोचे, कि मोरे मालक के आबे में अबै अबेर आय। और अपने संगी चाकरन हां मारन लगे, और दारू खोरन के संग्गै खान पीयन लगे। तब ऊ चाकर कौ मालक एैसई दिना आ है, जब बो ऊके आबे की आस नईं करत होबै। और एैसई बेरा जीहां बो जानत होबै, तब बो ऊहां कड़ो दण्ड दैके, और कपटियन के संग्गै ऊहां डार दै है, उते रोबो और दांत पीसबो हुईये। तब सरग कौ राज्य उन दस कुंवारियन जैसो हुईये, जौन अपनी मशालें लैके दूल्हे से मिलबे हां कड़ीं। उन में से पांच मूरख और पांच समजदार हतीं। कायसे मूरखन ने अपनी मशालें तो लईं, पर अपने संग्गै तेल नईं लओ। पर समजदारन ने अपनी मशालों के संग्गै कुप्पियन में तेल भी भर लओ। जब दूल्हे के आबे में देरी हो गई, तो बे सब ऊं घन लगीं और सो गईं। आधी रात में हल्ला मचो, कि तको, दूल्हा आ रओ आय, ऊसे मिलबे हां चलो। तब बे सब कुंवारियां उठ के अपनी अपनी मशालें ठीक करन लगीं। और मूरखन ने समजदारन से कई, हम हां भी अपने तेल में से कछु देओ, कायसे हमाई मशालें बुझबे पे आंय। पर समजदारन ने उत्तर दओ, नईं, जे हमाए लाने और तुमाए लाने पूरो न हुईये, भलो आय कि तुम बैंचबे वारन के ऐंगर जाके अपने लाने मोल लै लेओ। जब बे मोल लेबे हां चली गईं, तो दूल्हा आ गओ, और जौन तईयार हतीं, बे उन के संग्गै ब्याव के घर में चली गईं और द्वार बन्द कर दओ गओ। ईके पाछें बे दूसरी कुंवारियां सोई आके कैन लगीं, हे मालक, हे मालक, हमाए लाने द्वार खोल देओ। ऊने उत्तर दओ, कि मैं तुम से सांची कहत आंव, मैं तुम हां नईं चीनत। ई लाने जागत रहियो, कायसे तुम न तो ऊ दिन हां जानत आंव, और न ऊ बेरा हां। कायसे जा ऊ मान्स की सी दसा आय, जीने परदेस जाती बेरा अपने चाकरन हां टेर के, अपनी जाजाद उन हां सौंप दईं। ऊने एक हां पांच रुपईया, दूसरे हां दो, और तीसरे हां एक; यानि हर एक हां ऊकी हैसियत के जैसो दओ, और तब परदेस हां चलो गओ। जीहां पांच रुपईया मिले हते, ऊने तुरतईं जाके उन से धन्धा करो और पांच रुपईया और कमाए। ऐई तरहां जीहां दो रुपईया मिले हते, ऊने सोई दो और कमाए। पर जीहां एक मिलो हतो, ऊने जाके मिट्टी खोदी, और अपने मालक कौ रुपईया ऊमें गाड़ दओ। बिलात दिना के पाछें उन चाकरन कौ मालक आओ और उन से हिसाब लैन लगो। तब जीहां पांच रुपईया मिले हते, ऊने पांच रुपईया और लाके कहो; हे मालक, तेंने मोय पांच रुपईया दए हते, हेर, मैं ने इन से पांच रुपईया और कमाए आंय। ऊके मालक ने ऊसे कई, हे भले और भरोसेमन्द चाकर, तें तनक में भरोसेमन्द रओ; मैं तोय बिलात बस्तन कौ हाकिम बना हों अपने मालक की खुसी में सामिल हो। और जीहां दो रुपईया मिले हते, ऊने भी आके कई; हे मालक, तेंने मोय दो रुपईया दए हते, हेर, मैं ने दो और कमाए आंय। ऊके मालक ने ऊसे कई, हे भले और भरोसेमन्द चाकर, तें तनक में भरोसेमन्द रओ; मैं तोय बिलात बस्तन कौ हाकिम बना हों अपने मालक की खुसी में सामिल हो। तब जीहां एक रुपईया मिलो हतो, ऊ ने आके कई; हे मालक, मैं जानत हतो, कि तें कड़ो मान्स आय: तें जिते नईं बोत उते काटत आय, और जिते नईं डारत उते से बटोरत आय। ई लाने मैं डरा गओ और जाके मैं ने रुपईया मिट्टी में लुका दओ; हेर, जौन तोरो रुपईया आय, ऊ जौ आय। मगर ऊके मालक ने ऊहां उत्तर दओ, हे दुष्ट और आलसी चाकर; जब तें जौ जानत हतो, कि जिते मैं नईं बोत उते से काटत आंव; और जिते मैं नईं डारत उते से बटोरत आंव। तब तें ऐसो करतो, कि मोरो धन साहूकारन के ऐंगर धर देतो, जीसे कि मैं आके अपनो धन सूद के संग्गै ऊसे ले लेतो। ई लाने ईसे बो रुपईया लै लेओ, और जी के ऐंगर दस रुपईया आंय, ऊहां दै दो। कायसे, जीके ऐंगर आय, ऊहां और दओ जै है; और ऊके ऐंगर बिलात हो जै है: पर जीके ऐंगर नईंयां, ऊसे बो भी लै लओ जै है, जौन ऊके ऐंगर आय। और ई आलसी चाकर हां बायरें के अन्धयारे में डार दो, जिते रोबो और दांत पीसबो हुईये। जब मान्स कौ पूत अपनी मईमा में आ है, और सब सरगदूत ऊके संग्गै आ हैं तो बो अपनी मईमा के सिंहासन पर बिराज है। और सब जातियन के जने ऊके सामूं इकट्ठे करे जै हैं; और जैसो गड़रिया, गाड़रन हां छिरियन से नबेर देत आय, वैसई बो उन हां एक दूसरे से नबेर है। और बो गाड़रन हां अपनी दाहिनी कोद और छिरियन हां बांई कोद ठांड़ी कर है। तब राजा अपनी दाहिनी कोद वारन से कै है, हे मोरे बाप के धन्य मान्सन, आओ, ऊ राज्य के अधकारी हो जाओ, जो संसार के पेंला से तुमाए लाने तईयार करो भओ आय। कायसे मैं भूखो हतो, और तुम ने मोय खैबे हां दओ; मैं पियासो हतो, और तुम ने मोय पानू पिलाओ, मैं परदेसी हतो और तुम ने मोय अपने घरै ठहराओ। मैं नंगो हतो, तुम ने मोय उन्ना पैराए; मैं बीमार हतो, तुम ने मोरी सुधी लई, मैं जेहल में हतो, तुम मोय से मिलबे आए। तब धर्मी ऊहां उत्तर दै हैं कि हे पिरभू, हम ने तोय कबै भूखो तको और खाबे हां दओ? या पियासो तको, और पानू पिलाओ? और हम ने कबै तोय परदेसी जानो और अपने घर में धरो या नंगो तको, और उन्ना पैराए? हम ने कबै तोय बीमार या जेहल खाने में तको और तोसे मिलबे आए? तब राजा उन हां उत्तर दै है, मैं तुम से सांची कहत आंव, कि जौन कछु तुम ने मोरे इन हल्के भईयन में से कोऊ एक के संग्गै करो, बो मोरे संग्गै करो। तब बो बांई कोद वारन से कै है, हे श्रापित लोगो, मोय से दूर होकें ऊ अनन्त आगी में जा पड़ो, जौन शैतान और ऊके दूतन के लाने तईयार करी गई आय। कायसे मैं भूखो हतो, और तुम ने मोय कछु खाबे हां नईं दओ, मैं पियासो हतो, और तुम ने मोय पानू नईं पियाओ। मैं परदेसी हतो, और तुम ने मोय अपने घर में नईं ठहराओ; मैं नंगो हतो, और तुम ने मोय उन्ना नईं पैराए; बीमार और जेलखाने में हतो, और तुम ने मोरी खबर नईं लई। तब बे उत्तर दै हैं, कि हे पिरभू, हम ने कबै तोय भूखो, या पियासो, या परदेसी, या नंगो, या बीमार, या जेलखाने में तको, और तोरी सेवा नईं करी? तब बो उन हां उत्तर दै है, मैं तुम से सांची कहत आंव कि जौन तुम ने इन हल्के से हल्कन में से कोऊ एक के संग्गै नईं करो, बो मोरे संग्गै भी नईं करो। जे लोग अनन्त दण्ड भोग हैं, पर धर्मी अनन्त जीवन में जै हैं। जब यीशु जे सब बातन हां कह चुको, तो अपने चेलन से कैन लगो। तुम जानत आव, कि दो दिना के बाद फसह कौ पर्व आ रओ आय; और मान्स कौ पूत क्रूस पे चढ़ाए जाबे के लाने पकड़वाओ जै है। तब महायाजक और लोगन के बड़े बूढ़े, कइफा नाओं के बड़े महायाजक के आंगन में जुड़े। और उन ने आपस में यीशु हां मसकईं पकड़बे और मार डारबे की साजिस रची। पर बे कहत हते, पर्व की बेरा नईं; कहूं ऐसो न होय कि लोगन में दंगा हो जाए। जब यीशु बैतनिय्याह में शमौन कोढ़ी के घरै हतो। तो एक बईयर संगमरमर के बासन में कीमती इतर लैके ऊके ऐंगर आई, और जब बो खाबे हां बैठो हतो, तो ऊके मूंड़ पे उड़ेल दओ। जौ हेर के, ऊके चेले रिसयाए और कहन लगे, जा बरबादी काय? ईहां ऊंचे दाम में बेंच के गरीबन हां पईसा दओ जा सकत हतो। जा जानके यीशु ने उन से कई, तुम ई बईयर हां काय सतात आव? ऊने मोरे संग्गै भलाई करी आय? गरीब तो तुमाए संग्गै सदा रैत आंय, पर मैं तुमाए संग्गै सदा न रै हों? जब ऊने मोरे सरीर पे जौ इतर उड़ेलो, बो मोरे गाड़े जाबे के लाने करो आय। मैं तुम से सांची कैत हों, कि सबरे संसारी में जिते कहूं जौ सन्देसो प्रचार करो जै है, उते ऊके ई काज की चरचा सोई ऊकी याद में करी जै है। तब बारह में से एक, जी को नाओं यहूदा इस्करियोती हतो, महायाजकन के ऐंगर जाके ऊने कई। अगर मैं यीशु हां तुमाए हाथन पकड़वा देंओं, तो मोय का दै हौ? उन ने ऊहां चांदी के तीस सिक्का तौल के दे दए। और बो ऊहां पकड़वाबे के लाने सही मौका ढूंड़न लगो। फिन चेले अखमीरी रोटी के त्योहार के पेंले दिना, यीशु के ऐंगर आके पूंछन लगे; तें किते चाहत आय कि हम तोरे लाने फसह की तईयारी करें? ऊने कई, नगर में फलाने जन के ऐंगर जाके ऊसे कईयो, गुरू कैत आय, मोरी बेरा ऐंगर आय, मैं अपने चेलन के संग्गै तोरे इते फसह कौ त्योहार मना हों। तब यीशु के हुकुम के अन्सर चेलन ने फसह की तईयारी करी। जब संजा भई, तो बो बारह चेलन के संग्गै ब्यारी करबे बैठो। जब बे ब्यारी कर रए हते, तो ऊने कई, मैं तुम से सांची कहत आंव, कि तुम में से एक मोय पकड़वा है। ई पे बे सब बिलात दुखी भए, और एक एक करके ऊसे पूंछन लगे, हे गुरु, का बो मैं आंव? ऊने कई, कि जीने मोरे संग्गै टाठी में हाथ डारो आय, ओई मोय पकड़वा है। मान्स के पूत हां तो जैसो ऊके लाने लिखो गओ है, जातई है; पर हाय ऊपै, जी के द्वारा मान्स कौ पूत पकड़वाओ जै है: ऊ मान्स के लाने भलो होतो, कि ऊ को जन्म नईं होतो। तब ऊके पकड़वाबे वाले यहूदा ने कई हे रब्बी, का बो मैं आंव? ऊने कई, तेंने खुद कह दई। जब बे ब्यारी कर रए हते, तो यीशु ने रोटी लई, और आशीष मांग के तोड़ी, और चेलन हां दैके कई, लेओ खाओ; जा मोरी देह आय। फिन ऊने कटोरा लैके, धन्यवाद करो, और उन हां देत भए कई, तुम सब ई में से पियो। कायसे जे कौल कौ मोरो बो रकत आय, जौन बिलात लोगन के लाने पापन की छमा के लाने बहाओ जात आय। मैं तुम से कैत आंव, कि दाख को जौ रस अबै से लैके ऊ दिना लौ नईं पी हों, जब लौ अपने बाप के राज्य मैं तुमाए संग्गै नओ न पिओं। फिन भजन गाबे के बाद बे पहरवा पे चले गए। तब यीशु ने उन से कई; आज रात तुम सब मोरे काजें ठोकर खै हौ; कायसे लिखो आय, मैं चरवाहे हां मार हों; और हेड़ की गाड़रें इते उते हो जै हैं। पर जी जाबे के बाद मैं तुम से पेंला गलील हां जै हों। ई पे पतरस ने ऊसे कई, जदि सबरे तोरे काजें ठोकर खाएं तो खाएं, पर मैं कभऊं नईं खै हों। यीशु ने उन से कई, मैं तोसे सांची कहत आंव, कि आजई रात हां मुरगा की बांग देबे से पेंला, तें तीन बेर मोरो इनकर कर है। पतरस ने ऊसे कई, जदि मोय तोरे संग्गै मरने भी पड़े, तो भी मैं तोसे न मेंट हों: और सब चेलन ने भी जाई बात कई। तब यीशु उन के संग्गै गतसमनी नाओं की जांगह में आओ और ऊने अपने चेलन से कई, जब लौ मैं उते जाके प्रार्थना करत आंव, तुम इतईं बैठे रहियो। और अपने संग्गै पतरस और जब्दी के दोई पूतन हां ले गओ, और दुखी और बेचैन होन लगो। फिन ऊने उन से कई; मोरो मन बिलात उदास आय, इते लौ कि मैं मरबे पे आंव: तुम इतईं रुकियो, और मोरे संग्गै जगत रहियो। फिन बो उन से तनक आंगू बढ़ो और मों के बल गिरो, और जा बिनती करन लगो, ओ मोरे बाप, जदि हो सकत आय, तो जौ कटोरा मोय से टल जाबै; फिन भी मोरी नईं, पर तोरी मनसा पूरी होय। फिन बो चेलन के ऐंगर आओ और उन हां सोऊत पाओ, ऊने पतरस से कई; का तुम लोग मोरे संग्गै एक घड़ी लौ नईं जग पाए? जागत रहियो, और प्रार्थना करत रहियो, कि तुम परीक्षा में नईं पड़ो: आत्मा तो तईयार आय, पर सरीर दुरबल आय। फिन ऊने दूसरी बेर जाके जा बिनती करी; ओ मोरे बाप, अगर जौ मोरे पिये बगैर नईं टल सकत तो तोरी मनसा पूरी होबै। तब ऊने आके उन हां फिन सोत पाओ, कायसे उन की आंख नींद में डूबी हतीं। बो उन हां फिन छोड़के चलो गओ, और ओई बात कह के तीसरी बेर बिनती करन लगो। फिन ऊने चेलन के ऐंगर आके उन से कई; अब सोत रओ, और सुस्तात रओ: तको, घड़ी आ गई आय, और मान्स कौ पूत पापियन के हाथन पकड़वाओ जात आय। उठो, चलौ; तको, मोरो पकड़वाबे वालो ऐंगर आ गओ आय। जब बो जौ कैई रओ हतो, तो हेरो, यहूदा जौन बारह चेलन में से एक हतो, आओ, और ऊके संग्गै तलवारें और लठियां लए भए एक बड़ी भीड़ आई, जीहां महायाजकन और लोगन के पुरनियन ने पठैव हतो। पकड़वाबे वाले ने उन हां जौ कहके इसारो दओ हतो जीहां मैं चूमों ओई आय; ऊहां पकड़ लईयो। और तुरतईं यीशु के ऐंगर आके बोलो; ओ रब्बी परनाम; और ऊहां खूब चूमो। यीशु ने ऊसे कई; हे मित्र, जौन काज के लाने तें आओ आय, ऊहां कर ले। तब उन ने ऐंगर आके यीशु हां पकड़ लओ। हेरो, यीशु के संगियन में से एक ने तलबार काड़ लई, और महायाजकन के चाकर पे चला दई और ऊको कान उड़ा दओ। तब यीशु ने ऊसे कई; अपनी तलवार काठी में धर ले कायसे जौन तलवार चलात आंय, बे सब तलवार से मारे जै हैं। का तें नईं समजत, कि मैं अपने बाप से बिनती कर सकत आंव, और बो तुरतईं सरगदूतन की सैना हां पठै दै है? पर तब धर्मशास्त्र कौ लिखो कैसो पूरो हुईये, कि एैसई होबो जरूरी आय? तब यीशु ने भीड़ से कई; का तुम तलवारें और लठियां लए मोय डाकू के समान पकड़बे आए आव? मैं रोजीना मन्दर में बैठ के सन्देसो दओ करत हतो, और तुम ने मोय नईं पकड़ो। पर जौ सब ई लाने भओ आय, कि आगमवकतन कौ लिखो पूरो होबै। तब सब चेले ऊहां छोड़ के भग गए। जिन ने यीशु हां पकड़ो हतो, बे ऊहां महायाजक काइफा के ऐंगर लै गए, जिते शास्त्री और पुरनिए जमा हते। पतरस भी कछु दूरी पे ऊके पाछें पाछें निंग के महायाजक के आंगन लौ पोंचो, और भीतरै पिड़ के का हुईये जौ देखबे के लाने पहरेदारन के संग्गै बैठ गओ। महायाजक और सारी महापंचायत यीशु के बिरोध में लाबरी गवाही दैबे की कोसिस करत रई, जीसे बे ऊहां मार डारें। पर बिलात लबरे गवाह के आबे पे भी, बे कछु नईं कर सके। आखिरी में दो जन ने आके कई, ई मान्स ने कई आय; कि मैं परमेसुर के मन्दर हां नास करके ऊहां तीन दिना में फिन के बना सकत आंव। तब महायाजक ने ठांड़े होकें ऊसे कई, तें कछु उत्तर नईं देत? जे लोग तोरे बिरोध में का गवाही दै रए आंय? पर यीशु चुप रए: ई पे महायाजक ने ऊसे कई। मैं तोय जीयत परमेसुर की कौल देत आंव, कि अगर तें परमेसुर कौ पूत मसीह आय, तो हम से कै दे। यीशु ने ऊसे कई; तें ने खुदई कै दई; फिन भी मैं तोसे कहत आंव, कि अब से तुम मान्स के पूत हां सर्वशक्तिमान के दायने कोद बैठो, और सरग के बादरन पे आत भओ तक हौ। तब महायाजक ने अपने उन्ना फाड़के कई, ईने परमेसुर की निन्दा करी आय, अब हम हां और गवाहियन की का जरूरत आय? तको, तुम ने अबै जा निन्दा सुनी आय! तुम का समजत आव? उन ने उत्तर दओ, बो मृत्युदण्ड के लायक आय। तब उन ने ऊके मों पे थूंको, और ऊहां घूसों से मारो, और कछु ने थप्पड़ मारके कई। हे मसीह, आगमवानी करके हम हां बता दे: कि कीने तोय मारो? पतरस आंगन में बायरें बैठो भओ हतो; कि एक चाकरनी ने ऊके ऐंगर आके कई, तें तो सोऊ गलील के यीशु के संग्गै हतो? पर ऊ ने मना करत भए उन सब के सामूं कई, मैं नईं जानत कि तें का कै रई आय। जब बो बायरें ड्योढ़ी में गओ, तो एक और चाकरनी ने ऊहां हेर के जौन उते हते उन से कई; जौ भी तो नासरत के यीशु के संग्गै हतो। तब ऊने कौल खाके फिन मना करो, मैं ई मान्स हां नईं चीनत। तनक बेरा बाद, जौन उते ठांड़े हते, उन ने पतरस के ऐंगर आके ऊसे कई, तें सोई उन में से एक आय; कायसे तोरी बोली तोरो भेद खोलत आय। तब बो मेंटत भए कौल खान लगो, कि मैं ऊ मान्स हां नईं चीनत; और तुरतईं मुरगा ने बांग दई। तब पतरस हां बो बात जौन यीशु ने कई हती याद आई, कि मुरगा के बांग देबे के पेंला तें तीन बेर मोरो इनकार कर है, और पतरस बायरें जाके फूट फूट के रोन लगो। जब भुनसारो भओ, तो सब महायाजकन और लोगन के पुरनियन ने यीशु के विरुद्ध सलाह करी, कि ऊहां मार डारें। फिन उन ने ऊहां बांधो और लै जाके राज्यपाल पिलातुस के हाथन में सौंप दओ। जब यहूदा जीने ऊहां पकड़वाओ हतो, जौ हेरो कि यीशु दोषी ठहरओ गओ आय, तो बो पछताओ और चांदी के तीस सिक्का हां महायाजकन और पुरनियन हां लौटाके ऊने कई। मैं ने पाप करो है, मैं ने निर्दोष हां पकड़वाबे कौ सौदो करो है? उन ने कई, ईसे हम हां का? तेंई जान। तब बो उन चांदी के सिक्कन हां मन्दर में फेंक के चलो गओ, और ऊने जाके फांसी लगा लई। तब महायाजकन ने उन सिक्कन हां लैके कई, इन हां मन्दर के खजाने में रखबो साजो नईंयां, कायसे जौ रकत कौ दाम आय। और उन ने जुड़ के सलाह करी और उन सिक्कन से परदेसियन हां गाड़बे के लाने कुम्हार कौ खेत मोल ले लओ। ऐई काजें बो खेत आज लौ खून कौ खेत कहाऊ त है। तब बो बचन जौन यिर्मयाह आगमवकता ने कहो हतो पूरो भओ; कि उन ने चांदी के तीस सिक्का लए (जीहां इस्राएल की सन्तान ने ऊके लाने ठहराओ हतो)। और उन ने ऊहां कुम्हार के खेत के लाने दे दओ, जैसे कि प्रभु ने मोय हुकुम दओ हतो। जब यीशु राज्यपाल के सामूं ठांड़ो हतो, तो राज्यपाल ने ऊसे पूंछी; का तें यहूदियन कौ राजा आय? यीशु ने ऊसे कई, तें खुदई कह रओ आय। और जब महायाजकन और पुरनियन ऊपे दोष लगा रए हते, तो ऊने कोऊ उत्तर नईं दओ। तब पिलातुस ने ऊसे कई: का तें नईं सुनत, कि जे तोरे बिरोद में कितेक बातन की गवाही दे रए आंय? पर ऊने ऊहां एक बात कौ भी उत्तर नईं दओ, ईसे राज्यपाल हां बिलात अचरज भओ। राज्यपाल की जा नीत हती, कि पर्व की बेरा कोऊ एक बन्दी हां जीहां लोग चाहत हते, छोड़ दओ करत हतो। ओई बेरा उन की जेलखाने में बरअब्बा नाओं को एक नामी बन्दी हतो। जब बे जुड़े, तो पिलातुस ने उन से कई; तुम कीहां चाहत आव, कि मैं तुमाए लाने छोड़ देंओं? बरअब्बा हां या यीशु हां, जौन मसीह कहलात आय? कायसे बो जानत हतो कि उन ने ऊहां छल से पकड़वाओ आय। और जब बो न्याव करबे गद्दी पे बैठो हतो तो ऊकी घरवारी ने ऊहां कहला पठैव, कि ई धर्मी मान्स के मामले में हाथ न डारियो; कायसे आज रात मैं ने सपने में ऊके काजें बिलात दुख उठाओ आय। मगर महायाजकन और पुरनियन ने भीड़ हां भड़काओ, कि बे बरअब्बा हां छोड़बे और यीशु हां मार डारबे की मांग करें। तब राज्यपाल ने उन से पूंछी, इन दोई में से कीहां चाहत हौ, कि मैं तुमाए लाने छोड़ देंओं? उन ने कई बरअब्बा हां। पिलातुस ने उन से कई; फिन मैं यीशु हां जो मसीह कहाऊ त आय, ऊको का करों? उन सबरन ने कई ऊहां क्रूस पे चढ़ाओ। ऊने कई; काय ऊने का बुराई करी आय? पर बे और जोर से चिल्ला, चिल्ला के कहन लगे, “ऊहां क्रूस पे चढ़ाओ जाबै”। जब पिलातुस ने हेरो, कि कछु भी बन नईं पड़त बल्कि हुल्लड़ होत जात आय, तो ऊने पानू लओ और भीड़ के आंगू अपने हाथन हां धोके कई; मैं ई मान्स के खून से बरी आंव; तुमई जानो। तब लोगन ने कई, ई को खून हम पे और हमाई सन्तान पे होए। तब ऊने बरअब्बा हां उन के लाने छोड़ दओ, और यीशु हां कोड़ा लगवा के क्रूस पे चढ़ाए जाबे हां सौंप दओ। तब राज्यपाल के सिपाही यीशु हां किले में लै गए, और उते ऊके चारऊं कोद सबरे रोमी सिपाहियन हां जमा कर लओ। फिन ऊके उन्ना उतार के उन ने ऊहां गाड़े रंग कौ चोगा पहिनाओ। और कांटन कौ मुकुट गूंथ के ऊके मूंड़ पे धरो; और ऊके दांयने हाथ में सरकन्डा दओ फिन ऊके आंगू घुटना टेक के बे ऊको ठट्ठा करके कहन लगे, हे यहूदियन के राजा तोरी जय हो। और उन ने ऊपे थूको; और सरकन्डा लैके ऊहां मूड़ पे मारन लगे। ठट्ठा करबे के बाद, उन ने ऊको चोगा उतारो और ओई उन्ना ऊहां पैरा दए, और क्रूस पे चढ़ाबे ले चले। जब बे बायरें कड़ रए हते तो उन हां शिमोन नाओं को एक कुरेनी मिलो, उन ने ऊहां बेगार में पकड़ो कि ऊ को क्रूस लदवा के लै चले। और जब बे ऊ जांगह पे आए जौन गुलगुता कहाऊ त आय यानि खोपड़ी की जांगह। तो उन ने ऊहां पित्त मिलो भओ दाख कौ रस पीबे हां दओ, पर ऊने चीख के पीबो नईं चाहो। और जब बे ऊहां क्रूस पे टांग चुके; तो उन ने परची डाल के ऊके उन्ना बांट लए, और उतईं बैठ के बे ऊकी रखनवारी करन लगे। और उन ने ऊके मूंड़ के ऊपरै दोष पट्टी लगाई, जीमें लिखो हतो “जौ यहूदियन कौ राजा यीशु आय”। तब ऊके संग्गै दो डाकुअन हां सोऊ क्रूस पे टांगो एक हां ऊकी दांई, और दूसरे हां ऊके बांई कोद। उते से आबे जाबे वाले ऊको ठट्ठा कर रए हते, और मूंड़ हला हला के कहत हते। हे मन्दर हां ढाबेवारे और तीन दिना में बनावे वारे, अपने आप हां तो बचा ले: अगर तें परमेसुर कौ पूत आय, तो क्रूस पे से खालें उतर आ। ऐई तरहां महापुरोहित भी शास्त्रियन और पुरनियन के संग्गै ऊको ठट्ठा करत भए कह रए हते, ईने दूसरन हां बचाओ, पर अपने हां नईं बचा सकत। जौ “इस्राएल कौ राजा आय”। अब क्रूस पे से खालें उतर आए, तो हम ईहां मान लै हैं। जौ परमेसुर पे भरोसा करत आय, अगर बो ईसे खुस आय, तो अब ईहां छुड़ा लैबे, कायसे ईने कई हती, कि “मैं परमेसुर कौ पूत आंव”। जौन डांकू क्रूस पे टांगे गए हते बे सोऊ ऐई तरहां ऊकी हंसी कर रए हते। दुपरिया से लैके तीन बजे लेओ सबरे देश में अन्धयारो छाओ रहो। तीन बजे के करीब यीशु जोर से चिल्लाओ, एली, एली, लमा शबक्तनी? यानि हे मोरे परमेसुर, हे मोरे परमेसुर, तेंने मोय काय छोड़ दओ? उते ठांड़े भयन में से कछु ने जौ सुनके कई, जौ मान्स एलियाह हां टेर रओ आय। उन में से एक ने तुरतईं गदबद देके, सोक्ता लैके सिरका में बोड़ो, और सरकन्डा पे धरके, ऊहां चूसबे हां दओ। बाकी लोगन ने कई, तको एलिय्याह ऊहां बचाबे हां आत आय कि नईं। तब यीशु ने जोर से चिल्ला के प्राण छोड़ दए। और तको मन्दर कौ परदा ऊपरै से खालें लौ फटके दो टूंका हो गओ: धरती डोलन लगी और चट्टानें भी तड़क गईं। और कबरें खुल गईं; और बिलात सोए भए पवित्र लोगन के मुरदा जी गए। और ऊके फिन के जी जाबे के बाद बे कबरन में से कड़के पवित्र नगर में गए, और बिलातन हां दिखाई पड़े। तब दरोगा और जौन लोग ऊके संग्गै पहरा दै रए हते, जब उन ने भूंडोल और इन घटना हां देखो, तो बिलात डराके कई, सांची में “जौ परमेसुर कौ पूत हतो”। और उते बिलात बईयरन जौन यीशु की सेवा करत भई गलील से ऊके पाछें आईं हतीं, दूर से जौ हेर रईं हतीं। उन में मरियम मगदलीनी, याकूब और यूसुफ की मताई मरियम और जब्दी के पूतों की मताई हतीं। जब संजा भई तो अरिमतियाह कौ यूसुफ नाओं कौ एक धनी मान्स आओ, बो भी यीशु कौ चेला हतो। ऊने पिलातुस के ऐंगर जाके यीशु की लाश मांगी, तो पिलातुस ने ऊहां दिलवा दई। तब यूसुफ ने लाश हां लै जाके उजरे चादर में लपेड़ो। और ऊहां अपनी नई कबर में धरो, जौन ऊने चट्टान में खुदवाई हती, फिन एक भारी पत्थरा हां कबर के दोरे पे लुढ़का के चलो गओ। मरियम मगदलीनी और दूसरी मरियम उते कबर के सामूं बैठी हतीं। दूसरे दिना यानि तईयारी के एक दिना बादई, महायाजकन और और फरीसियन ने पिलातुस के ऐंगर जुड़ के कई। हे महाराज, हम हां खबर आय, कि ऊ भरमाबे वाले ने अपने जीते जी कई हती, कि तीन दिना के बाद मैं जी जै हों। ई लाने हुकुम दे कि तीसरे दिना लौ कबर की रखनवारी करी जाबै, कहूं ऐसो न होए कि ऊके चेले आके लाश हां चुरा लै जाबें, और लोगन से कहें, कि बो मरे भयन में से जी गओ आय: तब पाछें कौ दगा पेंला से बुरओ हुईये। पिलातुस ने उन से कई, तुमाए ऐंगर पहिरेदार तो आंय, जाओ जैसो भी ऊहां रखवा सको, वैसई करो। ई लाने उन ने जाके कबर की रखनवारी करवाई, और पहिरेदार बिठा के पत्थरा पे मोहर सोऊ लगवा दई। सब्त के दिना के बाद हफ्ताह के पेंलई दिना बड़े भुनसारे मरियम मगदलीनी और दूसरी मरियम कबर हेरबे आईं। और हेरो, एक बड़ो भूंडोल भओ, कायसे परमेसुर कौ एक दूत सरग से उतर के आओ, और पत्थरा हां लुढ़का के ऊपे बिराज गओ। ऊको रूप बिजली जैसो और ऊके उन्ना पाला जैसे उजरे हते। पहिरेदार ऊके डर से थर्रा गए, और मरे से हो गए। सरदूत ने बईयरन से कई, डराओ नईं कायसे मैं जानत आंव, कि तुम यीशु हां जीहां क्रूस पे चढ़ाओ गओ हतो, खोज रई आव। बो इतै नईंयां, पर बो अपने कहबे के अनसार जी गओ आय; आओ बो जांगह हेरो, जिते बो धरो गओ हतो। ऊके चेलन हां तुरतईं जाके बताओ, कि बो मरे भयन में से जी गओ आय; और हेरो बो तुम से पेंला गलील हां जै है, उते तुम ऊहां देख हौ, तको, मैं ने तुम हां बता दओ आय। और बे डर और भारी खुसी के संग्गै झट्टई कबर से लौटीं, और चेलन हां जौ सन्देस देबे के लाने गदबद दई। तब हेरो, यीशु उन से मिलो; और उन हां परनाम करो, और बे ऊके ऐंगर आईं, और उन ने ऊके गोड़े पकड़ के ऊहां दण्डवत करो। तब यीशु ने उन से कई, डराओ नईं; जाओ और मोरे भईयन से कहियो, कि बे गलील हां चले जाएं उते बे मोय देख हैं। बे गैल में हतीं, कि हेरो, पहिरेदारों में से कछु ने नगर में जाके पूरो हाल महायाजकन हां कह सुनाओ। तब उन ने पुरनियन के संग्गै जमा होकें सलाह करी और सिपाहियन हां बिलात रुपईया दैके कई। लोगन से कहियो, रात में जब हम सो रए हते, तो ऊके चेले आके ऊहां चुरा लै गए। और अगर राज्यपाल के कान लौ जा बात पहुंचे, तो हम ऊहां मना लै हैं और तुम हां जोखम से बचा लै हैं। उन ने रुपईया लैके जैसो बताओ गओ हतो, वैसई करो; और जे बात यहूदियन में दूर दूर लौ फैल गई, और अबै लौ प्रचलित आय। ऊके बाद ग्यारह चेले गलील के ऊ पहरवा पे गए, जीहां यीशु ने उन हां बताओ हतो। और उन ने ऊके दरसन पाके ऊहां परनाम करो, पर कोऊ कोऊहां शंका भई। तब यीशु ने उन के ऐंगर आके कई, कि सरग और धरती कौ पूरो अधकार मोय दओ गओ आय। ई लाने जाओ और सब जातन के लोगन हां चेला बनाओ, और उन हां बाप, पूत और पवित्रआत्मा के नाओं से बपतिस्मा देओ। और जौन जौन हुकुम मैं ने तुम हां दए आंय, ऊको पालन करबो सिखाओ, और तको, मैं संसारी के आखिर लौ सदा तुमाए संग्गै आंव। परमेसुर के बेटा यीशु मसीह के भले संदेसे की शुरुआत। जैसो यशायाह अगमवकता की पोथी में लिखो आय कि हेरो, मैं अपने दूत हां तोरे आंगू पठैत आंव, जो तोरे लाने गैल तईयार कर है। जंगल में एक टेरबेवाले कौ बोल सुनाई दे रओ आय कि प्रभु की गैल तईयार करो और ऊ की पक्की गैलें सूदी करो। यूहन्ना आओ ऊ जंगल में बपतिस्मा देत हतो, और पापन की माफी के लाने मन बदलबे के बपतिस्मा कौ परचार करत हतो। और पूरे यहूदिया देश के, और यरूशलेम के सबरे रैबेवारे निकल के ऊके ऐंगर गए, और अपने पापन हां मान के यरदन नदिया में ऊसे बपतिस्मा लओ। यूहन्ना ऊंट के रोंअन कौ उन्ना पैरें और अपनी करयाई में खाल कौ पटुका बांधे रहत हतो और टिडि्डयां और जंगल की मेंपर खात हतो। और जौ परचार करत हतो, कि मोरे बाद ऊ आबेवालो आय, जो मोय से जांदा ताकत वालो आय; मैं ई लायक नईंयां कि झुक के ऊ की पनईयों के बंध खोलों। मैंने तो तुमें पानी से बपतिस्मा दओ आय, पै ऊ तुमें शुद्ध आत्मा से बपतिस्मा दै है। ऊ दिना में यीशु ने गलील के नासरत गांव से आके, यरदन नदी में यूहन्ना से बपतिस्मा लओ। और जब ऊ पानी से कड़ के ऊपर आओ, सो तुरतईं ऊ ने आकास हां खुलत और आत्मा हां परेवा कैसो अपने ऊपर उतरत तको। और ऐसी आकासवानी भई, कि तें मोरो प्यारो बेटा आय, तोय से मैं खुस आंव। तबईं आत्मा ने ऊहां जंगल कोद पोंचाओ। और जंगल में चालीस दिना लौ शैतान ने ऊ की परीक्षा लई; और ऊ जंगली जानवरन के संग्गै रओ, और सरगदूत ऊ की खुसामद करत रए। यूहन्ना के पकड़वाए जाबे के बाद यीशु ने गलील में आके परमेसुर के राज कौ भलो संदेसो परचार करो। और कओ, समय पूरो भओ आय, और परमेसुर कौ राज ऐंगर आ गओ आय; मन बदलौ और भले संदेसे पै बिसवास करौ। गलील की झील के किनारे किनारे जात भए ऊ ने शमौन और ऊके भईया अन्द्रियास हां झील में जाल डालत तको; कायसे कि बे मछवारे हते। और यीशु ने उनसे कओ; मोरे पछाऊं चले आओ; मैं तुमें मान्सन कौ मछवारौ बना हों। बे तुरतईं जाल हां छोड़ के ऊके पछाऊं हो लय। और कछु आंगू बढ़के, ऊने जब्दी के बेटा याकूब और ऊके भईया यूहन्ना हां, नाव पै जाल हां सुदारत तको। ऊ ने तुरतईं उने बुलाओ; और बे अपने बाप जब्दी हां मजूरन के संग्गै नाव पै छोड़ के, ऊके पछाऊं चले गए। और बे कफरनहूम में आए, और ऊ तुरतईं विश्राम के दिना सभा के घर में जाके उपदेस करन लगो। और लोग ऊके उपदेस से चकित भए; कायसे ऊ उन हां शास्त्रियन कैसो नईं वरन् अधकारी कैसो उपदेस देत हतो। और ओई बेरा, उनकी सभा के घर में एक मान्स हतो, जीमें एक अशुद्ध आत्मा हती। ऊ ने चिल्ला के कओ, हे यीशु नासरी, हमें तोय से का काम? काय तें हमें नास करबे आओ आय? मैं तोहां जानत आंव, तें को आय? परमेसुर कौ शुद्ध मान्स! यीशु ने ऊहां डांट के कओ, चुप्प रै; और ऊ में से कड़ जा। तबईं अशुद्ध आत्मा ऊहां मरोर के, और बड़े जोर से चिल्या के ऊ में से कड़ गई। ईपे सब जनें अचम्भा करत भए आपस में बतकाव करन लगे कि जा का बात आय? जौ तो कोनऊं नओ उपदेस आए! ऊ अधिकार के संग्गै अशुद्ध आत्मन हां भी आज्ञा देत आय, और बे ऊ की आज्ञा मानत आंय। सो ऊ को नाओं तुरतईं गलील के अगल-बगल के पूरे देश में हर जांगा फैल गओ। और ऊ तुरतईं प्रार्थनाघर से निकल के, याकूब और यूहन्ना के संग्गै शमौन और अन्द्रियास के घरै आओ। और शमौन की सास हां ताप चढ़ो हतो, और उन ने तुरतईं ऊके बारे में ऊसे कओ। तब ऊ ने ऐंगर जाके ऊकौ हाथ पकड़ के उठाओ; और ऊ को ताप ऊ पै से उतर गओ, और बा उनकी सेवा खुसामद करन लगी। संजा के समय जब सूरज डूब गओ तब लोग सबरे बीमारन हां और उन हां जिनमें बुरई आत्माएं हतीं ऊके ऐंगर ले आए। और पूरौ नगर दरवाजे पै इकट्ठो भओ। और ऊ ने कैऊ अन हां जो कई तरहां की बीमारियन से दुखी हते, ठीक कर दओ; और कैऊ बुरई आत्मन हां काड़ो; और बुरई आत्मन हां बोलन न दओ कायसे बे ऊहां चीनत हतीं। और भुनसारे के पेंला से भौतऊ पेंला, ऊ उठके निकलो, और एक जंगली जांगा में गओ और उतै प्रार्थना करन लगो। तब शमौन और ऊके संग्गी ऊहां ढूंढ़बे गए। जब ऊ मिलो, सो ऊसे कओ; सब लोग तोहां ढूंढ़ रए आंय। ऊने उनसे कओ, आओ; हम और कऊं अगल बगल की बस्तियन में जाएं, कि मैं उते भी परचार करों, कायसे मैं ऐई हां निकलो आंव। सो ऊ पूरे गलील में उनकी सभाओं में जा जा के परचार करत रओ और बुरई आत्मन हां निकालत रओ। और एक कोढ़ी ने ऊके ऐंगर आके, ऊसे बिनती करी, और ऊके सामने टिंगरे टिका के ऊसे कओ; अगर तें चाहे तो मोहां शुद्ध कर सकत आय। ऊ ने ऊ पै तरस खाके हाथ बढ़ाओ, और ऊहां छूके कओ; मैं चाहत आंव कि तें साजौ हो जा। और तुरतईं ऊ को कोढ़ जात रओ, और ऊ साजौ हो गओ। तब ऊ ने ऊहां चिता के तुरतईं विदा करो। और ऊसे कओ, देख, कोऊ से कछु न कईये, लेकिन जाके अपने आप हां पुजारी हां दिखा, और अपने साजे होबे के बारे में जो कछु मूसा ने ठैराओ ऊहां भेंट चढ़ा, कि उन पै गवाही होबे। लेकिन ऊ बाहर जाके ई बात हां भौत परचार करन लगो, और इते तक फैलान लगो कि यीशु फिन खुलासां नगर में ना जा पाओ, लेकिन बाहरी जंगली जांगा में रओ; और चारऊं कोद से लोग ऊके ऐंगर आत रए। कैऊ दिना के बाद ऊ फिन कफरनहूम में आओ और सुनो गओ, कि ऊ घर में आय। फिन इतने मान्स जुड़ गए, कि दरवाजे के ऐंगर भी जांगा न मिली; और ऊ उने बचन सुना रओ हतो। और लोग एक लकवा के मारे भए हां चार मान्सन से उठवा के ऊके ऐंगर ले आए। लेकिन जब बे भीड़ के मारे ऊके ऐंगर न पोंच पाए, तो उन ने ऊ छत हां जीके नेंचें ऊ हतो, खोल दओ, और जब ऊहां उधेड़ चुके, सो ऊ खाट हां जीपै लकवा कौ मारो पड़ो हतो, लटका दओ। यीशु ने, उनकौ बिसवास हेर के, ऊ लकवा के मारे से कओ; ऐ बेटा, तोरे पाप क्षमा हो गए। तब कैऊ शास्त्री जौन उते बैठे हते, अपने अपने मन में विचार करन लगे। कि जौ मान्स काय ऐसो कैत आय? जौ तो परमेसुर की हंसी उड़ात आय, परमेसुर हां छोड़ के और को पाप माफ कर सकत आय? यीशु ने तुरतईं अपनी आत्मा में जान लओ, कि बे अपने अपने मन में ऐसो विचार कर रए आंय, और उनसे कओ, तुम अपने अपने मन में जौ विचार काय कर रए आव? सहज का आय? का लकवा के मारे से जौ कैबो कि तोरे पाप क्षमा भए, या जौ कैबो, कि उठ अपनी खटिया उठा के चल फिर? लेकिन जीसे तुम जान लेओ कि मान्स के बेटा हां धरती पै पाप क्षमा करबे कौ भी अधकार आय (ऊ ने ऊ लकवा के मारे से कओ)। मैं तोय से कैत आंव; उठ, अपनी खटिया उठाके अपने घरै चलो जा। और ऊ उठो, और तुरतईं खटिया उठा के और सब के सामूं से निकल के चलो गओ, ई पै सबरे अचम्भे में भए, और परमेसुर की बड़वाई करके कैन लगे, कि हमने एैसो कभऊं नईं देखो। ऊ फिन निकल के झील के किनारे गओ, और पूरी भीड़ ऊके ऐंगर पोंची, और ऊ उने उपदेस देन लगो। जात भए ऊ ने हलफई के बेटा लेवी हां चुंगी की चौकी पै बैठो तको, और ऊसे कओ; मोरे पछाऊं हो ले। और ऊ उठके, ऊके पछाऊं हो लओ: और ऊ ओई के घर में भोजन करबे बैठो, और भौत से चुंगी लेबेवारे और पापी यीशु और ऊके चेलन के संग्गै भोजन करबे बैठे; कायसे कि बे भौत से हते, और ऊके पछाऊं हो लए हते। और शास्त्रियन और फरीसियन ने जौ देख के, कि ऊ तौ पापियन और चुंगी लेबेवालन के संग्गै खात पियत आय। यीशु ने जौ सुनके, उनसे कहो, भले चंगन हां वैद की जरूरत नईंयां, लेकिन बीमारन हां आय: मैं धरमियन हां नईं, लेकिन पापियन हां बुलाबे आओ आंव। यूहन्ना के चेला, और फरीसी उपास करत हते; सो उन ने आके ऊसे जौ कओ, कि यूहन्ना के चेला और फरीसियन के चेला काय उपास करत आंय? लेकिन तोरे चेला उपास नईं करत आंय। यीशु ने उनसे कओ, जब लौ दूल्हा बरातियन के संग्गै रैत आय का बे उपास कर सकत आंय? सो जब लौ दूल्हा उनके संग्गै है, तब लौ बे उपास नईं कर सकत। लेकिन बे दिन आहें, कि दूल्हा उनसे अलग करो जै है; ऊ समय बे उपास कर हैं। नए उन्ना कौ थिगड़ा पुराने पैरावन पै कोऊ नईं लगात; नईं तो ऊ थिगड़ा ऊ में से कछु खींच लै है, यानी नओ, पुराने से, और ऊ और फट जै है। नए दाखरस हां पुरानी मशकन में कोऊ नईं रखत, नईं तो दाखरस मशकन हां फाड़ दै है, और दाखरस और मशकें दोई बरबाद हो जै हैं; लेकिन दाख कौ नओ रस नई मशकन में भरो जात आय। और ऐसो भओ कि यीशु विश्राम के दिना खेतन में से होकें जा रओ हतो; और ऊके चेला चलत भए बालें टोड़न लगे। तब फरीसियन ने ऊसे कओ, देख; जे विश्राम के दिना ऊ काम काय करत आंय जौन उचित नईंयां? यीशु ने उनसे कओ, काय तुमने कभऊं नईं पढ़ो, कि जब दाऊद हां जरूरत भई और जब ऊ और ऊके संग्गी भूखे भए तब ऊ ने का करो हतो? ऊ ने काय हां अबियातार महायाजक के समय, परमेसुर के मन्दर में जाके, भेंट की चढ़ी रोटियन हां खाओ हतो, जी कौ खाबौ याजकन हां छोड़ के और कोऊहां उचित नईयां, और अपने संगियन हां भी दईं। और यीशु ने फरीसियन से कओ; विश्राम कौ दिन मान्सन के लाने बनाओ गओ आय, न कि मान्स विश्राम के दिना के लाने। ईसे मान्सन कौ बेटा विश्राम के दिना कौ भी मालिक आय। और ऊ प्रार्थनाघर में फिन गओ; और उते एक मान्स हतो, जी कौ हाथ सूख गओ हतो। और बे ऊ पै दोष लगाबे के लाने ऊ की घात में लगे भए हते, कि तकें, ऊ विश्राम के दिना ऊहां ठीक करत आय कि नईं। ऊ ने सूखे हाथ वाले मान्स से कओ; बीच में ठाड़े होओ। और उनसे कओ; काय विश्राम के दिना भलौ करबो उचित आय कि बुरओ करबो, प्रान हां बचाबो कि मारबो? लेकिन बे चुप्प रए। और ऊ ने उनके मन की कड़ाई से उदास होकें, गुस्‍सा से चारऊ तरपी तको, और ऊ मान्स से कओ, अपनो हाथ बढ़ा ऊ ने हाथ बढ़ाओ, और ऊकौ हाथ ठीक हो गओ। तबईं फरीसी बाहर जाके तुरतईं हेरोदियन के संग्गै ऊके खिलाफ में सलाह करन लगे, कि ऊहां की प्रकार नास करें। और यीशु अपने चेलन के संग्गै झील कोदाईं चलो गओ: और गलील से एक बड़ी भीड़ ऊके पांछू हो लई। और यहूदिया, और यरूशलेम और इदूमिया से, और यरदन नदिया के पार, और सूर और सैदा के अगल बगल में एक बड़ी भीड़ जा सुनके, कि ऊ कैसे अचम्भे के काम करत आय, ऊके ऐंगर आई। और ऊ ने अपने चेलन से कओ, भीड़ के कारन एक छोटी नाव मोरे लाने तईयार रैबै जीसे बे मोहां दबा न पाबें। कायसे कि ऊ ने मुतके मान्सन हां साजौ कर दओ हतो; ईसे जितने मान्स रोगी हते, बे ऊहां छूबे के लाने ऊ पै गिरे पड़त हते। और बुरई आत्माएं भी, जब ऊहां तकत हतीं, तो ऊके आंगू गिर पड़त हतीं, और चिल्या के कैत हतीं कि तें परमेसुर कौ बेटा आय। और ऊ ने उन हां भौत चिताओ, कि मोरी असलियत न बताईयो। फिन ऊ पहरवा पै चढ़ गओ, और जिन हां ऊ चाहत हतो उन हां अपने ऐंगर बुलाओ; और बे ऊके ऐंगर चले आए। तब ऊ ने बारह मान्सन हां अपने ऐंगर रख लओ, कि बे ऊके संगै संगै रएं, और ऊ उन हां पोंचाबे, कि बे प्रचार करें। और बुरई आत्मन हां निकालबे कौ हक्क राखें। और बे जे आएं: शमौन जी कौ नाओं ऊ ने पतरस राखो। और जब्दी कौ बेटा याकूब, और याकूब कौ भईया यूहन्ना, जिनको नाओं ऊ ने बूअनरगिस, यानी गरजन कौ बेटा राखो। और अन्द्रियास, और फिलिप्पुस, और बरतुलमै, और मत्ती, और थोमा, और हलफई कौ बेटा याकूब, और तद्दी, और शमौन कनानी। और यहूदा इस्कारियोती, जीनें ऊहां पकड़वा भी दओ। और ऊ घर में आओ: और इतनी भीड़ इकट्ठी भई, कि बे रोटी तक न खा पाए। जब ऊके घर के लोगन ने जौ सुनो, तो ऊहां पकड़बे के लाने निकले; कायसे कैत हते, कि ऊकौ चित्त ठिकानें नईंयां। और शास्त्री जो यरूशलेम से आए हते, ऐसो कहत हते, कि ऊ में शैतान आय, और जौ भी, कि ऊ बुरई आत्मन के मुखिया की मदद से बुरई आत्मन हां निकालत आय। और ऊ उने ऐंगर बुलाके, उनसे कनौत दैके कहन लगो; शैतान कैसे शैतान हां निकाल सकत आय? और अगर कौनऊं राज्य में आपस में मनमुटाव हो जाए, तो ऊ राज्य कैसे टिकाऊ रह सकत आय? और अगर कोनऊं घर में मनमुटाव हो जाबै, तो ऊ घर कैसे टिकाऊ रह सकत आय? और अगर शैतान अपनौ बिरोधी होकें अपनन में मनमुटाव कराबै, तो ऊ कैसे बनो रह सकत आय? ऊ को तो अन्त हो जात आय। पै कोई मान्स कौनऊं ताकतवाले के घर में घुसके ऊकौ माल लूट नईं सकत, जौ लौ कि ऊ पेंला ऊ ताकतवाले हां बांध न ले; और तबई ऊके घर हां लूट लै है। मैं तुमसे सांची कैत आंव, कि मान्सन की सन्तान के सबरे पाप और निन्दा जौन बे करत आंय, माफ करी जै हैं। लेकिन जो कोऊ शुद्ध आत्मा के खिलाफ निन्दा कर है, ऊ कभऊं माफ न करो जै है: बल्कि ऊ ऐसे पाप कौ दोषी हुईये जौन पाप कभऊं खतम न हुईये। कायसे बे कैत हते, कि ऊ में बुरई आत्मा आय। और ऊ की महतारी और ऊके भईया आए, और बाहर ठांड़े होकें ऊहां बुलवाओ। और भीड़ ऊके अगल बगल बैठी हती, और उन ने ऊसे कओ; देख, तोरी महतारी और तोरे भईया बाहर तोहां ढूंढ़त आंय। ऊ ने उने उत्तर दओ, कि मोरी महतारी और मोरे भईया कौन आएं? और उन पै जो ऊके अगल बगल बैठे हते, नजर डाल के कओ, देखो, मोरी महतारी और मोरे भईया जे आंय। कायसे जो कोऊ परमेसुर की इच्छा पे चल है, ओई मोरो भईया और बहिन और महतारी आय। ऊ फिन झील के किनारे उपदेस दैन लगो: और ऐसी बड़ी भीड़ ऊके ऐंगर एकट्ठी हो गई, कि ऊ झील में एक नाव पै चढ़ के बैठ गओ और पूरी भीड़ धरती पै झील के किनारे ठांड़ी रई। और ऊ कनौत देके उन हां भौत सी बातें सिकाऊ न लगो, और अपने उपदेस में उनसे कओ। सुनौ: देखो, एक बोवेवालो, बीज बोवे हां निकलो। और बोत भए कछु तो गैल के किनारे गिरो और चिरईंयन ने आके ऊहां चुग लओ। और कछु पथरीली धरती पै गिरो जां ऊहां भौत माटी न मिली, और गैरी माटी न मिलबे के कारन जल्दी जम आओ। और जब सूरज कड़ो, सो जल गओ, और जड़ न पकड़बे के कारन सूक गओ। और कछु तो झाड़ियन में गिरो, और झाड़ियन ने बड़े होकें ऊहां दबा लओ, और ऊ फल न पाओ। लेकिन कछु साजी जमीन पै गिरो, और ऊ जमो, और बड़ौ होकें फलो फूलो, और कौनऊं तीस गुनौ, कौनऊं साठ गुनौ और कौनऊं सौ गुनौ फल लाओ। और यीशु ने कओ; जीके पास सुनबे के लाने कान होबें ऊ सुन ले। जब ऊ अकेलो रै गओ, तो ऊके संगियन ने ऊ बारह समेंत ऊसे ई कनौत के बारे में पूछो। यीशु ने उनसे कओ; तुम हां तो परमेसुर के राज्य के भेद की समझ दई गई आय, लेकिन बाहर वालन के लाने सबरी बातें कनौत में होती आंय। ई लाने कि बे देखत भए देखें और उने न सूझे और सुनत भए सुनें भी और न समझें; ऐसो न होबै कि बे बदलें, और माफ कर दए जाबें। फिन यीशु ने उनसे कओ; काय तुम जा कनौत नईं समझत? तो फिन और कनौत कैसे समझ हौ? बोवेवालो बचन बोऊत आय। जो गैल के किनारे के आंय जां पै बचन बोओ जात आय, जे बे आएं, कि जब उन ने सुनो, तो शैतान तुरतईं आके बचन हां जौन उन में बोओ गओ हतो, उठा ले जात आय। और ऊं सई जौन पथरीली धरती पै बोए जात आंय, जे बे आएं, कि जौन बचन सुन के तुरतईं खुसी से अपना लेत आंय। लेकिन अपने भीतर जड़ न रखबे के कारन बे तनक दिना के लाने रहत आंय; ईके बाद जब बचन के कारन उन पै क्लेश या उपद्रव होत आय, तो बे तुरतईं ठोकर खात आंय। और जौन झाड़ियन में बोए गए बे जे आंय जिन ने बचन सुनो। और दुनिया की चिन्ता, और धन कौ धोका, और और चीजन कौ लोभ उन में भरके बचन हां दबा देत आय। और ऊ बेकार रै जात आय। और जौन साजी धरती में बोए गए, जे बे आएं, जो बचन सुनके अपना लेत और फल लिआत आंय, कौनऊं तीस गुनौ, कोनऊं साठ गुनौ, और कौनऊं सौ गुनौ। और ऊ ने उनसे कओ; का दिया हां ई लाने लाओ जात आय कि पैमाने या खटिया के तरें धरो जाए? काय ईके लाने नईं, कि ओंटा पै धरो जाए? कायसे कि कौनऊं चीज छिपी नईंयां, बल्कि ईहां कि दिखान लगै। और न कछु छिपो भओ आय, पै ईके लाने कि दिखान लगै। अगर कोऊ के सुनबे के कान होबें, तो सुन लैबे। फिन उनसे ऊ ने कओ; ध्यान देओ, कि का सुनत आव? जौन नाप से तुम नापत आव ओई से तुमाए लाने भी नापो जै है, और तुमें ज्यादा दओ जै है। कायसे जीके पास में है, ऊहां दओ जै है; लेकिन जीके पास में नईंयां ऊसे जौन ऊके ऐंगर आय लै लओ जै है। फिन ऊ ने कओ; परमेसुर कौ राज्य ऐसो आय, जैसे कोनऊं मान्स धरती पै बीज छिड़के। और रात में सो जाबै, और दिन होत जगै और ऊ बीज ऐसे जमै और बढ़ै कि ऊ न जान पाए। धरती अपने आप फल लिआत आय, पेंला कुश, फिन बाल, और तब बालन में तईयार दाना। लेकिन जब दाना पक जात आय, तो ऊ तुरतईं हंसिया लगात आय, कायसे कि कटाई आ गई आय। फिनऊ ने कओ; कि हम परमेसुर के राज्य की कनौत कीसें देबें, और कौन किस्सा से ऊकौ बखान करें? ऊ राई के दाने कैसो आय; कि जब धरती में बोओ जात आय तो धरती के सबरे बीजन से छोटो होत आय। लेकिन जब बोओ गओ, तो जमके सबरे साग पातन से बड़ो हो जात आय, और ऊ की बड़ी डगालें निकलत आंय, कि आकास की चिरईयां ऊके छांयरे में बसेरो कर सकत आंय। और ऊ उन हां ई तरहां के भौत से किस्सा सुना सुना के उनकी जितनी समझ हती उतनो बचन सुनात हतो। और बिना किस्सा कएं उनसे कछु भी न कैत हतो; लेकिन अकेले में खुद के निजी चेलन हां सबरी बातन कौ मतलब बतात हतो। ओई दिना जब दिन डूबन लगो और संजा भई, तो ऊ ने उनसे कओ; आओ, हम ऊ पार चलें। और बे भीड़ हां छोड़ के जैसो ऊ हतो, ऊं सई ऊहां नाव पै संग्गै ले चले; और ऊके संग्गै, और भी नावें हतीं। तबईं जोर से आंधी आई, और पानी की हिलोरें नाव पै इतै तक लगीं, कि बा अब पानी से भरी जा रई हती। और ऊ खुद पछाऊं के हिस्सा में गद्दी पै सो रओ हतो; तब उन ने ऊहां जगा के ऊसे कओ; हे गुरू, काय तोय चिन्ता नईंयां, कि हम नास भए जात आंय? तब ऊ ने उठके आंधी हां डांटो, और पानी से कओ; “शान्त रह, रुक जा”: और आंधी चलबो बन्द हो गई और खूब चैन हो गओ। और उनसे कओ; तुम काय डरात आव? काय तुमें अब तक बिसवास नईंयां? और बे भौत डरा गए और एक दूसरे से बोले; जौ को आय, कि आंधी और पानी तक ऊ की आज्ञा मानत आंय? और बे झील के ऊ पार गिरासेनियों के देश पोंचे। और जब ऊ नाव पै से उतरो तो तुरतईं एक मान्स जी में बुरई आत्मा हती कबरों से निकल के ऊसे मिलो। ऊ कबरों में रैत हतो। और कोऊ ऊहां सांकरन से भी न बांध सकत हतो। कायसे ऊ बेर बेर बेड़ियन से और सांकरन से बांधो गओ हतो, पै ऊ ने सांकरन हां तोड़ दओ, और बेड़ियन के टुकड़ा टुकड़ा कर दए हते, और कोऊ ऊहां वस में न कर सकत हतो। ऊ लगातार रात दिन कबरन में और पहरवन में चिल्लात हतो, और खुद हां पथरन से घायल करत हतो। ऊ यीशु हां दूरई से देख के दौड़ो, और ऊहां परनाम करो। और जोर की आवाज में चिल्ला के कओ; हे यीशु, सबसे बड़े परमेसुर के बेटा, मोहां तोसे का काम? मैं तोहां परमेसुर कौ कौल धराऊत आंव, कि मोहां पीड़ा न दे। कायसे ऊ ने ऊसे कओ हतो, हे बुरई आत्मा, ई मान्स में से कड़ आ। यीशु ने ऊसे पूछो; तोरो का नाओं आय? ऊ ने ऊसे कओ; मोरो नाओं फौज आय; कायसे हम भौत से आंय। और ऊ ने ऊसे भौतई बिनती करी, कि हमें ई देश से बाहर न भेज। उतईं पहरवा पै सुअरन कौ एक बड़ौ झुण्ड चर रओ हतो। और उन ने ऊसे बिनती करके कओ, कि हमें उन सुअरन में भेज दे, कि हम उनके भीतर जाबें। सो यीशु ने उने हुकम दओ और बुरई आत्मा निकल के सुअरन के भीतर घुस गईं, और झुण्ड जो कोनऊं दो हजार गिनती में हतो, पहरवा पै से झपट के झील में गिर पड़ो और डूब के मर गओ। और उनके चराबेवारन ने दौड़ लगा के नगर और गांवन में जा खबर सुनाई। और जो भओ हतो, मान्स ऊहां देखबे आए। और यीशु के ऐंगर आके, बे ऊहां जीमें बुरई आत्माएं हतीं, यानी जीमें फौज समाई हती, उन्ना पैरें और अच्छी तरहां से बैठो देख के, डरा गए। और देखबे वालन ने ऊ को जीमें बुरई आत्माएं हतीं, और सुअरन कौ पूरौ हाल, उने कह सुनाओ। और बे ऊसे बिनती करके कहन लगे, कि हमाए सिवानन से चलो जा। और जब ऊ नाव पै चढ़न लगो, तो ऊ जीमें पेंला बुरई आत्माएं हतीं, ऊसे बिनती करन लगो, कि मोहां अपने संग्गै रहन दे। लेकिन ऊ ने ऊहां आज्ञा न दई, और ऊसे कओ, अपने घरै जाके अपने लोगन हां बता, कि तोपे दया करके प्रभु ने तोरे लाने कैसे बड़े काम करे आंय। ऊ जाके दिकपुलिस नगर में ई बात कौ परचार करन लगो, कि यीशु ने मोरे लाने कैसे बड़े काम करे; और सबरे अचम्भा करत हते। जब यीशु फिन नाव से ऊ पार गओ, तो एक बड़ी भीड़ ऊके ऐंगर जमा हो गई; और ऊ झील के किनारे हतो। और याईर नाओं प्रार्थनाघर के सरदारों में से एक आओ, और ऊहां देख के, ऊके गोड़ों में गिरो। और ऊ ने जौ कह के भौतई बिनती करी, कि मोरी हलकी बिटिया मरबे पे आय: तें आके ऊ पै हाथ धर दे, कि बा ठीक होकें जिन्दा रैबे। तब बे ऊके संग्गै चले; और बड़ी भीड़ ऊके पाछें हो चली, इतै लौ की लोग ऊ पे गिरे पड़त हते। और एक बईयर, जीहां बारह साल से खून बहबे को रोग हतो। और जीने मुतके बैद्यों से बड़ो दुख उठाओ और अपनौ सबरो धन खर्च करबे पै भी कछु ठीक न भई हती, बल्कि और रोगी हो गई हती। यीशु की चरचा सुनके, भीड़ में ऊके पांछू से आई, और ऊके उन्ना हां छू लओ। कायसे बा कैत हती, कि अगर मैं ऊके उन्ना हां छू लैहों, तो ठीक हो जै हों। और तुरतईं ऊकौ खून बहवो बन्द हो गओ; और ऊ ने अपनी देह में जान लऔ, कि मैं ऊ बीमारी से ठीक हो गई। यीशु ने तुरतईं खुद में जान लओ, कि मोय में से ताकत निकली आय, और भीड़ कोद मुड़के पूछो; मोरो उन्ना कीने छुओ? ऊके चेलन ने ऊसे कओ; तें देखत आय, कि भीड़ तोपे गिरी पड़त आय, और तें कैत आय; कि कीने मोहां छुओ? तबई ऊ ने ऊहां देखबे के लाने जीने जौ काम करो हतो, चारऊ कोद नजर दौड़ाई। तब बा बईर्यर जौ जान के, कि मोरी कैसी भलाई भई आय, डरात और कांपत भई आई, और ऊके गोड़न पै गिरके, ऊसे सबरो हाल सच्चौ सच्चौ बता दओ। ऊ ने ऊसे कओ; बेटी तोरे बिसवास ने तोय ठीक करो आय: कुशल से जा, और अपनी ई बीमारी से बची रै। ऊ ऐसो कैई रओ हतो, कि प्रार्थनाघर के सरदार के घर से लोगन ने आके कओ, कि तोरी बिटिया तो मर गई; अब गुरू हां काय तकलीफ देत आय। जौन बात बे कै रए हते, यीशु ने ऊहां अनसुनी करके, प्रार्थनाघर के सरदार से कओ; डरौ नें केवल बिसवास राखौ। और ऊ ने पतरस और याकूब और याकूब के भाई यूहन्ना हां छोड़, और कोऊहां अपने संग्गै आऊन न दओ। और प्रार्थनाघर के सरदार के घर में पोंच के, ऊ ने लोगन हां भौत रोत और चिल्लात तको। तब ऊ ने भीतर जाके ऊसे कओ, तुम काय हल्ला मचात और रोत आव? बिटिया मरी नईंयां, बल्कि सो रई आय। बे ऊ की हंसी करन लगे, लेकिन ऊ ने सब हां निकाल के बिटिया के महतारी बाप और अपने संगियन हां लैके, भीतर जहां बिटिया पड़ी हती गओ। और बिटिया कौ हाथ पकड़ के ऊसे कओ, “तलीता कूमी”; जी कौ मतलब आय कि “ए बिटिया, मैं तोसे कैत आंव, उठ”। और बिटिया तुरतईं उठके चलन फिरन लगी; कायसे कि बा बारह साल की हती। और ई पै लोग भौत अचम्भे में हो गए। फिन ऊ ने उनहां चिता के आज्ञा दई, कि जा बात कोऊ जान न पाबै और कओ; कि ऊहां कछु खाबे के लाने दओ जाए। उते से निकल के ऊ अपने देश में आओ, और ऊके चेला ऊके पछारूं हो चले। विश्राम के दिना ऊ प्रार्थनाघर में उपदेस करन लगो; और भौत से लोग सुनके अचम्भे में पड़ गए और कहन लगे, ईहां जे बातें कहां से आ गईं? और जौ कौन सौ ज्ञान आय जो ऊहां दओ गओ आय? और कैसे सामर्थ के काम ईके हाथन से दिखात आंय? काय जौ ओई बढ़ई नोंई, जौन मरियम कौ बेटा, और याकूब और योसेस और यहूदा और शमौन कौ भईया आय? और काय ऊ की बहनें इतै हमाए बीच में नईं रैतीं? ऐई से उन ने ऊके बारे में ठोकर खाई। यीशु ने उनसे कओ, कि अगमवकता कौ अपने देश और अपने परिवार और अपने घर हां छोड़के कऊं निरादर नई होत। और ऊ उतै कौनऊं सामर्थ के काम न कर सको, केवल तनक से बीमारन पै हाथ धर के उने ठीक करो। और ऊ ने उनके अबिसवास पै अचम्भा करो और चारऊ तरफ के गांवन में उपदेस करत फिरो। और ऊ बारह चेलन हां अपने ऐंगर बुलाके उन हां दो-दो करके भेजन लगो; और उनहां बुरई आत्मन पै हक्क जमाबे दओ। और ऊ ने उने आज्ञा दई, कि गैल के लाने लाठी छोड़ और कछु न लेओ; न तो रोटी, न झोली, न पटुका में पईसा। लेकिन पनईंयां पैरो और दो-दो कुरता न पैरो। और ऊ ने उनसे कओ; जां कऊं तुम कौनऊं घर में उतरौ तो जब लौ उतै से विदा न होओ, तब लौ ओई में ठैरे रओ। जौन जांगा के मान्स तुमें न अपनाबें, और तुमाई न सुनें, उते से चलतई अपने तलुओं की धूरा झरा डालो, कि उन पै गवाही हो। और उन ने जाके प्रचार करो, कि मन बदलो। और कैऊ बुरई आत्मन हां निकालो, और कैऊ बीमारन पै तेल मलके ठीक करो। और हेरोदेस राजा ने उनकी खबर सुनी, कायसे कि ऊकौ नाओं फैल गओ हतो, और ऊ ने कओ, कि यूहन्ना बपतिस्मा देबेवालो मरे भए में से जी उठो आय, ऐई से ऊसे जे सामर्थ के काम दिखात आंय। और औरन ने कओ, जौ एलिय्याह आय, लेकिन औरन ने कओ, अगमवकता या अगमवकतन में से कोनऊं एक के बराबर आय। हेरोदेस ने जौ सुनके कओ, जौन यूहन्ना कौ मूड़ मैंने कटवाओ हतो, ऊ जी उठो आय। कायसे हेरोदेस ने खुद अपने भईया फिलिप्पुस की घरवाली हेरोदियास के कारन, जीसे ऊ ने ब्याव करो हतो, लोगन हां भेज के यूहन्ना हां पकड़वा के कैदखाने में डाल दओ हतो। कायसे यूहन्ना ने हेरोदेस से कओ हतो, कि अपने भईया की घरवाली को राख लैबो तोय उचित नईंयां। ऐई से हेरोदियास ऊसे बैर राखत हती और जा चाहत हती, कि ऊहां मरवा डालै, लेकिन एैसो न हो पाओ। कायसे हेरोदेस यूहन्ना हां धर्मात्मा और शुद्ध मान्स जान के ऊसे डरात हतो, और ऊहां बचाए रहत हतो, और ऊ की सुनके भौत घबरात हतो, पै आनन्द से सुनत हतो। और ठीक मौका पै जब हेरोदेस ने अपने जन्मदिन पै अपने खास लोगन हां और फौज के मुखियन, और गलील के बड़े मान्सन के लाने जेवनार करी। और ओई हेरोदियास की बिटिया भीतर आई, और नाच के हेरोदेस हां और ऊके संग्गै बैठे लोगन हां खुस करो, तो राजा ने बिटिया से कओ, तें जो चाए मोसें मांग मैं तोहां दैहों। और ऊसे कौल करो, कि मैं अपने आधे राज्य लौ जो कछु तें मोसें मांगे मैं तोहां दैहों। ऊ ने बाहर जाके अपनी महतारी से पूछो कि मैं का मांगों? बा बोली, यूहन्ना बपतिस्मा दैबेवाले की मूड़। बा तुरतईं राजा के ऐंगर भीतर आई, और ऊसे बिनती करी कि मैं चाहत आंव, कि तें अबई यूहन्ना बपतिस्मा दैबेवाले की मूड़ एक थाल में मोहां मंगवा दे। तो राजा भौत उदास भओ, लेकिन अपने कौल के कारन और संग्गै बैठवेवालन के कारन ऊहां टालबो न चाहो। और राजा ने तुरतईं एक सिपाई हां हुकम दैके भेजो, कि ऊ की मूड़ काट लाए। ऊने कैदखाने में जाके ऊकौ मूड़ काटो, और एक थाल में धरके ले आओ और बिटिया हां दओ, और बिटिया ने अपनी महतारी हां दओ। जौ सुनके ऊके चेला आए, और ऊ की लाश हां उठा के कबर में धरो। प्रेरितन ने यीशु के ऐंगर इकट्ठे होकें, जो कछु उन ने करो, और सिखाओ हतो, सब कछु ऊहां बता दओ। ऊ ने उन से कई; तुम खुद अलग कौनऊं जंगली जांगा में आके थोड़ो आराम करो; कायसे भौत से लोग आत जात हते, और उने खाबे तक कौ मौका न मिलत हतो। ऐई से बे नाव पै चढ़के, सूनी जांगा में अलग चले गए। और कई ने उने जात भओ देख के चीन लओ, और सब नगरन सें इकट्ठे होकें उतै पैदल दौड़े और उनसे पेंला पोंच गए। ऊ ने निकल के भारी भीड़ तकी, और उनपै तरस खाओ, कायसे कि बे ऊ भेड़न कैसे हते, जिनकौ कोऊ रखवारौ न होबै, और ऊ उने भौत सी बातें सिखान लगो। जब दिन ज्यादा ढल गओ, तो ऊके चेला ऊके ऐंगर आके कहन लगे; जा सूनी जांगा आय, और दिन भौत ढल गओ आय। उने विदा करें, कि चारऊ तरफ गांव और बस्तियन में जाके, अपने खाबे के लाने कछु मोल लैबें। ऊ ने उने उत्तर दओ; कि तुमईं उने खाबे के लाने देओ: उन ने ऊसे कओ; का हम सौ दीनार की रोटियां मोल लेबें और उने खवाबें? ऊ ने उन से कओ; जाके देखो तुमाए ऐंगर कितेक रोटियां आंय? उन ने पता लगा के कओ; पांच रोटी और दो मछरियां। तब ऊ ने उने हुकम दओ, कि सब हां हरीरे चारे पै पंगत कैसो बैठा दो। बे सौ-सौ और पचास-पचास करके पांत-पांत में बैठ गए। और ऊ ने ऊ पांच रोटियन और दो मछरियां हां लओ, और सरग कोद हेर के धन्यवाद करो और रोटियां तोड़-तोड़ के चेलन हां देत गओ, कि बे लोगन हां परसे, और बे दो मछरियां भी उन सब में बांट दईं। और सबरे खाके तृप्त हो गए। और उन ने टुकड़न से बारह टुकनियां भरके उठाईं, और कछु मछरियां तक। जिन ने रोटियां खाईं, बे पांच हजार मान्स हते। तब ऊ ने तुरतईं अपने चेलन हां बिवश होकें नाव पै चढ़ाओ, कि बे ऊसे पेंला ऊ पार बैतसैदा हां चले जाबें, जब लौ ऊ लोगन हां विदा करे। और उने विदा करके पहरवा पै प्रार्थना करबे हां गओ। और जब संजा भई, तो नाव झील के बीच में हती, और ऊ अकेलो जमीन पै हतो। और जब ऊ ने तको कि बे नाव खेऊत खेऊत घबरा गए आंय, कायसे कि हवा उनके उल्टी चल रई हती, तो रात के चौथे पहर के आस पास ऊ झील पै चलत भओ उनके ऐंगर आओ, और उनसे आगे निकल जाओ चाहत हतो। लेकिन उन ने ऊहां झील पै चलत भए तक के समझो, कि भूत आय, और चिल्ला पड़े, कायसे सबरे ऊहां तक के घबरा गए हते। पै ऊ ने तुरतईं उनसे बातें करीं और कओ; ढाढ़स बांधो: मैं आओं, डरौ नें। तब ऊ उनके ऐंगर नाव पै आओ, और हवा रुक गई: और बे भौत अचम्भो करन लगे। कायसे बे ऊ रोटियन के बारे में न समझे हते बल्कि उनके मन कर्रे हो गए हते। और बे ऊ पार उतर के गन्नेसरत जांगा में पोंचे, और नाव घाट पै लगा दई। और जब बे नाव पै से उतरे, तो मान्स तुरतईं ऊहां चीन के। अगल बगल के सबरे देश में दौड़े, और बीमारन हां खटियों पै डालके, जहां जहां खबर पाई कि ऊ आय, उते उते लए फिरे। और जहां कऊं ऊ गांवन, नगरन में, या बस्तियन में जात हतो, तो मान्सन बीमारन हां बजारन में रख के ऊसे बिनती करत हते, कि बो उनहां अपने उन्ना के छोर हां छू लैन दे, और जितने ऊहां छुअत हते, सबरे ठीक हो जात हते। तब फरीसी और कईयक शास्त्री जौन यरूशलेम से आए हते, ऊके ऐंगर इकट्ठे भए। और उन ने ऊके कैऊ चेलन हां अशुद्ध यानी बिना हाथ धोए रोटी खात भओ तको। कायसे यहूदी और सबरे फरीसी, पुरनियों की रीत पै चलत आंय और जब लौ अच्छी तरहां से हाथ नईं धो लेत तब लौ नईं खात आंय। और बाजार से आके, जब लौ सपर नईं लेत, तब लौ नईं खात; और भौत सी और बातें आंय, जौन उनके ऐंगर मानबे के लाने पोंचाईं गईं आंय, जैसे कटोरों, और लोटों, और तांबे के बासन हां धोबो मांजबो। ईसे ऊ फरीसियन ने और शास्त्रियन ने ऊसे पूछो, कि तोरे चेला काय पुरनियों की रीत पै नईं चलत, और बिना हाथ धोए रोटी खात आंय? ऊ ने उनसे कओ; कि यशायाह ने तुम कपटियन के बारे में भौत ठीक अगमबानी करी, जैसो लिखो आय; कि जे लोग ओंठन से तो मोरी इज्जत करत आंय, पै उनकौ मन मोय से दूर रैत आय। और जे बेकार मोरी उपासना करत आंय, कायसे मान्सन की आज्ञा हां धरम कौ उपदेस देके सिखात आंय। कायसे तुम परमेसुर की आज्ञा हां टालके मान्सन की रीति हां मानत आव। और उनसे कओ; तुम अपनी रीतियन हां मानबे के लाने परमेसुर की आज्ञा कैसी अच्छी तरहां से टाल देत आव। कायसे कि मूसा ने कओ आय कि अपने बाप और अपनी महतारी की इज्जत करो; और जो कोई बाप और महतारी हां बुरओ कहे, ऊ अवश्य मार डालो जाय। लेकिन तुम कैत आव कि अगर कोऊ अपने बाप और महतारी से कहे, कि जो कछु तुम हां मोसे फायदा पोंच सकत हतो, ऊ कुरबान यानी संकल्प हो चुको। तो तुम ऊहां, ऊके बाप और ऊ की महतारी की कछु सेवा नईं करन देत। ई तरीका से तुम अपनी रीतियन से, जिन हां तुमने बनाओ आय, परमेसुर कौ बचन टाल देत आव; और एैसई भौत से काम करत आव। और ऊने लोगन हां अपने ऐंगर बुलाके उनसे कओ, तुम सब मोरी सुनो, और समझो। ऐसी तो कौनऊं चीज नईंयां जौन मान्स में बाहर से समा के अशुद्ध करै; लेकिन जौन चीजें मान्स के भीतर से कड़त आंय, बेई ऊहां अशुद्ध कर देती आंय। (अगर कोऊ के सुनबे के कान होबें तो सुन ले)। जब ऊ भीड़ के ऐंगर से घर में गओ, तो ऊके चेलन ने ई कनौत के बारे में ऊसे पूछो। ऊ ने उनसे कओ; काय तुम भी ऐसे नासमझ आव? काय तुम नईं जानत, कि जौन चीज बाहर से मान्स के भीतर जात आय, बा ऊहां अशुद्ध नईं कर सकत? कायसे कि बा ऊके मन में नईं, पेट में जात आय, और संडास में निकल जात आय? ऐसो कै के ऊ ने सबरी खाबेवाली चीजन हां शुद्ध बताओ। फिन ऊ ने कओ; जो कछु मान्स में से कड़त आय, ओई मान्स हां अशुद्ध करत आय। कायसे भीतर से यानी मान्स के मन से, बुरई-बुरई चिन्ता व्यभिचार। चोरी, हत्या, पराई बईयर पै बुरई नजर डालबो, लोभ, दुष्टता, छल, लुच्चपन, बुरई नजर, निन्दा, घमण्ड और मूरखता निकलत आय। जे सब बुरई बातें भीतर से ही कड़त आंय और मान्स हां अशुद्ध करत आंय। फिन ऊ उतै से उठके सूर और सैदा के देशन में आओ; और एक घर में गओ, और चाहत हतो, कि कोऊ न जान पाबै, लेकिन ऊ छिप न सको। और तुरतईं एक बईयर जी की मोंड़ी में बुरई आत्मा हती, ऊ की चरचा सुनके आई, और ऊके गोड़े पै गिरी। जा यूनानी और सूरूफिनीकी जात की हती; और ऊ ने ऊसे बिनती करी, कि मोरी मोंड़ी में से बुरई आत्मा निकाल दे। ऊ ने, ऊसे कओ, पेंला लड़कन हां तृप्त हौन दे, कायसे कि लड़कन की रोटी लैके कुत्तन के आंगू डालबो उचित नईयां। ऊने ऊहां उत्तर दओ; कि सच आय प्रभु; तौभी कुत्ते भी तो मेज के नेंचें बच्चन की रोटी कौ चूरा खा लेत आंय। ऊ ने ऊसे कओ; ई बात के कारन चली जा; बुरई आत्मा तोरी मोंड़ी में से कड़ गई आय। और ऊ ने अपने घरै आके तको कि मोंड़ी खटिया पै पड़ी आय, और बुरई आत्मा कड़ गई आय। फिन ऊ सूर और सैदा के देशन से कड़ के दिकपुलिस देश से होत भओ, गलील की झील पै पोंचो। और मान्सन ने एक बहरा हां जौन हकला भी हतो, ऊके ऐंगर लिवा के ऊसे बिनती करी, कि अपनौ हाथ ऊ पै धरै। तो ऊ ऊहां भीड़ से अलग ले गओ, और अपनी उंगरिया ऊके कानन में डाली, और थूंक के ऊ की जीभ हां छुओ। और सरग कोद हां तक के सांस लई, और ऊसे कओ; इप्फत्तह, यानी खुल जा। और ऊके कान खुल गए, और ऊ की जीभ की गांठ भी खुल गई, और ऊ साफ-साफ बोलन लगो। तब ऊ ने उने चिताओ कि कोऊ से न कहियो; लेकिन जितनौ ऊ ने उने चिताओ उतनईं बे और परचार करन लगे। और बे भौत अचम्भे में होकें कहन लगे, ऊ ने जो कछु करो आय सब अच्छो करो आय; ऊ बैहरन हां सुनबे की, और बौरन हां बोलबे की ताकत देत आय। ऊ दिना में जब फिन बड़ी भीड़ इकट्ठी भई, और उनके ऐंगर कछु खाबे हां न हतो, तो ऊ ने अपने चेलन हां ऐंगर बुला के उन से कओ। मोहां ई भीड़ पै तरस आत आय, कायसे जे तीन दिना से बराबर मोरे संग्गै आंय, और उनके ऐंगर कछु भी खाबे हां नईंयां। अगर मैं उने भूखौ घरै पोंचा देंओं, तो गैल में थक के रै जै हैं; कायसे कि इनमें से कोऊ कोऊ दूर से आए हैं। ऊके चेलन ने ऊहां जवाब दओ, कि इते जंगल में इतनी रोटी कोऊ कहां से लियाबै कि जे अफर जाबें। ऊ ने उनसे पूछो; कि तुमाए ऐंगर कितनी रोटी आंय? उन ने कई, सात। तब ऊ ने मान्सन हां जमीन पै बैठबे की आज्ञा दई, और बे सात रोटियां लईं, और धन्यवाद कर के टोड़ीं, और अपने चेलन हां देत गओ कि उनके अगारूं रखें, और उन ने लोगन के आंगू परस दओ। उनके ऐंगर तनक सी हल्की मछरियां भी हतीं; और ऊ ने धन्यवाद कर के उन हां भी लोगन के आंगू रखबे की आज्ञा दई। सो बे खाके अफर गए और बाकी टुकड़न के सात टुकना भर के उठाए। और मान्स चार हजार के आस पास हते; और ऊ ने उने विदा करो। और ऊ तुरतईं अपने चेलन के संग्गै नाव पै चढ़के दलमनूता देश हां चलो गओ। फिन फरीसी निकल के ऊसे बहस करन लगे, और ऊहां जांचबे के लाने ऊसे कौनऊं सरग की निसानी मांगी। ऊ ने अपनी आत्मा में हाय भर के कओ, ई समय के मान्स काय निसानी ढूंड़त आंय? मैं तुम से सांची कैत आंव, कि ई समय के लोगन हां कौनऊं निसानी नईं दई जै है। और ऊ उने छोड़ के फिन नाव पै चढ़ गओ और ऊ पार चलो गओ। और बे रोटी लैबो भूल गए हते, और नाव में उनके ऐंगर एकई रोटी हती। और ऊ ने उने चिताओ, कि तको, फरीसियन के खमीर और हेरोदेस के खमीर से चौकन्ने रओ। बे आपस में विचार करके कहन लगे, कि हमाए ऐंगर तो रोटी नईंयां। ऐसो जान के यीशु ने उन से कओ; तुम काय आपस में जौ विचार कर रए आव कि हमाए ऐंगर रोटी नईंयां? का अब तक नईं जानत और नईं समझत? का तुमाओ मन कर्रो हो गओ आय? का आंखें राखत भए भी नईं तकत, और कान राखत भए भी नईं सुनत? और तुमें याद नईंयां। कि जब मैंने पांच हजार के लाने पांच रोटी टोड़ीं हतीं तो तुमने टुकड़न की कितनी टुकनियां भर के उठाईं? उन ने ऊसे कओ, बारह टुकनियां। और जब चार हजार के लाने सात रोटीं हतीं तो तुमने टुकड़न के कितने टुकना भर के उठाए हते? उन ने ऊसे कओ सात टुकना। ऊ ने उनसे कओ, का तुम अबै तक नईं समझत? और बे बैतसैदा में आए; और लोग एक अंधरा हां ऊके ऐंगर लै आए और ऊसे बिनती करी, कि ऊहां छुए। ऊ ओई अंधरा कौ हाथ पकड़ के ऊहां गांव से बाहर ले गओ, और ऊ की आंखन में थूक के ऊ पै हाथ धरे, और ऊसे पूछो; का तें कछु तकत आय? ऊ ने आंख उठाके कओ; मैं मान्सन हां तकत आंव; कायसे बे मोहां निंगत भए दिखाई देत आंय, जैसे पेड़। तबई ऊ ने दूसरी बेर ऊ की आंखन पै हाथ धरे, और ऊ ने गौर से तको, और ऊ ठीक हो गओ, और सब कछु साफ साफ तकन लगो। और ऊ ने ऊहां जौ कह के घरै पोंचाओ, कि ई गांव के भीतर पांव तक न धरियो। यीशु और ऊके चेला कैसरिया फिलिप्पी के गांवन में चले गए: और गैल में ऊ ने अपने चेलन से पूछो कि लोग मोहां का कैत आंय? उन ने उत्तर दओ, कि यूहन्ना बपतिस्मा दैबेवालो; पै कौऊ कोऊ एलिय्याह; और कोऊ कोऊ अगमवकतन में से एक कैत आंय। ऊ ने उन से पूछो; लेकिन तुम मोहां का कैत आव? पतरस ने ऊहां उत्तर दओ; कि तें मसीह आय। तो ऊ ने उने चिता के कओ, कि मोरे बारे में जा कोऊ से न कईयो। और ऊ उने सिखान लगो, कि मान्स के बेटा हां जरूरी आय, कि बो भौत तकलीफ उठाबै, और पुरानी रीत वाले और बड़े पुजारी और शास्त्री ऊहां तुच्छ जानके मार डालें और ऊ तीन दिना के बाद जी उठे। ऊ ने जा बात उन से खुली खुली कह दई: ई पै पतरस ऊहां अलग लै जाके झिड़कन लगो। लेकिन ऊ ने पलट के, और अपने चेलन कोद तक के पतरस हां झड़प के कओ; कि ऐ शैतान, मोरे सामने से दूर हो; कायसे तें परमेसुर की बातन पै नईं, बल्कि मान्सन की बातन पै मन लगात आय। ऊ ने भीड़ हां अपने चेलन समेंत ऐंगर बुलाके उनसे कओ, जो कोऊ मोरे पछाऊं आबो चाहे, ऊ अपने घमण्ड से इनकार करै और अपनो क्रूस उठा के, मोरे पांछू हो लैबे। कायसे जो कोऊ अपने प्रान बचाओ चाहै ऊ ऊहां खो है, पै जो कोऊ मोरे और भले सन्देसे के लाने अपने प्रान खो है, ऊ ऊहां बचा है। अगर मान्सन पूरी दुनिया हां पाबै और अपने प्रान की हानि उठाबै, तो ऊहां का फायदा हुईये? और मान्स अपने प्रान के बदले का दै है? और जो कोऊ ई व्यभिचारी और पापी जात के बीच मोसे और मोरी बातन से लजा है, मान्स को बेटा भी जब ऊ पवित्र दूतन के संग्गै अपने बाप की महिमा के संग्गै आ है, तो ऊसे भी लजा है। और ऊ ने उन से कओ; मैं तुम से सांची कैत आंव, कि जौन इतै ठांड़े आंय, उन में से कैऊ ऐसे आंय, कि जब लौ परमेसुर के राज्य हां ताकत के संग्गै आओ भओ न तक लें, तौ लौ मौत को स्वाद बिल्कुल न चख हैं। छै दिना के बाद यीशु ने पतरस और याकूब और यूहन्ना हां संग्गै लओ, और अकेले में कौनऊं ऊंचे पहरवा पै लै गओ; और उनके सामने ऊकौ रूप बदल गओ। ऊकौ उन्ना ऐसो चमकन लगो और इतै लौ ज्यादा उजरौ भओ, कि धरती पै कौनऊं धोबी लौ ऊं सो उजरौ नईं कर सकत। और उने मूसा के संग्गै एलिय्याह दिखाई पड़ो; और बे यीशु के संग्गै बात करत हते। ईपै पतरस ने यीशु से कओ; हे रब्बी, हमाओ इते रहबो अच्छो आय: ईसे हम तीन मंड़प बनाएं; एक तोरे लाने, एक मूसा के लाने, और एक एलिय्याह के लाने। कायसे ऊ नईं जानत हतो, कि का उत्तर देबे; ईसे कि बे भौत डरा गए हते। तब एक बादल ने उने ढंक लओ, और ऊ बादल में से जा आवाज आई, कि जौ मोरो प्यारो बेटा आय; ऊ की सुनो। तब उन ने चारऊ कोद नजर डाली, और यीशु हां छोड़ अपने संग्गै और कोऊहां नईं तको। पहरवा से उतरत भए, ऊ ने उने आज्ञा दई, कि जब लौ मान्स कौ बेटा मरे भए में से न जी उठै, तब लौ जो कछु तुमने तको आय ऊ कोऊ से न कईयो। उन ने ई बात हां याद रखो; और आपस में बहस करन लगे, कि मरे भए में से जी उठबे कौ का मतलब आय? और उन ने ऊसे पूछो, शास्त्री काय कैत आंय, कि एलिय्याह कौ पेंला आबो निश्चित आय? ऊ ने उने उत्तर दओ, कि एलिय्याह सांचऊ में पेंला आके सब कछु ठीक कर है, लेकिन मान्स के बेटा के बारे में जौ काय लिखो आय, कि ऊ भौत दुख उठा है, और तुच्छ गिनो जै है? लेकिन मैं तुम से कैत आंव, कि एलिय्याह तो आ चुको, और जैसो ऊके बारे में लिखो आय, उन ने जैसो ऊके संग्गै चाहो सो करो। और जब ऊ चेलन के ऐंगर आओ, तो तको कि उनके चारऊ कोद भौत भीड़ लगी आय और शास्त्री उनके संग्गै बहस कर रए आंय। और ऊहां देखतई सबरे भौत अचम्भा करन लगे, और ऊके तरफ हां दौड़ के ऊसे नमस्कार करो। ऊ ने उनसे पूछो; तुम इन से का बहस कर रए आव? भीड़ में से एक ने ऊहां उत्तर दओ, कि हे गुरू, मैं अपने बेटा हां, जीमें एक गूंगी आत्मा समाई आय, तोरे ऐंगर लाओ हतो। जां कऊं बा ऊहां पकड़त आय, उतईं पटक देत आय: और ऊ मों में फैन भर लाऊत, और दांत पीसत, और सूकत जात आय; और मैंने तोरे चेलन से कओ हतो कि बे ऊहां निकाल देबें लेकिन बे निकाल नईं पाए। जौ सुनके ऊ ने उन से उत्तर देके कओ: हे अबिसवासी लोगो, मैं कब लौ तुमाए संग्गै रै हों? और कब लौ तुमाई सै हों? ऊहां मोरे ऐंगर ले आओ। तो बे ऊके ऐंगर ले आए: और जब ऊ ने ऊहां तको, तो तुरतईं ऊ आत्मा ने ऊहां मरोड़ो; और ऊ जमीन पे गिरो, और मों से फैन बहात भओ लोटन लगो। ऊ ने ऊके बाप से पूछो; ईकी जा हालत कब से आय? ऊ ने कओ, बचपन से: ऊ ने ईहां मारबे के लाने कभऊं आगी और कभऊं पानी में गिराओ; लेकिन अगर तें कछु कर सकै, तो हम पै तरस खाके हमाओ भलौ कर। यीशु ने ऊसे कओ; अगर तें कर सकत आय; जा का बात आय? बिसवास करबे वालन के लाने सब कछु हो सकत आय। लड़का के बाप ने तुरतईं गिड़गिड़ा के कओ; हे प्रभु, मैं बिसवास करत आंव, मोरे अबिसवास कौ उपाय कर। जब यीशु ने तको, कि लोग दौड़ के भीड़ लगा रए आंय, तो ऊ ने बुरई आत्मा हां जौ कह के डांटो; कि ऐ गूंगी और बहरी आत्मा, मैं तोहां हुकम देत आंव, ऊ में से कड़ आ, और ऊ में फिन कभऊं न घुसिए। तो बा चिल्ला के, ऊहां भौत मरोर के, कड़ आई, और लड़का मरो भओ सो हो गओ, इतै लौ के भौत लोग कहन लगे, कि ऊ मर गओ। लेकिन यीशु ने ऊकौ हाथ पकड़ के ऊहां उठाओ, और ऊ ठांड़ो हो गओ। जब ऊ घर में आओ, तो ऊके चेलन ने अकेले में ऊसे पूछो, हम ऊहां काय न निकाल सके? ऊ ने उन से कओ, कि जा जात बगैर प्रार्थना के कौनऊं और तरीका से निकल नईं सकत। फिन बे उते से चले, और गलील में होकें जा रय हते, और ऊ नईं चाहत हतो कि कोऊ जाने। कायसे कि ऊ अपने चेलन हां उपदेस देत और उन से कहत हतो, कि मान्स कौ बेटा मान्सन के हाथन में पकड़वाओ जै है, और बे ऊहां मार डाल हैं, और ऊ मरबे के तीन दिना बाद जी उठ है। पै जा बात उनकी समझ में नईं आई, और बे ऊसे पूछबे से डरात हते। फिन बे कफरनहूम में आए; और घर में आके ऊ ने उन से पूछो कि गैल में तुम कौन सी बात पै बहस करत हते? बे चुप्प रए, कायसे कि गैल में उन ने आपस में जा बहस करी हती, कि हम में से बड़ो को आय? तब ऊ ने बैठ के बारहों चेलन हां बुलाओ, और उन से कओ, अगर कोऊ बड़ो होबो चाहे, तो सबसे छोटो और सबकौ सेवक बने। और ऊने एक छोटे से लड़का हां लैके उनके बीच में ठांड़ो करो, और ऊहां गोदी में लैके उनसे कओ। जो कोऊ मोरे नाओं से ऐसे लड़कन में से कोनऊं एक हां अपनात आय; और जो कोऊ मोहां अपनात आय, ऊ मोहां नईं, बल्कि मोरे भेजबेवाले हां अपनात आय। तब यूहन्ना ने ऊसे कओ, हे गुरू, हमने एक मान्स हां तोरे नाओं से बुरई आत्मन हां निकालत तको और हम ऊहां रोकन लगे, कायसे ऊ हमाए पांछू नईं होत हतो। यीशु ने कओ, ऊहां न रोको; कायसे ऐसो कोऊ नईंयां जौन मोरे नाओं से ताकत कौ काम करै, और जल्दी से मोहा बुरओ कै सके। कायसे जौन हमाए खिलाफ नईंयां, ऊ हमाई तरफ आय। जो कोऊ एक कटोरा पानी तुमें ईसें पिलाबै कि तुम मसीह के आओ तो मैं तुम से सच्ची कैत आंव कि ऊ अपनो करमन कौ फल कौनऊं तरीका से न खो है। पै जो कोऊ ई छोटन में से जौन मोरे ऊपर बिसवास करत आंय, कोऊहां ठोकर खबाए तो ऊके लाने भलो जौ आय कि एक बड़ी चकिया कौ पाट ऊके गले में लटकाओ जाय और ऊहां समुन्दर में फें क दओ जाए। अगर तोरो हाथ तोहां ठोकर खबाए तो ऊहां काट डाल, टुण्डा होकें जीवन में घुसबो, तोरे लाने ईसे भलो आय। कि दो हाथ रहत भए नरक के बीच में ऊ आगी में डालो जाए जौन कभऊं बुझने नईंयां। अगर तोरो पांव तोहां ठोकर खबाए तो ऊहां काट डाल। लंगड़ौ होकें जीवन में घुसबो तोरे लाने ईसे भलो आय, कि दो पांव होत भए नरक में डालो जाए। और अगर तोरी आंख तोहां ठोकर खबाए तो ऊहां निकाल डाल, कनवां होकें परमेसुर के राज्य में घुसबो तोरे लाने ईसे भलौ आय, कि दो आंखें होत भए तें नरक में डालो जाए। जहां पै उनको कीड़ा नईं मरत और आगी नईं बुझत। कायसे कि हर एक जन आगी से नमकीन करो जै है। नोंन अच्छो आय, पै अगर नोंन कौ नोंनपन जात रए, तो ऊहां कीसे स्वाद में कर हौ? अपने में नोंन राखौ और आपसी में मेल-जोल से रऔ। फिन यीशु उतै से उठके यहूदिया के सिवानों में और यरदन नदिया के पार आओ, और भीड़ ऊके ऐंगर फिन से जमा हो गई, और ऊ अपनी रीत के हिसाब से, उन हां फिन के उपदेस दैन लगो। तब फरीसियन ने ऊके ऐंगर आके ऊ की परीक्षा करबे हां ऊसे पूछो, का जौ उचित आय, कि मान्स अपनी घरवाली हां छोड़े? यीशु ने उन हां उत्तर दओ, मूसा ने तुम हां का आज्ञा दई आय? उन ने कओ, मूसा ने छोड़ छुट्टी कौ कागज लिखबे और छोड़बे की आज्ञा दई आय। यीशु ने उन से कओ, कि तुमाए मन के कर्रेपन के कारन ऊ ने तुमाए लाने जा आज्ञा लिखी। पै संसार के शुरू से परमेसुर ने मान्स और बईयर के हिसाब से उने बनाओ आय। ई कारन मान्स अपने महतारी-बाप से अलग होकें अपनी घरवाली के संग्गै रै है, और बे दोई एक सरीर हुईयें। ईसे अब बे दो नईयां पै एक सरीर आंय। ईसे जीहां परमेसुर ने जोड़ो आय ऊहां मान्स अलग न करै। और घर में चेलन ने ईके बारे में ऊसे फिन पूछो। ऊ ने उन से कओ, जो कोऊ अपनी घरवाली हां छोड़ के दूसरी से ब्याव कर है, तो ऊ पहली के खिलाफ में व्यभिचार करत आय। और जौन घरवाली अपने मान्स हां छोड़ के दूसरे से ब्याव कर है, तो बा व्यभिचार करत आय। फिन लोग बच्चन हां ऊके ऐंगर लाऊ न लगे, कि ऊ उनपै हाथ धरै, पै चेलन ने उने डांटो। यीशु ने जौ तक के नाराज होकें उन से कओ, बच्चन हां मोरे ऐंगर आऊन देओ और उनहां न रोको, कायसे परमेसुर कौ राज एैसई को आय। मैं तुम से सांची कैत आंव, जो कोऊ परमेसुर के राज्य हां बच्चा की नाईं न अपनाए, ऊ ऊ में कभऊं पिड़ न पाहै। और ऊ ने उन हां गोद में लओ, और उन पै हाथ धरके उने आसीस दई। और जब ऊ निकल के गैल में जात हतो, तो एक मान्स ऊके ऐंगर दौड़त भओ आओ, और ऊके आंगू टिंगरे धर के ऊसे पूछो, हे अच्छे गुरू, अनन्त जीवन कौ हक्कदार होबे के लाने मैं का करों? यीशु ने ऊसे कओ, तें मोहां अच्छौ काए कैत आय? कोऊ अच्छौ नईयां, केवल एकई यानी परमेसुर आय। तें आज्ञन हां तो जानत आय; हत्या न करबो, व्यभिचार न करबो, चोरी न करबो, झूठी गवाही न दैबो, छल न करबो, अपने बाप और अपनी महतारी की इज्जत करबो। ऊ मान्स ने यीशु से कओ, हे गुरू, जौ सब हां मैं छुटपन से मानत आओ आंव। यीशु ने ऊ पै नजर कर के ऊसे प्रेम करो, और ऊसे कओ, तो में एक बात की कमी आय; जा, जो कछु तोरो आय, ऊहां बेंच के कंगालन हां दे, और तोहां सरग में धन मिल है, और आके मोरे पांछू हो ले। ई बात से ऊके मों पै उदासी छा गई, और ऊ सोचत भओ चलो गओ, कायसे कि ऊ भौत अमीर हतो। यीशु ने चारऊ कोद तक के अपने चेलन से कओ, धनवालन हां परमेसुर के राज में घुसबो कैसो मुसकिल आय। चेले ऊ की बातन से अचम्भा में पड़ गए, ई पै यीशु ने फिन उने उत्तर दओ, हे बच्चो, जौन धन पै भरोसा रखत आय, उन के लाने परमेसुर के राज में पिड़बो कैसो मुसकिल आय। परमेसुर के राज में धनवाले कौ पिड़बे से, ऊंट कौ सूजी के छेद में से कड़ जाबो आसान आय! चेले भौत चकित होकें आपस में कहन लगे, तो फिन की कौ उद्धार हो सकत आय? यीशु ने उनकी कोद तक के कओ, मान्सन से तो जौ नईं हो सकत, लेकिन परमेसुर से सब कछु हो सकत आय। पतरस यीशु से कहन लगो, कि देख, हम तो सब कछु छोड़ के तोरे पांछू हो लए आंय। यीशु ने कओ, मैं तुमसे सांची कैत आंव, कि एैसो कोऊ नईंयां, जीने मोरे और भले संदेसे के लाने घर या भईयन हां या बहनन हां या महतारी-बाप हां या बाल-बच्चन हां या खेतन हां छोड़ दओ होबै। और अब ई बेरा सौ गुनौ न पाए, परलोक में अनन्त जीवन के लाने घर, बहनन, महतारियन और बाल-बच्चन और खेतन को छोड़बो भौत जरूरी आय। पै कईयक जौन पेंला आंय, पांछू हुईये; और जौन पछाऊं आंय; बे पेंला हुईयें। और बे यरूशलेम हां जात भए गैल में हते, और यीशु उन के आंगू आंगू जा रओ हतो: और बे अचम्भा करन लगे और जौन ऊके पांछू पांछू चलत हते, डरान लगे, तब ऊ फिन उन बारह को लेके उन से बे बातें कहन लगो, जौन ऊ पै आबे वालीं हतीं। कि तको, हम यरूशलेम हां जात आंय, और मान्स कौ बेटा बड़े पुजारियन और धरमगुरुअन के हाथन पकड़वाओ जै है, और बे ऊहां मौत के लायक ठहरा हैं, और दूसरी जातियन के हाथ में दे दै हैं। और बे ऊ की हंसी ठठ्ठा कर हैं, और ऊ पै थूक हैं, और ऊहां कोड़ा मार हैं, और ऊहां मार डाल हैं, और तीन दिना के बाद ऊ जिन्दा हो जै है। तबई जब्दी नाओं के मान्स के बेटा याकूब और यूहन्ना ने ऊके ऐंगर आके कओ, हे गुरू, हम चाहत आंय, कि जो कछु हम तोसें मांगें, ओई तें हमाए लाने करे। ऊ ने उन से कओ, तुम का चाहत आव कि मैं तुमाए लाने करों? उन ने ऊसे कओ, कि हमें जौ दे, कि तोरी महिमा में हम में से एक तोरे दांएने और दूसरौ तोरे डेरे बैठे। यीशु ने उन से कओ, तुम नईं जानत, कि का मांगत आव? जौन तकलीफ मैं उठाबे पै आंव, का तुम उठा सकत आव? और जौन बपतिस्मा मैं लैबे पै आंव, का लै सकत आव? उन ने ऊसे कओ, हम से हो सकत आय: यीशु ने उन से कओ; जौन तकलीफ मैं उठाबे पै आंव, तुम उठा हौ; और जौन बपतिस्मा मैं लैबे पै आंव, तुम ऊहां लै हौ। पै जिन के लाने तईयार करो गओ आय, उने छोड़ और कोऊहां अपने दांएने और अपने डेरे बैठाबो मोरो काम नईंयां। जौ सुन के दसओं याकूब और यूहन्ना चेलन पै खिसयान लगे। यीशु ने उन हां ऐंगर बुलाके उन से कओ, तुम जानत आव, कि जौन दूसरी जातन के हाकिम माने जात आंय, बे उन पै मालिकी करत आंय, और उन में जौन बड़े आंय, उन पै अधिकार जताऊ त आंय। पै तुम में एैसो नईंयां, बल्कि जो कोऊ तुम में बड़ौ बनो चाहे ऊ तुमाओ सेवक बने। और जो कोऊ तुम में मुखिया भओ चाहे, ऊ सबको नौकर बनै। कायसे कि मान्स कौ बेटा ईके लाने नईं आओ, कि ऊ की सेवा खुसामद करी जाए, पै ईके लाने आओ, कि खुद सेवा टहल करै, और मुतकों की मुक्ति के लाने अपने प्रान देबे। और बे यरीहो नाओं शहर में आए, और जब यीशु और ऊके चेला, और एक बड़ी भीड़ यरीहो से कड़त हती, तो तिमाई कौ बेटा बरतिमाई एक अन्‍धो भिकारी गैल के किनारे बैठो हतो। ऊ जौ सुन के कि यीशु नासरी आय। जोर जोर से कहन लगो, कि हे दाऊद राजा की सन्तान, यीशु मोरे ऊपर दया कर। कैऊ अन ने ऊहां डांटो कि चुप्प रए, पै ऊ जोर जोर से टेरन लगो, कि हे दाऊद राजा की सन्तान, यीशु मोरे ऊपर दया कर। तो यीशु ने रुक के कओ, कि ऊहां बुलाओ; और लोगन ने ऊ अन्धरा हां बुला के ऊसे कओ, धीरज धर, उठ, ऊ तोहां बुलात आय। ऊ अपनो उन्ना फेंक के तुरतईं उठो, और यीशु के ऐंगर आओ। ई पै यीशु ने ऊसे कओ; तें का चाहत आय कि तोरे लाने मैं करों? अन्धरा ने ऊसे कओ, हे धरमगुरू, जौ कि मैं तकन लगों। यीशु ने ऊसे कओ; चलो जा, तोरे बिसवास ने तोहां ठीक कर दओ आय: और ऊ तुरतईं तकन लगो, और गैल में ऊके पांछू हो लओ। जब यीशु और ऊके चेला यरूशलेम नगर के ऐंगर जैतून पहरवा पै बैतफगे और बैतनिय्याह गांव के ऐंगर आए, तो ऊ ने अपने चेलन में से दो हां जौ कह के भेजो। कि अपने सामने के गांव में जाओ, और ऊ में पोंचतई एक गदईया कौ बच्चा जी पै कभऊं कोऊ सवार नईं भओ, बंधो भओ तुम हां मिल है, ऊहां छोड़ लै आओ। अगर तुम से कोऊ जौ पूछे, जौ का करत आव? तो कईयो, कि प्रभु हां ईकौ प्रयोजन आय; और ऊ तुरतईं ऊहां इतै भेज दै है। उन ने जाके ऊ बच्चा हां दरवाजे के ऐंगर चौक में बंधो भओ पाओ, और छोड़न लगे। उन में से जौन उतै ठांड़े हते, कोऊ कोऊ कहन लगे, जौ का करत आव, गदईया के बच्चा हां काय छोड़त आव? उन ने जैसो यीशु ने कओ हतो, ऊं सईं उन से कै दओ, तब उन ने उने जान दओ। और उन ने बच्चा हां यीशु के ऐंगर लै आके ऊ पे अपने उन्ना डाले और यीशु ऊके ऊपर बैठ गओ। कैऊ अन ने अपने उन्ना गैल में बिछाए और दूसरन ने खेतन में से डगालें काट काट के फैला दईं। और जौन ऊके आंगू आंगू जाते और पांछू पांछू चले आत हते, जोर जोर से चिल्लाऊ त जात हते, कि होशाना; धन्य आय ऊ जौन प्रभु के नाओं से आत आय। हमाए बाप दाऊद कौ राज जो आ रओ आय; धन्य आय: आकास में होशाना। और यीशु यरूशलेम नगर में पोंच के मन्दर में आओ, और चारऊ कोद सब चीजन हां तक के बारह चेलन के संग्गै बैतनिय्याह गांव गओ कायसे कि संजा हो गई हती। दूसरे दिना जब यीशु और ऊके चेला बैतनिय्याह गांव से निकले तो ऊहां भूख लगी। यीशु दूर से एक हरौ अंजीर कौ पेड़ तक के फल की आसा में ऐंगर गओ, पै पत्तन हां छोड़ कछु न पाओ; कायसे कि फल कौ समय न हतो। ईपै यीशु ने ऊ पेड़ से कओ, अबईं से कोऊ तोरो फल कभऊं न खाए। ऊके चेला जे बात सुन रए हते। फिन बे यरूशलेम में आए, और यीशु मन्दर में गओ; और उतै जौन सामान कौ लैन दैन कर रए हते उने बाहर निकालन लगो; और सर्राफों की पीढ़े और परेबा के बेंचबेवालन की चौकियां पलट दईं। और मन्दर में से होकें कोऊहां बासन लैके आबे जाबे नईं दओ। और उपदेस कर के उन से कओ, का जौ धरमपोथी में नईं लिखो आय, कि मोरो घर सब जातन के लाने प्रार्थना कौ घर कहला है? पै तुम ने ईहां डाकुअन की गुफा बना दई आय। जौ सुन के बड़े पुजारी और शास्त्री ऊ की हत्या करबे कौ मौका ढूंढ़न लगे; कायसे कि ऊसे डरात हते, ईसे कि सबरे मान्स ऊके उपदेस से चकित हो जात हते। और रोजाना संजा होत ऊ नगरी से बाहर जात हतो। फिन सबेरे जब बे उते से जात हते तो उन ने ऊ अंजीर के पेड़ हां जड़ तक सूखौ भओ तको। पतरस हां बा बात याद आई, और ऊ ने ऊसे कओ, हे देवपुरुष, देख, जौ अंजीर कौ पेड़ जीहां तेंने श्राप दई हती सूख गओ आय। यीशु ने ऊहां उत्तर दओ, परमेसुर पै बिसवास राखौ। मैं तुम से सांची कैत आंव, कि जो कोऊ ई पहरवा से कैबे; कि तें उखड़ जा, और समुन्दर में गिर पड़, और अपने मन में संका न करै, बल्कि आभास करै, कि जो कछु कैत आंव ऊ हो जै है, तो ऊके लाने ओई हुईये। ईसे मैं तुम से कैत आंव, कि जो कछु तुम प्रार्थना करके मांगौ, तो आभास कर लेओ कि तुमें मिल गओ, और तुमाए लाने हो जै है। और जब कभऊं तुम ठांड़े होकें प्रार्थना करत आव, तो अगर तुमाए मन में कोऊ की तरफ से कछु बिरोध होबै, तो क्षमा करो: ईसे कि तुमाओ सरगवालो बाप भी तुमाए अपराधन हां क्षमा कर है। अगर तुम क्षमा न कर हौ, तो तुमाओ बाप जौन सरग में आय, तुमाए अपराध क्षमा न कर है। यीशु अपने चेलन कै संग्गै फिन यरूशलेम नगर आओ, और जब ऊ मन्दर में टहल रओ हतो तो बड़े पुजारी, शास्त्री और पुराने तौर तरीका वाले ऊके ऐंगर आके पूंछन लगे। कि तें जे काम कौन हक्क से करत आय? और जौ हक्क तोहां कीने दओ कि तें जे काम करै? यीशु ने उन से कओ: मैं भी तुम से एक बात पूंछत आंव; मोहां जवाब देओ: तो मैं तुम हां बता हों, कि जे काम कौन से हक्क से करत आंव। यूहन्ना बपतिस्मा दैबेवाले कौ बपतिस्मा का सरग कोद से हतो कि मान्सन कोद से हतो? मोहां जवाब देओ। तब बे आपस में बहस करन लगे कि अगर हम कहें, कि सरग कोद से, सो ऊ कै है; फिन तुम ने ऊकौ आभास काय नईं करो? और अगर हम कहें, मान्सन कोद से तो मान्सन को डर आय, कायसे सब जानत आंय कि यूहन्ना सांचऊ में अगमवकता आय। सो उन ने यीशु हां जवाब दओ, कि हम नईं जानत: यीशु ने उन से कओ, मैं भी तुमें नईं बतात, कि जे काम कौन हक्क से करत आंव। फिन यीशु कनौत में उन से बातें करन लगो: कि कोऊ मान्स ने दाख की बारी लगाई, और ऊके चारऊं कोद बाड़ौ बांधो, और रस कौ कुण्ड खोदो, और गुम्मट बनाओ; और किसानन हां ऊ को ठेका देके परदेस चलो गओ। फिन फल के मौसम में ऊ ने किसानन के ऐंगर एक सेवक हां भेजो कि किसानन से दाखन के बगीचा के फल कौ हिस्सा ले। पै उन ने ऊहां पकड़ के पीटो और छूंछे हाथ लौटा दओ। फिन ऊ मान्स ने एक और सेवक हां उन के ऐंगर भेजो और उन ने ऊ को मूड़ फोड़ डालो और ऊ की बेज्जती करी। फिन ऊ ने एक और हां भेजो, और उन ने ऊहां मार डालो: तो ऊ ने और कैऊ अन हां भेजो: पै उन ने कैऊअन हां पीटो, और कैऊ अन हां मार डालो। अब एकई बचो हतो, जौन ऊ को प्यारो बेटा हतो; अन्त में ऊ ने ऊहां भी उनके ऐंगर जौ सोच के भेजो कि बे मोरे बेटा की इज्जत कर हैं। पै उन किसानन ने आपस में कओ; जौई तो वारिस आय; आओ, हम ऊहां मार डालें, तो जौ बगीचा हमाओ हो जै है। और उन ने ऊहां पकड़ के मार डालो, और बगीचा के बाहर फेंक दओ। ईसे दाख के बगीचा कौ मालक का कर है? ऊ आके उन किसानन कौ नास कर है, और दाख कौ बगीचा औरन हां दे दै है। का तुम ने धरम शास्त्र में जौ नईं पढ़ो, कि जौन पत्थर हां कारीगरन ने बिना काम कौ साबित करो हतो, ओई पत्थर सबसे जरूरी हो गओ हतो? जौ प्रभु की तरफ से भओ, और हमाई नजर में अनौखो आय। ई पै धरमगुरुअन ने यीशु हां पकड़वाओ चाहो, कायसे बे समझ गए हते, कि ऊ ने हमाए खिलाफ में जा कनौत कही आय: पै बे लोगन से डराने, और ऊहां छोड़ के चले गए। तब धरमगुरुअन ने ऊहां बातन में फंसाबे के लाने कैऊ अन फरीसियन और हेरोदियन धरम पंथियन हां ऊके ऐंगर भेजो। और उन ने आके ऊसे कओ; गुरूजी हम जानत आंय, कि तें सच्चो आय, और कोऊ की परवाह नईं करत; कायसे कितें मान्सन के मों देखी बातें नईं करत, बल्कि परमेसुर की गैल सच्चाई से बतात आय। तो का कैसर महाराजा हां टैक्स दैबो उचित आय, कि नईं? हम दैबें या न दैबें? यीशु ने उनकौ कपट जान के उन से कओ; मोहां काय परखत आव? एक दीनार मोरे ऐंगर ले आओ, कि मैं तकों। बे ले आए, और ऊ ने उन से कओ, जा मूरत और नाओं कौन को छपो आए? उन ने कओ, कैसर महाराजा कौ। यीशु ने उन से कओ; जौन कैसर महाराजा कौ आए ऊ कैसर महाराजा हां, और जौन परमेसुर कौ आए ऊ परमेसुर हां देओ। तब बे ऊ पै भौत अचम्भा करन लगे। फिन सदूकी धरम पंथियन ने भी, जौन कैत आंय कि मरे भयन कौ जी उठबो हैई नईंयां, ऊके ऐंगर आके ऊसे पूछो। हे गुरू, मूसा अगमवकता ने हमाए लाने लिखो आय, कि अगर कोऊ कौ भईया बिना औलाद के मर जाए, और ऊ की घरवाली रह जाए, तो ऊकौ भईया ऊ की घरवाली हां ब्याह लैबे और अपने भईया के लाने वंस पैदा करै। सो गुरू जी, सात भईया हते, पहलो भईया शादी कर के बिना औलाद मर गओ। तब दूसरे भईया ने ऊ की घरवाली हां ब्याह लओ और बिना औलाद मर गओ; और ऊंसई तीसरे ने भी। और सातई से औलाद न भई: सब से बाद में बा लुगाई भी मर गई। सो जी उठबे पै बा कौन की घरवाली हुईये? कायसे बा सातई की घरवाली हो चुकी हती? यीशु ने उन से कओ; का तुम ई कारन से भूल में नईं पड़े आव, कि तुम न तो धरमशास्त्र हां जानत आव, और न परमेसुर की ताकत हां। कायसे कि जब बे मरे भए में से जी उठ हैं, तो उन में ब्याव शादी न हुईये; पै सरग में दूतन की भांति हुईयें। मरे भयन के जी उठबे के बारे में का तुम ने मूसा अगमवकता की किताब में झाड़ी की कथा में नईं पढ़ो, कि परमेसुर ने ऊसे कओ, कि मैं इब्राहीम कौ परमेसुर, और इसहाक कौ परमेसुर, और याकूब कौ परमेसुर आंव? परमेसुर मरे भयन कौ नईं, बल्कि जियत कौ परमेसुर आय: सो तुम बड़ी भूल में पड़े आव। और धरम पंडितन में से एक ने आके उन हां बहस करत सुनो, और जौ जान के कि ऊ ने उन हां अच्छे तरीका से जवाब दओ; ऊसे पूछो, सबसे मुख्य आज्ञा कौन सी आय? यीशु ने ऊ धरम पंडित हां जवाब दओ, सबरी आज्ञन में से जा मुख्य आय; हे इस्राएल सुन; प्रभु हमाओ परमेसुर एकई प्रभु आय। और तें अपने प्रभु परमेसुर से अपने पूरे मन से और अपने पूरे प्रान से, अपनी पूरी बुद्धि से, और अपनी पूरी शक्ति से प्रेम राखियो। और दूसरी जा आय, कि तें अपने पड़ोसी से अपने बराबर प्रेम राखियो; ईसे बड़ी और कौनऊं आज्ञा नईंयां। धरमपंडित बोलो; हे गुरू, भौत ठीक! तेंने सांची कई; कि ऊ एकई आय, और ऊहां छोड़ के और कोऊ नईंयां। और ऊसे पूरे मन और पूरी बुद्धि और पूरे प्रान और पूरी शक्ति के संग्गै प्रेम राखियो और पड़ोसी से अपने बराबर प्रेम राखियो, सबरे होमों और बलिदानों से बढ़के आय। जब प्रभु ने तको कि ऊ ने समझ के जवाब दओ, तो ऊसे कओ; तें परमेसुर के राज से दूर नईंयां: फिन कोऊहां ऊसे कछु पूछबे की हिम्मत न पड़ी। फिन यीशु ने मन्दर में उपदेस देत भए जौ कओ, कि धरमपंडित काय कैत आंय, कि मसीह दाऊद राजा कौ बेटा आय? दाऊद ने खुद शुद्ध आत्मा में होकें कओ, कि प्रभु ने मोरे प्रभु से कओ; मोरे दाहिने बैठ, जब लौ मैं तोरे बैरियन हां तोरे गोड़ों के नेंचें न कर देंहों। दाऊद तो खुद ऊहां प्रभु कैत आय, फिन ऊ कहां से ऊकौ बेटा ठैरो? और भीड़ के लोग आनन्द से ऊ की सुनत हते। यीशु ने अपने उपदेस में उन से कओ, धरम पंडितन से सावधान रओ, जौन लम्बे उन्ना पैरें फिरबो। और बाजारन में नमस्कार, और प्रार्थनाघरन में खास खास आसन और जेवनारन में खास खास जांगा भी चाहत आंय। बे बिधवाओं के घर हां लूट लेत आंय, और दिखावा के लाने भौत देर तक प्रार्थना करत रैत आंय, जे ज्यादा सजा पा हैं। यीशु मन्दर के सामने बैठ के तक रओ हतो, कि लोग मन्दर के भण्डार में कैसे पईसा डालत आंय और कई धनवानन ने भौत कछु डालो। इत्ते में एक भौत गरीब बिधवा ने आके दो पईसा डाले। तब यीशु ने अपने चेलन हां ऐंगर बुलाके उन से कओ; मैं तुम से सांची कैत आंव, कि मन्दर के भण्डार में डालबेवालन में से ई गरीब विधवा ने सबसे बढ़के डालो आय। कायसे सब ने अपने धन की बढ़ोत्तरी में से डालो आय, लेकिन ईनें अपनी घटी में से जौन ऊकौ हतो, यानी पूरी कमाई डाल दई आय। जब यीशु मन्दर से कड़ रओ हतो, तो ऊके चेलन में से एक ने ऊसे कओ; हे गुरू, देख! कैसे कैसे पत्थर और कैसे कैसे भवन आंय। यीशु ने ऊसे कओ; का तुम जे बड़े बड़े भवन तकत आव: इते पत्थर पै पत्थर लौ बचो न रै है जौन गिराओ न जै है। जब यीशु जैतून नाओं के पहरवा पै मन्दर के सामने बैठो हतो, तो पतरस और याकूब और यूहन्ना और अन्द्रियास नाओं के चेलन ने यीशु हां अलग ले जाके ऊसे पूछो। हमें बता कि जे बातें कबै हुईयें? और जब जे बातें पूरी होबे पै हुईयें, ऊ बेरा कौ का निसान हुईये? यीशु ने उन से कओ; सावधान रओ कि कोऊ तुमें धोका न दे। कईयक मोरे नाओं से आके कै हैं, कि मैं ओई आंव और कैऊ अन हां धोका दे दै हैं। और जब तुम लड़ाई और लड़ाईयों की चरचा सुनो; तो न घबराईयो: कायसे कि इनको होबो निश्चित आय; लेकिन ऊ बेरा अन्त न हुईये। कायसे जात पै जात, राज्य पै राज्य चढ़ाई कर हैं, और हरेक जांगा भूडोल हुईये, और अकाल पड़ हैं; जौ तो तकलीफों की शुरूआत ही हुईये। लेकिन तुम अपने बारे में सावधान रओ; कायसे कि लोग तुमें महासभन में सौंप हैं और तुम पंचयातों में कूटे जै हौ; और मोरे कारन हाकिमों और राजाओं के आंगू ठांड़े करे जै हौ, ताकि उन के लाने गवाही होबै। पै जरूरी आय कि पेंला भलो संदेसो सब जातन में प्रचार करो जाए। जब बे तुमें लै जाके सौंप हैं, तो पेंला से चिन्ता न करियो, कि हम का कै हैं; पै जो कछु तुमें ओई घड़ी बताओ जाए, ओई कईयो; कायसे कि बोलबे वाले तुम नईंयां, बल्कि शुद्ध आत्मा आय। और भईया हां भईया, और बाप हां बेटा हत्या के लाने सौंप हैं, और लड़काबाले महतारी-बाप के खिलाफ में उठके उने मरवा दै हैं। और मोरे नाओं के कारन सब जने तुम से बैर कर हैं; पै जौन आखिरी लौ धीरज धरे रै है, ओई कौ उद्धार हुईये। सो जब तुम ऊ उजाड़बे वाली गन्दी चीज हां जहां उचित नईंयां उतै ठांड़ी तको, (पढ़बेवालौ समझ लेबे) तब जौन यहूदिया प्रदेश में होबें, बे पहरवन पै भग जाएं। जो कोठे पै होबें, ऊ अपने घर से कछु लैबे के लाने नेंचें न उतरै और न भीतर जाबै। और जो खेत में होबें, ऊ अपनौ उन्ना लैबे के लाने पछाऊं न लौटे। ऊ दिना में जौन गरभवती और दूध पियात हुईयें, उनके लाने जे भौत दुख की बात हुईये। और प्रार्थना करत रईयो कि जौ जाड़े में न होबै। कायसे कि बे दिन ऐसे कष्ट के हुईये, कि संसार के शुरू से जौन परमेसुर ने सिरजी आय अब लौ न तो भए, और न फिन कभऊं हुईयें। और अगर प्रभु ऊ दिना हां न घटातो, तो कोऊ प्रानी तक न बचतो; लेकिन उन चुने भयन के कारन जिन हां ऊ ने चुनौ आय, उन दिना हां घटाओ। ऊ बेरा अगर तुम से कोऊ कैबै; देखो, मसीह इते आय, या देखो, मसीह उते आय, तो बिसवास न करियो। कायसे झूठे मसीह और झूठे अगमवकता पनप जै हैं, और निसान और विचित्र काम दिखा हैं, कि अगर हो सके तो चुने भयन हां लौ भरमा दे। पै तुम सावधान रऔ: तको, मैंने सबरी बातें तुम हां पेंला से कै दईं आंय। उन दिना में ऊ क्लेश के बाद सूरज अंधेरौ हो जै है, और चन्द्रमा रोसनी न दै है। और आसमान से तरईयां गिरन लग हैं: और आसमान की ताकतें हिलाई जै हैं। तब लोग मान्स के बेटा हां बड़ी सामर्थ और महिमा के संग्गै बादरन में आत तक हैं। ऊ समयऊ अपने दूतन हां पोंचा के, धरती के ई छोर से आसमान के ऊ छोर लौ चारऊ दिसा से अपने चुने भए लोगन हां इकट्ठो कर है। अंजीर के पेड़े से जौ पटतरौ सीखौ: जब ऊ की डरईयां मुलायम हो जात; और पत्ता निकलन लगत आंय, तो तुम जान लेत आव, कि गरमी कौ मौसम ऐंगर आय। ऐई ढंग से जब तुम ई बातन हां होत तको, तो जान लेओ, कि ऊ ऐंगर आय, बल्कि दोरे पै आय। मैं तुमसे सच्ची कैत आंव, कि जब लौ जे सब बातें न होकें रै हैं, तब लौ जा पीढ़ी जाती न रै है। आकास और धरती टल जै हैं लेकिन मोरी बातें कभऊं न टल हैं। ऊ दिन या ऊ घड़ी के बारे में कोऊ नईं जानत, न सरग के दूत और न बेटा; बल्कि केवल परमेसुर। तकौ, जगत रऔ और प्रार्थना करत रऔ; कायसे तुम नईं जानत कि ऊ बेरा कबै आ है। जा ऊ मान्स कैसी दसा आय, जौन परदेस जाबे की बेरा अपनौ घर छोड़ जाबै, और अपने सेवकन हां हक्क दे देबे; और हर एक हां ऊकौ काम सौंप देबे, और पहरेदार हां जागत रैबे कौ हुकम देबे। ईसे जागत रऔ; कायसे तुम नईं जानत कि घर कौ मालक कबै आ है, दिन डूबत कि आधी रात के, या मुर्गा के बांग देबे की बेरा या भोर में। ऐसो न होबै कि ऊ अचानक आके तुम हां सोऊत पाबै। और जो कछु मैं तुमसे कैत आंव, ओई सब से कैत आंव, जागत रऔ। दो दिना बाद फसह और अखमीरी रोटी कौ त्योहार होबे वालो हतो: और बड़े पुजारी और धरम पंडित ई बात की तलाश में हते, कि ऊहां काय न छल से पकड़ के मार डालें। लेकिन कैत हते, कि त्योहार के दिना नईं, कऊं ऐसो न होबै कि लोगन में बलवा मचै। जब यीशु बैतनिय्याह गांव में शिमौन नाओं एक कोढ़ी के घरै भोजन करबे बैठो हतो, तब एक बईयर संगमरमर के बासन में जटामांसी कौ बड़ौ कीमती शुद्ध इतर लेके आई; और बासन टोड़ के इतर ऊके मूंड़ पै उण्डेलो। लेकिन कोऊ कोऊ अपने मन में रिसिया के कहन लगे, ई इतर हां काय सत्यानास करो गओ? कायसे कि जौ इतर तो तीन सौ दीनार से ज्यादा कीमत में बेंच के कंगालन हां बांटो जा सकत हतो, और बे ऊहां खिसयान लगे। यीशु ने कओ; ऊहां छोड़ देओ; ऊहां काय सतात आव? ऊ ने तो मोरे संग्गै भलाई करी आय। कंगाल तुमाए संग्गै हमेसा रहत आंय: और तुम जब चाहो तब उन से भलाई कर सकत आव; पै मैं तुमाए संग्गै हमेसा न रै हों। जो कछु बा कर सकी, सो ऊ ने करो, ऊ ने मोरे गाड़े जाबे की तईयारी में पैलऊं से मोरी देह पै इतर मलो आय। मैं तुम से सच्ची कैत आंव, कि सबरी दुनिया में जां कऊं भले संदेसे कौ परचार करो जै है, उते ऊके ई काम की चरचा भी ऊ की याद में करी जै है। तब यहूदा इसकरियोती जौन बारह चेलन में से एक हतो, बड़े पुजारियन के ऐंगर गओ, कि यीशु हां उनके हाथ पकड़वा देबे। बे जौ सुन के खुस भए, और ऊहां रुपईया दैबो मंजूर करो, और जौ मौका ढूंढ़न लगो कि ऊहां कौनऊं तरीका से पकड़वा देबे। अखमीरी रोटी के त्योहार के पहले दिना, जी में लोग फसह परब की बलि चढ़ात हते, यीशु के चेलन ने ऊसे पूंछो, तें कहां चाहत आय, कि हम जाके तोरे लाने फसह परब कौ भोजन खाबे की तईयारी करें? ऊ ने अपने चेलन में से दो चेलन हां जौ कै के भेजो, कि नगर में जाओ, और एक मान्स पानी कौ मटका उठाएं भए तुमें मिल है, ऊके पछाऊं हो लईयो। और ऊ जौन घर में जाबै, ऊ घर के मालिक से कईयो, गुरू कैत आय, कि मोरो पाहुंनौ कौ घर कौन सौ आय जीमें मैं अपने चेलन के संग्गै फसह खाओं? ऊ तुमें एक सजी सजाई, और तईयार करी भई बड़ी अटारी दिखा दै है, उतै हमाए लाने तईयारी करौ। सो चेला निकल के नगर में आए और जैसो यीशु ने उनसे कओ हतो, वैसई पाओ, और फसह परब कौ भोजन तईयार करो गओ। और जब संजा भई तो यीशु अपने बारह चेलन के संग्गै आओ। और जब बे बैठे भोजन कर रए हते, तो यीशु ने कओ; मैं तुम से सांची कैत आंव, कि तुम में से एक, जौन मोरे संग्गै ब्यारी कर रओ आय, मोहां पकड़वा है। उनके मों पै उदासी छा गई और बे एक एक कर के ऊसे कहन लगे; का ऊ मैं आंव? यीशु ने उन से कओ, ऊ बारह में से एक आय, जौन मोरे संग्गै टाठी में हाथ डालत आय। कायसे मान्स कौ बेटा तो, जैसो ऊके बारे में धरम पोथी में लिखो आय, पकड़वाओ जै है, लेकिन ऊ मान्स पै धिक्कार जीके द्वारा मान्स कौ बेटा पकड़वाओ जात आय! अगर ऊ मान्स कौ जन्म न होतो, तो ऊके लाने भलो होतो। और जब बे खा ही रए हते तो यीशु ने रोटी लई, और आसीष मांग के तोड़ी, और उने दई, और कओ कि लेओ, जा मोरी देह आय। फिन ऊ ने कटोरा जी में दाखन कौ रस हतो लैके धन्यवाद करो, और उने दओ; और उन सब ने ऊ में से पिओ। और ऊ ने चेलन से कओ, जौ प्रतिज्ञा कौ मोरो ऊ खून आय, जौन कैऊ अन के लाने बहाओ जात आय। मैं तुम से सांची कैत आंव, कि दाखन कौ रस ऊ दिना लौ फिर कभऊं न पी हों, जब लौ परमेसुर के राज में नओ न पिओं। फिन यीशु और ऊके चेला भजन गाके बाहर जैतून के पहरवा पै गए। तब यीशु ने उन से कओ; तुम सबरे ठोकर खै हौ, कायसे कि धरम पुस्तक में लिखो आय, कि मैं रखवाले हां मार हों, और गाड़रें इतै उतै बिखर जै हैं। लेकिन मैं अपने जी उठबे के बाद तुमसे पेंला गलील प्रदेश हां जै हों। पतरस ने यीशु से कओ; अगर सब ठोकर खाएं तौ खाएं, पै मैं ठोकर न खै हों। यीशु ने ऊसे कओ, मैं तोसे सांची कैत आंव, कि आजही ऐई रात के मुर्गा के दो बेर बांग दैबे से पेंला, तें तीन बेर मोसे मुकर जै है। पै पतरस ने और जोर दैके कओ, अगर मोहां तोरे संग्गै मरने भी पड़े तौभी तोरो इनकार कभऊं न कर हों: ऐई तरहां और सभई ने भी कओ। फिन बे गतसमने नाओं एक जांगा में आए, और यीशु ने अपने चेलन से कओ, इतै बैठे रओ, जब लौ मैं प्रार्थना करों। और ऊ पतरस और याकूब और यूहन्ना चेलन हां अपने संग्गै लै गओ: और भौत उकतान और घबरान लगो। और उन से कओ; मोरो मन भौत उदास आय, इतै लौ कि मैं मरबे पै आंव: तुम इतै रुको और जागत रऔ। और ऊ तनक अगारूं बढ़ो, और जमीन पै गिर के प्रार्थना करन लगो, कि अगर हो सकै तौ जा बेरा मो पै से टल जाय। और कओ, हे अब्बा, हे पिता, तोसे सब कछु हो सकत आय; ई तकलीफ, दुख हां मोरे ऐंगर से हटा ले: तौभी जैसो में चाहत आंव, वैसो नईं, पै जौन तें चाहत आय ऊंसई होबै। फिन ऊ आओ, और उने सोऊत पाके पतरस से कओ; हे शमौन तें सो रओ आय? का तें तनक देर लौ नईं जग सको? जागत और प्रार्थना करत रऔ कि तुम परीक्षा में न पड़ौ: आत्मा तो तईयार आय, पै सरीर कमजोर आय। और ऊ फिन चलो गओ, और ओई बात कह के फिन प्रार्थना करी। और फिन आके चेलन हां सोऊत पाओ, कायसे कि उनकी आंखें नींद से भरी हतीं; और बे नईं जानत हते कि ऊहां का उत्तर देबें। फिन तीसरी बेर ऊ ने आके उन से कओ; अब सोऊत रऔ और आराम करौ, बस तनक देर रै गई आय; देखो मान्स कौ बेटा पापियन के हाथ पकड़वाओ जात आय। उठौ चलें: तको, मोरो पकड़वाबे वालो ऐंगर आ चुको आय। यीशु जौ कैई रओ हतो, कि यहूदा जौन बारह में से एक हतो, अपने संग्गै बड़े पुजारियन और धरम पंडितन कोद से एक बड़ी भीड़ तलवारें और लाठियां लएं तुरतईं आ पोंची। और यीशु के पकड़वाबे वाले ने उन हां जौ बता दओ हतो, कि जीहां मैं चूमों ओई आय, ऊहां पकड़ के जतन से ले जईयो। और यहूदा आओ, और तुरतईं यीशु के ऐंगर जाके कओ; हे गुरू और ऊहां भौत चूमों। तब उन ने यीशु पै हाथ डाल के ऊहां पकड़ लओ। उन में से जौन चेला ऐंगर ठांड़े हते, एक चेला ने तलवार खेंच के बड़े पुजारी के सेवक पै चलाई, और ऊकौ कान काट डालो। यीशु ने उन से कओ; का तुम डाकू जान के मोरे पकड़बे के लाने तलवारें और लाठियां लेके निकले आव? मैं तो रोज मन्दर में तुमाए संग्गै रैके उपदेस देत हतो, तब तुम ने मोहां न पकड़ो: लेकिन जौ ईसे भओ आय कि पवित्रशास्त्र की बातें पूरी होबें। ईपै सबरे चेला ऊहां छोड़ के भाग गए। और एक जवान अपनी उगरारी देह पै चादर ओढ़ें भओ ऊके पछाऊं हो लओ; और लोगन ने ऊहां पकड़ो। पै ऊ चादर छोड़ के उगरारौ भाग गओ। फिन बे यीशु हां बड़े पुजारी के ऐंगर लै गए; और सबरे बड़े पुजारी और धरम पंडित ऊके इतै जमा हो गए। पतरस दूरई दूर से ऊके पांछू पांछू बड़े पुजारी की बखरी के भीतर लौ गओ, और नौकरन के संग्गै बैठ के आग तापन लगो। बड़ौ पुजारी और सबरी बड़ी सभा यीशु हां मार डालबे के लाने ऊके खिलाफ गवाही की तलास में हते, पै न मिली। कायसे कि कैऊअक ऊके खिलाफ झूठी गवाही दै रए हते, पै उनकी गवाही एक सी न हती। तब कितनन ने उठके यीशु पै जा झूठी गवाही दई। कि हमने ईहां जौ कहत सुनो आय कि मैं ई हाथ के बनाए भए मन्दर हां गिरा दै हों, और तीन दिना में दूसरौ बना हों, जौन हाथ से न बनो हुईये। ईपै भी उनकी गवाही एक सी न निकली। तब बड़े पुजारी ने बीच में ठांड़े होकें यीशु से पूंछो; कि तें कोनऊंउत्तर नईं देत? जे लोग तोरे खिलाफ में का गवाही देत आंय? लेकिन ऊ चुपचाप रओ, और कछु जवाब न दओ: बड़े पुजारी ने ऊसे फिन पूंछो, काय तें ऊ परम धन्य कौ बेटा मसीह आय? यीशु ने कओ, हां मैं आंव: और तुम मान्स के बेटा हां सर्वशक्तिमान परमेसुर के दांएने कोद बैठो, और आकास के बादरन के संग्गै आऊ त तक हौ। तब बड़े पुजारी ने अपने उन्ना फाड़के कओ; अब हमें गवाहों की और का जरूरत आय? तुम ने जा निन्दा सुनी: तुमाई का राय आय? ऊ सबरन ने कओ, ऊ मार डालबे के जोग आय। तब कोऊ तो ऊ पै थूंकन लगे, कोऊ ऊकौ मों ढांकन लगे और ऊहां घूंसे मारन लगे, और ऊसे कहन लगे, कि अगमवानी कर: और नौकरन ने ऊहां लैके थप्पड़ मारे। जब पतरस नेंचें आंगन में हतो, तो बड़े पुजारी की नौकरानियन में से एक उतै आई। और पतरस हां आग तापत देख के ऊहां घूर के तको और कहन लगी, तें भी तो ऊ यीशु जौन नासरत को आय, ऊके संग्गै हतो। ई पै पतरस बदल गओ और कओ कि मैं तो नईं जानत और नईं समझत कि तें का कह रई आय। फिन ऊ बाहर ड्योढ़ी में गओ और मुर्गा ने बांग दई। बा नौकरानी ऊहां तक के उन से जौन ऐंगर ठांढ़े हते, फिन कहन लगी, जौ उन में से एक आय। लेकिन पतरस फिन बदल गओ और तनक देर बाद उन ने जौन ऐंगर ठांड़े हते फिन पतरस से कओ; जरूर तें उन में से एक आय; कायसे तें गलील प्रदेश कौ भी आय। तब पतरस धिक्कार देन लगो और कौल खान लगो, कि मैं ऊ मान्स यीशु हां, जी की तुम चरचा करत आव, नईं जानत। तब तुरतईं दूसरी बेर मुर्गा ने बांग दई: पतरस हां बा बात जौन यीशु ने ऊसे कई हती याद आई, कि मुर्गा के दो बेर बांग देबे के पेंला तें तीन बेर मोरो इनकार कर है: ऊ जा बात हां सोच के रोऊन लगो। भोर के होतईं तुरतईं बड़े पुजारियन, और धरम पंडितन, बल्कि सबरी बड़ी सभा ने सलाह कर के यीशु हां बंधवाओ, और ऊहां लै जाके पीलातुस नाओं हाकिम के हाथ में सौंप दओ। और पीलातुस ने ऊसे पूंछो, का तें यहूदियन कौ राजा आय? ऊने ऊहां जवाब दओ; कि तें खुद ही कै रऔ आय। और बड़े पुजारी ऊ पै भौत बातन कौ दोष लगा रए हते। पीलातुस ने ऊसे फिन पूंछो, का तें कछु जवाब नईं देत, देख जे तोपै कितनी बातन कौ दोष लगात आंय? यीशु ने फिन कछु जवाब नईं दओ; इतै लौ कि पीलातुस हां बड़ौ अचम्भा भओ। और पीलातुस ओई त्योहार में कौनऊं एक बंधुआ जीहां लोग चाहत हते, उन के लाने छोड़ दओ करत हतो। और बरअब्बा नाओं कौ एक मान्स उन दंगा मचाबे वालन के संग्गै बंधुआ हतो, जिन ने दंगा में हत्या करी हती। और भीड़ ऊपर जाके पीलातुस से बिनती करन लगी, कि जैसो तें हमाए लाने करत आओ आय, ऊंसई कर। पीलातुस ने उन हां जवाब दओ, का तुम चाहत आव, कि मैं तुमाए लाने यहूदियन के राजा हां छोड़ देओं? कायसे कि ऊ जानत हतो, कि बड़े पुजारियन ने ऊहां ईरषा से पकड़वाओ हतो। लेकिन बड़े पुजारियन ने लोगन हां उसकाओ, कि ऊ बरअब्बा हां उनके लाने छोड़ दे। जौ सुनके पीलातुस ने उनसे फिन पूंछो; तो जीहां तुम यहूदियन कौ राजा कैत आव, ऊहां मैं का करों? बे फिन चिल्लाने, कि ऊहां क्रूस पै चढ़ा दे। पीलातुस ने उनसे कओ; काय, ईने का बुराई करी आय? लेकिन बे और भी चिल्लाने, कि ऊहां क्रूस पै चढ़ा दे। तब पीलातुस ने भीड़ हां खुस करबे की इच्छा से, बरअब्बा हां उनके लाने छोड़ दओ, और यीशु हां कोड़े लगवा के लोगन हां सौंप दओ, कि क्रूस पै चढ़ाओ जाए। और सिपाही ऊहां किले के भीतर आंगन में लै गए जौन प्रीटोरियुन कहाऊ त आय, और सबरी पलटन हां बुला लाए। और उन ने यीशु हां बैंजनी उन्ना पैराओ और कांटों कौ मुकुट बनाके ऊ की मूंड़ पै रख दओ। और जौ कह के ऊहां नमस्कार करन लगे, कि हे यहूदियन के राजा, नमस्कार। और बे ऊ की मूंड़ पै सरकण्डा मारत हते, और ऊ पै थूंकत, और टिंगरन के बल बैठ के ऊहां परनाम करत रए। और जब बे ऊ की हंसी कर चुके, तो ऊ पै से बैंजनी उन्ना उतार के ओई के उन्ना पैराए; और तब ऊहां क्रूस पै चढ़ाबे के लाने बाहर ले गए। और सिकन्दर और रुफुस नाओं के मान्स कौ बाप, शिमौन नाओं एक कुरेनी जात कौ मान्स, जौन गांव से आ रओ हतो उते से कड़ो; उन ने ऊहां बेगार में पकड़ो, कि ऊकौ क्रूस उठा के लै चले। और बे यीशु हां गुलगुता नाओं की जांगा पै जी कौ मतलब खोपड़ी की जांगा आय ले आए। और ऊहां मुर्र नाओं की नशीली दवा मिलो दाखन कौ रस दैन लगे, लेकिन ऊ ने नईं लओ। तब उन ने यीशु हां क्रूस पै चढ़ाओ, और ऊके उन्ना पै चिट्ठी डाल के, कि कीहां का मिलै, उने बांट लओ। और पहर भर दिन चढ़ आओ हतो, जब उन ने ऊहां क्रूस पै चढ़ाओ। और यीशु के दोष कौ कागज लिख के, ऊके ऊपर लगा दओ गओ कि “यहूदियन कौ राजा”। और उन ने यीशु के संग्गै दो डाकू, एक ऊ की दाहिनी और एक ऊके डेरे कोद क्रूस पै चढ़ाए। (तब धर्मशास्त्र कौ ऊ बचन, कि यीशु अपराधियन के संग्गै गिनो गओ, पूरौ भओ)। और गैल में जाबेवाले मूंड़ हला हला के और जौ कह के ऊ की निन्दा करत हते, कि वाह! मन्दर के गिराबेवाले और तीन दिना में बनाबेवाले! क्रूस पै से उतर के अपने आप हां बचा ले। ऐई तरीका से बड़े पुजारी और धरम पंडित यीशु कौ मजाक बनाऊ त हते। बे आपस में हंसी उड़ा के कहत हते; कि ईनें औरन हां बचाओ, और खुद हां नईं बचा सकत। इस्राएल कौ राजा मसीह अब क्रूस पै से उतर आबै कि हम देख के बिसवास करें, और जौन ऊके संग्गै क्रूस पै चढ़ाए गए हते, बे तक ऊ की निन्दा करत हते। और दोपहर होबे पै, सबरे देश में अन्धयारौ छा गओ; और तीसरे पहर लौ रओ। तीसरे पहर यीशु ने जोर से कओ, इलोई, इलोई, लमा शबकतनी? जी कौ मतलब आय; हे मोरे परमेसुर, हे मोरे परमेसुर, तेंने मोहां काय छोड़ दओ? जौन ऐंगर ठांड़े हते, उन में से कितनन ने जौ सुनके कओ: देखौ, जौ एलिय्याह अगमवकता हां पुकारत आय। और एक मान्स ने दौड़ के इसपंज हां सिरका में डुबाओ, और डंडा पै धर के ऊहां चुसाओ; और कओ, ठैर जाओ, तकें, कि एलिय्याह ऊहां उतारबे के लाने आत आय कि नईं। तब यीशु ने जोर से चिल्ला के प्रान छोड़ दए। और मन्दर कौ परदा ऊपर से नीचे लौ फट के दो टूंका हो गओ। जौन सिपाहियन कौ मुखिया यीशु के सामने ठांड़ो हतो, जब ऊहां ऐसे चिल्ला के प्रान छोड़त भओ तको, तो ऊ ने कओ, सच्चऊं जौ मान्स, परमेसुर कौ बेटा हतो। कैऊ बईयर भी दूर से तक रईं हतीं: उन में मरियम मगदलीनी और छोटे याकूब की और योसेस की महतारी मरियम और शलोमी हतीं। जब यीशु गलील में हतो, तो जे बईयरें ऊके पांछू हो लेत हतीं और ऊ की सेवा खुसामद करत हतीं; और भी कैऊ एक बईयरें हतीं, जौन यीशु के संग्गै यरूशलेमआईं हतीं। जब संजा हो गई, तो ईसे कि तईयारी कौ दिन हतो, जौन विश्राम के एक दिना पेंला होत आय। अरिमतिया शहर कौ रहबेवालो यूसुफ आओ, जौन इज्जतदार मंत्री और खुद भी परमेसुर के राज में बिसवास करत हतो; ऊ बड़ी हिम्मत कर के पीलातुस राजपाल के ऐंगर गओ और ऊसे यीशु की लाश मांगी। पीलातुस राजपाल ने अचम्भा करो, कि यीशु इतने जल्दी मर गओ; और सिपाहियन के मुखिया हां बुलाके पूंछो, कि का ऊहां मरे भए देर भई? सो जब सूबेदार से हाल जान लओ, सो लाश यूसुफ हां दिला दई। तब यूसुफ ने एक पतली चादर खरीदी, और लाश हां उतार के चादर में पलेड़ो, और एक कबर में जौन चट्टान में खोदी गई हती रखो, और कबर के द्वारे पै एक पथरा लुढ़का दओ। और मरियम मगदलीनी और योसेस की महतारी मरियम तक रईं हतीं, कि ऊ कहां रखो गओ आय। जब विश्राम कौ दिना बीत गओ, तो मरियम मगदलीनी और याकूब की महतारी मरियम और शलोमी ने सुगन्धित चीजें मोल लईं, कि आके यीशु की लाश पै मलें। और सप्ताह के पहले दिना बड़े भुनसारे, जब सूरज निकलो ही हतो, बे कबर पै आईं। और आपस में कैत हतीं, हमाए लाने कबर के दोरे से पथरा को लुढ़का है। जब उन ने आंख उठाई, तो तको पथरा लुढ़को भओ आय! कायसे ऊ भौत बड़ो हतो। और कबर के भीतर जाके, उन ने एक जवान हां सफेद उन्ना पैरें भए दांएने कोद बैठो तको, और भौत चकित हो गईं। ऊ ने उन से कओ, चकित न होओ, तुम यीशु नासरी हां, जौन क्रूस पै चढ़ाओ गओ हतो, ढूंढ़त आव: ऊ जिन्दा हो गओ आय; इतै नईंयां; तको, जा ओई जांगा आए, जहां पै उन ने ऊहां रखो हतो। लेकिन तुम जाओ, और ऊके चेलन और पतरस से कओ, कि ऊ तुम से पेंला गलील हां जै है; जैसो ऊ ने तुम से कओ हतो, तुम उतईं ऊहां देख हौ। और बे निकल के कबर से भग गईं; कायसे कि कपकपी और घबराहट उन पै छा गई हती और उन ने कोऊ से कछु नईं कओ, कायसे कि डरात हतीं। सप्ताह के पहले दिना इतवार को भोर होतई यीशु जी उठके पैलऊं मरियम मगदलीनी हां जौन में से ऊ ने सात बुरई आत्माएं निकाली हतीं, दिखाई दओ। ऊ ने जाके ऊके संगियन हां जौन शोक में डूबे हते और रो रए हते, समाचार दओ। और उन ने जौ सुन के कि यीशु जिन्दा है, और ऊ ने ऊहां तको आय, बिसवास न करो। ईके बाद यीशु दूसरे रूप में उन में से दो मान्स हां, जब बे गांव कोद जा रए हते, दिखाई दओ। उन ने भी जाके दूसरन हां समाचार दओ, लेकिन उन ने भी उनकी बात पै बिसवास न करो। पांछू यीशु उन ग्यारह चेलन हां भी, जब बे भोजन करबे बैठे हते दिखाई दओ, और उनके अबिसवास और मन के कर्रेपन पै उरानों दओ, कायसे कि जिन ने ऊके जी उठबे के बाद ऊहां तको हतो, इन ने उनकी बात पै बिसवास नईं करो हतो। और यीशु ने चेलन से कओ, तुम पूरी दुनिया में जाके, सबरे संसार के लोगन हां भलो संदेसो परचार करो। जो बिसवास कर है और बपतिस्मा लै है ओई को उद्धार हुईये, लेकिन जो बिसवास नें कर है ऊ दोषी ठहराओ जै है। और बिसवास करबे वालन में जे निसानी हुईयें कि बे मोरे नाओं से बुरई आत्मन हां निकाल हैं। नई नई भाषा बोल हैं, सांपन हां उठा लै हैं, और अगर बे जहरीली चीज पी जाएं तौभी उनकी कछु हानि न हुईये, बे बीमारन पै हाथ धर हैं, और बे ठीक हो जै हैं। अन्त में प्रभु यीशु उन से बातें करबे के बाद सरग पै उठा लओ गओ, और परमेसुर के दांए कोद बैठ गओ। और चेलन ने निकल के हर जांगा परचार करो, और प्रभु उनके संग्गै काम करत रओ, और उन चिन्हों के द्वारा जौन संगै संगै होत हते, बचन हां पक्को करत रओ। आमीन। ई लाने कि बिलात जन ने उन बातन कौ जौन हमाए मजारें घट चुकी आंय, इतिहास लिखबे में हाथ लगाओ आय। जैसो कि उन ने जौन पेंलई से इन बातन के तकबेवारे और बचन के सेवक हते हम तक पोंचाओ। ई लाने हे बड़े जसवाले थियुफिलुस, मोय भी सई लगो, कि उन सबरी बातन कौ सबरो हाल, शुरू से एन जांच पड़ताल कर के उन हां तोरे लाने एक के पाछें एक लिखों। कि तें जौ जान लेबे, कि बे बातें जिन की तें ने शिक्षा पाई आय, कितेक पक्की आंय। यहूदियों के राजा हेरोदेस के दिना में अबिय्याह के दल में जकरयाह नाओं कौ एक याजक हतो। ऊ की घरवाली हारून के वंस की हती, जीकौ नाओं इलीशिबा हतो। और बे दोई परमेसुर के सामूं धर्मी हते, और पिरमु के सबरे हुकम और नैम पे सई सई चलबेवाले हते। उन लौ कौनऊं बालबच्चा न हतो। कायसे कि इलीशिबा बांझ हती, और बे दोई बूढ़े हते। जब बो अपने दल की पारी में परमेसुर के सामूं याजक कौ काम करत हतो। तो याजकों की रीत अनसार ऊके नाओं पे चिठिया कड़ी, कि पिरभु के मन्दर में जाके धूप जलाए। धूप जलाती बेरा मान्सन की सबरी समाज बायरें बिन्तवाई कर रई हती। ओई बेरा पिरभु कौ एक सरगदूत धूप की वेदी के दाएं कोद ठांड़ो भओ ऊहां दिखाई दओ। जकरयाह ऊहां तक के घबरा गओ और बो बिलात डरा गओ। तब सरगदूत ने ऊसे कई हे जकरयाह, न डरा कायसे तोरी बिन्तवाई सुन लई गई आय और तोरी घरवाली इलीशिबा से तोरे लाने एक लड़का जन्म लै है, और तें ऊकौ नाओं यूहन्ना धरियो। तोय आनन्द और खुसी हुईये: और बिलात मान्स ऊके जन्म के काजें मगन हुईयें। कायसे बो पिरभु के सामूं महान हुईये; बो दाखन कौ रस और दारू कभऊं न पी है; बो अपनी माताई के गरभ से पवितर आत्मा से पूरो भर जै है। और इस्राएलियन में से उन के पिरभु परमेसुर कोद बिलात जन हां लौटा ले आ है। बो एलिय्याह की आत्मा और बल सक्ति में होकें ऊके आंगू चल है, कि पितरों कौ हिया बाल-बच्चन कुदाऊं लौटा देबे; और हुकुम न मानबेवारन हां धर्मीयन की समज पे लाबै; और पिरभु के लाने एक सई परजा तईयार करै। जकरयाह ने सरगदूत से पूंछो; जौ मैं कैसे जानों? कायसे मैं तो बूढ़ो आंव; और मोरी घरवाली भी बूढ़ी हो गई आय। सरगदूत ने ऊसे कई, कि मैं जिब्राईल आंव, जो परमेसुर के सामूं ठाड़ो रैत आंव; और मैं तोसें बातें करबे और तोय जौ भलो सन्देसो सुनाबे हां पठैओ गओ आंव। और तक जब लौ जे बातें पूरी न हो जाबें, ऊ दिना लौ तें गूंगो रै है, और बोल न सक है, ई लाने कि तेंने मोरी बातन की जौन अपने टैम पे पूरी हुईयें, बिसवास नईं करो। और मान्स जकरयाह की बाट तकत रए और अचम्भा करन लगे कि ऊ ए मन्दर में ऐसी देर काय लगी? जब बो बायरें कड़ो, तो उन से बोल न सको: सो बे जान गए, कि ऊने मन्दर में कोनऊं दर्शन पाओ आय; और बो उन से इसारो करत रओ, और गूंगो रह गओ। जब ऊ की सेवा के दिना पूरे भए, तो बो अपने घरै चलो गओ। इन दिनों के पाछें ऊ की घरवाली इलीशिबा गरभवती भई; और पांच मईना लौ अपने आप हां जौ कै कें छिपाए धरो। कि मान्सन में मेारी निंदरयाई दूर करबे के लाने पिरभु ने इन दिना में दया कृपा कर के मोरे लाने ऐसो करो आय। छठवें मईना में परमेसुर कुदाऊं से जिब्राईल सरगदूत गलील के नासरत नगर में एक कुंवारी लौ पठैओ गओ। जी की लगुन यूसुफ नाओं के दाऊद के वंस के एक मान्स से भई हती: ऊ कुंवारी कौ नाओं मरियम हतो। सरगदूत ने ऊके ऐंगरे आके कओ; तोरी जय हो, पिरभु ने तो पे किरपा करी आय, पिरभु तोरे संग्गै आय। बा उन बातन से बिलात डरा गई, और सोचन लगी, कि जौ की भांत कौ परनाम आय? सरगदूत ने मरियम से कओ, न डरा, कायसे परमेसुर की किरपा तो पे भई आय। तक, तें गरभवती हुईये, और तोरे एक बेटा हुईये; और तें ऊ को नाओं यीशु धरियो। ऊ जसवारो हुईये, और परमप्रधान कौ पूत कहा है; और पिरभु परमेसुर ऊके बाप दाऊद कौ राज ऊहां दै है। और बो याकूब के वंस पे हमेसा राज कर है; और ऊके राज कौ अन्त न हुईये। मरियम ने सरगदूत से कई, जौ काय हुईये? मैं तो कुंवारी आंव। सरगदूत ने ऊसे कई; पवित्तर आत्मा तोपे उतर है, और परमप्रधान की बल सक्ति तोपे छाया कर है, ई लाने बो पवित्तर जौन जन्म लेबेवालो आय, परमेसुर कौ पूत कहा है। और हेर, तोरी नातेदार इलीशिबा के सोऊ बुढ़ापे में बेटा होबेवालो आय, जौन बांझ कहात हती जौ ऊकौ छठवों मईना आय। कायसे परमेसुर कौ कओ भओ बचन अकारथ नईं जा सकत। मरियम ने कई, हेर, मैं पिरभु की दासी आंव, मोय तोरे कएअनसर होय: तब सरगदूत ऊके ऐंगर से चलो गओ। उनईं दिना में मरियम उठ के झट्टई पहरवा देस में यहूदा के एक नगर हां गई। और जकरयाह के घर जाके इलीशिबा हां परनाम करो। जैसई इलीशिबा ने मरियम कौ परनाम सुनो, उंसई बच्चा ऊके पेट में उछल पड़ो, और इलीशिबा पवित्तर आत्मा से भर गई। और टेर के कई, तें बईयरन में धन्न आय, और तोरे पेट कौ फल सोई धन्न आय। मोपे जा दया किरपा कां से भई, कि मोरे पिरभु की मताई मोरे ऐंगर आई। हेर, जैसई तोरे परनाम कौ बोल मोरे कानन में पड़ो, ओई बेरा बच्चा मोरे पेट में खुसी से उछल पड़ो। धन्न आय, बो जीने बिसवास करो, कि जो बातें पिरभु कुदाऊं से कई गईं आंय, बे पूरी हुईयें। तब मरियम ने कई, मोरो प्रान पिरभु की बड़ाई करत आय। और मोरी आत्मा मोरे उद्धार करबेवाले परमेसुर से मगन भई आय। कायसे कि ऊ ने अपनी दासी की दीनता को हेरो आय, ई लाने हेरो, अब से जुग जुग के मान्स मोय धन्न कै हैं। कायसे कि ऊ महाबली ने मोरे लाने बड़े काम करे आंय, और ऊकौ नाओं पवित्तर आय। और ऊ की दया उन पे, जौन ऊसे डरत आंय, पीढ़ी से पीढ़ी लौ बनी रैत आय। ऊ ने बड़ी सक्ति के काम करे आंय, और जौन घमण्डी हते उन हां तितर बितर करो आय। ऊ ने बलवानन को सिंहासन से गिरा दओ; और दीन जन हां जसवारो बना दओ आय। ऊ ने भूखन हां भोजन से अफरा दओ, और मालपानू वारन हां छूंछे हांथ काड़ दओ। ऊ ने अपने दास इस्राएल हां संभाल लओ। जैसो ऊ ने हमाए बाप दादों से कहो हतो, कि ऊ की दया इब्राहीम और ऊके वंस पे हमेसा बनी रै है। और मरियम लगभग तीन मईना इलीशिबा के संग्गै रैकें अपने घरै वापस आ गई। तब इलीशिबा के जनने कौ टैम पूरो भओ, और ऊ ने एक बेटा जनो। ऊके पड़ोसियों और नातेदारन ने जब जौ सुनो, कि पिरभु ने ऊ पे बड़ी किरपा करी आय, तो उन ने ऊके संग्गै खुसी मनाई। और ऐसो भओ कि मान्स आठवें दिना लड़का कौ खतना करबे आए और ऊ को नाओं ऊके बाप के नाओं जैसो जकरयाह धरन लगे। तब ऊ की मताई ने कई नईं; ऊ को नाओं यूहन्ना धरो जाबै। उन ने ऊसे कओ, तुमाए नातेदारन में कौनऊं कौ जौ नाओं नईंयां! तब उन ने ऊके बाप से इसारो कर के पूंछो। तें ऊकौ का नाम धरो चहत आय? ऊ ने लिखबे की पट्टी मंगा के ऊ पे लिख दओ, ऊकौ नाओं यूहन्ना आय: और सब ने अचम्भा करो। तब ऊकौ मों और जीभ तुरंत खुल गई; और बो बातें करन और परमेसुर कौ धन्यवाद करन लगो। और ऊके अड़ोस पड़ोस के मान्स डर से गए; और ई बात कौ चरचराटो सबरे यहूदिया के बाहरी देस में फैल गओ। जिन ने जे बातें सुनी, उन ने अपने हिये में सोस विचार के कओ, जौ बच्चा कैसो हुईये कायसे पिरभु कौ हाथ ऊके संग्गै हतो। ऊ को बाप जकरयाह पवित्तर आत्मा से भर गओ, और आगमबानी करन लगो। कि पिरभु इस्राएल कौ परमेसुर धन्न होबे, कायसे ऊ ने अपने मान्सन हां तको और उन कौ छुटकारा करो आय। और अपने दास दाऊद के घराने में हमाए लाने एक उद्धार कौ सींग काड़ो आय। जैसो ऊने अपने पवित्तर आगमवकताओं के द्वारा जौन संसार के शुरू से होत आए हैं, कओ हतो। याने हमाए बैरियन से और हम हां ओछो लेखबेवारन से हमाओ उद्धार करो आय। कि हमाए बाप-दादों पे दया कर के अपने पवित्तर कौल कौ सुमरन करै। और बो कौल जौन ऊ ने हमाए बाप इब्राहीम से करो हतो। कि बो हम हां जौ दै है, कि हम अपने बैरियन के हांथ से छूट के। ऊके सामूं पवित्तरता और धार्मिकता से जीवन भर निडर रैकें ऊ की सेवा करत रएं। और तें हे बालक, परमप्रधान कौ आगमवकता कहा है, कायसे तें पिरभु कौ गैल गोला तईयार करबे के लाने ऊके आंगू आंगू चल है। कि ऊके मान्सन हां त्राण की समज देबे, जौन उन के पापों की छिमा से मिलत आय। जौ हमाए परमेसुर की ओई बड़ी दया किरपा से हुईये; जी के काजें ऊपर से हम पे भुन्सारे की जोत चमक है। कि अन्धयारे और मौत की छाया में बैठबेवारन हां उजाला देबे, और हमाए गोड़न हां संसाई की गैल सूदे सई चलाबै। और ऊ बच्चा बढ़त और आत्मा में बली होत गओ, और इस्राएल पे उजागर होबे के पेंला हार में बनो रओ। उनईं दिना में ऐसो भओ कि रोम के महाराजा औगूस्तुस कैसर कुदाऊं से जौ हुकम भओ, कि सबरे संसार के मान्सन के नाओं लिखे जाबें। जा पैली नाओं लिखाई ऊ टैम भई, जब क्विरिनियुस सूरिया कौ राजपाल हतो। तब सबरे मान्स नाओं लिखवाबे हां अपने अपने नगर हां गए। सो यूसुफ सोई ई लाने कि बो दाऊद के घराने और वंस कौ हतो, गलील के नासरत नगर से यहूदिया में दाऊद के नगर बैतलहम हां गओ। कि ऊ की जौन से लगुन भई हती मरियम के संग्गै जौन गरभबती हती नाओं लिखवाए। उन के उते रैत भए ऊके जनबे के दिना पूरे भए। और बो अपनो पहलौठो पूत जनी, और ऊहां उन्ना में लपेट के चरनी में धरो; कायसे उन के लाने सराय में जांगा न हती। और ऊ देस में कितेक गड़रिये हते, जौन रात में मैदान में रैके अपने झुण्ड़ की रखनवारी करत हते। और पिरभु कौ एक दूत उन के ऐंगर आ ठांड़ो भओ, और पिरभु कौ तेज उन के चारऊं कुदाऊ चमको, और बे बिलात डर गए। तब सरगदूत ने उन से कई, नें डरो; कायसे हेरो मैं तुम हां बड़ी खुसी कौ भलो सन्देसो सुनात आंव, जो सबरे मान्सन के लाने हुईये। कि आज दाऊद के नगर में तुमाए लाने एक उद्धार कबेवारो जन्मो आय, और जौई मसीह पिरभु आय। और ईकौ तुमाए लाने जौ पता आय, कि तुम एक लड़का हां उन्ना में लिपटो भओ और चरनी में पड़ो भओ पा हौ। तब एकाएक ऊ सरगदूत के संग्गै सरगदूतन कौ झुण्ड़ परमेसुर कौ जस गात और जौ कैत भए दिखाई दओ। आकास में परमेसुर की मईमा और धरती पे उन मान्सन में जिन से बो खुस आय सान्ति होबे। जब सरगदूत उन के ऐंगर से सरग हां चले गए तो गड़रियन ने आपस में कओ, आओ, अपन बैतलहम जाके जा बात जौन भई आय, और जौ सन्देसो जौन पिरभु ने हम हां दओ आय, तकें। और उन ने तुरतईं जाके, मरियम और यूसुफ हां और चरनी में ऊ बालक हां पड़ो तको। उन हां तक के गड़रियन ने बा बात जौन ई बालक के लाने कई गई हती, प्रगट करो। और सब सुनबेवालन ने उन बातन से जो गड़रियन ने उन से कई अचम्भा करो। पर मरियम जे सबरी बातें अपने हिये में धरें सोसत रई। और गड़रिये जैसो उन से कओ गओ हतो, ऊंसई सब सुन के और तक के परमेसुर की मईमा और भजन करत भए लौट गए। जब आठ दिना पूरे भए, और ऊके खतने कौ टैम आओ, तो ऊकौ नाओं यीशु धरो गओ, जौन सरगदूत ने ऊके पेट में आबे के पेंला कओ हतो। और जब मूसा की नेम व्यवस्था के अनसार उन के शुद्ध होबे के दिना पूरे भए, तो बे बालक हां यरूशलेम में लाए, कि ऊहां पिरभु के सामूं लाएं। (जैसो कि पिरभु की नेम व्यवस्था में लिखो आय कि सबरे पहलौठे पिरभु के लाने पवित्तर कहा हैं)। और पिरभु की नैम व्यवस्था अनसार पंडुकों कौ एक जोड़ा, या कबूतर के दो बच्चे बलि चढ़ाएं। और तको, यरूशलेम में शमौन नाओं एक मान्स हतो, बो मान्स धर्मी और भक्त हतो; और इस्राएल की सान्ति की बाट जोह रओ हतो, और पवित्तर आत्मा ऊ पे हतो। और पवित्तर आत्मा से ऊहां चितावनी भई हती, कि जब लौ बो पिरभु के मसीह हां न तक लै है, तब लौ ऊ न मर है। बो आत्मा के सिखाबे से मन्दर में आओ; और जब मताई-बाप ऊ बालक यीशु हां भीतर लाए, कि ऊके लाने नेमव्यवस्था अनसार करें। तो शमौन ने यीशु हां गोद में लओ, और परमेसुर कौ धन्नवाद कर के कओ। हे मालक, अब तें अपने दास हां अपने बचन अनसार सान्ति से विदा करत आय। कायसे मोरी आंखन ने तोरे उद्धार हां तक लओ आय। जिए तेंने सबरे देशन के मान्सन के सामने तईयार करो आय। कि बो दूसरी जात वारन हां उजारो दैबे हां ज्योत, और तोरे निज मान्स इस्राएल कौ जस होबे। ऊके बाप और मताई इन बातन से जौन ऊके लाने कई जात हतीं, चकित होत हते। तब शमौन ने ऊहां आशीष देके, ऊ की मताई मरियम से कई; तक, बो तो इस्राएल में बिलात जनन के गिरबे, और उठबे के लाने, और एक ऐसो चिन्ह होबे हां ठैराओ गओ आय, जी के बिरोद में बातें कई जै हैं। इते लौ कि तोरो प्रान सोई तलवार से आर पार छिद जै है, ईसे बिलात जनन के हियन के विचार उजागर हुईयें। और अशेर के कुल में से हन्नाह नाओं फनूएल की मौड़ी एक आगमवकतन हती: और बा बिलात बूढ़ी हती, और ब्याओ के पाछें सात बरस अपने मनसेलू के संग्गै रै पाई हती। बा चौरासी बरस से बिधवा हती: और मन्दर हां न छोड़त हती पर उपवास और बिन्तवाई कर दिन रात भजन भक्ति करत हती। और बो ओई बेरा उते आके पिरभु को धन्नवाद करन लगी, और उन सब से, जौन यरूशलेम के छुटकारे की बाट जोहत हते, ऊके बारे में बात करन लगी। और जब बे पिरभु की नैम व्यवस्था अनसार सब कछु निपटा चुके, तो गलील में अपने नगर नासरत हां फिन चले गए। और बालक बढ़त और बलवन्त होत और समज से भरत गओ; और परमेसुर की दया किरपा ऊ पे हती। ऊके मताई-बाप हर साल फसह के त्योहार में यरूशलेम हां जाओ करत हते। जब बो बारह साल को भओ, तो बे त्योहार की रीत अनसार यरूशलेम हां गए। और जब बे उन दिना हां पूरो कर के लौटन लगे, तो बो लड़का यीशु यरूशलेम में रै गओ; ई बात हां ऊके मताई-बाप न जानत हते। बे औरें जौ समज के, कि बो और यात्रियों के सग्गै हुईये, एक दिना कौ पड़ाव कड़ गए, और ऊए अपने नातेदारन और जान पैचान वारन में ढूढ़न लगे। पर जब नईं मिलो, तो ढूंढ़त-ढूंढ़त यरूशलेम हां फिन लौट गए। तीन दिना के पछारें उन ने ऊ ए गुरूजनो के मजारें बिराजो, उन की सुनत और उन से प्रश्न करत भए पाओ। और जितेक जने ऊ की सुन रए हते, बे सबरे ऊ की समज और ऊके जवाबों से चकित हते। तब ऊके मताई बाप सन्न रै गए और ऊ की मताई ने ऊसे कई; हे बेटा, तेंने ऐसो व्यवहार हम से काय करो? तक, तोरो बाप और मैं कुढ़त भए तोए ढूंढ़त हते। ऊ ने उन से कई; तुम मोय काय ढूंढ़त हते? का न जानत हते, कि मोय अपने बाप के घर में होबो जरूरी आय। सो जौन बात ऊ ने उन से कई, उन ने बा नईं समजी। तब बो उन के संग्गै गओ, और नासरत में आओ, और मताई-बाप के वंस में रहो; और ऊ की मताई ने जे सबरी बातें अपने हिए में धरीं। और यीशु बुद्धि में और डील-डौल में और परमेसुर और मान्सन के अनुग्रह में बढ़त गओ। तिबिरियुस कैसर के राज के पंद्रहवें बरस में जब पुन्तियुस पीलातुस यहूदिया का राजपाल हतो, और चौथाई के राजाओं में हेरोदेस गलील का और ऊकौ भाई फिलिप्पुस इतूरैया, और फिलिप्पुस त्रखोनीतिस का और लिसानियास अबिलेने में हाकम हते। और जब हन्ना और कैफा महायाजक हते, ऊ टैम परमेसुर कौ बचन हार में जकरयाह के बेटा यूहन्ना लौ पोंचो। और बो यरदन के आसपास के प्रदेश में जाके, पापन की छिमा के लाने मन फिराओ के बपतिस्मा कौ सन्देसो देन लगो। जैसा यशायाह आगमवकता के कहे भए वचनन की पोथी में लिखो आय, कि हार में एक टेरबेवाले कौ बोल सुन पड़त आय, कि पिरभु की गैल तईयार करो, ऊके गैल गोला सूदे बनाओ। हर घाटी पाट दई जै है, और सबरे पहरवा और टीला नेंचें करे जै हैं; और जौन टेड़ो आय बो सीधो, और जौन ऊंचो नेंचो आय समतल गोला बन है। और सबरे प्रानी परमेसुर के उद्धार हां तक हैं। जौन मान्सन कौ झुण्ड़ कौ झुण्ड़ कड़ के ऊसे बपतिस्मा लेबे हां आत हतो, बो उन से कैत हतो; हे सांप के बच्चो, तुम हां कीने चिता दओ, किआबेवाले खुन्स से भागो। सो अधरम से पछता के धरमी बनबे कौ जतन करो: और अपने अपने हियन में जौ न बिचारो, कि हमाओ बाप इब्राहीम आय; कायसे मैं तुम से कै त आंव, कि परमेसुर इन पत्थरन से इब्राहीम के लाने बालबच्चा पैदा कर सकत आय। और अब तो कुल्हाड़ा पेड़ों की जड़ पे धरो आय, ई लाने जौन पेड़ साजो फल नईं फलत, बो काटो और आगी में डालो जात आय। मान्सन ने ऊसे पूंछो, तो हम का करें? ऊ ने उन से कई, जी लौ दो पैरबे के उन्ना होबें, बो उन हां बांट देबें जी लौ नईंयां और जी लौ खैबे हां खाना होबै, बो भी ऐंसई करे। और कर टैक्स लेबेवाले सोई बपतिस्मा लेबे हां आएं, और ऊसे पूंछो, हे गुरू हम का करें? ऊ ने उन से कओ, तुमाए लाने जितेक ठैराओ गओ आय, ऊसे अतकारो न लईयो। और सिपाहियन ने सोई ऊसे जौ पूंछो, हम का करें? ऊ ने उन से कओ, कोऊ पे उपद्रव न करियो, और न लबरो लांछन लगाईयो, और अपनी मजूरी में खुस रहियो। जब मान्स आस लगाएं हते, और सबरे अपने अपने हिये में यूहन्ना के बारे में विचार करत हते, कि कऊं जौई तो मसीह नईंयां? तब यूहन्ना ने उन सबरन से कओ: मैं तो तुम हां पानू से बपतिस्मा देत आंव, परन्त बो आबेवारो आय, जौन मोय से बली आय; मैं तो ई जोग नईंयां, कि ऊके जूतन के फीता खोल सकों, बो तुम हां पवित्तर आत्मा और आग से बपतिस्मा दै है। ऊ को सूपा ऊके हांथ में आय; और बो अपनो खलिहान अच्छी भांत साफ कर है; बो गेंहूं हां तो अपने खत्ते में जमा कर है, पर भूसा हां ऊ आग में डाल है जौन बुझबे की नईंयां। सो और बिलात दूसरी बातन हां समजा के बो भलो सन्देसो सुनात रओ। परन्त जब ऊ ने चौथाई देस के हाकम हेरोदेस हां ऊके भाई फिलिप्पुस की घरवाली हेरोदियास के बारे में बुरए काम जौन ऊ ने करे हते, तो ऊहां फटकार लगाई। तो हेरोदेस ने और बुरए काम के संग्गै जौ सोई करो कि यूहन्ना हां ऊने जेल में डाल दओ। जब सबरे मान्सन ने बपतिस्मा लओ, और यीशु ने सोई बपतिस्मा लओ और बो बिन्तवाई कर रओ हतो, तो आकास खुल गओ। तब पवित्तर आत्मा कबूतर की भांत ऊ पै उतरो, और जा आकासवानी भई, तें मोरो प्यारो पूत आय, मैं तोसें खुस आंव। जब यीशु अपनी सेवकाई करन लगो, तो ऊ लगभग तीस बरस कौ हतो और (जैसो समजो जात आय) बो यूसुफ कौ पूत हतो; और बो एली कौ। और बो मत्तात कौ, और बो लेवी कौ, और बो मलकी कौ, और बो यन्ना कौ, और बो यूसुफ कौ। और बो मत्तित्याह कौ, और बो आमोस कौ, और बो नहूम कौ, और बो असल्याह कौ, और बो नोगह कौ। और बो मात कौ, और बो मत्तित्याह कौ, और बो शिमी कौ, और बो योसेख कौ, और बो योदाह कौ। और बो यूहन्ना कौ, और बो रेसा कौ, और बो जरुब्बाबिल कौ, और बो शालतियेल कौ, और बो नेरी कौ। और बो मलकी कौ, और बो अद्दी कौ, और बो कोसाम कौ, और बो इलमोदाम कौ, और बो एर कौ। और बो येशू कौ, और बो इलाजार कौ, और बो योरीम कौ, और बो मत्तात कौ, और बो लेवी कौ। और बो शमौन कौ, और बो यहूदाह कौ, और बो यूसुफ कौ, और बो योनान कौ, और बो इलयाकीम कौ। और बो मलेआह कौ, और बो मिन्नाह कौ, और बो मत्तता कौ, और बो नातान कौ, और बो दाऊद कौ। और बो यिशै कौ, और बो ओबेद कौ, और बो बोआज कौ, और बो सलमोन कौ, और बो नहशोन कौ। और बो अम्मीनादाब कौ, और बो अरनी कौ, और बो हिस्रोन कौ, और बो फिरिस कौ, और बो यहूदाद कौ। और बो याकूब कौ, और बो इसहाक कौ, और बो इब्राहीम कौ, और बो तिरह कौ, और बो नाहोर कौ। और बो सरूग कौ, और बो रऊ कौ, और बो फिलिग कौ, और बो एबिर कौ, और बो शिलह कौ। और बो केनान कौ, और बो अरफजद कौ, और बो शेम कौ, और बो नूह कौ, और बो लिमिक कौ। और बो मथूशिलह कौ, और बो हनोक कौ, और बो यिरीद कौ, और बो महललेल कौ, और बो केनान कौ। और बो इनोश कौ, और बो शेत कौ, और बो आदम कौ, और बो परमेसुर कौ हतो। फिन यीशु पवित्तर आत्मा से भरो भओ, यरदन से लौटो; बो आत्मा के सिखाए से चालीस दिना लौ हार में फिरत रओ; और छलिया शैतान ऊहां परखत रओ। उन दिना में ऊ ने कछु न खाओ और जब बे दिना पूरे हो गए, तो ऊए भूख लगी। तब छलिया शैतान ने ऊसे कओ; जदि तें परमेसुर कौ पूत आय, तो ई पत्थरा से कै, कि रोटी बन जाबें। यीशु ने ऊसे कओ; लिखो आय, मान्स केवल रोटी से जीयत नें रै है। तब छलिया शैतान ऊहां ऊंचे पे ले गओ और पल भर में सबरे संसार के राज तका दए। और ऊसे कओ; जौ सबरो अधकार, और वैभव मैं तोहां दे दें हों, कायसे जौ सब मोय दओ गओ आय: मैं जिए चाहत आंव, ऊहां दे देत आंव। ई लाने, जदि तें मोय परनाम करे, तो जौ सबरो तोरो हो जै है। यीशु ने ऊसे कई; लिखो आय; कि तें पिरभु अपने परमेसुर हां परनाम कर; और बस ओई की उपासना कर। तब छलिया शैतान ने यीशु हां यरूशलेम में ले जा के मन्दर के कंगूरे पे ठांड़ो करो, और ऊसे कओ; जदि तें परमेसुर कौ पूत आय, तो अपने आप हां नेंचें गिरा दे। कायसे लिखो आय, कि बो तोरे लाने अपने सरगदूत हां हुकम दै है, कि बे तोरी रक्षा करें। और बे तोहां हाथों हाथ उठा लै हैं, ऐसो न होय कि तोरे गोड़न में पत्थरा से चोट लगे। यीशु ने ऊसे कई; जौ सोई कओ गओ आय, कि तें पिरभु अपने परमेसुर हां न परखिए। जब छलिया शैतान सब भांत परख चुको, तो कछु टैम के लाने ऊके ऐंगर से चलो गओ। फिन यीशु आत्मा की बल-सक्ति से भरो भओ गलील हां लौटो, और ऊकौ जस आस-पास के सबरे देस में फैल गओ। और बो उन के मन्दरों में प्रवचन करत रओ, और सब ऊ की बड़वाई करत हते। और यीशु नासरत में आओ; जिते पालो पोसो गओ हतो; और अपनी रीत अनसार सब्त के दिना मन्दर में धरम पोथी पढ़बे के लाने ठांड़ो भओ। यशायाह अगमवकता की पोथी ऊहां दई गई, यीशु ने पोथी खोल के बा जांगा काड़ी जिते जौ लिखो हतो। कि पिरभु कौ आत्मा मोपे आय, ई लाने कि ऊ ने गरीब-गुरवन हां भलो सन्देसो सुनाबे के लाने मोरो अभिषेक करो आय, और मोय ई लाने पठैओ आय, कि जौन बन्धुए आंय उन हां छुटकारे कौ और अन्धरन हां तकबे कौ भलो सन्देसो सुनाऔ और कुचले भए हां छुड़ाओं। और पिरभु की दया किरपा की बेरा कौ परचार करों। तब यीशु ने पोथी बन्द कर के चाकर के हांथ में दे दई, और बिराज गओ: मन्दर के सबरे मान्स ऊ कुदाऊं तकन लगे। तब बो उन से कैन लगो, कि आज जौ लिखो भओ तुम औरन के सामूं पूरो भओ आय। और सबरन ने ऊ की बड़वाई करी, और जौन दया किरपा की बातें ऊके मों से कड़त हतीं, उन बातन पे चकित भए; और कैन लगे; का जौ यूसुफ को पूत नईंया? यीशु ने उन से कओ; तुम मोय पे जा कहो भओ जरूर कै हौ, कि हे वैद्य, पेंला अपने आप हां साजो कर! जौन कछु हम ने सुनो आय कि कफरनहूम में करो गओ आए, ऊ ए अपने देस में सोई कर। और ऊ ने कओ; मैं तुम से सांसी कैत आंव, कौनऊं आगमवकता अपने देस में मान सन्मान नईं पात। और मैं तुम से कैत आंव, एलिय्याह के दिना में जब साढ़े तीन बरसन लौ आकास बन्द रओ, इते लौ कि सबरे देस में अकाल पड़ो, तो इस्राएल में मुतकी लौ बिधवाएं हतीं। पर एलिय्याह उन में से कौनऊं लौ नईं पठैओ गओ, पर पठैओ गओ तो बस सारफत की एक बिधवा के ऐंगर। और इलीशा आगमवकता के दिना में इस्राएल में बिलात कोढ़ी हते, पर नामान सूरयानी हां छोड़ कौनऊ और शुद्ध नईं करो गओ। जे बातें सुनतई जितेक जने मन्दर में हते, सबरे खुन्सया गए। उन ने उठ के ऊए नगर से बायरें काड़ो, और जौन पहरवा पे उन कौ नगर बसो हतो, ऊ की चोटी पे ऊहां लिवा गए, कि उते से ऊहां नेंचें गिरा देबें। पर बो उन के मजारें से कड़ के चलो गओ। फिन यीशु गलील के कफरनहूम नगर में गओ, और सब्त के दिना मान्सन हां बचन परचार कर रओ हतो। बे औरें यीशु के बचन परचार से चकित हो गए, कायसे ऊकौ बचन अधकार संग्गै हतो। मन्दर में एक मान्स हतो, जी में भूत आत्मा हती। बो जोर से चिल्ला उठो, हे यीशु नासरी, हम हां तोसे का काम? का तें हम हां नास करबे हां आओ आय? मैं तोहां चीनत आंव तें को आय? तें परमेसुर कौ पवित्तर जन आय। यीशु ने ऊहां डांट के कओ, चिमानो रै: और ऊ में से कड़ जा, तब भूत आत्मा ऊहां मजारें पटक के ऊहां कौनऊ नुकसान पोंचाए बिना ऊ में से कड़ गई। ई पे सब हां अचम्भा भओ, और बे आपस में बतयान लगे और कैन लगे, जौ कैसो बचन आय? कि बो अधकार और बल सक्ति से बुरई आत्माओं हां हुकम देत आए, और बे कड़ जात आंय। और चारऊं कोद सब जांगा ऊ की धूम मच गई। यीशु मन्दर में से उठ के शमौन पतरस के घर में गओ और ऊ की सास ताप में पड़ी हती, उन ने ऊसे ऊके लाने बिन्तवाई करी। यीशु ने ऊके ऐंगर ठांड़े होकें ताप हां डांटो, और ऊकौ ताप उतर गओ और तुरतऊं बो उठ के उन की सेवा टहल करन लगी। संजा बेरा जिन जिन के इते केऊ भांत के रोगी पड़े हते, बे औरें उन हां यीशु के ऐंगर लै आए, और ऊने उन में से सबरन पे हांथ धर के उन हां साजो करो। और भूत आत्मा सोई चिल्यातीं और जौ कैत भंई कि तें परमेसुर कौ पूत आय, बिलात जन में से कड़ गईं पर बो उन हां डांटत और बोलन न देत हतो, कायसे बे जानत हतीं, कि जौ मसीह आय। जब भुन्सारो भओ तो बो कड़ के एक सूनसान जांगा में गओ, और झुण्ड़ को झण्ड़ ऊहां ढूंढ़त भए ऊके ऐंगर आए, और ऊहां रोकन लगे, कि हमाए ऐंगर से नईं जाए। परन्त ऊ ने उन से कओ; मोय और नगरन में सोई परमेसुर के राज कौ भलो सन्देसो सुनाबो जरूरी आय, कायसे मैं ऐई लाने पठैओ गओ आंव। और बो गलील के मन्दरों में परचार करत रओ। जब भीड़ यीशु पे गिरी पड़त हती, और परमेसुर कौ बचन सुनत हती, और बो गन्नेसरत की झील के कगारें ठांड़ो हतो, तब ऐसो भओ। कि यीशु ने झील के कगारें दो डोंगी लगी भईं तकीं, और मछुए ऊ पै से उतर के जाल धो रए हते। उन डोंगियन में से एक डोंगी जौन शमौन पतरस की हती, ऊ पै चढ़ के, यीशु ने ऊसे बिन्तवाई करी, कि डोंगी हां कगार से तनक हटा ले, तब बो बैठ के डोंगी पे से मान्सन हां बचन सुनाऊन लगो। जब यीशु बातें कर चुको, तो शमौन पतरस से कओ, गैरे में ले चल, और मछरियां पकड़बे हां जाल डाल। शमौन पतरस ने यीशु से कओ, कि हे मालक, हम ने सबरी रात मैनत करी और कछु न पकड़ो; पर अब तोरे कैबे से जाल डाल हों। जब उन ने ऐसो करो, तो बिलात मछरियां घेर लाए, और उन के जाल फटन लगे। ई पे उन ने अपने संगियन हां इसारो करो, कि आके हमाई मदद करो: और उन ने आके, दोई डोंगी इते लौ भर लईं कि बे डूबन लगीं। जौ तक के शमौन पतरस यीशु के गोड़न पे गिर के कैन लगो; हे पिरभु, मोरे ऐंगर से जा, कायसे मैं पापी मान्स आंव। कायसे इतनी मछरियां के पकड़े जाबे से ऊहां और ऊके संगियन हां बिलात अचम्भा भओ। और वैसई जब्दी के पूत याकूब और यूहन्ना हां सोई, जौन शमौन के भागीदार हते, अचम्भा भओ, तब यीशु ने शमौन से कओ, नें डर, अब से तें मान्सन हां जीयत पकड़े कर है। और बे डोंगियन हां कगारें पे ले आए और सब कछु छोड़ के यीशु के पाछूं हो लए। जब यीशु कोनऊं नगर में हतो, तो उते कोढ़ से भरो एक मान्स आओ, और ऊ यीशु हां तक के मों के बल गिरो, और बिन्तवाई करी; हे पिरभु जदि तें चाहे तो मोहां शुद्ध कर सकत आय। यीशु ने हाथ बढाके ऊहां छिओ और कओ मैं चाहत आंव तें शुद्ध हो जा, और ऊकौ कोढ़ तुरतऊं जात रओ। तब यीशु ने ऊहां चिताओ, कोऊ से न कईयो, पर जाके अपने आप हां याजक हां तका, और शुद्ध होबे के लाने जो कछु मूसा ने ठैराओ आय, बो चढ़ावा चढ़ा, कि उन पे गवाई होबै। पर ऊ की चरचा दूर दूर लौ फैलत जा रई हती, और भीड़ की भीड़ यीशु की सुनबे और अपने रोगों से साजो होबे हां जमा हो गई। पर बो हार में अलैदा जाके बिन्तवाई करत हतो। एक दिना की बात आय कि यीशु उपदेश दे रओ हतो और कछु धरम ज्ञानी और धरम शिक्षक उते बिराजे हते, जौन गलील और यहूदिया के सबरे गांव और यरूशलेम से आए हते; और शुद्ध करबे हां पिरभु की सक्ति बल ऊके संग्गै हतो। और तको कैऊ मान्स एक रुगिया मान्स हां जौन लकवा कौ मारो हतो, खाट पे ले आए, बे औरें ऊहां भीतर ले जाबे और यीशु के सामूं रखबे कौ जतन कर रए हते। जब बे झुण्ड़ के काजें ऊ ए भीतर न ले जा सके तो उन ने कोठे पे चढ़ के और छत उदेर के, उए खाट समेंत यीशु के सामूं उतार दओ। यीशु ने उन कौ बिसवास तक के ऊसे कओ; हे मान्स, तोरे पाप छिमा भए। तब धरम ज्ञानी और धरम शिक्षक बतकाओ करन लगे, जौ को आय, जो परमेसुर हां निंदरत आय? परमेसुर हां छोड़ को पापन हां छिमा कर सकत आय? यीशु ने उन के हिये की बातें जान के, उन से पूछो, कि तुम अपने हियन में का बतकाओ कर रए आव। आसान का आय? जौ कहबो, कि तोरे पाप छिमा भए, या जौ कहबो कि उठ, और चल फिर? सो ई लाने कि तुम जान जाओ, कि मान्स के पूत हां धरती पे पाप छिमा करबे कौ सोई अधकार आय (यीशु ने लकवामारे से कओ), मैं तोसे कैत आंव, उठ अपनी खाट उठा के अपने घरै चलो जा। ऊ तुरतऊं यीशु के सामूं उठो, और जौन खाट पे ऊ पड़ो हतो, ऊहां उठा के परमेसुर कौ जस गाऊत अपने घरै चलो गओ। तब सबरे जने चकित भए और परमेसुर की बड़वाई करन लगे, और बिलात डरा के कैन लगे, आज हम ने अनोखी बातें तकीं आंय। और ईके पाछें यीशु बायरें गओ, और लेवी नाओं के एक चुंगी लेबेवाले हां चुंगी की चौकी पे बिराजो तको, और ऊसे कओ, मोरे पाछूं हो ले। तब बो सब कछु छोड़ के उठो, और ऊके पाछूं हो लओ। तब लेवी ने अपने घर में यीशु के लाने एक बड़ो भोज दओ; और चुंगी लेबेवारन कौ और औरन मान्सन कौ जौन ऊके संग्गै जेबे हां बिराजे हते, एक बड़ो झुण्ड हतो। ई पे धरम ज्ञानी और धरम शिक्षक ऊके चेलन से जौ कै कें कुड़कुड़न लगे, कि तुम चुंगी लेबेवालन और पापियन के संग्गै काय खात-पियत आव? यीशु ने उन हां उत्तर दओ; वैद्य भले चंगों के लाने नईं, पर रूगियन के लाने जरूरी आय। मैं धर्मियन हां नईं, पर पापियन हां हिया फेरबे के लाने बुलाबे हां आओ आंव। उन ने यीशु से कओ, यूहन्ना के चेला तो बिरोबर उपवास रखत और बिन्तवाई करत आंय, और ऊंसई धरम शिक्षकों के सोई, पर तोरे चेला तो खात-पियत आंय! यीशु ने उन से कओ, का तुम बरातियन से जब तक दूल्हा उन के संग्गै आय, उपवास करा सकत आव? पर बे दिना आहैं, जिन में दूल्हा उन से अलैदा करो जै है, तब बे उन दिना में उपवास कर हैं। यीशु ने एक और कनोत सोई उन से कई; कि कोऊ मान्स पैरत के नये उन्ना में से फाड़ के पुराने उन्ना में पैबन्द नईं लगात, नईं तो नओ तो फट जा है और ऊ नओ पुराने उन्ना से मेल सोई न खा है। और कोऊ नओ दाख कौ रस पुराने चमड़ा की मश्कों में नईं भरत, नईं तो नओ दाख कौ रस मश्कों हां फाड़ के बह जै है, और मश्कें सोई नास हो जें हैं। पर नओ दाख कौ रस नई मश्कों में भरो चइये। कोनऊं मान्स पुरानो दाख कौ रस पीके नओ नईं पियो चाहत कायसे बो कैत आय, कि पुरानो ही साजो आय। फिन सब्त के दिना बो खेतन में से होकें जा रओ हतो, और ऊके चेला बालें तोड़ तोड़के, और हांथन से मसल के खात जात हते। तब फरीसियन में से केऊ जने कैन लगे, तुम बो काम काय करत आव जौन सब्त के दिना करबो सई नईंयां? यीशु ने उन हां उत्तर दओ: का तुम ने जौ नईं बांचो, कि दाऊद ने जब बो और ऊके संग्गी भूखे हते तो का करो? बो कौन भांत परमेसुर के घर में गओ, और भेंट की रोटियां लेके खाईं, जिन हां खाबो याजकन हां छोड़ और कोऊहां खाबो सई नईंयां, और अपने संगियन हां सोई दईं। और ऊ ने उन से कओ; मान्स कौ पूत सब्त के दिना कौ सोई पिरभु आय। और ऐसो भओ कि कोऊ और सब्त के दिना बो मन्दर में जाके उपदेस देन लगो; उते एक मान्स हतो, जी को सूदो हाथ सूखो हतो। शास्त्री और फरीसी यीशु पे लांछन लगाबे कौ मौका पाबे की ताक में हते, कि तकें कि बो सब्त के दिना साजो करत आय कि नईं? पर यीशु उन के विचार जानत हतो; ई लाने यीशु ने ऊ सूखे हाथवाले से कओ; उठ, मजारें ठांड़ो हो जा, बो उठ ठांड़ो भओ। यीशु ने उन से कओ; मैं तुम से पूंछत आंव कि सब्त के दिना का सई आय, भलो करबो या बुरो करबो; प्रान हां बचाबो या नास करबो? और यीशु ने चारों कुदाऊं उन सब हां तक के ऊ मान्स से कओ; अपनो हाथ बढ़ा: ऊ ने ओई करो, और ऊकौ हाथ फिन के साजो हो गओ। पर बे आपे से बाहर होकें आपस में बतकाओ करन लगे कि हम यीशु के संग्गै का करें? उन दिना में बो पहरवा पे बिन्तवाई करबे हां कड़ो, और परमेसुर से बिन्तवाई करबे में सबरी रात बिताई। जब दिन भओ, तो ऊ ने अपने चेलन हां टेर के, उन में से बारह नबेर लए, और उन हां प्रेरित कओ। और बे जे आंय शमौन जी कौ नाओं ऊ ने पतरस सोई धरो; और ऊको भईया अन्द्रियास और याकूब और यूहन्ना, फिलिप्पुस और बरतुलमै। मत्ती और थोमा और हलफई कौ पूत याकूब और शमौन जौन जेलोतेस कहलात आय। और याकूब कौ पूत यहूदा और यहूदा इसकरियोती जौन ऊहां पकड़वाबे वारो बनो। तब बो उन के संग्गै उतर के समतल जांगा में ठांड़ो भओ, और ऊके चेलन की बड़ी भीड़, और सारे यहूदिया और यरूशलेम और सूर और सैदा के समुन्दर के कगारें के कुल्ल मान्स, जौन ऊ की सुनबे और अपनी बिमारियों से साजे होबे हां ऊके ऐंगर आए हते, उते हते। दुष्टआत्माओं के सताए भए मान्स सोई साजे करे जात हते। और सबरे ऊ ए छिओ चाहत हते, कायसे ऊ में से सामर्थ सक्ति कड़ के सब हां साजो करत हती। तब यीशु ने अपने चेलन कुदाऊं तक के कओ; धन्न आव तुम, जौन नरम दीन आव, कायसे परमेसुर कौ राज तुमाओ आय। धन्य आव तुम, जौन अब भूखे आव; कायसे अफराए जै हो, धन्न आव तुम, जौन अब रोऊत आव, कायसे तुम हंस हौ। धन्न आव तुम, जब मान्स के पूत के काजें मान्स तुम से बैर कर हैं, और तुम हां काड़ दै हैं, और तुमाई बुराई कर हैं, और तुमाओ नाओं बुरओ जान के काट दें हैं। ऊ दिना खुसी से कूंदिओ, कायसे तको, तुमाए लाने सरग में बड़ो प्रतिफल आय: उन के बाप-दादे आगमवकतन के संग्गै साई उंसई करत हते। पर हाय तुम पै; जौन मालपानू वारे आव, कायसे तुम अपने सुख भोग चुके। हाय तुम पै; जो अब अफरे आव, कायसे भूखे हुईयो: हाय तुम पै; जौन अब हंसत आव, कायसे अफसोस कर हौ और रो हौ। हाय तुम पै; जब सबरे मान्स तुम हां भलो कैबें, कायसे उन के बाप-दादे लबरे आगमवकतन के संग्गै ऐंसई करत हते। सो अब मैं तुम सुनबेवारन से कहत आंव, कि अपने बैरियन से प्रेम राखौ; जौन तुम से बैर करें, उन कौ भला करौ। जौन तुम हां कोसे, उन हां आसीस देओ: और जौन तुमाओ अपमान करै, ऊ न के लाने बिन्ती याजना करौ। जौन तोरे एक गाल पे चांटा मारे, ऊ कुदाऊं दूसरो सोई फेर दे; और जौन तोरो कोट छीन ले, ऊहां कुरता लेबे से सोई न रोक। जौन कोई तोसे मांगे, ऊहां दे; और जौन तोरी बस्त छीन लेबे, ऊसे वापस न मांग। और जैसो तुम चाहत आव कि मान्स तुमाए संग्गै करें, तुम सोई उन के संग्गै उंसई करो। जदि तुम अपने प्रेम राखबे वारन के संग्गै प्रेम राखो, तो तुमाई का बड़वाई? कायसे पापी सोई अपने प्रेम राखबे वारन के संग्गै प्रेम राखत आंय। और जदि तुम अपने भलाई करबे वारन के संग्गै भलाई करत आव, तो तुमाई का बड़वाई? कायसे पापी सोई ऐंसई करत आंय। और जदि तुम उन हां उधार देत आव, जिन से फिन वापस लेबे की आसा करत आव, तो तुमाई का बड़वाई? कायसे पापी पापियन हां उधार देत आंय, कि उन हां उतनौ फिन मिलै। पर अपने बैरियन से प्रेम राखौ, और भलाई करौ: और फिन वापस पाबे की आस न राख के उधार देओ; तो तुमाए लाने बड़ो इनाम हुईये: और तुम परम परधान के बालबच्चा ठैर हौ, कायसे बो उन पे जो धन्नवाद नईं करत और बुरए जन पे सोई दया करत आय। जैसो तुमाओ बाप दया करबेवारो आय, उंसई तुम सोई दया करबेवाले बनौ। लांछन न लगाओ; तो तुम पे सोई लांछन न लगाओ जै है: अपराधी न ठैराओ, तो तुम सोई अपराधी न ठैराए जै हौ: छिमा करो, तो तुम हां सोई छिमा करो जै है। दए करो तो तुम हां सोई दओ जै है: मान्स पूरो नाप ठांस ठांसके और हिला हिलाके और ऊपरै लौ भरो भओ तुमाई ओली में डाल हैं, कायसे जौन नाप से तुम नापत आव, ओई से तुमाए लाने सोई नापो जै है। फिन यीशु ने उन से एक और कनौत कई; का अन्धरा, अन्धरे हां गैल बता सकत आय? का दोई गढ्ढा में न गिर हैं? चेला अपने गुरु से बड़ो नईं, पर जौन सिद्ध हुईये, बो अपने गुरु के बिरोबर हुईये। तें अपने भाईया की आंख के तिनके हां काय तकत आय? और अपनी आंख कौ लट्ठा तोय नईं दिखात? और जब तें अपनी आंख कौ लट्ठा नईं तकत, तो अपने भईया से कौन भांत कै सकत आय, हे भईया, ठैर जा मैं तोरी आंख में से तिनका काड़ देओं? हे कपटी, पेंला तें अपनी आंख कौ लट्ठा काड़ ले, तब तें अपने भईया की आंख के तिनके हां काड़बे हां सई सई तक पा है। कायसे कौनऊ साजो पेड़ नईंयां, जौन बुरओ फल लात होबै, और न कोऊ बुरओ पेड़ आय, जौन साजो फल फलत होबै। हर एक पेड़ अपने फल से चीनो जात आय; कायसे मान्स झाड़ियन से अंजीर नईं तोड़त, और न झरबेरी से अंगूर तोड़त आय। भलो मान्स अपने हिये के भले भण्डार से भली बातें काड़त आय; और बुरओ मान्स अपने हिये के बुरए भण्डार से बुरई बातें काड़त आय; कायसे जौन हिये में भरो आय ओई ऊके मों पे आत आय। जब तुम मोरो कओ नईं मानत, तो मोय हे पिरभु, हे पिरभु, काय कैत आव? जौन कोई मोरे लौ आत आय, और मोरी बातें सुन के उन हां मानत आय, मैं तुम हां बतात आंव बो की के समान आय? बो ऊ मान्स के समान आय, जी ने घर बनाती बेरा माटी गैरी खोद के चट्टान पे खचव डाली, और जब बाढ़ आई और हिलोर कौ पानू ऊसे टकराओ, पर ऊहां हला न सकी; कायसे बो पक्को बनो हतो। पर जौन सुन के नईं मानत, बो ऊ मान्स के समान आय, जीने माटी के बिना नी के घर बनाओ। जब ऊ पे पानू की धारा लगी, तो बो तुरतऊं गिर पड़ो, और सत्यानास हो गओ। जब यीशु मान्सन हां पूरो उपदेस सुना चुको, तो कफरनहूम में आओ। और कोऊ सूबेदार कौ एक बिलात प्यारो चाकर हतो, और रोग से मरबे पे हतो। जब सूबेदार ने यीशु के बारे में सुनो तो ऊ ने यहूदियन के बूढ़े पुराने जन हां ऊसे जौ बिन्तवाई करबे हां पठैओ, कि आन के मोरे चाकर हां साजो कर। जब बे औरें यीशु लौ पोंचे तो यीशु से बिन्ती कर कैन लगे, कि बो ई जोग आय कि तें ऊके लाने जौ करे। कायसे ऊ हमाई जात वारन से प्रेम करत आय, और ओई ने हमाए मन्दर हां बनवाओ आय। यीशु उन के संग्गै सग्ंगै निंगो, और घर से तनकई दूर हतो, तो सूबेदार ने अपने प्रेमी जन हां जौ कैबे हां पठैओ, कि हे पिरभु दुख: न उठा, कायसे मैं ई जोग नईंयां, कि तें मोरी छत के नेचें आबै। ऐई काजें मैं ने अपने आप हां ई जोग सोई न समजो, कि तोरे ऐंगर आओं, बस बचन कै भर दे और मोरो चाकर साजो हो जै है। मैं सरकारी नौकर आंव; और सिपाई मोरे वस में आंय, मैं एक से कैत आंव, जा, तो ऊ जात आय; और दूजे से कैत आंव, आ, तो बो आत आय; और मैं अपने चाकर से कै त आंव जौ कर, तो बो ऊ करत आय। जब यीशु ने जौ सुनो तो अचम्भा करो, और झुण्ड कुदाऊं जौन ऊके पाछूं निंगत आत हती कओ, मैं तुम से कैत आंव, कि मैंने इस्राएल में भी ऐसो बिसवास नईं पाओ। और जो पठैए गए हते उन ने घर लौट के ऊ चाकर हां साजो पाओ। ई के पाछें तुरतऊं यीशु नाइन नाओं नगर हां गओ, और ऊके चेला, और बड़ो झुण्ड ऊके संग्गै निंग रओ हतो। जब बो नगर के दरवाजा लौ पोंचो, तो ऊ ने तको, कि मान्स एक मरे भए हां बायरें लए जा रए हते; बो अपनी मताई कौ एकलौतो पूत हतो, और बा बिधवा हती: और नगर के बिलात मान्स ऊके संग्गै हते। ऊहां तक के पिरभु हां ऊ पै बड़ी दया आई, और ऊसे कओ, न रो। तब यीशु ने ऐंगर जाके अर्थी हां छियो; तब अर्थी हां उठाबेवारे ठैर गए तब यीशु ने कओ; हे जवान मैं तोसे कैत आंव, उठ। तब ऊ मुरदा उठ बैठो, और बातें करन लगो: और यीशु ने ऊहां ऊ की मताई हां सौंप दओ। ई से सब जनें बिलात डरा गए; और बे औरें परमेसुर की बड़वाई कर के कैन लगे, कि हमाए मजारें एक बड़ो आगमवकता उठो आए, और परमेसुर ने अपने लोगन पे बड़ी किरपा करी आय। यीशु के बारे में जा बात सबरे यहूदिया और आस-पास के सबरे देस में फैल गई। यूहन्ना हां ऊके चेलन ने इन सबरी बातन कौ सन्देसो दओ। तब यूहन्ना ने अपने चेलन में से दो चेलों हां बुला के पिरभु के ऐंगर जौ पूंछबे के लाने पठैओ, कि का आबेवारो तेंई आय, या हम कोऊ और दूजे की बाट हेरें? उन ने यीशु के ऐंगर पोंच के कओ, यूहन्ना बपतिस्मा देबेवारे ने हम हां तोरे ऐंगर जौ पूंछबे हां पठैओ आय; कि का आबेवारो तेंई आय, या हम दूजे की बाट तकें? ओई बेरा यीशु ने बिलात जन हां रोगों, और पीड़ा दुख और बुरई आत्माओं से छुड़ाओ; और यीशु ने बिलात अंधरन हां आंखें दईं। फिन उन से कओ; जौन कछु तुम ने तको और सुनो आय, जाके यूहन्ना से कै दो; कि अंधरा तकत आंय, लगड़े निंगत फिरत आंय, कोढ़ी शुद्ध करे जात आंय, बहिरे सुनत आंय, मुरदे जिलाए जात आंय; और गरीब गुरवन हां भलो सन्देसो सुनाओ जात आय। और धन्न आय बो, जौन मोरे काजें ठोकर न खाबै। जब बे मान्स जौन यूहन्ना ने पठैय हते चले गए, तो यीशु यूहन्ना के बारे में मान्सन से कैन लगो; तुम हार में का तकबे गए हते? का बैहर से हलत भए सरकण्डा हां? तो फिन तुम का तकबे गए हते? का मलमल के उन्ना पैरें भए मान्स हां? तको, जौन चमक वारे उन्ना पैरत आंय, और ठाट बाट से रैत आंय, बे महलों में रैत आंय। तो फिन का तकबे गए हते? का कौनऊं आगमवकता हां? हओ, मैं तुम से कैत आंव, कि आगमवकता से भी बड़े हां। जौ ओई आय, जीके बारे में लिखो आय, कि हेरो, मैं अपने दूत हां तोरे आंगू पठैत आंव, जौन तोरे आंगू गैल तईयार कर है। मैं तुम से कैत आंव, जौन बईयरन से पैदा भए आंय, उन में से यूहन्ना से बड़ो कोऊ नईंयां: पर जौन परमेसुर के राज में हलके से हलको आय, बो ऊसे भी बड़ो आय। सबरी जनता ने और चुंगी लेबेवारन ने सोई यूहन्ना कौ बपतिस्मा लेके परमेसुर हां सांचो मान लओ। पर फरीसियन और व्यवस्था पालकों ने ऊसे बपतिस्मा न लेके, परमेसुर की मनसा हां अपने बारे में टाल दओ। सो मैं ई जुग के मान्सन हां, की के समान बताओं, कि बे औरें की के जैसे आंय? बे उन बच्चन घांई आंय जौन बजार में बैठे भए एक दूजे से टेर के कैत आंय, हम ने तुमाए लाने बांसुरी बजाई, और तुम नईं नाचे, हम ने दुख मनाओ और तुम नईं रोए! काय से यूहन्ना बपतिस्मा देबेवारो न रोटी खात आओ, और न दाख कौ रस पीयत आओ, और तुम कैत आव, ऊ में दुष्ट आत्मा आय। मान्स कौ पूत खात-पियत आओ आय; और तुम कैत आव, तको, पेटू और पियक्कड़ मान्स, चुंगी लेबेवारों कौ और अधर्मियन कौ मीत। पर बुद्धि अपनी सबरी सन्तानों से सांची ठैराई गई आय। फिन कोऊ फरीसी ने यीशु से बिन्तवाई करी, कि मोरे संग्गै भोजन कर; सो बो ऊ फरीसी के घरै जाके भोजन करबे हां बिराजो। और हेरौ, ऊ नगर की एक पापिनी दुराचारी बईयर जौ जान के कि बो फरीसी के घर में भोजन करबे हां बिराजो आय, संगमरमर के बरतन में इत्र लेके आई। ऊके गोड़न के ऐंगर, बो रोत भई, पाछूं ठांड़ी होकें ऊके गोड़न हां अंसुअन से भिगोन लगी, और अपने मूड़ के बाल से पोंछन लगी और ऊके गोड़े बेर-बेर चूम के उन पे इत्र मलो। जौ हेर के, बो फरीसी जीने यीशु हां बुलाओ हतो, अपने हिये में विचार करन लगो, जदि जौ आगमवकता होतो तो जान जातो, कि जा जौन ऊहां छी रई आय, बो को और कैसी बईयर आय? कायसे बा तो पापिनी आय। जौ जान के यीशु ने ऊसे कई; हे शमौन मोहां तोसें कछु कैने आय, ऊ बोलो, हे गुरु कै। कोऊ साहूकार से दो जने उधार लएं हते, एक पांच सौ, और दूजो पचास रुपईया धरत हतो। जब कि उन लौ चुकाबे हां कछु न रओ, तो ऊ ने दोई जन हां छिमा कर दओ: सो उन में से को ऊसे अधक प्रेम कर आय? शमौन ने उत्तर दओ, मोरी समज में बो जीकौ बिलात छोड़ दओ: यीशु ने ऊसे कओ, तेंने सई विचार करो। और ऊ बईयर कुदाऊं फिर के यीशु ने शमौन से कओ; का तें ई बईयर हां तकत आय? मैं तोरे घर में आओ पर तेंने मोय गोड़े धोबे हां पानू नईं दओ, पर ईने मोरे गोड़े अंसुअन से भिंजाए, और अपने बालों से पोंछो! तेंने मोय चूमा नईं दओ, पर जब से मैं आओ आंव तब से ईने मोरे गोड़न हां चूमबो नईं छोड़ो। तेंने मोरे मूड़ में तेल नईं मलो; पर ईने मोरे गोड़न पे इत्र मलो आय। ई लाने मैं तोसें कैत आंव; कि ईके पाप जौन कुल्ल बिलात हते, छिमा भए, कायसे ईने बिलात प्रेम करो; पर जीकौ तनक छिमा भओ आय, ऊ तनक प्रेम करत आय। और यीशु ने ऊ बईयर से कओ, तोरे पाप छिमा भए। तब जौन मान्स ऊके संग्गै भोजन करबे हां बिराजे हते, बे अपने अपने हिये में विचार करन लगे, जौ को आय जौन पापन हां सोई छिमा करत आय? पर यीशु ने ऊसे कई; तोरे बिसवास ने तोय बचा लओ आय, कुशल से चली जा। ईके पांछू यीशु तुरतऊं नगर नगर और गांव गांव परचार करत भओ, और परमेसुर के राज कौ भलो सन्देसो सुनात भओ, फिरन लगो। और बे बारह सोई ऊके संग्गै हते: और कछु बईयरें सोई हतीं जौन दुष्टआत्माओं और रोगों से छुड़ाई गई हतीं, और बे जे आयं, मरियम जौन मगदलीनी कहात हती, जी में से सात दुष्ट आत्माएं कड़ी हतीं। और हरोदेस के भण्डारी खोजा की घरवाली योअन्ना और सूसन्नाह और बिलात की बईयरें: जे औरें अपने निजी मालपानू से यीशु की सेवा करत हतीं। जब बड़ी भीड़ जुड़ी और नगर नगर के मान्स यीशु के ऐंगर चले आत हते, तो ऊ ने कनौत में कओ। एक बैवेवारो बीज बोवे हां कड़ो: बोऊत भए कछु गैल गोला कगारें गिरो, और कुचलो गओ, और आकास के पंछियन ने उए चुग लओ। कछु चट्टान पे गिरो, और उपजो, पर तरी न मिलबे से सूख गओ। कछु झाड़ियन के मजारें गिरो, और झाड़ियन ने संगै संगै बढ़ के उए दबा दओ। कछु सई खेत में गिरो, और जमो और जम के सौ गुना फल लाओ: जौ कै कें, ऊ ने जोर से टेर के कओ; जी के सुनबे हां कान होबें बे सुन लेबें। यीशु के चेलन ने ऊसे पूंछो, ई कनौत कौ मतलब का हो सकत आय? यीशु ने उन से कओ; तुम हां परमेसुर के राज की छिपी लुकी बातन हां समजबे की समज दई गई आय, पर और दूसरन हां कनौत में सुनाओ जात आय, ई लाने कि बे तकत भए भी न तकें, और सुनत भए सोई न समजें। कनौत की समजाइस जा आय; बीज परमेसुर कौ बचन आय। गैल के कगारें के बे आंय, जिन ने सुनो; तब छलिया शैतान आके उन के हिये में से बचन उठा ले जात आय, कि कऊं ऐसो न होबै कि बे बिसवास कर के उद्धार पाबें। चट्टान पे के बे आंय, कि जब सुनत आंय, तो खुसी से बचन हां अपना तो लेत आंय, पर जड़ न पकड़बे से बे तनक देर हां बिसवास रखत आंय, पर जांच परख की बेरा डगमगा जात आंय। जौन झाड़ियन में गिरे बे जे आंय, जौन सुनत तो आंय, पर आंगू निंग के सोस और मालपानू और जीवन के सुख बिलास में फंस जात आंय, और उन कौ फल नईं पकत। पर साजे खेत के बे आंय, जौन बचन सुनके भले और अच्छे हिये में संभालें रैत आंय, और धीरज से फल लात आंय। और मान्स दिया बार के कौनऊं बरतन से नईं ढ़ांकत, और न खाट नेचें धरत आंय, पर दीया ऊं चाई पर दीपदान पर धरत आय, जीसे भीतर आबेवारन हां उजयारो मिले। कछु लुको नईंयां, जौन उजागर न होय; और न कछु छिपो आय, जौन जानो न जाए, और उजागर न होय। ई लाने होसियार रओ, कि तुम कौन भांत सुनत आव? कायसे जी के ऐंगर आय, ऊहां और दओ जै है; और जी के ऐंगर नईंयां, ऊसे बौ सोई लै लओ जै है, जिए बो अपनो समजत आय। यीशु की मताई और भईया ऊके ऐंगर आय, पर भीड़ के काजें ऊसे भेंट न कर पाए। यीशु से कओ गओ, तोरी मताई और भईया बायरें ठांड़े आंय और तोसें भेंट करो चाहत आंय। यीशु ने उत्तर दओ; मोरी मताई और मोरे भईया तो जेई आंय, जौन परमेसुर कौ बचन सुनत और मानत आंय। फिन एक दिना यीशु और ऊके चेला नाव पे चढ़े, और ऊ ने उन से कओ; चलो झील के ऊ पार चलें, सो उन ने नाव ढ़ील दई। पर जब नाव चली जात हती, तो यीशु सो गओ: और झील पे अंधूरा चलन लगो, और नाव पानू से भरन लगी और बे खतरे में हते। तब उन ने ऊ लौ जाके ऊहां जगाओ, और कओ; स्वामी पिरभु! हम नास भए जात आंय: तब यीशु ने उठ के अंधूरा हां और पानू की लहरन हां डांटो और बे चिमा गए, और सब सान्त हो गओ। तब यीशु ने उन से कओ, तुमाओ बिसवास किते हतो? पर बे औरें डरा गए, और चकित होकें आपस में कैन लगे, जौ को आय? जौन आंधी और पानू हां सोई हुकम देत आय, और बे ऊ की मानत आंय। फिन बे गिरासेनियों के देस में पोंचे, जौन ऊ पार गलील के सामूं आय। जब यीशु कगार पे उतरो, तो ऊ नगर कौ एक मान्स ऊहां मिलो, ऊ मान्स में दुष्ट आत्माएं हतीं और बिलात दिना से बो न उन्ना पैरत हतो और न घर में रैत हतो, पर कब्रों में रओ करत हतो। बो यीशु हां तक के चिल्याओ, और ऊके सामूं गिर के जोर से टेर के कओ; हे परम परधान परमेसुर के पूत यीशु, मोय तोसे का काम! मैं तोसे बिन्तवाई करत आंव, मोय कष्ट न दे। कायसे यीशु ऊ अशुद्ध आत्मा हां ऊ मान्स में से कड़ जाबे कौ हुकम दे रओ हतो, ई लाने कि बो ऊ पे चढ़ बैठत हती; इते लौ कि मान्स ऊहां सांकलन और बेड़ियन से बांधत हते, पर ऊ उन हां तोड़ डालत हतो, और दुष्ट आत्मा ऊहां हार में भगाए फिरत हती। यीशु ने ऊसे पूंछो; तोरो नाओं का आय? ऊ ने कओ, सेना; कायसे बिलात दुष्ट आत्माएं ऊ में पिड़ गईं हतीं। उन ने यीशु से बिन्तवाई करी, कि हम हां बिकट गैरे गढ्ढे में जाबे कौ हुकम न कर। उते पहरवा पे सुअरन कौ एक झुण्ड चर रओ हतो, ई लाने उन ने बिन्तवाई करी, कि हम हां उन में पिड़ जान दे, यीशु ने उन हां जान दओ। तब दुष्ट आत्माएं ऊ मान्स में से कड़ के सुअरन में पिड़ गईं और बो झुण्ड ऊंचे कगार से झपट के झील में जा गिरो और डूब मरो। सुअरन के चराबेवारे जौ जौन भओ हतो, तक के कुर्रू दई, और नगर में, और गांव में जाके ऊकौ सन्देसो दओ। और मान्स जौन भओ हतो, ऊए तकबे हां कड़े, और यीशु के ऐंगर आके जौन मान्स में से दुष्ट आत्माएं कड़ी हतीं, ऊए यीशु के गोड़न के ऐंगर उन्ना पैरें और होस में बिराजो तक के डरा गए। और तकबे वारन ने नगर के मान्सन हां बताओ, कि बो दुष्ट आत्मा कौ सताओ भओ मान्स कौन भांत साजो भओ। तब गिरासेनियों के मान्सन ने यीशु से बिनती करी, कि हमाए इते से चलो जा; कायसे उन पे भारी डर समा गओ हतो: और बो नाव पे सवार होकें वापस लौट गओ। जौन मान्स में से दुष्ट आत्माएं कड़ी हतीं बो यीशु से बिन्तवाई करन लगो, कि मोय अपने संग्गै रैन दे, परन्त यीशु ने ऊए विदा कर के कओ। अपने घर हां लौट जा और मान्सन हां बता, कि परमेसुर ने तोरे लाने कितेक बड़े बड़े काम करे आंय: और बो लौट के सबरे नगर में परचार करन लगो, कि यीशु ने मोरे लाने कैसे बड़े बड़े काम करे आंय। जब यीशु लौट रओ हतो, तो मान्स ऊसे बड़ी खुसी से मिले; कायसे बे सबरे ऊ की बाट तकें हते। और तको, याईर नाओं कौ एक मान्स जौन मन्दर कौ परधान हतो, आओ, और यीशु के गोड़न पे गिर के यीशु से बिन्तवाई करन लगो, कि मोरे घरै चल। कायसे ऊ की बारह वर्ष की इकलौती मौड़ी हती, और बो मरबे पे हती: जब यीशु जा रओ हतो, तब मान्स ऊपे गिरे पड़त हते। और एक बईयर जीहां बारह बरस से रकत बहवे कौ रोग हतो, और बो अपनी सबरी कमाई बैद्यों के पांछू लगा चुकी हती, पर कौनऊं के हाथ से साजी न हो पाई हती। ऊ ने यीशु के पांछू से आके यीशु के उन्ना के छोर हां छुओ, और तुरतंई ऊकौ रकत बहवो बन्द हो गओ। ई पे यीशु ने कओ, मोय की ने छुओ? जब सबरे मुकरन लगे, तो पतरस और ऊके संगियन ने कओ; हे स्वामी, तोय तो भीड़ दबाए डालत आय और तो पे गिरी पड़ रई आय। पर यीशु ने कओ; कोऊ ने तो मोय छुओ आय कायसे मैंने जान लओ आय कि मोय में से सक्ति कड़ी आय। जब बईयर ने तको, कि मैं लुक नईं सकत, तो कांपत भई आई, और यीशु के गोड़न पे गिर के सबरे मान्सन के सामूं बताओ, कि ऊ ने कौन काजें यीशु हां छुओ, और कौन भांत तुरतऊं साजी हो गई। यीशु ने ऊसे कओ, बिटिया तोरे बिसवास ने तोहां साजो करो आय, खुसी से चली जा। जब यीशु जौ कैई रओ हतो, कि कोऊ ने मन्दर के सरदार के घर से आके कओ, तोरी मौड़ी मर गई: गुरू हां कष्ट न दे। यीशु ने जौ सुन के ऊहां उत्तर दओ, न डर; बस बिसवास रख; तो बो बच जै है। घर में आन के ऊ ने पतरस, याकूब और यूहन्ना हां छोड़ दूसरे और कोऊहां अपने संग्गै और मौड़ी के मताई-बाप हां छोड़ कोई और हां भीतर आन नईं दओ। सबरे ऊके लाने रो पीट रए हते, यीशु ने कओ; न रोओ; बा मरी नईंयां पर सो रई आय। बे जौ जान के, बो मर गई आय, यीशु की हंसी करन लगे। पर यीशु ने ऊकौ हाथ पकड़ो, और टेर के कओ, हे मौड़ी उठ! तब ऊके प्रान लौट आए और बा तुरतऊं उठ बैठी; फिन यीशु ने हुकम दओ, कि ऊ ए कछु खाबे हां दओ जाबै। ऊके मताई-बाप चकित भए, परन्त यीशु ने उन हां चिता के कओ, जौन कछु जौ भओ आय, कोऊ से न कईयो। फिन यीशु ने बारहों प्रेरितन हां बुला के उन हां सब दुष्ट आत्माओं और बिमारियन को दूर करबे की सक्ति और अधकार दओ। और उन हां परमेसुर के राज कौ परचार करबे, और रूगियन हां साजो करबे के लाने पठैओ। यीशु ने उन से कओ, जाती बेरा कछु न लईयो, न लठिया, न झोली, न रोटी, न पईसा टका, और न दो दो कुरता। जौन कोऊ घर में तुम ठहरो, उतईं रओ; और उते से आखरी दिना कड़ो। जौन कोऊ तुम हां न अपनाबे ऊ नगर से बायरें कड़त भए अपने गोड़न की धूरा झाड़ दईयो, कि उन पे गवाही होबै। और बे औरें कड़ के गांव गांव भलो सन्देसो सुनात, और हर कऊं मान्सन हां साजो करत भए फिरत रए। देश की चौथाई कौ राजा हेरोदेस जौ सब सुन के घबरा गओ, कायसे बिलात ने कओ, यूहन्ना मरे भयन में से जी उठो आय। और कछु ने जौ कओ, कि एलिय्याह दिखाई दओ आय: और कछु औरन ने ऐसो कओ, कि पुराने आगमवकतन में से कोऊ जी उठो आय। पर हेरोदेस ने कओ, यूहन्ना कौ मूड़ तो मैं ने कटवाओ हतो अब जौ को आय, जी के बारे मैं बातें सुनत आंव? और ऊ ने यीशु हां तकबे की मनसा करी। फिन प्रेरितन ने लौट के जौन कछु उन ने करो हतो, यीशु हां बता दओ, तब बो उन हां अपने संग्गै लेके बैतसैदा नाओं नगर हां ले गओ। पर झुण्ड के मान्सन हां पता पड़ गओ और बे औरें यीशु के पांछू चल पड़े: यीशु बड़ी खुसी से उन से मिलो, और परमेसुर के राज की बातें करन लगो: और रूगिया जौन साजे होबो चाहत हते, उन हां साजो करो। जब संजा होन लगी, तो प्रेरितन ने आके यीशु से कओ, भीड़ हां विदा कर, कि चारऊं कोद के गांव और बसतियन में टिकें, और भोजन कौ जतन करें, कायसे हम इते वीरान जांगा में आंय। यीशु ने उन से कओ, तुमई इन हां खैबे हां देओ, उन ने कओ, हमाए लौ पांच रोटि और दो मछरियां हां छोड़ कछु नईंयां, पर हओ, जदि हम इन सब के लाने खैबे हां मोल लें, तो हो सकत आय: बे औरें पांच हजार मान्सन के लगभग हते। तब ऊ ने अपने चेलन से कओ, उन हां पचास पचास कर के पांत में बैठा दो। उन ने ऊं सई करो, और सब हां बैठा दओ। तब यीशु ने पांच रोटी और दो मछरियां लईं, और सरग कुदाऊं तक के धन्नवाद करो, और तोड़ तोड़ के चेलन हां देत गओ, कि मान्सन हां परोसें। सो सब खाकें अफर गए, और बचे भए टुकड़न से बारह टुकनियां भरी उठाईं। जब यीशु हार में अकेलो बिन्तवाई कर रओ हतो, और ऊके चेला ऊके संग्गै हते, तो ऊ ने उन से पूंछो, मान्स मोय का कैत आंय? उन ने उत्तर दओ, यूहन्ना बपतिस्मा देबेवारो, और कोऊ कोऊ एलिय्याह कै त आंय, और कितेक कैत आंय पेंला के आगमवकतन में से कोई जी उठो आय। पर यीशु ने उन से पूंछो, पर तुम मोय का कैत आव? पतरस ने उत्तर दओ, परमेसुर कौ मसीह। तब यीशु ने उन हां हटक के कओ, जा बात कोऊ से नईं कईयो। फिन यीशु ने कओ, मान्स के पूत के लाने जरूरी आय, कि बिलात पीड़ा झेले, और बूढ़े पुराने धरम महापण्डत, और धरम ज्ञानी ऊ ए ओछो जान के मार डालें, और बो तीसरे दिना जी उठै। यीशु ने सब से कओ, जदि कोऊ मोरे पांछू आबो चाए, तो अपने आप हां नकार देबे और हर दिना अपनो क्रूस उठात भए मोरे पांछू हो लेबे। कायसे जौन कोऊ अपनो प्रान बचाओ चाहे बो ऊहां हिरा दै है, पर जौन कोऊ मोरे लाने अपनो प्रान हिरा है ओई ऊ ए बचा है। जदि मान्स सबरे संसार हां पा लेबे, और अपनो प्रान हिरा देबे, या ऊकौ नुकसान उठाबे, तो ऊए का लाभ हुईये? जौन कोऊ मोसें और मोरी बातन से लजा है; मान्स कौ पूत सोई जब बो अपनी, और अपने बाप की, और पवित्र सरग दूतन की, मईमा संग्गै आ है, तो ऊसे लजा है। मैं तुम सब से कैत आंव, कि जौन इते ठांड़े आंय, उन में से कछु ऐसे आंय, कि जब लौ परमेसुर कौ राज न तक लेबें, उन हां मौत न आ है। इन बातन के कोऊ आठ दिना पछारें, यीशु पतरस और यूहन्ना और याकूब हां संग्गै लेके बिन्तवाई करबे हां पहरवा पे गओ। जब बो बिन्तवाई कर रओ हतो, तो ऊके चेहरे कौ रूप बदल गओ: और ऊकौ उन्ना सफेद होकें चमकन लगो। और हेरो, मूसा और एलिय्याह, जे दो मान्स ऊसे बातें कर रए हते। जे मईमा संग्गै दिखाई दए; और ऊके मरबे की बातें कर रए हते, जौन यरूशलेम में होबेवारो हतो। पतरस और ऊके संग्गी ऊंघत हते, और जब साजी भांत चेत में आए, तो यीशु की मईमा; और उन दो मान्सन हां, जौन ऊके संग्गै ठांड़े हते, तको। जब बे ऊके ऐंगर से जान लगे, तो पतरस ने यीशु से कओ; हे मालक, हमाओ इतै रैबो साजो आय: सो हम तीन कुटियां बनाएं, एक तोरे लाने, एक मूसा के लाने, और एक एलिय्याह के लाने। ऊ न जानत हतो, कि का कै रओ आय। बो जौ कैई रओ हतो, कि एक बादल ने उन हां छा लओ, और जब बे ऊ बादल से घिरन लगे, तो डरा गए। तब ऊ बादल में से जौ बोल कड़ो, कि जौ मोरो पूत और मोरो नबेरो भओ आय, ई की सुनो। जौ बोल होतई यीशु अकेलो पाओ गओ: और बे चिमाने रए, और जौन कछु तको हतो, ऊ की कोऊ बात उन ने कोई से न करी। दूसरे दिना जब बे औरें पहरवा से नेंचें उतरे, तो एक बड़ी भीड़ यीशु से आन मिली। और हेरो, भीड़ में से एक मान्स ने टेर के कओ, हे गुरु, मैं तोसे बिन्तवाई करत आंव, कि मोरे पूत पे दया किरपा कर; कायसे ऊ मोरो इकलौतो आय। और तक, एक दुष्टात्मा ऊहां पकड़त आय, और बो एकाएक चिल्या पड़त आय; और बो ऊहां मड़ोरत आय, और ऊ मों में फसूकर भर लात आय; और ऊ ए कुचल के मुसकल से छोड़त आय। मैं ने तोरे चेलन से बिन्तवाई करी, कि उए काड़ देबें; पर बे न काड़ सके। यीशु ने उत्तर दओ, हे बिसवास न करबेवालो और हठ करबेवालो मान्सन, मैं कब लौ तुमाए संग्गै रै हों, और तुमाई सै हों? अपने मोंड़ा हां इतै ले आ। ऊ आ ई रओ हतो कि दुष्ट आत्मा ने पटको और मड़ोरो, परन्त यीशु ने ऊ अशुद्ध आत्मा हां डपटो और मोंड़ा हां साजो कर के ऊके बाप हां सौंप दओ। तब सबरे मान्स परमेसुर की महान सक्ति से चकित भए। सो जब सबरे मान्स उन सबरे कामन से जौन यीशु करत हतो, चकित हते, तो ऊ ने अपने चेलन से कओ; जे बातें तुमाए कानन में पड़ी रएं, कायसे मान्स कौ पूत मान्सन के हाथ में पकड़वाए जाबे हां आय। पर बे ई बात हां न समजत हते, और बे उन से लुकीं रईं, कि बे ऊ ए जान न पाएं, और बे ई बात के बारे में ऊसे पूछबे हां डरात हते। फिन चेलन में बात बतकाओ होन लगो, कि हम में से बड़ो को आय? पर यीशु ने उन के हियन कौ सोच जान लओ: और एक बच्चा हां अपने ऐंगर ठांड़ो करो। और यीशु ने उन से कओ; जौन कोई मोरे नाओं से ई मोंड़ा हां अपनात आय, बो मोहां अपनात आय; और जौन कोऊ मोय अपनात आय, बो मोरे पठैबेवारे हां अपनात आय, कायसे तुम में से जौन कोऊ हलके से हलको आय, ओई बड़ो आय। तब यूहन्ना ने कओ, हे मालक, हम ने एक मान्स हां तोरे नाओं से दुष्ट आत्माओं हां काड़त भए तको, और हम ने ऊ ए हटको, कायसे बो हमाए संग्गै होकें तोरे पांछू नईं हो लेत। यीशु ने ऊसे कओ, ऊहां न हटको, कायसे जौन तुमाए विरोध में नईंयां, ऊ तुमाई कुदाऊं आय। जब ऊके सरग जाबे के दिना ऐंगर आन लगे, तो उने यरूशलेम जाबे कौ विचार पक्को करो। और ऊ ने अपने आंगू दूत पठैए: बे सामरियन के एक गांव में गए, कि ऊके लाने जांगा तईयार करें। पर उते के मान्सन ने यीशु हां उते ठैरन न दओ, कायसे बो यरूशलेम जा रओ हतो। जौ तक के यीशु के चेला याकूब और यूहन्ना ने कओ; हे पिरभु, का तें चाहत आय, कि हम हुकम करें, कि आकास से आग गिर के उन हां भसम करे। पर यीशु ने उन कुदाऊं अपनो मों कर के उन हां डपटो और कओ, तुम नईं जानत कि तुम कैसी आत्मा के आव। कायसे मान्स कौ पूत मान्सन के प्रानन हां नास करबे हां नईं, पर बचाबे हां आओ आय: और बे कोऊ और नगर में चले गए। जब बे औरें गैल में निंगत जात हते, तो कोऊ ने ऊसे कओ, जिते जिते तें जै है, मैं तोरे पांछू हो लें हों। यीशु ने ऊसे कओ, लोमड़ियन के भट और आकास के पंछियन के बसेरा होत आंय, पर मान्स के पूत हां मूड़ धरबे की भी जांगा नईंयां। यीशु ने दूजे से कओ, मोरे पांछू चलो आ; ऊ ने यीशु से कओ; हे पिरभु, मोय पेंला जान दे कि मैं अपने बाप हां गाड़ आओं। यीशु ने ऊसे कओ, मरे भयन हां अपने मुरदा गाड़न दे, पर तें जाके परमेसुर के राज कौ परचार कर। एक और ने सोई कओ; हे पिरभु, मैं तोरे पांछू हो लें हों; पर पेंला मोय जान दे कि अपने घर के मान्सन से विदा ले आंव। यीशु ने ऊसे कओ; जौन कोई अपनो हाथ हल पे धर के पांछू तकत आय, बो परमेसुर के जोग नईंयां। इन बातन के पाछें पिरभु यीशु ने सत्तर मान्सन हां और नबेरो, और जौन जौन नगर और जांगा हां बो जाबे हां हतो, उते उन हां दो दो कर के अपने आंगू पठैओ। ऊ ने उन से कओ; पक्के खेत बिलात आंय; और मजूर तनक आंय: ई लाने खेत के मालक से बिनती करो, कि बो अपने खेत काटबे हां मजूर पठै देबे। तुम जाओ; तको, मैं तुम हां गाड़रन की घांई भेड़ियन के मजारें पठैत आंव। ई लाने न बटुआ, न खलता, न पनईयां लेओ; और न गैल गोला में कोऊहां परनाम करियो। जौन कोऊ घर में जाओ, पेंला कओ, कि ई घर कौ कल्याण होबै। जदि उते कोऊ कल्याण के जोग हुईये; तो तुमाओ कल्याण ऊ पै ठैर है, नईं तो तुमाए लौ लौट आ है। ओई घर में रओ, और जौन कछु बे औरें तुम हां खाबे हां देबें, ओई खाओ पियो, कायसे मजूर हां मजूरी मिलबो चईये: घर घर न फिरियो। जौन नगर में जाओ, और उते के मान्स तुम हां अपने घर में उतारें, तो जौन कछु तुमाए सामूं धरो जाबै तो ओई खाओ। उते के रूगियन हां साजो करो: और उन से कओ, परमेसुर कौ राज तुमाए ऐंगर आ पोंचो आय। पर जौन नगर में उते के मान्स तुम हां अपने इते न उतारें, तो उन के बाजारों में जाके कओ। तुमाए नगर की धूल भी, जौन हमाए गोड़न में लगी आय, बो तुमाए सामूं झाड़ देत आंय, पर एक बात पक्की जानो, कि परमेसुर कौ राज तुमाए ऐंगर आन पोंचोआय। मैं तुम से कैत आंव, ऊ दिना ऊ नगर की दसा से सदोम की दसा सहबे जोग हुईये। हाय खुराजीन! हाय बैतसैदा! जौन सक्ति बल के काम तुम में करे गए, जदि बे सूर और सैदा में करे जाते, तो टाट ओढ़ के और राख में बिराज के कब कौ हिया फिरा लेते। पर न्याय के दिना तुमाई दसा से सूर और सैदा की दसा सहबे जोग हुईये। और हे कफरनहूम, का तें सरग लौ ऊंचो करो जै है? तें तो अधोलोक तक नेंचें जै है। जौन तुमाई सुनत आय, बो मोरी सुनत आय, और जौन तुम हां ओछो जानत आय, बो मोय ओछो जानत आय; और जौन मोय ओछो जानत आय, बो मोरे पठैबेवाले हां ओछो जानत आय। सो बे सत्तर खुसी मनात भए वापस आए और कैन लगे, हे पिरभु, तोरे नाओं से दुष्ट आत्मा सोई हमाए वस में आंय। यीशु ने उन से कओ; मैं छलिया शैतान हां बिजली के घांई सरग से गिरो भओ तक रओ हतो। हेरो, मैं ने तुम हां सांपों और बिछुअन हां रोंदबे कौ, और बैरी के सबरे बल सक्ति पे तुम हां अधकार दओ आय; और कोई बस्त से तुम हां कछु नुकसान न हुईये। पर ईसे खुस न हुईयो, कि आत्मा तुमाए वस में आय, पर ईसे खुस हुईयो कि तुमाए नाओं सरग में लिखे आंय। ओई बेरा यीशु पवितर आत्मा में होकें खुसी से भर गओ, और कैन लगो; हे बाप, सरग और संसार के पिरभु, मैं तोरो धन्नवाद करत आंव, कि तेंने जे बातें बुद्धिमानों और समजवारन से लुका रखीं, और बच्चन पे उजागर करी आंय, हओ, हे बाप, कायसे तोहां जौई साजो लगो। मोरे बाप ने मोय सब कछु दे दओ आय और कोऊ नईं जानत पूत को आय पर बाप जानत आय और बाप को आय कोऊ नई जानत, बस पूत जानत आय, और बो जीपे पूत ऊहां पांछू उजागर करो चाए। तब चेलन कुदाऊं घूम के सूने में उन से कओ, धन्न आंय बे आंखें, जौन जे बातें तुम हेरत आव, ऊहां हेरती आंय। कायसे मैं तुम से कैत आंव, कि बिलात आगमवकता और राजन ने चाहो, कि जौन बातें तुम तकत आव, तकें; पर न तकीं और जौन बातें तुम सुनत आव सुनें, पर न सुनीं। और तको, एक व्यवस्था पण्डत आओ; और जौ कै के, यीशु हां परखन लगो: कि हे गुरु, बैकुंठ कौ जीवन कौ अधकारी होबे हां मैं का करों? यीशु ने ऊसे पूंछो; कि नैम व्यवस्था में का लिखो आय? तें कैसे बांचत आय? ऊ ने उत्तर दओ, कि तें पिरभु अपने परमेसुर से अपने सबरे हिये और अपने सबरे प्रान और अपनी सबरी बल सक्ति और अपनी सबरी बुद्धि से प्रेम रख; और अपने पड़ोसी से अपने जैसो प्रेम रख। यीशु ने ऊसे कओ, तेंने सई उत्तर दओ, जौई कर: तो तें जीयत रै है। पर ऊ ने अपने आप हां धरमी ठैराबे की मनसा से यीशु से पूंछो, तो मोरो पड़ोसी को आय? यीशु ने उत्तर दओ, कि एक मान्स यरूशलेम से यरीहो जा रओ हतो, डाकुअन ने ऊए घेर के ऊके उन्ना उतार लए, और मार पीट के ऊहां अधमरो छोड़ के चले गए। और ऐसो भओ, कि ओई गैल से एक धरम पण्डत जा रओ हतो: पर ऊहां तक के कतरा के चलो गओ। ऐई भांत एक लेवी ऊ जांगा पे आओ, ऊ सोई ऊहां तक के कतरा के चलो गओ। तब एक सामरी यात्री उते आओ, ऊ यात्री ने ऊ ए तको और ऊ पे तरस खाओ। ऊके ऐंगर पोंच के, ऊ ने ऊके घाव पे तेल और दाखन कौ रस डाल के पट्टी बांधी, और अपनी सवारी पे चढ़ा के ऊहां सराय में ले गओ, और ऊ की सेवा टहल करी। दूसरे दिना दो दीनार काड़ के सराय के मालक हां दए, और कओ; ईकी सेवा टहल करियो, और जौन कछु तोरो और लग है, बो मैं लौटबे पे भर दें हों। अब तोरी समज में जौन डाकुअन से घिर गओ हतो, उन तीनों में से ऊकौ पड़ोसी को ठैरो? ऊ ने कओ, ओई जी ने ऊ पे तरस खाओ: यीशु ने ऊसे कओ, जा, तें सोई ऐसई कर। फिन जब बे चले जात हते, तो बो एक गांव में गओ, और मारथा नाओं एक बईयर ने यीशु हां अपने घर में ठैराओ। और मरियम नाओं की ऊ की एक बहन हती; और बा यीशु के गोड़न के ऐंगर बैठ के ऊकौ बचन सुनत हती। पर मारथा सेवा करत करत घबरा गई और यीशु के ऐंगर आके बोली; हे पिरभु, का तोय कछु परवाह नईंयां कि मोरी बहन ने मोहां सेवा करबे हां अकेलो छोड़ दओ आय? ऊसे कै, कि मोरी मदद करे। पिरभु ने उए उत्तर दओ, मारथा, हे मारथा; तें बिलात बातन के लाने चिन्ता सोस करत आय और घबरात आय। पर एक बात जरूरी आय, और साजे हींसा हां जौन मरियम ने नबेर लओ आय: ऊसे बो छीनो न जै है। फिन यीशु कौनऊं जांगा बिन्तवाई कर रओ हतो: और जब बो बिन्तवाई कर चुको, तो ऊके चेलन में से एक ने ऊसे कओ; हे पिरभु, जैसे यूहन्ना ने अपने चेलन हां बिन्ती करबो सिखाओ आय ऊं सई तें हम हां सोई सिखा दे। यीशु ने उन से कओ; जब तुम बिन्तवाई करो, तो कओ; हे बाप, तोरो नाओं पवित्तर मानो जाबै, तोरो राज आबै। हमाई दिन भर की रोटी हर दिना हम हां दे। और हमाए पापन हां छिमा कर, कायसे हम सोई अपने सब अपराधियन हां छिमा करत आंय, और हम हां परीक्षा में न गिरन दे। और यीशु ने उन से कओ, तुम में से को आय कि ऊकौ एक मित्र होबे, और ऊ आधी रात में ऊके ऐंगर जाके ऊसे कए, हे मित्र, मोय तीन रोटी दे। कायसे एक मित्र यात्रा कर के मोरे ऐंगर आओ आय, और ऊहां खवाबे हां मोरे लौ कछु नईंयां। और ऊ घर के भीतर से उत्तर दे, कि मोय दुख न दे; अब तो किवाड़ बन्द हो गए आंय, और मोरे लरका बच्चा मोरे संग्गै बिछौने पे आंय, ई लाने मैं उठ के तोय नईं दे सकत। मैं तुम से कैत आंव, जदि ऊकौ मित्र होबे पे भी उए उठके न देबे, पर ऊके लज्जा सरम छोड़ के मांगबे के काजें उए जितेक जरूरत होबै उतनी उठ के दै है। और मैं तुम से कैत आंव; कि मांगो, तो तुम हां दओ जै है; ढूढ़ों, तो तुम पा हौ; खटखटाओ, तो तुमाए लाने खोलो जै है। कायसे जौन कोऊ मांगत आय, ऊहां मिलत आय; और जौन ढूंढ़त आय, उए मिलत आय; और जौन खटखटात आय, ऊके लाने खोलो जै है। तुम में से कौन ऐसो बाप हुईये, कि जब ऊकौ मोंड़ा रोटी मांगे, तो ऊ ए पत्थरा देबे: या मछरिया मांगे, तो मछरिया के बदले में ऊए सांप देबे? या अण्डा मांगे, तो ऊहां बिच्छू देबे? सो जब तुम बुरए होकें अपने बाल-बच्चन हां साजी बस्तें देबो जानत आव, तो तुमाओ बाप जौन सरग में आय, अपने मांगबेवारन हां पवित्तर आत्मा काय न दै है। फिन यीशु ने एक गूंगी दुष्ट आत्मा हां काड़ो: जब दुष्ट आत्मा कड़ गई, तो गूंगा बोलन लगो; और मान्सन चकित भए। पर उन में से कछु ने क ओ, जौ तो दुष्ट आत्माओं के परधान की मदद से दुष्ट आत्माओं हां काड़त आय। औरन ने ऊहां परखबे के लाने ऊसे आकास कौ एक चिन्ह मांगो। यीशु उन के सोस बिचार जानत हतो, सो ऊ ने उन से कओ; जौन जौन राज में फूट होत आय, बो राज मिट जात आय: और जौन घर में फूट होत आय, बो नास हो जात आय। और जदि छलिया शैतान अपनो ही बिरोधी हो जाबै, तो ऊकौ राज कौन भांत बनो रै है? कायसे तुम मोरे बारे में तो कैत आव, कि जौ छलिया शैतान की सहायता से दुष्ट आत्मा काड़त आय। भला जदि मैं छलिया शैतान की सहायता से दुष्ट आत्माओं हां काड़त आंव, तो तुमाए लरका बारे कौन की सहायता से काड़त आंय? ई लाने बेई तुमाओ न्याय चुका हैं। पर जदि मैं परमेसुर की सहायता से दुष्ट आत्माओं हां काड़त आंव, तो परमेसुर कौ राज तुमाए ऐंगर आ पोंचो आय। जब एक ताकदवारो मान्स हथयार बाधें भए अपने घर की रखनवारी करत आय, तो ऊकौ मालपानू बचो रैत आय। पर जब ऊसे बढ़ के कोऊ और ताकदवारो ऊहां लड़ के ऊ ए जीत लेत आय, तो ऊके बे हथयार जिन पे ऊ को भरोसा हतो, छीन लेत आय और ऊकौ मालपानू लूट के बितर देत आय। जौन मोरे संग्गै नईं बो मोरे बिरोध में आय और जौन मोरे संग्गै नईं बटोरत बो विथराऊत आय। जब दुष्टात्मा मान्स में से कड़ जात आय तो सूखी जांगा में आराम ढूंढ़त फिरत आय; और जब नईं पात तो कैत आय; कि मैं अपने ओई घर में जां से कड़ी हती लौट जै हों। और आन के उए साफ सुथरो सजो सजाओ पात आय। तब बो जाके अपने से भी बुरई और सात आत्माओं हां अपने संग्गै ले आत आय, और बे ऊ में पिड़ के बस जात आंय, और ऊ मान्स की बाद की दसा पेंला से भी बुरई हो जात आय। जब यीशु जे बातें कैई रओ हतो तो भीड़ में से कोई बईयर ने टेर के कओ, धन्न आय बो गरभ जी में तें रओ; और बो छाती जीसे तोय दूध मिलो। यीशु ने उत्तर दओ, हओ; पर धन्न बे आंय, जौन परमेसुर कौ बचन सुनत और मानत आएं। जब बड़ी भीड़ जुड़त जात हती तो बो कैन लगो; ई जुग के मान्स बुरए आंय; बे चिन्ह खोजत आंय; पर यूनुस के चिन्ह हां छोड़ कोई और चिन्ह उन हां न दओ जै है। जौन भांत यूनुस नीनवे के मान्सन के लाने चिन्ह ठैरो, ओई भांत मान्स कौ पूत सोई ई जुग के मान्सन के लाने ठैर है। दक्खिन की रानी न्याय के दिना इन दिना के मान्सन के विरोध में उठ के, उन हां दोषी ठैरा है, कायसे बा सुलैमान को ज्ञान सुनबे हां धरती के छोर से आई, और तको, इते बो आय जौन सुलैमान से भी बड़ो आय। नीनवे के मान्स न्याय के दिना इन दिना के मान्सन के बिरोध में ठांड़े होकें, उन हां दोषी ठैरा हैं, कायसे उन ने यूनुस को परचार सुन के हिया फेरो और तको, इते बो आय, जौन यूनुस से भी बड़ो आय। कौनऊं मान्स दिया बार के तलघर में, या कौनऊं बासन के नेंचें नईं धरत, पर ऊं चाई पे धरत आय कि भीतर आबे वारन हां उजाला देबे। तोरी देयां कौ दिया तोरी आंख आय, ई लाने जब तोरी आंख साफ आय; तो तोरी सबरी देयां सोई उजरी आय; पर जब बा बुरई आय, तो तोरी देयां सोई अंधियारी आय। ई लाने हुसयार रईयो, जौन उजारो तो में आय बो अंधेरो न हो जाबै। ई लाने जदि तोरी सबरी देयां उजयारी होबे, और ऊकौ कौनऊं हींसा अंधयारो न होबे, तो सबरो कौ सबरो ऐसो उजयारो हुईये, जैसो ऊ बेरा होत आय, जब दिया अपने उजयारे से तोय उजयारो देत आय। जब बो बातें कर रओ हतो, तो कोऊ फरीसी ने ऊसे बिन्ती करी, कि मोरे घरै खाना खा; और बो भीतर जाके खाना खाबे हां बिराज गओ। फरीसी जौ तक के चकित भओ कि यीशु ने खाना खाबे से पेंला नईं सपरो। पिरभु ने ऊसे कओ, हे धरम पण्डतो, तुम बेला और थाली हां ऊपर ऊपर तो मांजत आव, पर तुमाए भीतर अन्धेर और दुष्टता भरी आय। हे मूरखो, जीने बायरें कौ हींसा बनाओ आय, का ऊ ने भीतर कौ हींसा नईं बनाओ? पर जौन कछु भीतर आय ऊए दान कर दो, तो तको, सब कछु तुमाए लाने शुद्ध हो जै है। हे धरम पण्डतो तुम पे हाय! तुम पौदीना और सुदाब, और सब भांत के सागपात कौ दसमों हींसा देत आव, पर न्याय और परमेसुर के प्रेम हां टाल देत आव: चईये तो हतो कि इन हां सोई करत रैते और उन हां सोई न छोड़ते। हे धरम पण्डतो, तुम पे हाय! तुम मन्दर में आंगू की जांगा और बाजारों में आदर और नमस्कार साजे लगत आंय। हाय तुम पे! कायसे तुम उन छुपी भई कबरन घांई आव, जिन पे मान्स चलत तो आंय, पर नईं जानत कां निंग रए आंय। तब एक व्यवस्था पण्डत ने यीशु हां उत्तर दओ, कि हे गुरु, ऐसो कैबे से तें हमाई निन्दा करत आय। ऊ ने कओ; हे व्यवस्था पण्डतो, तुम पे भी हाय! तुम ऐसो बोझ जिन हां उठाबो कठन आय, मान्सन पे लाद देत आव परन्त तुम आपऊ ऊहां अपनी एक उंगरिया से लौ नईं छुअत। हाय तुम पे! तुम उन आगमवकतन की कबरें बनात आव, जिन हां तुमाए पुरखन ने मार डालो हतो। सो तुम गवाय आव, और अपने पुरखन के कामन में सामिल आव; कायसे उन ने तो उन हां मार डालो और तुम उन की कबरें बनात आव। ई लाने परमेसुर की बुद्धि ने सोई कओ आय, कि मैं उन के ऐंगर आगमवकतन और प्रेरितन हां पठै हों: और बे उन में से कितनन हां मार डाल हैं, और कितनन हां सता हैं। जीसे जितेक आगमवकतन कौ रकत संसार के पैदा होबे से बहाओ गओ आय, उन सबरन कौ लेखा ई जुग के मान्सन से लओ जाबे। हाबील की हत्या से लेके जकरयाह की हत्या लौ जौन वेदी और मन्दर के मजारें मार डारो गओ: मैं तुम से सांसी कैत आंव; ऊकौ लेखा ऐई बेरा के मान्सन से लओ जै है। हाय तुम व्यवस्था पण्डतों पे! कि तुम ने समज ज्ञान की कुंजी तो ले लई, पर तुम खुद ऊ में अन्दर न गए, और जाबेवारन हां सोई रोक दओ। जब बो उते से कड़ो, तो शास्त्री और फरीसी कछु पांछू पड़ गए और छेड़न लगे, कि बो बिलात बातें करे। और ऊ की घात में लगे रएं कि ऊ की मों की कोई बात पकड़ें। इतने में जब हजारन की भीड़ लग गई, इते लौ कि बे एक दूसरे पे गिरे पड़त हते, तो यीशु सब से पेंला अपने चेलन से कैन लगो, फरीसियन के खमीर जाने के उन के कपट से होसियार रईयो। कछु ढ़पो नईंयां, जौन खोलो न जै है; और न कछु लुको आय, जौन जानो न जै है। ई लाने जौन कछु तुम ने अंधयारे में कओ आय, बो उजाले में सुनो जै है: और जौन कछु तुम ने कोठरियों में कानों कान कओ आय, बो कोठों में परचार करो जै है। पर मैं तुम से जौन मोरे मित्र आव कैत आंव, जौन देयां हां घात करत आंय पर ऊके पछारें कछु नईं कर सकत, उन से न डरो। मैं तुम हां होसियार करत आंव कि तुम हां की से डरो चईये, घात करबे के पाछें जी हां नरक में डालबे कौ अधकार आय, ओई से डरो: मैं तुम से कैत आंव ओई से डरो। का दो पईसा की पांच गौरईयां नईं बिकत? पर परमेसुर उन में से एकऊ हां नईं बिसरत। तुमाए मूड़ के सबरे बाल सोई गिने भए आंय, सो डरो नईं, तुम बिलात गौरईयन से बढ़ के आव। मैं तुम से कैत आंव जौन कोऊ मान्सन के सामूं मोहां मान लै है, ऊ ए मान्स कौ पूत सोई परमेसुर के सरगदूतन के सामूं मान लै है। पर जौन कोऊ मान्सन के सामूं मोय नकार दै है, परमेसुर के सरगदूतन के सामूं ऊहां नकार दओ जै है। जौन कोऊ मान्स के पूत के बिरोध में कोई बात कै है, ऊकौ पाप छिमा करो जै है, पर जौन कोऊ पवित्तर आत्मा की निन्दा कर है, ऊकौ पाप छिमा न करो जै है। जब मान्स तुम हां सभाओं और हाकमों और अधिकारियन के सामूं ले जाएं, तो सोस न करियो कि हम कौन भांत से या का उत्तर दें, या का कैबें। कायसे पवित्तर आत्मा ओई बेरा तुम हां सिखा दै है, कि का कैबो चईये। फिन भीड़ में से एक ने ऊसे कओ, हे गुरु, मोरे भाई से कै, कि बाप की सम्पत्ति-धन मोय बांट दे। यीशु ने ऊसे कओ; हे मान्स, की ने मोय तुमाओ न्यायी या बटईया ठैराओ आय? और यीशु ने ऊसे कओ, होसयार रओ, और सब भांत के लोभ लालच से अपने हां बचाए रखो: कायसे कोई कौ जीवन ऊ की मालपानू के अधक होबे से नईं होत। यीशु ने उन से एक कनौत कई, कोई धनी के खेतन में बिलात खेती भई। तब बो अपने हिये में सोसन लगो, कि मैं का करों, कायसे मोरे ऐंगर जांगा नईंयां, जिते अपनो पजो भओ नांज हां धरों। और ऊ ने कओ; कि मैं अपने बखरी हां तोड़ के उन से बड़ी बखरी बना हों। और उते अपनी सबरी पज और मालपानू धर हों: और अपने प्रान से कै हों, कि प्रान, तोरे ऐंगर बिलात बरसन के लाने बिलात मालपानू धरो आय; सो चैन कर, खा, पी, सुख से रै। पर परमेसुर ने ऊसे कओ; हे मूरख, ऐई रात तोरो प्रान तो से लै लओ जै है: तब जौन कछु तेंने जोड़ धरो आय, बो की कौ हुईये? ऐसई बो मान्स सोई आय जौन अपने लाने धन बटोरत आय, पर परमेसुर के लेखे में धनी नईंयां। फिन यीशु ने अपने चेलन से कओ; ई लाने मैं तुम से कैत आंव, अपने प्रान की चिन्ता सोस न करो, कि हम का खा हैं; और न अपनी देयां की, कि हम का पैर हैं। कायसे भोजन से प्रान और उन्ना से देयां बढ़ के आय। कउअन पे गौर करो; बे न बोत आंय, न काटत; न उन के बखरी और न खत्ता होत आय; पर परमेसुर उन हां पालत आय; तुमाओ दाम पंछियन से क ऊं बढ़ के आय। तुम में ऐसो को आय, जौन चिन्ता सोस करबे से अपनी आयु में एक घड़ी भी बढ़ा सकत आय? ई लाने जब तुम सब से हलको भी काम नईं कर सकत, तो और बातन के लाने काय चिन्ता सोस करत आव? सोसनों के पेड़ों पे गौर करो कि बे कौन भांत बढ़त आंय; बे न मैनत करत, न कातत आंय; पर मैं तुम से कैत आंव, कि सुलैमान भी, अपने सबरे ठाट बाट में, उन में से कौनऊ एक के बिरोबर उन्ना न पैरें हतो। ई लाने जदि परमेसुर मैदान की घांस हां जौन आज आय, और कल भाड़ में झौंकी जै है, ऐसो पैराऊ त आय; तो हे बिसवास में कम मान्सन, तो बौ तुम हां काय न पहिना है। और तुम ई बात की खोज में न रओ, कि का खै हैं और का पी हैं, और न सक सन्देह करो। कायसे संसार की जातियां इन सब बस्तन की खोज में रैत आंय: और तुमाओ बाप जानत आय, कि जे बस्तें तुम हां चाने आंय। पर ऊके राज की खोज में रओ, तो जे बस्तें सोई तुम हां मिल जै हैं। हे हलके झुण्ड़, न डर; कायसे तुमाए बाप हां जौ साजो लगो आय, कि राज तुम हां दे। अपनो मालपानू बेच के दान में दे देओ; और अपने लाने ऐसे बटुए बना लेओ, जौन पुराने नईं होत, जाने के सरग पे ऐसो धन जोड़ो जौन घटत नईंयां और भड़या ऊके ऐंगर नईं जात, और कीड़ा नईं बिगाड़त। कायसे जिते तुमाओ धन आय, उतईं तुमाओ हिया सोई लगो रै है। तुमाई कमर बन्धी रएं, और तुमाए दिये जलत रएं। और तुम उन मान्सन घाईं बनो, जौन अपने मालक की बाट तक रए होबें, कि बो ब्याओ से कबै लौट है; कि जब बो आन के दोरो खटखटाए, तो तुरतऊं ऊके लाने खोल देओ। धन्न आंय बे चाकर, जिन हां उन कौ मालक आके जागत पाबे; मैं तुम से सांसी कैत आंव, कि बो कमर बान्ध के उन हां भोजन कराबे हां बैठा है, और ऐंगर आन के उन की सेवा कर है। जदि बो रात के दूसरे पहर या तीसरे पहर में आन के उन हां जागत पाबे, तो बे चाकर धन्न आंय। पर तुम जौ जान राखो, कि जदि घर कौ मालक जानत, कि भड़या कौन बेरा आ है, तो जागत रैतो, और अपने घर में सेंध न लगन देतो। तुम सोई तईयार रओ; कायसे जौन बेरा तुम सोचत लौ नईंयां, ओई बेरा मान्स कौ पूत आ जै है। तब पतरस ने कओ, हे पिरभु, का जा कनौत तें हम से या सब से कैत आय? यीशु ने कओ; बो बिसवास जोग और समजवारो भण्डारी को आय, जी कौ मालक ऊहां नौकर, चाकरों पे अधकारी ठैराए कि उन हां खैबे पीबे हां भोजन और सामान ठीक बेरा पे देबे। धन्न आय बो चाकर, जीहां ऊकौ मालक आके एैसई करत पाबै। मैं तुम से सांसी कैत आंव; बो ऊहां अपने सबरे मालपानू पे मुखिया ठैरा है। पर ऊ चाकर जदि जौ सोचन लगै, कि मोरो मालक तो आबे में अबेर कर रओ आय, और नौकरन और नौकरानियन हां मारन-पीटन लगे और खाबे-पीबे और पियक्कड़ होन लगे। तो ऊ चाकर कौ मालक ऐसे दिना जीकी ऊ सोचत लौ न होय, और ऐसी बेरा जिए बो जानत न हो आ है, और कुल्ल दांड़ देकें ऊकौ हींसा बिसवास न करबेवारन के संग्गै ठैरा है। और बो चाकर जौन अपने मालक की मनसा जानत हतो, पर तईयार न रओ और न ऊ की मनसा के अनसार चलो बिलात मार खा है। पर जौन न जानत भए मार खाबे के जोग काम करे बो तनक मार खा है, ई लाने जीहां बिलात दओ गओ आय, ऊसे बिलात मांगो जै है, और जिए बिलात सौंपो गओ आय, ऊसे बिलात मांग है। मैं धरती पे आग लगाबे हां आओ हों; और का चाहत आंव बस जा अबई सुलग जाती! मोय एक बपतिस्मा लेने आय, और जब लौ बो न हो ले तब तक मैं कैसी दुबधा में रै हों? का तुम समजत आव कि मैं धरती पे मेल करवाबे हां आओ हों? मैं तुम से कैत आंव; नईं, पर अलैदा करवाबे हां आओ हों। कायसे अब से एक घर में पांच जनें आपस में बैर धर हैं, तीन दो से और दो तीन से। बाप बेटा से, और बेटा बाप से बैर राख है; मां बेटी से, और बेटी मां से, सास बहू से और बहू सास से बैर राख है। और यीशु ने भीड़ से सोई कओ, जब तुम बादल हां पश्चिम से उठत तकत आव, तो तुरतऊं कैत आव, कि पानू बरस है; और ऐसई होत आय। और जब दक्खिनी बैहर चलत आय, तो कैत आव कै लू चल है, और ऐसई होत आय। हे कपटियो, तुम धरती और आकास के रंग रूप में भेद कर सकत आव, पर ई जुग के बारे में भेद काय नईं करबो जानत? तुम खुद सुलजा काय नईं लेत, कि सई का आय? जब तें अपने मु ई के संग्गै हाकम के ऐंगर जा रओ आय, तो गैल में ऊसे छूटबे कौ जतन कर, ऐसो न हो, कि बो तोहां न्यायधीश के सामूं ले जाबे, और न्यायधीश तोहां सिपाई हां सौंपे और सिपाई तोहां जेहल में डाले। मैं तुम से कैत आंव, कि जब लौ तें एक एक पईसा न भर दै है तब तक उते से छूटने न पा है। ऊ बेरा कछु मान्स आन पोंचे, और यीशु से उन गलीलियन के बारे में बात करन लगे, जिन कौ रकत पीलातुस ने उनईं के बलदानों के संग्गै मिलाओ हतो। जौ सुन के यीशु ने उन से उत्तर में जौ कओ, का तुम समजत आव, कि जे गलीली और सब गलीलियन से पापी हते कि उन पे ऐसी विपत पड़ी। मैं तुम से कैत आंव, कि नईं; पर जदि तुम हिया न फेरो, तो तुम सबरे सोई ऐई भांत से नास हुईयो। या का तुम समजत आव, कि बे अठारह जनें जिन पे शीलोह कौ गुम्मद गिरो, और बे दब के मर गए: यरुशलेम के और सबरे रहबेवारन से अधक पापी हते? मैं तुम से कैत आंव, कि नईं; पर जदि तुम हिया न फेरो तो तुम सोई ऐई भांत नास हुईयो। फिन यीशु ने जा कनौत सोई कई; कोऊ किसान के अंगूर के बगीचा में एक अंजीर कौ पेड़ लगो हतो: बो ऊ में फल ढूढ़बे हां आओ, पर ऊ में न मिलो। तब मालक ने बागीचा के रखनवारे से कओ, हेर मैं तीन बरसन से ई अंजीर के पेड़ में फल ढूढ़बे हां आत आंव, पर नईं पाऊत, ईहां काट डाल किजौ माटी हां काय रोके रए। रखनवारे ने कई, हे मालक, ई बरस तो और रहन दे; कि मैं ईके चारों कोद खोद के खाद डाल हों। जदि आंगू हां फले तो भलो, नईं तो ऊ ए काट डालियो। सब्त के दिना यीशु एक मन्दर में परचार कर रओ हतो। और उते एक बईयर हती, जिए अठारह बरस से एक कमजोर दुर्बल करबेवारी दुष्ट आत्मा लगी हती, और बो कुबड़ी हो गई हती, और कौनऊं भांत सूदी न हो सकत हती। यीशु ने ऊहां तक के बुलाओ, और कओ, हे बईयर, तें अपनी दुर्बलता से छूट गई। तब यीशु ने ऊ पे हाथ धरे, और बा तुरतऊं सूदी हो गई, और परमेसुर कौ जस गान लगी। ई लाने कि यीशु ने सब्त के दिना ऊहां साजो करो हतो, मन्दर कौ परधान रिसिया के कैन लगो और मान्सन से बोलो, छै दिना आंय, जिन में काम करो चईये, सो उनईं दिना में आके साजे होओ; पर सब्त के दिना में नईं। जौ सुन के यीशु ने उत्तर दओ; हे कपटियो, का सब्त के दिना तुम में से हर कोऊ अपने बैल या गधा हां थान से ढ़ील के पानी पिलाबे हां नईं ले जात। तो का जौ सई न हतो, कि जा बईयर जौन इब्राहीम की बेटी आय जीहां छलिया शैतान ने अठारह बरस से बान्ध रखो हतो, सब्त के दिना ई बन्धन से छुड़ाई जाती? जब यीशु ने जे बातें कईं, तो ऊके सबरे बिरोधी लज्जित हो गए, और सबरी भीड़ उन मंईमा के काम से जौन ऊ करत हतो, खुस भई। फिन यीशु ने कओ, परमेसुर कौ राज कौन के घांई आय? और मैं ऊ ए की के समान कहों? बो राई के दाने घांई आय, जिए कोऊ मान्स ने लेके अपने बगीचा में बोओ: और बो बढ़ के पेड़ हो गओ; और आकास के पंछियन ने ऊ की डालियों पे बसेरा करो। यीशु ने फिन कओ; मैं परमेसुर के राज हां कौन के घांई बताओं? बो तो खमीर घांई आय, जीहां कोऊ बईयर ने लेके तीन पसेरी आंटे में मिलाओ, और होत होत सबरो आंटा खमीर हो गओ। और यीशु नगर नगर, और गांव गांव होकें परचार करत भओ यरूशलेम कुदाऊं जा रओ हतो। तो कोऊ ने पिरभु से पूंछो; हे पिरभु, का उद्धार पाबेवारे तनक आंय? यीशु ने उन से कओ; सकरे दोरे से भीतर पिड़बे कौ जतन करो, कायसे मैं तुम से कैत आंव, कि बिलात जनें भीतर पिड़बे की कोसिस कर हैं, और भीतर पिड़ न पा हैं। जब घर कौ मालक उठ के दोरो बन्द कर चुको होय, और तुम बायरें ठांड़े भए दोरो खटखटा के कैन लगो, हे पिरभु, हमाए लाने खोल दे, और बो उत्तर देबे कि मैं तुम हां नईं चीनत, तुम कां के आव? तब तुम कैन लग हौ, कि हम ने तोरे सामूं खाओ पियो, और तेंने हमाए बाजारों में परचार करो। पर बो कै है, मैं तुम से कैत आंव, मैं नईं जानत तुम किते के आव, हे बुरए काम करबेवारो, तुम सब मोय से दूर होओ। उते रोबो और दांत पीसबो हुईये: जब तुम इब्राहीम और इसहाक और याकूब और सबरे आगमवकतन हां परमेसुर के राज में बिराजे, और अपने आप हां बायरें काड़ो भओ तक हौ। और पूरब और पश्चिम; और उत्तर और दक्खिन से मान्स आके परमेसुर के राज के भोज में सामिल हुईयें। और तको, कछु पिछले आंय बे पैले हुईयें, और कछु जौन पैले आंय, बे पिछले हुईयें। तब ओई बेरा कछु धरम पण्डतन ने यीशु लौ आन के कओ, इते से कड़ के चलो जा; कायसे हेरोदेस तोय मार डालबो चाहत आय। यीशु ने उन से कओ; जाके ऊ लोमड़ी से कै दो, कि हेर, मैं आज और कल दुष्टात्माओं हां काड़त और रूगियन हां साजो करत आंव, और तीसरे दिना अपनो काम पूरो कर हों। पर मोय आज और कल और परसों निंगबो जरूरी आय, कायसे हो नईं सकत कि कौनऊं आगमवकता यरूशलेम के बायरें मारो जाबै। हे यरूशलेम! हे यरूशलेम! तें जौन आगमवकतन हां मार डालत आय, और जौन तोरे ऐंगर पठैए गए उन पे पथराव करत आय; कितेक बेर मैं ने चाहो, कि जैसे मुर्गी अपने बच्चन हां अपने पंख के नेंचें इकट्ठो करत आय, ऊं सई मैं तोरे बच्चन हां जोड़ लेओं, पर तुम ने जौ न चाहो। हेरो, तुमाओ घर तुमाए लाने उजाड़ छोड़ो जात आय, और मैं तुम से कैत आंव, जब तग तुम न कै हौ, कि धन्न आय बो, जौन पिरभु के नाओं से आत आय, तब लौ तुम मोय फिन कभऊं न तक हौ। फिन यीशु सब्त के दिना धरम पण्डतन के मुखियन में से कोऊ के घरै रोटी खाबे गओ: और बे औरें ऊ की ताक में हते। और तको, एक मान्स ऊके सामूं हतो, जिए जलन्धर कौ रोग हतो। ई पे यीशु ने व्यवस्था पण्डत और धरम पण्डतन से कओ; का सब्त के दिना साजो करबो सई आय, कि नईं पर बे औरें चिमाने रए। तब यीशु ने ऊहां छूके साजो करो, और जाने दओ। यीशु ने उन से कओ; तुम में से ऐसो को आय, जी कौ गधा या बैल कुंआ में गिर जाबे और बो सब्त के दिना उए तुरतऊं बायरें न काड़े? बे इन बातन कौ कछु उत्तर न दे सके। जब यीशु ने तको, कि बुलाए भए मेहमान कौन भांत आदर मान की जांगा नबेर रए आंय तो उन से एक कनौत में उन से कओ। जब कोऊ तोहां ब्याओ में बुलाए, तो आदर मान की जांगा न बैठिए, कऊं ऐसो न होय, कि ऊ ने तोसे भी कोऊ बड़े हां नेवता दओ होय। और जीने तोय और ऊए दोईयन हां नेवता दओ आय: आके तो से कए, कि ईहां जांगा दे, और जब तोय लज्जित होकें सब से नेंची जांगा में बैठबो पड़े। पर जब तें बुलाओ जाए, तो सब से नेंची जांगा बिराजे, कि जब ऊ, जीने तोहां नेवता दओ आय आबै, और तो से कए कि हे मित्र, आंगू बढ़ के बिराज; तब तोरे संग्गै बिराजबेवारन के सामूं तोरी बड़ाई हुईये। कायसे जौन कोऊ अपने आप हां बड़ो बना है, बो हलको करो जै है; और जौन कोऊ अपने आप हां हलको बना है, बो बड़ो करो जै है। तब यीशु ने अपने नेवता देबेवारे से सोई कओ, जब तें दिन कौ या रात कौ भोज करे, तो अपने मित्र या भाईयन या कुटुम्बी जन हां या धनवान पड़ोसियन हां न बुला, कऊं ऐसो न होय, कि बे सोई तोय नेवता देबें, और तोरो बदला हो जाबे। पर जब तें भोज करे, तो गरीब गुरवन, टुण्डों, लगड़ों और अंधरन हां नेवता में बुला। तब तें धन्न हुईये, कायसे उन लौ तोहां बदला चुकाबे हां कछु नईंयां, पर जब धरमी जी उठ हैं तो तोहां ईकौ बदला मिल है। यीशु के संग्गै भोजन करबेवारन में से एक ने जे बातें सुन के ऊसे कओ, धन्न आय बो, जौन परमेसुर के राज में रोटी खै है। यीशु ने ऊसे कओ; कोऊ मान्स ने बड़ो भोज दओ और बिलात जन हां नेवता दओ। जब भोजन तईयार हो गओ, तो ऊ ने अपने चाकर के हाथ नेवता में बुलाए भए मान्सन हां क हला पठैओ, कि आओ अब भोजन तईयार आय। पर बे सबरे के सबरे बहाना बनान लगे, पैले ने ऊसे कओ, मैं ने खेत मोल खरीदो आय; और जरूरी आय कि ऊ ए तकों: मैं तोसे बिन्ती करत आंव, मोय छिमा करा दे। दूसरे ने कओ, मैं ने पांच जोड़ी बैल मोल लए आंय; और मोय उन हां परखबे जाने आय: मैं तोसे बिन्ती करत आंव, मोय छिमा करा दे। एक और ने कओ; मैं ने ब्याओ करो आय, ई लाने मैं नईं आ सकत। ऊ चाकर ने घर लौट के जे बातें अपने मालक हां कै सुनाईं, तब घर के मालक ने खुन्स में आके अपने चाकर से कओ, नगर के बाजारों और गलियों में जाके फुर्तीं से, कगालों, टुन्डों, लगड़ों, और अंधरन हां इतै ले आ। चाकर ने फिन कओ; हे मालक, जैसो तेंने कओ हतो, ऊंसई करो गाओ आय; पर फिन भी जांगा आय। मालक ने चाकर से कओ, गैल गोला, बस्ती, बाड़ों कुदाऊं मान्सन हां जबरदस्ती खेंच ला, जीसे मोरो घर भर जाबै। कायसे मैं तुम से कैत आंव, कि बे जौन नेवता में बुलाए गए हते, उन में से कौनऊं भोज कौ खाना न चीख है। जब बड़ी भीड़ यीशु के संग्गै जा रई हती, तो ऊ ने पाछूं घूम के उन से कओ। जदि कोऊ मोरे ऐंगर आबे, और अपने बाप और मताई और अपनी ब्यावता और बच्चन और भाईयन और बहनों और अपने प्रान को सोई अप्रिय न जाने, तो बो मोरो चेला नईं हो सकत। और जौन कोई अपनो क्रूस न उठाए, और मोरे पाछूं न आबै; बो सोई मोरो चेला नईं हो सकत। तुम में से को आय जौन गढ़ी बनाबो चाहत होय, और पेंला बैठ के हिसाब न जोड़े, कि गढ़ी बनाबे के लाने मोरे ऐंगर धन आय कि नईंयां? कऊं ऐसो न होबे, कि जब नी तो डार लेबे पर पूरो तईयार न कर सके, तो तकबेवारे जौ कै कें ऊहां हंसी में उड़ान लगें। कि जौ मान्स बनाने तो लगो, पर तईयार न कर सको। या कौन ऐसो राजा आय, कि दूसरे राजा से लड़ाई करबे हां जात होबे, और पेंला बिराज के विचार न कर लेबे कि जौन बीस हजार सिपाई लेके मो पे चढ़ो आत आय, का मैं दस हजार सिपाई लेके ऊकौ सामना कर सकत आंव, कि नईं? नईं तो ऊके दूरई रैत भए, बो दूतन हां पठै के मेल मिलाप करबो चाहै। ऐई भांत से तुम में से जौन कोऊ अपनो सब कछु न त्याग देबे, तो बो मोरो चेला नईं हो सकत। नोंन तो साजो आय, पर जदि नोंन कौ स्वाद बिगड़ जाबै, तो बो कौन बस्त से स्वादवारो करो जै है। बो न तो भूमि के न खाद के लाने काम में आत आय: ऊ ए तो मान्स बायरें मेंक देत आंय: जीके सुनबे के कान होएं बो सुन ले। सबरे चुंगी लेबेवारे और अधरमी यीशु के ऐंगर आत हते कि ऊ की बातें सुनें। और धरम पण्डत और शास्त्र पण्डत कुड़कुड़ा के कै न लगे, कि जौ तो अधरमी मान्सन से मिलत आय और उन के संग्गै खात सोई आय। तब यीशु ने उन से जा कनौत कई। तुम में से कौन ऐसो मान्स आय जी की सौ गाड़रें होबें, और उन में से एक हिरा जाबै; तो निन्नानबे हां हार में छोड़ के, ऊ हिरानी भई हां जब लग मिल न जाबे ऊ ए ढूंढ़त रए? और जब ऊहां मिल जात आय, तब बो बड़ी खुसी से ऊ गाड़र हां कन्धा पे उठा लेत आय। और घर में आके मित्रों और पड़ोसियन हां जोड़ के कैत आय, मोरे संग्गै खुसी मनाओ, कायसे मोरी हिरानी भई गाड़र मिल गई आय। मैं तुम से कैत आंव; ऐई भांत एक हिया फेरबेवारे अधरमी के लाने सोई सरग में इतनी खुसी होत आय, जितनो के निन्नानबे ऐसे धरमियन के लाने नईं होत, जिन हां हिया फेरबे की जरूरत नईंयां। या कौन ऐसी बईयर हुईये, जीके ऐंगर दस सिक्के होबें, और उन में से एक हिरा जाबै; तो बो दिया बार के और घर झाड़ बुहार के जब लौ हिरानो भओ सिक्का मिल न जाबे, ढूंढ़त न रैबे? और जब मिल जात आय, तो बा अपनी सखियों और पड़ोसन हां जोड़ के कैत आय, मोरे संग्गै खुसी मनाओ, कायसे मोरो हिरानो भओ सिक्का मिल गओ आय। मैं तुम से कैत आंव; कि ऐई भांत से एक हिया फेरबेवारे अधरमी के विषय में परमेसुर के सरगदूतन के सामूं खुसी मनाई जात आय। फिन यीशु ने कओ, कोऊ मान्स के दो पूत हते। उन में से हल्के ने अपने बाप से कओ, घर के मालपानू में से जौन मोरो हींसा होय, बो मोहां दे देओ। ऊ ने उन में अपनो मालपानू बांट दओ। बिलात दिना न कड़ पाए हते कि हल्को पूत अपनो सब कछु लेके दूर परदेस हां चलो गओ, और उते बुरए कामन में अपनो मालपानू उड़ा दओ। जब बो सब कछु गंवा चुको, तो ऊ देस में अकाल पड़ो, और ऊ कंगाल हो गओ। और बो ऊ देस के रैबेवारन में से एक के इते जा पोंचो: ऊ ने ऊहां अपने खेतन में सुअर चराबे हां पठैओ। और ऊ चाहत हतो, उन फलियन से जौन सुअर खात हते अपनो भेट भरे; और ऊहां कोई कछु न देत हतो। जब ऊ अपने होस में आओ, तब कैन लगो, मोरे बाप के कितेक मजूरन हां जितनी चाने ऊसे अधक रोटी मिलत आय, और मैं इते भूखो मर रओ आंव। मैं अब उठ के अपने बाप के ऐंगर जै हों और ऊसे कैहों कि मैंने सरग के बिरोध में और तोरे बिरोध में सोई पाप करो आय। अब मैं कोनऊं भांत से तोरो पूत नईं रओ, मोहां अपने एक मजूर की घांई धर ले। तब ऊ उठ के, अपने बाप के ऐंगर जाबे हां चलो: बो अबै दूरई हतो, कि ऊके बाप ने ऊहां तक के तरस खाओ, और दौड़ के ऊहां गले से लगाओ, और कुल्ल बेर चूमो। पूत ने ऊसे कओ, मैं ने सरग के बिरोध में और तोरे तकत पाप करो आय; और अब ई जोग नईं रओ, कि तोरो पूत कहाओं। पर बाप ने अपने चाकरन से कओ; तुरतऊं बढ़िया से बढ़िया उन्ना ऊ ऐ पैराओ, और ऊके हाथ में छल्ला, और गोड़न में पनईंयां पैराओ। और पलो भओ बकरा लाके मारो कि हम खाबें और खुसी मनाबें। कायसे मोरो जौ पूत मर गओ हतो, फिन जी गओ आय: हिरा गओ हतो, अब मिल गओ आय: और बे खुसी मनाऊन लगे। पर ऊकौ जेठो पूत खेत में हतो: और जब आत भओ बो घर के ऐंगर पोंचो, तो ऊ ने गाबे बजावे और नाचबे के बोल सुने। ऊ ने एक चाकर हां बुला के पूंछो; जौ का हो रओ आय? ऊ ने ऊसे कओ, तोरो भईया आओ आय; और तोरे बाप ने घर कौ पलो भओ बकरा कटवाओ आय, ई लाने कि ऊहां भलो साजो पाओ आय। जौ सुन के बो खुन्स से भर गओ, और घर के भीतर न जाबो चाहो: पर ऊकौ बाप बायरें आन के उए मनान लगो। ऊ ने बाप हां उत्तर दओ, कि तक; मैं इतने बरसन से तोरी सेवा कर रओ आंव, और कभऊं तोरो हुकम नईं टालो, तौ भी तेंने मोय एक बकरी को बच्चा लौ न दओ, कि मैं दोस्तन के संग्गै खुसी मनातो। पर जब तोरो जौ पूत, जीने तोरो मालपानू वेश्याओं में उड़ा दओ, आओ आय, तो तेंने ऊके लाने पलो भओ बकरा कटवा दओ। ऊ ने ऊसे कओ; बेटा, तें हमेसा मोरे संग्गै आय; और जौन कछु मोरो आय बो सब तोरो आय। अब खुसी मनाबो और मगन होबो चईये, कायसे जौ तोरो भाई मर गओ हतो फिन जी गओ आय; हिरा गओ हतो, अब मिल गओ आय। फिन यीशु ने चेलन से सोई कओ; कोऊ मालपानू वारे कौ एक भण्डारी हतो, और मान्सन ने ऊके सामूं ऊ पे जौ लांछन लगाओ कि जौ तोरो मालपानू उड़ाए देत आय। धनी ने ऊहां बुला के कओ, जौ काआय जो मैं तोरे बारे में सुन रओ आंव? अपने भण्डारी पन कौ लेखा दे; कायसे तें आंगू भण्डारी न रै है। तब भण्डारी सोचन लगो, अब मैं का करों? कायसे अब मोरो मालक मोसे भण्डारी कौ काम छीन रओ आय: माटी तो मोसे खोदी नईं जात: और भीख मांगबे से मोय सरम आ है। मैं समज गओ, कि का कर हों: जीसे जब मैं भण्डारी के काम से छुड़ाओ जांओं तो मान्स मोय अपने घरों में ले लेबें। तब ऊ ने अपने मालक के दैनदारन हां एक एक कर के बुलाओ और पैले से पूंछो, कि तो पे मोरे मालक कौ कितेक कर्जा आय? ऊ ने कओ, सौ मन तेल; तब भण्डारी ने ऊसे कओ, अपनो खाता बही ले और बैठ के पचास लिख दे। फिन ऊ ने दूसरे से पूछो, तो पे कितेक कर्जा आय? ऊ ने कओ सौ मन गेंहूं; तब ऊ ने ऊसे कओ; अपनो खाता बही ले और अस्सी लिख दे। मालक ने ऊ अधरमी भण्डारी हां सराहो कि ऊ ने चतुराई से काम करो आय; कायसे ई संसार के मान्स अपनी बेरा के मान्सन के संग्गै रीत व्यवहारों में ज्योत के मान्सन से ज्यादा चतुर आंय। और मैं तुम से कैत आंव, कि अधरम के धन से अपने लाने मित्र बना लेओ; जीसे जब ऊ बड़ा जाबै, तो बे तुम हां हमेसा के लाने अपने घरों में अपना लेबें। जौन तनक से तनक में सांचो आय, ऊ बिलात में सोई सांचो आय: और जौन तनक से तनक में अधरमी आय, ऊ बिलात में सोई अधरमी आय। ई लाने कि जब तुम अधरम के धन में सांचे न ठैरे, तो सांसो धन तुम हां को दै है! और जदि तुम पराए धन में सांचे न ठैरे, तो जौन तुमाओ आए, बो तुम हां को दै है? कौनऊं चाकर दो मालकन की सेवा नईं कर सकत: कायसे बो एक से बैर और दूसरे से प्रेम कर है; या एक से मिलो रै है और दूसरे हां ओछो जान है: तुम परमेसुर और धन दोईयन की सेवा नईं कर सकत। धरम पण्डत जौन लोभी हते, यीशु की सबरी बातें सुन के ताने मार के ऊ की हंसी करन लगे। यीशु ने उन से कओ; तुम तो मान्सन के सामूं अपने आप हां धरमी ठैरात आव: पर परमेसुर तुमाए हिया हां जानत आय, कायसे जौन बस्त मान्सन के लेखे जसवारी आय, बो परमेसुर के लेखे ओछी आय। नैम व्यवस्था और आगमवकता यूहन्ना तक रए, ऊ बेरा से परमेसुर के राज कौ भलो सन्देसो सुनाओ जा रओ आय, और हर कोऊ ऊ में जबरदस्ती पिड़त आय। आकास और धरती कौ टल जाबो आसान आय, पर व्यवस्था कौ एक बिन्दु इतनो कठन आय कि बिना पूरो भओ न मिट है। जौन कोऊ अपनी ब्यावता हां छोड़ के दूजी से ब्याओ करत आय, बो पर त्रिया भोग कौ पाप करत आय, और जौन कोऊ ऐसी छोड़ छुट्टीवारी से ब्याओ करत आय, ऊ सोई पर त्रिया भोग कौ पाप करत आय। एक धनी मान्स हतो जौन रेशम और मलमल कौ उन्ना पैरत और रोज सुख विलास और धूम धाम से रैत हतो। और लाजर नाओं कौ एक कंगाल जिए कुल्ल घाव हते धनी के दोरे पे छोड़ दओ जात हतो। और लाजर चाहत हतो, कि धनी की मेज से जौन जूठन गिरे ऊसे ऊकौ पेट भरै; कूकर सोई लाजर लौ आके ऊके घाव चाटत हते। और ऐसो भओ कि बो कंगाल लाजर मर गओ, और सरगदूतन ने ऊहां ले के इब्राहीम की गोदी में पोंचाओ; और बो धनवान सोई मरो; और गाड़ो गओ। और ऊ ने अधोलोक में पीड़ा से तड़फत भए अपनी आंख उठाईं, और दूर से इब्राहीम की गोदी में लाजर हां तको। तब ऊ ने टेर के कओ, हे बाप इब्राहीम, मो पे तरस खाके लाजर हां पठै दे, जीसे ऊ अपनी उंगरिया कौ सिरा पानू में भिंजो के मोरी जीभ हां ठण्डो करे, कायसे मैं ई ज्वाला में तड़प रओ आंव। पर इब्राहीम ने कओ; हे पूत सुमरन कर, कि तें अपने जीयत में साजी बस्तें ले चुको आय, ऊंसई लाजर बुरई बस्तें: पर अब बो इते सान्ति पा रओ आय, और तें तड़प रओ आय। इन सबरी बातन हां छोड़ हमाए और तुमाए मजारें एक भारी गढ्ढा ठैराओ गओ आय, कि जौन इते से ऊ पार तुमाए ऐंगर जाबो चाए, बे न जा सकें, और न कोऊ उते से ई पार हमाए ऐंगर आ सके। ऊ ने कओ; तो हे पिता मैं तोसे बिन्तवाई करत आंव, कि तें ऊहां मोरे बाप के घरै पठै दे। कायसे मोरे पांच भईया आंय, बो इन बातन की गवाई उन के सामूं देबे, ऐसो न होय कि बे सोई ई पीड़ा की जांगा में आएं। इब्राहीम ने ऊसे कओ, उन के ऐंगर तो मूसा और आगमवकतन की पोथियां आंय, बे उन की सुनें। ऊ ने कओ; नईं, हे पिता इब्राहीम; जदि कौनऊं मरे भयन में से जी उठे और उन के ऐंगर जाबे तो बे हिया फेर हैं। इब्राहीम ने ऊसे कओ, कि जब बे मूसा और आगमवकतन की नईं सुनत, तो जदि भरे भयन में से कोऊ जी सोई जाबे तौ भी बे ऊ की न मान हैं। फिन यीशु ने अपने चेलन से कओ; हो नईं सकत कि ठोकरें न लगें, पर हाय, ऊ मान्स पर जीके काजें बे आत आंय! जौन कोऊ हलके में से कोई एक हां ठोकर खिलात आय, ऊके लाने जौ साजो रैतो, कि चकिया कौ पाट ऊ की घींच में बांध के समुन्दर में मेंक दओ जातो। होसयार रओ; जदि तोरो भईया तोरे विरोद में पाप करै तो ऊ ए समजा, और पछताए तो ऊ ए छिमा कर। जदि दिन भरे में बो सात बेर तोरे बिरोध में पाप करे और सातों बेर फिन आ के कैबे, कि मैं पछतात आंव, तो ऊ ए छिमा कर। तब प्रेरितन ने पिरभु से कओ, हमाओ बिसवास बढ़ा। पिरभु ने कओ; जदि तुम हां राई के दाने के बिरोबर बिसवास होतो, तो तुम ई शहतूत के पेड़ से कैते कि जड़ से उखड़ के समुन्दर में लग जा, तो बो तुमाई मान लेतो। पर तुम में से ऐसो को आय, जी कौ चाकर हल जोतत, या गाड़रें चराऊ त होबे, और जब बो खेत से लौटे, तो ऊसे कय तुरतऊं आन के भोजन करबे बिराज। और जौ न कय, कि मोरो भोजन तईयार कर: और जब लग मैं खाओं-पिओं तब लग कमर कस के मोरी सेवा कर; ई के पाछें तें सोई खा पी लईयो। का बो ऊ चाकर कौ अहसान मान है, कि ऊ ने बेई काम करे जिन कौ हुकम करो गओ हतो। ऐई भांत से तुम सोई, जब उन सब कामन हां कर चुको जिन कौ हुकम तुम हां दओ गओ हतो, तो कओ, कि हम निकम्मे चाकर आंय; कि जौन कछु हम हां करबो चईये हतो हम ने बस ओई करो आय। और ऐसो भओ कि यीशु यरूशलेम हां जात भए सामरिया और गलील के मजारें से होकें जा रओ हतो। और कौनऊं गांव में भीतर पिड़त भए यीशु हां दस कोढ़ी मिले। उन ने दूर ठांड़े होकें, जोर से टेर के कओ, हे यीशु, हे मालक, हम पर दया करो। यीशु ने उन हां तक के कओ, जाओ; और अपने आप हां धरम पण्डतन हां दिखाओ; और जाती बेरा बे गैल में सब साजे हो गए। तब उन में से एक जौ तक के कि मैं साजो हो गओ आंव, ऊंचे बोल से परमेसुर कौ जस गात भए लौटो। और यीशु के गोड़न पे मों के बल गिर के, ऊकौ धन्नवाद करन लगो; और बो सामरी हतो। ई पे यीशु ने कओ, का दसों साजे नईं भए तो फिन बे नौ किते आंय? का ई परदेसी हां छोड़ कोई और न कड़ो, जौन परमेसुर कौ जस गातो? तब यीशु ने ऊसे कओ; उठ के चलो जा; तोरे बिसवास ने तोय साजो करो आय। तब फरीसियन ने यीशु से पूंछो, कि परमेसुर कौ राज कबै आ है? तो ऊ ने उन हां उत्तर दओ, कि परमेसुर कौ राज उजागर रूप से नईं आत। और मान्स जौ न कै हैं, कि हेरो, इते आय या उते आय, कायसे हेरो, परमेसुर कौ राज तुमाए मजारें आय। फिन यीशु ने चेलन से कओ; बे दिना आ हैं, जिन में तुम मान्स के पूत के दिना में से एक दिन तकबो चाहौ, और न तक पा हौ। मान्सन तुम से कै हैं, तको, उते आय, या तको इते आय; पर तुम चले न जईयो और न उन के पांछू हो लईयो। कायसे जैसे बिजली आकास के एक छोर से कौंध के आकास के दूसरे छोर लौ चमकत आय, ऊं सई मान्स कौ पूत सोई अपने दिन में आ है। पर पेंला जरूरी आय, कि बो बिलात दुख उठाए, और ई जुग के मान्स ऊए ओछो लेखें। जैसो नूह के दिना में भओ हतो, ऊंसई मान्स के पूत के दिना में सोई हुईये। जौन दिना लौ नूह जहाज में नईं चढ़ो, ऊ दिना लौ मान्स खात पियत हते, और उन में ब्याओ होत हते; तब जल प्रलय ने आन के सब हां नास करो। और जैसो लूत के दिना में भओ हतो, कि मान्स खात-पियत और लेन-देन करत, पेड़ लगात और घर बनात हते। पर जौन दिना लूत सदोम से कड़ो, ऊ दिना आग और गंधक आकास से बरसी और सब हां नास कर दओ। मान्स के पूत के आबे के दिना सोई ऐसई हुईये। ऊ दिना जौन अटारी पे होबे; और उन कौ सामान घर में होबे, बो उए लेबे हां न उतरे, और ऊंसई जौन खेत में होबे बे पांछू न आबें। लूत की घरईया हां सुमरन करो। जौन कोई अपनो प्रान बचाबो चाए बो ऊहां हिरा दै है, और जौन कोई अपनो प्रान हिरा दै है बो ऊहां बचा है। मैं तुम से कैत आंव, ऊ रात दो मान्स एक खाट पर हुईयें, एक ले लओ जै है, दूसरो छोड़ दओ जै है। दो बईयरें एक संग्गै चकिया चलात हुईयें, एक ले लई जै है, और दूसरी छोड़ दई जै है। (दो जनें खेत में हुईयें एक ले लओ जै है और दूसरो छोड़ दओ जै है।) जौ सुन के उन ने यीशु से पूंछो, हे पिरभु जौ किते हुईये? यीशु ने उन से कओ, जां लाश हुईये, उते गिद्ध जुड़ जै हैं। फिन यीशु ने ई के बारे में कि लगातार बिन्तवाई करो और हियाव न छोड़ो चाहिये उन से जा कनौत कई। कोऊ नगर में एक न्यायधीश रैत हतो; जौन न परमेसुर से डरत हतो और न कौनऊ मान्स की परवाय करत हतो। और ओई नगर में एक बिधवा रैत हती: जौन ऊके ऐंगर आ आकें कओ करत हती, कि मोरो न्याव चुका के मोय मु ई से बचा। न्यायधीश ने तो कितने टैम लौ टालमटोल करी पर आखर में हिये में सोस के कैन लगो, जौ सई आय कि न मैं परमेसुर से डरत आंव, और न मानस की कछु परवाय करत आंव। पर जा बिधवा मोय सतात रैत आय, ई लाने मैं ऊकौ न्याव चुका हों कऊं ऐसो न होबे कि बा बेर बेर आके अन्त में मोरी नाक में दम करे। यीशु ने कओ, सुनो, जौ अधर्मी न्यायी का कैत आय? सो का परमेसुर अपने नबेरे भय कौ न्याव न चुका है, जौन रात दिना ऊ की दुहाई देत रैत आंय, और का बो उन के बारे में अबेर कर है? मैं तुम से कैत आंव; बो तुरतईं उन कौ न्याव चुका है; फिन भी जब मान्स कौ पूत आ है, तो का बो धरती में बिसवास पा है? और यीशु ने कितनन हां जौन अपने उपरै भरोसा करत हते, कि हम धर्मी आंय, और औरन हां ओछो जानत हते, जा कनौत कई। दो मान्स मन्दर में बिन्तवाई करबे हां गए; एक फरीसी हतो दूसरो चुंगी लेबेवारो। फरीसी ठांड़ो होकें अपने हिये में जौ बिन्तवाई करन लगो, कि हे परमेसुर मैं तोरो धन्नवाद करत आंव, कि मैं और मान्सन घांई अन्धेर करबेवारो, अन्यायी और परत्रिया भोगी नईंयां, और न ई चुंगी लेबेवारे के घांई आंव। मैं सप्ताह में दो बेर उपास करत आंव; और मैं अपनी सबरी कमाई कौ दसमो हींसा सोई देत आंव। परन्त चुंगी लेबेवारे ने दूर ठांड़े होकें, सरग कुदाऊं आंख उठाओ भी नईं चाही, पर अपनी छाती पीट पीट के कओ; हे परमेसुर मोय पापी पे दया कर। मैं तुम से कैत आंव, कि बो दूसरो नईंया, पर जौई मान्स धरमी ठैराओ जाके अपने घरै गओ; कायसे जौन कोई अपने आप हां बड़ो बना है, बो हलको करो जै है; और जौन कोई अपने आप हां हलको बना है, बो बड़ो करो जै है। फिन मान्स अपने बच्चन हां यीशु के ऐंगर लाऊ न लगे, कि बो उन पे हाथ धरे; पर चेलन ने उन हां तक के डपटो। यीशु ने बच्चन हां अपने ऐंगर बुला के कओ, बच्चन हां मोरे ऐंगर आन देओ, उन हां मना न करौ: कायसे परमेसुर कौ राज ऐसोई कौ आय। मैं तुम से सांची कैत आंव, कि जौन कोई परमेसुर के राज हां बच्चा के घांई न अपना है बो ऊ में कभऊं न पिड़ पा है। कोऊ मुखिया ने यीशु से पूंछो, हे उत्तम गुरु, अनन्त जीवन कौ अधकारी होबे हां मैं का करों। यीशु ने ऊसे कओ; तें मोय उत्तम काय कैत आय? कोई उत्तम नईंयां, बस एक, जाने कै परमेसुर। तें हुकमन हां तो जानत आय, कि परत्रिया भोग न करियो, हत्या न करियो, भड़याई न करियो, झूठी गवाय न दईयो, अपने बाप अपनी मताई कौ आदर करियो। ऊ ने कओ, मैं तो इन सब हां लड़कपन से मानत आओ आंव। जौ सुन, यीशु ने ऊसे कओ, तो में अब भी एक बात की घटी आय, अपनो सब कछु बेंच के गरीब गुरवन हां बांट दे; और तोहां सरग में धन मिल है, और आके मोरे पांछू हो ले। बो जौ सुन के बिलात उदास भओ, कायसे ऊ बिलात धनी हतो। यीशु ने ऊ ए तक के कओ; धनवारन कौ परमेसुर के राज में पिड़ पाबो कितेक कठन आय? परमेसुर के राज में धनवरन कौ पिड़बे से ऊंट कौ सुई के छेदा में से कड़ जाबो आसान बात आय। तब सुनबेवारन ने कओ, तो फिन की कौ उद्धार हो सकत आय? यीशु ने कओ; जौन मान्स से नईं हो सकत, बो परमेसुर से हो सकत आय। पतरस ने कओ; हेर, हम तो घरबार छोड़ के तोरे पांछू हो लएआंय। यीशु ने उन से कओ; मैं तुम से सांसी कैत आंव, कि ऐसो कोऊ नईंयां जीने परमेसुर के राज के लाने घर या अपनी ब्यावता या भाईयों या मताई बाप या लड़का बच्चन हां छोड़ दओ होय। और ई बेरा कैऊ गुना अधक न पाए; और पर लोक में अनन्त जीवन। फिन यीशु ने बारहों हां संग्गै लेके कओ; तको, हम यरूशलेम हां जात आंय, और जितेक बातें मान्स के पूत के लाने आगमवकतन ने लिखी आंय बे सबरी पूरी हुईयें। कायसे ऊ दूसरी जातवारन के हाथ सौंपो जै है, और बे ऊ की हंसी उड़ा हैं; और ऊकौ अपमान कर हैं, और ऊ पे थूंक हैं। और ऊहां कोड़े मार हैं, और ऊहां मार डाल हैं, और बो तीसरे दिना जी उठ है। पर उन ने इन बातन में से एकऊ न समजीं: और जा बात उन से लुकी रई, और जौन कहो गओ हतो बो उन की समज में न आओ। जब बो यरीहो के ऐंगर पोंचो, तो एक अन्धा गैल कगारें बैठो भओ भीख मांग रओ हतो। और बो भीड़ के चलबे की आहट सुन के पूंछन लगो, जौ का हो रओ आय? मान्सन ने ऊए बताओ, कि यीशु नासरी जा रओ आय। तब ऊ ने टेर के कओ, हे यीशु दाऊद के वंस, मो पे दया कर। जौन आंगू जा रए हते, बे ऊहां डपटन लगे, कि चिमानो रै: पर ऊ और टेर के गिगयान लगो, हे यीशु दाऊद के वंस, मो पे दया कर। तब यीशु ने ठांड़े होकें हुकम करो कि ऊ ए मोरे ऐंगर लाओ, और जब बो ऐंगर आओ, तो यीशु ने ऊसे पूंछो। तें का चाहत आय, कि मैं तोरे लाने करों? ऊ ने कओ; हे पिरभु जौ कि मैं तकन लगों। यीशु ने ऊसे कओ; तकन लग, तोरे बिसवास ने तोहां साजो कर दओ आय। तब ऊ तुरतऊं तकन लगो; और परमेसुर कौ जस गाऊत बो यीशु के पांछू हो लओ, और सबरे मान्सन ने परमेसुर की बड़वाई करी। यीशु यरीहो में पिड़ के जा रओ हतो। और तको, जक्कई नाओं एक मान्स हतो जौन चुंगी लेबेवारन कौ सरदार और धनी हतो। बो यीशु हां तकबो चाहत हतो कि बो को आय? बो भीड़ के काजें तक न सकत हतो! कायसे ऊ नाटो हतो। तब ऊहां तकबे के लाने बो आंगू दौड़ के एक गूलर के पेड़ पे चढ़ गओ, कायसे यीशु ओई गैल से जाबेवारो हतो। जब यीशु ऊ जांगा पोंचो, तो ऊहां तक के जक्कई से बोलो; हे जक्कई झट उतर आ; कायसे आज मोय तोरे घर में रैबो जरूरी आय। बो तुरतऊं उतर के खुसी से ऊ ए अपने घरै ले गओ। जौ तक के सबरे मान्स कुड़कुड़ा के कैन लगे, बो तो एक पापी मान्स के घरै जा उतरो आय। जक्कई ने ठांड़े होकें पिरभु यीशु से कओ; हे पिरभु, तक, मैं अपनी आधी सम्पत्ति गरीब गुरवन हां देत आंव, और जदि कोऊ को कछु बेईमानी से लै लओ आय तो ऊ ए चौगुना फेर देत आंव। तब यीशु ने ऊसे कओ; आज ई घर में उद्धार आओ आय, ई लाने कि जौ सोई इब्राहीम कौ एक पूत आय। कायसे मान्स कौ पूत हिराने भयन हां ढूढ़बे और उन कौ उद्धार करबे हां आओ आय। जब बे औरें जे बातें सुन रए हते, तो यीशु ने एक कनौत कई, ई लाने कि बो यरूशलेम के ऐंगर हतो, और बे समजत हते, कि परमेसुर कौ राज अबई उजागर होन चाहत आय। सो ऊ ने कओ, एक धनी मान्स दूर देस हां गओ कि राज पद पाके वापस आबै। सो ऊने अपने दस चाकर बुला के उन हां दस मोहरें दईं, और उन से कओ, मोरे लौट आबे लौ लेन देन करियो। पर ऊके नगर के रैबेवारे ऊसे जलत हते, और ऊके पांछू दूतन के द्वारा कहबे पठैओ, कि हम नईं चाहत, कि जौ हम पे राज करे। जब बो राजपद पा के लौट आओ, तो ऐसो भओ कि ऊ ने अपने चाकरन हां जिन हां रकम दई हती, अपने ऐंगर बुलाओ, कि मालूम करे कि उन ने लेन-देन से का कमाओ। तब पेंले ने आके बताओ, हे मालक तोरी मोहर से मैं ने दस और मोहरें कमाई आंय। मालक ने ऊ चाकर से कओ; धन्न आय हे भौतई साजे चाकर, तें तनक में बिसवासी कड़ो अब दस नगरों पे अधकारी हो जा। दूसरे ने आन के कओ; हे मालक मैं ने तोरी मोहर से पांच और मोहरें कमाई आंय। मालक ने ऊसे सोई कओ, तें सोई पांच नगरों कौ अधकारी हो जा। तीसरे ने आके कओ; हे मालक हेर, तोरी मोहर जे आंय, जिए मैं ने अंगोछा में बान्ध धरो आय। कायसे मैं तोसे डरत हतो, ई लाने कि तें कठोर मान्स आय: जौन तेंने नईं धरो बो तें उठा लेत आय, और जौन तेंने नईं बोओ बो तें काटत आय। मालक ने ऊसे कओ; हे दुष्ट चाकर, मैं तोरे ही मों से तोहां दोषी ठैराऊत आंव: तें मोय जानत हतो कि मैं कठोर मान्स आंव, जौन मैं ने नईं धरो ऊ ए उठा लेत आंव, और जौन मैं ने नईं बोओ, ऊ ए काटत आंव। तो तेंने मोरे रुपईया बैंक में काय नईं धर दए, कि मैं आन के ब्याज समेंत ले लेतो? और जौन मान्स ऐंगर ठांड़े हते, मालक ने उन से कओ, ऊ मोहर ऊसे ले लेओ, और जी लौ दस मोहरें आंय ऊ ए दे दो। (उन ने मालक से कओ; हे मालक, ऊके ऐंगर तो दस मोहरें आंय)। मैं तुम से कैत आंव, कि जीके ऐंगर आय, ऊ ए और दओ जै है; और जीके ऐंगर नईंयां ऊसे ऊ सोई जौन ऊके ऐंगर आय ऊसे ले लओ जै है। पर मोरे उन बैरियन हां जौन न चाहत हते कि मैं उन पे राज करों, उन हां इते लै आके मोरे सामूं घात करो। जे बातें कै कें बो यरूशलेम कुदाऊं उन के आंगू आंगू चलो। जब यीशु जैतून नाओं पहरवा पे बैतफगे और बैतनियाह के ऐंगर पोंचो, तो ऊ ने अपने चेलन में से दो हां जौ कै कें पठैओ, सामूं के गांव में जाओ, ऊ में पोंचतई एक गधी कौ बच्चा जौन पे कभऊ कौनऊं सवार नईं भओ, बन्धो भओ तुम हां मिल है, ऊ ए ढ़ील के ले आओ। जदि कौनऊं तुम से पूंछे, कि काय ढ़ीलत आव, सो जौ कै दईयो, कि पिरभु हां ईकी जरूरत आय। जौन पठैय गए हते, उन ने जाके जैसो यीशु ने उन से कओ हतो, ऊंसई पाओ। जब बे गधे के बच्चा हां ढ़ील रए हते, तो ऊके मालिकन ने उन से पूंछो; ई बच्चे हां काय ढ़ीलत आव? उन ने कओ पिरभु हां ईकी जरूरत आय। बे ऊहां यीशु के ऐंगर ले आए, और अपने उन्ना ऊ बच्चा पर डाल के यीशु हां ऊ पे बैठा दओ। जब बो जा रओ हतो, तो बे अपने उन्ना गैल में बिछात जात हते। और ऐंगर आत भए जब बो जैतून पहरवा की ढलान पे पोंचो, तो चेलन की सबरी भीड़ उन सब आश्चर्य कामों के काजें जौन उन ने तके हते, खुस होकें चिल्या के परमेसुर कौ जस गान लगी। कि धन्न आय बो राजा, जौन पिरभु के नाओं से आत आय; सरग में सान्ति और आकास मण्डल में मईमा होबे। तब भीड़ में से कछु धरम पण्डत यीशु से कैन लगे, हे गुरू अपने चेलन हां डांट। यीशु ने उत्तर दओ, कि मैं तुम से कैत आंव, जदि जे चिमाने रएं, तो पत्थरा चिल्या उठ हैं। जब बो ऐंगर आओ तो नगर हां तक के ऊ पे रोओ। और कओ, का ही भलो होतो, कि तें; हओ, तेंई, ऐई दिना में कुशल की बातें जानतो, पर अब बे तोरी आंखन से लुक गईं आंय। कायसे बे दिना तो पे आ हैं, कि तोरे बैरी मोर्चा डाल के तोहां घेर लें हैं, और चारऊं कोद से तोहां दबा हैं। और तोय और तोरे बच्चन हां जौन तो में आंय, माटी में मिला हैं, और तो में पत्थरा पे पत्थरा लौ न छोड़ हैं; कायसे तेंने ऊ मौका हां जब तो पे दया किरपा करी गई न चीनो। तब यीशु मन्दर में जाके उते से लेन-देन करबेवारन हां बायरें काड़न लगो। और उन से कओ, लिखो आय; मोरो घर बिन्तवाई कौ घर हुईये: पर तुम ने ऊहां डांकुअन की खोह बना दओ आय। और यीशु रोज के रोज मन्दर में उपदेस करत हतो: और धरम महा पण्डत और शास्त्र ज्ञाता और मान्सन के मुखिया ऊहां मार डालबे कौ मौका ढूंढत हते। पर कौनऊं उपाय न खोज सके; कि यीशु हां कौन भांत मार डालें, कायसे सबरे मान्स बड़ी चाह से ऊ की सुनत हते। एक दिना ऐसो भओ कि जब बो मन्दर में उपदेस दे रओ हतो, तो धरम महा पण्डत और शास्त्र ज्ञानी, और बूढ़े पुरानन के संग्गै आके ठांड़े भए। और कैन लगे, कि हम हां बता, तें इन कामन हां कौन अधकार से करत आय, और बो को आय जीने तोहां जौ अधकार दओ आय? यीशु ने उन हां उत्तर दओ, मैं सोई तुम से एक बात पूंछत आंव, मोय बताओ। यूहन्ना कौ बपतिस्मा सरग कुदाऊं से हतो या मान्सन कुदाऊं से हतो? तब बे औरें आपस में कैन लगे, जदि हम कएं सरग कुदाऊं से, तो बो कै है; फिन तुम ने ऊ को बिसवास काय नईं करो? और जदि हम कएं, मान्सन कुदाऊं से, तो सबरे मान्स हम हां पथरा से मार डाल हैं, कायसे सबरे मान्स जानत हते, कि यूहन्ना आगमवकता हतो। सो उन ने उत्तर दआ, हम नईं जानत कि बो कौन कुदाऊं से हतो। यीशु ने उन से कओ, मैं सोई तुम हां नईं बतात, कि मैं जे काम कौन अधकार से करत आंव। तब बो मान्सन से जा कनौत कैन लगो, कोऊ मान्स ने एक दाख कौ बगीचा लगाओ, और किसानन हां ऊकौ ठेका दे दओ और बिलात दिना के लाने परदेस चलो गओ। टैम पे मालक ने किसानन के ऐंगर एक चाकर हां पठैओ, कि दाख के बगीचा कौ कछु फल ऊहां देबें, पर किसानन ने ऊहां मार पीट के छूछे हाथ लौटा दओ। फिन ऊ ने एक और चाकर हां पठैओ, और उन ने ऊ ए सोई पीट के और ऊकौ अपमान कर के छूछे हांथ लौटा दओ। फिन ऊ ने तीसरे चाकर हां पठैओ, और उन ने ऊ ए सोई पीट के निकाल दओ। तब दाख के बगीचा के मालक ने कओ, मैं का करों? मैं अपने प्यारे पूत हां पठै हों का जाने बे ऊकौ मान करें। जब किसानन ने ऊहां तको तो आपस में विचार करन लगे, कि जौ तो वारिस आय; आओ, हम ऊहां मार डालें, कि जा हमाई बपौती हो जाबै। और उन ने ऊहां दाख के बागीचा के बायरें काड़ के मार डालो: ई लाने दाख के बागीचा कौ मालक उन के संग्गै का कर है? बो आके उन किसानन हां नास कर है, और दाख कौ बागीचा और दूसरन हां सौंप है: जा सुन के उन ने कओ, परमेसुर ऐसो न करे। यीशु ने उन कुदाऊं तक के कओ; फिन जौ का लिखो आय, कि जो पथरा हां कारीगरन ने बेकार ठैराओ हतो, ओई कौने कौ मुड़ीसा हो गओ। जौन कोऊ ऊ पत्थर पे गिर है बो चकनाचूर हो जै है, और जी पे ऊ पथरा गिर है, ऊहां पीस डाल है। ओई बेरा शास्त्र पण्डत और धरम महा पण्डतन ने यीशु हां पकड़बो चाहो, कायसे बे समज गए हते, कि ऊ ने हम पे जा कानौत कई आय, पर बे मान्सन से डरे। और बे औरें यीशु की ताक में लगे रए और उन ने कछु भेदिए पठैय, कि धरम कौ भेस धरके ऊ की कोऊ न कोऊ बात पकड़ें, जी से यीशु हां राजपाल हां सौंपे। उन ने यीशु से कओ, हे गुरु, हम जानत आंय कि तें सई सई कैत आय, और सई सई सिखात आय, और कौनऊं की तरफदारी नईं करत; पर परमेसुर की गैल सचाई से बतात आय। अब तें हम हां बता कि का कैसर महाराज हां कर देबो सई आय, कि नईं। यीशु ने उन की चतुराई ताड़ के उन से कओ; एक दीनार मोय दिखाओ। ई पे कौन की मूरत और नाओं आय? उन ने कओ, कैसर कौ। यीशु ने उन से कओ; तो जौन कैसर को आय, बो कैसर हां दो और जौन परमेसुर कौ आय बो परमेसुर हां देओ। बे मान्सन के सामूं यीशु की बात हां न पकड़ सके, और यीशु के उत्तर से चकित होकें चिमाने रै गए। फिन सदूकी जो कैत आंय, कि मरे भयन कौ जी उठबो हैई नईंयां, उन में से कछु यीशु के ऐंगर आए और ऊसे पूंछो। कि हे गुरु, मूसा ने हमाए लाने ऐसो लिखो आय, कि जदि कोऊ कौ भईया अपनी ब्यावता के रैत भए बिना बाल बच्चा मर जाबे, तो ऊकौ भईया अपने भाई की ब्यावता से ब्याओ कर ले, और अपने भईया के लाने वंस पैदा करे। सो सात भईया हते, पैलो भईया ब्याओ कर के बिना बाल बच्चा मर गओ। और फिन दूजे ने और फिन तीजे ने सोई ऊ बईयर हां ब्याह लओ। ऐई भांत सातों बिना बाल बच्चा मर गए। सब के पांछू बा बईयर सोई मर गई। सो जी उठबे पे बा बईयर कौन की घरवाली हुईये, कायसे बा सातों की ब्यावता हो चुकी हती। यीशु ने उन से कओ; ई जुग के बाल बच्चन में शादी ब्याओ होत आय। पर जौन मान्स ई जोग हुईयें, कि ऊ जुग हां और मरे भयन में से जी उठबो पाबें, उन में शादी ब्याओ न हुईये। बे फिन मरबेवारे सोई नईंयां; कायसे बे सरगदूतन घांई हुईयें, और जी उठबे के लरका वाले होकें बे औरें परमेसुर के बाल बच्चा सोई हुईयें। पर जा बात कि मरे भए जी उठत आंय, मूसा ने सोई झाड़ी की घटना में उजागर करी आय, कि बो पिरभु हां इब्राहीम कौ परमेसुर, इसहाक कौ परमेसुर, और याकूब कौ परमेसुर कैत आय। परमेसुर तो मरे भयन कौ नईं पर जीयत कौ परमेसुर आय: कायसे ऊके ऐंगर सबरे जीयत आंय। तब जौ सुन के शास्त्र पण्डतन में से कैऊ एकन ने जौ कओ, कि हे गुरू, तेंने सई कओ। फिन उन हां यीशु से कछु और पूंछबे कौ हियाव न भओ। फिन यीशु ने उन से पूंछो, मसीह हां दाऊद कौ मौड़ा काय कैत आंय? दाऊद खुद भजन की पोथी में कैत आय, पिरभु ने मोरे पिरभु से कओ। मोरे दायने बिराज, जब लग कि मैं तोरे बैरियन हां तोरे गोड़ों के तरें न कर देंओं। दाऊद तो उए पिरभु कैत आय; तो फिन बो ऊकौ मौड़ा कौन भांत ठैरो। जब सबरे मान्स सुन रए हते, तो यीशु ने अपने चेलन से कओ। शास्त्र पण्डतन से होसियार रओ, जौन हां लम्बे चोगा पैर के फिरबो साजो लगत आय, और जौन हां बजारों में नमस्कार और सभाओं में ऊंचो आसन और जेवनारों में खास जांगा साजी लगत आय। जे बिधवाओं के घर हड़प जात आंय, और दिखाबे हां कुल्ल देर लौ बिन्तवाई करत रैत आंय: जे बिकट दण्ड पा हैं। फिन यीशु ने आंख उठा के मालपानू वारन हां अपनो अपनो दान भण्डार में डालत तको। और ऊने एक कंगाल बिधवा हां सोई ऊ में दो पईसा डालत तको। तब ऊ ने कओ; मैं तुम से सांची कैत आंव कि ई कंगाल बिधवा ने सब से बढ़ के डालो आय। कायसे उन सब ने अपनी अपनी बढ़ती में से दान में कछु डालो आय, पर ईने अपनी घटी में से अपनी सारी जीविका डाल दई आय। जब कैऊ मान्स मन्दर के बारे में कै रए हते, कि बो कैसे सुन्दर पथरों और दान की बस्तन से संवारो गओ आय तो यीशु ने कओ। बे दिना आ हैं, जिन में जौ सब जौन तुम तकत आव, उन में से कोऊ पथरा पे पथरा लौ न छूट है, जौन गिराओ न जै है। उन ने यीशु से पूंछो, हे गुरु, जौ सब कब हुईये? और जे बातें जब पूरी होबे पे हुईयें, तो ऊ टैम कौ का चिन्ह हुईये? यीशु ने कओ; होसयार रओ, कऊं धोखा न खा जाओ, कायसे कुल्ल जनें मोरे नाओं से आके कै हैं, कि मैं ओई आंव; और जौ सोई कि टैम ऐंगर आ पोंचो आय: पर तुम उन के पांछू न चले जईयो। और जब तुम लड़ाई और मान्सन की गुण्डा गर्दी के बारे में सुनो, तो घबरा न जईयो; कायसे इन कौ पेंला होबो जरूरी आय; पर ऊ बेरा तुरतऊं अन्त न हुईये। तब यीशु ने उन से कओ, कि जात पे जात और राज पे राज चढ़ाई कर है। और बड़े बड़े भूकम्प हुईयें, और जांगा जांगा काल और महामारी पड़ हैं, और आकास से डराबेवारी बातें और बड़े बड़े चिन्ह उजागर हुईयें। पर इन सबरी बातन से पेंला बे मोरे नाओं के काजें तुम हां पकड़ हैं, और सता हैं, और पंचयातों में सौंप हैं, और जेहल में डलवा हैं, और राजाओं और अधकारियन के सामूं ले जें हैं। पर जौ तुमाए लाने गवाई देबे कौ टैम हो जै है। ई लाने अपने हिये में ठान लेओ कि हम पेंला से उत्तर देबे की चिन्ता न कर हैं। कायसे मैं तुम हां सोच और समज देंहों, कि तुमाए सबरे बिरोधी तुमाओ सामना या वादविवाद न कर सक हैं। तुमाए मताई बाप भईया और नातेदार, और दोस्त सोई तुम हां पकड़वा हैं; इते लौ कि तुम में से केऊअन हां मरवा डाल हैं। और मोरे नाओं के काजें सबरे मान्स तुम से बैर कर हैं। पर तुमाए मूड़ कौ एक बाल तक न गिर है। अपने धीरज से तुम अपने प्राण हां बचाए रख हौ। यीशु ने आंगू कओ, जब तुम यरूशलेम हां सेनाओं से घिरो भओ तको, तो जान लईयो कि ऊकौ मिटबो ऐंगर आय। तब जौन मान्स यहूदा प्रान्त में होबें बे पहरवन पे भाग जाबें, और जौन यरूशलेम के भीतरे होबें बे बायरें कड़ जाबें; और जौन गांव में होबें लौट के शहर बस्ती में न जाबें। कायसे बे दांड़ के दिना ऐसे हुईयें, जिन में धरम पोथी में लिखी भई सबरी बातें पूरी हो जें हैं। उन दिना में जौन गरभवती और जौन दूध पिलाबेवारी हुईयें, उन के लाने हाय, हाय, कायसे देस में बड़ो कहर और इन मान्सन पे बड़ी आपत्ति हुईये। बे तलवार से मारे जें हैं, और सबरे देशन के मान्सन के मजारें दास बनाए जाके पोंचाए जें हैं, और जब लग दूसरी जातवारन की बेरा पूरी न होबे, तब लग यरूशलेम दूसरी जातवारन से रौंदो जै है। और सूरज और चान्द और तारों में चिन्ह दिखाई दें हैं, और धरती पे, देस देस के मान्सन हांसंकट हुईये; कायसे बे समुन्दर के गरजबे और लहरों की तेज आवाज से घबरा जें हैं। और डर के मारे संसार पे आबेवारी घटनाओं की बाट तकत तकत, मान्सन के जी में जी न रै है कायसे आकास की तागतें हलाई जें हैं। तब बे मान्स के पूत हां सामर्थ और बड़ी मईमां के संग्गै बादल पे आत तक हैं। जब जे बातें होन लगें, तो सूदे हो अपने मूड़ ऊपरे करियो; कायसे तुमाओ छुटकारो ऐंगर हुईये। यीशु ने उन से एक कनौत सोई कई, कि अंजीर के पेड़ और दूसरे सबरे पेड़ो हां तको। जैसई उन में कोंपलें कड़त आंय, तो तुम खुद तक के जान लेत आव, कि गरमी कौ मौसम ऐंगर आय। ऐई भांत जब तुम जे बातें होत तको, तो जान लईयो कि परमेसुर कौ राज ऐंगर आय। मैं तुम से सांसी कैत आंव, कि जब लग जे बातें पूरी न हो लें, तब लग ई पीढ़ी कौ कौनऊं भांत अन्त न हुईये। आकास और धरती टल जें हैं, पर मोरी बातें न टल हैं। यीशु ने आंगू कओ, ई लाने होसयार रओ, ऐसो न होबे कि तुमाए हिये उनीदे और मस्ती, और ई जीवन के सोस चिन्ताओं से सुस्त हो जाबें, और बो दिना तुम पे फन्दे के घांई एकाएक आन पड़े। कायसे बो सबरी धरती के सबरे रैबेवारन पे ऐई भांत आ पड़ है। ई लाने जागत रओ और सबरे टैम बिन्तवाई करत रओ कि तुम इन सबरी घटनाओं से बचबे, और मान्स के पूत के सामूं ठांड़े होबे के जोग बन सको। यीशु दिन को मन्दर में परचार करत हते; और रात हां बायरें जैतून नाओं के पहरवा पे रओ करत हते। भुन्सारो होतई सबरे मान्स यीशु की बातें सुनबे के लाने मन्दर में ऊके ऐंगर आ जात हते। अखमीरी रोटी कौ त्योहार, जो फसह कौ त्योहार सोई कहात आय, ऐंगर हतो। धरम महापण्डत और शास्त्री ई बात के मौका में हते कि यीशु हां कौन भांत मार डालें, पर बे मान्सन से डरत हते। छलिया शैतान यहूदा के हिये में समाओ, जौन इस्करियोती कहात हतो और बारह चेलन में गिनो जात हतो। ऊ ने जाके धरम महापण्डतन और पहरेदारों के सरदारों के संग्गै बात चीत करी, कि यीशु हां कौन भांत उन के हाथ पकड़वाए। बे बिलात खुस भए, और उन ने ऊहां रुपईया देबे कौ कौल करो। ऊ ने मान लओ, बो मौका ढूढ़न लगो, कि जब यीशु के ऐंगर भीड़ न होय तब यीशु हां उन के हाथ पकड़वा दे। तब अखमीरी रोटी कौ त्योहार आ गओ, ई त्योहार में फसह कौ मेमना बलि करो जात हतो। यीशु ने पतरस और यूहन्ना हां पठैओ और उन से जौ कओ, जाओ और हमाए ब्यारी के लाने फसह तईयार करो। उन ने यीशु से पूंछो; तें किते चाहत आय, कि हम फसह तईयार करें? यीशु ने उन से कओ; तको, नगर में पिड़तई एक मान्स पानू कौ मटका उठाए भए तुम हां मिल है, जौन घर में ऊ जाबै; तुम ऊके पांछू चले जईयो। और ऊ घर के मालक से कईयो, कि गुरु तोसे कैत आय; कि बो पाहुनशाला किते आय जीमें मैं अपने चेलन के संग्गै फसह खाओं? ऊ तुम हां एक सजी सजाई बड़ी अटारी दिखा दै है; उते फसह की तईयारी करियो। उन ने जाके ऊंसई पाओ, जैसो यीशु ने उन से कओ हतो, और फसह तईयार करो। जब बेरा आ पोंची, तब यीशु चेलन के संग्गै ब्यारी करबे बिराज गओ। यीशु ने उन से कओ; मोरी बड़ी मनसा हती, कि दुख झेलबे के पेंला जौ फसह तुमाए संग्गै खाओं। कायसे मैं तुम से कैत आंव, कि जब तक बो परमेसुर के राज में पूरो न होबै तब तक मैं ऊ ए कभऊं न खा हों। तब यीशु ने कटोरा लेके धन्नवाद करो, और कओ, ईहां लेओ और अपस में बांट लेओ। कायसे मैं तुम से कैत आंव, कि जब तक परमेसुर को राज न आबै, तब तक मैं दाख कौ रस अब से कभऊं न पी हों। फिन यीशु ने रोटी लई, और धन्नवाद कर के तोड़ी, और ऊ ने अपने चेलन हां दई और उन से कओ, जा मोरी देयां आय, जौन तुमाए लाने दई जात आय: मोरे सुमरन के लाने जौई करे करो। ऐई भांत से यीशु ने ब्यारी के पाछें कटोरा सोई दओ, और उन से कओ जौ कटोरा मोरे ऊ रकत में जौन तुमाए लाने बहाओ जात आय नओ कौल आय। पर तको, मोरे पकड़वाबेवारे कौ हाथ मोरे संग्गै मेज पे आय। कायसे मान्स कौ पूत तो जैसो ऊके लाने ठैराओ गओ हतो, पर हाय ऊ मान्स पे, जीके द्वारा बो पकड़वाओ जा रओ आय। तब चेले आपस में पूछतांछ करन लगे, कि हम में से को आय, जौन जौ काम कर है? उन में जौ बतकाओ सोई भओ; कि हम में से कौन चेला सब से बड़ो समजो जात आय? यीशु ने उन से कओ, दूसरी जातवारन के राजा उन पे अधकार रखत आंय; और जौन उन पे अधकार रखत आंय, बे भलाई करबेवारे कहात आंय। पर तुम ऐसे न हुईयो, पर जौन तुम में बड़ो आय, बो हलके घांई और जौन परधान आंय, बो चाकर घांई बनें। कायसे बड़ो को आय; बो जौन भोजन करबे बिराजो आय या बो जौन भोजन परोसबे की सेवा करत आय? का बो नईं जौन भोजन करबे बिराजो आय? पर मैं तुमाए मजारें चाकर घांई आंव। पर तुम बो आव, जौन मोरी परीक्षाओं में हमेसा मोरे संग्गै रए। और जैसे मोरे बाप ने मोरे लाने एक राज ठैराओ आय। ऊं सई मैं सोई तुमाए लाने ठैरात आंव, जीसे तुम मोरे राज में मोरी मेज पे खाओ - पियो; और सिहासनों पे बिराज के इस्राएल के बारह कुलों कौ न्याय करो। यीशु ने आंगू कओ, शिमौन, हे शिमौन, तक, छलिया शैतान ने तुम औरन हां मांग लओ आय कि बो गोंऊं के घांई तुम हां फटके। पर मैं ने तोरे लाने बिन्तवाई करी, कि तोरो बिसवास जात न रैबे: और जब तें फिरे तब अपने भईयन हां पक्को करिए। शिमौन ने यीशु से कओ; हे पिरभु, मैं तोरे संग्गै जेहल जाबे, पर मरबे हां सोई तईयार आंव। यीशु ने कओ; पतरस मैं तोसे कैत आंव, कि आज मुर्गा के बांग देबे के पेंला तें तीन बेर, ई बात से मेंट जै है कि तें मोय जानत आय। तब यीशु ने उन से पूंछो, जब मैं ने तुम हां बटुआ, झोली और जूता के बगैर पठैओ हतो, तब का तुम हां कोऊ बस्त की कमी भई हती? उन ने कओ; कौनऊ बस्त की कमी न भई हती। यीशु ने उन से कओ, पर अब जी लौ बटुआ होय बो बटुआ ले, और ऊंसई झोली सोई, जी लौ तलवार न होय बो अपने उन्ना बेंच के एक तलवार मोल ले। कायसे मैं तुम से कैत आंव, कि धरम पोथी में जौन लिखो आय, कि बो अपराधियन के संग्गै लेखो गओ, ऊकौ मो में पूरो होबो जरूरी आय; कायसे मोरे बारे में धरम पोथी में लिखी भई बातें पूरी होबे हां आंय। उन ने कओ; हे पिरभु, तक, इते दो तलवार आंय: यीशु ने उन से कओ; कुल्ल आंय। तब यीशु घर से बायरें कड़े और अपनी रीत अनसार जैतून के पहरवा पे गए, और चेले पिरभु के पांछू हो लए। ऊ जांगा पोंच के यीशु ने उन से कओ; बिन्तवाई करो, कि तुम परीक्षा में न पड़ो। और बो खुद उन से कछु दूरी पे गओ, और घुटने टेक के बिन्तवाई करन लगो। हे पिता जदि तें चाए तो जौ कटोरा मोरे ऐंगर से अलैदा कर ले, पर मोरी मनसा नईं पर तोरी मनसा पूरी होबे। तब सरग से एक दूत यीशु हां दिखाई दओ जौन ऊहां शक्ति बल देत हतो। और यीशु भारी संकट में व्याकुल होकें औरऊ हिये की गैराई से बिन्तवाई करन लगो; ऊकौ पसीना मानो रकत की बड़ी बड़ी बूंदन घांई धरती पे गिर रओ हतो। तब यीशु बिन्तवाई से उठो और अपने चेलन के ऐंगर आके उन हां उदासी के काजें सोऊत पाओ; और उन से कओ, काय सोत आव? उठो, बिन्तवाई करो, कि परीक्षा में न पड़ो। यीशु जौ कैई रओ हतो, कि तको एक भीड़ आई, और उन बारहों में से एक जी कौ नाओं यहूदा हतो उन के आंगू आंगू आ रओ हतो, बो यीशु के ऐंगर आओ, कि ऊकौ चूमा ले। यीशु ने ऊसे कओ, हे यहूदा, का तें चूमा ले के मान्स के पूत हां पकड़वात आय? यीशु के संगियन ने जब तको कि का होबेवारो आय, तो कओ; हे पिरभु, का हम तलवार चलाएं? और उन में से एक ने तलवार चला के धरम महापण्डत के चाकर कौ दाहनो कान उड़ा दओ। ई पे यीशु ने कओ; अब बस करो: और ऊकौ कान छूके ऊए साजो कर दओ। तब यीशु ने महापण्डतन; और मन्दर के चौकीदारों के सरदारों और बड़े पुरनियन से, जौन ऊ पे चढ़ आए हते, कओ; का तुम मोय डाकू जान के तलवारें और लाठियां लए भए कड़े आव? जब मैं मन्दर में हर दिना तुमाए संग्गै हतो, तो तुम ने मो पे हाथ न डालो; पर जा तुमाई बेरा आय, और अंधयारे को अधकार आय। फिन बे यीशु हां पकड़ के ले चले, और महापण्डत के घर में लाए, और पतरस दूर ही दूर ऊके पांछू पांछू निंगत हतो। और जब बे आंगन में आगी सुलगा के इकट्ठे बैठे हते, तो पतरस सोई उन के मजारें बैठ गओ। और एक चाकरनी ने ऊ ए आगी के उजाले में बैठो तक के और ऊ कुदाऊं तक के कैन लगी, जौ तो सोई ऊके संग्गै हतो। पर पतरस ने जौ कै कें मैट दओ, कि हे बईयर, मैं ऊहां नईं जानत। तनक बेरा पांछू कोऊ और ने पतरस हां तक के कओ, तें सोई उनईं में से आय: पतरस ने कओ; हे मान्स मैं नईं आंव। कोऊ घण्टा भर के पांछे एक और मान्स जोर देके कैन लगो; जौ पक्को आय कि जौ सोई ऊके संग्गै हतो; कायसे जौ गलील कौ रैबेवारो आय। पतरस ने कओ, हे मान्स, मैं नईं जानत कि तें का कैत आय? बो कैई रओ हतो कि तुरतंई मुर्गा ने बांग दई। तब यीशु ने घूम के पतरस कुदाऊं तको, और पतरस हां यीशु की बा बात याद आई जौन ऊ ने कई हती, कि आज मुर्गा के बांग देबे के पेंला, तें तीन बेर मोहां मैट दै है। और पतरस बायरें कड़ के फूट-फूट के रोन लगो। जौन मान्स यीशु हां पकड़ें हते, बे ऊ की हंसी उड़ा के ऊहां मारन पीटन लगे। और ऊ की आंखें मूंद के ऊसे पूंछो, आगमवानी कर के बता कि तोय की ने मारो? और उन ने कुल्ल निंदरबे की बातें ऊके बिरोध में कईं। जब दिन भओ तो मान्सन के बड़े बूढ़े और महापण्डत और शास्त्रज्ञानी जुड़े, और यीशु हां अपनी महापंचयात में लाके पूंछो। जदि तें मसीह आय, तो हम से कै दे! यीशु ने उन से कओ, जदि मैं तुम से कहों, तो बिसवास न कर हौ। और जदि पूछूं, तो उत्तर न दै हौ। पर अब से मान्स कौ पूत महाबली परमेसुर की दायनी कोद बिराजो रै है। ई पे सब ने कओ, तो का तें परमेसुर कौ पूत आय? यीशु ने उन से कओ; तुम खुद कैत आव, कायसे मैं आंव। तब उन ने कओ; अब हम हां गवाय की का जरूरत आय; कायसे हम ने खुद ऊके मों से सुन लओ आय। तब सबरी सभा उठ के यीशु हां पीलातुस के ऐंगर ले गई। उते बे औरें जौ कै कें यीशु पे लांछन लगान लगे, कि हम ने ईहां मान्सन हां बरगलात और कैसर महाराज हां कर देबे हां मना करत, और अपने आप हां मसीह राजा कैत भए सुनो आय। पीलातुस ने यीशु से पूंछो, का तें यहूदियन कौ राजा आय? यीशु ने ऊहां उत्तर दओ, कि तें खुद कै रओ आय। तब पीलातुस ने महायाजकन और मान्सन से कओ, मैं ई मान्स में कछु दोष नईं पात आंव। पर बे औरें और जोर लगा के कैन लगे, ईने गलील प्रदेश से लेके इते लौ सबरे यहूदा प्रदेश में परचार कर कर के मान्सन हां भड़का दओ आय। जौ सुन के पीलातुस ने पूंछो, का जौ मान्स गलील कौ रैबेवारो आय? जब पीलातुस हां मालूम पड़ो कि यीशु हेरोदेस राजा की रियासत कौ आय, तो ऊने यीशु हां हेरोदेस के ऐंगर पठै दओ, कायसे उन दिना हेरोदेस सोई यरूशलेम में हतो। राजा हेरोदेस यीशु हां तक के भारी खुस भओ, कायसे बो बिलात दिना से यीशु हां तकबो चाहत हतो: ऊ ने यीशु के बारे में सुनो हतो, और बो यीशु के द्वारा कोऊ आश्चर्य कर्म तकबे की आसा करत हतो। राजा हेरोदेस, यीशु से कुल्ल बातें पूंछत रओ, पर यीशु ने ऊहां कछु उत्तर न दओ। और महायाजक और शास्त्रज्ञानी उते ठांड़े हते और यीशु पर तन मन से लांछन लगात रए। तब हेरोदेस राजा और ऊके सिपाईयन ने यीशु कौ अपमान करो और ऊ की खिल्ली उड़ाई, हेरोदेस राजा ने यीशु हां राजसी चमकीलो उन्ना पैरा के पीलातुस के ऐंगर वापस पठै दओ। ओई दिना से पीलातुस और हेरोदेस दोस्त बन गए। ई के पेंला बे एक दूजे के बैरी हते। पीतालुस ने महायाजकन, अधकारियन और मान्सन हां बुला के कओ। तुम ई मान्स हां मोरे ऐंगर जौ लांछन लगा के लाए आव कि जौ मान्सन हां विद्रोह के लाने भड़कात आय, और तको, मैं ने तुम सब के सामूं ऊ की जांच परख करी आय, पर जिन बातन कौ ईपे लांछन लगात आव, उन बातन के बारे में मैं ने ईमें कछु दोष नईं पाओ आय। और न राजा हेरोदेस ने, कायसे ऊ ने सोई यीशु हां मोरे ऐंगर वापस पठै दओ आय: और तको, ईने ऐसो कछु नईं करो कि मार डालबे जोग ठैराओ जाबे। ई लाने मैं ऊहां चाबुक से पिटवा के छोड़ दे रओ आंव। (त्योहार के टैम पे बो उन के लाने एक कैदी हां, छोड़ दओ करत हतो)। तब सबरे मिल के चिल्या उठे, ईहां मारे जाबे कौ हुकम कर, और हमाए लाने बरअब्बा हां छोड़ दे। बरअब्बा कौनऊ हुड़दंग के काजें जौन नगर में भओ हतो, और हत्या के अपराध के काजें जेहल में डालो गओ हतो। पर पीलातुस ने यीशु हां छोड़ देबे की मनसा से मान्सन हां फिन समझाओ। पर उन ने चिल्या के कओ; कि ईहां क्रूस पे टांग दे, ईहां क्रूस पे टांग दे। पीलातुस ने तीसरी बेर उन से कओ; काय ईने का अपराध करो आय? मैं ने ईकी जांच में ईहां मार डालबे जोग कोई लांछन नईं पाओ! ई लाने मैं ईहां चाबुक से पिटवा के छोड़ दें हों। पर बे चिल्या के पीलातुस के पांछू पड़ गए, कि यीशु हां क्रूस पे टांग दओ जाए, और उन कौ चिल्याबो काम कौ रओ। तब पीलातुस ने हुकम करो, कि मान्सन की मांग के अनसार करो जाबे। पीलातुस ने ऊ मान्स हां जौन हुड़दंग और हत्या के काजें जेहल में डालो गओ हतो, और जिए बे चाहत हते, छोड़ दओ; और मान्सन की मनसा अनसार क्रूस पर टांगे जाबे के लाने यीशु हां सौंप दओ। जब सिपाई यीशु हां ले जा रए हते, तब उन ने गैल में शिमौन नाओं के कुरेनी हां पकड़ो जौन गांव से आ रओ हतो, उन ने ऊ पै क्रूस लाद दओ कि बो उठा के यीशु के पांछू पांछू ले चले। मान्सन कि भारी भीड़ यीशु के पांछू पांछू आ रई हती: भीड़ में कुल्ल बईयरें सोई हतीं, जौन यीशु के लाने छाती-पीटत और विलाप कर रई हतीं। यीशु ने उन कुदाऊं मुड़ के कओ; हे यरूशलेम की बेटियो, मोरे लाने न रोओ; पर अपने और अपने बच्चन के लाने रोओ। कायसे तको, बे दिना आ रए आंय, जब मान्स कै हैं, धन्न आंय बे बईयरें जौन बांझ आय, धन्न आंय बो गरभ जिन ने बच्चन हां जन्म नईं दओ और धन्न आंय बे स्तन जिन ने दूध नईं पिलाओ। ऊ बेरा बे पहारन से कै हैं, कि हम पे गिरो, और टीलों से कि हम हां ढ़ांप लेओ। कायसे जब बे हरे पेड़ से ऐसो व्यवहार करत आंय, तो ऊके सूखबे पे ऊके संग्गै का कछु न कर हैं? बे और दो मान्सन हां सोई जौन कुकर्मी हते यीशु के संग्गै मार डालबे हां ले गए। जब बे ऊ जांगा जीहां खोपड़ी कैत आंय पोंचे, तब उन ने उते यीशु हां और उन कुकर्मियन हां क्रूस पे यीशु की दायनी कोद और दूसरे हां बाईं कोद टांग दओ। तब यीशु ने कओ; हे पिता, इन हां छिमा कर, कायसे जे नईं जानत कि का कर रए आंय? और उन ने चिठिंया डाल के यीशु के कपड़ा आपस में बांट लए। मान्स ठांड़े ठांड़े जौ तक रए हते, पंचयात के अधकारी यीशु की खिल्ली उड़ा रए हते, सबरे कै रए हते, ईने दूसरन हां तो बचाओ, जदि जौ परमेसुर कौ मसीह आय, और ऊ को नबेरो भओ आय, तो अपने आप हां बचा ले। सिपाई सोई यीशु के क्रूस के ऐंगर आए और ऊ की ठिठोली करी और उन ने यीशु हां सिरका देके कओ। जदि तें यहूदियन कौ राजा आय, तो अपने आप हां बचा। यीशु के क्रूस पे एक सूचना पट्टी टंगी हती, कि जौ यहूदियन कौ राजा आय। जौन दो कुकर्मी क्रूस पे टांगे गए हते, उन में से एक ने यीशु हां निंदर के कओ; का तें मसीह नईंयां? तो फिन अपने हां और हम हां बचा। पर दूसरे ने ऊहां डांट के कओ, का तें परमेसुर से सोई नईं डरात? तें सोई ओई सजा पा रओ आय। हम तो करे की सई सजा पा रए आंय, कायसे हम अपने कामन कौ सई फल पा रए आंय; पर ईने कोऊ बुरओ काम नईं करो। तब ऊ ने यीशु से कओ; हे यीशु, जब तें अपने राज में आए, तो मोरी सुध लईयो। यीशु ने ऊसे कओ, मैं तोसे सांसी कैत आंव; आजई तें मोरे संग्गै सरग लोक में हुईये। लगभग दोपहर से तीसरे पहर लौ सबरे देस में अंधयारा छाओ रओ। सूरज कौ उजारो जात रओ, और मन्दर कौ परदा मजारें से फट गओ। यीशु ने जोर से टेर के कओ; हे पिता, मैं अपनी आत्मा तोरे हाथ में सौंपत आंव: और जौ कै कें प्रान छोड़ दओ। सेना के अधकारी ने, जौन कछु भओ हतो तक के, परमेसुर हां धन्न कओ, और ऊ ने कओ; सांचई में जौ मान्स धरमी हतो। और मान्स जौन जौ सब तकबे हां जुड़े हते, ई घटना हां तक के छाती पीटत भई लौट गई। पर यीशु की जान पैचान के मान्स, और बईयरें जौन गलील प्रदेश से यीशु के संग्गै आई हतीं, दूर ठांड़े होकें जौ सब तक रई हतीं। धरम पंचयात कौ एक पंच हतो ऊ को नाओं यूसुफ हतो, ऊ साजो और धरमी मान्स हतो। बो यहूदियन के सोस विचार और उन के ई काम से खुस न हतो; बो यहूदिया प्रदेश के अरिमतीया नगर कौ रैबेवारो और परमेसुर के राज की बाट तक रओ हतो। बो पीलातुस के ऐंगर गओ और यीशु की लाश मांगी। ऊ ने क्रूस पे से यीशु की लाश उतारी और ऊ ए चदरा में लपेड़ो, और ऊ ने ऊहां एक कबर में धरो, जौन चट्टान में खोदी गई हती; ऊ में कभऊं कौनऊ लाश न धरी गई हती। बो सबत के दिना की तईयारी कौ दिना हतो, और सबत कौ दिना शुरु होबेवारो हतो। और जौन बईयरन यीशु के संग्गै गलील प्रदेश से आईं हतीं, बे यूसुफ के पांछू पांछू गईं और उन ने ऊ कबर हां तको, और उन ने जौ सोई तको कि लाश कौन भांत धरी गई आय। बे औरें घरै वापस लौटीं और उन ने खुशबू और इतर दार मसाला मलबे हां तईयार करो: और धरम व्यवस्था के अनसार उन ने सबत के दिना आराम करो। सप्ताह के पैले दिना बड़े भुन्सारे बे उन खुशबूदार बस्तन हां जौन उन ने तईयार करी हतीं लेके कबर पे आईं। उन ने पत्थर हां कबर पे से लुड़को भओ पाओ। बे कबर के भीतरे गईं पर उन ने पिरभु यीशु की लाश न पाई। जब बे ई बात से भौचक्की हो रईं हतीं तो तको, दो मान्स चमकीले उन्ना पैरें भए उन के ऐंगर आन के ठांड़े हो गए। जब बे डरा गईं, और धरती कुदाऊं मों करें ठांड़ी रईं; तब उन ने उन से कओ; तुम जीयत हां मरे भयन में काय ढूंढ़ रई आव? बो इते नईंया, पर जी उठो आय; सुमरन करो; ऊ ने गलील में रैत भए तुम से कओ हतो। जरूरी आय, कि मान्स कौ पूत, पापियन के हाथ में पकड़वाओ जाए, और क्रूस पे टांगो जाए; और तीसरे दिना मरे भयन में से जी उठे। तब यीशु की बातें उन हां याद आईं। और कबर से लौट के उन ने उन ग्यारहों को, और, और सबरन हां, जे सबरी बातें कै सुनाईं। जिन ने चेलन हां जे बातें कईं, बे मरियम मगदलीनी और योअन्ना और याकूब की मताई मरियम और उन के संग की और बईयरें हतीं। पर उन की बातें उन हां कहानी सी जान पड़ी, और उन ने उन के कैबे कौ बिसवास नईं करो। तब पतरस उठ के कबर लौ दौड़ो गओ, और झुक के बस उन्ना पड़े तके, और जौन भओ हतो, ऊसे चकित होकें अपने घरै चलो गओ। तको, ओई दिना उन में से दो जन इम्माऊ स नाओं एक गांव हां जा रए हते, जौन यरूशलेम से सात मील की दूरी पे हतो। और बे इन सबरी बातन पे जौन घटी हतीं, आपस में बातचीत करत जात हते। और जब बे आपस में बातचीत और पूंछतांछ कर रए हते, तो यीशु खुद ऐंगर आन के उन के संग्गै हो लओ। पर उन चेलन की मति ऐसी मारी गई हती, कि बे औरें यीशु हां चीन न सके। यीशु ने उन से पूंछो; तुम कौन सी बातन के बारे में निंगत भए आपस में बात कर रए आव? तो बे उदास से ठांड़े रै गए। जब उन ने जौ सुनो, तो उन में से एक कौ नाओं क्लियुपास हतो ऊने कओ; का तें यरूशलेम में अकेलो परदेसी आय; जौन नईं जानत, बीते दिना में यरूशलेम में का भओ आय? यीशु ने उन से पूंछो; कौन सीं बातें? उन ने यीशु से कओ; यीशु नासरी के बारे में जो परमेसुर और सबरे मान्सन के लेखे में काम और बचन में सामर्थी आगमवकता हतो। और महायाजकन और हमाए अधकारियन ने यीशु हां पकड़वा दओ, कि उन हां मार डालबे की सजा दई जाबे; और उन ने यीशु हां क्रूस पे टांग दओ। पर हम हां आसा हती, कि जौई इस्राएल कौ उद्धार कर है, इन सबरी बातन के अलावा ई घटना हां घटे भए तीसरो दिना आय। हम में से कछु बईयरों ने भी हम हां आश्चर्य में डाल दओ आय, बे भुनसारे कबर पे गईं हतीं। पर उन हां जब यीशु की लाश नईं मिली, तो उन ने वापस आन के बताओ कि उन ने सरगदूतन कौ दर्शन पाओ आय, सरगदूतन ने उन से कओ कि यीशु जीयत आय। तब हमाए कछु संग्गी कबर पे गए, जैसो बईयरों ने कओ हतो, ऊंसई पाओ; पर उन ने यीशु हां उते नईं तको। यीशु ने उन से कओ; हे मूरखो, तुम आगमवकतन की सबरी बातन पे बिसवास करबे में कित्ते मन्दबुद्धि आव! का जौ जरूरी नईं हतो, कि मसीह जा पीड़ा झेलतो और तब अपनी मईमा में जातो। तब यीशु ने मूसा और सबरे आगमवकतन से शुरु कर के सबरे पवित्तर धरम पोथी में से, अपने बारे में लिखी भईं बातन कौ मतलब, उन हां समजा दओ। इतने में बे औरें ऊ गांव के ऐंगर पोंचे, जिते बे जा रए हते, यीशु के ढंग से ऐसो जान पड़ो, कि बो आंगू जा रओ आय। पर उन ने जौ कै कें यीशु हां रोको, कि हमाए संग्गै रै; कायसे लौलईया लग चली आय और दिन बिलात ढल गओ आय। तब बो उन के संग्गै रैबे हां भीतर गओ। जब यीशु उन के संग्गै खाना खाबे हां बिराजो, तो ऊ ने रोटी लेके धन्नवाद करो, और रोटी तोड़ के उन हां देन लगो। तब उन की आंखें खुल गईं; और उन ने ऊहां चीन लओ, और यीशु उन की आंखन से छिप गए। उन ने आपस में कओ; जब यीशु गैल में हम से बात करत हतो, और पवित्तर धरम पोथी कौ भेद हम हां समजा रओ हतो, तो का हमाए हियन में जोस न भर गओ हतो? ओई टैम बे औरें यरूशलेम हां लौट गए, और उन ग्यारहों और उन के संगियन हां जुड़ो पाओ। बे औरें कैत हते, पिरभु सांचई में जी उठो आय, और शमौन हां दिखो आय। तब उन ने गैल की बातें उन हां बता दईं और जौ सोई कि उन ने यीशु हां रोटी तोड़त बेरा कौन भांत चीनो। बे औरें जे बातें कैई रए हते, कि यीशु खुद उन के मजारें आ ठांड़ो भओ; और उन से कओ, तुम हां सान्ति मिले। पर बे औरें घबरा गए, और डरा गए, और समजे, कि हम कौनऊं भूत हां तकत आंय। यीशु ने उन से कओ; काय घबरात आव? और तुमाए हियन में संका काय उठत आय? मोरे हाथ और मोरे गोड़े तको, कि मैं ओई आंव; मोहां छी के तको; आत्मा के हड्डी मांस नईं होत जैसो मो में तकत आव। जौ कै कें यीशु ने उन हां अपने हाथ पांव दिखाए। जब खुसी के मारे उन हां बिसवास न भओ, और बे औरें चकित हते, तो यीशु ने उन से पूंछो; का तुमाए ऐंगर कछु खैबे हां आय? चेलन ने यीशु हां भुंजी मछरिया कौ एक टुकड़ा दओ। यीशु ने लेके उन के सामूं खाओ। फिन यीशु ने उन से कओ, जे मोरी बे बातें आंय, जौन मैं ने तुमाए संग्गै रैत भए तुम से कईं हतीं, कि जरूरी आय, कि जितेक बातें मूसा की नैम व्यवस्था और आगमवकतन और भजनों की पोथी में, मोरे लाने लिखी आंय, सबरी पूरी होबें। तब यीशु ने पवित्तर धर्म पोथी समजबे के लाने उन की बुद्धि खोल दई। और उन से कओ, ऐसो लिखो आय; कि मसीह पीड़ा झेल है; और तीसरे दिना मरे भयन में से जी उठ है। और यरूशलेम से लेके सबरी जातन में हिया फेरबे कौ और पापन की छिमा कौ परचार, ओई के नाओं से करो जै है। तुम इन बातन के गवाय आव। और तको, जी कौ कौल मोरे बाप ने करो आय, ऊहां मैं तुम पे उतार हों और जब लौ सरग से बल शक्ति न पाओ, तब तक तुम ऐई नगर में ठैरे रओ। तब बो उन हां बैतनिय्याह लौ बायरें ले गओ, और अपने हाथ उठा के उन हां आसीष दई। उन हां आसीष देत भए बो उन से अलैदा हो गओ और सरग पे उठा लओ गओ। चेले ऊहां दण्डवत कर के बड़ी खुसी से यरूशलेम लौट गए। और लगातार मन्दर में जाके परमेसुर की स्‍तुति भजन करत हते। शुरू में बचन हतो, और बचन परमेसुर के संग्गै हतो, और बचन परमेसुर हतो। जौई पेंला से परमेसुर के संग्गै हतो। सब कछु ऊके द्वारा पैदा भओ और जो कछु पैदा भओ आय, ऊ में से कछु भी ऊके बिना पैदा नईं भओ। ऊ में जीवन हतो, और बो जीवन मान्सन की ज्योत हती। और ज्योत अन्धयारे में चमकत आय; पर अन्धयारे ने ऊहां नईं अपनाओ। परमेसुर की कोद से पठैव भओ एक मान्स आओ जीको नाओं यूहन्ना हतो। बो ई लाने आओ, कि ऊ ज्योत कौ गवाह बनै, कि सब ऊके द्वारा भरोसा करें। बो खुद तो ज्योत नईं हतो, पर ई लाने आओ, कि ज्योत की गवाही देबे। बो सांची ज्योत जौन हरएक मान्स हां उजयारो करत आय, जगत में आबेवारी हती। बो जगत में हतो, और जगत ऊके द्वारा पैदा भओ, और जगत ने ऊहां नईं चीनो। बो अपने घरै आओ और ऊके घरवारन ने ऊहां नईं अपनाओ। पर जीने ऊहां अपनाओ, ऊ ने इन हां परमेसुर की लड़ेर होबे कौ हक्क दओ, यानि उन हां जौन ऊके नाओं पे भरोसा करत आय। बे न तो खून से, और न सरीर की मनसा से, और न ही मान्स की मनसा से, पर परमेसुर की मनसा से पैदा भय आंय। और बचन जौन कृपा और सच्चाई से भरपूर हतो रूपवान भओ; और हमाए बीच में डेरा करो, और हम ने ऊ की ऐसी कृपा हेरी, जैसे बाप के एकई मोंड़ा की कृपा। यूहन्ना ने ऊके बारे में गवाही दई, और जोर से कई, जौ ओई आय, जीके बारे में मैंने कई, बो जौन मोरे पाछें आबेवालो आय, मोय से आंगू रै है, कायसे बो मोय से पेंला हतो। कायसे ऊ की भरपूरी में से हम सबई ने पाओ यानि भारी दया। कायसे रीतियां मूसा के द्वारा दईं गईं; पर तरस, और सच्चाई तो यीशु मसीह के द्वारा मिली। परमेसुर हां कोऊ ने कभऊं नईं तको, एकलौतो पूत जौन बाप की कंईयां में आय, ओई ने ऊहां दरसाओ। यूहन्ना की गवाही जा आय, जब यहूदियन ने ऊके ऐंगर यरूशलेम से याजकन और लेवियन हां पूंछबे पठैव, तें को आय? तो ऊ ने जौ मान लओ, और मैटो नईं बल्कि मान लओ कि मैं मसीह नईं आंव। तबई उन ने ऊसे पूछो, तो फिन तें को आय? का तें एलिय्याह आय? ऊ ने कई, मैं नईं आंव: का तें बो अगमवक्ता आय? ऊ ने बताओ, नईं। तब उन ने ऊसे पूंछी, तो फिन तें को आय? कि हम अपने पठैबेवाले हां बता देबें; तें अपने बारे में का कहत आय? ऊ ने कई, मैं डांग में एक चिल्लाबेवाले कौ ऐरो आंव, प्रभु की गैल सूदी करियो, जैसो यशायाह अगमवक्ता ने कई हती। जे फरीसियन की कोद से पठैव गओ हतो। तबई उन ने ऊसे पूछी, जब तें न तो मसीह आय, न एलिय्याह आय, और न तो अगमवक्ता, तब तें बपतिस्मा काय देत आय? यूहन्ना ने उन हां बताओ, मैं तो पानू से बपतिस्मा देत आंव; पर तुमाए बीच में एक जन ठांड़ो आय, जीहां तुम नईं चीनत आव। जे ओई आय जौन मोरे पाछें आबे वालो हतो, और जी की पनईयां के बन्ध मैं खोलबे के लायक नईंयां। जे बातें यरदन के पार बैतनिय्याह में भईं, जिते यूहन्ना बपतिस्मा देत हतो। दूसरे दिना ऊ ने यीशु हां अपनी कोद आत तक के कई, हेरो, परमेसुर को मेमना आय, जौन जगत कौ पाप उठा लै जात आय। जौ ओई आय, जीके बारे में मैंने कई हती, कि मोरे पाछें एक जन आबेवारो है, जौन मोय से आंगू हो गओ आय, कायसे बो मोय से पेंला हतो। और मैं भी ऊहां नईं चीनत हतो, पर मैं ई लाने पानू से बपतिस्मा देत भओ आओ, कि बो इस्राएल पे दरसाव जाबै। और यूहन्ना ने जा कहत भए गवाही दई, मैंने आकास से आत्मा हां कपोत की घांई उतरत तको आय, और बो ऊ पै थम गओ। और मैं तो ऊहां नईं चीनत हतो, पर जीने मोय पानू से बपतिस्मा दैबे पठैव, ओई ने मोय से कई, जीपे तें आत्मा हां उतरत और ठहरत हेरे; पवित्र आत्मा से बपतिस्मा देबेवालो ओई आय। और मैंने हेरो, और गवाही दई आय, कि जौई परमेसुर कौ पूत आय। फिन दूसरे दिना यूहन्ना अपने चेलन में से दो के संग्गै ठांड़ो हतो। और ऊ ने यीशु हां जात भओ हेर के कई, तकौ, जौ परमेसुर कौ मेम्ना आय। तब दोई चेला ऊ की बात सुनके यीशु के पाछें हो लय। यीशु ने मुड़के उन हां अपने पाछें आत हेरो और उन से कई, तुम कौन की खोज में आव? उन ने कई, हे गुरू तें किते रैत आय? ऊ ने उन से कई, आओ तो देख लै हौ। तब उन ने जाके हेरो कि बो किते रैत आय, और ऊ दिना ऊके संग्गै रए; कायसे संझा के चार बज चुके हते। उन दोनऊ में से एक तो शमौन पतरस कौ भईया अन्द्रियास हतो। ऊ ने पेंला अपने सगे भईया शमौन से मिलके ऊसे कई, हम हां मसीह मिल गओ आय। और बो ऊहां यीशु के ऐंगर ले आओ, यीशु ने ऊ पै नजर डालके कई, तें यूहन्ना कौ पूत शमौन आय, तें कैफा यानि पतरस कहला है। दूसरे दिना यीशु ने गलील हां जाबे की ठानी; और फिलिप्पुस हां पाके ऊसे कई, मोरे पाछें चले आ। फिलिप्पुस तो अन्द्रियास और पतरस के नगर बैतसैदा कौ हतो। फिलिप्पुस ने नतनएल हां पाके ऊसे कई, जीके बारे में मूसा ने रीतियन में और अगमवकतन ने सोऊ लिखो आय, बो हम हां मिल गओ आय; बौ यूसुफ कौ पूत यीशु नासरी आय। नतनएल ने ऊसे कई, भला नासरत से भी कोई उमदा बसत कड़ सकत आय? फिलिप्पुस ने ऊसे कई, आके तक ले। यीशु ने नतनएल हां अपनी कोद आत हेर के ऊके बारे में कई, तको, सही में एक इस्राएली आय: जी में कोऊ छल नईंयां। नतनएल ने ऊसे कई, तें मोय कैसे जानत आय? यीशु ने ऊसे कई; ईसे पेंला कि फिलिप्पुस ने तोय टेरो, जब तें अंजीर के पेड़ तरें हतो, मैंने तोय तको हतो। नतनएल ने ऊसे कई, हे गुरू, तें परमेसुर कौ पूत आय; तें इस्राएल कौ राजा आय। यीशु ने ऊसे कई; कि मैंने तोय अंजीर के पेड़ तरें तको, का तें ई लाने भरोसा करत आय? तें ईसे भी बड़े बड़े काज देख है। ऊ ने फिन कई, मैं तुम से सांची सांची कहत आंव, कि तुम सरग हां खुलो भओ, और परमेसुर के सरगदूतन हां मान्स के पूत के संग्गै, खालें आत और ऊ परे चढ़त हेर हौ। तीसरे दिना गलील के काना में एक ब्याव हतो, और यीशु की मताई उतईं हती। यीशु और ऊके चेले सोई ब्याव के बुलौआ में आए हते। जब दाखरस नईं बचो, तो यीशु की मताई ने ऊसे कई, उन के ऐंगर दाखरस नईंयां। तब यीशु ने ऊसे कई, हे नारी मोय तोसे का काम? मोरी बेरा अबै नईं आई। ऊ की मताई ने चाकरन से कई, जो कछु बो तुम से कय, ओई करियो। उतंई यहूदियन के शुद्ध करबे की रीत के अन्सार पत्थरा के छ: मटका धरे हते, हर एक में करीब सत्तर अस्सी लीटर समाउत हतो। यीशु ने उन से कई, मटकन हां पानू से भर देओ, और उन ने उन हां मोंह लौ भर दओ। ऊ ने उन से कई, अब कछु काड़ के ब्यारी के मुखिया के ऐंगर लै जाओ, और बे ले गए। जब ब्यारी के मुखिया ने बो पानू चीखो, जो दाखरस बन गओ हतो, ऊहां पता नईं हतो, कि किते से आओ आय (पर जिन चाकरन ने पानू काड़ो हतो, बे जानत हते) तब ब्यारी के मुखिया ने दूल्हे हां टेरो, और ऊसे कई। सब जने मान्स पेंला उमदा दाखरस देत आय और जब लोगबाग पीके अफर जात आंय, तब घटिया देत आंय; तेंने तो उमदा दाखरस अबै लौ धरें रओ। गलील के काना में यीशु ने अपने अदभुत चिन्ह दिखा के अपनी महिमा दरसाई, और ऊके चेलन ने ऊ पे भरोसा करो। ईके बाद यीशु और ऊ की मताई, ऊके भईया और ऊके चेले कफरनहूम गए और उते कछु दिना रए। यहूदियन कौ फसह कौ परब ऐंगर हतो और यीशु यरूशलेम हां गओ। और मन्दर में ऊ ने बैल, गाड़रें और परेवा बेंचबेवालन और सुनारन हां बैठे भओ हेरो। और गिरमा कौ एक कोड़ा बनाओ, और उन सब गाड़रन और बैल के संग्गै, मन्दर से बायरें काड़ दओ, और सुनारन के पईसा बिथरा दए, और उन की मेज हां उलट दओ। और ऊ ने परेबा बेंचबेवालन से कई; इन हां इते से लै जाओ, मोरे बाप के घर हां हाट कौ घर नईं बनाओ। तब ऊके चेलन हां खबर आई कि लिखो आय, तोरे मकान कौ घुन मोय खा जै है। तब यहूदियन ने यीशु से कई, तें जौन जौ करत आय, तो हम हां कौन सौ चिन्ह दिखाऊ त आय? यीशु ने उन से कई; ई मन्दर हां ढाह देओ, मैं ईहां तीन दिना में फिन ठांड़ो कर देंहों। ईपे यहूदियन ने कई; ई मन्दर हां बनाबे में छियालीस साल लगे आंय, का तें ईहां तीन दिना में ठांड़ो कर दै है? पर बो तो अपनी देह के मन्दर के बारे में कै रओ हतो। ई लाने जब बो मरे भयन में से जी गओ, तो ऊके चेलन हां खबर आई, कि ऊ ने ऐसी कई हती; भरोसा करो। जब बो फसह के परब की बेरा यरूशेलेम में हतो, तो बिलात लोगन ने उन चिन्ह हां जिन हां बो दरसात हतो, हेर के ऊके नाओं पे भरोसा करो। मगर जिते लौ यीशु समझत हते, ऊ ने अपने खुदई हां उन के भरोसे पे नईं छोड़ो, कायसे बो सबरन हां चीनत हतो। ई लाने ऊहां ई बात की जरूरत नईं हती, कि कोऊ जनो, कोऊ मान्स के बारे में गवाही देबे, कायसे बो खुद जानत हतो, कि मान्स के मन में का आय। फरीसियन में से नीकुदेमुस नाओं कौ एक मान्स हतो, जौन यहूदियन कौ एक हाकिम हतो। ऊ ने रात में यीशु के ऐंगर आके कई, हे गुरू, हम जानत आंय, कि तें परमेसुर की कोद से आओ भओ गुरू आय; कायसे इन चिन्ह हां जौन तें दिखात आय, कोऊ नईं दरसा सकत, जब लौ परमेसुर ऊके संग्गै नईं होबै। यीशु ने जवाब में ऊसे कई; मैं तोसे सांची सांची कहत आंव, कि जब लौ कोऊ नए सिरे से जन्म नईं लै है, बो परमेसुर के राज्य में नईं जा सकत आय। नीकुदेमुस ने ऊसे कई, बूढ़ो मान्स कैसे जन्म लै सकत आय? का बो अपनी मताई के गरभ में दूसरी बेर जाके जन्म लै सकत आय? यीशु ने जवाब दओ, मैं तोसे सांची सांची कहत आंव; कि जब लौ कोऊ पानू और आत्मा से नईं जन्मे, बो परमेसुर के राज्य में नईं जा सकत। कायसे जौन सरीर से जन्मो आय, बो सरीर आय; और जौन आत्मा से जन्मो आय, बो आत्मा आय। अचरज नईं करियो, कि मैंने तोसे कई; जरूरी आय कि तें नओ जन्म ले। बैहर जिते चाहत उते चलत आय, और तें ऊ को ऐरौ लेत आय, पर जौ नईं जानत, कि बो किते से आत और किते हां जात आय, जौन आत्मा से जन्म लेत आय बो ऐसो ही आय। नीकुदेमुस ने जवाब देत भय ऊसे कई; जौ सब कैसे हो सकत आय? यीशु ने जवाब देत भय ऊसे कई; तें इस्राएलियन कौ गुरू होकें भी का इन बातन हां नईं समझत? मैं तोसें सांची सांची कहत आंव कि हम जौन जानत आंय, ओई कहत आंय, और जीहां हमने हेरो आय, ओई की गवाही देत आंय, और तुम हमाई कई नईं मानत। जब मैंने तुम से धरती की बातें करीं, तो तुम भरोसा नईं करत, अगर मैं तुम हां सरग की बातें बताओं, तो काय भरोसा कर हौ? और कोऊ सरग पे नईं चढ़ो, केवल ओई जौन सरग से उतरो, यानि मान्स को पूत जौन सरग में आय। और जैसो मूसा ने डांग में सर्प हां ऊंचे पे टांगो, वैसई जरूरी आय कि मान्स कौ पूत भी ऊंचे पे चढ़ाओ जाबै। कि जो कोऊ भरोसा करे, बो ऊ में अनन्त जीवन पाबै। कायसे परमेसुर ने जगत से ऐसो प्रेम करो, कि ऊ ने अपनो एकलौतो पूत हां दे दओ, कि जो कोऊ ऊ पै भरोसा करे, बो नास न होय, बरन अनन्त जीवन पाबै। कायसे परमेसुर ने अपने पूत हां जगत में ई लाने नईं पठैव, कि जगत हां दोषी ठहराए, पर ई लाने, कि जगत ऊके द्वारा उद्धार पाबै। जौन ऊ पे भरोसा करत आय, बो दोषी नईं ठहराओ जात, जौन भरोसा नईं करत, बो दोषी ठहराओ जा चुको आय; कायसे ऊ ने परमेसुर के एकलौते पूत के नाओं पै भरोसा नईं करो। और दोष कौ कारण जौ आय कि ज्योत जगत में आ चुकी आय, और मान्सन ने ज्योत हां अन्धयारे से बढ़के प्यारो जानो, कायसे उन के काज बुरय हते। कायसे हर एक जौन बुरओ करत आय, ज्योत से बैर करत आय, और ज्योत के ऐंगर नईं आत, कि कऊं ऊके काज दिखा न जाबें। पर बो जौन सांची हां मानत आय, बो ज्योत के ऐंगर आत आय, जीसे ऐसो दिखा जाबै, कि ऊके काज परमेसुर की कोद से करे गए आंय। इन बातन के बाद यीशु और ऊके चेले यहूदिया परगना में आए; और बो उतईं उन के संग्गै रह के बपतिस्मा देन लगो। यूहन्ना भी शालेम के ऐंगर ऐनोन में बपतिस्मा देत हतो। कायसे उते पानू बिलात हतो और लोग आके बपतिस्मा लेत हते। कायसे यूहन्ना ऊ बेरा लौ जेलखाने में नईं डालो गओ हतो। उते यूहन्ना के चेलन कौ कोऊ यहूदी के संग्गै शुद्ध करबे की रीत पे बतकाव होन लगो। और उन ने यूहन्ना के ऐंगर आके ऊसे कई, हे गुरू, जौन यरदन के ऊ पार तोरे संग्गै हतो, और जीकी तेंने गवाह दई हती, हेर, बो बपतिस्मा दे रओ आय, और सब लोगबाग ऊके ऐंगर आत आंय। यूहन्ना ने जबाव देत भय कई, जब लौ कोऊ मान्स हां सरग से न दओ जाबै, तब लौ बो कछु भी पा नईं सकत। तुम खुद मोरी गवाही देत आव, कि मैंने कई हती, मैं मसीह नईं आंव, वरन ऊके आंगू पठैव गओ आंव। दूल्हा ओई आय, जीकी दुल्हन आय, पर दूल्हे कौ संग्गी जौन ठांड़ो भओ ऊ की सुनत आय, दूल्हा कौ ऐरो सुनके मन में खुस होत आय; और ऐई तरहां मोरी खुसी पूरी भई आय। जरूरी आय कि बो बढ़े और मैं घटों। जौन ऊ परै से आत आय, बो सबई से बढ़के आय, जौन धरती से आत आय बो धरती कौ आय; और धरती की बातें करत आय: बो जौन सरग से आत आय, बो सब से बढ़के आय। जो कछु ऊ ने हेरो, और सुनो आय, ओई की गवाही देत आय; फिन भी कोऊ मान्स ऊ की गवाही नईं मानत। जीने ऊ की गवाही मान लई आय, ऊने ई बात पे छाप लगा दई, कि परमेसुर सांचो आय। कायसे जीहां परमेसुर ने पठैव आय, बो परमेसुर की बातें करत आय, कायसे बो बिना भेदभाव के ऊहां आत्मा देत आय। बाप पूत से प्रेम करत आय, और ऊ ने ओई के हाथ में सब कछु दै दओ आय। जौन पूत पे भरोसा करत आय, अनन्त जीवन ओई कौ आय; वरन बो जौन पूत की नईं मानत, ऊहां जीवन नईं मिल है, परन्त परमेसुर को कोप ऊ पे बनो रहत आय। फिन जब प्रभु हां पता पड़ो, कि फरीसियन ने सुनो आय, कि यीशु यूहन्ना से बढ़कें चेला बनात आय, और उन हां बपतिस्मा देत आय। (जबकि यीशु खुद नईं बल्कि ऊके चेला बपतिस्मा देत हते)। तब बो यहूदिया हां छोड़ के फिन गलील हां चलो गओ। और ऊहां सामरिया में होकें जाबो जरूरी हतो। ई लाने बो सामरिया के सूखार नाओं के एक नगर में आओ, जौन ऊ जमीन के ऐंगर आय, जीहां याकूब ने अपने पूत यूसुफ हां दई हती। और याकूब कौ कु आं उतईं हतो; ई लाने निंगत निंगत थक के यीशु कुआं के ऊपर ऐंसई बैठ गओ, ऊ बेरा करीब बारह बजे हते। इतेक में एक सामरी बईयर पानू भरबे आई, यीशु ने ऊसे कई, मोय पानू पिला। कायसे ऊके चेले खाबे हां मोल लेबे के लाने नगर में गए हते। ऊ सामरी बईयर ने ऊसे कई, तें यहूदी होकें मोय से पानू काय मांगत आय? (कायसे यहूदी सामरियन के संग्गै कोई तरहां को ब्यौहार नईं धरत)। यीशु ने ऊसे कई, अगर तें परमेसुर के बरदान हां चीनती, और जौ भी कि बो को आय जो तोसे कैत आय; मोय पानू पिला तो तें ऊसे मांगती, और बो तोय जीवन कौ पानू देतो। बईयर ने ऊसे कई, हे प्रभु, तोरे ऐंगर पानी भरबे हां कछु नईंयां, और कुआं गहरो आय, तो बो जीवन कौ पानू तोरे ऐंगर किते से आओ? का तें हमाए बाप याकूब से भी बढ़के आय, जीने हम हां जौ कुआं दओ; और जी में से ऊ ने पियो और ऊ की लड़ेरन और ऊके ढोरन ने सोई पियो। यीशु ने जवाब देत भए ऊसे कई, कि जो कोनऊं ई पानू में से पी है बो फिन प्यासो हुईये। पर जो कोनऊं ऊ पानू में से पी है, जौन मैं ऊहां दै हों, बौ कभऊं प्यासो नईं हुईये, कायसे बो पानू ऐसो दैहों, ऊ में सदा लौ जीबे के लाने उमड़बे वालो पानू कौ सोता बन जै है। बईयर ने ऊसे कई, हे प्रभु, बौ पानू मोय भी दे जीसे मैं फिन प्यासी न होऊं, और न पानू भरबे इते लौ आने पड़े। यीशु ने ऊसे कई, जाके अपने घरवारे हां इते टेर ला। बईयर ने ऊसे कई, मोरो कोऊ घरवारो नईंयां: यीशु ने ऊसे कई, तेंने सांची कई, तोरो कोऊ घरवारो नईंयां। कायसे तोरे पांच घरवारे भए आंय, और अबै जौन तोरे ऐंगर आय बो भी तोरो घरवारो नईंयां; जे तेंने सांची कई आय। ऊ बईयर ने ऊसे कई, हे प्रभु, मोय लगत आय कि तें अगमवकता आय। हमाए पुरखन ने ई पहरवा पे प्रार्थना करी, और तुम कहत आव कि यरूशलेम बो जांगह आय, जिते मान्सन हां प्रार्थना करो चईये। यीशु ने ऊसे कई, हे बईयर, मोरो भरोसा कर कायसे बेरा आ रई आय, जब तुम न ई पहरवा पे और न यरूशलेम में बाप की प्रार्थना कर हौ। तुम ऊ की प्रार्थना करत आव, जीहां नईं चीनत; हम ऊ की प्रार्थना करत आंय जीहां हम चीनत आंय; कायसे तरन तारन यहूदियन में से आय। पर बो बेरा आ रई आय, बल्कि आई गई आय, जब सांचे भक्त बाप की प्रार्थना आत्मा और सच्चाई से कर हैं, कायसे बाप अपने लाने ऐंसई भक्त चाहत आय। परमेसुर आत्मा आय, और जरूरी आय कि ऊके भक्त आत्मा और सच्चाई से ऊ की प्रार्थना करें। बईयर ने ऊसे कई, मैं जानत आंव कि मसीह जौन ख्रीष्ट कहलात आय, आबेवालो है; जब बो आ है, तो हम हां सब कछु बता दै है। यीशु ने ऊसे कई, मैं जौन तोसे बोल रओ आंव, ओई आंव। इतेक में ऊके चेले आ गए, और ऊहां एक बईयर से बतकाव करत अचरज में पड़ गए; फिन भी कोऊ ने जा नईं पूंछी, कि तें का चाहत आय? ऊ बईयर ने अपनो मटका उतईं छोड़ दओ, और नगर में जाके लोगन से कई। आओ, एक मान्स हां तको, जीने बो सब कछु जौन मैंने करो, ऊ ने मोय बता दओ: कहूं जौई तो मसीह नईंयां? बे नगर से निकल के ऊके ऐंगर आन लगे। ओई बेरा ऊके चेलन ने ऊसे बिनती करी, हे गुरू, कछु खा ले। पर यीशु ने उन हां बोलो, मोरे ऐंगर खाबे हां ऐसी रोटी आय, जीके बारे में तुम नईं जानत आव। चेले आपस में कहन लगे, कहूं कोऊ ऊके लाने रोटी तो नईं लाओ? यीशु ने उन से कई, मोरी रोटी जा आय कि अपने पठैबेवाले की मन की बात पूरी करों और ऊ को काज पूरो करों। का तुम जा नईं कहत, अबै कटनी होबे में चार महिना रह गए आंय? तको, मैं तुम से कहत आंव, अपनी आंखें उठाके खेतन पे नजर डालो, बे कटनी के लाने पक गए आंय। काटबे वारन हां मजूरी मिलत आय, और बो अनन्त जीवन के लाने फल बटोरत आय; कि बोबेवारो और काटबेवाले दोई मिलके खुसी मना सकें। कायसे इते जे कनौत सांची बैठत आय, एक बोत है और दूसरो काटत आय। मैंने तुम हां बो खेत काटबे पठैव, जी में तुम ने मेहनत नईं करी, दूसरन ने मेहनत करी और तुम ऊ की मेहनत के फल में संग्गी भय। ऊ नगर के कितेक सामरियन ने यीशु पे भरोसा करो, कायसे ऊ बईयर ने गवाही दई हती, की जो कछु मैंने करो, बो सब ऊ ने मोय बता दओ। सामरियन ने आके ऊसे बिनती करी, कि बो उन के संग्गै रय, तो बो दो दिना उन के संग्गै रहो। ऊके बोलबे से बिलात दूसरे जनों ने सोई ऊ पै भरोसा करो। और ऊ बईयर से कहन लगे, अब हम तोरे कहबे से भरोसा नईं करत; कायसे हम ने खुद सुन लओ आय, और हम जान गए आंय कि जौई सांची में जग कौ मुक्ति देबेवालो आय। दो दिना के पाछें बो उते से निकल के गलील हां चलो गओ। कायसे यीशु ने खुद गवाही दई, कि अगमवकता अपने देस में मान नईं पात। जब बो गलील में पहुंचो, तो गलीलियन ने ऊ को मान करो; बे तो उन सबई काजन हां देख चुके हते, जौन ऊ ने परब के दिना में यरूशलेम में करे हते, कायसे बे परब में उतईं गए हते। तब बो गलील के काना में आओ, जिते ऊ ने पानू हां दाखरस बना दओ हतो, उतईं राजा कौ एक चाकर हतो जीको पूत कफरनहूम में बीमार हतो। जब ऊ ने सुनी कि यीशु यहूदिया से गलील में आ गओ आय, तो बो ऊके ऐंगर गओ और ऊसे बिनती करन लगो, कि चलकें मोरे लरका हां साजो कर दे: कायसे बो मरबे पे हतो। यीशु ने ऊसे कई, जब लों तुम चिन्ह और चमत्कार नईं देख लैहौ तब लौ भरोसा नईं कर हौ। राजा के चाकर ने ऊसे कई, हे प्रभु, मोरे लड़का के मरबे के पेंला चल। यीशु ने ऊसे कई, जा, तोरो लरका जीयत आय: ऊ मान्स ने यीशु के कैबे पे भरोसा करो और चलो गओ। जब बो गैल में हतो, तो ऊके चाकर ने आके ऊसे कई तोरो लड़का जीयत आय। ऊ ने उन से पूंछी बो कितनी बेरा साजो होन लगोे हतो? उन ने कई, कल दिन के एक बजे ऊ को ताप उतर गओ। तब बाप समझ गओ, कि जा ओई बेरा आय, जब यीशु ने कई हती, तोरो लड़का जीयत आय, और खुद ऊ ने और ऊके पूरे घरवारन ने भरोसा करो। जौ दूसरो चिन्ह हतो, जौन यीशु ने यहूदिया से आके गलील में करो हतो। इन बातन के बाद यीशु यहूदियन के एक परब में यरूशलेम गओ। यरूशलेम में भेड़-फाटक के ऐंगर एक कुण्ड आय, जौन इब्रानी बोली में बेतहसदा कहाऊत आय, जीके पांच ओसारे आंय। इन में ऐसे बिलात जने (पानू के हिलबे की आस में) पड़े रहत हते, जौन बीमार, अन्धरे, लूले और सूखे अंग वाले हते। (बे पानू के हिलबे की बाट हेरत हते, कायसे प्रभु के सरगदूत, कोई खास बेरा पे कुण्ड में उतर के पानू हां हिलात हते, पानू के हिलतई जौन भी पेंला उतर जात हतो, बो चाए कोई सी बीमारी से बीमार काय न होबै, साजो हो जात हतो।) उतईं एक मान्स हतो, जौन अड़तीस बरस से बीमार हतो। जब यीशु ने ऊहां उते पड़ो भओ हेरो और जानो, कि बो उते ऊ दसा में बिलात दिना से पड़ो आय, तो ऊसे पूंछी, का तें साजो होबो चाहत आय? बीमार ने ऊसे कई, हे प्रभु, मोरे लौ कोऊ मान्स नईंयां, जौन मोय पानू के हिलतई कुण्ड में उतारे, जब मैं उतरबे हां होत आंव तो दूसरो मोय से पेंला उतर जात आय। यीशु ने ऊसे कई, उठ, अपनो बिछौना उठा और चल फिर। बो मान्स तुरतईं साजो हो गओ, और अपनो बिछौना उठाके निगन लगो और बो सब्त कौ दिना हतो। ई लाने यहूदियन ने ऊ से, जौन साजो भओ हतो, कई आज सब्त कौ दिना आय, ई लाने बिछौना उठाबो तोरे लाने साजो नईंयां। ऊ ने उन से कई, जीने मोय साजो करो, ओई ने मोसे कई, अपनो बिछौना उठा और चल फिर। उन ने ऊसे पूंछी, बो मान्स को आय जीने तोसे कई अपनो बिछौना उठा और चल फिर? परन्त जौन साजो हो गओ हतो, नईं जानत हतो कि बो को आय; कायसे उते भीड़ के काजें यीशु ऊ जांगा से चलो गओ हतो। ईके पाछें यीशु ने ऊहां मन्दर में मिलके ऊसे कई, हेर, तें साजो हो गओ आय; फिन कभऊं पाप नईं करियो, ऐसो न होय कि ईसे भी कोऊ भारी जोखम तोपे आ पड़े। ऊ मान्स ने जाके यहूदियन हां बताओ, कि बो यीशु आय, जीने मोय साजो करो। ईसें यहूदी लोग यीशु हां परेसान करन लगे, कायसे बो जे काम सब्त के दिन करत हतो। परन्त यीशु ने उन से कई, की मोरो बाप अबै लेओ काम करत आय, और मैं खुद भी काम करत आंव। ई बात से यहूदी ऊहां मार डालबे की और ज्यादा कोसिस करन लगे, कायसे बो न केवल सब्त की रीत हां तोड़ रओ हतो, परन्त परमेसुर हां अपनो बाप कहके, अपने आप हां परमेसुर के बरोबर ठहरा रओ हतो। ई लाने यीशु ने उन से कई, मैं तुम से सांची सांची कैत हों, कि पूत खुद कछु नईं कर सकत, केवल ओई जौन बो बाप हां करत हेरत आय, कायसे जौन कछु बाप करत आय, उनई कामन हां पूत भी ओई रीत से करत आय। कायसे बाप पूत से प्रेम करत आय, और बो उन सब कामन हां ऊहां दिखात आय; जिन हां बो खुद करत आय, और बो इन से भी बड़े कामन हां ऊहां तका है, जीसे की तुम अचरज करो। कायसे जी तरहां बाप मरे भयन हां जिला देत आय, ऊं सई पूत जिन हां चाहत आय उन हां जिलात आय। कायसे बाप भी कोऊ कौ न्याव नईं करत, बल्कि ऊ ने न्याव करबे कौ सबरो हक पूत हां दै दओ आय। कि सब लोग पूत कौ वैसई मान करें, जैसो की बाप कौ मान करत आंय, जौन पूत को मान नईं करत, बो बाप को भी मान नईं करत, जीने ऊहां पठैव। मैं तुम से सांची सांची कहत आंव, जौन मोरो बचन सुनके मोरे पठैबेवाले पे भरोसा करत आय, अनन्त जीवन ऊ को आय, और ऊ पे दण्ड कौ हुकुम नईं हुईये, परन्त बो मृत्यु से पार होकें जीवन में पिड़ चुको आय। मैं तुम से सांची सांची कहत आंव, बो बेरा आ रई आय, और अबै आय, जब मरे भए लोग परमेसुर के पूत कौ बोल सुन हैं, और जौन सुन हैं बे जी जै हैं। कायसे जैसे बाप अपने में जीवन धरत आय, ऊं सई ऊ ने पूत हां भी खुद में जीवन धरबे कौ हक्क दओ आय। और ऊ ने ऊहां न्याव करबे कौ भी हक्क दओ आय, कायसे बो मान्स कौ पूत आय। ईपे अचरज नईं करियो, कायसे बेरा आ रई आय, कि बे सब जौन कबरों में आंय, ऊ को बोल सुनके कबरन में से कड़ आ हैं। जिन ने साजे काज करे आंय बे अनन्त जीवन के लाने जी उठ हैं, और जिन ने बुरय काज करे आंय बे दण्ड भोगबे के लाने फिन जी उठ हैं। मैं अपनी कोद से कछु नईं कर सकत आंव; जैसो सुनत आंव, वैसई न्याव करत आंव, और मोरो न्याव सांचो आय; कायसे मैं अपनी नईं, परन्त अपने पठैबेवाले की मनसा चाहत आंव। अगर मैं केवल अपने बारे में गवाही देओं; तो मोरी गवाही सांची नईं। मोरे बारे में गवाही देबेवालो एक और आय, और मैं जानत आंव, कि जौन मोरे बारे में गवाही देत आय बो सांची आय। तुम ने यूहन्ना से पुछवाओ और ऊ ने सांची की गवाही दई आय। परन्त मैं अपने बारे में मान्स की गवाही नईं चाहत; पर जे बातें मैं ई लाने कैत हों, कि तुम हां उद्धार मिलै। बो तो बरत और दमकत दिया हतो; और तुम हां ऊ की ज्योत में कछु बेरा लौ खुसी मनाबो साजो लगो। परन्त जौन गवाही मोरी आय, बो यूहन्ना की गवाही से बढ़के आय: कायसे बाप ने जिन कामन हां पूरो करबे के लाने मोय सौंपो आय, यानि बे काम जौन मैं करत आंव, बेई मोरे बारे में गवाही देत आंय, कि बाप ने मोय पठैव। बाप जीने मोय पठैव आय, ओई ने मोरे बारे में गवाही दई आय, तुम ने न कभऊं ऊ को बोल सुनो आय और न ऊ को रूप हेरो आय। और ऊ को वचन तुम में बनो नईं रहत, कायसे जीने मोय पठैव आय तुम ऊ को भरोसा नईं करत। तुम पवित्र शास्त्र में खोजत आव, कायसे तुम सोचत आव कि ऊ में अनन्त जीवन मिलत आय, और जे ओई आंय, जौन मोरे बारे में गवाही देत आय। और तुम मोरे ऐंगर आबो नईं चाहत कि जीवन पाओ। मैं मान्सन से बड़वाई नईं चाहत। परन्त मैं तुम हां चीनत आंव, कि तुम में परमेसुर को प्रेम नईंयां। मैं अपने बाप के नाओं से आओ आंव, और तुम मोय नईं अपनात; जदि कोऊ और अपने ही नाओं से आबै तो तुम ऊहां अपना हौ। तुम कैसे भरोसा कर सकत आव, जब कि तुम खुद एक दूसरे से मान चाहत आव, और जौन मान अद्वैत परमेसुर की कोद से आय, ऊहां पाबो नईं चाहत? जौ ना सोचियो, कि बाप के सामूं मैं तुम हां दोषी ठहरा हों, तुम हां दोषी ठहराबे वालो तो मूसा आय, जीपे तुम ने आस धरी आय। कायसे जदि मूसा कौ भरोसा करते, तो मोरो भी भरोसा करते, कायसे ऊ ने मोरे बारे में लिखो आय। परन्त जदि तुम ऊ की लिखी बातन नईं मानत, तो मोरे बोलबे पे कैसे भरोसा कर हौ? इन बातन के पाछें यीशु गलील की झील तिबिरियास के ऊ पार चलो गओ। और एक बड़ी भीड़ ऊके पाछें निंग रई हती, कायसे बे उन अचरज के कामन हां हेरत हते जिन हां बो बीमारन पे करत हतो। यीशु पहरवा पे चढ़के अपने चेलन के संग्गै बैठ गओ। यहूदियन के फसह कौ परब ऐंगर हतो। जब यीशु ने अपनी आंखें उठाके एक बड़ी भीड़ हां अपने ऐंगर आत तको, तो फिलिप्पुस से पूंछी, इन के खाबे हां हम किते से रोटी मोल लाएं? बो उन हां परखबे के लाने ऐसो कैत हतो; कायसे बो जानत हतो कि ऊहां का करने आय। फिलिप्पुस ने ऊसे कई, दो सौ दीनार की रोटियां भी उन के लाने पूरी न हुईयें कि हर एक को तनक तनक मिले। ऊके चेलन में से शमौन पतरस के भईया अन्द्रियास ने ऊसे कई। इते एक मोंड़ा आय जी के ऐंगर जौ की पांच रोटियां और दो मछरियां आंय, परन्त इतेक लोगन के लाने बे का आंय। यीशु ने उन से कई, लोगन हां बिठवा देओ। ऊ जगह पे बिलात घांस हती, ई लाने मन्सेलू जौन गिनती में करीब पांच हजार हते, बैठ गए। तब यीशु ने रोटियां लईं, और धन्यवाद करके उन हां जौन बैठे हते बांट दईं, ऊं सई मछरियां भी जितेक बे चाहत हते बांट दईं। जब बे अफर गए तो ऊने अपने चेलन से कई, बचे भए टुकड़न हां बटोर लेओ, कि कछु भी फेंको न जाए। ई लाने उन ने ऊहां बटोरो, और जौ की पांच रोटियों के टुकड़न से, जौन खाबे वालन से बच गए हते बारह टुकनियां भरीं। जब लोग ने ऊ अचरज हां जीहां ऊ ने करो हतो, हेरो तो उन ने कई; सांची में जे ओई अगमवकता आय जौन जगत में आबेवालो हतो। यीशु ने जानके कि बे मोय जबरजस्ती राजा बनाबे के लाने लै जाबो चाहत आंय, फिन अकेलो पहरवा पे चलो गओ। जब संझा भई, तो ऊके चेले झील के तट पे गए। और नाव पे चढ़बे के पाछें बे कफरनहूम हां जाबे के लाने झील पार करन लगे, अंधयारो हो गओ हतो, और यीशु अबै लौ उन के ऐंगर नईं आओ हतो। तेज आंधी चलबे से झील में लहरें उठन लगीं। जब बे पांच छ: किलो मीटर लौ नाव खेत चले गय, तो उन ने यीशु हां झील पे निंगत, और नाव के ऐंगर आत भओ तको, और बे डरा गए। परन्त ऊ ने उन से कई, डराओ नईं; मैं आंव। बे ऊहां नाव पे चढ़ाबे के लाने तईयार भए और तुरतईं नाव ऊ जांगह पे जा टिकी, जिते बे जा रए हते। दूसरे दिना भीड़ ने, जौन झील के ऊ पार रह गई हती, जौ तको, कि केवल एक हल्की नाव उते हती, यीशु चेलन के संग्गै नाव पे नईं चढ़ो हतो, केवल चेले ही ऊ पार चले गए हते। (तबई तिबिरियास से ऊ जांगह के ऐंगर दूसरी नावें आईं, जिते उन ने प्रभु के धन्यवाद देबे के पाछें रोटी खाई हती)। जब भीड़ ने तको, कि न तो उते यीशु आय, और न ऊके चेले, तो बे खुद हल्की हल्की नाव पे चढ़के यीशु हां खोजत भए कफरनहूम पहुंचे। उन ने जब ऊहां झील के ऊ पार पाओ तो ऊसे कई, हे गुरू, तें इते कबै आओ? यीशु ने उन से कई, मैं तुम से सांची सांची कैत आंव, तुम मोय ई लाने नईं खोजत कि तुम ने चिन्ह हेरे, परन्त ई लाने कि तुम ने रोटियां खांई और अफर गए। ऊ रोटी के लाने मेहनत नईं करो जौन नास हो जात आय, परन्त ऊ रोटी के लाने जौन अनन्त जीवन लौ बनी रहत आय, जीहां मान्स कौ पूत तुम हां दै है, कायसे बाप यानि परमेसुर ने ओई पे अपनी छाप लगाई आय। ई लाने उन ने ऊसे कई, परमेसुर के काम करबे के लाने हम का करें? यीशु ने उन से कई; परमेसुर को काम जौ आय, कि जीहां ऊ ने पठैव आय, तुम ऊ पै भरोसा करो। तब उन ने ऊसे कई, फिन तें कैसो चिन्ह दिखात आय कि हम ऊहां हेरें और तोपे भरोसा करें, तें कैसो काम दिखात आय? हमाए पुरखन ने डांग में मन्ना खाओ; जैसो लिखो आय; ऊ ने उन हां खाबे के लाने स्वरग से रोटी दई। यीशु ने उन से कई, मैं तुम से सांची सांची कहत आंव की मूसा ने तुम हां सरग से बा रोटी नईं दई, पर मोरो बाप आय जौन सरग से तुम हां सच्ची रोटी देत आय। कायसे परमेसुर की रोटी बा आय, जौन सरग से उतरत आय और संसार को जीवन देत आय। तब उन ने ऊसे कई, हे प्रभु जा रोटी हम हां सदा लौ देत रहियो। यीशु ने उन से कई, जीवन की रोटी मैं आंव, जौन मोरे ऐंगर आत आय कभऊं भूखो न हुईये और जौन मोय पे भरोसा करत आय, कभऊं प्यासो न हुईये। परन्त मैंने तुम से कई, कि तुम ने मोहां तक भी लओ आय, तौभी भरोसा नईं करत। जो कछु बाप मोय देत आय, बो सब मोरे ऐंगर आ है, और जो कोऊ मोरे ऐंगर आ है, मैं ऊहां कभऊं बायरें नईं काड़ हों। कायसे मैं अपनी मनसा नईं, परन्त अपने पठैबेवाले की मनसा पूरी करबे के लाने सरग से उतरो आंव। जीने मोय पठैव, ऊ की मनसा जा आय, कि सब कछु जौन ऊ ने मोय दओ आय, ऊ में से कछु भी न हिराओं पर अखिरी दिना ऊहां फिन जिला दों। कायसे मोरे बाप की मनसा जा आय, कि जौन पूत हां तके, और ऊ पे भरोसा करत आय, बो अनन्त जीवन पाबै; और मैं अखिरी दिना में ऊहां फिन जिला दें हों। ई लाने यहूदी ऊ पे कुड़कुड़ान लगे, कायसे ऊ ने कई; जो रोटी सरग से उतरी आय, बो मैं आंव। और बे कैन लगे; का जौ यूसुफ कौ पूत यीशु नईंयां, जीके मताई बाप हां हम चीनत आंय? तो बो काय कैत आय कि मैं सरग से उतरो आंव। यीशु ने उन से कई, आपस में नें कुड़कुड़ाओ। मोरे ऐंगर कोऊ नईं आ सकत, जब लौ बाप जीने मोय पठैव आय, ऊहां अपने ऐंगर खेंच न ले; और मैं अखिरी दिना ऊहां फिन जिला दें हों। अगमवकतन के शास्त्रन में जौ लिखो आय, और बे सब परमेसुर की कोद से सिखाए भय हुईयें। जीने बाप से सुनो और सीखो आय, बो मोरे ऐंगर आत आय। जौ नईं, कि कोऊ ने बाप हां तको पर जौन परमेसुर की कोद से आय, केवल ओई ने बाप हां तको आय। मैं तुम से सांची सांची कहत आंव, की जौन भरोसा करत आय, अनन्त जीवन ओई कौ आय। जीवन की रोटी मैं आंव। तुमाए पुरखन ने डांग में मन्ना खाओ और बे मर गए। जा ओई रोटी आय जौन सरग से उतरत आय, कि जो कोऊ ऊ में से खाए बो न मर है। जीवन की रोटी जौन सरग से उतरी बो मैं आंव। जो कोऊ ई रोटी में से खा है, तो बो सदा लौ जीयत रै है, और जौन रोटी मैं जगत के जीवन के लाने दै हों, बो मोरो मांस आय। ईपे यहूदी आपस में जौ कहके बतकाव करन लगे, जौ मान्स हम हां अपनो मांस खाबै हां कैसे दे सकत आय? यीशु ने उन से कई; मैं तुम से सांची सांची कहत आंव जब लौ तुम मान्स के पूत कौ मांस न खै हौ, और ऊ को रकत न पी हौ, तुम में जीवन नईंयां। जौन मोरो मांस खात, और मोरो रकत पीयत आय, अनन्त जीवन ऊ को आय, और मैं अखिरी दिना में ऊहां फिन जिला दें हों। मोरो मांस तो सांची रोटी आय और मोरो खून सांची पीबे की चीज आय। जौन मोरो मांस खात और मोरो खून पीयत आय, बो मोय में बनो रहत आय, और मैं ऊ में। जैसे जीयत बाप ने मोय पठैव और मैं बाप के काजें जीयत आंव, ऐंसई बो भी जौन मोय खात आय मोरे लाने जीयत रै है। जो रोटी सरग से उतरी बा जाई आय, पुरखन जैसीनईं कि खाई और मर गए। ई रोटी हां जो खै है बो सदा लौ जीयत रै है। ऊ ने जे बातें ऊ बेरा कईं, जब बो कफरनहूम के एक प्रार्थनाघर में सीख दे रओ हतो। ई लाने ऊके चेलन में से बिलात ने जब जा सुनी तो कई, जा तो कठिन बात आय; ईहां कौन सुन सकत आय? यीशु ने जा जानके कि ऊके चेले ई पे कुड़कुड़ात आंय, उन से कई, का तुम हां जा बात बुरई लगत है? और तुम मान्स के पूत हां ऊ परे जात तक हौ, जिते बो पेंला हतो, तो का कर हौ? आत्मा तो जीवन देत आय, सरीर से कछु लाभ नईंयां, जौन बातें मैं ने तुम से क ईं बे आत्मा और जीवन आंय। पर तुम में से कछु आंय जो भरोसा नईं करत। कायसे यीशु पेंला से जानत हतो कि भरोसा नईं करबेवाले को आंय, और बे को आंय? और कौन मोय पकड़वा है। और ऊ ने कई, मैंने तुम से ऐई से कई हती, कि कोऊ मोरे ऐंगर नईं आ सकत, जब लौ बाप की कोद से ऊहां बरदान नईं दओ जाए। ई काजें ऊके चेलन में से बिलात लौट गए, और फिन ऊके संग्गै नईं चले। ई लाने यीशु ने उन बारहों से कई, का तुम भी चले जाओ चाहत आव? शमौन पतरस ने ऊसे कई, हे प्रभु हम की के ऐंगर जाबें? अनन्त जीवन की बातें तो तोरे ऐंगर आंय। हम ने भरोसा करो आय, और जान लओ है, कि परमेसुर कौ पवित्र जन तेंई आय। यीशु ने उन से कई, का मैंने तुम बारहों को नईं चुनो? फिन भी तुम में से एक शैतान आय। ऊ को मतलब शमौन इस्कारियोती के पूत यहूदा से हतो, कायसे उन बारहों में से ओई ऊहां पकड़वाबे पे हतो। इन बातन के पाछें यीशु गलील में फिरत रओ, बो यहूदिया में नईं जाओ चाहत हतो, कायसे यहूदी ऊहां मार डालबे की खोज में हते। यहूदियन कौ परब यानि मण्डपों को परब ऐंगर हतो। ई लाने ऊके भाईयों ने ऊसे कई, इते से निंग के यहूदिया में चलो जा, कि तोरे चेले भी उन कामन हां हेर सकें जिन हां तें करत आय। कायसे ऐसो कोऊ नईं हुईये, जौन नामी होबो चाहे, और लुक केकाम करे, अगर तें इन कामन हां करत आय, तो अपने हां संसार पे दरसा। कायसे ऊके भईया भी ऊ पे भरोसा नईं करत हते। ई लाने यीशु ने उन से कई, मोरी बेरा अबै लौ नईं आई; पर तुमाए लाने सबई बेरा सई आय। जगत तुम से बैर नईं कर सकत, परन्त मोसे करत आय, कायसे मैं ई बात की सीख देत आंव, कि उन के काज बुरय आंय। तुम खुद परब में जाओ, मैं ई परब में अबै नईं जात; कायसे मोरी बेरा अबै लौ पूरी नईं भई। उन से जे बातें कहबे के पाछें, बो गलील में रुक गओ। पर जब ऊके भईया परब में चले गए, तब बो भी गओ सब के सामूं नईं, मानो लुक के गओ। ई लाने यहूदी ऊ परब में ऊहां ढूंड़त रए और कह रए हते बो किते आय? और भीड़ ऊके बारे में कुड़कुड़ान लगी, कछु लोग कह रए हते; बो भलो मान्स आय, दूसरे कह रए हते; नईं, बो लोगन हां भरमात आय। फिन भी यहूदियन के डर से कोई ऊके बारे में खुलके नईं बोल रओ हतो। और जब परब के आधे दिना बीत गए; तो यीशु मन्दर में गओ और प्रवचन करन लगो। तब यहूदी अचरज में होकें कैन लगे, जौ मान्स बिना पढ़े कैसे ज्ञानी बन गओ? तब यीशु ने उन से कई, जौ सन्देस मोरो नईं, परन्त ऊ को आय जीने मोय पठैव। जदि कोऊ मान्स ऊ की मनसा पूरी करबे हां तईयार आय, तो बो ई सीख सें जान जै है, कि जे परमेसुर की कोद से आय, या मैं अपनी कोद से कैत आंव। जौन अपनी कोद से कहत आय, बो अपनी ही बड़ाई चाहत आय; पर जौन अपने पठैबेवाले की बड़ाई चाहत आय, ओई सांचो आय, और ऊ में कोई पाप नईंयां। का मूसा ने तुम हां नैम नईं दईं? फिन भी तुम में से कोई रीतियन कौ पालन नईं करत। तुम काय मोय मार डालबो चाहत आव? भीड़ ने कई; तोय में दुष्ट आत्मा आय; को तोय मार डालबो चाहत आय? यीशु ने उन से कई, मैंने एक काम करो और तुम सब अचरज करत आव। ऐई काजें मूसा ने तुम हां खतना की आज्ञा दई आय (जा नईं कि बा मूसा की ओर से आय परन्त बाप-दादों से चली आ रई आय) और तुम सब्त के दिना मान्स को खतना करत आव। ई लाने सब्त के दिना मान्स कौ खतना करो जात आय, कि मूसा की रीत कौ उलंघन न होबै, ई लाने मैंने सब्त के दिना एक मान्स हां साजो कर दओ, तुम मोपै काय खुनसियात हौ? मों देखो न्याव न करियो, परन्त धर्म से न्याव करो। तब यरूशलेम के कछु लोग कैन लगे; का जौ ओई मान्स नईं, जीहां बे मार डालबे की कोसिस कर रय आंय। पर तको, बो तो खुले आम बातें कर रओ आय और बे ऊसे कछु नईं कह रय आंय; कहूं हाकिमन हां भी तो नईं मालूम हो गओ आय; कि जौई मसीह आय? ईहां तो हम जानत आंय, कि जौ मान्स किते कौ आय, परन्त जब मसीह आ है, तो कोई भी न जान है, कि बो किते कौ आय। तब यीशु ने मन्दर में सीख देत भय जोर देके कई, तुम मोय जानत आव और जौ भी जानत हों, कि मैं किते कौआंव: मैं अपने से नईं आओ परन्त जीने मोय पठैव बो सांचो आय, जीहां तुम नईं चीनत। मैं ऊहां चीनत आंव; कायसे मैं ऊ की कोद से आंव और ओई ने मोय पठैव आय। ई लाने बे ऊहां पकड़बे की कोसिस करन लगे, फिन भी कोऊ ने ऊ पे हाथ नईं डालो, कायसे ऊ की बेरा अबै लौ नईं आई हती। और भीड़ में से बिलात जनन ने ऊ पै भरोसा करो, और कैन लगे जब मसीह आ है, तो का बो ई मान्स से भी ज्यादा चिन्ह दिखा है? फरीसियन ने भीड़ हां ऊके बारे में कानाफूसी करत देखो; और महापुरोहित और फरीसियन ने ऊहां पकड़ाबे के लाने सिपाहियन हां पठैव। ई लाने यीशु ने कई मैं तनक बेरा लौ और तुमाए संग्गै आंव; तब मैं ऊके ऐंगर चलो जै हों जीने मोय पठैव आय। तुम मोय ढूंढ़ हौ, पर नईं पाहौ और जिते कौ मैं आंव, उते तुम नईं जा सकत। यहूदियन ने आपस में कई, जौ किते जाहै, कि हम ऊहां न पाहैं? का बो उन के ऐंगर जाहै, जो यूनानियन में तितर-बितर होकें रहत आंय, और का यूनानियन हां भी सीख दै है? जा कैसी बात आय जौन ऊ ने कई, तुम मोय ढूंढ़ हौ और न पाहौ, और जिते कौ मैं आंव, उते तुम नईं आ सकत? फिन परब के अखिरी दिना, जौन खास दिना हतो, यीशु ठांड़ो भओ और जोर से कहन लगो, अगर कोऊ प्यासो होय तो मोरे ऐंगर आके पी ले। जौन मोय पे भरोसा कर है, जैसो पवित्र शास्त्र में कहो गओ आय, ऊके हृदय में से जीवन के पानू की नदियां बह जै है। ऊ ने पवित्र आत्मा के बारे में कई, जीहां ऊ पे भरोसा करबेवाले पाबे पे हते; कायसे पवित्र आत्मा अबै लौ नईं उतरो हतो, कायसे यीशु अबै लौ महिमा में नईं पहुंचो हतो। तब भीड़ में से कछु ने जब इन बोलन हां सुनो तो कई, जौ सही में बो अगमवकता आय। औरन ने कई; जौई मसीह आय, फिन कछु दूसरे लोग कहन लगे; काय? का मसीह गलील से आ है? का पवित्र शास्त्र में जौ नईं लिखो आय, कि मसीह दाऊद के गोत्र से और बैतलहम गांव से आ है, जिते दाऊद रहत हतो? ईसें लोगों में फूट पड़ गई। उन में से कछु ऊहां पकड़बो चाहत हते, पर कोऊ ने ऊ पे हाथ नईं डालो। तब सिपाही महापुरोहितन और फरीसियन के ऐंगर आए, और उन ने सिपाहियन से कई, तुम ऊहां काय नईं लाए? सिपाहियन ने उन से कई, आज लौ कोऊ ने ऐसी बातें कभऊं नईं कईं, जैसो बो कहत आय। तब फरीसियन ने उन से कई, कहूं तुम भी तो ऊ की बातन में नईं आ गए? का हाकिमन या फरीसियन में से कोऊ ने ऊ पै भरोसा करो आय? पर जे भीड़ जौन रीतियन हां नईं जानत, श्रापित आय। नीकुदेमुस ने, (जौन पेंला ऊके ऐंगर आओ हतो, और उन में से एक हतो) उन से कई। का हमाई रीतियां कोऊ मान्स हां जब लौ पेंला ऊ की नईं सुन ले और जा नईं जान ले, कि बो का करत आय; दोषी ठहरात आय? उन ने ऊसे कई; कहूं तें भी तो गलील कौ नईंयां? हेर, गलील से कोऊ अगमवकता प्रगट नईं होबे कौ। तब सब अपने अपने घरै चले गए। परन्त यीशु जैतून पहरवा पे गओ। भुनसारे बो फिन मन्दर में आओ, सब लोग ऊके ऐंगर आन लगे; और बो बैठके उन हां सन्देस देन लगो। तब फरीसी और शास्त्री एक बईयर हां लाए, जौन व्यभिचार में पकड़ी गई हती, और ऊहां बीच में ठांड़ो करोऔर यीशु से कई। हे गुरू, जा बईयर व्यभिचार करत भए पकड़ी गई आय। रीतियन में तो मूसा ने हम हां ऐसी बईयर हां पत्थरवाह करबे कौ हुकम दओ आय, तें ईके बारे में का कहत आय? बे ऊहां परखबे के लाने ऐसो कह रए हते, जीसे कि ऊ पै दोष लगाबे के लाने कोऊ बात मिले, परन्त यीशु झुक के अपनी उंगरिया से धरती पे लिखन लगो। जब बे बेर बेर ऊसे पूछत रए, तो ऊ ने सूदे ठांड़े होकें उन से कई, तुम में से जीने कछु पाप नईं करो होबे, ओई सब से पेंला ऊहां पथरा मारे। और फिन झुक के उंगरिया से धरती पे लिखन लगो। जब उन ने जा सुनी तो पेंला सियाने और फिन एक एक करके सब जने चले गए और बो अकेलो रह गओ, और बईयर उतईं बीच में ठांड़ी रह गई। तब यीशु ने सूदे ठांड़े होकें ऊसे कई, हे बईयर, बे किते गए? का कोऊ ने तोय दण्ड कौ हुकुम नईं दओ? ऊ ने कई, कोऊ ने भी नईं प्रभु, तब यीशु ने कई, मैं भी तोय दण्ड कौ हुकुम नईं देत; जा, अब फिन पाप न करियो। यीशु ने फिन लोगन से कई, जगत की ज्योत मैं आंव; जौन मोरे पाछें चल है, बो अन्धयारे में नईं निंग है, परन्त जीवन की ज्योत पा है। फरीसियन ने ऊसे कई; तें अपनी गवाही खुद दे रओ आय; तोरी गवाही सांची नईंयां। यीशु ने उन से कई; जदि अपनी गवाही मैं खुद देत आंव, तौभी मोरी गवाही ठीक आय, कायसे मैं जानत आंव, कि मैं किते से आओ हों और किते जा रओ आंव? परन्त तुम नईं जानत कि मैं किते से आओ या किते जात आंव। तुम लोग सरीर के अन्सार न्याव करत आव; मैं कोऊ कौ न्याव नईं करत। अगर मैं न्याव करों भी, तो मोरो न्याव सांचो आय; कायसे मैं अकेलो नईंयां, परन्त ऊ में आंव, और मोरो पठैबेवालो भी आय। तुमाई रीतियन में लिखो है, कि दो मान्स की गवाही मिल के ठीक होत आय। एक तो मैं अपनी गवाही खुद देत आंव, और दूसरो आय बाप जीने मोय पठैव और मोरे बारे में गवाही देत आय। तब बे ऊसे कैन लगे, तोरो बाप किते आय? यीशु ने उन से कई, तुम न तो मोय जानत आव, और न मोरे बाप हां, अगर तुम मोय जानते, तो मोरे बाप हां सोई जानते। जे बातें ऊ ने मन्दर में उपदेस देत भए खजाने घर में कईं, और कोऊ ने ऊहां नईं पकड़ो; कायसे ऊ की बेरा अबै लौ नईं आई हती। ऊ ने फिन उन से कई, मैं जानत आंव और तुम मोय ढूंड़ हौ और अपने पापन में मर हौ: जिते मैं जा रओ आंव, उते तुम नईं आ सकत। ईपे यहूदी कैन लगे, कहूं बो अपने आप हां मार तो न डाल है, बो कहत आय; जिते मैं जा रओ आंव उते तुम नईं आ सकत? ऊ ने उन से कई, तुम खालें के आव, मैं ऊ परै कौ आंव; तुम ई जगत के आव, मैं ई जगत कौ नईंयां। ई लाने मैं ने तुम से कई, कि तुम अपने ही पापन में मर हौ; कायसे जब लौ तुम भरोसा न कर हौ कि मैं ओई आंव, तुम अपने पापन में मर हौ। बे ऊसे कैणन लगे, तें को आय? यीशु ने उन से कई, ओई आंव जौन मैं तुम से पेंला से कहत आ रओ आंव। मोय तुमाए बारे में बिलात बातें कैने और न्याव करने आय, परन्त जीने मोय पठैव बो सांचो आय; और बे बातें जौन मैंने ऊसे सुनी, बे ही मैं जगत से कहत आंव। बे जा नईं समझे कि बो उन से बाप के बारे में कह रओ हतो। तब यीशु ने उन से कई, जब तुम मान्स के पूत हां ऊंचे पे चढ़ा हौ, तब तुम जान जै हौ कि मैं ओई आंव, और मैं अपने से कछु नईं करत, पर जैसो बाप ने मोय सिखाओ, मैं वैसई बातें कैत आंव। जीने मोय पठैव बो मोरे संग्गै आय; ऊ ने मोय अकेलो नईं छोड़ो; कायसे मैं सदा बे ही काज करत आंव, जीसे बो खुस होत आय। जब ऊ ने जे बातें कईं, तो बिलात ने ऊ पै भरोसा करो। तब यीशु ने उन यहूदियन से जिन ने ऊ पे भरोसा करो हतो, कहन लगे, जदि तुम मोरे कहबे जैसो कर हौ, तो सांची में मोरे चेले कहा हौ। और तुम सत्य हां जान हौ, सत्य तुम हां छुटकारो दै है। उन ने ऊसे कई; हम तो इब्राहीम के कुल से आंय और अब लौ कोऊ के चाकर नईं भए, तो फिन तें कैसे कहत आय, तुम छुट्टा हो जै हौ? यीशु ने उन से कई; मैं तुम से सांची सांची कहत आंव, जौन पाप करत आय, ऊ पाप कौ चाकर आय। चाकर सदा घरै नईं रहत; पूत सदा रहत आय। ई लाने अगर पूत तुम हां छुट्टा कर है, तो तुम सांची में छुट्टा हो जै हौ। मैं जानत आंव कि तुम इब्राहीम के कुल के आव; तौभी मोरो कहबो तुमाए मन में नईं बैठत, ई लाने तुम मोय मार डालबो चाहत आव। मैं बेई बातें कहत आंव, जिन हां अपने बाप के इते तको आय; ऐसई तुम भी बेई काज करत आव जिन हां, तुम ने अपने बाप से सुनो आय। उन ने ऊसे कई हमाओ बाप तो इब्राहीम आय, यीशु ने उन से कई; अगर तुम इब्राहीम की लड़ेर होते, तो इब्राहीम की घांई काज करते। परन्त अब तुम मोय जैसे मान्स हां मार डालबो चाहत आव, जीने तुम हां ऊ सत्य हां बताओ जौन मैंने परमेसुर से सुनो, ऐसो तो इब्राहीम ने नईं करो हतो। तुम अपने बाप के काज हां कर रए आव: उन ने ऊसे कई, हम व्यभिचार से नईं जन्मे; हमाओ एक बाप आय यानि परमेसुर। यीशु ने उन से कई; जदि परमेसुर तुमाओ बाप होतो, तो तुम मोसे प्रेम रखते; कायसे मैं परमेसुर से कड़ के आओ हों; मैं अपनी मनसा से नईं आओ, परन्त ओई ने मोय पठैव आय। जौन मैं कह रओ आंव ऊहां तुम काय नईं समझत? ई लाने कि तुम मोरो बचन नईं सुन सकत। तुम अपने बाप शैतान से आव, और अपने बाप की मनकी बात हां पूरो करबो चाहत आव। बो तो शुरु से हत्यारो आय, और सत्य पे टिको नईं रओ, कायसे सत्य ऊ में हैई नईंयां: जब बो झूट बोलत आय, तो अपने गुन से बोलत आय; कायसे बो झूटो आय, और झूट कौ बाप आय। मैं सांची बोलत आंव, ई लाने तुम मोरो भरोसा नईं करत। तुम में से को मोय पापी ठहरात आय? अगर मैं सांची बोलत आंव, तो तुम मोरो भरोसा काय नईं करत? जौन परमेसुर कौ आय, बो परमेसुर की बातें सुनत आय, तुम ई लाने उन हां नईं सुनत कायसे तुम परमेसुर के नईं आव। जा सुनके यहूदियन ने यीशु से कई; का हम सही नईं कहत, कि तें सामरी आय, और तो में दुष्ट आत्मा आय? यीशु ने उन से कई, मोय में दुष्ट आत्मा नईंयां; परन्त मैं अपने बाप कौ मान करत आंव, और तुम मोरो अपमान करत आव। मैं अपनो मान नईं चाहत, एक आय, जौन चाहत आय, और न्याव करत आय। मैं तुम से सांची सांची कहत आंव, अगर कोऊ मोरो बचन कौ पालन कर है, तो बो कभऊं मृत्यु हां न तक है। यहूदियन ने ऊसे कई, अब हम जान गए आंय कि तो में दुष्ट आत्मा आय: इब्राहीम मर गओ, और अगमवकता सोई मर गए और तें कहत आय, कि अगर कोऊ मोरे बचन कौ पालन कर है, तो बो कभऊं मृत्यु कौ स्वाद नईं चख है। सही में तें हमाए बाप इब्राहीम से बड़ो नईंयां, जौन मर गओ, अगमवकता भी मर गए, तें अपने खुद हां का समझत आय? यीशु ने उन से कई; जदि मैं खुद की बड़ाई करों, तो मोरो मान कछु भी नईंयां, मोय मान देबेवालो मोरो बाप आय, जीके बारे में तुम कहत आव, कि बो हमाओ परमेसुर आय। तुम ने तो ऊहां नईं चीनो, परन्त मैं ऊहां चीनत आंव; अगर मैं कहों कि मैं ऊहां नईं चीनत, तो मैं तुमाए घांई झूठो ठहर हों: परन्त मैं ऊहां चीनत और ऊके बचन को मानत आंव। तुमाओ बाप इब्राहीम मोरो दिन तकबे की आस में खुस हतो, ऊ ने तको भी और खुस भओ। यहूदियन ने ऊसे कई, तें अबै पचास बरस कौ नईंयां; फिन भी तेंने इब्राहीम हां तको आय? यीशु ने उन से कई; मैं तुम से सांची सांची कहत आंव; ईसे पेंला कि इब्राहीम पैदा भओ मैं आंव। तब उन ने ऊहां मारबे के लाने पत्थरा उठाए, परन्त यीशु लुक के मन्दर से बायरें कड़ गओ। फिन जात भय यीशु ने एक मान्स हां देखो, जौन जन्म से अन्धरो हतो। और ऊके चेलन ने जौ कहत भय ऊसे पूछी, हे गुरू, कीने पाप करो? ई मान्स ने या ईके मताई बाप ने, कि जौ अन्धरो पैदा भओ? यीशु ने उन से कई, न ई मान्स ने पाप करो; न ईके मताई बाप ने: पर जौ ई लाने भओ, कि परमेसुर कौ काज ऊ में दरसाओ जाबै। जरूरी आय कि जीने मोय पठैव आय, ऊके काज हम दिनई दिन में करें, बा रात आबेवाली आय, जीमें कोऊ काज नईं कर सकत। जब लौ मैं आंव, मैं जगत की ज्योत आंव। जब बो जौ कह चुको, तो ऊ ने धरती पे थूको और थूक से मट्टी सानी, और ऊ मिट्टी हां अन्धरे की आंखन पे लगाके। ऊसे कई; जाके शीलोह के कुण्ड में धो ले, (शीलोह कौ मतलब आय पठैव भओ) ई लाने ऊ ने जाके धोओ और हेरत भओ लौट आओ। तब पड़ोसी और जिन ने पेंला ऊहां भीख मांगत तको हतो, कैन लगे; का जौ ओई नईं आय, जौन बैठो भीख मांगत हतो? दूसरे कैन लगे, जौ ओई आय: कछु लोग ने कई, नईं; पर जौ ऊके घांई आय: बो कहत रओ मैं ओई आंव। तौ बे ऊसे पूछन लगे, तोरी आंखें कैसे खुल गईं? ऊ ने उन से कई, यीशु नाओं के जन ने माटी सानी, और मोरी आंखन पे लगाई और मोसे कई, शीलोह में जाके धो ले; ई लाने मैंने जाके धोओ और मैं हेरन लगो। और उन ने ऊसे पूंछी; बो किते आय? ऊ ने कई; मोय पता नईंयां। बे ऊहां जौन पेंला अन्धरो हतो, फरीसियन के ऐंगर ले गए। जी दिना यीशु ने माटी सान के ऊ की आंखन हां खोलो हतो बो सब्त कौ दिना हतो। फिन फरीसियन ने ऊसे पूंछी; कि तें कैसे हेरन लगो? और ऊ ने उन से कई; ऊ ने मोरी आंखन पे माटी लगाई, और मैंने धोओ, और अब मैं हेरत आंव। ई लाने फरीसी कैन लगे; जौ मान्स परमेसुर की कोद से नईं आय, कायसे बो सब्त कौ दिना नईं मानत। दूसरे कैन लगे, पापी जन ऐसे चिन्ह हां कैसे दिखा सकत आय? और उन में फूट पड़ गई। उन ने ऊ अन्धरे मान्स से फिन कई, ऊ ने तोरी आंखन हां खोलो, तें ऊके लाने का कहत आय? ऊ ने कई, बो अगमवकता आय। परन्त यहूदियन ने ऊ की बात कौ भरोसा नईं करो कि बो अन्धरा हतो और अब हेरन लगो, जब लौ कि उन ने ऊ आंखन पाबेवाले मान्स के मताई बाप हां टेर के। जौ न पूछ लओ, का जौ तुमाओ पूत आय, जीहां तुम कहत आव कि अन्धरा जन्मो हतो? तो अब बो कैसे हेरत आय? ऊके मताई बाप ने उन से कई; हम जानत आंय कि जौ हमाओ पूत आय, और जौ कि बो अन्धरा जन्मो हतो। पर अब बो कैसे हेरन लगो; हम नईं जानत, कीने ऊ की आंखें खोलीं; ओई से पूंछो; बो सियानो आय और बो अपने बारे में खुद बता दै है। ऊके मताई बाप ने ऐसी ई लाने कई, कायसे बे यहूदियन से डरात हते; कायसे यहूदी पेंलई एक जुट हो चुके हते, कि अगर कोऊ ऊहां मसीह मान है, तो प्रार्थना घर से काड़ दओ जै है। ई काजें ऊके मताई बाप ने कई, बो सियानो आय; ओई से पूंछ लेओ। तब उन ने ऊ मान्स हां जौन अन्धरो हतो, दूसरी बेर टेरो और ऊसे पूंछी, परमेसुर की बड़ाई कर, हम जानत आंय, कि बौ मान्स पापी आय। तब ऊ ने उन से कई, मैं नईं जानत, कि बो पापी आय या नईंयां। मैं तो एक बात जानत आंव, कि मैं अन्धरो हतो और अब हेरत आंव। उन ने ऊसे पूंछी, ऊ ने तोरे संग्गै का करो? तोरी आंखें ऊ ने कैसे खोलीं? ऊ ने उन से जा कई; मैं तो तुम से पेंला कह चुको आंव, और तुम ने नईं सुनी; फिन दूसरी बेर काय सुनबो चाहत आव? का तुम भी ऊके चेले बनबो चाहत आव? और उन ने ऊहां बुरो भलो कहत भए कई, तेंई ऊ को चेला आय; हम तो मूसा के चेले आंय। हम जानत आंय कि परमेसुर ने मूसा से बातें करी; परन्त ई मान्स के बारे में हम नईं जानत कि किते कौ आय। ऊ मान्स ने उन से जा कई; अरे जा तो बड़ी अचरज की बात आय कि तुम नईं जानत कि बो किते कौ आय, फिन भी ऊ ने मोरी आंखें खोल दईं। हम जानत आंय कि परमेसुर पापियन की नईं सुनत पर कोऊ परमेसुर कौ भक्त होबै, और ऊ की मनसा पर चलत आय, तो बो ऊ की सुनत आय। पुराने दिना से जौ कभऊं सुनबे में नईं आओ, कि कोऊ ने जन्म के अन्धरा की आंखें खोली होबें। जदि जौ मान्स परमेसुर की कोद से न होतो, तो कछु नईं कर सकत हतो। उन ने ऊसे कई, तें तो पापन से जन्मो आय, तें हम हां का सिखात आय? और उन ने ऊहां बायरें काड़ दओ। यीशु ने सुनी, कि उन ने ऊहां बायरें काड़ दओ आय; तो ऊसे मिलके ऊ ने कई, का तें परमेसुर के पूत पे भरोसा करत आय? ऊ ने यीशु से कई, कि बो को आय प्रभु; कि मैं ऊ पै भरोसा करों? यीशु ने ऊसे कई, तेंने ऊहां तको भी आय; और ओई आय जौन अबै तोरे संग्गै बतकाव कर रओ आय। ऊ ने कई, हे प्रभु, मैं भरोसा करत आंव, और ऊ ने ऊहां दण्डवत करो। तब यीशु ने कई, मैं ई जगत में न्याव के लाने आओ हों, कि जौन नईं हेरत बे हेरें, और जौन हेरत आंय बे अन्धरे हो जाबें। फरीसियन में से कछु ऊके संग्गै हते, जे बातें सुनके उन ने ऊसे कई, का हम भी अन्धरे आंय? यीशु ने उन से कई, जदि तुम अन्धरे होते तो तुम पापी न ठहरते, अब तुम कहत आव, कि हम हेरत आंय, ई लाने तुमाओ पाप बनो रहत आय। मैं तुम से सांची कहत आंव, कि जौन दोरे से गाड़रन के बाड़े में नईं पिड़त, परन्त दूसरी कोद से लांघ जात आय, बो भड़या और डाकू आय। परन्त जौन दोरे से पिड़त आय, बो गाड़रन कौ गड़रिया आय। रखवालो उन के लाने दोरो खोल देत आय, और गाड़रें ऊ को एैरो चीनत आंय, और बो अपनी गाड़रन कौ नाओं ले लेके टेरत आय और उन हां बायरें ले जात आय। जब बो अपनी सब गाड़रन हां बायरें काड़ लेत आय, तो उन के आंगू आंगू निगत जात, और गाड़रें ऊके पाछें चली जात हैं; कायसे बे ऊ को एैरो चीनत आंय। और बे कोऊ दूसरे के पाछें कभऊं नईं जै हैं, पर ऊसे बिचक हैं, कायसे बे दूसरे कौ एैरो नईं चीनतीं। यीशु ने उन से जा कनौत कई, पर बे नईं समझ पाए कि जे का बातें आंय जौन बो हम से कहत आय। तब यीशु ने उन से फिन कई, मैं तुम से सांची सांची कहत आंव, कि गाड़रन कौ द्वार मैं आंव। जितेक मोय से पेंला आय; बे सब भड़या और डाकू आंय परन्त गाड़रन ने उन की नईं सुनी। द्वार मैं आंव: जदि कोऊ मोरे द्वारा भीतर पिड़त आय तो बो उद्धार पा है, और भीतरे और बायरै आ है, जा है और चारा पा है। भड़या भड़याई करबे, मार डालबे और नास करबे हां आत आय। मैं ई लाने आओ हों, कि बे जीवन पाबें और बिलात भरपूरी से पाबें। उमदा गड़रिया मैं आंव; उमदा गड़रिया अपनी गाड़रन के लाने अपनो प्राण देत आय। बो जौन मजूर आय, गड़रिया नईंयां और न गाड़रन कौ मालक आय, बिघना हां आत देख, गाड़रन हां छोड़ के भाग जात आय, और बिघना लपक के उन हां इते उते कर देत आय। बो ई लाने भाग जात आय कायसे बो मजूर आय, और ऊहां गाड़रन की चिन्ता नईंयां। उमदा गड़रिया मैं आंव; मैं अपनी गाड़रन हां चीनत आंव, और मोरी गाड़रें मोय चीनत आंय। वैसई जैसो बाप मोय चीनत आय, और मैं बाप हां चीनत आंव, और मैं गाड़रन के लाने अपनो प्राण देत आंव। मोरी और भी गाड़रें आंय, जौन ई गाड़रन के बाड़े की नईंयां, मोय उन हां भी लाबो जरूरी आय, और बे मोरो एैरो लें हैं; तब उन कौ एकई झुण्ड और एकई गड़रिया हुईये। बाप ई लाने मोसे प्रेम करत आय, कि मैं अपनो प्राण देत आंव, कि ऊहां फिन ले लेओं। कोई ऊहां मोय से नईं छीनत, पर मैं ऊहां अपने आपई देत आंव: मोय ऊहां देबे को हक भी आय, और फिन ले लेबे कौ भी हक आय: जौ हुकुम मोय अपने बाप से मिलो आय। इन बातन से यहूदियन में फिन फूट पड़ गई। और उन में से बिलात लोग कहन लगे, ऊ में दुष्ट आत्मा आय, और बो पागल आय; तुम ऊ की काय सुनत आव? दूसरे लोग ने कई, जे बातें ऊ की नईंयां जी में दुष्ट आत्मा होय: का दुष्ट आत्मा अन्धरा की आंखें खोल सकत आय? ऊ बेरा यरूशलेम में समर्पण कौ पर्व मनाओ गओ, और जाड़े की ऋतु हती। और यीशु मन्दर में सुलैमान के औसारे में घूम रओ हतो। तब यहूदियन ने ऊके चारऊं कोद जमा होकें ऊसे कई, तें हम हां कब लौ दुबधा में धर है? जदि तें मसीह आय, तो हम से साफ साफ कह दे। यीशु ने उन से कई, मैंने तुम से कह दई, और तुम भरोसा नईं करत, जौन काज मैं अपने बाप के नाओं से करत आंव बेई मोरे बारे में गवाही देत आंय। पर तुम ई लाने भरोसा नईं करत, कायसे तुम मोरी गाड़रों में से नईं आव। मोरी गाड़रें मोरो एैरो सुनत आंय, मैं उन हां चीनत आंव, और बे मोरे पाछें पाछें निगत आंय। मैं उन हां अनन्त जीवन देत आंव, बे कभऊं नास नईं हुईंयें, और उन हां मोरे हाथन से कोऊ नईं छीन सकत। मोरो बाप, जीने उन हां मोय दओ आय, सब से बड़ो आय, और कोऊ भी उन हां बाप के हाथन से नईं छिना सकत। मैं और बाप एकई आंय। यहूदियन ने ऊहां पत्थरवाह करबे हां फिन पत्थरा उठाए। यीशु ने उन से कई, मैंने बाप की कोद से तुम हां बिलात साजे काज दिखाए आंय, उन में से की काज के लाने तुम मोय पत्थरा मारत आव? यहूदियन ने ऊसे कई, हम साजे काजन के लाने तोय पत्थरा नईं मारत, पर परमेसुर कौ ठठ्ठो करबे के लाने और ई लाने भी की तें मान्स होकें अपने हां परमेसुर बतात आय। यीशु ने उन से कई, का तुमाई रीतियन में नईं लिखो आय, की मैंने कई, तुम ईश्वर आव? जदि ऊ ने उन हां ईश्वर कई जिन के ऐंगर परमेसुर कौ बचन पहुंचो (और परमेसुर के पवित्र शास्त्र कौ खण्डन नईं करो जा सकत)। तो जीहां बाप ने पवित्र ठहराके जगत में पठैव, तुम ऊसे कहत आव कि तें ठट्ठा करत आय, ई लाने की मैंने कई, मैं परमेसुर कौ पूत आंव? जदि मैं अपने बाप के काज नईं करत, तो मोरो भरोसा नईं करो। पर जदि मैं उन हां करत आंव, तो चाए तुम मोरो भरोसा नईं करो, पर उन कामन कौ तो भरोसा करो, कि तुम जानो और समझो, कि बाप मोय में आय, और मैं बाप में आंव। तब उन ने ऊहां पकड़बे की फिन कोसिस करी पर बो उन के हाथन से बचके कड़ गओ। और फिन बो यरदन पार ऊ जांगह हां चलो गओ, जिते यूहन्ना पेंला बपतिस्मा देत हतो, और उतईं रहन लगो। बिलात लोग ऊके ऐंगर आके जौ कहत हते, यूहन्ना ने तो कोऊ चिन्ह नईं दिखाओ, फिन भी ऊ ने जौन ई मान्स के बारे में कई हती, बो सब सांची हती। और उते बिलात लोगन ने यीशु पे भरोसा करो। मरियम और ऊ की बहिन मरथा के गांव बैतनिय्याह कौ लाजर नाओं कौ एक मान्स बीमार हतो। जा ओई मरियम हती जीने प्रभु पे इतर डालके ऊके गोड़न हां अपने बालों से पोंछो हतो, ओई कौ भईया लाजर बीमार हतो। ई लान ऊकी बहिनों ने ऊहां खबर पठैई, कि हे प्रभु, जीसे तें प्रेम धरत आय, बो बीमार आय। यीशु ने जा सुनी तो कई, जा बीमारी मृत्यु की नईं, परन्त परमेसुर की बड़ाई के लाने आय, कि ईके द्वारा परमेसुर के पूत की बड़ाई होबै। यीशु तो मरथा और ऊ की बहिन मरियम और लाजर से प्रेम धरत हतो। जब ऊ ने सुनी, कि बो बीमार आय, तो जी जांगह पे बो हतो, उते दो दिना और रुक गओ। तब ईके पाछें ऊ ने चेलन से कई, कि आओ, हम फिन यहूदिया हां चलें। चेलन ने ऊसे कई, हे गुरू, अबै तो यहूदी तोय पत्थरवाह करबो चाहत हते, और का तें फिन उतईं जात आय? यीशु ने उन से कई, का दिन के बारह धण्टे नईं होत? जदि कोऊ दिन में निंगे, तो बो ठोकर नईं खात कायसे बो ई जगत की ज्योत हां तकत आय। परन्त कोऊ रात हां निंगे, तो ठोकर खात आय, कायसे ऊ में ज्योत नईंयां। ऐसो कै के पाछें, ऊ उन से कहन लगो, हमाओ संग्गी लाजर सो गओ आय, परन्त मैं ऊहां जगाबे जात आंव। तब चेलन से ऊसे कई, हे प्रभु, जदि बो सो गओ आय, तो बच जै है। यीशु ने तो ऊ की मृत्यु के बारे में कई हती, परन्त उन ने सोची कि बो नींद से सोबे के बारे में कह रओ आय। तब यीशु ने उन से साफ कह दई, कि लाजर मर गओ आय। और मैं तुमाए काजें खुस आंव कि मैं उते नईं हतो, जीसे तुम भरोसा करो, आओ अब हम ऊके ऐंगर चलें। तब थोमा ने जौन दिदुमुस कहलात आय, अपने संग्गी चेलन से कई, आओ हम सोई ऊके संग्गै मरबे हां चलें। जब यीशु आओ तो ऊहां मालूम भओ, कि ऊहां कबर में धरे चार दिना हो गए आंय। बैतनिय्याह तो यरूशलेम के ऐंगर कोऊ दो मील की दूरी पे हतो। और बिलात यहूदी मरथा और मरियम के ऐंगर ऊके भईया मरे पे में सान्ति देबे आए हते। मरथा ने जब सुनी कि यीशु आ रओ आय तो बा ऊसे मिलबे गई, परन्त मरियम घर में बैठी रई। मरथा ने यीशु से कई, हे प्रभु, जदि तें इतईं होतो, तो मोरो भईया नईं मरतो। और अब भी मैं जानत आंव, कि तें परमेसुर से जो कछु मांग है, परमेसुर तोय दै है। यीशु ने ऊसे कई, तोरो भईया जी जै है। मरथा ने ऊसे कई, मैं जानत आंव, कि अखिरी दिना में जी जाबे की बेरा बो जी जै है। यीशु ने ऊसे कई, फिन जी जाबो और जीवन मैं ही आंव, जौन मोय पे भरोसा करत आय बो जदि मर भी जाए, तो भी जी जै है। और हरएक जौन जीयत आय, और मोय पे भरोसा करत आय, कभऊं नईं मर है, का तें ई बात पे भरोसा करत आय? ऊ ने ऊसे कई, हओ प्रभु, मैं भरोसा कर चुकी आंव, कि तेंई परमेसुर कौ पूत मसीह आय जौन संसार में आबेवालो हतो, बो तेंई आय। जौ कहके बा चली गई, और अपनी बहिन मरियम हां टेर के चुपके से कई, गुरू इतईं आय, और तोय बुलात है। जब ऊ ने जा सुनी तो बा झट्टई उठी और ऊसे मिलबे आई। (यीशु जब लौ गांव में नईं पहुंचो हतो, परन्त ओई जांगह में हतो, जिते मरथा ऊसे मिली हती)। तब जौन यहूदी ऊके संग्गै घर में हते, और ऊहां सान्ति दे रय हते, जब उन ने मरियम हां तुरतईं उठके बायरै जात तको, तो जा समझ के कि बो कबर पे रोबे हां जा रई आय, बे ऊके पाछें हो लए। जब मरियम उते पहुंची, जिते यीशु हतो, तो ऊहां हेरतई ऊके गोड़न पे गिर पड़ी और कैन लगी, हे प्रभु, अगर तें इते होतो तो मोरो भईया नईं मरतो। जब यीशु ने ऊहां और ऊके संग्गै आए यहूदियन हां भी रोत हेरो, तो बो आत्मा में बिलात बेचैन और दुखी भओ, और कई तुम ने ऊहां किते धरो आय? उन ने ऊसे कई, हे प्रभु, चल के देख लेओ। यीशु रो पड़ो। तब यहूदी कहन लगे, तको, बो ऊसे कितेक प्रेम करत हतो। परन्त उन में से कितेक ने कई, का जौ जीने अन्धरे की आंखन हां खोलो, का ई मान्स हां मरबे से नईं बचा सकत हतो? फिन यीशु मन में बिलात दुखी होकें कब्र पे आए, बो एक खोह हती, और एक पत्थरा ऊ पै धरो हतो। यीशु ने कई; पत्थरा हां उठाओ: ऊ मरे भए की बहिन मरथा ने ऊसे कई, हे प्रभु, अब तो ऊ में से बदबू आत आय कायसे ऊहां मरे चार दिना हो गए आंय। यीशु ने ऊसे कई, का मैंने तोय से नईं कई हती कि अगर तें भरोसा कर है, तो परमेसुर की महिमा देख है? तब उन ने पत्थरा हां हटाओ, फिन यीशु ने अपनी आंखें ऊ परै उठाईं और कई, हे बाप, मैं तोरो धन्न मानत हों कि तेंने मोरी सुन लई आय। और मैं जानत आंव, कि तें सदा मोरी सुनत आय, परन्त चारऊं कोद ठांड़े भए मान्सन के काजें मैंने ऐसी कई, कि बे भरोसा करें, कि तेंने मोय पठैव आय। और जब बो जे बातें कह चुको, तो ऊ ने बिलात जोर से चिल्लाओ, कि हे लाजर कड़ आ। जौन मर गओ हतो, बो कफन से हाथ गोड़े बंधो भओ कड़ आओ, और ऊ को मों अंगोछे से लिपटो भओ हतो: यीशु ने उन से कई, ऊके बंध खोल देओ और ऊहां जान देओ। तब उन यहूदियन में से जौन मरियम के ऐंगर आए हते, यीशु कौ जौ काज तक लओ हतो, उन में से बिलात ने ऊ पे भरोसा करो। परन्त कछु ने फरीसियन के ऐंगर जाके उन हां बताओ कि यीशु ने का-का करो आय। ई लाने महापुरोहित और फरीसियन ने महापंचायत के लोगन हां जोड़ो और कहन लगे, हम का कर रय आंय? जौ मान्स तो बिलात चमत्कार दिखात आय। जदि हम ऊहां ऐंसई छोड़ दें, तो सब लोग ऊ पै भरोसा कर हैं और रोमी आके हमाई जमीन और जात दोई हां, अपने हक में कर लें हैं। तब उन में से एक यानि कैफा ने, जौन ऊ साल कौ महापुरोहित हतो, उन से कई, तुम कछु भी नईं जानत। न ई बात हां समझत आव, कि जौ भलो आय, कि एक जन हमाए लोग के लाने मरे, और न जा कि सबरी जात नास हो जाबै। जा ऊने खुद नईं कई, पर ऊ बरस को महापुरोहित होत भय आगमवानी करी, कि यीशु अपनी जात के लाने मर है। और न केवल जात के लाने, बल्कि ई लाने भी, कि परमेसुर की तितर-बितर सन्तान हां एक जुट कर दे। ओई दिना से उन ने ऊहां मार डालबे कौ कुचक्र रचो। ऊ दिना से यीशु यहूदियन के बीच न चलो और न फिरो; परन्त उते से इफ्राईम नाम के एक नगर हां गओ; जौन डांग परगना के ऐंगर प्रदेश में हतो और चेलन के संग्गै उतईं रहो। यहूदियन के फसह कौ परब ऐंगर हतो, और गांव के बिलात लोग फसह से पेंलई यरूशलेम हां गए, कि अपने आप हां शुद्ध करें। ई लाने बे यीशु हां खोज रए हते और मन्दर में ठांड़े होकें आपस में कह रए हते, तुम का सोचत आव। का बौ परब में नईं आ है? और बड़े पुरोहित और फरीसियन ने जौ हुकुम काड़ो हतो, कि अगर कोऊहां पता पड़े कि यीशु किते आय तो बताए, कि ऊहां पकड़ लओ जाबै। फिन फसह के छै दिना पेंलई यीशु बैतनिय्याह में आओ, जिते लाजर हतो: जीहां यीशु ने मरे भयन में से जिलाओ हतो। ऊके लाने उतईं, खाबे हां रोटी बनी, और मरथा पहुनाई कर रई हती, ऊके संग्गै जौन खाबे हां बैठे हते, उन में से लाजर एक हतो। तब मरियम ने जटामांसी कौ आधा किलो मांगे और असली इतर लेके यीशु के गोड़न पे मलो, और अपने बालों से ऊके गोड़े पोंछे, और इतर की खुशबू से घर महक उठो। परन्त ऊके चेलन में से यहूदा इस्कारियोती नाओं कौ चेला जौन ऊहां पकड़वाओ चाहत हतो, कहन लगो। ई इतर हां तीन सौ दीनार में बेंच के कंगालन हां काय नईं दे दओ गओ? ऊ ने जा ई लाने नईं कई, कि ऊहां कंगालन की चिन्ता हती, परन्त ई लाने कि बो भड़या हतो और ऊके ऐंगर रुपईयन कौ थैला रैत हतो, और जौन कछु ऊ में डालो जात हतो, बो ऊहां निकाल लेत हतो। यीशु ने कई, ऊहां मोरे गाड़े जाबे के दिना के लाने रहन दे। कायसे कंगाल तो तुमाए संग्गै सदा रहत आंय, परन्त मैं तुमाए संग्गै सदा नईं रै हों। जब यहूदियन की बिलात भीड़ ने जानो, कि यीशु उतईं आय, तो बे यीशु के काजें नईं परन्त ई लाने भी आए कि लाजर हां तकें, जीहां ऊ ने मरे भयन में से जिलाओ हतो। तब बड़े पुरोहितन ने लाजर हां सोई मार डालबे की सलाह करी। कायसे ऊसे बिलात यहूदी अलग होकें यीशु पे भरोसा करन लगे हते। दूसरे दिना परब में आई बड़ी भीड़ ने जब जा सुनी, कि यीशु यरूशलेम में आत आय। तब लोग खजरी की डालें लेके, ऊसे मिलबे हां कड़े, और चिल्यान लगे, होशन्ना धन्य आय बो जौन प्रभु के नाम से आत आय, यानि इस्राएल कौ राजा। जब यीशु हां एक गधे कौ बच्चा मिलो, यीशु ऊ पे बैठ गओ। जैसो कि लिखो आय, हे सिय्योन की बिटिया, न डरा, हेर तोरो राजा गधे के बच्चे पे बैठो चलो आत आय। ऊके चेले, पेंला तो जे बातें नईं जाने; परन्त यीशु के महिमामय होबे के पाछें, उन हां खबर आई, कि जे बातें ऊके बारे में लिखीं भईं हतीं; और लोग ने ऊके संग्गै ऐसो ही व्यवहार करो हतो। लाजर हां कबर से बायरै टेरबे, और मरे भयन में से जिलाबे की बेरा, जौन भीड़ यीशु के संग्गै हती, बो ऊ की गवाही दे रई हती। भीड़ ई काजें ऊसे मिलबे हां आई हती, कायसे लोगों ने सुनी हती, कि ऊ ने जौ चमत्कार दिखाओ आय। तब फरीसियन ने एक दूसरे से कई, सोचो तो सही कि तुम से कछु नईं बन पड़त, हेरो, जगत ऊके पाछें चल पड़ो आय। जौन लोग परब में प्रार्थना करबे जा रए हते, उन में कछु यूनानी हते। बे फिलिप्पुस के ऐंगर आके, जौन गलील के बैतसैदा कौ हतो, ऊसे पूंछन लगे श्रीमान हम यीशु से मिलबो चाहत आंय। फिलिप्पुस ने अन्द्रियास से कई; तब अन्द्रियास और फिलिप्पुस ने जाके यीशु हां बताओ। और यीशु ने उन से कई, बा बेरा आ गई आय, कि मान्स कौ पूत महिमामय होबै। मैं तुम से सांची सांची कहत आंव, कि जब लौ गेंहूं कौ दाना मिट्टी में पड़के मर नईं जात, बो अकेलो रहत आय परन्त जब मर जात आय, तो बिलात फलत आय। जौन अपने प्राण हां प्यारो जानत आय, बो ऊहां खो देत आय; और जौन अपने प्राण हां ई जगत में प्यारो नईं जानत आय; बो ऊहां अनन्त जीवन लौ बचाए धर है। जदि कोऊ मोरी सेवा करबो चाहे, तो मोरे पाछें चलै; और जिते मैं आंव, उते मोरो सेवक भी हुईये; अगर कोऊ मोरी सेवा कर है, तो बाप ऊ को मान कर है। अब मोरो जी बेचैन हो रओ आय। ई लाने अब मैं का कहों? हे बाप, मोय ई घड़ी से बचा? परन्त मैं ई मन्सा से ई घड़ी लौ पोंचो आंव। हे बाप, अपने नाम की महिमा कर, तब जा आकासवाणी भई, मैंने ऊ की महिमा करी आय, और फिन भी कर हों। तब भीड़ के लोग जौन उते ठांड़े भय सुन रए हते, कहन लगे; कि बादल गरजो आय, औरन ने कई, सरगदूत ने ऊसे बतकाओ करो आय। यीशु ने उन से कई, जे वाणी मोरे लाने नईंयां, पर तुमाए लाने भई आय। अब ई जगत कौ न्याव होत आय, अब ई जगत कौ हाकिम काड़ दओ जै है। और जदि मैं धरती पे से ऊ परे हां चढ़ाओ जै हों, तो सब हां अपने ऐंगर खेंच लै हों। ऐसो कहके बो दरसा रओ हतो, कि बौ कैसी मौत मर है। ई लाने भीड़ ने ऊसे कई, हम ने रीतियन में पढ़ो आय, कि मसीह सदा बनो रै है, फिन तें कैसे कहत आय, कि मान्स के पूत हां ऊंचे पे चढ़ाओ जाओ जरूरी आय? जौ मान्स कौ पूत को आय? यीशु ने उन से कई, तुमाए बीच ज्योत अब तनक बेरा के लाने आय, जब लौ ज्योत तुमाए संग्गै आय, तौ लौ निंगत रहियो; ऐसो न होबै कि अंधयारो तुम हां आ घेरे; जौन अंधयारे में निंगत आय बौ नईं जानत कि किते जात आय। जब लौ ज्योत तुमाए संग्गै आय, ज्योत पे भरोसा करो जीसे कि तुम ज्योत की लड़ेर बन सको। इन बातन हां कहके यीशु उते से चलो गओ और उन से छिपो रओ। वैसे ऊ ने उन के सामूं इतेक चिन्ह दिखाए, फिन भी उन ने ऊ पे भरोसा नईं करो। जीसे यशायाह आगमवक्ता कौ बो बचन पूरो होबै, जो ऊ ने कई हे प्रभु, कीने हमाए बताए पे भरोसा करो आय? और प्रभु कौ तेज कीपे दिखानो आय? ई काजें बे भरोसा नईं कर पाए, कायसे यशायाह ने फिन भी कई। कि ऊ ने उन की आंखन हां अन्धरो, और उन कौ मन कड़ो कर दओ आय; कहूं ऐसो न होबै, कि बे आंखन से हेरें, और मन से जानें, और मन फिराएं, और मैं उन हां साजो करों। यशायाह ने जे बातें ई लाने कईं, कि ऊ ने ऊ को तेज देखो; और ऊ ने ऊके बारे में बातें कईं। फिन भी हाकिमन में से बिलात ने ऊ पे भरोसा करो, परन्त फरीसियन के डर से बे ऊ की नईं मान रए हते, कहूं ऐसो न होय कि बे प्रार्थना घरन से काड़े जाबें। कायसे उन हां परमेसुर की खुसी से मान्सन की खुसी बिलात प्यारी लगत हती। फिन यीशु ने जोर से कई, जौन मोपे भरोसा करत आय, बो मोय पे नईं, परन्त मोरे पठैबेवाले पे भरोसा करत आय। और जौन मोय हेरत आय, बो ऊहां हेरत आय जीने मोय पठैव आय। मैं ज्योत आंव, और जगत में आओ हों कि जो कोऊ मोय में भरोसाधरै, बो अन्धयारे में न रए। जदि कोऊ मोरी बातें सुनके उन को मानत नईंयां, तो मैं ऊहां दोषी नईं ठहरात, कायसे मैं जगत कौ दोषी ठहराबे नईं, बल्कि जगत कौ उद्धार करबे हां आओ आंव। जौन मोरो ठट्ठा करत आय, और मोरे बोल हां नईं मानत ऊहां दोषी ठहराबे वालो तो एकई आय, जो बचन मैंने कहे आंय, ओई अन्त के दिना में ऊहां दोषी ठहरा है। मैंने अपने लाने कछु नईं कई, परन्त बाप जीने मोय पठैव आय, ओई ने मोय हुकुम दओ आय, कि का कहों और का बोलूं। और मैं जानत आंव, कि ऊ को हुकुम अनन्त जीवन आय, ई लाने मैं जो कछु बोलत आंव, जैसो बाप ने मोय से कई आय, वैसई बोलत आंव। फसह के परब के पेंला यीशु ने जौ जानके, कि मोरी घड़ी आ पहुंची आय, कि मैं संसार हां छोड़ के बाप के ऐंगर जाओं, तो अपनों से जौन संसार में हते, जैसो प्रेम ऊ रखत हतो, उन से अन्त लौ वैसई प्रेम धरें रओ। और खाबे की बेरा, जब शैतान पेंलईं से शमौन के पूत यहूदा इस्करियोती के मन में जौ डाल चुको हतो, कि बो ऊहां दगा से पकड़वाबै। तो यीशु जौ जानत भओ कि बाप ने सब कछु मोरे अधकार में कर दओ आय, और मैं परमेसुर के ऐंगर से आओ आंव, और परमेसुर के ऐंगर लौट के जा रओ आंव। खाबे पे से उठो और अपने उन्ना उतार दए, और गमछा लेके अपनी करयाई बांधी। तब ऊ ने एक बासन में पानू भरो और चेलन के गोड़े पखारे, और जौन गमछा ऊ ने करयाई में बांध रखो हतो, ऊसे उन के गोड़े पोंछन लगो। और जब बो शमौन पतरस के ऐंगर आओ, पतरस ने ऊसे कई, हे पिरभू, काय तें मोरे गोड़े पखारत आय? यीशु ने ऊसे कई, मैं जो करत आंव, तें ऊहां अबै नईं समझत, परन्त तें ईके पछारूं जान है। पतरस ने ऊसे कई, तें मोरे गोड़े कभऊं नईं पखार पे है, यीशु ने ऊसे कई, जदि मैं तोय न पखारों, तो मोरे संग्गै तोरो कछु भी नाता नईं। शमौन पतरस ने ऊसे कई, तो हे पिरभू, मोरे गोड़े अकेले नईं, हाथ और मूड़ हां भी धो दे। यीशु ने ऊसे कई, जीने सपर लओ आय, ऊहां तो अपने गोड़े ही पखारबे की जरूरत आय; कायसे बो पूरो शुद्ध आय और तुम शुद्ध आव; परन्त सब के सब नईं। बो तो ऊहां जानत हतो जौन ऊहां पकड़वाबे वारो हतो, ईसें ऊ ने कई, तुम सब के सब शुद्ध नईंयां। और जब बो उन के गोड़े पखार चुको, और अपने उन्ना पैर के बैठ गओ, तो ऊ ने उन से कई, का तुम समझे कि मैंने तुमाए संग्गै का करो आय? तुम मोय गुरू और प्रभु कहत आव, तुम सही कहत आव, कायसे मैं ओई आंव। जदि मैंने प्रभु और गुरू होत भय तुमाए गोड़े पखारे; तो तुम सोई एक दूसरे के गोड़े पखारियो। कायसे मैंने तुम हां नमूना दिखा दओ आय, कि तुम सोई वैसई करियो, जैसो मैंने तुमाए संग्गै करो। मैं तुम से सांची सांची कहत आंव, कि चाकर अपने मालक से बड़ो नईं; और न पठैव भओ अपने पठैबेवाले से बड़ो होत आय। तुम इन बातन हां जानत आव, और जदि उन पे चलो, तो तुम धन्य आव। मैं तुम सब के बारे में नईं कहत, मैं उन हां जानत आंव जिन हां मैंने चुन लओ आय, पर जौ ई लाने भओ, कि पवित्र शास्त्र कौ बचन पूरो होबै, कि जौन मोरी रोटी खात हतो, ऊ ने मोरे ऊपर लात उठाई। ऐसो होबे से पेंलई मैं तुम हां बता रओ आंव, कि जौ जब पूरो हो जाबै तो तुम भरोसा करो, कि मैं ओई आंव। मैं तुम से सांची सांची कहत आंव, कि जीहां मैं पठैत आंव ऊहां जौन अपनाबै, बो मोय अपनात आय; और जौन मोय अपनात आय, बो मोरे पठैबेवाले हां अपनात आय। जब यीशु जौ कह चुको तो आत्मा में बेचैन भओ और जा गवाही देके कई, मैं तुम से सांची सांची कहत आंव, कि तुम में से एक मोय पकड़वा है। चेले एक दूसरे हां ताकन लगे, कायसे जान नईं सके, कि बो की के लाने कह रओ आय। ऊके चेलन में से एक जीसे यीशु प्रेम करत हतो, यीशु की कोद झुको बैठो हतो। तब शमौन पतरस ने ऊ की कोद इसारो करके ऊसे कई, हम हां बता, बो को आय जीके बारे में तें कह रओ आय? ऊने यीशु की छाती की कोद ओई तरहां झुके भय ऊसे पूछो, हे प्रभु, बो को आय? तब यीशु ने ऊसे कई, जीहां मैं रोटी को टुकड़ा डुबो के देहों, ओई आय। तब ऊ ने रोटी को टुकड़ा डुबो के शमौन इस्करियोती के पूत यहूदा हां दओ। और टुकड़ा लेतई शैतान ऊ में समा गओ, तब यीशु ने ऊसे कई, जो तोहां करने आय, तुरतईं कर। पर जौन मेज पे खाबे हां बैठे हते उन में से कोऊ नईं जान पाओ कि ऊ ने की मतलब से ऐसी कई हती। यहूदा के ऐंगर रुपईयन कौ थैला रहत हतो, ई लाने कछु जा सोच रय हते, कि यीशु ऊसे कह रओ आय, कि परब के लाने जरूरी चीज बस्त हां मोल ले ले, या जा कि कंगालन हां कछु दै दे। तब टुकड़ा लेबे के बाद बो तुरतईं बायरै चलो गओ, और रात की बेरा हती। जब बो बायरें चलो गओ तो यीशु ने कई; अब मान्स के पूत की महिमा भई, और परमेसुर की महिमा ऊ में भई आय। अगर ऊ में परमेसुर की महिमा होत आय, तो परमेसुर भी अपने में ऊ की महिमा कर है और तुरतईं कर है। हे लड़को, मैं और तनक देर तुमाए संग्गै आंव, फिन तुम मोय ढूंढ़ हौ, और जैसो मैंने यहूदियन से कई, तुम से सोई कैत आंव, कि जिते मैं जाबेवालो आंव, उतै तुम नईं आ पा हौ। मैं तुम हां एक नओ हुकम देत आंव, कि तुम एक दूसरे से प्रेम करो: जैसो मैंने तुम से प्रेम करो आय, वैसई तुम भी एक दूसरे से प्रेम करो। जदि तुम आपस में प्रेम कर हौ तो ऐई से सब जान हैं, कि तुम मोरे चेले आव। शमौन पतरस ने ऊसे कई, हे प्रभु, तें किते जात आय? यीशु ने ऊसे कई, जिते मैं जात आंव, तें अबै मोरे पाछें नईं आ सकत! परन्त ईके बाद तें मोरे पाछें आ है। पतरस ने ऊसे कई, हे प्रभु मैं अबै तोरे पाछें काय नईं आ सकत? मैं तो तोरे लाने अपनी जान भी दे दै हों। यीशु ने ऊसे कई, का तें मोरे लाने अपनी जान दै है? मैं तोसे सांची सांची कहत आंव, कि जब लौ तें तीन बेर मोय चीनबे से मना न कर लै है, मुरगा बांग न दै है। तुम घबड़याओ नईं, परमेसुर पे भरोसा धरो और मोय पे भी भरोसा धरो। मोरे बाप के घरै रहबे की बिलात जांगह आंय, अगर नईं होते, तो मैं तुम से कह देतो कायसे मैं तुमाए लाने जांगह तईयार करबे जात आंव। और अगर मैं जाके तुमाए लाने जांगह तईयार कर हों, तो फिन आके तुम हां अपने इते लै जैहों, कि जिते मैं रओं उतईं तुम भी रओ। और जिते मैं जा रओ आंव तुम उते की गैल जानत आव। थोमा ने ऊसे कई, हे प्रभु, हम नईं जानत कि तें किते जा रओ आय? तो गैल कैसे जाने? यीशु ने ऊसे कई, गैल, सत्य और जीवन मैं ही आंव; बिना मोरे कोऊ बाप के ऐंगर नईं जा पा है। जदि तुम ने मोय जानो होतो, तो मोरे बाप हों सोई जानते, अब ऊहां जानत आव, और ऊहां हेरो भी आय। फिलिप्पुस ने ऊसे कई, हे प्रभु, बाप हां हम हां दिखा दे, जौई हमाए लाने बिलात आय। यीशु ने ऊसे कई; हे फिलिप्पुस, मैं इतेक दिना से तुमाए संग्गै आंव फिन भी तुम मोय नईं जानत? जीने मोय जानो आय ऊ ने बाप हां सोई जानो आय: तें काय कहत आय कि बाप हां हम हां दिखा दे? का तें भरोसा नईं करत, कि मैं बाप में आंव और बाप मोय में आय? जौन बातें मैं तुम से कहत आंव, बो अपनी कोद से नईं कहत, परन्त बाप जौन मोय में रहत आय, ओई अपनो काज करत आय। मोरो भरोसा करो, कि मैं बाप में आंव; और बाप मोय में आय; नईं तो काम देख के मोरो भरोसा करो। मैं तुम से सांची सांची कहत आंव, कि जौन मोय में भरोसा करत आय, बे काज जौन मैं करत आंव बो भी कर है, और ईसे भी बड़े काज कर है, कायसे मैं बाप के ऐंगर जात आंव। और जो कछु तुम मोरे नाओं से मांग हौ, ओई बो कर है कि पूत से बाप की महिमा होबै। जदि तुम मोसे मोरे नाओं में कछु मांग हौ, तो मैं ऊहां दै हों। जदि तुम मोसे प्रेम रखत आव, तो मोरी अग्या को मान हौ। और मैं बाप से बिनती कर हों, और बो तुम हां एक और संग्गी दै है, कि बो सदा तुमाए संग्गै रए। यानि सत्य कौ आत्मा, जीहां संसार ग्रहण नईं कर सकत, कायसे बो ऊहां नईं देखत आय और न चीनत आय: तुम ऊहां चीनत आव, कायसे बो तुमाए संग्गै रहत आय, और बो तुमाए भीतरे हुईये। मैं तुम हां अनाथ नईं छोड़ हों, मैं तुमाए ऐंगर आत आंव। तनक देर पाछें संसार मोय फिन नईं तक है, परन्त तुम मोय तक हौ, ई लाने की मैं जीयत आंव, और तुम भी जीयत रै हौ। ऊ दिना तुम जान जै हो, कि मैं अपने बाप में आंव, और तुम मोय में और मैं तुम में आंव। जीके ऐंगर मोरो हुकुम आय, और बो ऊ को मानत आय, ओई मोसे प्रेम करत आय, और जौन मोय से प्रेम करत आय, ऊसे मोरो बाप प्रेम कर है, और मैं ऊसे प्रेम कर हों, और अपने आपई हां ऊ पै दरसा हों। यहूदा जौन इस्करियोती नईं हतो, ऊ ने कई, हे प्रभु, ऐसो का भओ आय, कि तें अपने आप हां हम पे दरसाव चाहत आय, और जगत पे नईं? यीशु ने ऊसे कई, जदि कोऊ मोय से प्रेम करत आय, तो बो मोरे बचन हां मान है, और मोरो बाप ऊसे प्रेम कर है, और हम ऊके ऐंगर आ हैं, और ऊके संग्गै बस हैं। जौन मोसे प्रेम नईं करत, बो मोरे बचन को नईं मानत, और जौन बचन तुम सुनत आव, बो मोरो नईं परन्त बाप कौ आय, जीने मोय पठैव है। जौ बतकाव तुमाए संग्गै रहत भए मैंने तुम से करो। परन्त संग्गी यानि पवित्र आत्मा जीहां बाप मोरे नाओं में पठै है, बो तुम हां सब बातें सिखा है, और सब कछु जौन मैंने तुम से कई आय, तुम हां खबर करा है। मैं तुम हां सान्ति दएं जात आंव, अपनी सान्ति तुम हां देत आंव, ऐसो नईं देत जैसे संसार तुम हां देत आय, तुमाओ मन बेचैन न होए और न डराए। तुम ने सुनो, कि मैंने तुम से कई, मैं जा रओ आंव, और फिन तुमाए ऐंगर आ हों: जदि तुम मोसे प्रेम करते, तो खुस होते, कि मैं बाप के ऐंगर जात आंव कायसे बाप मोसे बढ़ के आय। और ईके होबे से पेंला मैंने तुम हां बता दओ आय, कि जब जौ हो जाबे, तो तुम भरोसा करो। मैं तुम से अब और बिलात बातें न कै हों, कायसे ई जगत कौ हाकिम आ रओ आय, और मोय में ऊ को कछु नईंयां। परन्त जौ ई लाने भओ कि संसार जान ले कि मैं बाप से प्रेम करत आंव, और जी तरहां बाप ने मोय हुकुम दओ आय, वैसई मैं ऊ को पालन करत आंव, उठो, इते से चलें। सच्ची दाख की बेल मैं आंव; और मोरो बाप किसान आय। जो डार मोय में आय, और नईं फलत, ऊहां बो काट डालत आय, और जौन फलत आय, ऊहां बो छांटत आय कि और फले। तुम तो ऊ बचन के काजें जौन मैंने तुम से कई आय, शुद्ध हो गए हौ। तुम मोय में बने रओ और मैं तुम में, जैसे डाल जदि दाख की बेल से नईं जुड़ी रैत, तो बो अपने आप नईं फलत, वैसई तुम भी अगर मोय में जुड़े न रए तो नईं फल सकत। मैं दाख की बेल आंव, तुम डालियां आव; जौन मोय में लगो रहत आय और मैं ऊ में, बिलात फल फलत आंय, कायसे मोसे दूर होकें तुम कछु नईं कर सकत। जदि कोई मोय में बनो नईं रै है, तो बो डाली की घांईं मेंक दओ जै है, और सूख जै है; और मान्स ऊहां जमा करके आगी में बार दें हैं, और बे बर जै हैं। जदि तुम मोय में बने रै हौ, और मोरी बातें तुम में बनी रै हैं, तो जौन मांग हौ बो तुमाए लाने हो जै है। मोरे बाप की बड़ाई ऐई से होत आय, कि तुम बिलात फल लाओ, तब तुम मोरे चेले कहा हौ। जैसे बाप ने मोसे प्रेम करो आय, वैसई मैंने सोई तुम से प्रेम करो आय, मोरे प्रेम में बने रहियो। जदि तुम मोरे हुकुम कौ पालन कर हौ, तो तुम मोरे प्रेम में बने रै हौ, वैसई जैसो मैंने अपने बाप के हुकम को मानो है, और ऊके प्रेम में बनो रहत आंव। जे बातें मैंने तुम से ई लाने कईं आंय, कि तुम में मोरी खुसी बनी रैबें, और तुमाई खुसी पूरी हो जाबै। मोरो हुक म जौ आय, कि जैसे मैंने तुम से प्रेम करो, वैसई तुम सोई एक दूसरे से प्रेम करो। ईसे बड़ो प्रेम और कोऊ कौ नईंयां, कि कोऊ अपने संगी के लाने अपनो प्राण दैबे। जौन हुकम मैं तुम हां देत आंव, अगर ऊहां मानो, तो तुम मोरे चेला कहा हौ। अब से मैं तुम हां गुलाम नईं कै हों, कायसे गुलाम नईं जानत, कि ऊ को मालक का करत आय, परन्त मैंने तुम हां संगी कहो आय, कायसे बे सब बातें जौन मैंने अपने बाप से सुनी आंय, तुम हां बता दईं आंय। तुम ने मोय नईं चुनो, परन्त मैंने तुम हां चुनो है और तुम हां बताओ, कि तुम फल लाओ; और तुमाओ फल बनो रए, कि तुम मोरे नाओं से जो कछु बाप से मांगो, बो तुम हां देबे। मैं तुम हां जे हुकम ई लाने देत आंव, कि तुम एक दूसरे से प्रेम करो। जदि जगत तुम से बैर रखत आय, तो तुम जानत आव, कि ऊ ने तुम से पेंला मोसे बैर रखो आय। जदि तुम संसार के होते, तो संसार अपनों से प्रेम करतो, परन्त ईसे कि तुम संसार के नईं आव, पर मैंने तुम हां संसार में से नबेर के बायरें काड़ लओ आय, ई लाने संसार तुम से बैर रखत आय। जो बात मैंने तुम से कई हती, खबर धरियो, गुलाम अपने मालक से बड़ो नईं होत। जदि उन ने मोय सताव, तो बे तुम हां सोई सता हैं; जदि उन ने मोरी बात मानी, तो बे तुमाई भी मान हैं। परन्त जे सब बातें, बे मोरे नाओं के काजें तुमाए संग्गै कर हैं, कायसे बे ऊहां नईं चीनत जीने मोय पठैव। जदि मैं नईं आतो और उन से बतकाव नईं करतो, तो बे पापी नईं ठहरते, पर अब अपने पाप के लाने उन के ऐंगर कोई बहानो नईंयां। जौन मोय से बैर रखत आय, ऊ मोरे बाप से भी बैर रखत आय। अगर मैं उन के बीच बे काज नईं करतो, जिन हां और कोई ने नईं करो तो बे पापी नईं ठहरते, पर अब तो उन ने मोय और मोरे बाप हां तको आय, और दोई से बैर करो आय। और ऐसो ई लाने भओ, कि बो बचन पूरो होबै, जौन उन की रीतियन में लिखो आय, कि उन ने मोसे व्यर्थ बैर करो। पर जब बो संग्गी आ है, जीहां मैं बाप की कोद से तुमाए ऐंगर पठै हों, यानि सत्य कौ आत्मा जौन बाप से कड़त आय, तो बो मोरी गवाह दै है। और तुम भी गवाही आव कायसे तुम शुरू से मोरे संग्गै रए आव। जे बातें मैंने तुम से ई लाने कईं कि तुम ठोकर खाबे से बचे रओ। बे तुम हां प्रार्थनाघरन से काड़ दें हैं, बल्कि बा बेरा आ रई आय, कि जो कोऊ तुम हां मार डाल है, बो जान है कि मैं परमेसुर के लाने कर रओ आंव। और बे ऐसो ई लाने कर हैं कायसे उन ने न बाप हां जानो और न मोय। और जे बातें मैंने ई लाने तुम से कईं, कि जब उन की बेरा आए तो तुम खबर रखियो, कि मैंने तुम हां ईके बारे में बता दओ हतो: और जे बातें मैंने तुम से शुरू से ई लाने नईं कईं, कायसे मैं तुमाए संग्गै हतो। अब मैं अपने पठैबेवाले के ऐंगर जा रओ आंव और तुम में से कोऊ मोय से नईं पूंछत, कि तें किते जा रओ आय? परन्त मैंने जो बातें तुम से कईं आंय, ई लाने तुमाओ मन दुख से भर गओ आय। तौभी मैं तुम से सांची सांची कहत आंव, कि मोरो जाबो तुमाए लाने साजो आय, कायसे जदि मैं नईं जा हों, तो ऊ सहायक तुमाए ऐंगर न आहै, पर जदि मैं जा हों, तो ऊहां तुमाए ऐंगर पठै दें हों। और जब बो आ है तो जगत हां पाप और धर्म और न्याव के बारे में निरुत्तर कर दै है। पाप के बारे में ई लाने कि बे मोय पे भरोसा नईं करत। धर्म के बारे में ई लाने कि मैं बाप के ऐंगर जात आंव। और तुम मोय फिन नईं देख हौ: न्याव के बारे में ई लाने कि संसार कौ हाकिम दोषी ठहराओ गओ आय। मोय तुम से और भी बिलात बातें कैने आंय, पर तुम अबै ऊहां सह नईं सकत आव। पर जब बो यानि सत्य कौ आत्मा आ है, तो बो तुम हां सब सत्य की गैल बता है, कायसे बो अपनी कोद से कछु नईं कै है, पर जो कछु सुन है, ओई कह है, और आबेवाली बातन हां तुमें बता है। बो मोरी बड़वाई कर है, कायसे बो मोरी बातन हां तुमें बता है। जौन कछु बाप कौ आय, बो सब मोरो आय; ई लाने मैंने कई, कि बो मोरी बातन हां लेके तुम पे दरसा है। तनक बेरा में तुम मोय नईं देख हौ, और फिन तनक बेरा में तुम मोय देख हौ? तब ऊके चेलन में से कछु ने आपस में कई, जा का बात आय, जौन बो हम से कह रओ आय, कि तनक बेरा में तुम मोय न देख हौ, और फिन तनक बेरा में तुम मोय देख हौ? कायसे मैं बाप के ऐंगर जात आंव? तब उन ने कई, तनक बेरा में, जौन बो कहत आय, का बात आय? हम नईं जानत, कि बो का कह रओ आय। यीशु ने जौ जानके, कि बे मोय से पूछबो चाहत आंय, उन से कई, का तुम ई बात के बारे में आपस में सोच विचार कर रए आव, जौन मैंने कई, कि तनक बेरा में तुम मोय न देख हौ, और फिन तनक बेरा में तुम मोय देख हौ? मैं तुम से सांची सांची कैत आंव; कि तुम रो हौ और दुख मना हौ, परन्त संसार खुसी मना है, तुम दुखी हुईयो पर तुमाओ दुख खुसी में बदल जै है। जब कोई जनानी हां बच्चा जनबे को पिरातो होत आय, तो ऊहां दुख होत आय, कायसे ऊ की दुख की बेरा आ पोंची आय, परन्त जब बो बच्चे हां जन चुकत आय तो ऊ पीड़ा हां ई खुसी से कि संसार में एक मान्स पैदा भओ आय, ऊ पीड़ा हां बिसर जात है। ई लाने तुम हां भी अबै तो दुख आय, पर मैं तुम से फिन मिल हों और तुमाए मन खुस हुईयें; और तुमाई खुसी हां कोई तुम से छिना नईं लै है। ऊ दिना तुम मोसे कछु नईं पूंछ हौ, मैं तुम से सांची सांची कहत आंव, जदि तुम बाप से कछु भी मांग हौ, तो बो ऊहां मोरे नाओं से तुम हां दै है। अब लौ तुम ने मोरे नाओं से कछु नईं मांगो; मांग हौ तो तुम हां मिल है जीसे तुमाई खुसी पूरी हो जाए। जे बातें मैंने तुम से कनौत में क ईं आंय, परन्त बा घड़ी आ रई आय, जब मैं फिन तुम से कनौत में नईं कै हों, परन्त तुम हां बाप के बारे में साफ बता दै हों। ऊ दिना तुम मोरे नाओं से मांग हौ, मैं तुम से जौ नईं कैत, कि तुमाए लाने बाप से बिनती कर हों। कायसे बाप खुद तुम से प्रेम करत आय, ई लाने कि तुम ने मोय से प्रेम करो आय, और जे भरोसा करो आय, कि मैं बाप में से कड़ के आओ आंव। मैं बाप में से कड़के संसार में आओ आंव, मैं फिन संसार हां छोड़के बाप के ऐंगर जा रओ आंव। ऊके चेलन ने कई, अब तें साफ कह रओ आय, और कनौत नईं कह रओ। अब हम जानत आंय, कि तें सब कछु जानत आय, और ई की जरूरत नईंयां, कि कोऊ तोय से कछु पूंछे, ईसे हम भरोसा करत आंय, कि तें परमेसुर से कड़ो आय। जा सुन के यीशु ने कई, का तुम अब भरोसा करत आव? तको, बो घड़ी आ रई आय बल्कि आ पोंची कि तुम फैल फुट होकें अपने अपने घरन हां भग जै हौ, और मोय अकेलो छोड़ दै हौ, फिन भी मैं अकेलो नईं हुईयों कायसे बाप मोरे संग्गै आय। जे बातें मैंने तुम से ई लाने कई आंय, कि तुम मोय में सान्ति पाओ; संसार में तुम हां दुख होत आय, परन्त हिम्मत बांधो, मैंने जगत हां जीत लओ आय। यीशु ने जे बातें कह के अपनी आंखन हां आकास कोद उठा के कई, हे बाप, बो बेरा आ पहुंची आय, अपने पूत की बड़ाई कर, कि पूत भी तोरी बड़ाई करे। कायसे तेंने तो ऊहां सब प्राणियों पे हक दओ आय, कि बो उन सब हां जिन हां तेंने ऊहां दओ आय, उन सब हां अनन्त जीवन देबे। और अनन्त जीवन जौ आय, कि बे तोय जौन एकई सांचो परमेसुर और यीशु मसीह हां जानें, जीहां तेंने पठैव आय। जौन काज तेंने मोय करबे हां दओ हतो, ऊहां पूरो करके मैंने धरती पे तोरी महिमा करी आय। और हे बाप, अब तें अपने संग्गै मोरी महिमा, ऊ महिमा से कर जौन जगत के जन्म से पेंला, तोरे संग्गै मोरी हती। मैंने तोरो नाओं उन मान्सन हां बताओ जिन हां तेंने संसार में से मोय दओ हतो: बे तोरे हते और तेंने उन हां मोय दओ और उन ने तोरे बचन हां मान लओ आय। अब बे जान गए आंय, कि जौन कछु तेंने मोय दओ आय, बो सब तोरी कोद से आय। कायसे जो बातें तेंने मोय दईं, मैंने उन हां कै दओ आय, और उन ने उन बोलन हां मान लओ और सही में जान लओ आय, कि मैं तोसें कड़ो आंव, और उन ने भरोसा करो आय कि तेंने ही मोय पठैव आय। मैं उन के लाने बिनती करत आंव, जगत के लाने बिनती नईं करत आंव परन्त उन के लाने जिन हां तेंने मोय दओ आय, कायसे बे तोरे आंय। और जो कछु मोरो आय बो सब तोरो आय, और जौन तोरो आय, बो मोरो आय; और इन से मोरी महिमा दिखात आय। अब मैं संसार में नईं रै हों, परन्त बे संसार में रै हैं, और मैं तोरे ऐंगर आत आंव; हे पवित्र बाप, अपने ऊ नाओं से जौन तेंने मोय दओ आय, उन की सुध ले, कि जैसे हम एक आंय बे सोई एक होबें। जब मैं उन के संग्गै हतो, तो मैंने तोरे ऊ नाओं से, जौन तेंने मोय दओ आय, उन की सुध लई, और नास के (शैतान) पूत हां छोड़ उन में से कोऊ नास नईं भओ, ई लाने कि पवित्र शास्त्र की बात पूरी होबै। परन्त अब मैं तोरे ऐंगर आत आंव, और जे बातें जगत में कहत आंव, कि बे अपने में मोरी खुसी पूरी पाबें। मैंने उन हां तोरो बचन कै दओ आय, और संसार ने ऊहां नईं मानो, कायसे जैसो मैं संसार कौ नईंयां, वैसई बे सोई संसार के नईंयां। मैं तोसे जा बिनती नईं करत हों, कि तें उन हां संसार से उठा ले, परन्त जौ कि तें उन हां ऊ दुष्ट से बचाए रखिये। बे संसार के नईं आंय, जैसो कि मैं भी संसार कौ नईं आंव। सत्य से उन हां पवित्र कर, तोरो बचन सत्य आय। जैसे तेंने मोय संसार में पठैव, मैंने सोई उन हां संसार में पठैव आय। और उन के लाने मैं अपने खुद हां पवित्र करत आंव, कि बे सत्य के द्वारा पवित्र करे जाबें। मैं केवल इनई के लाने बिनती नईं करत, परन्त उन के लाने भी जौन इन के बचन सुन के मोपे भरोसा कर हैं, कि बे सब एक होबें। जैसो हे बाप तें मोय में आय, और मैं तोय में आंव, वैसई बे भी हम में होबें, जीसे कि संसार भरोसा करे, कि तेंने मोय पठैव आय। और बो महिमा जौन तेंने मोय दई आय, मैंने उन हां दई आय कि बे वैसई एक होंय, जैसे हम एक आंय। मैं उन में और तें मोय में, कि बे सिद्ध होकें एक हो जाबें, जीसे संसार जानें कि तेंने मोय पठैव, और जैसो तेंने मोय से प्रेम करो, वैसई उन से भी प्रेम करो। हे बाप, मोरी चाहना आय कि जिन हां तेंने मोय दओ आय, जिते मैं आंव, उते सोई मोरे संग्गै रएं कि बे मोरी ऊ महिमा हों तक सकें, जीहां तेंने मोय दई आय, कायसे तेंने संसार के जन्म से पेंला मोय से प्रेम करो। हे धर्म बाप, संसार ने तोय नईं जानो, परन्त मैंने तोय जानो और इन ने सोई तोय जानो कि तेंने ही मोय पठैव आय। और मैंने तोरो नाओं इन हां बताओ और बतात रै हों की जो प्रेम तेंने मोय से करो, बो प्रेम उन में रैबे और मैं उन में रहों। जब यीशु जे बातें कह चुको, तो बो अपने चेलन के संग्गै किद्रोन नाले के ऊ पार गओ, जिते एक बगीचा हतो, जीमें बो और ऊके चेले गए। यहूदा भी जौन ऊहां पकड़वाबे पे हतो ऊ जांगह जानत हतो, कायसे यीशु बिलात बेर अपने चेलन के संग्गै उते जात हतो। तब यहूदा पलटन हां और महापुरोहितन और फरीसियन की कोद से सिपाहियन हां लेके, उते लालटेन, मशालें और हथियारों समेंत आओ। तब यीशु उन सब बातन हां जौन ऊ पे होबेवाली हतीं, जानके आंगू बढ़ो, और उन से कई, तुम की हां ढूंढ़त आव? उन ने कई, यीशु नासरी हां: यीशु ने उन से कई, मैं आंव: और यहूदा भी जौन ऊहां पकड़वाबे पे हतो, ऊ न के संग्गै ठांड़ो हतो। जब ऊ ने उन से जा कई, मैं आंव, तो बे पाछें हटे और धरती पे गिर पड़े। तब ऊ ने फिन पूंछी, तुम कीहां ढूंढ़त आव? उन ने कई, यीशु नासरी हां। यीशु ने उन से कई, मैं तुम से बता दओ कि मैं ही आंव, जदि तुम मोय ढूंढ़त आव तो इन हां जान दो। जौ ई लाने भओ, कि बो बचन पूरो होबै, जौन ऊ ने कई हती कि जिन हां तेंने मोय दओ, उन में से मैंने एक हां भी नईं खोओ। शमौन पतरस ने जौन तलवार लएं हतो, ऊहां निकाल के महापुरोहित के चाकर पे चलाई और ऊ को दायनो कान काट डालो, ऊ चाकर कौ नाओं मलखुस हतो। यीशु ने पतरस से कई, तलवार हां म्यान में धर, जौन प्यालो बाप ने मोय दओ आय का मैं ऊहां नईं पियों? तब रोमी सेना के दल और सेनापति और यहूदियन के सिपाहियन ने यीशु हां पकड़ के बांध लओ। और पेंला ऊहां हन्ना के ऐंगर ले गए, कायसे बो ऊ बरस के महापुरोहित काइफा कौ ससुर हतो। जौ काइफा ही हतो, जीने यहूदियन हां सलाह दई हती कि हम लोगन के लाने एक मान्सन हां मरबो साजो आय। शमौन पतरस और एक और चेला यीशु के पाछें हो लए, जौ चेला महापुरोहित कौ चिनार को हतो और यीशु के संग्गै महापुरोहित के आंगन में गओ। परन्त पतरस बायरै द्वार पे ही ठांड़ो रहो, तब बो दूसरो चेला जौन महापुरोहित कौ चिनार को हतो, बाहर कड़ो, और द्वारपालिन से कहके, पतरस हां भीतर ले आओ। तब चाकरनी जौन द्वारपालिन हती, पतरस से कई, का तें सोई ई मान्स के चेलन में से आय? ऊ ने कई, मैं नईं आंव। उतईं पे चाकर और सिपाही कोयला की सिगड़ी बारके ठांड़े ताप रए हते, कायसे जाड़ो हतो और पतरस भी उन के संग्गै ठांड़ो ताप रओ हतो। तब महापुरोहित ने यीशु से ऊके चेलन और ऊ की सीख के बारे में पूंछी? यीशु ने ऊसे कई, मैंने संसार में खुल के बातें करीं आंय; मैंने सदा प्रार्थनाघरन और मन्दर में जिते सब यहूदी जमा होत हते सीख दई आय, और मैंने लुक के कछु भी नईं कई। तें मोय से काय पूंछत आय? सुनबेवालन से पूंछ ले, कि मैंने उन से का कई? हेर, जे जानत आंय; कि मैंने का का कई? जब ऊ ने जा कई, तो ऐंगर ठांड़े सिपाहियन में से एक ने जा कहत भय, ऊहां ठूंसा मारो, तें महापुरोहित से ऐंसो बोलत आय? यीशु ने ऊसे कई, जदि मैंने गलत कई, तो ऊहां साबित कर; अगर सही कई आय, तो तें मोय काय मारत आय? तब हन्ना ने ऊहां काइफा महापुरोहित के ऐंगर बंधो भओ पठै दओ। शमौन पतरस ठांड़ो भओ ताप रओ हतो। तब उन ने ऊसे कई; का तें सोई ऊके चेलन में से आय? ऊ ने मेंट के कई, मैं नईं आंव। महापुरोहितन के चाकरन में से एक ने जौन ऊ मान्स कौ नातेदार हतो, जीको कान पतरस ने काट डालो हतो, कई, मैंने तोहां बगीचा में ऊके संग्गै तको हतो? तब पतरस फिन मेंट गओ और तुरतईं मुरगा ने बांग दई। और बे यीशु हां काइफा के ऐंगर से राजमहल में लै गए और भुनसारे की बेरा हती, परन्त बे खुद राजमहल में नईं पिड़े, कहूं अशुद्ध न हो जाबें ताकि फसह खा सकें। तब पीलातुस बायरें कड़ के उन के ऐंगर आओ और कई, तुम ई मान्स पे का दोष लगात आव? उन ने ऊसे कई, जदि जौ मान्स कुकर्मी न होतो तो हम ऊहां तोरे इते नईं लियाते। पीलातुस ने उन से कई, तुम खुद ईहां ले जाके अपनी रीतियन के अन्सार ईको न्याव करो: यहूदियन ने ऊसे कई, हम कोऊहां मृत्युदन्ड नईं दे सकत आंय। जौ ई लाने भओ, कि यीशु की बा बात पूरी होबै, जौन ऊ ने जौ इसारो करत भय कही हती, कि ऊ की मृत्यु कैसी हुईये। तब पीलातुस फिन राजमहल में भीतर गओ और यीशु हां टेरवाओ, और ऊसे कई, का तें यहूदियन को राजा आय? यीशु ने ऊसे कई, का तें जा बात अपनी कोद से कह रओ आय या औरन ने मोरे बारे में तोय बताओ? पीलातुस ने यीशु से कई, का मैं यहूदी आंव? तोरी ही जात और महापुरोहितन ने तोय मोरे हाथन में सौंपो आय, तेंने का करो आय? यीशु ने पीलातुस से कई, मोरो राज्य ई संसार कौ नईंयां, जदि मोरो राज्य ई जगत को होतो, तो मोरे राज्य के हाकिम लड़ाई करते, और मैं यहूदियन के हाथ नईं सौंपो जातो: परन्त मोरो राज्य ई जगत कौ नईंयां। पीलातुस ने यीशु से कई, तो का तें राजा आय? यीशु न ऊसे कई, तें सही कहत आय कि मैं राजा आंव; मैंने ई लाने जन्म लओ, और ई लाने जगत में आओ कि सत्य की गवाही देओं, जो कौनऊं सत्य कौ आय, मोरी बानी सुनत आय। पीलातुस ने ऊसे कई, सत्य का आय? और जब बो जौ कह चुको, तो बो फिन यहूदियन के ऐंगर बायरें गओ और उन से कई, मैं ऊ में कोऊ दोष नईं देखत। पर तुमाई रीत आय कि फसह के दिना मैं तुमाए लाने एक जन हां छोड़ देओं, का तुम चाहत आव कि मैं तुमाए लाने यहूदियन के राजा हां छोड़ देओं? तब उन ने फिन चिल्या के कई, ई मान्स हां नईं परन्त हमाए लाने बरअब्बा हां छोड़ दे; और बरअब्बा एक डाकू हतो। तब पीलातुस ने यीशु हां लेके कोड़े लगवाए। और सिपाहियन ने कांटों कौ मुकुट गूंथ के ऊके मूड़ पे धरो, और ऊहां बैंजनी रंग के उन्ना पहिराए। और बे ऊके ऐंगर आ-आके कहन लगे, हे यहूदियन के राजा, प्रणाम! और ऊहां थप्पड़ मारन लगे। तब पीलातुस ने फिन बायरें कड़ के उन से कई, तको, मैं ऊहां बायरें तुमाए ऐंगर ला रओ आंव, जीसे कि तुम जान लेओ कि मैं ऊ में कोऊ दोष नईं पात। तब यीशु कांटों कौ मुकुट और बैंजनी उन्ना पहिरें भए बायरें आओ और पीलातुस ने उन से कई, तको, जौ मान्स। जब महापुरोहितन और सिपाहियन ने ऊहां हेरो, तो चिल्या के कई, कि ऊहां क्रूस पे चढ़ाओ, क्रूस पे: पीलातुस ने उन से कई, तुमईं ऊहां ले जाओ और क्रूस पे चढ़ाओ; कायसे मैं ऊमें कोऊ दोष नईं पात। यहूदियन ने ऊसे कई, हमाई भी रीतियां आंय और ऊ रीतियन के अन्सार ईहां मृत्यु दन्ड मिलबो चईये, कायसे ऊ ने अपने हां परमेसुर कौ पूत कहो। जब पीलातुस ने जा बात सुनी तो और भी डरा गओ। तब फिन राजमहल के भीतरै जाके यीशु से कई, तें किते कौ आय? पर यीशु ने ऊहां कछु नईं बोलो। तब पीलातुस ने ऊसे कई, तें मोसे काय नईं बोलत आय? का तें नईं जानत कि तोय छोड़ देबे और क्रूस पे चढ़ाबे कौ हक मोय आय? यीशु ने कई, अगर तोय ऊ परै से नईं दओ जातो, तो तोरो मोय पे कोऊ हक नईं होतो; ई लाने जीने मोय तोरे हाथन सौंपो आय, ऊ को पाप बिलात आय। ईसे पीलातुस ने ऊहां छोड़ देबे की कोसिस करी, पर यहूदियन ने चिल्ला चिल्ला के कई, जदि तें ई मान्स हां छोड़ दै है तो तें कैसर के राज्य कौ भक्त नईंया; जो कोई अपने हां राजा कैत आय बो कैसर कौ सामना करत आय। पीलातुस जे बातें सुनके यीशु हां बायरें ले आओ और न्याव सिंहासन पे बैठ गओ, यानि ऊ जांगह पे, जौन चोंतरा इब्रानी में गब्बता कहलात हतो। जौ फसह की तईयारी कौ दिन हतो और करीब बारह बजे हते, तब ऊ ने यहूदियन से कई, तको, जौई आय तुमाओ राजा! ईपे बे चिल्या के बोले ले जा! ले जा! ईहां क्रूस पे चढ़ाओ: पीलातुस ने उन से कई, का मैं तुमाए राजा हां क्रूस पे चढ़ाओं? महापुरोहितन ने ऊसे कई, कैसर हां छोड़ हमाओ कोऊ राजा नईंयां। तब ऊ ने क्रूस पे चढ़ाबे के लाने, ऊहां उन के हाथ में सौंप दओ। तब बे यीशु हां ले गए। और बो अपनो क्रूस उठाए भय ऊ जांगह लौ बाहरें गओ, जौन खोपड़ी की जांगह कहलात आय और जीहां इब्रानी में गुलगुता कहत आंय। उते उन ने ऊहां और ऊके संग्गै दो और मान्सन हां क्रूस पे चढ़ाओ, एक हां ई कोद और दूसरे हां ऊ कोद, और बीच में यीशु हां। और पीलातुस ने एक दोष-पट्टी लिख के क्रूस पे लगा दई, जीपे जौ लिखो भओ हतो, यीशु नासरी यहूदियन कौ राजा। बा दोष-पट्टी बिलात यहूदियन ने बांची, कायसे बा जांगह जिते यीशु क्रूस पे चढ़ाओ गओ हतो, नगर के लिगां हतो और इब्रानी और लतीनी और यूनानी भाषा में लिखो गओ हतो। तब यहूदियन के बड़े पुरोहित पीलातुस से कैन लगे, यहूदियन कौ राजा नईं लिख पर जौ कि “ऊ ने कई, मैं यहूदियन कौ राजा आंव”। पीलातुस ने उन से कई, मैंने जो लिख दओ, सो लिख दओ। जब सिपाहियन ने यीशु हां क्रूस पे चढ़ा दओ, तो उन ने ऊके ऊ परी उन्ना हां उतारो और ऊके चार हिस्सा करे, हर एक सिपाही के लाने एक एक हिस्सा, ऐंसई कुरता भी लओ, कुरता बिना सियें ऊ परै से खालें लौ बुनो भओ हतो: ई लाने उन ने एक दूसरे से कई, हम ईहां नईं फाड़ें, पर ईके लाने चिट्ठी डालें कि जौ की को हुईये। जौ ई लाने भओ, कि पवित्र शास्त्र की बात पूरी होबै, कि उन ने मोरे उन्ना आपस में बांट लए और मोरे उन्ना पे चिठिया डालीं: ई लाने सिपाहियन ने ऐसई करो। पर यीशु के क्रूस के ऐंगर, ऊ की मताई और ऊ की मताई की बहन मरियम, क्लोपास की पत्नी और मरियम मगदलीनी ठांड़ी हती। यीशु ने अपनी मताई और ऊ चेला हां जीसे बो प्रेम करत हतो, ऐंगर ठांड़े भए हेरो और अपनी मताई से कई; हे नारी, हेर, जौ तोरो पूत आय। तब ऊ चेला से कई, जा तोरी मताई आय, और ओई बेरा से बो चेला ऊहां अपने घरै लिवा गओ। ईके पाछें यीशु ने जौ जानके कि सब कछु पूरो हो गओ आय; ई लाने कि पवित्र शास्त्र की बात पूरी होय कई, मैं प्यासो आंव। उते सिरका से भरो एक बासन धरो हतो, तब उन ने सिरका में भीगो भओ स्पंज हां जूफा के टहनी पे धरो, और ऊके मों से लगाओ। जब यीशु ने बो सिरका लओ, तो कई, पूरो भओ और ऊ ने मूड़ नवा के प्राण छोड़ दए। और ई लाने कि बो तईयारी कौ दिना हतो, यहूदियन ने पीलातुस से बिनती करी, कि उन के गोड़े तोड़ दएं जाबें और उन हां उतार दओ जाबे, जीसे कि सब्त के दिना उन की लाशें क्रूस पे नईं रएं। ई लाने सिपाहियन ने आके पेंला की टांगें तोड़ीं और फिन दूसरां की, जौन ऊके संग्गै क्रूस पे चढ़ाए गए हते। पर जब उन ने यीशु के ऐंगर आके तको कि बो मर चुको आए, तो ऊ की टांगें नईं तोड़ी। परन्त सिपाहियन में से एक ने भाला से ऊ को पंजर छेदो और तुरतईं ऊ में से खून और पानू बहन लगो। जीने जौ तको, ओई ने गवाही दई आय, और ऊ की गवाही सांची आय; बो खुद जानत आय, कि सांची कहत आय कि तुम भी भरोसा करो। जे बातें ई लाने भईं कि पवित्र शास्त्र की जा बात पूरी होय कि ऊ की कोई हड्डी तोड़ी नईं जै है। फिन पवित्र शास्त्र के एक दूसरे जांगा में लिखो आय, जीहां उन ने छेदो आय, बे ऊ पै नजर धर हैं। इन बातन के पाछें अरमतियाह के युसुफ ने, जो यहूदियन से डरात हतो, यीशु कौ छिपो चेलो हतो, पीलातुस से बिनती करी, कि ऊहां यीशु की लाश हां ले जाबे की मंजूरी मिले, और पीलातुस ने मंजूरी दे दई, तब बो यीशु की लाश हां ले गओ। नीकुदेमुस भी जौन पेंला रात को यीशु के ऐंगर गओ हतो करीब चालीस किलो मिलो भओ गन्धरस और एलवा लेके आओ। तब उन ने यीशु की लाश हां लओ और यहूदियन के गाड़े जाबे की रीत से ऊहां सुगन्धदार इतर के संग्गै कफन में लपेटो। ऊ जांगह पे जिते ऊहां क्रूस पे चढ़ाओ गओ हतो, एक बगीचा हतो; और ऊ बगीचा में एक नईं कबर हती; जीमें अबै लौ कोऊहां नईं धरो गओ हतो। तब यहूदियन की तईयारी के दिना के कारन और ई लाने कि बो कबर ऐंगर हती, उन ने यीशु हां ओई में धर दओ। हफ्ताह के पैले दिना मरियम मगदलीनी बड़े भुनसारे जब अन्धयारा ही हतो कबर पे आई, तो ऊ ने पत्थरा हां कबर पै से हटो भओ तको। तब बो गदबद देके शमौन पतरस और दूसरे चेला जीसे यीशु प्रेम करत हतो, उन के ऐंगर आके कई, बे प्रभु हां कबर में से काड़ ले गए आंय; और हम नईं जानत, कि उन ने ऊहां किते धर दओ आय। तब पतरस और दूसरो चेला झटपट कबर की कोद गए। बे दोई संगै संगै गदबद दे रए हते, पर दूसरो चेला पतरस से तेज गदबद देके कबर पे पैलईं पोंच गओ। ऊ ने नब के भीतर तको और उन्ना हां अलग पड़े हेरो, पर बो भीतर नईं गओ। तब शमौन पतरस भी ऊके पाछें पाछें उते आ पोंचो और कबर के भीतर जाके, ऊ ने उन्ना हां पड़े हेरो। और ऊ अंगोछा जीसे यीशु कौ मूड़ लपेटो गओ हतो, दूसरे उन्ना के संग्गै नईं परन्त अलग एक जांगह लिपटो भओ पड़ो हतो। तब दूसरे चेले ने भी जौन कबर पे पेंला पोंच गओ हतो, भीतर जाके हेरो और हेर के भरोसा करो। अबै लौ बे पवित्र शास्त्र की बो बात नईं जानत हते, कि ऊहां मरे भयन में से जी जाबो जरूरी आय। तब जे चेले अपने घर हां लौट गए। पर मरियम रोऊ त कबर के बाहर ठांड़ी रई और रोत भई ऊ ने नब के कबर में तको। जिते यीशु की लाश धरी हती, उतईं ऊ ने दो स्वर्गदूतन हां उजरे उन्ना पहिने भए, एक सिरहाने और दूसरे हां पैताने बैठो हेरो। और उन ने ऊसे कई, हे बईयर तें काय रोत आय? ऊ ने ऊसे कई, बे मोरे प्रभु हां उठा ले गए और मैं नईं जानत कि उन ने ऊहां किते धरो आय। जौ कहके जब बा घूमी तो यीशु हां उते ठांड़ो तको और नईं चीनो, कि जौ यीशु आय। यीशु ने ऊसे कई, हे बईयर, तें काय रोत आय? तें कीहों ढूंढ़त आय? ऊ ने ऊहां माली जानके ऊसे कई, भले मान्स, जदि तें ऊहां कहूं उठा ले गओ आय तो मोय बता कि तेंने ऊहां किते धरो आय, और मैं ऊहां ले जै हों। यीशु ने ऊसे कई, मरियम! ऊ ने घूम के इब्रानी में कई, रब्बूनी याने हे गुरू। यीशु ने ऊसे कई, मोय नईं छी कायसे मैं अबै लौ बाप के ऐंगर ऊ परै नईं गओ आंव, पर मोरे भईयन के ऐंगर जा और उन से कहिये, मैं अपने बाप और तुमाए बाप, और अपने परमेसुर और तुमाए परमेसुर के ऐंगर ऊ परै जात आंव। मरियम मगदलीनी ने जाके चेलन हां बताओ, कि मैंने प्रभु हां हेरो और ऊ ने मोसे जे बातें करीं। ओई दिना जो हफ्ताह कौ पैलो दिना हतो, संझा की बेरा जब उते के दोरे जिते चेले हते, यहूदियन के डर के मारे किवाड़ बन्द हते, तब यीशु आके उन के बीच ठांड़ो हो गओ और ऊ ने उन से कई, तुम हां सान्ति मिले। जब बो जौ कह चुको तो ऊ ने अपने हाथ और पंजर दोई उनहां दिखाए, तब चेले प्रभु हां हेर के खुस भए। यीशु ने फिन उन से कई, तुम हां सान्ति मिले; जैसे बाप ने मोय पठैव आय, वैसई मैं भी तुम हां पठैत हों। और जब बो जौ कह चुको, तो ऊ ने उन पे फूंको और उन से कई, पवित्र आत्मा लेओ। जिन के पाप तुम क्षमा करो तो बे उन के लाने क्षमा करे गए जिन के तुम धरो, बे धरे गए आंय। पर बारह में से एक यानि थोमा जौन दिदुमुस कहलात आय, जब यीशु आओ तो उन के संग्गै नईं हतो। जब दूसरे चेले ऊसे कहन लगे हम ने प्रभु हां हेरो आय, तो थोमा ने उन से कई, जब लौ मैं ऊके हाथन में कीलन के निसान नईं तक लों, और कीलन के छेद में अपनी उंगरिया नईं डाल लों और ऊके पंजर में अपनो हाथ नईं डाल लों, तब लौ मैं भरोसा नईं कर हों। आठ दिना के पाछें ऊके चेले फिन घर के भीतर हते, और थोमा उन के संग्गै हतो, और किवाड़ बन्द हते, तब यीशु आओ और उन के बीच में ठांड़ो होकें कई, तुम हां सान्ति मिले। तब ऊ ने थोमा से कई, अपनी उंगरिया इते ला और मोरे हाथन हां तक और अपनो हाथ बढ़ाके मोरे पंजर में डाल और संका नईं कर पर भरोसा कर। थोमा ने यीशु से कई, हे मोरे प्रभु, हे मोरे परमेसुर! यीशु ने ऊसे कई, तेंने मोय तक के भरोसा करो आय? धन्य हैं बे जिन ने मोय नईं तको, फिन भी भरोसा करो। यीशु ने बिलात और भी चिन्ह चेलन के सामूं दिखाए, जो ई किताब में नईं लिखे गए। पर जे ई लाने लिखे गए आंय, कि तुम भरोसा करो, कि यीशु ही परमेसुर कौ पूत मसीह आय: और भरोसा करके ऊके नाम से अनन्त जीवन पाओ। इन बातन के पाछें यीशु ने तिबिरियास झील के तीरे फिनअपने आप हां चेलन पे दरसाव और ई तरहां दरसाव। शमौन पतरस और थोमा जौन दिदुमुस कहलात आय, और गलील के काना कौ नतनएल और जब्दी कौ पूत, और यीशु के चेलन में से दो और जनें इकट्ठे हते। शमौन पतरस ने उन से कई, मैं मछरिया पकड़बे हां जा रओ आंव: उन ने शमौन पतरस से कई, हम सोई तोरे संग्गै चल हैं: बे जाके नाव पे चढ़ गए, और ऊ रात उन ने कछु भी नईं पकड़ो। जब भुनसारो होन लगो तो यीशु घाट पे आ ठांड़ो भओ; पर चेलन ने ऊहां नईं चीनो, कि बो यीशु आय। तब यीशु ने उन से कई, हे लड़को, का तुमाए ऐंगर कछु खाबे हां आय? उन ने यीशु से कई नईं। यीशु ने उन से कई, नाव की दांई कोद जाल डालो, तो पाहौ, तब उन ने जाल डालो, तब मछरियों के बिलात होबे से बे खेंच नईं पाए। ई लाने ऊ चेले ने जीसे यीशु प्रेम करत हतो पतरस से कई, जौ तो प्रभु आय: जब पतरस ने सुनी कि जौ प्रभु आय, तो ऊ ने अपनो चोगा पहन लओ, कायसे बो नंगो हतो, और झील में कूद पड़ो। पर दूसरे चेले हल्की नाव पे मछरियों से भरो भओ जाल खेंचत भय आए, कायसे बे घाट से बिलात दूर नईं, पर मानो दो सौ हाथ दूर हते। जब बे घाट पे उतरे, तो उन ने कोयला के अंगरा, और ऊ पे मछरिया धरी, और रोटी देखी। यीशु ने उन से कई, जौन मछरियां तुम ने अबै पकड़ी आंय, उन में से कछु लाओ। शमौन पतरस गओ और एक सौ त्रेपन बड़ी मछरियों से भरो भओ जाल हां घाट पे खेंच लाओ, मछरियां इतेक बिलात हतीं फिन भी जाल नईं फटो। यीशु ने उन से कई, आओ कलेवा करो, चेलन में से कोऊहां जौ पूछबे की हिम्मत नईं भई, कि ऊसे पूछें, तें को आय? कायसे जान गए हते, कि जौ प्रभु ही आय। यीशु ने आके रोटी लई और उन हां दई, और ऐंसई मछरिया सोई। जा तीसरी बेर आय, जब यीशु ने मरे भयन में से जी जाबे के पाछें चेलन हां दर्शन दए। जब बे कलेवा कर चुके, तो यीशु ने पतरस से कई, हे शमौन यूहन्ना के पूत, का तें इन से ज्यादा मोसे प्रेम करत आय? पतरस ने यीशु से कई, हओ प्रभु, तें तो जानत आय, कि मैं तोसे प्यार करत आंव: यीशु ने पतरस से कई, मोरी गाड़रन हां चरा। यीशु ने फिन दूसरी बेर पतरस से कई, शमौन यूहन्ना के पूत, का तें मोसे प्रेम करत आय? पतरस ने यीशु से कई, हओ प्रभु, तें तो जानत आय, कि मैं तोय से प्यार करत आंव: यीशु ने पतरस से कई, मोरी भेड़न की रखवाली कर। यीशु ने पतरस से तीसरी बेर कई, हे शमौन यूहन्ना के पूत, का तें मोय से प्यार करत आय? पतरस उदास भओ, कायसे यीशु ने तीसरी बेर ऐसी कई; कि का तें मोसे प्यार करत आय? और पतरस ने कई, हे प्रभु, तें सब कछु जानत आय, कि मैं तोसे प्यार करत आंव: यीशु ने ऊसे कई, तें मोरी गाड़रन चरा। मैं तोसे सांची सांची कहत आंव, जब तें जुआन हतो, तो अपनी करयाई बांध के जिते चाहत हतो, उते फिरत हतो; पर जब तें बूढ़ो हुईये, तो अपने हाथ लम्बे कर है, और कोऊ दूसरो तोरी करयाई बांध है और जिते तें नईं चाहे उते तोय ले जै है। ऊ ने ऐसो जौ इसारा देत भय कई, कि पतरस कैसी मौत से परमेसुर की महिमा कर है; और जब बो जौ कह चुको, तो यीशु ने ऊसे कई मोरे पाछें चलो आ। पतरस ने फिर के ऊ चेले हां पाछें आत तको, जीसे यीशु प्रेम करत हतो, यानि ओई जीने खाबे की बेरा ऊ की छाती की कोद नब के पूंछी हती, प्रभु, तोय पकड़वाबे वालो को आय? ऊहां हेर के पतरस ने यीशु से कई, हे प्रभु, ई मान्स कौ का हाल हुईये? यीशु ने पतरस से कई, अगर मैं चाहों कि बो मोरे आबे लों ठहरो रए, तो तोय ईसे का? तें मोरे पांछे हो ले। ई लाने भाईयन में जा बात फैल गईं, कि बो चेला नईं मर है; पर यीशु ने ऊसे जा नईं कई, कि बो नईं मर है, पर ऐसो कि अगर मैं चाहों कि बो मोरे आबे लों जीयत रए, तो तोय ईसे का? जौ ओई चेलो आय, जौन इन बातन की गवाही देत आय और जीने इन बातन हां लिखो आय और हम जानत आंय, कि ऊ की गवाही सांची आय। और भी बिलात काज यीशु ने करे; अगर उन हां एक-एक करके लिखो जातो, तो मैं सोचत आंव, जौन किताबें लिखी जातीं, बे संसार में भी नईं समातीं। हे थियुफिलुस, मैंने पैली पोथी उन सबरी बातन के बारे में लिखी, जो यीशु ने शुरू से करो और करत और सिखात रओ। ऊ दिना लौ जब बो उन प्रेरितन हां जिन हां ऊ ने नबेरो हतो, पवित्तर आत्मा के द्वारा हुकम देके ऊ परै उठाओ न गओ। और ऊ ने दुख पीड़ा झेलबे के पाछें बिलात पक्के सबूतों से उन हां अपने आप हां जीयत दिखाओ, और चालीस दिना लौ उन हां दिखाई देत रओ: और परमेसुर के राज की बातें करत रओ। और उन से मिल के उन हां हुकम दओ, कि यरूशलेम न छोड़ियो, परन्त पिता कौ कौल पूरो होबे की बाट तकत रओ, जी के बारे में तुम मोसे सुन चुके आव। कायसे यूहन्ना ने तो पानू से बपतिस्मा दओ आय, पर थोड़े दिना के पछारें तुम पवित्तर आत्मा से बपतिस्मा पा हौ। सो उन ने जुड़ के यीशु से पूछो, कि हे पिरभु, का तें इस्राएल हां राज अबई फेर दै है? यीशु ने उन से कओ; उन समयों या कालों हां जानबो, जिन हां पिता ने अपने ही अधकार में धरो आय, तुमाओ काम नईंयां। पर जब पवित्तर आत्मा तुम पे आ है तब तुम बल पा हौ; और यरूशलेम और सबरे यहूदिया और सामरिया में, और धरती के छोर लौ मोरे गवाह हुईयो। जौ कह के बो उन के तकत ऊ परै उठा लओ गओ, और बादरन ने ऊहां, उन की आंखन से लुका लओ। और ऊ की जाती बेरा जब बे ऊ परै आकास कुदाऊं ताक रए हते, तो तको, दो मन्सेलू सफेद उन्ना पैरें उन के ऐंगर आ ठांड़े भए। और कहन लगे; हे गलील के मान्सन, तुम काय इते ठांड़े सरग कुदाऊं तक रए आव? जौई यीशु, जौन तुमाए ऐंगर से सरग पे उठा लओ गओ आय, जौन रीति से तुम ने ऊहां सरग पे जात तको आय ओई रीति से बो फिन आ है। तब प्रेरित जैतून नाओं के पहरवा से जौन यरूशलेम से एक किलो मीटर की दूरी पर आय, यरूशलेम हां लौटे। और उते पोंचे तो ऊ अटारी पे गए, जिते पतरस और यूहन्ना और याकूब और अन्द्रियास और फिलिप्पुस और थोमा और बरतुलमाई और मत्ती और हलफ ई कौ पूत याकूब और शमौन जेलोतेस और याकूब कौ पूत यहूदा रैत हते। जे सबरे मुतकी बईयरन और यीशु की मताई मरियम और ऊके भईयन के संग्गै एक चित्त होकें बिन्तवाई में लगे रए। और उनई दिना में पतरस भईयन के संग्गै जौन एक सौ बीस के लगभग इकट्ठे जुड़े हते, ठांड़ो होकें कैन लगो। हे भईया हरौ, जो होने हतो कि पवित्तर पोथी कौ बो लिखो भओ पूरो होबे, जौन पवित्तर आत्मा ने दाऊद के मों से यहूदा के बारे में जौन यीशु के पकड़बेवारन कौ अगुवा हतो, पेंला से कई हती। कायसे बो हम में गिनो गओ, और ई सेवकाई में सामिल भओ। (ऊ ने पाप की कमाई से एक खेत मोल लओ; और मूड़ के बल गिरो, और ऊकौ पेट फट गओ, और ऊ की सबरी आंतें बायरें कड़ आईं। और ई बात हां यरूशलेम के सबरे रैबेवारे जान गए, इते लौ कि ऊ खेत कौ नाओं उन की भाषा में हकलदमा जाने कि रक्त कौ खेत पड़ गओ।) कायसे भजन की पोथी में लिखो आय, कि ऊकौ घर उजड़ जाबै, और ऊ में कोऊ न बसे, और ऊकौ पद कोऊ दूसरो ले ले। ई लाने जितेक दिना लौ पिरभु यीशु हमाए संग्गै आऊ त जाऊ त रओ, जाने कि यूहन्ना के बपतिस्मा से लेकें ऊके हमाए ऐंगर से उठाए जाबे लौ, जो मान्स बिरोबर हमाए संग्गै रए। जौ सई रै है कि उन में से एक जनो हमाए संग्गै ऊके जी उठबे कौ गवाह हो जाए। तब उन ने दो मान्सन हां ठांड़ो करो, एक यूसुफ हां, जौन बर-सबा कहात आय, जी कौ दूसरो नाओं यूसतुस आय, दूसरो मत्तिय्याह हां। और जौ क ह के बिन्तवाई करी; कि हे पिरभु, तें जो सबन के हिये जानत आय, जौ उजागर कर कि इन दोईयन में से तेंने कीहां नबेरो आय। कि बौ सेवकाई और प्रेरिताई कौ पद ले, जीहां यहूदा छोड़ के अपने स्थान हां गओ आय। तब उन ने उन के नाओं से चिठियां डालीं, और चिठि या मत्तिय्याह के नाओं पर कड़ी, सो बो उन ग्यारह प्रेरितन के संग्गै गिनो गओ। जब पिन्तेकुस्त कौ त्यौहार आओ, तो बे सबरे एक जांगा जुड़े हते। और अचानक आकास से बड़ी आंधी कैसी सनसनाहट की आवाज भई, और ऊसे सबरो घर जिते बे बैठे हते, गूंज गओ। और उन हां आगी की सी जीभें फटत भई दिखानी; और उन में से हर जने पे आ ठैरीं। और बे सबरे पवित्तर आत्मा से भर गए, और जौन भांत पवित्तर आत्मा ने उन हां बोलबे की समझ दई, बे औरें दूसरी दूसरी भाषा बोलन लगे। और आकास के नेंचें की हर एक जाति में से भक्त यहूदी यरूशलेम में रैत हते। जब बो आवाज भई तो मान्स जुड़ आए और बे औरें घबरा गए, कायसे हर एक जन हां जौई सुनाई पड़त हतो, कि जे मोरी भाषा में बोल रए आंय। और बे सबरे चकित और अचम्भित होकें कैन लगे; तको, जे जौन बोल रए आंय का सबरे गलील के रैबेवारे नईंयां? तो फिन का हम में से हर एक जन अपनी अपनी जन्म भूम की बोली सुनत आंय? हम जौन पारथी और मेदी और एलामी मान्स और मिसुपुतामियां और यहूदिया और कप्पदूकिया और पुन्तुस और आसिया। और फ्रूगिया और पमफूलिया और मिसर और लिबूआ देश जौन कुरेने के आस पास आय, इन सबरे देशन के रैबेवारे और रोम से आए भए मान्स, का यहूदी का बे जिन ने यहूदी मत अपना लओ हतो, क्रेती और अरब के रहबेवारे सोई आंय। बे औरें अपनी अपनी भाषा में उनसे परमेसुर के बड़े बड़े कामन की चरचा सुनत हते। और बे सबरे चकित भए, और घबरा के एक दूसरे से कैन लगे जौ का होबेवारो आय? परन्त औरन ने उन की ठिठोली कर के कओ, कि बे तो नई दारू के नसा में आंय। तब पतरस प्रेरितों के संग्गै ठांड़ो भओ और ऊं ची आवाज में कओ, हे यहूदियो और यरूशलेम के सबरे रैबेवारो, मोरी बातन हां समजो और कान लगा के मोरी बातें सुनो। जे नसे में नईंयां, जैसो तुम समज रए आव, कायसे अबै तो पहर ही दिन चढ़ो आय। पर जा बा बात आय, जौन जोएल अगमवकता ने कई हती। परमेसुर कैत आय, कि आखिर के दिनन में ऐसो हुईयै, कि मैं अपनौ आत्मा सबरे मान्सन पै उड़ेल हों और तुमाए मोंड़ा-मोंड़ी अगमबानी करहैं और तुमाए जुआन दरसन हेरहैं, और तुमाए बुजुर्ग सपने देखहैं। मैं अपने दास और दासियन पै सोई उन दिनन में अपनी आत्मा उड़ेल हों, और बे अगमवानी कर हैं। मैं ऊपर आकास में अद्भुत काम, और नेंचें पृथ्वी पै चिन्ह, मतलब खून, आगी और धुआं कौ बादल दिखाहों। परमेसुर के महान और महिमामय दिन के आबे से पैलां सूरज अंधयारौ हुईयै और चांद खून जैसौ हो जैहै। और जो कोऊ परमेसुर कौ नाओं लैहै, बौ उद्धार पाहै। हे इस्राएलियो, जे बातें सुनो: कि यीशु नासरी नाओं को एक मान्स हतो बो परमेसुर कोद से आओ हतो जा बात ऊके द्वारा करे गए सामर्थ के काम, आश्चर्य कर्म और चिन्हों से साबित आय, जौन परमेसुर ने तुमाए बीच ऊके द्वारा करे, जीहां तुम जानत आव। ओई हां, जब बो परमेसुर की ठैराई भई मनसा और होनहार के ज्ञान के अनसार पकड़वाओ गओ, तब तुम ने पापियन के हाथ से ऊहां क्रूस पे चढ़ा के मार डालो। पर ओई हां परमेसुर ने मौत के बन्धनों से छुड़ा के जिलाओ: कायसे जौ अनहोनो हतो कि बो मौत के वस में रैतो। कायसे दाऊद ऊके बारे में कैत आय, कि मैं पिरभु हां सदा अपने सामूं तकत रओ कायसे कि बो मोरी दांयी कोद आय, जीसे मैं डगमगा न जाओं। ऐई काजें मोरो हिया खुस भओ, और मोरी जीभ मगन भई; जाने कि मोरो सरीर सोई आसा में बनो रै है। कायसे तें मोरे प्रानन हां अधोलोक में न छोड़ है; और न अपने पवित्तर जन हां सड़ने दै है। तेंने मोहां जीवन की गैल बताई आय; तें मोहां अपने दरसन के द्वारा खुसी से भर दै है। हे भईया हरौ, मैं ऊ कुलपति दाऊद के बारे में तुम से हिम्मत कर के कै सकत आंव कि बो तो मर गओ और गाड़ो सोई गओ और ऊकी कबर आज लौ हमाए इते बनी भई आय। सो अगमवकता होकें और जो जान के कि परमेसुर ने मोय में कौल करो आय, कि मैं तोरे वंस से एक जने हां तोरे सिंहासन पे बैठा हों। ऊ ने जौन होबेवारो हतो पेंला से जान के मसीह के जी उठबे के विषय में अगमबानी की कि न तो ऊकौ प्रान अधोलोक में छोड़ो गओ, और न ऊ की लास सड़ने पाई। ऐई यीशु हां परमेसुर ने जिलाओ, जीके हम सब गवाय आंय। ई तरहां परमेसुर के दाहिने हाथ से ऊं चो पद पाके, और बाप से बा पवित्र आत्मा पाके जीकी कौल की गई हती, ऊ ने जौ उण्डेल दओ आय जो तुम तकत और सुनत आव। कायसे दाऊद तो सरग पे नईं चढ़ो; पर बो खुद कहत आय, कि प्रभु ने मोरे प्रभु से कई; मोरे दाहिने कोद बैठ, जब तक कि मैं तोरे दुसमन हां तोरे गोड़े के नेंचें की चौकी न कर देओं। सो अब इस्राएलियन कौ सबरो घरानो पक्को जान लैबे कि परमेसुर ने ओई यीशु हां जीहां तुम ने क्रूस पे चढ़ाओ, प्रभु भी ठहराओ और मसीह सोई। तब सुनबे वालन के हिया छिद गए, और बे पतरस और बाकी प्रेरितन से पूंछन लगे, कि हे भईया हरौ, हम का करें? पतरस ने उन से कओ, मन फिराओ, और तुम में हर एक जने अपने पापन की छिमा के लाने यीशु मसीह के नाओं से बपतिस्मा ले; तो तुम पवित्र आत्मा कौ दान पाहौ। कायसे जा कौल तुम, और तुमाई लड़ेर, और बे सब दूर दूर के मान्सन के लाने भी आए जिनहां प्रभु हमाए परमेसुर अपने ऐंगर बुला है। ऊ ने बिलात बातन से भी गवाय देके समझाओ कि अपने आप को इस टेढ़ी जातन से बचाओ। जिन ने ऊकौ बचन मानो उन ने बपतिस्मा लओ; और ओई दिना तीन हजार मान्सन के लगभग उन में जुड़ गए। और बे प्रेरितन से शिक्षा पाबे, और संगति रखबे में और रोटी तोड़बे में और बिनती करबे में लगे रएं। और सब लोगन पे भय छा गओ, और बिलात चमत्कार के काज और चिन्ह प्रेरितन के द्वारा प्रगट होत हते। और बे सब बिसवास करबेवाले संग्गै रहत हते, और उन की सब बस्तें सोंजयाई की हतीं। और बे अपनी अपनी जायदाद और बस्तें बेच बेच के जिन हां जरुरत होत हती बांट देत हते। और बे हर एक दिन एक मन होकें मन्दर में जुड़त हते, और घर घर रोटी तोड़त भए खुसी और मन की सीधाई से भोजन करत हते। और परमेसुर की भक्ति करत हते, और सब जने उन से खुस हते: और जो उद्धार पात हते, उनको प्रभु रोजीना उन में मिला देत हतो। पतरस और यूहन्ना तीसरे पहर बिन्तवाई की बेरा मन्दर में जा रए हते। और मान्स एक जन्म के लंगड़ा हां ला रए हते, जीहां बे रोजीना मन्दर के ऊ दोरे पे जौन सुन्दर कहात आय, बैठा देत हते, कि ऊ मन्दर में जाबेवारन से भीख मांगे। जबै ऊ ने पतरस और यूहन्ना हां मन्दर में जात तको, तो उन से भीख मांगी। पतरस ने यूहन्ना के संग्गै ऊ की कुदाऊं टकटकी लगा केकओ, हमाई कुदाऊं तक। सो बो उन से कछु मिलबे की आसा करत भओ उन कुदाऊं तकन लगो। तब पतरस ने कओ, चांदी और सोना तो मोरे लौ नईंयां; पर जौन कछु मोरे ऐंगर आय, बो तोय देत आंव: यीशु मसीह नासरी के नाओं से चल फिर। और ऊ ने ऊकौ सूदो हाथ पकड़ के उए उठाओ: और तुरतऊं ऊके गोड़न में और टखनों में ताकत आ गई। ऊ उठ के ठांड़ो हो गओ, और निंगन फिरन लगो और निंगत; और कू दत और परमेसुर की बड़ाई करत भओ उन के संग्गै मन्दर में गओ। सबरे मान्सन ने ऊहां निंगत फिरत और परमेसुर की बड़ाई करत तक के। ऊहां चीन लओ कि जौ ओई आय, जौन मन्दर के सुन्दर दोरे पे बैठ के भीख मांगत हतो; और ऊ चमत्कार से जौन ऊके संग्गै भओ हतो; बे बिकट चकरया गए। जब ऊ पतरस और यूहन्ना हां पकड़े भए हतो, तब सबरे मान्स बिलात चकित होत भए ऊ ओसारे में जौन सुलैमान कौ कहात आय, उन के ऐंगर भगत आए। जौ तक के पतरस ने मान्सन से कओ; हे इस्राएलियो, तुम ई मान्स पे काय चकित होत आव, और हमाई कोद ई भांत काय तक रय आव, कि मानो हमईं ने अपने बल या भक्ति से ईहां निंगबे जोग बना दओ आय। इब्राहीम और इसहाक और याकूब के परमेसुर, हमाए पुरखन के परमेसुर ने अपने सेवक यीशु की मईमा करी, जीहां तुम ने पकड़वा दओ, और जब पीलातुस ने ऊहां छोड़ देबे कौ विचार करो, तब तुम ने ऊके सामूं ऊकौ इन्कार कर दओ। तुम ने ऊ पवित्तर और धरमी हां नकार दओ, और बिन्तवाई करी, कि एक हत्यारे हां तुमाए लाने छोड़ दओ जाबै। और तुम ने जीवन के देबेवारे हां मार डालो, जीहां परमेसुर ने मरे भयन में से जिला दओ, और ई बात के हम गवाय आंय। और ओई के नाओं से, ऊ बिसवास के द्वारा जौन ऊके नाओं पे आय, ई मान्स हां जीहां तुम तकत आव और चीनत सोई आव, बल सक्ति दई आय; ओई बिसवास ने जौन ऊके द्वारा आय, ईहां तुम सबरन के सामूं पूरो पूरो साजो भलो कर दओ आय। अब हे भईया हरौ, मोय पता आय कि जौ सबरो काम तुम ने मूरखता से करो, और ऊं सई तुमाए सरदारन ने सोई करो। पर जिन बातन हां परमेसुर ने सबरे अगमवकतन के मों से पहलेई बता दओ हतो, कि ऊकौ मसीह पीड़ा झेल है; और उन हां ऊ ने ई भांत पूरो करो। ई लाने हिया फेरो और लौट आओ कि तुमाए पाप मिटाए जाएं, जी से पिरभु के सामूं से चैन सान्ति के दिन आएं। और बो यीशु हां पठैए, जौन तुमाए लाने पैलईं से मसीह ठैराओ गओ आय। जरूरी आय कि बो सरग में ऊ बेरा लौ रय जब लक कि बो सबरी बातन कौ सुदार न कर ले, जी की चरचा पुराने टैम से परमेसुर ने अपने पवित्र अगमवकतन के मों से करी आय। जैसो मूसा से कओ, पिरभु परमेसुर तुमाए भईयन में से तुमाए लाने मोरे जैसो एक अगमवकता उठा है, जो कछु ऊ तुम से काबे ऊ की सुनियो। पर हर एक मान्स जौन ऊ अगमवकता की न सुने, मान्सन में से नास करो जै है। और सामुएल से लेके ऊके पाछूंवारन लौ जित्ते अगमवकता बोले, उन सबरन ने इन दिना कौ सन्देसो दओ आय। तुम अगमवकतन के बाल बच्चा और ऊ कौल के भागी आव, जौन परमेसुर ने तुमाए पुरखन से बांधी, जब ऊ ने इब्राहीम से कओ, तोरे वंस से संसार के सबरे घरबार आसीस पा हैं। परमेसुर ने अपने चाकर हां उठाके पेंला तुमाए ऐंगर पठैओ, कि तुम में से हर एक हां ऊ की बुराईयन से फेर के आसीस देबे। जब बे मान्सन से जौ कैरए हते, तो याजक और मन्दर के सरदार और सदूकी उन पे चढ़ आए। कायसे बे बिकट खुन्सयाए कि बे मान्सन हां सिखात हते और यीशु कौ उदाहरण दे दे के मरे भयन में से जी उठबे कौ परचार करत हते। उन ने पतरस, यूहन्ना हां पकड़ के दूसरे दिना लौ हवालात में धरो, कायसे लौलईया लग गई हती। पर बचन के सुनबेवारन में से कुल्ल जन ने बिसवास करो, और उन की गिनती पांच हजार मुन्सेलुअन के करीब हो गई। दूसरे दिना ऐसो भओ कि उन के सरदार और पुरनिये और शास्त्री। और महायाजक हन्ना और कैफा और यूहन्ना और सिकन्दर और जितने महायाजक के कुटुम्ब के हते, सब यरूशलेम में जुड़े। बे उन हां महापंचयात के बीच ठांड़ो कर के पूछन लगे, कि तुम ने जौ काम की सामर्थ से और की नाओं से करो आय? तब पतरस ने पवित्तर आत्मा से भर के उन से कओ। हे मान्सन के सरदारो और पुरनियो, ई कमजोर मान्स के संग्गै जौन भलाई भई आय, यदि आज ऊके बारे में हम से पूछ तांछ करी जात आय, कि ऊ कैसे साजो भओ? तो तुम सब और सारे इस्राएली जान लें कि यीशु मसीह नासरी के नाओं से जीहां तुम ने क्रूस पे चढाओ, और परमेसुर ने मरे भयन में से जिलाओ, जौ मान्स तुमाए सामूं भलो चंगो ठांड़ो आय। जौ ओई पत्थरा आय जीहां राजमिस्त्रियन ने बेकार जानो और बो कोने के सिरे कौ पत्थरा हो गओ। कोऊ दूसरे के द्वारा उद्धार नईंयां; कायसे सरग के नेंचें मान्सन में और कोऊ नाओं नईंयां जीसे मान्स तरन तारन पा सके। जब उन ने पतरस और यूहन्ना कौ साहस तको, और जौ जानो कि जे अनपढ़े और साधारण मान्स आंय, तो चकित भए; फिन उन हां चीनो, कि बे यीशु के साथ रए आंय। ऊ मान्स हां जौन साजो भओ हतो, उन के संग्गै ठांड़ो तक के, बे विरोद में कछु न कै सके। पर उन हां पंचायत के बायरें जाबे कौ हुकम देके, बे आपस में सोस विचार करन लगे। कि हम इन मान्सन के संग्गै का करें? कायसे यरूशलेम के सबरे रैबेवारन पे उजागर आय, कि इन के द्वारा एक बड़ो चिन्ह दिखाओ गओ आय; और हम ऊहां नकार नईं सकत। पर ई लाने कि जा बात मान्सन में और न फैले, हम उन हां धमकाबें, कि बे ई नाओं से फिन कोऊ मान्स से बात न करें। तब उन हां बुलवा भेजो और चेतावनी देके जौ कओ, कि यीशु के नाओं से कछु न बोलियो और न सिखाईयो। पर पतरस और यूहन्ना ने उन हां जवाब दओ, तुमईं न्याय करो, का जौ परमेसुर के ऐंगर सई आय, कि हम परमेसुर की बात से बढ़के तुमाई बात मानें? कायसे जौ तो हम से नईं हो सकत, कि जौन हम ने तको और सुनो आय, बो न काबें। तब उन ने पतरस और यूहन्ना हां और धमका के छोड़ दओ, कायसे मान्सन के सामूं उन हां दण्ड़ देबे को कोऊ और मौका नईं मिलो, ई लाने जौन घटो ऊसे काजें सबरे मान्स परमेसुर की बड़ाई करत हते। ऊ मान्स, जौन साजो भओ हतो जी पे जा बात घटी हती, चालीस बरस से अधिक उमर कौ हतो। पंचयात से छूट के पतरस और यूहन्ना अपने संगियन के ऐंगर आए, और जो कछु प्रधान याजकों और बूढ़े पुरनियन ने उन से कओ हतो, उन हां सुना दओ। जौ सुन के, उन ने एक चित्त होकें ऐन ऊंचे बोल से परमेसुर से कओ, हे मालक, तें ओई आय जीने सरग और संसार और समुन्दर और जो कछु उन में आय बनाओ। तेंने पवित्तर आत्मा से अपने सेवक हमाए बाप दाऊद के मों से कओ, दूसरी जातवारन ने हुल्लड़ काय मचाओ? और देस के मान्सन ने काय बेकार की बातें विचारीं? पिरभु और ऊके मसीह के विरोद में संसार के राजा ठांड़े भए, और हाकम एक संग्गै जुड़ गए। कायसे कि सांची में तोरे चाकर यीशु के विरोद में, जौन को तेंने अभिषेक करो, हेरोदेस और पुन्तियुस पिलातुस सोई दूसरी जातवारन और इस्राएलियन के संग्गै ई नगर में जुड़े। कि जो कछु पेंला से तोरी तागद और मति से ठैरो हतो ओई करें। अब हे पिरभु, उन की धमकियन हां तक; और अपने चाकरन हां जौ बरदान दे, कि तोरो बचन भारी हियाव से सुनाएं। साजो करबे के लाने तें अपने हाथ हां बढ़ा; कि चिन्ह और अद्भुत काम तोरे पवित्र चाकर यीशु के नाओं से करे जाबें। जब बे बिन्तवाई कर चुके, तो बा जांगा जिते बे जुड़े हते हल गई, और बे सबरे पवित्तर आत्मा से भर गए, और परमेसुर कौ बचन हियाव से सुनात रए। बिसवास करबेवारन की मण्डली एक चित और एक हिए की हती, इते लौ कि कौनऊं अपनी जादाद अपनी न कैत हतो, पर सब कछु साझे कौ हतो। प्रेरित बड़ी सामर्थ से यीशु के जी उठबे की गवाई देत रए और उन सब पे बड़ी आसीस हती। उन में कौनऊ लौ गरीब गुरवा न हतो; कायसे जी लौ जमीन हती, बे औरें ऊहां बेच बेच के, बिकी भई बस्त कौ दाम लैके, प्रेरितन के गोड़न पे धरत हते। और जैसी जीहां जरूरत होत हती, ऊके अनसार हर एक हां बांट दओ जात हतो। यूसुफ नाओं को कुप्रुस कौ एक लेवी हतो, जी कौ नाओं प्रेरितन ने बर-नबा (जाने कि सान्ति कौ पूत) धरो हतो। ऊ लौ कछु भूमि हती, जीहां ऊ ने बेचो, और दाम के रुपैया लाके प्रेरितन के गोड़न पे धर दए। हनन्याह नाओं को एक मान्स, और ऊ की औरत सफीरा ने कछु भूमि बेची। और ऊके दाम में से कछु रख लओ; और जा बात ऊ की औरत सोई जानत हती, और ऊकौ एक हींसा प्रेरितन के गोड़न के आंगू धर दओ। पतरस ने कओ; हे हनन्याह! शैतान छलिया ने तोरे हिए में जा बात काय डाली, कि तें पवित्तर आत्मा से लाबरी काबे, और भूमि के दाम में से कछु रख लैबे। जब लग बा तोरे ऐंगर हती, का तोरी न हती? और जब बिक गई तो का तोरे वस में न हती? तेंने अपने हिए में जा बात काय सोची? तें मान्सन से नोईं, परन्त परमेसुर से लाबरी बोलो। जे बातें सुनतई हनन्याह गिर पड़ो, और प्राण छोड़ दए; और सबरे सुनबेवारन में बिकट डर समा गओ। फिन जवानन ने उठके ऊ की अर्थी बनाई और बायरें ले जाके गाड़ दओ। लगभग तीन घण्टा के बाद ऊ की औरत सफीरा, जो कछु भओ हतो न जान के भीतर आई। तब पतरस ने ऊसे कओ; मोय बता का तुम ने बा भूमि इत्तेई में बेंची हती? ऊ ने उत्तर दओ; हओ इत्तेई में। पतरस ने ऊसे कओ; जा का बात आय, कि तुम दोईयन ने पिरभु के आत्मा की परीक्षा के लाने एका करो? तक, तोरे आदमी के गाड़बेवारे दोरे पे ठांड़े आंय, और तोहां सोई बायरें ले जें हैं। तब बा तुरतऊं ऊके गोड़न पे गिर पड़ी, और प्राण छोड़ दए: और जवानन ने भीतर आके ऊहां मरो पाओ, और बायरें ले जाके ऊके आदमी के पास गाड़ दओ। सबरे बिसवासियन पे और इन बातों के सबरे सुनबेवारन पे, बड़ो डर समा गओ। प्रेरितन के हाथ से कुल्ल चिन्ह और अदभुत काम मान्सन के बीच दिखाए जात हते, (और बे सब एक चित होकें सुलैमान के ओसारे में जुड़त हते। पर औरों में से कोऊहां जा हिम्मत न होत हती, कि उन में आ मिले; फिन भी मान्स उन की बड़वाई करत हते। बिसवास करबेवारे कुल्ल मान्स और बईयरें पिरभु की मण्डली में और अधिक आके मिलत रए।) इते लौ कि मान्स रूगियन हां गैल में गोला पे लिया के, चारपाई और खटोलों पे पार देत हते, कि जब पतरस आबै, तो ऊ की छांई उन में से कोई पे पड़ जाबै। यरूशलेम के आसपास के नगरों से सोई बिलात मान्स रूगियन और भूत आत्माओं के सताए भय हां ला लाके, जुड़म हते, और सब साजे कर दए जात हते। सब महायाजक और ऊके सबरे संग्गी जौन सदूकियन के मत के हते, जलन से भर गए। और प्रेरितन हां पकड़ के हवालात में बन्द कर दओ। और रात को पिरभु के एक सरगदूत ने कैदखाने के दोरे खोल के उन हां बायरें लाके कओ। जाओ, मन्दर में ठांड़े होकें, ई जीवन की सबरी बातें मान्सन हां सुनाओ। बे जौ सुन के भुनसारो होतई मन्दर में जाके बचन सुनाऊ न लगे: तब महायाजक और ऊके संगियन ने महापंचायत हां और इस्राएलिययन के सब बूढ़े पुरनियन हां जोड़ो, और कैदखाने में कहला पठैओ कि उन हां ले आओ। पर सिपाईयन ने कैदखाने में पोंच के उन हां न पाओ, और लौट के उन हां सन्देसो दओ। हम ने कैदखाने हां बड़ी चौकसी से बन्द करो भओ, और सिपाईयन हां बायरें पैहरे पे ठांड़ो तको; पर जब खोलो, तो भीतर कोऊहां न पाओ। जब मन्दर के सरदार और प्रधान याजकन ने जे बातें सुनीं, तो उन के विषय में भारी चिन्ता में पड़ गए कि उन कौ का भओ? इत्ते में कोऊ ने आके उन हां बताओ, तकौ, जिन हां तुम ने कैदखाने में बन्द कर धरो हतो, बे मान्स मन्दर में ठांड़े हो मान्सन हां बचन परचार कर रए आंय। तब सरदार, सिपाईयन के संग्गै जाके, उन हां ले आए, पर जबरदस्ती नईं, कायसे मान्सन से डरात हते, कि बे उन हां पत्थरन से न मार डालें। उन ने प्रेरितन हां लाके महापंचायत के सामूं ठांड़ो कर दओ: तब महायाजक ने उन से पूछो। का हम ने तुम हां हटक के हुकम न दओ हतो, कि तुम ई नाओं से परचार न करियो? पर तको, तुम ने सबरे यरूशलेम हां अपने सन्देसे से भर दओ आए और ऊ जने कौ रकत हमाई घींच पे लाओ चाहत आव। तब पतरस और दूसरे प्रेरितन ने उत्तर दओ, मान्सन के हुकम से बढ़के, परमेसुर के हुकम कौ पालन करबो हमाओ कर्त्तव्य आय। हमाए बाप दादों के परमेसुर ने यीशु हां जिलाओ, जीहां तुम ने क्रूस पे टांग के मार डालो हतो। ओई हां परमेसुर ने पिरभु और उद्धारकर्त्ता ठैरा के अपने दायने हाथ पे ऊंची जांगा दई, कि बो इस्राएलियन हां हिया फेरबे कौ बल सक्ति और पापन की क्षमा देबे। हम इन बातन के गवाय आंय, और ऊंसई पवित्तर आत्मा सोई, जीहां परमेसुर ने उन हां दओ आय, जौन ऊकौ हुकम मानत आंय। जौ सुन के बे जल गए, और उन हां मार डालबो चाहो। पर गमलीएल नाओं के एक फरीसी ने जौन व्यवस्थापक और सबरे मान्सन में आदरणीय हतो, महापंचायत में ठांड़े होकें प्रेरितन हां तनक देर के लाने बायरें कर देबे कौ हुकम करो। तब ऊ ने कओ, हे इस्राएलियो तुम जो कछु इन मान्सन से करो चाहत आव, सोच विचार के करियो। कायसे इन दिनन से पेंला थियूदास जौ कहत भओ उठो, कि मैं सोई कछु आंव; और कोऊ चार सौ मान्स ऊके संग्गै हो लए, और बो मारो गओ; और जितेक मान्स ऊहां मानत हते, सब तितर बितर भए और मिट गए। ऊके पाछें नाओं लिखाई के दिना में यहूदा गलीली उठो, और कछु जनन हां अपनी कोद कर लओ: ऊ सोई नास हो गओ, और जितने जने ऊहां मानत हते, सब फैल फुट हो गए। ई लाने मैं तुम से कैत आंव, इन मान्सन से बचे रओ और इन से कछु काम न राखो; कायसे के जदि जौ काम मान्सन कुदाऊं से होबे तब तो मिट जै है। पर जदि परमेसुर कुदाऊं से होबे, तो तुम कौनऊं भात ऊहां मिटा न सक हौ; कऊं ऐसो न होबे, कि तुम परमेसुर से सोई लड़बेवारे ठैरो। तब उन ने ऊ की बात मान लई; और प्रेरितन हां बुला के पिटवाओ; और जौ हुकम देके छोड़ दओ, कि यीशु के नाओं से फिन कोई बात न करियो। बे ई बात से खुसी होकें महापंचयात के सामूं से चले गए, कि हम ऊके नाओं के लाने अपमानित होबे के जोग तो ठैरे। बे रोजीना मन्दर में और घर घर में बचन सुनात, और ई बात कौ भलो सन्देसो सुनाबे से, कि यीशु ही मसीह आय न रुके। उन दिना में जब चेलन की गिनती कुल्ल बढ़न लगी, तब यूनानी भाषा बोलबेवारे इब्रानी भाषा बोलबेवारन पे कुड़कुड़ऊन लगे, कि रोज रोज की सेवकाई में हमाई बिधवाओं की सुधि नईं लई जात। तब उन बारहों ने चेलों की मण्डली हां अपने ऐंगर बुला के कओ, जा सई बात नईंयां कि हम परमेसुर के बचन की सेवा हां छोड़ के खवाबे-पिवाबे की सेवा में रैबें। ई लाने हे भईया हरौ, अपने में से सात नामी मान्सन हां जौन पवित्तर आत्मा और समझदारी से भरे होबें, नबेर लेओ, कि हम उन हां ई काम पे ठैरा देबें। पर हम तो बिन्तवाई और बचन की सेवा में लगे रै हैं। जा बात सबरी मण्डली हां नोनी लगी, और उन ने स्तिफनुस नाओं के एक जनें हां जौन बिसवास और पवित्तर आत्मा से भरो हतो, और फिलिप्पुस और प्रुखुरुस और नीकानोर और तीमोन और परमिनास और अन्ताकीवासी नीकुलाउस हां जौन यहूदी मत में आ गओ हतो, नबेर लओ। इन हां प्रेरितन के सामूं ठांड़ो करो और उन ने बिन्तवाई कर के उन पे हाथ धरे। और परमेसुर कौ बचन फैलत गओ और यरूशलेम में चेलन की गिनती बिलात बढ़त गई; और याजकों कौ एक बड़ो समाज ई मत कौ मानबेवारो हो गओ। स्तिफनुस अनुग्रह और सामर्थ से भर के मान्सन में बड़े बड़े अदभुत काम और चिन्ह दिखात हतो। जब ऊ आराधनालय में से जौन लिबिरतीनों की कहलात हती, और कुरेनी और सिकन्दरिया और किलिकिया और एशिया के मान्सनों में से कैऊ जने ठांड़े होकें स्तिफनुस से बतकाव करन लगे। पर ऊ समझदारी और ऊ आत्मा कौ जीसे बो बातें करत हतो, बे सामना न कर सके। ई पे उन ने कैऊ मान्सन हां उस्केरो जौन कहन लगे, हम ने ईहां मूसा और परमेसुर के विरोद में निंदरत सुनो आय। और मान्सन और बड़े बूढ़ों और शास्त्रियन हां भड़का के चढ़ आए और ऊहां पकड़ के महापंचयात में ले आए। और लबरे गवाय ठांढ़े करे, जिन ने कओ जौ मान्स ई पवित्तर जांगा और नेम व्यवस्था के विरोद में बोलबो नईं छोड़त। कायसे हम ने ईहां जौ कैत सुनो आय, कि जौई यीशु नासरी ई जांगा हां ढ़ा दै है, और उन रीतियन हां बदल दै है जौन मूसा ने हम हां दई आय। तब सबरे मान्सन ने जौन महापंचयात में बैठे हते, ऊ पे आंखें गड़ाईं तो ऊकौ मों सरगदूत घांई तको। तब महायाजक ने कओ, का जे बातें सांची आंय? स्तिफनुस ने कओ; हे भईया हरौ, और मताई बाप सुनो, हमाओ बाप इब्राहीम हारान में बसवे से पेंला जब मिसुपुतामिया में हतो; तो तेजोमय परमेसुर ने ऊ ए दर्शन दओ। और ऊसे कओ तें अपनो देस और अपने मान्सन में से कड़ के ऊ देस में जा, जौन मैं तोहां तका हों। तब बो कसदियों के देस में से कड़ के हारान में जा बसो; ऊके बाप की मौत के पाछें परमेसुर ने ऊहां उते से लाके ई देस में बसाओ जी में अब तुम बसत आव। और ऊहां कछु लौ जमीन जदाद, इते लौ कि गोड़े धरबे हां जांगा नईं दई, पर कौल करो कि मैं जौ देस, तोरे और तोरे पाछें तोरे वंस के हाथ कर दें हों; जैसे ऊ समय ऊ लौ कौनऊ लड़का न हतो। और परमेसुर ने कहो; तोरी सन्तान के जनें पराए देस में परदेसी हुईयें; और बे उन हां दास बना हैं, और चार सौ बरसन लौ दुख दें है। फिन परमेसुर ने कओ; जौन जाति के बे दास हुईयें, उन हां मैं दण्ड दे हों; और ईके पाछें ऐई जांगा मोरी सेवा कर हैं। और परमेसुर ने ऊसे खतने कौ कौल बांधो; और ऐई दसा में इसहाक ऊसे पैदा भओ; और आठवें दिना ऊकौ खतना भओ; और इसहाक से याकूब और याकूब से बारह कुलपति पैदा भए। कुलपतियन ने यूसुफ से डाह कर के ऊहां मिसर जाबेवारन के हाथ बेंच दओ; पर परमेसुर ऊके संग्गै हतो। और ऊहां ऊ की सबरी परेसानियों से छुड़ा के मिसर के राजा फिरौन के आंगू दया और बुद्धि से भर दओ, और ऊ ने ऊहां मिसर पे और अपने घर पर अधकारी ठैराओ। तब मिसर और सबरे कनान में आकाल पड़ो; जी से भारी परेसानी भई, और हमाए बापदादों हां नांज नईं मिलत हतो। पर याकूब ने जा सुन के, कि मिसर में नांज आय, हमाए बापदादन हां पैली बेर पठैओ। दूजी बेर यूसुफ ने अपने हां अपने भाईयन पे उजागर कर दओ, और यूसुफ की जाति फिरौन हां पता पड़ गई। तब यूसुफ ने अपने बाप याकूब और अपने सबरे कुटुम्ब हां, जौन पछत्तर मान्स हते बुलवा पठैओ। तब याकूब मिसर में गओ; और उते ऊ और हमाए बापदादे मर गए। और बे शिकिम में पोंचाए जाके ऊ कबर में धरे गए, जीहां इब्राहीम ने चांदी देके शकेम में हमोर की सन्तान से खरीदो हतो। पर जब ऊ कौल कौ टैम पूरो होबे हां ऐंगर आओ, जौन परमेसुर ने इब्राहीम से करो हतो, तो मिसर में बे मान्स बढ़ गए; और बिलात हो गए। तब मिसर में दूसरो राजा भओ जौन यूसुफ हां नईं जानत हतो। ऊ ने हमाई जाति से चालाकी कर के हमाए बापदादन के संग्गै इते लौ बुरओ वैवार करो, कि उन हां अपने बाल बच्चा तक मेंक देने पड़े कि बे जीयत न रैबें। ओई टैम पे मूसा पैदा भओ बो परमेसुर के लेखे में ऐन खबसूरत हतो; बो तीन मईना लौ अपने बाप के घर में पालो गओ। जब मेंक दओ गओ तो फिरौन की बेटी ने ऊहां उठा लओ, और अपनो बेटा कर के ऊहां पालो। मूसा हां मिसरियन की सबरी विद्या पढ़ाई गई, और बो बचन और कर्म दोईयन में बली हतो। जब मूसा चालीस बरस कौ भओ, तो ऊके हिए में बात आई कि मैं अपने इस्राएली भाईयन से भेंट करों। ऊ ने एक जने पे जादती होत तक के, ऊहां बचाओ, और मिसरी हां मार के सताए भए कौ पलटा लओ। ऊ ने विचार करो, कि ऊके भाई समझ हैं कि परमेसुर ऊके हातन से उन कौ छुटकारो कर है, पर उन ने न समजो। दूसरे दिना जब बे आपुस में झगड़ रए हते, तो मूसा उते आओ; और जौ कह के उन हां मेल करबे हां समजाओ, हे मान्सन तुम तो भाई भाई आव, एक दूजे पे काय जादती करत आव? पर जौन अपने पड़ोसी पे जादती कर रओ हतो, ऊ ने मूसा हां जौ कै कें हटक दओ, तोहां कीने हम पे हाकम और न्यायी ठैराओ आय? का जौन भांत तेंने कल मिसरी हां मार डालो मोय सोई मार डालो चाहत आय? जा बात सुनके मूसा भगो; और मिद्यान देस में परदेसी होकें रैन लगो: और उत ऊके दो लरका भए। जब पूरे चालीस बरस बीत गए, तो एक सरगदूत ने सीनै पहरवा के हार में ऊहां एक बरत भई झाड़ी की ज्वाला में दर्शन दओ। मूसा जौ दर्शन तक के चकित भओ, और जब तकबे के लाने ऐंगर गओ, तो पिरभु कौ जौ बोल भओ। मैं तोरे बापदादों, इब्राहीम, इसहाक और याकूब कौ परमेसुर आंव: तब तो मूसा कांप उठो, इते लौ कि उए तकबे की हिम्मत न रई। तब पिरभु ने मूसा से कओ; अपने गोड़न से पनईंयां उतार ले, कायसे जौन जांगा तें ठांड़ो आय, बा पवित्तर भूमि आय। मैंने सांची में अपने मान्सन की जौन मिसर में आंय, बुरई दसा हां तको आय; और उन की आह और रोबो सुनो आय; ई लाने उन हां छुड़ाबे हां उतरो आंव। अब आ, मैं तोहां मिसर में पठै हों। जौन मूसा हां उन ने जौ कह के हटक दओ हतो कि तोय कीने हम पे हाकम और न्यायी ठैराओ आय; ओई हां परमेसुर ने हाकम और छुड़ाबेवारो ठैरा के, ऊ सरगदूत के द्वारा जीने ऊहां झाड़ी में दर्शन दओ हतो, पठैओ। जौई मान्स मिसर और लाल समुन्दर और हार में चालीस बरसन लौ अदभुत काम और चिन्ह तका तका के, उन हां काड़ लाओ। जौ ओई मूसा आय, जीने इस्राएलियन से कओ; परमेसुर तुमाए भाईयन में से तुमाए लाने मोरे जैसो एक अगमवकता उठा है। जौ ओई आय, जीने हार में मण्डली के मजारें ऊ सरगदूत के संग्गै सीनै पहरवा पे ऊसे बातें करीं, और हमाए बाप दादों के संग्गै हतो: ओई हां जीयत बचन मिले, कि हम लौ पोंचाए। पर हमाए बाप दादों ने ऊ की मानबो न चाही; पर ऊ ए हटा के अपने हिए मिसर कोद हां फेरे। और हारून से कओ; हमाए लाने ऐसो देवता बना, जौन हमाए आंगू आंगू चलें, कायसे ऊ मूसा जौन हम हां मिसर देस से काड़ लाओ, हम नईं जानत ऊहां का भओ आय? उन दिना में उन ने एक बछड़ा बना के ऊके सामूं बलि चढ़ाई; और अपने हांतन के कामन पे खुसी मनाऊ न लगे। सो परमेसुर ने मों फेर के उन हां छोड़ दओ, कि आकासगण हां पूजें; जैसो कि अगमवकतन की पोथियन में लिखो आय; हे इस्राएल के घराने, का तुम हार में चालीस बरसन लौ पशुबलि और अन्‍नबलि मोहां चढात रए? तुम मोलेक के तम्बू और रिफान देवता के तारे हां लए फिरत हते; जाने के उन मूर्तियन हां जिन हां तुम ने दण्डवत के लाने बनाओ हतो: सो मैं तुम हां बाबुल के ऊ पार ले जा के बसा हों। साक्षी कौ तम्बू हार में हमाए बापदादों के बीच हतो; जैसो ऊ ने ठैराओ, जीने मूसा से कओ; जो बनावट तेंने तकी आय, ऊके अनसार ऊहां बना। ओई तम्बू हां हमाए बाप दादों ने पेंला से पाके यहोशू के संग्गै इते ले आए; जौन टैम पे उन ने ऊ दूसरी जात वारन पे अधकार पाओ, जिन हां परमेसुर ने हमाए बाप दादों के सामूं से काड़ दओ; और ऊ तम्बू दाऊद के टैम तक रओ। ऊ पे परमेसुर ने दया करी, सो ऊ ने बिन्तवाई करी, कि बो याकूब के परमेसुर के लाने एक रैबे की जांगह बनाबें। पर सुलैमान ने ऊके लाने एक घर बनाओ। पर परम परधान हातन के बनाए घर में नईं रैत, जैसो के अगमवकता ने कओ आय। पिरभु कैत आय, सरग सिंहासन और पृथ्वी मोरे गोड़न की चौकी आय, मोरे लाने तुम कौन भांत कौ घर बना हौ? और मोरे निवास की कौन सी जांगह हुईये। का जे सबरी बस्तें मोरे हातन की बनाई भईं नईंयां? हे हठीले और हिए और कान के खतना न कराए गए मान्सो, तुम हमेसा पवित्तर आत्मा कौ विरोद करत आव। जैसो तुमाए बाप दादे करत हते, तुम सोई करत आव। अगमवकतन में से कीहां तुमाए बाप दादन ने नईं सताओ, उन ने ऊ धर्मी के आबे कौ सन्देसो देबेवारन हां मार डालो, और अब तुम सोई ऊके पकड़बेवारे और मार डालबेवारे भए। तुम ने सरगदूतन के द्वारा ठैराई भई व्यवस्था नेम तो पाओ, पर ऊके अनसार चल न पाए। जे बातें सुन के बे आपे से बायरें हो गए और ऊ पे खिसया के दांत पीसन लगे। पर ऊ ने पवित्तर आत्मा से भरके सरग कोद तको और परमेसुर की मईंमा करी और यीशु हां परमेसुर के सूदे हाथ ठांड़ो तको और कओ। तको, मैं सरग हां खुलो भओ, और मान्सन के पूत हां परमेसुर के सूदे हाथ ठांड़ो तकत आंव। तब उन ने चिल्याके कान बन्द कर लए, और एक संग्गै ऊ पै झपटे। और ऊहां नगर के बायरें काड़ के ऊ पे पत्थरा मेंकन लगे, जोैन उते हते उन ने अपने उन्ना शाऊ ल नाओं एक जुआन के गोड़न के ऐंगर उतार के धर दए। बे स्तिफनुस पे पत्थरा मेंकत रए, और ऊ जौ कै कें बिन्तवाई करत रओ; हे पिरभु यीशु, मोरी आत्मा हां स्वीकार कर। फिन घुटने टेक के जोर से पुकार के कओ, हे पिरभु जौ पाप उन पे नईं लगाओ, और जौ कै कें सो गओ: और शाऊ ल ऊ की हत्या में सामिल हतो। ओई दिना यरूशलेम की मण्डली पे बड़ो उपद्रव शुरू हो गओ और प्रेरितन हां छोड़ सब के सब यहूदिया और सामरिया देशों में फैल गए। कछु भगतन ने स्तिफनुस हां कबर में दफनाओ; और ऊके लाने बिलात दुख मनाओ। शाऊ ल मण्डली हां उजाड़ रओ हतो; और घर घर में घुस के बईयरन और मान्सन हां घर में से कड़ोर कड़ोर के जेहलखाने में डालत हतो। जौन तितर बितर भए हते, बे भलो सन्देसो सुनात फिरे। और फिलिप्पुस सामरिया नगर में जाके मान्सन के मजारें मसीह कौ परचार करन लगो। जौन बातें फिलिप्पुस ने कईं, उन हां मान्सन ने सुन के और जौन चिन्ह बो दिखात हतो उन हां तक के, एक चित होकें मन लगाओ। कायसे कुल्ल जनन में से अशुद्ध आत्माएं जोर से चिल्याऊ त भईं कड़ गईं, और बिलात लकवा के रोगी और लंगड़े सोई साजे करे गए। और ऊ नगर में बड़ी खुसी छा गई। ई से पेंला ऊ नगर में शमौन नाओं को एक मान्स हतो, जौन जादू टोना कर के सामरिया के मान्सन हां चकित करत हतो और अपने आप हां बड़ो जनो बनात हतो। छोटे से बड़े तक सबरे ऊहां मान देत हते, जौ मान्स परमेसुर की बा बड़ी तागद आय, जौन महान कहात आय। ऊ ने बिलात दिना से अपने जादू के कामन से उन हां चकित कर धरो हतो, ई लाने बे ऊ ए बिलात मानत हते। पर उन ने जब फिलिप्पुस कौ बिसवास करो जौन परमेसुर के राज और यीशु के नाओं कौ भलो सन्देसो सुनात हतो, तो मान्स का, बईयरें का, बपतिस्मा लेन लगे। तब शमौन ने खुद बिसवास करो और फिलिप्पुस के संग्गै रैन लगो, बो चिन्ह और बे बड़े आश्चर्य कर्म तक के चकित होत हतो। जब प्रेरितन ने जौन यरूशलेम में हते सुनो कि सामरियन ने परमेसुर कौ बचन मान लओ आय, तो पतरस और यूहन्ना हां उन लौ पठैओ। उन ने जाके उन के लाने बिन्तवाई करी कि पवित्तर आत्मा पाबें। कायसे बो अब लौ उन में से कोऊ पै न उतरो हतो, उन ने तो बस यीशु के नाओं में बपतिस्मा लओ हतो। तब उन ने उन पे हाथ धरे और उन ने पवित्तर आत्मा पाओ। जब शमौन ने तको कि प्रेरितन के हाथ धरबे से पवित्तर आत्मा दओ जात आय, तो ऊ उन के ऐंगर रुपईया लाओ और उन से कओ। जौ अधकार मोहां सोई दो, कि जौन कोऊ पै मैं हाथ धरों, बो पवित्तर आत्मा पाबै। पतरस ने शमौन से कओ; तोरे रुपईया तोरे संग्गै नास होबें, कायसे तेंने परमेसुर कौ दान रुपईयों से मोल लेबे कौ विचार करो आय। ई बात में न तोरो हींसा आय, न बांटा; कायसे तोरो हिया परमेसुर के आंगू सीधो नईंयां। ई लाने अपनी ई बुराई से हिया फिरा के पिरभु से बिन्तवाई कर, हो सकत आय तोरे हिये कौ विचार छिमा हो जाबै। मैं तक रओ आंव, कि तें पित्त की सी कड़वाहट और पापन के एन बन्धन में पड़ो आय। शमौन ने उत्तर दओ, कि तें मोरे लाने पिरभु से बिन्तवाई कर, कि जौन बातें तेंने क ईं आंय, उन में से कोऊ मो पे न आ पड़े। पतरस और यूहन्ना गवाई देके और पिरभु कौ बचन सुना के यरूशलेम हां वापस लौट गए, बे औरें लौटती बेरा, सामरियन के केऊ गांवन में भलो सन्देसो सुनात गए। पिरभु के एक सरगदूत ने फिलिप्पुस से कओ; उठ और दक्खिन कोद ऊ गैल पे जा, जौन यरूशलेम से अज्जाह हां जात आय, और जौन जंगल में आय। ऊ उठ के चल दओ, ऊने तको, कूश देश कौ एक मान्स आ रओ आय ऊ खोजा हतो और कूशियों की रानी कन्दाके कौ मन्त्री और खजांची हतो, बो अराधना करबे के लाने यरूशलेम आओ हतो। बो अपने रथ पे बिराजो भओ, अगमवकता यशायाह की पोथी बांचत भओ अपने देश कुदाऊं लौट रओ हतो। तब आत्मा ने फिलिप्पुस से कओ, ऐंगर जाके रथ के संग्गै हो ले। फिलिप्पुस ने रथ कुदाऊं गदबद लगाई ऊ ने ऊहां यशायाह अगमवकता की पोथी बांचत भए सुनो, ऊ ने पूछो तें जौन बांच रओ आय, का ऊहां समजत सोई आय? ऊ ने कओ, जब लग कोऊ मोय न समजाए मैं कौन भांत समझ सकत आंव? ऊ ने फिलिप्पुस से कओ, रथ में चढ़ के मोरे ऐंगर बैठ। पवित्तर धर्म पोथी से जौन अध्याय बो बांच रओ हतो, बो जौ हतो; बो गाड़र की घांई वध होबे हां पोंचाओ गओ, जैसे मेमना अपने ऊ न कतरबेवारन के आंगू चुप चाप रैत आय, ऊं सई ऊ ने सोई अपनो मों न खोलो। ऊ की दीनता के काजें ऊकौ न्याय नईं होने पाओ, ऊ टैम के मान्सन के बारे में को लेख को कर है, कायसे धरती से ऊकौ प्राण उठाओ जात आय। खोजे ने फिलिप्पुस से पूछो; मैं तोय से बिन्तवाई करत आंव, अगमवकता जौ की के बारे में कैत आय, अपने बारे में या कौनऊ और के बारे में। तब फिलिप्पुस ने बोल समजाबो शुरू करो, और पवित्तर पोथी के इनई बातन से शुरू कर के ऊहां यीशु कौ भलो सन्देसो सुनाओ। गैल पे चलत चलत बे कौनऊ सूनसान जांगा पोंचे, तब खोजे ने कओ, तको इते पानी आय, अब मोहां बपतिस्मा लेबे हां का रोक आय। फिलिप्पुस ने कओ, जदि तें पूरे मन से बिसवास करत आय तो जौ हो सकत आय: ऊ ने उत्तर दओ मैं बिसवास करत आंव कि यीशु मसीह परमेसुर को पूत आय। तब ऊ ने रथ ठांड़ो करबे कौ हुकम करो, फिलिप्पुस और खोजा दोई जने पानू में उतर पड़े, और फिलिप्पुस ने ऊहां बपतिस्मा दओ। जब बे पानू में से कड़ के ऊपर आए, तो पिरभु कौ आत्मा फिलिप्पुस हां उठा ले गओ, और खोजे ने ऊहां फिन न तको, और खोजा अपनी गैल पे खुसी खुसी चलो गओ। फिलिप्पुस अशदोद नगर में आ कड़ो, जब लौ बो कैसरिया नगर में न पोंचो, तब लौ नगर नगर सन्देसो सुनात रओ। शाऊल जौन अबै तक पिरभु के चेलन हां धमकाबे और मार डालबे की धुन में हतो, महायाजक के ऐंगर गओ। और ऊसे दमिश्क के आराधनालयों के नाओं पे ई बात पे चिठियां मंगाई, कि का मान्स, का बईयर, जिन हां ई पंथ के पाबे उन हां बांध के यरूशलेम ले आबै। पर निंगत निंगत जब बो दमिश्क के ऐंगर पोंचो, तो अचानक आकास से ऊके चारऊ कोद ज्योत चमकी। और ऊ भूमि पे गिर पड़ो, और ऊ ने जौ कैत भओ सुनो, हे शाऊ ल, हे शाऊ ल, तें मोय काय सतात आय? ऊ ने पूछो, हे पिरभु, तें को आय? ऊ ने कओ; मैं यीशु आंव; जीहां तें सतात आय। पर अब उठ के नगर में जा, और जौन तोहां करने आय, बो तोसे कहो जै है। जौन मान्स ऊके संग्गै हते, बे चकित रै गए; कायसे बोल तो सुनत हते, पर कोऊहां तकत न हते। तब शाऊ ल धरती पे से उठो, पर जब आंखें खोलीं तो ऊहां कछु दिखाई न दओ और बे ऊकौ हाथ पकड़ के दमिश्क में ले गए। बो तीन दिना लौ तक न सको, और न कछु खाओ न पियो। दमिश्क में हनन्याह नाओं कौ एक चेला हतो, ऊसे पिरभु ने दर्शन में कओ, हे हनन्याह! ऊ ने कओ; हओ पिरभु। तब पिरभु ने ऊसे कओ, उठके ऊ गली में जा जौन सीधी कहात आय, और यहूदा के घर में शाऊ ल नाओं के एक तारसी हां पूछ ले, कायसे तक, ऊ बिन्तवाई कर रओ आय। और ऊ ने हनन्याह नाओं के एक मान्स हां भीतर आत, और अपने ऊ परै हाथ धरत तको; जीसे फिन से तक पाबै। हनन्याह ने उत्तर दओ, हे पिरभु, मैंने ई मान्स के बारे में कुल्ल मान्सन से सुनो आय, कि ईने तोरे पवित्र जन के संग्गै यरूशलेम में बड़ी बड़ी बुराईयां करी आंय। और इते सोई ईहां परधान याजकन कुदाऊंसे अधकार मिलो आय, कि जौन मान्स तोरो नाओं लेत आंय, उन सब हां बांध ले। पर पिरभु ने ऊसे कओ, तें चलो जा; कायसे बो दूसरी जातवारन के लाने और राजाओं, और इस्राएलियन के सामूं मोरो नाओं परचार करबे और उजागर करबे हां मोरो नबेरो भओ जन आय। और मैं ऊहां बता हों, कि ऊहां मोरे नाओं के काजें कैसे कैसे दुख पीड़ा उठाबे पड़ हैं। तब हनन्याह उठ के ऊ घर में गओ, और ऊ पे अपनो हाथ धर के कओ, हे भाई शाऊ ल, पिरभु याने कि यीशु, जौन ऊ गैल में, जीसे तें आओ आय तोहां दिखाई दओ हतो, ओई ने मोय पठैओ आय, कि तें फिन के तकन लगै और पवित्तर आत्मा से भरपूर हो जाबै। और तुरतंऊ ऊ की आंख से छिलका से गिरे, और ऊ तकन लगो और उठ के बपतिस्मा लओ; फिन खाना खाकें बल पाओ। बो कैऊ दिना उन चेलन के संग्गै रओ जो दमिश्क में हते। और ऊ तुरतऊं आराधनालयों में यीशु कौ परचार करन लगो, कि बो परमेसुर कौ पूत आय। सब सुनबेवारे चकित होकें कैन लगे; का जौ ओई नईंयां जौन यरूशलेम में जो ई नाओं हां लेत हते, नास करत हतो, और इते सोई ई लाने आओ आय, कै उन हां बांध के परधान याजकन लौ ले जाबै? पर शाऊ ल और ऊ सक्तिवान होत गओ, और ई बात कौ सबूत दे दे के कै मसीह जौई आय, दमिश्क के रैबेवारे यहूदियन कौ मों बन्द करत रओ। जब कुल्ल दिना हो गए, तो यहूदियन ने जुड़ के शाऊ ल की हत्या करबे कौ जतन करो। पर उन की योजना शाऊ ल हां मालूम हो गई: बे तो ऊहां मार डालबे हां फाटकों पे दिन रात ऊ की घात में लगे रैत हते। पर रात हां ऊके चेलन ने ऊहां टुकना में बैठाओ, और शहरपनाह पर से लटका के उतार दओ। यरूशलेम में पोंच के शाऊ ल ने चेलन के संग्गै मिल जाबे कौ जतन करो: पर सबरे ऊसे डरात हते, कायसे कि उन हां बिसवास न होत हतो, कि ऊ सोई चेला आय। पर बरनबा ने ऊहां अपने संग्गै प्रेरितन के ऐंगर ले जाके उनहां बताओ, कि ईने कौन भांत गोला गैल में पिरभु हां तको, और ऊसे बातें करीं; फिन दमिश्क में ईने कैसे हिम्मत से यीशु के नाओं से परचार करो। बो उन के संग्गै यरूशलेम में आत जात रओ। और निधड़क होकें पिरभु के नाओं से परचार करत हतो: और यूनानी भाषा बोलबेवारे यहूदियन के संग्गै बातचीत और बतकाओ करत हतो; पर बे औरें ऊहां मार डालबे कौ जतन करन लगे। जौ जान के ऊहां कैसरिया में ले आए, और तरसुस हां पठै दओ। ई भांत सबरे यहूदिया, और गलील और सामरिया में मण्डली हां चैन मिलो, और ऊ की बढ़त होत रई; और बो पिरभु के डर और पवित्तर आत्मा की शान्ति में और आंगू बढ़त जात हती। फिन ऐसो भओ के पतरस सब जांगह फिरत भओ, उन पवित्तर जन के ऐंगर पोंचो, जौन लुद्दा में रैत हते। उते ऊ ए एनियास नाओं कौ एक लकवे कौ रूगिया मान्स मिलो, जौन आठ बरस से खाट पे पड़ो हतो। पतरस ने ऊसे कओ; हे एनियास! यीशु मसीह तोहां साजो करत आय; उठ, अपनो बिछौना बिछा, तब ऊ तुरतऊं उठ के ठांड़ो भओ। तब लुद्दा और शारोन के सबरे रैबेवारे ऊ ए तक के पिरभु कुदाऊं फिरे। याफा में तबीता जाने के दोरकास नाओं की एक बिसवासिनी रैत हती, बा कुल्ल भले भले काम और दान दओ करत हती। उनईं दिना बा रूगिया होकें मर गई; और उन ने ऊहां सपरा के अटारी में धर दओ। ई लाने कि लुद्दा याफा के ऐंगर हतो, चेलन ने जौ सुन के कि पतरस उते आय, दो मान्स पठै के ऊसे बिन्तवाई करी, कि हमाए इते आबे हां अबेर न कर। तब पतरस उठके उन के संग्गै हो लओ, और जब ऊ पोंचो, तो बे ऊहां ऊ अटारी पे ले गए; सबरी बिधवाएं रोत भईं ऊके ऐंगर आ ठांड़ी भईं: और जौन कुरता और उन्ना दोरकास ने उन के संग्गै रैत भए बनाए हते, दिखान लगीं। तब पतरस ने सबरन हां बायरें कर दओ, और घुटने टेक के बिन्तवाई करी; और लोथ कुदाऊं तक के कओ; हे तबीता उठ: तब ऊ ने अपनी आंखें खोल दईं; और पतरस हां तक के उठ बैठी। पतरस ने हाथ दे ऊहां उठाओ, और पवित्तर मान्सन और बिधवाओं हां बुलाके ऊ ए जीयत दिखा दओ। जा बात सबरे याफा में फैल गई: और बहुतों ने पिरभु पे बिसवास करो। और पतरस याफा में कोऊ चमड़ा के धन्धा करबेवारे लौ बिलात दिना तक रओ। कैसरिया में कुरनेलियुस नाओं कौ एक मान्स हतो, जौन इतालियानी नाओं की पलटन कौ सूबेदार हतो। ऊ भक्त हतो, और अपने सबरे घराने सुदा परमेसुर से डरात हतो, और यहूदी मान्सन हां कुल्ल दान देत, और बिरोबर परमेसुर से बिन्तवाई करत हतो। ऊ ने दिन के तीसरे पहर दर्शन में साफ साफ तको, कि परमेसुर कौ एक सरगदूत ऊके ऐंगर आओ और कैन लगो; हे कुरनेलियुस। ऊ ने ऊहां ऐन जोर लगा के तको; और डर के कओ; हे पिरभु का आय? ऊ ने कओ, तोरी बिन्तवाई और दान सुमरण के लाने परमेसुर के आंगू पोंचे आंय। और अब याफा हां मान्स पठै के शमौन हां जौन पतरस कहात आय, बुलवा ले। बो शमौन चमड़े के धन्धा करबेवारे के इते पाहुन आय, जी कौ समुन्दर के कगार पे घर आय। जब बो सरगदूत, जीने ऊसे बातें क ईं हतीं चलो गओ, तो ऊ ने दो सेवक, जौन ऊ लौ हाजिर रैत हते, उन में से एक भक्त सिपाई हां बुलाओ। और उन हां सबरी बातें समझा के याफा हां पठै दओ। दूसरे दिना, जब बे निंगत निंगत नगर के ऐंगर पोंचे, तो दोपहर के ऐंगर पतरस छत पे बिन्तवाई करबे हां चढ़ो। ऊहां भूख लगी, और कछु खाबे की चाहना हती; पर जब बे औरें तईयारी कर रए हते, तो ऊ गैर होस हो गओ। और ऊ ने तको, कि आकास खुल गओ; और एक बस्त, बड़ी चादरा की घांई चारों खूटों से लटको भओ, धरती कुदाऊं उतर रओ आय। जी में धरती के सब भांत के चौपाए और रेंगबेवारे जन्तु और आकास के पन्छी हते। ऊहां एक ऐसो बोल सुन पड़ो, हे पतरस उठ, मार और खा। पर पतरस ने कओ, नईं पिरभु, कभऊं नईं; कायसे कि मैंने कभऊं कौनऊ अपवित्र या अशुद्ध बस्त नईं खाई आय। और दूजी बेर ऊहां बोल फिन सुनाई दओ, जो कछु परमेसुर ने शुद्ध ठैराओ आय, ऊहां तें अशुद्ध न कै। तीन बेर ऐसई भओ; तब तुरतऊं ऊ पात्र आकास पे उठा लओ गओ। जब पतरस अपने हिये में दुबधा कर रओ हतो, कि जो दर्शन मैंने तको आय, बो का हो सकत आय? तो तको, बे मान्स जिन हां कुरनेलियुस ने पठैओ हतो, शमौन के घर कौ पता लगा दोरे पे आ ठांड़े भए। और टेर के पूंछन लगे, का शमौन जौन पतरस कहात आय, इतईं पाहुन आय? पतरस तो ऊ दर्शन पे सोचई रओ हतो, कि आत्मा ने ऊसे कओ, तक, तीन मान्स तोरी खोज में आंय। अब उठ के नीचे जा, और बिना सक संका उन के संग्गै चलो जा; कायसे मैंने उन हां पठैओ आय। तब पतरस ने उतर के उन मान्सन से कओ; तको, जीऐ तुम खोज रए आव, बो मैं आंव; तुमाए आबे कौ का कारण आय। उन ने उत्तर दओ; कुरनेलियुस सूबेदार जौन धरमी और परमेसुर से डराबेवारो आय और सबरी यहूदी जात में सुनाम मान्स आय, ऊ ने पवित्तर सरगदूत से जौ हुकम पाओ आय, कि तोय अपने घर बुला के तोसे बचन सुने। तब पतरस ने उन हां भीतर बुला के उन की पहुनाई करी। दूसरे दिना, बो उन के संग्गै गओ; और याफा के बिसवासी जन में से कछु उन के संग्गै हो लए। दूसरे दिना बे कैसरिया पोंचे, और कुरनेलियुस अपने घर वारन और प्यारे दोस्तों हां जोड़ के उन की बाट जोह रओ हतो। जब पतरस भीतर आ रओ हतो, तो कुरनेलियुस ने पतरस से भेंट करी, और ऊके गोड़न पे गिर के ऊहां परनाम करो। पर पतरस ने उए उठा के कओ, ठांड़ो हो, मैं सोई मान्स आंव। और ऊके संग्गै बतयात भओ भीतर गओ, और बिलात जन हां जुड़े देख के। उनसे कओ, तुम जानत आव, कि दूसरी जात वारन की संगत करबो या उन के इते जाबो यहूदी के लाने अधर्म आय, पर परमेसुर ने मोय बताओ आय, कि कोई मान्स हां अपवित्र या अशुद्ध न कहों। ई लाने जब मैं बुलाओ गओ; तो बिना कछु कए चलो आओ: अब मैं पूंछत आंव कि मोय की लाने बुलाओ गओ आय? कुरनेलियुस ने कओ; ऐई घड़ी पूरे चार दिना भए, मैं अपने घर में तीसरे पहर बिन्तवाई कर रओ हतो; तो तको, एक मान्स चमकीलो उन्ना पैरें भए, मोरे आंगू आ ठांड़ो भओ। और कैन लगो; हे कुरनेलियुस तोरी बिन्तवाई सुन लई गई आय, और तोरे दान परमेसुर के सामूं सुमरण करे गए आंय। ई लाने कोऊहां याफा पठै के शमौन हां जौन पतरस कहात आय, बुला ले, बो समुन्दर के कगारें शमौन चमड़े के धन्धा करबेवारे के इते पाहुन आय। तब मैंने तुरतऊं तोरे लौ मान्स पठैओ, और तेंने भला करो, कि तें आ गओ: अब हम सबरे इते परमेसुर के सामूं आंय, जीसे जौन कछु परमेसुर ने तोसें कओ आय बो सुनें। तब पतरस ने कओ; अब मोय पूरो पक्को भओ आय कि परमेसुर कोऊ की तरफदारी नईं करत। जाने कै हर जाति में जौन ऊसे डरत और धरम के काम करत आय, बो ऊ ए साजो लगत आय। जौन सन्देसो ऊ ने इस्राएलियन के ऐंगर पठैओ, जब ऊ ने यीशु मसीह के द्वारा (जौन सबई कौ पिरभु आय) सान्ति कौ भलो सन्देसो सुनाओ। बो सन्देसो तुम जानत आव जौन यूहन्ना के बपतिस्मा के परचार के पाछें गलील से शुरू होकें सबरे यहूदिया में फैल गओ। परमेसुर ने कौन भांत से यीशु नासरी हां पवित्तर आत्मा और सामर्थ से भर दओ: बो भलाई करत, और सब हां जौन शैतान छलिया के सताए भए हते, साजो करत फिरो; कायसे परमसुर ऊके संग्गै हतो। हम उन सबरे कामन के गवाय आंय; जौन ऊ ने यहूदिया के परगना और यरूशलेम में सोई करे, और उन ने ऊहां काठ के क्रूस पे लटका के मार डालो। ऊहां परमेसुर ने तीसरे दिना जिला दओ, और उजागर सोई कर दओ आय। सबरे मान्सन पे नईं पर उन गवाहों पै जिन हां परमेसुर ने पेंला से नबेर लओ हतो, जाने कि हम पे जिन ने ऊके संग्गै ऊके जी उठबे के पाछें खाओ पियो। और ऊ ने हम हां हुकम करो, कि मान्सन में परचार करो; और गवाय दो, कि बो ओई आय; जीहां परमेसुर ने जीयत भए और मरे भयन कौ न्यायी ठहराओ आय। ऊ की सबरे अगमबानी कैबेवारे गवाय देत आंय, कि जो कोई ऊ पै बिसवास कर है, ऊहां ऊके नाओं से पापन की छिमा मिल है। पतरस जे बातें कर ही रओ हतो, कि पवित्तर आत्मा बचन के सबरे सुनबेवारन पे उतर आओ। और जितने खतना करे भए बिसवासी पतरस के संग्गै आए हते, बे सब चकरया ग ए कि दूसरी जातवारन पे सोई पवित्तर आत्मा कौ दान उण्डेलो गओ आय। कायसे उन ने उन हां भांत भांत की भाषा बोलत और परमेसुर की बड़ाई करत सुनो। ई पे पतरस ने कओ; का कोई पानू हां रोक सकत आय, कि बे बपतिस्मा न पाएं, जिन ने हमाए घांई पवित्तर आत्मा पाओ आय? और ऊ ने हुकम दओ की उन हां यीशु मसीह के नाओं से बपतिस्मा दओ जाबै: तब उन ने ऊसे बिन्तवाई करी कि बो कछु दिना और उन के संग्गै बनो रए। फिन प्रेरितन और भाईयन ने जौन सबरे यहूदिया में हते सुनो, कि गैर यहूदियन ने सोई परमेसुर कौ बचन मान लओ आय। ई लाने जब पतरस यरूशलेम आओ, तो खतना करे भए लोग ऊसे जौ कह के बतकाव करन लगे। तेंने तो बिना खतना वाले लोगन के इते जाके उन के संग्गै रोटी खाई। तब पतरस ने उनहां सिलसिलेवार सुनाके समझाओ शुरू करो। मैं याफा नगर में प्रार्थना कर रओ हतो, मैंने बेसुध होकें एक दर्शन हेरो, कि एक बड़ी चदरा घांई कोऊ बस्त, चारऊं कोने से लटकत भई, आकास से उतर रई आय, बो ठीक मोरे ऐंगर आ गई। और जब मैंने ऊहां गौर से हेरो, तो ऊ में धरती के चौपाए और जंगली जिनावर और रेंगबेवाले जन्तु और आकास के पंछियन हां हेरो। तब मोय जौ बोलबो भी सुनाई दओ, पतरस उठ मार और खा। पर मैंने कई, हे प्रभु बिल्कुल नईं, कायसे मोरे मों में कभऊं अपवित्र या अशुद्ध बसत नईं गई। पर फिन आकास से दूसरी बेर बोलबो भओ, जीहां परमेसुर ने शुद्ध ठहराओ आय ऊहां अशुद्ध न कह। तीन बेर ऐंसई भओ; तब सब कछु फिन आकास में उठा लओ गओ। और हेरो, सही ओई बेरा तीन जनें, जौन कैसरिया से मोरे ऐंगर पठैय गए हते, ऊ घर के आंगू आ ठांड़े भए, जिते हम ठहरे हते। पवित्र आत्मा ने मोसे कई, कि मैं बेखटके उनके संग्गै जाओं, और जे छै भाईय सोई हमाए संग्गै निंगे; और हम ऊ मान्स के घरै गए। ऊ ने हम हां बताओ, कि की तरहां ऊ ने एक सरगदूत हां अपने घरै ठांड़ो हेरो, और जौ कहत सुनो, कोऊहां याफा पठैय के शमौन हां जौन पतरस कहात आय इते टेर ले। बो तोय ऐंसी बतें बता है, जीके द्वारा तें और तोरो सबरो कुटुम्ब उद्धार पा है। और जैसई मैंने बोलबो शुरू करो, वैसई पवित्र आत्मा उन पै भी ओई रीत से उतरो, जैसो शुरू में हम पे उतरो हतो। तब प्रभु कौ बोल मोय खबर आव; जौन बो कहो करत हतो; यूहन्ना ने तो पानू से बपतिस्मा दओ, पर तुम पवित्र आत्मा से बपतिस्मा पा हौ। ई लाने अगर परमेसुर ने उने भी ओई बरदान दओ, जौन हम हां प्रभु यीशु मसीह पे भरोसा करबे पे मिलो हतो; तो मैं को हतो जौन परमेसुर हां रोक सकत हतो? बे जौ सुनके चिमा गए, और परमेसुर की बड़ाई करके कहन लगे, तबई तो परमेसुर ने गैर यहूदियन हां भी जीबे के लाने मन फिराबे कौ बरदान दओ आय। ई लाने लोग ऊ सताव के काजें, जौन स्तुफनस से शुरू भओ हतो, इते उते हो गए हते, बे निंगत निंगत फीनीके, क्रुप्रुस और अन्ताकिया पोंचे; और यहूदियन हां छोड़ कोऊ और हां बचन नईं सुनात हते। पर उन में से कछु क्रुप्रुस और कुरेनी हते, जौन अन्ताकिया पोंच के यूनानियन हां भी प्रभु यीशु कौ सन्देसो सुनाउन लगे। प्रभु कौ हाथ उन पे हतो, और बड़ी गिनती में लोग भरोसा करके प्रभु की कोद फिरे। जब उन की चरचा यरूशलेम की मण्डली के कानों लौ पोंची, तो उन ने बरनावास हां अन्ताकिया पठैय दओ। ऊ ने उते पोंच के, परमेसुर के अनुग्रह हां हेरो तो बो खुस भओ; और उन सबई हां हिम्मत देन लगो कि बे पूरे मन से प्रभु के भरोसे में बने रएं। कायसे बो भलो मान्स हतो; और पवित्र आत्मा और भरोसे से भरपूर हतो: और बिलात लोग प्रभु के ऐंगर आए। ओई बेरा बो शाऊ ल हां खोजबे के लाने तरतुस गओ। जब बो ऊहां मिल गओ तो ऊहां अन्ताकिया लै आओ, तब ऐसो भओ कि बे पूरे एक बरस लौ मण्डली के संग्गै मिलत और बिलात लोगन हां सीख देत रए, और चेले सब से पेंला अन्ताकिया में मसीही कहलाए। उनईं दिना कछु अगमवकता यरूशलेम से अन्ताकिया हां आए। उन में से अगबुस नाओं एक जन ने ठांड़े होकें पवित्र आत्मा की अगुवाई से बताओ, कि सबरे संसार में अकाल पड़ है, और क्लौदियुस के राज्यकाल में ऐंसई भओ। चेलन ने ठानी, कि हरएक अपनी अपनी हैसियत के अनसार यहूदिया में रहबे वाले भाईयन की मदद के लाने कछु पठैय। उन ने ऐंसई करो; और बरनाबास और शाऊ ल के हाथन प्राचीनन के ऐंगर कछु पठै दओ। ओई बेरा राजा हेरोदेस ने मण्डली के कछु जन हां सताबे के लाने उन पे हाथ उठाए। ऊ ने यूहन्ना के भईया याकूब हां तलवार से मरवा डालो। और पतरस हां सोई पकड़वाबे के लाने आंगू बढ़ो, जे अखमीरी रोटी के दिना हते। और ऊ ने ऊहां पकड़वा के जेलखाने में डाल दओ, और चार चार सिपाईयन के चार दल हां पहरा पे ई लाने धरो, कि फसह के पाछें ऊहां बायरें मान्सन के सामूं लाओ जाबै। ई तरहां पतरस जेलखाने में धरो गओ, पर मण्डली ऊके लाने परमेसुर से एक मन से प्रार्थना करत रई। जी रात हेरोदेस ऊहां बायरें काड़बेवालो हतो, पतरस दो जंजीरन से बंधो भओ, दो सिपाईयन के बीच में सो रओ हतो: और पहिरेदार द्वार पे रखनवारी कर रओ हतो। और हेरो, प्रभु कौ एक सरगदूत एकाएक आ गओ: और ऊ कुठरिया में उजयारो चमको: और ऊ ने पतरस की पसुरिया में हाथ मार के ऊहां जगाओ, और कई; तुरतईं उठो, और ऊके हाथन से जंजीरें गिर पड़ीं। सरगदूत ने ऊसे कई; करियाई बांध और अपनी पनईयां पहिन ले, ऊ ने वैसई करो, फिन ऊ ने ऊसे कई, अपने उन्ना पहिन के मोरे पाछें आ। बो बायरें कड़ो और ऊके पाछें पाछें चलो गओ; पर ऊ की समझ में जौ नईं आ रओ हतो, कि जो कछु सरगदूत कर रओ आय, बो सांची आय, पर ऊ ने जा सोची, कि मैं कोई दरसन हेर रओ आंव। और जब बे पेंला और दूसरां पहिरे से कड़के, लोहे के ऊ फाटक पे आए, जौन नगर की कोद आय; तो बो ऊके लाने अपने से खुल गओ: बे बायरें कड़ के एक गलियारा में होकें निंगे, और तुरतईं सरगदूत ऊहां छोड़के चलो गओ। जब पतरस हां होस आओ, तो ऊ ने सोची अब मैं सही में जान गओ आंव, कि प्रभु ने अपनो सरगदूत पठैय के मोय हेरोदेस के हाथन से छुड़ा लओ, और यहूदियन की सबरी आस पे पानू फेर दओ आय। जब ऊहां जौ मालूम भओ तो ऊ यूहन्ना की मताई मरियम के घरै गओ, जौन मरकुस सोई कहात आय; जिते बिलात लोग जमा होकें प्रार्थना कर रए हते। जब ऊ ने फाटक के द्वारे हां खटखटाव, तब रूदे नाओं की चाकरनी खोलबे आई। जब ऊ ने पतरस कौ एैरो चीनो, तो खुसी के मारे बिना द्वार खोले, गदबद देके भीतर गई, और बताओ, कि पतरस द्वार पे ठांड़ो आय। उन ने ऊसे कई तें पगलू आय; मगर बो जोर से भरोसा धरके बोली जा सांची आय, तब उन ने कई, ऊकौ सरगदूत हुईये। पर पतरस खटखटात रओ, जब उन ने द्वार खोलो तो बे ऊहां हेर के अचरज में पड़ गए। पर ऊ ने उनहां सान्त रहबे कौ इसारो हाथन से करके बताओ, कि प्रभु ने मोय की तरहां जेलखाने से बायरें काड़ो, फिन ऊ ने कई, याकूब और भाईयन हां जौ बता दईयो, तब बो उते से कड़ के कोई दूसरी जांगह निंग गओ। भुनसारौ भए सिपाहियन में खलबली मच गई, की पतरस कौ का भओ। हेरोदेस ने जब ऊ की बहुत खोज करी, और ऊहां नईं पाओ; तो ऊ ने पहिरेदारन की खबर लई और हुकम दओ कि उनहां लै जाके मार डालें: और बो यहूदिया से कैसरिया में जाके रहन लगो। बो सूर और सैदा के लोगन से बिलात गुस्‍सा हतो; बे एक मन होकें ऊके ऐंगर आए और राजमहल के हाकिम बलास्तुस हां मनाके मेल करबो चाहो; कायसे राजा के देस से उन के देस की रोटी चलत हती। ठहराए गए दिना हेरोदेस राजसी उन्ना पहिन के गद्दी पे बैठो; और उनहां कैन लगो। और लोग बाग चिल्लात रए, जा तो मान्स की बोली नईं ईश्वर की बोली आय। ओई बेरा प्रभु के एक दूत ने ऊहां मारो, कायसे ऊ ने परमेसुर हां महिमा नईं दई, ऊके सरीर में कीड़ा पड़ गए और ऊ ने दम तोड़ दओ। पर परमेसुर कौ बोल बढ़त और फैलत गओ। बरनाबास और शाऊ ल जब अपनो काज पूरो कर चुके, तो यरूशलेम से लौटे, और अपने संग्गै यूहन्ना हां सोई, जौन मरकुस कहात आय लेत आए। अन्ताकिया की मडण्ली में कछु आगमवक्ता और गुरू हते; जैसे बरनाबास और शमौन जो नीगर कहात आय; लूकियुस कुरेनी, और देस की चौथाई के राजा हेरोदेस कौ दूधभाई मनाहेम और शाऊ ल। जब बे उपास और प्रभु की भक्ति कर रए हते, तो पवित्र आत्मा ने कई; मोरे लाने बरनाबास और शाऊ ल हां, ऊ काज के लाने न्यारो करो, जीके लाने मैंने उनहां टेरो आय। जब बे उपास और प्रार्थना कर चुके, तो उन पे हाथ धरके उनहां पठै दओ। ई लाने पवित्र आत्मा से कय से बे सिलूकिया गए; और उते से जहाज से कुप्रुस गए। सलमीस पहुंच के, उन ने यहूदियन के प्रार्थनाघरन में परमेसुर कौ परचार करबो शुरू करो; यूहन्ना उन कौ चाकर हतो। जब बे ऊ सबरे टापू में से होत भए पाफुस पोंचे, तो उनहां बार-यीशु नाओं कौ एक जादूगर मिलो, जौन यहूदी और लबरो आगमवक्ता हतो। बो राज्यपाल सिरगियुस पौलुस के संग्गै हतो, जौन होसियार जन हतो: ऊने बरनाबास और शाऊ ल हां टेर के परमेसुर के बोल हां सुनबो चाहो। पर इलीमास जादूगर ने, ऊके नाओं कौ जौई मतलब आय, उन कौ विरोध करके, राज्यपाल हां भरोसा करबे से बहकाबे की कोसिस करीे। पर शाऊ ल ने जौन पौलुस भी कहात हतो, पवित्र आत्मा से भरपूर होकें ऊ की कोद गौर से हेर के कई। सबई छल और मूरखता से भरे हे शैतान की लड़ेर, तें जौन सब धर्मन कौ बैरी आय, का तें प्रभु की सूदी गैल हां टेड़ो करबो न छोड़ है? अबै हेर, प्रभु कौ हाथ तोपे पड़ो आय; और तें अंधरो हो जै है और कछु बेरा लौ सूरज न हेर पै है: तब तुरतईं ऊ पै धुंधलो और अंधयारो छा गओ, और बो इते उते टटोलन लगो, कि कोऊ ऊ को हाथ हां थाम के ऊहां गैल बताए। तब राज्यपाल ने ई घटना हां देख के और प्रभु के बोल हां सुनके अचरज करके भरोसा करो। पौलुस और ऊके संग्गी पानू की गैल से होकें पाफुस से पंफूलिया के पिरगा में आए: और यूहन्ना उनहां छोड़ के यरूशलेम हां लौट गओ। बे पिरगा से निंग के पिसिदिया के अन्ताकिया में पोंचे; और सब्त के दिना प्रार्थनाघर में जाके बैठ गए। रीतियन और आगमवक्तन की पुस्तकन में से बोल हां पढ़बे के पाछें प्रार्थनाघर के हाकिमन ने उन के ऐंगर कहला पठैव, की हे भईया हरौ, अगर तुमाए ऐंगर लोगन के लाने कोऊ सुनाबेवारी बात होबै तो कओ। तब पौलुस ठांड़ो भओ और हाथन से इसारो करके कहन लगो; हे इस्राएलियो, और प्रभु को भय मानबेवालो सुनो। ई इस्राएली मान्सन के परमेसुर ने हमाए पुरखन हां चुन लओ, ऊ ने मिस्र के देस में चलबे की बेरा उनहां महान करो; और अपनी बलवान भुजा बड़ा के उनहां उते से काड़ लाओ। और करीब चालीस बरस लौ जंगलन में उन की सहत रओ। ऊहां कनान देस की सातई जातन हां नास करबे और उन की जमीन हां कब्जा कराबे के लाने बांटबे में करीब साढ़े चार सौ बरस लगे। इन बातन के पाछें, ऊ ने उनहां सामुएल आगमवक्ता की बेरा लौ न्याव दओ। तब उन ने राजा की मांग करी: और परमेसुर ने बिन्‍यामीन के गोत्र में से एक मान्स; यानि कीश कौ पूत शाऊ ल हां चालीस बरस के लाने उनहां राजा होबे हां दै दओ। फिन ऊहां निकालबे के पाछें, ऊ ने दाऊद हां उन कौ राजा बनाओ; जीके बारे में ऊ ने गवाही दई, और कई मोय एक मान्स यिशै कौ पूत मिलो आय; जौन मोरे मन के अनसार आय और जौन मोरी मनसाएं पूरी कर है। ऐई मान्स के वंस से परमेसुर ने अपनी ठाने अन्सार इस्राएल के ऐंगर एक उद्धार करबेवालो, यानि यीशु हां पठैव। जीके आबे से पेंला यूहन्ना ने सबरे इस्राएलियन के सब लोगन में मन फिराबे के बपतिस्मा कौ परचार करो हतो। जब यूहन्ना अपनो काज पूरो करबे पे हतो, तो ऊने कई, तुम मोय का समझत आव? मैं बो नईं आंव! पर हेरो, मोरे पाछें एक आबेवालो आय, ऊके गोड़ों की पनईयां के बन्ध मैं खोलबे लाक नईंयां। हे भईया हरौ, इब्राहीम के बच्चो; और तुम में से जौन परमेसुर कौ भय मानत आय, तुमाए लाने ही उद्धार कौ बचन पठैव गओ आय। ऐई जन हां और आगमवक्तन की बातन हां, जिनहां हरएक सब्त के दिना पढ़ो जात हतो न समझत हो, यरूशलेम के रहबेवालन और उन के हाकिमन ने ऊहां दोसी ठहराके इन बातन हां पूरो करो। कायसे उन के ऐंगर ऊहां मार डालबे के लाने कोऊ पक्को सबूत नईं हतो, फिन भी उन ने पीलातुस से मांग करी, कि बो मार डालो जाबै। जब उन ने ऊके बारे में लिखी भई सब बातन हां पूरो कर लओ, तब ऊहां क्रूस पे से उतरवा के कबर में धर दओ। पर परमेसुर ने ऊहां मरे भयन में से जिला दओ। और जौन ऊके संग्गै गलील से यरूशलेम आए हते, उनहां बिलात दिना लौ दरसन देत रओ; जे बेई आंय जौन अबै लोगन के सामूं गवाह आंय। हम तुमहां ऊ कौल के बारे में, जो पुरखन ने करी हती, जौ सन्देस सुनात आंय। कि परमेसुर ने यीशु हां जिला के, ओई बात हां हमाई लड़ेर के लाने पूरी करी, जैसो कि दूसरे भजन में भी लिखो आय, तें मोरो पूत आय; आजई मैंने तोय जन्म दओ आय। ऊ ने ऊहां मरे भयन में से जिलाओ, की बो कभऊं नईं सड़ है, ऊ ने ई तरहां कई; मैं दाऊद की पवित्र और अटल आसीस तोय दै हों। ई लाने बो एक और भजन में कहत आय; तें अपने पवित्र जन हां सड़न न दै है। कायसे दाऊद परमेसुर के मन के अनसार अपने जुग के लोगन कौ काज पूरो करत भओ सो गओ; और अपने पुरखन के बीच में गाड़ो गओ; और सड़ गओ। पर जीहां परमेसुर ने जिलाओ, बो सड़ने नईं पाओ। ई लाने हे भईया हरौ; तुम जौ जान लईयो कि ऐई के द्वारा पापन की क्षमा कौ सन्देस तुम हां सुनाओ जात आय। और ऐई के द्वारा हर एक भरोसा करबेवालो उन सबरी बातन से छुटकारो पात आय, जिन से तुम मूसा की रीतियन के द्वारा छुटकारो नईं पा सकत हते। ई लाने होसियार रहियो, कि कहूं आगमवक्तन कौ कहबो तुम पे घटित न हो जाबै। हे ठट्ठौ करबेवालो, हेरो, और अचरज करो, और मिट जाओ; कायसे मैं तुमाए दिन में एक काज कर रओ आंव; ऐसो काज, जीकी अगर कोऊ तुम से चरचा भी करे, तो तुम कभऊं ऊ की बातन कौ भरोसा न करियो। जब पौलुस और बरनाबास बायरें जान लगे तो मान्सन ने उन से बिनती करी, कि आबेवाले सब्त के दिना जे बातें फिन सुनाई जाबें। जब प्रार्थना सभा खतम हो गई तो बिलात यहूदी और यहूदी धर्म में आए भए भक्तन में से बिलात लोग पौलुस और बरनाबास के पाछें हो लए; उन ने बतकाव करत भए उन से बिनती करी कि परमेसुर के आसीस में बने रएं। आंगू के सब्त हां सबरो नगर परमेसुर के बोल हां सुनबे के लाने उमड़ पड़ो। पर जब यहूदियन ने भीड़ हां हेरो तो बे जलन से भर गए, और ठट्ठो करत भए पौलुस की कही भई बातन कौ बरगलान लगे। तब पौलुस और बरनाबास ने जोर देके कई, जौ जरूरी हतो, की परमेसुर कौ बोल पेंला से तुम हां सुनाओ जातो: पर ई लाने की तुम ऊ को नईं मानत आव, और अपने आपई हां अनन्त जीवन के लाने नईं ठहरात आव, तो हेरो, हम गैर यहूदियन की कोद जात आंय। कायसे प्रभु ने हम हां जौ हुकम दओ आय; मैंने तोय गैर यहूदियन के लाने ज्योत ठहराई आय; कि तें धरती के छोर लौ उद्धार कौ काज आय। जब गैर यहूदियन ने जौ सुनो तो बे खुस भए, और प्रभु के बोलन की बड़ाई करन लगे: और जितेक अनन्त जीवन के लाने ठहराए गए हते, उन ने भरोसा करो। और प्रभु कौ बोल पूरे इलाके में फैलत चलो गओ। पर यहूदियन ने भक्त और धनी बईयरनऔर नगर के बड़े खास जन हां भड़काओ, और पौलुस और बरनावास के खिलाफ उपद्रव कराके उनहां अपने इलाके से काड़ दओ। तब बे उन के सामूं अपने गोड़न की धूरा झाड़के इकुनियुम हां चले गए। और चेले खुसी और पवित्र आत्मा से सदा भरपूर होत गए। फिन ऐसो भओ कि इकुनियुम में बे संगै संगै यहूदियन के प्रार्थनाघर में गए, और उन ने ई ढंग से बतकाव करो, कि यहूदियन और यूनानियन दौनऊ में से बिलात लोगन ने भरोसा करो। पर जिन यहूदियन ने भरोसा नईं करो, उन ने गैर यहूदियन के मन हां उकसाव, और भाईयन के खिलाफ में कड़ुवाहट पैदा कर दई। ई लाने बे उते बिलात दिन लौ रए, और प्रभु पे भरोसा धरत भए, बेखटके परचार करत रए, और प्रभु उन के हाथन से चमत्कार और अचरज के काज करवा के अपनी आसीस के बोलन की गवाही देत रओ। पर नगर के लोग में फूट पड़ गई; जीसे कछु तो यहूदियन की कोद, और कछु प्रेरितन की कोद में हो गए। पर जब गैर यहूदियन और यहूदियन ने अपने हाकिमन के संग्गै मिलके, उन के संग्गै बुरो बरताव करबे और उनहां पत्थरवाह करबे की कोसिस करी। तो बे जौ जानके, लुकाउनिया के लुस्त्रा और दिरबे के नगरन में, और ऐंगर के देस में गदबद दे गए। और उते सन्देसो सुनात रए। लुस्त्रा में एक मान्स बैठो हतो, जीके गोड़े कमजोर हते: बो जन्म से ही लंगड़ा हतो, और कभऊं नईं निंगो हतो। बो पौलुस हां बतकाव करत सुन रओ हतो, पौलुस ने ऊ की कोद घूर के हेरो और जौ जान के कि ऊहां साजो हो जाबे कौ भरोसा आय। खूब जोर से कई, अपने गोड़न पे सूदो ठांड़ो हो जा: और ऊ उचक के ठांड़ो भओ और निंगन फिरन लगो। पौलुस के ई काज हां हेर के लुकानिया की बोली में लोग चीख के कहन लगे; देवता लोग मान्सन के रूप में हमाए बीच उतर आए हैं। बे बरनाबास हां ज्यूस कहन लगे और पौलुस हां हिरमेस, कायसे बो बतकाव करबे में मुखिया हतो। ज्यूस कौ मन्दर नगर के सामूं हतो, ऊ को पुजारी बैलन और मालाओं हां फाटक पे ले आओ और ऊ ने भीड़ के संग्गै मिलके बलि हां चढ़ाओ चाहो। पर जब प्रेरितन ने यानि पौलुस और बरनावास ने जौ सुनो, तो उन ने अपने उन्ना फाड़े, और भीड़ की कोद जौ चिलियाउत भए लपके; हे भाईया हरौ जौ सब का कर रए आव? हम भी तुमाए घांई मान्स आंय, और तुमहां ई लाने सन्देसो सुनात आंय, कि तुम इन बेकार की बातन हां छोड़के जीयत परमेसुर की कोद फिरो, जीने सरग, धरती, समुन्दर और जौन कछु ऊ में आए सबई हां बनाओ। ऊ ने बीते जुग में सबरी जातन हां अपनी अपनी गैल पे निंगन दओ। फिन भी ऊ ने खुद हां बिना गवाह के नईं छोड़ो; बस बो भलो करत रओ, और तुमहां बरसा और फरबे की ऋतुएं देके, तुमाए मन हां रोटी और खुसी भरत करत रओ। जौ कहबे पे भी, उन ने भीड़ हां बिलात मुसकल से रोको, कि उन के लाने बलि न चढ़ाबें। पर अन्ताकिया और इकुनियुम से यहूदी आए और भीड़ हां अपनी कोद करके, पौलुस हां पत्थरवाह करो, और ऊहां मरो भओ जानके नगर के बायरें घसीट लै गए। पर चेले जब ऊके चारऊं कोद आ ठांड़े भए, तो बो उठो और नगर में गओ और दूसरे दिना बो बरनाबास के संग्गै दिरबे चलो गओ। और ऊ नगर में सन्देसो सुनाबे और बिलात चेले बनाबे के पाछें, बे लुस्त्रा इकुनियुम और अन्ताकिया हां लौट आए। और चेलन के मन पक्को करत रए कि पक्के बने राबें, जौ कह के हिम्मत बंधात रए; हम हां बिलात दुख पीड़ा उठाके परमेसुर के राज में जाने आय। फिन उन ने हरएक मण्डली में सियानन हां ठहराके, उपवास के संग्गै प्रार्थना करी, और उनहां प्रभु के हाथन में सौंप दओ, जी पे उन ने भरोसा करो हतो। तब बे पिसिदिया में होत भए पंफूलिया पोंचे। फिन पिरगा में सन्देसे सुना के बे अत्तलिया गए। उते से बे जहाज से अंताकिया गए, जिते बे परमेसुर की आसीस में, ऊ काज के लाने सौंपे गए जीहां उन ने पूरो करो हतो। उते पोंच के उन ने मण्डली हां जमा करो और जौन कछु परमेसुर ने उनके संग्गै करो हतो, ऊहां कह सुनाओ और जौ भी कि कैसे, परमेसुर ने गैर यहूदियन के लाने भरोसे कौ द्वार खोल दओ। तब बे चेलन के संग्गै बिलात दिना लौ रए। कछु लोग यहूदिया से आके भाईयन हां सिखान लगे जब लौ मूसा की रीतियन के अनसार तुमाओ खतना न होबे, तुम उद्धार नईं पा सकत आव। जब पौलुस और बरनाबास और उन में से कछु लोग हां ई बात पै बतकाव भओ, तब जा विचारो, कि पौलुस और बरनाबास और कछु लोग ई बारे में प्रेरितन और सियानन के ऐंगर यरूशलेम जाबें। ई लाने मण्डली से विदा लैके बे फीनीके और सामरिया होत भए, गैर यहूदियन के मन बदलबे कौ पूरो सन्देसो सुना सुना के बिलात खुसी मना रए हते। जब बे यरूशलेम पोंचे, तो उन कौ सत्कार मण्डली, प्रेरितन और सियानन द्वारा करो गओ, तब उन ने बो सब कछु कह सुनाओ, जौन परमेसुर ने उन के संग्गै करो हतो। पर फरीसी कोद के कछु जनन में से जिन ने भरोसा करो हतो, ठांड़े होकें कई, उन हां खतना कराबो और उन हां मूसा की रीतियन कौ मानबो जरूरी आय। प्रेरित और सियाने ई बारे में बिचार करबे के लाने जमा भए। जब बिलात बतकाव हो चुको तब पतरस ने ठांड़े होकें उन से कई। हे भईया हरौ, तुम जानत आव, की बिलात दिना पेंला परमेसुर ने तुम में से मोय चुनो, कि गैर यहूदी लोग मोरे मों से सन्देसो कौ बचन सुनें और भरोसा करें। और परमेसुर जौन मन हां जानत आय, हमाई तरहां उनहां भी पवित्र आत्मा देके, उन की कोद में गवाही दई। ई तरहां भरोसे के द्वारा उन के मन हां सुद्ध करके ऊ ने हम में और उन में कोऊ फरक नईं रखो। ई लाने चेलन के कंधा पे ऐसो जुआ धरके, जीहां न तो हमाए पुरखन और न हम उठा सकत आंय, अब काहे परमेसुर हां परखत आव? पर हम हां पूरो भरोसा आय, कि प्रभु यीशु की दया से हमाओ उद्धार ओई घांई भओ आय; जी तरहां उन कौ। तब सबरी भीड़ चिमा के बरनाबास और पौलुस की बातें सुनन लगी, कि परमेसुर ने उन के द्वारा गैर यहूदियन में कैसे कैसे अचरज के चमत्कार दिखाए, और अचरज के काज करे। जब उन ने बोल लओ, तो याकूब ने कई, भईया मोरी सुनो। शमौन ने बताओ आय, की परमेसुर ने अपने नाम के लाने बिलात दिना पेंला, गैर यहूदियन में से एक प्रजा हां कैसे चुन लओ। ई बात से आगमवक्तन के बोल सोई मिलत आंय, जैसो लिखो आय। इन बातन के पाछें मैं लौट हों और मैं दाऊद के गिरे भए तम्बू हां फिन से ठांड़ो कर हों, और ऊके खण्डरन हां फिन से बनै हों, और मैं ऊ की मरम्मत कर हों। जीसे की बाकी लोग भी और सब गैरयहूदी भी जौन मोरे नाओं के कहात आंय, प्रभु हां खोजें। जौ ओई प्रभु कहात आय, जौन पुराने जमाने से इन बातन हां दरसात आओ आय। ई लाने मैं ई सार पे पोंचों आंव, कि हम उनहां दुख न देबें, जौन गैर यहूदियन में से परमेसुर की कोद लौट आंय। पर उनहां लिख के पठैय, कि बे मूरतन की असुद्धता और दुराचार और गला घोंटे भए पसुअन के मांस से और खून से बचे रएं। कायसे पुराने जमाने से नगर नगर में, मूसा की रीतियन कौ प्रचार करबेवाले होत आए हैं, और हर एक सब्त के दिना प्रार्थनाघर में ओई बांची जात आय। जब पूरी मण्डली संग्गै प्रेरितन और सियानन हां जौ नोंनो जान पड़ो, कि अपने बीच में से कछु मान्सन नबेर के, यानि बरसब्बा कहलाबे वाले यहूदा और सीलास हां जौन भाईयन में मुखिया हते; उनहां पौलुस और बरनाबास के संग्गै अन्ताकिया पठैय। उन ने उनके हाथन जा पाती पठैई, प्रेरितन और उन भाईयन की कोद से, जौन सियाने आंय अन्ताकिया, सीरिया और किलिकिया के भाईयन हां, जौन गैर यहूदियन में से आंय, परनाम। जब से हम ने सुनो, कि हम में से कछु ने हमाए हुकम बिना, अपनी बातन से तुमहां घबरा दओ; और तुमाए मन हां कच्चो कर दओ आय। एक राय होकें, हम हां जौ साजो लगो, कि अपने प्यारे बरनाबास और पौलुस के संग्गै कछु जन हां चुनके, तुमाए ऐंगर पठैय। जे ऐसे जने आंय, जिन ने हमाए प्रभु यीशु मसीह के नाओं के लाने अपने प्राण जोखम में डाले आंय। ई लाने हम ने यहूदा और सीलास हां पठैव आय, जौन खुद अपने मों से इन सबरी बातन कौ सन्देस दें हैं। कायसे पवित्र आत्मा और हम हां जौ सही जान पड़ो, कि इन जरूरी बातन हां छोड़; तुम पे और कोऊ बुझवा न डालें। की तुम मूरतन पे बलि चढ़ाई भई बस्तन से, खून से, गलो घोंटे गए मास से, और दुराचार से बचे रै हौ; इन से बचे रओ तो तुमाओ भलो हुईये, बाकी शुभ। बे सब विदा होकें अन्ताकिया गए, और उते बैठक करके उनहां बा पाती दई। जब बे पाती पढ़ चुके, तो ऊसे हिम्मत पाके बिलात खुस भए। यहूदा और सीलास ने आगमवक्तन होबे के काजें, भाईयन हां लम्बो बयान देके, हिम्मत बंधाई और कहो करो। कछु दिना रहबे के पाछें भाईयन ने सान्ति से उन के पठैबेवालन के ऐंगर, उनहां विदा करो। (पर सीलास हां उतईं रहबो साजो लगो।) पौलुस और बरनाबास भी अन्ताकिया में ठहर गए: और दूसरे बिलात लोगन के संग्गै, बे सोई प्रभु कौ बोल की सीख देत और ऊ को परचार करत रए। कछु दिना पाछें पौलुस ने बरनाबास से कई; जिन जिन नगरन में हम ने प्रभु कौ बोल सुनाओ हतो, आओ, उतईं लौट के भाईयन हां तकें, की बे कैसे आंय। बरनाबास अपने संग्गै मरकुस कहलाबे वाले यूहन्ना हां भी ले जाबो चाहत हतो। पर पौलुस ई बात पे अड़ो रओ कि हम ऊ जने हां, जीने पंफूलिया में हमाओ संग छोड़ दओ हतो, अपने संग्गै नईं लै जै हैं। ई पे उन के बीच ऐसी फूट पड़ गई, कि बे एक दूसरे से अलग हो गए: और बरनाबास, मरकुस हां लैके पानू की गैल से कुप्रुस चलो गओ। पर पौलुस ने सीलास हां चुन लओ, और भाईयन हां प्रभु के हाथन में सौंप के, बो उते से चलो गओ। और सीरिया, किलकिया में फिरत भए, मण्डलियन हां जमात रओ। तब बो दिरबे और लुस्त्रा हां सोऊ गओ, और हेरो, उते तीमुथियुस नाओं को एक चेला हतो, जो कोनऊ भरोसेमन्द यहूदनी कौ पूत हतो, पर ऊ को बाप यूनानी हतो। ऊ को लुस्त्रा और इकुनियुम के भाईयन में अच्छो नाओं हतो। पौलुस ई जन हां अपने संग्गै ले जाओ चाहत हतो; ई लाने ऊहां लैके, ऊ जांगह में रहबेवाले यहूदियन के काजें ऊ ने ऊ को खतना करो; कायसे बे सब जानत हते, की ऊ को बाप यूनानी हतो। जब बे नगर नगर होकें जा रए हते तो उन विधियों हां देत गए, जिनकी यरूशलेम के प्रेरितन और सियानन ने कहो हतो, की मान्स ऊहां मानें। ऐसे मण्डलियां भरोसे में बढ़त गईं, और गिनती में दिनों दिन बढ़त गई। बे फ्रूगिया और गलतिया के परगना से होकें कड़े, कायसे पवित्र आत्मा ने उनहां एशिया में बोल सुनाबे से मना करो। और जब बे मूसिया में पोंचे; तो उन ने बितुनिया जाबे की कोसिस करी, पर यीशु की आत्मा ने उनहां जान नईं दओ। ई लाने बे मूसिया होत भए त्रोआस पोंचे। रात में पौलुस ने एक दर्शन हेरो कि एक मकिदुनी मान्स ठांड़ो भओ मोय से बिनती कर रओ आय, कि मकिदुनिया में आके हमाई मदद कर। जब ऊ ने जौ दर्शन हेरो, तो जौ समझ के की परमेसुर ने उन लोगन में सन्देसो सुनाबे के लाने हमें टेरो आय, हम ने तुरतईं मकिदुनिया जाबे की सोची। ई लाने त्रोआस हां छोड़के हम पानू की गैल से सूदे सुमात्राके लौ गए और दूसरे दिना नियापुलिस हां। फिन उतईं से फिलिप्पी पोंचे, जौन मकिदुनिया प्रदेश कौ एक खास नगर, और रोमी बस्ती आय; और हम ऊ नगर में कछु दिना लौ रए। सब्त के दिना हम नगर के फाटक के बायरें नदिया के किनारे, जौ समझ के गए, कि उते प्रार्थना करबे की कोऊ जांगा हुईये; और हम बैठके उन बईयरन से बतकाओ करन लगे, जौन उते जमा हतीं। और लुदिया नाओं की थुआथीरा नगर की एक बईयर सुन रई हती, बो बैंजनी उन्ना बेचबेवाली और परमेसुर की भक्त हती, प्रभु ने ऊ को मन खोलो, कि बो पौलुस के बतकाओ पे ध्यान दैबे। जब ऊ ने और ऊके घर बारन ने बपतिस्मा लओ, तो हम से बिनती करी, अगर तुम मोय परमेसुर की बिसवासिनी मानत आव, तो आके मोरे घरै ठहरो; और बा हमें मनाकर ले गई। जब हम बिनती करबे की जांगह जा रए हते, तो हम हां एक चाकरनी मिली जीमें भविष्य की बातें बताबेवाली आत्मा हती; बो शकुन सोचबे से अपने मालकन के लाने बिलात रुपईया कमा लात हती। बो पौलुस और हमाए पाछें आके बेर बेर चिलाऊन लगी, जे मान्स परमप्रधान परमेसुर के भक्त आंय, जौन तुम हां उद्धार की गैल कौ सन्देस सुनात आंय। बो बिलात दिना लौ ऐंसई करत रई, पर पौलुस बिलात गुस्‍सा भओ, और ऊ ने मुड़के ऊ आत्मा से कई, मैं तोय यीशु मसीह के नाओं से हुकम देत आंव, की ऊ में से कड़ जा और बो ओई बेरा ऊ में से कड़ गई। जब ऊके मालक ने हेरो, कि हमाई कमाई की आस खतम हो गई, तो बे पौलुस और सीलास हां पकड़ के और घसीटत भए चौक में हाकिमन के आंगू लै गए। और उनहां खास हाकिमन के सामूं लाके उन ने कई; जे यहूदी हमाए नगर में बिलात गड़बड़ी मचा रए आंय। और ऐसी रीतियन कौ परचार कर रए आंय, जिनहां मानबो या स्वीकारबो हम रोमियन के लाने सही नईंयां। भीड़ जमा होकें उन पे चढ़ आई, और हाकिमन ने उन के उन्ना फाड़कें उतार डाले, और हुकम दओ कि उनहां बेंत से मारो जाबै। और बेंत से बिलात पिटवा के उनहां जेलखाने में डाल दओ; और जेलखाने के दरोगा हां हुकम दओ, की उन पे कड़ो पहरा दें। ऊ ने जौ हुकम पाके उनहां जेलखाने के भीतरी जांगा में डाल दओ और उन के गोड़े काठ में जकड़ दए। आधी रात पौलुस और सीलास प्रार्थना कर रए हते और परमेसुर कौ भजन गा रए हते, और कैदी उन की सुन रए हते। तब एकाएक बड़ो भूकम्प आओ, जीसे जेलखाने की नी हल गई, और तुरतईं सबरे किवाड़ खुल गए; और सब की बेड़ियां खुल गईं। दरोगा जब नींद से जागो, और ऊ ने जेलखाने के किवाड़न हां खुलो तको, तो अपनी तलवार खींच लई और जौ सोच के की कैदी भाग गए आंय, तो अपने आप हां मारबो चाहो। तब पौलुस ने जोर से चिल्ला के कई; अपने हां हानि नईं पोंचा, कायसे हम सब इतईं आंय। और बो दिया मांग के सूदो भीतरै गओ, और पौलुस और सीलास हां हेर के डरा के कांपत भओ गिर पड़ो। और उनहां बाहर लाके ऊ ने कई, भले मान्सो, उद्धार पाबे के लाने मैं का करों? उन ने कई, प्रभु यीशु मसीह पे भरोसा कर, तो तें और तोरो घरानो उद्धार पा है। तब उन ने ऊहां, और ऊके घर के सब मान्सन हां प्रभु कौ बोल सुनाओ। और ओई बेरा उनहां ले जाके ऊ ने उन के घाव धोए, और तुरतईं ऊ ने और ऊके घराने ने बपतिस्मा लओ। और उनहां अपने घरै लै जाके, ऊ ने तुरतईं रोटी परोसी और सबरे कुनवा के संग्गै परमेसुर पे भरोसा करके बिलात खुसी मनाई। जब भुनसारो भओ तब खास हाकिमन ने जौ कह के सिपाहियन हां पठैव, उन मान्सन हां छोड़ देओ। तब जेलखाने के दरोगा ने आके जे बतकाव पौलुस से करो, खास हाकिमन ने तुमहां छोड़ देबे के लाने हुकम करो आय, ई लाने अबई कड़के निंग जाओ। पर पौलुस ने उन से कई, उन ने हम हां जौन रोमी आंय, बिना दोसी ठहराए, सब के सामूं पिटवाओ और जेलखाने में डलवाओ और अब काय बे हम हां चुपके से कड़बे हां कैत आंय? जौ नईं हो सकत आय, बे खुद आके हम हां बायरें काड़ें। सिपाहियन ने जे बतकाव खास हाकिमन हां बताईं, जब उन ने सुनी कि बे रोमी आंय, तो बे डरा गए। और आके उन ने मनाओ, और उनहां बायरें ले जाके उन से बेर बेर बिनती करी, की बे नगर से कड़ जाबें। बे जेलखाने से कड़ के लुदिया के घरै गए, और उतईं भाईयन से मिलके उनहां हिम्मत बंधाई, और उन से विदा भए। फिन जब बे अम्फिपुलिस और अपुल्लोनिया से होकें कड़े, तो थिस्सलुनीके पोंचे, जिते यहूदियन कौ एक प्रार्थना घर हतो। पौलुस अपनी रीत के अनसार उन के ऐंगर गओ, और तीन सब्त लौ पवित्र शास्त्र में से उन के संग्गै बतकाव करत रओ। और ई बात कौ मतलब साफ करके जौ साबित करत रओ, की मसीह हां दुख उठाबो, और मरे भयन में से जी जाबो, जरूरी हतो; और बो कहत हतो, जौई यीशु जीको मैं तुमाए सामूं परचार करत आंव, मसीह आय। उन में से कछु मान्सन ने भरोसा करो, और भक्त यूनानियन के बड़े झुण्ड व बिलात खास बईयरन संग्गै बे पौलुस और सीलास के संग्गै मिल गए। पर यहूदी जलन से भर गए और उन ने बाजार से कछु दुष्टन हां अपने संग्गै कर लओ, और भीड़ जोड़ के नगर में हुल्लड़ मचाओ, और यासोन के घर पे चढ़ाई करके उनहां लोगन के आंगू लाबो चाहो। पर जब उन ने उते उनहां नईं पाओ, तो बे यासोन और कछु भाईयन हां नगर के हाकिमन के ऐंगर घसीट लाए, और चिल्या के कैन लगे जे लोग जिन ने जगत में उथल पुथल मचा दई आय, इते सोई आ पोंचे आंय। और यासोन ने उनहां अपने इते ठहराओ आय, और बे सबरे के सबरे कैसर के हुकम कौ जौ कहके बिरोध करत आंय, की यीशु राजा आय। और उन ने भीड़ हां और नगर के हाकिमन हां जिन ने जौ सब सुनो हतो, उसका दओ। ईपे उन ने यासोन और दूसरे लोगन से जमानत लैके उनहां जान दओ। भाईयन ने तुरतईं रात में पौलुस और सीलास हां बिरिया पठै दओ, जिते पोंचबे पे बे यहूदियन के प्रार्थनाघर में गए। जे लोग थिस्सलुनीके मान्सन से बिलात साजे हते, कायसे उन ने बड़ी लगन से बचन हां मान लओ, और रोजीना पवित्र पोथी में से खोज बीन करत रए, की हेरें जे बातें ऐंसई आंय कि नईंयां। ई लाने उन में से बिलात ने, और नामी यूनानी बईयरन में से और मान्सन में से बिलात ने भरोसा करो। पर जब थिस्सलुनीके यहूदियन हां पता पड़ो, की बिरीया में भी पौलुस ने परमेसुर कौ बचन सुनाओ आय, तो बे उते आके भीड़ हां भड़काऊ न और हुल्लड़ मचाऊ न लगे। तब भाईयन ने पौलुस हां तुरतईं समुन्दर किनारे पे जाबे के लाने विदा करो; पर सीलास और तीमुथियुस उतईं रै गए। पौलुस हां पहुंचाबे वाले एथेन्स लौ ऊहां लै गए, और ऊसे जौ हुकम पाके की सीलास और तीमुथियुस फौरन मोरे ऐंगर आ जाबें, बे उते से विदा भए। जब पौलुस एथेन्स में उन की बाट तकें हतो, तो नगर हां मूरतन से भरो भओ हेर के बर उठो। ई लाने बो हर दिना प्रार्थनाघर में यहूदियन से और गैर यहूदियन भक्तन से और बाजार में उन से जौन उते मिलत हते, बतकाव करत हतो। और कछु इपीकूरी और स्तोईकी ज्योतिषियन भी ऊसे बहस करन लगे, कछु कहत हते, जौ बकवासी कहबो का चाहत आय? पर दूसरन ने कई; जौ तो अद्भुत देवता कौ परचार करबेवालो जान पड़त आय, कायसे बो यीशु और मरे भयन के जी जाबे कौ परचार कर रओ हतो। बे ऊहां अपने संग्गै अरियुपगुस की बैठक में ले गए और पूछन लगे, कि हम हां बता, की जा नईं सीख जी को तें परचार करत आय का है? कायसे तें हम हां कछु अनोखी बातन हां सुनात आय, ई लाने हम जानबो चाहत आंय की इन बातन कौ मतलब का है? (कायसे सब एथेन्सवासी और परदेसी जौन उते रैत हते, नई नई बात कहबे और सुनबे के अलावा और कोऊ बात में अपनी बात नईं बितात हते।) तब पौलुस ने अरियुपगुस के बीच में ठांड़े होकें कई; हे एथेंस के रैबेवारो ऐसो लगत आय, की तुम सब बातन में बड़े धर्मी आव। कायसे जब मैं घूमत फिरत तुमाए पूजबे की चीजन को हेर रओ हतो, तो मोहां एक वेदी मिली, जीपे लिखो हतो, “अनजाने ईश्वर के लाने”। ई लाने जीहां तुम बिना जाने पूजत आव, ओई कौ सन्देसो मैं तुम हां सुनात आंव। परमेसुर जीने जगत और ऊ में की सबई बस्तन हां बनाओ, ओई सरग और धरती कौ प्रभु आय, बो हाथन के बने मन्दिरन में नईं रहत। और न ही मान्सन के हाथन से खुसामत करात आय, कायसे ऊहां कोऊ बात की कमी घटी नईंयां, बो सब हां जीवन और सांस और सब कछु देत आय। ऊने एकई जड़ से मान्स की हर एक जात हां बनाओ की सबरी धरती पे बस जाबें; और ई लाने ऊ ने उन को एक सही बेरा, और उन के रहबे की हदें ठहरा दईं। कि बे परमेसुर हां खोजें, जौ भी हो सकत आय की बे ऊहां टटोल के पाबें, जब की बो हम में से कोऊ से दूर नईंयां। कायसे ओई में हम जीयत रहत, और निंगत फिरत, और बने रहत आंय; जैसो कि तुमाए कछु कवियन ने भी कई आय, हम भी तो ओई की लड़ेर आंय। ऐई तरहां परमेसुर की लड़ेर होकें हम हां जौ कभऊं नईं सोचो चईये, की परमेसुर सोनो, चांदी यानि पथरा की कोऊ कारीगरी घांई आय, जौन मान्स की बनाई और सोच से गढ़ो गओ आय। ई लाने मूरखता की बातन हां छोड़, परमेसुर अब हर जांगा सबरे मान्सन हां हुकम देत आय, की मन फिराबें। कायसे ऊ ने एक दिना ठहराओ आय, जीमें एक मान्स के द्वारा, जीने ऊहां ठहराओ आय, बो धर्म से जगत कौ न्याव कर है, और ऊ ने मरे भयन में से ऊहां जिला के, ई बात हां सबरे मान्सन पे साबित कर दई आय। जब उन ने मरे भयन में से जी जाबे की बात सुनी तो कछु लोग ठट्ठा करन लगे, पर दूसरन ने कई, हम ई बारे में तोय से फिन कभऊं सुन हैं। ई पे पौलुस उन के बीच में से कहूं चलो गओ। पर कछु लोग ऊके संग्गै हो लए, और उन ने भरोसा करो, जिन में दियुनुसियुस अरियुपगी और दमरिस नाओं की एक बईयर हती, और उन के संग्गै दूसरे और भी लोग हते। इन बातन के पाछें पौलुस अथेने छोड़के कुरिन्थुस चलो गओ। और ऊहां अक्विला नाओं एक यहूदी मिलो, जौन हालई में अपनी घरवाली प्रिस्किल्ला के संग्गै इतालिया से आओ हतो, कायसे क्लोदियुस ने सब यहूदियन हां रोम से कड़ जाबे कौ हुकम दओ हतो। और ई लाने कि ऊ को भी ओई धन्धा हतो; बो उनके इते गओ और उनके संग्गै रहो, और बे काज करन लगे, कायसे धन्धे से बे झुग्गी बनाबेवाले हते। और बो हर सब्त के दिना प्रार्थना घरन में बहस करके यहूदियन और यूनानियन हां समझाबे की कोसिस करत हतो। पर जब सीलास और तीमुथियुस मकिदुनिया से आए, तो पौलुस बचन सुनाबे की धुन में लग के यहूदियन के आंगू गवाही देन लगो, कि यीशु ही मसीह आय। पर जब उन ने बिरोध करो और ठट्ठा करो, तो ऊ ने अपने उन्ना झाड़त भए उन से कई; तुमाओ खून तुमाए मूड़ पे होय: मैं बरी आंव, अब से मैं गैर यहूदियन के ऐंगर जें हों। उते से निंग के तितुस युस्तुस नाओं के एक जन के घरै गओ, जौन परमेसुर कौ भक्त हतो, और जीको घर प्रार्थना घर से लगो भओ हतो। और प्रार्थना घर के मुखिया क्रिसपुस ने अपने सबरे घराने संग्गै प्रभु पे भरोसा करो; और कुरिन्थुस के बिलात जनन ने जब जौ सुनो तो भरोसा करो और बपतिस्मा लओ। रात में प्रभु ने दर्शन में पौलुस से कई, मत डरा, परचार करत जा, और सान्त न रहिए। कायसे मैं तोरे संग्गै आंव: और कोऊ जन हानि पोंचाबे के लाने तोपे वार न कर है; कायसे ई नगर में मोरे बिलात जनें आंय। बो उन के बीच परमेसुर कौ बचन सुनात भओ डेढ़ साल लौ रहो। जब गल्लियो अखाया कौ राज्यपाल हतो तो यहूदी एक होकें पौलुस के बिरोध में उठ ठांड़े भए, और ऊहां न्याय की गद्दी के आंगू लाके कहन लगे। जौ मान्स रीतियन के खिलाफ परमेसुर की उपासना करबे के लाने, लोगन हां भड़कात आय। जब पौलुस बोलबे पे हतो, तो गल्लियो ने यहूदियन से कई; हे यहूदियो, अगर कोई अन्याय या घोर पाप की बात होती, तो तुमाओ जौ दोष सुनबो, मोरे लाने सही होतो। पर अगर जौ बतकाव बोलन और नाओं, और तुमाई रीतियन के बारे में आय, तो तुमई जानो; मैं इन बातन कौ न्यायी नईं बनबो चाहत। और ऊ ने उनहां न्याय गद्दी के आंगू से भगा दओ। तब सब लोगन ने प्रार्थना घर के मुखिया सोस्थिनेस हां पकड़ लओ और ऊहां न्याय गद्दी के आंगू पीटन लगे, पर गल्लियो ने इन बातन की कछु भी चिन्ता नईं करी। तब पौलुस ने उते और बिलात दिना लौ रुक के, भाईयन से विदा लई और प्रिस्किल्ला और अक्विला संग्गै पानू की गैल से सीरिया हां चलो गओ, किंखिया में ऊ ने मूड़ मुड़वाओ कायसे ऊ ने मन्नत मानी हती। फिन बे इफिसुस पोंचे जिते ऊ ने उनहां छोड़ दओ, और आपऊ प्रार्थनाघर में जाके यहूदियन से बतकाव करन लगो। जब मान्सन ने ऊसे कछु दिना के लाने और रहबे हां कई, तो ऊ ने नईं मानी। पर विदा होत बेरा ऊ ने जा कई, अगर परमेसुर की मनसा भई तो तुमाए ऐंगर फिन कें आहों। तब बो इफिसुस से जहाज से चलो गओ, जब बो कैसरिया में उतरो, तो ऊ ने ऊ परै जाके मण्डली से भेंट करी, और फिन से खालें आके अन्ताकिया हां चलो गओ। और उते कछु बेरा रह के ऊ ने विदा लई, और गलतिया और फ्रूगिया प्रदेशन कौ दौरा करत भओ बो सबई चेलन हां पक्को करत रओ। अपुल्लोस नाओं कौ एक यहूदी जीको जनम सिकन्दरिया में भओ हतो, जौन बोलबे में होसियार और पवित्रशास्त्र कौ जानकार हतो, इफिसुस में आओ। ई मान्स हां प्रभु के गैल की सीख दई गई हती, बो बड़े आत्मिक जोस से भरके यीशु के बारे में सही सही सुनात और सिखात हतो, पर बो केवल यूहन्ना के बपतिस्मा के बारे में जानत हतो। बो प्रार्थनाघर में बिना भय के बोलन लगो, पर जब प्रिस्किल्ला और अक्विला ने ऊ की सुनी, तो उन ने ऊहां एक कोद लै जाके, परमेसुर की गैल के बारे में और भी सही सही समझाओ। जब ऊ ने ऊ पार अखाया हां जाबो चाहो, तो भाईयन ने ऊहां हिम्मत बंधाई और चेलन हां लिखो, की ऊ को सत्कार करियो और जब बो उते पोंचो, तो ऊ ने उन लोगन की बिलात मदद करी, जिन ने आसीस के द्वारा भरोसा करो हतो। कायसे ऊ ने पवित्रशास्त्र से सबूत दै दै के, की यीशु ही मसीह आय: जोस के संग्गै यहूदियन हां सबई के आंगू सान्त कर दओ। ऐसो भओ की जब अपुल्लोस कुरिन्थुस में हतो, तो पौलुस ऊ परै के प्रदेशन से होत भओ इफिसुस में पोंचो, और उते पे ऊहां कछु चेले मिले। ऊ ने उन से कई; का तुम ने भरोसा करत भए पवित्र आत्मा पाओ? उन ने ऊसे कई, हमने तो सुनो भी नईंयां की पवित्र आत्मा आय। तब ऊ ने कई; फिन तुम ने की को बपतिस्मा लओ? उन ने कई; यूहन्ना कौ बपतिस्मा। ईपे पौलुस ने कई; यूहन्ना ने जा कहके लोगन हां मन फिराओ कौ बपतिस्मा दओ, की जौन मोरे पाछें आबेवालो आय, ऊ पे यानि यीशु पे भरोसा करियो। जा सुनके उन ने प्रभु यीशु के नाओं में बपतिस्मा लओ। जब पौलुस ने उन पे अपनो हाथ धरो, बे तरह तरह की बोली बोलन लगे और अगमबाणी करन लगे। जे सब करीब बारह मन्सेलू हते। बो प्रार्थनाघर में जाके तीन महिना लौ बेखटके बोलत रओ, और परमेसुर के राज्य के बारे में बतकाव करत और उनहां समझात रओ। पर जब कछु लोगन ने कड़ो होकें ऊ की नईं मानी और भीड़ के आंगू ई धरम हां भलो बुरो कहन लगे, तो बो चेलन हां लैके उन से अलग हो गओ, और तुरन्नुस की पाठशाला में रोजीना बतकाव करत रओ। दो साल लौ ऐसई होत रओ, जीसे की बे जौन आसिया में रहत हते यहूदी और यूनानी सब ने प्रभु कौ बचन सुन लओ। और पौलुस के हाथन से, परमेसुर अद्भुत बल के काज दिखात हतो। इते लौ की ऊके सरीर से छुए भए रूमाल और अंगोछा बीमारन पे डाल दए जात हते, और उन की बीमारियां दूर हो जात हतीं; और दुष्ट आत्माएं उन में से कड़ जात हतीं। पर झाड़ फूंक करबेवाले कछु यहूदी जौन इते उते घूमत फिरत हते, असुद्ध आत्मन से त्रस्त लोगन हां यीशु मसीह के नाओं कौ इस्तेमाल करबे की कोसिस जौ कहके करन लगे, मैं तुमहां ऊ यीशु की सौगंध देत आंव, जीको परचार पौलुस करत आय। और स्क्किवा नाओं कौ एक यहूदी बड़े पुरोहित के सातई पूत ऐंसई कर रय हते। पर दुष्ट आत्मा ने उनहां कई, यीशु हां मैं चीनत आंव, और पौलुस हां सोई चीनत आंव; पर तुम को आव? और बो मान्स जी में दुस्ट आत्मा हती; उन पै झपटो, और ऊहां वस में करके, उन पे ऐसो बली भओ की बे नंगे और घायल होकें ऊ घर से कड़ भगे। जे बात इफिसुस के रहबेवाले का यहूदी, का यूनानी सब जनन हां पता पड़ो, उन सब पे डर समा गओ; और प्रभु यीशु के नाओं की बढ़वाई करन लगे। जिन ने भरोसा करो हतो, उन में से बिलात ने आके अपने काज हां मान लओ और उनहां दरसा दओ। बिलात लोगन ने जो जादू टोना करत हते, अपनी अपनी पोथियां जमा करके सब के आंगू बार दईं, जब उन ने उन कौ मोल आंको, तो करीब पचास हजार सिक्कन के बरोबर कड़ीं। ई तरहां प्रभु कौ बचन बल के संग्गै फैलत और बली होत गओ। जब जे बातें हो चुकीं, तो पौलुस ने अपनी आत्मा में मकिदुनिया और अखाया से होत भओ, यरूशलेम जाबे की ठानी, और कई, उते पोंचबे के पाछें मोय रोम हां भी जाबो जरूरी आय। ई लाने जौन ऊ की खुसामद करत हते, उन में से दोई हां यानि तीमुथियुस और इरास्तुस हां मकिदुनिया पठैय के बो अकेले कछु बेरा के लाने आसिया में रहो। ई दिनन में धर्म के बारे में बड़ो दंगा भओ। कायसे देमेत्रियुस नाओं कौ एक सुनार हतो, जौन अरतिमिस के चान्दी के मन्दर बनवा के कारीगरन हां बिलात काम दिलात हतो। ऊ ने उनहां और ऐई तरहां कौ धन्धा करबे वाले कारीगरन हां इकट्ठो करके कई; हे भाईया हरौ, तुम जानत आव, कि हमहां ई धन्धे से कितनो धन मिलत आय। और तुम हेरत और सुनत आव, की न केवल इफिसुस में, बल्कि करीब सबरे आसिया में ई पौलुस ने बिलात लोगन हां समझा बुझाके और जौ कहके बहका दओ आय, की जा तो हाथन की कारीगरी आय, बो परमेसुर नईंयां। ईसे न केवल जौ डर आय, की हमाए धन्धे की साख जात रई आय; बल्कि अरतिमिस महान देवी कौ मन्दर तुच्छ समझो जै है, और जी देवी की पूजा आसिया और जगत के सबई लोग बाग करत आंय, बो अपने तेज से गिरा दई जै है। जब उन ने जा सुनी तो खुन्सया गए, और चीख चीख के कहन लगे, “इफिसियों की देवी अरतिमिस महान आय”। नगर में हो हल्ला मच गओ और लोगन ने गयुस और अरिस्तरखुस नाओं के पौलुस के संगियन हां जौन मकिदुनिया से आए हते, खचोड़ के एक संग्गै गदबद दै के नाठ्यशाला में गए। जब पौलुस ने भीड़ में जाओ चाहो, तो चेलन ने ऊहां हटक दओ। और आसिया के कछु हाकिमन ने जौन ऊके प्रेमी हते ऊहां कहला पठैव, और बेर बेर बिनती करी, की बो नाठ्यशाला में जाबे कौ जोखम न उठाए। ई लाने कोऊ कछु चीख रओ हतो, और कोऊ कछु; कायसे बैठक में उधम मचो हतो, बिलात जनें जौ नईं जानत हते, की बे इते काय जमा भए हते। तब भीड़ में कछु लोग ने सिकन्दर हां, जीहां यहूदियन ने आंगू ठांड़ो कर दओ हतो, सिकन्दर ने हाथ से इसारो करके बचाव में बैठक हां बोलबो चाहो। पर जब लोगन ने चीनो की बो यहूदी आय, तो करीब दो घण्टा लौ सब के सब एक होकें चिल्यात रए, इफिसियन की अरतिमिस महान आय। तब मन्दर के मंत्री ने भीड़ हां सान्त करके कई; हे इफिसुस के रैबेवारो, ऐंसो को मान्स आय, जौन नईं जानत की इफिसुस कौ जौ नगर महान देवी अरतिमिस के मन्दर में आकास से गिरी भई मूरत कौ रखनवारो आय। ई लाने जब इन बातन कौ खण्डन नईं हो सकत, तो जौई सही आय, की तुम सान्त रओ; और हड़बड़ी में क छु नईं करो। कायसे तुम इन मान्सन हां लाए आव, जौन न तो हमाए मन्दर के लुटेरे आंय, और न हमाई देवी के ठट्ठा करबेवाले आंय। फिन भी अगर देमेत्रियुस और उन कारीगरन हां जौन ऊके संग्गै आंय, कोई मान्स से कोऊ विवाद आय, तो कचहरी खुली आय, और राज्यपाल हाजिर आय; उते एक दूसरे पे दोस लगाबें। पर तुम ईके अलावा और कछु चाहत आव, तो ईको न्याव ठहराई बैठक में करो जै है। कायसे हम हां सांची ई बात कौ डर आय, की आज के भए दंगे कौ दोस कहूं हम पे नईं मड़ दओ जाबै, कायसे ईके होबे की कोऊ बात नईंयां, ई लाने हम भीड़ के जमा होबे कौ उलानो न दे पा हैं। जौ कह के ऊ ने बैठक हां भंग कर दओ। दंगा थम जाबे के पाछें पौलुस ने चेलन हां टेरो, उनहां समझाबे के बाद उन से विदा लैके, बो मकिदुनिया कोद चल दओ। बो उन सब परगना से होकें और मान्सन हां हिम्मत देत भओ यूनान पोंचो। उते ऊ ने तीन महिना बिताए, और जब बो जहाज से सूरिया जाबे हां हतो, तो यहूदियन ने ऊके बिरोध में साजिस रची, ई लाने ऊ ने ठानो की मकिदुनिया होकें लौट जाबै। बिरीया रहवासी पुर्रुस कौ पूत सोपत्रुस और थिस्सलूनीकियों रहवासी अरिस्तर्खुस और सिकुन्दुस और दिरबे कौ गयुस, तीमुथियुस और आसिया कौ तुखिकुस और त्रुफिमुस ऊके संग्गै हते। जे लोग हम से आंगू चले गए और त्रोआस में हमाई बाट देखत हते। अखमीरी रोटी के परब के पाछें हम फिलिप्पी से जहाज से कड़े और पांच दिना में उन के ऐंगर त्रोआस पोंचे, और उते सात दिना लौ रए। सप्ताह के पैले दिना जब हम रोटी तोड़बे के लाने जुड़े, तो पौलुस दूसरे दिना चले जाबे पे हते, पौलुस उनसे आधी रात लौ बातें करत रओ। जी अटारी में हम सबरे जुड़े हते, उते बिलात दिया जलत हते। यूतुखुस नाओं कौ एक जुवान खिड़की पे बैठो भओ ऊंघ रओ हतो, जब पौलुस बड़ी बेरा लौ बोलत रओ तो यूतुखुस हां नींद आ गई और बो तीन मंजिला से खालें गिर पड़ो, और मरो भओ उठाओ गओ। पर पौलुस खालें उतरो और ऊ पे झुक गओ, फिन ऊहां गले से लिपटा के कई; घबराओ नईं; कायसे ऊ को प्राण ओई में आय। फिन ऊ ने ऊ परै जाके रोटी तोड़ी और खाके उन से बड़ी बेरा लौ बतकाव करत रओ, की भुनसारो हो गओ; फिन बो चलो गओ। बे ऊ जुवान हां जीयत लै आए, और उनहां बड़ो चैन मिलो। पर हम पैलईं जाके जहाज से अस्सुस हां ई भरोसे से आंगू बढ़े, की उते से पौलुस हां चढ़ा लें हैं कायसे ऊ ने आपऊ निंग के जाबे की मनसा से ऐंसई व्यवस्था करी हती। जब बो हम हां अस्सुस में मिलो, तो हम ने ऊहां जहाज पे चढ़ा लओ और मितुलेने पोंचे। उते से निंग के हम दूसरे दिना खियुस के सामूं पोंचे, और अगले दिना हम समुन्दर पार सामुस हां पोंचे; और फिन दूसरे दिना मीलेतुस में आए। पौलुस ने जा ठानी हती की इफिसुस में रुके बिना आंगू बढ़ जाबें, की ऊहां आसिया में बिलात दिना न ठैरबो पड़े; कायसे बो जल्दी में हतो, की अगर हो सके, तो पिन्तेकुस्त के दिना ही यरूशलेम पोंच जाबें। ऊ ने मीलेतुस से इफिसुस हां खबर पाठेय के, और मण्डली के सियानन हां अपने ऐंगर टिरवाओ। और जब बे ऊके ऐंगर आए, तो ऊ ने उन से कई; तुम खुद जानत आव, की पैले दिना से जब मैंने आसिया में गोड़े धरे, कैसे तुमाए संग्गै सबई बेरा रओ। यानि की बड़ी लरमता के संग्गै, अंसुआ बहा बहा के, और उन जोखमन में भी जौन यहूदियन के साजिस के काजें मोय पे आ पड़ी हतीं; मैं प्रभु कौ काज करत रओ। और मैं कैसे तुमाए लाभ के लाने कोई भी बात बताबे से नईं झिझको, और सबई के सामूं और घरै घरै जाके तुम हां सन्देसो देत रओ। मैं यहूदी और यूनानी दोई हां कड़ाई से गवाही देत रओ, की परमेसुर की कोद मन फिराव, और प्रभु यीशु मसीह पे भरोसा करो। अब हेरो, मैं आत्मा में बंधो भओ यरूशलेम हां जात आंव, और उते न जाने मोय पे का का बीत है। केवल जौ की पवित्र आत्मा हरएक नगर में मोय गवाही दैके कहत आय, की बेड़ियां और दुख पीड़ा तोरी बाट जोह रए आंय। मैं अपने प्राण हां कोऊ भी तरहां अपने लाने प्यारो नईं समझत आंव, अगर समझत आंव, तो केवल ई लाने की में जीवन हां और ऊ काज हां, जौन मोय प्रभु यीशु मसीह से मिली आय, पूरी करों, यानि मैं परमेसुर के आसीस के सन्देसे की चित्त लगा के गवाही देओं। अब हेरो, मैं जानत आंव, की तुम सब जिन के बीच में परमेसुर के राज्य कौ सन्देसो सुनात फिरो, मोरो मों फिन नईं देख पै हौ। ई लाने आज के दिना मैं तुमाए आंगू गवाही दैके कहत आंव, की मैं सब लोगन के खून से बरी आंव। कायसे मैं परमेसुर की सबरी मनसा हां तुम हां बताबे से नईं झिझको। ई लाने अपनी और अपने सबरे गुट की रखनवारी करो; जीके बीच पवित्र आत्मा ने तुमहां मुखिया ठहराओ आय; की तुम परमेसुर की मण्डली की रखनवारी करो, जीहां ऊ ने अपने खून से मोल लओ आय। मैं जानत आंव, की मोरे जाबे के पाछें फाड़बे वाले बिगना तुमाए बीच आ हैं, जो गुट हां न छोड़ हैं। और तुमाए बीच ऐसे लोग ठांड़े हुईयें, जौन चेलन हां अपने लिगां खेंच लैबे के लाने ऊंट पटांग बात कर हैं। ई लाने चौकन्ने रहियो; और खबर राखियो; की मैंने तीन बरस लौ रात दिना अंसुआ बहा बहा के, एक एक हां समझाबो नईं छोड़ो। और अब मैं तुमहां परमेसुर, और ऊके आसीस के बचन हां सोंपत आंव, जौन तुमाई तरक्की कर सकत आय, और सब पवित्र करे गए लोगन के संग्गै बिरासत दे सकत आय। मैंने कोऊ कौ सोना, चांदी या उन्ना कौ लोभ नईं करो। तुम खुद जानत आव, की इनईं हाथन से मोरी और मोरे संगियन की जरूरत पूरी भई आय। मैंने तुमहां हरएक बातन से जौ बताओ आय, की तुम भी ऐंसई कड़ी मेहनत करके, कमजोरन हां संभालो, और प्रभु यीशु मसीह की बातन की खबर धरियो, जौन ऊ ने आपऊ कहे; की लेबे से देबो धन्य आय। जा कह के ऊ ने घुटनन हां टेको और सब के संग्गै प्रार्थना करी। तब बे सब फूट फूट के रौन लगे, और पौलुस के गले लिपट के ऊहां बेर बेर चूमन लगे। बे खास ऊ बात से दुखी हते, जौन ऊ ने कई हती, की तुम मोरो मों फिन न हेर हौ; और उन ने ऊहां जहाज लौ पोंचाओ। जब हम उन से विदा होकें जहाज से चले, तो सूदे चलकें कोस पोंचे, और दूसरे दिना रुदुस, और उते से पतरा। उते से फीनीके जाबे वालो एक जहाज मिलो, हम ऊ पे चढ़े और चल पड़े। जब हम हां कुप्रुस दिखनो, तो ऊहां बांई कोद छोड़के, सूरिया की कोद बढ़े और सूर में जा उतरे; कायसे उते जहाज को माल उतरने हतो। और चेलन से भेंट करके हम उते सात दिना लौ रए, और बे आत्मा की अगुवाई से पौलुस से कहत रए, की यरूशलेम में गोड़े न धरियो। जब उते हमाए ठहरबे के दिना पूरे भए, तो हम विदा होकें चले; और सब मान्स बईयरन, बच्चन संग्गै हम हां नगर के बायरें लौ पहुंचाबे आए, और समुन्दर तीरे पे घुटना टेक के प्रार्थना करबे के पाछें हम ने एक दूसरे से विदा लई। तब हम जहाज पे चढ़ गए, और बे अपने घरै लौट गए। जब हम ने सूर से पानू कौ दौरा पूरो कर लओ तो पतुलिमयुस पोंचे, और भाईयन कौ प्रेम हेर के एक दिना उन के संग्गै रए। दूसरे दिना उते से चलकें हम कैसरिया पोंचे, और फिलिप्पुस सन्देस प्रचारक के घरै जाके जौन सातऊ में से एक हतो, ऊके इते ठहरे। ऊ की चार कुंवारी बिटियां हतीं; जौन अगमवानी करत हतीं। जब हम हां रहत भए कछु दिना हो गए, तो यहूदिया से अगबुस नाओं कौ एक आगमवक्ता उते आओ। हमाए ऐंगर आके ऊ ने पौलुस को करियाई कौ फेंटा लओ, और अपने हाथ गोड़े बांधके कई; पवित्र आत्मा जौ कहत आय, जी मान्स कौ जो करियाई कौ फेंटा आय, ऊहां यरूशलेम में यहूदी ऐई तरहां बांध हैं, और अन्यजातियन के हाथ में दें हैं। जब हम ने जा सुनी, तो हम और उते के रहबेवाले मान्सन ने ऊसे यरूशलेम न जाबे के लाने बिनती करन लगे। तब पौलुस ने कई, तुम जौ का कर रए आव, की रो रो के मोरे मन हां तोड़ रए आव, मैं तो प्रभु यीशु के नाओं के लाने यरूशलेम में न केवल बांधे जाबे, पर मरबे हां सोई तैयार आंव। जब बो नईं मानो, तो हम जा कहके सान्त हो गए; प्रभु की मन्सा पूरी होबै। इन दिना के पाछें हम ने तईयारी करी, और यरूशलेम की कोद चल दए। कैसरिया से भी कछु चेले हमाए संग्गै हो लए, और हम हां कुप्रुस के मनासोन नाओं के एक चेला लौ लै आए, जीके संग्गै हम हां ठहरने हतो। जब हम यरूशलेम पहुंचे, तो भाईयन ने हम हां बड़ी खुसी के संग्गै ठहराओ। तब दूसरे दिना पौलुस हम हां लैके याकूब के घरै गओ, जिते सब सियाने जुड़े हते। उन कौ सत्कार करके, ऊ ने एक एक करके बे काज बताए, जौन परमेसुर ने ऊ की सेवा से गैर यहूदियन में करे हते। जौ सुनके उन ने परमेसुर की बढ़वाई करी, और कई; भईया तें तो हेरत आय, की यहूदियन में हजारन आंय, जिन ने भरोसा करो आय; बे सब रीतियन के लाने उमंग से भरे आंय। और उनहां तोरे बारे में बताओ गओ आय, की तें गैर यहूदियन के बीच रहबेवालो, यहूदियन हां जौ सिखात आय, की मूसा की सीख हां छोड़ दो, और कहत आय की न अपने बच्चन कौ खतना कराओ, और बनाई भई रीतियन हां मानो। तो फिन का करो जाबै? बे जरूर जा सुन हैं, की तें आओ आय। ई लाने जौन हम तोय से कएं, बो कर, हमाए इते चार जनें आंय, जिन ने मन्नत मानी आय। उनहां लै जा और उन के संग्गै अपने आप हां शुद्ध कर; और उनहां खरचा दे, की बे अपने मूड़ मुड़ाएं, तब सबरे जान लें हैं, की जौन बातें तोरे बारे में उन हां बताई गईं आंय, बे तो सांची नईंयां, पर जौ की तें आपई रीतियन हां पालन करत भए, और उन हां मानत है। जिते लौ भरोसेमन्द गैर यहूदियन कौ नाता आय, हम ने उनहां जौ सार लिख के पठैव आय, की बे मूरतन के आंगू बलि करे भए मांस से, और खून से, और गले घोंटे भए के मांस से, और दुराचार से बचे रएं। तब पौलुस उन मान्सन हां लै गओ, और दूसरे दिना उन के संग्गै अपने खुद हां भी शुद्ध करके मन्दर में गओ, उते ऊ ने सब हां बताओ की शुद्ध होबे के दिना कबै पूरे हुईयें, यानि हम में से हर एक के लाने बलिदान कबै चढ़ाओ जै है। जब बे सात दिना पूरे होबे हां हते, तो आसिया के यहूदियन ने ऊहां मन्दर में तक के भीड़ हां भड़का दओ, और पौलुस हां पकड़ लओ। और चिल्या के कई, हे इस्राएलियो हमाई मदद करो; जौ बो मान्स आय, जौन हर जांगा सब जनन में हमाई प्रजा और रीतियन और ई जांगा के बिरोध में परचार करत आय, इते लौ कि ऊ ने यूनानियन हां मन्दर में लिया के ई पवित्र जांगा हां असुद्ध कर दओ आय। कायसे ईसे पेंला उन ने त्रुफिमुस नाओं के इफिसी हां ऊके संग्गै नगर में हेरो हतो, और जौ मानो की पौलुस ऊहां मन्दर में लै आओ आय। पूरो नगर भड़क उठो, और सब लोग गदबद दैके जुड़ गए, और बे पौलुस हां पकड़ के मन्दर से बायरें घसीट लाए, और तुरतईं किवाड़ बन्द कर दए गए। जब बे ऊहां मार डालबे हां हते, तो रोमी सिपाहियन के सेनापति हां जा खबर मिली, की सारे यरूशलेम में गड़बड़ी मच गई आय। बो तुरतईं सिपाहियन और सूबेदारन हां लैके उन की कोद गदबद दई; और जब मान्सन ने सेनापति और सिपाहियन हां हेरो तो पौलुस हां पीटबो बन्द कर दओ। तब सेनापति ने ऐंगर आके ऊहां पकड़ लओ; और ऊहां दो सांकलन में बांधबे कौ हुकम दओ और पूछन लगो, जौ को आय, और ऊ ने का करो आय? पर भीड़ में से कोऊ कछु और कोऊ कछु कैत रओ और ऊ हुल्लड़ के मारे जब बो सही बात नईं जान सको, तो ऊहां छावनी में लै जाबे कौ हुकम दओ। जब बो छिड़ियन के ऐंगर पोंचो, तो ऐसो भओ, की हत्यारी भीड़ के काजें सिपाहियन हां ऊहां उठाके लै जाबो पड़ो। कायसे भीड़ ऊके पाछें लग गई हती और बे चीख रए हते, ईहां खतम करो। जब बे पौलुस हां छावनी के भीतरै लै जाबे हां हते, तो ऊ ने सेनापति से कई; का मैं तोसे कछु कह सकत हों? ऊ ने पूंछी तें यूनानी जानत आय? का तें बो मिसरी तो नईंयां, जीने कछु दिना पैले दंगा करवाओ और चार हजार कटारबन्द लोगन हां डांग में ले गओ हतो? पौलुस ने कई, मैं यहूदी आंव और तरसुस कौ एक रहबेवारो आंव! मैं तोसे बिनती करत आंव, की मोय लोगन से बतकाव करन दे। जब ऊ ने हुकम दै दओ, तो पौलुस ने छिड़ियन पै ठांड़े होकें अपने हाथन से लोगन की कोद इसारो करो, और जब उते सन्नाटा छा गओ, तो ऊ ने लोगन से इब्रानी बोली में कई। हे भईया हरौ, और बूढ़ो, मोरो कहबो सुनो, जीहां मैं अब तुमाए सामूं कात हों। जब उन लोगन ने सुनी की जौ हम से इब्रानी में बोल रओ आय, तो बे और सान्त हो गए, और ऊ ने कई; मैं यहूदी आंव, जौन किलकिया के तरसुस में जन्मो; पर ई नगर में मोरो पलबो पुसबो भओ और गमलिएल के चरनन मैं बैठ के पुरखन की रीतियन के अनसार कड़ाई से सीखो, और परमेसुर के लाने उमंग से भरो भओ हतो, जैसे आज तुम सब आव। मैंने ई धर्म हां इते लौ सताओ, की मान्सन और बईयर हां बांध बांध के जेलखाना में डाल दओ, और उनहां मरवा सोई डालो। ई बात की गवाही महापुरोहित और सियानन की बैठक दे सकत आय; मैंने भाईयन के नाओं पाती लई और ई मतलब से दमिश्क हां चलो, कि उते के लोगन हां बन्दी बना के दण्ड दिलाबे यरूशलेम लै जाओं। और ऐसो भओ की जब मैं दुपरिया की बेरा गैल में हतो, आकास से एकाएक बड़ी ज्योत मोरे चारऊं कोद चमकी। और मैं धरती पे गिर पड़ो: और एक बोली मोसे जा कहत सुनाई दई, हे शाऊ ल, हे शाऊ ल, तें मोय काय सतात आय? मैंने कई, प्रभु तें को आय? ऊ ने मोय से कई; मैं यीशु नासरी आंव, जीहां तें सतात आय। जौन मोरे संग्गै हते उन ने ज्योत तो तकी, पर जौन मोसे बोलत हतो ऊ की बोली नईं सुनी। तब मैंने कई; प्रभु मैं का करों? प्रभु ने मोसे कई; उठके दमिश्क हां जा, और उते तोय बो सब जौन तोरे करबे के लाने ठहराओ गओ आय, बता दओ जै है। जब ऊ ज्योत के तेजी से मोय कछु सूज नईं रओ हतो, मोरे संगियन ने हाथ पकड़ के मोय दमिश्क पहुंचाओ। तब हनन्याह नाओं के एक मान्स, जौन रीतियन के अनसार भक्त और उते रहबेवाले सब यहूदियन में नामी हतो। मोरे ऐंगर आके, और ठांड़े होकें मोय से कई; भईया शाऊ ल अपनी नजर लै ले: ओई पल मैंने ऊहां हेरो। और ऊ ने कई; हमाए पुरखन के परमेसुर ने तोय ई लाने ठहराओ आय, की तें ऊ की मनसा हां जाने, ऊ धर्मी हां हेरे, और ऊके मों से बतकाव सुने। कायसे तें ऊ की ओर से मान्सन के सामूं उन बातन कौ गवाह आय, जो तेंने तकी और सुनी आंय। अब कायहां अबेर करत आय? उठ बपतिस्मा ले, और ऊ को नाओं लैके अपने पापन हां धो डाल। फिन ऐसो भओ की जब मैं यरूशलेम लौट के मन्दर में प्रार्थना कर रओ हतो, तो मैं बेसुध हो गओ। और मैंने ऊहां जौ कहत भए हेरो; झटपट कर और यरूशलेम से तुरतई कड़ जा: कायसे बे मोरे बारे में तोरी गवाही नईं मान हैं। मैंने कई; हे प्रभु बे तो खुद जानत आंय, की मैं एक प्रार्थना घर से दूसरे प्रार्थनाघर में उनहां जौन तोपे भरोसा करत आंय, बन्दी बनात हतो और पीटत हतो। जब तोरे गवाह स्तिफनुस कौ खून बहाओ जा रओ हतो तब मैं भी ठांड़ो ऊ की हत्या में शामिल हतो, और हत्या करबे वालन के उन्ना की रखनवारी करत हतो। और ऊ ने मोसे कई, चलोजा: कायसे मैं तोय दूर दूर लौ गैर यहूदियन के बीच में पठै हों। बे ऊके ई कथन हां तो सुनत रए; फिन जोर से चिल्या के कहन लगे, ऐसे मान्स कौ धरती पे से अन्त कर देओ, कायसे ऊ को जीयत रहबो सही नईंयां। जब बे चीख चीख के अपने उन्ना उछालत और आकास में धूरा उड़ान लगे। तो सेनापति ने ऊहां किले में लै जाबे हां कई; और हुकम दओ, की ऊहां कोड़े लगवा के जांचो, जीसे ऊके बिरोध में लोगन के चीखबे कौ मतलब मोय पता होय। जब उन ने ऊहां चमड़ा के बंधन से बांधो तो पौलुस ने सूबेदार से जौन ऐंगरई ठांड़ो हतो, कई, का जौ सही आय, की एक रोमी मान्स हां कोड़े मारो, और बो भी बिना दोसी ठहराए? जब सूबेदार ने जा सुनी तो ऊ ने सेनापति से कई; तें जौ का करत आय? जौ तो रोमी मान्स आय। सेनापति ने आके ऊसे पूंछी; मोय बता, का तें रोमी आय? ऊने कई, हओ। तब सेनापति ने ऊसे कई; मैंने तो रोमी रहवासिकता बिलात रुपैया देके मोल लई आय, पौलुस ने कई, पर मैं तो जनम से रोमी आंव। तब जौन लोग ऊ की जांच पड़ताल करबे पे हते, तुरतईं ऊहां छोड़के दूर हो गए; और सेनापति भी जौ जान के की जौ एक रोमी रहवासी आय, डरा गओ, कायसे ऊ ने ऊहां बन्दी बनाओ हतो। पर दूसरे दिना जौ जानबे के लाने की यहूदियन ने काय ईपे दोस लगाओ आय, ऊ ने ऊके बन्ध खोल दए; और मुखिया पुरोहितन और महापंचायत हां इकट्ठो होबे कौ हुकम दओ, और पौलुस हां लै जाके उन के आंगू ठांड़ो कर दओ। पौलुस ने बड़ी पंचायत की कोद टकटकी लगात भए कई, भईया हरौ, मैंने आज लौ परमेसुर के आंगू पूरी तौर से खरो जीवन बिताओ। तब हनन्याह महापुरोहित ने ऐंगर ठांड़े लोगन हां ऊके मों पे चांटा मारबे कौ हुकम दओ। पौलुस ने ऊसे कई; हे चूना पुती भई भींत, तोय परमेसुर मार है: तें रीत के अनसार मोरो न्याव करबे के लाने इते बैठो आय, और फिन रीत के बिरोध में मोय मारबे कौ हुकम देत आय? ऐंगर ठांड़े लोग ने कई, का तें परमेसुर के महापुरोहित हां बुरो भलो कहत आय? ईपे पौलुस ने कई; भईया हरौ, मोय नईं मालूम हतो, की जौ महापुरोहित आय; कायसे लिखो आय, तें अपने लोग के हाकिमन हां बुरो नईं कहियो। जब पौलुस ने जौ हेरो, की एक झुण्ड सदूकियन कौ आय और दूसरो फरीसियन को, तो बो महा पंचायत में हल्ला करके कहन लगो, भईया हरौ, मैं फरीसी आंव और फरीसियन के वंस कौ आंव, मरे भयन की आस और फिन से जी जाबे के काजें ही मोरो न्याव हो रओ आय। ऊके जौ कहतई फरीसियन और सदूकियन में दो फांक हो गए; और पंचायत में फूट पड़ गई। कायसे सदूकियन कौ जौ कहबो आय, की न ही फिन से जी जाबो आय, न ही सरगदूत और न ही कोई आत्मा आय; पर फरीसी जौ सब मानत आंय। तब बड़ो हल्ला मचो और फरीसी झुण्ड के कछु शास्त्री उठ ठांड़े भए, और जोर जोर से बतकाव करन लगे, हम ई मान्स में कोऊ बुराई नईं दिखात; अगर कोई आत्मा या सरगदूत ने ईसे बतकाव करो आय तो फिन का? जब बात ज्यादा बढ़त गई, तो सेनापति डरा गओ की कहूं बे पौलुस हां टुकड़ा टुकड़ा न कर डालें, ई लाने ऊ ने सिपाहियन हां हुकम दओ, की खालें जाके उन के बीच में से ऊहां जबरईं काड़ के किले में लै जाबें। पर ओई रात प्रभु ने ऊके ऐंगर ठांड़े होकें कई; हिम्मत धर; कायसे जैसे तेंने यरूशलेम में हिम्मत से मोरी गवाही दई आय, ओई तरहां तोय रोम में भी गवाही देने पर है। जब दिन भओ, तो यहूदियन ने बदला लैबे की सोची, और जौ कहके सौगंध खाई की जब लौ पौलुस हां मार न डालें, तब लौ न खा हैं और न पी हैं। बदला लैबेवाले चालीस से अधक हते। तब बे मुखिया पुरोहितन और सियानन के ऐंगर जाके कहन लगे, हम ने पक्के से मन बना लओ आय; की जब लौ पौलुस हां न मार डालें, तब लौ कछु न चीख हैं। ई लाने अब तुम, और बड़ी पंचायत मिलके सेनापति हां समझाओ, की ऊहां अपने ऐंगर बहाने से टेरो, जानो की तुम ऊके बारे में खूब जांच परख करबो चाहत आव, हम ऊहां इते पोंचबे के पैलईं ऊहां मार डालबे के लाने तईयार रै हैं। पर जब पौलुस के भांजे ने ऊहां घात करबे के बारे में सुनी? तो किले में पोंचो और भीतरै जाके पौलुस हां सबरी बात बता दई। तब पौलुस ने सूबेदारन में से एक हां ऐंगर टेरके सब बात बता दई; ई जुवान हां सेनापति के ऐंगर लै जाओ, कायसे जौ ऊहां कछु बताओ चाहत आय। ई लाने ऊ ने ऊहां सेनापति के ऐंगर लै जाके कई; कैदी पौलुस ने मोय अपने ऐंगर टेर के बिनती करी आय, की मैं ई जुवान हां तोरे ऐंगर पोंचा देओं; कायसे जौ कछु बताओ चाहत आय। तब सेनापति ऊहां हाथ पकड़ के अलग लै गओ, और हरएं के पूछन लगो; तें मोय का बताओ चाहत आय? ऊ ने कई; यहूदी तोसे जा मांग करबे के लाने एक हो गए आंय, की पौलुस हां कल बड़ी पंचायत के आंगू लाबें, जानो की बे ऊ की और जांच परख कराबो चाहत आंय। ई लाने तें उन की न सुनिये, कायसे उन में से चालीस से अधक मान्स ऊ की घात में लगे भए आंय, जिन ने एक होकें जा सौगंध खाई आय, की जब लौ पौलुस हां न मार डालें, तब लौ न खा हैं और न पी हैं, बे अबै सोई तईयार आंय और तोरे हुकम की बाट देखें आंय। तब सेनापति ने जुवान हां जौ हुकम दैके जान दओ, कोऊ से न कहिये की तेंने मोय जा बात बताई आय। तब ऊ ने दो सूबेदारन हां अपने ऐंगर टेर के कई; कैसरिया जाबे के लाने रात नौ बजे लौ दो सौ सिपाहियन, सत्तर घुड़सवार, और दो सौ भालैत तईयार धरियो। राज्यपाल फैलिक्स के ऐंगर पौलुस हां साजी तरहां लै जाबे के लाने घुड़वन की सवारी कौ भी इंतजाम करो। और ऊ ने एक ऐसी पाती भी लिखी। महाराज राज्यपाल फेलिक्स हां क्लौदियुस लुसियास कौ नमस्कार। जब यहूदियन ने ई मान्स हां पकड़ के मार डालबो चाहो, तो मैंने जा जानके की जौ रोमी आय, सिपाहियन के संग्गै उन के ऊ परै धावा बोलो और में ईहां छुड़वा ले आओ। तब जौ पता लगाबे के लाने की बे की काजें ऊ पे दोस लगा रए आंय, मैं ऊहां उन की महापंचायत में ले गओ। फिन मोय पता पड़ो, की उन ने अपनी रीत हां लैके ऊ पे दोस लगाओ आय, पर ऐसो सोई दोस नईंयां जौन मौत की सजा देबे या कैदी बनाए जाबे के लाक होए। जब मोय जौ बताओ गओ, की ऊ मान्स के बिरुद्ध घात रची जा रई आय, तो मैंने ईहां तुरतईं तोरे ऐंगर पठै दओ; और ईपे दोस लगाबे वालन हां सोई हुकम दओ, की बे तोरे ऐंगर ईके बिरुद्ध दोस लगाबें। ई लाने सिपाहियन हां जैसो हुकम दओ हतो, पौलुस हां रातई रात अन्तिपत्रिस पोंचा दओ। पर दूसरे दिना घुड़सवारन हां ऊके संग्गै जाबे के लाने छोड़के बे किले हां लौट आए। जब घुड़सवार कैसरिया पोंचे, तो उन ने राज्यपाल हां पाती दई: और पौलुस हां भी ऊके आंगू हाजिर करो। पाती पढ़बे के पाछें ऊ ने पूंछी की तें की परगना कौ आय? और जौ जानके की जौ किलकिया कौ रहवासी आय; ऊने कई जब तोपे दोस लगाबेवाले भी आ हैं, तब मैं तोरी सुनवाई कर हों: और ऊ ने हुकम दओ की ऊहां हेरोदेस के किले में, रखवारी में धरो जाबै। पांच दिना के पाछें महापुरोहित हनन्याह कछु सियानन और तिरतुल्लुस नाओं कौ एक वकील हां संग्गै लैके आओ; और उन ने राज्यपाल के आगे पौलुस के विरुद्ध दोस लगाए। जब पौलुस हां टेरो गओ, तो तिरतुल्लुस ऊ पे दोस लगात भओ राज्यपाल से कहन लगो, कि, “महाराज फेलिक्स तोरे राज में हमाए देस में बड़ी सान्ति आय; और तोरी दूरन्दाजी से देस में बिलात काज कराए जा रए आंय। हम जा बात हर तरहां से और हर जांगा धन्य कहके मानत आंय। अब मैं तोरो और बिलात बेरा नास नईं करके तोय से बिनती करत आंव, की दया करके हम हां तनक सुनवाई कौ मौका दे। बात जा आय की जौ मान्स सांची में बदमास आय, और जगत भर के सारे यहूदियन में फूट डालत आय, और नासरियन के बुरई चाल कौ मुखिया आय। इते लौ की ईने मन्दर हां भी नास करबो चाहो, और तब हम ने ईहां बन्दी बना लओ, हम ईको न्याव अपनी रीत के अनसार करबो चाहत हते। पर सेनापति लुसियास ने आके ऊहां जबरदस्ती हमाए हाथन से छुड़ा लओ। और ईपे दोस लगाबे वालन हां तोरे आंगू आबे कौ हुकम दओ, जिन बातन के बारे में हम ऊ पै दोस लगात आंय, अगर तें खुद ऊसे पूछतांछ कर ले, तो तोय इन सब कौ ज्ञान हो जै है।” यहूदियन ने भी ई दोस में ऊ को संग दओ, और दाबा करो की जे बातें ऐंसई आंय। जब राज्यपाल ने पौलुस हां बोलबे कौ इसारा करो तो पौलुस ने बोलबो शुरू करो, जौ जानके की तें बिलात बरसन से ई जात कौ न्याव करत आओ आय, मैं खुसी से अपने बचाव में बोलत आंव। तें आपई सच्चाई कौ पता लगा सकत आय, की मोय प्रार्थना करबे के लाने यरूशलेम गए केवल बारह दिना भए आंय। इन ने मोय न ही मन्दर में, न ही प्रार्थना घर में, और न ही नगर में कहूं कोऊ से बतकाव करत या दंगा करत पाओ आय। और न ही जे उन दोषन हां जौन अब मोय पे लगात आंय, तोरे आंगू साबित कर सकत आंय। पर मैं तोरे आंगू जौ मान लेत आंव, की जी चाल हां जे बुरई चाल कहत आंय, ओई के अनसार मैं अपने पुरखन के परमेसुर कौ काज करत आंव: और जौन बातें रीत के अनसार आंय मानत हों, और जौन कछु आगमवक्तन के शास्त्रन में लिखी आंय, उन सब हां मानत हों। मैं परमेसुर में जौ आस धरत आंव, जैसे जे खुद भी धरत आंय, की सही में धर्मी और अधर्मी दोई कौ फिन से जी जाबो हुईये। ई लाने मैं भी परमेसुर और मान्सन के आंगू अपनी सोच हां निरदोस बनाए धरबे की सदा कोसिस करत आंव। अब बिलात बरसन के पाछें मैं अपनी जात के लाने दान पोंचाबे, और भेंट चढ़ाबे आओ हतो। जब इन ने मोय मन्दर में पाओ, तो मैं रीत अनसार सुद्ध होकें, बिना भीड़ भाड़ या दंगा करे, ई काज में लगो भओ हतो, पर उते आसिया के कछु यहूदी हते। अगर उन लौ कछु मोरे विरुद्ध दोस लगाबे कौ होतो तो उन हां चाहने हतो, की बे तोरे आंगू इते हाजिर होकें दोस लगाते। नईं तो जे लोग खुद बताबें, की जब मैं बड़ी पंचायत के आंगू ठांड़ो हतो, तो उन ने मोय में कौन दोस पाओ। केवल ई बात हां छोड़, जीहां मैंने उन के बीच ठांड़े होकें जोर से कई हती, मरे भयन के जी जाबे के बारे में, तुमाए आंगू मोरो न्याव हो रओ आय। पर फेलिक्स ने जौन ई चाल की सही सही जानकारी धरत हतो, सुनवाई रोक के कई, जब सेनापति लुसियास आ है, तब मैं तुमाए मुकदमा पै फैसला दें हों। तब ऊ ने सूबेदार हां हुकम दओ, की पौलुस हां कछु ढील देके हिरासत में धरो जाबै, और ऊके संगियन में से कोऊहां भी ऊ की खुसामद करबे से नईं रोको जाबै। कछु दिना के पाछें फेलिक्स अपनी घरवारी द्रुसिल्ला हां, जौन यहूदिनी हती, संग्गै लैके आओ; और पौलुस हां टेर के ऊ भरोसे के बारे में, जौन मसीह यीशु में आय सुनो। अब बो धर्म की और आबेवाले न्याव की बतकाव कर रओ हतो, तो फेलिक्स ने डरा के कई, ई बेरा तो तें जा, बेरा मिलबे पे मैं तोय फिन टेर हों। बो पौलुस से रुपैया पाबे की आस सोई करत हतो; ई लाने बो ऊहां बेर बेर टेर के, ऊसे बतकाव करत हतो। जब दो साल बीत गए, तो फेलिक्स की जांगा पे पुरकियुस फेस्तुस हां ठहराओ गओ, और फेलिक्स यहूदियन हां खुस करबे की मनसा से पौलुस हां हिरासत में ही छोड़ गओ। फेस्तुस ऊ परगना में पोंचबे के तीन दिना पाछें कैसरिया से यरूशलेम हां गओ। तब मुखिया पुरोहितों और यहूदियन के खास जन ने, पौलुस पे दोस लगा के ऊसे बिनती करी। और जा छूट मांगी, कि बो पौलुस हां यरूशलेम पठै दे, कायसे बे ऊहां गैल में मरवाबे की ताक में हते। तब फेस्तुस ने कई, पौलुस कैसरिया की हिरासत में आय, और मैं सोई झट्टई जाबे वालो आंव। फिन ऊ ने कई, तुम में से जौन खास जनें आंय बे मोरे संग्गै निंगे, और अगर ई मान्स ने कोऊ बुरव काज करो आय, तो उते ऊ पे दोस लगाबें। बो उन के बीच आठ या दस दिन रह के कैसरिया हां चलो गओ, दूसरे दिना ऊ ने न्याव आसन पे बैठ के हुकम दओ की पौलुस हां लाओ जाबै। ऊके उते पोंचबे पे यरूशलेम से आए भए यहूदी ऊके चारऊं कोद ठांड़े हो गए, और ऊ पे ऐसे बड़े दोस लगान लगे, जिन कौ उन के ऐंगर कोऊ सबूत नईं हतो। पर पौलुस ने अपने बचाव में कई, मैंने न यहूदियन की रीत, न मन्दर और न कैसर के बिरुद्ध कोऊ पाप करो आय। तब फेस्तुस ने यहूदियन हां खुस करबे की मनसा से पौलुस से कई, का तें चाहत आय, कि मैं इन दोस कौ न्याव यरूशलेम में करों। पर पौलुस ने कई; मैं कैसर के न्याव आसन के आंगू ठांड़ो आंव, मोरो न्याव इतईं होओ चईये: जैसो की तें भी भली भांत जानत आय, मैंने यहूदियन कौ कछु नईं बिगाड़ो आय। अगर मैं दोसी आंव और मैंने मृत्यु दण्ड पाबे के लाने कछु करो आय; तो मैं मरबे से मना नईं करत, पर अगर उन के द्वारा लगाए गए दोषन में से एकऊ सांची नईं ठहरे, तो कोऊ भी मोय इन के हाथन नईं सौंप सकत: मैं कैसर से अपील करत आंव। तब फेस्तुस ने अपनी पंचायत से सलाह कर के कई, तेंने कैसर से अपील करी आय, तें कैसर के आंगू ठांड़ो हुईये। जब बिलात दिना बीत गए तो राजा अग्रिप्पा और बिरनीके ने कैसरिया आके फेस्तुस से भेंट करी। जब कि उन हां उते बिलात दिना बिताने हते, तो फेस्तुस ने पौलुस कौ मुकदमा राजा के आंगू पेस करके कई; इते एक मान्स आय, जीहां फेलिक्स हिरासत में छोड़ गओ आय। जब मैं यरूशलेम में हतो, तो मुखिया महापुरोहित और यहूदियन के सियानन ने ऊके बिरुद्ध दोस लगाए; और बिनती करी, की ऊहां दण्ड दओ जाबै। तब मैंने उन से कई, की रोमियों में जा रीत नईंयां, की कोऊ दोसी हां, जब लौ दोस लगाबेवालन के आंगू ठांड़े होकें अपने बचाव में बोलबे कौ मौका नईं मिले, ऊहां दण्ड के लाने सौंपो जाबे। ई लाने जब बे इते जमा भए, तो मैंने बिना देरी करे, दूसरे दिना न्याव आसन पे बैठके, ऊ मान्स हां लाबे कौ हुकम दओ। जब दोस लगाबे वाले ठांड़े भए, तो उन ने ऊ पे कोऊ ऐसो बड़े दोस नईं लगाव, जैसी मोरी सोच हती। पर उन कौ सोच फरक हतो, ऊके संग्गै केवल अपने धरम की कछु बातन और यीशु नाओं के एक मान्स के बारे में हती, जौन मर गओ हतो, पर पौलुस ऊके जीयत होबे कौ दावा करत हतो। मोरी समझ में नईं आओ, की इन बातन की छान-बीन कैसे करी जाबै? ई लाने मैंने ऊसे पूछी, की का तें यरूशलेम जाबे हां तईयार आय, की उते इन बातन के बारे में तोरो न्याव होबै? पर जब पौलुस ने अपील करी, की महाराजाधिराज द्वारा ही मोरो न्याव करो जाबै; तो मैंने हुकम दओ, की जब लौ मैं ऊहां कैसर के ऐंगर नईं पठै दों, बो इतईं हिरासत में रए। तब अग्रिप्पा ने फेस्तुस से कई, मैं सोई मान्स की सुनबो चाहत आंव: ऊ ने कई, तें कल सुन लै है। ई लाने दूसरे दिना, जब अग्रिप्पा और बिरनीके बिलात धूमधाम से सेनापतियन और नगर के नामी जनें के संग्गै पंचायतघर में घुसे, तब फेस्तुस के हुकम से पौलुस हां लाओ गओ। फेस्तुस ने कई, हे महाराजा अग्रिप्पा, और हमाए संग्गै हाजिर भले मान्सो, ई मान्स हां हेरो, जीके बारे में सबरे यहूदी समाज ने यरूशलेम में और इते भी चीख चीख के मोसे बिनती करी आय, की ईको अब जीयत रहबो सही नईंयां। पर मैंने जान लओ, कि ईने मृत्यु दण्ड के लाक कछु नईं करो हतो; और ई लाने की ईने खुद महाराजाधिराज से अपील करी आय, तो मैंने ईहां पठैय देबे कौ फैसला करो। फिन भी मोरे ऐंगर ईके बारे में अपने महाराज हां लिखबे के लाने कोई सही बात नईंयां, ई लाने मैं ऊहां तुम सब के आंगू खास के हे राजा अग्रिप्पा तोरे आंगू लाओ आंव, की जांच खतम होबे पे मोय कछु लिखबे हां मिल जाबै। कायसे मोय जौ बेकार जान पड़त आय, की कोई कैदी हां ऊ की दोसपाती तईयार करे बिना पठैय दों। तब अग्रिप्पा ने पौलुस से कई; तोय अपने बचाव में बोलबे की मंजूरी आय, ईपे पौलुस हाथन हां बढ़ाके अपने बचाव में बोलन लगो। हे राजा अग्रिप्पा, यहूदियन ने मोपे कई एक दोस लगाए आंय, मैं अपने हां धन्य मानत आंव, की आज तोरे आंगू अपने बचाव में उन सब कौ बखान करबे जा रओ आंव। खासकर ई लाने की तें यहूदियन के सब रीत रिवाज और बतकाव हां जानत आय, ई लाने मैं बिनती करत आंव, की गम खाके मोरी सुन ले। मोरो चाल चलन जवानी से लैके अबै लौ जैसो रहो यानि मैंने ईहां शुरू से अपनी जात के बीच, और यरूशलेम में कैसे गुजारो, ईहां सब यहूदी जानत आंय। कायसे बे मोरे बारे में बिलात पेंला से जानत आंय, की मैंने अपने धरम के सब से कट्टर सोच के अनसार फरीसी होकें जीयत रओ, अगर बे चाहें तो ई बात की गवाह भी दे सकत आंय। पर अब ऊ आस के काजें, जो प्रतिज्ञा परमेसुर ने हमाए पुरखन से करी हती, मोरो न्याव करो जा रओ आय। हमाए बारह गोत्र ई प्रतिज्ञा कौ फल पाबे की आस लगाए भए, जोस के संग रात दिना परमेसुर कौ काज करत आंय, और हे राजन, ऐई आस के बारे में यहूदी मोय पे दोस लगात आंय। जा बात तुम लोगन हां भरोसेमन्द काय नईं लगात आय, की परमेसुर मरे भयन हां जिलात आय? मैंने भी जौई सोचो हतो, की नासरत के यीशु के नाओं के बिरुद्ध मोय बिलात कछु करने आय। और मैंने यरूशलेम में जौई करो; मुखिया महापुरोहितन से हुकम पाके मैंने बिलात पवित्र लोगन हां जेलखाने में डालो, पर जब बे मौत के घाट उतारे जा रए हते, तो मैंने उन के बिरुद्ध में अपनी हामी भी दई। मैं आमतौर पे सब प्रार्थनाघर में जाके उनहां सताव करत हतो, और यीशु कौ ठट्ठा करबे हां उनहां दबाव डालबे की कोसिस करत हतो, और उन के बिरुद्ध बड़े गुस्‍सा से भर के बाहर के नगरन में भी उन कौ पीछा करत हतो। जब मैं मुखिया महापुरोहितन की मंजूरी और हुकम पाके ऐई धुन में दमिश्क हां जा रओ हतो। तो हे राजा, मैंने दुहपरिया की बेरा गैल में सूरज से भी तेज ज्योत आकास से आत हेरी, जौन मोरे और मोरे संग्गै चलबे वालन के चारऊं कोद चमक रई हती। जब हम सब धरती पे गिर पड़े, तो मोय इब्रानी बोली में जौ सुनाई पड़ो, हे शाऊ ल, हे शाऊ ल, तें मोय काय सतात आय? पैने पे लात मारबो तोरे लाने कठनआय। मैंने कई, प्रभु तें को आय? प्रभु ने कई, मैं यीशु आंव, जीहां तें सता रओ आय। पर उठ, और अपने गोड़न पे ठांड़ो हो जा; मैंने ई लाने से तोय दरसन दओ आय, की तोय भक्त ठहराओं और न केवल इन बातन कौ, जौन तेंने हेरी आंय गवाह ठहराओं, पर उन बातन कौ भी जौन के लाने मैं तोय दरसन दें हों। मैं तोय तोरे लोगन से और गैर यहूदियन में से भी जिन के ऐंगर तोय पठैय रओ आंव, छुड़ात रै हों। कि तें उन की आंखन हां खोले, जीसे की बे अंधयारे से उजयारे की कोद, और शैतान के राज्य से परमेसुर की कोद फिरें; जीसे की बे पापन की क्षिमा, और उन लोगन के संग्गै पदवी पाबें, जौन मोय पे भरोसा करबे के द्वारा पवित्र भए आंय। ई लाने हे राजा अग्रिप्पा, मैंने ऊ स्वर्गीय दरसन के हुकम कौ नईं टालो। पर पेंला दमिश्क के, फिर यरूशलेम के, और तब यहूदियन के सबरे परगना के रहबेवालन हां, इते लौ की गैर यहूदियन हां सोई जौई परचार करत रहो, की बे पछता के परमेसुर की कोद फिरें और मन फिराबे के जैसे काज करें। ऐई काजें कछु यहूदियन ने मोय मन्दर में पकड़ो और मार डालबे की कोसिस करी। ई तरहां परमेसुर की कोद से मदद पाके मैं आज लौ बनो भओ आंव और हल्के बड़े सबई के आंगू गवाही देत आंव, और जौन बातें आगमवक्तन और मूसा ने कई आंय, की बे होबेवाली आंय, उनहां छोड़ कछु नईं कहत। यानि मसीह हां दुख उठाने पड़ है, और ओई मरे भयन में से जी जाबे वालन में पैलो होकें, यहूदी परजा और गैर यहूदियन दोई हां ज्योत कौ सन्देसो दै है। जब पौलुस अपने बचाव में ई तरहां बोल रओ हतो, तो फेस्तुस ने जोर से कई; पौलुस तें पगला आय, तोरी ज्यादा विद्या ने तोय पगला बना दओ है। पर पौलुस ने कई; महाराज फेस्तुस, मैं पगला नईं आंव, पर सांची और गूढ़ बातें करत आंव। इन बातन हां राजा खुद जानत आय, जीके आंगू मैं बिना हिचक के बोल रओ आंव, मोय पूरो भरोसा आय, की इन में से कोई बात नईंयां, जौन उन से छुपी होबै, कायसे जा बात कोऊ कोने में नईं भई। हे राजा अग्रिप्पा, का तें आगमवक्तन कौ भरोसा करत आय? हओ, मैं जानत आंव, की तें भरोसा करत आय। तब अग्रिप्पा ने पौलुस से कई, तें तनक समझाबे से मोय मसीही बनाओ चाहत आय। पौलुस ने कई, परमेसुर करे, चाए तनक या बिलात बेरा में, न केवल तें, पर बे सबरे सोई जौन आज मोरी सुन रए आंय, इन बंधनों हां छोड़, बे मोरे घांई हो जै हैं। तब राजा उठो और ऊके संग्गै राज्यपाल बिरनीके और बैठे भए लोग भी उठ के ठांड़े भए। और अलग जाके एक दूसरे से बतकाव करके जौ कहन लगे, जौ तो ऐसो कछु भी नईं कर रओ आय, जीसे मृत्युदण्ड या जेलखाने में डालबे लाक होय। अग्रिप्पा ने फेस्तुस से कई; अगर ई मान्स ने कैसर से अपील न करी होती, तो जौ छोड़ दओ जातो। जब जौ ठहराओ गओ, की हम जहाज से इतालिया जाबें, तो उन ने पौलुस और दूसरे कैदियन हां राजसी सैनिक दल के संग्गै यूलियुस नाओं के एक सूबेदार हां सौंप दओ। और अद्रमुत्तियुम कौ एक जहाज आसिया के तीरे के परगना में जाबे हां हतो, हम ऊ पे चढ़के समुन्दरी दौरा के लाने कड़ पड़े, अरिस्तर्खुस नाओं के थिस्सलुनीके कौ एक मकिदूनी भी हमाए संग्गै हतो। दूसरे दिना हम सैदा में उतर गए, और यूलियुस ने दया करके पौलुस हां ऊके संगियन के इते जान दओ की सत्कार पाए। उते से हम जहाज से कुप्रुस की आड़ में होकें चले, कायसे बैहर आंगू की हती। और जब हम किलिकिया और पंफूलिया के समुन्दर तीरे से होकें कड़े, तो लूसिया के मूरा में उतर गए। उते सूबेदार हां इतालिया जाबे वालो सिकन्दरिया कौ जहाज मिलो, और ऊ ने हम हां ऊ पे चढ़ा दओ। जब हम कछु दिना लौ हरां हरां परेसानी से कनिदुस के आंगू पोंचे, तो ई लाने की बैहर हम हां आंगू नईं बढ़न दे रई हती, हम सलमोने के आंगू से होकें क्रेते की आड़ में चले। और ऊके तीरे तीरे परेसानी से खेते भए हम एक जांगा पे पोंचे, जौन शुभलंगरबारी कहात हतो, जिते से लसया नगर ऐंगर हतो। बिलात बेरा बीत गई हती, और पानू की यात्रा भी जोखिम भरी हो गई हती, इते लौ की उपवास के दिना भी बीत चुके हते, ई लाने पौलुस उनहां जौ कहके चिताउन लगो। हे भईया हरौ, मोय ऐसो लगन लगो आय, ई समुन्दरी यात्रा में माल और जहाज की नईं, बल्कि हम हां अपने प्राणन की भी हानि उठानी पड़ है। पर सूबेदार ने पौलुस के कहबे की जांगा जहाज के चलाबेवाले और मुखिया की बातन की कोद ज्यादा ध्यान दओ। ई लाने की बो बन्दरगाह जड़कारो बिताबे के लाने सही नईं हतो; ज्यादातर लोगन की जा सलाह भई, की उते से आंगू बढ़ें, की कोऊ तरहां फीनिक्स पोंच के जड़कारो बिताएं, जौ क्रेते कौ एक बन्दरगाह आय, जीको मों दक्खन-पश्चिम और उत्तर-पश्चिम कोद आय। जब दक्खिनी बैहर हरां हरां बहन लगी, तो जौ सोच के की हमाओ विचार पूरो हो गओ, उन ने लंगर उठाओ और तीरे तीरे क्रेते के ऐंगर होकें जान लगे। पर तनकई देर में एक बड़ी आंधी उठी, जौन उत्तरी पूर्वी कहात आय। जब जहाज ऊ में फंस गओ और आंधी कौ सामना नईं कर सको, तो हम ने ऊहां बैहर के रुख में बहन दओ, और हम भी ओई के संग्गै बहत भए चले गए। तब कौदा नाओं के टापू की आड़ में बहत बहत हम परेसानी से जहाज की डोंगी हां वस में कर पाए। फिर ढीमरन ने डोंगी हां उठाओ, और जहाज हां खालें से ऊ परै लौ गिरमा से बांधो, और सुरतिस टापू के उथली जांगा में फंस जाबे के डर से पाल उतार के बहत चले गए। दूसरे दिना जब हम आंधी से बिलात हिचकोले खा रए हते, तो बे जहाज कौ माल फेंकन लगे। तीसरे दिना उन ने अपने हाथन से जहाज के समान हां सोई फेंक दओ। जब बिलात दिना लौ न सूरज दिखा पड़ो, न तारे और बिलात आंधी चलत हती, तो हरां हरां हमाए बचबे की आसा भी जात रई। जब बे बिना खाए पिए बिलात दिना बिता चुके, तब पौलुस ने उन के बीच ठांड़े होकें कई; हे भईया हरौ, सही होतो, की तुम मोरो कहबो मानते, और क्रेते से नईं चलते, तब न तो जा विपदा आती और न जा हानि उठानी पड़ती। अबै भी मैं तुम से जा बिनती करत आंव, की हिम्मत धरौ; कायसे तुम में से कोऊ के प्राणन की हानि न हुईये, पर केवल जहाज की। कायसे परमेसुर जीको मैं आंव, और जीको काज करत आंव, ऊ को एक सरगदूत आज रात मोरे ऐंगर आके ठांड़ो भओ। और ऊ ने कई, पौलुस न डरा; तोय कैसर के आंगू ठांड़ो होबो जरूरी आय, हेर, परमेसुर ने इन सब हां जौन तोरे संग्गै यात्रा कर रए आंय, तोय दओ आय। ई लाने हे भईया हरौ, हिम्मत धरो; कायसे मैं परमेसुर पे भरोसा करत हौ, की जैसो मोसे कहो गओ आय, वैसई हुईये। पर कोऊ टापू पे हमाओ जहाज जरूर जा टिक है। पर जब चौदहवीं रात आई, और हम अद्रिया सागर में भटकत फिर रए हते, तो आधी रात के करीब, ढीमरन ने ऐरो लओ, की हम कोऊ तीरे के ऐंगर पोंच रए आंय। थाह लेबे पे उन ने सेंतीस मीटर गहरो पाओ और तनक आंगू बढ़के उन ने फिर थांह लई, तो छब्बीस मीटर गहरो पाओ। तब ई डर से की कहूं चट्टान से न जा टकराएं, जहाज के पिछले हिस्सा से चार लंगर डाले, औरभुनसारे होबे की बाट जोहन लगे। जब ढीमर जहाज से भगबे की कोसिस कर रए हते, और अगले हिस्सा से लंगर डालबे के बहाने से डोंगी हां समुन्दर में उतार चुके हते। तो पौलुस ने सूबेदार और सिपाहियन से कई; अगर बे लोग जहाज पे नईं रएं, तो तुम नईं बच सकत। तब सिपाहियन ने गिरमा हां काट के डोंगी गिरा दई। जब भुनसारो होबे वालो हतो, तो पौलुस ने जौ कै कें, सब हां खाबे के लाने समझाओ, आज चौदह दिना हो गए आंय, जब से तुम आस तकत तकत भूखे रए, और तुम ने कछु नईं खाओ। ई लाने मैं तुम हां समझात आंव, की अपने प्राण बचाबे के लाने कछु खा लेओ, कायसे तुम में से कोऊ कौ बाल बांका न इुईये। जा कह के ऊ ने रोटी लई और सब के आंगू ऊके लाने परमेसुर हां धन्नवाद करो; और तोड़ के खाबे लग गओ। ईसे उन सब हां हिम्मत मिली और उन ने भी रोटी खाई। जहाज पे हम सब मिला के दो सौ छिहत्तर जनें हते। जब बे खाके अफर गए, तो गेंहूं हां समुन्दर में फेंक के जहाज हां हल्को करन लगे। जब दिन कड़ो, तो बे ऊ जांगा हां नईं चीन पाए, पर उनहां एक खाड़ी दिखाई पड़ी, जीको तीरो चौरस हतो, और उन ने सोचो, अगर हो सके तो जहाज हां ओई तीरे पे लगा दओ जाबै। उन ने लंगर काट के समुन्दर में छोड़ दओ, और ओई बेरा पतवारन की गांठें ढीली कर दईं, और बैहर के रुख में, हल्के पालन हां खोल के किनारे हां चल पड़े। पर दोई पानू की धारन के बीच पड़के जहाज बालू में फंस गओ, और ऊ को अगलो हिस्सा ऐसो धर गओ, की हिल नईं सको; और पाछें को हिस्सा लहरन के थपेड़न से टूटन लगो। सिपाहियन की सोच हती की कैदियन हां मार डालें; जीसे उन में से कोऊ भी तैर के नईं कड़ पाबै। पर सूबेदार ने पौलुस हां बचाबे की मनसा से उन हां ऐसो करबे से रोको, और हुकम दओ, की जौन तैर सकत आंय, बे पेंला कूद के धरती पे कड़ जाबें। और बाकी लोग पटरों और जहाज के दूसरे टुकड़न के सहारे कड़ जाबें, ई तरहां से सब लोग धरती पे साजे पोंच गए। जब हम सब बच कड़े, तब हम हां पता चलो की जौ टापू मिलिते कहाऊ त है। उतईं के आदिवासियन ने हम पे बड़ी दया करी; बरसा होबे से जाड़ो पड़न लगो हतो, ई लाने उन ने आगी बार के हम सब कौ सत्कार करो। जब पौलुस ने लकड़ियों कौ गट्ठा जमा करके आगी पे धरो, तो आंच पाके एक सांप कड़ो और ऊके हाथ से लिपड़ गओ। जब आदिवासियन ने सांप हां ऊके हाथ में लटके भओ तको, तो एक दूसरे से कैन लगे; सही में जौ मान्स हत्यारो आय, जौ समुन्दर से बच गओ, फिन भी न्याव ने ईहां जीयत रहन नईं दओ। तब ऊ ने सांप हां आगी में झटक दओ, और ऊहां कोऊ हानि नईं भई। बे तो जा बाट जोह रए हते, की बो सूज जै है, या खुद गिरके मर जै है, पर जब बे बिलात बेरा लौ बाट जोहत रए, और हेरो, की ऊहां कछु भी नईं भओ, तो अपनी सोच बदल के कहन लगे; की जौ तो कोऊ देवता आय। ऊ जांगा के ऐंगर पुबलियुस नाओं के मुखिया की धरती हती, ऊ ने हमाओ सत्कार करो और तीन दिना हमाई पाहुनाई करी। पुबलियुस कौ बाप बुखार और दस्त से रोगी पड़ो हतो, पौलुस ऊहां देखबे हां भीतरै गओ और ऊ ने प्रार्थना करके अपनो हाथ ऊ पै धरो, और ऊहां साजो कर दओ। ई बात से, टापू के बचे रोगी भी आके साजे होन लगे। और उन ने हमाओ तरहां तरहां से मान सत्कार करो, जब हम ऊ जांगा से चलबे हां हते, तो उन ने हमाई जरूरत की सब चीजें जहाज पे लदवा दईं। तीन महिना के पाछें हम सिकन्दरिया के एक जहाज से चले, जौन ई टापू पे जाड़ो काट चुको हतो; और जी की चिन्हार दियुसकूरी हतो। फिन सुरकूसा में लंगर डालके हम तीन दिना लौ रुके रए। उते से हम घूमके रेगियुम पहुंचे और एक दिना के बाद दक्खिनी बैहर चली, ई लाने हम दूसरे दिना पुतियुली में आए। उते हम हां कछु भईया मिले, जिन के बिनती करबे से हम उन के ऐंगर सात दिना लौ ठहरे; ऐसे हम रोम पोंचे। जब भाईयन ने हमाए बारे में सुनो तो अप्पियुस के चौक और तीन सराए लौ बे हम से मिलबे आए, उनहां हेर के पौलुस हां हिम्मत भई और ऊ ने परमेसुर हां धन्नवाद दओ। जब हम रोम में पोंचे, तब पौलुस हां एक सिपाही के संग्गै, जौन ऊ की चौकीदारी करत हतो, अलग रहबे की मंजूरी दई गई। फिन ऐसो भओ, की तीन दिना के बाद ऊ ने यहूदियन के मुखिया लोगन हां टेरो, जब बे जमा भए, तो ऊ ने उन से कई; भईया हरौ, मैंने अपनी जात या अपने पुरखन के रीति रिवाज के बिरुद्ध कछु नईं करो, फिन भी मैं यरूशलेम से कैदी बनाके रोमियन के हाथन सौंप दओ गओ आंव। उन ने पूंछ तांछ करबे के पाछें, मोय छोड़ दैबो चाहो, कायसे मोय मृत्युदण्ड दए जाबे की कोऊ बात नईं हती। पर जब यहूदियन ने बिरोध करो, तो मोय कैसर से अपील करने पड़ी, पर जौ नईं, की मोय अपनी जात पर कोऊ दोस लगाने हतो। ऐई काजें मैंने तुम हां बुलाओ आय, की तुम लोगन से मिलूं और बतकाव करों; कायसे इस्राएल की आसा के काजें, मैं ई सांकलन से बंधो भओ आंव। उन ने ऊसे कई; न तो हम हां यहूदियन से तोरे बारे में कोऊ चिठिया मिली आय, और न भाईयन में से कोऊ ने इते आके तोरे बारे में कोऊ खबर दई आय, और न कोऊ बुरई बात कई आय। पर हम तोरे बारे में तोरे विचार सुनबे की मनसा धरत आंय, कायसे हम जानत आंय, की सब जांगा लोग ईके बिरोध में बतकाव करत आंय। तब ऊके लाने एक दिना ठहराओ गओ, और बिलात जनें ऊ की रहबे की जांगा पे आए, ऊ ने परमेसुर के राज्य के बारे में सोचत भए, गवाही देके उनहां समझाओ, और भुनसारे से संजा लौ मूसा की रीति और आगमवक्तन की पोथियन से यीशु के बारे में उनहां समझाबे की कोसिस करत रहो। कछु लोग ने तो इन बातन हां मान लओ, पर कछु ने भरोसा नईं करो। जब बे एक दूसरे से राजी नईं भए, तब पौलुस की अखिरी बात के कहबे के पाछें बे उते से चले गए, पवित्र आत्मा ने यशायाह आगमवक्ता से तुमाए पुरखन से सही कई। जाके इन लोगन से कह दईयो, की तुम सुनत तो रै हौ, पर न समझ हौ, और हेरत तो रै हौ, पर न बूझ हौ। कायसे इन लोगन कौ मन मोंटो हो गओ आय, बे अपने कान से ऊंचो सुनन लगे आंय, और उन ने अपनी आंखन हां मूंद लओ आय, कहूं ऐसो न होबै की बे आंखन से हेरें, और अपने कान से सुनें, और अपने मन से समझें और फिरें, और मैं उनहां साजो करों। ई लाने तुम जान लईयो, की परमेसुर कौ जौ उद्धार अन्यजातियन के ऐंगर पठैव गओ आय, और बे सुन हैं। और जब बो जे बातें कह चुको, तो यहूदी आपस में बिलात बतकाव करत भए उते से चले गए। पौलुस अपने भाड़े के घर में दो बरस लौ रहो। और जौन ऊके ऐंगर आत हते, उन सब कौ सत्कार करत हतो और बिना डराए परमेसुर के राज्य कौ परचार करत, और प्रभु यीशु मसीह के बारे में सीख देत हतो। पौलुस कुदाऊं से जौन यीशु मसीह कौ चाकर आय, और प्रेरित होबे हां बुलाओ गओ, और परमेसुर के ऊ भले सन्देसे के परचार के लाने नबेरो गओ आय। जीहां ऊ ने पहलईं से अपने अगमवकतन के द्वारा पवित्तर धर्म पोथी में। अपने पुत्र हमाए पिरभु यीशु मसीह के लाने कौल करो हतो, बो देयां के रूप से दाऊद के वंस में पैदा भओ। और पवित्रता की आत्मा के भाव से मरे भयन में से जी उठबे के काजें अधिकार के संग्गै परमेसुर कौ पुत्र ठैरो आय। ओई से हम हां दया और भले सन्देस प्रचार करबे मिलो; कि ऊके नाओं से सबरी जातन के मान्स बिसवास कर के ऊ की मानें। जिन में से तुम सोई यीशु मसीह के होबे के लाने बुलाए गए आव। उन सबरन के नाओं जौन रोम में परमेसुर के प्यारे आएं और पवित्तर होबे हां बुलाए गए आएं। हमाए पिता परमेसुर और पिरभु यीशु मसीह की कुदाऊं से तुम हां दया और सान्ति मिलत रैबे। पेंला मैं तुम सब के लाने यीशु मसीह के द्वारा अपने परमेसुर कौ धन्यवाद करत आंव, कायसे के तुमाए बिसवास की खबर सबरे संसार में हो रई आय। परमेसुर जी की सेवा मैं अपने मन से ऊके पुत्र के भले सन्देसे के लाने करत आंव, ओई मोरो गवाह आय; कि मैं तुम हां लगातार याद करत रैत आंव। अपनी रोजीना की बिन्तवाई में तुम हां सोई सुमरन करत आंव, कि कैसऊ पिरभु परमेसुर अपनी मन्सा से तुम लौ पोंचा देबे। कायसे मैं तुम से मिलबे की मन्सा हिये से करत आंव, कि मैं तुम हां कोऊ आत्मिक दान देंओं कि तुम पक्के हो जाओ। जब मैं तुमाए सग्ंगै रओ तो हम ऊ बिसवास से जौन मोय है, और तुम में सोई आय, एक दूसरे से आसीस पाएं। हे भईया हरौ, मैं नईं चाहत, कि तुम ई बात से अनजान रओ, कि मैंने तुम लौ बेर बेर आबो चाहो, कि जैसो मोय दूसरी जातवारन में फल मिलो, ऊं सई तुम में सोई मिले, पर अबै लौ रुको रओ। मैं यूनानियों और दूसरी भाषावारन कौ और समजदार और जौन समझत नईंयां उनकौ करजदार आंव। मैं तुम हां सोई जौन रोम में रैत आंव, पिरभु परमेसुर कौ सन्देसो सुनाबे हां पूरो तईयार आंव। कायसे मैं भले सन्देस देबे से नईं लजात, ई लाने कि बो सब कोऊ जौन बिसवास करत आंय, पेंला तो यहूदी, फिन यूनानी के उद्धार के लाने परमेसुर की तागद आय। कायसे ऊ में परमेसुर की धार्मिकता बिसवास से, और बिसवास के लाने उजागर होत आय; जैसे लिखो आय, कि बिसवास से धर्मी मान्स जीयत रै है। परमेसुर कौ खुन्स तो उन लोगन की अभक्ति और अधर्म पे सरग से उजागर होत आय, जौन सत्त हां पाप से दबाए रैत आंय। ई लाने के परमेसुर के बारे में उन की समज उजागर आय, कायसे परमेसुर ने उन पे उजागर करो आय। कायसे संसार के बनवे के टैम से परमेसुर के अनदेखे गुन, जानो उनको भारी बल, संसार की रचना में साफ साफ समजो जा सकत आय, ई लाने उन लौ कोऊ बहानो नईंयां। ई काजें कि बे परमेसुर हां जानत हते, तो भी उन ने परमेसुर की बड़वाई और धन्नबाद नईं करो, परन्त अपने हियन से बेकार के सोच विचार करन लगे, और उन कौ अज्ञानी मन अंधेरो हो गओ। बे औरें अपने आप हां समजदार जान के मूरख बन गए। और कभऊं नास न होबेवारे परमेसुर की मईमा हां नासवान मान्स, और पंछियन, और जनावरन, और रेंगबेवारे जन्तुअन की मूरत बना डाली। ई काजें परमेसुर ने उन हां उन की हियन की इच्छा के अनसार गन्दे काम करबे के लाने छोड़ दओ, कि बे आपस में अपनी अपनी देयां कौ अनादर करें। कायसे उन ने परमेसुर की सच्चाई हां बदल के झूठ बना डालो, और संसार की बस्तन की सेवा और उपासना करी, न कि ऊ करतार की जौन जुग जुग धन्य आय। आमीन। ई लाने परमेसुर ने उन हां नीच मन्सा के बस में छोड़ दओ; इते लौ की उन की बईयरन ने सोई स्वाभाविक व्यवहार हां, जो स्वाभाव के बिरुद्ध आय, करन लगी। ऊं सई मनसेलू सोई बईयरन के संग्गै स्वाभाविक व्यवहार छोड़ के आपस में कामातुर होकें जलन लगे, और मनसेलुअन ने मनसेलुअन के संग्गै बुरओ काम कर के अपनी अज्ञानता कौ सई फल पाओ। जब उन ने परमेसुर हां नईं मानो, तो परमेसुर ने सोई उन हां उन के बुरे हियन पे छोड़ दओ; कि बे बुरए काम करें। ई लाने बे सब भांत के पाप, और दुष्टता, और लोभ लालच, और बैरभाव से भर गए; और डाह, और हत्या, और झगड़े, और छल कपट, और जलन से भरपूर हो गए, और चुगलखोर। बदनामी करबेवारे, परमेसुर के देखबे में घिना, दूसरन कौ मान न करबेवारे, घमण्डी, डींगमार, बुरई बुरई बातन के बनाबेवारे, मताई-बाप कौ कओ न करबेवारे। नसमज, बिसवासघाती, प्रेम रहित, दया रहित हो गए। बे औरें परमेसुर कौ नैम कानून जानत आंय, कि जौन भांत-भांत के काम करत आंय बे मारे जाबे के जोग आंय, फिन भी बे ऐसे बुरए काम करत आंय, परन्त ऐसे काम करबेवारन से खुस होत आंय। सो अब हे लांछन लगाबेवारे, तें कोनऊ काय न होबै; तो लौ कछु उत्तर नईयां! कायसे जौन बात में तें दूसरन पे लांछन लगात आय, ओई बात में अपने हां भी दोषी ठहरात आय, कायसे जैसो लांछन तें लगात आय, तें सोई ऊंसई काम करत आय। और हम जानत आंय, कि ऐसे ऐसे काम करबेवारन पे परमेसुर कुदाऊं से सई सई दण्ड कौ हुकम होत आय। हे मान्स, तें जौन ऐसे काम करबेवारन पे लांछन लगात आय, और खुद बेई काम करत आय; का जौ समजत आय, कि तें परमेसुर के दण्ड से बरक जै है? का तें ऊ की किरपा, सहनशीलता, और धीरजरूपी मन हां नीचो समझत आय? और का जौ नईं जानत, कि परमेसुर की किरपा तोय हिया फिराबो सिखात आय। पर तें अपनी जिद और हठीले मन के अनसार, जब परमेसुर कौ सच्चो न्याओ परगट हुईये, अपने लाने दण्ड कमा रओ आय। बो सबको उन के कामन के अनसार न्याय कर है। जौन साजे काम कर के मईमा, और आदर, और अमरता की खोज में आंय, उन हां बो अनन्त जीवन दै है। और जौन बकवादी आंय, और सत्त हां नईं मानत, पर अधर्म हां मानत आंय, उन पे क्रोध और कोप पड़ है। और दुख और परेसानी हर मान्स के प्राण पे जौन बुरओ करत आय आ है, पेंला यहूदी पे फिन यूनानी पे। परन्त आदर और मईमा और कलयाण हर जने हां मिल है, जौन भलो करत आय, पेंला यहूदी हां फिन यूनानी हां। कायसे परमेसुर कोई की तरफदारी नईं करत आय। ई लाने जिन ने बिना नैम व्यवस्था के पेंला पाप करो, बे बिना नैम व्यवस्था के नास सोई हुईयें, और जिन ने नैम व्यवस्था पाके पाप करो, उन को दण्ड व्यवस्था अनसार हुईये। (कायसे परमेसुर के इते नेम व्यवस्था सुनबेवारे धरमी नईं, परन्त परमेसुर के इते नैम व्यवस्था पे चलबेवारे धरमी ठैराए जै हैं। फिन दूसरी जातनवारे जिन लौ नैम व्यवस्था नईंयां, स्वाभाव से नैम व्यवस्था की बातन पे चलत आंय, तो नैम व्यवस्था उन लौ न होबे पे बे अपने लाने खुद नैम व्यवस्था आंय। बे नैम व्यवस्था की बातन हां अपने अपने हियन पे लिखी दिखात आंय, और उन की समज सोई गवाह होत आय, और उन के सोच उन हां लांछन लगात, या बिन लांछन ठैरात आंय।) जौन दिना परमेसुर, मोरे भले सन्देसे के अनसार, पिरभु यीशु मसीह के द्वारा मान्सन की लुकी भई बातन कौ न्याय कर है। जदि तें यहूदी कहात आय, और नैम व्यवस्था के अनसार चलत आय, और परमेसुर के सामूं घमण्ड करत आय। और ऊ की मनसा जानत और नैम व्यवस्था सीख के साजी साजी बातें तोय अच्छी लगत आंय। और अपने पे भरोसो रखत आय, कि मैं अंधरन कौ अगुवा, और अंधकार में पड़े भयन की ज्योत आओं। और न समजवारन हां सिखैबेवारो, और लरकावालन कौ ज्ञान देबेवारो आंव, और ज्ञान, और सत्त जौन नेम व्यवस्था में आय, मोय मिलो आय। अब तें जौन दूसरन हां सिखात आय, अपने आप हां नईं सिखात? का तें जौन भड़याई न करबे हां कैत आय, खुद भड़याई करत आय। तें जौन कैत आय, परतिरिया भोग न करिए, का खुद परतिरिया भोग करत आय? तें जौन मूरतन से धिनात आय, खुद मन्दरन हां लूटत आय। तें जौन नेम व्यवस्था के विषय में घमण्ड करत आय, का नैम व्यवस्था अनसार न चलकें, परमेसुर कौ अनादर करत आय? कायसे तुमाए काजें दूसरी जातवारन में परमेसुर के नाओं हां निंदरो जात आय, जैसो लिखो सोऊ आय। जदि तें नैम व्यवस्था के अनसार चले, तो खतने से लाभ तो आय, पर जदि तें नैम व्यवस्था अनसार न चले, तोरो खतना बिन खतना के समान ठैरो। ई लाने जदि बिना खतनावारो मान्स नैम व्यवस्था हां पूरो पूरो माने, तो का ऊ की बिन खतनावारी दसा खतना भए मान्स बिरोबर न मानी जै है? और जौन मान्स जाति के कारन बिन खतना के रओ, जदि बो नैम व्यवस्था हां पूरो करै, तो का तोय जौन लिखित नैम व्यवस्था आय और खतना करे जाबे पे लौ नैम व्यवस्था हां नई मानत आय, तोहां दोसी न ठैरा है? कायसे यहूदी ऊ नईंयां, जौन उजागर में यहूदी जाने जात आंय; और न ऊ खतना आय, जौन उजागर में आय, और देयां में आय। पर यहूदी ओई आय, जौन हिए से आय; और खतना ओई आय, जौन हिए और आत्मा कौ आय; लिखे से बात नईं बनत: ऐसन की बड़वाई मान्सन कुदाऊं से नईं, परन्त परमेसुर कुदाऊं से होत आय। सो यहूदी की का बड़वाई, या खतने कौ का लाभ? सब भांत से बिलात कछु। पेंला तो जौ के परमेसुर के बचन उन हां दए गए। जदि कछु बेईमान कड़ें तो का भओ। का उन के बेईमान होबे से परमेसुर की संचाई अकारथ ठैर है? बिलकुल नईं, बलकी परमेसुर सांचो और सबरे मान्स लबरे ठैरें, जैसो लिखो आय, जीसे तें अपनी बातन में धरमी ठैरे और न्याय करत समय तें जय पाए। ई लाने जदि हमाओ अधर्म परमेसुर हां धरमी ठैरा देत आय, तो हम का काबें? का जौ कि परमेसुर जौन खुन्स करत आय अन्यायी आय (जौ तो मैं मान्सन के तौर तरीके से कैत आंव)। बिलकुल नईं, नईं तो परमेसुर जगत कौ न्याय काय हां कर है। जदि मोरी लाबरी के काजें परमेसुर की संचाई ऊ की मईमा के लाने खुल के उजागर भई, तो फिन काय मोय अधर्मी के जैसो दण्ड के जोग ठैराओ गओ। हम काय बुराई न करें, कि भलाई कड़े? जब हम पे जौई लांछन लगाओ सोई जात आय, कछु जनें ऐसई लांछन बेर बेर लगात आंय, ऐसन हां दोषी कओ जाबो सई आय। तो फिन का भओ? का हम उन से साजे आंय? कभऊं नईं; कायसे हम यहूदियों और यूनानियों पे जौ लांछन लगा चुके आंय, कि बे दौनऊं पाप के बस में आंय। जैसो लिखो आय, कि कोनऊं धरमी नईं, एकऊ नईं। कोऊ समजवारो नईंयां; कोनऊं परमेसुर कौ खोजी नईंयां। सब भटक गए आंय, सब के सब निकम्मे बन गए, कोऊ भलाई करबेवारो नईंयां, एकऊ नईंयां। उन कौ गला खुली भई कबर आय: उन ने अपनी अपनी जीभ से छल करो आय: उन के होठों में सांपन कौ विष आय। उन के मों श्राप और कड़वाहट से भरे आंय। उन के गोड़े हत्या करबे हां फुरतीले आंय। उन की गैल में बरबादी और संकट क्लेश आय। उन ने भलाई की गैल नईं समझी। उन की आंखन के सामूं परमेसुर कौ भय नईंयां। हम जानत आंय, कि नैम व्यवस्था जो कछु कैत आय उनईं से कैत आय, जौन नैम व्यवस्था के मानबेवारे आंय: ई लाने के सबरन के मों बन्द करे जाबें, और सबरो संसार परमेसुर के दण्ड के जोग ठैरे। कायसे नैम व्यवस्था के अनसार चलबे से कोऊ प्रानी ऊके सामूं धरमी न ठैर है, ई लाने कि नैम व्यवस्था के द्वारा पाप की पहिचान होत आय। परन्त अब नैम व्यवस्था से अलैदा परमेसुर की बो धार्मिकता उजागर भई आय, जी की गवाई नैम व्यवस्था और अगमवकता देत आंय। जाने के परमेसुर की बो धार्मिकता, जौन यीशु मसीह पे बिसवास करबे से सबरे बिसवास करबेवारन के लाने आय; बात पूरी उजागर आय लुकी छिपी नईंयां। कायसे सबरन ने पाप करो और परमेसुर की मईमा से न्यारे आंय। परन्त ऊ की दया से ऊ छुटकारे के द्वारा जौन मसीह यीशु में आय, सेंत मेंत धरमी ठैराए जात आंय। उए परमेसुर ने ऊके रकत के काजें एक ऐसो दाम ठैरा दओ, जौन बिसवास करबे से काम करत आय, कि जौन पाप पेंला करे गए, और परमेसुर ने सहनकर उन पे गौर नईं करो; उन के लाने बो अपनी धार्मिकता उजागर करे। और अबई ऊकी धार्मिकता उजागर भई; जीसे बो आपई धरमी ठैरे, और जौन यीशु पर बिसवास करे, उन को सोई धरमी ठैराबेवारो होय। सो घमण्ड करबो कां रओ? ऊ की तो जांगा नईंयां: कौन सी नैम व्यवस्था के कारन से? का करमों की नैम व्यवस्था से? नईं परन्त बिसवास की नैम व्यवस्था से। ई लाने हम ई बात पे पोंचत आंय, कि मान्स नैम व्यवस्था के कामन से बिना बिसवास से धरमी ठैरत आय। का परमेसुर अकेले यहूदियन कौ आय? का दूसरी जातवारन कौ नईंयां? हओ, दूसरी जातवारन कौ सोई आय। कायसे एकई परमेसुर आय, जौन खतनावारन हां बिसवास से और बिना खतनावारन हां सोई बिसवास से धरमी ठैरा है। तो का हम नैम व्यवस्था हां बिसवास के द्वारा अकारथ ठैरात आंय? कमऊं नईं; परन्त नैम व्यवस्था हां पक्को करत आंय। ई लाने हम का कैबें, हमाए बाप इब्राहीम हां का मिलो? कायसे जदि इब्राहीम करमों से धरमी ठैराओ जातो, तो उए घमण्ड करबे की जांगा होती, पर परमेसुर के ऐंगर नईं। पवित्तर धरम पोथी का कैत आय? जौ कि इब्राहीम ने परमेसुर पर बिसवास धरो, और जौ ऊके लाने धार्मिकता गिनो गओ। काम करबेवारे हां मजूरी देबो दान नईंयां, परन्त हक्क समजो जात आय। परन्त जौन काम नईं करत पर पापी के धरमी ठैराबेवारे पे बिसवास करत आय, ऊकौ बिसवास ऊके लाने धार्मिकता गिनो जात आय। जिए परमेसुर बिन करमन के धरमी ठैरात आय, उए दाऊद सोई धन्न कैत आय। धन्न आंय बे जिन के पाप छिमा भए, और जिन के पाप ढांपे गए। धन्न आय बो मान्स जिए परमेसुर पापी न ठैराए। तो जौ धन्न कहबो, का खतनावारन के लाने आय, या बिना खतनावारन के लाने सोई आय? हम जौ कैत आंय, इब्राहीम के लाने उकौ बिसवास धार्मिकता गिनो गओ। तो बो कैसे गिनो गओ? खतना की दसा में या बिना खतना की दसा में? खतने की दसा में नईं पर बिना खतने की दसा में। इब्राहीम ने खतने कौ चिन्ह पाओ, कि बो बिसवास की धार्मिकता पे छाप होबे, जौन ऊ ने बिना खतना की दसा में धरो हतो: जी से बो उन सबरन कौ बाप ठैरो, जौन बिना खतना की दसा में बिसवास करत आंय, जीसे बे सोई धर्मी ठैरें। और उन खतना करे भयन कौ बाप होबे, जौन न अकेले खतना करे भए आंय, परन्त हमाए बाप इब्राहीम के बिसवास की गैल पे चलत आंय, जौन ऊने बिन खतना की दसा में करो हतो। कायसे जौ कौल करार कि बो संसार कौ अधकारी हुईये, न तो इब्राहीम हां, न ऊके वंस हां दई गई हती, पर बिसवास की धार्मिकता के द्वारा मिली हती। कायसे जदि नेम व्यवस्थावारे वंसज अधकारी आंय, तो बिसवास अकारथ और कौल करार बेकार ठैरी। नेम व्यवस्था तो खुन्स उपजात आय और जिते नैम व्यवस्था नईंयां उते ऊकौ न मानबो कछु मतलब नईं राखत। ऐई काजें कौल करार बिसवास के द्वारा मिलत आय, कि दया की रीति पर होबे, कि बो ऊके कुल वंसवारन के लाने पक्की होबे, न केवल उन के लाने जौन नैम व्यवस्थावारो आय पर उन के लाने सोई जौन इब्राहीम के घांई बिसवास करबेवारे आंय: ओई तो हम सबरन कौ बाप आय। (जैसो लिखो आय, मैंने तोय बिलात जातियन कौ बाप ठैराओ आय), ऊ परमेसुर के सामूं जीपे ऊ ने बिसवास करो हतो और जौन मरे भयन हां जिलात आय, और जौन बातें हैईं नईंयां, उन कौ नाओं ऐसो लेत आय, मानो बे आंय। ऊ ने निरासा में सोई आसा रख के बिसवास करो, ई लाने कि बचन के अनसार कि तोरो कुल वंस ऐसो हुईये बो बिलात जातन कौ बाप होबे। और बो एक सौ बरसन को हतो, अपनी मरी भई जैसी देयां और सारा के गरभ की मरी भई जैसी दसा जानके भी बिसवास में कच्चो न भओ। और न अबिसवासी बन के परमेसुर की कौल किरिया पे संका करी, पर बिसवास में पक्को होकें परमेसुर हां मईमा दई। और पक्की जान लेओ, कि जौन बात की ऊ ने कौल किरिया करी आय, बो ऊहां पूरो करबे में सई सांचो आय। ई काजें जौ ऊके लाने धार्मिकता लेखो गओ। और बचन, कि बिसवास धरबो ऊके लाने धार्मिकता गिनो गओ, न केवल बस ओई के लाने लिखो गओ। पर हमाए लाने सोई जिन कौ बिसवास धार्मिकता लेखो जै है, जाने कि हमाए लाने सोई जौन ऊ पै बिसवास करत आंय, जीने हमाए पिरभु यीशु हां मरे भयन में से जिलाओ। बो हमारे पापन के काजें पकड़वाओ गओ और हम हां धरमी बनाबे के लाने जिलाओ सोई गओ। सो जब हम बिसवास में धर्मी ठैरे, तो अपने पिरभु यीशु मसीह के द्वारा परमेसुर से जुड़े रैबें। जी के द्वारा बिसवास के काजें ऊ दया, जी में हम बने आंय, हमाई पोंच सोई भई, और परमेसुर की मईमा की आसा पे घमण्ड करें। बस जौई नईं, पर हम मुसीबतों में सोई घमण्ड करें, जौ जान के मुसीबत परेसानी से धीरज धरबो। और धीरज धरे से खरो कड़बो, और खरो कड़े से आसा पैदा होत आय। और आसा से लज्जा नईं होत, कायसे पवित्तर आत्मा जौन हम हां दओ गओ आय, ऊके द्वारा परमेसुर कौ प्रेम हमाए हियन में डालो गओ आय। कायसे जब हम कमजोर निरबल हते, तो मसीह ऐन सई बेरा पे पापी जनन के लाने मरो। का कोई धरमी मान्स के लाने अपनी जान दै है, जौ तो अन्होनो आय, परन्त हो सकत आय कोऊ भले मान्स के लाने अपनी जान की बाजी लौ लगा देबे। परन्त परमेसुर हम पे अपने प्रेम की भलाई ई भांत से उजागर करत आय, कि जब हम पापी हते तबई मसीह हमाए लाने मरो। सो जब हम ऊके रकत से धरमी ठैरे, बो ऊके द्वारा परमेसुर के न्याव से काय न बच हैं? कायसे बैरी होबे की दसा में ऊके पुत्र की मौत के द्वारा हमाओ मेल मिलाप परमेसुर से भओ, सो फिन मेल हो जाबे पे ऊके जीवन से हम तरन तारन काय न पा हैं? अकेले जौ नईं, पर हम अपने पिरभु यीशु मसीह के द्वारा हमाओ मेल मिलाप भओ आय, परमेसुर में खुसी मनात आंय। ई लाने जैसो एक मान्स के द्वारा पाप संसार में आओ, और पाप सें मौत आई, और ई भांत मौत सबरे मान्सन में फैल गई, कायसे सबरन ने पाप करो। नेम व्यवस्था के दए जाबे लौ पाप संसार में तो हतो, पर जिते नेम व्यवस्था नईंयां, उते पाप लेखो नईं जात। फिन आदम से लेके मूसा तक मौत ने उन लोगन पे सोई राज करो, जिन ने ऊ आदम के अपराध घांई जौन ऊके आबे कौ चिन्ह आय, पाप न करो। पर जैसी दसा पाप की आय, वैसी दसा दया के दान की नईंयां, कायसे एक मान्स के पाप के काजें बिलात मान्स मरे, तो परमेसुर कौ दान और ऊ की भलाई एक मान्स पिरभू यीशु मसीह के अनुग्रह से भओ, बिलात जन पे जरूर अधकाई से भओ। जैसो एक मान्स के पाप करबे कौ फल भओ, ऊंसई दान की दसा नईं, कायसे एकई के काजें दण्ड के हुकम कौ फैसला भओ, परन्त बिलात पापन के काजें ऐसो बरदान पैदा भओ, कि मान्स धरमी ठैरें। कायसे जब एकई मान्स के पाप के काजें मौत ने ऊ एकई के द्वारा राज करो, तो जौन मान्स दया और धर्मरूपी बरदान बिलात से पात आंय, बे एक मान्स जाने के यीशु मसीह के द्वारा संच्चई अनन्त जीवन में राज कर हैं। ई लाने जैसो एक पाप सबरे मान्सन के दण्ड़ के हुकम कौ कारन बनो, ऊंसई एक धर्म कौ काम सोई सबरे मान्सन के लाने जीवन के लाने धरमी ठैराए जाबे कौ काज भओ। कायसे जैसो एक मान्स के हुकम न मानबे सें बिलात जनें पापी ठैरे, ऊंसई एक मान्स के हुकम मानबे से बिलात जनें धरमी ठैर हैं। नेम व्यवस्था मजारें आ गई, कि पाप कुल्ल होबे, पे जिते पाप कुल्ल भए, उते दया सोई और बढ़के भई। कि जैसो पाप ने मौत फैलात भए राज करो, ऊंसई हमारे पिरभु यीशु मसीह के द्वारा दया सोई अनन्त जीवन के लाने धर्मी ठैरात भए राज करे। सो हम का कैबें? का हम पाप करत रैबें, कि दया कुल्ल होबै? कभऊं नईं, हम जब पाप के लाने मानो मर गए तो फिन आंगू ऊ में जीवन कैसे बिताएं? का तुम नईं जानत, कि हम सब जिन ने मसीह यीशु कौ बपतिस्मा लओ, तो ऊ की मौत कौ बपतिस्मा लओ? सो ऊ की मौत कौ बपतिस्मा पाबे से हम ऊके साथ गाड़े गए, जीसे जैसे मसीह पिता की मईमा से मरे भयन में से जिलाओ गओ, ऊं सई हम सोई नए जीवन की सी चाल चलें। कायसे जदि हम ऊ की मौत की समानता में ऊके संग्गै मिल गए आंय, तो पक्की तौर से ऊके जी उठबे की समानता मिल जै है। कायसे हम जानत आंय, कि हमाओ पापी जीवन ऊके संग्गै क्रूस पे चढ़ाओ गओ, जीसे पाप की देयां खतम हो जाबै, और आंगू हां हम पाप के बस में न रैबें। कायसे जौन मर गओ, बो पाप के बस में से छूट के धरमी ठैरो। ई लाने जदि हम मसीह के संग्गै मर गए, तो हमाओ बिसवास जौ आय, कि ऊके संग्गै जी हैं सोई। कायसे हम जानत आंय, कि मसीह मरे भयन में से जी उठके फिन मरबे कौ नईंयां, ऊ पै फिन मौत कौ राज नईं हुईये। कायसे ऊ जो मर गओ तो पाप के काजें एकई बार मर गओ; परन्त जौन जीयत आय, तो परमेसुर के लाने जीयत आय। ऊं सई तुम सोई अपने आप हां पाप के लाने तो मरो, परन्त परमेसुर के लाने मसीह यीशु में जीयत समजो। ई लाने पाप तुमाए नास होबेवारे देयां में राज न करे, कि तुम ऊ की लालसाओं के बस में रओ। और न अपने अंगों को अधरम कौ हथियार होबे को सौंपो, पर अपने आप हां मरे भयन में से जी उठो भओ जान के परमेसुर हां सौंपो, और अंगों को धरम के हथियार होबे के लाने परमेसुर हां सौंपो। तब तुम पे पाप कौ राज न हुईये, कायसे तुम नैम व्यवस्था के आधीन नईं पर दया के आधीन आव। सो का भओ? का हम ई लाने पाप करें, कि हम नैम व्यवस्था के आधीन नईंयां पर दया के आधीन आंय? कभऊं नईं। का तुम नईं जानत, जीकौ हुकम मानबे हां तुम अपने आप हां चाकर घांई सौंप देत आव, ओई के चाकर आव: और जी की मानत आव, चाए पाप के, जीसे मौत मिलत आय, चाए हुकम मानबे से, जीकौ अन्त धार्मिकता आय। परन्त परमेसुर कौ धन्नबाद होबे, कि तुम जौन पाप के चाकर हते अब हिए से ऊ सीख हां मानबेवारे हो गए, जाने कि जैसे सिखाए गए हते। और पाप से छुड़ाए जाके धरम के चाकर हो गए। मैं तुमाई देयां की कमजोरी के काजें मान्सन की रीत पे कैत आंव, जैसो तुम ने अपने अंगों को बुरए काम के लाने दलिद्दर और बुरए काम के चाकर कर के सौंपो हतो, ऊंसई अब अपने अंगों को पवित्रता के लाने धरम के चाकर कर के सौंप दो। जब तुम पाप के चाकर हते, तो धर्म कुदाऊं से स्वतंत्र हते। सो जिन बातन से तुम लजात आव, उन से तुम का फल पात हते? कायसे ऊकौ दूसरो छोर तो मौत आय, परन्त अब पाप से स्वतन्त्र होकें और परमेसुर के चाकर बन के तुम हां फल मिलो जीसे पवित्रता मिलत आय, और ऊके दूसरे छोर पै अनन्त जीवन आय। कायसे पाप की मजूरी मौत आय, परन्त परमेसुर कौ बरदान हमाए पिरभु यीशु मसीह में अनन्त जीवन आय। हे भईया हरौ, का तुम नईं जानत (मैं नेम व्यवस्था के जानबेवारन से कैत आंव), कि जब लौ मान्स जियत रैत आय, तब लौ ऊ पै नैम व्यवस्था कौ राज रैत आय। कायसे ब्याओवारी बईयर नैम व्यवस्था अनसार अपने मनसेलू के जीते जी ऊसे बन्धी रैत आय, परन्त जदि मन्सेलू मर जाबै, तो बा ब्याओ के बन्धन से छूट गई। ई लाने जदि बा अपने मन्सेलू के जीयत भए कौनऊं और मन्सेलू से सम्बन्ध राखै, तो बा पतिता कहा है, पर जदि मन्सेलू मर जाबै, तो बा ऊ न्याव की नेम व्यवस्था से छूट गई, इते लौ कि बा कोनऊं और मन्सेलू से ब्याव करै तो पतिता न कहा है। हे मोरे भईया हरौ, तुम सोई मसीह की देयां के द्वारा नेम व्यवस्था के लाने मरे भए बन गए, कि ऊ दूसरे के हो जाओ, जौन मरे भयन में से जी उठो: जीसे हम परमेसुर के लाने फल लाबें। कायसे जब हम संसार के हते, तो पापों की चाहना जौन नेम व्यवस्था से हती, मौत के फल पैदा करबे हां हमाई देयां में काम करत हती। परन्त जी के बन्धन में हम बंधे हते ऊके लाने मर के, अब नेम व्यवस्था से ऐसे छूट गए, कि लेख की पुरानी रीत पे नईं, पर आत्मा की नई रीत पे सेवा करत आंय। सो हम का कैबें? का नेम व्यवस्था पाप आय? कभऊं नईं! पर बिना नैम व्यवस्था के मैं पाप हां नईं चीनतो: नैम व्यवस्था जदि न कै ती, कि लालच न कर तो मै लालच हां न जानतो। परन्त पाप ने मौका पाके हुकम द्वारा मो में सब भांत कौ लालच पैदा करो, कायसे बिना नेम व्यवस्था पाप मरो भओ आय। मैं तो बिना नेम व्यवस्था पेंला जीयत हतो, परन्त जब हुकम आओ, तो पाप जी गओ, और मैं मर गओ। और ओई हुकम जौन जीवन के लाने हतो, मोरे लाने मौत कौ कारन ठैरी। कायसे पाप ने मौका पाके हुकम के द्वारा मोय बहका दओ, और ओई के द्वारा मोय मार सोई डालो। ई लाने नेम व्यवस्था पवित्तर आय, और हुकम सोई सई और साजो आय। तो का बो जौन साजी हती, मोरे लाने मौत ठैरी? कभऊं नईं! परन्त पाप ऊ साजी बस्त से मोरे लाने मौत हां पैदा करबेवारो भओ, कि ऊकौ पाप होबो उजागर होबे, और हुकम के द्वारा पाप कुल्ल पापवारो ठैरे। हम जानत आएं कि नैम व्यवस्था तो आत्मिक आय, परन्त मैं अधर्मी और पाप के हाथ बिको भओ आंव। जौन मैं करत आओं, बो मैं नईं जानत, कायसे जो कछु मैं करो चाहत आंव, बो नईं करत, परन्त जीसे मोय घिन आत आय, ओई करत आंव। जदि जौन मैं नईं चाहत और ओई करत आंव, तो मैं मान लेत आंव, कि नेम व्यवस्था भली आय। तो ऐसी दसा में ऊकौ करबेवारो मैं नईं, परन्त पाप आय, जो मोय में बसो है। कायसे मैं जानत आंव, कि मोय में जाने के मोरी देयां में कोनऊं साजी बस्त बास नईं करत, मैं चाहत तो आंव, पर भले काम मोसे नईं बन पड़त। कायसे जौन साजे काम हां मैं करबो चाहत आंव, बो तो नईं करत, परन्त जौन बुरए काम की मन्सा मैं नईं करत, ओई करत आंव। जदि मैं ओई करत आंव, जी की मन्सा नईं करत, तो ऊ को करबेवारो मैं न रहो, परन्त पाप जौन मोय में बसो आय। ई भांत मैं जो नैम व्यवस्था पात आंव, कि जब भलाई करे की मन्सा करत आंव, तो बुराई मोरे ऐंगर आत आय। कायसे मैं भीतर आत्मा से परमेसुर की व्यवसथा से खुस रैत आंव। परन्त मोय अपनी देयां में दूजे भांत की नेम व्यवस्था दिखात आय, जौन मोरी बुद्धि समज से लड़त आय, और मोय पाप अधर्म की नेम व्यवस्था के बन्धन में डालत आय जौन मोरे अंगों में आय। मैं कैसो अभागो मान्स आंव! मोहां ई मौत की देयां से को छुड़ा है? हमाए पिरभु यीशु मसीह के द्वारा परमेसुर कौ धन्नबाद होबै: ई लाने मैं आपनी बुद्धि समज से तो परमेसुर की नैम व्यवस्था कौ, पर देयां से पाप अधर्म की नेम व्यवस्था कौ पालन करत आंव। सो अब जौन मसीह यीशु में आंय, उन पे दण्ड कौ हुकम नईंयां: कायसे बे देयां के अनसार नईं पर आत्मा के अनसार चलत आंय। कायसे जीवन की आत्मा के नैम व्यवस्था ने मसीह यीशु में मोय पाप की, और मौत की नैम व्यवस्था से स्वतन्त्र कर दओ आय। कायसे जौन काज नैम व्यवस्था देयां के काजें कमजोर होकें न कर सकी, ऊहां परमेसुर ने करो, जाने कि अपने पूत हां पापवारी देयां कौ रूप देके, पापबलि होबे के लाने पठैओ, देयां में पाप पे दण्ड कौ हुकम दओ। ई लाने कि नेम व्यवस्था कौ हम में जौन पाप के अनसार नईं पर आत्मा के अनसार चलत आंय, पूरी करी जाबे। कायसे अधर्मवारे जनें अधर्म की बातन पे हिया लगात आंय; पर धरमी जनें आत्मा की बातन में हिया लगात आंय। देयां की मन्सा अनसार चलबो तो मौत आय, पर आत्मा पे मन लगाबो जीवन और सान्ति आय। कायसे देयां की मन्सा अनसार चलबो तो परमेसुर से बैर धरबो आय, जा बात न तो परमेसुर की नेम व्यवस्था के आधीन आय, और न हो सकत आय। जौन जनें पाप के बन्धन में आंय, बे परमेसुर हां खुस नईं कर सकत। परन्त जब परमेसुर कौ आत्मा तुम में बसत आय, तो तुम अधर्म की दसा में नईंयां, पर आत्मिक दसा में आव। जदि कोऊ में मसीह कौ आत्मा नईं तो बो मसीही नईंयां। जदि मसीह तुमाए हियन में आय, तो देयां पाप के काजें मरी भई आय; पर आत्मा धरम के काजें जीयत रैत आय। जदि ओई कौ आत्मा जीने यीशु हां मरे भयन में से जिलाओ तुम में बसो आय; तो जीने मसीह हां मरे भयन में से जिलाओ, बो तुमाई मिटबेवारी देयां हां सोई अपने आत्मा से जौन तुम में बसो आय जिला है। ई लाने हे भईया हरौ, हम अधर्म के करजदार नईं, कि अधर्म के लाने समय बिताएं। कायसे जदि तुम अधर्म के अनसार समय बिता हौ, तो मर हौ, जदि आत्मा से देयां के बुरए कामन हां मार हौ, तो जीयत रै हो। ई लाने कि जितेक मान्स परमेसुर की आत्मा के चलाए चलत आंय, बेई परमेसुर के पूत आंय। कायसे तुम हां पाप करत रैबे की आत्मा नईं मिली, कि फिन डराओ परन्त बेटा लरका की आत्मा मिली आय, जीसे हम हे दद्दा, हे पिता कै कें टेरत आंय। आत्मा खुद हमाई आत्मा के संग्गै गवाय देत आय, कि हम परमेसुर के लरका बिटिया आंय। जदि लरका बिटिया आंय, तो वारिस सोई, जाने के परमेसुर के वारिस और मसीह के संगी वारिस आंय, जब हम ऊके संग्गै दुख मुसीबत उठाबें तो ऊके संग्गै मईमा सोई पा हैं। कायसे मैं समजत आंव, अबै के दुख परेसानी ऊ मईमा के आंगू, जौन हम पे उजागर होबेवारी आय, कछु लौ नईंयां। कायसे सबरो संसार बड़ी आसा से परमेसुर के लरका बिटिया के उजागर होबे की बाट जोह रओ आय। कायसे सबरो संसार अपनी मन्सा से नईं, पर अपने अधकार में करबेवारे के कुदाऊं से अकारथ में ई आसा से करी गई आय। कि सबरो संसार आपई नास से छुटकारा पाके, परमेसुर की सन्तानन की मईमा की स्वतंत्रता पा है। कायसे हम जानत आंय, कि सबरो संसार अब लौ जुड़ के गुहार भरत और पीड़ा में पड़ी तड़फत आय। और अकेले ओई नईं पर हम सोई जिन लौ आत्मा कौ पेंला फल आय, आपई अपने में कराहत आंय; और लरका बिटिया होबे हां, अपने देयां के छुटकारे की बाट जोहत आंय। ई आसा से हमाओ तरन तारन भओ आय, पर जौन बस्त की आसा करी जाय, जब बा देखबे में आय, फिन आसा कां रई? कायसे जौन बस्त हां कोऊ हेर रओ आय, ऊ की आसा का कर है? परन्त जौन बस्त हां हम नईं तकत आंय, जदि ऊ की आसा करत आंय, तो हिये हां दिलासा दे ऊ की बाट देखत आंय। ई भांत आत्मा सोई हमाई कमजोरी में सहायता करत आय, कायसे हम नईं जानत, कि बिन्तवाई कौन रीत से करो चईये; परन्त आत्मा खुद बड़ी पीड़ा से भर के जौन लेखी नईं जा सकत, हमाए लाने बिन्तवाई करत आय। और हिये कौ परखबेवारो जानत आय, कि आत्मा की मन्सा का आय? कायसे बो पवित्तर मान्सन के लाने परमेसुर की मन्सा अनसार बिन्तवाई करत आय। हम जानत आंय, कि जौन जनें परमेसुर से प्रेम राखत आंय, उन के लाने सबरी बातें भलाई हां उत्पन्न करत आंय, जाने के उनईं के लाने जौन ऊ की मन्सा अनसार टेरे गए आंय। कायसे जिन हां ऊ ने पेंला से जान लओ आय, उन हां ऊ ने पेंला से ठैराओ आय, कि ऊके पुत्तर के समान होबें, जीसे ऊ बिलात भईयन में पैलोठो ठैरे। फिन जिन हां ऊ ने पेंला से ठैराओ, उन हां बुलाओ सोई, और जिन हां बुलाओ, उन हां धरमी सोई ठैराओ आय, और जिन हां धरमी ठैराओ, उन हां मईमा सोई दई। सो हम इन बातन के लाने का कैबें? जदि परमेसुर हमाई कुदाऊं आय, तो हमाओ बिरोदी को हो सकत आय? जीने अपने निज पुत्तर हां सोई न रख छोड़ो, पर उए हम सब के लाने दे दओ: बो ऊके संग्गै हम हां और सबई कछु काय न दै है। परमेसुर के नबेरे भयन पे लांछन को लगा है? परमेसुर बो आय जौन उन हां धरमी ठेराबेवारो आय। फिन को आय जौन दण्ड़ कौ हुकम दै है? मसीह बो आय जौन मर गओ और मरे भयन में से जी सोई उठो, और परमेसुर के दायें हाथ कुदाऊं आय, और हमाए लाने बिन्तवाई सोई करत आय। को हम हां मसीह के प्रेम से अलग कर है? का सताव, या संकट, या उपद्रव, या आकाल, या नंगाई, या जोखम, या तलवार? जैसो कि लेख आय, तोरे लाने हम दिनभर घात करे जात आंय; हम सब मारे जाबेवारी गाड़रन के भांत हो गए आंय। पर इन सबरी बातन में हम ऊके द्वारा जीने हम से प्रेम करो आय, जीत पाबेवारे से बढ़के आंय। कायसे मोय पक्को बिसवास आय, कि न मौत, न जीवन, न सरगदूत, न बड़ेअधकार, न अबै कौ टैम, न आबेवारो टैम, न बल, न ऊंचाई। न गैराई और न कोऊ संसार की बातें, हम हां परमेसुर के प्रेम से, जौन हमाए पिरभु यीशु मसीह में आय, अलग कर सकत आय। मैं मसीह में सांची कैत आंव, लबरी नईं कै रओ और मोरो सोच सोई पवित्तर आत्मा में गवाई देत आय। कि मोय बड़ो दुख आय, और मोरो हिया हमेसा दुखत रैत आय। कायसे मैं इते लौ चाहत हतो, कि अपने नाते रिस्तेदारन के लाने जो मोरे वंस कुल के आंय, आपई मसीह से श्रापित हो जात। बे इस्राएली आंय; और लरका बाल बच्चन को अधकार और मईमा, कौल करार और नेम व्यवस्था और उपासना और कौल सपथ उनईं की आंय। पुरखा सोई उन में से आंय, और मसीह सोई आदम रूप में उन में से भओ, सब के ऊ परै परम परमेसुर जुग जुग धन्न होबै। आमीन। पर जौ नईं, कि परमेसुर कौ बचन टल गओ, ई लाने कि जौन इस्राएल के वंसवारे आंय, बे सबरे इस्राएली नईंयां। और न इब्राहीम के वंसवारे होबे के काजें सबरे ऊके लरका बिटिया ठैरे, परन्त (लिखो आय) इसहाक से तोरो वंस कुल कहा है। जाने कि देयां के लरका बाले परमेसुर के लरका बाले नईं, परन्त कौल करार के लरका बाले वंस गिने जात आंय। कायसे कौल करार की बात जा आय, मैं अपनी बेरा में आहों, और सारा के पूत हुईये। और अकेले जौ नईं, परन्त जब रिबका सोई हमाए पिता इसहाक से गरभ से भई। और अब लौ न तो लरका जन्मे हते, और न उन ने कछु भलो या बुरओ करो हतो ऊ ने कओ, जेठो लरका लौरे कौ चाकर हुईये। ई लाने कि परमेसुर की जौन मन्सा ऊके नबेर लेबे अनसार आय, करमों के काजें नईं, परन्त बुलाबेवारे पे बनी रैबै। जैसो लिखो आय, मैंने याकूब से प्रेम करो, परन्त एसाव हों दूर धरो। ई लाने हम का कैबें? का परमेसुर के इते अन्याय आय? कभऊं नईं। कायसे बो मूसा से कैत आय, मैं जौन कोऊ पे दया करो चाहों, ऊपै दया कर हों, और जौन पे किरपा करो चाहों ओई पे किरपा कर हों। सो जा न तो चाहबेवारे की, न दौड़बेवारे की परन्त दया करबेवारे परमेसुर की बात आय। कायसे पवित्तर धरम पोथी में फिरौन राजा से कओ गओ, कि मैंने तोहां ई लाने ठाड़ो करो आय, कि तोय में अपनो बल ब जोर दिखाओं, और मोरे नाओं कौ परचार सबरे संसार में होबै। ई लाने बो जौन पे चाहत आय, ऊ पे दया करत आय; और जीहां चाहत आय, उए कड़ो बना देत आय। सो तें मोसे कै है, बो फिन काय लांछन लगात आय? को ऊ की मन्सा कौ विरोद करत आय? हे मान्स, भला तें को आय, जो परमेसुर कौ सामना करत आय? का बनाई भई बस्त बनाबेवारे से कै सकत आय कि तेंने मोय ऐसो काय बनाओ? का कुम्हार हां माटी के लौंदा पे अधकार नईंयां, कि एकई लौंदे में से, एक बासन आदर के लाने, और दूसरे बासन हां अनादर के लाने बनाबे? तो ईमें कौन सी अचम्भे की बात आय? कि परमेसुर ने अपनो न्याव दिखाबे और अपनो बल उजागर करबे की मन्सा से न्याव के बासनों की जौन मिटाए जाबे के लाने तईयार करे गए हते बड़े धीरज से सई। और दया के बासनों पे जिन हां ऊ ने मईमा के लाने पेंला से तईयार करे हते, अपनी मईमा के धन हां उजागर करबे की मन्सा करी? जाने कि हम पे जिन हां ऊ ने अकेले यहूदियन में से नईं, पर दूसरी जातन में से सोई बुलाओ। जैसो बो होशे की पोथी में सोई कैत आय, जौन मोरी प्रजा न हती, उन हां मैं अपनी प्रजा कै हों, और जौन प्यारी न हती, ऊहां प्यारी कै हों। और ऐसो हुईये कि जौन जांगा में उनसे जौ कओ गओ हतो, कि तुम मोरी प्रजा नईं आव, ओई जांगा बे जीयत परमेसुर की सन्तान कहा हैं। और यशायाह अगमवकता इस्राएलियन के लाने जोर देके कैत आय, चाए इस्राएल के सन्तानों की गिनती समुन्दर की बालू के किनको के बिरोबर होबे, पर उन में से तनकई बच हैं। कायसे पिरभु धरती पे अपनो कओ पूरो कर के, अपने धरम से उए पक्को कर है। जैसो यशायाह ने पेंला सोई कओ हतो, जदि सेनाओं कौ पिरभु हमाए लाने कछु वंस न छोड़तो, तो हम सदोम के समान और अमोरा की घाईं मिट गए होते। सो हम का कैबें? कि दूसरी जातवारन ने जौन धार्मिकता की खोज नईं करत हते, धार्मिकता पाई, जाने कि बो धार्मिकता जौन बिसवास से आय। परन्त इस्राएली; जौन धर्म की नैम व्यवस्था हां खोजत हते, ऊ नेम व्यवस्था लौ नईं पोंचे। की लाने? ई लाने कि बे बिसवास से नईं, परन्त जानो कि बे कर्मो से ऊहां खोजत हते: उन ने ऊ ने ऊपर कड़े पत्थरा पे उपटा खाओ। जैसो लेख आय; तको मैं सिय्यौन में एक ठेस लगबे कौ पत्थरा, और ठोकर खाबे की एक टोर धरत आंव; और जौन ऊ पे बिसवास कर है, बो न लजा है। हे भईया हरौ, मोरे हिये की अभलाखा और उन के लाने परमेसुर से मोरी बिन्तवाई आय, कि बे तरन तारन पाबें। कायसे मैं उन की गवाय देत आंव, कि उन हां परमेसुर के लाने धुन लगी रैत आय, पर समजदारी के संग्गै नईं। कायसे बे परमेसुर की धार्मिकता से अंजान होकें, और अपनी धार्मिकता हां स्थापित करबे कौ जतन कर के, परमेसुर की धार्मिकता के आधीन न भए। कायसे सब कोऊ जौन बिसवास करत आंय उन के काजें धार्मिकता के लाने मसीह नेम व्यवस्था कौ अन्त आय। कायसे मूसा ने ऐसो लेख करो आय, कि जौन मान्स ऊ धार्मिकता पे जौन नेम व्यवस्था पर आय, चलत आय, बो ओई से जीयत रै है। परन्त जौन धार्मिकता बिसवास से आय, बा ऐसो कैत आय, तें अपने हिये में जौ न कईयो कि सरग पे को चढ़ है? (जानें कि मसीह हां उतार लाबे के लाने!) या गहराव में को उतर है? (जाने कि मसीह हां मरे भयन में से जिला के ऊ परै लाबे के लाने!) पर बो का कैत आय? कि मोरे बचन तोरे ऐंगर आय, तोरे मों में और तोरे हिये में आय; जौ ओई बिसवास कौ बचन आय, जौन हम परचार करत आंय। कि जदि तें अपने मों से यीशु हां पिरभु माने के अपनाबे और अपने हिये से बिसवास करे, कि परमेसुर ने ऊ ऐ मरे भयन में से जिलाओ, तो तें जरूर से उद्धार पा है। कायसे धार्मिकता के लाने हिये से बिसवास करो जात आय, और उद्धार के लाने मों से मान लओ जात आय। कायसे पवित्तर धर्म पोथी जा कैत आय, कि जो कोई ऊ पै बिसवास कर है, बो न लजा है। यहूदियों और यूनानियों में कछु अन्तर नईंयां, ई लाने कि बो सब कौ पिरभु आय; और अपने सबरे नाओं लेबेवारन के लाने उदार आय। कायसे जो कोऊ परमेसुर कौ नाओं लैहै, बो उद्धार पाहै। फिन जीपे उन ने बिसवास नईं करो, ऊकौ नाओं कैसे लेबें? और जीके बारे में नईं सुनो ऊ पै बिसवास कैसे करबें। और परचारक बिना कैसे सुनें? और यदि भेजे न जाबें, तो कैसे परचार करें? जैसो लेख आय, कि उन के गोड़े कैसे साजे आंय, जौन साजी बातन कौ भलो सन्देसो सुनात आंय! पर सब ने ऊ भले सन्देसे पे कान नईं लगाओ: यशायाह अगमवकता कैत आय, पिरभु की ने हमाए सन्देसे पे बिसवास करो आय? सो बिसवास सुनबे से, और सुनबो मसीह के बचन से होत आय। परन्त मैं कैत आंव, का उन ने नईं सुनो? सुनो तो जरूर आय कायसे लिखो आय, उन के बोल सबरे संसार में, और उन के बचन जगत के छोर लौ पोंच गए आंय। मैं फिन कैत आंव, का इस्राएली न जानत हते? पेंला तो मूसा कैत आय, मैं उन के द्वारा जौन जाति नईंयां, तुमाए हियन में जलन पैदा कर हों, मैं एक मूरख जात से तुम हां रिस दिला हों। फिन यशायाह अगमवकता बड़ी हिम्मत से कैत आय, जौन मोय न ढूंढ़त हते, उन ने मोय पा लओ: और जौन मोय पूछत लौ न हते, उन पे मैं उजागर हो गओ। परन्त इस्राएल के विषय में बो जा कैत आय कि मैं सबरे दिना अपने हाथ एक हुकम न मानबेवारी और बतकाओ करबेवारी प्रजा कुदाऊं पसारे रओ। ई लाने मैं कैत आंव, का परमेसुर ने अपनी प्रजा हां छोड़ दओ? कभऊं नईं; मैं सोई इस्राएली आंव: इब्राहीम के वंस और बिन्‍यामीन के कुल में से आंव। परमेसुर ने अपनी ऊ प्रजा हां नईं छोड़ो, जिन हां ऊ ने पेंला से नबेरो हतो: का तुम नईं जानत, कि पवित्तर पोथी में एलियाह अगमवकता के लाने का कओ गओ आय; कि बो इस्राएल के विरोद में परमेसुर से बिन्तवाई करत आय। कि हे पिरभु, उन ने तोरे अगमवकतन हां मार डालो आय, और पवित्तर वेदियन हां मिटा दओ आय; और मैं ही अकेलो बरको आंव, और बे मोरे प्रान हां सोई नास करो चाहत आंय। पर परमेसुर से उए का उत्तर मिलो कि मैंने अपने लाने सात हजार मान्सन हां बचा धरो आय जिन ने बाअल की पूजा नईं करी। ठीक ऐई भांत ई टेम सोई, दया से नबेरे गए कछु मान्स बरक गए आंय। जदि जौ दया से भओ आय, तो कर्मों से नईं; नईं तो दया फिन दया न रई। ईको नतीजा का भओ? जौ कि इस्राएली जी की खोज में हते, बो उन हां नईं मिलो; पर नबेरे भयन हां मिलो, और बचे भए कठोर बना दए गए। जैसो लिखो आय, परमेसुर ने उन हां आज के दिन लौ गैरी नींद में डाल दओ आय, और ऐसी आंखें दईं जौन न हेरें और ऐसे कान जौन न सुनें। और दाऊद राजा कैत आय; उन कौ खैबो उन के लाने जाल, और फन्दा, और उपटा और दांड़ कौ काज होबे। उन की आंखन पे अंधयारो छा जाबे जीसे न हेरें, और तें हमेसा उन की कमर हां झुकाए रै। सो मैं कैत आंव का उन ने ई लाने ठोकर खाई, कि गिर पड़ें? क भऊं नईं: पर उनके गिरबे के काजें दूसरी जातवारन हां उद्धार मिलो, कि उन हां जलन होबे। ई लाने जदि उनको गिरबो संसार के लाने धन और उन की घटी कमी दूसरी जातवारन के लाने मालपानू कौ काज बनी, तो उन की भरपूरी से का क छु न हुईये। मैं तुम दूसरी जातवारन से कैत आंव: जब मैं दूसरी जातवारन के लाने प्रेरित आंव, तो मैं अपनी सेवा की बड़वाई करत आंव। जीसे कोऊ भांत से अपने नातेदारन में जलन पैदा करवा के उन में से कैऊ अन कौ उद्धार करवाओं। कायसे जब उन कौ त्याग दओ जाबो संसार के मिलाप कौ काज भओ, तो का उन को अपनाओ जाबो मरे भयन में से जी उठबे के बिरोबर न हुईये? जब भेंट की पैली बस्त पवित्तर आय, तो पूरो और सब कछु पवित्तर हुईये: और जब जड़ें पवित्तर ठैरीं, तो डालियां सोई पवित्तर हुईयें। पर जदि कछु डालें कतर दईं गईं, और तें जौन जंगली जैतून आय ऊ में सांटो गओ, और असली जैतून की जड़ की चिकनाई को हींसावारो बनो आय। तो डालियन पे घमण्ड न करिये: और जदि तें घमण्ड करे, तो याद राखियो, कि तें जड़ हां नईं, परन्त जड़ तोहां संभालत आय। फिन तें कै है कि डालियां ई लाने कतरी गईं, कि मैं सांटो जाओं। सई आय, बे तो बिसवास न करबे के काजें कतरी गईं, पर तें बिसवास में बनो रैत आय, सो घमण्ड न कर पर डर के रै। कायसे जब परमेसुर ने पेड़ की सई डालियन हां नईं छोड़ो, तो तोहां सोई न छोड़ है। ई लाने परमेसुर की किरपा और कड़ाई हां तक! जौन गिर गए, उन पे कड़ाई, पर तो पे किरपा, जदि तें ऊ में बनो रै है तो भलो, नईं तो, तें सोई काट डालो जै है। बे सोई जदि अबिसवास में न रैबें, तो सांटे जै हैं कायसे परमेसुर उन हां फिन के सांट सकत आय। कायसे जदि तें ऊ जलपाई से, जौन अपने आप जंगली आय काटो गओ और स्वाभाव के बिरुद्ध साजे जलपाई में सांटो गओ, तो बे जौन साजे जैतून की डालियां आंय, अपने ई जैतून में काय न सांटे जै हैं। हे भईया हरौ, कऊं ऐसो न होबै, कि तुम अपने आप हां समजदार मान लेओ; ई लाने मैं नईं चाहत कि तुम ई भेद से अनजान रओ, कि जब लौ दूसरी जातवारन कौ अंधबिसवास न मिट जाबै, तब लौ इस्राएल कौ एक भाग ऐंसई कठोर रै है। और ई भांत से सबरो इस्राएल उद्धार पा है; जैसो लेख आय, छुड़ाबेवारो सिय्यौन से आ है, और अधर्म हां याकूब से दूर कर है। और उन के संग्गै मोरो जौई कौल हुईये, मैं उन के पापन हां दूर कर दें हों। भले सन्देसे के लेखे से तो तुमाए बैरी आंय, परन्त चुन लए जाबे से बे बापदादों के काजें प्यारे आंय। कायसे परमेसुर के बरदान और बुलाहट अटल आंय। कायसे जैसे तुम ने पेंला परमेसुर कौ हुकम न मानो पर अबै ऊ को हुकम न मानबे से तुम पे दया भई आय। ऊंसई उन ने सोई अबै हुकम न मानो कि तुम पे जौन दया होत आय ऊसे उन पे सोई दया होबे। कायसे परमेसुर ने सब हां हुकम तोड़बे कौ दोशी बना के राखो जी से सब पे दया होबे। आहा! परमेसुर कौ धन और समज बड़ी गैरी आय! ऊकौ सोचबो कि उनकी थाह न मिले, और ऊ की गैल कौ बयान नईं हो सकत। पिरभु की समज हां कीने जानो? या ऊकौ सलाय देबेवारो को भओ? या कीने पेंला ऊ ए कछु दओ आय जी कौ बदला ऊहां चुकाओ जाए। कायसे ओई कुदाऊं से, और ओई से, और ओई के लाने सब कछु आय: ऊकी मईमा जुगानजुग होत रैबे। आमीन। ई लाने हे भईया हरौ, मैं तुम हां परमेसुर की दया की याद करा के बिन्तवाई करत आंव, कि अपनी देयां हां जीयत, और पवित्तर, और परमेसुर हां साजो लगबेवारो बलिदान कर के चढ़ाओ: जाई तुमाई आत्मिक सेवा आय। और ई संसार के जैसे न बनो; पर तुमाए समज के नए हो जाबे से तुमाओ चाल सोई बदलत जाबे, जी से तुम परमेसुर की साजी और भावती, और सिद्ध अभलाखा अनुभव से मालूम करत रओ। कायसे मैं ऊ दया किरपा के काजें जौन मोय पै भई आय, तुम सबरन से कैत आंव, कि जैसो समजो चईये, ऊसे बढ़ के कोई अपने हां न समजे परन्त जैसो परमेसुर ने सबई हां योग्यता अनसार बिसवास दओ आय, ऊंसई सई सोच बिचार के संग्गै अपने हां समजे। कायसे जैसे हमाई देयां में बिलात अंग आंय, और सबरे अंगों कौ एकई सौ काम नईंयां। ऊंसई हम जौन बिलात आंय, मसीह में एक देयां होकें आपस में एक दूसरे के अंग आंय। और जब ऊ दया किरपा के अनसार जौन हम हां दओ गओ आय, हम हां अलग अलग बरदान मिले आंय, तो जीहां अगमवानी कौ दान मिलो होबै, बो बिसवास से ऊके अनसार अगमवानी करे। जदि सेवा खुसामद करबे कौ दान मिलो होबै, तो सेवा में लगो रैबे, जदि कोई सिखाबेवारो होबै, तो सिखाबे में लगो रैबे। यदि कोई बचन कौ परचारक होबै, तो बचन परचार में लगो रैबे; दान देबेवारो मुठी खोल के देबे, जौन अगुवाई करे, बो जोस से करे, जौन दया करे, बो खुसी से करे। दिखाबे कौ प्रेम न होबै; बुराई से दूर रओ; भलाई में लगे रओ। तुम में भाईचारे कौ प्रेम बनो रैबे; आदर करबे में एक दूसरे से बढ़ के आदर करो। जतन करबे में बिलकुल आलस न करो; आत्मिक जोस से भरे रओ; पिरभु की सेवा करत रओ। आसा में खुस रओ; परेसानी मुसीबत से न डराओ; बिन्तवाई करबे में हमेसा लगे रओ। पवित्तर मान्सन हां जौन कछु घटी होबे, ऊ में उन की सहायता करो; पहुनाई करबे में लगे रओ। अपने सताबेवारन हां आसीष देओ; आसीष देओ श्राप न देओ। खुसी मनाबेवारन के संग्गै खुसी मनाओ; और दुखी जन के संग्गै रोओ। आपस में एक सो मन धरो; अभिमानी न बनो; परन्त दीनों के संग्गै मेल जोल धरो; अपने लेखे बड़वाई न करो। बुराई के बदले कोई से बुराई न करो; जो बातें सब मान्सन को भली लगें, बे बातें करो। जिते लौ बन सके, तुम सब मान्सन के संग्गै मेल मिलाप से रओ। हे प्यारो अपनो बदला न लईयो; परन्त परमेसुर के खुन्ख हां काम करन देओ, कायसे लिखो आय, बदला लेबो मोरो काम आय, पिरभु कैत आय मैंई बदला दे हों। परन्त जदि तोरो बैरी भूखो होबै, तो ऊ ए खाना खबा; जदि प्यासो होबै, तो ऊ ए पानी पिबा; कायसे ऐसो करबे से तें ऊके मूड़ के ऊ परै आग के अंगारन कौ ढेर लगा है। बुराई से न हारो परन्त भलाई से बुराई हां जीत लेओ। हर एक जन बड़े अधकारियन के नेंचें रैबे; कायसे कोई अधकार ऐसो नईंयां, जौन परमेसुर कुदाऊं से न होबे; और जो अधकार आंय, बे परमेसुर कुदाऊं से ठैराए गए आंय। ई लाने जो कोई अधकार कौ बिरोद करत आय, बो परमेसुर के कानून कौ विरोद करत आय, और विरोद करबेवारे दण्ड़ पा हैं। कायसे हाकम साजे काम के लाने नईं, परन्त बुरए काम के लाने डरबे कौ कारन आय, सो जदि तें हाकम से निडर रैबो चाहत आय, तो साजे काम कर तो हाकम तोरी पीठ थपथपा है। कायसे बो तोरे साजे के लाने परमेसुर कौ सेवक आय। परन्त जदि तें बुराई करे, तो डर; कायसे ऊ तलवार ऐंसई नईं लएं और परमेसुर को सेवक आय; कि ऊके न्याय के अनसार बुरए काम करबेवारन हां दण्ड़ देबे। ई लाने आधीन रैबो न केवल न्याय के डर से जरूरी आय परन्त बुद्धि समज सोई जरूरी आय, विवेक सोई जाई गवाय देत आय। ई लाने टैक्स सोई दो, कायसे बे परमेसुर के सेवक आंय, और हमेसा ऐई काम में लगे रैत आंय। ई लाने सबको हक्क चुकाओ, जीहां कर चानें, ऊहां कर देओ; जिए महसूल चानें, ऊहां महसूल देओ; जी से डरबो चईये, ऊसे डरो; जी कौ आदर सम्मान करो चईये ऊकौ आदर सम्मान करो। आपस के प्रेम हां छोड़ और कोई बात में कोऊ के करजदार न बनो; कायसे जौन कोई दूसरे से प्रेम राखत आय, ओई ने नेम व्यवस्था पूरी करी आय। कायसे जौ कि परतिरिया भोग न करियो, हत्या न करियो; भड़याई न करियो, लालच न करियो; और इन हां छोड़ और कोऊ हुकम सोई होबे तो सबरी बातें ईमें पूरी होत आय, कि अपने पड़ोसी से अपने जैसो प्रेम राख। प्रेम पड़ोसी की कछु बुराई नईं करत, ई लाने प्रेम करबो नेम व्यवस्था हां पूरो करबो आय। और ई बेरा हां पैचान के ऐंसोई करो, ई लाने कि अब तुमाए लाने सोत से जाग जाबे की बेरा आ पोंची आय, कायसे जौन बेरा हम ने बिसवास करो हतो, ऊ बेरा के हिसाब से अब हमाओ उद्धार एकदम ऐंगर आय। रात कुल्ल बीत गई आय, और भुन्सारो होबे हां आय; ई लाने हम अंधयारे के कामन हां छोड़ के जोत के हथियार बांध लेबें। जैसो दिन में सई लगत आय, ऊं सई हम सूदरी चाल चलें; न अपनी मनमौजीपन में, न परतिरिया भोग में, न दारूबाजी, न लुच्चपन में, न लड़ाई झगड़ा न डाह में। परन्त पिरभु यीशु मसीह की लीक पै चलो, और देयां की अभलाखा हां पूरो करबे कौ जतन न करो। जौन बिसवास में कमजोर होबै, उन हां अपनी संगत में ले लेओ; परन्त उन के सक सन्देह पर बतकाओ के लाने नईं। कायसे एक हां बिसवास आय, कि सबई कछु खाबो सई आय, परन्त जौन बिसवास में कमजोर आय, ऊ साग पात ही खात आय। और खाबेवारो न खाबेवारे हां नीचो न जाने, और जौन नईं खात आय बो खाबेवारे पे दोस न लगाबै, कायसे परमेसुर ने ऊ ए अपना लओ आय। तें को आय कि दूसरे के चाकर पे लांछन लगात आय? ऊकौ पक्को रैबो या गिर जाबो ऊके मालक से जुड़ो आय, और बो पक्को कर ही दओ जै है; कायसे पिरभु ऊ ए पक्को राख सकत आय। कोऊ एक दिना हां दूसरे दिना से बढ़ के मानत आय, और कोऊ सब दिन हां एक जैसो जानत आय: सबई जने अपने हिए में ठान लेबे। जौन कोऊ दिनां हां मानत आय, बो पिरभु के लाने मानत आय: जौन कोऊ खात आय, बो पिरभु के लाने खात आय, कायसे ऊ परमेसुर कौ धन्नबाद करत आय, और जौन नईं खात, बो पिरभु के लाने नईं खात और परमेसुर कौ धन्नबाद करत आय। कायसे हम में से सब कोई न तो अपने लाने जियत आय और न अपने लाने मरत आय। कायसे जदि हम जीयत आंय, तो पिरभु के लाने जीयत आंय; और जदि मरत आंय, तो पिरभु के लाने मरत आंय; सो हम जीएं या मरें, हम पिरभु ही के आंय। कायसे मसीह ऐई लाने मरो और जी सोई उठो कि बो मरे भयन और जीयत दोईयन कौ पिरभु होबे। तें अपने भईया पे काय लांछन लगात आय? या तें फिन अपने भईया हां काय तुच्छ जानत आय? हम सब के सब परमेसुर के न्याय आसन के सामूं ठांड़े हुईयें। कायसे लिखो आय, पिरभु कैत आय, मोरे जीवन कौ कौल कि हर एक घुटना मोरे आंगू टिक है, और हर एक जीभ परमेसुर हां मान लै है। ई लाने हम में से सबरे जने परमेसुर हां अपनो लेखा दै है। सो आंगू से हम एक दूसरे पे लांछन न लगाबें पर तुम जौ ठान लेओ कि कोनऊ अपने भाई के सामूं ठेस या उपटा लगबे कौ कारण न बने। मैं जानत आंव, और पिरभु यीशु में मोय पक्को पता पड़ो आय, कि कोऊ बस्त अपने आप में अशुद्ध नईंयां, परन्त जौन ऊ ए अशुद्ध समजत आए, ऊके लाने असुद्ध आय। जदि तोरो भईया तोरे खैबे के काजें सोच में पड़त आय, तो फिन तें प्रेम के चलन में नईं चलत: जीके लाने मसीह मरो ऊहां तें अपने खैबे से नास न कर। ई लाने तुमाए लाने जौन साजो आय बो न निंदरो जाए। कायसे परमेसुर कौ राज खैबो पीबो नईंयां; परन्त धरम और मेल मिलाप और बा खुसी आय; जौन पवित्तर आत्मा से होत आय। और जो कोऊ मसीह की ई भांत सेवा करत आय, बो परमेसुर हां साजो लगत आय और मान्सन में सोई मानो जात आय। ई लाने हम उन बातन में लगे रैबें, जिन से मेल मिलाप और एक दूसरे कौ सुधार होबे। खैबे के लाने परमेसुर कौ काम न बिलोर: सब कछु सुद्ध तो आय, परन्त ऊ मान्स के लाने बुरओ आय, जीहां ऊके खैबे से ठोकर लगत आय। भलो तो जौ आय, कि तें न मांस मछरिया खाबै और न दारू पिए, और न कछु ऐसो करे, जीसे तोरो भईया ठोकर खाबै। तोरो जौ बिसवास होय, ऊ ए परमेसुर के सामूं अपने हिये में धर, धन्न तो बो आय, जौन ऊ बात में, जिए ऊ सई समजत होय, अपने आप हां दोसी नईं ठैराऊ त। पर जौन कछु सक सन्देह कर के खात आय, बो दण्ड़ के जोग ठैर चुको; कायसे बिसवास से नईं खात, और जो कछु बिसवास से नईंयां, बो पाप आय। हम जौन धार्मिक बातन के मानबे में पक्के आंय, हम उन की जौन अपने आचरण में कमजोर आंय उन की सहें; जौ नईं कि हम अपने हां खुसी करें। हम अपने अपने पड़ोसी की भलाई करके ऊए खुस करें कि बो बढ़े। कायसे मसीह ने अपने आप हां खुस नईं करो, पर लेख आय, तोरे निन्दा करबेवारन कौ निन्दरबो मोय पे आ पड़ो। जितेक बातें पेंला से लिखी गईं, बे हमाई सीख के लाने लिखी गईं, कि हम धीरज और पवित्तर पोथी की सान्ति के द्वारा आसा धरें। धीरज और सान्ति कौ दैबेवारो परमेसुर तुम हां जौ बरदान देबे, कि मसीह यीशु के अनसार आपस में एक मन के बने रओ। जीसे तुम एक मन और एक अवाज में हमारे पिरभु यीशु मसीह के बाप परमेसुर की बड़ाई करो। ई लाने, जैसो मसीह ने परमेसुर की मईमा के लाने तुम हां अपना लओ आय, ऊं सई तुम सोई एक दूजे हां अपनाओ। ई लाने मैं कैत आंव, कि जौन कौल करार बाप दादन से करे गए हते, उन हां पक्को करबे के लाने मसीह, परमेसुर की सच्चाई कौ प्रमाण देबे के लाने खतना करे भयन कौ दास बनो। और दूसरी जातवारे सोई परमेसुर की दया के काजें परमेसुर की स्‍तुति आराधना करें, जैसो लिखो आय; ई लाने में जात जात में तोरो धन्नबाद कर हों, और तोरे नाम के भजन कीरतन कर हों। फिन कओ आय, हे जाति जाति के सबरे जनो, ऊ की परजा के संग्गै खुसी मनाओ। और फिन हे जाति जाति के सब मान्सन, पिरभु कौ भजन कीरतन करो; और हे राज राज के सबरे मान्सन; ऊकी जय जयकार करो। और फिन यशायाह अगमवकता कैत आय, यशै की एक जड़ कड़ है, और दूसरी जातवारन कौ हाकम होबे हां एक उठ है, ऊ पै दूसरी जातवारे अपनो भरोसा धर हैं। परमेसुर जौन आसा को दैबेवारो आय, तुम हां बिसवास करबे में सबरी भांत की खुसी से सान्ति भर देबे, कि पवित्तर आत्मा के बल से तुमाई आसा बढ़त जाय। हे मोरे भईया हरौ, मैं खुद तुमाए बारे में पक्के से जानत आंव, कि तुम सोई आप ही भलाई से भरे और पिरभु परमेसुर की समज से भरेपूरे आव और एक दूजे हां चिता सकत आव। पर मैंने कऊं कऊं सुमरन कराबे हां तुम हां हिम्मत कर के लिखो, जौ ऊ दया के काजें भओ, जौन परमेसुर ने मोय दओ आय। कि मैं दूसरी जातवारन के लाने मसीह यीशु कौ चाकर होकें परमेसुर के भले सन्देसे की सेवा याजक घांई करों; जीसे दूसरी जातवारन कौ मानो दओ जाबो, पवित्तर आत्मा से पवित्तर बनके अपनाओ जाबे। ई लाने उन बातन के बारे में जौन परमेसुर से जुड़ी आंय, मैं मसीह यीशु में घमण्ड कर सकत आंव। कायसे उन बातन हां छोड़ और कोऊ बात के विषय में कैबे की दम नईंयां, जौन मसीह ने दूसरी जातवारन हां पिरभु के बिसवास में बनाए रैबे के लाने बचन, और कर्म। और अद्भुत चिन्हों और आश्चर्य कामन की शक्ति से, और पवित्तर आत्मा के बल सक्ति से मोरे द्वारा करे गए: इते लौ कि मैंने यरूशलेम से लेकेइल्लुरिकुम तक मसीह के भले सन्देसे कौ पूरो पूरो परचार करो। परन्त मोरे मन की जा आस आय, कि जिते जिते मसीह के नाओं कौ परचार नईं भओ, उतईं भलो सन्देसो परचार करों, ऐसो न होबै, दूसरे की नी पे मैं घर बनाओं। पर जैसो लिखो आय, ऊंसई होबे, जिन हां ऊकौ भलो सन्देसो नईं मिलो, बेई तक हैं और जिन ने नईं सुनो बेई समज हैं। ऐई लाने मैं तुम लौ आबे हां थमो रओ। पर अब इन देसों में मोरे काम के लाने और जांगा नईं रई, और बिलात बरसन से मोय तुम लौ आबे की बड़ी अभलाखा आय। ई लाने जब मैं इसपानिया हां जै हों तो तुम लौ होत भओ जै हों, कायसे मोय आसा आय, कि ऊ जांगा में तुम से भेंट कर हों, और जब तुमाई संगत से मोरो जी भर जाबै, तो तुम मोय कछु आंगू लौ पोंचा दईयो। पर अबै तो मैं पवित्तर भक्तन की सेवा हां यरूशलेम हां जा रओ आंव। कायसे मकिदुनियां और अखया के बिसवासी जन हां जौ भलो लगो, कि यरूशलेम के पवित्तर मान्सन में गरीब भूखन के लाने कछु चन्दा जोड़ें। उन हां भलो तो लगो, पर बे उन के करजदार सोई आंय, कायसे दूसरी जातवारे उन की आत्मिक बातन में संग्गी भए, तो उनहां सोई साजो भलो लगो, कि उन की रुपईया पईसा से मदद करें। ई लाने मैं जौ काम पूरो करके और उन हां जौ चन्दा सौंप के तुमाए पास होत भओ इसपानिया हां जै हों। और मैं जानत आंव, कि जब मैं तुमाए ऐंगर आहों, तो मसीह की एन आसीसों के साथ आहों। हे भईया हरौ; हमाए पिरभु यीशु मसीह के और पवित्तर आत्मा के प्यार कौ सुमरन करा के, मैं तुम से बिन्तवाई करत आंव, कि मोरे लाने परमेसुर से बिन्तवाई करबे में मोरे संग्गै लगे रओ। कि मैं यहूदिया के बिसवास न करबेवारन से बरको रओं, और मोरी बा सेवा जौन यरूशलेम के लाने आय, पवित्तर मान्सन हां साजी लगै। और मैं परमेसुर की मन्सा से तुमाए ऐंगर खुसी से आके सान्ति पाओं। सान्ति कौ परमेसुर तुम सबरन के संग्गै रैबे। आमीन। मैं तुम से फीबे के लाने, जौन हमाई बैन और किंखिया की मण्डली की सेवा करबेवारी आय, बिन्तवाई करत आंव। कि जैसो तुम पवित्तर मान्सन हां चईये, ऊहां पिरभु में अपनाओ; और जौन कोऊ बात में ऊहां तुम से कछु काम होबै, तो ऊकी मदद करौ; कायसे बा बिलात जन की इते लौ कि मोरी भलाई सोई करबेवारी रई आय। प्रिसका और अक्विला हां जौन मसीह यीशु में मोरे संग्गै काम करबेवारे आंय, नमस्कार। उन ने मोरे प्रानन के लाने अपने प्रान जोखम में डाल दए हते और अकेले मैंई नईं, परन्त दूसरी जातवारन की मण्डलियन सोई उन कौ धन्नबाद करत आंय। ऊ मण्डली हां सोई नमस्कार जौन उन के घर में आय। मोरे प्यारे इपैनितुस हां जौन मसीह के लाने आसिया कौ पैलो फल आय, नमस्कार। मरियम हां जीने तुमाए लाने बिलात काम करो, नमस्कार। अन्द्रुनीकुस और यूनियास हां जौन मोरे कुल वंस के आंय, और मोरे संग्गै कैद भए हते, और प्रेरितन में नामी आंय, और मोय से पेंला मसीही भए हते, नमस्कार। अम्पलियातुस हां, जौन पिरभु में मोरो प्यारो आय, नमस्कार। उरबानुस हां, जौन मसीह में हमाओ संगी काम करबेवारो आय, और मोरे प्यारे इस्तखुस हां नमस्कार। अपिल्लेस हां जौन मसीह में खरो कड़ो, नमस्कार। अरिस्तुबुलुस के घराने हां नमस्कार। मोरे घराने के हेरोदियोन हां नमस्कार। नरकिस्सुस के घराने के जौन मान्स पिरभु में आंय, उन हां नमस्कार। त्रूफै ना और त्रूफोसा हां जौन पिरभु में मैनत करत आंय, नमस्कार। प्रिया पिरसिस हां जीने पिरभु में एन मैनत करी, नमस्कार। रूफुस हां जौन पिरभु में नबेरो भओ आय, और ऊ की मताई हां जौन मोरी सोई मताई आय, दोईयन हां नमस्कार। असुक्रितुस और फिलगोन और हिर्मेस और पत्रुवास और हिमांस और उन के संगी भईयन हां नमस्कार। फिलुलुगुस और यूलिया और नेर्युस और ऊ की बैन, और उलुम्पास और उन के संगी सबरे पवित्तर जनन हां नमस्कार आपस में पवित्तर चूमा से नमस्कार करो: तुम हां मसीह की सबरी मण्डलियन कुदाऊं से नमस्कार। सो हे भईया हरौ, मैं तुम से बिन्तवाई करत आंव, कि जौन मान्स ऊ सीख के बिरुद्ध जौन तुम ने सीखी आय, फूट डालबे और ठोकर खिलाबे के काजें कछु करें, उन हां ताड़ लए करे; और उन से दूर रओ। कायसे ऐसे मान्स हमाए पिरभु यीशु मसीह की नईं, पर अपने पेट की सेवा करत आंय; और चिकनी चुपड़ी बातन से सूदे सादे मन के मान्सन हां बहका देत आंय। तुमाए हुकम मानबे की बात सबरे मान्सन में फैल गई आय, ई लाने मैं तुमाए बारे में खुसी मनात आंव; परन्त मैं जौ चाहत आंव, कि तुम भलाई के लाने समजदार, परन्त बुराई के लाने भोले बने रओ। सान्ति कौ परमेसुर सैतान हां झट्टई तुमाए गोड़न तरें कुचरवा दै है। हमाए पिरभु यीशु मसीह की दया तुमाए संग्गै बनी रैबे। मोरे संग्गै काम करबेवारे तीमुथियुस कौ तुम हां नमस्कार, और मोरे नातेदार लूकियुस और यासोन और सोसिपत्रुस कौ तुम हां नमस्कार। ई चिठिया के लिखबेवारे मुझ तिरतीयुस कौ पिरभु में तुम हां नमस्कार। गयुस जौन मोरी और मण्डली की पहुनाई करबेवारो आय, ऊकौ तुम हां नमस्कार: इरास्तुस जौन नगर कौ भण्डारी आय, और भाई क्वारतुस कौ तुम हां नमस्कार। हमाए पिरभु यीशु मसीह की दया तुमाए संग्गै बनी रैबे। अब जौन तुम हां मोरे भले सन्देसे मानो कि यीशु मसीह के सन्देसे के परचार के अनसार पक्को कर सकत आय, ऊ भेद के प्रकाश के अनसार जौन हमेसा से लुको रओ। परन्त अब उजागर होकें जुग जुग जीबेवारे परमेसुर के हुकम से अगमवकतन की पोथियन से सबरी जातन हां बताओ गओ आय, कि बे बिसवास करके हुकम मानबेवारे हो जाबें। ओई महान बुद्धिमान परमेसुर की यीशु मसीह के द्वारा जुग जुग लौ मईमा होत रैबे। आमीन। पौलुस जौन परमेसुर की मन्सा से यीशु मसीह को चेला होबे हां बुलाओ गओ और हमाए भाई सोस्थिनेस कोद से। परमेसुर की ऊ समाज के नाओं जौन कुरिन्थुस में आय, जाने कि उन के नाओं जौन मसीह यीशु में पवित्तर करे गए आंय, और जौन पवित्तर होबे हां बुलाए गए आंय, और उन सबरन के नाओं जौन अपनी अपनी जांगा पिरभु यीशु के नाओं से बिन्तवाई करत आंय। हमाए पिता परमेसुर और पिरभु यीशु मसीह के नाओं में तुम पे दया, सान्ति बनी रैबे। मैं तुमाए लाने अपने परमेसुर कौ धन्न मानत आंव, कि परमेसुर की दया यीशु मसीह में तुम पे भई आय। कि तुम मसीह में होकें सबरी बातन में जाने कि सबरे बचनन के ज्ञान से भर गए आव। कि मसीह की गवाई तुम में पक्की कड़ी। इते लौ कि आत्मा के सबरे बरदान तुम में आंय और कछु कमीं नईंयां, और तुम हमाए पिरभु यीशु मसीह के उजागर होबे की बाट बड़ी लालसा से तकत रैत आव। बो तुम हां आखीर तक पक्को सोई कर है, कि तुम हमाए पिरभु यीशु के फिन के आबे के दिना लौ बिना लांछन ठैरो। परमेसुर बिसवास जोग आय; जीसे तुम उनके लरका हमाए पिरभु यीशु मसीह की संगत में बुलाए गए आव। हे भईया हरौ, यीशु मसीह जौन हमाओ पिरभु आय उनईं के नाओं से मैं तुम से बिन्तवाई करत आंव, कि तुम सबई एकई बात कओ; और तुम में फूट न होबे, परन्त तुम एकई हिये और एकई विचार के बने रओ। कायसे भईया हरौ, मोहां खलोए के घरवारन ने तुमाए बारे में जौ बताओ आय, कि तुम में आपस में न्याव होत आय। मोरो कैबो जौ आय, कि तुम में से कोऊ तो अपने आप हां पौलुस कौ, कोऊ अपुल्लोस कौ, कोऊ कैफा कौ, कोऊ मसीह कौ कैत आय। का मसीह बट गओ? का पौलुस तुमाए काजें क्रूस पे टांगो गओ? का तुम हां पौलुस के नाओं कौ बपतिस्मा मिलो? मैं परमेसुर कौ धन्न मानत आंव, कि क्रिस्पुस और गयुस हां छोड़ के, मैंने कोऊ और हां बपतिस्मा नईं दओ। कऊं ऐसो न होबे, कि कोऊ कए, कि तुम हां मोरे नाओं कौ बपतिस्मा मिलो। और मैंने स्तिफनास के घराने हां सोई बपतिस्मा दओ, इन हां छोड़, मोय नईं पता कि मैंने कोऊ और हां बपतिस्मा दओ। कायसे मसीह ने मोहां बपतिस्मा दैबे को नईं, परन्त भलो सन्देसो परचार करबे हां पठैव आय, और जौ सोई कि पढ़े लिखे जनें की समज से नईं, ऐसो न होबे कि मसीह की क्रूस की पीड़ा झेलबो बेकार जाबै। कायसे क्रूस की गाथा जौन नास होबेवारे आंय उन के लाने मूरखन की किस्सा कहानी आय, परन्त हम तरन तारन पाबेवारन हां परमेसुर की बल सकती आय। कयसे लिखो आय, कि मैं बड़ी समाजवारे जनन की समज हां नास कर दै हों, और ज्ञानी जनन के ज्ञान हां मिटा डाल हों। कां रओ ज्ञानवारो? कां रओ शास्त्र कौ जानबेवारो? कां रओ ई संसार कौ बतकाओवारो? का परमेसुर ने ई संसार के ज्ञान हां मूरखता नईं ठैराओ? कायसे जब परमेसुर के ज्ञान अनसार संसार ने ज्ञान से परमेसुर हां न चीनो तो परमेसुर हां जौ साजो लगो, कि ई परचार की मूरखता द्वारा बिसवास करबेवारन हां तरन तारन देबे। यहूदी तो चिन्न चाहत आंय, और यूनानी ज्ञान हां ढूंढ़ रए आंय। परन्त हम तो ऊ क्रूस पे टांगे गए मसीह कौ परचार करत आंय, जौन यहूदियन हां उपटा कौ काज, और दूसरी जातवारन हां मूरखता आय। परन्त जीहां उन ने टेरो आय चाहे बे यहूदी होबें चाहे यूनानी, उन के लाने मसीह, परमेसुर की बल सक्ती, और परमेसुर कौ ज्ञान आय। कायसे परमेसुर की मूरखता मान्सन के ज्ञान से बढ़ के ज्ञानवान आय; और परमेसुर की कमजोरी मान्सन के बल से बिलात बलवान आय। हे भईया हरौ, अपने बुलाए जाबे हां तो सोचो, कि देयां के अनसार न बिलात ज्ञानवारे, न बिलात बलवान और न बड़े महाजन बुलाए गए। परन्त परमेसुर ने संसार के मूरखन हां नबेर लओ, कि ज्ञानवारन हां लज्जित करें; और परमेसुर ने संसार के कमजोरों हां नबेर लओ आय, कि बलवानन हां लज्जित करे। और परमेसुर ने संसार के नीचों और ओछों हां, इते लौ कि जौन हैईं नईंयां उन हां सोई नबेर लओ, कि उन हां जौन आंय, बेकार ठैराबें। जीसे कोई प्रानी परमेसुर के आंगू घमण्ड न कर पाबै। परन्त ओई कुदाऊं से तुम मसीह यीशु में आव, जौन परमेसुर कुदाऊं से हमाए लाने ज्ञान ठैरो जाने कि धरम, और पवित्तरता, और छुटकारो। जीसे जैसो लिखो आय, ऊंसई होबे, कि जौन घमण्ड करे बो पिरभु में घमण्ड करे। और हे भईया हरौ, जब मैं परमेसुर कौ गैरो बचन सुनात भओ तुमाए ऐंगर आओ, तो बचन या ज्ञान की अधकाई के संग्गै नईं आओ। कायसे कि मैंने पक्को ठान लओ हतो, कि तुमाए मजारें यीशु मसीह, जाने कि क्रूस पे टांगे गए मसीह हां छोड़ और कोऊ बात हां न जानों। और मैं कमजोरी और डरात भए, और बिलात कंपत भओ तुम औरन के संग्गै रओ। और मोरे बचन, और मोरे परचार में ज्ञान की लुभाबेवारी बातें न हतीं; परन्त आत्मा और सामर्थ कौ प्रमाण हतो। ई लाने तुमाओ बिसवास मान्सन के ज्ञान पे न होबे, परन्त परमेसुर की सक्ति पे बनो रैबे। फिन हम समजदारों में ज्ञान की बातें सोई सुनात आंय: परन्त जौ ज्ञान न तो ई संसार कौ, और न ही हाकमन कौ आय जौन नास होबेवारे आंय। परन्त हम परमेसुर के ऊ ज्ञान की लुकी भई बातन हां बतात आंय, जाने के लुको भओ ज्ञान हां, जिए परमेसुर ने पेंला से हमाई बड़वाई के लाने ठैराओ। जी ज्ञान हां ई जुग के हाकमन में से कोऊ ने न समजो, जदि उन की समज में आ गओ होतो, तो मईमा के पिरभु हां क्रूस पे न टांगते। परन्त जैसो लिखो आय, जिन बातन हां आंखन ने नईं तको, और न कान ने सुनो, और जौन मान्स के हिये में नईं समाई, उनईं हां परमेसुर ने अपने प्रेम करबेवारन के लाने तईयार करी आंय। परन्त परमेसुर ने उन हां अपनी आत्मा से हम पे उजागर करो; कायसे आत्मा सबरी बातें, इते लौ कि परमेसुर की गैरी बातें सोई परखत आय। मान्सन में से कौन कोऊ मान्स की बातें जानत आय, अकेले ओई मान्स की आत्मा जौन ऊ में आय, ऊं सई परमेसुर की बातें सोई कोई नईं जानत, बस परमेसुर की आत्मा। परन्त हम ने संसार की आत्मा नईं, परन्त बो आत्मा पाओ आय, जौन परमेसुर कुदाऊं से आय, कि हम उन बातन हां समजें, जौन परमेसुर ने हम हां दई आंय। जिन हां हम मान्सन के सिखाए भई बातन में नईं, परन्त आत्मा के सिखाए भई बातों में, जाने कि आत्मिक सोच हां आत्मिक बातन में मिला के बताओ करत आंय। परन्त सारीरिक मान्स परमेसुर की आत्मा की बातें नईं अपनात, कायसे बे बातें ऊ की समझ सें मूरखता की बातें आंय, और बो उन हां समज नईं सकत कायसे उनकी परख आत्मिक रूप से होत आय। आत्मिक जन सबई कछु परखत आय, परन्त बो खुद कोई और मान्स से परखो नईं जात। कायसे पिरभु के मन हां कीने जानो आय, कि उनहां सिखाबे? परन्त हम में मसीह को हिया आय। हे भईया हरौ, मैं तुम से ई परकार से बातें नईं कर सको, जैसे आत्मिक जन से; परन्त जैसे सारीरिक जन से, और उन जैसे जौन मसीह में हल्के बच्चा घांई आंय। मैंने तुम हां दूध पिबाओ, अन्न न खबाओ; कायसे कि तुम ऊहां न खा सकत हते; इते लौ कि अब लौ सोई नईं खा सकत आव। कायसे तुन अब लौ सारीरिक आव, कि जब तुम में जलन और झगड़ा आय, तो का तुम सारीरिक नईंयां? और मान्सन जैसी गैल नईं निंगत? ई लाने कि जब एक कैत आय, कि मैं पौलुस कौ आंव, और दूजो कि मैं अपुल्लोस कौ आंव, तो का तुम मान्स नईंयां? अपुल्लोस का और पौलुस का आंय? बस चाकर, जिनके द्वारा तुम ने बिसवास करो, जैसो हर एक हां पिरभु ने दओ। मैंने लगाओ, अपुल्लोस ने ढारो, अकेले परमेसुर ने बढ़ाओ। ई लाने न तो रोपबेवारो कछु आय, और न ढारबेवारो, परन्त परमेसुर जौन बढ़ाबेवारो आय। लगाबेवारो और ढारबेवारो दोनऊं एक आंय; परन्त हर एक जैसी मैनत कर हैं ऊंसई मजूरी पा हैं। कायसे कि हम परमेसुर के संग्गै काम करबेवारे आंय; तुम परमेसुर की खेती और परमेसुर के बनाए भए आव। परमेसुर की ऊ किरपा से, जौन मो पे भई, मैंने एक साजे कारीगर घांई नीं डाली आय, और दूसरो जनो चुनाई करत आय; परन्त हर एक मान्स हुंसयार रैबै, कि बो ऊ पे कैसी चुनाई करत आय। कायसे ऊ नीं हां छोड़ जौन डली आय, और बो यीशु मसीह आय: कोऊ और नीं नईं डाल सकत। और जदि कोऊ ई नीं पे चाहे कि सोने और चांदी या मांगे पथरा, लकड़ियां या घांस फूस की चुनाई कर है। तो सबरे जन कौ काम उजागर हो जै है, कायसे ऊ दिना पता पड़ है; और बो आगी से उजागर हुईये: और आगी ई सबरे मान्सन कौ काम परख है। जी की चुनाई कौ काम ऊ पै बनो रै है, बो मजूरी पा है। यदि कोऊ कौ काम जल जै है, ऊहां टोटो हुईये; बो तो बच जै है परन्त बरत बरत। का तुम हां जौ पता नईंयां, कि तुम परमेसुर कौ मन्दर आव, और परमेसुर कौ आत्मा तुमाए भीतरै बसत आय। यदि कोऊ परमेसुर के मन्दर हां नास कर है, तो परमेसुर ऊहां नास कर है; कायसे परमेसुर कौ मन्दर पवित्तर आय, और ऊ मन्दर तुम आव। कोऊ अपने आप हां धोखा न देबे: जदि तुम में से कोऊ ई संसार में अपने आप हां ज्ञानी समझे, तो मूरख बने; कि ज्ञानी हो जाबै। कायसे ई संसार कौ ज्ञान परमेसुर के सामूं मूरखपन आय, जैसो लिखो आय; कि बो ज्ञानियन हां उनईं की चतुराई में फंसा देत आय। और फिन पिरभु ज्ञानियन की चिन्ताओं हां जानत आय, कि बे ऊं सई आंय। ई लाने मान्सन पे कोऊ घमण्ड न करे, कायसे सबई कछु तुमाओ आय। का पौलुस, का अपुल्लोस, का कैफा, का संसार, का जीवन, का मरबो, का आज, का आबेवारो कल, सबई कछु तुमाओ आय। और तुम मसीह के आव, और मसीह परमेसुर कौ आय। मान्स हम हां मसीह के चाकर और परमेसुर की लुकी भई बातन के जानबेवारे मानें। फिन इते भण्डारी में जा बात तकी जात आय, कि बिसवास जोग कड़े। परन्त मोरी समज में जा हलकी बात आय, कि तुम या मान्सन कौ कोऊ न्यायी मोहां जांचे, परन्त मैं खुद अपने आप हां नईं जांचत। कायसे मोरो हिया मोहां कोऊ बात में दोस नईं देत, परन्त ईसें मैं निरदोस नईं ठैरत, कायसे मोहां जांचबेवारो पिरभु आय। सो जब लौ पिरभु न आबै, बेरा से पेंला कोऊ बात कौ न्याय न करो: ओई तो अंधयारे की लुकी बातें उजारे में दिखा है, और हियों के सोचों हां उजागर कर है, तब परमेसुर कुदाऊं से सबरन की बड़वाई हुईये। हे भईया हरौ, मैंने इन बातन में अपनी और अपुल्लोस की कनौत सी कई, कि तुम हम से जौ सीखो, कि जैसो लिखो आय ऊसे आंगू न बढ़ियो, एक हां बड़ो और दूसरे हां ओछो न जानियो। कायसे एक दूसरे में को अन्तर कर सकत आय? और तोरे ऐंगर का आए जौन तेंने दूसरे से न पाओ होबै: और जब तेंने दूसरे से पाओ आय, तो ऐसो घमण्ड काय करत आय, कि मानो नईं पाओ? तुम तो अफर गए; तुम धनवारे हो गए, तुम ने हम हां छोड़ के राज करो; परन्त नोंनो रैतो कि तुम राज करते कि हम सोई तुमाए संग्गै राज करते। मोहां ऐसो लगत आय कि परमेसुर ने हम चेलन हां सबके पाछें उन मान्सन घांई ठैराओ आय, जिनहां मार डालबे कौ हुकम हो चुको होबे; कायसे हम संसार और सरगदूतों और मान्सन के लाने एक तमासा ठैरे आंय। हम मसीह के लाने मूरख आंय; परन्त तुम ज्ञानवान आव: हम कमजोर आंय और तुम बली आव: तुमहां मान दओ जात आय, और हम हां ओछो लेखो जात आय। हम अबै लौ भूखे प्यासे और उधाड़े आंय, घूंसा खात आंय और भैराने से फिरत आंय; अपने ई हाथन से काम करके मैनत करत आंय। मान्स बुरओ कैत, हम आसीसत आंय; बे सतात आंय, हम गम्म खात आंय। बे बदनाम करत आंय, हम उन के लाने बिन्तवाई करत आंय: हम अबै लौ संसार के कूरा और बस्तन की खुरचन जैसे माने जात आंय। मैं जे बातें तुमहां लजाबे हां नईं लिखत, अकेले अपनो प्यारो लड़का जान के समझात आंव। कायसे मसीह के बारे में तुम हां सिखाबेवारे दस हजार लौ होते, परन्त तुमाए बाप कुल्ल जनें नईंयां, कायसे मसीह यीशु के भले सन्देसे हां सुनाबे से मैं तुमाओ बाप भओ। ई लाने मैं तुम से बिन्तवाई करत आंव, कि मोरी सी चाल चलो। ऐई लाने मैंने तीमुथियुस हां जौन पिरभु में मोरो बिसवास जोग लड़का आय, तुमाए ऐंगर पठैओ आय, ऊ तुम हां मसीह में मोरी चाल सुमरन करा है, जैसो कि मैं हर जांगा मंडलियन हां सिखाओ करत आंव। कछु मान्स घमण्ड से ऐसे भर गए आंय, जौ सोच के, कि जानो मैं तुमाए ऐंगर न आ हों। परन्त जदि पिरभु की मन्सा भई तो मैं तुमाए ऐंगर जल्दी आ हों, और घमंडियों की बातन को नईं, परन्त उन की बल सकती कौ पता कर लै हों। कायसे परमेसुर कौ राज निरी बातन में नईं, अकेले बल सकती में आय। तुम का चाहत आव? कि मैं बुदरिया लैकें तुम लौ आंव या प्रेम और नरमता की आत्मा के संग्गै? इतै लौ सुनबे में आत आय, कि तुम में कुकर्म होत आय, ऐसो पाप जौन दूसरी जातवारन में लौ नईं होत, कि एक जनो अपने बाप की घरवारी हां राख लेत आय। तुम हां ई पाप से सरम लौ नईं आत, कि ऐसे काज के करबेवारे हां अपने बीच से काड़ बायरें करो, पर तुम तो मूड़ ऊंचो कर के निगत आव। मैं तो देयां के भाव से तुम से दूर हतो, परन्त हिये से तुमाए बीच ऐसे पाप करबेवारन के लाने हुकम दे चुको आंव। कि जब मोरी और तुमाई आत्मा, हमाए पिरभु यीशु मसीह के जस से जुड़ जाबे, तो ऐसो मान्स, हमाए पिरभु यीशु मसीह के नाओं से। शैतान छलिया के लाने छोड़ दओ जाबै, कि ऊ की आत्मा यीशु के नाओं से तरन तारन पाबै। तुमाओ बड़ो बोल बोलवो साजो नईंयां: का तुम हां जौ पता नईयां, कि तनक से खमीर से पूरो मड़ो भओ चून खमीर हो जात आय। पुराने खमीर हां काड़ डालो, और तुम साजे कड़ आओ: और साजो मड़ो भओ चून बनो: कि तुम में खमीर न रैबे, कायसे हमाओ फसह जौन मसीह आय, हमाए लाने बलदान भओ आय। सो आओ, हम त्यौहार में खुसी मनाबें, न पुराने खमीर से न बुराई से न दुष्टता के खमीर से, परन्त सांचे हिये और सच्चाई की बनी खमीर की रोटी संग्गै। मैंने अपनी चिठिया में लिखो आय, कि परतिरिया संगत करबेवारे से संगत न करियो। जौ नईं, कि तुम सबरेहार ई संसार के परतिरिया संगत करबेवारन की, लालची, या अन्धेर करबेवारे, मूर्ती पूजबेवारों की संगत न करो; कायसे ऐसे में तो तुम हां संसार में से कड़ जाने पड़तो। मोरो कैबो जौ आय; कि जदि कोऊ बिसवासी कहाबे, और परतिरिया संगतवारो, लालची, मूरतन की पूजा करबेवारो, गाली देबेवारो, दारू पीबेवारो, या अंधेर करबेवारो होबै, तो ऊ की संगत न करियो; इते लौ कि ऐसे मान्स के संग्गै रोटी सोई न जेईयो। कायसे मोहां बायरेंवारन से का काम? कि उन कौ न्याव करों का तुम अपनी समाज में न्याव नईं करत? बायरेंवारन कौ न्याय परमेसुर करत आय: ई लाने ऊ कुकर्मी हां अपने बीच से काड़ दो। का तुम में से कोऊहां ऐसी हिम्मत आय, कि जब दूसरे जनें से न्याव होबे, तो निपटाबे हां पापी मान्सन लौ जाए; और पवित्तर मान्सन लौ न जाबै? का तुम हां जौ पता नईंयां, कि पवित्तर मान्स संसार कौ न्याव कर हैं? सो जब तुम हां संसार कौ न्याव करने आय, तो का तुम हलके से हलके न्याव निपटाबे के जोग नईंयां? का तुम हां जौ पता नईंयां, कि हम सरगदूतन कौ न्याव कर हैं? तो का संसार की बातन कौ न्याय न करें? जदि तुम हां संसार की बातन कौ न्याव करने होबे, तो का उनहां बैठा हौ जौन समाज में कछु नईं समजे जात आंय? मैं तुम हां लज्जित करबे हां ऐसो कैत आंव: का तुम में एकऊ समझवारो नईंयां, जौन अपने भईयन के बीच न्याव करे। इते लौ कि भईयन भईयन के बीच न्याव होत आय, बो सोई दूसरी जातवारन के सामूं। तुम में सांचऊ बड़ो दोस जौ आय, कि आपस में कोर्ट कचारी में लड़त आव; तुम अन्याय काए नईं सहत? अपनो नुकसान काए नईं सहत? तुम अन्याय करत और नुकसान पोंचात आव, और बो सोई भईयन हां। का तुम हां पता नईंयां, कि जौन न्याव बिलोरत आंय बे परमेसुर के राज में न जा पा हैं? ई धोखे में न रईयो, न बेश्या से संगतवारे, न मूर्ती पूजा करबेवारे, न दूसरे की तिरिया से संगत करबेवारे, न लुच्चे, न लुगुवा लुगुवा से संगत करबेवारे। भड़या, लालचवारे, दारू पीबेवारे, गाली देबेवारे, जबरंई करबेवारे परमेसुर के राज के बारस न हुईयें। तुम में से बिलात जनें ऐंसई हते, पर अब तुम पिरभु यीशु मसीह के नाओं से और हमाए परमेसुर की आत्मा से धोए गए आव, अब तुम पवित्तर हो गए आव और धर्मी ठैरे आव। सबरी बस्तें मोरे लाने साजी तो आंय, परन्त सबरी बस्तें भलाई नईं करत, सबरी बस्तें मोरे लाने साजी आंय, अकेले मैं कोऊ बन्धन में न रै हों। भोजन पेट के लाने और पेट भोजन के लाने आय, परन्त परमेसुर ईहां और ऊहां दोईयन हां नास कर है, परन्त देयां बुरए काम हां नईं, परन्त पिरभु के लाने आय; और पिरभु देयां के लाने आय। और परमेसुर ने पिरभु हां अपने बल से जिलाओ, और हम हां सोई जिला है। का तुम हां पता नईंयां, कि तुमाई देयां मसीह कौ हींसा आय? सो का मैं मसीह कौ हींसा लेके ऊहां बेश्या कौ हींसा बनाओं? कभऊं नर्इं। का तुम हां पता नईयां, कि जौन बेश्या से संगत करत आय, बो ऊके संग्गै एक देयां हो जात आय कायसे कओ गओ आय, कि बे दोई एक देयां हुईयें। और जौन पिरभु की संगत में रैत आय, बो उनके संग्गै एक जी हो जात आय। व्यभिचार से बरके रओ: जितेक और पाप मान्स करत आय, बे देयां के बायरें आंय, परन्त व्यभिचार करबेवारो अपनी ई देयां के बिरोद में पाप करत आय। का तुम हां पता नईंयां, कि तुमाई देयां पवित्तर आत्मा कौ मन्दर आय; जौन तुम में बसो आय और तुम हां परमेसुर कुदाऊं से मिलो आय, और तुम अपने नईं आव? कायसे टका देके खरीद लए गए आव, ई लाने अपनी देयां से परमेसुर की बड़वाई करो। उन बातन के लाने जौन तुम ने लिखीं आंय, जौ साजो आय, कि मान्स बईयर हां न छिए। परन्त कुकर्म के डर से सबरे मन्सेलुअन की घरवारी, और सबरी बईयरन कौ मन्सेलू होबे। मन्सेलू अपनी घरवारी कौ हक्क पूरो करे; ऊं सई घरवारी सोई अपने मन्सेलू कौ। घरवारी हां अपनी देयां पे अधकार नईं पर ऊके मन्सेलू कौ अधकार आय; ऊं सई मन्सेलू हां अपनी देयां पे अधकार नईं, परन्त घरवारी कौ आय। तुम एक दूजे से न्यारे होकें न रओ; परन्त कछु बेरा लौ आपस की राजी खुसी से कि बिन्तवाई के लाने कछु टैम मिले, और फिन एक संग्गै रओ, ऐसो न होबै, कि तुमाए न्यारे होकें रैबे से शैतान छलिया तुम हां परखे। परन्त मैंने जो कओ आय बो मोरी सलाय आय हुकम नईंयां। मैं जौ चाहत आंव, कि जैसो मैं आंव, ऊंसई सबरे मान्स होबें; परन्त सबरन हां परमेसुर कुदाऊं से न्यारे न्यारे बरदान मिले आंय; कोऊहां कोऊ भांत कौ, और कोऊहां और कोऊ भांत कौ। परन्त मैं बिना ब्याओवारन और बिधवाओं के लाने कैत आंव, कि उन के लाने ऐसई रैबो साजो आय, जैसो मैं आंव। परन्त जदि बे कामवासना बस में न कर सकें, तो बे शादी ब्याओ करें; कायसे शादी ब्याओ करबो कामवासना में जलत रैबे से साजो आय। जिन कौ ब्याओ हो गओ आय, उन हां मैं नईं, पिरभु हुकम देत आय, कि बईयर अपने मन्सेलु से अलग न होबै। (और जदि अलैदा हो सोई जाबै, तो बिना दूसरो ब्याओ करे रैबे; या अपने मन्सेलू से फिन मेल कर लेबे) और न मन्सेलू अपनी घरवारी हां छोड़े। और जन से पिरभु नईं, अकेले मैं कैत आंव, कि कोऊ भईया की घरवारी बिसवास न धरत होबे, परन्त ऊके संग्गै रैबे हां राजी होबे, तो बो ऊहां न छोड़े। और जदि कोऊ बईयर कौ मुन्स बिसवास नईं धरत होबे, परन्त ऊके संग्गै रैबे हां राजी होबे; तो बा अपने मन्सेलू हां न छोड़े। कायसे ऐसो मन्सेलू जौन बिसवास नईं धरत होबे, बो अपनी घरवारी के काजें पवित्तर ठहराओ जै है, और ऐसी बईयर जौन बिसवास न धरत होबे, अपने घरवारे के काजें पवित्तर ठहराई जै है; नईं तो तुमाए बालबच्चे असुद्ध होते, परन्त अब तो बे सुद्ध आंय। कोऊ जनो जौन बिसवास न धरत होबे, तो छोड़ छुट्टी हो जान देओ, ऐसे में कोऊ भईया या बिन्नू हां कोऊ बन्धन नईंयां; परन्त परमेसुर ने हम हां मेल जोल हां टेरो आय। कायसे हे बईयर, का तोहां पता आय, कि तें अपने मुन्स कौ तरन तारन करा लै है? और हे भईया, तोहां पता आय, कि तें अपनी घरवारी कौ तरन तारन करा लै है? परन्त जैसो पिरभु ने एक एक हां बांटो आय, और जैसो पिरभू ने एक एक को बुलाओ आय; ऊंसई बो चले: और मैं सबरी मंडलियन में ऐसई हुकम देत आंव। जौन खतना करो भओ बुलाओ गओ होय, बो बिना खतनावारो न बने: और जौन बिना खतनावारो बुलाओ गओ होय, बो खतना न कराबै। न तो खतना कछु आय, और न ऊं सई बिना खतनावारो परन्त परमेसुर कौ हुकम मानबो सबई कछु आय। हर एक जन जैसो बुलाओ गओ होय, ऊं सई रैबे। जदि तें चाकर जैसो बुलाओ गओ होय तो चिन्ता नें कर; अकेले जो तें छूटबो चाहे, तो ऐसई काम कर। कायसे जौन चाकर जैसो पिरभु में बुलाओ गओ आय, बो पिरभु लौ छोड़ो भओ आय: और ऊं सई जौन छूटे जैसो बुलाओ गओ आय, बो मसीह कौ चाकर आय। तुम टका देके मोल लए गए आव, मान्सन के चाकर न बनो। हे भईया हरौ, जो कोऊ जैसो बुलाओ गओ होबे, बो ओई में परमेसुर के संग्गै रैबे। कुंआरिअन के लाने पिरभु कौ कोऊ हुकम मोहां नईं मिलो, परन्त बिसवास जोग होबे के लाने जैसी किरपा पिरभु ने मो पे करी आय, ओई के अनसार सलाय देत आंव। सो मोरी समज में जौ साजो आय, कि ई दिना में पीड़ा के काजें मान्स जैसो आय, ऊं सई रैबे। जदि तोरी घरबारी आय, तो ऊसे अलैदा होबे कौ जतन न कर: और जदि तोरी घरवारी नईंयां, तो बईयर हां न खोज। परन्त जदि तें ब्याओ सोई करे, तो पाप नईंयां; और जदि कुंआरी ब्याही जाबै तो कछु पाप नईंयां; परन्त ऐसन हां देयां की पीड़ा हुईये, और मैं बरकाओ चाहत आंव। हे भईया हरौ, मैं जौ कैत आंव, कि बेरा हां घटा दओ गओ आय, ई लाने चईये कि जिन की घरवारी होबे, बे ऐसे होबें मानो कि उन की घरवारी नईंयां। और रोबेवारे ऐसे होबें, मानो रोऊ त नईंयां; और खुसी मनाबेवारे ऐसे होबें, मानो खुसी नईं मनात; मोल लेबेवारे ऐसे होबें, मानो उन लौ कछु नईंयां। और ई संसार की बस्तन हां काम में लाबेवारे ऐसे होबें, कि उनई में मगन न हो जाबें, कायसे ई संसार की रीत और ब्योहार बदलत जात आंय। सो मैं जौ चाहत आंव, कि तुम बिलात न सोचो: जीकौ ब्याओ नईं भओ बो मान्स पिरभु की बातन के सोच में रैत आय, कि पिरभु हां कैसे खुस राखै। परन्त ब्याओवारो जनो संसार की बातन के सोच में रैत आय, कि अपनी घरवारी हां कौन भांत से खुस राखै। ब्याओवारी और बिना ब्याओवारी में सोई भेद आय: बिना ब्याओवारी पिरभु के सोच में रैत आय, कि बो देयां और आत्मा दोईयन में पवित्तर होबै, परन्त ब्याओवारी संसार के सोच में रैत आय, कि अपने मन्सेलु हां खुस राखै। जा बात तुमाए लाभ के लाने कैत आंव, जौ नईं कि तुम हां फांस लेंओं, परन्त ई लाने कि जैसो नोंनो आय, ऊंसई करो जाबे; कि तुम एक हिये के होकें पिरभु की सेवा में लगे रओ। और जदि कोऊ जौ समजे, कि मैं अपनी ऊ कुंआरी कौ हक्क मार रओ आंव, जी की जवानी ढल रई आय, और ऊ सोचे कि ऊकौ ब्याओ होबो चईये, तो जैसो चाए, ऊंसो कर, ईमें पाप नईंयां, बो ऊकौ ब्याओ होन देबे। परन्त जौन हिये में पक्को रैत आय, और ऊहां ब्याओ करे हां मन्सा न होबे, बो मन्सा पूरी करबे कौ अधकार राखत आय, और जौन कोऊ ने अपने अपने हिये में पक्को कर लओ होय, कि मैं अपनी कुंआरी हां बिना ब्याओ रैन दे हों, बो साजो करत आय। सो जौन अपनी कुंआरी कौ ब्याओ कर देत आय, बो साजो करत आय, और जौन ब्याओ नईं करत, ऊ सोई साजो करत आय। जब लौ कोई बईयर कौ मन्सेलु जियत रैत आय, तब लौ बो ऊसे बंधी भई आय, परन्त जब ऊकौ मन्सेलु मर जाबै, तो जीसें चाए ब्याओ कर सकत आय, अकेले पिरभु में। परन्त जैसी आय जदि वैसई रैबे, तो मोरे विचार में औरऊ धन्न आय, और मैं समजत आंव, कि परमेसुर कौ आत्मा मो में सोई आय। अब मूरतों के सामूं बलि करी भई बस्तों के बारे में - हम जानत आंय, कि हम सबई हां ज्ञान आय: ज्ञान घमण्ड पैदा करत आय, परन्त प्रेम से बढ़ती होत आय। जदि कोऊ समझे, कि मोहां कछु पता आय, तो जैसो जानो चईये ऊंसो अबै लौ नईं जानत। परन्त जदि कोऊ परमेसुर से प्रेम धरत आय, तो ऊए परमेसुर चीनत आय। सो मूरतों के सामूं बलि करी भई बस्तों के खाबे के बारे में -- हम जानत आंय, कि संसार में मूरत कछु बस्त नईंयां, और एक हां छोड़ कोऊ और परमेसुर नईंयां। ऊंसे तो आकास में और धरती पे बिलात ईसुर कहात आंय, (जैसो कि बिलात के ईसुर और बिलात के पिरभु आंय)। परन्त हमाए ऐंगर तो एकई परमेसुर आय: जाने कि बाप जौन कुदाऊं से सबरी बस्तें आंय, और हम उनईं के लाने आंय, और एकई पिरभु आय, जाने कि यीशु मसीह जिनके द्वारा सबरी बस्तें भईं, और हम सोई उनईं के द्वारा आंय। परन्त सबरन हां ऐसो ज्ञान नईंयां; परन्त कितेक जनें अब लौ मूरत हां कछु समजबे के कारण मूरतन के सामूं बलि करी गई कछु बस्त जानके खात आंय, और उन कौ हिया कमजोर होकें असुद्ध होत आय। खैबो हम हां परमेसुर के ऐंगर नईं ले जात, जदि हम न खाबें, तो कछु नुकसान नईंयां, और जदि खाबें तो कछु फायदा नईंयां। परन्त हुंसयार रओ, ऐसो न होबे, कि तुमाई जा छूट कऊं कमजोर जन के लाने उपटा लगबे कौ कारण बने। कायसे जदि कोऊ तोय ज्ञानी हां मूरत के मन्दर में खात तके, और ऊ कमजोर मान्स होबै, तो का ऊ की समज में मूरत के सामूं बलि करी भई बस्त के खैबे की हिम्मत न हो जै है। ई परकार से तोरी समज के काजें बो कमजोर भईया जीके लाने मसीह मरो, नास हो जै है। सो भईयन को अपराध करबे से और उन की कमजोर समज हां चोट पोंचाबे से तुम मसीह कौ अपराध करत आव। ई काजें जदि खैबो मोरे भईया हां ठेस खबाए, तो मैं कभऊं कोऊ भांत से मांस न खै हों, न होबे कि मैं अपने भईया को उपटा कौ कारण बनों। का मैं छूट्टा नईंयां? का मैं चेला नोंई? का मैंने यीशु को जौन हमाओ पिरभु आय, नईं तको? का तुम पिरभु में मोरे बनाए नईंयां? जदि मैं औरन के लाने चेला नईंयां, पर तुमाए लाने तो आंव, कायसे तुम पिरभु में मोरे चेलापन पे मानो छाप आव। जौन मोहां जांचत परखत आंय, उन के लाने जौई मोरो जवाब आय। का हमहां खैबे पीबे कौ अधकार नईंयां? का हम हां जौ अधकार नईंयां, कि कोई मसीही बिन्नु हां ब्याओ कर के लएं फिरें, जैसो और चेले और पिरभु के भाई और कैफा करत आंय? या अकेले मोहां और बरनबास को अधकार नईं कि कमाई करबो छोड़ें। कौन कभऊं अपनी गांठ से खाके सिपाई कौ काम करत आय: कौन दाख कौ बगीचा लगा के ऊ की दाखें नईं खात? कौन गाड़रन की रखनवारी करके उनकौ दूध नईं पियत? का मैं जे बातें मान्सन घांई बोलत आंव? का नेम व्यवस्था जौई नईं कैत? कायसे मूसा की नैम व्यवस्था में लिखो आय कि दांय में चलत भए बैल कौ मों न बांधियो: का परमेसुर बैलन की सोच करत आय? या जौ हमाए लाने कैत आय? हओ, हमाए लाने लिखो गओ, कायसे सई आय, कि जोतबेवारो आसा से जोते, और दांय करबेवारो मिलबे की आसा से दांय करे। सो जब हमने तुमाए लाने आत्मिक बस्तें बोईं, तो का जा कोई बड़ी बात आय, कि तुमाई बे बस्तें जौन हम हां जरूरी आंय तुम से चाहना करें। और दूसरन कौ तुम पे जौ अधकार आय, तो का हमाओ ईसें अधक अधकार न हुईये? परन्त हम जौ अधकार काम में न लाएं; परन्त गम्म खात आंय, कि हम से मसीह के परचार में कोऊ रोक न होबे। का तुम हां पता नईंयां? कि जौन पवित्तर बस्तन की चाकरी खुसामद करत आंय, बे मन्दर में से खात आंय; और जौन वेदी की सेवा करत आंय; तो जो कछु वेदी पे चढ़ाओ जात आय ओई में से खात आंय? ऐई भांत से पिरभु ने सोई ठैराओ आय, कि जौन मान्स भलो सन्देसो सुनात आय, उन कौ पेट भरबो ओई से होबे। परन्त मैं इन में से कोऊ बात काम में न लाओ, और मैंने जे बातें ई लाने नईं लिखीं, कि मोरे लाने ऐसो करो जाए, कायसे ई से साजो तो मोरो मरबो भलो आय; कि कोऊ मोरो घमण्ड अकारथ ठैराबे। और जदि मैं भलो सन्देसो सुनाओं, तो मोरो कछु घमण्ड नईं, कायसे जौ तो मोरे लाने जरूरी आय; और जदि मैं भलो सन्देसो न सुनाओं, तो मो पे हाय। कायसे जदि अपनी मन्सा से जौ करत आंव, तो मजूरी मोहां मिलत आय, और जदि अपनी मन्सा से नईं करत, फिन भी जिम्मेदारी मोहां दई गई आय। सो मोरी मजूरी कौन सी आय? जौ कि भलो सन्देसो सुनाबे में मैं मसीह कौ भलो सन्देसो सेंत मेंत कर दों; इते लौ कि भले सन्देसे में मोरो जौन अधकार आय, ऊ को मैं सबई भांत से काम में लाओं। कायसे सबरे बन्धनों से छूटबे पे सोई मैंने अपने आप हां सबरन कौ चाकर बना दओ आय; कि बिलात जन हां ऐंच लाओं। मैं यहूदियन के लाने यहूदी बनो, कि यहूदियन हां ऐंच लाओं, जौन नैम व्यवस्था के अधीन आंय उन के लाने नैम व्यवस्था के अधीन न होबे पे सोऊ नैम व्यवस्था के अधीन बनो, कि जौन नैम व्यवस्था के अधीन आंय, ऐंच लाओं। नैम व्यवसथा न मानबेवारन के लाने मैं (जौन परमेसुर की नैम व्यवस्था के बिना नईं, परन्त मसीह की नैम व्यवस्था के अधीन आंव) बिना नैम व्यवस्थावारो बनो, कि बिना नैम व्यवस्थावारन हां ऐंच लाओं। मैं कमजोर मान्सन के लाने कमजोर बन गओ, कि कमजोर जन हां ऐंच लाओ, मैं सबरे मान्सन के लाने सबई कछु बनो आंव, कि कोऊ न कोऊ परकार से बिलात जनन कौ तरन तारन कराओं। मैं सब कछु भले सन्देसे के लाने करत आंव, कि मैं दूसरन कौ संग्गी बन जाओं। काय तुम हां पता नईंयां, कि दौड़ में बिलात जनें दौड़त आंय, अकेले इनाम एकई को मिलत आय, तुम ऊंसई दौड़ो कि इनाम पा जाओ। और सबरे पैलवान सबई परकार कौ संयम करत आंय, बे तो नास होबेवारे मुकट को पाबे के लाने जौ सब करत आंय, परन्त हम तो ऊ मुकट के लाने करत आंय, जौन नास न हुईय। ई लाने मैं तो ई परकार से दौड़त आंव, परन्त ऐसो नईं कि ठिकानो न होबे, मैं सोई ऐई परकार से घूंसों से लड़त आंव, परन्त उन घांई नईं जौन हवा को पीटत भए लड़त आंय। परन्त मैं अपनी देयां को मारत कूटत, और बस में करें रैत आंव; ऐसो न होबे कि दूसरन को परचार करके, मैं खुद कोई भांत से निकम्मो ठैरों। हे भईया हरौ, मैं नईं चाहत, कि तुम बे बातें न जानो, कि हमाए सबरे बूड़े पुराने बादल के नेंचें हते, और सबरे के सबरे समुन्दर के बीच से कड़ गए। और सबरन ने बादल में, और समुन्दर में, मूसा कौ बपतिस्मा लओ। और सबरन ने एकई आत्मिक भोजन करो। और सबरन ने एकई आत्मिक पानू पियो, कायसे बे ऊ आत्मिक चट्टान से पियत हते, जौन उन के संग्गै-संग्गै निंगत हती; और बो चट्टान मसीह हतो। अकेले परमेसुर उन में से बिलात जन से खुस नईं भओ, ई लाने बे हार में मर गए। जे बातें हमाए लाने कनौत ठैरीं, कि जैसो उन ने लालच करो, ऊं सई हम बुरई बस्तन कौ लालच न करें। और तुम मूरत पूजबेवारे न बनो; जैसे कि उन में से कितेक बन गए हते, जैसो लिखो आय, कि मान्स खाबे-पीबे हां बैठे, और खेलबे-कूदबे हां उठे। और न हम व्यभिचार करें; जैसो उन में से कितेक ने करो: और एक दिना में तेईस हजार मर गए। और न हम पिरभु को परखें, जैसो उन में से कितेक ने करो, और सांपन के काटे से नास भए। और न तुम कुड़कुड़ाओ, जैसे उन में से कितेक कुड़कुड़ाए, और नास करबेवारन से नास भए। परन्त जे सबरी बातें, जौन उन ने भोगी, कनौत घांई जैसी आंय, और बे हम हां चिताबे के लाने जौन संसार के नास होबे की बेरा में रैत आंय, लिखी गईं। ई लाने जौन समजत आय, कि मैं पक्को आंव, ऊ हुंसयार रैबे; कि क ऊं गिर न पड़े। तुम ऐसी कोऊ जांचबे परखबेवारी बात में नईं पड़े, जौन मान्स के सहबे के बायरें होबे: और परमेसुर सांचो आय: बो तुम हां सहबे से बायरें जांच परख में न पड़न दै है, परन्त जांच परख के संग्गै कछु उपाव सोई कर है; कि तुम सह सको। ई लाजें, हे मोरे प्यारो मूरत पूजा से बचे रओ। मैं तुम हां समजदार जानके कैत आंव: जौन मैं कैत आंव, ऊ ए जांचो परखो। बो धन्नबाद कौ कटोरा, जी पे हम धन्नबाद करत आंय, का मसीह के रकत की संगत नईंयां? बो रोटी जिये हम तोड़त आंय, का बो मसीह की देयां की संगत नईंयां? ई लाने कि एकई रोटी आय, सो हम सोई जौन बिलात आंय, एक देयां आंय: कायसे हम सबरे ओई रोटी में से खात आंय। जौन देयां के हिसाब से इस्राएली आंय, उन हां तको: का बलिदानों के खैबेवारे वेदी के भागी नईंयां? फिन मैं का कैत आंव? का जौ कि मूरत कौ बलदान कछु आय या मूरत कछु आय। नईं, परन्त जौ, कि दूसरी जातवारे जौन बलदान करत आंय, बे परमेसुर के लाने नईं, परन्त बुरई आत्माओं के लाने बलदान करत आंय: और मैं नईं चाहत, कि तुम बुरई आत्माओं के भागीदार होओ। तुम पिरभु के कटोरा, और बुरई आत्माओं के कटोरा दोईयन में से नईं पी सकत! तुम पिरभु के बैठका पे और बुरई आत्मा के बैठका दोईयन के भागीदार नईं हो सकत। का हम पिरभु को रिस दिलात आंय? का हम उन से बलवान आंय? सबरी बस्तें मोरे लाने सजी तो आंय, परन्त सबरी फायदा की नोंई: सबरी बस्तें मोरे लाने सई तो आंय, परन्त सबरी बस्तन से बढत नईंया। दूसरन की भलाई कौ जतन करो, अपनी नईं। जौन कछु कसाईयन के इते बिकत आय, बो खाओ और हिये में कोनऊं सोच न करो। कायसे संसार और जो कछु ऊ में है पिरभु कौ आय। और जदि दूसरी जातनवारन में से कोई तुम हां नेवता देबे, और तुम जाओ चाहो, तो जो कछु तुमाए सामूं धरो जाबे, ओई खाओ: और हिये के सोच के काजें कछु न पूछो। परन्त तुम से कोई जदि कैबे, जा तो मूरत हां चड़ाई गई बस्त आय, तो ओई बताबेवारे के काजें, और हिये के सोच के काजें न खाओ। मोरो मतबल, तोरे हिये की संका, सोच नईंयां, परन्त ऊ दूसरे जनें से आय, भला तोरी छूट औरन के सोच से काय जांची परखी जाबे। जदि मैं धन्नबाद करके भागीदार होत आंव, तो जीपे मैं धन्नबाद करत आंव, ऊके लाने मोहां खोरी काय लगाई जात आय। सो तुम चाए खाओ चाए पियो, चाए जो कछु करो, सबई कछु परमेसुर की मईमा के लाने करो। तुम न यहूदियन, न यूनानियन, और न परमेसुर की मण्डली के लाने उपटा के कारण बनो। जैसो मैं सोई सबरी बातन में सबरन को खुस राखत आंव, और अपनो नईं, परन्त बिलात जन कौ फायदा सोचत आंव, कि बे तरन तारन पाबें। तुम मोरी सी चाल चलो जैसो मैं मसीह की सी चाल चलत आंव। हे भईर्या हरौ, मैं तुमाई बड़बाई करत आंव, कि तुम सबरी बातन में मोहां सुमरन करत आव: और जौन ब्योहार मैंने तुम हां सिखा दए हते, तुम ऊं सई करत आव। सो मैं चाहत आंव, कि तुम जौ जानो, कि सबरे मन्सेलूअन कौ मूड़ मसीह आय: और बईयर कौ मूड़ मन्सेलू आय: और मसीह कौ मूड़ परमेसुर आय। जौन मन्सेलू मूड़ ढांक के बिन्तवाई या अगमबानी करत आय, बो अपने मूड़ कौ मान नईं करत। परन्त जौन बईयर मूड़ उगारें बिन्तवाई या अगमबानी करत आय, बो अपने मूड़ कौ मान नईं करत, कायसे बा तो मुन्डी होबे के बिरोबर आय। जदि बईयर मूड़ न ढांके, तो बाल सोई कटवा लेबे; जदि बईयर के लाने बाल कटवाओ या मुड़वाओ लाज की बात आय, तो पल्लू से मूड़ ढांके। हओ, मन्सेलू को अपनो मूड़ ढांकबो सई नईंयां, कायसे बौ परमेसुर कौ रुप जैसो और मईमा आय; परन्त बईयर मन्सेलू की मइ्रर्मा आय! कायसे मन्सेलू बईयर से नईं भओ, परन्त बईयर मन्सेलू से भई आय। और मन्सेलू बईयर के लाने नईं रचो गओ, परन्त बईयर मन्सेलू के लाने रची गई आय। ई लाने सरगदूतन के काजें बईयर हां सई आय, कि अधीनता कौ मान अपनी मूड़ पे धरे। परन्त पिरभु में न तो बईयर बिना मन्सेलू के, न मन्सेलू बिना बईयर के आय। कायसे जैसे बईयर मन्सेलू से आय, ऊं सई मुन्सेलू बईयर के द्वारा आय; परन्त सबरी बस्तें परमेसुर से आंय। तुम आपई सोचो, का बईयर को उघाड़े मूड़ परमेसुर से बिन्तवाई करबो साजो आय। का तुम हां नईं पता, कि जदि मन्सेलू बड़े बाल राखे, तो ओई कौ मान घटत आय। परन्त जदि बईयर बड़े बाल राखे; तो ऊके लाने सुन्दरता आय, कायसे बाल ऊ को ओढ़नी के लाने दय गए आंय। परन्त जदि कोई बात बतकाओ करो चाए, तो बो जौ जान लैबे कि हमाई और न परमेसुर की मण्डली की ऐसी रीत आय। परन्त जौ हुकम देत भए, मैं तुमाई बड़वाई नईं करत, ई लाने कि तुमाए संग्गै जुड़बे से भलो नईंयां, परन्त नुकसान होत आय। कायसे कि पैले तो मैं जौ सुनत आंव, कि जब तुम मण्डली में जुड़त आव, तो तुमए बीचा फूट रैत आय और मैं कछु कछु सांची सोई मानत आंव। कायसे तुम में दलबन्दी जरूर से हुईये, ई लाने कि जौन मान्स तुम में से सांचे कड़े, बे उजागर हो जाबें। सो तुम जौन एक जांगा जुड़त आव तो जौ पिरभु की बियारी करबे हां नोंई। कायसे खाबे की बेरा, एक दूजे से पैले अपनी बियारी कर लेत आय, और कोऊ तो भूखो रैत आय, और कोऊ मतवारो हो जात आय। का खाबे पीबे के लाने तुमाए घर नईंयां? या परमेसुर की मण्डली हां ओछो समजत आव, और जिन लौ नईंयां उन हां लज्जित करत आव? मैं तुम से का कओं? का ई बात में तुम औरन की बड़वाई करों? मैं बड़वाई नईं करत। कायसे कि जा बात मोय पिरभु से पोंची, और मैंने तुम हां पोंचा दई; कि पिरभु यीशु ने जौन रात बो पकड़वाओ गओ रोटी लई। और धन्नवाद करके रोटी तोड़ी, और कओ; कि जा मोरी देयां आय, जौन तुमाए लाने आय: मोरे सुमरन के लाने जौई करौ। ओई भांत से पिरभु ने बियारी के पाछें कटोरा सोई लओ, और कओ; जौ कटोरा मोरे रकत में नओ कौल आय: जब कभऊं पियो, तो मोरे सुमरन के लाने जौई करे करौ। कायसे जब कभऊं तुम जा रोटी खात, और ई कटोरा में से पियत आव, तो पिरभु की मौत हां जब लौ बो न आबै, परचार करत आव। ई लाने जौन कोऊ अपने आप को बिन जांचे परखे पिरभु की रोटी खाबै, या उनके कटोरा में से पीबे, बो पिरभु की देयां और रकत कौ अपराधी ठैर है। ई लाने मान्स अपने आप को जांच परख लेबे, और ऐई भांत से ई रोटी में से खाबै, और ई कटोरा में से पीबे। कायसे कि जौन खात पियत बेरा पिरभु की देयां हां न चीने, बो खाबे और पीबे से अपने ऊ परे दांड़ लात आय। ऐई काजें तुम में से बिलात जने कमजोर और रूगिया आंय, और बिलात जने मर सोई गए। जदि हम अपने आप हां जांचते, तो दांड़ न पाते। परन्त पिरभु हम हां दांड़ देके हुंसयार करत आय, कि संसार के संग्गै हम पे लांछन खोरी न आबै। ई लाने हे मोरे भईया हरौ, जब तुम खाबे के लाने इकट्ठे होत आव, तो एक दूजे के लाने ठैरे करो। जदि कोऊ भूखो होबे, तो अपने घर में खा लेबे, जीसे तुमाओ इकट्ठो होबो दांड़ कौ काज न होबे: बची कुची बातन हां मैं आके सुदार दै हों। हे भईया हरौ, मोरी मनसा आय कि तुम आत्मिक बरदान जानो। तुम हां पता आय, कि जब तुम दूसरी जातवारे हते, तो गूंगी मूरतन के पाछें जैसे निंगाए जात हते, ऊं सई निंगत हते। ई लाने मैं तुम हां चिताए देत आंव कि जौन कोई आत्मा के उसकेरे से बोले, ऊ नईं कैत कि यीशु बुरओ आय; और न कोऊ पवित्तर आत्मा के बिना कै सकत आय कि यीशु पिरभु आय। बरदान तो कुल्ल भांत के आंय, परन्त आत्मा एकई आय। और सेवा खुसामद सोई कुल्ल भांत की आंय, परन्त पिरभु एकई आय। और बड़े नामी काम कैऊ भांत के आंय, परन्त परमेसुर एकई आय, जौन सबरन में सबई कछु करबे की चाहना जगात आय। परन्त सबरन हां लाभ पोंचाबे हां, सबई हां आत्मा की जोत दई जात आय। कायसे एक हां आत्मा से समज की बातें दईं जात आंय; और दूजे हां ओई आत्मा से ज्ञान की बातें। और कोऊहां ओई आत्मा से बिसवास; और कोऊहां ओई एक आत्मा से साजो करबे कौ बरदान दओ जात आय। फिन कोऊहां अचरज के काम करबे हां सक्ति; और कोऊहां अगमबानी की; और कोऊहां आत्माओं की जांच परख; और कोऊहां कुल्ल भांत की भाषा; और कोऊहां भाषा कौ मतलब बताबो। परन्त जे सबरे असरवारे काम ओई एक आत्मा करवात आय, और जिये जो चाहत आय ऊ बांट देत आय। कायसे जौन भांत देयां तो एकई आय, परन्त ऊ में अंग बिलात आंय, और ऊ एक देयां के सबरे अंग, बिलात होबे पे सोई सबरे जुड़ के एकई देयां आय, ओई भांत मसीह सोई आय। कायसे कि हम सबरन ने का यहूदी, का यूनानी, चाए दास, या छुट्टा, एकई आत्मा से एक देयां होबे के लाने बपतिस्मा लओ, और हम सबरन हां एकई आत्मा पिबाओ गओ आय। जैसे कि देयां में एकई अंग नईंयां, परन्त बिलात के आंय। जदि गोड़ो काबे; कि मैं हाथ नईंयां, ई लाने देयां कौ नईंयां, तो का बो ई काजें देयां कौ नईंयां? और जदि कान काबे; कि मैं आंख नईंयां, ई लाने देयां कौ नईंयां, तो का बो ई काजें देयां कौ नईंयां। जदि सबरी देयां आंख ही होती, तो सुनबो कां होतो? जदि सबरी देयां कान ही होती, तो सूंघबो कां होतो? परन्त सांचई परमेसुर ने अंगों हां अपनी चाहना अनसार एक एक कर के देयां में धरो आय। जदि बे सबरे एकई अंग होते, तो देयां कां होती? परन्त अब अंग तो बिलात आंय, परन्त देयां एकई आय। आंख हाथ से नईं कै सकत, कि तें मोरे काम कौ नईंयां, और न मूड़ गोड़न से कै सकत आय, कि तें मोरे काम कौ नईंयां। परन्त देयां के बे अंग जौन औरन से कमजोर दिखात आंय, भौत जरूरी आंय। और देयां के जौन अंगों हां मान जोग नईं समजत आंय, उनई हां हम अधक मान देत आंय; और हमाए बुरय लगबेवारे अंग औरई बिलात अच्छे लगन लगत आंय। फिन भी हमाए साजे अंगों हां ईसे काम नोंईं, परन्त परमेसुर ने देयां हां ऐसो बना दओ आय, कि जौन अंग ओछो लेखो जात हतो ऊहां और बिलात कौ मान बढ़े। जीसे देयां में फूटन न पड़ै, परन्त अंग बिरोबर दूसरे अंगों की चिन्ता करें। ई लाने जदि एक अंग में पिरातो होबे, तो सबरे अंग ऊके संग्गै पीड़ा पाऊ त आंय; और जदि एक अंग की बड़वाई होत आय, तो ऊके संग्गै सबरे खुसी मनात आंय। ऐई भांत तुम सबरे जुड़ के मसीह की देयां आव, और अलग अलग ऊके अंग आव। और परमेसुर ने मण्डली में अलग अलग मान्स राखे आंय; पेंला प्रेरित, दूजे अगमवकता, फिन गुरूजन, फिन अचरज के काम करबेवारे, फिन साजो करबेवारे, और भलाई करबेवारे, और मुखिया, और बिलात भांत की भाषा बोलबेवारे। का सबरे चेला आंय? का सबरे अगमवकता आंय? का सबरे गुरूजन आंय? का सबरे अचरज के काम करबेवारे आंय? का सबरन हां साजो करबे कौ बरदान मिलो आय? का सबरे भांत भांत की भाषा बोलत आंय? का सबरे भाषा कौ मतलब बतात आंय? तुम बड़े से बड़े बरदानों की चाहना में मगन रओ! परन्त मैं तुम हां और सबसे साजी गैल बतात आंव। जदि मैं मान्सन और सरगदूतन की बोलियां बोलों, और प्रेम न धरों, तो मैं ठनठानात भओ पीतल, और झनझानात भई झांझ आंव। और जदि मैं अगमवानी कर सकों, और सब भेदों और ज्ञान को समजों, और मोय इते लौ पक्को बिसवास होबे, कि मैं पहारवन हां हटा देओं, परन्त प्रेम न धरों, तो मैं कछु लौ नईंयां। और जदि मैं अपनी सबरी जादाद गरीब गुरवन को खबा देओं, या अपनी देयां बारवे के लाने दे देओं, और प्रेम न धरों, तो मोहां कछु भी फायदा नईंयां। प्रेम धीरज धरत आय, दया करबेवारो आय; प्रेम बैर की गांठ नईं बाधें रैत; प्रेम अपनी बड़वाई नईं करत, और घमण्ड में नईं बनो रैत। बो बुरई चाल नईं चलत, बो अपने भले की नईं सोचत, खिसयात नईंयां, बुरओ नईं मानत। बुरए काम से खुस नईं होत, परन्त संचाई से खुस होत आय। बो सबरी बातें सह लेत आय, सबरी बातन कौ बिसवास करत आय, सबरी बातन में आसा राखत आय, सबरी बातन में धीरज धरत आय। प्रेम कभऊं टलत नईंयां; अगमबानी होबें तो मिट जै हैं; भाषाएं बोली होबें तो जात रै हैं; ज्ञान होबे, तो मिट जै है। कायसे कि हमाओ ज्ञान आधो आय, और हमाई अगमबानी आधी। परन्त जब सर्वसिद्ध आ है, तो आधो मिट जै है। जब मैं हलको बच्चा हतो, तो मैं हलके बच्चा घांई बोलत हतो, बच्चन के जैसो हिया हतो, बच्चन के जैसी समज हती; परन्त जब सियानो हो गओ, तो बच्चन की बातें छोड़ दईं। अब हम हां ऐना में धुंधलो सौ दिखाई देत आय; परन्त ऊ बेरा आमूं सामूं हेर हैं, अबै तो मोरो ज्ञान अधूरो आय, परन्त ऊ बेरा भली भांत चीन्ह हों, जैसो मैं चीनो गओ आंव। पर अब बिसवास, आसा, प्रेम जे तीनईं पक्के से बने रैत आंय, परन्त इन में प्रेम सब से बढ़ के आय। प्रेम की चाल पे चलो, और आत्मा के बरदानों की धुन पाबे में लगे रओ, खास करके जौ कि अगमवानी करो। कायसे जौन कोई दूसरी बोली में बातें करत आय: बो मान्सन से नईं, परन्त परमेसुर से बातें करत आय; ईसे कि कोई ऊ की बात नईं समजत; कायसे बो अपने मन के भेद की बातें परमेसुर से कैत आय। परन्त जौन अगमवानी करत आय, बो मान्सन की बढ़ती, और उपदेस, और सान्ति की बातें कहत आय। जौन दूसरी भाषा में बातें करत आय, बो अपनी बढ़ती करत आय; परन्त जौन अगमवानी करत आय, बो समाज की बढ़ती करत आय। मैं चाहत आंव, कि तुम सबरे दूसरी भाषाओं में बातें करो, परन्त और अधक जौ चाहत आंव कि अगमवानी करो: कायसे कि दूसरी भाषा बोलबेवारो समाज की बढ़ती के लाने अनुवाद न करे तो अगमवानी कैबेवारो ऊसे बढ़ के आय। ई लाने हे भईया हरौ, जदि मैं तुमाए ऐंगर आके दूसरी भाषा में बात करों, और बुद्धमानी, या ज्ञान समज, या अगमवानी, या उपदेस की बातें तुम से न कओं, तो तुम हां मो सें का फायदा हुईये? ऐई भांत जदि बिना जी वारी बस्तें सोई, जिन से आवाज कड़त आय मानौ बांसरी, या बीन, जदि उनकी आवाज में अन्तर न होबे, तो जौन फूंको या बजाओ जात आय, तो बो कौन भांत चीनो जै है? और जदि तुरही की आवाज साफ न होबे, तो को लड़ाई के लाने तईयारी कर है? ऐसई तुम सोई जदि जीभ से साफ साफ बातें न कओ, तो जो कछु कओ जात आय, बो कैसे समजो जै है? तुम तो बैहर से बातें करबेवारे कहा हौ। संसार में बिलात भांत की भाषाएं बोली जात होबें, परन्त उन में कोऊ बिना मतलब की नईं होत हुईंयें। ई लाने जदि मैं कोऊ भाषा कौ मतलब न समझों, तो बोलबेवारे की समज में मैं परदेसी ठैर हों; और बोलबेवारो मोरी समज में परदेसी ठैर है। ई लाने तुम सोई जब आत्मा के बरदानों की बड़ी लगन लगाए आव, तो ऐसी कोसस करो, कि तुमाए बरदानों की बढ़ती से समाज की बढ़ती होबे। ई काजें जौन दूसरी भाषा बोले, तो बो बिन्तवाई करे, कि ऊकौ मतलब सोई बता पाबे। ई लाने जदि मैं दूसरी भाषा में बिन्तवाई करों, तो मोरी आत्मा बिन्तवाई करत आय, परन्त मोरी समज काम नईं देत। सो का करो चईये? मैं आत्मा से सोई बिन्तवाई कर हों, और समज से सोई बिन्तवाई कर हों; मैं आत्मा से गाहों, और समज से सोई गाहों। नईं तो जदि तें आत्मा से धन्नबाद कर है, तो फिन बेसमज तोरे धन्नवाद पे आमीन काय को कै है? ई लाने कि बो तो नईं समजत, कि तें का कैत आय? तें तो भले हिये से धन्नवाद करत आय, परन्त दूसरे को भलो नईं होत। मैं अपने परमेसुर कौ धन्न मानत आंव, कि मैं तुम सबरन से बढ़के दूसरी दूसरी भाषा में बोलत आंव। परन्त समाज में दूसरी भाषा में दस हजार बातें कैबे से जौ मोहां और साजो जान पड़त आय, कि दूसरन को सिखाबे के लाने समज से पांचई बातें कओं। हे भईया हरौ, तुम समज में हलके बच्चा न बनो: जानें कि बुराई में तो हलके बच्चा रओ, परन्त समज में सियाने बनो। नेम व्यवस्था में लिखो आय, कि पिरभु कैत आय; मैं दूसरी भाषा बोलबेवारन के द्वारा, और दूसरन के मों से इन औरन से बातें कर हों अकेले बे मोरी न सुन हैं। ई लाने दूसरी दूसरी भाषा बोलबो बिसवास करबेवारन के लाने नईं, परन्त बिसवास न करबेवारन के लाने चिन्ह आंय, और अगमवानी बिसवास न करबेवारन के लाने नईं पर बिसवास करबेवारन के लाने चिन्ह आंय। सो जदि समाज एक जांगा जुड़ी होबे, और सबरे जने दूसरी दूसरी भाषा बोलें, और जौन पढ़ो लिखो नईंयां और बिसवास न करबेवारे मान्स भीतरे आ जाबें, तो का बे तुम हां पगला न कै हैं? परन्त जदि सबरे अगमबानी करन लगें, और कोऊ बिना बिसवास करबेवारो या बिना पढ़ो लिखो मान्स भीतरे आ जाबै, तो सबरे ऊहां लांछन लगा हैं और जांच परख लै हैं। और ऊके हिये की लुकी भई बात उजागर हो जै है, और उतईं बो मों के बल गिरके परमेसुर को परनाम कर है, और मान लै है, कै सांची में परमेसुर तुमाए मजारें आय। ई लाने हे भईया हरौ का करो चईये? जब तुम सब जुड़त आव, तो हर एक में भजन, उपदेस या दूसरी भाषा या जोत, या दूसरी भाषा कौ मतलब बताबो रैत आय: सबई कछु आत्मिक बढ़ती के लाने होबो चईये। जदि दूसरी भाषा में बात करने होबे, तो दो दो या बिलात के होबें तो तीन तीन जनें बारी बारी से बोलें, और एक जनो ऊकौ मतलब बताबै। परन्त जदि मतलब बताबेवारो न होबे, तो दूसरी भाषा बोलबेवारो समाज में चिमानो रय, और अपने हिये से, और परमेसुर से बतकाओ करे। अगमवानी बोलबेवारन में से दो या तीन बोलें, और बचे भए जनें उन की बातन को जाचें परखें। परन्त जदि दूसरे पे जौन बैठो आय, कछु परमेसुर की जोत उजागर होबे, तो पेंलावारो चिमानो रय। कायसे कि तुम सबरे एक एक करके अगमवानी कर सकत आव जीसे सबरे सीखें, और सबरे सान्ति पाबें। और अगमवानी करबेवारन की आत्मा अगमवानी करबेवारन के वस में आय। कायसे परमेसुर बिगाड़ करबेवारो नईंयां, परन्त सान्ति देबेवारो आय; जैसो पवित्तर मान्सन की सबरी समाजों में आय। बईयरें समाज की सभा में चिमानी रैबें, कायसे उनहां बातें करबे कौ हुकम नईंयां, परन्त हुकम के वस में रैबें: जैसो नेम व्यवस्था में सोई लिखो आय। और जदि बे कछु सीखो चाएं, तो घर में अपने अपने मुन्सेलू से पूछें, कायसे बईयर हां समाज में बतकाओ करबो लज्जा की बात आय। का परमेसुर को बचन तुम में से कड़ो? या अकेलो तुमईं लौ पोंचो आय? जदि कोऊ मान्स अपने हां अगमवकता या आत्मिक जनो समजे, तो जौ जान लेबे, कि जौन बातें मैं तुम हां लिखत आंव, बे पिरभु के हुकम आंय। परन्त जदि कोऊ न जानें, तो न जानें। सो हे भईया हरौ, अगमवानी कहबे की लगन में रओ और दूसरी भाषा बोलबे से न हटकौ। पर सबरी बातें सई भांत और नेम अनसार होबें। हे भईया हरौ, मैं तुम हां ओई भलो सन्देसो बतात आंव जौन पेंला सुनाओ हतो, जिए तुम ने मान सोई लओ हतो और जी में तुम पक्के सोई आव। ओई से तुमाओ तरन तारन सोई होत आय, जदि ऊ भले सन्देसे को जौन मैंने तुम हां सुनाओ हतो सुमरन करत आव; नईं तो तुमाओ बिसवास करबो अकारथ भओ। ऐई से मैंने सब से पेंला तुम हां ओई बात पोंचा दई, जौन मोहां मिली हती, कि पवित्तर धर्मपोथी के बचन के अनसार यीशु मसीह हमाए पापों के लाने मर गओ। और गाड़ो गओ; और पवित्तर धर्मपोथी के अनसार तीसरे दिना जी सोई उठो। और कैफा को, फिन बारह जनों हां दिखाई दओ। फिन पांच सौ से अधक भाईयन हां एक संग्गै दिखाई दओ, जिन में से बिलात के अबै लौ जीयत आंय अकेले कैऊ बड़ा गए। फिन याकूब हां दिखाई दओ, तब सबरे चेलन हां दिखाई दओ। और सबरन के पाछें मोहां सोई दिखाई दओ, जौन मानो आधे दिना कौ जन्मो आंव। कायसे कि मैं चेलन में सबई से हलको आंव, इते लौ कि चेला कहाबे के जोग सोई नईंयां, कायसे कि मैंने परमेसुर की समाज को सताओ हतो। परन्त मैं जो कछु आंव, परमेसुर की दया से आंव: और उनकी जौन दया मो पे भई आय, बा अकारथ नईं गई; परन्त मैंने उन सबरन से बढ़के मैनत सोई करी: जानो कि जौ मोरी कुदाऊं से नईं भओ परन्त परमेसुर की दया से जौन मो पे हती। सो चाए मैं होओं, चाए बे होबें, हम जौई परचार करत आंय, और ऐई पे तुम ने बिसवास धरो आय। सो जब मसीह कौ जौ परचार करो जात आय, कि बो मरे भयन में से जी उठो, तो तुम में से कैऊ काय हां कैत आंय, कि मरे भयन कौ जी उठबो हैई नईंयां। जदि मरे भयन को जी उठबो नईंयां, तो मसीह सोई नईं जी उठो। जदि मसीह नईं जी उठो, तो हमाओ परचार करबो सोई अकारथ आय; और तुमाओ बिसवास करबो सोई अकारथ आय। जाने कि हम परमेसुर के लबरे गवाय ठैरे; कायसे कि हम ने परमेसुर के बारे में जा गवाय दई, कि उन ने मसीह हां जिला दओ परन्त जदि मरे भए सांचई में नईं जिलाए जाते, तो उन ने मसीह हां सोई नईं जिलाओ। और जदि मरे भए नईं जी उठत, तो मसीह सोई नईं जी उठो। और जदि मसीह नईं जी उठो, तो तुमाओ बिसवास अकारथ आय; और तुम अब लौ अपने पापन में उलझे आव। और जौन मसीह में बिसवास धरें मर गए, बे सोई नास भए। जदि हम अकेले अबई जीयत भए मसीह सें आसा राखत आंय, तो हम सबरे मान्सन से अभागे आंय। परन्त सांचई मसीह मरे भयन में से जी उठो आय, और जौन सो गए आंय, उन में सब से पेंला जीबेवारो भओ। कायसे कि जब मान्स से मौत आई; तो मान्स से मरे भयन को जी उठबो सोई आओ। और जैसे आदम में सबरे मरत आंय, ऊं सई मसीह में सबरे जिलाए जै हैं। परन्त सबई कोई अपनी अपनी बेरा पे; पैलो फल मसीह; फिन मसीह के आबे पे उनके जनें। ईके पाछें अन्त हुईये; ऊ बेरा बो सबरो राज और सबरे अधकार और बल सक्ति हां खतम करके राज्य हां परमेसुर बाप के हाथ में दे दै है। कायसे कि जब लौ बो अपने बैरियन हां अपने गोड़न तरें न ले आ है, तब लौ उन कौ राज करबो जरूरी आय। सबई से पाछें कौ बैरी जौन नास करो जै है बा मौत आय। कायसे कि परमेसुर ने सबई कछु उनके गोड़न तरें कर दओ आय, परन्त जब बो कैत आय कि सबई कछु ऊके अधकार में कर दओ गओ आय, तो जा बात साफ आय, कि जीने सबई कछु उनके अधकार में कर दओ, बो खुद अलग रओ। और जब सबई कछु उनके अधकार में हो जै है, तो बेटा सोई खुद उनके अधकार में हो जै है, जीने सबई कछु उनके अधकार में कर दओ; जीसे सबई में परमेसुर सब कछु होबे। नईं तो जौन मान्स मरे भयन के लाने बपतिस्मा लेत आंय, बे का कर हैं? जदि मुरदे जी उठतई नईंयां, तो फिन काय उन के लाने बपतिस्मा लेत आंय? और हम सोई काय सबरे हार जोखम में पड़े रैत आंय? हे भईया हरौ, मोय ऊ घमण्ड की कौल जौन हमाए पिरभु यीशु मसीह में, मैं तुमाए बारे में करत आंव, कि मैं रोजीना मरत आंव। जदि मैं मान्सन की रीत पे इफिसुस में बन जनावर से लड़ो, तो मोय का लाभ भओ? जदि मरे जिलाए नईं जै हैं, तो आओ, खाबें-पीबें, कायसे कल तो मर जै हैं। धोखा न खाओ, बुरओ संग साथ साजे चरित्र को बिगाड़ देत आय। धरम के लाने जाग उठो और पाप न करो; कायसे कि कितेक ऐसे आंय जौन परमेसुर को नईं जानत, मैं तुम हां लजाबे हां जौ कैत आंव। अब कोई जौ कै है, कि मरे भए कौन भांत से जी उठत आंय, और कौन तरहां की देयां संग्गै आत आंय? अरे मूरख, जो कछु तें बोत आय, जब लौ बो न मरे, जिलाओ नईं जात। तें जो बोत आय, जा बा देयां नईंयां जौन पैदा होबेवारी आय, परन्त खालस दाना आय, चाए गोंऊं कौ, चाए कोऊ और नांज कौ। परन्त जब परमेसुर अपनी मन्सा के अनसार ऊहां देयां देत आय; और हर एक बीज हां ऊ की खास देयां। सबई की देयां एक भांत नईंयां, परन्त मान्सन की देयां और आय, और जानवरों की देयां और आय; पंछियन की देयां और आय, मछरियन की देयां और आय। सरगवारन की देयां आय, और संसार वारन की देयां सोई आय: परन्त सरगवारन की देयां कौ तेज और आय, और संसार वारन कौ और। सूरज कौ तेज और आय, चांद कौ तेज और आय, और तारागणों कौ तेज और आय, (कायसे कि एक तारे से दूसरे तारे के तेज में अन्तर आय)। मरे भयन कौ जी उठबो सोई ऐसई आय, देयां मिटबेवारी दसा में बोई जात आय और न मिटबेवारे रूप में जी उठत आय। बो बिना आदर के संग्गै बोई जात आय, और तेज के संग्गै जी उठत आय; कमजोरी के संग्गै बोई जात आय; और बड़े बल के संग्गै जी उठत आय। संसारी देयां बोई जात आय, और आत्मिक देयां जी उठत आय, जैसे संसारी देयां आय, तो आत्मिक देयां सोई आय। ऐसई लिखो सोई आय, कि पैलो मान्स, आदम जीबेवारो प्रानी बनो, और आखरी आदम, जीवन देबेवारो आत्मा बनो। परन्त पैलो आत्मिक न हतो, पर संसार कौ हतो, ईके पाछें, आत्मिक भओ। पैलो मान्स धरती से, जाने कि माटी कौ हतो; दूसरो मान्स सरग कौ आय। जैसे बो माटी कौ हतो, ऊं सई और माटी के आंय; और जैसो बो सरग कौ आय, ऊं सई और सरगवारे आंय। और जैसे हम ने ऊकौ रूप, जौन माटी कौ हतो ले लओ, ऊंसई ऊ सरगवारे कौ रूप सोई ले लें हैं। हे भईया हरौ, मैं जौ कैत आंव कि मांस और रकत परमेसुर के राज के अधकारी नईं हो सकत, और न नास होबेवारो अमरता कौ अधकारी हो सकत आय। हेरो, मैं तुम से भेद की बात कैत आंव: हम सबरे तो न मर हैं, पर सबरे बदल जै हैं। और जो छिन्न भर में, पलक झपकत पिछली तुरही फूंकत हुईये: और मरे भए अमरता की दसा में जिलाए जै हैं, और हम बदल जै हैं। कायसे कि जरूरी आय, जा मिटबेवारी देयां अमरता हां पैर लेबे, और जा मरबेवारी देयां अमरता हां पैर लेबे। और जब जा नास होबेवारी अविनास हां पैर लै है, और जा मरबेवारो अमरता हां पैर लै है, तब बो बचन जौन लिखो आय पूरो हो जै है, कि जय ने मौत हां निगल लओ। हे मौत तोरी जय कां रई? हे मौत तोरो डंक कां रओ? मौत कौडंक पाप आय; और पाप कौ बल नेम व्यवस्था आय। परन्त परमेसुर कौ धन्न होबे, जौन हमाए पिरभु यीशु मसीह के द्वारा हम हां जीत दिलात आय। सो हे मोरे प्यारे भईया हरौ, पक्के बने रओ, और पिरभु के काम में बढ़त जाओ, कायसे कि जानत आव, कि तुमाई मैनत पिरभु में अकारथ नईंयां। अब ऊ दान के बारे में जौन पवित्तर जनों के लाने जोड़ो जात आय, जैसो हुकम मैंने गलतिया की मंडलियन हां दओ, ऊंसई तुम सोई करो। हप्ताह के पैले दिना तुम में से सबरे जने अपनी कमाई के अनसार कछु बचा के धर छोड़े, कि मोरे आबे पे दान न जोड़ने पड़े। और जब मैं आहों, तो जिन हां तुम चाहौ उनहां चिठिया देके पठै दें हों, कि तुमाओ दान यरूशलेम पोंचा दें। और जदि मोरो जाबो नोंनो रै है, तो बे मोरे संग्गै चले जै हैं। और मैं मकिदुनिया होकें तुमाए ऐंगर आहों, कायसे कि मोय मकिदुनिया होकें तो जाने आय। परन्त हो सकत आय कि तुमाए इते रुक जाओं और शरद ऋतु के दिना तुमाए इते काटों, तब जां मोरो जाबो हुईये, तुम पठै दईयो। कायसे मैं अब गैल में तुम से नईं मिलो चाहत; परन्त मोय आसा आय, कि जदि पिरभु चाए, तो कछु बेरा लौ तुमाए संग्गै रै हों। परन्त मैं पिन्तकुस्त लौ इफिसुस में रै हों। कायसे मोरे लाने एक बड़ो और काम कौ दोरो खुलो आय, और बिरोधी बिलात के आंय। जदि तीमुथियुस आ जाबै तो हेरिओ; कि बो तुमाए इते बिना डर के रैबे; कायसे बो मोरे घांई पिरभु कौ काम करत आय। ई लाने कोऊ ऊहां नेंचो न माने, परन्त ऊहां सुतारें ई कोद पठै दईयो, कि मोरे ऐंगर आ जाबे; कायसे मैं ऊ की बाट तक रओ आंव, कि बो भाईयन के संग्गै आबै। और अप्पुल्लोस भईया से मैंने बिलात बिन्तवाई करी आय, कि बो तुमाए ऐंगर भाईयन के संग्गै जाबै; परन्त ऊ ने ई बेर जाबे हां कछु लौ अभलाखा न करी, परन्त जब मौका हुईये तब आ जै है। हुंसयार रओ, बिसवास में पक्के बनो, संयमी जीवन जियो, बल सक्ति से भर जाओ। जो कछु करत आव प्रेम से करो। हे भईया हरौ, तुम स्तिफनास के घरवारन हां जानत आव, कि बे अखया में सबसे पेंला बिसवास लाए हते, और पवित्तर जनों की सेवा खुसामद हां तईयार रैत आंय। सो मैं तुम से बिन्तवाई करत आंव कि ऐसन कौ कओ मानो, जाने सबई कोई के जौन ई काम में मैनती और संग्गी आय। और मैं स्तिफनास और फूरतूनातुस और अखइकुस के आबे से खुस आंव, कायसे उन ने तुमाई घटी पूरी करी आय। और उन ने मोरो और तुमाओ हिया जूड़ो करो आय, ई लाने ऐसन हां मानो। आसिया की मण्डली कोद से तुम हां नमस्कार: अक्विला और प्रिसका कौ और उन के घराने की मण्डली कौ सोई तुम हां पिरभु में कुल्ल बिलात कौ नमस्कार। सबरे भईयन कौ तुम हां नमस्कार: पवित्तर चूमा से एक दूजे हां नमस्कार करो। मैं पौलुस कौ अपने हाथन से लिखो भओ नमस्कार: जदि कोई पिरभु से प्रेम न धरे ऊ पे तुरतईं विपदा पड़े। हमाओ पिरभु आबेवारो आय। पिरभु यीशु मसीह की दया तुम पे होत रैबे। मोरो प्रेम मसीह यीशु में तुम सबरन से रैबे। आमीन। पौलुस ने लिखी जौन परमेसुर की मंसा से मसीह यीशु को प्रेरित भओ, और तीमुथियुस भईया से परमेसुर की ऊ मण्डली के नाओं जौन कुरिन्थुस में आय; अखया में सबरे घर बिरादरी के लोगन के नाओं। हमाए पिता परमेसुर और पिरभु यीशु मसीह से तुम हां दया और सान्ति मिलत रए। हमाए पिरभु यीशु मसीह के परमेसुर, और पिता को धन्न होबे, जौन दया करबेवारे पिता आंय, और सब सान्ति कौ परमेसुर आय। बो हमाए सबरे पिराते में सान्ति देत आय; कि ऊ सान्ति से जौन परमेसुर हम हां देत आय, उन हां सोई सान्ति देबे, जौन कोई पिराते से दुखी होबे। कायसे जैसे मसीह के कारण हम हां बिलात पिरातो होत आय, ऊं सई हमाई सान्ति भी मसीह से बिलात होत आय। जदि हम दुख में पड़े आंय, तो ईसे तुम हां सान्ति और तरन तारन के लाने आय और जैसे सान्ति मिलत आय, तो तुमाई सान्ति के लाने आय; जीके जोर से तुम चिमाने उन पिरातों हां सह लेत आव, जैसे हम सोई सहत आंय। हमाई आस तुमाए लाने बड़ी आय, कायसे हम हां पता आय, कि जैसो दुख तुम हां मिलत ऊं सई सान्ति सोई जुड़त आय। भईया हरौ, हम नईं चाहत कि तुम हमाए उन दुखों हां न जानो, जौन आसिया में हमने भुकते, कि हम ऐसे दबे चपे हते, जौन हमाए सैबे से बायरें हतो, ऐसो लगत हतो कि जान से जै हैं। हम ने तो अपने मन में सोच लओ हतो, कि हम पै मौत की सजा हो गई हती हम अपनो कछु भरोसा न राखें, अकेले पिरभू यीशु को जौन मरे भयन को जिलात आय। उनई ने हमें इतनी बड़ी मौत से बचाओ, और बचे आंय; और उन से हमें जाई आस आय, कि बे आगे सोई बचा हैं। तुन सोई जुड़के बिन्तवारी करके हमाओ हाथ बटा हौ, कि जौन बरदान मिलो आय, उनसे बिलात जनें हमाए लाने धन्न मानें। कायसे हम अपने हिये की जा बात मानत आंय, कि और ऊ पै बड़वाई करत आंय, कि संसार में और तुमाए बीच हमाई चाल परमेसुर को भाबेवारी पवित्तर और सांची हती, और ऐसो संसार के ज्ञान से नोंई, अकेले परमेसुर की दया से भई। हम तुम हां और कछु नईं लिखत, अकेले बेई बातें जौन तुम पढ़त और मानत आव, और मोहां आस आय, कि अन्त लौ मानत रै हौ। जैसो तुम में से किेत्ते जनों ने मान लओ आय, हम से तुमाई बड़वाई भई आय; और तुम सोई पिरभू यीशु के दिना जो फिन आहै तुम से हमाई बड़वाई हुईये। ऐई से मोरी चाहना हती कि पेंला तुम लौ आओं; कि तुम हां एक और बरदान मिलै। तुम लौ होत में मकिदुनिया जाओं, और फिन के मकिदुनिया होकें तुम लौ आओं; और तुम मोय कछु गैल यहूदिया की धरा देओ। सो जा मरजी जौन मोरी भई तो का मैंने अपने मन से करो आय? जौन बात करत आंव का बिना सोचे करत आंव, और सबरी बातन हां करो चाहत आंव। और नईं सोई करत आंव, परमेसुर जानत आय कि हमाई बातन में दोई हां और नईं नईयां। कायसे परमेसुर को पुत्तर पिरभू यीशु मसीह जी को जानों सिलवानुस और तीमुथियुस ने तुमाए बीच परचार करो; उन की बातन में हां और नईं बातें न हतीं अकेले हां हां कहो। कायसे परमेसुर की जौन बातें आंय, बे सोई हां से होत आय: ऐईसे इन बातन के पाछें आमीन सोई भओ, कि ऐसई हमारी मन्सा सोई आय कि हमसे परमेसुर की बड़वाई होबे। और जौन हम हां मसीह में बली बनात आय, जीनें हम हां नबेरो ओई आय परमेसुर। जीनें हम पै छाप लगा दई आय और बयाने में आत्मा हां हमाए जी में डालो आय। मैं परमेसुर हां जान के जौ कैत आंव, कि मैं अबै लौ कुरिन्थुस में ईसे नईं आओ, कि मोहां तुम पै दया आत हती। जौ नईंयां, कि हम तुम पे यीशु पै बिसवास करबे से अधकार जमात आंय, अकेले तुमाए मजा मौज में खुसी आय, कायसे तुम बिसवास में पक्के बने रहत आव। मैंने अपने जी में जौ पक्को कर लओ हतो कि फिन से तुम लौ दुखी होकें न आओं। कायसे मैं तुम हां दुखी करों, तो मोहां आनन्द दैबेवारों को हुईये, मानो ओई जी को मन मैंने तोड़ो होबे? जा बात मैंने तुम हां ईसें लिखी, कि ऐसो न होबे, मैं जब आओं तो जिन से मोरो जी ठण्डो होबो चईये, उनई से मोरो जी टूटे; कायसे मैं जौ जानत आंव, कि जौन बात से मोरो जी ठण्डो होत, ओई तुमाओ सब कौ हाल आय। बड़े पिराने में, और मन की चोट से, मैंने अंसुआ डाल डाल के तुम हां लिखो आय, ईसे नईं कि तुमाओ मन टूटे, अकेले जौ कि तुम ऊ बड़े प्रेम हां जानो, जौन मोहां तुम पे आय। और कोऊ ने मोरो जी टोड़ो आय, तो मोहां अकेले नईं (कि उनके संग्गै कर्रो न पड़ों) तुम सबरन को कछु कछु जी टोड़ो आय। ऐसे मान्स के काजें जौन सजा भईयन में से जितनन ने दई, बा मुतकी आय। ईसे भलो आय कि ऊ मान्स की गलती छिमा करो; और सान्ति की बातें करो, ऐसो न होबे कि ऊ मान्स कौ हिया टूट जाबे। ईसे मैं तुम से बिन्तबाई करत आंव, कि ऊ मान्स से प्रेम करत रओ। मैंने तुम हां ईसे लिखो हतो, कि तुमाई जांच करों, कि तुम सबरी बातें मानबे हां राजी आंव, कि नईंयां। जी को तुम कछु छिमा करत आंव ऊहां मैं सोई छिमा करत आंव, कायसे जो कछु मैंने छिमा करो आय, मानो करो आय, तो तुमाए काजें मसीह में हो छिमा करो आय। कि शैतान छलिया को हम पै दांव न चले, कायसे हम ऊ की बातें जानत आंय। जब मैं मसीह की बातें सुनात त्रोआस आओ, और पिरभु ने मोरे काजें एक द्वार खोलो। तो मोरो मन ठण्डो न पड़ो, कायसे भईया तीतुस मोहां नईं मिलो; सो उनसे विदा लैके मैं मकिदुनिया कोदाऊं चलो गओ। अकेले परमेसुर को धन्न मानत आंव, जौन मसीह में हम हां सबरी जीत देत आय, और अपनी बातन की बास हम में हो सबरी जांगा फैलत आय। कायसे हम परमेसुर के लाने तरन तारन पाबेवारे, और नरककुण्ड जाबेवारे, दोई के काजें मसीह की सुगन्ध आंय। कछु लोगन हां नरक के काजें मरबे की गन्ध, और कछु हां तरन तारन के काजें जीवन की सुगन्ध, इन बातन के लाने कौन आय? कायसे हम बिलात जनों जैसे नईंयां, जौन परमेसुर की बातन में कछु दूसरी बातें जोड़ देत आंय; अकेले हिये से, परमेसुर की बातें परमेसुर हां मानो सजीव देखत मसीह में कैत आंय। का हम अपनी बड़वाई करन लगें? और का हम मनो सिफारिस की चिठिया बिलात जनों से लियाबें, और का तुम से लैबें? हमाई चिठिया तो तुमई आओ, जौन हमाए हिये में उतरी आय, और ऊहां सबरे जनें पढ़त और मानत आंय। जौ सबरन हां पता आय, तुम मसीह की मानो चिठिया आओ, जीहां हम ने चाकर घांई लिखो आय; जा स्याही से नईं, अकेले जीयत परमेसुर की आत्मा से पथरन की पटिया में नईं, हिये की मांसवारी तखती में लिखो आय। हम मसीह में होकें परमेसुर पे ऐसो ध्यान धरें आंय। ऐसो नईंयां, कि हम ई लाक आंय, कि अपने हों कछु बातन हां सोचें; अकेले हम तो परमेसुर के कारण आय। जिन ने हम हां नये नियम के चाकर लाक बनाओ, अक्षरन के चाकर नईं केबल आत्मा के चाकर; कायसे अक्षर तो मारत आय, पे आत्मा जिलात आय। जैसे मत्यु को नेम जौन पथरन पै खोदे गए हते, इते लेओ जस पाओ, कि मूसा के मों पै की जोत जौन पेंला से घटत जात हती, इस्राएल के जनें उनके मों हेर न सकत हते। तो आत्मा की नैम और उजरी काय न हुईये? कायसे जब दोषी ठहराबे वाली नैम ऐसी उजरी हती, तो जौन नैम धरमी बनात आय बो और उजरी हुईये? और जौन उजरो दिखात हतो, जौन ऊ उजयारे से तेज हतो, ऊके सामूं फीको पड़ गओ। कायसे जब बो जौन घटत जात हतो ऐसो उजरो दिखात हतो, तो बो जौन अटल रै है और उजरी हुईये। सो ऐसी आस लगाए हम हिम्मत धरें बोलत आंय। और मूसा घांई नईं, जीनें अपनो मों ढापों हतो कि इस्राएली लोग ऊ घटबेवारी बस्त को अन्त कैसो हुईये न तकें। अकेले इन की बुद्धि मारी गई, कायसे आज लौ पुराने नेम की बातन हां बांचत बेरा उन के हिये पे परदा जैसो लगो आय; अकेले मसीह में बो परदा उठ जात आय। अबै जब मूसा की पोथी बांची जात आय, तो उन के हिये पे मानो परदा डलो आय। अकेले जब उनको मन पिरभू कुदाऊं फिर जै है, तो बो परदा सोई उठ जै है। पिरभू तो आत्मा आय: और जिते पिरभू की आत्मा आय उते सब छुट्टा होत आय। अकेले हम सबरन के मों पे पिरभू को तेज ऐसो दिखात आय, जैसो आईना में, तो पिरभू जौन आत्मा आय, हम उनके तेज के रूप में हरय हरय बदलत जै हैं। सो जब हम पै ऐसी दया भई, कि ऐसो काज हम हां मिलो, तो हम हिम्मत नईं हारत। और हम ने बुरय कामन हां छोड़ दओ आय, और बनके नईं चलत, और न परमेसुर के बचन में कछु मिलात आंय, अकेले सांची बातें उजागर करत आंय, और परमेसुर हां जानत भए सबरन के हिये पै अपनी बात बैठा देत आंय। अकेले हमाए परचार पै कछु परदा डलो आय, तो बो जौन नरक कुण्ड जाबेवारे आंय उन के लाने मानो डलो आय। और जौन मान्सन ने बिसवास नईं करो, कायसे उन की बुद्धि हां ई संसार के ईसुर-शैतान छलिया ने अंधरया दओ आय, कि मसीह जौन परमेसुर आय, उनकी बातन को तेज उन पे अबै न पड़े। कायसे हम अपने नईं, अकेले हम पिरभू यीशु को परचार करत आंय, कि बो पिरभू आय; अपने लाने तो हम कैत आंय, कि यीशु के कारण मानो तुमाए चाकर आंय। कायसे परमेसुर ने कई, कि अंधियारे में जोत होबे; और ओई जोत हमाए हिये में चमकी, कि परमेसुर की जोत यीशु मसीह के मों पे हो चिमचिमानी। अकेले हमाए लौ जा पूंजी माटी के घैलों में धरी आय, जौ बल हमाओ नईंया, परन्त परमेसुर को दओ आय। हम चारऊं कोद से दुख भोग रय आंय, अकेले हमाओ बुरओ नईं होत; हम पे काम नईं बनत, अकेले मन टूटो नईंयां। परेसान तो होत आंय; अकेले बिसराय नईं जात; पटके तो जात आंय, अकेले मिटत नईंयां। हम यीशु मसीह के मरबे हां मानो अपनी देह में लय फिरत आंय; कि यीशु को दओ जीवन हमाई देह से उजागर होबे। कायसे हम जीयत यीशु के कारण मानो मरबे हां तईयार रैत आंय, कि यीशु को दओ जीवन हमाई मरबेवारी देह से उजागर होबे। सो मृत्यु हम पै असर करत आय और तुम पै जीवन। ईसे कि हम में बाई बिसवास की आत्मा आय, (जीके लाने लिखो आय, कि मैंने बिसवास करो, ईसे में बोलो) हम सोई बिसवास करत आंय, ऐईसे बतात आंय। कायसे हम हां पता आय, कि जीनें यीशु हां मरे भयन में से जिलाओ, ओई ऐसो जान के, कि हम यीशु के संग्गै आंय हम हां सोई जिला है, और तुमाए संग्गै अपने सामूं लिआ है। कायसे सबरी बस्तें तुमाए लाने आंय, कि दया जौन बिलात जनों से होकें परमेसुर के मान के काजें धन्न सोई कहाबे। ईसे हम हिम्मत नईं हारत; जैसे हमाओ सरीर टूटत जात आय; अकेले हमाए भीतर वालो रोजीना नओ होत जात आय। कायसे हमाओ छिन भरे की परेसानी हमाए काजें खास मान देत आय। हम तो जौन बस्तें दिखात आंय उनहां नईं अकेले जौन दिखात नईंयां उनहां तकत रैत आंय, कायसे जौन बस्तें दिखात आंय बे तनक दिना की आंय, अकेले जौन नईं दिखात बे बिरोबर बनी रै हैं। हम हां पता आय, कि जब हमाओ संसार पे को डेरा गिराओ जै है, तो हम हां परमेसुर से सरग में एक बड़ो घर मिल है, जौन हाथन को बनो नईं, अकेले हमेसा बनो रै है। ई में तो हम गुहार भरत, और जा आस धरत आंय; कि अपने सरग के घर हां पहन लेबें। कि ऊहां पैरबे से हम उघारे नईं दिखाएं। ई डेरा में रैत बुझवा से दबे गुहार देत रैत आंय; कायसे हम उतारबो नईं, अकेले धरे रैबो चाहत आंय, कि जौन मरबेवारो आय बो जीवन में मानो डूब जाबे। जीनें हम हां ऐसो बनाओ आय बो परमेसुर आय, जीनें पेसगी में हम हां अपनो आत्मा दओ आय। सो हम हिम्मत बांधे रैत आंय और ऐसो जानत आंय; कि जब लौ हम देह में रैत आंय, तो पिरभु से अलग आंय। कायसे हम कोऊ रूप हां तक के नईं, अकेले बिसवास से चलत आंय। ईसे हम हिम्मत बांधे रैत आंय, और देह हां छोड़ के पिरभू के संग्गै रैबे को मन बना लओ आय। ईसे हमाए हिये की मनसा जा आय, कि चाए संग्गै रएं और चाए न्यारे रैबें, पिरभू हां अच्छे लगें। कायसे हम सबरन की सबरी बातें मसीह जब न्याय करबे बैठ हैं तो खुल जै हैं, एक एक जनें अपने भले और बुरय कामन को इनाम जौन संसार में रैत करे आंय पाबें। सो पिरभू से डराके हम सबरन हां समझात आंय, कायसे हमाओ सबरो हाल परमेसुर हां पता आय; हमें ऐसी आस आय, कि हमाए हिये हां सोई पता आय। अकेले हम तुमाए सामूं अपनी बड़वाई नईं करत, अकेले जो बात आय तुम उनहां बड़ी सान से बताओ, जौन मन में तो नईं, अकेले दिखाबेवारी बातन हां मानता देत आंय। हम मानो सुर्त बिसरे आंय, तो परमेसुर के काजें; और चित्त में आय, तो तुमाए काजें आंय। कायसे मसीह को प्रेम हम हां बिवस कर देत आय; ईसे हम समझत आंय, कि एक जनों सबरन के काजें मरो तो सबरे मानो मर गए। और बे ईसे सबरन के काजें मरे, कि जौन जीयत आंय, बे आगे हां अपने लाने न जीये अकेले उनके लाने जौन उनकी कोती मरो और फिन जी सोई गए। सो अब से आगे हम कोऊहां संसार जैसो न मान हैं, और जैसे हम ने मसीह हां संसार घांई जानो हतो, आगे उन हां ऐसो न सोच हैं। जो कोऊ मसीह से जुड़ गओ आय बो नओ हो गओ: पुरानी बातें चली गईं आंय, अब सबरो नओ दिखात आय। सबरी बातें परमेसुर कुदाऊं से आंय, जीनें मसीह में होकें हमसे मेल कर लओ, और परमेसुर के संग्गै मान्स जुड़ जाबें जौ काज हम हां दओ। जानो कि परमेसुर ने मसीह में अपनो मेल संसार के मान्सन से कर लओ, और उन के पापन की सजा उन हां नईं दई, और उनको जुड़ जाबो कैसे हो सकत, जौ बताबे कौ काज हमें दओ। सो हम परमेसुर के कोती उनके राजदूत आंय; और परमेसुर हम में होकें बिन्तवारी करत आय: कि परमेसुर से जुड़ जाओ। जौन पाप जानत लौ न हते, उनईं के ऊ परै उन ने हमाए पाप डाल दए, कि उन से हम सबरे जनें परमेसुर के लाने धरमी हो जाबें। हम जौन उनके संग्गै काम करत आंय ऐसो समझात आंय, कि परमेसुर ने जौन दया तुमाए ऊ परै करी आय, ऊहां ऐसई न जानो। कायसे बे तो कैत आंय, कि मैंने खुसी की बेरा तुमाई सुन लई, और तुमाए तरन तारन के काजें तुमाई मदद करी: तको, अबई बो खुसी की बेरा आय; तको, अबै तरन तारन को दिन आय। हम जो नईं चाहत कि कोई बात से तुमहां ठेस लगे, कि हम जानें सेवा करी ऊहां कोऊ बुरओ न कैबें। अकेले एक एक बात में परमेसुर के चाकर जैसो अपनो अच्छो जीवन जीयत आंय, बड़े धीरज से, पिराते में, कंगाली में, परेसानी में। कोड़ा खाए से, कैद होबे में, मान्सन ने जुड़ के परेसान करे से, बिलात मैनत से, जगत रैबे और उपास करबे से। साजो रैके, ज्ञान से, धीरज धर के, दया करके, पवित्तर आत्मा से। सांचे प्रेम से, सांचे बोल से, परमेसुर के बल से; धरम के हथियारन से जौन दांए, बांए हैं। मान और अपमान से, बुरए नाओं और भले नाओं से, ऐसो लगत तो आय कि बुरई सलाह देत हो अकेले सांचे आंय। मानो कोऊ जानत नईंयां; अकेले सब जानत आंय; मरत जैसे आंय और तको जीयत आंय; ठुकत पिटतवारे जैसे आंय अकेले जान से नईं मरत। रोबेवारन जैसे आंय, अकेले खुस रैत आंय; कंगाल जैसे लगत, अकेले बिलात जन हां पईसावारे बना देत आंय, ऐसे दिखात मानों हमाए ऐंगर कछु नईंयां अकेले सब कछु धरो आय। हे कुरिन्थियों, हम ने तुमसे खुलके बतकाओ करो, और हमाओ मन तुमाए काजें खुलो आय। तुमाए काजें हमाए मन में कछु गांठ नईंयां, अकेले तुमाए मन में गांठ लगी आय। अकेले अपने लरका बिटिया मानके तुमसे कैत आंव, तुम सोई अपनो मन खोल दो। जौन बिसवासी नईंयां उनके संग्गै कोऊ समबन्ध न धरो, जैसे दो बैला संग्गै जोत दए जात आंय, कायसे धरमी को का मेल अधरमी से? और उजयारे और अंधयारे को का जोड़? और मसीह को शैतान छलिया से का जोड़? और बिसवास करबेवारे को जौन बिसवास नईं करत उनसे का नातो? और मूरतन को परमेसुर के मन्दर में का काज? कायसे हम जियत परमेसुर के मन्दर आंय; जैसो परमेसुर ने कहो आय कि उन में बस हों और उन में घूम हों; और मैं उन को परमेसुर और बे मोरे जनें कहा हैं। ईसे पिरभू कैत आय, कि उनके बीच से कड़ जाओ और अलग रओ; तो मैं तुम हां ग्रहण कर हों। और तुमाओ बाप हुईयों, और तुम मोरे बेटा बिटिया कहा हौ: जे महाबली पिरभू परमेसुर को बचन आय। सो प्यारो जब जे बचन हम हां मिले, तो हम अपनी देह और आत्मा की सबरी गंदगी हां धो डालें, और मन में परमेसुर को भय मानें और पवित्तर हो जाबें। हम हां अपने हिये में जांगा देओ: हम ने कोऊ पे न बेजा करो, और कोई हां नईं बिगाड़ो, और न कोऊहां ठगो। मैं तुम हां दोष देबे हां ऐसो नईं कैत: कायसे मैंने पेंला से तुम से कहो आय, कि तुम हमाए हिये में ऐसे बसे आव कि हम तुमाए संग्गै मरबे जीबे हां राजी आंय। मैं बड़ी हिम्मत से कैत आंव, कि मोहां तुम पै बड़ो धमण्ड आय: मोरो मन सान्ति से भर गओ आय; अपने सबरे पिराते में मोरो मन खुसी से बेचैन आय। कायसे जब हम मकिदुनिया पोंचे, तब सोई हमाई देह हां चैन नईं मिलो, अकेले चारऊं कोद से हम हां दुख मिलो; बायरें अदावटें और भीतरे बेजा बातें हतीं। अकेले सूदे लोगन हां चैन दैबेवारे परमेसुर ने तीतुस के आबे से हम हां चैन दओ। अकेले ऊके आबे से नईं परन्त ऊके मन के चैन से, जौन ऊहां तुम लोगन से मिलो हतो; ऊ ने तुमाई मरजी, और तुमाए पिराते और तुमाई लगन के लाने हम हां सुनाओ, जीसे मोहां और आनन्द भओ। मैंने तो अपनी चिठिया से तुम हां दुख दओ, अकेले ईसे मोहां बुरओ नईं लगो जैसो पेंला लगत हतो, कायसे तुम हां ऊ चिठिया से बुरओ तो लगो अकेले बो छिन भरे को हतो। अब मोहां अच्छो लगो ईसे नईं कि तुम हां दुख भओ, अकेले ईसे कि तुम ने ई दुख से मन बदलो, कायसे जौन दुख तुम हां भओ बो परमेसुर की मरजी से तुम हां दओ हतो, कि हमाई ओर से तुम हां कछु हानि न होबे। कायसे परमेसुर की भक्ति से जौन दुख होत ऊसे पछताबो होत आय, जीसे तरन तारन होत और फिन ईपै हम हां पछताबो नईं होत: मानो संसारी दुख से मौत उत्पन्न होत आय। सो तकौ, ऐई बात सेकि तुम हां परमेसुर भक्ति को शोक भओ जीसे तुमें जोस आओ कि जुआब देबो और खुन्स, और डर, और लालसा, और धुन और बदला लैबे की मन में आई? अकेले तुम ने सबरी हालत में जौ दिखा दओ, कि तुम इन बातन से बरी आव। फिन जौन मैंने तुम हां लिखो, ईसे नईं कि कोऊ से अन्याय करो, और न ऊके कारन जी पे अन्याय करो गओ, अकेले तुमाओ मन जौन हम पै आय, बो परमेसुर के सामूं तुम हां पता पड़ जाबे। ईसे हम हां चैन मिलो, और हमाई सान्ति और ऊके संग्गै तीतुस को आनन्द ने हम हां औरई आनन्द दओ, कायसे ऊ को हिया तुमाई बातन से ठण्डो हो गओ। कायसे मैंने ऊके सामूं तुमाए लाने बड़वाई करी, तो ऊहां लाज नईं आई, अकेले जैसे हम ने सबरी बातें सांची सांची कै दईं, ऊंसई हमाई बड़वाई करबो तीतुस के सामूं सांची कड़ी। और जब ऊहां तुमाए कई करबे को सुद आत आय, कि कैसे डरात और कपत तुम ने ऊसे भेंट करी; ईसे ऊ को प्रेम तुम पे और होत जात आय। मोहां अच्छो लगो, कि तुमाई बातन से मोरी हिम्मत बंधी आय। अब भईया हरौ, हम तुम हां परमेसुर की दया की बातें सुनात आंय, जौन मकिदुनिया की मंडलियन पै भओ। कै तंगी में से कड़ के उन हां बड़ो आनन्द मिलो, और गरीबी बढ़बे पे उन ने और खुल के दओ। उन के लाने मैं जौ कहो चाहत आंव, कि उन ने अपने बस भर और ऊसे अतकारो दओ। और ई दान के लाने और पवित्तर लोगन की सेवा को जौन मौका मिले, ऊके काजें हम से बेर बेर बिन्तवारी करी। जैसी हमाई आसा हती, ऊं सई नईं, पै उन ने पिरभू हां, और फिन परमेसुर की मरजी से अपनो सब कछु हमें दे दओ। ईसे हम ने तीतुस हां समझाओ, कि जैसो ऊ ने पेंला करो, ऊं सई तुमाए बीच ई दान को काम सोई पूरो कर डालें। सो एक एक बातन में जैसे बिसवास, बचन, ज्ञान और सब कोसिस में, और प्रेम में, जौन हम से घटे होबें, ऊ में ब ढ़त जाओ, ऊं सई ई दान के काम में सोई आगे रओ। मैं ऊ अग्यां तो नईं करत, अकेले दूसरन की खुसी से तुमाओ प्रेम सांचो आय जौ परखबे को कैत आंव। तुम हमाए पिरभू यीशु की दया जानत आव, कि बे धनी होकें तुमाए लाने कंगाल बने कि उनके कंगाल होबे से हम धनी हो जाबें। ई बात में मोरी जा मंसा आय, कायसे ऐसो तुमाए काजें नोंनो आय; जौन तुम ने एक बरस लौ ई काज करबे में, अकेले ई बात के चाहबे में आगे रहे। ईसे अब जौ काज पूरो करो, जैसी तुमाई मरजी आय, अपनी पूंजी लगा के ई काज हां पूरो कर डालो। कायसे मन से दान दओ जाबे तो बो ग्रहण होत आय, जौन उन लौ आय अकेले ऊसे जौन उन लौ नईंयां। ऐसो नईंयां, कि दूसरन हां मजा मिले और तुम हां परेसानी। अकेले बरोबरी से होबे की तुमाओ भरो पूरो रैबौ उनकी घटी में काम आबै, कि उनको भरो पूरो होबे से तुमाई घटी में काम आबे, कि बरोबरी हो जाबै। जैसो लिखो आय, जीनें बिलात बटोरो ऊ को कछु जादा नईं कड़ो, और जी ने थोड़ो सो बटोरो ऊ को कम नईं कड़ो। परमेसुर कौ धन्न होबे, जिन ने ओई मन्सा तीतुस के मन में सोई भर दई। और बे हमाए समझाबे में आ गए और बड़े हुलास से बो तुमाए बीच गए आएं। हम ने ऊके संग्गै एक भईया हां पठैव आय, जी को नाओं बचन की सेवा में सब मंडलियन में जानो भओ आय। इतनो नईं, मण्डली ने सोई सोचो कि दान के काम में बो हमाए संग्गै जाबे, सो हम जा सेवा ईसे करत आंय, कि पिरभू को मान बढ़े और हमाए मन को राजी होबो पता हो जाबे। हम ईसे चौकस रैत आंय, कि जो दया के काम में हम लगे आंय, कोई हम पे दोष न लगा पाबे। कायसे जौन बातें पिरभू लौ नईं, अकेले सबरन लौ अच्छी लगत आंय हम उनईं के लाने सोचत आंय। हम ने ऊके संग्गै अपने भईयन हां पठैव आय, जीहां हम ने बेर बेर जांचो और अच्छो पाओ; अकेले ऊ को भरोसा तुम पे बिलात आय, और एईसे बो और खुस आय। कोऊ जनें तीतुस के लाने पूछे, तो बो मोरो संगी, और तुमाए लाने मोरे संग्गै काम करबेवारो आय, और हमाए भईयन के लाने पूछो, तो बे मण्डली के लोगन ने पठैव और परमेसुर के मान के लाने आंय। अपनो प्रेम और हम ने जौन बड़वाई तुमाए काजें करी मण्डलियन के सामूं इन बातन हां पक्को दिखाओ। अब ऊ सेवा जौन पवित्तर लोगन के काजें होत आय, मोय तुम हां जौ लिखो नईं चईये। कायसे मैं तुमाए मन की तईयारी हां जानत आंव, जीसे मैंने मकिदुनिया वारन के सामूं बड़बारी करी, कि अखया के मान्स एक साल से राजी भए, तुमाए हुलास ने बिलात जन हां उसकेरो आय। अकेले मैंने भईयन हां ईसे पठैव, कि हम ने जौन बड़वाई तुमाई करी, ईसे झूठी न पड़े, अकेले जैसो मैंने कई; ऊंसई तुम तईयार रओ। ऐसो न होबे, कि कोऊ मकिदुनियावारो मोरे संग्गै आबे, और तुम हां तईयार न पाए, तो का जानें, जो भरोसा जौन हमाओ तुम पै आय हम (जौ नईं कैत कि तुम) नेंचो देखो। सो मैंने भईयन से जा बिन्तवारी करी कि बे पेंला तुम लौ जाबें, और तुमाए खुले मन के काम जिनके काजें मैंने पेंला उन हां कहो हतो, तईयार कर लेबें, कि जौ लोभ से नईं अकेले खुले मन से होबे। अकेले बात ऐसी आय, कि जौन थोड़ो बोत आय उन हां थोड़ो मिल है; और जौन बिलात बो है, बो बिलात सोई काट है। हर एक जनें जैसो मन में ठानें ऊं सई दान करे; कुड़कुड़ा के नईं, और दबाओ से नईं, कायसे परमेसुर खुले मन से देबेवारे से प्रेम करत आय। परमेसुर सब प्रकार की दया तुम पे कर है, जीसे हर बात में हर समय पै, जो कछु तुमें चानें, बो सब तुम पे बिलात रैबे, और भले काज के लाने तुम लौ बिलात होबे। जैसो लिखो आय, ऊने बिखराओ ऊ ने गरीबन हां दओ, उनको पुन्न सदा उनके संग्गै रै है। जौन बोवेवारे हां बीज, और खैबे हां रोटी देत आय बो तुम हां बीज दै है, और ऊहां उगा है; और तुमाए धरम के फल बहुतई बढ़ा है। कि तुम सबरे कामन में खुले मन से देओ जीसे परमेसुर को नाओं धन्न मानो जाबै, बढत जाओ। कायसे ई काज हां पूरो करबे से, पवित्तर लोगन की घटी पूरी हुईये, और मान्स परमेसुर को जस मानत आय। कायसे इन काजन की चरचा करके परमेसुर बड़वाई करत आंय, कि तुम मसीह के बचनन हां मानके ऊ को कहो करत आव, और सबरन की मदद करबे में आगे रैत आव। और बे तुमाए लाने बिन्तवारी करत आंय; कायसे तुम पै परमेसुर की बिलात दया भई आय, और जा चाहना करत कि तुम बढ़त जाओ। परमेसुर हां उनके ऊ दान के काजें जी की चरचा करबो मुस्कल आय, धन्न मानो जाबे। मैं ओई पौलुस जौन तुमाए सामूं दीन आंव, अकेले तुमाए पीठ पाछें तुम पै कैबे की हिम्मत करत आंव; कि तुम हां मसीह जैसी दीनता, और सादे मन से समझात आंव। मैं जा बिन्तवारी करत आंव, कि तुमाए संग्गै मोहां निधड़क होकें ऐसो नईं करने आय; जैसे बिलात जनें हम हां अपने मन से चलबोवारो मानत आंय, बल से बात करो चाहत आंव। हम सरीर में तो चलत फिरत आंय, अकेले सरीर जैसो न्याव नईं करत। कायसे हमाई लड़ाई के हथयार सारीरिक नईंयां, अकेले गढ़ी गिरा देबेवारे परमेसुर के बल से भरे आंय। सो जौन विचार और बड़ी बड़ी बातें, जौन परमेसुर हां नईं चीनत आय, उन हां आड़े हाथ लेत आंय, और सब विचारन हां बस में करके मसीह की अग्यां मानबेवारे बना देत आंय। और हम तईयार रैत आंय कि जब तुम मसीह की अग्यां मानबो पूरो कर लेओ, तो जौन अग्यां तुम ने नईं मानी उनको बदला लेबें। तुम इनई बातन हां हेरत आव, जौन आंखन के सामूं आंय, कोई हां भरोसा होबे कि बो मसीह को आय, तो ऊहां जौ सोई पता होबे, कि जैसो बो मसीह कौ आय, ऊंसई हम सोई आंय। कायसे जौन अधकार मोहां मिलो ऊकी बड़बाई करों, जौन पिरभू ने तुमाए बिगाड़बे हां नईं अकेले बनाबे हां दओ आय, तो लजा हों नईं। जौ ईसे कैत आंव, कि कोऊ जा न कै लेबे की चिठियन से तुम हां डरात आंव। कायसे कैत आंय, कि उनकी चिठियां बजनदार और मतलब से भरी आंय; अकेले जब देखत आंव, तो ऐसो लगत कि बो देह को नरम और बोलबे में ढीलो आय। जौन ऐसो कैत आय, बो सोच लैबे, जैसे हमाए न होबे पै चिठियन में हमाए बचन आंय, ऊंसई तुमाए सामूं हमाए काम सोई हुईयें। हमाई जा हिम्मत नईंयां कि हम अपने हां उनके संग्गै गिनें, कि अपनो मिलान उनसे करें, जौन अपनी बड़बाई करत, और एक दूसरे से अपनो मिलान करके मूरख बनत आंय। हम हद्द से बढ़ के अपनी बड़वाई न कर हैं, केवल उतै लौ जिते लौ परमेसुर ने हमें कहो आय; ओई में तुम सोई आ गए आव सो ओई जैसी बड़बाई कर हैं। कायसे हम अपनी हद्द से बाहर अपने हां नईं उठाओ चाहत, जैसो तुम लौ न पोंचबे की दसा में होतो, अकेले मसीह के बचन सुनात तुम लौ आ चुके आंय। और हम हद्द से बाहर दूसरन के कामन पै बड़वाई नईं करत; अकेले हम हां जौ पता आय, कि जैसे जैसे तुमाओ बिसवास बढ़ है तो हम सोई अपनी हद्द से तुमाए कारण और बढत जै हैं। कि हम तुमाए परगना से आगे कड़ के बचन सुनाएं, ऐसो नईंयां, कि हम दूसरन की हद्द में करे काम पे बड़बारी करें। जौन बड़वाई करे, तो पिरभू पै करे। कायसे जौन अपनी बड़वाई करत आय, बो नईं, अकेले पिरभू जी की बड़वाई करे, ऊ ग्रहण करो जात आय। तुम मोरी तनक मूरखपन सह लेते तो कैसो नोंनो होतो; सांची आय कि तुम मोरी सह लेत आव। कायसे में तुमाए काजें ईश्वरीय धुन में लगो रैत आंव, कायसे मैंने एकई जनें से तुमाई बात चलाई आय, कि तुम हां साजी कुंआरी जैसी मसीह के हाथ दे देओं। अकेले मोहां डर आय कि जैसे सरप ने होसियारी से हव्वा हां बिलोर दओ, ऊंसई तुमाओ मन को सीधोपन और साजोपन जौन मसीह के संग्गै होबो चईये कहूं बिगड़ न जाबै। कोऊ तुम लौ आके, कोऊ दूसरे यीशु को परचार करे, जी को परचार हम ने नईं करो: कि और कोई आत्मा तुम हां मिले; जौन पेंला नईं मिली; और कोई बचन जीऐ पेंला तुम ने नईं मानो, तो तुमाओ सैबो नोंनो रैतो। मैं तो समझत आंव, कि में दूसरे बड़े प्रेरितन में से घट नईंयां। जैसे मैं बोलबे में अनाड़ी आओं, अकेले ज्ञान में नईंयां, हम ने तो ई ज्ञान हां सबरी बातन में सबरन हां दिखाओ आय। ईमें मैंने कछु पाप करो; कि मैंने तुम हां यीशु के बचन सेंत मेंत सुनाए; अपने हां नेंचो करो, कि तुम ऊंचे हो जाओ? मैंने दूसरी मंडलियन हां लूटो कि मैंने उन से मजूरी लई, कि तुमाई सेवा करों। जब तुमाए संग्गै हतो, और मोहां घटी भई, तो मैंने कोनऊ पै बोझो नईं डालो, कायसे मकिदुनिया वारे भईयन ने आके, मोरी कभी घटी पूरी कर दई: और मैंने कोई बात मैं अपनो बुझवा तुम पै नईं डालो, और कभऊं न डाल हों। मो में जैसे कछु मसीह की सांची बात आय, तो अखया परगना में ई बात पर मोहां बड़वाई करबे से कोऊ न रोक है। की काजें? का ईसे कि मैं तुम से प्रेम नईं करत? परमेसुर जौ जानत आय। अकेले जौन मैं करत आंव, ओई करत रै हों; कि जौन ई ताक में लगे रैत आंय, उनको दांव न चल पाबै, कि जिन बातन में बे बड़ो समझत आंय, उन में बे हमाए जैसे कड़ें। कायसे ऐसे जनें झूठे प्रेरित, और धोखा को काम करबेवारे, और मसीह के प्रेरितों को रूप धरें आंय। और जा बात बड़ी नईंयां कि शैतान छलिया आपई चमचमात सरगदूत को रूप धर लेत आय। सो शैतान के जनें सोई धरम के चाकरन घाईं दिखाबें, तो कोई बड़ी बात नईंयां, अकेले उनको अन्त उन के काजन जैसो हुईये। मैं तुम से फिन कैत आंव, कि कोऊ मोहां मूरख न समझे; नईं तो मूरख समझ के मोरी सह लेओ, कि तनक मोरी बड़वाई होबे। ऐसे बेधड़क बड़े बोल जौन मैं कैत आंव बे पिरभू के बताए जैसे नोंईं अकेले मानो मूरख घाईं कैत आंव। बिलात जनें संसारी जैसी बड़वाई करत आंय, तो मैं सोई बड़वाई कर हों। तुम तो समझदार आओ बड़े मजे से मूरखन की सह लेत आव। कायसे जब तुम हां कोऊ दास बना लेत आय, या खा जात आय, या फंसा लेत आय, या अपने हां बड़ो कैत आय, या तुमाए मों पे थप्पड़ मारत आय, तो तुम सह जात आव। मोरो कैबो मानो छोटे होकें, जैसे हम कमजोर हते; अकेले कोई बात में कोनऊं हिम्मत बांधत हतो (मैं मूरखता से कैत आंव) तो मैं सोई हिम्मत बांधत आंव। का बेई इब्रानी आंय? मैं सोई आंव: का बेई इस्राएली आंय? मैं सोई आंव: का बेई इब्राहीम के वंस के आंय? मैं सोई आंव, का बेई मसीह के चाकर आंय? (मैं पगला घांई कैत आंव) मैं उनसे बढ़के आंव! बिलात मैनत करे में; बेर बेर जेहल जाबे में; कोड़ा घले में; बेर बेर मरत मरत बचो। पांच बेर मैंने यहूदियन से उन्तालीस, उन्तालीस कोड़ा खाए। तीन बेरे मोहां बेंतें घलीं; एक बेर मान्सन ने पथरा मारे; तीन बेर जहाज जी पे मैं जा रओ हतो, टूट गए; एक रात और दिना मैंने समुन्द्र के पानू के बीच काटो। मोहां बेर बेर यात्रा में; नदियों की परेसानी में; भड़यों के जोखम में; अपने जात बिरादरी वारन से परेसानी में; दूसरे बिरादरी वारन से परेसानी में; शहरन की परेसानी में; जंगल की परेसानी में; समद्र की परेसानी में; नकली भईयन से परेसानी में। मैनत करत दुख में; बेर बेर जागत रैबे में; भूखे पियासे में; बेर बेर उपासे रैबे में; जड़कारे में; खुले में रैबे में। और बिलात बातें जिन को ब्यान मैंने नईं करो, सबरी मंडलियन की चिन्ता मोहां तोड़े डालत आय। कौन की कमजोरी से में परेसान नईं होत? और कौन के उपटा खाबे से मोहां पिरातो नईं होत? बड़वाई करने हो, तो में अपनी कमजोरी पै कर हों। पिरभू यीशु के परमेसुर पिता को धन्न मानत आंव, और जौ सोई जानत आंव, कि मैं लाबरी नईं कैत। दमिश्क में अरितास राजा जौन हाकम हतो, ऊ ने मोहां पकड़बे दमिश्कियों के नगर में पैहरा बैठा दओ हतो। मोहां टुकना में धरके जंगला से भीत पै हो नेंचें उतारो गओ, और मैं उनके हाथन से बच कड़ो। बड़बाई करबो मोरे लाने साजो नईंयां अकेले करने आत आय; सो मैं पिरभू के दए दरसन और जौन जोत पाई उनकी चरचा कर हों। मैं मसीह में एक जनें हां जानत आंव, चौदह बरस भए पता नईंया कि देह के संग्गै, और देह बिना, परमेसुर जानत आय, ऐसो जनों तीसरे सरग लौ उठा लओ गओ। में ऐसे मान्स हां चीनत आंव पता नईंयां देह संग्गै, और देह बिना, परमेसुर जानत आय। कि सरग लोक लौ उठा लओ गओ, उते ऐसो बतकाओ सुनो जौन कै नईं सकत; और उन बातन को मों पे लियाबो मान्स के लाने साजो नईंयां। ऐसे मान्स की मैं बड़बाई कर हों, अकेले अपने पै और अपनी कमजोरी को छोड़, बड़वाई न कर हों। कायसे मैं बड़बाई करबो चाहों तो भी मूरख नईं कहा हों, कायसे सांची बोल हों; पै तनक थम जात हों, ऐसो न होबै, मानो कोऊ मोहां तकत होबे, और मोहां सुनत होबे, मोहां ऊसे बड़ो समझे। और ऐसो न होबे कि जौन जोत मैंने पाई बिलात होबे से मैं फूल जाओं, मोरी देह में एक कांटा लगाओ गओ, कि शैतान छलिया को एक दूत मोहां घूंसा मारै कि मैं फूल न जाओं। ई बातन के लाने मैंने पिरभू से तीन बेर बिन्तवारी करी, कि जौ मोसे दूर हो जाबै। और उन ने मोसे कई, मोरी दया तोपे बिलात आय; कायसे मोरी बल कमजोरी में दिखात आय; ईसे मैं बड़े मजे से अपनी कमजोरियन पे बड़वाई कर हों, कि मसीह को जोर मोरे ऊ परै छाओ रए। ईसे में मसीह के लाने कमजोरी में, और निन्दा में, और कंगाली में, और विरोध में, पिराते में खुस आंव; कायसे जब मैं कमजोर लगत आंव, तबई मजबूत होत आंव। मैं मूरख तो बनो, अकेले तुम ने मोसे जौ जबरई करवाओ: तुम हां तो मोरी बड़वाई करो चईये, कायसे मानो में कछु नईंयां, अकेले उन सब बड़े बड़े प्रेरितन से कोई बात में घट नईंयां। प्रेरित के जौन गुण बड़े धीरज से दिखाए उनके संग्गै, और अजूबा काज, और बड़े बड़े काज सोई दिखाए। तुम कौन सी बात में दूसरी मंडलियन से कम हते, कि मैंने तुम पे अपनो बुझवा नईं डालो: मोरो जौ अन्याय छिमा करो। हेरो, में तीसरी बेर तुम लौ आबे हां तईयार आंव, में तुम पे कछु बुझवा न धर हों; कायसे तुम मोरी जायजाद नईंयां, अकेले में तुम हां चाहत आंव: कायसे बाल-बच्चन हां मताई-बाप के काजें जायजाद नईं जोड़ो चईये, अकेले मताई-बाप हां बाल-बच्चन के लाने। मैं जो कछु तुम हां चाने मैं बड़े खुलके खरचा कर हों, और खुद खरचा हो जैहों: का जितनो बढ़ के प्रेम मैं तुमसे करत आंव, का तुम उतनो घट के प्रेम मोसे कर हौ? ऐसो हो सकत आय, कि मैंने तुम पै बुझबा नईं डालो, अकेले मसकई धोका देके तुम हां फंसा लओ। सोचो कि जौन जन मैंने तुम लौ पठैव, का उन से छल करके मैंने तुन से कछु लै लओ? मैंने तीतुस हां समझा बुझा के और ऊके संग्गै ऊ भईया हां पठैव, तो का तीतुस ने कछु बेईमानी से तुम से कछु ले लओ? का हम एकई आत्मा से नईं चलें? का एकई गैल पै नईं चलें? तुम अब लौ समझत हुईयो के हम तुमाए सामूं जबाव दे रए आंय, हम परमेसुर हां सामूं जान के मसीह में बोलत आंय, और भईया हरौ, जे सबरी बातें तुमाए बढ़बे के काजें कैत आंय। कायसे मोहां डर आय, कहूं ऐसो न होबे, कि मैं आके जैसो चाहत आंव, और जैसो तुम हां नईंर् चाहत ऊंसई पाओं; और मोय सोई जैसो तुम नईं चाहत वैसो पाओ, कि तुमाए भीतरै लड़ाई, बैर, गुस्‍सा करबो, दूसरन को बिरोध, जलन, चुगली करबो, अभमान और बखेड़े होबें। और मोरो परमेसुर कहूं मोहां फिन के तुम लौ आबै हों जोर देबे और मोहां फिन के बिलात जनों से दुख होबे, जीनें पेंला पाप करो हतो, और उन बुरए काज, परतिरिया संगत, और लुचपन से, जौन उन ने करे, मन न बदलो होबै। अब तीसरी बेर तुम लौ आत आंव: दो और तीन गवाह जौन एक बात कै हैं। जैसे मैं जब दूसरी बेर तुमाए संग्गै हतो, मानो दूर रैत भए उन से जिन ने पेंला पाप करो, और दूसरे लोगन से अब पेंला से कय देत आंव, कि मैं फिन आहों, तो अब न छोड़ हों। तुम चाहत आव कि मैं बताओं के मसीह मोसे बात करत आय, जौन तुमाए बीच कमजोर नईं; अकेले बली आय। बो कमजोरी में क्रूस पै चढ़ाओ तो गओ, अकेले परमेसुर के बल से अबै जीयत है, हम तो सोई उन में कमजोर आंय; अकेले परमेसुर के बल से जौन तुमाए लाने आय, उनके संग्गै जी हैं। अपने आप हां जांचो, कि बिसवास में पक्के हो कि नईंयां; अपने हां जांचो, का तुम जौ नईं जानत, कि यीशु मसीह तुम में आय? नईं तो तुम निकम्मे कड़े। मोरी जा आसा आय, कि तुम जान लैहो, कि हम निकम्मे नईंयां। और हम अपने परमेसुर से जा बिन्तवाई करत आंय, कि तुम कोई बुरय काम नईं करो; ईसे नईं, कि हम अच्छे दिखाबें, अकेले ईसे कि तुम भलो करो, चाए हम कछु काम के न कड़ें। कायसे हम सांचे के बदले बिरोध में कछु नईं कर सकत, अकेले सांचे के काजें सब कर सकत आंय। जब हम कमजोर आंय, और तुम बली आव, तो हम खुस होत आंय, और जा बिन्तवाई सोई करत आंय, कि तुम बढ़िया हो जाओ। ईसे में तुमाए पीठ पाछें जौ लिखत आंव, कि उते आके जौन अधकार मोहां मिलो आय जीहां पिरभू ने बिलोरबे हां नईं अकेले बनाबे हां मोहां दओ आय, कर्रे होकें कछु करने न पड़े। सो भईया हरौ, सुखी रओ; पक्के होत जाओ; हिम्मत राखौ; एक मन राखौ; जुड़के रओ, और प्रेम और सान्ति को दैबेवारो परमेसुर तुमाए संग्गै होबै। एक दूसरे हां पवित्तर चूमा देके नमस्कार करो। सबरे पवित्तर जनें तुम हां नमस्कार करत आंय। पिरभू यीशु मसीह की दया और परमेसुर कौ प्रेम और पवित्रात्मा की संगत तुम सबरन के संग्गै होत रए। पौलुस जौन न मान्सन की मरजी से, न मान्सन से, अकेले यीशु मसीह और परमेसुर जौन पिता आय, जिन ने ऊहां मरे भयन में से जिलाओ, प्रेरित आय। और सबरे भईयन कोद से, जौन मोरे संग्गै आंय; गलतिया की मण्डली के नाओं। परमेसुर पिता, और हमाए पिरभु यीशु मसीह से तुम हां दया और सान्ति मिलत रए। उनईं ने अपने हां हमाए पापन के काजें दे दओ, किहमाए परमेसुर पिता की मरजी से हमें ई बुरए संसार के बन्धन से छुड़ाबै। उनको गुनगान और मान हमेसा लौ होत रए। आमीन। मोहां समझ में नईं आत, की जीने तुम हां मसीह की दया से टेरो उन से तुम इतनी जल्दी पलट के और बातन में लग गए आव। अकेले कोऊ और बचन नईंयां: बतकाओ ऐसो आय, कि कितेक ऐसे आंय, जौन तुम हां बिलोर देत आंय, और मसीह के बचन हां बिगाड़ो चाहत आंय। अकेले हमऔर सरग को कोऊ दूत इन बचन हां छोड़ जौन हम ने सुनाओ कोई और बातें तुम हां सुनाबे, तो ऊ पे श्राप होबे। जैसो हम पेंला कै चुके, ऊं सई अबै सोई कैत आंव, कि उन बचन हां छोड़ जौन तुम ने माने, कोऊ और बातें कैबे, तो ऊ पे श्राप होबे। अब मैं का मान्सन हां राजी करत आंव कि परमेसुर हां? का मैं मान्सन हां खुस करो चाहत आंव। अबै लौ मैं मान्सन हां खुस करत रओ होतो, तो मैं मसीह को दास नईं होतो। भईया हरौ, मैं तुम हां चिताए देत आंव, कि जौन बचन मैंने सुनाओ आय, बो मान्स को सौ नईंयां। कायसे बो बचन मोहां मान्स से नईं मिलो, और कोऊ ने मोहां नईं सिखाओ, अकेले यीशु मसीह की जोत से मिलो। यहूदी बिरादरी में पेंला जैसी मोरी चाल हती, तुम ने सुन लई आय; कि मैं परमेसुर की मण्डली के लोगन हां बिलात सतात हतो और मार डालत हतो। अपनी जात भईयन जौन मोरी उमर के हते उनसे आगे बढ़ो भओ हतो, और अपने बाप दादन की रीत हां मानबे में बहुत आगे हतो। अकेले परमेसुर, जीने मोरी मताई के गरभ से मोहां नबेरो हतो और अपनी दया से बुला लओ। जब उनकी मन्सा भई, कि मोपे अपने पुत्तर हां प्रगट करें कि मैं जौन यहूदी भईयन उन हां बचन सुनाओं; तो मैंने मान्स से कछु सलाह नईं लई। और न यरूशलेम जाके जौन मोय से पेंला के प्रेरित हते भेंट करी, अकेले तुरतईं अरब देस हां चलो गओ: और उते से सीदो दमिश्क हां लौट आओ। और तीन बरस बीते पै मैं कैफा से मिलबे यरूशलेम गओ, और उते पन्द्रह दिना लौ टिको। अकेले पिरभु के भईया याकूब हां छोड़ और कौनऊ से नईं मिलो। जौन बातें मैं तुम हां लिख रओ आंव, परमेसुर हां सामूं जान के कैत आंव, कि बे लाबरी नईंयां। ईके बाद मैं सूरिया और किलिकिया देस में आओ। अकेले यहूदियन में से जौन मसीह हां मानबेवारी मण्डली, जिन ने मोरो मों लौ कभऊं न तको हतो। अकेले जौ सुनत हतीं, कि जौन पेंला हम हां सतात हतो, अब ओई धरम कौ बचन सुनात आय, जीहां पेंला नास करत हतो। और मोरे लाने परमेसुर को गुन गान करत हतीं। चौदह बरस के बाद बरनबास के संग्गै मैं फिन के यरूशलेम हां गओ, और तीतुस हां सोई संग्गै ले गओ। मोरो जाबो ईसुर के बताए भओ: और जो बचन में अन्य जातियन में परचार करत हों, बो मैंने उन हां बता दओ; पै अकेले में उन हां जौन बड़े कहात हते, कि ऐसो नईं होबे, कि मोरी अबै की, और आंगे की दौड़ बेकार जाबै। अकेले तीतुस जौन मोरे संग्गै हतो और जात से यूनानी आय; खतना करवाबे हां अबै जोर नईं डालो गओ। ऐसो उन लबरा भईयन के कारण भओ, जौन लुक के भीतरे पोंच गए हते, और बा छूट जौन यीशु मसीह में मिली हती, ऊ को भेद लेके हम हां परेसान करें। उनकी बातें हम ने एक घड़ी भर नईं मानी, कि बचन की सच्चाई तुम में बनी रए। जौन जनें कछु बड़े समझे जात हते (बे चाए जैसे हते, मोहां ईसे काम नईंयां, परमेसुर कोऊ न्यारी बातें नईं करत) उन से जौन कछु समझे जात हते, मोहां कछु नईं मिलो। अकेले जब उन ने तको, कि जैसो खतना भए लोगन हां बचन सुनाबे की जिम्मेवारी पतरस हां दई गईं, ऊं सई बिना खतनावारन के काजें मोहां। (कायसे जीनें पतरस से खतना भय मान्सन में प्रेरिताई को कार्य बड़े प्रभाव से करवाओ, ओई ने मोसे अन्य जातियन में बढिया काम करवाओ)। और जब उन ने बा दया हां जौन मोय पे भई जान लओ, तो याकूब, कैफा और यूहन्ना ने जौन मण्डली के खम्भा कहात हते, मोहां और बरनबास हां सूदो हाथ मिला के हम हां संग्गै कर लओ, कि हम अन्य जातियन लौ जाबें, और बे औरें खतना वारन लौ। बस जा कई, कि हम गरीब गुरवन की सुध लेबें, और ओई काज करबे को मैं अपने हो लगो आंव। अकेले जब कैफा अन्ताकिया में आओ, तो मैंने उनके मों पे कई, कायसे उनको दोस हतो। कायसे याकूब लौ से कित्तई मान्सन के आबे के पेंला बो अन्य जातियन के संग्गै खात हतो, अकेले जब बे आए, तो खतनावारन के डर से उन से न्यारो हो गओ और बिचकन लगो। उनके संग्गै बचे यहूदियन ने सोई बुरऔ करो, इते लौ कि बरनबास सोई उन की बातन में आ गओ। अकेले मोहां लगो, कि बे बचन की बातन में सूदे नईं चलत, तो मैंने सबरन के सामूं कैफा से कहो, कि तें यहूदी होकें अन्य जातियन घांई चलत आय, और यहूदियन जैसो नईं तो तुम अन्य जातियन हां यहूदियन जैसो चलबे हां काय कैत? हम तो जनम से यहूदी आंय, और पापी अन्य जातियन में से नईंयां। अकेले जौ जानत आंय कि मान्स नैम पूरो करके नईं, परन्त यीशु मैं बिसवास धरके बच सकत आय, हम ने सोई मसीह पै बिसवास धरो, कि हम नैम के कानून कायदन से नईं, अकेले मसीह पे बिसवास धरे से धरमी बने; कायसे नैम के काम करबे से कोऊ जनो धरमी नईं होत। हम में से जौन मसीह से धरमी होओ चाहत आंय, कहूं खुद पापी कड़े, तो का मसीह पाप को चाकर आय? कभऊं नईं। कायसे जो कछु मैंने गिरा दओ, कहूं ओई हां फिन के उठात आंव, तो अपने आप अपराधी ठहरत हों। मैं तो नैम से नैम के काजें मर गओ, कि मैं परमेसुर के लाने जीओं। मैं मसीह के संग्गै क्रूस पै चढाओ गओ हों, अब मैं जीयत नईंयां, अकेले मसीह मोय मैं जीयत आय: और मैं जौन देह में जीयत हों तो ऊ बिसवास से जीयत हों, जौन परमेसुर के पुत्र पै आय, जीनें मोय से प्रेम करो, और अपने प्रान मोरे लाने दे दए। मैं परमेसुर की दया हां बेकार नईं कैत, कायसे धर्मी नैम से होतो, तो मसीह को बलदान बेकार जातो। हे मूरख गलतियो, की ने तुमाओ मन मोह लओ? तुमाई तो आंखन के सामूं यीशु मसीह क्रूस में दिखे। मैं तुम से जौ जानबो चाहत आंव, कि तुम ने आत्मा हां, नैम में चले से, कि बिसवास से पाओ। का तुम ऐसे मूरख आव, कि आत्मा से लैके और देह की रीत पै अन्त कर हौ? का तुम ने इतनो दुख ऐंसई उठाओ? अकेले जौ सब बेकार नईंयां। सो जो कछु तुम हां आत्मा से मिलत और तुम में हो बड़े काज करत, का बो नैम के बताए कामन से, कि बिसवास के जौन बचन तुम ने सुने ऐसो होत आय? इब्राहीम ने परमेसुर पे बिसवास धरो और ओई से ऊ धरमी कहाओ। तो तुम जान लेओ, कि बिसवास करबेवारे इब्राहीम के बाल बच्चा आंय। और धरम पोथी में आओ आय, कि परमेसुर अन्य जातियन हां बिसवास करे से धरमी ठहरा है, पेंला से इब्राहीम हां जौ बता दओ, कि तुमाए नाओं से सबरी जातनवारे आसीसें। सो जौन बिसवास करत आंय, बे इब्राहीम के संग्गै आसीस पात हैं। सो जितने जने नैम के काजन पै भरोसा करत आंय, उन सबरन हां श्राप मिल है, कायसे ऐसो लिखो आय, कि जौन नैम की पोथी में लिखी सबरी बातन नईं करत, बो श्रापित आय। जा बात तो खुली आय, कि नैम से परमेसुर लौ कोऊ धरमी नईं कहात, कायसे धरमी बिसवास करे से जी है। अकेले नैम को बिसवास से कछु लैबो दैबो नईंयां, अकेले जौन इन हां मान है, बो ओई से जीयत रै है। मसीह जौन हमाए काजें श्रापित कहाए, हम हां मोल लेके नैम के श्राप से छुड़ा लओ कायसे ऐसो पोथी में लिखो आय, कि जौन काठ में लटकाओ जै है ऊ श्रापित आय। जौ सब ईसे भओ, कि इब्राहीम हां जौन आसीस मिली बा मसीह यीशु में हो अन्य जातियन हां मिले, और हम बिसवास करबे से ऊ आत्मा पाएं, जी के लाने पेंला कहो गओ हतो। भईया हरौ, मैं मान्सन जैसो कैत आंव, कि मान्स के बचन ऐसे पक्के हो जात आंय, कि कोऊ उनहां नईं टोड़त और न ऊ में कछु जोड़त आय। सो प्रतिज्ञा इब्राहीम और उनके वंस वारन हां मिली, ऐसो नईं कैत, कि वंस हां; मतलब बिलात जन के काजें नईं अकेले एक जनें के वंस हां: और बो मसीह आय। अकेले मैं जौ कैत आंव, कि जौन वाचा परमेसुर ने पेंला से पक्की करी हती, ऊहां नैम चार सौ तीस बरसन के बाद नईं मेंट सकी, कि वाचा बचन झूठे पड़ जाते। कायसे सरग को सब कछु नैम से मिलो, तो जौन बचन दए हते उन से नईं, अकेले परमेसुर ने तो इब्राहीम हां प्रतिज्ञा से दे दई। तो नैम को का भओ? बो तो बुरय कामन से बाद में मिली, कि ऊ वंस के आबे लौ रैबे, जीहां प्रतिज्ञा दई गई हती, और बा सरग के एक दूत के सामूं दई हती। बीचवारो तो एक को नईं होत, अकेले परमेसुर तो एकई आय। तो का नैम परमेसुर की प्रतिज्ञा के आड़े आत है? ऐसो कभऊं न होबे, कायसे ऐसो नैम दओ जातो जीसे जीवन मिले, तो सांची आय कि धरमी सोई नैम से होते। अकेले पवित्र पोथी में लिखो आय कि सबरे पाप के जाल में फंसे आंय, कि बा प्रतिज्ञा जीसे यीशु मसीह पै बिसवास करो चईये, बिसवास करबेवारन के काजें पूरी हो जाबे। अकेले बिसवास की बात आबे कै पेंला नैम के नेंचें हम हां बचात हती, और जी पै बिसवास करने हतो बो आबेवारो हतो, हमओई से बंधे रएं। ईसे नैम मसीह लौ ले जाबे में हमाओ गुरू रही आय, कि हम बिसवास से धरमी होबें। अकेले जब बिसवास आ गओ, तो हम गुरू के नेंचें नईं रए। कायसे तुम सबरे जनें यीशु मसीह पै बिसवास धरके, परमेसुर के बाल बच्चा बन गए। और तुम में से जिन ने मसीह में बपतिस्मा लओ उन ने मानो मसीह हां ओढ़ लओ आय। अब तो कोऊ यहूदी नईं रओ और न यूनानी; और न कोऊ चाकर, और न छुट्टा; न कोऊ मान्स, और न बईयर, कायसे तुम सबरे यीशु मसीह में एक आव। तुम यीशु के हो गए, तो इब्राहीम के वंस के और प्रतिज्ञा जौन दई हती ऊके हक्कदार हो गए। मैं जा कैत आंव, कि वारिस जब लौ बच्चा आय, ऊ सबरी बस्तन को मालक आय, अकेले ऊ में और चाकर में कछु भेद नईयां। पिता के बनाए समय लौ सिपाईयन और भण्डारियन के बस में रैत आय। ऊंसई हम, जब लौ हल्के हते, संसार की बातन के सिखाय में हते। अकेले जब समय पूरो भओ, तो परमेसुर ने अपने पुत्र हां पठैओ, जो स्त्री से जन्मो, और नैम के आधीन भओ। कि जौन नैम से दबे आंय उनहां कीमत देके छुड़ा लैबे, और हम गोद लय वारे हो जाबें। और तुम जौन लड़का हो, एईसे परमेसुर ने अपने पुत्र की आत्मा हां, जौन हे अब्बा, हे पिता कहके टेरत आय, तुमाए हिये में धरो। सो तें अब चाकर नईं रहो, अकेले लड़का हो गओ; और जब लड़का हो गओ, तो परमेसुर की जायजाद को हाकम सोई हो गओ। भलो, तब तो तुम औरें परमेसुर हां न जानके उनके चाकर हते जौन स्वभाव से परमेसुर नईंयां। अकेले अब तो तुम ने परमेसुर हां चीन लओ आय, तो बे छोटी और नेंची पेंला की बातन में काय फिरत आव, का तुम उनई के पाछें फिन के चलो चाहत आव। तुम औरें दिना, मईना, खास बेरा और बरसन हां मानत आव। मोहां तुमाए लाने जौ भय आय, कि कहूं ऐसो न होबै, जैसी मैनत मैंने तुम में करी, बा बेकार न चली जाबै। भईया हरौ, में तुम से बिन्तवारी करत आंव, तुम मोरे जैसे बनो: कायसे मैं सोई तुमाए जैसो हो गओ हतो; तुम ने मोरो कछु नईं बिगाड़ो। अकेले तुमें पता आय, कि पेंला मैंने देह पे कमजोर होकें तुम हां बचन सुनाओ। और तुम ने सोई मोरी हालत पे ध्यान नईं दओ जौन तुम हां बिलोर सकत हती, तुम ने मोहा हल्को नईं जानो; और घिनाए नईं; अकेले मसीह के दूत जैसो मोहां अपनाओ। अब बा खुसी कां गई? मोहां पता आय, कि हो सकत, तो तुम अपनी आंखें सोई निकाल के मोहां दे देते। तो का सांची कैबे से मैं तुमाओ बैरी बन गओ। बे तुम हां मित्र तो बनाओ चाहत आंय, पर अच्छे मन से नईं; सांची जा आय कि बे तुमहां न्यारो करो चाहत आंय, कि तुमई उन हां मित्र बना लेओ। अकेले जौ सोई अच्छो आय, कि साजी बातन में मित्र बनाओ जाए, ऊ बेरा नईं जब मैं तुमाए संग्गै हों। मोरे लड़को, जब लौ तुम में मसीह को रूप न हो जाबै, तो लौ मैं तुमाए काजें मानों बच्चा होबे वारी जैसो पिरात होत सहत आंव। मन में तो ऐसो आत आय, अबै तुम लौ आके और जैसो बतकाव करों, कायसे तुमाए काजें मोरे हिये में संका आय। तुम नैम मानो चाहत आव, मो से कओ, का तुम नैम की नईं सुनत? ऐसो लिखो आय, कि इब्राहीम के दो लड़का भए; एक नौकरानी से, और दूसरो ब्यावता से। अकेले जौन नौकरानी से भओ, बो मन की मरजी से भओ; और जौन ब्यावता से भओ, बो प्रतिज्ञा से भओ। जे मानो कनौत आए, दोई जनी मानो दो वाचाएं आंय, एक जौन सीने पहार में दई जीसे दास भओ; जौन हाजिरा आय। और हाजिरा मानो अरब देस को सीने पहार आय, और आज को यरूशलेम ऊ की बरोबरी को आय, कायसे बो अपने बाल बच्चन के संग्गै बंधुआ हो गओ। अकेले ऊपर की यरूशलेम छुट्टा आय, और हमाई मताई आय। कायसे ऐसो लिखो आय, कि हे बांझ, तें जौन बच्चा नईं जनत खुस हो, तें जीको पिराबो नईं उठत खुल के जय मना, कायसे जौन छोड़ दई गई हती ऊके बाल बच्चा जौन सुहागिन आय ऊसे बिलात आंय। भईया हरौ, हम इसहाक जैसे प्रतिज्ञा की सन्तान आएं। और जैसो ऊ बेरा मन से जनमो भओ आत्मा से भए हां परेसान करत हतो, ऊंसई अबै सोई होत आय। अकेले पवित्तर पोथी में का लिखो आय? नौकरानी और ऊके लड़का हां निकाल दे, कायसे नौकरानी को लड़का ब्यावता के लड़का के संग्गै जायजाद को भागीदार नईं हो सकत। ई लाने भईया हरौ, हम नौकरानी के नईं, अकेले ब्यावता के लड़का आंय। मसीह ने छुट्टा होबे हां हमें छुड़ाओ आय; सो ऐंसई बने रओ, और दास को बोझा फिन से न लेओ। हेरो, मैं पौलुस तुम से कैत आंव, कि खतना करा हौ तो मसीह से तुम हां कछु फायदा न हुईये। अकेले में खतना कराबेवारन हां समझात आंव, कि तुम हां पूरे नैम मानने पड़ हैं। तुम जौन नैम द्वारा धरमी बनो चाहत आव, मसीह से अलग और दया से गिरे भए आव। कायसे आत्मा के कारन हम बिसवास से, आबेवारी धरम की गैल हेरत आंय। मसीह यीशु में न खतनावारो और न बिना खतनावारो कछु काम के आंय, अकेले जौन प्रेम से काम करत आय। तुम तो बढ़िया दौड़ रय हते, फिन कीने तुम हां बिलोर दओ, कि सांची बातन हां न मानो। ऐसो जीने तुम हां नबेरो उनकी सीख नईंयां। थोड़ो सो खमीरा सबरे मड़े आटे हां खमीर कर डालत आय। मोहां पिरभु कींसो तुम पै ईमान आय, कि तुमाओ कोऊ ओर विचार नईंयां; अकेले जौन तुम हां बिलोर देत आय, बो कोऊ काय न होबै दण्ड पा है। अकेले भईया हरौ, जैसे मैं अबै लौ खतना की बात करत आंव, तो काय हां मोहां परेसान करो जात आय; क्रूस से जौन डर हतो बो चलो गओ। भलो होतो, कि जौन तुम हां बिलोरत आंय बे काट डाले जाबें। भईया हरौ, तुम छुट्टा होबे हां बुलाए गए आव अकेले ऐसो न होबै, कि जो छुट्टा होबो मनमानी हां छू ट दैबे, अकेले प्रेम से एक दूजे की सेवा करो। कायसे सबरो नैम एकई बात में पूरो होत आय, कि तें अपने पड़ोसवारे से अपनो जैसो प्रेम राख। अकेले तुम एक दूजे हां दांत से काटत आव और फाड़बे हां फिरत आव, सूदे रओ, कि एक दूजे हां सत्यानास न कर देओ। अकेले मैं कैत आंव, आत्मा जैसो कैबे ऊंसे करो, तो तुम अपने मन की बात में न चल हौ। कायसे मन आत्मा से उल्टो आय, और आत्मा मन से उल्टो आय, और दोई एक दूसरे के दुसमन आंय; कि जौन तुम करो चाहत आव ऊ न कर पाओ। जैसे तुम आत्मा से चलत आव, तो नैम के नेंचें नईंयां। मन के काज ऐसे आंय, जैसे परतिरिया संगत, गन्दे काम, लुच्चाई। मूरतन की पूजा, गुनयाई, बैर, न्याओ, जलन, विरोध, फूट और बुरय काम। दूसरन को बुरओ चाहबो, नसा करबो, नांच, राई, और ऐसई बुरय काम, इनके लाने मैं पेंला से कैत आंव, जैसो पेंला सोई कहो हतो, कि ऐसे काम करबेवारे ईसुर के राज में हक्कदार नईं हुईयें। अकेले आत्मा के फल प्रेम, आनन्द, मेल मिलाप, धीरज धरबो। दया, भलो करबो, बिसवास, नम्रता और कायदे से रैबो आय; ऐसे कामन से उलटो कोऊ नैम नईंयां। जौन मसीह यीशु के हो गए, उन ने अपने मन हां ऊ की सबरी इच्छा और अभलाखा संग्गै क्रूस पै चढ़ा दओ। मानो हम आत्मा से जीयत आंय, तो आत्मा जैसी चाल सोई चलें। हम अपने हां बड़ो सोच के एक दूजे हां परेसान न करें, और एक दूसरे को बुरओ न चाहें। भईया हरौ, कोऊ मान्स कोई गलती में पकड़ो जाए, तो तुम जौन आत्मिक आव, तो नरमाई से ऐसे हां संभालो, और अपने हां चौकन्ने राखो कि गिर न जाओ। तुम एक दूजे को बुझवा उठाओ, और ई तरहां मसीह को नेम पूरो करो। कायसे कोऊ कछु न होबे पै अपने हां कछु सोचे, तो अपने हां धोखा देत आय। अकेले जनें अपने काम हां जांचे, दूसरे के लाने नईं अकेले अपने हां बड़वाई करबे को मौका हुईये। कायसे हर मान्स अपनो बुझवा ढो है। जौन धरम पोथी की बातें सीखत आय, बो सब नोंनी बातन में सिखाबेवारे हां सोई जोड़े। धोके में न रओ, परमेसुर को मजाक नईं करो, कायसे मान्स जो कछु बो है ओई काट है। कायसे जौन अपने जी के लाने बोत आय, बो अपने काजें नास होबे की कटनी काट है। भलो करबे में हिम्मत न हारो, कायसे हम ढिलयाए न, तो अपनी बेरा पे कटनी काट हैं। ईसे जां तक मौका मिलै हम सबरन के संग्गै भलो करें, मानके भईयन के संग्गै। हेरो, मैंने कैसे बड़े बड़े अक्षरन में तुम हां अपने हाथन से लिखो आय। जौन संसार हां दिखाओ चाहत हैं बे तुमाए खतना करवाबे हां जोर देत आंय, ईसे कि मसीह के क्रूस पै हो उन हां कोऊ न परेसान करें। कायसे खतना कराबेवारे खुद नैम में नईं चलत, अकेले तुमाओ खतना ईसे चाहत आंय, कि तुम पै हो बड़वाई मारें। अकेले ऐसो नईं होबे, कि मैं और कोऊ बात में बड़वाई करों, केवल हमाए पिरभु यीशु मसीह के क्रूस पै, जीसे संसार मोरे काजें और मैं संसार के काजें क्रूस पै चढाओ गओ हों। कायसे न खतनावारे, और जौन को खतना नईं भओ कछु आंय, केवल जौन नए बन गए। और जौन ई नैम पै चल हैं, उन पै और परमेसुर के खास इस्राएल पै, सान्ति और दया होत रए। आगे कोऊ मोहां परेसान नईं करे, कायसे मैं यीशु की चिनानी हां अपनी देह में लगाए फिरत आंव। भईया हरौ, हमाए पिरभु यीशु मसीह की दया तुमाई आत्मा पै रैबे। आमीन। पौलुस की लिखी जौन परमेसुर की मरजी से यीशु मसीह कौ प्रेरित आए, सबरे पवित्तर और जौन यीशु मसीह पै बिसवास करत इफिसुस में आंय। हमाए पिता परमेसुर और पिरभू यीशु मसीह के नाओं में तुम सबरन हां दया और सान्ति मिले। हमाए पिरभू यीशु मसीह के परमेसुर और पिता हां धन्न होबे, जिन ने हम हां मसीह में सरग में सबरी आसीस दई आंय। जैसे उन ने हम हां संसार के बने से पेंला नबेर लओ, कि हम उन लौ प्रेम, पवित्तर और बेखोट कड़ें। अपनी मरजी से हम हां पेंला से धरो कि यीशु मसीह में हम उनके गोद लए लड़का कहाबें। कि उनकी दया को गुनगान होबे, जौन उन ने हमें उन प्यारे में सेंत मेत दओ। हम हां उन में और उनके रकत में हमाए बुरे कामन की क्षिमा, उनके दया जैसे धन में से मिलो। जीहां उन ने सबरे ज्ञान और समझ में हम पै बेजा करो। उन ने अपनी मरजी को लुको भेद हम हां अपने विचार से बताओ जीहां उन ने अपने मन में ठानो हतो। कि दिना पूरे होबे पे ऐसो होबै कि जो कछु सरग में, और जौन धरती पै आय, बो सब मसीह के नाओं में जुड़ जाबै। ओई में हम सोई उन की मरजी से जौन अपनी मरजी से सब कछु करत आंय, पेंला से नबेरे जाके हक्कदार भए। कि हम ने पेंला से मसीह पै ऐसी आस धरी हती, कि उनके गुन गान हम से होबें। उनई में जब तुम ने सांचे बचन सुने, जौन से तुमाए तरन तारन हो, जीहां तुम ने मानो, और कौल करे भए पवित्रात्मा की चिनानी लग गई। बो उनके मोल लय वारन के छूटबे पे जौन जायजाद हम हां मिल है ऊ को बयानो आय, उनके नाओं को गुन गान होबे। ऐई से मैं सोई बिसवास करबे लाक बचन सुनके जौन तुम में पिरभू यीशु में आय, और तुमाए प्रेम से सभन हां पता आय। तुमाए लाने धन्न मानबो नईं छोड़त, और अपनी बिन्तवारी में तुम हां याद करत आंव। कि हमाए पिरभू यीशु मसीह के परमेसुर जौन सबरे जस को देबेवारो आय, तुम हां अपनी चिनारी में, बुद्धि और प्रकास की आत्मा देबे। तुमाई आंखें खुलें कि तुम जानो, कि उनके देखे से तुम हां बड़ी आसा मिली आय, और उनके पवित्तर लोगन में ऊ की जायजाद को मान बड़ो आय। और उनको जोर हमाए काजें जौन बिसवास करत आंय, जौ सब उनके जोर से नओ आय। जौन उन ने मसीह के लाने करो, कि उन हां मरे भयन में से जिलाओ और सरग में अपने सूदे हाथ पै। सब बड़प्पन, अधकार और बल, और राज काज, और हर एक नाओं से जौन ई धरती पै और आबेवारे लोक में सोई रै है बैठाओ। और सब कछु उनके गोड़ों के तरें कर दओ: और उन हां सब बस्तन पै ऊं चो करके मण्डली हां दओ। जा उनकी देह आय, और ओई को जस आय, जौन सबरन में सब देत आय। और उन ने तुम हां सोई जिलाओ, जौन अपने बुरय काम और पापन में मरे भए हते। तुम पेंला ई संसार की रीत पै, और आकास के हाकम शैतान और ऊ आत्मा से चलत हते, जौन अबै सोई कई न करबे वारन में काम करत आय। पेंला हम सोई अपने मन की मरजी पै चलबेवारे हते, और मन की मरजी पूरी करत हते, हमाए काज नास होबे वारन जैसे हते। अकेले परमेसुर जौन बड़ी दया करत आय; और अपने प्रेम से जौन उन ने अपन से करो। जब हम अपने बुरए कामन में मरे जैसे हते, तब हम हां मरे भयन में से जिलाओ; (दया से तुमाओ तरन तारन भओ आय)। और मसीह यीशु के संग्गै ऊं चो करो, और सरग में उनके संग्गै बैठाओ। उनकी किरपा जौन मसीह यीशु में हम पै भई आय, आबेवारे दिना में अपनी दया को बड़े धन दिखाबे। कायसे बिसवास करबे पै दया से तुमाओ तरन तारन भओ आय। और करमन से नईं, ऐसो न होबै कि कोई बड़वाई करे। कायसे उन ने हम हां बनाओ आय; और मसीह यीशु में अच्छे पुन्य के काम करबे के लाने परमेसुर ने पेंला से हमाए लाने धरो होबे। सो ध्यान करो, कि तुम जौन संसार के कैबे हां अनजान हो, (और जौन मान्स के हाथन से खतना करे गए, काय बे तुम हां बिना खतनावारे कैत आंय)। जब तुम मसीह से न्यारे और इस्राएल के लोग नईं हते, और जौन बचन दओ गओ हतो ऊ में न हते, और बिन आसा और संसार में बिना ईसुर के हते। अकेले अब मसीह यीशु में जौन पेंला दूर हते, मसीह के रकत से ऐंगर आ गए आव। कायसे उनईं ने हमाओ मेल करवा दओ, और हम हां एक कर दओ: और जौन भीत न्यारो करत हती ऊहां गिरा दओ। और हमाए मन से उल्टी बे नैम के तरीका हते, उन हां सोई अन्त कर डालो, और दोईयन से अपने काजें एक नओ मान्स बना के मिला लओ। और क्रूस पै बो जौन बैरी हतो ऊहां नास करो, और ऐसे दोईयन हां एक बना के परमेसुर से जोड़ दओ। और उन ने आके तुम हां जौन दूर हते, और जौन ऐंगर हते, दोई हां जुड़ मिल जाओ, जौ बताओ। और उन ने दोईयन हां एकई आत्मा में पिता लौ पोंच करवा दई। ईसे तुम अब गैर देस के और यात्री नईं रए, अकेले पवित्तर लोगन के संग्गी ऐई देस के और परमेसुर के वंस के हो गए। और प्रेरितन और आगमवकतन की बनाई नीं पै, जीके कोनिया को पथरा मसीह यीशु आय, बनाए गए आव। जी में सबरो घर एक संग्गै मिलके, पिरभू में एक पवित्तर मन्दर बनत जात आय। जी में तुम सोई आत्मा में हो परमेसुर के रैबे की जांगा होबे के लाने, एकई संग्गै बनत जात आव। ऐईसे में पौलुस जौन तुम अन्य जातियन के काजें मसीह यीशु को दास आंव। और तुम ने परमेसुर की दया कैसे मिलै ईकी बात सुनी होबै, जौन तुमाए काजें मोहां मिलो आय। जौ भेद मोहां जोत से मिलो, जैसो मैं पेंला थोड़े में लिख चुको आंव। जीहां बांच के तुम हां पता चल जै है, कि मैं मसीह को ऊ भेद किते लौ समझत आंव। जौन पेंला मान्सन हां ऐसो नईं बताओ गओ हतो, जैसो आत्मा से अब उनके पवित्तर प्रेरितन और अगमवकतन हां मिलो आय। कि मसीह यीशु में बचन सुनके अन्यजाति लोग सोई मिलबेवारे हक्क में सोंजिया हुईयें, और एकई देह और प्रतिज्ञा के संग्गी हुईयें। और मैं, परमेसुर की दया से मिले दान के, और उनकी जान के बल से मोहां मिलो, और उन बचनन को सुनाबेवारो बनो। मो पै जौन सबरे परित्तर लोगन में सबसे लौरो आंव, जा दया भई, कि मैं अन्यजातियन हां मसीह में मिलबेवारे महा धन के बचन सुनाओं। और सबरन पै जा बात उजागर करों, कि ऊ भेद कैसो आय, जौन सबके रचबेवारे परमेसुर ने पेंला से लुका के धरो हतो। कि अब मण्डली से परमेसुर के बिलात ज्ञान उन मुखियन और हाकमन पै जौन सरग में आय खोले। ऊ पुरानी मन्सा से जौन उन ने हमाए पिरभू यीशु मसीह में करी हती। जी में हमें उन पै बिसवास धरके बड़ी हिम्मत और आस से उन लौ आबे को अधकार आय। ईसें मैं बिन्तवारी करत आंव कि जौन परेसानी मोहां तुमाए काजें हो रई आय, उनसे तुम हिम्मत न हारौ, कायसे उनसे तुमाओ भलो हुईये। एईसे उन पिता के सामूं घूंटे टेकत आंव। जिनसे सरग और धरती पै, एक एक वंस को नाओं धरो जात आय। कि बे अपने जस से जो दान दैबे, कि तुम उनके आत्मा से अपने भीतरवारे मनुष्यत्व में बल पाकें मजबूत होत जाओ। और बिसवास करे से मसीह तुमाए हिये में रैबे, कि तुम प्रेम में जड़ पकड़ के और नीं डाल के। सबरे पवित्तर लोगन के संग्गै अच्छी समझ को ज्ञान पाओ। और मसीह के ऊ प्रेम हां जान सकौ, जौन ज्ञान से बायरे आय, कि तुम परमेसुर की सबरी बातन में पक्के हो जाओ। अब जौन ऐसो बली आय, कि हमाई बिनती और मांगे से अधिक देत आय, ऊ बल से जौन हमाए भीतर काज करत आय। मण्डली में, और मसीह यीशु में, उनको मान पीढी से पीढी लौ हमेसा होबै। आमीन। मैं जौन पिरभू में बंधुआ आंव तुम से बिन्तवाई करत आंव, कि जी काजें तुमाओ बुलऊ आ भओ आय, ऊ की जैसी चाल चलो। मानो नरम होकें धीरत और प्रेम से, एक दूजे की बात सै लेओ। और मेल से एक होकें आत्मा में एक होबे की कोसिस करो। एकई देह आय, और एकई आत्मा; जैसे तुम हां जौन नेवता मिलो हतो अपने बुलाए जैबे से एकई आसा आय। एकई पिरभू आय, एकई बिसवास, एकई बपतिस्मा सबरन ने लओ आय। और सबरन को एकई परमेसुर और पिता आय, जौन सबके ऊ परे, और सबरन के बीचां, और सबरन में आय। अकेले हम में से एक एक जनें हां मसीह के दए नाप से दया मिली। ईसे बे कैत आंय, कि बे ऊंचे चढ़ गए, और हम जाने बंधे हते ऊहां सोई ले गए, और मान्सन हां सब कछु दओ। (उनके चढ़बे से, और का भओ कि बे पाताल में सोई उतर के गए। और बे जौन नेचें उतरे हते बे आकास के ऊ परे सोई चढ गए, कि सब कछु साजो हो जाबे)। उन ने कित्तई हां प्रेरित बनाओ, और कित्तई हां अगमवकता, और कित्तई हां बचन सुनाबेवारे, और कित्तई हां रखनवारी करबेवारे और कक्षा लैबेवारे बना दए। जीसे बिसवास करबेवारे पक्के होबें, और सेवा करी जाबै, और मसीह की देह बढत जाबै। जब लौ हम सबरे जनें सब बिसवास की बातन में, और परमेसुर के पुत्र के जैसे एक न हो जाबें, और पक्के जनें हो जाबें और मसीह के से डील डौल लौ बढ़ न जाबें। कि हम आगे बच्चन घांई नईं रैबें, जौन मान्सन की ठगाई और चालाकी से उनके फंसाबे की चाल, और उनके कैबे से, एक एक बयार से उछाले, और इते उते घुमाए जात आंय। अकेले प्रेम में सूदे चलत, सबरी बातन में जौन मुखिया आय, जानो मसीह में बढत जाओ। जीसे पूरो सरीर एक एक जोड़ से मिलके, और गसके ऊ तौर पै जाने सबरे जनों हां अलग अलग होत आय, अपने में बढ़त जात आय, कि बो प्रेम में बढ़त चली जाबै। ईसे मैं जौ कैत आंव, और पिरभू में तुम हां चिताय देत आंव, कि जैसे अन्यजाति लोग अपने मन की बुरई बातन पै चलत आंय, तुमअब से ऐसे नईं चलो। कायसे उनकी बुद्धि में अन्धयारो भरो आय और न समझी से जौन उन में आंय, और उन के हिये के कर्रे होबे से बे परमेसुर की जिन्दगी से दूर हो गए। उन हां अब कछु पता नईं पड़त, और बे बुरय काम करत आंय, और सबरे गन्दे काम मन से करत आंय। अकेले तुम ने मसीह से ऐसो नईं सीखो। तुम ने सांची उनकी बात पै ध्यान धरो, और जैसो यीशु में सांचो आय, बोई तुम हां सिखाओ गओ आय। कि तुम पेंला की बातन हां जौन पुरानो मान्स जौन धोखा भरी बातें करत आय, ऊहां उतार डालो। और अपने मन हां जौन आत्मा की बातन में ढल के नये मान्स बनत जाओ। और नये मान्स को चोला पैरो, जौन परमेसुर ने सांची धरम, और पवित्तर जीवन के लाने बनाओ आय। ईसे लाबरी कैबे छोड़ के सबरे जनें एक दूजे से सांची कओ, कायसे हम एक दूसरे के अंग आंय। खुन्सयाओ, अकेले पाप न कर बैठो: दिन डूबे लौ तुमाओ खुन्सयाबो न रैबे। और शैतान छलिया हां कोऊ मौका न देओ। चोरी करबेवारे अब चोरी नईं करें, अकेले अच्छे काम करें और हाथन से मैनत करें; कि जीहां अटका पड़े, ऊहां दैबे हां तुम लौ कछु होबे। कोऊ गन्दी गाली तुमाए मों से न कड़े, अकेले बे बातें जीसे मान्स को भलो होबे, और सुनबे वारन हां दया आबे। और परमेसुर की आत्मा हां न दुखाओ, जिन से तुमाए पाप से छूटे भय हां ईकी छाप लगी। सबरी कड़वाहट और खुन्स, और न्याओ, और बुराई और दूसरन से बैर तुम न करो। अकेले एक दूजे पै दया करो, और जैसे परमेसुर ने मसीह में तुमाए पाप क्षिमा कर दए, ऊंसई तुम सोई एक दूजे के पाप क्षिमा करो। सो अच्छे बच्चन होकें परमेसुर जैसे हो जाओ। प्रेम से चलो; जैसो मसीह ने तुम से प्रेम करो; और हमाए काजें जैसो अगरबत्ती की सुगन्ध परमेसुर के आगे भेंट चढ़ाई। जैसा पवित्तर मान्सन के लेखे अच्छो आय, तुम में परतिरिया संगत न होबे, और कोऊ गन्दो काम, और लोभ की बातें लौ न करो। और बेसरम जैसे बातें और मूरखता की बातें, और न ठिठोरी करो, कायसे जे बातें नईं सोहात, अकेले धन्न मानो। कायसे तुम हां पता आय, कि कोऊ परतिरिया संगत करबेवारो, कि गन्दो मान्स, और लोभी मान्स, जौन मूरतें पूजा करबेवारे जैसो आय, मसीह और परमेसुर के राज्य में हींसा न हुईये। कोई तुम हां ऊं सई बातन से धोखा न देबे; कायसे ऐसे कामन से परमेसुर को श्राप अग्या न मानबेवारन पै होत आय। सो तुम उनके संग्गै न रओ। कायसे तुम पेंला अंधियारे में हते अकेले अब पिरभु में जोत आव, सो उजयारे वारन जैसो चलो। (कायसे जोत कौ फल सब परकार की भलाई, और धार्मिकता, और सत्त आय) और जौ जांचो, कि पिरभू हां का अच्छो लगत आय? और अंधयारे में जौन बेकार काम होत आंय साथ न दो, अकेले कओ कि जे अच्छे नईंयां। ऐसे लुके छिपे कामन पै बतकाओ करबे से सरम आत आय। जी बातन और कामन हां हटको जाबै बे सबरे जोत से परगट होत आंय, कायसे जौन सब कछु परगट करत आय बो जोत आय। ईसे बे कैत आंय, कि सोबेवारे जागो और मरे भय में से जी उठौ; तो मसीह की जोत तुम पै चमक है। ईसे ध्यान धरो, कि कौन सी गैल निंगत आव; मूरखन जैसो नईं अकेले बुद्धमान जैसे निंगो। और जौन समय मिलो आय ऊहां मांगो समझो, कायसे बुरे दिना आंय। सो मूरख न बनो, अकेले चित्त लगाओ, कि पिरभू की चाहना का है? और दाखन के रस पीके बेसुर्त न हो, कायसे ऐसे में बुरय काम होत आंय, पै आत्मा से भरत जाओ। मिल जुल के भजन और गुनगान और आत्मा के गीत गाओ, और अपने मन में पिरभू के सामूं गात रओ और कीर्तन करो। और हमेसा सबरी बातन में हमाए पिरभू यीशु मसीह के नाओं से परमेसुर पिता हां धन्न मानो। और मसीह से डरा के एक दूजे की कई करो। बईयरें अपने मुन्स की कई करबें, मानो जैसे पिरभू की। कायसे मुन्स बईयर की मूड़ आय जैसे प्रभु यीशु मसीह मण्डली की मूड़ आय। अकेले जैसे मण्डली मसीह की कई करत, ऊं सई बईयरें एक एक बात में अपने मुन्स की बात मानें। मुन्स अपनी बईयर से प्रेम राखो, जैसो मसीह ने मण्डली से करो और अपनो प्राण ऊके काजें दे दओ। उन ने अपने बचन से मण्डली हां पवित्तर करो और ऊहां बचन के जल से स्नान करा के पवित्तर करो। पिरभू यीशु मसीह ने मण्डली हां एक बढ़िया मण्डली करो, और ऊहां सबरे दोस से दूर करके अपने लौ खड़ी होबे लाक बनाओ। सो मुन्स अपनी घरबारी से अपने जैसो प्रेम करे, जौन अपनी घरबारी से प्रेम करत आय, मानो बो अपनी देह से प्रेम करत आय। कायसे कोई अपने सरीर से कभऊं बैर नईं रखत और देह की देखभाल करत आय, जैसे पिरभू यीशु मसीह अपनी कलीसिया से करत आय। कायसे हम उनकी देह जाने मण्डली के भाग आंय। ईसे मान्स अपने मताई बाप हां छोड़के अपनी घरबारी से जुड़ो रै है, और बे दोई एक देह हुईयें। जा बात समझबे में मुसकल आय; परन्त जा बात यीशु मसीह और उनकी कलीसिया के लाने सोई आय। तुम सबरे जनें अपनी अपनी बईयरन से अपने घांई प्रेम राखो, और बईयर अपने मुन्स से डरें। हे लड़को, अपने मताई बाप की कई करो, कायसे ऐसो करबो साजो आय। अपने मताई बाप को मान करो (जा पैली अग्या आय, जी के संग्गै परमेसुर की सौगंध सोई आय) कि तोरो भलो हुईये, और तें बिलात दिना लौ धरती पै जीयत रहै। लड़का वारे, अपने बच्चन पै कर्रे न होओ परन्त उन हां पिरभू की बातें सिखाओ, और जैसे जैसे बे बढ़त जाएं, उन हां चितात रओ। हे चाकरो, जौन संसार में तुमाए मालक आंय, उनसे डर के उनके बस में रओ, जैसे तुम यीशु मसीह की कई करत आव, ऊं सई उनकी सोई करो। और मालक हां खुस करबे उनकी सेवा दिखाबे भर हां न करो, परन्त यीशु मसीह के चाकरन घांई उनकी बात मानो। और अपने मालकन की ऐसी सेवा करो, जैसी पिरभू की सेवा करत आव। कायसे जो जैसो कर है चाहे चाकर होबै चाहे दूसरो जन, पिरभू से ऊं सई इनाम पै हो। मालको तुम सोई चाकरन हां धमकी न देओ, परन्त साजी बातें करो कायसे उनको और तुमाओ एकई मालक आय, जौन सरग में रैत आय और बो कोई की तरफदारी नईं करत। सो पिरभू के जोर से मजबूत बनो। ई संसार में परमेसुर के हथयार धरो; कि तुम शैतान छलिया की चाल से बचके मजबूत बने रओ। कायसे हमाई लड़ाई मान्सन से नईंयां, परन्त हमाई लड़ाई शैतान और अंधियारे के जोर से आय, जौन आकास में आय। ईसे जौन हथयार परमेसुर ने दए आंय उन हां लै लेओ कि जब बुरे दिना आबें तो तुम उनको सामना कर सको, और जब लड़ाई खतम हो जाबै तो तुम पक्के ठांड़े रओ। सो सांचे से करयाई कसो, और परमेसुर को न्याय तुमाए ओढ़बे हां होबे। और दूसरन हां परमेसुर की कथा सुनाओ, तुमाए गोड़ों के लाने मानो जूता कौ काम करें। और तुमाओ बिसवास मानो ढाल जैसी तुम हां शैतान के जलत भय तीर से बचा है, और तुम पक्के कड़ हौ। और परमेसुर को तरन तारन तुमाए मूड़ हां बचा है, और परमेसुर को बचन तलवार जैसो मन में धर लेओ। और सबरी बेरा मन से बिन्तवारी करत रओ, सो जगत रओ, और सब तरन तारन पाए भईयन के लाने बिन्तवारी करत रओ। और मोरे लाने सोई, कि जब मैं परचार करों तो मोहां ऐसो तेज मिले, कि मैं हिम्मत से परमेसुर के बचन की छुपी बातन हां बताओं, जी के लाने मैं इते जंजीर से बंधो आंव। कि जब मैं बचन हां बड़ी हिम्तत से, बिना डर के सुनाओं। तुखिकुस जौन मोरो प्यारो भईया जौन मन से पिरभू की सेवा करत आय, बो तुम हां सबरी बातें बता दै है, कि मैं कैसो रैत आंव। मैंने ऊहां ऐई से तुम लौ पठैव आय, कि तुम हां बताए कि मैं कैसो आंव, और ऊ तुम हां उभार है। अब परमेसुर पिता और पिरभू यीशु मसीह से सबरे भईयन हां सान्ति, प्रेम और बिसवास मिले। जौन जनें हमाए पिरभू यीशु मसीह से पूरे मन से प्रेम राखत आंय, उन सबरन पै दया होत रए। यीशु मसीह के जनें पौलुस और तिमुथियुस की ओर से सब पवित्तर भईयन हां, जौन फिलिप्पी शहर में रैत आंय, उनके गुरुजन और सेवक हां। हमाए पिता परमेसुर और पिरभू यीशु मसीह के नाओं में तुम हां दया और सान्ति मिले। मैं जब तुम हां याद करत आंव, तो परमेसुर कौ धन्न मानत आंव। और तुमाए काजें बिन्तवारी करत आंव, तो मन से करत आंव। कायसे तुम पेंला से आज लौ सुसमाचार फैलाबे में मोरे संग्गै रैत आव। और मोहां पक्को बिसवास आय, कि जीने तुम में तरन तारन को काज करो आय, ओई यीशु मसीह के आबे लौ पूरो कर है। मैं एैसई तुम सब के लाने सोचत आंव, कायसे तुम सबरे जनें मोरे हिये में बसे आव, और चाहे मैं इते जेहल में आंव और सुसमाचार हां प्रचारत आंव तुम सबरे जनें मोरे संग्गै ठांड़े आव। पिरभू जौ जानत आय, कि मोरे हिये में तुम सबरन के लाने पिरभू यीशु मसीह जैसो प्रेम आय। मोरी जा बिनती आय, कि तुमाओ प्रेम ओई मन से पिरभू यीशु मसीह पै लगो रैबे। कि तुम चीनो कि कौन सी बात तुमाए काजें भली आय, और जब लौ पिरभू फिन के आहें; तुम पवित्तर और बिन खोट के बने रओ। और उन बातन से जौन यीशु मसीह पै ध्यान धरे से मिलत आय, परमेसुर के नाओं के जस से बढ़त जाओ। भईया हरौ, मोरी जा चाहना आय, कि तुम जौ समझो कि जो कछु मोय पे बीती, ऊसे पिरभू को जस बढो आय। इते लौ कि रोम के राजा कैसर की पूरी पलटन वारन हां जौ पता आय, कि मैं पिरभू यीशु मसीह के लाने ई जेहल में आंव। और पिरभू में जौन मोरे भईया आंय, मोरे पकड़े जाबे से और भी हिम्मत से पिरभू को बचन सुनात रैत आंय। जा सोई सांची आय कि कित्ते जन जलन से और कित्ते भली मनसा से बचन सुनात आंय। कछु जनें तो प्रेमबस परचार करबे से जौ जानत आंय कि मैं इते सुसमाचार हां बचाबे हां आओ। और कछु जनें अपनी बड़ाई हां परचार करत आंय, मन से नईं कि जेहल में मोरे लाने और परेसानी होबे। इन सबरी बातन से का जा बात सांची आय, कि बुरय विचार से, और सांचे में पिरभू को परचार हो रओ आय, और ईसे मोहां खुसी आय। मोहां पता आय, कि तुमाई बिन्तवारी से, और आत्मा के जोर से, जौ सब मोरे छूटबे के लाने हुईये। मोरे मन की जा चाहना आय, कि मैं कभऊं नेंचो न हेरों, परन्त हिम्मत धरों कि पिरभू की बड़ाई मोरी देह से होत रैबे, जैसो अबै होत आय, चाहे मैं जीओं और चाहे मर जाओं। कायसे मोरे लाने जब लौ जीयत रओं तो पिरभू के लाने आय, और मर गओ तो और भी बढ़िया आय। जैसे मैं जीओं तो मोरे काज हां नोंनो आय, तौ का कहों, मोरी समझ में नईं आत। अब मैं अधर में मानो लटको आंव; मोरो मन आय कि मैं ई संसार हां छोड़ के पिरभू यीशु मसीह लौ जाओं। परन्त तुमाए काजें मोहां जीबो और भी अच्छो आय। ईसे मोहां पता आय कि मैं तुमाए संग्गै जीयत रै हों, कि तुम अपने बिसवास के आनन्द में बढ़त जाओ। सो मोरे फिन के तुमाए बीच आबे से तुमाओ आनन्द और भी बढ़े, और तुम पिरभू यीशु मसीह में और भी बढ़त जाओ। इत्तो करौ कि तुमाओ जीवन सुसमाचार की बातन जैसो होबै, और चाहे मैं आओं और न आओं मोहां पता चलै, कि तुम एकई मन के बने आव और एक होकें पिरभू की बात दूसरन लौ बताबे में लगे रैत आव। जौ भलो आय कि तुम उन से नईं डरात? जौन तुमाओ बिरोध करत आय ईसे जौ लगत आय कि बे औरें सत्यानास हो जै हैं, परन्त जौ परमेसुर से तुमाए तरन तारन हां आय। परन्त परमेसुर ने तुम पै ऐसी दया करी आय, कि तुम उन की बातन पै बिसवास धरो, और उनके काजें दुख सोई सहो। और जैसो काम तुम ने मोहां करत तको आय ऊं सई तुम सोई करौ, तुम अबै सोई सुनत आव, कि मैं ऊं सई काज करत जात आंव। पिरभू यीशु मसीह के होबे से कछु हिम्मत मिली आय, और उन के प्रेम से कछु दिलासा मिली आय, और आत्मा में उनके संग्गै रैत आंव। तो एक सो मन राखो जीसे मोहां खुसी होत आय, एक सौ प्रेम करो, और अपने काम करबे में एक मन के रओ। अपनी बड़वाई के लाने और कोई के बिरोध में कछु न करो परन्त दूसरन हां अपने से अच्छो सोचो। अपने भले की नईं सोचो, परन्त दूसरन के भले की सोचो। जैसा यीशु मसीह को मन हतो ऊं सई तुमाओ होओ चईये। जौन परमेसुर हते परन्त उन ने परमेसुर जैसो होबो नईं चाहो। परन्त न कछु बन गए, और चाकर जैसे हो गए, और मान्स बन गए। और मान्स बनके ई संसार में आए और खुदई नेंचें हो गए, और परमेसुर की अग्या मानके क्रूस पै मरबे हां तईयार हो गए। ऐई से परमेसुर ने उन हां बढ़ाओ, और उन हां बो नाओं दओ जौन सबरे नाओं से बड़ो आय। कि यीशु मसीह के नाओं से एक एक मान्स अपने घुटने पै होकें उन हां मानें, सरग में, धरती पै, और धरती के नेंचें सोई। और हर एक जनों मान लेबे कि यीशु मसीह केवल पिरभू आय, कि परमेसुर पिता को मान होबे। सो मोरे भईया हरौ, तुम मोरे देखत और मोरे पछाऊं सोई उन की बातन मानत रए, सो ऐसई अपने अपने तरन तारन होबे जैसे काज करत रओ। कायसे परमेसुर जौन तुमाए मन से और इच्छा हां तुमाए जीवन में पूरो करके अपनी जय करो चाहत आय। सबरे काम बिना कुड़कुड़ाए और बिना कछु कहे करो। कि तुम ई संसार में बिन दोस के सूदे सादे परमेसुर के जने होकें ई बुरई और टेढ़े संसार में बिन पाप बने रओ, (उन मान्सन के बीच जिन्हें तुमें जीवन की बातें बता के, मानो एक जलत भओ दिया जैसे आव)। तुम ऐसई बने रए तो मोहां जो गरब हुईये, कि जौन सेवा मैंने तुमाए बीच मैनत से करी बो ऊं सई नईं गई। तुमाए बिसवास जीमें तुम ने दुख उठाओ और मारे गए ऊके संग्गै मोहां मरने पड़ो तो मोहां आनन्द हुईये। ऊं सई तुम सोई खुस हो, और मोरे संग्गै खुसी मनाओ। पिरभू ने मोहां जा आसा दई आय, कि मैं झट्टई तीमुथियुस हां तुम लौ पठैओं, कि तुमाए बारे में सुनके मोहां साजो लगे। कायसे मोरे लौ ऐसो और कोऊ नईंयां, जाने जीसे तुमाई भले की सोचें। कायसे सबरे अपने भले की सोचत आंय, परन्त पिरभू यीशु मसीह की नईं सोचत। तुम हां पता आय कि तीमुथियुस ने जैसी सेवा करी आय, मानो जैसे एक लरका अपने दद्दा संग्गै करत होबे, ऊं सई ऊ ने मोरे संग्गै सेवा करी आय। जैसई मोहां पता मिल है कि मोरो का होबेवारो आय, तो मैं ऊहां तुम लौ पठै दैहों। और पिरभू में मोहां सोई जा आस लगी आय, कि मैं झट्टई तुम लौ आहों। और मैंने इपफ्रुदीतुस जानें मोरो भईया, और संग्गै काम करबेवारे सिपाई जैसो, जो तुम ने मोरी सेवा हां पठैव हतो, ऊहां मैंने तुम लौ पठैबे को मन बनाओ आय। कायसे ऊ को हिया तुम से जुड़ो हतो, और किलपत रैत हतो, तुम ने ऊ की बीमारी की खबर सुनी हती। बो सांचऊ बीमार हो गओ हतो, कि मरबेवारो हतो, परन्त परमेसुर ने दया करके; ऊहां और मोहां अच्छो कर दओ, कि मोहां दुख न होबै। ऐई से मैंने ऊहां पठैबो चाहो कि तुम ऊसे जुड़ के खुस हो, और मोरो मन सोई ठंड़ो होबे। सो तुम ऊसे खुसी से भेंट करियो, और ऐसे मान्सन को मान राखियो। कायसे बो पिरभू की सेवा में मरबेवारो हतो, कि जौन मदद तुम मोरी न कर सके बो ऊ करतो। सो भईया हरौ, पिरभू में सुखी रओ: जे बातें तुम हां लिखे से मोहां कछु नईंयां, जे बातें तुमाए भले को आंय। उन कुत्तन से संभले रईयो, उन बुरय काम करबेवारन से बच के रईयो, जौन काट कूट करत आंय उनसे बचियो। कायसे हमाओ खतना भओ, हम परमेसुर की आत्मा मैं होकें ध्यान करत आंय, और पिरभू की जय मानत आंय अपनी नईं। मैं तो अपनी देह पै घमण्ड कर सकत आंव, अगर कोई ऐसो सोचे तो मैं उनसे बढ़के रख सकत आंव। कायसे आठें दिना मोरो खतना भओ, इस्राएल के वंस, और बिन्‍यामीन के गोत्र को हतो; और मूसा के नैम हां फरीसी मान्सन घांई जैसो मानत हतो। मोरी लगन ऐसी हती कि मण्डली के मान्सन हां मारत हतो; और मूसा के नैम मानबे में पक्को हतो। परन्त जे बातें जौन मोरी बड़वाई की हतीं, उन हां मैंने पिरभू यीशु मसीह हां मानबे पै मैंने छोड़ दईं। और पिरभू के जस और मान की बड़ी बातन हां पाके मैंने और सबरी बातन हां छोड़ दओ, पिरभू हां पाके मैंने दूसरी सबरी बातें छोड़ दईं, बे मोरे लाने कूड़ा घांई आंय। और पिरभू की बातन में बनो रओ; और मूसा के नैम से जौन बड़वाई मिलत आय, ऊहां छोड़ के जौन बातें पिरभू पै बिसवास करे से मिलत आंय, उन में पक्को रओ। मैं पिरभू यीशु मसीह हां और उनके मरे भयन में से जी उठबे के जस हां जानो चाहत आंव, और क्रूस पै जौन पीड़ा उन ने सही ऊहां समझन चाहत आंव, और उनके मरबे जैसो मैं सोई हो जाओं। कि मैं सोई ऊंसई जी उठों, जैसे मसीह मरे भयन में से जी उठे हते। ऐसो नईंयां कि मोहां जौ सब मिल गओ आय, और मैं पूरो साजो हो गओ आंव; परन्त मैं ओई जैसो होबे भगत जात आंव, जी के लाने पिरभू यीशु मसीह ने पकड़ो आय। भईया हरौ, मैं अबै लौ जो सब नईं पाओ हों, परन्त एक काम करत आंव, कि जो बातें पाछें छूट गईं, उन हां बिसर के आगे की बातन हां पाबें हां बढ़ो जात आंव। मैं आगे हां निसाने पै पहुंचबे हां बढ़ो चलो जात आंव, कि ऊ इनाम पाओं, जीके काजें पिरभू ने मोहां बुलाओ आय कि मोहां सरग पौचाबे। सो सबरे जनें जौन पक्के हो गए आंय, तो बे ऐसई सोचें, अगर तुमाओ कोऊ और भी विचार होबे तो परमेसुर बा बात सोई तुम हां उजागर कर दै है। सो जौन हम ने पाओ आय, ऊं सई काम करें। भईया हरौ, तुम सबरे जनें मोरे घांई चलो, और उन हां देखो, जौन हमाए जैसी चाल चलत आंय। कायसे बिलात जनें ऐसी चाल चलत आंय, जिन के लाने मैंने बेर बेर तुम से कई आय, और अब तो ऐसो कह के रोत आंव, कि बिलात जनें ऐसे चलत आंय मानो क्रूस के बैरी होबें। उन हां एक दिना खतम हो जाने आय, उनको पेट उन कौ ईसुर आय, और जिन बातन से सरम आओ चईये उनईं पै बे गरब करत आंय, उनको मन संसार की बस्तन पै लगो रैत आय। हमाए रैबे की जांगा सरग में आय; और हम अपने तारन करबेवारे यीशु मसीह की उते से आबे की गैल तकें आंय। जौन अपने बल से सबरी बस्तन हां अपने बस में कर सकत आय, हमाई ई देह को रूप बदल के, उनकी देह जैसो बना दें हैं। ईसे भईया हरौ, जिन पै मोरो जी लगो रैत आय, जिन हां मैं चाहत आंव और मोरी लालसा आय, कि बे मोरी खुसी आय, और मोरी चाहना आय, कि तुम पिरभू में पक्के बने रओ। मैं यूओदिया और सुन्तुखे हां सोई समझात आंव, कि बे पिरभू में एक मन से रैबें। और मोरे भले जनो जिन ने मोरे संग्गै सेवा करी आय तुम से बिनती करत आंव, कि तुम उन बईयरन को हाथ बटाओ, जौन मोरे संग्गै सुसमाचार के परचार में लगी रईं, उन ने मोरे और क्लेमेंस के संग्गै मिलके बहुत काम करो, उन के नाओं जीवन की पोथी में लिखे आंय। पिरभू में हमेसा खुस रओ; मैं फिन कैत आंव कि खुस रओ। तुमाए भले जीवन से सबरन हां पता चले, कायसे पिरभू झट्टई आबेवारे आंय। कोई बात की चाहना न करो: परन्त हर एक बात में अपनी बिनती धन्न मान के परमेसुर से करो। अब परमेसुर की सान्ति, जौन मान्स की समझ के बायरें आय, तुमाए मन और तुमाए सोच हां पिरभू यीशु मसीह में बचाए राख है। सो भईया हरौ, जौन बातें सांची आंय, और जौन साजी आंय, जौन पवित्तर और अच्छी आंय, और मन हां भाती आंय, सो जौन बातें कहबे लाक होबें, उनईं पै ध्यान धरो। जौन बातें तुम ने मोय से सुनी, सीखी, और अपने हिये में धरीं आंय, उनईं जैसो करो, ऐसो करबे से परमेसुर जौन सान्ति देत आय तुमाए संग्गै रै है। मैं पिरभू में बहुतई खुस आंव बिलात दिना के बाद तुम हां मोरी याद फिन के आई; पेंला सोई तुम हां चिन्ता हती, परन्त तुम जा चिन्ता न दिखा पाए। मैं ऐसो ई लाने नईं कै रओ कायसे मोहां पईसन की जरूरत आय; मैंने तो सीखो आय कि जैसो हो, ओई हाल में खुस रओ। मैंने पईसन की कमी और बहुत पईसन देखो आय: मैंने जैसो हाल होबै ऊ में खुस रैबो सीखो आय, चाहे खीब खैबे हां होबै चाहे भूखे रैबें, बिलात होबे और कछु न होबे। मैं ऊ परमेसुर के जोर से सब कछु कर सकत आंव। जा तुमाई भलमनसाहत आय, कि मोरी कमी में तुम ने मोरी मदद करी। फिलिप्पियों के रैबेवारे जौ अच्छे से जानत आंय, कि परचार करत जब मकिदुनिया से चलो तो पईसा के लैबे दैबे में कोई मण्डली ने मोरी मदद नईं करी, परन्त तुम ने मोरी कमी पूरी करी। और ऊं सई जब मैं थिस्सलुनीके में हतो; तबै सोई तुम ने मोरी घटी में एक बेरा नईं परन्त दो बेरा कछु पईसा भेजे हते। जौ नईंयां कि मोहां कछु चईये परन्त मैं चाहत आंव कछु ऐसी बातें, जौन से आगे हां तुमाओ फायदा होबे। मोरे लौ सब कछु आय, और बिलात सोई आय: जौन बस्तें तुम ने इपफ्रुदीतुस के हाथन पठैई हतीं बे मोहां बहुतई साजी लगीं, बे मानो ऊ बली जैसे आय, जी की गन्ध और बलदान से परमेसुर खुस होत आय। मोरो परमेसुर तुमाई सबरी घटी हां अपने जस के धन से पिरभू यीशु मसीह के नाओं से पूरी कर है। अब हमाए परमेसुर और पिता को जस बिरोबर बनो रैबे। आमीन। सब बिसवासी जन हां यीशु मसीह के नाओं से नमस्कार कईयो। जौन भईया हरें मोरे संग्गै आंय, तुम हां नमस्कार कैत आंव। और सब बिसवासी जनें, और राजा कैसर के घर से तुम हां नमस्कार कैत आंय। हमाए पिरभू यीशु मसीह तुमाई आत्मा के संग्गै बने रैबें। आमीन। पौलुस ने लिखी, जौन परमेसुर की मन्सा से यीशु मसीह को चेला आय, और तीमुथियुस भैया से। उन सबरे लोगन हां जौन यीशु मसीह में पवित्तर करे जाके उन पै बिसवास ले आए सबरे भाईयन हां जौन कुलुस्से नगर में रैत आंय। हमाए पिता परमेसुर से तुम सब हां दया और सान्ति मिले। हम औरें रोजीना तुमाए लाने बिन्तवारी करके अपने प्रभु यीशु मसीह के पिता परमेसुर को धन्नबाद करत आंय। कायसे हमाए सुनबे में आओ आय, कि यीशु मसीह पै तुम ने बिसवास धरो आय, और सबरे जात भाईयन से प्रेम करत आव। कि जी बस्त की तुम आस लगाए आव जौन तुमाए लाने सरग में धरी आय, जीके लाने तुम ने सुसमाचार में सोई सुनो हतो। जौन सुसमाचार तुम ने सुनो और जीहां संसार के मान्सन ने मानो, और ऊ पै चित्त लगाओ मानो कि जी दिना से तुम ने ऊ सुसमाचार हां सुनो, और पूरे मन से बिसवास करो, और परमेसुर की दया जौन उन ने करी ऊहां चीनो आय, और ऊहां मन में बसाओ आय। ओई बातें तुम ने हमाए प्यारे भईया इपफ्रास जौन हमाए संग्गै सेवा करत आय सुनी, इपफ्रास हमाई समझ से पिरभू यीशु मसीह को पक्को काम करबेवारो आय। उनईं ने हमें तुमाओ प्रेम जौन तुमाए मन में आय ऊ की चरचा हमसे करी। सो जी दिना से तुमाई बातें सुनी आंय, हम तुमाए लाने बिन्तवारी करबे में चूक नईं करत, जीसे तुम ई पूरे ज्ञान और मन से परमेसुर हां जानत जाओ। कि तुमाई चाल पिरभू हां अच्छी लगे, और बे सबरी बातन से खुस होबें, और तुमाए काज भले होबें, और परमेसुर के काज में बढ़त चलो। और उनके जस के जोर से और सबरी बात में बढ़त जाओ, इते लौ कि मजे से धीरज करके सैबेवारोपन राखो। मोरी चाहना आय कि तुम पिता परमेसुर को धन्न मानो, कि उन ने तुम हां अपनेवारन में जोड़ के उजयारे वारे बना दए। उनई ने हम हां शैतान के अंधियारे से छुड़ा के अपने प्यारे बेटा यीशु मसीह के राज में जोड़ दओ। जिन ने हमें पापन से छुड़ा के, पापन से क्षिमा करो। पिरभू यीशु मसीह में परमेसुर को रूप दिखात आय, बे सबरी सृष्टि के पेंला से आंय। उनईं ने सबरे संसार हां बनाओ, सरग में की और धरती मैं की जौन बस्तें दिखात आंय, और जौन नईं दिखात आंय, राज और जो अधकार करत आंय सांचई उनके लाने रचो आय। बेई सबरे संसार के पैले से आंय, और सबरे संसार की बस्तें बे एकजुट करें आंय। बेई अपनी देह, जानो बिरादरी के मुखिया आंय; उनईं से संसार चलो और मरे भयन में से जी उठबेवारन में पैले हते जीसे बे सबरन में ऊंचे रैबें। पिता परमेसुर ईमें खुस आंय कि बे अपनो पूरो वास अपने पुत्र यीशु मसीह में राखें। और उनके पुत्र पिरभू यीशु के क्रूस पै बलदान होकें अपने रक्त से, सबरे जौन सरग में रैत और जौन धरती पै रैत उन हां परमेसुर से जोड़ दओ। और यीशु मसीह ने अपनी देह में, क्रूस पै मर के तुमाओ मेल परमेसुर से करवा दओ, कायसे तुम पेंला उन से दूर भटके हते और अपने बुरय विचारन और करमन से उनके बैरी हो गए हते। जीसे तुम हां अब पवित्तर बनाके, बिन खोट करो कि तुम परमेसुर के सामूं ठांड़े हो सको। सो तुम अपने बिसवास जौन तुम ने करो आय ऊ में पक्के बने रओ, और सुसमाचार सुने पै जौन आस तुमाई बढ़ी हती, जी को परचार ई संसार में भओ; जीहां मैं पौलुस ने तुम हां सुनाओ। अब जौन दुख मोहां तुमाए काजें भओ ऊ पे मोहां खुसी आय, और मैं अब उनकी कलीसिया के लाने दुख सहबे हां राजी आंव। परमेसुर की मन्सा से मोहां उनकी कलीसिया को काम करबेवारो धरो, और मोहां तुम लौ पठैओ, कि मैं तुम हां उनको पूरो ज्ञान बताओं। जो बिलात बरस से सबरे घर छिपो रओ, परन्त अब उन हां जीने बिसवास करो मिलो। परमेसुर ने ऐसो ई लाने करो, कायसे बे चाहत हते कि गैर इस्राएलियन उनके जसवारी बातन हां समझें, और यीशु मसीह अब उनके हिये में बसे आंय, और आंगे आबेवारी बातन की आस आय। जी को परचार करके हम सबरे मान्सन हां चितात आंय, और पूरे ज्ञान से सब हां सिखात आंय, कि सबरे जनें जौन यीशु मसीह पै बिसवास धरे बे पक्के बन जाबें। ऐई से मैं बहुतई मैनत करत आंव जौन मोहां उनसे मिलत आय। मैं चाहत आंव कि तुम और लौदीकिया में रैबेवारे सबरे मान्स जानें, जीने मोरो मों लौ नईं तको कि मैं उन के काजें कैसी मैनत करत आंव। कि उन के हिये में सान्ति होबे और बे सबरे प्रेम से जुड़े रैबें, बे सबरे जनें बहुतई आसीस पाहें, जौ जानके कि यीशु मसीह जिन में होकें परमेसुर परगट भए उन हां जान लेबें। कायसे उन में ज्ञान और समझ बहुत भरो आय। मैं जे बातें तुम हां ईसे कैत आंव, कि कोई मान्स तुम हां भटका न देबे। मैं तुमसे अबै बिलात दूर आंव, पै आत्मा में होकें बिलकुल ऐंगर आंव, और मोहां खुसी आय कि तुम हां जैसो रओ चईये वैसई आओ, और तुमाओ बिसवास यीशु मसीह पै खीब जमो आय। सो जैसो तुम ने यीशु मसीह हां अपनो पिरभू मानो आय, ऊंसई पिरभू में चलो। और उन में तुमाई जड़ मजबूत होबे और तुम आगे बढत चलो; और जैसो तुम ने सीखो और समझो आय वैसई बिसवास में पक्के होत जाओ, और मन से पिरभू को धन्न मानो। चौकन्ने रओ कि कोई तुम हां बेकार बतकाओ में न फंसा लेबे, जौन मान्स की बातें आंय बे सब संसार कौ छल आय, परन्त जे बातें पिरभू की नईंयां। कायसे पिरभू यीशु मसीह में परमेसुर स्वयं बसे आंय। और तुम उनईं में बढ़ रए आव, कायसे तुम उनईं के आओ जौन सबरे ज्ञान और अधकार से बढ़के ऊंचे आंय। पिरभू ने ऊंसई तुमाई बुरई अभलाखा निकाल दई, जैसे खतना होबे पै सरीर को भाग कट के न्यारो हो जात आय। और जब तुम ने बपतिस्मा लओ तो ऊंसई पिरभू यीशु मसीह के संग्गै मानो गाड़े गए, और परमेसुर के बल पे बिसवास करे से, जिन ने उन हां मरे भयन में से जिलाओ, ऊंसई जी गए। उन ने तुम हां जौन अपने पापन में मरे जैसे हते, और परमेसुर की सन्तान न हते परन्त परमेसुर ने यीशु मसीह के संग्गै जिला दओ, और तुमाए सबरे पापन की क्षिमा कर दई। और परमेसुर ने हम हां मूसा के नैम न मानबे को जौन दंड लगाओ हतो, बो सोई मिटा के ऊहां क्रूस पै खिलियन से जड़ दओ। क्रूस में पिरभू यीशु मसीह ने सब अधकार के जोर हां हरा दओ, और सबरे संसार ने देखो कि जे सब बंध गए, और क्रूस पै उनकी जीत को जसन भओ। सो अब कोई तुम हां नईं कैबे कि का खाओ और का पीओ, और न कोऊ नये चांद और दूसरे त्यौहार हां कै है कबै मानो। कायसे जा तीज त्यौहार आबेवारी बातन की छाया आंय, परन्त पिरभू यीशु मसीह सांचे आंय। उन से धोका न खाईयो जौन ऐसे दिखात आंय कि बड़े कोंरे मन के आंय, जौन सरगदूतन की पूजा करत आंय परन्त तुम हां ऊ इनाम से जौन तुम हां मिलो चईये ऊ में बिलोरा डालत आंय। ऐसो मान्स बेसमझी की बातें करत आय और स्वारथी आय। बे पिरभू यीशु मसीह के संग्गै नईं जुड़े आंय, जौन सबरी देह के मूड़ आंय, पिरभू सरीर हां सकती देत आय, परमेसुर के जोर से जोड़त और मांस हां संग्गै बांधे रैबे। तुम यीशु मसीह के संग्गै मर गए, अब संसार को जोर तुम पे नईं चलत, अब तुम ऐसी बात हां काय मानत आव। कि जौ न छियो, और जौ न खाओ, और ऊहां हाथ न लगाईयो। (कायसे जे सबरी बस्तें काम में लात लात खतम हो जै हैं)। जब लौ जे बस्तें काम में आत आंय, तब लौ ठीक आय परन्त फिन बे काम की नईं रैत, सो अपन काय हां उन बातन हां मानें, जौन मांस ने बनाई आंय इन नेम हां मानबो अपन हां अच्छो लगे, इनसे ऐसो लगे कि तुम परमेसुर से बहुतई प्रेम करत भय नरम पड़े आव, और अपनी देह हां बस में राखें आव परन्त इन से तुमाई इच्छा हां रोकबे में कछु नहीं होत। कायसे कि तुम यीशु मसीह के संग्गै जी उठे आव, सो अब सरग की बस्तन पै ध्यान धरो, जिते यीशु मसीह परमेसुर के दांए हाथ पे बिराजमान आंय। ई धरती की बस्तन से मोह न करो परन्त सरग की बस्तन पै ध्यान करो। कायसे तुम तो मानो मर गए, और अब तुमाओ जी पिरभू यीशु मसीह में बनो आय। अब यीशु मसीह में तुमाओ जी लग गओ आय, सो जब बे परगट हुईयें, तो तुम सोई उनके संग्गै जस पाहौ। सो अब अपनी देह की अभलाखा हां पूरो न करो, परतिरिया संगत करबे की अभलाखा और गन्दे काम, बुरय विचार, और दूसरन की बस्तन को लालच न करो, कायसे जे सब मूरत की पूजा जैसे आंय। परमेसुर ऐसे काज करबेवारे मान्सन से खुनसियात आय। तुम ने सोई जे काम करे, जब तुम उनके संग्गै रैत हते। सो अब तुम सोई खुनसियाबो, रौब दिखाबो, बैर करबो, दूसरन को बुरओ सोचबो और गाली देबो छोड़ दो। दूसरन से झूटो न बोलो, कायसे तुम ने पेंला जैसे काम छोड़ और उनकी अभलाखा छोड़ दई आय। अब तुम नये मान्स हो गए आव सो अपने बनाबेवारे जैसे होत जाओ कि तुम उन हां और भी जान जाओ। उन में कोई यूनानी, यहूदी, खतना करो और बिना खतना करो, और न जंगल में रैबेवारो, स्कूती, न बन्धुआ मजूर, और न छूटो मान्स न्यारे नईंयां, कायसे यीशु मसीह सब के लाने आय और सबरन के हिये में रैत आंय। परमेसुर ने तुम से प्रेम करो और तुम हां पवित्तर करके अपने लोगन में जोड़ लओ आय, सो तुम दया करबेवारे, दीन, और भलो करबेवारे और धीरज धरबेवारे बनो। और कोनऊ हां कोई पै कछु दोस मिले तो एक दूसरन की बात सहो, और दूसरे जन की गलती को क्षिमा करो, जैसे पिरभू ने तुमाए पापन हां क्षिमा करो तुम सोई ऊं सई करो। प्रेम सब में बढ़के आय और प्रेम में सबरी बातें जुड़ी रैत आंय। तुम सबरे जनें यीशु मसीह की देह के मानो अंग आव और सान्ति से रैबे हां जुड़े आव, सो जानो सान्ति पिरभू से मिलत आय, ऊ तुमाए सोच हां संभाले और तुम उन हां धन्नवाद देत रओ। यीशु मसीह के बचन हां अपने हिये में बसा लेओ; और दूसरन हां पूरे ज्ञान से सिखाओ, और चिताओ, और परमेसुर हां धन्न मानो, और अपने से परमेसुर के भजन गाओ और उन हां धन्न कहो। और जो कछु उनके नाओं से कओ और करो, उन सबरी बातन में परमेसुर हां धन्न मानो। हे घरवालियो, जैसो प्रभु में साजो आय, कि तुम अपने घरवारे की बातें मानो। ऐ घरवारे जनो, अपनी घरवालियों से प्रेम राखो, और उन हां परेसान न करो। हे लड़का बिटिया हरौ, अपने मताई बाप की कई करो, कायसे पिरभू हां जौ साजो लगत आय। हे बच्चनवारे, अपने लड़का वारन हां परेसान न करो, ऐसो न होबै कि उनको मन टूट जाबै। हे चाकरो, अपने मालिक की बात मानो और सबरी बातन में उन हां खुस राखो, और ऐसो न करो कि जब बे तकत होबें तो दिखाबे हां तुम से डरके करें, पूरो मन लगाके काम करो। अपनो काम मन से करो, मानो तुम मान्सन के लाने नईं परन्त पिरभू के लाने करत आव। कायसे जौन पिरभू की सेवा तुम करत आव, बे तुम हां ईको इनाम सोई दै है। कायसे पिरभू कोई को पक्ष नईं करत; बे बुरय करबेवारन हां दण्ड दै है। ऐ मालिको, अपने चाकरन पै बेजा न करो, ध्यान धरो कि सरग में तुमाओ मालिक रैत आय। बिन्तवारी करत रओ, और उनको धन्न मानो। और हमाए काजें सोई बिन्तवारी करो, कि परमेसुर हमाए लाने बचन सुनाबे हां ऐसो द्वार खोल देबे, कि हम पिरभू यीशु मसीह की कथा सुनात रएं, जीके काजें मैं जेहल में आंव। मोरी इच्छा आय कि मैं पिरभू की कथा सुनाओं, उन हां उजागर करों। जौन मौका अपन हां मिलो आय, उनके लाने जिन ने बचन नईं सुनो आय, उन हां सोच समझ के बताबें। तुमाई बोली और बतकाओ साजो होओ चईये, कि तुम हां मान्स हां समझात बने। मोरो भईया और पिरभू को सेवक, तुखिकुस जौन मोरे संग्गै सेवा करत आय, तुम हां सबरो हाल चाल बता दै है। ऊहां मैंने ई लाने पठैओ आय, कि हमाओ सबरो हाल तुम हां पता चलै और तुमाए हिये हां सान्ति मिले। और तुखिकुस के संग्गै उनेसिमुस हां सोई पठैओ आय, जौन तुम में से निकलो भओ, भलो और प्यारो भईया आय, जे दोई जनें इते को सबरो हाल चाल तुम हां बता दै हैं। अरिस्तर्खुस जौन मोरे संग्गै जेहल में आय, और मरकुस जौन बरनबास को भईया लगत आय (जीके लाने मैंने कई हती कि जब बो तुम लौ आबै, तो उनकी अच्छी खुसामद करियो)। और यीशु जो यूस्तुस कहात आय, तुम हां नमस्कार कैत आंय। और इस्राएली लोगन में से जेई जनें मोरे संग्गै सेवा करत रय आंय, और इन से मोहां खीब अच्छो लगो आय। इपफ्रास जौन तुम में से आय, और पिरभू यीशु मसीह को सेवक आय, तुम हां नमस्कार कैत आय और तुमाए काजें बिन्तवारी में लगो रैत आय, कि तुम पक्के होकें ई सीख पै चलत रओ। मैं ई बात को गवाह होकें, जो तुमाए और लौदीकिया और हियरापुलिस वारन के लाने बड़ी मैनत करत आय। प्यारे बैद्य लूका और देमास को नमस्कार पौंचे। लौदीकिया वारन हां और नुमफास के घर में जुड़ के आराधना करबेवारन हां नमस्कार कईयो। और जब जा चिठिया तुमाए इते वारन हां पढ़ के सुनाई जाबै, तो ऐसो करियो कि लौदीकिया के भईयन में सोई पढ़ी जाबै। और अर्खिप्पुस से कईयो कि जौन काज में तें लगो आय, बो पिरभू को आय ऊहां बड़ी सोच समझ से करियो। मैं पौलुस ने अपने हाथन से नमस्कार लिखो आय। मोहां जौन हथकड़ी डली आंय बे कायसे डलीं जौ ध्यान धरियो; परमेसुर की दया तुम पै बनी रैबे। आमीन। पौलुस और सिलवानुस और तीमुथियुस ने चिठिया लिखी उन सबरे बिसवासी जन हां जौन परमेसुर पिता और यीशु मसीह मेंआंय और थिस्सलुनीकियों में रैत आंय, तुम पे सान्ति और दया होबै। हम बिनती करत में तुम सबरन हां याद राखत आंय और तुमाए लाने परमेसुर को धन्न मानत आंय। हम हमेसा परमेसुर के सामूं तुमाए बिसवास से करे काम, और सेवा जौन प्रेम से करी आय, और यीशु मसीह में हमाई जौन आस आय ऊहां याद करत आंय। हे भईया हरौ, और परमेसुर के पियारे जनो हमें पता आय, की तुम परमेसुर के खास जनें आव। कायसे जब हम ने तुम हां बचन सुनाओ तो बो पवित्तर आत्मा के जोर में और पक्के बिसवास से हतो, और तुम हां पता आय कि हम कैसे तुमाए बीच रए। और तुम ने बड़े दुख में परन्त पवित्तर आत्मा में खुसी से बचन हां अपने मन से मानो और हमाए जैसो चले। इते लौ कि मकिदुनिया और अखया के सब जौन ने बचन मानो उनके लाने नमूना हते। कायसे तुमाय इते से मकिदुनिया और अखया में सोई पिरभू को बचन सुनाओ गओ, परन्त तुमाए बिसवास की खबर सुनी ईके लाने हम हां और कछु नईं कैने। और बे जौ सोई कैत आंय कि तुम ने हमाई बातें कैसे सुनी, और तुम मूरतन की पूजा छोड़ के परमेसुर की बातें मानी, कि जीयत और सांचे परमेसुर की सेवा करो। और उनके पुत्तर पिरभू यीशु मसीह के सरग से फिन के आबे की रस्ता तकत रओ, जीहां उन ने मरे भयन में से जिला दओ, जौन हम हां नरक के दुख से बचात आय। भईया हरौ, तुम हां पता आय कि तुम लौ हमाओ आबो ऊं सई नईं रओ। तुम हां पता आय कि पैली बेरा हम फिलिप्पी में गए, तो कैसो दुख और परेसानी हम पे पड़ी, परन्त परमेसुर ने हम हां ऐसी हिम्मत दई, कि हम परमेसुर की बातें बिरोध में सोई सुनात रएं। कायसे जौन बातें मानबे हां हम ने कई उन में कछु गल्ती और संका नईंयां, और बुरय और गन्दे मन से नईं कई। परन्त जैसो परमेसुर ने हम हां बचन दओ, हम मान्सन हां खुसी नईं परन्त परमेसुर हां खुस करत आंय; परमेसुर जौ जानत आय। तुम हां पता आय, कि हम ने कभऊं लुभाबे की झूटी बात नईं करी, और न कछु चाहना से काम करो, परमेसुर जानत आय। हम परमेसुर के भेजे भए तुम पै बोझो डाल सकत हते, परन्त तुम में से, और कौनऊं मान्सन से मान नईं चाहो। जैसे मताई अपने लड़का बारे की देख भाल अच्छे से करत आंय, ऊं सई हम ने तुमाए संग्गै करो। हम तुम से प्रेम करत हते सो परमेसुर की बातें तुम हां सुनाईं, इतनो लौ कि हम अपनी जान दैबे हां तईयार हते, कायसे तुम हमाए हिये में बस गए हते। भईया हरौ, तुम हमाए दुख और परेसानी हां जानत आव, कि हम ने रात दिना अपनो धन्धा करत तुम हां परमेसुर की बातें बताईं, कि तुम में से कोई पै बुझवा न डालें। तुम और परमेसुर हां पता आय, कि हम तुमाए बीच जौन ने बिसवास धरो, कैसे साजे और बिन खोट धरम से रए। जैसे बाप अपने बाल बच्चन हां सिखात आय, और प्रेम करत ऊं सई हम तुम हां सिखात हते, और समझात, और सान्ति देत हते। कि तुमाओ जीवन जैसो परमेसुर चाहत आय ऊं सो होबै, जीने तुम हां अपने राज में बुलाओ आय। सो हम परमेसुर को धन्न मानत आंय; कि जब परमेसुर की बातें तुम ने सुनीं, तो तुम ने ऊहां मान्सन की नईं, परन्त परमेसुर की बातें लेखी (जा सांची आय) और अब तुमाए जीवन में दिखात आय। भईया हरौ, तुम ने ऊं सई करो जैसे यहूदिया में परमेसुर के मानबे वारन की मण्डली ने करो, कायसे तुम ने अपने जनें मानो यहूदियन से ऊं सई दुख सहो जैसो उन ने यहूदियन से पाओ। जिन ने पिरभू यीशु मसीह हां और अगमवकतन हां मार डालो, और हम हां बिलात सताओ, परमेसुर उनसे खुस नईंयां; कायसे बे सबरन को बिरोध करत आंय। बे यहूदियन हां छोड़ दूसरन से तरन तारन की बातें करबे हां रोकत आंय, कि अन्यजाति के लाने अपने पाप कौ घड़ा भरत रैबें; परन्त अब उन पै सोई परमेसुर को कोप आबेवारो आय। भईया हरौ, जब हम तनक बेरा हां तुम से मन से नईं परन्त ऊसे अलग हो गए हते, तो हमाई बड़ी लालसा रई कि हम आके तुमाओ मों देखें। ईसे मैंने (पौलुस ने) एक बेर नईं, दो बेरा तुम लों आओ चाहो, परन्त शैतान छलिया कोऊ न कोऊ बिघन लियात रहो। सो जब पिरभू यीशु मसीह फिन के आहै तो हमाई आसा और खुसी जैसो मुकुट का तुम न हुईयो? हमाई बड़वाई और खुसी तो तुम में आय। जब हम और न सह सके, तो हम ने सोचो की अकेले एथेन्स में रै जाबें। और हम ने तीमुथियुस हां जौन यीशु मसीह में हमाओ भईया, और परमेसुर को बचन परचार करबेवारे आंय, तुम लौ पठैव कि बो तुम हां बिसवास में पक्को करे। कि कोई इन परेसानी से बिसवास में डगमगा न जाबै; कायसे तुम जानत आव, कि हमाओ जौई काज आय। पेंला हम जब तुमाए बीच हते, तो तुम से कई हती, कि हम हां परेसानी उठाने आ है, और तको जैसी कई हती ऊंसई भओ। ऐई से हम से रओ न गओ, और हम ने तुमाई खबर लैबे हां पठैव, कि जब परेसानी आई तो तुम लौट तो नईं गए, कि हमाओ करो कराओ मिट जाबै। परन्त अबई तीमुथियुस ने तुमाए ऐंगर से लौट के तुमाए बिसवास और पिरभू में तुमाए प्रेम की खबर सुनाई, कि तुम हम हां याद करत आव, और हम हां देखबे को मन करे आव, जैसो हम तुम हां देखबो चाहत आंय। भईया हरौ, अपनी परेसानी की हालत में तुमाए बिसवास में पक्के बने रैबे से हम हां बड़ी सान्ति मिली। सो हमाई जान में जान आई, जा सुनके कि तुम पिरभू में पक्के बने आव। सो तुमाई सुनके हम ने परमेसुर को जस मानो, और हम कैसे परमेसुर को ई के लाने धन्न मानें? हम रात दिना बिन्तवारी करत आंय, कि तुम लौ आके पिरभू की और बातें बताएं। अब हमाए पिता परमेसुर और पिरभू यीशु मसीह, तुम लौ आबे में हमाई गैल बनाबें। और पिरभू ऐसो करे, कि जैसे हम तुम से प्रेम राखें आंय; ऊं सई तुम एक दूजे से, और सबरे मान्सन से प्रेम करो, तो तुम बढ़त जै हौ। कि बो तुमाए मन हां पक्को करे, कि जब हमाओ पिरभू यीशु मसीह अपने मानबे वारन के संग्गै फिन के आबें, तो हम परमेसुर के सामूं पक्के और सांचे माने जाबें। सो भईया हरौ, हम तुम से कैत आंय, और पिरभू के नाओं से तुम हां समझात आंय, जैसो तुमने तको आय, कि हम जैसो बे चाहत आंय, और जीसे खुस होत आय, ऊंसई रैत आंय, तुम सोई ऊंसई चलत आव सो अच्छे से आगे चलत चलो। तुम हां पता आय, कि हम ने तुम हां यीशु मसीह की कौन कौन अग्या बताई आंय। परमेसुर जौ चाहत आय, कि तुम साजे बनो: तुम में परतिरिया और परमान्स की संगत न होबै। और तुम अपने अपने सरीर वस में राखो, जीसे तुम पवित्तर और मान मिलबेवारे बनो। तुम जौ काम वासना से न करो, जैसे दूसरे जनें करत आंय, जौन परमेसुर हां नई चीनतीं। ई बात में कोई अपने भईया हां न ठगे, और न ऊ की भली मंसा को गलत फायदा उठाए, परमेसुर ऐसे मान्स हां उनके पापन के लाने दण्ड दै है; जैसो हम ने पेंला बता के चिता दओ हतो। कायसे परमेसुर जौ चाहत आय, हम बुरय काम न करें परन्त साजे बने रैबें। सो जौन ई सीख हां हल्की बात समझत आय, बो मान्स हां नईं, पर परमेसुर हां नीचो समझत आय, जीनें हम हां पवित्तर आत्मा दई आय। और भईयन में प्रेम के काजें मैं का लिखों; कायसे एक दूजे से प्रेम के लाने तुम ने परमेसुर से सीखो आय। तुम मकिदुनिया के सबरन भईयन से प्रेम करत आव, परन्त हम तुम से कैत आंय, और प्रेम करबे में बढ़त जाओ। और जैसो हम ने तुम से कई, सो चिमाने रैके अपनो धन्धा करो, अपने हाथन से कमाओ। ऐसो करबे से मण्डली के बायरेवारे तुमाओ मान कर हैं, और तुम हां दूसरन पै बोझो नईं बन ने आहै। भईया हरौ, हम नईं चाहत, कि जौन मर गए, उनके लाने नें जानो; ऐसो न होबै, कि दूसरे जन घांई तुम रोओ पीटो जिन हां सांचई कोई आसा नईंयां। कायसे जैसे पिरभू यीशु मसीह मरे और जी गए, ऊं सई परमेसुर उन हां जौन यीशु मसीह पै बिसवास धरें मर जात, माने पर रैत आंय, ऊं सई जिला दै है। कायसे पिरभू ने जैसी कई तुम से सोई कैत आंय, कि हम जौन जीयत आंय, और पिरभू के आबे लौ जीयत रै हैं, सो जौन मर गए आंय उनसे आगे न बढ़ हैं। कायसे पिरभू खुद सरग से उतर है; ऊ बेरा बड़ी जोर की अग्या हुईये, और बड़े दूत और तुरही के फूके जाबे की आवाज हुईये, और जौन पिरभू यीशु मसीह पै बिसवास धरें मर गए हते, बे पेंला जी उठ हैं। और ईके पाछें हम जौन जियत हुईयें और संसार में बचे रै हैं, उनके संग्गै बादरन पै उठा लय जै हैं, कि हवा में पिरभू से जुड़े, और फिन हम पिरभू के संग्गै रै हैं। सो इन बातन से एक दूजे हां सान्ति बंधाओ। अब भईया हरौ, जो कबै और कौन दिना हुईये हम कछु नईं लिखत। कायसे तुम हां खुद पता आय कि जैसे भड़या रात के अंधयारे में आत आय, ऊं सई पिरभू के आबे को दिना हुईये। जब मान्स कैत रै है, कि मजा मौज आय, और कछु डर नईयां, तो बरबादी को दिना एका एक आ जै है, जैसे एक गरभवती बईयर हां पिराबो होत आय; और बे न बच हैं। परन्त भईया हरौ, तुम तो अंधियारे में नईयां, कि पिरभू के आबेवारो दिना चोर घांई आ जाबै। कायसे तुम सबरे जनें उजयारो पाय, और दिन के बच्चा आव, तुम न तो रात के, और न अंधियारेवारे आव। सो हम दूसरन घांई सोत नईं रैबें, परन्त जागत और चौकन्ने रैबें। कायसे जौन सोत आंय, बे रात हां सोत आंय, और जौन पियत आंय, बे सोई रात में पियत आंय। परन्त हम जो उजयारेवारे आंय, सो हम बिसवास और प्रेम धरें, जौन मानो हमाओ बचाबेवारो झिलम आय और तरन तारन की आस, जौन मानो मूड़ ढांकबे की टोपी आय। कायसे परमेसुर ने हम हां नरक हां नईं, परन्त पिरभू यीशु मसीह से तरन तारन पाबें। पिरभू हमाए काजें ईसे मरे, कि हम चाए मरें, चाए जीयत रैबें, उनके संग्गै जीबें। सो एक दूजे हां उसकाओ, और एक दूजे हां बिसवास में पक्को करो, और तुम ऐसई करत सोई आव। भईया हरौ, हम तुम से कैत आंय, कि तुमाए बीच जौन मैनत करत आंय, और पिरभू में तुमाए गुरू आंय, और तुम हां समझात आंय, उनकी बात मानो। और बे जो करत आंय ऊसे उन हां मान करो; और अपने बीच मेल-मिलाप से रओ। भईया हरौ, हम बताएं कि जौन की चाल ठीक नईंयां उन हां समझाओ, और जौन पाछें आंय उन हां बढ़ाओ, और सबरन की सहो। ध्यान धरो, कोई से बुरय से बुरो न करो; परन्त भला करो। हमेसा खुस रओ। हमेसा बिन्तवारी करत रओ। एक एक बात के लाने परमेसुर हां धन्न मानो: कायसे पिरभू यीशु मसीह जौई तुम से चाहत आय। आत्मा की आगी हां न बुझाओ। आगमवानी के चिताबे हां हलको न जानो। सबरी बातन हां परखो जौन साजी होबें उन हां मानो। सबरी बुरई बातन से दूर रओ। सान्ति दैबेवारे परमेसुर तुम हां साजो राखे; और तुमाई आत्मा, प्रान और देह हमाए पिरभू यीशु मसीह के आबे लौ बिन खोट बने रैबें। जीने तुम हां बुलाओ आय, बो सांचो आय तुमाए काजें ऐसई कर है। भईया हरौ, हमाए काजें बिनतवारी करो। सबरे भईयन हां चूमा देके नमस्कार कहियो। मैं पिरभू में तुम हां अग्यां देत आंव, कि जा चिठिया सबरे भईयन के बीच बांची जाबै। हमाए पिरभू यीशु मसीह की किरपा तुम पै बनी रैबे। पौलुस, सिलवानुस और तीमुथियुस को थिस्सलुनीकियों की मण्डली के नाओं, जौन हमाए पिता परमेसुर और पिरभू यीशु मसीह पै बिसवास करबेवारे आंय। हमाए परमेसुर पिता और पिरभू यीशु मसीह से तुम हां दया और सान्ति मिले। भईया हरौ, तुमाए लाने हम हां परमेसुर को धन्न मानो चईये, और जौ सांचो आय कि तुमाओ पिरभू पै बिसवास बढ़त जात आय, और तुम एक दूजे से खीब प्रेम करत आव। हम तुमाए लाने परमेसुर की मण्डली में बड़वाई करत आंय, कि जितेक दुख तुम सहत आव, उन से तुमाओ बिसवास और धीरज दिखात आय। ईसे जौ पता लगत आय; कि परमेसुर सच्चो न्यायी आय, और ईसे पक्को हो गओ कि तुम परमेसुर के राज्य के लायक आओ, जीके काजें तुम दुख सोई उठात आव। और जौ परमेसुर को न्याव आय, कि जौन तुम हां दुख देत आय, उन हां सोई दुख देबे। तुम हां जौन दुख मिलत आय, उन हां चैन मिलबे; जौ जब हुईये जब पिरभू यीशु मसीह अपने बली सरग के दूतन के संग्गै, धधकत आगी में सरग से आहै। और जौन जनें परमेसुर हां नईं चीनत, और पिरभू यीशु मसीह की बातें नईं मानत उन से बदला लै है। बे सबरे जनें पिरभू के बल के जस से, उनकी सक्ती और तेज से दूर होकें अनन्त निवास में दुख भोग हैं। जौ सब ऊ दिना हुईये, जब पिरभू अपने मानबेवारन में जस पाहें, और सबरे बिसवास करबेवारन में अजूबा दिखा है; कायसे जौन बातें हम ने तुम हां बताई हतीं उन हां तुम ने मानो आय। सो हम लग के तुमाए काजें बिन्तवारी करत आंय, कि हमाओ परमेसुर तुम हां ई बुलऊ आ के लाक माने, और अपने बल से अपनी काम करबे की भली इच्छा, और बिसवास के कामन से पूरो करे। हमाए परमेसुर और पिरभू यीशु मसीह को नाओं तुमाए बीच जस पाए, और तुम उन में जस पाओ, जौन पिरभू यीशु मसीह की दया से मिलत आय। भईया हरौ, हमाए पिरभू यीशु मसीह के आबे, और अपन सबको उन लौ इकठ्ठे होबे के काजें बिन्तवारी करत आंय। कि तुम हलकी सी अगमवानी की बात से उखड़ न जईयो, और कोऊ चिठिया जौन हमाई ओर से होबै, जा समझिओ कि पिरभू के आबे को दिना आ चुको आय। कोऊ तरहां से कोई के धोखा में न आईयो, कायसे बो दिना जब लौ न आहै, जब लौ धरम धरती पै से न उठ जाबै, और पाप और अन्त, जानो शैतान छलिया न दिखाबे। जौन बिरोध करत आंय, उन हां जौन परमेसुर के मानबेवारे आंय, और अपने आप हां बड़ो कैत आंय, इते लौ कि बो परमेसुर के मन्दर में बैठ के अपने आप हां परमेसुर कैत आय। तुम हां ध्यान आय कि जब मैं तुमाए बीच हतो तो तुम से ऐसई बातें कैत हतो। अब तुम हां पता आय, कि कौन ऊहां छैकें आय, कि बो अपनी बेरा में दिखै। कायसे गड़बड़ी मन को छुपाके करबेवारो अबै लगो आय, परन्त अबै एक छेंकबेवारो आय, और जब लौ बो अलग न हो जाबै, बो ऊहां रोके रै है। जब बो अधरम करबेवारे आहें, तो पिरभू यीशु मसीह अपनी मों की फूंक से मार डाल है, और अपने आबे के तेज से भसम कर डाल है। और ऊ अधरमी को आबो शैतान के कामन जैसो हुईये, बो झूठे बल से और अजूबा काम करत दिख है। और सब परकार के अधरम के संग्गै सब तरहां की धोखाबाजी से हुईये; कायसे उन ने सांची बातन और प्रेम हां नई मानो कि उनको तरन तारन हो जातो। ऐई से परमेसुर उन के बीच भटका देबेवारी आत्मा डाल है, कि बे झूठी बातन हां मानें। और जितने जनें सांचे हां नईं मानत, परन्त अधरम की बातन हां चाहत आंय, उन हां दण्ड दै है। भईया हरौ, पिरभू के प्यारो हम हां चईये कि हम विशेषकर तुमाए लाने पिरभू को धन्न मानें, कि परमेसुर ने तुम हां पेंला से नबेरो; कि आत्मा से पवित्तर करके, और जौन सांची बातें तुम हां बताई गईं उनसे तुमाओ तरन तारन होबै। उन ने तुम हां हमाए बचन सुनाबे से अपने लौ बुलाओ, कि तुम हमाए पिरभू यीशु मसीह, बो जौन मान सम्मान दओ गओ आय ऊ में हम सोई जुड़ जाबें। सो भईया हरौ, पक्के बने रओ; अब जौन बातें तुम हां सुनाई गईं हतीं, और जौन बातें हमाई चिठिया से सीखीं, उन हां पकड़े रओ। और हमाओ पिरभू यीशु मसीह और पिता परमेसुर जीने हम से प्रेम करो, और अपनी दया से ऐसी सान्ति जौन हमेसा रै है और बढ़िया आस दई आय। बोई तुमाए मन हां सान्ति देबे, और तुम हां अच्छे काम करबे हां, और उनके कए बचन में पक्को करे। सो भईया हरौ, हमाए काजें सोई बिन्तवारी करो, कि पिरभू को बचन ऐसो झट्टई फैल जाबै, और बचन हां मान मिले, जैसे तुमाए बीच मिलो आय। और हम टेढ़े और बुरय मान्सन से बचे रएं, कायसे जे मान्स बिसवास धरबेवारे नईंयां। परन्त पिरभू सांचे आंय; बे तुम हां पक्को बनाए राख हैं: और तुम हां ऊ बुरय जनें से मानो शैतान छलिया से बचा है। हम हां तुम पै भरोसा आय, कि जौन जौन अग्यां हम तुम हां देत आंय, उन हां तुम मानत आव, और आगे हां ऐसई मानत रै हौ। अब तुमाए मन हां परमेसुर ने जौन प्रेम करो आय, और यीशु मसीह ने तुमाए लाने धीरत धरो ऊहां बनाए रएं। भईया हरौ, हम पिरभू यीशु मसीह के नाओं से तुम हां अग्यां देत आंय; कि जो भईया बुरई चाल चले, और जौन सीख ऊ ने हम से पाई ऊहां नईं मानत, ऊसे बच के रओ। तुम हां पता आय, कि तुम हां कैसे हमाई जैसी चाल चलने आय; कायसे हम तुमाए बीचां बुरई चाल नईं चलें। और कोई की रोटी बिना पईसन के नईं खाई, परन्त रात दिना मैनत से अपनो धन्धो करत हते, कि तुम में से कोई पे बोझो न होबै। ऐसो नईंयां, कि हम ऐसो नईं कर सकत हते; परन्त हम ने तुमाए लाने सीख धरी, कि तुम सोई हमाए जैसो करो। और जब हम तुमाए लौ हते, तो जा सीख तुम हां दई हती, कि कोई जनो काम न करो चाहे, तो ऊहां खैबे न दईयो। हम ने सुनो आय, कि तुमाए बीच कित्तई मान्स बुरई चाल चलत आंय; और कछु काम नईं करत, परन्त दूसरन के कामन में अड़ंगा डालत आंय। ऐसे मान्सन हां हम पिरभू यीशु मसीह के नाओं से सलाह देत आंय, कि बे चिमाने अपनो काम धन्धा करें, और कमा के अपनी रोटी खाबें। परन्त भईया हरौ, तुम दूसरन की मदद करबे में हिम्मत न हारियो। कोऊ जनें हमाई चिठिया में लिखी बात न माने, तो उन पै खास नजर रखियो; और उनकी संगत न करियो, कि उन हां लाज आबे। ऐसे मान्स हां अपनो बैरी न मानियो, परन्त ऊहां आपनो भईया सोच के समझात रईयो। अब पिरभू जौन सान्ति दैबेवारे आंय खुद तुम हां सबरी बातन में सान्ति दैबे: पिरभू तुमाए संग्गै रैबें। मैं पौलुस अपने हाथ से नमस्कार लिख रओ आंव: हर एक चिठिया में जा मोरी चिन्हानी आय: मैं ऐसई लिखत आंव। हमाए पिरभू यीशु मसीह की किरपा तुम सबरन पै बनी रैबे। पौलुस ने लिखी जौन तरन तारन करबेवारे परमेसुर, और हमाई आसा जौन यीशु मसीह में आय उनकी अग्या से प्रभु यीशु मसीह के सेवक आंय, तीमुथियुस हां जौन मोरो भलो लरका आय। पिता परमेसुर, और हमाए प्रभु यीशु मसीह से तुम पै किरपा, दया और सान्ति मिलत रैबे। जैसे मैंने मकिदुनिया हां जाती बेरा तोसे कई हती, कि इफिसुस मैं बने रैके उते जौन औरई बातें बतात आंय कईयो कि ऐसो न करें। और उनके किस्सा कहानी पै और जौन मान्सन की पुस्तन को अन्त नईयां उन पै ध्यान न धरे, कायसे इनसे विवाद होत आंय; और ईको परमेसुर के तरन तारक से कछु मतलब नईंयां, जो बिसवास से सम्बन्ध रखत आंय। मोरे कैबे को मतलब जौ आय, कि सांचे मन और साजे हिये से, और बैर न रखबेवाले के बिसवास से प्रेम बढ़त आय। इन बातन हां छोड़ के बिलात जनें फालतू बातन के पाछें चलकें भटक गए आंय। बे मूसा को नैम सिखाबेवारे तो बनो चाहत आंय, परन्त जौन बातन पै जोर देत आंय, उन हां समझत लौ नईंयां। हमें पता आय, कि मूसा को जैसो नैम आय ऊ पै चलै तो बो भलो आय। कायसे नैम अच्छे मान्स के लाने नईंयां, परन्त अधरमी जनें, जौन कछु नईं मानत उनके लाने भक्ति नईं करबेवारे, और अशुद्ध, मताई-बाप हां मारबेवारे, और हत्यारन के लाने आंय। परतिरिया संगत करबेवारे, पुरुष के संग्गै भोग करबेवारे, मान्सन हां बेंचबेवारे, लबरा, लाबरी गवा दैबेवारे, और जौन सांचे परचार को बिरोध करत आंय उनके लाने नैम बने आंय। जो उन महा धन्य परमेसुर के जस के ऊ सुसमाचार से आय, जौन मोहां दओ गओ आय। मैं अपने प्रभु यीशु मसीह को, धन्न मानत आंव जीने मोहां ऐसो बल दओ; कि उन ने मोपै बिसवास करके अपनी सेवा के लाने धरो। मैं तो पेंला बुरई बातें कैबेवारो, दूसरन हां सताबेवारो, और अन्धेर करबेवारो हतो; परन्त उन ने मोपै दया करी कायसे मैंने जो सबरी बातें बिन सोचे समझे करीं। और मोपै प्रभु यीशु मसीह की कृपा, उनपै बिसवास करबे से उन के प्रेम से बिलात भई। जा बात सांची और सबरे जनें के मानबे जोग आय, कि यीशु मसीह पापियन को तरन तारन करबे हां ई संसार में आए, उन में सबसे बड़ो मैं आंव। मोपै प्रभु की दया ईसे भई, कि यीशु मसीह ने मोरे लाने धीरज धरो, कि जौन उनपै बिसवास करके हमेसा को जीवन पाबे, उनके लाने मैं जैसो पापी एक नमूना भओ। अब महान राजा सदा बने रैबेवारे अनदेखे, ऐसे परमेसुर जिनको कोऊ मेल को नईयां उन हां मान, जस जुगजुग होत रैबै। आमीन। मोरे बेटा तीमुथियुस, जौन बातें तोरे लाने पेंला से कई गई हतीं, मैं तोसे कैत आंव कि उन हां करत जा। और बिसवास और साजे मन से करत जा, कछु जन ने जे बातें छोड़ दई आंय, सो उनको बिसवास को जहाज मानो डूब गओ। उनई में से हुमिनयुस और सिकन्दर आंय जिन्हां मैंने शैतान के हाथन छोड़ दओ, कि बुरई बातें न करें। सबसे पेंला मोरो कैबो जौ आय, कि तुम सबरे मान्सन के काजें, बिन्तवारी मांगबो और धन्न मानो। राजन और सबरे जौन ऊंचे पदवारे आंय कि बे भजन भक्ति के साथ अपनो जीवन संभल के जीएं। ऐसो जीवन हमाए तरन तारक करबेवारे परमेसुर हां साजो लगत, और उन हां भात आय। परमेसुर जे चाहत आंय, सबरे मान्सन को तरन तारन होबै; और बे सांची बात हां जानें। कायसे परमेसुर केवल एकई आय: मान्सन और परमेसुर के बीच एक जनों आय, जौन परमेसुर होकें मान्स बन गए जानो यीशु मसीह। जीने अपने प्राणन हां सबके तरन तारन के लाने दे दओ; जी की गवाह ठीक बेरा पै दई गई। मैं सांची कैत आंव, ईमें तनकई झूठ नईयां, कि मैं ऐई के लाने परचारक और प्रेरित बनो, कि यहूदीयन हां छोड़ दूसरी जात वारन के बीच जाई सांची बात बताबेवारो होओं। सो मोरी जा चाहना आय, कि मन्सेलू जब बिनती करे तो बिना खुन्स और झगड़ा के साजे पवित्तर हाथन है ऊपर उठा के करबें। ऊंसई बईयरें अच्छे और साजे उन्ना पैरें, और अपने बाल न गूंथो, और सुन्ने, और मोतीयन, और मांगे भड़कीले उन्ना से नईं सजें परन्त अच्छे काम करबेवारी होबें। कायसे परमेसुर को भजन भक्ति करबेवारी बईयरन हां जौई अच्छो लगत आय। बईयर हां चिमाने रैके और बात मानके सीखो चईये। और मैं जौ सोई कैत आंव, कि बईयर उपदेस न करै, और न मन्सेलू हां अग्यां दैबे, परन्त चिमानी रैबें। कायसे पेंला आदम जानो मन्सेलू, और पाछें हव्वा जानो बईयर बनाई गई। और आदम नईं, अकेले हव्वा शैतान छलिया की बातन में फंसके अग्या तोड़बेवारी हो गई। परन्त बईयर बच्चा पैदा करबे से अपनी जांगा फिन के पाहें, सो उन हां ठीक ठाक रैबो चईये और बिसवास, और प्रेम करबे, और पवित्तर बनो रओ चईये। जा बात सांची आय, कि जौन मण्डली को मुखिया होबो चाहत आय, ऊ अच्छे काम करबेवारो होबै। सो मुखिया बिन दोसवारो एकई बईयर को मुन्स, संयमी, अपने हां बस में रखबेवारो, सीधो, अच्छो, पहुनाई करबेवारो, और सिखाबे में अच्छो होबै। पीबेवारो और मारपीट करबेवारो न होबै; बात करबे में अच्छो, झगड़ा करबेवारो, और लोभ करबेवारो न होबै। अपने घर हां संवारबेवारो, और लड़का बारन हां ठीक से अपने अधीन रखबेवारो होबै। (जब कोऊ अपने घर की देखभाल अच्छे से न करे, तो बो परमेसुर की मण्डली के लोगन की रखनवारी अच्छे से कैसे कर है)। ध्यान धरियो के मुखिया नओ चेला न होबै, ऐसो न होबै, कि घमण्ड में आके शैतान घांई दण्ड ऊहां सोई मिले। और बायरें के मान्सन में ऊ को अच्छो नाओं होबै। ऐसो न होबै बो शैतान के जाल में फंसके बदनाम होबै। ऊंसई सेवकों को सोई गंभीर मान्स होओ चईये, बो दोरंगी, और पीबेवारो न होबै, और घूस लेबेवारो जन न होबै। और साजे मन से बिसवास की बातन हां ध्यान में धरबेवारो होबै। और चईये कि पेंला उनकी जांच पड़ताल करी जाबै, और साजे कड़ें, तो सेवक को काम करें। ऐसई बईयरन हां सोई गंभीर होओ चईये; दूसरन पै दोष मड़बेवारी न होबें परन्त होशियार और बिसवास करबे लाक होबें। सेवक एकई बईयरन को मुन्स होबै, और लड़का वारन और अपने घर को अच्छे से धरबो जानें। कायसे जौन सेवक को काज अच्छे से करे, तो ऊ को बड़ो नाम हुईये और यीशु मसीह पै बिसवास में पक्के कड़ हैं। मैं तोरे लौ जल्दी आबे की आसा लगाएं आंव परन्त जे बातें मैं तोहां लिखत आंव। मोरे आबे में तनक अबेर हो जाबै, तो ध्यान धरियो, कि परमेसुर को घर, जियत परमेसुर की मण्डली आय, जौन सांचे को खम्भा और उठी नी आय; ईमें कैसो चलो चईये ईपै ध्यान धरियो। धरम को भेद बड़ो आय ईको ध्यान धरियो; बो सरीर में होकें संसार में आओ जा बात आत्मा ने बताई, और सरगदूतन ने संसार मैं ईको परचार करो, मान्सन ने ऊ पै बिसवास करो और बो सरग पै उठा लओ गओ। आत्मा कैत आय, की आबेवारे दिना में कितेक मान्स बिलोरबेवारी आत्मा, और बुरई आत्मा की बातन मैं मन लगा के सांचे बिसवास की बातन से भटक जै हैं। ऐसी सीख उन झूठे मान्सन से आहें, मानो जिन को जी तांते लोहे से दागो गओ होबै। जे ब्याव करबे से रोक हैं, और कह हैं कि खैबे की कछु बस्तन से दूर रओ, परन्त परमेसुर ने उन बस्तन हां ई लाने बनाई आंय कि बिसवासी जनें, और सांचे हां चीनबेवारे उन हां परमेसुर को धन्न मानके खाबें। कायसे परमेसुर की बनाई सबरी बस्तें अच्छी आंय, और कोई ऐसी बस्त नईंयां; जौन खाबे हां न होबै। कायसे परमेसुर के बचन और बिन्तवारी में साजी हो जात आय। तें भईयन हां समझा के इन बातन की याद करा, तो तें यीशु मसीह को अच्छो सेवा करबेवारो हुईये: और बिसवास की बातन हां और जौन बातें सिखाई गई आंय, और जिन हां तें मानत आय, तें बढ़त रै है। परन्त गन्दी और बूढ़ी दादी बईयरन की कहानियन पै ध्यान न करो, और भक्ति करत रओ। कायसे दैहिक कसरत ज्यादा फायदा नईं करत आय, परन्त भक्ति सबरी बातन में फायदे की होत आय, ई बेरा में, और आबेवारे दिना में सोई। जा बात सांची आय, और सब तरहां के मान्स जा मानत आंय। हम खूबई मैनत करत आंय और कोसस करत आंय, कि हमाई आस जीयत परमेसुर पे आय; जौन मान्सन को, और जौन उन हां मानत आंय उनको तरन तारन करबेवारो आय। सो चईये के तें इन बातन हां मानबे को जोर डाले, और इन बातन हां बतात रै। कोई तोरी जुआनी हां नेंचो नईं लेखे; परन्त बातचीत, और चाल चलन, प्रेम, और बिसवास करबे में, और पवित्तर जीवन धरबे में मान्सन के काजें नमूना बनो रै। और जब लौ मैं उते न आओं, तब लौ पढ़बे, उपदेस देबे और सिखाबे में लगो रै। जौन बरदान तोहां मिलो आय, ऊ पै ध्यान धरियो जौन के लाने पैले से तोरे लाने कहो गओ हतो, और जी के लाने बड़े बूढ़न ने तोपे हाथ धरो हतो। इनई बातन पै ध्यान लगा और सोचत रै, कि सबरन के हेरत तें बढ़त जाबै। अपनी और अपनी बातन जौन तें सिखात आय ध्यान धरै रओ। इन बातन में पक्को बनो रै, कायसे ऐसो करबे से तें अपने, और जौन तोरी बातन हां सुनत आय उनको तरन तारन हुईये। कोई बूढ़े जने हां न डांटिये; परन्त बाप समझ के समझा दईये, और जुआनन हां भईया सोच के, और बूढ़ियन हां मताई सोच के। और जुआन बाईयर हां पूरी पवित्तरता से बहन जानके समझात रईये। जौन सांचई बिधवा हो गई हो उनको मान करियो। और कोऊ बिधवा बईयर के लड़कावारे और नाती नता होबें, तो बे पेंला अपने घरवारन मैं अच्छे से रैबें, और अपने मताई बाप हां उनको जौन हक्क होबे बो देओ। जौन सांचई बिधवा होबै, और उनको और कोई न होबै; बे केवल परमेसुर के आसरे होबें, और रात दिना बिन्तवाई करबे में लगी रैबें। परन्त जौन संसार के भोग में पड़ जाबै, मनो बे जीयत जागत मरी जैसी आय। उनहां समझात रै, कि कोई उन पै उंगरिया न उठा पाबें। परन्त कोई अपनी और अपने घरवारन की देखभाल साजे से न करे, तो बो बिसवास करी भई बातन हां मानो भूल गओ, और जौन बिसवास नईं करत उनसे गिरो भओ आय। ऊ बिधवा को नाओं लिखो जाबै, जौन साठ बरसन से कम न होबै, और एकई मुन्स करो होबै। और साजो काम करबेवारी रई होबै, जीने अपने लरका वारन हां ठीक से पालो होबै; पाहुरन की सेवा खुसामद करी होबै, पपित्तर जनन के गोड़े धोय होबें, और दुखियन की मदद करी होबै, और अच्छे कामन में मन से लगी रई होबै। जुआन बिधवा को नाओं न लिखियो, कायसे बे यीशु मसीह की सीख से उल्टी चलीं और सुख भोग में लगी रईं, और ब्याव करो चाहत हतीं। बे बुरई आंय, कायसे बे अपने पेंला वारे बिसवास से भटक गईं आंय। बे घर घर फिरती आंय, और आलसी हो गई आंय, और ऊके संग्गै फालतू बातें करतीं और जौन बातें नईं करो चईये। मैं जौ कैत आंव कि जुआन बिधवाएं ब्याओ करें; और लरका बिटिया जन के अपनो घर बार देखें, कि कोई उनहां भलो बुरो न कैबे। कछु जनी तो भटक के शैतान छलिया के से काज करत आंय। कोई बिसवासी बहन लौ कछु बिधवाएं रैत होबें, तो बा उन की देखभाल करै, कि मण्डली पै खरचा न बैठे, और बा बहन ऐसी बिधवाओं की मदद करे। जौन मुखिया अच्छे से काम करत, और परमेसुर की बातें दूसरन हां बतात आंय और मेनत से सिखात आंय, उन हां दुगनो मान मिल है। कायसे पवित्तर पोथी में लिखो आय, कि दांय में निबे बैलवा को मों न बांधियो, कायसे मजूर हां मजूरी मिलबो चईये। कोई मुखिया पै कोई दोस होबै तो दो तीन गवाय बिना ऊ पै ध्यान न दईयो। जौन पाप करे ऊहां सबरे मान्सन के सामूं समझा देओ, कि दूजे जनें सोई पाप करबे से डराबें। परमेसुर, यीशु मसीह, और खास सरगदूतन के मानो सामूं जानके मैं तुम हां कए देत आंव, कि मन से इन बातन हां मानियो और कोई के संग्गै मों देखो न करियो। कोई बिसवासी पै झट्टई हाथ न धरियो और दूसरन के पाप में संग्गी न हुईयो: अपने हां साजो बनाए राखियो। जीवन में केवल पानू पीबेवारो न रहियो, अपने पेट के बेर बेर पिराबे और बेर बेर बीमार होबे से थोड़ो सो दाखन कौ रस पी लंय गय। कित्तई मान्सन के पाप तो खुल जात आंय, और पेंला से उनको न्याव होन लगत आय, परन्त कछु जनन के पाछें खुलत आंय। एैसई कछु जनन के अच्छे काज झट दिखात आंय, और दूसरन के कैसऊ लुके छुपे नईं रै सकत। जितेक चाकर जूए के नेंचें आंय, बे अपने अपने मालक को बड़े मान के जोग जानें, जीसे परमेसुर के नाओं और उपदेस की निन्दा न होबे। और जिन के मालक बिसवासी आंय, इन हां बे भईया होबे के कारन तुच्छ न जानें; बल्कि उन की और भी सेवा करें, कायसे ईसे लाभ उठाबेवारे बिसवासी और प्रेमी आंय: इन बातन के लाने उपदेस करियो और समझात रहियो। जदि कोऊ और परकार कौ उपदेस देत आय; और साजी बातन हां, माने हमाए पिरभू यीशु मसीह की बातन को और ऊ उपदेस को नईं मानत, जो भक्ति के अनसार आय। तो बो घमण्डी हो गओ, और कछु नईं जानत, पर ऊहां बिवाद और शब्दों पै बहस करबे कौ रोग आय, जिन से डाह, और लड़ाई, और निन्दा की बातें, और बुरय बुरय शक। और उन मान्सन में बेकार के झगड़ा पैदा होत आंय, जिन की मती बिगड़ गई आय और बे सत्य से अलग हो गए आंय, जो समझत आंय कि भक्ति कमाई कौ दोरो आय। पर संतोस के संग्गै भक्ति बड़ी कमाई आय। कायसे न हम संसार में कछु लाए आंय और न कछु लै जा सकत आंय। और जदि हमाए ऐंगर खाबे और पहनबे को होबै, तो इनईं पर संतोस करो चईये। पर जो मालदार होबो चाहत आंय, बे ऐसी परीछा, और बेकार के काम और नुसकान में फंसत आंय, जो मान्सन हां बिगाड़ देत आय और बिनास के समन्दर में डुबो देत आय। कायसे रुपईया कौ लोभ सब परकार की बुराईयन की जड़ आय, जीहां पाबे की कोसिस करत भए कितेक जनें बिसवास की गैल से भटक के अपने आप हां बिलात परकार के दुखों से छलनी कर लओ आय। पर हे परमेसुर के जन, तें इन बातन से भाग; और धरम, भक्ति, बिसवास, प्रेम, धीरज और नम्रता कौ पीछा कर। बिसवास की अच्छी कुस्ती लड़; और ऊ अनन्त जीवन को धर ले, जीके लाने तें बुलाओ गओ, और बिलात गवाह के सामूं अच्छो स्वीकार करो हतो। मैं तोहां परमेसुर हां जो सब हां जीयत रखत आय, और पिरभू यीशु मसीह को गवाह मानके जीने पुन्तियुस पीलातुस के सामने अच्छो स्वीकार करो, जौ आदेस देत आंव। कि तें हमाए पिरभू यीशु मसीह के परगट होबे तक ई आदेस हां बिना कलंक के और निरदोस राख। जीहां बो ठीक बेरा में दिखा है, जो परम धन्न और राजाओं कौ राजा, और पिरभुओं कौ पिरभू आय। और अमरता केवल ओई की आय, और बो अगम्य ज्योत में रहत आय, और न ऊहां कोई मान्स ने तको, और न कभऊं तक सकत आय: ऊ की प्रतिष्ठा और राज जुग जुग लौ रै है। आमीन। ई संसार के मालदारों को आदेस दे, कि बे घमण्डी न होबें और धन कौ लालच न करें, पर परमेसुर पर जो हमाए सुख के लाने सब कछु बिलात देत आय। और भलाई करें, और अच्छे कामन में धनी बनें; और उदार और मदद के लाने तईयार रैबें। और आंगू के लाने एक अच्छी नी डाल राखें, कि सत्य के जीवन हां बस में कर लेबें। हे तीमुथियुस ई बात की रखनवारी कर और जी समज हां समज कहबो भूल आय, ऊके असुद्ध बतकाव और बिरोध की बातन से दूर रह। कितेक ई समज कौ अपना के, बिसवास से भटक गए आंय। तुम पर आसीस होत रैबे। पौलुस ने लिखी जीने यीशु मसीह पै बैकुण्ठ के लाने बिसवास करो और जौन परमेसुर की मरजी से यीशु मसीह के प्रेरित आंय। प्यारे बेटा तीमुथियुस हां लिखी। परमेसुर पिता और हमाए प्रभु यीशु मसीह में तुमें दया और सान्ति मिलत रए। मैं अपने परमेसुर की सेवा अपने बड़े बूढ़न की रीत से साजे विवेक से करत आंव, और उनकी दया से तुमाए काजें बिन्तवारी करत आंव। और तेंने जौन मन से सेवा करी आय, ऊकी याद रात दिना करत आंव और मोरो मन भरो आय। मोहां याद आत आय, कि तोरी नानी लोइस, और तोरी मताई योनीके अपने बिसवास में पक्के हते, और मोहां पता आय, कि तें सोई उन जैसो आय। ऐई से मैं तोहां सोई कैत आंव, कि जौन बरदान तोहां मोरे हाथ धरे से मिलो आय ऊहां और उजयार दे। हम हां डरने नईंयां, कायसे परमेसुर ने हम हां प्रेम और बस भर काम करबे को भय दओ आय। सो परमेसुर की गवाही से, और मोरे से जो उनके नाओं से जेहल में आंव, लजाईयो न, परन्त मोरे संग्गै सेवा में दुख उठाबे हां तईयार रै। जीने हमाओ तरन तारन करो, और हम हां अपनौ बना लओ, जौ हमाए पुण्य के कामन से नईंयां; परन्त परमेसुर की दया से भओ आय। जब से प्रभु यीशु मसीह हमाए हिये में आय तो मानो उजयारो हो आओ, जीने मृत्यु हां खतम करो, और हम हां हमेसा हां बैकुण्डवास पहुंचबे को ज्ञान दओ। ऐई बचन को मैंने परचार करो और उनको भेजो, और सबरे हार उपदेस करो। ऐई से मैं जे दुख उठा रओ आंव, और लजात नईंयां, कायसे मैंने जिन पै बिसवास धरो आय उन हां जानत आंव; और मोहां पक्को आय, कि जौन जीवन मैंने उन हां दे दओ आय ऊहां साजो धरे रै हैं। जौन खरी बातें तेंने मोसे सुनी आंय उन हां पक्को मान के प्रेम से यीशु मसीह की बातन हां मानत जा। पवित्रात्मा जौन हमाए हिये में बल देत आय, जौन काम उन ने दओ आय ऊहां सुतारो धरे रै। तोहां पता आय, कि आसियावारे सबरे जनें मोसे फिर गए आंय, जैसे फूगिलुस और हिरमुगिनेस। उनेसिफुरुस के घर के जनन पे प्रभु दया करें, कायसे ऊने कई बेरा मोरे हिये हां मानो ठण्डो करो, और मैं जेहल में आंव ईसे नईं सरमाओ। परन्त जब बो रोम नगर आओ, तो मुसकल से ढूढ़त भओ मोहां मिलबे आओ। (प्रभु ऊपे अपनी दया बनाए रखे) जौन जौन काज ऊनें इफिसुस में करे उनकी सोई तोहां पता आय। मोरे बेटा, यीशु मसीह की दया से पक्को होत जा। जौन बातें तेंने बिलात जनन के सामूं मोय से सुनी आंय, उन हां दूसरे बिसवास करबेवारन हां सुना दे; जौन औरन हां बेई बातें सिखाबें। यीशु मसीह के अच्छे सिपाही घांई मोरे संग्गै दुख उठाबे हां तईयार हो। जब कोई सिपाही लड़ाई में जात आय, तो जीने ऊहां भरती करो आय, ऊहां खुस करबे हां अपने मन हां संसार की बातन से दूर धरत आय। अखाड़े में लड़बेवारो पहलवान अच्छे से नईं लड़त तो इनाम नईं मिलत। जौन किसान मेहनत करत आय ऊको फल ऊहां मिलत आय। मोरी बातन पै ध्यान धर, और पिरभू तोहां सबरी बातन की समझ दै है। यीशु मसीह पे ध्यान धरै रै, जौन दाऊद के घर से भओ, और मरे भयन में से जी उठो; जेई बातें तो मैंने तुम हां सुनाई हतीं। उनईं बातन पै मैं बुरय मान्सन जैसो दुख उठा रओ आंव, इते लौ कि जेहल में आंव; परन्त परमेसुर कौ बचन खुलो आय। मैं बिसवास धरबेवारन के लाने सब सह रओ कि बे यीशु मसीह में तरन तारन पाबें। सांची बात जा आय, कि यदि हम उनके संग्गै मानो मर गए आंय तो उनके संग्गै जी जै हैं। और हम धीरज धरें, तो उनके संग्गै राज सोई कर हैं: हम उन हां मान न दै हैं तो बे हमाओ मान सोई न कर हैं। हम बिसवास न धरें परन्त बो बिसवास धरें रैत आय, कायसे बे अपनी कई नईं टाल सकत। इन बातन हां उन हां बतात रै, और प्रभु के सामूं चितात रै, कि बहस न करें, ऊसे कछु नईं बनत; परन्त मान्स बिलुर जात आय। ऐसे कय कर, कि परमेसुर खुस होबें और ऐसे काम करो जीसे आगे हां न लजाओ, और उनके सब बचनन हां अच्छे से मानो। गन्दे बतकाव से दूर बनो रै; कायसे ऐसे जनें जो बुरओ बोलत हैं सो परमेसुर से और दूर होत जात आंय। उनकी बातें मानो सड़े घाव जैसे बढ़त जै है: हुमिनयुस और फिलेतुस उनईं में से आय। जौन जौ कैत आंय कि मरे भए जी उठे आंय बे सांची बातन हां नईं मानत, और कित्तई उन के बिसवास हां बिलोर देत आंय। परन्त परमेसुर की बातें जीमें नीं जैसी बैठ गई आंय, उन पै ऐसी छाप लगी आय कि परमेसुर उन हां चीनत आंय; जो कोनऊं परमेसुर को नाओं जपत आय, बो अधरम से बचो रै है। बड़े लोगन के घर में सोने-चांदी केई बासन नईं, परन्त माटी और लकड़िया के बासन सोई होत आंय; कोऊ को आदर धरो जात आय, और कोनऊं को नईं। जौन कोनऊं अपने हां इन बचनन से साजो राख है, तो ऊको आदर हुईये; और बो जनो मालक के काम आहै, और भले कामन में लगो रै है। जवानी की अभलाखा से दूर बनो रै; और जौन साजे मन से पिरभु हां मानत आंय, उनके संग्गै धरम और प्रेम से चलो, और दूसरे जनन से मिले रओ। मूरख और अनपढ़ मान्सन की बातन से दूर रओ; कायसे तें जानत आय, कि ऐसी बातन से झगड़ा होत आंय। प्रभु के दास हां झगड़ा करबेवारो नईं भओ चईये, परन्त सबरन के संग्गै मीठो बोलबेवारो, और सबरी बातन में होसयार और दूसरन की बात सैबेवारो होबै। जौन जनें बिरोध करें उन हां धीरज से समझा दो, का पता कि परमेसुर उनको मन बदल देबे, कि बे सोई इन सांची बातन हां मानें। और उनकी अग्या मानबे हां तईयार रैके शैतान छलिया के जाल से छूट जाबें। जौ मन में धरौ, कि अन्तिम दिना बड़े कठन हुईयें। कायसे मान्स स्वार्थी, लोभी, डींग माबेवारो, बुराई करबेवारो, और मताई बाप की कई नईं करबेवारो, और बुरओ हुईये। ऊमें प्रेम न रै है, और दूसरन हां क्षिमा नईं कर हैं, दूसरन में दोस लगाबेवारो हुईये, और अपने मन की करके कठोर, और भलो न चाहें। बिसवास घाती, बात न मानबेवारो, घमण्डी और परमेसुर की बातन हां नईं परन्त दुनिया के भोग विलास में डलो रै है। बे भगत जैसे तो लग हैं, परन्त उनके जस हां न मान हैं; ऐसे जन से दूरई रईयो। इनईं में बे सोई आंय, जौन घरन में चिमा के पिड़ जात आंय और बुरई बईयरन हां फंसा लेत आंय, जौन बुरई अभलाखा में पड़ी पाप करत रैत आंय। बे मानो सीखत तो हैं परन्त सांची बातन हां कऊं, नईं चीनत। जैसे यन्नेस और यम्ब्रेस ने मूसा की बात नईं मानी ऊंसई बे सोई सांची बातों को बिरोध करत आंय: उनकी मति बिगड़ गई और बे बिसवास करबेवारी साजी बातन हां बिलकुल नईं मानत। बे ईसे आगे नईं जात, कायसे जैसे उनकी मूरखता सबरन के सामूं खुल गई, ऊंसई इन की सोई खुल जै है। तेंने अपने उपदेस, और अपनी चाल, और बिसवास, और सैबेवारो मन, प्रेम और धीरज, और सताए जाबे में सोई मोरे संग्गै दुख उठाओ आय। और ऐसे कठन दुखन में जौन अन्ताकिया, इकुनियम और लुस्त्रा में मोपे भए और दुख जौन मैंने उठाए हैं; उन सबरन से प्रभु ने मोहां छुड़ाओ। जौन यीशु मसीह के बिसवास में पक्के हुईयें, साजो जीवन जीबो चाहत आंय बे सोई सताए जै हैं। और दुष्ट जनें जो बहकात आंय और धोका देत आंय, बे धोका खाके और बिगड़त जै हैं। परन्त तेंने जौन बातें सीखी आंय और उन पै बिसवास धरो, उन में पक्को बनो रै; ध्यान धरियो कि जे बातें तेंने कौन से सीखी हतीं? तें तो बालकपन से पवित्र शास्त्र की बातन हां जानत आय, जिनके मानबे से तोरो तरन तारन होत आय, और तें और होसयार हो जै है। कायसे पवित्र शास्त्र के एक एक बचन परमेसुर की आत्मा के कय से लिखे गए आंय, जीसे उपदेस होबे, और मान्सन के समझाबे और सुधरबे, और धरम की गैल जानें हां साजो आय। जीसे परमेसुर को मानबेवारो साजो बने, और भले काज करबे हां तैयार रैबे। परमेसुर और यीशु मसीह के सामूं जौन जीयत और मरे जनों कौ न्याव कर है, जब बे फिन के परगट हुईयें, और अपनो धरम को राज जमै हैं जौ सोच के तोहां चिताए देत आंव। कि तें बचन के परचार के लाने तईयार रै; और सबरी बातन में धीरज से सै, और मान्सन हां सिखा और दपट और समझा दे। कायसे ऐसे दिना आहें, कि मान्स सच्ची बात न मान हैं, परन्त जौन बातें सुनबे में मजा आबै और अपनी अभलाखा जैसो कैबेवारो जोड़ लै है। और सांची बातन से फिरके कहानी किस्सा पै मन लगा है। परन्त तें सबरी बातन में होसयार रै, दुख उठाबे हां तईयार रै, और सुसमाचार सुनात जा और जौन काज तोहां दओ आय ऊहां पूरो कर। कायसे अब मैं बलदान होबेवारो आंव, और मोरे ई संसार से जाबे को टेम हो गओ आय। मैंने अच्छी कुस्ती लड़ी आय मानो मैंने अपनी दौड़ पूरी कर लई आय, और अपने बिसवास में पक्को बनो रओ आंव। आगे परमेसुर जौन सांचे आंय मोरे काजें धरम को मुकुट धरें आंय, जौन मोहां दै हैं और मोहां नईं, परन्त उन हां सोई दै हैं, जौन उनके फिन के आबे की प्रेम से बाट तकें आंय। मुद्दई मों लौ आईये। कायसे देमास ने ई संसार के मोह जाल में पड़ के मोहां छोड़ दओ आय, और थिस्सलुनीके हां चलो गओ आय, और क्रेसकेंस गलतिया हां और तीतुस दलमतिया हां चलो गओ आय। लूका मोरे संग्गै बनो आय: मरकुस हां संग्गै लैके मो लौ चलो आ; कायसे सेवा के काज में ऊ बड़े काम को आय। तुखिकुस हां मैंने इफिसुस पठैव आय। जौन बागा में त्रोआस में करपुस लौ छोड़ आओ हतो, जब तें आहै, तो ऊहां और जौन किताबें खास करके चर्मपत्रों हां लेत अईये। सिकन्दर ठठेरे ने मोरे संग्गै बुरओ करो आय, परमेसुर ऊहां ऊकी करनी को फल दै है। तें सोई ऊसे संभल के रईयो, कायसे ऊने हमाई बातन को बिरोध करो आय। मैंने जब पैलो जवाब दओ तो कोनऊं ने मोरो साथ नईं दओ, सब ने मोहां छोड़ दओ हतो: परमेसुर करै कि ऊहां इन सबरी बातन को लेखो न दैबे पड़े। प्रभु ने मोरी सहायता करी, और मोहां हिम्मत दई: कि मैं सबरे हार प्रचार करों, की सबरे जनें सुन लेबें; मैं तो मानो नाहर के मों से छूट आओ। मोहां भरोसा आय कि प्रभु मोहां बुरई बातन से बचा है, और मोरो तरन तारन करके मोहां अपने सरग धाम में लै जै है: उनईं की जय होबै। आमीन। प्रिसका और अक्विला, और उनेसिफुरुस के घर वारन हां नमस्कार कईये। इरास्तुस कुरिन्थुस में रै गओ, और त्रुफिमुस हां मैं मीलेतुस में बिमार छोड़ आओ। जाड़े के दिना से पेंला चलो अईये: यूबूलुस, और पूदेंस, लीनुस और क्लोदिया, और सबरन हां नमस्कार कईये। प्रभु तोरे आत्मा हां बल देबे: तुम पै किरपा बनी रैबे। पौलुस ने लिखी जा चिठिया जौन परमेसुर को चाकर और यीशु मसीह कौ प्रेरित आय, जीहां परमेसुर नबेरे जनन के बिसवास, और जीने सांची बातन हां चीनो आय। अनन्‍तकाल लौ जीयत रैबे की आस से करी, जीके लाने परमेसुर ने कई जौन लाबरी नईं कैत। और ऐन बेरा पै अपने परचार से उजागर करी, जौन हमाए तरन तारन करबेवारे परमेसुर की मरजी से दई गई। जा चिठिया तीतुस हां लिखी जौन धरम से मोरो लड़का आय; तुम हमाए परमेसुर पिता जौन हमाओ तरन तारन करबेवारे आंय, तुम सबरे जनन पै दया और सान्ति बनी रैबे। मैं ई काजें तोहां क्रेते में छोड़ आओ हतो, कि तें जौन बातें बचीं आंय उन हां ठीक ठाक करे, और जैसी मैंने कई हती कि हरएक जांगा पै प्राचीनन हां काम पै लगाए। प्राचीन बिन खोट एकई बईयर राखबेवारो होबै, और उनके बाल बच्चा पिरभु पै बिसवास करबेवारे होबें, और ऊ धनी न होबे परन्त कई करबेवारे होबै। कायसे मुखिया हां परमेसुर के काम करने आंय; बो बिनखोट, हटी और खुन्सयाबेवारो, न पीबेवारो और न मारपीट करबेवारो और घूस लैबेवारो न होबै। बो पहुनाई करबेवारो, और दूसरन कौ भलो करबेवारो, अपने बस में रैबेवारो, न्याय करबेवारो, पवित्तर और अपनी इन्द्रियन हां बस में रखबेवारो होबै। और जौन धरम की बातें उन ने सुनी आंय, उन हां मानबेवारो होबै और खरी बातन कौ परचार करे, और बहस करबेवारन हां ऐसो जवाब दैबे कि विवादियन कौ मुंह बंद हो जाबै। कायसे बिलात जनें बिरोध करत आंय, लबरा और धोका देत आंय; जे बे आंय जिनको खतना हो गओ आय। उनकौ मों बन्द करो चईये, जे औरें पईसा ऐंठबे हां बुरई बातें बताके घर के घर बिगाड़त आंय। उनईं में के एक जनें ने जौन उनको आगमवकता आय, ऐसो कैत आय, क्रेते के जनें पेंला से लाबरी कैत आंय, और पशुअन जैसे बिलात खैबेवारे और आलसी जनें आंय। जा बात तो सांची आय, सो उन हां कर्रे के समझा दईये, कि बिसवास में पक्के बनो। और यहूदियन की कथा कहानियन और मान्सन की कई न करें, जे तो सांची बातन हां छोड़के बिलुर गए आंय। साजे मान्सन के लाने सब साजो आय, और बुरय और बिसवास न करबेवारन हां कछु साजो नईंयां; कायसे उनकी समझ और उनको हिया साजो नईंयां। बे कैत तो आंय, कि परमेसुर हां चीनत आंय, परन्त ऐसे काम करत आंय मानो उन हां नईं चीनत, कायसे बे घिना आंय और कई नईं करत; और उन पै कछु साजो करत नईं बनत। तें साफ साफ कहें गए, जौन साजी बातें आंय। सियाने जनें समझदार रएं, और उनको धरो भओ बिसवास प्रेम और सैबे कौ मन होबै। ऐसई सियानी बईयरन की चाल साजी होबै, बे नसा न करें और दूसरन पै दोस न लगाबें; परन्त साजी बातें सिखाबें। कि बे हल्की बईयरन हां कैबें, कि अपने मुन्स और लरका बारन से प्रेम राखो। बे साजी, पतिविरता, घर को काम काज करबेवारी, साजी और अपने मुन्स की कई करबेवारी होबें, कि परमेसुर के बचन हां दूसरे जनें बुरओ न कैबें। ऐसई जुआन मान्सन हां सोई समझाओ, कि ठीक ठाक रैबें। सबरे काम ऐसे करौ कि मान्स बड़वाई करें; तुमाई बातें खरी और बजनदार होबें। तुमाई बातें खरी होबें, कि कोई उन हां बुरओ न कहबे; कि हमाए विरोधियन हां कोऊ ऐसो मौका न मिलै, और बे लजा जाबें। चाकरन हां समझाओ, कि अपने मालक की कई करें, और अपने काम से उन हां खुस राखें, और कभऊं उन हां पलट के जुआब न दैबें। चोरी भड़याई न करें; परन्त सबरी बातन में सांचे बिसवास करबेवारे बनें, इन सबरी बातन हां मानबे से हमाए तरन तारन करबेवारे परमेसुर के बचन हां और उजागर करें। कायसे हम हां पता पड़ गओ आय, कि परमेसुर की किरपा से मान्सन को तरन तारन भओ आय। बे हम हां चितात आंय, कि हम अधरम और संसार की लुभाबेवारी बातन से चित्त फेर के ई जुग में अपने हां बस में राख के धरम करम से चलबें। और जौन आस हम लगाए आंय कि महाबली परमेसुर और पिरभु यीशु मसीह जिन ने हमाओ तरन तारन करो आय, उनकी फिन के आबे की गैल तकें रैबें। उन ने अपने आप अपनो बलदान करो, कि हम हां सबरे पापन से दूर करबें, और हम हां साजो कर के ऐसे बनाबें जौन धरम के काज में लगे होबें। तें पूरे हक्क से इन बातन हां समझा, और सिखा दे कि कोई तोपे उंगरिया न उठा पाबै। मान्सन हां चिताओ, कि हाकम और मालकन की कई करौ, और उन की कई मानो, और कोनऊ भलो काम होबै तो ऊहां मन से करौ। कोई की बुराई न करो; और झनझट न करो; परन्त सूदे रओ और सबरे मान्सन के संग्गै नरमाई से चलो। कायसे हम पेंला, मूरख और परमेसुर की अग्या न मानबेवाले, और दुबधा में हते, और भांत भांत की चाहना करत हते, और मजा मौज चाहत हते और अदावट धरें हते, और दूसरन को बुरओ सोचत हते, और बहुत घिना हते और दूसरन से बैर मानें हते। परन्त जब हमाए पिरभु यीशु मसीह ने किरपा करके हम से प्रेम करो। सो उन ने हमाओ तरन तारन करो: जौन हमाए घरम के क रमन से नईं, जौन हम ने करे, परन्त उन की दया से भओ, जीसे हम हां नओ जीवन पवित्तर आत्मा के नये बनाबे से मिलो। जो जीवन उन ने हमाए तरन तारन करबेवारे पिरभु यीशु मसीह में होकें खुल के दओ। जीसे हम उनकी किरपा सें धरमी भए, और मरे के पाछें जीवन के हक्कदार भए। जे बातें सांची आंय, और मोरी जा चाहना आय, कि तें इन बातन हां खुल के बताए कि जीने परमेसुर पै बिसवास धरो आय, बे भले कामन में लगे रैबें, कायसे जे बातें बढ़िया और मान्सन के भले की आंय। सो ओछे बतकाव से, और पुस्तन के किस्सा से, अदावट और उन झनझटन से न्यारे रओ; कायसे इन से कछु बनत नईंयां। कोई पाखण्डी होबै तो ऊहां समझा के ऊसे दूर रओ। जौ समझो कि ऐसो मान्स सांची गैल से भटक गओ आय, और अपने आप हां पापी जान के पाप करबे में लगो रैत आय। जब मैं तोय अरतिमास या तुखिकुस हां पठैओं, तो तें मोरे ऐंगर नीकुपुलिस हां अईयो; कायसे मैंने उतईं जाड़े के दिना काटबे की सोची आय। जेनास व्यवस्था करबेवारो और अप्पुल्लोस हां जतन से आगे पठै दईये, और जौ ध्यान धरिये कि उन हां कछु बस्त की घटी न होबै। हमाए जनें हां सोई जौन बस्त चाने होबै ऊहां दैबे में पाछें न रैबें। मोरे सबरे संग्गी भईयन हां तोहां नमस्कार पोंचे, और जौन हम में मिल गए आंय, उन हां सोई नमस्कार कईयो। तुम सबरन पै परमेसुर की किरपा बनी रैबे। पौलुस जौन यीशु मसीह के कारण जेहल में आय, और भईया तिमुथियुस ने लिखी संग्गी भईया फिलेमोन हां। और बहन अफफिया, और हमाए संग्गी अरखिप्पुस और फिलेमोन के घर में जुड़बेवाली मण्डली के जनन हां। हमाए पिता परमेसुर और पिरभू यीशु मसीह में तुम हां दया और किरपा मिलत रैबे। मोहां पिरभू में तोरे प्रेम और तोरे बिसवास जौन तें सबरे जनन पै धरे आय। ऊके लाने रोजीना परमेसुर को जस मानत आंव; और प्रार्थना में तोहां याद करत आंव। तोरे हमाए संग्गै जुड़बे से और तोरे भले कामन से पिरभू को और जस होबै। कायसे भईया, तोरो प्रेम जो प्रभु से और मान्सन से लगो आय, ऊसे हमाए मन हां अच्छो लगो, सुनो आय कि तोसें मण्डली के जनन के मन हरे हो गए आंय। मोहां मसीह में जा हिम्मत मिली, कि जौन चीज ठीक आय ऊहां करबे की अग्यां देओं। मैं बूढ़ो पौलुस जौन यीशु मसीह के नाओं के कारण अबै जेहल में आंव, ऐसो साजो लगो कि तुम से प्रेम से कहों। मैं अपने लड़का उनेसिमुस जौन ने जेहल में बचन सुनके बिसवास धरो ऊके लाने ऐसो कैत आंव। कि बो तो पेंला मोरे कोऊ काम को नईं हतो, परन्त अब तो तोरे और मोरे दोई के लाने बड़े काम को आय। ओई के लाने जौन मोरे हिये को टुकड़ा आय, जीहां मैंने तोरे ऐंगर पोंचा दओ आय। ऊहां मैं अपने संग्गै धरो चाहत हतो, कि बो तोरे नाओं से ई जेहल में जौन बचन सुनाबे से आय, मोरी सेवा करै। परन्त मैंने तोरी मरजी के बिना कछु नईं करो चाहो, कि तोरी मो पे दया मन से होबै, कोई दबाओ से नईं। का पता कि ऊ तोसे कछु दिना तक न्यारो रहो कि सबरे हार तोरे संग्गै रैबे। अब नौकर घांई नईं, परन्त ऊसे बढ़के मानो, भईया जैसो रैबे और जौन संसार के देखत और पिरभु में मोरो प्यारो आय। तें मोहां अपनो संग्गी जाने, तो ऊहां ऐसो मानियो जैसे मोहां मानत आय। और ऊने तोरो कछु नुकसान करो होबै, और तोसे कछु उधार लओ होबै, तो बो सबरो मोरे नाओं में लिख लईये। मैं पौलुस अपने हाथन से लिख रओ आंव, कि मैं सबरो पटा दै हों; मोहां जौ कैबे की बात नईंयां, कि मोरो करजा जौन तो पे आय बो मानो तेंई आय। भईया जौ करके तो मोहां भलो लग है, तोरे ऐसो करबे से मानो तें मोरे हिये हां हरो भरो कर है। तें मोरी बात मानत आय, ऐसो जानके और तो पै भरोसा धरके, मैंने जौ लिखो आय मोहां पता आय, कि तें मोरे कहे से बढ़के कर है। मोरे रुकबे के लाने जांगा धरिये; मोहां पता आय कि तुमाई बिन्तवाई से मैं तुम हां फिन के मिल जै हों। इपफ्रास जौन प्रभु यीशु मसीह के कारण मोरे संग्गै जेहल में आय। और मरकुस और अरिस्तर्खुस और देमास और लूका जौन मोरे संग्गै काम करत आंय, तोहां नमस्कार कैत हैं। हमाए प्रभु यीशु मसीह की दया तुमाए जीवन पै बनी रैबे। पेंला के दिन में परमेसुर ने हमाए बूढ़े बारन से तनक तनक और भांत भांत से आगमवकतन से बातें करीं। अन्त में परमेसुर ने अपने पुत्तर हां पठै कै उन में होकें बातें करीं जीसे संसार हां रचो, और एक दिना बेई पूरे संसार के मालक हुईयें। पुत्तर परमेसुर पिता की जस की जोत और उनके जैसो आय, और बेई अपने बल से धरती हां संभाले आंय: बे मान्सन के पापन हां धोके परमेसुर महान के दाएं हाथ पै जा बैठे। और बे सरगदूतन से अच्छे कड़े, और उनहां ऊ नाओं दओ गओ जौन दूसरन से सबसे बड़ो आय। कायसे परमेसुर ने सभई सरगदूतन से कबै कई, कि तें मोरो पुत्र आय? कायसे आज मैं तुमाओ पिता कहाओ, और जौ सोई कैत आय, कि मैं ऊ को पिता हुईयों, और बो मोरो पुत्तर कहा है? जब परमेसुर अपने एकलौते पुत्र हां संसार में लेके आत आय, तो बो अपने सरगदूतन से कैत आय, की ऊहां मानो। और सरगदूतन के लाने ऐसो कैत आय, कि बो अपने दूतन हां पवन, और अपने दासों को ज्वाला बनात आय। और अपने बेटा से कैत आय, कि तुम परमेसुर आव और तुम जीवन भर राज कर हौ। तेंने धरम से प्रेम करो और अधरम से बैर रखो; ईसे तुमाए परमेसुर ने तुम हां तुमाए सबरे दोस्तन से अधिक खुस करो। और कैत आय, हे पिरभू पेंला तुम ने धरती को बनाओ, और सरग तुमाए हाथन को बनाओ आय। संसार और सरग तो नास हो जै हैं, पर तुम बने रै हौ, और सबरी बस्तें उन्ना घांई पुरानी हो जै हैं। तें उनहां चादर घांई लपेट लै है, और जैसे पैरबे के उन्ना बदलत आय बदल डाल है, पर तें ओई आय और हमेसा ऐसई बने रै है। परमेसुर ने का कभऊं सरगदूत से कई, कि आ और मोरे दाएं बैठ जा, जब लौ मैं तोरे बैरियन हां तोरे गोड़े तरें न कर देंओं? सरगदूत जौन को तरन तारन हो गओ; उनकी सेवा खुसामद को आंय। हम हां चईये कि जौन बातें हम ने सुनी आंय, और मन लगाओ, उनहां पकड़े रओ कि हम भटक के दूर न चले जाबें। कायसे जौन बातें सरगदूतन ने कईं बो सांची कड़ी तो जौन ने आज्ञा न मानी उनहां ठीक दण्ड मिलो। तो हम ऐसे अच्छे तरन तारन के रस्ता हां जानके कैसे बचे जात आंय? पिरभू ने पेंला ईहां हमें बताओ, और जिन ने जो बचन सुनो और मानो ईसे हमें पक्को हो गओ कि जौ सांचो आय। परमेसुर ने जौ दिखाओ कि उनको बचन सांचो आय, अदभुत काम और चिन्ह दिखा के, और पवित्रात्मा देके ईकी गवाह दई। ऊ ने जो आबेवारे संसार जीकौ बतकाव हम करत आंय, ऊहां सरगदूतन के हाथ में नईं दओ। कोऊ ने बचन में ऐसी कई, कि मान्स में ऐसो का आय, कि तें ऊ की चिन्ता करे, और हम जैसे कमजोर मान्स पै ध्यान करे? तेंने मान्स हां सरगदूतन से तनकई हलको बनाओ; तेंने मान्स हां जस और आदर को मुकुट दओ, और अपने बनाए संसार पै राज करबे कौ मौका दओ। तेंने सब कछु मान्स के नेंचें कर दओ; और कोई बस्त हमाए अधकार से बायरें नईंयां, परन्त हम अबै लौ सब कछु अपने अधकार में नईं देखत। यीशु मसीह हां सरगदूतन के तनकई कम करो गओ हतो, पर मृत्यु कौ दुख उठाबे के कारन मइमा और आदर कौ मुकुट पहने देखत आंय; परन्त परमेसुर की दया से हरएक मान्स के लाने मौत कौ स्वाद चीखे। कायसे सबरो ऊ को आय और ओई ने रचो आय, सो ऊ ने बहुत से मान्सन हां परमेसुर के लड़का बिटिया बनाबे हां यीशु मसीह के द्वारा बचा के, उनके बचाबेवारे हां सिद्ध करे। कायसे पिरभू यीशु मसीह और जौन उनके द्वारा परमेसुर के लरका बिटिया बने, एकई बीज में से आंय; ऐई से बे अपने भईयन हां भईया और बहन कैत आंय। बे पिरभू यीशु मसीह को परचार भईयन में कर हैं, और तोरे भजन गाहें। ऊ ने जा भी कई कि मैं परमेसुर पै भरोसा धर हों, और जा सोई कि तक, मैं अपने बच्चन के संग्गै जीहां परमेसुर ने मोहां दए आंय। और जब हम बिसवास धरबेवारे मान्स देह धरें आंय, सो ऊ ने भी मान्स देह धरी और हमाए जैसो हो गओ; बो मर गओ कि शैतान छलिया हां बरबाद कर दे, जीहां मौत में अधकार मिलो आय। जौन मान्स डरके रैत आय कि पता नईंयां कि मौत कबै आ जै है, उनहां मौत के डर से छुड़ा लओ। पिरभू यीशु मसीह सरगदूतन हां नईं परन्त इब्राहीम के लड़का बारन हां समारबे हां आए। ईसे ऊ हम जैसो बनबे आओ, कि बो परमेसुर के सामूं हमाए काजें एक दयालू और बिसवास धरबे लाक महायाजक होबै; कि बो मान्सन के पापन को भरना भरें। कायसे जब पिरभू की जांच भई, और क्रूस को दुख उठाओ, तो बो उन की भी सहायता कर सकत आय, जिन मान्सन की जांच होत आय। सो भईया हरौ, तुम सब उनके जनें आव, और यीशु मसीह हां जौन प्रेरित और हमाए महायाजक आएं ध्यान धरौ। जीने उनहां पठैव हतो उनकी कही करी, जैसे मूसा ने अपने सबरे वंस के मान्सन की सेवा करी। कायसे पिरभू यीशु मसीह मूसा से बढ़के हते उनहां और भी मान दओ चईये, जैसे घर को बनईया घर से अधक मान पात आय। कायसे घर को कोऊ तो बनईया होत आय, परन्त परमेसुर ने धरती को सब कछु बनाओ। मूसा अपने लोगन के बीच सेवा करबे में साजे हते, उन ने आगे आबेवारी सबरी बातें बता दईं। परन्त यीशु मसीह परमेसुर के घर के मान्सन के ऊ परे आंय, और उनके घर तो हम आंय, हम हां अब लौ पक्के बने रओ चईये। जैसो आत्मा कैत आय, कि तुम जब आज उनकी बात हां सुनो। तो अपने मन हां कर्रो न करियो, जैसो मान्सन ने हार में आत बेरा करो हतो। उते तुमाए पुरखन ने मोहां परखो और चालीस बरस लौ मोरे कामन हां तको। परमेसुर उन मान्सन से परेसान हो गए, कायसे उनके मन चित्त भटकत रैत हते, और मैं तुम से का चाहत आंव न समझे। और परमेसुर ने गुनसिया के कई, कि तुम मोरे आराम की जांगा में न जा पाहौ। सो भईया हरौ, चेतो और बुरई बातन में न लगो, जीसे तुम परमेसुर से भटक जाओ। तुम एक दूजे हां समझात रहो, और जब लौ आज को दिना आय, तको कि कोऊ पाप में फं सके कर्रो न हो जाबै। जब से हम ने पिरभू यीशु मसीह से मन लगाओ, उनईं बातन पै बने रओ चईये। जैसो पोथी में लिखो आय, कि जब आजई तुम उनकी वाणी हां सुनो, तो अपने मन हां कर्रो न करियो, जैसो मान्सन ने करो हतो। कौन से मान्सन ने गुन्सियाओ? का बेई न हते, जौन मूसा के संग्गै मिसर देस से कड़े हते? और परमेसुर चालीस बरस लौ की से परेसान रय? का उनईं से नईं, जौन ने पाप करो, और जिनकी लासें रस्ता में डली रईं? परमेसुर ने कौन के लाने कई, कि बे ऊ देस में न जा पै हैं; उनईं से जिन ने उनकी कई नईं करी? जिन ने परमेसुर के बचन नईं माने बे ऊ देस में नई पोंचे। सो उनके विश्राम में जाबे की बात अबै सोई आय, हम हां डर के चलो चईये, ऐसो न होबै, कि कोई रै जाबै। हम हां सोई जेई बातें बताई हतीं, परन्त उनहां जौन बातें सुनाईं, उनसे उन ने कछु बिसवास नईं धरो। जीने बिसवास धरो, बे विश्राम में पोंचे; जैसो पोथी में लिखो आय, कि परमेसुर ने उन मान्सन से गुन्सया के कई कि तुम मोरे आराम की जांगा में न पहुंच हौ। और उनकी पोथी में एक जांगा ऐसो आओ आय, कि सातें दिना परमेसुर ने संसार हां बना के आराम करो। और पोथी में एक जांगा ऐसो सोई लिखो आय, कि बे सरग में जिते मैं रैत आंव उते न जै हैं। ऐसो सोई कहो आय, कि जिन ने परचार की बातन को नईं मानो बे मोरी जांगा न जै हैं। ईके बाद तो दाऊद की पोथी में ऐसो सोई कैत आय, जैसो पैले कहो हतो कि जब तुम मोरी बातें सुनो तो अपने मन हां कर्रो न करियो। यदि यहोशू अपने लोगन हां विश्राम में ले जातो, तो परमेसुर फिन के ई दिना की न कैते। सो ध्यान धरौ कि परमेसुर पै बिसवास धरबेवारन के लाने विश्राम को दिनअबै आबेवारो आय। सो जिन ने परमेसुर के जैसे अपने काज पूरे करे आंय, बे ऊंसई अपने कामन से विश्राम कर हैं। हम हां ऊ विश्राम में जैबे की कोसस करने आय, कहूं ऐसो न होबै, कि हम उनकी कई न करके उते न पहुंच पाबें। कायसे परमेसुर के बचन जीयत, और बली आंय, जैसी दोई तरपेवारी तलवार, उनके बचन से आत्मा और जीव, और एक एक गांठ हां तोड़त आय, जब लौ हिये में का आय जौ न जान लैबे। कछु भी परमेसुर से लुको छिपो नईंयां बे सब जानत आंय, और उनकी आंखन से कछु नईं बरको आय। हमाओ ऐसो बड़ो महायाजक आय, जौन सरग चलो गओ, बे आंय पिरभू यीशु मसीह; जौन परमेसुर के पुत्तर आंय, सो अपन ने जिन बातन पै चित्त लगाओ आय उन में पक्के होत जाबें। पिरभू यीशु मसीह हमाई उन बातन हां जी में हम कच्चे आंय; उनहां जानत आंय, कायसे एक एक बात में उनकी परख भई, परन्त उन में कोई पाप नईं कड़ो। सो हम जब बिन्तवारी करें, तो अपने परमेसुर से ऐसे मांगें, कि बे हमाई सुनें और जो कछु हमें चाने होबै बो हम हां दैबें। महायाजक मान्सन में से होत हतो, कि बो मान्सन के पापन की छिमा के लाने भेंट चढाए, और बलि करै। बो पापी मान्सन के अज्ञान हां जानत आय, कायसे बो मान्सन में से होबे से उनके पापन हां समझत आय। ऐई लाने बो जैसे दूसरे जन के लाने, ऊंसई अपने काजें सोई बली चढ़ाबे। परन्त मान को जौ पद कोई हां अपने से नईं मिलत, जैसो हारून हां जो काज परमेसुर ने दओ हतो। ऊंसई पिरभू यीशु मसीह ने जौ मान देबेवारो पद अपने से नईं लै लओ, जौ तो उन हां उनईं ने दओ, और कहो कि जौ मोरो बिटवा और मैं ई को बाप आओं। पोथी में जौ लिखो आय, कि तें मलिकिसिदक जैसो हमाए लाने हमेसा लौ को याजक आय। ऊ ने अपने जीयत गुहार लगा के और अंसुआ बहात कई, कि मोहां आबेवारी मौत से बचा लेओ, और उनकी जैसी लगन से बे बच गए। परन्त परमेसुर के लड़का होबे पै भी, उन ने अपने मरबे लौ परमेसुर की कई करी। और सबरे दुख हां सह के, अपने सबरे मानबेवारन को तरन तारन करो। और उन हां परमेसुर ने न्यारो करके मलिकिसिदक जैसो महायाजक बना दओ। ईके लाने और बहुत कछु कहो जा सकत आय, जीहां हम अबै नईं समझ सकत; कायसे तुम अब तनक ऊं चो सुनन लगे आओ। अबै लौ तो तुम हां सिखाबेवारो होने हतो, परन्त ऐसो लगत आय, कि तुम हां बे बातें जौन पेंला बताईं हतीं फिन के बताबें? तुम अबै लौ दूध पीबो चाहत आव, तुम हां तो अबै रोटी खैबेवारो हो जाने हतो। परन्त जैसे दूध पियत बच्चा परमेसुर की बातें नईं समझत कि का अच्छो आय, कायसे बो अबै हल्को बच्चा आय। कायसे बड़े जनें रोटी खात आंय, जानो बे अच्छे बुरय हां चीनत आंय। सो अब हमें समझवारो हो जाओ चईये, जौन पिरभू मसीह की पेंला की बातें नईं, परन्त बड़े हो जाबो चईये, कि समझें कि हम ने कैसे अपने बुरय कामन हां छोड़ के अपनो चित्त परमेसुर की बातन पै लगाओ। और अब फिरके बपतिस्मा और हाथ धरबे, और मरे भए कैसे जी उठ हैं, और आबेवारे न्याय जैसी पेंला की शिक्षा में आगे बढें। सो परमेसुर की मरजी जैसो अपने आगे बढत जाबें। कायसे जीने परमेसुर की जोत पाई, और जिन हां परमेसुर ने बरदान दए और जिन ने पवित्तर आत्मा पाओ। जीने परमेसुर के बचन हां सुनो, और आबेवारे दिना में हमाओ का हुईये ईहां समझ लओ। ऐसे जनें अच्छी बातन हां छोड़ देबें; और औरई गैल धर लेबें तो उन हां फिरके ओई सांची गैल पै लै आबो मुसकल आय; मानो ऐसे जन पिरभू यीशु मसीह हां फिन से क्रूस पै ठोकत आंय, और सब के सामूं उनके नाओं पै बट्टा लगात आंय। अच्छी धरती जी पै पानू बरसो होबै, और जौन खेती हां तईयार होबै, कि मान्सन के लाने खैबे हां पजे, ऐसी धरती हां परमेसुर आसीस देत आय। परन्त ऊ धरती पै जरियां और भटकटई ऊगत आय, तो बेकार आय ऊ पै परमेसुर को श्राप आहै, और बा आगी में बारी जै है। भईया हरौ, हम ऐसो कैत तो आंय परन्त हमाओ सोच आय, कि तुम उनके जैसे काज करत आव जीको तरन तारन हो गओ आय। हम जौ सोई कैत आंय कि परमेसुर अच्छे न्यायी आंय, बो तुमाई याद कर है, कि तुम कैसे उन सबरे जन जिन ने यीशु मसीह हां पकड़ लओ आय, उन की सेवा खुसामद करत आव। परन्त हमाई जा अभलाखा आय, कि तुम अपनी आबेवारी बातन की आस धरो और ऊ में बढत जाओ। सो आलसी न बनो; परन्त अपने बिसवास में बने रओ, और जब लौ परमेसुर ने उन हां बे बातें न दईं जी की उन ने कई हती धीरज धरो। परमेसुर ने जब इब्राहीम हां असीसो, तो और कोऊ के नाओं से नईं कहो कायसे कोई परमेसुर से बड़ो नईंयां। कि मैं तोहां और तोरे वंस परवार हां आसीस दैहों। परन्त अब्राहीम ने धीरज धरो जब लौ जौन परमेसुर ने ऊसे कई हती पूरी न भई। मान्स अपने से बड़े को कौल खाके बात पक्की करत आय, और उनकी सबरी बातें कौल खाके पूरी होत आंय। सो जब परमेसुर ने जौन बात कई आय, ऊहां पूरो करो सो अब जौन हमाई आस आय जीहां हमें पाने आय ऊहां पक्को धरें रैत आंय। परमेसुर झूटो नईं कात, सो जब बे कौल खात और वचन देत तो ऊ बात हां कभऊ नईं बदलत, सो अब जौन हमाई आस आय जी हां हमें पाने आय ऊहां पक्को धरें रैत आंय। ओई आस पे हम कर्रे के बिसवास धरें आय, कायसे बा आस अबै मानो परदा के पांछे होबे। पिरभू यीशु मसीह हमाए आंगू गए आंय, जैसे मलिकिसिदक सबरे दिना हां हमाओ याजक हतो, ऊं सई यीशु मसीह सोई हमाए याजक आंय। मलिकिसिदक सालेम को राजा और परमेसुर को याजक हतो, जब इब्राहीम राजाओं हां हरा के लौटो, तो ऐई ने ऊहां असीसो हतो। और ऐई हां इब्राहीम ने सबरी बस्तन को दसवों भाग दओ हतो: मलिकिसिदक नाओं को मतलब आय धरम कौ राजा, और सालेम मतलब सान्ति कौ राजा आय। जी को न बाप आय न मताई और न वंस परवार आय, पता नईंयां कि बे कब से आंय और कब लौ रै हैं, परन्त बे परमेसुर के पूत जैसे आंय। तनक ध्यान धरौ उन पै जौन बड़े हते और जिन हां हमाए बूढ़े पुराने जनें इब्राहीम ने अच्छे लूट के माल कौ दसवों भाग दओ। लेवी के वंस के लोगन हां जौन याजक को काज करत आय, ऐसो कओ गओ हतो, कि बे इब्राहीम के वंस वारन से भी व्यवस्था अनसार दसवांस लैबे। परन्त इन ने जौन लेवी परवार के न हते, इब्राहीम से दसवांस लओ, और जिन हां प्रतिज्ञाएं मिलीं हतीं उन हां आसीसें दईं। जा बात सांची आय, कि छोटो जनो बड़े से आसीस पात आय। धरती पै तो दसवांस लैबेवारे मान्स मर जात आंय, परन्त मलिकिसिदक के लाने कहो आय कि बो जीयत आय। ऐसो कैत आंय कि लेवी जौन दसवांस लेत आय, परन्त उन ने इब्राहीम में होकें दसवांस दओ। कायसे लेवी जौन इब्राहीम के वंस में जन्मो, जीने मलिकिसिदक हां दसवांस दओ। मूसा के नैम से लेवी के वंसवारे याजक होत हते, (जी से मान्सन हां नैम मिले) तो फिन दूसरे याजक को का काज, जैसे मलिकिसिदक जौन हारून के वंस को न हतो। कायसे जब याजक की जांगा बदलत आय, तो फिन नैम सोई बदलबो चईये। कायसे जी के लाने हम कैत आंय बे हमाए पिरभू यीशु मसीह आंय, जौन यहूदा के गोत्र के हते जिन ने कभऊ परमेसुर की बेदी की सेवा नईं करी। सो अब जौ खुलासा हो गओ, कि हमाए पिरभू यीशु मसीह यहूदा के गोत्र के हते, और ई गोत्र में से याजक होबे की चरचा मूसा ने नईं करी। मलिकिसिदक जैसो एक और याजक होबेवारो हतो। जो याजक अपने गोत्र से नईं, परन्त अपने न मरबेवारे जीवन से हतो। कायसे उन के लाने गवाह दई गई, कि तें मलिकिसिदक की रीत पे जुगानुजुग याजक आय। सो जौन आज्ञा पेंला मिली हती; बा काम की नईं रई परन्त बा लोप हो गई। (कायसे मूसा के नैम काम के नईं रए) और ऊ की जांगा एक और अच्छी आस मिली, जीसे हम परमेसुर के ऐंगर जा सकत आंय। पिरभू यीशु मसीह परमेसुर की मरजी से याजक बने। (कायसे बे सबरे याजक बिना बचन के भए, जिनके लाने पोथी में ऐसो लिखो आय, कि मैं परमेसुर ऐसो कैत आंव कि तुम हमेसा लौ याजक बने रै हौ, ईहां मैं अब न बदल हों कि तें हमेसा को याजक आय)। सो यीशु मसीह में होकें हम हां एक अच्छी बात मिली। बे तो बिलात याजक भए, कायसे बे सबरे मर जात हते। परन्त जे तो हमेसा जीयत रै हैं; ईसे उनकौ याजक को काम हमेसा हां रै है। सो जौन पिरभू यीशु मसीह पै बिसवास धरके परमेसुर लौ पोंच हैं; बे उनको पूरो पूरो तरन तारन करत आय, और परमेसुर के सामूं उनके लाने बिन्तबारी करत आंय। हम हां ऐसई महायाजक चानें हतो, जौन पवित्तर, सूदे और बिना पाप के होबें, और पापी मान्सन जैसे न होबें, परन्त सरग लौ ऊंचे उठे होबें। और उन महायाजकन घांई उन हां रोजीना पेंला अपने लाने और दूसरे मान्सन के लाने बलदान चढाबें; कायसे पिरभू यीशु मसीह ने खुद बलदान होकें एकई बेर में सबरो काम निपटा दओ। कायसे मूसा के नैम से जौन याजक बनाए जात हते बे मान्सन घांई कमजोर हते; परन्त बा बात जौन मूसा के नैम के बाद आई, जीने उनसे अपने लरका पिरभू यीशु मसीह हां याजक बना दओ, जौन अच्छे याजक कड़े। अब बड़ी बात जा आय, कि हमाए महायाजक महाबली परमेसुर के दांय हाथ पै बिराजे आंय। और बे महा पवित्तर जांगा सरग मैं मानो ऊ तम्बू में सेवा करत आंय, जौन मान्सन के हाथन को बनो नईंयां, परन्त पिरभू ने खुद बनाओ आय। कायसे याजक भेंट और बलिदान करत हते, ईसे पिरभू यीशु मसीह लौ सोई कछु चढाबे हां होबो चईये। जदि बो इते धरती पै होतो, तो कभऊं याजक नईं कहाते, कायसे इते दूसरे याजक होत आंय जौन बली चढात आंय। कायसे धरती पै को तम्बू सरग पै के तम्बू की छाप आय, जब मूसा ने जो तम्बू बनाओ, तो ऐसो बनाओ जैसो ऊ ने पहरवा पै तको हतो। पर यीशु मसीह हां अच्छी सेवा मिली, जीमें बे मान्सन के लाने परमेसुर से बिन्तवारी करत आय, जा और भी अच्छी बात आय। कायसे बा पैली वाचा साजी होती, तो दूसरी वाचा की कछु चाहना न होती। परन्त परमेसुर ने ई वाचा में कमी पाके कई, मैं तुम से कैत आंव कि ऐसे दिना आ हैं कि मैं एक नओ कौल इस्राएल के लोगन से कर हों। जो ऊ कौल घांई नईंयां, जौन मैंने उन के बाप दादन से बांधी हती, जब मैं उनको हाथ पकड़ के उन हां मिसर देस से काड़ के ले आओ हतो, परन्त बे अपने कौल में सांचे नईं कड़े, सो मैंने उन हां छोड़ दओ। पिरभू कैत आय, कि अब जौन कौल मैं उन के संग्गै बांध हों, बा ऐसी आय, कि मैं अपने नैम हां उनके हिये और जी में डाल हों, और बे औरें मोरे जनें हुईयें और मैं उन को परमेसुर हुईयों। और कोई हां मोरे लाने न बता हैं, कायसे बे सबरे मोहां हिये से चीन हैं। मैं उन पै दया कर हों, और उनके अधरम और पापन की छिमा कर दै हों। नये कौल से अब पुरानो कौल छूट गओ, कायसे जौन बस्त पुरानी होकें बेकाम हो जात बा छूट जात आय। पहलो कौल जौन भओ हतो ऊके अपने नैम हते; और धरती पै ध्यान मनन करबे हां तम्बूवारो मन्दर हतो। जानो कि पेंला वारो मन्दर हाथन से बनो हतो, ऊ में दियादान, एक मेज, भेंट करबेवारी रोटी हती; बो पवित्तर जांगा कहात हती। और परदा के पछाऊं हती परम पवित्तर जांगा। उते सुन्ने की धूपदानी और बाचा को बक्सा जौन चारऊ ओर सुन्ने से मढ़ो हतो, जीमें मन्ना से भरो सुन्ने को मर्तबान, हारून की छड़ी जीमें फूल कड़ आए हते, और पथरा की पटिया जी पै दसई अग्यां लिखी हतीं। ऊके ऊ परै दोई चमचमात करूब हते, जिनके पंख दया की जांगा के ऊपर छायरो करें हते। ऐसो हतो उते, तम्बू में जिते याजक जाके अपनो काम करत हते। परन्त आगेवारी जांगा में याजक बरस भर में एक बेर रकत लेके जात हतो, कि मान्सन की भूल चूक के काजें बलदान करें। इन बातन से पवित्तर आत्मा ऐसो कैत आय, कि जब लौ पेंलावारो तम्बू मैं ध्यान मनन होत हतो, जब लौ पवित्तर जांगा को रास्ता सबरन हां नईं पता चलो। ऊ तम्बू में ऐसी भेंट और बलि चढ़ाई जात आय, कि ऊसे बली चढाबेवारे मान्सन को मन साजो न होत हतो। सो बे नैम खाबे पीबे और सपरबे के हते, जौन मान्स के लाने हते, उन हां बेरा आबे पै सुधारो जात आय। परन्त पिरभू यीशु मसीह ई संसार की अच्छी बस्तन को महायाजक होकें आओ, सो बे अबई से बढ़िया तम्बू जौन मान्स के हाथन की बनी नईंयां, मानो ई संसार जैसो नईंयां। परन्त पिरभू यीशु मसीह ने अपने बलदान के रकत के संग्गै एकई बेर पवित्तर जांगा में पहुंच के हमेसा के लाने तरन तारन करो, जौन बकरन और बछड़न के रकत से न हो सको। कायसे बकरा और बैलवा को रकत और कलोर की राख मान्सन की देह हां साफ करत आय। तो पिरभू यीशु मसीह को रकत जौन बिलकुल बिन पाप हते, परमेसुर के सामूं निषपाप बलदान चढाओ, तो बो तुम हां बुरय काज से पूरे मन से काय न पवित्तर कर है, कि तुम जीयत परमेसुर की सेवा करो। पिरभू यीशु मसीह ने उन हां बनाओ, जीने पुराने नैम हां नईं मानो अब उन ने नए नैम से अपने लाने मान्सन हां बुलाओ, कि बे सरग की जायजाद के मालक हो जाबें। कायसे जब नओ नैम चलो तो नैम चलाबेवारे हां मरबो चईये, कि ऊ नैम को फायदा दूसरन हां मिले। कायसे ऐसो नैम मरबे पै पक्को होत आय, जौ लौ कौल करबेवारो जियत आय, तौ बो कौल कछु मतलब को नईं होत। पैली कौल सोई रकत से बंधी हती। कायसे जब मूसा ने नैम की सबरी बातन हां सबरे मान्सन हां सुना दईं, तो उन ने बकरन और बछड़न को रकत लैके, पानू और लाल ऊ न, और जूफा की झाडू से सबरे मान्सन पै छिटक दओ। और कहो, कि परमेसुर की अग्यां से जौ रक्त कौल हां पक्को करत आय। और ऐसई उन ने तम्बू के भीतर सेवा में आबेवारे सबरे सामान पै रकत छींटो। मूसा के नैम से सबरी बस्तें रकत से साजी होत आंय; और रकत बहाए बिना पापन की छिमा नईं होत। जे बस्तें, सरग पै की छाया आंय उन हां इन बलदान से पवित्तर करो जात आय; परन्त सरग की बस्तें और अच्छे बलदान चईये। कायसे पिरभू यीशु मसीह ऊ पवित्तर जांगा में नईं गए, जौन सांचे पवित्तर जांगा को नमूना जैसो आय, बे तो सरग चले गए कि हमाए काजें परमेसुर के सामूं बने आंय। जौ नईंयां कि पिरभू यीशु मसीह हां बेर बेर बलदान करो चईये, जैसो महायाजक हर साल जनावर को रकत लैके पवित्तर जांगा मैं जात हतो। ऐसो तो उन हां संसार के बने से बेर बेर बलदान होने होतो; परन्त अबई जुग के खतम होबे पै बे एक बेर जगत मैं आके, और अपने बलदान से पाप हां दूर कर दओ। और मान्सन हां एक बेर मरके उनको न्याय हुईये। ऊंसई पिरभू यीशु मसीह बिलात जनों के पापन हां हरबे हां एकई बेर बलदान भए, और जब बे फिन के संसार में आहें तो पाप हां हरबे हां नईं, परन्त जौन उनकी आस लगाए आंय उनको तरन तारन कर हैं। मूसा के नैम आबेवारी बातन की छाया आय, जा छाया अपने में अच्छी नईंयां, कायसे इन से मान्स पाप से नईं छूटत, जौन बलदान हर बरस करने पड़त आंय, उन मान्सन हां कभऊं सुद्ध नईं कर सकत। जौन जनें बलदान चढ़ात हते उन के पाप छिमा हो जाते, तो फिन बलदान चढ़ाबे कौ काम नईं होतो, कायसे उनको जी उन हां पापी न कैतो। कायसे उन हां हर बरस अपने पापन के लाने बलदान करबो होत आय। बैल और बछड़न के रकत से मान्सन के पाप धुलबो मुसकल आय। ऐई से जब उन ने देह धारन करी तो कहो, कि बलदान और भेंट तुम ने नईं मांगी। होमबली और पापन के लाने बली चढ़ाबे से परमेसुर खुस नईं भए। तब पिरभू यीशु मसीह ने कहो, कि मैं इ धरती पै आ गओ आंव, (धर्म पोथी में मोरे काजें ऐसो लिखो आय) कि परमेसुर तुमाई मरजी पूरी करें। पेंला उन ने कहो, कि बलदान और भेंट और होमबली, और पाप की बली मोहां नईं भात; मूसा के नैम हां पूरो करबे हां बलदान चढाए जात आंय। जौ सोई कैत आंय, कि मैं संसार में आ गओ आंव, कि तुमाई इच्छा पूरी करों; ईसे बे पेंलावारे बलदान बन्द कर देत आय। उनकी मरजी से यीशु मसीह के एक बेर बलदान से हमाए पापन की छिमा भई। याजक रोजीना सेवा को काज करत आंय, परन्त बे बेर बेर बलदान से पापन हां दूर न कर सके। पर पिरभू यीशु मसीह ने पापन के बदले एकई बेर सदा के लाने अपनो बलदान करके, परमेसुर के दांय हाथ जा बैठे। और जे जब लौ उतईं बैठ हैं, जब लौ उनके सबरे बैरी उनके गोड़न तरें न हो जाबें। कायसे उन ने एकई बलदान से उन हां पापन से छुड़ाके परमेसुर के जनें बना दओ। पवित्रात्मा सोई ऐसो कैत आय; कि पेंला ऐसो कहो गओ। समय आबे पै मैं उनसे एक कौल कर हों, बो ऐसो आय कि मैं अपने नैम उनके हिये में लिख हों और उन के जी में डाल हों। (फिन बो ऐसो कैत आय) कि उन के बुरय कामन हां, और उन के पापन हां कभऊं याद न कर हों। जब उन के पापन की छिमा हो गई, तो पापन के लाने बलदान करबे की कोई जरूरत नईंयां। सो भईया हरौ, पिरभू यीशु मसीह के रकत के जोर से महापवित्तर जांगा में जाबे को हियाव हो गओ आय। ई नई गैल से हम जीवन में पोंच हैं, और जा गैल जौन यीशु मसीह आय हम हां परदा में से लै जै हैं। और हमाओ ऐसो बड़ो याजक आय, जो परमेसुर के घर को मुखिया आय। सो परमेसुर लौ साफ हिये, और बिसवास से, और अपने मन हां शुद्ध करके और अपने मन हां बुरई बातन से दूर करके, और अपनी देह हां साफ पानू से सपर के आओ। और हमाई जौन आसा आय ऊहां कर्रे से पकड़े रओ, जीने अपन हां जा आसा दई आय, बो सांचो आय। हम दूसरन हां प्रेम करबे हां, और पुण्य के अच्छे काम करबे हां बढ़ावा देबें। कई मान्स एक संग्गै जुड़के आराधना नईं करत ऐसो अच्छो नईंयां, एक दूजे हां अच्छी सला देओ; पिरभू को आबो जल्दी होने आय, सो उनईं एक दूजे के संग्गै जुड़त रओ। जिन ने सांचो बचन हिये में धर लओ हतो, परन्त जान के पाप में पड़ जाबें, तो अब उनके लाने कोई और बलदान काम न आहें। ऐसे जन पै आबेवारो न्याय पड़ है और बे नरक कुण्ड की आग में तड़पें, कायसे बे बचन हां नईं मानत। मूसा के नैम में एक जनों जौन कई नईं करत दो तीन जन के कैबे पे, बिना दया के मार डालो जात हतो। सो सोच लेओ कि जीने परमेसुर के लड़का यीशु मसीह को तिरस्कार करो, और उनके रकत जीसे मान्सन के पाप कटत ऊहां नईं मानो, ऐसन हां बहुतई दण्ड मिल है, कायसे उन ने ऊ दया जौन उन पै होने हती ऊहां नईं मानो। कायसे हम उन हां चीनत आंय, जीने कई, कि न्याय करबो मोरा काज आय, मैं ऊहां दण्ड दै हों: और ऐसो सोई लिखो आय, कि पिरभू अपने मानबेवारन को सोई न्याय कर हैं। जीयत परमेसुर के हाथ में पड़बो भयंकर बात आय। पेंला के दिना हां याद करो, जब तुम ने पिरभू की जोत पाई तो तुम ने बड़ी पीड़ा सही परन्त पक्के बने रए। सोचो कि तुम में से कछु जनें तो मान्सन के सामूं निंदरत गए, और तुम में से कछु जन की भारी दुरदसा करी गई। जौन जनें जेहल में डाले गए उन पै तुम ने दया करी, और जब मान्सन ने तुमाई चीज बस्तें ले लईं; तब तुम चिमाने रए, कायसे तुम हां पता हतो कि तुमें ईसे बढ़िया और हमेसा बनी रैबैवारी बस्तें मिल हैं। सो हिम्मत न हारो कायसे तुमाए काजें एक बड़ो इनाम धरो आय। धीरज धरबो सीखो कि तुम परमेसुर हां खुस राखो, और ध्यान धरो कि पिरभू से तुम हां ईको बड़ो फल मिल है। जैसो पोथी में कड़ो, कि परमेसुर अब झट्टई आहै, और अब और बेरा न हुईये। मोरो नाओं लैबेवारो अपने बिसवास से जी है, परन्त जौन पिछल जात आय उन से परमेसुर खुस नईं हुईयें। हम उन मान्सन घांई नईंयां, जो पिछल के बिगड़ गए परन्त हम अपने बिसवास में पक्के रै हैं, कि तरन तारन पाबें। बिसवास से हम जिन बातन की आस धरें आंय, पक्की होती और जौन बातें दिखात नईंयां ऊहां पक्को करत आंय। हमाए बाप दादन को जौन बिसवास हतो ऊसे परमेसुर हां उन ने खुस करो। हम बिसवास करत आंय कि संसार हां परमेसुर ने बचन कै के बनाओ, जा नईं, कि हम जौन देखत आंय, बो देखी भई बस्तों से बनो होय। बिसवास करके हाबिल ने कैन से बढ़िया बलदान परमेसुर हां चढ़ाओ; और ओई से ऊ धरमी कहाओ, ऐई से ऊके बिसवास की चरचा अबै लौ होत आय। हनोक सोई बिसवास धरें हतो ईसे बो जीयत उठा लओ गओ, कि न मरै, कायसे परमेसुर ने ऊहां उठा लओ, ऊके उठाए जाबे के पेंला ऐसो कैत हते कि हनोक के जीवन से परमेसुर खुस हते। बिसवास बिना परमेसुर खुस नईं होत, कायसे जौन परमेसुर लौ आत आय ऊहां बिसवास धरो चईये, कि परमेसुर सांचे आंय; और जौन उन हां ढूढ़त है ऊहां बे मिलत आंय। बिसवास धर के नूह ने जौन बात ऊ बेरा न दिखात हती, जब कहो गओ तो साजे मन से अपने घर के लोगन हां बचाबे हां एक बड़ी नाव बनाई, और संसार के दूसरे जनों पै न्याय आ गओ और बे डूब मरे; और नूह हां अपने बिसवास से आसीस मिली। बिसवास से इब्राहीम हां जब परमेसुर ने टेरो तो ऊ जांगा निकल गओ जौन ऊहां मिलबेवारी हती, बो जौ न जानत हतो, कि बा कैसी जांगा आय; परन्त चलो गओ। बिसवास करके इब्राहीम ऊ देस में परदेसी होकें तम्बुओं में रहो, ऐसई इसहाक और याकूब सोई रहे। जौ ऊ ने ईसे करो कायसे बो तो पक्की नीं वारे नगर की बाट धरें हतो, जीहां बनाबेवारो परमेसुर आय। बिसवास करके सारा ने जौन बूढ़ी हो गई हती ऊ ने गरभवती होबे की सक्ती पाई; कायसे बा जानत हती कि परमेसुर जीने जौ बचन कहो आय बो सांचो आय। ऐई से मानो जो मान्सन बूढ़ो और मरो जैसो हतो, ऊसे आकास के तारे जैसे और बालू जैसो अनगिनत वंस परवार हुईये। जे सबरे जनें जौई बिसवास धरें मर गए; और जिन बस्तन की कई गई हती बे न पाईं; परन्त उन ने मानो कि आबेवारे दिना में ऐसो हुईये, अबै ई संसार में हम बाहरवारे परदेसी आंय। जौन ऐसी बातें कैत आंय, बे जौ दिखात आंय, कि बे अपने देस और जांगा जिते उन हां जाने आय खोजत होबें। बे ऐसो सोचत हते कि जिते से आय हैं उतईं चले जाबें, तो उन हां ऐसो करबे को मौका हतो। परन्त बे एक और बढ़िया सरग हां जाओ चाहत हते, ऐई से परमेसुर उनके परमेसुर कहाबे हां राजी हते, और उन ने इन के काजें एक नगर तईयार करो आय। इब्राहीम से परमेसुर ने कई हती, कि इसहाक जौन ऊ को एकलौतो लड़का हतो, कि ईसें तोरो वंस परवार चल है। बिसवास से जब परमेसुर ने इब्राहीम से कहो कि अपने लड़का इसहाक हां बलदान चढाए, तो ऊ राजी हतो। इब्राहीम हां पक्को बिसवास हतो, कि परमेसुर मरे हां जिला सकत आय, मानो इसहाक मरबे के बाद ऊहां मिल जै है। इसहाक ने बिसवास से अपने दोई लड़का याकूब और एसव हां आसीसो। बिसवास से याकूब ने मरबे के पेंला यूसुफ के दोई लड़कन हां आसीसो, और लठिया के सहारे ठांड़ो होकें उन दोईयन हां परनाम करो। बिसवास से जब यूसुफ मरबेवारो हतो, तो ऊ ने एक दिना इस्राएल को मिसर से कड़बे की कई, और ऐसो कहो कि चलती बेरा मोरे हड़रा लेत जईयो। बिसवास से मूसा के मताई बाप ने ऊहां पैदा होतई तीन मईना लौ लुका के धरो; कायसे उनकौ लड़का खबसूरत हतो, और बे राजा की अग्यां से नईं डराने। बिसवास से जब मूसा सियानो हो गओ, तो ऊ ने फिरौन राजा की बिटिया को लड़का होबे से मना कर दओ। कायसे ऊहां पाप में रैके थोड़े से दिना के मजा मौज से परमेसुर के लोगन संग्गै दुख उठाबो अच्छो लगो। मूसा ने मिसर देस के धन दौलत से यीशु मसीह के नाओं से भलो बुरो कहाबो अच्छो लगो; कायसे बो आगे आबेवारे आनन्द हां तकें हतो। बिसवास से मूसा ने मिसर हां छोड़ दओ, और राजा से नईं डरानो, कायसे जौन बातें अबै न दिखात हतीं ऊ ने होत तकीं। बिसवास से मान्सन ने जब मिसर के जेठे मान्स और जनावर मारे जाबे हां हते, मेमने को रकत द्वारे पै लगा के फसह मनाओ और जीयत बच गए। बिसवास से बे लाल समुन्दर हां ऐसो पार कर गए, जैसे सूखी धरती पै से; और ऐसो तक के जब मिसर के मान्सन सोई पार उतरन लगे, तो बे सबरे डूब मरे। बिसवास ही से यरीहो नगर की चौदीवारी, जब इस्राएलियन ने सात दिना लौ चक्कर लगाओ तो गिर पड़ी। बिसवास ही से राहाब वेश्या जीने इस्राएलियन के भेदियन हां दुका के धरो, यरीहो के दूसरे जन के संग्गै नईं मारी गई। और का कहों? कायसे अब इतनी बेरा नईंयां, कि गिदोन, बाराक, समसून, यिफतह, दाऊद और शामुएल और दूसरे अगमवकतन की बातें बताओं। इतने बिसवास से लड़ के राज जीते; धरम के काज करे; जिन बस्तन हां कहो गओ हतो बे पाईं, नाहरन के मौ बन्द करे। आगी की लपटन हां ठण्डो करो; तलवार के मारे जाबे से बच कड़े, कमजोर हते पै बल मिलो; लड़ाईयों में जीते; बाहर के राजन की सेना हां मार भगाओ। कछु बईयरन ने अपने जन हां जौन मर गए हते फिन जीयत पाओ; बिलात जनें मार खात मर गए; परन्त जा न कई कि छोड़ दो; उन हां आस हती कि मर गए तो एक दिना जी उठ हैं। बिलात जन को मजाक उड़ाओ गओ, कोड़ा लगे और बांध के जेहल में डाले गए; इन सबरी बातन से उन हां परखो गओ। पथरा मारे गए; आरी से चीर के दो टूंका काटे गए; और उन हां जांचो गओ; तलवार से काटे गए; जौन लौ कछु न रहो, और पिराते में, और बुकरियन और गाड़रन की खलड़िया ओढ़े सबरे हार मारे फिरे। जंगल, पहरवा, और गुफन में और घरती के बीच खदरन में रए। संसार ने इन अच्छे मान्सन हां नईं चाहो, परन्त बिसवास से रए और मर गए, परन्त उन हां जौन बातें कई गईं हतीं बे न मिलीं। जौ सब ईसे भओ कि परमेसुर ने हमाए काजें और भी अच्छी बस्तें हमाए लाने धरी हतीं, और उनकी मंसा हती कि बे हमाए बिना अपने जीवन हां पूरो करें। ई लाने जब इतने सबरे जनों की गवाह हम जानत आंय, तो अब सबरी रोकबेवारी बस्तन और उलझाबेवारे पाप और बुरई बातन हां छोड़ के, जैसी दौड़ हम हां दौड़ने आय ऊहां संभल के दौड़ें। और हम अपनी नजर हां यीशु मसीह पै लगाबें; जौन हमें आगे लै चलत आय, जिन ने क्रूस पै चढ़ाए जाबे की निन्दा सई; और आज मजे से अपने बाप के संग्गै सरग में सिंहासन पै बिराजे आंय। सो यीशु मसीह पै ध्यान करो, जीने अपने लाने पापियन से बुरई बातें सुनी, कि जब मान्सन तुमाए लाने कछु कएं तो हिम्मत न हारियो। तुम में से कोऊ पाप से लड़त भओ ऐसो नईं लड़ो कि तुमाओ रकत बहो। तुम बिसर गए आव कि पोथी में ऐसो लिखो हतो, कि पिरभू की बातन हां हलके न लेओ, और बो जब तुम हां सुधारे तो हिम्मत न हारियो। पिरभू जीसे प्रेम करत आंय, उन हां सुधारत सोई आंय; और जीहां अपनो बना लेत उन हां कोड़ा सोई लगात आय। जब तुम हां सुधारो जाबै, तो धीरज धरियो जैसे सबरे बाप मताई अपने लड़का वारन हां सीख देत आंय। परमेसुर अपने लड़का वारन हां सीख देत आंय, तुम हां ऐसी सीख न मिली होबै तो तुम उनके बाल बच्चा नईंयां। जब हमाए मताई बाप हम हां सीख देत आंय, तो अपन उन हां मान देत आंय, पिता परमेसुर से सीख लेबें कि अपने बिलात दिना जियत रैबें। हमाए मताई बाप तनक बेरा हां हम हां सीख देत आंय, परन्त परमेसुर हमें सीख देत आय कि हम ओई जैसे पवित्तर बनें। जा तो सांची आय कि अबै की सीख से हम हां पिरातो होत आय, परन्त सीख से हम सुधर जाबें तो हम भले रै हैं। सो अब अपने हाथन हां मजबूत और अपने घुटने के बल ठांड़े होओ। और सूदी गैल पै चलो तो लंगड़ा ठीक से चल है, और अच्छो हो जै है। सबरे जनों से मेल राखो, और साजे रओ ईके बिना तुम परमेसुर हां न तक पा हौ। और ध्यान धरो कि कोई परमेसुर की दया से न बच पाबै, और तकत रओ कि कोई करऔ होकें दूसरे जन हां परेसान न करे। एसव घांई बुरओ और अधरमी मान्स न कड़े, जीने तनक से भोजन के लाने अपनी आबेवारी आसीस हिरा दई। तुम हां पता आय कि पाछें आसीस चाहत हतो परन्त ऊहां नईं मिली, और अंसुआ बहाबे पै ऊहां फिन के मौका नईं मिलो। तुम ऊ पहरवा जीहां छियो नईं जात जौन आगी से बरत हतो, काली घटा, अंधियारे और बड़ी बैहर ऊसे आत हती। और तुरही की आवाज, और बोलबेवारे के ऐंगर नईं गए, उते जौन उन की सुनत हते, बोले कि अब और हम से न बोलो। कायसे बे उनकी कही न कर पाए, कि कोई जनावर पहाड़ हां छी लेबे, तो ऊहां पथरन से मार डालियो। बो सब जौन दिखात हतो बड़ो डरबेवारो हतो, मूसा तो डर के मारे कंपत हतो। परन्त तुम सिय्योन के पहरवा और जियत परमेसुर के नगर यरूशलेम ऐंगर। जिते लाखों सरगदूत के संग्गै परमेसुर के प्यारे जनें जीके नाओं सरग में लिखे आंय; और परमेसुर जौन न्यायी आय उन के संग्गै आय, और अच्छे मान्सन की आत्मा जीने पापन की छिमा पाई आय। और उतईं पिरभू यीशु मसीह आंय, जीने अपने रकत से जौन हाबिल के रकत से भलो आय एक नई गैल बनाई आय। संभल के रहो, और जे बातें कहबेवारे की सुनो, जब मान्सन ने कैबेवारे की बात न मानी जौन सिय्योन पहरवा से बोलत हतो, तो का तुम उन की बात जौन सरग से बोलत आय बच पाहौ। ऊ बेरा तो उनके बोल से धरती कंपन लगी हती, परन्त उन ने कई आय कि ई बेरा मोरे बोले से धरती और आकास कांपन लग हैं। “एक बेर फिन के” को मतलब आय कि जौन बस्तें हलत आंय, बे बनाई गईं हतीं सो बे तो हल जै हैं, और बे बस्तें जौन हलाई नईं जात बे सब बनी रै हैं। सो हम परमेसुर की जय मानें, कि हम हां ऐसो राज मिलो जौन हल नईं सकत, उनके राज में हम उनको गुनगान करें, और उन हां मान देबें जीसे बे खुस रैबें। कायसे हमाओ परमेसुर सब भसम करबेवारी आगी जैसो आय। एक दूजे की खबर राखो। कोऊ बाहर से आबै तो अपने घर में रोटी खिलाईयो, कायसे ऐसो करके कछु जन ने बिना जाने सरगदूतन हां खिलाओ आय। जौन जेहल में आय, उनको ध्यान रखियो जौ मानके कि तुमई जेहल में आव; जीके संग्गै बुरओ होबे उनकी सोई चिन्ता करियो, जौ सोच के तुम उन के संग्गै आव। ब्याव हां आदर की बात सोचो, और ब्याव में अपनी संग्गी हां धोखो न दईयो; कायसे एक दिना परमेसुर परतिरिया संगत करबेवारन को न्याय कर हैं। रुपईया पईसा को लालच न करियो, और जो कछु तुम लौ आय, ऊ पै सन्तोष करियो; कायसे पिरभू ने कई आय, कि बे तुम हां कभऊं न छोड़ है। तुम हां सोई ऐसो कहो चईये, परमेसुर मोरी मदद कर है; मैं काय हां डरों, मान्स मोरो कछु नईं बिगाड़ सकत। अपने गुरू जन हां जीने तुम हां परमेसुर की कथा सुनाई, उन हां न बिसराईयो; और ध्यान धरियो कि उन को जीवन कैसो हतो और उनके बिसवास की बातन हां पकड़े रहियो। यीशु मसीह बदलत नईंयां, बे जैसे कल हते सो आज सोई आंय, और कल ऊंसई बने रै हैं। दूसरे परचार की बातन से नईं बिलुरियो, और अपने मन हां पक्को बनाए रखियो, खाबे की बस्तन पै भौत ध्यान न धरियो, कायसे खाबे से जादा कछु नईं होत। हमाई एक बेदी आय, जीसे खाबे को अधकार उन हां लौ नईंयां, जौन वेदी की सेवा करत आंय। कायसे जिन जानवरन को रकत महायाजक पाप बलि के काजें भीतरे ले जात आंय, ऊ जानवर की देह हां जिते मान्स रैत आंय, ऊके बायरें बार दईयो। ऐई से पिरभू यीशु मसीह ने मान्सन हां अपने रकत से साजो करबे हां गांव के बायरें क्रूस पै दुख उठाओ। सो आओ, अपन यीशु मसीह लौ बायरें चलें कि उनके अपमान में उनके संग्गै रैबें। कायसे संसार में कोई ऐसी नगरी नईंयां, जौन हमेसा लौ बनी रै है हम तो ऊं सई नगर की राह तकें बैठे आंय। सो हम परमेसुर के गुनगान, यीशु मसीह के नाओं से चढात रएं। भलो करबो, और दया करबो न छोड़ियो, कायसे ऐसे काम से परमेसुर खुस रैत आय। अपने गुरु जनों की मानो बे तुमाए जीवन हां तकें रैत आंय; कायसे बे परमेसुर हां तुमाए लाने लेखो दै हैं, बे जो काज खुसी से करें, बोझो न समझें, कायसे ऐसी सेवा से तुम हां कोई फायदा न हुईये। हमाए काजें बिन्तवारी करत रईयो, हमाओ जी ठीक ठाक आय; और हम अपने जीवन में अच्छो रहो चाहत आंय। मैं तुम हां जौ सोई कहो चाहत आंव, कि बिन्तवारी करो कि मैं फिन के तुम लौ आके भेंट करों। परमेसुर जौन सान्ति देबेवारे आंय, जिन ने हमाए पिरभू यीशु मसीह हां जौन गाड़र के बड़े रखनवारे आंय, अपने रकत से अपने लोगन हां पाप की मौज से बचाओ। बे तुम हां उनकी अज्ञा मानबे और जौन अच्छो होबे, ऊहां करबे को मन हमाए भीतरे बनाबे, कि उनको मान सम्मान होत रैबे। आमीन। भईया हरौ, मैं तुम से बिन्तवाई करत आंव, कि जौन बातें मैंने तुम हां लिखी आंय उन पै ध्यान धरियो। तुम हां पता चलो हुईये हमाओ भईया तीमुथियुस जेहल से छूट गओ आय, बो इते समय पै आ गओ, तो मैं ऊहां लैके तुम लौ आहों। अपने सबरे गुरु जनों और सबरे बिसवासियन हां नमस्कार कईयो, इतालियावारे तुम हां नमस्कार कैत आंय। मोरी जा बिन्ती आय कि परमेसुर तुम सबन पै दया करे। आमीन। परमेसुर और पिरभु यीशु मसीह के चाकर याकूब की कोद से उन बारहों कुलों हां, जौन फैल फुट होकें रैत आंय, नमस्कार पोंचे। मोरे भईया हरौ, जब तुम कैऊ भांत की परीक्षाओं में पड़ो, तो ईहां बड़ी खुसी की बात मानियो। कायसे तुम जानत आव, कि तुमाए बिसवास के परखे जाबे से धीरज जनम लेत आय। धीरज हां अपनो काम पूरो करन देओ, कि तुम पक्के और सिद्ध हो जाओ और तुम में कोई बात की घटी न रैबे। जदि तुम में से कोई हां समज की घटी होबै, तो बो परमेसुर से मांगे, परमेसुर बिना कए सबई हां उदारता से देत आय; और बुद्धि समज ऊ ए दई जै है। ऊ बिसवास से मांगे, और कछु संका न करे; कायसे संका करबेवारो समुन्दर की लहर के भांत आय, जौन बैहर से बहत और उछाली जात आय। ऐसो मान्स जौ न समजे, कि मोहां पिरभु से कछु मिल है। बो मान्स दुचित्ता आय, और अपनी सबरी बातन में चंचल आय। दीन भाई अपने बड़े पद पे घमण्ड करे। और धनवारो अपनी ओछी दसा पे: कायसे बो घांस के फूल की भांत जात रै है। कायसे सूरज ऊ गतई कड़ो घाम पड़त आय और घांस हां सुखा देत आय, और ऊकौ फूल झड़ जात आय, और ऊ की सुन्दरता जात रैत आय; ओई भांत धनवालो सोई अपनी गैल पे निंगत निंगत धूला में मिल जै है। धन्न आय बो मान्स, जौन परीक्षा में पक्को कड़े; कायसे बो परीक्षा में खरो कड़ के जीवन कौ बौ मुकुट पा है, जी कौ कौल पिरभु ने अपने प्रेम धरबेवारन हां दओ आय। जब कोनऊं की परीक्षा होबै, तो बो जौ न कैबे, कि ऊ की परीक्षा परमेसुर कुदाऊं से हो रई आय; कायसे न तो बुरई बातन से परमेसुर की परख हो सकत आय, और न बो कोनऊं की परख खुद करत आय। परन्त हरएक जनों अपनी अभलाखा से खिंच के, और फं स के परीक्षा में पड़त आय। फिन अभलाखा गरभवती होकें पाप हां जनम देत आय, पाप जब बढ़ जात आय तब मौत हां जनम देत आय। हे मोरे प्यारे भईया हरौ, धोखा न खाओ। हर एक साजो बरदान और हर एक साजे से साजे बरदान ऊ परै से आंय, और उजयारे के बाप कुदाऊं से मिलत आय, जौन न तो कभऊं बदलत आय, और न छाया के जैसो बदलबे वारो आय। ऊ ने अपनी मनसा से हम हां सत्त के बचन से बनाओ आय, जीसे हम ऊके संसार की बनाई भई बस्तन में से मानो पैलो फल होबें। हे मोरे प्यारे भईया हरौ, जा बात तुम जानत आव: ई लाने सबरे मान्स सुनबे के लाने एकदम तईयार और बोलवे में धीरजवारे, और खुन्स में गम्म खाबेवारे होबें। मान्स कौ खुन्स परमेसुर के धरम हां पूरो नईं कर सकत। ई लाने सबरी गन्दगी और सबरी दुष्टता दूर कर के, ऊ बचन हां दीनता से अपना लेओ, जौन हिये में बोओ गओ और जौन तुमाए प्रानन कौ तारन कर सकत आय। बचन अनसार चलबेवारे बनो, और अकेले सुनबेवारेई नईं, अकेले सुनबेवारेई अपने आप हां धोखा देत हैं। जौन कोऊ बचन कौ सुनबेवारो होबै, और ऊके अनसार चलबेवारो न होबै, बो तो ऊ मान्स घांई आय, जौन अपनो निज कौ मों ऐना में तकत आय। ऐना में बो अपने आप हां तक के चलो जात, और तुरतईं बिसर जात आय कि मैं कैसो हतो। पर जौन मान्स स्वतन्त्रता की सिद्ध नैम व्यवस्था पे ध्यान करत रैत आय, बो अपने काम में ई लाने आसीष पा है कि बो सुन के बिसरत नईं, परन्त वैसई काम सोई करत आय। जदि कोई अपने आप हां भगत सोसे, और अपनी जीभ पे लगाम न देबे, तो बो अपने हिये हां छलत आय, ऊ की भक्ती अकारथ आय। हमाए पिता परमेसुर के लेखे में सुद्ध और साफ भक्ति जा आय, कि हम अनाथों और बिधवाओं की दुख पीड़ा में उन की सुध लेबें, और अपने आप हां संसार की बातन से दूर राखें। हे मोरे भईया हरौ, हमाए पिरभु यीशु मसीह जौन जसवारे आंय, उनकौ बिसवास तुम में पिच्छदारी से न होबे। मान लेओ, जदि एक मन्सेलू सोने कौ छल्ला और भारी साजे उन्ना पैरें भए तुमाए भजनालय में आबै, और एक गरीब भूखो सोई मैले कुचैले उन्ना पैरें भए आबै। और जदि तुम ऊ साजे उन्ना पैरे भए मान्स कौ मों तक के ऊसे कओ इते साजी जांगा बिराजो; परन्त गरीब से कओ, तें इते ठांड़ो रै, या मोरे गोड़न के ऐंगर धरती पे बैठ। तो का तुम ने दोईयन में भेद नईं करो? का तुम बुरए सोच से न्याय करबेवारे न ठैरे? हे मोरे प्यारे भईया हरौ, सुनो; का परमेसुर ने ई संसार के गरीबन हां नईं नबेरो, कि बे बिसवास में धनी और ऊ राज के हाकम होबें, जी कौ कौल उन ने अपने प्रेम करबे वारन से करो आय? पर तुम ने अपने पिच्छवारी के बैवार से ऊ गरीब कौ अपमान करो: का धनी मान्स तुम पे अत्याचार नईं करत, का बेई तुम हां कचारियन में कड़ोर कड़ोर के नईं ले जात। का बे ऊ साजे नाओं हां नईं निंदरत, जीके तुम कहात आव? जदि तुम पवित्तर पोथी के ई बचन अनसार बैवार करत आव, कि तें अपने पड़ोसी से अपने घांई प्रेम कर, तो सांचई तुम परमेसुर के राज की नैम हां पूरो करत आव, तो साजो करत आव। परन्त जदि तुम पिच्छदारी करत आव, तो पाप करत आव; और परमेसुर की व्यवस्था तुम हां दोषी ठैरात आय। जदि कोऊ मान्स सबरी नैम हां पालन करत आय, परन्त एकई बात में चूक जाबै तो बो सबरी बातन में दोषी ठैरो। ई लाने जीने जौ कओ, कि तें परत्रिया संगत न करियो ओई ने जौ सोई कओ, कि तें कोई हां न मार डालिये, ई लाने जदि तेंने परत्रिया संगत नईं करी, पर मार डालो तौभी तें व्यवस्था कौ तोड़बे वारो ठैरो। तुम उन मान्सन घांई बचन बोलो, और काम करो, जिन कौ न्याव स्वतन्त्रता की व्यवस्था के अनसार हुईये। जीने दया नईं करी, ऊकौ न्याव बिना दया हुईये, दया न्याय पे बिजय पात आय। हे मोरे भईया हरौ, जदि कोई कय कि मोय बिसवास आय पर बो बिसवास के जैसे काम न करत होबै, तो ऊसे का फायदा? का ऐसो बिसवास ऊकौ तारन कर सकत आय? जदि कोई भईया या बहन नंगे उगरारे होय, और उन हां रोजीना खैबे की कमी होबै। और तुम उन से कओ, तुमाओ भलो होबै, तुम गरम रओ, और अफरे रओ; पर जौन बस्तें उन की देह के लाने जरूरी चाने आंय, बे उन हां न देओ तो का लाभ? ऊंसई बिसवास सोई जदि करम संग्गै न होबै तो बो मरो भओ जैसो आय। परन्त कोई जनो जौ कै सकत आय कि तुमाए ऐंगर बिसवास आय, मोरे ऐंगर करम आय, तें अपनो बिसवास मोय करम बिना दिखा; मैं अपनो बिसवास अपने करमों के द्वारा तोहां दिखा हों। तोय बिसवास आय कि एकई परमेसुर आय: तोरो जौ बिसवास नोंनो आय, दुष्ट आत्मा सोई जौ बिसवास करत आंय, और कांपत आंय। हे बेसमज मान्स, का तें जौ सोई नईं जानत, कि करम बिना बिसवास अकारथ आय? का हमाओ बाप इब्राहीम कामन से ऊ टैम धरमी नईं ठैराओ गओ, जब ऊने अपने मोंड़ा हां बेदी पे चढाओ? तुम तकत आव, कि ऊकौ बिसवास और करम एकई संग्गै काम कर रय हते और जो कछु ऊने करो ऊसे ऊकौ बिसवास दिखानो। और पवित्तर पोथी कौ जौ बचन पूरो भओ, कि इब्राहीम ने परमेसुर पे बिसवास करो, और जौ उन के लाने धरम कहाओ, और बे परमेसुर के दोस्त कहाए। तुम ने तक लओ कि मान्स अकेले बिसवास से नईं, परन्त करमन से सोई धरमी ठैरत आय। ऐसई राहाब बेश्या सोई जब ऊ ने दूतन हां अपने घर में उतारो, और दूजी गैल से बिदा करो, तो का बा करमन से धरमी न ठैरी? जैसे देह आत्मा बिना मरी भई आय, ऊंसई बिसवास सोई करम बिना मरो भओ आय। हे मोरे भईया हरौ, तुम में से बिलात जनें प्रवचन करबेवारे न बनें, कायसे तुम जानत आव, कि हम जौन प्रवचन करबेवारे आंय बिलात दण्ड के भागी हुईयें। प्रवचन देती बेरा हम कुल्ल बेर चूक जात आंय, जो कोनऊ बोलवे में चूक नईं करत, ओई सिद्ध मान्स आय; और सबरी देयां पे सोई लगाम लगा सकत आय। हम जब अपने बस में करबे के लाने घुड़वन के मों में लगाम लगात आंय, तो हम उन हां जैसो चाएं भगा सकत आंय। तको पानू के जहाज सोई बड़े बड़े होत आंय, और तेज बैहर से चलाए जात आंय, परन्त एक हलकी सी पतवार से चलाबेवारे की मन्सा से भुमाए जात आंय। ऊंसई जीभ सोई एक हलको सो अंग आय पर बा बड़ी बड़ी डींगें मारत आय। तको, तनक सी आगी से कितेक बड़े जंगल में आग लग जात आय। जीभ सोई एक आग आय; जीभ हमाई देंया में पाप कौ एक संसार आय, बा सबरी देयां पे कलंक पोतत आय, बा भवचक्र में आग लगा देत आय और नरक कुण्ड की आग से बरत रैत आय। सबरी भांत के जंगली जनावर, पंछी, रेंगवेवारे कीड़ा मकोड़ा और पानू के प्रानी मान्सन के बस में हो सकत आंय, और बे सब बस में हो सोई गए आंय। पर जीभ हां कोनऊ मान्स बस में नईं कर सकत आय; बा एक ऐसी बला आय जौन कभऊं रुकत नईंयां; बा प्रान हां नास करबेवारे विष से भरी भई आय। ऐई से हम पिरभु और पिता परमेसुर की जय जय करत आंय; और ऐई से मान्सन हां कोसत आंय जौन परमेसुर के बरोबर स्वरूप में पैदा भए आंय। एकई मों से धन्नबाद और कोसबो दोई कड़त आंय। हे मोरे भईया हरौ, ऐसो नईं भओ चईये। का पानू की झिर से एकई मों से मीठो और खारो पानू दोई कड़त आंय? हे मोरे भईया हरौ; का आम के पेड़ से बेर, या दाखन की बौल में निबुआ फल सकत आंय? ऊंसई खारे पानू की झिर से मीठो पानू नईं कड़ सकत। तुम में बुद्धमान और समजवारो को आय? जौन ऐसो होय बो साजे चलन से अपने कामन हां ऊ दीनता संग्गै दिखाबें जौन समज से होत आय। जदि तुम अपने हियन में जलत आव और बुराई धरत आव, तो सत्त के बिरोद में घमण्ड न करियो, और न लबरी बात कईयो। जा समज बा नईंया, जौन ऊपरै से उतरत आय पे संसारी, और अपुन की, देयां की, और शैतान छलिया की आय। जिते जलन और बुराई होत आय, उते बखेड़ा और सब भांत कौ बुरओ काम होत आय। पर जौन समज ऊपर से आत आय, पेंला तो बा पवित्तर फिन मेल जोल धरबेवारी, नम्र मीठो बोल, दया, साजी साजी बातन से भरो भओ पिच्छदारी और कपट के बिना होत आय। जौन मेल मिलाप करात आय, बा धर्म कहात और ऊहां मेल मिलाप के संग्गै बोओ जात है। तुम में न्याओ और झगड़ा कां से आ गए? का देयां के भोग विलास से नईं जौन हमाई देयां में बिराजे भए आंय? तुम चाहना करत आव, पर तुम हां मिलत नईंयां; ई लाने कि तुम मार डालत आव और आपुस में जलन बैर रखत आव; और तुम हां कछु मिलत नईंयां; सो तुम न्याओ करत आव और तुम हां कछु मिलत नईंयां, कायसे बिन्तवाई नईं करत। तुम मांगत आव और पात नईंयां, ई लाने कि बुरई नियत से मांगत आव, कि अपने भोग विलास में उड़ा दो। हे पापीनिओ, का तुम नईं जानत, कि संसार से दोस्ती करबो परमेसुर से बैर धरबो आय? सो जो कोऊ संसार कौ दोस्त होबो चाहत आय, बो अपने आप हां परमेसुर कौ बैरी बनात आय। का तुम जौ समजत आव, कि पवित्र बचन ऊंसई कहत आय? कि जौन आत्मा हां ऊ ने हमाए भीतरै बसाओ आय, कि बो ऐसी चाहना करत आय, कि ऊसे जलन डाह होबै। बो तो औरऊ दया करत आय; ऐई काजें ऐसो लिखो आय, कि परमेसुर घमंडियों से बिरोद करत आय, पर दीनों पे दया करत आय। ई लाने परमेसुर के बस में रओ; और शैतान छलिया कौ सामना करो, तो बो तुमाए ऐंगर से भाग जै है। परमेसुर के ऐंगरे आओ, तो बो सोई तुमाए ऐंगरे आ है: हे पापियो, अपने काम सुद्ध करो; और हे दुचित्ते लोगो अपने हियन हां पवित्तर करो। दुख मनाओ और रोओ, तुमाई हंसी, दुख में और तुमाओ मजा मौज उदासी में बदल जाए। पिरभु के सामूं दीन बनो, तो बो तुम हां परधान बना है। हे भईया हरौ, एक दूजे पे दोस न मढ़ो, जौन अपने भाईया की बदनामी करत आय, ऊ भाई पे दोष मढ़त आय, बो कानून धरम पे दोस लगात आय; और जदि तें कानून धरम पे दोस लगात आय, तो तें कानून धरम पे चलबेवारो नईंयां, पर ऊ पे हाकम ठैरो। कानून बनाबेवारो और हाकम तो एकई आंय, जौन बरका सकत और नास करबे में सक्तिमान आंय; पर तें को आय, जौन अपने पड़ोसी पे दोस मढ़त आय? तुम जौन जा कैत आव, आज या कल हम कोई और नगर में जाके उते एक साल रै हैं, और व्यापार कर के लाभ कमा हैं। और जौ नईं जानत किकल का हुईये; तनक सुन लईयो, तुमाओ जीवन हैई का? तुम तो पानू की भाप जैसे आव, जौन तनक देर हां दिखात आय, फिन गायब हो जात आय। पर तुम हां कओ चाईये, जदि पिरभु चाए तो हम जीयत रै हैं, और जौ काम सोई कर है। पर तुम डींग मारबे पे घमण्ड करत आव; ऐसो घमण्ड सई नईं होत। ई लाने जौन कोई भलाई करबो जानत आय और नईं करत, ऊके लाने जा बात पाप आय। हे मालपानू वारो सुनो तो; तुम अपनी आबेवारी बिपत पर फूट फूट के रोओ। तुमाओ मालपानू सड़ गओ आय और तुमाए उन्ना में कीड़ा लग गए आंय। तुमाए सोने चांदी हां काई लग गई आय; और ऊ काई तुमाए बिरोद में गवाई आय, तुमाओ मांस खा जै है: तुम ने आखीर के जुग में मालपानू बटोरो आय। तको, जौन मजूरन ने तुमाए खेत काटे, उन की बा मजूरी तुम ने बेईमानी से धर लई आय बा चिल्या रई आय, और कटईयन की बिनती, सेनाओं के यहोवा परमेसुर के कान लौ पोंच गई आय। तुम ई संसार में भोग बिलास में रम गए और ऐन सुख भोगो; तुम ने मारे जाबे के दिना के लाने अपने हिये हां पाल पोस के मोंटो ताजो बना लओ आय। तुम ने सांचे हां पापी ठैरा के मार डालो; और बो तुमाओ सामना नईं करत। ई लाने हे भईया हरौ, पिरभु के आबे के दिना लौ धीरज धरो, तको, किसान धरती से फसल की आस धरत है, पैली और अखीरी पानू बरसबे लौ धीरज धरत आय। तुम सोई धीरज धरो, और अपने हिये हां पक्को करो, कायसे पिरभु के आबे कौ दिना बस ऐंगर आय। हे भईया हरौ, एक दूजे पे लांछन न लगाओ जीसे तुम पे कोऊ लांछन न लगाए, तको, हाकम दोरे पे ठांड़ो आय। हे भईया हरौ, जौन आगमवकतन ने पिरभु के नाओं से बातें करी, उन हां दुख उठाबे और धीरज धरबे कौ एक नमूना समझौ। तको, हम धीरज धरबेवारन हां धन्न कैत आंय; तुम ने अय्यूब के धीरज के बारे में तो सुनो आय, और पिरभु कुदाऊं से ऊहां फल मिलो बो सोई जान गए आव, जीसे हम जानत आंय कि पिरभु कितेक दयावारो है जौ पता पड़त आय। हे मोरे भईया हरौ, सब से साजी बात जा आय कि कौल न करियो; न सरग की, न संसार की, न कोऊ और बस्त की, पर तुमाई बात चीत हां की हां, और नईं की नईं होबै, जीसे तुम हां दण्ड न मिले। जदि तुम में कोई दुखी होबै तो बो बिन्तवाई करे: जदि मन मगन होबै, तो बो भजन गीत गाबै। जदि तुम में कोई रूगिया बिमार आय, तो समाज के बड़े बूढ़न हां बुलाबै, और बे पिरभु के नाओं से ऊपै तेल लगा के ऊके लाने बिन्तवाई करें। और बिसवास की बिन्तवाई से रूगिया बच जै है और पिरभु ऊहां उठा के ठांड़ो कर है; और जदि ऊ ने पाप सोई करे होबें, तो उनकी सोई क्षिमा मिल जै है। ई लाने तुम अपने अपने पापन हां एक दूजे के सामूं मान लेओ; और एक दूजे के लाने बिन्तवाई करो, जीसे चंगे हो जाओ; धर्मी जन की बिन्तवाई के असर से भौत कछु हो सकत आय। एलिय्याह तो सोई हम जैसो दुख सुख भोगी मान्स हतो; और ऊ ने गिड़गिड़ा के बिन्तवाई करी; कि पानू न बरसे; और साढ़े तीन बरस लौ धरती पे पानू नईं बरसो। फिन ऊ ने बिन्तवाई करी, तो आकास से पानू बरसो, और धरती पे खेतीबारी भई। हे मोरे भईया हरौ, जदि तुम में कोऊ सांची गैल छोड़ दे, और कोनऊं ऊहां वापुस फेर लाए। तो बो जौ जान लेबे, कि जौन कौनऊं भटके भए पापी हां फेर ले आ है, बो एक प्रान हां मरबे से बचा है, और कुल्ल के पाप मिट जै हैं। पतरस की कोद से जौन यीशु मसीह कौ चेला आय, उन परदेसियन के नाओं, जौन पुन्तुस, गलतिया, कप्पदुकिया, आसिया और बिथुनिया में तितर बितर होकें रैत आंय। और परमेसुर बाप के आगमज्ञान के अनसार, आत्मा के पवित्तर करबे के द्वारा हुकम मानबे, और यीशु मसीह के रकत के छिड़के जाबे के लाने नबेरे गए आंय। तुम हां बिलात आसीस और सान्ति मिलत रैबे। हमाए पिरभु यीशु मसीह के परमेसुर और बाप कौ धन्नबाद होबै, जीने यीशु मसीह के मरे भयन में से जी उठबे के द्वारा, अपनी बड़ी किरपा से हम हां जीयत आसा के लाने नओ जनम दओ। जाने कि एक न मरबेवारी और निर्मल, और हमेसा की मीरास के लाने, जौन तुमाए लाने सरग में धरी आय। जी की रक्षा परमेसुर की सकती से, बिसवास से ऊ तारण के लाने, जौन आबेवारे टैम में उजागर होबेवारी आय, करी जात आय। और ऐई काजें तुम खुस होत आव, परन्त जरूरी आय कि अबै कछु दिना लौ कुल्ल भांत की परीक्षाओं से उदास आव। जौ ई लाने आय कि तुमाओ परखो भओ बिसवास, जौन आग से तपाए भए नास होबेवारे सोने से सोई कछु बिलात मोल कौ आय, यीशु मसीह के उजागर होबे पे बड़वाई, मईमां और आदर कौ काज ठैरे। ऊसे तुम बिना तकें प्रेम राखत आव, और अब तो ऊ पे बिना तकें सोई बिसवास करके ऐसे खुस और परसन्न होत आव, जौ कओ नईं जा सकत और मईमा से भरो भओ आय। और अपने बिसवास कौ मिलबेवारो फल जाने कि आत्माओं कौ तारण पाऊ त जात आव। ऐई तारण के बारे में उन आगमवकताओं ने बिलात खोज और जांच पड़ताल करी, जिन ने ऊ किरपा के बारे में जौन तुम पे होबे हां हती, आगमवानी करी हती। उन ने ई बात की खोज करी कि मसीह की आत्मा जौन उन में हती, और पेंलई से मसीह की पीड़ा की और ऊके पाछें होबेवारी मईमा की गवाई देत हतो, बो कौन से और कैसे टैम कुदाऊं इसारो करत हतो। उन पे जौ उजागर करो गओ, कि बे अपनी नोंई परन्त तुमाई सेवा के लाने जे बातें कओ करत हते, जी की खबर अब तुम हां उन से जौन सरग से पठैओ गओ: तुम हां भलो सन्देसो सुनाओ, और इन बातन हां सरगदूत सोई ध्यान से देखबे की मनसा राखत आंय। ई काजें अपनी अपनी बुद्धि की करयाई कस के, और हुसयार रैके ऊ किरिया की पूरी आसा राखो, जौन पिरभु यीशु के उजागर होबे की बेरा तुम हां मिलबेवारो आय। और हुकम मानबेवारे बच्चन की घांई अपनी न समझी के बेरा की पुरानी अभलाखाओं के जैसे न बनो। पर जैसो तुमाओ बुलाबेवारो पवित्तर आय, ऊं सई तुम सोई अपने सबरे चाल चलन में पवित्तर बनो। कायसे लिखो आय, कि पवित्तर बनो, कायसे मैं पवित्तर आंव। जब कि तुम, हे बाप, कह के ऊसे बिन्तवाई करत आव, जौन बिना पिच्छदारी करके सबई कोई के कामन के अनसार न्याय करत आय, तो अपने परदेसी होबे की बेरा डर के काटो। कायसे तुम जानत आव, कि तुमाओ निकम्मा चाल चलन जौन पुरखन से चलो आत आय, ऊसे तुमाओ तारण चान्दी सोने जाने के नास होबेवारी बस्तन से नईं भओ। पर निर्दोष और बेदाग मेमने जाने कि मसीह के अमोल रक्त से भओ। ऊकौ ज्ञान तो संसार के होबे से पेंलई से जानो गओ हतो, पर ई आखीर जुग में तुमाए लाने उजागर भओ। जौन ऊके द्वारा ऊ परमेसुर पे बिसवास करत आव, जीने ऊहां मरे भयन में से जिलाओ, और मईमां दई; कि तुमाओ बिसवास और आस परमेसुर पे होबै। सो जब तुम ने भाईचारे की निश्चल प्रीति के लाने सत्य के मानबे से अपने हियन हां पवित्तर करो आय, तो तन मन लगा के एक दूजे से अधक प्रेम करो। कायसे तुम ने नास होबेवारो नईं पर न मिटबेवारे बीज से परमेसुर के जीयत और सदा ठैरबेवारे बचन सें नओ जनम पाओ आय। सबरे प्रानी घांस घांई आंय, और ऊ की सबरी सुन्दरता घांस के फूल घांई आय: घांस सूख जात और फूल झड़ जात आय। परन्त पिरभु कौ बचन जुग जुग लेओ बनो रै है जौ ओई भले सन्देसे कौ बचन आय जौन तुम हां सुनाओ गओ हतो। ई लाने सब भांत कौ बैरभाव और छल और कपट और जरुआपन और बदनामी हां अलग कर के। नये जन्मे भए बच्चन की घांई सुद्ध आत्मिक दूध की लालसा करो, ताकि ऊ सें तारण पाबे के लाने बढ़त जाओ। तुम ने पिरभु की किरपा कौ स्वाद चीख लओ आय। ऊके ऐंगर आके, जिए मान्सन ने तो बिना काम कौ ठैराओ, परन्त परमेसुर के ऐंगर नबेरो भओ, और बिलात मोल कौ जीयत पथरा आय। तुम सोई खुद जीयत पथरन की घांई आत्मिक घर बनत जात आव, जीसे याजकन कौ पवित्तर समाज बन के, ऐसे आत्मिक बलदान चढ़ाओ, जौन यीशु मसीह के परमेसुर हां भले लगत आय। ई लाने पवित्तर पोथी में सोई लिखो आय, कि तको, मैं सिय्योन में कोने के मुड़ीसे कौ नबेरो भओ और बिलात मोल कौ पथरा धरत आंव: और जौन कोनऊ ऊपे बिसवास कर है, बो कौनऊ भांत लज्जित न हुईये। सो तुमाए लाने जौन बिसवास करत आव, बो तो कीमती आय, पर जौन बिसवास नईं करत उन के लाने जौन पथरा हां कारीगरन ने बेकाम ठैराओ हतो, बो कोने कौ मुड़ीसा हो गओ। बो उपटा लगबे कौ पथरा और ठोकर खाबे की चट्टान हो गओ आय, कायसे बे तो बचन को न मानके चोट खात आंय और ऐई के लाने बे ठैराए सोई गए हते। पर तुम एक नबेरो भओ वंस, और राजपद अधकारी, याजकन कौ समाज, और पवित्तर लोग, और पवित्तर मान्स और परमेसुर की निज परजा आव, ई लाने कि जीने तुम हां अंधयारे में से अपनी जोत में बुलाओ आय, ऊके गुण परगट करो। तुम पेंला तो कछु न हते, पर अब परमेसुर की परजा आव; तुम पे दया न भई हती परन्त अब तुम पे दया भई आय। हे प्यारो मैं तुम से बिन्तवाई करत आंव, कि तुम अपने आप हां परदेसी और यात्री जान के उन संसारी अभलाखाओं से जौन आत्मा से लड़त आंय, बरके रओ। दूसरी जातन में तुमाओ चाल चलन सई रैबे; ई लाने कि जौन जौन बातन में बे तुम हां बुरए काम करबेवारो जान के बदनाम करत हते, बे तुमाए साजे कामन हां तक के; उनईं के काजें, दया किरपा के दिना परमेसुर की मईमां करें। पिरभु के लाने मान्सन के ठैराए भए सबरे परबन्ध के नेचें रओ, राजा के ई लाने कि बो सबरन कौ परधान आय। और हाकमन के, कायसे बे बुरए काम करबेवारन हां दण्ड़ देबे और साजे काम करबेवारन की बड़वाई के लाने उनके पठैय भए आंय। कायसे परमेसुर की मन्सा जा आय, कि तुम साजे काम करबे से बेसमझ लोगन की न समझी की बातन हां बन्द कर दो। और अपने आप हां छुट्टा जानो पर अपने ई छुट्टापन हां बुराई के लाने आड़ न बनाओ, परन्त अपने आप हां परमेसुर कौ चाकर समज के चलो। सबई कौ मान करो, भईयन से प्रेम राखो, परमेसुर से डराओ, राजा कौ आदरमान करो। हे चाकरो, सब परकार के डर के संग्गै अपने मालकन के नेंचें रओ, अकेले साजो और नरम, पर दुष्टों के सोई। कायसे जदि कोई परमेसुर कौ बिचार कर के अन्याय से पीड़ा उठात भओ दुख सहत आय, तो जौ बिलात नोंनो आय। कायसे जदि तुम ने अधरम करके घूंसे खाए और गम्म खाई, तो ईमें का बड़वाई की बात आय? परन्त जदि साजो काम कर के पीड़ा झेलत आव और धीरज धरत आव, तो जौ परमेसुर हां साजो लगत है। और तुम ऐई के लाने बुलाए सोई गए आव, कायसे मसीह सोई तुमाए लाने पीड़ा झेल के, तुम हां एक आदर्श दे गओ आय, कि तुम सोई उन के चिन्न पे निंगो। न तो ऊ ने पाप करो, न ऊके मों से कोई छल की बात कड़ी। बो गाली सुन के गाली न देत हतो, और पीड़ा झेल के कोऊहां सोई धौंस न देत हतो, पर अपने आप हां सांचे न्यायी के हाथ में सौंपत हतो। बो खुद हमाए पापन हां अपनी देयां पे लएं भए क्रूस पे चढ़ गओ, जीसे हम पापन के लाने मर के धार्मिकता के लाने जीवन बिताएं; ओई के मार खाबे से तुम साजे भए। कायसे तुम पेंला हिरानी भई गाड़रन घांई हते, पर अब अपने प्रानो के रखनवारे और परधान के ऐगर फिन आ गए आव। हे बईयरो तुम सोई अपने मन्सेलू की अग्या में रओ। ई लाने कि जदि इन में से कोई ऐसे होंय जौन बचन हां न मानत होबें, पर तुमाए डर संग्गै पवित्तर चाल चलन हां तक के बिना बचन के अपनी अपनी बईयर के चाल चलन के द्वारा खिंच जाबें। और तुमाओ सिंगार ऊ परी न होबै, जाने कि बाल गूंथबो, और सोने के गैने या भांत भांत के उन्ना पैरबो। पर तुमाओ लुको भओ और गुप्त मनुष्यत्व, नरमता और हिये की दीनता की न मिटबेवारी सजावट से सजो रैबे, कायसे परमेसुर के लेखे में ईकौ बड़ो मोल आय। और पेंला के टैम की पवित्तर बईयरें सोई, जौन परमेसुर पे आसा राखत हतीं, अपने आप हां ऐई भांत से संवारती और अपने मन्सेलू की अग्यां में रैत हतीं। जैसे सारा इब्राहीम की अग्यां में रैत और मालक कैत हती, सो तुम सोई जदि भलो करो, और कोई भांत के डर से न डराओ, तो ऊ की बिटियां ठैर हौ। ऊंसई हे मन्सेलू हरौ, तुम सोई समजदारी से बईयरन के संग्गै जीवन बिताओ और बईयर हां अबला जान के ऊकौ मान करौ, और जौ समज के, कि तुम दोई जीवन के बरदान के हक्कदार आव, जीसे तुमाई बिन्तवाई रुक न जाबै। ई लाने सबरे के सबरे एक हिये और दया करबेवारे, और भाईचारे की प्रीति रखबेवारे, और तरस खाबेवारे, और नरम बनो। बुराई के बदले बुराई न करो; और न गाली के बदले गाली दो; पर ईके उलटे आसीस दो: कायसे तुम आसीस के वारस होबे के लाने बुलाए गए आव। कायसे जौन कोई जीवन की मन्सा रखत आय, और नोंने साजे दिना तकबो चाहत आय, बो अपनी जीब हां बुराई से, और अपने होंठन हां कपट की बात कैबे से रोके रए। बो बुराई को संग छोड़े, और भलाई करे; बो मेल मिलाप हां खोजे, और ओई के जतन में रैबे। कायसे पिरभु की आंखें धरमियन पे लगी रैत आंय, और ऊके कान उन की बिन्तवाई कुदाऊं लगे रैत आंय, परन्त पिरभु बुराई करबे वारन के बिरुद्ध रैत आय। और जदि तुम भलाई करबे हां उस्काते रओ, तो फिन तुमाई बुराई करबेवारो को आय? और जदि तुम धरम के काजें पीड़ा सोई भोगो, तो धन्न आव; पर उन के डराबे से न डरो, और न घबराओ। पर मसीह हां पिरभु जान के अपने अपने मन में पवित्तर समजो, और जौन कोई तुम से तुमाई आसा के बारे में कछु पूंछे, तो ऊ ए जवाब देबे के लाने हमेसा तईयार रओ, पर नरमता और डर के संग्गै। और अपनी समज सोई सुद्ध राखो, ई लाने कि जिन बातन के बारे में तुमाई बदनामी होत आय, उन के बारे में बे जौन तुमाए मसीही साजे चाल चलन कौ अपमान करत आंय लज्जित होबें। कायसे जदि परमेसुर की जाई मन्सा होबै, कि तुम भलाई करबे के काजें पीड़ा उठाओ, तो जा बुराई करबे के काजें पीड़ा भोगबे से साजो आय। ई लाने कि मसीह ने सोई, जाने कि अधरमी जन के लाने धरमी ने पापन के काजें एक बेर पीड़ा भोगी, जीसे हम हां परमेसुर के ऐंगर पोंचाबें: बो देयां के लेखे से मार डालो गओ, पर आत्मा के लेखे से जिलाओ गओ। ओई में यीशु ने बन्दी आत्माओं हां सोई परचार करो। जिन ने ऊ बीती बेरा में हुकम न मानो जब परमेसुर नूह के दिना में धीरज धर ठैरो रओ, और जहाज बन रओ हतो, जीमें बैठ के तनक जने, जाने कि आठ प्रानी पानू से बच गए। और ओई पानू की कनौत सोई, जाने कि बपतिस्मा, यीशु मसीह के जी उठबे से, अब तुम हां बचात आय; (ऊसे देयां कौ मैल हटाबे को मतलब नईंयां, पर सुद्ध विवेक से परमेसुर के बस में हो जाबे कौ मतलब आय)। मसीह सरग पे जाके परमेसुर के दांय कोद विराजमान भओ; और सरगदूत और सबरे अधकारी और सकतीबल उनके बस करे गए। जब मसीह ने देयां में होकें पीड़ा उठाई, तो तुम सोई ओई मन्सा हां अपना के हथयार बांध लेओ, कायसे जीने देयां में पीड़ा उठाई, बो पाप से छूट गओ। आगे हां अपनो रै गओ संसारी जीवन मान्सन की मरजी से नईं, परन्त परमेसुर की मन्सा के अनसार गुजारो। दूसरी जातन की मन्सा के अनसार काम करबे, और लुच्चपन की बुरई अभलाखाओं, मतवालोपन, लीला-क्रीड़ा, पिय्यकड़पन, और घिनौनी मूरती पूजा में तुम ने पैले टैम खो दओ, बो बिलात भओ। ईसे बे अचम्भो करत आंय, कि तुम ऐसे बड़े लुच्चपन में उन को साथ नईं देत आव, ई लाने बे तुम हां बुरो भलो कैत आंय। पर बे ऊहां जौन जीयत और मरे भयन कौ न्याय करबे हां तईयार आय, लेखा दें हैं। मरे भयन हां सोई भलो सन्देसो ई लाने सुनाओ गओ, कि देयां में तो मान्सन के अनसार उन कौ न्याय होबै, पर आत्मा में बे परमेसुर के अनसार जीयत रैबें। सबरी बातन को अखीर तुरतईं होबेवारो आय; ई लाने संयमी होकें बिन्तवाई के लाने हुसयार रओ। सब से ऊं ची बात जा आय कि एक दूजे से अधक से अधक प्रेम करो; कायसे प्रेम सबरे पापन हां ढांक देत आय। बिना कुड़कुड़ाए एक दूजे कौ अतिथी सत्कार करो। जीहां जौन वरदान मिलो आय, बो ऊ ए परमेसुर के कैऊ भांत के अनुग्रह के साजे भण्डारी घांई दूसरन की सेवा में लगाबें। जदि कोऊ बोले, तो ऐसो बोले, कि मानो परमेसुर कौ बचन आय; जदि कोऊ सेवा करे, तो बो ऊ बल से करे जौन परमेसुर देत आय; जीसे सबरी बातन में यीशु मसीह के द्वारा परमेसुर की मईमा उजागर होबै मईमा और सबरी बल सकती जुग जुग ओई की आय। आमीन। हे प्यारो, जौन पीड़ा घांई आगी तुमाए जांचबे के लाने तुम पे पड़ी आय, ऊ ए जौ समज के अचम्भा न करो कि कोऊ अनोखी बात तुम पे बीत रई आय। जैसे जैसे मसीह की पीड़ाओं में तुम संग्गी साथी होत रैत आव, खुस रओ, जीसे ऊ की मईमा के उजागर होबे की बेरा सोई खुसी से मगन हो जाओ। फिन जदि मसीह के नाओं के लाने तुम हां निन्दरो जात आय, तो तुम धन्न आव; कायसे मईमा की आत्मा, जौन परमेसुर की आत्मा आय, तुम पे छाया करत आय। तुम में से कोऊ जनो हत्यारो, या भड़या, या कुकरमी होबे, या दूसरन के काम में अड़ंगा लगाबे के काजें पीड़ा न पाबै। पर जदि मसीही होबे के काजें बो पीड़ा पाए, तो लज्जित न होय, पर ई बात के लाने परमेसुर की मईमा करे। बा बेरा आ पोंची आय, कि पेंला परमेसुर के मान्सन कौ न्याय करो जाए, जब न्याय कौ शुरू हमई से हुईये, तो उनकौ का अन्त हुईये जौन परमेसुर के भले सन्देसे हां नईंर् मानत आंय। जदि धरमी जनो मुसकल से तारन पा है, तो बिना भक्तीवारे और अधरमी कौ का ठिकानो? ई लाने जौन परमेसुर की मन्सा के अनसार पीड़ा उठात आंय, बे भलो करत भए, अपने प्रान हां बिसवास जोग धरती के रचबेवारे के हाथ में सौंप देबें। तुम में जौन धार्मिक बूढ़े आंय, मैं उनईं घांई धार्मिक बूढ़ों और मसीह की पीड़ाओं को गवाय और उजागर होबेवारी मईमां में संगसाथी होकें जा विनय करत आंव। परमेसुर के ऊ झुण्ड की, जौन तुमाए मजारें आंय रखनवारी करो; जौ काम दबाव से नईं, परन्त परमेसुर की मनसा अनसार खुसी से, और ओछी कमाई के लाने नईं, पर मन लगा के करो। जौन मान्स तुम हां सौंपे गए आंय, उन पे अधकार न गांठो, परन्त झुण्ड के लाने आदर्स बनो। जब परधान रखवारो आ है, तब तुम हां मईमा कौ मुकट दओ जै है, जौन कभऊं नास न हुईये। हे नए जवानो, तुम सोई धार्मिक बूढ़ों के नेंचें रओ तुम सबरे एक दूजे के लाने दीन और नरम बनो, कायसे परमेसुर घमंडियों कौ सामनो करत आय, परन्त बो दीनो पे दया करत आय। परमेसुर के महाबली हाथ के नेंचें दीनता से रओ, जीसे बो तुम हां सई टैम पे बढ़ाबे। अपने सबरे सोच ओई पे डाल देओ, कायसे उनईं हां तुमाओ सोच आय। हुसयार रओ, और जागत रओ, कायसे तुमाओ बिरोधी शैतान, गरजबे वाले नाहर घांई ई ताक में रैत आय, कि कीहां फाड़ खाबै। बिसवास में पक्के बनो, और जौ जान के ऊकौ सामना करो, कि तुमाए भाई जौन संसार में आंय, ऐसई पीड़ा भोग रए आंय। अब परमेसुर जौन सबरी दया कौ दाता आय, जीने तुम हां मसीह में अपनी सदा की मईमा के लाने बुलाओ आय, तुमाए तनक बेरा लौ पीड़ा उठाबे के पाछें खुद तुम हां सिद्ध, पक्को, सकतीवान और पक्को कर है। और ऊकौ पराकरम जुग जुग होत रैबे। आमीन। मैं ने सिलवानुस के हाथ, जिये मैं बिसवास जोग भाई मानत आंव, तनक में लिख के तुम हां समजाओ आय और जा गवाय दई आय, कि परमेसुर की सांची दया जाई आय, ऐई में पक्के बने रओ। और बाबुल में तुमाए घांई जौन नबेरे भए मान्स आंय, बे और मोरो पूत मरकुस तुम हां नमस्कार कैत आंय। एक दूजे हां चूम के प्रेम से नमस्कार कओ। तुम सबरन हां जौन मसीह में आव सान्ति मिले। शिमौन पतरस की कोद से जौन यीशु मसीह कौ चाकर और चेला आय, उन मान्सन के नाओं चिठिया जिन ने हमाए परमेसुर और तारन करबवारे यीशु मसीह की धार्मिकता से हमाए घांई अनमोल बिसवास पा लओ आय। परमेसुर के और हमाए पिरभु यीशु की पैचान के द्वारा, तुम में दया और सान्ति बिलात बढ़त जाबै। ओई परमेसुर की बलसकती ने सबई कछु जौन जीवन और भक्ती से समबन्ध राखत आय, हम हां ओई की पैचान से दओ आय, जीने हम हां अपनी मईमां और साजे गुनो के अनसार बुलाओ आय। उन के द्वारा ऊ ने हम हां अनमोल और बिलात बड़ी कौलें दई आंय; कि तुम इन के द्वारा ऊ आचरण से छूट जाओ, जौन संसार में बुरई मनसाओं से होत आय और तब परमेसुर के स्वाभाव के संगी साथी हो जाओ। ऐई काजें तुम सबई भांत कौ जतन करके, अपने बिसवास पे साजो गुन, साजे गुन पे समज। समज पे संयम, संयम पे धीरज, और धीरज पे भक्ति। भक्ति पे भाईचारे कौ स्नेह, और स्नेह पे प्रेम बढ़ात जाओ। जदि जे बातें तुम में रैबें, और बढ़त जाबें, तो तुम हां पिरभु यीशु हां पैचानबे में निकम्में और निष्फल न होन दै है। जीमें जे बातें नईयां, ऊ धुंधलो तकत आय, और अन्धरो आय, बो बिसर बैठो आय कि बो अब अपने पेंला के अधरम से धुल के सुद्ध हो चुको आय। ई काजें हे भईया हरौ, अपने बुलाए जाबे, और नबेरे जाबे हां पक्को करबे हां और अधक जतन करत जाओ, जदि तुम ऐसो करत हौ, तो कभऊं ठोकर न खा हौ। परन्त तुम हमाए पिरभु और तारन करबेवारे यीशु मसीह के सदा के राज में बड़े मान के संग्गै पहुंच हौ। तुम जे बातें जानत आव, और जौन सांचो बचन तुम हां मिलो आय, ऊ में बने रैत आव, फिन भी मैं तुम हां उन बातन की सुध दिलाबे हां सदा तईयार रै हों। मैं जौ अपने लाने सई समजत आंव, कि जब लौ मैं जी रओ आंव, तब लौ तुम हां सुध दिवा दिवा के उस्केरत रओं। मैं जौ जानत आंव, कि मसीह के बचन के अनसार मोरे मारे जाबे कौ टैम झट्टईं आबेवारो आय। ई लाने मैं ऐसो जतन कर हों, कि मोरे सिधार जाबे के पाछें तुम इन बातन हां सदा सुमरन कर सको। जब हम ने तुम हां अपने पिरभु यीशु मसीह की बलसकती कौ, और उनके आबे को संदेसो दओ तो हम ने चतुराई से गढ़े भए किस्सा की नकल नईं करी हती, पर हम ने खुद यीशु के जस हां तको हतो। जब पिरभु यीशु मसीह ने परमेसुर बाप से मान, और मईमां पाई तब ऊ जस भरी मईमां में से जौ बोल सुनाई दओ कि जौ मोरो प्यारो पूत आय, जीसे मैं खुस आंव। जब हम उनके संग्गै पवित्तर पहाड़ पे हते, तब हम ने सरग से जौई बोल सुनो हतो। हमाए ऐंगर आगमवकतन कौ जौन बचन आय, बो ई घटना से पक्को ठैरो, तुम जौ साजो करत आव और जौ समज के ऊ पे ध्यान करत आव, कि जौ एक दीया आय जौन अन्धयारी जांगा में ऊ टैम लौ जोत देत रैत आय, जब लौ भुन्सारो न हो जाबै और भुन्सारे कौ तारा तुमाए हियन में न चमक उठे। पर पेंला जा बात जान लेओ, कि पवित्तर पोथी की कोई भी आगमवानी, कोऊ के अपने ई सोच विचार के आधार पे पूरी नईं होत। कायसे कोनऊं आगमवानी मान्सन की मनसा से कभऊं नईं भई, पर भगत जनें पवित्तर आत्मा से आज्ञा पाके परमेसुर कुदाऊं से बोलत हते। जौन भांत उन मान्सन में लबरे आगमवकता हते ओई भांत तुम में सोई लबरे परचारक हुईयें, जौन नास करबेवारे पाखंड कौ उद्घाटन लुके लुके कर हैं, बे अपने ऊ मालक को जीने उन हां मोल लओ आय मैट दें हैं, और अपने आप हां भारी नास की गैराई में डार दें हैं। बिलात जनें उन के घांई लुच्चपन कर हैं, जिन के काजें सत्त की गैल हां निंदरो जै है। बे लालच में आके लबरी बातें बना हैं और तुम हां अपने फायदा कौ कारन बना हैं, दण्ड़ कौ हुकम जो उन पे पेंला से हो चुको आय, और ऊके आबे में देर नईंयां, उन कौ नास झट्टई होबेवारो आय। जब परमेसुर ने उन सरगदूतन हां जिन ने पाप करो हतो नईं छोड़ो, पर उन हां नरक में पठै के अन्धयारे कुन्डों में डाल दओ, जीसे बे न्याय के दिना लौ बन्दी रैबें। परमेसुर ने पेंला जुग के संसार हां सोई न छोड़ो, परन्त पाप भरे संसार पे महा जलप्रलय पठै के सांचई के परचारक नूह के संग्गै सात और जनन हां बरका लओ। परमेसुर ने सदोम और अमोरा नगरों हां नास कौ ऐसो दण्ड़ दओ, कि उन हां भस्म कर के राख में मिला दओ, जीसे बे आगे के अधरमी जनों को सीख के लाने एक कानौत बनें। और धरमी लूत हां जौन अधरमी जनों के बुरए चालचलन से बिलात दुखी हतो, छुटकारो दओ। (कायसे बो सांचो मान्स उन के मजारें रैत भए, और उन के अधरम के कामन हां तक तक के, और सुन सुन के, रोजीना अपने सांचे हिये में दुखी होत हतो)। सो पिरभु भक्तन हां परीक्षा में से काड़ लैबो और अधरमी जन हां न्याय के दिना लौ दण्ड़ की दसा में धरबो सोई जानत आय। सब से बढ़ के उन हां जौन बुरई बासनाओं के बस में होकें देयां के अनसार निंगत, और पिरभु के राज हां ओछो जानत आंय; बे ढीठ, और हठी आंय, और ऊंचे पद वारन हां बुरो भलो कैबे से नईं डरात। जब कि सरगदूत जौन सकती और बल में उन से बड़े आंय, पिरभु के सामूं उन हां बुरो भलो कह के लांछन नईं लगात। परन्त जे मान्स बिना समजवारे जनावर घांई आंय, जौन पकड़े जाबे और नास होबे के लाने पैदा भए आंय; जिन बातन हां बे जानतई नईंयां, उन के लाने दूसरन हां बुरो भलो कैत आंय, बे अपनी सड़ाहट में खुद सड़ जें हैं। अपने अधरम कौ फल उनईं हां मिल है, उन हां दिन दुपारी सुख विलास करबो साजो लगत आय; बे कलंक और दागी आंय, जब बे तुमाए संग्गै खात पियत आंय, तब अपनी कुदाऊं से प्रेम भोज करके भोग विलास करत आंय। उन की आंखें व्यभिचार से भरी आंय, बे अधरम करे बिना रै नईं सकत, बे चंचल मन वारन हां फुसला लेत आंय; उनके हिये लालच करबे की लत में पड़े आंय, बे सन्ताप के लरका बच्चा आंय। बे सूदी गैल हां छोड़ के भटक गए आंय, और बओर के पूत बिलाम की गैल पे चलत आंय; जीने अधरम की मजूरी हां प्यारो जानो हतो। परन्त ऊ ए अपने अधरम के काजें फटकार सुनने पड़ी, इते लौ कि मान्सन की भाषा न बोलबेवारी गदईया ने मान्सन के बोल से ऊ आगमवकता हां सिर्रीपन से हटको। जे जनें सूके कुंआ, और आंधी के उड़ाए भए बादल आंय, इन के लाने भारी बड़ो अंधयारो ठैराओ गओ आय। बे बेकार की घमण्ड की बातें कर कर के ओछे कामन से, उन मान्सन हां देयां की अभलाखा में फंसा लेत आंय, जौन हिराए भए में से अबै कड़ई रए आंय। बे उन हां छूटो भओ होबे कौ कौल तो देत आंय, परन्त बे खुद सड़ी आदतन के चाकर आंय, कायसे जौन मान्स जीसे हार जात आय, बो ऊकौ चाकर बन जात आय। जब बे पिरभु और तारन करबेवारे यीशु मसीह की पैचान द्वारा संसार की कुल भांत की सड़ाहट से बच कड़े, और फिन उन में फंस के हार गए, तो उन की पाछें की हालत पेंला से बुरई होत आय। धरम की साजी गैल के न जानबे पे उन हां दई गई पवित्तर हुकम से फिर जाबे से भलो तो जौ होतो, कि बे ऊ ए न जानते, उन पे जा कहावत सई बैठत आय। कूकर अपनी छांट कुदाऊं लौटत और सपराई भई सुंगरिया कीचड़ में लोटबे के लाने लौट जात आय। हे प्यारे भईया हरौ, अब मैं तुम हां दूसरी चिठिया लिख रओ आंव, मैं ने दोई चिठियन में सुमरन कराके तुमाए सुद्ध हिये हां उस्केरो आय। तुम उन बातन हां, जौन पवित्तर आगमवकतन ने पेंला से कई आंय और पिरभु, और तारन करबेवारे के ऊ हुकम हां सुमरन करो, जौन तुमाए चेलन के द्वारा दई गई हती। और पेंला तुम जौ जान लेओ, कि अखीर के दिना में ठट्ठा उड़ाबेवारे आ हैं, जौन अपनी अभलाखा के अनसार चल हैं। बे कै हैं, कि ऊके आबे कौ कौल कां गओ? कायसे जब से हमाए पुरखा मर गए, सबई कछु ऊं सई आय, जैसो संसार के शुरू से हतो? बे ठेंकें जौ बिसर गए, कि परमेसुर के बचन के द्वारा आकास जुग जुग से बनो भओ और धरती सोई पानू में से बनी और पानू में रमी आय। ऐई से ऊ जुग कौ संसार पानू में डूब के नास हो गओ। पर अबै के आकास और धरती ओई बचन के द्वारा आगी में जलाए जाबे के लाने धरे गए आंय; बे बिन भक्तीवारे मान्सन के न्याय और नास के दिना लौ ऐसई धरे जै हैं। हे प्यारे भईया हरौ, जा बात तुम से छिपी न रैबे कि पिरभु के इते एक दिना हजार बरसन बिरोबर आय, और हजार बरस एक दिना बिरोबर आय। पिरभु अपने कौल के विषय में अबेर नईं करत, जैसो कि कितेक जनें समजत आंय; बो नईं चाहत कि कौनऊं मान्स नास होबे; परन्त जौ कि सबई हां हिया बदलबे कौ मौका मिले। परन्त पिरभु कौ दिन भड़या घांई आ जै है, ऊ दिन आकास बड़ी हड़बड़ाहट की गरजन से जात रै है, सबरी चीजें बिलात तांती होकें पिघल जै हैं, धरती और ऊ पे के काम जल जें हैं। जब जे सबई बस्तें, ई भांत से नास होबेवारी आंय, तो तुम हां पवित्तर चालचलन और भक्ती में कैसो जीवन गुजारो चईये। परमेसुर के ऊ दिना की बाट तक के ऊके झट्टईं आबे के लाने कैसी कोसिस करो चईये? ऊ दिना आकास आगी से जल के नास हो जै है, और चीजें बस्तें बिलात तांती होकें पिघल जें हैं। ऊके कौल अनसार हम एक नये आकास और धरती की बाट तकत आंय, जी में धारमिकता बास कर है। ई लाने हे प्यारे भईया हरौ, जब कि तुम इन बातन की बाट तकत आव तो कोसिस करो, कि तुम सान्ति से ऊके सामूं बिना दाग और बिना लांछन ठैरो। हमाए पिरभु यीशु के धीरज हां तारन समजो, जैसो हमाए प्यारे भईया पौलुस ने सोई ऊ समज के अनसार जौन ऊ ए मिली आय, तुम हां लिखो आय। ऊ ने अपनी सबरी चिठियन में सोई इन बातन कौ बयान करो आय उन में कछु बातें ऐसी आंय, जिन कौ समजबौ कठन आय, मूरख और चंचल मान्स उन के मतलब को पवित्तर पोथी की और बातन की भांत ऐंचतान के अपने ई नास कौ काज बनात आंय। ई लाने हे प्यारे भईया हरौ, तुम और पेंलई से इन बात हां जान के हुसयार रओ, कि अधरम जन की गलती में फंस के अपने पक्के बिसवास हां कऊं हिरा न दो। परन्त हमाए पिरभु, और तारन करबेवारे यीशु मसीह के अनुग्रह और सान्ति में बढ़त जाओ। ओई की मईमां अबै सोई होबै, और जुगानुजुग होत रैबे। आमीन। जीवन दैबेवारो बचन जौन पेंला से आय, जी की बातें हम ने सुनी, और जीहां अपनी आंखन से तको, जीहां हम ने खुल के हेरो; और हाथन के छिओ। (बो जीवनदाता परगट भओ, और हम ने ऊहां तको, और ऐसो कैत आंय, कि उन से ध्यान धरे से तरन तारन होत आय; बे पिता परमेसुर के संग्गै रैत हते): जो कछु हम ने तको और सुनो बेई बातें तुम हां बतात आंय, कि तुम सोई इन बातन में बिसवास धरौ; कि हमाओ जोड़ परमेसुर, और उनके बेटा यीशु मसीह से आय। जे सबरी बातें हम ईसे लिखत आंय, कि हम हां और खुसी होबै। जौन बतकाओ हम ने उनके मों से सुनो, ओई तुम हां बतात आंय, कि परमेसुर ज्योत आंय; उन में अंधयारो बिलकुल नईंयां। हम कैबें, कि उनके संग्गै हमाओ अच्छो सम्बन्ध आय, और फिन अंधियारे में चलबें, तो हम लबरा कहा हैं; और हमाई बातन में कछु सत्त नईंयां। जैसे बे ज्योत में रैत आंय, ऊंसई हम सोई ज्योत में चलबें, तो हम एक दूजे से मिलके रैबें; और पिरभु यीशु मसीह के रक्त के जस से हमाए पाप कट जै हैं। हम कैबें, कि हम ने कभऊं कोई पाप नईं करो, तो अपने हां धोका देत आंय: और हम में कछु सत्त नईंयां। परन्त जब हम अपने पापन हां मानें, तो बे हमाए पापन हां क्षिमा कर हैं, और हम हां सबरी अधरम की बातन से सुद्ध करबे में सांचे आंय। हम कैबें कि हम ने कछु पाप नईं करे, तो उन हां झूठो ठहरात आंय, और उनके बचन को सत्त हम में नईंयां। हे मोरे लड़को, मैंने जे बातें तुम हां ईसे लिखी आंय, कि तुम ठैकें पाप न करो; और तुम से कछु पाप हो जाबै, तो ध्यान धरो कि परमेसुर लौ हमाओ एक ध्यान धरबेवारो यीशु मसीह आय। पिरभु यीशु मसीह में ही हमाए पापन की क्षिमा आय; और हमाए अकेले नईं, परन्त संसार के सबरे जनन की। जब हम उनकी अग्यां मान हैं, तो पता पड़ है कि हम उनकी कई करत आंय। जो कौनऊं ऐसो कैत आय, कि मैं उनकी कई करत आंव, और उनकी अग्यां नईं मानत, तो बो लबरा आय; और ऊ की बातन में कछु सत्त नईंयां। परन्त जो कोनऊं उनकी कई करबे, बौ सांचई परमेसुर से प्रेम करत आय; ऐसो करबे से पता चलत आय, कि हम उनके आंय। जो कोनऊं जौ कैत आय, कि मैं उनकी कई करत आंव, तो ऊहां उनकी सी गैल पै चलो चईये। प्यारे भईया हरौ, मैं तुम हां कोई नई अग्यां नईं लिख रओ, परन्त बोई पुरानी अग्यां जौन पेंला से तुम हां मिली हती; जौन तुमने पेंला सुनो हतो। अब मैं तुम हां नई अग्यां लिखत आंव; जौन परमेसुर ने तुम हां मानबे हां कहो आय; कायसे तुमाए हिये को अंधियारो मिटत जात आय, और सच्ची ज्योत अब तुम में चमकन लगी आय। जो कोनऊ ऐंसो कैत आय, कि मैं ज्योत में आंव; और अपने भईया से अदावट धरें आय, बो अबै लौ अंधियारे में आय। जो कोनऊ अपने भईया से प्रेम धरत आय, ज्योत में बनो रैत आय, और ऊ को कछु बुरओ न हुईये। परन्त जौन अपने भईया से अदावट धरत आय, बो मानो अंधियारे में आय, और ऊहां जौ पता नईंया कि कौन सी गैल धरें आय, कायसे अंधियारे में ऊहां कछु नईं सूझत। हे लड़कावारे, मैं तुम हां ईसे लिखत आंव, कायसे उनके नाओं से तुमाए पापन की क्षिमा भई। बड़े बूढ़े जनो, मैं तुम हां ईसे लिखत आंव, कि जौन संसार के पेंला से हते उन हां तुमने मानो आय, जुआनो, मैंने तुम हां ईसे लिखो आय, कि परमेसुर की बातन हां मानो कायसे तुम ऊ दुष्ट छलिया से जीते आव। बड़े बूढ़े जनो, मैं तुम हां ईसे लिखत आंव, कि जौन संसार में पेंला से हते तुम उन हां जानत आव, जुआनो, मैंने तुम हां ईसे लिखो आय, कि तुम बली बनो, और परमेसुर कौ बचन तुम में बनो रैत आय, कायसे तुम ऊ दुष्ट छलिया से जीते आव। तुम ई संसार और संसार की बस्तन से प्रेम न धरो, कायसे जौन संसार से प्रेम धरत आय, ऊ में परमेसुर के लाने प्रेम नईं रैत। कायसे जो कछु संसार में आय, जानो कि मान्स की अभलाखा, आंखन की अभलाखा, और अपनी कमाई पै घमण्ड, जे सबरी बातें परमेसुर के मन की नईंयां, परन्त संसार की बातें आंय। संसार और ई संसार की अभलाखा इतई मिट जै है, परन्त जौन परमेसुर की कई करत आय, बो हमेसा बनो रै है। हे लड़कावारे, सुनो जा आखरी बेरा आय, जैसो तुम ने सुनो आय, यीशु मसीह को बिरोधी आबेवारो आय, ऐसो लगत आय कि उनके बिरोधी अबै भी ठांड़े हो रय आंय; ऐई से पता लगत आय, कि जे आखरी दिना आंय। बे हम में से निकले हते परन्त सांचई हम में के नईं हते; कायसे हमाए बीच के होते, तो हमाए संग्गै रैते, उन के निकल जाबे से पता पड़त आय कि बे हमाए बीच के न हते। हमें तो पवित्तर परमेसुर ने न्यारो करो आय, और जे सबरी बातन हां तुम जानत आव। मैंने जे बातें तुम हां जौ सोच के नईं लिखीं, कि तुम उन हां नईं चीनत, परन्त ईसे लिखो, कि सांचे परमेसुर से लाबरी झूठी बातें नईं कड़तीं। लबरा को आय? बो जौन यीशु मसीह हां संसार के मान्सन के पाप से छुड़ाबेवारो नईं मानत; बो यीशु मसीह को बिरोधी आय, परमेसुर जौन पिता आय और यीशु मसीह जौन उनके बेटा आंय उन हां नईं मानत। जो बेटा हां नईं मानत उन लौ परमेसुर पिता सोई नईंयां, परन्त जौन बेटा हां मानत आय, पिता परमेसुर ऊके संग्गै रैत आय। जो कछु तुम ने पैली बेरा से सुनो आय ओई हां मानो, कायसे जौन बातें तुम ने पेंला सुनके अपने हिये में जमा लईं, तो तुम यीशु मसीह जौन बेटा आय और परमेसुर जौन पिता आय उन में बने रै हौ। जी की उन ने हमसे कौल करो हतो बो बैकुण्ड को वास आय। जे बातें मैंने उनके लाने कई आंय, जौन तुम हां सांची गैल से बिलोरत आंय। जैसे उन ने तुम हां अपनाओ, और जिन में तुम बने आव; सो अब कोई हां तुम हां और नईं चिताने, कायसे बे तो आपऊ तुम हां सबरी बातें बतात आंय; कोऊ सांचो आय लबरा नईंयां, सो जौन बातें उन ने बताई उन हां मानो। सो लड़को, उनकजनों के मानो, कायसे जब बे फिन आहें, तो हम बिना खटके उनके सामूं ठांड़े हुईयें। कायसे जो तुम मानत आव, कि बे सांचे आंय, तो तुम जौ सोई जानत आव, कि जौन धरम की गैल धरै आय, बो मानो उनईं को आय। हेरो, परमेसुर पिता ने हम से कैसो प्रेम करो, कि हम परमेसुर के लड़का बिटिया कहाय, और हम आंय सोऊ: ऐईसे संसार हम हां नईं चीनत, कायसे संसार के मान्सन ने उन हां सोई नईं मानो। प्यारे भईया हरौ, अबै तो हम परमेसुर के लड़का बिटिया कहात आंय, और अबै जौ पता नईंयां, कि हम और का हुईयें! इतनो पता आय, कि जब बे फिन के आहें तो हम सोई उन घांई हो जै हैं, और उन हां उनके सांचे रूप में तक हैं। जिन हां प्रभु यीशु मसीह ऐसी आस आय, बे उन जैसे पवित्तर रैत आंय। जौन पाप करत आय, बो परमेसुर के नैम हां तोड़त आय; और पाप नैम के तोड़बे से होत आय। तुम हां तो पता आय, कि बे हमाए पापन हां हरबे आए; उन में बिलकुल पाप न हतो। जौन अपने मन से उन हां मानत आय, बो जनो पाप नईं करत: जौन पाप करत आय, मानो ऊ ने न तो उन हां तको आय, और न उन हां मानत आय। लड़को, कोऊ के भरमाबे की बातन में न अईयो; जौन मान्स धरम के काम करत आय, ओई उन जैसो धरमी आय। जौन जनो पाप करत आय, बो मानो शैतान छलिया के उसकाय बुरय काम करत आय, कायसे शैतान छलिया पेंला से पाप करबेवारो आय: परन्त परमेसुर के बेटा यीशु मसीह ईसे परगट भए, कि शैतान छलिया के कामन हां खतम करें। जौन परमेसुर हां मानत आंय बो पाप नईं करत; कायसे परमेसुर की आत्मा ऊ में बनी रैत आय: और बो जनो पाप नईं कर सकत, कायसे बो सांचे मन से उन हां मानत आय। ऐसई तो पता पड़त आय कि कौन शैतान छलिया, और कौन परमेसुर के मानबेवारे आंय; जौन धरम की गैल नईं चलत, बो परमेसुर को मानबेवारे नईंयां, और न ऊ जनो, जौन अपने भईया से प्रेम नईं करत। कायसे जौन सन्देसो तुम ने पेंला से सुनो, बो ऐसो आय, कि हम एक दूसरे से प्रेम राखें। कैन घांई नईं करियो जौन दुष्ट हतो, जीने अपने भईया हां मार डालो: और काय हां मार डालो? कायसे ऊ को भईया धरम की गैल चलत हतो, और ऊ दुष्टी हतो। भईया हरौ, हटी संसार के मान्स तुम से अदावट धरें तो अचम्भा न करियो। हम जौ मानत आंय, कि हमाओ नरक कुण्ड से कड़के मानो तरन तारन भओ आय; कायसे कि हम भईयन से प्रेम करत आंय: जौन प्रेम नईं करत, बो मानो नरक कुण्ड में डलो आय। जो कोनऊ अपने भईया से अदावट धरत आय, बो हत्यारा आय; तुम हां तो पता आय, कि कोई हत्यारे को तरन तारन नईं होत। हम ने प्रेम ईमें तको, कि पिरभु यीशु मसीह ने हमाए काजें अपनो जीवन बलदान कर दओ; हम हां सोई भईयन के काजें अपनो बलदान करो चईये। जी लौ संसार में बिलात जायजाद होबै, और बो अपने भईया हां कंगाल देख के तरस न खाबै, तो ऐसे मान्स में परमेसुर को प्रेम नईं रैत। हे लड़को, हम अपने मों की बोली से नईं, परन्त अपने कामन और सत्त से प्रेम करबें। ईसे जौ पता पड़त आय, कि हम सांचे हां जानत आंय; और जी बातन के लाने हमाओ मन न बोले बो नईं करें, जीसे परमेसुर के सामूं ठांड़े होबे की हम हां हिम्मत मिले। कायसे परमेसुर तो हमाए मन से बड़े आंय, और बे सबकछु जानत आंय। प्यारे भईया हरौ, मानो तुमाओ मन तुम हां दोषी न बताबै, तो हम हां परमेसुर के सामूं ठांड़े होबे की हिम्मत होत आय। जा बात सोई आय कि जो कछु हम उनसे बिन्तवारी करत आंय, तो बे हम हां देत आंय; कायसे कि हम उनकी कई करत आंय; और जौन बातें उन हां भाती आंय, उनई हां करत आंय। उनकी अग्या जा आय कि हम उनके बेटा यीशु मसीह हां मानें और जैसो उन ने कई आय सो एक दूजे से प्रेम करें। जो कोनऊं उनकी कई करत आंय, बे एक दूसरे से मिले रैत आंय; और ऊ आत्मा जौन उन ने हम हां दई आय, बो हम हां बतात आय, कि हम उनके संगै संगै बने आंय। भईया हरौ, सबरे मान्सन की बात न मानो: परन्त उनकी बात हां परखो, कि बे बातें परमेसुर से आंय कि नईंयां; कायसे मुतके अगमवकता ई संसार में हो गए आंय। परमेसुर की आत्मा से चलबेवारे हां चीनबे की सबसे बड़ी बात जा आय, कि बौ जनो मानत आय, कि पिरभु यीशु मसीह ने जा देह धरी बा परमेसुर के कय से आय। जौन आत्मा यीशु मसीह हां नईं मानत, बौ उनके बिरोधी की आत्मा आय; और ओई यीशु मसीह को सोई बिरोध करत आय; ऊ आत्मा के लाने तुमने सुनो हतो, कि बो आबेवारो आय: और अब संसार में आय। हे लड़को, तुम परमेसुर के आओ: और तुम ऊ शैतान छलिया से जीते आव; कायसे जौन तुमाए भीतरे आय, बो ऊ छलिया से जौन संसार में आय, बड़ो आय। बे जनें संसार के आंय, ऐईसे संसार जैसो उनको बतकाओ आय; और संसार हां उनको बतकाओ साजो लगत आय। हम तो परमेसुर के जनें आंय, जौन परमेसुर हां नईं चीनत आंय बो हमाई बातन हां नईं सुनत; ऐईसे हम सत्त के जनें और भरम में पड़े जनें हां चीन लेत आंय। प्यारे जनौ, एक दूजे से प्रेम करो; कायसे प्रेम परमेसुर को दओ आय, जो कोनऊं प्रेम करत आय, बो मानो परमेसुर से जन्मो आय; और उन हां मानत आय। जौन प्रेम नईं करत, बो परमेसुर हां नईं चीनत, कायसे कि परमेसुर तो प्रेम आय। परमेसुर ने हम से प्रेम करो, कि उन ने अपने इकलौते बेटा हां संसार में पठै दओ, कि उन में होकें हमाओ तरन तारन होबै। प्रेम ईसे नईं होत, कि हम उन से प्रेम करत आंय; परन्त ई में आय, कि उन ने हम से प्रेम करो; और हमाए पापन की सजा भुगतबे हां अपने बेटा हां पठैओ। प्यारे जनौ, जब परमेसुर हम से ऐसो प्रेम धरें आय, तो हम हां सोई एक दूजे से प्रेम करो चईये। परमेसुर हां कोई मान्स ने कभऊं नईं तको; जब हम एक दूजे से प्रेम करत आंय, तो मानो परमेसुर हमाए भीतर बने रैत आंय; और उनको प्रेम हमाए भीतर भरो रैत आय। ऐई से पता चलत आय, कि हमाओ मन से उनके संग्गै अपनी आत्मा को अंस हमाए भीतर धरो आय। हम ने जौ चीनो आय और हमाई जा गवाह आय, कि परमेसुर ने अपने बेटा यीशु मसीह हां ई संसार को तरन तारन करबे हां पठैओ। जो मान्स जा बात मान लेत आय, कि यीशु मसीह परमेसुर के बेटा आंय; बे परमेसुर हां और परमेसुर उन हां जानत आय। जौन प्रेम परमेसुर हम से करत आय, ऊ प्रेम हम ने जानो आय, और हमाए हिये में बस गओ आय; कि परमेसुर प्रेम आय: और जौन प्रेम करत आय बो परमेसुर में रैत आय, और परमेसुर उन में बने रैत आंय। ऐईसे परमेसुर को प्रेम हम में पूरो भओ आय, कि न्याय के दिना हम हां हियाव होबै; जैसे बे संसार में आंय ऊंसई हम सोई आंय। प्रेम होबै तो डर नईं रैत, कायसे पूरो प्रेम डर हां दूर कर देत आय, कायसे भय से दुख होत आय, जौन भय राखत मानो उन में पूरो प्रेम नईंयां। हम ईसे प्रेम करत आंय, कि उन ने पेंला होकें हम से प्रेम करो। कायसे कोऊ कैबे, कि मैं परमेसुर से प्रेम धरें आंव; और अपने भईया से अदावट धरे; तो ऊ लबरा आय: कायसे जौन अपनी आंखन देखे भईया से प्रेम नईं करे, तो परमेसुर जिन हां ऊ ने कभऊं नईं तको, उनसे कैसे प्रेम धर है। उनसे हम हां जा अग्यां मिली आय, कि जो कोनऊं परमेसुर से प्रेम धरें आय, ऊ अपने भईया से सोई प्रेम कर है। जो कोनऊं जौ बिसवास करत आय कि यीशु ही मसीह आय, बो परमेसुर से पैदा भओ आय और जो कोनऊं पैदा करबेवारे से प्रेम करत आय, बे सोई उन से प्रेम करत आय और उनकी मानत आय। जब हम परमेसुर से प्रेम धरत आंय, और उनकी कई करत आंय, ऐई से हम हां पता आय, कि हम परमेसुर के जन से सोई प्रेम धरें आंय। परमेसुर को प्रेम ऐसो आय, कि हम उनकी कई करें; और उनकी अग्यां कठन नईंयां। कायसे जौन परमेसुर की कई करत आय, बो संसार की बातन में नईं पड़त, कायसे ऊ ने संसार जैसी नईं करी कायसे बौ अपने बिसवास में पक्को कड़ो। संसार की बातन पै जै पाबेवारो को आय? ओई जौन बिसवास धरें आय, कि यीशु मसीह परमेसुर को बेटा आय। यीशु मसीह ई संसार में मान्स होकें आए, बे मानो पानू से नईं परन्त पानू और रकत दोई से धरती पै आए। कायसे जा बात आत्मा से भई; और आत्मा की बात सांची होत आय। ऐसी बात आत्मा, पानू और रकत; तीनईं संग्गै आंय और तीनईं एकई सी कैत आंय। जब हम मान्सन की कई मानत आंय, तो परमेसुर की कई तो ईसे बढ़के होत आय; जौन बात उन ने अपने बेटा यीशु मसीह के लाने कई आंय। जौन परमेसुर के बेटा पै बिसवास धरें आय, कि जा सांची आय; जीने परमेसुर की कई गई मानी, ऊने मानो उन हां झूठो मानो; जौन उन ने अपने बेटा के लाने कई। बो ऐसी आय, कि परमेसुर ने हम हां तरन तारन की कई: जौन उनके बेटा यीशु मसीह में हम हां मिलो। जीने बेटा पै बिसवास धरो, बे परलोक के वासी भए, जीने परमेसुर के बेटा हां नईं मानो उन हां परलोक नईं मिलो। मैंने ईसे तुम हां, जा चिठिया लिखी कायसे तुम परमेसुर के बेटा पै बिसवास धरै आव; कायसे ऐसो लिखो आय कि मानो तुमाओ परलोक वास पक्को आय। अब हमाई उन से बिन्तवारी करबे की मन्सा होत आय; कि उनकी कई जैसो हम मांगें तो बे करत आंय। जब हम हां ऐसो पता आय, कि जो कछु हम मांगें तो बे देत आंय, तो हम जौ कैत आंय, कि हम ने जौन मांगो सो पाओ। कोऊ अपने भईया हां ऐसो पाप करत तकै, जी पाप से नरक कुण्ड हां नईं जात तो ऊहां परलोक मिल है, कायसे पाप ऐसो सोई होत आय जीसे परलोक नईं मिलत, ऐसे पाप के लाने बिन्तवारी करबे हां मैं नईं कैत। सबरे अधरम तो पाप आंय, परन्त कछु ऐसे पाप सोई आंय, जीके करे से परलोक वास नईं छूटत। हम हां पता आय, कि जौन परमेसुर मैं बिसवास धरें आय, बो जनो पाप करतई नईंयां; कायसे परमेसुर ऊहां बचाए रैत आंय, और ऊ शैतान छलिया उन हां छी लौ नईं पात। हम हां पता आय, कि हम परमेसुर पै बिसवास धरें आंय, और पूरे संसार के जनें शैतान छलिया की कई करत आंय। कायसे हम हां पता आय, कि परमेसुर के बेटा ई धरती पै आ गए आंय, और उन ने हम हां ऐसी सीख दई आय, कि हम उन सांचे जनें को चीनें, और उनईं के संग्गै बने रैबें; बे सांचे परमेसुर आंय और उन में होकें बैकुण्ड वास मिलत आय। हे लड़को, मूरतन से बचे रईयो। मैं सियाने ने ऊ निबरी भई बईयरें और उनके लड़कावारन हां लिखो, जिन हां परमेसुर सांचो प्रेम धरत आय, ई लाने कि हम ने उनकी सांची बातन हां मानो आय, और उन हां पक्को पकड़ें आय, जौन बातें पक्की आंय। मैं अकेले नईं, पर सबरे जनें जौन इन सांची बातन हां मानत आंय बे सोई प्रेम धर हैं। परमेसुर जौन पिता आय, और पिता के बेटा यीशु मसीह की तुम पे दया, किरपा, सान्ति, सत्त, और प्रेम हमाए संग्गै बने रै हैं। मोहां बिलात साजो लगो, कि तुमाए लड़कावारे उन अग्यां हां, जौन पिता परमेसुर से मिली आय उन हां सांचे मन से मानत आंय। अब हे बईयर, मैं कोई नई बात नईं कैत, परन्त बाई जौन पेंला से कई, ऐसो लिखत आंव; कि तुम एक दूजे से प्रेम धरो। प्रेम ऐसो, कि उन ने जौन अग्यां दईं आय, उन हां जिन हां हम ने पेंला से जानो आय उन पै चलो। कायसे बिलात जनें बिलोरबेवारे ऐसो कैत फिर रए, कि यीशु मसीह मान्स होकें नईं आए, ई धरती पे ऐसे जनें मसीह के बिरोधी आंय। तुम चौकन्नें रओ; कायसे जौन काम हमने करो आय, ऊहां न बिलोरियो, जीसे ऊको पूरो मजा तुम हां मिले। जौन आगे हां यीशु मसीह की सीख पै नईं चलत, मानो ऊ लौ परमेसुर नईंयां, परन्त जौन उनकी सीख पै चलत आंय, बौ मानो परमेसुर पिता और उनके बेटा यीशु मसीह में पक्को बनो रैत आय। कोई तुम लौ आबै, और जा सीख न देबे, तो ऊहां अपने घर में न आन दईयो, और न नमस्कार करियो। कायसे जौन ऐसे मान्स हां नमस्कार करत आय, बो मानो ऊके बुरे करमन में मिलो आय। मोय तुम हां और बिलात बातें लिखबे हां आंय, परन्त कागज और सियाही से नईं लिखो चाहत; मोरी मन्सा आय, कि तुम लौ आओं और आमूं सामूं बतकाओ करों, जीसे मोरो और तुमाओ मन भरै। ई मण्डली के जनें तुम हां नमस्कार कैत आंय। मैं सियाने ने जा चिठिया लिखी प्यारे गयुस के नाओं, जीहां मैं मन से चाहत आंव। प्यारे भईया, मोरी जा बिन्तवारी आय; जैसे तें हिये की बातन में बढ़ रओ आय, ऊं सई सबरी बातन में बढ़े, और भलो चंगौ बनो रैबे। जब भईयन ने इते आके बताओ, कि तें सत्त पे चलत आय, तो मोहां भलो लगो। मोहां ईसे बढ़के कोऊ भलो नईं लगत, कि मोरे लड़कावारे सत्त पे चलत आंय। प्यारे भईया, तें परदेसी भईयन से अच्छे बिसवासी घांई सम्बन्ध धरें आय। उन ने इते की मण्डली के सामूं तोरे प्रेम की कई, जौन मोहां भली लगी, तें उन हां ऊंसई विदा सोई करियो। कायसे बे ऊ नाओं के लाने कड़े आंय, और अन्य जातियन से कछु नईं लेत। जौन हमाए संग्गै उन सांची बातन हां मानत आंय, उनको अपने बीच मान करियो। दियुत्रिफेस जौन बड़ो बनत आय, हमाई कई नईं करत। जब मैं आहों, तो ऊके कामन की याद दिला हों, और बता हों कि तें हम हां काए बुरओ कैत है; और इतईं नईं दूसरे भईयन हां बिरादरी में लैबे से मना करत आय; और दूसरन हां लैबे से हटकत आय, और बिरादरी से निकाल सोई देत आय। प्यारे जनों, बुराई के नईं, परन्त भलाई के संग्गी बनो, कायसे भलाई करबेवारो मानो परमेसुर हां मानत आय; और बुरो करबेवारे मानो उन हां नईंर् मानत। देमेत्रियुस के लाने सबरन ने बताओ और हम सोई कैत आंय; और तोहां पता आय कि हम लाबरी नईं कैत, कि बो सांचो जनो आय। मोय तोहां और लिखने हतो; परन्त सियाही और कलम से नईं लिखो चाहत। मोरी मन्सा आय कि झट्टई तुम लौ आओं तो अपन आमूं सामूं बतकाओ करबी; तुम साजे रओ। इते के भईया तुम हां नमस्कार कैत आंय; उते के सबरे भईयन हां मोरो नमस्कार कईयो। चिठिया लिखी यहूदा ने जौन यीशु मसीह को सेवक और याकूब को भईया आय, उन हां जौन परमेसुर के प्यारे और पिरभु यीशु मसीह में बचाय गए और बुलाए गए आंय। तुम हां दया, सान्ति और प्रेम भरपूरी से मिलत रैबे। प्यारे जनो, मैंने जब तुम हां मुक्ति जौन हम सबन हां मिली ईके बारे में खुलके लिखो, तो मैंने सोची के जिन बातन पै तुमने बिसवास करो आय खुल के लिखो, कि तुम ऊ बिसवास की बातन हां मानो। कायसे कछु जनें चुपके से हमाए संग्गै जुड़ गए आंय, जिन हां पैले से लिखो आय कि उन हां दण्ड दओ जाबै, कायसे बे सच्चे नईयां, और परमेसुर की दया हां छोड़ बुरय कामन में लगे रैत आंय, और हमाए महाबली मालक और पिरभु यीशु मसीह हां नईं मानत। तुम हां सबरी बातें एक बेर बताई आंय, परन्त फिन के बताओ चाहत आंव, कि परमेसुर ने एक बिरादरी के लोगन हां मिश्र देस से छुड़ाओ, परन्त जिन ने उनकी नईं मानी उन हां मार डालो। जिन सरगदूतन ने अपनो काज ठीक ठाक से नईं करो और सरग छोड़ दओ, उन हां ऊ न्याव के दिना के लाने अंधियारे में बांध के धरो आय। जैसे सदोम और अमोरा और उनके ऐंगर के नगर, परमेसुर हां छोड़ के दूसरे हां मानन लगे हते और परतिरिया के पाछें पड़े हते, उन हां आग में बार दओ हम उन से सीख लेबें। ऊंसई जे सर्रोटीवारे जो अपनी देह हां अशुद्ध करबेवारे, और अपने से बड़ों हां बुरऔ कैत आंय। जब महाबली सरगदूत मीकाईल ने, शैतान छलिया से मूसा की मरी देह के लाने पूछो, तो ऊहां कछु बुरओ न कहो, परन्त जा कई कि परमेसुर तोहां डांटे। जे जिन बातन को समझत नईंया, उन हां बुरो कैत आंय; और जिन हां दोस जैसो मानत आंय, उनसे अपने आप हां मानो मारत आंय। उन पे श्राप पड़े, कायसे बे कैन जैसी चाल चले, और तनक से पईसन के लाने बिलाम जैसे कुटे भए, और कोरह के जैसो बिरोध करके मारे गए। जे तुमाई प्रेम सभा में तुमाए संग्गै खात पियत आंय, और जैसे समुन्दर में चट्टान दबी रैत आय, ऊंसई अपने पेट के लाने कमाई करबेवारे रखनवारे आंय; जौन मानो बिना जल के बादरे घांई आंय, जिन हां बैहर उड़ा देत; और पतझड़ में जैसो पेड़ो हो जात, जैसे मर गओ होबै, और बे ऐसे आंय जैसे जड़ से पट गए होबें। बे समुन्दर में जैसे हिलकोरे आत आंय, और उनको फेन मानो उन हां सरम आबेवारी बातें आंय, बे मानो हिलबेवारे तारों जैसे आंय, इनहां नरक के अंधयारे में डालो जै है। और हनोक ने जो आदम से सांती पुस्त में हतो, इन जनन के लाने ऐसो कओ, कि तकौ, पिरभु यीशु मसीह अपने पवित्तर करे मान्सन के संग्गै आ है। और बो सबरे मान्सन को न्याव कर है, और सब बुरे काम करबे और हमाए लाने बुरी बातें कैबे वारन हां दोषी ठहराएं। इनहां कोऊ बात में संतोस नईंयां, जे कुड़कुड़ात, और अपनी बुरई मन्सा से काम करत आंय; और बिलात बड़वाई की बातें करत आंय; और फायदे के लाने मों पै मान्सन की बड़वाई करत आंय। प्यारे भईया हरौ, तुम उन बातन पै ध्यान धरौ; जो पिरभु यीशु मसीह के बारई चेलन ने कईं। बे कहत हते, कि आबेवारे दिना मैं ऐसे मान्स हुईयें जौन धरम की गैल न चल हैं, परन्त धरम की बातन की हंसी कर हैं। ऐसे जन आत्मा की बात पै नईं परन्त अपने मन पै चलत आंय, और भईयन में फूट डालत आंय। प्यारे भईया हरौ, तुम ने जौन बिसवास धरो आय ऊ में पक्के बनो और मन से बिन्तवारी करत रओ। और परमेसुर से प्रेम करत रओ; और पिरभु यीशु मसीह से हमाओ तरन तारन हुईये जा बात मन में बसाएं रओ। और जौन मान्स इन बातन पै संका करत उन पै दया करके जे बातें बतात रओ। और बहुतई जन हां नरक की आग से खींच लेओ, और बहुतई जन हां नरक के मों से बचावे की सोचो; और जौन जने पापन में भिड़ाने आंय उनके उन्ना हां न छियो। जौन तुम हां बिलुरबे से बचा लै है, और पाप से धोके उजरो कर लै है, अपने सरग लोक के तेज में। उन महान महाबली परमेसुर जिन ने हमाओ तरन तारन करो, उनको जस, मान और बल हमाए पिरभु यीशु मसीह में जैसो पेंला हतो और अबै आय, और जुगानुजुग सोई होत रैबे। आमीन। यीशु मसीह का प्रकाशितवाक्य जौन उन हां परमेसुर ने ईसे दओ, कि अपने जन हां बे बातें, जौन जल्दी होबेबारी आंय, दिखाबें: और ऊ ने अपने सरगदूत हां पठै के अपने दास यूहन्ना हां बताओ। यूहन्ना ने परमेसुर को बचन और पिरभु यीशु ने जौन करो, जीहां उन ने तको हतो ऊ की गवाही दई। ऊ मान्स धन्न आय जो इन अगमवानी की बातन हां पढ़त आय, और जौन सुनत और इन में लिखी बातन हां मानत आंय, कायसे अब बेरा बिलात जल्दी आबेवारी आय। यूहन्ना ने लिखो आसिया की सात मण्डली हां कि यीशु मसीह जौन अबै है, और जो हते, और जौन आबेवालो आय; और उन सात आत्माओं की कोद से, जौन ऊके सिंहासन के सामूं हैं। और यीशु मसीह की कोद से, जौन सच्चे गवाह और मरे भयन में से जी जाबेवाले में पहलौठा, और संसार के राजन के स्वामी आंय, तुम हां सान्ति और दया मिलत रए: जो हम से प्रेम रखत आय, और जीने अपने खून के द्वारा हम हां पापन से छुड़ाओ आय। और हम हां एक राज्य और अपने बाप परमेसुर के लाने याजक भी बना दओ; उनको जस और बड़े काज हमेसा बने रैबें। आमीन। तको, ऊ बादरन के संग्गै आबेवारे आय; और सबरे जनें उन हां तक हैं, और जिन ने उन हां पसुरिया में चाक दओ हतो, बे भी उन हां तक हैं, और संसार के सबरे कुल उन के कारन छाती पीट हैं। हओ। आमीन। पिरभु जौन परमेसुर हते, और जौन आबेवारे आंय; जौन महाबली आय: ऐसो कहत आय, कि मैं पेंला से आंव और अन्त लौ रै हों। मैं यूहन्ना जौन तुमाओ भईया, और यीशु मसीह के लाने मैंने जौन दुख तुमाए संग्गै सहो आय, और परमेसुर कौ बचन, और यीशु की गवाही के कारन पतमुस टापू में हतो। एक दिना परमेसुर ने मोरी आत्मा हां लओ, और मैंने अपने पछारें तुरही जैसी बड़े जोर की आवाज सुनी। कि जो कछु तें हेरत आय, उन सबरी बातन हां एक पोथी में लिख के सातई मण्डली हां पठै दे, जैसे इफीसुस, स्मुरना, पिरगमुन, थूआतीरा, सरदीस, फिलदेलफिया और लौदीकिया में। मैंने ऊहां जौन मोय से बातें कर रओ हतो; तकबे के लाने अपनों मों फेरो; तो उते सोने की सात दीवटें तकीं। और उन दीवटों के बीच में पिरभू यीशु मसीह जैसे एक मान्स हां तको, जो गोड़ों लौ उन्ना पैरें, और छाती पै खीब चमचमात पट्टा बांधे हतो। ऊके मूंड़ के बाल सफेद पाला जैसे उजरे हते; और ऊ की आंखें आग की लपटें जैसी हतीं। ऊके गोड़े बढ़िया पीतल जैसे हते जैसे अबई भट्टी में से कड़े होबें; और उनकी बोली पानू की धारा के बोल जैसी हती। और ऊ अपने हाथ में सात तारे लएं हतो: और ऊके मों से मानो तेज तलवार जैसी निकलत हती; और ऊ को मों ऐसो चमकत हतो, जैसे सूरज कड़ी धूप में चमकत आय। जब मैं ने उन हां तको, तो ऊके गोड़े में मुरदा जैसो गिर पड़ो और ऊ ने मोपे अपनो दाहिनो हाथ धरके कई, कि न डर; मैं पेंला और अन्त लौ रैबेवारो और जीयत आंव। मैं मर गओ हतो, और अब हेर; मैं जुगजुग लौ जीयत आंव; और मृत्यु और अधोलोक जिते मरे भय रैत आंय ऊ की कुंजी मोरे ऐंगर आंय। ई लाने जो तेंने तको आय और जो हो रओ आय; और जो ईके बाद होबेवारो आय, उन सब हां लिख ले। यानी उन सात तारों हां जौन तेंने मोरे दाएं हाथ में तके हते, और उन सात सोने की दीवटों कौ का मतलब आय: बे सात तारे सात मण्डली के दूत आंय, और बे सात दीवटें सात मण्डली आंय। इफिसुस की मण्डली के दूत हां ऐसो लिखो, कि, जौन सात तारे अपने दाएं हाथ में लय हैं, और सोने की सात दीवटों के बीच में फिरत आय, बो जौ कैत आय। कि तोरे कामन हां, और पूरी मेहनत, और तोरो धीरज जानत आंव; और जौ भी कि तें बुरय लोगन हां नईं चाहत; और जौन अपने आप हां प्रेरित कहत आंय, पर हैं नईंयां, उन हां तेंने परख के लबरा पाओ। तें धीरज धरत आय, और मोरे नाओं के लाने दुख उठात उठात थकत नईंयां। पर मोहां तोसें जौ कहने आय कि तेंने पेंला जैसो प्रेम छोड़ दओ आय। सो अब चेत जा, कि तें किन बातन में गिरो और फिन से बेई काज कर जौन तें पेंला करत हतो; कायसे तें पेंला जैसे काज न कर है, तो मैं तोरे ऐंगर आहों और तोरी दीवट हां उते से हटा देंहों। पर तो में एक बात साजी आय, कि तें नीकुलइयों के काजन हां बुरो मानत आय, जिन हां मैं भी नईं चाहत आंव। जीके कान होबें, बे सुन लेबें कि आत्मा मण्डलियन से का कैत आय: कि जो जय पाबै, मैं ऊहां जीवन दैबेवारे पेड़ में से जो परमेसुर के सरगलोक में लगो आय, ऊके फल खैबे हां दै हों। और स्मुरना की मण्डली के दूत हां ऐसो लिखो, कि, जौन पेंला और अन्तिम आय; जो मर गओ हतो और अब जी गओ आय, बो जौ कहत आय। कि मैं तोरो दुख और तोरी गरीबी हां जानत आंव; (परन्त तें धनी आय); और जौन अपने हां यहूदी कैत आंय पर हैं नईंयां, और शैतान छलिया की बातन में लगे आंय, मोहां जौ सब पता आय। जौन दुख तोहां झेलबे पड़ हैं, उन से न डरा: कायसे शैतान छलिया तुम में से कछु लोगन हां जेहल में डलवा है कि तुमाओ बिसवास परखो जाबै; और तुम हां दस दिना लौ दुख उठाने पड़ है: मरबे लौ बिसवास धर; तो मैं तुम हां सरग को जीवन दै हों। जीके कान होबें, बो सुन लेबें कि आत्मा मण्डलियन से का कैत आय: कि जौन इन बातन में पक्को बनो रै है ऊहां दूसरी मृत्यु से कछु न हुईये। और पिरगमुन की मण्डली के दूत हां ऐसो लिखो, कि, जीके ऐंगर चोखी और दोधारी तलवार आय, बो जौ कैत आय। कि तें उते रैत आय जिते शैतान छलिया कौ सिंहासन आय, पर मोरे नाओं पै बिसवास धरे रैत आय; और मोपे बिसवास करबे से उन दिना में पक्को रओ, जब मोरो सच्चो और पक्को गवाह अन्तिपास, तुमाए बीच मारो गओ। पर मोय तोसे कछु बातें कहने आय, कायसे तोरे इते कछु तो ऐसे आंय, जो बिलाम की शिक्षा को मानत आंय, जीने बालाक हां इस्राएली लोगन के सामूं ठोकर कौ कारन रखबो सिखाओ, कि मूरतन हां चढ़ाओ भओ भोजन खाबें, और व्यभिचार करें। ऊं सई तोरे इते कछु तो ऐसे आंय, जो नीकुलइयों की सिखाई बातन हां मानत आंय। सो अब इन बातन हां छोड़ दो, नईं तो मैं तोरे ऐंगर आके, ऐसे मान्सन से लड़हों और अपने मों के बचन से उनहां ऐसो काट हों जैसे तलवार काटत आय। जीके कान होबें, बो सुन लेबें कि आत्मा मण्डलियन से का कैत आय; जौन इन बातन हां मान है, ऊहां मैं गुप्त मन्ना में से दै हों; और ऊहां एक सफेद पथरा सोई दै हों, और ऊ पथरा पै एक नाओं लिखो हुईये, जीहां केवल बे जान हैं जीहां बो मिल है। और थुआतीरा की मण्डली के दूत हां ऐसो लिखो, कि, परमेसुर को पूत जी की आंखें आगी की लपटें जैसी आंय, और जीके गोड़े उम्दा पीतल जैसे आंय, ऐसो कैत आय। कि मैं तोरे सबरे काज, तोरे प्रेम, और बिसवास, तोरी सेवा, और तोरे धीरज हां जानत आंव, और जौ सोई जानत आंव कि तोरे अबै के काम पेंला के कामन से बढ़िया आंय। पर मोय तोसे जौ कहने आय, कि तें ऊ बईयर इजेबेल हां अपने बीच रैन देत आय जौन अपने हां आगमवक्तनी कैत आय, और तोरे मान्सन हां सिखात आय कि सब बुरय काम करो, और मूरतन के सामूं चढ़ाओ भओ भोजन खाओ ऐसो कै के उनहां बिलोरत आय। मैने ऊहां अपने पापन हां छोड़ के अच्छे काज करबे कौ मौका दओ, परन्त बा अपने बुरय कामन हां नईं छोड़त। मैं अब ऊ इजेबेल हां ऐसो मार हों; और जौन ऊके संग्गै जुड़ के बुरय काज करत हैं ऐसो करबो न छोड़ हैं तो उनपै भारी विपत डाल हों। जौन ऊ की बातें मानत आय उन हां सोई मार हों, कि मण्डली के जनें जौ जान लें हैं कि मान्सन के मन की बात मोहां पता आय। मैं तुम सब के करमन कौ बदला तुम हां दैहों। तुम जौन थूआतीरा में रैत आव पर ईजेबेल की कई भई बातन हां नईं मानत, और बे उन बातन हां शैतान की गैरी बात कैत आंय और नईं जानत, पिरभू कैत हैं, कि मैं तुम पै और बुझवा न डाल हों। पर जब लौ मैं तुमाए ऐंगर न आओं इन बातन हां जिनें मानत आव मन से मानत रईयो। जौन इन बातन हां अन्त लौ मान है, मैं ऊहां देस देस के लोगन में मुखिया बना हों। और मैं बो अधकार जौन मोरे पिता ने मोहां दओ आय, ऊं सई उन हां सोई दै हों, बे लोहे को राजदण्ड लेके उन पै राज्य कर है, और जैसे कुम्हार के माटी के बासन टूट के चकनाचूर हो जात आंय, वैसई बे सोई हुईयें। और मैं ऊहां भुनसारे कौ तारा दै हों। जीके कान होबें, बो सुन लेबें कि आत्मा मण्डलियन से का कैत आय। सरदीस की मण्डली के दूत हां ऐसो लिखो, कि, जीके ऐंगर परमेसुर की सात आत्माएं और सात तारे आंय, बो कैत आय, कि मैं तोरे सब काम हां जानत आंव, कि तें कहात तो है जीयत, पर है मरो भओ। जागत रओ, और उन बस्तन हां जो बची रह गईं आंय, और जौन मिटबेवारी हतीं, उन हां पक्को कर; कायसे मैंने तोरे कोई काज हां अपने परमेसुर के ऐंगर पूरो नईं पाओ। चेतो और ध्यान धरो कि तुम ने कौन सी बातें सीखी हतीं, और उन में पक्के बने रओ, और अपने पापन हां छोड़ो: अगर तें न चेतो, तो जैसो भड़या बिना कहे आत आय ऊंसई मैं आ जै हों। पर एक बात तो आय कि तोरे इते सरदीस में कछु ऐसे जनें आंय, जिन ने अपने उन्ना असुद्ध नईं करे, बे सब मोरे संग्गै उजरे उन्ना पैर के घूम हैं कायसे बे लायक आंय। जो कोऊ इन बातन में पक्को रै है, उन हां ऐसई सफेद उन्ना पैराए जै हैं, और मैं कैसऊ उन को नाओं जीवन की किताब में से न काट हों, मैं परमेसुर और सरगदूतन के सामूं जौ मान लै हों कि जे मोरे जनें आंय। जीके कान होबें, बो सुन लेबें कि आत्मा मण्डलियन से का कैत आय। और फिलेदिलफिया की मण्डली के दूत हां ऐसो लिखो, कि, जो पवित्तर और सांचो आय, और जौन दाऊद की कुंजी धरत आय, जीके खोले भय हां कोऊ बन्द नईं कर सकत और बन्द हां खोल नईं सकत, बो ऐसो कैत आय। कि मैं तोरे कामन हां जानत आंव, (हेर, मैंने तोरे सामूं एक द्वार खोल रखो आय, जीहां कोई बन्द नईं कर सकत) तें बड़ो बली नईंयां, पर मोरे बचन कौ पालन करो आय और मोरे नाओं से नईं मुकरो। हेर, मैं शैतान छलिया की कई करबेवारन हां तोरे बस में कर दै हों, और जौन यहूदी कहलान लगे आंय, पर हैं नईंयां, बे झूठ बोलत आंय -- हेर, मैं ऐसो कर हों, कि बे आके तोरे गोड़े पै दण्डवत कर हैं, और उन हां पता लग जै है, कि मैंने तोसे प्रेम रखो आय। तेंने मोरे बचन हां धीरज से मानो आय, ईसे मैं तोहां परीक्षा की ऊ बेरा में बचाए रख हों, जो धरती पे रहबेवारन हां परखबे के लाने संसार पै आबेवालो आय। मैं जल्दी आबेवारो आंव; जो कछु तोरे ऐंगर आय, ऊहां पकड़े रै, कि कोऊ तोरो मुकट छीन न लैबे। जौन पक्को बनो रै है, ऊहां मैं अपने परमेसुर के मन्दर को एक खंभा बनै हों; और बो हमेसा उतईं बनो रै है; और मैं अपने परमेसुर को नाओं, और उनके नगर, मानो नये यरूशलेम, जो मोरे परमेसुर के ऐंगर से सरग से उतरबे वालो आय और अपनो नओ नाओं ऊ पै लिख हों। जीके कान होबें, बो सुन लेबें कि आत्मा मण्डलियन से का कैत आय। लौदीकिया की मण्डली के दूत हां ऐसो लिखो, कि, जो आमीन, और भरोसा धरबे जोग, और सच्चो गवाह आय, और परमेसुर के संसार कौ खास कारन आय, बो ऐसो कैत आय। कि मैं तोरे कामन हां जानत आंव कि तें न तो जूड़ो आय और न तांतो: भला होतो कि तें जूड़ो या तांतो होतो। पर तें गुनगुनो आय, न तो जूड़ो और न तांतो, मैं तोहां अपने मों से उगलबेवारो आंव। तें जो कैत आय, कि मैं बड़ो धनी आंव, और धनवालो हो गओ आंव, और मोहां कोनऊ बस्त की कमी नईंयां, और जौ नईं जानत, कि तें अभागा और तुच्छ और कंगाल और अन्धरा और नंगो आय। ई लाने मैं तोहां सम्मति देत आंव, कि आगी में ताओ भओ सोना मोसे मोल ले कि सांचऊ में धनी हो जाबै; और सफेद उन्ना लैके पैर ले कि तोहां नंगेपन जैसी सरम न होबै; और अपनी आंखें आंजबे हां बढिया सुरमा लै ले, कि तोहां दिखान लगै। मैं जिन हां प्रेम करत आंव, उन सब हां चितात और उन हां सजा देत आंव, सो अब चेतो और अपने बुरय कामन हां छोड़ो। सुनो, मैं तुमाए मन के द्वारे पै ठाड़ो खटखटात आंव; अगर तुम मोरे टेरबे हां सुनो और मन के किवाड़ खोलो, तो मैं तुमाए मन में आहों और अपन दोई संग्गै खै हैं। जौन पक्को निकल है, मैं ऊहां अपने संग्गै सिंहासन पै बैठा हों। जीके कान होबें, बो सुन लेबें कि आत्मा मण्डलियन से का कैत आय। ईके पाछें मैंने तको कि सरग में एक द्वार खुलो आय; और जीहां मैंने पेंला अपने संग्गै बात करत सुनो हतो, जी की बोली मानो तुरही जैसी हती, ओई कैत हतो कि इते ऊ परै आ जाओ: और मैं तोहां बे बातें दिखा हों, जिनको इन बातन के बाद पूरो होबो जरुरी आय। और तुरतईं आत्मा ने मोहां अपने बस में कर लओ; और मैंने का तको, कि सरग में एक सिंहासन धरो आय, और ऊ सिंहासन पै कोऊ बैठो आय। और जो ऊ पै बैठो आय, बो यशब और मणि जैसो दिखत आय, और ऊके चारऊं कोद मेघधनुष जैसो दिखाई देत आय। और ऊ सिंहासन के चारऊं कोद चौबीस सिंहासन आंय; और इन पै चौबीस प्राचीन उजरे उन्ना पैरे बिराजे आंय, और उनके मूड़ पै सोने के मुकुट धरे आंय। और ऊ सिंहासन जौन बीच में धरो हतो, ऊ में से बिजली जैसी कौंदत और गरजन होत हती, और सिंहासन के सामूं आगी जैसे सात दिया जल रए आंय, जे सातई परमेसुर की आत्मा आंय। ऊ सिंहासन के सामूं ऐसो लगत हतो जैसे साफ सुतरो कांच को समुन्दर होबै, और सिंहासन के बीच में और चौगिर्द चार जनावर हते, जिनके आंगे और पाछें आंखई आंखें हतीं। पैलो जनावर नाहर जैसो हतो, दूसरो जनावर बछवा जैसो, और तीसरे को मों मान्स जैसो हतो, और चौथो जनावर उड़त भओ उकाब जैसो हतो। इन चारई जनावरन के छै छै पंखा हते, और उनके भीतर और चारऊ कोद आंखई आंखें हतीं; बे रात दिना बिना आराम करे जौ कहत रैत आंय, कि पवित्तर, पवित्तर, पवित्तर, पिरभू परमेसुर, महाबली, जौन पेंला हते, और अबै आंय, और जौन आबेवारे आंय। जे जनावर उनकी जौन सिंहासन पै बिराजे हते, और हमेसा जीयत रै हैं, आदर और उनको गुनगान करत रै हैं। और चौबीसई प्राचीन सिंहासन पै बिराजेवारे के सामूं गिर जै हैं, और उनहां जौन जीयत रै हैं परनाम कर हैं; और अपने मुकुट उनके सामूं ऐसो कैत धर दै हैं। कि हमाए पिरभू, और परमेसुर, तुमईं मान, गुनगान और जस पाबे के लायक आव; कायसे तुमईं ने सबरे संसार की बस्तन हां अपनी मरजी से बनाओ। और जौन सिंहासन पै बैठो हतो, ऊके हाथ में मैंने एक किताब हेरी, जौन भीतर और बायरें लिखी हती, और ऊहां सात मुहरें लगा के बन्द करो हतो। फिन मैंने एक बली सरगदूत हां तको जौन जोर के ऐसो परचार करत हतो, कि ई किताब की मुहरें तोड़के ईहां पढ़बे जोग को आय। और न सरग में, और न धरती पै, और न धरती के नेंचें कोऊ ऐसो जनो नईं मिलो जौन ऊ किताब हां खोलबे और हेरबे लायक होबै। और मैं जोर से रोऊन लगो, कायसे ऊ किताब हां खोलबे, और ऊहां हेरबेवारो कोऊ न मिलो। तब उन प्राचीनन में से एक ने मोसे कई, न रोओ; हेरो, यहूदा के गोत्र को बो नाहर, जौन दाऊद के कुल में को आय, ऊ किताब हां खोलबे और ऊपै लगी सातई मुहरन हां तोड़बे जोग आय। सो मैंने ऊ सिंहासन और चारई जनावर और उन प्राचीनन के बीच में, मानो एक मारो गओ गाड़र कौ बच्चा ठांड़ो तको: ऊके सात सींग और सातई आंखें हतीं; बे परमेसुर की सातई आत्मा आंय, जौन पूरे संसार में पठैई गईं हतीं। उन ने आके जौन सिंहासन पै बिराजो हतो, उन के हाथ से बा किताब लै लई। और जब किताब हां ऊ ने लै लओ, तो बे चारई जनावर और चौबीसई प्राचीन ऊ गाड़र के बच्चा के सामूं गिर पड़े; और सबरन के हाथ में वीणा और धूप से भरे सोने के कटोरा हते, जे पवित्तर लोगन की बिन्तवारी आंय। और बे सबरे जौ नओ गाना गान लगे, कि तें ई किताब हां लैबे और ऊ की मुहरें खोलबे जोग आय; कायसे तेंने अपने बलदान के रकत से सबरे कुल, और बोली, और लोगन, और जातियन में से परमेसुर के लाने मान्सन हां मोल ले लओ आय। और उन हां हमाए परमेसुर के खास जनें और याजक बना दओ; और बे धरती पै राज कर हैं। और मैंने हेरो, तो सिंहासन और उन जनावर और प्राचीनन के चारऊ कोद मुतके सरगदूतन कौ बोल सुनो, जौन लाखों और कड़ोरन हते। और बे ऊंची आवाज में कैत हते; कि बलिदान भओ मेमना बल, धन, और ज्ञान, और मान, और मईमा, और धन्नबाद के जोग आय। फिन मैंने सरग में, और धरती पै, और धरती के नेंचें, और समन्दर के भीतर की सबरी बस्तन, और जो कछु उन में आय, ऐसो कैत सुनो, कि जौन सिंहासन पै बिराजो आय, ऊ को और मेमने कौ धन्नबाद, मान और राज हमेसा रैबे। और चारऊ जनावर बोले आमीन, और प्राचीनन ने घुटने के बल गिरके दण्डवत करो। फिन मैंने तको, कि मेमने ने उन सात मुहरन में से एक हां खोलो; और बे चारई जनावर में से एक गरजो और कई कि आ। और मैंने तको, और एक सफेद घुड़वा दिखानो, और ऊ पै सवार धनुष लएं हतो: और ऊहां एक मुकुट दओ गओ, और बो जय करत कड़ो कि और भी जय मिलबे। जब ऊ ने दूसरी मुहर हां खोलो, तो मैंने दूसरे जनावर हां जौ कैत सुनो, आ। फिन एक और घुड़वा कड़ो, जो लाल रंग कौ हतो; और ऊ पै जौन बैठो हतो ऊहां जो अधकार दओ कि धरती पै से सुख चैन उठा लेबे, कि मान्स एक दूजे हां मारें; और ऊहां एक बड़ी तलवार भी दई गई। जब मेमना ने तीसरी मुहर हां खोलो, तो मैंने तीसरे जनावर हां जौ कैत सुनो, कि आ: सो मैंने हेरो, कि एक करिया घुड़वा आय; और ऊ पै बैठे जने के हाथ में एक तराजू आय। मैंने उन चारई जनावरन के बीच ऐसो कैत सुनो, कि दिन भरे की मजूरी कौ एक सेर भर गेंह, और एक दीनार को तीन सेर जवा, तेल, और दाखन के रस को नुसकान न करियो। और जब ऊ ने चौथी मुहर खोली, तो मैंने चौथे जनावर की बोली सुनी, कि बायरें आ। मैंने हेरो, कि एक पीलो घुड़वा आय; और ऊ पै जौन बैठो आय ऊकौ नाओं मृत्यु आय: और मरे भयन को लोक ऊके पाछें आय और उन हां धरती की एक चौथाई पै जौ अधकार दओ गओ, कि तलवार, और भुखमरी, और संसार के बन पशुअन के द्वारा लोगन हां मार डालें। और जब उन ने पांचवी मुहर खोली, तो मैंने वेदी के नेंचें उन मान्सन के प्रानन हां तको, जो परमेसुर के बचन हां सुनाबे, और अपने बिसवास की बातन हां सुनाबे में मारे गए हते। उन ने ऊं ची आवाज में कहो; हे मालक, हे पवित्तर और सांचे जने; तुम कब लौ न्याव न कर हौ? और धरती पै के रहबेवारे जिन ने हमें मार डालो ऊ को पलटा कब लौ न लै हौ? और उन सबरन हां सफेद उन्ना दओ गओ और उन से कहो गओ, कि और थोड़ी बेरा लौ आराम करो, जब लौ तुमाए संग्गी सेवा करबेवारे, और भईया, जौन तुमाए जैसे कतल होबेवारे आंय, उन सबरन की गिनती पूरी न हो जाबै। और जब उन ने छटी मुहर खोली, तो मैंने तको, कि एक बड़ो भूडोल भओ; और सूरज कम्बल घांई करिया हो गओ, और पूरो चन्द्रमा रकत जैसो हो गओ। और आकास से तारे धरती पै ऐसे गिरे, जैसे बड़ी आंधी आबे से अंजीर के पेड़ से कच्चे अंजीर टपकत आंय। और आकास ऐसो खिसक गओ, जैसे चिठिया गुड़याई होबै; और हर एक पहरवा, और टापू, अपनी जांगा से खिसक गए। और धरती के राजा, और उनके खास जनें, साहूकार और बड़े जनें, और नौकर चाकर पहरवन की गुफा में, और बड़ी टोरन में लुक गए। और पहरवा से, और बड्डी टोरन से कहन लगे, कि हमाए ऊपर गिर पड़ो; और हम हां जो सिंहासन पै बैठो आय, और मेमने के कोप से बचा लेओ। कायसे ऊ भयानक दिन आ गओ आय, जब परमेसुर और मेमना अपनो कोप दिखा है, अब कौन ऊसे बच सकत आय। ईके पाछें मैंने धरती के चारऊ कोंना पै चार सरगदूत ठांड़े तके, बे धरती पै चलबेवारी हवा हां रोके हते कि धरती, समुन्दर और कोऊ पेड़ पै हवा न लगे। फिन मैंने एक और सरगदूत हां तको, जौन जीयत परमेसुर की मुहर लएं जिते से सूरज कड़त आय ऊपर की ओर आत तको; ऊ ने उन चारई सरगदूतन से जिन हां धरती और समुन्दर हां बरबाद करबे को अधकार दओ गओ हतो, बड़े जोर से कई। जब लौ हम अपने परमेसुर के सेवा करबेवारन के माथे पै मुहर न लगा देबें, तौ लेओ धरती और समुन्दर और पेड़ों हां नुसकान न करियो। और जिन पै मुहर दई गई, मैंने उन की गिनती सुनी, बे इस्राएल के सब गोत्रन में से एक लाख चौआलीस हजार हते। यहूदा के गोत्र के बारह हजार पै मुहर दई गई; रूबेन के गोत्र के बारह हजार; गाद के गोत्र में से बारह हजार पे। आशेर के गोत्र में से बारह हजार पे; नप्ताली के गोत्र में से बारह हजार पे, मनश्शिह के गोत्र में से बारह हजार। शमौन के गोत्र में से बारह हजार पे; लेबी के गोत्र में से बारह हजार पे; इस्साकार के गोत्र में से बारह हजार पे। जबूलून के गोत्र में से बारह हजार पे; यूसुफ के गोत्र में से बारह हजार और बिन्‍यामीन के गोत्र में से बारह हजार पै मुहर दई गई। ईके पाछें मैंने हेरो, कि एक एक कुल और जातियन, देस और हर एक बोली बोलबेवारन की एक बड़ी भीड़, जीहां कोऊ गिन न सके उजरे उन्ना पैरें, और हातन में खजूर की डालियां लएं सिंहासन के सामूं और मेमने के सामूं ठांड़ी आंय। और जोर से कैत आय, कि हमाए परमेसुर जो सिंहासन पै बिराजे आंय, और मेमने की जौन तरन तारन कर सकत आय, जय जय होबै। और सबरे सरगदूत, ऊ सिंहासन और प्राचीनन और चारऊ जनावरन के चारऊ कोद ठांड़े आंय, फिन बे सिंहासन के सामूं मों के बल गिर पड़े; और परमेसुर को दण्डवत कर के कई, आमीन। हमाए परमेसुर को मान, गुणगान और बल सक्ति, धन्नबाद हमेसा लौ बनो रैबे। आमीन। प्राचीनन में से एक ने मोसे पूंछो; कि जौ उजरे उन्ना पैरे को आय? और किते से आव है? मैंने उन से कई; हे मालक, तुम तो जानत आव: ऊ ने मोसे कई; कि जे बे आंय, जो ऊ बड़े दुख उठा के निकले आंय; और इन ने अपने उन्ना मेमने के रकत से धोके उजरे करे आंय। ऐई से जे परमेसुर के सिंहासन के सामूं आंय, और उनके मन्दर में दिन रात उनकी सेवा करत आंय; और जो सिंहासन पै बिराजे आंय, बे अपनी छत्र छाया उन पै राखें रै हैं। अब इन हां न भूख लग है, और न प्यास और न उन पे सूरज की तपन पड़ है। कायसे मेमना जो सिंहासन के बीच में आय, बो उनकी रखनवारी कर है; और उन हां जीवन के जल के झरने लौ ले जै है, और परमेसुर उन की आंखन से सबरे अंसुआ पोंछ डाल है। जब उन ने सातीं मुहर खोली, तो सरग में आधे घन्टा लौ सन्नाटा छा गओ। और मैंने उन सातई सरगदूतन हां जौन परमेसुर के सामूं ठांड़े रैत आंय, तको, और उन हां सात तुरहियां दईं गई। फिन एक और सरगदूत हाथ में सोने कौ धूपदान लैकें आओ, और बेदी के ऐंगर ठांड़ो हो गओ; ऊहां बिलात धूप दओ गओ, कि बो सब पवित्र लोगन की बिन्तवारी के संग्गै वेदी पै जढ़ाए, जो सिंहासन के सामूं आय। और ऊ धूप को धुआं पवित्तर लोगन की बिन्तवारी के संग्गै परमेसुर लौ पहुंच गओ। और सरगदूत ने धूपदानी में वेदी से आगी लई, और धरती पै डाल दई, और गरजन और बिजली कोंधी और धरती हिलन लगी। और बे सात सरगदूत जिन लौ सात तुरहियां हतीं, फूंकबे हां तईयार भए। पैले सरगदूत ने तुरही फूंकी, और रकत मिलौनी ओले और आगी कड़ी, और धरती पै डाली गई; और एक तिहाई संसार बर गओ, और एक तिहाई पेड़ बर गए; और सबरी हरी घांस सोई बर गई। और दूसरे सरगदूत ने तुरही फूंकी, और मानो आगी में जलत एक पहरवा समुन्दर में डाल दओ; और समुन्दर को एक तिहाई जल रकत हो गओ। और समुन्दर में की एक तिहाई जीयत चीजें मर गईं, और एक तिहाई पानू के जहाज नास हो गए। और तीसरे सरगदूत ने तुरही फूंकी, एक बड़ो तारा जो मशाल घाईं बरत हतो, सरग से टूटो, और एक तिहाई नदियन के सोतन पै गिरो। ऊ तारे को नाओं नागदौना कहात आय, और एक तिहाई पानू नागदौना जैसो करऔ हो गओ, और बिलात मान्स पानू के करय होबे से मर गए। और चौथे सरगदूत ने तुरही फूंकी, और सूरज को एक तिहाई और चन्दा को एक तिहाई और तारन की एक तिहाई पै विपत आई, इते लौ कि उनकौ एक तिहाई भाग अंधियारो हो गओ और दिन के एक तिहाई में उजयारो नईं रहो, और ऊंसई रात में सोई। और मैंने फिन तको, तो आकाश के बीच उकाब हां उड़त और ऊंची आवाज में ऐसो कैत सुनो, कि उन तीन सरगदूतन की तुरही को फूकबो बचो आय, धरती पै रैबेवारे मान्सन पै हाय! हाय! हाय! और जब पांचवें सरगदूत ने तुरही फूंकी, तो मैंने सरग से धरती पै एक तारा गिरत भओ तको, और ऊहां अथाह कुण्ड की कुंजी दई गई। और ऊ ने अथाह कुण्ड हां खोलो, और कुण्ड में से जैसे बड़ी सी भट्टी होबै ऐसो धुआं उठो, और कुण्ड के धुआं से सूरज और हवा करिया हो गई। और ऊ धुआं में से धरती पै टिडि्डयां कड़ीं, और उन हां धरती के बिच्छु जैसो जोर मिलो। और उन से कहो गओ, कि न धरती पै की घांस को और न कोऊ हरियाई और पेड़ हां नुकसान करियो, केवल उन मान्सन हां जीके माथे पै परमेसुर की मोहर न होबै। और उन हां मारबे कौ नईं, परन्त पांच महिना लौ उन हां पीड़ा देबे कौ अधकार दओ गओ: और बे ऐसो काटत हते जैसे बिच्छू के डंक मारबे को पिरातो होत आय। ऊ न दिना में मान्स मरबे हां फिर है, परन्त मौत न मिल है; और मरबे की चाहना कर हैं, और मौत उन से भाग है। और बे टिडि्डयां लड़ाई में जाबेवारे घुड़वा जैसे हतीं, और उन की मूड़ पै मानो सोने को मुकुट धरो होबै; और उन के मों मान्सन जैसे हते। उन के बाल बईयरन जैसे, और दांत नाहर जैसे हते। और बे लोहे जैसी ओढ़नी ओढ़े हते, और उन के पंखन में से ऐसी आवाज आत हती जैसे रथों में जुते घुड़वा लड़ाई में भगत होबें। उनकी पूंछ बिच्छु घाईं हतीं, और उन में डंक हते, और पांच महिना लौ मान्स हां परेसान करबे की सक्ति उनकी पूंछ में हती। अथाह कुण्ड को दूत उन पै राजा हतो, ऊ को नाओं इब्रानी बोली में अबद्दोन, और यूनानी बोली में अपुल्लयोन हतो। पैली विपत तो निकल गई, तको, अब ईके पांछू दो विपत और आबेवारी आंय। और जब छठे सरगदूत ने तुरही फूंकी, सो जो सोने की वेदी परमेसुर के सामूं आय ऊके सींगों में से मैंने ऐसो शब्द सुनो। मानो कोई छठे सरगदूत से जीके ऐंगर तुरही हती, कैत हतो कि उन चार सरगदूत जो फुरात नदिया के ऐंगर बंधे भए आंय, उन हां छोड़ दे। और बे चार दूत छोड़ दए गए जो ओई घड़ी, और दिन, और महिना, और साल के लाने एक तिहाई मान्सन हां मारबे हां तईयार करे गए हते। और पल्टन के घुड़सवारन की गिनती बीस करोड़ हती; मैंने उनकी गिनती सुनी हती। मोहां ई दर्शन में घुड़वा और उन पै ऐसे सवार दिखाई दए, जिन की झिलमें आगी, धूम्रकान्त, और गंधक जैसी हतीं, और उन घुड़वन की मूड़ नाहर जैसी हतीं: और उनके मों में से आगी, धुआं, और गन्धक कड़त हती। इन तीनईं मरियों; मानो आगी, धुआं और गन्धक जो ऊके मों से कड़त हती, मान्सन में से एक तिहाई जन मारे गए। उन घुड़वन को बल उन के मों, और पूंछ में हतो; कायसे उन की पूंछें सांप जैसी हतीं, और उन की पूंछ में मूड़ सोई हती, और इनईं से बे मारत हते। ऊ बचे मान्स जौन इन मरियों से न मरे हते, उन ने अपने कामन हां नई छोड़ो, और भूतात्मा की, और सोने और चांदी, पीतल, पथरा और लकड़िया की मूरतों की पूजा नईं करें, जो न तो देख, सुन सकत, और न चल फिर सकत आंय। और जो खून, जादू टोना, और परतिरिया संगत, और चोरी, जो उन ने करी हतीं, बे उन ने न छोड़ीं। फिन मैंने एक बली सरगदूत हां बादल ओढ़ के सरग से उतरत तको, ऊके मूड़ पै मेघधनुष हतो: और ऊ को मों सूरज घांई हतो और ऊके गोड़े आगी के खम्भा जैसे हते। और ऊके हाथ में एक खुली भई किताब हती; ऊ ने अपनो दांया गोड़ो समुद्र पै, और बांया धरती पै धरो। और इतनी जोर के चिल्लयानो, जैसे नाहर गरजत होबै; और जब ऊ चिल्लयानो तो गरजबे के संग्गै सात शब्द सुनाई दए। और जब सातई गरजन के शब्द सुनाई दे चुके, तो मैं लिखबे पै हतो, और मैंने सरग से ऐसो शब्द सुनो, कि जौन सात शब्द गरजन के संग्गै सुने आंय, उन हां कोऊहां न बतईयो, और न लिखियो। और जौन सरगदूत हां मैंने समुद्र और धरती पै ठांड़ो तको हतो; ऊ ने अपनो दांया हाथ सरग लौ उठाओ। और ऊ ने कई जौन हमेसा जियत रै है, और जीने सरग और जो कुछ ऊ में आय, और जो कछु धरती और ऊ पै आय, और समुद्र हां और जो कुछ ऊ में आय ऊहां रचो आय ओई की कसम खाकें कई, अब और अबेर न हुईये। परन्त सातवें सरगदूत के कहे दिना में हुईयें जब बो तुरही फूकबेवारो हुईये, तो जो बातें परमेसुर ने ऊ सुसमाचार जौन अब लौ लुको हतो, जो ऊ ने अपने अगमवकता हां दओ हतो बो पूरो हुईये। और जो शब्द करबेवारे हां मैंने सरग से बोलत सुनो हतो, बो फिन के मोसे बतकाव करन लगो; ऊ ने कई जाओ, जो सरगदूत समुद्र और धरती पै ठांड़ो आय, ऊके हाथ में से खुली पोथी हां लै ले। सो मैंने सरगदूत के ऐंगर जाके कई, कि जा हल्की पोथी मोहां दै दे; और ऊ ने मोसे कई ले और ईहां खा ले, जा तोरे पेट हां करओ तो कर है, परन्त तोरे मों में मेपर जैसी गुरीरी लग है। सो मैंने बा हल्की पोथी सरगदूत के हाथन से लेके खा लई, बा मोरे मों में तो मेपर जैसी गुरीरी लगी, परन्त जब मैं ऊहां खा गओ, तो मोरो पेट करओ हो गओ। तब मोसे जौ कहो गओ, कि तोहां मुल्क के मान्सन, और जातियन, और जो दूसरी बोली बोलत आंय, और राजन पै, फिन आगमवानी करने हुईये। मोहां एक लग्गी जैसो एक सरकंडा दओ गओ, और कोऊ ने मोसे कई; उठ, परमेसुर के मन्दर और बेदी, और ऊ में भजन करबेवारन हां नाप ले। और मन्दर के बायरें को आंगन छोड़ दईये; ऊहां नईं नापिये, कायसे बो दूसरी जातन के मान्सन हां दओ गओ आय, और बे पवित्तर नगर हां ब्यालीस महिना लौ रोंदत रै हैं। और मैं अपने दो गवाह को जौ अधकार दै हों, कि बे टाट ओढ़ के एक हजार दो सौ साठ दिना लौ आगमवाणी करें। जे बे जैतून के दो पेड़ और दो दीवटें आंय, जो धरती के पिरभू के सामूं ठांड़े रैत आंय। और यदि कोऊ उन हां नुसकान पोंचात आय, तो उन के मों से आगी कड़ के सबरे बैरियन हां भसम कर दै है। उन हां अधकार आय, कि आकास बन्द कर देबें, कि जब बे अगमवानी करें तो पानू न बरसे, और उन हां सबरे पानू पै अधकार आय, कि ऊहां रकत बनाबें, और जब उन की मन्सा होबै तो धरती पै हर तरहां की विपत ले आबें। और जब बे अपनी गवाह दे दै हैं, तो ऊ जनावर जो अथाह कुण्ड में से निकल है, उन से लड़ के उन हां जीत लै है और उन हां मार डाल है। और उन की लाशें बड़े नगर के चौक में डली रै हैं, जो आत्मा की रीत से सदोम और मिसर कहलात आय, जिते उन के पिरभू ईसा मसीह हां क्रूस पै टांगो गओ हतो। और सबरे जनें, और कुल, और तरहां तरहां की बोली बोलबेवारे और जातियन के जनें, साढ़े तीन दिना लौ उन की लाश हां तकत रै हैं, और उन की लाशन हां कबर में न धरन दै हैं। और धरती के रहबेवारे, उन के मरबे से मजा मौज कर हैं, और एक दूजे हां भेंट पठै हैं, कायसे इन दोई आगमवकतन ने धरती पै रहबेवारन हां सताओ हतो। और साढ़े तीन दिना होबे पै परमेसुर ने उन के सरीर में जीव फूंक दओ; और बे अपने गोड़े पै ठांड़े हो गए, और उन हां तकबेवारे डरा गए। और उन हां सरग से एक आवाज सुनाई दई, कि इते ऊ परै आओ; ऐसो सुन के बे बादरन पै सवार होकें अपने बैरियन के हेरत हेरत सरग हां चले गए। फिन ओई बेरा धरती कपन लगी, और नगर को दसवों भाग गिर पड़ो; और ऊ धरती के कम्पन से सात हजार मान्स खतम हो गए और सरग के परमेसुर की जय जय भई। दूसरी विपत तो बीत गई, तको, अब तीसरी विपत आबेवारी आय। और जब सातवें दूत ने तुरही फूंकी, तो सरग में जोर जोर की पुकार सुनी गई, कि संसार कौ राज हमाए पिरभू ईसा मसीह को हो गओ आय। और बे सदा लौ राज कर हैं, और चौबीस प्राचीन जो परमेसुर के सामूं अपने सिंहासन पै बिराजे हते, मों के बल गिरके परमेसुर कौ जस मानो। और ऐसो कैन लगे, कि हे महाबली पिरभू परमेसुर, जो हते और अबै आय, हम तुमाओ जस मानत आंय, कि तुम ने अपने बल से राज करो आय। दूसरी जातवारन तो खुनस्याए, और तोरो प्रकोप उन पै पड़ो, और अब बा बेरा आ गई आय, कि मरे भओं को न्याव करो जाए, और तुमाए आगमवकता और पवित्तर मान्सन हां और हल्के बड़े जो तुमाए नाओं से डरत आंय, उन हां इनाम दओ जाए, और जिन ने धरती हां बरबाद करो आय उन को नास करो जाए। और परमेसुर कौ मन्दर जो सरग में आय, बो खोलो गओ, और ऊके मन्दर में ऊ की वाचा को सन्दूक दिखाई दओ, और बिजली कड़कड़ान लगी और धरती डोलन लगी, और बड़े बड़े ओला गिरे। फिन सरग पै एक बड़ो चिन्ह दिखाई दओ, कि एक बईयर सूरज हां ओढ़नी जैसे ओढ़े हती, और चांद ऊके गोड़े तरें हतो, और ऊ की मूड़ पै बारह तारों कौ मुकट धरो हतो। बा पेट से भई, और चिल्लात हती, कायसे बच्चा होबे कौ पिरातो ऊहां हतो; और ऐसो लगत हतो की बच्चा हाबेवारो आय। एक और चिन्ह सरग में दिखाई दओ, और तको, एक बड़े लाल रंग कौ अजगर हतो जीकी सात मूड़ और दस सींग हते, और ऊके मूड़न पै सात राजमुकुट धरे हते। और ऊ ने अपनी पूंछ से आकास के तारों में से एक तिहाई खींच के धरती पै डाल दए, और बो अजगर ऊ बईयर जौन के बच्चा होने हतो, ऊके सामूं ठांड़ो हो गओ, कि जब ऊ को बच्चा होबै तो ऊहां निगल जाए। ऊ को लड़का भओ जो सब राज्य और जातियन पै लोहे के राजदण्ड से राज करबे पै हतो, और ऊ को बच्चा परमेसुर के सिंहासन लौ एकाएक पोंचा दओ गओ। और बा बईयर ऊ जंगल कुदाऊं भग गई, जिते परमेसुर ने ऊके लाने एक जांगा तईयार करी हती, कि बा उते एक हजार दो सौ साठ दिना लौ खाए पिए। फिन सरग पै लड़ाई भई, मीकाईल सरगदूत और ऊके संग्गी अजगर से लड़बे हां कड़े, और अजगर और ऊके दूत के बीच लड़ाई भई। परन्त अजगर जीत नईं पाओ, और सरग में उन के लाने जांगा नईं मिली। और बो बड़ो अजगर जो इबलीस और शैतान छलिया कहात आय, और सबरे संसार हां बहकाबे वालो आय, धरती पै ऊ को और ऊके दूतन हां गिरा दओ गओ। फिन मैंने सरग से एक बड़ो बोल सुनो, कि अब हमाए परमेसुर को तरन तारन, और बल, और राज, और ईसा मसीह को जस दिखानो आय; कायसे जो रात दिन परमेसुर के सामूं हमाए भईयन पै दोष लगात हतो, गिरा दओ गओ। और उन ने मेमने के रकत और अपनी गवाह से शैतान छलिया पै जीत पाई, और उन ने अपने प्रानन हां लौ दे दओ। ईसे सरग में रैबेवारो खुश हो; हे धरती, और समुन्दर तुम पै हाय! कायसे शैतान छलिया बड़ी खुन्स में तुमाए ऐंगर उतर आओ आय; कायसे ऊहां पता आय, कि ऊ की बेरा तनकदिना की आय। जब अजगर ने हेरो, कि बो धरती पैगिरा दओ गओ आय, तो ऊ बईयर हां जौन बेटा जनी हती, ऊहां सताओ। और ऊ बईयर हां बड़े उकाब के दो पंखा दय गए, कि सांप के सामूंसे उड़ के जंगल में ऊ जांगा जाए, जिते बा कछु बेरा लौ पाली जाबै। सांप ने ऊ बईयर के पाछें अपने मों से नदिया जैसो पानू बहाओ, कि ऊहां ई नदिया में बहा दे। परन्त धरती ने ऊ बईयर हां सम्भालो, और बो नदिया हां जौन अजगर के मों से कड़ी हती, ऊहां पी लओ। अजगर बईयर पै बड़ो खिसयाओ, और ऊ ने ऊ बईयर के दूसरे लड़का बारन से जो परमेसुर की आज्ञाओं को मानत हते, और पिरभू यीशु की गवाह देत हते, लड़बे हां गओ। और बो समुन्दर की बालू पै जाके ठांड़ो हो गओ। मैंने एक जनावर हां समुन्दर में से कड़त हेरो, जीके दस सींग और सात मूंड़ हते; और ऊके दसई सींग पै राजमुकुट हते, और ऊ की मूड़ पै निन्दा के नाओं लिखे हते। और जो जनावर मैंने हेरो, बो चीता जैसो हतो; और ऊके गोड़े भालू जैसे, और मों नाहर जैसो हतो; और अजगर ने अपनो अधकार और राज ऊहां दे दओ। मैंने ऊके दस मूंड़ में से एक पै बड़ो घाव तको, मानो बो मरबे पै होबै; फिन कछु देर में ऊ को बो घाव ठीक हो गओ, और संसार के सबरे मान्स ऊ जनावर के पाछें बड़े अचम्भा करत भए चले। उन ने अजगर की पूजा करी, कायसे अजगर ने ऊ जनावर हां अपनो अधकार दे दओ हतो, और ऐसी कैत भए ऊ की पूजा करी, कि ई जैसो को आय? कौन ऊसे लड़ सकत आय? और बड़े बोल बोलबे और बुराई करबे के लाने ऊहां एक मों दओ गओ, और ऊहां ब्यालीस महिना लौ काम करबे कौ अधकार दओ गओ। और ऊ ने परमेसुर की बुराई करबे के लाने अपनो मों खोलो, कि ऊके नाओं और सरग के रैबेवालों की बुराई करे। और ऊहां परमेसुर के लोगन से लड़बे, और उन हां हरा दैबे, और ऊहां एक एक कुल, लोग और अलग अलग भाषा बोलबेवारन, और जाति पै अधकार दओ गओ। और धरती के बे सब रैबेवारे जिन के नाओं ऊ मेमने की जीवन की पोथी में नईं गए, जो संसार की रचना की बेरा से घात भओ आय, ऊ जनावर की पूजा कर हैं। जीके कान होबें बो सुने। जिन हां कैद होबे हां आय, बे जेहल में जै हैं, जौन हां तलवार से मारो जाने आय, बे तलवार से मारे जै हैं, ऐसे में परमेसुर के लोगन हां बिसवास और धीरज धरबे कौ आय। फिन मैंने एक और जनावर हां धरती में से कड़त हेरो, ऊके मेमने जैसे दो सींग हते; और बो अजगर घांई बोलत हतो। जौ ऊ जनावर के लाने काम करत हतो, जी कौ घाव अच्छो हो गओ हतो, और ऊ की पूजा करवात हतो। और बो बड़े बड़े काम करत हतो, इते लौ के मान्सन के देखत सरग से धरती पै आग बरसा देत हतो। जौ जनावर धरती पै रैबेवारन हां मूरख बनात हतो, और उन बेजा काम हां जौ ऊ जनावर के बल से करत हतो, और संसार के मान्सन से कैत हतो, कि बो जनावर जीहां घाव हो गओ हतो बो अच्छो हो गओ आय, सो तुम ऊ की मूरत बनाओ, और ऊ की पूजा करो। और जब ऊ मूरत में प्राण प्रतिष्ठा करबे को अधकार दओ गओ, कि बा मूरत बोलन लगे; और जौन ऊ मूरत की पूजा न करे, बो मरवा डालो जाए। और ऊ ने लौरे, जेठे, साहूकार, गरीब गुरवा और चाकरन के दाएं हाथ या उनके माथे पै एक एक छाप लगवा दई। ऊ जनावर के नाओं या ऊके अंक की छाप, जब लौ न लगे तब लौ कोई कोऊ बस्त न खरीद और न बेंच पाहै। तुम हां ई जनावर को अंक जौन एक मान्स को अंक आए, और बो अंक छै सौ छियासठ आय, जीहां ज्ञान होबे सो ईहां बूझे। फिन मैंने तको, कि बो मेमना सिय्योन पहरवा पै ठांड़ो आय, और ऊके संग्गै एक लाख चौआलीस हजार मान्स आंय, जिन के कपाट पै उनको और उनके बाप कौ नाओं लिखो आय। और सरग से मोहां एक ऐसी आवाज आई, मानो जैसे पानू की बिलात धार हो और ऊके संग्गै गरजबे की आवाज ऐसी सुनी जैसे कोऊ वीणा बजात होबे। और बे सिंहासन और चारई जनावर और प्राचीनन के सामूं एक नओ गाना गात हते, उन एक लाख चौआलीस हजार मान्स जौन धरती पै से मोल लय गए हते, उनके छोड़ कोऊ ई गाना हां नईं सीख सकत हतो। जे बे आंय, जो बईयरन के संग्गै अशुद्ध नईं भए, परन्त कुंआरे आंय: और जे बे आंय, कि जिते मेमना जात आय, बे ऊके पछाऊं जात आंय: जे जने संसार में से परमेसुर के सामूं ठांड़े होबे हां छुड़ाए गए आंय। इन मान्सन में कछु खोट नईंयां, जे कभऊं झूठ नईं बोले। फिन मैंने एक सरगदूत हां आकास के बीच उड़त तको, जीके ऐंगर धरती पै रैबेवारे सब जातियन, सबरी बोली बोलबेवारे, और मान्सन हां सुनाबे हां सनातन सुसमाचार हतो। और ऊ ने ऊं ची टेर लगाई; परमेसुर से डरो; और उन के गुणगान करो; कायसे अब न्याय की बेरा आ गई आय, सो ऊ को भजन करो, जीने सरग और धरती हां और समुन्दर और पानू के झरने बनाए। फिन ईके पाछें एक और सरगदूत ऐसो कैत भओ आओ, कि बड़ो बाबुल देश बरबाद हो गओ, जीने संसार के मान्सन हां सबरी बुरई बातें सिखाईं। फिन ईके पाछें एक और सरगदूत बड़ी आवाज में ऐसो कैत आओ, कि जो कोऊ ऊ जनावर और ऊ की मूरत हां पूजे, और अपने हाथ और माथे पे ऊ की छाप लगाए। तो ऐसो जनो परमेसुर की गुन्स से भरे कटोरा में से पी है, और पवित्तर सरगदूतन और मेमने के सामूं आग और गन्धक की पीड़ा में डालो जै है। और ऊ आग और गन्धक को धुआं हमेसा लौ निकलत रै है, और जो ऊ जनावर और ऊ की मूरत की पूजा कर हैं, और ऊ की छाप हां लगा हैं, उन हां रात दिना कभऊं चैन न मिल है। पवित्र लोकन कौ धीरज ऐई में आय, जो परमेसुर की सीख मानत और पिरभु यीशु मसीह पै बिसवास रखत आंय। मैंने सरग से ऐसो शब्द सुनो, कि लिख; जो मान्स पिरभू में मरत आंय, बे अब से धन्न आंय, आत्मा ने सोई कई कि जौन मेहनत से काम उन ने करो आय उन हां इनाम मिल है, और बे आराम कर हैं। फिन मैंने तको, एक उजरो बादल आय, और ऊ बादरे पै मनुष्य के पुत्र जैसो कोई बिराजो आय, जीके मूड़ पै सोने कौ मुकुट और हाथ में एक तेज हंसिया आय। फिन एक और सरगदूत ने मन्दर से कड़ के, ऊसे जो बादल पै बिराजो हतो, कई कि अपनो हंसिया लैके काटो, कायसे कटनी के दिना आ गए आंय, कायसे संसार की खेती पक गई आय। सो जो बादल पै बिराजे हते, उन ने धरती पै अपनो हंसिया लगा के कटाई करी। फिन एक और सरगदूत ऊ मन्दर से कड़ो, जो सरग में आय, ऊके ऐंगर सोई तेज हंसिया हतो। फिन एक और सरगदूत जीहां आगी पै अधकार हतो, बेदी में से कड़ो, और जीके ऐंगर तेज हंसिया हतो, ऊसे कहो; कि अपने तेज हंसिया से धरती पै जो दाखलता के गुच्छा आंय उन हां काट ले; कायसे उनकी दाखें पक गईं आंय। और ऊ सरगदूत ने अपने हंसिया से धरती पै की दाखें काट के, और उन हां परमेसुर के कोप कुण्ड में डाल दओ। और नगर के बायरें ऊ रस कुण्ड में दाखें कुचली गईं, और रस के कुण्ड में से इतनो रकत निकलो, कि नदिया घाईं सौ कोस लौ बहो, और इतनो गैरो हतो कि ठांड़े घुड़वन की लगाम लौ पहुंचो। फिन मैंने सरग में एक बड़ो अजीब चिन्ह तको, सात सरगदूत जिनके हांतन में पिछली सात विपत हतीं, कायसे उन के पूरे हो जाबे पै परमेसुर के कोप को अन्त आय। और मैंने आगी में मिलौ कांच कौ सो समुद्र हेरो, और जो ऊ जनावर पर, और ऊ की मूरत पै, और ऊके नाओं के अंक से जीते हते, उन मान्सन हां परमेसुर की वीणा लए समुन्दर के ऐंगर ठांड़ो तको। और बे परमेसुर के दास मूसा कौ गीत, और मेमने कौ गीत गाके कहत हते, कि हे महाबलि पिरभू परमेसुर, तोरे सबरे काज अदभुत आंय, हे जुग जुग के राजा, तोरी चाल सूदी और सांची आय। हे पिरभू, को तुम से न डरा है? और तुमाए नाओं को गुनगान न कर है? कायसे तुमईं पवित्तर आव, और सबरी जातन के मान्स आके तुम हां दण्डवत कर हैं, कायसे जो न्याय तुम ने करे आंय बे भले और अच्छे आंय। फिन मैंने ईके बाद तको, कि सरग में साक्षी के तम्बू कौ मन्दर खोलो गओ। और बे सात सरगदूत जिन के ऐंगर बे सात विपत हतीं, चोखे और चमचमात मणी पैरे भए और छाती में सुनहले पटुका बांधे मन्दर में से बायरें कड़े। और उन चार जनावर में से एक ने उन सात सरगदूतन हां परमेसुर के, जो हमेसा जीयत रै हैं, कोप से भरे सात सोने के कटोरा दए। और परमेसुर की मईमा, और उनके बल से मन्दर धुएं से भर गओ, और जब लौ उन सात सरगदूतन की विपतें खतम न भईं, तौ लेओ कोऊ मन्दर के भीतरे न घुस पाओ। फिन मैंने मन्दर में कोऊहां जोर से सात सरगदूतन से जौ कैत सुनो कि जाओ, और परमेसुर के कोप के सातई कटोरन हां धरती पै उड़ेल दो। सो पैले सरगदूत ने अपनो कटोरा धरती पै उड़ेल दओ। और जिन मान्सन पै ऊ जनावर की छाप हती, और जो ऊ की मूरत की पूजा करत हते, उन हां एक बुरओ और बिलात पिराते वारो खता कड़ो। और दूसरे सरगदूत ने अपनो कटोरा समुन्दर पै उड़ेल दओ और समुन्दर को पानू मरे खून जैसो हो गओ, और समुन्दर के सबरे जीव मर गए। और तीसरे सरगदूत ने अपनो कटोरा नदियन और पानू के सोतन पै डाल दओ, और उनको पानू रकत हो गओ। और मैंने पानू के सरगदूत हां जौ कैत सुनो, कि हे पवित्तर जौन अबै है, और जौन हतो, तें न्यायी आय और तेंने जौ न्याय करो। कायसे उन ने पवित्तर लोगन, और अगमवकतन हां रकत बहाओ हतो, और तेंने उन हां रकत पिलाओ; कायसे बे ऐई जोग आंय। फिन मैंने बेदी से ऐसो शब्द सुनो, कि हे महाबली पिरभू परमेसुर, तोरे फैसले नोंने और सच्चे आंय। और चौथे सरगदूत ने अपनो कटोरा सूरज पै उड़ेल दओ, और ऊहां मान्सन हां झुलसा देबे कौ अधकार दओ गओ। और मान्स भारी तपन से झुलस गए, और परमेसुर के नाओं की जीहां इन विपत पै अधकार आय, बुरओ कहो और ऊकौ मन से जस न मानो। और पांचवें सरगदूत ने अपनो कटोरा ऊ जनावर के सिंहासन पै उड़ेल दओ, और ऊके राज में अंधियारा छा गओ; और मान्स पिराते में अपनी जीभ हां मुराउन लगे। और अपने पिराते और फोडों के कारन सरग के परमेसुर की निन्दा करन लगे; और अपने कामन हां नईं छोड़ो। और छटे सरगदूत ने अपनो कटोरा फुरात नदिया पै उड़ेल दओ, और नदिया को पानू रीत गओ, कि पूरब के राजन के आबे के लाने गैल तईयार हो जाबै। और मैंने अजगर और ऊ जनावर और ऊ लबरा अगमवकता के मों से तीन भूत आत्मन हां मेंढक के रूप में कड़त तको। जे अजूबा काम दिखाबेवारी दुष्टात्माएं आंय, जो संसार के सब राजन के ऐंगर निकल के ई लाने जात आंय, कि उन हां महाबली परमेसुर से ऊ बड़े दिना के लाने लड़बे इकठ्ठो करें। हेर, मैं भड़या घाईं आत आंव; धन्न बो आय, जो जागत रैत आय, और बो अपने उन्ना हां तके रैत आय, कि बो नंगो न फिरै, और मान्सन ऊकौ नंगापन न हेरें। और उन ने ऊ न हां ऊ जांगा इकठ्ठो करो, जो इब्रानी बोली में हर-मगिदोन कहलात आय। और सातवें सरगदूत ने अपनो कटोरा हवा पै उड़ेल दओ, और मन्दर के सिंहासन से बड़ी आवाज भई, कि “हो चुको”। फिन बिजली कोंधी और बादल गर्जे, और धरती डोल गई, जब से मान्सन कौ जन्म धरती पै भओ, ऐसो बड़ो भूकम्प कभऊं नई भओ हतो। और ऊ बड़े नगर के तीन टूंका हो गए, और दूसरे देसन के नगर सोई ढह गए, सो परमेसुर ने अपनी खीज में ऊहां अपने खुन्स के प्याले की मदरा पिया दई। और एक एक टापू अपनी जांगा से खिसक गए; और पहरवा कहां गए पता नईं पड़ो। और आकास से धरती पै मन मन भर के ओला गिरे, ईसे कि जा विपत बिलात बड़ी हती, मान्सन ने परमेसुर हां ओला की विपत के लाने भलो बुरो कहो। जिन सात सरगदूतन के ऐंगर बे सात कटोरा हते, उन में से एक ने मोरे ऐंगर आके कई कि इते आओ, मैं तुम हां ऊ बड़ी वेश्या कौ का हाल भओ दिखाओं। जौन वेश्या के संग्गै धरती के राजन ने बुरओ कर्म करो; और ऊके सबरे लजाबे के काम मानो ऐसे हते, जैसे संसार के मान्सन ने ऊके बुरय कर्म की मदिरा पी लई होबै। फिन आत्मा की मदद से बो मोहां जंगल में लै गओ, और मैंने किरमिजी रंग के जनावर पै परमेसुर की निन्दा के नाओं से छिपे एक बईयर हां तको, और जीकी सात मूड़ और दस सींग हते। बा बईयर भटारंग, और किरमिजी रंग के उन्ना पैरे हती, और सोने और बिलात मेंहगे मणी और मोतियन से सजी हती, और ऊके हाथ में एक सोने को कटोरा हतो, जो गन्दी और अशुद्ध बस्त और बेशरमी के कामन से भरो हतो। और ऊके माथे पै जौ नाओं लिखो हतो, “मैं बड़े बाबुल शहर, धरती पै की सबसे गन्दी, घिनऊ और बुरई कामन की मताई”। और मैंने बा बईयर हां पिरभू ईसा मसीह के जनों कौ रकत पिये और मतवालो तको, और ऊहां तक के मैं चकित भओ। सरगदूत ने मोय से कई, तें काए चकित भओ? मैं तो ई बईयर, और ऊ जनावर, जीपे बा सवारी करत आय, और जीके सात मूड़ और दस सींग आंय, तोहां ऊकौ भेद बतात आंव। जो जनावर तेंने तको आय, जो पेंला तो हतो, परन्त अब नईयां, जो बिलात गैरे कुण्ड में से कड़ है और विनाश में पड़ है। और धरती के रैबेवारे मान्स जिनके नाओं पेंला से जीवन की पोथी में नईं लिखे गए, ई जनावर की जा हालत तक के, कि पेंला हतो, और अब नईंयां; और अब फिन आ जा है, अजूबा मान हैं। जी लौ बुद्धि होबे बो ईहां समझ सकत आय, कि बे सात मूड़ सात पहरवा आंय, जिन पै बा बईयर बैठी आय। और बे सात मूड़, सात राजा आंय, पांच राजा तो हो गए, और एक जो अबै लौ आओ नईयां, अब जब बो आ है, तो कछु दिना लौ रै है। और जो जनावर पेंला हतो, और अब नईयां, बो आठवों आय; और उन सात में से पैदा भओ, और विनाश में पड़ है। और जो दस सींग तेंने देखे बे दस राजा आंय; जिन ने अबै लौ राज नईं पाओ; परन्त बे सोई ऊ जनावर के संग्गै घड़ी भर हां राज पा हैं। जे सब एक मन हुईयें, और बे सब अपनो बल और अधकार ऊ जनावर हां दै हैं। जे मेमने से लड़ हैं, और मेमना जीत है; कायसे बो प्रभुओं कौ पिरभू, और राजाओं कौ राजा आय: और जो बुलाए भए, और चुने भए, और बिसवासी उनके संग्गै आंय, बे सोई जय पा हैं। फिन ऊ ने मोय से कहो, कि जो पानू तेंने तको, जीपै बा वेश्या बैठी आय, बे लोग, और भीड़ और सबरी जातन, और बोली बोलबेवारन में से आंय। और जो दस सींग तेंने तके, बे और जनावर ऊ वेश्या से बैर धर हैं, और ऊके सबरे उन्ना उतार लै हैं और ऊहां नंगी कर दै हैं; और उकौ मांस खा जै हैं, और ऊहां आग में जला दें हैं। कायसे परमेसुर उनके मन में जौ डाल है, कि बे ऊ की मनसा पूरी करें; और जब लौ परमेसुर को कहो पूरो न हो जाबै, तब लौ बे एक मन होकें अपनो अपनो राज ऊ जनावर हां दे देबें। और बा बईयर, जीहां तेंने देखो आय बो बड़ो नगर आय, जो संसार के राजाओं पै राज करत आय। ईके पाछें मैंने एक सरगदूत हां सरग से उतरत तको, जो बहुत बली हतो; और धरती ऊके तेज से चमक उठी। ऊ ने बड़ी जोर से कई, कि गिर गओ बड़ो बाबुल गिर गओ: और भूतन कौ घर, और दुष्ट आत्मा कौ अड्डा, और एक गन्दी और घिनी चिरईया कौ अड्डा हो गओ। कायसे ऊके व्यभिचार की विकराल मदिरा के कारन सब जातियां गिर गईं आंय, और धरती के राजाओं ने ऊके संग्गै व्यभिचार करो आय; और धरती के महाजन ऊके मजा मौज से धनी हो गए। फिन मैंने सरग से कोऊ कौ शब्द सुनो, कि हे मोरे जनो, ऊ में से कड़ आओ; कि तुम ऊके पापन में संग्गी न हो, कहूं ऐसो न होबै के ऊकी विपत तुम पे आ पड़े। कायसे ऊके पाप सरग लौ पोंच गए आंय, और ऊके पाप और बुरय काम परमेसुर हां पता आंय। जैसो ऊ ने तुमाए संग्गै करो, तुम सोई ऊके संग्गै ऊं सई करो, और जैसो ऊ ने काम करो आय ऊं सई ऊके कामन कौ दुगनो बदला दो, और जैसे ऊ ने अपने कटोरा से दूसरन हां पिलाओ ऊहां दुगनो पिलाओ। जैसे मजा मौज में रैके ऊ ने अपने हां बड़ो दिखाओ; ऊं सई दुख और पिरातो ऊहां दो; कायसे बा अपने मन में कैत आय, मैं रानी बनी बैठी आंव, मैं बिधवा नईंयां; मैं कभऊं परेसानी में नईं पड़ हों। सो एकई दिना में ऊ पे ऐसी विपत आ पड़ है, मानो मौत, दुख और अकाल; और बा आगी में बार दई जै है, कायसे ऊ को न्याय करबेवारो महाबली पिरभू परमेसुर आय। और एक एक राजा जिन ने ऊके संग्गै व्यभिचार, और मजा मौज में संग्गी बने रहे, जब ऊके जलबे को धुआं तक हैं, तो ऊके लाने रो हैं, और छाती पीट हैं। और जो पीड़ा ऊहां हुईये ऊसे घबरा के बे दूर ठांड़े होकें कै हैं, हे बड़े नगर, बाबुल! हे पक्के नगर, हाय! हाय! घड़ी भर में तोहां दण्ड मिल गओ आय। और संसार के धंधा करबेवारे ऊके लाने रो हैं और किलप हैं, कायसे अब कोई उनको माल मोल न लै है। जैसे सोनो, चान्दी, हीरा, मोती और मलमल के उन्ना, और बैजनी, किरमिची और रेशम के उन्ना, और अच्छी महकबेवारी लकड़ियां, और हांथीदांत की बस्तें, और मांगी लकड़ियां, और पीतल, और लोहे, और संगमरमर की बस्तें। और दालचीनी, मसाले, धूप, इतर, लोबान, दारू, तेल, मैदा, पिसिया, गईयां, बैलवा, गाड़र, छिरियां, घुड़वा, रथ और नौकर, और मान्सन के प्रान। और अब सबरे फल जो तें मन से चाहत हतो बे अब नईयां; और मजेदार वस्तें और मांगी बस्तें चली गईं, और बे सब फिन न मिल हैं। बे व्यापारी जो इन बस्तों को ऊहां बेच के साहूकार बन गए हते, ऊके पिराते हां तक के और डरा के दूर ठांड़े हुईयें, और रोऊत और किलपत बे ऐसो कै हैं। हाय! हाय! जा बाबुल नगरी जो मखमल, बेंजनी और किरमिजी उन्ना पैंरे हती, और सोने और हीरे जवाहरातन से सजी हती। घड़ी भर में ऊ को ऐसो भारी धन चलो गओ: और समुन्दर से आके जो धंधो करत हते बे सब दूर ठांड़े हो गए। और ऊके जलबे को धुआं देखत भए कै हैं, कि कौन सो नगर ई बड़े नगर जैसो आय? और अपने मूड़ पै धूरा डाल के, रोते और किलपत भए चिल्लिया के कै हैं, हाय! हाय! जा बड़ी नगरी बाबुल जी में समुन्दर से आके जो धंधा करबेवारे धनी हो गए हते, बे घड़ी भर में उजड़ गए। हे सरग और धरती पै रैवेबारे लोगो, प्रेरितन और अगमवकता, ऊ पे मजा करो, कायसे परमेसुर ने तुमाओ बदला ऊसे ले लओ। फिन एक बली सरगदूत ने चकिया के पाट जैसो एक पथरा लैके समुन्दर में फेंक दओ, और ऐसो कहो कि जा बड़ी नगरी बाबुल ऐंसई गिराई जै है, और फिन कभऊं ऊ को पता न मिल है। और वीणा और बांसली बजाबेवारे, और तुरही फूकबेवारन को गल्ला अब सुनाई न दै है, और कोऊ बस्त बनाबेवारो कारीगर और बेंचबेवारो इते कभऊं न मिल है; और चकिया चलाबे की आहट अब सुनाई न पड़ है। और दिया को उजारो कभऊं तोय में न चमक है, और दूल्हा दुलईया को ब्याव होत न दिखा है; कायसे तोरे व्यापारी संसार भर में जाने जात हते, और तोरे टोना टोटका से सब जातियन भरमाई गईं हतीं। और अगमवकतन और परमेसुर के जन, और धरती पै के सबरे मारे गए मान्सन को रकत ओई में पाओ गओ। ई के पाछें मैंने सरग में बहुत बड़ी भीड़ हां ऐसो कैत सुनो, कि हल्लिलूय्याह उद्धार, मईमा और बल हमाए परमेसुर के आंय। कायसे ऊके न्याव सांचे आंय, उन ने ई भ्रष्ट वेश्या को जीने संसार हां अपनी काली करतूतन से बिगाड़ दओ, परमेसुर ने ऊ को न्याव करो, और अपने जने के मारे जाबे कौ पलटा ले लओ। उन ने फिन के हल्लिलूय्याह कई: और ऊके जलबे को धुआं जुग जुग उठत रै है। और चौबीस प्राचीनन और चार जनावर ने घूटे पै गिरके सिंहासन पै बिराजे परमेसुर हां दण्डवत करो; और कहो आमीन, हल्लिलूय्याह। और सिंहासन में से जौ कहत सुनो गओ, कि हमाए परमेसुर के सब मानबेवारो, हल्के, बड़े तुम सब उनको गुनगान करो। फिन मैंने एक बड़ी आवाज सुनी मानो जैसे पानू के बहबे और भयंकर गरजबे कौ होबे, कि हल्लिलूय्याह, ई लाने कि हमाओ परमेसुर महाबली राज करत आय। आओ, हम मजा मौज करें, और उनको भजन करें; कायसे मेमने के ब्याओ की बेरा आ गई: और ऊ की दुलईया तईयार हो गई आय। ऊहां ब्याव के लाने बढिया, चमकत मलमल के उन्ना पैरबे कौ अधकार दओ गओ, कायसे मलमल कौ मतलब, परमेसुर के लोगन के धरम के काम आंय। और ऊ ने मोय से कही; जौ लिख, कि धन्न बे आंय, जो मेमने के ब्याओ के भोज में बुलाए गए आंय; और ऊ ने मोय से कई, जे परमेसुर की सांची वाणी आंय। और मैं दण्डवत करबे के लाने ऊके गोड़ों पै गिरो; ऊ ने मोय से कई; हेर, ऐसो न कर, कायसे मैं जो पिरभू को परचार करत आंव उनईं में से एक आंव, केवल परमेसुर के सामूं झुको; कायसे ईसा मसीह कौ परचार आगमवानी की आत्मा आय। फिन मैंने सरग हां एकदम खुलो तको; और एक सफेद घुड़वा आय; और ऊ पै एक सवार आय, जो बिसवास करे जोग आय; और बो धरम के संग्गै न्याव और लड़ाई करत आय। ऊ की आंखें आगी जैसी आंय: और ऊके मूड़ पै मुतके राजमुकुट आंय; और ऊ को एक नाओं लिखो आय, जीहां ऊके छोड़ और कोऊ नईं जानत। और बो रकत डरो उन्ना पहने आय: और उन कौ नाओं परमेसुर कौ बचन आय। और सरग की पलटन सफेद घुड़वन पै सवार और सफेद मखमल पैरे भए उनके पाछें पाछें चली आत आय। और उनके मों से एक चोखी तलवार कड़त आय, और बे लोहे को राजदण्ड लैके देश देश के मान्सन हां मार हैं और उनपै राज कर हैं, और परमेसुर के बड़े कोप से मदिरा के कुण्ड में दाखें रौंद हैं। और उनके उन्ना और जांघ पै जौ नाओं लिखो आय, राजाओं कौ राजा और पिरभुओं कौ पिरभू। फिन मैंने एक सरगदूत हां सूरज पै ठांड़ो तको, ऊ ने चिल्लिया के आकाश में उड़बेवारे सब पंछीयन से कहो, आओ, सब परमेसुर की बड़ी बियारी में जुड़ जाओ। जी से तुम राजन और उनके मुखियन और बली और घुड़वन और उनके सवारन और छोटे-बड़े, मान्सन कौ मांस खाओ। फिन मैंने ऊ जनावर और धरती के सबरे राजा और उनकी पलटन हां ऊ घुड़वा पै बैठे, और ऊ की बड़ी पलटन से लड़बे के लाने जुड़े तको। और बो जनावर और ऊके संग्गै ऊ लबरा अगमवकता पकड़ो गओ, जौ ओई आय जौन अदभुत काम दिखा के मान्सन हां चकरया देत हतो, और बे ऊ जनावर की छाप सोई लगाएं हते, और ऊ की पूजा करत हते, जे दोई जीयत भए आगी की झील में जो गन्धक से जलत हती, डाले गए। और बाकी मान्स ऊ घुड़वा पै बैठे मान्स की तलवार जो ऊके मों से कड़त हती, मार डाले गए; और सबरे पंछीयन ने मन भरके उनको मास खाओ। फिन मैंने एक सरगदूत हां सरग से उतरत तको; ऊके हाथ में अथाह कुण्ड की कुंजी, और बड़ी जंजीर हती। और ऊ ने बड़े अजगर जानो पुराने सांप हां, जीहां इबलीस और शैतान छलिया कैत आंय; पकड़ के हजार बरस के लाने बान्ध दओ। और ऊहां अथाह कुण्ड में डालके बन्द कर दओ, और मुहर लगा दई, कि बो हजार बरस पूरे होबे तक जाति जाति के मान्सन हां न भरमाए; ईके बाद जरुरी आय, कि तनक बेरा के लाने ऊहां छोड़ो जाए। फिन मैंने सिंहासन तके, और उन पै मान्स बैठ गए, और उन हां न्याव करबे कौ अधकार दओ गओ; और मैंने उन आत्माओं हां भी तको, जिन की मूड़ें ईसा मसीह की गवाह और परमेसुर के परचार करे से काटे गए हते; और जिन ने ऊ जनावर और ऊ की मूरत की पूजा नईं करी हती, और ऊ की छाप अपने माथे और हाथन पै नईं लगाई हती; बे औरें जीवित होकें ईसा मसीह के संग्गै हजार बरस लौ राज करत रए। और जब लौ हजार बरस पूरे न भए तब लौ बचे भय न जी उठे; जौ तो पैलो जी उठबे कौ मौका हतो। धन्न और पवित्तर बे आंय, जो पैले मरे में से जी उठे; ऐसों पै दूसरी मौत कौ अधकार नईयां, पर बे परमेसुर और ईसा मसीह के याजक हुईयें, और उनके संग्गै एक हजार बरस लौ राज कर हैं। और जब हजार बरस पूरे हो जै हैं; तो शैतान छलिया जेहल से छूट जै है। और उन जातियन हां जो धरती के चारऊ कोद हुईयें, जैसे याजूज और माजूज हां जौन गिनाई में समुन्दर की बालू जितने हुईयें, उन हां भरमा के लड़ाई के लाने इकठ्ठे कर है। और बे पूरी धरती पै फैल जै हैं; और परमेसुर के लोगन की छावनी और जी नगर हां बे चाहत आंय ऊहां चारऊ कोद से घेर लै हैं: और आगी सरग से उतर के उन हां भसम कर दै है। और उनको भरमाबे वालो शैतान छलिया आग और गन्धक से बरत झील में, जी में बो जनावर और लबरा अगमवकता सोई हुईये, ऊ में डाल दओ जै है, और बे सबरे रात दिना पिराते से तड़पत रै हैं। फिन मैंने एक बड़ो सफेद सिंहासन और जौन ऊ पै बिराजो हतो ऊहां तको, जीके सामूं से धरती और आकास भाग ठांड़े भए, और उन हां जांगा न मिली। फिन मैंने लौरे जेठे सब जनें हां मरे भए हां सिंहासन के सामूं ठांड़ो तको, और पोथी खोली गईं; और फिन एक और पोथी खोली गई, जानो जीवन की पोथी; और जैसो उन पोथियन में लिखो भओ हतो, उन के काजन अनसार मरे भयन कौ न्याव करो गओ। और समुन्दर ने उन मरे भए हां जो उन में हते दे दओ, और मृत्यु और अधलोक ने उन मरे भए हां जो उन में हते दे दओ; और उन में से हर एक के कामन के अनसार उन कौ न्याव करो गओ। और मृत्यु और अधलोक सोई आग की झील में डाले गए; जा आग की झील में डालो जाबो दूसरी मृत्यु आय। जी को नाओं जीवन की पोथी में नईं कड़ो, बो सोई आग की झील में डालो गओ। मैंने नए आकास और नईं धरती हां तको, कायसे पेंला धरती और आकास लोप हो गए हते, और समुन्दर सोई न रहो। फिन मैंने पवित्तर नगर नये यरूशलेम हां सरग पै से परमेसुर के ऐंगर उतरत देखो, जो मानो एक दुलैया जैसी सजी संवरी हती, जैसे अपने घरवारे के लाने सजी होबै। फिन मैंने सिंहासन में से कोऊ हां जा टेर लगात सुनो, कि हेर, कि परमेसुर कौ डेरा मान्सन के बीच में आय; और मान्सन उनके संग्गै रै हैं, और बे मान्सन के परमेसुर कहा हैं। और बे उनकी आंखन से अंसुआ पोंछ डाल हैं; और ईके पाछें मरबो न हुईये, और न रोबो, न किलपबो, और न पिरातो हुईये; पेंला की सबरी बातें चली गईं। और जो सिंहासन पे बिराजे हते, ऊ ने कई, कि तको, मैं सब कछु नओ करें देत आंव: और बोले लिख लेओ, कायसे जे बचन बिसवास के जोग और सांचे आंय। फिन ऊ ने मोय से कहो, जे बातें पूरी हो गई आंय, मैं अलफा और ओमिगा, शुरु और अन्त आंव: मैं प्यासे मान्स हां जीवन के जल के झरने से सेंत मेंत पिला हों। जो पिरभू की बातन में पक्को कड़े, उन हां जे सबरी आसीस मिल हैं; और मैं ऊकौ परमेसुर रै हों, और बो मोरो पुत्र रै है। परन्त जो डरपोकों, और बिसवास नईं करबेवारे, और मलिच्छ, और हत्यारे, और परतिरिया संगत करबेवारो, और टोना टोटका करबेवारो, और मूरत हां पूजबेवारो, और सब झूठ कौ भाग ऊ झील में मिल है, जो आग और गंधक से जलत रैत आय: जा दूसरी मौत आय। फिन जो सात सरगदूतन के ऐंगर आबेवारी विपत से भरे सात कटोरा हते, उन में से एक मोरे ऐंगर आओ, और मोय से बोलो; इते आओ: मैं तोहां मेमने की दुल्हन दिखा हों। और ऊ ने मोहां आत्मा में एक बड़े और ऊंचे पहरवा पै ले गओ, और पवित्तर नगर यरूशलेम हां परमेसुर के ऐंगर से उतरत दिखाओ। परमेसुर को तेज ऊ में हतो, और ऊ की जोत बिल्लौर के समान यशब और दूसरे हीरा मोती जैसी उजरी हती। और ऊ की चौहद्दी बड़ी ऊंची हती, और ऊ में बारह फाटक हते और फाटकों पै बारह सरगदूत हते; और उन पै इस्राएलियन के बारह गोत्र के नाओं लिखे हते। पूरब में तीन फाटक, उत्तर में तीन फाटक, और दक्खिन में तीन फाटक, और पश्चिम में तीन फाटक हते। और नगर की चौहद्दी की बारह नी हतीं, और उन पै मेमने के बारह प्रेरितन के नाओं लिखे हते। और जो मोय से बतकाव कर रओ हतो, ऊके ऐंगर नगर, और उनके फाटकों और ऊ की चौहद्दी हां नापबे हां एक सोने कौ गज हतो। और ऊ नगर चारई तरपे एक सौ हतो और ऊ की लम्बाई चौड़ाई बरोबर हती, और ऊ ने गज से नगर हां नापो, तो साड़े सात सौ कोस कड़ो: ऊ की लम्बाई, चौड़ाई, और ऊंचाई बरोबर हती। और ऊ ने नगर की चौहद्दी हां मान्स जानो सरग के दूत के नाप से नापो, तो बा एक सौ चौआलीस हाथ कड़ी। और ऊ की चौहद्दी की जुड़ाई यशब घांई हती, और ऊ नगर चोखे सोने जैसो हतो, जो साफ सुतरो कांच जैसो होबै। और ऊ नगर की नी मेंहगे पत्थर से बनी हती, पैली नी यशब की, दूसरी नीलमणी की, तीसरी लालड़ी की, और चौथी मरकत की। पांची गोमेदक की, छटी माणिक्य की, सातवीं पीतमणी की, आठवीं पेरोज की, नवीं पुखराज की, दसवीं लहसनिए की, ग्यारहवीं धूम्रकान्त की, और बारहवीं याकूत की हती। और बारहों फाटक, बारह मोतियन के हते; एक एक फाटक, एक एक मोती कौ बनो हतो; और नगर की गैल साफ सुथरे कांच घांई चोखे सुन्ने की हती। और मोहां उते कोई मन्दर नईं दिखानो, कायसे महाबली पिरभू परमेसुर, और मेमना उतै के मन्दर आंय। और ऊ नगर में सूरज और चन्दा के उजयारे की जरुरत नईंयां, कायसे परमेसुर के तेज से उते उजयारो हतो, और मेमना उते की ज्योत हतो। और जाति जाति के लोग उनकी जोत में चल फिर हैं, और धरती के राजा अपनो धन उते लै आहें। ऊके फाटक दिन भर खुले रै हैं, और रात उते न हुईये। और जाति जाति के जनें अपनो धन उते लै आहें। और उते कोऊ गन्दी बस्त और गन्दो काम करबेवारो, और झूठ बनाबेवारो कैसऊ न घुस पाहै; परन्त बे जनें जिन के नाओं जीवन की पोथी में लिखे आंय। फिन ऊ ने मोहां बिल्लौर जैसी झिलमिलात भई जीवन के जल की नदिया दिखाई, जो परमेसुर और मेमने के सिंहासन से कड़ के, ऊ नगर की गैल के बीच में बहत हती। और नदिया के ई पार; और ऊ पार, जीवन कौ पेड़ हतो: ऊ में बारह तरहां के फल लगत हते, और बो हर महिना फलत हतो; और ऊ पेड़ के पत्तन से जाति जाति के मान्स चंग्गे होत हते। फिन श्राप न हुईये, और परमेसुर और मेमना कौ सिंहासन नगर में हुईये, और ऊके चाकर ऊ की सेवा कर हैं। और उनको मों हेरत रै हैं, और उनको नाओं उनके माथों पै लिखो हुईये। और फिन रात न हुईये, और उते दिया और सूरज के उजयारे की जरुरत नईंयां, कायसे पिरभु परमेसुर उन हां उजयारो दै हैं: और बे जुग जुग लौ राज कर हैं। फिन उन ने मोय से कहो, जे बातें सांची और बिसवास के जोग आंय, और पिरभू ने जो आगमवकतों की आत्माओं कौ परमेसुर आय, उन ने अपने सरगदूत हां ईसे पठैव, कि बे बातें जो झट्टई पूरी होबेवारी आंय, अपने दासों हां जरुर दिखाबें। हेर, मैं झट्टई आबेवारो आंव; धन्न आंय बे, जो ई पोथी की अगमवानी की बातन हां मानत आय। मैं ओई यूहन्ना आंव, जो इन बातन हां सुनत, और तकत हतो; और जब मैंने सुनो, और तको, तो जो सरगदूत मोहां जे सबरी बातें दिखात हतो, मैं ऊ केगोड़े पै दण्वत करबे के लाने गिर गओ। और ऊ ने मोय से कई, देख, तें ऐसो नईं कर, कायसे मैं तोरो और तोरे भईया अगमवकतन और ई पोथी की बातन हां मानबेवारों में से एक आंव; तें केवल परमेसुर हां दण्डवत कर। फिन ऊ मोय से बोलो, ई पोथी में लिखी आवेवारी बातन हां बन्द न कर; कायसे जे बातें झट्टई होबेवारी आंय। जो बुरो करत आय, बो बुरओ करत रै है; और जो दीन आय, बो दीन बनो रए; और जो धरमी आय, बो धरमी बने रैबें; और जो पवित्तर आय, बो पवित्तर बने रैबें। हेरो, मैं झट्टई आवेवारो आंव; और एक एक जन के काम कौ इनाम मैं उन हां दै हों। मैं अलफा और ओमिगा, पैलो और पाछें को, आरम्भ और अन्त आंव। धन्न बे आंय, जो अपने उन्ना फींच लेत आंय, कायसे उन हां जीवन के पेड़ लौ जाबे को अधकार मिल है, और बे फाटकों में से होकें नगर के भीतर आहें। परन्त कुत्ता, और टोना टोटका करबेवारे, परतिरिया संगत करबेवारे, हत्या करबेवारे, मूर्ती पूजा करबेवारे, और झूठ बोलबे की चाहना करबेवारे और झूट बनाबेवारे बायरें रै हैं। ईसा मसीह ने अपने मोहां सरग से ईसे पठैव, कि तुमाए पेंला मण्डलियन के बारे में बताबें: मैं तो दाऊद की जड़ और ऊके वंस से आंव, और भुनसारे निकलबेवारो चमचमात भओ तारा आओं। आत्मा और दुल्हिन दोई कैत हैं, कि आओ; सुनबेवारे सोई कहें, कि आओ; और जीहां प्यास लगी होबे बो आबै, और जो चाहे जीवन को जल सेंतमेंत लेबे। मैं हर एक मान्स हां जो ई पोथी की बातन हां सुनत आय, गवाह देत आंव, कि कोऊ मान्स इन बातन में कछु जोड़े, तो परमेसुर ई पोथी में लिखी विपतन हां उन पै बढ़ा है। और कोई इन आबेवारी बातन हां पोथी में से कछु निकाले, तो परमेसुर जीवन के पेड़ और पवित्तर नगर जीके लाने ईमें लिखो आय, ऊ को भाग काड़ दै है। जो इन बातन की गवाह देत आय, बो ऐसो कैत आय, हओ, मैं जल्दी आबेवारो आंव। आमीन। हे पिरभू यीशु आओ। पिरभू यीशु सब पवित्तर लोगों पै दया करें। आमीन।